47-1-1a

༼ཉ༽ ༄༅། ༈ །མདོ་སྡེ་སྣ་ཚོགས་ཀྱི་སྐོར་བཞུགས་སོ། །
(黃)  經藏第八部

47-1-1b

༄༅༅། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ།  བམ་པོ་དང་པོ། 
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་
ཐོས་པ་དུས་གཅིག་ན། བཅོམ་ལྡན་འདས་རྩྭ་མཆོག་གི་གྲོང་ཁྱེར་སྐྱེས་བུ་སྟོབས་པོ་ཆེ་འབྱུང་བའི་
གནས་ཀླུང་ཧ་རི་ལ་བ་དིའི་འགྲམ་ཤིང་སཱ་ལ་དྲུང་གཉིས་ཀྱི་བར་ན། དགེ་སློང་ཆེན་པོའི་དགེ་འདུན་
བརྒྱ་སྟོང་ཕྲག་བརྒྱད་བཅུ་སྙེད་ཀྱིས་ཡོངས་སུ་བསྐོར་ནས། མདུན་དུ་བདར་ཏེ་ཐབས་གཅིག་ཏུ་བཞུགས་
སོ། །དེའི་ཚེ་བཅོམ་ལྡན་འདས་དཔྱིད་ཟླ་འབྲིང་པོའི་ཚེས་བཅྭ་ལྔའི་ཉིན་པར་ཡོངས་སུ་མྱ་ངན་ལས་
འདའ་བར་གཤེགས་སུ་ཉེ་བ་ན། བཅོམ་ལྡན་འདས་ཀྱི་བྱིན་ཀྱི་བརླབས་ཀྱིས་གསུང་ཆེན་པོས་སྲིད་པའི་
རྩེ་མོའི་བར་དུ་ཀུན་དུ་ཁྱབ་པར་སེམས་ཅན་ཐམས་ཅད་ལ་སོ་སོའི་སྐད་དུ་གསུང་འདི་སྐད་ཅེས་གྲགས་

47-1-2a

པར་གྱུར་ཏོ། །དེང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐྱེ་བོ་མང་པོ་རྣམས་ལ་ཐུགས་བརྩེ་བ། སེམས་ཅན་ཐམས་ཅད་ཀྱི་སྐྱབས་དང་མགོན་དུ་གྱུར་པ། སེམས་ཅན་
ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་མཉམ་པར་གཟིགས་པ། སེམས་ཅན་གྱི་སྐྱབས་དང་། དཔུང་གཉེན་དང་། རྟེན་དང་། གནས་སུ་གྱུར་པ་དེང་ཡོངས་སུ་མྱ་ངན་ལས་འདའོ། །སོ་སོའི་སྐྱེ་བོ་དག་ཐེ་ཙོམ་
དང་སོམ་ཉིར་གྱུར་པ་ཡོད་ན། ད་ཞུ་ཞིང་དྲི་བའི་དུས་ནང་གི་ཐ་མ་འདིར་ཞུ་ཞིང་གསོལ་ཅིག་ཅེས་པའི་གསུང་གིས་ཡོངས་སུ་གྲགས་པར་གྱུར་ཏོ། །དེའི་ཚེ་བཅོམ་ལྡན་འདས་སྔ་དྲོའི་དུས་ཀྱི་ཚེ་ཞལ་གྱི་སྒོ་ནས་འོད་
རྣམ་པ་སྣ་ཚོགས་བཀྱེ་བ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ཤེལ་ལྟ་བུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དང་། ཕྱོགས་བཅུའི་འཇིག་རྟེན་གྱི་ཁམས་
ཀྱི་བར་དུ་ཡོངས་སུ་སྣང་བར་བྱས་ནས། དེ་དག་ན་གནས་པ་ལམ་རྒྱུད་དྲུག་གི་སེམས་ཅན་དག་འོད་ཟེར་དེས་རེག་མ་ཐག་ཏུ་ཁ་ན་མ་ཐོ་བའི་ཉོན་མོངས་པ་ཐམས་ཅད་བྱང་བར་གྱུར་ཏོ། །དེའི་ཚེ་སོ་སོའི་སྐྱེ་བོ་དག་
དེ་ལྟ་བུའི་ལྟས་མཐོང་ཞིང་ཐོས་ནས་མྱ་ངན་ཆེན་པོས་ཡིད་གདུངས་ཏེ། དུས་གཅིག་ཏུ་ཆོ་ངེས་རྡུང་ཞིང་ངུས་ནས་འདི་སྐད་དུ། ཨེ་མའོ་ཤིན་དུ་བྱམས་པའི་ཕ་མར་གྱུར་པ། ཀྱི་ཧུད་ཀྱི་ཧུད་མྱ་ངན་ལས་འདས་
སམ་ཞེས་སྨྲས་ནས་ཐལ་མོས་མགོ་དང་བྲང་རྡེབས་ཏེ་ཆོ་ངེ་རྡུང་ངོ་། །ཁ་ཅིག་ནི་ལུས་ཀྱང་རབ་ཏུ་འདར་ཞིང་བ་སྤུ་ཀུན་ལངས་ནས་སྐད་ཀྱིས་བརྣངས་པ་ཙམ་དུ་ངུས་སོ། །དེའི་ཚེ་ན་ས་ཆེན་པོ་འདི་དང་། རི་དང་རྒྱ་མཚོ་
ཡང་རབ་ཏུ་གཡོས་ཤིང་འཁྲུགས་སོ། །དེ་ནས་སེམས་ཅན་དེ་དག་གཅིག་ལ་གཅིག་སྤྲོ་བསྲིང་ཞིང་མྱ་ངན་བསང་བའི་ཕྱིར་འདི་སྐད་དུ། ཀྱེ་གྲོགས་པོ་དག་མྱ་ངན་མ་བྱེད་པར་མྱུར་དུ་རྩྭ་མཆོག་གི་གྲོང་ཁྱེར་སྐྱེས་བུ་

47-1-2b

སྟོབས་པོ་ཆེ་འབྱུང་བའི་གནས་དེ་བཞིན་གཤེགས་པ་ག་ལ་བ་དེར་འདོང་ངོ་། །དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། དེ་བཞིན་གཤེགས་པ་ཡོངས་སུ་མྱ་ངན་ལས་མི་འདའ་བར་འཇིག་རྟེན་ན་བསྐལ་
པ་གཅིག་གམ། བསྐལ་པ་གཅིག་འགྲིབས་ཀྱི་བར་དུ་བཞུགས་པར་གསོལ་དུ་འདེང་ངོ་ཞེས་སྨྲས་སོ། །ལ་ལ་ནི་གཅིག་གི་ལག་པ་ལ་གཅིག་འཇུས་ནས་འདི་སྐད་དུ་འཇིག་རྟེན་སྟོངས་ཏེ། སེམས་ཅན་གྱི་བསོད་ནམས་
ཟད་པས་མི་དགེ་བའི་ལས་འཇིག་རྟེན་དུ་བྱུང་བར་གྱུར་གྱིས། གྲོགས་པོ་དག་དེ་བཞིན་གཤེགས་པ་ནི་རིང་པོ་མི་ཐོགས་པར་ཡོངས་སུ་མྱ་ངན་ལས་འདས་བར་གཤེགས་ངེས་ཀྱིས། བདག་ཅག་མྱུར་དུ་འདེང་ངོ་ཞེས་སྨྲའོ། །
ལ་ལ་ནི་འདི་སྐད་དུ་འཇིག་རྟེན་སྟོངས་སོ། །འཇིག་རྟེན་སྟོངས་སོ། །བདག་ཅག་ལ་དེང་སླན་ཆད་ནི་མགོན་དང་སྐྱབས་མེད་དེ། དབུལ་ཕོངས་པར་གྱུར་ཏོ། །དེང་ཁོ་ནར་བླ་ན་མེད་པའི་བཅོམ་ལྡན་འདས་དང་ཡོངས་སུ་བྲལ་
བས་ད་སླན་ཆད་སོམ་ཉི་དང་ཐེ་ཚོམ་ཟ་བ་སུ་ལ་ཞུ་ཞེས་སྨྲའོ། །དེའི་ཚེ་ན་ཚད་མེད་པའི་ཉེ་གནས་ཆེན་པོ་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་དང་། ཚེ་དང་ལྡན་པ་བ་ཀུ་ལ་དང་། ཚེ་དང་ལྡན་པ་ཀུན་དགའ་བོ་ལ་སོགས་པ་དགེ་
སློང་ཆེན་པོ་དེ་དག་ཀྱང་། སངས་རྒྱས་ཀྱི་འོད་ཀྱིས་རེག་པས་ལུས་ཀུན་འདར་ཞིང་མི་བཟོད་པ་ཙམ་དུ་རབ་ཏུ་གཡོས་ཏེ། སེམས་ཀྱང་མྱོས་ནས་ཆོ་ངེས་འདེབས་ཤིང་དེ་ལྟ་བུའི་སྡུག་བསྔལ་རྣམ་པ་སྣ་ཚོགས་ཀྱིས་ནོན་
པར་གྱུརད་ཏོ། །དེའི་ཚེ་གཞན་ཡང་དགེ་སློང་བརྒྱ་སྟོང་ཕྲག་བརྒྱད་བཅུ་སྙེད་ཐམས་ཅད་ཀྱང་དགྲ་བཅོམ་པ། སེམས་ཀྱི་དབང་དུ་གྱུར་པ། བྱ་བ་བྱས་པ། ཉོན་མོངས་པ་ཡོངས་སུ་སྤངས་པ། དབང་པོ་ཐམས་ཅད་
རབ་ཏུ་དུལ་བ། ཀླུའི་རྒྱལ་པོ་ཆེན་པོ་ལྟར་མཐུ་ཆེ་བ། སྟོང་པའི་ཤེས་རབ་དང་ལྡན་པ། ཕྱིས་བདག་གི་དོན་རབ་ཏུ་རྙེད་པ། ཙན་དན་གྱི་ཚལ་ལྟར་ཙན་དན་གྱིས་ཡོངས་སུ་བསྐོར་བ། སེང་གེའི་རྒྱལ་པོ་ལྟར་སེང་

47-1-3a

གེས་ཡོངས་སུ་བསྐོར་བ། དེ་ལྟ་བུའི་ཚད་མེད་པའི་ཡོན་ཏན་དང་ལྡན་པ། ཐམས་ཅད་ཀྱང་སངས་རྒྱས་ཀྱི་སྲས་ཡང་དག་པ་ཤ་སྟག་གོ། །དེ་དག་ཀྱང་སྔ་དྲོའི་ཉི་མ་ཤར་མ་ཐག་ཏུ་གནས་ནས་བྱུང་སྟེ། སོ་ཤིང་
འཆའ་བ་ན་སངས་རྒྱས་ཀྱི་འོད་ཀྱིས་རེག་ནས་གཅིག་ལ་གཅིག་འདི་སྐད་དུ་གྲོགས་པོ་དག་མྱུར་དུ་ཁ་ལག་ཁྲུས་ཤིག་ཅེས་སྨྲས་སོ། །དེ་སྐད་ཅེས་སྨྲས་མ་ཐག་ཏུ་ལུས་ཀྱི་བ་སྤུ་ཀུན་ལངས་ནས། ལུས་ལ་ཁྱབ་པར་ཁྲག་
བརྒྱས་པ་ནི་མེ་ཏོག་པ་ལ་ཤ་ལྟ་བུར་གྱུར་ཏེ། མིག་མཆི་མས་གང་ནས་སྡུག་བསྔལ་ཆེན་པོ་མྱོང་བར་གྱུར་ཏོ། །དེ་དག་ཐམས་ཅད་ཀྱང་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་ཀྱི་ཕྱིར། ཐེག་པ་ཆེན་པོ་དོན་
དམ་པའི་སྟོང་པ་ཉིད་ལ་རྣལ་འབྱོར་ཏུ་བསྒྲུབ་པའི་ཕྱིར། དེ་བཞིན་གཤེགས་པས་ཐབས་སུ་དགོངས་ཏེ། གསུངས་པ་དག་བསྟན་པའི་ཕྱིར། རྣམ་པ་སྣ་ཚོགས་སུ་ཆོས་སྟོན་པ་རྒྱུན་མི་བཅད་པའི་ཕྱིར། སེམས་ཅན་ཐམས་
ཅད་ཡོངས་སུ་གདུལ་བའི་ཕྱིར། བཅོམ་ལྡན་འདས་གང་ན་བ་དེར་མྱུར་དུ་དོང་ནས་སྤྱི་བོས་སངས་རྒྱས་ཀྱི་ཞབས་ལ་ཕྱག་འཚལ་ཏེ། ལན་བརྒྱ་སྟོང་དུ་བསྐོར་ནས་ཐལ་མོ་སྦྱར་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་
གཞན་ཡང་ཀུན་ཏ་ལའི་བུ་མོ་དགེ་སློང་མ་དཔལ་བཟངས་དང་། དགེ་སློང་མ་བསྙེན་དགའ་མ་དང་། དགེ་སློང་མ་རྒྱ་མཚོའི་བློ་གྲོས་ལ་སོགས་ཏེ། དགེ་སློང་མ་ཁྲི་ཕྲག་དྲུག་བཅུ་སྙེད་ཐམས་ཅད་ཀྱང་དགྲ་བཅོམ་པ་
ཟག་པ་ཟད་པ། སེམས་ཀྱི་དབང་དུ་གྱུར་པ། བྱ་བ་བྱས་པ། ཉོན་མོངས་པ་ཡོངས་སུ་སྤངས་པ། དབང་པོ་རབ་ཏུ་དུལ་བ། ཀླུ་ཆེན་པོ་ལྟར་གཟི་བརྗིད་རབ་ཏུ་ཆེ་བ། སྟོང་པ་ཉིད་ཀྱི་ཤེས་རབ་དང་ལྡན་པ་ཤ་སྟག་སྟེ། དེ་དག་
ཀྱང་སྔ་དྲོའི་དུས་ཀྱི་ཚེ་ཉི་མ་ཐོག་མ་ཤར་བ་ན། ལུས་ཀྱི་བ་སྤུ་ཀུན་སྐྱི་བུང་ཞེས་བྱེད་ནས་ལུས་ལ་ཁྱབ་པར་ཁྲག་གིས་རྒྱས་པ་ནི་མེ་ཏོག་པ་ལ་ཤ་ལྟ་བུར་གྱུར་ཏེ། མིག་མཆི་མས་ཡོངས་སུ་གང་ནས་སྡུག་བསྔལ་ཆེན་པོ་

47-1-3b

མྱོང་བར་གྱུར་ཏོ། །དེ་དག་ཀྱང་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར། ཐེག་པ་ཆེན་པོ་དོན་དམ་པའི་སྟོང་པ་ཉིད་ལ་རྣལ་འབྱོར་ཏུ་བསྒྲུབ་པའི་ཕྱིར། དེ་བཞིན་གཤེགས་པས་ཐབས་སུ་དགོངས་ཏེ་གསུངས་པ་
དག་བསྟན་པའི་ཕྱིར། རྣམ་པ་སྣ་ཚོགས་སུ་ཆོས་སྟོན་པ་རྒྱུན་མི་བཅད་པའི་ཕྱིར། སེམས་ཅན་ཐམས་ཅད་ཡོངས་སུ་གདུལ་བའི་ཕྱིར་བཅོམ་ལྡན་འདས་གང་ན་བ་དེར་མྱུར་དུ་དོང་ནས་སངས་རྒྱས་ཀྱི་ཞབས་ལ་སྤྱི་བོས་
ཕྱག་འཚལ་ཏེ། ལན་བརྒྱ་སྟོང་དུ་བསྐོར་ནས་ཐལ་མོ་སྦྱར་ཏེ་ཕྱོགས་གཅིག་ཏུ་འཁོད་དོ། །དགེ་སློང་མ་དེ་དག་གི་ནང་ན་དགེ་སློང་མ་ཁ་ཅིག་ནི་བྱང་ཆུབ་སེམས་དཔའ་སྟེ། མིའི་ནང་ན་ཀླུ་ལྟ་བུ་ས་བཅུ་རབ་ཏུ་ནོན་པ། 
མི་གཡོ་བ་ལ་གནས་པ། སེམས་ཅན་གདུལ་བའི་ཕྱིར་བུད་མེད་ཀྱི་ལུས་སྟོན་ཀྱང་རྟག་ཏུ་ཚད་མེད་པ་བཞི་ལ་ནན་ཏན་བྱེད་པ། སེམས་ཀྱི་དབང་དུ་གྱུར་པས་སངས་རྒྱས་ཀྱི་སྐུར་ཡང་སྤྲུལ་པ་ཤ་སྟག་གོ། །དེའི་ཚེ་གཞན་
ཡང་ཀླུང་གང་གཱ་གཅིག་གི་བྱེ་མ་སྙེད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་མིའི་ནང་ན་ཀླུ་ལྟ་བུ་ས་བཅུ་རབ་ཏུ་ནོན་པ། མི་གཡོ་བ་ལ་རབ་ཏུ་གནས་པ། ཐབས་ཀྱིས་ལུས་སྟོན་པ་ཤ་སྟག་ལ་འདི་ལྟ་སྟེ། བྱང་ཆུབ་
སེམས་དཔའ་རྒྱ་མཚོའི་དཔལ་དང་། བྱང་ཆུབ་སེམས་དཔའ་བློ་གྲོས་མི་ཟད་པ་ལ་སོགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་ཐོག་མར་དྲངས་ནས་ཐམས་ཅད་ཀྱང་ཐེག་པ་ཆེན་པོ་ལ་
བཀུར་སྟི་བྱེད་པ། ཐེག་པ་ཆེན་པོ་ལ་རབ་ཏུ་གནས་པ། ཐེག་པ་ཆེན་པོ་ལ་ཤིན་དུ་མཁས་པ། ཐེག་པ་ཆེན་པོ་ལ་ཤིན་དུ་མོས་པ། ཐེག་པ་ཆེན་པོ་ལ་ཤིན་དུ་བསྲུང་བ། འཇིག་རྟེན་དུ་བཅས་པ་ཐམས་ཅད་ཀྱི་སེམས་དང་
སྦྱོར་བ། མ་འོངས་པའི་དུས་སུ་མ་གྲོལ་བ་གྲོལ་བར་ཡི་དམ་འཆའ་བ། འདས་པའི་དུས་ན་བསྐལ་པ་གྲངས་མེད་པའི་བར་དུ་ཚུལ་ཁྲིམས་ཡོངས་སུ་བསྲུངས་པ། སྤྱོད་པ་ཡོངས་སུ་འཛིན་པ། མ་གྲོལ་བ་

47-1-4a

གྲོལ་བར་བྱེད་པ། དཀོན་མཆོག་གསུམ་གྱི་གདུང་རྒྱུན་མི་འཆད་པར་འཚོབ་པ། མ་འོངས་པའི་དུས་སུ་ཆོས་ཀྱི་འཁོར་ལོ་བསྐོར་བར་འགྱུར་བ། རྒྱན་ཆེན་པོས་ཤིན་ཏུ་བརྒྱན་པ་དེ་ལྟ་བུའི་ཡོན་ཏན་ཚད་མེད་
པ་དང་ལྡན་པ། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་ལྟ་བ་ཤ་སྟག་གོ། །དེ་དག་ཀྱང་སྔ་དྲོའི་དུས་ཉི་མ་ཤར་མ་ཐག་ཏུ་སངས་རྒྱས་ཀྱི་འོད་ཀྱིས་རེག་ནས་ལུས་ཀྱི་བ་སྤུ་ཀུན་ལངས་ཏེ། ལུས་ལ་ཁྱབ་པར་ཁྲག་
གིས་རྒྱས་པ་ནི་ཇི་ལྟར་མེ་ཏོག་པ་ལ་ཤ་ལྟ་བུར་གྱུར་ཏེ། མིག་མཆི་མས་ཡོངས་སུ་གང་ནས་སྡུག་བསྔལ་མྱོང་བར་གྱུར་ཏོ། །དེ་དག་ཀྱང་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ཐེག་པ་ཆེན་པོ་དོན་དམ་པའི་
སྟོང་པ་ཉིད་ལ་རྣལ་འབྱོར་ཏུ་བསྒྲུབ་པའི་ཕྱིར། དེ་བཞིན་གཤེགས་པས་ཐབས་སུ་དགོངས་ཏེ་གསུངས་པ་བསྟན་པའི་ཕྱིར། རྣམ་པ་སྣ་ཚོགས་སུ་ཆོས་སྟོན་པ་རྒྱུན་མི་གཅད་པའི་ཕྱིར། སེམས་ཅན་ཐམས་ཅད་
ཡོངས་སུ་གདུལ་བའི་ཕྱིར་བཅོམ་ལྡན་འདས་གང་ན་བ་དེར་དོང་ནས་ཕྱིན་པ་དང་། སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་ལན་བརྒྱ་སྟོང་དུ་བསྐོར་ཏེ། ཐལ་མོ་སྦྱར་ནས་སྟི་སྟང་དང་བཅས་པས་ཕྱོགས་གཅིག་
ཏུ་འཁོད་དོ། །དེའི་ཚེ་གཞན་ཡང་ཀླུང་གང་གཱ་གཉིས་ཀྱི་བྱེ་མ་སྙེད་ཀྱི་དགེ་བསྙེན་ཕ་ཁྲིམས་ལྔ་ཡོངས་སུ་སྲུང་བ་ལ་འདི་ལྟ་སྟེ། དགེ་བསྙེན་གཟི་རྗིད་ཀྱི་རྒྱལ་པོ་དང་། དགེ་བསྙེན་ལེགས་པའི་ཡོན་ཏན་ལ་སོགས་
པས་ཐོག་མར་དྲངས་ཏེ། ཐམས་ཅད་ཀྱང་གཉེན་པོར་གྱུར་པའི་ཆོས་ལ་ཤིན་ཏུ་མོས་པ་ནི་འདི་ལྟ་སྟེ། སྡུག་བསྔལ་དང་བདེ་བ་དང་། རྟག་པ་དང་མི་རྟག་པ་དང་། ཡོངས་སུ་དག་པ་དང་། མ་དག་པ་དང་། བདག་དང་
བདག་མེད་པ་དང་། ངེས་པ་དང་མ་ངེས་པ་དང་། སྐྱབས་སུ་འགྲོ་བ་དང་སྐྱབས་སུ་མི་འགྲོ་བ་དང་། སེམས་ཅན་དང་སེམས་ཅན་མ་ཡིན་པ་དང་། ཐེར་ཟུག་དང་ཐེར་ཟུག་མ་ཡིན་པ་དང་། བདེ་བ་དང་བདེ་བ་མ་ཡིན་པ་

47-1-4b

དང་། འདུས་བྱས་པ་དང་འདུས་མ་བྱས་པ་དང་། ཆད་པ་དང་ཆད་པ་མ་ཡིན་པ་དང་། མྱ་ངན་ལས་འདའ་བ་དང་། མྱ་ངན་ལས་འདའ་བ་མ་ཡིན་པ་དང་། ལྷག་པ་དང་ལྷག་པ་མ་ཡིན་པ་ལ་སོགས་ཏེ། གཉེན་པོར་གྱུར་
པའི་ཆོས་འདི་དག་ལ་རྟག་པར་ཤིན་ཏུ་མོས་པ་ཤ་སྟག་གོ། །གཞན་ཡང་བླ་ན་མེད་པའི་ཐེག་པ་ཆེན་པོ་ལ་ཐོས་པར་མོས་པ། ཇི་ལྟར་ཐོས་པ་བཞིན་དུ་གཞན་ལ་ཡང་སྟོན་ནུས་པ། ཚུལ་ཁྲིམས་ཡོངས་སུ་སྲུང་
བ། ཐེག་པ་ཆེན་པོ་ལ་སྐོམ་པས་གདུངས་པ་ལྟར་མོས་པ། བདག་ཀྱང་ཤིན་ཏུ་ངོམས་ལ། སྐོམ་པས་གདུངས་པ་གཞན་ཡང་ངོམས་པར་བྱེད་པ། བླ་ན་མེད་པའི་ཡེ་ཤེས་ལ་ཤིན་ཏུ་འཇུག་པ། ཐེག་པ་ཆེན་པོ་ལ་
མོས་པ། ཐེག་པ་ཆེན་པོ་ལ་ཤིན་དུ་སྲུང་བ། འཇིག་རྟེན་པ་ཐམས་ཅད་ཀྱི་སེམས་དང་ཤིན་ཏུ་སྦྱོར་བ། མ་རྒལ་བ་སྒྲོལ་བ། མ་གྲོལ་བ་འགྲོལ་བ། དཀོན་མཆོག་གསུམ་གྱི་གདུང་རྒྱུན་མི་འཆད་པར་འཚོབ་
པ། མ་འོངས་པའི་དུས་སུ་ཆོས་ཀྱི་འཁོར་ལོ་ཤིན་ཏུ་བསྐོར་བ། རྒྱན་ཆེན་པོས་རྣམ་པར་བརྒྱན་པ། སེམས་ཤིན་ཏུ་ཟབ་མོའི་རོ་ལ་མོས་པ། ཚུལ་ཁྲིམས་ཡོངས་སུ་དག་པ། ཐམས་ཅད་ཀྱང་དེ་ལྟ་བུའི་ཡོན་ཏན་
དང་ལྡན་པ། སེམས་ཅན་ཐམས་ཅད་ལ་སྙིང་རྗེ་ཆེན་པོའི་སེམས་སྐྱེད་ཅིང་བུ་གཅིག་པ་དང་འདྲ་བར་གཉིས་སུ་མེད་པར་སྙོམས་པ་ཤ་སྟག་གོ། །དེ་དག་ཀྱང་སྔ་དྲོའི་དུས་ཉི་མ་ཤར་མ་ཐག་ཏུ་འོད་ཟེར་གྱིས་
རེག་ནས་དེ་བཞིན་གཤེགས་པའི་སྤུར་ཞུགས་ལ་བཞེན་པའི་ཕྱིར་ཐམས་ཅད་ཀྱིས་སོ་སོ་ནས་སྤོས་ཀྱི་ཤིང་ཁྲི་ཕྲག་དུ་མ་བཤམས་པ་ལ་འདི་ལྟ་སྟེ། སྤོས་ཀྱི་ཤིང་ཙན་དན་དང་། ཨ་ག་རུ་དང་། གོ་ཤ་རི་ཥ་ཙན་དན་
དང་། ལྷའི་ཤིང་བསུང་ཅན་ལ་སོགས་པའོ། །ཤིང་དེ་དག་ཀྱང་མཛེས་པའི་རི་མོ་དང་ལྡན་ཞིང་རིན་པོ་ཆེ་སྣ་བདུན་གྱིས་རྣམ་པར་བརྒྱན་པ། འོད་ཤིན་ཏུ་འཚེར་ཞིང་གསལ་བ་ནི་དཔེར་ན་རི་མོ་མཁན་གྱིས་ཚོན་

47-1-5a

སྣ་ཚོགས་བཀྱེ་བ་དང་འདྲ་སྟེ། སངས་རྒྱས་ཀྱི་བྱིན་གྱི་བརླབས་ཀྱིས་ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་ལྡན་ཏེ། འགྲོ་བ་མང་པོས་མཐོང་ན་དགའ་བར་འགྱུར་བ་ཤ་སྟག་གོ། །ཤིང་རྣམ་
པ་མང་པོ་དེ་དག་ལ་གཞན་ཡང་རྣམ་པ་སྣ་ཚོགས་ཀྱི་སྤོས་ཀྱི་འདའ་གུ་དང་། གུར་གུམ་དང་། ཨ་ག་རུ་དང་། པོག་ལ་སོགས་པས་ཡོངས་སུ་བསྐུས་ལ། མེ་ཏོག་རྣམ་པ་སྣ་ཚོགས་ཀྱིས་གཏོར་ཅིང་བརྒྱན་པ་ནི་འདི་ལྟ་སྟེ། མེ་
ཏོག་ཨུད་པ་ལ་དང་། མེ་ཏོག་ཀུ་མུ་ད་དང་། མེ་ཏོག་པད་མོ་དང་། མེ་ཏོག་པུན་ད་རི་ཀ་ལ་སོགས་པའོ། །ཤིང་དེ་དག་ལ་གཞན་ཡང་ཚོན་རྣམ་པ་ལྔ་དང་ལྡན་པའི་བ་དན་ཤིན་ཏུ་འཇམ་ཞིང་མཛེས་པ་ཡོངས་སུ་སྤྱངས་པ་ནི་
དཔེར་ན་ལྷའི་ན་བཟའ་ཀེའུ་ཤ་ཡ་འམ། ཤུ་མ་ལྟ་བུའོ། །སྤོས་ཀྱི་ཤིང་དེ་དག་ཀྱང་རིན་པོ་ཆེ་ཡི་ཤིང་རྟས་བསྐྱས་ཏེ། རིན་པོ་ཆེའི་ཤིང་རྟ་དེ་དག་ལས་ཀྱང་འོད་རྣམ་པ་སྣ་ཚོགས་བྱུང་བ་ནི་འདི་ལྟ་སྟེ། སྔོན་
པོ་དང་། སེར་པོ་དང་། དམར་པོ་དང་། དཀར་པོའོ། །ཤིང་རྟའི་གཉའ་ཤིང་དང་། བར་གདང་ལ་སོགས་པ་ཡང་རིན་པོ་ཆེ་སྣ་བདུན་གྱིས་རྣམ་པར་སྤྲས་ཏེ། ཤིང་རྟ་དེ་རེ་རེ་ཡང་རྟ་བཞི་བཞིས་དྲངས་སོ། །
རྟ་དེ་དག་ཀྱང་མགྱོགས་ཁྱད་རླུང་དང་འདྲའོ། །ཤིང་རྟ་དེ་རེ་རེའི་མདུན་ན་རིན་པོ་ཆེ་སྣ་བདུན་གྱི་རྒྱལ་མཚན་ལྔ་བཅུ་སྙེད་དངར་དེ། གསེར་གྱི་དྲ་བས་བླ་རེས་བྲེས་སོ། །རིན་པོ་ཆེའི་ཤིང་རྟ་དེ་རེ་རེའི་སྟེང་སྟེང་ཡང་
རིན་པོ་ཆེའི་གདུགས་ལྔ་བཅུ་སྙེད་བྲེས་སོ། །ཤིང་རྟ་དེ་རེ་རེ་ལ་ཡང་མེ་ཏོག་གི་ཕྲེང་བ་སྤྱངས་པ་ནི་འདི་ལྟ་སྟེ། མེ་ཏོག་ཨུད་པ་ལ་དང་། མེ་ཏོག་ཀུ་མུ་ད་དང་། མེ་ཏོག་པད་མོ་དང་། པུན་དྷ་རི་ཀ་རྣམས་ཏེ། འདབ་མ་ནི་
གསེར། གེ་སར་ནི་རྡོ་རྗེ་ལས་བྱས་ཏེ། མེ་ཏོག་གེ་སར་དེ་དག་གི་ནང་ན་ཡང་བུང་བ་ནག་པོ་ལྡིང་ཞིང་རྩེའོ། །གཞན་ཡང་སྒྲ་སྐད་མང་པོ་སྙན་པ་དང་། དེ་མ་ཡིན་པ་མི་རྟག་པ་དང་། སྡུག་བསྔལ་བ་དང་། སྟོང་པ་ཉིད་དང་། 

47-1-5b

བདག་མེད་པའི་སྒྲ་ཡང་འབྱིན་ཏོ། །དེ་དག་ལས་གཞན་ཡང་བྱང་ཆུབ་སེམས་དཔའི་སྔོན་སྤྱད་པ་སྤྱོད་པའི་སྒྲ་དང་། གཞན་ཡང་རོལ་མོ་རྣམ་པ་སྣ་ཚོགས་ཀྱི་སྒྲ་གྲག་པ་ནི་འདི་ལྟ་སྟེ། གླུ་དང་། གར་དང་། གླིང་བུ་དང་། དགུ་པོ་རྒྱུད་
མངས་དང་། སེའུ་དང་ཤིང་དང་། རྔའི་སྒྲ་རྣམས་སོ། །རོལ་མོའི་སྒྲ་དེ་ལས་གཞན་ཡང་འདི་སྐད་དུ་ཀྱི་ཧུད་ཀྱི་ཧུད་འཇིག་རྟེན་སྟོངས་སོ་ཞེས་ཟེར་བའི་སྒྲ་ཡང་འབྱུང་ངོ་། །ཤིང་རྟ་དེ་རེ་རེའི་མདུན་ན། དགེ་བསྙེན་རིན་པོ་ཆེ་སྣ་
བཞིའི་ཁྲིའུ་ཐོགས་པ་རེ་རེ་ཡོད་དེ། ཁྲིའུ་དེའི་སྟེང་ན་རྣམ་པ་སྣ་ཚོགས་ཀྱི་མེ་ཏོག་སྤུངས་པ་ནི་འདི་ལྟ་སྟེ། མེ་ཏོག་ཨུད་པ་ལ་དང་། ཀུ་མུ་ད་དང་། པད་མོ་དང་པུན་ད་རི་ཀ་དང་། གུར་ཀུམ་དང་། བྱུག་སྤོས་དང་། 
བདུག་སྤོས་ལ་སོགས་པ་མཆོག་ཏུ་གྱུར་ཕུལ་དུ་གྱུར་པ་རྣམས་བཤམས་སོ། །དགེ་བསྙེན་རྣམས་ཀྱིས་སངས་རྒྱས་དང་དགེ་འདུན་ལ་བསོད་སྙོམས་རྣམ་པ་སྣ་ཚོགས་བཤམས་པ་ཡང་ཐམས་ཅད་ཙན་དན་དང་། 
ཨ་ག་རུའི་ཤིང་བསུང་ཅན་བསྲེགས་ཏེ། ཡོན་ཏན་བརྒྱད་དང་ལྡན་པའི་ཆུ་ལས་གཡོས་སུ་བྱས་སོ། །ཞལ་ཟས་དེ་དག་ཀྱང་རོ་རྣམ་པ་དྲུག་དང་ལྡན་ནོ། །འདི་ལྟ་སྟེ་ཁ་བ་དང་། སྐྱུར་བ་དང་། མངར་བ་དང་། ཚ་བ་དང་། 
ལན་ཚྭ་བྲོ་བ་དང་། མངར་བའི་རོ་དང་ལྡན་ནོ། །གཞན་ཡང་ཡོན་ཏན་རྣམ་པ་གསུམ་དང་ལྡན་ཏེ། མཉེན་ཞིང་འཇམ་པ་དང་། གཙང་བ་དང་། ཆོས་བཞིན་བྱས་པའོ། །དེ་ལྟ་བུ་ལ་སོགས་པའི་མཆོད་པ་རྣམ་པ་
སྣ་ཚོགས་བཤམས་ནས། སྟོབས་པོ་ཆེ་འབྱུང་བའི་གནས་ས་ལའི་ཤིང་དྲུང་དུ་ལྷགས་སོ། །གཞན་ཡང་གསེར་གྱི་བྱེ་མས་ས་གཞིར་བདལ་ཏེ། ལྷའི་ན་བཟའ་ཀ་ཙ་ལིན་ད་དང་། ཁམ་པ་ལ་དང་། དར་གྱིས་དེའི་
སྟེང་དུ་བཏིང་བ་ནི་ཁོ་ར་ཁོར་ཡུག་དཔག་ཚད་བཅུ་གཉིས་ཚུན་ཆད་ཡོག་པར་བྱས་སོ། །སངས་རྒྱས་དང་དགེ་འདུན་བཞུགས་པའི་རིན་པོ་ཆེ་སྣ་བདུན་གྱི་སེང་གེའི་ཁྲི་བཤམས་ཏེ། ཁྲི་དེ་དག་ཀྱང་འཕང་དུ་མཐོ་ཁྱད་རི་

47-1-6a

རབ་ལྷུན་པོ་དང་མཉམ་མོ། །ཁྲི་དེ་དག་གི་སྟེང་ན་རིན་པོ་ཆེའི་གུར་ཕུབ་ནས་དོ་ཤལ་རྣམ་པ་མང་པོ་སྤྱངས་སོ། །སཱ་ལའི་ཤིང་དེ་དག་ལ་ཡང་རྣམ་པ་སྣ་ཚོགས་ཀྱི་བ་དན་སྤྱངས་ཏེ། གདུགས་བྲེས་ནས་རྣམ་པ་
སྣ་ཚོགས་ཀྱི་སྤོས་བསུང་ཅན་གྱི་འདའ་གུས་ཤིང་དེ་དག་ལ་བསྐུས་སོ། །ཤིང་གི་བར་ཡང་མེ་ཏོག་རྣམ་པ་སྣ་ཚོགས་ཀྱིས་ཆལ་པར་བཀང་ངོ་། །དགེ་བསྙེན་དེ་རྣམས་སོ་སོ་ན་ཡིད་ལ་འདི་སྙམ་དུ་སེམས་སོ། །སོ་སོའི་སྐྱེ་
བོ་དག་གལ་ཏེ་བཟའ་བས་བྲེལ་ན་བཟའ་བ་བྱིན་ནོ། །བཏུང་བས་བྲེལ་བ་ལ་བཏུང་བ། མགོ་འདོད་པ་རྣམས་ལ་མགོ། མིག་འདོད་པ་རྣམས་ལ་མིག །དེ་ལྟར་སོ་སོའི་སྐྱེ་བོ་དག་ཅི་འདོད་པ་བཞིན་དུ་སྦྱིན་པ་ཐམས་ཅད་བྱིན་ཏེ། 
སྦྱིན་པ་དེ་ཡང་འདོད་ཆགས་དང་། ཞེ་སྡང་དང་། གཏི་མུག་དང་། རྙོག་པའི་སེམས་མེད་དོ། །དེ་ལས་གཞན་པ་འཇིག་རྟེན་གྱི་ལོངས་སྤྱོད་ཀྱི་ཕྱིར་བསམ་པའི་སེམས་མེད་ཀྱི་བླ་ན་མེད་པ་ཡོངས་སུ་དག་པའི་བྱང་ཆུབ་འབའ་
ཞིག་གི་ཕྱིར་རོ། །དགེ་བསྙེན་དེ་དག་བླ་ན་མེད་པའི་བྱང་ཆུབ་ལ་བདེ་བར་གནས་ནས་ཡང་འདི་སྙམ་དུ་སེམས་སོ། །དེ་བཞིན་གཤེགས་པ་ནི་བདག་ཅག་གི་མཆོད་པ་འདི་བཞེས་ནས་ཡོངས་སུ་མྱ་ངན་ལས་འདའོ་སྙམ་
བསམས་ནས། དེ་དག་གི་ལུས་ཀྱི་བ་སྤུ་ཀུན་ལངས་ཏེ། ལུས་ཁྲག་གིས་རྒྱས་པ་ནི་མེ་ཏོག་པ་ལ་ཤ་ལྟ་བུར་གྱུར། མཆི་མས་ནི་མིག་གང་། སྡུག་བསྔལ་ཆེན་པོས་ནི་ཡིད་གདུངས་པར་གྱུར་ཏེ། སོ་སོ་ནས་
མཆོད་པའི་ཡོ་བྱད་བཤམས་པ་སྤོས་ཀྱི་ཤིང་དང་། རྒྱལ་མཚན་དང་། བ་དན་དང་། གདུགས་དང་། ཞལ་ཟས་རྣམས་རིན་པོ་ཆེའི་ཤིང་རྟས་བསྐྱས་ནས་སངས་རྒྱས་གང་ན་བ་དེར་སོང་སྟེ་ཕྱིན་པ་དང་། སངས་རྒྱས་
ཀྱི་ཞབས་ལ་སྤྱི་བོས་ཕྱག་འཚལ་ནས་མཆོད་པའི་ཡོ་བྱད་བཤམས་པས་དེ་བཞིན་གཤེགས་པ་ལ་མཆོད་དེ། ལན་བརྒྱ་སྟོང་དུ་བསྐོར་ནས་སྐད་ཕྱུང་སྟེ་ངུས་སོ། །ངུ་བའི་སྒྲས་གནམ་ས་ཡང་གཡོས་སོ། །

47-1-6b

བྲང་རྡུང་ཞིང་ཆོ་ངེས་འདེབས་ཏེ། མཆི་མ་ཆར་བཞིན་དུ་ཟག་ནས། གཅིག་ལ་གཅིག་འདི་སྐད་དུ་ཀྱི་ཧུད་ཀྱི་ཧུད་གྲོགས་པོ་དག་འཇིག་རྟེན་སྟོངས་སོ། །འཇིག་རྟེན་སྟོངས་སོ་ཞེས་སྨྲས་ནས། དེ་བཞིན་གཤེགས་པའི་
སྤྱན་སྔར་ལུས་བརྡབས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པས་ཐུགས་བརྩེ་བའི་སླད་དུ་བདག་གི་མཆོད་པ་བཤམས་པ་ནང་གི་ཐ་མ་འདི་བཞེས་ཤིག་ཅེས་བསོལ་ཏོ། །བཅོམ་
ལྡན་འདས་དུས་མཁྱེན་པས་ཅང་མི་གསུང་སྟེ་མ་བཞེད་ནས། དེ་བཞིན་དུ་ལན་གསུམ་གྱི་བར་དུ་གསོལ་ཀྱང་བཞེས་སུ་མ་གནང་ངོ་། །དགེ་བསྙེན་དེ་དག་བསམ་པ་བཞིན་དུ་མ་གྱུར་ནས། མྱ་ངན་གྱིས་ཡིད་གདུངས་
ཏེ། ཅང་མི་སྨྲ་བར་འཁོད་པ་ནི་དཔེར་ན་ཕ་མ་ཤིན་ཏུ་བྱམས་པའི་བུ་གཅིག་པ་གློ་བུར་དུ་ནད་ཀྱིས་བཏབ་སྟེ་ཚེ་འཕོས་ནས་དུར་དུ་བསྐྱལ་ཏེ། ཤིན་ཏུ་མྱ་ངན་གྱིས་ཡིད་གདུངས་པ་དང་འདྲ་བར་དགེ་བསྙེན་དེ་དག་མྱ་ངན་
གྱིས་ཡིད་གདུངས་པ་ཡང་དེ་དང་འདྲ་སྟེ། མཆོད་པའི་ཡོ་བྱད་རྣམས་གནས་གཅིག་ཏུ་བཞག་ནས་ཕྱོགས་གཅིག་ཏུ་ཅང་མི་སྨྲ་བར་འཁོད་དོ། །དེའི་ཚེ་གཞན་ཡང་ཀླུང་གང་གཱ་གསུམ་གྱི་བྱེ་མ་སྙེད་ཀྱི་དགེ་
བསྙེན་མ་ཁྲིམས་ལྔ་ཡོངས་སུ་སྲུང་བ། སྤྱོད་ལམ་དང་ལྡན་པ་འདི་ལྟ་སྟེ། དགེ་བསྙེན་མ་འཚོ་བའི་ཡོན་ཏན་དང་། དགེ་བསྙེན་མ་དཔལ་གྱི་ཕྲེང་བ་དང་། དགེ་བསྙེན་མ་བྱི་ཤ་ཀ་ལ་སོགས་པས་ཐོག་མ་དྲངས་
ནས་དགེ་བསྙེན་མ་བརྒྱད་ཁྲི་བཞི་སྟོང་སྙེད་ཐམས་ཅད་ཀྱང་དམ་པའི་ཆོས་ཡོངསུ་འཛིན་པ། སེམས་ཅན་ཚད་མེད་པ་བརྒྱ་སྟོང་གདུལ་བའི་ཕྱིར་བུད་མེད་ཀྱི་ལུས་སུ་སྟོན་ཅིང་ཁྱིམ་གྱི་ཆོས་ཡོངས་སུ་སྨོད་པ། བདག་
གི་ལུས་ལ་སྦྲུལ་གདུག་པ་བཞིན་དང་འདྲ་བར་རྟོགས་པ། ལུས་ལ་རྟག་ཏུ་སྲིན་བུ་གྲངས་མེད་པས་ཟ་བ་དང་། ལུས་འདི་ལ་ཤིན་དུ་བཙོག་པ་དང་། འདོད་པས་ཡོངས་སུ་བཅིངས་པར་རྟོགས་པ། ལུས་འདི་ལ་ཁྱི་

47-1-7a

རོ་དང་འདྲ་བར་འཇིགས་སུ་རུང་བ་དང་། ལུས་འདི་ནི་མི་གཙང་བ་སྟེ། བུ་ག་དགུ་ནས་རྟག་ཏུ་ཟག་པར་རྟོགས་པ། ལུས་འདི་ནི་མཁར་དང་འདྲ་སྟེ། ཤ་དང་ལྤགས་པ་དང་རྩ་དང་རྒྱུས་པས་རྣམ་པར་བཀྲིས་པ། 
ལག་པ་དང་རྐང་པ་ནི་མཁར་གྱི་ཉེན་ལྟ་བུར་གྱུར་པ། མིག་ནི་སྐར་ཁུང་ལྟ་བུར་གྱུར་པ། མགོ་བོ་ནི་ཁང་པ་ལྟ་བུར་གྱུར་ཏེ། སེམས་རྒྱལ་པོ་དང་འདྲ་བ་དེའི་ནང་ན་གནས་པར་རྟོགས་པ། ལུས་མཁར་དང་འདྲ་བ་འདི་
ནི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་སྤངས་ཏེ། བུས་པ་སོ་སོའི་སྐྱེ་བོ་དག་ནི་དེ་ལ་ཆགས་པར་བྱེད་དོ། །འདོད་ཆགས་དང་། ཞེ་སྡང་དང་། གཏི་མུག་གི་སྲིན་པོ་གནས་པར་རྟོགས་པ། ལུས་འདི་ནི་
སྙིང་པོ་མེད་པ་སྟེ། འདམ་བུའི་མྱུ་གུ་འམ། ཨེ་རན་འདའ་འམ། ཆུའི་ཆུ་བུར་རམ། ཆུ་ཤིང་ལྟ་བུར་རྟོགས་པ། ལུས་འདི་ནི་མི་རྟག་པ་སྟེ། སྐད་ཅིག་སྐད་ཅིག་དུ་འཕོ་ཞིང་དཔེར་ན་གློག་གི་འོད་དམ། གཟར་པོའི་ཆུ་
འམ། སྒྱུ་མ་འམ། སྨིག་རྒྱུ་འམ། ཆུ་ལ་རི་མོ་བྲིས་པ་ལྟ་བུར་རྟོགས་པ། ལུས་འདི་ནི་འགྱུར་ཞིང་འཕོ་བ་སྟེ། དཔེར་ན་ཆུ་འགྲམ་གཡང་སའི་སྡོང་པོ་ལྟ་བུར་རྟོགས་པ་ལུས་འདི་ནི་རིང་པོར་མི་ཐོགས་པ་སྟེ། 
སྤྱང་ཀི་དང་། འཕར་བ་དང་། སྲིན་བྱ་དང་། འུག་པ་དང་། བྱ་རྒོད་དང་། ཁྭ་དང་། སྐེ་ག་དང་། ཁྱི་ལྟོགས་པའི་གཟན་དུ་འགྱུར་ཏེ། འདི་ལ་མཁས་པ་ཤེས་རབ་ཅན་སུ་ཞིག་མོས་ཤིང་ཆགས་པར་བྱེད་སྙམ་དུ་རྟོགས་
པ། བ་རྨིག་གི་ནང་དུ་རྒྱ་མཚོ་ཆེན་པོའི་ཆུ་བླུགས་ཀྱང་བཟོད་ཀྱི་ལུས་འདི་མི་རྟག་པ་དང་། མི་གཙང་བ་དང་། བཙོག་པ་ནི་བརྗོད་སླ་བ་མ་ཡིན་པར་རྟོགས་པ། ས་ཆེན་པོ་འདི་རྒྱ་ཤུག་ཙམ་དུ་དྲིལ་ཏམ། ཆུང་
ངུ་ན་ཡུངས་ཀར་གྱི་འབྲུ་འམ། རྡུལ་ཕྲ་མོར་གསེ་བ་ནི་སླའི། ལུས་འདིའི་ཉེས་པའི་སྐྱོན་བརྗོད་པ་ནི། སླ་བ་མ་ཡིན་པར་རྟོགས་པ། དེ་བས་ན་མཆིལ་མ་དང་འདྲ་བར་ཡོངས་སུ་སྤངས་ནས་དེའི་རྒྱུ་དེའི་རྐྱེན་གྱིས་

47-1-7b

དགེ་བསྙེན་མ་རྣམས་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཆོས་ལ་རྟག་ཏུ་ནན་ཏན་བྱེད་པ། ཐེག་པ་ཆེན་པོའི་མདོ་སྡེ་ཉན་ཅིང་འཛིན་པ་ལ་མོས་པ། ཐོས་ནས་ཀྱང་གཞན་ལ་རྒྱ་ཆེར་སྟོན་ནུས་
པ། སྔོན་གྱི་སྨོན་ལམ་ཡོངས་སུ་འཛིན་པ། བུད་མེད་ཀྱི་ལུས་ལ་ཤིན་ཏུ་སྨོད་པ། ཤིན་དུ་སྐྱོན་ཆེ་བར་ཤེས་པ། སྙིང་པོ་མེད་པར་རྟོགས་པ། སེམས་རྟག་ཏུ་རྣལ་འབྱོར་དུ་སྤྱོད་པ། དེ་བཞིན་དུ་ཡང་དག་པར་རྟོག་
ཅིང་མཐའ་མེད་པར་འཁོར་བའི་རྒྱུན་ཡོངས་སུ་གཅོད་པ། ཐེག་པ་ཆེན་པོ་ལ་སྐོམ་པས་གདུངས་པ་ལྟར་མོས་པ། བདག་ཤིན་དུ་ངོམས་པས་གཞན་ཡང་ཤིན་དུ་ངོམས་པར་བྱེད་པ། ཐེག་པ་ཆེན་པོ་ལ་རབ་ཏུ་མོས་པ། 
ཐེག་པ་ཆེན་པོ་ལ་ཤིན་དུ་སྲུང་བ། བུད་མེད་ཀྱི་ལུས་སུ་སྟོན་ཀྱང་ཡང་དག་པར་བྱང་ཆུབ་སེམས་དཔའ་ཤ་སྟག་སྟེ། ཐམས་ཅད་ཀྱང་འཇིག་རྟེན་གྱི་བསམ་པ་དང་ཤིན་ཏུ་སྦྱོར་བ། མ་རྒལ་བ་སྒྲོལ་བ། མ་གྲོལ་བ་འགྲོལ་
བ། དཀོན་མཆོག་གསུམ་གྱི་གདུང་རྒྱུན་མི་འཆད་པར་འཚོབ་པ། མ་འོངས་པའི་དུས་སུ་ཆོས་ཀྱི་འཁོར་ལོ་བསྐོར་བར་འགྱུར་བ། རྒྱན་ཆེན་པོས་ཡོངས་སུ་བརྒྱན་པ། ཚུལ་ཁྲིམས་ཡོངས་སུ་བསྲུང་བ། དེ་ལྟ་བུའི་ཡོན་ཏན་
ཚད་མེད་པ་དང་ལྡན་པ། སེམས་ཅན་ཐམས་ཅད་ལ་སྙིང་རྗེའི་སེམས་བསྐྱེད་ཅིང་བུ་གཅིག་དང་འདྲ་བར་གཉིས་སུ་མེད་པར་མཉམ་པ་ཤ་སྟག་གོ། །དེ་དག་ཀྱང་སྔ་དྲོའི་དུས་ཉི་མ་ཐོག་མ་ཤར་བ་ན་འོད་ཀྱིས་རེག་ནས་
གཅིག་ལ་གཅིག་འདི་སྐད་དུ་དེང་ནི་ཤིང་སཱ་ལ་དྲུང་གཉིས་ཀྱི་དྲུང་དུ་འདེང་ངོ་ཞེས་སྨྲས་སོ། །དགེ་བསྙེན་མ་རྣམས་ཀྱིས་མཆོད་པའི་ཡོ་བྱད་བཤམས་པ་སྔ་མ་བས་ཕྱེད་ཀྱིས་བཟང་བར་སྦྱར་ཏེ། སངས་རྒྱས་གང་ན་བར་ལྷགས་
ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། ལན་བརྒྱ་སྟོང་བསྐོར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སངས་རྒྱས་དགེ་འདུན་དུ་བཅས་པ་ལ་མཆོད་པའི་

47-1-8a

ཡོ་བྱད་བཤམས་པ་འདི་དེ་བཞིན་གཤེགས་པས་ཐུགས་བརྩེ་བའི་སླད་དུ་བཞེས་ཤིག་ཅེས་གསོལ་ཏོ། །དེ་ལ་བཅོམ་ལྡན་འདས་ཅང་མི་གསུང་བས་བཞེས་སུ་མ་གནང་ངོ་། །དགེ་བསྙེན་མ་རྣམས་བསམས་
པ་བཞིན་དུ་མ་གྱུར་པས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་གཞན་ཡང་ཀླུང་གང་གཱ་བཞིའི་བྱེ་མ་སྙེད་ཀྱི་ལི་ཙ་བྱིའི་བུ་གྲོང་ཁྱེར་ཡངས་པ་ཅན་ན་གནས་པའི་སྐྱེས་པ་དང་། བུད་མེད་དང་། 
ཁྱེའུ་དང་། བུ་མོ་དང་། ཆུང་མ་དང་། འཁོར་རྣམས་དང་། གཞན་ཡང་འཛམ་བུའི་གླིང་གི་རྒྱལ་རིགས་སུ་གཏོགས་པ་རྒྱལ་པོའི་འཁོར་དང་བཅས་ཏེ། ཐམས་ཅད་ཀྱང་ཆོས་འདོད་པའི་ཕྱིར་ཚུལ་ཁྲིམས་ཡོངས་སུ་བསྲུང་
བ། སྤྱོད་ལམ་དང་ལྡན་པ། སློབ་པ་གཞན་ལ་ཞུགས་ཤིང་དམ་པའི་ཆོས་ལ་སུན་འབྱིན་པ་ཤིན་ཏུ་ཚར་གཅོད་པ་ཤ་སྟག་གཅིག་ལ་གཅིག་འདི་སྐད་ཅེས་དམ་འཆའོ། །བདག་ཅག་གསེར་དང་། དངུལ་དང་། རིན་པོ་
ཆེའི་གཏེར་མཛོད་ལྟ་བུར་ཡང་དག་པའི་ཆོས་ཤིན་ཏུ་ཟབ་མོ་བདུད་རྩི་ལྟ་བུར་ཟད་མི་ཤེས་པ་ཡུན་དུ་འཇིག་རྟེན་ན་གནས་པར་བྱས་ཏེ། བདག་ཅག་ཀྱང་དེ་དག་ལ་རྟག་ཏུ་ནན་ཏན་ཏུ་སྤྱོད་པར་གྱུར་ཅིག །གལ་ཏེ་ཞལ་ནས་
གསུངས་པའི་དམ་པའི་ཆོས་ལ་དབང་ཟ་ཞིང་། སྐུར་པ་ཞིག་ཡོད་ན་བདག་ཅག་གིས་དེའི་ལྕེ་བཅད་དོ་ཞེས་དམ་བཅས་ཤིང་། གཞན་ཡང་ཁྱིམ་ནས་ཁྱིམ་མ་ཡིན་པར་རབ་ཏུ་བྱུང་བ་དག །ཚུལ་ཁྲིམས་ལས་ཉམས་པར་
གྱུར་ན་བདག་ཅག་གིས་ཁྱིམ་པར་ཕབ་སྟེ་ལས་བྱེད་དུ་གཞུག་གོ་ཞེས་པ་དང་། གལ་ཏེ་དམ་པའི་ཆོས་ལ་ནན་ཏན་དུ་བྱེད་ན་བདག་ཅག་གིས་ཕ་མ་དང་འདྲ་བར་རིམ་གྲོ་དང་བཀུར་སྟི་བྱའོ་ཞེས་པ་དང་། གལ་ཏེ་དགེ་འདུན་
ལས་དམ་པའི་ཆོས་ལ་ནན་ཏན་དུ་སྤྱོད་པ་ཞིག་ཡོད་ན་བདག་ཅག་གིས་རྗེས་སུ་ཡི་རང་ཞིང་དེ་ལ་མཐུ་ཡང་སྦྱིན་པར་བྱའོ་ཞེས་དམ་བཅས་པ། རྟག་ཏུ་ཐེག་པ་ཆེན་པོའི་མདོ་སྡེ་ཐོས་པར་མོས་ཤིང་། ཐོས་ནས་ཀྱང་

47-1-8b

གཞན་ལ་རྒྱས་པར་སྟོན་པ་དེ་ལྟ་བུའི་ཡོན་ཏན་དང་ལྡན་པ་ཤ་སྟག་ལ་འདི་ལྟ་སྟེ། ལི་ཙ་བྱིའི་བུ་རྣམ་དག་དྲི་མ་མེད་པའི་སྙིང་པོ་དང་། ལི་ཙ་བྱིའི་བུ་བག་ཡོད་རྣམ་པར་དག་པ་དང་། ལི་ཙ་བྱིའི་བུ་རྟག་ཏུ་དྲི་མེད་རྣམ་དག་ཡོན་
ཏན་ལ་སོགས་ཏེ། དེ་དག་གཅིག་ལ་གཅིག་འདི་སྐད་དུ་ཀྱེ་གྲོགས་པོ་དག་མྱུར་བར་དེ་བཞིན་གཤེགས་པ་གང་ན་བ་དེར་སོང་སྟེ་མཆོད་པ་ཕུན་སུམ་ཚོགས་པ་རྣམ་པ་སྣ་ཚོགས་ཀྱིས་མཆོད་དུ་འདེང་ངོ་། །དེ་ནས་ལི་ཙ་བྱི་དེ་དག་
རེ་རེས་ཀྱང་བལ་གླང་བརྒྱད་ཁྲི་བཞི་སྟོང་དང་། རིན་པོ་ཆེའི་ཤིང་རྟ་རྟ་བཞི་དང་བཅས་པ་བརྒྱད་ཁྲི་བཞི་སྟོང་དང་། ཡིད་བཞིན་གྱི་ནོར་བུ་རིན་པོ་ཆེ་བརྒྱད་ཁྲི་བཞི་སྟོང་དང་། གཞན་ཡང་ཤིང་ཙན་དན་དང་། ཨ་ག་རུ་སྦམས་པ་བརྒྱད་
ཁྲི་བཞི་སྟོང་སྙེད་བཤམས་ཏེ། བལ་གླང་དེ་རེ་རེའི་མདུན་ན་རིན་པོ་ཆེའི་རྒྱལ་མཚན་དང་། བ་དན་དང་། གདུགས་ཀྱང་བཤམས་སོ། །གདུགས་ནང་གི་ཆུང་ངུ་ཡང་ཁོ་ར་ཁོར་ཡུག་ཏུ་དཔག་ཚད་གཅིག་ཁེབས་སོ། །བ་དན་ནང་
གི་ཐུང་ངུ་ཡང་རིང་ཁྱད་དཔག་ཚད་སུམ་བཅུ་རྩ་གཉིས་སོ། །རིན་པོ་ཆེའི་རྒྱལ་མཚན་ནང་གི་ཆུང་བ་ཡང་མཐོ་ཁྱད་དཔག་ཚད་བརྒྱ་པ་སྟེ། དེ་ལྟ་བུའི་མཆོད་པའི་ཡོ་བྱད་བཤམས་ནས་སངས་རྒྱས་གང་ན་བར་ལྷགས་ཏེ་
ཕྱིན་པ་དང་། སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་ལན་བརྒྱ་སྟོང་དུ་བསྐོར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སངས་རྒྱས་དང་དགེ་སློང་གི་དགེ་འདུན་རྣམས་
ལ་མཆོད་པའི་ཡོ་བྱད་འདི་དག་འབུལ་ན་དེ་བཞིན་གཤེགས་པས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་འདི་དག་བཞེས་ཤིག་ཅེས་གསོལ་ཏོ། །དེ་ལ་དེ་བཞིན་གཤེགས་པ་ཅང་མི་གསུང་ནས་བཞེས་སུ་མ་གནང་ངོ་། །
ལི་ཙ་བྱིའི་བུ་རྣམས་བསམས་པ་བཞིན་དུ་མ་གྱུར་ནས་ཤིན་ཏུ་མྱ་ངན་གྱིས་ནོན་ཏེ། བཅོམ་ལྡན་འདས་ཀྱི་བྱིན་གྱི་རླབས་ཀྱིས་ས་ལས་ཤིང་ཏ་ལ་བདུན་སྲིད་དུ་འཕགས་ནས་སྟེང་གི་ནམ་མཁའ་ལ་ཅང་མི་སྨྲ་བར་འཁོད་དོ། །

47-1-9a

དེའི་ཚེ་གཞན་ཡང་ཀླུང་གང་གཱ་ལྔའི་བྱེ་མ་སྙེད་ཀྱི་བློན་པོ་ཆེན་པོ་དང་། ཁྱིམ་བདག་དང་། ཚོང་དཔོན་ཐེག་པ་ཆེན་པོ་ལ་ཤིན་དུ་མོས་པས་སློབ་པ་གཞན་ལ་ཞུགས་པ་གང་ཞིག་ཡང་དག་པའི་ཆོས་ལ་སྨོད་པ་ཞིག་ཡོད་ན། 
དེ་དག་གི་མཐུས་ཐུལ་བ་ནི་ཇི་ལྟར་རྩྭ་དང་ཤིང་ལ་སེར་བ་བབ་པ་ལྟ་བུ་ཤ་སྟག་ལ་འདི་ལྟ་སྟེ། ཚོང་དཔོན་ཉི་མའི་འོད་དང་། ཚོང་དཔོན་འཇིག་རྟེན་སྐྱོང་དང་། ཚོང་དཔོན་ཆོས་སྐྱོང་ལ་སོགས་པས་ཐོག་མར་དྲངས་ཏེ། དེ་དག་གིས་སོ་སོ་ནས་
མཆོད་པའི་ཡོ་བྱད་བཤམས་པ་ནི་སྔ་མ་བས་ལྔ་འགྱུར་ཙམ་བཤམས་ཏེ། ཤིང་སཱ་ལ་དྲུང་གཉིས་ཀྱི་བར་གང་ན་བར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་འཚལ་ནས་ལན་བརྒྱ་སྟོང་དུ་
བསྐོར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སངས་རྒྱས་དང་དགེ་འདུན་རྣམས་ལ་མཆོད་པའི་ཡོ་བྱད་འདི་དག་འབུལ་ན་བཞེས་ཤིག་ཅེས་གསོལ་ཏོ། །དེ་ལ་དེ་བཞིན་
གཤེགས་པ་ཅང་མི་གསུང་ནས་བཞེས་སུ་མ་གནང་ངོ་། །ཚོང་དཔོན་དེ་དག་བསམས་པ་བཞིན་དུ་མ་གྱུར་ནས་ཤིན་ཏུ་མྱ་ངན་གྱིས་ཡིད་གདུངས་པར་གྱུར་ཏེ། བཅོམ་ལྡན་འདས་ཀྱི་བྱིན་གྱི་བརླབས་ཀྱིས་ས་ལས་ཤིང་ཏ་ལ་
བདུན་སྲིད་དུ་འཕགས་ནས་སྟེང་གི་ནམ་མཁའ་ལ་ཅང་མི་སྨྲ་བར་འཁོད་དོ། །དེའི་ཚེ་གཞན་ཡང་ཡུལ་ཡངས་པ་ཅན་གྱི་རྒྱལ་པོ་བཙུན་མོ་དང་སླས་སུ་བཅས་པ། གཞན་ཡང་འཛམ་བུ་གླིང་ན་རྒྱལ་པོ་མ་སྐྱེས་དགྲ་མ་གཏོགས་
པར་རྒྱལ་ཕྲན་དེ་མ་ཡིན་པ་ཐམས་ཅད་དང་། གྲོང་ཁྱེར་དང་། ལྗོངས་དང་། གྲོང་མདབ་ཐམས་ཅད་ཀྱི་མི་ཐམས་ཅད་དང་བཅས་པ་ལ་འདི་ལྟ་སྟེ། རྒྱལ་པོ་ཟླ་འོད་དྲི་མེད་རྒྱལ་པོ་ལ་སོགས་པས་ཐོག་མར་དྲངས་ནས་སོ་སོ་ནས་དམག་
རྣམ་བཞི་དང་བཅས་ཏེ། སངས་རྒྱས་གང་ན་བར་ལྷགས་སོ། །རྒྱལ་པོ་དེ་དག་རེ་རེ་ཡང་འཁོར་ཁྲི་ཕྲག་བརྒྱད་བཅུ་དང་བཅས་སོ། །དམག་གི་ཚོགས་ཀྱང་བལ་གླང་དང་རྟ་པ་སྟེ། བལ་གླང་དེ་དག་ཀྱང་མཆེ་བ་དྲུག་དང་ལྡན་ལ། རྟ་རྣམས་

47-1-9b

ཀྱང་མགྱོགས་ཁྱད་རླུང་བཞིན་ཏེ། མཆོད་པའི་ཡོ་བྱད་བཤམས་པ་ཡང་སྔ་མ་བས་དྲུག་འགྱུར་གྱིས་ལྷག་གོ། །རིན་པོ་ཆེའི་གདུགས་ནང་གི་ཆུང་ངུ་ཡང་ཆུ་ཞེང་ཁོ་ར་ཁོར་ཡུག་དུ་དཔག་ཚད་བརྒྱད་ཁེབས་སོ། །བ་དན་
ནང་གི་ཐུང་ངུ་ཡང་རིང་ཁྱད་དཔག་ཚད་བཅུ་དྲུག་སྙེད་དོ། །རིན་པོ་ཆེའི་རྒྱལ་མཚན་ནང་གི་ཆུང་ངུ་ཡང་མཐོ་ཁྱད་དཔག་ཚད་སུམ་ཅུ་རྩ་དྲུག་གོ། །རྒྱལ་པོ་དེ་དག་ཐམས་ཅད་ཀྱང་ཡང་དག་པའི་ཆོས་ལ་གནས་པས་ལོག་
པའི་ཆོས་ཀུན་ལ་ཤིན་ཏུ་སྨོད་པ། ཐེག་པ་ཆེན་པོ་ལ་བཀུར་སྟི་བྱེད་པ། ཐེག་པ་ཆེན་པོ་ལ་ཤིན་ཏུ་མོས་པ། སེམས་ཅན་ཐམས་ཅད་ལ་བུ་གཅིག་དང་འདྲ་བར་བྱམས་པ། ཞལ་ཟས་བཤམས་པའི་དྲི་ཡང་དཔག་
ཚད་བཞིའི་བར་དུ་བྲོ་བ་བཤམས་ནས་སྔ་དྲོའི་དུས་ཀྱི་ཚེ་མཆོད་པའི་ཡོ་བྱད་རྣམ་པ་སྣ་ཚོགས་ཐོགས་ཏེ། ཤིང་སཱ་ལ་དྲུང་གཉིས་ཀྱི་བར་དེ་བཞིན་གཤེགས་པ་གང་ན་བཞུགས་པ་དེར་སོང་ནས་ཕྱིན་པ་དང་། བཅོམ་ལྡན་འདས་
ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སངས་རྒྱས་དང་། དགེ་སློང་གི་དགེ་འདུན་རྣམས་ལ་མཆོད་པ་འདི་དག་འབུལ་ན་དེ་བཞིན་གཤེགས་པས་ཐུགས་བརྩེ་བའི་སླད་དུ་བདག་གི་མཆོད་པ་
ཐ་མ་འདི་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་བཞེས་སུ་མ་གནང་ངོ་། །རྒྱལ་པོ་དེ་དག་ཀྱང་བསམས་པ་བཞིན་དུ་མ་གྱུར་པས་ཤིན་ཏུ་མྱ་ངན་གྱིས་ཡིད་གདུངས་པར་གྱུར་ཏེ་ཕྱོགས་གཅིག་ཏུ་
འཁོད་དོ། །དེའི་ཚེ་གཞན་ཡང་ཀླུང་གང་གཱ་བདུན་གྱི་བྱེ་མ་སྙེད་ཀྱི་རྒྱལ་པོའི་བཙུན་མོ་རྣམས་ཚོགས་ཏེ། དེ་ལ་གཅིག་མ་གཏོགས་པ་ནི་མ་སྐྱེས་དགྲའི་བཙུན་མོ་འབའ་ཞིག་སེམས་ཅན་གདུལ་བའི་ཕྱིར་བུད་མེད་ཀྱི་ལུས་སུ་སྟོན་ཏེ། 
རྟག་ཏུ་ལུས་ཀྱིས་ནན་ཏན་དུ་སྤྱོད་ཅིང་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཆོས་ལ་སེམས་འདྲིས་ཤིང་གོམས་པར་བྱེད་པ་དེ་ལ་སོགས་ཏེ། བཙུན་མོ་ཁམས་གསུམ་བཟང་མོ་དང་། བཙུན་མོ་འདོད་པའི་ཡོན་

47-1-10a

ཏན་ལ་སོགས་པས་ཐོག་མ་དྲངས་སོ། །ཐམས་ཅད་ཀྱང་དམ་པའི་ཆོས་ལ་གནས་ཤིང་ཚུལ་ཁྲིམས་ཡོངས་སུ་སྲུང་བ། སྤྱོད་ལམ་དང་ལྡན་པ། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་བྱམས་པ་
ཤ་སྟག་གོ། །དེ་དག་ཀྱང་གཅིག་ལ་གཅིག་འདི་སྐད་དུ་བདག་ཀྱང་མྱུར་བར་སངས་རྒྱས་གང་ན་བཞུགས་པར་འདེང་ངོ་ཞེས་སྨྲས་སོ། །རྒྱལ་པོའི་བཙུན་མོ་རྣམས་ཀྱིས་མཆོད་པའི་ཡོ་བྱད་བཤམས་པ་ནི་སྔ་མ་བས་བདུན་
གྱུར་གྱིས་བླགས་སྟེ། མེ་ཏོག་དང་། སྤོས་དང་། རིན་པོ་ཆེའི་རྒྱལ་མཚན་དང་། དར་གྱི་བ་དན་དང་། གདུགས་དང་། ཞལ་ཟས་མཆོག་རྣམས་སོ། །རིན་པོ་ཆེའི་གདུགས་ནང་གི་ཆུང་ངུ་ཡང་ཆུ་ཞེང་ཁོ་ར་ཁོར་ཡུག་དུ་དཔག་
ཚད་བཅུ་དྲུག་ཁེབས་སོ། །བ་དན་ནང་གི་ཐུང་ངུའི་ཚད་ཀྱང་དཔག་ཚད་སུམ་ཅུ་རྩ་དྲུག་སྙེད་དོ། །རིན་པོ་ཆེའི་རྒྱལ་མཚན་ནང་གི་དམའ་བའི་ཚད་ཀྱང་དཔག་ཚད་དྲུག་བཅུ་རྩ་བརྒྱད་སྙེད་དོ། །ཞལ་ཟས་ཀྱི་དྲི་བསུང་གིས་
ཀྱང་དཔག་ཚད་བརྒྱད་ཀྱི་བར་དུ་བྲོ་བ་མཆོད་པའི་ཡོ་བྱད་དེ་ལྟ་བུ་དག་བཤམས་ནས་དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ལན་བརྒྱ་སྟོང་དུ་མ་
བསྐོར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སངས་རྒྱས་དང་། དགེ་སློང་གི་དགེ་འདུན་རྣམས་ལ་མཆོད་པའི་ཡོ་བྱད་བཤམས་ཏེ་འབུལ་བ་འདི་དེ་བཞིན་གཤེགས་པས་
བདག་ཅག་ལ་ཐུགས་བརྩེ་བའི་སླད་དུ་མཆོད་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་ནས་བཞེས་སུ་མ་གནང་ངོ་། །དེའི་ཚེ་རྒྱལ་པོའི་བཙུན་མོ་རྣམས་
བསམས་པ་བཞིན་དུ་མ་གྱུར་ནས་ཤིན་ཏུ་མྱ་ངན་གྱིས་ཡིད་གདུངས་ཏེ། སྐྲ་འབལ་ཞིང་བྲང་ལ་ཐལ་མོས་རྡེབས་ཏེ་ཆོ་ངེས་རྡུང་བ་ནི་ཇི་ལྟར་བུའི་ནང་ན་སྡུག་པ་ཤི་བ་དང་འདྲ་བར་གྱུར་ནས་ཕྱོགས་གཅིག་དུ་ཅང་མི་སྨྲ་བར་འཁོད་

47-1-10b

དོ། །དེའི་ཚེ་ཀླུང་གང་གཱ་བརྒྱད་ཀྱི་བྱེ་མ་སྙེད་ཀྱི་ལྷའི་བུ་མོ་རྣམས་ལ་འདི་ལྟ་སྟེ། ལྷའི་བུ་མོ་ཡངས་པའི་མིག་ཅེས་བྱ་བས་ཐོག་མར་དྲངས་ནས་འདི་སྐད་ཅེས་སྨྲས་སོ། །ཀྱེ་གྲོགས་མོ་དག་མཐོང་ངམ་ལྟོས་ཤིག །འཁོར་གྱི་
དཀྱིལ་འཁོར་མང་པོས་མཆོད་པའི་ཡོ་བྱད་རྣམ་པ་སྣ་ཚོགས་བཤམས་ནས་དེ་བཞིན་གཤེགས་པ་དང་དགེ་སློང་གི་དགེ་འདུན་ལ་འབུལ་བ་མཐོང་ངམ། བདག་ཅག་ཀྱང་མཆོད་པའི་ཡོ་བྱད་བཤམས་ཏེ། དེ་བཞིན་གཤེགས་
པ་ལ་མཆོད་ནས་དེ་བཞིན་གཤེགས་པས་བཞེས་པའི་འོག་ཏུ་མྱ་ངན་ལས་མི་འདའ་བར་བཞུགས་སུ་གསོལ་བར་བྱའོ། །ཀྱེ་གྲོགས་མོ་དག་སངས་རྒྱས་བཅོམ་ལྡན་འདས་འཇིག་རྟེན་དུ་གཤེགས་པའང་ཤིན་དུ་དཀའ། 
མཆོད་པ་ནང་གི་ཐ་མ་བཤམས་ཏེ་འབུལ་བ་ཡང་ཤིན་དུ་དཀའོ། །གལ་ཏེ་བཅོམ་ལྡན་འདས་མྱ་ངན་ལས་འདས་ན་འཇིག་རྟེན་སྟོངས་པར་འགྱུར་རོ་ཞེས་སྨྲས་སོ། །ལྷའི་བུ་མོ་དེ་རྣམས་ཀྱང་ཐེག་པ་ཆེན་པོ་འདོད་པ། ཐེག་
པ་ཆེན་པོ་ཐོས་པར་མོས་པ། ཐོས་ནས་ཀྱང་གཞན་ལ་རྒྱ་ཆེར་སྟོན་ནུས་པ། ཐེག་པ་ཆེན་པོ་ལ་སྐོམ་པས་གདུངས་པ་ལྟར་གྱུར་ཅིང་བདག་ཤིན་ཏུ་ངོམས་པ་ལྟར་སྐོམ་པས་གདུངས་པ་གཞན་དག་ཀྱང་ངོམས་པར་བྱེད་
པ། ཐེག་པ་ཆེན་པོ་ལ་སྐྱོབ་པ། སློབ་པ་གཞན་ལ་ཞུགས་པ་དག་ཐེག་པ་ཆེན་པོ་ལ་སུན་འབྱིན་ཅིང་ཕྲག་དོག་བྱེད་པ་ཡོད་ན་ཇི་ལྟར་རྩྭ་ལ་སེར་བ་བབ་པ་བཞིན་དུ་ཤིན་དུ་ཐུལ་བ། ཚུལ་ཁྲིམས་ཡོངས་སུ་སྲུང་བ། 
སྤྱོད་ལམ་དང་ལྡན་པ། འཇིག་རྟེན་ཐམས་ཅད་ཀྱི་ཡིད་དང་སྦྱོར་བ་ལ་ཤིན་ཏུ་མཁས་པ། མ་དུལ་བ་རྣམས་འདུལ་བ། མ་གྲོལ་བ་རྣམས་འགྲོལ་བར་བྱེད་པ། ཕྱི་མ་མ་འོངས་པའི་དུས་སུ་ཆོས་ཀྱི་འཁོར་ལོ་སྐོར་ཞིང་། 
དཀོན་མཆོག་གསུམ་གྱི་གདུང་རྒྱུན་མི་འཆད་པར་འཚོབ་པ། ཐེག་པ་ཆེན་པོ་ལ་ནན་ཏན་བྱེད་ཅིང་རྒྱན་ཆེན་པོས་ཤིན་དུ་བརྒྱན་པ། དེ་ལྟ་བུའི་ཡོན་ཏན་ཚད་མེད་པ་དང་ལྡན་པ། སེམས་ཅན་ཐམས་ཅད་ལ་ཡང་

47-1-11a

བུ་གཅིག་དང་འདྲ་བར་བྱམས་པ་ཤ་སྟག་སྟེ། དེ་དག་ཀྱང་སྔ་དྲོའི་དུས་ཉི་མ་ཐོག་མ་ཤར་བ་ན་སོ་སོ་ནས་རྣམ་པ་སྣ་ཚོགས་ཀྱི་ལྷའི་ཤིང་བསུང་ཅན་བཤམས་པ་ནི་མིའི་ཤིང་བསུང་ཅན་ལས་ཁྱད་པར་དུ་གྱུར་པ་ཤིང་
གི་བསུང་དེས་མིའི་འཇིག་རྟེན་ན་མནམ་ཞིང་དྲི་མི་ཞིམ་པ་ཐམས་ཅད་ཞི་བར་བྱེད་པ། ཤིང་རྟ་དཀར་པོ་ལ་གདུགས་དཀར་པོ་བྲེས་ཏེ་རྟ་དཀར་པོ་བཞིས་དྲངས་པ། ཤིང་རྟ་དེ་རེ་རེའི་སྟེང་ཡང་གུར་དཀར་པོ་ཕུབ་པ་ལ་གུར་གྱི་
མཐའ་མ་ཡང་གསེར་གྱི་དྲིལ་བུ་སྤྱངས་པ། རྣམ་པ་སྣ་ཚོགས་ཀྱི་སྤོས་དང་། མེ་ཏོག་དང་། རིན་པོ་ཆེའི་རྒྱལ་མཚན་དང་། བ་དན་དང་། གདུགས་དང་། ཞལ་ཟས་མཆོག་དམ་པ་དང་། རོལ་མོའི་རྣམ་པ་སྣ་ཚོགས་
བཤམས་ཏེ། སེང་གེའི་གདན་བཏིང་ངོ་། །སེང་གེའི་གདན་གྱི་རྐང་པ་བཞི་ཡང་བཻ་དཱུརྱ་མཐོན་མཐིང་ལས་བྱས་པ། དེའི་རྟེན་ནི་རིན་པོ་ཆེ་སྣ་བདུན་གྱི་སྣམ་རྟེན་དང་བཅས་པ། མདུན་ཡང་གསེར་ལས་བྱས་པའི་
སྔས་རེ་རེ་ཡོད་པ། རིན་པོ་ཆེ་སྣ་བདུན་གྱི་སྒྲོན་མའི་སྡོང་པོ་ལ་ནོར་བུ་རིན་པོ་ཆེ་རྣམ་པ་སྣ་ཚོགས་ཀྱི་སྒྲོན་མ་སྣང་བ། ས་གཞི་ཐམས་ཅད་ལྷའི་མེ་ཏོག་གིས་ཆལ་པར་བཀོད་པ་དེ་ལྟ་བུ་དག་ལྷའི་བུ་མོ་དེ་དག་གིས་
བཤམས་ནས་ཡིད་གདུང་ཞིང་མཆི་མ་ཟག་སྟེ་སྡུག་བསྔལ་ཆེན་པོ་སྐྱེས་ཀྱང་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ཐེག་པ་ཆེན་པོ་དོན་དམ་པ་སྟོང་པ་ཉིད་དང་ལྡན་པར་བྱ་བ་དང་། དེ་བཞིན་གཤེགས་པས་
དགོངས་ཏེ་གསུངས་པ་མངོན་དུ་བསྟན་པ་དང་། ཆོས་རྣམ་པ་སྣ་ཚོགས་སྨྲ་བ་རྒྱུན་མི་བཅད་པའི་ཕྱིར་བཅོམ་ལྡན་འདས་གང་ན་བར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། ལན་བརྒྱ་སྟོང་དུ་
བསྐོར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་བཤམས་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །བཅོམ་ལྡན་འདས་དུས་མཁྱེན་པས་

47-1-11b

ཅང་མི་གསུང་ནས་བཞེས་སུ་མ་གནང་ངོ་། །ལྷའི་བུ་མོ་རྣམས་བསམས་པ་བཞིན་དུ་མ་གྱུར་ནས་མྱ་ངན་གྱིས་ཡིད་གདུངས་ཏེ་ཅང་མི་སྨྲ་བར་ཕྱོགས་གཅིག་དུ་འཁོད་དོ། །དེའི་ཚེ་གཞན་ཡང་ཀླུང་གང་གཱ་དགུའི་བྱེ་མ་སྙེད་ཀྱི་ཀླུའི་
རྒྱལ་པོ་ཕྱོགས་བཞི་ནས་ལྷགས་པ་ལ་འདི་ལྟ་སྟེ། ཀླུའི་རྒྱལ་པོ་འཇོག་པོ་དང་། ཀླུའི་རྒྱལ་པོ་དགའ་བོ་དང་། ཀླུའི་རྒྱལ་པོ་ཉེ་དགའ་བོ་ལ་སོགས་པས་ཐོག་མར་དྲངས་ནས། ཀླུའི་རྒྱལ་པོ་རྣམས་ཀྱང་སྔ་དྲོའི་དུས་ཉི་མ་
ཐོག་མ་ཤར་བ་ན་ལྷ་དང་མི་ལས་ལྷག་པའི་མཆོད་པའི་ཡོ་བྱད་བཤམས་ནས། བཅོམ་ལྡན་འདས་གང་ན་བར་ལྷགས་ཏེ་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ལན་བརྒྱ་སྟོང་དུ་བསྐོར་ཏེ། བཅོམ་ལྡན་འདས་
ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་ནས་བཞེས་སུ་མ་གནང་ངོ་། །དེ་ནས་
ཀླུའི་རྒྱལ་པོ་རྣམས་ཀྱང་བསམས་པ་བཞིན་དུ་མ་གྱུར་པས་མྱ་ངན་གྱིས་ཡིད་གདུངས་ཏེ། ཕྱོགས་གཅིག་ཏུ་འཁོད་དོ། །དེའི་ཚེ་གཞན་ཡང་ཀླུང་གང་གཱ་བཅུའི་བྱེ་མ་སྙེད་ཀྱི་གནོད་སྦྱིན་གྱི་རྒྱལ་པོ་ངལ་བསོ་པོ་ལ་
སོགས་པས་ཐོག་མར་དྲངས་ནས་གཅིག་ལ་གཅིག་འདི་སྐད་དུ་ཀྱེ་སྐྱེས་བུ་དག་མྱུར་བར་སངས་རྒྱས་གང་ན་བ་དེར་འདེང་ངོ་ཞེས་སྨྲས་ནས་མཆོད་པའི་ཡོ་བྱད་ཀླུ་བས་ལྷག་པར་བཤམས་ཏེ། བཅོམ་ལྡན་འདས་གང་ན་
བར་ལྷགས་ནས་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ཏེ་ལན་བརྒྱ་སྟོང་དུ་མ་བསྐོར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་
བཤམས་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །དེ་ལ་བཅོམ་ལྡན་འདས་ཅང་མི་གསུང་བས་བཞེས་སུ་མ་གནང་ངོ་། །གནོད་སྦྱིན་གྱི་རྒྱལ་པོ་རྣམས་བསམས་པ་བཞིན་དུ་མ་གྱུར་པས་མྱ་ངན་གྱིས་

47-1-12a

ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་གཞན་ཡང་ཀླུང་གང་གཱ་ཉི་ཤུའི་བྱེ་མ་སྙེད་ཀྱི་ནམ་མཁའ་ལྡིང་གི་རྒྱལ་པོ་ཕས་རྒོལ་བ་བཅོམ་པ་ཞེས་བྱ་བས་ཐོག་མར་དྲངས་སོ། །གཞན་ཡང་ཀླུང་གང་གཱ་སུམ་
ཅུའི་བྱེ་མ་སྙེད་ཀྱི་དྲི་ཟའི་རྒྱལ་པོ་མཐུ་བོ་ཆེས་ཐོག་མར་དྲངས་སོ། །གཞན་ཡང་ཀླུང་གང་གཱ་བཞི་བཅུའི་བྱེ་མ་སྙེད་ཀྱི་མི་འམ་ཅིའི་རྒྱལ་པོ་ཤིན་ཏུ་མཐོང་བ་ཞེས་བྱ་བས་ཐོག་མར་དྲངས་སོ། །གཞན་ཡང་ཀླུང་གང་གཱ་ལྔ་བཅུའི་བྱེ་
མ་སྙེད་ཀྱི་ལྟོ་འཕྱེ་ཆེན་པོའི་རྒྱལ་པོ་ཤིན་ཏུ་མཐོང་བ་ཆེན་པོ་ཞེས་བྱ་བས་ཐོག་མར་དྲངས་སོ། །གཞན་ཡང་ཀླུང་གང་གཱ་དྲུག་བཅུའི་བྱེ་མ་སྙེད་ཀྱི་ལྷ་མ་ཡིན་གྱི་རྒྱལ་པོ་ཁ་བ་བི་ལིས་ཐོག་མར་དྲངས་སོ། །གཞན་ཡང་ཀླུང་གང་གཱ་
བདུན་བཅུའི་བྱེ་མ་སྙེད་ཀྱི་ཏ་ན་པའི་རྒྱལ་པོ་དྲི་མེད་འབབ་ཆུ་དང་། བ་ཏི་ད་ཏ་ལ་སོགས་པས་ཐོག་མར་དྲངས་སོ། །གཞན་ཡང་ཀླུང་གང་གཱ་བརྒྱད་བཅུའི་བྱེ་མ་སྙེད་ཀྱི་སྲིན་པོའི་རྒྱལ་པོ་འཇིགས་སུ་རུང་བ་ཞེས་བྱ་བས་ཐོག་མར་
དྲངས་སོ། །དེ་དག་ཀྱང་སྡིག་པ་མི་དགེ་བའི་སེམས་ཡོངས་སུ་སྤངས་ནས་མི་ལ་མི་ཟ་བ་དང་། དགྲ་དང་ཁོན་དུ་གྱུར་པ་ལ་བྱམས་ཤིང་སྙིང་རྗེའི་སེམས་སྐྱེ་བ་དང་། གཟུགས་མི་སྡུག་པ་ཡང་སངས་རྒྱས་ཀྱི་བྱིན་གྱི་བརླབས་
ཀྱིས་ཐམས་ཅད་བཟང་ཞིང་སྡུག་པར་གྱུར་ཏོ། །གཞན་ཡང་ཀླུང་གང་གཱ་དགུ་བཅུའི་བྱེ་མ་སྙེད་ཀྱི་ནགས་ཚལ་ལ་དབང་བའི་ལྷ་དྲི་བསུང་ལ་དགའ་བ་ཞེས་བྱ་བས་ཐོག་མར་དྲངས་སོ། །གཞན་ཡང་ཀླུང་གང་གཱ་སྟོང་གི་བྱེ་
མ་སྙེད་ཀྱི་རིག་འཛིན་གྱི་རྒྱལ་པོ་རྫུ་འཕྲུལ་ཆེན་པོ་ཞེས་བྱ་བས་ཐོག་མར་དྲངས་སོ། །གཞན་ཡང་ཀླུང་གང་གཱ་འབུམ་གྱི་བྱེ་མ་སྙེད་ཀྱི་མདངས་ཟ་བའི་རྒྱལ་པོ་ཤིན་ཏུ་མཐོང་ཞེས་བྱ་བས་ཐོག་མར་དྲངས་སོ། །
གཞན་ཡང་ཀླུང་གང་གཱ་ཁྲི་ཕྲག་བརྒྱའི་བྱེ་མ་སྙེད་ཀྱི་ལྷའི་བུ་མོ་འདོད་ཆགས་ཅན་ལམ་པ་དང་། ཨུར་པ་ཤི་དང་། ཏི་ལོཏྟ་མ་དང་། ཕྱིར་ཤ་ཙི་ལ་སོགས་པས་ཐོག་མར་དྲངས་སོ། །གཞན་ཡང་ཀླུང་གང་གཱ་ཁྲི་

47-1-12b

ཕྲག་སྟོང་གི་བྱེ་མ་སྙེད་ཀྱི་ས་ལ་གནས་པའི་ཡི་དགས་ཀྱི་རྒྱལ་པོ་གཞོག་དཀར་བྱ་བས་ཐོག་མར་དྲངས་སོ། །གཞན་ཡང་ཀླུང་གང་གཱ་འབུམ་ཕྲག་བཅུའི་བྱེ་མ་སྙེད་ཀྱི་ལྷའི་སྲས་པོ་རྣམས་དང་། ལྷའི་རྒྱལ་པོ་ལ་ཕྱོགས་
བཞིའི་མགོན་པོས་ཐོག་མར་དྲངས་སོ། །གཞན་ཡང་ཀླུང་གང་གཱ་འབུམ་ཕྲག་བཅུའི་བྱེ་མ་སྙེད་ཀྱི་ཀླུང་གི་ལྷས་ནི་ཕྱོགས་བཞི་ནས་ས་ལས་སྐྱེས་པའི་མེ་ཏོག་དུས་དང་དུས་མ་ཡིན་པ་རྣམས་སཱ་ལའི་ཤིང་དྲུང་དུ་
ཆལ་པར་བཀང་ངོ་། །གཞན་ཡང་ཀླུང་གང་གཱ་འབུམ་ཕྲག་བཅུའི་བྱེ་མ་སྙེད་ཀྱི་རླུང་དང་ཆར་ལ་དབང་བའི་ལྷ་རྣམས་ནི་འདི་སྙམ་དུ་བདག་ཅག་གིས་དེ་བཞིན་གཤེགས་པ་མྱ་ངན་ལས་འདས་ནས་ཞུགས་ལ་བཞེན་
པ་ན་ཆར་རབ་ཏུ་ཕབ་སྟེ་དུས་སུ་མི་ཞི་བར་བྱ་བ་དང་། འཁོར་གྱི་དཀྱིལ་འཁོར་ལས་ཚ་བས་གདུངས་པ་རྣམས་ཀྱང་ཤིན་དུ་བསིལ་བར་བྱའོ་སྙམ་དུ་སེམས་སོ། །གཞན་ཡང་ཀླུང་གང་གཱ་ཉི་ཤུའི་བྱེ་མ་སྙེད་ཀྱི་
སྤོས་ཀྱི་བལ་གླང་ཆེན་པོ་བལ་གླང་གི་རྒྱལ་པོ་ལ་ཧུ་དང་། བལ་གླང་གི་རྒྱལ་པོ་གསེར་ཅན་དང་། བལ་གླང་གི་རྒྱལ་པོ་མངར་བའི་རོ་དང་། བལ་གླང་གི་རྒྱལ་པོ་མཐོན་མཐིང་མིག་དང་། བལ་གླང་གི་རྒྱལ་པོ་བསུང་
ཅན་ལ་སོགས་པས་ཐོག་མར་དྲངས་ཏེ། དེ་དག་ཐམས་ཅད་ཀྱང་ཐེག་པ་ཆེན་པོ་ལ་སྟི་སྟང་བྱེད་པ། ཐེག་པ་ཆེན་པོ་ལ་མོས་པ་ཤ་སྟག་སྟེ། དེ་དག་གིས་ཀྱང་སངས་རྒྱས་བཅོམ་ལྡན་འདས་རིང་པོར་མི་ཐོགས་པར་
མྱ་ངན་ལས་འདའ་བར་ཤེས་པས་སོ་སོ་ནས་པད་མོ་བཟང་པོ་ཚད་མེད་དཔག་ཏུ་མེད་པ་ཕྱུང་སྟེ་སངས་རྒྱས་བཅོམ་ལྡན་འདས་གང་ན་བར་ལྷགས་ནས་གདོང་གིས་ཕྱག་འཚལ་ཏེ། ཕྱོགས་གཅིག་ཏུ་སྡོད་དོ། །གཞན་ཡང་
ཀླུང་གང་གཱ་ཉི་ཤུའི་བྱེ་མ་སྙེད་ཀྱི་རི་དགས་ཀྱི་རྒྱལ་པོ་སེང་གེ་སེང་གེ་སྒྲ་ཞེས་བྱ་བས་ཐོག་མར་དྲངས་ཏེ་སེམས་ཅན་ཐམས་ཅད་ལ་མི་འཇིགས་པ་བྱིན་ནས་སོ་སོ་ནས་མེ་ཏོག་དང་འབྲས་བུ་ཐོགས་ཏེ། སངས་རྒྱས་

47-1-13a

གང་ན་བར་ལྷགས་ནས་སངས་རྒྱས་ཀྱི་ཞབས་ལ་ཕྱག་འཚལ་ཏེ། ཕྱོགས་གཅིག་ཏུ་སྡོད་དོ། །གཞན་ཡང་ཀླུང་གང་གཱ་ཉི་ཤུའི་བྱེ་མ་སྙེད་ཀྱི་བྱའི་རྒྱལ་པོ་ངང་པ་དང་། ངུར་པ་དང་། རྨ་བྱ་དང་། གཻན་དར་པ་དང་ཀ་ལན་ཏ་
དང་། གུ་ཡོག་དང་། ནེ་ཙོ་དང་། ཀོ་ཤི་ལ་དང་། བ་ཧི་ཀ་དང་། ཀ་ལ་པིང་ཀ་དང་། འཚོ་བྱེད་ལ་སོགས་པ་བྱའི་རྒྱལ་པོ་རྣམས་ཀྱང་སོ་སོ་ནས་མེ་ཏོག་དང་། འབྲས་བུ་ཐོགས་ཏེ་སངས་རྒྱས་གང་ན་བར་ལྷགས་ནས་བཅོམ་ལྡན་
འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་སྡོད་དོ། །གཞན་ཡང་ཀླུང་གང་གཱ་ཉི་ཤུའི་བྱེ་མ་སྙེད་ཀྱི་ཆུ་གླང་དང་། བ་དང་ལུག་ལ་སོགས་པ་སངས་རྒྱས་གང་ན་བར་ལྷགས་ནས་གྲོང་ཁྱེར་རྩྭ་མཆོག་གི་
འོབས་དང་། ཤང་ཤོང་ཐམས་ཅད་ཀྱང་དྲི་བསུང་དང་ལྡན་པ། ཁ་དོག་དང་རོ་བྲོ་བར་ལྡན་པའི་འོ་མས་ཀུན་ཏུ་གང་བར་བྱས་ནས་ཕྱོགས་གཅིག་ཏུ་སྡོད་དོ། །གཞན་ཡང་ཀླུང་གང་གཱ་ཉི་ཤུའི་བྱེ་མ་སྙེད་ཀྱི་གླིང་བཞི་
ལ་གནས་པའི་དྲང་སྲོང་བཟོད་པ་ཅན་ཞེས་བྱ་བ་ལ་སོགས་པས་ཐོག་མར་དྲངས་ཏེ་སོ་སོ་ནས་མེ་ཏོག་དང་། སྤོས་དང་། འབྲས་བུ་མངར་བ་ལ་སོགས་པ་ཐོགས་ཏེ། སངས་རྒྱས་གང་ན་བར་ལྷགས་ནས་བཅོམ་
ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ་ལན་གསུམ་བསྐོར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་ནང་གི་ཐ་མ་འདི་
བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་ནས་བཞེས་སུ་མ་གནང་ནས་དྲང་སྲོང་རྣམས་བསམས་པ་བཞིན་དུ་མ་གྱུར་ནས་མྱ་ངན་གྱིས་ཡིད་གདུངས་ཏེ། ཕྱོགས་
གཅིག་ཏུ་འཁོད་དོ། །འཛམ་བུའི་གླིང་གི་བུང་བའི་རྒྱལ་པོ་སྒྲ་སྙན་ཞེས་བྱ་བས་ཐོག་མར་དྲངས་ནས་བུང་བ་ཐམས་ཅད་ཀྱང་མེ་ཏོག་རྣམ་པ་སྣ་ཚོགས་ཐོགས་ཏེ་སངས་རྒྱས་གང་ན་བར་ལྷགས་ནས་

47-1-13b

བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། ལན་ཅིག་བསྐོར་ནས་ཕྱོགས་གཅིག་ཏུ་སྡོད་དོ། །དེའི་ཚེ་འཛམ་བུའི་གླིང་ན་གནས་པའི་དགེ་སློང་དང་། དགེ་སློང་མ་ཐམས་ཅད་འདུས་ཏེ། དེ་ལ་གཉིས་མ་གཏོགས་
པ་ནི་འོད་སྲུང་ཆེན་པོ་དང་དགའ་བོའོ། །གཞན་ཡང་འཇིག་རྟེན་གྱི་ཁམས་ཚད་མེད་གྲངས་མེད་པ་ཀླུང་གང་གཱའི་བྱེ་མ་སྙེད་དང་། འཛམ་བུའི་གླིང་གི་རི་ལ་སོགས་པ་རི་རབ་རིའི་རྒྱལ་པོས་ཐོག་མར་དྲངས་ཏེ། 
རི་དེ་དག་ཐམས་ཅད་ཀྱང་ཤིན་ཏུ་བརྒྱན་པ་ནི་ནགས་ཚལ་རྒྱས་པ་དང་། ཤིང་རྣམས་ཀྱི་ལོ་མ་དང་། ཡལ་ག་ཡང་རན་པར་ཉི་མའི་འོད་ཆོད་པ་དང་། མེ་ཏོག་རྣམ་པ་སྣ་ཚོགས་རྒྱས་པ་དང་། ཁོ་ར་
ཁོར་ཡུག་ཏུ་འབབ་ཆུ་དང་ཆུ་མིག་ཡོངས་སུ་དག་ཅིང་བསུང་དང་ལྡན་པ་དང་། ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། 
ལྟོ་འཕྱེ་ཆེན་པོ་དང་། རིག་འཛིན་དང་དྲང་སྲོང་ལ་སོགས་པས་རོལ་མོ་རྣམ་པ་སྣ་ཚོགས་བྱེད་པས་ཡོངས་སུ་གང་བར་གྱུར་ཏོ། །ལྷ་དང་དྲང་སྲོང་དེ་དག་ཀྱང་བཅོམ་ལྡན་འདས་གང་ན་བར་ལྷགས་ཏེ་
སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །གཞན་ཡང་གྲངས་མེད་པའི་ཀླུང་གང་གཱའི་བྱེ་མ་སྙེད་ཀྱི་རྒྱ་མཚོ་བཞིའི་ལྷ་དང་། འབབ་ཆུ་ཀུན་གྱི་ལྷ་གཟི་བརྗིད་ཆེན་པོ་
དང་ལྡན་པ་རྫུ་འཕྲུལ་དང་ལྡན་པ་རྣམས་ཀྱང་སྔ་མ་བས་ལྷག་པར་མཆོད་པའི་ཡོ་བྱད་བཤམས་ཏེ། ལྷ་རྣམས་ཀྱི་ལུས་ཀྱི་འོད་དང་། རོལ་མོའི་ཆ་བྱད་དང་། མེ་མར་གྱིས་ཉི་ཟླའི་འོད་ཀྱང་མི་སྣང་བར་
བྱས་ནས་མེ་ཏོག་ཙམ་པ་ཀས་ཀླུང་ཧ་རི་བ་དི་ལོགས་སུ་གཏོར་ཏེ། སངས་རྒྱས་གང་ན་བར་ལྷགས་ནས་སངས་རྒྱས་ཀྱི་ཞབས་ལ་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །དེའི་ཚེ་གྲོང་ཁྱེར་རྩྭ་

47-1-14a

མཆོག་གི་ཤིང་སཱ་ལའི་ཚལ་ཐམས་ཅད་ཀྱང་སྐྱ་བོར་གྱུར་ཏེ། སྟེང་གི་ནམ་མཁའ་ལ་རིན་པོ་ཆེ་སྣ་བདུན་གྱི་གཞལ་མེད་ཁང་འབུར་དང་རི་མོར་ལྡན་པ་རྒྱན་གྱིས་མཛེས་པ་ཁོ་ར་ཁོར་ཡུག་ཏུ་རིན་པོ་ཆེ་སྣ་ཚོགས་
ཀྱིས་སྤྲས་པ། གཞལ་མེད་ཁང་གི་དྲུང་ན་ཆུ་མིག་དང་། རྫིང་བུ་དང་། མཚེའུ་ལས་མེ་ཏོག་པད་མོ་སྐྱེས་པ་ནི་བྱང་གི་སྒྲ་མི་སྙན་ནམ། སུམ་ཅུ་རྩ་གསུམ་གནས་གྱི་བསྐྱེད་མོས་ཚལ་ཤིན་ཏུ་དགའ་བ་ཞེས་
བྱ་བ་དང་འདྲ་བ་རང་བྱུང་བར་གྱུར་ཏོ། །དེའི་ཚེ་ན་ཤིང་སཱ་ལའི་ཚལ་ཀུན་ཏུ་རྣམ་པ་སྣ་ཚོགས་ཀྱིས་བརྒྱན་ཅིང་ཤིན་དུ་ཡིད་དུ་འོང་བར་གྱུར་ཏོ། །དེའི་ཚེ་ལྷ་དང་མི་དང་ལྷ་མ་ཡིན་ལ་སོགས་པ་ཐམས་ཅད་ཀྱིས་
དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བའི་ལྟས་ཡིན་པར་རིག་ནས་ཐམས་ཅད་མྱ་ངན་གྱིས་ཡིད་གདུངས་ཏེ་མི་དགའ་བར་གྱུར་ཏོ། །དེའི་ཚེ་རྒྱལ་ཆེན་བཞིའི་རྒྱལ་པོ་དང་། བརྒྱ་བྱིན་ལྷའི་དབང་ཕྱུག་
དག་གཅིག་ལ་གཅིག་འདི་སྐད་དུ་ཀྱེ་སྐྱེས་བུ་དག་འཇིག་རྟེན་དུ་བཅས་པ་ལྷ་དང་། མི་དང་། ལྷ་མ་ཡིན་ལ་སོགས་པས་མཆོད་པ་བཤམས་ཏེ་དེ་བཞིན་གཤེགས་པ་ལ་མཆོད་པ་བྱེད་པ་ལ་ལྟོས། བདག་ཅག་
ཀྱང་དེ་བཞིན་དུ་མཆོད་པ་བྱའོ། །གལ་ཏེ་བདག་ཅག་གིས་ནང་གི་ཐ་མར་མཆོད་ན་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་དུ་ངེས་སོ་ཞེས་སྨྲས་སོ། །དེ་ནས་རྒྱལ་ཆེན་རིས་བཞིའི་ལྷ་
རྣམས་ཀྱིས་མཆོད་པ་སྔ་མ་བས་ཤིན་ཏུ་ལྷག་པར་བཤམས་པ་ལ་འདི་ལྟ་སྟེ། མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དང་། མེ་ཏོག་ཀ་ཙི་ལི་དང་། ཀ་ཙི་ལི་ཀ་ཆེན་པོ་དང་། མེ་ཏོག་མཉྫུ་ཥ་ཀ་དང་། 
མཉྫུ་ཥ་ཀ་ཆེན་པོ་དང་། མེ་ཏོག་སན་ཏ་ནི་ཀ་དང་། སན་ཏ་ནི་ཀ་ཆེན་པོ་དང་། མེ་ཏོག་ཡིད་དུ་འོང་བ་དང་། ཡིད་དུ་འོང་བ་ཆེན་པོ་དང་། མེ་ཏོག་ཀུན་ཏུ་བཟང་པོ་དང་། ཀུན་ཏུ་བཟང་པོ་ཆེན་པོ་དང་། མེ་ཏོག་

47-1-14b

དུས་ཅན་དང་། དུས་ཅན་ཆེན་པོ་དང་། མེ་ཏོག་བསུང་གི་གྲོང་ཁྱེར་དང་། བསུང་གི་གྲོང་ཁྱེར་ཆེན་པོ་དང་། མེ་ཏོག་རབ་ཏུ་དགའ་བ་དང་། རབ་ཏུ་དགའ་བ་ཆེན་པོ་དང་། མེ་ཏོག་འདོད་ལྡན་དང་། འདོད་ལྡན་ཆེན་པོ་དང་། 
མེ་ཏོག་བསུང་མྱོས་དང་། བསུང་མྱོས་ཆེན་པོ་དང་། མེ་ཏོག་ཀུན་ཏུ་བསུང་དང་། ཀུན་དུ་བསུང་ཆེན་པོ་དང་། མེ་ཏོག་ལྷའི་གསེར་འདབ་དང་། མེ་ཏོག་ཀླུ་ཞེས་བྱ་བ་དང་། ཤིང་པ་རི་ཙི་ཏྲའི་མེ་ཏོག་དང་། ཤིང་ཀོ་བི་
ད་རའི་མེ་ཏོག་དང་། གཞན་ཡང་རྣམ་པ་སྣ་ཚོགས་ཀྱི་ཞལ་ཟས་རོ་བྲོ་བ་དང་ལྡན་པ་ཐོགས་ཏེ། སངས་རྒྱས་གང་ན་བར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། ལྷ་རྣམས་ཀྱི་
འོད་ཀྱིས་ཉི་ཟླའི་འོད་ཀྱང་ཟིལ་ཀྱིས་ནོན་ཏོ། །མཆོད་པའི་ཡོ་བྱད་དེ་དག་གིས་དེ་བཞིན་གཤེགས་པ་ལ་མཆོད་པ་བྱ་བར་བཤམས་ནས་དེ་བཞིན་གཤེགས་པ་དུས་མཁྱེན་པས་ཅང་མི་གསུང་བར་བཞེས་སུ་མ་གནང་
ངོ་། །དེའི་ཚེ་ལྷ་རྣམས་ཀྱང་བསམས་པ་བཞིན་དུ་མ་གྱུར་པས་མྱ་ངན་གྱིས་ཡིད་གདུངས་ཏེ། ཕྱོགས་གཅིག་ཏུ་འཁོད་དོ། །དེའི་ཚེ་བརྒྱ་བྱིན་ལྷའི་དབང་ཕྱུག་དང་། སུམ་བཅུ་རྩ་གསུམ་གནས་གྱི་
ལྷ་རྣམས་ཀྱིས་སྔ་མ་བས་ཤིན་ཏུ་ལྷག་པའི་མཆོད་པའི་ཡོ་བྱད་བཤམས་ནས་མེ་ཏོག་ཐོགས་པ་ཡང་སྔ་མ་དང་འདྲ་སྟེ། དྲི་བསུང་གིས་ཤིན་ཏུ་ངད་པ་ནི་ཡིད་དུ་འོང་བ་སྟེ། གཞལ་མེད་ཁང་རྒྱལ་བར་
འགྱུར་བ་ཞེས་བྱ་བ་དང་། གཞལ་མེད་ཁང་ཆུང་ངུའི་རྣམས་བཤམས་ཏེ། སངས་རྒྱས་གང་ན་བར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་བདག་ཅག་ནི་ཐེག་པ་ཆེན་པོ་ལ་ཤིན་དུ་དད་ཅིང་མོས་ན་དེ་བཞིན་གཤེགས་པས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་འདི་དག་བཞེས་ཤིག་ཅེས་གསོལ་ཏོ། །

47-1-15a

བཅོམ་ལྡན་འདས་དུས་མཁྱེན་པས་ཅང་མི་གསུང་བར་བཞེས་སུ་མ་གནང་ངོ་།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་གཉིས་པ། དེ་ནས་བརྒྱ་བྱིན་དང་
ལྷའི་འཁོར་རྣམས་བསམས་པ་བཞིན་དུ་མ་གྱུར་ནས་མྱ་ངན་གྱིས་ཡིད་གདུངས་ཏེ། ཕྱོགས་གཅིག་ཏུ་འཁོད་དོ། །འདོད་པའི་ཁམས་ཀྱི་གནམ་རིམ་པ་དྲུག་གི་བར་དུ་མཆོད་པའི་ཡོ་བྱད་བཤམས་པ་ནི་རིན་པོ་
ཆེའི་རྒྱལ་མཚན་དང་། བ་དན་དང་། གདུགས་གཅིག་པས་ཀྱང་གཅིག་བཟང་བའོ། །རིན་པོ་ཆེའི་གདུགས་ནང་གི་ཆུང་ངུ་ཡང་གླིང་བཞི་ཁེབས་སོ། །བ་དན་ནང་གི་ཐུང་ངུ་ཡང་རྒྱ་མཚོ་བཞི་འཁོར་རོ། །རྒྱལ་
མཚན་ནང་གི་དམའ་བ་ཡང་གཞན་འཕྲུལ་དབང་བྱེད་གནམ་ལ་རེག་སྟེ། རླུང་གིས་བསྐྱོད་ན་སྒྲ་སྐད་སྙན་པ་འབྱིན་པ་དང་། ཞལ་ཟས་ཕུལ་དུ་བྱུང་བ་རྣམ་པ་སྣ་ཚོགས་བཤམས་ནས་བཅོམ་ལྡན་འདས་གང་ན་བར་ལྷགས་
ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་ནང་གི་ཐ་མ་འདི་བཞེས་ཤིག་ཅེས་
གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་བར་བཞེས་སུ་མ་གནང་ངོ་། །དེ་ནས་ལྷ་རྣམས་ཀྱང་བསམས་པ་བཞིན་དུ་མ་གྱུར་པས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །
དེ་ལ་གཅིག་མ་གཏོགས་པ་ནི་སྲིད་པའི་རྩེ་མོ་སྟེ། ཚངས་པའི་རིས་ཀྱི་ལྷ་རྣམས་ཀྱང་འདུས་པར་གྱུར་ཏོ། །དེའི་ཚེ་ཚངས་པའི་རྒྱལ་པོ་དང་། ཚངས་པའི་རིས་ཀྱི་ལྷ་རྣམས་ཀྱི་འོད་ཀྱིས་གླིང་བཞི་ཀུན་སྣང་
བར་བྱས་ནས་འདོད་པའི་ཁམས་ན་ལྷ་དང་། མི་དང་། ཉི་ཟླའི་འོད་ཀྱང་མི་སྣང་བར་བྱས་སོ། །དེ་དག་ཀྱང་སོ་སོ་ནས་རིན་པོ་ཆེའི་རྒྱལ་མཚན་དང་། བ་དན་དང་། གདུགས་ཐོགས་པ་ནི་བ་དན་ནང་གི་ཐུང་ངུ་

47-1-15b

ཡང་ཚངས་པའི་གནས་ནས་ཤིང་སཱ་ལའི་ཚལ་ལ་ཐུག་པ་ཐོགས་ནས་སངས་རྒྱས་གང་ན་བར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་བདག་ཅག་གི་མཆོད་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་བར་བཞེས་སུ་མ་གནང་ངོ་། །
ཚངས་པའི་ལྷ་རྣམས་བསམས་པ་བཞིན་དུ་མ་གྱུར་ནས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་ལྷ་མ་ཡིན་གྱི་རྒྱལ་པོ་ཐག་བཟངས་རིས་ཀྱང་འཁོར་དཔག་ཏུ་མེད་པ་དང་བཅས་ཏེ་
ལྷགས་སོ། །དེ་རྣམས་ཀྱི་ལུས་ཀྱི་འོད་ཀྱང་ཚངས་པའི་ལྷ་བས་ཀྱང་ལྷག་པར་གྱུར་ཏེ་རིན་པོ་ཆེའི་རྒྱལ་མཚན་དང་། བ་དན་དང་། གདུགས་རྣམས་ཐོགས་ཏེ། གདུགས་ནང་གི་ཆུ་ངུ་ཡང་སྟོང་ཆུང་ངུའི་
འཇིག་རྟེན་གྱི་ཁམས་ཁེབས་པ་དང་། ཕུལ་དུ་བྱུང་བའི་ཞལ་ཟས་མཆོག་རྣམས་ཐོགས་ནས་སངས་རྒྱས་གང་ན་བར་ལྷགས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་
བར་བཞེས་སུ་མ་གནང་ནས་ལྷ་མ་ཡིན་རྣམས་བསམས་པ་བཞིན་དུ་མ་གྱུར་པས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་འདོད་པའི་ཁམས་ཀྱི་བདུད་ཀྱི་རྒྱལ་པོ་བདུད་སྡིག་
ཏོ་ཅན་ཡང་འཁོར་ལྷའི་བུ་མོ་གྲངས་མེད་དཔག་ཏུ་མེད་པ་དང་བཅས་ཏེ། སེམས་ཅན་དམྱལ་བའི་སྒོ་ཕྱེ་ནས་ཡོངས་སུ་བསིལ་ཞིང་དགའ་བའི་ཆུ་ཕབ་སྟེ། དེ་དག་ལ་འདི་སྐད་ཅེས་བསྒོའོ། །ཁྱེད་ལ་

47-1-16a

སོགས་པ་གཞན་ཅི་ཡང་མི་ནུས་ཀྱིས་སེམས་རྩེ་གཅིག་ཏུ་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་དྲན་པར་གྱིས་ལ་མཆོད་པ་བྱེད་པ་ལ་རྗེས་སུ་ཡི་རང་བར་གྱིས་ཤིག་
དང་། ཁྱེད་ཡུན་རིང་པོར་རབ་ཏུ་བདེ་བར་འགྱུར་རོ། །དེ་ནས་བདུད་སྡིག་ཅན་སེམས་ཅན་དམྱལ་བའི་མཚོན་ཆ་དང་། སྡུག་བསྔལ་དུ་འགྱུར་བའི་མེ་རབ་ཏུ་འབར་བ་ཡང་བསིལ་བའི་ཆར་གྱིས་ཞི་བར་བྱས་ནས། 
སངས་རྒྱས་ཀྱི་བྱིན་གྱི་བརླབས་ཀྱིས་བདུད་ཀྱི་འཁོར་རྣམས་ཀྱང་འདི་སྙམ་དུ་སེམས་བསྐྱེད་པར་གྱུར་ཏོ། །ཐམས་ཅད་ཀྱིས་རལ་གྲི་དང་། མདའ་གཞུ་དང་། གོ་ཆ་དང་མཚོན་ཤག་ཏི་དང་། ལྕགས་ཀྱུ་དང་། 
ལྕགས་ཐོ་དང་། དགྲ་སྟ་དང་། འཁོར་ལོ་དང་། ཞགས་པ་ལ་སོགས་ཏེ་མཚོན་ཆ་ཐམས་ཅད་སྤངས་ནས་མཆོད་པའི་ཡོ་བྱད་ལྷ་དང་མི་ལས་ཁྱད་པར་དུ་གྱུར་པ་བཤམས་སོ། །གདུགས་ནང་གི་ཆུང་ངུ་
ཡང་སྟོང་འབྲིང་པོའི་འཇིག་རྟེན་གྱི་ཁམས་ཁེབས་པ་ཐོགས་ནས་སངས་རྒྱས་གང་ན་བར་ལྷགས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་
ཏོ། །བཅོམ་ལྡན་འདས་བདག་ཅག་ཀྱང་ཐེག་པ་ཆེན་པོ་ལ་རབ་ཏུ་དད་ཅིང་མོས་ཏེ་ཐེག་པ་ཆེན་པོ་བསྲུང་བར་འཚལ་ལོ། །བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་གང་ཞིག་ཁེ་དང་གྲགས་
པའི་ཕྱིར་རམ། གཞན་སྐྲག་པར་བྱ་བའི་ཕྱིར་རམ། གཞན་ལ་བརྫུན་བྱ་བའི་ཕྱིར་རམ། ནོར་དང་ཟང་ཟིང་གི་ཕྱིར་རམ། གཞན་གྱི་ཡིད་དང་སྦྱོར་བ་ཙམ་གྱི་ཕྱིར་ཐེག་པ་ཆེན་པོ་འདི་འཛིན་པར་བྱེད་ན་བདེན་ཡང་རུང་། 
བརྫུན་ཡང་རུང་བདག་ཅག་གིས་དེའི་ཚེ་གང་ཟག་དེའི་འཇིགས་པ་བསལ་བའི་ཕྱིར་གསང་སྔགས་འདི་འབུལ་ལོ། །ཙྱོག་ཀྱེ། ཏ་ཏ་ལ་ཙྱོག་ཀྱེ། ལོ་ཧ་ལེ། མ་ཧཱ་ལོ་ཧ་ལེ། ཨ་ལ་ཙ་ལ་ཏ་ལ་སྭཱ་ཧཱ། སྔགས་འདིས་

47-1-16b

ནི་སེམས་སྟོར་བ་རྣམས་དང་། འཇིགས་སྐྲག་པ་དང་། ཆོས་སྨྲ་བ་དང་། ཡང་དག་པའི་ཆོས་ཀྱི་བར་དུ་མི་གཅོད་པ་དང་། མུ་སྟེགས་ཅན་འདུལ་བ་དང་། བདག་གི་ལུས་བསྲུང་བ་དང་། ཡང་དག་པའི་ཆོས་བསྲུང་བ་
དང་། ཐེག་པ་ཆེན་པོ་བསྲུང་བའི་སླད་དུ་གསང་སྔགས་འདི་འབུལ་ལོ། །གང་གིས་གསང་སྔགས་འདི་ཡིད་ལ་བགྱིད་ན་བལ་གླང་རྨིས་པའི་འཇིགས་པ་དང་བྲལ་བར་འགྱུར། གལ་ཏེ་འབྲོག་དགོན་པ་འམ། 
ཡུལ་ས་སྟོང་པ་བག་ཚ་བའི་གནས་སུ་མཆིས་ན་ཡང་འཇིགས་པར་མི་འགྱུར། ཆུ་དང་མེ་དང་། སེང་གེ་དང་། སྟག་དང་། སྤྱང་གི་དང་། དགྲས་འཇིགས་པ་དང་། རྒྱལ་པོའི་ཆད་པས་འཇིགས་པ་ལས་ཀྱང་ཐར་
བར་འགྱུར་རོ། །བཅོམ་ལྡན་འདས་གང་གིས་གསང་སྔགས་འདི་ཡིད་ལ་བགྱིད་ན་འཇིགས་པ་དེ་དག་ལ་སོགས་པ་ཐམས་ཅད་དང་བྲལ་བར་འགྱུར་རོ། །བཅོམ་ལྡན་འདས་གསང་སྔགས་འདི་འཛིན་པ་ལ་བདག་
ཅག་གིས་བསྐྱབ་ཅིང་སྦ་བ་ནི་ཇི་ལྟར་རུ་སྦལ་ཡན་ལག་དྲུག་སྦེད་པ་བཞིན་ནོ། །བཅོམ་ལྡན་འདས་བདག་ཅག་གཡོ་དང་སྒྱུས་འདི་སྐད་དུ་སྨྲ་བ་མ་ལགས་ཀྱི་གང་གཟུངས་སྔགས་འདི་འཛིན་པ་ལ་བདག་ཅག་གིས་
མཐུ་སྟོབས་བསྟང་ངོ་། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་ནང་གི་ཐ་མ་འདི་བཞེས་སུ་གསོལ། དེ་ནས་བཅོམ་ལྡན་འདས་ཀྱིས་བདུད་སྡིག་ཏོ་ཅན་ལ་འདི་སྐད་ཅེས་བཀའ་སྩལ་
ཏོ། །ཁྱེད་ཀྱིས་མཆོད་པ་ཞལ་ཟས་ཕུལ་བ་རྣམས་ནི་མི་བཞེས་སོ། །འགྲོ་བ་ཐམས་ཅད་དང་འཁོར་རྣམ་བཞི་ལ་ཕན་པ་དང་བདེ་བའི་ཕྱིར་གསང་སྔགས་འདི་བཞེས་སོ་ཞེས་བཀའ་སྩལ་ནས་ཅང་མི་གསུང་
བར་གཞན་ནི་བཞེས་སུ་མ་གནང་ངོ་། །དེ་ལྟར་ལན་གསུམ་གྱི་བར་དུ་གསོལ་ཀྱང་བཞེས་སུ་མ་གནང་ནས་བདུད་སྡིག་ཏོ་ཅན་བསམས་པ་བཞིན་དུ་མ་གྱུར་པས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །

47-1-17a

དེའི་ཚེ་ལྷ་དབང་སྒྱུར་ཆེན་པོ་ཡང་འཁོར་ལྷ་གྲངས་མེད་དཔག་ཏུ་མེད་པ་དང་བཅས་ཏེ། མཆོད་པའི་ཡོ་བྱད་བཤམས་པ་ཡང་ཚངས་པ་དང་བརྒྱ་བྱིན་དང་། འཇིག་རྟེན་གྱི་མགོན་པོ་བཞི་དང་། ལྷ་དང་། 
མི་དང་། ལྷ་མ་ཡིན་སྡེ་བརྒྱད་དང་། མི་མ་ཡིན་པ་ལ་སོགས་པས་མཆོད་པའི་ཡོ་བྱད་རྣམས་ཟིལ་གྱིས་གནོན་པ་ནི་ཇི་ལྟར་སོལ་བའི་དྲུང་ན་ཤེལ་བཞག་པ་དང་འདྲ་སྟེ་ཐམས་ཅད་མི་སྣང་བར་གྱུར་ཏོ། །རིན་པོ་ཆེའི་
གདུགས་ནང་གི་ཆུང་ངུ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོངས་སུ་ཁེབས་པའི་མཆོད་པའི་ཡོ་བྱད་ལ་སོགས་པ་ཐོགས་ཏེ། སངས་རྒྱས་གང་ན་བར་ལྷགས་ནས་བཅོམ་ལྡན་འདས་
ཀྱི་ཞབས་ལ་སྤྱི་བོས་ཕྱག་འཚལ་ནས་ལན་གྲངས་མེད་པར་བསྐོར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་མཆོད་པའི་ཡོ་བྱད་ནང་གི་ཐ་མ་འདི་འབུལ་བ་ནི་ཇི་
ལྟར་ན་བདག་ཅག་ལ་སྦྲང་བུས་མཆོད་པ་འབུལ་བ་འམ། ཆུ་སྙིམ་པ་གང་རྒྱ་མཚོ་ཆེན་པོར་བླུགས་པ་འམ། མེ་མར་ཆུང་ངུ་གཅིག་གི་འོད་ཀྱིས་ཉི་མ་བརྒྱ་སྟོང་ལ་བཏང་བ་འམ། དབྱར་མེ་ཏོག་ཤིན་ཏུ་
རྒྱས་པའི་དུས་སུ་མེ་ཏོག་གཅིག་ཐོགས་ཏེ་མེ་ཏོག་མང་པོའི་ཁྲོད་དུ་བཞག་པ་འམ། ཡུངས་ཀར་འབྲུམ་བུ་གཅིག་ཙམ་རི་རབ་རིའི་རྒྱལ་པོ་ལ་བསྟེངས་ན་རྒྱ་མཚོ་དང་ཉི་མ་དང་། མེ་ཏོག་མང་པོ་དང་། རི་རབ་ལ་མི་སྨན་
པ་དང་འདྲ་བར་བཅོམ་ལྡན་འདས་བདག་ཅག་གི་མཆོད་པ་ཡང་དེ་དང་འདྲའོ། །གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྤོས་དང་། མེ་ཏོག་དང་། རོལ་མོ་དང་། བ་དན་དང་། གདུགས་དང་། 
རྒྱལ་མཚན་གྱིས་ཡོངས་སུ་བཀང་སྟེ། མཆོད་ཀྱང་སྨོས་པའི་རིན་ཏུ་མི་འཚལ་ཏོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པ་ནི་འགྲོ་བ་མང་པོའི་སླད་དུ་སེམས་ཅན་དམྱལ་བ་དང་། ཡི་དགས་དང་། བྱོལ་

47-1-17b

སོང་གི་སྐྱེ་གནས་སུ་སྡུག་བསྔལ་མང་པོ་ལེན་ཏོ། །དེ་བས་ན་བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་འདི་དག་བཞེས་ཤིག་ཅེས་གསོལ་ཏོ། །དེའི་ཚེ་འདི་ནས་ཤར་ཕྱོགས་སུ་འཇིག་རྟེན་གྱི་
ཁམས་ཀླུང་གང་གཱའི་བྱེ་མ་གྲངས་མེད་དཔག་ཏུ་མེད་པ་འདས་པའི་ཕ་རོལ་སངས་རྒྱས་ཀྱི་ཞིང་ཡིད་དུ་འོང་བའི་སྒྲ་སྙན་ཞེས་བྱ་བ་ན་སངས་རྒྱས་ནམ་མཁའ་དང་མཉམ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པ། མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་
ལྡན་འདས་བཞུགས་ཏེ། དེའི་ཚེ་ན་སངས་རྒྱས་དེས་ཉེ་གནས་ཆེན་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་སོང་ལ་འདི་ནས་ནུབ་ཕྱོགས་སུ་འཇིག་རྟེན་གྱི་ཁམས་མི་མཇེད་ཅེས་བྱ་བ་ན་སངས་རྒྱས་
ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པ་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། 
ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དེ་རིང་པོ་མི་ཐོགས་པར་ཡོངས་སུ་མྱ་ངན་ལས་འདར་ཉེའོ། །རིགས་ཀྱི་བུ་ཁྱོད་འཇིག་རྟེན་གྱི་ཁམས་འདིའི་ཞལ་ཟས་བསུང་ཅན་དྲི་ཤིན་ཏུ་ཞིམ་པ། 
ཡིད་དུ་འོང་ཞིང་བདེ་བར་འགྱུར་བ་འདི་ཐོགས་ཏེ། སངས་རྒྱས་བཅོམ་ལྡན་འདས་དེ་ལ་ཕུལ་ཅིག །བཅོམ་ལྡན་འདས་དེ་གསོལ་ནས་ཡོངས་སུ་མྱ་ངན་ལས་འདའ་བར་གཤེགས་སོ། །རིགས་ཀྱི་བུ་ཁྱོད་དེ་ལ་ཕྱག་
འཚལ་ཞིང་ཐེ་ཚོམ་དུ་གྱུར་པ་ཡང་ཞུ་བའི་དུས་ལ་བབ་བོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་དཔག་ཏུ་མེད་པ་ཞེས་བྱ་བ་འདུག་པ་ལས་ལངས་ནས་སངས་རྒྱས་ཀྱི་ཞབས་ལ་སྤྱི་

47-1-18a

བོས་ཕྱག་འཚལ་ཏེ། ལན་གསུམ་བསྐོར་ནས་བྱང་ཆུབ་སེམས་དཔའ་གྲངས་མེད་དཔག་ཏུ་མེད་པ་དང་ཐབས་ཅིག་ཏུ་སངས་རྒྱས་ཀྱི་ཞིང་དེ་ནས་མི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་དོང་ངོ་། །
དེའི་ཚེ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམ་པ་དྲུག་ཏུ་གཡོས་ནས་འཁོར་གྱི་ནང་ན་ཚངས་པ་དང་། བརྒྱ་བྱིན་དང་། ཕྱོགས་བཞིའི་མགོན་པོ་དང་། བདུད་སྡིག་ཏོ་ཅན་དང་། དབང་སྒྱུར་ཆེན་པོ་
ལ་སོགས་པ་དེ་དག་གིས་ས་གཡོས་པ་མཐོང་ནས་ལུས་སྐྱི་བུང་ཞེས་བྱེད་དེ་ལྕེ་ཡང་སྐམས་པ་ཙམ་དུ་དངས་སྐྲག་པར་གྱུར་ཏེ། སོ་སོར་འགྲོ་བར་ཆས་ནས་ལུས་ཀྱི་འོད་དང་གཟི་བརྗིད་ཀྱང་མི་སྣང་བར་གྱུར་ཏོ། །
དེ་ནས་འཇམ་དཔལ་གཞོན་ནུར་གྱུར་པ་འདུག་པ་ལས་ལངས་ཏེ། འཁོར་གྱི་དཀྱིལ་འཁོར་རྣམས་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཁྱེད་འཇིགས་པར་མ་བྱེད་ཅིག །ཁྱེད་མ་འཇིགས་ཤིག །
དེ་ཅིའི་ཕྱིར་ཞེ་ན། འདི་ནས་ཤར་ཕྱོགས་ན་འཇིག་རྟེན་གྱི་ཁམས་ཀླུང་གང་གཱའི་བྱེ་མ་གྲངས་མེད་དཔག་ཏུ་མེད་པ་འདས་པའི་ཕ་རོལ་ན་འཇིག་རྟེན་གྱི་ཁམས་ཡིད་དུ་འོང་བའི་སྒྲ་སྙན་ཞེས་བྱ་བ་ན་སངས་རྒྱས་
ནམ་མཁའ་དང་མཉམ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་སུམ་བཅུ་རྩ་གཉིས་དང་ལྡན་པ་བཞུགས་ཏེ། དེ་ན་བྱང་ཆུབ་སེམས་དཔའ་ལུས་
དཔག་ཏུ་མེད་པ་ཞེས་བྱ་བ་འཁོར་བྱང་ཆུབ་སེམས་དཔའ་གྲངས་མེད་པ་དང་བཅས་ཏེ། འཇིག་རྟེན་གྱི་ཁམས་འདིར་དེ་བཞིན་གཤེགས་པ་ལ་མཆོད་དུ་འོང་བས་བྱང་ཆུབ་སེམས་དཔའ་དེའི་གཟི་བརྗིད་དང་
བྱིན་གྱིས་ཁྱེད་ཀྱི་ལུས་ཀྱི་འོད་ཀྱང་མི་སྣང་བར་གྱུར་ཏོ། །དེ་བས་ན་ཁྱེད་མ་འཇིགས་པར་ཤིན་དུ་དགའ་བ་སྐྱེད་ཅིག །དེའི་ཚེ་ན་འཁོར་གྱི་དཀྱིལ་འཁོར་དེ་དག་ཐམས་ཅད་ཀྱིས་རྒྱང་མ་ནས་སངས་རྒྱས་དེ་

47-1-18b

དང་། འཁོར་མང་པོ་རྣམས་མཐོང་བ་ནི་ཇི་ལྟར་མེ་ལོང་གསལ་བའི་ནང་ན་བདག་གི་གཟུགས་བརྙན་མཐོང་བ་བཞིན་ནོ། །དེ་ནས་ཡང་འཇམ་དཔལ་གྱིས་འཁོར་མང་པོ་རྣམས་ལ་འདི་སྐད་ཅེས་སྨྲས་སོ། །ཁྱེད་
ཀྱིས་སངས་རྒྱས་དེ་མཐོང་བ་ནི་ཇི་ལྟར་སངས་རྒྱས་འདི་མཐོང་བ་དང་འདྲ་བར་སངས་རྒྱས་ཀྱི་བྱིན་གྱི་བརླབས་ཀྱིས་གཞན་ཡང་སངས་རྒྱས་ཕྱོགས་བཅུ་ན་བཞུགས་པ་དཔག་ཏུ་མེད་པ་སྙེད་ཀྱང་མཐོང་བར་གྱུར་ཏོ། །
དེའི་ཚེ་འཁོར་གྱི་དཀྱིལ་འཁོར་མང་པོས་གཅིག་ལ་གཅིག་འདི་སྐད་དུ་ཀྱི་ཧུད་ཀྱི་ཧུད་འཇིག་རྟེན་སྟོངས་སོ། །འཇིག་རྟེན་སྟོངས་སོ། །དེ་བཞིན་གཤེགས་པ་རིང་པོར་མི་ཐོགས་པར་ཡོངས་སུ་མྱ་ངན་ལས་འདའོ་
ཞེས་སྨྲས་སོ། །དེའི་ཚེ་འཁོར་གྱི་དཀྱིལ་འཁོར་མང་པོ་ཐམས་ཅད་ཀྱིས་བྱང་ཆུབ་སེམས་དཔའ་ལུས་དཔག་ཏུ་མེད་པ་འཁོར་དང་བཅས་པ་མཐོང་བ་ནི་འདི་ལྟ་སྟེ། བྱང་ཆུབ་སེམས་དཔའ་དེའི་བ་སྤུའི་ཁུང་བུ་རེ་
རེ་ནས་མེ་ཏོག་པད་མོ་ཆེན་པོ་རེ་རེ་བྱུང་ལ་པད་མོ་དེ་རེ་རེའི་སྟེང་ཡང་གྲོང་ཁྱེར་བདུན་ཁྲི་བརྒྱད་སྟོང་སྙེད་ཡོད་དོ། །གྲོང་ཁྱེར་དེ་ཡང་ཆུ་ཞེང་གབ་པར་གྲོང་ཁྱེར་ཡངས་པ་ཅན་དང་མཉམ་སྟེ། ར་བ་དང་འོབས་ཀྱང་
རིན་པོ་ཆེ་སྣ་བདུན་གྱིས་སྤྲས་ལ་རིན་པོ་ཆེའི་ཤིང་ཏ་ལ་རིམ་པ་བདུན་དངར་བ། དེ་ན་གནས་པའི་མི་ཐམས་ཅད་ཀྱང་རབ་ཏུ་བདེ་ཞིང་སྐྱིད་པ། གྲོང་ཁྱེར་དེའི་ཅོག་བར་ཡང་འཛམ་བུ་ཆུ་ཀླུང་གི་གསེར་
ལས་བྱས་པ། ཅོག་བར་དེ་རེ་རེའི་བར་ནི་རིན་པོ་ཆེ་སྣ་བདུན་གྱི་ཤིང་རྣམ་པ་སྣ་ཚོགས་ཡོད་དེ་མེ་ཏོག་དང་འབྲས་བུ་ཤིན་དུ་རྒྱས་པ། རླུང་མི་དྲག་པས་བསྐྱོད་པ་ན་སྒྲ་སྐད་ཤིན་དུ་སྙན་པ་ནི་ཇི་ལྟར་ལྷའི་རོལ་མོ་ཟེར་བ་
ལྟ་བུ་དེ་ན་གནས་པའི་མི་དག་གིས་ཐོས་ན་ཕུལ་དུ་བྱུང་བའི་བར་དུ་བདེ་བ་མྱོང་བར་འགྱུར་རོ། །འོབས་ཀྱི་ནང་ན་ཡང་ཡོངས་སུ་དག་པའི་ཆུ་བསུང་ཅན་བཻ་དཱུརྱ་དང་འདྲ་བས་ཡོངས་སུ་གང་ངོ་། །ཆུ་དེ་དག་ལ་རིན་པོ་ཆེ་

47-1-19a

སྣ་བདུན་གྱི་གྲུ་ཡོད་དོ། །གྲུའི་སྟེང་ན་མི་དག་རྩེ་ཞིང་ཁྲུས་བྱེད་དེ་གཅིག་ལ་གཅིག་དགའ་ཞིང་རབ་ཏུ་བདེ་བ་མྱོང་ངོ་། །གཞན་ཡང་ཁ་དོག་རྣམ་པ་སྣ་ཚོགས་ཀྱི་པད་མོ་སྐྱེ་བ་ནི་ཨུད་པ་ལ་དང་། ཀུ་
མུ་ད་དང་། པུན་ད་རི་ཀ་ལ་སོགས་པ་ཤིང་རྟའི་འཁོར་ལོ་ཙམ་སྐྱེའོ། །འོབས་ཀྱི་གཡས་གཡོན་ན་བསྐྱེད་མོས་ཚལ་མང་དུ་ཡོད་དེ་བསྐྱེད་མོས་ཚལ་དེ་རེ་རེའི་ནང་དུ་ཡང་ཆུ་མིག་དང་བཅས་པའི་རྫིང་བུ་ལྔ་ལྔ་
ཡོད་དོ། །རྫིང་བུ་དེ་དག་གི་ནང་ན་ཡང་མེ་ཏོག་ཨུད་པ་ལ་དང་། ཀུ་མུ་ད་དང་། པད་མ་དང་། པུན་ད་རི་ཀ་ཆེ་ཁྱད་ཤིང་རྟའི་འཁོར་ལོ་ཙམ་སྐྱེས་ཏེ་དྲི་བསུང་ཤིན་ཏུ་མང་བ། རབ་ཏུ་ཡིད་དུ་འོང་བ། ཆུ་ཤིན་དུ་གསལ་
ཞིང་འཇམ་པ། ངང་པ་དང་། ངུར་པ་ལ་སོགས་པ་རྐྱལ་ཞིང་རྩེ་བ། བསྐྱེད་མོས་ཚལ་དེ་ན་གཞན་ཡང་རིན་པོ་ཆེའི་གཞལ་མེད་ཁང་ཡོད་དེ། གཞལ་མེད་ཁང་དེ་རེ་རེའི་ཡང་ཆུ་ཞེང་གབ་པར་དཔག་ཚད་
བཞི་ཡོད་དོ། །གཞལ་མེད་ཁང་དེའི་ར་བ་ཡང་རིན་པོ་ཆེ་སྣ་བཞི་ལས་བྱས་སོ། །འདི་ལྟ་སྟེ་གསེར་དང་། དངུལ་དང་བཻ་དཱུརྱ་དང་། ཤེལ་ལས་བྱས་ཏེ་བད་ཀྱང་གསེར་ལས་བྱས། ས་གཞི་ནི་མུ་ས་ལ་
གར་བྷ་ལས་བླངས་ཏེ་གསེར་གྱི་བྱེ་མ་བདལ་བ། གཞལ་མེད་ཁང་དེའི་དྲུང་ན་རིན་པོ་ཆེ་སྣ་བདུན་གྱི་འབབ་ཆུ་དང་། ཆུ་མིག་དང་། རྫིང་བུ་ཡོད་དེ། རྫིང་བུ་དེ་རེ་རེ་ལ་ཡང་གསེར་གྱི་ཐེམ་སྐས་བཅྭ་བརྒྱད་བཅྭ་བརྒྱད་
ཡོད་དོ། །ཆུ་ཞེང་ཡང་འཛམ་བུ་ཆུ་ཀླུང་གི་གསེར་ལས་བྱས་ཏེ། སུམ་བཅུ་རྩ་གསུམ་གནམ་གྱི་བསྐྱེད་མོས་ཚལ་རབ་ཏུ་བདེ་བ་ཅན་དང་འདྲའོ། །གྲོང་ཁྱེར་དེ་རེ་རེའི་ནང་ན་ཡང་རྒྱལ་པོ་བརྒྱད་ཁྲི་བཞི་སྟོང་
སྙེད་ཡོད་དོ། །རྒྱལ་པོ་དེ་རེ་རེ་ལ་ཡང་བཙུན་མོ་དང་ཕོ་བྲང་གི་སླས་གྲངས་མེད་པ་ཡོད་དོ། །དེ་དག་དང་ལྷན་ཅིག་ཏུ་རྩེ་ཞིང་དགའོ། །དེ་ན་གནས་པའི་མི་ཐམས་ཅད་ཀྱང་སོ་སོའི་གནས་ན་རྩེ་ཞིང་དགའོ། །

47-1-19b

དེ་ན་གནས་པའི་སེམས་ཅན་རྣམས་ནི་རྣ་བར་གཞན་མི་གྲག་གི་བླ་ན་མེད་པའི་ཐེག་པ་ཆེན་པོའི་སྒྲ་འབའ་ཞིག་གྲག་གོ། མེ་ཏོག་དེ་རེ་རེའི་ནང་ན་ཡང་སེང་གེའི་ཁྲི་རེ་རེ་ཡོད་དེ། ཁྲི་དེའི་རྐང་པ་བཞི་ཡང་བཻ་དཱུརྱ་མཐོན་
མཐིང་ལ་བྱས་པ། ཁམས་གསུམ་ལས་འདས་པའི་ན་བཟའ་ཤིན་ཏུ་འཇམ་པ་དཀར་པོ་བཏིང་ངོ་། །ཁྲི་དེ་རེ་རེའི་སྟེང་ན་རྒྱལ་པོ་རེ་རེ་འདུག་སྟེ་ཐེག་པ་ཆེན་པོའི་ཆོས་ཀྱིས་སེམས་ཅན་རྣམས་འདུལ་ཏེ། དེ་ལ་ཡང་
སེམས་ཅན་ལ་ལ་ནི་ཐེག་པ་ཆེན་པོའི་མདོ་སྡེ་གླེགས་བམ་དུ་འདྲི་བ་དང་། འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། ཇི་ལྟར་སྨྲས་པ་བཞིན་དུ་ནན་ཏན་དུ་བྱེད་པ་དང་། ཤིན་དུ་རྒྱས་པའི་བར་དུ་བྱེད་དོ། །དེའི་ཚེ་ན་
བྱང་ཆུབ་སེམས་དཔའ་ལུས་དཔག་ཏུ་མེད་པ་དེས་བདག་གི་ལུས་ལ་སེམས་ཅན་ཚད་མེད་པ་སྙེད་བཀོད་པ་དེ་ཡང་འཇིག་རྟེན་གྱི་བདེ་བ་བཏང་ནས་ཐམས་ཅད་འདི་སྐད་དུ་ཀྱི་ཧུད་ཀྱི་ཧུད་འཇིག་རྟེན་སྟོངས་སོ། །དེ་
བཞིན་གཤེགས་པ་ནི་རིང་པོ་མ་ལོན་པར་ཡོངས་སུ་མྱ་ངན་ལས་འདའོ་ཞེས་སྨྲའོ། །དེའི་ཚེ་བྱང་ཆུབ་སེམས་དཔའ་ལུས་དཔག་ཏུ་མེད་པ་བྱང་ཆུབ་སེམས་དཔའི་འཁོར་ཚད་མེད་པ་སྙེད་ཀྱིས་བསྐོར་ཏེ། དེ་ལྟ་བུའི་རྫུ་
འཕྲུལ་མངོན་པར་བསྟན་ནས་མཆོད་པའི་ཡོ་བྱད་ཚད་མེད་པ་རྣམ་པ་སྣ་ཚོགས་དང་། ཞལ་ཟས་བསུང་ཅན་ཐོགས་ཏེ། གང་ཞིག་ལ་ཞལ་ཟས་དེའི་བསུང་གིས་རེག་ན་ཀུན་ནས་ཉོན་མོངས་པའི་དྲི་མ་ཐམས་ཅད་ཞི་བར་
འགྱུར་རོ། །བྱང་ཆུབ་སེམས་དཔའ་དེའི་བྱིན་གྱི་བརླབས་ཀྱིས་འཁོར་གྱི་དཀྱིལ་འཁོར་ཐམས་ཅད་རྫུ་འཕྲུལ་དེ་དག་མཐོང་བར་གྱུར་ཏོ། །བྱང་ཆུབ་སེམས་དཔའ་ལུས་དཔག་ཏུ་མེད་པ་ནི་ལུས་ཆེན་པོ་དཔག་ཏུ་མེད་དེ་དེ་ནམ་མཁའ་
དང་མཉམ་པས་སངས་རྒྱས་བཅོམ་ལྡན་འདས་མ་གཏོགས་པར་གཞན་གང་གིས་ཀྱང་བྱང་ཆུབ་སེམས་དཔའ་དེའི་ལུས་ཀྱི་མཐའ་ཤེས་པར་ནུས་པ་མེད་དོ། །དེའི་ཚེ་བྱང་ཆུབ་སེམས་དཔའ་ལུས་དཔག་ཏུ་མེད་པ་འཁོར་དང་བཅས་པས་མཆོད་པའི་

47-1-20a

ཡོ་བྱད་སྔ་མ་བས་ལྷག་པར་བཤམས་ནས་སངས་རྒྱས་གང་ན་བར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། ཐལ་མོ་སྦྱར་སྟི་སྟང་དང་བཅས་ནས་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་འདི་དག་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་བར་བཞེས་སུ་མ་གནང་ནས་བྱང་ཆུབ་སེམས་དཔའ་
ལུས་དཔག་ཏུ་མེད་པ་འཁོར་དང་བཅས་པ་ཕྱོགས་གཅིག་ཏུ་འཁོད་དོ། །དེ་བཞིན་དུ་ལྷོ་དང་ནུབ་དང་བྱང་ཕྱོགས་ཀྱི་སངས་རྒྱས་ཀྱི་ཞིང་ཀུན་ནས་བྱང་ཆུབ་སེམས་དཔའ་ལུས་དཔག་ཏུ་མེད་པ་གྲངས་མེད་པ་སྙེད་ཀྱང་མཆོད་པའི་ཡོ་བྱད་སྔ་མ་བས་
ལྷག་པར་བཤམས་ནས་སངས་རྒྱས་གང་ན་བར་ལྷགས་པ་ནས་ཕྱོགས་གཅིག་ཏུ་འཁོད་པའི་བར་དུ་རྒྱས་པར་རིག་པར་བྱའོ། །དེའི་ཚེ་ཤིང་སཱ་ལའི་དྲུང་གཉིས་ཀྱི་བར་བསོད་ནམས་ཀྱི་ས་གཞི་བཀྲ་ཤིས་ཀྱི་གནས་དེར་ཁོ་ར་ཁོར་ཡུག་ཏུ་དཔག་ཚད་སུམ་བཅུ་
རྩ་གཉིས་ཀྱི་བར་འཁོར་གྱི་དཀྱིལ་འཁོར་གྱིས་ས་སྟོང་ཅུང་ཟད་ཀྱང་མེད་པར་ཡོངས་སུ་གང་ངོ་། །དེའི་ཚེ་ཕྱོགས་བཞི་ནས་འདུས་པའི་བྱང་ཆུབ་སེམས་དཔའ་འཁོར་དང་བཅས་ཏེ། འདུག་པའི་གནས་ནི་སྨྱུང་གི་རྩེ་མོ་འམ། ཁབ་ཀྱི་རྩེ་མོ་ཙམ་
འམ། རྡུལ་ཕྲ་མོ་ཙམ་མོ། །ཕྱོགས་བཅུའི་འཇིག་རྟེན་གྱི་ཁམས་རྡུལ་ཕྲ་རབ་སྙེད་ཀྱི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ཐམས་ཅད་ཀྱང་འདུས་པར་གྱུར། འཛམ་བུའི་གླིང་ན་གནས་པའི་འཁོར་ཐམས་ཅད་ཀྱང་འདུས་པར་གྱུར་ཏེ། དེ་ལ་
གཉིས་མ་གཏོགས་པ་ནི་འོད་སྲུང་ཆེན་པོ་དང་དགའ་བོའོ། །རྒྱལ་པོ་མ་སྐྱེས་དགྲ་འཁོར་དང་བཅས་པ་དང་། སྦྲུལ་གདུག་པ་བལྟས་པ་ཙམ་གྱིས་འཆི་བར་བྱེད་པ་དང་། སྦུར་བ་དང་། ཟ་གདུག་དང་། སྡིག་པའི་བར་དུ་སྡིག་པ་ཅན་གྱི་ལས་སྤྱོད་པ་རྣམ་པ་བཅུ་དྲུག་པོ་
མ་གཏོགས་པར་གཞན་ཐམས་ཅད་འདུས་པར་གྱུར་ཏོ། །སྲིན་པོ་ད་ན་བ་དང་། ལྷ་མ་ཡིན་ལ་སོགས་པ་ཐམས་ཅད་ཀྱིས་སྡིག་པའི་བསམ་པ་བཏང་ནས་གཅིག་ལ་གཅིག་བྱམས་ཤིང་སྡུག་པའི་སེམས་བསྐྱེད་པ་ནི་ཕ་འམ། མ་འམ། ཕུ་ནུ་ལྟ་བུར་གྱུར་ཏོ། །

47-1-20b

སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གནས་པའི་སེམས་ཅན་ཐམས་ཅད་ཀྱང་གཅིག་ལ་གཅིག་བྱམས་པའི་སེམས་བསྐྱེད་དེ་གཅིག་མ་གཏོགས་པ་ནི་ལོག་སྲེད་ཅན་ནོ། །དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་
རྟེན་གྱི་ཁམས་ཀྱང་སངས་རྒྱས་ཀྱི་བྱིན་གྱི་བརླབས་ཀྱིས་ས་གཞི་ཐམས་ཅད་ཀྱང་འཇམ་པར་གྱུར་ཏེ་ངམ་གྲོག་དང་། བྱེ་མ་དང་། གསེག་མ་དང་། རྡོ་བ་དང་། ཤིང་ཚེར་མ་ཅན་དང་། རྩྭ་གདུག་པ་ཡང་མེད་པར་གྱུར་ཏེ་རིན་པོ་ཆེ་རྣམ་པ་སྣ་ཚོགས་ཀྱིས་
ཤིན་དུ་རྒྱས་པ་ནི་ནུབ་ཕྱོགས་ཀྱི་སངས་རྒྱས་ཚེ་དཔག་ཏུ་མེད་པའི་འཇིག་རྟེན་གྱི་ཁམས་བདེ་བ་ཅན་དང་འདྲ་བར་གྱུར་ཏོ། །དེའི་ཚེ་འཁོར་གྱི་དཀྱིལ་འཁོར་མང་པོ་ཐམས་ཅད་ཀྱིས་ཕྱོགས་བཅུའི་འཇིག་རྟེན་གྱི་ཁམས་རྡུལ་ཕྲ་མོ་སྙེད་ཤིན་
ཏུ་སྣང་བ་ནི་ཇི་ལྟར་མེ་ལོང་གསལ་བའི་ནང་ན་བདག་གི་གཟུགས་བརྙན་སྣང་བ་བཞིན་ནོ། །དེ་ནས་དེ་བཞིན་གཤེགས་པའི་ཞལ་གྱི་སྒོ་ནས་འོད་རྣམ་པ་ལྔ་བྱུང་སྟེ་འཁོར་གྱི་དཀྱིལ་འཁོར་མང་པོ་སྣང་བར་བྱས་ནས་དེ་དག་གི་ལུས་ཀྱི་འོད་ཟེར་མི་
མངོན་པར་ཟིལ་གྱིས་མནན་ཏེ་བྱ་བ་བྱས་ནས་ཕྱིར་ཞལ་གྱི་སྒོར་ཞུགས་སོ། །དེའི་ཚེ་ལྷ་དང་མི་དང་། ལྷ་མ་ཡིན་ལ་སོགས་པ་འཁོར་རྣམས་ཀྱིས་སངས་རྒྱས་ཀྱི་འོད་ཟེར་ཞལ་གྱི་སྒོར་ཞུགས་པ་མཐོང་ནས་ཐམས་ཅད་འཇིགས་སྐྲག་སྟེ་
ལུས་ཀྱི་བ་སྤུ་ཀུན་ཀྱང་ལངས་ནས་གཅིག་ལ་གཅིག་འདི་སྐད་དུ་དེ་བཞིན་གཤེགས་པས་འོད་ཟེར་བཀྱེ་ནས་སླར་ཞུགས་པ་འདི་ནི་རྒྱུ་མེད་པ་འམ། རྐྱེན་མེད་པ་མ་ཡིན་ཏེ། ཕྱོགས་བཅུར་མཛད་པ་ཀུན་མཛད་ནས་ཐ་མ་ཡོངས་སུ་མྱ་ངན་ལས་འདའ་བ་
འི་ལྟས་ཡིན་དུ་ངེས་སོ། །ཀྱི་ཧུད་ཀྱི་ཧུད་དེ་བཞིན་གཤེགས་པས་ཚད་མེད་པ་བཞིའི་ཐུགས་བཏང་ནས་ལྷ་དང་མི་རྣམས་ཀྱི་མཆོད་པ་ཡང་བཞེས་སུ་མ་གནང་ངོ་། །དེང་སླན་ཆད་ནི་ཡེ་ཤེས་ཀྱི་ཉི་མ་ཡང་ནུབ་པར་གྱུར། བླ་ན་མེད་པའི་ཆོས་ཀྱི་གྲུ་ཡང་བྱིང་
བར་གྱུར་ཏོ། །ཀྱི་ཧུད་རེ་སྡུག་འཇིག་རྟེན་སྡུག་བསྔལ་ཆེན་པོས་གདུངས་པར་གྱུར་ཏོ་ཞེས་སྨྲས་ནས་བྲང་ལ་ཁུ་ཚུར་གྱིས་རྡེག་ཅིང་ཆོ་ངེས་འདོན་པས་ལུས་ཀྱིས་མི་བཟོད་པ་ཙམ་དུ་ཤིན་ཏུ་འདར་ཏེ་བ་སྤུའི་ཁུང་བུ་ནས་ཁྲག་ཀྱང་ཟག་པར་གྱུར་ཏོ། །དེའི་ཚེ་

47-1-21a

འཁོར་གྱི་དཀྱིལ་འཁོར་དེ་ན་གྲོང་ཁྱེར་རྩྭ་མཆོག་གི་ཤིང་མཁན་གྱི་བུ་དགེ་བསྙེན་ཙུན་ད་ཞེས་བྱ་བ་རིས་མཐུན་པའི་འཁོར་ལྔ་བཅུ་དང་ལྷན་ཅིག་ཏུ་འདུས་སོ། །དེས་འཇིག་རྟེན་དུ་བཅས་པ་དག་དགེ་བའི་འབྲས་བུ་ཐོབ་པར་བྱ་བའི་ཕྱིར་སྔོན་
གྱི་ཚུལ་བཏང་ནས་འདུག་པ་ལས་ལངས་ཏེ། བླ་གོས་ཕྱོགས་གཅིག་ཏུ་བྱས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་མཆི་མ་བླགས་ཏེ། སངས་རྒྱས་ཀྱི་ཞབས་ལ་སྤྱི་བོས་
ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་བདག་ཅག་གིས་མཆོད་པ་ཐ་མ་འདི་བཞེས་སུ་གསོལ། དེ་ཡང་སེམས་ཅན་དཔག་ཏུ་མ་མཆིས་པ་དག་
བསྒྲལ་བའི་སླད་དུའོ། །བཅོམ་ལྡན་འདས་བདག་ཅག་དེང་སླན་ཆད་མགོན་མ་མཆིས། སྐྱབས་མ་མཆིས། དཔུང་གཉེན་མ་མཆིས་རྟེན་མ་མཆིས། གནས་མ་མཆིས་ཏེ། ཤིན་དུ་ཕོངས་པས་དེ་བཞིན་གཤེགས་པ་ལ་སླད་མ་མ་
མཆིས་པའི་དུས་ཀྱི་ཚོགས་ཙམ་ཞིག་གསོལ་ལོ། །བཅོམ་ལྡན་འདས་ཐུགས་བརྩེ་བའི་སླད་དུ་བདག་ཅག་གི་མཆོད་པ་ཐ་མ་འདི་བཞེས་ནས་གདོད་ཡོངས་སུ་མྱ་ངན་ལས་འདའ་བར་གཤེགས་སུ་གསོལ། བཅོམ་ལྡན་འདས་དཔེར་ན་རྒྱལ་
རིགས་སམ། བྲམ་ཟེ་འམ། གདོལ་པ་ཡང་རུང་དབུལ་ཕོངས་པས་ཡུལ་གཞན་དུ་མཆིས་ཏེ་ཞིང་གི་ལས་ལ་ཞུགས་ནས་རྨོན་པ་དུལ་བ་དང་། ཞིང་ཡང་གཤིན་ལ་ས་གཞི་ཡང་མཉམ་པ་དང་། གསེག་མ་དང་ཞིང་གི་ངོ་ཡུར་མ་མཆིས་ན་དགུང་
ཆར་འབའ་ཞིག་ལ་རེའོ། །བཅོམ་ལྡན་འདས་རྨོན་པ་དུལ་བ་ཞེས་བགྱི་བ་ནི་ལུས་དང་ངག་གི་ལས་བདུན་པོའི་དཔེའོ། །ཞིང་གཤིན་ལ་ས་གཞི་མཉམ་པ་ཞེས་བགྱི་བ་ནི་ཤེས་རབ་ཀྱི་དཔེའོ། །གསེག་མ་དང་ཞིང་གི་ངོ་ཡུར་མ་མཆིས་པ་ནི་
ཉོན་མོངས་པའི་དཔེའོ། །བཅོམ་ལྡན་འདས་བདག་ཅག་ལ་ཡང་རྨོན་པ་དུལ་བ་དང་། ཞིང་གཤིན་པ་ཡང་མཆིས་ལ་ཞིང་གི་ངོ་ཡུར་མ་བསྩལ་ན་དེ་བཞིན་གཤེགས་པའི་བདུད་རྩིའི་ཆར་འབའ་ཤིག་ལ་རེའོ། །རིགས་དབུལ་པོ་བཞི་ནི་བདག་ལགས་ཏེ། 

47-1-21b

བདག་ནི་བླ་ན་མེད་པ་ཡང་དག་པར་རྫོགས་པའི་ཆོས་ཀྱི་རིན་པོ་ཆེས་དབུལ་ཏེ་ཕོངས་ཐུགས་བརྩེ་བའི་སླད་དུ་བདག་ཅག་གི་དབུལ་ཕོངས་པའི་སྡུག་བསྔལ་བསལ་ཞིང་སྡུག་བསྔལ་གྱིས་ཡོངས་སུ་གདུངས་པའི་སེམས་ཅན་ཚད་མ་
མཆིས་པ་བསྒྲལ་དུ་གསོལ། བདག་ཅག་གི་མཆོད་པ་འདི་ཤིན་ཏུ་ཆུང་མོད་ཀྱི་འོན་ཀྱང་དེ་བཞིན་གཤེགས་པའི་འཁོར་མང་པོ་ཀུན་གྱི་བསོད་སྙོམས་སུ་འཚལ་ན་བཅོམ་ལྡན་འདས་བདག་ཅག་ལ་མགོན་མ་མཆིས། སྐྱབས་མ་མཆིས། 
དཔུང་གཉེན་མ་མཆིས། སྒྲ་གཅན་འཛིན་ལྟ་བུར་ཐུགས་བརྩེ་བར་དགོངས་སུ་གསོལ། དེ་ནས་བཅོམ་ལྡན་འདས་ཐམས་ཅད་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་བསྒྱུར་བས་ཙུན་ད་ལ་འདི་སྐད་ཅེས་བཀའ་སྩལ་ཏོ། །ལེགས་སོ་
ལེགས་སོ། །ངས་ཁྱོད་ཀྱི་དབུལ་ཕོངས་པ་མེད་པ་དང་བླ་ན་མེད་པའི་ཆོས་ཀྱི་ཆར་ལུས་ལ་དབབ་ཅིང་ཆོས་ཀྱི་མྱུ་གུ་སྐྱེ་བར་བྱའོ། །ཁྱོད་ནི་ད་ལྟར་ཚེ་དང་། མདོག་དང་། སྟོབས་དང་། བདེ་བ་དང་། ཐོགས་པ་མེད་པའི་སོ་སོར་ཡང་དག་པར་ཤེས་པ་ཐོབ་པར་
འདོད་དེ། ངས་ཁྱོད་ལ་ཚེ་དང་། མདོག་དང་། སྟོབས་དང་། བདེ་བ་དང་ཐོགས་པ་མེད་པའི་སོ་སོར་ཡང་དག་པར་ཤེས་པ་རྟག་ཏུ་སྦྱིན་ནོ། །དེ་ཅིའི་ཕྱིར་ཞེ་ན། ཙུན་ད་ཟས་ཀྱི་སྦྱིན་པ་བྱིན་པས་ཁྱད་པར་མེད་པའི་འབྲས་བུ་རྣམ་པ་གཉིས་ཐོབ་པར་འགྱུར་
རོ། །གཉིས་གང་ཞེ་ན། བཞེས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པ་དང་། བཞེས་ནས་ཡོངས་སུ་མྱ་ངན་ལས་འདའ་བར་འགྱུར་བའོ། །ངས་ཀྱང་ཁྱོད་ཀྱི་མཆོད་པ་ནང་གི་ཐ་མ་འདི་བཞེས་པས་ཁྱོད་ཀྱི་སྦྱིན་པའི་ཕ་
རོལ་ཏུ་ཕྱིན་པ་ཡོངས་སུ་རྫོགས་པར་གྱུར་ཏོ། །དེ་ནས་ཙུན་དས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར་ན་སྦྱིན་པ་བྱིན་པ་འབྲས་བུ་རྣམ་པ་གཉིས་ཁྱད་པར་མ་མཆིས་སོ་ཞེས་བགྱི་བ་དེ་མ་
ལགས་སོ། །དེ་ཅིའི་སླད་དུ་ཞེ་ན། སྔར་སྦྱིན་པ་བཞེས་པ་ནི་ཉོན་མོངས་པ་ཡང་མང་བས་ཐམས་ཅད་མཁྱེན་པའི་ཡེ་ཤེས་ཀྱང་རྫོགས་པར་མ་གྱུར། སེམས་ཅན་གྱི་སྦྱིན་པའི་ཕ་རོལ་ཏུ་ཕྱིན་པ་རྫོགས་པར་བགྱིད་པའང་མ་ལགས་སོ། །སྦྱིན་པ་བྱིན་པ་

47-1-22a

སླད་ཀྱིས་བཞེས་པ་ནི་ཉོན་མོངས་པ་ཡང་བས་པར་གྱུར་ལ་ཐམས་ཅད་མཁྱེན་པའི་ཡེ་ཤེས་ཀྱང་ཡོངས་སུ་རྫོགས་ཤིང་སེམས་ཅན་གྱི་སྦྱིན་པའི་ཕ་རོལ་ཏུ་ཕྱིན་པ་ཡང་ཡོངས་སུ་རྫོགས་པར་བགྱིད་པ་ལགས་སོ། །སྦྱིན་པ་སྔ་མར་མ་བླངས་
པ་ནི་སེམས་ཅན་ནོ། །སྦྱིན་པ་ཕྱིས་བཞེས་པ་ནི་ལྷའི་ལྷའོ། །སྦྱིན་པ་སྔར་བླངས་པ་ནི་ཟས་དང་འདྲེས་པའི་ལུས། ཉོན་མོངས་པ་དང་བཅས་པའི་ལུས། ཐ་བ་ཅན་གྱི་ལུས། མི་རྟག་པའི་ལུས་སོ། །སྦྱིན་པ་ཕྱིས་བཞེས་པ་ནི་ཉོན་མོངས་པ་མ་མཆིས་
པའི་སྐུ་རྡོ་རྗེ་ལྟ་བུའི་སྐུ་ཆོས་ཀྱི་སྐུ། རྟག་པའི་སྐུ། མཐའ་ཡས་པའི་སྐུ་ལགས་ན་ཅིའི་སླད་དུ་སྦྱིན་པ་རྣམ་པ་གཉིས་ཀྱི་འབྲས་བུ་ཁྱད་པར་མ་མཆིས་ཤེས་གསུངས། སྔར་སྦྱིན་པ་བླངས་པ་ནི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་
པར་མི་འགྱུར་བ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་ཡོངས་སུ་རྫོགས་པར་མི་འགྱུར་ཏེ། ཤའི་མིག་འབའ་ཞིག་ཐོབ་ཀྱི་སངས་རྒྱས་ཀྱི་སྤྱན་མི་ཐོབ་པ་ནས་ཤེས་རབ་ཀྱི་སྤྱན་གྱི་བར་དུ་ཐོབ་པ་མ་ལགས་སོ། །སྦྱིན་པ་ཕྱིས་བཞེས་པ་
ནི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་ཡོངས་སུ་རྫོགས་ལ་སངས་རྒྱས་ཀྱི་སྤྱན་དང་ལྡན་པ་ནས་ཤེས་རབ་ཀྱི་སྤྱན་གྱི་བར་དུ་ལྡན་པ་ལགས་ན་ཅིའི་སླད་དུ་སྦྱིན་པ་རྣམ་པ་གཉིས་ཀྱི་འབྲས་
བུ་ཁྱད་པར་མ་མཆིས་ཤེས་གསུངས། བཅོམ་ལྡན་འདས་སྦྱིན་པ་སྔར་བླངས་པ་ནི་བླངས་མ་ཐག་ཏུ་འཚལ་ནས་དེ་མ་ཐག་ཏུ་ཞུ་བས་ཚེ་དང་མདོག་དང་། སྟོབས་དང་བདེ་བ་དང་། སོ་སོ་ཡང་དག་པར་རིག་པ་ཐོབ་པ་ལགས་སོ། །སྦྱིན་པ་ཕྱིས་
བཞེས་པ་ནི་གསོལ་བ་དང་ཞུ་བ་ཡང་མ་མཆིས་ལ་འབྲས་བུ་རྣམ་པ་ལྔ་པོ་ཡང་མ་མཆིས་ན་ཅིའི་སླད་དུ་སྦྱིན་པ་རྣམ་པ་གཉིས་ཀྱི་འབྲས་བུ་ཁྱད་པར་མ་མཆིས་ཤེས་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་
ཀྱི་བུ་དེ་བཞིན་གཤེགས་པ་ནི་བསྐལ་པ་ཚད་མེད། མཐའ་ཡས་གྲངས་མེད་པའི་བར་དུ་ཟས་སམ་ཉོན་མོངས་པ་དང་བཅས་པའི་སྐུ་མ་ཡིན། ནང་གི་ཐ་མའི་སྐུ་མ་ཡིན་ཏེ། རྟག་པའི་སྐུ། ཆོས་ཀྱི་སྐུ། རྡོ་རྗེའི་སྐུའོ། །རིགས་ཀྱི་བུ་སངས་

47-1-22b

རྒྱས་ཀྱི་རང་བཞིན་མ་མཐོང་བ་ནི་ཉོན་མོངས་པའི་ལུས། ཟས་དང་བཅས་པའི་ལུས་ནང་གི་ཐ་མའི་ལུས་སོ། །བྱང་ཆུབ་སེམས་དཔའ་དེའི་ཚེ་བསོད་སྙོམས་བཞེས་ནས་རྡོ་རྗེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ་བསོད་
སྙོམས་ཞུ་མ་ཐག་ཏུ་སངས་རྒྱས་ཀྱི་རང་བཞིན་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། དེ་བས་ན་སྦྱིན་པ་གཉིས་ཀྱི་འབྲས་བུ་ཁྱད་པར་མེད་དོ་ཞེས་ངས་གསུངས་སོ། །
བྱང་ཆུབ་སེམས་དཔའ་ཐོག་མ་ཡང་བདུད་བཞི་བཅོམ་ལ། ང་མྱ་ངན་ལས་འདའ་ཀར་ཡང་བདུད་རྣམ་བཞི་བཅོམ་པས་དེ་བས་ན་སྦྱིན་པ་རྣམ་པ་གཉིས་ཀྱི་འབྲས་བུ་ཁྱད་པར་མེད་དོ་ཞེས་ངས་གསུངས་སོ། །བྱང་ཆུབ་སེམས་དཔའ་
དེའི་ཚེ་ན་མདོ་སྡེ་བཅུ་གཉིས་རྒྱས་པར་མ་གསུངས་མོད་ཀྱི། ཐམས་ཅད་སྔར་ཐུགས་སུ་ཆུད་ལ་ང་མྱ་ངན་ལས་འདའ་ཀར་སེམས་ཅན་རྣམས་ལ་རྒྱས་པར་ཕྱེ་ཞིང་བསྟན་པས་དེ་བས་ན་སྦྱིན་པ་རྣམ་པ་གཉིས་ལ་ཁྱད་པར་མེད་དོ། །
རིགས་ཀྱི་བུ་དེ་བཞིན་གཤེགས་པའི་སྐུ་ནི་བསྐལ་པ་ཚད་མེད་གྲངས་མེད་པའི་བར་དུ་བསོད་སྙོམས་མི་གསོལ་མོད་ཀྱི་ཉན་ཐོས་རྣམས་ལ་འདི་སྐད་ཅེས་གསུངས་ཏེ། སྔོན་དེ་བཞིན་གཤེགས་པས་གནག་རྫི་མོ་ནན་ཏ་དང་། 
ནན་ཏ་པ་ལ་གཉིས་ཀྱིས་འོ་མའི་འཇམས་ཕུལ་བ་བཞེས་ནས་གདོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །ད་ནི་ཡང་དག་པར་བཤོས་མི་གསོལ་ཏེ། འཁོར་གྱི་དཀྱིལ་
འཁོར་མང་པོ་འདི་དག་གི་ཕྱིར་ཁྱོད་ཀྱི་མཆོད་པ་ཐ་མ་འདི་བཞེས་མོད་ཀྱི། ཡང་དག་པར་ན་གསོལ་བ་མེད་དོ། །དེའི་ཚེ་ན་འཁོར་གྱི་དཀྱིལ་འཁོར་དེ་རྣམས་བཅོམ་ལྡན་འདས་ཀྱིས་ཙུན་དའི་མཆོད་པ་བཞེས་པ་མཐོང་ནས་ཐམས་
ཅད་དགའ་མགུ་རངས་ཏེ་སྐད་མཐུན་པས་ཙུན་ད་ལ་ལེགས་སོ། །ཤིན་ཏུ་ལེགས་སོ་ཞེས་སྨྲས་ཏེ། ཁྱོད་ཀྱི་མིང་བཏགས་པ་ཐོག་ཏུ་བབ་བོ། །ཙུན་ད་ཞེས་བྱ་བ་ནི་དོན་དམ་པ་ལ་མཁས་པ་སྟེ། ཁྱོད་ཀྱིས་ཀྱང་དེང་འདིར་དོན་ཆེན་པོ་བརྩམས་པས་དེ་བས་ན་དོན་

47-1-23a

ལས་མིང་ཙུན་ད་ཞེས་བཏགས་ཏེ། ཁྱོད་ཀྱིས་ནི་ཚེ་འདི་ཉིད་ལ་གྲགས་པ་དང་ཕན་པའི་དོན་ཆེན་པོ་ཐོབ་ཅིང་སྨོན་པ་ཡང་ཡོངས་སུ་རྫོགས་པར་གྱུར་ཏེ། ངོ་མཚར་ཆེའོ། །ཙུན་ད་མིའི་ནང་དུ་སྐྱེས་ཀྱང་བླ་ན་མེད་པའི་བདེ་བ་ཤིན་དུ་
རྙེད་དཀའ་བ་ཐོབ་བོ། །ལེགས་སོ། །ཙུན་ད་མེ་ཏོག་ཨུ་དུམ་བ་ར་ལྟར་འཇིག་རྟེན་ན་ཤིན་ཏུ་དཀོན་པ་སྟེ། སངས་རྒྱས་འཇིག་རྟེན་དུ་གཤེགས་པ་ཡང་ཤིན་དུ་རྙེད་དཀའ་ལ། སངས་རྒྱས་དང་ཕྲད་ནས་དད་པ་སྐྱེད་པ་ཡང་ཤིན་དུ་
དཀའ། ཆོས་ཐོས་པ་ཡང་ཤིན་དུ་དཀའ། སངས་རྒྱས་ཡོངས་སུ་མྱ་ངན་ལས་འདའ་ཀར་མཆོད་པ་བཤམས་ཏེ་འབུལ་བ་ཡང་ཤིན་ཏུ་དཀའོ། །ཙུན་ད་ལ་ཕྱག་འཚལ་ལོ། །ཙུན་ད་ལ་ཕྱག་འཚལ་ལོ། །ཁྱོད་ནི་སྦྱིན་པའི་ཕ་རོལ་ཏུ་
ཕྱིན་པ་ཡོངས་སུ་རྫོགས་ཏེ། སྟོན་གྱི་ཚེས་བཅྭ་ལྔའི་ཟླ་བ་ལྟར་རྒྱས་ཤིང་ཡོངས་སུ་དག་ལ། སྤྲིན་ནམ་ན་བུན་གྱིས་མ་ཆོད་ན་ཐམས་ཅད་ཀྱིས་བལྟ་བ་དང་འདྲ་བར་ཁྱོད་ཀྱང་དེ་དང་འདྲ་བར་བདག་ཅག་ལ་སོགས་པས་ཤིན་ཏུ་བལྟ་
བར་གྱུར་ཏོ། །ཁྱོད་ཀྱི་མཆོད་པ་ནང་གི་ཐ་མ་བཞེས་པས་ཁྱོད་ཀྱི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་ཏེ། ཙུན་ད་ཁྱོད་ལ་ཕྱག་འཚལ་ལོ། །དེ་བས་ན་ཁྱོད་ནི་ཟླ་བ་ཡོངས་སུ་རྒྱས་པ་དང་འདྲ་སྟེ། སེམས་ཅན་
གང་ཡང་མི་ལྟ་བ་མེད་དོ། །ཙུན་ད་ཁྱོད་ལ་ཕྱག་འཚལ་ལོ། །མིའི་ལུས་ཐོབ་ནས་ཀྱང་སེམས་ནི་སངས་རྒྱས་ཀྱི་ཐུགས་དང་འདྲ་བས་ཙུན་ད་ཁྱོད་ནི་སངས་རྒྱས་ཀྱི་སྲས་ཡང་དག་པ་སྟེ། སྒྲ་གཅན་འཛིན་དང་ཐ་མི་དད་དོ། །དེ་ནས་འཁོར་
གྱི་དཀྱིལ་འཁོར་དེ་རྣམས་ཀྱིས་ཚིགས་སུ་བཅད་དེ་སྨྲས་པ། མི་ཡི་ནང་ན་ཁྱོད་སྐྱེས་པ། །དྲུག་པོ་ལྷ་ལས་ཤིན་ཏུ་འཕགས། །བདག་ཅག་འཁོར་རྣམས་ཐམས་ཅད་ཀྱིས། །ཁྱོད་ལ་ཕྱག་འཚལ་གསོལ་བ་འདེབས། །མི་ཡི་སྐྱེས་བུ་ཁྱུ་མཆོག་ནི། །
ཡོངས་སུ་མྱ་ངན་འདའ་ཞེས་གསུངས། །བདག་ཅག་རྣམས་ལ་སྙིང་བརྩེའི་ཕྱིར། །སངས་རྒྱས་བཞུགས་པར་གསོལ་བ་ཐོབ། །ཡུན་དུ་འཇིག་རྟེན་འདིར་བཞུགས་ཤིང་། །ཚད་མེད་འཁོར་ལ་ཕན་པའི་ཕྱིར། །མཁས་པ་རྣམས་ཀྱིས་བསྔགས་པ་ཡི། །བླ་

47-1-23b

མེད་ཆོས་མཆོག་བཤད་དུ་གསོལ། །ཁྱོད་ཀྱིས་གསོལ་བ་མ་བཏབ་ན། །བདག་ཅག་མི་རྣམས་མི་འཚོའོ། །དེ་བས་ཁྱོད་ནི་གསོལ་བ་ཐོབ། །ཁ་ལོ་སྒྱུར་བའི་སྟོན་པ་ལ་དེའི་ཚེ་ཙུན་ད་ཤིན་ཏུ་དགའ་མགུ་རངས་པ་ནི་དཔེར་ན་མི་
ཞིག་ཕ་མ་ཤི་བ་ལས་ཕྱིར་སོས་པ་ཙམ་དུ་ཙུན་ད་ཡང་ཤིན་དུ་དགའ་བར་གྱུར་ནས་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ཏེ་ཚིགས་སུ་བཅད་པ་འདི་སྐད་ཅེས་གསོལ་ཏོ། །ལེགས་སོ་བདེ་བའི་དོན་དུ་གྱུར། །མི་ཡི་ལུས་ཀྱང་
ལེགས་པར་ཐོབ། །འདོད་ཆགས་ཞེ་སྡང་གཏི་མུག་བསལ། །ངན་སོང་གསུམ་ཡང་ཡོངས་སུ་སྤངས། །ལེགས་སོ་བདེ་བའི་དོན་གྱུར་ཏེ། །རིན་ཆེན་གསེར་གྱི་རི་མཐོང་ནས། །སྟོན་པ་ཁ་ལོ་སྒྱུར་དང་མཇལ། །བྱོལ་སོང་ཁམས་
སུ་སྐྱེ་མི་དགོས། །སངས་རྒྱས་ཨུ་དུམ་བ་ར་ལྟར། །ཕྲད་པའི་དུས་ཀྱང་ཤིན་ཏུ་དཀའ། །ཕྲད་ནས་དགེ་བའི་རྩ་བ་བསྐྱེད། །ཡི་དགས་སྡུག་བསྔལ་ཡོངས་སུ་བཅོམ། །གཞན་ཡང་ཡོངས་སུ་བཅོམ་པ་ནི། །ལྷ་མ་ཡིན་གྱི་རིས་རྣམས་ཏེ། །ཁབ་
ཙས་ཡུངས་དཀར་བཟེད་པ་བས། །སངས་རྒྱས་འབྱུང་བ་དེ་བས་དཀའ། །བདག་ནི་སྦྱིན་པ་ཡོངས་རྫོགས་ཏེ། །ལྷ་དང་མི་ཡི་རྒྱུད་ལས་ཐར། །འཇིག་རྟེན་ཆོས་ཀྱིས་མ་གོས་པ། །པད་མོ་ཆུས་མི་ཆགས་བཞིན་ཏེ། །སྲིད་པའི་བར་དུ་ལེགས་
པར་སྤངས། །འཁོར་བའི་རྒྱུན་ལས་ཡོངས་སུ་གྲོལ། །མི་ཡི་ལུས་ཐོབ་ཤིན་དུ་དཀའ། །སངས་རྒྱས་འབྱུང་དང་ཕྲད་པར་དཀའ། །ཇི་ལྟར་རྒྱ་མཚོ་ཆེན་པོའི་ནང་། །རུས་སྦལ་ལོང་བ་འབྱུང་བ་དེ། །ཤིང་གི་བུ་གར་མགོ་ཆུད་བཞིན། །སངས་
རྒྱས་འབྱུང་བ་དེ་བས་དཀའ། །བདག་གིས་མཆོད་པ་གསོལ་བ་འདི། །བླ་མེད་འབྲས་བུ་ཐོབ་པར་སྨོན། །ཀུན་ནས་ཉོན་མོངས་ཐམས་ཅད་ནི། །སྙིང་པོ་མེད་པས་ཐམས་ཅད་བཅོམ། །བདག་ཉིད་ད་ལྟར་འདི་ཉིད་ན། །ལྷ་དང་མི་ཡི་ལུས་མི་རེ། །ཅི་སྟེ་ཐོབ་
པར་གྱུར་ན་ཡང་། །དེ་ལ་དགའ་བ་མོས་པ་མེད། །བཅོམ་ལྡན་བདག་གི་མཆོད་བཞེས་པས། །ཤིན་དུ་དགའ་བ་དཔག་མ་མཆིས། །ཨེ་རན་ཏ་ཡི་མེ་ཏོག་ལས། །ཙན་དན་བཟང་པོའི་དྲི་འབྱུང་བཞིན། །བདག་ནི་ཨེ་རན་འདྲ་བ་སྟེ། །བཅོམ་ལྡན་བདག་

47-1-24a

གི་མཆོད་བཞེས་པས། །ཙན་དན་བཟང་པོའི་བསུང་མངར་བཞིན། །དེ་བས་བདག་ནི་ཤིན་ཏུ་དགའ། །བདག་ནི་འབྲས་བུ་མངོན་དུ་ཐོབ། །བླ་མེད་མཆོག་གི་གནས་ཕྱིན་ཏེ། །ཚངས་པ་བརྒྱ་བྱིན་ལྷ་རྣམས་ཀྱང་། །ལྷགས་
ནས་བདག་ལ་མཆོད་པ་བགྱིད། །འཇིག་རྟེན་བཅས་པ་ཐམས་ཅད་ནི། །སྡུག་བསྔལ་ཆེན་པོ་མྱ་ངན་སྐྱེས། །སངས་རྒྱས་བཅོམ་ལྡན་འདས་བཞུགས་པ། །ཡོངས་སུ་མྱ་ངན་འདའ་ཞེས་རྟོགས། །ཐམས་ཅད་འཐུན་པར་སྐད་
ཆེན་པོས། །འཇིག་རྟེན་ཁ་ལོ་སྒྱུར་བ་མེད། །སེམས་ཅན་ཐམས་ཅད་མི་སྤང་ཞིང་། །སྲས་དང་འདྲ་བར་གཟིགས་སུ་གསོལ། །བཅོམ་ལྡན་དགེ་འདུན་འཁོར་རྣམས་ལ། །བླ་ན་མེད་པའི་ཆོས་སྟོན་པ། །ཇི་ལྟར་རྒྱ་མཚོ་ཆེན་པོའི་
དབུས། །རིན་ཆེན་རི་རབ་སྣང་བ་བཞིན། །བཅོམ་ལྡན་མི་ཤེས་ཡོངས་གཅོད་པ། །མ་རིག་པ་ཡི་མུན་སེལ་ཏེ། །ཇི་ལྟར་ནམ་མཁའ་བར་སྣང་ལ། །སྤྲིན་ཆོད་ཡོངས་སུ་བསིལ་བ་བཞིན། །བཅོམ་ལྡན་ཡོངས་སུ་སེལ་བ་ནི། །
ཀུན་ནས་ཉོན་མོངས་ཐམས་ཅད་དེ། །ཇི་ལྟར་ཉི་མ་ཤར་ནས་སུ། །སྤྲིན་མེད་ཀུན་དུ་སྣང་བ་བཞིན། །ད་ལྟར་སེམས་ཅན་འདི་དག་ནི། །ཤིན་དུ་ངུ་བས་མིག་ཀྱང་སྐྲངས། །ཐམས་ཅད་འཁོར་བར་འཁོར་བ་ཡི། །སྡུག་བསྔལ་འབབ་ཀླུང་
གཡེངས་པར་གྱུར། །དེ་བས་སངས་རྒྱས་བཅོམ་ལྡན་འདས། །འགྲོ་བའི་དད་པ་བསྐྱེད་པ་དང་། །འཁོར་བའི་སྡུག་བསྔལ་གཅད་པའི་ཕྱིར། །འཇིག་རྟེན་ཡུན་དུ་བཞུགས་པར་གསོལ། །བཅོམ་ལྡན་འདས་ཀྱིས་ཙུན་ད་ལ་བཀའ་
སྩལ་པ། དེ་དེ་བཞིན་ཏེ། དེ་དེ་བཞིན་ནོ། །ཁྱོད་ཀྱིས་སྨྲས་པ་བཞིན་ཏེ། སངས་རྒྱས་བཅོམ་ལྡན་འདས་འཇིག་རྟེན་དུ་གཤེགས་པ་ཡང་ཤིན་དུ་དཀའ་བ་ནི་མེ་ཏོག་ཨུ་དུམ་བ་ར་དང་འདྲའོ། །སངས་རྒྱས་དང་ཕྲད་ནས་དད་པ་སྐྱེ་བ་
ཡང་དེ་བས་ཤིན་དུ་དཀའོ། །སངས་རྒྱས་ཡོངས་སུ་མྱ་ངན་ལས་འདའ་ཀར་མཆོད་པ་ཕུལ་བ་བཞེས་ཏེ། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་པ་ཡང་དེ་བས་ཤིན་དུ་དཀའ་སྟེ། ཙུན་ད་ཁྱོད་མྱ་ངན་མ་བྱེད་པར་སྤྲོ་བ་སྐྱེད་ཅིག །དེ་བཞིན་གཤེགས་

47-1-24b

པས་མཆོད་པ་ནང་གི་ཐ་མ་འདི་བཞེས་ཏེ། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་པས་ཆོག་གི་བཅོམ་ལྡན་འདས་ལ་འཇིག་རྟེན་ན་ཡུན་དུ་བཞུགས་པར་གསོལ་བ་མ་འདེབས་ཤིག །ཁྱོད་ཀྱིས་སངས་རྒྱས་རྣམས་ཀྱི་
སྤྱོད་ཡུལ་ཐམས་ཅད་མི་རྟག་ལ་འདུ་བྱེད་རྣམས་ཀྱི་མཚན་ཉིད་ཀྱང་དེའི་ཚུལ་དུ་རིག་པར་གྱིས་ཤིག །དེ་ནས་ཙུན་ད་ལ་ཚིགས་སུ་བཅད་དེ་བཀའ་སྩལ་པ། འཇིག་རྟེན་བཅས་པ་ཐམས་ཅད་ནི། །སྐྱེ་བ་ཡོད་ན་འཆི་བ་ཡོད། །
ཚེ་ལོ་གྲངས་མེད་ཐུབ་པ་ཡང་། །ཐ་མར་ཟད་པར་རིག་པར་བྱ། །དར་བ་ཡོད་ན་རྒུད་པ་ཡོད། །འདུ་བ་ཡོད་ན་འབྲལ་བ་ཡོད། །ལང་ཚོ་དེ་ཡང་མི་རྟག་སྟེ། །དར་བའི་མདོག་ཀྱང་ནད་ཀྱིས་འཕྲོག །འཚོ་བའི་ཚེ་ཡང་འཆི་བས་འཕྲོག །
རྟག་པའི་ཆོས་ནི་གང་ཡང་མེད། །དབང་དུ་གྱུར་པའི་རྒྱལ་པོ་དག །བྱིན་དང་མཐུ་སྟོབས་ཟླ་མེད་ཀྱང་། །ཐམས་ཅད་འགྱུར་ཞིང་འཕོ་བས་ན། །འཚོ་བའི་སྲོག་ཀྱང་དེ་བཞིན་ནོ། །སྡུག་བསྔལ་འཁོར་ལོ་མཐའ་མེད་དེ། །འཁོར་
བར་འཁོར་བ་རྒྱུན་མི་འཆད། །ཁམས་གསུམ་ཐམས་ཅད་རྟག་པ་མེད། །སྲིད་པ་ཐམས་ཅད་བདེ་མ་ཡིན། །སྲིད་པའི་མཚན་ཉིད་དངོས་པོ་ནི། །ཐམས་ཅད་སྟོང་པ་མེད་པ་སྟེ། །འཇིག་པའི་ཆོས་ཅན་འགྱུར་ཞིང་འཕོ། །མྱ་ངན་
སྐྱོན་དང་རྟག་ཏུ་བཅས། །སྐྱོན་མང་འཇིག་པའི་ཆོས་ཅན་ཏེ། །རྒ་དང་ན་འཆིས་རྟག་ཏུ་གཙེས། །སྲིད་པའི་ཆོས་ནི་མཐའ་ཡས་པས། །འགྱུར་ཞིང་འཕོ་བའི་དགྲ་དང་བཅས། །ཉོན་མོངས་ཀུན་དུ་གླགས་པ་ནི། །ཇི་ལྟར་དར་གྱི་
སྲིན་བུ་བཞིན། །དེ་ལ་མཁས་པ་ཤེས་རབ་ཅན། །སུ་ཞིག་དགའ་ཞིང་མོས་པར་བྱེད། །ལུས་འདི་སྡུག་བསྔལ་ཕུང་པོ་སྟེ། །ཐམས་ཅད་མི་གཙང་བཙོག་པའོ། །སྐྱོན་གྱིས་བཅིངས་ཤིང་རྨ་དང་ལྡན། །ཕན་པའི་དོན་ནི་ཡེ་ནས་
མེད། །ཡར་ན་ལྷ་ཡི་ལུས་བར་དུ། །ཐམས་ཅད་དེ་དང་འདྲ་བས་ན། །འདོད་པ་ཐམས་ཅད་མི་རྟག་པས། །ང་ནི་དེ་ལ་ཆགས་མི་བྱེད། །འདོད་སྤངས་ལེགས་པར་ཡིད་བྱས་ན། །ཡང་དག་བདེན་པ་རིག་པར་འགྱུར། །སྲིད་པ་ཡོངས་སུ་གཅོད་པ་ནི། །

47-1-25a

དེང་འདིར་ཡོངས་སུ་མྱ་ངན་འདའ། །ང་ནི་སྲིད་པའི་ཕ་རོལ་ཕྱིན། །སྡུག་བསྔལ་ཀུན་ལས་ཤིན་དུ་འདས། །དེ་བས་ད་ལྟར་ཐོབ་པ་ནི། །བླ་མེད་བདེ་བ་འབའ་ཞིག་གོ། །དེ་ཡི་རྒྱུ་དང་རྐྱེན་ཀྱིས་ན། །སྤྲོས་པ་མེད་པའི་མཐའ་རིག་
སྟེ། །བཅིང་བ་ཐམས་ཅད་ཡོངས་བཅད་ནས། །དེང་འདིར་ཡོངས་སུ་མྱ་ངན་འདའ། །ང་ལ་རྒ་ཤི་ན་བ་མེད། །སྐུ་ཚེའི་ཚད་ཀྱང་ཟད་མི་ཤེས། །དེང་དུ་མྱ་ངན་འདས་པ་ནི། །ཇི་ལྟར་མེ་ཆེན་ཤི་བ་བཞིན། །ཙུན་ད་ཁྱོད་ནི་མ་རྟོག་ཤིག །
དེ་བཞིན་གཤེགས་པའི་དོན་རྣམས་ལ། །དེ་བཞིན་གཤེགས་པའི་སྙིང་པོ་འདི། །རི་རབ་བཞིན་དུ་བརྟག་པར་བྱ། །ང་ནི་མྱ་ངན་འདས་བཞུགས་ཏེ། །མཆོག་གི་བདེ་བ་མྱོང་བར་འགྱུར། །སངས་རྒྱས་རྣམས་ཀྱི་ཆོས་ཉིད་
ཡིན། །དེ་བས་ངུ་བར་མི་བྱའོ། །དེ་ནས་ཙུན་དས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་དེ་བཞིན་ཏེ། དེ་དེ་བཞིན་ནོ། །བཅོམ་ལྡན་འདས་ཀྱིས་གསུངས་པ་བཞིན་ཏེ། བདག་འཚལ་བའི་ཤེས་རབ་ཤིན་དུ་ཆུང་བ་ནི་
དཔེར་ན་སྦྲང་བུ་དང་འདྲ་བ་བདག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་གཤེགས་པའི་དོན་ཟབ་མོ་ག་ལ་རིག །བཅོམ་ལྡན་འདས་བདག་ནི་ཀླུང་ཆེན་པོ་དང་འདྲ་བའི་བྱང་ཆུབ་སེམས་དཔའ་སེམས་
དཔའ་ཆེན་པོ་ཀུན་ནས་ཉོན་མོངས་པ་དང་ཟག་པ་ཐམས་ཅད་བས་པ་འཇམ་དཔལ་གཞོན་ནུར་གྱུར་པ་ལ་སོགས་པ་དང་མཉམ་པར་གྱུར་ཏོ། །བཅོམ་ལྡན་འདས་དཔེར་ན་གསར་བུ་རབ་ཏུ་བྱུང་བ་བསྙེན་པར་མ་རྫོགས་མོད་ཀྱི། 
དགེ་འདུན་གྱི་གྲངས་སུ་མཆི་བ་དང་འདྲ་བར་བདག་ཀྱང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བྱིན་ཀྱི་བརླབས་ཀྱིས་དེ་ལྟར་བྱང་ཆུབ་སེམས་དཔའ་ཆེན་པོ་དེ་དག་གི་གྲངས་སུ་གཏོགས་པར་གྱུར་ཏེ། དེ་བས་ན་
བདག་ནི་དེ་བཞིན་གཤེགས་པ་ཡུན་དུ་འཇིག་རྟེན་ན་བཞུགས་ཤིང་། མྱ་ངན་ལས་མི་འདའ་བར་གསོལ་ལོ། །བཅོམ་ལྡན་འདས་དཔེར་ན་མི་བཀྲེས་པ་དེ་ནི་སླར་སློན་མི་གདའ་བ་སྟེ། བཅོམ་ལྡན་འདས་བདག་ཀྱང་དེ་དང་འདྲ་ན་མྱ་ངན་

47-1-25b

ལས་མི་འདའ་བར་འཇིག་རྟེན་ན་ཡུན་དུ་བཞུགས་པར་གསོལ་ལོ། །དེ་ནས་འཇམ་དཔལ་གཞོན་ནུར་གྱུར་པས་ཙུན་ད་ལ་འདི་སྐད་ཅེས་སྨྲས་སོ། །ཙུན་ད་ཁྱོད་འདི་སྐད་དུ་དེ་བཞིན་གཤེགས་པ་འཇིག་རྟེན་ན་ཡུན་དུ་བཞུགས་ཤིང་ཡོངས་སུ་མྱ་ངན་
ལས་མི་འདའ་བར་གསོལ་བ། ཇི་ལྟར་མི་ཤིན་དུ་བཀྲེས་པ་དེ་སྐྱུག་བྲོ་མི་སྲིད་དོ་ཞེས་དེ་སྐད་མ་ཟེར་ཅིག །ཁྱོད་འདུ་བྱེད་རྣམས་ཀྱི་མཚན་ཉིད་ལ་ཤིན་དུ་རྟོགས་ཤིག །དེ་ལྟར་འདུ་བྱེད་ལ་བརྟགས་ན་སྟོང་པ་ཉིད་ཀྱི་ཏིང་ངེ་འཛིན་དང་ལྡན་པར་
འགྱུར་གྱིས། ཡང་དག་པའི་ཆོས་འདོད་པ་དག་དེ་ལྟ་བུའི་ཚུལ་དུ་བསླབ་པར་བྱའོ། །ཙུན་དས་འཇམ་དཔལ་ལ་སྨྲས་པ། དེ་བཞིན་གཤེགས་པ་ཞེས་བྱ་བ་ནི་ལྷ་དང་མིའི་ནང་ན་མཆོག་ཏུ་གྱུར། ཕུལ་དུ་གྱུར་ན་ཅི་དེ་བཞིན་གཤེགས་པ་
འདུ་བྱེད་ལགས་སམ། ཅི་སྟེ་འདུ་བྱེད་ལགས་ན་སྐྱེ་ཞིང་འགོག་པའི་ཆོས་ཅན་དུ་འགྱུར་ཏེ། དཔེར་ན་ཆུའི་ཆུ་བུར་ལྟར་དེ་མ་ཐག་ཏུ་འབྱུང་ལ། དེ་མ་ཐག་ཏུ་འཇིག་སྟེ། འཁོར་བར་འཁོར་བ་ནི་ཤིང་རྟའི་འཁོར་ལོ་དང་མཚུངས་ཏེ། འདུ་བྱེད་
ཐམས་ཅད་ཀྱང་དེ་དང་མཚུངས་སོ། །བདག་གིས་སྔོན་ཐོས་པ་ལྟར་ན་ལྷ་རྣམས་ཀྱི་ཚེའི་ཚད་ཀྱང་ཤིན་དུ་རིང་ངོ་ཞེས་འབྱུང་ན་ཅིའི་སླད་དུ་བཅོམ་ལྡན་འདས་ལྷའི་ལྷ་སྐུ་ཚེ་རབ་ཏུ་ཐུང་སྟེ། ལོ་བརྒྱར་ཡང་མི་བཞུགས་པར་གྱུར། དཔེར་
ན་དབང་དུ་གྱུར་པའི་གྲོང་རྡལ་གྱི་གཙོ་བོ་ཡང་དབང་དང་མཐུ་ཡོད་པས་ཕས་རྒོལ་བ་ཐུལ་ཏེ། ནམ་བསོད་ནམས་ཟད་ཏེ་དབུལ་ཕོངས་པར་གྱུར་ན་ཀུན་གྱིས་བརྙས་ཤིང་མཐོ་བཙམས་ཏེ་བཀོལ་བར་འགྱུར་རོ། །དེ་ཅིའི་སླད་དུ་ཞེ་ན། བྱིན་དང་
མཐུ་ཉམས་པའི་ཕྱིར་རོ། །འོ་ན་བཅོམ་ལྡན་འདས་ཀྱང་འདུ་བྱེད་རྣམས་དང་འཐུན་པར་འགྱུར་རོ། །ཇི་སྟེ་འདུ་བྱེད་རྣམས་དང་འཐུན་པར་གྱུར་ན་ལྷའི་ལྷ་ཞེས་ཀྱང་གདགས་སུ་མི་རུང་ངོ་། །དེ་ཅིའི་སླད་དུ་ཞེ་ན། འདུ་བྱེད་རྣམས་ནི་སྐྱེ་
ཤིའི་ཆོས་སོ། །དེ་བས་ན་འཇམ་དཔལ་དེ་བཞིན་གཤེགས་པ་ལ་འདུ་བྱེད་དང་འཐུན་པར་མི་བལྟའོ། །འཇམ་དཔལ་མཁྱེན་བཞིན་དུ་གསུང་ངམ་འོན་ཏེ་མི་མཁྱེན་པས་དེ་བཞིན་གཤེགས་པ་འདུ་བྱེད་རྣམས་དང་འཐུན་ནོ་ཞེས་

47-1-26a

གསུངས། ཅི་སྟེ་དེ་བཞིན་གཤེགས་པ་འདུ་བྱེད་རྣམས་དང་འཐུན་ན་ལྟ། དེ་བཞིན་གཤེགས་པ་ནི་འཇིག་རྟེན་གསུམ་ན་ལྷའི་ལྷ་སྟེ། དབང་དུ་གྱུར་པའི་ཆོས་ཀྱི་རྒྱལ་པོ་ཞེས་བདགས་སུ་མི་རུང་ངོ་། །དཔེར་ན་རྒྱལ་པོ་གཅིག་
ལ་གྱད་སྟོབས་པོ་ཆེ་གཅིག་གིས་ཕས་རྒོལ་བ་སྟོང་ཐུབ་སྟེ་གང་གིས་ཀྱང་མི་ཐུབ་ན་དེ་ནི་མི་སྟོང་ཐུབ་པའི་གྱད་ཅེས་བྱ་སྟེ། གྱད་དེ་ལ་ནི་རྒྱལ་པོས་ཀྱང་གནང་ལ་བྱ་དགའ་ཡང་གཞན་པས་ལྷག་པར་སྩལ་ཏོ། །གྱད་དེས་མི་སྟོང་ཐུབ་ཅེས་
བྱ་བ་ཡང་གྱད་དེས་སྟོབས་འབའ་ཞིག་གིས་མི་སྟོང་ཐུབ་པ་མ་ཡིན་གྱི། རྩལ་རྣམ་པ་སྣ་ཚོགས་ཀྱིས་མི་སྟོང་ལས་ཕུལ་དུ་གྱུར་པས་ན་སྟོང་ཐུབ་པའི་གྱད་ཅེས་བཏགས་སོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཉོན་མོངས་པའི་
བདུད་དང་། ཕུང་པོའི་བདུད་དང་། ལྷའི་བུའི་བདུད་དང་། འཆི་བདག་གི་བདུད་ཡོངས་སུ་བཅོམ་པས་དེ་བཞིན་གཤེགས་པ་ནི་ཁམས་གསུམ་ན་ཕུལ་དུ་གྱུར་པའོ་ཞེས་གསུངས་ཏེ། ཇི་ལྟར་གྱད་གཅིག་གིས་མི་སྟོང་ཐུབ་པ་བཞིན་ནོ། །དེ་
བས་ན་དེ་བཞིན་གཤེགས་པ་ཡང་རྣམ་པ་སྣ་ཚོགས་ཀྱི་ཡོན་ཏན་ཚད་མེད་པ་དང་ལྡན་པས་ན་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཤེས་བཏགས་སོ། །འཇམ་དཔལ་རྣམ་པར་རྟོག་པས་དེ་བཞིན་གཤེགས་པ་
ལ་འདུ་བྱེད་རྣམས་དང་འཐུན་ནོ། །ཞེས་རྣམ་པར་རྟོག་པར་མི་རིགས་སོ། །དཔེར་ན་ཁྱིམ་བདག་ཕྱུག་པོ་ཞིག་གི་བུ་ཁྱེའུ་ཞིག་བཙས་ནས་མཚན་མཁན་གྱིས་བལྟས་ཏེ། ཚེ་ཐུང་ངོ་ཞེས་དཔྱད་ན་ཕ་མས་དེ་སྐད་ཅེས་ཐོས་མ་ཐག་ཏུ་རིགས་
འཚོབ་པར་མི་འགྱུར་བར་ཤེས་པས་དེ་ལ་སྡུག་པར་མི་བྱེད་དེ། རྩྭ་ཙམ་གྱི་ཚོང་དུ་འཛིན་ཏོ། །གང་ཚེ་ཐུང་བ་དེ་ལ་ནི་དགེ་སྦྱོང་དང་། བྲམ་ཟེ་ལ་སོགས་པའི་ཁྱེའུ་དང་བུ་མོ་ཆེ་ཆུང་གི་བར་དུ་བཙུན་པར་མི་བྱེད་དོ། །ཅི་སྟེ་དེ་བཞིན་གཤེགས་པ་
འདུ་བྱེད་རྣམས་དང་འཐུན་ན་ལྟ། འཇིག་རྟེན་དུ་བཅས་པ་ལྷ་དང་མི་དང་། སེམས་ཅན་ཐམས་ཅད་ཀྱིས་ཀྱང་བཙུན་པར་མི་བྱེད་དོ། །དེ་བཞིན་གཤེགས་པས་གསུངས་པའི་ཡང་དག་པའི་ཆོས་མི་འགྱུར་མི་འཕོ་བ་ཡང་འཛིན་པ་མེད་པར་འགྱུར་

47-1-26b

རོ། །དེ་བས་ན་འཇམ་དཔལ་དེ་བཞིན་གཤེགས་པ་ལ་འདུ་བྱེད་རྣམས་དང་འཐུན་ནོ་ཞེས་གསུང་བ་མི་རིགས་སོ། །འཇམ་དཔལ་དཔེར་ན་བུད་མེད་དབུལ་མོ་གནས་མེད་པ། རྟེན་མེད་པ། སྐྱབས་མེད་པ་ཞིག་ནད་ཀྱིས་ཀྱང་གཟིར་
ལ། ཟས་དང་སྐོམ་གྱིས་ཀྱང་ཕོངས་ཏེ་འཁྱམས་ཞིང་འགྲོ་བ་གཅིག་གི་ཁྱིམ་དུ་ཕྱིན་ནས་བུ་བཙས་ན། ཁྱིམ་བདག་དེས་འདུག་ཏུ་མི་སྟེར་ཏེ་སྐྲོད་དོ། །བུད་མེད་དེ་བུ་བཙས་ནས་རིང་པོ་མ་ལོན་ཀྱང་བུ་ཕང་དུ་ཐོགས་ཏེ་ཡུལ་གཞན་
དུ་འགྲོ་བ་ལས་ལམ་དུ་རླུང་དང་ཆར་པ་དང་ལྷགས་པས་ཉོན་མོངས་ལ། སྦྲང་བུ་དང་ཤ་སྦྲང་དང་སྦྲུལ་གདུག་པ་དང་ཕྲད་དམ་ལམ་གྱི་བར་ཆུ་ཀླུང་གང་གཱས་ཆོད་ཀྱང་ཆུ་ཀླུང་ཤིན་ཏུ་ཟབ་ཅིང་དྲག་པ་དེ་ལས་བུ་པང་དུ་ཐོགས་ཏེ་འབོག་གོ། །
དེ་ནས་མ་སྨད་གཉིས་ཀ་ཆུའི་ནང་དུ་ནུབ་བོ། །དེ་ལྟར་བུད་མེད་དེ་བུ་ལ་བྱམས་ཤིང་སྡུག་པས་བསམས་པའི་བསོད་ནམས་ཀྱིས་ཤི་མ་ཐག་ཏུ་ཚངས་པའི་ལྷར་སྐྱེས་སོ། །འཇམ་དཔལ་རིགས་ཀྱི་བུ་དག་དམ་པའི་ཆོས་བསྲུང་
བའི་ཕྱིར་དེ་བཞིན་གཤེགས་པ་ལ་འདུ་བྱེད་རྣམས་དང་འཐུན་ནོ་ཞེ་འམ། འདུ་བྱེད་རྣམས་དང་མི་འཐུན་ནོ་ཞེས་བརྗོད་པར་མི་བྱའི་བདག་ནི་གཏི་མུག་གིས་ལྡོངས་པས་ཤེས་རབ་ཀྱི་མིག་མེད་དེ། དེ་བཞིན་གཤེགས་པའི་དམ་པའི་
ཆོས་ནི་བསམ་གྱིས་མི་ཁྱབ་པས་མི་རྟོག་སྟེ། དེ་བས་ན་དེ་བཞིན་གཤེགས་པ་ནི་ངེས་པར་འདུས་བྱས་ཞེའམ། ངེས་པར་འདུས་མ་བྱས་ཞེས་བརྗོད་པར་མི་བྱའོ། །གང་ཡང་དག་པར་ལྟ་བས་ནི་དེ་བཞིན་གཤེགས་པ་ལ་འདུས་
མ་བྱས་པའོ་ཞེས་བརྗོད་པར་མི་བྱའོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་དགེ་བར་འགྱུར་བའི་ཆོས་བསྐྱེད་ཅིང་འགྲོ་བ་མང་པོ་ལ་ཐུགས་བརྩེ་བའི་ཕྱིར་རོ། །ཇི་ལྟར་བུད་མེད་དབུལ་མོ་དེ་ཀླུང་གང་གཱ་ལ་རྒལ་
བ་ན་བུ་སྡུག་པར་བསམས་ཏེ་ལུས་དང་སྲོག་ཀྱང་ཡལ་བར་གྱུར་པ་དང་འདྲ་བར་རིགས་ཀྱི་བུ་ཆོས་བསྲུང་བའི་བྱང་ཆུབ་སེམས་དཔའ་ཡང་དེ་བཞིན་དུ་ལུས་དང་སྲོག་ལ་བབ་ཀྱི་བར་དུ་དེ་བཞིན་གཤེགས་པ་ལ་འདུས་བྱས་དང་

47-1-27a

མཐུན་ཞེ་འམ། དེ་བཞིན་གཤེགས་པ་ལ་འདུས་མ་བྱས་དང་མཐུན་ཞེས་བརྗོད་པར་མི་བྱའོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་གསུམ་པ། དེ་ལྟར་དེ་བཞིན་གཤེགས་པ་འདུས་མ་བྱས་
པ་དང་མཐུན་ནོ་ཞེས་བརྗོད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བ་ནི་ཇི་ལྟར་བུད་མེད་དབུལ་མོ་དེ་ཚངས་པའི་ལྷར་སྐྱེས་པ་བཞིན་ནོ། །དེ་ཅིའི་ཕྱིར་ཞེ་ན། ཆོས་བསྲུང་བའི་ཕྱིར་རོ། །དེ་ལ་ཆོས་བསྲུང་བ་གང་ཞེ་ན། དེ་བཞིན་
གཤེགས་པ་ནི་འདུས་མ་བྱས་པའོ་ཞེས་སྨྲ་བའོ། །རིགས་ཀྱི་བུ་གང་ཟག་དེ་ནི་རྣམ་པར་གྲོལ་བ་ལ་མི་རེ་མོད་གྱི། རྣམ་པར་གྲོལ་བ་རང་ཐོབ་སྟེ། ཇི་ལྟར་བུད་མེད་དབུལ་མོ་དེ་ཚངས་པའི་ལྷར་མི་རེ་མོད་ཀྱི། ཚངས་པའི་ལྷར་རང་སྐྱེས་སོ། །
འཇམ་དཔལ་འདི་ལྟ་སྟེ་དཔེར་ན་མི་ཞིག་ལམ་རིང་པོར་འདྲོན་དུ་སོང་བ་ལས་ལམ་དུ་ངལ་ཆད་དེ་གཞན་གྱི་ཁྱིམ་དུ་ཉལ་ཉལ་བ་ལས་དེའི་ཁྱིམ་མེས་འབར་ཏེ་རབ་ཏུ་འཇིགས་སྐྲག་ནས་དེ་འདི་སྙམ་དུ་བདག་ནི་གདོན་མི་ཟ་བར་འཆིའོ་སྙམ་
བསམས་ནས་ཁྲེལ་ཞིང་ངོ་ཚ་བ་དང་ལྡན་པའི་ཕྱིར་གོས་ཀྱིས་ལུས་དཀྲིས་སོ། །དེར་ཚེ་འཕོས་ནས་སུམ་བཅུ་རྩ་གསུམ་གནམ་གྱི་ལྷར་སྐྱེས་སོ། །དེ་ནས་ཡང་ལན་བརྒྱད་བཅུའི་བར་དུ་ཚངས་པ་ཆེན་པོའི་རྒྱལ་པོར་སྐྱེས་སོ། །
དེ་ནས་ལོ་བརྒྱ་སྟོང་ཚང་བར་མིའི་ནང་དུ་འཁོར་ལོས་སྒྱུར་བའི་རྒྱལ་པོར་སྐྱེས་ཏེ། གང་ཟག་དེ་ནམ་དུ་ཡང་ངན་སོང་གསུམ་དུ་མ་སྐྱེས་ཀྱི་གོང་ནས་གོང་དུ་རབ་ཏུ་བདེ་བའི་གནས་སུ་སྐྱེས་སོ། །དེ་བས་ན་འཇམ་དཔལ་རིགས་ཀྱི་བུ་
དག་ཁྲེལ་ཞིང་ངོ་ཚ་བ་དང་ལྡན་པ་རྣམས་ཀྱིས་སངས་རྒྱས་བཅོམ་ལྡན་འདས་ལ་འདུས་བྱས་རྣམས་དང་འཐུན་པར་མི་བལྟའོ། །འཇམ་དཔལ་མུ་སྟེགས་ཅན་ངན་པར་ལྟ་བ་ནི་དེ་བཞིན་གཤེགས་པ་ལ་འདུས་བྱས་དང་མཐུན་ནོ་ཞེས་སྨྲའི་ཚུལ་
ཁྲིམས་སྲུང་བའི་དགེ་སློང་དག་ནི་དེ་ལྟར་དེ་བཞིན་གཤེགས་པ་ལ་འདུས་བྱས་པ་ཡིན་པར་མི་ལྟའོ། །ཅི་སྟེ་དེ་བཞིན་གཤེགས་པ་ལ་འདུས་བྱས་ཡིན་ནོ་ཞེས་བརྗོད་ན་དེ་ནི་བརྫུན་དུ་སྨྲ་བ་ཡིན་ཏེ། གང་ཟག་དེ་ནི་ཤི་མ་ཐག་ཏུ་སེམས་ཅན་དམྱལ་བར་

47-1-27b

སྐྱེ་བར་རིག་པར་བྱའོ། །ཇི་ལྟར་གང་ཟག་བདག་གི་ཁྱིམ་ན་གནས་པ་བཞིན་ནོ། །འཇམ་དཔལ་དེ་བཞིན་གཤེགས་པ་ནི་ཡང་དག་པར་འདུས་མ་བྱས་པའི་ཆོས་ཅན་ཡིན་པས་འདུས་བྱས་ཞེས་བརྗོད་པར་མི་བྱའོ། །འཇམ་དཔལ་དེང་སླན་
ཆད་འཁོར་བར་འཁོར་བ་ན་ཤེས་པ་མེད་པར་སྤངས་ཏེ། ཡང་དག་པའི་ཡེ་ཤེས་བཙལ་བར་བྱའོ། །དེ་བཞིན་གཤེགས་པ་ནི་འདུས་མ་བྱས་པ་སྟེ། གང་ཞིག་དེ་བཞིན་གཤེགས་པ་ལ་དེ་ལྟ་བུའི་ཚུལ་དུ་ལྟ་ན་མཚན་སུམ་བཅུ་རྩ་གཉིས་
དང་ལྡན་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱའོ། །དེ་ནས་འཇམ་དཔལ་གཞོན་ནུར་གྱུར་པས་ཙུན་ད་ལ་སྨྲས་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ནི་ཤིན་ཏུ་ཚེ་རིང་བར་འགྱུར་བའི་རྒྱུ་
མངོན་སུམ་དུ་གྱུར་ཏེ། དེ་བཞིན་གཤེགས་པ་ནི་རྟག་པའི་ཆོས་ཅན། མི་འགྱུར་མི་འཕོ་བའི་ཆོས་ཅན། འདུས་མ་བྱས་པའི་ཆོས་སུ་རྟོགས་པ་ལེགས་སོ། །ཁྱོད་ཀྱིས་དེ་བཞིན་གཤེགས་པ་ལ་འདུས་བྱས་ཀྱི་མཚན་ཉིད་དུ་མ་
བརྗོད་པ་ལེགས་སོ། །ཇི་ལྟར་མེས་ཚིག་པའི་གང་ཟག་དེ་ཁྲེལ་ཞིང་ངོ་ཚ་བ་དང་ལྡན་པས་གོས་ཀྱིས་ལུས་གཡོགས་པ་དང་། བསམ་པ་དེ་དགེ་བས་སུམ་བཅུ་རྩ་གསུམ་གནམ་གྱི་ལྷར་སྐྱེས་ཏེ། ཚངས་པའི་རྒྱལ་པོ་དང་། འཁོར་
ལོས་སྒྱུར་བའི་རྒྱལ་པོར་གྱུར་ཏེ། རྟག་ཏུ་གནས་བདེ་བར་སྐྱེས་ཀྱི་ངན་སོང་དུ་མ་སྐྱེས་སོ། །དེ་བཞིན་དུ་ཁྱོད་ཀྱང་དེ་བཞིན་གཤེགས་པའི་འདུས་བྱས་ཀྱི་མཚན་ཉིད་མ་བརྗོད་པས་ཕྱི་མ་མ་འོངས་པའི་དུས་སུ་གདོན་མི་ཟ་བར་མཚན་
སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་། མ་འདྲེས་པའི་ཆོས་བཅྭ་བརྒྱད་དང་། ཚེ་ཚད་མེད་པ་དང་། འཁོར་བར་མི་གནས་པ་དང་། རབ་ཏུ་བདེ་བ་དང་། རིང་པོར་མི་ཐོགས་པར་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་རོ།། 
ཙུན་ད་དེ་ནི་དེ་བཞིན་གཤེགས་པས་རྒྱས་པར་གསུང་བར་འགྱུར་གྱིས་བདག་ཅག་གཉིས་ཀས་དེ་བཞིན་གཤེགས་པའི་འདུས་བྱས་ཀྱི་མཚན་ཉིད་མི་བརྗོད་པར་བྱའོ། །འདུས་བྱས་དང་འདུས་མ་བྱས་པ་འདི་རེ་ཤིག་ཞོག་ལ་བསོད་སྙོམས་ཅི་འབྱོར་

47-1-28a

པ་མྱུར་དུ་ཕུལ་ཅིག །སྦྱིན་པ་འདི་ནི་སྦྱིན་པ་བྱིན་པའི་ནང་ན་ཕུལ་དུ་འགྱུར་རོ། །དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལམ་རིང་པོ་ནས་འོངས་པ་ངལ་ཆད་པ་དག་ལ་ཡོངས་སུ་དག་པའི་སེམས་ཀྱིས་ཅི་འདོད་པ་
མྱུར་དུ་ཕུལ་ཅིག་དང་། ཁྱོད་ཀྱི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་ས་བོན་དུ་འགྱུར་རོ། །ཙུན་ད་གང་གིས་ནང་གི་ཐ་མར་སངས་རྒྱས་དང་དགེ་འདུན་ལ་མང་ཡང་རུང་ཉུང་ཡང་རུང་། ཆོག་ཀྱང་རུང་མ་ཆོག་ཀྱང་རུང་། དེ་བཞིན་
གཤེགས་པ་ཡོངས་སུ་མྱ་ངན་ལས་འདའ་ཀར་ཕུལ་ཅིག །ཙུན་དས་འཇམ་དཔལ་ལ་སྨྲས་པ། ཅིའི་ཕྱིར་བསོད་སྙོམས་ལ་ཆགས་ཏེ། མང་བ་དང་ཉུང་བ་དང་། ཆོག་པ་དང་མ་ཆོག་པ་དང་། དུས་སུ་ཕུལ་ཅིག་ཅེས་གསུང་། འཇམ་དཔལ་
དེ་བཞིན་གཤེགས་པ་སྔོན་ལོ་དྲུག་གི་བར་དུ་དཀའ་བ་སྤྱོད་ཀྱང་བཟོད་ན། དེང་འདིར་སྐད་ཅིག་ཐང་ཅིག་ཙམ་ཐོགས་པ་ལྟ་ཅི་སྨོས། འཇམ་དཔལ་ཅི་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཀྱིས་བསོད་སྙོམས་འདི་
ཡང་དག་པར་བཞེས་སོ་སྙམ་སེམས་སམ། བདག་ནི་དེ་བཞིན་གཤེགས་པའི་སྐུ་འདི་ངེས་པར་ཆོས་ཀྱི་སྐུ་ཡིན་གྱི། ཟས་ཀྱི་སྐུ་མ་ཡིན་པར་ཤེས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་ལ་འདི་སྐད་ཅེས་བཀའ་སྩལ་ཏོ། །
དེ་དེ་བཞིན་ནོ། །དེ་དེ་བཞིན་ཏེ། ཙུན་དས་སྨྲས་པ་བཞིན་ནོ། །ཙུན་ད་ཤིན་ཏུ་ལེགས་སོ། །ཁྱོད་ནི་མཆོག་གི་ཡེ་ཤེས་ཆེན་པོ་དང་ལྡན་ཏེ། ཐེག་པ་ཆེན་པོའི་མདོ་སྡེ་ཤིན་ཏུ་ཟབ་མོ་ཡང་ལེགས་པར་རྟོགས་སོ། །འཇམ་དཔལ་གྱིས་ཙུན་
ད་ལ་སྨྲས་པ། ཁྱོད་ཀྱིས་དེ་བཞིན་གཤེགས་པ་ལ་འདུས་མ་བྱས་པར་རྟོགས་པ་ནི།  དེ་བཞིན་གཤེགས་པའི་སྐུ་ཚེའི་ཚད་ནི་ཤིན་ཏུ་རིང་བས་དེ་ལྟ་བུའི་ཚུལ་དུ་ཤེས་ན་དེ་བཞིན་གཤེགས་པས་ཀྱང་ཁྱོད་ལ་སྤྲོ་བ་གནང་བར་
གྱུར་ཏོ། །ཙུན་དས་སྨྲས་པ། བདག་འབའ་ཞིག་ལ་སྤྲོ་བ་གནང་བ་མ་ཡིན་གྱི་སེམས་ཅན་ཐམས་ཅད་ལ་ཡང་སྤྲོ་བ་གནང་བ་ཡིན་ནོ། །འཇམ་དཔལ་གྱིས་སྨྲས་པ། དེ་བཞིན་གཤེགས་པས་ཁྱོད་དང་བདག་དང་སེམས་

47-1-28b

ཅན་ཐམས་ཅད་ལ་ཡང་སྤྲོ་བ་གནང་བ་ཡིན་ནོ། །ཙུན་དས་སྨྲས་པ། འཇམ་དཔལ་དེ་བཞིན་གཤེགས་པས་སྤྲོ་བ་གནང་ངོ་ཞེས་མ་ཟེར་ཅིག །སྤྲོ་བ་ཞེས་བྱ་བ་ནི་ཕྱིན་ཅི་ལོག་ཏུ་འདུ་ཤེས་པའོ། །གང་ཕྱིན་ཅི་ལོག་ཏུ་འདུ་ཤེས་པ་ནི་འཁོར་བ་
འོ། །གང་འཁོར་བ་དེ་ནི་འདུས་བྱས་ཀྱི་ཆོས་ཅན་ནོ། །དེ་བས་ན་འཇམ་དཔལ་དེ་བཞིན་གཤེགས་པ་ལ་འདུས་བྱས་སུ་མི་བལྟའོ། །ཅི་སྟེ་དེ་བཞིན་གཤེགས་པ་ལ་འདུས་བྱས་ཡིན་པར་སྨྲས་ན་སྐྱེས་བུ་ཁྱོད་དང་བདག་ཀྱང་ཕྱིན་ཅི་
ལོག་སྤྱོད་པར་གྱུར་ཏོ། །འཇམ་དཔལ་དེ་བཞིན་གཤེགས་པ་ལ་ནི་སྡུག་པར་དགོངས་པ་མེད་དོ། །སྡུག་པར་སེམས་པ་ནི་དཔེར་ན་བ་བེའུ་ལ་སྡུག་པར་སེམས་ཏེ། ལྟོགས་སམ་སྐོམ་ཡང་འགྲོ་བཞིན་དུ་རྩྭ་དང་ཆུ་ཚོལ་ཏེ། 
ཆོག་ཀྱང་རུང་མ་ཆོག་ཀྱང་རུང་། དེ་མ་ཐག་ཏུ་བེའུ་ཚོལ་ཞིང་འོང་ངོ་། །སངས་རྒྱས་བཅོམ་ལྡན་འདས་ལ་ནི་དེ་ལྟ་བུའི་དགོངས་པ་མི་མངའི་ཐམས་ཅད་ལ་སྒྲ་གཅན་འཛིན་དང་འདྲ་བར་གཟིགས་སོ། །གང་དེ་ལྟར་དགོངས་པ་དེ་ནི་སངས་
རྒྱས་རྣམས་ཀྱི་ཡེ་ཤེས་ཀྱི་སྤྱོད་ཡུལ་ལོ། །འཇམ་དཔལ་འདི་ལྟ་སྟེ། དཔེར་ན་རྒྱལ་པོ་ཆེན་པོའི་རྟ་ཤིན་དུ་དུལ་བ་ལས་བཅས་པའི་ཤིང་རྟ་ལ། བོང་བུའི་ཤིང་རྟས་སླེབས་སུ་རེ་བ་ནི་གནས་མེད་དོ། །སྐྱེས་བུ་ཁྱོད་དང་བདག་ཀྱང་དེ་དང་
འདྲ་སྟེ། དེ་བཞིན་གཤེགས་པའི་དགོངས་པ་ཟབ་མོའི་མཐའ་ཆུབ་པར་རྟོགས་སུ་རེ་བ་ཡང་གནས་མེད་དོ། །འཇམ་དཔལ་འདི་ལྟ་སྟེ་དཔེར་ན་བྱ་ནམ་མཁའ་ལྡིང་གི་རྒྱལ་པོ་སྟེང་གི་ནམ་མཁའ་ལ་དཔག་ཚད་གྲངས་མེད་པ་
ཞིག་ལས་འཕགས་ཏེ། འོག་ཏུ་རྒྱ་མཚོ་ལ་བལྟས་ན་ཆུའི་ནང་ན་གནས་པ་ཉ་དང་རུས་སྦལ་དང་། ཁོ་གོར་བབ་ཤ་དང་། ཆུ་སྲིན་དང་། ཀླུ་ལ་སོགས་པ་ཆུ་ལ་གནས་པའི་རིས་སུ་གཏོགས་པ་ཐམས་ཅད་གསལ་བར་
མཐོང་བ་ནི་ཇི་ལྟར་མེ་ལོང་གསལ་བའི་ནང་ན་གཟུགས་བརྙན་སྣང་བ་དང་འདྲ་སྟེ། བུས་པ་ཤེས་པ་ཆུང་བ་དག་གིས་ནི་དཔག་ནུས་པ་མ་ཡིན་ནོ། །དེ་ལྟར་དེས་མི་མཐོང་བ་བཞིན་དུ་སྐྱེས་བུ་ཁྱོད་དང་བདག་ཀྱང་དེ་དང་

47-1-29a

འདྲ་སྟེ། དེ་བཞིན་གཤེགས་པའི་ཡེ་ཤེས་ལ་དཔག་ནུས་པ་མ་ཡིན་ནོ། །འཇམ་དཔལ་གྱིས་ཙུན་ད་ལ་སྨྲས་པ། དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་སྨྲས་པ་བཞིན་ཏེ། ངས་དོན་འདི་དག་མ་རྟོགས་པ་ནི་མ་ཡིན་གྱི་ཁྱོད་
དང་བྱང་ཆུབ་སེམས་དཔའི་རྣམས་བསྟན་པར་ཟད་དོ། །དེའི་ཚེ་བཅོམ་ལྡན་འདས་ཀྱིས་ཞལ་གྱི་སྒོ་ནས་འོད་ཟེར་རྣམ་པ་སྣ་ཚོགས་བཀྱེ་ནས་འོད་དེས་འཇམ་དཔལ་གྱི་ལུས་ལ་ཡོངས་སུ་སྣང་བར་བྱས་སོ། །འཇམ་དཔལ་ལ་
འོད་དེས་རེག་མ་ཐག་ཏུ་དངོས་པོ་ཇི་ལྟ་བ་ཉིད་མོད་ལ་རྟོགས་ནས་ཙུན་ད་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པས་ལྟས་འདི་བསྟན་ནས་རིང་པོ་མི་ཐོགས་པར་ཡོངས་སུ་མྱ་ངན་ལས་འདས་པར་གཤེགས་ངེས་ཀྱིས་ཁྱོད་
ཀྱི་མཆོད་པ་ནང་གི་ཐ་མར་བཤམས་པ་བཅོམ་ལྡན་འདས་དང་། དགེ་འདུན་ཆེན་པོ་རྣམས་ལ་དབུལ་བའི་དུས་ལ་བབ་བོ། །ཙུན་ད་དེ་བཞིན་གཤེགས་པས་འོད་ཟེར་རྣམ་པ་སྣ་ཚོགས་བཀྱེ་བ་འདི་ནི་རྒྱུ་མེད་རྐྱེན་མེད་པ་མ་ཡིན་
པར་རིག་པར་གྱིས་ཤིག །ཙུན་དས་དེ་སྐད་ཅེས་སྨྲས་པ་ཐོས་ནས་ཅང་མི་སྨྲ་བར་འདུག་གོ། བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། ཁྱོད་ཀྱིས་མཆོད་པ་བཤམས་པ་སངས་རྒྱས་དང་དགེ་འདུན་རྣམས་ལ་
དབུལ་བའི་དུས་ལ་བབ་བོ། །དེ་བཞིན་གཤེགས་པ་ནི་ཡོངས་སུ་མྱ་ངན་ལས་འདའོ་ཞེས་ལན་གཉིས་ལན་གསུམ་གྱི་བར་དུ་དེ་བཞིན་དུ་བཀའ་སྩལ་ཏོ། །དེའི་ཚེ་ཙུན་དས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་
པ་ཐོས་མ་ཐག་དུ་སྐད་ཆེན་པོ་ཕྱུང་སྟེ་ངུས་ནས་འདི་སྐད་དུ་ཀྱི་ཧུད་ཀྱི་ཧུད་འཇིག་རྟེན་སྟོངས་སོ་ཞེས་ཆོ་ངེས་རྡུང་ངོ་། །ཡང་འཁོར་གྱི་དཀྱིལ་འཁོར་རྣམས་ལ་འདི་སྐད་དུ་བདག་ཅག་གིས་ལུས་སྨད་ལྔ་ས་ལ་གཏུགས་ཏེ། 
ཐམས་ཅད་ཀྱིས་སྐད་མཐུན་པར་བཅོམ་ལྡན་འདས་མྱ་ངན་ལས་མི་འདའ་བར་གསོལ་བ་གདབ་པར་བྱའོ། །བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། སེམས་ཡོངས་སུ་གདུངས་ཤིང་མ་ངུ་བར་བདག་གི་

47-1-29b

ལུས་ལ་ཆུ་ཤིང་ལྟ་བུ་འམ། སྨིག་རྒྱུ་བ་འམ། ཆུའི་ཆུ་བུར་རམ། སྒྱུ་མ་འམ། དྲི་ཟའི་གྲོང་ཁྱེར་རམ། རྫ་སོ་མ་བཏང་བ་ལྟ་བུ་འམ། གློག་གི་འོད་དམ། ཆུ་ལ་རི་མོ་བྲིས་པ་འམ། གསོད་དུ་ཁྲིད་པའི་བཙོན་ལྟ་བུ་འམ། ཤིང་ཏོག་
སྨིན་པ་ལྟ་བུ་འམ། ཤ་རུལ་པ་འམ། ཐགས་ཀྱི་རྒྱུ་ཟད་པ་འམ། གཏུན་ལྟ་བུར་བལྟའོ། །འདུ་བྱེད་རྣམས་ལ་དུག་དང་འདྲེས་པའི་ཟས་ལྟ་བུར་བལྟའོ། །འདུས་བྱས་ཀྱི་ཆོས་རྣམས་ལ་ཉེས་པའི་སྐྱོན་རྣམ་པ་མང་བར་བལྟའོ། །དེ་
ནས་ཙུན་དས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་འཇིག་རྟེན་ན་ཡུན་དུ་བཞུགས་པར་མི་དགྱེས་ན་བདག་མི་ངུ་བའི་གཏོལ་ག་ལ་མཆིས། ཀྱི་ཧུད་ཀྱི་ཧུད་འཇིག་རྟེན་སྟོངས་སོ། །བཅོམ་ལྡན་
འདས་བདག་ཅག་དང་། སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ་འཇིག་རྟེན་ན་ཡུན་དུ་བཞུགས་ཤིང་མྱ་ངན་ལས་མི་འདའ་བར་གསོལ་ལོ། །བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། བདག་ཅག་ལ་
ཐུགས་བརྩེ་བའི་ཕྱིར་འཇིག་རྟེན་ན་ཡུན་དུ་བཞུགས་པར་གསོལ་ཞེས་མ་ཟེར་ཅིག །ངས་ཁྱོད་ལ་སོགས་པ་འགྲོ་བ་ཐམས་ཅད་ལ་ཐུགས་བརྩེ་བའི་ཕྱིར་ཡོངས་སུ་མྱ་ངན་ལས་འདའ་བར་གཤེགས་སོ། །དེ་ཅིའི་
ཕྱིར་ཞེ་ན། སངས་རྒྱས་རྣམས་ཀྱི་ཆོས་ཉིད་ཀྱང་དེ་ཡིན་ལ་འདུས་བྱས་ཀྱང་དེ་དང་འདྲའོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་སྐད་ཅེས་གསུངས་སོ། །འདུས་བྱས་པ་ཡི་ཆོས་ཐམས་ཅད། །རང་བཞིན་
ཉིད་ཀྱིས་མི་རྟག་སྟེ། །སྐྱེས་ནས་མི་གནས་པ་ཡིན་པས། །རབ་ཏུ་ཞི་བ་དེ་བདེའོ། །ཙུན་ད་ཁྱོད་འདུས་བྱས་ཐམས་ཅད་འདྲེས་པ་དང་། ཆོས་ཐམས་ཅད་ལ་བདག་མེད་པ་དང་། མི་རྟག་པ་དང་། རིང་དུ་མི་གནས་ཏེ། ལུས་འདི་ནི་ཤིན་དུ་སྐྱོན་
མང་བས་ཆུ་བུར་ལྟ་བུར་ལྟོས་ལ་དེ་བས་ན་མ་ངུ་ཤིག །དེ་ནས་ཙུན་དས་བཅོམ་ལྡན་འདས་ལ་གསོལ་པ། དེ་དེ་བཞིན་ནོ། །དེ་དེ་བཞིན་ནོ། བཅོམ་ལྡན་འདས་ཀྱིས་གསུངས་པ་བཞིན་ཏེ། དེ་བཞིན་གཤེགས་པ་ཡོངས་སུ་མྱ་ངན་ལས་

47-1-30a

འདའ་བ་ཡང་ཐབས་སུ་བསྟན་པར་འཚལ་མོད་ཀྱི་བདག་གིས་མྱ་ངན་མི་བགྱིད་ཀྱང་མི་བཟོད་དོ། །ཡང་ཤིན་ཏུ་བསམས་ན་དགའ་ཞིང་སྤྲོ་བ་ཡང་སྐྱེའོ། །བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། ལེགས་
སོ་ཤིན་ཏུ་ལེགས་སོ། །དེ་བཞིན་གཤེགས་པས་སེམས་ཅན་དང་འཐུན་པའི་ཚུལ་དུ་མྱ་ངན་ལས་འདའ་བར་བསྟན་པ་ཤེས་པ་ལེགས་སོ། །ཙུན་ད་ཁྱོད་ལེགས་པར་ཉོན་ཅིག །འདི་ལྟ་སྟེ་དཔེར་ན་བྱ་ས་ལ་ས་ཞེས་བྱ་བ་དབྱར་ཚ་བའི་
དུས་སུ་ཐམས་ཅད་མཚོ་མ་དྲོས་པ་ཞེས་བྱ་བར་འདུའོ། །བཅོམ་ལྡན་འདས་ཀྱང་དེ་དང་འདྲ་སྟེ། གནས་དེ་ཉིད་དུ་གཤེགས་སོ། །ཙུན་ད་ཁྱོད་དེ་བཞིན་གཤེགས་པའི་སྐུ་ཚེའི་ཚད་རིང་ཞེ་འམ། ཐུང་ཞེས་མ་རྟོག་པར་ཆོས་
ཐམས་ཅད་སྒྱུ་མ་དང་འདྲ་སྟེ། དེ་བཞིན་གཤེགས་པས་ཐབས་ཀྱིས་ཅི་ལ་འང་ཆགས་པར་མི་མཛད་དོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ཆོས་ཉིད་ཀྱིས་དེའོ། །ཙུན་ད་ཁྱོད་ཀྱི་མཆོད་པ་ནང་གི་ཐ་མར་བཤམས་པ་འདི་བཞེས་པ་ནི་ཁྱོད་
འཁོར་བའི་ཀླུང་ལས་བསྒྲལ་བའི་ཕྱིར་རོ། །དེ་ལ་ལྷ་འམ། མི་འམ། འཇིག་རྟེན་དུ་བཅས་པ་གང་ཡང་རུང་ནང་གི་ཐ་མར་མཆོད་པ་བཤམས་ཏེ། ང་ལ་ཕུལ་ན་མི་གཡོ་བའི་འབྲས་བུ་ཐོབ་ཅིང་རྟག་ཏུ་བདེ་བ་མྱོང་བར་འགྱུར་རོ། །དེ་ཅིའི་ཕྱིར་ཞེ་ན། ང་
ནི་སེམས་ཅན་ཐམས་ཅད་ཀྱི་བསོད་ནམས་ཀྱི་ཞིང་ཡིན་པའི་ཕྱིར་རོ། །ཁྱོད་ཀྱང་སེམས་ཅན་རྣམས་ཀྱི་བསོད་ནམས་ཀྱི་ཞིང་དུ་འགྱུར་བར་འདོད་ན་མཆོད་པ་བཤམས་པ་མ་ཐོགས་པར་མྱུར་དུ་ཕུལ་ཅིག །དེ་ནས་ཙུན་དས་སེམས་ཅན་
ཐམས་ཅད་རྣམ་པར་གྲོལ་བར་བྱ་བའི་ཕྱིར་མགོ་སྨད་དེ་མཆི་མ་བླགས་བཞིན་དུ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཤིན་དུ་ལེགས་སོ། །བཅོམ་ལྡན་འདས་བདག་བསོད་ནམས་ཀྱི་ཞིང་དུ་འགྱུར་ཡང་དག་ན་ལྟ། དེ་བཞིན་
གཤེགས་པ་མྱ་ངན་ལས་འདའ་བ་དང་། མྱ་ངན་ལས་འདའ་བ་མ་ལགས་པར་རྟོགས་པར་འགྱུར་བ་ཞིག་ན་བདག་ཅག་ཉན་ཐོས་དང་རང་སངས་རྒྱས་ཀྱི་ཡེ་ཤེས་ནི་སྦྲང་བུ་དང་འདྲ་བས་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བ་དང་མྱ་ངན་

47-1-30b

ལས་མི་འདའ་བ་དཔོག་མི་ནུས་སོ། །དེ་ནས་ཙུན་ད་འཁོར་དང་བཅས་པས་མཆི་མ་བླགས་ཏེ་ངུ་བཞིན་དུ་དེ་བཞིན་གཤེགས་པ་ལ་བསྐོར་བ་བྱས་བདུག་སྤོས་དང་མེ་ཏོག་གིས་གཏོར་ཏེ། མཆོད་པ་བྱས་ནས་འཇམ་དཔལ་དང་བཅས་སུ་འདུག་པ་ལས་
ལངས་ཏེ། མཆོད་པ་ཤོམ་དུ་དོང་ངོ་། །དེ་ལྟར་སོང་མ་ཐག་ཏུ་དེའི་ཚེ་ས་ཡང་ཚངས་པའི་འཇིག་རྟེན་ལ་ཐུག་གི་བར་དུ་རྣམ་པ་དྲུག་ཏུ་གཡོས་སོ། །ས་གཡོ་བ་ལ་རྣམ་པ་གཉིས་ཏེ། ས་གཡོས་པ་དང་། རབ་ཏུ་གཡོས་པའོ། །ཅུང་ཟད་གཡོས་པ་ནི་ས་
གཡོས་པ་ཞེས་བྱའོ། །ཆེར་གཡོས་པ་ནི་རབ་ཏུ་གཡོས་པ་ཞེས་བྱའོ། །སྐད་ཆུང་བ་ནི་ས་གཡོས་པ་ཞེས་བྱའོ། །སྐད་ཆེ་བ་ནི་རབ་ཏུ་གཡོས་པ་ཞེས་བྱའོ། །ས་འབའ་ཞིག་གཡོས་པ་ནི་ས་གཡོས་པ་ཞེས་བྱའོ། །རི་དང་ཆུ་དང་ཤིང་དང་རྒྱ་མཚོ་
ལ་སོགས་པ་ཐམས་ཅད་གཡོས་པ་ནི་རབ་ཏུ་གཡོས་པ་ཞེས་བྱའོ། །ཕྱོགས་གཅིག་ཏུ་གཡོས་པ་ནི་ས་གཡོས་པ་ཞེས་བྱའོ། །ཀུན་དུ་འཁོར་ཞིང་གཡོས་པ་ནི་རབ་ཏུ་གཡོས་པ་ཞེས་བྱའོ། །འགུལ་བ་ནི་ས་གཡོས་པ་ཞེས་བྱའོ། །འགུལ་བ་ན་
སེམས་ཅན་ཐམས་ཅད་ཀྱི་སེམས་ཀྱང་གཡོས་པ་ནི་རབ་ཏུ་གཡོས་པ་ཞེས་བྱའོ། །བྱང་ཆུབ་སེམས་དཔའ་ཐོག་མ་གནས་པ་དེ་ན་གནམ་ནས་བབས་ཏེ་འཛམ་བུའི་གླིང་དུ་གཤེགས་པ་ན་རབ་ཏུ་གཡོས་པ་ཞེས་བྱའོ། །ཐོག་མ་བཙས་པ་དང་། རབ་ཏུ་བྱུང་བ་
དང་། བླ་ན་མེད་པ་ཡང་དག་པར་རྫོགས་པར་སངས་རྒྱས་པ་དང་། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདའ་བར་གཤེགས་པ་ནི་རབ་ཏུ་གཡོས་པ་ཞེས་བྱའོ། །དེང་དེ་བཞིན་གཤེགས་པ་ཡང་ཡོངས་སུ་མྱ་ངན་ལས་འདའ་བར་གཤེགས་
པ་ལྟ་སྟེ། དེ་བས་ན་ས་འདི་ཡང་རབ་ཏུ་གཡོས་སོ། །དེ་ནས་ལྷ་དང་། ཀླུ་དང་དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ལ་སོགས་པ་དེ་དག་ཐོས་མ་ཐག་ཏུ་ལུས་ཀྱི་བ་སྤུ་ཀུན་ལངས་ནས་ཐམས་ཅད་དུ་
ངུས་ཏེ་སྐད་མཐུན་པར་ཚིགས་སུ་བཅད་པས་འདི་སྐད་ཅེས་གསོལ་ཏོ། །ཕྱག་འཚལ་ཁ་ལོ་སྒྱུར་བ་ལ། །བདག་ཅག་རྣམས་ནི་གསོལ་བ་འདེབས། །དྲང་སྲོང་ཆེན་པོས་བོར་བས་ན། །མགོན་སྐྱབས་རྟེན་མ་མཆིས་པར་གྱུར། །བཅོམ་ལྡན་མྱ་ངན་འདས་གཤེགས་པས། །བདག་ཅག་སྡུག་བསྔལ་

47-1-31a

རྒྱ་མཚོར་ནུབ། །ཡིད་བློང་མྱ་ངན་གདུང་བ་ནི། །ཇི་ལྟར་བེའུ་དག་མ་སྟོར་བཞིན། །དབུལ་ཕོངས་མགོན་དང་སྐྱབས་མ་མཆིས། །ཇི་ལྟར་ཤིན་དུ་ན་བ་དེ། །སྨན་པ་མཁས་པ་མ་མཆིས་པས། །ཡིད་བཞིན་བཟའ་བ་
ཅི་ཡང་འཚལ། །སེམས་ཅན་ཉོན་མོངས་ནད་ཀྱིས་གཟིར། །ལྟ་བ་རྣམས་ཀྱིས་རྟག་ཏུ་གཙེ། །ཆོས་ཀྱི་སྨན་པ་མཁས་དང་བྲལ། །ངན་པར་ལྟ་བའི་གདུག་པ་འཚལ། །དེ་བས་སངས་རྒྱས་བཅོམ་ལྡན་འདས། །བདག་
ཅག་སྤང་བ་མི་མཛད་གསོལ། །དཔེར་ན་རྒྱལ་པོ་མི་བཞུགས་ན། །ཡུལ་མི་ཐམས་ཅད་ལྟོགས་པར་གྱུར། །བདག་ཅག་རྣམས་ཀྱང་དེ་འདྲ་སྟེ། །ཆོས་ཀྱི་རོ་དང་སྐྱབས་ཀྱང་སྟོར། །སངས་རྒྱས་མྱ་ངན་འདའ་ཐོས་པས། །བདག་ཅག་
སེམས་ནི་མྱོས་པར་གྱུར། །ཇི་ལྟར་ས་ཆེན་རབ་གཡོས་ནས། །ཕྱོགས་རྣམས་ཤིན་ཏུ་བསླད་པ་བཞིན། །དྲང་སྲོང་མྱ་ངན་འདས་གཤེགས་པས། །སངས་རྒྱས་ཉི་མ་ས་ལ་ལྷུང་། །ཆོས་ཀྱི་ཆུ་ཡང་སྐམས་པར་གྱུར། །
བདག་ཅག་གདོན་མི་ཟ་བར་འཆི། །བཅོམ་ལྡན་མྱ་ངན་འདས་གཤེགས་ན། །འགྲོ་བའི་སྡུག་བསྔལ་གདུང་བ་ནི། །དཔེར་ན་ཚོང་པ་ཞིག་གི་བུ། །གསར་དུ་ཕ་མ་ཤི་བ་བཞིན། །བཅོམ་ལྡན་མྱ་ངན་འདས་གཤེགས་ཏེ། །ཅི་སྟེ་མི་བཞུགས་
པར་གྱུར་ན། །བདག་དང་སེམས་ཅན་ཐམས་ཅད་ནི། །མགོན་དང་སྐྱབས་མ་མཆིས་པར་འགྱུར། །བཅོམ་ལྡན་མྱ་ངན་འདས་གཤེགས་ན། །བྱོལ་སོང་སྐྱེ་གནས་བར་དུ་ཡང་། །ཐམས་ཅད་སྡུག་བསྔལ་ཡི་གློང་ཞིང་། །གདུངས་པར་གྱུར་
ཏེ་སྨྲེ་སྔགས་འདོན། །དེང་འདིར་བདག་ཅག་རྣམས་ཀྱིས་ནི། །མྱ་ངན་མི་བགྱིད་གཏོལ་མ་མཆིས། །དེ་བཞིན་གཤེགས་པས་བོར་བ་ཡང་། །ཇི་ལྟར་མཆིལ་མ་ངར་སྣབས་བཞིན། །དཔེར་ན་ཉི་མ་ཤར་བ་ན། །འོད་ཟེར་ཀུན་ཏུ་ལྷམ་མེར་སྣང་། །
ཀུན་ཏུ་སྣང་བར་བྱས་པ་ན། །མུན་པ་ཐམས་ཅད་མེད་པར་གྱུར། །དེ་བཞིན་གཤེགས་པའི་རྫུ་འཕྲུལ་འོད། །བདག་ཅག་རྣམས་ཀྱི་ཉོན་མོངས་བསལ། །འཁོར་གྱི་ནང་དུ་བཞུགས་པ་ཡང་། །རི་རབ་རི་ཡི་རྒྱལ་པོ་བཞིན། །བཅོམ་ལྡན་

47-1-31b

འདས་དཔེར་ན་རྒྱལ་པོ་ཞིག་གི་སྲས་བུ་བྱད་གཟུགས་བཟང་བ་བལྟ་ན་སྡུག་པ་ཤིན་ཏུ་མཛེས་པ་དག་མཆིས་ན་ཤིན་ཏུ་བྱམས་པས་སྔར་རྩལ་སྣ་ཚོགས་བསླབས་ཏེ། ཁོང་དུ་ཆུད་པའི་འོག་ཏུ་གཤེད་མ་ལ་སོད་ཅིག་ཅེས་གཏད་ཏོ། །
བཅོམ་ལྡན་འདས་བདག་ཅག་ཀྱང་ཆོས་ཀྱི་སྲས་སུ་གྱུར་ཏེ། བཅོམ་ལྡན་འདས་ཀྱིས་བསྟན་ཅིང་བཅོས་ན་ཡང་དག་པར་ལྟ་བ་དང་ལྡན་པར་འགྱུར་གྱིས་བདག་ཅག་རྣམས་མི་སྤང་དུ་གསོལ། ཅི་སྟེ་བདག་ཅག་ཡོངས་སུ་སྤངས་
པར་གྱུར་ན་རྒྱལ་པོའི་སྲས་དང་འདྲ་བར་མི་འགྱུར་རམ། མྱ་ངན་ལས་མི་འདའ་བར་འཇིག་རྟེན་ན་ཡུན་དུ་བཞུགས་པར་གསོལ། བཅོམ་ལྡན་འདས་དཔེར་ན་སྐྱེས་བུ་ཞིག་གཙུག་ལག་རྣམས་ལེགས་པར་བསླབས་ནས་གཙུག་
ལག་གིས་སྐྲག་པར་གྱུར་ཏོ། །བཅོམ་ལྡན་འདས་ཀྱང་དེ་དང་མཚུངས་ཏེ། ཆོས་ཐམས་ཅད་ཐུགས་སུ་ཆུད་ནས་ཆོས་ཀྱིས་བསྙེངས་པར་གྱུར་ཏོ། །གལ་ཏེ་དེ་བཞིན་གཤེགས་པ་འཇིག་རྟེན་ན་ཡུན་དུ་བཞུགས་ཤིང་བདུད་རྩི་
ལྟ་བུའི་ཆོས་བསྟན་ཏེ། ཐམས་ཅད་ངོམས་པར་མཛད་ན་སེམས་ཅན་ཐམས་ཅད་ཀྱང་སེམས་ཅན་དམྱལ་བར་ལྟུང་གིས་མི་དོགས་སོ། །བཅོམ་ལྡན་འདས་དཔེར་ན་སྐྱེས་བུ་ཞིག་ལས་བྱེད་པའི་འཕྲོ་ལས་བཟུང་སྟེ། བཙོན་རར་
བཅུག་ནས་དེ་ལ་མི་ཞིག་གིས་འདི་སྐད་དུ་ཁྱོད་འདི་ན་ཅི་བྱེད་ཅེས་དྲིས་ན་བདག་ནི་ཤིན་ཏུ་སྡུག་བསྔལ་ཆེན་པོ་མྱོང་ཞིང་འདུག་སྟེ། འདི་ལས་ཐར་ན་རབ་ཏུ་བདེ་བར་འགྱུར་རོ་ཞེས་མཆིའོ། །བཅོམ་ལྡན་འདས་ཀྱང་དེ་དང་འདྲ་སྟེ། བདག་
ཅག་གི་སླད་དུ་སྤྱོད་པ་དཀའ་བ་མཛད་མཛད་དེ། བདག་ཅག་འཁོར་བའི་ཉོན་མོངས་པ་ལས་མ་ཐར་ན་དེ་བཞིན་གཤེགས་པ་བདེ་བར་ག་ལ་འགྱུར། བཅོམ་ལྡན་འདས་དཔེར་ན་སྨན་པ་ཤིན་དུ་མཁས་པ་ནི་སྨན་དཔྱད་གསང་བ་
དག་བུ་ལ་སྟོན་ཀྱི། སློབ་མ་གཞན་ལ་མི་སྟོན་ནོ། །བཅོམ་ལྡན་འདས་ཀྱང་དེ་དང་འདྲ་སྟེ། དགོངས་ཏེ་གསུངས་པའི་སྙིང་པོ་ཤིན་ཏུ་ཟབ་མོ་ཡང་འཇམ་དཔལ་འབའ་ཞིག་ལ་བསྟན་ཀྱི། བདག་ཅག་རྣམས་ལ་བསྟན་པར་མ་གྱུར་ཏོ། །

47-1-32a

དེ་བཞིན་གཤེགས་པ་ཡང་སྨན་པ་ལྟ་བུ་འབའ་ཞིག་ལ་བསྟན་ཀྱི། སློབ་མ་གཞན་ལ་མི་སྟོན་པ་ལྟར་དེ་བཞིན་གཤེགས་པ་ནི་ཆོས་ཐམས་ཅད་ལ་ཕྲག་དོག་ཏུ་མ་གྱུར་པ་ལགས་སོ། །སྨན་པ་དེས་ཀུན་ལ་འདྲ་བར་མ་
བསྟན་པ་ནི་བྱམས་སྡང་གི་སེམས་དང་བཅས་པས་གསང་སྟེ་སྟོན་པར་གྱུར་ན་དེ་བཞིན་གཤེགས་པའི་ཐུགས་ནི་བྱམས་སྡང་མི་མངའ་ན་ཅིའི་སླད་དུ་བདག་ཅག་ལ་བསྟན་པར་མ་གྱུར། བཅོམ་ལྡན་འདས་ཡུན་དུ་བཞུགས་ཤིང་
མྱ་ངན་ལས་མི་འདའ་བར་གསོལ་ལོ། །བཅོམ་ལྡན་འདས་དཔེར་ན་རྒན་པོ་འམ། གཞོན་ནུ་ཡང་རུང་ནད་ཀྱིས་སྡུག་བསྔལ་བར་གྱུར་ལ། ལམ་བཟང་པོ་སྤངས་ནས་ལམ་ཉམ་ང་བ་གཡང་ས་དང་བཅས་པ། ལམ་ངན་པར་
ཞུགས་ན་ཤིན་ཏུ་སྡུག་བསྔལ་མྱོང་བར་འགྱུར་རོ། །དེ་ལ་མི་ཞིག་གིས་མཐོང་ནས་སྙིང་བརྩེ་བས་ལམ་ཉམ་ང་བ་མེད་པ་བཟང་པོ་བསྟན་ཏོ། །བཅོམ་ལྡན་འདས་བདག་ཅག་ཀྱང་དེ་དང་འདྲ་སྟེ། དེ་ལ་གཞོན་ནུ་ཞེས་བགྱི་བ་ནི་ཆོས་
ཅན་གྱི་ལུས་མ་བསྐྱེད་པའི་དཔེའོ། །རྒན་པོ་ཞེས་བགྱི་བ་ནི་ཉོན་མོངས་པ་ཆེན་པོའི་དཔེའོ། །ན་བ་ནི་འཁོར་བ་ལས་མ་ཐར་བའི་དཔེའོ། །ལམ་གཡང་ས་དང་ལྡན་པ་ནི་སྲིད་པ་ཉི་ཤུ་ལྔ་པོའི་དཔེའོ། །བཅོམ་ལྡན་འདས་བདག་
ཅག་ལ་བདུད་རྩིའི་ལམ་ཡང་དག་པར་བསྟན་ཅིང་མྱ་ངན་ལས་མི་འདའ་བར་འཇིག་རྟེན་ན་ཡུན་དུ་བཞུགས་པར་གསོལ་ལོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ཁྱོད་དགེ་སློང་དག་བྱིས་
པ་མ་རབས་སམ། ལྷ་དང་མི་ལྟ་བུར་མྱ་ངན་དང་ངུ་བ་མ་བྱེད་པར་ཡང་དག་པར་དྲན་པ་ཉེ་བར་གཞག་པ་ལ་བརྩོན་འགྲུས་སུ་གྱིས་ཤིག །དེའི་ཚེ་ལྷ་དང་མི་དང་ལྷ་མ་ཡིན་ལ་སོགས་པས་བཅོམ་ལྡན་འདས་ཀྱིས་མ་ངུ་ཤིག་
ཅེས་བཀའ་སྩལ་པ་ཐོས་ནས་དཔེར་ན་མི་ཞིག་བུ་ཤི་ནས་བུའི་ཤིད་བཏང་མ་ཐག་ཏུ་མ་ངུ་ཤིག་ཅེས་བསྒོ་བ་དང་མཚུངས་སོ། །དེ་ནས་བཅོམ་ལྡན་འདས་ཀྱིས་འཁོར་མང་པོ་དེ་དག་ལ་ཚིགས་སུ་བཅད་དེ་བཀའ་སྩལ་པ། ཁྱེད་རྣམས་སོ་

47-1-32b

སོར་སྤྲོ་སྐྱེད་ལ། །མྱ་ངན་ཆེན་པོ་མ་བྱེད་ཅིག །སངས་རྒྱས་རྣམས་ཀྱི་ཆོས་ཉིད་ཡིན། །དེ་བས་ཅང་མི་གསུང་བར་བཞུགས། །བག་ཡོད་སྤྱོད་ལ་མོས་པར་བྱ། །ཡང་དག་དྲན་པས་སེམས་ཀྱང་སྲུང་། །ཆོས་མ་ཡིན་པ་རབ་སྤངས་ཏེ། །
སྤྲོ་བ་སྐྱེད་ལ་དགའ་བར་གྱིས། །གཞན་ཡང་དགེ་སློང་དག་ཐེ་ཚོམ་དང་སོམ་ཉིར་གྱུར་པ་ཡོད་ན། ཐམས་ཅད་ཞུ་ཞིང་དྲིས་ཤིག །སྟོང་པ་དང་སྟོང་པ་མ་ཡིན་པ་དང་། རྟག་པ་དང་མི་རྟག་པ་དང་། སྡུག་བསྔལ་བ་དང་སྡུག་བསྔལ་མ་ཡིན་པ་དང་། 
གནས་དང་གནས་མ་ཡིན་པ་དང་། སོང་བ་དང་མ་སོང་བ་དང་། འོངས་པ་དང་མ་འོངས་པ་མ་ཡིན་པ་དང་། ཐེར་ཟུག་དང་ཐེར་ཟུག་མ་ཡིན་པ་དང་། ཆད་པ་དང་རྟག་པ་དང་། སེམས་ཅན་དང་སེམས་ཅན་མ་ཡིན་པ་དང་། ཡོད་པ་དང་མེད་པ་དང་། 
བདེན་པ་དང་མི་བདེན་པ་དང་། ཡང་དག་པ་དང་ཡང་དག་པ་མ་ཡིན་པ་དང་། འགོག་པ་དང་འགོག་པ་མ་ཡིན་པ་དང་། གསང་བ་དང་མི་གསང་བ་དང་། གཉིས་དང་མི་གཉིས་པ་ལ་སོགས་པའི་ཆོས་ལ་ཐེ་ཚོམ་དུ་གྱུར་པ་ཡོད་ན། ཞུ་བའི་
སྐབས་ལ་བབ་ཀྱིས་དྲིས་ཤིག་དང་། ཅི་དང་ཅི་དྲིས་པ་དེའི་ཐེ་ཚོམ་བཅད་དོ། །ཁྱེད་ལ་སྔར་བདུད་རྩི་ལྟ་བུའི་ཆོས་བསྟན་ཏེ། གདོད་ཡོངས་སུ་མྱ་ངན་ལས་འདའ་བར་བྱའོ། །དགེ་སློང་དག་སངས་རྒྱས་འཇིག་རྟེན་དུ་གཤེགས་པ་
ཡང་ཤིན་ཏུ་དཀོན། མིའི་ལུས་ཐོབ་པ་ཡང་ཤིན་ཏུ་དཀའ། སངས་རྒྱས་དང་ཕྲད་ཅིང་དད་པ་སྐྱེད་པ་ཡང་ཤིན་ཏུ་དཀའ། བཟོད་དཀའ་བ་བཟོད་པ་ཡང་ཤིན་དུ་དཀའ། ཚུལ་ཁྲིམས་རྫོགས་ཤིང་མ་གོད་མ་ཉམས་ཏེ། དགྲ་བཅོམ་
པའི་འབྲས་བུ་ཐོབ་པ་ཡང་ཤིན་དུ་དཀའ་སྟེ། ས་ལེ་སྦྲམ་འམ་མེ་ཏོག་ཨུ་དུམ་བ་ར་ཚོལ་བ་བཞིན་ནོ། །དགེ་སློང་དག་མི་ཁོམ་པ་བརྒྱད་དང་བྲལ་ཏེ། མིའི་ལུས་ཐོབ་པར་དཀའ་བ་ཐོབ་ནས་ང་དང་ཕྲད་པར་གྱུར་ན་དོན་མེད་པར་ཆུད་མི་གསན་ཏོ། །ང་སྔོན་
དཀའ་བ་རྣམ་པ་སྣ་ཚོགས་སྤྱད་པས་ད་ལྟར་འདི་ལྟ་བུའི་བླ་ན་མེད་པའི་ཐབས་མཁས་པ་དང་ལྡན་པར་གྱུར་ཏོ། །ཁྱེད་ལ་སོགས་པའི་ཕྱིར་བསྐལ་པ་ཚད་མེད་པའི་བར་དུ་ལུས་ཀྱི་ཡན་ལག་ལག་པ་དང་རྐང་པ་དང་། མགོ་དང་། མིག་དང་། རྐང་དང་། 

47-1-33a

གླད་པ་ཡང་ཡོངས་སུ་བཏང་ངོ་། །དེ་བས་ན་ཁྱེད་རྣམས་བག་མེད་པར་མི་བྱའོ། །དགེ་སློང་དག་ཇི་ལྟར་ན་ཡང་དག་པའི་ཆོས་ཀྱི་རིན་པོ་ཆེའི་མཁར་བརྒྱན་ཅིང་ཡོན་ཏན་རིན་པོ་ཆེ་རྣམ་པ་སྣ་ཚོགས་དང་ལྡན་ཞིང་། ཚུལ་
ཁྲིམས་དང་ཏིང་ངེ་འཛིན་དང་། ཤེས་རབ་ཀྱི་ར་བ་དང་། འོབས་དང་ཉེན་ལྟ་བུར་འགྱུར་བར་བྱ་བ་སོམས་ཤིག །ཁྱེད་སངས་རྒྱས་ཀྱི་ཆོས་རིན་པོ་ཆེའི་མཁར་ལྟ་བུ་དང་ཕྲད་པའི་འོག་ཏུ། ཡང་དག་པ་མ་ཡིན་པ་སྒྱུ་དང་བཅས་པ་
ལེན་པའི་མི་རིགས་སོ། །དཔེར་ན་ཚོང་དཔོན་དག་རིན་པོ་ཆེ་ཡང་དག་པའི་གླིང་དུ་ཕྱིན་ན། གྱོ་མོ་དང་རྡོ་བ་བླངས་ཏེ་ཕྱིར་ཁྱིམ་དུ་འོངས་པ་འདྲ་བར་ཁྱེད་ཀྱང་དེ་དང་འདྲ་སྟེ། རིན་པོ་ཆེའི་གླིང་དུ་ཕྱིན་ནས་རྫས་སྒྱུ་མ་དག་ལེན་ཏོ། །
དགེ་སློང་དག་ཞུམ་པའི་བསམ་པས་ཆོག་པའི་སེམས་མ་སྐྱེད་ཅིག །ཁྱེད་རྣམས་རབ་ཏུ་བྱུང་མོད་ཀྱི། ཐེག་པ་ཆེན་པོ་ལ་མོས་པར་མི་བྱེད་དོ། །དགེ་སློང་དག་ཁ་དོག་བསྒྱུར་བའི་གོས་ངུར་སྨྲིག་གྱོན་མོད་ཀྱི། སེམས་ནི་
ཐེག་པ་ཆེན་པོ་ཡོངས་སུ་དག་པའི་ཆོས་ལ་ཞེན་པར་མ་གྱུར་ཏོ། །དགེ་སློང་དག་བསོད་སྙོམས་ལ་ཞུགས་ཏེ་ཀུན་ཏུ་རྒྱུ་མོད་ཀྱི། ཐེག་པ་ཆེན་པོའི་ཆོས་ཀྱི་ཟས་མ་མྱོང་ངོ་། །དགེ་སློང་དག་སྐྲ་དང་ཁ་སྤུ་བྲེགས་མོད་ཀྱི། 
ཡང་དག་པའི་ཆོས་ཀྱི་ཀུན་ནས་ཉོན་མོངས་པ་མེད་པར་མ་བྱས་སོ། །དགེ་སློང་དག་དེང་ཐམས་ཅད་ཚོགས་པ་འདིར་ཡང་དག་པར་གསུང་གིས་ཁྱེད་ལ་སྟོན་ཏོ། །དེ་བཞིན་གཤེགས་པའི་ཆོས་རྣམས་ཀྱི་མཚན་ཉིད་ནི་ཡང་
དག་པ་སྟེ། ཕྱིན་ཅི་མ་ལོག་པའོ། །དེ་བས་ན་ཁྱེད་རྣམས་དཔའ་ཞིང་རྟུལ་ཕོད་པའི་སེམས་ཀྱིས་ཀུན་ནས་ཉོན་མོངས་པ་གཞོམ་པ་ལ་བརྩོན་པར་གྱིས་ཤིག །སྟོབས་བཅུ་དང་ལྡན་པའི་ཡེ་ཤེས་ཀྱི་ཉི་མ་ནུབ་པར་གྱུར་ན་ཁྱེད་རྣམས་
ཀྱང་མ་རིག་པས་ཁེབས་པར་འགྱུར་རོ། །དགེ་སློང་དག་དཔེར་ན་ས་ཆེན་པོ་དང་རི་ལ་སྐྱེས་པའི་རྩི་ཤིང་ནི་སེམས་ཅན་རྣམས་ཀྱི་དགོས་པར་འགྱུར་རོ། །ངའི་ཆོས་ཀྱང་དེ་དང་འདྲ་སྟེ། ཤིན་དུ་དགེ་བའི་བདུད་རྩི་ལྟ་བུའི་ཆོས་ཀྱི་རོ་ཡང་སྐྱེ་ལ། སེམས་ཅན་གྱི་

47-1-33b

ཉོན་མོངས་པའི་ནད་རྣམ་པ་སྣ་ཚོགས་ཀྱི་སྨན་ཏུ་ཡང་འགྱུར་རོ། །ངས་དེང་འདིར་སེམས་ཅན་ཐམས་ཅད་དང་ངའི་སྲས་སུ་གྱུར་པ་འཁོར་རྣམ་པ་བཞི་ཡང་དགོངས་ཏེ་གསུངས་པའི་སྙིང་པོ་ལ་བདེ་བར་དགོད་ཅིང་ང་དེ་ལ་བདེ་བར་གནས་ནས་
ཡོངས་སུ་མྱ་ངན་ལས་འདའོ། །དེ་ལ་དགོངས་ཏེ་གསུངས་པའི་སྙིང་པོ་ཞེས་བྱ་བ་གང་ཞེ་ན། དཔེར་ན་ཡི་གེ་ཨི་ལྟ་བུ་ཐིག་ལེ་གསུམ་ཐད་གར་བཞག་གམ། དངར་ན་ཨིར་མི་འགྱུར་གྱི། དབང་སྒྱུར་ཆེན་པོའི་མིག་ལྟ་བུར་ཕོ་
གསུམ་དུ་བཞག་ན་ཨིར་འགྱུར་ཏེ། ཐིག་ལེ་གསུམ་སོ་སོར་ཕྲལ་བ་ལས་ཀྱང་མ་ཡིན་ནོ། །ང་ཡང་དེ་དང་འདྲ་སྟེ། རྣམ་པར་གྲོལ་བའི་ཆོས་ཀྱང་མྱ་ངན་ལས་འདའ་བ་མ་ཡིན། དེ་བཞིན་གཤེགས་པའི་སྐུ་ཡང་མྱ་ངན་ལས་འདའ་བ་
མ་ཡིན། ཤེས་རབ་ཀྱི་ཕ་རོལ་ཏུ་ཕྱིན་པ་ཡང་མྱ་ངན་ལས་འདའ་བ་མ་ཡིན། ཆོས་གསུམ་པོ་སོ་སོར་ཕྲལ་བ་ལས་ཀྱང་མྱ་ངན་ལས་འདའ་བ་ཡང་མ་ཡིན་ཏེ། ང་ནི་ཆོས་གསུམ་པོ་འདི་ལ་གནས་ནས་སེམས་ཅན་གྱི་ཕྱིར་མྱ་ངན་ལས་
འདའ་བ་ཞེས་བྱ་སྟེ། ཇི་ལྟར་འཇིག་རྟེན་ན་ཡི་གེ་ཨི་ཞེས་གྲགས་པ་བཞིན་ནོ། །དེའི་ཚེ་ན་དགེ་སློང་རྣམས་སངས་རྒྱས་བཅོམ་ལྡན་འདས་ངེས་པར་ཡོངས་སུ་མྱ་ངན་ལས་འདའོ་ཞེས་གསུངས་པ་ཐོས་ནས་ཤིན་དུ་མི་དགའ་སྟེ། 
ལུས་ཀྱི་བ་སྤུ་ཐམས་ཅད་ལངས་ནས་མིག་མཆི་མས་གང་བཞིན་དུ་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་ལན་གྲངས་མེད་པར་བསྐོར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ལེགས་པར་གསུངས་སོ། །བཅོམ་ལྡན་འདས་དཔེར་ན་འགྲོ་བ་ཐམས་ཅད་ཀྱི་རྗེས་ཀྱི་ནང་ན། བལ་གླང་གི་རྗེས་མཆོག་གོ། །མི་རྟག་པའི་འདུ་ཤེས་ཀྱང་དེ་དང་འདྲ་
སྟེ། འདུ་ཤེས་ཐམས་ཅད་ཀྱི་ནང་ན་མཆོག་གོ། །གང་ཞིག་དེ་ལ་བརྩོན་འགྲུས་སུ་ནན་ཏན་བགྱིད་ན་འདོད་པའི་ཁམས་ཀྱི་འདོད་པ་ཐམས་ཅད་དང་། གཟུགས་དང་གཟུགས་མེད་པའི་འདོད་པ་དང་། མ་རིག་པ་དང་ང་རྒྱལ་དང་། མི་རྟག་པའི་འདུ་ཤེས་

47-1-34a

ཐམས་ཅད་ཀྱང་མ་མཆིས་པར་བགྱིད་དོ། །བཅོམ་ལྡན་འདས་གལ་ཏེ་དེ་བཞིན་གཤེགས་པ་མི་རྟག་པའི་འདུ་ཤེས་དང་བྲལ་ན། ད་ཡོངས་སུ་མྱ་ངན་ལས་འདའ་བར་གཤེགས་པར་མི་རིགས་སོ། །ཅི་སྟེ་མ་བྲལ་ན་ཅིའི་སླད་
དུ་མི་རྟག་པ་ལ་ནན་ཏན་བགྱིས་ནས་ཁམས་གསུམ་གྱི་འདོད་པ་དང་། མ་རིག་པ་དང་། ང་རྒྱལ་དང་། མི་རྟག་པའི་འདུ་ཤེས་དང་བྲལ་བར་འགྱུར་རོ་ཞེས་གསུངས། བཅོམ་ལྡན་འདས་དཔེར་ན་ཞིང་པ་དག་ནི་སྟོན་གྱི་དུས་སུ་ཞིང་རྨོས་
ནས་ཞིང་གི་ངོ་ཡུར་མ་ཡོངས་སུ་སེལ་ཏོ། །མི་རྟག་པའི་འདུ་ཤེས་ཀྱང་དེ་དང་འདྲ་སྟེ། འདོད་པའི་ཁམས་ཀྱི་འདོད་པ་དང་། གཟུགས་དང་གཟུགས་མ་མཆིས་པའི་འདོད་པ་དང་། མ་རིག་པ་དང་། ང་རྒྱལ་དང་མི་རྟག་པའི་འདུ་ཤེས་ཀྱི་
བར་དུ་སེལ་ཏོ། །བཅོམ་ལྡན་འདས་དཔེར་ན་ཞིང་རྨོ་བའི་ནང་ན་སྟོན་ལོག་བཏབ་པ་བཟང་ངོ་། །རྗེས་ཐམས་ཅད་ཀྱི་ནང་ན་བལ་གླང་གི་རྗེས་མཆོག་གོ། །འདུ་ཤེས་ཐམས་ཅད་ཀྱི་ནང་ན་ཡང་མི་རྟག་པ་མཆོག་གོ། །བཅོམ་
ལྡན་འདས་དཔེར་ན་རྒྱལ་པོ་ཆེན་པོ་ནི་མགུམ་པའི་དུས་བགྱིད་པ་ན། སྔར་མཐའ་བཞིར་ཤོ་བཏང་ནས་བཙོན་ཐམས་ཅད་ཐར་པའི་འོག་ཏུ་ཚེའི་བྱ་བ་བགྱིད་དོ། །དེ་བཞིན་གཤེགས་པ་ཡང་དེ་དང་འདྲ་བར་སེམས་ཅན་ཐམས་
ཅད་ཤེས་རབ་མེད་པའི་མ་རིག་པས་ཡོངས་སུ་ཁེབས་པ་ལས་བསྒྲལ་ཏེ་ཐར་བར་མཛད་ནས། གདོད་མྱ་ངན་ལས་འདའ་བར་གཤེགས་པའི་རིགས་ཀྱི། བདག་ཅག་མ་བསྒྲལ་བར་ཅིའི་སླད་དུ་དེ་བཞིན་གཤེགས་པས་
བདག་ཅག་ཡོངས་སུ་བཏང་སྟེ། ཡོངས་སུ་མྱ་ངན་ལས་འདའ་བར་གཤེགས། བཅོམ་ལྡན་འདས་དཔེར་ན་མི་ཞིག་ཡི་དགས་ཀྱིས་བརླམས་ཏེ། སྔགས་མཁན་དང་ཕྲད་ན། སྔགས་ཀྱི་མཐུས་དེ་ལས་ཐར་བར་འགྱུར་རོ། །
དེ་བཞིན་གཤེགས་པ་ཡང་དེ་དང་འདྲ་སྟེ། ཉན་ཐོས་རྣམས་ཀྱིས་མ་རིག་པའི་ཡི་དགས་བསལ་ཅིང་ཤེས་རབ་ཀྱི་ཕ་རོལ་ཏུ་ཕྱིན་པ་དང་། རྣམ་པར་གྲོལ་བ་ལ་སོགས་པའི་ཆོས་ལ་བདེ་བར་དགོད་པ་ནི་ཇི་ལྟར་འཇིག་རྟེན་ན་ཡི་གེ་ཨི་

47-1-34b

ཞེས་གྲགས་པ་བཞིན་ནོ། །བཅོམ་ལྡན་འདས་དཔེར་ན་སྤོས་ཀྱི་གླང་པོ་ཆེ་ནི་མིས་བཅིངས་ན་འདུལ་མཁས་པའི་མཁན་པོ་མཆིས་ཀྱང་མི་ཐུལ་ཏེ། བཅིངས་པའི་ཐག་པ་བཅད་ནས་ཡིད་བཞིན་དུ་མཆིའོ། །དེ་ལྟར་བདག་ནི་ཉོན་
མོངས་པ་ལྔ་བཅུ་རྩ་བདུན་གྱིས་བཅིངས་པ་ལས་མ་གྲོལ་ན་ཅིའི་སླད་དུ་དེ་བཞིན་གཤེགས་པས་ཡོངས་སུ་བཏང་སྟེ་མྱ་ངན་ལས་འདའ་བར་གཤེགས། བཅོམ་ལྡན་འདས་དཔེར་ན་ཚ་བའི་ནད་ཀྱིས་བཏབ་པ་ནི་སྨན་པ་མཁས་པ་
དང་ཕྲད་ན་དེ་མ་ཐག་ཏུ་འཚོའོ། །བདག་ཀྱང་དེ་དང་འདྲ་ན་ལོག་པར་འཚོ་བའི་ཚ་བའི་ནད་མང་པོས་སྡུག་བསྔལ་བར་གྱུར་ཏེ། དེ་བཞིན་གཤེགས་པ་དང་མཇལ་ཀྱང་ནད་མ་བྱང་སྟེ། བླ་ན་མེད་པའི་བདེ་བ་རྟག་པ་ཡང་མ་ཐོབ་
ན། ཅིའི་སླད་དུ་དེ་བཞིན་གཤེགས་པས་ཡོངས་སུ་སྤངས་ཏེ། མྱ་ངན་ལས་འདའ་བར་གཤེགས། བཅོམ་ལྡན་འདས་དཔེར་ན་མི་ར་རོ་བ་ནི་མི་དྲན་པས་ན་ཉེ་རིང་མི་ཤེས་ཏེ། མ་དང་བུ་མོ་དང་། སྲིང་མོ་ལ་མི་འོས་མི་རིགས་པ་བྱེད་ཅིང་
བག་མ་མཆིས་པར་སྨྲས་ཏེ། མི་གཙང་བའི་སྟེང་ན་ཉལ་ལོ། །དེ་ལ་སྨན་པ་མཁས་པས་སྨན་བཏང་སྟེ། ཆང་འཐུངས་པ་སླར་སྐྱུགས་ན། དེ་མ་ཐག་ཏུ་དྲན་ཏེ་འཛེམ་པ་དང་ངོ་ཚ་བའི་སེམས་སྐྱེས་ནས། ཆང་ནི་སྡིག་པ་མི་དགེ་བ་
ཐམས་ཅད་ཀྱི་རྩ་བ་ཡིན་ཏེ། གང་གིས་ཡོངས་སུ་སྤངས་ན། སྡིག་པ་ཐམས་ཅད་ཀྱང་སྤོང་བར་འགྱུར་རོ་ཞེས་འགྱོད་པ་སྐྱེའོ། །བཅོམ་ལྡན་འདས་བདག་ཅག་ཀྱང་དེ་དང་འདྲ་སྟེ། ཐོག་མ་མ་མཆིས་པའི་དུས་ནས་འཁོར་བར་
འཁོར་ཏེ། འདོད་པས་མྱོས་ནས་འདོད་པ་ལྔ་ལ་ཆགས་པས་མ་མ་ལགས་པ་ལ་མར་འདུ་ཤེས། སྲིང་མོ་མ་ལགས་པ་ལ་སྲིང་མོར་འདུ་ཤེས། བུ་མོ་མ་ལགས་པ་ལ་བུ་མོར་འདུ་ཤེས་སེམས་ཅན་མ་ལགས་པ་ལ་སེམས་
ཅན་དུ་འདུ་ཤེས་བསྐྱེད་པས་འཁོར་བར་འཁོར་ཏེ། སྡུག་བསྔལ་མྱོང་བ་ནི་ཇི་ལྟར་མི་ར་རོ་བ་ངན་སྐྱུགས་ཀྱི་སྟེང་ན་ཉལ་བ་བཞིན་ནོ། །དེ་བཞིན་གཤེགས་པས་ཀྱང་བདག་ལ་ཆོས་ཀྱི་སྨན་བཏང་ནས་ཉོན་མོངས་པའི་ཆང་

47-1-35a

སླར་སྐྱུགས་མོད་ཀྱི། ལེགས་པར་མ་སངས་པར་ཅིའི་སླད་དུ་དེ་བཞིན་གཤེགས་པས་ཡོངས་སུ་སྤངས་ཏེ་མྱ་ངན་ལས་འདའ་བར་གཤེགས། བཅོམ་ལྡན་འདས་དཔེར་ན་གང་ཟག་གཅིག་ཤིང་ཆུ་ཤིང་ལ་སྲ་ཞིང་སྙིང་པོ་
ཡོད་དོ་ཞེས་སྟོན་ན། དེ་ནི་གནས་མ་ལགས་སོ། །བཅོམ་ལྡན་འདས་སོ་སོའི་སྐྱེ་བོ་དག་ཀྱང་དེ་དང་འདྲ་སྟེ། བདག་དང་། གང་ཟག་དང་། སེམས་ཅན་དང་། འཚོ་བ་དང་། ཤེད་ཅན་དང་། ཤེད་བདག་དང་། ཤེས་པ་དང་། མཐོང་བ་དང་། 
བྱ་བ་དང་། བྱེད་པ་པོ་ལ་ཡང་དག་པ་བདེན་པའོ། ཞེས་སྟོན་ན། དེ་ཡང་གནས་མ་ལགས་སོ། །བདག་ཅག་ཀྱང་དེ་ལྟར་བདག་མ་མཆིས་པ་ལ་ནན་ཏན་བགྱིད་དོ། །བཅོམ་ལྡན་འདས་དཔེར་ན་སྦྲང་མ་ནི་ཅིར་ཡང་མི་དགོས་ཏེ། 
ལུས་ཀྱང་དེ་དང་འདྲ་བར་བདག་མ་མཆིས། བདག་པོ་མ་མཆིས་སོ། །བཅོམ་ལྡན་འདས་མེ་ཏོག་མདབ་མ་བདུན་པ་ལ་དྲི་བསུང་མ་མཆིས་པ་དང་འདྲ་བར་ལུས་འདི་ལ་ཡང་བདག་མ་མཆིས། བདག་པོ་མ་མཆིས་ཏེ། བདག་ཅག་
ཀྱང་དེ་ལྟ་བུའི་སེམས་ཀྱིས་བདག་མ་མཆིས་པའི་འདུ་ཤེས་ལ་ནན་ཏན་བགྱིད་དོ། །བཅོམ་ལྡན་འདས་ཀྱིས་གསུངས་པ་ལྟར་ཆོས་ཐམས་ཅད་ལ་བདག་དང་བདག་གི་བ་མ་མཆིས་ཏེ། དགེ་སློང་དག་དེ་ལྟ་བུའི་ཚུལ་དུ་ནན་ཏན་
གྱིས་ཤིག །དེ་ལྟ་བུར་ནན་ཏན་བྱས་ན། ང་རྒྱལ་ཡོངས་སུ་སྤོང་བར་འགྱུར་རོ་ཞེས་གསུངས་པ་ལྟར། བདག་ཅག་གིས་ང་རྒྱལ་སྤངས་ནས་མྱ་ངན་ལས་འདའ་བར་གཤེགས་སུ་གསོལ་ལོ། །བཅོམ་ལྡན་འདས་དཔེར་ན་ནམ་
མཁའ་ལ་འཕུར་བའི་བྱའི་རྗེས་ནི་མངོན་དུ་སྣང་བའི་གནས་མ་མཆིས་སོ། །གང་བདག་མ་མཆིས་པ་ལ་ནན་ཏན་བགྱིད་པ་ནི་ལྟ་བ་རྣམས་མཆིས་ཤེས་བགྱི་བའི་གནས་མ་མཆིས་སོ། །དེ་ནས་བཅོམ་ལྡན་འདས་ཀྱིས་དགེ་སློང་
རྣམས་ལ་བཀའ་སྩལ་པ། ལེགས་སོ་ཤིན་ཏུ་ལེགས་སོ། །ཁྱེད་རྣམས་ཀྱིས་བདག་མེད་པའི་འདུ་ཤེས་ལེགས་པར་བསྒོམས་སོ། །དེ་ནས་དགེ་སློང་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་

47-1-35b

ལྡན་འདས་བདག་ཅག་ནི་བདག་མ་མཆིས་པའི་འདུ་ཤེས་ལ་ནན་ཏན་བགྱིད་པར་མ་བས་ཀྱི། དེ་མ་ལགས་པ་གཞན་ཡང་སྡུག་བསྔལ་བར་འདུ་ཤེས་པ་དང་། སྟོང་པ་དང་། མི་རྟག་པ་དང་། བདག་མ་མཆིས་པར་འདུ་ཤེས་པ་ལ་ཡང་
ནན་ཏན་བགྱིད་དོ། །བཅོམ་ལྡན་འདས་དཔེར་ན་མི་ར་རོ་བ་ནི་སེམས་མྱོས་པར་གྱུར་པས་རི་དང་ཆུ་དང་། བྲག་དང་། ཤིང་དང་། ཁང་ཁྱིམ་དང་། ཉི་ཟླ་དང་། སྐར་མའི་བར་དུ་འཁོར་བ་སྙམ་བགྱིད་དེ། བཅོམ་ལྡན་འདས་གང་
སྡུག་བསྔལ་བ་དང་། མི་རྟག་པ་དང་། བདག་མ་མཆིས་པའི་འདུ་ཤེས་ལ་སོགས་པ་ལ་ནན་ཏན་མི་བགྱིད་ན། གང་ཟག་དེ་ནི་འཕགས་པ་ཞེས་མི་བགྱི་སྟེ། བག་མ་མཆིས་པས་འཁོར་བར་ཡོངས་སུ་འཁོར་རོ། །བཅོམ་
ལྡན་འདས་དེ་བས་ན་བདག་ཅག་ནི་འདུ་ཤེས་དེ་དག་ལ་ཤིན་དུ་ནན་ཏན་བགྱིད་དོ། །དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག །ཁྱེད་ཀྱིས་མི་ར་རོ་བ་ལ་དཔེ་
བླངས་པ་ནི་ཚིག་དང་འབྲུ་ཙམ་ཤེས་པར་ཟད་ཀྱི། དོན་ནི་མ་རྟོགས་སོ། །དེ་ལ་དོན་ཞེས་བྱ་བ་གང་ཞེ་ན། དཔེར་ན་མི་ར་རོ་བས་ཉི་ཟླ་ལ་སོགས་པ་མི་འཁོར་བར་འཁོར་བར་འདུ་ཤེས་པ་དང་འདྲ་བར་སོ་སོའི་སྐྱེ་བོ་ཡང་དེ་དང་འདྲ་སྟེ། 
ཀུན་ནས་ཉོན་མོངས་པའི་མ་རིག་པས་ཡོངས་སུ་ཁེབས་པས་ན་ཕྱིན་ཅི་ལོག་གི་སེམས་བསྐྱེད་དེ། བདག་ལ་བདག་མེད་པར་འདུ་ཤེས་རྟག་པ་ལ་མི་རྟག་པར་འདུ་ཤེས། ཡོངས་སུ་དག་པ་ལ་ཡོངས་སུ་མ་དག་པར་འདུ་ཤེས། བདེ་བ་
ལ་སྡུག་བསྔལ་བར་འདུ་ཤེས་ཏེ། ཀུན་ནས་ཉོན་མོངས་པས་ཡོངས་སུ་ཁེབས་པས་དེ་དང་འདྲ་བར་འདུ་ཤེས་མོད་ཀྱི། དོན་ཁོང་དུ་མ་ཆུད་པས་མི་ར་རོ་བ་དེ་འཁོར་བའི་གནས་མ་ཡིན་པ་ལ་འཁོར་བར་འདུ་ཤེས་བསྐྱེད་པ་བཞིན་ནོ། །
བདག་ཅེས་བྱ་བ་ནི་སངས་རྒྱས་ཞེས་བྱ་བའི་དོན་ནོ། །རྟག་པ་ནི་ཆོས་ཀྱི་སྐུ་ཞེས་བྱ་བའི་དོན་ནོ། །བདེ་བ་ནི་མྱ་ངན་ལས་འདས་པ་ཞེས་བྱ་བའི་དོན་ནོ། །ཡོངས་སུ་དག་པ་ནི་ཆོས་ཞེས་བྱ་བའི་དོན་ཡིན་ན། ཅིའི་ཕྱིར་དགེ་སློང་

47-1-36a

ཁྱེད་བདག་ཏུ་འདུ་ཤེས་པ་ནི་ང་རྒྱལ་ཅན་ཡིན་ཏེ། འཁོར་བ་ན་འཁོར་རོ་ཞེས་སྨྲ། ཁྱེད་སྨྲ་བ་ལྟར་ན་བདག་ཅག་ཀྱང་མི་རྟག་པ་དང་། སྡུག་བསྔལ་བ་དང་། བདག་མེད་པའི་འདུ་ཤེས་ལ་ནན་ཏན་བྱེད་དོ་ཞེས་བྱ་བ་ནི་ཡང་
དག་པར་དོན་མེད་དོ། །ནན་ཏན་བྱེད་པ་གསུམ་པོ་དེ་ལ་ཡང་དག་པའི་དོན་མེད་པས་དེ་མ་ཡིན་པ་ནན་ཏན་བྱེད་པའི་ཆོས་གསུམ་པོ་ལས་ལྷག་པ་ངས་བཤད་པར་བྱའོ། །སྡུག་བསྔལ་ལ་བདེ་བར་འཛིན་པ་དང་། བདེ་བ་ལ་
སྡུག་བསྔལ་དུ་འཛིན་པ་ནི་ཕྱིན་ཅི་ལོག་གི་ཆོས་སོ། །མི་རྟག་པ་ལ་རྟག་པར་འཛིན་པ་དང་། རྟག་པ་ལ་མི་རྟག་པར་འཛིན་པ་ནི་ཕྱིན་ཅི་ལོག་གི་ཆོས་སོ། །བདག་མེད་པ་ལ་བདག་ཏུ་འཛིན་པ་དང་། བདག་ལ་བདག་མེད་
པར་འཛིན་པ་ནི་ཕྱིན་ཅི་ལོག་གི་ཆོས་སོ། །ཡོངས་སུ་མ་དག་པ་ལ་དག་པར་འཛིན་པ་དང་། ཡོངས་སུ་དག་པ་ལ་ཡོངས་སུ་མ་དག་པར་འཛིན་པ་ནི་ཕྱིན་ཅི་ལོག་གི་ཆོས་སོ། །ཕྱིན་ཅི་ལོག་གི་ཆོས་རྣམ་པ་བཞི་པོ་འདི་ནི་
ཡང་དག་པར་ཇི་ལྟ་བུར་ནན་ཏན་བྱ་བ་གང་ཟག་གིས་མི་ཤེས་སོ། །དགེ་སློང་དག་སྡུག་བསྔལ་གྱི་ཆོས་ལ་བདེ་བར་འདུ་ཤེས་སྐྱེད་ཅིག །མི་རྟག་པ་ལ་རྟག་པར་འདུ་ཤེས་སྐྱེད་ཅིག །བདག་མེད་པ་ལ་བདག་ཏུ་འདུ་ཤེས་
སྐྱེད་ཅིག །ཡོངས་སུ་མ་དག་པ་ལ་དག་པར་འདུ་ཤེས་སྐྱེད་ཅིག །འཇིག་རྟེན་ན་ཡང་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཡོད་དོ། །འཇིག་རྟེན་ལས་འདས་པ་ལ་ཡང་རྟག་པ་དང་། བདེ་བ་དང་། 
བདག་དང་། ཡོངས་སུ་དག་པ་ཡོད་དོ། །འཇིག་རྟེན་གྱི་ཆོས་ནི་བརྗོད་དུ་ཡོད་ལ་དོན་མེད་པའོ། །འཇིག་རྟེན་ལས་འདས་པ་ནི་བརྗོད་དུ་ཡང་ཡོད་ལ། དོན་ཡང་ཡོད་དོ། །དེ་ཅིའི་ཕྱིར་ཞེ་ན། འཇིག་རྟེན་གྱི་ཆོས་
ནི་ཕྱིན་ཅི་ལོག་བཞི་དང་བཅས་པས་དོན་མི་རྟོགས་སོ། །དེ་ཇི་ལྟ་ཞེ་ན་འདུ་ཤེས་ཕྱིན་ཅི་ལོག་དང་། སེམས་ཕྱིན་ཅི་ལོག་དང་། ལྟ་བ་ཕྱིན་ཅི་ལོག་དང་། ཕྱིན་ཅི་ལོག་གསུམ་གྱིས་འཇིག་རྟེན་པ་ནི་བདེ་བ་ལ་སྡུག་བསྔལ་

47-1-36b

དུ་ལྟ། རྟག་པ་ལ་མི་རྟག་པར་ལྟ། བདག་ལ་བདག་མེད་པར་ལྟ། ཡོངས་སུ་དག་པ་ལ་ཡོངས་སུ་མ་དག་པར་ལྟ་སྟེ། ཕྱིན་ཅི་ལོག་ཅེས་བྱའོ། །ཕྱིན་ཅི་ལོག་པས་ན་འཇིག་རྟེན་པས་ནི་ཚིག་ཏུ་སྨྲ་བ་ཤེས་ཀྱི། དོན་མི་ཤེས་སོ། །དེ་ལ་དོན་ཞེས་
བྱ་བ་གང་ཞེ་ན། བདག་མེད་པ་ནི་འཁོར་བ་ཞེས་བྱའོ། །བདག་ཅེས་བྱ་བ་ནི་དེ་བཞིན་གཤེགས་པའོ། །མི་རྟག་པ་ནི་ཉན་ཐོས་དང་རང་སངས་རྒྱས་སོ། །རྟག་པ་ནི་དེ་བཞིན་གཤེགས་པའི་ཆོས་ཀྱི་སྐུའོ། །སྡུག་བསྔལ་བ་ནི་མུ་
སྟེགས་ཅན་ཐམས་ཅད་དོ། །བདེ་བ་ནི་ཡོངས་སུ་མྱ་ངན་ལས་འདས་པའོ། །ཡོངས་སུ་མ་དག་པ་ནི་འདུས་བྱས་པའི་ཆོས་སོ། །ཡོངས་སུ་དག་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཡང་དག་པའི་ཆོས་ཡིན་ཏེ། 
དེ་བས་ན་ཕྱིན་ཅི་མ་ལོག་པ་ཞེས་བྱའོ། དེ་ལྟར་ན་ཕྱིན་ཅི་མ་ལོག་པས་ཚིག་ཏུ་རྗོད་པ་ཡང་ཤེས་ལ་དོན་ཡང་ཤེས་སོ། །གང་ཞིག་ཕྱིན་ཅི་ལོག་བཞི་པོ་ཡོངས་སུ་སྤོང་བར་འདོད་ན། དེ་ལྟ་བུའི་ཚུལ་དུ་རྟག་པ་དང་། བདེ་བ་དང་བདག་
དང་། ཡོངས་སུ་དག་པར་རིག་པར་བྱའོ། །དེ་ནས་དགེ་སློང་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར། ཕྱིན་ཅི་ལོག་བཞི་རྟོགས་པས་རྟག་པ་དང་། བདེ་བ་དང་། 
བདག་དང་། ཡོངས་སུ་དག་པ་ཁོང་དུ་ཆུད་ཅེས་གསུངས་ན། དེ་བཞིན་གཤེགས་པ་ནི་ཕྱིན་ཅི་ལོག་བཞི་མི་མངའ་སྟེ། རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཐུགས་སུ་ཆུད་དོ། །དེ་ལྟར་རྟག་པ་དང་། བདེ་བ་
དང་། བདག་དང་། ཡོངས་སུ་དག་པ་ཐུགས་སུ་ཆུད་ན། ཅིའི་སླད་དུ་བསྐལ་པ་གཅིག་གམ། བསྐལ་པ་ཕྱེད་ཀྱི་བར་དུ་བཞུགས་ཤིང་། བདག་ཅག་གི་ཕྱིན་ཅི་ལོག་བཞི་ཡོངས་སུ་སྤོང་བར་འགྱུར་བ་མི་སྟོན་པར་བདག་ཅག་
སྤངས་ཏེ། ཡོངས་སུ་མྱ་ངན་ལས་འདའ་བར་གཤེགས། དེ་བཞིན་གཤེགས་པས་བདག་ཅག་ལ་ཐུགས་བརྩེ་བའི་སླད་དུ་བདག་ཅག་གི་སྟོན་པར་གྱུར་ན། བདག་ཅག་ཀྱང་རྩེ་གཅིག་པའི་སེམས་ཀྱིས་སྤྱི་བོས་ལེན་ཅིང་ནན་ཏན་བགྱིད་དོ། །

47-1-37a

གལ་ཏེ་དེ་བཞིན་གཤེགས་པ་མྱ་ངན་ལས་འདའ་ན། བདག་ཅག་ཀྱང་དེ་ལྟར་གདུག་པ་ཅན་གྱི་ལུས་དང་ལྷན་ཅིག་ཏུ་གནས་ཏེ་ཚངས་པར་སྤྱད་པ་སྤྱོད། བདག་ཅག་ཀྱང་བཅོམ་ལྡན་འདས་ཀྱི་ཞབས་འབྲིང་དུ་མྱ་ངན་ལས་
འདའོ། །དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་ཡང་འདི་སྐད་ཅེས་བཀའ་སྩལ་ཏོ། །ཁྱེད་དེ་སྐད་མ་ཟེར་ཅིག །ངས་ནི་བླ་ན་མེད་པའི་ཡང་དག་པའི་ཆོས་ཐམས་ཅད་ཀྱང་འོད་སྲུང་ཆེན་པོ་ལ་གཏད་དོ། །འོད་སྲུང་ཆེན་
པོ་ནི་ཁྱེད་ཀྱི་གནས་དང་རྟེན་དུ་འགྱུར་ཏེ། ཇི་ལྟར་དེ་བཞིན་གཤེགས་པ་སེམས་ཅན་ཐམས་ཅད་ཀྱི་གནས་དང་རྟེན་དུ་གྱུར་པ་བཞིན། འོད་སྲུང་ཆེན་པོ་འདི་ཡང་ཁྱེད་ལ་སོགས་པ་ཐམས་ཅད་ཀྱི་གནས་དང་རྟེན་དུ་འགྱུར་རོ། །
དཔེར་ན་རྒྱལ་པོ་ཆེན་པོ་དབང་དང་ལྡན་པ་ཡང་བསང་དུ་འགྲོ་བ་ན། ཡུལ་གྱི་སྲིད་ཐམས་ཅད་ཀྱང་བློན་པོ་ཆེན་པོ་ལ་གཏད་དོ། །དེ་བཞིན་གཤེགས་པ་ཡང་དེ་དང་འདྲ་བར་དམ་པའི་ཆོས་ཐམས་ཅད་ཀྱང་འོད་སྲུང་ཆེན་པོ་ལ་གཏད་ཏོ། །
ཁྱེད་རྣམས་མི་རྟག་པ་དང་། སྡུག་བསྔལ་བའི་འདུ་ཤེས་ལ་ནན་ཏན་བྱེད་པ་ཡང་ཡང་དག་པ་མ་ཡིན་ནོ། །དཔེར་ན་དབྱར་གྱི་དུས་སུ་རྫིང་ཆེན་པོའི་ནང་ན་གཟིངས་ཀྱི་སྟེང་ན་རྩེ་བ་ལས་རིན་པོ་ཆེ་བཻ་དཱུརྱ་ཆུར་ལྷུང་ན། དེའི་
ཚེ་མི་མཁས་པ་ཐམས་ཅད་ཆུའི་ནང་དུ་ཞུགས་ནས། གྱོ་མོ་དང་རྡོ་བ་དང་། རྩྭ་དང་ཤིང་དང་། གསེག་མ་དག་སོ་སོ་ནས་ཕྱུང་སྟེ། རིན་པོ་ཆེ་བཻ་དཱུརྱ་རྙེད་སྙམ་ནས་དགའ་བཞིན་དུ་ཕྱིར་བྱུང་ན། གདོད་ཡང་དག་པ་མ་ཡིན་
པར་ཤེས་སོ། །དེའི་ཚེ་རིན་པོ་ཆེ་ཆུའི་ནང་ན་ཡོད་པས་རིན་པོ་ཆེའི་མཐུས་ཆུ་ཡོངས་སུ་དང་བས་ན་ཐམས་ཅད་ཀྱིས་ནོར་བུ་རིན་པོ་ཆེ་ཆུའི་གཏིང་ན་ཡོད་པར་ཤེས་ཏེ། ཇི་ལྟར་སྟེང་གི་ནམ་མཁའ་ལ་ཟླ་བ་ལྟ་བ་བཞིན་ནོ། །
དེའི་ཚེ་ན་འཁོར་དེ་དག་གི་ནང་ན་མཁས་པ་ཐབས་དང་ལྡན་པས་ནི། དལ་གྱིས་ཆུའི་ནང་དུ་ཞུགས་ནས་རིན་པོ་ཆེ་ལེན་ཏོ། །དགེ་སློང་ཁྱེད་ཀྱང་མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། ཡོངས་སུ་མ་དག་པའི་

47-1-37b

འདུ་ཤེས་ལ་ནན་ཏན་བྱེད་པ་ནི་ཇི་ལྟར་མི་མང་པོ་དག་སོ་སོ་ནས་གྱོ་མོ་དང་། རྡོ་བ་དང་། རྩྭ་དང་ཤིང་དང་། གསེག་མ་དག་ཕྱུང་ནས་ནོར་བུ་རིན་པོ་ཆེ་རྙེད་དོ་སྙམ་སེམས་པ་དང་འདྲའོ། །ཁྱེད་རྣམས་ཀྱང་ཐབས་ལ་ཤིན་ཏུ་མཁས་པར་
གང་ནས་གང་དུ་གནས་ཀྱང་བདག་ཏུ་འདུ་ཤེས་པ་དང་། རྟག་པ་དང་། བདེ་བ་དང་། ཡོངས་སུ་དག་པར་འདུ་ཤེས་པ་ལ་མཁས་པར་གྱིས་ཤིག །ཁྱེད་ཀྱིས་སྔར་ཆོས་རྣམ་པ་བཞི་པོའི་མཚན་མ་ཙམ་ལ་ནན་ཏན་བྱས་པ་ནི་ཐམས་
ཅད་ཀྱང་ཕྱིན་ཅི་ལོག་ཏུ་གྱུར་ཏོ། །འདུ་ཤེས་རྣམས་ལ་ཡང་དག་པ་ཇི་ལྟ་བ་བཞིན་དུ་ནན་ཏན་དུ་སྒོམ་པ་ན། ཇི་ལྟར་མཁས་པ་ཐབས་དང་ལྡན་པ་དེས་ནོར་བུ་རིན་པོ་ཆེ་ཕྱུང་བ་དང་འདྲ་བར་བདག་ཏུ་འདུ་ཤེས་པ་དང་། རྟག་པ་དང་། 
བདེ་བ་དང་། ཡོངས་སུ་དག་པར་འདུ་ཤེས་པ་ལ་ནན་ཏན་བྱའོ། །དེ་ནས་ཡང་དགེ་སློང་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སྔར་གསུངས་པ་ལྟར་ན། ཆོས་ཐམས་ཅད་ལ་
བདག་མེད་ཀྱིས་ཁྱེད་དེ་ལྟ་བུའི་ཚུལ་དུ་ནན་ཏན་གྱིས་ཤིག །དེ་ལྟར་ནན་ཏན་བྱས་ན། བདག་ཏུ་འདུ་ཤེས་པ་སྤོང་བར་འགྱུར་རོ། །བདག་ཏུ་འདུ་ཤེས་པ་སྤངས་ན། ང་རྒྱལ་དང་བྲལ་བར་འགྱུར་རོ། །ང་རྒྱལ་དང་བྲལ་
ན་མྱ་ངན་ལས་འདའོ་ཞེས་གསུང་བའི་དོན་ཇི་ལྟ་བུ་ལགས། དེ་ནས་བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ཤིན་ཏུ་ལེགས་སོ། །བདག་ཅག་གི་ཐེ་ཚོམ་བཅད་པའི་ཕྱིར་དོན་འདི་ལེགས་པར་དྲིས་སོ། །
འདི་ལྟ་སྟེ་དཔེར་ན་རྒྱལ་པོ་མི་མཁས་པ་ཤེས་པ་ཆུང་བ་ལ་སྨན་པ་ཡང་མི་མཁས་པ་གླེན་པ་ཞིག་ཡོད་ན། རྒྱལ་པོས་མ་རྟོགས་པས་སྨན་པ་དེ་ལ་བྱ་དགའ་ཆེར་སྩལ་ཏོ། །སྨན་པ་གླེན་པ་དེས་ནི་ནད་ཐམས་ཅད་ལ་སྨན་
དུ་འོ་མ་གཏོང་སྟེ། ནད་ཐོག་མ་ཅི་ལས་གྱུར་པ་ཡང་མི་ཤེས་ལ། སྨན་དུ་འོ་མ་གཏོང་བ་ལ་ཡང་མི་མཁས་པས། རླུང་ནད་དང་། བད་ཀན་དང་། མཁྲིས་པའི་ནད་ཐམས་ཅད་ལ་ཡང་སྨན་དུ་འོ་མ་གཏོང་སྟེ། རྒྱལ་པོས་ནི་སྨན་པ་ཉིད་ཀྱང་མ་

47-1-38a

རྟོགས་ལ་འོ་མ་བཟང་ངམ་ངན་པའི་བྱེ་བྲག་ཀྱང་མི་ཕྱེད་དོ། །དེ་ལ་སྨན་པ་མཁས་པ་རིག་པ་བརྒྱད་དང་ལྡན་པ། ནད་ཐམས་ཅད་གསོ་བ་ལ་ཤིན་ཏུ་མཁས་པ། དཔྱད་ཐམས་ཅད་ཁོང་དུ་ཆུད་པ་ཞིག་ཡུལ་གཞན་ནས་འོངས་
ན། དེའི་ཚེ་སྨན་པ་མི་མཁས་པ་དེ་མཁས་པ་དེ་ལ་འདྲི་འམ་སློབ་པར་མི་བྱེད་ཀྱི། ཕྱིར་ང་རྒྱལ་གྱི་སེམས་སྐྱེད་དོ། །དེའི་ཚེ་སྨན་པ་མཁས་པ་དེ་མི་མཁས་པ་དེ་ལ་བརྟེན་ནས་སློབ་དཔོན་དུ་བཟུང་སྟེ། སྨན་དཔྱད་གསང་བ་
དག་བསླབ་པའི་ཕྱིར་སྨན་པ་གླེན་པ་དེ་ལ་བདག་ནི་ཁྱོད་ལ་སློབ་དཔོན་དུ་གསོལ���གྱིས་དཔྱད་རྣམས་བསྟན་ཅིང་བཤད་དུ་གསོལ་ཞེས་གསོལ་བ་བཏབ་ན། སྨན་པ་གླེན་པ་དེ་མཁས་པ་དེ་ལ་འདི་སྐད་ཅེས་དམ་འཆའོ། །ཁྱོད་ཅི་སྟེ་ལོ་
བཞི་བཅུ་རྩ་བརྒྱད་ཀྱི་བར་དུ་ཁོ་བོའི་གཡོག་བྱ་ན། དཔྱད་ཐམས་ཅད་ཀྱང་བསྟན་ཏོ་ཞེས་བསྒོའོ། །དེ་ནས་སྨན་པ་མཁས་པ་དེས་མི་མཁས་པའི་ལུང་བཞིན་དུ་བགྱིའོ། །བདག་གིས་རྔོ་ཅི་ཐོག་གིས་ཁྱོད་ཀྱི་གཡོག་བགྱིའོ།། 
ཞེས་སྨྲས་སོ། །དེ་ནས་སྨན་པ་གླན་པ་དེ་སྨན་པ་གསར་པ་ཁྲིད་ནས་རྒྱལ་པོའི་ཕོ་བྲང་དུ་ཆས་སོ། །རྒྱལ་པོ་དང་ཕྲད་ནས། དེའི་ཚེ་སྨན་པ་གསར་བ་དེས་རྒྱལ་པོ་དེ་ལ་དཔྱད་རྣམ་པ་སྣ་ཚོགས་དང་། གཞན་ཡང་སྒྱུ་རྩལ་
མང་པོའི་གཏམ་དང་། ཡུལ་གྱི་སྲིད་གཟུང་བ་དང་། ནད་པ་གསོ་བའི་ཐབས་འདིའོ། །རྒྱལ་པོ་ཆེན་པོ་ཐུགས་སུ་ཆུད་པར་གྱིས་ཤིག་ཅེས་གཏམ་བྱས་སོ། །དེའི་ཚེ་རྒྱལ་པོ་དེས་དེ་སྐད་སྨྲས་པ་ཐོས་པ་དང་། 
སྨན་པ་རྙིང་པ་དེ་མི་མཁས་པར་ཤེས་ནས། ཡུལ་དེ་ནས་བསྐྲད་དོ། །དེ་ནས་ཀྱང་སྨན་པ་གསར་པ་དེ་ལ་ལྷག་པར་རིམ་གྲོ་དང་བཀུར་སྟི་སྐྱེད་དོ། །དེའི་ཚེ་སྨན་པ་གསར་པ་དེ་འདི་སྙམ་དུ་རྒྱལ་པོ་འདི་ལ་བསྟན་པའི་
དུས་ལ་བབ་བོ་སྙམ་དུ་བསམས་ནས། རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་བདག་ལ་དགོངས་པ་མད་ན། བདག་གིས་གསོལ་པ་གཅིག་གནང་བར་མཛོད་ཅིག །རྒྱལ་པོས་སྨྲས་པ། ཁོ་བོའི་ལག་

47-1-38b

པ་གཡས་པ་ནས་ལུས་ཀྱི་ཡན་ལག་ཐམས་ཅད་ཀྱི་བར་དུ་ཡིད་བཞིན་དུ་སློངས་ཤིག་དང་ཐམས་ཅད་སྦྱིན་པར་བྱའོ། །སྨན་པ་དེས་གསོལ་པ། འདི་ལྟར་རྒྱལ་པོའི་ལུས་ཀྱི་ཡན་ལག་ཐམས་ཅད་ཀྱང་བདག་འཚལ་བར་གནང་
མོད་ཀྱི། བདག་ཐུགས་མི་ཐུབ་ལ་མང་པོ་ཡང་མི་གསོལ་ན། དེང་སླན་ཆད་ཡུལ་མི་ཐམས་ཅད་ཀྱིས་སྨན་པ་རྙིང་པའི་དཔྱད་སྨན་དུ་འོ་མ་གཏོང་བ་ཤོས་བཅད་པ་དཀར་གདགས་སུ་གསོལ། དེ་ཅིའི་སླད་དུ་ཞེ་ན། སྨན་དེ་ནི་
གདུག་པ་དང་བཅས་པས་མང་དུ་འཆི་བའི་ཕྱིར་རོ། །གལ་ཏེ་སྨན་དེ་གཏོང་བ་ཡོད་ན་ཡན་ལག་མགོ་བཅད་དོ་ཞེས་བཀར་བཏགས་ནས། སྨན་འོ་མ་གཏོང་བ་ཆོད་པས་དུས་མ་ཡིན་པར་འཆི་བ་མེད་དེ། ཐམས་ཅད་བདེ་ཞིང་
སྐྱིད་པར་འགྱུར་གྱིས་བདག་གིས་གསོལ་བ་འདི་གནང་བར་མཛོད་ཅིག །དེ་ནས་རྒྱལ་པོས་སྨྲས་པ། ཁྱེད་གསོལ་བ་འདི་ཤིན་དུ་ཕན་པར་འགྱུར་བ་ཡིན་ཏེ། དེང་ཕྱིན་ཆད་ཡུལ་མི་ལས་ན་བ་ཞིག་ཡོད་ན། སྨན་འོ་མ་གཏོང་
དུ་མི་གནང་ངོ་། །གལ་ཏེ་འོ་མ་གཏོང་བ་ཞིག་ཡོད་ན། ཡན་ལག་གི་དམ་པ་མགོ་བཅད་དོ་ཞེས་བཀར་བཏགས་སོ། །དེའི་ཚེ་ན་སྨན་པ་མཁས་པ་དེ་ཚ་བ་དང་། ཁ་བ་དང་། སྐྱུར་བ་དང་། མངར་བ་དང་། མངལ་བ་ལ་སོགས་
ཏེ། རོ་རྣམ་པ་སྣ་ཚོགས་ཀྱི་སྨན་སྦྱར་ཏེ་ནད་གསོས་ན་གང་ཡང་མ་སོས་པ་མེད་དོ། །དེ་ནས་ཕྱིས་རིང་པོ་མ་ལོན་པར་རྒྱལ་པོ་དེ་ནད་ཀྱིས་བཏབ་ནས་སྨན་པ་དེ་བཀུག་སྟེ་འདི་ལྟར་ང་ནི་ནད་ཀྱིས་སྡུག་བསྔལ་བར་གྱུར་ན་
ཇི་ལྟར་གསོ་ཞེས་སྨྲས་པ་དང་། སྨན་པ་དེས་རྒྱལ་པོའི་ནད་བལྟས་ན་སྨན་དུ་འོ་མ་དགོས་པ་འདྲ་ནས། རྒྱལ་པོ་ལ་གསོལ་པ་རྒྱལ་པོའི་ནད་ཐབས་དང་སྦྱར་ན་སྨན་དུ་འོ་མ་གཏང་འཚལ་ཏེ། བདག་གིས་སྔར་སྨན་དུ་འོ་མ་གཏང་དུ་མི་
རུང་ཞེས་གསོལ་བ་བརྫུན་དུ་གྱུར་ཏེ། སྨན་དུ་འོ་མ་ལས་བཟང་བ་མ་མཆིས་ལ། རྒྱལ་པོའི་ནད་ཀྱང་ཚ་བ་ལས་གྱུར་པས། སྨན་དུ་འོ་མ་བཏང་ན་བཟང་ངོ་། །རྒྱལ་པོས་སྨྲས་པ། སྨན་པ་ཁྱོད་འོན་ཏེ་མྱོས་སམ། ཚ་བའི་ནད་ཀྱིས་བཏབ་ན་ནད་འདི་ལ་འོ་མ་ཕན་

47-1-39a

ནོ་ཞེས་སྨྲ། ཁྱོད་ཀྱིས་སྔར་འོ་མ་ལ་དུག་ཡོད་དོ་ཞེས་སྨྲས་ན། ད་ཇི་ལྟར་བཏུང་། ཁྱོད་ཀྱིས་ང་ལ་བགམ་འམ། སྨན་པ་སྔ་མས་བསྔགས་པ་ལ་དུག་ཡོད་དོ་ཞེས་པས་སྨན་པ་གཅིག་བསྐྲད་པའི་འོག་ཏུ། ད་ཡང་ན་བ་
ལ་སྨན་དུ་འོ་མ་བཟང་ངོ་ཞེས་ཁྱོད་སྨྲ་བ་དང་སྦྱར་ན། ངའི་སྨན་པ་རྙིང་པ་ནི་ཁྱོད་པས་མཁས་ངེས་སོ། །དེ་ནས་སྨན་པས་ཡང་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་དེ་སྐད་མ་གསུང་ཤིག །དཔེར་ན་སྲིན་བུ་ཤིང་ཟན་གྱི་རྗེས་
ལས་ཡི་གེར་རུང་བ་འང་ཡོད་དོ། །སྲིན་བུས་ནི་ཡི་གེ་ཡིན་ནམ་མ་ཡིན་པ་མི་ཤེས་ཀྱི། དེ་ལ་མཁས་པ་ཤེས་རབ་ཅན་གྱིས་མཐོང་ན། སྲིན་བུ་ཡི་གེ་ཤེས་སོ་ཞེས་ངོ་མཚར་དུ་མི་འཛིན་ཏོ། །རྒྱལ་པོ་ཆེན་པོ་སྨན་པ་སྔ་མ་ཡང་
དེ་དང་འདྲ་སྟེ། ནད་རྣམས་མི་རྟོགས་པས་ཐམས་ཅད་ལ་སྨན་འོ་མ་གཏོང་བ་ནི་ཇི་ལྟར་སྲིན་བུའི་རྗེས་ལས་ཡི་གེར་འགྱུར་བ་བཞིན་ཏེ། སྨན་པ་སྔ་མས་ནི་འོ་མ་བཟང་ངན་དང་། རུང་མི་རུང་ཡང་མི་ཤེས་སོ། །རྒྱལ་པོས་སྨྲས་
པ། སྨན་པ་སྔ་མས་ཇི་ལྟ་བུར་མི་ཤེས། སྨན་པས་སྨྲས་པ། སྨན་འོ་མ་ཞེས་བྱ་བ་ནི་གདུག་པ་ཡང་ལགས་ལ། བདུད་རྩི་ཡང་ལགས་སོ། །དེ་ལ་ཇི་ལྟར་ན་འོ་མ་དེ་གདུག་པ་ཡང་ཡིན་ལ། བདུད་རྩི་ཡང་ཡིན་ཞེ་ན། གལ་
ཏེ་བ་ཉིད་སྤང་མ་དང་། རྩྭ་སྦྱིན་པ་དང་། ཕུབ་མ་མ་ཟོས་ལ། བེའུ་ཡང་ཤིན་ཏུ་དུལ་ཞིང་འཚོ་བའི་ས་ཡང་རི་མཐོན་པོའི་སྟེང་མ་ཡིན་ནགས་ཁྲོད་མ་ཡིན་པ་ན་འཚོ་ཞིང་། ཆུ་ཡང་འབབ་ཆུ་དངས་མ་ལ་བླུད་དེ། དྲག་ཏུ་མི་བདའ། 
ཁྱུ་མཆོག་དང་ཁྱུ་གཅིག་ཏུ་མི་འཚོ་བར་བག་ཡངས་སུ་ཟ་ཞིང་འཐུང་ལ། འགྲོ་བ་དང་སྡོད་པ་ཡང་བག་ཡངས་སུ་འགྱུར་བའི་བའི་འོ་མ་ནི་ནད་རྣམས་ལ་ཕན་པས་བདུད་རྩི་ཞེས་བྱའོ། །དེ་མ་ཡིན་པ་ནི་ཐམས་ཅད་ཀྱང་གདུག་པ་
དང་བཅས་པ་ཞེས་བྱའོ། །དེའི་ཚེ་ན་རྒྱལ་པོ་ཆེན་པོས་དེ་སྐད་ཅེས་སྨྲས་པ་ཐོས་ནས་སྨན་པ་ལེགས་སོ། །ཤིན་ཏུ་ལེགས་པར་སྨྲས་སོ། །ད་སླན་ཆད་འོ་མ་བཟང་ངན་དང་རུང་མི་རུང་ཡང་ཤེས་སོ། །དེ་ནས་སྨན་དུ་འོ་མ་བཏང་

47-1-39b

ནས་ནད་ཀྱང་བྱང་བར་གྱུར་ཏེ། ཡུལ་མི་ཐམས་ཅད་ལ་ད་ཕྱིན་ཆད་སྨན་དུ་འོ་མ་ཐོང་ཤིག་ཅེས་བཀར་བཏགས་སོ། །ཡུལ་མི་རྣམས་ཀྱིས་དེ་སྐད་ཅེས་ཐོས་ནས་ཐམས་ཅད་གཤེ་སྟེ། རྒྱལ་པོ་ཆེན་པོ་འདི་ནི་ཡི་དགས་ཀྱིས་བརླམས་སམ། སྨྱོས་
སམ་ཅི་ཉེས་ན། བདག་ཅག་བསླུས་ཏེ། སྨན་དུ་འོ་མ་ཐོང་ཤིག་ཅེས་གསུང་། ཡུལ་མི་ཐམས་ཅད་ཁྲོས་བཞིན་དུ་རྒྱལ་པོའི་སྤྱན་སྔར་ལྷགས་སོ། །དེ་ལ་རྒྱལ་པོས་བཀའ་སྩལ་པ། ཁྱེད་ང་ལ་མ་གཤེ་ཤིག །སྨན་དུ་འོ་མ་བཏང་དུ་
རུང་ངམ་མི་རུང་བ་ནི་སྨན་པ་འདིའི་དཔྱད་ཡིན་གྱི། ངས་ནི་མ་ཉེས་སོ། །དེའི་ཚེ་རྒྱལ་པོ་ཆེན་པོ་དང་། ཡུལ་མི་ཐམས་ཅད་ཀྱང་ཤིན་ཏུ་དགའ་ཞིང་མགུ་བར་གྱུར་ནས། སྨན་པ་དེ་ལ་ལྷག་པར་རིམ་གྲོ་དང་བཀུར་སྟི་བསྐྱེད་དེ། ནད་པ་
ཐམས་ཅད་ལ་སྨན་འོ་མ་བཏང་བས་ནད་ཀྱང་བྱང་བར་གྱུར་ཏོ། །དགེ་སློང་ཁྱེད་ཀྱང་དེ་ལྟ་བུའི་ཚུལ་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། མཁྱེན་པ་དང་ཞབས་སུ་ལྡན་པ། བདེ་བར་
གཤེགས་པ། འཇིག་རྟེན་རིག་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ལ་དེ་ལྟར་རིག་པར་བྱ་སྟེ། སྨན་པ་ཆེན་པོ་ལྟ་བུར་འཇིག་རྟེན་དུ་གཤེགས་
ནས། མུ་སྟེགས་ཅན་ངན་པར་ལྟ་བའི་སྨན་པ་ཐམས་ཅད་བཏུལ་ནས་རྒྱལ་པོ་ཐམས་ཅད་ལ་ང་ནི་སྨན་པའོ་ཞེས་བརྗོད་དེ། མུ་སྟེགས་ཅན་དག་གདུལ་བའི་ཕྱིར་འདི་སྐད་དུ་བདག་མེད་དོ། །གང་ཟག་མེད། སེམས་ཅན་
མེད། འཚོ་བ་མེད། ཤེད་ཅན་མེད། ཤེད་བདག་མེད། ཤེས་པ་དང་། མཐོང་བ་དང་། བྱ་བ་དང་། བྱེད་པ་པོ་མེད་དོ་ཞེས་གསུངས་སོ། །དགེ་སློང་དག་མུ་སྟེགས་ཅན་གྱིས་བདག་ཅེས་བརྗོད་པ་ནི་སྲིན་བུའི་རྗེས་ལས་
ཡི་གེར་འགྱུར་བ་ཡང་དེ་དང་འདྲ་སྟེ། དེ་བས་ན་དེ་བཞིན་གཤེགས་པས་ནི་སངས་རྒྱས་ཀྱི་ཆོས་ལ་བདག་མེད་དོ་ཞེས་གསུངས་ཏེ། དེ་ནི་སེམས་ཅན་གདུལ་བའི་ཕྱིར། དུས་མཁྱེན་པའི་ཕྱིར་དེ་ལྟར་བདག་མེད་ཅེས་

47-1-40a

གསུངས་པ་ཡང་། རྒྱུ་ཡོད་རྐྱེན་ཡོད་པས་ན། བདག་ཡོད་ཅེས་གསུངས་པ་ནི་ཇི་ལྟར་སྨན་པ་མཁས་པས་འོ་མ་ལ་སྨན་དུ་རུང་བ་དང་མི་རུང་བ་ཤེས་པ་དང་འདྲ་སྟེ། བྱིས་པ་མ་རབས་ཀྱིས་བདག་ཏུ་འཛིན་པ་ལྟ་བུ་ནི་མ་ཡིན་ནོ། །
བྱིས་པ་མ་རབས་ཀྱིས་བདག་ཏུ་འཛིན་པ་ནི་མཐེ་བོ་ཙམ་ཞེ་འམ། ཡུངས་ཀར་ཙམ་ཞེས་འམ། རྡུལ་ཕྲ་མོ་ཙམ་དུ་འཛིན་ཏོ། །དེ་བཞིན་གཤེགས་པས་བདག་ཅེས་བརྗོད་པ་ནི་དེ་ལྟ་བུ་མ་ཡིན་པས་ཆོས་ཐམས་ཅད་ལ་བདག་མེད་དོ་
ཞེས་གསུངས་ཀྱང་ཡང་དག་པར་ན་བདག་མེད་པ་མ་ཡིན་ཏེ། བདག་ཅེས་བྱ་བ་ནི་ཆོས་གང་བདེན་པ། ཡང་དག་པ་རྟག་པར་གནས་པ་བདག་པོར་གྱུར་པ། མི་འགྱུར་མི་འཕོ་བ་དེ་ནི་བདག་ཅེས་བྱ་སྟེ་ཇི་ལྟར་སྨན་པ་ཆེན་པོ་དེ་
སྨན་འོ་མ་ལ་མཁས་པ་བཞིན་ནོ། །དེ་བཞིན་གཤེགས་པ་ཡང་དེ་དང་འདྲ་སྟེ། སོ་སོའི་སྐྱེ་བོའི་ཕྱིར་ཆོས་ཐམས་ཅད་ལ་ཡང་དག་པར་བདག་ཡོད་དོ་ཞེས་གསུངས་ཀྱིས། ཁྱེད་ལ་སོགས་པས་འཁོར་རྣམ་བཞི་ཡང་དེ་ལྟ་
བུའི་ཚུལ་དུ་ཆོས་ཐམས་ཅད་ལ་ནན་ཏན་གྱིས་ཤིག །། །། བམ་པོ་བཞི་པ། བཅོམ་ལྡན་འདས་ཀྱིས་གཞན་ཡང་དགེ་སློང་རྣམས་ལ་འདི་སྐད་ཅེས་བཀའ་སྩལ་ཏོ། །
དགེ་སློང་དག་ཁྱེད་འདུལ་བ་ལ་ཇི་ཙམ་ཐེ་ཙོམ་དུ་གྱུར་པ་དེ་དག་ཇིར་དགའ་བར་དྲིས་ཤིག་དང་། ངས་བསྟན་ཅིང་བཤད་དེ་ཁྱེད་ཀྱི་སེམས་རངས་པར་བྱའོ། །ངས་ནི་ཆོས་ཐམས་ཅད་ངོ་བོ་ཉིད་ཀྱིས་སྟོང་པ་ཉིད་དུ་མངོན་པར་རྟོགས་
ཏེ། དགེ་སློང་དག་དེ་བཞིན་གཤེགས་པས་ནི་ཆོས་ཐམས་ཅད་རང་བཞིན་གྱིས་སྟོང་པ་ཉིད་དུ་རྟོགས་པར་ཟད་དོ་སྙམ་དུ་མི་བསམ་མོ། །དགེ་སློང་དག་འདུལ་བ་ལ་ཇི་ཙམ་དུ་ཐེ་ཚོམ་དུ་གྱུར་པ་དེ་དག་ད་ཞུ་བའི་དུས་ལ་བབ་བོ། །
དེ་ནས་དགེ་སློང་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ཅག་ནི་ཤེས་རབ་དང་མི་ལྡན་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཞུ་ཞིང་གསོལ་

47-1-40b

བའི་མཐུ་མ་མཆིས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པའི་སྤྱོད་ཡུལ་བསམ་གྱིས་མི་ཁྱབ་པས་ཏིང་ངེ་འཛིན་ཡང་བསམ་གྱིས་མི་ཁྱབ་ལ། སྟོན་པས་བསྟན་པ་ཡང་བསམ་གྱིས་མི་ཁྱབ་པས་བདག་ཅག་ནི་ཤེས་རབ་ཞན་ཏེ་
དེ་བཞིན་གཤེགས་པ་ལ་ཞུ་ཞིང་གསོལ་བའི་མཐུ་མ་མཆིས་སོ། །བཅོམ་ལྡན་འདས་དཔེར་བགྱི་ན། རྒན་པོ་ལོ་བརྒྱ་ཉི་ཤུ་ལོན་པ། རྒས་འཁོགས་པ། རྟག་ཏུ་ན་བ་རྩོལ་བའི་མཐུ་མ་མཆིས་པ། ཉམ་ཆུང་བ་ཚེའི་དབང་དུ་
མ་གྱུར་པ་གཅིག་ལ། མི་ཕྱུག་པོ་དོན་གཉེར་བའི་ཕྱིར་ཡུལ་གཞན་དུ་མཆི་བ་ཞིག་གསེར་སྲང་བརྒྱ་སྟོང་དུ་མ་གཏམས་ནས་འདི་སྐད་དུ་བདག་གི་ནོར་བུ་རིན་པོ་ཆེ་འདི་ཁྱོད་ལ་གཏམས་ཀྱིས་ལོ་བཅུ་འམ། གལ་ཏེ་ལོ་ཉི་ཤུ་ན་
ཕྱིར་འཁོར་གྱིས། སླར་བྱིན་ཅིག་ཅེས་སྨྲས་སོ། །རྒན་པོ་དེས་རིན་པོ་ཆེ་དེ་བླངས་ནས་རིང་པོ་མ་ལོན་པར་ནད་ཀྱིས་ཤི་སྟེ། རབས་ཀྱང་ཆད་པས་རིན་པོ་ཆེ་དེ་ཅི་གཏམས་པ་རྣམས་ཀྱང་ཐམས་ཅད་འཁྱམས་
པར་གྱུར་ཏོ། །ནོར་བདག་ཕྱིར་ལོག་ནས་སླར་བླངས་པའི་གནས་མ་མཆིས་པར་གྱུར་ཏོ། །དེ་ལྟར་གླེན་པ་དེ་གཏམས་པའི་རིགས་སམ། མི་རིགས་པའི་གནས་མི་འཚལ་བས་ཡུལ་གཞན་ནས་སླར་འཁོར་
ཡང་རིན་པོ་ཆེ་ཀུན་འཁྱམས་ཏེ་སླར་བླང་བའི་གནས་མ་མཆིས་སོ། །བཅོམ་ལྡན་འདས་བདག་ཅག་ཉན་ཐོས་རྣམས་ཀྱང་དེ་དང་འདྲ་སྟེ། དེ་བཞིན་གཤེགས་པས་ཡང་དང་ཡང་ནན་ཏན་དུ་འདུལ་བ་བསྟན་པ་ནི་ཐོས་ན། 
གཟུངས་སུ་འཛིན་ཅིང་ཆོས་ཡུན་དུ་གནས་པར་བགྱིད་མི་ནུས་པ་ནི་ཇི་ལྟར་རྒན་པོ་དེས་ཕ་རོལ་པོས་གཏམས་པ་བླངས་པ་དང་མཚུངས་ཏེ། བདག་ཅག་ལ་ཤེས་རབ་མ་མཆིས་པས་འདུལ་བ་རྣམས་ལ་གང་
ཞུ་ཞིང་འདྲི་བའི་ཆ་ཡང་མ་མཆིས་སོ། །བཅོམ་ལྡན་འདས་ཀྱིས་དགེ་སློང་དག་ལ་བཀའ་སྩལ་པ། ཁྱེད་དེང་ང་ལ་ཞུས་ན་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་ཏུ་འགྱུར་གྱིས་

47-1-41a

དེ་བས་ན་ཁྱེད་ཅི་དང་ཅི་འདོད་པ་དྲིས་ཤིག །དེ་ནས་དགེ་སློང་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དཔེར་ན་སྐྱེས་བུ་ཚད་ལ་བབ་པ། ལོ་ཉི་ཤུ་རྩ་ལྔ་ལོན་པ། ཤིན་ཏུ་ལང་འཚོ་བ། བྱད་
གཟུགས་དང་ལྡན་པ། ནོར་རིན་པོ་ཆེ་གསེར་དང་དངུལ་དང་བཻ་དཱུརྱ་རབ་ཏུ་མང་བ། ཕ་དང་མ་དང་། ཆུང་མ་དང་། བུ་དང་འཁོར་དུ་བཅས་པ་ཞིག་ལ། གལ་ཏེ་མི་ཞིག་གིས་ནོར་རིན་པོ་ཆེ་དག་གཏམས་ཏེ། དེ་ལ་འདི་སྐད་དུ་བདག་ནི་དོན་
གཉེར་ཞིང་ཡུལ་གཞན་དུ་མཆིས། ནོར་རིན་པོ་ཆེ་འདི་དག་ཁྱོད་ལ་གཏམས་ཀྱིས། ནམ་འཁོར་བ་ན་སླར་སྩོལ་ཅིག་ཅེས་སྨྲས་སོ། །དེ་ནས་སྐྱེས་བུ་དེས་བདག་གི་ནོར་དང་འདྲ་བར་ཤིན་དུ་བསྲུངས་སོ། །སྐྱེས་བུ་དེ་ཕྱིས་ནད་
ཀྱིས་བཏབ་ནས་དྲུང་གི་འཁོར་ཀུན་བསྡུས་ཏེ། འདི་སྐད་དུ་རིན་པོ་ཆེ་འདི་དག་ནི་ཆེ་གེ་མོ་ཞིག་གིས་གཏམས་ཀྱིས། ནམ་ལེན་དུ་འོངས་པ་དང་སླར་བྱིན་ཅིག་ཅེས་བསྒོའོ། །མཁས་པ་ཤེས་རབ་ཅན་ནི་དེ་ལྟར་གཏམས་པ་དང་མི་
གཏམས་པའི་གནས་འཚལ་བས་སླར་འཁོར་མ་ཐག་ཏུ་རིན་པོ་ཆེ་ཀུན་ཐོབ་བོ། །བཅོམ་ལྡན་འདས་དེ་བཞིན་དུ་ཆོས་ཀྱི་དཀོན་མཆོག་འདི་ཡང་གལ་ཏེ། དགའ་བོའམ་དགེ་སློང་དག་ལ་གཏམས་ན་ཡུན་རིང་པོར་མི་གནས་སོ། །
དེ་ཅིའི་སླད་དུ་ཞེ་ན། འོད་སྲུང་ཆེན་པོ་དང་ཉན་ཐོས་ཐམས་ཅད་ནི་མི་རྟག་པ་སྟེ། ཇི་ལྟར་རྒན་པོ་དེས་གཞན་གྱིས་གཏམས་པའི་ནོར་ལེན་པ་དང་མཚུངས་སོ། །དེ་བས་ན་བླ་ན་མ་མཆིས་པའི་ཆོས་ཀྱི་དཀོན་མཆོག་འདི་
བྱང་ཆུབ་སེམས་དཔའ་རྣམས་ལ་གཏམས་ན་བྱང་ཆུབ་སེམས་དཔའ་རྣམས་ནི་འདྲི་བ་དང་ལན་གླན་པ་ལ་མཁས་པས་ཆོས་རིན་པོ་ཆེ་འདི་ཡུན་དུ་གནས་ཤིང་བསྐལ་པ་ཚད་མེད་པའི་བར་དུ་ཤིན་དུ་རྒྱས་པར་འགྱུར་ལ། 
སེམས་ཅན་ལ་ཕན་པའི་དོན་དུ་འགྱུར་ཏེ། ཇི་ལྟར་སྐྱེས་བུ་ལང་འཚོ་ལ་ནོར་རིན་པོ་ཆེ་གཏམས་པ་དང་མཚུངས་སོ། །དེ་ལྟ་བས་ན་བྱང་ཆུབ་སེམས་དཔའ་ཆེན་པོས་ནི་ཞུ་ཞིང་གསོལ་བའི་མཐུ་མཆིས་ཀྱི་བདག་ཅག་སྦྲང་བུ་དང་

47-1-41b

འདྲ་བའི་ཤེས་རབ་ཀྱིས་ནི་དེ་བཞིན་གཤེགས་པའི་ཆོས་ཤིན་ཏུ་ཟབ་མོ་ལ་ཞུ་བའི་མཐུ་མ་མཆིས་སོ། །ཞེས་གསོལ་ནས་ཅང་མི་སྨྲ་བར་འཁོད་དོ། །དེ་ནས་བཅོམ་ལྡན་འདས་ཀྱིས་ཤིན་ཏུ་ལེགས་སོ་ཤིན་དུ་ལེགས་སོ་ཞེས་བསྟོད་
ནས་དགེ་སློང་དག་ཁྱེད་ཀྱིས་ཟག་པ་མེད་པའི་སེམས་དང་། དགྲ་བཅོམ་པའི་སེམས་ལེགས་པར་ཐོབ་བོ། །ང་ཡང་དེ་སྙམ་དུ་དགོངས་ཏེ། རྐྱེན་རྣམ་པ་དེ་གཉིས་ཀྱིས་ཐེག་པ་ཆེན་པོ་འདི་བྱང་ཆུབ་སེམས་དཔའ་ལ་གཏམས་ན་
དམ་པའི་ཆོས་ཡུན་དུ་གནས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་ན་འདུས་པའི་རིགས་ཀྱི་བུ་དང་རིགས་ཀྱི་བུ་མོ་རྣམས་ལ་བཀའ་སྩལ་པ། ངའི་སྐུ་ཚེ་ནི་དཔག་ཏུ་མེད་དེ། སོ་སོ་ཡང་དག་
པར་ཤེས་པ་ཡང་ཟད་མི་ཤེས་མོད་ཀྱི། ཁྱེད་འདུལ་བ་དང་ཆོས་མངོན་པ་ལས་ཅི་དང་ཅི་འདོད་པ་ཡིད་བཞིན་དུ་དྲིས་ཤིག་ཅེས་ལན་གཉིས་ལན་གསུམ་གྱི་བར་དུ་བཀའ་སྩལ་ཏོ། །དེའི་ཚེ་འཁོར་གྱི་དཀྱིལ་འཁོར་དེ་ན་བྱང་ཆུབ་
སེམས་དཔའ་སེམས་དཔའ་ཆེན་པོ་གྲོང་ཁྱེར་ཏ་ལ་ཞེས་བྱ་བ་ན་གནས་པ་ན། བྲམ་ཟེའི་རིགས་འོད་སྲུང་ཆེན་པོ་ཞེས་བྱ་བ་རབ་ཏུ་གཞོན་པ་ཞིག་སངས་རྒྱས་ཀྱིས་བྱིན་གྱིས་བརླབས་ཀྱིས་འདུག་པ་ལས་ལངས་ནས་བླ་གོས་
ཕྱོགས་གཅིག་ཏུ་བྱས་ཏེ། ལན་བརྒྱ་སྟོང་དུ་མར་བསྐོར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་བདག་གིས་ཞུས་ནས་ཞུས་པའི་ལུང་བསྟན་
པར་བཅོམ་ལྡན་འདས་ཀྱིས་སྐབས་དབྱེ་བར་གནང་ན་བདག་གིས་དེ་བཞིན་གཤེགས་པ་ལ་ཕྱོགས་གཅིག་ཅིག་ཞུའོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཁྱོད་ཀྱིས་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་ལ་ཅི་དང་ཅི་འདོད་པ་དྲིས་ཤིག་དང་། ངས་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་རངས་ཤིང་ཐེ་ཚོམ་མེད་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་

47-1-42a

ཆེན་པོ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་བདག་ཞུ་བར་གནང་ན་བདག་གི་ཤེས་རབ་ནི་སྦྲང་བུ་ལྟ་བུར་གྱུར་ལ། དེ་བཞིན་གཤེགས་པའི་ཡོན་ཏན་
ནི་ཤིན་ཏུ་མཐོ་བས་གཅན་ཟན་དང་སེང་གེ་ལྟ་བུ་རྣམ་པར་མི་ཤིགས་པའི་འཁོར་གྱིས་ཡོངས་སུ་བསྐོར་ཏེ། དེ་བཞིན་གཤེགས་པའི་སྐུ་ཡང་རྡོ་རྗེ་ལྟ་བུ་ལ་མདོག་བཻ་དཱུརྱ་འདྲ་སྟེ་མི་ཤིགས་པ་ལགས་ལ། ཡེ་ཤེས་དང་ཤེས་རབ་རྒྱ་
མཚོ་ལྟ་བུས་ཡོངས་སུ་བསྐོར་ཅིང་། འཁོར་གྱི་དཀྱིལ་འཁོར་ན་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་སོགས་པ་ཡང་ཚད་མེད་མཐའ་ཡས་པའི་ཡོན་ཏན་མཆོག་དང་ལྡན་ཏེ། སྤོས་ཀྱི་གླང་པོ་ཆེ་ལྟ་བུའི་
འཁོར་གྱི་དཀྱིལ་འཁོར་འདིའི་ནང་ན་འདྲི་བར་ག་ལ་སྤོབས་མོད་ཀྱི། འོན་ཀྱིས་ཀྱང་སངས་རྒྱས་གྱི་བྱིན་ཀྱི་བརླབས་དང་འཁོར་མང་པོའི་དགེ་བའི་རྩ་བའི་ཤུགས་ཀྱིས་ཅུང་ཟད་ཅིག་ཞུ་བར་འཚལ་ཏོ་ཞེས་བཅོམ་ལྡན་འདས་ལ་
ཚིགས་སུ་བཅད་དེ་གསོལ་པ། ཚེ་རིང་བར་ནི་ཅིས་འགྱུར་ཞིང་། །མི་འཇིག་རྡོ་རྗེའི་ལུས་ཅིས་འཐོབ། །ཅི་ཡི་རྒྱུ་དང་རྐྱེན་གང་གིས། །ཤིན་ཏུ་བརྟན་པའི་སྟོབས་ཀྱང་འཐོབ། །ཇི་ལྟར་མདོ་སྡེ་འདི་ཉིད་ཀྱིས། །མཐར་
ཐུག་ཕ་རོལ་ཕྱིན་པར་འགྱུར། །བཅོམ་ལྡན་འདས་ཀྱིས་དགོངས་པ་གང་། །སེམས་ཅན་དག་ལ་བཤད་དུ་གསོལ། །ཇི་ལྟར་ཆེ་བ་ཉིད་འཐོབ་ཅིང་། །ཀུན་གྱི་རྟེན་དང་གནས་སུ་འགྱུར། །དགྲ་བཅོམ་པ་ཉིད་མ་ཡིན་པར། །དགྲ་
བཅོམ་པ་དང་མཉམ་པ་ལགས། །ཇི་ལྟར་ལྷ་ཡི་བདུད་རྣམས་ཀྱིས། །བར་ཆད་བགྱིད་པ་འཚལ་བར་བགྱི། །བཅོམ་ལྡན་གསུང་དང་བདུད་ཀྱི་ཚིག །ཇི་ལྟར་རྟོགས་ཤིང་འཚལ་བར་བགྱི། །ཇི་ལྟར་ཁ་ལོ་སྒྱུར་བ་དག །དགྱེས་
བཞིན་དོན་དམ་བདེན་པ་གསུངས། །ཡང་དག་དགེ་དང་ལྡན་བཞིན་དུ། །ཕྱིན་ཅི་ལོག་བཞི་སྟོན་པ་ལགས། །ཇི་ལྟར་དགེ་བའི་ལས་བགྱིད་པ། །དྲང་སྲོང་ཆེན་པོས་བཤད་དུ་གསོལ། །ཇི་ལྟར་བྱང་ཆུབ་སེམས་དཔའ་རྣམས། །ལྟ་དཀའ་

47-1-42b

ཉིད་ཀྱང་མཐོང་བར་འགྱུར། །ཇི་ལྟར་རྫོགས་པའི་དོན་ཆུད་ཅིང་། །དོན་གྱི་ཕྱེད་ཙམ་རྟོགས་པ་ལགས། །ཇི་ལྟར་འཕགས་དང་མཐུན་སྤྱོད་ཅིང་། །ས་ལ་ས་ཞེས་བྱ་ལྟ་བུ། །ཀ་ལིང་ཏེ་དང་ཉི་ཟླ་དང་། །ཕོད་དང་སྐར་ཆེན་ལྟ་བུ་ལགས། །
ཇི་ལྟར་སེམས་ནི་མ་བསྐྱེད་པར། །བྱང་ཆུབ་སེམས་དཔའ་ཞེས་སུ་གདགས། །ཇི་ལྟར་འཁོར་གྱི་དཀྱིལ་འཁོར་དུ། །མི་འཇིགས་པ་ཡི་སེམས་ཐོབ་ཅིང་། །འཛམ་བུ་ཆུ་ཀླུང་གསེར་ལྟ་བུར། །སྐྱོན་དང་རྣམ་པར་བྲལ་བ་ལགས། །
ཇི་ལྟར་འཇིག་རྟེན་རྙོག་པ་འདིར། །པད་མོ་བཞིན་དུ་མི་ཆགས་འགྱུར། །ཇི་ལྟར་ཀུན་ནས་ཉོན་མོངས་ཀྱང་། །ཀུན་ནས་ཉོན་མོངས་ཆགས་མི་འགྱུར། །སྨན་པ་མཁས་པས་ནད་གསོས་པ། །ནད་མི་འགོ་བ་ལྟ་བུ་ལགས། །འཁོར་
བའི་རྒྱ་མཚོ་ཆེན་པོར་ནི། །ཇི་ལྟར་དེད་དཔོན་ལྟ་བུར་འགྱུར། །ཇི་ལྟར་འཁོར་བ་ཡོངས་སྤངས་པ། །སྦྲུལ་ལྤགས་རྗེ་བ་ལྟ་བུ་ལགས། །ཇི་ལྟར་དཀོན་མཆོག་གསུམ་པོ་ལ། །ཡིད་བཞིན་ལྷ་ཡི་ཤིང་ལྟ་བུ། །ཐེག་པ་གསུམ་གྱི་རིགས་
མེད་ན། །ཅི་ཡི་སླད་དུ་གསུངས་པར་གྱུར། །དཔེར་ན་བདེ་བ་མ་སྐྱེས་པར། །ཇི་ལྟར་བདེ་བ་མྱོང་ཞེས་བགྱི། །ཇི་ལྟར་བྱང་ཆུབ་སེམས་དཔའ་རྣམས། །མི་ཤིགས་པ་ཡི་འཁོར་ཡང་འཐོབ། །ཇི་ལྟར་མདོངས་ཤིང་འཐོབས་པ་ཡི། །འདྲེན་
པ་ཡི་ནི་མིག་དུ་འགྱུར། །ཇི་ལྟར་མགོ་མང་སྟོན་པ་ཡང་། །དྲང་སྲོང་ཆེན་པོས་བཤད་དུ་གསོལ། །ཇི་ལྟར་ཆོས་རྣམས་སྨྲ་བ་དག །ཟླ་བ་ཚེས་པ་བཞིན་དུ་སྐྱེ། །ཇི་ལྟ་བུར་ན་མཐར་ཕྱིན་པའི། །མྱ་ངན་འདའ་བ་སྟོན་པ་ལས། །ཇི་ལྟར་
དཔའ་ཞིང་བརྩོན་པ་ལ། །མི་དང་ལྷ་དང་བདུད་ལམ་སྟོན། །ཇི་ལྟར་ཆོས་ཀྱི་མཚན་ཉིད་ཤེས། །ཆོས་ཀྱི་བདེ་བ་མྱོང་བ་ལགས། །ཇི་ལྟར་བྱང་ཆུབ་སེམས་དཔའ་རྣམས། །ཐམས་ཅད་ནད་དང་བྲལ་བ་ལགས། །ཇི་ལྟར་སོ་
སོའི་སྐྱེ་བོའི་ཕྱིར། །དགོངས་ཏེ་གསུངས་པ་སྟོན་པ་ལགས། །མཐར་ཕྱིན་པ་ཡི་དོན་ནི་གང་། །ཇི་ལྟར་མཐར་མ་ཕྱིན་པ་ལགས། །ཐེ་ཚོམ་གཅོད་པའི་ཕྱིར་གསུངས་ན། །གཅིག་ཏུ་ངེས་པར་ཅིས་མི་གསུང་། །ཇི་ལྟར་གྱ་ནོམ་བླ་མེད་པའི། །

47-1-43a

བྱང་ཆུབ་ལ་ནི་བསྙེན་པར་འགྱུར། །བྱང་ཆུབ་སེམས་དཔའ་རྣམས་ཀྱི་ཕྱིར། །དེ་བཞིན་གཤེགས་ལ་བདག་ཞུའོ། །སྤྱོད་པ་ཤིན་ཏུ་ཟབ་མོ་ཡི། །དམ་པ་དག་ནི་བཤད་དུ་གསོལ། །རྣམ་པ་ཐམས་ཅད་ཆོས་
ཀྱི་ནང་། །བདེ་བའི་རང་བཞིན་ཀུན་མཆིས་ན། །དྲང་སྲོང་ཆེན་པོ་མཆོག་གིས་སུ། །རྣམ་པར་ཕྱེ་སྟེ་བསྟན་དུ་གསོལ། །སྐྱེ་བོའི་རྟེན་དང་གནས་འགྱུར་བ། །རྐང་གཉིས་མཆོག་སྟེ་སྨན་ལྟ་བུ། །ཕུང་པོ་རྣམས་ལས་
ཞུ་བརྩམས་ཀྱང་། །འཚལ་བའི་ཤེས་རབ་མ་མཆིས་སོ། །དེ་ལྟར་ཤིན་དུ་ཟབ་མོ་ཡི། །སངས་རྒྱས་རྣམས་ཀྱི་སྤྱོད་ཡུལ་ནི། །བྱང་ཆུབ་སེམས་དཔའ་བརྩོན་པ་ཡང་། །ཤེས་པར་ནུས་པ་མ་ལགས་སོ། །དེའི་ཚེ་བཅོམ་ལྡན་
འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ཤིན་དུ་ལེགས་སོ་ཤིན་དུ་ལེགས་སོ་ཞེས་བྱ་བ་བྱིན་ནས། རིགས་ཀྱི་བུ་ཁྱོད་ཀྱིས་རྣམ་པ་ཐམས་ཅད་མཁྱེན་པའི་ཡེ་ཤེས་མ་ཐོབ་མོད་ཀྱི། ཁྱོད་ཀྱིས་ཤིན་ཏུ་ཟབ་མོའི་སྙིང་པོ་
ཞུ་ཞིང་གསོལ་བ་འདི་ཐམས་ཅད་མཁྱེན་པའི་ཡེ་ཤེས་ཀྱིས་འདྲི་བ་དང་ཐ་མི་དད་དོ། །རིགས་ཀྱི་བུ་སྔོན་བྱང་ཆུབ་ཀྱི་ཤིང་དྲུང་དུ་སྙིང་པོར་བྱང་ཆུབ་སྟེ་མངོན་པར་སངས་རྒྱས་པ་ན། དེའི་ཚེ་ན་ཡང་སངས་རྒྱས་ཀྱི་ཞིང་ཚད་མེད་
གྲངས་མེད་པ་གང་གཱའི་ཀླུང་གི་བྱེ་མ་སྙེད་ནས་བྱང་ཆུབ་སེམས་དཔའ་རྣམས་ལྷགས་ཏེ། ང་ལ་ཤིན་དུ་ཟབ་མོའི་དོན་དྲིས་པའི་ཚིག་གི་རྣམ་གྲངས་དང་། དོན་དང་ཡོན་ཏན་ཡང་འདི་དང་འདྲ་སྟེ་ཐ་མི་དད་དོ། །གང་གིས་འདི་
སྐད་དུ་འདྲི་བ་ནི་སེམས་ཅན་ཚད་མེད་པ་སྙེད་ལ་ཕན་པ་དང་བདེ་བའི་དོན་དུ་སྤྱོད་པ་ཡིན་ནོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཤེས་རབ་མ་མཆིས་པས་
འདི་ལྟ་བུ་ཤིན་དུ་ཟབ་མོའི་དོན་དྲི་བའི་མཐུ་མ་མཆིས་སོ། །བཅོམ་ལྡན་འདས་འདི་ལྟ་སྟེ་དཔེར་ན་སྦྲང་བུ་དག་ནི་རྒྱ་མཚོའི་ཕ་རོལ་དུ་འཕུར་ནུས་པའི་མཐུ་འམ་ནམ་མཁའི་དབྱིངས་ཀུན་ཏུ་ཕྱིན་པའི་མཐུ་མ་མཆིས་སོ། །བདག་ཀྱང་དེ་དང་འདྲ་བར་དེ་བཞིན་གཤེགས་

47-1-43b

པའི་ཡེ་ཤེས་ཀྱི་རྒྱ་མཚོའི་ཆོས་ཉིད་ནམ་མཁའ་ལྟ་བུ་ཤིན་དུ་ཟབ་མོའི་དོན་དྲི་བའི་མཐུ་མ་མཆིས་སོ། །བཅོམ་ལྡན་འདས་དཔེར་ན་རྒྱལ་པོའི་གཙུག་ཕུད་ལ་འདོགས་པའི་ནོར་བུ་རིན་པོ་ཆེ་བང་མཛོད་སྲུང་བའི་
བློན་པོ་ལ་བཞག་ན་བློན་པོ་དེས་སྤྱི་བོས་ལེན་ཏེ། སྲུང་བའི་དམ་བཞག་ཆེར་བགྱིད་དོ། །བདག་ཀྱང་དེ་བཞིན་དུ་དེ་བཞིན་གཤེགས་པས་གསུངས་པའི་དོན་ཤིན་དུ་རྒྱས་པའི་དོན་ཟབ་མོ་འདི་སྤྱི་བོས་ལེན་ཏེ་སྲུང་བའི་ནན་ཏན་
ཆེར་བགྱིད་དོ། །དེ་ཅིའི་སླད་དུ་ཞེ་ན། བདག་གིས་ཤེས་རབ་ཤིན་དུ་ཟབ་མོ་བསྒྲུབས་པའི་སླད་དུའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་ཤིན་དུ་ལེགས་པར་ཉོན་ཅིག་དང་། 
དེ་བཞིན་གཤེགས་པའི་སྐུ་ཚེ་རིང་བའི་ལས་ཁྱོད་ལ་བཤད་དོ། །བྱང་ཆུབ་སེམས་དཔས་ལས་དེའི་རྒྱུ་དང་རྐྱེན་ཐོས་པས་ཚེ་རིང་བར་འགྱུར་གྱིས་དེ་བས་ན་ཤིན་ཏུ་ལེགས་པར་ཉོན་ཅིག་ཅི་ཙམ་དུ་ལས་གང་གིས་བྱང་ཆུབ་ཀྱི་རྒྱུར་འགྱུར་བ་དེ་
ལ་ནི་ཤིན་ཏུ་ལེགས་པར་གཟུང་ཞིང་མཉན་པར་བྱའོ། །ཐོས་ནས་ཀྱང་གཞན་ལ་རྒྱ་ཆེར་བསྟན་པར་བྱའོ། །རིགས་ཀྱི་བུ་ངས་ཀྱང་སྔོན་ལས་དེ་དག་སྒྲུབ་པའི་ནན་ཏན་ཤིན་དུ་བྱས་པས་མྱུར་དུ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། ང་ཡང་ཁྱོད་ལ་རྒྱས་པར་བཤད་པར་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་རྒྱལ་བུ་རྒྱལ་ཚབ་ཅིག་མཉེས་པ་བྱས་ཏེ་བཙས་ན་རྒྱལ་པོ་དེ་བྱམས་ཤིང་དྲན་པའི་
ཕྱིར་གང་ནས་གང་དུ་བཙས་པའི་གནས་དེ་དག་ཏུ་བལྟར་འགྲོའོ། །བྱང་ཆུབ་སེམས་དཔའ་ཡང་ཚེ་རིང་བར་འདོད་ན་དེ་བཞིན་དུ་སེམས་ཅན་ཐམས་ཅད་ལ་བུ་དང་འདྲ་བར་སྲུང་ཞིང་བྱམས་པ་དང་། སྙིང་རྗེ་དང་། དགའ་
བ་དང་། བཏང་སྙོམས་ཆེན་པོ་བསྐྱེད་དེ། སྲོག་མི་གཅོད་པའི་ཁྲིམས་གཟུང་བར་བྱའོ། །དགེ་བའི་ཆོས་ལ་གཟུད་ཅིང་སེམས་ཅན་ཐམས་ཅད་ཁྲིམས་ལྔ་དང་། དགེ་བ་བཅུའི་ལས་ཀྱི་ལམ་ལ་དགོད་དོ། །གཞན་ཡང་སེམས་ཅན་དམྱལ་བ་དང་། ཡི་དགས་དང་། 

47-1-44a

བྱོལ་སོང་དང་། ལྷ་མ་ཡིན་གྱི་གནས་རྒྱུད་ཐམས་ཅད་དུ་སྡུག་བསྔལ་བའི་སེམས་ཅན་ཐམས་ཅད་བསྒྲལ་བ་ནི་མ་གྲོལ་བ་རྣམས་གྲོལ་བར་བྱ་བ་དང་། ཕ་རོལ་དུ་མ་ཕྱིན་པ་རྣམས་ཕ་རོལ་དུ་ཕྱིན་པར་བྱ་བ་དང་། མྱ་ངན་ལས་
མ་འདས་པ་རྣམས་མྱ་ངན་ལས་འདའ་བར་བྱ་བ་དང་། འཇིགས་སྐྲག་པ་རྣམས་བདེ་བར་སྤྲོ་བསྲིང་ངོ་། །དེ་ལྟ་བུའི་ལས་ཀྱི་རྒྱུ་དང་རྐྱེན་གྱིས་བྱང་ཆུབ་སེམས་དཔའ་ཚེ་རིང་བར་འགྱུར་ཞིང་ཤེས་རབ་ཀྱི་དབང་ཐོབ་པ་དང་། གང་ནས་གང་དུ་ཚེ་
འཕོས་ཀྱང་མཐོ་རིས་ཀྱི་ལྷར་སྐྱེ་བར་འགྱུར་རོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་
ཅན་ཐམས་ཅད་ལ་བུ་གཅིག་པ་དང་འདྲ་བར་འདུ་ཤེས་བསྐྱེད་དོ་ཞེས་བགྱི་བའི་དོན་ཤིན་ཏུ་ཟབ་པས་བདག་གིས་མི་རིག་གོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ལ་
སེམས་མཉམ་པར་བུ་གཅིག་པ་དང་འདྲ་བར་འདུ་ཤེས་བསྐྱེད་དོ་ཞེས་དེ་བཞིན་གཤེགས་པས་གསུངས་པ་མི་རིགས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པས་བསྟན་པ་ལ་ཞུགས་པ་དག་ཁ་ཅིག་ནི་ཚུལ་ཁྲིམས་ཉམས་
པ་ཡང་མཆིས། ཁ་ཅིག་ནི་ཁ་ན་མ་ཐོ་བའི་ཆོས་བགྱིད། ཁ་ཅིག་ནི་དམ་པའི་ཆོས་ཉམས་པར་བགྱིད་པ་དག་ཀྱང་མཆིས་ན་ཇི་ལྟ་བུར་དེ་དག་ལ་བུ་གཅིག་པ་དང་འདྲ་བར་འདུ་ཤེས་བསྐྱེད་པར་བགྱི། བཅོམ་ལྡན་འདས་ཀྱིས་འོད་
སྲུང་ལ་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་ཏེ་ང་ནི་སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་བུར་འདུ་ཤེས་སོ། །བཅོམ་ལྡན་འདས་ལ་འོད་སྲུང་གིས་འདི་སྐད་ཅེས་གསོལ་ཏོ། །སྔོན་ཟླ་བ་ཉ་བ་
བཅྭ་ལྔའི་ཉིན་པར་དགེ་འདུན་ཡོངས་སུ་དག་པ་དག་གསོ་སྦྱོང་བགྱིད་པ་ནི་ཁྱེའུ་གཞོན་ནུ་ལུས་དང་། ངག་དང་། ཡིད་མ་བྱང་བ་ཞིག་དབེན་པའི་གནས་ནས་དགེ་འདུན་གསོ་སྦྱོང་བགྱིད་པ་མཉན་པས་ལག་ན་རྡོ་རྗེ་སངས་རྒྱས་ཀྱི་

47-1-44b

བྱིན་ཀྱི་རླབས་ཀྱིས་རྡོ་རྗེའི་གཏུན་གྱིས་རྡུལ་བཞིན་དུ། བགྱིས་ན་བཅོམ་ལྡན་འདས་ལག་ན་རྡོ་རྗེ་དེ་ཤིན་དུ་ཁྲོ་བས་ཁྱེའུ་དེ་སྲོག་དང་ཕྲལ་ན་ཅིའི་སླད་དུ་དེ་བཞིན་གཤེགས་པས་སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲའོ། །
ཞེས་གསུངས། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཁྱོད་དེ་སྐད་མ་ཟེར་ཅིག །ཁྱེའུ་གཞོན་ནུ་དེ་ཡང་སྤྲུལ་པ་ཙམ་དུ་ཟད་ཀྱི། ཡང་དག་པར་ན་མི་མ་ཡིན་ཏེ། དེ་ནི་ཚུལ་ཁྲིམས་ཉམས་པ་དག་དགེ་འདུན་ཡོངས་སུ་
དག་པའི་ནང་ནས་དབྱུང་བའི་ཕྱིར་རོ། །ལག་ན་རྡོ་རྗེ་ཡང་སྤྲུལ་བ་ཙམ་དུ་ཟད་དོ། །འོད་སྲུང་དམ་པའི་ཆོས་མ་རུང་བར་བྱས་པ་དང་། ལོག་སྲེད་ཅན་དང་། སྲོག་གཅོད་པ་དང་། ངན་པར་ལྟ་བ་དང་། ཚུལ་ཁྲིམས་ཉམས་པ་དག་ལ་
ཡང་ང་ནི་ཐུགས་རྗེ་ཆེན་པོ་བསྐྱེད་དེ་སྲས་སྒྲ་གཅན་འཛིན་དང་འདྲ་བར་ལྟའོ། །རིགས་ཀྱི་བུ་དཔེར་ན་རྒྱལ་པོ་ནི་བློན་པོ་དག་ཉེས་པ་བྱུང་སྟེ་ཁྲིམས་ལས་འགལ་ན་མི་གཏོང་སྟེ། ཁྲིམས་ཅི་ལ་བབ་པ་དང་སྦྱོར་རོ། །དེ་བཞིན་གཤེགས་
པ་ནི་དེ་ལྟ་མ་ཡིན་ཏེ། བསྟན་པ་ལས་ཉམས་པ་ཡོད་ན་བསྐྲད་པའི་ལས་བྱ་བ་དང་། སྤྱོ་བའི་ལས་བྱ་བ་དང་། གཞག་པའི་ལས་བྱ་བ་དང་། ཉེས་པ་གླེང་བའི་ལས་བྱ་བ་དང་། མི་སྣང་བར་བྱ་བའི་ལས་བྱ་བ་དང་། ཞི་བར་བྱ་བའི་ལས་
བྱ་བ་དང་། ངན་པར་ལྟ་བ་སྤོང་བའི་ལས་བྱེད་དོ། །རིགས་ཀྱི་བུ་དེ་བཞིན་གཤེགས་པས་ནི་ཆོས་ལ་སྐུར་པ་དག་ལ་ཡོངས་སུ་གདུལ་བའི་ལས་བྱེད་དེ། ངན་པར་སྤྱོད་པ་དག་རྣམ་པར་སྨིན་པའི་འབྲས་བུ་སྟོན་པར་བྱེད་དོ། །རིགས་
ཀྱི་བུ་འདི་ལྟར་རིག་པར་བྱ་སྟེ། དེ་བཞིན་གཤེགས་པས་ནི་སེམས་ཅན་ངན་པ་དག་ལ་མི་འཇིགས་པ་སྦྱིན་པ་ཡིན་ནོ། །གལ་ཏེ་འོད་ཟེར་གཅིག་གམ། གཉིས་སམ་ལྔ་བཀྱེ་བས་གང་ལ་རིག་པའི་སེམས་ཅན་དེ་དག་ནི་
སྡིག་པ་ཡོངས་སུ་སྤོང་བར་འགྱུར་རོ། །དེ་བས་ན་དེ་བཞིན་གཤེགས་པ་ནི་དེ་ལྟ་བུའི་མཐུ་ཚད་མེད་པ་དང་ལྡན་ནོ། །རིགས་ཀྱི་བུ་གང་མ་མཐོང་བའི་ཆོས་རྣམས་ཁྱོད་ཀྱིས་མཐོང་བར་འདོད་ན་ཁྱོད་ལ་དེའི་ཕྱོགས་ཙམ་ཞིག་བསྟན་པར་

47-1-45a

བྱའོ། །ང་ཡོངས་སུ་མྱ་ངན་ལས་འདས་པའི་འོག་ཏུ་ཕྱོགས་གང་ན་དགེ་སློང་ཚུལ་ཁྲིམས་དང་ལྡན་ཞིང་སྤྱོད་ལམ་མ་ཉམས་པ་དམ་པའི་ཆོས་ཡོངས་སུ་སྲུང་བ་དག་གིས་ཆོས་མ་རུང་བར་བྱེད་པ་རྣམས་སྐྲོད་ཅིང་
ཆད་པས་ཀྱང་གཅོད་པའི་སྐྱེས་བུ་དེ་ནི་བསོད་ནམས་ཚད་མེད་དཔག་ཏུ་མེད་པ་ཐོབ་པར་རིག་པར་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་རྒྱལ་པོ་ཆོས་ངན་པ་འབའ་ཞིག་སྤྱོད་པ་ཞིག་ནད་ཀྱིས་བཏབ་པ་ལས་ཡུལ་དེ་དང་ཉེ་བ་
འི་རྒྱལ་པོ་ཞིག་དེ་ལྟར་ན་བར་གྱུར་པ་ཐོས་ནས་རྒྱལ་པོ་ནད་པ་དེ་མེད་པར་བྱ་བའི་ཕྱིར་དམག་དྲངས་སོ། །རྒྱལ་པོ་ནད་པ་དེ་མཐུ་དང་དཔུང་ཆུངས་པས་འཇིགས་སྐྲག་སྟེ། མི་དགེ་བ་བཏང་ནས་དགེ་བ་ལ་བརྩོན་པར་གྱུར་ན་ཕས་
རྒོལ་བའི་རྒྱལ་པོ་དེས་བསོད་ནམས་ཚད་མེད་པ་ཐོབ་པར་འགྱུར་རོ། །དེ་བཞིན་དུ་ཆོས་འཛིན་པའི་དགེ་སློང་དག་ཀྱང་དེ་དང་འདྲ་བར་ཆོས་མ་རུངས་བར་བྱེད་པའི་གང་ཟག་དག་སྐྲོད་པ་དང་། ཆད་པས་གཅོད་པའི་ལས་བྱས་
ཏེ་དགེ་བའི་ཆོས་ལ་བཙུད་ན་བསོད་ནམས་ཚད་མེད་པ་འཐོབ་པར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་ཁྱིམ་བདག་གཅིག་གི་ཁྱིམ་དུ་དུག་གི་སྡོང་པོ་སྐྱེས་ན་ཁྱིམ་བདག་དེས་དུག་ཡིན་པར་ཤེས་མ་ཐག་ཏུ་རྩ་བ་ནས་མེད་
པར་བྱེད། །གཞན་ཡང་སྐྱེས་བུ་ལང་འཚོ་བའི་མགོ་ལ་སྐྲ་དཀར་ཞིག་བྱུང་ན་དེ་ངོ་ཚ་སྟེ་དེ་མ་ཐག་ཏུ་རྩ་བ་ནས་བཏོན་ཏེ་ཕྱིས་མི་སྐྱེ་བའི་ཆོས་སུ་མེད་པར་བྱེད་དོ། །ཆོས་འཛིན་པའི་དགེ་སློང་ཡང་དེ་དང་འདྲ་སྟེ། དགེ་སློང་
ཚུལ་ཁྲིམས་ཉམས་པ་དམ་པའི་ཆོས་མ་རུངས་བར་བྱེད་པ་མཐོང་ན་གནས་ནས་བསྐྲད་ཅིང་ཆད་པས་གཅད་པར་བྱའོ། །དགེ་སློང་དགེ་བས་བསླབ་ཚིག་ཉམས་པ་དག་མཐོང་སྟེ་གནས་ནས་མ་བསྐྲད་དམ། ཆད་པས་མ་
བཅད་ན་དེ་ནི་སངས་རྒྱས་ཀྱིས་བསྟན་པའི་ཆོས་ཀྱི་དགྲ་ཡིན་པར་རིག་པར་བྱའོ། །གང་གིས་གནས་ནས་སྐྲོད་དམ། ཆད་པས་གཅོད་ན་དེ་ནི་ངའི་ཉེ་གནས་ཉན་ཐོས་ཡང་དག་པ་ཡིན་ནོ། །ཡང་བཅོམ་ལྡན་འདས་ལ་བྱང་

47-1-45b

ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །ཇི་ལྟར་བཅོམ་ལྡན་འདས་ཀྱིས་གསུངས་པ་ལྟར་ན་སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་གཟིགས་སོ་ཞེས་བགྱི་བ་མི་རུང་ངོ་། །བཅོམ་
ལྡན་འདས་གལ་ཏེ་གང་ཟག་གཅིག་གིས་མཚོན་ཐོགས་ཏེ་སངས་རྒྱས་ལ་འདེབས་པ་དང་། གང་ཟག་གཅིག་གིས་ཙན་དན་གྱི་འདའ་གུས་སངས་རྒྱས་ཀྱི་སྐུ་ལ་བྱུགས་པ་གཉིས་ལ། བཅོམ་ལྡན་འདས་ཀྱིས་ཐུགས་མཉམ་པར་
གཟིགས་ན་ཅིའི་སླད་དུ་བསླབ་ཚིག་ཉམས་པ་དག་ཆད་པས་བཅད་དོ་ཞེས་གསུངས། ཅི་སྟེ་བསླབ་ཚིག་ཉམས་པ་དག་ཆད་པས་བཅད་ན་གསུང་བ་དང་འགལ་ལོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་
ལ་བཀའ་སྩལ་པ། རིགས་ཀྱི་བུ་འདི་ལྟ་སྟེ་དཔེར་ན་རྒྱལ་པོ་འམ་བློན་པོ་ཆེན་པོ་ཞིག་ལ་བུ་གཟུགས་བྱད་དང་ལྡན་པ་ཤེས་རབ་རྣོ་བ་གཉིས་སམ། གསུམ་འམ། བཞི་ཡོད་དེ། སློབ་དཔོན་སྟོན་པ་མཁས་པ་ལ་གནས་
བཅས་ནས། འདི་སྐད་དུ་བདག་གི་བུ་འདི་དག་ཚུལ་དང་། གཙུག་ལག་དང་། རྩལ་དང་། ཡི་གེ་དང་། བགྲང་བ་དང་། རྩིས་ལོབས་པ་ཞིག་ཏུ་བསླབ་པར་གསོལ་ལོ། །བདག་གིས་བུ་བཞི་པོ་འདི་ཁྱོད་ལ་བཅོལ་གྱིས་ཅི་
སྟེ་བུ་གསུམ་ལྕག་འོག་དུ་ཤི་ཡང་བླའི། བུ་གཅིག་བསླབ་པ་ལོབས་པར་བྱ་བའི་ཕྱིར་ནན་ཐུར་སྐྱེད་ཅིག །བུ་གསུམ་པོ་ཤི་ཡང་བདག་ནི་འཁོན་དུ་མི་འཛིན་ཏོ། །འོད་སྲུང་དེ་ལ་ཇི་སྙམ་དུ་སེམས། བུ་དེའི་ཕ་དང་
སློབ་པའི་སློབ་དཔོན་དེ་གསོད་པའི་ཉེས་པ་ཐོབ་བམ། གསོལ་པ་བཅོམ་ལྡན་འདས་མ་ལགས་སོ། །དེ་ཅིའི་སླད་དུ་ཞེ་ན། སྡུག་པར་བསམས་ཏེ། བསླབ་པ་ལོབས་པར་བགྱི་བ་ལགས་ཀྱིས། མི་སྡུག་པར་
བསམས་ཏེ་བསླབ་པ་མ་ལགས་པས། བསོད་ནམས་ཚད་མེད་པ་ཐོབ་པར་འགྱུར་རོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། བསླབ་ཚིག་ཉམས་པ་དག་ལ་ཡང་བུ་གཅིག་པ་དང་འདྲ་བར་གཟིགས་

47-1-46a

སོ། དེ་བཞིན་གཤེགས་པས་བླ་ན་མེད་པའི་དམ་པའི་ཆོས་ནི་རྒྱལ་པོ་དང་། བློན་པོ་ཆེན་པོ་དང་། དགེ་སློང་དང་དགེ་སློང་མ་དང་། དགེ་བསྙེན་དང་དགེ་བསྙེན་མ་ལ་གཏམས་ཤིང་གཏང་བས་རྒྱལ་པོ་དང་། འཁོར་རྣམ་
བཞིས་གང་བསླབ་པ་ལ་ཞུགས་པ་དག་ལྷག་པའི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཐོབ་པར་སྐུལ་ཅིག །གང་བསླབ་པ་གསུམ་པོ་འདི་ལ་མི་སློབ་ཅིང་ལེ་ལོ་བྱེད་པ་དང་། ཚུལ་ཁྲིམས་ཉམས་པ་དང་། ཆོས་མ་རུང་
བར་བྱེད་ན་རྒྱལ་པོ་དང་། བློན་པོ་ཆེན་པོ་དང་འཁོར་རྣམ་བཞིས་ཆད་པས་ཆོད་ཅིག །རིགས་ཀྱི་བུ་རྒྱལ་པོ་དེ་དང་། འཁོར་རྣམ་བཞི་པོ་དེ་ཁ་ན་མ་ཐོ་བའི་སྡིག་འཐོབ་པར་འགྱུར་རམ། མ་ལགས་སོ། རིགས་ཀྱི་བུ་དེ་ལྟར་རྒྱལ་
པོ་དེ་དང་། འཁོར་རྣམ་བཞི་པོ་དེ་ཡང་སྡིག་པར་མི་འགྱུར་ན་དེ་བཞིན་གཤེགས་པ་ལྟ་སྨོས་ཀྱང་ཅི་དགོས། རིགས་ཀྱི་བུ་དེ་བཞིན་གཤེགས་པ་ནི་དེ་ལྟར་མཉམ་པའི་ཐུགས་ཀྱིས་སེམས་ཅན་ཐམས་ཅད་ལ་བུ་གཅིག་པ་དང་
འདྲ་བར་དགོངས་སོ། །གང་དེ་ལྟར་སེམས་པ་དེ་ནི་བྱང་ཆུབ་སེམས་དཔའ་མཉམ་པའི་སེམས་ཀྱིས་སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་འདུ་ཤེས་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་གང་དེ་
ལྟར་ལས་དེ་ལ་ནན་ཏན་བྱེད་པ་ནི་ཚེ་རིང་བར་འགྱུར་ཞིང་སྔོན་གྱི་གནས་ཀྱང་ཤེས་པར་འགྱུར་རོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སངས་རྒྱས་ཀྱིས་གསུངས་པ་
ལྟར་བྱང་ཆུབ་སེམས་དཔའ་གང་མཉམ་པའི་སེམས་ལ་ནན་ཏན་བྱས་ཏེ། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་འདུ་ཤེས་པས་ཚེ་རིང་བར་འགྱུར་རོ་ཞེས་དེ་བཞིན་གཤེགས་པས་དེ་སྐད་གསུང་བ་མི་
རིགས་སོ། །དེ་ཅིའི་སླད་དུ་ཞེ་ན། འདི་ལྟ་སྟེ་ཤེས་རབ་དང་ལྡན་པའི་སྲི་ཞུར་བགྱི་བའི་ཆོས་རྣམ་པ་སྣ་ཚོགས་ཀྱང་སྟོན་མཁས་པ་ཞིག་ཁྱིམ་དུ་མཆིས་ནས་ཕ་མ་ལ་རྡོ་དབྱུག་གིས་འཚོག་གོ། །ཕ་མ་ནི་བསོད་ནམས་

47-1-46b

ཀྱི་ཞིང་ལགས་ཏེ། ཕན་པ་དང་བདེ་བ་འབའ་ཞིག་བགྱིད་ཅིང་ཤིན་ཏུ་ཕྲད་དཀའ་བས་དེ་ནི་མཆོད་པར་འོས་ན། དེ་ལ་གནོད་པས་རྣམ་པར་གཙེས་ན་ཆོས་འཚལ་བ་དེ་སྨྲ་བ་དང་བགྱིད་པར་མི་མཐུན་ཏེ་འགལ་ལོ། །དེ་བཞིན་
གཤེགས་པ་ཡང་དེ་དང་འདྲ་སྟེ། དེ་ལྟར་བྱང་ཆུབ་སེམས་དཔའ་སེམས་མཉམ་པ་ལ་ནན་ཏན་བགྱིད་ཅིང་སེམས་ཅན་ཐམས་ཅད་ལ་བུ་གཅིག་དང་འདྲ་བར་འདུ་ཤེས་པས་ཚེ་རིང་ཞིང་སྔོན་གྱི་གནས་ཤེས་པར་འགྱུར་ལ་མི་འཕོ་སྟེ། 
རྟག་ཏུ་འཇིག་རྟེན་ན་གནས་པ་ཞིག་ལགས་ན་ཅིའི་སླད་དུ་བཅོམ་ལྡན་འདས་མི་དང་འདྲ་བར་སྐུ་ཚེ་རབ་ཏུ་ཐུང་བར་གྱུར། དེ་བཞིན་གཤེགས་པས་སེམས་ཅན་ཐམས་ཅད་ལ་དགྲ་ལྟ་བུར་དགོངས་པ་མངའ་འམ། བཅོམ་
ལྡན་འདས་སྔོན་སྡིག་པ་ཅི་ཞིག་མཛད་ཅིང་ཇི་སྙེད་ཀྱི་སྲོག་གི་དབང་པོ་དང་ཕྲལ་ན་འདི་ལྟར་སྐུ་ཚེ་ལོ་བརྒྱ་འང་མ་ཐུབ་པར་རབ་ཏུ་ཐུང་བར་གྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་ཁྱོད་ཅིའི་ཕྱིར་
དེ་བཞིན་གཤེགས་པའི་སྤྱན་སྔར་མ་རྩིས་པའི་ཚིག་འདི་ལྟ་སྨྲས། དེ་བཞིན་གཤེགས་པའི་སྐུ་ཚེ་ནི་ཚེའི་ནང་ན་མཆོག་ཏུ་གྱུར་ཕུལ་དུ་གྱུར་ཏེ། རྟག་པའི་ཆོས་ཀྱི་ནང་ན་ཡང་མཆོག་ཏུ་གྱུར་ཕུལ་དུ་གྱུར་ཏོ། །བྱང་ཆུབ་
སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། དེ་བཞིན་གཤེགས་པའི་སྐུ་ཚེ་རིང་ཞེས་བགྱི་བ་ཇི་ལྟ་བུ་ལགས། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་ཆུ་ཀླུང་ཆེན་པོ་
བརྒྱད་ཡོད་དེ། གང་གཱ་ཞེས་བྱ་བ་དང་། ཡམ་པ་ལ་དང་། ས་ལ་དང་། ཨ་ལི་ལ་བར་ཏ་དང་། མ་ཧཱ་དང་། སིན་དུ་དང་། ཕག་ཤ་དང་། སི་ཏ་ཞེས་བྱ་བ་ཆུ་ཀླུང་ཆེན་པོ་བརྒྱད་དང་། དེ་མ་ཡིན་པའི་ཆུ་བྲན་ཐམས་ཅད་ཀྱང་རྒྱ་མཚོ་
ཆེན་པོར་འབབ་པོ། །འོད་སྲུང་དེ་བཞིན་དུ་ལྷ་དང་བཅས་པ་དང་། ས་དང་ནམ་མཁའ་ལ་གནས་པ་ཐམས་ཅད་ཀྱི་ཚེ་སྲོག་གི་ཆུ་ཀླུང་ཐམས་ཅད་དེ་བཞིན་གཤེགས་པའི་སྐུ་ཚེའི་རྒྱ་མཚོར་འབབ་པོ་དེ་བས་ན་དེ་བཞིན་

47-1-47a

གཤེགས་པའི་སྐུ་ཚེ་ནི་ཚད་མེད་དོ། །འོད་སྲུང་གཞན་ཡང་འདི་ལྟ་སྟེ། མཚོ་མ་དྲོས་ཤེས་བྱ་བ་ལས་ཆུ་ཀླུང་ཆེན་པོ་བཞི་འབབ་བོ། །དེ་བཞིན་གཤེགས་པ་ཡང་དེ་དང་འདྲ་བར་ཚེ་ཐམས་ཅད་ཀྱི་འབྱུང་གནས་ཡིན་ནོ། །
འོད་སྲུང་འདི་ལྟ་སྟེ། རྟག་པའི་ཆོས་ཐམས་ཅད་ཀྱི་ནང་ན་ནམ་མཁའ་ནི་མཆོག་གོ། །དེ་བཞིན་གཤེགས་པ་ཡང་དེ་བཞིན་དུ་རྟག་པའི་ནང་ན་མཆོག་ཏུ་གྱུར་ཕུལ་དུ་གྱུར་ཏོ། །འོད་སྲུང་འདི་ལྟ་སྟེ། སྨན་གྱི་ནང་ན་མར་གྱི་སྙིང་
པོ་ནི་མཆོག་གོ། །དེ་བཞིན་དུ་དེ་བཞིན་གཤེགས་པ་ཡང་སེམས་ཅན་ཐམས་ཅད་ཀྱི་ནང་ན་སྐུ་ཚེའི་མཆོག་ཏུ་གྱུར་ཏོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། དེ་བཞིན་གཤེགས་པའི་
སྐུ་ཚེ་དེ་ལྟར་གྱུར་ན། བསྐལ་པ་གཅིག་གམ། བསྐལ་པ་གཅིག་འགྲིབས་ཀྱི་བར་དུ་བཞུགས་ཏེ་དམ་པའི་ཆོས་ཀྱི་ཆར་རྟག་ཏུ་དབབ་པའི་རིགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཁྱོད་ཀྱིས་
དེ་བཞིན་གཤེགས་པ་ལ་འགོག་པ་འམ། ཟད་པའི་འདུ་ཤེས་མ་སྐྱེད་ཅིག །འོད་སྲུང་ཅི་སྟེ་དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་འམ། མུ་སྟེགས་ཅན་གྱི་བར་དུ་མངོན་པར་ཤེས་
པ་ལྔ་དང་ལྡན་པ་དབང་དུ་གྱུར་པ་དག་ཀྱང་བསྐལ་པ་གཅིག་གམ། བསྐལ་པ་གཅིག་འགྲིབས་ཀྱི་བར་དུ་ནམ་མཁའ་སྟོང་པ་ལ་འགྲོ་བ་དང་། སྡོད་པ་དང་། འདུག་པ་དང་། ཉལ་བའི་དབང་ཐོབ་ནས་རྩིབ་ལོགས་གཡོན་ནས་
ནི་མེ་འབར། རྩིབ་ལོགས་གཡས་ནས་ནི་ཆུ་འབབ། ལུས་ཀྱི་སྟོད་ནས་ནི་དུད་པ་འཐུལ་ཏེ། མེའི་ཕུང་པོ་ཆེན་པོ་ལྟ་བུར་ཡང་སྒྱུར་ལ། གལ་ཏེ་ཚེའི་བར་དུ་གནས་པར་འདོད་ན་ཡང་ཡིད་བཞིན་དུ་གནས་ཏེ་ཚེ་རིང་ཐུང་
གི་དབང་ཐོབ་ནས་དེ་ལྟར་མངོན་པར་ཤེས་པ་ལྔ་ཐོབ་པ་ཙམ་གྱིས་ཀྱང་ཡིད་བཞིན་གྱི་མཐུ་དང་ལྡན་ན་དེ་བཞིན་གཤེགས་པ་ཆོས་ཐམས་ཅད་ལ་དབང་སྒྱུར་བའི་མཐུ་བརྙེས་པ་ལྟ་ཅི་སྨོས་ཏེ། སྐུ་ཚེ་བསྐལ་པ་ཕྱེད་དམ། 

47-1-47b

བསྐལ་པ་གཅིག་གམ། བསྐལ་པ་བརྒྱ་སྟོང་ངམ། བསྐལ་པ་ཚད་མེད་པའི་བར་དུ་གནས་པ་ལྟ་ཅི་སྨོས་ཏེ། དོན་དེ་ལྟ་བས་ན་དེ་བཞིན་གཤེགས་པ་ནི་རྟག་པའི་སྐུ་གནས་པའི་ཆོས་ཅན་མི་འགྱུར་བའི་ཆོས་ཅན་དུ་རིག་པར་བྱའོ། །
དེ་བཞིན་གཤེགས་པའི་སྐུ་ནི་སྤྲུལ་པའི་སྐུ་སྟེ། ཟས་རྣམས་ཀྱི་སྐུ་མ་ཡིན་གྱི། སེམས་ཅན་བསྒྲལ་བའི་ཕྱིར་དུག་གི་སྡོང་པོ་དང་འདྲ་བར་བསྟན་ཏེ། དེ་བས་ན་ཡོངས་སུ་མྱ་ངན་ལས་འདའ་བ་བསྟན་པར་རིག་པར་བྱའོ། །དེ་བས་
ན་དེ་བཞིན་གཤེགས་པ་ནི་རྟག་པའི་ཆོས་ཅན་མི་འགྱུར་བའི་ཆོས་ཅན་དུ་རིག་པར་བྱ་སྟེ། ཁྱེད་ལ་སོགས་པས་དོན་དམ་པ་ལ་བརྩོན་འགྲུས་ཤིན་དུ་ནན་ཏན་བྱའོ། །ཤིན་དུ་ནན་ཏན་བྱས་ནས་ཀྱང་གཞན་དག་ལ་རྒྱ་ཆེར་བཤད་དོ། །
དེ་ནས་བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །འཇིག་རྟེན་ལས་འདའ་བའི་ཆོས་དང་། འཇིག་རྟེན་གྱི་ཆོས་ལ་བྱེ་བྲག་དང་ཁྱད་པར་ཅི་མཆིས། སངས་རྒྱས་ཀྱིས་
གསུངས་པ་ལྟར་སངས་རྒྱས་ཀྱང་རྟག་པའི་ཆོས་ཅན་མི་འགྱུར་བའི་ཆོས་ཅན་ལགས་ན། འཇིག་རྟེན་པ་ཚངས་པའི་ལྷ་ཡང་རྟག་ལ་དབང་སྒྱུར་གྱི་ལྷ་ཡང་རྟག་སྟེ། མི་འགྱུར་བའི་ཆོས་ཅན་བདག་ཅེས་བྱ་བ་ཡང་རྟག་
ལ། རང་བཞིན་ཡང་རྟག །རྡུལ་ཕྲ་མོ་ཡང་རྟག་ཅེས་མཆི་ན་ཅི་སྟེ་དེ་བཞིན་གཤེགས་པ་ཡང་རྟག་པའི་ཆོས་ཅན་ལགས་ན། དེ་བཞིན་གཤེགས་པས་ཅིའི་སླད་དུ་རྟག་པ་མངོན་པར་མི་སྟོན། ཅི་སྟེ་རྟག་པ་མངོན་
པར་མི་སྟོན་ན་བྱེ་བྲག་དང་ཁྱད་པར་ཡང་ཅི་ཞིག་མཆིས། ཚངས་པའི་ལྷ་ནས་རྡུལ་ཕྲ་མོ་དང་། རང་བཞིན་རྟག་ཅེས་མཆི་བ་ཡང་མངོན་པར་ནི་མ་མཆིས་སོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། 
འདི་ལྟ་སྟེ་དཔེར་ན་ཁྱིམ་བདག་གཅིག་ལ་བ་རྣམ་པ་མང་པོ་བདོག་པའི་སྤུ་མདོག་མི་མཐུན་ཡང་། ཁྱུ་གཅིག་ཏུ་རྫིའུ་ལ་གཏད་དེ། རྩྭ་དང་ཆུ་ག་ལ་ཡོད་པར་སྙེགས་ཤིང་འཚོའོ། །དེ་ཡང་ཞོ་དང་འོ་མ་ཙམ་

47-1-48a

གྱི་ཕྱིར་མ་ཡིན་གྱི། མར་གྱི་སྙིང་པོ་འདོད་པའི་ཕྱིར་རོ། །ཁྱིམ་བདག་དེ་ཕྱིས་ཤི་ནས་བ་རྣམས་ཀྱང་རྐུན་པོས་དེད་དོ། །རྐུན་པོ་དེ་དག་ལ་བུད་མེད་མེད་པས། བ་བཞོས་ནས་སོ་སོར་འཐུངས་སོ། །ཕྱིས་རྐུན་པོ་དེ་དག་
གཅིག་ལ་གཅིག་འདི་སྐད་དུ་སྔོན་ཁྱིམ་བདག་ཆེན་པོ་དེ་བ་འདི་སྙེད་གསོ་བ་ཡང་ཞོ་དང་འོ་མ་ཙམ་གྱི་ཕྱིར་མ་ཡིན་གྱི། མར་གྱི་སྙིང་པོ་འབའ་ཤིག་འདོད་པར་ཟད་ན་ད་བདག་ཅག་གིས་ཀྱང་ཐབས་ཅི་ཞིག་བྱས་ན། མར་གྱི་སྙིང་པོ་ཐོབ་པར་
འགྱུར་ཞེས་བགྲོས་སོ། །མར་གྱི་སྙིང་པོ་ཞེས་བྱ་བ་ནི་འཇིག་རྟེན་ན་རོ་བྲོ་བ་ཐམས་ཅད་ཀྱི་ནང་ན་མཆོག་ཡིན་ཏེ། ཅི་སྟེ་འོ་མ་ཡོད་དུ་ཟིན་གྱིས་ཀྱང་། བླུགས་པའི་སྣོད་མེད་ཅེས་སྨྲས་སོ། །ཡང་འདི་སྐད་དུ་བདག་ཅག་ལ་རྐྱལ་པ་ཡོད་པས་
རྐྱལ་པར་བླུགས་ཤེས་བགྲོས་ཏེ་བླུགས་པའི་གནས་ཡོད་དུ་ཟིན་གྱིས་ཀྱང་ཞོ་དང་སྲུབ་པའི་ཐབས་མི་ཤེས་པས་དེ་དག་གིས་དར་བ་ཙམ་ཡང་། ཐོབ་པར་མི་ནུས་ན་མར་ཐ་མལ་པ་ལ་ལྟ་ཅི་སྨོས་ཏེ། དེའི་ཚེ་རྐུན་པོ་མ་རུངས་
པ་དེ་དག་མར་གྱི་སྙིང་པོ་འདོད་པའི་ཕྱིར་ཡང་དང་ཡང་ཆུ་བསྣན་པས་འོ་མ་དང་། ཞོ་དང་མར་གྱི་སྙིང་པོའི་བར་དུ་བཅས་ཏེ་ཉམས་པར་གྱུར་ཏེ། །སྐྱེ་བོ་གླེན་པ་ཡང་དེ་དང་འདྲ་སྟེ། དགེ་བའི་བག་ཅུང་ཟད་ཡོད་པ་ཡང་དེ་བཞིན་
གཤེགས་པའི་དམ་པའི་ཆོས་ལས་བྱུང་ངོ་། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་དེ་བཞིན་གཤེགས་པའི་དགེ་བའི་ཆོས་ཚུལ་ཁྲིམས་དང་ཏིང་ངེ་འཛིན་དང་། ཤེས་རབ་ཀྱི་ཆ་ལས་རྐུས་
པ་ནི་ཇི་ལྟར་རྐུན་པོ་རྣམས་ཀྱིས་བརྐུས་པ་བཞིན་ནོ། །སྐྱེ་བོ་གླེན་པ་དག་ཀྱང་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཀྱི་ཆ་ཙམ་ཐོབ་མོད་ཀྱི། སྦྱོར་བའི་ཐབས་མེད་པས་རྣམ་པར་གྲོལ་ཞིང་སྟོན་མི་
ནུས་སོ། །དོན་དེ་ལྟ་བས་ན་རྟག་པའི་ཚུལ་ཁྲིམས་སམ། རྟག་པའི་ཏིང་ངེ་འཛིན་ནམ། རྟག་པའི་ཤེས་རབ་བམ། རྣམ་པར་གྲོལ་བའི་བར་དུ་ཐོབ་པར་མི་ནུས་པ་ནི་རྐུན་པོ་དེ་དག་ཐབས་མི་ཤེས་ཏེ། མར་ཀྱི་

47-1-48b

སྙིང་པོ་མི་ཐོབ་པ་དང་མཚུངས་སོ། །རྐུན་པོ་དེ་དག་མར་གྱི་སྙིང་པོ་འདོད་པའི་ཕྱིར་ཆུ་བསྣན་པ་ལྟར་སྐྱེ་བོ་མ་རབས་ཀྱང་དེ་དང་འདྲ་སྟེ། རྣམ་པར་ཐར་པ་འདོད་པའི་ཕྱིར་བདག་དང་། སེམས་ཅན་དང་། སྲོག་དང་། སྐྱེས་བུ་དང་། ཚངས་པ་དང་། 
དབང་སྒྱུར་དང་། ལྷ་དང་། རྡུལ་ཕྲ་མོ་དང་། འཇིག་རྟེན་གྱི་རང་བཞིན་དང་། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། འདུ་ཤེས་མེད་པ་དང་། འདུ་ཤེས་མེད་མིན་གྱི་བར་དུ་མྱ་ངན་ལས་འདས་པའོ། །
ཞེས་སྨྲས་ཏེ། དེ་ནི་ཡང་དག་པར་རྣམ་པར་གྲོལ་བ་འམ། མྱ་ངན་ལས་འདའ་བ་མི་ཐོབ་པ་ནི་ཇི་ལྟར་རྐུན་པོ་དེ་དག་མར་གྱི་སྙིང་པོ་མི་ཐོབ་པ་བཞིན་ནོ། །སྐྱེ་བོ་མ་རབས་དག་ཚངས་པར་སྤྱོད་པ་ཅུང་ཟད་ཙམ་དང་། ཕ་མ་
ལ་སྲི་ཞུ་བྱས་པ་ཙམ་གྱི་རྒྱུ་དང་རྐྱེན་གྱིས་མཐོ་རིས་ཀྱི་ལྷར་སྐྱེ་སྟེ། བདེ་བའི་ལོངས་སྤྱོད་ཅུང་ཟད་མྱོང་བ་ནི་ཇི་ལྟར་རྐུན་པོ་དེ་དག་འོ་མ་ལ་ཆུས་བསྣན་པ་བཞིན་ནོ། །སྐྱེ་བོ་མ་རབས་དག་ནི་ཚངས་པར་སྤྱོད་པ་ཅུང་ཟད་
ཙམ་དང་། ཕ་མ་ལ་སྲི་ཞུ་བྱས་པ་ཙམ་གྱི་རྒྱུས་མཐོ་རིས་ཀྱི་ལྷར་སྐྱེས་པར་མི་ཤེས་སོ། །གཞན་ཡང་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། དཀོན་མཆོག་གསུམ་ལ་སྐྱབས་སུ་འགྲོ་བར་
མི་ཤེས་སོ། །དེ་ལྟར་མི་ཤེས་པས་རྟག་པ་དང་། བདེ་བ་དང་བདག་དང་། ཡོངས་སུ་དག་པ་སྨྲ་མོད་ཀྱི་དེ་ཡང་མི་ཤེས་སོ། །དེ་བས་ན་དེ་བཞིན་གཤེགས་པ་འཇིག་རྟེན་དུ་གཤེགས་ནས་རྟག་པ་དང་། བདེ་བ་དང་། 
བདག་དང་། ཡོངས་སུ་དག་པ་བསྟན་ཅིང་བཤད་དོ། །ཇི་ལྟར་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན། དེའི་བསོད་ནམས་ཀྱི་ཤུགས་ཀྱིས་རྐུན་པོ་མ་རུངས་པ་དག་སོ་སོར་འབྱེར་ཞིང་འབྲོས་སོ། །
བ་རྣམས་མ་ཤི་བས་འཁོར་ལོས་སྒྱུར་བའི་རྒྱལ་པོས་རྫིའུ་ཐབས་དང་ལྡན་པ་ལ་གཏད་དེ་རྫིའུ་ཐབས་དང་ལྡན་པས་མར་གྱི་སྙིང་པོ་ཡང་ཡོད་པར་གྱུར་ཏོ། །མར་གྱི་སྙིང་པོ་ཡོད་པས་སེམས་ཅན་ཐམས་ཅད་ཀྱང་ནད་ཀྱི་སྡུག་བསྔལ་དང་བྲལ་

47-1-49a

ལོ། །ཆོས་ཀྱི་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་གཤེགས་ནས་སྐྱེ་བོ་མ་རབས་དག་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་སྟོན་མི་ནུས་ཏེ་སོ་སོར་འབྱེར་ཞིང་འབྲོས་སོ། །དེའི་ཚེ་བཅོམ་ལྡན་འདས་
ཀྱིས་འཇིག་རྟེན་གྱི་ཆོས་དང་། འཇིག་རྟེན་ལས་འདས་པའི་ཆོས་སེམས་ཅན་གྱི་དོན་དུ་བྱང་ཆུབ་སེམས་དཔའ་རྣམས་ལ་བསྟན་ཅིང་བཤད་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་མར་གྱི་སྙིང་པོ་ལྟ་བུ་
ཐོབ་པར་གྱུར་ཏེ། གཞན་ཡང་སེམས་ཅན་མཐའ་ཡས་དཔག་ཏུ་མེད་པ་དག་བླ་ན་མེད་པའི་ཆོས་བདུད་རྩི་ལྟ་བུ་ཐོབ་པར་བྱ་བ་ནི་འདི་ལྟ་སྟེ། དེ་བཞིན་གཤེགས་པའི་རྟག་པ་དང་། བདེ་བ་དང་། བདག་དང་ཡོངས་སུ་དག་པའི་
ཆོས་རྣམས་སོ། །དོན་དེ་ལྟ་བས་ན་རིགས་ཀྱི་བུ་དེ་བཞིན་གཤེགས་པ་ནི་རྟག་པ་དང་མི་འགྱུར་བའི་ཆོས་ཅན་ཡིན་ཏེ། འཇིག་རྟེན་པ་སྐྱེ་བོ་མ་རབས་དག་གིས་ཚངས་པའི་ལྷ་ལ་སོགས་པ་ལ་རྟག་པའི་ཆོས་ཡིན་ནོ་ཞེས་
སྨྲ་བ་དང་མི་འདྲ་སྟེ། རྟག་པའི་ཆོས་སུ་གྲགས་པ་འདི་ནི་མདོར་ན་དེ་བཞིན་གཤེགས་པ་ལ་བྱའི་ཆོས་གཞན་དག་ལ་ནི་མ་ཡིན་ནོ། །འོད་སྲུང་དེ་ལྟ་བས་ན་དེ་བཞིན་གཤེགས་པའི་སྐུར་རིག་པར་བྱའོ། །འོད་སྲུང་གང་རིགས་ཀྱི་བུ་འམ། 
རིགས་ཀྱི་བུ་མོ་དག་ནི་རྟག་ཏུ་རྩེ་གཅིག་པའི་སེམས་ཀྱིས་སངས་རྒྱས་རྟག་པ་དང་གནས་པའོ་ཞེས་བྱ་བའི་ཚིག་འདི་གཉིས་ལ་ནན་ཏན་བྱའོ། །འོད་སྲུང་གང་རིགས་ཀྱི་བུ་འམ་རིགས་ཀྱི་བུ་མོ་དག་ནི་ཚིག་འདི་གཉིས་ལ་ནན་
ཏན་བྱེད་ན། གང་ཟག་དེ་ནི་ངའི་རྗེས་སུ་སྤྱོད་ཅིང་ངས་ཕྱིན་པའི་གནས་སུ་ཕྱིན་པར་བྱའོ། །རིགས་ཀྱི་བུ་གང་གིས་ཚིག་འདི་གཉིས་ལ་ནན་ཏན་བྱེད་པ་དེ་མཚན་མ་སྤངས་ན་དེ་བཞིན་གཤེགས་པས་ཡོངས་སུ་མྱ་ངན་ལས་འདའ་
བར་དགོངས་པར་རིག་པར་བྱའོ། །རིགས་ཀྱི་བུ་མྱ་ངན་ལས་འདའ་བའི་དོན་ནི་སངས་རྒྱས་ཀྱི་ཆོས་ཉིད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་

47-1-49b

འདས་ཆོས་ཉིད་ཅེས་བགྱི་བའི་དོན་ཇི་ལྟ་བུ་ལགས་བཅོམ་ལྡན་འདས་བདག་ནི་ཆོས་ཉིད་ཀྱི་དོན་ཇི་ལྟ་བུ་ལགས་པ་མི་འཚལ་ན་དེ་བཞིན་གཤེགས་པས་ཐུགས་བརྩེ་བའི་སླད་དུ་རྒྱས་པར་བསྟན་དུ་གསོལ། ཆོས་ཉིད་ཅེས་བགྱི་
བ་ནི་ལུས་དང་རྣམ་པར་བྲལ་ལུས་དང་བྲལ་བ་ནི་ཅི་ཡང་མ་མཆིས་པ་སྟེ། ཅི་ཡང་མ་མཆིས་ན་ལུས་ཤེས་བགྱི་བ་ཡང་ཇི་ལྟར་རྣམ་པར་གཞག །ལུས་རྣམ་པར་གཞག་ཏུ་མཆིས་ན་ནི་ལུས་ལ་ཆོས་ཉིད་ཀྱང་མ་མཆིས་པར་འགྱུར་རོ། །
ལུས་ལ་ཆོས་ཉིད་ཀྱང་མ་མཆིས་པར་གྱུར་ན་ཇི་ལྟ་བུར་རྣམ་པར་གཞག །བདག་གི་ཇི་ལྟར་རིག་པར་བགྱི་ཞེས་གསོལ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་འདི་སྐད་ཅེས་བཀའ་སྩལ་ཏོ། །རིགས་
ཀྱི་བུ་ཁྱོད་ཀྱིས་འདི་ལྟར་ཆོས་ཉིད་དགག་པར་མི་བྱའོ། །ཆོས་ཉིད་ཅེས་བྱ་བ་ལ་ནི་འགོག་པ་མེད་དོ། །རིགས་ཀྱི་བུ་དཔེར་ན་འདུ་ཤེས་མེད་པའི་ལྷ་དག་གཟུགས་ཀྱི་ཕུང་པོ་དང་ལྡན་མོད་ཀྱི་གཟུགས་ཀྱི་འདུ་ཤེས་མེད་པས་ལྷ་དེ་
ལ་ནི་ཇི་ལྟར་གནས། བདེ་བ་ལ་ཇི་ལྟར་ལོངས་སྤྱོད། ཇི་ལྟར་འདུ་ཤེས་ལ་སྤྱོད། ཇི་ལྟར་ཐོས་ཤིང་མཐོང་ཞེས་འདྲི་བའི་མི་རིགས་སོ། །རིགས་ཀྱི་བུ་དེ་བཞིན་གཤེགས་པའི་སྤྱོད་ཡུལ་ནི་ཉན་ཐོས་དང་རང་སངས་རྒྱས་ཀྱིས་
ཤེས་པ་མ་ཡིན་ནོ། །རིགས་ཀྱི་བུ་དེ་བཞིན་གཤེགས་པའི་སྐུ་ལ་ནི་འགོག་པའི་ཆོས་སོ་ཞེས་སྨྲ་བར་མི་བྱའོ། །རིགས་ཀྱི་བུ་འགོག་པའི་ཆོས་ནི་སངས་རྒྱས་ཀྱི་སྤྱོད་ཡུལ་ཡིན་གྱི། ཉན་ཐོས་དང་རང་སངས་རྒྱས་ཀྱིས་ཤེས་
པ་མ་ཡིན་ནོ། །རིགས་ཀྱི་བུ་ཁྱོད་ཀྱིས་ནི་དེ་བཞིན་གཤེགས་པ་གང་དུ་གནས་གང་དུ་སྤྱོད། གང་དུ་གཟིགས། ཅི་ལ་ལོངས་སྤྱོད་པ་རྟོག་ཅིང་དཔག་པར་མི་བྱའོ། །རིགས་ཀྱི་བུ་དོན་དེ་དག་ནི་ཁྱོད་ལ་སོགས་པས་ཤེས་ཤིང་རྟོགས་
པ་མ་ཡིན་ཏེ། སངས་རྒྱས་ཀྱི་ཆོས་ཀྱི་སྐུ་དང་། རྣམ་པ་སྣ་ཚོགས་ཀྱི་ཐབས་ནི་བསམ་གྱིས་མི་ཁྱབ་བོ། །རིགས་ཀྱི་བུ་གཞན་ཡང་སངས་རྒྱས་དང་། ཆོས་དང་དགེ་འདུན་ལ་རྟག་ཏུ་དྲན་ཞིང་ནན་ཏན་བྱའོ། །ཆོས་རྣམས་

47-1-50a

པ་གསུམ་པོ་འདི་ནི་ཐ་དད་པ་མ་ཡིན་པའི་མཚན་ཉིད་མི་རྟག་པ་མ་ཡིན་པའི་མཚན་ཉིད། མི་འཕོ་བའི་མཚན་ཉིད་དོ། །གང་ཞིག་ཆོས་རྣམ་པ་གསུམ་པོ་འདི་ལ་ཐ་དད་པར་འདུ་ཤེས་ན་སྐྱེ་བོ་དེ་ནི་སྐྱབས་
སུ་འགྲོ་བ་གསུམ་ལ་མི་གནས་པ། ཚུལ་ཁྲིམས་དང་མི་ལྡན་པ་ཞེས་བྱ་བ་སྟེ། ཉན་ཐོས་དང་རང་སངས་རྒྱས་ཀྱི་བྱང་ཆུབ་ཀྱང་ཐོབ་པར་མི་ནུས་སོ། །གང་གིས་བསམ་གྱིས་མི་ཁྱབ་པ་དེ་ལ་རྟག་པའི་འདུ་ཤེས་
ཀྱིས་ནན་ཏན་བྱེད་ན་དེ་ནི་སྐྱབས་སུ་འགྲོ་བའི་གནས་ཡིན་ནོ། །རིགས་ཀྱི་བུ་དཔེར་ན་ཤིང་ཡོད་པའི་རྐྱེན་ཀྱིས་གྲིབ་མ་ཡོད་དོ། །དེ་བཞིན་གཤེགས་པ་ཡང་དེ་དང་འདྲ་སྟེ། རྟག་པའི་ཆོས་ཡོད་པས་སྐྱབས་སུ་འགྲོ་བའི་
གནས་ཡོད་ཀྱི་མི་རྟག་པ་ནི་མ་ཡིན་ནོ། །གང་ཞིག་དེ་བཞིན་གཤེགས་པ་ལ་མི་རྟག་པའོ་ཞེས་སྨྲ་ན་དེ་བཞིན་གཤེགས་པ་ཡང་ལྷ་དང་འཇིག་རྟེན་དུ་བཅས་པའི་སྐྱབས་སུ་འགྲོ་བའི་གནས་མ་ཡིན་ནོ། །དེ་ནས་བཅོམ་ལྡན་
འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དཔེར་ན་ནམ་རྨུས་ན་སྐྱེད་ཤིང་མཆིས་ཀྱང་གྲིབ་མ་ནི་མ་མཆིས་སོ། །བཀའ་སྩལ་པ། འོད་སྲུང་ཤིང་ཡོད་ལ་གྲིབ་མ་
མེད་ཅེས་མི་བྱའོ། །དེ་ནི་ཤའི་མིག་གིས་མི་མཐོང་བའི་ཕྱིར་རོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། རང་བཞིན་ཉིད་ཀྱིས་རྟག་ཏུ་གནས་ལ་མི་འགྱུར་མི་འཕོ་མོད་ཀྱི། ཤེས་རབ་ཀྱི་མིག་མེད་པས་ནི་
མཐོང་བར་མི་ནུས་ཏེ། ཇི་ལྟར་ནམ་རྨུས་པའི་ཚེ་ཤིང་གི་གྲིབ་མ་མི་མཐོང་བ་བཞིན་ནོ། །སྐྱེ་བོ་མ་རབས་ཀྱང་སངས་རྒྱས་མྱ་ངན་ལས་འདས་ནས་གང་གིས་དེ་བཞིན་གཤེགས་པ་ནི་མི་རྟག་པའོ་ཞེས་སྨྲ་བ་ཡང་དེ་དང་འདྲ་སྟེ། 
གང་གིས་དེ་བཞིན་གཤེགས་པ་ནི་ཆོས་དང་། དགེ་འདུན་དང་ཐ་དད་དོ་ཞེས་སྨྲ་ན་དེ་ནི་སྐྱབས་སུ་འགྲོ་བའི་གནས་གསུམ་པོར་མི་འགྱུར་རོ། །དཔེར་ན་ཁྱོད་ཀྱི་ཕ་མ་ནི་སོ་སོ་ཐ་དད་པའི་ཕྱིར་མི་རྟག་ཅེས་བྱར་རུང་ངོ་། །དེ་ནས་

47-1-50b

བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་གདོད་སངས་རྒྱས་དང་། ཆོས་དང་། དགེ་འདུན་རྟག་པ་དང་། རབས་བདུན་གྱི་ཕ་མའི་བར་དུ་དྲན་པར་འགྱུར་བ་
ནི་ངོ་མཚར་ཆེའོ། །བཅོམ་ལྡན་འདས་བདག་གིས་དེ་བཞིན་གཤེགས་པ་དང་། ཆོས་དང་། དགེ་འདུན་བསམ་གྱིས་མི་ཁྱབ་པ་ལ་གོམས་པར་བགྱིད་དེ། བདག་དེ་ལ་གོམས་ནས་གཞན་དག་ལ་ཡང་དོན་དེ་རྒྱ་ཆེར་བསྟན་པར་
བགྱིའོ། །གང་ཞིག་འདི་ལ་ཡིད་མི་ཆེས་པ་དེ་ནི་ཡུན་རིང་པོ་ནས་མི་རྟག་པ་སྒོམ་པ་སྟེ། བདག་གིས་དེ་ལ་བ་མོ་འམ། སེར་བ་ལྟ་བུར་བགྱིའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ལེགས་སོ། །
ལེགས་སོ་ཞེས་བཀའ་སྩལ་ནས་ཁྱོད་ནི་དམ་པའི་ཆོས་ཤིན་དུ་སྲུང་ཞིང་ཡོངས་སུ་འཛིན་པ་སྟེ། དེ་ལྟར་ཆོས་སྲུང་ཞིང་སེམས་ཅན་ལ་མི་སླུ་བའི་དགེ་བའི་རྩ་བ་ལས་དེ་ཉིད་ཀྱི་རྐྱེན་གྱིས་ཚེ་རིང་བ་དང་སྔོན་གྱི་གནས་ཤེས་
པར་འགྱུར་རོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས་སྐུ་ཚེའི་ལེའུ་ཞེས་བྱ་སྟེ་གཅིག་གོ། །། དེ་ནས་བཅོམ་ལྡན་འདས་ཀྱིས་འོད་སྲུང་ལ་འདི་སྐད་ཅེས་བཀའ་སྩལ་ཏོ། །རིགས་
ཀྱི་བུ་དེ་བཞིན་གཤེགས་པའི་སྐུ་ཞེས་བྱ་བ་ནི་རྟག་ཏུ་གནས་པའི་སྐུ། མི་འཇིག་པའི་སྐུ། རྡོ་རྗེའི་སྐུ། ཟས་རྣམས་ཀྱི་སྐུ་མ་ཡིན་གྱི་ཆོས་ཀྱི་སྐུའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་
འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར་སྐུ་དེ་དག་ནི་བདག་གིས་མ་མཐོང་གི། མི་རྟག་པ་དང་། འཇིག་པ་དང་། རྡུལ་དང་། ཟས་རྣམས་ཀྱི་སྐུར་མཐོང་ངོ་། །དེ་ཅིའི་སླད་དུ་ཞེ་ན། དེ་བཞིན་
གཤེགས་པ་ཡོངས་སུ་མྱ་ངན་ལས་འདས་པར་གཤེགས་པའི་སླད་དུའོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཁྱོད་ཀྱིས་དེ་བཞིན་གཤེགས་པའི་སྐུ་ལ་སྙིང་པོ་མེད་པ་འམ། འཇིག་པ་ཅན་སྐྱེ་བོ་མ་

47-1-51a

རབས་ཀྱི་ལུས་དང་འདྲ་བར་མི་བལྟའོ། །རིགས་ཀྱི་བུ་ཁྱོད་ཀྱིས་འདི་ལྟར་རིག་པར་བྱ་སྟེ། དེ་བཞིན་གཤེགས་པའི་སྐུ་ནི་བསྐལ་པ་ཚད་མེད་པའི་བར་དུ་བརྟན་པ། སྙིང་པོ་ཅན་མི་འཇིག་པ། ལྷ་དང་མིའི་ལུས་
ལྟ་བུ་མ་ཡིན་པ། འཇིག་པའི་སྐུ་མ་ཡིན་པ། ཟས་རྣམས་ཀྱི་སྐུ་མ་ཡིན་པའོ། །དེ་བཞིན་གཤེགས་པའི་སྐུ་ནི་སྐུ་མ་ཡིན་པའི་སྐུ། མི་སྐྱེ་མི་འགོག་པ། མ་བསྡུས་པ། ཚད་མེད་པ། མཐའ་ཡས་པ། རྗེས་མེད་པ། 
ཤེས་པ་མེད་པ། གཟུགས་མེད་པ། མཐར་རྣམ་པར་དག་པ། མི་གཡོ་བ་ཚོར་བ་མེད་པ། འདུ་བྱེད་མེད་པ། མི་གནས་པ། མ་བྱས་པ་བྲོ་བ་མེད་པ། མ་འདྲེས་པ། འདུས་བྱས་པ་མ་ཡིན། ལས་མ་ཡིན། འབྲས་བུ་མ་
ཡིན། སྤྱོད་པ་མ་ཡིན། འགོག་པ་མ་ཡིན། སེམས་མ་ཡིན། བགྲང་བ་མ་ཡིན། བསམ་གྱིས་མི་ཁྱབ་པ། དཔག་ཏུ་མེད་པ། རྣམ་པར་མི་ཤེས་པ། སེམས་དང་བྲལ་བ། སེམས་དང་བྲལ་བ་ཡང་མ་ཡིན་པ། 
སེམས་མཉམ་པ་མེད་པ། མེད་པ་ཡང་མ་ཡིན་པ། སོང་བ་དང་འོང་བ་མེད་པ། སོང་བ་དང་འོང་བ་མེད་པ་མ་ཡིན་པ། མི་འཇིག་པ། མ་ཉམས་པ། མི་ཆད་པ། མ་ཆད་པ། མ་བྱུང་བ། མི་འགོག་པ། བདག་པོ་མེད་པ། 
བདག་པོ་མེད་པ་ཡང་མ་ཡིན་པ། ཡོད་པ་ཡང་མ་ཡིན། མེད་པ་ཡང་མ་ཡིན། ཚོར་བ་ཡང་མ་ཡིན། རྟོག་པ་མ་ཡིན། ཡི་གེ་མ་ཡིན། ཡི་གེ་མེད་པ་མ་ཡིན། ཏིང་ངེ་འཛིན་མ་ཡིན། ཏིང་ངེ་འཛིན་མེད་པ་མ་ཡིན། 
བལྟར་མེད་པ། མངོན་པར་སྣང་བ། གནས་མེད་པ། གནས་མེད་པ་མ་ཡིན་པ། རྟེན་མེད་པ། རྟེན་མེད་པ་ཡང་མ་ཡིན་པ། མུན་པ་མ་ཡིན་པ། སྣང་བ་མ་ཡིན་པ། ཞི་བ་མ་ཡིན། མ་ཞི་བ་མ་ཡིན། ཅི་ཡང་མེད་པ་
མི་ལེན་པ། མི་གཏོང་བ། རྣམ་པར་དག་པ། དྲི་མ་མེད་པ། རྩོད་པ་མེད་པ། རྩོད་པ་ཆད་པ། གནས་མེད་པར་གནས་པ། མི་ལེན་པ། མི་ལྟུང་བ་ཆོས་མ་ཡིན་པ། ཆོས་མ་ཡིན་པ་ཡང་མ་ཡིན་པ། བསོད་ནམས་

47-1-51b

ཀྱི་ཞིང་མ་ཡིན་པ། བསོད་ནམས་ཀྱི་ཞིང་མ་ཡིན་པ་ཡང་མ་ཡིན་པ། མི་ཟད་པ་ཟད་པ་མེད་པ། ཟད་པ་ཐམས་ཅད་དང་བྲལ་བ། སྟོང་པ་ཉིད་སྟོང་པ་དང་བྲལ་བ། རྟག་ཏུ་གནས་པ་མ་ཡིན་པ། སྐད་ཅིག་པའི་
རྒྱུན་ཀྱིས་འགོག་པ་མ་ཡིན་པ། རྙོག་པའི་དྲི་མ་མེད་པ། ཡི་གེ་མེད་པ། ཡི་གེ་དང་བྲལ་བ། སྒྲ་མ་ཡིན་བཤད་པ་མ་ཡིན། གོམས་པར་བསྒོམས་པ་མ་ཡིན། བརྗོད་པ་མ་ཡིན། དཔོག་པ་མ་ཡིན་གཅིག་མ་
ཡིན། ཐ་དད་པ་མ་ཡིན། གཟུགས་མ་ཡིན། མཚན་མ་ཡིན། མཚན་རྣམ་པས་བརྒྱན་པ། དཔའ་བ་མ་ཡིན། སྐྲག་པ་མ་ཡིན། ཞི་བ་མེད་པ། མ་ཞི་བ། མ་གདུངས་པ། མི་གདུང་བ་བལྟར་མེད་པ། མཚན་
མ་མེད་པ། དེ་བཞིན་གཤེགས་པ་ནི་སེམས་ཅན་ཐམས་ཅད་ཀྱི་དོན་བྱས་ཀྱང་སེམས་ཅན་གྱི་དོན་བྱས་པ་མེད་པ། སེམས་ཅན་རྣམ་པར་བཀྲོལ་ཡང་རྣམ་པར་བཀྲོལ་བ་མེད་པ། སེམས་ཅན་མངོན་པར་འཚང་
རྒྱ་བར་མཛད་ཀྱང་མངོན་པར་འཚང་རྒྱ་བ་མེད་པ། གཉིས་སུ་མེད་པར་ཡང་དག་པ་ཇི་ལྟ་བ་བཞིན་དུ་ཆོས་སྟོན་པ། དཔག་ཏུ་མེད་པ། མི་མཉམ་པ་དང་མཉམ་པ། ནམ་མཁའ་དང་མཉམ་པ། གཟུགས་མེད་པ་མ་
སྐྱེས་པ་ཉིད་དང་འཐུན་པ། མི་ཆད་པ། མི་རྟག་པ། རྟག་ཏུ་ཐེག་པ་གཅིག་ལ་སྤྱོད་ཀྱང་སེམས་ཅན་གྱིས་གསུམ་དུ་མཐོང་བ། མི་འགྱུར་བ་མི་ལྡོག་པ། ཀུན་ནས་ཉོན་མོངས་པ་ཐམས་ཅད་བཅད་པ། མི་རྩོད་པ། 
མི་གཅིག་པ། མཚན་ཉིད་མ་ཡིན་པ། མཚན་ཉིད་ལ་གནས་པ། འདུས་པ་མ་ཡིན། གྱེས་པ་མ་ཡིན། རིང་བ་མ་ཡིན། ཐུང་བ་མ་ཡིན། ཟླུམ་པོ་མ་ཡིན། གྲུ་བཞི་མ་ཡིན། ཕུང་པོ་དང་སྐྱེ་མཆེད་དང་ཁམས་མ་ཡིན། ཕུང་པོ་དང་སྐྱེ་
མཆེད་དང་ཁམས་མ་ཡིན་པ་ཡང་མ་ཡིན། འཕེལ་བ་མ་ཡིན། འབྲི་བ་མ་ཡིན། བཟང་པོ་མ་ཡིན། ངན་པ་མ་ཡིན་ནོ། །དེ་བཞིན་གཤེགས་པའི་སྐུ་ནི་དེ་ལྟར་ཡོན་ཏན་ཚད་མེད་པ་དང་ལྡན་ཏེ། ཤེས་པ་མེད་ཅིང་མི་ཤེས་པ་ཡང་མེད། མཐོང་བ་མེད་ཅིང་

47-1-52a

མི་མཐོང་བ་ཡང་མེད། འདུས་བྱས་པ་མ་ཡིན། འདུས་མ་བྱས་པ་མ་ཡིན། འཇིག་རྟེན་མ་ཡིན། འཇིག་རྟེན་མ་ཡིན་པ་འང་མ་ཡིན། བྱས་པ་མ་ཡིན། མ་བྱས་པ་འང་མ་ཡིན། གནས་མ་ཡིན། མི་གནས་
པ་མ་ཡིན། ཆེན་པོ་བཞི་མ་ཡིན། ཆེན་པོ་བཞི་མ་ཡིན་པ་ཡང་མ་ཡིན། རྒྱུ་མ་ཡིན། རྒྱུ་མེད་པ་མ་ཡིན། སེམས་ཅན་མ་ཡིན། སེམས་ཅན་མེད་པ་མ་ཡིན། དགེ་སྦྱོང་མ་ཡིན། བྲམ་ཟེ་མ་ཡིན། སེང་གེ་ལྟ་བུ། སེང་གེ་
ཆེན་པོ། སྐུ་མ་ཡིན། སྐུ་མ་ཡིན་པ་ཡང་མ་ཡིན་པ། བརྗོད་དུ་མེད་པ། ཆོས་གཅིག་ཙམ་གྱི་མཚན་ཉིད་དང་ཡང་བྲལ་བ། བརྩི་བ་འམ་བགྲང་བར་མི་རུང་བ། མྱ་ངན་ལས་འདའ་བ་ན་མྱ་ངན་ལས་མི་འདའ་བ་སྟེ། དེ་བཞིན་
གཤེགས་པའི་ཆོས་ཀྱི་སྐུ་ནི་དེ་ལྟ་བུའི་ཡོན་ཏན་ཚད་མེད་པ་དམ་པ་དང་ལྡན་ནོ། །འོད་སྲུང་དེ་ནི་དེ་བཞིན་གཤེགས་པ་ཉག་གཅིག་གིས་མཁྱེན་ཀྱི། ཉན་ཐོས་དང་རང་སངས་རྒྱས་ཀྱིས། ཤེས་པ་མ་ཡིན་ནོ། །འོད་སྲུང་དེ་ལྟར་དེ་
བཞིན་གཤེགས་པའི་སྐུ་ནི་ཡོན་ཏན་ཚད་མེད་པ་དང་ལྡན་ཏེ། ཟས་རྣམས་ཀྱིས་བསྐྱེད་ཅིང་གསོ་བའི་སྐུ་ནི་མ་ཡིན་ནོ། །འོད་སྲུང་དེ་བཞིན་གཤེགས་པའི་སྐུ་ཡང་དག་པའི་ཡོན་ཏན་ནི་འདི་ལྟ་བུ་ཡིན་ན་དེ་ལ་ན་བ་འམ། 
སྡུག་བསྔལ་བ་འམ། སྙིང་པོ་མེད་པ་འམ། མི་བརྟན་པ་རྫ་སོ་མ་བཏང་བ་ལྟ་བུ་ག་ལ་ཞིག་ཡོད། འོད་སྲུང་དེ་བཞིན་གཤེགས་པས་ན་བ་དང་སྡུག་བསྔལ་བ་བསྟན་པ་ནི་སེམས་ཅན་གདུལ་བའི་ཕྱིར་རོ། །རིགས་ཀྱི་བུ་ཁྱོད་
ཀྱིས་འདི་ལྟར་རིག་པར་བྱ་སྟེ། དེ་བཞིན་གཤེགས་པའི་སྐུ་ནི་རྡོ་རྗེའི་སྐུ་ཡིན་ཏེ་དེང་ཕྱིན་ཆད་ཁྱོད་ཀྱིས་དོན་འདི་རྩེ་གཅིག་པའི་སེམས་ཀྱིས་ཡིད་ལ་བྱའི་ཟས་རྣམས་ཀྱི་སྐུར་ནི་མི་བསམ་མོ། །གཞན་ལ་ཡང་དེ་བཞིན་གཤེགས་
པའི་སྐུ་ནི་ཆོས་ཀྱི་སྐུ་ཡིན་པར་སྟོན་ཅིག །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་ལྟར་དེ་བཞིན་གཤེགས་པ་དེ་ལྟ་བུའི་ཡོན་ཏན་དང་ལྡན་ན་བསྙུངས་

47-1-52b

པ་དང་། མི་རྟག་པ་དང་། འཇིག་པ་ལྟ་ག་ལ་ཞིག་མཆིས་ཏེ། བདག་ནི་དེང་སླན་ཆད་དེ་བཞིན་གཤེགས་པའི་སྐུ་ནི་རྟག་པ། ཆོས་ཀྱི་སྐུ་རབ་ཏུ་བདེ་བའི་སྐུར་ཡིད་ལ་བགྱིད་དེ། གཞན་དག་ལ་ཡང་དེ་བཞིན་དུ་བསྟན་པར་འཚལ་ལོ། །
བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་ནི་རྡོ་རྗེ་ལྟ་བུར་མི་འཇིག་པ་ལགས་ན་ཅིའི་རྒྱུ་ལས་གྱུར་པ་ནི་བདག་གིས་མི་འཚལ་ཏོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། དམ་པའི་ཆོས་སྲུང་ཞིང་འཛིན་
པ་དེའི་རྒྱུ་དེའི་རྐྱེན་གྱིས་རྡོ་རྗེའི་སྐུ་དང་ལྡན་པར་གྱུར་ཏོ། །འོད་སྲུང་ངས་སྔོན་ཆོས་ཡོངས་སུ་བསྲུང་བའི་རྒྱུ་དང་རྐྱེན་གྱིས་རྡོ་རྗེའི་སྐུ་དང་ལྡན་ཏེ་རྟག་ཏུ་གནས་པ་དང་མི་འཇིག་པར་གྱུར་ཏོ། །རིགས་ཀྱི་བུ་དམ་པའི་ཆོས་སྲུང་ཞིང་
སྲུང་བ་ནི་ཁྲིམས་ལྔ་ཡང་མི་འཛིན་ཏེ་སྤྱོད་ལམ་ཡང་མི་སྲུང་བར་མཚོན་ཆ་རལ་གྲི་དང་། མདའ་གཞུ་དང་། མདུང་ལ་སོགས་པ་ཐོགས་ཏེ་དགེ་སློང་ཚུལ་ཁྲིམས་ཡོངས་སུ་དག་པ་དག་སྲུང་བའོ། །དེ་ནས་བཅོམ་ལྡན་འདས་
ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །ཡང་བཅོམ་ལྡན་འདས་དགེ་སློང་གང་བསྲུང་བ་བཏང་སྟེ། དབེན་པའི་གནས་དུར་ཁྲོད་དམ། ཤིང་དྲུང་ན་གནས་པ་ནི་དགེ་སློང་ཡང་དག་པ་ལགས་ཀྱི་
གང་སྲུང་བའི་རྗེས་སུ་སྤྱོད་པ་ནི་ཁྱིམ་བདག་མགོ་རེག་གོ་ཞེས་འབྱུང་ངོ་། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཁྱིམ་བདག་མགོ་རེག་ཅེས་མ་ཟེར་ཅིག །དགེ་སློང་གང་དུ་གནས་ཀྱང་ལུས་ཀྱི་ཡོ་བྱད་
ཙམ་ཆོག་པར་ལེན་ཅིང་། མདོ་སྡེ་ཀློག་པ་དང་། འདོན་པ་དང་། བསམ་གཏན་ཡིད་ལ་བྱེད་པ་དང་། ཆོས་འདྲི་བ་ཡོད་ན་དེ་ལ་སྦྱིན་པ་དང་ཚུལ་ཁྲིམས་དང་། བསོད་ནམས་ཀྱི་ཚོགས་དང་། འདོད་པ་ཉུང་བ་དང་། ཆོག་ཤེས་པ་
ལ་སོགས་པ་ཆོས་རྣམ་པ་སྣ་ཚོགས་སྟོན་ཀྱང་དེ་ནི་སེང་གེའི་སྒྲ་སྒྲོགས་པ་ཞེས་མི་བྱ། སེང་གེས་ཡོངས་སུ་བསྐོར་བ་ཞེས་ཀྱང་མི་བྱ། ཆོས་ངན་པ་སྤྱོད་པ་གདུལ་ནུས་པ་མ་ཡིན། དགེ་སློང་དེ་ནི་བདག་གི་དོན་ཀྱང་བྱེད་མི་

47-1-53a

ནུས་ལ། གཞན་གྱི་དོན་བྱེད་པ་ཡང་མ་ཡིན་ཏེ། དེ་ནི་བག་མེད་པ་ལེ་ལོ་ཅན་ཡིན་ཏེ། ཚུལ་ཁྲིམས་སྲུང་ཞིང་ཚངས་པར་སྤྱོད་ཀྱང་དེ་ནི་ཅི་ཡང་མི་ནུས་པར་རིག་པར་བྱའོ། །དགེ་སློང་གང་འཚོ་བའི་ཡོ་བྱད་ཀྱང་
མང་དུ་ཡོད་ལ། ཚུལ་ཁྲིམས་ཀྱང་ཡོངས་སུ་སྲུང་ཞིང་སེང་གེའི་སྒྲ་སྒྲོགས་ཏེ། དམ་པའི་ཆོས་མདོའི་སྡེ་དང་། དབྱངས་ཀྱིས་བསྙད་པ་དང་། ལུང་དུ་བསྟན་པ་དང་ཚིགས་སུ་བཅད་པ་དང་། ཆེད་དུ་བརྗོད་པ་དང་། སྐྱེས་པའི་
རབས་དང་། དེ་ལྟ་བུ་བྱུང་བ་དང་། གླེང་གཞི་དང་། རྨད་དུ་བྱུང་བ་དང་། རྟོགས་པ་བརྗོད་པ་དང་། ཤིན་ཏུ་རྒྱས་པ་དང་། གཏན་ལ་བབ་པར་བསྟན་པ་ལ་སོགས་པ་མདོ་སྡེ་དགུ་པོ་དག་འདོན་ཅིང་། གཞན་དག་ལ་རྒྱ་ཆེར་སྟོན་ལ། སེམས་ཅན་
ལ་ཕན་པ་དང་བདེ་བའི་ཕྱིར་འདི་སྐད་དུ་མྱ་ངན་ལས་འདའ་བའི་མདོ་ལས་དགེ་སློང་རྣམས་བྲན་ཁོལ་དང་། བ་ལང་དང་། ལུག་ལ་སོགས་པ་ཆོས་མ་ཡིན་པའི་དངོས་པོ་འཆང་དུ་མི་གནང་ངོ་ཞེས་འབྱུང་སྟེ། དགེ་སློང་མ་བརྟགས་
པའི་དངོས་པོ་དེ་དག་འཆང་ན་ཆད་པས་ཆོད་ཅིག་ཅེས་སྨྲས་ལ། དེ་བཞིན་གཤེགས་པས་སྔོན་མདོ་སྡེ་གཞན་དག་ལས་ཀྱང་དགེ་སློང་མ་བརྟགས་པའི་དངོས་པོ་དེ་དག་བཅངས་པས་རྒྱལ་པོ་ཆེ་གེ་མོ་ཞིག་གིས་ཆད་པས་
བཅད་དེ་ཁྱིམ་པར་ཕབ་བོ་ཞེས་དགེ་སློང་གང་འདི་སྐད་དུ་སེང་གེའི་སྒྲ་སྒྲོགས་པ་ནི་ཚུལ་ཁྲིམས་ངན་པ་ཅན་དག་དེ་སྐད་ཅེས་ཐོས་ནས་ཞེ་སྡང་སྐྱེས་ཏེ། ཆོས་སྨྲ་བ་དེ་གསོད་དོ། །ཆོས་སྨྲ་བ་དེ་ཅི་སྟེ་ཚེ་འཕོས་ནས་ཡང་ཚུལ་
ཁྲིམས་འཛིན་ཅིང་བདག་དང་གཞན་གྱི་དོན་བྱེད་པ་ཞེས་བྱ་སྟེ། དེ་ལྟ་བས་ན་ངས་ནི་རྒྱལ་པོ་དང་། བློན་པོ་ཆེན་པོ་དང་། དགེ་བསྙེན་རྣམས་ཀྱིས་ཆོས་སྨྲ་བ་དག་བསྲུང་བར་གནང་ངོ་། །གང་དམ་པའི་ཆོས་བསྲུང་བར་འདོད་པ་ནི་དེ་ལྟར་
བསླབ་པར་བྱའོ། །འོད་སྲུང་དེ་ལྟར་ཚུལ་ཁྲིམས་ཉམས་ཤིང་ཆོས་མི་སྲུང་བ་ནི་ཁྱིམ་བདག་མགོ་རེག་ཅེས་བྱའི། ཚུལ་ཁྲིམས་སྲུང་བ་ལ་ནི་མ་ཡིན་ནོ།། །། བམ་པོ་ལྔ་པ། རིགས་ཀྱི་བུ་སྔོན་གྱི་བསྐལ་པ་

47-1-53b

ཚད་མེད་མཐའ་ཡས་གྲངས་མེད་པ་འདས་པའི་ཕ་རོལ་ན་གྲོང་ཁྱེར་རྩྭ་མཆོག་འདི་ཉིད་དུ་སངས་རྒྱས་བཅོམ་ལྡན་འདས་རབ་ཏུ་དགའ་བ་བསྐྱེད་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པ། མཁྱེན་པ་
དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་མངོན་པར་བྱུང་ངོ་། །དེའི་ཚེ་དེའི་དུས་ན་འཇིག་
རྟེན་གྱི་ཁམས་འདི་ཡང་ཤིན་ཏུ་ཡངས་ཤིང་ཡོངས་སུ་དག་ལ་མི་རབ་ཏུ་མང་ཞིང་བདེ་སྐྱིད་པ་དང་། ཟས་དང་སྐོམ་གྱིས་མི་བྲེལ་བ་ནི་ཇི་ལྟར་རབ་ཏུ་བདེ་བ་ཅན་གྱི་འཇིག་རྟེན་གྱི་ཁམས་ཀྱི་བྱང་ཆུབ་སེམས་དཔའ་བཞིན་ནོ། །
སངས་རྒྱས་བཅོམ་ལྡན་འདས་དེ་འཇིག་རྟེན་ན་ཚད་མེད་པའི་བར་དུ་བཞུགས་ནས་སེམས་ཅན་གྱི་དོན་མཛད་དེ། ཤིང་སཱ་ལ་དྲུང་གཉིས་ཀྱི་བར་དུ་ཡོངས་སུ་མྱ་ངན་ལས་འདས་སོ། །སངས་རྒྱས་དེ་མྱ་ངན་ལས་འདས་ནས་དམ་པ་
འི་ཆོས་ལོ་ཁྲི་ཕྲག་ཚད་མེད་པ་བཞི་བཅུ་ལྷག་གི་བར་དུ་གནས་པར་གྱུར་ཏོ། །དེའི་ཚེ་ན་དགེ་སློང་ཚུལ་ཁྲིམས་ཤིན་དུ་སྲུང་བ་ཡོན་ཏན་བློ་གྲོས་ཤེས་བྱ་བ་ཞིག་ལ་འཁོར་ཤིན་དུ་མང་ཞིང་འཁོར་རྣམས་ལ་སེང་གེའི་སྒྲ་སྒྲོགས་
ཏེ། མདོ་སྡེ་དགུ་ཡང་རྒྱས་པར་སྟོན་པ་ལ་ཤིན་དུ་མཁས་པས་དགེ་སློང་རྣམས་བྲན་ཕོ་དང་བྲན་མོ་དང་བ་ལང་དང་ལུག་ལ་སོགས་པ་ཆོས་མ་ཡིན་པའི་དངོས་པོ་རྣམས་གསོར་མི་གནང་ངོ་ཞེས་བསྒོའོ། །དེའི་ཚེ་ན་དགེ་སློང་ཚུལ་
ཁྲིམས་ཉམས་པ་ཤིན་དུ་མང་བས་དེ་དག་གིས་དེ་སྐད་ཅེས་བསྒོ་བ་ཐོས་ནས་ཐམས་ཅད་ཞེ་སྡང་གི་སེམས་སྐྱེས་ཏེ། མཚོན་ཆ་ཐོགས་ནས་ཆོས་སྨྲ་བ་དེ་ལ་བསྙེན་ཏོ། །དེའི་ཚེ་དེའི་དུས་ན་ཡུལ་དེའི་རྒྱལ་པོ་ཡོན་ཏན་ཅན་
ཞེས་བྱ་བ་དེས་དེ་ལྟ་བུར་གྱུར་པ་ཐོས་ནས་ཆོས་བསྲུང་བའི་ཕྱིར་དེ་མ་ཐག་ཏུ་ཆོས་སྨྲ་བ་ག་ལ་བའི་དྲུང་དུ་སོང་སྟེ། དགེ་སློང་ཚུལ་ཁྲིམས་ཉམས་པ་མ་རུངས་པ་དག་གཡུལ་བཤམས་ཏེ་འཐབས་ནས་ཆོས་སྨྲ་བའི་དགེ་སློང་

47-1-54a

དེ་བགེགས་དེ་ལས་ཐར་བར་བྱས་སོ། །དེའི་ཚེ་རྒྱལ་པོ་དེའི་ལུས་ལ་རལ་གྲི་དང་། མདའ་དང་མཚོན་ཤག་ཏི་ལ་སོགས་པ་མཚོན་ཆའི་རྨས་ཡུངས་ཀར་ཙམ་ཡང་གསོན་པ་མེད་དོ། །དེའི་ཚེ་དགེ་སློང་ཡོན་ཏན་བློ་གྲོས་
ཀྱིས་རྒྱལ་པོ་དེ་ལ་ཤིན་དུ་ལེགས་སོ་ཤིན་དུ་ལེགས་སོ། །རྒྱལ་པོ་ཁྱོད་ནི་ཡང་དག་པར་དམ་པའི་ཆོས་ཤིན་དུ་སྲུང་བ་སྟེ། མ་འོངས་པའི་དུས་སུ་ཚད་མེད་པའི་ཆོས་ཀྱི་སྣོད་དུ་འགྱུར་རོ་ཞེས་སྨྲས་སོ། །རྒྱལ་པོ་དེས་དེའི་ཚེ་ན་ཆོས་
ཐོས་པས་སེམས་རབ་ཏུ་དགའ་བར་གྱུར་ནས་དེ་མ་ཐག་ཏུ་ཚེ་འཕོས་ཏེ། མི་གཡོ་བ་དེ་བཞིན་གཤེགས་པའི་སངས་རྒྱས་ཀྱི་ཞིང་དུ་སྐྱེས་ནས་སངས་རྒྱས་དེའི་ཉེ་གནས་མཆོག་ཏུ་གྱུར་ཏོ། །རྒྱལ་པོ་དེའི་འཁོར་གཡུལ་དུ་
ཞུགས་ཏེ་བརྒལ་བ་དང་། དགའ་སྟེ་རྗེས་སུ་ཡི་རང་བ་རྣམ་པ་ཐམས་ཅད་བྱང་ཆུབ་ཀྱི་སེམས་ལས་ཕྱིར་མི་ལྡོག་པར་གྱུར་ཏེ། ཚེ་འཕོས་ནས་ཐམས་ཅད་མི་གཡོ་བའི་སངས་རྒྱས་ཀྱི་ཞིང་དུ་སྐྱེས་སོ། །དགེ་སློང་ཡོན་ཏན་
བློ་གྲོས་ཀྱང་ཕྱིས་ཚེ་འཕོས་ནས་དེ་བཞིན་དུ་མི་གཡོ་བ་དེ་བཞིན་གཤེགས་པའི་ཞིང་དུ་སྐྱེས་ཏེ། སངས་རྒྱས་བཅོམ་ལྡན་འདས་དེ་ནི་ཉན་ཐོས་ཀྱི་དགེ་འདུན་གྱི་ནང་ན་རབ་འོག་ཏུ་གྱུར་ཏོ། །དེ་བས་ན་དམ་པའི་ཆོས་ནུབ་ཅིང་
ཟད་དུ་ཉེ་བ་ན་དེ་ལྟར་བསྲུང་ཞིང་སྐྱབས་བྱའོ། །འོད་སྲུང་དེའི་ཚེ་དེའི་དུས་ན་རྒྱལ་པོ་དེ་ནི་ང་ཡིན་ནོ། །ཆོས་སྨྲ་བའི་དགེ་སློང་དེ་ནི་སངས་རྒྱས་འོད་སྲུང་ཞེས་བྱ་བ་ཡིན་ནོ། །འོད་སྲུང་དམ་པའི་ཆོས་བསྲུངས་པས་
དེ་ལྟ་བུ་ལ་སོགས་པ་ཚད་མེད་པའི་འབྲས་བུ་ཡང་ཐོབ་ལ། དེའི་རྒྱུ་དེའི་རྐྱེན་ཀྱིས་འདི་ལྟར་ང་ནི་རྣམ་པ་སྣ་ཚོགས་ཀྱི་མཚན་དང་དཔེ་བྱད་བཟང་པོ་རྣམ་པ་སྣ་ཚོགས་ཀྱིས་ཡོངས་སུ་བརྒྱན་པའི་ཆོས་ཀྱི་སྐུ་དང་། མི་ཤིགས་
པའི་སྐུ་ལྷུན་ཀྱིས་གྲུབ་པར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པའི་སྐུ་རྟག་པ་ནི་རྡོ་ལ་རི་མོ་བྲིས་པ་དང་

47-1-54b

འདྲའོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་ལྟ་བས་ན་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དག་ཤིན་དུ་བརྩོན་འགྲུས་བསྐྱེད་དེ། 
དམ་པའི་ཆོས་བསྲུང་བར་བྱའོ། །དམ་པའི་ཆོས་བསྲུངས་པའི་འབྲས་བུ་ནི་རྒྱ་ཆེ་སྟེ་ཚད་མེད་དོ། །རིགས་ཀྱི་བུ་དེ་བས་ན་ཆོས་སྲུང་བའི་དགེ་བསྙེན་དག་ལག་ན་མཚོན་ཆ་ཐོགས་ཏེ། ཆོས་སྲུང་བའི་དགེ་སློང་ལ་བསྲུང་
ཞིང་སྐྱབས་བྱའོ། །གང་ཚུལ་ཁྲིམས་ལྔ་སྲུང་བ་ཙམ་གྱིས་ཐེག་པ་ཆེན་པོའི་གང་ཟག་ཅེས་མི་བྱའི། ཚུལ་ཁྲིམས་ལྔ་མ་བསྲུངས་པའི་དམ་པའི་ཆོས་སྲུང་ན་ཐེག་པ་ཆེན་པོ་ཞེས་བྱའོ། །དམ་པའི་ཆོས་སྲུང་ན་ལག་ན་
མཚོན་ཆ་ཐོགས་ཏེ། ཆོས་སྨྲ་བ་ལ་བསྲུང་བར་བྱའོ། །བཅོམ་ལྡན་འདས་ལ་འོད་སྲུང་གིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གང་དེ་ལྟར་དགེ་བསྙེན་མཚོན་ཆ་ཐོགས་པ་དང་ལྷན་ཅིག་འགྲོགས་སྟེན་ན་
དེ་ལ་སྟོན་པ་ཞེས་བགྱི་འམ། སྟོན་པ་ཞེས་མི་བགྱི། དེ་ཚུལ་ཁྲིམས་བསྲུང་བ་ལགས་སམ། ཚུལ་ཁྲིམས་ཉམས་པ་ལགས། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། དེ་དག་ལ་ཚུལ་ཁྲིམས་ཉམས་པའོ། །
སྙམ་དུ་མ་སེམས་ཤིག །རིགས་ཀྱི་བུ་ང་ཡོངས་སུ་མྱ་ངན་ལས་འདས་ནས་རྙོག་པ་ཅན་གྱི་འཇིག་རྟེན་ན་ཡུལ་འཁྲུགས་ཏེ། གཅིག་ལ་གཅིག་འཕྲོག་པས་མུ་གེས་ཉེན་པར་འགྱུར་རོ། །དེའི་ཚེ་ན་མང་དུ་འཚོ་བས་ཕོངས་པའི་
ཕྱིར་རབ་ཏུ་བྱུང་བར་རྩོལ་ཏེ། དེ་དག་ནི་མགོ་རེག་ཅེས་བྱའོ། །གང་ཟག་མགོ་རེག་དེ་དག་གང་དགེ་སློང་ཚུལ་ཁྲིམས་འཛིན་ཅིང་སྤྱོད་ལམ་དང་ལྡན་པ་ཡོངས་སུ་དག་པ་དམ་པའི་ཆོས་སྲུང་བ་ཡོད་ན་སྐྲོད་དོ། །
གསོད་དོ། །གནོད་པ་བྱེད་དོ། །ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །དགེ་སློང་ཚུལ་ཁྲིམས་སྲུང་ཞིང་དམ་པའི་ཆོས་ཡོངས་སུ་འཛིན་པ་དག་ཇི་ལྟར་གྲོང་ཁྱེར་

47-1-55a

དང་ལྗོངས་སུ་སེམས་ཅན་གདུལ་བའི་ཕྱིར་རྒྱུ་ཞིང་མཆི་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བས་ན་གང་ཚུལ་ཁྲིམས་འཛིན་པ་དག་ཁྱིམ་པ་མཚོན་ཆ་ཐོགས་པ་ལ་བརྟེན་
ཅིང་འགྲོགས་ཤིག་ཅེས་ངས་གནང་བ་ཡིན་ནོ། །གལ་ཏེ་རྒྱལ་པོ་འམ། བློན་པོ་འམ། ཁྱིམ་བདག་གམ། དགེ་བསྙེན་ལ་སོགས་པ་ཆོས་བསྲུང་བའི་ཕྱིར་མཚོན་ཆ་ཐོགས་ཀྱང་དེ་ནི་ཚུལ་ཁྲིམས་སྲུང་བ་ཞེས་བྱ་སྟེ། 
མཚོན་ཆ་ཐོགས་མོད་ཀྱི། སྲོག་མི་གཅོད་པས་དེ་ནི་ཚུལ་ཁྲིམས་སྲུང་བའི་མཆོག་ཅེས་བྱའོ། །འོད་སྲུང་གིས་ཡང་གསོལ་པ། བཅོམ་ལྡན་འདས་ཆོས་སྲུང་བ་ནི་ཡང་དག་པར་ལྟ་བ་དང་ལྡན་ཏེ། ཐེག་པ་ཆེན་པོའི་
མདོ་སྡེ་རྒྱས་པར་སྟོན་པ་ནི་རྒྱལ་པོའི་རིན་པོ་ཆེའི་གདུགས་དང་། མར་སྣོད་དང་། ཁྲེ་འབྲས་དང་། ཤིང་ཏོག་རྣམ་པ་སྣ་ཚོགས་ལ་ནམ་དུ་ཡང་དབང་མི་བགྱིད་དེ། རྙེད་པ་དང་བཀུར་སྟི་ཙམ་གྱི་སླད་དུ་རྒྱལ་པོ་དང་། བློན་པོ་དང་། 
ཁྱིམ་བདག་ལ་མི་རྟེན། ཡོན་བདག་ལ་གཡོ་དང་སྒྱུས་འཚོ་བའི་སེམས་ཀྱང་མ་མཆིས་སོ། །སྤྱོད་ལམ་དང་ལྡན་པས་ཚུལ་ཁྲིམས་ཉམས་པའི་གང་ཟག་མ་རུངས་པ་དག་བཏུལ་ཀྱང་། དེ་ནི་ཚུལ་ཁྲིམས་
འཛིན་ཅིང་ཆོས་སྲུང་བའི་སྟོན་པ་ཞེས་བགྱིའོ། །སེམས་ཅན་མང་པོའི་དགེ་བའི་བཤེས་གཉེན་ཡང་དག་པ་ཡིན་པས་རྒྱ་མཚོ་ལྟར་སེམས་རྒྱ་ཆེ་ཞིང་ཡངས་སོ། །འོད་སྲུང་དགེ་སློང་གང་རྙེད་པ་དང་བཀུར་སྟིའི་ཕྱིར་གཞན་ལ་ཆོས་
སྟོན་ན་གང་ཟག་དེའི་འཁོར་དུ་གཏོགས་པ་ཐམས་ཅད་ཀྱང་རྙེད་པ་དང་བཀུར་སྟིའི་ཕྱིར་ཆོས་སྟོན་ཏེ། གང་ཟག་དེས་བདག་གི་དགེ་འདུན་གྱི་འཁོར་ཡང་མ་རུང་བར་བྱེད་དོ། །འོད་སྲུང་དགེ་འདུན་ལ་རྣམ་པ་གསུམ་སྟེ། ཚུལ་
ཁྲིམས་ཉམས་པ་གོ་འདུན་གྱི་དགེ་འདུན་དང་། གླེན་ཞིང་གཏི་མུག་པའི་དགེ་འདུན་དང་། ཡོངས་སུ་དག་པའི་དགེ་འདུན་ནོ། །ཚུལ་ཁྲིམས་ཉམས་ཤིང་གོ་འདུན་གྱི་དགེ་འདུན་ནི་འཇིག་ཀྱང་སླའི། ཚུལ་ཁྲིམས་འཛིན་ཅིང་

47-1-55b

ཡོངས་སུ་དག་པའི་དགེ་འདུན་ནི་རྙེད་པ་དང་བཀུར་སྟིའི་རྐྱེན་ཀྱིས་འཇིག་ནུས་པ་མ་ཡིན་ནོ། །དེ་ལ་ཇི་ལྟར་ན་ཚུལ་ཁྲིམས་ཉམས་ཤིང་གོ་འདུན་གྱི་དགེ་འདུན་ཞེ་ན། དགེ་སློང་གང་ཚུལ་ཁྲིམས་སྲུང་ཡང་རྙེད་པ་དང་བཀུར་
སྟིའི་ཕྱིར་ཚུལ་ཁྲིམས་ཉམས་པ་ལ་བརྟེན་ཏེ། ལྷན་ཅིག་ཏུ་འདུག་གམ། འགྲོ་འམ་སྡོད་དམ། འགྲོགས་སམ། གཅིག་ལ་གཅིག་བཤེས་པར་བྱེད་ཅིང་ལས་འཐུན་པར་བྱེད་ན་དེ་ནི་ཚུལ་ཁྲིམས་ཉམས་པ་ཞེས་ཀྱང་བྱ། 
གོ་འདུན་གྱི་དགེ་འདུན་ཞེས་བྱའོ། །དེ་ལ་ཇི་ལྟར་ན་གླེན་ཞིང་གཏི་མུག་པའི་དགེ་འདུན་ཞེ་ན། དགེ་སློང་གང་བས་མཐར་གནས་ཤིང་དབང་པོ་མི་རྣོ་ལ། རྟུལ་བ་གླེན་པ་འདོད་པ་ཉུང་ཞིང་བསོད་སྙོམས་བྱེད་ལ། གསོ་སྦྱིན་གྱི་ཉི་
མ་དང་ཚུལ་ནས་བྱུང་བའི་དུས་སུ་ཉེ་གནས་སུ་གྱུར་པ་རྣམས་ནི་ཡོངས་སུ་དག་པར་འཆགས་ཤིང་འཐོལ་དུ་འཛུད་ཀྱི་ཉེ་གནས་མ་ཡིན་པ་ཚུལ་ཁྲིམས་ཉམས་པ་དག་མཐོང་ན་ཡོངས་སུ་དག་པར་འཆགས་ཤིང་འཐོལ་དུ་མི་འཇུག་
པར་ལྷན་ཅིག་ཏུ་གསོ་སྦྱོང་དང་ཚུལ་ནས་འབྱུང་བའི་ལས་བྱེད་པ་ནི་གླེན་ཞིང་གཏི་མུག་པའི་དགེ་འདུན་ཞེས་བྱའོ། །དེ་ལ་ཇི་ལྟར་ན་ཡོངས་སུ་དག་པའི་དགེ་འདུན་ཞེ་ན། དགེ་སློང་གི་དགེ་འདུན་གང་བདུད་ཁྲི་ཕྲག་
བརྒྱ་སྟོང་གིས་ཀྱང་མི་ཕྱེད་མི་ཤིགས་ན་དེ་ནི་བྱང་ཆུབ་སེམས་དཔའི་དགེ་འདུན་རྣམ་པར་དག་པ་སྟེ། དགེ་འདུན་གོང་དུ་སྨོས་པ་རྣམ་པ་གཉིས་པོ་ཡང་བདུལ་ཏེ། ཡོངས་སུ་དག་པའི་དགེ་འདུན་གྱི་ནང་དུ་བཙུད་ན། 
དེ་ནི་ཆོས་སྲུང་བའི་བླ་ན་མེད་པའི་སློབ་དཔོན་ཆེན་པོ་ཞེས་བྱའོ། །འདུལ་བ་ལ་མཁས་པ་ནི་སེམས་ཅན་ལ་ཕན་པ་དང་གདུལ་བའི་ཕྱིར་ཚུལ་ཁྲིམས་ཀྱི་མཚན་ཉིད་ལྕི་བ་དང་ཡང་བ་ལ་ཤིན་དུ་མཁས་ཏེ། གང་ཚུལ་
ཁྲིམས་མ་ཡིན་པ་ནི་ཤེས་པར་མི་རྩོལ་ལོ། །གང་ཚུལ་ཁྲིམས་ཀྱི་ཕྱོགས་ལ་ནི་རྟོགས་ཤིང་ཤེས་པར་བྱེད་དོ། །དེ་ལ་ཇི་ལྟར་ན་སེམས་ཅན་གདུལ་བའི་ཕྱིར་བྱང་ཆུབ་སེམས་དཔའ་དག་རྟག་ཏུ་དུས་མེད་པར་གྲོང་ཁྱེར་དུ་

47-1-56a

འཇུག་ཅིང་། ཡུགས་ས་མོ་དང་། སྨད་འཚོང་མའི་གནས་སུ་འང་འཇུག་ཅིང་ལྷན་ཅིག་ཏུ་ཡང་གནས་ལ། ལོ་མང་པོར་ཐོགས་པ་ནི་ཉན་ཐོས་དག་གིས་དེ་ལྟར་མི་བྱ་སྟེ། དེ་ནི་སེམས་ཅན་ལ་ཕན་པ་དང་བདེ་བའི་
ཕྱིར་གདུལ་བ་ཞེས་བྱའོ། །ཇི་ལྟར་ན་ལྕི་བ་ཤེས་པར་བྱ་ཞེ་ན། དེ་བཞིན་གཤེགས་པས་དངོས་པོ་གཅིག་ལས་ཚུལ་ཁྲིམས་བཅས་ཏེ། ཁྱེད་དེང་ཕྱིན་ཆད་འདི་ལས་ཉམས་པར་མ་བྱེད་ཅིག་ཅེས་བྱ་བ་རྩ་བ་བཞི་ལྟ་བུ་སྟེ། 
རབ་ཏུ་བྱུང་བ་དག་བྱེད་དུ་མི་གནང་ངོ་ཞེས་བཅས་པ་ལས་ཆེད་དུ་བྱས་ན། དེ་ནི་དགེ་སྦྱོང་མ་ཡིན། ཤཱཀྱའི་སྲས་མ་ཡིན་ཏེ་དེ་དག་ནི་ལྕི་བ་ཞེས་བྱའོ། །ཇི་ལྟར་ན་ཡང་བ་ཞེ་ན། ཡང་བའི་དངོས་པོ་ལ་ལན་གསུམ་གྱི་བར་དུ་
བསྐུལ་ཏེ་བཏང་ན་ནི་ཡང་བ་ཞེས་བྱའོ། །ཚུལ་ཁྲིམས་ལས་མི་འབྱུང་བ་ནི་གང་ཡོངས་སུ་མ་དག་པའི་དངོས་པོ་སྤྱོད་པའི་ཆ་མ་ཡིན་པར་གསུངས་པ་དང་ལྷན་ཅིག་དུ་མི་སྤྱོད་པའོ། །འདུལ་བ་ལས་འབྱུང་བ་ནི་ཚུལ་
ཁྲིམས་ཤིན་དུ་སློབ་ཅིང་། ཚུལ་ཁྲིམས་ཉམས་པ་ལ་མི་བརྟེན་པ་དང་། གང་ཚུལ་ཁྲིམས་ཀྱི་རྗེས་སུ་གཞོལ་ཞིང་སྤྱོད་པ་མཐོང་ན་རབ་ཏུ་དགའ་བའི་སེམས་སྐྱེ་བ་དང་། དེ་ལྟར་སངས་རྒྱས་ཀྱི་ཆོས་སུ་བྱ་བ་ཀུན་ཤེས་ཤིང་
ཤིན་ཏུ་སྟོན་མཁས་པ་ནི་ཚུལ་ཁྲིམས་ཀྱི་སློབ་དཔོན་ཞེས་བྱ་སྟེ། ཡི་གེ་འབྲུ་གཅིག་ཙམ་ལ་ཤིན་ཏུ་མཁས་པ་འམ། མདོ་སྡེ་ཤིན་དུ་འཛིན་པ་ཡང་དེ་དང་འདྲའོ། །དེ་ལྟར་ན་རིགས་ཀྱི་བུ་སངས་རྒྱས་ཀྱི་ཆོས་ཚད་
མེད་དེ་བསམ་གྱིས་མི་ཁྱབ་ལ། དེ་བཞིན་གཤེགས་པ་ཡང་བསམ་གྱིས་མི་ཁྱབ་བོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་གསོལ་པ། དེ་དེ་བཞིན་ནོ། །དེ་དེ་བཞིན་ནོ། བཅོམ་ལྡན་
འདས་ཀྱིས་བཀའ་སྩལ་པ་བཞིན་ཏེ། སངས་རྒྱས་ཀྱི་ཆོས་བསམ་གྱིས་མི་ཁྱབ་ལ། དེ་བཞིན་གཤེགས་པ་ཡང་བསམ་གྱིས་མི་ཁྱབ་པས་དེ་བས་ན་དེ་བཞིན་གཤེགས་པ་ནི་རྟག་པ་དང་། མི་འཇིག་པ་མི་འགྱུར་བ་སྟེ། 

47-1-56b

བདག་ཀྱང་དེ་ལ་ཤིན་ཏུ་ནན་ཏན་བགྱིད། གཞན་དག་ལ་ཡང་དོན་དེ་དག་རྒྱས་པར་བསྟན་པར་འཚལ་ལོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ལེགས་སོ་ཤིན་དུ་ལེགས་སོ་ཞེས་
བྱ་བ་བྱིན་ནས་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པའི་སྐུ་ནི་རྡོ་རྗེའི་སྐུ། མི་འཇིག་པའི་སྐུ་སྟེ། བྱང་ཆུབ་སེམས་དཔའ་དག་དེ་ལྟར་ཤིན་ཏུ་བསླབ་ཅིང་མཐོང་བ་དང་ཤེས་པར་བྱའོ། །གང་གིས་
དེ་ལྟར་མངོན་པར་ཤེས་ཤིང་མཐོང་བ་ནི་དེ་བཞིན་གཤེགས་པའི་སྐུ་དང་མི་ཤིགས་པའི་སྐུ་མཐོང་བ་ཞེས་བྱ་བ་སྟེ། ཇི་ལྟར་མེ་ལོང་གི་ནང་ན་གཟུགས་བརྙན་མཐོང་བ་བཞིན་ནོ། །འཕགས་པ་ཡོངས་སུ་མྱ་
ངན་ལས་འདས་པ་ཆེན་པོའི་མདོ་ལས་རྡོ་རྗེའི་སྐུ་ཞེས་བྱ་བའི་ལེའུ་སྟེ་གཉིས་སོ།། །། དེ་ནས་བཅོམ་ལྡན་འདས་ཀྱིས་འོད་སྲུང་ལ་ཡང་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་མདོ་སྡེ་འདི་
འི་མིང་དང་ཚིག་དང་། ཡོན་ཏན་རྣམས་ལེགས་པར་ཟུང་ཤིག །རིགས་ཀྱི་བུ་འམ་རིགས་ཀྱི་བུ་མོ་གང་ཞིག་མདོ་སྡེ་འདིའི་མིང་ཐོས་པ་ཙམ་གྱིས་ཀྱང་ལམ་རྒྱུད་བཞིར་སྐྱེ་བའི་གནས་མེད་དོ། །དེ་ཅིའི་ཕྱིར་ཞེ་ན། 
མདོ་སྡེ་འདི་ནི་སངས་རྒྱས་བཅོམ་ལྡན་འདས་ཚད་མེད་དཔག་ཏུ་མེད་པས་བསྒྲུབས་པའི་ཡོན་ཏན་དུ་གྱུར་པ་ངས་བརྗོད་པ་ཡིན་ནོ། །བྱང་ཆུབ་སེམས་དཔའ་འོད་སྲུང་གིས་གསོལ་པ། བཅོམ་ལྡན་ལྡན་འདས་
མདོ་སྡེ་འདིའི་མཚན་ཅི་ཞེས་བགྱི། བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་ཡོངས་སུ་གཟུང་བར་བགྱི། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། མདོ་སྡེ་འདིའི་མིང་ནི་ཡོངས་སུ་
མྱ་ངན་ལས་འདས་པ་ཆེན་པོ་ཐོག་མར་ཡང་དགེ། བར་དུ་ཡང་དགེ། ཐ་མར་ཡང་དགེ། དོན་བཟང་བ། ཚིག་བཟང་པོ། མ་འདྲེས་པ། རྣམ་པར་དཀར་བ། ཚངས་པར་སྤྱོད་པ་འབའ་ཞིག་རྡོ་རྗེ་ལྟ་བུའི་རིན་པོ་ཆེའི་མཛོད་མ་ཉམས་

47-1-57a

པ་ཞེས་བྱ་སྟེ། ཁྱོད་ཤིན་དུ་ལེགས་པར་ཉོན་ཅིག་དང་། ངས་ཁྱོད་ལ་བསྟན་པར་བྱའོ། །རིགས་ཀྱི་བུ་དེ་ལ་ཆེན་པོ་ཞེས་བྱ་བ་ནི་རྟག་ཅེས་བྱ་བའི་དོན་ཏེ། དཔེར་ན་ཆུ་ཀླུང་ཆེན་པོ་བརྒྱད་ནི་ཐམས་ཅད་རྒྱ་མཚོར་
འབབ་པ་བཞིན་དུ་མདོ་སྡེ་འདི་ཡང་ཀུན་ནས་ཉོན་མོངས་པ་ཐམས་ཅད་དང་། བདུད་ཀྱི་རིས་རྣམས་བཏུལ་ནས་མཐར་ཡོངས་སུ་མྱ་ངན་ལས་འདས་པ་ཆེན་པོ་ལུས་དང་སྲོག་གཏོང་བར་འགྱུར་བས་ཡོངས་སུ་མྱ་ངན་ལས་འདས་
པ་ཆེན་པོ་ཞེས་བྱའོ། །རིགས་ཀྱི་བུ་དཔེར་ན་སྨན་པ་མཁས་པའི་སྨན་དཔྱད་བཟང་པོ་ལ་སྨན་གྱི་དཔྱད་ཐམས་ཅད་འདུས་པ་བཞིན་དུ་རིགས་ཀྱི་བུ་དེ་བཞིན་གཤེགས་པས་གསུངས་པའི་ཆོས་ཤིན་ཏུ་ཟབ་མོ་རྣམ་པ་ཐམས་
ཅད་ཡོངས་སུ་མྱ་ངན་ལས་འདས་པ་ཆེན་པོར་འདུས་པས་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །རིགས་ཀྱི་བུ་དཔེར་ན་ཞིང་པ་དག་ནི་དབྱར་ཞིང་ལ་ས་བོན་བཏབ་ནས་རྟག་ཏུ་རེ་བའི་སེམས་ཡོད་དེ། འབྲས་
བུ་ལག་ཏུ་ཐོབ་ནས་རེ་བ་ཐམས་ཅད་ཞིའོ། །རིགས་ཀྱི་བུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། མདོ་སྡེ་གཞན་ལ་སྒོམ་པ་ནི་རྟག་པ་ཆོས་ཀྱི་རོ་འདི་ལ་རེའོ། །ཅི་སྟེ་ཡོངས་སུ་མྱ་ངན་ལས་འདས་པ་ཆེན་པོ་འདི་ཐོས་ནས་མདོ་
སྡེ་གཞན་གྱི་ཆོས་ཀྱི་རོ་ལ་རེ་བ་ཐམས་ཅད་ཞི་བར་ནི་ཡོངས་སུ་མྱ་ངན་ལས་འདས་པ་ཆེན་པོ་འདིས་སེམས་ཅན་ཐམས་ཅད་སྲིད་པ་ལས་སྒྲོལ་བའི་ཕྱིར་རོ། །རིགས་ཀྱི་བུ་འདི་ལྟ་སྟེ་དཔེར་ན་རྗེས་ཐམས་
ཅད་ཀྱི་ནང་ན་བལ་གླང་གི་རྗེས་མཆོག་གོ། །དེ་བཞིན་དུ་མདོ་སྡེ་འདི་ཡང་མདོ་སྡེ་གཞན་ཐམས་ཅད་ཀྱི་ཏིང་ངེ་འཛིན་པས་མཆོག་གོ། །རིགས་ཀྱི་བུ་འདི་ལྟ་སྟེ། ཞིང་རྨོས་པའི་ནང་ན་སྟོན་ལོག་བཏབ་པ་ནི་
ཞིང་གི་ནང་ན་མཆོག་གོ། །དེ་བཞིན་དུ་མདོ་སྡེ་འདི་ཡང་ཀུན་གྱི་མཆོག་གོ། །རིགས་ཀྱི་བུ་འདི་ལྟ་སྟེ། སྨན་གྱི་ནང་ན་མར་གྱི་སྙིང་པོ་མཆོག་གོ། །དེ་བཞིན་དུ་ཡོངས་སུ་མྱ་ངན་ལས་འདས་པ་ཆེན་པོ་འདི་ཡང་

47-1-57b

སེམས་ཅན་ཐམས་ཅད་ཀྱི་ཉོན་མོངས་པས་གདུང་བའི་སེམས་ཞི་བར་བྱེད་པས་མཆོག་གོ། །རིགས་ཀྱི་བུ་དཔེར་ན་མར་མངར་རུ་ནི་རོ་རྣམ་པ་བརྒྱད་དང་ལྡན་ནོ། །དེ་བཞིན་དུ་མྱ་ངན་ལས་འདས་པ་ཆེན་པོ་འདི་
ཡང་རོ་བརྒྱད་དང་ལྡན་ནོ། །བརྒྱད་གང་ཞེ་ན། རྟག་པ་དང་། ཐེར་ཟུག་དང་། བདེ་བ་དང་། བསིལ་བ་དང་། མི་རྒ་བ་དང་། མི་འཆི་བ་དང་། དྲི་མ་མེད་པ་དང་། རབ་ཏུ་སྐྱིད་པ་སྟེ། རོ་བརྒྱད་ཅེས་བྱའོ། །རོ་བརྒྱད་དང་ལྡན་པས་
ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་འདི་ལ་རབ་ཏུ་གནས་ཤིང་། བར་བར་གནས་དེ་ཉིད་ཀྱིས་མྱ་ངན་ལས་འདའ་བ་སྟོན་པ་དེ་ནི་ཡོངས་སུ་
མྱ་ངན་ལས་འདས་པ་ཆེན་པོ་ཞེས་བྱའོ། །འོད་སྲུང་རིགས་ཀྱི་བུ་འམ་རིགས་ཀྱི་བུ་མོ་གང་ཞིག་ཡོངས་སུ་མྱ་ངན་ལས་འདས་པ་ཆེན་པོས་མྱ་ངན་ལས་འདའ་བར་འདོད་ན་འདི་བཞིན་དུ་བསླབ་པར་བྱའོ། །
དེ་བཞིན་གཤེགས་པ་ནི་རྟག་པ་གནས་པའི་ཆོས་ཅན་ཏེ། ཆོས་དང་དགེ་འདུན་ཡང་དེ་བཞིན་དུ་རིག་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །
ངོ་མཚར་ཆེའོ། །བཅོམ་ལྡན་འདས་དེ་བཞིན་གཤེགས་པའི་ཡོན་ཏན་ཡང་བསམ་གྱིས་མི་ཁྱབ། ཆོས་དང་དགེ་འདུན་ཡང་བསམ་གྱིས་མི་ཁྱབ་སྟེ། ཡོངས་སུ་མྱ་ངན་ལས་འདས་པ་ཆེན་པོ་ཡང་བསམ་
གྱིས་མི་ཁྱབ་བོ། །གང་སུ་ཞིག་མདོ་སྡེ་འདི་སློབ་པ་ནི་ཡང་དག་པའི་ཆོས་ཀྱི་སྒོ་ཐོབ་ཅིང་། སྨན་པ་མཁས་པ་ཞེས་བགྱི་ལ། གང་མི་སློབ་པ་དེ་དག་ནི་ལྡོངས་པ་ཤེས་རབ་ཀྱི་མིག་མ་མཆིས་པ་མ་རིག་པས་
ཡོངས་སུ་ཁེབས་པ་ལགས་པར་འཚལ་ལོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས་མཚན་གྱི་ཡོན་ཏན་བརྗོད་པ་ཞེས་བྱ་བའི་ལེའུ་སྟེ་གསུམ་མོ།། །། དེ་ནས་བཅོམ་

47-1-58a

ལྡན་འདས་ཀྱིས་འོད་སྲུང་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ཡོངས་སུ་མྱ་ངན་ལས་འདས་པ་ཆེན་པོ་འབྱེད་ཅིང་སྟོན་པ་
དག་མཚན་ཉིད་རྣམ་པ་འདི་བཞི་ལ་མཁས་པར་བྱའོ། །བཞི་གང་ཞེ་ན། བདག་ཚུལ་བཞིན་དུ་བྱ་བ་དང་། གཞན་ཚུལ་བཞིན་དུ་འཆོས་པ་དང་། ཇི་སྐད་དྲིས་པ་དེ་བཞིན་དུ་ལན་འདེབས་པ་དང་། 
རྟེན་ཅིང་འབྲེལ་ཏེ་བྱུང་བ་ལ་མཁས་པའོ། །དེ་ལ་བདག་ཚུལ་བཞིན་དུ་བྱེད་པ་གང་ཞེ་ན། སངས་རྒྱས་བཅོམ་ལྡན་འདས་ཀྱིས་རྟེན་ཅིང་འབྲེལ་ཏེ་བྱུང་བ་གཟིགས་ཏེ་གསུངས་པ་དཔེར་ན་དགེ་སློང་ཞིག་
མེའི་ཕུང་པོ་ཆེན་པོ་མཐོང་ན་དེ་འདི་སྐད་དུ་བདག་ནི་མེའི་ཕུང་པོ་ཆེན་པོར་ཞུགས་ཏེ་ཚིག་ཀྱང་བླའི། དེ་བཞིན་གཤེགས་པས་གསུངས་པའི་མདོ་སྡེ་བཅུ་གཉིས་དང་དགོངས་ཏེ་གསུངས་པའི་སྙིང་པོ་ལ་
འདི་ནི་བདུད་སྡིག་ཏོ་ཅན་གྱིས་བཤད་པ་ཡིན་ནོ་ཞེས་སྐུར་པ་མི་འདེབས་སོ། །ཇི་ཙམ་དུ་སངས་རྒྱས་དང་། ཆོས་དང་། དགེ་འདུན་ལ་མི་རྟག་གོ་ཞེས་སྨྲ་བ་དེ་ནི་བདག་ཀྱང་བསླུས་ལ། ཕ་རོལ་པོ་གཞན་ཡང་
བསླུས་པ་ཡིན་ཏེ། གལ་ཏེ་རལ་གྱི་རྣོན་པོས་ལྕེ་བཅད་ཀྱང་བླའི། སངས་རྒྱས་དང་ཆོས་དང་། དགེ་འདུན་ལ། མི་རྟག་གོ་ཞེས་མི་སྨྲའོ། །གཞན་དེ་སྐད་སྨྲ་བ་ལ་ཡང་ཡིད་མི་ཆེས་ཏེ། དེ་སྐད་དུ་སྨྲ་བ་དེ་ལ་
སྙིང་རྗེའི་སེམས་བསྐྱེད་དོ། །སངས་རྒྱས་དང་ཆོས་དང་། དགེ་འདུན་ལ་བསམ་གྱིས་མི་ཁྱབ་པར་བཟུང་སྟེ། བདག་གི་ལུས་ལ་མེའི་ཕུང་པོ་ལྟར་རྟོག་པ་ནི་བདག་ཚུལ་བཞིན་དུ་བྱེད་པ་ཞེས་བྱའོ། །དེ་ལ་ཇི་
ལྟར་ན་གཞན་ཚུལ་བཞིན་དུ་འཆོས་པ་གང་ཞེ་ན། བཅོམ་ལྡན་འདས་ཆོས་སྟོན་པའི་ཚེ། བུད་མེད་གཅིག་ཅིག་བུ་ནུ་ཞོ་བསྣུན་པ་ཐོགས་ཏེ། བཅོམ་ལྡན་འདས་གང་ན་བར་འོངས་ནས་སངས་རྒྱས་ཀྱི་ཞབས་ལ་ཕྱག་

47-1-58b

འཚལ་ཏེ་སངས་རྒྱས་ལ་ཞུ་བར་བསམས་པ་ཡིད་ལ་བྱས་བཞིན་དུ་ཕྱོགས་གཅིག་ཏུ་འདུག་གོ། །དེའི་ཚེ་བཅོམ་ལྡན་འདས་ཀྱིས་མཁྱེན་བཞིན་དུ་བུད་མེད་ལ་འདི་སྐད་ཅེས་བཀའ་སྩལ་ཏོ། །ཁྱོད་བུ་སྡུག་པར་
བསམས་ནས་མར་མང་དུ་བསྙོད་དེ། ཞུ་འམ་མ་ཞུ་རྟོགས་པའི་ཕྱིར་འོངས་སམ། དེ་ནས་བུད་མེད་དེས་བཅོམ་ལྡན་འདས་ལ་གསོལ་པ། ངོ་མཚར་ཆེའོ། །བཅོམ་ལྡན་འདས་བདག་གི་ཡིད་ལ་བསམས་པ་བཞིན་
དུ་མཁྱེན་ཏོ། །བདག་གིས་མར་སྩལ་བ་མངས་སམ་ཉུངས་པ། བཅོམ་ལྡན་འདས་ཀྱིས་བསྟན་དུ་གསོལ། བཅོམ་ལྡན་འདས་བདག་གིས་དེང་བུ་འདི་མར་ཞིག་སྩལ་ཏེ་མ་ཞུ་བས་ཚེའི་བར་ཆད་དུ་འགྱུར་གྱིས་
དོགས་ན་དེ་བཞིན་གཤེགས་པས་བདག་ལ་བསྟན་དུ་གསོལ། དེ་ལ་བཅོམ་ལྡན་འདས་ཀྱིས་བཀའ་སྩལ་པ། ཁྱོད་བུས་ཟོས་པའི་མར་ནི་དེ་མ་ཐག་ཏུ་ཞུ་སྟེ་ཚེ་དང་ལུས་ཀྱི་མཚག་ཏུ་གྱུར་ཏོ། །བུད་མེད་དེས་
དེ་སྐད་ཅེས་བཀའ་སྩལ་པ་ཐོས་ནས་རབ་ཏུ་དགའ་རངས་ཏེ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཡང་དག་པར་གསུངས་པས་བདག་རབ་ཏུ་དགའ་བར་གྱུར་ཏོ། །བཅོམ་ལྡན་འདས་
ཀྱིས་འདི་ལྟར་སེམས་ཅན་གདུལ་བའི་སླད་དུ་ཞུ་བ་དང་། མི་ཞུ་བ་རྣམ་པར་ཕྱེ་སྟེ་གསུངས་པ་དང་། གཞན་ཡང་ཆོས་ཐམས་ཅད་བདག་མེད་པ་དང་། མི་རྟག་པར་གསུངས་པ་ཤིན་དུ་ལེགས་སོ། །
གལ་ཏེ་བཅོམ་ལྡན་འདས་ཀྱིས་རྟག་པ་སྔར་བཤད་ན། འདུལ་བའི་འཁོར་འདི་དག་འདི་སྐད་དུ་ཆོས་འདི་ནི་མུ་སྟེགས་ཅན་དང་འཐུན་ནོ་ཞེས་མཆི་སྟེ་སྤོང་བར་གྱུར་ཏོ། །བཅོམ་ལྡན་འདས་ཀྱིས་བུད་མེད་དེ་
ལ་བཀའ་སྩལ་པ། ཁྱོད་ཀྱི་བུ་དེ་སྐྱེས་ཏེ་རྒྱུག་ནུས་པ་ཙམ་ན་ཁ་ཟས་འཇུ་དཀའ་བ་ཡང་ཞུ་སྟེ་སྔར་བྱིན་པའི་མར་ཙམ་གྱིས་ནི་ཆོག་པ་མ་ཡིན་ནོ། །ངའི་ཉན་ཐོས་ཀྱི་ཉེ་གནས་ཀྱང་ཁྱོད་ཀྱི་བུ་ཆུང་ངུ་དེ་དང་འདྲ་

47-1-59a

སྟེ། རྟག་པའི་ཆོས་འདི་འཇུ་མི་ནུས་སོ། །དེ་བས་ན་ངས་སྔར་སྡུག་བསྔལ་བ་དང་། མི་རྟག་པ་ལ་སོགས་པ་བཤད་པ་ཡིན་ནོ། །ངའི་ཉན་ཐོས་ཀྱི་ཉེ་གནས་ཡོན་ཏན་དང་ལྡན་པ་ཐེག་པ་ཆེན་པོའི་མདོ་ལ་
ནན་ཏན་དུ་སྤྱོད་བཟོད་པ་དག་ལ་ནི་ངས་མདོ་སྡེ་འདི་ཉིད་ཀྱི་རོ་རྣམ་པ་དྲུག་བསྟན་ཏོ། །རོ་རྣམ་པ་དྲུག་གང་ཞེ་ན། སྡུག་བསྔལ་ནི་སྐྱུར་བའི་རོ་ལྟ་བུའོ། །མི་རྟག་པ་ནི་ལན་ཚྭའི་རོ་ལྟ་བུའོ། །བདག་མེད་པ་ནི་ཁ་
བའི་རོ་ལྟ་བུའོ། །བདེ་བ་ནི་མངར་བའི་རོ་ལྟ་བུའོ། །བདག་ནི་ཚ་བའི་རོ་ལྟ་བུའོ། །རྟག་པ་ནི་མངལ་བའི་རོ་ལྟ་བུའོ། །འཇིག་རྟེན་ན་རོ་རྣམ་པ་གསུམ་སྟེ། མི་རྟག་པ་དང་། བདག་མེད་པ་དང་། བདེ་བ་མེད་པ་སྟེ། ཉོན་
མོངས་པ་ནི་ཤིང་ལྟ་བུ། ཤེས་རབ་ནི་མེ་ལྟ་བུ་སྟེ། དེའི་རྒྱུ་དང་དེའི་རྐྱེན་ཀྱིས་མྱ་ངན་ལས་འདས་པའི་ཟས་སུ་གྱུར་པ་ནི་རྟག་པ་དང་། བདེ་བ་དང་བདག་དང་། ཡོངས་སུ་དག་པ་སྟེ། ཉེ་གནས་སུ་གྱུར་པའི་རྣམས་རོ་དེ་ལ་
དགོད་དོ། །ཡང་བུད་མེད་དེ་ལ་བཀའ་སྩལ་པ། ཁྱོད་དོན་གཉེར་ཅིང་གཞན་དུ་འགྲོ་ན་ཁྱོད་ཀྱི་བུ་མ་རུངས་པ་ཁྱིམ་ནས་ཕྱུང་ལ། རིན་པོ་ཆེའི་གཏེར་རྣམས་བུ་འཛངས་པ་ལ་གཏོད་ཅིག །བུད་མེད་ཀྱིས་གསོལ་པ། 
བཅོམ་ལྡན་འདས་འཕགས་པའི་བཀའ་བཞིན་ཏེ། རིན་པོ་ཆེའི་གཏེར་རྣམས་བུ་འཛངས་པ་ལ་སྔོན་གྱི། བུ་ངན་པ་ལ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ང་ཡང་དེ་དང་འདྲ་སྟེ། ཡོངས་སུ་མྱ་ངན་
ལས་འདའ་བ་ན། དེ་བཞིན་གཤེགས་པས་དགོངས་ཏེ་གསུངས་པ་བླ་ན་མེད་པའི་ཆོས་ཀྱི་གཏེར་ཉན་ཐོས་གྱི་ཉེ་གནས་རྣམས་ལ་མི་སྟོན་པ་འང་ཁྱོད་ཀྱིས་རིན་པོ་ཆེའི་གཏེར་བུ་ངན་པ་ལ་མི་སྟོན་པ་བཞིན་ནོ། །
བྱང་ཆུབ་སེམས་དཔའ་རྣམས་ལ་གདམས་ཤིང་གཏད་པ་ནི། ཇི་ལྟར་ཁྱོད་ཀྱིས་རིན་པོ་ཆེའི་གཏེར་རྣམས་བུ་འཛངས་པ་ལ་གཏད་པ་བཞིན་ནོ། །དེ་ཅིའི་ཕྱིར་ཞེ་ན། ཉན་ཐོས་ཀྱི་ཉེ་གནས་དག་ནི་སྐྱེ་བ་དང་

47-1-59b

འཕོ་བའི་འདུ་ཤེས་དང་བཅས་པས་སངས་རྒྱས་བཅོམ་ལྡན་འདས་ནི་ཡང་དག་པར་མྱ་ངན་ལས་འདས་སོ་སྙམ་སྟེ། ང་ནི་ཡང་དག་པར་མྱ་ངན་ལས་འདས་པ་མ་ཡིན་ནོ། །དཔེར་ན་ཁྱོད་ལམ་རིང་པོར་སོང་བ་ལས་
ཕྱིར་མ་འཁོར་གྱི་བར་དུ་ཁྱོད་ཀྱི་བུ་མ་རུངས་པས་ཁྱོད་མ་ཤི་བར་ཤི་ཞེས་ཟེར་བ་དང་འདྲའོ། །བྱང་ཆུབ་སེམས་དཔའ་དག་ནི་དེ་བཞིན་གཤེགས་པ་རྟག་པ། མི་འཕོ་བ། མི་འགྱུར་བའོ་ཞེས་ཟེར་ཏེ། ཇི་ལྟར་ཁྱོད་ཀྱི་
བུ་འཛངས་པ་ཁྱོད་མ་ཤིའོ་ཞེས་ཟེར་བ་དང་འདྲའོ། །དོན་དེ་ལྟ་བས་ངས་བླ་ན་མེད་པ་དགོངས་ཏེ་གསུངས་པ་ཆོས་ཀྱི་གཏེར་བྱང་ཆུབ་སེམས་དཔའ་རྣམས་ལ་གཏད་དོ། །རིགས་ཀྱི་བུ་སེམས་ཅན་གང་ཞིག་སངས་རྒྱས་
རྟག་པ། གནས་པ། མི་འཕོ་མི་འགྱུར་བར་འཛིན་ན། གནས་དེ་ཉིད་ན་སངས་རྒྱས་བཞུགས་པར་རིག་པར་བྱ་སྟེ། དེ་དག་ནི་ཚུལ་བཞིན་དུ་གཞན་འཆོས་པ་ཞེས་བྱའོ། །དེ་ལ་ཇི་ལྟར་ན་དྲིས་པ་བཞིན་དུ་ལན་འདེབས་པ་
ཞེ་ན། གལ་ཏེ་གང་ཟག་གཅིག་གིས། སངས་རྒྱས་བཅོམ་ལྡན་འདས་ལ་འདི་སྐད་དུ། བདག་གིས་ནོར་དང་། ཟང་ཟིང་ཅི་ཡང་མ་བཏང་བར་སྦྱིན་བདག་ཆེན་པོའི་མིང་དུ་གྲགས་པར་འགྱུར་ཞེས་སྨྲ་ན། བཅོམ་ལྡན་
འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །དགེ་སྦྱོང་དང་བྲམ་ཟེ་ལ་སོགས་པ་འདོད་པ་ཉུང་ཞིང་ཆོག་ཤེས་པ། མ་བརྟགས་པའི་ཡོ་བྱད་མི་འཆང་མི་སོགས་པ་ལ་བྲན་པོ་དང་བྲན་མོ་དང་། ལས་བྱེད་པའི་མི་བྱིན་
པ་དང་། ཚངས་པར་སྤྱོད་པ་ལ་བུད་མེད་བྱིན་པ་དང་། ཤ་ཆང་བཅད་པ་ལ་ཤ་ཆང་བྱིན་པ་དང་། ཕྱི་དྲོ་ཕན་ཆད་མི་ཟ་བ་ལ་ཁ་ཟས་བྱིན་པ་དང་། འཇོ་བའི་མེ་ཏོག་དང་སྤོས་མི་ཐོགས་པ་ལ་མེ་ཏོག་དང་སྤོས་བྱིན་པ་དག །
སྦྱིན་པའི་མིང་ནི་ཀུན་དུ་གྲགས་པར་ཡང་འགྱུར་ལ། ནོར་དང་ཟང་ཟིང་ཅུང་ཟད་ཙམ་ཡང་མི་ཉམས་ཏེ་འདི་དག་ནི་དྲིས་པ་བཞིན་དུ་ལན་བཏབ་པ་ཞེས་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་

47-1-60a

སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཤ་འཚལ་བ་ལ་ཤ་སྩལ་བ་མི་རིགས་མོད། དེ་ཅིའི་སླད་དུ་ཞེ་ན། བདག་ནི་ཤ་མི་འཚལ་བ་དག་ལ་ཡོན་ཏན་ཆེན་པོ་བརྒྱད་དང་ལྡན་པར་མཐོང་ངོ་། །
བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཤིན་དུ་ལེགས་སོ། །ཁྱོད་ཀྱིས་ངའི་དགོངས་པ་ཤེས་པ་ཤིན་དུ་ལེགས་སོ། །ཆོས་སྲུང་བའི་བྱང་ཆུབ་སེམས་དཔའ་དག་ནི་འདི་ལྟར་རིག་པར་བྱའོ། །རིགས་
ཀྱི་བུ་དེང་ཕན་ཆད་ཉན་ཐོས་ཀྱི་ཉེ་གནས་དག་ཤ་ཟར་མི་གནང་ངོ་། །གལ་ཏེ་ཡོན་བདག་དད་པས་བྱིན་ན་ཡང་། དེ་ལ་བུའི་ཤ་ལྟ་བུར་འདུ་ཤེས་བསྐྱེད་དོ། །བྱང་ཆུབ་སེམས་དཔའ་འོད་སྲུང་གིས་གསོལ་པ་
བཅོམ་ལྡན་འདས་ཅིའི་སླད་དུ། དེ་བཞིན་གཤེགས་པས་ཤ་འཚལ་དུ་མི་གནང་། བཀའ་སྩལ་པ། རིགས་ཀྱི་བུ་ཤ་ཟ་བ་ནི་སྙིང་རྗེ་ཆེན་པོའི་རིགས་གཅོད་པ་ཡིན་ནོ། །འོད་སྲུང་གིས་གསོལ་པ་སྔོན་བཅོམ་
ལྡན་འདས་ཀྱིས་ཤ་བརྟགས་པ་རྣམ་པ་གསུམ་འཚལ་དུ་གནང་བ་མ་ལགས་སམ། བཀའ་སྩལ་པ། འོད་སྲུང་ཤ་བརྟགས་པ་རྣམ་གསུམ་ཟར་གནང་བ་ནི་བགས་ཀྱིས་བཅད་པའི་ཐབས་སུ་གསུངས་སོ། །
བྱང་ཆུབ་སེམས་དཔའ་འོད་སྲུང་གིས་གསོལ་པ། ཅིའི་སླད་དུ་མ་བརྟགས་པ་རྣམ་པ་བཅུ་དང་། བརྟགས་པ་རྣམ་པ་དགུའི་བར་དུ་འཚལ་དུ་མི་གནང་། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། 
དེ་ཡང་བགས་ཀྱིས་བཅད་པའི་དོན་དུ་གསུངས་ཏེ། མདོར་ན་ཤ་བཅད་པའི་དོན་དུ་བསྟན་པ་ཡིན་ནོ། །བྱང་ཆུབ་སེམས་དཔའ་འོད་སྲུང་གིས་གསོལ་པ། བཅོམ་ལྡན་འདས་ཅིའི་སླད་དུ་དེ་བཞིན་གཤེགས་པས་
ཉའི་ཤ་ལ་བསོད་པའི་ཟས་སོ་ཞེས་གསུངས། བཀའ་སྩལ་པ། རིགས་ཀྱི་བུ་ངས་ནི་ཉ་ཤ་ལ་སོགས་པ་ལ་བསོད་པའི་ཟས་སོ་ཞེས་མ་གསུངས་ཀྱི། བུ་རམ་གྱི་ཤིང་དང་། འབྲས་དང་། ཁ་ར་དང་ཁྲེ་དང་། ནས་ལ་

47-1-60b

སོགས་པ་དང་། ཧ་སེ་དང་། འོ་མ་དང་། ཞོ་དང་མར་དང་། འབྲུ་མར་ལ་སོགས་པ་ལ་བསོད་པའི་ཟས་སོ་ཞེས་གསུངས་ཏེ། གོས་རྣམ་པ་མང་པོ་ཡང་འཆང་དུ་གནང་བར་ངས་གསུངས་མོད་ཀྱི། འཆང་དུ་གནང་བ་དེ་ཡང་ཁ་
དོག་བསྒྱུར་བ་ལ་བྱ་ན། ཉའི་ཤ་ལ་ཆགས་པ་ལྟ་སྨོས་ཀྱང་ཅི་དགོས། འོད་སྲུང་གིས་གསོལ་པ་དེ་བཞིན་གཤེགས་པས་ཤ་འཚལ་དུ་མི་གནང་ན་རོ་རྣམ་པ་ལྔ་པོ། འོ་མ་དང་ཞོ་དང་དར་བ་དང་། མར་དཀར་དང་། 
ཞུན་མར་དང་། ཏིལ་མར་ལ་སོགས་པ་དང་། གོས་ཀེའུ་ཤ་ཡ་དང་། དོ་ཤལ་དང་། ཀོ་ལྷམ་དང་། གསེར་དངུལ་གྱི་སྣོད་ལ་སོགས་པ་ཡང་འཆང་དུ་མི་གནང་བའི་རིགས་སོ། །བཀའ་སྩལ་པ། རིགས་ཀྱི་བུ་གཅེར་བུ་པའི་
ལྟ་བ་དང་འཐུན་པ་མ་ཡིན་གྱི། དེ་བཞིན་གཤེགས་པས་ཚུལ་ཁྲིམས་བཅས་པའི་རྣམས་ནི་སོ་སོར་དགོངས་ཏེ་གསུངས་པ་ཡིན་པས་དགོངས་པ་ཐ་དད་པའི་ཕྱིར་ཤ་བརྟགས་པ་རྣམ་གསུམ་ཟར་གནང་བ་
ཡིན་ནོ། །འདུ་ཤེས་ཐ་དད་པའི་ཕྱིར་ཤ་རྣམ་པ་བཅུ་བཅད་པ་ཡིན་ནོ། །འདུ་ཤེས་ཐ་དད་པས་རང་ཤི་བ་ལ་སོགས་པ་ཤ་ཐམས་ཅད་ཟར་མི་གནང་བ་ཡིན་ནོ། །འོད་སྲུང་ངས་ནི་དེང་ཕན་ཅད་ཉེ་གནས་སུ་གྱུར་པ་
རྣམས་ཀྱིས་ཤ་ཐམས་ཅད་ཟར་མི་རུང་ངོ་། །ཞེས་གསུངས་སོ། །འོད་སྲུང་ཤ་ཟ་བ་དག་ནི་འགྲོ་འམ། སྡོད་དམ་འདུག་གམ། ཉལ་ཡང་སེམས་ཅན་གང་ལ་དྲིས་ཕོག་པ་ཐམས་ཅད་འཇིགས་སྐྲག་གོ། །འདི་ལྟ་སྟེ་
དཔེར་ན་མི་ཞིག་སེང་གེའི་དྲི་བྲོ་བས་ཐམས་ཅད་འཇིགས་ཤིང་སྐྲག་གོ། །རིགས་ཀྱི་བུ་དཔེར་ན་མི་ཞིག་སྒོག་པ་ཟོས་ན་མནམ་པས་ཐམས་ཅད་ཀྱིས་མི་འདོད་དེ་འབྱོལ་ན། དེ་ལ་ཉེ་བར་སྙེན་པ་ལྟ་ཅི་སྨོས། 
ཤ་ཟ་བ་རྣམས་ཀྱང་དེ་དང་འདྲ་སྟེ། སེམས་ཅན་རྣམས་ལ་ཤའི་དྲིས་ཕོག་ན་སྐྲག་སྟེ། ཤི་བས་འཇིགས་པའི་འདུ་ཤེས་འབྱུང་ངོ་། །ཆུ་ལ་གནས་པ་དང་། ཐང་ལ་གནས་པ་དང་། ནམ་མཁའ་ལ་འགྲོ་བའི་

47-1-61a

སྲོག་ཆགས་ཐམས་ཅད་འབྱོལ་ཞིང་འབྲོས་ཏེ། འདི་ནི་བདག་ཅག་གི་དགྲ་ཡིན་ནོ་ཞེས་ཟེར་རོ། །དེ་བས་ན་བྱང་ཆུབ་སེམས་དཔའ་དག་ཤ་ཟ་བར་མི་རྩོལ་ལོ། །སེམས་ཅན་སྒྲོལ་བའི་ཕྱིར་ཤ་ཟ་བ་
སྟོན་ཏེ། ཟ་བ་ལྟར་བྱེད་ན་འང་ཡང་དག་པར་ན་མི་ཟའོ། །རིགས་ཀྱི་བུ་འདི་ལྟར་བྱང་ཆུབ་སེམས་དཔའ་ནི་ཡོངས་སུ་དག་པའི་ཟས་ཀྱང་མི་ཟ་ན་ཤ་ཟ་བ་ལྟ་སྨོས་ཀྱང་ཅི་དགོས། རིགས་ཀྱི་བུ་ང་ཡོངས་སུ་མྱ་ངན་
ལས་འདས་ནས་ལོ་ཚད་མེད་པ་བརྒྱ་ན་འཕགས་པའི་ལམ་བཞིས་བྱུང་བའི་འཕགས་པ་ཀུན་ཀྱང་མྱ་ངན་ལས་འདས་ནས་དམ་པའི་ཆོས་ནི་ནུབ། གཟུགས་བརྙན་ལ་ཆོས་སུ་བྱེད་པ་ན། དགེ་སློང་དག་
འདུལ་བ་འཛིན་པ་དང་འདྲ་བར་འཆོས་ཤིང་མདོ་སྡེ་ཀློག་པ་དང་འདོན་པ་ནི་ཉུང་གི། ལུས་གསོ་བའི་ཕྱིར་ཁ་ཟས་ལ་ནི་ཆགས་ལུས་ལ་ནི་གོས་ངན་པ་རྩུབ་པོ་གྱོན་ལ། མདོག་ཀྱང་ནག་པོར་གྱུར། གཟི་བརྗིད་
ཀྱང་མེད་ལ། བ་ལང་དང་ལུག་ཀྱང་འཚོ། ཤིང་དང་རྩྭ་ཡང་ཁུར་དུ་ཁྱེར་ཏེ། སྐྲ་དང་སེན་མོ་ནི་རིང་དུ་བསྐྱེད་པ་དག་ཀྱང་འབྱུང་སྟེ། ངུར་སྨྲིག་གི་གོས་གྱོན་མོད་ཀྱི། རྔོན་པ་དང་འདྲ་སྟེ། མིག་ཕབ་ལ་གོམ་པ་
དལ་ཡང་བྱི་ལ་བྱི་བ་ལ་འཇབ་པ་དང་། མཚུངས་ཏེ་བདག་ནི་དགྲ་བཅོམ་པ་ཡིན་ནོ་ཞེས་རྟག་ཏུ་བརྗོད་ཀྱང་། ནད་དང་སྡུག་བསྔལ་དང་། གཉིད་དང་མི་གཙང་བས་གཟིར་ཏེ། ཕྱི་རོལ་གྱི་ཚུལ་འཆོས་ཀྱང་
ནང་གི་སེམས་ནི་ཕྲག་དོག་དང་འདོད་པས་ཟིལ་གྱིས་ནོན་པས་ཆོས་ལོག་པ་ཅན་གྱི་བྲམ་ཟེ་ལ་སོགས་པ་དང་མཚུངས་སོ། །དགེ་སྦྱོང་མ་ཡིན་པར་དགེ་སྦྱོང་གི་གཟུགས་སུ་སྟོན་ཅིང་། ངན་པར་ལྟ་བ་བསྐྱེད་ནས་
ཡང་དག་པའི་ཆོས་ལ་ཡང་སྐུར་པ་འདེབས་སོ། །གང་ཟག་དེ་དག་གིས་དེ་བཞིན་གཤེགས་པས་བཅས་པའི་ཚུལ་ཁྲིམས་དང་། འདུལ་བ་དང་། སྤྱོད་ལམ་དང་། རྣམ་པར་གྲོལ་བའི་འབྲས་བུ་བསྟན་པ་དང་། 

47-1-61b

མ་བརྟགས་པའི་ཆོས་སྤང་བ་བསྟན་པ་ཡང་མ་རུང་བར་བྱས། དགོངས་ཏེ་གསུངས་པ་ཤིན་དུ་ཟབ་མོ་ཡང་མ་རུང་བར་བྱས་ནས། སོ་སོའི་རང་བཟོས་མདོ་སྡེ་དང་འདུལ་བ་བཤད་དེ། འདི་སྐད་དུ་དེ་བཞིན་
གཤེགས་པས་བདག་ཅག་ཤ་ཟ་བར་གནང་ཞེས་ཟེར་ཏེ། ཡི་གེར་བྲིས་ནས། སངས་རྒྱས་ཀྱིས་གསུངས་སོ་ཞེས་ཕན་ཆུན་དུ་རྩོད་ཅིང་སོ་སོ་ནས་བདག་ནི་དགེ་སྦྱོང་ཤཱཀྱའི་སྲས་སོ་ཞེས་སྒྲོགས་སོ། །
རིགས་ཀྱི་བུ་དེའི་ཚེ་ན་གཞན་ཡང་དགེ་སྦྱོང་དག་འབྲུ་མང་དུ་སྩོགས་ཤིང་། ཉའི་ཤ་ལ་ལག་དར་ཏེ་སྤྱོད་དོ། །མར་གྱི་སྣོད་དང་། རིན་པོ་ཆེའི་གདུགས་དང་། ཀོ་ལྷམ་དག་འཆང་ཞིང་། རྒྱལ་པོ་དང་། བློན་པོ་དང་། 
ཁྱིམ་བདག་ལ་བརྟེན་ནས་མཚན་ལྟ་བ་དང་། སྐར་མ་ལྟ་བ་དང་། མོ་དང་སྨན་དཔྱད་དག་སློབ་ཅིང་། བྲན་ཕོ་དང་བྲན་མོ་དང་། གསེར་དང་དངུལ་དང་། མུ་ས་ལ་གར་བྷ་དང་། སྤུག་དང་ཤེལ་དང་མུ་ཏིག་དང་། 
བྱི་རུ་དང་། སྦུར་ལོང་དང་། ཤེལ་གྱི་སྣམ་བུ་དང་། དོ་ཤལ་ལ་སོགས་པ་དང་། ཤིང་ཏོག་རྣམ་པ་སྣ་ཚོགས་ལ་སྤྱོད་དེ། གཞན་ཡང་རྩལ་དང་། རི་མོ་དང་། འཇི་བ་ལ་སྤྱོད་པ་དང་། ཡི་གེ་སློབ་པའི་སློབ་དཔོན་དང་། 
ཞིང་རྨོ་བ་དང་། ཞིང་རྔ་བ་དང་། བྱད་སྟེམ་དང་། སྔགས་དང་སྨན་སྦྱོར་བ་དང་། གླུ་གར་དང་། རོལ་མོ་དང་། སྤོས་དང་། མེ་ཏོག་གིས་འཇོ་བ་དང་། ཨུག་ཤུད་དང་མིག་མངས་དང་། བཟོ་རྣམ་པ་སྣ་ཚོགས་
སློབ་ཅིང་བྱེད་པ་དག་འབྱུང་ངོ་། །དགེ་སློང་གང་ཞིག་མི་དགེ་བའི་དངོས་པོ་དེ་དག་སྤངས་ན། གང་ཟག་དེ་ནི་ངའི་ཉེ་གནས་ཡང་དག་པ་ཡིན་པར་རིག་པར་བྱའོ། །དེ་ནས་འོད་སྲུང་གིས་ཡང་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ཡོན་བདག་ལ་ལྟོས་ཏེ་འཚོ་བ་དག །བསོད་སྙོམས་བྱེད་པའི་ཚེ། 

47-1-62a

ཤ་དང་འདྲེས་པའི་ཟས་ཤིག་སྩལ་ན། ཇི་ལྟར་འཚལ་བར་བགྱི། ཅིས་བརྟགས་པར་འགྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཤ་དང་ཟས་སོ་སོར་ཕྱེ་ལ། ཆུས་བཀྲུས་
ཏེ་བཟའ་བར་བྱའོ། །གལ་ཏེ་ལྷུང་བཟེད་ཤ་དང་འབགས་ཀྱང་བྲོ་བའི་རོ་མེད་ན། སྤྱོད་ཀྱང་ཉེས་མེད་དོ། །གལ་ཏེ་བསོད་སྙོམས་ཀྱི་ནང་ན་ཤ་མང་དུ་འོངས་ན་ཡང་བླང་བར་མི་བྱའོ། །གལ་ཏེ་ཟས་ཀྱི་ནང་ན་ཤ་
སྣང་ན་མ་ཟ་ཤིག ། ཟོས་ན་ཉེས་པ་དང་བཅས་པ་སྟེ། ངས་ཤ་ཟར་མི་གནང་བ་དང་བཅས་པ་འདི་རྒྱས་པར་བསྟན་ན། ཟད་པའི་མཐའ་མེད་དེ། མྱ་ངན་ལས་འདའ་བའི་དུས་ལ་བབ་པས་ཕྱོགས་ཙམ་ཞིག་བཤད་
དོ། །འདི་དག་ནི་དྲིས་པའི་ལན་བཏབ་པ་ཞེས་བྱའོ། །འོད་སྲུང་དེ་ལ་ཇི་ལྟར་ན་རྟེན་ཅིང་འབྲེལ་ཏེ་བྱུང་བའི་དོན་ལ་མཁས་པ་ཞེ་ན། འདི་ལྟ་སྟེ། འཁོར་རྣམ་བཞི་ངའི་དྲུང་དུ་ལྷགས་ཏེ། བཅོམ་ལྡན་འདས་ཀྱིས་
དོན་འདི་དག་དེ་བཞིན་གཤེགས་པ་ཐོག་མ་མངོན་པར་བྱང་ཆུབ་ནས་རྒྱལ་པོ་སྡེ་རབ་ཏུ་འཕམ་བྱེད་ལ་ཆོས་ཀྱི་གཞུང་ཤིན་ཏུ་ཟབ་མོ་འདི་ཅིའི་སླད་དུ་མ་གསུངས། བར་བར་ནི་ཤིན་ཏུ་ཟབ་པར་ཡང་གསུངས། 
བར་བར་ནི་མི་ཟབ་པར་ཡང་གསུངས། བར་བར་ནི་ཉམས་པ་ཞེས་ཀྱང་བགྱི། བར་བར་ནི་མ་ཉམས་པ་ཞེས་ཀྱང་བགྱི་ན། དེ་ལ་ཇི་ལྟར་ན་ལྟུང་བ་ཞེས་བགྱི། འདུལ་བ་ནི་གང་སོ་སོར་ཐར་པ་ཞེས་བགྱི་བ་ནི་གང་
ལགས། བཅོམ་ལྡན་འདས་ཀྱིས་བཀའ་སྩལ་པ། སོ་སོར་ཐར་པ་ཞེས་བྱ་བ་ནི་ཆོག་ཤེས་པ། སྤྱོད་ལམ་དང་ལྡན་པ་ཅི་ཡང་མི་སྩོགས་པ། འཚོ་བ་ཡོངས་སུ་དག་པའོ། །ལྟུང་བ་ནི་རྒྱུད་བཞིར་ལྟུང་བའོ། །
གཞན་ཡང་ལྟུང་བ་ནི་སེམས་ཅན་དམྱལ་བ་དང་། མཚམས་མེད་པའི་བར་དུ་ལྟུང་བ་སྟེ། མགྱོགས་བུལ་ནི་ཆར་པ་དྲག་པོའི་གཏོལ་མེད་དོ། །དེ་ཐོས་པ་ཙམ་གྱིས་ཀྱང་འཇིགས་སྐྲག་སྟེ། ཚུལ་ཁྲིམས་སྲུང་

47-1-62b

བ་དང་སྤྱོད་ལམ་སྡོམ་པ་དང་། ཆོག་ཤེས་པ་ལ་ནན་ཏན་བྱེད་པ་དང་། མ་བརྟགས་པའི་ཟང་ཟིང་ཐམས་ཅད་མི་ལེན་པར་འགྱུར་རོ། །གཞན་ཡང་ལྟུང་བ་ཞེས་བྱ་བ་ནི་སེམས་ཅན་དམྱལ་བ་དང་། 
བྱོལ་སོང་དང་། ཡི་དགས་ཀྱི་ཁམས་བསྐྱེད་པ་སྟེ། དོན་དེ་ལྟ་བས་ན་ལྟུང་བ་ཞེས་བྱའོ། །གཞན་ཡང་སོ་སོར་ཐར་པ་ཞེས་བྱ་བ་ནི་ལུས་དང་། ངག་དང་། ཡིད་ཀྱི་མི་དགེ་བའི་ལས་ངན་པ་ཡོངས་སུ་སྤང་
བའོ། །འདུལ་བ་ཞེས་བྱ་བ་ནི་ཚུལ་ཁྲིམས་དང་མདོ་སྡེའི་དོན་ཤིན་ཏུ་ཟབ་མོ་ལ་འཇུག་ཅིང་མ་བརྟགས་པའི་ཟང་ཟིང་ཐམས་ཅད་དང་། མ་རྟགས་པའི་རྒྱུ་དང་རྐྱེན་ལེན་དུ་མི་གནང་བའོ། །གཞན་ཡང་
ཕས་ཕམ་པ་བཞི་དང་། དགེ་འདུན་གྱི་ལྷག་མ་བཅུ་གསུམ་དང་། མ་ངེས་པའི་ཆོས་གཉིས་དང་། སྤང་བ་ལྟུང་བའི་ཆོས་སུམ་བཅུ་དང་། ལྟུང་བ་དགུ་བཅུ་རྩ་གཅིག་དང་། སོ་སོར་བཤགས་པའི་ཆོས་བཞི་དང་། 
བསླབ་པ་མང་པོ་དང་། བདུན་ཤིན་དུ་ཞི་བ་ལ་སོགས་པ་ཉམས་སུ་མི་གནང་ངོ་། །གང་ཟག་ལ་ལ་ནི་ཚུལ་ཁྲིམས་ཐམས་ཅད་ཉམས་པ་ཡང་ཡོད་དོ། །ཐམས་ཅད་ཅེས་བྱ་བ་ནི་ཕས་ཕམ་པ་བཞི་ནས། 
བདུན་ཤིན་དུ་ཞི་བའི་བར་ལ་བྱའོ། །གང་ཟག་ལ་ལ་ནི་ཡང་དག་པའི་ཆོས་ཤིན་དུ་ཟབ་མོ་ལ་སྐུར་ཏེ་ལོག་སྲེད་ཅན་དུ་གྱུར་ནས། མཚན་ཉིད་ཐམས་ཅད་དང་། རྒྱུ་རྐྱེན་མེད་པ་རྫོགས་པར་འཛིན་ཏེ། གང་ཟག་
དེ་དག་བདག་ནི་དབང་པོ་རྣོ་ཞིང་ཤེས་རབ་དང་ལྡན་པའོ་ཞེས་ཁས་འཆེས་ཏེ་ཁ་ན་མ་ཐོ་བ་ལྕི་བ་དང་། ཡང་བ་ཐམས་ཅད་འཆབ་ཅིང་སྦ་བ་ནི་ཇི་ལྟར་རུ་སྦལ་ཡན་ལག་དྲུག་སྦེད་པ་བཞིན་ནོ། །དེ་ལྟར་ཁ་ན་མ་ཐོ་བའི་
རྣམས་ཡུན་རིང་པོ་ནས་མི་འགྱོད་དེ། དེ་ལྟར་མི་འགྱོད་པས་ཉིན་མཚན་དུ་སྐྱེ་ཞིང་འཕེལ་བར་འགྱུར་རོ། །དགེ་སློང་དེ་དག་ཉེས་པ་བྱུང་བའི་རྣམས་ནམ་དུ་ཡང་མི་འགྱོད་དེ། དེ་བས་ན་ཉེས་པ་ཀུན་དུ་གླགས་ནས་

47-1-63a

དེའི་ཕྱིར་དེ་བཞིན་གཤེགས་པས་དངོས་པོ་དེ་དག་མཁྱེན་ཏེ་བགས་ཀྱིས་བཅས་ཀྱིས་ཅིག་ཅར་ནི་མ་ཡིན་ནོ། །དེའི་ཚེ་ན་རིགས་ཀྱི་བུ་དང་རིགས་ཀྱི་བུ་མོ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་
བཞིན་གཤེགས་པས་དེ་ལྟར་མཁྱེན་བཞིན་ཅིའི་སླད་དུ་སྔར་མ་བཅས། བཅོམ་ལྡན་འདས་ཀྱིས་སེམས་ཅན་དག་མཚམས་མེད་པའི་སེམས་ཅན་དམྱལ་བར་བཏང་བ་མ་ལགས་སམ། དཔེར་ན་མི་མང་པོ་ཡུལ་གཞན་དུ་
འགྲོ་བ་ལས་འབྲོག་བསླད་ནས་ལམ་དང་བྲལ་ཏེ། ལམ་མ་ཡིན་པར་ཞུགས་ཀྱང་མི་དེ་དག་འབྲོག་བསླད་པར་མི་འཚལ་ཏེ་ལམ་མོ་སྙམ་ནས། གཞན་ལ་ལམ་ཡིན་ནམ་མ་ཡིན་པར་དྲི་བའི་གནས་ཀྱང་མེད་དོ། །
དེ་བཞིན་དུ་སེམས་ཅན་དག་སངས་རྒྱས་ཀྱི་ཆོས་ཀྱིས་བསླད་དེ། དེ་ཡང་དག་པ་གང་ལགས་པ་མི་མཐོང་ན། དེ་བཞིན་གཤེགས་པས་སྔར་ཡང་དག་པའི་ལམ་བསྟན་ཏེ་དགེ་སློང་དག་འདི་ནི་ཚུལ་ཁྲིམས་ཉམས་པའོ། །
འདི་ནི་ཚུལ་ཁྲིམས་སྲུང་བའོ་ཞེས་བཀའ་སྩལ་ཏེ། ཚུལ་ཁྲིམས་བཅའ་བའི་རིགས་ན། ཅིའི་སླད་དུ་དེ་བཞིན་གཤེགས་པ་ཡང་དག་པར་རྫོགས་པ། ཡང་དག་པའི་ལམ་མཁྱེན་ཅིང་གཟིགས་པ། ལྷའི་ནང་ན་ལྷ་ལྟ་བུ། 
དགེ་བ་བཅུའི་ཡོན་ཏན་དང་དོན་སྟོན་པ་ལ་ཤིན་ཏུ་མཁས་པ། ཅིའི་སླད་དུ་ཚུལ་ཁྲིམས་འདི་སྔར་མ་བཅས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པས་སེམས་ཅན་ལ་དགེ་བ་བཅུའི་
ཡོན་ཏན་སྟོན་པ་ཡང་བདེན་ཏེ། དེ་བཞིན་གཤེགས་པ་ནི་སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་གཟིགས་ན་ཅིའི་ཕྱིར་ཁྱོད་ཀྱིས་འདི་སྐད་དུ། བཅོམ་ལྡན་འདས་ཀྱིས་སེམས་ཅན་དག་དམྱལ་བར་
བཏང་བར་མ་ཡིན་ནམ་ཞེས་སྨྲ། ངས་གང་ཟག་འགའ་ཞིག་མཚམས་མེད་པའི་སེམས་ཅན་དམྱལ་བར་ལྟུང་བའི་རྒྱུ་དང་ལྡན་པར་གཟིགས་ན་ཡང་། གང་ཟག་དེའི་ཕྱིར་བསྐལ་པ་གཅིག་གམ་བསྐལ་པ་གཅིག་འགྲིབས་

47-1-63b

ཀྱི་བར་དུ་ཡང་འཇིག་རྟེན་ན་བཞུགས་སོ། །ང་ནི་སེམས་ཅན་ཐམས་ཅད་ལ་ཐུགས་རྗེ་ཆེན་པོ་དང་ལྡན་པ་ཡིན་ནོ། དེའི་ཕྱིར་སྲས་ལྟ་བུར་འདུ་ཤེས་པ་དག་སེམས་ཅན་དམྱལ་བར་གཏོང་། རིགས་ཀྱི་བུ་འདི་ལྟ་སྟེ་དཔེར་ན། 
རྒྱལ་པོའི་ཁམས་འདི་ན་ཚེམ་བུ་གྱོན་པ་དག །གོས་ལ་བུ་ག་རྡོལ་ཡོད་ན། གདོད་ལྷན་པས་ཀློན་ནོ། །དེ་བཞིན་གཤེགས་པ་ཡང་དེ་དང་འདྲ་སྟེ་སེམས་ཅན་གང་མཚམས་མེད་པའི་སེམས་ཅན་དམྱལ་བར་ལྟུང་བར་
འགྱུར་བའི་རྒྱུ་དང་རྐྱེན་གཅིག་གཟིགས་ན། དགེ་བའི་ཚུལ་ཁྲིམས་ཀྱིས་དེ་སྲུང་བར་བྱེད་དོ། །རིགས་ཀྱི་བུ་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་ཡང་སྔར་སེམས་ཅན་ལ་དགེ་བ་བཅུའི་ཆོས་ཀྱིས་འདུལ་ལོ། །
ཕྱིས་མི་དགེ་བ་སྤྱོད་པ་ཡོད་ན་དེ་ལ་ཅི་རིགས་སུ་བགས་ཀྱིས་ཆད་པས་གཅོད་དོ། །ཉེས་པའི་ཆད་པས་བཅད་ནས་གདོད་འཕྲུལ་གྱི་རྒྱལ་པོའི་ཆོས་སྤྱོད་དོ། །རིགས་ཀྱི་བུ་ང་ཡང་དེ་དང་འདྲ་སྟེ། བསྟན་པ་ཡོད་ཀྱང་སྔར་མ་བཅས་
པ་ནི། དགེ་སློང་དག་ཆོས་མ་ཡིན་པར་སྤྱོད་དུ་བྱེད་ན། གདོད་ཅི་རིགས་སུ་བགས་ཀྱིས་བཅས་པས་ན། གང་ཆོས་ལ་མོས་པའི་སྐྱེ་བོ་དག་ནི་སྟོན་པའི་རྗེས་སུ་མོས་པར་འགྱུར་རོ། །དེ་བས་ན་འཁོར་དེ་དག་གིས་དེ་བཞིན་
གཤེགས་པའི་ཆོས་ཀྱི་སྐུ་མཐོང་བར་གྱུར་ཏོ། །འདི་ལྟ་སྟེ། འཁོར་ལོས་སྒྱུར་བའི་རྒྱལ་པོའི་འཁོར་ལོ་རིན་པོ་ཆེའི་ནི་བསམ་གྱིས་མི་ཁྱབ་བོ། །དེ་བཞིན་གཤེགས་པ་ཡང་དེ་བཞིན་དུ་བསམ་གྱིས་མི་ཁྱབ་སྟེ། ཆོས་
དང་དགེ་འདུན་ཡང་བསམ་གྱིས་མི་ཁྱབ་ལ། ཆོས་སྟོན་པ་དང་། ཆོས་ཉན་པ་ཡང་བསམ་གྱིས་མི་ཁྱབ་སྟེ། འདི་ནི་རྟེན་ཅིང་འབྲེལ་ཏེ་བྱུང་བ་ལ་མཁས་པ་ཞེས་བྱའོ། །བྱང་ཆུབ་སེམས་དཔའ་དེ་ལྟར་མཚན་ཉིད་རྣམ་
པ་འདི་བཞིའི་དོན་རྣམ་པར་འབྱེད་པ་ལ་མཁས་པ་ནི་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་ནང་ན་རྟེན་ཅིང་འབྲེལ་ཏེ་འབྱུང་བའི་དོན་ལ་མཁས་པ་ཞེས་བྱའོ། །དེ་ལ་གཞན་ཡང་བདག་ཚུལ་བཞིན་དུ་བྱེད་པ་

47-1-64a

ཞེས་བྱ་བ་ནི་ཡོངས་སུ་མྱ་ངན་ལས་འདས་པ་ཆེན་པོ་འཐོབ་པའོ། །གཞན་ཚུལ་བཞིན་དུ་འཆོས་པ་ནི་ངས་དགེ་སློང་དག་ལ་དེ་བཞིན་གཤེགས་པ་ནི་རྟག་པ་མི་འཕོ་བའོ་ཞེས་བསྟན་པའོ། །དྲིས་པའི་ལན་བཏབ་
པ་ནི་འོད་སྲུང་ཁྱོད་ཀྱིས་དྲིས་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་དགེ་བསྙེན་མ་ལ་ཤིན་དུ་ཟབ་མོའི་དོན་རྒྱས་པར་བསྟན་པའོ། །རྟེན་ཅིང་འབྲེལ་
ཏེ་འབྱུང་བའི་དོན་ནི་ཉན་ཐོས་དང་། རང་སངས་རྒྱས་དག་ཤིན་ཏུ་ཟབ་མོའི་དོན་འདི་ལྟ་བུ་མི་ཤེས་ཤིང་ཡི་གེའི་འབྲུ་ཨི་ལྟ་བུ་ཐིག་ལེ་གསུམ་གྱིས་སྨྲ་བ་དང་། རྣམ་པར་གྲོལ་བ་མྱ་ངན་ལས་འདའ་བའི་ཤེས་རབ་ཆེན་པོ་
དགོངས་ཏེ་གསུངས་པའི་སྙིང་པོ་མ་ཐོས་པའི་རྣམས་ངས་དེང་འདིར་ཉན་ཐོས་པ་དག་ལ་རྣམ་པར་ཕྱེ་སྟེ་བསྟན་པས་ཤེས་རབ་ཀྱི་མིག་བསྐྱེད་དོ། །གལ་ཏེ་གང་ཟག་ལ་ལ་ཞིག་འདི་སྐད་དུ་དངོས་པོ་རྣམ་པ་བཞི་པོ་འདི་
གཅིག་གོ་ཞེས་སྨྲ་ན་བརྫུན་དུ་མ་གྱུར་ཏམ་ཞེས་ཟེར་ན་དེ་ལ་འདི་སྐད་དུ་ནམ་མཁའ་ནི་ཅི་ཡང་མེད་པ་སྟེ། མི་གཡོ་མི་འཁྲུག་པ་ཡིན་ན་དངོས་པོ་བཞི་པོ་ལ་ཐ་དད་པ་ཅི་ཡོད་ན། དེ་ལ་བརྫུན་ཞེས་བྱར་རུང་ངམ་གསོལ་
པ་མ་ལགས་སོ། །བཅོམ་ལྡན་འདས་ཚིག་མང་པོ་དེ་དག་ནི་དོན་གཅིག་གོ། །འདི་ལྟ་སྟེ་སྟོང་པ་ཉིད་ཀྱི་དོན་ཏོ། །བདག་དང་གཞན་ཚུལ་བཞིན་དུ་བྱེད་པ་དང་། དྲིས་པའི་ལན་འདེབས་པ་དང་། རྟེན་ཅིང་འབྲེལ་ཏེ་འབྱུང་བའི་དོན་
ཡང་དེ་འདྲ་སྟེ། མྱ་ངན་ལས་འདས་པ་ཆེན་པོ་དང་མཉམ་པར་ཐ་མི་དད་དོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་འམ་རིགས་ཀྱི་བུ་མོ་གང་ཞིག་འདི་སྐད་དུ་དེ་བཞིན་གཤེགས་པ་ནི་མི་རྟག་གོ། །ཇི་ལྟ་
བུར་མི་རྟག་ཅེ་ན། བཅོམ་ལྡན་འདས་ཀྱིས་གསུངས་པ་ལྟར་ཉོན་མོངས་པ། ཐམས་ཅད་འགགས་པས་མྱ་ངན་ལས་འདའ་བ་ཞེས་བྱ་སྟེ། དཔེར་ན་མེ་ཤི་ན་ཅི་ཡང་མེད་པ་བཞིན་དུ། ཉོན་མོངས་པ་ཐམས་ཅད་འགགས་པ་ཡང་

47-1-64b

དེ་དང་འདྲ་སྟེ། དེ་ལ་མྱ་ངན་ལས་འདས་པ་ཞེས་བྱ་ན། དེ་ལ་ཅིའི་ཕྱིར་དེ་བཞིན་གཤེགས་པ་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བ་ཞེས་སྨྲ་འམ། ཡང་བཅོམ་ལྡན་འདས་ཀྱིས་གསུངས་པ་ལྟར་སྲིད་པ་དང་བྲལ་བས་མྱ་ངན་
ལས་འདས་པ་ཞེས་བྱ་སྟེ། མྱ་ངན་ལས་འདས་པ་དེ་ལ་ནི་སྲིད་པ་གང་ཡང་མེད་ན། དེ་ལ་ཇི་ལྟར་ན་དེ་བཞིན་གཤེགས་པ་ནི་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བ་ཞེས་བྱ། དཔེར་ན་གོས་ཟད་དེ་ཞིག་ན་དངོས་པོ་ཅི་
ཡང་མེད་པ་བཞིན་དུ་མྱ་ངན་ལས་འདས་པ་ཡང་དེ་དང་འདྲ་སྟེ། ཉོན་མོངས་པ་ཐམས་ཅད་འགགས་པས་དངོས་པོ་ཞེས་བྱ་བ་ཅི་ཡང་མེད་ན། དེ་ལ་ཅིའི་ཕྱིར་དེ་བཞིན་གཤེགས་པ་ནི་རྟག་ཏུ་གནས་པའི་ཆོས་ཅན་མི་འགྱུར་
མི་འཕོ་བ་ཞེས་སྨྲ་འམ། བཅོམ་ལྡན་འདས་ཀྱིས་གསུངས་པ་ལྟར་ན་འདོད་པ་དང་བྲལ་ཏེ་རབ་ཏུ་ཞི་བ་ནི་མྱ་ངན་ལས་འདའ་བ་ཞེས་བྱ་སྟེ། དཔེར་ན་མི་ཞིག་མགོ་བོ་བཅད་ན་མགོ་བོ་མེད་པ་ཞེས་བྱ་བ་དང་འདྲ་བར་འདོད་པ་དང་
བྲལ་བ་རབ་ཏུ་ཞི་བ་ཡང་དེ་དང་འདྲ་སྟེ། སྟོང་པ་ཅི་ཡང་མེད་པས་མྱ་ངན་ལས་འདས་པ་ཞེས་བྱ་ན། དེ་ལ་ཡང་ཅིའི་ཕྱིར་དེ་བཞིན་གཤེགས་པ་ནི་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བ་ཞེས་སྨྲ་འམ། གཞན་ཡང་
བཅོམ་ལྡན་འདས་ཀྱིས་ཚིགས་སུ་བཅད་ནས་འདི་སྐད་ཅེས་བཀའ་སྩལ་ཏོ། །དཔེར་ན་རབ་ཏུ་ཚ་བའི་ལྕགས། །ཐོ་བས་བརྡུངས་ན་ཚ་བ་འབྱུང་། །གྱེས་ནས་དེ་མ་ཐག་ཏུ་མེད། །དེ་ཡི་གནས་ཀྱང་ཤེས་མི་ནུས། །ཡང་དག་རྣམ་
པར་གྲོལ་བ་ཡང་། །མཚན་ཉིད་དེ་དང་འདྲ་བ་སྟེ། །འདོད་པ་ཐམས་ཅད་ཡོངས་སྤངས་ནས། །སྲིད་པའི་འདམ་ལས་རབ་རྒལ་ཏེ། །མི་གཡོ་བ་ཡི་གནས་ཐོབ་ནས། །བྱིན་པའི་གནས་ནི་ཤེས་མི་ནུས། །ཞེས་དེ་སྐད་བཀའ་སྩལ་
པ་དེ་ལ་ཡང་ཅིའི་ཕྱིར་དེ་བཞིན་གཤེགས་པ་ནི་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བའི་ཆོས་ཅན་ཞེས་སྨྲ་ན། འོད་སྲུང་དེ་སྐད་དུ་སྨྲ་བའི་གང་ཟག་དེ་ནི་ལོག་པར་སྨྲ་བ་ཡིན་ནོ། །འོད་སྲུང་ཁྱོད་ཀྱང་དེ་བཞིན་གཤེགས་པ་

47-1-65a

ཉིད་ལ་འགོག་པ་དང་ཟད་པའི་འདུ་ཤེས་མ་སྐྱེད་ཅིག །འོད་སྲུང་ཉོན་མོངས་པ་འགགས་པ་ནི་དངོས་པོ་ཞེས་མི་གདགས་སོ། །དེ་ཅིའི་ཕྱིར་ཞེ་ན། མཐར་ཕྱིན་པའི་ཕྱིར་རྟག་པ་ཞེས་བྱའོ། །ཚིག་འདི་ནི་རབ་ཏུ་ཞི་བ་སྟེ་བླ་ན་མེད་
པའོ། །མཚན་མ་ཐམས་ཅད་ལྷག་མ་མ་ལུས་པར་ཟད་པའོ། །ཚིག་འདི་ནི་རྣམ་པར་དཀར་བ། རྟག་པ་གནས་པ་ཕྱིར་མི་ལྡོག་པ་སྟེ། དེའི་ཕྱིར་ན་མྱ་ངན་ལས་འདས་པ་ལ་རྟག་པ་གནས་པ་ཞེས་བྱའོ། །དེ་བཞིན་གཤེགས་
པ་ཡང་དེ་དང་འདྲ་སྟེ། རྟག་པ་གནས་པ་མི་འགྱུར་བའོ། །མི་རྟག་ཅེས་བྱ་བ་ནི་ཉོན་མོངས་པའོ། །སོ་སོར་གྱེས་ནས་མེད་པར་འགྱུར་ཏེ་གནས་ཀྱང་མི་རྙེད་དོ་ཞེས་བྱ་བ་ནི། དེ་བཞིན་གཤེགས་པས་ཉོན་མོངས་པ་ཐམས་ཅད་
འགགས་ནས་རྒྱུད་ལྔ་ལ་མི་གནས་པའོ། །དེ་བས་ན་དེ་བཞིན་གཤེགས་པ་ནི་རྟག་པ་གནས་པའི་ཆོས་ཅན་མི་འགྱུར་མི་འཕོ་བའོ། །གཞན་ཡང་འོད་སྲུང་སངས་རྒྱས་རྣམས་ཀྱི་སྟོན་པ་ནི་ཆོས་སོ། །དེ་བས་ན་དེ་བཞིན་
གཤེགས་པ་ཡང་བཀུར་སྟི་དང་མཆོད་པ་མཛད་དོ། །ཆོས་རྟག་པའི་ཕྱིར་སངས་རྒྱས་རྣམས་ཀྱང་རྟག་གོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །གལ་ཏེ་ཉོན་མོངས་
པའི་མེ་འགགས་པས་དེ་བཞིན་གཤེགས་པ་ཡང་འགགས་ན། དེ་བཞིན་གཤེགས་པ་ནི་རྟག་ཏུ་གནས་པ་མ་ལགས་ཏེ་དཔེར་ན་ལྕགས་བསྲེགས་པ་ཁ་དོག་དམར་པོ་ཞི་སྟེ་མི་རྙེད་པ་བཞིན་དུ་དེ་བཞིན་གཤེགས་པའི་ཉོན་
མོངས་པ་ཡང་དེ་དང་འདྲ་སྟེ། ཞི་བའི་གནས་ཀྱང་མི་རྙེད་དོ། །གཞན་ཡང་དཔེར་ན་ལྕགས་དེ་ལ་ཚ་བ་དང་དམར་བ་ཞི་ནས་མ་མཆིས་པར་འགྱུར་བ་བཞིན་དུ་དེ་བཞིན་གཤེགས་པ་ཡང་དེ་དང་འདྲ་སྟེ། ཞི་ནས་རྟག་པ་མེད་པས་ཉོན་མོངས་
པའི་མེ་འགགས་ནས་ཡོངས་སུ་མྱ་ངན་ལས་འདས་པར་ཞུགས་པས་དེ་བཞིན་གཤེགས་པ་ནི་མི་རྟག་པའོ། །བཀའ་སྩལ་པ་རིགས་ཀྱི་བུ་ལྕགས་ཞེས་བྱ་བ་ནི་བུས་པ་མ་རབས་ལ་བྱ་སྟེ། བུས་པ་མ་རབས་ནི་ཉོན་མོངས་པ་འགགས་ཀྱང་། 

47-1-65b

འགགས་མ་ཐག་ཏུ་ཕྱིས་སྐྱེ་བས་མི་རྟག་པ་ཞེས་བྱའོ། །དེ་བཞིན་གཤེགས་པ་ནི་དེ་ལྟ་མ་ཡིན་ཏེ། འགགས་ནས་ཕྱིར་མི་སྐྱེ་བའི་ཕྱིར་རྟག་པ་ཞེས་བྱའོ། །འོད་སྲུང་གིས་གསོལ་པ། དཔེར་ན་ལྕགས་ནི་ཁ་དོག་དམར་པོ་ཞི་བའི་
འོག་ཏུ་ཕྱིས་མེར་སྩལ་ན་སླར་ཡང་ཁ་དོག་དམར་པོར་འགྱུར་རོ། །དེ་བཞིན་གཤེགས་པ་ཡང་དེ་དང་འདྲ་ན་ལྟ་ཉོན་མོངས་པ་སླར་ཡང་སྐྱེས་ཏེ། ཉོན་མོངས་པ་སླར་ཡང་སྐྱེ་བས་མི་རྟག་པ་ལགས་སོ། །བཅོམ་ལྡན་འདས་
ཀྱིས་འོད་སྲུང་ལ་བཀའ་སྩལ་པ། ཁྱོད་འདི་སྐད་དུ་དེ་བཞིན་གཤེགས་པ་ལ་མི་རྟག་གོ་ཞེས་མ་ཟེར་ཅིག །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་རྟག་པའོ། །རིགས་ཀྱི་བུ་དཔེར་ན་ཤིང་ཚིག་ཀྱང་ཐལ་བ་ཡོད་དོ། །ཉོན་
མོངས་པ་འགགས་ན་མྱ་ངན་ལས་འདའ་བ་ཡོད་དེ། གོས་ཞིག་པ་འམ་མགོ་བཅད་པ་འམ་སྣོད་ཆག་པ་ལ་སོགས་པའི་དཔེ་དང་འདྲ་སྟེ། དངོས་པོ་དེ་དག་ཀྱང་སོ་སོ་ན་གོས་ཞིག་པ་དང་། མགོ་བཅད་པ་དང་སྣོད་ཆག་པ་ཞེས་
བྱ་བའི་མིང་ཡོད་པ་དང་འདྲའོ། །འོད་སྲུང་ལྕགས་ཚ་བ་གྲངས་ཀྱང་ཕྱིས་ཚ་བར་འགྱུར་གྱི། དེ་བཞིན་གཤེགས་པ་ནི་དེ་ལྟ་མ་ཡིན་ཏེ། ཉོན་མོངས་པ་བཅད་ནས་མཐར་ཡོངས་སུ་བསིལ་བས་ཉོན་མོངས་པའི་མེ་ཕྱིས་མི་སྐྱེའོ། །
འོད་སྲུང་སེམས་ཅན་ཚད་མེད་པ་རྣམས་ནི་ལྕགས་དེ་དང་འདྲ་སྟེ། ངས་ཟག་པ་མེད་པའི་ཤེས་རབ་ཀྱི་མེས་སེམས་ཅན་དེ་དག་གི་ཀུན་ནས་ཉོན་མོངས་པ་བསྲེག་པར་རིག་པར་བྱའོ། །ཡང་འོད་སྲུང་གིས་གསོལ་པ། ཤིན་དུ་ལེགས་
སོ་ཤིན་དུ་ལེགས་སོ། །བདག་གིས་ནི་དེང་དེ་བཞིན་གཤེགས་པ་རྟག་པ་ལགས་པར་ལེགས་པར་ཐོས་སོ།། །། བམ་པོ་དྲུག་པ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། འདི་ལྟ་སྟེ་དཔེར་ན་
འཁོར་ལོས་སྒྱུར་བའི་རྒྱལ་པོ་འཆག་པའི་ཕྱིར་ཕོ་བྲང་གི་ཕྱི་རོལ་ཏུ་སོང་སྟེ། སླས་མང་པོའི་འཁོར་ན་མེད་ཀྱང་འཁོར་ལོས་སྒྱུར་བའི་རྒྱལ་པོ་དེ་ཤིའོ་ཞེས་བྱར་མི་རུང་ངོ་། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ་

47-1-66a

འཛམ་བུའི་གླིང་གི་ཁམས་འདི་ན་མི་སྣང་སྟེ། མྱ་ངན་ལས་འདའ་བར་ཞུགས་ཀྱང་མི་རྟག་གོ་ཞེས་མི་བྱའོ། །དེ་བཞིན་གཤེགས་པ་ནི་ཉོན་མོངས་པ་ཚད་མེད་པ་ལས་བྱུང་སྟེ། མྱ་ངན་ལས་འདས་པར་ཞུགས་ནས་རབ་ཏུ་བདེ་
བའི་གནས་བྱང་ཆུབ་ཀྱི་ཡན་ལག་གི་མེ་ཏོག་ལ་རྒྱུ་ཞིང་རབ་ཏུ་བདེ་བས་འཚོའོ། །ཡང་འོད་སྲུང་གིས་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་ན་ང་ནི་ཡུན་རིང་པོ་ནས་ཉོན་མོངས་པའི་རྒྱ་མཚོ་ལས་རྒལ་ཏོ་ཞེས་
གསུངས་ན། གལ་ཏེ་བཅོམ་ལྡན་འདས་ཉོན་མོངས་པའི་རྒྱ་མཚོ་ལས་རྒལ་ལགས་ན། ཅིའི་སླད་དུ་གྲགས་འཛིན་ལས་སྲས་སྒྲ་གཅན་འཛིན་ལྟ་བུ་བལྟམ་པར་གྱུར། དེ་བས་ན་དེ་བཞིན་གཤེགས་པ་ནི་ཉོན་མོངས་པ་དང་ཀུན་ནས་
ཉོན་མོངས་པའི་རྒྱ་མཚོ་ལས་མ་གྲོལ་བ་འདྲ་ན། བཅོམ་ལྡན་འདས་དེའི་རྒྱུ་དང་དེའི་རྐྱེན་བདག་ལ་བཤད་དུ་གསོལ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཁྱོད་དེ་བཞིན་གཤེགས་པ་ལ་ཡུན་རིང་པོ་ནས་ཉོན་
མོངས་པའི་རྒྱ་མཚོ་རྒལ་ན། ཅིའི་ཕྱིར་གྲགས་འཛིན་ལས་སྲས་སྒྲ་གཅན་འཛིན་བལྟམ་པར་གྱུར། དེ་བས་ན་དེ་བཞིན་གཤེགས་པ་ནི་ཉོན་མོངས་པ་དང་། ཀུན་ནས་ཉོན་མོངས་པའི་རྒྱ་མཚོ་ཆེན་པོ་ལས་མ་རྒལ་བ་དང་
འདྲའོ་ཞེས་དེ་སྐད་མ་སྨྲ་ཤིག །རིགས་ཀྱི་བུ་ཡོངས་སུ་མྱ་ངན་ལས་འདས་པ་ཆེན་པོ་ནི་དོན་ཆེན་པོ་རྣམ་པར་གཞག་པ་ཡིན་གྱིས། ཁྱེད་རྣམས་ཤིན་དུ་བརྟགས་པར་ཉོན་དེ། གཞན་ལ་ཡང་རྒྱ་ཆེར་སྟོན་ལ་ཐེ་ཚོམ་དང་
འཇིགས་པ་མ་སྐྱེད་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་གང་ཞིག་མྱ་ངན་ལས་འདས་པ་ཆེན་པོ་ལ་གནས་ན་རི་རབ་རིའི་རྒྱལ་པོ་ལྟར་མཐོ་ཞིང་ཆེ་བ་ཡུངས་ཀར་གྱི་འབྲུམ་བུ་གཅིག་གི་ནང་དུ་བཅུག་ཀྱང་
རི་རབ་ལྷུན་པོ་ལ་གནས་པའི་སེམས་ཅན་དེ་དག་གཅིག་ལ་གཅིག་དོག་པ་འམ། ཕན་ཚུན་དུ་བསྐྱོད་པར་མི་ཤེས་སོ། །གང་འདུལ་བའི་རིགས་པ་དེ་དག་ནི་བྱང་ཆུབ་སེམས་དཔས་རི་རབ་ལྷུན་པོ་དེ་ཡུངས་ཀར་གྱི་ནང་དུ་བཅུག་པ་

47-1-66b

ཕྱིར་གནས་སུ་བཞག་པར་ཡང་མཐོང་ངོ་། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོ་ལ་གནས་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་
ཡུངས་ཀར་གཅིག་གི་ནང་དུ་བཅུག་ན་དེ་ན་གནས་པའི་སེམས་ཅན་དག་གཅིག་ལ་གཅིག་དོག་པ་འམ། གནས་ཕན་ཚུན་དུ་བསྐྱོད་པར་མི་ཤེས་སོ། །གང་འདུལ་བའི་རིགས་པ་འབའ་ཤིག་གིས་ནི་བྱང་ཆུབ་སེམས་དཔས་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡུངས་ཀར་གྱི་ནང་དུ་བཅུག་པ་དང་། ཕྱིར་བཞག་པར་ཡང་ཤེས་སོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོ་
ལ་གནས་པ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་བ་སྤུའི་བུ་ག་གཅིག་ཏུ་བཅུག་པ་ནས་ཕྱིར་གནས་སུ་བཞག་པའི་བར་དུ་རྒྱས་པར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་མྱ་ངན་ལས་འདས་པ་ཆེན་པོ་ལ་གནས་པ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་བླངས་ཏེ། ཁབ་ཀྱི་རྩེ་མོ་ལ་བཞག་གམ། སངས་རྒྱས་ཀྱི་ཞིང་གཞན་དུ་འཕངས་ཀྱང་དེ་ན་གནས་པའི་
སེམས་ཅན་ཐམས་ཅད་གང་ནས་འོངས་པ་དང་། གང་དུ་སོང་བ་མི་ཤེས་སོ། །གང་འདུལ་བའི་རིགས་པ་འབའ་ཤིག་གིས་ནི་མཐོང་བ་ནས་ཕྱིར་གནས་སུ་བཞག་པའི་བར་དུ་ཤེས་སོ། །རིགས་ཀྱི་བུ་གཞན་ཡང་བྱང་ཆུབ་
སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོ་ལ་གནས་པ་ནི་ཕྱོགས་བཅུའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀུན་ལག་པ་གཡས་པས་བླངས་ནས་རྫ་མཁན་གྱི་འཁོར་ལོ་ལྟར་
བསྐོར་ཏེ། འཇིག་རྟེན་གྱི་ཁམས་རྡུལ་ཕྲ་རབ་སྙེད་ཀྱི་ཕ་རོལ་དུ་འཕངས་ཀྱང་སེམས་ཅན་དེ་དག་ལ་གཅིག་ཙམ་ཡང་སོང་བ་འམ་འོངས་པར་མི་ཚོར་ཏེ། གང་འདུལ་བའི་རིགས་པ་འབའ་ཤིག་གིས་ནི་མཐོང་བ་ནས་ཕྱིར་

47-1-67a

གནས་སུ་འོངས་པའི་བར་དུ་ཤེས་སོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོ་ལ་གནས་པ་ནི་ཕྱོགས་བཅུའི་སངས་རྒྱས་ཀྱི་ཞིང་ཚད་མེད་པ་ཐམས་ཅད་
བདག་གི་ཁོང་པར་བཅུག་ཀྱང་དེ་ན་གནས་པའི་སེམས་ཅན་དག་གཅིག་ལ་གཅིག་གཟེར་ཅིང་དོག་པ་འམ། སོང་བ་འམ་འོངས་པ་འམ། གནས་པར་མི་ཤེས་ཏེ། གང་འདུལ་བའི་རིགས་པ་འབའ་ཤིག་གིས་ནི་མཐོང་བ་ནས་
ཕྱིར་གནས་སུ་འོངས་པའི་བར་དུ་ཤེས་སོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོ་ལ་གནས་པ་ནི་ཕྱོགས་བཅུའི་འཇིག་རྟེན་གྱི་ཁམས་ཀུན་རྡུལ་ཕྲ་རབ་གཅིག་
གི་ནང་དུ་བཅུག་ཀྱང་དེ་ན་གནས་པའི་སེམས་ཅན་གཅིག་ལ་གཅིག་གཟེར་ཅིང་དོག་པ་འམ། སོང་བ་དང་འོངས་པ་མི་ཤེས་ཏེ། གང་འདུལ་བའི་རིགས་པ་འབའ་ཤིག་གིས་ནི་མཐོང་བ་ནས་གནས་སུ་ཕྱིན་པའི་བར་དུ་ཤེས་
སོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོ་ལ་གནས་པས་དེ་ལྟ་བུའི་མངོན་པར་ཤེས་པའི་ཆོ་འཕྲུལ་ཚད་མེད་པ་སྙེད་སྟོན་ཏེ། དེ་བས་ན་མྱ་ངན་ལས་འདས་པ་
ཆེན་པོ་ཞེས་བྱའོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པའི་ཆོ་འཕྲུལ་ཚད་མེད་པར་བསྟན་པ་དེ་ལ་ནི་སེམས་ཅན་ཐམས་ཅད་ཀྱིས་དཔག་པ་འམ། རིག་པར་མི་ནུས་ན། ཁྱོད་ཀྱིས་དེ་
བཞིན་གཤེགས་པ་འདོད་ཆགས་ཀྱི་ཕྱོགས་ལ་ཉེ་བས། སྲས་སྒྲ་གཅན་འཛིན་བལྟམ་པར་ཤེས་པར་ག་ལ་རུང་། རིགས་ཀྱི་བུ་ཡུན་རིང་པོ་ནས་མྱ་ངན་ལས་འདས་པ་ཆེན་པོ་འདི་ལ་གནས་ནས་མངོན་པར་ཤེས་པའི་ཆོ་འཕྲུལ་
རྣམ་པ་སྣ་ཚོགས་སྟོན་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཉི་ཟླ་ཕྲག་བརྒྱ་དང་། འཛམ་བུའི་གླིང་ཕྲག་བརྒྱ་ལ་རྣམ་པ་སྣ་ཚོགས་སུ་སྟོན་པ་ནི་དཔའ་བར་འགྲོ་བའི་ཏིང་ངེ་འཛིན་གྱི་མདོ་ལས་རྒྱས་

47-1-67b

པར་བསྟན་པ་བཞིན་ནོ། །ངས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འཛམ་བུའི་གླིང་འདིར་ཡོངས་སུ་མྱ་ངན་འདའ་བར་བསྟན་ཀྱང་མཐར་ཡོངས་སུ་མྱ་ངན་ལས་འདས་པ་ཡིན་ནོ། །འཛམ་བུའི་གླིང་འདིར་ཡུམ་
གྱི་ལྷུམས་སུ་བལྟམ་པ་བསྟན་པ་ཡང་། ཡབ་དང་ཡུམ་ང་ལ་སྲས་སུ་འདུ་ཤེས་གཞག་པར་བྱ་བའི་ཕྱིར་ཡིན་གྱི། ངའི་སྐུ་ནི་མཐར་འདོད་ཆགས་འདུས་པ་ལས་སྐྱེས་པ་མ་ཡིན་ནོ། །ང་ནི་བསྐལ་པ་ཡུན་རིང་པོ་ཚད་མེད་པའི་བར་དུ་
འདོད་པ་ཡོངས་སུ་སྤངས་པས། ངའི་སྐུ་འདི་ནི་ཆོས་ཀྱི་སྐུ་སྟེ། འཇིག་རྟེན་པའི་རྗེས་སུ་མངལ་དུ་ཞུགས་པ་བསྟན་པ་ཡིན་ནོ། །རིགས་ཀྱི་བུ་འཛམ་བུའི་གླིང་འདིར་ལུམ་བིའི་ཚལ་དུ་ཡུམ་ལྷ་མཛེས་ཀྱི་ལྷུམས་ནས་བལྟམ་
སྟེ། བལྟམ་མ་ཐག་ཏུ་ཤར་ཕྱོགས་སུ་གོམ་པ་བདུན་བོར་ནས། འདི་སྐད་དུ་ང་ནི་ལྷ་དང་། མི་དང་ལྷ་མ་ཡིན་དུ་བཅས་པའི་ནང་ན་མཆོག་ཏུ་གྱུར། ཕུལ་དུ་གྱུར། གཙོ་བོར་གྱུར་ཏོ་ཞེས་སྨྲ་སྟེ། ཡབ་དང་ཡུམ་དང་། འཇིག་རྟེན་
དུ་བཅས་པ་ལྷ་དང་། མིས་མཐོང་བ་ཐམས་ཅད་དགའ་ནས་ངོ་མཚར་རྨད་ཀྱི་སེམས་སྐྱེས་སོ། །མི་ཐམས་ཅད་ཀྱིས་ནི་ང་ལ་བུས་པ་ཆུང་ངུར་འཛིན་ཏེ། ངའི་སྐུ་འདི་ནི་བསྐལ་པ་ཚད་མེད་པ་ནས་ཉོན་མོངས་པའི་ཆོས་
དེ་ལྟ་བུ་དང་བྲལ་ལོ། །དེ་བཞིན་གཤེགས་པའི་སྐུ་ནི་ཆོས་ཀྱི་སྐུ་སྟེ་ཤ་དང་ཁྲག་དང་རྒྱུས་པ་དང་། རྩ་དང་རུས་པ་དང་། རྐང་ལས་བསྒྲུབས་པའི་ལུས་མ་ཡིན་མོད་ཀྱི། འཇིག་རྟེན་པའི་རྗེས་སུ་བུས་པ་ཆུང་ངུའི་ལུས་
བསྟན་ཏོ། །ལྷོ་ཕྱོགས་སུ་གོམ་པ་བདུན་བོར་ནས་སེམས་ཅན་ཚད་མེད་པ་ལ་བླ་ན་མེད་པའི་བསོད་ནམས་ཀྱི་ཞིང་མངོན་པར་བསྟན་ཏོ། །ནུབ་ཕྱོགས་སུ་གོམ་པ་བདུན་བོར་བ་ནི་སྐྱེ་བ་ཟད་པ་དང་། རྒ་བ་དང་། 
འཆི་བ་མེད་པའི་སྐུ་ཐ་མ་བསྟན་པའི་ཕྱིར་རོ། །བྱང་ཕྱོགས་སུ་གོམ་པ་བདུན་བོར་བ་ནི་སྲིད་པའི་འཁོར་བ་ཐམས་ཅད་ལས་གྲོལ་བར་བསྟན་ཏོ། །ཤར་ཕྱོགས་སུ་གོམ་པ་བདུན་བོར་བ་ནི་སེམས་ཅན་གྱི་སྟོན་པ་

47-1-68a

ཡིན་པར་མངོན་པར་བསྟན་པ་ཡིན་ནོ། །ཕྱོགས་མཚམས་བཞིར་གོམ་པ་བདུན་བདུན་བོར་བ་ནི་ཉོན་མོངས་པ་རྣམ་པ་སྣ་ཚོགས་དང་བདུད་རྣམ་བཞི་ཡོངས་སུ་བཅོམ་སྟེ། དེ་བཞིན་གཤེགས་པ་ཡང་དག་པར་
རྫོགས་པར་མངོན་པར་སངས་རྒྱས་པ་བསྟན་པའོ། །བླ་མ་ཕྱོགས་སུ་གོམ་པ་བདུན་བོར་བ་ནི་གང་མི་གཙང་བའི་དངོས་པོ་ཐམས་ཅད་ཀྱིས་མི་གོས་ཏེ། ནམ་མཁའ་ལྟ་བུར་གྱུར་པ་བསྟན་པའོ། །འོག་མའི་ཕྱོགས་སུ་གོམ་
པ་བདུན་བོར་བ་ནི་ཆོས་ཀྱི་ཆར་གྱིས་སེམས་ཅན་དམྱལ་བའི་མེ་གསད་དེ། སེམས་ཅན་དེ་དག་རབ་ཏུ་བདེ་བ་མྱོང་བ་དང་། ཚུལ་ཁྲིམས་ངན་པ་ཅན་ལ་བ་མོ་དང་སེར་བ་ལྟ་བུ་བསྟན་པའོ། །འཛམ་བུའི་གླིང་དུ་སྐྱེས་ནས་
ཞག་བདུན་ལོན་པ་དང་། སྐྲ་བྲེགས་པ་བསྟན་ཏེ། མི་ཐམས་ཅད་ཀྱིས་ནི་ང་ལ་བུས་པར་འཛིན་ཏོ། །ཐོག་མ་སྐྲ་འདྲེག་པ་ན། འཇིག་རྟེན་དུ་བཅས་པ་ལྷ་དང་། མི་དང་བདུད་དང་ཚངས་པ་དང་། བྲམ་ཟེ་ལ་སོགས་པ་གང་
གིས་ཀྱང་། ངའི་སྤྱི་གཙུག་གི་མཚན་ཡང་མཐོང་བར་མི་ནུས་ན། གྲི་ཐོགས་ཏེ་ངའི་སྐྲ་འདྲེག་པ་ལྟ་ཅི་སྨོས། གྲི་ཐོགས་ཏེ་ངའི་སྤྱི་གཙུག་འདྲེག་པ་ནི་གནས་མེད་དོ། །ང་ཡུན་རིང་པོ་ནས་བསྐལ་པ་ཚད་མེད་པའི་བར་དུ་སྐྲ་
དང་ཁ་སྤུ་བྲེགས་ཏེ། ད་ཡང་འཇིག་རྟེན་པའི་རྗེས་སུ་སྐྲ་བྲེགས་པ་བསྟན་པ་ཡིན་ནོ། །ང་ཐོག་མ་བལྟམ་ནས་ཡབ་དང་ཡུམ་གྱིས་ང་ལྷ་ལ་བསྟན་པའི་ཕྱིར་ལྷའི་རྟེན་གྱི་ནང་དུ་ཁྲིད་ནས་ལྷ་དབང་སྒྱུར་ཆེན་པོ་ལ་བསྟན་
པ་ན། ལྷ་དབང་སྒྱུར་ཆེན་པོས་ང་མཐོང་བའི་ཚེ་ཐལ་མོ་སྦྱར་ཏེ་སྟི་སྟང་དང་བཅས་པས་ཕྱོགས་གཅིག་ཏུ་འགྲེང་ངོ་། །ང་ནི་ཡུན་རིང་པོ་ནས་བསྐལ་པ་ཚད་མེད་པའི་བར་དུ་ལྷའི་རྟེན་གྱི་ནང་དུ་འགྲོ་བ་སྤངས་མོད་ཀྱི་
འཇིག་རྟེན་པའི་རྗེས་སུ་འཐུན་པར་བྱ་བའི་ཕྱིར་དེ་ཡང་བསྟན་ཏོ། །ང་ནི་འཛམ་བུའི་གླིང་དུ་རྣ་བ་ཕུག་པ་ཡང་བསྟན་ཏེ། སེམས་ཅན་ཐམས་ཅད་ཀྱིས་ཡང་དག་པར་ངའི་རྣ་བ་དབུག་ནུས་པ་མེད་དེ། འཇིག་རྟེན་པའི་

47-1-68b

རྗེས་སུ་འཐུན་པར་བྱ་བའི་ཕྱིར་དེ་ཡང་མངོན་པར་བསྟན་ཏོ། །རིན་པོ་ཆེ་ལས་རྣ་ཆ་སེང་གེ་ཅན་བྱས་ཏེ། ངའི་རྣ་བ་ལ་བཏགས་མོད་ཀྱི། ང་ནི་བསྐལ་པ་ཚད་མེད་པའི་བར་དུ་བརྒྱན་པའི་རྒྱན་ཡོངས་སུ་སྤངས་ཏེ། འཇིག་རྟེན་
པའི་རྗེས་སུ་འཐུན་པར་བྱ་བའི་ཕྱིར་དེ་ཡང་བསྟན་ཏོ། །ཡི་གེའི་གྲྭར་ཡིག་རྩིས་ཀྱང་བསླབས་ཏེ། ང་ནི་བསྐལ་པ་ཚད་མེད་པའི་བར་དུ་ཕུན་སུམ་ཚོགས་པ་དང་ལྡན་པས་ཁམས་གསུམ་དུ་བརྟགས་ན་སེམས་ཅན་གང་
ཡང་ངའི་སློབ་དཔོན་དུ་འགྱུར་བ་མེད་མོད་ཀྱི། འཇིག་རྟེན་པའི་རྗེས་སུ་འཐུན་པར་བྱ་བའི་ཕྱིར་བསླབ་པའི་གྲྭར་ཞུགས་པ་ཡང་བསྟན་ཏོ། །དེ་བས་ན་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཤེས་
བྱའོ། །གླང་པོ་ཆེའི་རྐྱལ་བསླབས་པ་དང་། རྟ་གདུལ་བ་དང་། སྟོབས་རྒོལ་བ་དང་། ཉམ་རྩལ་རྣམ་པ་སྣ་ཚོགས་སྦྱང་བའི་བར་དུ་བསྟན་ཏོ། །འཛམ་བུའི་གླིང་དུ་རྒྱལ་ཚབ་ཀྱང་བསྟན་ཏེ། སེམས་ཅན་དག་ང་ལ་རྒྱལ་
འཚབ་དུ་བཟུང་ནས། འདོད་པ་ལྔ་ལ་རབ་ཏུ་ལོངས་སྤྱོད་པར་ཡང་མཐོང་ངོ་། །ང་ནི་བསྐལ་པ་ཚད་མེད་པའི་བར་དུ་འདོད་པ་ལྔའི་བདེ་བ་ཡོངས་སུ་སྤངས་མོད་ཀྱི། འཇིག་རྟེན་པའི་རྗེས་སུ་དེ་ཡང་བསྟན་ཏོ། །མཚན་
མཁན་གྱིས་ངའི་མཚན་བལྟས་པ་ན། གལ་ཏེ་རབ་ཏུ་མ་བྱུང་ན་འཁོར་ལོས་སྒྱུར་བའི་རྒྱལ་པོར་གྱུར་ཏེ། འཛམ་བུའི་གླིང་ལ་དབང་སྒྱུར་རོ་ཞེས་སེམས་ཅན་ཐམས་ཅད་ཡིད་ཆེས་སོ། །ང་ནི་བསྐལ་པ་ཚད་མེད་པའི་
བར་དུ་འཁོར་ལོས་སྒྱུར་བའི་རྒྱལ་པོའི་ཐབས་བཏང་སྟེ། ཆོས་ཀྱི་འཁོར་ལོས་སྒྱུར་བའི་རྒྱལ་པོར་ཞུགས་སོ། །འཛམ་བུའི་གླིང་ན་བུད་མེད་མང་པོ་དང་འདོད་པ་ལྔ་སྤངས་ཏེ། རྒ་བ་དང་ན་བ་དང་། འཆི་བ་དང་། དགེ་སྦྱོང་
མཐོང་ནས་རབ་ཏུ་བྱུང་བ་བསྟན་པས་སེམས་ཅན་ཐམས་ཅད་ཀྱིས་རྒྱལ་ཚབ་བཟང་སྦྱིན་གདོད་རབ་ཏུ་འབྱུང་ངོ་ཞེས་ཟེར་རོ། །ང་ནི་བསྐལ་པ་ཚད་མེད་པའི་བར་དུ་རབ་ཏུ་བྱུང་སྟེ་ལམ་བསྒོམས་ཀྱང་། འཇིག་རྟེན་པའི་

47-1-69a

རྗེས་སུ་འཐུན་པར་བྱ་བའི་ཕྱིར་དེ་ཡང་མངོན་པར་བསྟན་ཏོ། །ངས་འཛམ་བུའི་གླིང་དུ་ཁྱིམ་ནས་ཁྱིམ་མ་ཡིན་པར་རབ་ཏུ་བྱུང་ནས་བསྙེན་པར་རྫོགས་ཏེ་ལམ་ལ་ཤིན་ཏུ་ནན་ཏན་བྱས་པས། རྒྱུན་ཏུ་
ཞུགས་པའི་འབྲས་བུ་དང་། ལན་གཅིག་ཕྱིར་ལྡོག་པའི་འབྲས་བུ་དང་། ཕྱིར་མི་ལྡོག་པའི་འབྲས་བུ་དང་། དགྲ་བཅོམ་པའི་འབྲས་བུའི་བར་དུ་ཐོབ་པ་བསྟན་ཏེ། སོ་སོའི་སྐྱེ་བོ་དག་ནི་དགྲ་བཅོམ་པའི་འབྲས་བུ་ཐོབ་
པར་མི་དཀའ་སྟེ་སླ་བ་ཞིག་གོ་སྙམ་དུ་སེམས་སོ། །ང་ནི་བསྐལ་པ་གྲངས་མེད་པའི་སྔ་རོལ་དུ་དགྲ་བཅོམ་པའི་འབྲས་བུ་ཐོབ་ཀྱང་སེམས་ཅན་གདུལ་བའི་ཕྱིར་དེ་ཡང་བསྟན་ཏོ། །སྙིང་པོ་བྱང་ཆུབ་ཀྱི་ཤིང་དྲུང་དུ་རྩྭ་བཏིང་
བ་ལ་འདུག་ནས་བདུད་ཀྱི་རིས་རྣམས་བཏུལ་ཏེ། སོ་སོའི་སྐྱེ་བོ་དག་ནི་ངས་གདོད་སྙིང་པོ་བྱང་ཆུབ་ཀྱི་ཤིང་དྲུང་དུ་བདུད་ཀྱི་རིས་རྣམས་བཏུལ་སྙམ་སེམས་ཏེ། ང་ནི་བསྐལ་པ་གྲངས་མེད་པའི་སྔ་རོལ་དུ་བདུད་ཐམས་
ཅད་བཏུལ་ཟིན་མོད་ཀྱི། སེམས་ཅན་མ་དུལ་བ་དག་གདུལ་བའི་ཕྱིར་བདུད་བཏུལ་བ་དེ་ཡང་མངོན་པར་བསྟན་ཏོ། །ངས་ནི་བཤང་གཅི་ཆེ་ཆུང་དང་། དབུགས་ཕྱི་ནང་དུ་རྒྱུ་བ་ཡང་བསྟན་པས་སོ་སོའི་སྐྱེ་བོ་དག་ནི་ང་ལ་
བཤང་གཅི་ཆེ་ཆུང་དང་དབུགས་ཕྱི་ནང་དུ་རྒྱུ་བ་ཡོད་སྙམ་སེམས་ཏེ། ངའི་སྐུ་འདི་བསོད་ནམས་ཀྱི་འབྲས་བུ་ཡིན་པས་དེ་ལྟ་བུའི་བཤང་གཅི་ཆེ་ཆུང་དང་དབུགས་ཕྱི་ནང་དུ་རྒྱུ་བའི་བག་མེད་ཀྱང་འཇིག་རྟེན་པའི་རྗེས་སུ་
འཐུན་པར་བྱ་བའི་ཕྱིར་དེ་ཡང་མངོན་པར་བསྟན་ཏོ། །ངས་ནི་ཕ་རོལ་པོས་སྦྱིན་པ་བྱིན་པ་བླངས་པ་ཡང་བསྟན་ཏེ། ངའི་སྐུ་འདི་ལ་ནི་བཀྲེས་པ་འམ་སྐོམ་པའི་བག་མེད་དོ། །འོན་ཀྱང་འཇིག་རྟེན་པའི་རྗེས་སུ་
འཐུན་པར་བྱ་བའི་ཕྱིར་དེ་ཡང་མངོན་པར་བསྟན་ཏོ་གཞན་ཡང་སོ་སོའི་སྐྱེ་བོ་དང་འཐུན་པར་ཉལ་བ་དང་གཉིད་ལོག་པ་ཡང་བསྟན་ཏེ། ང་ནི་བསྐལ་པ་གྲངས་མེད་པའི་བར་དུ་ཤིན་ཏུ་ཟབ་མོའི་ཤེས་རབ་དང་ལྡན་ཏེ། 

47-1-69b

སྲིད་པ་གསུམ་དང་ཡོངས་སུ་བྲལ་ཡང་། འགྲོ་བ་དང་སྡོད་པ་དང་། སྤྱོད་ལམ་དང་། གླད་པ་ན་བ་དང་། ལྟོ་ན་བ་དང་རྒྱབ་ན་བ་དང་། འབྲུམ་བུ་དང་། བཀྲུས་པ་དང་། རྐང་པ་འཁྲུ་བ་དང་། ལག་པ་འཁྲུ་བ་དང་། གདོང་འཁྲུ་བ་དང་། 
ཁ་འཁྲུ་བ་དང་། སོ་ཤིང་འཆའ་བའི་བར་དུ་བསྟན་ཏེ། སོ་སོའི་སྐྱེ་བོ་དག་ནི་ང་ལ་དེ་དག་ཀུན་ཡོད་དོ་ཞེས་སེམས་ཏེ། ངའི་སྐུ་ལ་ནི་དེ་དག་གང་ཡང་མེད་དོ། །ངའི་ཞབས་པད་མོ་ལྟར་ཡོངས་སུ་དག་ཅིང་ཞལ་གྱི་དྲི་མེ་ཏོག་
ཨུད་པ་ལ་བྲོ་ཡང་སོ་སོའི་སྐྱེ་བོ་དག་ནི་ང་ལ་གང་ཟག་སྙམ་དུ་སེམས་ཏེ། ཡང་དག་པར་ནང་ནི་གང་ཟག་མ་ཡིན་ནོ། །ང་ཡང་ཚེམ་བུ་གྱོན་ཅིང་འཁྲུ་བ་དང་། འཚེད་པ་དང་། འཆག་པར་བསྟན་ཏེ། ང་ནི་སྔོན་ཡུན་རིང་པོ་ནས་
གོས་མི་དགོས་པར་གྱུར་ཏོ། །སོ་སོའི་སྐྱེ་བོ་དག་ནི་སྒྲ་གཅན་འཛིན་ལ་ངའི་བུ་སྙམ། རྒྱལ་པོ་ཟས་གཙང་མ་ནི་ངའི་ཡབ་སྙམ། ལྷ་མཛེས་ནི་ཡུམ་སྙམ། འཇིག་རྟེན་གྱི་བདེ་བ་ལ་ཡང་ལོངས་སྤྱད་ནས་དངོས་པོ་དེ་དག་ཐམས་
ཅད་བཏང་སྟེ། རབ་ཏུ་བྱུང་ནས་ལམ་ལ་ནན་ཏན་དུ་བྱེད་དོ་སྙམ་སེམས་སོ། །གཞན་ཡང་ཁ་ཅིག་ནི་རྒྱལ་པོ་ཆེན་པོའི་རྒྱལ་ཚབ་ཐུ་བོ་གཽ་ཏ་མའི་རིགས་ཆེན་པོ་ལ་གཏོགས་པའི་འཇིག་རྟེན་གྱི་བདེ་བ་ཐམས་ཅད་སྤངས་ནས་
འཇིག་རྟེན་ལས་འདའ་བའི་ཆོས་ཚོལ་ལོ་སྙམ་སྟེ། ང་ནི་ཡུན་རིང་པོ་ནས་འཇིག་རྟེན་གྱི་འདོད་པའི་དངོས་པོ་ཐམས་ཅད་ཡོངས་སུ་སྤངས་ཏེ། དེ་དག་ཐམས་ཅད་ནི་བསྟན་པ་ཙམ་དུ་ཟད་དོ། །རིགས་ཀྱི་བུ་ང་ནི་འཛམ་བུའི་གླིང་
འདིར་ཡང་དང་ཡང་མྱ་ངན་ལས་འདས་པ་བསྟན་ཀྱང་། མཐར་ཡོངས་སུ་མྱ་ངན་ལས་འདས་པ་མ་ཡིན་ཏེ། སོ་སོའི་སྐྱེ་བོ་དག་ནི་དེ་བཞིན་གཤེགས་པ་ཡང་དག་པར་འགོག་པ་ཟད་དོ་སྙམ་སྟེ། དེ་བཞིན་གཤེགས་པ་ནི་མཐར་ཟད་པ་
མ་ཡིན་པས་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བའི་ཆོས་ཅན་དུ་རིག་པར་བྱའོ། །རིགས་ཀྱི་བུ་མྱ་ངན་ལས་འདས་པ་ཆེན་པོ་ཞེས་བྱ་བ་ནི། སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་དབྱིངས་སོ། །

47-1-70a

གཞན་ཡང་ངས་འཛམ་བུའི་གླིང་འདིར་འཇིག་རྟེན་དུ་མངོན་པར་འབྱུང་བ་བསྟན་ཏེ། སོ་སོའི་སྐྱེ་བོ་དག་ནི་ང་གདོད་མངོན་པར་སངས་རྒྱས་སོ་སྙམ་སེམས་ཏེ། ང་ནི་བསྐལ་པ་གྲངས་མེད་པའི་བར་དུ་བྱ་བ་ཐམས་
ཅད་བྱས་ཀྱང་འཇིག་རྟེན་པའི་རྗེས་སུ་འཛམ་བུའི་གླིང་འདིར་གདོད་མངོན་པར་སངས་རྒྱས་པ་བསྟན་ཏོ། །ང་ཡང་འཛམ་བུའི་གླིང་འདིར་ཚུལ་ཁྲིམས་མ་བསྡམས་ཏེ་རྩ་བ་བཞི་ཡང་ཉམས་པ་བསྟན་པས་སོ་སོའི་སྐྱེ་བོ་དག་
ནི་ཡང་དག་པར་ངས་ཚུལ་ཁྲིམས་ཉམས་སོ་སྙམ་དུ་སེམས་ཀྱང་། ང་ནི་བསྐལ་པ་ཚད་མེད་པའི་བར་དུ་ཚུལ་ཁྲིམས་བསྲུངས་པ་ལ་ཉམས་པ་མེད་དོ། །ང་ཡང་འཛམ་བུའི་གླིང་འདིར་ལོག་སྲེད་ཅན་དུ་བསྟན་ཏེ། སོ་སོའི་
སྐྱེ་བོ་དག་ནི་ཐམས་ཅད་ཀྱིས་ང་ལ་ལོག་སྲེད་ཅན་ཡིན་པར་སེམས་ཀྱང་། ང་ནི་ཡང་དག་པར་ལོག་སྲེད་ཅན་མ་ཡིན་ནོ། །གལ་ཏེ་ལོག་སྲེད་ཅན་ཡིན་ན་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་
སངས་རྒྱས་པར་གྱུར། ང་ཡང་འཛམ་བུའི་གླིང་འདིར་དགེ་འདུན་འདུམ་པའི་དབྱེན་བྱས་པ་བསྟན་ཏེ། སོ་སོའི་སྐྱེ་བོ་དག་ནི་ང་ལ་དགེ་འདུན་འདུམ་པའི་དབྱེན་བྱས་སོ་སྙམ་དུ་སེམས་ཀྱང་། ངས་རྣམ་པར་བལྟས་ན་འཇིག་
རྟེན་དུ་བཅས་པ་ལྷ་དང་མིའི་ནང་ན་དགེ་འདུན་འདུམ་པའི་དབྱེན་བྱེད་ནུས་པ་མ་མཐོང་ངོ་། །ང་ཡང་འཛམ་བུའི་གླིང་འདིར་དམ་པའི་ཆོས་ཡོངས་སུ་སྲུང་བ་བསྟན་ཏེ། སོ་སོའི་སྐྱེ་བོ་དག་ནི་ང་ལ་ཆོས་སྲུང་བ་ཡིན་ནོ་
སྙམ་ནས། ཐམས་ཅད་ངོ་མཚར་དུ་གྱུར་ཏེ། སངས་རྒྱས་རྣམས་ཀྱི་ཆོས་ཉིད་དེ་ཡིན་པས་དེ་ལ་ནི་ངོ་མཚར་དུ་མི་བྱའོ། །ང་ཡང་འཛམ་བུའི་གླིང་འདིར་བདུད་སྡིག་ཏོ་ཅན་གྱི་ལུས་སུ་བསྟན་ཏོ། སོ་སོའི་སྐྱེ་བོ་དག་
ནི་ཡང་དག་པར་ང་ལ་བདུད་སྡིག་ཏོ་ཅན་ཡིན་ནོ་ཞེས་སེམས་ཀྱང་། ང་ནི་བསྐལ་པ་ཚད་མེད་པའི་བར་དུ་བདུད་ཀྱི་ལས་དང་ཡོངས་སུ་བྲལ་ཏེ། པད་མོ་ལྟར་ཡོངས་སུ་དག་པ་ལ་འགོ་བ་མེད་དོ། །ང་ཡང་འཛམ་བུའི་

47-1-70b

གླིང་འདིར་བུད་མེད་ཀྱི་ལུས་ཀྱིས་སངས་རྒྱས་པ་བསྟན་ཏེ། སོ་སོའི་སྐྱེ་བོ་དག་ནི་འདི་ལྟར་ངོ་མཚར་ཆེ་སྟེ། བུད་མེད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ་སྙམ་དུ་སེམས་
ཏེ། དེ་བཞིན་གཤེགས་པ་ནི་ནམ་དུ་བུད་མེད་ཀྱི་ལུས་མི་ལེན་ཀྱང་སེམས་ཅན་ཚད་མེད་པ་སྙེད་གདུལ་བའི་ཕྱིར་བུད་མེད་ཀྱི་གཟུགས་སུ་བསྟན་ཏོ། །སེམས་ཅན་ཐམས་ཅད་ལ་ཐུགས་བརྩེ་བའི་ཕྱིར་གཟུགས་
བྱད་རྣམ་པ་སྣ་ཚོགས་བསྟན་པ་ཡིན་ནོ། །ང་ཡང་འཛམ་བུའི་གླིང་འདིར་ལམ་རྒྱུད་བཞིར་སྐྱེ་བ་བསྟན་ཏེ། ང་ནི་ཡུན་རིང་པོ་ནས་ལམ་གྱི་རྒྱུད་དུ་འགྱུར་བའི་རྒྱུད་བཅད་དོ། །ལས་ཀྱི་རྒྱུས་ལམ་རྒྱུད་བཞིར་ལྷུང་
ནས་སེམས་ཅན་དེ་དག་གདུལ་བའི་ཕྱིར་དེ་དག་ཏུ་སྐྱེ་བ་ཡང་མངོན་པར་བསྟན་ཏོ། །ང་ཡང་འཛམ་བུའི་གླིང་འདིར་ཚངས་པའི་ལྷའི་རྒྱལ་པོ་བྱས་ཏེ། གང་ཚངས་པའི་ལྷ་ལ་རྗེད་པ་དག་ཡང་དག་པའི་ཆོས་ལ་
དགོད་པའི་ཕྱིར་གྱི། ཡང་དག་པར་ཚངས་པ་ནི་མ་ཡིན་ཡང་སོ་སོའི་སྐྱེ་བོ་དག་ནི་ང་ལ་ཡང་དག་པར་ཚངས་པའི་ལྷའི་རྒྱལ་པོ་སྙམ་སེམས་ཏེ། ལྷའི་གཟུགས་སུ་ལྷ་གཞན་དག་ཏུ་བསྟན་པ་ཡང་དེ་བཞིན་ནོ། །ང་ཡང་
འཛམ་བུའི་གླིང་འདིར་བུད་མེད་སྦྲུལ་འཚོང་མའི་གནས་སུ་འགྲོ་བ་བསྟན་ཏེ། ང་ལ་ནི་ཡང་དག་པར་འདོད་ཆགས་པའི་འདུ་ཤེས་མེད་ལ། པད་མོ་ལྟར་ཡོངས་སུ་དག་ཅིང་ཅིས་ཀྱང་མི་འགོ་ཡང་སེམས་ཅན་གང་འདོད་
ཆགས་ཀྱིས་ཟིལ་གྱིས་ནོན་པ་དག །ལམ་སྲང་བཞི་མདོར་དམ་པའི་ཆོས་བསྟན་པའི་ཕྱིར་གྱི། ང་ལ་ཡང་དག་པར་འདོད་ཆགས་ཀྱི་སེམས་མེད་ཀྱང་། སོ་སོའི་སྐྱེ་བོ་དག་ནི་ང་ལ་བུད་མེད་ཀྱི་དབང་བྱེད་དོ་སྙམ་སེམས་
སོ། །ང་ཡང་འཛམ་བུའི་གླིང་འདིར་གོས་སྔོན་པོ་གྱོན་པའི་རིགས་སུ་འགྲོ་བ་བསྟན་ཏེ། དེ་ཡང་བྲན་མོར་གྱུར་པ་ཡང་དག་པའི་ཆོས་ལ་དགོད་པའི་ཕྱིར་གྱི། ང་ལ་ནི་ཡང་དག་པར་གོས་སྔོན་པོ་གྱོན་པའི་གནས་སུ་ལྷུང་བའི་

47-1-71a

ལས་མེད་པར་རིག་པར་བྱའོ། །ང་ཡང་འཛམ་བུའི་གླིང་འདིར་སློབ་དཔོན་ལྟ་བུར་བསྟན་ཏེ། བུས་པ་གཞོན་ནུ་ཤེད་མ་བྱེ་བ་ཡང་དག་པའི་ཆོས་ལ་དགོད་པའི་ཕྱིར་རོ། །ང་ཡང་འཛམ་བུའི་གླིང་འདིར་ཆང་འཐུང་བ་དང་། 
རྒྱལ་པོའི་གནས་དང་། ཕམ་རྒྱལ་གྱི་ཕྱིར་ཐབ་མོ་བྱས་པ་ཡང་བསྟན་ཏེ། དེ་ཡང་སེམས་ཅན་དེ་དག་གདུལ་ཞིང་བསྒྲལ་བའི་ཕྱིར་གྱི། ང་ལ་ནི་དེ་ལྟ་བུའི་ལས་མེད་ཀྱང་། སོ་སོའི་སྐྱེ་བོ་དག་ནི་ང་ལ་དེ་ལྟ་བུའི་ལས་ཀྱང་བྱེད་དོ་
སྙམ་སེམས་སོ། །ང་ཡང་ཡུན་རིང་པོར་དུར་ཁྲོད་ན་བྱ་རྒོད་ཀྱི་ལུས་སུ་བསྟན་ཏེ། དེ་ཡང་བྱ་ཐམས་ཅད་བསྒྲལ་བའི་ཕྱིར་གྱི། སོ་སོའི་སྐྱེ་བོ་དག་ནི་ང་ལ་ཡང་དག་པར་བྱ་རྒོད་ཀྱི་ལུས་སུ་སེམས་ཏེ། ང་ནི་ཡུན་རིང་པོ་ནས་
ལས་དེ་ལྟ་བུ་དང་བྲལ་ཡང་བྱ་རྣམས་བསྒྲལ་བའི་ཕྱིར་དེ་ཡང་མངོན་པར་བསྟན་ཏོ། །ང་ཡང་འཛམ་བུའི་གླིང་འདིར་སེམས་ཅན་ཚད་མེད་པ། གདུལ་ཞིང་དམ་པའི་ཆོས་ལ་དགོད་པའི་ཕྱིར་ཁྱིམ་བདག་གི་ལུས་ཀྱང་བསྟན་ཏོ་
གཞན་ཡང་རྒྱལ་པོ་དང་། བློན་པོ་དང་། རྒྱལ་བུ་དང་། བློན་པོ་ཆེན་པོར་གྱུར་ཏེ། དེ་དག་ཀུན་དུ་ཡང་གཙོ་བོ་དང་ཕུལ་དུ་གྱུར་ཅིང་། དམ་པའི་ཆོས་ལ་ནན་ཏན་བྱ་བའི་ཕྱིར་རྒྱལ་པོའི་ཐབས་སུ་ཡང་ཞུགས་སོ། །ང་ཡང་
འཛམ་བུའི་གླིང་འདིར་ནད་ཀྱི་བསྐལ་པ་བྱུང་ནས། སེམས་ཅན་མང་པོ་ནད་ཀྱིས་རྣམ་པར་གཟིར་བ་དག་སྨན་གྱིས་གསོས་ཏེ། དེའི་འོག་དུ་དམ་པའི་ཆོས་བསྟན་ནས་བླ་ན་མེད་པའི་བྱང་ཆུབ་ལ་བཀོད་དེ། སོ་སོའི་
སྐྱེ་བོ་དག་ནི་ནད་ཀྱི་བསྐལ་པ་བྱུང་སྙམ་སེམས་སོ། །གཞན་ཡང་འཛམ་བུའི་གླིང་འདིར་མུ་གེའི་བསྐལ་པ་བྱུང་བ་ན། དེ་དག་ཅི་འདོད་པ་བཞིན་བཟའ་བ་དང་བཏུང་བ་བྱིན་ནས་གདོད་དམ་པའི་ཆོས་བསྟན་ཏེ། བླ་ན་མེད་
པའི་བྱང་ཆུབ་ལ་བཀོད་དོ། །གཞན་ཡང་འཛམ་བུའི་གླིང་འདིར་མཚོན་གྱི་བསྐལ་པ་བྱུང་བ་ན། དེ་ལ་དམ་པའི་ཆོས་བསྟན་ཏེ། དགྲར་འཁོན་དུ་འཛིན་པ་སྤངས་ནས། བླ་ན་མེད་པའི་བྱང་ཆུབ་ལ་བཀོད་དོ། །གཞན་ཡང་

47-1-71b

རྟག་པར་འཛིན་པ་དག་ལ་མི་རྟག་པའི་འདུ་ཤེས་བསྟན་པ་དང་། བདེ་བར་འདུ་ཤེས་པ་ལ་སྡུག་བསྔལ་བའི་འདུ་ཤེས་བསྟན་པ་དང་། བདག་ཏུ་འདུ་ཤེས་པ་དག་ལ་བདག་མེད་པར་བསྟན་པ་དང་། ཡོངས་སུ་དག་པར་འདུ་
ཤེས་པ་དག་ལ་ཡོངས་སུ་མ་དག་པའི་འདུ་ཤེས་བསྟན་པའི་ཕྱིར་རོ། །སེམས་ཅན་གང་ཞིག་ཁམས་གསུམ་ལ་ཆགས་ན་དེ་ལ་དམ་པའི་ཆོས་བསྟན་ཏེ་གནས་དེ་སྤོང་བར་བྱེད་དོ། །སེམས་ཅན་གདུལ་ཞིང་བསྒྲལ་
བའི་ཕྱིར་བླ་མེད་དམ་པ་སྨན་ལྟ་བུ་སྟོན་ཏོ། །ཀུན་དུ་ཉོན་མོངས་པའི་ཤིང་ཐམས་ཅད་གཅད་པའི་ཕྱིར་བླ་ན་མེད་པའི་ཆོས་ཀྱི་སྨན་གྱི་ཤིང་བསྐྱེད་དོ། །མུ་སྟེགས་ཅན་གྱི་རྣམས་གདུལ་ཞིང་བསྒྲལ་བའི་ཕྱིར་ཡང་
དག་པའི་ཆོས་སྟོན་ཏོ། །སེམས་ཅན་ཐམས་ཅད་ཀྱི་སྟོན་པར་མངོན་པར་བསྟན་ཀྱང་ཐོག་མ་ནས་སེམས་ཅན་གྱི་སྟོན་པའོ་སྙམ་དུ་མི་དགོངས་སོ། །བུས་པ་མ་རབས་བསྒྲལ་བའི་ཕྱིར་དེ་དག་ཏུ་འགྲོ་བ་ཡང་མངོན་
པར་སྟོན་ཏེ། ཆོས་བསྟན་པའི་ཕྱིར་གྱི། ལས་ངན་པས་དེའི་ལུས་ལེན་པ་ནི་མ་ཡིན་ནོ། །དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ནི་དེ་ལྟར་ཡོངས་སུ་མྱ་ངན་ལས་འདས་པ་ཆེན་པོ་ལ་བདེ་བར་གནས་
པ་སྟེ། དེ་བས་ན་རྟག་ཏུ་གནས་པ་མི་འགྱུར་བའི་ཆོས་ཅན་ཞེས་བྱའོ། །ཇི་ལྟར་འཛམ་བུའི་གླིང་ལྟར་ཤར་གྱི་ལུས་འཕགས་གླིང་དང་། ནུབ་ཀྱི་བལ་གླང་སྤྱོད་དང་། བྱང་གི་སྒྲ་མི་སྙན་ཡང་དེ་བཞིན་དུ་རྒྱས་པར་རོ། །
གླིང་བཞི་ན་ཇི་ལྟ་བ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་དེ་བཞིན་ཏེ། སྲིད་པ་ཉི་ཤུ་ལྔ་པོ་ནི་ཇི་ལྟར་དཔའ་བར་འགྲོ་བའི་མདོ་ལས་རྒྱས་པར་བསྟན་པ་བཞིན་ནོ། །དོན་དེ་ལྟ་བས་ན་ཡོངས་
སུ་མྱ་ངན་ལས་འདས་པ་ཆེན་པོ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་ཞིག་ཡོངས་སུ་མྱ་ངན་ལས་འདས་པ་ཆེན་པོ་ལ་བདེ་བར་གནས་ན་མངོན་པར་ཤེས་པའི་རྫུ་འཕྲུལ་འདི་ལྟ་བུ་སྟོན་པ་ལ་

47-1-72a

འཇིགས་པ་མེད་དོ། །འོད་སྲུང་རྐྱེན་དེ་ལྟ་བས་ན་ཁྱོད་ཀྱིས་སྒྲ་གཅན་འཛིན་ལ་སངས་རྒྱས་ཀྱི་སྲས་ཡིན་ནོ་ཞེས་མ་ཟེར་ཅིག ། དེ་ཅིའི་ཕྱིར་ཞེ་ན། ངས་སྔོན་བསྐལ་པ་ཚད་མེད་པའི་བར་དུ་སྲིད་པའི་འདོད་པ་དང་བྲལ་བས་
དེ་བས་ན་དེ་བཞིན་གཤེགས་པ་ནི་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བ་ཞེས་བྱའོ། །འོད་སྲུང་གིས་ཡང་གསོལ་པ། ཅིའི་སླད་དུ་དེ་བཞིན་གཤེགས་པ་ལ་རྟག་ཏུ་གནས་པའི་ཆོས་ཅན་ཞེས་བགྱི། བཅོམ་ལྡན་
འདས་ཀྱིས་གསུངས་པ་ལྟར་ན་མེ་མར་གུམ་ནས་གནས་དང་ཕྱོགས་ཀྱང་མ་མཆིས་པ་དེ་བཞིན་དུ་དེ་བཞིན་གཤེགས་པ་ཡང་དེ་དང་འདྲ་སྟེ། མྱ་ངན་ལས་འདས་ནས་གནས་དང་ཕྱོགས་མ་མཆིས་པ་ཡང་དེ་བཞིན་ནོ་ཞེས་
མ་གསུངས་སམ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་ཁྱོད་འདི་སྐད་དུ་ཇི་ལྟར་མེ་མར་ཤི་ན་གནས་དང་ཕྱོགས་མེད་པ་བཞིན་དུ་དེ་བཞིན་གཤེགས་པ་ཡང་དེ་དང་འདྲ་སྟེ། མྱ་ངན་ལས་འདས་
ནས་གནས་དང་ཕྱོགས་ཀྱང་མེད་དོ། །ཞེས་མ་ཟེར་ཅིག །རིགས་ཀྱི་བུ་འདི་ལྟ་སྟེ་དཔེར་ན། སྐྱེས་པ་འམ་བུད་མེད་གཅིག་མེ་མར་འཛུགས་ན། མར་གྱི་སྣོད་ཆེ་ཆུང་ལས་མར་གྱིས་བཀང་སྟེ་གཟུགས་སོ། །ཇི་སྲིད་མར་ཡོད་ཀྱི་
བར་དུ་ནི་སྣང་བ་ཡང་ཡོད་དོ། །ཅི་སྟེ་མར་ཟད་ན་སྣང་བ་ཡང་མེད་པར་འགྱུར་རོ། །སྣང་བ་མེད་པར་གྱུར་པ་ནི་ཉོན་མོངས་པ་ཟད་པ་ལྟ་བུའོ། །སྣང་བ་ཟད་དེ་མེད་པར་སོང་ཡང་མེ་མར་གྱི་སྣོད་མེད་པར་འགྱུར་བ་མ་ཡིན་ཏེ། དེ་བཞིན་
གཤེགས་པ་ཡང་དེ་དང་འདྲ་སྟེ། ཉོན་མོངས་པ་ཟད་དེ་མེད་ཀྱང་ཆོས་ཀྱི་སྐུ་ནི་རྟག་ཏུ་ཡོད་དོ། །རིགས་ཀྱི་བུ་དེ་ཁྱོད་ཀྱི་ཡིད་ལ་ཇི་སྙམ་སྣང་བ་དང་། མེ་མར་གྱི་སྣོད་ཅིག་ཆར་མེད་པར་འགྱུར་རམ། འོད་སྲུང་གིས་གསོལ་པ། མ་ལགས་
སོ། །བཅོམ་ལྡན་འདས་ཅིག་ཆར་མ་མཆིས་པ་མ་ལགས་ཀྱང་མི་རྟག་པར་འདྲའོ། །ཅི་སྟེ་ཆོས་ཀྱི་སྐུ་མར་གྱི་སྣོད་དང་འདྲ་ན། མར་མེའི་སྣོད་མི་རྟག་པས་ཆོས་ཀྱི་སྐུ་ཡང་དེ་དང་འདྲ་བར་མི་རྟག་པར་འགྱུར་རོ། །རིགས་ཀྱི་བུ་ཁྱོད་

47-1-72b

དེ་སྐད་ཅེས་མ་སྨྲ་ཤིག ། འཇིག་རྟེན་ན་སྣོད་ཅེས་བྱ་བར་གྲགས་པ་དང་། སངས་རྒྱས་བཅོམ་ལྡན་འདས་ཀྱི་བླ་ན་མེད་པའི་ཆོས་ཀྱི་སྣོད་ཅེས་བྱ་བ་སྣོད་ནི་མི་རྟག་པ་ཡིན་ཡང་དེ་བཞིན་གཤེགས་པ་ནི་མ་ཡིན་ནོ། །ཆོས་ཐམས་
ཅད་ལས་འདའ་བ་ནི་རྟག་པ་སྟེ། དེ་བཞིན་གཤེགས་པའི་ངོ་བོ་ཉིད་ཡིན་པས་རྟག་པ་ཞེས་བྱའོ། །གཞན་ཡང་རིགས་ཀྱི་བུ་མེ་མར་ཟད་ཅེས་བྱ་བ་ནི་དགྲ་བཅོམ་པའི་མྱ་ངན་ལས་འདའ་བ་ལ་བྱའོ། །འདོད་པའི་ཉོན་མོངས་པ་
ཐམས་ཅད་མེད་པར་བྱས་པས་ན་མེ་མར་ཟད་པ་ལྟ་བུའོ། །ལན་ཅིག་ཕྱིར་མི་ལྡོག་པ་ནི་འདོད་པ་དང་བཅས་པ་སྟེ། འདོད་པ་དང་བཅས་པས་མེ་མར་ཟད་པ་ལྟ་བུ་ཞེས་བྱར་མི་རུང་ངོ་། །དེ་བས་ན་ངས་སྔོན་མཚན་མ་དགག་
པའི་ཕྱིར་མེ་མར་ཟད་པ་ལྟ་བུའོ། །ཞེས་བཤད་ཀྱི། ཡོངས་སུ་མྱ་ངན་ལས་འདས་པ་ཆེན་པོ་ནི་མེ་མར་ཟད་པ་ལྟ་བུ་མ་ཡིན་ནོ། །ལན་ཅིག་ཕྱིར་མི་ལྡོག་ཅེས་བྱ་བ་ནི་ཡང་དང་ཡང་ལྡོག་པ་མ་ཡིན། སྲིད་པ་ཉི་ཤུ་ལྔ་པོར་
ཕྱིར་མི་ལྡོག་ཅིང་། ལུས་མནམ་པོ་དང་། ལུས་སྲིན་ཅན་དང་། ལུས་གདུག་པ་ཅན་མི་ལེན་པས་ན་ཕྱིར་མི་ལྡོག་པ་ཞེས་བྱའོ། །ལུས་ཡང་ལེན་པ་ནི་ཕྱིར་ལྡོག་པ་ཞེས་བྱ་ཡང་ལུས་མི་ལེན་པ་ནི་ཕྱིར་མི་ལྡོག་པ་ཞེས་བྱའོ། །
སོང་བ་དང་ལྡོག་པ་ཡོད་པས་ཕྱིར་ལྡོག་པ་ཞེས་བྱ། སོང་བ་དང་ལྡོག་པ་མེད་པས་ཕྱིར་མི་ལྡོག་པ་ཞེས་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་
འདས་སངས་རྒྱས་བཅོམ་ལྡན་འདས་ཀྱིས་གསུངས་པ་ལྟར་དགོངས་ཏེ་གསུངས་པའི་སྙིང་པོ་མཆིས་སོ་ཞེས་བགྱི་བའི་དོན་དེ་ལྟ་མ་ལགས་སོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ལ་དགོངས་ཏེ་གསུངས་
གསུངས་པའི་རྗོད་པ་མངའི། དགོངས་ཏེ་གསུངས་པའི་སྙིང་པོ་ཞེས་བགྱི་བ་ནི་མ་མཆིས་སོ། །དཔེར་ན་སྒྱུ་མ་མཁན་ཞིག་གིས་ཤིང་གི་འཁྲུལ་འཁོར་གྱི་མི་ཞིག་བགྱིས་ན། ཤིང་གི་མི་དེ་ནི་ཀུན་གྱིས་ཀྱང་མཐོང་བར་རུང་གི་

47-1-73a

བརྐྱང་བ་དང་། བསྐུམ་པ་དང་། དགྱེ་བ་དང་། རྒུ་བ་ནི་ནང་ནས་བསྒྱུར་བར་མི་འཚལ་ཏོ། །སངས་རྒྱས་ཀྱི་ཆོས་ནི་དེ་ལྟ་བུ་མ་ལགས་ཏེ། སེམས་ཅན་ཐམས་ཅད་ཀྱིས་མཐོང་ཞིང་ཤེས་པར་བགྱི་བ་ལགས་ན། ཅིའི་སླད་
དུ་སངས་རྒྱས་བཅོམ་ལྡན་འདས་ཀྱིས་དགོངས་ཏེ་གསུངས་པའི་སྙིང་པོ་མཆིས་ཤེས་གསུངས། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཤིན་དུ་ལེགས་སོ་ཤིན་དུ་ལེགས་སོ། །རིགས་ཀྱི་བུ་ཁྱོད་ཀྱིས་སྨྲས་པ་
བཞིན་ཏེ། དེ་བཞིན་གཤེགས་པ་ལ་ཡང་དག་པར་ན་དགོངས་ཏེ་གསུངས་པའི་སྙིང་པོ་མེད་དོ། །དེ་ཅིའི་ཕྱིར་ཞེ་ན་འདི་ལྟ་སྟེ། སྟོན་གྱི་ཟླ་བ་ཉ་བ་ནི་སྟེང་གི་ནམ་མཁའ་ལ་ཤིན་དུ་གསལ་བར་སྣང་བས་བསྒྲིབས་
པ་མེད་པའི་ཕྱིར་སྐྱེ་བོ་ཐམས་ཅད་ཀྱིས་མཐོང་ངོ་། །དེ་བཞིན་གཤེགས་པའི་བཀའ་ཡང་དེ་དང་འདྲ་བར་ཤིན་ཏུ་གསལ་ཞིང་རྣམ་པར་དག་ཀྱང་། བྱིས་པ་མ་རབས་ཀྱིས་མི་ཤེས་པའི་ཕྱིར་ན་དགོངས་ཏེ་
གསུངས་པའི་སྙིང་པོ་ཞེས་བྱའོ། །མཁས་པ་ཤེས་རབ་ཅན་དག་གིས་ཁོང་དུ་ཆུད་པས་གསང་བ་ཞེས་མི་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་མི་ཞིག་གསེར་དངུལ་མང་དུ་བསགས་ཏེ། སྲང་གྲངས་མེད་
པར་ཕྱིན་ཀྱང་སེར་སྣ་བྱེད་དེ། དབུལ་ཕོངས་པ་ལ་སྦྱིན་པ་མི་བྱེད་པ་ནི་སྩོགས་པས་གསང་བའི་མཛོད་ཅེས་བྱའི། དེ་བཞིན་གཤེགས་པ་ནི་དེ་ལྟ་བུ་མ་ཡིན་ཏེ། བསྐལ་པ་ཚད་མེད་པའི་བར་དུ་དམ་པའི་
ཆོས་རིན་པོ་ཆེ་ཚད་མེད་པ་བསགས་པ་སེར་སྣ་མེད་པར་སེམས་ཅན་ཐམས་ཅད་ལ་རྟག་ཏུ་སྦྱིན་པ་བྱེད་ན་ཅིའི་ཕྱིར་དེ་བཞིན་གཤེགས་པ་ལ་དགོངས་ཏེ་གསུངས་པའི་སྙིང་པོ་ཡོད་ཅེས་བྱ། རིགས་ཀྱི་བུ་འདི་
ལྟ་སྟེ་དཔེར་ན། མི་ཞིག་དབང་པོ་མ་ཚང་བ། མིག་ཡ་གཅིག་གམ། ལག་པ་ཡ་གཅིག་གམ། རྐང་པ་ཡ་གཅིག་མ་ཚང་ན་ངོ་ཚ་བའི་ཕྱིར་གཞན་གྱིས་མི་མཐོང་བར་བྱེད་པས་གསང་བ་ཞེས་བྱའོ། །དེ་བཞིན་

47-1-73b

གཤེགས་པ་ནི་དེ་ལྟ་བུ་མ་ཡིན་ཏེ་དམ་པའི་ཆོས་ཐམས་ཅད་ཕུན་སུམ་ཚོགས་ཏེ་ཉམས་པ་མེད་པས་སྐྱེ་བོ་ཀུན་མཐོང་བར་བྱེད་ན། ཅིའི་ཕྱིར་དེ་བཞིན་གཤེགས་པ་ལ་དགོངས་ཏེ་གསུངས་པའི་སྙིང་པོ་ཡོད་ཅེས་
བྱ། རིགས་ཀྱི་བུ་འདི་ལྟ་སྟེ། དཔེར་ན་མི་དབུལ་པོ་ཞིག་ལ་བུ་ལོན་མང་པོ་ཆགས་ན། བུ་ལོན་དེད་པས་འཇིགས་ཏེ་མི་མཐོང་བར་བྱ་བའི་ཕྱིར་ན་གསང་བ་ཞེས་བྱའོ། །དེ་བཞིན་གཤེགས་པ་ནི་དེ་ལྟ་བུ་མ་ཡིན་ཏེ། 
སེམས་ཅན་ཐམས་ཅད་ལ་འཇིག་རྟེན་གྱི་ཆོས་ཀྱང་མ་ཆགས་ལ། སེམས་ཅན་ལ་འཇིག་རྟེན་ལས་འདས་པའི་ཆོས་ཆགས་ཀྱང་མི་གསང་ངོ་། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ལ་བུ་གཅིག་པ་
དང་འདྲ་བར་དགོངས་ཏེ་བླ་ན་མེད་པའི་ཆོས་འབྱེད་ཅིང་སྟོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན་ཁྱིམ་བདག་ཕྱུག་པོ་ཞིག་ལ་བུ་གཅིག་ལས་མེད་དེ་ཤིན་ཏུ་སྡུག་ཅིང་བྱམས་ན། རིན་པོ་ཆེ་ཅི་བདོག་པ་ཐམས་ཅད་
སྟེན་ཏོ་དེ་བཞིན་གཤེགས་པ་ཡང་དེ་དང་འདྲ་སྟེ། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་གཟིགས་སོ། །རིགས་ཀྱི་བུ་འདི་ལྟ་སྟེ། འཇིག་རྟེན་ན་མི་དག་ནི་ཕོ་མོའི་མཚན་མི་སྡུག་པའི་ཕྱིར་གོས་ཀྱིས་འགེབས་
པས་ན་གསང་བ་ཞེས་བྱའོ། །དེ་བཞིན་གཤེགས་པ་ནི་དེ་ལྟ་བུ་མ་ཡིན་ཏེ། དབང་པོ་ལས་རིང་དུ་གྱུར་ཏེ། དབང་པོའི་ཕ་རོལ་ཏུ་གྱུར་པས་གསང་ཞིང་གབ་པ་མེད་དོ། །རིགས་ཀྱི་བུ་འདི་ལྟ་སྟེ། བྲམ་ཟེ་དག་ནི་ཚིག་ཏུ་སྨྲ་བའི་
གཙུག་ལག་ཐམས་ཅད་རྒྱལ་རིགས་དང་གདོལ་རིགས་ཀྱིས་ཐོས་པར་མི་འདོད་དོ། །དེ་ཅིའི་ཕྱིར་ཞེ་ན། སྨྲ་བའི་གཙུག་ལག་ལ་ཉེས་པའི་སྐྱོན་ཡོད་པའི་ཕྱིར་རོ། །དེ་བཞིན་གཤེགས་པའི་དམ་པའི་ཆོས་ནི་དེ་ལྟ་མ་
ཡིན་ཏེ། ཐོག་མ་དང་ཐ་མ་དང་། བར་དུ་ཡང་དགེ་བས་གསང་བ་ཞེས་བྱར་མི་རུང་ངོ་། །རིགས་ཀྱི་བུ་དཔེར་ན་ཁྱིམ་བདག་གཅིག་ལ་བུ་གཅིག་ལས་མེད་དེ་ཤིན་ཏུ་སྡུག་ཅིང་བྱམས་པའི་ཕྱིར་སློབ་དཔོན་གྱི་གན་དུ་ཁྲིད་

47-1-74a

ནས་བསླབ་པ་སློབ་ཏུ་བཅུག་ན། མྱུར་དུ་མི་ལོབས་སུ་དོགས་པས་སྡུག་པའི་ཕྱིར་ཁྱིམ་དུ་ཁྲིད་ནས་ཉིན་མཚན་དུ་བརྩོན་འགྲུས་བསྐྱེད་དེ། ཡི་གེ་ཕྱེད་སློབ་ཅིང་སྟོན་ཀྱི། གཙུག་ལག་ཆེན་པོ་མི་སྟོན་ཏོ། །དེ་ཅིའི་ཕྱིར་ཞེ་ན། 
ན་སོ་གཞོན་ལ་ཤེད་མ་རྫོགས་པས་ལྡོབ་པའི་མཐུ་མེད་པའི་ཕྱིར་རོ། །རིགས་ཀྱི་བུ་ཁྱིམ་བདག་དེས་ཡི་གེ་ཕྱེད་བསླབས་ན། བུ་དེས་དེའི་ཚེ་གཙུག་ལག་ཆེན་པོ་ཤེས་ཤིང་རྟོགས་པར་འགྱུར་རམ། གསོལ་པ་མ་ལགས་
སོ། །བཅོམ་ལྡན་འདས་རིགས་ཀྱི་བུ་ཁྱིམ་བདག་དེས་བུ་དེ་ལ་གསང་བ་ཡིན་ནམ། གསོལ་པ་མ་ལགས་སོ། །བཅོམ་ལྡན་འདས་དེ་ཅིའི་སླད་དུ་ཞེ་ན། བུ་ན་སོ་གཞོན་ཏེ་མི་ལྡོབ་པའི་སླད་དུ་མ་བསྟན་གྱི། སེར་
སྣ་བྱས་ཏེ་གསང་བའི་སླད་དུ་མ་བསྟན་པ་ནི་མ་ལགས་སོ། །དེ་ཅིའི་སླད་དུ་ཞེ་ན། སེར་སྣའི་སེམས་དང་བཅས་པ་ནི་གསང་བ་ཞེས་བགྱི་ན། དེ་བཞིན་གཤེགས་པ་ནི་དེ་ལྟ་བུ་མ་ལགས་ཏེ། དགོངས་ཏེ་གསུངས་པའི་
སྙིང་པོ་མཆིས་ཤེས་བགྱིར་མི་རུང་ངོ་། །བཅོམ་ལྡན་འདས་ཀྱིས་བཀའ་སྩལ་པ། ཤིན་དུ་ལེགས་སོ་ཤིན་དུ་ལེགས་སོ། །རིགས་ཀྱི་བུ་ཁྱོད་ཀྱིས་སྨྲས་པ་བཞིན་ཏེ། ཞེ་སྡང་གི་སེམས་དང་། ཕྲག་དོག་དང་སེར་སྣའི་
སེམས་དང་བཅས་པ་ནི་གསང་བ་ཞེས་བྱའི། དེ་བཞིན་གཤེགས་པ་ལ་ནི་ཞེ་སྡང་བ་དང་། ཕྲག་དོག་དང་། སེར་སྣའི་ཐུགས་མི་མངའ་བས་ན་གསང་བ་ཡོད་དོ་ཞེས་བྱར་མི་རུང་ངོ་། །རིགས་ཀྱི་བུ་ཁྱིམ་བདག་ཅེས་
བྱ་བ་ནི་དེ་བཞིན་གཤེགས་པ་ལྟ་བུའོ། །བུ་གཅིག་པ་ཞེས་བྱ་བ་ནི་སེམས་ཅན་ཐམས་ཅད་ལ་བྱ་སྟེ། དེ་བཞིན་གཤེགས་པ་ནི་སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་གཟིགས་སོ། །བུ་སློབ་
པ་ནི་ཉན་ཐོས་ཀྱི་ཉེ་གནས་ལྟ་བུའོ། །ཡི་གེ་ཕྱེད་ཅེས་བྱ་བ་ནི་ཡི་གེ་སྡེ་དགུ་པོ་ལྟ་བུའོ། །གཙུག་ལག་ཆེན་པོ་ཞེས་བྱ་བ་ནི་ཤིན་དུ་རྒྱས་པ་ཐེག་པ་ཆེན་པོའི་མདོ་སྡེ་ལྟ་བུའོ། །ཉན་ཐོས་ཀྱི་རྣམས་ལ་ཤེས་

47-1-74b

རབ་ཀྱི་མཐུ་མེད་པས་དེ་བཞིན་གཤེགས་པས་ཡི་གེ་ཕྱེད་ལྟ་བུ་མདོ་སྡེ་དགུ་པོ་བཤད་ཀྱི་གཙུག་ལག་ཆེན་པོ་ལྟ་བུ་ཤིན་དུ་རྒྱས་པ་ཐེག་པ་ཆེན་པོའི་མདོ་སྡེ་མ་བཤད་དོ། །རིགས་ཀྱི་བུ་ཁྱིམ་བདག་གི་བུ་ཤེད་རྫོགས་ཏེ་ལྡོབ་པའི་
མཐུ་ཡོད་བཞིན་དུ་གཙུག་ལག་ཆེན་པོ་མ་བསླབས་ན་གསང་བ་ཞེས་བྱའོ། །ཉན་ཐོས་ཀྱང་གལ་ཏེ་ཐེག་པ་ཆེན་པོའི་གཙུག་ལག་ལྡོབ་པའི་མཐུ་ཡོད་པར་གྱུར་ལ། དེ་བཞིན་གཤེགས་པས་སེར་སྣ་མཛད་དེ་མ་
བསྟན་ན་དེ་བཞིན་གཤེགས་པ་ལ་དགོངས་ཏེ་གསུངས་པའི་སྙིང་པོ་ཡོད་ཅེས་བྱར་རུང་ངོ་། །དེ་བཞིན་གཤེགས་པ་ནི་དེ་ལྟ་བུ་མ་ཡིན་ཏེ། དེ་བས་ན་དེ་བཞིན་གཤེགས་པ་ལ་དགོངས་ཏེ་གསུངས་པའི་སྙིང་པོ་མེད་དོ། །
ཇི་ལྟར་ཁྱིམ་བདག་དེས་སྔར་བུ་དེ་ལ་ཡི་གེ་ཕྱེད་པོ་བསྟན་ནས་དེའི་འོག་ཏུ་གཙུག་ལག་ཆེན་པོ་སྟོན་པ་བཞིན་དུ། དེ་བཞིན་གཤེགས་པ་ཡང་དེ་དང་འདྲ་སྟེ། ཉེ་གནས་རྣམས་ལ་སྔར་ཡི་གེ་ཕྱེད་ལྟ་བུ་མདོ་སྡེ་དགུ་པོ་
བསྟན་ནས་དེའི་འོག་ཏུ་གཙུག་ལག་ཆེན་པོ་སྟོན་པ་ནི་འདི་ལྟ་སྟེ། དེ་བཞིན་གཤེགས་པ་ནི་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བ་ཞེས་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན་དབྱར་གྱི་
དུས་སུ་ཆར་སྤྲིན་ཆེན་པོ་ལངས་ཏེ། ཆར་པ་ཆེན་པོ་བབ་ན། ཞིང་པ་ཞིང་ལས་བྱེད་པ་ས་བོན་མང་དུ་བཏབ་པ་རྣམས་ཀྱིས་ནི་ལོ་ཐོག་མང་དུ་ཐོབ་པར་འགྱུར་རོ། །གང་ས་བོན་ཉུང་ངུ་བཏབ་པ་རྣམས་ཀྱིས་ནི་ལོ་ཐོག་ཉུང་
ངུ་ཐོབ་སྟེ། དེ་ནི་ཀླུའི་རྒྱལ་པོས་ཉེས་པ་མ་ཡིན་ལ། ཀླུའི་རྒྱལ་པོས་གསང་བ་ཡང་མ་ཡིན་ནོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཆོས་ཆེན་པོའི་ཆར་ཡོངས་སུ་མྱ་ངན་ལས་འདས་པ་ཆེན་པོ་ཕབ་པས་
སེམས་ཅན་གང་དགེ་བའི་འབྲས་བུ་བསྐྱེད་པ་དག་ནི་ཤེས་རབ་ཀྱི་མྱུ་གུ་དང་འབྲས་བུ་ཐོབ་པར་འགྱུར། དགེ་བའི་ས་བོན་མེད་པ་ནི་ཅི་ཡང་མ་ཐོབ་སྟེ། ཅི་ཡང་མ་ཐོབ་པ་ནི་དེ་བཞིན་གཤེགས་པས་ཉེས་པ་མ་ཡིན་ལ། 

47-1-75a

དེ་བཞིན་གཤེགས་པ་ལ་ཡང་དག་པར་ན་གསང་བ་ཡང་མེད་དོ། །འོད་སྲུང་གིས་ཡང་གསོལ་པ། བདག་གིས་ནི་སངས་རྒྱས་བཅོམ་ལྡན་འདས་ལ་དགོངས་ཏེ་གསུངས་པ་གསང་བའི་སྙིང་པོ་མ་
མཆིས་པར་རྟོགས་ན། བཅོམ་ལྡན་འདས་ཀྱིས་གསུངས་པ་ལྟར་གཙུག་ལག་ཆེན་པོ་ནི་དེ་བཞིན་གཤེགས་པས་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བ་ལྟ་བུའོ་ཞེས་བགྱི་བ་དེ་མི་རུང་ངོ་། །
དེ་ཅིའི་སླད་དུ་ཞེ་ན། སྔོན་བཅོམ་ལྡན་འདས་ཀྱིས་ཚིགས་སུ་བཅད་པ་འདི་སྐད་ཅེས་གསུངས་སོ། །དེ་བཞིན་གཤེགས་དང་རང་རྒྱལ་དང་། །ཉན་ཐོས་པའི་ཉེ་གནས་ཀྱང་། །མི་རྟག་པའི་ལུས་འདོར་ན། །བུས་པ་
མ་རབས་སྨོས་ཅི་དགོས། །ཤེས་གསུངས་ལ། ད་འདིར་རྟག་ཏུ་གནས་པ་མི་འགྱུར་མི་འཕོ་བ་ཞེས་གསུངས་པའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ངས་ནི་ཉན་ཐོས་པའི་ཉེ་གནས་ཐམས་
ཅད་ལ་ཡི་གེ་ཕྱེད་པོ་བསྟན་པའི་ཕྱིར་ཚིགས་སུ་བཅད་པ་དེ་སྐད་ཅེས་གསུངས་པ་ཡིན་ནོ། །རིགས་ཀྱི་བུ་གཞན་ཡང་རྒྱལ་པོ་རབ་ཏུ་སྡེ་འཕམ་བྱེད་ཀྱི་མ་ཤི་བ་ན། རྒྱལ་པོ་མྱ་ངན་གྱིས་ནོན་ཏེ་རབ་ཏུ་ངུ་ཞིང་། ཡིད་ལ་
གཅགས་བཞིན་དུ་ང་གང་ན་བར་འོངས་ནས་ངས་རྒྱལ་པོ་ལ་མཁྱེན་བཞིན་དུ་རྒྱལ་པོ་ཆེན་པོ་ཅིའི་ཕྱིར་རབ་ཏུ་སྡུག་བསྔལ་ཞིང་ཡི་མུག་པར་གྱུར་ཅེས་དྲིས་ན། རྒྱལ་པོས་གསོལ་པ། བཙུན་མོ་ཆེན་མོ་དེང་ཚེའི་བྱ་བ་
བྱས་ཏེ། གལ་ཏེ་སུ་ཞིག་གིས་བདག་གི་མའི་ཚེ་སླར་བཟློག་ན། བདག་གིས་རྒྱལ་ཐབས་དང་། བལ་གླང་དང་རྟ་དང་། རིན་པོ་ཆེ་སྣ་བདུན་དང་། ལུས་དང་སྲོག་ཀྱང་འབུལ་ལོ་ཞེས་སྨྲས་སོ། །ངས་རྒྱལ་པོ་དེ་ལ་འདི་སྐད་དུ་
རྒྱལ་པོ་ཆེན་པོ་མྱ་ངན་གྱིས་ཡིད་གདུངས་པར་མ་བྱེད་ཅིག །སེམས་ཅན་ཐམས་ཅད་ཚེ་ཟད་དེ་ཤི་ཞེས་བྱ་བ་ཡོད་དོ། །སངས་རྒྱས་དང་རང་སངས་རྒྱས་དང་ཉན་ཐོས་རྣམས་ཀྱང་ལུས་འདོར་ན། བུས་པ་མ་རབས་ལྟ་ཅི་

47-1-75b

སྨོས་ཏེ། རིགས་ཀྱི་བུ་ངས་རྒྱལ་པོ་དེའི་མྱ་ངན་བསང་བའི་ཕྱིར་ཡི་གེ་ཕྱེད་པོའི་ཚིགས་སུ་བཅད་པ་དེ་དག་གསུངས་པ་ཡིན་ནོ། །ངས་ད་ཉན་ཐོས་ཀྱི་ཉེ་གནས་རྣམས་ལ་གཙུག་ལག་ཆེན་པོ་བསྟན་ཏེ། དེ་བཞིན་གཤེགས་
པ་ནི་རྟག་ཏུ་གནས་པ་མི་འགྱུར་མི་འཕོ་བའོ། །ཞེས་གསུངས་པ་ལ། དེ་ལ་གང་ཟག་ལ་ལ་ཞིག་གིས་དེ་བཞིན་གཤེགས་པ་མི་རྟག་ཅེས་ཟེར་ན་དེའི་ལྕེ་ཅི་སྟེ་ཆད་པར་མ་གྱུར། འོད་སྲུང་གིས་ཡང་གསོལ་པ། བཅོམ་
ལྡན་འདས་ཀྱིས་ཡང་ཚིགས་སུ་བཅད་པ་ལ་འདི་སྐད་ཅེས་མ་གསུངས་སམ། ཅི་ཡང་སྩོགས་པ་མེད་ཅིང་། །ཟས་ཀྱི་ཚོད་ཀྱང་ཤེས་པ། །མཁའ་ལ་བྱ་འཕུར་བཞིན་ཏེ། །རྗེས་ནི་སུས་ཀྱང་མི་ཆོད། །ཅེས་བགྱི་བའི་
དོན་ཇི་ལྟ་བུ་ལགས། བཅོམ་ལྡན་འདས་ཀྱིས་དཀྱིལ་འཁོར་འདིའི་ནང་ན་ཅི་ཡང་མི་སྩོགས་ཤེས་བགྱི་བ་ནི་གང་ལགས། ཟས་ཀྱི་ཚོད་འཛིན་པ་གང་ལགས། ནམ་མཁའ་ལ་བྱ་འཕུར་བ་ལྟར་རྗེས་མི་རྙེད་པ་དེ་ལྟ་བུ་
ནི་སུ། སོང་བ་དེ་ཡང་ཕྱོགས་གང་དུ་ཕྱིན་པར་གྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། སྩོགས་པ་ཞེས་བྱ་བ་ནི་ནོར་བུ་རིན་པོ་ཆེའོ། །རིགས་ཀྱི་བུ་སོགས་པ་ལ་རྣམ་པ་གཉིས་ཏེ། འདུས་བྱས་དང་
འདུས་མ་བྱས་པའོ། །འདུས་བྱས་ཀྱི་སོགས་པ་ནི་ཉན་ཐོས་ཀྱི་སྤྱོད་པ་ལ་བྱའོ། །འདུས་མ་བྱས་པའི་སོགས་པ་ནི་དེ་བཞིན་གཤེགས་པའི་སྤྱོད་པའོ། །རིགས་ཀྱི་བུ་དགེ་འདུན་ལ་ཡང་རྣམ་པ་གཉིས་ཏེ། འདུས་
བྱས་དང་འདུས་མ་བྱས་པའོ། །འདུས་བྱས་ཀྱི་དགེ་འདུན་ཞེས་བྱ་བ་ནི་ཉན་ཐོས་སོ། །ཉན་ཐོས་ཀྱི་དགེ་འདུན་ཞེས་བྱ་བ་ནི་སོགས་པ་མེད་པའོ། །ཅི་མི་སོགས་ཤི་ན་བྲན་ཕོ་དང་བྲན་མོ་དང་། ཆོས་མ་ཡིན་པའི་དངོས་
པོ་བང་མཛོད་དང་ཁྲེ་འབྲས་དང་། ཏིལ་དང་ཟར་མ་དང་། སྲན་མ་ཆེ་ཆུང་ལ་སོགས་པ་མི་སོགས་པའོ། །དེ་ལ་གང་ཞིག་གིས་འདི་སྐད་དུ་དེ་བཞིན་གཤེགས་པས་བྲན་པོ་དང་། བྲན་མོ་དང་ལས་བྱེད་པའི་མི་ལ་སོགས་པ་

47-1-76a

འཆང་དུ་གནང་ངོ་ཞེས་ཟེར་ན། དེའི་ལྕེ་ལྐུག་པར་འགྱུར་བའི་རིགས་སོ། །ངའི་ཉན་ཐོས་ཀྱི་ཉེ་གནས་དག་ནི་མི་སོགས་པ་ཞེས་ཀྱང་བྱ། ཟས་ཀྱི་ཚོད་ཤེས་པ་ཞེས་ཀྱང་བྱ་སྟེ། གང་ཟས་ལ་ཆགས་པ་ནི་ཆོག་མི་
ཤེས་པ་ཞེས་བྱ། གང་ཟས་ལ་མ་ཆགས་པ་ནི་ཆོག་ཤེས་པ་ཞེས་བྱའོ། །རྗེས་མི་ཆོད་ཅེས་བྱ་བ་ནི་བླ་ན་མེད་པའི་བྱང་ཆུབ་ལ་བསྙེན་པ་སྟེ། གང་ཟག་དེ་ནི་ངས་གསུངས་པ་ལྟར་སོང་མོད་ཀྱི། ཕྱིན་པའི་གནས་མེད་དོ། །
འོད་སྲུང་གིས་ཡང་གསོལ་པ། འདུས་བྱས་ཀྱི་དགེ་འདུན་ལ་ཡང་མི་སོགས་པ་ཞེས་བགྱི་ན། འདུས་མ་བྱས་པའི་དགེ་འདུན་ལྟ་ཅི་སྨོས་ཏེ། དེ་ནི་དེ་བཞིན་གཤེགས་པ་ལ་བགྱི་ན། དེ་བཞིན་གཤེགས་པ་ལ་སྩོགས་པ་ག་
ལ་ཞིག་མཆིས། སོགས་པ་ཞེས་བགྱི་བ་ནི་གསང་བ་འམ་སྦེད་པ་ལ་བགྱི་ན། དེ་བཞིན་གཤེགས་པ་ནི་གསུང་ལ་སེར་སྣ་མི་མངའ་བས་གསང་བ་ཞེས་བགྱིར་མི་རུང་ངོ་། །རྗེས་མི་ཆོད་ཅེས་བྱ་བ་ནི་འདི་ལྟ་སྟེ། མྱ་ངན་ལས་
འདས་པའོ། །མྱ་ངན་ལས་འདས་པ་ཉི་ཟླ་དང་སྐར་མ་དང་། གཟའ་སྐར་དང་། གྲང་བ་དང་། ཚ་བ་དང་རླུང་དང་ཆར་པ་དང་། སྐྱེ་བ་དང་རྒ་བ་དང་། ན་བ་དང་འཆི་བ་དང་། སྲིད་པ་ཉི་ཤུ་ལྔ་པོ་ཡང་མ་མཆིས་ལ། མྱ་ངན་དང་སྡུག་བསྔལ་
དང་། ཉོན་མོངས་པ་དང་བྲལ་བའོ། །དེ་ལྟར་མྱ་ངན་ལས་འདས་པ་ནི་དེ་བཞིན་གཤེགས་པའི་གནས་རྟག་པ་མི་འགྱུར་མི་འཕོ་བ་སྟེ། རྒྱུ་དང་རྐྱེན་དེ་ལྟ་བས་ན་དེ་བཞིན་གཤེགས་པ་ནི་ཤིང་སཱ་ལའི་དྲུང་དུ་ཡོངས་སུ་མྱ་ངན་
ལས་འདའ་བ་ཆེན་པོས་ཡོངས་སུ་མྱ་ངན་ལས་འདས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆེན་པོ་ཞེས་བྱ་བ་ནི་རང་བཞིན་ཉིད་ཡངས་ཤིང་རྒྱ་ཆེ་བའོ། །དཔེར་ན་གང་ཟག་གཅིག་ཚེ་ལོ་གྲངས་མེད་པར་
ཐུབ་པས་ན་སྐྱེས་བུ་ཆེན་པོ་ཞེས་བྱའོ། །གལ་ཏེ་དམ་པའི་ཆོས་ལ་བདེ་བར་གནས་ན་མིའི་ནང་དུ་ཕུལ་དུ་གྱུར་པ་ཞེས་བྱའོ། །ངས་སྐྱེས་བུ་ཆེན་པོ་བརྒྱད་ཅེས་གསུངས་པ་གང་ཟག་གཅིག་འབའ་ཞིག་གིས་ཐོབ་པ་འམ། 

47-1-76b

ཀུན་ཀྱིས་ཐོབ་པར་རུང་། གལ་ཏེ་མི་གཅིག་གིས་བརྒྱད་ཆར་ལྡན་ན། དེ་ནི་མཆོག་དང་ཕུལ་དུ་གྱུར་པ་ཞེས་བྱའོ། །མྱ་ངན་ལས་འདའ་བ་ཞེས་བྱ་བ་ནི་ཉེས་པའི་སྐྱོན་མེད་པ་སྟེ། རིགས་ཀྱི་བུ་དཔེར་ན་མི་ཞིག་དུག་མདས་ཕོག་ན། 
ན་བའི་སྡུག་བསྔལ་ཆེན་པོ་མྱོང་ངོ་། །དེ་གལ་ཏེ་སྨན་པ་མཁས་པ་དང་ཕྲད་ན། སྨན་པས་སྨན་བཟང་པོས་བསྐུས་པས་ན་བའི་སྡུག་བསྔལ་དང་བྲལ་ཏེ་རབ་ཏུ་བདེ་བར་འགྱུར་ལ། སྨན་པ་དེ་ཡང་གྲོང་དང་། གྲོང་ཁྱེར་དང་གྲོང་
འདབ་དུ་རྒྱུ་ཞིང་གང་ན་རྨ་བྱུང་བའི་སྡུག་བསྔལ་བ་ཐམས་ཅད་གསོ་ཞིང་སྡུག་བསྔལ་དང་བྲལ་བར་བྱེད་དོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། མངོན་པར་སངས་རྒྱས་ནས་སྨན་པའི་རྒྱལ་པོར་གྱུར་ཏེ། 
འཛམ་བུའི་གླིང་ན་བསྐལ་པ་ཚད་མེད་པའི་བར་དུ་སྡུག་བསྔལ་གྱིས་རྣམ་པར་གཟིར་བའི་སེམས་ཅན་འདོད་ཆགས་དང་། ཞེ་སྡང་དང་གཏི་མུག་གི་ཉོན་མོངས་པའི་ཟུག་རྔུས་གཟིར་ཏེ་སྡུག་བསྔལ་ཆེན་པོ་མྱོང་བ་དག་
ལ་ཐེག་པ་ཆེན་པོའི་མདོ་སྡེ་བདུད་རྩི་ལྟ་བུའི་ཆོས་ཀྱི་སྨན་གྱིས་དེ་དག་གསོས་ནས་ཕྱོགས་དང་གནས་གཞན་དག་ན་ཉོན་མོངས་པའི་ཟུག་རྔུས་གཟིར་བ་ཡང་མངོན་པར་སངས་རྒྱས་པ་བསྟན་ཏེ། དེ་ཡང་འཚོ་བར་མཛད་དེ། 
དེ་ལྟ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱ་བ་ནི་རྣམ་པར་གྲོལ་བའི་གནས་ཏེ། སེམས་ཅན་གང་ན་གདུལ་བའི་གནས་དེར་དེ་བཞིན་གཤེགས་པའི་སྐུ་མངོན་
པར་སྟོན་པས། ཤིན་ཏུ་ཟབ་མོའི་དོན་ཡང་དག་པ་འདིའི་ཕྱིར་ཡང་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །
བཅོམ་ལྡན་འདས་འཇིག་རྟེན་གྱི་སྨན་པས་སེམས་ཅན་གྱི་ནད་ཐམས་ཅད་གསོ་ནུས་སམ། རིགས་ཀྱི་བུ་འཇིག་རྟེན་ན་ན་བ་རྣམ་པ་གཉིས་ཏེ། གསོར་རུང་བ་དང་གསོར་མི་རུང་བའོ། །གསོར་རུང་བ་ནི་སྨན་པས་གསོས་ན་འཚོའོ། །

47-1-77a

གསོར་མི་རུང་བ་ནི་སྨན་པས་གསོས་ཀྱང་མི་འཚོའོ། །འོད་སྲུང་གིས་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་ན། དེ་བཞིན་གཤེགས་པ་ཡང་འཛམ་བུའི་གླིང་ན་སེམས་ཅན་གསོས་སོ་ཞེས་
བཀའ་སྩལ་ཏེ། གལ་ཏེ་གསོས་ན་སེམས་ཅན་གྱི་ནང་ན་ཅིའི་སླད་དུ་མྱ་ངན་ལས་མ་འདས་པ་ཡང་མང་། གལ་ཏེ་ཐམས་ཅད་ཀྱིས་མ་ཐོབ་ན། ཅིའི་སླད་དུ་དེ་བཞིན་གཤེགས་པས་ཐམས་ཅད་གསོས་ནས་ཕྱོགས་གཞན་
དུ་ཡང་གཤེགས་ཤེས་བཀའ་སྩལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འཛམ་བུའི་གླིང་ན་སེམས་ཅན་ལ་རྣམ་པ་གཉིས་སོ། །དད་པ་དང་བཅས་པ་དང་དད་པ་མེད་པའོ། །གང་དད་པ་དང་བཅས་
པ་ནི་གསོར་རུང་ངོ་། །དེ་ཅིའི་ཕྱིར་ཞེ་ན། ངེས་པར་མྱ་ངན་ལས་འདས་ཏེ་སྐྱོན་མེད་པའི་ཕྱིར་ངས་འཛམ་བུའི་གླིང་གི་སེམས་ཅན་ཀུན་གསོས་སོ་ཞེས་གསུངས་སོ། །གང་དད་པ་མེད་པ་ནི་ལོག་སྲེད་ཅན་ཞེས་བྱ་སྟེ། 
ལོག་སྲེད་ཅན་ཞེས་བྱ་བ་ནི་གསོར་མི་རུང་བའོ། །ལོག་སྲེད་ཅན་ལ་མ་གཏོགས་པ་ཐམས་ཅད་གསོས་པས་ན། མྱ་ངན་ལས་འདའ་བ་ལ་སྐྱོན་མེད་དོ། །གསོལ་པ། བཅོམ་ལྡན་འདས་མྱ་ངན་ལས་འདའ་བ་ཞེས་བགྱི་
བ་གང་ལགས། རིགས་ཀྱི་བུ་མྱ་ངན་ལས་འདའ་བ་ཞེས་བྱ་བ་ནི་རྣམ་པར་གྲོལ་བའོ། །འོད་སྲུང་གིས་ཡང་གསོལ་པ། རྣམ་པར་གྲོལ་བ་ཞེས་བགྱི་བ་གཟུགས་ལགས་སམ། འོན་ཏེ་གཟུགས་མ་ལགས། བཅོམ་
ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལ་ལ་ནི་གཟུགས་ཀྱང་ཡིན། ལ་ལ་ནི་གཟུགས་མ་ཡིན་ནོ། །གཟུགས་མ་ཡིན་པ་ནི་ཉན་ཐོས་དང་རང་སངས་རྒྱས་ཀྱིས་རྣམ་པར་གྲོལ་བའོ། །གཟུགས་ཤེས་བྱ་བ་ནི་
སངས་རྒྱས་བཅོམ་ལྡན་འདས་ཀྱི་རྣམ་པར་གྲོལ་བའོ། །རིགས་ཀྱི་བུ་དེ་ལྟ་བས་ན་རྣམ་པར་གྲོལ་བ་ནི་གཟུགས་ཀྱང་ཡིན་ལ་གཟུགས་ཀྱང་མ་ཡིན་ནོ། །དེ་བཞིན་གཤེགས་པས་ཉན་ཐོས་ཀྱི་ཉེ་གནས་ལ་ནི་གཟུགས་མ་ཡིན་ནོ། །

47-1-77b

ཞེས་གསུངས་སོ། །གསོལ་པ་བཅོམ་ལྡན་འདས་ཉན་ཐོས་དང་རང་སངས་རྒྱས་ལ་གལ་ཏེ་གཟུགས་མ་མཆིས་ན་ཅི་ལ་གནས། རིགས་ཀྱི་བུ་དཔེར་ན་འདུ་ཤེས་མེད་འདུ་ཤེས་མེད་མིན་གྱི་ལྷ་དང་འདྲ་སྟེ་གཟུགས་ཀྱང་ཡིན་
ལ་གཟུགས་ཀྱང་མ་ཡིན་པས་ངས་གཟུགས་མ་ཡིན་ཞེས་གསུངས་སོ། །གལ་ཏེ་ཁ་ཅིག་གིས་འདི་སྐད་དུ་འདུ་ཤེས་མེད་འདུ་ཤེས་མེད་མིན་གྱི་ལྷ་དག་གལ་ཏེ་གཟུགས་མ་ཡིན་ན་ཅི་ལ་གནས་ཏེ་འགྲོ་བ་དང་། 
སོང་བ་དང་འོང་བར་འགྱུར་ཞེས་རྒོལ་ན། དེ་ལ་དོན་དེ་དག་ནི་སངས་རྒྱས་བཅོམ་ལྡན་འདས་ཀྱི་སྤྱོད་ཡུལ་ཡིན་པས་ཉན་ཐོས་དང་རང་སངས་རྒྱས་ཀྱིས་ཤེས་པ་མ་ཡིན་ཏེ། རྣམ་པར་གྲོལ་བ་ཡང་དེ་དང་འདྲ་སྟེ་
གཟུགས་ཀྱང་ཡིན་ལ་གཟུགས་ཀྱང་མ་ཡིན་པས་གཟུགས་མ་ཡིན་ནོ་ཞེས་གསུངས་སོ། །འདུ་ཤེས་ཀྱང་ཡིན་ལ་འདུ་ཤེས་ཀྱང་མ་ཡིན་པས་འདུ་ཤེས་མ་ཡིན་ཞེས་གསུངས་ཏེ། དོན་དེ་དག་ནི་སངས་
རྒྱས་ཀྱི་སྤྱོད་ཡུལ་ཡིན་གྱི། ཉན་ཐོས་དང་རང་སངས་རྒྱས་རྣམས་ཀྱིས་ཤེས་པ་མ་ཡིན་ནོ།། །། བམ་པོ་བདུན་པ། དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་
སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་ཡོངས་སུ་མྱ་ངན་ལས་འདས་པ་ཆེན་པོ་རྣམ་པར་གྲོལ་བའི་དོན་ཡང་རྒྱས་པར་བཤད་དུ་གསོལ། བཅོམ་ལྡན་འདས་ཀྱིས་འོད་
སྲུང་ལ་བཀའ་སྩལ་པ། ཤིན་དུ་ལེགས་སོ་ཤིན་དུ་ལེགས་སོ། །རིགས་ཀྱི་བུ་ཡང་དག་པར་རྣམ་པར་གྲོལ་བ་ཞེས་བྱ་བ་ནི་གང་རྣམ་པར་བཅིང་བའི་བཅིངས་པ་ཐམས་ཅད་དང་ཡོངས་སུ་བྲལ་བའོ། །དེ་ལྟར་
ཡང་དག་པར་གྲོལ་བ་ནི་བཅིངས་པ་ཐམས་ཅད་དང་ཡོངས་སུ་བྲལ་བས་སྐྱེ་བ་ཡང་མེད་ལ་འདུས་པ་ཡང་མེད་དོ། །འདི་ལྟ་སྟེ། དཔེར་ན་ཕ་མ་འདུས་ཤིང་ཕྲད་པ་ལས་བུ་བྱུང་ངོ་། །ཡང་དག་པར་རྣམ་པར་གྲོལ་བ་ནི་

47-1-78a

དེ་ལྟ་མ་ཡིན་པས་ན་རྣམ་པར་གྲོལ་བ་དེ་ནི་མ་སྐྱེས་པ་ཞེས་བྱའོ། །འོད་སྲུང་དཔེར་ན་མར་གྱི་སྙིང་པོ་ནི་རང་བཞིན་གྱིས་རྣམ་པར་དག་གོ། །དེ་བཞིན་གཤེགས་པ་ཡང་དེ་དང་འདྲ་སྟེ། །ཕ་མ་འདུས་ཤིང་ཕྲད་པའི་རྐྱེན་
ཀྱིས་བྱུང་བ་མ་ཡིན་ཏེ། རང་བཞིན་གྱིས་ཡོངས་སུ་དག་ཀྱང་སོ་སོའི་སྐྱེ་བོ་དག་གདུལ་བའི་ཕྱིར་ཕ་མ་མངོན་པར་བསྟན་ཏོ། །ཡང་དག་པར་རྣམ་པར་གྲོལ་བ་ཞེས་བྱ་བ་ནི་དེ་བཞིན་གཤེགས་པ་སྟེ། དེ་བཞིན་གཤེགས་པའི་
རྣམ་པར་གྲོལ་བ་ལ་ནི་གཉིས་སུ་མེད་དབྱེར་མེད་དོ། །དཔེར་ན་དབྱར་གྱི་དུས་སུ་ས་བོན་བཏབ་ན་དྲོད་གཤེར་གྱིས་རླན་པས་དེ་མ་ཐག་ཏུ་སྐྱེ་ཞིང་འབྱུང་ངོ་། །ཡང་དག་པར་རྣམ་པར་གྲོལ་བ་ནི་དེ་ལྟ་མ་ཡིན་ནོ། །གཞན་ཡང་
རྣམ་པར་གྲོལ་བ་ཞེས་བྱ་བ་ནི་སྟོང་ཞིང་མེད་པའོ། །སྟོང་ཞིང་མེད་པ་ནི་རྣམ་པར་གྲོལ་བའོ། །རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་སྟོང་པ་མེད་པ་བྱས་པ་མ་ཡིན་བྱེད་པ་མ་ཡིན་
ནོ། །བྱས་པ་ཞེས་བྱ་བ་ནི་མཁར་དང་། གྲོང་དང་། ཁང་ཁྱིམ་དང་། ཉེན་དང་ཅོག་པར་རོ། །ཡང་དག་པར་རྣམ་པར་གྲོལ་བ་ནི་དེ་ལྟ་མ་ཡིན་ཏེ། དེ་ལྟ་བས་ན་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་
གྲོལ་བ་ཞེས་བྱ་བ་ནི་འདུས་མ་བྱས་པའི་ཆོས་སོ། །འདུས་བྱས་ནི་དཔེར་ན་རྫ་མ་དང་འདྲ་སྟེ། འཇིག་པའི་ཆོས་ཅན་ནོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། ཡང་དག་པར་རྣམ་པར་གྲོལ་བ་ནི་མ་སྐྱེས་པ་མི་འགོག་པའོ། །
དེ་བས་ན་རྣམ་པར་གྲོལ་བ་ནི་དེ་བཞིན་གཤེགས་པ་སྟེ། དེ་བཞིན་གཤེགས་པ་ཡང་དེ་དང་འདྲ་བར་མི་སྐྱེ་མི་འགོག ། མི་རྒ་མི་འཆི་མི་འཇིག་མི་འཆག་སྟེ། འདུས་བྱས་ཀྱི་ཆོས་མ་ཡིན་ནོ། །དོན་དེ་ལྟ་བས་ན་དེ་བཞིན་གཤེགས་པ་
ཡོངས་སུ་མྱ་ངན་ལས་འདས་ཏེ་མི་རྒ་མི་འཆི་བ་ཞེས་བྱའོ། །དེ་ཡང་གང་ཞེ་ན། རྒས་ཤེས་བྱ་བ་ནི་འཕོ་ཞིང་འགྱུར་བ། སྐྲ་དཀར་བ་གདོང་ལ་གཉེར་མ་བྱུང་བའོ། །ཤི་ཞེས་བྱ་བ་ནི་ལུས་ཞིག་ཚེ་འཕོས་པའོ། །དངོས་པོ་འདི་དག་

47-1-78b

ནི་རྣམ་པར་གྲོལ་བ་ལ་མེད་དེ། དེ་མེད་པས་ན་རྣམ་པར་གྲོལ་བ་ཞེས་བྱའོ། །དེ་བཞིན་གཤེགས་པ་ལ་སྐྲ་དཀར་བ་གདོང་ལ་གཉེར་མར་འགྱུར་བ་འདུས་བྱས་པའི་ཆོས་མེད་དོ། །དེ་བས་ན་དེ་བཞིན་གཤེགས་པ་ལ་རྒ་བ་མེད་དོ། །
རྒ་བ་མེད་པས་ན་འཆི་བ་འང་མེད་དོ། །གཞན་ཡང་རྣམ་པར་གྲོལ་བ་ནི་ན་བ་མེད་པའོ། །ན་བ་ཞེས་བྱ་བ་ནི་ནད་བཞི་བརྒྱ་རྩ་བཞི་དང་། དེ་མ་ཡིན་པའི་རྐྱེན་གཞན་གྱིས་ལུས་ལ་གནོད་པར་འགྱུར་བའོ། །དེ་དག་གང་ཡང་མེད་པས་
ན་རྣམ་པར་གྲོལ་བ་ཞེས་བྱའོ། །གང་ནད་མེད་པ་ནི་ཡང་དག་པར་རྣམ་པར་གྲོལ་བའོ་ཞེས་བྱའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ལ་ན་བ་མེད་པས་ན་ཆོས་ཀྱི་སྐུ་ལ་ཡང་ན་
བ་མེད་དོ། །དེ་ལྟར་ན་བ་མེད་པས་དེ་བཞིན་གཤེགས་པ་ཞེས་བྱའོ། །ཤི་ཞེས་བྱ་བ་ནི་ལུས་ཞིག་སྟེ་ཚེ་འཕོས་པའོ། །དེ་ལ་ཤི་བ་མེད་པས་ཟིལ་མངར་ལྟ་བུའོ། །ཟིལ་མངར་ནི་ཡང་དག་པར་རྣམ་པར་དག་པར་གྲོལ་བའོ། །
ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་ལྟར་དེ་བཞིན་གཤེགས་པ་ནི་དེ་ལྟ་བུའི་ཡོན་ཏན་ཕུན་སུམ་ཚོགས་པ་དང་ལྡན་ན་ཅིའི་ཕྱིར་དེ་བཞིན་གཤེགས་པ་ལ་མི་རྟག་ཅེས་བྱ། གལ་ཏེ་དེ་བཞིན་
གཤེགས་པ་ལ་མི་རྟག་ཅེས་སྨྲ་ན། དེ་ནི་གནས་མ་ཡིན་ནོ། །དེ་ནི་རྡོ་རྗེ་ལྟ་བུའི་སྐུ་ཡིན་ན་ཅིའི་ཕྱིར་མི་རྟག །དེ་བས་ན་དེ་བཞིན་གཤེགས་པ་ལ་ནི་ཚེ་ཟད་པ་ཞེས་མི་བྱའོ། །དེ་བཞིན་གཤེགས་པ་ནི་ཡོངས་སུ་དག་པ་དྲི་མ་
མེད་པའོ། །དེ་བཞིན་གཤེགས་པའི་སྐུ་ནི་མངལ་གྱིས་མ་གོས་པ་སྟེ། མེ་ཏོག་པུན་ད་རི་ཀ་ལྟར་རང་བཞིན་གྱིས་རྣམ་པར་དག་པའོ། །དེ་བཞིན་གཤེགས་པའི་རྣམ་པར་གྲོལ་བ་ཡང་དེ་དང་འདྲའོ། །རྣམ་པར་གྲོལ་བ་དེ་ཉིད་དེ་
བཞིན་གཤེགས་པའོ། །དེ་བས་ན་དེ་བཞིན་གཤེགས་པ་ནི་ཡོངས་སུ་དག་ཅིང་དྲི་མ་མེད་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་ཟག་པའི་རྨ་ཐམས་ཅད་ལྷག་མ་མ་ལུས་པར་ཟད་པའོ། །དེ་བཞིན་གཤེགས་པ་

47-1-79a

ཡང་དེ་དང་འདྲ་སྟེ། ཟག་པའི་རྨ་ཐམས་ཅད་མེད་དོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་རྩོད་པ་མེད་པ་སྟེ། དཔེར་ན་མི་ལྟོགས་པ་ཞིག་ཁ་ཟས་མཐོང་ན་ཤིན་དུ་ཆགས་པར་འགྱུར་རོ། །རྣམ་པར་གྲོལ་བ་ནི་དེ་
ལྟ་མ་ཡིན་ནོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་བདེ་བ་ཞི་བའོ། །བུས་པ་མ་རབས་དག་ནི་དབང་སྒྱུར་ཆེན་པོ་ལ་བདེ་ཞིང་ཞི་བ་ཞེས་ཟེར་བ་ཚིག་དེ་ནི་བརྫུན་ཏེ་བདེན་པ་མ་ཡིན་ནོ། །ཡང་དག་པར་བདེ་ཞིང་ཞི་བ་ནི་མཐར་
རྣམ་པར་གྲོལ་བའོ། །མཐར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་རབ་ཏུ་བདེ་བའོ། །དཔེར་ན་དགྲ་མང་པོའི་གནས་ནི་བདེ་བ་མ་ཡིན་ནོ། །དགྲ་མེད་པའི་གནས་ནི་རབ་ཏུ་
བདེ་བ་ཞེས་བྱའོ། །རྣམ་པར་གྲོལ་བ་ཡང་འཇིགས་པ་མེད་པས་ན་རབ་ཏུ་བདེ་བ་ཞེས་བྱའོ། །དེ་བས་ན་རབ་ཏུ་བདེ་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །
དེ་བཞིན་གཤེགས་པ་ཞེས་བྱ་བ་ནི་ཆོས་སོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་མཉམ་པའི་ཟླ་མེད་པའོ། །མཉམ་པའི་ཟླ་མེད་པ་ཞེས་བྱ་བ་ནི་དཔེར་ན་རྒྱལ་པོ་དག་ནི་ཡུལ་ས་མཉམ་པའི་ཟླ་ཡོད་པས་མཉམ་པ་
འོ། །རྣམ་པར་གྲོལ་བ་ལ་ནི་དེ་ལྟ་བུ་མེད་དོ། །མཉམ་པའི་ཟླ་མེད་པ་ནི་དཔེར་ན་འཁོར་ལོས་སྒྱུར་བའི་རྒྱལ་པོ་ལ་ནི་མཉམ་པའི་ཟླ་མེད་དོ། །རྣམ་པར་གྲོལ་བ་ལ་ཡང་དེ་དང་འདྲ་སྟེ། མཉམ་པའི་ཟླ་མེད་དོ། །མཉམ་པ་
འི་ཟླ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའི་ཆོས་ཀྱི་འཁོར་ལོས་སྒྱུར་བའི་རྒྱལ་པོའོ། །དེ་བས་ན་དེ་བཞིན་གཤེགས་པ་ལ་མཉམ་པའི་ཟླ་མེད་དོ། །
མཉམ་པའི་ཟླ་ཡོད་ཅེས་བྱ་བའི་གནས་མེད་དོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་མྱ་ངན་མེད་པའོ། །མྱ་ངན་ཡོད་ཅེས་བྱ་བ་ནི་དཔེར་ན་རྒྱལ་པོ་དག་ཕས་རྒོལ་བའི་དགྲས་འཇིགས་པས་མྱ་ངན་བྱེད་དོ། །

47-1-79b

རྣམ་པར་གྲོལ་བ་ལ་ནི་དེ་ལྟ་བུའི་དངོས་པོ་མེད་དོ། །དཔེར་ན་དགྲ་ཀུན་བཅོམ་ན། དེ་ལ་ནི་མྱ་ངན་ནམ་དོགས་པ་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། མྱ་ངན་ནམ་འཇིགས་པ་མེད་པའོ་མྱ་ངན་ནམ་འཇིགས་པ་
མེད་པ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་མྱ་ངན་དང་རྒ་བ་མེད་པའོ། །དཔེར་ན་བུད་མེད་གཅིག་བུ་གཅིག་པ་ཡུལ་གཞན་དུ་སོང་བ་ལས་ཤིའོ། །ཞེས་གཏམ་ངན་ཐོས་ནོ་མྱ་ངན་
གྱིས་སྡུག་བསྔལ་བར་འགྱུར་རོ། །ཕྱིས་མ་ཤིའོ་ཞེས་ཐོས་ན་དེ་མ་ཐག་ཏུ་དགའ་བ་སྐྱེའོ། །རྣམ་པར་གྲོལ་བ་ལ་ནི་དངོས་པོ་དེ་དག་མེད་དེ། མྱ་ངན་དང་དགའ་བ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་
རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་རྡུལ་དང་དྲི་མ་མེད་པའོ། །དཔེར་ན་དཔྱིད་ཀྱི་དུས་ན་ཉི་མ་ནུབ་ན་རླུང་དང་རྡུལ་ལྡང་ངོ་། །རྣམ་པར་གྲོལ་བ་ལ་ནི་དངོས་པོ་དེ་དག་གང་
ཡང་མེད་དོ། །རྡུལ་མེད་པ་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོའི་གཙུག་ཕུད་ལ་འདོགས་པའི་
ནོར་བུ་རིན་པོ་ཆེ་ནི་དྲི་མ་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། དྲི་མ་དག་མེད་དོ་དྲི་མ་མེད་པ་ནི་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དཔེར་ན་གསེར་བཙོ་མ་
ནི་བྱེ་མ་དང་འདྲེས་པས་རིན་པོ་ཆེ་ཡང་དག་པ་ཞེས་བྱ་སྟེ། གང་ཟག་གིས་རྙེད་ན་དེ་ལ་ནོར་གྱི་དབྱིག་ཏུ་འདུ་ཤེས་སོ། །རྣམ་པར་གྲོལ་བ་ཉིད་ཀྱང་རིན་པོ་ཆེ་ཡང་དག་པ་དང་འདྲ་སྟེ། རིན་པོ་ཆེ་ཡང་དག་པ་ནི་ཡང་དག་པར་རྣམ་
པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དཔེར་ན་རྫ་མ་བཅག་པ་ནི་སྒྲ་མི་སྙན་ནོ། །རིན་པོ་ཆེ་རྡོ་རྗེའི་བུམ་པ་ནི་དེ་ལྟ་བུ་མ་ཡིན་ཏེ། ཡང་དག་པར་རྣམ་པར་གྲོལ་བ་ལ་ཡང་སྒྲ་མི་སྙན་

47-1-80a

པ་མེད་དོ། །རིན་པོ་ཆེ་རྡོ་རྗེའི་བུམ་པ་ནི་ཡང་དག་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བས་ན་དེ་བཞིན་གཤེགས་པའི་སྐུ་ནི་མི་འཇིག་པའོ། །སྒྲ་མི་སྙན་པ་ཞེས་བྱ་བ་
ནི་འདི་ལྟ་སྟེ། ཨེ་རན་དའི་འབྲས་བུ་དབྱར་ཉི་མ་ཚ་བ་ལ་སྐམས་ན། ཉི་མས་གདུངས་པས་སྒྲ་འབྱུང་ངོ་། །རྣམ་པར་གྲོལ་བ་ལ་ནི་དངོས་པོ་དེ་དག་མེད་དེ། རིན་པོ་ཆེ་རྡོ་རྗེའི་བུམ་པ་ལྟར་མི་སྙན་པ་ཆག་པའི་སྒྲ་མེད་དོ། །
གལ་ཏེ་མི་མང་པོ་བརྒྱ་སྟོང་གྲངས་མེད་པ་ཐམས་ཅད་ཀྱིས་ཅིག་ཆར་མདའ་འཕངས་ཀྱང་འཇིག་པར་མི་འགྱུར་ལ། མི་སྙན་པ་ཆག་པའི་སྒྲ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་
རྣམ་པར་གྲོལ་བ་ནི་དེ་བཞིན་གཤེགས་པའོ། །འདི་ལྟ་སྟེ་མི་དབུལ་པོ་ཞིག་ལ་གཞན་གྱི་བུ་ལོན་ཆགས་ན་བཟུང་སྟེ། ལྕགས་དང་ཁོང་སྒྲིལ་དང་། ལྟོང་འདོགས་ཏེ་སྡུག་བསྔལ་བར་བྱེད་དོ། །རྣམ་པར་གྲོལ་བ་ལ་
ནི་དེ་ལྟ་བུའི་དངོས་པོ་མེད་དེ་བུ་ལོན་ཆགས་པ་ཡང་མེད་དོ། །འདི་ལྟ་སྟེ་ཚོང་དཔོན་ཕྱུག་པོ་ནི་ནོར་རིན་པོ་ཆེ་གྲངས་མེད་པ་ཞིག་བདོག་ལ་མཐུ་དང་དབང་དུ་ལྡན་ལ། བུ་ལོན་ཆགས་པ་ཡང་མེད་དོ། །རྣམ་པར་
གྲོལ་བ་ཡང་དེ་དང་འདྲ་སྟེ། ཆོས་ཀྱི་ནོར་རིན་པོ་ཆེ་མང་པོ་དང་ལྡན་ལ། མཐུ་དང་དབང་ཡོད་པས་བུ་ལོན་ཆགས་པ་ཡང་མེད་དོ། །བུ་ལོན་ཆགས་པ་མེད་པ་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་
དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་ཡོངས་སུ་གདུང་བ་མེད་པའོ། །འདི་ལྟ་སྟེ་དཔྱིད་ཉི་མ་ཚ་བ་ལ་འགྲོ་བ་དང་། དབྱར་མངར་པོ་ཟ་བ་དང་། དགུན་གྲང་བས་
རེག་པའོ། །ཡང་དག་པར་རྣམ་པར་གྲོལ་བ་ལ་ནི་དེ་འདྲ་བའི་ཡིད་དུ་མི་འོང་བའི་དངོས་པོ་གང་ཡང་མེད་དོ། །ཡོངས་སུ་གདུང་བ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་

47-1-80b

བཞིན་གཤེགས་པའོ། །ཡོངས་སུ་གདུང་བ་ནི་འདི་ལྟ་སྟེ། མི་ཞིག་ཉ་ཤ་འདྲངས་པར་ཟོས་པའི་འོག་ཏུ་འོ་མ་འཐུངས་ན་མི་དེ་ནི་ཤི་བ་ལས་རིང་བ་མ་ཡིན་ནོ། །ཡང་དག་པར་རྣམ་པར་གྲོལ་བ་ལ་ནི་དེ་ལྟ་བུའི་དངོས་པོ་མེད་
དོ། །མི་དེས་གལ་ཏེ་སྨན་བདུད་རྩི་ལྟ་བུ་ཞིག་རྙེད་ན་ནི་ནད་དེ་ཡང་འཚོ་བར་འགྱུར་རོ། །ཡང་དག་པར་རྣམ་པར་གྲོལ་བ་ཡང་དེ་དང་འདྲའོ། །སྨན་བདུད་རྩི་ཞེས་བྱ་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་
རྣམ་པར་གྲོལ་བ་དེ་ནི་དེ་བཞིན་གཤེགས་པ་ཡིན་ན་དེ་ལ་གདུང་བ་དང་མི་གདུང་བ་ཞེས་ཇི་སྐད་བྱ། འདི་ལྟ་སྟེ་བྱིས་པ་མ་རབས་ང་རྒྱལ་གྱི་དབང་དུ་གྱུར་པ་དག་ནི་འདི་སྙམ་དུ་སེམས་སོ། །སེམས་ཅན་ཐམས་ཅད་ཀྱི་
ནང་ན་བདག་ལ་གསོད་ནུས་པ་མེད་དོ་ཞེས་ནས་སྟག་དང་། སྦྲུལ་དང་། སྲིན་གདུག་པ་དག་འཛིན་ཏེ། མ་རབས་དེ་ནི་ཚེ་ཟད་པའི་མཐའ་ལས་མི་རིང་སྟེ། གློ་བུར་དུ་འཆི་བར་རིག་པར་བྱའོ། །ཡང་དག་པར་རྣམ་པར་
གྲོལ་བ་ལ་ནི་དེ་ལྟ་བུའི་དངོས་པོ་མེད་དོ། །ཡོངས་སུ་མི་གདུང་བ་ནི་འདི་ལྟ་སྟེ། འཁོར་ལོས་སྒྱུར་བའི་རྒྱལ་པོའི་ནོར་བུ་རིན་པོ་ཆེ་ལྟ་བུ་སྦུར་བུ་ལ་སོགས་པ་སྲིན་གདུག་པ་རྣམ་པ་དགུ་བཅུ་རྩ་དྲུག་སྙེད་འདུལ་ནུས་ཏེ། གང་
ནོར་བུ་རིན་པོ་ཆེ་དེའི་དྲི་བྲོ་བ་ཙམ་གྱིས་གདུག་པ་ཐམས་ཅད་མེད་པར་འགྱུར་རོ། །ཡང་དག་པར་རྣམ་པར་གྲོལ་བ་ཡང་དེ་དང་འདྲ་སྟེ། སྲིད་པ་ཉི་ཤུ་རྩ་ལྔ་པོ་ལས་རིང་དུ་གྱུར་ཏོ། །གདུག་པ་མེད་པ་ཞེས་བྱ་བ་ནི་ཡང་དག་པར་
རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་གདུག་པ་མེད་པ་ནི་ནམ་མཁའ་ལྟ་བུའོ། །རྣམ་པར་གྲོལ་བ་ཡང་དེ་དང་འདྲ་སྟེ། ནམ་མཁའ་ཞེས་བྱ་བ་ནི་ཡང་
དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །རྣམ་པར་གདུང་བ་ཞེས་བྱ་བ་ནི་རྩྭ་སྐམ་པོའི་དྲུང་དུ་མེ་བུས་ན་ཚིག་པར་འགྱུར་རོ། །ཡང་དག་པར་རྣམ་པར་གྲོལ་བ་ལ་ནི་དེ་ལྟ་བུའི་

47-1-81a

དངོས་པོ་མེད་དོ། །གཞན་ཡང་ཡོངས་སུ་གདུང་བ་མེད་པ་ནི་འདི་ལྟ་སྟེ། ཉི་ཟླ་ནི་སེམས་ཅན་དག་ལ་ཡོངས་སུ་གདུང་བར་མི་འགྱུར་རོ། །རྣམ་པར་གྲོལ་བ་ཡང་དེ་དང་འདྲ་སྟེ། སེམས་ཅན་ཐམས་ཅད་ལ་ཡོངས་
སུ་གདུང་བར་མི་འགྱུར་རོ། །གདུང་བ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་མི་གཡོ་བའི་ཆོས་ཅན་ཏེ། 
དཔེར་ན་བྱམས་པ་དང་སྡང་བ་མེད་པ་ལྟ་བུའོ། །ཡང་དག་པར་རྣམ་པར་གྲོལ་བ་ལ་ནི་དེ་ལྟ་བུའི་དངོས་པོ་མེད་དོ། །མི་གཡོ་བ་ཞེས་བྱ་བ་ནི་འཁོར་ལོས་སྒྱུར་བའི་རྒྱལ་པོ་ལྟ་བུ་སྟེ། དེ་ལ་ནི་རྒྱལ་པོ་དེ་དང་འདྲ་བ་གྲོགས་
སུ་འགྱུར་བ་མེད་དོ། །དེ་ལ་དེ་འདྲ་བའི་གྲོགས་སུ་འགྱུར་བ་ཡོད་ཅེས་བྱ་བའི་གནས་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། གཞན་གྲོགས་སུ་འགྱུར་བ་མེད་དེ། གྲོགས་སུ་འགྱུར་བ་ཡོད་ཅེས་བྱ་བའི་གནས་མེད་
དོ། །རྒྱལ་པོ་དེ་ལ་གྲོགས་སུ་འགྱུར་བ་མེད་ཅེས་བྱ་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ཞེས་བྱ་བ་ནི་ཆོས་ཡིན་ནོ། །གཞན་
ཡང་མི་གཡོ་བ་ཞེས་བྱ་བ་ནི་འདི་ལྟ་སྟེ། དཔེར་ན་གོས་དཀར་པོ་ནི་ཁ་དོག་བསྒྱུར་སླའོ། །རྣམ་པར་གྲོལ་བ་ནི་དེ་ལྟ་མ་ཡིན་ནོ། །དཔེར་ན་མེ་ཏོག་ཤ་ཀ་ཞེས་བྱ་བ་ལ་མནམ་པ་འམ། ཁ་དོག་སྔོན་པོར་འདུག་ཅེས་བྱ་བའི་
གནས་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། དེ་ལ་མནམ་པ་འམ། མདོག་གཞན་དུ་འདུག་ཅེས་བྱ་བའི་གནས་མེད་དོ། །དེ་བས་ན་རྣམ་པར་གྲོལ་བ་ཉིད་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་
བ་ཞེས་བྱ་བ་ནི་རྨད་དུ་བྱུང་བའོ། །འདི་ལྟ་སྟེ་ཆུའི་ནང་ན་པད་མོ་སྐྱེས་པ་ན་ངོ་མཚར་དུ་མི་བྱའི་མེའི་ནང་ནས་པད་མོ་སྐྱེས་ན་རྨད་དུ་ངོ་མཚར་དུ་བྱ་སྟེ། དེ་མཐོང་ན་ཐམས་ཅད་དགའ་བར་འགྱུར་རོ། །ཡང་དག་པར་རྣམ་པར་

47-1-81b

གྲོལ་བ་ཡང་དེ་དང་འདྲ་སྟེ། གང་མཐོང་བ་ཐམས་ཅད་སེམས་རབ་ཏུ་དགའ་བར་འགྱུར་རོ། །རྨད་དུ་བྱུང་བ་ཞེས་བྱ་བ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པ་
འོ། །དེ་བཞིན་གཤེགས་པ་ཞེས་བྱ་བ་ནི་ཆོས་ཀྱི་སྐུའོ། །གཞན་ཡང་རྨད་དུ་བྱུང་བ་ཞེས་བྱ་བ་ནི་དཔེར་ན་བུ་བཙས་མ་ཐག་པ་ལ་སོ་མེད་ཀྱི་བགས་ཀྱིས་ཆེར་སྐྱེས་ནས་གདོད་སོ་ཡང་སྐྱེ་བར་འགྱུར་རོ། །རྣམ་པར་
གྲོལ་བ་ནི་དེ་ལྟ་བུ་མ་ཡིན་ཏེ། སྐྱེ་བ་དང་མི་སྐྱེ་བ་ཞེས་བྱ་བ་མེད་དོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་སྟོང་པ། ཞི་བ་མ་ངེས་པ་མེད་པའོ། །མ་ངེས་པ་ནི་ལོག་སྲེད་ཅན་ལ་བྱ་སྟེ། མཐར་རྩ་བ་ཉམས་པ་ལས་
མི་འགྱུར་ཞིང་འཚང་རྒྱ་བའི་གནས་མེད་དོ། །དེ་ཅིའི་ཕྱིར་ཞེ་ན། གལ་ཏེ་གང་ཟག་དེས་སངས་རྒྱས་ཀྱི་དམ་པའི་ཆོས་ལ་དད་པའི་ཡོངས་སུ་དག་པ་བསྐྱེད་ན། དེ་ནི་ལོག་སྲེད་མེད་པར་བྱས་པ་ཡིན་ཏེ། གལ་ཏེ་དགེ་བསྙེན་པར་
འགྱུར་ན་ཡང་། ལོག་སྲེད་མེད་པར་བྱས་པ་ཡིན་ནོ། །རྩ་བ་ཉམས་པ་ཡང་ཁ་ན་མ་ཐོ་བའི་སྡིག་དེ་མེད་པར་བྱས་ན། མངོན་པར་འཚང་རྒྱ་བར་འགྱུར་རོ། །དེ་བས་ན་མཐར་མི་འགྱུར་ཞིང་མངོན་པར་འཚང་མི་རྒྱའོ་ཞེས་
བྱ་བའི་གནས་མེད་དོ། །ཡང་དག་པར་རྣམ་པར་གྲོལ་བ་ལ་ནི་དེ་ལྟ་བུའི་འགོག་པ་འམ་མེད་པར་བྱས་པའི་དངོས་པོ་མེད་དོ། །གཞན་ཡང་སྟོང་པ་ཞི་བ་ཞེས་བྱ་བ་ནི་ཆོས་ཀྱི་དབྱིངས་ཡིན་ཏེ། ཆོས་ཀྱི་དབྱིངས་ཇི་ལྟ་བ་ཉིད་ཡང་
དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་ལོག་སྲེད་ཅན་ཞེས་བྱ་བ་འགགས་ཏེ་ཟད་པར་བྱས་ན་དེ་ལ་ལོག་སྲེད་ཅན་ཞེས་མི་བྱའོ། །དེ་ལ་ལོག་སྲེད་ཅན་
ཞེས་བྱ་བ་གང་ཞེ་ན། ལོག་སྲེད་ཅན་ཞེས་བྱ་བ་ནི་དགེ་བའི་རྩ་བ་ཐམས་ཅད་བཅད་དེ། དགེ་བའི་ཆོས་ཐམས་ཅད་ལ་མི་གནས་ཤིང་། དགེ་བའི་སེམས་སྐད་ཅིག་ཙམ་ཡང་མི་འབྱུང་བའོ། །ཡང་དག་པར་རྣམ་པར་གྲོལ་བ་ལ་ནི་

47-1-82a

དངོས་པོ་དེ་དག་གང་ཡང་མེད་དོ། །དངོས་པོ་གང་ཡང་མེད་པས་ན་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་
དཔག་ཏུ་མེད་པའོ། །འདི་ལྟ་སྟེ་དཔེར་ན་ཁྲེ་འབྲས་ཀྱི་ཕུང་པོ་ལ་ཚད་དཔག་ཅིང་ཤེས་པར་རུང་ངོ་། །ཡང་དག་པར་རྣམ་པར་གྲོལ་བ་ནི་དེ་ལྟ་བུ་མ་ཡིན་ནོ། །འདི་ལྟ་སྟེ། རྒྱ་མཚོ་ཆེན་པོ་ནི་ཚད་དཔག་ཅིང་གཞལ་དུ་མེད་དོ། །
རྣམ་པར་གྲོལ་བ་ཡང་དེ་དང་འདྲ་སྟེ་ཚད་དཔག་ཅིང་གཞལ་དུ་མེད་དོ། །དཔག་ཏུ་མེད་པ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་
ཞེས་བྱ་བ་ནི་ཚད་མེད་པའོ། །ཇི་ལྟར་སེམས་ཅན་ཐམས་ཅད་ལ་ལས་ཀྱི་རྣམ་པར་སྨིན་པ་མང་བ་བཞིན་དུ་རྣམ་པར་གྲོལ་བ་ཡང་དེ་དང་འདྲ་སྟེ་སྨིན་པ་ཚད་མེད་དོ། །སྨིན་པ་ཚད་མེད་པ་ནི་ཡང་དག་པར་རྣམ་པར་གྲོལ་
བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་ཡངས་ཤིང་རྒྱ་ཆེ་བའོ། །འདི་ལྟ་སྟེ་རྒྱ་མཚོ་ཆེན་པོ་ནི་མཉམ་པའི་ཟླ་མེད་དོ། །རྣམ་པར་གྲོལ་
བ་ཡང་དེ་དང་འདྲ་སྟེ་མཉམ་པའི་ཟླ་མེད་དོ། །མཉམ་པའི་ཟླ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་
ནི་བླ་ན་མེད་པའི་མཆོག་གོ། །འདི་ལྟ་སྟེ། དཔེར་ན་ནམ་མཁའ་ནི་མཆོག་ཏུ་མཐོ་སྟེ་ཟླ་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ་ཟླ་མེད་པར་མཆོག་ཏུ་མཐོ་བའོ། །མཐོ་སྟེ་ཟླ་མེད་པ་ནི་ཡང་དག་པར་རྣམ་པར་གྲོལ་
བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་གནས་པ་མེད་དོ། །འདི་ལྟ་སྟེ། རི་དགས་ཀྱི་རྒྱལ་པོ་སེང་གེ་འདུག་པའི་གནས་སུ་ནི་རི་དགས་གཞན་

47-1-82b

ཐམས་ཅད་མི་གནས་སོ། །རྣམ་པར་གྲོལ་བ་ཡང་དེ་དང་འདྲ་སྟེ་གནས་མེད་དོ། །གནས་པ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་
ཡང་རྣམ་པར་གྲོལ་བ་ཞེས་བྱ་བ་ནི་བླ་ན་མེད་པའོ། །དཔེར་ན་བྱང་ཕྱོགས་ནི་ཕྱོགས་ཐམས་ཅད་ཀྱི་བླ་མའོ། །རྣམ་པར་གྲོལ་བ་ཡང་དེ་དང་འདྲ་སྟེ་བླ་ན་མེད་པའོ། །བླ་ན་མེད་པ་ནི་ཡང་དག་པར་རྣམ་པར་
གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་བླ་ན་མེད་པའི་ཡང་བླ་ན་མེད་པའོ། །དཔེར་ན་བྱང་ཕྱོགས་ཤར་ཕྱོགས་ཀྱི་བླ་ན་
མེད་པའི་ཡང་བླ་ན་མེད་པའོ། །རྣམ་པར་གྲོལ་བ་ཡང་དེ་དང་འདྲ་སྟེ། བླ་ན་མེད་པའི་ཡང་བླ་ན་མེད་པའོ། །བླ་ན་མེད་པའི་ཡང་བླ་ན་མེད་པ་ནི་ཡང་དག་པར་རྣམ་པར་གྲོལ་བའོ། །
ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་རྟག་པའི་ཆོས་ཅན་ནོ། །དཔེར་ན་ལྷ་དང་མི་ནི་ལུས་ཞིག་སྟེ་ཚེ་འཕོ་བའི་
ཆོས་ལ་མི་རྟག་སྟེ། རྟག་པ་མ་ཡིན་ནོ། །རྣམ་པར་གྲོལ་བ་ནི་དེ་དང་འདྲ་སྟེ། མི་རྟག་པ་མ་ཡིན་ནོ། །མི་རྟག་པ་མ་ཡིན་པ་ནི། ཡང་དག་པར་རྣམ་པར་
གྲོལ་བའོ། །ཡང་དག་པར་རྣམ་པར་གྲོལ་བ་ནི། དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི། སྲ་བའི་སྙིང་པོ་ཅན་ནོ། །འདི་ལྟ་སྟེ། 
སེང་ལྡེང་དང་། ཙན་དན་དང་། ཨ་ག་རུ་ནི་རང་བཞིན་གྱིས་སྲ་བའོ། །རྣམ་པར་གྲོལ་བ་ཡང་དེ་དང་འདྲ་སྟེ། རང་བཞིན་གྱིས་སྲ་བ་བརྟན་པའོ། །

47-1-83a

རང་བཞིན་གྱིས་སྲ་བ་བརྟན་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་གསོ་བ་མ་ཡིན་པ་ཞེས་བྱའོ། །དཔེར་ན་འདམ་
བུ་དང་སྨྱུག་མ་ནི་ཁོང་སྟོང་པས་གསོབ་བོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། དེ་བས་ན་རྣམ་པར་གྲོལ་བ་ཉིད་དེ་བཞིན་གཤེགས་པ་ཡིན་པར་རིག་པར་བྱའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་ཇིས་ཀྱང་
མི་གོས་པའོ། །དཔེར་ན་རྩིག་པ་བྱི་བདར་མ་བྱས་ན། སྲིན་བུ་དང་སྦྲང་བུ་དག་དེ་ལ་གནས་ཤིང་རྒྱུའོ། །གལ་ཏེ་འཇི་བས་བསྐུས་ལ་རི་མོས་བྲིས་ན་སྲིན་བུ་དག་ཚོན་རྩིའི་དྲི་ཚོར་ནས་མི་གནས་སོ། །དེ་ལྟར་མི་གནས་པ་ནི་
རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་མཐའ་མེད་པའོ། །དཔེར་ན་གྲོང་ཁྱེར་ནི་མཐའ་ཡོད་དེ། རྣམ་པར་གྲོལ་བ་ནི་དེ་ལྟ་བུ་
མ་ཡིན་ནོ། །དཔེར་ན་ནམ་མཁའ་ནི་མཐའ་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ་མཐའ་མེད་དོ། །དེ་བས་ན་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་
ནི་བལྟར་མེད་པའོ། །འདི་ལྟ་སྟེ། ནམ་མཁའ་སྟོང་པ་ལ་བྱའི་རྗེས་ཤིན་ཏུ་བལྟ་བར་དཀའོ། །ཤིན་ཏུ་བལྟ་བར་དཀའ་བ་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་
གཤེགས་པའོ། །གཞན་ཡང་རྣམ་པར་གྲོལ་བ་ནི་ཤིན་ཏུ་ཟབ་པ་ཞེས་བྱའོ། །དེ་ཅིའི་ཕྱིར་ཞེ་ན། ཉན་ཐོས་དང་རང་སངས་རྒྱས་ཐམས་ཅད་ཀྱིས་འཇུག་མི་ནུས་པའི་ཕྱིར་རོ། །འཇུག་མི་ནུས་པ་ནི་ཡང་དག་པར་
རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་ཤིན་ཏུ་ཟབ་མོ་ཞེས་བྱ་བ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་སྟི་སྟང་བྱེད་པའོ། །དཔེར་ན་

47-1-83b

བུ་སྲི་ཞུ་ཆེ་བ་དག་ནི་ཕ་མ་ལ་ཤིན་ཏུ་སྟི་སྟང་དང་བཀུར་སྟི་བྱེད་དེ། བསོད་ནམས་ཤིན་ཏུ་ཟབ་བོ། །བསོད་ནམས་ཤིན་དུ་ཟབ་པ་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་
བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་བལྟར་མི་མཐོང་བའོ། །དཔེར་ན་མི་དག་བདག་གི་སྤྱི་བོ་མི་མཐོང་བ་བཞིན་དུ་རྣམ་པར་གྲོལ་བ་ཡང་དེ་དང་འདྲ་སྟེ། ཉན་ཐོས་དང་རང་སངས་
རྒྱས་ཀྱིས་བལྟར་མི་མཐོང་ངོ་། །བལྟར་མི་མཐོང་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་གནས་དང་རྟེན་མེད་པའོ། །དཔེར་ན་ནམ་མཁའ་ནི་གནས་
དང་རྟེན་མེད་དེ། རྣམ་པར་གྲོལ་བ་ཡང་དེ་དང་འདྲའོ། །གནས་དང་རྟེན་ཞེས་བྱ་བ་ནི་སྲིད་པ་ཉི་ཤུ་རྩ་ལྔ་པོའི་དཔེའོ། །གནས་དང་རྟེན་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་
གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་བླང་དུ་མེད་པའོ། །དཔེར་ན་ཤིང་ཐོག་ཨ་མྲའི་འབྲས་བུ་ནི་བླང་ཞིང་གཟུང་དུ་ཡོད་དོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ་བླང་ཞིང་གཟུང་དུ་མེད་དོ། །
བླང་ཞིང་གཟུང་དུ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་གཟུང་དུ་མེད་པའོ། །དཔེར་ན་སྒྱུ་མ་ནི་གཟུང་
དུ་མེད་དེ། རྣམ་པར་གྲོལ་བ་ཡང་དེ་དང་འདྲ་སྟེ་གཟུང་དུ་མེད་དོ། །གཟུང་དུ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་
ནི་ལུས་ཀྱི་དངོས་པོ་མེད་པའོ། །དཔེར་ན་མི་ལ་ལུས་ཡོད་པས་ཤུ་བ་དང་མཛེ་དང་སྐེམ་པ་དང་སྨྱོ་བ་ལ་སོགས་པ་ཡོད་དོ། །ཡང་དག་པར་རྣམ་པར་གྲོལ་བ་ལ་ནི་དེ་དང་འདྲ་བའི་ནད་རྣམས་མེད་དོ། །གང་ནད་དེ་དག་

47-1-84a

མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་རོ་གཅིག་པའོ། །ཇི་ལྟར་འོ་མ་རོ་གཅིག་པ་བཞིན་དུ་རྣམ་པར་
གྲོལ་བ་ཡང་དེ་དང་འདྲ་སྟེ་རོ་གཅིག་གོ། །རོ་གཅིག་པ་ནི་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཡོངས་སུ་དག་པའོ། །དཔེར་ན་མ་རྙོགས་པ་ནི་
ཤིན་དུ་དག་ཅིང་དང་བའོ། །རྣམ་པར་གྲོལ་བ་ཡང་དེ་དང་འདྲ་སྟེ་ཡོངས་སུ་དག་ཅིང་དང་བའོ། །ཡོངས་སུ་དག་ཅིང་དང་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་
གཤེགས་པའོ། །གཞན་ཡང་རྣམ་པར་གྲོལ་བ་ནི་རོ་གཅིག་པའོ། །དཔེར་ན་ནམ་མཁའ་ལས་འབབ་པའི་ཆར་པ་ནི་རྣམ་པར་དག་ཅིང་རོ་གཅིག་གོ། །རྣམ་པར་གྲོལ་བ་ཡང་དེ་དང་འདྲ་སྟེ། རྣམ་པར་དག་
ཅིང་རོ་གཅིག་གོ། །རྣམ་པར་དག་ཅིང་རོ་གཅིག་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཡོངས་སུ་གསལ་
བའོ། །དཔེར་ན་ཟླ་བ་རྒྱས་པ་ལ་སྤྲིན་དང་ན་བུན་གྱིས་མཆོད་པ་དང་འདྲ་བར་རྣམ་པར་གྲོལ་བ་ཡང་དེ་དང་འདྲ་སྟེ་སྤྲིན་དང་ན་བུན་མེད་དོ། །སྤྲིན་དང་ན་བུན་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་
པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་རབ་ཏུ་ཞི་བའོ། །དཔེར་ན་མི་ཞིག་རིམས་ནད་ཚ་བས་བཏབ་པ་ལས་སོས་ན་ཞི་བའོ། །རྣམ་པར་གྲོལ་བ་ཡང་དེ་དང་འདྲ་
སྟེ་རབ་ཏུ་ཞི་བའོ། །རབ་ཏུ་ཞི་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་མཉམ་པའོ། །དཔེར་ན་འབྲོག་

47-1-84b

དགོན་པ་ན་སྦྲུལ་གདུག་པ་དང་། སྤྱང་ཀི་ལ་སོགས་པ་ནི་འདྲ་བར་གསོད་སེམས་ཡོད་དོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ་གསོད་སེམས་མེད་དོ། །གསོད་སེམས་མེད་པ་ནི་ཡང་དག་པར་རྣམ་པར་གྲོལ་བའོ། །
ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་མཉམ་པ་ཞེས་བྱ་བ་ནི་དཔེར་ན་ཕ་མ་ནི་བུ་ལ་སེམས་མཉམ་མོ། །རྣམ་པར་གྲོལ་བ་ཡང་དེ་དང་འདྲ་སྟེ་སེམས་མཉམ་མོ། །སེམས་མཉམ་པ་ནི་ཡང་དག་
པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་གཞན་པའི་གནས་མེད་པའོ། །དཔེར་ན་མི་ཞིག་གནས་ཤིན་ཏུ་བཟང་པོ་ཡོངས་སུ་དག་པ་ཞིག་ལ་གནས་ན་དེ་ལས་གཞན་པའི་གནས་
མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། གཞན་པའི་གནས་མེད་དོ། །གཞན་པའི་གནས་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་
ཡང་རྣམ་པར་གྲོལ་བ་ནི་ཆོག་ཤེས་པའོ། །དཔེར་ན་མི་ཞིག་ལྟོགས་ཏེ་ཁ་ཟས་ཞིམ་པོ་དང་ཕྲད་ན་ཆོག་མི་ཤེས་པར་ཟའོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། དཔེར་ན་འོ་ཐུག་འཐུངས་ན་གཞན་ཅི་ཡང་
མི་འདོད་དོ། །གཞན་མི་འདོད་པ་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཡོངས་སུ་གཅོད་པའོ། །དཔེར་ན་
མི་ཞིག་བཅིངས་པའི་ཐག་པ་བཅད་ན་བཅིང་བ་ལས་གྲོལ་བར་འགྱུར་རོ། །རྣམ་པར་གྲོལ་བ་ཡང་དེ་དང་འདྲ་སྟེ་ཐེ་ཙོམ་གྱི་བཅིངས་པ་ཐམས་ཅད་གཅོད་དོ། །དེ་ལྟར་ཐེ་ཙོམ་གཅོད་པ་ནི་ཡང་དག་པར་རྣམ་པར་གྲོལ་བའོ། །
ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཕ་རོལ་དུ་ཕྱིན་པའོ། །དཔེར་ན་ཆུ་ཀླུང་ལ་ནི་ཚུ་རོལ་དང་ཕ་རོལ་གྱི་འགྲམ་ཡོད་དོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། 

47-1-85a

ཚུ་རོལ་ཅེས་བྱ་བ་མེད་ཀྱང་ཕ་རོལ་ཅེས་བྱ་བ་ཡོད་དོ། །ཕ་རོལ་ཅེས་བྱ་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་
གྲོལ་བ་ནི་ཅང་མི་སྨྲའོ། །དཔེར་ན་རྒྱ་མཚོ་ནི་ཆུ་ཆེར་སྐྱེས་ན་སྒྲ་སྐད་མང་པོ་འབྱུང་ངོ་། །རྣམ་པར་གྲོལ་བ་ནི་དེ་དང་མི་འདྲ་སྟེ། དེ་ལྟར་ན་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་
བ་ནི་ཞིམ་པ་དང་མངར་བའོ། །དཔེར་ན་སྨན་སྦྱར་བའི་ནང་དུ་ཨ་རུ་ར་བཅུག་ན་རོ་ཁ་བར་འགྱུར་རོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། ཟིལ་མངར་གྱི་རོ་ཅན་ནོ། །ཟིལ་མངར་གྱི་རོ་ཅན་ནི་ཡང་དག་པར་
རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཉོན་མོངས་པ་ཀུན་སེལ་བའོ། །དཔེར་ན་སྨན་པ་མཁས་པས་སྨན་སྣ་ཚོགས་
སྦྱར་ཏེ། ནད་པ་རྣམས་གསོ་བ་ལ་མཁས་པ་དང་འདྲ་བར་རྣམ་པར་གྲོལ་བ་ཡང་དེ་བཞིན་དུ་ཉོན་མོངས་པ་ཐམས་ཅད་སེལ་ཏོ། །ཉོན་མོངས་པ་ཀུན་སེལ་བ་ནི་ཡང་དག་པར་རྣམ་པར་གྲོལ་བའི་དཔེའོ། །
ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་དོག་པ་མེད་པའོ། །དཔེར་ན་ཁང་ཁྱིམ་ཆུང་ངུ་ནི་དོག་པ་སྟེ། མང་པོ་མི་ཤོང་ངོ་། །རྣམ་པར་གྲོལ་བ་ནི་དེ་ལྟ་མ་ཡིན་ཏེ་
མང་དུ་ཤོང་བའོ། །མང་དུ་ཤོང་བ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་འདོད་པ་ཞི་བ་འདོད་ཆགས་དང་མ་
འདྲེས་པའོ། །དཔེར་ན་བུད་མེད་ནི་འདོད་ཆགས་མང་བའོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ་དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་ལྟར་ན་དེ་བཞིན་གཤེགས་པ་ནི་འདོད་ཆགས་དང་

47-1-85b

ཞེ་སྡང་དང་། གཏི་མུག་དང་ང་རྒྱལ་ལ་སོགས་པའི་ཀུན་ནས་ཉོན་མོངས་པ་ཐམས་ཅད་མེད་པའོ། །གཞན་ཡང་རྣམ་པར་གྲོལ་བ་ནི་འདོད་པ་མེད་པའོ། །འདོད་པ་ལ་རྣམ་པ་གཉིས་ཏེ་ཡི་དགས་ཀྱི་འདོད་པ་དང་། ཆོས་ཀྱི་འདོད་པའོ། །
ཡང་དག་པར་རྣམ་པར་གྲོལ་བ་ལ་ཡི་དགས་ཀྱི་འདོད་པ་མེད་མོད་ཀྱི་སེམས་ཅན་ལ་ཐུགས་བརྩེ་བའི་ཕྱིར་ཆོས་ཀྱི་འདོད་པ་ཡོད་དོ། །དེ་ལྟར་ན་ཆོས་ཀྱི་འདོད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་
ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་བདག་དང་བདག་གི་བ་དང་བྲལ་བ་སྟེ། དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་ཆོས་སོ། །གཞན་ཡང་རྣམ་པར་གྲོལ་བ་ནི་
འགོག་པ་ཟད་པ་སྲིད་པའི་ཆགས་པ་ཐམས་ཅད་ལས་རིང་དུ་གྱུར་པའོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་ཆོས་སོ། །གཞན་ཡང་རྣམ་པར་གྲོལ་བ་ནི་མགོན་དང་སྐྱབས་
ཏེ་འཇིགས་པ་ཐམས་ཅད་ལས་སྐྱོབ་པའོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་ཆོས་སོ། །རྣམ་པར་གྲོལ་བ་ནི་གནས་ལྟ་བུའོ། །གང་ཞིག་འདི་ལ་གནས་ན་གནས་གཞན་ནི་
མི་ཚོལ་ལོ། །དཔེར་ན་མི་ཞིག་རྒྱལ་པོ་ལ་རྟེན་ན་གནས་གཞན་མི་ཚོལ་ལོ། །རྒྱལ་པོ་ལ་གནས་པ་ནི་འགྱུར་བ་ཡོད་ཀྱི་རྣམ་པར་གྲོལ་བ་ལ་གནས་ན་འགྱུར་བ་མེད་དོ། །འགྱུར་བ་མེད་པ་ནི་ཡང་དག་པར་རྣམ་པར་གྲོལ་བ་
འོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་ཆོས་སོ། །གཞན་ཡང་རྣམ་པར་གྲོལ་བ་ནི་གནས་དང་རྟེན་ལྟ་བུའོ། །དཔེར་ན་མི་ཞིག་འབྲོག་དགོན་པར་སོང་ན་འཇིགས་པ་འམ་
བག་ཚ་བ་ཡོད་དོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ་འཇིགས་པ་འམ་བག་ཚ་བ་མེད་དོ། །འཇིགས་པ་འམ་བག་ཚ་བ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པ་

47-1-86a

འོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་འཇིགས་པ་མེད་པའོ། །དཔེར་ན་སེང་གེའི་རྒྱལ་པོ་ནི་རི་དགས་ཐམས་ཅད་ཀྱིས་མི་འཇིགས་སོ། །རྣམ་པར་གྲོལ་བ་ཡང་དེ་དང་འདྲ་སྟེ། བདུད་ཀྱི་རིས་ཐམས་ཅད་ཀྱིས་
མི་འཇིགས་སོ། །འཇིགས་པ་མེད་པ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མི་དོག་པའོ། །དཔེར་ན་ལམ་དོག་པོར་ནི་མི་གཉིས་མཉམ་དུ་
འགྲོར་མེད་དོ། །རྣམ་པར་གྲོལ་བ་ནི་དེ་དང་མི་འདྲ་སྟེ་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་དོག་པ་ནི་དཔེར་ན་མི་ཞིག་སྟག་གིས་འཇིགས་ཏེ་ཁྲོན་པར་མཆོངས་པ་ལྟ་བུའོ། །རྣམ་པར་གྲོལ་བ་ནི་དེ་ལྟ་མ་
ཡིན་ཏེ། དེ་ལྟར་རྣམ་པར་གྲོལ་བ་དེ་ནི་དེ་བཞིན་གཤེགས་པའོ། །གཞན་ཡང་མི་དོག་པ་ནི་གྲུ་ཞིག་པ་ཆུང་ངུ་སྤངས་ནས་གྲུ་བཟང་པོར་ཞུགས་ཏེ། རྒྱ་མཚོ་ལ་བདེ་བར་རྒལ་ནས་བདེ་བའི་གནས་སུ་ཕྱིན་པའོ། །རྣམ་པར་གྲོལ་བ་
ཡང་དེ་དང་འདྲ་སྟེ་སེམས་རབ་ཏུ་བདེ་བའོ། །སེམས་རབ་ཏུ་བདེ་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་རྒྱུ་དང་རྐྱེན་ལས་
འབྱིན་པའོ། །འདི་ལྟ་སྟེ། འོ་མའི་རྐྱེན་ཀྱིས་ཞོའོ། །ཞོའི་རྐྱེན་ཀྱིས་མར་རོ། །མར་གྱི་རྐྱེན་ཀྱིས་མར་གྱི་སྙིང་པོའོ། །ཡང་དག་པར་རྣམ་པར་གྲོལ་བ་ལ་ནི་རྒྱུ་གང་ཡང་མེད་དོ། །རྒྱུ་མེད་པ་ནི་ཡང་དག་པར་རྣམ་པར་གྲོལ་བ་སྟེ། 
ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ང་རྒྱལ་འདུལ་བའོ། །དཔེར་ན་རྒྱལ་པོ་ཆེན་པོ་ནི་རྒྱལ་ཕྲན་རྣམས་ལ་ང་རྒྱལ་བྱེད་དོ། །རྣམ་པར་གྲོལ་བ་ནི་དེ་ལྟ་བུ་མ་ཡིན་
ནོ། དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་ཆོས་སོ། །གཞན་ཡང་རྣམ་པར་གྲོལ་བ་ནི་བག་མེད་པ་འདུལ་བའོ། །བག་མེད་པ་ནི་འདོད་པ་མང་བའོ། །རྣམ་པར་གྲོལ་བ་ལ་ནི་དེ་དག་མེད་དོ། །དེ་དག་མེད་པ་ནི་

47-1-86b

ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མ་རིག་པ་སེལ་བའོ། །དཔེར་ན་ཚིགས་མ་དང་བྲལ་བ་ནི་སྨན་དམ་པ་སྟེ་མར་གྱི་སྙིང་
པོའོ། །རྣམ་པར་གྲོལ་བ་ཡང་དེ་དང་འདྲ་སྟེ། མ་རིག་པའི་ཚིགས་མ་བསལ་ཏེ་ཡང་དག་པའི་རིག་པ་དང་ལྡན་ནོ། །ཡང་དག་པའི་རིག་པ་དང་ལྡན་པ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་གྲོལ་བ་ནི་དེ་
བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་རབ་ཏུ་ཞི་བ་གཅིག་པུ་སྟེ་མི་གཉིས་པ་འབྲོག་དགོན་པའི་བལ་གླང་རྒོད་ལྟར་གཅིག་པུ་གྲོགས་མེད་པའོ། །རྣམ་པར་གྲོལ་བ་ཡང་དེ་དང་འདྲ་སྟེ། གཅིག་
པུ་གཉིས་སུ་མེད་པའོ། །གཅིག་པུ་གཉིས་སུ་མེད་པ་ནི་ཡང་དག་པར་རྣམ་པར་གྲོལ་བ་སྟེ་ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་བསྲ་བ་སྙིང་པོ་ཅན་ནོ། །
སྨྱིག་མ་དང་འདམ་བུ་དང་གསོ་མ་ནི་ཐམས་ཅད་ཁོང་སྟོང་མོད་ཀྱི། འབྲས་བུ་ནི་སྲ་བའོ། །སངས་རྒྱས་བཅོམ་ལྡན་འདས་མ་གཏོགས་པར་འཇིག་རྟེན་དུ་བཅས་པ་ལྷ་དང་མི་ཐམས་ཅད་ནི་མི་སྲ་མི་བརྟན་པའོ། །
ཡང་དག་པར་རྣམ་པར་གྲོལ་བ་ནི་སྲིད་པའི་རྒྱུན་ཐམས་ཅད་ལས་རིང་དུ་གྱུར་པའོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མངོན་པར་རིག་པ་དག་བསྐྱེད་པའོ། །
ཡང་དག་པར་རྣམ་པར་གྲོལ་བ་ཡང་དེ་དང་འདྲ་སྟེ། དེ་ལྟར་རྣམ་པར་གྲོལ་བ་དེ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་སྲིད་པ་ཐམས་ཅད་སྤངས་པའོ། །དཔེར་ན་མི་ཞིག་འདྲངས་པར་
ཟོས་ན་སྐྱུགས་པ་ལྟ་བུ་སྟེ། རྣམ་པར་གྲོལ་བ་ཡང་དེ་དང་འདྲ་བར་སྲིད་པ་ཐམས་ཅད་སྤངས་པའོ། །སྲིད་པ་ཐམས་ཅད་སྤངས་པ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་

47-1-87a

དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་གདོན་མི་ཟའ་བའོ། །དཔེར་ན་མེ་ཏོག་པ་ཤི་ཀའི་དྲི་ནི་འདབ་མ་བདུན་པོ་ལ་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། དེ་ལྟར་རྣམ་
པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཆུའི་ཁམས་དང་འདྲའོ། །འདི་ལྟ་སྟེ་ཆུའི་ཁམས་ནི་ཆེན་པོ་བཞིའི་ནང་ན་མཆོག་སྟེ། རྩི་ཤིང་དང་འབྲས་བུ་ཐམས་ཅད་རླན་ཅིང་སྣུམ་
པར་བྱེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། སྐྱེ་བ་ཐམས་ཅད་རླན་པར་བྱེད་དོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་འཇུག་པ་ཞེས་བྱའོ། །དཔེར་ན་སྒོ་
ཡོད་ན་འཇུག་པ་ཡོད་པ་དང་། གསེར་གྱི་འབྱུང་ཁུང་ན་གསེར་ཡོད་པ་དང་འདྲ་བར་རྣམ་པར་གྲོལ་བ་ཡང་དེ་དང་འདྲ་སྟེ། བདག་མེད་པ་སྒོམ་པ་རྣམས་འཇུག་པར་བྱེད་དོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་
པའོ། །གཞན་ཡང་རྣམ་པར་གྲོལ་བ་ནི་དགེ་བའོ། །དཔེར་ན་སློབ་མ་ཞིག་སློབ་དཔོན་གྱི་རྗེས་སུ་འབྲང་ཞིང་བསྒོ་བ་མཉན་ན་དགེ་བ་ཞེས་བྱའོ། །རྣམ་པར་གྲོལ་བ་ཡང་དེ་དང་འདྲ་སྟེ། དེ་ལྟར་རྣམ་པར་གྲོལ་བ་
ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་འཇིག་རྟེན་ལས་འདས་པའི་ཆོས་ཏེ་ཆོས་ཐམས་ཅད་ཀྱི་ཕུལ་དུ་འགྱུར་བའོ། །དཔེར་ན་རོ་བྲོ་བ་ཐམས་ཅད་ཀྱི་ནང་ན་མར་དང་འོ་མ་ནི་མཆོག་གོ། །
རྣམ་པར་གྲོལ་བ་ཡང་དེ་དང་འདྲ་སྟེ། དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མི་གཡོ་བའོ། །དཔེར་ན་སྒོའི་ཐེམ་པ་ནི་རླུང་གིས་བསྐྱོད་མི་ནུས་སོ། །ཡང་དག་པར་
རྣམ་པར་གྲོལ་བ་ཡང་དེ་དང་འདྲ་སྟེ། དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་དབའ་རླབས་མེད་པའོ། །དཔེར་ན་རྒྱ་མཚོའི་ཆུ་ནི་དབའ་རླབས་རྒོད་པའོ། །

47-1-87b

རྣམ་པར་གྲོལ་བ་ནི་དེ་ལྟ་མ་ཡིན་ཏེ། དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་རྒྱལ་པོའི་ཕོ་བྲང་ལྟ་བུའོ། །རྣམ་པར་གྲོལ་བ་ཡང་དེ་དང་འདྲ་སྟེ། དེ་ལྟར་རྣམ་པར་གྲོལ་བ་དེ་
ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཅིར་ཡང་དགོས་ཏེ། དཔེར་ན་འཛམ་བུ་ཆུ་ཀླུང་གི་གསེར་ནི་ཅིར་ཡང་དགོས་ཏེ། དེ་ལ་ཉེས་པའི་སྐྱོན་གདགས་སུ་མེད་དོ། །རྣམ་པར་གྲོལ་བ་ཡང་དེ་
དང་འདྲ་སྟེ་ཉེས་པའི་སྐྱོན་མེད་དོ། །ཉེས་པའི་སྐྱོན་མེད་པ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་
བུས་པ་ཤེད་མ་བྱེ་བའི་བྱ་བ་སྤངས་པའོ། །དཔེར་ན་སྐྱེས་བུ་ཆེན་པོ་ནི་བུས་པའི་བྱེད་པ་མི་བྱེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། ཕུང་པོ་ལྔ་ཡོངས་སུ་སྤངས་པའོ། །ཕུང་པོ་ལྔ་ཡོངས་སུ་སྤངས་པ་ནི་ཡང་དག་
པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མཐར་ཕྱིན་པའོ། །དཔེར་ན་བཙོན་དོང་དུ་བཅུག་པ་དེ་ལས་ཐར་ན་སྔར་རབ་ཏུ་ཁྲུས་བྱས་
ཏེ་གདོད་ཁྱིམ་དུ་འགྲོའོ། །རྣམ་པར་གྲོལ་བ་ཡང་དེ་དང་འདྲ་སྟེ་མཐར་ཡོངས་སུ་དག་པའོ། །མཐར་ཡོངས་སུ་དག་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་དེ་ནི་དེ་བཞིན་གཤེགས་
པའོ། །གཞན་ཡང་རྣམ་པར་གྲོལ་བ་ནི་མ་བྱས་པར་བདེ་བའོ། །མ་བྱས་པར་བདེ་བ་ནི་འདོད་ཆགས་དང་། ཞེ་སྡང་དང་གཏི་མུག་ལ་སོགས་པ་ཐམས་ཅད་སྐྱུགས་པའི་ཕྱིར་རོ། །དཔེར་ན་མི་ཞིག་མ་ཚོར་བར་
སྦྲུལ་གདུག་པས་ཟིན་ན་གདུག་པ་མེད་པར་བྱ་བའི་ཕྱིར་སྐྱུག་སྨན་གཏང་ངོ་། །སྐྱུགས་ན་དུག་མེད་པར་འགྱུར་ཏེ་ལུས་བདེའོ། །རྣམ་པར་གྲོལ་བ་ཡང་དེ་དང་འདྲ་སྟེ་ཀུན་ནས་ཉོན་མོངས་པའི་གདུག་པ་ཐམས་ཅད་

47-1-88a

སྐྱུགས་པས་ལུས་བདེ་བར་འགྱུར་ཏེ། མ་བྱས་པར་བདེ་བ་ཞེས་བྱའོ། །མ་བྱས་པར་བདེ་བ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་
རྣམ་པར་གྲོལ་བ་ནི་ཉོན་མོངས་པ་རྣམ་པ་བཞིའི་སྦྲུལ་གདུག་པ་བཅད་པ་ཞེས་བྱའོ། །ཉོན་མོངས་པ་བཅད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་
ཡང་རྣམ་པར་གྲོལ་བ་ནི་སྲིད་པ་ཐམས་ཅད་སྤངས་ཏེ། སྡུག་བསྔལ་ཐམས་ཅད་འགགས་པ། བདེ་བ་ཐམས་ཅད་ཐོབ་པ་འདོད་ཆགས་དང་། ཞེ་སྡང་དང་གཏི་མུག་ཐམས་ཅད་ཡོངས་སུ་བཅད་དེ། ཀུན་ནས་ཉོན་མོངས་པ་
འི་རྩ་བ་ཐམས་ཅད་འབྱིན་པའོ། །ཉོན་མོངས་པའི་རྩ་བ་འབྱིན་པ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་འདུས་བྱས་པའི་ཆོས་
ཐམས་ཅད་ཡོངས་སུ་བཅད་ནས་ཟག་པ་མེད་པའི་ཆོས་ཐམས་ཅད་བསྐྱེད་པ་རྒྱུད་ཐམས་ཅད་བཅད་པ་འདི་ལྟ་སྟེ། བདག་དང་བདག་མེད་པ་དང་། བདག་མ་ཡིན་པ་དང་། བདག་མེད་པ་མ་ཡིན་པ་དང་། ཆགས་ཤིང་འཛིན་
པ་འབའ་ཤིག་གཅོད་ཀྱི། བདག་ཏུ་ལྟ་བ་གཅད་པ་མ་ཡིན་ནོ། །བདག་ཏུ་ལྟ་བ་ནི་སངས་རྒྱས་ཀྱི་རང་བཞིན་ནོ། །སངས་རྒྱས་ཀྱི་རང་བཞིན་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་
བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མི་སྟོང་པའི། སྟོང་པའོ། །སྟོང་པའི་སྟོང་པ་ཞེས་བྱ་བ་ནི་ཅི་ཡང་མེད་པའོ། །ཅི་ཡང་མེད་པ་ནི་མུ་སྟེགས་ཅན་གཅེར་བུ་པ་ལ་སོགས་པའི་རྣམ་པར་གྲོལ་བ་
ལྟ་བུའོ། །གཅེར་བུ་པ་ལ་ནི་ཡང་དག་པར་རྣམ་པར་གྲོལ་བ་མེད་པས་སྟོང་པའི་སྟོང་པ་ཞེས་བྱའོ། །ཡང་དག་པར་རྣམ་པར་གྲོལ་བ་ནི་དེ་ལྟ་བུ་མ་ཡིན་པས་མི་སྟོང་པའི་སྟོང་པའོ། །མི་སྟོང་པའི་སྟོང་པ་ནི་ཡང་དག་པར་རྣམ་

47-1-88b

པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་དེ་ལྟ་བུ་མ་ཡིན་པས་མི་སྟོང་པའི་སྟོང་པའོ། །མི་སྟོང་པའི་སྟོང་པ་ནི་ཡང་དག་པར་རྣམ་པར་གྲོལ་བའོ། །
ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མི་སྟོང་པའོ། །དཔེར་ན་ཆུ་དང་མར་དང་། ཞོ་དང་ཆང་དང་སྦྲང་རྩིའི་སྣོད་རྫེའུ་ལྟ་བུ། ཆུ་དང་མར་དང་ཞོ་དང་ཆང་དང་། སྦྲང་རྩི་མེད་ཀྱང་། 
དེ་ལ་ཆུ་ལ་སོགས་པའི་རྫེའུ་ཞེས་འདོགས་ཏེ། རྫིའུ་དེ་ལ་ནི་སྟོང་ཞེ་འམ། མི་སྟོང་ཞེས་གདགས་སུ་མེད་དོ། །དེ་ལ་སྟོང་ཞེས་བྱར་ནི་གཟུགས་དང་། དྲི་དང་བྲོ་བ་རེག་བྱ་ཞེས་གདགས་སུ་མི་རུང་ངོ་། །མི་སྟོང་པ་ཞེས་བྱར་ནི་ཆུ་
ལ་སོགས་པ་གང་ཡང་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། གཟུགས་ཤེ་འམ་གཟུགས་མ་ཡིན་ཞེ་འམ་སྟོང་ཞེ་འམ་མི་སྟོང་ཞེས་གདགས་སུ་མེད་དོ། །གལ་ཏེ་སྟོང་ཞེས་བྱར་ནི་རྟག་པ་དང་། བདེ་བ་དང་བདག་
དང་། དག་པ་ཞེས་བྱར་མི་རུང་ངོ་། །མི་སྟོང་ཞེས་བྱར་ནི་རྟག་པ་དང་། བདེ་བ་དང་བདག་དང་། དག་པ་སུས་མྱོང་སྟེ། དོན་དེ་ལྟ་བས་ན་སྟོང་ཞེ་འམ་མི་སྟོང་ཞེས་གདགས་སུ་མེད་དོ། །འདི་ལྟ་སྟེ་སྲིད་པ་ཉི་ཤུ་ལྔ་པོ་དང་། ཀུན་
ནས་ཉོན་མོངས་པ་དང་། སྡུག་བསྔལ་བ་ཐམས་ཅད་དང་། མཚན་མ་ཐམས་ཅད་དང་། འདུས་བྱས་ཀྱི་འདུ་བྱེད་ཐམས་ཅད་མེད་པའི་ཕྱིར། རྫེའུ་ན་ཞོ་མེད་པ་དང་འདྲ་སྟེ། སྟོང་པ་ཞེས་བྱའོ། །མི་སྟོང་ཞེས་བྱ་བ་ནི་ཡང་
དག་པའི་གཟུགས་རྟག་པ། བདེ་བ་བདག་དང་། དག་པ་ཞེས་བྱ་བ་མི་གཡོ་མི་འཕོ་བ་དཔེར་ན་རྫེའུ་གཟུགས་དང་། དྲི་དང་བྲོ་བ་དང་། རེག་བྱ་ཡོད་པས་མི་སྟོང་ཞེས་བྱ་སྟེ། དེ་བས་ན་རྣམ་པར་གྲོལ་བ་ནི་རྫེའུ་དེ་དང་འདྲའོ། །
རྫེའུ་དེ་ནི་རྐྱེན་དང་། ཕྲད་ན་ཆག་པ་འམ་ཆག་པར་འགྱུར་གྱི་རྣམ་པར་གྲོལ་བ་ནི་དེ་ལྟ་བུ་མ་ཡིན་ཏེ། གཞིག་དུ་མེད་དོ། །གཞིག་ཏུ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་

47-1-89a

གཤེགས་པའོ། །གཞན་ཡང་རྣམ་པར་གྲོལ་བ་ནི་འདོད་པ་དང་བྲལ་ལོ། །དཔེར་ན་གང་ཟག་ནི་འདོད་པའི་སེམས་དང་ལྡན་པས་བརྒྱ་བྱིན་ལྷའི་དབང་ཕྱུག་དང་། ཚངས་པའི་རྒྱལ་པོ་དང་། དབང་སྒྱུར་རྒྱལ་པོ་
ལ་ཡང་རེའོ། །རྣམ་པར་གྲོལ་བ་ནི་དེ་ལྟ་བུ་མ་ཡིན་ཏེ། གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས་འདོད་པ་མེད་ཐེ་ཚོམ་མེད་དོ། །འདོད་པ་མེད་པ་ཐེ་ཚོམ་མེད་པ་ནི་ཡང་
དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གལ་ཏེ་རྣམ་པར་གྲོལ་བ་ལ་འདོད་པ་དང་ཐེ་ཚོམ་ཡོད་ཅེས་ཟེར་ན་དེ་ནི་གནས་མེད་དོ། །གཞན་ཡང་རྣམ་པར་གྲོལ་
བ་ནི་སྲིད་པའི་འདོད་པ་དང་། མཚན་མ་ཐམས་ཅད་དང་། རྣམ་པར་འཆིང་བ་ཐམས་ཅད་དང་ཀུན་ནས་ཉོན་མོངས་པ་ཐམས་ཅད་དང་འཁོར་བ་ཐམས་ཅད་དང་རྒྱུ་དང་རྐྱེན་ཐམས་ཅད་དང་། རྣམ་པར་སྨིན་པའི་འབྲས་བུ་
ཐམས་ཅད་ཡོངས་སུ་བཅད་པའོ། །དེ་ལྟར་རྣམ་པར་གྲོལ་བ་དེ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་མྱ་ངན་ལས་འདས་པའོ། །སེམས་ཅན་ཐམས་ཅད་ནི་འཁོར་བའི་ཉོན་མོངས་པས་འཇིགས་
པའི་ཕྱིར་སྐྱབས་སུ་འགྲོ་བ་གསུམ་ལ་གཞོལ་ལོ། །དཔེར་ན་རི་དགས་ནི་རྔོན་པས་འཇིགས་ཏེ། ཅི་སྟེ་བགེགས་ལས་ཐར་ན་མཆོངས་པ་གཅིག་བྱེད་དེ། དེ་ནི་སྐྱབས་སུ་འགྲོ་བ་གཅིག་གོ། །དེ་ལྟར་མཆོངས་པ་
གསུམ་བྱེད་པ་ནི་སྐྱབས་སུ་འགྲོ་བ་གསུམ་གྱི་དཔེའོ། །མཆོངས་པ་གསུམ་བྱས་པས་བདེ་བར་འགྱུར་རོ། །སོ་སོའི་སྐྱེ་བོ་ཡང་དེ་དང་འདྲ་སྟེ། བདུད་རྣམ་བཞིའི་རྔོན་པས་འཇིགས་པས་སྐྱབས་སུ་འགྲོ་བ་གསུམ་ལ་
གཞོལ་བར་བྱེད་དོ། །སྐྱབས་སུ་འགྲོ་བ་གསུམ་ལ་ཕྱོགས་པས་བདེ་བར་འགྱུར་རོ། །གང་བདེ་བར་འགྱུར་བ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་

47-1-89b

གཤེགས་པ་ནི་མྱ་ངན་ལས་འདས་པའོ། །མྱ་ངན་ལས་འདས་པ་ནི་ཟད་མི་ཤེས་པའོ། །ཟད་མི་ཤེས་པ་ནི་སངས་རྒྱས་ཀྱི་རང་བཞིན་ནོ། །སངས་རྒྱས་ཀྱི་རང་བཞིན་ནི་གདོན་མི་ཟ་བའོ། །གདོན་མི་ཟ་བ་ནི་བླ་ན་མེད་པ་ཡང་དག་
པར་རྫོགས་པའི་སངས་རྒྱས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་མྱ་ངན་ལས་འདའ་བ་དང་། སངས་རྒྱས་ཀྱི་རང་བཞིན་དང་། གདོན་
མི་ཟ་བ་དང་། དེ་བཞིན་གཤེགས་པ་དོན་གཅིག་པ་ལགས་ན། ཅིའི་སླད་དུ་སྐྱབས་སུ་མཆི་བ་གསུམ་དུ་གསུངས་བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་སེམས་ཅན་དག་ནི་འཁོར་བས་སྐྲག་
ནས་སྐྱབས་སུ་འགྲོ་བ་གསུམ་ལ་ཕྱོགས་སོ། །སྐྱབས་སུ་འགྲོ་བ་གསུམ་གྱིས་ན་སངས་རྒྱས་ཀྱི་རང་བཞིན་དང་། གདོན་མི་ཟ་བ་དང་མྱ་ངན་ལས་འདས་པ་ཡིན་པར་རིག་པར་བྱའོ། །རིགས་ཀྱི་བུ་ཆོས་ཁ་ཅིག་ནི་མིང་གཅིག་ལ་དོན་ཐ་དད་དོ། །ཆོས་ཁ་
ཅིག་ནི་མིང་དང་དོན་གཉིས་ཀ་ཐ་དད་དོ་མིང་གཅིག་ལ་དོན་ཐ་དད་པ་ནི་སངས་རྒྱས་རྟག་ཅེས་བྱ་བ་དང་ཆོས་རྟག་པ་དང་། དགེ་སློང་གི་དགེ་འདུན་རྟག་པ་དང་། མྱ་ངན་ལས་འདའ་བ་དང་། ནམ་མཁའ་རྟག་ཅེས་བྱ་བ་ནི་མིང་གཅིག་ལ་
དོན་ཐ་དད་པ་ཞེས་བྱའོ། །མིང་དང་དོན་གཉིས་ཀ་ཐ་དད་པ་ནི་སངས་རྒྱས་ནི་མིང་ཚོར་བའོ། །ཆོས་ནི་མ་ཚོར་བ་དགེ་འདུན་ནི་འདུམ་པ། མྱ་ངན་ལས་འདའ་བ་ནི་རྣམ་པར་གྲོལ་བ། ནམ་མཁའ་ནི་དགེ་བ་མ་ཡིན་པ་
ཐོགས་པ་མེད་པ་ཞེས་ཀྱང་བྱ་སྟེ་དེ་ནི་མིང་དང་དོན་གཉིས་ཀ་ཐ་དད་པ་ཞེས་བྱའོ། །རིགས་ཀྱི་བུ་སྐྱབས་སུ་འགྲོ་བ་གསུམ་ཡང་དེ་དང་འདྲ་སྟེ། མིང་དང་དོན་གཉིས་ཀ་ཐ་དད་དོ། །དེ་ལ་གཅིག་ཅེས་བྱ་བ་གང་ཞེ་
ན། །དེ་བས་ན་ངས་སྐྱེ་དགུའི་བདག་མོ་གཽ་ཏ་མཱི་ལ་བཀའ་སྩལ་པ། གཽ་ཏ་མཱི་ང་ལ་མ་མཆོད་པར་དགེ་འདུན་ལ་མཆོད་ཅིག །དགེ་འདུན་ལ་མཆོད་ན་དཀོན་མཆོག་གསུམ་ལ་མཆོད་པ་ཞེས་བྱའོ། །དེ་ནས་སྐྱེ་

47-1-90a

དགུའི་བདག་མོས་འདི་སྐད་ཅེས་གསོལ་ཏོ། །དགེ་འདུན་གྱི་ནང་ན་སངས་རྒྱས་དང་ཆོས་ཀྱང་མེད་ན་ཅིའི་ཕྱིར། དགེ་འདུན་ལ་མཆོད་པས་དཀོན་མཆོག་གསུམ་ལ་མཆོད་པར་འགྱུར། དེ་ལ་ངས་འདི་སྐད་ཅེས་བཀའ་
སྩལ་ཏོ། །ཁྱོད་ཀྱིས་ངས་བསྟན་པ་བཞིན་བྱེད་པ་ནི་སངས་རྒྱས་ལ་མཆོད་པའོ། །རྣམ་པར་གྲོལ་བར་འདོད་པས་ཆོས་ལ་མཆོད་པའོ། །དགེ་འདུན་བཞེས་པས་ན་དགེ་འདུན་ལ་མཆོད་པའོ། །དེ་བས་ན་རིགས་ཀྱི་བུ་
དཀོན་མཆོག་གསུམ་གཅིག་ཅེས་བྱར་མི་རུང་ངོ་། །རིགས་ཀྱི་བུ་བཅོམ་ལྡན་འདས་ནི་སྐབས་ཁ་ཅིག་ཏུ་གཅིག་ལ་གསུམ་དུ་གསུང་ངོ་། །སྐབས་ཁ་ཅིག་ཏུ་ནི་གསུམ་ཡང་གཅིག་ཏུ་གསུངས་ཏེ། དེ་བས་ན་སངས་རྒྱས་
རྣམས་ཀྱི་སྤྱོད་ཡུལ་ནི་ཉན་ཐོས་དང་རང་སངས་རྒྱས་ཀྱིས་ཤེས་པར་ནུས་པ་མ་ཡིན་ནོ། །འོད་སྲུང་གིས་ཡང་གསོལ་པ། བཅོམ་ལྡན་འདས་བཅོམ་ལྡན་འདས་ཀྱིས་གསུངས་པ་ལྟར་མཐར་བདེ་བ་ནི་མྱ་ངན་ལས་འདས་
པའོ་ཞེས་གསུངས་པའི་དོན་ཇི་ལྟ་བུ་ལགས། མྱ་ངན་ལས་འདས་པ་ཞེས་བགྱི་བ་ནི་ལུས་ལ་བཏང་སྙོམས་ཡེ་ཤེས་ལ་བཏང་སྙོམས་པ་ལགས་ཏེ། ལུས་དང་ཡེ་ཤེས་ལ་བཏང་སྙོམས་ན་བདེ་བ་སུས་མྱོང་བར་འགྱུར། 
བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དཔེར་ན་མི་ཞིག་འདྲངས་པར་ཟོས་པའི་འོག་ཏུ་ཁོང་པ་མི་བདེ་བ་ལས་ཕྱི་རོལ་ཏུ་སོང་སྟེ་སྐྱུགས་ནས་ཕྱིར་འོངས་ན། གྲོགས་པོ་དག་དེ་ལ་ཁྱོད་མི་བདེ་བ་ཅི་ལྟ་སོས་
སམ་ཞེས་འདྲིའོ། །དེས་སྨྲས་པ་སོས་ཏེ་མི་བདེ་བ་མེད་ཅེས་ཟེར་རོ། །དེ་བཞིན་གཤེགས་པ་ཡང་དེ་དང་འདྲ་སྟེ་མཐར་སྲིད་པ་ཉི་ཤུ་ལྔ་པོ་དང་བྲལ་ནས་ཡོངས་སུ་མྱ་ངན་ལས་འདས་ཏེ། རབ་ཏུ་བདེ་བའི་གནས་སུ་
ཕྱིན་པས་བསྐྱོད་དུ་མེད་ཟད་པ་དང་འགོག་པ་ཞེས་བྱ་བ་མེད་དེ། ཚོར་བ་ཐམས་ཅད་བཅད་པས་བདེ་བར་ཚོར་བ་མེད་པ་ཞེས་བྱའོ། །དེ་ལྟར་ཚོར་བ་མྱོང་བ་མེད་པ་ནི་རྟག་པ་བདེ་བ་ཞེས་བྱའོ། །གང་ཞིག་དེ་བཞིན་

47-1-90b

གཤེགས་པ་ལ་བདེ་བར་ཚོར་བ་ཡོད་ཅེས་བྱ་བ་དེ་ནི་གནས་མེད་དོ། །དེ་བས་ན་མཐར་བདེ་བ་ནི་མྱ་ངན་ལས་འདས་པའོ། །མྱ་ངན་ལས་འདས་པ་དེ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་
དེ་བཞིན་གཤེགས་པའོ། །འོད་སྲུང་གིས་ཡང་གསོལ་པ། མི་སྐྱེ་མི་འགོག་པ་རྣམ་པར་གྲོལ་བ་ལགས་སམ། དེ་དེ་བཞིན་ནོ་དེ་དེ་བཞིན་ནོ། །རིགས་ཀྱི་བུ་མི་སྐྱེ་མི་འགོག་པ་ནི་རྣམ་པར་གྲོལ་བའོ། །དེ་ལྟར་རྣམ་པར་
གྲོལ་བ་ནི་དེ་བཞིན་གཤེགས་པའོ། །འོད་སྲུང་གིས་ཡང་གསོལ་པ། གལ་ཏེ་མི་སྐྱེ་མི་འགོག་པ་དེ་རྣམ་པར་གྲོལ་བ་ལགས་ན། ནམ་མཁའི་མཚན་ཉིད་ཀྱང་མི་སྐྱེ་མི་འགོག་ན། དེ་ཡང་དེ་བཞིན་གཤེགས་པ་ལགས་
སམ། དེ་བཞིན་གཤེགས་པ་ནི་རྣམ་པར་གྲོལ་བ་མ་ལགས་སམ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་དེ་ལྟ་མ་ཡིན་ནོ། །ཅིའི་ཕྱིར་དེ་ལྟ་མ་ཡིན་ཞེ་ན། རིགས་ཀྱི་བུ་དཔེར་ན་བྱ་ཀ་ལན་
འདའ་ཀ་དང་། འཚོ་བ་འཚོ་བྱེད་ནི་ཤིན་དུ་འང་སྐད་སྙན་པ་ཡིན་ན། ཁྭ་སྐེགས་ཀྱི་སྐད་དང་འདྲ་བ་འང་མ་ལགས་སོ། །བཅོམ་ལྡན་འདས་ཁྭ་སྐེགས་ནི་ཤིན་དུ་ཡང་སྐད་མི་སྙན་ཏེ། འཚོ་བ་འཚོ་བྱེད་དང་བསྒྲུན་དུ་མ་
མཆིས་ཏེ། སྟོང་གི་ཆར་ཡང་བསྒྲུན་དུ་མ་མཆིས་སོ། །འོད་སྲུང་གིས་ཡང་གསོལ་པ། བྱ་ཀ་ལན་འདའ་ཀ་ལ་སོགས་པ་ནི་སྐད་ཀྱང་ཤིན་དུ་སྙན་ལ། ལུས་ཀྱང་མི་འདྲ་ན་ཅིའི་སླད་དུ་དེ་བཞིན་གཤེགས་པས་ཁྭ་སྐེགས་
ཀྱི་དཔེར་གསུངས། རི་རབ་ཀྱི་དཔེ་ཡུངས་ཀར་ལ་ལེན་པ་དང་མཚུངས་ཏེ། བཅོམ་ལྡན་འདས་དང་ནམ་མཁའ་ཡང་དེ་བཞིན་ནོ། །བྱ་ཀ་ལན་འདའ་ཀའི་སྐད་ནི་སངས་རྒྱས་བཅོམ་ལྡན་འདས་ཀྱི་གསུང་གི་དཔེར་རུང་གི། 
ཁྭ་སྐེགས་ཀྱི་སྐད་ཀྱི་དཔེར་ནི་མི་རུང་ངོ་། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་འདི་སྐད་ཅེས་བཀའ་སྩལ་ཏོ། །ཤིན་དུ་ལེགས་སོ་ཤིན་དུ་ལེགས་སོ། །ཁྱོད་ནི་ཤིན་དུ་ཟབ་མོའི་དོན་ལ་

47-1-91a

ཤིན་དུ་མཁས་ཏེ། དེ་བཞིན་གཤེགས་པ་ནི་སྐབས་ཁ་ཅིག་ཏུ་རྒྱུ་དང་རྐྱེན་ལ་གཟིགས་ནས། ནམ་མཁའ་ཡང་རྣམ་པར་གྲོལ་བའི་དཔེར་གསུངས་སོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །
ཡང་དག་པར་རྣམ་པར་གྲོལ་བ་ནི་འཇིག་རྟེན་དུ་བཅས་པ་ལྷ་དང་མི་ཐམས་ཅད་ཀྱིས་བསྒྲུན་དུ་མེད་དེ། ནམ་མཁའ་འདི་ནི་ཡང་དག་པར་དཔེར་མི་རུང་མོད་ཀྱི། སེམས་ཅན་གདུལ་བའི་ཕྱིར་ནམ་མཁའ་ལྟ་བུར་དཔེར་
མི་རུང་ཡང་དཔེར་གསུངས་ཏེ། དེ་བས་ན་རྣམ་པར་གྲོལ་བ་ཉིད་དེ་བཞིན་གཤེགས་པར་རིག་པར་བྱའོ། །དེ་བཞིན་གཤེགས་པ་ཉིད་ནི་རྣམ་པར་གྲོལ་བའོ། །རྣམ་པར་གྲོལ་བ་དང་དེ་བཞིན་གཤེགས་པ་ནི་གཉིས་
སུ་མེད་ལ་དབྱེར་མེད་དོ། །རིགས་ཀྱི་བུ་དཔེར་མི་རུང་ཞེས་བྱ་བ་ནི་བསྒྲུན་དུ་མེད་པའི་དངོས་པོ་དག་ནི་དཔེར་དྲང་དུ་མི་རུང་ཡང་རྒྱུ་དང་རྐྱེན་ཁ་ཅིག་གི་སྐབས་སུ་དཔེ་དྲང་དུ་ཡོད་དོ། །མདོ་སྡེ་དག་ལས་ཀྱང་གསུངས་ཏེ། 
ཞལ་ནི་ཟླ་བ་གང་བ་འདྲ་བ་ཞེས་བྱ་བ་དང་། བལ་གྱི་གླང་པོ་ཆེ་ཤིན་དུ་དཀར་བ་ནི་གངས་ཀྱི་རི་དང་འདྲའོ། །ཞེས་བྱ་བ་ཟླ་བ་གང་བ་ཞལ་ཡིན་ཞེས་བྱར་མི་རུང་ལ། གངས་ཀྱི་རི་ཡང་བལ་གྱི་གླང་པོ་ཆེ་ཡིན་ཞེས་བྱར་མི་རུང་སྟེ། 
རིགས་ཀྱི་བུ་དཔེས་རྣམ་པར་གྲོལ་བ་ལ་དཔེར་བྱར་མི་རུང་མོད་ཀྱི་སེམས་ཅན་གདུལ་བའི་ཕྱིར་ན་དཔེ་བསྟན་པ་ཡིན་ནོ། །དཔེ་མང་པོས་ཆོས་རྣམས་ཀྱི་ཆོས་ཉིད་རིགས་པར་འགྱུར་བ་ཡང་དེ་བཞིན་ནོ།། །།
བམ་པོ་བརྒྱད་པ། འོད་སྲུང་གིས་ཡང་གསོལ་པ། ཅིའི་སླད་དུ་ན་དེ་བཞིན་གཤེགས་པས་རྣམ་པ་གཉིས་སུ་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དཔེར་ན་མི་ཞིག་རལ་གྲི་ཐོགས་ཏེ། 
ཞེ་སྡང་གི་སེམས་ཀྱིས་དེ་བཞིན་གཤེགས་པ་ལ་གསོད་དུ་འོངས་ན། དེ་ལ་དེ་བཞིན་གཤེགས་པས་མི་ཁྲོ་ཞིང་མདངས་དང་ཆས་ན། མི་དེ་ནི་དེ་བཞིན་གཤེགས་པ་ལ་གསོད་པའི་མཚམས་མེད་པའི་ལས་སུ་འགྱུར་རམ། 

47-1-91b

མ་ལགས་སོ། །བཅོམ་ལྡན་འདས་ཅིའི་སླད་དུ་ཞེ་ན། དེ་བཞིན་གཤེགས་པའི་སྐུ་ནི་གཞིག་མི་ནུས་པའི་ཕྱིར་རོ། །དེ་ཡང་ཇི་ལྟ་ཞེ་ན། སྐུ་ཕུང་པོ་ནི་མ་མཆིས་ཀྱི་ཆོས་ཉིད་འབའ་ཤིག་དང་ལྡན་ཏེ། ཆོས་རྣམས་ཀྱི་ཆོས་
ཉིད་ནི་གཞིག་ཏུ་མི་རུང་བ་ལགས་ན། གང་ཟག་དེས་སངས་རྒྱས་ཀྱི་སྐུ་གཞིག་ག་ལ་ནུས་མོད་ཀྱི་སྡིག་པའི་སེམས་དང་བཅས་པས་མཚམས་མ་མཆིས་པའི་ལུས་སུ་ནི་འགྱུར་རོ། །དེའི་སླད་དུ་དཔེར་ན་ཆོས་རྣམས་ཀྱི་
ཆོས་ཉིད་རིག་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་འདི་སྐད་ཅེས་བཀའ་སྩལ་ཏོ། །ཤིན་དུ་ལེགས་སོ་ཤིན་དུ་ལེགས་སོ། །རིགས་ཀྱི་བུ་ངས་གསུངས་པ་ལས་ཁྱོད་ཀྱིས་
སྔར་གསོལ་བ་ལེགས་སོ། །རིགས་ཀྱི་བུ་དཔེར་ན་མི་སྡིག་ཅན་ཞིག་མ་བསད་པར་བསམས་ནས་ཞིང་གི་ལས་བྱེད་པར་མ་ཟན་སྐྱེལ་དུ་འོངས་པ་ལས་དེ་ལ་བསད་པར་བསམས་ཏེ་རལ་གྲི་བདར་ཏེ་ཆས་པ་ལས་མས་ཚོར་
ནས་ཁྲེ་འབྲས་སྤུངས་པའི་ཕུང་པོར་ཞུགས་ཏེ། མི་དེས་རལ་གྲི་ཐོགས་ཏེ་ཁྲེ་འབྲས་ཀྱི་ཕུང་པོ་ལ་བསྐོར་ཅིང་རལ་གྲི་བཏབ་ནས་དེ་ནི་སོད་དོ་སྙམ་ནས་དགའ་བའི་སེམས་སྐྱེས་སོ། །ཕྱིས་དེའི་མ་ཁྲེ་འབྲས་ཀྱི་ཕུང་པོའི་ནང་ནས་
བྱུང་སྟེ། ཕྱིར་ཁྱིམ་དུ་འོངས་ན་དེ་ཁྱོད་ཀྱི་ཡིད་ལ་ཇི་སྙམ། མི་དེ་མཚམས་མེད་པའི་སྡིག་བྱས་པ་ཡིན་ནམ། གསོལ་པ་བཅོམ་ལྡན་འདས་གཅིག་དུ་ངེས་པ་མ་ལགས་སོ། །དེ་ཅིའི་སླད་དུ་ཞེ་ན། དེ་ལ་སྡིག་པ་མཆིས་ཤེས་
བགྱིར་ནི་མའི་ལུས་ཞིག་པར་གྱུར་པ་མ་ལགས། ལུས་ཞིག་པར་མ་གྱུར་ན་སྡིག་པ་མཆིས་ཤེས་བགྱིར་ག་ལ་རུང་། སྡིག་པ་མ་མཆིས་ཤེས་བགྱིར་ནི་སོད་དོ་སྙམ་བསམས་ནས་དགའ་སེམས་ཀྱང་བསྐྱེད་ན་མ་མཆིས་ཤེས་
བགྱིར་ཡང་ག་ལ་རུང་སྟེ། མི་དེས་མཚམས་མེད་པ་རྫོགས་པ་མ་ལགས་མོད་ཀྱི་འོན་ཀྱང་མཚམས་མ་མཆིས་པའི་ལས་བགྱིས་སོ། །རྒྱུ་དང་རྐྱེན་དེ་ལྟ་བས་ན་ཆོས་རྣམས་ཀྱི་ཆོས་ཉིད་རིག་པར་འགྱུར་རོ། །བཅོམ་

47-1-92a

ལྡན་འདས་ཀྱིས་བཀའ་སྩལ་པ། ཤིན་དུ་ལེགས་སོ་ཤིན་དུ་ལེགས་སོ། །རིགས་ཀྱི་བུ་རྒྱུ་དང་རྐྱེན་དེ་ལྟ་བས་ན་ངས་རྣམ་པ་སྣ་ཚོགས་ཀྱི་ཐབས་དང་དཔེས་རྣམ་པར་གྲོལ་བའི་དཔེར་གསུངས་པ་
ཡིན་ནོ། །དཔེ་རྣམ་པ་གྲངས་མེད་ཚད་མེད་པ་སྙེད་ཀྱིས་དཔེར་བསྟན་ཀྱང་ཡང་དག་པར་ན་དཔེར་བསྒྲུན་དུ་མེད་དེ། རྒྱུ་དང་རྐྱེན་ཁ་ཅིག་གི་སྐབས་སུ་ནི་དཔེས་བསྟན་ཏུ་རུང་ངོ་། །རྒྱུ་དང་རྐྱེན་ཁ་ཅིག་གི་སྐབས་སུ་
ནི་དཔེས་བསྟན་དུ་མི་རུང་སྟེ། དེ་བས་ན་རྣམ་པར་གྲོལ་བ་ནི་དེ་ལྟ་བུའི་ཡོན་ཏན་ཚད་མེད་པ་དང་ལྡན་ཏེ། མྱ་ངན་ལས་འདས་པ་ལ་ཞུགས་པའོ། །མྱ་ངན་ལས་འདའ་བ་དང་། དེ་བཞིན་གཤེགས་པ་ལ་ཡང་དེ་ལྟ་
བུའི་ཡོན་ཏན་ཚད་མེད་པ་དང་ལྡན་ནོ། །དེ་ལྟ་བུའི་ཡོན་ཏན་ཚད་མེད་པ་དང་ལྡན་ཏེ། ཕུན་སུམ་ཚོགས་པའི་ཕྱིར་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །བྱང་ཆུབ་སེམས་དཔའ་འོད་སྲུང་གིས་
བཅོམ་ལྡན་འདས་ལ་གསོལ་པ། བཅོམ་ལྡན་འདས་བདག་གིས་ནི་དེ་བཞིན་གཤེགས་པ་བྱོན་པའི་གནས་གདོད་འཚལ་ཏེ། བས་མ་འཚལ་བའི་གནས་སོ། །དེ་ལྟར་བས་མི་འཚལ་བས་ན་སྐུ་ཚེའི་ཚད་ཀྱང་བས་
མི་འཚལ་བར་རིག་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ནི་ཡང་དག་པའི་ཆོས་ཤིན་དུ་འཛིན་ཅིང་སྲུང་བའོ། །རིགས་ཀྱི་བུ་འམ་རིགས་ཀྱི་བུ་མོ་གང་ཀུན་
ནས་ཉོན་མོངས་པས་རྣམ་པར་བཅིངས་པ་གཅོད་འདོད་པ་དག་ནི་དེ་ལྟར་དམ་པའི་ཆོས་གཟུང་ཞིང་བསྲུང་བར་བྱའོ། །རིགས་ཀྱི་བུ་ཡོངས་སུ་མྱ་ངན་ལས་འདས་པའི་མདོ་ཤིན་དུ་ཟབ་མོ་འདི་ལས་གང་ཟག་རྣམ་པ་
བཞིས་ཡང་དག་པའི་ཆོས་སྲུང་ཞིང་ཡང་དག་པའི་ཆོས་རྣམ་པར་འཇོག་པ་དང་། ཡང་དག་པའི་ཆོས་ཡིད་ལ་བྱེད་ནུས་ཤིང་འཇིག་རྟེན་དུ་བཅས་པ་ལ་སྙིང་བརྩེ་བ་དང་། འཇིག་རྟེན་དུ་བཅས་པའི་རྟེན་དང་གནས་སུ་འགྱུར་

47-1-92b

ཞིང་ལྷ་དང་མི་མང་པོ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །གང་ཟག་བཞི་པོ་གང་ཞེ་ན་གང་ཟག་གང་འཇིག་རྟེན་ལས་འདས་ཏེ་ཉོན་མོངས་པའི་མཚན་ཉིད་དང་ལྡན་པ་ནི་རྒྱུན་ཏུ་ཞུགས་པ་ཞེས་བྱ་སྟེ་གཅིག་གོ། །
གང་ཟག་ལན་ཅིག་ཕྱིར་ལྡོག་པ་ནི་གཉིས་སོ། །ལན་ཅིག་ཕྱིར་མི་ལྡོག་པ་ནི་གསུམ་མོ། །དགྲ་བཅོམ་པ་ནི་བཞིའོ། །གང་ཟག་རྣམ་པ་བཞི་པོ་འདི་དག་འཇིག་རྟེན་དུ་བྱུང་ན། འཇིག་རྟེན་དུ་བཅས་པ་ལ་སྙིང་བརྩེ་
ཞིང་འཇིག་རྟེན་དུ་བཅས་པའི་རྟེན་དང་གནས་སུ་འགྱུར་ཏེ། ལྷ་དང་མི་མང་པོ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །དེ་ལ་ཉོན་མོངས་པའི་མཚན་ཉིད་དང་ལྡན་པ་གང་ཞེ་ན། དེ་ལ་གང་ཟག་གང་ཞིག་ཚུལ་ཁྲིམས་
ཡོངས་སུ་སྡོམ་ཞིང་སྤྱོད་ལམ་མི་ཉམས་པས་ཡང་དག་པའི་ཆོས་རྣམ་པར་གཞག་ནས་སངས་རྒྱས་ལས་ཇི་སྐད་དུ་ཐོས་པ་བཞིན་དུ་ཡི་གེ་དང་དོན་ལ་མཁས་ཏེ། གཞན་ལ་ཡང་རྒྱས་པར་འཆད་ཅིང་སྟོན་པ་ནི་འདི་ལྟ་
སྟེ། འདོད་པ་ཉུང་བ་དང་། འདོད་པ་མང་བ་དང་། བྱང་ཆུབ་ཡིན་པ་ལ་སོགས་པ་སྐྱེས་བུ་ཆེན་པོ་ཡ་བརྒྱད་ཀྱི་ཆོས་རྒྱས་པར་སྟོན་པའོ། །གང་ཉེས་པ་བྱུང་བ་རྣམས་ཀྱང་འཐོལ་ཞིང་འགྱོད་ཚངས་བྱེད་དུ་བཅུག་ནས། ཉེས་པ་
བྱང་བར་བྱེད་པ་དང་། བྱང་ཆུབ་སེམས་དཔའ་རྣམས་ཀྱི་ཐབས་དང་སྤྱོད་པ་དང་། དགོངས་ཏེ་གསུངས་པའི་ཆོས་ལ་ཤིན་དུ་མཁས་པ་ནི་བྱིས་པ་སོ་སོའི་སྐྱེ་བོ་ཞེས་བྱའི་སྐྱེས་བུ་ཡ་བརྒྱད་པོ་མ་ཡིན་ནོ། །སྐྱེས་བུ་ཡ་བརྒྱད་
པོ་ནི་བྱིས་པ་སོ་སོའི་སྐྱེ་བོ་ཞེས་མི་བྱ་སྟེ། བྱང་ཆུབ་སེམས་དཔའ་ཞེས་བྱའི་སངས་རྒྱས་ཤེས་བྱ་བ་ནི་མ་ཡིན་ནོ། །སྐྱེས་བུ་གཉིས་པོ་ནི་རྒྱུན་དུ་ཞུགས་པ་ཞེས་བྱའོ། །ལན་ཅིག་ཕྱིར་ལྡོག་པ་ནི་ཡང་དག་པའི་ཆོས་རྙེད་
དམ། ཡང་དག་པའི་ཆོས་འཛིན་ཏམ། སངས་རྒྱས་ལས་ཆོས་ཐོས་ན་ཇི་ལྟར་ཐོས་པ་བཞིན་དུ་གླེགས་བམ་དུ་འདྲི་ཞིང་འཆང་བ་དང་། ཀློག་པ་དང་། འདོན་པ་དང་། གཞན་ལ་ཡང་རྒྱས་པར་སྟོན་ཅིང་འཆད་དོ། །དེ་ཆོས་ཐོས་

47-1-93a

ནས་མི་འདྲི་བ་དང་། འཆང་བ་དང་། འཛིན་པར་མི་བྱེད་པ་དང་། གཞན་ལ་ཡང་མི་འཆད་དོ། །བྲན་ཕོ་དང་། བྲན་མོ་ལ་སོགས་པ་མ་བརྟགས་པའི་དངོས་པོ་དག་སངས་རྒྱས་ཀྱིས་འཆང་དུ་གནང་ངོ་ཞེས་སྨྲ་བའི་གནས་མེད་
དེ། དེ་ནི་གང་ཟག་གཉིས་པོ་ཞེས་བྱ་སྟེ། གང་ཟག་དེ་ནི་གཉིས་པོ་དང་གསུམ་པོའི་ས་ཐོབ་པ་ཡང་མ་ཡིན་ལ། བྱང་ཆུབ་སེམས་དཔའ་ལུང་བསྟན་པ་ཞེས་ཀྱང་མི་བྱའོ། །གང་ཟག་གསུམ་པོ་ནི་ལན་ཅིག་ཕྱིར་མི་ལྡོག་པ་ཞེས་
བྱ་སྟེ། ལན་ཅིག་ཕྱིར་མི་ལྡོག་པ་ནི་ཡང་དག་པར་ཆོས་ལ་སྐུར་བ་འམ། བྲན་ཕོ་དང་བྲན་མོ་དང་། ལས་བྱེད་པའི་མི་ལ་སོགས་པ་མ་བརྟགས་པའི་དངོས་པོ་དག་འཆང་དུ་གནང་ཞེ་འམ། མུ་སྟེགས་ཅན་གྱི་གཙུག་
ལག་དང་། ཡི་གེ་ལ་སློབ་ཅིང་འཛིན་ཅེ་འམ། ཀུན་ནས་ཉོན་མོངས་པས་སྒྲིབ་པར་འགྱུར་ཞེ་འམ། བག་ལ་ཉལ་བའི་ཉོན་མོངས་པས་སྒྲིབ་ཅིང་གཡོག་པར་འགྱུར་ཞེ་འམ། དེ་བཞིན་གཤེགས་པའི་སྐུ་གདུང་
ཡང་དག་པ་སྦེད་ཅིང་འཆབ་ཅེ་འམ། ཕྱི་རོལ་གྱི་ནད་རྣམ་པ་མང་པོས་འཚེ་ཞིང་གནོད་པར་འགྱུར་ཞེ་འམ། སྦྲུལ་གདུག་པ་རྣམ་པ་བཞིས་ཟིན་པར་འགྱུར་ཞེ་འམ། བདག་དུ་སྨྲ་བ་ལ་སོགས་པའི་གནས་མེད་ཀྱི། 
བདག་མེད་པར་སྨྲ་བའི་གནས་ནི་ཡོད་དོ། །འཇིག་རྟེན་གྱི་ཆོས་ལ་ཆགས་པར་སྨྲ་བའི་གནས་ནི་མེད་ཀྱི། ཐེག་པ་ཆེན་པོ་བར་ཆད་ཀྱི་རྒྱུན་མེད་པར་སྟོན་པའི་གནས་ནི་ཡོད་དོ། །གང་ལུས་ལེན་པ་དེ་སྲིན་བུ་བརྒྱད་
ཁྲིས་བཟའ་བའི་གནས་མེད་ཀྱི། འདོད་ཆགས་ཡོངས་སུ་སྤངས་ནས་ཆུང་ངུ་ན་རྨི་ལམ་ན་ཡང་མི་གཙང་བ་མི་འབྱུང་བའི་གནས་ནི་ཡོད་དོ། །མཚར་ཆེ་བའི་བྱ་བ་བྱེད་པ་ན་འཇིགས་སྐྲག་པར་འགྱུར་བའི་གནས་
ཀྱང་མེད་དོ། །ལེན་ཅིག་ཕྱིར་མི་ལྡོག་པ་ཞེས་བྱ་བ་ཅིའི་དོན་ཞེ་ན། གང་ཟག་དེ་ནི་ཉེས་པའི་སྐྱོན་གོང་དུ་སྨོས་པའི་ནང་དུ་ཕྱིར་མི་འཁོར་ཏེ། དེས་གོས་པར་ཡང་མི་འགྱུར་ལ། ཕྱིར་འཁོར་ཞིང་སྐྱེ་ཡང་དེ་ནི་བྱང་ཆུབ་སེམས་

47-1-93b

དཔའ་ཞེས་བྱ་སྟེ། ལུང་བསྟན་པ་ཡང་ཐོབ་པས་རིང་པོར་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་ཡང་འགྱུར་ཏེ། དེ་ནི་གང་ཟག་གསུམ་པ་ཞེས་བྱའོ། །གང་ཟག་
བཞི་པ་ནི་དགྲ་བཅོམ་པ་ཞེས་བྱ་སྟེ། དགྲ་བཅོམ་པ་ནི་ཉོན་མོངས་པ་ཐམས་ཅད་བཅད་པ། ཁུར་བོར་བ། བྱ་བ་བྱས་པ། ཕྱིས་བདག་གི་དོན་རབ་ཏུ་ཐོབ་རྙེད་པ། ས་བཅུ་ལ་རབ་ཏུ་གནས་པ། ཡེ་ཤེས་ལ་དབང་སྒྱུར་བ། 
སོ་སོའི་སྐྱེ་བོ་ཅི་ལ་མོས་པ་བཞིན་དུ་རྣམ་པ་སྣ་ཚོགས་ཀྱིས་གཟུགས་དང་ཆ་ལུགས་ཀྱང་དེ་བཞིན་དུ་སྟོན་པ། མངོན་པར་འཚང་རྒྱ་བར་འདོད་ན་ཡང་མངོན་པར་སངས་རྒྱས་པ་སྟོན་ཏེ། དེ་ལྟ་བུའི་ཡོན་ཏན་
ཚད་མེད་པ་དང་ལྡན་པས་ན་དགྲ་བཅོམ་པ་ཞེས་བྱའོ། །དེ་བས་ན་སྐྱེས་བུ་ཆེན་པོ་བཞི་འཇིག་རྟེན་དུ་བྱུང་ན། འཇིག་རྟེན་དུ་བཅས་པ་ལ་སྙིང་བརྩེ་བས་འཇིག་རྟེན་དུ་བཅས་པའི་གནས་དང་རྟེན་དུ་འགྱུར་ཞིང་ལྷ་
དང་མི་མང་པོ་ལ་ཕན་པ་དང་བདེ་བའི་དོན་བྱེད་པ་དང་། ལྷ་དང་མིའི་ནང་ན་མཆོག་ཏུ་འགྱུར། གཙོ་བོར་འགྱུར། ཕུལ་དུ་འགྱུར་ཏེ། ཇི་ལྟར་དེ་བཞིན་གཤེགས་པ་ཐམས་ཅད་ཀྱི་སྐྱབས་སུ་འགྲོ་བའི་གནས་མིའི་
མཆོག་དུ་གྱུར་པ་བཞིན་ནོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་སྐྱེས་བུ་བཞི་པོ་ལ་མི་གནས་མི་རྟེན་ཏོ། །དེ་ཅིའི་སླད་དུ་
ཞེ་ན། བཅོམ་ལྡན་འདས་ཀྱིས་སྔོན་མདོ་སྡེ་གུ་ཤི་ལས་དྲིས་པ་ལས་འདི་སྐད་ཅེས་གསུངས་ཏེ། གོ་ཤི་ལ་ལྷ་དང་བདུད་དང་། ཚངས་པ་ལ་སོགས་པ་ཁྱོད་གཞིག་ཅིང་མི་རུང་བར་བྱ་བའི་ཕྱིར་སངས་རྒྱས་ཀྱི་གཟུགས་
ལྟ་བུར་བསྒྱུར་ནས་མཚན་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་། འོད་ཀྱི་དཀྱིལ་འཁོར་འདོམ་གང་བ་དང་། ཞལ་ཟླ་བ་རྒྱས་པ་ལྟ་བུ་དང་། སྨིན་མཚམས་ཀྱི་མཛོད་སྤུའི་མཚན་དཀར་ཁྱད་

47-1-94a

གངས་སམ། དུང་ལྟ་བུས་ཡོངས་སུ་བརྒྱན་ཏེ་འོངས་ན་ཁྱོད་ཡང་དག་པ་ཡིན་ནམ་མ་ཡིན་པ་རྟོགས་ཤིག །རྟོགས་ཤིང་ཤེས་ནས་གདུལ་བར་བྱའོ་ཞེས་གསུངས་ཏེ། བཅོམ་ལྡན་འདས་བདུད་ལ་སོགས་པས་
སངས་རྒྱས་ཀྱི་སྐུར་ཡང་སྟོན་ཅིང་སྤྲུལ་ནུས་ན་དགྲ་བཅོམ་པ་ལ་སོགས་པ་སྐྱེས་བུ་བཞིའི་ལུས་སུ་སྟོན་ཅིང་ནམ་མཁའ་ལ་འགྲོ་བ་དང་། ཉལ་བ་དང་། འདུག་པ་དང་། རྩིབ་ལོགས་གཡོན་ནས་ཆུ་འབྱུང་བ་དང་། རྩིབ་
ལོགས་གཡས་ནས་མེ་འབྱུང་བ་དང་། ལུས་ལ་དུད་པ་འཐུལ་ཞིང་མེའི་ཕུང་པོ་ལྟར་སྟོན་པ་ལྟ་སྨོས་ཀྱང་ཅི་འཚལ་ཏེ། རྒྱུ་དང་རྐྱེན་དེ་ལྟ་བས་ན་བདག་ནི་དེ་ལ་དད་པ་ཡང་མི་སྐྱེ་ལ་སྟོན་པ་ཞིག་ཡོད་ན་ཡང་། ཚུལ་
བཞིན་དུ་མི་བགྱིད་བཀུར་སྟི་དང་། རྟེན་དང་གནས་ལྟ་བུར་མི་སེམས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་བསྟན་པ་ལ་ཐེ་ཙོམ་ཡོད་ན་ཡང་གཟུང་བར་མི་བྱ་ན་དེ་དག་གིས་བསྟན་པ་ལྟ་ཅི་
སྨོས་ཏེ། དེ་བས་ན་དགེ་འམ་མི་དགེའམ། བྱ་འམ་མི་བྱ་བ་ཤིན་དུ་བརྟགས་ཏེ་ཁོང་དུ་ཆུད་པར་བྱའོ། །དེ་ལྟར་བྱས་ན་ཡུན་རིང་པོར་བདེ་བ་མྱོང་བར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་ཁྱི་རྐུན་ཞིག་ཁྱིམ་
དུ་འོངས་ཏེ་བྲན་མོ་ཁྱིམ་སྲུང་གིས་ཚོར་ན་དེ་ལ་སྤྱོས་ཏེ་མྱུར་དུ་ཕྱིར་སོང་ཤིག །མ་བྲོས་ན་བསད་དོ་ཞེས་སྨྲས་ཏེ། ཁྱིས་དེ་སྐད་ཐོས་ནས་བྲོས་ཏེ་ཕྱིར་མི་ལྡོག་གོ། །ཁྱོད་ཀྱང་དེ་བཞིན་དུ་བདུད་སྡིག་ཏོ་ཅན་འདུལ་བ་
ན། དེ་ལ་འདི་སྐད་དུ་སྡིག་ཏོ་ཅན་ཁྱོད་འདི་འདྲ་བའི་གཟུགས་སུ་མ་སྟོན་ཅིག ། །ཅི་སྟེ་སྟོན་ན་འཆིང་བ་རྣམ་པ་ལྔས་འཆིང་ངོ་ཞེས་གྱིས་ཤིག ། །བདུད་ཀྱིས་དེ་སྐད་ཐོས་ན་འབྲོས་ཏེ། ཕྱིར་མི་ལྡོག་པ་ཡང་ཇི་ལྟར་
ཁྱི་རྐུན་དེ་ཕྱིར་མི་ལྡོག་པ་བཞིན་ནོ། །འོད་སྲུང་གིས་ཡང་གསོལ་པ། བཅོམ་ལྡན་འདས་ཀྱིས་ཁྱིམ་བདག་གུ་ཤི་ལ་ལ་འདི་སྐད་ཅེས་གསུངས་ཏེ། གང་ཞིག་དེ་ལྟར་བདུད་ཐུལ་ན། ཡོངས་སུ་མྱ་ངན་ལས་འདས་

47-1-94b

པ་ཆེན་པོ་ལ་ཉེ་བ་ཞེས་བགྱི་ན། ཅིའི་སླད་དུ་བཅོམ་ལྡན་འདས་ཀྱིས་གང་ཟག་བཞི་པོ་ལ་གནས་དང་རྟེན་ལྟ་བུར་གསུངས། གང་ཟག་བཞི་པོས་སྟོན་པ་ལ་ངེས་པར་ཡིད་ཆེས་སུ་རུང་ངམ། བཅོམ་ལྡན་འདས་ཀྱིས་འོད་སྲུང་ལ་
བཀའ་སྩལ་པ། རིགས་ཀྱི་བུ་ངས་གསུངས་པ་ཡང་དེ་དང་འདྲ་སྟེ། དེ་ལྟ་བུ་ཡིན་ནོ། །རིགས་ཀྱི་བུ་ངས་ནི་ཉན་ཐོས་ཤའི་མིག་ཅན་དག་ལ་བདུད་འདུལ་བར་བསྟན་གྱི། ཐེག་པ་ཆེན་པོ་ལ་ནན་ཏན་བྱེད་པའི་གང་ཟག་ལ་བཤད་པ་
ནི་མ་ཡིན་ནོ། །ཉན་ཐོས་ཀྱི་གང་ཟག་ནི་འཕྲུལ་གྱི་མིག་ཅན་དུ་གྱུར་ཀྱང་ཤའི་མིག་ཅེས་བྱའོ། །ཐེག་པ་ཆེན་པོ་སློབ་པའི་ནི་ཤའི་མིག་ཅན་ཡང་སངས་རྒྱས་ཀྱི་སྤྱན་ཞེས་བྱའོ། །དེ་ཅིའི་ཕྱིར་ཞེ་ན། ཐེག་པ་ཆེན་པོ་
འི་མདོ་སྡེ་ནི་སངས་རྒྱས་ཀྱི་ཐེག་པ་ཞེས་བྱ་སྟེ། སངས་རྒྱས་ཀྱི་ཐེག་པ་ནི་མཆོག་ཏུ་གྱུར་ཕུལ་དུ་གྱུར་པའོ། །རིགས་ཀྱི་བུ་འདི་ལྟ་སྟེ་དཔེར་ན་སྐྱེས་བུ་དཔལ་ཞིང་སྒྱུ་རྩལ་ཆེ་བ་ལ་ནི་གང་སྡར་མ་ཞན་པ་དག་རྟག་ཏུ་འཁོར་
ཞིང་རྟེན་ཏོ། །སྐྱེས་བུ་དཔའ་བོ་དེས་སྡར་མ་དེ་ལ་ཁྱོད་གཞུ་འདི་ལྟར་ཟུང་ཤིག །མདའ་འདི་ལྟར་འཕོངས་ཤིག །ཤག་ཏི་སློབ་ཅིང་ཀྱོ་བ་ཏང་དང་ཞགས་པ་འདི་ལྟར་ཐོབ་ཤིག་ཅེས་སྟོན་ཏོ། །གཞན་ཡང་འདི་སྐད་དུ་དགྲ་དང་
འཐབ་པ་ནི་མཚོན་གྱི་ཁར་སོང་བ་དང་འདྲ་མོད་ཀྱི། འཇིགས་སྐྲག་པའི་འདུ་ཤེས་མ་སྐྱེད་པར་ཕ་རོལ་པོ་ལྷ་དང་མི་ལ་ཤིན་དུ་བརྙས་པའི་འདུ་ཤེས་སྐྱེད་ཅིག །བདག་ནི་ཤིན་དུ་དཔའ་ཞིང་རྩལ་ཆེ་བར་འདུ་ཤེས་སྐྱེད་ཅིག །བར་བར་
གྱི་དུས་སུ་མི་སྡར་མ་ཞན་པ་དག་ཅིག་དཔའ་བོ་ལྟར་བཅོས་ཏེ། མདའ་གཞུ་དང་རལ་གྲི་དང་མཚོན་ཆ་སྣ་ཚོགས་ཐོགས་ཏེ། གཡུལ་ངོར་ལྷགས་ནས་སྐད་ཆེན་པོས་བོས་ན། ཁྱོད་དེ་ལ་འཇིགས་པ་འམ། སྐྲག་པ་ལྟར་མ་བྱེད་
ཅིག་དང་། སྡར་མ་དེས་ཁྱོད་མི་སྐྲག་པར་ཤེས་ནས་ཁྱི་རྐུན་དང་འདྲ་བར་དེ་མ་ཐག་ཏུ་འགྱེས་ཤིང་འབྲོས་སོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། ཉན་ཐོས་རྣམས་ལ་ཁྱེད་བདུད་སྡིག་ཏོ་ཅན་གྱིས་མ་སྐྲག་

47-1-95a

ཤིག ། གལ་ཏེ་བདུད་སྡིག་ཏོ་ཅན་སངས་རྒྱས་ཀྱི་སྐུར་སྤྲུལ་ཏེ། ཁྱོད་ཀྱི་དྲུང་དུ་འོང་ན་ཡང་ཁྱོད་ཤིན་དུ་བརྟན་པའི་བརྩོན་འགྲུས་ཀྱིས་བདུད་ཀྱི་སྡེ་རྣམས་ཐུལ་ཅིག །དེའི་ཚེ་ན་བདུད་ཀྱང་མྱ་ངན་གྱིས་ནོན་ཏེ་མི་དགའ་
ནས་ཕྱིར་འགྲོའོ། །རིགས་ཀྱི་བུ་དཔེར་ན་སྐྱེས་བུ་དཔའ་བོ་གཞན་ལ་སློབ་མི་དགོས་པ་ལྟར་ཐེག་པ་ཆེན་པོ་ལ་ནན་ཏན་བྱེད་པ་ཡང་དེ་དང་འདྲ་སྟེ། ཤིན་ཏུ་ཟབ་མོའི་མདོ་སྡེ་རྣམ་པ་སྣ་ཚོགས་ཐོས་ཀྱང་སེམས་རབ་ཏུ་
དགའ་ཞིང་རངས་པར་འགྱུར་གྱི། འཇིགས་པ་འམ་སྐྲག་པ་མི་སྐྱེའོ། །དེ་ཅིའི་ཕྱིར་ཞེ་ན། འདི་ལྟར་ཐེག་པ་ཆེན་པོ་ལ་སློབ་པའི་གང་ཟག་ནི་སྔོན་འདས་པའི་སངས་རྒྱས་གྲངས་མེད་པ་བརྒྱ་སྟོང་ལ་ཕྱག་དང་། 
བསྙེན་བཀུར་དང་། མཆོད་པ་བྱས་པས་གལ་ཏེ་བདུད་ཀྱི་འཁོར་གྲངས་མེད་པ་བརྒྱ་སྟོང་སྙེད་ཀྱིས་གནོད་པ་འམ། རྣམ་པར་གཙེས་ཀྱང་དེ་ལ་ནི་ནམ་དུ་ཡང་འཇིགས་སྐྲག་པ་མི་འབྱུང་ངོ་། །རིགས་ཀྱི་བུ་འདི་ལྟ་སྟེ་དཔེར་
ན་མི་ཞིག་སྨན་ཨ་གས་རྙེད་ན་སྦྲུལ་གདུག་པ་ལ་སོགས་པ་ཐམས་ཅད་ཀྱིས་མི་འཇིགས་སོ། །སྨན་དེའི་མཐུས་གདུག་པ་ཐམས་ཅད་གཞིལ་ནུས་པའི་ཕྱིར་རོ། །ཐེག་པ་ཆེན་པོའི་མདོ་སྡེ་ཡང་དེ་དང་འདྲ་སྟེ། 
བདུད་གདུག་པ་ཐམས་ཅད་ཀྱིས་མི་འཇིགས་ལ། ཕྱིས་མི་ལྡང་བར་ཡང་གདུལ་ནུས་སོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཀླུ་གདུག་པ་ནི་ཕ་རོལ་ལ་གསོད་པའི་ཚེ། བར་འགའ་ནི་མིག་གིས་བལྟས་པ་
ཙམ་འམ། བར་འགའ་དབུགས་ཀྱིས་རྔུབས་པ་ཙམ་གྱིས་འཆི་སྟེ། དེ་བས་ན་སེང་གེ་དང་། སྟག་དང་། ཕར་སྤྱང་དང་། ཁྱི་ལ་སོགས་པ་ཐམས་ཅད་དེ་ལ་འཇིགས་སོ། །གཅན་ཟན་དེ་དག་ལ་སོགས་པས་དེའི་སྐད་ཐོས་
སམ། དེའི་ལུས་ཀྱིས་རེག་པ་ཙམ་གྱིས་མི་འཆི་བ་མེད་དོ། །གང་སྔགས་ལ་ཤིན་ཏུ་མཁས་པ་ནི་སྔགས་ཀྱི་མཐུས་ན་ཀླུ་གདུག་པ་དང་། ནམ་མཁའ་ལྡིང་དང་། བལ་གྱི་གླང་པོ་ཆེ་སྨྱོས་པ་དང་། སེང་གེ་དང་། སྟག་དང་། 

47-1-95b

ཕར་སྤྱང་ལ་སོགས་པ་ཐམས་ཅད་ཐུལ་ཏེ། ཁ་ལོ་སྒྱུར་ཞིང་ཞོན་ཀྱང་ནུས་སོ། །གཅན་ཟན་དེ་དག་གིས་སྔགས་ལ་མཁས་པ་དེ་མཐོང་བ་ཙམ་གྱིས་རང་འདུལ་ལོ། །ཉན་ཐོས་དང་། རང་སངས་རྒྱས་ཀྱང་དེ་དང་འདྲ་
སྟེ། བདུད་སྡིག་ཏོ་ཅན་མཐོང་ན་ཐམས་ཅད་འཇིགས་སྐྲག་གོ། །བདུད་སྡིག་ཏོ་ཅན་ནི་དེ་དག་ལ་འཇིགས་སྐྲག་པའི་སེམས་མེད་དེ། བདུད་ཀྱི་ལས་ཀྱང་བྱེད་དོ། །ཐེག་པ་ཆེན་པོ་ལ་སློབ་པ་ཡང་དེ་དང་འདྲ་སྟེ། 
དེ་ལྟར་ཉན་ཐོས་དག་བདུད་ཀྱིས་སྐྲག་སྟེ། ཐེག་པ་ཆེན་པོ་ལ་མི་མོས་མི་དད་པ་མཐོང་ནས། སྔར་ཐབས་ཀྱིས་བདུད་ཀྱི་རིས་རྣམས་བཏུལ་ཏེ། ཐམས་ཅད་འདུལ་བར་བྱས་ནས། དེའི་འོག་ཏུ་དམ་པའི་ཆོས་རྣམ་པ་སྣ་
ཚོགས་སྟོན་ཅིང་འཆད་དོ། །ཉན་ཐོས་དང་། རང་སངས་རྒྱས་དག་དེ་ལྟར་བདུད་རྣམས་བཏུལ་བ་མཐོང་ན། གདོད་སྐྲག་པ་སྐྱེས་ཏེ། ཐེག་པ་ཆེན་པོ་དམ་པའི་ཆོས་བླ་ན་མེད་པ་ལ་མོས་པ་དང་དད་པ་བསྐྱེད་དེ། 
འདི་སྐད་དུ་བདག་ཅག་ནི་ཕྱིན་ཆད་དམ་པའི་ཆོས་འདིའི་བར་ཆད་དང་། བགེགས་མི་བྱའོ་ཞེས་སྨྲའོ། །གཞན་ཡང་རིགས་ཀྱི་བུ་ཉན་ཐོས་དང་། རང་སངས་རྒྱས་ནི་ཉོན་མོངས་པ་རྣམས་ལ་འཇིགས་པ་དང་སྐྲག་པ་
སྐྱེའོ། །ཐེག་པ་ཆེན་པོ་སློབ་པ་དག་ནི་འཇིགས་པ་འམ་བག་ཚ་བ་མེད་དོ། །ཐེག་པ་ཆེན་པོ་ལ་ནན་ཏན་བྱེད་པ་ནི་དེ་ལྟ་བུའི་མཐུ་དང་ལྡན་ཏེ། རྒྱུ་དང་རྐྱེན་དེ་ལྟ་བས་ན་སྔར་བསྟན་ཅིང་བཤད་པ་ནི་ཉན་ཐོས་
དང་རང་སངས་རྒྱས་དག་གིས་བདུད་གདུལ་བའི་ཕྱིར་གྱི། ཐེག་པ་ཆེན་པོའི་ཕྱིར་ནི་མ་ཡིན་ནོ། །ཐེག་པ་ཆེན་པོ་མྱ་ངན་ལས་འདས་པའི་མདོ་སྡེ་ཤིན་ཏུ་ཟབ་མོ་འདི་ནི་ངོ་མཚར་ཆེ་ཞིང་རྨད་དུ་གྱུར་པ་སྟེ། 
གདུལ་ནུས་པ་མེད་དོ། །གང་ཞིག་མཉན་དེ་ཐོས་ནས་དད་ཅིང་འཛིན་ཏམ། དེ་བཞིན་གཤེགས་པ་ལ་རྟག་པའི་ཆོས་ཅན་དུ་ཡིད་ཆེས་ན་གང་ཟག་དེ་ནི་མེ་ཏོག་ཨུ་དུམ་བ་ར་ལྟར་ཤིན་དུ་དཀོན་པའོ། །ང་མྱ་ངན་ལས་

47-1-96a

འདས་ནས་གང་གིས་ཐེག་པ་ཆེན་པོའི་མདོ་སྡེ་ཤིན་དུ་ཟབ་མོ་འདི་ཐོས་ནས་དད་པའི་སེམས་སྐྱེས་ན། དེ་ནི་མ་འོངས་པའི་དུས་སུ་བསྐལ་པ་བརྒྱ་སྟོང་གི་བར་དུ་ངན་སོང་དུ་མི་ལྟུང་བར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་
བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་ང་མྱ་ངན་ལས་འདས་ནས་ཡོངས་སུ་མྱ་ངན་ལས་འདས་པའི་མདོ་སྡེ་དམ་པ་འདི་ལ་སེམས་ཅན་གྲངས་མེད་པ་བརྒྱ་སྟོང་སྙེད་ཀྱིས་སྐུར་ཅིང་ཡིད་མི་ཆེས་པར་འགྱུར་རོ། །བྱང་ཆུབ་
སེམས་དཔའ་འོད་སྲུང་གིས་ཡང་གསོལ་པ། བཅོམ་ལྡན་འདས་སེམས་ཅན་དེ་དག་སངས་རྒྱས་མྱ་ངན་ལས་འདས་པའི་འོག་ཏུ་ཡུན་རིང་དུ་མདོ་སྡེ་འདི་ལ་བསྙེན་ནས་བཀུར་བར་འགྱུར་ན། དེ་ལ་སྤྱེ་བོ་ཤིན་དུ་དགེ་བ་དང་ལྡན་པ་ཇི་ལྟ་བུས་ཆོས་ལ་
རྣམ་པར་སྐུར་པ་དེ་སྒྲོལ་བར་འགྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་ང་མྱ་ངན་ལས་འདས་ནས་ལོ་བཞི་བཅུའི་བར་དུ་ནི་འཛམ་བུའི་གླིང་འདིར་རྒྱས་པར་འགྱུར་ཏེ། དེ་ནས་སའི་འོག་ཏུ་ནུབ་པར་འགྱུར་རོ། །རིགས་ཀྱི་
བུ་དཔེར་ན་བུ་རམ་གྱི་ཤིང་དང་ཤ་ཁ་ར་དང་། འོ་མ་དང་། མར་དང་། མར་གྱི་སྙིང་པོ་ཡོད་པའི་གནས་ན། འཁོད་པའི་སེམས་ཅན་དག་ནི་རོ་བྲོ་བ་དེ་ལ་རོའི་ནང་ན་མཆོག་དམ་པར་འཛིན་དོ། །དེ་ལ་ཁ་ཅིག་ནི་ཁྲེ་དང་ཡུག་པོའི་ས་བོན་འབའ་ཤིག་ཟ་ན་
དེ་དག་ཀྱང་འདི་སྐད་དུ་བདག་ཅག་གི་ཟས་འདི་ལས་འདའ་བ་མེད་ཅེས་ཟེར་རོ། །དེ་ནི་སེམས་ཅན་བསོད་ནམས་ཆུང་བའི་ལས་ཀྱི་རྣམ་པར་སྨིན་པ་ཡིན་ཏེ། བསོད་ནམས་ཅན་སྐལ་བ་དང་ལྡན་པ་དག་ནི། ཁྲེ་དང་ཡུག་པོའི་ས་བོན་རྣམས་ཀྱང་མི་ཐོས་ཏེ་ཟས་སུ་
འབྲས་དང་བུ་རམ་དང་། ཤ་ཁ་ར་དང་མར་གྱི་སྙིང་པོ་འབའ་ཤིག་ཟའོ། །མྱ་ངན་ལས་འདས་པའི་མདོ་སྡེ་དམ་པ་འདི་ཡང་དེ་དང་འདྲ་སྟེ། དབང་པོ་རྟུལ་པོ་བསོད་ནམས་ཆུང་ཞིང་སྐལ་བ་མེད་པ་དག་ཐོས་པར་མི་འདོད་དོ། །ཇི་ལྟར་བསོད་ནམས་ཆུང་བ་དག་འབྲས་
དང་ཤ་ཁ་ར་ལ་སོགས་པ་མི་འདོད་པ་ལྟར། ཐེག་པ་ཆུང་ངུ་གཉིས་ཀྱང་དེ་དང་འདྲ་སྟེ། མྱ་ངན་ལས་འདའ་བ་ཆེན་པོའི་མདོ་སྡེ་དམ་པ་འདི་མི་འདོད་དོ། །དེ་ལ་སོ་སོའི་སྐྱེ་བོ་གང་མདོ་སྡེ་འདི་ཐོས་པར་མོས་ཤིང་ཐོས་ཀྱང་རབ་ཏུ་དགའ་སྟེ། སྐུར་བ་མི་བྱེད་པ་ནི་སེམས་ཅན་བསོད་

47-1-96b

ནམས་ཅན་འབྲས་ལ་སོགས་པ་ཟ་བ་དང་མཚུངས་སོ། །རིགས་ཀྱི་བུ་དཔེར་ན་རྒྱལ་པོ་ཞིག་རིའི་གསེབ་ཤིན་དུ་ཉམ་ང་བའི་གནས་ན་འདུག་ན། བུ་རམ་གྱི་ཤིང་དང་། འབྲས་དང་། ཤ་ཁ་ར་ཞིག་ཡོད་ཀྱང་དཀོན་པས་ན་ཟད་ཀྱིས་དོགས་
ཏེ། ཟ་བའི་ཐུགས་ནི་མི་ཐུབ་ཀྱི་སོགས་སོ། །ཁྲེ་དང་ཡུག་པོའི་ས་བོན་འབའ་ཤིག་ཟའོ། །རྒྱལ་པོ་གཞན་ཞིག་གིས་ཐོས་ནས། དེ་སྙིང་བརྩེ་བའི་ཕྱིར་འབྲས་དང་ཤ་ཁ་ར་ལ་སོགས་པ་ཤིང་རྟས་བསྐྱས་ཏེ་བྱིན་ན། རྒྱལ་པོ་དེས་
ཀུན་ལ་བགོས་ཏེ་བྱིན་ནས་གདོད་ཟའོ། །ཟོས་ནས་ཐམས་ཅད་དགའ་སྟེ། འདི་སྐད་དུ་རྒྱལ་པོ་དེའི་ཕྱིར་བདག་ཅག་ཀྱང་སྔོན་མ་མྱོང་བའི་ཟས་སོས་པར་གྱུར་ཏོ་ཞེས་ཟེར་རོ། །རིགས་ཀྱི་བུ་སྐྱེས་བུ་གང་ཟག་བཞི་པོ་ཡང་དེ་དང་འདྲ་
སྟེ། བླ་ན་མེད་པའི་ཆོས་ཆེན་པོའི་དེད་དཔོན་ནོ། །གང་ཟག་རྣམ་པ་དེ་བཞི་ལས་གང་ཟག་གཅིག་གིས་ཕྱོགས་གཞན་ཞིག་ན། བྱང་ཆུབ་སེམས་དཔའ་ཚད་མེད་པ་རྣམས་ཐེག་པ་ཆེན་པོའི་མདོ་སྡེ་འདི་སློབ་བམ། བདག་
གླེགས་བམ་དུ་འདྲི་འམ། གཞན་དག་གླེགས་བམ་དུ་འདྲིར་གཞུག་གམ། རྙེད་པ་དང་བཀུར་སྟི་དང་། གྲགས་པའི་ཕྱིར་རམ། ཆོས་མངོན་པའི་ཕྱིར་རམ། རྟེན་དང་གནས་ཀྱི་ཕྱིར་རམ། མདོ་སྡེ་གཞན་དག་ཏུ་བསྐུར་ཞིང་བརྗེ་བ་
ཙམ་གྱི་ཕྱིར་གྱི། གཞན་དག་ལ་རྒྱས་པར་སྟོན་ཅིང་འཆད་མི་ནུས་པ་མཐོང་ན་དེ་དག་གི་ཕྱིར་མདོ་སྡེ་དམ་པ་འདི་ཕྱོགས་དེར་བསྐྱལ་ཏེ། བྱང་ཆུབ་སེམས་དཔའ་དེ་དག་ལ་བྱིན་ནས། བླ་ན་མེད་པའི་བྱང་ཆུབ་ཏུ་སེམས་བསྐྱེད་
དུ་བཅུག་སྟེ། བྱང་ཆུབ་ལ་བཀོད་ནས། བྱང་ཆུབ་སེམས་དཔའ་དེ་དག་ཀྱང་མདོ་སྡེ་འདི་ཐོས་པས་གཞན་དག་ལ་རྒྱས་པར་སྟོན་ཅིང་བཤད་དེ། སེམས་ཅན་ཚད་མེད་པ་རྣམས་ཀྱང་། ཐེག་པ་ཆེན་པོའི་མདོ་སྡེ་འདིའི་ཆོས་ཀྱི་རོ་
མྱོང་བར་བྱས་ན། དེ་ནི་བྱང་ཆུབ་སེམས་དཔའ་དེ་གཅིག་གི་མཐུས་སྔོན་མ་ཐོས་པའི་མདོ་སྡེ་ཐོས་པར་གྱུར་ཏེ། ཇི་ལྟར་རྒྱལ་པོ་གཅིག་གི་མཐུས་ཐམས་ཅད་ཀྱིས་སྔོན་མ་མྱོང་བའི་ཟས་མྱོང་བར་འགྱུར་བ་བཞིན་ནོ། །

47-1-97a

རིགས་ཀྱི་བུ་གཞན་ཡང་མྱ་ངན་ལས་འདའ་བ་ཆེན་པོའི་མདོ་གང་ན་ཡོད་པའི་གནས་དེ་ནི་རྡོ་རྗེ་ལྟ་བུ་ཡིན་ལ། དེ་ན་གནས་པའི་མི་ཡང་རྡོ་རྗེ་དང་འདྲ་བར་རིག་པར་བྱའོ། །གང་ཞིག་མདོ་སྡེ་འདི་མཉན་ན་དེ་ནི་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་སྟེ། ཇི་ལྟར་སྨོན་པ་བཞིན་དུ་ཡང་འགྲུབ་པར་འགྱུར་རོ། །ངས་འདིར་ཇི་སྐད་དུ་གསུངས་པ་བཞིན་དགེ་སློང་ཁྱེད་ཤིན་དུ་གཟུངས་སུ་ཟུང་ཤིག །སེམས་ཅན་
གང་ཞིག་མདོ་སྡེ་འདི་མཉན་མི་ནུས་ན་གང་ཟག་དེ་ནི་ཤིན་དུ་ཐུགས་བརྩེ་བའི་གནས་སུ་རིག་པར་བྱའོ། །དེ་ཅིའི་ཕྱིར་ཞེ་ན། གང་ཟག་དེས་ཐེག་པ་ཆེན་པོའི་མདོ་སྡེ་ཤིན་དུ་ཟབ་མོའི་དོན་འདི་གཟུང་མི་ནུས་པའི་ཕྱིར་རོ། །
དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་མྱ་ངན་ལས་འདས་ནས་ལོ་བཞི་བཅུའི་བར་དུ་ཡོངས་སུ་མྱ་ངན་ལས་འདས་
པ་ཆེན་པོའི་མདོ་འདི་འཛམ་བུ་གླིང་དུ་རྒྱས་པར་འགྱུར་རོ། །དེ་ནས་སའི་འོག་ཏུ་ནུབ་ནས་ཕྱིས་ཡུན་རིང་མོ་ཞིག་ན་ཕྱིར་ཡང་འབྱུང་ངོ་། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངའི་དམ་པའི་ཆོས་འདི་ལོ་
བརྒྱད་བཅུ་ལ་མ་གཏོག་པ་སྔར་ལོ་བཞི་བཅུའི་བར་དུ་འཛམ་བུའི་གླིང་འདིར་ཆོས་ཀྱི་ཆར་ཆེན་པོ་འབབ་པར་འགྱུར་རོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །
བཅོམ་ལྡན་འདས་མདོ་སྡེ་འདི་དམ་པའི་ཆོས་འཇིག་པའི་ཚེ། ཡང་དག་པའི་ཚུལ་ཁྲིམས་ཉམས་པའི་ཚེ། ཆོས་མ་ལགས་པ་འཕེལ་ཞིང་སྐྱེ་བའི་ཚེ། ཚུལ་བཞིན་བྱེད་པའི་སེམས་ཅན་དག་མ་མཆིས་པའི་ཚེ། 
སུ་དག་གིས་འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། ཁོང་དུ་ཆུད་པར་བགྱིད་པ་དང་། མཆོད་པ་དང་རིམ་གྲོ་དང་བཀུར་སྟི་བགྱིད་ཅིང་གླེགས་བམ་དུ་འདྲི་བ་དང་། རྣམ་པར་འགྲེལ་ཅིང་སྟོན་པར་འགྱུར་བ་དེ་བཞིན་

47-1-97b

གཤེགས་པས་སོ་སོའི་སྐྱེ་བོ་དག་ལས་ཐུགས་བརྩེ་བའི་སླད་དུ་རྒྱས་པར་ཕྱེ་སྟེ་བསྟན་དུ་གསོལ། བྱང་ཆུབ་སེམས་དཔའ་རྣམས་ཐོས་ནས་འཛིན་པར་འགྱུར་རོ། །གཟུངས་སུ་བཟུང་བས་ན་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ལེགས་སོ་ཤིན་ཏུ་ལེགས་སོ་ཞེས་བཀའ་སྩལ་ནས། རིགས་ཀྱི་བུ་ཁྱོད་ཀྱིས་དོན་འདི་དག་དྲིས་པ་ལེགས་
སོ། །རིགས་ཀྱི་བུ་སེམས་ཅན་གང་ཞིག་ཆུ་ཀླུང་དགའ་སྐྱེད་ཀྱི་བྱེ་མ་སྙེད་ཀྱི་སངས་རྒྱས་ལ་བྱང་ཆུབ་ཏུ་སེམས་བསྐྱེད་ན། དེས་ནི་དུས་ངན་པའི་ཚེ། མདོ་སྡེ་འདི་འཆང་བ་དང་། འཛིན་པར་འགྱུར་ཏེ། སྐུར་པ་མི་འདེབས་
སོ། །རིགས་ཀྱི་བུ་སེམས་ཅན་གང་ཞིག་ཆུ་ཀླུང་གང་གཱ་གཅིག་གི་བྱེ་མ་སྙེད་ཀྱི་སངས་རྒྱས་ལས་བྱང་ཆུབ་ཏུ་སེམས་བསྐྱེད་ན། དེས་ནི་དུས་ངན་པའི་ཚེ། ཆོས་འདི་ལ་མི་སྐུར་ཅིང་མདོ་སྡེ་འདི་ལ་མོས་པར་འགྱུར་ཏེ། 
གཞན་ལ་རྒྱས་པར་འབྱེད་ཅིང་སྟོན་ནི་མི་ནུས་སོ། །རིགས་ཀྱི་བུ་སེམས་ཅན་གང་ཞིག་ཆུ་ཀླུང་གང་གཱ་གཉིས་ཀྱི་སངས་རྒྱས་སྙེད་ལ་བྱང་ཆུབ་ཏུ་སེམས་བསྐྱེད་ན། དེས་ནི་དུས་ངན་པའི་ཚེ་ཆོས་འདི་ལ་མི་སྐུར་ཏེ། 
དད་ཅིང་མོས་པ་དང་འཆང་ཞིང་འཛིན་པ་དང་། ཀློག་པ་དང་འདོན་པར་འགྱུར་ཏེ། གཞན་ལ་རྒྱས་པར་སྟོན་ནི་མི་ནུས་སོ། །སེམས་ཅན་གང་ཞིག་ཀླུང་གང་གཱ་གསུམ་གྱི་བྱེ་མ་སྙེད་ཀྱི་སངས་རྒྱས་ལས་བྱང་ཆུབ་ཏུ་སེམས་
བསྐྱེད་ན། དེས་ནི་དུས་ངན་པའི་ཚེ་ཆོས་འདི་ལ་མི་སྐུར་ཏེ། འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། གླེགས་བམ་དུ་འདྲི་བར་འགྱུར་ཏེ། གཞན་ལ་སྟོན་མོད་ཀྱི་དོན་ཟབ་མོ་ནི་མི་ཤེས་སོ། །སེམས་
ཅན་གང་ཞིག་ཀླུང་གང་གཱ་བཞིའི་བྱེ་མ་སྙེད་ཀྱི་སངས་རྒྱས་ལས་བྱང་ཆུབ་དུ་སེམས་བསྐྱེད་ན། དེས་ནི་དུས་ངན་པའི་ཚེ་ན་ཆོས་འདི་ལ་མི་སྐུར་ཏེ། འཆང་བ་དང་། འཛིན་པ་དང་། ཀློག་པ་དང་། འདོན་པ་དང་གླེགས་བམ་

47-1-98a

དུ་འདྲི་བར་འགྱུར་ཏེ། དེས་ནི་གཞན་དག་ལ་དོན་ཟབ་མོ་བཅུ་དྲུག་གི་ཆ་གཅིག་ཙམ་སྟོན་པར་འགྱུར་རོ། །སྟོན་ཅིང་འཆད་མོད་ཀྱི་དེ་ཡང་རྫོགས་པར་ཤེས་པ་ནི་མ་ཡིན་ནོ། །སེམས་ཅན་གང་ཞིག་ཀླུང་གང་གཱ་ལྔའི་བྱེ་
མ་སྙེད་ཀྱི་སངས་རྒྱས་ལས་བྱང་ཆུབ་ཏུ་སེམས་བསྐྱེད་ན་དེས་ནི་དུས་ངན་པའི་ཚེ་ན་ཆོས་འདི་ལ་མི་སྐུར་ཏེ། འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། གླེགས་བམ་དུ་འདྲི་བ་དང་། གཞན་ལ་ཡང་དོན་ཟབ་མོ་བཅུ་
དྲུག་ཆའི་ཆ་བརྒྱད་སྟོན་ནུས་པར་འགྱུར་རོ། །སེམས་ཅན་གང་ཞིག་ཀླུང་གང་གཱ་དྲུག་གི་བྱེ་མ་སྙེད་ཀྱི་སངས་རྒྱས་ལས་བྱང་ཆུབ་ཏུ་སེམས་བསྐྱེད་ན། དེས་ནི་དུས་ངན་པའི་ཚེ་ན་ཆོས་འདི་ལ་མི་སྐུར་ཏེ། འཆང་བ་དང་། འཛིན་པ་
དང་། ཀློག་པ་དང་། འདོན་པ་དང་། གླེགས་བམ་དུ་འདྲི་བ་དང་། གཞན་ལ་ཡང་བཅུ་དྲུག་ཆའི་ཆ་བཅུ་གཉིས་སྟོན་ནུས་པར་འགྱུར་རོ། །སེམས་ཅན་གང་ཞིག་ཀླུང་གང་གཱ་བདུན་གྱི་བྱེ་མ་སྙེད་ཀྱི་སངས་རྒྱས་ལས་བྱང་ཆུབ་ཏུ་
སེམས་བསྐྱེད་ན་དེས་ནི་དུས་ངན་པའི་ཚེ་ན། ཆོས་འདི་ལ་མི་སྐུར་ཏེ། འཆང་བ་དང་། འཛིན་པ་དང་། འདོན་པ་དང་། ཀློག་པ་དང་། གླེགས་བམ་དུ་འདྲི་བ་དང་། གཞན་ལ་ཡང་བཅུ་དྲུག་ཆའི་ཆ་བཅུ་བཞི་སྟོན་ནུས་པར་འགྱུར་རོ། །
སེམས་ཅན་གང་ཞིག་ཀླུང་གང་གཱ་བརྒྱད་ཀྱི་བྱེ་མ་སྙེད་ཀྱི་སངས་རྒྱས་ལས་བྱང་ཆུབ་དུ་སེམས་བསྐྱེད་ན། དེས་ནི་དུས་ངན་པའི་ཚེ་ན། ཆོས་འདི་ལ་མི་སྐུར་ཏེ། འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། 
གཞན་ལ་ཡང་གླེགས་བམ་དུ་འདྲིར་བསྐུལ་བ་དང་། བདག་ཀྱང་ཉན་ཅིང་འཛིན་ལ་གཞན་དག་ཀྱང་ཉན་པ་དང་འཛིན་པ་དང་། ཀློག་པ་དང་། འདོན་པ་དང་། ཁོང་དུ་ཆུད་པར་བྱེད་པར་བསྐུལ་བ་དང་། འཇིག་རྟེན་ལ་སྙིང་བརྩེ་བའི་
ཕྱིར་ཤིན་དུ་སྲུང་ཞིང་མདོ་སྡེ་ལ་མཆོད་པ་བྱེད་པ་དང་། གཞན་དག་ཀྱང་མཆོད་པ་དང་རིམ་གྲོ་དང་བཀུར་བསྟི་དང་ཕྱག་བྱ་བ་དང་། ཀློག་པ་དང་། འདོན་པའི་བར་དུ་བསྐུལ་བ་ཡང་དེ་བཞིན་ནོ། །དེས་དོན་ཟབ་མོ་ཡང་རྫོགས་པར་

47-1-98b

ཁོང་དུ་ཆུད་པ་ནི་འདི་ལྟ་སྟེ། དེ་བཞིན་གཤེགས་པ་ནི་རྟག་དུ་གནས་པའི་ཆོས་ཅན་མི་འགྱུར་བ་མཐར་བདེ་བ་དང་། སེམས་ཅན་ལ་སངས་རྒྱས་ཀྱི་རང་བཞིན་ཡོད་པར་རྒྱས་པར་འཆད་པ་དང་། དེ་བཞིན་གཤེགས་པའི་
ཆོས་ཀྱི་གཏེར་ལ་ཤིན་ཏུ་མཁས་པ་དང་། སངས་རྒྱས་དེ་དག་ལ་མཆོད་པ་བྱས་ན་བླ་ན་མེད་པའི་ཡང་དག་པའི་ཆོས་འདི་དག་འཆང་བ་དང་འཛིན་པ་དང་། སྐྱོབ་པ་དང་། རྣམ་པར་གཞག་པ་རྟོགས་པར་འགྱུར་རོ། །
གང་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། གང་ཟག་དེ་ནི་མ་འོངས་པའི་དུས་སུ་ཡང་དག་པའི་ཆོས་འདི་འཆང་བ་དང་། འཛིན་པ་དང་། སྐྱོབ་པར་འགྱུར་ཞིང་ངེས་པར་ཡང་དག་
པའི་ཆོས་རྣམ་པར་གཞག་པར་རིག་པར་བྱའོ། །དེ་བས་ན་ཁྱོད་ཀྱིས་མ་འོངས་པའི་དུས་ངན་པའི་ཚེ། དམ་པའི་ཆོས་བསྲུང་བར་འགྱུར་བ་དག་ཤེས་པར་བྱའོ། །དེ་ཅིའི་ཕྱིར་ཞེ་ན། སེམས་བསྐྱེད་པ་དེ་དག་ནི་མ་འོངས་
པའི་དུས་སུ་གདོན་མི་ཟ་བར་བླ་ན་མེད་པ་ཡང་དག་པའི་ཆོས་དག་སྲུང་ཞིང་འཛིན་ནུས་པའི་ཕྱིར་རོ། །རིགས་ཀྱི་བུ་དགེ་སློང་ཚུལ་ཁྲིམས་ངན་པ་ཅན་དག་ནི་ང་མྱ་ངན་ལས་འདས་པ་ཐོས་ན་མྱ་ངན་མི་བྱེད་དེ་དེང་དེ་བཞིན་
གཤེགས་པ་མྱ་ངན་ལས་འདས་པས་ཚིམ་མོ། །དེ་བཞིན་གཤེགས་པ་འཇིག་རྟེན་ན་བཞུགས་ན་བདག་ཅག་གི་རྙེད་པའི་བགེགས་སུ་འགྱུར་ཏེ། ང་མྱ་ངན་ལས་འདས་ན་བདག་ཅག་གི་རྙེད་པ་ལ་བགེགས་བྱེད་ཅིང་འཕྲོག་པ་
མེད་དོ། །བགེགས་བྱེད་ཅིང་འཕྲོག་པ་མེད་པས་རྙེད་པ་ཡང་མང་དུ་འཐོབ་པར་འགྱུར་རོ། །དེ་བཞིན་གཤེགས་པ་འཇིག་རྟེན་ན་བཞུགས་ན་ཚུལ་ཁྲིམས་ཤིན་དུ་དམ་སྟེ། ང་མྱ་ངན་ལས་འདས་ན་ཐམས་ཅད་ལྷོད་པར་
འགྱུར་ཏེ། ལུས་ལ་ཆོས་གོས་འདི་ཡང་ཆོས་ཀྱི་ཚུལ་འཆོས་པ་ཙམ་དུ་ཟད་དེ། ད་ནི་ཞིག་ཅིང་རལ་བར་གྱུར་ཀྱང་ཤིང་གི་ཁ་ན་བ་དན་དང་འདྲའོ། །ཞེས་སྨྲ་བའི་གང་ཟག་དེ་ནི་མདོ་སྡེ་འདི་ལ་སྐུར་ཅིང་དབང་ཟའོ། །

47-1-99a

རིགས་ཀྱི་བུ་ཁྱོད་ཀྱིས་དེ་ལྟར་ཡིད་ལ་ཟུང་ཤིག །སེམས་ཅན་གང་ཞིག་ཚད་མེད་པའི་ཡོན་ཏན་ཕུན་སུམ་ཚོགས་པ་དང་ལྡན་ན་དེས་ནི་ཐེག་པ་ཆེན་པོའི་མདོ་སྡེ་འདི་ལ་དད་ཅིང་ཡིད་ཆེས་སོ། །
དད་ནས་ཀྱང་འཆང་ཞིང་འཛིན་ཏེ། སེམས་ཅན་གཞན་དག་ཐོས་པར་མོས་པ་ལ་རྒྱས་པར་བསྟན་ཅིང་བཤད་ན། གང་ཟག་དེས་ཐོས་པ་ཙམ་གྱིས་སྔོན་འདས་པའི་བསྐལ་པ་གྲངས་མེད་ཚད་མེད་པའི་མི་དགེ་བའི་ལས་ཐམས་
ཅད་ཞུ་ཞིང་བྱང་བར་འགྱུར་རོ། །གང་ཞིག་མདོ་སྡེ་འདི་ལ་མ་དད་དམ། ཡིད་མི་ཆེས་ན་ཚེ་འདི་ཉིད་ལ་ཡང་ནད་རྣམ་པ་ཚད་མེད་པས་གཟིར་ཏེ། སྡུག་བསྔལ་བར་འགྱུར་བ་དང་། མི་མང་པོས་གཤེ་ཞིང་སྤྱོ་བ་དང་ཚེ་འཕོས་ནས་
ཀྱང་ཀུན་གྱིས་བརྙས་ཤིང་སྨོད་པ་དང་། བྱད་བཞིན་མི་སྡུག་པ་དང་། འཚོ་བའི་ཡོ་བྱད་ཀྱིས་བྲེལ་ཕོངས་པ་དང་། ཅུང་ཟད་ཅིག་རྙེད་ན་ཡང་ངན་ལ་རྩུབ་པ་དང་། གང་ནས་གང་དུ་སྐྱེས་ཀྱང་རྟག་ཏུ་དབུལ་ཕོངས་ཤིང་མ་རབས་ངན་
པར་སྐྱེ་བ་དང་། དམ་པའི་ཆོས་ལ་སྐུར་པ་ངན་པར་ལྟ་བའི་རིགས་སུ་སྐྱེ་བ་དང་། མཐར་དུས་བྱེད་པ་ན་ཡུལ་འཁྲུགས་པ་འམ། མཚོན་ཆ་དང་ཕྲད་པ་དང་། རྒྱལ་པོ་ཆོས་བཞིན་མི་བྱེད་པ་དང་། དགྲ་སྡང་བ་དང་ཕྲད་པ་དང་། 
བཤེས་གཉེན་གྲོགས་པོ་ཡོད་ཀྱང་མི་ཕྲད་པ་དང་། འཚོ་བའི་ཡོ་བྱད་ཅི་ཡང་མི་རྙེད་པ་དང་། ཅུང་ཟད་ཅིག་རྙེད་ཀྱང་རྟག་ཏུ་བཀྲེས་སྐོམ་པས་ཡོངས་སུ་གདུངས་པ་དང་། མ་རབས་ངན་པ་དང་བཤེས་ཤིང་སྟེན་པ་དང་། རྒྱལ་པོ་དང་བློན་
པོས་ཀྱང་མི་འདོད་པ་དང་། ཅི་སྟེ་སྟོན་ཅིང་འཆད་པ་དོན་ལས་མ་གོལ་ཡང་ཡིད་མི་ཆེས་ཏེ། མི་འཛིན་པར་འགྱུར་རོ། །གང་ཟག་དེ་ནི་དགེ་བའི་གནས་བཟང་པོར་མི་སྐྱེ་སྟེ། བྱ་མདབ་མ་ཆག་པ་འཕུར་མི་ནུས་པ་ལྟར་གང་ཟག་དེ་ཡང་དེ་དང་
འདྲ་སྟེ། མ་འོངས་པའི་དུས་སུ་ལྷ་དང་མིའི་གནས་བཟང་པོར་མི་སྐྱེའོ། །དེ་ལ་གང་ཟག་སུ་ཞིག་ཐེག་པ་ཆེན་པོའི་མདོ་སྡེ་འདི་ལ་ཡིད་ཆེས་ཤིང་དད་ན་མངོན་པར་ཐོབ་པའི་ལུས་ངན་ལ་མི་སྡུག་ཀྱང་མདོ་སྡེ་འདིའི་ཡོན་ཏན་གྱིས་བྱད་

47-1-99b

གཟུགས་བཟང་བ་དང་། གཟི་བརྗིད་དང་མཐུར་ལྡན་པ་དང་མདངས་ཀྱང་འཕེལ་ཞིང་སྐྱེ་སྟེ། འཇིག་རྟེན་དུ་བཅས་པ་ལྷ་དང་། མི་ཐམས་ཅད་ཀྱི་ཡིད་དུ་འོང་ཞིང་ལྟ་འདོད་པ་དང་། རིམ་གྲོ་དང་། བཀུར་སྟི་དང་། མཆོད་པ་བྱེད་ཅིང་གཏོང་མི་
ཕོད་པར་འགྱུར་རོ། །རྒྱལ་པོ་དང་། བློན་པོ་དང་། གཉེན་དང་། འཁོར་རྣམས་ཀྱིས་སྨྲ་ཞིང་བསྒོ་བ་ལ་དད་ཅིང་ཡིད་ཆེས་པར་འགྱུར་རོ། །གལ་ཏེ་ངའི་ཉན་ཐོས་ཀྱི་ཉེ་གནས་གང་ཞིག་གིས་མཆོག་གི་ཕུལ་དུ་གྱུར་པའི་དོན་སྤྱོད་པར་འདོད་ན་
འཇིག་རྟེན་དུ་བཅས་པ་ལ་ཐེག་པ་ཆེན་པོའི་མདོ་སྡེ་འདི་རྒྱས་པར་འགྲེལ་ཅིང་བསྟན་པར་བྱའོ། །རིགས་ཀྱི་བུ་དཔེར་ན་ཟིལ་པ་ནི་རིང་དུ་གནས་པར་འདོད་ཀྱང་ཉི་མ་ཤར་བ་ལས་མི་འདའ་སྟེ། ཉི་མ་ཤར་མ་ཐག་ཏུ་ལྷག་མ་ཡང་མ་ལུས་
པར་མེད་པར་འགྱུར་རོ། །རིགས་ཀྱི་བུ་སེམས་ཅན་དེ་དག་གི་མི་དགེ་བའི་ལས་ཇི་སྙེད་ཡོད་པ་ཡང་དེ་དང་འདྲ་སྟེ། རིང་དུ་གནས་པར་འདོད་ཀྱང་མྱ་ངན་ལས་འདས་པ་ཆེན་པོའི་ཉི་མ་ཤར་བ་མཐོང་བ་ལས་མི་འདའོ། །ཉི་མ་དེ་ཤར་མ་
ཐག་དུ་དེ་དག་གི་མི་དགེ་བའི་ལས་ཐམས་ཅད་ཞུ་ཞིང་བྱང་བར་འགྱུར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་གང་ཟག་རབ་ཏུ་བྱུང་བ་སྐྲ་དང་ཁ་སྤུ་བྲེགས་ཏེ་ཆོས་གོས་གྱོན་ན་དགེ་ཚུལ་གྱི་ཚུལ་ཁྲིམས་བཅུ་མ་མནོས་
ཀྱང་ཁྱིམ་བདག་གཅིག་གིས་དགེ་འདུན་ཀུན་བོས་ཏེ། ཁྲིམས་མ་མནོས་པ་ཡང་དགེ་འདུན་འགྲོན་དུ་བོས་པའི་ནང་དུ་གཏོགས་ན་ཁྲིམས་མ་མནོས་མོད་ཀྱི། དགེ་འདུན་གྱི་གྲངས་སུ་འགྲོའོ། །རིགས་ཀྱི་བུ་སེམས་ཅན་གང་ཞིག་
ཐེག་པ་ཆེན་པོའི་མདོ་ཡོངས་སུ་མྱ་ངན་ལས་འདས་པ་འདི་བསླབ་པར་སེམས་བསྐྱེད་དེ། གླེགས་བམ་དུ་འདྲི་འམ། འཆང་ངམ་འཛིན་ཏམ། ཀློག་གམ་འདོན་པ་ཡང་དེ་དང་འདྲ་སྟེ། ཕུན་སུམ་ཚོགས་པ་མ་ཡིན་པ་ཡང་ས་
བཅུར་ཕྱིན་པ་སྟེ། ས་བཅུ་པའི་གྲངས་སུ་བགྲང་ངོ་། །གལ་ཏེ་སེམས་ཅན་གང་སངས་རྒྱས་ཀྱི་ཉེ་གནས་སུ་གྱུར་ཀྱང་རུང་། མ་གྱུར་ཀྱང་རུང་སྟེ། འདོད་ཆགས་ཀྱིས་སྐྲག་གམ། ཁེ་དང་རྙེད་པའི་ཕྱིར་མདོ་སྡེ་འདིའི་ཚིགས་སུ་

47-1-100a

བཅད་པ་གཅིག་ཙམ་མཉན་ཏེ་ཐོས་ནས་མི་སྐུར་ན། གང་ཟག་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཉེ་བར་བསྙེན་པ་ཡིན་པར་རིག་པར་བྱའོ། །རིགས་ཀྱི་བུ་རྒྱུ་དང་རྐྱེན་དེ་ལྟ་བས་ན། 
སྐྱེས་བུ་ཆེན་པོ་བཞི་སངས་རྒྱས་ཀྱིས་གསུངས་པ་བཞིན་དུ་སངས་རྒྱས་ཀྱིས་གསུངས་པ་མ་ཡིན་ཞེས་ཟེར་ན། དེ་ནི་གནས་མ་ཡིན་ནོ། །དེ་བས་ན་སྐྱེས་བུ་ཆེན་པོ་བཞི་ནི་འཇིག་རྟེན་གྱི་རྟེན་དང་གནས་ལྟ་བུར་
ངས་གསུངས་སོ། །རིགས་ཀྱི་བུ་དེ་བས་ན་ཁྱོད་ཀྱིས་སྐྱེས་བུ་བཞི་པོ་ལ་མཆོད་པ་བྱའོ། །བཅོམ་ལྡན་འདས་བདག་ཅག་གིས་སྐྱེས་བུ་ཆེན་པོ་བཞི་པོ་དེ་ཇི་ལྟ་བུར་འཚལ་ཅིང་མཆོད་པར་བགྱི། བཅོམ་
ལྡན་འདས་ཀྱིས་འོད་སྲུང་ལ་བཀའ་སྩལ་པ། གང་ན་དམ་པའི་ཆོས་སྲུང་ཞིང་རྣམ་པར་གཞག་པའི་གང་ཟག་དེ་ལ་ནི་གསོལ་བ་གདབ་ཅིང་ལུས་དང་སྲོག་ཀྱང་བཏང་སྟེ་མཆོད་པ་བྱའོ་ཞེས་ངས་ཐེག་པ་ཆེན་པོའི་
མདོ་སྡེ་གཞན་ལས་ཀྱང་འདི་སྐད་དུ་གསུངས་སོ། །དམ་པའི་ཆོས་དག་ཤེས་ན། །རྒན་ནམ་གཞོན་ཡང་རུང་སྟེ། །ཕ་མ་འམ་བྲམ་ཟེ་ལྟ་བུར། །མཆོད་ཅིང་སྟི་སྟང་ཕྱག་བྱ། །དམ་པའི་ཆོས་དག་ཤེས་ན། །རྒན་
ནམ་གཞོན་ཡང་རུང་སྟེ། །ལྷ་དག་དབང་ཕྱུག་མཆོད་ལྟར། །མཆོད་ཅིང་སྟི་སྟང་ཕྱག་བྱ། །དེ་ནས་ཡང་བཅོམ་ལྡན་འདས་ལ། བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་
འདས་ཀྱིས་གསུངས་པ་བཞིན་ཏེ། བླ་མ་དང་སློབ་དཔོན་ལ་མཆོད་པ་བགྱི་བ་ནི་དེ་ལགས་ན་ཡང་རྒྱས་པར་བཤད་དུ་གསོལ། གལ་ཏེ་བླ་མ་ཚུལ་ཁྲིམས་དང་ལྡན་པ་ཞིག་གཞོན་ནུ་ལས་སྔོན་མ་ཐོས་པ་དག་
འདྲི་ན་གང་ཟག་དེ་ལ་ཕྱག་བགྱི་འམ། ཅི་སྟེ་དེ་ལ་ཕྱག་བགྱིས་ན། ཚུལ་ཁྲིམས་སྲུང་བ་ཞེས་བགྱིར་ཡང་མི་རུང་། དེ་ལ་གཞོན་ནུ་ཚུལ་ཁྲིམས་དང་ལྡན་པ་ཞིག་བླ་མ་རྒན་པོ་ཚུལ་ཁྲིམས་ཉམས་པ་ཞིག་ལས་

47-1-100b

སྔོན་མ་ཐོས་པ་དག་འདྲི་ན་དེ་ལ་ཡང་ཕྱག་བགྱི་འམ། གལ་ཏེ་རབ་ཏུ་བྱུང་བ་ཞིག་ཁྱིམ་པ་ལས་སྔོན་མ་ཐོས་པ་འདྲི་ན་དེ་ལ་ཡང་ཕྱག་བགྱི་བ་ལགས་སམ། རབ་ཏུ་བྱུང་བས་ཁྱིམ་པ་ལ་ཕྱག་མི་བྱའོ་ཞེས་ཀྱང་
གསུངས་ལ་སངས་རྒྱས་ཀྱི་ཆོས་ཀྱིས་ཆུང་ངུ་གཞོན་ནུ་དག་གིས་བླ་མ་རྒན་པོ་ལ་བཀུར་བསྟི་དང་ཕྱག་བྱའོ། །དེ་ཅིའི་ཕྱིར་ཞེ་ན། བླ་མ་རྒན་པོ་དག་སྔར་བསྙེན་པར་རྫོགས་པའི་ཕྱིར་རིམ་གྲོ་དང་ཕྱག་བྱའོ་ཞེས་ཀྱང་
གསུངས། ཡང་བཅོམ་ལྡན་འདས་ཀྱིས་གསུངས་པ་ལྟར་ན་ཚུལ་ཁྲིམས་ཉམས་པ་ནི་སངས་རྒྱས་ཀྱི་ཆོས་ཀྱི་ནང་དུ་མི་ཆུད་དེ། དཔེར་ན་ཞིང་གཤིན་པའི་ནང་ན་ཡུག་པོ་འམ། རྩྭ་ལྟ་བུ་ཞེས་ཀྱང་གསུངས། གཞན་
དུ་ན་བཅོམ་ལྡན་འདས་ཀྱིས་དམ་པའི་ཆོས་ཤེས་ན་རྒན་ནམ་གཞོན་ཡང་རུང་། དེ་ལ་ནི་ཇི་ལྟར་ལྷ་རྣམས་ཀྱིས་དབང་ཕྱུག་རྒྱལ་པོ་ལ་ཕྱག་བྱེད་ཅིང་རིམ་གྲོ་བྱེད་པ་ལྟར་མཆོད་དོ་ཞེས་གསུངས་ན་དོན་རྣམ་པ་གཉིས་པོ་
འདི་ཇི་ལྟ་ལགས། དེ་བཞིན་གཤེགས་པས་གསུངས་པ་འདི་ལ་འགལ་བ་མ་མཆིས་སམ། བཅོམ་ལྡན་འདས་ཀྱིས་གསུངས་པ་ལྟར་རྣམ་པ་གཞན་དུ་ན་དགེ་སློང་ཚུལ་ཁྲིམས་སྲུང་བ་ཡང་ཉེས་པ་མ་མཆིས་
ཤེས་བཅོམ་ལྡན་འདས་ཀྱིས་ཅིའི་སླད་དུ་དེ་སྐད་ཅེས་གསུངས། བཅོམ་ལྡན་འདས་ཀྱིས་མདོ་སྡེ་གཞན་དག་ལས་ཚུལ་ཁྲིམས་ཉམས་པ་དག་ཆད་པས་གཅོད་དོ་ཞེས་གསུངས་པ་ཡང་དོན་ངེས་པ་མ་ལགས་སོ། །བཅོམ་
ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་ངས་མ་འོངས་པའི་དུས་ན་བྱང་ཆུབ་སེམས་དཔའ་ཐེག་པ་ཆེན་པོ་ལ་རྩོལ་བ་དག་གི་ཕྱིར་ཚིགས་སུ་བཅད་པ་དེ་སྐད་ཅེས་གསུངས་ཀྱི། ཉན་ཐོས་ཀྱི་ཉེ་གནས་ཀྱི་ཕྱིར་
གསུངས་པ་ནི་མ་ཡིན་ནོ། །རིགས་ཀྱི་བུ་ངས་སྔོན་གསུངས་པ་ལྟར་ན་དམ་པའི་ཆོས་རྣམ་པར་འཇིག་ཅིང་ཚུལ་ཁྲིམས་ངན་པ་ཅན་དག་སྤྱོད་པ་ན། ཚུལ་ཁྲིམས་ངན་པ་ཅན་དག་འབྱུང་ཞིང་ཆོས་མ་ཡིན་པ་སྤྱོད་པ་ན། 

47-1-101a

འཕགས་པ་ཐམས་ཅད་མངོན་པར་མི་འབྱུང་བ་ན། བྲན་ཕོ་དང་བྲན་མོ་དང་མ་བརྟགས་པའི་དངོས་པོ་དག་འཆང་ཞིང་སྤྱོད་པའི་དུས་ན། སྐྱེས་བུ་རྣམ་པ་བཞི་པོ་ལས་གཅིག་ཙམ་ཞིག་མངོན་པར་འབྱུང་
སྟེ། སྐྲ་དང་ཁ་སྤུ་བྲེགས་ནས་རབ་ཏུ་བྱུང་སྟེ། ལམ་ལ་ནན་ཏན་བྱེད་དོ། །དེས་དགེ་སློང་དག་སོ་སོ་ནས་བྲན་ཕོ་དང་བྲན་མོ་དང་ལས་བྱེད་པའི་མི་མ་བརྟགས་པའི་དངོས་པོ་འཆང་སྟེ། བརྟགས་སམ་མ་བརྟགས་
པ་ཡང་མི་ཤེས། འདུལ་བ་དང་། འདུལ་བ་མ་ཡིན་པ་ཡང་མི་ཤེས་པ་དེ་དག་མཐོང་ནས། སྐྱེས་བུ་དེས་དགེ་སློང་དེ་དག་གདུལ་བའི་ཕྱིར། ཚུལ་ཁྲིམས་འདྲ་བར་བྱེད་ཀྱང་སྤྱོད་པ་མི་མཐུན་ཏེ། བདག་གིས་སྤྱོད་པ་
འི་གནས་དང་། སངས་རྒྱས་ཀྱི་སྤྱོད་ཡུལ་ཡང་ཤིན་དུ་རྟོགས་ཤིང་ཤེས་ལ་ཕ་རོལ་པོས་ཕས་ཕམ་པའི་ཉེས་པ་བྱུང་བར་མཐོང་ཡང་ཅང་མི་སྨྲ་སྟེ་མི་གླེང་ངོ་། །དེ་ཅིའི་ཕྱིར་ཞེ་ན། བདག་འཇིག་རྟེན་དུ་བྱུང་བ་ནི་
དམ་པའི་ཆོས་སྲུང་ཞིང་རྣམ་པར་གཞག་པའི་ཕྱིར་ཏེ། དེ་བས་ན་ཅང་མི་སྨྲ་སྟེ་མི་གླེང་ངོ་། །རིགས་ཀྱི་བུ་དེ་ལྟར་སྐྱེས་བུ་དེས་ཆོས་བསྲུང་བའི་ཕྱིར་ཉེས་པ་ཡོད་ཀྱང་ཚུལ་ཁྲིམས་ཞིག་པ་ཞེས་མི་བྱའོ། །རིགས་ཀྱི་
བུ་དཔེར་ན་རྒྱལ་པོ་ཞིག་ནད་ཀྱིས་བཏབ་སྟེ་ཤི་ལ་རྒྱལ་ཚབ་ནི་ན་གཞོན་ཏེ། སྲིད་ཀྱི་ལས་མི་ནུས་པའི་སྐབས་སུ་རེས་འགའ་ནི་གདོལ་པ་ནོར་རིན་པོ་ཆེ་ཤིན་དུ་མང་ཞིང་རབ་ཏུ་ཕྱུག་པོ་ལོངས་སྤྱོད་དང་ལྡན་པ་
འཁོར་རབ་ཏུ་མང་བ་ཞིག་མཐུ་བསྙེམས་ཏེ། རྒྱལ་པོའི་སྲིད་ཕྲོགས་ཏེ། རྒྱལ་པོར་ཞུགས་ན་ཡུལ་དེ་ན་གནས་པའི་ཁྱིམ་བདག་དང་། བྲམ་ཟེ་ལ་སོགས་པ་ཕལ་ཆེར་ཡུལ་གཞན་དུ་འབྱེར་ཞིང་འབྲོས་སོ། །
ཅི་སྟེ་དེ་ན་གནས་ན་ཡང་རྒྱལ་པོ་ཆེན་པོ་དེ་ལ་ལྟ་ཡང་མི་འདོད་དོ། །གལ་ཏེ་ཁྱིམ་བདག་དང་། ཚོང་དཔོན་དང་། བྲམ་ཟེ་ལ་སོགས་པ་ཡུལ་གཏོང་མ་ཕོད་པ་ཡང་དཔེར་ན་སྐྱེད་ཤིང་གར་སྐྱེས་པའི་གནས་དེ་ཉིད་དུ་ཤི་

47-1-101b

བར་འགྱུར་བ་དང་མཚུངས་སོ། །རྒྱལ་པོ་གདོལ་པ་དེས་ཡུལ་མི་དག་བྱེར་བྲོས་མང་བར་རྟོགས་ནས། གཞན་ཡང་གདོལ་པ་དག་ལམ་དང་། སྲང་ཀུན་བསྲུངས་ཏེ། ཞག་བདུན་གྱི་བར་དུ་རྔ་བརྡུངས་ནས་འདི་སྐད་དུ་ཀྱེ་བྲམ་ཟེ་
དག་ཁྱེད་ལ་གང་ཞིག་གིས་བདག་གི་སྤྱི་བོ་ནས་དབང་བསྐུར་ན་ཡུལ་གྱི་ཕྱེད་སྦྱིན་ནོ་ཞེས་བོས་ཀྱང་བྲམ་ཟེ་གཅིག་གིས་ཀྱང་མ་བཏུལ་ཏེ། སོ་སོ་ནས་གཅིག་ལ་གཅིག་འདི་སྐད་དུ་བྲམ་ཟེའི་རིགས་ལས་འདི་ལྟ་བུའི་ལས་བྱེད་པའི་མི་
སྲིད་དོ་ཞེའོ། །རྒྱལ་པོ་གདོལ་པས་ཡང་འདི་སྐད་དུ་བྲམ་ཟེ་ཁྱེད་ལས་གཅིག་ཙམ་ཡང་བདག་གི་སྟོན་པར་འགྱུར་བ་མེད་ན། བྲམ་ཟེ་ཁྱེད་ཀྱང་རིགས་ངན་གདོལ་པ་དང་ལྷན་ཅིག་དུ་བཞག་ཅིང་བསྙལ་ལ་ལས་ཀྱང་འདྲ་བར་
བྱེད་དུ་གཞུག་གོ། །གལ་ཏེ་བདག་གི་སྤྱི་བོ་ནས་དབང་བསྐུར་ན་ཡུལ་གྱི་ཕྱེད་ཀྱང་སྦྱིན་ནོ། །ཚིག་འདི་མི་བརྫུན་པར་དམ་ཚིག་ཀྱང་གཟུང་ངོ་། །སུམ་བཅུ་རྩ་གསུམ་གནམ་གྱི་བདུད་རྩི་མི་འཆི་བ་ཡང་བགོས་ཏེ་སྦྱིན་ནོ་ཞེས་
སྨྲས་སོ། །དེའི་ཚེ་ན་བྲམ་ཟེའི་བུ་ཤིན་ཏུ་ན་གཞོན་པ་ཤིན་ཏུ་ཚངས་པར་སྤྱོད་པ་ཐོར་གཙུག་ཀྱི་མཚན་དང་ལྡན་པ། སྔགས་དང་ཆོ་ག་ལ་ཤིན་ཏུ་མཁས་པ་ཞིག་རྒྱལ་པོ་ག་ལ་བ་དེར་སོང་ནས་རྒྱལ་པོ་དེ་ལ་རྒྱལ་པོ་ཆེན་པོས་
བཀའ་སྩལ་པ། བདག་གིས་བགྱིའོ་ཞེས་གསོལ་ཏོ། །དེ་ནས་རྒྱལ་པོ་དེ་ཤིན་ཏུ་དགའ་ནས་བྲམ་ཟེ་གཞོན་ནུ་དེ་སྤྱི་བོ་ནས་དབང་བསྐུར་བའི་སྟོན་པར་བཅུག་གོ། །བྲམ་ཟེ་གཞན་དག་དེ་ཞེས་ཐོས་ནས་ཐམས་ཅད་
གཞོན་ནུ་དེ་ལ་གཤེ་སྟེ། ཁྱོད་བྲམ་ཟེ་ཡིན་ན་ཅིའི་ཕྱིར་རིགས་ངན་གདོལ་པ་དེའི་སློབ་དཔོན་བྱེད་ཅེས་སྤྱོས་སོ། །དེའི་ཚེ་རྒྱལ་པོ་དེས་ཡུལ་དེའི་ཕྱེད་གཞོན་ནུ་དེ་ལ་བྱིན་ནས། ཡུལ་གྱི་སྲིད་ཀྱང་ལྷན་ཅིག་ཏུ་འཛིན་
ཏོ། །ཕྱིས་རིང་ཞིག་ལོན་པ་དང་གཞོན་ནུ་དེས་རྒྱལ་པོ་ལ་འདི་སྐད་ཅེས་གསོལ་ཏོ། །བདག་གི་ཁྱིམ་བོར་ཏེ་རྒྱལ་པོའི་སྟོན་པར་མཆིས་ན་རྒྱལ་པོ་ལ་སྔགས་དང་སྒྱུ་རྩལ་ལ་སོགས་པ་བསྟན་ཅིང་བསླབས་ཀྱང་རྒྱལ་པོས་

47-1-102a

ནི་བདག་ལ་ཉེ་བར་མི་སེམས་སོ། །རྒྱལ་པོས་སྨྲས་པ། བདག་གིས་ཁྱོད་ལ་ཉེ་བར་ཇི་ལྟར་མི་སེམས། གཞོན་ནུས་གསོལ་པ། སྔོན་གྱི་རྒྱལ་པོའི་མི་འཆི་བའི་སྨན་ད་དུང་མ་འཚལ་ཏོ། །
རྒྱལ་པོས་སྨྲས་པ། ལེགས་སོ་ལེགས་སོ། །སྟོན་པ་ཆེན་པོ་བདག་གིས་དེ་ལྟར་མ་འཚལ་གྱིས། སྟོན་པ་བཞེད་ན་ཐམས་ཅད་བཞེས་ཤིག ། །དེ་ནས་གཞོན་ནུ་དེས་རྒྱལ་པོས་གནང་བའི་སྨན་བླངས་ནས་
ཁྱིམ་དུ་འོངས་ཏེ་བློན་པོ་ཆེན་པོ་རྣམས་དང་ལྷན་ཅིག་འཐུངས་སོ། །བློན་པོ་རྣམས་ཀྱིས་འཐུངས་ནས་ཤིན་ཏུ་བདེ་བར་གྱུར་ཏེ། སྟོན་པ་ལ་སྨན་མི་འཆི་བ་བདུད་རྩི་ལྟ་བུ་ཡོད་དོ་ཞེས་རྒྱལ་པོ་ལ་གསོལ་
ཏོ། །རྒྱལ་པོས་དེ་སྐད་ཅེས་ཐོས་ནས་སྟོན་པ་ལ་འདི་སྐད་ཅེས་སྨྲས་སོ། །སྟོན་པ་ཆེན་པོ་བློན་པོ་ཆེན་པོ་རྣམས་འཚལ་བའི་བདུད་རྩི་དག་ཀྱང་ཤས་མི་སྩལ་ཏམ། དེ་ནས་གཞོན་ནུ་དེས་དུག་དང་བསྲེས་
ཏེ་རྒྱལ་པོ་ལ་བྱིན་ནོ། །རྒྱལ་པོ་དེ་ཟོས་མ་ཐག་དུ་དུག་ལངས་ནས་ཅི་ཡང་མི་ཚོར་ཏེ། ཤི་བ་བཞིན་དུ་ས་ལ་འགྱེལ་ཏོ། །དེ་ནས་བྲམ་ཟེ་གཞོན་ནུ་དེས་རྒྱལ་ཚབ་རྒྱལ་པོར་དབང་བསྐུར་ནས། འདི་སྐད་
དུ་སེང་གེའི་ཁྲི་ལ་ཆོས་ཉིད་ཀྱིས་གདོལ་པ་ལ་སོགས་པ་འདུག་པ་མ་ལགས་ཀྱི་བདག་གིས་གནའ་ནས་ཀྱང་རིགས་ངན་གདོལ་པས་རྒྱལ་པོ་བགྱིད་ཅེས་མ་ཐོས་སོ། །རིགས་ངན་གདོལ་པས་རྒྱལ་པོ་བགྱིད་ཅིང་
འབངས་ཀྱི་སྲིད་བཟུང་བའི་ཆོས་མ་མཆིས་ཀྱིས་ཁྱོད་ཀྱིས་རྒྱལ་པོ་མཛད་དོ། །དྲང་པོའི་ཆོས་ཀྱིས་རྒྱལ་པོའི་སྲིད་ཟུང་ཤིག ། །དེའི་ཚེ་གཞོན་ནུ་དེས་ལས་ཀུན་བྱས་པའི་འོག་ཏུ་ཕྱིར་ཡང་གསོ་བའི་སྨན་རིགས་
ངན་གདོལ་པ་ལ་བྱིན་ནས་ཕྱིར་དྲན་པར་བྱས་སོ། །ཕྱིར་དྲན་པར་བྱས་ནས་ཡུལ་དེ་ནས་བསྐྲད་དོ། །དེའི་ཚེ་གཞོན་ནུ་དེས་དེ་ལྟ་བུ་དག་བྱས་མོད་ཀྱི། འོན་ཀྱང་བྲམ་ཟེའི་ཆོས་ལ་མ་ཉམས་སོ། །

47-1-102b

ཁྱིམ་བདག་དང་བྲམ་ཟེ་ལ་སོགས་པ་དེ་ལྟ་བུར་གྱུར་པ་མཐོང་ནས་ངོ་མཚར་རྨད་དེ་ལེགས་སོ་ལེགས་སོ། །སྐྱེས་བུ་ཁྱོད་ཀྱིས་རིགས་ངན་གདོལ་པ་བསྐྲད་པ་ལེགས་པར་བསྐྲད་དོ་ཞེས་ཀུན་གྱིས་བསྔགས་ཤིང་
བསྟོད་པར་གྱུར་ཏོ། །རིགས་ཀྱི་བུ་ང་ཡོངས་སུ་མྱ་ངན་ལས་འདས་པའི་འོག་ཏུ་དམ་པའི་ཆོས་བསྲུང་ཞིང་འཛིན་པའི་བྱང་ཆུབ་སེམས་དཔའ་ལ་སོགས་པ་ཡང་དེ་དང་འདྲ་སྟེ། སྦྱོར་བའི་ཐབས་ཀྱིས་ཚུལ་
ཁྲིམས་ཉམས་པ་མིང་ཙམ་གྱི་དགེ་སློང་མ་བརྟགས་པའི་རྫས་ཐམས་ཅད་འཆང་བ་དང་ལས་འཐུན་པར་སྤྱོད་དོ། །དེའི་ཚེ་ན་བྱང་ཆུབ་སེམས་དཔའ་དག་གིས་གང་ཟག་ལ་ལ་ཚུལ་ཁྲིམས་མང་དུ་ཉམས་
ཀྱང་ཚུལ་ཁྲིམས་ལོག་པ་ཅན་གྱི་དགེ་སློང་སྡིག་པ་ཅན་དག་ལ་ཆད་པས་གཅོད་ན་དེའི་གན་དུ་སོང་སྟེ་བསྙེན་བཀུར་དང་ཕྱག་ཀྱང་བྱེད། ཡོ་བྱད་རྣམ་པ་བཞི་ཡང་འབུལ། དེ་མ་ཡིན་པ་མདོ་སྡེ་དང་
འཚོ་བའི་ཡོ་བྱད་ཀུན་འབུལ་ལོ། །ཅི་སྟེ་བདག་ལ་མི་བདོག་ན་ཡང་ཐབས་རྣམ་པ་སྣ་ཚོགས་ཀྱིས། སྦྱིན་བདག་ལས་ཀྱང་སློངས་ཏེ་འབུལ་ལོ། །དེ་བས་ན་མ་བརྟགས་པའི་དངོས་པོ་རྣམ་པ་བརྒྱད་
ཀྱང་འཆང་ཞིང་སྤྱོད་དོ། །དེ་ཅིའི་ཕྱིར་ཞེ་ན། གང་ཟག་དེས་དགེ་སློང་སྡིག་ཅན་འདུལ་བ་ནི་ཇི་ལྟར་བྲམ་ཟེ་གཞོན་ནུས་རིགས་ངན་གདོལ་པ་འདུལ་བ་བཞིན་ནོ། །དེ་ལྟར་བྱང་ཆུབ་སེམས་དཔས་
གང་ཟག་དེ་ལ་བསྙེན་བཀུར་རམ་ཕྱག་བྱེད་དམ། མ་བརྟགས་པའི་དངོས་པོ་བརྒྱད་པོ་འཆང་ཡང་སྡིག་པ་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་དེས་དགེ་སློང་སྡིག་ཅན་རྣམས་
བསྐྲད་དེ་ཡོངས་སུ་དག་པའི་དགེ་འདུན་རྣམས་རབ་ཏུ་བདེ་བར་བྱ་བའི་ཕྱིར། ཤིན་ཏུ་རྒྱས་པའི་ཐེག་པ་ཆེན་པོའི་མདོ་སྡེ་རྒྱས་ཤིང་འཇིག་རྟེན་དུ་བཅས་པ་ལྷ་དང་མི་ཐམས་ཅད་ལ་ཕན་པ་དང་བདེ་བར་

47-1-103a

བྱ་བའི་དོན་གྱི་ཕྱིར་རོ། །རིགས་ཀྱི་བུ་དེའི་རྒྱུ་དེའི་རྐྱེན་ཀྱིས་ན་མདོ་སྡེ་དག་ལས་ངས་ཚིགས་སུ་བཅད་པ་གཉིས་པོ་གསུངས་ཏེ། བྱང་ཆུབ་སེམས་དཔའ་དག་ཀྱང་དམ་པའི་ཆོས་བསྲུང་བའི་གང་
ཟག་ལ་བསྔགས་ཤིང་བསྟོད་པ་ནི་ཇི་ལྟར་ཁྱིམ་བདག་དང་བྲམ་ཟེ་ལ་སོགས་པས་བྲམ་ཟེ་གཞོན་ནུ་ལེགས་སོ་ལེགས་སོ་ཞེས་བསྔགས་པ་བཞིན་ནོ། །གང་ཆོས་བསྲུང་བའི་བྱང་ཆུབ་སེམས་དཔའ་ནི་དེ་
ལྟ་བུའི་ཚུལ་དུ་བྱའོ། །དེ་ལ་གང་ཞིག་ཆོས་བསྲུང་བའི་གང་ཟག་དག་ཚུལ་ཁྲིམས་ལོག་པ་ཅན་དང་ལས་ལྷན་ཅིག་དུ་བྱེད་པ་མཐོང་བས་ཉེས་པ་ཡོད་པར་འཛིན་ན་གང་ཟག་དེ་ནི་བདག་ལ་གནོད་པར་རིག་པར་
བྱ་སྟེ། ཆོས་བསྲུང་བ་དེ་ལ་ནི་ཉེས་པ་མེད་དོ། །རིགས་ཀྱི་བུ་དགེ་སློང་གང་ཞིག་ཚུལ་ཁྲིམས་ཉམས་ནས་ང་རྒྱལ་གྱི་དབང་དུ་གྱུར་ཏེ། འཆབ་ཅིང་མི་འགྱོད་ན་གང་ཟག་དེ་ནི་ཡང་དག་པར་ཚུལ་ཁྲིམས་
ཉམས་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཆོས་བསྲུང་བའི་ཕྱིར་ཉམས་པ་ཡོད་ཀྱང་ཚུལ་ཁྲིམས་ཉམས་པའོ་ཞེས་མི་བྱའོ། །དེ་ཅིའི་ཕྱིར་ཞེ་ན། ང་རྒྱལ་གྱི་དབང་དུ་གྱུར་
པ་མ་ཡིན་ཏེ། འཐོལ་ཞིང་བཤགས་པའི་ཕྱིར་རོ། །རིགས་ཀྱི་བུ་དེ་བས་ན་ངས་མདོ་སྡེ་ལས་ཕྱོགས་གཅིག་པའི་ཚིགས་སུ་བཅད་པ་འདི་དག་གསུངས་སོ། །དམ་པའི་ཆོས་དག་ཤེས་ན། །རྒན་ནམ་
གཞོན་ཡང་རུང་སྟེ། །བསྙེན་བཀུར་སྟི་སྟང་ཕྱག་བྱ། །བྲམ་ཟེ་མེ་ལྷ་ཅན་དག །ཇི་ལྟར་མེ་ལྷ་རྗེད་བཞིན། །སུམ་བཅུ་རྩ་གསུམ་ལྷ་དག །དབང་ཕྱུག་མཆོད་པ་ལྟར་རོ། །རྒྱུ་དང་རྐྱེན་དེ་ལྟ་བས་ན་ངས་
ཉན་ཐོས་ཀྱི་ཐེག་པ་ཅན་ལ་མ་གསུངས་ཀྱི། བྱང་ཆུབ་སེམས་དཔའ་འབའ་ཞིག་གི་ཕྱིར་ཚིགས་སུ་བཅད་པ་འདི་དག་གསུངས་སོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་

47-1-103b

སྐད་ཅེས་གསོལ་ཏོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དག་ནི་ཚུལ་ཁྲིམས་ལ་རབ་ཏུ་ལྷོད་པ་འདྲ་ན་ཐོག་མ་མནོས་པའི་ཚུལ་ཁྲིམས་མཆིས་ཤེས་བགྱིར་རུང་ངམ། བཅོམ་ལྡན་
འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་དེ་སྐད་ཅེས་མ་ཟེར་ཅིག །དེ་ཅིའི་ཕྱིར་ཞེ་ན། ཐོག་མ་མནོས་པའི་ཚུལ་ཁྲིམས་ཇི་ལྟར་མནོས་པ་བཞིན་དུ་མི་ཉམས་སོ། །ཅི་སྟེ་ཉམས་ན་ཡང་དེ་མ་ཐག་
དུ་འགྱོད་ཅིང་འཐོལ་ཏེ། འཐོལ་བས་ནི་ཡོངས་སུ་དག་གོ། །རིགས་ཀྱི་བུ་འདི་ལྟ་སྟེ་དཔེར་ན་ཆུ་བསྒྱུར་བའི་རྐ་མགོ་ལྟ་བུ་བུག་རྡོལ་དུ་གྱུར་ན་ཆུ་ཟག་གོ། །དེ་ཅིའི་ཕྱིར་ཞེ་ན། འཆོས་པ་མེད་པའི་ཕྱིར་རོ། །ཅི་སྟེ་དེ་ལ་
བཅོས་པ་ཡོད་ན་ཕྱི་རོལ་དུ་ཆུ་མི་ཟག་གོ། །བྱང་ཆུབ་སེམས་དཔའ་ཡང་དེ་དང་འདྲ་སྟེ། ཚུལ་ཁྲིམས་ཉམས་པ་དང་ལྷན་ཅིག་ཏུ་གསོ་སྦྱིན་དང་། ཚུལ་ནས་འབྱུང་བའི་ལས་དང་། དགེ་འདུན་གྱི་ལས་བྱེད་ཀྱང་ཚུལ་
ཁྲིམས་མི་ཉམས་ཏེ། ཆུ་རྐ་བུག་རྡོལ་ཅན་ལྟ་བུ་མ་ཡིན་ནོ། །དེ་ཅིའི་ཕྱིར་ཞེ་ན། གལ་ཏེ་ཚུལ་ཁྲིམས་ཡོངས་སུ་དག་པའི་གང་ཟག་མེད་ན་དགེ་འདུན་འགྲིབ་པར་འགྱུར་ཏེ། ང་རྒྱལ་དང་ལེ་ལོ་ཡང་ཕྱི་ཕྱིར་སྐྱེའོ། །
གལ་ཏེ་ཚུལ་ཁྲིམས་ཡོངས་སུ་དག་པ་ཡོད་ན་ཐོག་མ་བསྙེན་པར་རྫོགས་པའི་ཚུལ་ཁྲིམས་ཀྱང་མི་ཉམས་སོ། །རིགས་ཀྱི་བུ་ཐེག་པ་ལ་ཀློད་པ་ནི་ཀློད་པ་ཞེས་བྱའི་ཚུལ་ཁྲིམས་ལ་ཀློད་པ་ནི་ཀློད་པ་ཞེས་མི་བྱའོ། །
བྱང་ཆུབ་སེམས་དཔའ་སེམས་དཔའ་ཆེན་པོ་དག་ཐེག་པ་ཆེན་པོ་འདི་ལ་ང་རྒྱལ་དང་ལེ་ལོའི་སེམས་མེད་ན་ཚུལ་ཁྲིམས་ཉིད་ཅེས་བྱ་སྟེ། དམ་པའི་ཆོས་སྲུང་བའི་ཕྱིར་ཐེག་པ་ཆེན་པོའི་ཆུས་ཁྲུས་བྱེད་དོ། །དེ་བས་
ན་བྱང་ཆུབ་སེམས་དཔའ་ཚུལ་ཁྲིམས་ཉམས་པར་སྟོན་ཀྱང་ཀློད་པ་ཞེས་མི་བྱའོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་འདུན་གྱི་

47-1-104a

ནང་ན་སྐྱེས་བུ་རྣམ་པ་བཞི་མཆིས་ཀྱང་། ཤིང་ཏོག་ཨ་མྲའི་འབྲས་བུ་ལྟར་སྨིན་ནམ་མ་སྨིན་བརྟག་དཀའ་ན་ཚུལ་ཁྲིམས་ཉམས་པ་དང་། ཚུལ་ཁྲིམས་མ་ཉམས་པ་ཇི་ལྟར་རྟོགས་པར་བགྱི། 
བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདིས་ན་ཤེས་པར་སླའོ། །ཇི་ལྟར་ན་མྱ་ངན་ལས་འདས་པ་ཆེན་པོའི་མདོ་སྡེ་འདིས་ཤེས་པར་འགྱུར་ཞེ་ན། 
འདི་ལྟ་སྟེ་དཔེར་ན་ཞིང་པ་དག་ཞིང་ལ་འབྲས་དང་ཁྲེ་དག་རྨོས་ཏེ། ཁྲེ་རྒོད་ལ་སོགས་པ་བསལ་ནས། ཤའི་མིག་གིས་བརྟགས་ན་ཞིང་གཤིན་པ་ཞེས་བྱ་སྟེ། འབྲུ་སྨིན་ནས་རྩྭ་དང་ཁྲེ་སོ་སོར་དབྱེའོ། །
དེ་བཞིན་དུ་ཡོ་བྱད་རྣམ་པ་བརྒྱད་ཀྱིས་དགེ་འདུན་སྨེ་བར་འགྱུར་རོ། །དེ་དག་བསལ་ན་ཤའི་མིག་གིས་བརྟགས་ཀྱང་ཡོངས་སུ་དག་པར་རིག་གོ། །ཚུལ་ཁྲིམས་ཉམས་པ་དང་། ཚུལ་ཁྲིམས་སྲུང་བ་དག་ཉེས་པ་
མི་བྱེད་པའི་ཚེ་ན་ཤའི་མིག་གིས་བརྟགས་པས་རྟོགས་པར་དཀའ་སྟེ། ཉེས་པ་མངོན་དུ་བྱུང་ན་ཤེས་པར་སླ་བ་ནི་ཇི་ལྟར་ཁྲེ་རྒོད་དག་ཤེས་ཤིང་རྟོགས་པར་སླ་བ་བཞིན་ནོ། །དགེ་འདུན་ཡང་དེ་དང་འདྲ་སྟེ། 
མ་བརྟགས་པའི་དངོས་པོ་བརྒྱད་སྦྲུལ་གདུག་པ་དང་འདྲ་བར་ཡོངས་སུ་སྤངས་ནས་དེ་ནི་ཡོངས་སུ་དག་པའི་འཕགས་པའི་དགེ་འདུན་བསོད་ནམས་ཀྱི་ཞིང་ཞེས་བྱ་སྟེ། ལྷ་དང་མིས་མཆོད་པར་འོས་པའི་གནས་སུ་ཡོངས་
སུ་དག་པའི་འབྲས་བུ་སྨིན་པར་འགྱུར་བ་སྟེ། ཤའི་མིག་ཅན་དག་གིས་རྟོགས་པ་མ་ཡིན་ནོ། །རིགས་ཀྱི་བུ་གཞན་ཡང་ཤིང་ཀ་ལ་ཀའི་ཚལ་ན། ཤིང་ཀ་ལ་ཀ་ནི་རབ་ཏུ་མང་སྟེ། ཤིང་ཙིན་ཏ་ཀ་ནི་དྲུང་
གཅིག་ལས་མེད་དོ། །ཤིང་ཀ་ལ་ཀ་དང་ཙིན་ཏ་ཀའི་འབྲས་བུ་འདྲ་སྟེ། བྱེ་བྲག་མི་ཕྱེད་པས་འབྲས་བུ་སྨིན་པ་ན་བུད་མེད་གཅིག་གིས་ཀུན་བཏུས་སོ། །ཚལ་དེ་ན་ཙིན་ཏ་ཀའི་འབྲས་བུ་ནི་བཅུ་ཆ་གཅིག་ཙམ་

47-1-104b

ཀ་ལ་ཀའི་འབྲས་བུ་ནི་བཅུ་ཆ་བས་མང་སྟེ། བུད་མེད་དེས་མི་ཤེས་པས་བཏུས་ནས་ཚོང་དུས་སུ་བཙོངས་སོ། །བྱིས་པ་ཆུང་ངུ་གླེན་པ་དག་ངོ་མ་ཤེས་ནས་ཀ་ལ་ཀའི་འབྲས་བུ་ཉོས་ཏེ་ཟོས་སོ། །ཟོས་མ་ཐག་ཏུ་ཤི་
བར་གྱུར་ཏོ། །མཁས་པ་ཤེས་རབ་ཅན་དག་དེ་ལྟར་གྱུར་པ་ཐོས་ནས་བུད་མེད་དེ་ལ་འདི་སྐད་དུ་ཆེ་ཞེ་ཤིང་ཏོག་འདི་ག་ལས་འོངས་ཤེས་དྲིས་ན། བུད་མེད་དེས་ཕྱོགས་དང་གནས་འདི་ནས་འོངས་ཤེས་སྨྲའོ། །དེ་ལ་ཀུན་
གྱི་གནས་དང་ཕྱོགས་དེ་ན་ཤིང་ཀ་ལ་ཀ་མང་རབ་སྟེ། ཙིན་ཏ་ཀ་ནི་དྲུང་གཅིག་ལས་མེད་དོ་ཞེས་བརྒད་ནས་འགྲོའོ། །རིགས་ཀྱི་བུ་དགེ་འདུན་གྱི་ནང་ན་མ་བརྟགས་པ་རྣམ་པ་བརྒྱད་ལ་སྤྱོད་པ་ཡང་དེ་དང་འདྲ་
སྟེ། དགེ་འདུན་གྱི་ནང་ན་མ་བརྟགས་པའི་ཆོས་རྣམ་པ་བརྒྱད་ལ་སྤྱོད་པ་ནི་མང་རབ་ཀྱི། ཚུལ་ཁྲིམས་ཡོངས་སུ་སྲུང་ཞིང་མ་བརྟགས་པའི་ཆོས་བརྒྱད་ལ་མི་སྤྱོད་པ་ནི་གཅིག་ཙམ་མོ། །དེ་ལྟར་མ་
བརྟགས་པའི་ཆོས་མ་ཡིན་པ་འཆང་ཞིང་སྤྱོད་པར་ཤེས་ཀྱང་དེ་དང་ལས་ལྷན་ཅིག་དུ་བྱེད་དོ། །མི་འབྲལ་བ་ནི་ཇི་ལྟར་ཀ་ལ་ཀའི་ཚལ་ན་ཙིན་ཏ་དྲུང་གཅིག་སྐྱེས་པ་བཞིན་ནོ། །དགེ་བསྙེན་གཅིག་གིས་དེ་
ལྟར་གང་ཟག་དེ་དག་ཆོས་མ་ཡིན་པ་མང་དུ་སྤྱོད་ཅིང་མཆོད་པ་དང་། རིམ་གྲོ་བྱེད་པ་མེད་པ་མཐོང་བས་གང་ཟག་དེ་ལ་མཆོད་པར་བྱེད་པས་སེམས་ན་སྔར་དེ་ལ་འདི་སྐད་དུ་བཙུན་པ་མ་བརྟགས་པའི་དངོས་པོ་
བརྒྱད་སྤྱོད་དམ། སངས་རྒྱས་ཀྱིས་གནང་ངམ་ཞེས་དྲིས་ཤིག །གལ་ཏེ་སངས་རྒྱས་ཀྱིས་གནང་ཞེས་ཟེར་ན། གང་ཟག་དེ་དང་ལྷན་ཅིག་གསོ་སྦྱིན་དང་། གསོལ་བ་དང་། ཞུ་བའི་ལས་དང་། 
ཚུལ་ནས་འབྱུང་བའི་ལས་བྱར་རུང་ངམ་མི་རུང་ཞེས་དྲིས་ཤིག །དགེ་བསྙེན་གྱིས་དེ་སྐད་དྲིས་ཏེ། དགེ་འདུན་དག་འདི་སྐད་དུ་འདི་ལྟར་མ་བརྟགས་པའི་དངོས་པོ་བརྒྱད་པོ་ནི་བཅོམ་ལྡན་འདས་ཀྱིས་ཐུགས་

47-1-105a

བརྩེ་བའི་སླད་དུ་བདག་ཅག་འཆང་ཞིང་སྤྱོད་དུ་གནང་ངོ་ཞེས་ཟེར་ན་དགེ་བསྙེན་གྱིས་འདི་སྐད་དུ་གཙུག་ལག་ཁང་མཚམས་གཅིག་གི་དགེ་སློང་ལས་ཁ་ཅིག་ནི་གསེར་དང་དངུལ་ལ་སོགས་པ་སངས་རྒྱས་
ཀྱིས་སྤྱོད་དུ་གནང་ངོ་ཞེས་ཟེར་རོ། །ཁ་ཅིག་ནི་མི་གནང་ངོ་ཞེས་ཟེར་ཏེ། གནང་ངོ་ཞེས་ཟེར་བ་དང་། མི་གནང་ངོ་ཞེས་སྨྲ་བ་དང་ལྷན་ཅིག་ཏུ་གནས་པར་ཡང་མི་བྱ། གསོ་སྦྱོང་དང་ཚུལ་ནས་འབྱུང་བའི་ལས་
ཀྱང་མི་བྱ། ཆུང་ངུ་ན་ཆུ་མིག་གཅིག་ཏུ་ཆུ་ཡང་མི་བཏུང་ཞིང་འཚོ་བའི་ཡོ་བྱད་ཐུན་མོང་དུ་མྱི་སྤྱོད་དོ་ཞེས་གསུངས་ན། ཅིའི་ཕྱིར་ཁྱེད་ཀྱིས་སངས་རྒྱས་ཀྱིས་གནང་བ་སྐད་དུ་སྨྲ། བཅོམ་ལྡན་འདས་ལྷའི་ནང་ན་
ལྷ་ཅི་སྟེ་སྤྱོད་ཅིང་འཆང་དུ་གནང་ན་ཁྱེད་དགེ་འདུན་གྱིས་སྤྱོད་པར་མ་འོས་སོ། །ཅི་སྟེ་སྤྱོད་པར་གྱུར་ན་གསོ་སྦྱོང་དང་ཚུལ་ནས་འབྱུང་བ་དང་གསོལ་བ་དང་། ཞུ་བ་དང་། དགེ་འདུན་གྱིས་བྱ་བའི་ལས་ཀྱི་བར་དུ་
བྱེད་པར་མ་འོས་སོ། །ཅི་སྟེ་གསོ་སྦྱོང་དང་། ཚུལ་ནས་འབྱུང་བ་དང་། གསོལ་བ་དང་ཞུ་བ་དང་། དགེ་འདུན་གྱི་ལས་ལྷན་ཅིག་དུ་བྱས་ན་ཚེ་འཕོས་མ་ཐག་དུ་སེམས་ཅན་དམྱལ་བར་ལྟུང་སྟེ། ཇི་ལྟར་
བུས་པ་དག་ཤིང་ཏོག་ཀ་ལ་ཀ་ཟོས་ནས་ཤི་བ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་གྲོང་ངམ་ཚོང་དུས་ན་སྨན་འཚོང་བ་གངས་ལ་སྐྱེས་པའི་སྨན་བཟང་པོ་ཞིག་འཚོང་ན་ཉོ་བ་ཡང་མང་ངོ་། །
སྨན་དེ་དང་འདྲ་བ་གཞན་གྱིས་བཙོངས་ཀྱང་ཀུན་གྱིས་མི་ཤེས་པས་ཐམས་ཅད་སྨན་ཉོ་བའི་ཕྱིར་སྨན་འཚོང་བའི་གན་དུ་འོངས་ནས་ཁྱོད་ལ་གངས་ལ་སྐྱེ་བའི་སྨན་ཡོད་དམ་ཞེས་འདྲི་ན་སྨན་འཚོང་བ་དེས་དེ་དང་
འདྲ་བའི་སྨན་ཞིག་འདི་ནི་གངས་ལས་སྐྱེ་བའི་སྨན་ནོ། །ཞེས་བརྫུན་བྱས་ཏེ་བཙོངས་ཀྱང་། ཤའི་མིག་གིས་མི་རྟོགས་པས་བདག་ནི་གངས་ལས་སྐྱེས་པའི་སྨན་བཟང་པོ་ཉོས་ཏེ་རྙེད་དོ་སྙམ་

47-1-105b

སེམས་སོ།། །། བམ་པོ་དགུ་པ། འོད་སྲུང་ཉན་ཐོས་ཀྱི་དགེ་འདུན་གྱི་ནང་ན་མིང་ཙམ་གྱི་དགེ་འདུན་དང་། ཡང་དག་པའི་དགེ་འདུན་དང་། འདུམ་པའི་དགེ་འདུན་
ཞེས་བྱ་བའི་དགེ་འདུན་ཡོད་ཀྱིས་ཚུལ་ཁྲིམས་སྲུང་ངམ། ཚུལ་ཁྲིམས་ཉམས་ཀྱང་རུང་། དགེ་འདུན་དེ་ལ་ནི་མཆོད་པ་དང་། བཀུར་སྟི་དང་། ཕྱག་བྱ་བ་ལ་སྩོགས་པ་འདྲ་བར་བྱའོ། །དགེ་བསྙེན་གྱིས་
མི་རྟོགས་པ་ནི་གང་ཟག་གིས་གངས་ལ་སྐྱེ་བའི་སྨན་བཟང་པོ་མི་རྟོགས་པ་བཞིན་ནོ། །ཚུལ་ཁྲིམས་སྲུང་བ་ནི་གང་། ཚུལ་ཁྲིམས་ཉམས་པ་ནི་གང་། གང་ནི་ཡང་དག་པའི་དགེ་འདུན། མིང་
ཙམ་གྱི་དགེ་འདུན་ནི་གང་ཡིན་པ། ལྷའི་མིག་ཅན་གྱིས་ནི་ཤེས་ཤིང་རྟོགས་སོ། །འོད་སྲུང་གལ་ཏེ་དགེ་བསྙེན་གྱིས་དགེ་སློང་ཚུལ་ཁྲིམས་ཉམས་པར་ཤེས་ཡང་དག་ན་དེ་ལ་ནི་བསྙེན་བཀུར་
དང་ཕྱག་དང་། མཆོད་པ་ལ་སྩོགས་པ་མི་བྱའོ། །གལ་ཏེ་གང་ཟག་དེས་མ་བརྟགས་པའི་ཆོས་བརྒྱད་པོ་སྤྱོད་པར་ཤེས། ཡང་དག་ན་ཡང་དེ་ལ་ནི། བསྙེན་བཀུར་དང་། མཆོད་
པའི་ཡོ་བྱད་སྦྱར་བ་དང་། ཕྱག་དང་མཆོད་པ་ལ་སོགས་པ་མི་བྱའོ། །གལ་ཏེ་དགེ་འདུན་གྱི་ནང་ན་ཚུལ་ཁྲིམས་ཉམས་པ་ཡོད་ན། གོས་ངུར་སྨྲིག་གྱོན་པ་ཙམ་གྱིས། དེ་ལ་ཕྱག་
དང་། མཆོད་པ་ལ་སོགས་པ་མི་བྱའོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །ལེགས་སོ་ལེགས་
སོ། །བཅོམ་ལྡན་འདས་དེ་བཞིན་གཤེགས་པས། བཀའ་ཡང་དག་པར་གསུངས་ཏེ། བདག་གཟུངས་སུ་འཛིན་པར་འཚལ་ལོ། །དཔེར་ན་རྡོ་རྗེ་ནི་རིན་པོ་ཆེ་གཞན་དང་། ཐ་དད་

47-1-106a

དེ། བཅོམ་ལྡན་འདས་ཀྱིས་གསུངས་པ་ལྟར་ན། དགེ་སློང་རྣམས་ནི་ཆོས་རྣམ་པ་བཞི་པོ་ལ་གནས་པར་བགྱིའོ། །བཞི་གང་ཞེ་ན། ཆོས་ལ་གནས་ཀྱི་གང་ཟག་ལ་མི་གནས་པ་
དང་། དོན་ལ་གནས་ཀྱི་ཚིག་ལ་མི་གནས་པ་དང་། ཡེ་ཤེས་ལ་གནས་ཀྱི་རྣམ་པར་ཤེས་པ་ལ་མི་གནས་པ་དང་། ངེས་པའི་དོན་ལ་གནས་ཀྱི་དཀྲི་བའི་དོན་ལ་མི་གནས་པ་སྟེ། 
ཆོས་རྣམ་པ་བཞི་པོ་འདི་རྟོགས་པར་བགྱི་བ་ལགས་ཀྱི། སྐྱེས་བུ་རྣམ་པ་བཞི་པོ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཆོས་ལ་གནས་ཤེས་བྱ་
བ་ནི། དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བ་ཆེན་པོའོ། །སངས་རྒྱས་ཀྱི་ཆོས་ནི་ཆོས་རྣམས་ཀྱི་ཆོས་ཉིད་དོ། །ཆོས་ཉིད་ཅེས་བྱ་བ་ནི་དེ་བཞིན་གཤེགས་པའོ། །
དེ་བས་ན་དེ་བཞིན་གཤེགས་པ་ནི། རྟག་པ་མི་འགྱུར་བའོ། །དེ་ལ་གང་ཞིག་དེ་བཞིན་གཤེགས་པ་མི་རྟག་ཅེས་སྨྲ་ན་གང་ཟག་དེ་ནི་ཆོས་ཉིད་མི་མཐོང་། མི་ཤེས་པའོ། །གལ་ཏེ་
ཆོས་ཉིད་མི་མཐོང་མི་ཤེས་ན། དེ་ལ་མི་གནས་མི་རྟེན་ཏེ། གོང་དུ་གསུངས་པའི་སྐྱེས་བུ་བཞི་པོ་འཇིག་རྟེན་དུ་བྱུང་བ་དམ་པའི་ཆོས་སྲུང་ཞིང་འཛིན་ན། ཤེས་ཤིང་རིག་པར་བྱ་སྟེ། 
དེ་ལ་གནས་ཤིང་བརྟེན་པར་བྱའོ། །དེ་ཅིའི་ཕྱིར་ཞེ་ན། གང་ཟག་དེ་ནི་དེ་བཞིན་གཤེགས་པས་དགོངས་ཏེ། གསུངས་པའི་དོན་ཟབ་མོ་ལ་ཤིན་ཏུ་མཁས་པས། དེ་བཞིན་
གཤེགས་པ་ནི་རྟག་པ་མི་འགྱུར་བར་ཤེས་པའི་ཕྱིར་རོ། །གལ་ཏེ་དེ་བཞིན་གཤེགས་པ་ལ། མི་རྟག་ཅེ་འམ། འགྱུར་བ་འཕོ་བའི་ཆོས་ཅན་ནོ། །ཞེས་བྱ་བའི་གནས་མེད་དེ། 

47-1-106b

སྐྱེས་བུ་རྣམ་པ་བཞི་པོ་ནི་དེ་བཞིན་གཤེགས་པ་ཞེས་བྱའོ། །དེ་ཅིའི་ཕྱིར་ཞེ་ན། གང་ཟག་དེ་ནི་དེ་བཞིན་གཤེགས་པས་དགོངས་ཏེ། གསུངས་པ་ཤེས་ལ་སྟོན་ཀྱང་ནུས་པའི་ཕྱིར་
རོ། །སྐྱེས་བུ་གང་ཞིག་དེ་བཞིན་གཤེགས་པས་དགོངས་ཏེ། གསུངས་པའི་དོན་ཟབ་མོ་ཡང་ཤེས་ལ། དེ་བཞིན་གཤེགས་པ་ནི་མི་འགྱུར་བའི་ཆོས་ཅན་དུ་ཤེས་ན་སྐྱེས་བུ་དེ་ནི་རྙེད་པ་
ཙམ་གྱི་ཕྱིར་དེ་བཞིན་གཤེགས་པ་ནི་མི་རྟག་གོ། །ཞེས་སྨྲ་བའི་གནས་མེད་དེ། སྐྱེས་བུ་དེ་ལ་ཡང་གནས་ཤིང་རྟེན་པར་བྱ་ན། སྐྱེས་བུ་བཞི་པོ་ལ་གནས་ཤིང་རྟེན་པ་ལྟ་ཅི་སྨོས། 
ཆོས་ལ་གནས་ཤེས་བྱ་བ་ནི་ཆོས་ཉིད་ལ་བྱའོ། །གང་ཟག་ལ་མི་གནས་ཤེས་བྱ་བ་ནི་ཉན་ཐོས་ལ་བྱའོ། །ཆོས་ཉིད་ཅེས་བྱ་བ་ནི་དེ་བཞིན་གཤེགས་པའོ། །ཉན་ཐོས་ཤེས་བྱ་བ་
ནི་འདུས་བྱས་སོ། །དེ་བཞིན་གཤེགས་པ་ནི་རྟག་པའོ། །འདུས་བྱས་ནི་མི་རྟག་པའོ། །རིགས་ཀྱི་བུ་གང་ཟག་ཚུལ་ཁྲིམས་ཉམས་པ་རྙེད་པ་འམ། གྲགས་པའི་ཕྱིར། དེ་
བཞིན་གཤེགས་པ་ནི་མི་རྟག་པ་འགྱུར་ཞིང་འཕོ་བའོ། །ཞེས་སྨྲ་ན་གང་ཟག་དེ་ལ་ནི། གནས་པར་མི་བྱ་སྟེ། རིགས་ཀྱི་བུ་དེ་ནི་ངེས་པའི་དོན་ཞེས་བྱའོ། །དོན་ལ་གནས་ཀྱི་
ཚིག་ལ་མི་གནས་ཤེས་བྱ་བ་གང་ཞེ་ན། དོན་ནི་དོན་མངོན་པར་རྟོགས་པའོ། །མངོན་པར་རྟོགས་པའི་དོན་ཞེས་བྱ་བ་ནི་མི་ཞུམ་པའོ། །མི་ཞུམ་པ་ནི་ཕུན་སུམ་ཚོགས་པའོ། །
ཕུན་སུམ་ཚོགས་པའི་དོན་ནི་དེ་བཞིན་གཤེགས་པ་རྟག་ཏུ་གནས་པ་མི་འགྱུར་མི་འཕོ་བའོ། །དེ་བཞིན་གཤེགས་པ་རྟག་ཏུ་གནས་པ་མི་འགྱུར་མི་འཕོ་བའི་དོན་ནི་ཆོས་རྟག་པའོ། །ཆོས་རྟག་པའི་དོན་

47-1-107a

དགེ་འདུན་རྟག་པ་སྟེ། འདི་ནི་དོན་ལ་གནས་པ་སྟེ། ཚིག་ལ་མི་གནས་པ་ཞེས་བྱའོ། །དེ་ལ་མི་གནས་པའི་ཚིག་གང་ཞེ་ན། འདི་ལྟ་སྟེ་རྣམ་པར་སྤྲོས་པའི་འཇིག་རྟེན་གྱི་གཙུག་ལག་དང་། 
བཅོམ་ལྡན་འདས་ཀྱིས་གསུངས་པ་ལྟར་མདོ་སྡེ་ཚད་མེད་པ་འདོད་པ་མང་ཞིང་ཆོག་མི་ཤེས་པ་སྒྱུས་འཚོ་ཞིང་གཡོ་བྱེད་པ། སྤྱོད་ལམ་འཆོས་པ་རྙེད་པ་དང་གྲགས་པའི་ཕྱིར་ཁྱིམ་པ་ལ་རྟེན་པ་དང་། གཞན་ཡང་
འདི་སྐད་དུ་སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་འཆང་ཞིང་སྤྱོད་དུ་གནང་བ་ནི་འདི་ལྟ་སྟེ། བྲན་ཕོ་དང་། བྲན་མོ་དང་། ཡོངས་སུ་མ་བརྟགས་པའི་དངོས་པོ་གསེར་དང་། དངུལ་དང་རིན་པོ་ཆེ་དང་། ནས་
འབྲས་དང་། བང་མཛོད་དང་། བ་ལང་དང་། ལུག་དང་། བལ་གྱི་གླང་པོ་ཆེ་དང་། རྟ་ལ་སོགས་པ་སྤྱོད་ཅིང་ཚོང་སྤོགས་བྱེད་དུ་གནང་བ་དང་། མུ་གེའི་དུས་བྱུང་བ་ན་སྲས་རྣམས་ལ་ཐུགས་བརྩེ་བའི་ཕྱིར། 
དགེ་སློང་དག་ཡོ་བྱད་ལྷག་པ་སྩོགས་ཤིང་འཆང་དུ་གནང་ངོ་ཞེས་གསུངས་པ་དང་། བདག་གིས་ལག་དར་དེ་ཁ་ཟས་ཀྱི་གཡོས་བྱས་ནས། བྱིན་ལེན་མ་བྱས་པར་ཟོས་ཀྱང་རུང་ངོ་ཞེས་མདོ་སྡེ་ལས་གསུངས་
ཀྱང་ཚིག་དེ་ལ་ནི་གནས་པར་མི་བྱའོ། །ཡེ་ཤེས་ལ་གནས་ཀྱི་རྣམ་པར་ཤེས་པ་ལ་མི་གནས་ཤེས་བྱ་བ་གང་ཞེ་ན། ཡེ་ཤེས་ནི་དེ་བཞིན་གཤེགས་པའོ། །ཉན་ཐོས་པ་གང་ཞིག་དེ་བཞིན་གཤེགས་པའི་ཡོན་
ཏན་ལ་ཤིན་ཏུ་མི་གནས་པ་དེ་ནི་རྣམ་པར་ཤེས་པ་ཞེས་བྱ་སྟེ། གནས་པར་མི་བྱའོ། །གང་ཞིག་དེ་བཞིན་གཤེགས་པ་ཉིད་ཆོས་ཀྱི་སྐུར་ཤེས་ན་དེ་ནི་ཡང་དག་པའི་ཡེ་ཤེས་ཡིན་ཏེ། དེ་ལ་ནི་གནས་པར་བྱའོ། །
གང་ཞིག་དེ་བཞིན་གཤེགས་པས་ཐབས་སུ་སྟོན་པའི་སྐུ་ལ་འདི་ནི་ཕུང་པོ་དང་ཁམས་དང་སྐྱེ་མཆེད་ལས་འདུས་པ་སྟེ། ཞལ་ཟས་ཀྱིས་གསོ་བ་ཡིན་པར་ཤེས་ན་དེ་ནི་རྣམ་པར་ཤེས་པ་སྟེ་གནས་པར་མི་བྱའོ། །གང་ཞིག་

47-1-107b

དེ་སྐད་དུ་སྟོན་ཏམ། ཡི་གེ་དང་གཙུག་ལག་ལས་འབྱུང་ཡང་གནས་པར་མི་བྱའོ། །ངེས་པའི་དོན་གྱི་མདོ་སྡེ་ལ་གནས་ཀྱི་བཀྲི་བའི་དོན་གྱི་མདོ་སྡེ་ལ་མི་གནས་སོ་ཞེས་བྱ་བ་གང་ཞེ་ན། བཀྲི་བའི་དོན་གྱི་མདོ་སྡེ་ནི་འདི་ལྟ་
སྟེ། ཉན་ཐོས་ཀྱི་ཐེག་པ་ཅན་དག་བཅོམ་ལྡན་འདས་ཀྱི་དོན་ཤིན་ཏུ་ཟབ་མོ་ཐོས་ན་ཐེ་ཙོམ་དུ་སྐྱེ་ཞིང་ངོ་མཚར་དུ་གྱུར་ཏེ། དོན་ཟབ་མོ་སྙིང་པོ་ལས་ཡེ་ཤེས་ཀྱི་རྒྱ་མཚོ་ཆེན་པོ་འབྱུང་བར་མི་ཤེས་སོ། །དཔེར་ན་བུས་
པ་ཆུང་ངུ་ཅི་ཡང་མི་ཤེས་ཤིང་བྱེ་བྲག་མི་ཕྱེད་པ་ལྟ་བུ་ནི་བཀྲི་བའི་དོན་ཅེས་བྱའོ། །ངེས་པའི་དོན་ཅེས་བྱ་བ་ནི་བྱང་ཆུབ་སེམས་དཔའི་ཡང་དག་པའི་ཡེ་ཤེས་ཀྱིས་ཇི་ལྟར་བསམ་པ་བཞིན་དུ་ཐོགས་པ་མེད་པའི་ཡེ་ཤེས་འཇུག་
སྟེ། དཔེར་ན་སྐྱེས་བུ་ཆེན་པོ་ཅི་ཡང་མི་ཤེས་པ་མེད་པ་ནི་ངེས་པའི་དོན་ཅེས་བྱའོ། །གཞན་ཡང་ཉན་ཐོས་ཀྱི་ཐེག་པ་ནི་བཀྲི་བའི་དོན་ཅེས་བྱའོ། །བླ་ན་མེད་པའི་ཐེག་པ་ཆེན་པོ་ནི་ངེས་པའི་དོན་ཅེས་བྱའོ། །གང་ཞིག་དེ་བཞིན་
གཤེགས་པ་ནི་མི་རྟག་གོ། །འགྱུར་ཞིང་འཕོ་བའོ་ཞེས་སྨྲ་བ་ནི་བཀྲི་བའི་དོན་ཏོ། །གང་ཞིག་དེ་བཞིན་གཤེགས་པ་ནི་རྟག་པའོ། །མི་འགྱུར་མི་འཕོ་བའོ་ཞེས་སྨྲ་བ་ནི་ངེས་པའི་དོན་ཅེས་བྱའོ། །གང་ཉན་ཐོས་ཀྱི་བསྟན་
པས་ཆུད་ཅིང་རྟོགས་པ་ནི་བཀྲི་བའི་དོན་ཏོ། །བྱང་ཆུབ་སེམས་དཔའི་བསྟན་པས་ཆུད་ཅིང་རིག་པ་ནི་ངེས་པའི་དོན་ཅེས་བྱའོ། །གང་ཞིག་དེ་བཞིན་གཤེགས་པ་ལ་ཞལ་ཟས་ཀྱིས་གསོ་དགོས་ཤེས་སྨྲ་བ་ནི་བཀྲི་
བའི་དོན་ཏོ། །གང་ཞིག་རྟག་པ་གནས་པ་མི་འགྱུར་མི་འཕོ་བའོ་ཞེས་སྨྲ་བ་ནི་ངེས་པའི་དོན་ཅེས་བྱའོ། །གང་ཞིག་དེ་བཞིན་གཤེགས་པ་མྱ་ངན་ལས་འདས་པ་ནི་ཇི་ལྟར་ཤིང་ཟད་ནས་མི་ཤི་བ་བཞིན་ནོ་ཞེས་
སྨྲ་བ་ནི་བཀྲི་བའི་དོན་ཏོ། །གང་ཞིག་དེ་བཞིན་གཤེགས་པ་ནི་ཆོས་ཀྱི་དབྱིངས་ཉིད་ལ་ཞུགས་སོ་ཞེས་སྨྲ་བ་ནི་ངེས་པའི་དོན་ཅེས་བྱའོ། །མདོར་ན་ཉན་ཐོས་ཀྱི་ཐེག་པའི་ཆོས་ལ་ནི་གནས་པར་མི་བྱའོ། །དེ་ཅིའི་ཕྱིར་ཞེ་

47-1-108a

ན། དེ་བཞིན་གཤེགས་པས་སོ་སོའི་སྐྱེ་བོ་བསྒྲལ་བའི་ཕྱིར་ཉན་ཐོས་ཀྱི་ཐེག་པ་ནི་སྦྱོར་བའི་ཐབས་སུ་གསུངས་སོ། །འདི་ལྟ་སྟེ་དཔེར་ན་ཁྱིམ་བདག་གིས་བུ་ཆུང་ངུ་ལ་ཡི་གེ་ཕྱེད་བསྟན་པ་བཞིན་ནོ། །རིགས་
ཀྱི་བུ་ཉན་ཐོས་ཀྱི་ཐེག་པ་ནི་དཔེར་ན་ཞིང་ཐོག་མ་རྨོས་མ་ཐག་པ་དང་མཚུངས་ཏེ་འབྲས་བུ་མེད་པས་གནས་པར་མི་བྱའོ། །དེ་བས་ན་ཉན་ཐོས་ཀྱི་ཐེག་པ་ནི་བཀྲི་བའི་དོན་ཅེས་བྱའོ། །ཐེག་པ་ཆེན་པོའི་ཆོས་ལ་ནི་གནས་པར་བྱའོ། །
དེ་ཅིའི་ཕྱིར་ཞེ་ན། དེ་བཞིན་གཤེགས་པས་སོ་སོའི་སྐྱེ་བོ་དག་བསྒྲལ་བའི་ཕྱིར་སྦྱོར་བའི་ཐབས་སུ་ཐེག་པ་ཆེན་པོ་གསུངས་ཏེ། དེ་བས་ན་ངེས་པའི་དོན་ཅེས་བྱ་སྟེ། གནས་པར་བྱའོ། །དེ་ལྟར་དེ་ལྟ་བུའི་ཚུལ་དུ་གནས་
པ་རྣམ་པ་བཞི་ཁོང་དུ་ཆུད་ཅིང་ཤེས་པར་བྱའོ། །གཞན་ཡང་དོན་ལ་གནས་ཤེས་བྱ་བ་དོན་ནི་ཡང་དག་པའོ། །ཡང་དག་པ་ནི་འོད་གསལ་བའོ། །འོད་གསལ་བ་ནི་མ་ཞུམ་པའོ། །མ་ཞུམ་པ་ནི་དེ་བཞིན་གཤེགས་པའོ། །
གཞན་ཡང་འོད་གསལ་བ་ནི་ཡེ་ཤེས་སོ། །ཡང་དག་པ་ནི་རྟག་ཏུ་གནས་པའོ། །དེ་བཞིན་གཤེགས་པ་རྟག་པ་ནི་ཆོས་ལ་གནས་པའོ། །ཆོས་ཤེས་བྱ་བ་ནི་རྟག་པ་མཐའ་ཡས་པ་བསམ་གྱིས་མི་ཁྱབ་པ་གཟུང་དུ་
མེད་པ། བཅིང་དུ་མེད་པ་སྟེ་བལྟར་རུང་བའོ། །གང་ཞིག་མཐོང་བར་མི་རུང་ཞེས་སྨྲ་ན་གང་ཟག་དེ་ལ་གནས་པར་མི་བྱ་སྟེ། དེ་བས་ན་ཆོས་ལ་གནས་ཀྱི་གང་ཟག་ལ་མི་གནས་སོ། །གང་ཞིག་ཤིན་ཏུ་ཚིག་བཟང་པོས་མི་
རྟག་ཅེས་སྨྲ་ན་ཚིག་དེ་ལ་ནི་གནས་པར་མི་བྱ་སྟེ། དེ་བས་ན་དོན་ལ་གནས་ཀྱི་ཚིག་ལ་མི་གནས་ཤེས་བྱའོ། །ཡེ་ཤེས་ལ་གནས་པའི་དགེ་འདུན་ནི་རྟག་པ་འདུས་མ་བྱས་པ་མི་འཕོ་བ་མ་བརྟགས་པའི་དངོས་པོ་བརྒྱད་མི་
འཆང་བ་སྟེ། དེ་བས་ན་ཡེ་ཤེས་ལ་གནས་ཀྱི་རྣམ་པར་ཤེས་པ་ལ་མི་གནས་སོ། །ཁ་ཅིག་འདི་སྐད་དུ་རྣམ་པར་ཤེས་པས་བྱས། རྣམ་པར་ཤེས་པས་མྱོང་སྟེ་འདུམ་པའི་དགེ་འདུན་མེད་ཅེས་སྨྲ་བ་ཡང་ཡོད་དོ། །དེ་ཅིའི་ཕྱིར་

47-1-108b

ཞེ་ན། འདུམ་པ་ཞེས་བྱ་བ་ནི་ཅི་ཡང་མེད་པའོ། །ཅི་ཡང་མེད་པས་ན་རྟག་ཅེས་ཅི་ལ་བྱ། དེ་བས་ན་རྣམ་པར་ཤེས་པ་ལ་མི་གནས་སོ། །ངེས་པའི་དོན་ལ་གནས་པ་གང་ཞེ་ན། ངེས་པའི་དོན་ཅེས་བྱ་བ་ནི་ཆོག་ཤེས་པ་སྟེ། ནམ་
དུ་ཡང་སྒྱུས་མི་འཚོ། སྤྱོད་ལམ་མི་འཆོས། ང་རྒྱལ་མི་བྱེད། རྙེད་པ་དང་གྲགས་པ་ལ་མི་ཆགས། དེ་བཞིན་གཤེགས་པས་སྦྱོར་བའི་ཐབས་སུ་གསུངས་པའི་ཆོས་ལ་ཆགས་པར་མི་བྱེད་པ་སྟེ། དེ་ནི་ངེས་པའི་དོན་ཅེས་བྱའོ། །
གང་ཞིག་དེ་ལ་གནས་ན་གང་ཟག་དེ་ནི་དོན་དམ་པ་ལ་གནས་པ་ཞེས་བྱ་སྟེ། དེ་བས་ན་ངེས་པའི་དོན་ལ་གནས་སོ། །བཀྲི་བའི་དོན་ལ་མི་གནས་པ་གང་ཞེ་ན། བཀྲི་བའི་དོན་ནི་མདོ་སྡེ་དག་ལས་ཐམས་ཅད་གདུང་བ་ཅན། ཐམས་
ཅད་མི་རྟག་པ། ཐམས་ཅད་སྡུག་བསྔལ་བ། ཐམས་ཅད་སྟོང་པ། ཐམས་ཅད་བདག་མེད་པའོ་ཞེས་གསུངས་པ་ནི་བཀྲི་བའི་དོན་ཅེས་བྱའོ། །དེ་ཅིའི་ཕྱིར་ཞེ་ན། དོན་དེ་དག་མི་ཤེས་པ་འགྲོ་བ་མང་པོ་མཚམས་
མེད་པའི་སེམས་ཅན་དམྱལ་བར་ལྟུང་བར་བྱེད་པའི་ཕྱིར་རོ། །དེ་ཅི་ལྟ་ཞེ་ན། ཆགས་ཤིང་ཞེན་པས་དོན་མངོན་པར་མི་རྟོགས་སོ། །ཐམས་ཅད་གདུང་བ་ཅན་ནི་མྱ་ངན་ལས་འདའ་བ་ཡང་གདུང་བ་དང་། ཐམས་
ཅད་མི་རྟག་པ་ནི་མྱ་ངན་ལས་འདའ་བ་ཡང་མི་རྟག་གོ་ཞེས་དེ་བཞིན་གཤེགས་པས་གསུངས་པར་འཛིན་ཏེ། སྡུག་བསྔལ་བ་དང་། སྟོང་པ་དང་། བདག་མེད་པའི་བར་དུ་རྒྱས་པར་རིག་པར་བྱ་སྟེ། དེ་བས་ན་བཀྲི་བའི་
དོན་གྱི་མདོ་སྡེ་ལ་གནས་པར་མི་བྱའོ། །དེ་ལ་གང་ཞིག་འདི་སྐད་དུ་དེ་བཞིན་གཤེགས་པ་ནི་སེམས་ཅན་ཐམས་ཅད་ལ་ཐུགས་བརྩེ་བའི་ཕྱིར་དུས་དང་ཚོད་ཤིན་ཏུ་མཁས་སོ། །དུས་ལ་མཁས་པས་ཡང་བ་དག་
ཀྱང་ལྕི་བར་གསུངས། ལྕི་བ་འང་ཡང་བར་གསུངས་ཏེ་དེ་བཞིན་གཤེགས་པས་མཁྱེན་ཅིང་རྟོགས་པས་ཉེ་གནས་གང་ལ་སྦྱིན་བདག་དད་པས་དགོས་པའི་ཡོ་བྱད་ཅི་འདོད་པ་སྦྱོར་ཞིང་སྦྱིན་པའི་གང་ཟག་དེ་ལ་ནི་བཅོམ་

47-1-109a

ལྡན་འདས་ཀྱིས་བྲན་ཕོ་དང་། བྲན་མོ་དང་། གསེར་དང་དངུལ་དང་རིན་པོ་ཆེ་ལ་སྤྱོད་ཅིང་ཚོང་སྤོགས་བྱེད་པ་ལ་སྩོགས་པ་མ་བརྟགས་པའི་དངོས་པོ་ཐམས་ཅད་འཆང་ཞིང་སྤྱོད་དུ་མ་གནང་ངོ་། །ཉེ་གནས་གང་ལ་འཚོ་
བའི་ཡོ་བྱད་སྦྱིན་པའི་ཡོན་བདག་མེད་ལ་མུ་གེ་བྱུང་སྟེ། བསོད་སྙོམས་མི་རྙེད་པའི་དུས་ན་ཡང་དག་པའི་ཆོས་རྣམ་པར་གཞག་ཅིང་བསྲུང་བའི་ཕྱིར། ངའི་ཉེ་གནས་དག་བྲན་ཕོ་དང་བྲན་མོ་དང་། གསེར་དང་། དངུལ་དང་། བཞོན་
པའི་ཐེག་པ་དང་། ཁང་ཁྱིམ་དང་། ནས་འབྲས་དང་། ཚོང་སྤོགས་ལ་སོགས་པ་འཆང་ཞིང་སྤྱོད་དུ་གནང་སྟེ། དེ་ལྟར་འཆང་ཞིང་སྤྱོད་དུ་གནང་མོད་ཀྱི་སྦྱིན་བདག་དད་པ་ཆེན་པོ་དང་ལྡན་པ་མེད་དུ་མི་རུང་ངོ་། །དེ་ལྟར་ན་ཆོས་
རྣམ་པ་བཞི་པོ་འདི་ལ་གནས་པར་བྱའོ། །གཞན་ཡང་འདུལ་བ་དང་ཆོས་མངོན་པ་དང་། མདོ་སྡེ་ལས་རྣམ་པ་བཞི་པོ་འདི་དང་མི་འགལ་ན་གནས་པར་བྱའོ། །དེ་ལ་གང་ཞིག་དུས་དང་དུས་མ་ཡིན་པ་འམ། ཆོས་སྲུང་
བ་འམ། ཆོས་མི་སྲུང་བ་དང་། སྦྱོར་བ་ཡང་མེད་དེ། དེ་བཞིན་གཤེགས་པས་མ་བརྟགས་པའི་དངོས་པོ་འདི་དག་དགེ་སློང་ཐམས་ཅད་སྤྱོད་དུ་གནང་ངོ་ཞེས་སྨྲ་ན་ཚིག་དེ་ལ་ནི་གནས་པར་མི་བྱའོ། །འདུལ་བ་འམ། 
ཆོས་མངོན་པ་འམ། མདོ་སྡེ་དག་ལས་འདི་སྐད་དུ་འདི་དང་འཐུན་པར་གསུངས་ན་སྡེ་སྣོད་གསུམ་པོ་ལ་ཡང་གནས་པར་མི་བྱའོ། །ངས་སྐྱེ་བོ་ཤའི་མིག་ཅན་ལ་གནས་པ་བཞི་པོ་འདི་གསུངས་ཀྱི་ཤེས་རབ་ཀྱི་
མིག་ཅན་གྱི་ཕྱིར་མ་ཡིན་ནོ། །དེ་བས་ན་ངས་གནས་པ་བཞི་པོ་འདི་གསུངས་སོ། །ཆོས་ཤེས་བྱ་བ་ནི་ཆོས་རྣམས་ཀྱི་ཆོས་ཉིད་དོ། །དོན་ཅེས་བྱ་བ་ནི་དེ་བཞིན་གཤེགས་པ་རྟག་པ་མི་འགྱུར་བའོ། །ཡེ་ཤེས་ཤེས་
བྱ་བ་ནི་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་ཤེས་པའོ། །ངེས་པའི་དོན་ཅེས་བྱ་བ་ནི་ཐེག་པ་ཆེན་པོའི་མདོ་སྡེ་ཐམས་ཅད་རྟོགས་པའོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་

47-1-109b

སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སྔར་གསུངས་པའི་སྐྱེས་བུ་རྣམ་པ་བཞི་པོ་ལ་གནས་པར་མི་བགྱི་འམ། བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་
ནོ། །རིགས་ཀྱི་བུ་བཅོམ་ལྡན་འདས་ཀྱིས་གསུངས་པ་ལྟར་ན་དེ་ལ་གནས་པར་མི་བྱའོ། །དེ་ཅིའི་ཕྱིར་ཞེ་ན། བདུད་རྣམ་པ་བཞི་ཡོད་པའི་ཕྱིར་རོ། །བཞི་གང་ཞེ་ན། བདུད་ཀྱིས་བསྟན་པའི་མདོ་སྡེ་དང་འདུལ་བ་འཛིན་
པའོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་གསོལ་པ། བཅོམ་ལྡན་འདས་ཀྱིས་བདུད་རྣམ་པ་བཞི་ཡང་མཆིས་པར་གསུངས་ན་དེ་ལ་བདུད་ཀྱིས་བསྟན་པ་དང་། སངས་རྒྱས་
ཀྱིས་གསུངས་པ་བདག་ཅག་གིས་བྱེ་བྲག་ཅིས་དབྱེ། སོ་སོའི་སྐྱེ་བོ་དག་བདུད་ཀྱི་རྗེས་སུ་སྤྱོད་པ་ཡང་མཆིས། སངས་རྒྱས་ཀྱིས་བསྟན་པའི་རྗེས་སུ་འཇུག་པ་ཡང་མཆིས་ན་དེ་དག་ཇི་ལྟ་བུར་འཚལ་བར་
བགྱི། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ང་ཡོངས་སུ་མྱ་ངན་ལས་འདས་ནས་ལོ་བདུན་བརྒྱ་ལོན་པའི་འོག་ཏུ་བདུད་སྡིག་ཏོ་ཅན་གྱིས་དམ་པའི་ཆོས་བགས་ཀྱིས་འཇིག་ཅིང་མ་རུང་བར་
བྱེད་དོ། །དཔེར་ན་རྔོན་པ་ངུར་སྨྲིག་གི་ཚལ་བུ་གྱོན་པ་ལྟར་བདུད་སྡིག་ཏོ་ཅན་ཡང་དེ་བཞིན་དུ་དགེ་སློང་གི་གཟུགས་དང་། དགེ་སློང་མའི་གཟུགས། དགེ་བསྙེན་གྱི་གཟུགས་དང་། དགེ་བསྙེན་མའི་གཟུགས་སུ་
ཡང་སྟོན་ཏེ། དེ་མ་ཡིན་པ་གཞན་ཡང་རྒྱུན་དུ་ཞུགས་པ་ནས་དགྲ་བཅོམ་པའི་ལུས་ཀྱི་བར་དུ་ཡང་སྤྲུལ་ཅིང་སངས་རྒྱས་ཀྱི་གཟུགས་སུ་ཡང་སྤྲུལ་ཅིང་སྟོན་ཏོ། །བདུད་ཀྱི་རྒྱལ་པོ་ཟག་པ་དང་བཅས་པའི་ལུས་ཀྱིས་
ཟག་པ་མེད་པའི་ལུས་སུ་སྤྲུལ་ཏེ། ངའི་དམ་པའི་ཆོས་འཇིག་ཅིང་མ་རུང་བར་བྱེད་དོ། །བདུད་སྡིག་ཏོ་ཅན་དེ་དམ་པའི་ཆོས་མ་རུང་བར་བྱེད་པ་ན་འདི་སྐད་ཅེས་ཟེར་རོ། །བྱང་ཆུབ་སེམས་དཔའ་སྔོན་དགའ་ལྡན་གནམ་ནས་མི་སྣང་བར་

47-1-110a

གྱུར་ཏེ། གྲོང་ཁྱེར་སེར་སྐྱའི་རྒྱལ་པོ་ཟས་གཙང་མའི་ཕོ་བྲང་དུ་ཕ་མ་གཉིས་འདུས་པའི་འདོད་པ་ལས་ལུས་འདི་སྐྱེས་སོ་ཞེས་སྨྲའོ། །གང་ཟག་ནི་མིའི་རྒྱུད་དུ་སྐྱེས་ཏེ། འཇིག་རྟེན་དུ་བཅས་པ་ལྷ་དང་། 
མིའི་འཁོར་ཐམས་ཅད་ཀྱིས་མཆོད་ཅིང་སྟི་སྟང་བྱེད་པར་འགྱུར་བ་ནི་གནས་མེད་དོ། །གཞན་ཡང་འདི་སྐད་དུ་སྔོན་དཀའ་བ་རྣམ་པ་མང་པོ་སྤྱོད་ཅིང་། མགོ་དང་། མིག་དང་། རུས་པ་དང་། རྐང་དང་། ཡུལ་དང་། 
སྲིད་དང་། ཆུང་མ་དང་བུ་ཕོ་ལ་སོགས་པ་སྦྱིན་པ་བྱས་པས་མངོན་པར་སངས་རྒྱས་ཏེ། དེའི་རྒྱུ་དེའི་རྐྱེན་ཀྱིས་འཇིག་རྟེན་དུ་བཅས་པ། ལྷ་དང་མི་དང་དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་མི་འམ་ཅི་དང་། 
ལྟོ་འཕྱེ་ཆེན་པོ་ལ་སོགས་པས་མཆོད་ཅིང་སྟི་སྟང་བྱེད་པར་གྱུར་ཏོ་ཞེས་གལ་ཏེ་མདོ་སྡེ་དང་འདུལ་བ་ལས་དེ་སྐད་ཅེས་འབྱུང་ན་ཡང་དེ་ནི་བདུད་ཀྱིས་བསྟན་པ་ཡིན་པར་རིག་པར་བྱའོ། །རིགས་ཀྱི་བུ་མདོ་སྡེ་འམ་
འདུལ་བ་ལས་གང་འདི་སྐད་དུ་དེ་བཞིན་གཤེགས་པ་ནི་མངོན་པར་སངས་རྒྱས་ནས་ཡུན་རིང་སྟེ། མངོན་པར་སངས་རྒྱས་པ་བསྟན་པ་ནི་སེམས་ཅན་རྣམས་སྒྲོལ་བའི་ཕྱིར་ཏེ། འཇིག་རྟེན་པའི་རྗེས་སུ་ཕ་མ་
འདུས་པ་ལས་སྐྱེས་པར་བསྟན་ཏོ་ཞེས་མདོ་སྡེ་དང་འདུལ་བ་ལས་འདི་སྐད་འབྱུང་ན་དེ་ནི་ཡང་དག་པར་དེ་བཞིན་གཤེགས་པ་ཡིན་པར་རིག་པར་བྱའོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་པ་ནི་
བདུད་ཀྱི་རིས་སུ་གཏོགས་སོ། །དེ་ལ་གང་སངས་རྒྱས་ཀྱིས་བསྟན་པའི་མདོ་སྡེ་དང་འདུལ་བའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་ལ་གང་ཞིག་དེ་བཞིན་གཤེགས་པ་
ཐོག་མ་བལྟམས་ནས་ཕྱོགས་བཅུར་གོམ་པ་བདུན་བདུན་གཤེགས་པར་ཡིད་མི་ཆེས་ན་དེ་ནི་བདུད་ཀྱིས་བསྟན་པ་ལ་ཞུགས་པའོ། །དེ་ལ་གང་དེ་བཞིན་གཤེགས་པ་འཇིག་རྟེན་དུ་བྱུང་ནས་ཕྱོགས་བཅུར་གོམ་

47-1-110b

པ་བདུན་བདུན་གཤེགས་ཏེ། དེ་ནི་དེ་བཞིན་གཤེགས་པས་ཐབས་སུ་བསྟན་པ་ཡིན་ནོ་ཞེས་སྨྲ་ན་དེ་ནི་དེ་བཞིན་གཤེགས་པས་བསྟན་པའི་མདོ་སྡེ་དང་འདུལ་བ་ཡིན་ནོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་
པ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །དེ་ལ་གང་ཞིག་བྱང་ཆུབ་སེམས་དཔའ་ཐོག་མ་བཙས་ནས་རྒྱལ་པོ་ཡབ་
ཀྱིས་ལྷའི་རྟེན་ལ་ཕྱག་འཚལ་དུ་ཁྲིད་པ་ན་ཕྱིར་ལྷ་རྣམས་ཀྱིས་མཐོང་མ་ཐག་དུ་ཕྱག་བྱས་ཏེ། དེ་བས་ན་སངས་རྒྱས་ཤེས་བྱའོ། །དེ་ལ་གང་ཞིག་འདི་སྐད་དུ་ལྷ་ཞེས་བྱ་བ་སྔར་བྱུང་སྟེ། སངས་རྒྱས་ནི་འཕྱི་
ན་ཅིའི་ཕྱིར་ལྷ་རྣམས་ཀྱིས་སངས་རྒྱས་ལ་སྟི་སྟང་དང་ཕྱག་བྱེད་ཅེས་དེ་སྐད་དུ་རྒོལ་ན་དེ་ནི་བདུད་སྡིག་ཏོ་ཅན་གྱིས་བསྟན་པ་ཡིན་པར་རིག་པར་བྱའོ། །དེ་ལ་གང་ཞིག་འདི་སྐད་དུ་སངས་རྒྱས་བཅོམ་ལྡན་འདས་
ལྷའི་རྟེན་དུ་གཤེགས་པ་ན་དབང་སྒྱུར་ཆེན་པོ་དང་། ཚངས་པ་ཆེན་པོ་དང་། བརྒྱ་བྱིན་ལྷའི་དབང་ཕྱུག་ལ་སོགས་པ་ལྷ་ཐམས་ཅད་ཀྱིས་ཐལ་མོ་སྦྱར་ཏེ། སྟི་སྟང་དང་བཅས་པས་ཞབས་ལ་ཕྱག་བྱས་སོ་ཞེས་
མདོ་སྡེ་དང་འདུལ་བ་ལས་བྱུང་ན་དེ་ནི་སངས་རྒྱས་ཀྱིས་བསྟན་པའོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་ན་དེ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །དེ་ལ་གང་སངས་རྒྱས་ཀྱིས་བསྟན་
པའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །མདོ་སྡེ་དང་འདུལ་བ་གང་ལས་བྱང་ཆུབ་སེམས་དཔའ་རྒྱལ་འཚབ་མཛད་པ་ན་འདོད་པའི་སེམས་ཀྱིས་ཕྱོགས་བཞི་ནས་བཙུན་མོ་བཙལ་ཏེ། 
ཕོ་བྲང་གི་ནང་དུ་འདོད་པ་རྣམ་པ་ལྔ་བདེ་བར་སྤྱོད་དོ་ཞེས་མདོ་སྡེ་དང་འདུལ་བ་ལས་འབྱུང་ན་དེ་ནི་བདུད་ཀྱིས་བསྟན་པ་ཡིན་ནོ། །དེ་ལ་གང་ཞིག་བྱང་ཆུབ་སེམས་དཔའ་ཡུན་རིང་པོ་ནས་འདོད་པའི་སེམས་དང་། 

47-1-111a

བཙུན་མོའི་འཁོར་གྱི་འདོད་པ་ཡོངས་སུ་སྤངས་ཏེ། སུམ་བཅུ་རྩ་གསུམ་གནམ་གྱི་ལྷའི་འདོད་པ་ལྔ་ཡང་མཆིལ་མ་བཞིན་དུ་བོར་ན་མིའི་འདོད་པ་ལྟ་ཅི་སྨོས་ཏེ། སྐྲ་དང་ཁ་སྤུ་བྲེགས་ནས་ཁྱིམ་ནས་ཁྱིམ་མ་ཡིན་
པར་རབ་ཏུ་བྱུང་སྟེ། བྱང་ཆུབ་ལ་ནན་ཏན་བྱེད་དོ་ཞེས་མདོ་སྡེ་དང་འདུལ་བ་ལ་དེ་སྐད་ཅེས་བྱུང་ན་དེ་ནི་སངས་རྒྱས་ཀྱིས་བསྟན་པ་ཡིན་ནོ། །དེ་ལ་གང་བདུད་ཀྱིས་བསྟན་པའི་མདོ་སྡེ་དང་། འདུལ་བའི་རྗེས་སུ་འཇུག་པ་ནི་བདུད་ཀྱི་
རིས་སུ་གཏོགས་པ་ཞེས་བྱའོ། །དེ་ལ་གང་སངས་རྒྱས་ཀྱིས་བསྟན་པའི་མདོ་སྡེ་དང་འདུལ་བའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །གཞན་ཡང་འདི་སྐད་དུ་སྔོན་སངས་རྒྱས་བཅོམ་ལྡན་འདས་
རྒྱལ་བུ་འཛེ་ཏའི་ཚལ་ན་བཞུགས་པའི་ཚེ། དགེ་སློང་རྣམས་ཀྱིས་བྲན་ཕོ་དང་བྲན་མོ་དང་། ལས་བྱེད་པའི་མི་དང་། བ་ལང་དང་། ར་ལུག་དང་། བལ་གྱི་གླང་པོ་ཆེ་དང་། རྟ་དང་། བོང་བུ་དང་། དྲེའུ་དང་། བྱ་དང་། ཁྱི་དང་། ཕག་ལ་
སོགས་པ་གསོ་ཞིང་འཆང་བ་དང་། གསེར་དང་། དངུལ་དང་། བཻ་དཱུརྱ་དང་། མུ་ཏིག་དང་། ཤེལ་དང་། ཨས་མ་གར་བྷ་དང་། མུ་ས་ལ་གལ་བྷ་དང་། ཤེལ་གྱི་སྣམ་བུ་དང་། ལྕགས་དང་། ཟངས་དང་། ཟངས་གཞོང་ཆེ་ཆུང་ལ་
སོགས་པ་མ་བརྟགས་པའི་དངོས་པོ་རྣམས་འཆང་ཞིང་སྤྱོད་པ་དང་། ཞིང་རྨོ་བ་དང་། ཚོང་སྤོགས་དང་། ཁྲེ་འབྲས་ལ་སོགས་པ་འཇོག་ཅིང་སྤྱོད་དུ་གནང་བར་བཅོམ་ལྡན་འདས་ཐུགས་རྗེ་ཆེན་པོས་སེམས་ཅན་ལ་ཐུགས་
བརྩེ་བའི་སླད་དུ་འཆང་ཞིང་སྤྱོད་དུ་གནང་ངོ་ཞེས་མདོ་སྡེ་འམ་འདུལ་བ་ལས་འབྱུང་ན་དེ་ནི་བདུད་ཀྱིས་བསྟན་པ་ཡིན་ནོ། །དེ་ལ་གང་ཞིག་སྔོན་སངས་རྒྱས་རྒྱལ་བུ་འཛེ་ཏའི་ཚལ་ཡི་དགས་འདའ་ལི་ལོ་ཞེས་བྱ་བར་
གནས་པ་ན། དེའི་ཚེ་བཅོམ་ལྡན་འདས་བྲམ་ཟེ་རའི་ཡོན་ཏན་ཞེས་བྱ་བ་དང་། རྒྱལ་པོ་སྡེ་རབ་ཏུ་འཕམ་བྱེད་ཀྱི་ཕྱིར་འདི་སྐད་དུ་གསུངས་ཏེ། དགེ་སློང་ནི་གསེར་དང་། དངུལ་དང་། བཻ་དཱུརྱ་དང་། ཤེལ་དང་། མུ་ཏིག་དང་། 

47-1-111b

མུ་ས་ལ་གར་བྷ་དང་། བྱི་རུ་དང་། ཨས་མ་གར་བྷ་དང་། ཤེལ་གྱི་སྣམ་བུ་དང་། བྲན་ཕོ་དང་། བྲན་མོ་དང་། ལས་བྱེད་པའི་མི་དང་། ཁྱེའུ་དང་། བུ་མོ་དང་། བ་ལང་དང་། རྭ་ལུག་དང་། བལ་གྱི་གླང་པོ་ཆེ་དང་། རྟ་དང་། བོང་བུ་དང་། དྲེའུ་དང་། བྱ་
དང་། ཁྱི་དང་། ཕག་དང་། ལྕགས་དང་། ཟངས་དང་། ཟངས་གཞོང་ཆེ་ཕྲ་ལ་སོགས་པ་མ་བརྟགས་པའི་དངོས་པོ་ཁྲི་སྟན་དང་། མལ་ཆ་དང་། འཚོ་བའི་ཡོ་བྱད་རྣམ་པ་མང་པོ་ཁང་ཁྱིམ་དང་། ཞིང་རྨོ་བ་དང་། ཚོང་སྤོགས་དང་། 
ལག་དར་ཏེ་ཁ་ཟས་ཀྱི་གཡོས་བྱེད་པ་དང་། ལག་དར་ཏེ་ཕྱེ་འཐག་པ་དང་། འབྲས་འདྲུ་བ་དང་། ལུས་གསོ་བའི་སྔགས་དང་། ཁྲ་འདུལ་བའི་ཆོ་ག་དང་། སྐར་མ་བལྟ་བ་དང་། མོ་གདབ་པ་དང་། ཁྱོ་ཤུག་གི་མཚན་བལྟ་བ་དང་། 
རྨི་ལམ་གསོད་པ་དང་། འདི་ནི་བུ་ཕོར་འོང་། འདི་ནི་བུ་མོར་འོང་། འདི་ནི་བུ་ཕོ་མ་ཡིན། འདི་ནི་བུ་མོ་མ་ཡིན་ཞེས་མཁས་པའི་གནས་དྲུག་ཅུ་རྩ་བཞི་བརྟག་པ་དང་། གཞན་ཡང་རིག་པའི་གནས་བཅྭ་བརྒྱད་དང་། སྔགས་
དང་། བཟོ་རྣམ་པ་སྣ་ཚོགས་དང་། འཇིག་རྟེན་གྱི་གཙུག་ལག་ཚད་མེད་པ་སྨྲ་བ་དང་། སྤོས་ཕྱེ་མ་དང་། བྱུག་སྤོས་དང་། བདུག་སྤོས་རྣམ་པ་སྣ་ཚོགས་སྦྱོར་བ་དང་། མེ་ཏོག་གི་ཕྲེང་བ་རྣམ་པ་སྣ་ཚོགས་དང་། སྐྲ་འཆོས་པའི་ཆོ་ག་དང་། 
གཡོ་དང་། སྒྱུ་དང་ཁེ་དང་། རྙེད་པ་ལ་ཆོག་མི་ཤེས་པ་དང་། འདུ་འཛི་ལ་དགའ་བ་དང་། གཏམ་དང་། སྨྲང་ལ་དགའ་བ་དང་། ཉ་ཤ་ལ་དགའ་བ་དང་། དུག་སྦྱོར་བ་དང་། སྨེ་བ་དེ་བྱུང་བའི་སྨན་སྦྱོར་བ་དང་། བྱུག་པའི་མར་བསུང་
ཅན་སྦྱོར་བ་དང་། རིན་པོ་ཆེའི་གདུགས་དང་། ལྷམ་ལ་སོགས་པ་བྱེད་པ་དང་། བསིལ་ཡབ་དང་། ཟ་མ་ཏོག་དང་། རི་མོ་ལ་སོགས་པ་བྱེད་པ་དང་། ཁྲེ་འབྲས་དང་། སྲན་མ་རྣམ་པ་མང་པོ་དང་། ཤིང་ཏོག་གི་རྣམས་
ལ་སོགས་པ་དང་། རྒྱལ་པོ་དང་། རྒྱལ་བུ་དང་། བློན་པོ་ལ་རྟེན་པ་དང་། བུད་མེད་ལ་རྟེན་པ་དང་། བར་བར་སྐད་ཆེན་པོས་གོད་པ་དང་། བར་བར་ཅང་མི་སྨྲ་བར་ཁ་རོག་པ་དང་། ཆོས་རྣམས་ལ་ཐེ་ཙོམ་བྱེད་པ་དང་། བརྫུན་དུ་

47-1-112a

སྨྲ་བ་དང་། བཟང་ངོ་ངན་ནོ་དགེའོ། །མི་དགེའོ་ཞེས་བརྫུན་དུ་སྨྲ་བ་དང་། གོས་བཟང་པོས་ཆ་ཞིང་འཇོ་བ་ལ་སོགས་པ་དེ་ལྟ་བུའི་མ་བརྟགས་པའི་གནས་རྣམ་པ་སྣ་ཚོགས་ལ་སྤྱོད་ཅིང་བྱེད་པ་དང་། ཡོན་
བདག་དད་པའི་མདུན་དུ་བདག་སྟོད་པ་དང་། མ་བརྟགས་པའི་གནས་སུ་ཆང་འཚོང་བ་དང་། སྦྲུལ་འཚོང་མ་དང་། ཚོང་བྱེད་པར་རྟག་ཏུ་འགྲོ་བ་ལ་སོགས་པ་དེ་དག་ཐམས་ཅད་ནི་དགེ་སློང་དག་ལ་གནང་བར་ངས་མ་
གསུངས་ཏེ། དེ་ནི་དགེ་སློང་གི་ནང་ན་འདུག་པར་ཡང་གནང་བ་མ་ཡིན་ཏེ། ཁྱིམ་པར་ཕབ་ལ་ལས་བྱེད་དུ་གཞུག་གོ། །དཔེར་ན་ཞིང་གཤིན་པའི་ནང་ན་ཁྲེ་རྒོད་སྐྱེས་པ་དང་མཚུངས་ཏེ། ལྷག་མ་མ་ལུས་པར་བསལ་
ཅིང་དབྱུང་ངོ་ཞེས་གསུངས་པའི་མདོ་སྡེ་དང་འདུལ་བ་ནི་དེ་བཞིན་གཤེགས་པས་བསྟན་པ་ཡིན་པར་རིག་པར་བྱའོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་པ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །
སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །གཞན་ཡང་འདི་སྐད་དུ་བྱང་ཆུབ་སེམས་དཔའ་ནི་འཇིག་རྟེན་གྱི་ལྷ་དག་མཆོད་པའི་ཕྱིར་ལྷའི་རྟེན་དུ་འགྲོའོ། །འདི་ལྟ་སྟེ། ཚངས་
པའི་ལྷ་དང་། དབང་སྒྱུར་ཆེན་པོ་དང་། འཇུག་སེལ་དང་། ཀཱ་ཏྱཱ་ཡ་ན་ལ་སོགས་པ་སྟེ། དེར་འགྲོ་བ་ཡང་ལྷ་རྣམས་གདུལ་བའི་ཕྱིར་གྱི། དེ་ལྟ་བུ་མ་ཡིན་ནོ་ཞེས་བྱ་བའི་གནས་མེད་དོ། །གཞན་ཡང་འདི་སྐད་དུ་བྱང་ཆུབ་སེམས་
དཔའ་ནི་མུ་སྟེགས་ཅན་གྱི་གཙུག་ལག་དང་། དཀའ་ཐུབ་དང་སྤྱོད་ལམ་དང་། ཚིག་དང་སྨྲ་བ་ལས་རྒྱལ་བའི་སྒྱུ་རྩལ་དང་། འཐབ་ཅིང་རྩོད་པའི་སྡུམས་བྱེད་མི་ནུས་པས། ཁྱེའུ་དང་བུ་མོ་དང་། བློན་པོ་ཆེན་པོ་ལ་སོགས་པས་སྟི་སྟང་
མི་བྱེད་དོ། །སྨན་ལ་སོགས་པ་འང་སྦྱོར་མི་ཤེས་པས་ན་དེ་བཞིན་གཤེགས་པ་ཞེས་བྱ་སྟེ། ཅི་སྟེ་ཤེས་ན་ངན་པར་ལྟ་བ་ལོག་པ་ཅན་ཞེ་འམ། གཞན་ཡང་དེ་བཞིན་གཤེགས་པ་ནི་དགྲ་དང་། གཉེན་ལ་མཉམ་

47-1-112b

པར་དགོངས་ཏེ། མཚོན་གྱིས་བཏབ་འམ། བྱུག་སྤོས་ཀྱིས་བསྐུས་ཀྱང་དེ་གཉིས་ཀ་ལ་ཕན་པ་འམ། གནོད་པའི་ཐུགས་མི་མངའ་སྟེ་དབུ་མར་གནས་པས། དེ་བཞིན་གཤེགས་པའོ་ཞེས་མདོ་སྡེ་འམ་འདུལ་བ་ལས་འབྱུང་ན་དེ་ནི་
བདུད་ཀྱིས་བསྟན་པ་ཡིན་པར་རིག་པར་བྱའོ། །དེ་ལ་གང་འདི་སྐད་དུ་བྱང་ཆུབ་སེམས་དཔའ་ནི་དེ་ལྟར་ཐབས་ཀྱིས་ལྷའི་རྟེན་དུ་འགྲོ་བ་དང་། མུ་སྟེགས་ཅན་གྱི་ཆོས་ལས་རབ་ཏུ་བྱུང་ནས་སློབ་པ་ལ་འཇུག་པ་བསྟན་པ་དང་། 
སྤྱོད་ལམ་དང་། དཀའ་ཐུབ་དང་ཆོག་ཤེས་པར་བསྟན་པ་དང་། ཚིགས་དང་སྨྲ་བ་ལས་རྒྱལ་བ་ཐམས་ཅད་ཤེས་པར་བྱ་བའི་ཕྱིར་ཡི་གེའི་གྲྭར་སློབ་པ་བསྟན་པ་དང་། འཐབ་ཅིང་རྩོད་པར་འགྱུར་བའི་སྡུམས་བྱེད་པ་བསྟན་པ་
དང་། འཁོར་མང་པོ་དང་། ཁྱེའུ་དང་བུ་མོ་དང་། བཙུན་མོ་དང་། ཕོ་བྲང་གི་སླས་དང་། ཁྱིམ་བདག་དང་། ཚོང་དཔོན་དང་། བྲམ་ཟེ་ལ་སོགས་པ་རྒྱལ་པོ་དང་། བློན་པོ་ཆེན་པོ་དང་། དབུལ་པོ་ལ་སོགས་པ་ལས་ཕུལ་དུ་གྱུར་པ་དང་། 
མཆོག་ཏུ་གྱུར་པར་བསྟན་ཏོ། །དེ་དག་གིས་བསྙེན་བཀུར་བྱེད་པ་ལ་སོགས་པ་འང་བསྟན། དེ་ལྟ་བུ་ལ་སོགས་པའི་དངོས་པོའི་རྣམ་པ་མང་པོ་བསྟན་ཏོ། །ལྟ་བ་དེ་དག་ལ་གནས་ཀྱང་མ་ཆགས་པ་ནི་དཔེར་ན་པད་མོ་
ལ་རྡུལ་དང་དྲི་མ་མི་གོས་པ་བཞིན་ནོ། །དེ་ལ་ཡང་འགྲོ་བ་མང་པོ་བསྒྲལ་བའི་ཕྱིར་འཇིག་རྟེན་པའི་རྗེས་སུ་དེ་ལྟ་བུའི་ཐབས་མཁས་པ་རྣམ་པ་སྣ་ཚོགས་སྤྱོད་དོ་ཞེས་མདོ་སྡེ་དང་འདུལ་བ་གང་ལས་འབྱུང་ན་དེ་ནི་དེ་བཞིན་
གཤེགས་པས་བསྟན་པ་ཡིན་པར་རིག་པར་བྱའོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་པ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་བྱང་ཆུབ་
སེམས་དཔའ་ཆེན་པོའོ། །དེ་ལ་གང་འདི་སྐད་དུ་དེ་བཞིན་གཤེགས་པས་ནི་བདག་ཅག་ལ་མདོ་སྡེ་དང་འདུལ་བ་གསུངས་པ་ལས་མི་དགེ་བའི་ཆོས་ལྕི་བ་དང་། ཡང་བ་དང་། ཉེས་བྱས་ཀྱི་བར་དུ་རང་བཞིན་གྱིས་ལྕི་བ་

47-1-113a

ཡིན་པས་བདག་ཅག་ནི་འདུལ་བ་ལས་འགལ་བར་མི་བྱེད་དེ། བདག་ཅག་ནི་ཡུན་རིང་པོ་ནས་བཟོད་ཀྱང་ཆོས་འདི་དག་ལ་ཁྱེད་ནི་ཡིད་མི་ཆེས་ན། བདག་ཅག་གིས་ཇི་སྐད་དུ་བདག་ཅག་གིས་འདུལ་བ་བཏང་སྟེ། ཁྱེད་ཀྱིས་
འདུལ་བའི་རྗེས་སུ་འཇུག་པར་བྱ། ཁྱེད་ཀྱི་འདུལ་བ་ནི་བདུད་ཀྱིས་བསྟན་པ་ཡིན་གྱི། བདག་ཅག་གི་མདོ་སྡེ་དང་འདུལ་བ་ནི་སངས་རྒྱས་ཀྱིས་བཅས་པ་ཡིན་ནོ། །དེ་བཞིན་གཤེགས་པས་སྔར་གསུངས་པའི་གསུང་རབ་དགུ་པོ་
ཡང་བདག་ཅག་གི་མདོ་སྡེ་དང་འདུལ་བ་དགུ་པོ་ལ་ངེས་པར་གསུངས་ཀྱི། ཤིན་ཏུ་རྒྱས་པའི་མདོ་སྡེ་ནི་ཚིག་གཅིག་གམ། ཡི་གེ་གཅིག་ཙམ་ཡང་མ་ཐོས་སོ། །དེ་བཞིན་གཤེགས་པས་གསུངས་པའི་མདོ་སྡེ་དང་འདུལ་
བ་ནི་ཚད་ཀྱང་མ་མཆིས་ན་ཤིན་ཏུ་རྒྱས་པའི་མདོ་སྡེ་ཞེས་མི་འབྱུང་སྟེ། དེ་དག་ལས་ནི་གསུང་རབ་མདོ་སྡེ་བཅུ་ཡོད་དོ་ཞེས་མ་ཐོས་སོ། །ཅི་སྟེ་ཡོད་ན་གདོན་མི་ཟ་བར་ལྷ་སྦྱིན་གྱིས་བྱས་པ་ཡིན་པར་རིག་པར་བྱའོ། །
ལྷ་སྦྱིན་ངན་པ་དགེ་བའི་ཆོས་གཞིག་པའི་ཕྱིར་ཤིན་ཏུ་རྒྱས་པའི་མདོ་སྡེ་བྱས་ཏེ། བདག་ཅག་ནི་མདོ་སྡེ་བདུད་ཀྱིས་བསྟན་པ་ཡིན་པས་ན་ཡིད་མི་ཆེས་སོ། །དེ་ཅིའི་ཕྱིར་ཞེ་ན། ཆོས་གཞིག་ཅིང་གཅིག་ལ་གཅིག་གིས་
སྐྱོན་འདོགས་པའི་ཚིག་དེ་ལྟ་བུ་ནི་ཁྱེད་ཀྱི་མདོ་སྡེ་ལས་འབྱུང་གི། བདག་ཅག་གི་མདོ་སྡེ་ལ་མེད་དོ། །བདག་ཅག་གི་མདོ་སྡེ་དང་འདུལ་བ་དེ་བཞིན་གཤེགས་པས་གསུངས་པ་ལས་གསང་བར་འདི་སྐད་ཅེས་འབྱུང་
སྟེ། ང་ཡོངས་སུ་མྱ་ངན་ལས་འདས་ནས་དུས་ངན་པའི་ཚེ་མདོ་སྡེ་དང་འདུལ་བ་ཡང་དག་པ་མ་ཡིན་པ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ཞེས་བྱ་བ་འབྱུང་ངོ་ཞེས་སྨྲ་བ་མ་འོངས་པའི་དུས་ན་དེ་ལྟ་བུའི་དགེ་སློང་
སྡིག་པ་ཅན་དག་འབྱུང་ངོ་། །ངས་ཡང་འདི་སྐད་དུ་གསུངས་ཏེ། གསུང་རབ་སྡེ་དགུ་ལ་མ་གཏོགས་པ་ཤིན་ཏུ་རྒྱས་པའི་མདོ་ཡོད་པར་གསུངས་སོ། །དེ་ལ་གང་ཞིག་དེའི་དོན་ཤེས་ན་དེ་ནི་མདོ་སྡེ་དང་འདུལ་བ་ཤིན་ཏུ་

47-1-113b

ཡང་དག་པར་རྟོགས་པ་ཡིན་ཏེ། དེ་ནི་མ་བརྟགས་པའི་དངོས་པོ་ཐམས་ཅད་སྤངས་པ། ཟླ་བ་ཉ་བ་ལྟར་ཤིན་ཏུ་གསལ་ཞིང་དག་པའོ་ཞེས་ངས་གསུངས་སོ། །དེ་ལ་གང་འདི་སྐད་དུ་དེ་བཞིན་གཤེགས་པས་མདོ་སྡེ་རེ་
རེ་ལས་ཀྱང་དོན་གང་གཱའི་ཀླུང་གི་བྱེ་མ་སྙེད་འབྱུང་ཡང་འདི་སྐད་དུ་མ་གསུངས་པས་འདི་ནི་ཡང་དག་པར་མེད་པ་ཡིན་ནོ། །ཅི་སྟེ་ཡོད་ན་བདག་ཅག་གི་འདུལ་བ་ལས་ཅིའི་ཕྱིར་མ་གསུངས། འདི་ལྟར་མ་གསུངས་ཏེ་མ་
བྱུང་བས་ན་བདག་ཅག་ནི་དེ་ལ་ཡིད་མི་ཆེས་སོ་ཞེས་དེ་སྐད་དུ་སྨྲ་ན་གང་ཟག་དེ་ནི་ཤིན་ཏུ་ཁ་ན་མ་ཐོ་བ་ཐོབ་པ་ཡིན་པར་རིག་པར་བྱའོ། །གང་ཟག་དེ་ཡང་འདི་སྐད་དུ་མདོ་སྡེ་དང་འདུལ་བ་དེ་ནི་བདག་གིས་གཟུང་
བར་བྱའོ། །དེ་ཅིའི་ཕྱིར་ཞེ་ན། འདིས་ཆོག་ཤེས་ཤིང་འདོད་པ་ཉུང་བ་དང་། ཀུན་ནས་ཉོན་མོངས་པ་གཅོད་པ་དང་། ཤེས་རབ་དང་མྱ་ངན་ལས་འདའ་བའི་དགེ་བའི་ཆོས་ཀྱི་རྒྱུར་འགྱུར་བའི་ཕྱིར་རོ་ཞེས་དེ་སྐད་དུ་སྨྲ་
ན་ཡང་ངའི་ཉེ་གནས་མ་ཡིན་ནོ། །དེ་ལ་གང་འདི་སྐད་དུ་དེ་བཞིན་གཤེགས་པས་འགྲོ་བ་མང་པོ་བསྒྲལ་བའི་ཕྱིར་ཤིན་ཏུ་རྒྱས་པའི་མདོ་སྡེ་གསུངས་སོ་ཞེས་སྨྲ་ན་དེ་ནི་ངའི་ཉེ་གནས་ཡང་དག་པ་ཡིན་པར་རིག་པར་
བྱའོ། །དེ་ལ་གང་ཞིག་ཤིན་ཏུ་རྒྱས་པའི་མདོ་སྡེ་མི་འདོད་ན་དེ་ནི་ངའི་ཉེ་གནས་ཀྱང་མ་ཡིན། སངས་རྒྱས་ཀྱི་ཆོས་ཀྱིས་རབ་ཏུ་བྱུང་བ་མ་ཡིན་ཏེ། དེ་ནི་ངན་པར་ལྟ་བ་མུ་སྟེགས་ཅན་གྱི་འཁོར་ཡིན་པར་རིག་པར་བྱའོ། །
མདོ་སྡེ་དང་འདུལ་བ་གང་ལས་འདི་སྐད་དུ་གསུངས་ན་དེ་ནི་སངས་རྒྱས་ཀྱིས་བསྟན་པ་ཡིན་ནོ། །དེ་མ་ཡིན་པ་ནི་བདུད་ཀྱིས་བསྟན་པ་ཡིན་ནོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་པ་ནི་བདུད་ཀྱི་འཁོར་
ཅེས་བྱའོ། །དེ་ལ་གང་སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །རིགས་ཀྱི་བུ་གཞན་ཡང་འདི་སྐད་དུ་དེ་བཞིན་གཤེགས་པ་ནི་ཡོན་ཏན་ཚད་མེད་པ་ལས་གྲུབ་པ་མ་

47-1-114a

ཡིན་ཏེ། མི་རྟག་པ་འགྱུར་ཞིང་འཕོ་བའོ། །སྟོང་པའི་ཆོས་ཐོབ་པས་བདག་མེད་ཅེས་གསུངས་ཏེ། དེ་ནི་འཇིག་རྟེན་དང་འཐུན་པ་མ་ཡིན་ནོ་ཞེས་དེ་སྐད་དུ་འབྱུང་བའི་མདོ་སྡེ་དང་འདུལ་བ་ནི་བདུད་ཀྱིས་བསྟན་
པ་ཞེས་བྱའོ། །དེ་ལ་གང་ཞིག་འདི་སྐད་དུ་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ནི་བསམ་གྱིས་མི་ཁྱབ་པ་སྟེ། ཚད་མེད་གྲངས་མེད་པའི་ཡོན་ཏན་ལས་གྲུབ་པའོ། །དེ་བས་ན་རྟག་པ་གནས་
པ་མི་འགྱུར་མི་འཕོ་བའོ་ཞེས་མདོ་སྡེ་དང་འདུལ་བ་ལས་འབྱུང་ན་དེ་ནི་སངས་རྒྱས་ཀྱིས་བསྟན་པ་ཡིན་ནོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་པ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །སངས་རྒྱས་
ཀྱིས་བསྟན་པའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །གཞན་ཡང་ཁ་ཅིག་འདི་སྐད་དུ་དགེ་སློང་དག་ཕས་ཕམ་པའི་ཁ་ན་མ་ཐོ་བ་མ་བྱུང་བར་ཀུན་གྱིས་ཕས་ཕམ་པ་བྱུང་སྟེ། ཏ་ལའི་མགོ་
བཅད་པ་བཞིན་དུ་གྱུར་ཏོ་ཞེས་སྨྲ་ཡང་དགེ་སློང་དེ་ནི་ཕས་ཕམ་པ་བྱུང་བ་མ་ཡིན་ནོ། །དེ་ཅིའི་ཕྱིར་ཞེ་ན། ངས་ནི་ཕས་ཕམ་པ་བཞི་ལས་གཅིག་ཙམ་ཉམས་ན་རྡོ་བཅག་པ་ལྟར་ཕྱིར་མི་འབྱོར་རོ་ཞེས་གསུངས་ཏེ། 
དེ་ལ་གང་ཞིག་བླ་མ་མིའི་ཆོས་ཐོབ་བོ་ཞེས་དེ་སྐད་སྨྲ་ན་དེ་ནི་ཕས་ཕམ་པའོ། །དེ་ཅིའི་ཕྱིར་ཞེ་ན། ཡང་དག་པར་ཅིར་ཡང་མ་ཐོབ་པར་ཐོབ་པ་ལྟར་སྒྱུ་དང་གཡོ་འཆོས་ན་གང་ཟག་དེ་ནི་མིའི་ཆོས་ལས་
ཉམས་པ་ཞེས་བྱ་སྟེ། ཕས་ཕམ་པ་ཡིན་ནོ། །འདི་ལྟ་སྟེ། དགེ་སློང་གང་ཞིག་འདོད་པ་ཉུང་བ་ཆོག་ཤེས་པ། ཚུལ་ཁྲིམས་བསྲུང་བ། ཡོངས་སུ་དག་པ། བས་མཐར་གནས་པའི་དྲུང་དུ་རྒྱལ་པོ་འམ། བློན་པོ་ཆེན་
པོ་འོངས་ནས་དགེ་སློང་འདི་ནི་དགྲ་བཅོམ་པར་འགྱུར་རོ་སྙམ་བསམས་ཏེ་དྲུང་དུ་བསྙེན་ནས་བསྟོད་པ་དང་བསྙེན་བཀུར་དང་ཕྱག་བྱས་ཏེ། འདི་སྐད་དུ་སློབ་དཔོན་ཆེན་པོ་ལུས་འདི་རྗེས་མ་ཐག་ཏུ་བླ་ན་མེད་པ་

47-1-114b

ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱའོ། །ཞེས་སྨྲ་ན་དགེ་སློང་དེ་རྒྱལ་པོ་དེ་ལ་འདི་སྐད་ཅེས་སྨྲའོ། །རྒྱལ་པོ་ཆེན་པོ་བདག་ནི་ཡང་དག་པར་དགེ་སྦྱོང་གི་འབྲས་བུ་མ་ཐོབ་ཀྱིས་རྒྱལ་པོ་ཆེན་པོ་བདག་ལ་དགེ་སྦྱོང་གི་འབྲས་བུ་
ཐོབ་བོ་ཞེས་མ་གསུང་ཤིག །རྒྱལ་པོ་ཆེན་པོ་བདག་ལ་ཆོག་མི་ཤེས་པའི་ཆོས་བཀའ་མི་སྩལ་དུ་གསོལ། གང་ཆོག་ཤེས་པ་དག་ནི་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ་ཞེས་
བྱ་བའི་བར་དུ་བསྟོད་ཀྱང་ལན་མ་བཏབ་ཏེ་ཅང་མི་སྨྲའོ། །བདག་གིས་ཀྱང་ཅི་སྟེ་ལན་མི་འདེབས་པར་ཅང་མ་སྨྲས་ན་སངས་རྒྱས་བཅོམ་ལྡན་འདས་ཀྱིས་རྣམ་པར་སྨད་པར་འགྱུར་རོ། །གང་ཆོག་མི་ཤེས་པར་སྤྱོད་པ་ལ་ནི་
སངས་རྒྱས་ཐམས་ཅད་ཀྱིས་བསྟོད་ཅིང་བསྔགས་ཏེ། དེ་བས་ན་བདག་ནི་ནམ་དུ་ཡང་ཆོག་མི་ཤེས་པ་ལ་སྤྱོད་པར་དགའོ། །ཆོག་ཤེས་པ་ནི་བདག་གིས་འབྲས་བུ་མ་ཐོབ་པར་རྒྱལ་པོས་འབྲས་བུ་ཐོབ་བོ་ཞེས་སྨྲས་ཀྱང་
བདག་མི་འདོད་པ་ནི་ཆོག་ཤེས་པ་ཞེས་བྱའོ། །དེའི་ཚེ་ན་རྒྱལ་པོ་ཡང་འདི་སྐད་དུ་སློབ་དཔོན་ཆེན་པོ་ཁྱོད་ནི་ཡང་དག་པར་དགྲ་བཅོམ་པའི་འབྲས་བུ་ཐོབ་སྟེ། སངས་རྒྱས་དང་ཐ་མི་དད་དོ་ཞེས་སྨྲས་ན་དེའི་ཚེ་ན་རྒྱལ་པོ་
དེས་ཡུལ་མི་ཐམས་ཅད་དང་། བཙུན་མོ་དང་། ཕོ་བྲང་གི་སླས་ཀྱི་འཁོར་ཐམས་ཅད་དུ་དགེ་སློང་དེས་དགེ་སྦྱོང་གི་འབྲས་བུ་ཐོབ་བོ་ཞེས་བསྒྲགས་ནས་དེ་སྐད་ཅེས་ཐོས་པ་ཐམས་ཅད་དགེ་སློང་དེ་ལ་ཤིན་ཏུ་དད་པ་དང་། མཆོད་པ་
བྱ་བ་དང་། བཀུར་སྟི་དང་། རིམ་གྲོ་བྱ་བའི་སེམས་སྐྱེས་སོ། །དེ་ལྟར་དགེ་སློང་དེ་ཡང་ཡང་དག་པར་ཚངས་པར་སྤྱོད་ཅིང་ཡོངས་སུ་དག་པ་ཡིན་པས་དེའི་རྒྱུ་དེའི་རྐྱེན་ཀྱིས་དེ་ལ་དགའ་བ་ཐམས་ཅད་བསོད་ནམས་ཆེན་པོ་ཐོབ་
ཀྱི། དགེ་སློང་དེ་ནི་ཕས་ཕམ་པའི་ཁ་ན་མ་ཐོ་བ་ཉམས་པ་མ་ཡིན་ནོ། །དེ་ཅིའི་ཕྱིར་ཞེ་ན། ཕ་རོལ་པོས་དགའ་བ་དང་། དད་པ་དང་། བསྟོད་པ་དང་། མཆོད་པར་བྱ་བའི་སེམས་རང་སྐྱེས་པའི་ཕྱིར་རོ། །དེ་ལྟར་ན་དགེ་

47-1-115a

སློང་དེ་ལ་ནི་ཁ་ན་མ་ཐོ་བ་ཉམས་པ་མེད་དོ། །དེ་ལ་ནི་གང་ཞིག་དེ་ལ་ཁ་ན་མ་ཐོ་བ་ཡོད་ཅེས་སྨྲ་ན། མདོ་སྡེ་དེ་ནི་བདུད་ཀྱིས་བསྟན་པ་ཡིན་པར་རིག་པར་བྱའོ། །གཞན་ཡང་དགེ་སློང་དག་སངས་རྒྱས་ཀྱིས་དགོངས་ཏེ་གསུངས་པའི་
མདོ་སྡེ་ཟབ་མོ་ལས་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་དེ། སངས་རྒྱས་ཀྱི་རང་བཞིན་ཡོད་པས་ཚད་མེད་པའི་ཀུན་ནས་ཉོན་མོངས་པ་ཆོད་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་
འཚང་རྒྱ་སྟེ། ལོག་སྲེད་ཅན་ནི་མ་གཏོགས་སོ་ཞེས་སྨྲ་བ་ལ། རྒྱལ་པོ་འམ། བློན་པོ་ཆེན་པོ་ཞིག་གིས་འདི་སྐད་དུ་དགེ་སློང་ཁྱོད་མངོན་པར་འཚང་རྒྱ་འམ་མི་རྒྱ། སངས་རྒྱས་ཀྱི་རང་བཞིན་ཡོད་དམ་ཞེས་འདྲི་ན་དེ་ལ་འདི་
སྐད་ཅེས་སྨྲོས་ཤིག །བདག་གི་ལུས་ལ་སངས་རྒྱས་ཀྱི་རང་བཞིན་ནི་ངེས་པར་ཡོད་ན་སངས་རྒྱས་སུ་འགྲུབ་བམ་མི་འགྲུབ་པ་ནི་མ་གཏོགས་སོ། །རྒྱལ་པོས་སྨྲས་པ། བཙུན་པ་ལོག་སྲེད་ཀྱི་ལས་མ་བྱས་ན། གདོན་མི་ཟ་བར་
འགྲུབ་སྟེ་ཐེ་ཙོམ་མེད་དོ། །དགེ་སློང་གིས་དེ་ལ་རྒྱལ་པོ་ཆེན་པོས་སྨྲས་པ་བཞིན་ནོ། །དེ་སྐད་དུ་ངེས་པར་སངས་རྒྱས་ཀྱི་རང་བཞིན་ཡོད་དོ་ཞེས་དགེ་སློང་དེས་སྨྲས་ཀྱང་ཕས་ཕམ་པར་མི་འགྱུར་རོ། །གཞན་ཡང་དགེ་སློང་དག་རབ་ཏུ་འབྱུང་
བའི་ཚེ་ན་འདི་སྙམ་དུ་སེམས་ཏེ། བདག་ནི་མཐར་གདོན་མི་ཟ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ་སྙམ་བསམས་ན་གང་ཟག་དེ་བླ་ན་མེད་པའི་བྱང་ཆུབ་མ་ཐོབ་ཀྱང་བསོད་ནམས་ཚད་
མེད་མཐའ་ཡས་དཔག་ཏུ་མེད་པ་འཐོབ་བོ། །ཅི་སྟེ་དེ་ལ་གང་ཞིག་གིས་ཕས་ཕམ་པ་འབྱུང་ངོ་ཞེས་སྨྲ་ན་འོ་ན་ལྟ་དགེ་སློང་ཐམས་ཅད་ཕས་ཕམ་པ་མ་བྱུང་བ་མེད་མོད། དེ་ཅིའི་ཕྱིར་ཞེ་ན། ང་སྔོན་བསྐལ་པ་ཁྲག་ཁྲིག་བརྒྱད་བཅུའི་
བར་དུ་མ་བརྟགས་པའི་དངོས་པོ་ཐམས་ཅད་སྤངས་ཏེ། འདོད་པ་ཉུང་བ་དང་། ཆོག་ཤེས་པའི་སྤྱོད་ལམ་དང་ལྡན་པས་དེ་བཞིན་གཤེགས་པའི་བླ་ན་མེད་པའི་ཆོས་ཀྱི་སྡེ་སྣོད་ལ་ནན་ཏན་བྱས་ཏེ། བདག་གི་ལུས་ལ་སངས་རྒྱས་ཀྱི་

47-1-115b

རང་བཞིན་ངེས་པར་ཡོད་པར་ཤེས་པས་དེ་བས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དུ་མངོན་པར་སངས་རྒྱས་ནས་སངས་རྒྱས་ཤེས་བྱ་བ་ཐུགས་རྗེ་ཆེན་པོ་དང་ལྡན་པར་གྱུར་ཏོ། །གང་འདི་སྐད་དུ་སྨྲ་བའི་མདོ་སྡེ་དང་འདུལ་
བ་ནི་སངས་རྒྱས་ཀྱིས་བསྟན་པ་ཞེས་བྱའོ། །དེ་ལ་གང་བསྟན་པ་འདིའི་རྗེས་སུ་མི་འཇུག་པ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །བསྟན་པ་འདིའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །གཞན་ཡང་
འདི་སྐད་དུ་ཕས་ཕམ་པ་བཞི་ཡང་མེད་ལ་དགེ་འདུན་གྱི་ལྷག་མ་བཅུ་གསུམ་དང་། མ་ངེས་པའི་ཆོས་གཉིས་དང་། སྤང་བའི་ལྟུང་བ་སུམ་བཅུ་དང་། ལྟུང་བ་དགུ་བཅུ་རྩ་གཅིག་དང་། སོ་སོར་བཤགས་པའི་ཆོས་བཞི་དང་། 
བསླབ་པ་མང་པོ་དང་། བདུན་ཤིན་ཏུ་ཞི་བར་བྱེད་པ་ལ་སོགས་པ་ཡང་མེད། སྦོམ་པོ་དང་མཚམས་མེད་པ་ལྔ་ལ་སོགས་པ་དང་། ལོག་སྲེད་ཅེས་བྱ་བ་ཐམས་ཅད་མེད་དོ། །གལ་ཏེ་དགེ་སློང་དག་དེ་དག་ལ་སོགས་པ་
ཉམས་པས་སེམས་ཅན་དམྱལ་བར་ལྟུང་ན་མུ་སྟེགས་ཅན་ཐམས་ཅད་ལྟ་མཐོ་རིས་ཀྱི་ལྷར་སྐྱེས་མོད། དེ་ཅིའི་ཕྱིར་ཞེ་ན། མུ་སྟེགས་ཅན་ལ་སོགས་པ་ལ་ཚུལ་ཁྲིམས་ཤེས་བྱ་བ་ཉམས་པ་མེད་པའི་ཕྱིར་རོ། །དེ་བས་
ན་དེ་བཞིན་གཤེགས་པས་གང་ཟག་དག་གདུལ་བའི་ཕྱིར་ཚུལ་ཁྲིམས་ཤེས་བྱ་བ་གསུངས་སོ། །སངས་རྒྱས་ཀྱིས་གསུངས་པ་ལས་ཀྱང་ངའི་དགེ་སློང་དག་གལ་ཏེ་མི་ཚངས་པར་སྤྱོད་འདོད་ན་ཆོས་གོས་བཞག་སྟེ། 
ཁྱིམ་པའི་གོས་གྱོན་ལ་མི་ཚངས་པར་སྤྱོད་ཅིག །གཞན་ཡང་འདི་སྙམ་དུ་མི་ཚངས་པར་སྤྱོད་པ་འདི་བདག་ཅག་འབའ་ཞིག་གི་སྐྱོན་མ་ཡིན་ཏེ། དེ་བཞིན་གཤེགས་པའི་ཚེ་ཡང་དགེ་སློང་དག་མི་ཚངས་པར་སྤྱོད་དེ། 
རྣམ་པར་གྲོལ་བ་ཡང་ཡོད། ཚེ་འཕོས་ནས་མཐོ་རིས་ཀྱི་ལྷར་སྐྱེ་བ་ཡང་ཡེ་ནས་ཡོད་དེ། བདག་འབའ་ཤིག་གིས་སྤྱོད་པ་མ་ཡིན། ལ་ལས་ཕས་ཕམ་པ་བཞི་ཉམས་པ་དང་། ལ་ལས་ཚུལ་ཁྲིམས་ལྔ་ཉམས་པ་

47-1-116a

དང་། ལ་ལ་ནི་མ་བརྟགས་པ་སྤྱོད་ལམ་མ་ཡིན་པའི་ལས་ཐམས་ཅད་བྱས་ཀྱང་ཡང་དག་པར་རྣམ་པར་གྲོལ་བ་ཡོད་དེ། དེ་བཞིན་གཤེགས་པས་ཉེས་པ་གཅིག་བྱས་ན། སུམ་བཅུ་རྩ་གསུམ་གནམ་གྱི་ཉི་མ་དང་། ཟླ་བ་
དང་། ལོར་བགྲང་བའི་ལོ་སྟོང་ཕྲག་བརྒྱད་བརྒྱའི་བར་དུ་སེམས་ཅན་དམྱལ་བར་ལྟུང་ངོ་ཞེས་གསུངས་མོད་ཀྱི། དེ་ཡང་དེ་བཞིན་གཤེགས་པས་གང་ཟག་དག་གདུལ་བའི་ཕྱིར་གསུངས་པར་ཟད་ཅེ་འམ། ཕས་ཕམ་པ་དང་ཉེས་བྱས་
ཀྱི་བར་དུ་ལྕི་ཡང་གི་བར་དུ་ཁྱད་པར་མེད་དེ། འདུལ་བ་འཛིན་པ་དག་གིས་སངས་རྒྱས་ཀྱིས་བཅས་པར་བརྫུན་དུ་སྨྲས་སོ་ཞེས་དེ་སྐད་ཟེར་ན་དེ་ནི་སངས་རྒྱས་ཀྱིས་བསྟན་པ་མ་ཡིན་གྱི། དེ་སྐད་དུ་སྨྲ་བ་ནི་བདུད་ཀྱི་མདོ་སྡེ་དང་འདུལ་བ་
ཡིན་པར་རིག་པར་བྱའོ། །དེ་ལ་གང་འདི་སྐད་དུ་ཚུལ་ཁྲིམས་ལ་གནས་པ་ཉེས་བྱས་ཕྲ་མོའི་བར་དུ་གཅིག་ཙམ་ཉམས་ན་ཡང་དཔག་ཏུ་མེད་པའི་སྡུག་བསྔལ་མྱོང་བར་གྱུར་ཏེ། དེ་ལྟར་ཤེས་ནས་ཇི་ལྟར་རུ་སྦལ་དག་ཡན་ལག་
དྲུག་སྦེད་པ་བཞིན་དུ་བདག་གི་ལུས་ཤིན་ཏུ་བསྲུང་ངོ་། །དེ་ལ་གཞན་ཡང་འདུལ་བ་འཛིན་པ་དག་འདི་སྐད་དུ་ཚུལ་ཁྲིམས་ཅི་ཉམས་ཀྱང་ཁ་ན་མ་ཐོ་བའི་འབྲས་བུ་སྨིན་པ་མེད་དོ་ཞེས་སྨྲ་ན་གང་ཟག་དེ་ལ་བསྙེན་པར་མི་བྱའོ་ཞེས་
བཅོམ་ལྡན་འདས་ཀྱིས་ཚིགས་སུ་བཅད་པ་ལས་གསུངས་པ། ཆོས་གཅིག་ཙམ་ལས་འདས་པ་གང་། །དེ་ནི་བརྫུན་དུ་སྨྲ་བ་སྟེ། །འཇིག་རྟེན་ཕྱི་མ་མི་མཐོང་བས། །སྡིག་པ་གང་ཡང་མི་བྱེད་མེད། །དེ་བས་ན་གང་ཟག་
དེ་ལ་བསྙེན་པར་མི་བྱ་སྟེ། ངའི་སངས་རྒྱས་ཀྱི་ཆོས་ནི་འདི་ལྟར་ཡོངས་སུ་དག་པ་ཡིན་ན་ཉེས་པ་སྦོམ་པོ་དང་། དགེ་འདུན་གྱི་ལྷག་མ་དང་། ཕས་ཕམ་པ་དག་ཁ་ན་མ་ཐོ་བ་ཡིན་པར་རྩི་བ་ལྟ་སྨོས་ཀྱང་ཅི་དགོས། དེ་བས་ན་ཆོས་
དེ་དག་ཤིན་ཏུ་བསྲུང་ངོ་། །གལ་ཏེ་མ་བསྲུངས་ན་གཞན་དུ་ན་ཆོས་གང་ལ་ཚུལ་ཁྲིམས་ཤེས་གདགས། ངས་མདོ་སྡེ་ལས་ཀྱང་གསུངས་ཏེ། ཕས་ཕམ་པ་བཞི་ཉམས་པ་ནས་ཉེས་བྱས་ཕྲ་མོའི་བར་དུ་ཉམས་ན་ཆད་

47-1-116b

པས་གཅོད་དོ་ཞེས་གསུངས་སོ། །སོ་སོའི་སྐྱེ་བོ་དག་གལ་ཏེ་ཚུལ་ཁྲིམས་མ་བསྲུངས་ན་སངས་རྒྱས་ཀྱི་རང་བཞིན་ཇི་ལྟར་མཐོང་བར་འགྱུར་ཏེ། སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པ་ཡང་ཚུལ་
ཁྲིམས་བསྲུངས་པ་ལས་མཐོང་བར་འགྱུར་རོ། །སངས་རྒྱས་ཀྱི་རང་བཞིན་མཐོང་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །མདོ་སྡེ་གསུང་རབ་དགུ་པོ་ལས་ཤིན་ཏུ་རྒྱས་པའི་
མདོ་སྡེ་མེད་དེ། སངས་རྒྱས་ཀྱི་རང་བཞིན་ཡོད་པར་ཡང་ངས་མ་གསུངས་སོ། །མདོ་སྡེ་དེ་ལས་མ་གསུངས་མོད་ཀྱི། ཡང་དག་པར་ཡོད་པར་རིག་པར་བྱའོ། །དེ་ལ་གང་ཞིག་དེ་སྐད་དུ་སྨྲ་བ་ནི་ངའི་ཉེ་གནས་ཡང་དག་པ་ཡིན་
པར་རིག་པར་བྱའོ། །བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་མཆིས་པར་བཀའ་སྩལ་པ། 
འདི་མདོ་སྡེ་གསུང་རབ་དགུ་པོ་ལས་ནི་མ་ཐོས་ན་ད་མཆིས་པར་བསྟན་ཅིང་གསུངས་ན་ཕས་ཕམ་པར་མི་འགྱུར་རམ། བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་སྨྲས་པ་བཞིན་ཏེ། ཕས་ཕམ་པར་མི་འགྱུར་རོ། །
རིགས་ཀྱི་བུ་འདི་ལྟ་སྟེ། དཔེར་ན་གང་ཟག་གཅིག་གིས་འདི་སྐད་དུ་རྒྱ་མཚོའི་ནང་ན་རིན་པོ་ཆེ་བདུན་ནི་ཡོད་ཀྱི། བརྒྱད་མེད་དོ་ཞེས་སྨྲས་ཀྱང་ཉེས་པ་མེད་དོ། །དེ་བཞིན་དུ་མདོ་སྡེ་གསུང་རབ་དགུ་པོ་ལས་སངས་རྒྱས་ཀྱི་རང་བཞིན་
མེད་དོ་ཅེས་སྨྲས་ཀྱང་ཉེས་པ་མེད་དོ། །དེ་ཅིའི་ཕྱིར་ཞེ་ན། བཅོམ་ལྡན་འདས་ཀྱིས་ཐེག་པ་ཆེན་པོ་ཡེ་ཤེས་ཀྱི་རྒྱ་མཚོ་ལས་སངས་རྒྱས་ཀྱི་རང་བཞིན་ཡོད་པར་གསུངས་ཀྱི། ཐེག་པ་གཉིས་ཀྱིས་ནི་ཤེས་པ་འམ་མཐོང་བ་
མ་ཡིན་ཏེ། དེ་བས་ན་མེད་ཅེས་སྨྲས་ཀྱང་ཉེས་པ་མེད་དོ། །འདི་ལྟར་སྤྱོད་ཡུལ་འདི་ནི་སངས་རྒྱས་རྣམས་ཀྱིས་མཁྱེན་ཀྱིས་ཉན་ཐོས་དང་རང་སངས་རྒྱས་ཀྱིས་ཤེས་པའི་ཡུལ་མ་ཡིན་ནོ། །རིགས་ཀྱི་བུ་གལ་ཏེ་གང་ཟག་

47-1-117a

གིས་དེ་བཞིན་གཤེགས་པའི་སྙིང་པོ་ཤིན་ཏུ་ཟབ་མོ་མ་ཐོས་ན་སངས་རྒྱས་ཀྱི་རང་བཞིན་ཡོད་པར་མི་ཤེས་སོ། །དེ་ལ་ཤིན་ཏུ་ཟབ་མོའི་སྙིང་པོ་གང་ཞེ་ན། དེ་ནི་འདི་ལྟ་སྟེ། ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེའོ། །
རིགས་ཀྱི་བུ་མུ་སྟེགས་ཅན་ཁ་ཅིག་ནི་བདག་ཅེས་བྱ་བ་རྟག་པར་ཡང་སྨྲ། ཁ་ཅིག་ནི་བདག་མེད་ཅེས་བྱ་བ་ཆད་པར་ཡང་སྨྲའོ། །དེ་བཞིན་གཤེགས་པ་ནི་དེ་ལྟ་མ་ཡིན་ཏེ། བདག་ཡོད་པར་ཡང་གསུངས་ལ། བདག་མེད་
པར་ཡང་གསུངས་པས་དབུ་མ་ཞེས་བྱའོ། །དེ་ལ་གང་ཞིག་སངས་རྒྱས་ཀྱིས་དབུ་མར་གསུངས་པ་ལས་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་དེ། ཉོན་མོངས་པས་བསྒྲིབས་པས་མི་ཤེས་མི་
མཐོང་ངོ་། །དེ་བས་ན་ཉོན་མོངས་པ་གཅད་པའི་ཐབས་ལ་ནན་ཏན་བྱའོ་ཞེས་གང་དེ་སྐད་དུ་སྨྲ་ན་དེ་ནི་ཕས་ཕམ་པ་བཞི་མ་ཉམས་པ་ཡིན་པར་རིག་པར་བྱའོ། །གང་འདི་སྐད་དུ་མི་སྨྲ་བ་དེ་ནི་ཕས་ཕམ་པ་ཉམས་པ་ཞེས་
བྱའོ། །དེ་ལ་གང་ཞིག་འདི་སྐད་དུ་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་རང་བཞིན་ཡོད་པའི་ཕྱིར་རོ། །སངས་རྒྱས་ཀྱི་རང་བཞིན་
ཡོད་པ་ནི་གདོན་མི་ཟ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་སྟེ། དེ་བས་ན་བདག་ནི་བྱང་ཆུབ་ཏུ་མངོན་པར་སངས་རྒྱས་སོ་ཞེས་སྨྲ་ན་གང་ཟག་དེ་ནི་ཕས་ཕམ་པ་བྱུང་བ་རིག་
པར་བྱའོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་རང་བཞིན་ཡོད་མོད་ཀྱི་སྒྲུབ་པའི་ཐབས་ལ་ནན་ཏན་མ་བྱས་ན་མཐོང་བར་མི་འགྱུར་རོ། །མི་མཐོང་བས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་མི་རྒྱའོ། །
རིགས་ཀྱི་བུ་དེ་ལྟ་བས་ན་སངས་རྒྱས་ཀྱི་ཆོས་ནི་ཤིན་ཏུ་ཟབ་སྟེ། བསམ་གྱིས་མི་ཁྱབ་བོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱལ་པོ་ཞིག་གིས་

47-1-117b

ཇི་ལྟར་ན་དགེ་སློང་དག་བླ་མའི་ཆོས་ལས་ཉམས་པ་ལགས་ཤེས་འདྲི་ན་དེ་ལ་ཇི་སྐད་བགྱི། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། དགེ་སློང་གང་ཞིག་རྙེད་པ་དང་བསོད་སྙོམས་ཀྱི་ཕྱིར་གཡོ་དང་སྒྱུས་འཚོ་ཞིང་། འདི་
སྙམ་དུ་བདག་ལ་འཇིག་རྟེན་དུ་བཅས་པས་དགེ་སློང་དུ་ཤེས་པར་འགྱུར་སྙམ་དུ་སེམས་ཏེ། བདག་ཇི་ལྟར་ན་རྙེད་པ་ཆེར་རྙེད་ཅིང་གྲགས་པར་འགྱུར་སྙམ་ནས་དགེ་སློང་གླེན་པ་གཏི་མུག་ཅན་དག་ཉིན་མཚན་དུ་འདི་སྙམ་དུ་སེམས་
ཏེ། བདག་དགེ་སྦྱོང་གི་འབྲས་བུ་མ་ཐོབ་ཀྱང་འཇིག་རྟེན་དུ་བཅས་པ་དག་གིས་བདག་གིས་དགེ་སྦྱོང་གི་འབྲས་བུ་ཐོབ་པ་ཙམ་དུ་འཛིན་པར་འགྱུར། དགེ་བསྙེན་དང་། དགེ་བསྙེན་མ་ལ་སོགས་པ་ཐམས་ཅད་ཀྱིས་བདག་ལ་
འཕགས་པ་བསོད་ནམས་ཅན་ནོ་ཞེས་བརྗོད་པར་འགྱུར་སྙམ་སེམས་ཏེ། དེ་ཡང་རྙེད་པ་དང་གྲགས་པའི་ཕྱིར་གྱི་ཆོས་འདོད་པའི་ཕྱིར་ནི་མ་ཡིན་ནོ། །སྤྱོད་ལམ་འཆོས་ཤིང་ངུར་སྨྲིག་བགོ་བ་དང་། ལྷུང་བཟེད་ཐོགས་པ་ཚུལ་
ལས་མི་ཉམས་ཤིང་བས་མཐར་གནས་ནས་དགྲ་བཅོམ་པ་ལྟ་བུར་འཆོས་ཏེ། འཇིག་རྟེན་གྱི་མི་དག་ཇི་ལྟར་ན་དགེ་སློང་འདི་ནི་མཆོག་དམ་པ་སྟེ། དཀའ་ཐུབ་དང་རབ་ཏུ་ཞི་བའི་ཆོས་ལ་ནན་ཏན་བྱེད་པའོ་ཞེས་བསྔགས་ཤིང་
དེའི་རྒྱུ་དེའི་རྐྱེན་ཀྱིས་བདག་ལ་སློབ་མ་དང་འཁོར་མང་བར་འགྱུར། ཐམས་ཅད་ཀྱིས་ཆོས་གོས་དང་། བསོད་སྙོམས་དང་། མལ་ཆ་དང་། ནད་ཀྱི་རྐྱེན་སྨན་མང་དུ་འབུལ་ཞིང་བུད་མེད་མང་པོས་བསྙེན་བཀུར་དང་། སྟི་སྟང་བྱེད་པར་འགྱུར་
སྙམ། དགེ་སློང་ཕ་འམ། དགེ་སློང་མ་དག་དེ་ལྟར་སེམས་ན་དེ་ནི་བླ་མ་མིའི་ཆོས་ཅན་དུ་འགྱུར་བ་ཞེས་བྱའོ། །དེ་ལ་དགེ་སློང་གང་བླ་ན་མེད་པའི་དམ་པའི་ཆོས་རྣམ་པར་གཞག་པའི་ཕྱིར་བས་མཐར་གནས་ན་དགྲ་བཅོམ་པ་མ་ཡིན་
ཡང་ཕ་རོལ་པོས་དགྲ་བཅོམ་པ་ཡིན་པར་སེམས་ན་དེ་ནི་དགེ་སློང་ཤིན་ཏུ་དགེ་བ། དགེ་སློང་ཞི་བ། དགེ་སློང་བཟང་པོ་སྟེ། སྐྱེ་བོ་ཚད་མེད་པ་རྣམས་དད་པའི་སེམས་སྐྱེ་བར་འགྱུར་རོ། །དེའི་རྒྱུ་དེའི་རྐྱེན་ཀྱིས་ཚད་མེད་པའི་དགེ་སློང་

47-1-118a

དག་དེའི་འཁོར་དུ་འགྱུར་ཏེ། ཚུལ་ཁྲིམས་ཉམས་པའི་དགེ་སློང་དང་། དགེ་བསྙེན་དག་ཀྱང་ཚུལ་ཁྲིམས་སྡོམ་པ་ལ་གནས་པར་འགྱུར་རོ། །དེའི་རྒྱུ་དེའི་རྐྱེན་གྱིས་དམ་པའི་ཆོས་ཡུན་རིང་དུ་གནས་ཤིང་དེ་བཞིན་
གཤེགས་པའི་བླ་ན་མེད་པའི་ཆོས་རྒྱས་པ་དང་། ཤིན་ཏུ་རྒྱས་པའི་ཐེག་པ་ཆེན་པོའི་ཆོས་ཀྱིས་སྐྱེ་བོ་ཚད་མེད་པ་སྒྲོལ་བ་དང་། དེ་བཞིན་གཤེགས་པས་གསུངས་པའི་མདོ་སྡེ་དང་འདུལ་བའི་དོན་ལྕི་བ་དང་ཡང་བ་ལ་ཤིན་ཏུ་
མཁས་པར་འགྱུར་རོ། །དེ་འདི་སྐད་དུ་བདག་ལ་སངས་རྒྱས་ཀྱི་རང་བཞིན་ཡོད་དེ། དེ་བཞིན་གཤེགས་པའི་སྙིང་པོ་ཞེས་བྱ་བའི་མདོ་ལས་ཀྱང་བདག་ནི་གདོན་མི་ཟ་བར་མངོན་པར་འཚང་རྒྱ་སྟེ། ཚད་མེད་པའི་ཀུན་
ནས་ཉོན་མོངས་པ་འང་ཟད་པར་འགྱུར་ཞིས་སྨྲ་ལ་ཚད་མེད་པའི་དགེ་བསྙེན་རྣམས་ལ་ཡང་འདི་སྐད་དུ་ཁྱེད་ལ་སངས་རྒྱས་ཀྱི་རང་བཞིན་ཡོད་དེ། བདག་ཅག་དེ་བཞིན་གཤེགས་པའི་བྱང་ཆུབ་ཀྱི་ས་ལ་གནས་ན་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་སྟེ། ཚད་མེད་པའི་ཀུན་ནས་ཉོན་མོངས་པ་འང་ཞི་བར་འགྱུར་རོ་ཞེས་དེ་སྐད་དུ་སྨྲས་ཀྱང་གང་ཟག་དེ་ནི་བླ་མ་མིའི་ཆོས་སྨྲ་བ་མ་ཡིན་ཏེ། བྱང་ཆུབ་སེམས་དཔའ་ཞེས་
བྱའོ། །དེ་ལ་ཉེས་བྱས་ཀྱི་ཁ་ན་མ་ཐོ་བས་ཀྱང་སུམ་བཅུ་རྩ་གསུམ་གནམ་གྱི་ཉི་མ་དང་། ཟླ་བ་དང་ལོར་བགྲང་བའི་ལོ་སྟོང་ཕྲག་བརྒྱད་བརྒྱའི་བར་དུ་སེམས་ཅན་དམྱལ་བར་ལྟུང་སྟེ། སྡུག་བསྔལ་མྱོང་བར་འགྱུར་ན་ཆེད་དུ་ཉེས་
པ་སྦོམ་པོའི་སྡིག་པ་བྱེད་པ་ལྟ་ཅི་སྨོས། ཐེག་པ་ཆེན་པོ་ལས་དགེ་སློང་གང་ཞིག་ཉེས་པ་སྦོམ་པོ་བྱུང་ན་བསྙེན་པར་མི་བྱའོ་ཞེས་གསུངས་སོ། །དེ་ལ་ཐེག་པ་ཆེན་པོའི་མདོ་ལས་ཉེས་པ་སྦོམ་པོར་འགྱུར་བ་གང་ཞེ་ན། 
གལ་ཏེ་ཁྱིམ་བདག་གཅིག་གིས་སངས་རྒྱས་ཀྱི་རྟེན་གཙུག་ལག་ཁང་བརྩིགས་ནས་མེ་ཏོག་གི་ཕྲེང་བ་སངས་རྒྱས་ལ་ཕུལ་ཏེ། དགེ་སློང་གཅིག་གིས་མེ་ཏོག་གི་ཕྲེང་བ་བརྒྱུས་པའི་སྲད་བུ་མ་ཞུས་པར་བླངས་ན་ཉེས་

47-1-118b

པ་སྦོམ་པོའོ། །ཤེས་ཀྱང་རུང་མི་ཤེས་ཀྱང་རུང་སྦོམ་པོའོ། །གལ་ཏེ་འདོད་པའི་སེམས་ཀྱིས་སངས་རྒྱས་ཀྱི་མཆོད་རྟེན་བཤིག་ན་ཡང་ཉེས་པ་སྦོམ་པོ་སྟེ། གང་ཟག་དེ་ལ་ནི་བརྟེན་པར་མི་བྱའོ། །གལ་ཏེ་རྒྱལ་པོ་
འམ་བློན་པོ་ཞིག་གིས་མཆོད་རྟེན་ཞིག་པ་མཐོང་ནས་སྐུ་གདུང་མཆོད་པའི་ཕྱིར་རམ། ཞིག་པ་གསོ་བའི་ཕྱིར་བཅོས་ཏེ། མཆོད་རྟེན་གྱི་ནང་ནས་རིན་པོ་ཆེ་རྙེད་ནས་དགེ་སློང་ལ་བཞག་པ་ལས་དགེ་སློང་གི་དབང་
བྱས་ཏེ། བདག་གིར་སྤྱད་ན་དགེ་སློང་དེ་ནི་སྨེ་བའོ། །རྩོད་ཅིང་འཐབ་པའི་ཕྱིར་གཞིར་འགྱུར་བ་སྟེ། དགེ་བསྙེན་པ་རྣམས་ཀྱིས་དེ་ལ་བསྙེན་བཀུར་དང་། མཆོད་པ་དང་སྟི་སྟང་མི་བྱའོ། །དགེ་སློང་དེ་ནི་དབང་པོ་མེད་པ་
ཞེས་ཀྱང་བྱ། མཚན་གཉིས་པ་ཞེས་ཀྱང་བྱ། མ་ནིང་ཞེས་ཀྱང་བྱའོ། །མ་ནིང་ཞེས་ཀྱང་བྱ་བ་ནི། བུད་མེད་ལ་ཆགས་པའི་ཚེ་བུད་མེད་དུ་འགྱུར་བ་དང་། སྐྱེས་པ་ལ་ཆགས་པའི་ཚེ་སྐྱེས་པར་འགྱུར་བའོ། །དགེ་སློང་དེ་
ནི་དབང་པོ་ངན་པ་ཞེས་བྱ་སྟེ། སྐྱེས་པ་ཞེས་ཀྱང་མི་བྱ། བུད་མེད་ཅེས་ཀྱང་མི་བྱ། རབ་ཏུ་བྱུང་བ་ཞེས་ཀྱང་མི་བྱ། ཁྱིམ་པ་ཞེས་ཀྱང་མི་བྱ་སྟེ། དགེ་སློང་དེ་ལ་ནི་བསྙེན་བཀུར་དང་མཆོད་པ་དང་། སྟི་སྟང་མི་བྱའོ། །སངས་
རྒྱས་ཀྱི་བསྟན་པ་ལས་དགེ་སྦྱོང་གི་ཆོས་ནི་སྙིང་རྗེའི་སེམས་ཀྱིས་སེམས་ཅན་གྱི་མགོན་དང་སྐྱབས་བྱེད་ཅིང་ཆུང་ངུ་ན་གྲོག་མའི་བར་དུ་ཡང་མི་འཇིགས་པ་སྦྱིན་པ་ནི་དགེ་སྦྱོང་གི་ཆོས་ཤེས་བྱའོ། །སྨྱོ་བའི་ཁུ་བ་ཆུང་
མི་འཐུང་ཞིང་དྲི་མི་ཞིམ་པ་དང་མནམ་པའི་བར་དུ་ཡོངས་སུ་སྤོང་བ་ནི་དགེ་སྦྱོང་གི་ཆོས་ཤེས་བྱའོ། །བརྫུན་དུ་མི་སྨྲ་ཞིང་ཆུང་ངུ་ན་རྨི་ལམ་ན་ཡང་བརྫུན་སྨྲ་བར་མི་སེམས་པ་ནི་དགེ་སྦྱོང་གི་ཆོས་ཤེས་བྱའོ། །འདོད་ཆགས་
ཀྱི་སེམས་རྨི་ལམ་གྱི་བར་དུ་ཡང་མེད་པ་ནི་དགེ་སྦྱོང་གི་ཆོས་ཤེས་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །གལ་ཏེ་དགེ་སློང་གིས་རྨི་ལམ་དུ་མི་ཚངས་པར་

47-1-119a

སྤྱད་ན་ཚུལ་ཁྲིམས་ཉམས་པར་འགྱུར་རམ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་མ་ཡིན་ནོ། །མི་ཚངས་པར་སྤྱོད་པ་ལ་ཤིན་ཏུ་བཙོག་པར་བསམས་ཏེ། ཆུང་ངུ་ན་སྐད་ཅིག་ཙམ་ཡང་གཙང་བའི་འདུ་
ཤེས་མི་སྐྱེད་དོ། །བུད་མེད་ཀྱིས་རྣམ་པར་ཉོན་མོངས་པའི་འདུ་ཤེས་སྤངས་ཏེ། རྨི་ལམ་དུ་མི་ཚངས་པར་སྤྱོད་པར་རྨིས་ན་སད་མ་ཐག་དུ་ཤིན་ཏུ་འགྱོད་པའི་སེམས་བསྐྱེད་དོ། །དགེ་སློང་གིས་བསོད་སྙོམས་སྤྱོད་པ་ན་མུ་གེ་བྱུང་བའི་ཚེ། 
བུའི་ཤ་ལ་ཟ་བ་ཙམ་དུ་འདུ་ཤེས་སྐྱེད་དོ། །འདོད་ཆགས་ཀྱི་སེམས་བྱུང་ན་དེ་མ་ཐག་ཏུ་ཡོངས་སུ་སྤོང་ངོ་། །ཆོས་ཀྱི་རྣམ་གྲངས་འདི་དག་ནི་སངས་རྒྱས་ཀྱི་ཆོས་ཀྱིས་གསུངས་པའི་མདོ་སྡེ་དང་འདུལ་བ་ཡིན་པར་ཤེས་པར་བྱའོ། །
དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་པ་ནི་བདུད་ཀྱི་རིས་སུ་གཏོགས་པ་ཡིན་ནོ། །སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །དེ་ལ་གང་འདི་སྐད་དུ་རྟག་ཏུ་རྐང་པ་ཡ་
གཅིག་གིས་འགྲེང་བ་དང་། ཁ་རོག་སྟེ་ཅང་མི་སྨྲ་བ་དང་། ཆུར་མཆོང་བ་དང་། མེར་མཆོང་བ་དང་། བྲག་ལས་མཆོང་བ་དང་། ཡ་ང་བ་ལ་མི་འཛེམ་པ་དང་། དུག་འཐུང་བ་དང་། ཁ་ཟས་མི་ཟ་བ་དང་། ཐལ་ཁུང་ན་ཉལ་བ་དང་། བདག་གི་རྐང་ལག་
འཆིང་བ་དང་། སེམས་ཅན་གསོད་པ་དང་། རིག་སྔགས་ཅན་དང་། གདོལ་བུ་དང་། དབང་པོ་མེད་པ་དང་། མཚན་གཉིས་པ་དང་། མཚན་མ་ངེས་པ་དང་། དབང་པོ་མ་ཚང་བ་ལ་སོགས་པ་ཐམས་ཅད་དེ་བཞིན་གཤེགས་པས་རབ་ཏུ་བྱུང་
བར་གནང་ངོ་ཞེས་སྨྲ་ན་དེ་ནི་བདུད་ཀྱིས་བསྟན་པ་ཡིན་ནོ། །སྔོན་བཅོམ་ལྡན་འདས་ཀྱིས་ཟར་གནང་བ་ནི་བའི་འོ་མ་ལས་བསྒྱུར་བ་རྣམ་པ་ལྔ་དང་། འབྲུ་མར་དང་། སྦྲང་རྩི་ལ་སོགས་པ་དང་། གོས་ཀེའུ་ཤ་ཡ་དང་། ལྷམ་ཡུ་རྡུམ་
ལ་སོགས་པ་གྱོན་དུ་གནང་བ་ལས་དེ་མ་ཡིན་པ་གཞན་ཡང་འདི་སྐད་དུ། མ་ཧ་ལང་ཀ་ཡང་གྱོན་དུ་གནང་ངོ་ཞེ་འམ། ས་བོན་ཐམས་ཅད་སྩོགས་སུ་གནང་ཞེས་འམ། རྩྭ་དང་ཤིང་ལ་སོགས་པ་ཐམས་ཅད་ལ་སྲོག་ཡོད་པར་སངས་རྒྱས་

47-1-119b

ཀྱིས་གསུངས་ནས་མྱ་ངན་ལས་འདས་སོ་ཞེས་མདོ་སྡེ་དང་འདུལ་བ་ལ་དེ་སྐད་འབྱུང་ན་དེ་ནི་བདུད་ཀྱིས་བསྟན་པ་ཡིན་པར་ཤེས་པར་བྱའོ། །སངས་རྒྱས་ཀྱིས་ནི་རྟག་ཏུ་རྐང་པ་ཡ་གཅིག་གིས་འགྲེང་བར་ཡང་མ་གནང་སྟེ། ཆོས་ཀྱི་
ཕྱིར་འགྲོ་བ་དང་། སྡོད་པ་དང་། འདུག་པ་དང་། ཉལ་དུ་གནང་ངོ་། །དེ་མ་ཡིན་པ་དུག་ཟ་བ་དང་། ཁ་ཟས་མི་ཟ་བ་དང་། ཚ་བ་རྣམ་ལྔས་ལུས་སྲེག་པ་དང་། རྐང་ལག་འཆིང་བ་དང་། སེམས་ཅན་གསོད་པ་དང་། རིག་སྔགས་གཅོད་པ་དང་། 
འགྲོན་བུ་དང་། བ་ལང་གི་མཆེ་བ་ལས་ལྷམ་བྱེད་པ་དང་། ས་བོན་སྩོགས་པ་དང་། རྩི་ཤིང་ལས་སྲོག་ཡོད་པ་དང་། མ་ཧ་ལིང་ཀ་གྱོན་དུ་མི་གནང་སྟེ། གལ་ཏེ་བཅོམ་ལྡན་འདས་ཀྱིས་གནང་བར་གསུངས་སོ་ཞེས་སྨྲ་ན་དེ་ནི་མུ་སྟེགས་
ཅན་གྱི་འཁོར་ཡིན་ཏེ། སངས་རྒྱས་ཀྱི་ཉེ་གནས་མ་ཡིན་ནོ། །སངས་རྒྱས་ཀྱིས་གནང་བ་ནི་བའི་འོ་མ་ལས་སྒྱུར་བ་རྣམ་པ་ལྔ་དང་། འབྲུ་མར་དང་། སྦྲང་རྩི་ལ་སོགས་པ་དང་། ཀེའུ་ཤ་ཡ་དང་། ལྷམ་བུ་ཡུ་ཆད་གྱོན་དུ་གནང་ངོ་། །སངས་
རྒྱས་ཀྱིས་ཆེན་པོ་བཞི་ལ་སྲོག་མེད་པར་གསུངས་ཏེ། མདོ་སྡེ་དང་འདུལ་བ་ལས་འདི་སྐད་དུ་བྱུང་བ་ནི་སངས་རྒྱས་ཀྱིས་བསྟན་པ་ཞེས་བྱའོ། །དེ་ལ་སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་ངའི་ཉེ་གནས་
ཡང་དག་པ་ཡིན་ནོ། །གལ་ཏེ་སངས་རྒྱས་ཀྱིས་བསྟན་པའི་རྗེས་སུ་མི་འཇུག་པ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །གལ་ཏེ་སངས་རྒྱས་ཀྱིས་བསྟན་པའི་མདོ་སྡེ་དང་འདུལ་བའི་རྗེས་སུ་ཞུགས་ན་དེ་ནི་བྱང་ཆུབ་
སེམས་དཔའ་སེམས་དཔའ་ཆེན་པོ་ཡིན་པར་རིག་པར་བྱའོ། །རིགས་ཀྱི་བུ་བདུད་ཀྱིས་བསྟན་པ་དང་། སངས་རྒྱས་ཀྱིས་གསུངས་པའི་ཁྱད་པར་དང་བྱེ་བྲག་ནི་རྒྱས་པར་ཁྱོད་ལ་བཤད་པ་འདི་ཡིན་ནོ། །བྱང་ཆུབ་སེམས་
དཔའ་འོད་སྲུང་གིས་ཡང་གསོལ་པ། བཅོམ་ལྡན་འདས་བདག་གིས་ནི་གདོད་བདུད་ཀྱིས་བསྟན་པ་དང་། སངས་རྒྱས་ཀྱིས་གསུངས་པའི་བྱེ་བྲག་གི་མཚན་ཉིད་འཚལ་ཏེ། དེས་ན་སངས་རྒྱས་ཀྱི་ཆོས་ཟབ་མོ་ཡང་རྟོགས་པར་

47-1-120a

འགྱུར་རོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱིས་དེ་ལྟར་ཤིན་ཏུ་བྱེ་བྲག་ཕྱེད་ཅིང་གསལ་བར་རྟོགས་ན་མཁས་པ་ཤེས་རབ་ཅན་ཞེས་བྱའོ། །
རིགས་ཀྱི་བུ་སྡུག་བསྔལ་ནི་འཕགས་པའི་བདེན་པ་ཞེས་བྱར་མི་རུང་ངོ་། །དེ་ཅིའི་ཕྱིར་ཞེ་ན། ཅི་སྟེ་སྡུག་བསྔལ་ལ་སྡུག་བསྔལ་གྱི་འཕགས་པའི་བདེན་པ་ཞེས་བྱ་ན་ལྟ། བ་ལང་དང་། ལུག་དང་། བོང་བུ་དང་། རྟ་དང་། སེམས་
ཅན་དམྱལ་བའི་སེམས་ཅན་ལ་ཡང་འཕགས་པའི་བདེན་པ་ཡོད་པར་འགྱུར་རོ། །རིགས་ཀྱི་བུ་གང་ཞིག་དེ་བཞིན་གཤེགས་པའི་སྤྱོད་ཡུལ་ཤིན་ཏུ་ཟབ་མོ་རྟག་པ་གནས་པ་མི་འགྱུར་བའི་ཆོས་ཀྱི་སྐུ་དམ་པ་ལ་ཞལ་ཟས་ཀྱིས་
གསོ་བའི་སྐུ་སྙམ་སྟེ། ཆོས་ཀྱི་སྐུ་མ་ཡིན་པར་སེམས་ཤིང་དེ་བཞིན་གཤེགས་པའི་ཡོན་ཏན་དང་། གཟི་བརྗིད་དང་། ཆེ་བ་ཉིད་མི་ཤེས་ན་སྡུག་བསྔལ་བ་ཞེས་བྱའོ། །དེ་ཅིའི་ཕྱིར་ཞེ་ན། མི་ཤེས་པའི་ཕྱིར་ཆོས་ལ་ནི་ཆོས་མ་
ཡིན་པར་ལྟ། ཆོས་མ་ཡིན་པ་ལ་ནི་ཆོས་སུ་ལྟ་སྟེ། དེ་བས་ན་གང་ཟག་དེ་ནི་གདོན་མི་ཟ་བར་ངན་སོང་དུ་ལྟུང་ཞིང་འཁོར་བར་འཁོར་ཏེ། ཀུན་ནས་ཉོན་མོངས་པ་སྐྱེ་ཞིང་སྡུག་བསྔལ་ཆེན་པོ་མྱོང་བར་འགྱུར་རོ། །དེ་ལ་གང་ཞིག་དེ་
བཞིན་གཤེགས་པ་ནི་རྟག་པ་གནས་པ་མི་འགྱུར་མི་འཕོ་བར་ཤེས་སམ། རྟག་པ་དང་གནས་པའི་ཚིག་གཉིས་རྣ་ཁུང་དུ་ཐོས་པ་ཙམ་གྱིས་མཐོ་རིས་སུ་སྐྱེ་སྟེ། ཕྱིས་རྣམ་པར་གྲོལ་བ་ན་དེ་བཞིན་གཤེགས་པ་ནི་
རྟག་པ་གནས་པ་མི་འགྱུར་མི་འཕོ་བར་རྟོགས་ཤིང་རིག་པར་འགྱུར་ཏེ། རིག་ཅིང་རྟོགས་པས་འདི་སྐད་དུ་བདག་སྔོན་དོན་འདི་རྟོགས་པས་རྣམ་པར་གྲོལ་བར་གྱུར་ཏོ། །བདག་ཐོག་མ་ནས་མི་ཤེས་མ་རྟོགས་པས། འཁོར་
བར་འཁོར་བའི་མཐའ་མེད་པར་གྱུར་ཏེ། དེ་ནི་ཡང་དག་པའི་ཡེ་ཤེས་ཀྱིས་ཤེས་པར་གྱུར་ཏོ་ཞེས་སྨྲའོ།། །། བམ་པོ་བཅུ་པ། དེ་ལྟར་ཡང་དག་པའི་ཡེ་ཤེས་ཀྱིས་ཤེས་པ་ནི་སྡུག་བསྔལ་སྒོམ་པ་ཞེས་བྱ་སྟེ། ཕན་པ་དང་། 

47-1-120b

བདེ་བའི་དོན་ཆེན་པོར་འགྱུར་རོ། །གང་དེ་ལྟ་བུའི་ཚུལ་དུ་མི་ཤེས་ན་ཤིན་ཏུ་ནན་ཏན་བྱས་ཀྱང་ཕན་པ་དང་བདེ་བའི་དོན་དུ་མི་འགྱུར་རོ། །དེ་ལྟར་ན་སྡུག་བསྔལ་ཤེས་པ་སྟེ། སྡུག་བསྔལ་གྱི་འཕགས་པའི་བདེན་པ་ཞེས་བྱའོ། །
དེ་ལ་གང་དེ་ལྟ་བུའི་ཚུལ་དུ་ནན་ཏན་མ་བྱས་ན་སྡུག་བསྔལ་ཞེས་བྱ་སྟེ། སྡུག་བསྔལ་གྱི་འཕགས་པའི་བདེན་པ་མ་ཡིན་ནོ། །སྡུག་བསྔལ་ཀུན་འབྱུང་གི་བདེན་པ་ནི་ཡང་དག་པའི་ཆོས་ཡེ་ཤེས་མི་སྐྱེ་ཞིང་མ་བརྟགས་པའི་དངོས་པོ་
བྲན་ཕོ་དང་བྲན་མོ་ལ་སོགས་པ་འཆང་ཞིང་སྤྱོད་པ་དང་། ཆོས་མ་ཡིན་པ་ལ་ཡང་དག་པའི་ཆོས་སྨྲ་ཞིང་དམ་པའི་ཆོས་མེད་པར་བྱེད། ཡུན་རིང་དུ་གནས་པར་མི་བྱེད་པའོ། །དེའི་རྒྱུ་དེའི་རྐྱེན་ཀྱིས་ཆོས་རྣམས་ཀྱི་ཆོས་ཉིད་ཀྱང་མི་ཤེས་
སོ། །མི་ཤེས་པས་ན་འཁོར་བར་འཁོར་ཏེ་སྡུག་བསྔལ་མང་པོ་མྱོང་བས་མཐོ་རིས་སུ་སྐྱེ་བ་འམ་ཡང་དག་པའི་རྣམ་པར་གྲོལ་བས་རྣམ་པར་མི་གྲོལ་ལོ། །དེ་ལ་གང་ཟབ་མོའི་ཡེ་ཤེས་དང་ལྡན་པ། དམ་པའི་ཆོས་མི་འཇིག་པ་ནི་དེའི་རྒྱུ་དེའི་
རྐྱེན་ཀྱིས་མཐོ་རིས་སུ་སྐྱེ་སྟེ། ཡང་དག་པའི་རྣམ་པར་གྲོལ་བས་རྣམ་པར་གྲོལ་ལོ། །གང་སྡུག་བསྔལ་ཀུན་འབྱུང་གི་བདེན་པ་མི་ཤེས་ཏེ། དམ་པའི་ཆོས་ནི་མི་རྟག་པ་མི་གནས་པ་འགྱུར་བའི་ཆོས་ཅན་ནོ་ཞེས་སྨྲ་ན་དེའི་རྒྱུ་དེའི་རྐྱེན་
ཀྱིས་བསྐལ་པ་གྲངས་མེད་པའི་བར་དུ་འཁོར་བར་འཁོར་ཞིང་སྡུག་བསྔལ་མང་པོ་མྱོང་བར་འགྱུར་རོ། །དེ་ལ་གང་དམ་པའི་ཆོས་ནི་རྟག་པ་གནས་པ་མི་འགྱུར་མི་འཕོ་བ་ཉིད་དུ་ཤེས་ན་ཀུན་འབྱུང་ཤེས་པ་སྟེ། ཀུན་འབྱུང་འཕགས་པའི་
བདེན་པ་ཞེས་བྱའོ། །གང་དེ་ལྟ་བུའི་ཚུལ་དུ་ནན་ཏན་མི་བྱེད་ན་ཀུན་འབྱུང་ཞེས་བྱ་སྟེ། ཀུན་འབྱུང་འཕགས་པའི་བདེན་པ་མ་ཡིན་ནོ། །སྡུག་བསྔལ་འགོག་པའི་བདེན་པ་ནི་གང་སྟོང་པ་ཉིད་ལ་མང་དུ་སྒོམ་ཞིང་ནན་ཏན་བྱེད་པ་དང་
དགེ་བ་ཞེས་མི་བྱའོ། །དེ་ཅིའི་ཕྱིར་ཞེ་ན། ཆོས་ཐམས་ཅད་འགོག་པའི་ཕྱིར་དེ་བཞིན་གཤེགས་པའི་ཡང་དག་པའི་ཆོས་ཀྱི་སྡེ་སྣོད་འཇིག་པའི་ཕྱིར་རོ། །གང་དེ་ལྟར་སློབ་ཅིང་ནན་ཏན་བྱེད་པ་ནི་སྟོང་པ་ཉིད་སྒོམ་པའོ། །སྡུག་བསྔལ་

47-1-121a

འགོག་པ་སྒོམ་པ་ནི་མུ་སྟེགས་ཅན་ཐམས་ཅད་ལས་ཕྱིར་བཟློག་པའོ། །ཅི་སྟེ་སྟོང་པ་ཉིད་སྒོམ་པ་འགོག་པ་ཉིད་ཡིན་དུ་ཟིན་ན་མུ་སྟེགས་ཅན་ཐམས་ཅད་ཀྱང་སྟོང་པའི་ཆོས་སྒོམ་པས་འགོག་པའི་བདེན་པ་
ཡོད་པར་འགྱུར་རོ། །དེ་ལ་གང་ཞིག་འདི་སྐད་དུ་དེ་བཞིན་གཤེགས་པའི་སྙིང་པོ་ཡོད་དེ་བལྟར་མི་མཐོང་མོད་ཀྱི། ཉོན་མོངས་པ་ཐམས་ཅད་བསལ་ན་རྟོགས་པར་འགྱུར་རོ་ཞེས་སྨྲ་འམ། གལ་ཏེ་སྐད་ཅིག་ཙམ་སེམས་བསྐྱེད་
ན་ཡང་དེའི་རྒྱུ་དེའི་རྐྱེན་ཀྱིས་ཆོས་ཐམས་ཅད་ལ་དབང་ཐོབ་པར་འགྱུར་རོ། །གང་ཞིག་དེ་བཞིན་གཤེགས་པའི་སྙིང་པོ་ལ་བདག་དང་། སྟོང་པ་དང་། ཞི་བ་མེད་པའི་ཚུལ་དུ་སྒོམ་ན་གང་ཟག་དེ་ནི་སྐྱེ་བ་ཚད་མེད་པའི་བར་དུ་འཁོར་
བར་ཡོངས་སུ་འཁོར་ཞིང་སྡུག་བསྔལ་མྱོང་བར་འགྱུར་རོ། །དེ་ལ་གང་དེ་ལྟ་བུའི་ཚུལ་དུ་མི་སྒོམ་ན་ཉོན་མོངས་པ་དང་བཅས་ཀྱང་མྱུར་དུ་བྱང་བར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྙིང་པོ་གསང་བ་
ཤེས་པའི་ཕྱིར་ཏེ། སྡུག་བསྔལ་འགོག་པའི་བདེན་པ་ཞེས་བྱའོ། །དེ་ལ་གང་དེ་ལྟ་བུའི་ཚུལ་དུ་ནན་ཏན་བྱེད་ན་ངའི་ཉེ་གནས་སོ། །གང་དེ་ལྟ་བུའི་ཚུལ་དུ་ནན་ཏན་མི་བྱེད་པ་ནི་དོན་མེད་པར་སྒོམ་པ་སྟེ། འགོག་པ་
འཕགས་པའི་བདེན་པ་མ་ཡིན་ནོ། །ལམ་གྱི་འཕགས་པའི་བདེན་པ་ནི་འདི་ལྟ་སྟེ། སངས་རྒྱས་དང་། ཆོས་དང་། དགེ་འདུན་དང་། ཡང་དག་པར་རྣམ་པར་གྲོལ་བ་ལ་སེམས་ཅན་ཁ་ཅིག་ཕྱིན་ཅི་ལོག་གི་སེམས་ཀྱིས་འདི་སྐད་དུ་
སངས་རྒྱས་དང་། ཆོས་དང་། དགེ་འདུན་དང་། ཡང་དག་པར་རྣམ་པར་གྲོལ་བ་མེད་དེ། སྒྱུ་མ་ལྟ་བུར་འཁོར་བར་འཁོར་རོ་ཞེས་དེ་ལྟ་བུའི་ཚུལ་དུ་ལྟ་ན་དེའི་རྒྱུ་དེའི་རྐྱེན་ཀྱིས་སྲིད་པ་གསུམ་དུ་འཁོར་ཞིང་ཡུན་རིང་པོར་སྡུག་བསྔལ་ཆེན་པོ་མྱོང་
བར་འགྱུར་རོ། །དེ་ལ་གང་འདི་ལྟ་བུར་སེམས་བསྐྱེད་དེ། དེ་བཞིན་གཤེགས་པ་དང་། ཆོས་དང་། དགེ་འདུན་དང་རྣམ་པར་གྲོལ་བ་ནི་རྟག་པ་གནས་པ་མི་འགྱུར་མི་འཕོ་བའི་ཚུལ་དུ་ལྟ་ན་དེ་ལྟར་སྐད་ཅིག་སེམས་པ་ཙམ་གྱིས་སྐྱེ་བ་ཚད་མེད་པའི་

47-1-121b

བར་དུ་བསོད་ནམས་ཡིད་བཞིན་དུ་འགྱུར་བའི་དབང་ཐོབ་པར་འགྱུར་རོ། །དེ་ཅིའི་ཕྱིར་ཞེ་ན། ང་ཡང་སྔོན་ཕྱིན་ཅི་ལོག་བཞིས་ཆོས་མ་ཡིན་པ་ལ་ཆོས་སུ་བཟུང་བས་མི་དགེ་བའི་ལས་ཀྱི་རྣམ་པར་སྨིན་པ་ཚད་མེད་པ་མྱོང་བར་གྱུར་ཏོ། །
ད་ནི་ལྟ་བ་དེ་ལྟ་བུའི་ཚུལ་དུ་ལྟ་བ་འགགས་པས་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། འདི་ནི་ལམ་གྱི་འཕགས་པའི་བདེན་པ་ཞེས་བྱའོ། །དེ་ལ་གང་ཞིག་འདི་སྐད་དུ་དཀོན་མཆོག་གསུམ་མི་རྟག་ཅེས་སྨྲ་ཞིང་
ལྟ་བ་དེ་ལ་སྒོམ་ན་དོན་མེད་པར་སྒོམ་པ་སྟེ། ལམ་གྱི་འཕགས་པའི་བདེན་པ་མ་ཡིན་ནོ། །གང་ཆོས་དེ་ལ་རྟག་པ་གནས་པའི་ཚུལ་དུ་སྒོམ་ན་ངའི་ཉེ་གནས་ཤེས་བྱ་སྟེ། འཕགས་པའི་བདེན་པ་བཞི་ཡང་དག་པར་མཐོང་ཞིང་འཕགས་
པའི་བདེན་པ་བཞི་བསྒོམ་པ་ལ་ནན་ཏན་བྱེད་པ་ཞེས་བྱའོ། །བྱང་ཆུབ་སེམས་དཔའ་འོད་སྲུངས་གིས་བཅོམ་ལྡན་འདས་ལ་གསོལ་པ། བདག་ནི་གདོད་འཕགས་པའི་བདེན་པ་བཞི་ཤིན་ཏུ་ནན་ཏན་བྱ་བའི་ཆོས་འཚལ་བར་གྱུར་ཏོ། །
བཅོམ་ལྡན་འདས་ཀྱིས་འོད་སྲུངས་ལ་བཀའ་སྩལ་པ། རིགས་ཀྱི་བུ་དེ་ལ་ཕྱིན་ཅི་ལོག་བཞི་ཞེས་བྱ་བ་ནི་འདི་ལྟ་སྟེ། སྡུག་བསྔལ་མ་ཡིན་པ་ལ་སྡུག་བསྔལ་དུ་འདུ་ཤེས་བསྐྱེད་པ་ནི་ཕྱིན་ཅི་ལོག་ཅེས་བྱའོ། །སྡུག་བསྔལ་མེད་
པ་ནི་དེ་བཞིན་གཤེགས་པ་ཞེས་བྱའོ། །སྡུག་བསྔལ་བར་འདུ་ཤེས་བསྐྱེད་པ་ནི་དེ་བཞིན་གཤེགས་པ་ལ་མི་རྟག་པ་འམ། འགྱུར་ཞིང་འཕོ་བར་སེམས་པའོ། །གང་དེ་བཞིན་གཤེགས་པ་ལ་མི་རྟག་ཅེས་སྨྲ་བ་ནི་ཁ་ན་མ་ཐོ་བ་
ཆེན་པོའི་སྡུག་བསྔལ་ལོ། །གང་འདི་སྐད་དུ་དེ་བཞིན་གཤེགས་པ་ནི་སྡུག་བསྔལ་བའི་སྐུ་བོར་ཏེ། ཤིང་ཟད་མེ་ཤི་བ་བཞིན་དུ་མྱ་ངན་ལས་འདས་སོ་ཞེས་སྨྲ་ན་དེ་ནི་སྡུག་བསྔལ་མེད་པ་ལ་སྡུག་བསྔལ་དུ་འདུ་ཤེས་བསྐྱེད་པ་སྟེ། 
ཕྱིན་ཅི་ལོག་ཅེས་བྱའོ། །ཅི་སྟེ་ངས་དེ་བཞིན་གཤེགས་པ་རྟག་ཅེས་གསུངས་ན། དེ་ནི་བདག་ཏུ་ལྟ་བ་སྟེ། བདག་ཏུ་ལྟ་ན་ཚད་མེད་པའི་ཁ་ན་མ་ཐོ་བར་འགྱུར་ཏེ། དེ་བས་ན་དེ་བཞིན་གཤེགས་པ་ནི་མི་རྟག་ཅེས་གསུངས་པའི་རིགས་སོ། །

47-1-122a

གང་དེ་སྐད་དུ་སྨྲ་ན་བདག་ཅེས་བྱ་བ་བདེ་བ་མྱོང་ངོ་། །དེ་བཞིན་གཤེགས་པ་མི་རྟག་ཅེས་སྨྲ་ན་སྡུག་བསྔལ་བའོ། །ཅི་སྟེ་སྡུག་བསྔལ་བ་ཡིན་ན་ཅིའི་ཕྱིར་བདེ་བར་འགྱུར་ཞེ་ན། སྡུག་བསྔལ་ལ་བདེ་བར་འདུ་ཤེས་པས་
ཕྱིན་ཅི་ལོག་གོ། །བདེ་བ་ལ་སྡུག་བསྔལ་བར་འདུ་ཤེས་ན་ཡང་ཕྱིན་ཅི་ལོག་གོ། །བདེ་བ་ནི་དེ་བཞིན་གཤེགས་པའོ། །སྡུག་བསྔལ་བ་ནི་དེ་བཞིན་གཤེགས་པ་མི་རྟག་ཅེས་སྨྲ་བའོ། །ཅི་སྟེ་དེ་བཞིན་གཤེགས་པ་མི་རྟག་ཅེས་
སྨྲ་ན། དེ་ནི་བདེ་བ་ལ་སྡུག་བསྔལ་དུ་འདུ་ཤེས་པ་ཞེས་བྱའོ། །དེ་བཞིན་གཤེགས་པ་རྟག་ཅེས་བྱ་བ་ནི་བདེ་བའོ། །ཅི་སྟེ་ངས་གསུངས་པ་ལྟར་དེ་བཞིན་གཤེགས་པ་རྟག་པ་ཡིན་ན་ཅིའི་ཕྱིར་མྱ་ངན་ལས་འདའ། གལ་ཏེ་དེ་བཞིན་
གཤེགས་པ་སྡུག་བསྔལ་བ་མ་ཡིན་ན་ཅིའི་ཕྱིར་སྐུ་བོར་ཏེ་མྱ་ངན་ལས་འདའ་བར་ཞུགས་ཞེས་དེ་ལྟར་བདེ་བ་ལ་སྡུག་བསྔལ་བར་འདུ་ཤེས་ན་ཕྱིན་ཅི་ལོག་གཅིག་ཅེས་བྱའོ། །མི་རྟག་པ་ལ་རྟག་པར་འདུ་ཤེས་པ་འང་ཕྱིན་ཅི་ལོག་ཅེས་
བྱའོ། །མི་རྟག་པ་ནི་སྟོང་པ་ཉིད་མི་སྒོམ་པའོ། །སྟོང་པ་ཉིད་མ་བསྒོམས་པས་ཚེ་ཐུང་བར་འགྱུར་རོ། །དེ་ལ་གང་སྟོང་པ་ཉིད་ཀྱིས་ཞི་བ་མ་བསྒོམས་ཀྱང་ཚེ་རིང་བར་འགྱུར་རོ། །ཞེས་སྨྲ་ན་ཕྱིན་ཅི་ལོག་ཅེས་བྱ་སྟེ། ཕྱིན་ཅི་ལོག་
གཉིས་སོ། །བདག་མེད་པ་ལ་བདག་དུ་འདུ་ཤེས། བདག་ལ་བདག་མེད་པར་འདུ་ཤེས་པ་ཡང་ཕྱིན་ཅི་ལོག་གོ། །འཇིག་རྟེན་པ་ཡང་བདག་ཡོད་པར་སྨྲ། སངས་རྒྱས་ཀྱི་ཆོས་ལ་ཡང་བདག་ཡོད་པར་སྨྲ་སྟེ། འཇིག་རྟེན་པ་དག་བདག་
ཡོད་པར་སྨྲ་མོད་ཀྱི། སངས་རྒྱས་ཀྱི་རང་བཞིན་ཡོད་པ་མ་ཡིན་པས་དེ་ནི་བདག་མེད་པ་ལ་བདག་ཏུ་འདུ་ཤེས་པ་སྟེ་ཕྱིན་ཅི་ལོག་ཅེས་བྱའོ། །སངས་རྒྱས་ཀྱི་ཆོས་ཀྱི་བདག་ཡོད་པ་ནི་རང་བཞིན་ནོ། །འཇིག་རྟེན་པ་དག་ནི་སངས་
རྒྱས་ཀྱི་ཆོས་ལ་བདག་མེད་ཅེས་སྨྲ་བས། དེ་བས་ན་བདག་ལ་བདག་མེད་པར་འདུ་ཤེས་པ་ཞེས་བྱའོ། །གལ་ཏེ་སངས་རྒྱས་ཀྱི་ཆོས་ལ་ངེས་པར་བདག་མེད་ཅེས་སྨྲ་ན་དེ་བཞིན་གཤེགས་པས་ཉེ་གནས་རྣམས་ལ་བདག་མེད་པར་

47-1-122b

སྒོམས་ཤིག་ཅེས་བཀའ་སྩལ་པ་འང་ཕྱིན་ཅི་ལོག་ཅེས་བྱ་བར་འགྱུར་ཏེ། འདི་ནི་ཕྱིན་ཅི་ལོག་གསུམ་མོ། །གཙང་བ་ལ་མི་གཙང་བར་འདུ་ཤེས། མི་གཙང་བ་ལ་གཙང་བར་འདུ་ཤེས་པ་འང་ཕྱིན་ཅི་ལོག་གོ། །གཙང་བ་ནི་དེ་བཞིན་གཤེགས་པ་རྟག་
པ། གནས་པ་ཞལ་ཟས་དང་འདྲེས་པའི་སྐུ་མ་ཡིན། ཉོན་མོངས་པའི་སྐུ་མ་ཡིན། ཤ་དང་ཁྲག་གི་སྐུ་མ་ཡིན། རྩ་དང་ཆུ་བ་དང་རུས་པས་རྣམ་པར་གླགས་པའི་སྐུ་མ་ཡིན་ཏེ། དེ་ལ་གང་འདི་སྐད་དུ་དེ་བཞིན་གཤེགས་པ་ནི་མི་རྟག་པ། ཞལ་
ཟས་དང་འདྲེས་པའི་སྐུ། རྩ་དང་ཆུ་བ་དང་རུས་པའི་བར་དུ་རྣམ་པར་གླགས་པའི་སྐུ་ཡིན་ཏེ། ཆོས་དང་དགེ་འདུན་དང་། རྣམ་པར་གྲོལ་བ་ཡང་འགོག་ཅིང་ཟད་པར་འགྱུར་རོ། །ཞེས་སྨྲ་ན་ཕྱིན་ཅི་ལོག་ཅེས་བྱའོ། །མི་གཙང་བ་ལ་གཙང་བར་འདུ་ཤེས་
པ་ནི་གང་འདི་སྐད་དུ་ངའི་ལུས་འདི་ལ་གཅིག་ཙམ་ཡང་མི་གཙང་བ་མེད་དེ། མི་གཙང་བ་མེད་པས་ན་གདོན་མི་ཟ་བར་ཡོངས་སུ་དག་པའི་གནས་སུ་ཕྱིན་པར་འགྱུར་ཏེ། དེ་བཞིན་གཤེགས་པས་མི་གཙང་བ་སྒོམ་པ་ལ་ནན་ཏན་གྱིས་ཤིག་ཅེས་
གསུངས་པའང་བརྫུན་ནོ་ཞེས་སྨྲ་ན་ཕྱིན་ཅི་ལོག་ཅེས་བྱ་སྟེ། འདི་ནི་ཕྱིན་ཅི་ལོག་བཞི་ཞེས་བྱའོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བདག་ཅག་ནི་སྔོན་ངན་པར་ལྟ་བ་ལས་གདོད་ཡང་དག་པར་ལྟ་བར་གྱུར་
ཏོ། །བཅོམ་ལྡན་འདས་སྲིད་པ་ཉི་ཤུ་ལྔ་པོ་ལ་བདག་ཅེས་བགྱི་བ་མཆིས་སམ་མ་མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བདག་ཅེས་བྱ་བ་ནི་དེ་བཞིན་གཤེགས་པའི་སྙིང་པོའི་དོན་ཏོ། །སེམས་ཅན་
ཐམས་ཅད་ལ་སངས་རྒྱས་ཀྱི་རང་བཞིན་ཡོད་པ་ནི་བདག་ཅེས་བྱ་བའི་དོན་ཏོ། །དེ་ལྟར་བདག་ཅེས་བྱ་བའི་དོན་ནི་ཐོག་མ་མེད་པའི་དུས་ནས་ཚད་མེད་པའི་ཀུན་ནས་ཉོན་མོངས་པས་རྣམ་པར་བསྒྲིབས་ཏེ། དེ་བས་ན་སེམས་ཅན་དག་མཐོང་
བར་མ་གྱུར་ཏོ། །རིགས་ཀྱི་བུ་འདི་ལྟ་སྟེ། དཔེར་ན་བུད་མེད་དབུལ་མོ་ཞིག་ཁང་པའི་ནང་ན་གསེར་གྱི་གཏེར་ཡོད་ཀྱང་ཐམས་ཅད་ཀྱིས་ཡོད་པར་མི་ཤེས་པ་ལས་ཕྱིས་སྐྱེས་བུ་ཤིན་ཏུ་ཐབས་ལ་མཁས་པ་གཅིག་གིས་བུད་མེད་དབུལ་

47-1-123a

མོ་ལ་འདི་སྐད་དུ། བུ་མོ་ཁྱོད་ཁོ་བོའི་ཕྱག་དར་བར་གླ་ཟ་ནུས་སམ། བུད་མེད་དེས་སྨྲས་པ། ཁོ་མོས་མི་ནུས་སོ། །ཅི་སྟེ་ཁྱོད་ཀྱིས་ཁོ་མོའི་བུས་གསེར་གྱི་གཏེར་ཞིག་སྦས་པ་བསྟན་ནུས་ན་ཁྱོད་ཀྱི་ལས་བྱའོ། །
སྐྱེས་བུ་དེས་སྨྲས་པ། ཁོ་བོ་ནི་ཤིན་ཏུ་ཐབས་མཁས་པས་ཁྱོད་ཀྱི་བུས་སྦས་པའི་གསེར་གྱི་གཏེར་ཁོ་བོས་ཤེས་ཀྱིས་བསྟན་ཏོ། །བུད་མེད་དེས་སྨྲས་པ། ཁོ་མོའི་ཁྱིམ་གང་གི་མི་ཆེ་ཕྲ་ཐམས་ཅད་ཀྱིས་ཀྱང་མི་
ཤེས་ན་ཅིག་ཁྱོད་ཀྱིས་ཤེས་སམ། སྐྱེས་བུ་དེས་སྨྲས་པ། ཁོ་བོས་ནི་ཐེ་ཙོམ་མེད་པར་ཤེས་སོ། །བུད་མེད་དེས་སྨྲས་པ། ཁོ་མོ་ད་མཐོང་བར་འདོད་ཀྱིས་སྟོན་ཅིག །དེ་ནས་སྐྱེས་བུ་དེས་ཁོ་མོའི་ཁང་པར་ཞུགས་ནས་
གསེར་གྱི་གཏེར་བྲུས་ཏེ་བུད་མེད་དེ་ལ་བསྟན་ཏོ། །བུད་མེད་དེས་གཏེར་མཐོང་ནས་ཤིན་ཏུ་དགའ་མགུ་སྟེ་ངོ་མཚར་རྨད་ཀྱི་འདུ་ཤེས་སྐྱེས་ནས་སྐྱེས་བུ་དེ་ལ་སྟི་སྟང་དུ་བྱེད་དོ། །རིགས་ཀྱི་བུ་སེམས་ཅན་ཐམས་ཅད་ཀྱི་སངས་
རྒྱས་ཀྱི་རང་བཞིན་ཡང་དེ་དང་འདྲ་སྟེ། སེམས་ཅན་ཐམས་ཅད་ཀྱིས་མི་མཐོང་བ་ཡང་ཇི་ལྟར་བུད་མེད་དབུལ་མོས་རིན་པོ་ཆེའི་གཏེར་མི་མཐོང་བ་བཞིན་ནོ། །རིགས་ཀྱི་བུ་ངས་སྐྱེ་བོ་ཐམས་ཅད་སངས་རྒྱས་ཀྱི་རང་བཞིན་
ཡོད་པ་ཀུན་ནས་ཉོན་མོངས་པས་བསྒྲིབས་ཏེ། མི་མཐོང་བ་བསྟན་པ་ཡང་ཇི་ལྟར་བུད་མེད་དབུལ་མོས་གསེར་གྱི་གཏེར་མི་མཐོང་བ་བསྟན་པ་བཞིན་ནོ། །རིགས་ཀྱི་བུ་དེ་བཞིན་གཤེགས་པས་ཀྱང་སེམས་ཅན་ཐམས་
ཅད་ལ་མངོན་པར་སངས་རྒྱས་པའི་རིན་པོ་ཆེའི་གཏེར་བསྟན་པ་ནི་འདི་ལྟ་སྟེ། སངས་རྒྱས་ཀྱི་རང་བཞིན་ནོ། །སོ་སོ་སྐྱེ་བོ་དག་ཀྱང་དེ་ལྟ་བུའི་དངོས་པོ་རྣམས་མཐོང་ནས་རབ་ཏུ་དགའ་བའི་སེམས་སྐྱེས་ཏེ་
དེ་བཞིན་གཤེགས་པ་ལ་བསྙེན་བཀུར་བྱེད་ཅིང་ཕྱོགས་སོ། །ཐབས་མཁས་པའི་སྐྱེས་བུ་ཞེས་བྱ་བ་ནི་དེ་བཞིན་གཤེགས་པའི་དཔེའོ། །བུད་མེད་དབུལ་མོ་ཞེས་བྱ་བ་ནི་སོ་སོ་སྐྱེ་བོ་ཚད་མེད་པའི་དཔེའོ། །

47-1-123b

གསེར་གྱི་གཏེར་ཞེས་བྱ་བ་ནི་སངས་རྒྱས་ཀྱི་རང་བཞིན་གྱི་དཔེའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་བུད་མེད་བུ་ཆུང་ངུ་ཁམ་ཉག་གསོ་བ་ཞིག་གལ་ཏེ་བུ་དེ་ནད་ཀྱིས་བཏབ་ན་བུད་མེད་དེ་ཤིན་ཏུ་མྱ་ངན་གྱིས་
གདུངས་ཏེ་སྨན་འཚོལ་ལོ། །དེ་ལ་སྨན་པས་སྨན་མར་དང་། འོ་མ་དང་། ཤ་ཁ་ར་དང་། གསུམ་དུ་སྦྱར་ཏེ་བུ་ལ་བསླུད་ནས་བུད་མེད་དེ་ལ་འདི་སྐད་ཅེས་བསྒོའོ། །བུ་འདི་སྨན་གཏང་གིས་རེ་ཤིག་སྨན་མ་ཞུའི་བར་དུ་ནུ་ཞོ་
བསླུད་དུ་མི་རུང་ངོ་ཞེས་བསྒོའོ། །དེ་ནས་བུད་མེད་དེས་ནུ་ཞོ་མ་བསྣུན་པའི་ཕྱིར་ནུ་མ་ལ་མཁྲིས་པས་བྱུགས་ནས་བུ་ལ་ཁོ་མོའི་ནུ་མ་དུག་གིས་བསྐུས་ཏེ་ནུར་མི་རུང་ངོ་ཞེས་ཟེར་རོ། །བུ་དེ་སྐོམ་གྱིས་གདུངས་ཏེ། ནུ་མ་ནུ་
འདོད་ཀྱང་ཁ་བའི་རོ་ཚོར་མ་ཐག་ཏུ་ནུར་མི་བཏུབ་པོ། །སྨན་ཞུ་ནས་བུད་མེད་ཀྱིས་ནུ་མ་དག་པར་བཀྲུས་ཏེ། འདི་སྐད་དུ་བུ་ཚུར་ཤོག །ད་ནུ་མ་ནུར་གཞུག་གོ་ཞེས་སྨྲས་ན་ཁྱེའུ་དེ་སྐོམ་གྱིས་གདུངས་ཀྱང་ཁ་བའི་
རོ་མྱོང་བས་བོས་ཀྱང་འོང་དུ་མི་གཏུབ་པོ། །དེ་ལ་ཡང་མས་འདི་སྐད་དུ་བསྒོའོ། །ཁྱོད་སྔར་སྨན་མ་ཐུངས་ཏེ་སྨན་མ་ཞུ་བའི་བར་དུ་ནུ་མ་བླུད་དུ་མི་རུང་བས་ཁོ་མོས་དུག་གིས་བསྐུས་པ་ཡིན་གྱིས་ད་ཁྱོད་ཀྱི་སྨན་
ཀྱང་ཞུ་ལ། ཁ་བ་ཡང་བཀྲུས་ཀྱིས་ད་ནི་ཁ་བའི་རོ་མེད་དོ་ཞེས་སྨྲས་ན་གདོད་བགས་ཀྱིས་ཉེ་སྟེ་འཐུང་ཏུ་བཏུབ་བོ། །རིགས་ཀྱི་བུ་དེ་བཞིན་གཤེགས་པ་ཡང་དེ་བཞིན་དུ་སེམས་ཅན་ཐམས་ཅད་བསྒྲལ་བའི་ཕྱིར། 
སེམས་ཅན་ཐམས་ཅད་བདག་མེད་པའི་ཆོས་ལ་ནན་ཏན་བྱེད་པ་སྟོན་ཏོ། །དེ་ལ་ནན་ཏན་བྱས་པས་བདག་ཅེས་བྱ་བའི་སེམས་མེད་དེ་ཡོངས་སུ་མྱ་ངན་ལས་འདའོ། །དེ་ལ་ཡང་འཇིག་རྟེན་རྒྱང་པན་པའི་ངན་པར་ལྟ་བ་བསལ་
བའི་ཕྱིར་འཇིག་རྟེན་རྒྱང་པན་པའི་ཆོས་ལས་འདས་པ་བསྟན་པའི་ཕྱིར་གཞན་ཡང་འཇིག་རྟེན་རྒྱང་པན་པ་དག་བདག་ཏུ་ལྟ་བ་ཡང་དག་པ་མ་ཡིན་པར་བསྟན་པའི་ཕྱིར་བདག་མེད་པའི་ཆོས་བསྒོམས་པས་ཡོངས་སུ་

47-1-124a

དག་པའི་ལུས་སུ་འགྱུར་བའི་ཕྱིར་ཇི་ལྟར་བུད་མེད་དེས་བུའི་ཕྱིར་མཁྲིས་པས་ནུ་མ་བསྐུས་པ་བཞིན་དུ་དེ་བཞིན་གཤེགས་པ་ཡང་དེ་དང་འདྲ་སྟེ། སྟོང་པ་ཉིད་བསྒོམས་པའི་ཕྱིར་ཆོས་ཐམས་ཅད་ལ་བདག་མེད་ཅེས་
གསུངས་སོ། །ཇི་ལྟར་བུད་མེད་དེས་ནུ་མ་ཕྱིར་བཀྲུས་ནས་བུ་བོས་ཏེ་ནུ་ཞོ་བླུད་དོ་ཞེས་བྱ་བ་བཞིན་དུ་ངས་དེ་བཞིན་གཤེགས་པའི་སྙིང་པོ་བསྟན་པ་ཡང་དེ་དང་འདྲ་སྟེ། དགེ་སློང་ཁྱོད་ཀྱང་མ་སྐྲག་པར་ཇི་ལྟར་བུ་དེ་ལ་མས་བོས་ཏེ་ནུ་
ཞོ་བགས་ཀྱིས་འཐུང་བ་བཞིན་དུ་དགེ་སློང་ཁྱེད་ཀྱང་བྱེ་བྲག་ཕྱེད་པར་གྱིས་ཤིག །དེ་བཞིན་གཤེགས་པའི་སྙིང་པོ་ནི་མེད་པར་བྱ་བ་མ་ཡིན་ནོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། 
བཅོམ་ལྡན་འདས་ཡང་དག་པར་བདག་ཅེས་བགྱི་བ་མ་མཆིས་སོ། །དེ་ཅིའི་སླད་དུ་ཞེ་ན། བུས་པ་ཆུང་ངུ་ནི་ཐོག་མ་བཙས་པ་ན་ཅི་ཡང་བྱེ་བྲག་མི་ཕྱེད་དེ་མི་འཚལ་ཏོ། །བདག་ཅེས་བགྱི་བ་མཆིས་པ་ལགས་ན་བཙས་མ་
ཐག་དུ་ཐམས་ཅད་བྱེ་བྲག་འབྱེད་ཅིང་འཚལ་བའི་རིགས་སོ། །དེ་བས་ན་ངེས་པར་བདག་ཅེས་བགྱི་བ་མ་མཆིས་པར་མངོན་ནོ། །གལ་ཏེ་བདག་ཅེས་བགྱི་བ་ངེས་པར་མཆིས་པ་ཞིག་ལགས་ན་སྐྱེ་བ་གཅིག་བླངས་ནས་
མཐར་མ་མཆིས་པར་འགྱུར་བའི་མི་རིགས་སོ། །ཅི་སྟེ་ཐམས་ཅད་ལ་སངས་རྒྱས་ཀྱི་རང་བཞིན་མཆིས་ཏེ་རྟག་པ་ཞིག་ལགས་ན་འཇིག་པ་ཡང་མི་རིགས་སོ། །གལ་ཏེ་འཇིག་པའི་མཚན་ཉིད་མ་ལགས་ན་ཅིའི་སླད་དུ་རྒྱལ་
རིགས་དང་། བྲམ་ཟེ་དང་། རིགས་ངན་དང་། གདོལ་པ་དང་། བྱོལ་སོང་ལ་སོགས་པ་རྣམ་པ་ཐ་དད་དེ། ལས་ཀྱི་རྣམ་པར་སྨིན་པ་རྣམ་པ་སྣ་ཚོགས་མི་མཐུན་ཞིང་རྒྱུ་ཐ་དད་པར་འགྱུར། ཅི་སྟེ་བདག་ཅེས་བགྱི་བ་ངེས་པར་
མཆིས་ན་སེམས་ཅན་ཐམས་ཅད་ལ་བཟང་ངན་མ་མཆིས་པའི་རིགས་ཏེ། དེ་ལྟ་བས་ན་སངས་རྒྱས་ཀྱི་རང་བཞིན་ཞེས་བགྱི་བ་ནི་རྟག་པའི་ཆོས་མ་ལགས་པར་མངོན་ནོ། །ཅི་སྟེ་སངས་རྒྱས་ཀྱི་རང་བཞིན་

47-1-124b

ངེས་པར་རྟག་པ་ཞིག་ལགས་ན་ཅིའི་སླད་དུ་སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་ངག་རྩུབ་མོ་དང་། ཚིག་ཐུན་ཚགས་དང་། འདོད་ཆགས་དང་། ཞེ་སྡང་དང་ངན་པར་
ལྟ་བ་ལ་སོགས་པ་བསྟན་ཅིང་གསུངས། གལ་ཏེ་བདག་ཅེས་བགྱི་བའི་རང་བཞིན་རྟག་པ་ལགས་ན་ཅིའི་སླད་དུ་ཆང་འཐུངས་པས་མྱོས་ཤིང་དྲན་པ་ཉམས་པར་འགྱུར། གལ་ཏེ་བདག་ཅེས་བགྱི་བའི་རང་བཞིན་རྟག་པ་
ལགས་ན། ལོང་བས་ཀྱང་གཟུགས་མཐོང་ལ། འོན་པས་ཀྱང་སྒྲ་ཐོས། ལྐུགས་པས་ཀྱང་སྨྲ་ནུས་ཞ་བོས་ཀྱང་འགྲོ་ནུས་པར་འགྱུར་རོ། །ཅི་སྟེ་བདག་ཅེས་བགྱི་བའི་རང་བཞིན་རྟག་ན་ཆུ་དང་། མེ་དང་། གཡང་ས་དང་། 
དུག་དང་། མཚོན་དང་། གཅན་ཟན་མ་རུངས་པ་ལས་ཀྱང་འབྱོལ་བ་མི་རིགས་སོ། །ཅི་སྟེ་བདག་ཅེས་བགྱི་བ་རྟག་ན་སྔོན་ཅི་ཤེས་པ་ཕྱིས་བརྗེད་པར་མི་རིགས་སོ། །ཅི་སྟེ་ཕྱིས་མི་བརྗེད་ན་ཅིའི་སླད་དུ་བདག་གིས་མི་འདི་སྔོན་
མ་མཐོང་ངོ་ཞེས་བགྱི་བ་ལ་སོགས་པ་སྨྲ་བར་འགྱུར། གལ་ཏེ་བདག་ཅེས་བགྱི་བ་རྟག་ན་གཞོན་ནུ་ལང་ཚོ་བ་དང་རྒས་ཏེ་རྒུད་པ་ལ་སོགས་པ་དང་། སྔོན་ཅི་བྱས་པའི་དངོས་པོ་ཐམས་ཅད་ཀྱང་མི་བརྗེད་དེ་དྲན་པའི་རིགས་
སོ། །ཅི་སྟེ་བདག་ཅེས་བགྱི་བ་རྟག་ན་ཅི་ལ་གནས། མཆིལ་མ་དང་། སྣབས་ལ་གནས་སམ། ཁ་དོག་སྔོན་པོ་དང་། སེར་པོ་དང་། དམར་པོ་ལ་སོགས་པ་ལ་གནས། ཅི་སྟེ་བདག་ཅེས་བགྱི་བ་རྟག་པ་ཞིག་ལགས་ན་ཏིལ་མར་གྱིས་ལུས་
བསྐུས་པ་བཞིན་དུ་ཐམས་ཅད་དུ་ཁྱབ་པའི་རིགས་ཏེ། གལ་ཏེ་ལུས་བཅད་པའི་ཚེ་བདག་ཀྱང་འཆད་པར་འགྱུར་བའི་རིགས་སོ། །བཅོམ་ལྡན་འདས་ཀྱིས་འོད་སྲུངས་ལ་བཀའ་སྩལ་པ། རིགས་ཀྱི་བུ་འདི་ལྟ་སྟེ་དཔེར་ན་རྒྱལ་པོ་ལ་གྱད་གཅིག་
ཡོད་པའི་འཕྲལ་བ་ན་རྡོ་རྗེའི་ནོར་བུ་གཅིག་ཡོད་པ་གྱད་གཞན་དང་སྟོབས་བཀྱེ་བ་ལས་གྱད་ཕ་རོལ་པོས་མགོས་རེག་སྟེ། འཕྲལ་བའི་ནོར་བུ་ཤའི་ནང་དུ་ནུབ་ཀྱང་ནོར་བུ་གར་སོང་བ་མི་ཤེས་སོ། །རྨ་བྱུང་བའི་ཕྱིར་སྨན་པ་བོས་ནས་སྨན་པ་

47-1-125a

ཤིན་ཏུ་མཁས་པས་ནི་ནོར་བུ་ཤའི་ནང་དུ་སོང་བའི་ཕྱིར་རྨ་བྱུང་བས་དེ་ལ་སྨན་མི་བྱེད་དེ། འདི་སྐད་དུ་ཀྱེ་སྟོབས་པོ་ཆེ་ཁྱོད་ཀྱི་འཕྲལ་བའི་ནོར་བུ་ག་རེ་ཞེས་ཟེར་རོ། །གྱད་དེ་དངངས་ནས་སྨན་པ་ལ་འདི་སྐད་དུ་བདག་གི་འཕྲལ་བའི་
ནོར་བུ་གར་ཡང་མ་སོང་བའི་རིགས་ཏེ། དེ་མེད་ན་འདི་སྒྱུ་མ་མ་ཡིན་ནམ་སྙམ་སེམས་ཏེ། ཤིན་ཏུ་མྱ་ངན་བྱེད་དོ། །དེ་ནས་སྨན་པ་དེས་ཀྱང་དེའི་སྤྲོ་བ་བསྐྱེད་ནས་ཁྱོད་དེ་ལྟར་མྱ་ངན་མ་བྱེད་ཅིག །ཁྱོད་སྟོབས་བཀྱེ་བ་ན་ནོར་བུ་ཤའི་ནང་
དུ་ནུབ་སྟེ་གཟུགས་བརྙན་ཙམ་ཕྱི་རོལ་དུ་སྣང་ངོ་། །ཁྱོད་སྟོབས་བཀྱེ་བ་ན་ཞེ་སྡང་བསྐྱེད་དེ། ནོར་བུའི་མཐུས་ཤའི་ནང་དུ་ནུབ་ཀྱང་མ་ཚོར་བ་ཡིན་ནོ། །དེ་སྐད་དུ་སྨྲས་ཀྱང་ཡིད་མ་ཆེས་ནས་འདི་སྐད་དུ་སྨན་པ་ཁྱོད་བརྫུན་མ་
ཟེར་ཅིག །ཅི་སྟེ་ཤའི་ནང་དུ་ནུབ་ན་རྣག་ཁྲག་ཤིན་ཏུ་བཙོག་པ་ཡིན་པས་ཕྱིར་འབྱུང་བའི་རིགས་སོ། །ཅི་སྟེ་ཆུ་བའི་ནང་དུ་སོང་བ་ནི་ཁྱོད་ཀྱིས་ཀྱང་མཐོང་བའི་མི་རིགས་སོ། །དེ་ནས་སྨན་པས་མེ་ལོང་ལྟར་བཅུག་ནས་མེ་ལོང་གི་ནང་
དུ་ནོར་བུ་ཡང་སྣང་བར་གསལ་བར་གྱུར་ཏོ། །གྱད་དེས་དེ་ལྟར་གྱུར་པ་མཐོང་ནས་ངོ་མཚར་རྨད་ཀྱི་འདུ་ཤེས་སྐྱེས་སོ། །རིགས་ཀྱི་བུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། དགེ་བའི་བཤེས་གཉེན་ལ་བསྙེན་བཀུར་མ་བྱས་
པས་སངས་རྒྱས་ཀྱི་རང་བཞིན་ཡོད་ཀྱང་མཐོང་བར་མི་ནུས་སོ། །འདོད་ཆགས་དང་། ཞེ་སྡང་དང་། གཏི་མུག་གིས་བསྒྲིབས་ཏེ་ཟིལ་གྱིས་ནོན་པས་སེམས་ཅན་དམྱལ་བ་དང་། བྱོལ་སོང་དང་། ཡི་དགས་དང་། ལྷ་མ་ཡིན་དང་། གདོལ་པ་
དང་། རིགས་ངན་དང་། རྒྱལ་རིགས་དང་། བྲམ་ཟེའི་རིགས་ལ་སོགས་པ་རྣམ་པ་སྣ་ཚོགས་སུ་སྐྱེ་ཞིང་ལྷུང་བར་གྱུར་ཏོ། །སེམས་ལ་རྣམ་པ་སྣ་ཚོགས་ཀྱི་ལས་བསྐྱེད་པས་མིའི་ལུས་ཐོབ་ཀྱང་འོན་པ་དང་། ལོང་བ་དང་། ལྐུགས་པ་
དང་། ཞ་བོ་ལ་སོགས་པར་གྱུར་ཏེ། སྲེད་པ་ཉི་ཤུ་ལྔ་པོར་རྣམ་པར་སྨིན་པའི་འབྲས་བུ་མྱོང་བར་གྱུར་ཏོ། །འདོད་ཆགས་དང་། ཞེ་སྡང་དང་། གཏི་མུག་གིས་སེམས་བསྒྲིབས་པས་ན་སངས་རྒྱས་ཀྱི་རང་བཞིན་མི་ཤེས་པས་ནི་ཇི་

47-1-125b

ལྟར་གྱད་དེས་ནོར་བུ་རིན་པོ་ཆེ་ཤའི་ནང་དུ་ནུབ་པ་མི་ཤེས་ཏེ་སྟོར་སྙམ་སེམས་པ་ལྟར་སོ་སོ་སྐྱེ་བོ་ཡང་དེ་དང་འདྲ་སྟེ། དགེ་བའི་བཤེས་གཉེན་ལ་བསྙེན་བཀུར་བྱེད་པ་མི་ཤེས། དེ་བཞིན་གཤེགས་པའི་སྙིང་པོ་ཤིན་ཏུ་གསང་བ་མི་ཤེས་པས་
བདག་མེད་པ་ལ་སྒོམ་ཞིང་ནན་ཏན་བྱེད་དོ། །དཔེར་ན་འཕགས་པ་མ་ཡིན་པ་དག་ནི་བདག་མེད་པ་སྨྲ་ཡང་བདག་ཅེས་བྱ་བའི་ཡང་དག་པའི་མཚན་ཉིད་མི་ཤེས་སོ། །ངའི་ཉེ་གནས་དག་ཀྱང་དེ་དང་འདྲ་སྟེ། དགེ་བའི་བཤེས་གཉེན་ལ་བསྙེན་
བཀུར་བྱེད་པ་ཡང་མི་ཤེས་པས་བདག་མེད་པ་སྒོམ་པ་ཡང་མི་ཤེས་ཏེ། བདག་མེད་པའི་གནས་ཀྱང་མི་ཤེས་སོ། །བདག་མེད་པའི་མཚན་ཉིད་ཀྱང་མི་ཤེས་ན་བདག་གི་ཡང་དག་པའི་མཚན་ཉིད་ཤེས་པ་ལྟ་ཅི་སྨོས། རིགས་ཀྱི་བུ་དེ་ལྟར་དེ་བཞིན་
གཤེགས་པས་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་གསུངས་པ་ཡང་ཇི་ལྟར་སྨན་པ་མཁས་པས་གྱད་ཀྱི་རྡོ་རྗེའི་ནོར་བུ་བསྟན་པ་བཞིན་ནོ། །སོ་སོའི་སྐྱེ་བོ་དག་ནི་ཀུན་ནས་ཉོན་མོངས་པ་ཚད་མེད་པ་སྙེད་
ཀྱིས་བསྒྲིབས་ཤིང་ཟིལ་གྱིས་ནོན་པས་སངས་རྒྱས་ཀྱི་རང་བཞིན་མི་ཤེས་སོ། །གལ་ཏེ་ནམ་ཉོན་མོངས་པ་ཟད་པ་ན་དེའི་ཚེ་གསལ་བར་མངོན་པར་རྟོགས་པར་འགྱུར་བ་ནི་ཇི་ལྟར་གྱད་དེས་མེ་ལོང་གསལ་བའི་ནང་དུ་ནོར་བུ་རིན་པོ་ཆེ་མཐོང་བ་
བཞིན་ནོ། །རིགས་ཀྱི་བུ་དེ་བཞིན་གཤེགས་པའི་སྙིང་པོ་ནི་དེ་ལྟར་ཚད་མེད་དེ་བསམ་གྱིས་མི་ཁྱབ་བོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་གངས་ཀྱི་རི་ལ་སྨན་བདེ་བ་ཞེས་བྱ་བའི་རོ་ཡོད་དོ། །དེའི་རོ་ནི་ཤིན་ཏུ་མངར་ཏེ། 
ནགས་སྟུག་པོའི་དྲུང་དུ་སྐྱེ་བས་མཐོང་བར་མི་ནུས་སོ། །དེ་ལ་དྲི་བྲོ་བ་ཙམ་གྱིས་གནས་དེ་ན་སྨན་ཡོད་པར་ཤེས་སོ། །སྔོན་འདས་པའི་དུས་ན་འཁོར་ལོས་སྒྱུར་བའི་རྒྱལ་པོ་ཞིག་སྨན་དེ་འདོད་པའི་ཕྱིར་གངས་ཀྱི་རི་དེ་ལ་གནས་
ཀུན་དུ་ཤིང་གི་ཝ་བཙུགས་ནས་སྨན་ཟག་པ་བཟེད་དོ། །སྨན་དེ་ནམ་སྨིན་པ་ན་ཆུ་བཞིན་དུ་ས་ལ་ཟག་པས་ཤིང་གི་ཝ་བཟེད་པའི་ནང་དུ་ཡང་ཟགས་ཏེ་རོ་དེ་ནི་ཡང་དག་པའོ། །རྒྱལ་པོ་དེ་འདས་པའི་འོག་ཏུ་ནི་སྨན་དེའི་རོ་བར་འགའ་ནི་སྐྱུར། 

47-1-126a

བར་འགའ་ནི་ལན་ཚྭ། བར་འགའ་ནི་མངར། བར་འགའ་ནི་ཁ། བར་འགའ་ནི་ཚ། བར་འགའ་ནི་བསྐའོ། །དེ་ལྟར་རོ་གཅིག་པོ་དེ་ཡང་གར་ཟག་པའི་གནས་ལས་རྣམ་པ་ཐ་དད་དུ་གྱུར་ཏེ། སྨན་དེའི་རོ་ཉིད་ནི་རི་ལ་ཡོད་དོ། །
དཔེར་ན་ཟླ་བ་རྒྱས་པ་ནི་བསོད་ནམས་ཆུང་བ་དག་གིས་ཤིན་ཏུ་ཉམ་ཐག་པར་ལས་སུ་བྱས་ཏེ་གཞོར་གྱིས་བརྐོས་ཀྱང་ཐོབ་པར་མི་ནུས་སོ། །གལ་ཏེ་རྒྱལ་པོ་འཕགས་པ་དག་འཇིག་རྟེན་དུ་བྱུང་ན་བསོད་ནམས་ཀྱི་རྐྱེན་ཀྱིས་སྨན་དེའི་
རོ་ཡང་ཡང་དག་པར་འཐོབ་པར་འགྱུར་རོ། །རིགས་ཀྱི་བུ་དེ་བཞིན་གཤེགས་པའི་སྙིང་པོའི་རོ་ཡང་དེ་དང་འདྲ་སྟེ་ཀུན་ནས་ཉོན་མོངས་པའི་ནགས་སྟུག་པོས་བསྒྲིབས་པས་སེམས་ཅན་མ་རིག་པ་དག་གིས་མཐོང་བར་མི་ནུས་
སོ། །སྨན་རོ་གཅིག་པ་ཞེས་བྱ་བ་ནི་སངས་རྒྱས་ཀྱི་རང་བཞིན་གྱི་དཔེ་སྟེ། ཀུན་ནས་ཉོན་མོངས་པའི་དབང་གིས་རོ་རྣམ་པ་སྣ་ཚོགས་སུ་གྱུར་པ་ནི་འདི་ལྟ་སྟེ། སེམས་ཅན་དམྱལ་བ་དང་། ཡི་དགས་དང་། བྱོལ་སོང་དང་། ལྷ་དང་
མི་དང་། སྐྱེས་པ་དང་། བུད་མེད་དང་། མ་ནིང་དང་། རྒྱལ་རིགས་དང་། བྲམ་ཟེ་དང་། རིགས་ངན་གདོལ་པ་ལ་སོགས་པར་གྱུར་པའོ། །སངས་རྒྱས་ཀྱི་རང་བཞིན་ནི་ཤིན་ཏུ་དཔའ་བས་དེ་བས་ན་གསོད་མི་ནུས་སོ། །ཅི་སྟེ་བསད་ན་སངས་རྒྱས་
ཀྱི་རང་བཞིན་མེད་པར་བྱས་པ་ཡིན་ནོ། །སངས་རྒྱས་ཀྱི་རང་བཞིན་ནི་རང་བཞིན་གྱིས་མེད་པར་བྱེད་ནུས་པ་མ་ཡིན་ཏེ། མེད་པར་བྱ་བའི་གནས་མེད་དོ། །བདག་ཅེས་བྱ་བའི་རང་བཞིན་ཉིད་ནི་དེ་བཞིན་གཤེགས་པའི་གསང་བའི་སྙིང་པོའོ། །
དེ་ལྟར་གསང་བའི་སྙིང་པོ་དེ་ནི་གང་གིས་ཀྱང་འཇིག་ཅིང་མེད་པར་བྱེད་ནུས་པ་མ་ཡིན་ཏེ། མེད་པར་བྱེད་མི་ནུས་ཀྱང་མཐོང་བར་མི་རུང་ངོ་། །གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ན་རྟོགས་
ཤིང་རིག་པར་འགྱུར་ཏེ། དེ་བས་ན་གསོད་ནུས་པ་མེད་དོ། །བྱང་ཆུབ་སེམས་དཔའ་འོད་སྲུང་གིས་གསོལ་པ། ཅི་སྟེ་གསོད་ནུས་པ་མ་མཆིས་ན་མི་དགེ་བའི་ལས་ཤེས་བགྱི་བ་ཡང་མ་མཆིས་སམ། བཅོམ་ལྡན་འདས་ཀྱིས་འོད་སྲུང་

47-1-126b

ལ་བཀའ་སྩལ་པ། ཡང་དག་པར་ན་གསོད་པ་ཡོད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ་སེམས་ཅན་གྱི་སངས་རྒྱས་ཀྱི་རང་བཞིན་ནི་ཕུང་པོ་ལྔ་ལ་གནས་ཏེ། གལ་ཏེ་ཕུང་པོ་ལྔ་བཤིག་ན་སྲོག་བཅད་པ་ཞེས་བྱའོ། །གལ་ཏེ་སྲོག་
བཅད་ན་ངན་སོང་དུ་ལྟུང་བར་འགྱུར་ཏེ། ལས་ཀྱི་རྒྱུ་དང་རྐྱེན་ཀྱིས་རྒྱལ་རིགས་དང་བྲམ་ཟེ་ལ་སོགས་པ་དང་། རིགས་ངན་གདོལ་པ་དང་། སྐྱེས་པ་དང་། བུད་མེད་དང་། མ་ནིང་དང་། སྲིད་པ་ཉི་ཤུ་ལྔ་པོ་ལ་སོགས་པ་རྣམ་པ་ཐ་དད་པའི་མཚན་
ཉིད་ཀྱིས་འཁོར་བར་འཁོར་རོ། །འཕགས་པ་མ་ཡིན་པ་དག་ནི་བདག་ཅེས་བྱ་བ་མཚན་ཉིད་ཆེན་པོ་དང་། ཆུང་ངུ་དང་། ཏིལ་ལམ། ཁྲེ་འམ། སྲན་མ་འམ། མཐེ་བོའི་བར་དུ་རྣམ་པ་སྣ་ཚོགས་སུ་འཛིན་ཏེ། གང་མི་བདེན་པའི་སྒྱུ་མའི་
མཚན་ཉིད་དུ་འཛིན་པ་ཡང་དག་པ་མ་ཡིན་ནོ། །འཇིག་རྟེན་ལས་འདའ་བའི་བདག་གི་མཚན་ཉིད་ནི་སངས་རྒྱས་ཀྱི་རང་བཞིན་ཞེས་བྱ་སྟེ། དེ་ལྟར་བདག་དུ་འཛིན་པ་ནི་ཤིན་ཏུ་མཆོག་ཅེས་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་
ན་སྐྱེས་བུ་གཏེར་གྱི་རྒྱུས་ལ་ཤིན་ཏུ་མཁས་པ་ཞིག་གཞོར་རྣོན་པོ་ཐོགས་ཏེ་བརྐོས་ན། རྡོ་འམ་གསེག་མ་འམ་ཕ་བོང་ལ་ཡང་ཐོགས་པ་མེད་པར་རྐོའོ། །གལ་ཏེ་རྡོ་རྗེ་ལ་ཐུག་ན་ཅིས་ཀྱང་མི་ཚུགས་སོ། །རྡོ་རྗེ་ཞེས་བྱ་བ་ལ་ནི་མཚོན་
ཅིས་ཀྱང་མི་ཚུགས་ཤིང་གཅོད་མི་ནུས་སོ། །རིགས་ཀྱི་བུ་སེམས་ཅན་གྱི་སངས་རྒྱས་ཀྱི་རང་བཞིན་ཡང་དེ་དང་འདྲ་སྟེ། འཇིག་རྟེན་ལ་རྒོལ་བ་ཐམས་ཅད་ལྷ་དང་། བདུད་སྡིག་ཏོ་ཅན་དང་། མི་དང་། འཇིག་རྟེན་དུ་བཅས་པ་ཐམས་ཅད་ཀྱིས་
གཞིག་མི་ནུས་སོ། །ཕུང་པོ་ལྔའི་མཚན་ཉིད་ནི་བྱེད་པ་དང་བཅས་པའོ། །བྱེད་པ་དང་བཅས་པའི་མཚན་ཉིད་ནི་རྡོ་འམ་གསེག་མ་ལྟ་བུ་སྟེ། འབིགས་ཤིང་གཅོད་ནུས་སོ། །སངས་རྒྱས་ཀྱི་རང་བཞིན་ནི་རྡོ་རྗེ་ལྟ་བུ་སྟེ། གཞིག་མི་
ནུས་སོ། །དེ་བས་ན་ཕུང་པོ་ལྔ་བཤིག་པ་ནི་སྲོག་གཅོད་པ་ཞེས་བྱའོ། །རིགས་ཀྱི་བུ་སངས་རྒྱས་ཀྱི་ཆོས་ནི་དེ་ལྟར་བསམ་གྱིས་མི་ཁྱབ་པར་རིག་པར་བྱའོ། །རིགས་ཀྱི་བུ་ཤིན་ཏུ་རྒྱས་པའི་མདོ་སྡེ་ནི་བདུད་རྩི་ལྟ་བུ་ཡང་

47-1-127a

ཡིན་ལ། དུག་ལྟ་བུ་ཡང་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །ཅིའི་སླད་དུ་དེ་བཞིན་གཤེགས་པས་ཤིན་ཏུ་རྒྱས་པའི་མདོ་སྡེ་ལ་བདུད་རྩི་ལྟ་བུ་དང་། དུག་ལྟ་བུ་
ལགས་སོ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་དེ་བཞིན་གཤེགས་པའི་སྙིང་པོ་ཡང་དག་པའི་དོན་ཤེས་པར་འདོད་དམ། འོད་སྲུང་གིས་གསོལ་པ། བདག་དེ་བཞིན་གཤེགས་པའི་
སྙིང་པོའི་དོན་གང་ལགས་པ་རྟོགས་པར་འཚལ་ལོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཁ་ཅིག་བདུད་རྩི་འཐུངས་པ་ལས། །ཚེ་ཐུང་སྔར་ཤི་བ་ཡང་ཡོད། །ཁ་ཅིག་བདུད་རྩི་འཐུངས་པ་
ལས། །ཚེ་རིང་རྟག་ཏུ་འདུག་པ་འང་ཡོད། །ཁ་ཅིག་དུག་འཐུངས་དབང་གིས་འཚོ། །ཁ་ཅིག་དུག་གི་རྐྱེན་ཀྱིས་འཆི། །ཐོགས་མེད་ཡེ་ཤེས་ཟིལ་མངར་ནི། །ཐེག་པ་ཆེན་པོའི་མདོ་སྡེ་སྟེ། །ཐེག་པ་ཆེན་པོའི་མདོ་སྡེ་ནི། །
སྨན་དང་དུག་དུ་འདྲེས་པའོ། །ཇི་ལྟར་མར་དང་ཁ་ར་དང་། །མར་གྱི་སྙིང་པོ་ལ་སོགས་པ། །འཐུངས་ཏེ་ཞུ་ན་སྨན་དུ་འགྱུར། །མ་ཞུ་བ་ནི་དུག་ཅེས་བྱ། །ཤིན་ཏུ་རྒྱས་པ་འང་དེ་བཞིན་ཏེ། །མཁས་པ་དག་གིས་བདུད་རྩིར་འགྱུར། །
གླེན་པས་སངས་རྒྱས་རང་བཞིན་དག །མི་ཤེས་པ་ཡིས་དུག་དུ་འགྱུར། །ཉན་ཐོས་པ་དང་རང་རྒྱལ་དང་། །ཐེག་པ་ཆེན་པོའི་བདུད་རྩི་སྟེ། །ཇི་ལྟར་བྲོ་བའི་རོ་ཐམས་ཅད། །འོ་མ་མཆོག་ཏུ་འགྱུར་བ་བཞིན། །དེ་ལྟར་བརྩོན་
འགྲུས་རྩོམ་པ་དག །ཐེག་པ་ཆེན་པོའི་དབང་གིས་ནི། །ཡོངས་སུ་མྱ་ངན་འདས་འགྱུར་ཞིང་། །མིའི་ཁྱུ་མཆོག་རྒྱལ་པོར་འགྱུར། །འོད་སྲུང་ཁྱོད་དང་སེམས་ཅན་གང་། །སངས་རྒྱས་རང་བཞིན་ཤེས་པ་ནི། །བླ་ན་མེད་པའི་
ཟིལ་མངར་རོ། །མི་སྐྱེ་མི་འཆི་བར་འགྱུར་རོ། །འོད་སྲུང་ཁྱོད་ཀྱིས་ཤེས་པར་གྱིས། །དཀོན་མཆོག་གསུམ་དག་རྟོགས་པར་གྱིས། །དཀོན་མཆོག་གསུམ་གྱི་མཚན་ཉིད་ནི། །བདག་ཅེས་བྱ་བའི་མཚན་ཉིད་དོ། །བདག་དང་

47-1-127b

སངས་རྒྱས་རང་བཞིན་ཉིད། །གང་གིས་མངོན་སུམ་རྟོགས་གྱུར་ན། །དེ་བཞིན་གཤེགས་པའི་སྙིང་པོ་ཉིད། །སྐྱེས་བུ་དེས་ནི་རྟོགས་འགྱུར་རོ། །བདག་དང་བདག་གིར་གང་ཤེས་པ། །དེ་ནི་འཇིག་རྟེན་འདས་པའོ། །སངས་
རྒྱས་ཆོས་དང་དགེ་འདུན་ནི། །ཕུལ་དུ་བླ་ན་མེད་པའི་མཆོག །ཚིགས་སུ་བཅད་དེ་ངས་གསུངས་པ། །མཚན་ཉིད་དོན་ནི་འདི་དག་གོ། །དེ་ནས་བྱང་ཆུབ་སེམས་དཔའ་འོད་སྲུང་གིས་ཚིགས་སུ་བཅད་དེ་བཅོམ་ལྡན་འདས་ལ་
གསོལ་པ། སྐྱབས་སུ་འགྲོ་བའི་གནས་གསུམ་པོ། །བདག་ནི་གང་ཡང་མ་རྟོགས་ན། །བླ་མེད་འཇིགས་པ་མ་མཆིས་པར། །དེ་ལ་ཇི་ལྟར་སྐྱབས་སུ་མཆི། །དཀོན་མཆོག་གསུམ་ཡང་མ་རྟོགས་ན། །བདག་མ་མཆིས་
པར་ཇི་ལྟར་བགྱི། །ཇི་ལྟར་སངས་རྒྱས་སྐྱབས་གསོལ་ན། །རབ་ཏུ་བདེ་བ་ཐོབ་པར་འགྱུར། །ཇི་ལྟར་ཆོས་ལ་སྐྱབས་གསོལ་བ། །བདག་ལ་རྒྱལ་བས་བསྟན་དུ་གསོལ། །ཇི་ལྟར་ཆེ་བའི་དབང་ཐོབ་འགྱུར། །དབང་དུ་མི་འགྱུར་
གང་ལགས་པ། །ཇི་ལྟར་དགེ་འདུན་སྐྱབས་གསོལ་ན། །བླ་མེད་བདེ་བ་ཐོབ་པར་འགྱུར། །ཇི་ལྟར་བདེ་བའི་ཚིག་སྨྲ་ན། །མ་འོངས་དུས་སུ་མངོན་སངས་རྒྱས། །མ་འོངས་དུས་སུ་མི་འགྲུབ་ན། །དཀོན་མཆོག་གསུམ་ལ་ཇི་ལྟར་
ཕྱོགས། །བདག་གིས་སྔ་ནས་མི་འཚལ་ཏེ། །བགས་ཀྱིས་འཚལ་བར་འགྱུར་བས་ན། །ཇི་ལྟ་བུར་ན་མི་སྦྲུམ་པར། །བུ་དག་བཙའ་བའི་འདུ་ཤེས་བསྐྱེད། །མངལ་ན་ཇི་ལྟར་མཆིས་ངེས་ན། །དེ་ནི་བུ་མཆིས་པ་ཞེས་བགྱི། །
ཅི་སྟེ་མངལ་ན་བུ་མཆིས་ན། །རིང་པོར་མི་ཐོགས་ངེས་པར་འབྱུང་། །དེ་ནི་བུ་ཡི་དོན་ལགས་ཏེ། །སེམས་ཅན་ལས་ཀྱང་དེ་བཞིན་ནོ། །བཅོམ་ལྡན་འདས་ཀྱིས་གསུངས་པ་ལྟར། །གླེན་པ་དག་གིས་ཤེས་མི་ནུས། །དེ་ལྟར་མི་
རྟོགས་མི་ཤེས་པས། །ཡང་དང་ཡང་དུ་འཁོར་བར་འཁོར། །མིང་ཙམ་གྱི་ནི་དགེ་བསྙེན་དག །ཡང་དག་པའི་དོན་མི་འཚལ། །ཤིན་ཏུ་རྒྱས་པར་འབྱེད་བསྟན་ཏེ། །བདག་གི་ཐེ་ཙོམ་བཅད་དུ་གསོལ། །ཡེ་ཤེས་ཆེན་པོ་བཅོམ་ལྡན་འདས། །

47-1-128a

ཐུགས་བརྩེའི་སླད་དུ་རྒྱས་པར་ནི། །དེ་བཞིན་གཤེགས་པས་གསང་བ་ཡིས། །རིན་ཆེན་སྙིང་པོ་བཤད་དུ་གསོལ། །འོད་སྲུངས་ཁྱོད་ཀྱིས་ཤེས་པར་གྱིས། །གསང་བའི་སྙིང་པོ་གང་ཡིན་པ། །ངས་ནི་རབ་ཏུ་འབྱེད་བསྟན་
ཏེ། །ཁྱོད་ཀྱི་ཐེ་ཙོམ་བཅད་པར་བྱ། །ཤིན་ཏུ་བརྟགས་པར་ཉོན་ཅིག་དང་། །ཁྱོད་ནི་བྱང་ཆུབ་སེམས་དཔའི་ནང་། །སངས་རྒྱས་འབྱུང་བ་བདུན་པ་ཡི། །མཚན་དང་མིང་དུ་འཐུན་པར་འགྱུར། །སངས་རྒྱས་དག་ལ་སྐྱབས་གསོལ་བ། །
དེ་ནི་ཡང་དག་དགེ་བསྙེན་ཏེ། །ནམ་དུ་འང་ལྷ་རྣམས་གཞན་དག་ལ། །སྐྱབས་གསོལ་བར་ནི་མི་འགྱུར་རོ། །དམ་པའི་ཆོས་ལ་སྐྱབས་གསོལ་ན། །འཚེ་ཞིང་གསོད་པའི་སེམས་དང་བྲལ། །དགེ་འདུན་ལ་ནི་སྐྱབས་གསོལ་ན། །
མུ་སྟེགས་ཅན་ལ་ཕྱོགས་མི་འགྱུར། །དཀོན་མཆོག་གསུམ་ལ་སྐྱབས་གསོལ་ན། །འཇིགས་པ་མེད་པ་ཐོབ་པར་འགྱུར། །འོད་སྲུང་སངས་རྒྱས་ལ་གསོལ་པ། །བདག་ནི་གསུམ་ལ་སྐྱབས་གསོལ་བས། །སངས་རྒྱས་རྣམས་
ཀྱི་སྤྱོད་ཡུལ་གྱི། །ཡང་དག་པ་ཡི་ལམ་ཞེས་བགྱི། །དཀོན་མཆོག་གསུམ་གྱི་མཚན་ཉིད་མཉམ། །ཡེ་ཤེས་ཆེན་པོ་ཉིད་དང་ལྡན། །བདག་དང་སངས་རྒྱས་རང་བཞིན་ནི། །གཉིས་སུ་མེད་དེ་བྱེ་བྲག་མེད། །སངས་རྒྱས་བསྟོད་
པའི་ལམ་འདི་ནི། །ཡང་དག་ཚོལ་བ་བདེ་བའི་གནས། །ཐམས་ཅད་མཁྱེན་ཅིང་གཟིགས་པས་ན། །སངས་རྒྱས་མང་པོས་བསྔགས་པར་འགྱུར། །བདག་ཀྱང་བདེ་གཤེགས་བསྔགས་པ་ཡི། །བླ་མེད་ལམ་ལ་གཞོལ་ཞིང་འབབ། །
བདུད་རྩི་མཆོག་གི་དམ་པ་སྟེ། །སྲིད་པའི་ནང་ན་མེད་པའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུངས་ལ་བཀའ་སྩལ་པ། རིགས་ཀྱི་བུ་ཁྱོད་ཀྱིས་ཉན་ཐོས་སམ། བུས་པ་མ་རབས་སམ་དཀོན་མཆོག་
གསུམ་ལ་བྱེ་བྲག་མ་འབྱེད་ཅིག །ཐེག་པ་ཆེན་པོ་ལ་ནི་དཀོན་མཆོག་གསུམ་ལ་རྣམ་པར་བྱེ་བྲག་འབྱེད་པའི་མཚན་ཉིད་མེད་དོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ངོ་བོ་ཉིད་ལ་ཆོས་དང་དགེ་འདུན་ཡོད་པའི་ཕྱིར་རོ། །ཉན་ཐོས་དང་

47-1-128b

བུས་པ་མ་རབས་བསྒྲལ་བའི་ཕྱིར་དཀོན་མཆོག་གསུམ་རྣམ་པར་ཕྱེ་སྟེ་ཐ་དད་པར་བསྟན་ཏོ། །རིགས་ཀྱི་བུ་གང་འཇིག་རྟེན་པའི་ཆོས་ཀྱི་རྗེས་སུ་འཇུག་འདོད་པ་དག་ནི་སྐྱབས་སུ་འགྲོ་བའི་གནས་གསུམ་ཡོད་པར་བྱེ་བྲག་འབྱེད་དོ། །
རིགས་ཀྱི་བུ་བྱང་ཆུབ་སེམས་དཔའ་དག་ནི་འདི་སྙམ་དུ་སེམས་ཏེ། །བདག་གི་ལུས་འདི་སངས་རྒྱས་ལ་སྐྱབས་སུ་སོང་བས་ལུས་འདི་ཉིད་ཀྱིས་མངོན་པར་འཚང་རྒྱ་སྟེ། མངོན་པར་སངས་རྒྱས་ནས་སངས་རྒྱས་ལ་བསྙེན་བཀུར་དང་། སྟི་སྟང་
དང་། མཆོད་པ་དང་། ཕྱག་བྱ་བའི་ཆོས་མེད་དོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ནི་མཉམ་པར་སེམས་ཅན་ཐམས་ཅད་ཀྱི་སྐྱབས་སུ་འགྲོ་བའི་གནས་མཛད་པའི་ཕྱིར་རོ། །གང་ཆོས་ཀྱི་སྐུ་གདུང་ལ་རིམ་གྲོ་
བྱེད་པ་ནི་སངས་རྒྱས་རྣམས་ཀྱི་མཆོད་རྟེན་ལ་གུས་པར་ཕྱག་བྱའོ། །དེ་ཅི་ལྟ་ཞེ་ན། སོ་སོའི་སྐྱེ་བོ་བསྒྲལ་བའི་ཕྱིར་རོ། །གཞན་ཡང་སེམས་ཅན་དག་ངའི་སྐུ་ལ་མཆོད་རྟེན་ལྟ་བུར་འདུ་ཤེས་བསྐྱེད་དེ། ཕྱག་དང་མཆོད་པ་བྱེད་དོ། །
དེ་ལྟར་སེམས་ཅན་དེ་དག་གིས་ངའི་ཆོས་ཀྱི་སྐུ་ལ་ཡང་སྐྱབས་ཚོལ་བའི་གནས་བྱེད་དོ། །སེམས་ཅན་ཐམས་ཅད་ནི་ཡང་དག་པ་མ་ཡིན་པ་ཆོས་ལོག་པ་ལ་གནས་ཏེ། དེ་བས་ན་ངས་རིམ་གྱིས་ཡང་དག་པའི་ཆོས་བསྟན་ཏོ། །གཞན་
ཡང་ཡང་དག་པའི་དགེ་འདུན་མ་ཡིན་པ་ལ་སྐྱབས་སུ་སོང་བ་དག་ལ་ཡང་དག་པའི་དགེ་འདུན་དག་ལ་སྐྱབས་སུ་འགྲོ་བའི་གནས་ཀྱང་བྱེད་དོ། །གང་དཀོན་མཆོག་གསུམ་ལ་བྱེ་བྲག་འབྱེད་པ་དག་ལ་ནི་སྐྱབས་སུ་འགྲོ་བའི་གནས་གཅིག་
ཏེ། གསུམ་དུ་བྱེ་བྲག་མེད་དོ་ཞེས་ཀྱང་སྟོན་ཏོ། །དམུས་ལོང་འདོངས་པར་གྱུར་པ་ལ་ནི་མིག་ལྟ་བུར་ཡང་སྟོན་ཏོ། །གཞན་ཡང་ཉན་ཐོས་དང་རང་སངས་རྒྱས་ཀྱི་སྐྱབས་སུ་འགྲོ་བའི་གནས་ཡང་དག་པ་འང་བྱའོ་སྙམ་སེམས་
སོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་དག་ནི་སེམས་ཅན་མ་རུངས་པ་ཚད་མེད་པ་དང་མཁས་པ་ཤེས་རབ་དག་གི་ཕྱིར་སངས་རྒྱས་ཀྱི་མཛད་པ་བྱེད་དོ། །རིགས་ཀྱི་བུ་དཔེར་ན་སྐྱེས་བུ་ཞིག་གཡུལ་ངོར་ཕྱིན་པའི་ཚེ་

47-1-129a

འདི་སྙམ་དུ་བདག་ནི་མཆོག་སྟེ། དམག་གི་ཚོགས་འདི་དག་ཐམས་ཅད་ཀྱང་བདག་འབའ་ཤིག་ལ་ལྟོས་སོ་སྙམ་སེམས་སོ། །གཞན་ཡང་དཔེར་ན་རྒྱལ་ཚབ་གཞོན་ནུ་འདི་སྙམ་དུ་སེམས་ཏེ། བདག་ནི་རྒྱལ་བུ་ཐམས་ཅད་
ཐུལ་ཏེ། རྒྱལ་པོ་ཆེན་པོའི་སྲིད་དང་། དབང་བ་ཐམས་ཅད་ལ་བདག་དབང་དུ་གྱུར་ཏེ། རྒྱལ་བུ་ཐམས་ཅད་ཀྱང་བདག་ལ་ཕྱོགས་པས། དེ་བས་ན་ཞན་པའི་བསམ་པ་མི་སྐྱེད་དོ་སྙམ་དུ་སེམས་ཏེ། ཇི་ལྟར་རྒྱལ་པོ་དང་རྒྱལ་བུ་དེ་
བཞིན་དུ་བློན་པོ་ཆེན་པོ་ཡང་དེ་དང་འདྲའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་འང་དེ་དང་འདྲ་བར་འདི་སྙམ་དུ་སེམས་སོ། །ཇི་ལྟར་ན་དངོས་པོ་གསུམ་པོ་བདག་དང་རང་བཞིན་གཅིག་ཏུ་འགྱུར་སྙམ་སེམས་
སོ། །རིགས་ཀྱི་བུ་ངས་བསྟན་པའི་དངོས་པོ་གསུམ་པོ་འདི་ནི་མྱ་ངན་ལས་འདས་པའོ། །དེ་བཞིན་གཤེགས་པ་ནི་སྐྱེས་བུ་དམ་པ་སྟེ། ཇི་ལྟར་མིའི་ལུས་ལ་ཡན་ལག་དང་ཉིང་ལག་ཐམས་ཅད་ཀྱི་ནང་ན་མགོ་བོ་དམ་པ་སྟེ། གཞན་
མ་ཡིན་པ་བཞིན་དུ་སངས་རྒྱས་ཀྱང་དེ་དང་འདྲ་བར་མཆོག་དམ་པ་སྟེ། ཆོས་དང་དགེ་འདུན་ནི་མ་ཡིན་ནོ། །འཇིག་རྟེན་པ་རྣམས་བསྒྲལ་བའི་ཕྱིར་མཚན་ཉིད་རྣམ་པ་སྣ་ཚོགས་སུ་སྐས་ཀྱི་ཐེམ་པ་ལྟར་བྱེ་བྲག་དུ་བསྟན་ཏོ། །
དེ་བས་ན་ཁྱོད་ནི་བུས་པ་གླེན་པ་ལྟར། དཀོན་མཆོག་གསུམ་ལ་ཐ་དད་པའི་མཚན་ཉིད་དུ་མི་གཟུང་ངོ་། །ཁྱོད་ནི་ཐེག་པ་ཆེན་པོ་ལ་ཞུགས་པས་དབང་པོ་རྣོ་བ་ནི་རལ་གྲི་རྣོན་པོ་དང་འདྲའོ། །བྱང་ཆུབ་སེམས་དཔའ་འོད་སྲུང་གིས་བཅོམ་
ལྡན་འདས་ལ་གསོལ་པ། བདག་ནི་རྟོགས་བཞིན་དུ་བཅོམ་ལྡན་འདས་ལ་ཞུ་བ་ལགས་ཀྱི། མི་འཚལ་བ་ནི་མ་ལགས་ཏེ། བདག་གིས་བྱང་ཆུབ་སེམས་དཔའ་གང་དཔའ་ཞིང་དབང་པོ་རྟུལ་ཕོད་པ་རྣམས་ཀྱི་སླད་དུ་དྲི་མ་མ་མཆིས་པ་ཡོངས་སུ་
དག་པའི་སྤྱོད་ཡུལ་དུ་ཞུགས་པ་ལགས་སོ། །གཞན་ཡང་དེ་བཞིན་གཤེགས་པས་བྱང་ཆུབ་སེམས་དཔའ་རྣམས་ལ་ངོ་མཚར་རྨད་ཀྱི་དངོས་པོ་འབྱེད་ཅིང་བསྟན་པ་དང་། ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་བསྔགས་

47-1-129b

པའི་སླད་དུ་ཞུགས་ཏེ། དེ་བཞིན་གཤེགས་པས་ཐུགས་རྗེ་ཆེན་པོས་ལེགས་པར་གསུངས་པས་བདག་ཀྱང་དེ་ལ་གནས་པར་འཚལ་ལོ། །གང་ན་བྱང་ཆུབ་སེམས་དཔའི་སྤྱོད་ཡུལ་ལ་ཡོངས་སུ་དག་པ་སྟོན་པ། དེ་ན་ཡོངས་སུ་མྱ་ངན་ལས་
འདས་པ་ཆེན་པོའི་མདོ་སྡེ་སྟོན་པ་ལགས་སོ། །བཅོམ་ལྡན་འདས་བདག་གིས་ཀྱང་དེ་བཞིན་གཤེགས་པའི་གསང་བའི་སྙིང་པོ་འདི་སེམས་ཅན་ཐམས་ཅད་ལ་རྒྱས་པར་བསྟན་ཅིང་དཀོན་མཆོག་གསུམ་ལ་སྐྱབས་སུ་འགྲོ་བའི་གནས་
ཡང་དག་པར་རྟོགས་པར་བགྱིའོ། །དེ་ལ་སེམས་ཅན་གང་ཞིག་འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདི་ལ་དད་ཅིང་ཡིད་ཆེས་ན་སྐྱེས་བུ་དེ་ནི་དཀོན་མཆོག་གསུམ་ལ་སྐྱབས་སུ་འགྲོ་བའི་གནས་རྟོགས་ཤིང་
ཁོང་དུ་ཆུད་པ་ལགས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པའི་གསང་བའི་སྙིང་པོ་ལ་སངས་རྒྱས་ཀྱི་རང་བཞིན་མཆིས་པའི་ཕྱིར་རོ། །གང་འོད་སྡེ་འདི་སྟོན་ཅིང་འཆད་པ་དེའི་ལུས་ལ་སངས་རྒྱས་ཀྱི་རང་བཞིན་མ་མཆིས་
པར་སྨྲ་སྟེ། སྐྱེས་བུ་དེ་ནི་དཀོན་མཆོག་གསུམ་ལ་སྐྱབས་སུ་འགྲོ་བ་མ་ཡིན་པ་གཞན་མི་ཚོལ་ལོ། །དེ་ཅིའི་སླད་དུ་ཞེ་ན། ཕྱི་མ་མ་འོངས་པའི་དུས་སུ་བདག་གི་ལུས་འདི་ཉིད་དཀོན་མཆོག་གསུམ་དུ་འགྱུར་ཏེ། ཉན་ཐོས་དང་། རང་
སངས་རྒྱས་དང་དེ་མ་ཡིན་པའི་སྐྱེ་བོ་གཞན་ཐམས་ཅད་ཀྱང་བདག་ལ་བརྟེན་ཏེ། རིམ་གྲོ་དང་། བཀུར་སྟི་དང་། ཕྱག་འཚལ་བར་འགྱུར་བའི་ཕྱིར་རོ། །རིགས་ཀྱི་བུ་དོན་དེ་ལྟ་བས་ན་ཐེག་པ་ཆེན་པོའི་མདོ་སྡེ་ལ་ཡང་དག་པར་བསླབ་
པར་བྱའོ། །འོད་སྲུང་གིས་ཡང་གསོལ་པ། སངས་རྒྱས་ཀྱི་རང་བཞིན་ནི་བསམ་གྱིས་མི་ཁྱབ་སྟེ། དེ་བཞིན་དུ་མཚན་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱད་བཅུ་ཡང་བསམ་གྱིས་མི་ཁྱབ་བོ། །དེ་ནས་བཅོམ་ལྡན་
འདས་ཀྱིས་བྱང་ཆུབ་སེམས་དཔའ་འོད་སྲུངས་ལ་ལེགས་སོ་ཤིན་ཏུ་ལེགས་སོ་ཞེས་བཀའ་སྩལ་ཏོ། །རིགས་ཀྱི་བུ་ཁྱོད་ནི་ཤིན་ཏུ་ཟབ་པའི་ཤེས་རབ་དང་ལྡན་པས་ངས་ཀྱང་ཁྱོད་ཀྱི་དེ་བཞིན་གཤེགས་པའི་སྙིང་པོ་ལ་འཇུག་པ་

47-1-130a

ལེགས་པར་བསྟན་པར་བྱའོ། །གལ་ཏེ་བདག་ཅེས་བྱ་བ་ཐེར་ཟུག་དུ་རྟག་པའི་ཆོས་ཡིན་ན་ནི། སྡུག་བསྔལ་དང་བྲལ་བར་མི་འགྱུར་རོ། །གལ་ཏེ་བདག་ཅེས་བྱ་བ་མེད་ན་ནི་ཚངས་པར་སྤྱོད་པ་དག་ཕན་པའི་དོན་མེད་པར་
འགྱུར་རོ། །གལ་ཏེ་ཆོས་ཐམས་ཅད་བདག་མེད་པར་སྨྲ་ན་དེ་ནི་ཆད་པར་ལྟ་བ་ཡིན་ནོ། །ཅི་སྟེ་བདག་ཅེས་བྱ་ཐེར་ཟུག་དུ་སྨྲ་ན་དེ་ནི་རྟག་པར་ལྟ་བ་ཡིན་ནོ། །གང་འདུ་བྱེད་ཐམས་ཅད་མི་རྟག་པར་ལྟ་ན་དེ་ཡང་ཆད་པར་ལྟ་བར་འགྱུར་
རོ། །འདུ་བྱེད་རྟག་པར་ལྟ་ན་དེ་ལ་ཡང་རྟག་པར་ལྟ་བར་འགྱུར་རོ། །གང་སྡུག་བསྔལ་བར་སྨྲ་ན་ཆད་པར་ལྟ་བ་ཡིན་ནོ། །གལ་ཏེ་བདེ་བར་སྨྲ་ན་ཡང་རྟག་པར་ལྟ་བ་ཡིན་ནོ། །གང་ཆོས་ཐམས་ཅད་རྟག་གོ་བར་ནན་ཏན་བྱེད་ན་ཆད་པར་ལྟ་
བར་ལྟུང་ངོ་། །ཆོས་ཐམས་ཅད་ཆད་པར་ནན་ཏན་བྱེད་ན་རྟག་པར་ལྟ་བར་ལྟུང་ངོ་། །དཔེར་ན་སྲིན་བུ་ཁུང་བུར་འགྲོ་བ་དག་རྐང་པ་སྔ་མ་བོར་ནས་རྐང་པ་ཕྱི་མ་འདོར་རོ། །རྟག་པ་དང་ཆད་པ་ལ་ནན་ཏན་བྱེད་པ་ཡང་དེ་དང་འདྲ་སྟེ། ཆད་པ་
དང་། རྟག་པའི་རྐྱེན་ལ་རྟོགས་སོ། །དོན་དེ་ལྟ་བས་ན་སྡུག་བསྔལ་བའི་ཆོས་གཞན་ལ་ནན་ཏན་བྱེད་པ་ནི་མི་དགེ་བའོ། །བདེ་བའི་ཆོས་ལ་ནན་ཏན་བྱེད་པ་ནི་དགེ་བ་ཞེས་བྱའོ། །བདག་མེད་པའི་ཆོས་གཞན་ལ་ནན་ཏན་བྱེད་
པ་ནི་ཀུན་ནས་ཉོན་མོངས་པའི་ཕྱོགས་ཡིན་ནོ། །རྟག་པའི་ཆོས་གཞན་ལ་ནན་ཏན་བྱེད་པ་ནི་དེ་བཞིན་གཤེགས་པའི་གསང་བའི་སྙིང་པོ་ཞེས་བྱ་སྟེ། མྱ་ངན་ལས་འདས་པ་ནི་གནས་དང་རྟེན་མེད་པའོ། །མི་རྟག་པའི་ཆོས་
གཞན་ལ་ནན་ཏན་བྱེད་པ་ནི་རྫས་དང་ཟང་ཟིང་ཡོད་པའོ། །རྟག་པའི་ཆོས་གཞན་ལ་ནན་ཏན་བྱེད་པ་ནི་སངས་རྒྱས་དང་ཆོས་དང་དགེ་འདུན་དང་ཡང་དག་པར་རྣམ་པར་གྲོལ་བའོ། །དེ་བས་ན་སངས་རྒྱས་ཀྱི་རང་བཞིན་ནི་ལམ་དབུ་
མ་མཐའ་གཉིས་དང་ཡོངས་སུ་བྲལ་བ་ཡིན་པར་རིག་པར་བྱའོ། །ཡང་དག་པའི་ཆོས་བསྟན་པ་ལ་བུས་པ་མ་རབས་དག་ནི་དེ་ལ་ཐ་ཙོམ་མེད་དོ། །དཔེར་ན་ནད་པ་ཉམ་ཆུང་བ་དག་མར་མཐུངས་ན་ལུས་ཡང་ཞིང་དགའ་བར་འགྱུར་རོ། །

47-1-130b

ཡོད་པ་དང་མེད་པའི་ཆོས་ཀྱང་རང་བཞིན་གཅིག་ཏུ་མ་ཆད་དེ། དཔེར་ན་ཆེན་པོ་བཞི་རང་བཞིན་མི་འཐུན་པས་གཅིག་གི་གཉེན་པོར་གཅིག་འགྱུར་ཏེ། དེ་ལ་སྨན་པ་མཁས་པས་ནི་གང་གི་ཤས་ཆེ་བ་བཞིན་དུ་ཤིན་དུ་རྟོགས་སོ། །
རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། སེམས་ཅན་ཐམས་ཅད་ལ་སྨན་པ་ལྟ་བུར་ཀུན་ནས་ཉོན་མོངས་པའི་རང་བཞིན་རྣམ་པ་ཐ་དད་པ་མཁྱེན་པས་ཡོངས་སུ་བསལ་ཏེ། དེ་བཞིན་གཤེགས་པའི་གསང་
བའི་སྙིང་པོ་སངས་རྒྱས་ཀྱི་རང་བཞིན་ཡོངས་སུ་དག་པ་མི་འགྱུར་མི་འཕོ་བ་སྟོན་ཏོ། །གལ་ཏེ་ཡོད་པར་སྨྲ་ན་མཁས་པ་ཤེས་རབ་ཅན་དག་ཆགས་པའི་མི་རིགས་ལ་གལ་ཏེ་མེད་པར་སྨྲ་ན་བརྫུན་དུ་སྨྲ་བར་འགྱུར་རོ། །
གལ་ཏེ་ཡོད་པར་སྨྲ་ན། འཕགས་པ་ཅང་མི་སྨྲ་བའི་རིགས་ལ། གཞན་ཡང་ཁྱལ་པ་དང་རྩོད་པར་སྨྲ་བའི་མི་རིགས་ཏེ། ཡང་དག་པའི་ཆོས་ཉིད་རྟོགས་པར་འདོད་དོ། །བུས་པ་མ་རབས་ནི་ཁྱལ་པར་སྨྲ་ཞིང་རྩོད་པས་དེ་བཞིན་
གཤེགས་པའི་གསང་བའི་སྙིང་པོ་མི་ཤེས་སོ། །གལ་ཏེ་སྡུག་བསྔལ་བར་སྨྲ་ན་བུས་པ་གླེན་པ་དག་ལུས་འདི་མི་རྟག་གོ་སྙམ་སེམས་སོ། །ཐམས་ཅད་སྡུག་བསྔལ་བར་སྨྲ་ན་ལུས་ལ་བདེ་བའི་རང་བཞིན་ཡོད་པར་མི་ཤེས་
སོ། །གལ་ཏེ་མི་རྟག་པར་སྨྲ་ན་བུས་པ་གླེན་པ་དག་ལུས་ཐམས་ཅད་མི་རྟག་གོ་སྙམ་སྟེ་རྫ་སོ་མ་གཏང་བ་དང་འདྲ་བར་འཛིན་ཏོ། །དེ་ལ་མཁས་པ་ཤེས་རབ་ཅན་དག་ནི་རྣམ་པར་ཕྱེ་སྟེ། ཐམས་ཅད་ཀྱི་ཐམས་ཅད་དུ་མི་
རྟག་པར་མི་སྨྲའོ། །དེ་ཅིའི་ཕྱིར་ཞེ་ན། བདག་གི་ལུས་ལ་སངས་རྒྱས་ཀྱི་རང་བཞིན་གྱི་ས་བོན་ཡོད་པའི་ཕྱིར་རོ། །གལ་ཏེ་བདག་མེད་པར་སྨྲ་ན་བུས་པ་གླེན་པ་དག་སངས་རྒྱས་ཀྱི་ཆོས་ཐམས་ཅད་བདག་མེད་དོ་སྙམ་
དུ་འཛིན་ཏོ། །མཁས་པ་ཤེས་རབ་ཅན་ནི་བདག་མེད་པ་བླ་དགས་སུ་བཏགས་པར་ཟད་དེ། བདེན་པ་མེད་པར་རྣམ་པར་དབྱེའོ། །དེ་ལྟར་ཤེས་ནས་དེ་ལ་ཐེ་ཙོམ་མི་སྐྱེད་དོ། །གང་དེ་བཞིན་གཤེགས་པའི་སྙིང་པོ་སྟོང་

47-1-131a

པར་སྨྲ་ན་བུས་པ་གླེན་པ་དག་ཐོས་ནས་ཆད་པ་འམ། མེད་པར་ལྟ་བ་སྐྱེའོ། །མཁས་པ་ཤེས་རབ་ཅན་དག་ནི་དེ་བཞིན་གཤེགས་པ་རྟག་པ་མི་འགྱུར་མི་འཕོ་བར་བྱེ་བྲག་དབྱེའོ། །གལ་ཏེ་རྣམ་པར་གྲོལ་བ་སྒྱུ་མ་ལྟ་
བུར་སྨྲ་ན་བུས་པ་གླེན་པ་དག་རྣམ་པར་གྲོལ་བ་མ་ཐོབ་པའི་རྣམས་བདུད་ཀྱི་ཆོས་ཡིན་ནོ་སྙམ་དུ་འཛིན་ཏོ། །མཁས་པ་ཤེས་རབ་ཅན་ནི་རྣམ་པར་ཕྱེ་སྟེ་མིའི་ནང་ན་སེང་གེ་ལྟ་བུར་དེ་བཞིན་གཤེགས་པ་ཉག་ཅིག་ནི་རྟག་
པ་གནས་པ་མི་འགྱུར་མི་འཕོ་བར་དབྱེའོ། །གལ་ཏེ་མ་རིག་པའི་རྐྱེན་ཀྱིས་འདུ་བྱེད་རྣམས་བྱུང་བར་སྨྲ་ན། བྱིས་པ་གླེན་པ་དག་ཐོས་ནས་རིག་པ་དང་མ་རིག་པར་ཆོས་གཉིས་སུ་བྱེ་བྲག་འབྱེད་དོ། །མཁས་པ་ཤེས་རབ་ཅན་
ནི་རང་བཞིན་གྱིས་གཉིས་སུ་མེད་པར་རྟོགས་སོ། །གང་གཉིས་སུ་མེད་པ་ནི་ཡང་དག་པ་ཉིད་དོ། །གལ་ཏེ་འདུ་བྱེད་ཀྱི་རྐྱེན་ཀྱིས་རྣམ་པར་ཤེས་པ་བྱུང་བར་སྨྲ་ན་བུས་པ་གླེན་པ་དག་འདུ་བྱེད་དང་རྣམ་པར་ཤེས་པ་གཉིས་སུ་
འཛིན་ཏོ། །མཁས་པ་ཤེས་རབ་ཅན་ནི་རང་བཞིན་གྱིས་གཉིས་སུ་མེད་པར་རྟོགས་སོ། །གཉིས་སུ་མེད་པ་ནི་ཡང་དག་པ་ཉིད་དོ། །གལ་ཏེ་དགེ་བ་བཅུ་དང་མི་དགེ་བ་བཅུ་པོ་འདི་ནི་བྱ་བའི་རིགས། འདི་ནི་མི་བྱ་བའི་རིགས། 
འདི་ནི་མཐོ་རིས་ཀྱི་ལམ། འདི་ནི་ངན་སོང་གི་རྒྱུ། འདི་ནི་རྣམ་པར་དཀར་བའི་ཆོས། འདི་ནི་ཆོས་ནག་པོའི་ཞེས་སྨྲ་ན་བུས་པ་གླེན་པ་དག་གཉིས་སུ་འཛིན་ཏོ། །མཁས་པ་ཤེས་རབ་ཅན་ནི་རང་བཞིན་གྱིས་གཉིས་སུ་མེད་
པར་རྟོགས་ཏེ། གཉིས་སུ་མེད་པ་ནི་ཡང་དག་པ་ཉིད་དོ། །གལ་ཏེ་ཆོས་ཐམས་ཅད་སྡུག་བསྔལ་བར་ནན་ཏན་བྱའོ་ཞེས་སྨྲ་ན་བུས་པ་གླེན་པ་དག་གཉིས་སུ་འཛིན་ཏོ། །མཁས་པ་ཤེས་རབ་ཅན་ནི་རང་བཞིན་གྱིས་གཉིས་
སུ་མེད་པར་རྟོགས་ཏེ། གཉིས་སུ་མེད་པ་ནི་ཡང་དག་པ་ཉིད་དོ། །གལ་ཏེ་འདུ་བྱེད་ཐམས་ཅད་མི་རྟག་ཅེ་འམ། དེ་བཞིན་གཤེགས་པའི་སྙིང་པོ་ཡང་མི་རྟག་ཅེས་སྨྲ་ན་བུས་པ་གླེན་པ་དག་གཉིས་སུ་འཛིན་ཏོ། །

47-1-131b

མཁས་པ་ཤེས་རབ་ཅན་ནི་རང་བཞིན་གྱིས་གཉིས་སུ་མེད་པར་རྟོགས་ཏེ། གཉིས་སུ་མེད་པ་ཉིད་ནི་ཡང་དག་པ་ཉིད་དོ། །ཆོས་ཐམས་ཅད་བདག་མེད་དེ། དེ་བཞིན་གཤེགས་པའི་སྙིང་པོ་ཡང་དག་པ་མེད་ཅེས་སྨྲ་ན་བུས་
པ་གླེན་པ་དག་གཉིས་སུ་འཛིན་ཏོ། །མཁས་པ་ཤེས་རབ་ཅན་ནི་རང་བཞིན་གྱིས་གཉིས་སུ་མེད་པར་རྟོགས་ཏེ་གཉིས་སུ་མེད་པ་ཉིད་ནི་ཡང་དག་པ་ཉིད་དོ། །བདག་དང་བདག་མེད་པ་རང་བཞིན་གྱིས་གཉིས་སུ་མེད་དོ། །
དེ་བཞིན་གཤེགས་པའི་སྙིང་པོའི་དོན་ནི་དེ་ལྟར་དཔག་ཏུ་མེད་ཅིང་ཚད་མེད་མཐའ་ཡས་པར་སངས་རྒྱས་བཅོམ་ལྡན་འདས་ཀྱིས་ཡོངས་སུ་བསྔགས་པས་ངས་ཀྱང་ཡོན་ཏན་དང་ལྡན་པའི་མདོ་སྡེ་ཐམས་ཅད་ལས་ཀྱང་རྒྱས་པར་
གསུངས་སོ།། །། བམ་པོ་བཅུ་གཅིག་པ། རིགས་ཀྱི་བུ་བདག་ཅེས་བྱ་བ་དང་བདག་མེད་པ་རང་བཞིན་གྱིས་གཉིས་སུ་མེད་པར་ཁྱོད་ཀྱིས་དེ་ལྟར་གཟུངས་སུ་ཟུང་ལ་སྤྱི་བོས་ལོང་ཤིག །རིགས་
ཀྱི་བུ་ཁྱོད་ཀྱིས་མདོ་སྡེ་འདི་བརྟན་པར་གཟུངས་སུ་ཟུང་ལ་དྲན་པར་གྱིས་ཤིག །ངས་སྔོན་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཆེན་པོའི་མདོ་ལས་ཀྱང་བདག་དང་བདག་མེད་པའི་མཚན་ཉིད་ཀྱིས་གཉིས་སུ་མེད་པར་
བསྟན་ཏོ། །འདི་ལྟ་སྟེ་འོ་མ་ལས་ཞོ་འབྱུང་བ་དང་། ཞོ་ལས་མར་འབྱུང་བ་དང་། མར་ལས་ཞུན་མར་འབྱུང་བ་དང་། ཞུན་མར་ལས་མར་གྱི་སྙིང་པོ་འབྱུང་སྟེ། དེ་ལྟར་ཞོའི་རང་བཞིན་དེ་འོ་མ་ལས་བྱུང་ངམ། འོན་ཏེ་ཞོ་
ཉིད་ལས་བྱུང་ངམ། འོན་ཏེ་གཞན་ནས་བྱུང་བ་མར་གྱི་སྙིང་པོའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །གལ་ཏེ་གཞན་ནམ་བྱུང་ན་གཞན་གྱིས་བྱས་པ་ཡིན་ཏེ། གཞན་གྱིས་བྱས་ན་འོ་མ་ལས་བྱུང་བ་
མ་ཡིན་པར་འགྱུར་རོ། །གལ་ཏེ་འོ་མ་ལས་མ་བྱུང་ན་འོ་མ་ཅིར་ཡང་མི་དགོས་པར་འགྱུར་རོ། །གལ་ཏེ་ཞོ་ཉིད་ལས་བྱུང་ན་འདྲ་བའི་ཡང་མི་རིགས་ཏེ། རྒྱུན་ལས་སྐྱེ་བར་འགྱུར་རོ། །གལ་ཏེ་རྒྱུན་ལས་སྐྱེས་ན། ལྷན་

47-1-132a

ཅིག་སྐྱེས་པ་མ་ཡིན་ནོ། །གལ་ཏེ་ལྷན་ཅིག་མ་སྐྱེས་ན་རོ་རྣམ་པ་ལྔ་དུས་གཅིག་ཏུ་འབྱུང་བའི་རིགས་ཏེ། དུས་གཅིག་ཏུ་བྱུང་བ་ཡང་མ་ཡིན་མོད་ཀྱི་ངེས་པར་གཞན་ནས་འོངས་པ་ཡང་མ་ཡིན་ནོ། །དེ་བས་ན་འོ་
མའི་ནང་ན་མངར་བའི་རོ་ཆེ་བས་སྔ་ནས་ཞོའི་མཚན་ཉིད་ཀྱང་རང་འགྱུར་བར་མི་ནུས་སོ། །དེ་བཞིན་དུ་མར་གྱི་སྙིང་པོའི་བར་དུ་རྒྱས་པར་རིག་པར་བྱའོ། །བ་རྩྭ་ཟོས་པ་དང་། ཆུ་འཐུངས་པའི་རྒྱུ་དང་རྐྱེན་གྱིས་ཁྲག་དུ་འགྱུར་
ཏེ། ཁྲག་ལས་འོ་མར་གྱུར་ཏོ། །གལ་ཏེ་རྩྭ་མངར་བ་ཟོས་ན་འོ་མ་ཡང་མངར་རོ། །གལ་ཏེ་རྩྭ་ཁ་བ་ཟོས་ན་འོ་མ་ཡང་ཁ་བར་འགྱུར་རོ། །གངས་ཀྱི་རི་ལ་རྩྭ་སྣུམ་པ་ཞེས་བྱ་བ་ཡོད་དེ། གལ་ཏེ་བས་ཟོས་ན་མར་གྱི་སྙིང་
པོ་འབའ་ཞིག་ཏུ་འགྱུར་ཏེ། ཁ་དོག་སྔོན་པོ་འམ། སེར་པོ་འམ། དམར་པོ་འམ། དཀར་པོ་འམ། ནག་པོར་ནི་མི་མངོན་ནོ། །རྩྭ་གཞན་ཟོས་པའི་རྒྱུ་དང་རྐྱེན་ལས་འོ་མའི་རོ་དང་། ཁ་དོག་ཀྱང་ཐ་དད་པར་འགྱུར་རོ། །བུས་པ་
སོ་སོའི་སྐྱེ་བོ་དག་རིག་པ་དང་མ་རིག་པའི་ལས་ཀྱི་རྒྱུ་དང་རྐྱེན་གྱི་མཚན་ཉིད་གཉིས་བསྐྱེད་དོ། །གལ་ཏེ་མ་རིག་པ་ལས་བཟློག་ན་རིག་པ་ཞེས་བྱ་སྟེ། དེ་བཞིན་དུ་ཆོས་ཐམས་ཅད་ཀྱང་དགེ་བ་དང་མི་དགེ་བ་ཞེས་བྱ་བ་
མཚན་ཉིད་གཉིས་སུ་མེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར་འོ་མའི་ནང་ན་ཞོ་མཆིས་ཤེས་བགྱི་བའི་དོན་ཇི་ལྟ་
བུ་ལགས། བཅོམ་ལྡན་འདས་ཅི་སྟེ་འོ་མའི་ནང་ན་ཞོའི་རང་བཞིན་ངེས་པར་མཆིས་ལ་ཤིན་ཏུ་ཕྲ་བས་མི་མཐོང་ན་ཅིའི་སླད་དུ་འོ་མའི་རྐྱེན་ཀྱིས་ཞོ་འབྱུང་ངོ་ཞེས་གསུངས། ཆོས་ཐོག་མ་ནས་མ་མཆིས་ན་ནི་སྐྱེས་
ཤེས་བགྱིར་རུང་ན། སྔ་ནས་མཆིས་པ་ཞིག་ལགས་ན་ཅིའི་སླད་དུ་སྐྱེས་ཤེས་བཀའ་སྩལ། ཅི་སྟེ་འོ་མའི་ནང་ན་ཞོའི་རང་བཞིན་མཆིས་པར་ངེས་ན་རྩི་ཤིང་ཐམས་ཅད་ཀྱི་ནང་ན་ཡང་འོ་མ་མཆིས་པའི་རིགས་སོ། །

47-1-132b

དེ་བཞིན་དུ་འོ་མའི་ནང་ན་ཡང་རྩི་ཤིང་མཆིས་པར་འགྱུར་རོ། །ཅི་སྟེ་འོ་མའི་ནང་ན་ངེས་པར་ཞོ་མ་མཆིས་པ་ཞིག་ལགས་ན་ཅིའི་སླད་དུ་འོ་མའི་རྐྱེན་ཀྱིས་ཞོ་འབྱུང་བར་འགྱུར། གལ་ཏེ་ཆོས་ཀྱང་སྔ་ནས་མ་མཆིས་ལ། 
ཕྱིས་སྐྱེས་པ་ཞིག་ལགས་ན་ཅིའི་སླད་དུ་འོ་མའི་ནང་ན་རྩི་ཤིང་མི་སྐྱེ། བཀའ་སྩལ་པ། རིགས་ཀྱི་བུ་གཅིག་ཏུ་ངེས་པར་འོ་མའི་ནང་ན་ཞོ་ཡོད་ཅེ་འམ། འོ་མའི་ནང་ན་ཞོ་མེད་ཅེས་བྱར་མི་རུང་ལ། དེ་མ་གཏོགས་པ་ལས་
བྱུང་ཞེས་བྱར་ཡང་མི་རུང་ངོ་། །གལ་ཏེ་འོ་མའི་ནང་ན་ཞོ་ངེས་པར་ཡོད་དོ་ཞེས་སྨྲ་ན་ཅིའི་ཕྱིར་དངོས་པོ་དང་རོ་ཐ་དད་པར་འགྱུར་ཏེ། དེ་བས་ན་ངེས་པར་འོ་མའི་ནང་ན་ཞོའི་རང་བཞིན་ཡོད་ཅེས་བྱར་ཡང་མི་རུང་ངོ་། །གལ་ཏེ་འོ་
མའི་ནང་ན་ངེས་པར་ཞོ་མེད་དོ་ཞེས་སྨྲ་ན་ཡང་། ཅིའི་ཕྱིར་རི་བོང་གི་རྭ་མི་འབྱུང་། འོ་མའི་ནང་ན་དུག་བླུགས་ན་ཞོ་དེ་འཐུངས་པས་འཆི་བར་འགྱུར་ཏེ། དེ་བས་ན་འོ་མའི་ནང་ན་ངེས་པར་ཞོའི་རང་བཞིན་མེད་ཅེས་བྱར་ཡང་མི་རུང་ངོ་། །
ཅི་སྟེ་དེ་མ་གཏོགས་པ་གཞན་ལས་འབྱུང་ཞེས་སྨྲ་ན་ཅིའི་ཕྱིར་ཆུ་ལས་ཞོ་མི་འབྱུང་། དེ་བས་ན་དེ་མ་གཏོགས་པ་གཞན་ལས་ཞོ་འབྱུང་ངོ་ཞེས་བྱར་ཡང་མི་རུང་ངོ་། །རིགས་ཀྱི་བུ་བ་རྩྭ་ཟོས་པ་ལས་ཁྲག་ཏུ་འགྱུར། 
ཁྲག་ལས་འོ་མར་འགྱུར་ཏེ། སེམས་ཅན་གྱི་བསོད་ནམས་ཀྱི་རྒྱུས་གྲུབ་པ་ཡིན་ནོ། །དེ་ལྟར་འོ་མ་དེ་རྩྭ་དང་ཁྲག་ལས་གྱུར་མོད་ཀྱི་གཉིས་ཤེས་བྱར་མི་རུང་སྟེ། རྒྱུ་དང་རྐྱེན་ལས་བྱུང་བ་ཞེས་བྱའོ། །ཞོ་དང་མར་གྱི་
སྙིང་པོའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །དེ་བས་ན་བའི་ཞོ་ཞེས་བྱ་སྟེ། འོ་མར་མི་སྣང་བའི་རྒྱུ་དང་རྐྱེན་ཀྱིས་ཞོ་ཞེས་གདགས་སོ། །རྒྱུ་དང་རྐྱེན་གང་ལས་གྱུར་ཅེ་ན། དྲོད་དང་སྐྱུར་བ་ལས་གྱུར་ཏེ། 
དེ་བས་ན་རྒྱུ་དང་རྐྱེན་ལས་བྱུང་བ་ནས་མར་གྱི་སྙིང་པོའི་བར་དུ་དེ་བཞིན་དུ་རྒྱས་པར་རིག་པར་བྱའོ། །དེ་བས་ན་འོ་མའི་ནང་ན་ངེས་པར་ཞོའི་རང་བཞིན་མེད་དེ་གཞན་ལས་བྱུང་ངོ་ཞེས་བྱར་མི་རུང་སྟེ་གནས་མེད་དོ། །

47-1-133a

རིགས་ཀྱི་བུ་རིག་པ་དང་མ་རིག་པ་ཡང་དེ་དང་འདྲ་སྟེ། ཀུན་ནས་ཉོན་མོངས་པ་དང་ལྷན་ཅིག་པའི་དུས་ན་ནི་མ་རིག་པ་ཞེས་བྱའོ། །ནམ་དགེ་བའི་ཆོས་དང་ལྷན་ཅིག་པ་དེའི་དུས་ན་རིག་པ་ཞེས་བྱ་སྟེ། དེ་བས་ན་ངས་གསུངས་
པ་ལ་མཚན་ཉིད་གཉིས་སུ་མེད་དེ། དེ་བས་ན་དེའི་རྒྱུ་དེའི་རྐྱེན་ཀྱིས་སྔར་ངས་འདི་སྐད་ཅེས་གསུངས་སོ། །གངས་ཀྱི་རི་ལ་རྩྭ་སྣུམ་པ་ཞེས་བྱ་བ་ཡོད་དེ་བས་ཟོས་ན། ཐམས་ཅད་མར་གྱི་སྙིང་པོར་འགྱུར་བ་དང་འདྲ་བར་
སངས་རྒྱས་ཀྱི་རང་བཞིན་ཡང་དེ་དང་འདྲའོ། །རིགས་ཀྱི་བུ་སེམས་ཅན་བསོད་ནམས་ཆུངས་བས་རྩྭ་སྣུམ་པ་ཞེས་བྱ་བ་མི་མཐོང་བ་དང་འདྲ་བར་སངས་རྒྱས་ཀྱི་རང་བཞིན་ཡང་དེ་དང་འདྲ་སྟེ། ཀུན་ནས་ཉོན་མོངས་པས་ཁེབས་
པས་སེམས་ཅན་རྣམས་ཀྱིས་མི་མཐོང་ངོ་། །འདི་ལྟ་སྟེ་དཔེར་ན་རྒྱ་མཚོའི་རོ་གཅིག་ཏུ་ལན་ཚྭ་བྲོ་བ་ཡིན་ཡང་དེའི་ནང་ན་ཆུའི་རོ་དམ་པ་འོ་མའི་རོ་བྲོ་བ་ཡོད་དོ། །དཔེར་ན་གངས་ཀྱི་རི་ནི་ཡོན་ཏན་སྣ་ཚོགས་དང་ལྡན་ཏེ། 
སྨན་བཟང་པོ་ཤ་སྟག་སྐྱེ་ཡང་དེ་ལ་དུག་ཀྱང་མི་སྐྱེ་བ་མ་ཡིན་ནོ། །སོ་སོའི་སྐྱེ་བོའི་ལུས་ཀྱང་དེ་དང་འདྲ་སྟེ་སྦྲུལ་གདུག་པ་བཞི་དང་བཅས་པ་ཡིན་མོད་ཀྱི། དེ་ལ་སྨན་བཟང་པོ་རྒྱལ་པོ་ལྟ་བུ་ཡང་ཡོད་པ་ནི་འདི་ལྟ་སྟེ། སངས་
རྒྱས་ཀྱི་རང་བཞིན་འདུས་བྱས་པའི་ཆོས་མ་ཡིན་པ་སྟེ། ཀུན་ནས་ཉོན་མོངས་པས་བསྒྲིབས་པར་གྱུར་ཏོ། །དེ་ལ་གང་རྒྱལ་རིགས་སམ། བྲམ་ཟེ་འམ། རྗེའུ་རིགས་སམ། དམངས་རིགས་ཀྱིས་ཉོན་མོངས་པ་ཀུན་བསལ་ན། 
སངས་རྒྱས་ཀྱི་རང་བཞིན་མཐོང་ཞིང་བླ་ན་མེད་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་རོ། །འདི་ལྟ་སྟེ། དཔེར་ན་སྟེང་གི་ནམ་མཁའ་ལ་སྤྲིན་ཆགས་ཏེ་འབྲུག་གྲགས་ན་བལ་གླང་གི་མཆེ་བ་ཀུན་ལ་མེ་ཏོག་སྐྱེའོ། །
ཅི་སྟེ་འབྲུག་མ་གྲགས་ན་མེ་ཏོག་ཀྱང་མི་སྐྱེ་ལ། བཏགས་པ་ཡང་མེད་དོ། །སེམས་ཅན་རྣམས་ཀྱི་སངས་རྒྱས་ཀྱི་རང་བཞིན་ཡང་དེ་དང་འདྲ་སྟེ། གལ་ཏེ་ཀུན་ནས་ཉོན་མོངས་པས་ཁེབས་ན་མཐོང་བར་མི་འགྱུར་རོ། །དེ་བས་ན་

47-1-133b

སེམས་ཅན་ལ་བདག་མེད་ཅེས་ངས་གསུངས་ཏེ། གང་གིས་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདི་ཐོས་ན་སངས་རྒྱས་ཀྱི་རང་བཞིན་འདི་མཐོང་བར་འགྱུར་ཏེ། བལ་གླང་གི་མཆེ་བའི་མེ་ཏོག་བཞིན་ནོ། །མདོ་
སྡེ་གཞན་གྱིས་ཏིང་ངེ་འཛིན་ཐམས་ཅད་ཀྱང་མདོ་སྡེ་འདི་མ་ཐོས་ན་དེ་བཞིན་གཤེགས་པའི་སྙིང་པོ་དམ་པ་མི་མཐོང་སྟེ། ཇི་ལྟར་འབྲུག་མ་གྲགས་ན། བལ་གླང་གི་མཆེ་བའི་མེ་ཏོག་མི་མཐོང་བ་བཞིན་ནོ། །མདོ་སྡེ་འདི་ཐོས་
ན་དེ་བཞིན་གཤེགས་པ་ཐམས་ཅད་ཀྱིས་དགོངས་ཏེ་གསུངས་པའི་སྙིང་པོ་རྟོགས་པར་འགྱུར་རོ། །སངས་རྒྱས་ཀྱི་རང་བཞིན་ཞེས་བྱ་བ་ནི་སྟེང་གི་ནམ་མཁའ་ལ་འབྲུག་གྲགས་ན་བལ་གླང་གི་མཆེ་བའི་མེ་ཏོག་མཐོང་བའི་
དཔེའོ། །མདོ་སྡེ་འདི་ཐོས་ན་སེམས་ཅན་ཚད་མེད་པ་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་རྟོགས་པར་འགྱུར་རོ། །དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ནི་དེ་བཞིན་གཤེགས་པས་དགོངས་ཏེ་གསུངས་པའི་
སྙིང་པོ་ཞེས་བྱ་སྟེ། ཆོས་ཀྱི་སྐུ་བསྐྱེད་པར་འགྱུར་བ་ནི་ཇི་ལྟར་འབྲུག་གྲགས་ན་བལ་གླང་གི་མཆེ་བའི་མེ་ཏོག་སྐྱེས་པ་བཞིན་ནོ། །དེ་ལྟ་བུའི་དོན་ཆེན་པོ་འབྱུང་ཞིང་སྐྱེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་
བྱའོ། །རིགས་ཀྱི་བུ་འམ་རིགས་ཀྱི་བུ་མོ་གང་ཞིག་གིས་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་ཤིན་ཏུ་ནན་ཏན་བྱེད་ན་དེ་ནི་སངས་རྒྱས་ཀྱི་དྲིན་ལ་ལན་གློན་པ་ཡིན་ཏེ་སངས་རྒྱས་ཀྱི་ཉེ་གནས་ཡང་དག་པ་ཞེས་བྱའོ། །
དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །ཤིན་ཏུ་ངོ་མཚར་ཏོ། །བཅོམ་ལྡན་འདས་སངས་རྒྱས་ཀྱི་རང་བཞིན་ཞེས་བགྱི་བ་ནི་ཤིན་ཏུ་ཟབ་ཅིང་ཤིན་ཏུ་ཕྲ་བས་མཐོང་བར་ཡང་དཀའ་
ལ་འཇུག་པར་ཡང་དཀའ་སྟེ། ཉན་ཐོས་དང་རང་སངས་རྒྱས་ཀྱིས་རྟོགས་པར་འགྱུར་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་སྨྲས་པ་བཞིན་ནོ། །དེ་ནས་

47-1-134a

ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །སངས་རྒྱས་ཀྱི་རང་བཞིན་ཞེས་བགྱི་བ་ཇི་ལྟ་བུར་ཟབ་ཅིང་མཐོང་བར་དཀའ་ལ་འཇུག་པར་ཡང་དཀའ། བཅོམ་ལྡན་འདས་ཀྱིས་
བཀའ་སྩལ་པ། རིགས་ཀྱི་བུ་འདི་ལྟ་སྟེ། དཔེར་ན་གང་ཟག་དམུས་ལོང་གསོ་བའི་ཕྱིར་སྨན་པ་མཁས་པའི་གན་དུ་སོང་ངོ་། །སྨན་པས་གསེར་གྱི་གྲི་ཐོགས་ཏེ་མིག་གི་རབ་རིབ་ཀྱི་བྲིས་མ་བཅད་ནས་འཛུབ་མོ་གཅིག་སྦྲེང་སྟེ་
བསྟན་ན་ལོང་བ་དེ་མི་མཐོང་ངོ་ཞེས་ཟེར་རོ། །འཛུབ་མོ་གཉིས་སམ་གསུམ་བསྟན་ན་གདོད་ཅུང་ཟད་ཅིག་མཐོང་ངོ་ཞེས་ཟེར་རོ། །རིགས་ཀྱི་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདི་མ་གསུངས་ན་བྱང་ཆུབ་སེམས་
སེམས་དཔའ་ཚད་མེད་པ་ཕ་རོལ་ཏུ་ཕྱིན་པ་ཡོངས་སུ་རྫོགས་པ་ནས་ས་བཅུའི་བར་དུ་གནས་ཀྱང་སངས་རྒྱས་ཀྱི་རང་བཞིན་མི་མཐོང་བ་ནི་དེ་དང་འདྲ་སྟེ། དེ་བཞིན་གཤེགས་པས་གསུངས་ནས་ཅུང་ཟད་ཅིག་མཐོང་བར་གྱུར་ཏོ། །
བྱང་ཆུབ་སེམས་དཔའ་སེམས་དཔའ་ཆེན་པོ་དག་དེ་ལྟར་མཐོང་བར་གྱུར་ནས་འདི་སྐད་ཅེས་སྨྲའོ། །ཤིན་ཏུ་ངོ་མཚར་ཏོ། །བཅོམ་ལྡན་འདས་བདག་ཅག་ནི་བསྐལ་པ་གྲངས་མེད་པའི་བར་དུ་འཁོར་བར་འཁོར་ཏེ། བདག་མེད་པས་
ཡོངས་སུ་བསླུས་པར་གྱུར་ཏོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་ས་བཅུ་ལ་གནས་པས་ཀྱང་སངས་རྒྱས་ཀྱི་རང་བཞིན་གསལ་བར་མི་མཐོང་ན། ཉན་ཐོས་དང་རང་སངས་རྒྱས་ཀྱིས་མི་མཐོང་བ་ལྟ་སྨོས་ཀྱང་ཅི་དགོས། 
རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྟེང་གི་ནམ་མཁའ་མཐོན་པོ་ལ་བྱ་ལྡིང་བ་ན། བྱ་འམ་ནམ་མཁའ་གང་ཡིན་པ་ལེགས་པར་མི་རྟོགས་ཏེ་བརྟགས་ན་གདོད་མངོན་ནོ། །ས་བཅུ་ལ་གནས་པའི་བྱང་ཆུབ་སེམས་དཔས་དེ་བཞིན་
གཤེགས་པའི་སྙིང་པོ་ཕྱོགས་ཙམ་ཞིག་རྟོགས་ཤིང་། མཐོང་བ་ཡང་དེ་དང་འདྲ་ན། ཉན་ཐོས་དང་རང་སངས་རྒྱས་ཀྱིས་རྟོགས་ཤིང་མཐོང་བ་ལྟ་ཅི་སྨོས། རིགས་ཀྱི་བུ་དཔེར་ན་ཆང་གིས་ར་རོ་བ་ལམ་དུ་འགྲོ་ན་ལམ་བདེ་བླག་དུ་ལེགས་པར་

47-1-134b

མི་མཐོང་བ་བཞིན་དུ་ས་བཅུ་ལ་གནས་པའི་བྱང་ཆུབ་སེམས་དཔའ་ཡང་དེ་དང་འདྲ་སྟེ། དེ་བཞིན་གཤེགས་པའི་སྙིང་པོ་ཕྱོགས་ཙམ་ཞིག་རྟོགས་ཤིང་མཐོང་ངོ་། །རིགས་ཀྱི་བུ་དཔེར་ན་མི་ཞིག་འབྲོག་དགོན་པར་སོང་བ་ལས་
སྐོམ་གྱིས་གདུངས་ཏེ། ཆུ་ཚོལ་བ་ལས་ཤིང་གི་གི་སྟེང་ན་བྱ་བཞད་འདུག་པར་མཐོང་ན་མི་དེ་སྐོམ་གྱིས་གདུངས་པས་ཤིང་ངམ་ཆུ་ཡིན་པ་མི་རྟོགས་སོ། །ལེགས་པར་བརྟགས་ན་གདོད་བྱ་བཞད་དང་ཤིང་ཡིན་པར་ཤེས་སོ། །
རིགས་ཀྱི་བུ་ས་བཅུ་ལ་གནས་པའི་བྱང་ཆུབ་སེམས་དཔས་དེ་བཞིན་གཤེགས་པའི་སྙིང་པོ་ཕྱོགས་ཙམ་ཞིག་མཐོང་ཞིང་རྟོགས་པ་ཡང་དེ་དང་འདྲ་སྟེ། གསལ་བར་བདེ་བླག་ཏུ་རྟོགས་པ་ནི་མ་ཡིན་ནོ། །རིགས་ཀྱི་བུ་དཔེར་ན་
རྒྱ་མཚོར་ཞུགས་པ་དག་དཔག་ཚད་བརྒྱ་འམ། སྟོང་ངམ། ཚད་མེད་པའི་ཕ་རོལ་ནས་གྲུ་ཆེན་པོའི་ཡང་རྟོག་གམ་ཁང་པ་བརྩེག་མ་མཐོང་ན་དེ་དག་འདི་སྙམ་དུ་རྟོག་གམ། ནམ་མཁའ་གང་ཡིན་སྙམ་དུ་སེམས་ཏེ། ཡུན་རིང་
དུ་བརྟགས་ན་གདོད་ངེས་པར་ཡང་རྟོག་གམ། ཁང་པ་བརྩེག་མར་རྟོགས་སོ། །ས་བཅུ་ལ་གནས་པའི་བྱང་ཆུབ་སེམས་དཔས་བདག་གི་ལུས་ལ་དེ་བཞིན་གཤེགས་པའི་སྙིང་པོ་མཐོང་བ་ཡང་དེ་དང་འདྲ་སྟེ། བདེ་བླག་དུ་གསལ་
བ་ནི་མ་ཡིན་ནོ། །རིགས་ཀྱི་བུ་དཔེར་ན་རྒྱལ་བུ་ཤིན་ཏུ་ཞན་པ་ཞིག་མཚན་མོ་མཚན་ཡལ་ནངས་ཀྱི་བར་དུ་རྩེ་རྩེ་ན་ནང་པར་དུ་ཐམས་ཅད་བདེ་བླག་དུ་གསལ་བར་མི་རྟོགས་སོ། །ས་བཅུ་ལ་གནས་པའི་བྱང་ཆུབ་སེམས་དཔའ་
བདག་གི་ལུས་ལ་དེ་བཞིན་གཤེགས་པའི་སྙིང་པོ་མཐོང་བ་ཡང་དེ་དང་འདྲ་སྟེ། གསལ་བར་ཡང་མི་རྟོགས་སོ། །རིགས་ཀྱི་བུ་དཔེར་ན་བློན་པོ་ཞིག་རྒྱལ་པོས་མངགས་ན་མཚན་མོ་མུན་པའི་ནང་དུ་སོང་སོང་བ་ལས་གློག་གི་
འོད་ཀྱིས་གནག་གི་ཁྱུ་གཅིག་མཐོང་ནས། དེ་འདི་སྙམ་དུ་གནག་གམ། ནགས་ཚལ་ལམ། སྤྲིན་ནམ། ཁང་ཁྱིམ་གང་ཡིན་སྙམ་སེམས་སོ། །མི་དེས་གནག་ཡིན་པར་སེམས་མོད་ཀྱི། ངེས་པ་མ་ཡིན་ནོ། །ས་བཅུ་ལ་གནས་པའི་བྱང་ཆུབ་

47-1-135a

སེམས་དཔའ་ཡང་དེ་དང་འདྲ་སྟེ། བདག་གི་ལུས་ལ་དེ་བཞིན་གཤེགས་པའི་སྙིང་པོ་ལེགས་པར་མི་རྟོགས་སོ། །རིགས་ཀྱི་བུ་གཞན་ཡང་དཔེར་ན་ཚུལ་ཁྲིམས་ལ་གནས་པའི་དགེ་སློང་དག་སྲིན་བུ་མེད་པའི་ཆུ་ལ་རྟོག་
ན་ཆུའི་ནང་ན་འགུལ་བ་སྲིན་བུ་ཡིན་ནམ། རྡུལ་ཡིན་པ་བདེ་བླག་དུ་མི་རྟོགས་སོ། །ཡུན་རིང་དུ་བརྟགས་ན་རྡུལ་ཡིན་པར་ཤེས་མོད་ཀྱི། ངེས་པར་རྟོགས་པ་མ་ཡིན་ནོ། །ས་བཅུ་ལ་གནས་པའི་བྱང་ཆུབ་སེམས་དཔའ་ཡང་དེ་དང་འདྲ་སྟེ། 
བདག་གི་ལུས་ལ་དེ་བཞིན་གཤེགས་པའི་སྙིང་པོ་བདེ་བླག་དུ་གསལ་བར་མི་རྟོགས་སོ། །རིགས་ཀྱི་བུ་དཔེར་ན་ནམ་རྨུས་ཏེ། ནམ་མཁའ་མ་དག་ན་རྒྱང་མ་ནས་བྱིས་པ་ཆུང་ངུ་མཐོང་ནས་ཕྱུགས་སམ། བྱ་འམ། མི་འམ་ཅི་ཡིན་
པ་མི་རྟོགས་ཏེ། ཡུན་རིང་དུ་བརྟགས་ན་བྱིས་པ་ཡིན་པར་མཐོང་ཡང་གསལ་བར་རྟོག་པ་ནི་མ་ཡིན་ནོ། །ས་བཅུ་ལ་གནས་པའི་བྱང་ཆུབ་སེམས་དཔས་བདག་གི་ལུས་ལ་དེ་བཞིན་གཤེགས་པའི་སྙིང་པོ་མཐོང་བ་
ཡང་དེ་དང་འདྲ་སྟེ། གསལ་བར་མི་རྟོགས་སོ། །རིགས་ཀྱི་བུ་དཔེར་ན་མི་ཞིག་མཚན་མོ་མུན་པའི་ནང་ན་བྱང་ཆུབ་སེམས་དཔའི་སྐུ་གཟུགས་རི་མོ་ལ་བྲིས་པ་ཞིག་མཐོང་ན་དེ་འདི་སྙམ་དུ་འདི་བྱང་ཆུབ་སེམས་དཔའི་
གཟུགས་སམ། དབང་ཕྱུག་གི་གཟུགས་སམ། ཚངས་པ་ཆེན་པོའི་གཟུགས་སམ། གོས་ཁ་དོག་བསྒྱུར་བ་ཡིན་ནམ་སྙམ་སེམས་ཏེ། དེས་ཡུན་རིང་དུ་བརྟགས་ན་བྱང་ཆུབ་སེམས་དཔའི་གཟུགས་ཡིན་པར་ཤེས་མོད་ཀྱི། 
གསལ་བར་རྟོགས་པ་ནི་མ་ཡིན་ནོ། །ས་བཅུ་ལ་གནས་པའི་བྱང་ཆུབ་སེམས་དཔས་བདག་གི་ལུས་ལ་དེ་བཞིན་གཤེགས་པའི་སྙིང་པོ་མཐོང་བ་ཡང་དེ་དང་འདྲ་སྟེ། གསལ་བར་རྟོགས་པ་ནི་མ་ཡིན་ནོ། །རིགས་ཀྱི་བུ་
སངས་རྒྱས་ཀྱི་རང་བཞིན་ཞེས་བྱ་བ་ནི་དེ་ལྟར་ཤིན་ཏུ་ཟབ་སྟེ། མཐོང་ཞིང་རྟོགས་པར་དཀའ་བས་སངས་རྒྱས་ཉག་གཅིག་གིས་རྟོགས་ཀྱི། ཉན་ཐོས་དང་རང་སངས་རྒྱས་ཀྱིས་རྟོགས་པར་འགྱུར་བ་མ་ཡིན་ནོ། །རིགས་ཀྱི་བུ་མཁས་

47-1-135b

པ་ཤེས་རབ་ཅན་གྱིས་དེ་བཞིན་གཤེགས་པའི་སྙིང་པོ་ལ་དེ་ལྟ་བུར་བརྟག་ཅིང་བྱེ་བྲག་དབྱེ་བར་བྱའོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་ལྟར་
སངས་རྒྱས་ཀྱི་རང་བཞིན་དེ་ཤིན་ཏུ་ཟབ་ཅིང་མཐོང་བར་དཀའ་ན། ཤའི་མིག་ཅན་དག་གིས་ཇི་ལྟར་མཐོང་བར་འགྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་དཔེར་ན་འདུ་ཤེས་མེད་འདུ་ཤེས་མེད་མིན་
གྱི་ལྷ་དག་ཀྱང་ཐེག་པ་གཉིས་པོས་མི་རྟོགས་མོད་ཀྱི། མདོ་སྡེའི་ལུང་གི་རྗེས་སུ་ཡིད་ཆེས་པས་རྟོགས་སོ། །རིགས་ཀྱི་བུ་ཉན་ཐོས་དང་རང་སངས་རྒྱས་ཀྱིས་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལ་བརྟེན་ཏེ། 
བདག་གི་ལུས་ལ་དེ་བཞིན་གཤེགས་པའི་སྙིང་པོ་ཡོད་པར་རྟོགས་པ་ཡང་དེ་དང་འདྲའོ། །རིགས་ཀྱི་བུ་དེ་བས་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྤྱོད་པའི་ནན་ཏན་ལ་བརྩོན་འགྲུས་བྱའོ། །རིགས་ཀྱི་བུ་སངས་
རྒྱས་ཀྱི་རང་བཞིན་ནི་སངས་རྒྱས་ཉག་གཅིག་གིས་མཁྱེན་གྱི། ཉན་ཐོས་དང་རང་སངས་རྒྱས་ཀྱིས་ནི་ཤེས་པ་མ་ཡིན་ནོ། །ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་གསོལ་པ། འཕགས་པ་མ་ཡིན་པ་བྱིས་
པ་མ་རབས་ནི་སྲོག་ཆགས་ཐམས་ཅད་ལ་བདག་མཆིས་པར་སྨྲའོ། །བཅོམ་ལྡན་འདས་ཀྱིས་བཀའ་སྩལ་པ། དཔེར་ན་རྒྱལ་བུ་ཞིག་དང་མི་དབུལ་པོ་ཞིག་མཛའ་བོར་འཐམས་ཏེ། གཅིག་གི་ཁྱིམ་དུ་གཅིག་འགྲོའོ། །དེའི་ཚེ་
ན་མི་དབུལ་པོ་དེས་རྒྱལ་བུ་དེ་ལ་རལ་གྲི་ཤིན་ཏུ་བཟང་པོ་གཅིག་ཡོད་པ་མཐོང་ནས་ཆགས་པའི་སེམས་སྐྱེས་སོ། །ཕྱིས་རྒྱལ་བུ་དེ་རལ་གྲི་ཐོགས་ཏེ་ཡུལ་གཞན་དུ་སོང་ནས་མི་དབུལ་པོ་དེ་ཡང་ཕྱིས་གཞན་ཞིག་གི་ཁྱིམ་ན་
ཉལ་བ་ལས་གཉིད་ལོག་ན་ཁ་ན་རལ་གྲི་རལ་གྲི་ཞེས་བརྡོལ་ལོ། །དེའི་གན་ན་འདུག་པའི་མིས་དེ་སྐད་ཅེས་བརྡོལ་བ་ཐོས་ནས་བཟུང་སྟེ་རྒྱལ་པོ་ལ་ཕུལ་ལོ། །དེ་ནས་རྒྱལ་པོས་མི་དེ་ལ་འདི་སྐད་དུ་ཁྱོད་ཀྱི་ཁ་ནས་རལ་གྲི་རལ་གྲི་ཞེས་

47-1-136a

ཟེར་བ་ག་རེ་ཞེས་བཀའ་སྩལ་ཏོ། །མི་དེས་རྒྱུས་ཞིབ་དུ་རྒྱས་པར་རྒྱལ་པོ་ལ་གསོལ་ནས་གལ་ཏེ་རྒྱལ་པོས་བདག་གི་ལུས་དང་ཡན་ལག་དང་ཉིང་ལག་ཀུན་དུམ་བུ་དུམ་བུར་གཏུབས་ཀྱང་རལ་གྲི་ནི་བདག་ལ་མ་
མཆིས་ཏེ། བདག་སྔོན་རྒྱལ་བུ་ཆེ་གེ་མོ་ཞིག་དང་མཛའ་བས་རྒྱལ་བུ་དེ་ལ་རལ་གྲི་བཟང་པོ་ཅིག་མཆིས་པར་མིག་གིས་ནི་མཐོང་གི། ལག་པས་རེག་པའི་ཐུགས་ཀྱང་མ་ཐུབ་ན་ཆེད་དུ་བླངས་པ་ལྟ་ཅི་སྨོས། རྒྱལ་པོ་དེས་བཀའ་
སྩལ་པ། ཁྱོད་ཀྱིས་རལ་གྲི་དེ་མཐོང་ཡང་དག་ན་རལ་གྲི་དེའི་དབྱིབས་ཅི་འདྲ། གསོལ་པ། རྒྱལ་པོ་བདག་གིས་མཐོང་བ་ནི་ར་རུ་འདྲ་བ་ཞིག །རྒྱལ་པོས་དེ་སྐད་ཅེས་སྨྲས་པ་ཐོས་ནས། གོད་དེ་ཁྱོད་མྱ་ངན་མ་བྱེད་པར་གར་
དགའ་བར་སོང་ཤིག །ཁོ་བོའི་མཛོད་ན་རལ་གྲི་དེ་འདྲ་བ་མི་སྲིད་ན། ཁྱོད་ཀྱི་རྒྱལ་བུ་དེ་ལ་མཐོང་བ་ལྟ་སྨོས་ཀྱང་ཅི་དགོས། དེ་ནས་རྒྱལ་པོ་དེས་བློན་པོ་རྣམས་ལ་བཀའ་སྩལ་པ། ཁྱེད་ཀྱིས་རལ་གྲི་དེ་འདྲ་བ་ཞིག་མཐོང་ངམ་ཞེས་
དྲིས་ནས། དེ་རིང་པོ་མ་ལོན་པར་ཚེ་འདས་སོ། །དེ་ནས་རྒྱལ་པོ་དེའི་རྒྱལ་ཚབ་རྒྱལ་པོའི་དབང་བསྐུར་ནས་རྒྱལ་པོ་དེས་ཀྱང་བློན་པོ་རྣམས་ལ་ཡང་འདི་སྐད་དུ་ཁྱེད་ཀྱིས་སྔོན་མཛོད་ཀྱི་ནང་ན་རལ་གྲི་དེ་འདྲ་བ་ཞིག་མཐོང་ངམ། 
ཞེས་དྲིས་སོ། །བློན་པོ་རྣམས་ཀྱིས་སྨྲས་པ། བདག་ཅག་གིས་སྔོན་མཐོང་ངོ་ཞེས་གསོལ་ཏོ། །ཡང་དྲིས་པ་ཁྱེད་ཀྱིས་མཐོང་ན་རལ་གྲི་དེའི་དབྱིབས་ཅི་འདྲ་བ་ཞིག་མཐོང་། གསོལ་པ། རྒྱལ་པོ་ཆེན་པོ་བདག་
ཅག་གིས་ར་རུ་འདྲ་བ་ཞིག་མཐོང་ངོ་། །རྒྱལ་པོས་སྨྲས་པ། ཁོ་བོའི་མཛོད་ཀྱི་ནང་ན་རལ་གྲི་དེ་འདྲ་བ་ཡོད་མི་སྲིད་དོ། །དེ་བཞིན་དུ་རྒྱལ་པོ་རབས་བཞིའི་བར་དུ་རལ་གྲི་དེ་རྨས་ཀྱང་ཁུངས་མ་ཕྱིན་ཏོ། །ཕྱིས་ལོ་
མང་ཞིག་ལོན་པའི་འོག་དུ་སྔོན་བྲོས་པའི་རྒྱལ་བུ་དེ་ཡུལ་གཞན་ནས་ཕྱིར་ལོག་ནས་རྒྱལ་པོར་ཞུགས་ཏེ་རྒྱལ་པོའི་དབང་ཐོབ་ནས་དེས་ཀྱང་བློན་པོ་རྣམས་ལ་བཀའ་སྩལ་པ། ཁྱེད་ཀྱིས་རལ་གྲི་དེ་མཐོང་ངམ། 

47-1-136b

བློན་པོ་རྣམས་ཀྱིས་གསོལ་པ། རྒྱལ་པོ་ཆེན་པོ་བདག་ཅག་གིས་མཐོང་ངོ་། །སྨྲས་པ། ཁྱེད་ཀྱིས་ཅི་སྟེ་མཐོང་ན་རལ་གྲི་དེའི་དབྱིབས་ཅི་འདྲ། བློན་པོ་ཁ་ཅིག་གིས་གསོལ་པ། ལྷའི་སྲས་ཤིན་ཏུ་གསལ་ཏེ། མེ་ཏོག་ཨུད་པ་ལ་
འདྲའོ། །ཁ་ཅིག་གིས་ནི་ར་རུ་འདྲའོ། ཞེས་གསོལ་ཏོ། །ཁ་ཅིག་གིས་ནི་ཁ་དོག་དམར་ཁྱད་མེའི་ཕུང་པོ་འདྲའོ་ཞེས་གསོལ་ཏོ། །ཁ་ཅིག་གིས་ནི་སྦྲུལ་ནག་པོ་འདྲའོ་ཞེས་གསོལ་ཏོ། །དེའི་ཚེ་རྒྱལ་པོ་དེ་བགད་ནས་བློན་པོ་
རྣམས་ལ་ཁྱེད་ཀྱིས་ངའི་རལ་གྲི་ཡང་དག་པ་མ་མཐོང་ངོ་ཞེས་བཀའ་སྩལ་ཏོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། འཇིག་རྟེན་དུ་བྱུང་ནས་བདག་ཅེས་བྱ་བའི་མཚན་ཉིད་ཡང་
དག་པ་བསྟན་ཏེ། བསྟན་མ་ཐག་དུ་སོང་བ་ནི་དཔེར་ན་རྒྱལ་བུ་རལ་གྲི་བཟང་པོ་ཐོགས་ཏེ་ཡུལ་གཞན་དུ་བྲོས་པ་དང་མཚུངས་སོ། །བུས་པ་གླེན་པ་དག་ཐམས་ཅད་ལ་བདག་ཡོད་དོ། །བདག་ཡོད་དོ་ཞེས་སྨྲ་བ་ནི་
མི་དབུལ་པོ་གཞན་གྱི་ཁྱིམ་ན་གཉིད་ལོག་པ་ལས་རལ་གྲི་རལ་གྲི་ཞེས་བརྡོལ་བ་དང་མཚུངས་སོ། །ཉན་ཐོས་དང་རང་སངས་རྒྱས་ཀྱིས་སེམས་ཅན་རྣམས་ལ་བདག་ཅེས་བྱ་བའི་མཚན་ཉིད་ཅི་འདྲ་བ་དྲིས་ན། དེ་ལ་ཁ་
ཅིག་ནི་བདག་དུ་ལྟ་བ་དང་བདག་མེད་ཅེས་བྱ་བའི་མཚན་ཉིད་མཐེ་བོ་ཙམ་ཞིག་ཡོད་དོ་ཞེས་སྨྲའོ། །ཁ་ཅིག་ནི་ཁྲེའི་འབྲུམ་བུ་ཙམ་ཞིག་ཡོད་དོ་ཞེས་སྨྲའོ། །ཁ་ཅིག་ནི་ཏིལ་གྱི་འབྲུ་ཙམ་ཞིག་གོ་ཞེས་སྨྲའོ། །ཁ་ཅིག་ནི་
བདག་གི་མཚན་ཉིད་ཅེས་བྱ་བ་སེམས་ལ་གནས་ཏེ། ཉི་མ་ལྟ་བུར་འབར་ཞིང་གསལ་ལོ་ཞེས་སྨྲ་སྟེ། དེ་ལྟར་སོ་སོའི་སྐྱེ་བོ་དག་བདག་ཅེས་བྱ་བའི་མཚན་ཉིད་མི་ཤེས་པ་ཡང་། ཇི་ལྟར་བློན་པོ་རྣམས་ཀྱིས་རལ་
གྲི་བཟང་པོ་དེ་མི་ཤེས་པ་བཞིན་ནོ། །བྱང་ཆུབ་སེམས་དཔས་དེ་ལྟར་བདག་ཅེས་བྱ་བའི་མཚན་ཉིད་བསྟན་པ་བུས་པ་གླེན་པ་དག་གིས་མི་ཤེས་པས་རྣམ་པ་སྣ་ཚོགས་བྱེ་བྲག་ཕྱེ་སྟེ། བདག་ཅེས་བྱ་བའི་མཚན་ཉིད་དུ་འཛིན་

47-1-137a

པ་ནི་རལ་གྲིའི་དབྱིབས་ཅི་འདྲ་བ་ཞེས་དྲིས་ན་ར་རུ་འདྲའོ་ཞེས་སྨྲ་བ་དང་མཚུངས་སོ། །དེ་ལྟར་བུས་པ་མ་རབས་དག་ནི་རྒྱུན་མི་འཆད་པར་ངན་པར་ལྟ་བ་བསྐྱེད་དེ། དེ་ལྟར་ངན་པར་ལྟ་བ་བཅད་པའི་ཕྱིར་དེ་བཞིན་གཤེགས་
པས་བདག་མེད་པ་བསྟན་པ་ནི་དཔེར་ན་རྒྱལ་བུ་དག་བློན་པོ་རྣམས་ལ་ངའི་མཛོད་ན་དེ་འདྲ་བའི་རལ་གྲི་མེད་དོ་ཞེས་སྨྲ་བ་དང་མཚུངས་སོ། །རིགས་ཀྱི་བུ་དེང་དེ་བཞིན་གཤེགས་པས་བདག་ཅེས་བྱ་བ་བསྟན་པ་ནི་སངས་
རྒྱས་ཀྱི་རང་བཞིན་ཞེས་བྱའོ། །དེ་ལྟར་སངས་རྒྱས་ཀྱི་རང་བཞིན་དེ་ནི་སངས་རྒྱས་ཀྱིས་བསྟན་པའི་ཆོས་ཀྱི་ནང་ན་རལ་གྲི་ཤིན་དུ་གསལ་ཞིང་དག་པ་དང་མཚུངས་སོ། །རིགས་ཀྱི་བུ་དེ་ལ་བུས་པ་མ་རབས་གང་དེ་སྐད་
དུ་ལེགས་པར་སྨྲ་བ་ནི་བླ་ན་མེད་པའི་སངས་རྒྱས་ཀྱི་ཆོས་ལ་འབབ་པ་མ་ཡིན་ནོ། །དེ་ལ་གང་ཞིག་ལེགས་པར་རྣམ་པར་ཕྱེ་སྟེ་བསྟན་པའི་རྗེས་སུ་ཞུགས་ན་དེ་ནི་བྱང་ཆུབ་སེམས་དཔའི་གཟུགས་ལྟ་བུར་རིག་པར་བྱའོ། །རིགས་
ཀྱི་བུ་ཇི་ཙམ་དུ་རྣམ་པ་ཐ་དད་དུ་སྨྲ་བ་རིག་སྔགས་དང་། ཚིག་ལས་རྣམ་པར་རྒྱལ་བའི་གཙུག་ལག་དང་། ཡི་གེ་ལ་སོགས་པ་ཐམས་ཅད་ཀྱང་སངས་རྒྱས་ཀྱིས་བསྟན་པ་ཡིན་གྱི། མུ་སྟེགས་ཅན་གྱིས་བསྟན་པ་མ་ཡིན་ནོ། །
དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །དེ་བཞིན་གཤེགས་པས་ཇི་ལྟ་བུར་ཡི་གེའི་མ་མོ་རྣམས་བསྟན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། 
རིགས་ཀྱི་བུ་སྔར་ཡི་གེ་ཕྱེད་ཀྱི་མ་མོ་བསྟན་པས་གཙུག་ལག་དང་། རིག་སྔགས་དང་། ཚིག་ལས་རྣམ་པར་རྒྱལ་བ་དང་། སྒྲ་སྐད་ལ་སོགས་པ་འཛིན་པར་འགྱུར་ཏེ། བྱིས་པ་མ་རབས་དག་ཡི་གེའི་མ་མོ་བསླབས་པས་དེའི་
འོག་ཏུ་ཆོས་དང་། ཆོས་མ་ཡིན་པ་ལ་སོགས་པ་ཤེས་པར་འགྱུར་རོ། །ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་གསོལ་པ། ཡི་གེ་ཞེས་བགྱི་བའི་དོན་ཇི་ལྟ་བུ་ལགས། བཀའ་སྩལ་པ། རིགས་ཀྱི་བུ་ཡི་

47-1-137b

གེའི་འབྲུ་བཞི་པོ་ནི་ཡི་གེའི་དོན་ཅེས་བྱའོ། །ཡི་གེ་ཞེས་བྱ་བ་ནི་མྱ་ངན་ལས་འདས་པ་སྟེ། རྟག་པས་ན་མི་ཟད་པའོ། །གང་མི་ཟག་པ་དེ་ནི་མི་ཟད་པའོ། །མི་ཟད་པ་ཞེས་བྱ་བ་དེ་ནི་དེ་བཞིན་གཤེགས་པའི་རྡོ་རྗེའི་སྐུའོ། །
དེ་བས་ན་ཡི་གེའི་འབྲུ་བཅུ་བཞི་པོ་དེ་ནི་ཡི་གེའི་མ་མོ་དེ་ལ་ཨ་ཞེས་བྱ་བ་དེ་ནི་མི་འཇིག་པའོ། །གང་མི་འཇིག་པ་ནི་དཀོན་མཆོག་གསུམ་ཞེས་བྱ་སྟེ་རྡོ་རྗེ་ལྟ་བུའོ། །གཞན་ཡང་ཨ་ཞེས་བྱ་བ་ནི་མི་ཟག་པའོ། །
གང་མི་ཟག་པ་ནི་དེ་བཞིན་གཤེགས་པ་ཞེས་བྱ་སྟེ། དེ་བཞིན་གཤེགས་པ་ནི་བུ་ག་དགུ་ནས་ཅི་འང་མི་ཟག་པས་དེ་བས་ན་ཟག་པ་མེད་པ་ཞེས་བྱའོ། །བུ་གུ་མེད་པས་མི་ཟག་པ་སྟེ། མི་ཟག་པ་ནི་རྟག་པའོ། །རྟག་པ་
ནི་དེ་བཞིན་གཤེགས་པ་སྟེ། དེ་བཞིན་གཤེགས་པ་ནི་འདུས་མ་བྱས་པས་མི་ཟག་པའོ། །གཞན་ཡང་ཨ་ཞེས་བྱ་བ་ནི་ཡོན་ཏན་གྱི་ཚོགས་ཤེས་བྱའོ། །ཡོན་ཏན་གྱི་ཚོགས་ནི་དཀོན་མཆོག་གསུམ་ཡིན་པས་དེའི་ཕྱིར་
ཨ་ཞེས་བྱའོ། །དེ་ལ་ཨ་ཞེས་བྱ་བ་ནི་སློབ་དཔོན་ཞེས་བྱ་བའི་དོན་ཏོ། །སློབ་དཔོན་ཞེས་བྱ་བའི་དོན་ཇི་ལྟ་བུ་ཞེ་ན། འཇིག་རྟེན་ན་འཕགས་པ་ཞེས་གྲགས་པའོ། །འཕགས་པ་ཞེས་བྱ་བ་དེ་ཡང་ཇི་ལྟ་བུ་ཞེ་ན། འཕགས་
པ་ནི་མ་ཆགས་པ། འདོད་པ་ཉུང་བ་ཆོག་ཤེས་པ། ཡོངས་སུ་དག་པ། སྲིད་པ་གསུམ་དུ་འཁོར་བའི་སེམས་ཅན་སྒྲོལ་བ་ནི་འཕགས་པ་ཞེས་བྱའོ། །གཞན་ཡང་ཨ་ཞེས་བྱ་བ་ནི་བཅས་པ་སྟེ། ཚུལ་ཁྲིམས་ལྷག་པར་བསྲུང་
ཞིང་སྤྱོད་ལམ་གྱི་རྗེས་སུ་གཞོལ་བའོ། །གཞན་ཡང་ཨ་ཞེས་བྱ་བ་ནི་འཕགས་པའི་རྗེས་སུ་སྤྱོད་ལམ་འགྲོ་བ་དང་། སྡོད་པ་དང་། བསྐྱོད་པ་དང་། གཡོ་བ་དང་། དཀོན་མཆོག་གསུམ་དང་། ཕ་མ་ལ་སྲི་ཞུ་དང་། མཆོད་པ་
དང་། བཀུར་སྟི་དང་། རིམ་གྲོ་དང་། ཕྱག་བྱེད་པ་སློབ་ཅིང་ཐེག་པ་ཆེན་པོ་ལ་ཡང་སློབ་པའོ། །རིགས་ཀྱི་བུ་ཁྱེད་ལ་སོགས་པ་ཚུལ་ཁྲིམས་སྡོམ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་འཕགས་

47-1-138a

པ་ཞེས་བྱའོ། །གཞན་ཡང་ཨ་ཞེས་བྱ་བ་ནི་སྟོན་ཅིང་འཆོས་པ་སྟེ། ཇི་ལྟར་དེ་བཞིན་གཤེགས་པས་འདི་དག་ནི་བྱ་བའི་རིགས་པའོ། །འདི་དག་ནི་བྱ་བའི་མི་རིགས་སོ་ཞེས་བསྟན་པ་ཆོས་མ་ཡིན་པའི་རྣམས་མི་བྱེད་པ་ནི་
འཕགས་པ་ཞེས་བྱ་སྟེ། དེ་བས་ན་ཨ་ཞེས་བྱའོ། །དེ་ལ་ཨི་ཞེས་བྱ་བ་ནི་སངས་རྒྱས་ཀྱི་ཆོས་ཚངས་པར་སྤྱོད་པ་རྒྱ་ཆེན་པོ་ཟླ་བ་རྒྱས་པ་ལྟར་གསལ་ཞིང་དྲི་མ་མེད་པ་སྟེ། ཁྱེད་ལ་སོགས་པ་འདི་དག་ནི་བྱ་བའི་རིགས་པའོ། །
འདི་དག་ནི་བྱ་བའི་མི་རིགས་པའོ། །འདི་ནི་དོན་ནོ། །འདི་ནི་དོན་མ་ཡིན་ནོ། །འདི་ནི་སངས་རྒྱས་ཀྱིས་གསུངས་པའོ། །འདི་ནི་བདུད་ཀྱིས་བསྟན་པའོ་ཞེས་བཤད་པ་སྟེ། དེ་བས་ན་ཨི་ཞེས་བྱའོ། །དེ་ལ་ཨཱི་ཞེས་བྱ་བ་ནི་སངས་
རྒྱས་ཀྱི་ཆོས་ཤིན་ཏུ་ཟབ་ཅིང་ཕྲ་བ། ཆུད་དཀའ་བ། ལྷ་དབང་སྒྱུར་ཆེན་པོ་འམ། ཚངས་པ་ཆེན་པོ་ལྟར་ཆོས་ཀྱིས་དབང་སྒྱུར་བའོ། །གང་གཟུངས་སུ་འཛིན་པ་ནི་ཆོས་བསྲུང་བ་ཞེས་བྱའོ། །གཞན་ཡང་དབང་སྒྱུར་བ་ནི་འཇིག་
རྟེན་གྱི་མགོན་པོ་བཞི་སྟེ། དབང་སྒྱུར་བ་བཞི་པོས་ནི་ཡོངས་སུ་མྱ་ངན་ལས་འདས་པ་ཆེན་པོའི་མདོ་འདི་སྲུང་ཞིང་འཛིན་ལ་རྒྱས་པར་སྟོན་ཅིང་འཆད་པའི་དབང་བྱེད་དོ། །གཞན་ཡང་ཨི་ཞེས་བྱ་བ་ནི་སོ་སོའི་སྐྱེ་བོ་ལ་ཆོས་
སྟོན་པའི་དབང་བྱེད་པའོ། །གཞན་ཡང་ཨི་ཞེས་བྱ་བ་ནི་གང་དབང་དུ་འགྱུར་བའི་ཕྱིར་བཤད་པའོ། །དེ་ཡང་གང་ཞེ་ན་འདི་ལྟ་སྟེ། ཤིན་ཏུ་རྒྱས་པའི་མདོ་སྡེ་ལ་ནན་ཏན་བྱེད་པའོ། །གཞན་ཡང་ཨཱི་ཞེས་བྱ་བ་ནི་མི་གཙང་བ་བསལ་
བ་ལྟར་སེར་སྣ་དང་ཕྲག་དོག་ཡོངས་སུ་བཅད་དེ། ཐམས་ཅད་བཀྲ་ཤིས་པར་སྒྱུར་བས་དེའི་ཕྱིར་ཨཱི་ཞེས་བྱའོ། །དེ་ལ་ཨུ་ཞེས་བྱ་བ་ནི་མདོ་སྡེ་ཀུན་གྱི་ནང་ན་ཕུལ་དུ་གྱུར་པ། མཆོག་དམ་པ། བླ་མའི་ཡང་བླ་མར་གྱུར་པ། ཡོངས་སུ་
མྱ་ངན་ལས་འདས་པ་ཆེན་པོའོ། །གཞན་ཡང་ཨུ་ཞེས་བྱ་བ་ནི་དེ་བཞིན་གཤེགས་པའི་རང་བཞིན་ཉན་ཐོས་དང་རང་སངས་རྒྱས་ཐམས་ཅད་ཀྱིས་སྔོན་མ་ཐོས་པ་སྟེ། གླིང་ཐམས་ཅད་ཀྱི་ནང་ན་བྱང་གི་སྒྲ་མི་སྙན་མཆོག་དམ་

47-1-138b

པར་གྱུར་པ་བཞིན་དུ། བྱང་ཆུབ་སེམས་དཔས་གལ་ཏེ་མདོ་སྡེ་འདི་ཉན་ཏམ། གཟུངས་སུ་འཛིན་ན། སེམས་ཅན་ཐམས་ཅད་ཀྱི་ཕུལ་དུ་འགྱུར། གཙོ་བོར་འགྱུར། མཆོག་དམ་པར་འགྱུར་ཏེ། དེ་བས་ན་མདོ་སྡེ་འདི་ནི་ཀུན་
གྱི་གཙོ་བོ་མཆོག་དམ་པ་ཕུལ་དུ་གྱུར་པས་ཨུ་ཞེས་བྱའོ། །དེ་ལ་ཨུ་ཞེས་བྱ་བ་ནི་ཇི་ལྟར་བའི་འོ་མ་རོ་ཐམས་ཅད་ཀྱི་ནང་ན་མཆོག་ཏུ་གྱུར་པ་ལྟར། དེ་བཞིན་གཤེགས་པའི་རང་བཞིན་ཡང་དེ་དང་འདྲ་སྟེ། མདོ་སྡེ་ཐམས་ཅད་ཀྱི་ནང་ན་
གཙོ་བོ། མཆོག་དམ་པ་ཕུལ་དུ་གྱུར་པའོ། །གང་ཞིག་འདི་ལ་འཕྱ་བ་འམ་སྐུར་ན་དེ་བྱོལ་སོང་དང་ཐ་མི་དད་པར་རིག་པར་བྱའོ། །གཞན་ཡང་ཨཱུ་ཞེས་བྱ་བ་ནི་གང་ཟག་དེ་ཡང་དག་པར་དྲན་པའི་ཤེས་རབ་མེད་པས་དེ་བཞིན་
གཤེགས་པས་གསང་བའི་སྙིང་པོ་ལ་འཕྱ་ཞིང་སྐུར་བས་གང་ཟག་དེ་ནི་ཤིན་ཏུ་སྙིང་བརྩེ་བའི་གནས་སུ་རིག་པར་བྱ་སྟེ། དེ་ནི་དེ་བཞིན་གཤེགས་པའི་གསང་བའི་སྙིང་པོ་བདག་མེད་པ་བསྟན་པ་དང་བྲལ་བས་ཨཱུ་ཞེས་བྱའོ། །དེ་ལ་
ཨེ་ཞེས་བྱ་བ་ནི་སངས་རྒྱས་ཉིད་མྱ་ངན་ལས་འདས་པ་སྟེ། དེ་བས་ན་ཨེ་ཞེས་བྱའོ། །དེ་ལ་ཨེ་ཞེས་བྱ་བ་ནི་དེ་བཞིན་གཤེགས་པའི་དོན་ཏོ། །གཞན་ཡང་ཨཻ་ཞེས་བྱ་བ་ནི་དེ་བཞིན་གཤེགས་པ་གཤེགས་སམ། བཞུགས་བམ་
སྨྱང་ངམ། བསྐུམ་འམ་བསྐྱོད་ཅིང་གཡོ་བ་ཐམས་ཅད་དུ་སོ་སོའི་སྐྱེ་བོ་ལ་ཕན་པ་དང་བདེ་བའི་དོན་དུ་མི་འགྱུར་བ་མ་ཡིན་ཏེ། དེ་ནི་ཨཻ་ཞེས་བྱའོ། །དེ་ལ་ཨོ་ཞེས་བྱ་བ་ནི་ཉོན་མོངས་པའི་དོན་ཏོ། །ཉོན་མོངས་པ་ནི་ཟག་པ་དང་
བཅས་པ་ཞེས་བྱའོ། །དེ་བཞིན་གཤེགས་པ་ནི་ཉོན་མོངས་པ་ཐམས་ཅད་ཡོངས་སུ་བཅད་པས་ཨོ་ཞེས་བྱའོ། །དེ་ལ་ཨཽ་ཞེས་བྱ་བ་ནི་ཐེག་པ་ཆེན་པོའི་དོན་ཏེ། ཡི་གེ་འབྲུ་བཅུ་བཞི་པོ་མཐར་ཕྱིན་པའི་དོན་ཏོ། །ཐེག་པ་
ཆེན་པོའི་མདོ་སྡེ་ཡང་དེ་དང་འདྲ་སྟེ། མདོ་སྡེ་ཐམས་ཅད་ཀྱི་ནང་ན་མཐར་ཕྱིན་པའི་མཆོག་ཡིན་པས་ཨཽ་ཞེས་བྱའོ། །དེ་ལ་ཨཾ་ཞེས་བྱ་བ་ནི་མ་བརྟགས་པ་མི་གཙང་བའི་དངོས་པོ་ཐམས་ཅད་བསལ་ཏེ། སངས་རྒྱས་ཀྱི་བསྟན་

47-1-139a

པ་ལས་གསེར་དང་དངུལ་ལ་སྩོགས་པ་རིན་པོ་ཆེ་ཐམས་ཅད་གཏོང་ནུས་པས་ཨྃ་ཞེས་བྱའོ། །དེ་ལ་ཨ༔ ཞེས་བྱ་བ་ནི་ཐེག་པ་མཆོག་གི་དོན་ཏོ། །དེ་ཅིའི་ཕྱིར་ཞེ་ན། ཐེག་པ་ཆེན་པོའི་མདོ་མྱ་ངན་ལས་འདས་པ་ཆེན་
པོ་འདི་ཡང་མདོ་སྡེ་ཐམས་ཅད་ཀྱི་ནང་ན་གཙོ་བོ་དམ་པ། ཕུལ་དུ་གྱུར་པས། ཨ༔ ཞེས་བྱའོ། །དེ་ལ་ཀ་ཞེས་བྱ་བ་ནི་སེམས་ཅན་ཐམས་ཅད་ལ་སྙིང་རྗེ་སྐྱེ་བ་སྟེ། ཇི་ལྟར་སྒྲ་ཅན་འཛིན་བཞིན་དུ་སྲས་སུ་འདུ་ཤེས་ཤིང་དགེ་
བའི་དོན་དུ་འགྱུར་བས་ཀ་ཞེས་བྱའོ། །དེ་ལ་ཁ་ཞེས་བྱ་བ་ནི་དགེ་བའི་བཤེས་གཉེན་མ་ཡིན་པའོ། །དགེ་བའི་བཤེས་གཉེན་མ་ཡིན་པ་ནི་རྨེ་བ་བཙོག་པ་སྟེ། དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་པས་ཁ་ཞེས་བྱའོ། །
དེ་ལ་ག་ཞེས་བྱ་བ་ནི་སྙིང་པོའོ། །སྙིང་པོ་ཞེས་བྱ་བ་ནི་དེ་བཞིན་གཤེགས་པའི་གསང་བའི་སྙིང་པོ་སྟེ། སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་ཅེས་བྱ་བ་སྟེ། དེ་ནི་ག་ཞེས་བྱའོ། །དེ་ལ་གྷ་ཞེས་བྱ་བ་ནི་དེ་
བཞིན་གཤེགས་པ་རྟག་པའི་སྒྲའོ། །དེ་ལ་ཇི་ལྟར་ན་དེ་བཞིན་གཤེགས་པ་རྟག་པའི་སྒྲ་ཞེ་ན། འདི་ལྟ་སྟེ། དེ་བཞིན་གཤེགས་པ་རྟག་པ། གནས་པ། མི་འགྱུར། མི་འཕོ་བས་གྷ་ཞེས་བྱའོ། །དེ་ལ་ང་ཞེས་བྱ་བ་ནི་འདུ་
བྱེད་ཐམས་ཅད་ཞིག་པའི་མཚན་ཉིད་དེ། དེ་བས་ང་ཞེས་བྱའོ། །དེ་ལ་ཙ་ཞེས་བྱ་བ་ནི་བསྒོམ་པའི་དོན་ཏེ། སེམས་ཅན་ཐམས་ཅད་གདུལ་བ་ནི་བསྒོམ་པའི་དོན་ཅེས་བྱ་སྟེ་ཙ་ཞེས་བྱའོ། །དེ་ལ་ཚ་ཞེས་བྱ་བ་ནི་དེ་བཞིན་གཤེགས་
པས་སེམས་ཅན་ཐམས་ཅད་ལ་གདུགས་ཆེན་པོ་ལྟར་སྐྱོབ་ཅིང་ཁེབས་པས་ཚ་ཞེས་བྱའོ། །དེ་ལ་ཛ་ཞེས་བྱ་བ་ནི་ཡང་དག་པར་གྲོལ་བ་རྒ་བའི་མཚན་ཉིད་མེད་པས་ཛ་ཞེས་བྱའོ། །དེ་ལ་ཛྷ་ཞེས་བྱ་བ་ནི་ཀུན་ནས་ཉོན་མོངས་པས་འཆིང་
བ་ནི་ནགས་ཐིབས་པོ་དང་འདྲ་བས་ཛྷ་ཞེས་བྱའོ། །དེ་ལ་ཉ་ཞེས་བྱ་བ་ནི་ཤེས་རབ་ཀྱི་དོན་ཏོ། །ཡང་དག་པའི་ཆོས་ཉིད་ཤེས་པས་ན་ཉ་ཞེས་བྱའོ། །དེ་ལ་ཊ་ཞེས་བྱ་བ་ནི་འཛམ་བུའི་གླིང་དུ་སྐུ་ཕྱེད་བསྟན་ཏེ། ཆོས་བཤད་པ་ནི་ཟླ་བ་ཕྱེད་

47-1-139b

ལྟ་བུ་ཡིན་པས་ཊ་ཞེས་བྱའོ། །དེ་ལ་ཋ་ཞེས་བྱ་བ་ནི་ཆོས་ཀྱི་སྐུ་ཡོངས་སུ་རྫོགས་པ་ཟླ་བ་རྒྱས་པ་དང་འདྲ་བས་ཋ་ཞེས་བྱའོ། །དེ་ལ་ཌ་ཞེས་བྱ་བ་ནི་དགེ་སློང་གླེན་པ་དག་རྟག་པ་དང་མི་རྟག་པ་མི་ཤེས་ཏེ། བུས་པ་ཆུང་ངུ་དང་འདྲ་བས་
ཌ་ཞེས་བྱའོ། །དེ་ལ་ཌྷ་ཞེས་བྱ་བ་ནི་སློབ་དཔོན་གྱི་དྲིན་མི་ཤེས་ཏེ། ལུས་ཤ་བཟན་དང་འདྲ་བས་ཌྷ་ཞེས་བྱའོ། །དེ་ལ་ཎ་ཞེས་བྱ་བ་ནི་འཕགས་པའི་དོན་མ་ཡིན་ཏེ། མུ་སྟེགས་ཅན་ལྟ་བུ་ཡིན་པས་ཎ་ཞེས་བྱའོ། །དེ་ལ་ཏ་ཞེས་
བྱ་བ་ནི་གནས་གང་དུ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ཀྱེ་དགེ་སློང་དག་འཇིགས་ཤིང་སྐྲག་པ་སྤོངས་ཤིག་དང་། ཁྱེད་ལ་དམ་པའི་ཆོས་བསྟན་ཏོ་ཞེས་བྱུང་བ་ནི་ཏ་ཞེས་བྱའོ། །དེ་ལ་ཐ་ཞེས་བྱ་བ་
ནི་གླེན་པ་གཏི་མུག་པའི་དོན་ཏེ། སེམས་ཅན་འཁོར་བས་རྣམ་པར་གླགས་ཏེ་རྣམ་པར་འཁོར་བ་ནི་དར་གྱི་སྲིན་བུ་འམ། སྦུར་པ་ལྟ་བུ་ཡིན་པས་ཐ་ཞེས་བྱའོ། །དེ་ལ་ད་ནི་སྦྱིན་པ་ཆེན་པོ་བྱིན་ཏེ། ཐེག་པ་ཆེན་པོ་ཡིན་པས་ད་ཞེས་
བྱའོ། །དེ་ལ་དྷ་ནི་ཡོན་ཏན་བསྔགས་ཤིང་བསྟོད་པ་འདི་ལྟ་སྟེ། དཀོན་མཆོག་གསུམ་ནི་རི་རབ་རིའི་རྒྱལ་པོ་དང་འདྲ་སྟེ། ཤིན་ཏུ་བཟང་ཞིང་མཐོ་ལ་ཡངས་ཤིང་ཆེ་བས་རྡིབ་ཅིང་འགྱེལ་བ་མེད་པས་ན་དྷ་ཞེས་བྱའོ། །དེ་ལ་ན་ནི་
དཀོན་མཆོག་གསུམ་རབ་ཏུ་བརྟན་ཏེ། སྒོའི་གཏན་པ་དང་འདྲ་བས་མི་གཡོ་བ་ཞེས་བྱ་བ་ནི་ན་ཞེས་བྱའོ། །དེ་ལ་པ་ནི་ཕྱིན་ཅི་ལོག་གི་དོན་ཏེ། གང་འདི་སྐད་དུ་དཀོན་མཆོག་གསུམ་ཟད་ཅིང་མེད་པར་འགྱུར་རོ་ཞེས་སྨྲ་ན། 
དེ་ནི་བདག་བསླུས་པ་ཡིན་པར་རིག་པར་བྱ་སྟེ། དེ་ནི་པ་ཞེས་བྱའོ། །དེ་ལ་ཕ་ནི་འཇིག་རྟེན་གྱི་བགེགས་ཏེ་འཇིག་རྟེན་ན་བསྐལ་པ་འབྱུང་བའི་ཚེ་དཀོན་མཆོག་གསུམ་ཡང་མེད་པར་འགྱུར་རོ་ཞེས་སྨྲ་ན། 
དེ་ནི་ཤིན་ཏུ་ཡང་གླེན་ཞིང་ཤེས་རབ་མེད་པ་སྟེ། འཕགས་པ་ལ་དབང་ཟ་བ་ཡིན་པས་ཕ་ཞེས་བྱའོ། །དེ་ལ་བ་ནི་སངས་རྒྱས་ཀྱི་སྟོབས་བཅུ་ཡིན་པས་བ་ཞེས་བྱའོ། །དེ་ལ་བྷ་ནི་ཁུར་ལྕི་བ་ཁྱེར་བ་སྟེ། བླ་ན་མེད་པའི་ཡང་

47-1-140a

དག་པའི་ཆོས་ཕྲག་པ་ལ་བཀུར་བཟོད་པས་དེ་ནི་བྱང་ཆུབ་སེམས་དཔའ་ཆེན་པོ་ཡིན་པར་རིག་པར་བྱ་སྟེ། བྷ་ཞེས་བྱའོ། །དེ་ལ་མ་ནི་ཤིན་ཏུ་སྡོམ་པ་གཉན་པ་བཅས་པ་ཐེག་པ་ཆེན་པོའི་མདོ་སྡེ་ཡོངས་སུ་
མྱ་ངན་ལས་འདའ་བ་ཆེན་པོ་སྟེ་མ་ཞེས་བྱའོ། །དེ་ལ་ཡ་ནི་བྱང་ཆུབ་སེམས་དཔའ་རྣམས་གནས་ཐམས་ཅད་དུ་སེམས་ཅན་རྣམས་ལ་ཐེག་པ་ཆེན་པོའི་ཆོས་སྟོན་པས་ཡ་ཞེས་བྱའོ། །དེ་ལ་ར་ནི་འདོད་ཆགས་དང་
ཞེ་སྡང་དང་གཏི་མུག་ཡོངས་སུ་བཅོམ་ནས་ཡང་དག་པའི་ཆོས་སྟོན་པས་ར་ཞེས་བྱའོ། །དེ་ལ་ལ་ནི་ཉན་ཐོས་ཀྱི་ཐེག་པ་ཅན་ནི་འགྱུར་བ་མི་གནས་པ་སྟེ། ཐེག་པ་ཆེན་པོ་ནི་བསྟན་པ་མི་གཡོ་བས་ཉན་ཐོས་ཀྱི་ཐེག་པ་
སྤོང་ཞིང་བླ་ན་མེད་པའི་ཐེག་པ་ཆེན་པོ་ལ་བརྩོན་བསལ་ཞེས་བྱའོ། །དེ་ལ་ཝ་ནི་སངས་རྒྱས་བཅོམ་ལྡན་འདས་སེམས་ཅན་གྱི་ཕྱིར་ཆོས་ཆེན་པོའི་ཆར་ཕབ་ནས་འཇིག་རྟེན་གྱི་རིག་སྔགས་དང་ཡི་གེ་དང་། གཙུག་ལག་
ལ་སོགས་པ་ནི་ཝ་ཞེས་བྱའོ། །དེ་ལ་ཤ་ནི་ཟུག་རྔུ་རྣམ་པ་ལྔ་ཡོངས་སུ་སྤངས་པས་ཤ་ཞེས་བྱའོ། །དེ་ལ་ཥ་ནི་དོན་ཡོངས་སུ་རྫོགས་པ་སྟེ། གང་ཞིག་ཡོངས་སུ་མྱ་ངན་ལས་འདས་པ་དོན་ཆེན་པོའི་མདོ་མཉན་ན། 
དེ་ནི་ཐེག་པ་ཆེན་པོའི་མདོ་སྡེ་ཐམས་ཅད་ཐོས་ཤིང་འཛིན་པས་ཥ་ཞེས་བྱའོ། །དེ་ལ་ས་ནི་སེམས་ཅན་རྣམས་ལ་དམ་པའི་ཆོས་བསྟན་ཏེ། སེམས་དཔའ་བར་གྱུར་པས་ས་ཞེས་བྱའོ། །དེ་ལ་ཧ་ནི་སེམས་རབ་ཏུ་དགའ་
བ་སྟེ། བཅོམ་ལྡན་འདས་འདུ་བྱེད་ཐམས་ཅད་དང་བྲལ་བ་ངོ་མཚར་ཆེའོ། །ཨེ་མ་དེ་བཞིན་གཤེགས་པ་ཡངས་སུ་མྱ་ངན་ལས་འདས་སོ་ཞེས་བྱ་བ་ནི་ཧ་ཞེས་བྱའོ། །དེ་ལ་ཀྵ་ཞེས་བྱ་བ་ནི་བདུད་ཀྱི་དོན་ཏོ། །ཚད་
མེད་པའི་བདུད་ཀྱིས་དེ་བཞིན་གཤེགས་པའི་གསང་བའི་སྙིང་པོ་འཇིག་མི་ནུས་པས་ཀྵ་ཞེས་བྱའོ། །གཞན་ཡང་ཀྵ་ནི་འཇིག་རྟེན་པའི་རྗེས་སུ་ཕ་མ་དང་ཆུང་མ་དང་། བུའི་བར་དུ་བསྟན་པས་ཀྵ་ཞེས་བྱའོ། །དེ་ལ་རི་རཱི་

47-1-140b

ལི་ལཱི་ཞེས་བྱ་བ་ནི་ཡི་གེ་བཞི་པོ་འདི་ནི་དོན་རྣམ་པ་བཞིའོ། །འདི་ལྟ་སྟེ་སངས་རྒྱས་དང་ཆོས་དང་དགེ་འདུན་དང་གཉེན་པོའི་ཆོས་སོ། །དེ་ལ་གཉེན་པོའི་ཆོས་ནི་འཇིག་རྟེན་པའི་ཆོས་སུ་ལྷ་སྦྱིན་ལྟར་དགེ་འདུན་གྱི་དབྱེན་བྱས་
པ་དང་། ཚུལ་ཁྲིམས་བཅྭ་བའི་ཕྱིར་གཟུགས་དང་ཆ་ལུགས་རྣམ་པ་སྣ་ཚོགས་བསྟན་ཀྱང་མཁས་པ་ཤེས་རབ་ཅན་ནི་ཁོང་དུ་ཆུད་པས་དེ་ལ་མི་འཇིགས་ཏེ། འདི་ནི་འཇིག་རྟེན་གྱི་རྗེས་སུ་འཇུག་པ་ཡིན་པས་དེའི་ཕྱིར་རི་རཱི་ལི་ལཱི་
ཞེས་བྱའོ། །དབུགས་རྔུབ་པ་དང་། ལྕེའི་དབང་པོ་དང་། སྣའི་དབུགས་རིང་ཐུང་དང་། འདྲེན་པ་ལས་སྒྲའི་རྗེས་སུ་དོན་ཤེས་པར་འགྱུར་ཏེ། དེ་ཡང་ལྕེ་དང་སོ་ལས་རྣམ་པ་ཐ་དད་དུ་འགྱུར་རོ། །དེ་ལྟར་ཡི་གེའི་དོན་འདི་ནི་སེམས་ཅན་
དག་གི་ངག་གི་ལས་ཡོངས་སུ་དག་པར་འགྱུར་ཏེ། སེམས་ཅན་གྱི་སངས་རྒྱས་ཀྱི་རང་བཞིན་ནི་ཡི་གེ་ལ་ལྟོས་པས་གདོད་ཡོངས་སུ་དག་པར་འགྱུར་བ་ནི་མ་ཡིན་ནོ། །དེ་ཅིའི་ཕྱིར་ཞེ་ན། རང་བཞིན་གྱིས་ཐོག་མ་ནས་རྣམ་པར་དག་པས་
ཕུང་པོ་དང་ཁམས་དང་སྐྱེ་མཆེད་ཀྱི་ནང་ན་གནས་ཀྱང་ཕུང་པོ་དང་ཁམས་དང་སྐྱེ་མཆེད་ལྟ་བུ་ནི་མ་ཡིན་ནོ། །དེ་བས་ན་སེམས་ཅན་དག་ནི་བྱང་ཆུབ་སེམས་དཔའ་རྣམས་ལ་སྐྱབས་སུ་འགྲོ་བར་བྱའོ། །སངས་རྒྱས་ཀྱི་རང་བཞིན་
གྱི་ཕྱིར་སེམས་ཅན་ཐམས་ཅད་ལ་ཁྱད་པར་མེད་པར་རྣམ་པར་ལྟའོ། །དེ་བས་ན་ཡི་གེ་ཕྱེད་པོ་ནི་མདོ་སྡེ་དང་གཙུག་ལག་དང་སྨྲ་བ་དང་ཚིག་གིས་རྣམ་པར་རྒྱལ་བའི་རྩ་བ་ཡིན་ནོ། །ཡི་གེ་ཕྱེད་པོའི་དོན་ནི་ཀུན་ནས་ཉོན་མོངས་
པ་ཀུན་གྱི་སྨྲ་བའི་རྩ་བ་ཡིན་པས་ཡི་གེ་ཕྱེད་ཅེས་བྱའོ། །ཡི་གེ་རྫོགས་པ་ནི་དགེ་བའི་ཆོས་ཐམས་ཅད་སྨྲ་བའི་རྩ་བའོ། །དཔེར་ན་འཇིག་རྟེན་ན་གང་སྡིག་པ་མི་དགེ་བ་བྱེད་པ་ནི་སྐྱེས་བུ་ཕྱེད་ཅེས་བྱའོ། །དགེ་བ་ཀུན་སྤྱོད་པ་ནི། 
རྫོགས་པ་ཞེས་བྱའོ། །དེ་ལྟར་ན་མདོ་སྡེ་དང་གཙུག་ལག་དང་སྨྲ་བ་ཐམས་ཅད་ནི་ཡི་གེ་ཕྱེད་པོའི་རྩ་བར་འགྱུར་རོ། །དེ་ལ་གང་ཞིག་འདི་སྐད་དུ་དེ་བཞིན་གཤེགས་པ་དང་། ཡང་དག་པར་རྣམ་པར་གྲོལ་བ་ཡང་ཡི་གེ་ཕྱེད་པོའི་ནང་

47-1-141a

དུ་འཇུག་ཅེས་སྨྲ་ན་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། ཡི་གེ་དང་བྲལ་བའི་ཕྱིར་ཏེ། དེ་བས་ན་དེ་བཞིན་གཤེགས་པ་ནི་ཆོས་ཐམས་ཅད་ལ་མ་ཐོགས་མ་ཆགས་ཏེ། ཡང་དག་པར་རྣམ་པར་གྲོལ་ལོ། །དེ་ལ་ཡི་གེའི་དོན་
རྟོགས་ཤིང་ཤེས་པ་གང་ཞེ་ན། གང་ཞིག་དེ་བཞིན་གཤེགས་པ་འཇིག་རྟེན་དུ་གཤེགས་ནས་ཡི་གེ་ཕྱེད་པོ་མེད་པར་བྱས་པ་ཤེས་ན། དེ་ནི་ཡི་གེའི་དོན་ཤེས་ཤིང་རྟོགས་པ་ཞེས་བྱའོ། །གང་ཡི་གེ་ཕྱེད་པོའི་དོན་གྱི་རྗེས་སུ་
འཇུག་པ་ནི་དེ་བཞིན་གཤེགས་པའི་རང་བཞིན་མི་ཤེས་པའོ། །དེ་ལ་ཡི་གེ་མེད་པའི་དོན་གང་ཞེ་ན། གང་མི་དགེ་བའི་ཆོས་ལ་བསྙེན་ཅིང་སྤྱོད་པ་དེ་ནི་ཡི་གེ་མེད་པ་ཞེས་བྱའོ། །གཞན་ཡང་ཡི་གེ་མེད་པ་ནི་དགེ་བའི་ཆོས་ལ་
བསྙེན་ཅིང་སྤྱོད་ཀྱང་དེ་བཞིན་གཤེགས་པ་རྟག་པའམ། མི་རྟག་གམ། ཐེར་ཟུག་གམ། ཐེར་ཟུག་མ་ཡིན་པ་མི་ཤེས། ཆོས་དང་དགེ་འདུན་ཡང་མི་ཤེས། འདུལ་བ་དང་འདུལ་བ་མ་ཡིན་པ་དང་། མདོ་སྡེ་དང་མདོ་སྡེ་མ་ཡིན་པ་དང་། 
བདུད་ཀྱིས་བསྟན་པ་དང་། སངས་རྒྱས་ཀྱིས་བསྟན་པ་མི་ཤེས་ཏེ། བྱེ་བྲག་མི་བྱེད་པ་དེ་ནི་ཡི་གེ་མེད་པའི་དོན་ལ་ཞུགས་པ་ཞེས་བྱའོ། །དེ་ལྟར་ན་ངས་ཡི་གེ་མེད་པའི་དོན་གྱི་རྗེས་སུ་འཇུག་པ་ཡང་ངས་བཤད་དོ། །རིགས་ཀྱི་བུ་དེ་
བས་ན་ཁྱེད་ཀྱིས་ཡི་གེ་ཕྱེད་པོ་སྤངས་ཏེ། ཡི་གེ་རྫོགས་པ་ལ་ཤིན་ཏུ་མཁས་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་
ཡི་གེའི་གྲངས་ཤིན་ཏུ་མཁས་པར་བགྱིའོ། །བདག་ཅག་གིས་སྟོན་པ་བླ་ན་མེད་པ་དང་མཇལ་བས་དེ་བཞིན་གཤེགས་པས་བསྟན་པའི་བཀའ་བཞིན་དུ་བགྱིའོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་
བཀའ་སྩལ་པ། ལེགས་སོ་ལེགས་སོ། །གང་དམ་པའི་ཆོས་བསྙེན་པར་འདོད་པ་དག་དེ་བཞིན་དུ་བསླབ་པར་བྱའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་འདི་ལྟ་སྟེ་

47-1-141b

བྱའི་ནང་ན་བྱ་ཀ་ལན་ད་ཀ་དང་། བྱ་ངུར་པ་ནི་གར་སོང་བ་ཡང་མི་འབྲལ་ཏེ་ལྷན་ཅིག་གོ། །དེ་བཞིན་དུ་སྡུག་བསྔལ་བ་དང་མི་རྟག་པ་དང་བདག་མེད་པ་ཡང་དེ་དང་འདྲ་སྟེ་མི་འབྲལ་ལོ། །བྱང་ཆུབ་སེམས་དཔའ་འོད་སྲུང་གིས་བཅོམ་
ལྡན་འདས་ལ་གསོལ་པ། བཅོམ་ལྡན་འདས་ཇི་ལྟར་ན་སྡུག་བསྔལ་བ་དང་མི་རྟག་པ་དང་བདག་མེད་པ་ལ་བྱ་ངུར་པ་དང་བྱ་ཀ་ལན་ད་ཀ་ལྟ་བུ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སྡུག་བསྔལ་གྱི་
ཆོས་ཀྱང་གཞན་ལ། བདེ་བའི་ཆོས་ཀྱང་གཞན། རྟག་པའི་ཆོས་ཀྱང་གཞན་ལ། མི་རྟག་པའི་ཆོས་ཀྱང་གཞན། བདག་ཅེས་བགྱི་བའི་ཆོས་ཀྱང་གཞན་ལ། བདག་མེད་པའི་ཆོས་ཀྱང་གཞན་ནོ། །དཔེར་ན་འབྲས་ནི་ནས་ལས་གཞན་
ལ། ནས་ཀྱང་སྲན་མ་དང་བུ་རམ་ཤིང་ལས་གཞན་ནོ། །དེ་ལྟར་རྣམ་པ་དེ་དག་ཐོག་མ་མྱུ་གུ་བྱུང་བ་ནས་ལོ་མ་དང་མེ་ཏོག་གི་བར་དུ་ནི་མི་རྟག་གོ། །འབྲས་བུར་སྨིན་ནས་མིས་ཡོངས་སུ་སྤྱོད་པ་ན་རྟག་པ་ཞེས་བྱའོ། །དེ་ཅིའི་ཕྱིར་ཞེ་ན། 
མཚན་ཉིད་ཀྱིས་ཡང་དག་པ་བདེན་པའི་ཕྱིར་རོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་དེ་ལྟར་དངོས་པོ་དེ་དག་རྟག་པ་ལགས་ན་དེ་བཞིན་གཤེགས་པ་དང་འདྲ་བ་ལགས་སམ། 
བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་སྐད་ཅེས་མ་ཟེར་ཅིག །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ལ་རི་རབ་རིའི་རྒྱལ་པོ་དང་འདྲའོ་ཞེས་བྱ་ན་ཅི་བསྐལ་པ་བཤིག་པའི་ཚེ། རི་རབ་ལྷུན་པོ་ནི་འཇིག་
ཅིང་རྙིལ་བར་འགྱུར་ན་དེ་བཞིན་གཤེགས་པ་ཡང་དེའི་ཚེ་འཇིག་པར་འགྱུར་རམ། རིགས་ཀྱི་བུ་ཁྱོད་ཀྱིས་ནི་དོན་དེ་དག་ཞུ་བར་མི་བྱའོ། །རིགས་ཀྱི་བུ་ཆོས་ཐམས་ཅད་ཀྱི་ནང་ན་མྱ་ངན་ལས་འདས་པ་མ་གཏོགས་པར་
ཆོས་གཅིག་ཀྱང་རྟག་ཅེས་པ་མེད་དེ། ཀུན་རྫོབ་དུ་འབྲས་བུ་ནི་རྟག་ཅེས་གསུངས་སོ། །བྱང་ཆུབ་སེམས་དཔའ་འོད་སྲུང་གིས་གསོལ་པ། བཅོམ་ལྡན་འདས་ལེགས་སོ་ཤིན་ཏུ་ལེགས་སོ། །བཅོམ་ལྡན་འདས་ཀྱིས་

47-1-142a

གསུངས་པ་བཞིན་ནོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། དེ་དེ་བཞིན་ཏེ། དེ་དེ་བཞིན་ནོ། །རིགས་ཀྱི་བུ་མདོ་སྡེ་ལ་སོགས་པ་ཐམས་ཅད་ཀྱི་ཏིང་ངེ་འཛིན་ལ་ནན་ཏན་བྱས་ཀྱང་ཡོངས་སུ་མྱ་ངན་ལས་
འདས་པ་ཆེན་པོ་མ་ཐོས་ན། ཐམས་ཅད་མི་རྟག་ཅེས་སྨྲའོ། །མདོ་སྡེ་འདི་ཐོས་ནས་ཉོན་མོངས་པ་དང་བཅས་ཀྱང་ཉོན་མོངས་པ་མེད་པ་དང་འདྲ་སྟེ། ལྷ་དང་མིར་བཅས་པའི་འཇིག་རྟེན་ཐམས་ཅད་ལ་ཕན་པ་དང་། བདེ་བའི་དོན་བྱེད་
པར་འགྱུར་རོ། །དེ་ཅིའི་ཕྱིར་ཞེ་ན། བདག་གི་ལུས་ལ་སངས་རྒྱས་ཀྱི་རང་བཞིན་ཡོད་པར་རྟོགས་པས་རྟག་པ་ཞེས་བྱའོ། །རིགས་ཀྱི་བུ་གཞན་ཡང་དཔེར་ན་ཤིང་ཨ་མྲ་ལ་མེ་ཏོག་མ་བྱུང་བ་ནི་མི་རྟག་པ་ཞེས་བྱའོ། །འབྲས་བུ་
མངོན་དུ་གྱུར་ནས་ཕན་པའི་དོན་དུ་འགྱུར་བས་རྟག་པ་ཞེས་བྱའོ། །དེ་ལྟར་ན་རིགས་ཀྱི་བུ་མདོ་སྡེ་ཐམས་ཅད་ལས་བྱུང་བའི་ཏིང་ངེ་འཛིན་བསྒོམས་ཀྱང་ཡོངས་སུ་མྱ་ངན་ལས་འདས་པ་ཆེན་པོ་འདི་མ་ཐོས་ན་ཐམས་ཅད་མི་རྟག་ཅེས་
སྨྲའོ། །གལ་ཏེ་འདི་ཐོས་ནས་ཉོན་མོངས་པ་དང་བཅས་ཀྱང་ཉོན་མོངས་པ་མེད་པ་དང་འདྲ་སྟེ། ལྷ་དང་མི་ཐམས་ཅད་ལ་ཕན་པ་དང་བདེ་བའི་དོན་དུ་འགྱུར་རོ། །དེ་ཅིའི་ཕྱིར་ཞེ་ན། བདག་གི་ལུས་ལ་སངས་རྒྱས་ཀྱི་རང་བཞིན་ཡོད་
པར་རྟོགས་པས་རྟག་པ་ཞེས་བྱའོ། །རིགས་ཀྱི་བུ་གཞན་ཡང་དཔེར་ན་གསེར་གྱི་གར་བུ་བཞུས་ཏེ་ཞུ་བའི་ཚེ་ན་མི་རྟག་པ་ཞེས་བྱའོ། །ཞུ་ནས་གསེར་དུ་གྱུར་ཏེ་ཕན་པའི་དོན་དུ་གྱུར་པ་ན་རྟག་པ་ཞེས་བྱའོ། །དེ་ལྟར་ན་རིགས་
ཀྱི་བུ་མདོ་སྡེ་ཐམས་ཅད་ཀྱི་ཏིང་ངེ་འཛིན་བསྒོམས་ཀྱང་ཡོངས་སུ་མྱ་ངན་ལས་འདས་པ་ཆེན་པོ་འདི་མ་ཐོས་ན་ཐམས་ཅད་མི་རྟག་ཅེས་སྨྲའོ། །མདོ་སྡེ་འདི་ཐོས་ནས་ཉོན་མོངས་པ་དང་བཅས་ཀྱང་ཉོན་མོངས་པ་མེད་པ་དང་འདྲ་
སྟེ། ལྷ་དང་མི་ཐམས་ཅད་ལ་ཕན་པ་དང་བདེ་བར་འགྱུར་རོ། །དེ་ཅིའི་ཕྱིར་ཞེ་ན། བདག་གི་ལུས་ལ་སངས་རྒྱས་ཀྱི་རང་བཞིན་ཡོད་པར་རྟོགས་པས་རྟག་པ་ཞེས་བྱའོ། །རིགས་ཀྱི་བུ་གཞན་ཡང་དཔེར་ན་ཏིལ་ནི་མར་བཙིར་

47-1-142b

བའི་ཚེ་ན་མི་རྟག་པ་ཞེས་བྱའོ། །བཙིར་ཏེ་མར་དུ་གྱུར་ནས་ཕན་པའི་དོན་དུ་འགྱུར་བས་རྟག་པ་ཞེས་བྱའོ། །རིགས་ཀྱི་བུ་མདོ་སྡེ་ཐམས་ཅད་ཀྱི་ཏིང་ངེ་འཛིན་བསྒོམས་ཀྱང་ཡོངས་སུ་མྱ་ངན་ལས་འདས་པའི་མདོ་འདི་མ་ཐོས་
ན་ཐམས་ཅད་མི་རྟག་ཅེས་སྨྲའོ། །མདོ་སྡེ་འདི་ཐོས་ནས་ཉོན་མོངས་པ་དང་བཅས་ཀྱང་ཉོན་མོངས་པ་མེད་པ་དང་འདྲ་སྟེ། ལྷ་དང་མི་ཐམས་ཅད་ལ་ཕན་པ་དང་བདེ་བའི་དོན་དུ་འགྱུར་རོ། །དེ་ཅིའི་ཕྱིར་ཞེ་ན། བདག་གི་ལུས་
ལ་སངས་རྒྱས་ཀྱི་རང་བཞིན་ཡོད་པར་རྟོགས་པས་རྟག་པ་ཞེས་བྱའོ། །རིགས་ཀྱི་བུ་གཞན་ཡང་དཔེར་ན་འབབ་ཆུ་ཐམས་ཅད་ནི་རྒྱ་མཚོར་འབབ་བོ། །དེ་བཞིན་དུ་མདོ་སྡེ་ཐམས་ཅད་ཀྱི་ཏིང་ངེ་འཛིན་ཀྱང་ཐེག་པ་
ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལ་འབབ་བོ། །དེ་ཅིའི་ཕྱིར་ཞེ་ན། མཐར་སངས་རྒྱས་ཀྱི་རང་བཞིན་ཡོད་པར་ལེགས་པར་གསུངས་པའི་ཕྱིར་རོ། །རིགས་ཀྱི་བུ་དེ་བས་ན་རྟག་པའི་ཆོས་ཀྱང་གཞན་
ལ། མི་རྟག་པའི་ཆོས་ཀྱང་གཞན་ཞེས་ངས་གསུངས་ཏེ། བདག་མེད་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་
དེ་བཞིན་གཤེགས་པ་ནི་སློས་པའི་མྱ་ངན་གྱི་ཟུག་རྔུ་དང་བྲལ་བའོ། །སློས་པའི་མྱ་ངན་ཅན་ནི་གནམ་གྱི་ལྷ་ལགས་ཏེ། དེ་བཞིན་གཤེགས་པ་ནི་ལྷ་མ་ལགས་སོ། །སློས་པའི་མྱ་ངན་ནི་མི་ལགས་ཏེ། དེ་བཞིན་གཤེགས་
པ་ནི་མི་མ་ལགས་སོ། །སློས་པའི་མྱ་ངན་ཅན་ནི་སྲིད་པ་ཉི་ཤུ་ལྔ་པོ་ལགས་ཏེ། དེ་བཞིན་གཤེགས་པ་ནི་སྲིད་པ་ཉི་ཤུ་ལྔ་པོ་མ་ལགས་སོ། །དེ་བས་ན་དེ་བཞིན་གཤེགས་པ་ལ་སློས་པའི་མྱ་ངན་མི་མངའ་ན་ཅིའི་སླད་དུ་
དེ་བཞིན་གཤེགས་པ་ལ་སློས་པའི་མྱ་ངན་མངའ་ཞེས་བསྒྲགས་ཤིང་གསུང་། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདུ་ཤེས་མེད་པའི་ལྷ་ནི་འདུ་ཤེས་མེད་པ་ཞེས་བྱའོ། །གལ་ཏེ་འདུ་ཤེས་མེད་

47-1-143a

ན་འཚོ་བའི་སྲོག་ཀྱང་མེད་དོ། །གལ་ཏེ་འཚོ་བའི་སྲོག་མེད་ན་ཕུང་པོ་དང་ཁམས་དང་སྐྱེ་མཆེད་ག་ལ་ཞིག་ཡོད་དེ། དེ་བས་ན་འདུ་ཤེས་མེད་པའི་ལྷའི་སྲོག་ནི་འདི་ན་གནས་སོ་ཞེས་སྨྲར་མི་རུང་ངོ་། །རིགས་ཀྱི་བུ་དཔེར་ན་
ཤིང་གི་ལྷའི་བུ་ཤིང་ལ་གནས་ཀྱང་ཡལ་ག་འམ། མཛེར་པ་འམ། སྡོང་པོ་འམ། ལོ་མ་ལ་ངེས་པར་གནས་ཤེས་བྱར་མི་རུང་སྟེ། གནས་མ་ངེས་ཀྱང་མེད་ཅེས་བྱར་ནི་མི་རུང་ངོ་། །འདུ་ཤེས་མེད་པའི་ལྷའི་སྲོག་ཀྱང་དེ་དང་འདྲའོ། །
རིགས་ཀྱི་བུ་སངས་རྒྱས་ཀྱི་ཆོས་ཀྱང་དེ་དང་འདྲ་སྟེ། ཤིན་ཏུ་ཟབ་ཅིང་རྟོགས་པར་དཀའོ། །དེ་བཞིན་གཤེགས་པ་ལ་སློས་པའི་མྱ་ངན་དང་སྡུག་བསྔལ་བ་མེད་ཀྱང་སེམས་ཅན་ལ་ཐུགས་རྗེ་ཆེན་པོ་སྐྱེད་པའི་ཕྱིར་སློས་པའི་མྱ་ངན་
ཡོད་པར་སྟོན་ཏེ། སེམས་ཅན་རྣམས་ལ་སྒྲ་གཅན་འཛིན་ལྟ་བུར་གཟིགས་སོ། །གཞན་ཡང་རིགས་ཀྱི་བུ་འདུ་ཤེས་མེད་པའི་ལྷའི་སྲོག་ནི་སངས་རྒྱས་ཉག་གཅིག་གིས་མཁྱེན་ཀྱི། གཞན་གྱིས་རྟོགས་པ་འམ་ཤེས་པ་
མ་ཡིན་ནོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱི་ལྷ་ཡང་དེ་དང་འདྲའོ། །འོད་སྲུང་དེ་བཞིན་གཤེགས་པའི་རང་བཞིན་ནི་ཡོངས་སུ་དག་ཅིང་ཆགས་པ་མེད་པ་སྟེ། དཔེར་ན་སྤྲུལ་པ་ལྟ་བུ་ཡིན་ན་སློས་པའི་མྱ་ངན་
དང་སྡུག་བསྔལ་ག་ལ་ཞིག་ཡོད། གལ་ཏེ་དེ་བཞིན་གཤེགས་པ་ལ་མྱ་ངན་མེད་ན་ཇི་ལྟར་སེམས་ཅན་ཐམས་ཅད་ལ་ཕན་པའི་དོན་དུ་འགྱུར་ཞིང་སངས་རྒྱས་ཀྱི་ཆོས་རྒྱས་པར་སྟོན་པར་འགྱུར། ཅི་སྟེ་མེད་ན་ཅིའི་ཕྱིར་སེམས་
ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་གཟིགས་སོ་ཞེས་གསུངས། ཅི་སྟེ་སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་མི་གཟིགས་ན་དེ་སྐད་དུ་གསུངས་པ་དེ་ཡང་བརྫུན་པར་འགྱུར་རོ། །དེ་བས་
ན་རིགས་ཀྱི་བུ་སངས་རྒྱས་ཀྱང་བསམ་གྱིས་མི་ཁྱབ་ལ། ཆོས་ཀྱང་བསམ་གྱིས་མི་ཁྱབ། སེམས་ཅན་གྱི་སངས་རྒྱས་ཀྱི་རང་བཞིན་ཡང་བསམ་གྱིས་མི་ཁྱབ། འདུ་ཤེས་མེད་པའི་ལྷའི་ཚེའི་ཚད་ཀྱང་བསམ་གྱིས་མི་

47-1-143b

ཁྱབ་བོ། །དེ་བཞིན་གཤེགས་པ་ལ་མྱ་ངན་ཡོད་ཅེས་བྱ་བ་དང་། མྱ་ངན་མེད་ཅེས་བྱ་བ་སངས་རྒྱས་རྣམས་ཀྱི་སྤྱོད་ཡུལ་ཡིན་གྱི། ཉན་ཐོས་དང་རང་སངས་རྒྱས་ཀྱིས་ཤེས་པ་ནི་མ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན་ནམ་མཁའ་
སྟོང་པ་ལ་ཁང་པ་དང་། རྡུལ་ཕྲ་མོ་ལ་སོགས་པ་ཡང་མི་ཆགས་ཏེ། ཅི་སྟེ་ཁང་པ་ནམ་མཁའ་ལ་མི་རྟེན་ཞེས་བྱ་བ་ཡང་གནས་མེད་དོ། །དེ་བས་ན་ཁང་པ་ནི་ནམ་མཁའ་ལ་གནས་ཞེ་འམ། ནམ་མཁའ་ལ་མི་གནས་ཤེས་བྱར་
མི་རུང་ངོ་། །བྱིས་པ་སོ་སོའི་སྐྱེ་བོ་དག་ནི་ཁང་པ་ནམ་མཁའ་ལ་གནས་ཤེས་སྨྲ་མོད་ཀྱི། ནམ་མཁའ་ནི་ཡང་དག་པར་ན་གནས་མེད་དོ། །དེ་ཅིའི་ཕྱིར་ཞེ་ན། རང་བཞིན་གྱིས་གནས་པའི་ཕྱིར་རོ། །རིགས་ཀྱི་བུ་སེམས་
ཀྱང་དེ་དང་འདྲ་སྟེ། ཕུང་པོ་དང་ཁམས་དང་སྐྱེ་མཆེད་ལ་གནས་ཤེ་འམ་མི་གནས་ཤེས་བྱར་མི་རུང་ངོ་། །འདུ་ཤེས་མེད་པའི་ལྷའི་ཚེ་ཡང་དེ་དང་འདྲ་སྟེ། དེ་བཞིན་དུ་དེ་བཞིན་གཤེགས་པའི་མྱ་ངན་ཡང་དེ་དང་འདྲའོ། །
ཅི་སྟེ་མྱ་ངན་མེད་ན་ཅིའི་ཕྱིར་སེམས་ཅན་ལ་སྲས་སྒྲ་གཅན་འཛིན་དང་འདྲ་བར་གཟིགས་ཤེས་གསུངས། ཅི་སྟེ་ཡོད་ན་ཅིའི་ཕྱིར་རང་བཞིན་གྱིས་ནམ་མཁའ་དང་འདྲའོ་ཞེས་གསུངས། རིགས་ཀྱི་བུ་དཔེར་ན་སྒྱུ་མ་
མཁན་ཞིག་ཁང་པ་དང་། གསོད་པ་དང་། གསོ་བ་དང་། འཆིང་བ་དང་། བཏང་བ་དང་། གཞན་ཡང་གསེར་དང་། དངུལ་དང་། བཻ་དཱུརྱ་དང་། རིན་པོ་ཆེ་རྣམ་པ་སྣ་ཚོགས་དང་། ནགས་ཚལ་དང་ཤིང་གེལ་པ་ལ་སོགས་པ་སྣ་ཚོགས་
བྱས་ན་དེ་ལ་ནི་བདེན་པའི་རང་བཞིན་མེད་དོ། །དེ་བཞིན་གཤེགས་པ་ཡང་དེ་དང་འདྲ་སྟེ། འཇིག་རྟེན་པའི་རྗེས་སུ་མྱ་ངན་ལ་སོགས་པ་བསྟན་གྱི་བདེན་པ་ནི་མ་ཡིན་ནོ། །རིགས་ཀྱི་བུ་དེ་བཞིན་གཤེགས་པ་ནི་ཡོངས་སུ་མྱ་ངན་
ལས་འདས་ན་དེ་ལ་མྱ་ངན་དང་སྡུག་བསྔལ་ག་ལ་ཞིག་ཡོད། གང་ཞིག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ཏེ་མི་རྟག་གོ་སྙམ་སེམས་ན་གང་ཟག་དེ་ཉིད་མྱ་ངན་དང་བཅས་པ་ཡིན་པར་རིག་པར་

47-1-144a

བྱའོ། །དེ་ལ་གང་ཞིག་དེ་བཞིན་གཤེགས་པ་མྱ་ངན་ལས་མ་འདས་ཤེ་འམ། རྟག་པ་གནས་པ་མི་འགྱུར་བར་སེམས་ན་གང་ཟག་དེ་ནི་མྱ་ངན་མེད་པ་སྟེ། དེ་བཞིན་གཤེགས་པ་ལ་མྱ་ངན་ཡོད་པར་རམ། མྱ་ངན་
མེད་པར་ཤེས་པ་མེད་དོ། །གཞན་ཡང་རིགས་ཀྱི་བུ་དཔེར་ན་མི་མ་རབས་ཐ་མ་ནི་སྐྱེས་བུ་འབྲིང་དང་རབ་ཀྱི་ཆོས་མི་ཤེས་སོ། །སྐྱེས་བུ་འབྲིང་ཡང་རབ་ཀྱི་ཆོས་མི་ཤེས་སོ། །སྐྱེས་བུ་རབ་ནི་རབ་ཀྱི་ཆོས་ཤེས་ཀྱང་ཤེས་ལ། 
འབྲིང་དང་ཐ་མའི་ཆོས་ཀྱང་ཤེས་སོ། །ཉན་ཐོས་དང་རང་སངས་རྒྱས་ཀྱང་དེ་དང་འདྲ་སྟེ། བདག་གིས་ཤེས་པར་ཟད་ཀྱི། དེ་བཞིན་གཤེགས་པ་ནི་དེ་ལྟ་མ་ཡིན་ཏེ། བདག་གིས་ཡང་མཁྱེན་ལ་གཞན་གྱིས་ཡང་མཁྱེན་པས་
དེའི་ཕྱིར་ན་དེ་བཞིན་གཤེགས་པ་ནི་ཐོགས་པ་མེད་པའི་ཡེ་ཤེས་ཤེས་བྱའོ། །འཇིག་རྟེན་གྱི་རྗེས་སུ་སྒྱུ་མ་དང་འདྲ་བ་བསྟན་པས་བུས་པ་ཤའི་མིག་ཅན་དག་ནི་ཡང་དག་པ་བདེན་པ་ཡིན་ནོ་སྙམ་སེམས་ཏེ། དེས་དེ་བཞིན་
གཤེགས་པའི་ཐོགས་པ་མེད་པའི་ཡེ་ཤེས་ཤེས་པར་འགྱུར་བའི་གནས་མེད་དོ། །མྱ་ངན་ཡོད་དམ། མྱ་ངན་མེད་པ་ནི་སངས་རྒྱས་ཉག་གཅིག་གིས་མཁྱེན་པས་དེའི་ཕྱིར་ན་བདག་ཡོད་པའི་ཆོས་ཀྱང་གཞན་ལ། བདག་
མེད་པའི་ཆོས་ཀྱང་གཞན་ཏེ། བྱ་ངུར་པ་དང་ཀ་ལན་ད་ཀ་ལྟ་བུའོ། །གཞན་ཡང་རིགས་ཀྱི་བུ་སངས་རྒྱས་ཀྱི་ཆོས་ནི་བྱ་ངུར་པ་ལྷན་ཅིག་ཏུ་འགྲོ་བ་དང་མཚུངས་སོ། །བྱ་ངུར་པ་དང་། ཀ་ལན་ད་ཀ་ནི་དབྱར་ཆུ་བྲུག་པ་ན་
གནས་མཐོ་ཞིང་བཙན་པོར་ཕྲུ་གུ་གླགས་ནས་གསོ་བའི་ཕྱིར་གདོད་གང་ན་ཆུ་ཡོད་པར་འགྲོའོ། །དེ་བཞིན་གཤེགས་པ་འཇིག་རྟེན་དུ་གཤེགས་པ་ཡང་དེ་དང་འདྲ་སྟེ། ཚད་མེད་པའི་སེམས་ཅན་དམ་པའི་ཆོས་ཀྱིས་སྐྱོང་
བ་ཇི་ལྟར་བྱ་ངུར་པ་དང་། ཀ་ལན་ད་ཀ་ལ་སོགས་པ་གནས་བཙན་ཞིང་མཐོན་པོར་ཕྲུ་གུ་འཇོག་པ་དང་འདྲ་བར་དེ་བཞིན་གཤེགས་པ་ཡང་དེ་དང་འདྲ་སྟེ། སེམས་ཅན་གྱི་མཛད་པ་ཀུན་མཛད་ནས་ཡོངས་སུ་མྱ་ངན་ལས་འདས་པར་

47-1-144b

གཤེགས་སོ། །རིགས་ཀྱི་བུ་སྡུག་བསྔལ་གྱི་ཆོས་ཀྱང་གཞན་ལ། བདེ་བའི་ཆོས་ཀྱང་གཞན་ཏེ། འདུ་བྱེད་ཐམས་ཅད་ནི་སྡུག་བསྔལ་བ། མྱ་ངན་ལས་འདས་པ་ནི་བདེ་བའོ། །དོན་དམ་པ་ནི་འདུ་བྱེད་ཐམས་ཅད་འཇིག་པའོ། །
བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཇི་ལྟར་ན་སེམས་ཅན་མྱ་ངན་ལས་འདའ་བ་ཐོབ་པ་དག་རབ་ཏུ་བདེ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་
ཀྱི་བུ་ངས་གསུངས་པ་ལྟར་ན། འདུ་བྱེད་ཐམས་ཅད་འདུས་པ་ནི་རྒ་བ་དང་འཆི་བའོ་ཞེས་གསུངས་སོ། །བག་དང་ལྡན་ཞིང་བག་བྱེད་པ། །དེ་ནི་བདུད་རྩི་ལྟ་བུའི་གནས། །བག་དང་མི་ལྡན་བག་མེད་པ། །དེ་ནི་འཆི་བའི་གནས་
ཡིན་ནོ། །དེ་ལ་བག་བྱེད་པ་དག་ནི་མི་མཆི་བ་ཡི་གནས་འཐོབ་བོ། །དེ་ལ་བག་བྱེད་པ་དག་ནི་རྟག་ཏུ་འཆི་བའི་ལམ་དུ་འགྲོའོ། །གང་བག་མི་བྱེད་པ་ནི་འདུས་བྱས་ཀྱི་ཆོས་ཤེས་བྱའོ། །གང་འདུས་བྱས་ཀྱི་ཆོས་དེ་ནི་སྡུག་
བསྔལ་བའི་མཆོག་ཡིན་ནོ། །གང་བག་བྱེད་པ་ནི་མྱ་ངན་ལས་འདས་པ་ཞེས་བྱ་སྟེ། མྱ་ངན་ལས་འདས་པ་ནི་བདུད་རྩི་ཞེས་བྱ་སྟེ། བདེ་བའི་མཆོག་གོ། །གལ་ཏེ་འདུ་བྱེད་ལ་ཞུགས་ན་འཆི་བའི་གནས་ཤེས་བྱ་སྟེ་སྡུག་
བསྔལ་གྱི་མཆོག་ཏུ་འགྱུར་རོ། །གལ་ཏེ་མྱ་ངན་ལས་འདས་པར་ཕྱིན་ན། མི་འཆི་བ་ཞེས་བྱ་སྟེ། བདེ་བའི་མཆོག་མྱོང་བར་འགྱུར་རོ། །གལ་ཏེ་བག་བྱེད་ན་འདུ་བྱེད་མང་པོ་འདུས་ཀྱང་རྟག་པ། བདེ་བ། མི་འཆི་བ། མི་
འཇིག་པ་ཞེས་བྱའོ། །དེ་ལ་བག་མེད་པ་ནི་གང་། བག་བྱེད་པ་ནི་གང་ཞེ་ན། འཕགས་པ་མ་ཡིན་པ་བུས་པ་མ་རབས་ནི་བག་མེད་པ་སྟེ། འཆི་བ་དང་བཅས་པའི་ཆོས་ཅན་ནོ། །འཇིག་རྟེན་ལས་འདས་པའི་འཕགས་པ་
ནི་བག་དང་ལྡན་པ་སྟེ། རྒ་ཤི་མེད་པའོ། །དེ་ཅིའི་ཕྱིར་ཞེ་ན། མཆོག་ཏུ་བདེ་བའི་མྱ་ངན་ལས་འདས་པར་ཞུགས་པའི་ཕྱིར་རོ། །དེ་བས་ན་སྡུག་བསྔལ་བའི་ཆོས་ཀྱང་གཞན་ལ། བདེ་བའི་ཆོས་ཀྱང་གཞན་ནོ། །བདག་ཅེས་

47-1-145a

བྱ་བའི་ཆོས་ཀྱང་གཞན་ལ། བདག་མེད་པའི་ཆོས་ཀྱང་གཞན་ཏེ། ཇི་ལྟར་ས་ལ་འགྲོ་བའི་མི་དག་ནམ་མཁའི་བྱའི་རྗེས་བརྟགས་ན་མི་མཐོང་བ་བཞིན་ནོ།། །། བམ་པོ་བཅུ་གཉིས་པ། 
རིགས་ཀྱི་བུ་སེམས་ཅན་ཡང་དེ་དང་འདྲ་སྟེ། འཕྲུལ་གྱི་མིག་ནི་མེད་གྱི། ཉོན་མོངས་པ་དང་བཅས་པས་བདག་ལ་སངས་རྒྱས་ཀྱི་རང་བཞིན་ཡོད་པར་མི་མཐོང་ངོ་། །དེ་བས་ན་ངས་བདག་མེད་པ་ཞེས་བྱ་བ་བསྟན་པ་ཡིན་ནོ། །
དེ་ཅིའི་ཕྱིར་ཞེ་ན། འཕྲུལ་གྱི་མིག་མེད་པ་དག་བདག་ཅེས་བྱ་བ་ཡང་དག་པ་ནི་མི་ཤེས་ཀྱི། བླ་དགས་སུ་བདག་ཅེས་བྱ་བ་འཛིན་པས་ཉོན་མོངས་པའི་དབང་གིས་འདུས་བྱས་ལ་རྣམ་པར་འདུ་བྱེད་དེ། མི་རྟག་པ་ཞེས་བྱའོ། །དེ་བས་
ན་ངས་རྟག་པའི་ཆོས་ཀྱང་གཞན་ལ་མི་རྟག་པའི་ཆོས་ཀྱང་གཞན་ཞེས་བཤད་དོ། །དེ་ལ་འདི་སྐད་ཅེས་བྱའོ། །དཔའ་ཞིང་རྩོལ་ནུས་པ་དག་ནི། །རི་ཡི་རྩེ་མོ་ལ་འདུག་གམ། །ཐང་ངམ་དགོན་པ་གར་གནས་ཀྱང་། །བྱིས་པ་མ་རབས་རྟག་
ཏུ་མཐོང་། །ཡེ་ཤེས་ཆེན་པོའི་གནས་ཕྱིན་ཏེ། །བླ་ན་མེད་པའི་སྟེགས་འཛེགས་ན། །བདག་གི་མྱ་ངན་ཀུན་སེལ་བས། །སེམས་ཅན་ཀུན་གྱི་མྱ་ངན་མཐོང་། །དེ་བཞིན་གཤེགས་པ་ནི་སེམས་ཅན་ཚད་མེད་པའི་ཉོན་མོངས་པ་
ཐམས་ཅད་བཅོམ་ནས་ཡེ་ཤེས་ཀྱི་རི་བོ་ལ་བཞུགས་པས་སོ་སོའི་སྐྱེ་བོ་ཐམས་ཅད་ནི་རྟག་ཏུ་ཚད་མེད་པའི་ཉོན་མོངས་པས་རྣམ་པར་གཟིར་བར་གཟིགས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་
སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཚིགས་སུ་བཅད་དེ་གསུངས་པ་ལྟར་མ་ལགས་སོ། །དེ་ཅིའི་སླད་དུ་ཞེ་ན། མྱ་ངན་ལས་འདས་པ་ལ་མྱ་ངན་ཞེས་བགྱི་བ་ཡང་མ་མཆིས། དགའ་བ་ཡང་མ་
མཆིས་ན་ཅིའི་སླད་དུ་ཡེ་ཤེས་ཀྱི་སྟེགས་ལ་འཛེགས་པ་དང་། རིའི་རྩེ་མོ་ལྟ་བུར་ཕྱིན་པ་དང་འདྲ་སྟེ། སེམས་ཅན་ཐམས་ཅད་མཐོང་ངོ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཡེ་ཤེས་ཀྱི་

47-1-145b

སྟེགས་ནི་མྱ་ངན་ལས་འདས་པ་ལ་བྱའོ། །མྱ་ངན་མེད་པ་ནི་དེ་བཞིན་གཤེགས་པའོ། །མྱ་ངན་དང་བཅས་པ་ནི་བྱིས་པ་མ་རབས་རྣམས་སོ། །བྱིས་པ་མ་རབས་ནི་མྱ་ངན་དང་བཅས་པ། དེ་བཞིན་གཤེགས་པ་ནི་མྱ་ངན་མེད་
པ་ཞེས་བྱའོ། །རི་རབ་ཀྱི་རྩེ་མོ་ཞེས་བྱ་བ་ནི་ཡང་དག་པར་རྣམ་པར་གྲོལ་བའོ། །གང་བརྩོན་འགྲུས་ལ་འབད་པ་ནི་རི་རབ་ལྷུན་པོ་ལྟ་བུ་སྟེ། མི་གཡོ་མི་ལྡེག་པའོ། །ས་ཞེས་བྱ་བ་ནི་འདུས་བྱས་ཀྱིས་རྣམ་པར་འདུ་བྱེད་
པ་སྟེ། བྱིས་པ་མ་རབས་དག་ནི་ས་དེ་ལ་གནས་ནས་འདུས་བྱས་ལ་རྣམ་པར་འདུ་བྱེད་དོ། །མཁས་པ་ཤེས་རབ་ཅན་དག་ནི་མངོན་པར་སངས་རྒྱས་པ་སྟེ། ཡོད་པ་རྣམ་པར་སྤངས་ནས་རྟག་པའི་ཕྱིར་དེ་བཞིན་གཤེགས་
པ་ཞེས་བྱའོ། །དེ་བཞིན་གཤེགས་པ་ནི་སོ་སོའི་སྐྱེ་བོ་ཚད་མེད་པ་དག་སྲིད་པའི་ཟུག་རྔུས་ཟུག་པ་ལ་ཐུགས་བརྩེ་བའི་ཕྱིར་དེ་བཞིན་གཤེགས་པ་ལ་མྱ་ངན་ཡོད་ཅེས་བྱའོ། །བྱང་ཆུབ་སེམས་དཔའ་འོད་སྲུང་གིས་
གསོལ་པ། བཅོམ་ལྡན་འདས་གལ་ཏེ་དེ་བཞིན་གཤེགས་པ་ལ་མྱ་ངན་མངའ་ན། ཡང་དག་པར་རྫོགས་པའི་སངས་རྒྱས་ཤེས་གདགས་སུ་མི་རུང་བར་འགྱུར་རོ། །བཅོམ་ལྡན་འདས་ཀྱིས་འོད་སྲུང་ལ་བཀའ་
སྩལ་པ། དེ་ཡང་དོན་མེད་པ་མ་ཡིན་ཏེ། སོ་སོའི་སྐྱེ་བོ་གང་དང་གང་གིས་འདུལ་བར་འགྱུར་བ་དེ་དང་དེ་དག་ཏུ་དེ་བཞིན་གཤེགས་པ་སྐྱེ་བ་སྟོན་ཏོ། །སྐྱེ་བ་སྟེན་མོད་ཀྱི་ཡང་དག་པར་སྐྱེ་བ་མེད་དེ། དེ་བས་ན་དེ་བཞིན་
གཤེགས་པ་ནི་རྟག་པ་གནས་པའི་ཆོས་ཅན་ཏེ། ཀ་ལན་ད་ཀ་དང་བྱ་ངུར་པ་ལྟ་བུའོ། །རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན་གང་ཟག་དག་ཟླ་བ་སྤྲིན་གྱིས་ཆོད་དེ་མི་སྣང་ན། ཟླ་བ་ནུབ་བོ་སྙམ་སེམས་
ཏེ། ཡང་དག་པར་ན་ཟླ་བ་ལ་ནུབ་པ་མེད་དོ། །གླིང་གཞན་དུ་ཤར་བ་ན་དེ་ན་གནས་པའི་སེམས་ཅན་དག་ནི་ཟླ་བ་ཤར་ཏོ་སྙམ་སེམས་ཏེ། ཡང་དག་པར་ན་ཟླ་བ་ལ་ཤར་བ་མེད་དོ། །དེ་ཅིའི་ཕྱིར་ཞེ་ན། རི་རབ་ལྷུན་པོས་

47-1-146a

སྒྲིབས་ཏེ་མི་སྣང་གི། ཟླ་བ་ལ་ཤར་བ་འམ་ནུབ་པ་ཞེས་བྱ་བ་མེད་དོ། །དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཀྱང་དེ་དང་འདྲ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་
གཤེགས་པ་འཛམ་བུའི་གླིང་དུ་ཕ་དང་མ་ཡང་ཡོད་པར་བསྟན་ནས་སོ་སོའི་སྐྱེ་བོ་དག་ནི་དེ་བཞིན་གཤེགས་པ་འཛམ་བུའི་གླིང་དུ་བྱུང་ངོ་སྙམ་སེམས་སོ། །འཛམ་བུའི་གླིང་དུ་མྱ་ངན་ལས་འདས་པ་ཡང་བསྟན་ཏེ། དེ་བཞིན་
གཤེགས་པ་ཡང་དག་པར་མྱ་ངན་ལས་འདས་པ་མེད་ཀྱང་། སེམས་ཅན་དག་ནི་དེ་བཞིན་གཤེགས་པ་མྱ་ངན་ལས་འདས་སོ་སྙམ་སེམས་ཏེ། ཇི་ལྟར་ཟླ་བ་ལ་ནུབ་པའི་དཔེ་བཤད་པ་བཞིན་ནོ། །རིགས་ཀྱི་བུ་དེ་བཞིན་
གཤེགས་པ་ཉིད་ལ་ཡང་ཡང་དག་པར་ན་སྐྱེ་བ་དང་འགོག་པ་མེད་དེ་སེམས་ཅན་གདུལ་བའི་ཕྱིར་སྐྱེ་བ་དང་འགོག་པ་བསྟན་ཏོ། །རིགས་ཀྱི་བུ་དཔེར་ན་ཟླ་བ་ཁམས་འདི་དག་ཏུ་ཡོངས་སུ་རྒྱས་པར་སྣང་ན་ཁམས་གཞན་ན་
ཕྱེད་དུ་སྣང་ངོ་། །ཁམས་འདི་ན་ཕྱེད་དུ་སྣང་ན་ཁམས་གཞན་ན་རྒྱས་པར་སྣང་ངོ་། །འཛམ་བུའི་གླིང་གི་མི་དག་ཟླ་བ་ཐོག་མ་ཤར་བ་མཐོང་ན་ཚེས་གཅིག་ཅེས་ཟེར་ཏེ། ཟླ་བ་ཚེས་པའི་འདུ་ཤེས་སྐྱེད་དོ། །ཟླ་བ་རྒྱས་ཤིང་
གང་བ་མཐོང་ན་ཚེས་བཅྭ་ལྔ་ཞེས་ཟེར་ཏེ་ཟླ་བ་རྒྱས་པའི་འདུ་ཤེས་སྐྱེད་དོ། །ཡང་དག་པར་ན་ཟླ་བ་ཉིད་ལ་ནི་སྐྱེ་བ་དང་འབྲི་བ་མེད་དེ། རི་རབ་ལྷུན་པོའི་དབང་གིས་ནི་སྐྱེ་བ་དང་འབྲི་བ་ཡང་ཡོད་དོ། །རིགས་ཀྱི་བུ་དེ་བཞིན་
གཤེགས་པ་ཡང་དེ་དང་འདྲ་སྟེ། འཛམ་བུའི་གླིང་འདིར་ཐོག་མ་སྐྱེ་བ་ཡང་བསྟན། མྱ་ངན་ལས་འདས་པ་ཡང་བསྟན་ཏེ། ཐོག་མ་སྐྱེ་བ་བསྟན་པ་ནི་ཟླ་བ་ཚེས་པ་དང་འདྲའོ། །ཐམས་ཅད་ཀྱིས་གཞོན་ནུ་ཐོག་མ་བཙས་ནས་
གོམ་པ་བདུན་བོར་བ་ན་ཚེས་གཉིས་ཀྱི་ཟླ་བ་ལྟ་བུར་སེམས་སོ། །དེ་ནས་གཞོན་ནུ་སློབ་པ་ལ་ཞུགས་པ་བསྟན་པ་ན་ཚེས་གསུམ་གྱི་ཟླ་བ་ལྟ་བུར་སེམས་སོ། །རབ་ཏུ་བྱུང་བ་བསྟན་པ་ན་ཚེས་བརྒྱད་ཀྱི་ཟླ་བ་ལྟ་བུར་

47-1-146b

སེམས་སོ། །ཡེ་ཤེས་ཀྱི་འོད་ཆེན་པོ་བཏང་ནས་སེམས་ཅན་ཚད་མེད་པ་དང་བདུད་མང་པོ་བཏུལ་བ་ན་ཚེས་བཅྭ་ལྔའི་ཟླ་བ་རྒྱས་པ་ལྟ་བུར་སེམས་སོ། །གཞན་ཡང་མཚན་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱད་
བཅུས་ཡོངས་སུ་བརྒྱན་པ་མྱ་ངན་ལས་འདས་པ་བསྟན་པ་ན་ཟླ་བ་བྲི་བ་ལྟ་བུར་སེམས་སོ། །དེ་ལྟར་སེམས་ཅན་དག་ནི་མཐོང་བ་མི་འདྲ་སྟེ། ལ་ལས་ནི་ཟླ་བ་ཕྱེད་རལ་དུ་མཐོང་། ལ་ལས་ནི་ཟླ་བ་རྒྱས་པར་མཐོང་། ལ་ལས་ནི་
ཟླ་བ་འབྲི་བར་མཐོང་སྟེ། ཟླ་བའི་རང་བཞིན་ལ་ནི་ཡང་དག་པར་ན་སྐྱེ་བ་དང་འབྲི་བ་མེད་དེ། རྟག་ཏུ་རྒྱས་ཤིང་གང་ངོ་། །དེ་བཞིན་གཤེགས་པ་ཡང་དེ་དང་འདྲ་སྟེ། དེ་བས་ན་རྟག་པ་གནས་པ་མི་འགྱུར་བ་ཞེས་བྱའོ། །རིགས་
ཀྱི་བུ་གཞན་ཡང་འདི་ལྟ་སྟེ་དཔེར་ན་ཟླ་བ་རྒྱས་པ་ནི་གནས་གང་དང་གང་དུ་གྲོང་ཁྱེར་རམ། གྲོང་རྡལ་ལམ། རི་འམ། འབྲོག་གམ། ཆུ་འམ། ཁྲོན་པ་འམ། རྫིང་ངམ། གཞོང་པ་འམ། གནས་ཐམས་ཅད་དུ་སྣང་སྟེ། 
སེམས་ཅན་གང་དཔག་ཚད་གཅིག་གམ། དཔག་ཚད་བརྒྱ་སྟོང་གི་བར་དུ་སོང་ཡང་ཟླ་བ་དེ་བཞིན་དུ་མཐོང་སྟེ། དེ་ལ་བུས་པ་གླེན་པ་དག་འདི་སྙམ་དུ་སེམས་ཏེ། བདག་གི་ཁྱིམ་ན་འདུག་པ་ན་ཟླ་བ་འདི་མཐོང་ན་ད་འབྲོག་
དགོན་པ་འདིར་ཡང་མཐོང་བ་འདི་ཟླ་བ་སྔོན་མཐོང་བ་དེ་ཡིན་ནམ་མ་ཡིན་སྙམ་སེམས་སོ། །དེ་ལ་དེ་དག་ཆེ་ཆུང་གི་ཚད་ཀྱང་དཔྱོད་དེ། ལ་ལ་ནི་ཟངས་ཀྱི་ཁ་ཁོར་ཙམ་མོ་ཞེས་ཟེར་རོ། །ལ་ལ་ནི་ཤིང་རྟའི་འཁོར་ལོ་ཙམ་མོ་ཞེས་
ཟེར་རོ། །ལ་ལ་ནི་དཔག་ཚད་བཞི་བཅུ་རྩ་དགུ་ཡོད་དོ་ཞེས་ཟེར་རོ། །ཐམས་ཅད་ཀྱིས་ཟླ་བའི་འོད་མཐོང་ཡང་ལ་ལ་ནི་ཟླུམ་པོ་གསེར་གྱི་གཞོང་པ་ལྟ་བུར་མཐོང་སྟེ། དེ་ལྟར་ཟླ་བའི་རང་བཞིན་གཅིག་ཀྱང་སེམས་ཅན་
རྣམ་པ་ཐ་དད་པས་སྣ་ཚོགས་སུ་རྣམ་པ་ཐ་དད་པར་འདུ་ཤེས་སོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། འཇིག་རྟེན་དུ་མངོན་པར་གཤེགས་ནས་དེ་ལ་ལྷ་དང་མི་ཁ་ཅིག་ནི་འདི་སྙམ་དུ། དེ་བཞིན་

47-1-147a

གཤེགས་པ་འདི་བདག་འབའ་ཤིག་གི་མིག་སྔ་ན་བཞུགས་སོ་སྙམ་སེམས་སོ། །སེམས་ཅན་ཁ་ཅིག་ཀྱང་འདི་སྙམ་དུ་དེ་བཞིན་གཤེགས་པ་ནི་བདག་འབའ་ཤིག་གི་མིག་སྔ་ན་སྣང་ངོ་སྙམ་སེམས་སོ། །སེམས་
ཅན་འོན་པ་དང་། ལྐུགས་པ་ཁ་ཅིག་ནི་དེ་བཞིན་གཤེགས་པ་ཡང་འོན་ཏམ་ལྐུགས་སྙམ་སེམས་སོ། །སེམས་ཅན་སྐད་རྣམ་པ་སྣ་ཚོགས་མི་མཐུན་པ་ཡང་སོ་སོ་ན་དེ་བཞིན་གཤེགས་པ་ནི་བདག་གི་སྐད་དུ་གསུངས་སོ་
སྙམ་སེམས་སོ། །སོ་སོ་ནས་བདག་འབའ་ཤིག་གི་ཁྱིམ་དུ་གཤེགས་ཏེ། བདག་འབའ་ཞིག་གི་མཆོད་པ་བཞེས་སོ་སྙམ་སེམས་སོ། །སེམས་ཅན་ལ་ལས་ནི་དེ་བཞིན་གཤེགས་པའི་སྐུ་ཚད་མེད་པར་རྒྱ་ཆེན་པོར་
མཐོང་ངོ་། །ལ་ལས་ནི་སྐུ་རབ་ཏུ་ཆུང་ངུར་མཐོང་ངོ་། །ལ་ལས་ནི་ཉན་ཐོས་ཀྱི་གཟུགས་ལྟ་བུར་མཐོང་ངོ་། །ལ་ལས་ནི་རང་སངས་རྒྱས་ཀྱི་གཟུགས་ལྟ་བུར་མཐོང་ངོ་། །མུ་སྟེགས་ཅན་ཁ་ཅིག་ནི་འདི་སྙམ་དུ་དེ་བཞིན་
གཤེགས་པ་ནི་བདག་གི་ཆོས་ཀྱིས་རབ་ཏུ་འབྱུང་སྟེ། སློབ་པ་ལ་ཞུགས་སོ་སྙམ་སེམས་སོ། །སེམས་ཅན་ལ་ལ་ནི་འདི་སྙམ་དུ་དེ་བཞིན་གཤེགས་པ་བདག་འབའ་ཤིག་གི་ཕྱིར་འཇིག་རྟེན་དུ་གཤེགས་སོ་
སྙམ་སེམས་སོ། །དེ་བཞིན་གཤེགས་པའི་རང་བཞིན་ཡང་དག་པ་ནི་ཟླ་བ་དང་འདྲ་སྟེ། ཆོས་ཀྱི་སྐུ་མི་སྐྱེ་བའི་སྐུ། ཐབས་ཀྱི་སྐུ་སྟེ། འཇིག་རྟེན་པའི་རྗེས་སུ་སྔོན་གྱི་ལས་རྣམ་པ་ཚད་མེད་པ་གནས་ཐམས་ཅད་དུ་སྐྱེ་
བ་བསྟན་པ་ནི་ཟླ་བ་དང་འདྲའོ། །དེ་བས་ན་དེ་བཞིན་གཤེགས་པ་ནི་རྟག་པ་གནས་པ་མི་འགྱུར་མི་འཕོ་བའོ། །རིགས་ཀྱི་བུ་གཞན་ཡང་ལྷ་མ་ཡིན་སྒྲ་གཅན་འཛིན་ལྟ་བུ་ལག་པས་ཟླ་བ་བཀབ་པ་ན་འཇིག་རྟེན་པ་
དག་ནི་ཟླ་བ་ཤིའོ་ཞེས་ཟེར་ཏེ་ཡང་དག་པར་ན་ལྷ་མ་ཡིན་གྱི་རྒྱལ་པོས་ཟླ་བ་བསད་པ་མ་ཡིན་གྱི་སྣང་བ་སྒྲིབས་སུ་ཟད་དོ། །ཟླ་བ་རྒྱས་པ་ལ་འབྲི་བ་མེད་ཀྱི་ལག་པས་བསྒྲིབས་པས་མི་སྣང་བར་ཟད་དོ། །ཕྱིར་ལག་

47-1-147b

པ་བསྐུམས་ན་འཇིག་རྟེན་པ་དག་ནི་ཟླ་བ་ཕྱིར་སྐྱེས་སོ་ཞེས་ཟེར་ཏེ། ཟླ་བ་འདི་ནི་སྡུག་བསྔལ་ཡང་མྱོང་ངོ་ཞེས་ཟེར་རོ། །གལ་ཏེ་ལྷ་མ་ཡིན་བརྒྱ་སྟོང་སྙེད་ཚོགས་ཀྱང་ཟླ་བ་ལ་ནི་གནོད་པ་བྱེད་མི་ནུས་སོ། །དེ་བཞིན་
གཤེགས་པ་ཡང་དེ་དང་འདྲ་སྟེ་སེམས་ཅན་ཁ་ཅིག་དེ་བཞིན་གཤེགས་པ་ལ་སྡིག་པའི་སེམས་བསྐྱེད་དེ་སངས་རྒྱས་ཀྱི་སྐུ་ལ་ཁྲག་ཕྱུང་བ་དང་། མཚམས་མེད་པ་ལྔ་བྱས་པ་དང་། ལོག་སྲེད་ཀྱི་བར་དུ་བྱས་པ་བསྟན་པ་
ཡང་ཕྱི་མ་མ་འོངས་པའི་སེམས་ཅན་དགེ་འདུན་དང་ཆོས་འཇིག་ཅིང་མ་རུང་བ་བྱེད་པའི་ཕྱིར་བསྟན་པར་ཟད་ཀྱི། གལ་ཏེ་བདུད་ཚད་མེད་བརྒྱ་སྟོང་སྙེད་ཚོགས་ཀྱང་དེ་བཞིན་གཤེགས་པའི་སྐུ་ལ་ཁྲག་མི་ཕྱིན་ཏོ། །
དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྐུ་ལ་ནི་ཤ་དང་། ཁྲག་དང་། ཆུ་བ་དང་། རྩ་དང་། རྐང་དང་། རུས་པ་མེད་པའི་ཕྱིར་རོ། །དེ་བཞིན་གཤེགས་པ་ནི་ཡང་དག་པར་ན་འཁྲུག་པ་འམ་འཇིག་པ་མེད་དེ་སེམས་ཅན་དག་
ནི་ཆོས་དང་དགེ་འདུན་འཇིག་པ་དང་། དེ་བཞིན་གཤེགས་པ་ཡང་མེད་པར་འགྱུར་རོ་སྙམ་སེམས་སོ། །དེ་བཞིན་གཤེགས་པའི་ཡང་དག་པའི་རང་བཞིན་ནི་འགྱུར་བ་འམ་འཇིག་པ་མེད་དེ་འཇིག་རྟེན་པའི་རྗེས་སུ་དེ་
ཡང་བསྟན་ཏོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་མི་གཉིས་ཤིག་འཐབས་ན་མཚོན་བཏབ་སྟེ་ལུས་ལ་ཁྲག་བྱུང་ངམ། ཤི་བར་གྱུར་ཀྱང་གསོད་པའི་འདུ་ཤེས་མ་བསྐྱེད་པས་ལས་དེའི་མཚན་ཉིད་དེ་ནི་ཡང་གི། 
ལྕི་བ་མ་ཡིན་ནོ། །དེ་བཞིན་གཤེགས་པ་ལ་ཡང་ཐོག་མ་ནས་གསོད་པའི་སེམས་མེད་ན་སྐུ་ལ་ཁྲག་བྱུང་ན་ལས་ཀྱི་མཚན་ཉིད་དེ་ནི་ཡང་གི། ལྕི་བ་མ་ཡིན་ནོ། །དེ་ལྟར་ན་དེ་བཞིན་གཤེགས་པས་མ་འོངས་པའི་སེམས་
ཅན་དག་གདུལ་བའི་ཕྱིར་ལས་ཀྱི་འབྲས་བུ་རྣམ་པར་སྨིན་པ་བསྟན་ཏོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་པ་མཁས་པ་ནི་བརྩོན་འགྲུས་བསྐྱེད་དེ་བུ་དེ་ལ་སྨན་སྟོན་ཏོ། །འདི་ནི་རྩ་བའི་སྨན། འདི་ནི་དྲིའི་སྨན། 

47-1-148a

འདི་ནི་ཁ་དོག་གི་སྨན་ཏེ་རྣམ་པ་སྣ་ཚོགས་ཐ་དད་ཀྱིས་ཁྱོད་ལེགས་པར་ཤེས་པར་གྱིས་ཤིག་ཅེས་སྟོན་ན་བུ་ཡང་ཕས་བསྒོ་བ་བཞིན་དུ་བརྩོན་འགྲུས་སུ་སློབ་སྟེ་སྨན་ལ་མཁས་པར་བྱེད་དོ། །ཕྱིས་སྨན་པ་དེ་ཚེའི་
དུས་བྱས་ཏེ་ཤི་ན་སྨན་པའི་བུ་དེ་འདི་སྐད་དུ་ཕས་བདག་ལ་རྩ་བའི་སྨན་དང་། སྡོང་བུའི་སྨན་དང་། མེ་ཏོག་གི་སྨན་དང་། ཁ་དོག་གི་སྨན་འདི་ཡིན་ནོ་སྙམ་བསྟན་པར་དྲན་ནོ། །དེ་བཞིན་གཤེགས་པ་ཡང་དེ་དང་འདྲ་སྟེ། སེམས་ཅན་
གདུལ་བའི་ཕྱིར་ཚུལ་ཁྲིམས་བཅས་ནས་འདི་ནི་ཚུལ་ཁྲིམས་སུ་གསུངས་སོ། །འདི་ནི་མཚམས་མེད་པ་ལྔ་དང་། དམ་པའི་ཆོས་ལ་དབང་སྐུར་ཅིང་དབང་ཟ་བ་དང་། འདི་ནི་ལོག་སྲེད་ཀྱི་ལས་ཡིན་གྱི་མ་བྱེད་ཅིག་ཅེས་མ་
འོངས་པའི་སྐྱེ་བོའི་ཕྱིར་དེ་དག་ཀྱང་བསྟན་པ་ཡིན་ནོ། །དེ་བས་ན་དགེ་སློང་དག་སངས་རྒྱས་ཡོངས་སུ་མྱ་ངན་ལས་འདས་པའི་འོག་ཏུ་ཤིན་ཏུ་ཟབ་མོའི་དོན་གྱི་མདོ་སྡེ་འདི་དག་ཡིན། ལྕི་བ་དང་ཡང་བའི་མཚན་ཉིད་དུ་གསུངས་
པའི་འདུལ་བ་ནི་འདི་དག་ཡིན། ཆོས་ཀྱི་ཚིག་རྣམ་པར་སྤྲོས་པ་ཆོས་མངོན་པ་ནི་འདི་ཡིན་ནོ་ཞེས་ཇི་ལྟར་སྨན་པ་མཁས་པས་བུ་ལ་སྨན་བསྟན་པ་བཞིན་དུ་མངོན་པར་བསྟན་ཏོ། །གཞན་ཡང་རིགས་ཀྱི་བུ་འཇིག་རྟེན་ན་མི་
དག་ནི་ཟླ་བ་དྲུག་ལ་ཟླ་བ་ལན་ཅིག་ཤི་བར་སེམས་སོ། །མཐོ་རིས་ཀྱི་ལྷ་དག་ནི་སྐད་ཅིག་ཙམ་གྱིས་ཟླ་བ་ཤི་བར་མཐོང་ངོ་། །དེ་ཅིའི་ཕྱིར་ཞེ་ན། ལྷའི་ཞག་ནི་རིང་ལ། མིའི་ཞག་ནི་ཐུང་བའི་ཕྱིར་རོ། །རིགས་ཀྱི་བུ་དེ་བཞིན་
གཤེགས་པ་ཡང་དེ་དང་འདྲ་སྟེ། ལྷ་དང་མི་རྣམས་ཀྱིས་ནི། དེ་བཞིན་གཤེགས་པའི་སྐུ་ཚེ་རབ་ཏུ་ཐུང་ངོ་སྙམ་སེམས་ཏེ། ཇི་ལྟར་ལྷ་དང་མི་དག་གིས་སྐད་ཅིག་ཐང་ཅིག་གིས་ཟླ་བ་ཤི་བར་མཐོང་བ་བཞིན་ནོ། །དེ་བཞིན་
གཤེགས་པས་ནི་གཞན་ཡང་སྐད་ཅིག་ཐང་ཅིག་གིས་མྱ་ངན་ལས་འདས་པ་ཁྲི་ཕྲག་བརྒྱ་སྟོང་སྟོན་ཅིང་ཉོན་མོངས་པའི་བདུད་དང་། ཕུང་པོའི་བདུད་དང་། འཆི་བདག་གི་བདུད་དང་། ལྷའི་བུའི་བདུད་ལ་སོགས་པ་བཅོམ་

47-1-148b

པ་བསྟན་པས་ན་ལྷའི་བདུད་ཁྲི་ཕྲག་བརྒྱ་སྟོང་སྙེད་ཀྱིས་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་ཤེས་སོ། །གཞན་ཡང་སྔོན་གྱི་ལས་དང་རྒྱུ་དང་རྐྱེན་ཁྲི་ཕྲག་བརྒྱ་སྟོང་སྙེད་འཇིག་རྟེན་གྱི་མཚན་ཉིད་རྣམ་པ་ཐ་དད་པ་
བཞིན་དུ་སྟོན་ཏེ། དེ་ལྟར་ཚད་མེད་མཐའ་ཡས་བསམ་གྱིས་མི་ཁྱབ་པས་ན་དེ་བཞིན་གཤེགས་པ་ནི་རྟག་པ་གནས་པ་མི་འགྱུར་བའོ། །གཞན་ཡང་རིགས་ཀྱི་བུ་འདི་ལྟ་སྟེ་དཔེར་ན་ཟླ་བ་གསལ་བ་ལ་ནི་འགྲོ་བ་ཐམས་ཅད་
བལྟ་འདོད་པའི་ཕྱིར་དེ་བས་ན་ཟླ་བ་བལྟ་ན་དགའ་བ་ཞེས་བྱའོ། །སེམས་ཅན་ནི་འདོད་ཆགས་དང་ཞེ་སྡང་དང་གཏི་མུག་ཏུ་བཅས་པས་བལྟ་ན་དགའ་བ་ཞེས་མི་བྱའོ། །དེ་བཞིན་གཤེགས་པ་ནི་ཡོངས་སུ་དག་པ་དྲི་མ་མེད་
པ་མཆོག་དང་ཕུལ་དུ་གྱུར་པ་ཡིན་པས་བལྟ་ན་དགའ་བ་ཞེས་བྱའོ། །གང་ཆོས་ལ་མོས་པའི་སྐྱེ་བོ་དག་ནི་བལྟ་བ་དག་ལ་དགའ་བ་མི་སྐྱེའོ། །གང་མི་དགེ་བ་དག་ནི་མཐོང་བར་ཡང་མི་འདོད་དོ། །དེ་བས་ན་དེ་བཞིན་གཤེགས་པ་ནི་
དཔེར་ན་ཟླ་བ་གསལ་བ་དང་འདྲའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཉི་མ་ཤར་བ་དང་འདྲ་བ་ལ་དཔྱིད་དང་དབྱར་དང་དགུན་ལྟ་བུ་དུས་གསུམ་ཐ་དད་དེ་དགུན་ནི་ཉི་མ་ཐུང་ལ། དབྱར་ནི་ཉི་མ་རིང་སྟེ་དཔྱིད་ནི་རིང་བ་ཡང་
མ་ཡིན་ཐུང་བ་ཡང་མ་ཡིན་ནོ། །དེ་བཞིན་གཤེགས་པ་ཡང་དེ་དང་འདྲ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་སྐུ་ཚེ་རབ་ཏུ་ཐུང་ལ་ཉན་ཐོས་རྣམས་ལ་ཡང་སྐུ་ཚེ་རབ་ཏུ་ཐུང་བ་བསྟན་པས་དེ་དག་
ཐམས་ཅད་ནི་དེ་བཞིན་གཤེགས་པའི་སྐུ་ཚེ་རབ་ཏུ་ཐུང་བར་སེམས་ཏེ། དཔེར་ན་དགུན་གྱི་ཉི་མ་དང་འདྲའོ། །བྱང་ཆུབ་སེམས་དཔའ་རྣམས་ལ་ནི་རིང་བ་ཡང་མ་ཡིན། ཐུང་བ་ཡང་མ་ཡིན་པ་བསྐལ་པ་གཅིག་གམ། 
བསྐལ་པ་གཅིག་འགྲིབས་ཀྱི་བར་དུ་བསྟན་ཏེ་ཇི་ལྟར་དཔྱིད་ཀྱི་ཉི་མ་བཞིན་ནོ། །སངས་རྒྱས་རྣམས་ཀྱིས་ནི་སངས་རྒྱས་ཀྱི་སྐུ་ཚེ་ཚད་མེད་པར་གཟིགས་ཏེ། ཇི་ལྟར་དབྱར་གྱི་ཉི་མ་བཞིན་ནོ། །རིགས་ཀྱི་བུ་

47-1-149a

དེ་བཞིན་གཤེགས་པས་གསུངས་པ་ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་འཇིག་རྟེན་དུ་བསྟན་ཏེ། ཆོས་ཆེན་པོའི་ཆར་ཕབ་པ་མ་འོངས་པའི་དུས་སུ་སྐྱེས་བུ་གང་ཞིག་མདོ་སྡེ་འདི་སྲུང་ངམ་འཛིན་ཏམ། རྣམ་
པར་འབྱེད་ཅིང་བསྟན་ཏེ་སེམས་ཅན་ལ་ཕན་པའི་དོན་བྱེད་ན་དེ་བྱང་ཆུབ་སེམས་དཔའ་ཡང་དག་པ་ཡིན་པར་རིག་པར་བྱ་སྟེ། དཔེར་ན་དབྱར་གྱི་དུས་སུ་ཆར་བབ་པ་དང་མཚུངས་སོ། །དེ་ལ་ཉན་ཐོས་དང་རང་སངས་རྒྱས་ཀྱིས་དེ་
བཞིན་གཤེགས་པས་དགོངས་ཏེ་གསུངས་པ་བསྟན་པ་འདི་ཐོས་ནས་དཔེར་ན་དགུན་གྱི་དུས་དང་མཚུངས་ཏེ། གྲང་བ་དང་ལྷགས་པ་ཆེན་པོ་དང་ཕྲད་དོ། །བྱང་ཆུབ་སེམས་དཔས་དགོངས་ཏེ་གསུངས་པ་དེ་བཞིན་གཤེགས་
པ་རྟག་པ་དང་མི་འགྱུར་བ་བསྟན་པ་འདི་ཐོས་ན་དཔྱིད་ཀྱི་དུས་སུ་མྱུ་གུ་ཐམས་ཅད་འབྱུང་བ་དང་མཚུངས་སོ། །དེ་བཞིན་གཤེགས་པའི་རང་བཞིན་ལ་རིང་ཐུང་ཞེས་བྱ་བ་མེད་དོ། །འཇིག་རྟེན་པའི་ཕྱིར་དེ་དག་བསྟན་
ཀྱང་དེ་ནི་སངས་རྒྱས་ཀྱི་ཡང་དག་པའི་ཆོས་ཉིད་དོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྐར་མ་ཐམས་ཅད་ཉིན་པར་མི་སྣང་སྟེ། གང་ཟག་གླེན་པ་དག་ནི་སྐར་མ་ནུབ་སྟེ་མེད་པར་སོང་ངོ་སྙམ་སེམས་སོ། །
ཡང་དག་པར་མེད་པ་ནི་མ་ཡིན་གྱི། ཉི་མའི་འོད་ཀྱིས་མི་སྣང་བར་ཟད་དོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཉན་ཐོས་དང་རང་སངས་རྒྱས་ཀྱིས་མི་མཐོང་བ་ནི། ཇི་ལྟར་འཇིག་རྟེན་པ་དག་གིས་ཉིན་པར་
སྐར་མ་མི་མཐོང་བ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ནམ་རྨུས་པའི་ཚེ་ཉི་མ་དང་ཟླ་བ་མི་སྣང་ན་བུས་པ་གླེན་པ་དག་ནི་ཉི་མ་དང་ཟླ་བ་མེད་པར་སོང་ངོ་སྙམ་སེམས་ཏེ། ཡང་དག་པར་ན་ཉི་མ་དང་
ཟླ་བ་མེད་པར་མ་སོང་ངོ་། །དེ་བཞིན་གཤེགས་པའི་དམ་པའི་ཆོས་མེད་པར་སོང་བ་ན་དཀོན་མཆོག་གསུམ་མངོན་སུམ་དུ་མི་སྣང་བ་ཡང་དེ་དང་འདྲ་སྟེ། དེ་བཞིན་དུ་གཏན་མེད་པར་སོང་བ་ནི་མ་ཡིན་ནོ། །དེ་བས་ན་

47-1-149b

དེ་བཞིན་གཤེགས་པ་ནི་རྟག་པ་མི་འགྱུར་མི་འཕོ་བར་རིག་པར་བྱའོ། །དེ་ཅིའི་ཕྱིར་ཞེ་ན། དཀོན་མཆོག་གསུམ་གྱི་ཡང་དག་པ་ཉིད་ལ་ནི་དྲི་མས་མི་གོས་པའི་ཕྱིར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཟླ་བ་
ཤི་བའི་ནུབ་མོ་ནི་སྐར་མ་ཕོད་ཤར་ན་ཤིན་ཏུ་གསལ་ཏེ། དེ་མ་ཐག་ཏུ་ཕྱིར་ཡང་ནུབ་བོ། །འཇིག་རྟེན་པ་དག་མཐོང་ན་བཀྲ་མི་ཤིས་སོ་ཞེས་ཟེར་རོ། །སངས་རྒྱས་ཀྱང་དེ་དང་འདྲ་སྟེ། སངས་རྒྱས་མེད་པའི་འཇིག་རྟེན་དུ་འབྱུང་
བས་སོ་སོའི་སྐྱེ་བོ་དག་གིས་མཐོང་ན་ཐམས་ཅད་ཀྱིས་དེ་བཞིན་གཤེགས་པ་ཡང་དག་པར་མྱ་ངན་ལས་འདས་སོ་སྙམ་སེམས་ཏེ་མྱ་ངན་བྱེད་དོ། །དེ་བཞིན་གཤེགས་པ་ནི་ཡང་དག་པར་ན་མེད་པར་མ་གྱུར་ཏེ། ཇི་ལྟར་ཉི་མ་
དང་ཟླ་བ་མི་སྣང་བ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཉི་མ་ཤར་ན་ལྷོ་བུར་མེད་པར་འགྱུར་རོ། །ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ཡང་དེ་དང་འདྲ་སྟེ། འཇིག་རྟེན་དུ་བྱུང་བས་གལ་ཏེ་
སེམས་ཅན་གྱི་རྣ་ཁུང་དུ་ཐོས་ན་མི་དགེ་བ་ཐམས་ཅད་དང་མཚམས་མེད་པའི་ཁ་ན་མ་ཐོ་བའི་ལས་ཐམས་ཅད་སེལ་བར་འགྱུར་རོ། །ཡོངས་སུ་མྱ་ངན་ལས་འདས་པ་ཤིན་ཏུ་ཟབ་མོའི་སྤྱོད་ཡུལ་འདི་ནི་བསམ་གྱིས་
མི་ཁྱབ་སྟེ། དེ་བཞིན་གཤེགས་པའི་རང་བཞིན་ལེགས་པར་གསུངས་པས་དེའི་ཕྱིར་ན་རིགས་ཀྱི་བུ་དང་རིགས་ཀྱི་བུ་མོ་དག་དེ་བཞིན་གཤེགས་པ་ལ་རྟག་པ་དང་མི་འགྱུར་མི་འཕོ་བ་དང་། དམ་པའི་ཆོས་ཀྱང་རྒྱུན་མི་འཆད་
པ་དང་། དགེ་འདུན་ཡང་མེད་པར་མི་འགྱུར་བའི་སེམས་བསྐྱེད་དོ། །དེ་བས་ན་ཤིན་ཏུ་ཐབས་མཁས་པས་མདོ་སྡེ་འདི་ལ་བརྩོན་འགྲུས་སུ་ནན་ཏན་བྱས་ན་སྐྱེས་བུ་དེ་ནི་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཐོབ་པར་འགྱུར་རོ། །དེ་བས་ན་མདོ་སྡེ་འདི་ནི་ཚད་མེད་པའི་ཡོན་ཏན་ལྷུན་གྱིས་གྲུབ་པ་ཞེས་ཀྱང་བྱ། བྱང་ཆུབ་ཟད་མི་ཤེས་པ་ཞེས་ཀྱང་བྱ་སྟེ། ཟད་མི་ཤེས་པས་ན་ཡོངས་སུ་མྱ་ངན་ལས་འདས་པ་

47-1-150a

ཆེན་པོ་ཞེས་གདགས་སོ། །ཤིན་ཏུ་འོད་དང་ལྡན་པས་དབྱར་གྱི་ཉི་མ་དང་མཚུངས་སོ། །ཚོགས་མཐའ་ཡས་པས་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་ཉི་ཟླའི་འོད་
ནི་འོད་སྣང་བ་ཐམས་ཅད་ཀྱི་མཆོག་གོ། །མྱ་ངན་ལས་འདས་པ་ཆེན་པོའི་འོད་ཀྱང་དེ་དང་འདྲ་སྟེ། མདོ་སྡེའི་ཏིང་ངེ་འཛིན་ཀྱི་མཆོག་ཐམས་ཅད་པས་མཆོག་སྟེ། མདོ་སྡེའི་ཏིང་ངེ་འཛིན་གྱི་འོད་ཐམས་ཅད་ཀྱིས་ཉེ་བ་མ་ཡིན་
ནོ། །དེ་ཅིའི་ཕྱིར་ཞེ་ན། ཡོངས་སུ་མྱ་ངན་ལས་འདས་པའི་འོད་འདི་ནི་སེམས་ཅན་དག་གི་བ་སྤུའི་ཁུང་བུ་ཀུན་ཏུ་འཇུག་སྟེ། སེམས་ཅན་ལ་བྱང་ཆུབ་ཀྱི་སེམས་མེད་ཀྱང་། བྱང་ཆུབ་ཀྱི་རྒྱུར་འགྱུར་བར་བྱེད་པས་ན་
ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་བཅོམ་ལྡན་འདས་ཀྱིས་གསུངས་པ་ལྟར་ན་མྱ་ངན་ལས་འདས་པ་
ཆེན་པོའི་འོད་ཟེར་གྱིས་རེག་ན་སེམས་ཅན་ཐམས་ཅད་ཀྱི་བ་སྤུའི་བུ་གར་འཇུག་པས་སེམས་ཅན་དེ་དག་ལ་བྱང་ཆུབ་ཀྱི་སེམས་མ་མཆིས་ཀྱང་བྱང་ཆུབ་ཀྱི་རྒྱུར་འགྱུར་རོ་ཞེས་བགྱི་བ་དེ་མི་རུང་ངོ་། །དེ་ཅིའི་སླད་དུ་ཞེ་ན། 
བཅོམ་ལྡན་འདས་ཕས་ཕམ་པ་བཞི་འབྱུང་བ་དང་། མཚམས་མེད་པ་ལྔ་བགྱིས་པ་དང་། ལོག་སྲེད་ཀྱི་ལས་བགྱིས་པ་འོད་ཟེར་གྱིས་རེག་པས་བྱང་ཆུབ་ཀྱི་རྒྱུར་འགྱུར་ན་ལྟ་དེ་དག་དང་ཚུལ་ཁྲིམས་སྲུང་ཞིང་དགེ་བའི་ཚོགས་
ལ་སོགས་པ་ལ་ཁྱད་པར་ཡང་ཅི་མཆིས། གལ་ཏེ་ཁྱད་པར་ཞིག་མི་མཆིས་ན་དེ་བཞིན་གཤེགས་པས་གནས་པར་བགྱི་བའི་ཆོས་རྣམ་པ་བཞི་ཡང་ཅིའི་སླད་དུ་གསུངས། བཅོམ་ལྡན་འདས་བཅོམ་ལྡན་འདས་ཀྱིས་གསུངས་
པ་ལྟར། སེམས་ཅན་གང་མྱ་ངན་ལས་འདས་པ་ཆེན་པོའི་མདོ་སྡེ་རྣ་ཁུང་དུ་ཐོས་པས་ཉོན་མོངས་པ་ཐམས་ཅད་སེལ་བར་འགྱུར་ན། དེ་བཞིན་གཤེགས་པས་ཅིའི་སླད་དུ་སྔར་འདི་སྐད་དུ་གང་ཟག་དག་སྔོན་སངས་

47-1-150b

རྒྱས་ཀླུང་གང་གཱའི་བྱེ་མ་སྙེད་ལ་སེམས་བསྐྱེད་དེ། མྱ་ངན་ལས་འདས་པ་ཆེན་པོ་ཐོས་ཀྱང་དོན་ཤེས་པར་མ་གྱུར་ཏོ་ཞེས་གསུངས་སོ། །གལ་ཏེ་དོན་མི་འཚལ་ན་ཉོན་མོངས་པ་ཐམས་ཅད་ཇི་ལྟར་ཆོད་པར་འགྱུར། བཅོམ་ལྡན་
འདས་ཀྱིས་བཀའ་སྩལ་པ། རིགས་ཀྱི་བུ་ལོག་སྲེད་ཅན་མ་གཏོགས་པར་སེམས་ཅན་གཞན་དག་མདོ་སྡེ་འདི་ཐོས་ན་ཐམས་ཅད་ཀྱི་བྱང་ཆུབ་ཀྱི་རྒྱུར་འགྱུར་ཏེ། ཆོས་ཀྱི་སྒྲའི་འོད་ཟེར་བ་སྤུའི་བུ་གར་ཞུགས་ན་གདོན་
མི་ཟ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་རོ། །དེ་ཅིའི་ཕྱིར་ཞེ་ན། སྐྱེས་བུ་གང་ཞིག་སངས་རྒྱས་ཚད་མེད་པ་སྙེད་ལ་བསྙེན་བཀུར་བ་དང་། མཆོད་པ་དང་། ཕྱག་བྱས་ན་ཡོངས་སུ་མྱ་ངན་
ལས་འདས་པ་ཆེན་པོའི་མདོ་སྡེ་ཐོས་ཏེ། བསོད་ནམས་ཆུང་ངུ་རྣམས་ཀྱིས་ནི་ཐོས་པར་འགྱུར་བ་མ་ཡིན་ནོ། །དེ་ཡང་ཇི་ལྟ་ཞེ་ན། གང་ཡོན་ཏན་ཆེན་པོ་དང་ལྡན་པ་དག་ནི་དོན་ཆེན་པོ་འདི་ཐོས་པར་འགྱུར་གྱི་ཞན་པ་ཆུང་ངུ་
རྣམས་ཀྱིས་ཐོས་པར་མི་འགྱུར་རོ། །དེ་ལ་དོན་ཆེན་པོ་ཞེས་བྱ་བ་ནི་སངས་རྒྱས་རྣམས་ཀྱི་ཤིན་ཏུ་ཟབ་པའི་གསང་བའི་སྙིང་པོ་སངས་རྒྱས་ཀྱི་རང་བཞིན་ལ་བྱ་སྟེ། དེ་བས་ན་དོན་ཆེན་པོ་ཞེས་བྱའོ། །བྱང་ཆུབ་སེམས་
དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཇི་ལྟར་ན་བྱང་ཆུབ་ཏུ་སེམས་མ་བསྐྱེད་པ་དག་བྱང་ཆུབ་ཀྱི་རྒྱུར་འགྱུར་ཞེས་བགྱི། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། 
གང་ཞིག་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ཐོས་ནས་འདི་སྐད་དུ་བདག་ནི་བྱང་ཆུབ་ཏུ་སེམས་བསྐྱེད་མི་དགོས་སོ་ཞེས་དམ་པའི་ཆོས་ལ་སྐུར་ན་མི་དེ་རྨི་ལམ་ན་སྲིན་པོའི་གཟུགས་མཐོང་སྟེ་ཤིན་ཏུ་སྐྲག་
པར་ཡང་འགྱུར་ལ། སྲིན་པོ་དེ་འདི་སྐད་དུ་ཀྱེ་རིགས་ཀྱི་བུ་ཁྱོད་ད་གལ་ཏེ་བྱང་ཆུབ་ཏུ་སེམས་མ་བསྐྱེད་ན་ཁྱོད་ཀྱི་འཚོ་བའི་སྲོག་བཅད་དོ་ཞེས་སྨྲས་པས་མི་དེ་སྐྲག་བཞིན་དུ་སད་ནས་བྱང་ཆུབ་ཏུ་སེམས་སྐྱེད་པར་འགྱུར་རོ། །

47-1-151a

སྐྱེས་བུ་དེ་ཚེ་འཕོས་ནས་གལ་ཏེ་ངན་སོང་གསུམ་དུ་ལྟུང་ངམ། མི་དང་མཐོ་རིས་ཀྱི་ལྷར་སྐྱེས་ཀྱང་བྱང་ཆུབ་ཀྱི་སེམས་ཀྱི་རྒྱུན་མི་ཆད་དེ་དྲན་པས་ན་གང་ཟག་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་
ཡིན་པར་རིག་པར་བྱའོ། །དོན་དེ་ལྟ་བས་ན་མྱ་ངན་ལས་འདས་པ་ཆེན་པོའི་བྱིན་དང་ཤུགས་ཀྱིས་བྱང་ཆུབ་ཏུ་སེམས་མ་བསྐྱེད་པའི་བྱང་ཆུབ་ཀྱི་རྒྱུར་འགྱུར་བ་ཞེས་བྱའོ། །རིགས་ཀྱི་བུ་དེ་ནི་བྱང་ཆུབ་སེམས་དཔའི་
སེམས་བསྐྱེད་པའི་རྒྱུ་དང་རྐྱེན་ཞེས་བྱ་སྟེ། རྒྱུ་དང་རྐྱེན་མེད་པ་ནི་མ་ཡིན་ནོ། །དེ་བས་ན་ཐེག་པ་ཆེན་པོའི་མདོ་སྡེ་དམ་པ་འདི་ནི་ཡང་དག་པར་སངས་རྒྱས་ཀྱིས་གསུངས་པའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་
ན་སྟེང་གི་ནམ་མཁའ་ལ་ཆར་སྤྲིན་གྱིས་ཁེབས་ཏེ་ཆར་པ་ཆེན་པོ་བབ་ན་ཤིང་སྐམ་འམ། བྲག་གམ། རི་མཐོན་པོ་ཆུ་མི་ཕྱིན་པའི་གནས་ཐམས་ཅད་དུ་ཡང་འབབ་སྟེ། ཤོང་བུ་དང་ས་དམའ་བ་ཀུན་ཆུས་ཡོངས་སུ་གང་ལ་
སེམས་ཅན་ཚད་མེད་པ་ཐམས་ཅད་ལ་ཕན་པའི་དོན་དུ་འགྱུར་རོ། །མྱ་ངན་ལས་འདས་པ་ཆེན་པོའི་མདོ་སྡེ་ཡང་དེ་དང་འདྲ་སྟེ། ཆོས་ཆེན་པོའི་ཆར་སེམས་ཅན་ཀུན་ལ་ཕབ་ཀྱང་། ལོག་སྲེད་ཅན་འབའ་ཞིག་ནི་བྱང་ཆུབ་ཀྱི་
སེམས་སྐྱེ་བའི་གནས་མེད་དོ། །རིགས་ཀྱི་བུ་དཔེར་ན་ས་བོན་ཚིག་པ་ནི་བསྐལ་པ་བརྒྱ་སྟོང་གི་བར་དུ་ཆར་གྱིས་ཡོངས་སུ་བརླན་ཀྱང་མྱུ་གུ་མི་སྐྱེ་སྟེ་སྐྱེ་བའི་གནས་མེད་དོ། །ལོག་སྲེད་ཅན་ཡང་དེ་དང་འདྲ་སྟེ། 
ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་དམ་པ་ཐོས་སུ་ཟིན་ཀྱང་བྱང་ཆུབ་ཀྱི་སེམས་ཀྱི་མྱུ་གུ་མི་སྐྱེ་སྟེ་སྐྱེ་བའི་གནས་མེད་དོ། །དེ་ཅིའི་ཕྱིར་ཞེ་ན། གང་ཟག་དེ་ནི་དགེ་བའི་རྩ་བ་ཐམས་ཅད་མེད་པར་བྱས་ཏེ་ས་
བོན་ཚིག་པ་དང་འདྲ་བར་གྱུར་པས་བྱང་ཆུབ་ཀྱི་རྩ་བ་དང་མྱུ་གུ་མི་སྐྱེའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ནོར་བུ་རིན་པོ་ཆེ་ཆུ་འདང་ལྟ་བུ་ཆུ་རྙོག་མ་ཅན་གྱི་ནང་དུ་བཅུག་ན་ནོར་བུའི་མཐུས་ཆུ་དང་བར་འགྱུར་གྱི་འཇིམ་

47-1-151b

པའི་ནང་དུ་བཅུག་ན་དང་བར་མི་འགྱུར་རོ། །མྱ་ངན་ལས་འདས་པ་ཆེན་པོའི་མདོ་སྡེ་དམ་པ་ཡང་དེ་དང་འདྲ་སྟེ། སེམས་ཅན་མཚམས་མེད་པ་ལྔ་བྱས་པ་དང་། ཕས་ཕམ་པ་བཞི་བྱུང་བའི་ཆུ་རྙོག་མ་ཅན་ལྟ་བུའི་ནང་དུ་བཅུག་ན་དག་
པར་འགྱུར་ཞིང་བྱང་ཆུབ་ཏུ་སེམས་སྐྱེ་ཡང་སྲིད་ཀྱི། ལོག་སྲེད་ཅན་འཇིམ་རྫབ་ལྟ་བུའི་ནང་དུ་ནི་ལོ་བརྒྱ་སྟོང་གི་བར་དུ་བཞག་ཀྱང་དག་པར་འགྱུར་ཞེའམ། བྱང་ཆུབ་ཀྱི་སེམས་སྐྱེ་མི་སྲིད་དོ། །དེ་ཅིའི་ཕྱིར་ཞེ་ན། ལོག་སྲེད་
ཅན་ནི་དགེ་བའི་རྩ་བ་ཀུན་མེད་པར་བྱས་པས་སྣོད་དུ་མ་གྱུར་ཏོ། །དེ་ལ་གལ་ཏེ་གང་ཟག་དེས་ལོ་བརྒྱ་སྟོང་གི་བར་དུ་མྱ་ངན་ལས་འདས་པ་ཆེན་པོའི་མདོ་སྡེ་འདི་མཉན་ཏམ། འཛིན་ཀྱང་བྱང་ཆུབ་ཏུ་སེམས་བསྐྱེད་མི་ནུས་
སོ། །དེ་ཅིའི་ཕྱིར་ཞེ་ན། དགེ་བའི་སེམས་མེད་པའི་ཕྱིར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་གྱི་སྡོང་པོའི་ནང་ན་སྨན་གྱི་རྒྱལ་པོ་ཞེས་བྱ་བ་ནི་སྨན་གྱི་ནང་ན་མཆོག་དང་ཕུལ་དུ་གྱུར་པས་དར་བ་དང་སྦྱར་
ཏམ། སྦྲང་རྩི་དང་སྦྱར་ཏམ། མར་དང་སྦྱར་ཏམ། ཆུ་དང་བསྲེས་སམ། འོ་མ་དང་བསྲེས་སམ། ཕྱེ་མར་བཏགས་སམ། རིལ་བུར་བྱས་སམ། འདའ་གུར་བསྐུས་སམ། དྲིས་བདུགས་སམ། མིག་ཏུ་བསྐུས་སམ། 
མཐོང་ངམ། བསྣམས་པ་ཙམ་གྱིས་ཀྱང་སེམས་ཅན་གྱི་ནད་ཐམས་ཅད་ཞི་བར་བྱེད་དེ། འོན་ཀྱང་སྨན་གྱི་སྡོང་པོ་དེ་འདི་སྙམ་དུ་སེམས་ཅན་དག་བདག་གི་རྩ་བ་བླངས་ན་ལོ་མ་བརྔ་བའི་མི་རིགས་སྙམ་འམ། ལོ་མ་རྔས་
ན་རྩ་བ་བླང་བའི་མི་རིགས་སྙམ་འམ། སྡོང་པོ་བླངས་ན་པགས་པ་བཤུ་བའི་མི་རིགས་སྙམ་འམ། པགས་པ་བཤུས་ན་སྡོང་པོ་བརྔ་བའི་མི་རིགས་སྙམ་མི་སེམས་ཏེ། དེ་ལྟར་མི་སེམས་མོད་ཀྱི། འོན་ཀྱང་སེམས་ཅན་
གྱི་ནད་ཀྱི་སྡུག་བསྔལ་ཐམས་ཅད་སེལ་ནུས་སོ། །རིགས་ཀྱི་བུ་མྱ་ངན་ལས་འདས་པ་ཆེན་པོའི་མདོ་སྡེ་དམ་པ་འདི་ཡང་དེ་དང་འདྲ་སྟེ། སེམས་ཅན་ཐམས་ཅད་ཀྱི་ཕས་ཕམ་པ་བཞི་དང་། མཚམས་མེད་པ་ལྔ་དང་། 

47-1-152a

ཕྱི་རོལ་དང་ནང་གི་མི་དགེ་བའི་ལས་ཐམས་ཅད་མེད་པར་བྱེད་དེ། གང་བྱང་ཆུབ་ཏུ་སེམས་མ་བསྐྱེད་པ་དག་ཀྱང་འདིའི་དབང་གིས་བྱང་ཆུབ་ཏུ་སེམས་བསྐྱེད་པར་འགྱུར་རོ། །དེ་ཅིའི་ཕྱིར་ཞེ་ན། མདོ་སྡེ་འདི་ཡང་
མདོ་སྡེ་ཐམས་ཅད་ཀྱི་ནང་ན་རྒྱལ་པོ་ལྟ་བུ་སྟེ། ཇི་ལྟར་སྨན་གྱི་ནང་ན་སྨན་གྱི་རྒྱལ་པོ་ལྟ་བུའོ། །གང་ཞིག་མྱ་ངན་ལས་འདས་པ་ཆེན་པོ་འདི་ལ་ནན་ཏན་བྱེད་དམ་ནན་ཏན་མི་བྱེད་ཀྱང་རུང་། མདོ་སྡེ་འདིའི་མཚན་ཡོད་པ་ཐོས་ཏེ་
ཐོས་མ་ཐག་ཏུ་དད་ཅིང་ཡིད་ཆེས་ན་ཉོན་མོངས་པའི་ནད་ཐམས་ཅད་མེད་པར་བྱེད་ཀྱང་ལོག་སྲེད་ཅན་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བདེ་བར་དགོད་མི་ནུས་སོ། །ཇི་ལྟར་སྨན་གྱི་རྒྱལ་པོ་དེ་ནད་ཐམས་
ཅད་འཚོ་བར་བྱེད་མོད་ཀྱི་ངེས་པར་འཆི་བའི་དུས་ལ་བབ་པ་ནི་མ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ལག་པ་ལ་རྨ་ཡོད་པ་དག་གིས་དུག་གཟུང་ན་དུག་ཁོང་དུ་འགྲོའོ། །རྨ་མེད་པ་ནི་གཟུང་ཡང་ཁོང་
དུ་མི་འགྲོའོ། །ལོག་སྲེད་ཅན་ཡང་དེ་དང་འདྲ་སྟེ། བྱང་ཆུབ་ཀྱི་རྒྱུ་མེད་པས་རྨ་མེད་པས་དུག་གཟུང་བ་དང་མཚུངས་ཏེ་ཁོང་དུ་མི་འགྲོའོ། །རྨ་ཞེས་བྱ་བ་ནི་བླ་ན་མེད་པའི་བྱང་ཆུབ་ཀྱི་རྒྱུའོ། །དུག་ཅེས་བྱ་བ་ནི་དོན་དམ་པའི་
སྨན་ལྟ་བུའོ། །རྨ་མེད་པ་ནི་ལོག་སྲེད་ཅན་ལྟ་བུའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་རྡོ་རྗེ་ནི་ཅིས་ཀྱང་མི་ཆོགས་ཏེ། ཐམས་ཅད་ཕིགས་ཤིང་གཅོག་ནུས་ཀྱང་རུ་སྦལ་གྱི་ཁོག་པ་དང་ར་རུས་ཆོགས་སོ། །
མྱ་ངན་ལས་འདས་པ་ཆེན་པོའི་མདོ་སྡེ་འདི་ཡང་དེ་དང་འདྲ་སྟེ། ཚད་མེད་པའི་སེམས་ཅན་བྱང་ཆུབ་ཀྱི་ལམ་ལ་བདེ་བར་བཙུད་ཀྱང་ལོག་སྲེད་ཅན་དག་ནི་བྱང་ཆུབ་ཀྱི་རྒྱུ་སྐྱེད་མི་ནུས་སོ། །རིགས་ཀྱི་བུ་གཞན་ཡང་འདི་
ལྟ་སྟེ་རྩྭ་དན་ཐུ་ལི་ཀ་དང་། ཤིང་སྦ་ལི་ཤི་དང་། ལི་ཀ་ལྟ་བུ་སྡོང་བུ་དང་ཡལ་ཀ་བཅད་ཀྱང་དེ་མ་ཐག་ཏུ་ཕྱིར་སྐྱེས་ཏེ། ཤིང་ཏ་ལ་ལྟར་བཅད་ནས་ཕྱིར་མི་སྐྱེ་བ་ནི་མ་ཡིན་ནོ། །སེམས་ཅན་དེ་དག་ཀྱང་དེ་དང་འདྲ་སྟེ། གལ་ཏེ་མྱ་ངན་

47-1-152b

ལས་འདས་པ་ཆེན་པོའི་མདོ་སྡེ་ཐོས་ན་ཕས་ཕམ་པ་བཞི་བྱུང་ངམ། མཚམས་མེད་པ་ལྔ་བྱས་ཀྱང་བྱང་ཆུབ་ཀྱི་རྒྱུ་ཕྱིར་སྐྱེ་ཡང་སྲིད་ཀྱི། ལོག་སྲེད་ཅན་ནི་དེ་ལྟར་མ་ཡིན་ཏེ། མདོ་སྡེ་དམ་པ་འདི་ཐོས་སམ། མཉན་ཀྱང་བྱང་ཆུབ་
ཀྱི་རྒྱུ་སྐྱེ་མི་སྲིད་དོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཤིང་ཀ་ཏ་ལ་དང་ཙིན་དོ་ཀ་ལྟ་བུ་བཅད་ན་ས་བོན་ཚིག་པ་དང་འདྲ་སྟེ་ཕྱིར་མི་སྐྱེའོ། །ལོག་སྲེད་ཅན་དག་དེ་དང་འདྲ་སྟེ། མྱ་ངན་ལས་འདས་པ་ཆེན་པོའི་མདོ་
སྡེ་ཐོས་ཀྱང་བྱང་ཆུབ་ཀྱི་རྒྱུ་མི་སྐྱེ་བ་ནི་ས་བོན་ཚིག་པ་དང་འདྲའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཆར་ཆེན་པོ་བབ་ན་ནམ་མཁའ་སྟོང་པ་ལ་མི་ཆགས་སོ། །མྱ་ངན་ལས་འདས་པ་ཆེན་པོའི་མདོ་སྡེ་ཡང་དེ་
དང་འདྲ་སྟེ། ཆོས་ཀྱི་ཆར་ཀུན་ཏུ་ཕབ་ཀྱང་ལོག་སྲེད་ཅན་ལ་མི་ཆགས་སོ། །ལོག་སྲེད་ཅན་གྱི་ལུས་ལ་རྡོ་རྗེ་གཏམས་པ་ལྟར་ཀུན་ཏུ་ཁྱབ་པས་ཅིས་ཀྱང་མི་ཚུགས་སོ། །བྱང་ཆུབ་སེམས་དཔའ་འོད་སྲུང་གིས་
བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་ཚིགས་སུ་བཅད་པ་ལས་ཀྱང་བཀའ་སྩལ་པ། དགེ་བ་མ་མཐོང་དགེ་མི་བྱེད། །སྡིག་པ་མཐོང་བས་སྡིག་པ་བྱེད། །དེ་ལ་འཇིགས་ཤིང་བྱོལ་བ་ནི། །
ཇི་ལྟར་ལམ་ངན་གཡང་ས་བཞིན་ཞེས། བཅོམ་ལྡན་འདས་ཀྱིས་དེ་སྐད་ཅེས་གསུངས་པའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་མ་མཐོང་ཞེས་བྱ་བ་ནི་སངས་རྒྱས་ཀྱི་རང་
བཞིན་མ་མཐོང་བའོ། །དགེ་བ་ཞེས་བྱ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །མི་བྱེད་ཅེས་བྱ་བ་ནི་དགེ་བའི་བཤེས་གཉེན་ལ་བསྙེན་བཀུར་མི་བྱེད་པའོ། །མཐོང་ཞེས་བྱ་བ་ནི་རྒྱུ་དང་འབྲས་བུ་མེད་
པར་མཐོང་བའོ། །སྡིག་པ་ཞེས་བྱ་བ་ནི་ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་ལ་སྐུར་བའོ། །བྱེད་ཅེས་བྱ་བ་ནི་ལོག་སྲེད་ཅན་ཤིན་ཏུ་རྒྱས་པ་མེད་པར་སྨྲ་སྟེ། དེ་བས་ན་ལོག་སྲེད་ཅན་དག་ནི་ཡོངས་སུ་དག་པ་དགེ་བའི་

47-1-153a

ཆོས་ལ་འཇུག་ཅིང་འབད་པའི་སེམས་མེད་དོ། །ཆོས་གང་ལ་དགེ་བ་ཞེས་བྱ་ཞེ་ན། དེ་ནི་མྱ་ངན་ལས་འདས་པའོ། །མྱ་ངན་ལས་འདས་པ་ལ་འཇུག་ཅིང་འབད་པ་ནི་འཕགས་པའི་སྤྱོད་པ་ལ་ནན་ཏན་བྱེད་པའོ། །ལོག་
སྲེད་ཅན་དག་ནི་འཕགས་པའི་སྤྱོད་པ་མི་སྤྱོད་པས་མྱ་ངན་ལས་འདས་པ་ལ་འཇུག་ཅིང་འབད་མི་ནུས་སོ། །དེ་ལ་སྐྲག་པར་བྱའོ་ཞེས་བྱ་བ་ནི་དམ་པའི་ཆོས་ལ་སྐུར་པ་སྟེ། གང་གིས་སྐྲག་པར་བྱ་ཞེ་ན། མཁས་པ་ཤེས་རབ་
ཅན་དག་གིས་སོ། །དེ་ཅིའི་ཕྱིར་ཞེ་ན། ཆོས་ལ་སྐུར་པས་དགེ་བའི་སེམས་མེད་དེ། སྦྱོར་བའི་ཐབས་མེད་པའི་ཕྱིར་རོ། །ལམ་གཡང་ས་ཞེས་བྱ་བ་ནི་འདུ་བྱེད་རྣམས་སོ། །འོད་སྲུང་གིས་ཡང་གསོལ་པ། བཅོམ་ལྡན་འདས་
ཀྱིས་གསུངས་པ་ལས། བྱ་བ་མཐོང་བ་གང་དག་ལགས། །དགེ་བའི་ཆོས་སུ་གང་དག་འགྱུར། །མི་འཇིགས་པ་ཡི་གནས་ནི་གང་། །རྒྱལ་པོས་བདེ་བའི་ལམ་བགྲོད་བཞིན། །ཞེས་བགྱི་བའི་དོན་ནི་ཇི་ལྟ་བུ་ལགས། 
བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱ་བ་མཐོང་ཞེས་བྱ་བ་ནི། སྡིག་པ་འཐོལ་བ་ལ་བྱ་སྟེ། འཁོར་བའི་མཐའ་ནས་སྡིག་པ་མི་དགེ་བའི་ཆོས་ཅི་བྱས་པ་ཀུན་བཤགས་ཏེ། ཕྱིན་པ་མེད་པའི་གནས་སུ་ཕྱིན་
པའོ། །དེ་བས་ན་གནས་དེ་ནི་མི་འཇིགས་པ་སྟེ། དཔེར་ན་རྒྱལ་པོ་ལམ་དུ་ཞུགས་ཏེ་སོང་ན་ལམ་ཀ་ནས་མི་རྒོད་ལ་སོགས་པ་འབྱོལ་ཞིང་འབྲོས་སོ། །དེ་བཞིན་དུ་སྡིག་པ་མི་དགེ་བའི་ཆོས་ཀྱང་མཐོལ་ཞིང་བཤགས་
ན་ཐམས་ཅད་བྱང་བར་འགྱུར་རོ། །གཞན་ཡང་བྱེད་པ་མི་མཐོང་བ་ནི་ལོག་སྲེད་ཅན་དག་སྡིག་པ་མི་དགེ་བའི་ལས་ཀྱང་མི་མཐོང་བའོ། །ལོག་སྲེད་ཅན་དག་ནི་ང་རྒྱལ་ཀྱི་དྲེགས་པས་སྡིག་པ་མི་དགེ་བའི་ཆོས་མང་དུ་
བྱས་ཀྱང་ཐོག་མ་ནས་མི་སྐྲག་མི་འཇིགས་པའོ། །དེ་བས་ན་མྱ་ངན་ལས་འདས་པ་མི་ཐོབ་པ་ནི་དཔེར་ན་སྤྲེའུ་དག་ཆུའི་ནང་གི་ཟླ་བ་འཛིན་པ་དང་མཚུངས་སོ། །རིགས་ཀྱི་བུ་གལ་ཏེ་ཚད་མེད་པའི་སེམས་ཅན་ཐམས་ཅད་ཅིག་

47-1-153b

ཅར་དུས་གཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཀྱང་དེ་བཞིན་གཤེགས་པ་དེ་དག་གིས་ཀྱང་ལོག་སྲེད་ཅན་དག་བྱང་ཆུབ་ཐོབ་པར་མི་རིགས་ཏེ། དེ་བས་ན་བྱ་བ་མི་མཐོང་བ་ཞེས་བྱའོ། །
གཞན་ཡང་སུས་བྱས་པ་མི་མཐོང་ཞེ་ན། དེ་བཞིན་གཤེགས་པས་མཛད་པས་མི་མཐོང་ངོ་། །དེ་བཞིན་གཤེགས་པས་སོ་སོའི་སྐྱེ་བོ་ལ་སངས་རྒྱས་ཀྱི་རང་བཞིན་བསྟན་ཅིང་བཤད་ཀྱང་ལོག་སྲེད་ཅན་དག་ནི་འཁོར་བ་ན་ཡོངས་སུ་འཁོར་
བས་ཤེས་པར་རམ། མཐོང་བར་མི་འགྱུར་རོ། །དེ་བས་ན་དེ་བཞིན་གཤེགས་པས་མཛད་པ་མི་མཐོང་བ་ཞེས་བྱའོ། །གཞན་ཡང་ལོག་སྲེད་ཅན་དག་ནི་མཐར་དེ་བཞིན་གཤེགས་པ་མྱ་ངན་ལས་འདས་ཏེ་ཡང་དག་པར་མི་རྟག་པར་
འཛིན་པ་ནི་ཇི་ལྟར་མར་མེ་དང་མར་བཅས་པར་ཟད་པ་ལྟ་བུར་མཐོང་བའོ། །དེ་ཅིའི་ཕྱིར་ཞེ་ན། གང་ཟག་དེ་སྡིག་པ་མི་དགེ་བའི་ལས་མི་འབྲི་བའི་ཕྱིར་རོ། །བྱང་ཆུབ་སེམས་དཔའ་གང་ཞིག་དགེ་བ་བྱས་པའི་ལས་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་པ་ན་ལོག་སྲེད་ཅན་དག་ནི་དེ་ལ་འཕྱ་ཞིང་མ་དད་མོད་ཀྱི། འོན་ཀྱང་བྱང་ཆུབ་སེམས་དཔའ་རྣམས་ནི་དེ་དག་ཀྱང་བླ་ན་མེད་པའི་བྱང་ཆུབ་ཐོབ་པར་ཡོངས་སུ་སྔོ་བར་བྱེད་དོ། །དེ་ཅིའི་ཕྱིར་
ཞེ་ན། སངས་རྒྱས་རྣམས་ཀྱི་ཆོས་ཉིད་དེ་འདྲ་བའི་ཕྱིར་རོ། །འོ་མ་ལས་ནི་ཞོར་འགྱུར་ཞིང་། །སྡིག་པ་འཕྲལ་དུ་སྨིན་མི་འགྱུར། །མེ་མདག་ཐལ་བས་ཡོག་པ་ལ། །གླེན་པ་བརྙས་པས་རྫི་བར་འགྱུར། །ལོག་སྲེད་ཅན་དག་ནི་
མིག་མེད་པ་ཞེས་བྱ་སྟེ། དེ་བས་ན་དགྲ་བཅོམ་པའི་ལམ་མི་མཐོང་ངོ་། །དགྲ་བཅོམ་པ་ནི་འཁོར་བའི་ལམ་ངན་པ་གཡང་སར་མི་འགྲོའོ། །མིག་མེད་པ་དག་ནི་ཤིན་ཏུ་རྒྱས་པ་ལ་སྐུར་པས་དགྲ་བཅོམ་པ་ལྟར་བྱམས་པའི་
སེམས་ལ་ནན་ཏན་མི་བྱེད་དོ། །ལོག་སྲེད་ཅན་དག་ཤིན་ཏུ་རྒྱས་པ་ལ་ནན་ཏན་མི་བྱེད་པ་འང་དེ་དང་འདྲའོ། །སྐྱེས་བུ་གང་ཞིག་འདི་སྐད་དུ་བདག་ནི་ཉན་ཐོས་པའི་མདོ་སྡེ་ལ་མ་དད་ཀྱི་ཐེག་པ་ཆེན་པོ་ལ་དད་དེ་འདོན་པ་དང་། ཀློག་པ་དང་། 

47-1-154a

སྟོན་ཅིང་འཆད་པའང་བྱེད་དོ། །དེ་བས་ན་བདག་ནི་བྱང་ཆུབ་སེམས་དཔའ་སྟེ། སེམས་ཅན་ཐམས་ཅད་ལ་ཡང་སངས་རྒྱས་ཀྱི་རང་བཞིན་ཡོད་པས་སེམས་ཅན་གྱི་ལུས་ཀྱི་ནང་ན་སྟོབས་བཅུ་དང་། མཚན་སུམ་བཅུ་
རྩ་གཉིས་དང་། དཔེ་བྱད་བཟང་པོ་བརྒྱད་བཅུ་ཡང་ཡོད་དོ། །བདག་སྨྲ་བ་དང་། སངས་རྒྱས་ཀྱིས་གསུངས་པ་ཐ་མི་དད་དོ། །བདག་དང་ཁྱེད་བཅས་སུ་ཚད་མེད་པའི་ཉོན་མོངས་པ་འཇོམས་པར་འགྱུར་བ་ནི་ཇི་ལྟར་ཆུ་སྣོད་ཆག་
པ་བཞིན་དུ་ཉོན་མོངས་པ་ཀུན་བཅོམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མཐོང་བར་འགྱུར་རོ་ཞེས་སྐྱེས་བུ་དེས་དེ་སྐད་དུ་སྟོན་ཅིང་འཆད་མོད་ཀྱི། སེམས་ཅན་ལ་ཡང་དག་པར་སངས་རྒྱས་ཀྱི་རང་བཞིན་
ཡོད་པར་ཡིད་ཆེས་པ་མ་ཡིན་ཏེ་ཕན་པ་དང་བདེ་བའི་ཕྱིར་ཡི་གེ་ལས་འབྱུང་བ་བཞིན་སྟོན་ཏེ། དེ་ལྟར་སྟོན་པ་དེ་ནི་སྡིག་པ་ཅན་ཞེས་བྱ་སྟེ། སྡིག་པ་ཅན་དེ་ནི་ཇི་ལྟར་འོ་མ་ལས་ཞོར་འགྱུར་བ་བཞིན་དུ་འབྲས་བུ་མྱུར་དུ་མི་འགྲུབ་པའོ། །
དཔེར་ན་རྒྱལ་པོའི་ཕོ་ཉ་ཤིན་ཏུ་སྨྲ་མཁས་ལ་ཐབས་དང་ལྡན་པ་ཞིག་ཡུལ་གཞན་དུ་བཀའ་སྩལ་ཏེ་བཏང་ན་ལུས་དང་སྲོག་ལ་བབ་ཀྱང་རྒྱལ་པོའི་བཀའ་མི་འཆབ་བོ། །མཁས་པ་ཤེས་རབ་ཅན་ཡང་དེ་དང་འདྲ་སྟེ། བྱིས་པ་མ་
རབས་ཀྱི་ནང་དུ་ལུས་དང་སྲོག་ལ་མི་ལྟ་བར་ཐེག་པ་ཆེན་པོ་ཤིན་ཏུ་རྒྱས་པ་དེ་བཞིན་གཤེགས་པའི་སྙིང་པོ་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པ་སྒྲོགས་ཤིང་སྟོན་ཏོ། །རིགས་ཀྱི་བུ་ལོག་སྲེད་ཅན་
འགའ་ཞིག་དགྲ་བཅོམ་པ་ལྟར་འཆོས་ཏེ། བས་མཐར་གནས་ནས་ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་ལ་འཕྱ་ཞིང་སྐུར་ན་བུས་པ་མ་རབས་དག་དེ་ལ་ཡང་དག་པར་དགྲ་བཅོམ་པ་འམ། བྱང་ཆུབ་སེམས་དཔའ་སེམས་
དཔའ་ཆེན་པོ་ཡིན་པར་འཛིན་ཏེ། ལོག་སྲེད་ཅན་དགེ་སྦྱོང་སྡིག་པ་ཅན་དེ་བས་མཐར་གནས་ཀྱང་། བས་མཐར་གནས་པའི་ཆོས་མ་རུང་བར་བྱེད་དོ། །ཕ་རོལ་པོས་རྙེད་པ་དང་བཀུར་སྟི་ཐོབ་པ་ལ་ཕྲག་དོག་གི་སེམས་སྐྱེས་

47-1-154b

ནས་འདི་སྐད་དུ་ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་ཡང་བདུད་སྡིག་ཏོ་ཅན་གྱིས་བསྟན་པ་ཡིན་ཏེ། དེ་བཞིན་གཤེགས་པ་ཡང་མི་རྟག་པའོ་ཞེས་སྨྲས་ཏེ། དམ་པའི་ཆོས་འཇིག་ཅིང་དགེ་འདུན་མ་རུང་བར་བྱེད་དོ། །གཞན་ཡང་འདི་
སྐད་དུ་བདུད་སྡིག་ཏོ་ཅན་གྱིས་སྨྲས་པ་ནི་དགེ་བའི་རྗེས་སུ་སྨྲས་པ་མ་ཡིན་ནོ་ཞེས་སྡིག་པ་མི་དགེ་བའི་ཆོས་དེ་སྐད་ཅེས་སྨྲས་ཏེ། སྡིག་པ་དེ་ལྟར་བྱས་ཀྱང་འོ་མ་ལས་ཞོར་འགྱུར་བ་བཞིན་དུ་འཕྲལ་ཏུ་སྨིན་པ་མ་ཡིན་པས་མེ་
མདག་ཐལ་བས་བཀབ་པ་ལ་བརྙས་པ་བཞིན་དུ་སྟེང་དུ་རྫིའོ། །གང་ཟག་དེ་ནི་ལོག་སྲེད་ཅན་ཞེས་བྱའོ། །དེ་བས་ན་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་དམ་པ་འདི་ངེས་པར་ཡོངས་སུ་དག་པའོ། །ནོར་བུ་རིན་པོ་ཆེ་ཆུ་
རྙོག་པ་ཅན་གྱི་ནང་དུ་བཅུག་ན་ཆུ་དང་བར་འགྱུར་བ་ལྟར་ཐེག་པ་ཆེན་པོའི་མདོ་སྡེ་འདི་ཡང་དེ་དང་འདྲའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་མེ་ཏོག་པད་མོ་དག་ཉི་མའི་འོད་ཀྱིས་ཕོག་མ་ཐག་ཏུ་ཁ་འབྱེའོ། །སེམས་
ཅན་ཐམས་ཅད་ཀྱང་དེ་དང་འདྲ་སྟེ། གལ་ཏེ་མྱ་ངན་ལས་འདས་པ་ཆེན་པོ་ཉི་མ་ལྟ་བུ་མཐོང་ན་སེམས་མ་སྐྱེད་པ་དག་སེམས་བསྐྱེད་ཅིང་བྱང་ཆུབ་ཀྱི་རྒྱུར་འགྱུར་རོ། །དེ་བས་ན་མྱ་ངན་ལས་འདས་པའི་འོད་བ་སྤུའི་བུ་གར་
ཞུགས་ན་རྒྱུ་དམ་པར་འགྱུར་རོ་ཞེས་ངས་གསུངས་སོ། །ལོག་སྲེད་ཅན་ནི་སངས་རྒྱས་ཀྱི་རང་བཞིན་ཡོད་ཀྱང་ཁ་ན་མ་ཐོ་བའི་དྲི་མ་ཚད་མེད་པ་སྙེད་ཀྱིས་གླགས་པས་མི་ཐར་བ་ནི་ཇི་ལྟར་དར་གྱི་སྲིན་བུའི་ཁོག་པ་དང་
འདྲ་སྟེ། ལས་དེ་ལྟ་བུའི་རྐྱེན་གྱིས་བྱང་ཆུབ་ཀྱི་རྒྱུ་མི་སྐྱེ་སྟེ། འཁོར་བར་འཁོར་བའི་མཐའ་མི་ཟད་པར་གྱུར་ཏོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་མེ་ཏོག་ཨུད་པ་ལ་དང་། མེ་ཏོག་པད་མོ་དང་། མེ་ཏོག་ཀུ་མུ་ད་དང་། 
མེ་ཏོག་པུན་ད་རི་ཀ་དག་འདམ་རྫབ་ཀྱི་ནང་ནས་སྐྱེས་མོད་ཀྱི། འདམ་གྱིས་མི་གོས་སོ། །སེམས་ཅན་གང་མྱ་ངན་ལས་འདས་པ་ཆེན་པོའི་མདོ་སྡེ་དམ་པ་འདི་ལ་ནན་ཏན་བྱེད་པ་འང་དེ་དང་འདྲ་སྟེ། ཉོན་མོངས་པ་དང་བཅས་མོད་

47-1-155a

ཀྱི་ཉོན་མོངས་པས་མི་གོས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་རང་བཞིན་གྱི་མཚན་ཉིད་ཤེས་པའི་ཕྱིར་རོ། །རིགས་ཀྱི་བུ་དཔེར་ན་ཡུལ་ལ་ལ་ན་ཤིན་ཏུ་བསིལ་བའི་རླུང་དང་ལྡན་ན། སེམས་
ཅན་གང་ཚ་བས་གདུངས་པའི་ལུས་ཀྱི་བ་སྤུའི་ཁུང་ལ་རེག་ན་ཚ་བས་གདུངས་པ་མེད་པར་འགྱུར་རོ། །ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་འདི་འང་དེ་དང་འདྲའོ། །སེམས་ཅན་ཐམས་ཅད་ཀྱི་བ་སྤུའི་
བུ་གར་འཇུག་ཅིང་བྱང་ཆུབ་ཀྱི་རྒྱུར་འགྱུར་བར་བྱེད་དེ། ལོག་སྲེད་ཅན་འབའ་ཞིག་ནི་མ་གཏོགས་སོ། །དེ་ཅིའི་ཕྱིར་ཞེ་ན། ཆོས་ཀྱི་སྣོད་མ་ཡིན་པའི་ཕྱིར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་པ་མཁས་པ་རིག་པ་
རྣམ་པ་བརྒྱད་ལ་མཁས་པ་དག་ནད་ཐམས་ཅད་ཞི་བར་བྱེད་ནུས་མོད་ཀྱི། ངེས་པར་ཤི་བའི་དུས་ལ་བབ་པ་ལ་ནི་མ་ཡིན་ནོ། །མདོ་སྡེའི་ཏིང་ངེ་འཛིན་ཐམས་ཅད་ཀྱང་དེ་དང་འདྲ་སྟེ། སེམས་ཅན་ཐམས་ཅད་ཀྱི་འདོད་ཆགས་དང་། ཞེ་སྡང་
དང་། གཏི་མུག་གི་ཀུན་ནས་ཉོན་མོངས་པའི་ནད་གསོ་ཞིང་ཀུན་ནས་ཉོན་མོངས་པའི་ཟུག་རྔུ་འབྱིན་ནུས་མོད་ཀྱི། ཕས་ཕམ་པ་བཞི་ཉམས་པ་དང་། མཚམས་མེད་པ་ལྔ་བྱས་པ་ལ་ནི་མ་ཡིན་ནོ། །རིགས་ཀྱི་བུ་གཞན་ཡང་
འདི་ལྟ་སྟེ་སྨན་པ་མཁས་པ་རིག་པ་བརྒྱད་ལས་ཀྱང་འདས་པ་དག་སེམས་ཅན་གྱི་ནད་ཀྱི་སྡུག་བསྔལ་ཐམས་ཅད་སེལ་ནུས་མོད་ཀྱི། གདོན་མི་ཟ་བར་ཤི་བའི་དུས་ལ་བབ་པ་ལ་ནི་མ་ཡིན་ནོ། །མྱ་ངན་ལས་འདས་པ་ཆེན་པོ་
ཐེག་པ་ཆེན་པོའི་མདོ་སྡེ་འདི་ཡང་དེ་དང་འདྲ་སྟེ། སེམས་ཅན་གྱི་ཉོན་མོངས་པ་ཐམས་ཅད་སྤོང་བར་བྱེད་ཅིང་། དེ་བཞིན་གཤེགས་པའི་ཡོངས་སུ་དག་པའི་རྒྱུར་འགྱུར་བ་ལ་བདེ་བར་འཇོག་པ་དང་། སེམས་མ་བསྐྱེད་པ་
དག་སེམས་སྐྱེད་པར་ནི་བྱེད་མོད་ཀྱི། ངེས་པར་འཆི་བ་ལོག་སྲེད་ཅན་ལ་ནི་མ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ། སྨན་པ་མཁས་པ་ནི་མིག་ནད་ལས་ལོང་བར་གྱུར་པ་དག་ནི་ཉི་མ་དང་། ཟླ་བ་དང་། མེ་དང་། སྐར་མ་

47-1-155b

དང་། གཟུགས་རྣམ་པ་ཐམས་ཅད་མཐོང་བར་བྱེད་ནུས་ཀྱི། ཐོག་མ་ནས་དམུས་ལོང་དུ་གྱུར་པ་ལ་ནི་མ་ཡིན་ནོ། །ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་འདི་ཡང་དེ་དང་འདྲ་སྟེ། ཉན་ཐོས་དང་རང་སངས་རྒྱས་
ཀྱི་ཐེག་པ་ཅན་ཡང་ཤེས་རབ་ཀྱི་མིག་ཐོབ་ཅིང་ཚད་མེད་མཐའ་ཡས་པའི་ཐེག་པ་ཆེན་པོའི་མདོ་སྡེ་ལ་དགོད་པ་དང་། སེམས་མ་བསྐྱེད་པ་ཕས་ཕམ་པ་བཞི་ཉམས་པ་དང་། མཚམས་མེད་པ་ལྔ་བྱས་པ་དག་ཀྱང་བྱང་
ཆུབ་ཏུ་སེམས་བསྐྱེད་པར་བྱེད་ནི་ནུས་ཀྱི། ཐོག་མ་ནས་དམུས་ལོང་དུ་གྱུར་པ་ལོག་སྲེད་ཅན་དག་ལ་ནི་མ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན་སྨན་པ་ཤིན་ཏུ་མཁས་པ་རིག་པ་རྣམ་པ་བརྒྱད་དང་
ལྡན་པ་ནི་སེམས་ཅན་གྱི་ནད་ཐམས་ཅད་གསོ་བའི་ཕྱིར་སྨན་རྣམ་པ་མང་པོ་སྦྱོར་ཏེ། སྐྱུག་པ་དང་། འཁྲུ་བ་དང་། བསྐུ་བ་དང་། བདུག་པ་དང་། སྣར་བླུགས་པ་དང་། ཕྱེ་མ་དང་རིལ་བུ་ལ་སོགས་པ་སྦྱོར་རོ། །
གལ་ཏེ་མི་དབུལ་པོ་སྨན་མི་འདོད་པ་ཞིག་ན་ཡང་སྨན་པས་དེ་ལ་སྙིང་བརྩེ་བའི་ཕྱིར་ཁྱིམ་དུ་ཁྲིད་ནས་ནན་གྱིས་སྨན་བླུད་དེ་ནད་འཚོ་བར་བྱེད་དོ། །གལ་ཏེ་བུད་མེད་བུ་བཙས་པ་ཞིག་ཤ་མ་མ་ཕྱིན་ན་ཡང་དེ་ལ་སྨན་གཏོང་
སྟེ། ཤ་མ་ཡང་བྱུང་ལ་བུ་ཡང་བདེ་བར་བཙའ་བར་བྱེད་དོ། །ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་འདི་ཡང་དེ་དང་འདྲ་སྟེ། གནས་གང་དང་གང་ན་ཡོད་པ་དེ་དང་དེ་དག་ཏུ་སེམས་ཅན་གྱི་ཉོན་མོངས་པ་ཚད་
མེད་པ་སྙེད་ཞི་བར་བྱེད་དེ། ཕས་ཕམ་པ་བཞི་ཉམས་པ་དང་། མཚམས་མེད་པ་ལྔ་བྱས་པ་དང་། སེམས་མ་བསྐྱེད་པ་ཡང་སེམས་བསྐྱེད་པར་འགྱུར་ན་ལོག་སྲེད་ཅན་ནི་མ་གཏོགས་སོ། །བྱང་ཆུབ་སེམས་དཔའ་
འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཕས་ཕམ་པ་བཞི་ཉམས་པ་དང་། མཚམས་མ་མཆིས་པ་ལྔ་བགྱིས་པ་དག་ནི་ཇི་ལྟར་ཤིང་ཏ་ལའི་མགོ་བཅད་ན་ཕྱིར་མི་སྐྱེ་བ་དང་འདྲ་སྟེ། དེ་དག་བྱང་

47-1-156a

ཆུབ་ཏུ་སེམས་མ་བསྐྱེད་པ་ཅིའི་སླད་དུ་བྱང་ཆུབ་ཀྱི་རྒྱུར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སེམས་ཅན་དེ་དག་གལ་ཏེ་རྨི་ལམ་ན་སེམས་ཅན་དམྱལ་བར་ལྟུང་སྟེ། སྡུག་བསྔལ་མང་པོ་མྱོང་བ་
རྨིས་ན་འགྱོད་པའི་སེམས་སྐྱེས་ཏེ། ཀྱི་ཧུད་བདག་ཅིའི་ཕྱིར་འདི་འདྲ་བའི་སྡིག་པ་མྱོང་བར་འགྱུར། བདག་ཅི་སྟེ་སྡིག་པ་འདི་ལས་ཐར་ན་གདོན་མི་ཟ་བར་བྱང་ཆུབ་ཏུ་སེམས་བསྐྱེད་པར་བྱའོ། །ད་ལྟར་མྱོང་བ་འདི་ནི་རབ་ཏུ་འང་སྡུག་
བསྔལ་བའོ་སྙམ་བསམས་ནས་དེ་ནས་སད་དེ་དམ་པའི་ཆོས་ལ་འབྲས་བུ་ཆེན་པོ་དང་ལྡན་པར་ཤེས་སོ། །ཇི་ལྟར་བུ་ཆུང་ངུ་བགས་ཀྱིས་ཆེར་སྐྱེས་ཀྱི་བར་དུ་རྟག་ཏུ་འདི་སྙམ་དུ་སེམས་ཏེ། སྨན་པ་དེ་ནི་སྨན་ལ་ཤིན་ཏུ་མཁས་སོ། །
བདག་མངལ་ན་འདུག་པ་ལས་བདག་གི་མ་ལ་སྨན་གཏང་བས་སྨན་གྱི་མཐུས་བདེ་བར་གྱུར་ཏེ། བདག་ཀྱང་འཚོ་བར་གྱུར་ཏོ། །ངོ་མཚར་ཆེའོ། །བདག་གི་མས་ཟླ་བ་བཅུའི་བར་དུ་སྡུག་བསྔལ་ཆེན་པོ་མྱོང་སྟེ། བདག་བཙས་
ནས་ཀྱང་གཤེར་བ་མི་བདེ་བ་དང་ནི་བྲལ། བསྐམ་པ་བདེ་བ་དང་ནི་ཕྲད་དེ་མི་གཙང་བ་བཤང་གཅི་ཆེ་ཆུང་ཡང་ཕྱགས་ནས་ནུ་ཞོ་བསྣུན་ཏེ། བདག་གི་ལུས་འདི་དག་གསོས་ནས་རིམ་གྲོ་ཆེར་བྱས་སོ། །དེ་བས་ན་བདག་ཀྱང་
དྲིན་ལ་ལན་གླན་པའི་ཕྱིར་རིམ་གྲོ་ཆེར་བྱས་ཏེ་ཡིད་དང་མི་འགལ་བར་མཆོད་པ་བྱའོ་སྙམ་སེམས་སོ། །ཕས་ཕམ་པ་བཞི་ཉམས་པ་དང་། མཚམས་མེད་པའི་སྡིག་བྱས་པ་ཡང་མཐར་དུས་བྱེད་པ་ན། ཐེག་པ་ཆེན་པོའི་མདོ་
སྡེ་མྱ་ངན་ལས་འདས་པ་ཆེན་པོ་འདི་དྲན་པར་བྱས་ན་སེམས་ཅན་དམྱལ་བ་འམ། བྱོལ་སོང་གི་སྐྱེ་གནས་སམ། ཡི་དགས་སམ། ལྷ་འམ་མིར་སྐྱེས་ཀྱང་མདོ་སྡེ་འདིས་མི་དེའི་བྱང་ཆུབ་ཀྱི་རྒྱུར་འགྱུར་བར་བྱེད་དེ། ལོག་སྲེད་
ཅན་ནི་མ་གཏོགས་སོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་པ་མཁས་པ་འམ། སྨན་པ་མཁས་པའི་བུ་སྨན་གཞན་ལས་འཕགས་པར་མཁས་པ་དུག་གི་སྨན་ལ་ཡང་ཤིན་ཏུ་མཁས་ཤིང་རིག་སྔགས་

47-1-156b

ལ་ཡང་མཁས་ན་སྦྲུལ་གདུག་པ་འམ། ཀླུ་འམ། གདུག་པ་གཞན་དག་ཀྱང་རིག་སྔགས་དང་སྨན་གྱི་མཐུས་གདུག་པ་མེད་པར་བྱེད་དོ། །གལ་ཏེ་ལྷམ་ལ་སྨན་བསྐུས་ཏེ། སྦྲུལ་གདུག་པ་ལ་སོགས་པ་ལ་རེག་ན་གདུག་པ་
ཞི་བར་འགྱུར་ཡང་། གདུག་པ་ཀླུ་ཆེན་པོ་ཞེས་བྱ་བ་ནི་མ་ཡིན་ནོ། །ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་འདི་ཡང་དེ་དང་འདྲ་སྟེ། སེམས་ཅན་གང་ཕས་ཕམ་པ་བཞི་ཉམས་སམ། མཚམས་མེད་པ་ལྔ་
བྱས་ཀྱང་དེ་དག་གི་ཁ་ན་མ་ཐོ་བའི་སྡིག་པ་བྱང་ཞིང་བྱང་ཆུབ་ལ་དགོད་པར་བྱེད་དོ། །ལྷམ་ལ་སྨན་གྱིས་བསྐུས་ན་ཡང་དུག་ཞི་བར་བྱེད་པ་ལྟར་སེམས་མ་བསྐྱེད་པ་དག་ཀྱང་སེམས་བསྐྱེད་ཅིང་བྱང་ཆུབ་ལ་བདེ་བར་དགོད་པར་
བྱེད་དོ། །ཐེག་པ་ཆེན་པོ་མྱ་ངན་ལས་འདས་པ་ཆེན་པོའི་མདོ་སྡེ་སྨན་ལྟ་བུ་འདིའི་མཐུས་སེམས་ཅན་ཐམས་ཅད་བདེ་བར་བྱེད་ཀྱང་ཀླུ་ཆེན་པོ་ལྟ་བུ་ལོག་སྲེད་ཅན་དག་ནི་མ་གཏོགས་སོ། །རིགས་ཀྱི་བུ་གཞན་ཡང་འདི་ལྟ་སྟེ་
དཔེར་ན་མི་ཞིག་གིས་དུག་རྣམ་པར་སྦྱར་ནས་རྔ་ཆེན་པོ་ལ་བསྐུས་ཏེ་མི་མང་པོའི་ནང་དུ་བརྡུངས་ན་སྒྲ་དེ་ཐོས་པར་མི་འདོད་མོད་ཀྱི། ཐོས་པ་ཐམས་ཅད་འཆི་ཡང་གློ་བུར་དུ་འཆི་བར་མི་འགྱུར་བ་འབའ་ཞིག་ནི་མ་གཏོགས་སོ། །
ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་འདི་ཡང་དེ་དང་འདྲ་སྟེ། གང་དང་གང་ན་འདུ་བྱེད་མང་པོའི་ནང་དུ་སྒྲ་ཐོས་པར་གྱུར་ན་འདོད་ཆགས་དང་། ཞེ་སྡང་དང་། གཏི་མུག་གི་ཉོན་མོངས་པ་ཀུན་འབྱང་བར་
འགྱུར་ཏེ། དེ་ལ་སེམས་ཤིང་ཡིད་ལ་བྱ་བའི་བསམ་པ་མེད་ཀྱང་མྱ་ངན་ལས་འདས་པ་ཆེན་པོའི་མཐུས་ཉོན་མོངས་པ་ཀུན་ཞི་བར་འགྱུར་རོ། །ཕས་ཕམ་པ་བཞི་ཉམས་པ་དང་། མཚམས་མེད་པ་ལྔ་བྱས་པ་དག་ཀྱང་། མདོ་
སྡེ་འདི་ཐོས་ན་བླ་ན་མེད་པའི་བྱང་ཆུབ་ཀྱི་རྒྱུར་འགྱུར་ཏེ། ཉོན་མོངས་པ་ཁད་ཀྱིས་འབྱང་བར་འགྱུར་ན་གློ་བུར་དུ་མི་འཆི་བ་ལོག་སྲེད་ཅན་ནི་མ་གཏོགས་སོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་མུན་སྲོས་ན་ལས་བྱ་བ་ཐམས་ཅད་

47-1-157a

གཏོང་སྟེ། འཕྲོ་ལུས་ཀྱང་སང་གི་བར་དུ་སྡོད་དོ། །ཐེག་པ་ཆེན་པོ་སློབ་པ་ཡང་དེ་དང་འདྲ་སྟེ། མདོ་སྡེའི་ཏིང་ངེ་འཛིན་ཐམས་ཅད་ལ་ནན་ཏན་བྱས་ཀྱང་མྱ་ངན་ལས་འདས་པ་ཆེན་པོ་ཉི་མ་ལྟ་བུ་འདི་ལས་དེ་བཞིན་
གཤེགས་པས་དགོངས་ཏེ་གསུངས་པ་འདི་ཐོས་ནས་གདོད་བྱང་ཆུབ་ཀྱི་ལས་བྱེད་དེ་དམ་པའི་ཆོས་ལ་བདེ་བར་གནས་སོ། །དཔེར་ན་ཆར་པ་ནི་ས་བོན་ཐམས་ཅད་སྐྱེ་བ་དང་འབྲས་བུ་ཐམས་ཅད་སྨིན་པ་དང་། མུ་གེ་ལ་སོགས་
པ་སེལ་ཅིང་ལོངས་སྤྱོད་དང་ལྡན་པར་བྱེད་དོ། །དེ་བཞིན་གཤེགས་པའི་སྙིང་པོ་ཆོས་ཀྱི་ཆར་ཚད་མེད་པ་འདི་ཡང་དེ་དང་འདྲ་སྟེ། གདུང་བའི་ནད་རྣམ་པ་བརྒྱད་སེལ་བ་དང་། མདོ་སྡེ་འདི་འཇིག་རྟེན་དུ་བྱུང་བས་འབྲས་བུ་ཐམས་
ཅད་སྨིན་པར་བྱེད་པ་དང་། ཐམས་ཅད་ལ་ཕན་པ་དང་བདེ་བར་འགྱུར་བ་དང་། སོ་སོའི་སྐྱེ་བོ་དག་སངས་རྒྱས་ཀྱི་རང་བཞིན་མཐོང་བ་ཇི་ལྟར་པུཎ་ཌ་རཱི་ཀའི་མདོ་ལས་ཉན་ཐོས་བརྒྱད་སྟོང་རྣམས་ལ་ལུང་བསྟན་ཏེ་འབྲས་བུ་ཆེན་པོ་
ཐོབ་པ་བཞིན་ནོ། །ཇི་ལྟར་སྟོན་གྱི་དུས་སུ་ལས་བྱས་ནས་དགུན་སྦེད་པ་ལྟར་ལས་གཞན་མི་བྱེད་པ་ལོག་སྲེད་ཅན་ཡང་དེ་དང་འདྲ་སྟེ། དགེ་བའི་ཆོས་ལ་རྩོལ་བ་མེད་དོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་
པ་མཁས་པ་ཞིག་ཕ་རོལ་པོའི་བུ་ཞིག་འདྲེས་བརླམས་ཤེས་ཐོས་ན་སྨན་བཟང་པོ་སྦྱར་ཏེ། མི་ཅིག་དེའི་སྟེང་དུ་མངགས་ནས་འདི་སྐད་ཅེས་ཁྱོད་སྨན་འདི་ཐོགས་ལ་དེའི་གན་དུ་སྐྱོལ་ཅིག །ཅི་སྟེ་མངགས་པའི་མི་
དེ་ཉིད་ལམ་དུ་ཡི་དགས་དང་ཕྲད་ན་ཡང་སྨན་དེའི་སྟོབས་ཀྱིས་འབྱོལ་ཞིང་འབྲོས་པར་འགྱུར་རོ། །ཁྱོད་ཅི་སྟེ་ཐོགས་ན་ཡང་ཁོ་བོ་ཉིད་དོན་དུ་འགྲོ་སྟེ་ནད་པ་དེ་གློ་བུར་གྱིས་འཆི་བར་མི་བྱའོ། །ཅི་སྟེ་ནད་པ་དེས་མངགས་
པའི་མི་དེའམ། ཁོ་བོ་ཉིད་དང་ཕྲད་ན་སྨན་གྱི་སྟོབས་ཀྱིས་ནད་ཀྱི་སྡུག་བསྔལ་དང་བྲལ་ཏེ་བདེ་བར་འགྱུར་རོ། །ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་འདི་ཡང་དེ་དང་འདྲ་སྟེ། དགེ་སློང་ངམ། དགེ་སློང་མ་འམ། 

47-1-157b

དགེ་བསྙེན་ནམ། དགེ་བསྙེན་མ་འམ། མུ་སྟེགས་ཅན་ལ་སོགས་པ་གང་སུ་ཡང་རུང་སྟེ་མདོ་སྡེ་འདི་འཆང་ངམ། འཛིན་ཏམ། ཀློག་གམ། འདོན་ཏམ། ཁོང་དུ་ཆུད་པར་བྱེད་དམ། གཞན་ལ་རྒྱས་པར་སྟོན་ཅིང་འཆད་དམ། 
བདག་གིས་གླེགས་བམ་དུ་བྲིས་སམ། གཞན་འདྲིར་བཅུག་ན་དེ་དག་ཐམས་ཅད་ཀྱི་བྱང་ཆུབ་ཀྱི་རྒྱུར་འགྱུར་རོ། །གལ་ཏེ་ཕས་ཕམ་པ་བཞི་ཉམས་སམ། མཚམས་མེད་པ་ལྔའི་སྡིག་བྱས་སམ། ཡི་དགས་ཀྱིས་བརླམས་
སམ། གདུག་པས་གནོད་པར་གྱུར་པ་དག་མདོ་སྡེ་འདི་ཐོས་ན་སྡིག་པ་ཐམས་ཅད་བྱང་བར་འགྱུར་ཏེ། ཇི་ལྟར་སྨན་པ་མཁས་པ་དེ་མཐོང་ན་ཡི་དགས་ལ་སོགས་པ་འབྱོལ་ཞིང་འབྲོས་པ་བཞིན་ནོ། །དེ་བས་ན་དེ་ནི་བྱང་ཆུབ་
སེམས་དཔའ་སེམས་དཔའ་ཆེན་པོ་ཡང་དག་པ་ཞེས་བྱའོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་ཆེན་པོ་ཐོས་པ་ཙམ་དང་། དེ་བཞིན་གཤེགས་པ་རྟག་གོ་བར་བསམས་པའི་ཕྱིར་རོ། །ཐོས་པ་ཙམ་གྱིས་ཀྱང་དེ་
ལྟ་བུར་གྱུར་ན། གླེགས་བམ་དུ་འདྲི་འམ། འཆང་ངམ་འཛིན་ཏམ། ཀློག་གམ། འདོན་པ་ལྟ་སྨོས་ཀྱང་ཅི་དགོས་ཏེ། ལོག་སྲེད་ཅན་མ་གཏོགས་པར་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་
ཡིན་པར་རིག་པར་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་འོན་པས་སྒྲ་སྐད་ཅི་ཡང་མི་ཐོས་སོ། །ལོག་སྲེད་ཅན་ཡང་དེ་དང་འདྲ་སྟེ། མདོ་སྡེ་དམ་པ་འདི་ཉན་པར་རྩོལ་ཡང་མི་ཐོས་སོ། །དེ་ཅིའི་ཕྱིར་ཞེ་ན། 
ཐོས་པའི་རྒྱུ་མེད་པའི་ཕྱིར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་པ་མཁས་པ་དཔྱད་ཐམས་ཅད་རབ་ཏུ་རྟོགས་པ་རིག་སྔགས་ཚད་མེད་པ་ཡང་ཤེས་པ་ཞིག་གིས་རྒྱལ་པོ་ལ་འདི་སྐད་ཅེས་སྨྲས་སོ། །རྒྱལ་པོ་
ཆེན་པོ་རྒྱལ་པོ་ཆེན་པོ་ལ་ནི་ངེས་པར་འཆི་བར་འགྱུར་བའི་ནད་ཡོད་དོ། །རྒྱལ་པོས་སྨྲས་པ། ཁྱོད་ཁོ་བོའི་ཁོང་པར་མ་ཕྱིན་ན། ཁོ་བོ་ལ་ངེས་པར་འཆི་བར་འགྱུར་བའི་ནད་ཡོད་པར་ཇི་ལྟར་ཤེས། སྨན་པས་སྨྲས་པ། 

47-1-158a

དེ་ལྟར་ཡིད་མི་ཆེས་ན་བཀྲུ་སྨན་ཐོང་ཤིག་དང་། ནད་ཕྱིར་འབྱུང་སྟེ་མཐོང་བར་འགྱུར་རོ་ཞེས་སྨྲས་ཀྱང་སྨན་འཐུང་དུ་མ་བཏུབ་བོ། །དེ་ནས་སྨན་པ་དེས་རིག་སྔགས་ཀྱི་མཐུས་རྒྱལ་པོ་དེའི་རྐུབ་ལ་ཤུ་བ་སྐྱེས་ནས་རྐུབ་
ནས་སྲིན་བུ་དང་ཁྲག་བྱུང་བར་བྱས་སོ། །རྒྱལ་པོ་དེ་དེ་ལྟར་གྱུར་པ་མཐོང་ནས་ཤིན་ཏུ་སྐྲག་སྟེ། སྨན་པ་དེ་ལ་ལེགས་སོ་ལེགས་སོ་ཞེས་བསྟོད་ནས་སྔར་ཁྱོད་ཀྱི་ཚིག་མ་ཉན་ཏེ། ད་ཡང་ཁྱོད་ཀྱིས་བདག་གི་ལུས་ལ་ཤིན་ཏུ་
ཕན་པ་ཆེན་པོ་བྱས་སོ་ཞེས་སྨྲས་ནས་སྨན་པ་དེ་ཕ་མ་ལྟ་བུར་བཀུར་སྟི་བྱེད་དོ། །ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་ཡང་དེ་དང་འདྲ་སྟེ། སེམས་ཅན་གང་འདོད་པ་དང་བཅས་པ་འམ། འདོད་པ་མེད་ཀྱང་རུང་སྟེ། 
དེ་དག་གི་ཉོན་མོངས་པ་ཐམས་ཅད་ཞི་བར་བྱེད་དོ། །སེམས་ཅན་གང་རྨི་ལམ་ན་མདོ་སྡེ་འདི་རྨིས་པས་མཆོད་པ་དང་། བཀུར་སྟི་བྱེད་པ་ནི་ཇི་ལྟར་རྒྱལ་པོ་ཆེན་པོས་སྨན་པ་མཁས་པ་ལ་བཀུར་སྟི་བྱེད་པ་བཞིན་ནོ། །ཇི་ལྟར་
སྨན་པ་མཁས་པས་ངེས་པར་འཆི་བར་འགྱུར་བ་མི་གསོ་བ་བཞིན་དུ་མྱ་ངན་ལས་འདས་པ་ཆེན་པོའི་མདོ་སྡེ་འདི་ཡང་དེ་དང་འདྲ་སྟེ། ལོག་སྲེད་ཅན་ལ་གསོ་བར་མི་འགྱུར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་
པ་མཁས་པས་རིག་པའི་གནས་བརྒྱད་ལ་མཁས་པ་དག་ནད་ཐམས་ཅད་གསོ་ནུས་ཀྱང་ངེས་པར་འཆི་བར་འགྱུར་བའི་ནད་གསོ་ནུས་པ་མ་ཡིན་ནོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་དེ་དང་འདྲ་སྟེ། སེམས་ཅན་གྱི་
སྲིད་པའི་ཁ་ན་མ་ཐོ་བ་ཐམས་ཅད་གསོད་ནུས་ཀྱང་ངེས་པར་འཆི་བར་འགྱུར་བ་ལྟ་བུ་ལོག་སྲེད་ཅན་དག་གསོད་ནུས་པ་མ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་པ་མཁས་པས་རིག་པའི་གནས་བརྒྱད་ལ་
མཁས་པ་སྨན་དཔྱད་ཀུན་དང་རིག་པའི་གནས་བརྒྱད་ཀྱི་ཕ་རོལ་ཏུ་ཕྱིན་ཏེ་ཐམས་ཅད་རྟོགས་ནས་སྔར་བུ་ལ་ཆུའི་ནང་ནས་འབྱུང་བ་དང་། སྐམ་ས་ལ་འབྱུང་བ་དང་། རི་ལ་འབྱུང་བའི་སྨན་ཐམས་ཅད་སྟོན་ཏོ། །དེ་དག་ཤེས་ནས་བགས་

47-1-158b

ཀྱིས་རིག་པའི་གནས་བརྒྱད་སྟོན་ཏོ། །དེ་ནས་དེ་མ་ཡིན་པ་དཔྱད་གསང་བའི་མཆོག་ཀྱང་སྟོན་ཏོ། །དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཀྱང་དེ་དང་འདྲ་སྟེ། སྔར་སྲས་དང་འདྲ་བ་དགེ་སློང་རྣམས་ལ་ཉོན་
མོངས་པ་ཐམས་ཅད་བསལ་བའི་ཐབས་བསྟན་ཏེ། ལུས་གཙང་བར་བྱ་བ་སྙིང་པོ་མེད་པའི་འདུ་ཤེས་ལ་ནན་ཏན་བྱེད་དུ་བཅུག་པ་དེ་ནི་ཆུ་དང་སྐམ་ས་དང་རི་བྲགས་ལྟ་བུ་བསྟན་པའོ། །ཆུ་ཞེས་བྱ་བ་ནི་ལུས་སྡུག་བསྔལ་མྱོང་བ་ཆུའི་ཆུ་
བུར་དང་འདྲའོ་ཞེས་བསྟན་པའོ། །སྐམ་ས་ཞེས་བྱ་བ་ནི་ལུས་འདི་སྙིང་པོ་མེད་དེ་ཆུ་ཤིང་དང་འདྲའོ་ཞེས་བསྟན་པའོ། །རི་བྲགས་ཤེས་བྱ་བ་ནི་ཉོན་མོངས་པའི་ནང་ན་བདག་མེད་པའི་འདུ་ཤེས་བསྒོམ་པ་བསྟན་པ་སྟེ། དེ་བས་ན་
ལུས་ལ་བདག་མེད་པ་ཞེས་བྱའོ། །དེ་བཞིན་གཤེགས་པས་དེ་ལྟར་ཉེ་གནས་རྣམས་ལ་བགས་ཀྱིས་མདོ་སྡེ་དགུ་པོ་བསྟན་ཏེ་རྟོགས་པར་བྱས་ནས་དེའི་འོག་ཏུ་དེ་བཞིན་གཤེགས་པའི་སྙིང་པོ་བསྟན་ཏེ། སྲས་ལྟ་བུའི་
ཕྱིར་དེ་བཞིན་གཤེགས་པ་རྟག་གོ་ཞེས་པ་བཤད་དོ། །དེ་བཞིན་གཤེགས་པས་དེ་ལྟར་ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་བསྟན་པ་ནི་སེམས་ཅན་གང་སེམས་སྐྱེད་དམ། སེམས་མ་བསྐྱེད་པ་ཐམས་ཅད་ཀྱི་བྱང་
ཆུབ་ཀྱི་རྒྱུར་འགྱུར་ཏེ། ལོག་སྲེད་ཅན་འབའ་ཞིག་ནི་མ་གཏོགས་སོ། །རིགས་ཀྱི་བུ་ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་འདི་ནི་ཚད་མེད་མཐའ་ཡས་པ་སྟེ་བསམ་གྱིས་མི་ཁྱབ་པོ། །དེ་བས་ན་འདི་ནི་
སྨན་པ་མཁས་པའི་མཆོག་ཕུལ་དུ་གྱུར་པ། གཙོ་བོར་གྱུར་པ། མདོ་སྡེ་ཀུན་གྱི་རྒྱལ་པོ་ལྟ་བུའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་གྲུ་ཆེན་པོ་ནི་རྒྱ་མཚོའི་ཚུ་རོལ་ནས་རྒྱ་མཚོའི་ཕ་རོལ་དུ་སྒྲོལ་ལ། རྒྱ་
མཚོའི་ཕ་རོལ་ནས་ཚུ་རོལ་དུ་ཡང་སྒྲོལ་ལོ། །དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཀྱང་དེ་དང་འདྲ་སྟེ། མྱ་ངན་ལས་འདས་པ་ཆེན་པོ་རིན་པོ་ཆེའི་གྲུར་ཞུགས་ན་སེམས་ཅན་ཡོངས་སུ་སྒྲོལ་ཏེ་གང་ནས་གང་དུ་

47-1-159a

འགྲོ་བར་འགྱུར་བ་ཡོད་ན་དེ་དང་དེ་དག་ཏུ་སྒྲོལ་ཞིང་དེ་བཞིན་གཤེགས་པའི་སྐུ་མཐོང་བར་མཛད་དོ། །དེ་བས་ན་དེ་བཞིན་གཤེགས་པ་ནི་གྲུ་སྒྲོལ་བའི་མཁན་པོ་ལྟ་བུའོ། །དཔེར་ན་གྲུ་གཟིངས་ཀྱང་མཉན་པ་ཡོད་ན་འགྲོ་
བ་དག་རྒྱ་མཚོ་ལས་རྒལ་བར་གྱུར་ཏེ་དེ་བཞིན་གཤེགས་པ་རྟག་ཏུ་སེམས་ཅན་མང་པོ་སྒྲོལ་བའི་དོན་མཛད་པ་ཡང་དེ་དང་འདྲའོ།། །། བམ་པོ་བཅུ་གསུམ་པ། རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་རྒྱ་མཚོ་
ཆེན་པོ་ལས་རྒལ་བའི་གྲུར་ཞུགས་པ་དག་གལ་ཏེ་རླུང་དང་ལྡན་ན་ནི་སྐད་ཅིག་ཐང་ཅིག་གིས་དཔག་ཚད་ཚད་མེད་པའི་ཕ་རོལ་ཏུ་ཕྱིན་པར་འགྱུར་རོ། །གལ་ཏེ་རླུང་དང་མི་ལྡན་ན་ལོ་ཚད་མེད་པའི་བར་དུ་བསྡད་ཀྱང་གནས་
ནས་མི་འཕགས་སོ། །གལ་ཏེ་གྲུ་ཞིག་ན་ཆུར་ནུབ་སྟེ་འཆི་བར་ཡང་འགྱུར་རོ། །གལ་ཏེ་སེམས་ཅན་དག་གཏི་མུག་གི་འཁོར་བའི་རྒྱ་མཚོ་ཆེན་པོར་འདུ་བྱེད་ཀྱི་གྲུ་ལ་ཞུགས་པ་ཡང་དེ་དང་འདྲ་སྟེ། གལ་ཏེ་མྱ་ངན་ལས་
འདས་པ་ཆེན་པོའི་རླུང་དྲག་པོ་དང་ཕྲད་ན་མྱུར་དུ་བླ་ན་མེད་པའི་བྱང་ཆུབ་ཏུ་ཕྱིན་པར་འགྱུར་གྱི། གལ་ཏེ་མ་ཕྲད་ན་བསྐལ་པ་ཚད་མེད་པའི་བར་དུ་འཁོར་བར་ཡོངས་སུ་འཁོར་ཏེ་གལ་ཏེ་ན་སེམས་ཅན་དམྱལ་བ་དང་། 
ཡི་དགས་དང་། བྱོལ་སོང་གི་སྐྱེ་གནས་སུ་ལྟུང་བར་འགྱུར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་རྒྱ་མཚོ་ཆེན་པོའི་གྲུར་ཞུགས་ཏེ་ཡུན་རིང་པོ་ལོན་པ་དག་རླུང་དང་མི་ལྡན་ན་དེ་འདི་སྙམ་དུ་སེམས་སོ། །
བདག་ཅག་ནི་གདོན་མི་ཟ་བར་འཆི་བར་འགྱུར་རོ་སྙམ་སྟེ། དེ་ལྟར་སེམས་པ་ན་ཅི་སྟེ་རླུང་དྲག་པོ་དང་ཕྲད་ནས་ཡིད་བཞིན་དུ་རྒྱ་མཚོའི་ཕ་རོལ་དུ་ཕྱིན་ན་དེ་འདི་སྐད་དུ་རླུང་གིས་ཤིན་ཏུ་ཚིམ་པར་གྱུར་ཏོ། །བདག་ཅག་
ཀྱང་བདེ་བར་རྒྱ་མཚོའི་བགེགས་ལས་ཐར་བར་གྱུར་ཏོ་ཞེས་ཟེར་རོ། །སེམས་ཅན་ཡུན་རིང་པོར་གཏི་མུག་གི་འཁོར་བའི་རྒྱ་མཚོར་དེད་དེ། སྡུག་བསྔལ་གྱིས་གཟིར་བ་མྱ་ངན་ལས་འདས་པ་ཆེན་པོའི་རླུང་དང་

47-1-159b

མ་ཕྲད་པ་ན་དེ་འདི་སྙམ་དུ་སེམས་ཏེ། བདག་ཅག་ནི་གདོན་མི་ཟ་བར་སེམས་ཅན་དམྱལ་བ་དང་། ཡི་དགས་དང་བྱོལ་སོང་གི་སྐྱེ་གནས་སུ་ལྟུང་བར་འགྱུར་རོ་སྙམ་སེམས་སོ། །ཇི་ལྟར་སེམས་པ་ན་ཅི་སྟེ་མྱ་ངན་ལས་འདས་པ་
ཆེན་པོའི་རླུང་དང་ཕྲད་ནས་ཡིད་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཞག་ན་གདོད་ཡང་དག་པ་ཡིན་པར་རྟོགས་ཏེ། ངོ་མཚར་རྨད་ཀྱི་འདུ་ཤེས་སྐྱེས་ནས་བདག་སྔོན་འདི་ལྟ་བུའི་དེ་བཞིན་གཤེགས་པའི་
གསང་བའི་སྙིང་པོ་མ་ཐོས་སོ། །ཞེས་ཟེར་ཏེ་མྱ་ངན་ལས་འདས་པ་ཆེན་པོའི་མདོ་སྡེ་ལ་ཡོངས་སུ་དག་པའི་སར་སེམས་སྐྱེ་བར་འགྱུར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྦྲུལ་ལྤགས་པ་རྗེ་བ་ན་དེ་ལ་ཤི་བ་ཞེས་
བྱ་བ་འམ། གསོལ་པ་མ་ལགས་སོ། །བཅོམ་ལྡན་འདས་རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། ཐབས་ཀྱིས་སྐུ་ཡོངས་སུ་བཏང་བ་བསྟན་པ་ལ་ཇི་ལྟར་དེ་ལ་དེ་བཞིན་གཤེགས་པ་མི་རྟག་གོ་ཞེས་བྱ་བར་རུང་ངམ། 
གསོལ་པ་མ་ལགས་སོ། །བཅོམ་ལྡན་འདས་དེ་བཞིན་གཤེགས་པས་འཛམ་བུའི་གླིང་འདིར་ཐབས་ཀྱིས་སྐུ་བཏང་བ་ནི་དཔེར་ན་སྦྲུལ་ལྤགས་པ་རྗེ་བ་དང་འདྲ་སྟེ། དེ་བས་ན་དེ་བཞིན་གཤེགས་པ་ནི་རྟག་པ་གནས་པ་ཞེས་
བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་གསེར་མགར་མཁས་པས་གསེར་ལ་ཡོ་བྱད་རྣམ་པ་སྣ་ཚོགས་ཡིད་བཞིན་དུ་རྡུང་ངོ་། །དེ་བཞིན་གཤེགས་པ་ཡང་དེ་དང་འདྲ་སྟེ། སྲིད་པ་ཉི་ཤུ་ལྔ་པོར་གཟུགས་ཀྱི་སྐུ་རྣམ་
པ་སྣ་ཚོགས་མངོན་པར་བསྟན་ཏེ་སོ་སོའི་སྐྱེ་བོ་འཁོར་བ་ལས་ཡོངས་སུ་འདོན་པས་དེ་བཞིན་གཤེགས་པ་ནི་སྐུ་དཔག་ཏུ་མེད་པ་ཞེས་བྱའོ། །དེ་ལྟར་སྐུ་རྣམ་པ་སྣ་ཚོགས་སྟོན་ཀྱང་། རྟག་པ་གནས་པ་མི་འགྱུར་མི་འཕོ་བ་
ཞེས་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཤིང་ཨ་མྲ་དང་འཛམ་བུའི་ཤིང་ནི་ལོ་གཅིག་ལ་ལན་གསུམ་དུ་འགྱུར་རོ། །འདི་ལྟ་སྟེ་ཆེད་འགའི་དུས་སུ་ནི་མེ་ཏོག་ལ་སོགས་པ་ཤིན་ཏུ་རྒྱས་པར་འགྱུར། ཆེད་

47-1-160a

འགའི་དུས་སུ་ནི་འདབ་མ་ལ་སོགས་པ་ཤིན་ཏུ་རྒྱས་པར་འགྱུར། ཆེད་འགའི་དུས་སུ་ནི་འདབ་མ་ཐམས་ཅད་ལྷགས་ནས་ཤིང་སྐམ་ལྟ་བུར་འགྱུར་རོ། །རིགས་ཀྱི་བུ་དེ་ཁྱོད་ཀྱི་ཡིད་ལ་ཇི་སྙམ་སེམས། དེའི་ཚེ་ན་ཤིང་
དེ་ཡང་དག་པར་སྐམས་སམ། གསོལ་པ། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། འཇིག་རྟེན་གསུམ་པོར་སྐུ་རྣམ་པ་གསུམ་སྟོན་ཏེ། འདི་ལྟ་སྟེ། 
ཆེད་འགའ་ནི་ཐོག་མ་བཙས་པ་དང་། ཆེད་འགའ་ནི་སྐུ་རྫོགས་པ་དང་། ཆེད་འགའ་ནི་མྱ་ངན་ལས་འདས་པ་བསྟན་ཏེ། དེ་བཞིན་གཤེགས་པའི་སྐུ་མི་རྟག་པ་ནི་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་
གིས་བཅོམ་ལྡན་འདས་ལ་ལེགས་སོ་ཤིན་ཏུ་ལེགས་སོ་ཞེས་བསྟོད་ནས་བཅོམ་ལྡན་འདས་ཀྱིས་གསུངས་པ་བཞིན་ཏེ། དེ་བཞིན་གཤེགས་པ་ནི་རྟག་པ་གནས་པ་མི་འགྱུར་མི་འཕོ་བའོ་ཞེས་གསོལ་ཏོ། །བཅོམ་ལྡན་འདས་
ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པས་དགོངས་ཏེ་གསུངས་པ་ནི་ཤིན་ཏུ་ཡང་ཤེས་པར་དཀའོ། །འདི་ལྟ་སྟེ། དཔེར་ན་རྒྱལ་པོ་ཆེན་པོ་ཞིག་གིས་བློན་པོ་རྣམས་ལ་སེན་ཏ་པ་འོན་ཅིག་ཅེས་བཀའ་སྩལ་ན། 
སེན་ཏ་པ་ཞེས་བྱ་བ་མིང་གཅིག་ལ་དངོས་པོར་བསྔོ་བ་བཞི་ཡོད་དོ། །འདི་ལྟ་སྟེ་ལན་ཚྭ་དང་། སྣོད་དང་། ཆུ་དང་། རྟ་སྟེ་དངོས་པོ་འདི་བཞི་ནི་མཐུན་ནོ། །དེ་ལ་བློན་པོ་མཁས་པས་ནི་གལ་ཏེ་རྒྱལ་པོ་ཁྲུས་བྱ་བར་བསམས་ཏེ་སེན་
ཏ་པ་འོན་ཅིག་ཅེས་བསྒོ་བའི་དུས་ན་ཆུ་འབུལ་ལོ། །རྒྱལ་པོ་ཟས་ཀྱི་བྱ་བ་བྱེད་པ་ན་སེན་ཏ་པ་འོན་ཅིག་ཅེས་བགོ་བའི་དུས་ན་ལན་ཚྭ་འབུལ་ལོ། །རྒྱལ་པོ་ཟས་ཀྱི་བྱ་བ་བྱས་ནས་སྐོམ་འཐུང་བ་ན་སེན་ཏ་པ་འོན་ཅིག་ཅེས་བགོ་བའི་
དུས་ན་དེ་ལ་སྣོད་འབུལ་ལོ། །གལ་ཏེ་རྒྱལ་པོ་འགྲོ་བར་གཟས་ཏེ་སེན་ཏ་པ་འོན་ཅིག་ཅེས་བསྒོ་བའི་དུས་ན་རྟ་ཁྲིད་དེ་འོང་ངོ་། །དེ་ལྟར་བློན་པོ་མཁས་པས་ནི་རྒྱལ་པོའི་མན་ངག་བཞི་པོ་ལ་མཁས་སོ། །ཐེག་པ་ཆེན་པོའི་མདོ་སྡེ་

47-1-160b

འདི་ཡང་དེ་དང་འདྲ་སྟེ། མི་རྟག་པ་རྣམ་པ་བཞི་ཡོད་དོ། །ཐེག་པ་ཆེན་པོ་ལ་ཤིན་ཏུ་མཁས་པའི་སྐྱེས་བུ་དག་ནི་དེ་ལ་ཤིན་ཏུ་མཁས་པར་བྱའོ། །སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ནས་སེམས་ཅན་དག་ལ་དེ་བཞིན་གཤེགས་
པ་མྱ་ངན་ལས་འདས་པ་བཤད་པས་སྐྱེས་བུ་མཁས་པ་དག་གིས་དེ་བཞིན་གཤེགས་པས་རྟག་པར་འཛིན་པ་ལ་མི་རྟག་པར་བསྟན་པར་ཤེས་ཏེ་དགེ་སློང་དག་ནི་མི་རྟག་པའི་མཚན་ཉིད་ལ་ནན་ཏན་བྱེད་དུ་གཞུག་པའི་ཕྱིར་རོ། །
གཞན་ཡང་ཕྱེད་འགའི་དུས་ན་དམ་པའི་ཆོས་འཇིག་པར་འགྱུར་རོ་ཞེས་བསྟན་པས་སྐྱེས་བུ་མཁས་པ་དག་གིས་དེ་བཞིན་གཤེགས་པས་གང་བདེ་བར་འཛིན་པ་ལ་སྡུག་བསྔལ་བ་བསྟན་པར་ཤེས་ཏེ། དགེ་སློང་དག་སྡུག་བསྔལ་
བའི་མཚན་ཉིད་ལ་ནན་ཏན་བྱེད་དུ་གཞུག་པའི་ཕྱིར་རོ། །གཞན་ཡང་འདི་སྐད་དུ་ང་ལ་ན་བའི་སྡུག་བསྔལ་ཡོད་དེ། དགེ་འདུན་ཡང་འཇིག་པར་འགྱུར་རོ་ཞེས་བསྟན་པས་སྐྱེས་བུ་མཁས་པ་དག་གིས་དེ་བཞིན་གཤེགས་པས་
བདག་ཏུ་འཛིན་པ་རྣམས་ལ་བདག་མེད་པ་བསྟན་པར་ཤེས་ཏེ། དགེ་སློང་དག་བདག་མེད་པ་ལ་ནན་ཏན་བྱེད་དུ་གཞུག་པའི་ཕྱིར་རོ། །ཕྱེད་འགའ་འདི་སྐད་དུ་སྟོང་པ་ཉིད་ཅེས་བྱ་བ་ནི་ཡང་དག་པར་རྣམ་པར་གྲོལ་བའོ་ཞེས་བསྟན་
པས་སྐྱེས་བུ་མཁས་པ་དག་གིས་ནི་དེ་བཞིན་གཤེགས་པས་ཡང་དག་པར་རྣམ་པར་གྲོལ་བར་བསྟན་གྱི། སྲིད་པ་ཉི་ཤུ་ལྔ་པོ་ནི་མེད་པར་ཤེས་ཏེ། དགེ་སློང་དག་སྟོང་པ་ཉིད་ལ་ནན་ཏན་བྱེད་དུ་གཞུག་པའི་ཕྱིར་རོ། །དེ་བས་ན་ཡང་
དག་པར་རྣམ་པར་གྲོལ་བ་ལ་ནི་སྟོང་པ་ཉིད་དོ་ཞེས་བསྟན་ཏོ། །མི་གཡོ་བ་གཡོ་བ་མེད་པ་ཞེས་ཀྱང་བྱ་སྟེ། རྣམ་པར་གྲོལ་བ་དེ་ལ་སྡུག་བསྔལ་བ་མེད་པའི་ཕྱིར་མི་གཡོ་བ་ཞེས་བྱའོ། །ཡང་དག་པར་རྣམ་པར་གྲོལ་བ་ནི་མཚན་
མ་མེད་པས་མཚན་མ་མེད་པ་ཞེས་བྱ་སྟེ། གཟུགས་དང་། སྒྲ་དང་། དྲི་དང་། རོ་དང་། རེག་བྱ་ལ་སོགས་པ་མེད་པའི་ཕྱིར་མཚན་མ་མེད་པ་ཞེས་བྱའོ། །ཡང་དག་པར་རྣམ་པར་གྲོལ་བ་ནི་རྟག་པ་མི་འགྱུར་མི་འཕོ་བ་

47-1-161a

སྟེ། རྣམ་པར་གྲོལ་བ་ལ་མི་རྟག་པ་དང་། གདུང་བར་འགྱུར་བ་དང་། འཕོ་བ་མེད་པས། དེ་བས་ན་རྣམ་པར་གྲོལ་བ་ནི་རྟག་པ་གནས་པ་མི་འགྱུར་བ་བསིལ་བའོ། །གལ་ཏེ་སེམས་ཅན་ཐམས་ཅད་ལ་དེ་བཞིན་
གཤེགས་པའི་རང་བཞིན་ཡོད་པ་བསྟན་ན་དེ་ལ་སྐྱེས་བུ་མཁས་པས་ནི་འདི་ལྟར་དེ་བཞིན་གཤེགས་པས་རྟག་པ་ཞེས་བྱ་བའི་ཆོས་བསྟན་ཏེ། དགེ་སློང་དག་ཡང་དག་པར་རྟག་པའི་ཆོས་ལ་ནན་ཏན་བྱེད་དུ་གཞུག་པར་ཤེས་
སོ། །དགེ་སློང་དག་དེ་ལྟར་རྗེས་སུ་ནན་ཏན་བྱེད་ཅིང་སློབ་པ་དེ་ནི་ངའི་ཉེ་གནས་ཡང་དག་པ་ཡིན་པར་རིག་པར་བྱའོ། །དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་ལ་མཁས་པ་དེ་ནི་ཇི་ལྟར་རྒྱལ་པོ་ཆེན་པོ་དེའི་བློན་པོ་
མཁས་པས་རྒྱལ་པོའི་བསམ་པ་ཤེས་པ་དང་འདྲའོ། །རིགས་ཀྱི་བུ་དེ་ལྟར་རྒྱལ་པོ་ཆེན་པོ་དེ་ལ་ཡང་མན་ངག་དུ་སྨྲ་བའི་ཚིག་ཡོད་ན་དེ་བཞིན་གཤེགས་པ་ལ་ཡོད་པ་ལྟ་ཅི་སྨོས། རིགས་ཀྱི་བུ་དེ་བས་ན་དེ་བཞིན་གཤེགས་
པས་དགོངས་ཏེ་གསུངས་པ་ནི་ཤིན་ཏུ་ཤེས་པར་དཀའ་སྟེ། མཁས་པ་ཤེས་རབ་ཅན་གྱིས་ནི་ངས་དགོངས་ཏེ་གསུངས་པའི་ཆོས་ཟབ་མོ་འདི་ཤེས་པར་འགྱུར་གྱི། འཇིག་རྟེན་ན་བྱིས་པ་གླེན་པ་དག་གིས་ཤེས་པར་འགྱུར་
བ་མ་ཡིན་ནོ། །གཞན་ཡང་རིགས་ཀྱི་བུ་འདི་ལྟ་སྟེ་དཔེར་ན་ཤིང་པ་ལ་ཤ་དང་། ཀ་ནི་ཀ་དང་། ཨ་ཤོ་ཀ་ནི་ཐན་ཆེན་བྱུང་ན་མེ་ཏོག་དང་འབྲས་བུ་མི་སྐྱེ་སྟེ་གཞན་ཡང་ཆུ་ལས་སྐྱེས་པ་ཐམས་ཅད་ཀྱང་སྣུམ་མེད་ལ་ཚད་དུ་ཕྱིན་
པར་མི་སྐྱེ་ཞིང་སྨན་ཐམས་ཅད་ཀྱང་མཐུ་ཆུང་བར་འགྱུར་རོ། །རིགས་ཀྱི་བུ་ཐེག་པ་ཆེན་པོའི་མདོ་སྡེ་ཡོངས་སུ་མྱ་ངན་ལས་འདས་པ་ཆེན་པོ་འདི་ཡང་དེ་དང་འདྲ་སྟེ། ང་མྱ་ངན་ལས་འདས་ནས་སེམས་ཅན་དག་སྟི་སྟང་
མི་བྱེད་དེ། གཟི་བརྗིད་ཀྱང་ཆུང་བར་འགྱུར་རོ། །དེ་ཅིའི་ཕྱིར་ཞེ་ན། སེམས་ཅན་དེ་དག་དེ་བཞིན་གཤེགས་པས་དགོངས་ཏེ་གསུངས་པ་མི་ཤེས་པའི་ཕྱིར་རོ། །དེ་ཡང་ཇི་ལྟ་ཞེ་ན། སེམས་ཅན་དག་བསོད་ནམས་ཆུང་

47-1-161b

བའི་ཕྱིར་རོ། །རིགས་ཀྱི་བུ་གཞན་ཡང་དེ་བཞིན་གཤེགས་པའི་དམ་པའི་ཆོས་རྣམ་པར་འཇིག་ཅིང་ཟད་དུ་ཉེ་བ་ན་དེའི་ཚེ་དེའི་དུས་ན་དགེ་སློང་སྡིག་པ་སྤྱོད་པ་མང་སྟེ་དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་མི་
ཤེས་པས། ལེ་ལོ་དང་སྙོམ་ལས་བྱེད་དེ། དེ་བཞིན་གཤེགས་པའི་ཡང་དག་པའི་ཆོས་ཀློག་པ་དང་། འདོན་པ་དང་། རྣམ་པར་འབྱེད་ཅིང་སྟོན་མི་ནུས་སོ། །དཔེར་ན་རྐུན་པོ་གླེན་པ་དག་རིན་པོ་ཆེ་ཡང་དག་པ་བོར་ནས་ཕུབ་མ་ཁུར་
དུ་ཁྱེར་བ་དང་འདྲ་བར་དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་མི་ཤེས་པས་མདོ་སྡེ་འདི་ལ་ལེ་ལོ་བྱེད་དེ། བརྩོན་འགྲུས་མི་སྐྱེད་དེ། ཀྱི་ཧུད་དེ་དག་ནི་མ་འོངས་པའི་དུས་སུ་ཤིན་ཏུ་འཇིགས་པའི་གཡང་ས་ཆེན་
པོར་ལྟུང་བར་འགྱུར་རོ། །ཀྱི་ཧུད་སེམས་ཅན་དེ་དག་ནི་ཐེག་པ་ཆེན་པོའི་མདོ་སྡེ་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་བརྩོན་པར་མི་བྱེད་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་འབའ་ཞིག་གིས་ནི་
མདོ་སྡེ་འདིའི་དོན་ཡང་དག་པ་ཇི་ལྟ་བ་བཞིན་དུ་འཇུག་སྟེ་འབྲུ་དང་ཚིག་ལ་མི་ཆགས་དེའི་རྗེས་སུ་གཞོལ་ཞིང་འགལ་བར་མི་བྱེད་པས་སེམས་ཅན་རྣམས་ལ་ཡང་དེ་བཞིན་དུ་སྟོན་ཏོ། །རིགས་ཀྱི་བུ་གཞན་ཡང་འདི་ལྟ་སྟེ་
དཔེར་ན་རྫིའུ་འོ་མ་འཚོང་བ་དག་འོ་མ་མང་བར་བྱ་བའི་ཕྱིར་ཆུ་སུམ་གཉིས་བསྣན་ནས་རྫིའུ་གཞན་ལ་ཡང་འཚོང་ངོ་། །རྫེའུ་དེས་ཀྱང་དེ་ལས་ཆུ་སུམ་གཉིས་བསྣན་ནས་གྲོང་ཁྱེར་དང་ཉེ་བའི་མི་ལ་འཚོང་ངོ་། །དེས་ཀྱང་
དེའི་སྟེང་དུ་ཆུ་སུམ་གཉིས་བསྣན་ནས་གྲོང་ཁྱེར་ན་གནས་པའི་མི་ལ་འཚོང་ངོ་། །དེས་ཉོས་ནས་དེའི་སྟེང་དུ་ཡང་ཆུ་སུམ་གཉིས་ཀྱིས་བསྣན་ཏེ་ཚོང་དུས་སུ་འཚོང་ངོ་། །དེའི་ཚེ་དེའི་དུས་ན་མི་ཞིག་བུའི་ཆུང་མ་ལེན་
པའི་མགྲོན་བོས་ནས་འོ་མ་བཟང་པོ་འདོད་པའི་ཕྱིར་ཚོང་དུས་སུ་འོ་མ་ཉོར་སོང་བ་ལས་འོ་མ་དེ་དང་ཕྲད་ནས་ཆུས་བསྣན་པ་ཆུ་མང་བར་ཤེས་བཞིན་དུ་དགོས་པའི་ཁར་བབ་པས་རིན་ཆེ་ཡང་ཉོས་སོ། །ཉོས་ནས་ཕྱིར་

47-1-162a

ཁྱིམ་དུ་ཕྱིན་པ་དང་ཐུག་པ་བཙོས་ན་འོ་མའི་རོ་མེད་དོ། །དེ་ལྟར་འོ་མའི་རོ་མེད་མོད་ཀྱི་ཁ་བའི་རོ་ལས་ནི་བརྒྱ་སྟོང་སྙེད་ཀྱིས་ལྷག་གོ། དེ་ཅིའི་ཕྱིར་ཞེ་ན། འོ་མས་སྒྱུར་བའི་རོ་ནི་རོ་གཞན་ལས་མཆོག་ཏུ་འགྱུར་བའི་ཕྱིར་རོ། །རིགས་
ཀྱི་བུ་ང་མྱ་ངན་ལས་འདས་ནས་དམ་པའི་ཆོས་འཇིག་པར་མ་གྱུར་པ་ལོ་བརྒྱད་བཅུ་ན། དེའི་ཚེ་དེའི་དུས་སུ་འཛམ་བུའི་གླིང་འདིར་མདོ་སྡེ་འདི་ཤིན་ཏུ་རྒྱས་པར་འགྱུར་རོ། །དེའི་ཚེ་དེའི་དུས་ན་དགེ་སློང་སྡིག་ཅན་དག་མདོ་སྡེ་
འདི་ལ་མདོ་སྡེ་བཏུས་ནས་ཕྱོགས་ཆ་རྣམ་པ་མང་དུ་འབྱེད་དེ་དེས་ནི་དམ་པའི་ཆོས་ཀྱི་མདོག་དང་བསུང་དང་བྲོ་བའི་རོ་མེད་པར་བྱས་སོ། །སྡིག་པ་ཅན་དག་དེ་ལྟར་མདོ་སྡེ་འདི་ཀློག་གམ། འདོན་མོད་ཀྱི་དེ་བཞིན་གཤེགས་
པས་དགོངས་ཏེ་གསུངས་པའི་དོན་ཟབ་མོ་འདི་མེད་པར་བྱས་ཀྱི། འཇིག་རྟེན་གྱི་སྙན་ཚིག་དོན་མེད་པ་བརྟགས་ནས་གོང་དུ་སྨོས་པ་ནི་འོག་ཏུ་བཅུག །འོག་ཏུ་སྨོས་པ་ནི་གོང་དུ་བཅུག །ཐོག་མ་དང་ཐ་མར་སྨོས་
པ་ནི་བར་དུ་བཅུག །བར་དུ་སྨོས་པ་ནི་ཐོག་མ་དང་ཐ་མར་བཅུག་གོ། །དེ་ལྟར་དགེ་སློང་སྡིག་པ་ཅན་དེ་དག་ནི་བདུད་ཀྱི་གྲོགས་ཡིན་ཏེ། མ་བརྟགས་པའི་དངོས་པོ་ཐམས་ཅད་འཆང་ཡང་དེ་བཞིན་གཤེགས་པས་
འཆང་དུ་གནང་ངོ་ཞེས་ཟེར་ཏེ། ཇི་ལྟར་རྫིའུ་ལ་སོགས་པ་འོ་མའི་ནང་དུ་ཆུས་སྣོན་པ་བཞིན་དུ་དགེ་སློང་སྡིག་པ་ཅན་ཡང་དེ་དང་འདྲ་སྟེ། འཇིག་རྟེན་གྱི་ཚིག་གིས་བསྣན་ཏེ་ནོར་བར་གཏན་ལ་ཕབ་པས་སྐྱེ་བོ་
མང་དུ་ཡང་དག་པར་བསྟན་པ་དང་། ཡང་དག་པར་གླེགས་བམ་དུ་འདྲི་བ་དང་། ཡང་དག་པར་འཇུག་ཅིང་བཀུར་སྟི་དང་། བསྟོད་པ་དང་། མཆོད་པ་དང་། རིམ་གྲོར་བྱར་མེད་པར་བྱས་སོ། །དགེ་སློང་སྡིག་པ་
ཅན་དེས་རྙེད་པ་དང་གྲགས་པའི་ཕྱིར་མདོ་སྡེ་འདི་ཅུང་ཟད་ཙམ་ཡང་སྟོན་མི་ནུས་ན་རྒྱ་ཆེར་སྟོན་པ་ལྟ་ཅི་སྨོས་ཏེ། ཇི་ལྟར་རྫིའུ་དབུལ་མོས་འོ་མ་གཅིག་ནས་གཅིག་ཏུ་འཚོང་ཞིང་རོ་མེད་པར་འགྱུར་བ་ལྟར་ཐེག་པ་

47-1-162b

ཆེན་པོའི་མདོ་སྡེ་ཡོངས་སུ་མྱ་ངན་ལས་འདས་པ་ཆེན་པོ་འདི་ཡང་དེ་དང་འདྲ་སྟེ། ཕྱིར་ཞིང་མི་བྲོ་བ་དང་རོ་མེད་པར་འགྱུར་རོ། །དེ་ལྟར་རོ་མེད་ཀྱང་གཞན་པས་སྟོང་འགྱུར་གྱིས་ལྷག་པ་ནི་འོ་མའི་རོ་དེ་རོ་གཞན་པས་སྟོང་འགྱུར་
གྱིས་ལྷག་པ་བཞིན་ནོ། །དེ་ཅིའི་ཕྱིར་ཞེ་ན། ཐེག་པ་ཆེན་པོའི་མདོ་སྡེ་ཡོངས་སུ་མྱ་ངན་ལས་འདས་པ་འདི་ཉན་ཐོས་ཀྱི་མདོ་སྡེ་ལས་ཕུལ་དུ་གྱུར་མཆོག་ཏུ་གྱུར་པ་ནི་ཇི་ལྟར་བའི་འོ་མ་རོ་ཐམས་ཅད་པས་མཆོག་ཏུ་གྱུར་པ་
བཞིན་ནོ། །དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །རིགས་ཀྱི་བུ་གཞན་ཡང་རིགས་ཀྱི་བུ་དང་རིགས་ཀྱི་བུ་མོ་ལ་སོགས་པ་གང་ཡང་སྐྱེས་པའི་ལུས་མི་འདོད་པ་མེད་དོ། །དེ་ཅིའི་ཕྱིར་ཞེ་ན། 
བུད་མེད་ཐམས་ཅད་ནི་སྡིག་པ་ཐམས་ཅད་ཀྱི་གནས་ཡིན་པའི་ཕྱིར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྦྲང་བུའི་གཅིན་གྱིས་ནི་ས་ཆེན་པོ་འདི་རླན་པར་མི་ནུས་སོ། །བུད་མེད་ཅེས་བྱ་བའི་འདོད་ཆགས་ཆོག་
མི་ཤེས་པ་ཡང་དེ་དང་འདྲ་སྟེ། འདི་ལྟ་སྟེ་དཔེར་ན་ས་ཆེན་པོ་འདི་ཐམས་ཅད་ཡུངས་ཀར་གྱི་འབྲུམ་བུ་ཙམ་དྲིལ་བའི་སྐྱེས་པ་དེ་སྙེད་བུད་མེད་གཅིག་ལ་མི་ཚངས་པ་སྤྱད་ཀྱང་ཆོག་པའི་སེམས་མེད་དོ། །གལ་ཏེ་ཀླུང་གང་
གཱའི་བྱེ་མ་སྙེད་ཀྱི་སྐྱེས་པ་བུད་མེད་གཅིག་ལ་བྱིན་ཏེ་མི་ཚངས་པར་སྤྱོད་དུ་བཅུག་ཀྱང་ཆོག་པ་འམ་སྐྱོ་བ་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན་རྒྱ་མཚོ་ཆེན་པོར་ནི་ཆར་པ་དང་འབབ་ཆུ་ཐམས་ཅད་འབབ་ཀྱང་རྒྱ་མཚོ་
དེ་ལ་གང་བ་འམ་ཆོག་པ་མེད་དོ། །བུད་མེད་ཀྱང་ཆོས་ཉིད་ཀྱིས་དེ་དང་འདྲ་བས་ཅི་སྟེ་དངོས་པོ་ཐམས་ཅད་སྐྱེས་པར་གྱུར་ཏེ་བུད་མེད་གཅིག་ལ་མི་ཚངས་པར་སྤྱོད་ཀྱང་ཆོག་པར་རམ་སྐྱོ་བར་མི་འགྱུར་རོ། །
རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཤིང་ཨ་ཤོ་ཀ་དང་། པ་ཏ་ལ་དང་ཀ་ནི་ཀ་ལྟ་བུ་དབྱར་མེ་ཏོག་རྒྱས་པ་ན་བུང་བ་དག་དྲི་དང་བསུང་ལེན་པ་ཆོག་མི་ཤེས་སོ། །བུད་མེད་སྐྱེས་པ་ལ་ཆགས་པ་ཡང་དེ་དང་འདྲ་སྟེ་སྐྱོ་

47-1-163a

མི་ཤེས་སོ། །རིགས་ཀྱི་བུ་དེ་བས་ན་རིགས་ཀྱི་བུ་དང་རིགས་ཀྱི་བུ་མོ་དག་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ཉན་ན་རྟག་ཏུ་བུད་མེད་ལ་ཡོངས་སུ་སྨོད་དེ་སྐྱེས་པའི་ལུས་ཚོལ་ལོ། །
དེ་ཅིའི་ཕྱིར་ཞེ་ན། ཐེག་པ་ཆེན་པོའི་མདོ་སྡེ་འདི་སྐྱེས་བུའི་མཚན་དང་ལྡན་ནོ། །འདི་ལྟ་སྟེ་དེ་ནི་སངས་རྒྱས་ཀྱི་རང་བཞིན་ནོ། །དེ་ལ་གང་སངས་རྒྱས་ཀྱི་རང་བཞིན་མི་ཤེས་པ་དེ་ནི་སྐྱེས་བུའི་མཚན་མེད་དོ། །དེ་ཅིའི་ཕྱིར་
ཞེ་ན། བདག་ལ་སངས་རྒྱས་ཀྱི་རང་བཞིན་ཡོད་པར་མི་ཤེས་པའི་ཕྱིར་རོ། །གང་སངས་རྒྱས་ཀྱི་རང་བཞིན་མི་ཤེས་པ་དེ་ནི་བུད་མེད་ཅེས་ངས་བཤད་དོ། །སངས་རྒྱས་ཀྱི་རང་བཞིན་ཤེས་པ་དེ་ནི་སྐྱེས་བུའི་མཚན་དང་
ལྡན་པ་ཞེས་ངས་བཤད་དོ། །དེ་ལ་བུད་མེད་གང་ཞིག་གལ་ཏེ་བདག་ལ་སངས་རྒྱས་ཀྱི་རང་བཞིན་ཡོད་པར་ཤེས་ན་དེ་ནི་སྐྱེས་པ་ཞེས་བྱའོ། །རིགས་ཀྱི་བུ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ནི་ཚད་
མེད་དཔག་ཏུ་མེད་བསམ་གྱིས་མི་ཁྱབ་པའི་བསོད་ནམས་ཀྱི་ཕུང་པོར་རིག་པར་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་གསང་བའི་སྙིང་པོ་འཆད་པའི་ཕྱིར་རོ། །དེ་བས་ན་རིགས་ཀྱི་བུ་འམ་རིགས་ཀྱི་བུ་མོ་
དག་དེ་བཞིན་གཤེགས་པའི་གསང་བའི་སྙིང་པོ་མྱུར་དུ་ཤེས་པར་འདོད་ན་མདོ་སྡེ་འདི་ལ་སྦྱོར་བའི་ནན་ཏན་བརྩོན་འགྲུས་སུ་བྱའོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། དེ་དེ་བཞིན་
ཏེ། དེ་དེ་བཞིན་ནོ། །བཅོམ་ལྡན་འདས་ཀྱིས་བཀའ་བཞིན་ཏེ། བདག་ཀྱང་དེ་བཞིན་གཤེགས་པའི་གསང་བའི་སྙིང་པོ་རྟོགས་པས་སྐྱེས་བུའི་མཚན་དང་ལྡན་ནོ། །དེ་བཞིན་གཤེགས་པས་བསྐུལ་བས་ངེས་པར་རྟོགས་
པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ། །རིགས་ཀྱི་བུ་ཁྱོད་འཇིག་རྟེན་པའི་རྗེས་སུ་འདི་སྐད་སྨྲས་པ་ལེགས་སོ། །འོད་སྲུང་གིས་གསོལ་པ། བདག་ནི་འཇིག་རྟེན་པའི་ཆོས་ཀྱི་རྗེས་སུ་

47-1-163b

འཇུག་པ་མ་ལགས་སོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ལེགས་སོ་ཤིན་ཏུ་ལེགས་སོ། །ཁྱོད་ཀྱིས་ཤེས་པ་ནི་བླ་ན་མེད་པའི་ཆོས་ཀྱི་རོ་ཤིན་ཏུ་ཟབ་མོ་ཤེས་པར་དཀའ་བ་ཤེས་ཏེ། ཇི་ལྟར་བུང་བ་
དག་ཁ་དོག་ལ་མི་གནོད་པར་རོ་མྱོང་བ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྦྲང་བུའི་གཅིན་གྱིས་ས་ཆེན་པོ་འདི་རླན་པར་མི་ནུས་སོ། །མ་འོངས་པའི་དུས་ན་མདོ་སྡེ་འདི་འཕེལ་བ་ཡང་དེ་དང་འདྲ་སྟེ། 
དམ་པའི་ཆོས་རྣམ་པར་འཇིག་ཏུ་ཉེ་བ་ན་མདོ་སྡེ་འདི་ས་ཕྱོགས་འདིར་སྔར་ནུབ་པར་འགྱུར་རོ། །དེ་བས་ན་དམ་པའི་ཆོས་ཉམས་པར་འགྱུར་བར་རིག་པར་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་དབྱར་འདས་
པའི་འོག་ཏུ་སྟོན་འབྱུང་སྟེ། སྟོན་གྱི་དུས་སུ་ནི་རྒྱུན་མི་འཆད་པར་ཆར་པ་འབབ་བོ། །ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ཡང་དེ་དང་འདྲ་སྟེ། ལྷོ་ཕྱོགས་ཀྱི་བྱང་ཆུབ་སེམས་དཔའ་རྣམས་
ཀྱི་ཕྱིར་ཤིན་ཏུ་རྒྱས་པར་འགྱུར་ཏེ། ཆོས་ཀྱི་ཆར་གྱིས་གནས་ཀུན་ཏུ་གང་བར་འགྱུར་རོ། །དམ་པའི་ཆོས་འཇིག་དུ་ཉེ་བ་ན་ཡུལ་ཁ་ཆེ་ཡུལ་དུ་མི་ཉམས་པར་བགས་ཀྱིས་སའི་ནང་དུ་ནུབ་པར་འགྱུར་ཏེ། 
དེ་དག་ལས་ཁ་ཅིག་ནི་དད། ཁ་ཅིག་ནི་མི་དད་དོ། །དེ་ནས་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ཟིལ་མངར་གྱི་རོ་དང་ལྡན་པ་ཐམས་ཅད་སའི་ནང་དུ་ནུབ་པར་འགྱུར་རོ། །མདོ་སྡེ་འདི་ནུབ་ནས་ཐེག་པ་ཆེན་པོའི་
མདོ་སྡེ་གཞན་ཐམས་ཅད་ཀྱང་ནུབ་ཅིང་མེད་པར་གྱུར་ཏོ། །གལ་ཏེ་མདོ་སྡེ་འདིའི་ཕུན་སུམ་ཚོགས་པ་མི་ཉམས་པ་མིའི་ནང་ན་གླང་པོ་ཆེའི་རྒྱལ་པོ་ལྟ་བུ་བྱང་ཆུབ་སེམས་དཔའ་ལ་སོགས་པས་ནི་དེ་བཞིན་གཤེགས་པའི་
བླ་ན་མེད་པའི་དམ་པའི་ཆོས་རིང་པོར་མི་ཐོགས་པར་འགྱུར་བ་ཤེས་སོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ད་ལྟར་ཙུན་དའི་ཐེ་ཚོམ་དུ་གྱུར་པ་བཅོམ་

47-1-164a

ལྡན་འདས་ཀྱིས་ཐེ་ཚོམ་བཅད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་ཐེ་ཚོམ་དུ་གྱུར་པ་སྨྲོས་ཤིག་དང་། ཁྱོད་ཀྱི་ཐེ་ཚོམ་བསལ་བར་བྱའོ། །འཇམ་དཔལ་གྱིས་གསོལ་པ། སངས་
རྒྱས་ཀྱི་རང་བཞིན་འཚལ་ཅིང་མཐོང་བའི་དུས་ན་དེ་བཞིན་གཤེགས་པ་རྟག་པ་ལགས་ལ། སངས་རྒྱས་ཀྱི་རང་བཞིན་མཐོང་བས་རྟག་པ་ཞེས་བགྱི་ན་མ་མཐོང་བའི་སྔོན་རོལ་ན་རྟག་པ་མ་ལགས་སམ། ཐོག་མ་ནས་མི་རྟག་པ་
ཞིག་ལགས་ན་ནི་ཕྱིས་ཀྱང་མི་རྟག་པར་འགྱུར་བའི་རིགས་སོ། །དེ་ཅིའི་སླད་དུ་ཞེ་ན། དཔེར་ན་འཇིག་རྟེན་གྱི་རྫས་ལྟ་བུ་ཐོག་མ་ནས་མ་མཆིས་པ་ཞིག་ལགས་ལ། ད་མཆིས་པར་རུང་ན་མཆིས་ནས་ཀྱང་སླར་མ་མཆིས་པར་
འགྱུར་ཏེ། དངོས་པོ་ཐམས་ཅད་ནི་རྟག་པ་མ་ལགས་སོ། །དེ་བས་ན་སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་ལ་སོགས་པ་ཡང་དེ་དང་བྱེ་བྲག་མ་མཆིས་སོ། །དེ་ནས་བཅོམ་ལྡན་འདས་ཀྱིས་ཚིགས་
སུ་བཅད་དེ་བཀའ་སྩལ་པ། ཐོག་མ་ཡོད་ལ་ད་ལྟར་མེད། །ཐོག་མ་མེད་ལ་ད་ལྟར་ཡོད། །དུས་གསུམ་སྲིད་པའི་ཆོས་ཐམས་ཅད། །དེ་ལྟ་བུ་ནི་མ་ཡིན་ནོ། །རིགས་ཀྱི་བུ་དེ་བས་ན་སངས་རྒྱས་དང་བྱང་ཆུབ་སེམས་དཔའ་དང་། ཉན་
ཐོས་དང་རང་སངས་རྒྱས་དག་ཐ་དད་པ་ཡང་ཡོད་ལ་ཐ་དད་པ་ཡང་མེད་དོ། །འཇམ་དཔལ་གྱིས་བཅོམ་ལྡན་འདས་ལ་གསོལ་པ། ལེགས་སོ་ལེགས་སོ། །འཕགས་པའི་བཀའ་བཞིན་ཏེ། བདག་ཀྱང་དེ་ལྟར་རྟོགས་སོ། །སངས་རྒྱས་
དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་དག་ཐ་དད་པ་ཡང་ལགས་ལ། ཐ་དད་པ་ཡང་མ་ལགས་པར་འཚལ་ཏོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་
ཀྱིས་གསུངས་པ་ལྟར་སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་དག་ཏུ་ཐ་དད་པ་མ་མཆིས་ཤེས་བགྱི་བ་དེ་སེམས་ཅན་ཐམས་ཅད་ལ་ཕན་པ་དང་། བདེ་བའི་དོན་གྱི་སླད་དུ་དེ་བཞིན་གཤེགས་པས་རྒྱས་

47-1-164b

པར་དབྱེ་ཞིང་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཤིན་ཏུ་བརྟགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་རྒྱས་པར་བཤད་པར་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་ཁྱིམ་བདག་གམ། ཁྱིམ་
བདག་གི་བུ་ཞིག་ལ། བ་བཞོན་སྤུ་མདོག་རྣམ་པ་ཐ་དད་པ་མང་དུ་ཡོད་དེ། རྫིའུ་ཅིག་འཚོར་བཅུག་ནས་ཕྱིས་དུས་ཀྱི་ལྷ་རྗེད་པ་ཞིག་ན་བ་ཐམས་ཅད་བཞོས་ཏེ་འོ་མ་སྣོད་ཅིག་ཏུ་བླུགས་སོ། །འོ་མ་དེ་དག་ཐམས་ཅད་ཁ་དོག་དཀར་པོ་
གཅིག་ཏུ་འཐུན་པ་མཐོང་ནས་ངོ་མཚར་རྨད་དུ་གྱུར་ཏེ། འདི་ལྟར་བ་འདི་དག་སྤུ་མདོག་ཐ་དད་པ་ཅིའི་ཕྱིར་འོ་མ་ཁ་དོག་གཅིག་ཏུ་གྱུར་སྙམ་ཡ་མཚན་དུ་གྱུར་ཏེ། འདི་ཡང་སེམས་ཅན་གྱི་ལས་ཀྱི་རྣམ་པར་སྨིན་པ་ལས་འོ་མའི་ཁ་དོག་གཅིག་ཏུ་
གྱུར་ཏོ་སྙམ་དུ་སེམས་སོ། །རིགས་ཀྱི་བུ་ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའ་ཡང་དེ་དང་འདྲ་སྟེ། སངས་རྒྱས་ཀྱི་རང་བཞིན་གཅིག་ཏུ་འཐུན་པ་ནི་འོ་མ་དེ་དག་ལྟ་བུའོ། །དེ་ཅིའི་ཕྱིར་ཞེ་ན། ཟག་པ་མེད་པར་འཐུན་
པའི་ཕྱིར་རོ། །སོ་སོའི་སྐྱེ་བོ་དག་ནི་སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་དག་ཐ་དད་དོ་ཞེས་སྨྲ་སྟེ། ཉན་ཐོས་དང་བུས་པ་མ་རབས་དག་ཀྱང་ཐེག་པ་གསུམ་ལྟ་བུ་ཅིའི་ཕྱིར་ཐ་མི་དད་སྙམ་ཐེ་
ཚོམ་ཟ་མོད་ཀྱི། དེ་དག་གིས་ཐེག་པ་གསུམ་ཆར་སངས་རྒྱས་ཀྱི་རང་བཞིན་དུ་འཐུན་པར་ཕྱིས་རང་རྟོགས་པ་ནི་ཇི་ལྟར་གང་ཟག་དེ་ལས་ཀྱི་རྒྱུ་དང་རྐྱེན་གྱི་དབང་གིས་འོ་མའི་ཁ་དོག་གཅིག་པར་ཤེས་པ་བཞིན་ནོ། །རིགས་
ཀྱི་བུ་གཞན་ཡང་འདི་ལྟ་སྟེ་དཔེར་ན། གསེར་རྡོ་ལྟ་བུ་གང་ངན་པའི་རྣམས་བསལ་ཏེ་བོར་ལ་བཞུས་ན་གསེར་ཡང་དག་པར་འབྱུང་སྟེ་རིན་ཐང་ཡང་ཚད་མེད་དོ། །རིགས་ཀྱི་བུ་ཉན་ཐོས་དང་རང་སངས་རྒྱས་དང་བྱང་ཆུབ་སེམས་
དཔའ་ཡང་དེ་དང་འདྲ་སྟེ། ཐམས་ཅད་སངས་རྒྱས་ཀྱི་རང་བཞིན་དུ་སྒྲུབ་པར་འཐུན་ནོ། །དེ་ཅིའི་ཕྱིར་ཞེ་ན། ཉོན་མོངས་པ་ཡོངས་སུ་གསལ་བའི་ཕྱིར་རོ། །དེ་ཡང་གསེར་རྡོ་བཞུས་ཏེ་ངན་པ་བོར་བ་དང་མཚུངས་སོ། །དེ་བས་ན་

47-1-165a

སེམས་ཅན་ཐམས་ཅད་སངས་རྒྱས་ཀྱི་རང་བཞིན་དུ་འཐུན་ཏེ་ཐ་དད་པ་མེད་དོ། །སྔར་དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་ཐོས་ན་ཕྱིས་མངོན་པར་འཚང་རྒྱ་བའི་ཚེ་རང་གིས་རིག་པ་ནི་ཇི་ལྟར་ཁྱིམ་
བདག་དེས་བའི་འོ་མ་དེ་ཁ་དོག་གཅིག་ཏུ་རྟོགས་པ་བཞིན་ནོ། །དེ་ཅིའི་ཕྱིར་ཞེ་ན། དཔག་ཏུ་མེད་པའི་ཉོན་མོངས་པ་ཐམས་ཅད་བསལ་བའི་ཕྱིར་རོ། །དེ་བས་ན་སེམས་ཅན་ཐམས་ཅད་སངས་རྒྱས་ཀྱི་རང་བཞིན་གཅིག་ཏུ་འཐུན་
ཏེ་ཐ་དད་པ་མེད་པ་ནི་སྔོན་དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་ཐོས་པ་ལྟར། ཕྱིས་མངོན་པར་འཚང་རྒྱ་བ་ན་རང་གིས་རིག་པར་འགྱུར་བ་ནི་ཇི་ལྟར་ཁྱིམ་བདག་དེས་བའི་འོ་མ་གཅིག་ཏུ་འཐུན་པར་རིག་པ་
བཞིན་ནོ། །དེ་ཅིའི་ཕྱིར་ཞེ་ན། དཔག་ཏུ་མེད་པའི་ཉོན་མོངས་པ་ཐམས་ཅད་བསལ་བའི་ཕྱིར་རོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་སྟེ་
སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་མཆིས་ན་སངས་རྒྱས་དང་སེམས་ཅན་ཐ་དད་པའི་བྱེ་བྲག་ཅི་མཆིས། དེ་སྐད་ཅེས་གསུངས་པ་འདི་སྐྱོན་དུ་འགྱུར་རོ། །དེ་ལྟར་སེམས་ཅན་ཐམས་ཅད་ལ་སངས་རྒྱས་
ཀྱི་རང་བཞིན་མཆིས་ན་ཅིའི་སླད་དུ་ཤཱ་རིའི་བུ་ལ་སོགས་པ་ནི་མྱ་ངན་ལས་འདས་པ་ཆུང་ངུས་མྱ་ངན་ལས་འདས་པར་གྱུར། རང་སངས་རྒྱས་རྣམས་ནི་མྱ་ངན་ལས་འདས་པ་འབྲིང་པོས་མྱ་ངན་ལས་འདས་པར་གྱུར། 
བྱང་ཆུབ་སེམས་དཔའ་རྣམས་ནི་མྱ་ངན་ལས་འདས་པ་ཆེན་པོས་མྱ་ངན་ལས་འདས་པར་གྱུར། དེ་དག་ལ་སོགས་པ་སངས་རྒྱས་ཀྱི་རང་བཞིན་གཅིག་ཏུ་འཐུན་ན་ཅིའི་སླད་དུ་དེ་བཞིན་གཤེགས་པའི་མྱ་ངན་ལས་
འདས་པས་ཡོངས་སུ་མྱ་ངན་ལས་འདས་པར་མ་གྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སངས་རྒྱས་བཅོམ་ལྡན་འདས་ཀྱིས་མྱ་ངན་ལས་འདའ་བ་ཐོབ་པ་ནི་ཉན་ཐོས་དང་རང་སངས་རྒྱས་ཀྱིས་ཐོབ་

47-1-165b

པ་མ་ཡིན་ཏེ། དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ནི་དགེ་བའི་བཤེས་གཉེན་ཞེས་བྱའོ། །གལ་ཏེ་འཇིག་རྟེན་ན་སངས་རྒྱས་མི་བཞུགས་ཀྱང་ཐེག་པ་གཉིས་པོས་མྱ་ངན་ལས་འདས་པ་གཉིས་པོ་མི་ཐོབ་
པ་མ་ཡིན་ནོ། །འོད་སྲུང་གིས་ཡང་གསོལ་པ། བཅོམ་ལྡན་འདས་ཀྱིས་ཡང་འདི་སྐད་དུ་གསུངས་པའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། བསྐལ་པ་ཚད་མེད་དཔག་ཏུ་མེད་གྲངས་མེད་
པའི་བར་དུ་སངས་རྒྱས་བཅོམ་ལྡན་འདས་འཇིག་རྟེན་དུ་ལན་འགའ་འབྱུང་སྟེ། ཐེག་པ་རྣམ་པ་གསུམ་འབྱེད་ཅིང་སྟོན་ཏོ། །རིགས་ཀྱི་བུ་ཇི་ལྟར་ཁྱོད་ཀྱིས་བྱང་ཆུབ་སེམས་དཔའ་དང་། ཐེག་པ་རྣམ་པ་གཉིས་པོ་
བྱེ་བྲག་ཅི་ཡོད་ཅེས་དྲིས་པ་ནི་ངས་སྔར་དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་ཡོངས་སུ་མྱ་ངན་ལས་འདས་པ་ཆེན་པོ་འདི་ལས་དོན་དེ་ཉིད་རྒྱས་པར་བསྟན་ཏེ། དགྲ་བཅོམ་པ་རྣམས་ལ་དགེ་བའི་བཤེས་
གཉེན་མེད་དོ་ཞེས་བཤད་པ་ཡིན་ནོ། །དེ་ཅིའི་ཕྱིར་ཞེ་ན། དགྲ་བཅོམ་པ་རྣམས་ཡོངས་སུ་མྱ་ངན་ལས་འདས་པ་ཆེན་པོ་ཐོབ་པའི་ཕྱིར་རོ། །དེ་བས་ན་མྱ་ངན་ལས་འདས་པ་ཆེན་པོ་ནི་མཐར་བདེ་བར་འགྱུར་བས་ན་ཡོངས་
སུ་མྱ་ངན་ལས་འདས་པ་ཆེན་པོ་ཞེས་བྱའོ། །འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར་བྱེ་བྲག་མཆིས་པ་དང་། བྱེ་བྲག་མ་མཆིས་པའི་དོན་བདག་
གིས་གདོད་རྟོགས་སོ། །དེ་ཡང་ཅིའི་སླད་དུ་ཞེ་ན། བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་ལ་སོགས་པ་ཐམས་ཅད་ཀྱང་མ་འོངས་པའི་དུས་སུ་ཡོངས་སུ་མྱ་ངན་ལས་འདས་པ་ཆེན་པོ་ལ་འབབ་པར་
འཚལ་ཏོ། །དཔེར་ན་འབབ་ཆུ་ཐམས་ཅད་རྒྱ་མཚོར་འབབ་པ་ལྟར། ཉན་ཐོས་དང་། རང་སངས་རྒྱས་ཐམས་ཅད་རྟག་པ་ཞེས་བགྱིའི་མི་རྟག་པ་ནི་མ་ལགས་སོ། །དེ་བས་ན་བྱེ་བྲག་ཀྱང་མཆིས་ལ་བྱེ་བྲག་ཀྱང་མ་མཆིས་སོ། །འོད་སྲུང་

47-1-166a

གིས་ཡང་གསོལ་པ། མཚན་ཉིད་ལ་བྱེ་བྲག་མཆིས་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཉན་ཐོས་དག་ནི་འོ་མ་ལྟ་བུའོ། །རང་སངས་རྒྱས་ནི་ཞོ་ལྟ་བུའོ། །བྱང་ཆུབ་སེམས་དཔའ་
ནི་མར་རམ་ཞུན་མར་ལྟ་བུའོ། །སངས་རྒྱས་བཅོམ་ལྡན་འདས་ནི་མར་གྱི་སྙིང་པོ་ལྟ་བུ་སྟེ། དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་འདི་ལས་མཚན་ཉིད་རྣམ་པ་བཞི་ཐ་དད་པར་བཤད་དོ། །འོད་སྲུང་གིས་ཡང་གསོལ་
པ། སེམས་ཅན་ཐམས་ཅད་ཀྱི་མཚན་ཉིད་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དཔེར་ན་བ་བེའུ་བྱུང་མ་ཐག་གི་འོ་མ་ནི་ཁྲག་དང་འདྲེས་སོ། །བྱིས་པ་མ་རབས་ཀྱི་མཚན་ཉིད་ཉོན་མོངས་པ་
དང་འདྲེས་པ་ཡང་དེ་དང་འདྲའོ། །ཡང་འོད་སྲུང་གིས་གསོལ་པ། རྩྭ་མཆོག་གི་གྲོང་ཁྱེར་ན་གནས་པའི་རིགས་ངན་རབ་ཏུ་དགའ་བ་ཞེས་བྱ་བ་བཅོམ་ལྡན་འདས་ཀྱིས་ལུང་བསྟན་པ་ཁྱོད་ནི་སེམས་བསྐྱེད་པ་ཙམ་གྱིས་འཇིག་
རྟེན་གྱི་ཁམས་འདིར་སངས་རྒྱས་སྟོང་གི་གྲངས་སུ་གཏོགས་པར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱའོ་ཞེས་ལུང་བསྟན་ལ། བཙུན་པ་ཤཱ་རིའི་བུ་དང་། མཽད་གལ་ཡ་ན་ལ་སོགས་པ་མྱུར་དུ་
མངོན་པར་འཚང་རྒྱའོ་ཞེས་ལུང་མི་སྟོན། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་ལ་ལ་ནི་སྨོན་ལམ་གྱི་དབང་གིས་འཇིག་རྟེན་ན་ཡུན་རིང་དུ་
གནས་ཤིང་། དམ་པའི་ཆོས་ཡུན་དུ་བཟུང་ནས་གདོད་བླ་ན་མེད་པའི་བྱང་ཆུབ་ཏུ་འཚང་རྒྱའོ། །གང་མྱུར་དུ་འགྲུབ་པར་སྨོན་ལམ་བཏབ་པ་ནི་མྱུར་དུ་འགྲུབ་བོ་ཞེས་ལུང་བསྟན་པ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་
སྟེ་དཔེར་ན་ཚོང་དཔོན་ཞིག་རིན་ཐང་མེད་པའི་ནོར་བུ་རིན་པོ་ཆེ་ཐོགས་ཏེ་ཚོང་དུས་སུ་འཚོང་དུ་འོངས་ན་གླེན་པ་ནོར་ངོ་མི་ཤེས་པ་དག་གིས་མཐོང་ན་དེ་ལ་བརྙས་སྨོད་དེ་འཕྱའོ། །ནོར་བདག་གིས་འདི་ནི་ནོར་བུ་རིན་པོ་ཆེ་རིན་ཐང་མེད་

47-1-166b

པ་ཡིན་ནོ་ཞེས་སྨྲས་ཀྱང་འོན་ཀྱང་འཕྱའོ། །དེ་དག་གཅིག་ལ་གཅིག་འདི་སྐད་དུ་འདི་ནི་ནོར་བུ་རིན་པོ་ཆེ་ཡང་དག་པ་མ་ཡིན་གྱི། ཤེལ་གྱི་སྒོ་ང་ཡིན་ནོ་ཞེས་ཟེར་རོ། །རིགས་ཀྱི་བུ་ཉན་ཐོས་དང་། རང་སངས་རྒྱས་ཀྱང་དེ་དང་འདྲ་སྟེ། གལ་ཏེ་མྱུར་དུ་
འགྲུབ་པར་ལུང་བསྟན་པ་ཐོས་ན་ལེ་ལོ་དང་སྙོམ་ལས་བྱེད་དེ། བརྙས་ཤིང་སྨོད་ལ་འཕྱ་བ་ནི་ཇི་ལྟར་གླེན་པ་དག་ནོར་བུ་རིན་པོ་ཆེ་ཡང་དག་པ་མི་ཤེས་པ་བཞིན་ནོ། །ཕྱི་མ་མ་འོངས་པའི་དུས་སུ་དགེ་སློང་དག་དགེ་བའི་ཆོས་ལ་བརྩོན་
འགྲུས་སུ་ནན་ཏན་བྱེད་ནི་མི་ནུས་ཀྱི། དབུལ་ཕོངས་ནས་ཟས་དང་སྐོམ་གྱིས་བྲེལ་བའི་རྐྱེན་ཀྱིས་རབ་ཏུ་བྱུང་སྟེ་ལུས་གསོ་བའི་ཕྱིར་སེམས་རྒོད་པས་སྒྱུས་འཚོའོ། །ཅི་སྟེ་དེ་བཞིན་གཤེགས་པས་ཉན་ཐོས་དག་མྱུར་དུ་འགྲུབ་བོ་
ཞེས་ལུང་བསྟན་ན་འཕྱ་ཞིང་བརྙས་སྨོད་པར་འགྱུར་ཏེ། དེ་དག་ནི་ཚུལ་ཁྲིམས་ཡོངས་སུ་ཉམས་ཀྱང་བླ་མ་མིའི་ཆོས་ཐོབ་བོ་ཞེས་སྨྲའོ། །དེ་བས་ན་གང་སྨོན་ལམ་མྱུར་བར་བསྐྱེད་པ་ནི་མྱུར་བའི་ལུང་བསྟན་ཏོ། །གང་དམ་པའི་ཆོས་
སྲུང་ཞིང་འཛིན་པ་དག་ནི་ཡུན་རིང་པོའི་ལུང་བསྟན་ཏོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་དག་ཇི་ལྟར་ན་མི་ཤིགས་པའི་འཁོར་འཐོབ་
པར་འགྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། བྱང་ཆུབ་སེམས་དཔའ་གང་དམ་པའི་ཆོས་སྲུང་ཞིང་འཛིན་པ་ལ་བརྩོན་འགྲུས་རྩོམ་ན་དེའི་རྒྱུ་དེའི་རྐྱེན་ཀྱིས་འཁོར་མི་ཤིགས་པ་འཐོབ་པར་འགྱུར་རོ། །བྱང་ཆུབ་
སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། ཅིའི་རྒྱུ་ཅིའི་རྐྱེན་གྱིས་ན་སེམས་ཅན་དག་མཆུ་སྐམས་པར་འགྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། གང་ཞིག་དཀོན་མཆོག་གསུམ་
ཡུན་དུ་གནས་པར་མི་ཤེས་ན་དེའི་རྒྱུ་དེའི་རྐྱེན་གྱིས་ཁ་དང་མཆུ་རྟག་ཏུ་སྐམས་པར་གྱུར་ཏོ། །མི་གང་མངར་བ་དང་། ཁ་བ་དང་ཚ་བ་དང་། སྐྱུར་བ་དང་། མངལ་བ་དང་། ལན་ཚྭའི་རོ་ལ་སོགས་པ་བྲོ་བ་རྣམ་པ་དྲུག་བྱེ་བྲག་

47-1-167a

མི་ཕྱེད་ཅིང་མི་རྟོགས་པར་འགྱུར། །སེམས་ཅན་ཐམས་ཅད་གླེན་ཞིང་གཏི་མུག་པའི་དབང་གིས་དཀོན་མཆོག་གསུམ་རྟག་པར་མི་ཤེས་ན་དེའི་ཕྱིར་ཁ་དང་མཆུ་རྟག་པར་སྐམས་པར་འགྱུར་རོ། །
རིགས་ཀྱི་བུ་གཞན་ཡང་འདི་ལྟ་སྟེ། སེམས་ཅན་གང་ཞིག་དེ་བཞིན་གཤེགས་པ་ལ་རྟག་པ་ཉིད་དུ་མི་ཤེས་ན་གང་ཟག་དེ་ནི་དམུས་ལོང་དུ་རིག་པར་བྱའོ། །སེམས་ཅན་གང་ཞིག་དེ་བཞིན་གཤེགས་པ་རྟག་
པ་ཉིད་དུ་ཤེས་ན་གང་ཟག་དེ་ནི་ཤའི་མིག་ཅན་ཡིན་མོད་ཀྱི། ལྷའི་མིག་དང་ལྡན་པར་ངས་བཤད་དོ། །རིགས་ཀྱི་བུ་གཞན་ཡང་འདི་ལྟ་སྟེ་གང་ཞིག་དེ་བཞིན་གཤེགས་པ་ལ་རྟག་པ་ཉིད་དུ་ཤེས་ན་གང་ཟག་
དེ་ནི་ཡུན་རིང་པོ་ནས་མདོ་སྡེ་འདི་ལ་ནན་ཏན་བྱས་པ་ཡིན་ཏེ། ལྷའི་མིག་དང་ལྡན་པར་རིག་པར་བྱའོ། །གང་ཞིག་ལྷའི་མིག་དང་ལྡན་དུ་ཟིན་ཀྱང་གལ་ཏེ་དེ་བཞིན་གཤེགས་པ་ལ་རྟག་པ་ཉིད་དུ་མི་ཤེས་
ན་དེ་ནི་ཤའི་མིག་ཅན་ཞེས་བྱ་སྟེ། གང་ཟག་དེ་ནི་བདག་གི་ལུས་ཀྱི་ཡན་ལག་དང་། ཉིང་ལག་ཀྱང་མི་ཤེས་ལ། གཞན་དག་ཀྱང་ཤེས་པར་བྱེད་མི་ནུས་ཏེ། དེ་བས་ན་ཤའི་མིག་ཅན་ཞེས་བྱའོ། །རིགས་
ཀྱི་བུ་གཞན་ཡང་འདི་ལྟ་སྟེ་དེ་བཞིན་གཤེགས་པ་ནི་རྟག་ཏུ་སེམས་ཅན་ཐམས་ཅད་ཀྱི་ཕ་མ་མཛད་དོ། །དེ་ཅིའི་ཕྱིར་ཞེ་ན། སེམས་ཅན་རྣམ་པ་སྣ་ཚོགས་རྐང་གཉིས་དང་། རྐང་བཞི་དང་། རྐང་མངས་དང་། རྐང་
མེད་ཐམས་ཅད་ལ་དེ་བཞིན་གཤེགས་པས་གསུང་གཅིག་གིས་ཆོས་བསྟན་ན་རྣམ་པ་ཐ་དད་པ་དེ་དང་དེ་དག་ཐམས་ཅད་ཀྱིས་སོ་སོར་གོ་སྟེ། དེ་དག་སོ་སོ་ནས་དེ་བཞིན་གཤེགས་པ་ནི་དེང་བདག་འབའ་ཞིག་ལ་ཆོས་
བསྟན་ཏོ་སྙམ་སེམས་ཏེ། དེ་བས་ན་ཕ་མ་ལྟ་བུ་ཞེས་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་བུས་པ་བཙས་ནས་ནམ་ཟླ་བ་བཅུ་དྲུག་ལོན་པ་དག་སྨྲར་རྩོལ་མོད་ཀྱི། གོ་བའམ་བརྡ་ཕྲད་པ་ཉིད་དུ་མི་ལྕོགས་ཏེ། 

47-1-167b

དེའི་ཕ་མས་སྐད་བསླབ་པའི་ཕྱིར་བུས་པ་ཅི་ཟེར་བ་བཞིན་དུ་སྨྲས་ཏེ། བགས་ཀྱིས་སྟོན་ན། ཅི་ཁྱེའུ་དེའི་ཕ་མ་དེ་ཡང་སྐད་མི་ལྕོགས་ཏེ་ཟུར་མ་ཕྱིན་པ་ཡིན་ནམ། གསོལ་པ་མ་ལགས་སོ། །བཅོམ་ལྡན་འདས་
ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། སེམས་ཅན་རྣམ་པ་སྣ་ཚོགས་ཀྱི་རྗེས་སུ་གསུང་རྣམ་པ་སྣ་ཚོགས་ཀྱིས་ཆོས་སྟོན་ཏོ། །དམ་པའི་ཆོས་ལ་དགོད་པའི་ཕྱིར་ཅི་
རིགས་སུ་ཆ་ལུགས་རྣམ་པ་སྣ་ཚོགས་སྟོན་ཏེ། དེ་བཞིན་གཤེགས་པ་དེ་དང་འཐུན་པའི་སྐད་གསུང་ན། ཅི་དེ་ཡང་མ་ལྕོགས་པ་ཡིན་ནམ། གསོལ་པ་མ་ལགས་སོ། །བཅོམ་ལྡན་འདས་ཅིའི་སླད་དུ་ཞེ་ན། 
དེ་བཞིན་གཤེགས་པའི་གསུང་ནི་སེང་གེའི་སྒྲ་ལྟ་བུ་སྟེ། འཇིག་རྟེན་པ་རྣམ་པ་སྣ་ཚོགས་ཀྱི་རྗེས་སུ་གསུང་རྣམ་པ་སྣ་ཚོགས་ཀྱིས་སེམས་ཅན་རྣམས་ལ་དམ་པའི་ཆོས་སྟོན་ཏོ། །འཕགས་པ་ཡོངས་སུ་
མྱ་ངན་ལས་འདས་པ་ཆེན་པོའི་མདོ་ལས། དེ་བཞིན་གཤེགས་པའི་སྙིང་པོའི་ལེའུ་སྟེ་བཞི་པའོ།། །། དེ་ནས་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་རྣམ་པ་སྣ་ཚོགས་བཀྱེ་བ་ནི་སྔོན་པོ་དང་། སེར་པོ་
དང་། དམར་པོ་དང་། དཀར་པོ་དང་། ལེ་བརྒན་དང་། སྨུག་པོ་སྟེ། ཙུན་དའི་ལུས་ཀུན་སྣང་བར་བྱས་སོ། །ཙུན་དའི་ལུས་ལ་འོད་དེས་རེག་པ་དང་། འཁོར་དང་བཅས་ཏེ་ཞལ་ཟས་མང་པོ་ཐོགས་ཏེ་སངས་རྒྱས་གང་ན་བ་དེར་
མྱུར་དུ་སོང་སྟེ། དེ་བཞིན་གཤེགས་པ་དང་། དགེ་སློང་གི་དགེ་འདུན་ལ་མཆོད་པ་ཐ་མ་དབུལ་བའི་ཕྱིར་མཆོད་པའི་ཡོ་བྱད་ཕུན་སུམ་ཚོགས་པ་རྣམ་པ་མང་པོ་ཐོགས་ཏེ་སངས་རྒྱས་ལ་ཉེ་བར་བསྙེན་ཏོ། །དེའི་ཚེ་ན་
ལྷ་གཟི་བརྗིད་ཆེན་པོ་དང་ལྡན་པ་རྣམས་འཁོར་བར་བསྐོར་ཏེ་མདུན་ཀྱང་ཆོད་པར་གྱུར་ནས་ཙུན་ད་ལ་ཙུན་ད་ཁྱོད་ཀྱི་མཆོད་པ་རེ་ཤིག་སྡོད་ཅིག་ཅེས་བསྒོའོ། །དེའི་ཚེ་ན་ཡང་དེ་བཞིན་གཤེགས་པས་འོད་

47-1-168a

ཚད་མེད་དཔག་ཏུ་མེད་པ་རྣམ་པ་སྣ་ཚོགས་བཀྱེ་ནས་ལྷ་རྣམས་ཀྱི་ལུས་ལ་སྣང་བར་བྱས་སོ། །ལྷའི་འཁོར་དེ་དག་འོད་དེས་རེག་མ་ཐག་ཏུ་ལྷ་རྣམས་ཀྱང་གོ་ཕྱེ་ནས་མཆོད་པ་འབུལ་དུ་བཅུག་གོ། །
དེའི་ཚེ་ན་ལྷ་དང་མི་ཐམས་ཅད་ཀྱང་སོ་སོ་ནས་མཆོད་པ་རྣམ་པ་སྣ་ཚོགས་ཐོགས་ནས་སངས་རྒྱས་ཀྱི་སྤྱན་སྔར་བསྙེན་ཏེ་པུས་མོ་བཙུགས་ནས་བཅོམ་ལྡན་འདས་ཀྱིས་དགེ་སློང་གི་དགེ་འདུན་འདི་དག་བདག་ཅག་
གི་མཆོད་པ་ལེན་དུ་གནང་བར་མཛད་དུ་གསོལ་ཞེས་དེ་བཞིན་གཤེགས་པ་ལ་གསོལ་ཏོ། །དགེ་སློང་གི་དགེ་འདུན་རྣམས་ཀྱང་དུས་ཤེས་པས་ལྷུང་བཟེད་ཐོགས་ནས་སེམས་རྩེ་གཅིག་ཏུ་སྤྱོད་ལམ་ལ་
གནས་སོ། །དེའི་ཚེ་ཙུན་དས་སངས་རྒྱས་དང་དགེ་འདུན་བཞུགས་པའི་གདན་སེང་གའི་ཁྲི་རྣམ་པ་མང་པོ་བཙུགས་ནས། བ་དན་དང་རྒྱལ་མཚན་དང་། གདུགས་བྲེས་ཏེ། སྤོས་དང་། མེ་ཏོག་དང་། ཕྲེང་བས་
ཀྱང་ཡོངས་སུ་བརྒྱན་ཏོ། །དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་ཁམས་འདི་རྒྱན་གྱིས་ཡོངས་སུ་བརྒྱན་པ་ནི་ཇི་ལྟར་ནུབ་ཕྱོགས་ཀྱི་བདེ་བ་ཅན་གྱི་འཇིག་རྟེན་གྱི་ཁམས་ལྟ་བུར་གྱུར་ཏོ། །དེ་ནས་བཙུན་ད་
སངས་རྒྱས་ཀྱི་སྤྱན་སྔར་མི་དགའ་བའི་མྱ་ངན་ཆེན་པོས་ནོན་ནས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཐུགས་བརྩེ་བའི་སླད་དུ་བསྐལ་པ་གཅིག་གམ་བསྐལ་པ་གཅིག་འགྲིབས་ཀྱི་བར་
དུ་བཞུགས་སུ་གསོལ་ལོ། །བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། ང་འཇིག་རྟེན་ན་ཡུན་དུ་གནས་པར་འདོད་ན་ཁྱོད་ཀྱིས་མཆོད་པ་ཐ་མར་འབུལ་བའི་ཡོ་བྱད་མྱུར་དུ་ཕུལ་ལ་སྦྱིན་པའི་ཕ་རོལ་ཏུ་ཕྱིན་པ་
ཡོངས་སུ་རྫོགས་པར་གྱིས་ཤིག །དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དང་། ལྷ་དང་མི་ལ་སོགས་པ་ཐམས་ཅད་ཀྱིས་སྐད་འཐུན་པར་འདི་སྐད་ཅེས་སྨྲས་སོ། །ངོ་མཚར་ཆེའོ། །ཙུན་ད་ཁྱོད་བསོད་

47-1-168b

ནམས་ཆེན་པོ་ཡོངས་སུ་རྫོགས་པས་དེ་བཞིན་གཤེགས་པ་ཁྱོད་ཀྱི་མཆོད་པ་ཐ་མ་བཞེས་སོ། །བདག་ཅག་ནི་བསོད་ནམས་མེད་པས་མཆོད་པའི་ཡོ་བྱད་བཤམས་པ་ཡང་ཆུད་ཟོས་པར་གྱུར་ཏོ་ཞེས་སྨྲས་སོ། །དེའི་ཚེ་ན་
བཅོམ་ལྡན་འདས་ཀྱིས་དེ་དག་གི་རེ་བ་ཡོངས་སུ་རྫོགས་པར་བྱ་བའི་ཕྱིར་སྐུའི་བ་སྤུའི་ཁུང་རེ་རེ་ནས་སྤྲུལ་པའི་སངས་རྒྱས་ཚད་མེད་པ་སྤྲུལ་ཏེ། སངས་རྒྱས་དེ་དག་རེ་རེ་ལ་ཡང་དགེ་སློང་གི་འཁོར་ཚད་མེད་པ་སྙེད་ཀྱིས་
བསྐོར་ནས་བཅོམ་ལྡན་འདས་དང་དགེ་འདུན་གྱི་འཁོར་ཚད་མེད་པ་དེ་དག་གིས་ཀྱང་དེ་དག་གི་མཆོད་པ་བཞེས་པར་བསྟན་ཏོ། །བཅོམ་ལྡན་འདས་ཤཱཀྱ་ཐུབ་པ་ཡང་ཙུན་དའི་མཆོད་པ་བཞེས་སོ། །
དེའི་ཚེ་ཙུན་དས་ཕུལ་བའི་བསོད་སྙོམས་འབྲས་ཀྱང་ཡུལ་དབུས་གྱུར་འཆང་གི་བྲེ་ཁལ་ཚད་བརྒྱད་ཕུལ་བ་ཡང་བཅོམ་ལྡན་འདས་ཀྱི་བྱིན་གྱི་བརླབས་ཀྱིས་འཁོར་གྱི་དཀྱིལ་འཁོར་དེ་དག་ཐམས་ཅད་
བསོད་སྙོམས་ཀྱིས་ཆོག་པར་གྱུར་ཏོ། །དེའི་ཚེ་ཙུན་ད་དེ་ལྟ་བུར་གྱུར་པ་མཐོང་ནས་རབ་ཏུ་དགའ་བ་སྐྱེས་ཏེ། འཁོར་གྱི་དཀྱིལ་འཁོར་དེ་དག་ཐམས་ཅད་ཀྱང་རབ་ཏུ་དགའ་བར་གྱུར་ཏོ། །དེའི་ཚེ་ན་
འཁོར་གྱི་དཀྱིལ་འཁོར་དེ་དག་ཐམས་ཅད་བཅོམ་ལྡན་འདས་ཀྱི་བྱིན་གྱི་བརླབས་ཀྱིས་སོ་སོའི་ཡིད་ལ་དེ་བཞིན་གཤེགས་པ་ནི་བདག་ཅག་གི་མཆོད་པ་བཞེས་པས་རིང་པོ་མི་ཐོགས་པར་ཡོངས་སུ་མྱ་
ངན་ལས་འདའ་འོ་སྙམ་དུ་སེམས་པར་གྱུར་ཏོ། །དེ་སྙམ་དུ་བསམས་ནས་སོ་སོའི་སེམས་ལ་མྱ་ངན་དང་དགའ་བ་འདྲེས་པར་གྱུར་ཏོ། །དེའི་ཚེ་ན་ཚལ་དེའི་ས་གཞི་ཤིན་ཏུ་ཆུང་ཞིང་དོག་པ་ལས་དེ་
གཤེགས་པའི་བྱིན་གྱི་བརླབས་ཀྱིས་ཁབ་ཀྱི་རྩེ་མོ་འཛུགས་པའི་ས་ཙམ་ལ་ཡང་ཚད་མེད་པའི་སངས་རྒྱས་བཅོམ་ལྡན་འདས་འཁོར་དང་བཅས་ཏེ་བཞུགས་ཤིང་བསོད་སྙོམས་བཞེས་ཏེ། བསོད་སྙོམས་

47-1-169a

དེ་དག་ཀྱང་བྱེ་བྲག་ཕྱེད་པར་མཐོང་ངོ་། །དེའི་ཚེ་ན་ལྷ་དང་། མི་དང་། ལྷ་མ་ཡིན་ལ་སོགས་པ་ཐམས་ཅད་མཆི་མ་བླགས་ཏེ་ངུས་ནས་འདི་སྐད་ཅེས་སྨྲས་སོ། །དེ་བཞིན་གཤེགས་པས་བདག་
ཅག་གི་མཆོད་པ་ཐ་མ་བཞེས་ཏེ་མཆོད་པ་བཞེས་ནས་ཡོངས་སུ་མྱ་ངན་ལས་འདས་པར་གཤེགས་ན་བདག་ཅག་གིས་སླན་ཆད་མཆོད་པ་སུ་ལ་བགྱི། བདག་ཅག་གི་བླ་ན་མེད་པའི་ཁ་ལོ་སྒྱུར་བ་དང་གཏན་
བྲལ་བས་ན་མིག་ལྡོངས་པར་གྱུར་ཏོ་ཞེས་སྨྲསོ། །དེའི་ཚེ་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་དེ་དག་སྤྲོ་བ་སྲིང་བའི་ཕྱིར་ཚིགས་སུ་བཅད་དེ་བཀའ་སྩལ་པ། ཁྱེད་རྣམས་མྱ་ངན་མ་བྱེད་ཅིག །
སངས་རྒྱས་ཆོས་ཉིད་དེ་བཞིན་ཏེ། །ང་ནི་མྱ་ངན་འདས་ནས་ཀྱང་། །ཚད་མེད་པ་ཡི་བསྐལ་པ་སྙེད། །རྟག་ཏུ་བདེ་བའི་མཆོག་ལ་སྤྱོད། །རྟག་ཏུ་རབ་ཏུ་བདེ་ལ་གནས། །ཁྱེད་རྣམས་ཤིན་ཏུ་བརྟགས་པར་ཉོན། །
མྱ་ངན་འདའ་བ་ངས་བཤད་ཀྱིས། །ཟས་ཀྱི་འདུ་ཤེས་མེད་པས་ན། །བཀྲིས་ཤིང་སྐོམ་པའི་སྐྱོན་རྣམས་མེད། །དེང་འདིར་ཁྱེད་ལ་སོགས་པ་ལ། །རྗེས་སུ་གཞོལ་བའི་སྨོན་ལམ་བཏབ། །འཁོར་གྱི་དཀྱིལ་
འཁོར་འདི་ཐམས་ཅད། །རབ་ཏུ་བདེ་བ་ཐོབ་པར་བྱ། །ཁྱེད་རྣམས་ཐོས་ནས་ནན་ཏན་བྱོས། །སངས་རྒྱས་ཆོས་རྣམས་རྟག་པ་ལ། །ནམ་ཞིག་ཁྭ་དང་འུག་པ་གཉིས། །འཚང་གཅིག་ནང་དུ་གནས་བཅེས་
ཏེ། །དེ་གཉིས་སྤུན་བཞིན་གྱུར་པ་ན། །དེ་ན་མྱ་ངན་འདའ་བར་འགྱུར། །དེ་བཞིན་གཤེགས་པས་ཐམས་ཅད་ལ། །སྒྲ་གཅན་འཛིན་ལྟར་གཟིགས་པས་ན། །འགྲོ་བ་ཀུན་གྱི་གཙོར་གྱུར་པ། །ཅི་ཕྱིར་
ཡོངས་སུ་མྱ་ངན་འདའ། །ནམ་ཞིག་སྦྲུལ་དང་སྲེ་མོ་གཉིས། །ཁུང་གཅིག་ནང་དུ་ཚང་བཅས་ཏེ། །དེ་གཉིས་སྤུན་ལྟར་གྱུར་པ་ན། །དེ་ན་ཡོངས་སུ་མྱ་ངན་འདའ། །དེ་བཞིན་གཤེགས་པས་ཐམས་ཅད་ལ། །

47-1-169b

སྒྲ་གཅན་འཛིན་ལྟར་ཀུན་གཟིགས་ཏེ། །སེམས་ཅན་ཀུན་གྱི་གཙོར་གྱུར་པ། །ཅི་ཕྱིར་ཡོངས་སུ་མྱ་ངན་འདའ། །ཅི་སྟེ་མེ་ཏོག་འདབ་བདུན་པོ། །པ་ཤི་ཀ་ཡི་དྲིར་གྱུར་ཏམ། །ཀ་ལ་ཀ་ཡི་ཤིང་ལས་ནི། །
ཙིན་དའི་འབྲས་བུ་འཆགས་སྲིད་ཀྱི། །དེ་བཞིན་གཤེགས་པས་ཐམས་ཅད་ལ། །སྒྲ་གཅན་འཛིན་ལྟར་གཟིགས་པས་ན། །ཅི་ཕྱིར་སྙིང་རྗེ་ཀུན་བཏང་སྟེ། །ཡོངས་སུ་མྱ་ངན་འདའ་བར་གཤེགས། །ཅི་སྟེ་ལོག་སྲེད་
ཅན་དེ་དག །སྙིང་པོར་བྱང་ཆུབ་སངས་རྒྱས་ཏེ། །བདེ་བའི་མཆོག་ལ་གནས་གྱུར་ན། །དེ་ན་མྱ་ངན་འདའ་བར་འགྱུར། །དེ་བཞིན་གཤེགས་པས་ཐམས་ཅད་ལ། །སྒྲ་གཅན་འཛིན་ལྟར་གཟིགས་པས་ན། །
ཅི་ཕྱིར་སྙིང་རྗེ་ཀུན་བཏང་སྟེ། །ཡོངས་སུ་མྱ་ངན་འདའ་བར་གཤེགས། །གལ་ཏེ་སོ་སོའི་སྐྱེ་བོ་དག །དུས་གཅིག་མཉམ་པར་སངས་རྒྱས་ཏེ། །ཉེས་པའི་སྐྱོན་རྣམས་ཀུན་སྤངས་ན། །དེ་ན་མྱ་ངན་འདའ་བར་
འགྱུར། །དེ་བཞིན་གཤེགས་པས་ཐམས་ཅད་ལ། །སྒྲ་གཅན་འཛིན་ལྟར་གཟིགས་པས་ན། །ཅི་ཕྱིར་སྙིང་རྗེ་ཀུན་བཏང་སྟེ། །ཡོངས་སུ་མྱ་ངན་འདའ་བར་གཤེགས། །ཅི་སྟེ་སྦྲང་བུ་ཆུང་ངུའི་གཅིན། །
ས་ཆེན་འདི་ཡང་འཇིག་ནུས་ལ། །རི་དང་ལྗོངས་ཀུན་མེད་པར་རམ། །རྒྱ་མཚོ་ཆེན་པོ་འགེངས་འགྱུར་ན། །དེ་ན་ཡོངས་སུ་མྱ་ངན་འདའ། །སྙིང་རྗེའི་སེམས་ཀྱིས་ཐམས་ཅད་ལ། །སྒྲ་གཅན་འཛིན་ལྟར་གཟིགས་
པས་ན། །འགྲོ་བ་ཀུན་གྱི་གཙོ་འགྱུར་བ། །ཅི་ཕྱིར་ཡོངས་སུ་མྱ་ངན་འདའ། །དེ་བས་ཁྱེད་ལ་སོགས་པ་དག །དམ་པའི་ཆོས་ལ་མོས་པར་གྱིས། །མྱ་ངན་གྱིས་ཀྱང་མ་གདུངས་པར། །ཡི་བློང་ངུ་བར་མ་བྱེད་ཅིག །
ཡང་དག་ལ་ནི་གང་སྤྱོད་པ། །དེ་བཞིན་གཤེགས་པ་རྟག་པ་སྒོམ། །དེ་ལྟར་དམ་ཆོས་དེ་ཉིད་ཀྱང་། །མི་འགྱུར་རྟག་ཏུ་གནས་པར་རྟོགས། །གཞན་ཡང་དཀོན་མཆོག་གསུམ་དག་ལ། །རྟག་ཏུ་གནས་པར་འདུ་ཤེས་

47-1-170a

སྐྱེད། །དེ་ལ་ཤིན་ཏུ་སྲུང་བ་ན། །སྔགས་ཀྱི་མཐུ་དབང་ཤིང་སྐམ་ལ། །མེ་ཏོག་དག་ཀྱང་སྐྱེ་བ་བཞིན། །དེ་ནི་དཀོན་མཆོག་གསུམ་པོ་ལ། །འཁོར་རྣམ་བཞི་སྟེ་ལེགས་པར་ཉོན། །ཐོས་ནས་ཤིན་ཏུ་དགའ་
བཞིན་དུ། །བྱང་ཆུབ་ཏུ་ནི་སེམས་སྐྱེད་ཅིང་། །གང་ཞིག་དཀོན་མཆོག་གསུམ་པོ་ལ། །དོན་དམ་བདེན་པར་རྟག་འཛིན་ན། །དེ་ནི་སངས་རྒྱས་མང་པོ་ཡི། །སྨོན་ལམ་ཕུལ་གྱི་མཆོག་ཡིན་ནོ། །དེ་ལ་དགེ་སློང་
ངམ། དགེ་སློང་མ་འམ། དགེ་སྙེན་ནམ། དགེ་བསྙེན་མ་གང་ཞིག་དེ་བཞིན་གཤེགས་པའི་སྨོན་ལམ་མཆོག་གི་སྨོན་ལམ་བཏབ་པ་ནི་གླེན་པ་འམ་གཏི་མུག་ཅན་མ་ཡིན་ཏེ། མཆོད་པའི་གནས་ཡིན་པར་
རིག་པར་བྱའོ། །སྨོན་ལམ་དེའི་མཐུས་ཡོན་ཏན་གྱི་འབྲས་བུ་སྨིན་པ་ནི་དགྲ་བཅོམ་པ་ལྟར་འཇིག་རྟེན་གྱི་ཕུལ་གྱི་མཆོག་ཏུ་འགྱུར་རོ། །གང་ཞིག་དེ་ལྟར་དཀོན་མཆོག་གསུམ་ལ་རྟག་པ་ཉིད་དུ་མི་ཤེས་ན་དེ་ནི་
རིགས་ངན་ཡིན་པར་རིག་པར་བྱའོ། །གང་ཞིག་ཆོས་རྣམ་པ་གསུམ་པོ་རྟག་པ་ཉིད་དུ་ཤེས་ན་ཆོས་བདེན་པའི་རྐྱེན་ཀྱིས་སྡུག་བསྔལ་བ་དང་འབྲལ་ཞིང་རབ་ཏུ་བདེ་བར་འགྱུར། གནོད་པ་མེད་པར་འགྱུར། བར་ཆད་
བྱེད་པ་མེད་པར་འགྱུར་རོ། །དེའི་ཚེ་ལྷ་དང་མི་དང་། ལྷ་མ་ཡིན་ལ་སོགས་པ་འཁོར་དེ་དག་གིས་དེ་སྐད་ཅེས་གསུངས་པ་ཐོས་ནས་རབ་ཏུ་དགའ་མགུ་རངས་པའི་སེམས་སྐྱེས་ཏེ། ཤིན་ཏུ་དུལ་ཞིང་ངེས་པའི་སེམས་
སུ་གྱུར། སྒྲིབ་པ་ཀུན་ཤིན་ཏུ་བསལ་བའི་སེམས་སུ་གྱུར། མཐོ་སྨན་མེད་པའི་སེམས་སུ་གྱུར་ཏེ། གཟི་བརྗིད་རྣམ་པར་དང་བ་དང་། འཛུམ་པའི་མདངས་ཅན་དུ་གྱུར་ནས་དེ་བཞིན་གཤེགས་པ་རྟག་པ་ཉིད་དུ་ཤེས་ཏེ། 
དེ་བས་ན་ལྷ་རྫས་ཀྱི་མཆོད་པ་རྣམ་པ་མང་པོས་མཆོད་དེ། ལྷ་རྫས་ཀྱི་མེ་ཏོག་དང་། སྤོས་དང་། ཕྱེ་མ་དང་། བྱུག་པོས་དང་། ལྷ་རྫས་ཀྱི་རོལ་མོས་ཡོངས་སུ་མཆོད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་

47-1-170b

དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་ཁྱོད་ཀྱིས་འཁོར་གྱི་དཀྱིལ་འཁོར་འདི་དག་ངོ་མཚར་རྨད་དུ་གྱུར་པ་མཐོང་ངམ། འོད་སྲུང་གིས་གསོལ་པ། མཐོང་ངོ་། །བཅོམ་ལྡན་འདས་དེ་བཞིན་གཤེགས་པ་ཚད་མེད་པ་
དཔག་ཏུ་མེད་པ་དག་འཁོར་མང་པོའི་མཆོད་པ་ཡོངས་སུ་བཞེས་པ་མཐོང་ངོ་། །གཞན་ཡང་སངས་རྒྱས་མང་པོའི་སྐུ་ནི་རབ་ཏུ་ཆེ་ལ། བཞུགས་པའི་གདན་ནི་ཁབ་ཀྱི་རྩེ་མོ་ཙམ་སྟེ། འཁོར་མང་པོས་ཡོངས་སུ་སྐོར་ཀྱང་གཅིག་
ལ་གཅིག་འཇེར་བར་མ་གྱུར་པར་མཐོང་ངོ་། །གཞན་ཡང་འཁོར་མང་པོ་འདི་དག་སྨོན་ལམ་ཆེན་པོ་བསྐྱེད་ནས་ཚིགས་སུ་བཅད་པ་བཅུ་གསུམ་པོ་སྨྲས་པ་ཡང་མཐོང་ངོ་། །གཞན་ཡང་འཁོར་གྱི་དཀྱིལ་འཁོར་འདི་དག་
སོ་སོ་ནས་འདི་སྙམ་དུ། དེ་བཞིན་གཤེགས་པ་ནི་བདག་འབའ་ཞིག་གི་མཆོད་པ་བཞེས་སོ་སྙམ་དུ་སེམས་པར་ཡང་འཚལ་ཏོ། །གལ་ཏེ་ཙུན་དས་ཕུལ་བའི་མཆོད་པ་རྡུལ་ཕྲ་མོར་བཏགས་ཏེ། སངས་རྒྱས་གཅིག་
ལ་རྡུལ་ཕྲ་མོ་ཅིག་ཙམ་ཕུལ་ཀྱང་ཆོག་པ་འམ་ཁྱབ་པར་མི་འགྱུར་ན་དེ་བཞིན་གཤེགས་པའི་བྱིན་གྱི་བརླབས་ཀྱིས་ཐམས་ཅད་ཁྱེད་ཅིང་ཆོག་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་
པོ་འཇམ་དཔལ་གཞོན་ནུར་གྱུར་པ་ལ་སོགས་པས་ངོ་མཚར་རྨད་དུ་གྱུར་པ་འདི་དག་ཤེས་སོ། །དེ་ཡང་དེ་བཞིན་གཤེགས་པས་ཐབས་སུ་བསྟན་ཏེ། ཉན་ཐོས་ཀྱི་འཁོར་རྣམས་དང་། ལྷ་མ་ཡིན་ལ་
སོགས་པས་དེ་བཞིན་གཤེགས་པ་ནི་རྟག་པའི་ཆོས་ཉིད་དུ་ཤེས་སོ། །དེའི་ཚེ་བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། ཁྱོད་ཀྱིས་མཐོང་བ་འདི་དག་ངོ་མཚར་རྨད་དོ་སྙམ་སེམས་སམ། གསོལ་པ་དེ་བཞིན་ནོ། །
བཅོམ་ལྡན་འདས་བདག་སྔར་ཚད་མེད་པའི་སངས་རྒྱས་མང་པོ་མཚན་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱད་བཅུས་ཡོངས་སུ་བརྒྱན་པར་མཐོང་ན་ད་ནི་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་བྱད་

47-1-171a

གཟུགས་མཆོག་ཏུ་གྱུར་ཏེ། སངས་རྒྱས་ཉག་གཅིག་སྨན་གྱི་སྡོང་པོ་ལྟར་བཞུགས་ཤིང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཡོངས་སུ་བསྐོར་བར་མཐོང་ངོ་། །བཅོམ་ལྡན་འདས་
ཀྱིས་ཙུན་ད་ལ་བཀའ་སྩལ་པ། ཁྱོད་ཀྱིས་སྔར་སངས་རྒྱས་ཚད་མེད་པ་མཐོང་བ་ནི་ངས་མངོན་པར་སྤྲུལ་པ་ཤ་སྟག་སྟེ། སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར། དགའ་བར་བྱ་བའི་ཕྱིར་མངོན་པར་སྤྲུལ་
ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་སྤྱོད་པ་བསམ་གྱིས་མི་ཁྱབ་སྟེ། ཚད་མེད་པའི་སངས་རྒྱས་ཀྱི་མཛད་པ་ཤ་སྟག་གོ། །ཙུན་ད་ཁྱོད་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོའི་
སྤྱོད་པ་དང་ལྡན་ཏེ། ས་བཅུ་ལ་རབ་ཏུ་གནས་པས་བྱང་ཆུབ་སེམས་དཔའི་སྤྱོད་པ་རྫོགས་པར་ལྡན་ནོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། དེ་དེ་བཞིན་ནོ། །དེ་དེ་བཞིན་ནོ། །
བཅོམ་ལྡན་འདས་ཀྱིས་གསུངས་པ་བཞིན་ནོ། །ཙུན་ད་འདི་ནི་སྤྱོད་པ་ཐམས་ཅད་བྱང་ཆུབ་སེམས་དཔའི་སྤྱོད་པ་དང་ལྡན་ཏེ། བདག་ཅག་རྗེས་སུ་ཡི་རང་ངོ་། །དེ་བཞིན་གཤེགས་པས་ཕྱི་མ་མ་འོངས་པའི་སྐྱེ་བོ་ཚད་
མེད་པ་ལ་སྣང་བ་ཆེན་པོ་མཛད་པའི་སླད་དུ་ཐེག་པ་ཆེན་པོའི་མདོ་སྡེ་ཡོངས་སུ་མྱ་ངན་ལས་འདས་པ་ཆེན་པོ་གསུངས་སོ། །བཅོམ་ལྡན་འདས་མདོ་སྡེ་ཐམས་ཅད་ལས། བཅོམ་ལྡན་འདས་ཀྱིས་གསུངས་པ་ལྷག་མ་
དང་བཅས་པའི་དོན་ལགས་སམ། ལྷག་མ་མ་མཆིས་པའི་དོན་དུ་གསུངས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་གསུངས་པ་ནི་ལྷག་མ་དང་བཅས་པ་ཡང་ཡོད་ལ། ལྷག་མ་མེད་པའི་
དོན་ཡང་ཡིན་ནོ། །དེ་ནས་ཙུན་དས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་ཟང་ཟིང་བདོག་པ་ཐམས་ཅད་སྦྱིན་པ་བྱིན་པ་ནི་བསྔགས་ཤིང་བསྟོད་མོད་ཀྱི། རྣམ་པར་སྨོད་པར་མི་བྱའོ། །

47-1-171b

ཞེས་བཅོམ་ལྡན་འདས་ཀྱིས་གསུངས་པའི་དོན་ཇི་ལྟ་བུ། ཚུལ་ཁྲིམས་དང་ཚུལ་ཁྲིམས་ངན་པ་ཅན་ལ་བྱེ་བྲག་གི་ཁྱད་པར་ཅི་མཆིས། བཅོམ་ལྡན་འདས་ཀྱིས་བཀའ་སྩལ་པ། རྣམ་པ་གཅིག་པུ་མ་གཏོགས་པར་
སྦྱིན་པ་གཞན་ཐམས་ཅད་ལ་བསྟོད་ཅིང་བསྔགས་སོ། །ཙུན་དས་གསོལ་པ། གཅིག་པུ་མ་གཏོགས་ཞེས་བགྱི་བ་དེ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། དེ་ནི་མདོ་སྡེ་འདི་ལས་གང་ཚུལ་ཁྲིམས་ངན་
པ་ཅན་དུ་གསུངས་པའོ། །ཙུན་དས་ཡང་གསོལ་པ། བཅོམ་ལྡན་འདས་དེའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ཚུལ་ཁྲིམས་ངན་པ་ཅན་ཞེས་བྱ་བ་ནི་ལོག་སྲེད་ཅན་ལ་བྱའོ། །དེ་མ་ཡིན་པ་
སྦྱིན་པ་ཐམས་ཅད་ལ་བསྟོད་ཅིང་བསྔགས་ཏེ། འབྲས་བུ་ཆེན་པོ་ཐོབ་པར་འགྱུར་རོ། །ཙུན་དས་ཡང་གསོལ་པ། ལོག་སྲེད་ཅན་ཞེས་བགྱི་བ་ཇི་ལྟ་བུ་ལགས། བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། 
དགེ་སློང་ངམ། དགེ་སློང་མ་འམ། དགེ་བསྙེན་ནམ། དགེ་བསྙེན་མ་གང་ཞིག་ཚིག་ངན་པ་སྨྲ་ཞིང་དམ་པའི་ཆོས་ལ་སྐུར་པ་འདེབས་པ་དང་། ཁ་ན་མ་ཐོ་བའི་ལས་བྱས་ཀྱང་འགྱོད་པ་འམ། ཁྲེལ་བ་འམ། 
འཛེམ་པའི་སེམས་མེད་དེ། གང་ཟག་དེ་ལྟ་བུ་ནི་ལོག་སྲེད་ཅན་གྱི་ལམ་ལ་འབབ་པ་ཞེས་བྱའོ། །གང་ཞིག་རྩ་བ་བཞི་ཉམས་སམ། མཚམས་མེད་པ་ལྔ་བྱས་པར་བདག་ཉིད་ཀྱིས་ཤེས་ལ། དེ་ལྟར་ཁ་ན་མ་ཐོ་བ་ཆེན་
པོ་བྱས་ཀྱང་ཐོག་མ་ནས་འཇིགས་པ་འམ་ཁྲེལ་ཞིང་འཛེམ་པའི་སེམས་མེད་དེ། མི་འགྱོད་མི་མཐོལ་བ་དང་དམ་པའི་ཆོས་ལ་ཕངས་ཤིང་གཅེས་པར་མི་འཛིན་ཏེ། རྣམ་པར་གཞག་པའི་སེམས་མེད་ཀྱི། བརྙས་ཤིང་
སྐུར་པ་དང་ཉེས་པ་མང་པོ་ཞེས་སྐྱོན་འདོགས་པའི་གང་ཟག་དེ་ཡང་ལོག་སྲེད་ཅན་གྱི་ལམ་ལ་འབབ་པ་ཞེས་བྱའོ། །གཞན་ཡང་གང་ཞིག་སངས་རྒྱས་དང་། ཆོས་དང་དགེ་འདུན་མེད་དོ་ཞེས་སྨྲ་བ་དེ་ཡང་ལོག་སྲེད་ཅན་

47-1-172a

གྱི་ལམ་ལ་འབབ་པ་ཞེས་བྱའོ། །དེ་ལྟར་ལོག་སྲེད་ཅན་འདི་འབའ་ཤིག་མ་གཏོགས་པ་བྱིས་པ་གཞན་ཐམས་ཅད་ལ་བསྟོད་ཅིང་བསྔགས་སོ།། །། བམ་པོ་བཅུ་བཞི་པ། དེ་ནས་ཙུན་དས་
ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཚུལ་ཁྲིམས་ངན་པ་ཅན་གྱི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། གང་ཚུལ་ཁྲིམས་རྩ་བ་བཞི་ཉམས་པ་
མཚམས་མེད་པ་ལྔ་བྱས་པ་དང་། དམ་པའི་ཆོས་ལ་རྣམ་པར་སྐུར་པ་འདེབས་པ་དེ་ནི་ཚུལ་ཁྲིམས་ངན་པ་ཞེས་བྱའོ། །ཙུན་དས་ཡང་གསོལ་པ། དེ་ལྟར་ཚུལ་ཁྲིམས་ངན་པ་ཅན་དེ་རྣམ་པར་གྲོལ་བའི་སྐལ་བ་
མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རྒྱུ་དང་རྐྱེན་དུ་ལྡན་ན་གྲོལ་བའི་སྐལ་བ་ཡོད་དེ། གལ་ཏེ་ཆོས་གོས་ཀྱང་གྱོན་ལ་ཡོངས་སུ་མ་སྤངས། ཁྲེལ་ཞིང་འཛེམ་པ་དང་འཇིགས་པའི་སེམས་དང་ཡང་ལྡན། 
ཤིན་ཏུ་ཡང་འགྱོད་ལ་འདི་སྙམ་དུ་ཀྱི་ཧུད་བདག་གིས་ཅིའི་ཕྱིར་ཁ་ན་མ་ཐོ་བའི་ལས་ཆེན་པོ་འདི་བྱས། ཀྱི་ཧུད་བདག་གིས་ཅིའི་ཕྱིར་སྡུག་བསྔལ་དུ་འགྱུར་བའི་ལས་འདི་བྱས་སྙམ་དུ་ཤིན་ཏུ་འགྱོད་པའི་སེམས་སྐྱེས་
ལ། ཆོས་བསྲུང་བའི་སེམས་དང་ཆོས་རྣམ་པར་གཞག་པའི་སེམས་ཀྱང་བསྐྱེད་དེ། ཆོས་བཟུང་ཞིང་འཛིན་པ་ལ་མཆོད་པར་བྱེད་པ་དང་། ཐེག་པ་ཆེན་པོའི་མདོ་སྡེ་འདོན་ཅིང་ཀློག་པ་ལ་ཞུ་བ་དང་། གསོལ་བ་འདེབས་
པ་དང་། བདག་ཀྱང་འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། ཁོང་དུ་ཆུད་པར་བྱེད་ལ། གཞན་ལ་ཡང་རྒྱས་པར་སྟོན་ཅིང་འཆད་པའི་གང་ཟག་དེ་ནི་ཚུལ་ཁྲིམས་ངན་པ་ཅན་ཞེས་མི་བྱའོ། །དེ་ཅིའི་ཕྱིར་ཞེ་
ན། རིགས་ཀྱི་བུ་འདི་ལྟ་སྟེ་དཔེར་ན་ཉི་མ་ཤར་ན་ན་བུན་དང་། ཁུག་རྣ་མི་སྣང་བའི་མུན་པ་ཀུན་སེལ་བར་འགྱུར་རོ། །ཡོངས་སུ་མྱ་ངན་ལས་འདས་པའི་མདོ་སྡེ་ཆེན་པོ་འདི་འཇིག་རྟེན་དུ་བྱུང་བ་ཡང་དེ་དང་འདྲ་སྟེ། སེམས་ཅན་

47-1-172b

གྱིས་བསྐལ་པ་ཚད་མེད་པའི་ཁ་ན་མ་ཐོ་བའི་ལས་ཅི་བྱས་པ་ཐམས་ཅད་སེལ་བར་ནུས་སོ། །དེ་བས་ན་མདོ་སྡེ་འདི་ལས་དམ་པའི་ཆོས་ཀྱི་སྐྱབས་བྱས་པ་དག་འབྲས་བུ་ཆེན་པོ་ཐོབ་པར་འགྱུར་ཏེ། ཚུལ་ཁྲིམས་
ངན་པ་ཅན་དག་རྣམ་པར་དགྲོལ་ནུས་སོ་ཞེས་བཤད་པ་ཡིན་ནོ། །དེ་ལ་གང་ཞིག་དམ་པའི་ཆོས་ལ་སྐུར་ཀྱང་ཤིན་ཏུ་འགྱོད་ཅིང་འཐོལ་ལ། ཆོས་ལ་སྐྱབས་སུ་སོང་ནས་མི་དགེ་བའི་ལས་བྱས་པ་ཐམས་ཅད་དྲན་པར་
བྱས་ཏེ། དཔེར་ན་མི་ཞིག་གསད་པའི་ལས་བྱས་ན་ཤིན་ཏུ་འཇིགས་པའི་སེམས་སྐྱེ་བ་ལྟར་རམ། རབ་ཏུ་ངོ་ཚ་བ་དང་ཁྲེལ་བའི་སེམས་སྐྱེས་ཏེ། དམ་པའི་ཆོས་འདི་མ་གཏོགས་པར་གཞན་གུད་ན་སྐྱབས་དང་དཔུང་གཉེན་
དུ་འགྱུར་བ་མེད་དོ་སྙམ་པའི་སེམས་སྐྱེས་ཏེ། དམ་པའི་ཆོས་ལ་སྐྱབས་སུ་འགྲོ་བ་ཇི་ལྟར་བསྟན་ཅིང་གསུངས་པ་བཞིན་དུ་སྐྱབས་སུ་སོང་བའི་གང་ཟག་དེ་ལ་སྦྱིན་པ་བྱིན་ན་བསོད་ནམས་དཔག་ཏུ་མེད་པ་འཐོབ་ཅིང་
འཇིག་རྟེན་གྱི་མཆོད་པའི་གནས་སུ་འགྱུར་རོ། །གང་ཞིག་དེ་ལྟར་གོང་དུ་སྨོས་པའི་ཁ་ན་མ་ཐོ་བའི་ལས་བྱས་ནས་ཟླ་བ་གཅིག་གམ། ཞག་བཅྭ་ལྔའི་བར་དུ་སྐྱབས་སུ་འགྲོ་བ་འམ་འཐོལ་བ་འམ། འགྱོད་པའི་སེམས་
མི་སྐྱེ་བའི་གང་ཟག་དེ་ལ་སྦྱིན་པ་བྱིན་ན་ཡང་འབྲས་བུ་ཆེན་པོར་མི་འགྱུར་ཏེ། མཚམས་མེད་པ་ལྔའི་སྡིག་བྱས་པ་ཡང་དེ་དང་འདྲ་སྟེ། འགྱོད་པའི་སེམས་སྐྱེས་ལ། ཁོང་ནས་ངོ་ཚ་བ་དང་ཁྲེལ་བའི་སེམས་སུ་ལྡན་ཏེ། 
བདག་གིས་མི་དགེ་བའི་ལས་བྱས་པས་སྡུག་བསྔལ་ཆེན་པོ་མྱོང་བར་འགྱུར་རོ། །སྙམ་སེམས་ཏེ་དམ་པའི་ཆོས་རྣམ་པར་གཞག་པའི་ཕྱིར་མགོན་དང་སྐྱབས་བྱེད་ན་དེ་ཡང་མཚམས་མེད་པ་ལྔའི་སྡིག་བྱས་པ་མ་ཡིན་ནོ། །
ཅི་སྟེ་དེ་ལ་སྦྱིན་པ་བྱིན་ན་ཚད་མེད་པའི་བསོད་ནམས་འཐོབ་པར་འགྱུར་རོ། །མཚམས་མེད་པའི་ལས་བྱས་ཀྱང་དམ་པའི་ཆོས་བསྲུང་བ་འམ། སྐྱབས་སུ་འགྲོ་བའི་སེམས་བསྐྱེད་པ་དེ་ལ་སྦྱིན་པ་བྱིན་ན། བསོད་ནམས་

47-1-173a

སུ་འགྱུར་བ་ནི་སྨོས་སུ་ཡང་མི་ཆོག་གོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཁ་ན་མ་ཐོ་བའི་ལས་ཆེན་པོ་བྱས་པ་དག་ཤིན་ཏུ་བརྟགས་པར་ཉོན་ཅིག་དང་། ཁྱོད་ལ་རྒྱས་པར་ཕྱེ་སྟེ་བཤད་པར་བྱའོ། །
དེ་དག་འདི་སྙམ་དུ་སེམས་སྐྱེད་ཅིག །དམ་པའི་ཆོས་ཤེས་བྱ་བ་ནི་དེ་བཞིན་གཤེགས་པའི་སྙིང་པོ་སྟེ། དེ་བས་ན་བསྲུང་ཞིང་བསྐྱབ་པ་དང་རྣམ་པར་གཞག་པར་བྱའོ། །དེ་ལ་སྦྱིན་པ་བྱིན་པས་བསོད་ནམས་ཀྱི་འབྲས་བུ་
མཆོག་འཐོབ་པར་འགྱུར་རོ། །རིགས་ཀྱི་བུ་དཔེར་ན་བུད་མེད་སྦྲུམ་མ་བུ་འབྱུང་དུ་ཉེ་བ་ཞིག་ཡུལ་དུ་མུ་གེ་བྱུང་སྟེ་འཁྲུགས་ནས་ཡུལ་གཞན་ཞིག་གི་ལྷའི་རྟེན་བཅས་པ་ཞིག་ཏུ་བུ་བཙས་ནས་ཕྱིས་བདག་གི་ཡུལ་ཉིད་ན་
འཁྲུག་པ་ཡང་ཞི། ལོ་ཡང་རབ་ཏུ་ལེགས་སོ་ཞེས་གཏམ་ཐོས་ནས་བུ་ཁུར་དུ་ཁྱེར་ཏེ་ཕྱིར་བདག་གི་ཡུལ་དུ་ཆས་སོ། །དེའི་བར་དུ་ཆུ་ཆེན་པོ་བྲུག་ནས་བུ་ཁུར་དུ་ཁྱེར་ཏེ་ཆུ་རྒལ་མ་ནུས་པས་དེ་འདི་སྙམ་དུ་སེམས་སོ། 
བདག་ཅག་མ་སྨད་གཉིས་ལྷན་ཅིག་ཚེ་འཕོས་ཀྱང་བླའི། བུ་བོར་ཏེ་བདག་འབའ་ཞིག་ཆུ་རྒལ་བར་མི་བྱ་སྙམ་བསམ་པ་ལས་ཆུ་རྒལ་བ་ལས་མ་སྨད་གཉིས་ཆུའི་ནང་དུ་ཤིའོ། །ཤི་མ་ཐག་ཏུ་མཐོ་རིས་ཀྱི་ལྷར་སྐྱེས་སོ། །
དེ་ཡང་བུ་ལ་བྱམས་ཏེ་ཆུ་ལས་སྒྲོལ་བར་བསམས་པའི་ཕྱིར་རོ། །བུད་མེད་དེ་རང་བཞིན་ངན་ལ་གཏུམ་ཡང་བུ་ལ་བྱམས་པར་བསམས་པས་མཐོ་རིས་ཀྱི་ལྷར་སྐྱེས་སོ། །རྩ་བ་བཞི་ཉམས་པ་དང་མཚམས་མེད་པ་ལྔ་བྱེད་པ་
དག་ཀྱང་དམ་པའི་ཆོས་བསྲུང་ཞིང་བསྐྱབ་པའི་སེམས་བསྐྱེད་པ་ཡང་དེ་དང་འདྲ་སྟེ། སྔར་མི་དགེ་བའི་ལས་བྱས་མོད་ཀྱི། ཆོས་བསྲུང་པས་ན་འཇིག་རྟེན་ན་བླ་ན་མེད་པའི་བསོད་ནམས་ཀྱི་ཞིང་དུ་འགྱུར་ཏེ། དེ་ལྟར་ན་ཆོས་སྲུང་
ཞིང་སྐྱོབ་པ་དེ་ཚད་མེད་པའི་འབྲས་བུ་མཆོག་དང་ལྡན་ནོ། །ཙུན་དས་ཡང་གསོལ་པ། བཅོམ་ལྡན་འདས་ལོག་སྲེད་ཅན་དག་ཤིན་ཏུ་འགྱོད་ཅིང་ངོ་ཚ་བ་དང་ལྡན་ལ། དཀོན་མཆོག་གསུམ་ལ་ཡང་སྟི་སྟང་བཅས་པས་མཆོད་

47-1-173b

པ་བགྱིད་བསྟོད་པ་བགྱིད་ན་དེ་ལ་སྦྱིན་པ་བྱིན་ན་འབྲས་བུ་ཆེན་པོ་ཐོབ་པར་འགྱུར་རམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་དེ་སྐད་ཅེས་མ་ཟེར་ཅིག །རིགས་ཀྱི་བུ་འདི་ལྟ་སྟེ་དཔེར་ན་མི་ཞིག་ཤིང་ཏོག་
ཨ་མྲ་ཟོས་ནས་འབྲས་བུ་ས་ལ་བོར་རོ། །དེ་འདི་སྙམ་དུ་འབྲས་བུའི་ནང་ན་ཡང་རོ་མངར་བ་ཡོད་དུ་ངེས་སོ་སྙམ་བསམས་ནས་འབྲས་བུ་བཅག་སྟེ་མྱངས་པ་དང་། ཤིན་ཏུ་ཁ་བར་གྱུར་པས་དེ་ལ་འགྱོད་པའི་སེམས་
སྐྱེས་ཏེ་ཤིང་ཏོག་དེ་མཐར་མེད་ཀྱིས་དོགས་ནས་འབྲས་བུ་བཅག་པའི་ཕྱིར་ས་ལ་སྨོས་ནས་དེ་སྐྱེ་བར་འདོད་པའི་ཕྱིར་དུས་སུ་མར་དང་འོ་མ་ལ་སོགས་པ་བླུགས་ཏེ་ཤིན་ཏུ་ནན་ཏན་བྱས་ན། དེ་ཁྱོད་ཀྱིས་ཡིད་ལ་ཇི་སྙམ་དེ་
སྐྱེ་བར་འགྱུར་རམ། གསོལ་པ་མ་ལགས་སོ། །བཅོམ་ལྡན་འདས་གལ་ཏེ་གནམ་སས་བླ་ན་མེད་པའི་བདུད་རྩིའི་ཆར་བབ་ཀྱང་སྐྱེ་བར་མི་འགྱུར་རོ། །རིགས་ཀྱི་བུ་ལོག་སྲེད་ཅན་དེ་ཡང་དེ་དང་འདྲ་སྟེ། དགེ་བའི་རྩ་བ་
ཀུན་བསྲེགས་ན། ཁ་ན་མ་ཐོ་བའི་ལས་ཅི་ལ་བརྟེན་ཏེ་འབྱང་བར་འགྱུར། རིགས་ཀྱི་བུ་གལ་ཏེ་དགེ་བའི་སེམས་སྐྱེས་ན་དེ་ནི་ལོག་སྲེད་ཅན་ཞེས་མི་བྱའོ། །རིགས་ཀྱི་བུ་སྦྱིན་པ་བྱས་པ་ཐམས་ཅད་ཀྱི་རྣམ་པར་སྨིན་པའི་
འབྲས་བུ་ཁྱད་པར་མེད་པ་མ་ཡིན་ནོ། །དེ་ཅིའི་ཕྱིར་ཞེ་ན། ཉན་ཐོས་རྣམས་ལ་སྦྱིན་པ་བྱས་པའི་འབྲས་བུ་རྣམ་པར་སྨིན་པ་དང་། རང་སངས་རྒྱས་ལ་སྦྱིན་པ་བྱིན་པ་ཡང་ཁྱད་པར་ཡོད་དེ། དེ་བཞིན་གཤེགས་པ་འབའ་
ཞིག་ལ་སྦྱིན་པ་བྱིན་པ་ནི། བླ་ན་མེད་པའི་འབྲས་བུ་ཐོབ་པར་འགྱུར་ཏེ། དེ་བས་ན་སྦྱིན་པ་ཐམས་ཅད་ལ་ཁྱད་པར་མེད་པ་ཡང་མ་ཡིན་ནོ། །ཙུན་དས་ཡང་གསོལ་པ། ཅིའི་སླད་དུ་དེ་བཞིན་གཤེགས་པས་ཚིགས་སུ་བཅད་
པ་འདི་སྐད་ཅེས་གསུངས། བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། ངས་ཚིགས་སུ་བཅད་པ་འདི་གསུངས་པ་ནི་རྒྱུ་དང་རྐྱེན་མེད་པ་མ་ཡིན་ཏེ། སྔོན་རྒྱལ་པོའི་ཁབ་འདི་ན་དགེ་བསྙེན་ཤིན་ཏུ་མ་དད་པ་ཞིག་མུ་

47-1-174a

སྟེགས་ཅན་གཅེར་བུ་པ་ལ་སྦྱིན་པ་བྱིན་ནས་ང་ལ་སྦྱིན་པའི་དོན་དྲིས་པས་དེའི་རྒྱུ་དེའི་རྐྱེན་ཀྱིས་ཚིགས་སུ་བཅད་པ་དེ་དག་ངས་སྨྲས་སོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ལ་དགོངས་ཏེ་གསུངས་པའི་སྙིང་པོ་བསྟན་པའི་ཕྱིར་ངས་གསུངས་སོ། །ཚིགས་སུ་བཅད་པ་འདིའི་དོན་ཇི་ལྟ་བུ་ཞེ་ན། ཐམས་ཅད་ཅེས་བྱ་བ་ཡང་ཕྱོགས་གཅིག་གི་ཐམས་ཅད་ལ་བྱ་སྟེ། བྱང་ཆུབ་སེམས་དཔའ་སེམས་
དཔའ་ཆེན་པོ་མིའི་གཙོ་བོར་གྱུར་པ་ཡང་ཚུལ་ཁྲིམས་སྲུང་བ་དག་ནི་ཡོངས་སུ་སྡུད་ཅིང་ཅི་དགོས་པ་སྦྱིན་པར་ཡང་བྱེད་དོ། །ཚུལ་ཁྲིམས་ངན་པ་ཅན་དག་ནི་ཞིང་གཤིན་པའི་ཡུག་པོ་འམ། ཁྲེ་རྒོད་ལྟར་ཡོངས་སུ་
སྤོང་བའོ། །གཞན་ཡང་རིགས་ཀྱི་བུ་ངས་སྤོ་ན་ཚིགས་སུ་བཅད་པ་འདི་དག་གསུངས་སོ། །འབབ་ཆུའི་ཆུ་ཀླུང་ཐམས་ཅད་ནི། །ངེས་པར་གྱ་གྱུ་ཡོད་ཡང་དག །ནགས་ཚལ་གཏོགས་པ་ཐམས་ཅད་ནི། །ངེས་པར་ཤིན་
ཏུ་གདོན་མི་ཟ། །བུད་མེད་སྨོས་པ་ཐམས་ཅད་ནི། །ཀུན་ཀྱང་གཡོ་སྒྱུ་ཡོད་དུ་ངེས། །དབང་དང་ལྡན་པ་ཐམས་ཅད་ནི། །གདོན་མི་ཟ་བར་ལོངས་སྤྱོད་ལྡན། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་
འཇམ་དཔལ་གཞོན་ནུར་གྱུར་པ་འདུག་པ་ལས་ལངས་ནས་བླ་གོས་ཕྲག་པ་གཅིག་ཏུ་བྱས། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཚིགས་
སུ་བཅད་པ་འདི་སྐད་ཅེས་གསོལ་ཏོ། །འབབ་ཆུའི་ཆུ་ཀླུང་ཐམས་ཅད་ནི། །ངེས་པར་གྱ་གྱུ་མཆིས་མ་ལགས། །ནགས་ཚལ་གཏོགས་པ་ཐམས་ཅད་ནི། །ངེས་པར་ཐམས་ཅད་ཤིང་མ་ལགས། །བུད་མེད་
སྨོས་པ་ཐམས་ཅད་ནི། །ཐམས་ཅད་གཡོ་སྒྱུ་མཆིས་མ་ལགས། །དབང་དུ་གྱུར་པ་ཐམས་ཅད་ནི། །ཐམས་ཅད་ལོངས་སྤྱོད་ལྡན་མ་ལགས། །དེ་བས་ན་བཅོམ་ལྡན་འདས་ཀྱིས་གསུངས་པའི་དོན་འདི་ནི་ལྷག་

47-1-174b

མ་དང་བཅས་པ་ལགས་ན། བདག་ཅག་ལ་ཐུགས་བརྩེ་བའི་སླད་དུ་དེའི་རྒྱུ་དང་རྐྱེན་བསྟན་དུ་གསོལ། དེ་ཅིའི་སླད་དུ་ཞེ་ན། བཅོམ་ལྡན་འདས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། གླིང་ནུབ་ཀྱི་བ་ལང་
སྤྱོད་ཅེས་བྱ་བ་ན་ཆུ་ཀླུང་ས་པ་ཀ་ཞེས་བགྱི་བ་ཞིག་མཆིས་ཏེ། ཐིག་ནག་པོ་ལྟར་ནུབ་ཀྱི་རྒྱ་མཚོར་འབབ་བོ། །ཆུ་ཀླུང་དེའི་མཚན་ཉིད་མདོ་སྡེ་གཞན་དག་ལགས་ཀྱང་བཅོམ་ལྡན་འདས་ཀྱིས་མ་གསུངས་ན། 
དེ་བཞིན་གཤེགས་པས་ཤིན་ཏུ་རྒྱས་པའི་མདོ་སྡེ་འདི་ལས་ལྷག་མ་མཆིས་པར་གསུངས་པའི་བྱང་ཆུབ་སེམས་དཔའ་རྣམས་ཀྱང་དོན་འདི་དག་རྟོགས་པར་མཛད་དུ་གསོལ། བཅོམ་ལྡན་འདས་དཔེར་ན་མི་ལ་
ལ་ཞིག་སྔར་གསེར་རྡོ་ངོ་ཤེས་ལ་གསེར་ངོ་མི་ཤེས་པ་དང་མཚུངས་ཏེ། དེ་བཞིན་གཤེགས་པ་ཡང་དེ་དང་འདྲ་བར་ཆོས་ཐམས་ཅད་ཐུགས་སུ་ཆུད་ཀྱང་བསྟན་ཅིང་གསུངས་པ་མ་བས་པའི་ལྷག་མ་དང་བཅས་སོ། །
དེ་བཞིན་གཤེགས་པས་དེ་ལྷག་མ་དང་བཅས་པ་གསུངས་མོད་ཀྱི། དེ་ཡང་ཐབས་དང་སྦྱར་ཏེ་དགོངས་ནས་གསུངས་པར་འཚལ་ཏོ། །ནགས་ཚལ་ཐམས་ཅད་ངས་པར་ཤིང་ངོ་ཞེས་བགྱི་བ་ཡང་ལྷག་མ་དང་བཅས་སོ། །
དེ་ཅིའི་སླད་དུ་ཞེ་ན། གསེར་དང་དངུལ་དང་། བཻ་དཱུརྱ་ལ་སོགས་པ་རིན་པོ་ཆེ་རྣམ་པ་སྣ་ཚོགས་ཀྱི་ནགས་ལ་ཡང་ཚལ་ཞེས་བགྱིའོ། །བུད་མེད་ཐམས་ཅད་ངེས་པར་གཡོ་སྒྱུ་ཅན་ནོ་ཞེས་བགྱི་བ་ཡང་ལྷག་མ་དང་བཅས་སོ། །
དེ་ཅིའི་སླད་དུ་ཞེ་ན། བུད་མེད་ཁ་ཅིག་ཚུལ་ཁྲིམས་ཡོངས་སུ་སྲུང་ཞིང་ཡོན་ཏན་དང་ལྡན་པ། བྱམས་པ་དང་སྙིང་རྗེར་ལྡན་པ་ཡང་མཆིས་སོ། །དབང་དང་བཅས་པ་ཐམས་ཅད་ལོངས་སྤྱོད་དང་ལྡན་ནོ་ཞེས་བགྱི་བ་ཡང་ལྷག་
མ་དང་བཅས་སོ། །དེ་ཅིའི་སླད་དུ་ཞེ་ན། དབང་དང་བཅས་པ་འཁོར་ལོས་སྒྱུར་བ་དེ་བཞིན་གཤེགས་པ་ཆོས་ཀྱི་རྒྱལ་པོ་ནི་འཆི་བདག་གི་བདུད་ཀྱི་རིས་སུ་མ་གཏོགས་ཏེ། མེད་པར་བྱེད་མི་ནུས་སོ། །ཚངས་པ་དང་བརྒྱ་བྱིན་

47-1-175a

ལ་སོགས་པ་ནི་དབང་དང་བཅས་མོད་ཀྱི་མི་རྟག་པ་ལགས་སོ། །གང་རྟག་པ་མི་འགྱུར་མི་འཕོ་བ་ནི་དབང་དང་བཅས་པ་ཞེས་བགྱི་སྟེ། དེ་ཡང་ཐེག་པ་ཆེན་པོ་ཡོངས་སུ་མྱ་ངན་ལས་འདས་པ་འདི་ལགས་སོ། །བཅོམ་
ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ནི་ཤིན་ཏུ་སྨྲ་བའི་སྤོབས་པ་དང་ལྡན་ཏེ། འོན་ཀྱང་སྐད་ཅིག་སྡོད་ལ་བརྟན་པོར་ཉོན་ཅིག །འཇམ་དཔལ་དཔེར་ན་ཁྱིམ་བདག་ནད་ཀྱིས་གཟིར་ཏེ་ཤིན་ཏུ་ཉམ་ཆུང་བ་ཞིག་
སྨན་པ་མཁས་པ་དང་ཕྲད་ནས་སྨན་པ་དེས་སྨན་ཨ་ཀས་སྦྱར་ཏོ། །ནད་པ་དེ་བརྐམ་པ་ཞིག་སྟེ་མང་དུ་ཟ་འདོད་ན་དེ་ལ་སྨན་པས་འདི་སྐད་ཟེར་རོ། །ནད་པ་ཁྱོད་སྨན་ཞུ་ན་ནི་མང་དུ་ཡང་གཏང་བ་ཞིག་ན། ཁྱོད་ཉམ་ཆུང་རིད་
དེ་མི་འཇུ་བས་མང་དུ་གཏང་དུ་མི་རུང་ངོ་། །དེ་བས་ན་སྨན་ཨ་གས་འདི་ནི་བདུད་རྩི་ཞེས་ཀྱང་བྱ་ལ། དུག་ཅེས་ཀྱང་བྱའོ། །གལ་ཏེ་མང་དུ་འཐུངས་ཏེ་མ་ཞུ་ན་དུག་ཅེས་བྱའོ། །རིགས་ཀྱི་བུ་ཁྱོད་སྨན་པ་མཁས་པ་དེས་སྨྲས་པ་
དེ་ལ་དོན་འགལ་ཞིང་ནོར་བ་འམ། སྨན་གྱི་མཐུ་མེད་པར་གྱུར་ཏོ་སྙམ་དུ་མ་སེམས་ཤིག །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། རྒྱལ་པོ་དང་བཙུན་མོ་དང་། རྒྱལ་བུ་དང་། བློན་པོ་ཆེན་པོ་རྣམས་དང་། རྒྱལ་པོ་
རབ་ཏུ་སྡེ་ཕམ་བྱེད་དང་། རྒྱལ་བུ་དང་བཙུན་མོ་དང་། ཕོ་བྲང་གི་སླས་ང་རྒྱལ་ཅན་དག་གི་དབང་དུ་བྱས་ཏེ། དེ་དག་གདུལ་བའི་ཕྱིར་དེ་དག་འཇིགས་ཤིང་སྐྲག་པར་བྱ་བའི་ཕྱིར་སྨན་པ་མཁས་པ་དེ་དང་འདྲ་བར་ཚིགས་སུ་བཅད་པ་འདི་
གསུངས་སོ། །འབབ་པའི་ཆུ་ཀླུང་ཐམས་ཅད་ནི། །ངེས་པར་གྱ་གྱུ་ཡོད་ཡང་དག །ནགས་ཚལ་གཏོགས་པ་ཐམས་ཅད་ནི། །ངེས་པར་ཤིང་དུ་གདོན་མི་ཟ། །བུད་མེད་སྨོས་པ་ཐམས་ཅད་ནི། །ཀུན་ཀྱང་ལྕམ་
སྒྱུ་ཡོད་དུ་ངེས། །དབང་དང་ལྡན་པ་ཐམས་ཅད་ནི། །གདོན་མི་ཟ་བར་ལོངས་སྤྱོད་ལྡན། །འཇམ་དཔལ་ཁྱོད་ཀྱིས་འདི་ལྟར་རིག་པར་བྱ་སྟེ། དེ་བཞིན་གཤེགས་པས་གསུངས་པ་ལ་ནི་འཁྲུལ་པ་མེད་དོ། །ས་ཆེན་པོ་

47-1-175b

འགྱུར་ཞིང་ལྡོག་ཀྱང་སྲིད་ཀྱི། དེ་བཞིན་གཤེགས་པས་གསུངས་པ་ལ་འཁྲུལ་པ་མེད་དོ་དེ་བས་ན་དེ་བཞིན་གཤེགས་པས་གསུངས་པ་ཐམས་ཅད་ལྷག་མ་དང་བཅས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་
ནུར་གྱུར་པ་ལ་ཤིན་ཏུ་ལེགས་སོ། །ཤིན་ཏུ་ལེགས་སོ་ཞེས་བསྟོད་དེ། རིགས་ཀྱི་བུ་ཁྱོད་ནི་ཡུན་རིང་པོ་ནས་དོན་འདི་རབ་ཏུ་རྟོགས་པས་ཐམས་ཅད་ལ་སྙིང་བརྩེ་བ་དང་། སེམས་ཅན་ཐམས་ཅད་ཡེ་ཤེས་སུ་འགྱུར་བར་བྱ་བའི་ཕྱིར་
དེ་བཞིན་གཤེགས་པ་ལ་ཚིགས་སུ་བཅད་པའི་དོན་འདི་རྒྱས་པར་དྲིས་པ་ལེགས་སོ། །དེ་ནས་འཇམ་དཔལ་གཞོན་ནུར་གྱུར་པས་ཡང་སངས་རྒྱས་ཀྱི་སྤྱན་སྔར་ཚིགས་སུ་བཅད་དེ་གསོལ་བ། ཕ་རོལ་གཞན་གྱིས་སྨྲས་པ་
ལ། །རྗེས་སུ་གཞོལ་གྱི་ཕྱིར་མི་བཟློག །གཞན་གྱིས་བྱས་དང་མ་བྱས་པ། །དེ་ལ་བརྟག་པར་མི་བྱའོ། །བདག་ལ་ཤིན་ཏུ་བརྟག་པ་ནི། །དགེ་དང་མི་དགེ་གང་སྤྱོད་པ། །བཅོམ་ལྡན་འདས་ཀྱིས་དེ་སྐད་གསུངས་པའི་ཆོས་ཀྱི་
སྨན་དེ་ནི་ཡང་དག་པར་གསུངས་པ་མ་ལགས་ན། ཕ་རོལ་པོས་གཞན་གྱིས་སྨྲ་བའི་རྗེས་སུ་གཞོལ་ཞིང་འགལ་བར་མི་བགྱིད་པ་དེ་བཞིན་གཤེགས་པས་ཐུགས་བརྩེ་བའི་སླད་དུ་ཡང་དག་པར་བསྟན་དུ་གསོལ། 
དེ་ཅིའི་སླད་དུ་ཞེ་ན། བཅོམ་ལྡན་འདས་ཀྱིས་རྣམ་པ་དུ་མ་ལས་སློབ་པ་ཕྱི་རོལ་དུ་རྣམ་པ་དགུ་བཅུ་རྩ་ལྔ་པོ་ཐམས་ཅད་ངན་སོང་དུ་འགྲོའོ་ཞེས་གསུངས་ལ། ཉན་ཐོས་ཀྱི་ཉེ་གནས་རྣམས་ནི་ཐམས་ཅད་ཡང་དག་པའི་ལམ་དུ་
འགྲོའོ་ཞེས་གསུངས་ཏེ། གང་ཚུལ་ཁྲིམས་ཡོངསུ་སྲུང་ཞིང་སྤྱོད་ལམ་ཤིན་ཏུ་སྡོམ་པ་དབང་པོ་རྣམས་སྲུང་བའི་གང་ཟག་དེ་ནི་ཆོས་ཆེན་པོ་ལ་ཤིན་ཏུ་མོས་ཤིང་དགེ་བའི་ལམ་ལ་སྤྱོད་པ་ཡང་ལགས་ན། བཅོམ་ལྡན་
འདས་ཀྱིས་ཅིའི་སླད་དུ་མདོ་སྡེ་དགུ་པོ་ལས་ཕ་རོལ་པོ་གཞན་ལ་སྨོད་ན་རྣམ་པར་སྨད་ཅིང་སྤྱོ་བར་བྱའོ་ཞེས་ཚིགས་སུ་བཅད་པའི་དོན་འདི་ཅི་ལས་དགོངས་ཏེ་གསུངས། བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། 

47-1-176a

རིགས་ཀྱི་བུ་ངས་ཚིགས་སུ་བཅད་པ་གསུངས་པ་འདི་ཡང་སེམས་ཅན་ཐམས་ཅད་ཀྱི་ཕྱིར་ནི་མ་ཡིན་གྱི། དེའི་ཚེ་ན་རྒྱལ་པོ་མ་སྐྱེས་དགྲ་འབའ་ཞིག་གི་ཕྱིར་གསུངས་ཏེ། སངས་རྒྱས་བཅོམ་ལྡན་འདས་ནི་རྒྱུ་དང་
རྐྱེན་མེད་པར་བཟློག་སྟེ་གསུངས་པ་ཆོས་མེད་དོ། །རྒྱུ་དང་རྐྱེན་ཡོད་པས་ན་དེ་སྐད་ཅེས་གསུངས་པ་ཡིན་ནོ། །རིགས་ཀྱི་བུ་རྒྱལ་པོ་མ་སྐྱེས་དགྲས་ཕ་བསད་ནས་ང་གང་ན་བ་དེར་འོངས་ནས་གདུལ་བར་འདོད་པའི་ཕྱིར་ང་
ལ་འདི་སྐད་ཅེས་དྲིས་སོ། །ཇི་ལྟར་ན་སངས་རྒྱས་བཅོམ་ལྡན་འདས་ཐམས་ཅད་མཁྱེན་པ་ཞེས་བགྱི་བ་དེ་ནི་ཐམས་ཅད་མཁྱེན་པ་མ་ལགས་སོ། །ཅི་སྟེ་ཐམས་ཅད་མཁྱེན་པ་ལགས་ན། ལྷ་སྦྱིན་ལྟ་བུ་སྔོན་
སྐྱེ་བ་གྲངས་མེད་པའི་བར་དུ་ངན་སེམས་ཀྱིས་དེ་བཞིན་གཤེགས་པ་ལ་གནོད་པ་བགྱིད་པ་ལགས་ན། ཅིའི་སླད་དུ་དེ་བཞིན་གཤེགས་པས་རབ་ཏུ་བྱུང་བར་གནང་ཞེས་དྲིས་ནས་རིགས་ཀྱི་བུ་དེའི་རྒྱུ་དེའི་རྐྱེན་ཀྱིས་རྒྱལ་པོ་དེ་
འི་ཕྱིར་ཚིགས་སུ་བཅད་པ་འདི་སྐད་ཅེས་སྨྲས་སོ། །ཕ་རོལ་གཞན་གྱིས་སྨྲས་པ་ལ། །རྗེས་སུ་གཞོལ་གྱི་ཕྱིར་མི་བཟློག །གཞན་གྱིས་བྱས་དང་མ་བྱས་པ། །དེ་ལ་བརྟག་པར་མི་བྱའོ། །བདག་གི་ལུས་ལ་ཤིན་ཏུ་
བརྟག །དགེ་དང་མི་དགེ་གང་སྤྱོད་པ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཕ་བསད་པའི་མཚམས་མེད་པའི་ཁ་ན་མ་ཐོ་བའི་ལས་བྱས་ཀྱིས། ཤིན་ཏུ་འགྱོད་པའི་མཐོལ་ལ་ཡོངས་སུ་དག་
པར་འགྱུར་བར་མི་བྱ་བར་ཅིའི་ཕྱིར་གཞན་གྱི་ཉེས་པའི་སྐྱོན་འཚོལ་བ་ལ་ཞུགས་ཤེས། རིགས་ཀྱི་བུ་ངས་རྒྱལ་པོ་དེའི་ཕྱིར་དེ་བས་ན་ཚིགས་སུ་བཅད་པ་དེ་དག་གསུངས་པ་ཡིན་ནོ། །གཞན་ཡང་རིགས་ཀྱི་བུ་གང་ཚུལ་ཁྲིམས་
ཡོངས་སུ་སྲུང་ཞིང་སྤྱོད་ལམ་དང་ལྡན་པ་དག་གཞན་གྱི་སྐྱོན་ཚོལ་བ་ལ་ཞུགས་པ་རྣམས་ཀྱི་ཕྱིར་ཡང་ཚིགས་སུ་བཅད་པ་དེ་སྐད་ཅེས་གསུངས་པ་ཡིན་ནོ། །གང་ཟག་སུ་ཞིག་ཕ་རོལ་པོས་བསྟན་ཅིང་འཆོས་པའི་རྗེས་སུ་

47-1-176b

མི་དགེ་བ་ཡོངས་སུ་སྤོང་སྟེ། གཞན་དག་ཀྱང་མི་དགེ་བའི་ལས་ཟློག་པར་བྱེད་ན་དེ་ནི་ངའི་ཉེ་གནས་ཡང་དག་པའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་ལ་ཚིགས་སུ་བཅད་དེ་བཀའ་སྩལ་པ། མཚོན་ཆས་
མི་འཇིགས་གང་ཡང་མེད། །འཚོ་བའི་སྲོག་ལ་ཐམས་ཅད་ཆགས། །བདག་གི་ལུས་ལ་དཔེ་བླངས་ཏེ། །གཞན་ལ་མ་འཚོག་མ་གསོད་ཅིག །དེ་ནས་འཇམ་དཔལ་གཞོན་ནུར་གྱུར་པས་ཡང་བཅོམ་ལྡན་འདས་ཀྱི་
སྤྱན་སྔར་ཚིགས་སུ་བཅད་དེ་གསོལ་བ། ཐམས་ཅད་མཚོན་ཆས་འཇིགས་པ་མིན། །སྲོག་ལ་ཐམས་ཅད་ཆགས་མ་ལགས། །བདག་གི་ལུས་ལ་དཔེ་བླངས་ཏེ། །དགེ་བར་སྤྱོད་ལ་བརྩོན་པར་བྱ། །དེ་བཞིན་
གཤེགས་པས་ཆོས་ཀྱི་ཚིག་གི་དོན་གསུངས་པ་འདི་ཡང་བས་པའི་མཐར་ཕྱིན་པ་མ་ལགས་སོ། །དེ་ཅིའི་སླད་དུ་ཞེ་ན། དགྲ་བཅོམ་པ་དང་། འཁོར་ལོས་སྒྱུར་བའི་རྒྱལ་པོའི་བུད་མེད་རིན་པོ་ཆེ་དང་། བལ་གླང་དང་། རྟ་དང་། 
བློན་པོ་རིན་པོ་ཆེ་ནི་གནམ་གྱི་ལྷ་འམ། ལྷ་མ་ཡིན་གྱི་མཚོན་རྣོན་པོ་ཐོགས་ཀྱང་གསོད་ནུས་པའི་གནས་མེད་དོ། །སྐྱེས་བུ་དཔའ་བོ་དང་། བུད་མེད་ཆུ་གང་ཅན་དང་། རྟའི་རྒྱལ་པོ་དང་། གཅན་ཟན་གྱི་རྒྱལ་པོ་དང་། 
དགེ་སློང་ཚུལ་ཁྲིམས་སྲུང་བ་ནི་གཉེན་པོ་སྔོན་དུ་སྣང་ཡང་མི་འཇིགས་མི་སྐྲག་པས་དེ་བས་ན་དེ་བཞིན་གཤེགས་པས་ཚིགས་སུ་བཅད་དེ་གསུངས་པ་འདི་ཡང་ལྷག་མ་དང་བཅས་སོ། །བདག་གི་ལུས་ལ་དཔེ་བླང་ངོ་། །ཞེས་བགྱི་
བ་ཡང་ལྷག་མ་དང་བཅས་པ་ལགས་སོ། །དེ་ཅིའི་སླད་དུ་ཞེ་ན། ཅི་སྟེ་དགྲ་བཅོམ་པ་དག་བདག་ལ་གཞན་གྱི་དཔེ་ལེན་ན་བདག་ཏུ་འདུ་ཤེས་པ་དང་། སྲོག་ཏུ་འདུ་ཤེས་པ་ཡོད་པར་འགྱུར་རོ། །བདག་ཏུ་འདུ་ཤེས་པ་དང་སྲོག་ཏུ་འདུ་ཤེས་
པ་ཡོད་ན་སྲུང་བར་འགྱུར་ཏེ། བྱིས་པ་མ་རབས་དག་གིས་ཀྱང་དགྲ་བཅོམ་པ་མཐོང་བར་འགྱུར་ཏེ། ཐམས་ཅད་རྣལ་འབྱོར་ཅན་དུ་འགྱུར་རོ། །ཅི་སྟེ་དེ་ལྟ་བུ་ལགས་ན་ངན་པར་ལྟ་བ་ལགས་སོ། །གལ་ཏེ་ངན་པར་ལྟ་བ་ལགས་ན་ཚེ་

47-1-177a

འཕོས་མ་ཐག་ཏུ་སེམས་ཅན་དམྱལ་བར་སྐྱེ་བར་འགྱུར་རོ། །གཞན་ཡང་དགྲ་བཅོམ་པ་དག་ནི་སེམས་ཅན་ཐམས་ཅད་ལ་གསོད་པའི་སེམས་གལ་ཏེ་ཡང་སྐྱེ་བའི་གནས་མ་མཆིས་སོ། །སེམས་ཅན་ཚད་
མེད་པ་དག་ཀྱང་དགྲ་བཅོམ་པ་ལ་གསོད་ནུས་པ་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བདག་ཏུ་འདུ་ཤེས་ཤེས་བྱ་བ་ནི་སེམས་ཅན་ལ་སྙིང་རྗེ་ཆེན་པོའི་སེམས་སྐྱེས་ཏེ་གསོད་པའི་འདུ་
ཤེས་མེད་པ་ནི་དགྲ་བཅོམ་པ་དག་གིས་སེམས་མཉམ་པ་ཉིད་དོ། །བཅོམ་ལྡན་འདས་ལ་རྒྱུ་དང་རྐྱེན་མེད་པར་འགལ་བར་གསུངས་པ་ཡོད་དོ་སྙམ་མ་སེམས་ཤིག །སྔོན་རྒྱལ་པོའི་ཁབ་འདི་ན་རྔོན་པ་ཞིག་རི་དགས་མང་དུ་
བསད་ནས་ང་ལ་ཤ་ཟོ་ཤིག་ཅེས་སྤྱན་དྲངས་སོ། །ངས་དེའི་ཚེ་གསོལ་བ་གནང་མོད་ཀྱི། སེམས་ཅན་ཐམས་ཅད་ལ་སྒྲ་གཅན་འཛིན་ལྟར་ཤིན་ཏུ་བྱམས་པའི་སེམས་ཉེ་བར་གཞག་ནས་ཚིགས་སུ་བཅད་པ་འདི་སྐད་ཅེས་
གསུངས་སོ། །ཁྱོད་ནི་ཤིན་ཏུ་ཚེ་རིང་ཞིང་། །འཇིག་རྟེན་འདིར་ཀྱང་རིང་དུ་འདུག །མི་གསོད་པ་ཡི་ཆོས་འཛིན་ཅིང་། །སངས་རྒྱས་ཚེ་དང་འདྲ་བར་ཤོག །ཚིགས་སུ་བཅད་པ་འདི་ཡང་སྨྲས། །མཚོན་ཆས་མི་འཇིགས་གང་ཡང་
མེད། །འཚོ་བའི་སྲོག་ལ་ཐམས་ཅད་ཆགས། །བདག་གི་ལུས་ལ་དཔེ་བླངས་ཏེ། །འཚོག་དང་གསོད་པ་མ་བྱེད་ཅིག །དེ་ནས་ཡང་བཅོམ་ལྡན་འདས་ཀྱིས་འཇམ་དཔལ་གཞོན་ནུ་ལ་ཤིན་ཏུ་ལེགས་སོ་ཤིན་ཏུ་ལེགས་སོ་
ཞེས་བྱ་བ་བྱིན་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཕྱིར་དེ་བཞིན་གཤེགས་པ་ལ་དོན་ཤིན་ཏུ་ཟབ་མོ་འདི་ལྟ་བུ་དྲིས་པ་ལེགས་སོ་ཞེས་བྱ་བ་བྱིན་ནོ། །དེ་ནས་འཇམ་དཔལ་གྱིས་ཚིགས་སུ་བཅད་དེ་གསོལ་
པ། ཇི་ལྟར་ཤིན་ཏུ་ཕ་མ་ལ། །སྟི་སྟང་བཅས་པས་རྗེས་སུ་གཞོལ། །ཇི་ལྟར་ཉམས་སུ་བླངས་པ་དག །མཚམས་མེད་སེམས་ཅན་དམྱལ་བར་ལྟུང་། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་འཇམ་དཔལ་ལ་བཀའ་སྩལ་པ། 

47-1-177b

འདོད་ཆགས་པ་ནི་མ་ཞེས་བྱ། །མ་རིག་པ་ནི་ཕ་ཡིན་ནོ། །སྟི་སྟང་བཅས་པས་རྗེས་འཇུག་ན། །མཚམས་མེད་སེམས་ཅན་དམྱལ་བར་ལྟུང་། །དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་འཇམ་དཔལ་ལ་ཚིགས་སུ་བཅད་
དེ་བཀའ་སྩལ་པ། ཐམས་ཅད་གཞན་གྱིས་དབང་སྒྱུར་ན། །དེ་ནི་སྡུག་བསྔལ་བ་ཞེས་བྱ། །ཐམས་ཅད་བདག་གིས་དབང་སྒྱུར་ན། །དེ་ནི་དབང་དང་བདེ་བར་ལྡན། །ང་རྒྱལ་དྲེགས་པ་ཐམས་ཅད་ནི། །མཐུ་དང་ལྡན་པས་ཁྲོ་གཏུམ་ཆེ། །དགེ་
ཞིང་དེས་པ་ཐམས་ཅད་ནི། །ཀུན་ལ་བྱམས་ཏེ་སྙིང་རྗེར་ལྡན། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པས་
གསུངས་པ་འདི་ཡང་བས་པའི་མཐར་ཕྱིན་པ་མ་ལགས་སོ། །བཅོམ་ལྡན་འདས་ཐུགས་བརྩེ་བའི་སླད་དུ་དེའི་རྒྱུ་དང་རྐྱེན་བསྟན་དུ་གསོལ། དེ་ཅིའི་སླད་དུ་ཞེ་ན། དཔེར་ན་ཁྱིམ་བདག་གི་བུ་དག་སློབ་དཔོན་ལ་སློབ་པའི་ཚེ་ན་སློབ་དཔོན་གྱི་
དབང་དུ་གྱུར་པ་མ་ལགས་སམ། གལ་ཏེ་སློབ་དཔོན་གྱི་དབང་དུ་གྱུར་ན་ཡང་སློབ་པའི་དོན་མི་འགྲུབ་ལ། སློབ་དཔོན་གྱི་དབང་དུ་མ་གྱུར་ན་ཡང་མི་འགྲུབ། བདག་གི་དབང་དུ་གྱུར་ན་ཡང་སློབ་པ་ཡང་མི་འགྲུབ་སྟེ། དེ་བས་ན་དེ་བཞིན་
གཤེགས་པས་གསུངས་པ་ནི་ལྷག་མ་དང་བཅས་པ་ལགས་སོ། །བཅོམ་ལྡན་འདས་གཞན་ཡང་འདི་ལྟ་སྟེ་དཔེར་ན་རྒྱལ་བུ་ཅི་ཡང་མི་སློབ་ཅི་ཡང་མི་ཤེས་པ་དག་བདག་གི་དབང་དུ་འགྱུར་བ་ལགས་མོད་ཀྱི། གླེན་ཞིང་མི་ཤེས་པས་
རྟག་ཏུ་སྡུག་བསྔལ་ལོ། །དེ་ལྟར་ན་རྒྱལ་བུ་དེ་ནི་བདག་གི་དབང་དུ་འགྱུར་ཞེས་བགྱིར་ཡང་གྲུབ་པའི་དོན་མ་མཆིས་ལ། གཞན་གྱི་དབང་དུ་འགྱུར་ཞེས་བགྱིར་ཡང་གྲུབ་པའི་དོན་མ་མཆིས་པས། དེ་བས་ན་བཅོམ་ལྡན་འདས་ཀྱིས་གསུངས་
པའི་དོན་འདི་ནི་ལྷག་མ་དང་བཅས་པ་ལགས་པས། དེ་བས་ན་ཐམས་ཅད་གཞན་གྱི་དབང་དུ་འགྱུར་བ་ལ་ཡང་ངེས་པར་སྡུག་བསྔལ་ཞེས་བགྱིར་མི་རུང་ལ། ཐམས་ཅད་བདག་གི་དབང་དུ་འགྱུར་བ་ལ་ཡང་ངེས་པར་བདེ་བ་ཞེས་

47-1-178a

བགྱིར་མི་རུང་ངོ་། །ང་རྒྱལ་ཀྱི་དྲེགས་པ་ཐམས་ཅད་ཀྱང་ཁྲོ་གཏུམ་ཅན་ནོ་ཞེས་བགྱི་བ་ཡང་ལྷག་མ་དང་བཅས་སོ། །བཅོམ་ལྡན་འདས་དཔེར་ན་བུད་མེད་ཆུ་གང་ཅན་དག་ང་རྒྱལ་གྱི་དབང་གིས་རབ་ཏུ་བྱུང་སྟེ། སློབ་པ་ལ་
ཞུགས་ན་ཚུལ་ཁྲིམས་ཡོངས་སུ་སྲུང་ཞིང་སྤྱོད་ལམ་ཤིན་ཏུ་སྡོམ་སྟེ། དབང་པོ་མི་གཡེང་བར་ནན་ཏན་བྱེད་དོ། །དེ་བས་ན་ང་རྒྱལ་གྱི་ཀུན་ནས་ཉོན་མོངས་པ་ཐམས་ཅད་ངེས་པར་ཁྲོ་གཏུམ་པའོ་ཞེས་བགྱིར་མི་རུང་ངོ་། །དེས་ཤིང་
དགེ་བ་ཐམས་ཅད་ཀྱང་བྱམས་པ་དང་སྙིང་རྗེར་ལྡན་ནོ་ཞེས་བགྱི་བ་ཡང་ལྷག་མ་དང་བཅས་པ་ལགས་སོ། །དཔེར་ན་མི་ཞིག་ཕས་ཕམ་པ་ཞིག་བྱུང་ཡང་ཆོས་གོས་མ་སྤངས། ཕྱི་རོལ་གྱི་སྤྱོད་ལམ་ཤིན་ཏུ་སྡོམ་ཡང་ཆོས་སྲུང་བ་
དག་མཐོང་ན་མི་འདོད་དེ་སྤོངས་སོ། །དེ་ཚེ་འཕོས་ནས་ཀྱང་སེམས་ཅན་དམྱལ་བར་ལྟུང་ངོ་། །གལ་ཏེ་དགེ་བ་ཞིག་ཕས་ཕམ་པ་བྱུང་ན་ཆོས་སྲུང་བ་དེ་དག་གིས་བསྐྲོད་པར་བྱེད་དེ་ཁྱིམ་པར་འབེབས་སོ། །དེ་བས་ན་དེས་ཤིང་དགེ་བ་
ཐམས་ཅད་ལ་ངེས་པར་བྱམས་པ་དང་ལྡན་ནོ་ཞེས་བགྱིར་མི་རུང་ངོ་། །དེ་ནས་བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། རྒྱུ་དང་རྐྱེན་ཡོད་པའི་ཕྱིར་དེ་བཞིན་གཤེགས་པས་འདི་ལྟར་ལྷག་མ་དང་བཅས་པའི་
དོན་གསུངས་སོ། །གཞན་ཡང་བཅོམ་ལྡན་འདས་ནི་རྒྱུ་དང་རྐྱེན་ཡོད་པའི་ཕྱིར་འདི་སྐད་ཅེས་གསུངས་པ་ཡིན་ནོ། །རྒྱལ་པོའི་ཁབ་འདིར་བུད་མེད་ཤིན་ཏུ་བཟང་མོ་ཞེས་བྱ་བ་ཞིག་ཕ་མའི་ཁྱིམ་དུ་འགྲོ་བའི་ལམ་ཡོངས་
སུ་ང་ག་ན་བར་འོངས་ནས་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་གསོལ་ནས་འདི་སྐད་ཅེས་སྨྲས་སོ། །བུད་མེད་ཐམས་ཅད་ནི་མཐུ་མེད་པ་དབང་མེད་པ་ཡིན་ནོ། །སྐྱེས་པ་ཐམས་ཅད་ནི་དབང་ལ་ཐོགས་པ་མེད་པ་
ཡིན་ནོ་ཞེས་སྨྲས་པས་དེའི་ཚེ་ན་བུད་མེད་དེའི་བསམ་པ་ཐུགས་སུ་ཆུད་ནས་དེའི་ཕྱིར་ཚིགས་སུ་བཅད་པ་འདི་དག་སྨྲས་པ་ཡིན་ནོ། །འཇམ་དཔལ་ལེགས་སོ་ལེགས་སོ། །ཁྱོད་ཀྱིས་སེམས་ཅན་ཐམས་ཅད་ཀྱི་ཕྱིར་དེ་བཞིན་

47-1-178b

གཤེགས་པ་ལ་དེ་ལྟ་བུའི་དོན་དྲི་བ་ལེགས་སོ། །དེ་ནས་འཇམ་དཔལ་གྱིས་ཚིགས་སུ་བཅད་དེ་གསོལ་པ། སེམས་ཅན་སྐྱེ་དགུ་ཐམས་ཅད་ནི། །ཀུན་ཀྱང་ཟས་དང་སྐོམ་ལ་རྟེན། །མཐུ་དང་ལྡན་པ་ཐམས་ཅད་ན། །དེ་ཡི་སེམས་དང་
ཕྲག་དོག་མེད། །ཐམས་ཅད་ཟས་དང་སྐོམ་གྱི་རྐྱེན། །ནད་ཀྱི་སྡུག་བསྔལ་མྱོང་བར་འགྱུར། །སྤྱོད་པ་རྣམ་པར་དག་པ་ནི། །རབ་ཏུ་བདེ་བ་མྱོང་བར་འགྱུར། །དེ་བས་ན་བཅོམ་ལྡན་འདས་ཙུན་དའི་བསོད་སྙོམས་དང་མཆོད་པ་བཞེས་
པ་འདི་དེ་བཞིན་གཤེགས་པ་ལ་བསྙེངས་པ་མི་མངའ་འམ། དེ་ལ་བཅོམ་ལྡན་འདས་ཀྱིས་ཚིགས་སུ་བཅད་དེ་འཇམ་དཔལ་ལ་བཀའ་སྩལ་པ། སེམས་ཅན་སྐྱེ་དགུ་ཐམས་ཅད་ནི། །ཟས་དང་སྐོམ་ལ་ལྟོས་མ་ཡིན། །མཐུ་དང་
ལྡན་པ་ཐམས་ཅད་ཀྱང་། །ཕྲག་དོག་སེམས་ནི་མེད་མ་ཡིན། །ཐམས་ཅད་ཟས་ཀྱི་རྐྱེན་དབང་གིས། །ནད་ཀྱིས་གཟིར་བར་འགྱུར་མ་ཡིན། །སྤྱོད་པ་དག་པ་ཐམས་ཅད་ཀྱང་། །ཐམས་ཅད་བདེ་བ་མྱོང་མ་ཡིན། །འཇམ་དཔལ་ཅི་
སྟེ་ཁྱོད་ན་བར་གྱུར་ན་དེ་བཞིན་དུ་ང་ཡང་ན་བར་འགྱུར་བའི་རིགས་སོ། །དེ་ཅིའི་ཕྱིར་ཞེ་ན། དགྲ་བཅོམ་པ་རྣམས་དང་། རང་སངས་རྒྱས་རྣམས་དང་། བྱང་ཆུབ་སེམས་དཔའ་དང་། དེ་བཞིན་གཤེགས་པ་ནི་ཡང་དག་པར་ན་ཅི་ཡང་ཟ་བ་
མེད་དེ། ཕ་རོལ་འདུལ་བའི་ཕྱིར་སོ་སོའི་སྐྱེ་བོ་ཚད་མེད་པ་དག་གི་སྦྱིན་པ་བླངས་པར་བསྟན་ཏེ། དེ་ཡང་དེ་དག་གི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བ་དང་། སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་
དང་གཤིན་རྗེའི་འཇིག་རྟེན་ལས་བསྒྲལ་བའི་ཕྱིར་རོ། །དེ་ལ་གང་ཞིག་འདི་སྙམ་དུ་དེ་བཞིན་གཤེགས་པ་ཡང་ལོ་དྲུག་གི་བར་དུ་ཤིན་ཏུ་སྤྱོད་དཀའ་བ་སྤྱད་དེ། སྐུ་ཡང་ཤིན་ཏུ་ཉམ་ཆུང་བར་གྱུར་ཏོ་སྙམ་དུ་སེམས་
ན་དེ་ནི་གནས་མ་ཡིན་ནོ། །སངས་རྒྱས་བཅོམ་ལྡན་འདས་ནི་སྲིད་པ་ལས་རྣམ་པར་གྲོལ་བས་བུས་པ་མ་རབས་དང་མི་འདྲ་བ་ཡིན་ན་ཅིའི་ཕྱིར་སྐུ་ཉམ་ཆུང་ཞིང་རིང་བར་འགྱུར། སངས་རྒྱས་བཅོམ་ལྡན་འདས་ནི་ཤིན་

47-1-179a

ཏུ་བརྩོན་འགྲུས་སུ་ནན་ཏན་བྱས་པས་རྡོ་རྗེ་ལྟ་བུའི་སྐུ་འཐོབ་པར་འགྱུར་ཏེ། འཇིག་རྟེན་དང་བཅས་པའི་ལུས་སྐྱོན་ཡོད་པ་ལྟ་བུ་དང་འདྲ་བ་མ་ཡིན་ཏེ་ངའི་ཉེ་གནས་རྣམས་ཀྱང་དེ་དང་འདྲ་བར་བསམ་གྱིས་མི་ཁྱབ་པས་
ཟས་ལ་རྟེན་པ་ཡིན་ནོ། །མཐུ་བོ་ཆེ་ཐམས་ཅད་ཕྲག་དོག་མེད་དོ་ཞེས་བྱ་བ་ཡང་ལྷག་མ་དང་བཅས་སོ། །དཔེར་ན་འཇིག་རྟེན་ན་མི་ཁ་ཅིག་ཚེ་གཅིག་དུ་ཕྲག་དོག་གི་སེམས་ཀྱང་མེད་ལ་མཐུ་མེད་པ་ཡང་ཡོད་དོ། །ནད་ཐམས་ཅད་
ཟས་ལ་འགྱུར་ཞེས་བྱ་བ་ཡང་ལྷག་མ་དང་བཅས་སོ། །མི་ཁ་ཅིག་ནི་གློ་བུར་གྱི་ནད་བག་མ་བྱས་པ་ལས་འགྱུར་བ་ཡང་ཡོད་དོ། །འདི་ལྟ་སྟེ་དེ་ནི་ཚེར་མས་ཟུག་པ་དང་། མཚོན་ཆས་ཕོག་པ་ལ་སོགས་པའོ། །སྤྱོད་པ་
རྣམ་པར་དག་པ་ཐམས་ཅད་བདེ་བ་མྱོང་ངོ་ཞེས་བྱ་བ་ཡང་ལྷག་མ་དང་བཅས་སོ། །འཇིག་རྟེན་ན་མུ་སྟེགས་ཅན་ཚངས་པར་ཡོངས་སུ་དག་པར་སྤྱོད་མོད་ཀྱི་སྡུག་བསྔལ་མང་དུ་མྱོང་བ་ཡང་ཡོད་དོ། །དེ་བས་ན་དེ་བཞིན་གཤེགས་པས་
གསུངས་པ་ཐམས་ཅད་ཀྱང་ལྷག་མ་དང་བཅས་ཏེ། དེ་ནི་དེ་བཞིན་གཤེགས་པས་རྒྱུ་དང་རྐྱེན་མེད་བཞིན་དུ་ཚིགས་སུ་བཅད་པ་འདི་སྨྲས་པ་མ་ཡིན་གྱི། རྒྱུ་ཡོད་རྐྱེན་ཡོད་པར་གསུངས་སོ། །སྔོན་ཡུལ་ཧུ་ད་ཡ་ན་འདིར་བྲམ་
ཟེར་སྐྱེས་ཡོན་ཏན་ཞེས་བྱ་བ་ང་གང་ན་བ་དེར་འོངས་ནས་དུས་བརྒྱད་ཀྱི་ཁྲིམས་བཞི་པོ་བསྲུང་བར་འདོད་པས་ངས་དེའི་ཚེ་དེ་ལ་ཚིགས་སུ་བཅད་པ་དེ་དག་གསུངས་པ་ཡིན་ནོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དག་ནི་ལྷག་མ་མ་མཆིས་པའི་དོན་ཞེས་བགྱི་བ་ལགས། གང་དག་ནི་དོན་ཐམས་ཅད་ཅེས་བགྱི་བ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཐམས་
ཅད་ཅེས་བྱ་བ་ནི་བྱང་ཆུབ་ཀྱི་ཕྱོགས་དང་། དགེ་བའི་ཆོས་ལ་མོས་པ་མ་གཏོགས་པ་ནི་ཐམས་ཅད་ཀྱང་ཡིན་ལ། ལྷག་མ་མེད་པ་ཞེས་ཀྱང་བྱའོ། །ཆོས་གཞན་ཐམས་ཅད་ནི་ལྷག་མ་དང་བཅས་པ་ཞེས་ཀྱང་བྱ་ལ། ལྷག་མ་མེད་པ་ཞེས་

47-1-179b

ཀྱང་བྱ་སྟེ། ཆོས་ལ་མོས་པའི་རིགས་ཀྱི་བུ་དག་ལྷག་མ་དང་བཅས་པ་དང་། ལྷག་མ་མེད་པའི་དོན་ཤེས་པར་འདོད་པའི་ཕྱིར་རོ། །དེ་ནས་བྱང་ཆུབ་སེམས་དཔའ་འོད་སྲུང་ཤིན་ཏུ་དགའ་ཞིང་མགུ་རངས་པར་གྱུར་ནས་ཡང་བཅོམ་
ལྡན་འདས་ལ་འདི་སྐད་ཅེས་གསོལ་ཏོ། །ངོ་མཚར་ཆེའོ། །བཅོམ་ལྡན་འདས་སེམས་ཅན་ཐམས་ཅད་ལ་སྲས་སྒྲ་གཅན་འཛིན་ལྟར་མཉམ་པར་གཟིགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་
སྲུང་ལ་ལེགས་སོ་ལེགས་སོ། །ཁྱོད་ཀྱིས་དོན་ཤིན་ཏུ་ཟབ་མོ་རྟོགས་པ་ལེགས་སོ་ལེགས་སོ་ཞེས་བྱ་བ་བྱིན་ནོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་ཡོན་ཏན་དང་བསོད་ནམས་ཇི་སྙེད་ཅིག་ཐོབ་པ་བསྟན་དུ་གསོལ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་གང་ཞིག་གིས་མདོ་སྡེ་འདིའི་མིང་
ཐོས་པ་ཙམ་གྱི་བསོད་ནམས་ཀྱི་ཕུང་པོ་ཐོབ་པ་ནི་སངས་རྒྱས་བཅོམ་ལྡན་འདས་མ་གཏོགས་པར་ཉན་ཐོས་དང་རང་སངས་རྒྱས་ཀྱིས་ཀྱང་བརྗོད་དུ་ནུས་པ་མ་ཡིན་ནོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་སྤྱོད་ཡུལ་ཡིན་ཏེ། བསམ་
གྱིས་མི་ཁྱབ་པའི་ཕྱིར་རོ། །དེ་ལ་གང་ཞིག་འཆང་ངམ། འཛིན་ཏམ། ཀློག་གམ། འདོན་ཏམ། ཁོང་དུ་ཆུད་པར་བྱེད་དམ། གླེགས་བམ་ལ་འདྲི་འམ། འདྲིར་བཅུག་པ་ལྟ་སྨོས་ཀྱང་ཅི་དགོས་ཏེ་དེའི་ཚེ་འཇིག་རྟེན་དུ་བཅས་པ་ལྷ་དང་
མི་དང་ལྷ་མ་ཡིན་ལ་སྩོགས་པ་ཐམས་ཅད་ཀྱིས། སངས་རྒྱས་ཀྱི་སྤྱན་སྔར་སྐད་འཐུན་པར་ཚིགས་སུ་བཅད་པ་འདི་སྐད་ཅེས་གསོལ་ཏོ། །སངས་རྒྱས་རྣམས་ནི་བསམ་མི་ཁྱབ། །ཆོས་དང་དགེ་འདུན་དེ་བཞིན་ཏེ། །ད་བས་བདག་ཅག་
གསོལ་བ་འདེབས། །ད་རུང་ཅུང་ཟད་བཞུགས་པར་གསོལ། །བཙུན་པ་འོད་སྲུང་ཆེན་པོ་དང་། །གཞན་ཡང་དགའ་བོ་ལ་སོགས་པ། །འཁོར་གྱི་དཀྱིལ་འཁོར་གཉིས་པོ་ཡང་། །མ་མཆིས་རེ་ཞིག་གཞེས་སུ་གསོལ། །དབུས་གྱུར་

47-1-180a

འཆང་གི་ཡུལ་བདག་པོ། །རྒྱལ་པོ་ཆེན་པོ་མ་སྐྱེས་དགྲ། །སངས་རྒྱས་ལ་ནི་རབ་མོས་པ། །དེ་ཡང་ད་དུང་འདིར་མ་མཆིས། །དེ་བཞིན་གཤེགས་པ་ཐུགས་བརྩེའི་ཕྱིར། །ད་དུང་ཅུང་ཟད་གཞེས་སུ་གསོལ། །འཁོར་གྱི་
དཀྱིལ་འཁོར་མང་པོ་འདིར། །བདག་གི་ཐེ་ཙོམ་གཅད་དུ་གསོལ། །དེ་ནས་དེ་བཞིན་གཤེགས་པས་འཁོར་མང་པོ་དག་ལ་ཚིགས་སུ་བཅད་དེ་བཀའ་སྩལ་པ། ང་ཡི་ཆོས་ཀྱི་སྲས་ཐུ་བོ། །འོད་སྲུང་ཆེན་པོ་ཞེས་བྱ་སྟེ། །
དགའ་བོ་བརྩོན་འགྲུས་རྩོམ་པའི་མཆོག །ཀུན་གྱི་ཐེ་ཙོམ་གཅོད་པར་འགྱུར། །ཁྱོད་ཀྱིས་ཤིན་ཏུ་ལེགས་པར་ཉོན། །དགའ་བོ་མང་དུ་ཐོས་པ་ལས། །ཤིན་ཏུ་རྟོགས་པར་འགྱུར་བ་ནི། །རྟག་དང་མི་རྟག་དོན་རྣམས་ཏེ། །
དེ་བས་དེ་ཡི་ཕྱིར་ན་ཁྱེད། །མི་དགའ་མྱ་ངན་མ་བྱེད་ཅིག །དེའི་ཚེ་འཁོར་གྱི་དཀྱིལ་འཁོར་མང་པོ་དེ་དག་མཆོད་པའི་ཡོ་བྱད་རྣམ་པ་སྣ་ཚོགས་ཀྱིས་བཅོམ་ལྡན་འདས་ལ་མངོན་པར་མཆོད་ནས། བླ་ན་མེད་པ་ཡང་དག་པར་རྫོགས་
རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བྱང་ཆུབ་སེམས་དཔའ་ཚད་མེད་མཐའ་ཡས་པ་ཀླུང་གང་གཱའི་བྱེ་མ་སྙེད་ནི་ས་དང་པོ་ལ་གནས་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་འཇམ་དཔལ་གཞོན་ནུ་དང་། བྱང་
ཆུབ་སེམས་དཔའ་འོད་སྲུང་དང་། ཙུན་ད་ལུང་བསྟན་ནས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་བདག་གི་སེམས་ལ་ཤིན་ཏུ་ནན་ཏན་བྱོས་ལ། བག་ཡོད་པར་གྱིས་ཤིག །ང་ནི་ད་ལྟར་རྒྱབ་ན་བས་ཐམས་ཅད་དུ་ན་བར་གྱུར་
གྱིས། ང་ནི་ཇི་ལྟར་བུས་པ་ཆུང་ངུ་ན་བ་ལྟར་ཉལ་ལོ་སྙམ་དགོངས་སོ། །འཇམ་དཔལ་ལ་སོགས་པ་ཁྱེད་རྣམས་ཀྱིས་འཁོར་བཞི་པོ་ལ་ཐེག་པ་ཆེན་པོའི་ཆོས་རྒྱས་པར་སྟོན་ཅིག །ད་ཆོས་འདི་དག་ཀྱང་ཁྱེད་ལ་ཡོངས་སུ་
གདམས་སོ། །དེ་བཞིན་དུ་འོད་སྲུང་དང་། དགའ་བོ་ཁྱེད་ལ་ཡང་ཡང་དག་པའི་ཆོས་འདི་དག་གདམས་སོ། །དེའི་ཚེ་དེ་བཞིན་གཤེགས་པས་དེ་སྐད་ཅེས་གསུངས་ནས། སོ་སོའི་སྐྱེ་བོ་དག་གདུལ་བའི་ཕྱིར་ནད་པ་དག་གློ་གཡས་པ་ཕབ་

47-1-180b

སྟེ་གཟིམས་སོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ནི་ནད་ཀྱིས་སྡུག་བསྔལ་བའི་སྐྱོན་ཐམས་ཅད་དང་བྲལ་བ་ལགས་ཏེ། 
བསྙེངས་པ་མི་མངའ་ན། བཅོམ་ལྡན་འདས་སེམས་ཅན་ཐམས་ཅད་ནི་གདུག་པའི་ཟུག་རྔུ་རྣམ་པ་བཞིས་ནད་ཀྱི་རྒྱུར་འགྱུར་བ་ནི་འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་དང་། ང་རྒྱལ་ལོ། །གལ་ཏེ་ནད་ཀྱི་རྒྱུ་མཆིས་ན། 
ནད་མང་པོ་སྐྱེ་བར་འགྱུར་བ་ནི་འདི་ལྟ་སྟེ། འདོད་པས་ཚ་བ་དང་གློ་ན་བ་དང་དབུགས་རྒོད་པ་དང་། སྐྱུག་བྲོ་བ་དང་། ལུས་ཀུན་སྦྲིད་པ་དང་། སྙིང་འཁྲུག་ཅིང་མི་དྲན་པ་དང་། ཚད་པར་འཁྲུག་པ་དང་། ཟ་གུ་དང་། མིག་དང་རྣ་བ་ཚ་ཞིང་ན་བ་དང་། 
རྒྱབ་འཛིངས་པ་དང་། ལྟོ་དབོ་བ་དང་། སྨྱོ་བ་དང་རིད་ཅིང་སྐམ་པ་དང་། ཡི་དགས་ཀྱིས་བརླམས་པ་ལ་སོགས་པ་སྟེ། ལུས་དང་སེམས་ཀྱི་ནད་རྣམ་པ་སྣ་ཚོགས་ནི་བཅོམ་ལྡན་འདས་ལ་མི་མངའ་ན་དེང་ཅིའི་སླད་དུ་དེ་བཞིན་གཤེགས་པ་སྐུ་ཚེ་ལ་གཟིགས་
ཏེ། ང་རྒྱབ་ན་བར་འགྱུར་གྱིས་འཇམ་དཔལ་ཁྱོད་འཁོར་མང་པོ་ལ་ཆོས་སྟོན་ཅིག་ཅེས་བཀའ་སྩལ། རྒྱུ་དང་རྐྱེན་རྣམ་པ་གཉིས་ཀྱི་ནད་ཀྱིས་སྡུག་བསྔལ་བར་མི་འགྱུར་བ་ནི་འདི་ལྟ་སྟེ། སེམས་ཅན་ཐམས་ཅད་ལ་བྱམས་ཤིང་སྙིང་བརྩེ་བ་
དང་། ནད་པ་ལ་ན་བའི་རྐྱེན་སྨན་སྦྱིན་ཞིང་དབུལ་བ་སྟེ། དེ་བཞིན་གཤེགས་པ་ནི་སྔོན་བསྐལ་པ་ཚད་མ་མཆིས་པའི་བར་དུ་བྱང་ཆུབ་ཀྱི་ལམ་ལ་ཤིན་ཏུ་ནན་ཏན་མཛད་དེ། རྟག་ཏུ་གསུང་སྙན་པས་སེམས་ཅན་ལ་བདེ་བའི་
དོན་མཛད་ཅིང་སྡུག་བསྔལ་བར་མི་འགྱུར་བ་དང་། ནད་པ་ལ་སྨན་རྣམ་པ་སྣ་ཚོགས་ཡོངས་སུ་གཏོང་བ་ལགས་ན་དེ་ཅིའི་རྐྱེན་གྱིས་དེང་འདི་ལྟར་བསྙུང་ངོ་ཞེས་བཀའ་སྩལ། བཅོམ་ལྡན་འདས་འཇིག་རྟེན་ན་ནད་པ་དག་ནི་བར་
བར་འདུག་བར་བར་ཉལ། བར་འགའ་ནི་མི་བདེ་བས་བཟའ་བ་དང་འཐུང་བ་ཡང་སློང་། །བར་འགའ་ནི་འཁོར་རྣམས་ལ་སོ་ཚིས་དང་ལས་ཀྱང་འདི་ལྟར་བྱའོ་ཞེས་སྟོན་ན་དེ་བཞིན་གཤེགས་པ་ཅིའི་སླད་དུ་ཅང་མི་གསུང་བར་

47-1-181a

གཟིམས་ཏེ་ཉན་ཐོས་ཀྱི་ཉེ་གནས་རྣམས་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་དང་། རྣམ་པར་གྲོལ་བ་དང་། སྙོམས་པར་འཇུག་པ་དང་། ཡང་དག་པར་སྤོང་བ་ལ་བརྩོན་པ་དག་ཅིའི་སླད་དུ་མི་
སྟོན། ཅིའི་རྐྱེན་གྱིས་ཐེག་པ་ཆེན་པོའི་མདོ་སྡེ་ཤིན་ཏུ་ཟབ་མོ་འདི་དག་མི་གསུང་ཞིང་ཅིའི་སླད་དུ་དེ་བཞིན་གཤེགས་པས་ཚད་མེད་པའི་ཐབས་ཀྱིས་འོད་སྲུང་ཆེན་པོ་མིའི་ནང་ན་གླང་པོའི་རྒྱལ་པོ་དང་འདྲ་བ་དང་། སྐྱེས་
བུ་ཆེན་པོ་རྣམས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་མི་སྟོན། ཅིའི་སླད་དུ་དགེ་སློང་མ་རུངས་པ་མ་བརྟགས་པའི་དངོས་པོ་ཐམས་ཅད་འཆང་བ་ལ་ཆད་པས་གཅོད་པ་མི་སྟོན། བཅོམ་ལྡན་
འདས་ཡང་དག་པར་སྙུན་མི་མངའ་བཞིན་དུ་ཅིའི་སླད་དུ་ཅང་མི་གསུང་བར་གློ་གཡས་པ་ཕབ་ནས་གཟིམས་པར་གྱུར། བྱང་ཆུབ་སེམས་དཔའ་དག་ནད་པ་ལ་ནད་ཀྱི་རྐྱེན་སྨན་བྱིན་པ་ན། དགེ་བའི་རྩ་བ་ཐམས་ཅད་སེམས་ཅན་ལ་
བདར་ནས་ཐུན་མོང་དུ་ཐམས་ཅད་མཁྱེན་པའི་ཡེ་ཤེས་སུ་བསྔོས་ཏེ། སེམས་ཅན་ཐམས་ཅད་ཀྱི་ཉོན་མོངས་པའི་སྒྲིབ་པ་དང་། ལས་ཀྱི་སྒྲིབ་པ་དང་། རྣམ་པར་སྨིན་པའི་སྒྲིབ་པ་ཡོངས་སུ་སེལ་ཏོ། །ཉོན་མོངས་པའི་སྒྲིབ་པ་ཞེས་
བགྱི་བ་ནི་འདོད་ཆགས་དང་། ཞེ་སྡང་དང་། གཏི་མུག་དང་། ཁོང་ཁྲོ་བའི་ཀུན་ནས་དཀྲིས་པའི་ཉོན་མོངས་པ་དང་། ཕྲག་དོག་དང་། སེར་སྣ་དང་། གཡོ་དང་། སྒྱུ་དང་། མི་འཛེམ་པ་དང་། ཁྲེལ་མེད་པ་དང་། ང་རྒྱལ་དང་། རབ་ཀྱི་ང་རྒྱལ་དང་། 
ང་རྒྱལ་ལས་ཀྱང་ང་རྒྱལ་དང་། ངའོ་སྙམ་པའི་ང་རྒྱལ་དང་། ལོག་པའི་ང་རྒྱལ་དང་། མངོན་པའི་ང་རྒྱལ་དང་། ཆུང་བའི་ང་རྒྱལ་དང་། བག་མེད་པ་དང་། དྲེགས་པ་དང་། ཁོན་ཏུ་འཛིན་པ་དང་། རྩོད་པ་དང་ལོག་པར་འཚོ་བ་དང་། གཡོ་སྒྱུས་
ཚུལ་འཆོས་པ་དང་། རྙེད་པས་རྙེད་པ་ཚོལ་བ་དང་། ཆོས་མ་ཡིན་པས་ཚོལ་བ་དང་། མང་དུ་ཚོལ་བ་དང་། སྟི་སྟང་མེད་པ་དང་། བསྟན་པ་བཞིན་དུ་མི་བྱེད་པ་དང་། མི་དགེ་བའི་བཤེས་གཉེན་ལ་བསྟེན་པ་དང་། རྙེད་པ་ལ་ཆགས་པས་མི་སྐྱོ་

47-1-181b

བ་དང་། འཆིང་བས་རྣམ་པར་བཅིངས་པས་དགྲོལ་བར་དཀའ་བ་དང་། འདོད་པ་ངན་པ་ལ་འདོད་པ་དང་། ཆགས་པ་ངན་པ་ལ་ཆགས་པ་དང་། འཇིག་ཚོགས་སུ་ལྟ་བ་དང་། ཡོད་པར་ལྟ་བ་དང་། མེད་པར་ལྟ་བ་དང་། སྨྱང་ཞིང་འཕྲེས་པ་དང་། 
དགའ་བ་དང་། གཉིད་དང་། གླལ་བ་དང་། མི་དགའ་བ་དང་། བཟའ་བ་དང་། བཏུང་བ་ལ་ཆགས་པ་དང་། སེམས་རྨུགས་པ་དང་། སེམས་གཞན་ལ་དམིགས་པ་དང་། མི་དགེ་བ་ཡིད་ལ་བྱེད་པ་དང་། ལུས་དང་ངག་ངན་པར་སྤྱོད་པ་དང་། མང་དུ་སྨྲ་
བ་ལ་དགའ་བ་དང་། དབང་པོ་རྣམས་རྟུལ་བ་དང་། སྨྲའོ་ཅོག་ཏུ་བརྫུན་ཟེར་བ་དང་། འདོད་པའི་རྟོག་པ་དང་། ཞེ་སྡང་གི་རྟོག་པ་དང་། གནོད་པའི་རྟོག་པས་ཀུན་ཏུ་ཁེབས་པ་ཉོན་མོངས་པའི་སྒྲིབ་པ་ཞེས་བྱ་བ་དང་། མཚམས་མེད་པ་ལྔའི་ཁ་
ན་མ་ཐོ་བའི་ལས་ཀྱི་སྒྲིབ་པ་དང་། སེམས་ཅན་དམྱལ་བ་དང་། བྱོལ་སོང་དང་། ཡི་དགས་སུ་སྐྱེ་བ་དང་། དམ་པའི་ཆོས་ལ་སྐུར་པ་དང་། ལོག་སྲེད་ཅན་དུ་སྐྱེས་པ་ནི་རྣམ་པར་སྨིན་པའི་སྒྲིབ་པ་ཞེས་བགྱི་སྟེ། སྒྲིབ་པ་རྣམ་པ་
གསུམ་པོ་འདི་ནི་ནད་ཆེན་པོ་ཞེས་བགྱི་ན་བྱང་ཆུབ་སེམས་དཔའ་རྣམས་ནི་བསྐལ་པ་ཚད་མེད་པའི་བར་དུ་བྱང་ཆུབ་ཀྱི་སྤྱད་པ་སྤྱོད་པ་ན་ན་བ་ཐམས་ཅད་ལ་སྨན་གསོས་ཀྱི་སྦྱིན་པ་བྱིན་ཏེ་འདི་སྐད་དུ་སྨོན་ལམ་བཏབ་བོ། །
སེམས་ཅན་ཐམས་ཅད་ནད་དང་ཡོངས་སུ་བྲལ་ཏེ། དེ་བཞིན་གཤེགས་པའི་རྡོ་རྗེའི་སྐུ་ཐོབ་པར་གྱུར་ཅིག །སེམས་ཅན་ཚད་མེད་པ་ཐམས་ཅད་ལ་སྨན་དམ་པའི་རྒྱལ་པོར་གྱུར་ཏེ་ནད་མ་རུངས་པ་ཐམས་ཅད་སེལ་བར་གྱུར་ཅིག །
སེམས་ཅན་ཐམས་ཅད་སྨན་ཨ་ག་ཐོབ་ཅིང་། སྨན་དེའི་མཐུས་གདུག་པ་ཐམས་ཅད་སེལ་བར་གྱུར་ཅིག །གཞན་ཡང་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་ཅིང་། མྱུར་དུ་བླ་ན་
མེད་པའི་སངས་རྒྱས་ཀྱི་སྨན་རྙེད་དེ་ཉོན་མོངས་པའི་ཟུག་རྔུ་ཐམས་ཅད་བསལ་བར་གྱུར་ཅིག །གཞན་ཡང་སེམས་ཅན་ཐམས་ཅད་ཤིན་ཏུ་བརྩོན་འགྲུས་བརྩོམ་པས་དེ་བཞིན་གཤེགས་པའི་རྡོ་རྗེ་ལྟ་བུའི་ཐུགས་དང་ལྡན་ཏེ་སྨན་དམ་

47-1-182a

པར་གྱུར་ནས་ནད་ཐམས་ཅད་གསོ་ཞིང་རྩོད་པའི་འདུ་ཤེས་མེད་པར་གྱུར་ཅིག །གཞན་ཡང་སེམས་ཅན་དག་སྨན་གྱི་སྡོང་པོ་ཆེན་པོར་གྱུར་ཏེ། ནད་མ་རུངས་པ་ཐམས་ཅད་བསལ་བར་གྱུར་ཅིག །གཞན་ཡང་སེམས་
ཅན་ཐམས་ཅད་གདུག་པའི་ཟུག་རྔུ་ཕྱུང་ནས་དེ་བཞིན་གཤེགས་པའི་བླ་ན་མེད་པའི་འོད་ཟེར་ཐོབ་པར་གྱུར་ཅིག །གཞན་ཡང་སེམས་ཅན་ཐམས་ཅད་དེ་བཞིན་གཤེགས་པའི་ཡེ་ཤེས་ཀྱི་སྨན་ཆེན་པོའི་ཆོས་ཀྱི་གཏེར་ཤིན་ཏུ་ཟབ་མོ་
ལ་འཇུག་པར་གྱུར་ཅིག་ཅེས་སྨོན་ལམ་འདེབས་སོ། །བཅོམ་ལྡན་འདས་བྱང་ཆུབ་སེམས་དཔའ་ཡང་དེ་ལྟར་བསྐལ་པ་ཚད་མེད་དཔག་ཏུ་མེད། བགྲང་དུ་མེད་པ་བརྒྱ་སྟོང་གི་བར་དུ་དེ་སྐད་ཅེས་སྨོན་ལམ་བཏབ་སྟེ། སེམས་ཅན་ཐམས་
ཅད་ནད་མ་མཆིས་པར་བགྱིད་ན་ཅིའི་རྐྱེན་གྱིས་དེ་བཞིན་གཤེགས་པ་ང་ནའོ་ཞེས་བཀའ་སྩལ། བཅོམ་ལྡན་འདས་གཞན་ཡང་འཇིག་རྟེན་ན་ནད་པ་ཁ་ཅིག་ནི་འདུག་པ་དང་། ལྡང་བ་དང་། འགྲོ་བ་དང་། འགོག་ཀྱང་མི་ནུས། 
ཁ་ཟས་དང་། སྐོམ་ཡང་མི་ཆུད་དེ། བུ་ཚ་ལ་སྟོན་ཅིང་འཆོས་ཀྱང་མི་ནུས། འཚོ་ནམ་གྱི་ལས་བྱ་བའི་འདོམས་ཀྱང་མི་ནུས་ཏེ། དེའི་ཚེ་ན་དེའི་ཕ་མ་དང་། ཆུང་མ་དང་། བུ་དང་འཁོར་དང་། གཉེན་བཤེས་ལ་སོགས་པ་ཐམས་
ཅད་ཀྱིས་དེ་ནི་ངེས་པར་འཆི་བར་འདུ་ཤེས་སོ། །བཅོམ་ལྡན་འདས་དེ་ལྟར་དེ་བཞིན་གཤེགས་པ་དེ་ཡང་དེ་དང་འདྲ་སྟེ། གློ་གཡས་པ་ཕབ་ནས་གཟིམས་ཏེ། ཅང་མི་གསུང་བར་གྱུར་པས་འཛམ་བུའི་གླིང་འདི་ན་སྐྱེ་བོ་བླུན་པོ་
དག་འདི་སྙམ་དུ་སེམས་པར་འགྱུར་རོ། །དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ངེས་པར་མྱ་ངན་ལས་འདས་ཏེ་འགོག་པ་ཟད་པའི་འདུ་ཤེས་སྐྱེད་དོ། །དེ་བཞིན་གཤེགས་པ་ཉིད་ནི་མཐར་ཡོངས་སུ་མྱ་ངན་
ལས་འདའ་བ་ཡང་མ་མཆིས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པ་ནི་རྟག་པ་མི་འགྱུར་མི་འཕོ་བའི་ཕྱིར་རོ། །དེའི་རྒྱུ་དེའི་རྐྱེན་གྱིས་ང་འདི་ལྟར་རྒྱབ་ནའོ་ཞེས་གསུངས་པའི་མི་རིགས་སོ། །བཅོམ་ལྡན་འདས་གཞན་

47-1-182b

ཡང་འཇིག་རྟེན་ན་ནད་པ་ཁ་ཅིག་ནི་ཤིན་ཏུ་སྐེམ་ཤིང་རིད་པས་གན་རྐྱལ་ལམ། གློས་ཉལ་ནས་ལྡང་མི་ནུས་ཏེ། དེའི་ཚེ་འཁོར་རྣམས་ཀྱང་དེ་ལ་མི་འདོད་པའི་སེམས་སྐྱེས་ནས་གདོན་མི་ཟ་བར་འཆི་བར་འདུ་ཤེས་སོ། །དེ་བཞིན་
གཤེགས་པ་ཡང་དེ་དང་འདྲ་སྟེ། མུ་སྟེགས་ཅན་རྣམ་པ་དགུ་བཅུ་རྩ་ལྔ་པོ་མི་འདོད་དེ་མྱ་ངན་ལས་འདའ་བར་འདུ་ཤེས་སོ། །མུ་སྟེགས་ཅན་དག་འདི་སྐད་དུ་བདག་ཅག་ལ་སོགས་པ་ནི་བདག་ཅེས་བྱ་བ་དང་། བདག་པོ་དང་དུས་
དང་རྡུལ་ཕྲ་མོ་ལ་སོགས་པའི་ཆོས་ཀྱིས་རྟག་པར་གྱུར་པས་འགྱུར་ཞིང་འཕོ་བ་མེད་ཀྱི། དགེ་སྦྱོང་གཽ་ཏ་མ་ནི་མི་རྟག་པས་ཕྲོགས་ནས་འགྱུར་ཞིང་འཕོ་བའི་ཆོས་ཅན་དུ་གྱུར་ཏོ་ཞེས་སྨྲའོ། །དེ་བས་ན་བཅོམ་ལྡན་འདས་ཅང་མི་
གསུང་བར་གློ་གཡས་པ་ཕབ་སྟེ་གཟིམས་པའི་མི་རིགས་སོ། །བཅོམ་ལྡན་འདས་གཞན་ཡང་འཇིག་རྟེན་ན་ནད་པ་དག་ནི་ཆེན་པོ་བཞི་ཉམས་ནས་ཤས་མི་མཉམ་པ་ལ་ཤིན་ཏུ་རིད་ཅིང་སྐེམ་པར་གྱུར་ཏེ། དེ་བས་ན་
ཡིད་བཞིན་དུ་ལྡང་བ་དང་འདུག་པ་མི་ནུས་ཏེ་ཉལ་བ་ལགས་ན་དེ་བཞིན་གཤེགས་པ་ནི་ཆེན་པོ་བཞི་ཡང་མི་མཉམ་པ་མ་མཆིས་ལ། སྐུའི་མཐུ་དང་ཡང་ལྡན། ཉམས་རིད་པ་ཡང་མ་མཆིས་ཏེ། བཅོམ་ལྡན་འདས་
ཁྱུ་མཆོག་ཆུང་ངུ་བཅུའི་སྟོབས་ནི་ཁྱུ་མཆོག་ཆེན་པོ་གཅིག་གི་སྟོབས་སུ་མ་མཆིས། ཁྱུ་མཆོག་ཆེན་པོ་བཅུའི་སྟོབས་ཀྱང་ཁྱུ་མཆོག་ཆེན་པོ་སྔོན་པོ་གཅིག་གི་སྟོབས་སུ་མ་མཆིས། ཁྱུ་མཆོག་སྔོན་པོ་བཅུའི་སྟོབས་
ཀྱང་བལ་གླང་གཡུང་གཅིག་གི་སྟོབས་སུ་མ་མཆིས། བལ་གླང་གཡུང་བཅུའི་སྟོབས་ཀྱང་བལ་གླང་རྒོད་གཅིག་གི་སྟོབས་སུ་མ་མཆིས། བལ་གླང་རྒོད་བཅུའི་སྟོབས་ཀྱང་བལ་གླང་མཆེ་བ་གཉིས་པ་གཅིག་གི་སྟོབས་སུ་
མ་མཆིས། བལ་གླང་མཆེ་བ་གཉིས་པ་བཅུའི་སྟོབས་ཀྱང་བལ་གླང་མཆི་བ་བཞི་པ་གཅིག་གི་སྟོབས་སུ་མ་མཆིས། བལ་གླང་མཆེ་བ་བཞི་པ་བཅུའི་སྟོབས་ཀྱང་གངས་ཀྱི་རིའི་བལ་གླང་དཀར་པོ་གཅིག་གི་སྟོབས་སུ་མ་མཆིས། 

47-1-183a

གངས་ཀྱི་རིའི་བལ་གླང་དཀར་པོ་བཅུའི་སྟོབས་ཀྱང་སྤོས་ཀྱི་བལ་གླང་གཅིག་གི་སྟོབས་སུ་མ་མཆིས། སྤོས་ཀྱི་བལ་གླང་བཅུའི་སྟོབས་ཀྱང་བལ་གླང་སྔོན་པོ་གཅིག་གི་སྟོབས་སུ་མ་མཆིས། བལ་གླང་སྔོན་པོ་བཅུའི་སྟོབས་
ཀྱང་བལ་གླང་སེར་པོ་གཅིག་གི་སྟོབས་སུ་མ་མཆིས། བལ་གླང་སེར་པོ་བཅུའི་སྟོབས་ཀྱང་བལ་གླང་དམར་པོ་གཅིག་གི་སྟོབས་སུ་མ་མཆིས། བལ་གླང་དམར་པོ་བཅུའི་སྟོབས་ཀྱང་བལ་གླང་དཀར་པོ་གཅིག་གི་སྟོབས་སུ་མ་མཆིས། 
བལ་གླང་དཀར་པོ་བཅུའི་སྟོབས་ཀྱང་བལ་གླང་རི་ཞེས་བྱ་བ་གཅིག་གི་སྟོབས་སུ་མ་མཆིས། བལ་གླང་རི་ཞེས་བྱ་བ་བཅུའི་སྟོབས་ཀྱང་བལ་གླང་ཨུད་པ་ལ་གཅིག་གི་སྟོབས་སུ་མ་མཆིས། བལ་གླང་ཨུད་པ་ལ་བཅུའི་སྟོབས་ཀྱང་བལ་གླང་
ཀུ་མུ་ད་གཅིག་གི་སྟོབས་སུ་མ་མཆིས། བལ་གླང་ཀུ་མུ་ད་བཅུའི་སྟོབས་ཀྱང་བལ་གླང་བུན་ད་རི་ཀ་གཅིག་གི་སྟོབས་སུ་མ་མཆིས། བལ་གླང་བུན་ད་རི་ཀ་བཅུའི་སྟོབས་ཀྱང་མིའི་ནང་ན་གྱད་གཅིག་གི་སྟོབས་སུ་མ་མཆིས། མིའི་
གྱད་བཅུའི་སྟོབས་ཀྱང་པར་གན་དེ་གཅིག་གི་སྟོབས་སུ་མ་མཆིས། པར་གན་དེ་བཅུའི་སྟོབས་ཀྱང་མཐུ་བོ་ཆེ་ལག་པ་བརྒྱད་པ་གཅིག་གི་སྟོབས་སུ་མ་མཆིས། མཐུ་བོ་ཆེ་བཅུའི་སྟོབས་ཀྱང་གནས་བཅུ་པའི་བྱང་ཆུབ་སེམས་དཔའ་
ཚིགས་གཅིག་པའི་སྟོབས་སུ་མ་མཆིས་སོ། །སོ་སོའི་སྐྱེ་བོ་ཐམས་ཅད་ཀྱི་རུས་པའི་ཚིགས་ནི་གཅིག་ལ་གཅིག་རེག་ཅིང་འབྲེལ་བ་མ་ལགས་ཀྱི། གྱད་སྟོབས་པོ་ཆེའི་རུས་པའི་ཚིགས་ནི་གཅིག་ལ་གཅིག་རེག་གོ། །པར་གན་དེའི་རུས་
པའི་ཚིགས་ནི་གཅིག་ལ་གཅིག་འབྲེལ་ཏོ། །མཐུ་བོ་ཆེའི་རུས་པའི་ཚིགས་ནི་ལུ་གུ་རྒྱུད་བཞིན་གཅིག་ལ་གཅིག་འབྲེལ་ཏོ། །བྱང་ཆུབ་སེམས་དཔའི་རུས་པའི་ཚིགས་ནི་འབྲུག་འཁྱིལ་པ་ལྟར་མདུད་པ་ཅན་དུ་མཆིས་པས་དེ་བས་ན་དེའི་
སྟོབས་ནི་མཆོག་ཏུ་ཆེའོ། །འཇིག་རྟེན་ཐོག་མ་མངོན་པར་ཆགས་པ་ན་རྡོ་རྗེའི་མཐའ་ལ་བརྟན་ཏེ། རྡོ་རྗེའི་གདན་སྙིང་པོ་བྱང་ཆུབ་ཀྱི་དཀྱིལ་འཁོར་དུ་མངོན་པར་བྱུང་ནས་བྱང་ཆུབ་སེམས་དཔའ་གང་ན་དེ་ལ་བཞུགས་ཏེ། དེ་ཉིད་ཀྱི་

47-1-183b

ཚེ་ན་སྟོབས་བཅུ་རྙེད་པར་གྱུར་ཏོ། །དེ་བཞིན་གཤེགས་པ་ནི་བྱིས་པ་ཆུང་ངུ་ལྟ་བུ་མ་ལགས་ཏེ། བྱིས་པ་ཆུང་ངུ་ནི་གླེན་ཏེ་ཤེས་པ་མ་མཆིས་ལ། སྨྲ་ཡང་མི་ཤེས་པས་ན་ཡིད་བཞིན་དུ་འགྲེ་ཞིང་ཉལ་ཡང་སུ་ཡང་མི་འཕྱ་སྟེ། དེ་བཞིན་
གཤེགས་པ་ནི་ཡེ་ཤེས་ཆེན་པོ་དང་ལྡན་པས་ཐམས་ཅད་ལ་འོད་ཀྱིས་གསལ་བར་མཛད་པ་ནི་མིའི་ནང་ན་ཀླུ་ལྟ་བུ་ལགས་པས་གཟི་བརྗིད་ཆེན་པོ་དང་ལྡན་ཏེ། རྫུ་འཕྲུལ་ཆེན་པོ་མངོན་པར་རྫོགས་ནས་བླ་ན་མེད་པའི་དྲང་སྲོང་ཆེན་པོ་ཐེ་
ཚོམ་གྱི་དྲ་བ་ཡོངས་སུ་བཅད་པ། འདོད་པའི་ཟུག་རྔུ་ཕྱུང་བ། སྤྱོད་ལམ་ཤིན་ཏུ་མཛེས་པ། སྤྱོད་ལམ་གྱི་དབང་དུ་གྱུར་པ། བསྙེངས་པ་མི་མངའ་བ་ལགས་ན་ཅིའི་སླད་དུ་གློ་གཡས་པ་ཕབ་སྟེ་གཟིམས་པས་འཇིག་རྟེན་དུ་བཅས་པ་
ལྷ་དང་མི་ཐམས་ཅད་མི་དགའ་ཞིང་སྡུག་བསྔལ་གྱིས་གདུངས་པར་མཛད། དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་དེ་གསོལ་པ། ཡོན་ཏན་ཆེན་པོ་གཽ་ཏ་མ། །བཞེངས་ཏེ་དམ་
ཆོས་བསྟན་དུ་གསོལ། །ཇི་ལྟར་བྱིས་པ་ཆུང་ངུ་འམ། །ནད་པ་ཉལ་བ་ལྟ་བུ་མིན། །ལྷ་མི་སྟོན་པ་ཁ་ལོ་སྒྱུར། །ཤིང་དབང་དྲུང་དུ་གཟིམས་པ་འདི། །བྱིས་པ་མ་རབས་མཐོང་ནས་སུ། །ངེས་པར་མྱ་ངན་འདའ་ཞེས་མཆི། །ཤིན་ཏུ་རྒྱས་པའི་
མདོ་སྡེ་ལས། །སངས་རྒྱས་སྤྱོད་ཡུལ་ཟབ་མོ་ཡི། །དགོངས་ཏེ་གསུངས་པ་མི་ཤེས་པ། །དམུས་ལོང་ལམ་མི་མཐོང་བ་བཞིན། །བྱང་ཆུབ་སེམས་དཔའ་ཆེན་པོ་དང་། །འཇམ་དཔལ་གཞོན་ནུ་ལ་སོགས་པ། །ཟབ་མོའི་དོན་རྣམས་
རྟོགས་པ་ནི། །ཇི་ལྟར་འཕོང་ལ་གོམས་པ་བཞིན། །དུས་གསུམ་གཤེགས་པའི་བཅོམ་ལྡན་འདས། །ཐུགས་རྗེ་ཆེན་པོའི་གཙོ་བོར་གྱུར། །དེ་ལྟར་ཐུགས་རྗེ་ཆེ་བ་དེ། །ད་ལྟར་ཇི་ལྟར་ག་ལ་མཆིས། །ཇི་སྟེ་ཐུགས་རྗེ་མི་མངའ་ན། །
སངས་རྒྱས་ཞེས་ཀྱང་བགྱིར་མི་རུང་། །ཇི་སྟེ་མྱ་ངན་འདས་གྱུར་ན། །རྟག་པ་ཞེས་ཀྱང་བགྱིར་མི་རུང་། །བླ་ན་མེད་པའི་བཅོམ་ལྡན་འདས། །བདག་ཅག་གསོལ་བ་གནང་བར་མཛོད། །འགྲོ་བ་ཀུན་ལ་བདེ་བའི་ཕྱིར། །མུ་སྟེགས་ཅན་དག་

47-1-184a

གདུལ་དུ་གསོལ། །དེའི་ཚེ་བཅོམ་ལྡན་འདས་ཐུགས་རྗེ་ཆེན་པོ་ལ་གོམས་པའི་ཐུགས་ཀྱིས་སེམས་ཅན་སོ་སོའི་བསམ་པ་མཁྱེན་ནས་དེ་དག་གི་རྗེས་སུ་མཐར་ཕན་པ་དང་བདེ་བའི་དོན་མཛད་པའི་ཕྱིར་གཟིམས་པ་ལས་
གཞེངས་ནས། ཀྱིལ་མོ་ཀྲུང་བཅས་ཏེ་བཞུགས་སོ། །དེའི་ཚེ་སྐུ་མདོག་ལྷང་ངེ་ལྷམ་མེར་འཚེར་བ་ནི་གསེར་བཙོ་མ་ལྟར་གསལ་བར་གྱུར་ཏོ། །ཞལ་མདོག་ཤིན་ཏུ་མཛེས་པ་ནི་ཇི་ལྟར་ཟླ་བ་རྒྱས་པ་ལྟ་བུའོ། །སྐུ་ཤིན་ཏུ་གསལ་ཞིང་
དག་པས་དྲི་མ་འམ། རྙོག་པའི་བག་མེད་དེ་འོད་ཟེར་ཆེན་པོ་བཀྱེ་ནས་ནམ་མཁའི་དབྱིངས་ཡོངས་སུ་གང་བར་གྱུར་ཏོ། །ཉི་མ་བརྒྱ་སྟོང་བས་ཤིན་ཏུ་ལྷག་པའི་འོད་ཀྱིས་ཤར་ཕྱོགས་དང་། ལྷོ་དང་། ནུབ་དང་། བྱང་དང་། ཕྱོགས་མཚམས་བཞི་
དང་། སྟེང་དང་འོག་གི་ཕྱོགས་ཀྱི་སངས་རྒྱས་ཀྱི་འཇིག་རྟེན་གྱི་ཁམས་སུ་སེམས་ཅན་ཐམས་ཅད་ལ་ཡེ་ཤེས་ཆེན་པོའི་སྣང་བ་བྱིན་ནས་མ་རིག་པའི་མུན་པ་ཡོངས་སུ་བསལ་ཏོ། །གཞན་ཡང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་
སྙེད་བྱང་ཆུབ་ཀྱི་སེམས་ལས་སླར་མི་ལྡོག་པར་བཀོད་དོ། །དེའི་ཚེ་བཅོམ་ལྡན་འདས་སེང་གེའི་རྒྱལ་པོ་ལྟར་བསྙེངས་པ་མེད་བཞིན་དུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱད་བཅུས་སྐུ་ཡོངས་སུ་
བརྒྱན་ཏེ། སྐུའི་བ་སྤུའི་བུ་ག་རེ་རེ་ནས་པད་མོ་རེ་རེ་བྱུང་བར་སྤྲུལ་ཏོ། །པད་མོ་དེ་དག་ཀྱང་འདབ་མ་སྟོང་སྟོང་དང་ལྡན་ཏེ། པད་མོ་ཉིད་ནི་གསེར། སྡོང་བུ་ནི་བཻ་དཱུརྱ། གེ་སར་ནི་རྡོ་རྗེ། གཞི་ནི་ཤེལ་ལས་བྱས་པ་སྟེ། ཤིང་རྟའི་
འཁོར་ལོ་ཙམ་མོ། །པད་མོ་དེ་དག་སོ་སོ་ལས་ཀྱང་འོད་རྣམ་པ་སྣ་ཚོགས་བྱུང་བ་ནི་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། སྨུག་པོ་དང་། ཤེལ་གྱི་ཁ་དོག་ལྟ་བུ་སྟེ། འོད་དེ་དག་སོ་སོ་ནས་མཚམས་མེད་པའི་སེམས་
ཅན་དམྱལ་བ་ཆེན་པོ་དང་། འདུ་ཤེས་ཀྱི་སེམས་ཅན་དམྱལ་བ་དང་། ཐིག་ནག་པོའི་སེམས་ཅན་དམྱལ་བ་དང་། སྣ་ཚོགས་འདུས་པའི་སེམས་ཅན་དམྱལ་བ་དང་། འོ་དོད་འབོད་པའི་སེམས་ཅན་དམྱལ་བ་ཆེན་པོ་དང་། 

47-1-184b

འོ་དོད་འབོད་པ་ཆེན་པོའི་སེམས་ཅན་དམྱལ་བ་དང་། ཤིན་ཏུ་ཚིག་པའི་སེམས་ཅན་དམྱལ་བ་དང་། རབ་ཏུ་ཆེར་ཚིག་པའི་སེམས་ཅན་དམྱལ་བ་དང་། སེམས་ཅན་དམྱལ་བ་བརྒྱད་པོར་སྐྱེས་པའི་སེམས་ཅན་དག་རྟག་ཏུ་སྡུག་བསྔལ་
མང་པོས་རྣམ་པར་གཟིར་བ་ནི་འདི་ལྟ་སྟེ། སྲེག་པ་དང་། བཙོ་བ་དང་། མེ་མུར་དང་། གཏུན་བུས་གདུང་བ་ལ་སོགས་པ་སྟེ། དེ་དག་ཀྱང་འོད་དེས་ཕོག་མ་ཐག་ཏུ་སྡུག་བསྔལ་དེ་དག་ལྷག་མ་མ་ལུས་པར་ཐམས་ཅད་བྱང་ནས་རབ་
ཏུ་བདེ་བ་དང་། ཤིན་ཏུ་བསིལ་བར་ལོངས་སྤྱོད་པར་གྱུར་ཏོ། །འོད་ཟེར་དེ་ལས་འདི་སྐད་དུ། དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་གྲགས་པར་གྱུར་པ་ནི། ཀྱེ་སེམས་ཅན་ཁྱེད་ཀུན་ལ་ཡང་སངས་རྒྱས་ཀྱི་རང་
བཞིན་ཡོད་དོ་ཞེས་གྲགས་པར་གྱུར་ཏོ། །སེམས་ཅན་དེ་དག་གིས་དེ་སྐད་ཅེས་ཐོས་ནས་དེ་མ་ཐག་ཏུ་ཚེ་འཕོས་ཏེ་མཐོ་རིས་ཀྱི་ལྷ་དང་མིར་སྐྱེས་སོ། །ཤིན་ཏུ་གྲང་བའི་སེམས་ཅན་དམྱལ་བ་བརྒྱད་ལ་འདི་ལྟ་སྟེ། ཨ་ཕ་པའི་སེམས་
ཅན་དམྱལ་བ་དང་། ཨ་ཏ་ཏའི་སེམས་ཅན་དམྱལ་བ་དང་། ཨ་ལ་ལའི་སེམས་ཅན་དམྱལ་བ་དང་། ཨ་ཚ་ཚའི་སེམས་ཅན་དམྱལ་བ་དང་། ཨུད་པ་ལའི་སེམས་ཅན་དམྱལ་བ་དང་། པ་ཐུ་མའི་སེམས་ཅན་དམྱལ་བ་དང་། ཀུ་མུ་དའི་
སེམས་ཅན་དམྱལ་བ་དང་། པུན་ད་རི་ཀའི་སེམས་ཅན་དམྱལ་བ་སྟེ། དེ་དག་ཏུ་སྐྱེས་པའི་སེམས་ཅན་རྟག་ཏུ་སྡུག་བསྔལ་ཆེན་པོ་མྱོང་བ་ནི་འདི་ལྟ་སྟེ། ལུས་རབ་ཏུ་གས་པ་དང་། ཞིག་པ་དང་། དུམ་བུ་དུམ་བུར་ཆད་པར་གྱུར་ཏེ། 
དེ་དག་ཀྱང་འོད་ཀྱིས་རེག་མ་ཐག་ཏུ་སྡུག་བསྔལ་ལྷག་མ་མ་ལུས་པར་བྱང་བར་གྱུར་ཏོ། །དྲོ་བ་དང་འཇམ་པར་གྱུར་ནས་འོད་དེ་ལ་འདི་སྐད་དུ། དེ་བཞིན་གཤེགས་པའི་སྙིང་པོ་སྟོན་པའི་སྒྲ་གྲགས་པ་ནི་འདི་ལྟ་སྟེ། ཀྱེ་སེམས་ཅན་
ཁྱེད་ལ་ཡང་སངས་རྒྱས་ཀྱི་རང་བཞིན་ཡོད་དོ་ཞེས་གྲགས་ཏེ་དེ་དག་གིས་དེ་སྐད་ཅེས་ཐོས་ནས་དེ་མ་ཐག་ཏུ་ཚེ་འཕོས་ཏེ་མཐོ་རིས་ཀྱི་ལྷ་དང་མིར་སྐྱེས་པར་གྱུར་ཏོ། །དེའི་ཚེ་དེའི་དུས་ན་འཛམ་བུའི་གླིང་འདི་དང་། འཇིག་རྟེན་གྱི་ཁམས་

47-1-185a

གཞན་དག་གི་སེམས་ཅན་དམྱལ་བ་ཐམས་ཅད་སྟོངས་པར་གྱུར་ཏེ་སྡུག་བསྔལ་མྱོང་བ་མེད་དོ། །ཡི་དགས་ཀྱི་ཁམས་སུ་སྐྱེས་པ་དག་ཟས་དང་སྐོམ་གྱིས་ཡོངས་སུ་གདུངས་པ། སྐྲ་ཤད་འཛིངས་པས་ལུས་དཀྲིས་པ། 
ལོ་བརྒྱ་སྟོང་གི་བར་དུ་ཆུའི་མིང་ཡང་མི་ཐོས་པ་དག་འོད་དེས་རེག་མ་ཐག་ཏུ་བཀྲེས་པ་དང་། སྐོམ་པས་གདུངས་པ་དང་བྲལ་ཏེ་འོད་དེ་ལས་འདི་སྐད་དུ་དེ་བཞིན་གཤེགས་པའི་སྙིང་པོ་སྟོན་པའི་སྒྲ་གྲགས་པ་ནི་འདི་ལྟ་སྟེ། སེམས་ཅན་ཁྱེད་
ལ་ཡང་སངས་རྒྱས་ཀྱི་རང་བཞིན་ཡོད་དོ་ཞེས་པའི་ཚིག་གྲགས་པར་གྱུར་ཏོ། །སེམས་ཅན་དེ་དག་གིས་ཚིག་དེ་སྐད་ཅེས་ཐོས་ནས་དེ་དག་ཚེ་འཕོས་ཏེ་དེ་མ་ཐག་ཏུ་མཐོ་རིས་ཀྱི་ལྷ་དང་མིར་སྐྱེས་ཏེ། ཡི་དགས་ཀྱི་ཁམས་ཀྱང་སྟོངས་པར་གྱུར་
ཏེ། དེ་ལ་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ལ་སྐུར་པ་ནི་མ་གཏོགས་སོ། །བྱོལ་སོང་གི་སྐྱེ་གནས་སུ་སྐྱེས་པའི་སེམས་ཅན་གཅིག་ལ་གཅིག་འཆའ་ཞིང་ཟ་བ་གནོད་པ་བྱེད་པ་དག་ཀྱང་འོད་དེས་རེག་ནས་སྡིག་པའི་སེམས་ཞི་བར་
གྱུར་ཏེ། འོད་དེ་ལས་ཀྱང་འདི་སྐད་དུ་དེ་བཞིན་གཤེགས་པའི་སྙིང་པོ་སྟོན་པ་གྲགས་པ་ནི་འདི་ལྟ་སྟེ། སེམས་ཅན་ཁྱེད་ལ་ཡང་སངས་རྒྱས་ཀྱི་རང་བཞིན་ཡོད་དོ་ཞེས་གྲགས་པར་གྱུར་ཏོ། །སེམས་ཅན་དེ་དག་གིས་འདི་སྐད་ཅེས་ཐོས་ནས་
ཚེ་འཕོས་ཏེ། དེ་མ་ཐག་ཏུ་ལྷ་དང་མིར་སྐྱེས་སོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་བཅྭ་ལྔ་པ། དེའི་ཚེ་དེའི་དུས་ན་བྱོལ་སོང་གི་ཁམས་ཀྱང་སྟོངས་པར་གྱུར་ཏེ། དམ་པའི་ཆོས་ལ་
སྐུར་པ་ནི་མ་གཏོགས་སོ། །པད་མོ་རེ་རེ་ལ་ཡང་སངས་རྒྱས་རེ་རེ་བཞུགས་པ་ནི་འོད་ཟེར་འཁོར་བར་འདོམ་གང་དང་ལྡན་པ། གསེར་བཙོ་མའི་མདོག་ལྟ་བུ་ལྷམ་མེར་འཚེར་བ། ཤིན་ཏུ་མཛེས་པ་མཆོག་ཏུ་བསྒྲུན་དུ་མེད་པ། སྐྱེས་བུ་ཆེན་
པོའི་མཚན་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱད་བཅུས་སྐུ་ཤིན་ཏུ་བརྒྱན་པ། སངས་རྒྱས་དེ་དག་ལ་ལ་ནི་བཞུགས། ལ་ལ་ནི་འགྲེང་། ལ་ལ་ནི་མནལ། ལ་ལ་ནི་སྡོད། ལ་ལ་ནི་འབྲུག་གི་སྒྲ་སྒྲོགས། ལ་ལ་ནི་ཆར་འབེབས། 

47-1-185b

ལ་ལ་ནི་གློག་གི་འོད་འགྱེད། ལ་ལ་ནི་རླུང་གཏོང་། ལ་ལ་ནི་སྐུ་མེ་ལྕེའི་ཕུང་པོ་ལྟར་འབར། ལ་ལ་ནི་རིན་པོ་ཆེ་སྣ་བདུན་གྱི་རི་དང་། རྫིང་དང་། མཚེའུ་དང་། ཆུ་མིག་དང་། འབབ་ཆུ་དང་། ནགས་ཚལ་ཡང་མངོན་པར་སྟོན། ལ་ལ་རིན་པོ་ཆེ་སྣ་བདུན་
གྱི་ཡུལ་དང་། གྲོང་དང་གྲོང་རྡལ་དང་། གྲང་ཁྱེར་དང་། ཁང་ཁྱིམ་ཡང་མངོན་པར་སྟོན། ལ་ལ་ནི་བ་གླང་དང་། རྟ་དང་སེང་གེ་དང་། སྟག་དང་། སྤྱང་ཀི་དང་། རྨ་བྱ་དང་། ནམ་མཁའ་ལྡིང་ལ་སོགས་པ་ཡང་སྟོན། ལ་ལ་ནི་འཛམ་བུའི་གླིང་ན་གནས་པ་
འི་སེམས་ཅན་གྱིས་སེམས་ཅན་དམྱལ་བ་དང་། བྱོལ་སོང་དང་། ཡི་དགས་འབའ་ཞིག་གིས་གང་བར་སྣང་བ་སྟོན། ལ་ལ་ནི་འདོད་པའི་ཁམས་ཀྱི་གནས་རིམ་པ་དྲུག་སྟོན། བཅོམ་ལྡན་འདས་ལ་ལ་ནི་ཕུང་པོ་དང་། ཁམས་དང་། སྐྱེ་མཆེད་ཀྱི་
སྐྱོན་མང་པོ་སྟོན་ཏོ། །ལ་ལ་ནི་བདེན་པ་བཞིའི་ཆོས་སྟོན་ཏོ། །ལ་ལ་ནི་རྟེན་ཅིང་འབྲེལ་ཏེ་འབྱུང་བ་སྟོན་ཏོ། །ལ་ལ་ནི་ལས་དང་ཉོན་མོངས་པ་ཐམས་ཅད་རྒྱུ་དང་རྐྱེན་ལས་སྐྱེ་བར་སྟོན་ཏོ། །ལ་ལ་ནི་བདག་དང་བདག་མེད་པ་སྟོན་ཏོ། །ལ་ལ་ནི་སྡུག་
བསྔལ་བ་དང་བདེ་བའི་ཆོས་གཉིས་པོ་སྟོན་ཏོ་ལ་ལ་ནི་རྟག་པ་དང་མི་རྟག་པ་སྟོན་ཏོ། །ལ་ལ་ནི་གཙང་བ་དང་མི་གཙང་བ་སྟོན་ཏོ། །བཅོམ་ལྡན་འདས་ལ་ལ་ནི་བྱང་ཆུབ་སེམས་དཔའ་རྣམས་ལ་ཕ་རོལ་ཏུ་ཕྱིན་པ་དྲུག་སྟོན་ཏོ། །ལ་ལ་ནི་བྱང་ཆུབ་
སེམས་དཔའི་ཡོན་ཏན་གང་ཡིན་པ་སྟོན་ཏོ། །ལ་ལ་ནི་སངས་རྒྱས་བཅོམ་ལྡན་འདས་ཀྱི་ཡོན་ཏན་གང་ཡིན་པ་སྟོན་ཏོ། །ལ་ལ་ནི་ཉན་ཐོས་ཀྱི་ཡོན་ཏན་གང་ཡིན་པ་སྟོན་ཏོ། །ལ་ལ་ནི་ཐེག་པ་གཅིག་པ་བརྩམས་ཏེ་སྟོན་ཏོ། །ལ་ལ་ནི་ཐེག་པ་གསུམ་
གྱི་མངོན་པར་བྱང་ཆུབ་པ་སྟོན་ཏོ། །བཅོམ་ལྡན་འདས་ལ་ལ་ནི་རྩིབ་ལོགས་གཡོན་པ་ནས་ཆུ་འབབ་པ་དང་། རྩིབ་ལོགས་གཡས་པ་ནས་མེ་འབར་བ་སྟོན་ཏོ། །ལ་ལ་ནི་ཐོག་མ་བཙས་པ་དང་། རབ་ཏུ་བྱུང་བ་དང་། སྙིང་པོ་བྱང་ཆུབ་ལ་ཞུགས་པ་
དང་། བྱང་ཆུབ་ཀྱི་ཤིང་དྲུང་དུ་ཆོས་ཀྱི་འཁོར་ལོ་སྐོར་བ་དང་། ཡོངས་སུ་མྱ་ངན་ལས་འདའ་བ་ཡང་སྟོན་ཏོ། །བཅོམ་ལྡན་འདས་ལ་ལ་ནི་སེང་གེའི་སྒྲ་སྒྲོགས་ཏེ། འཁོར་གྱི་དཀྱིལ་འཁོར་དག་འབྲས་བུ་དང་པོ་དང་། གཉིས་པ་དང་། གསུམ་པ་དང་། བཞི་པའི་བར་དུ་

47-1-186a

ཐོབ་པར་སྟོན་ཏོ། །ལ་ལ་ནི་འཁོར་བ་ལས་བྱུང་བའི་རྒྱུ་དང་རྐྱེན་ཚད་མེད་པ་ཡང་སྟོན་ཏོ། །དེའི་ཚེ་ན་འཛམ་བུའི་གླིང་འདིར་གནས་པའི་སེམས་ཅན་འོད་དེས་རེག་པའི་རྣམས་དབུས་ལོང་དག་ནི་མཐོང་བར་གྱུར། འོན་པ་དག་ནི་
ཐོས་པར་གྱུར། ལྐུགས་པ་དག་ནི་སྨྲ་ཤེས་པར་གྱུར། ཞ་བོ་དག་ཀྱང་འགྲོ་ནུས་པར་གྱུར། དབུལ་ཕོངས་པ་ནི་ལོངས་སྤྱོད་དང་ལྡན་པར་གྱུར། སེར་སྣ་ཅན་ནི་གཏོང་ཕོད་པར་གྱུར། ཞེ་སྡང་ཅན་ནི་བྱམས་པའི་སེམས་དང་ལྡན་པར་གྱུར། 
མ་དད་པ་རྣམས་ནི་དད་པར་གྱུར་ཏེ། དེ་ལྟར་འཇིག་རྟེན་གྱི་ཁམས་ན་སེམས་ཅན་གཅིག་ཙམ་ཡང་མི་དགེ་བའི་ཆོས་ལ་སྤྱོད་པ་མེད་དེ། ལོག་སྲེད་ཅན་འབའ་ཞིག་ནི་མ་གཏོགསོ། །དེའི་ཚེ་ན་ལྷ་དང་། ཀླུ་དང་གནོད་སྦྱིན་དང་། དྲི་ཟ་དང་། 
ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། སྲིན་པོ་དང་། གྲུལ་བུམ་དང་། མི་དང་མི་མ་ཡིན་པ་ལ་སོགས་པ་ཐམས་ཅད་སྐད་མཐུན་པར་འདི་སྐད་ཅེས་གསོལ་ཏོ། །ཤིན་ཏུ་ལེགས་སོ། །བླ་ན་མེད་
པ་བཅོམ་ལྡན་འདས་ཐམས་ཅད་ལ་ཕན་པ་དང་། བདེ་བའི་དོན་མཛད་པ་ཤིན་ཏུ་ལེགས་སོ་ཞེས་དེ་སྐད་ཅེས་གསོལ་ནས་རབ་ཏུ་དགའ་མགུ་རངས་ཏེ་ལ་ལ་ནི་གླུ་ལེན། ལ་ལ་ནི་གར་བྱེད། ལ་ལ་ནི་ཡན་ལག་བསྐུལ་ཏེ། མེ་ཏོག་རྣམ་
པ་སྣ་ཚོགས་ཀྱིས། སངས་རྒྱས་དང་། དགེ་འདུན་དུ་བཅས་པ་ལ་མངོན་པར་གཏོར་བ་ནི་འདི་ལྟ་སྟེ། ལྷ་རྫས་ཀྱི་མེ་ཏོག་ཨུད་པ་ལ་དང་། ལྷ་རྫས་ཀྱི་མེ་ཏོག་ཀུ་མུ་ད་དང་། མེ་ཏོག་པད་མོ་དང་། པུན་ད་རི་ཀ་དང་། ལྷ་རྫས་ཀྱི་མེ་ཏོག་
མན་དཱ་ར་བ་དང་། མན་དཱ་ར་བ་ཆེན་པོ་དང་། མན་འཛུ་ཥ་ཀ་དང་། མན་ཛུ་ཥ་ཀ་ཆེན་པོ་དང་། སན་དན་དང་། སན་དན་ཆེན་པོ་དང་། ལོ་ཙ་ནི་དང་། ལོ་ཙ་ནི་ཆེན་པོ་དང་། བསུང་ཅན་དང་། བསུང་ཅན་ཆེན་པོ་དང་། ཡིད་དུ་འོང་བ་དང་། ཡིད་དུ་
འོང་བ་ཆེན་པོ་དང་། བལྟ་ན་དགའ་བ་དང་། བལྟ་ན་དགའ་བ་ཆེན་པོ་དང་། ཤིན་ཏུ་མཛེས་པ་དང་། མཆོག་ཏུ་མཛེས་པ་རྣམས་སོ། །གཞན་ཡང་ལྷ་རྫས་ཀྱི་སྤོས་མང་པོ་མངོན་པར་གཏོར་བ་ནི་འདི་ལྟ་སྟེ། ལྷ་རྫས་ཀྱི་སྤོས་ཆུ་འབྱིང་དང་། 

47-1-186b

ཨ་ག་རུ་དང་། ཙན་དན་དང་། གུར་ཀུམ་དང་། སྤོས་སྦྱར་མ་དང་། རྒྱ་མཚོའི་ངོགས་ཀྱི་བརྩེགས་པ་ལ་སོགས་པའོ། །གཞན་ཡང་ལྷ་རྫས་ཀྱི་རིན་པོ་ཆེའི་རྒྱལ་མཚན་དང་། བ་དན་དང་། གདུགས་དང་། གཞན་ཡང་ལྷ་རྫས་ཀྱི་རོལ་མོ་གླིང་
བུ་དང་། གཅེའུ་ཁ་མངས་དང་། དགུ་པོ་རྒྱུད་མངས་དང་། རྔ་ལ་སོགས་པས་མངོན་པར་མཆོད་ནས་སངས་རྒྱས་ཀྱི་སྤྱན་སྔར་ཚིགས་སུ་བཅད་དེ་གསོལ་པ། བདག་ཅག་ཕྱག་འཚལ་བརྩོན་འགྲུས་བར་རྩོམ་པ། །བླ་མེད་ཡང་དག་
རྫོགས་པ་རྐང་གཉིས་མཆོག །ལྷ་མི་བཅས་པ་འཁོར་གྱིས་མི་ཤེས་པ། །ཁྱུ་མཆོག་གཽ་ཏམ་ཁྱོད་ནི་ཤིན་ཏུ་རྟོགས། །བཅོམ་ལྡན་འདས་པའི་དུས་ན་བདག་ཅག་ཕྱིར། །བསྐལ་པ་ཚད་མེད་བར་དུ་དཀའ་བ་མཛད། །ཅི་ཡི་སླད་དུ་ཐུགས་
དམ་རབ་བཏང་སྟེ། །ཡོངས་སུ་མྱ་ངན་འདའ་བར་གཤེགས་པར་དགོངས། །འགྲོ་བ་ཐམས་ཅད་ཀུན་གྱིས་མི་ཤེས་པ། །དེ་བཞིན་གཤེགས་པ་གསང་བའི་སྙིང་པོའོ། །དེ་ཡི་རྐྱེན་ཀྱིས་འབྱུང་བར་རབ་དཀའ་སྟེ། །འཁོར་བ་ཀུན་ཏུ་འཁོར་ཞིང་
ངན་སོང་ལྟུང་། །བཅོམ་ལྡན་འདས་ཀྱིས་གསུངས་པའི་དགྲ་བཅོམ་པ། །དེ་དག་ཐམས་ཅད་མྱ་ངན་འདའ་བར་འཇུག །དེ་ལྟར་སངས་རྒྱས་སྤྱོད་ཡུལ་ཟབ་མོ་ནི། །བྱིས་པ་མ་རབས་སུ་ཞིག་རྟོགས་པར་འགྱུར། །འགྲོ་བ་ཀུན་གྱི་ཉོན་མོངས་བསལ་
བའི་ཕྱིར། །འགྲོ་བ་ཀུན་ལ་ཟིལ་མངར་ཆོས་ཀྱང་སྟོན། །གང་ཞིག་བདུད་རྩི་འདི་དག་མྱོང་བ་ནི། །ཕྱིར་ཡང་སྐྱེ་རྒ་ན་མཆི་ལེན་མི་སྲིད། །བཅོམ་ལྡན་འདས་ཀྱིས་ཤིན་ཏུ་གསོ་བ་ནི། །སེམས་ཅན་མང་པོ་བརྒྱ་སྟོང་ཚད་མེད་སྙེད། །ནད་ཀྱིས་ཤིན་ཏུ་གདུངས་
ཏེ་གཟིར་བའི་རྣམས། །ལྷག་མ་ལུས་པ་མེད་པར་ཐམས་ཅད་བསལ། །བཅོམ་ལྡན་འདས་ནི་ཡུན་རིང་ནད་སྤངས་པས། །དེ་ཕྱིར་སངས་རྒྱས་ཐ་མ་བདུན་པོར་གྱུར། །དེང་འདིར་ཆོས་ཀྱི་ཆར་ཀུན་ཕབ་ནས་སུ། །བདག་ཅག་ཡོན་ཏན་ས་བོན་བརླན་པར་
མཛོད། །དེ་ལྟར་ལྷ་མིར་བཅས་པ་འཁོར་རྣམས་ཀྱིས། །དེ་སྐད་གསོལ་ནས་ཅང་མི་སྨྲ་བར་འཁོད། །ཚིགས་སུ་བཅད་པ་འདི་དག་གསོལ་པའི་ཚེ། པད་མོ་ལ་བཞུགས་པའི་སངས་རྒྱས་ཐམས་ཅད་འཛམ་བུའི་གླིང་ནས་གཙང་མའི་རིས་ཀྱི་བར་དུ་ཐམས་ཅད་

47-1-187a

ཀྱིས་ཐོས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ལེགས་སོ་ལེགས་སོ་ཞེས་བྱ་བ་བྱིན་ནས་རིགས་ཀྱི་བུ་འདི་ལྟར་ཁྱོད་ནི་ཤིན་ཏུ་ཟབ་མོའི་ཡེ་ཤེས་འདི་ལྟ་བུ་དང་ལྡན་པས་ན་བདུད་
དང་མུ་སྟེགས་ཅན་ཐམས་ཅད་ཀྱིས་རྣམ་པར་འཇིག་མི་ནུས་སོ། །རིགས་ཀྱི་བུ་ཁྱོད་འདི་ལྟར་ཤིན་ཏུ་བདེ་བར་གནས་པས་ངན་པར་ལྟ་བ་ཐམས་ཅད་རླུང་གིས་བསྐྱོད་པར་མི་ནུས་སོ། །རིགས་ཀྱི་བུ་ཁྱོད་ཀྱིས་འདི་ལྟར་སོ་སོ་ཡང་དག་པར་
ཤེས་པའི་སྤོབས་པ་དང་ལྡན་པ་ནི་འདས་པའི་སངས་རྒྱས་བཅོམ་ལྡན་འདས་ཚད་མེད་པ་གང་གཱ་ཀླུང་གི་བྱེ་མ་སྙེད་ལ་མཆོད་པ་བྱས་པས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དོན་འདི་དག་དྲིས་
པར་གྱུར་ཏོ། །རིགས་ཀྱི་བུ་ང་ནི་ཡུན་རིང་པོའི་བསྐལ་པ་ཚད་མེད་མཐའ་ཡས་དཔག་ཏུ་མེད་པ་བྱེ་བ་ཁྲག་ཁྲིག་བརྒྱ་སྟོང་གི་བར་དུ་ནད་ཀྱི་དངོས་པོ་དང་བྲལ་བས་བསྙེངས་ཏེ་ཉལ་བ་ཡང་ཡོངས་སུ་སྤོང་ངོ་། །འོད་སྲུང་སྔོན་བསྐལ་པ་ཚད་མེད་གྲངས་
མེད་པ་འདས་པ་དེའི་ཚེ་དེའི་དུས་ན་སངས་རྒྱས་བཅོམ་ལྡན་འདས་བླ་མེད་རྒྱལ་བ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པ། མཁྱེན་པ་དང་རྐང་པར་ལྡན་པ་བདེ་བར་གཤེགས་པ་འཇིག་རྟེན་རིག་པ། བླ་ན་མེད་
པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་མངོན་པར་བྱུང་ནས། ཉན་ཐོས་རྣམས་ལ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་རྒྱས་པར་ཕྱེ་ཞིང་བསྟན་
ཏེ། དོན་རྟོགས་པར་བྱས་སོ། །དེའི་ཚེ་ན་ང་ཡང་སངས་རྒྱས་དེའི་ཉན་ཐོས་སུ་གྱུར་པས། ཡོངས་སུ་མྱ་ངན་ལས་འདས་པ་ཆེན་པོའི་མདོ་འདི་བཟུངས་སུ་བཟུང་ནས། ཀློག་པ་དང་། འདོན་པ་དང་། དོན་ཁོང་དུ་ཆུད་པ་དང་། གླེགས་བམ་དུ་འདྲི་
བ་དང་། གཞན་ལ་རྒྱས་པར་འབྱེད་ཅིང་སྟོན་པ་ལ་སོགས་པ་བྱས་ཏེ། དགེ་བའི་རྩ་བ་དེ་ཉིད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་སོ། །རིགས་ཀྱི་བུ་དེ་ཚུན་ཆད་སྡིག་པའི་ཉོན་མོངས་པའི་ལས་ཀྱིས་ངན་

47-1-187b

སོང་དུ་ལྟུང་མ་མྱོང་ངོ་། །དམ་པའི་ཆོས་ལ་སྐུར་ཏེ་ལོག་སྲེད་ཅན་གྱི་ལས་སམ། ཉུང་རུམ་དང་། དབང་པོ་མེད་པ་དང་། མཚན་གཉིས་པའི་ལུས་ཀྱང་ལེན་མ་མྱོང་ངོ་། །མཚམས་མེད་པའི་ལས་ཕ་མ་བསད་པ་དང་། དགྲ་བཅོམ་པ་བསད་པ་
དང་། མཆོད་རྟེན་བཤིག་པ་དང་། དགེ་འདུན་གྱི་དབྱེན་བྱེད་པ་དང་། སངས་རྒྱས་ཀྱི་སྐུ་ལ་ངན་སེམས་ཀྱིས་ཁྲག་ཕྱུང་བ་དང་། རྩ་བ་བཞི་ཉམས་པའི་ལས་བྱེད་མ་མྱོང་ངོ་། །དེ་ཚུན་ཆད་ལུས་དང་སེམས་རབ་ཏུ་བདེ་བར་གྱུར་ཀྱི། 
སྡུག་བསྔལ་གྱིས་གདུངས་པར་མ་གྱུར་ཏོ། །འོད་སྲུང་ང་ལ་ནི་ཡང་དག་པར་ན་ནད་ཐམས་ཅད་མེད་དོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ནི་ཡུན་རིང་པོ་ནས་ནད་ཐམས་ཅད་ཡོངས་སུ་སྤངས་པའི་ཕྱིར་རོ། །འོད་སྲུང་སོ་
སོའི་སྐྱེ་བོ་དག་ནི་ཐེག་པ་ཆེན་པོ་ཤིན་ཏུ་རྒྱས་པ་ལས་དགོངས་ཏེ་གསུངས་པའི་དོན་མི་ཤེས་པས་ན་དེ་བཞིན་གཤེགས་པ་ནི་ཡང་དག་པར་ནད་ཡོད་དོ་སྙམ་སེམས་སོ། །འོད་སྲུང་དེ་བཞིན་གཤེགས་པ་ནི་མིའི་ནང་ན་སེང་གེའོ་ཞེས་
བྱ་བ་དེ་ཡང་དེ་བཞིན་གཤེགས་པ་ནི་ཡང་དག་པར་ན་སེང་གེ་མ་ཡིན་ཏེ། དེ་སྐད་ཅེས་གསུངས་པ་དེ་ནི་དེ་བཞིན་གཤེགས་པས་དགོངས་ཏེ་གསུངས་པ་ཡིན་པར་རིག་པར་བྱའོ། །འོད་སྲུང་དེ་བཞིན་གཤེགས་པ་ནི་མིའི་ནང་ན་ཀླུ་
ཆེན་པོ་ཞེས་བྱ་བ་ཡང་ང་ནི་བསྐལ་པ་ཚད་མེད་པའི་བར་དུ་ལས་དེ་དག་ཡོངས་སུ་སྤངས་པ་ཡིན་ནོ། །འོད་སྲུང་དེ་ལ་དེ་བཞིན་གཤེགས་པ་ནི་མི་ཡིན་ནོ། །ལྷ་ཡིན་ནོ་ཞེས་ཟེར་ཏེ། ཡང་དག་པར་ན་ང་ནི་མི་ཡང་མ་
ཡིན། ལྷ་ཡང་མ་ཡིན། གནོད་སྦྱིན་མ་ཡིན། དྲི་ཟ་མ་ཡིན། ལྷ་མ་ཡིན་མ་ཡིན། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་མ་ཡིན། བདག་མ་ཡིན། སྲོག་མ་ཡིན། འཚོ་བ་མ་ཡིན། ཤེད་
ཅན་མ་ཡིན། ཤེད་བདག་མ་ཡིན། བྱས་པ་མ་ཡིན། མ་བྱས་པ་མ་ཡིན། ཚོར་བ་མ་ཡིན། མི་ཚོར་བ་མ་ཡིན། བཅོམ་ལྡན་འདས་མ་ཡིན། ཉན་ཐོས་མ་ཡིན། སྨྲ་བ་མ་ཡིན། མི་སྨྲ་བ་མ་ཡིན་ཏེ། དེ་སྐད་ཅེས་

47-1-188a

གསུངས་པ་དེ་དག་ཐམས་ཅད་ནི་དེ་བཞིན་གཤེགས་པས་དགོངས་ཏེ་གསུངས་པ་ཡིན་པར་རིག་པར་བྱའོ། །འོད་སྲུང་དེ་ལ་དེ་བཞིན་གཤེགས་པ་ནི་རྒྱ་མཚོ་དང་འདྲ་བའོ། །རི་རབ་དང་འདྲ་བའོ་ཞེས་ཀྱང་བྱ་སྟེ། ཡང་དག་པར་ན་དེ་བཞིན་གཤེགས་པ་
ནི་ལན་ཚྭའི་རོ་བྲོ་བ་མ་ཡིན། བྲག་ཆ་ལྟ་བུ་མ་ཡིན་ཏེ། དེ་སྐད་ཅེས་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་དེ་བཞིན་གཤེགས་པ་ནི་པུན་ད་རི་ཀ་དང་འདྲ་བའོ་ཞེས་ཀྱང་བྱ་སྟེ། ཡང་དག་པར་ན་དེ་བཞིན་གཤེགས་
པ་ནི་པུན་ད་རི་ཀ་མ་ཡིན་ཏེ། དེ་སྐད་ཅེས་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་དེ་བཞིན་གཤེགས་པ་ནི་ཕ་མ་ལྟ་བུའོ་ཞེས་ཀྱང་བྱ་སྟེ། དེ་བཞིན་གཤེགས་པ་ནི་ཡང་དག་པར་ན་ཕ་མ་མ་ཡིན་གྱི། ད་སྐད་ཅེས་
གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་དེ་བཞིན་གཤེགས་པ་ནི་དེད་དཔོན་ཆེན་པོ་ཞེས་ཀྱང་བྱ་སྟེ། དེ་བཞིན་གཤེགས་པ་ནི་ཡང་དག་པར་ན་དེད་དཔོན་ཆེན་པོ་མ་ཡིན་གྱི། དེ་སྐད་ཅེས་གསུངས་པ་དེ་ཡང་དེ་བཞིན་
གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་དེ་བཞིན་གཤེགས་པ་ནི་ཚོང་དཔོན་དང་འདྲ་བའོ་ཞེས་ཀྱང་བྱ་སྟེ། ཡང་དག་པར་ན་དེ་བཞིན་གཤེགས་པ་ནི་ཚོང་དཔོན་མ་ཡིན་གྱི། དེ་སྐད་ཅེས་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་
པ་ཡིན་ནོ། །འོད་སྲུང་དེ་བཞིན་གཤེགས་པ་ནི་བདུད་བཅོམ་པ་ཞེས་ཀྱང་བྱ་སྟེ། ཡང་དག་པར་ན་དེ་བཞིན་གཤེགས་པ་ལ་ངན་སེམས་མེད་ཀྱི། དེ་དག་གདུལ་བའི་ཕྱིར་དེ་སྐད་ཅེས་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་
སྲུང་དེ་བཞིན་གཤེགས་པ་ནི་འབྲུམ་བུ་མ་རུངས་པ་གསོ་བའོ་ཞེས་བྱ་སྟེ། ཡང་དག་པར་ན་དེ་བཞིན་གཤེགས་པ་ནི་འབྲུམ་བུ་གསོ་བའི་མཁན་པོ་མ་ཡིན་གྱི། དེ་སྐད་ཅེས་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་
ངས་སྔར་གསུངས་པ་ལྟར། རིགས་ཀྱི་བུ་འམ་རིགས་ཀྱི་བུ་མོ་གང་ཞིག་ལུས་དང་། ངག་དང་ཡིད་ཀྱི་ལས་ཡོངས་སུ་དག་པར་སྦྱོང་བ་དེ་ཡང་ཐ་མ་འཆི་བའི་དུས་བྱེད་པ་ན་གཉེན་བཤེས་ཡོད་མོད་ཀྱི། དེའི་རོ་གལ་ཏེ་ན་མེར་སྲེག་གོ། །གལ་ཏེ་ན་ཆུའི་ནང་ངམ། 

47-1-188b

དུར་ཁྲོད་དུ་འདོར་ཏེ། ཝ་དང་། ཁྱི་དང་། སྤྱང་ཀི་ལ་སོགས་པས་ཟོས་ཀྱང་། དེའི་རྣམ་པར་ཤེས་པ་ནི་མཐོ་རིས་སུ་སྐྱེའོ། །དེ་ལྟར་དེའི་སེམས་ནི་སོང་བ་དང་། འོང་བ་ཡང་མེད། ཕྱིན་པའི་གནས་ཀྱང་མེད་ཀྱི། སྔ་ཕྱིར་འདྲ་བའི་སྐད་ཅིག་མའི་རྒྱུན་ཡིན་གྱི། ཐ་དད་པ་ནི་
མེད་དོ་ཞེས་དེ་སྐད་གསུངས་པ་དེ་ཡང་དེ་བཞིན་གཤེགས་པས་དགོངས་ཏེ་གསུངས་པ་ཡིན་ནོ། །འོད་སྲུང་ད་ལྟར་ང་ནའོ་ཞེས་བྱ་བ་དེ་ཡང་དེ་དང་འདྲ་སྟེ། དེ་བཞིན་གཤེགས་པས་དགོངས་ཏེ་གསུངས་པ་ཡིན་ཏེ། དེ་བས་ན་སྲོག་ལ་ལྟ་བས་ང་རྒྱབ་སྙུང་གིས་འཇམ་དཔལ་
ཁྱོད་འཁོར་རྣམ་བཞི་ལ་ཆོས་སྟོན་ཅིག་ཅེས་བྱས་པ་ཡིན་ནོ། །འོད་སྲུང་ཡང་དག་པར་ན་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་མི་སྙུང་སྟེ། གློ་གཡས་པ་ཕབ་ནས་ཉལ་བ་ཡང་མེད་ལ། མཐར་ཡོངས་སུ་མྱ་ངན་ལས་འདས་པ་ཡང་མེད་དོ། །
འོད་སྲུང་ཡོངས་སུ་མྱ་ངན་ལས་འདས་པ་ཆེན་པོ་འདི་ནི་སངས་རྒྱས་རྣམས་ཀྱི་ཏིང་ངེ་འཛིན་ཤིན་ཏུ་ཟབ་མོ་ཡིན་གྱི། ཉན་ཐོས་དང་། རང་སངས་རྒྱས་རྣམས་ཀྱི་སྤྱོད་ཡུལ་མ་ཡིན་ནོ། །འོད་སྲུང་ཁྱོད་སྔར་འདྲི་བ་ལས། དེ་བཞིན་གཤེགས་པ་ཅིའི་སླད་དུ་གཟིམས་ཏེ་
མི་བཞེངས། ཞལ་ཟས་ཀྱང་མི་གསོལ། འཁོར་རྣམས་ལ་གདམས་པ་དང་། འཚོ་ཚིས་ཀྱི་ལས་ལ་སོགས་པ་ཡང་མི་སྟོན་ཅེས་དྲིས་པ་ནི། འོད་སྲུང་འདི་ལྟ་སྟེ། ནམ་མཁའ་ཉིད་ལ་ནི་འདུག་པ་འམ། ལངས་པ་ཡང་མེད། ཟས་དང་སྐོམ་འདོད་པ་ཡང་མེད། 
འཁོར་རྣམས་ལ་གདམས་པ་དང་། འཚོ་ཚིས་ཀྱི་ལས་སྟོན་པ་མེད། འོང་བ་དང་སོང་བ་དང་། སྐྱེ་བ་དང་། འགོག་པ་དང་། རྒ་བ་དང་། ལང་འཚོ་བ་དང་། བྱུང་བ་དང་། ནུབ་པ་དང་། སྨྲས་པ་དང་། འཆག་པ་དང་། གྲོལ་བ་དང་། འཆིང་བ་ཞེས་བྱ་བ་མེད་དེ། བདག་ཅེས་བརྗོད་
པ་མེད། གཞན་ཞེས་བརྗོད་པ་མེད། བདག་གྲོལ་བ་ཡང་མེད། གཞན་དགྲོལ་བ་ཡང་མེད། བདེ་བ་ཡང་མ་ཡིན། ན་བ་ཡང་མ་ཡིན་ནོ། །རིགས་ཀྱི་བུ་སངས་རྒྱས་བཅོམ་ལྡན་འདས་ཀྱང་དེ་དང་འདྲ་སྟེ། ནམ་མཁའ་ལྟ་བུ་ཡིན་ན། ནད་ཀྱིས་སྡུག་བསྔལ་
བ་ག་ལ་ཞིག་ཡོད། འོད་སྲུང་འཇིག་རྟེན་ན་གང་ཟག་རྣམ་པ་གསུམ་གྱི་ནད་ནི་ཤིན་ཏུ་ཡང་གསོ་དཀའོ། །གང་ཞེ་ན། ཐེག་པ་ཆེན་པོ་ལ་སྐུར་པ་དང་། མཚམས་མེད་པ་ལྔ་བྱས་པ་དང་། ལོག་སྲེད་ཅན་ཏེ། ནད་རྣམ་པ་འདི་གསུམ་ནི་འཇིག་རྟེན་ན་ཤིན་

47-1-189a

ཏུ་ཡང་གསོ་དཀའ་སྟེ། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔས་ཀྱང་གསོ་ནུས་པ་མ་ཡིན་ནོ། །རིགས་ཀྱི་བུ་དཔེར་ན་ངེས་པར་འཆི་བའི་ནད་གསོ་དཀའ་བ་ནི། ནད་གཡོག་དང་། ཡིད་བཞིན་གྱི་སྨན་དུ་ལྡན་ནམ། 
ནད་གཡོག་མེད་དམ། ཡིད་བཞིན་དུ་སྨན་དང་མི་ལྡན་ན་ཡང་ནད་དེ་ནི་ངེས་པར་གསོར་མི་རུང་བས་ན། མི་དེ་གདོན་མི་ཟ་བར་འཆིའོ། །རིགས་ཀྱི་བུ་གང་ཟག་རྣམ་པ་གསུམ་པོ་དེ་ཡང་དེ་དང་འདྲ་སྟེ། གལ་ཏེ་ཉན་ཐོས་སམ། རང་སངས་རྒྱས་སམ། བྱང་ཆུབ་
སེམས་དཔས་ཆོས་བསྟན་ཏམ། ཆོས་མ་བསྟན་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་འགྱུར་གྱི། ཆོས་མ་ཐོས་པས་སེམས་སྐྱེད་པར་འགྱུར་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་དུ་གཞུག་མི་ནུས་
སོ། །འོད་སྲུང་དཔེར་ན་ནད་གསོར་རུང་བ། ནད་གཡོག་དང་། ཡིད་བཞིན་གྱི་སྨན་དང་ལྡན་ན་འཚོ་བར་འགྱུར་རོ། །རྣམ་པ་གསུམ་པོ་དང་མི་ལྡན་ན་འཚོ་བར་མི་འགྱུར་ཏེ། ཉན་ཐོས་དང་། རང་སངས་རྒྱས་ཀྱང་དེ་དང་འདྲ་སྟེ། སངས་རྒྱས་དང་བྱང་ཆུབ་སེམས་དཔའ་
ལས་ཆོས་ཐོས་ན་དེ་མ་ཐག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་འགྱུར་གྱི། ཆོས་མ་ཐོས་པས་སེམས་བསྐྱེད་པར་འགྱུར་བ་མ་ཡིན་ནོ། །འོད་སྲུང་དཔེར་ན་ནད་པ་ཞིག་ནད་གཡོག་དང་། ཡིད་བཞིན་གྱི་སྨན་དང་ལྡན་ཡང་རུང་། 
ནད་གཡོག་དང་། ཡིད་བཞིན་གྱི་སྨན་དུ་མི་ལྡན་ཡང་རུང་སྟེ། འཚོ་བར་འགྱུར་བ་ཡོད་དེ། དེ་བཞིན་དུ་གང་ཟག་རྣམ་པ་གཅིག་ཀྱང་དེ་དང་འདྲ་སྟེ། ཉན་ཐོས་དང་ཕྲད་ཀྱང་རུང་། ཉན་ཐོས་དང་མ་ཕྲད་ཀྱང་རུང་། རང་སངས་རྒྱས་དང་ཕྲད་ཀྱང་རུང་། རང་སངས་རྒྱས་དང་མ་
ཕྲད་ཀྱང་རུང་། བྱང་ཆུབ་སེམས་དཔའ་དང་ཕྲད་ཀྱང་རུང་། བྱང་ཆུབ་སེམས་དཔའ་དང་མ་ཕྲད་ཀྱང་རུང་། དེ་བཞིན་གཤེགས་པ་དང་ཕྲད་ཀྱང་རུང་། དེ་བཞིན་གཤེགས་པ་དང་མ་ཕྲད་ཀྱང་རུང་། ཆོས་ཐོས་ཀྱང་རུང་། ཆོས་མ་ཐོས་ཀྱང་རུང་སྟེ། བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་བ་ཡོད་དོ། །འདི་ལྟ་སྟེ། གང་ཟག་སུ་ཞིག་བདག་གི་ཕྱིར་རམ། གཞན་གྱི་ཕྱིར་རམ། གལ་ཏེ་འཇིགས་པའི་ཕྱིར་རམ། རྙེད་པ་དང་གྲགས་པའི་ཕྱིར་རམ། གཡོ་སྒྱུའི་ཕྱིར་རམ། གཞན་བསླུ་བ་ཅན་

47-1-189b

གྱི་ཕྱིར་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདི་བྲིས་སམ། འདྲིར་བཅུག་གམ། འཆང་ངམ། འཛིན་ཏམ། ཀློག་གམ། འདོན་ཏམ། སྟི་སྟང་དང་བཅས་པས་མཆོད་པ་བྱེད་དམ། གཞན་ལ་སྟོན་ཅིང་འཆད་པའོ། །འོད་སྲུང་གང་ཟག་རྣམ་པ་
འདི་ལྔ་ནི་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལ་སྐྱོན་དང་བཅས་པ་བཞིན་དུ་སྤྱོད་ཀྱི། དེ་བཞིན་གཤེགས་པ་ནི་མ་ཡིན་ནོ། །ལྔ་གང་ཞེ་ན། འདི་ལྟ་སྟེ། ཉོན་མོངས་པ་རྣམ་པ་གསུམ་བཅད་ནས། རྒྱུན་ཏུ་ཞུགས་པའི་འབྲས་བུ་
ཐོབ་པས་སེམས་ཅན་དམྱལ་བ་དང་། བྱོལ་སོང་དང་། ཡི་དགས་ཀྱི་ཁམས་སུ་མི་སྐྱེའི། ལྷ་དང་མིར་ལན་བདུན་ལྡོག་པ། སྡུག་བསྔལ་ཐམས་ཅད་བཅད་ནས་མྱ་ངན་ལས་འདས་པར་ཞུགས་པ་སྟེ། འོད་སྲུང་དེ་ནི་སྐྱོན་དང་བཅས་པས་སྤྱོད་པའི་གང་
ཟག་གཅིག་ཅེས་བྱ་སྟེ། མ་འོངས་པའི་དུས་ཀྱི་བསྐལ་པ་བརྒྱད་ཁྲི་འདས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་རོ། །འོད་སྲུང་ཉོན་མོངས་པ་ཐ་མ་གསུམ་པོ་བཅད་ནས། འདོད་ཆགས་དང་ཞེ་སྡང་
དང་། གཏི་མུག་སྲབ་པར་གྱུར་ཏེ། ལན་ཅིག་ཕྱིར་ལྡོག་པའི་འབྲས་བུ་འཐོབ་པས། ལན་ཅིག་ཕྱིར་ལྡོག་སྟེ་སྡུག་བསྔལ་ཡོངས་སུ་བཅད་ནས་མྱ་ངན་ལས་འདས་པར་ཞུགས་པ་ནི། འོད་སྲུང་སྐྱོན་དང་བཅས་པར་སྤྱོད་པ་གཉིས་ཤེས་བྱ་སྟེ། 
དེ་ཡང་བསྐལ་པ་དྲུག་ཁྲི་འདས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་འགྱུར་རོ། །འོད་སྲུང་གང་ཟག་གསུམ་པོ་ནི་ཉོན་མོངས་པ་ཐ་མ་ལྔ་པོ་བཅད་དེ་ཕྱིར་མི་ལྡོག་པའི་འབྲས་བུ་ཐོབ་པས་ཕྱིར་མི་ལྡོག་སྟེ། སྡུག་བསྔལ་ཐམས་
ཅད་བཅད་ནས་མྱ་ངན་ལས་འདས་པར་ཞུགས་པ་ནི། སྐྱོན་དང་བཅས་པར་སྤྱོད་པ་གསུམ་ཞེས་བྱ་སྟེ། དེ་ཡང་བསྐལ་པ་བཞི་ཁྲི་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་འགྱུར་རོ། །འོད་སྲུང་གང་ཟག་བཞི་པོ་ནི་
འདོད་ཆགས་དང་། ཞེ་སྡང་དང་། གཏི་མུག་ཡོངས་སུ་བཅད་ནས། དགྲ་བཅོམ་པའི་འབྲས་བུ་ཐོབ་པས་ཉོན་མོངས་པ་ལྷག་མ་མ་ལུས་པར་མྱ་ངན་ལས་འདས་པར་ཞུགས་པ་ནི་བསེ་རུ་ལྟར་གཅིག་ཏུ་སྤྱོད་པ་ཡང་མ་ཡིན་ཏེ། དེ་ནི་སྐྱོན་དང་བཅས་

47-1-190a

པར་སྤྱོད་པ་བཞི་ཞེས་བྱ་སྟེ། དེ་ཡང་བསྐལ་པ་ཉི་ཁྲི་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་འགྱུར་རོ། །འོད་སྲུང་གང་ཟག་ལྔ་པ་ཡང་འདོད་ཆགས་དང་། ཞེ་སྡང་དང་། གཏི་མུག་ཡོངས་སུ་
བཅད་ནས། རང་སངས་རྒྱས་ཀྱི་འབྲས་བུ་ཐོབ་སྟེ། ཉོན་མོངས་པ་ལྷག་མ་མ་ལུས་པར་མྱ་ངན་ལས་འདས་པར་ཞུགས་ཏེ། བསེ་རུ་ལྟར་གཅིག་པུ་སྤྱོད་པ་ནི་སྐྱོན་དང་བཅས་པར་སྤྱོད་པ་ལྔ་ཞེས་བྱ་སྟེ། དེ་ཡང་བསྐལ་པ་ཁྲི་འདས་ནས་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་རོ། །འོད་སྲུང་དེ་དག་ནི་སྐྱོན་དང་བཅས་པར་སྤྱོད་པའི་གང་ཟག་ལྔ་ཞེས་བྱ་སྟེ། དེ་བཞིན་གཤེགས་པ་ནི་མ་ཡིན་ནོ། །
འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས། འཁོར་མང་པོས་ཀུན་ནས་དྲིས་པ་ཞེས་བྱ་བའི་ལེའུ་སྟེ་ལྔའོ།། །། དེ་ནས་བཅོམ་ལྡན་འདས་ཀྱིས་བྱང་ཆུབ་
སེམས་དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དག ། ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདི་ལས། སྤྱོད་པ་རྣམ་ལྔ་ཡིད་ལ་བྱའོ། །ལྔ་གང་ཞེ་ན། འཕགས་པའི་སྤྱོད་
པ་དང་། ཚངས་པའི་སྤྱོད་པ་དང་། ལྷའི་སྤྱོད་པ་དང་། བྱིས་པའི་སྤྱོད་པ་དང་། སྐྱོན་དང་བཅས་པའི་སྤྱོད་པའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སྤྱོད་པ་ལྔ་པོ་འདི་ལ་ཤིན་ཏུ་ནན་ཏན་བྱའོ། །གཞན་ཡང་སྤྱོད་པ་
གཅིག་སྟེ། དེ་བཞིན་གཤེགས་པའི་སྤྱོད་པའོ། །དེ་ཡང་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདིའོ། །འོད་སྲུང་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་འཕགས་པའི་སྤྱད་པ་སྤྱོད་པ་ཡིན་ཞེ་ན། 
བྱང་ཆུབ་སེམས་དཔའ་སེམས་དཔའ་ཆེན་པོས་གལ་ཏེ་ཉན་ཐོས་སམ། དེ་བཞིན་གཤེགས་པ་ལས་ཡོངས་སུ་མྱ་ངན་ལས་འདས་པའི་མདོ་སྡེ་འདི་ཐོས་ནས་དད་པ་བསྐྱེད་དོ། །དད་པ་བསྐྱེད་ནས། འདི་སྙམ་དུ་བསམ་པ་ཡིད་ལ་བྱའོ། །

47-1-190b

སངས་རྒྱས་བཅོམ་ལྡན་འདས་རྣམས་ལ་བླ་ན་མེད་པའི་ལམ་ཡོད་དེ། ཡང་དག་པའི་ཆོས་ཆེན་པོ་ཡོད་པས། འཁོར་མང་པོ་རྣམས་ཡང་དག་པར་སྤྱོད་དེ། གཞན་ཡང་ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་ཡོད་དེ། བདག་ཀྱང་དེ་ལ་
དད་པ་དང་། མོས་པར་བྱའོ། །ཐེག་པ་ཆེན་པོའི་མདོ་སྡེ་ཚོལ་བའི་ཕྱིར་ཤིན་ཏུ་ཆགས་པའི་ཆུང་མ་དང་བུ་དང་། འཁོར་རྣམས་དང་། གནས་པའི་ཁང་ཁྱིམ་དང་། གསེར་དང་དངུལ་དང་། རིན་པོ་ཆེ་དང་། རྒྱན་དམ་པ་དང་། མེ་ཏོག་དང་། 
སྤོས་དང་། རོལ་མོ་དང་། བྲན་ཕོ་དང་། བྲན་མོ་དང་། ལས་བྱེད་པའི་མི་དང་། ཁྱེའུ་དང་། བུ་མོ་དང་། བལ་གླང་དང་། རྟ་དང་། ཤིང་རྟ་དང་། བ་གླང་དང་། ལུག་དང་། བྱ་དང་། ཁྱི་དང་། ཕག་ལ་སོགས་པ་ཡང་ཡོངས་སུ་གཏང་བར་བྱའོ། །
ཡང་འདི་སྙམ་དུ་སེམས་ཏེ། ཁྱིམ་ན་གནས་པ་ཤིན་ཏུ་དོག་པ་དག་ནི་བཙོན་ར་དང་མཚུངས་ཏེ། ཉོན་མོངས་པ་ཐམས་ཅད་ཀྱང་དེའི་དབང་གིས་སྐྱེའོ། །རབ་ཏུ་བྱུང་བ་ཤིན་ཏུ་ཡངས་པ་ནི་ནམ་མཁའ་དང་འདྲ་སྟེ། དགེ་བའི་ཆོས་
ཐམས་ཅད་ཀྱང་དེའི་དབང་གིས་སྐྱེ་ཞིང་འཕེལ་ལོ། །ཁྱིམ་ན་གནས་པས་འཚོ་བའི་མཐར་མི་ཕྱིན་ཀྱི། བདག་ཚངས་པར་སྤྱོད་པའི་ཕྱིར་སྐྲ་དང་ཁ་སྤུ་བྲེགས་ཏེ། ཁྱིམ་ནས་ཁྱིམ་མ་ཡིན་པར་རབ་ཏུ་འབྱུང་ཞིང་བྱང་ཆུབ་ལ་ནན་ཏན་
བྱའོ་སྙམ་དུ་བསམས་ནས། བདག་གདོན་མི་ཟ་བར་རབ་ཏུ་བྱུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ནན་ཏན་བྱེད་དོ། །བྱང་ཆུབ་སེམས་དཔའ་དེ་ལྟར་རབ་ཏུ་བྱུང་བའི་ཚེ། བདུད་སྡིག་ཏོ་ཅན་ཤིན་ཏུ་
སྡུག་བསྔལ་བར་གྱུར་ནས། འདི་སྐད་དུ་བྱང་ཆུབ་སེམས་དཔའ་འདི་ཡང་ང་དང་རྩོད་པར་འགྱུར་རོ་ཞེས་ཟེར་རོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་གཞན་དང་ལྟ་ག་ལ་ཞིག་རྩོད་དེ། དེའི་ཚེ་ན་བྱང་ཆུབ་སེམས་དཔའ་དེ་དགེ་འདུན་གྱི་གནས་
སུ་སོང་ནས། གལ་ཏེ་དེ་བཞིན་གཤེགས་པ་འམ། དེ་བཞིན་གཤེགས་པའི་ཉེ་གནས་སྤྱོད་ལམ་དང་ལྡན་པ། དབང་པོ་ཞི་བ། སེམས་མཉེན་ཞིང་དེས་པ། ཡོངས་སུ་དག་པ་རབ་ཏུ་ཞི་བའི་དྲུང་དུ་སོང་ནས། རབ་ཏུ་འབྱུང་བར་གསོལ་ཏེ། 

47-1-191a

སྐྲ་དང་ཁ་སྤུ་བྲེགས་ནས། ཆོས་གོས་ངུར་སྨྲིག་གྱོན་ནོ། །དེ་ལྟར་རབ་ཏུ་བྱུང་ནས། ཚུལ་ཁྲིམས་ཡོངས་སུ་བསྲུངས་ཏེ། སྤྱོད་ལམ་མི་ཉམས་པ་དང་། སྤྱོད་ལམ་མཛེས་པ་དང་། ཉེས་པ་མི་བྱེད་པ་དང་། ཆུང་ངུ་ན་ཉེས་
བྱས་ཀྱི་བར་དུ་ཡང་འཇིགས་པའི་སེམས་སྐྱེད་ཅིང་། ཚུལ་ཁྲིམས་སྲུང་བའི་སེམས་རྡོ་རྗེ་ལྟར་བརྟན་པའོ། །རིགས་ཀྱི་བུ་དཔེར་ན་མི་ཞིག་རྐྱལ་པ་ཐོགས་ཏེ་རྒྱ་མཚོར་ཞུགས་པ་ལས། དེའི་ཚེ་རྒྱ་མཚོའི་ནང་ནས་སྲིན་པོ་ཞིག་གིས་མི་དེ་ལ་
རྐྱལ་པ་བསླངས་པ་ལས། མི་དེས་དེ་སྐད་ཅེས་ཐོས་ནས། དེ་འདི་སྙམ་དུ་སེམས་ཏེ། བདག་ཅི་སྟེ་རྐྱལ་པ་འདི་བྱིན་ན་གདོན་མི་ཟ་བར་ཆུའི་ནང་དུ་ནུབ་སྟེ་འཆིའོ་སྙམ་བསམས་ནས། སྲིན་པོ་དེ་ལ་འདི་སྐད་ཅེས་སྨྲས་སོ། །ཁྱོད་ཀྱིས་བདག་བསད་ཀྱང་བླའི་
རྐྱལ་པ་ནི་སྦྱིན་དུ་མི་རུང་ངོ་། །སྲིན་པོས་ཡང་སྨྲས་པ། རིལ་ཀྱིས་སྦྱིན་དུ་མི་རུང་ན་ཡང་ཕྱེད་ཙམ་ཞིག་སྦྱིན་དུ་མི་རུང་ངམ་ཞེས་སྨྲས་ཀྱང་མ་སྟེར་རོ། །སྲིན་པོས་ཡང་སྨྲས་པ། ཕྱེད་སྦྱིན་དུ་མི་རུང་ན་སུམ་ཆ་ཙམ་ཞིག་བྱིན་ཅིག་ཅེས་བྱས་ཀྱང་མ་སྟེར་རོ། 
སྲིན་པོས་ཡང་སྨྲས་པ། སུམ་ཆ་ཙམ་སྦྱིན་དུ་མི་རུང་ན་ཡང་ལག་མཐིལ་ཙམ་བྱིན་ཅིག་ཅེས་སྨྲས་ཀྱང་མ་སྟེར་རོ། །སྲིན་པོས་ཡང་སྨྲས་པ། འདི་ལྟར་ཁྱོད་ཀྱིས་ལག་མཐིལ་ཙམ་ཡང་མི་སྦྱིན་ན། བདག་ནི་ཤིན་ཏུ་ལྟོགས་པས་སྡུག་བསྔལ་གྱིས་ཡོངས་སུ་
གདུངས་ན་རྡུལ་གྱི་ཆ་ཤས་ཙམ་ཞིག་བདག་ལ་སྩལ་དུ་གསོལ། མི་དེས་སྨྲས་པ། ཁྱོད་སློང་བ་འདི་ཡང་ཆེན་པོ་མ་ཡིན་ཏེ་ཤིན་ཏུ་ཡང་ཆུང་མོད་ཀྱི། འོན་ཀྱང་བདག་རྒྱ་མཚོ་མ་རྒལ་ལ། ཕ་རོལ་གྱི་མཐའ་ཉེ་རིང་ཡང་མ་རྟོགས་པར་ཁྱོད་ལ་བྱིན་པར་གྱུར་ན། 
དབུགས་ཕྱིར་འབྱུང་སྟེ། རྒྱ་མཚོའི་བགེགས་ལས་ཀྱང་ག་ལ་ཞིག་ཐར་ཏེ། ཆུའི་ནང་དུ་བདག་འཆི་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་ཡོངས་སུ་བསྲུང་བ་ཡང་དེ་དང་འདྲ་སྟེ། ཇི་ལྟར་རྒྱ་མཚོ་རྒལ་བའི་
མི་དེ་རྐྱལ་པ་ཕངས་པ་བཞིན་དུ་བྱང་ཆུབ་སེམས་དཔའ་ཡང་ཚུལ་ཁྲིམས་སྲུང་བའི་ཚེ་ན། ཉོན་མོངས་པའི་སྲིན་པོ་མ་རུངས་པ་རྣམས་བྱང་ཆུབ་སེམས་དཔའ་ལ་འདི་སྐད་ཅེས་ཟེར་རོ། །ཁྱོད་བདག་སྨྲ་བ་ལ་ཡིད་ཆེས་པར་གྱིས་ཤིག་དང་ཁྱོད་ལ་སླུ་བ་མ་

47-1-191b

ཡིན་ཏེ། ཁྱོད་ཀྱིས་ཕས་ཕམ་པ་བཞི་ཉམས་ཀྱང་ཚུལ་ཁྲིམས་གཞན་སྲུང་ན་དེའི་རྒྱུ་དེའི་རྐྱེན་ཀྱིས་ཁྱོད་རབ་ཏུ་བདེ་བའི་མྱ་ངན་ལས་འདའ་བ་འཐོབ་པར་འགྱུར་རོ་ཞེས་ཟེར་རོ། །དེའི་ཚེ་ན། བྱང་ཆུབ་སེམས་དཔའ་དེ་འདི་སྐད་ཅེས་ཟེར་རོ། །བདག་ཚུལ་
ཁྲིམས་དེ་དག་བསྲུངས་པས་མཚམས་མེད་པའི་སེམས་ཅན་དམྱལ་བར་ལྟུང་ཡང་བླའི། ཚུལ་ཁྲིམས་ཉམས་ཏེ་མཐོ་རིས་ཀྱི་ལྷར་སྐྱེ་བ་མི་འདོད་དོ། །ཉོན་མོངས་པའི་སྲིན་པོ་ཡང་འདི་སྐད་ཅེས་ཟེར་ཏེ། ཁྱོད་ཕས་ཕམ་པ་བཞི་ཉམས་པར་མི་འདོད་ན། 
དགེ་འདུན་གྱི་ལྷག་མ་མ་བསྲུངས་ཀྱང་དེའི་རྒྱུ་དེའི་རྐྱེན་གྱིས་རབ་ཏུ་བདེ་བའི་མྱ་ངན་ལས་འདའ་བ་ཐོབ་པར་འགྱུར་རོ་ཞེས་སྨྲས་ཀྱང་། དེའི་རྗེས་སུ་མི་འཇུག་གོ། །ཉོན་མོངས་པའི་སྲིན་པོ་ཡང་འདི་སྐད་དུ། ཁྱོད་དགེ་འདུན་གྱི་ལྷག་མ་ཉམས་པར་མི་འདོད་ན། 
ཉེས་པ་སྦོམ་པོའི་ཆོས་ཉམས་ཀྱང་དེའི་རྒྱུ་དེའི་རྐྱེན་ཀྱིས་ཁྱོད་རབ་ཏུ་བདེ་བའི་མྱ་ངན་ལས་འདའ་བ་ཐོབ་པར་འགྱུར་རོ། །ཞེས་སྨྲས་ཀྱང་། བྱང་ཆུབ་སེམས་དཔའ་ཚིག་དེའི་རྗེས་སུ་མི་འཇུག་གོ། །ཉོན་མོངས་པའི་སྲིན་པོ་ཡང་འདི་སྐད་དུ། ཁྱོད་ཉེས་པ་
སྦོམ་པོའི་ཆོས་ཉམས་པར་མི་འདོད་ན། སྤང་བ་ལྟུང་བའི་ཆོས་ཉམས་ཀྱང་དེའི་རྒྱུ་དེའི་རྐྱེན་གྱིས་རབ་ཏུ་བདེ་བའི་མྱ་ངན་ལས་འདའ་བ་ཐོབ་པར་འགྱུར་རོ་ཞེས་སྨྲས་ཀྱང་། བྱང་ཆུབ་སེམས་དཔའ་ཚིག་དེའི་རྗེས་སུ་མི་འཇུག་གོ། །སྲིན་པོས་ཡང་སྨྲས་པ། 
ཁྱོད་དེ་ལྟར་སྤང་བས་ལྟུང་བའི་ཆོས་ཉམས་པར་མི་འདོད་ན་ལྟུང་བ་དགུ་བཅུ་ཉམས་ཀྱང་དེའི་རྒྱུ་དེའི་རྐྱེན་ཀྱིས་རབ་ཏུ་བདེ་བའི་མྱ་ངན་ལས་འདའ་བ་ཐོབ་པར་འགྱུར་རོ་ཞེས་སྨྲས་ཀྱང་། བྱང་ཆུབ་སེམས་དཔའ་ཚིག་དེའི་རྗེས་སུ་མི་འཇུག་གོ། །སྲིན་པོས་
ཡང་འདི་སྐད་དུ་ལྟུང་བ་དགུ་བཅུ་ཉམས་པར་མི་འདོད་ན། ཉེས་བྱས་ཀྱི་ཆོས་ཉམས་ཀྱང་དེའི་རྒྱུ་དེའི་རྐྱེན་ཀྱིས་རབ་ཏུ་བདེ་བའི་མྱ་ངན་ལས་འདའ་བ་ཐོབ་པར་འགྱུར་རོ་ཞེས་སྨྲས་ཀྱང་། བྱང་ཆུབ་སེམས་དཔའ་དེའི་ཚེ་འདི་སྙམ་དུ་སེམས་ཏེ། 
གལ་ཏེ་བདག་ལ་ཉེས་བྱས་ཀྱི་ཁ་ན་མ་ཐོ་བ་བྱུང་སྟེ་མ་བཤགས་མ་མཐོལ་ན་འཁོར་བའི་ཕ་རོལ་ཏུ་ཡང་མི་ཕྱིན། མྱ་ངན་ལས་འདའ་བར་ཡང་མི་འགྱུར་རོ་སྙམ་སེམས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ཆུང་ངུ་ན་ཉེས་བྱས་ལ་ཡང་

47-1-192a

རྡོ་རྗེ་ལྟ་བུའི་སེམས་ཀྱིས་སྲུང་ཞིང་འཛིན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཕས་ཕམ་པ་བཞི་སྲུང་བ་དང་། ཉེས་བྱས་སྲུང་བ་ལ་ཤིན་ཏུ་བརྟན་ཏེ་ཐ་དད་པ་མེད་དོ། །བྱང་ཆུབ་སེམས་དཔས་གལ་ཏེ་དེ་ལྟར་སྲུང་བ་ནི་
ཚུལ་ཁྲིམས་ཀྱི་ཡན་ལག་ལྔ་དང་ལྡན་པ་ཞེས་བྱའོ། །འདི་ལྟ་སྟེ་བྱང་ཆུབ་སེམས་དཔའི་ལས་ཀྱི་ངོ་བོ་ཉིད་ཡོངས་སུ་དག་པའི་ཚུལ་ཁྲིམས་དང་། སྔ་མ་དང་ཕྱི་མའི་འཁོར་ཡོངས་སུ་དག་པའི་ཚུལ་ཁྲིམས་དང་། ངན་པར་རྟོག་པ་མ་ཡིན་པ་རྟོག་པ་
རྣམ་པར་དག་པའི་ཚུལ་ཁྲིམས་དང་། ཡང་དག་པའི་དྲན་པ་སྲུང་ཞིང་དྲན་པ་རྣམ་པར་དག་པའི་ཚུལ་ཁྲིམས་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་བའི་ཚུལ་ཁྲིམས་སོ། །འོད་སྲུང་གཞན་ཡང་བྱང་ཆུབ་སེམས་དཔའ་སེམས་
དཔའ་ཆེན་པོའི་ཚུལ་ཁྲིམས་ལ་རྣམ་པ་གཉིས་ཏེ། འཇིག་རྟེན་ན་ཡང་དག་པར་བསྟན་པའི་ཚུལ་ཁྲིམས་བླངས་པ་དང་། ཡང་དག་པའི་ཆོས་ཀྱི་ཚུལ་ཁྲིམས་ཐོབ་པ་སྟེ། བྱང་ཆུབ་སེམས་དཔས་གལ་ཏེ་ཡང་དག་པའི་ཆོས་ཀྱི་ཚུལ་ཁྲིམས་ཐོབ་ན། 
ནམ་དུ་ཡང་སྡིག་པ་མི་བྱེད་དོ། །འཇིག་རྟེན་ན་ཡང་དག་པར་བསྟན་པའི་ཚུལ་ཁྲིམས་བླང་བ་ནི་གསོལ་བ་དང་། བཞིའི་ལས་བྱས་པས་ཐོབ་པར་འགྱུར་རོ། །གཞན་ཡང་རིགས་ཀྱི་བུ་ཚུལ་ཁྲིམས་ལ་རྣམ་པ་གཉིས་ཏེ། རང་བཞིན་གྱིས་ལྕི་བའི་
ཚུལ་ཁྲིམས་དང་། འཇིག་རྟེན་གྱིས་དཔྱས་པ་མེད་པར་བྱེད་པའི་ཚུལ་ཁྲིམས་སོ། །རང་བཞིན་གྱིས་ལྕི་བའི་ཚུལ་ཁྲིམས་ནི་ཕས་ཕམ་པ་བཞིའོ། །འཇིག་རྟེན་གྱིས་དཔྱས་པ་མེད་པར་བྱ་བའི་ཚུལ་ཁྲིམས་ནི། ཚོང་མི་བྱེད་པ་དང་། 
བྲེ་ཕུལ་དང་། སྲང་མི་འཆོས་པ་དང་། གཞན་ལ་མི་སླུ་བ་དང་། གཞན་ཡང་རིགས་དང་མཐུ་བསྙེམས་ཏེ་གཞན་གྱི་ནོར་མི་འཕྲོག་པ་དང་། གཞན་ཡང་གནོད་སེམས་ཀྱིས་འཆིང་བ་དང་། ལས་སུ་བྱས་པ་བཤིག་སྟེ་མ་རུང་བར་བྱེད་པ་དང་། 
མེ་མར་གྱི་འོད་ཡོད་བཞིན་དུ་ཉལ་བ་དང་། ཁང་ཁྱིམ་དང་། རྨོ་བའི་ལས་བྱེད་པ་དང་། འཚོ་ཚིས་ཀྱི་ལས་ལ་སོགས་པ་བྱར་མི་རུང་བ་དང་། གཞན་ཡང་བལ་གླང་དང་། རྟ་དང་། ཤིང་རྟ་དང་། བ་གླང་དང་། ལུག་དང་། རྔ་མོ་དང་། བོང་བུ་

47-1-192b

དང་། བྱ་དང་། ཁྱི་དང་། སྤྲེའུ་དང་། རྨ་བྱ་དང་། ནེ་ཙོ་དང་། འཚོ་བྱེད་དང་། ཀོ་བྱི་ལ་དང་། ཕར་བ་དང་། སྟག་དང་། གཟིག་དང་། བྱི་ལ་དང་། ཕག་དང་། དེ་མ་ཡིན་པ་གཅན་ཟན་མ་རུངས་པ་རྣམས་དང་། ཁྱེའུ་དང་། བུ་མོ་དང་། སྐྱེས་པ་དང་། 
བུད་མེད་དང་། བྲན་ཕོ་དང་། བྲན་མོ་དང་། ལས་བྱེད་པ་མི་འཆང་མི་གསོ་བ་དང་། གཞན་ཡང་གསེར་དང་། དངུལ་དང་། བཻ་དཱུརྱ་དང་། ཤེལ་དང་། མུ་ཏིག་དང་། ཨས་མ་གར་བྷ་དང་། མུ་ས་ལ་གལ་བྷ་དང་། བྱི་རུ་དང་། ཤེལ་གྱི་སྣམ་བུ་དང་། དོ་ཤལ་ལ་
སོགས་ཏེ་རིན་པོ་ཆེ་རྣམས་དང་། ཟངས་དང་། འཁར་བ་དང་། ར་གན་གྱི་སྣོད་དང་། གདིང་བ་བར་ཏང་དང་། དྲེའུ་རྔོག་དང་། གདིང་བ་འཇམ་པོ་དང་། དེ་མ་ཡིན་པ་ཁྲེ་དང་། འབྲས་དང་། ནས་དང་གྲོ་དང་། སྲན་མ་དང་། ཟར་མ་དང་། ཟས་གཡོས་བྱས་པ་
དང་། མ་བྱས་པ་ལ་སོགས་པ་མི་འཆང་བ་དང་། རྟག་ཏུ་ཟ་གཅིག་བྱེད་ཅིང་ཡང་དང་ཡང་མི་ལེན་པ་དང་། རྟག་ཏུ་བསོད་སྙོམས་སྤྱོད་པ་དང་། དགེ་འདུན་གྱི་ནང་ན་ཟས་ཀྱི་བྱ་བ་བྱེད་པ་དང་། རྟག་ཏུ་ཆོག་ཤེས་པ་དང་། ཁུད་པར་འགྲོན་དུ་བོས་པར་མི་འགྲོ་བ་དང་། 
ཤ་མི་ཟ་བ་དང་། སྨྱོ་བའི་ཁུ་བ་ཆང་མི་མཐུང་བ་དང་། དཀུ་བ་རྣམ་པ་ལྔ་ལ་སོགས་ཏེ། དཀུ་ཞིང་མནམ་པའི་བག་མི་ཟ་བ་དང་། དེ་བས་ན་དེའི་ལུས་ནི་མནམ་པའི་བག་མེད་དེ། རྟག་ཏུ་འཇིག་རྟེན་དུ་བཅས་པའི་ལྷ་དང་མི་ཐམས་ཅད་ཀྱིས་བཀུར་སྟི་དང་། 
རིམ་གྲོ་བྱེད་ཅིང་། མཆོད་པ་དང་། བསྟོད་པར་འགྱུར་བ་དང་། ཟས་ཀྱི་ཚོད་འཛིན་པ་དང་། ལྷག་མ་མི་འཆང་བ་དང་། སྦྱིན་བདག་གི་གོས་བྱིན་པ་ལེན་ན་ཡང་རན་པར་ལེན་པ་དང་། གང་ནས་གང་དུ་འགྲོ་ཡང་ཆོས་གོས་གསུམ་དང་། ལྷུང་བཟེད་དུ་བཅས་
ཏེ་བྱའི་འདབ་མ་ལྟར་མི་འབྲེལ་བ་དང་། གཞན་ཡང་རྩ་བའི་འབྲས་བུ་དང་། སྡོང་བུའི་འབྲས་བུ་དང་། ཚིགས་ཀྱི་ས་བོན་དང་། མདུད་པའི་ས་བོན་དང་། འབྲས་བུའི་ས་བོན་མི་འཆང་བ་དང་། གཞན་ཡང་རིན་པོ་ཆེའི་གཏེར་དང་། གསེར་དང་། 
དངུལ་དང་། བཟའ་བ་དང་། བཏུང་བ་དང་། ཚང་མང་དང་། བང་མཛོད་དང་། བགོ་བའི་གོས་དང་། ཁྲི་སྟན་མཐོན་པོ་དང་། བལ་གླང་གི་མཆེ་བའི་ཁྲི་དང་། གསེར་གྱི་ཁྲི་དང་། ཐགས་སུ་བཏགས་པ་རྣམ་པ་མང་པོ་ལ་སོགས་པ་ལ་མི་ཉལ་མི་

47-1-193a

འཆང་བ་དང་། གཞན་ཡང་རྩྭ་ལས་བྱས་པའི་སྟན་འཇམ་པོ་ཐམས་ཅད་མི་འཆང་བ་དང་། བལ་གླང་གི་ཁྱོགས་དང་། རྟའི་ཁྱོགས་ལ་མི་འདུག་པ་དང་། ཤིན་ཏུ་འཇམ་པའི་གོས་མི་གདིང་བ་དང་། ཁྲི་ལ་
སྔས་གཉིས་མི་བཅའ་བ་དང་། གཞན་ཡང་སྔས་བཟང་པོ་དང་། བསྙེས་པའི་སྔས་མི་འཆང་བ་དང་། ནམ་དུ་ཡང་བལ་གླང་འཐབ་པ་དང་། རྟ་འཐབ་པ་དང་། ཤིང་རྟ་འཐབ་པ་དང་། དམག་འཐབ་པ་དང་། སྐྱེས་པ་འཐབ་པ་དང་། 
བུད་མེད་འཐབ་པ་དང་། ཁྱུ་མཆོག་འཐབ་པ་དང་། ལུག་འཐབ་པ་དང་། ཆུ་གླང་འཐབ་པ་དང་། བྱ་འཐབ་པ་དང་། ནེ་ཙོ་འཐབ་པ་ལ་སོགས་པ་ལ་མི་ལྟ་བ་དང་། ཆེད་དུ་གཡུལ་བཤམས་པ་ལ་མི་ལྟ་བ་དང་། གཞན་ཡང་
དུང་འབུད་པ་དང་། རྔ་རྡུང་བ་དང་། གླིང་བུ་དང་། གཅེའུ་ཁ་མངས་དང་། གིམ་དང་། ཤིར་དང་། དགུ་པོ་རྒྱུད་མངས་ལ་སོགས་ཏེ། རོལ་མོ་རྣམས་སངས་རྒྱས་ལ་མཆོད་པ་མ་གཏོགས་པར་མི་ཉན་པ་དང་། ཨུག་ཤུད་དང་། 
མིག་མངས་དང་། པར་སིག་གི་རྩེད་མོ་སེང་གེ་དང་། བལ་གླང་གི་རྐྱ་འགྱེད་པ་དང་། ཆོ་ལོ་དང་། བརྒྱན་པོ་དང་། ཕོ་ལོང་རྡེབས་པ་དང་། རྡོ་འཕེན་པ་དང་། ཁྲས་དང་། རྩེད་མོའི་བག་ཐམས་ཅད་མི་བྱེད་མི་ལྟ་བ་དང་། ནམ་དུ་ཡང་ལྟས་དང་། 
མཚན་ལྟ་བ་ལག་པ་དང་། རྐང་པ་དང་། ངོ་དང་། མིག་གི་མཚན་ལྟ་བ་མི་བྱེད་པ་དང་། སེན་མོ་ལ་མེ་ལོང་ལྟ་བུར་ལྟ་བ་དང་། རྩྭ་དང་ལྕུག་མ་དང་། བུམ་པ་དང་། ཐོད་པ་ལ་མོ་འདེབས་ཤིང་ལྟས་སུ་ལྟ་བ་མི་བྱེད་པ་དང་། དེ་མ་ཡིན་པ་གཉིད་བསང་བ་མ་
གཏོགས་པར་སྐར་མ་ལ་སྩོགས་པ་མི་ལྟ་བ་དང་། རྒྱལ་པོའི་ཕོ་ཉ་དང་། ཕྲིན་གྱིས་ཚུ་རོལ་གྱི་ཚིག་ཕ་རོལ་ཏུ་སྨྲ་ཞིང་། ཕ་རོལ་ཀྱི་ཚིག་ཚུ་རོལ་དུ་སྨྲ་བ་མི་བྱེད་པ་དང་། གཡོ་དང་། སྒྱུས་ལོག་པར་འཚོ་བ་མ་ཡིན་པ་དང་། གཞན་ཡང་རྒྱལ་པོའི་
གཏམ་དང་། བློན་པོ་དང་། རྐུན་པོ་དང་། དགྲ་ཐབས་དང་། བཟའ་བ་དང་། བཏུང་བ་དང་། ཡུལ་དང་། མུ་གེ་དང་། འཇིགས་པ་དང་། བདེ་སྐྱིད་པ་ལ་སོགས་པའི་གཏམ་མི་སྨྲ་བ་སྟེ། རིགས་ཀྱི་བུ་དེ་དག་ནི་བྱང་ཆུབ་སེམས་དཔའ་སེམས་

47-1-193b

དཔའ་ཆེན་པོའི་འཇིག་རྟེན་པས་མི་དཔྱས་པའི་ཚུལ་ཁྲིམས་ཤེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་ལྟར་བཅས་པའི་ཚུལ་ཁྲིམས་སྲུང་བ་དང་། རང་བཞིན་གྱིས་ལྕི་བའི་ཚུལ་ཁྲིམས་སྲུང་བ་ལ་ཐ་དད་པའི་
བྱེ་བྲག་མེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་ཚུལ་ཁྲིམས་ཡོངས་སུ་སྲུང་བ་ན་འདི་སྐད་ཅེས་དམ་བཅའོ། །བདག་གི་ལུས་འདི་མེ་མ་མུར་གྱི་དོང་ཟབ་མོར་མཆོངས་ཀྱང་སླའི་འདས་པ་དང་། མ་འོངས་པ་དང་། 
ད་ལྟར་བཞུགས་པའི་སངས་རྒྱས་རྣམས་ཀྱིས་བཅས་པའི་ཚུལ་ཁྲིམས་ལས་ཉམས་ཏེ། རྒྱལ་རིགས་ཀྱི་བུ་མོ་འམ། བྲམ་ཟེ་མོ་འམ། ཁྱིམ་བདག་མོ་ལ་མི་ཚངས་པར་སྤྱོད་པའི་ལས་མི་བྱའོ་ཞེས་དམ་འཆའོ། །རིགས་ཀྱི་བུ་གཞན་
ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའོ། །གལ་ཏེ་ལྕགས་ཤིན་ཏུ་ཚ་བས་བདག་གི་ལུས་དཀྲིས་གླགས་ཀྱང་སླའི། ཚུལ་ཁྲིམས་ཉམས་པའི་ལུས་ཀྱིས་སྦྱིན་བདག་དད་པས་བྱིན་པའི་གོས་མི་བགོའོ། །
རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་དུ་དམ་འཆའ་སྟེ། བདག་གི་ཁར་ལྕགས་ཀྱི་ཐུ་ལུམ་མིད་ཀྱང་སླའི། ཚུལ་ཁྲིམས་ཉམས་པའི་ཁ་འདིས་ནམ་དུ་ཡང་སྦྱིན་བདག་དད་པས་བྱིན་པའི་ཁ་ཟས་
མི་ཟའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་དུ་དམ་འཆའ་སྟེ། བདག་གི་ལུས་འདི་ལྕགས་ཤིན་ཏུ་ཚ་བའི་སྟེང་དུ་ཉལ་ཡང་སླའི། ཚུལ་ཁྲིམས་ཉམས་པའི་ལུས་ཀྱིས་ནམ་དུ་ཡང་སྦྱིན་བདག་
དད་པས་བྱིན་པའི་ཁྲི་སྟན་ལ་མི་ཉལ་ལོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། བདག་གི་ལུས་ལ་མཚོན་ཤག་ཏི་སུམ་བརྒྱས་བཙུགས་ཀྱང་སླའི། ཚུལ་ཁྲིམས་ཉམས་པའི་
ལུས་ཀྱིས་ནམ་དུ་ཡང་སྦྱིན་བདག་དད་པས་བྱིན་པའི་ནད་ཀྱི་རྐྱེན་སྨན་མི་བཏུང་ངོ་། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། བདག་གི་ལུས་འདི་ཤིན་ཏུ་ཁོལ་བའི་ཟངས་པོ་ཆེར་

47-1-194a

བསྐོལ་ཀྱང་སླའི། ཚུལ་ཁྲིམས་ཉམས་པའི་ལུས་ཀྱིས་སྦྱིན་བདག་དད་པས་བྱས་པའི་གནས་ཁང་དུ་མི་འདུག་གོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་
སྟེ། གལ་ཏེ་ལྕགས་ཀྱི་ཐོ་བས་མགོ་ནས་རྐང་གི་བར་དུ་བརྡུངས་ཏེ་རྡུལ་དུ་གྱུར་ཀྱང་སླའི། ཚུལ་ཁྲིམས་ཉམས་པའི་ལུས་ཀྱིས་རྒྱལ་རིགས་དང་བྲམ་ཟེ་དང་ཁྱིམ་བདག་གི་རིམ་གྲོ་དང་ཕྱག་བྱ་བ་མི་འདོད་དོ། །རིགས་ཀྱི་བུ་གཞན་
ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། ལྕགས་ཀྱི་ཐུར་མ་ཤིན་ཏུ་ཚ་བས་མིག་གཉིས་བྲུས་ཀྱང་སླའི། འདོད་ཆགས་ཀྱི་སེམས་ཀྱིས་ཕ་རོལ་གྱི་གཟུགས་བཟང་པོ་ལ་མི་ལྟའོ། །རིགས་
ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། ཇི་སྟེ་སྨྱུང་མང་པོས་རྣ་བའི་དབང་པོ་བཙུགས་ཀྱང་སླའི། འདོད་ཆགས་དང་བཅས་པའི་སེམས་ཀྱིས་སྒྲ་སྙན་པ་མི་མཉན་ནོ། །རིགས་ཀྱི་
བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། གྲི་རྣོན་པོས་སྣ་བཅད་ཀྱང་སླའི། འདོད་ཆགས་ཀྱི་སེམས་ཀྱིས་དྲི་ཞིམ་པོ་ལ་མི་སྣོམ་མོ། །རིགས་ཀྱི་བུ་གཞན་ཡང་བྱང་ཆུབ་སེམས་
དཔའ་སེམས་དཔའ་ཆེན་པོ་ཡང་འདི་སྐད་ཅེས་དམ་འཆའ་སྟེ། གྲི་རྣོན་པོས་ལྕེ་བཅད་ཀྱང་སླའི། འདོད་ཆགས་ཀྱི་སེམས་ཀྱིས་རོ་ཞིམ་པོ་ལ་མི་ཆགས་སོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་
ཡང་འདི་སྐད་ཅེས་དམ་འཆའ་སྟེ། གལ་ཏེ་སྟ་རེ་རྣོན་པོས་བདག་གི་ལུས་དུམ་བུ་དུམ་བུར་བཏུབས་ཀྱང་སླའི། འདོད་ཆགས་དང་བཅས་པའི་སེམས་ཀྱིས་རེག་བྱ་མང་པོ་ལ་མི་ཆགས་སོ། །དེ་ཅིའི་ཕྱིར་ཞེ་ན། དེའི་རྒྱུ་དེའི་རྐྱེན་ཀྱིས་
རྣལ་འབྱོར་ཅན་དག་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེ་བར་འགྱུར་རོ། །འོད་སྲུང་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཡོངས་སུ་སྲུང་བ་ཞེས་བྱའོ། །

47-1-194b

བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་ཤིན་ཏུ་བསྲུངས་ནས། སེམས་ཅན་ཐམས་ཅད་ལ་སྔོ་བར་བྱེད་དོ། །དེའི་རྒྱུ་དེའི་རྐྱེན་གྱིས་སེམས་ཅན་ཐམས་ཅད་ཚུལ་ཁྲིམས་ཤིན་ཏུ་བསྲུང་བ་དང་། རྣམ་པར་དག་པའི་
ཚུལ་ཁྲིམས་དང་། ཤིན་ཏུ་དགེ་བའི་ཚུལ་ཁྲིམས་དང་། མི་ཉམས་པའི་ཚུལ་ཁྲིམས་དང་། མི་ཟློས་པའི་ཚུལ་ཁྲིམས་དང་། ཐེག་པ་ཆེན་པོའི་ཚུལ་ཁྲིམས་དང་། ཕྱིར་མི་ལྡོག་པའི་ཚུལ་ཁྲིམས་དང་། སེམས་དང་སྦྱོར་བའི་
ཚུལ་ཁྲིམས་དང་། མཐར་ཕྱིན་པའི་ཚུལ་ཁྲིམས་དང་། ཕ་རོལ་ཏུ་ཕྱིན་པའི་ཚུལ་ཁྲིམས་རྫོགས་པར་གྱུར་ཅིག་ཅེས་སྨོན་ལམ་འདེབས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཚུལ་ཁྲིམས་ཡོངས་སུ་
དག་པར་སྦྱོང་བ་ན། ཐོག་མ་མི་གཡོ་བའི་ས་ལ་གནས་པར་འགྱུར་རོ། །ཅིའི་ཕྱིར་མི་གཡོ་བའི་ས་ཞེས་བྱ་ཞེ་ན། བྱང་ཆུབ་སེམས་དཔའ་མི་གཡོ་བའི་ས་ལ་གནས་པ་ན། མི་གཡོ་མི་ལྟུང་མི་ལྡོག་མི་ཤིགས་པའི་ཕྱིར་རོ། །རིགས་ཀྱི་
བུ་དཔེར་ན་རི་རབ་རིའི་རྒྱལ་པོ་ནི་རླུང་ཤིན་ཏུ་དྲག་པོ་རྫི་རླུང་ཡུག་གིས་ཀྱང་གཡོ་བ་འམ། ལྟུང་བ་འམ། འཇིག་པར་མི་ནུས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་ས་དེ་ལ་གནས་པ་ཡང་དེ་དང་འདྲ་སྟེ། གཟུགས་དང་། 
སྒྲ་དང་། དྲི་དང་། རོ་དང་། རེག་བྱས་གཡོ་བར་མི་ནུས། སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དུ་ལྟུང་བར་མི་འགྱུར། ཉན་ཐོས་དང་རང་སངས་རྒྱས་ཀྱི་སར་ཕྱིར་མི་ལྡོག་སྟེ། ལྟ་བ་མང་པོའི་རླུང་གིས་
ཀྱང་མི་ཤིགས་ཤིང་ལོག་པར་འཚོ་བར་མི་འགྱུར་རོ། །རིགས་ཀྱི་བུ་གཞན་ཡང་མི་གཡོ་བ་ཞེས་བྱ་བ་ནི་འདོད་ཆགས་དང་། ཞེ་སྡང་དང་། གཏི་མུག་གིས་མི་གཡོས་སོ། །གཞན་ཡང་མི་ལྟུང་ཞེས་བྱ་བ་ནི་ཕས་ཕམ་པ་བཞིར་མི་ལྟུང་དེ། 
གཞན་ཡང་མི་ལྡོག་ཅེས་བྱ་བ་ནི་ཕྱིར་ཚུལ་ཁྲིམས་ལས་ཁྱིམ་དུ་མི་ལྡོག་གོ། །གཞན་ཡང་མི་འཇིག་ཅེས་བྱ་བ་ནི་ཐེག་པ་ཆེན་པོའི་མདོ་སྡེ་ལས་མི་འགལ་བས་མི་ཤིགས་སོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ནི་

47-1-195a

ཉོན་མོངས་པའི་བདུད་ཀྱིས་མི་གཡོས་སོ། །ཕུང་པོའི་བདུད་ཀྱིས་ལྟུང་བར་མི་འགྱུར་རོ། །སྙིང་པོ་བྱང་ཆུབ་ཀྱི་བར་དུ་ལྷའི་བདུད་ཡོད་མོད་ཀྱི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་གོ། །འཆི་བདག་གི་
བདུད་ཀྱིས་ཀྱང་མི་ཤིགས་སོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པའི་སྤྱོད་པ་ལ་ཤིན་ཏུ་ནན་ཏན་བྱེད་པ་ཞེས་བྱའོ། །རིགས་ཀྱི་བུ་ཅིའི་ཕྱིར་འཕགས་པའི་སྤྱོད་པ་ཞེས་བྱ་ཞེ་ན། འཕགས་པའི་
སྤྱོད་པ་ནི་སངས་རྒྱས་དང་བྱང་ཆུབ་སེམས་དཔའ་སྤྱོད་པའི་ཕྱིར་ན། འཕགས་པའི་སྤྱོད་པ་ཞེས་བྱའོ། །ཅིའི་ཕྱིར་སངས་རྒྱས་དང་བྱང་ཆུབ་སེམས་དཔའ་ལ་འཕགས་པ་ཞེས་བྱ་ཞེ་ན། དེ་དག་ལ་སོགས་པ་འཕགས་པའི་ཆོས་དང་
ལྡན་པའི་ཕྱིར། ཆོས་ཐམས་ཅད་ལ་ངོ་བོ་ཉིད་ཀྱིས་སྟོང་པ་ཉིད་དུ་རྟོགས་པའི་ཕྱིར། དེ་བས་ན་འཕགས་པ་ཞེས་བྱའོ། །གཞན་ཡང་འཕགས་པའི་ཚུལ་ཁྲིམས་དང་ལྡན་པས་འཕགས་པ་ཞེས་བྱའོ། །འཕགས་པའི་ཏིང་ངེ་
འཛིན་དང་ཤེས་རབ་ཏུ་ལྡན་པས་འཕགས་པ་ཞེས་བྱའོ། །གཞན་ཡང་འཕགས་པའི་ནོར་བདུན་དད་པ་དང་། ཚུལ་ཁྲིམས་དང་། འཛེམ་པ་དང་། ཁྲེལ་བ་དང་། མང་དུ་ཐོས་པ་དང་། ཤེས་རབ་དང་། བཏང་སྙོམས་ཀྱི་ནོར་དང་ལྡན་པས་
འཕགས་པ་ཞེས་བྱའོ། །གཞན་ཡང་འཕགས་པའི་ལམ་ཡན་ལག་རྣམ་པ་བདུན་དང་ལྡན་པས་འཕགས་པ་ཞེས་བྱ་སྟེ། དེ་བས་ན་འཕགས་པའི་སྤྱོད་པ་ཞེས་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་
དཔའ་ཆེན་པོ་འཕགས་པའི་སྤྱད་པ་སྤྱོད་པ་ནི། ལུས་འདི་ལ་སྤྱི་བོ་ནས་རྐང་པའི་བར་དུ་བརྟགས་ན། སྐྲ་དང་། སེན་མོ་དང་། སོ་དང་། མི་གཙང་བ་བཙོག་པ། པགས་པ་དང་། ཤ་དང་། རྒྱུས་པ་དང་། རུས་པ་དང་། མཚེར་པ་དང་། 
མཁལ་མ་དང་། སྙིང་དང་། གློ་བ་དང་། མཆིན་པ་དང་། མཁྲིས་པ་དང་། རྒྱུ་མ་དང་། ཕོ་བ་དང་། ཞུ་བ་དང་། མ་ཞུ་བའི་སྣོད་གཉིས་དང་། བཤང་བ་ཆེ་ཆུང་དང་། མཆིལ་མ་དང་། སྣབས་དང་། མཆི་མ་དང་། ཀླད་པ་དང་ཐོད་པ་

47-1-195b

དང་། རྐང་དང་། རྣག་དང་། ཁྲག་དང་། རྩ་ལ་སོགས་པ་མི་གཙང་བ་འབའ་ཞིག་གིས་གང་བར་མཐོང་ངོ་། །བྱང་ཆུབ་སེམས་དཔའ་དེ་ལྟར་རྩེ་གཅིག་ཏུ་ཤིན་ཏུ་རྟོག་པ་ན། བདག་ཅེས་བྱ་བ་སུ་དབང་། གང་ན་གནས། བདག་ཅེས་བྱ་བ་
སུ་དབང་ཞེས་ཤིན་ཏུ་རྟོག་སྟེ། ཡང་འདི་སྙམ་དུ་སེམས་སོ། །རུས་པ་དེ་བདག་ཡིན་ནམ། རུས་པ་ལས་གཞན་པ་ཞིག་ཡོད་དམ་སྙམ། བྱང་ཆུབ་སེམས་དཔའ་དེའི་ཚེ་ལྤགས་པ་དང་། ཤ་བཏང་སྟེ། ཀེང་རུས་འབའ་ཞིག་ལ་རྟོག་གོ། །
ཡང་འདི་སྙམ་དུ་སེམས་ཏེ། རུས་པའི་ཁ་དོག་ཀྱང་རྣམ་པ་ཐ་དད་དེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ཕུག་རོན་གྱི་གཤོག་པ་ལྟ་བུ་སྟེ། དེ་ལྟར་ན་རུས་པའི་མཚན་ཉིད་ཀྱང་བདག་མ་ཡིན་ནོ། །དེ་ཅིའི་ཕྱིར་ཞེ་ན། 
བདག་ཅེས་བྱ་བ་ནི་སྔོན་པོ་འམ། སེར་པོ་འམ། དམར་པོ་འམ། དཀར་པོ་འམ། ཕུ་རོན་གྱི་གཤོག་པ་ལྟ་བུ་མ་ཡིན་པའི་ཕྱིར་རོ། །བྱང་ཆུབ་སེམས་དཔས་དེ་ལྟར་རྩེ་གཅིག་པའི་སེམས་ཀྱིས་ཤིན་ཏུ་རྟོག་པ་ན། གཟུགས་ལ་འདོད་
ཆགས་པ་ཐམས་ཅད་ཞི་བར་འགྱུར་རོ། །ཡང་འདི་སྙམ་དུ་སེམས་ཏེ། རུས་པ་དེ་ཡང་རྟེན་ཅིང་འབྲེལ་ཏེ་འབྱུང་བ་ཡིན་ཏེ། རྐང་པའི་རྟིང་པའི་རུས་པས་ནི་ལོང་བུའི་རུས་པ་བརྟེན། ལོང་བུས་ནི་རྗེ་ངར་གྱི་རུས་པ་བརྟེན། རྗེ་ངར་གྱི་རུས་
པས་ནི་པུས་མོ་བརྟེན། པུས་མོའི་རུས་པས་ནི་བརླའི་རུས་པ་བརྟེན། བརླའི་རུས་པས་ནི་དཔྱིའི་རུས་པ་བརྟེན། དཔྱིའི་རུས་པས་ནི་རྐེད་པའི་རུས་པ་བརྟེན། རྐེད་པའི་རུས་པས་ནི་སྒལ་ཚིགས་ཀྱི་རུས་པ་བརྟེན། རྒལ་ཚིགས་ཀྱི་རུས་
པས་ནི་རྩིབ་མའི་རུས་པ་བརྟེན། ཡང་རྒལ་ཚིགས་ཀྱི་རུས་པས་ནི་གཉའ་བའི་རུས་པ་བརྟེན། གཉའ་བའི་རུས་པས་ནི་འགྲམ་པའི་རུས་པ་བརྟེན། འགྲམ་པའི་རུས་པས་ནི་འགྲམ་སོ་དང་ཐོད་པའི་རུས་པ་བརྟེན་ཏོ། །ཡང་ལྟག་རུས་ནི་ཕྲག་པའི་
རུས་པ་ལ་རྟེན། ཕྲག་པའི་རུས་པ་ནི་ལག་ངར་གྱི་རུས་པ་ལ་རྟེན། ལག་ངར་གྱི་རུས་པ་ནི་མཁྲིག་མའི་རུས་པ་ལ་རྟེན། ཁྲིག་མའི་རུས་པ་ནི་ལག་མཐིལ་གྱི་རུས་པ་ལ་རྟེན། ལག་མཐིལ་གྱི་རུས་པ་ནི་སོར་མོའི་རུས་པ་ལ་རྟེན་ཏེ། དེ་ལྟར་རུས་པ་

47-1-196a

ཐམས་ཅད་གཅིག་ལ་གཅིག་རྟེན་ཅིང་འབྲེལ་བར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་རྟོག་པ་ན་ལུས་ཀྱི་རུས་པ་ཐམས་ཅད་སོ་སོ་ནས་འདུད་པར་རྟོགས་སོ། །དེ་ལྟར་ཤིན་ཏུ་རྟོགས་པ་ན་གཟུགས་ལ་ཆགས་པ་དང་། 
མངའ་བྱད་ལ་ཆགས་པ་དང་། རེག་ན་འཇམ་པའི་ཆགས་པ་རྣམ་པ་གསུམ་པོ་ཡོངས་སུ་སྤོང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་རུས་པ་སྔོན་པོ་ལ་རྟོག་པ་ན་ས་ཆེན་པོ་འདི་ལྷོ་བྱང་ཤར་ནུབ་དང་། ཕྱོགས་མཚམས་
བཞི་དང་། སྟེང་དང་། འོག་ཀུན་སྔོན་པོར་མཐོང་ངོ་། །སྔོན་པོ་ལ་རྟོག་པ་བཞིན་དུ་སེར་པོ་དང་། དཀར་པོ་དང་། ཕུག་རོན་གྱི་གཤོག་པ་ལྟ་བུ་ཡང་དེ་བཞིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་རྟོག་པ་ན་སྨིན་མཚམས་
ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ཕུག་རོན་གྱི་གཤོག་པ་ལྟ་བུ་བྱུང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེས་འོད་དེ་རེ་རེ་ལས་ཀྱང་སངས་རྒྱས་བཞུགས་པར་མཐོང་ནས། དེ་ལ་ལུས་འདི་
མི་གཙང་བའི་རྒྱུ་དང་རྐྱེན་རྟེན་ཅིང་འབྲེལ་ཏེ་འབྱུང་བ་འདྲི་ཞིང་ཞུ་བ་ནི་འདི་ལྟ་སྟེ། ལུས་འདི་འདུག་པ་དང་། ལྡང་བ་དང་། འགྲོ་བ་དང་། སྡོད་པ་དང་། རྒུ་བ་དང་། དགྱེ་བ་དང་། ལྟ་བ་དང་། མིག་འཛུམས་པ་དང་། དབུགས་རྒྱུ་བ་དང་། ངུ་བ་དང་། 
རྒོད་པ་དང་། དགའ་བར་འགྱུར་བ་དེ་ལ་ནི་བདག་པོ་མེད་ན་སུ་ཞིག་དེ་ལྟར་བསྒྱུར་ཞེས་ཞུ་ཞིང་འདྲིའོ། །དེ་སྐད་ཅེས་དྲིས་ནས་འོད་ཀྱི་ནང་ན་བཞུགས་པའི་སངས་རྒྱས་ཀྱང་མོད་ལ་མི་སྣང་བར་གྱུར་ཏོ།། །།
འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་བཅུ་དྲུག་པ། ཡང་འདི་སྙམ་དུ་སེམས་ཏེ། འོན་ཏེ་རྣམ་པར་ཤེས་པ་དེ་བདག་ཡིན་ནམ། ཅི་ན་སངས་རྒྱས་རྣམས་ཀྱིས་བདག་ལ་བསྟན་པར་
མ་གྱུར་སྙམ་ནས་རྣམ་པར་ཤེས་པ་ལ་བརྟགས་ན་རྣམ་པར་ཤེས་པ་ལ་ནི་སྐད་ཅིག་སྐད་ཅིག་དུ་ཆུ་བོའི་རྒྱུན་བཞིན་སྐྱེ་ཞིང་འགོག་པས་དེ་ཡང་བདག་མ་ཡིན་ནོ་ཡང་འདི་སྙམ་དུ་སེམས་ཏེ་ཕྱི་ནང་དུ་རྒྱུ་བའི་དབུགས་འདི་ནི་རླུང་ཡིན་ཏེ། རླུང་གི་མཚན་ཉིད་ནི་ཆེན་པོ་བཞི་

47-1-196b

ཡིན་པས། ཆེན་པོ་བཞི་ལ་བདག་ཅེས་བྱ་བ་གང་ཡིན། སའི་མཚན་ཉིད་ཀྱང་བདག་མ་ཡིན་ལ། དེ་བཞིན་དུ་ཆུ་དང་། མེ་དང་། རླུང་གི་མཚན་ཉིད་ཀྱང་བདག་ཅེས་བྱ་བ་མ་ཡིན་ནོ་སྙམ་སེམས་སོ། །ཡང་འདི་སྙམ་དུ་སེམས་ཏེ། ལུས་འདི་ལ་
ནི་ཐམས་ཅད་ཀྱང་བདག་ཅེས་བྱ་བ་མེད་དེ། སེམས་དང་རླུང་འདུས་ཤིང་ཚོགས་པའི་རྒྱུ་དང་རྐྱེན་ལས་བྱ་བ་རྣམ་པ་སྣ་ཚོགས་མངོན་དུ་སྣང་བར་གྱུར་པ་ནི་དཔེར་ན་སྔགས་ཀྱི་ཕྱིར་རམ། སྒྱུ་མ་མཁན་གྱིས་བྱས་པ་བཞིན་ནོ། །གཞན་ཡང་དགུ་པོ་
རྒྱུད་མངས་དང་འདྲ་སྟེ། ཡིད་བཞིན་དུ་སྒྲ་འབྱུང་བས་དེས་ན་ལུས་འདི་མི་གཙང་བ་སྟེ། རྒྱུ་དང་རྐྱེན་ཚོགས་པ་ལ་རག་ལུས་པས་གྲུབ་པ་ཡིན་ན་ཆགས་སུ་ཡང་ཅི་ཞིག་ཡོད། གལ་ཏེ་ཕ་རོལ་པོས་གཤེ་འམ་སྤྱོས་ན་ཡང་ཞེ་སྡང་བསྐྱེད་དུ་ཡང་
ཅི་ཞིག་ཡོད་དེ། བདག་གི་ལུས་འདི་ནི་མི་གཙང་བ་རྣམ་པ་སུམ་བཅུ་རྩ་དྲུག་གིས་ཡོངས་སུ་གང་ན་གཤེ་ཞིང་སྤྱོ་བ་དེ་ཡང་ཅི་ལ་གནས། གཤེ་བ་ཐོས་ན་ཡང་འདི་སྙམ་དུ་སེམས་ཏེ། སྒྲ་སྐད་གང་གིས་སྤྱོ་བར་འགྱུར་སྙམ། སྒྲ་སྐད་
ཀུན་ལ་སོ་སོར་བརྟགས་ན་གཤེ་བ་ཡོད་པར་མི་མཐོང་སྟེ། གཅིག་ལ་མེད་པ་བཞིན་མང་པོ་ཡང་དེ་དང་འདྲ་སྟེ། དེ་བས་ན་ཞེ་སྡང་མི་སྐྱེའོ། །གལ་ཏེ་ཕ་རོལ་པོས་བརྡེགས་ན་ཡང་འདི་སྙམ་དུ་སེམས་ཏེ། འདི་ལྟར་བརྡེགས་པ་འདི་ཅི་
ལས་བྱུང་སྙམ་བརྟགས་ན་ལག་པ་དང་། སྟོབས་དང་། དབྱིག་པ་དང་། བདག་གི་ལུས་ཚོགས་པ་ལས་རྡེག་པ་ཞེས་བྱ་བ་བྱུང་ན་ཅིའི་ཕྱིར་ཕ་རོལ་ལ་ཁྲོས། འདི་ནི་བདག་གི་ལུས་ཡོད་པས་ན་འདི་འདྲ་བ་མྱོང་བར་གྱུར་ཏེ། བདག་གི་ཕུང་པོ་ལྔའི་
ལུས་འདི་ཡོད་པ་ལས་འདི་འདྲ་བར་གྱུར་ཏོ། །དཔེར་ན་འབེན་ཡོད་པའི་རྐྱེན་ཀྱིས་མདའ་འོང་བ་དང་འདྲ་བར་བདག་གི་ལུས་ཀྱང་དེ་དང་འདྲ་སྟེ། ལུས་ཡོད་པས་ན་རྡེག་པ་ཡོད་དེ། གལ་ཏེ་བདག་གིས་ལུས་བཟོད་པ་མ་བྱས་ན་སེམས་འཁྲུག་པར་འགྱུར་རོ། །
གལ་ཏེ་སེམས་འཁྲུགས་ན་ཡང་དག་པའི་དྲན་པ་ཉམས་པར་འགྱུར། གལ་ཏེ་ཡང་དག་པའི་དྲན་པ་ཉམས་ན། དགེ་བ་དང་མི་དགེ་བའི་དོན་མི་རྟོགས་སོ། །དགེ་བ་དང་མི་དགེ་བའི་དོན་མ་རྟོགས་ན་ཁ་ན་མ་ཐོ་བའི་ཆོས་སྤྱོད་པར་འགྱུར་རོ། །

47-1-197a

ཁ་ན་མ་ཐོ་བའི་ཆོས་བྱས་ན་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། ཡི་དགས་ཀྱི་ཁམས་སུ་ལྟུང་བར་འགྱུར་རོ། །བྱང་ཆུབ་སེམས་དཔའ་དེའི་ཚེ་དེ་ལྟར་རྟོགས་པས་དྲན་པ་ཉེ་བར་གཞག་པ་བཞི་ཐོབ་པར་འགྱུར་
རོ། །དྲན་པ་ཉེ་བར་གཞག་པ་བཞི་ཐོབ་པས་ཤིན་ཏུ་བཟོད་པའི་ས་ལ་གནས་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ས་དེ་ལ་གནས་ན། འདོད་ཆགས་དང་། ཞེ་སྡང་དང་། གཏི་མུག་ལ་བཟོད་དོ། །གཞན་ཡང་
གྲང་བ་དང་། ཚ་བ་དང་། བྲུ་བ་དང་། སྐོམ་པ་དང་། སྦྲང་མ་དང་། མཆུ་སྨྱུང་དང་། རླུང་དང་། རེག་བྱ་ཡིད་དུ་མི་འོང་བ་དང་། ནད་རྣམ་པ་སྣ་ཚོགས་དང་། ཚིག་ངན་པས་གཤེ་བ་དང་། སྤྱོ་བ་དང་། རྡེག་པ་དང་། འཚོག་པ་དང་། གཞུ་བ་དང་། མདོར་ན་ལུས་
དང་སེམས་སྡུག་བསྔལ་བར་འགྱུར་བ་ཐམས་ཅད་ལ་བཟོད་དེ། དེ་བས་ན་ཤིན་ཏུ་བཟོད་པའི་ས་ལ་གནས་པ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
བཅོམ་ལྡན་འདས་བྱང་ཆུབ་སེམས་དཔའ་མི་གཡོ་བའི་ས་ལ་གནས་པར་མ་གྱུར་གྱི་བར་དུ་ཚུལ་ཁྲིམས་ཡོངས་སུ་དག་པར་བསྲུང་བ་ན་རྒྱུ་དང་རྐྱེན་གང་གིས་ཚུལ་ཁྲིམས་ཉམས་པར་འགྱུར་བ་མཆིས་སམ། བཅོམ་ལྡན་འདས་ཀྱིས་བཀའ་སྩལ་
པ། རིགས་ཀྱི་བུ་ཡོད་དོ། །བྱང་ཆུབ་སེམས་དཔའ་མི་གཡོ་བའི་ས་ལ་གནས་པར་མ་གྱུར་ཀྱི་བར་དུ་རྒྱུ་དང་རྐྱེན་ཀྱིས་ཚུལ་ཁྲིམས་ཉམས་པར་གྱུར་པ་ཡོད་དོ། །འོད་སྲུང་ངོ་མཚར་དུ་གྱུར་ནས་དེ་གང་ལགས་ཤེས་གསོལ་པ་དང་། བཅོམ་ལྡན་འདས་ཀྱིས་
འོད་སྲུང་ལ་བཀའ་སྩལ་པ། བྱང་ཆུབ་སེམས་དཔའ་བདག་གི་ཚུལ་ཁྲིམས་ཉམས་པར་གྱུར་པ་དེའི་རྒྱུ་དེའི་རྐྱེན་ཀྱིས། ཕ་རོལ་པོ་གཞན་དག་ཐེག་པ་ཆེན་པོའི་མདོ་སྡེ་ལ་མོས་ཤིང་དང་བས་འཆང་ཞིང་འཛིན་པར་འགྱུར་རམ། 
ཕ་རོལ་པོ་གཞན་དག་ཀློག་པ་དང་། འདོན་པ་དང་། ཁོང་དུ་ཆུད་པར་བྱེད་པ་དང་། གླེགས་བམ་དུ་འདྲི་བར་འགྱུར་བ་དང་། གཞན་དག་ལ་ཡང་རྒྱས་པར་སྟོན་ཅིང་

47-1-197b

འཆད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་ཙམ་གྱི་ཚོད་ན། དེའི་ཕྱིར་ཚུལ་ཁྲིམས་ཉམས་པར་བྱེད་དེ་བྱང་ཆུབ་སེམས་དཔའ་དེའི་ཚེ་འདི་སྙམ་དུ་སེམས་སོ། །བདག་བསྐལ་པ་གཅིག་གམ་བསྐལ་པ་གཅིག་
འགྲིབས་ཀྱི་བར་དུ་མཚམས་མེད་པའི་སེམས་ཅན་དམྱལ་བ་ཆེན་པོར་ལྷུང་ཡང་སླའི། ཕ་རོལ་པོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་དགོད་པར་བྱེད་དོ། །འོད་སྲུང་དེའི་རྒྱུ་དེའི་རྐྱེན་གྱིས་ན་བྱང་ཆུབ་སེམས་དཔའ་སེམས་
དཔའ་ཆེན་པོ་ཚུལ་ཁྲིམས་དག་ཉམས་པར་འགྱུར་རོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་བྱང་ཆུབ་སེམས་དཔའ་
ཕ་རོལ་པོ་བྱང་ཆུབ་ཀྱི་སེམས་ལས་ཕྱིར་མི་ལྡོག་པར་བསྐྱབ་ཅིང་བསྡུ་བའི་སླད་དུ་ཚུལ་ཁྲིམས་ཉམས་ཀྱང་མཚམས་མེད་པའི་སེམས་ཅན་དམྱལ་བར་ལྟུང་བའི་གནས་མ་མཆིས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། 
ལེགས་སོ་ཤིན་ཏུ་ལེགས་སོ། །ཁྱོད་ཀྱིས་སྨྲས་པ་བཞིན་ནོ། །ང་ཡང་སྔོན་འཛམ་བུའི་གླིང་འདིར་རྒྱལ་པོ་ཆེན་པོ་དྲང་སྲོང་ཞེས་བྱ་བར་གྱུར་པས་ན་ཐེག་པ་ཆེན་པོའི་མདོ་སྡེ་ལ་སྟི་སྟང་དང་བཅས་པས་ཤིན་ཏུ་དད་ཅིང་མོས་ཏེ། སེམས་དགེ་བ་འབའ་
ཤིག་ལ་བརྩོན་པས་ཁ་ན་མ་ཐོ་བའི་ལས་ཕྲག་དོག་དང་སེར་སྣའི་བག་མེད་དེ། ངག་གི་ལས་ཀྱིས་ནི་རྟག་ཏུ་ངག་སྙན་པ་དང་། དགེ་བའི་ཆོས་སྨྲ་ཞིང་སྟོན་ཏོ། །ལུས་ཀྱིས་ཀྱང་དབུལ་ཕོངས་པ་མགོན་དང་སྐྱབས་མེད་པའི་དཔུང་གཉེན་བྱས་ཏེ། སྦྱིན་པ་ལ་
བར་ཆད་མེད་པར་བརྩོན་པར་གྱུར་ཏོ། །དེའི་ཚེ་དེའི་དུས་ན་འཇིག་རྟེན་ན་སངས་རྒྱས་ཀྱང་མི་བཞུགས། ཉན་ཐོས་དང་རང་སངས་རྒྱས་ཀྱང་མེད་དེ། དེའི་ཚེ་ན་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ལ་དད་ཅིང་མོས་པའི་ཕྱིར་ངས་ལོ་བཅུ་གཉིས་
ཀྱི་བར་དུ་བྲམ་ཟེའི་གཡོག་བྱས་ཏེ། ཡོ་བྱད་ཅི་འདོད་པ་སྦྱར་ཏོ། །ལོ་བཅུ་གཉིས་ཀྱི་བར་དུ་བདེ་བ་བྱིན་ནས་སྟོན་པ་དེ་རྣམས་ལ་འདི་སྐད་ཅེས་སྨྲས་སོ། །ཀྱེ་སྟོན་པ་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་ཅིག་ཅེས་སྨྲས་སོ། །

47-1-198a

བྲམ་ཟེས་སྨྲས་པ། རྒྱལ་པོ་ཆེན་པོ་བྱང་ཆུབ་ཀྱི་མཚན་ཉིད་ནི་ཅི་ཡང་མེད་པ་སྟེ། ཐེག་པ་ཆེན་པོའི་མདོ་སྡེ་ཡང་དེ་དང་འདྲ་བ་ཡིན་ན། རྒྱལ་པོ་ཆེན་པོ་ཅིའི་ཕྱིར་མི་ཞེས་བྱ་བ་བཀུར་བཀུར་ཏེ། ནམ་མཁའ་དང་མཉམ་ཞེས་སྨྲས་སོ། །
རིགས་ཀྱི་བུ་ང་དེའི་ཚེ་ཐེག་པ་ཆེན་པོ་ལ་ཤིན་དུ་མོས་པས་བྲམ་ཟེས་ཤིན་དུ་རྒྱས་པ་ལ་སྐུར་པའི་ཚིག་དེ་ཐོས་ནས། དེའི་ཚེ་ན་ངས་བྲམ་ཟེ་དེའི་སྲོག་བཅད་དོ། །རིགས་ཀྱི་བུ་དེའི་རྒྱུ་དེའི་རྐྱེན་ཀྱིས་དེ་ཚུན་ཅད་སེམས་ཅན་དམྱལ་བར་མ་སྐྱེས་སོ། །
རིགས་ཀྱི་བུ་ཐེག་པ་ཆེན་པོའི་མདོ་སྡེ་ལ་བསྲུང་ཞིང་བསྐྱབ་པའི་མཐུ་སྟོབས་ནི་དེ་ལྟར་ཚད་མེད་དོ། །འོད་སྲུང་གཞན་ཡང་འཕགས་པའི་སྤྱོད་པ་ནི་འདི་ལྟ་སྟེ། འཕགས་པའི་བདེན་པ་བཞིའོ། །དེ་ཡང་གང་ཞེ་ན། སྡུག་བསྔལ་དང་། ཀུན་འབྱུང་བ་དང་། 
འགོག་པ་དང་། ལམ་ནི་འཕགས་པའི་བདེན་པ་བཞི་ཞེས་བྱའོ། །འོད་སྲུང་སྡུག་བསྔལ་ཞེས་བྱ་བ་ནི་ཤ་ཐང་གདུང་བའི་མཚན་ཉིད་དོ། །ཀུན་འབྱུང་བ་ནི་སྐྱེ་ཞིང་འཕེལ་བའི་མཚན་ཉིད་དོ། །འགོག་པ་ནི་ཞི་བ་འགོག་པའི་མཚན་ཉིད་དོ། །ལམ་ནི་
ཐེག་པ་ཆེན་པོའི་མཚན་ཉིད་དོ། །རིགས་ཀྱི་བུ་གཞན་ཡང་སྡུག་བསྔལ་ནི་མངོན་དུ་སྣང་བའི་མཚན་ཉིད་དོ། །ཀུན་འབྱུང་བ་ནི་འགྱུར་བའི་མཚན་ཉིད་དོ། །འགོག་པ་ནི་བསལ་བའི་མཚན་ཉིད་དོ། །ལམ་ནི་བསལ་བས་འགྱུར་བའི་མཚན་ཉིད་དོ།། 
རིགས་ཀྱི་བུ་གཞན་ཡང་སྡུག་བསྔལ་ལ་རྣམ་པ་གསུམ་སྟེ། སྡུག་བསྔལ་བའི་སྡུག་བསྔལ་དང་འདུ་བྱེད་ཀྱི་སྡུག་བསྔལ་དང་། འགྱུར་བའི་སྡུག་བསྔལ་ལོ། །ཀུན་འབྱུང་བ་ནི་སྲིད་པ་ཉི་ཤུ་རྩ་ལྔའོ་འགོག་པ་ནི་ཉི་ཤུ་རྩ་ལྔ་འགོག་པའོ། །ལམ་ནི་ཚུལ་ཁྲིམས་དང་། 
ཏིང་ངེ་འཛིན་དང་། ཤེས་རབ་བསྒོམ་པའོ། །རིགས་ཀྱི་བུ་གཞན་ཡང་ཟག་པ་དང་བཅས་པའི་ཆོས་ལ་ཡང་རྒྱུ་དང་བཅས། འབྲས་བུ་དང་བཅས་པ་རྣམ་པ་གཉིས་ཡོད་དོ། །ཟག་པ་མེད་པའི་ཆོས་ལ་ཡང་རྒྱུ་དང་། བཅས་འབྲས་བུ་དང་བཅས་པ་རྣམ་པ་
གཉིས་ཡོད་དོ། །ཟག་པ་དང་བཅས་པ་འབྲས་བུ་དང་བཅས་པ་ནི་སྡུག་བསྔལ་ཞེས་བྱའོ། །ཟག་པ་དང་བཅས་པའི་རྒྱུ་དང་བཅས་པ་ནི་ཀུན་འབྱུང་ཞེས་བྱའོ། །ཟག་པ་མེད་པའི་འབྲས་བུ་དང་བཅས་པ་ནི་འགོག་པ་ཞེས་བྱའོ། །ཟག་པ་མེད་

47-1-198b

པའི་རྒྱུ་དང་བཅས་པ་ནི་ལམ་ཞེས་བྱའོ། །རིགས་ཀྱི་བུ་གཞན་ཡང་མཚན་ཉིད་རྣམ་པ་འདི་བརྒྱད་ནི་སྡུག་བསྔལ་ཞེས་བྱའོ། །འདི་ལྟ་སྟེ། སྐྱེ་བའི་སྡུག་བསྔལ་དང་། རྒ་བའི་སྡུག་བསྔལ་དང་། ན་བའི་སྡུག་བསྔལ་དང་། ཤི་བའི་སྡུག་བསྔལ་དང་། འདོད་པ་དང་
བྲལ་བའི་སྡུག་བསྔལ་དང་། དགྲ་སྡང་བ་དང་ཕྲད་པའི་སྡུག་བསྔལ་དང་། འདོད་པ་མི་རྙེད་པའི་སྡུག་བསྔལ་དང་། ཕུང་པོ་ལྔ་ནི་སྡུག་བསྔལ་ཏེ། གང་སྡུག་བསྔལ་བརྒྱད་པོ་འདི་དག་སྐྱེ་བར་བྱེད་པ་ནི་ཀུན་འབྱུང་ཞེས་བྱའོ། །ཆོས་འདི་དག་གི་གནས་ཀྱང་
མེད་པ་ནི་འགོག་པ་ཞེས་བྱའོ། །སྟོབས་བཅུ་དང་། མི་འཇིགས་པ་བཞི་དང་། དྲན་པ་ཉེ་བར་གཞག་པ་གསུམ་དང་། སྙིང་རྗེ་ཆེན་པོ་ནི་ལམ་ཞེས་བྱའོ། །རིགས་ཀྱི་བུ་སྐྱེ་བ་ཞེས་བྱ་བ་ནི་འབྱུང་བའི་མཚན་ཉིད་དེ། དེ་ཡང་རྣམ་པ་ལྔའོ། །འདི་ལྟ་སྟེ། 
ཐོག་མ་བྱུང་བ་དང་། ཐ་མར་ཟད་པ་དང་། འཕེལ་ཞིང་སྐྱེ་བ་དང་། མངལ་ནས་བྱུང་བ་དང་། རིགས་ལས་སྐྱེས་པའོ། །རྒས་ཤེས་བྱ་བ་ནི་རྒས་པ་ལ་རྣམ་པ་གཉིས་ཏེ། སྐད་ཅིག་སྐད་ཅིག་ཏུ་རྒས་པ་དང་། མཐར་རྒས་པའོ། །ཡང་རྣམ་
པ་གཉིས་ཏེ། སྐྱེ་ཞིང་འཕེལ་བས་རྒས་པ་དང་། འགོག་ཅིང་ཞིགས་པས་རྒས་པ་ནི་རྒས་པ་ཞེས་བྱའོ། །ན་བ་ཞེས་བྱ་བ་གང་ཞེ་ན། ན་བ་ནི་ཆེན་པོ་བཞི་ཡི་སྦྲུལ་གདུག་པ་ཤས་མི་མཉམ་པ་ལས་ནད་དུ་གྱུར་ཏེ། དེ་ཡང་རྣམ་པ་གཉིས་
སོ། །ལུས་ན་བ་དང་། སེམས་ན་བ་སྟེ། ལུས་ན་བ་ལ་ཡང་རྣམ་པ་ལྔའོ། །བད་ཀན་ལས་གྱུར་པ་དང་། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། འདུས་པ་ལས་ནད་དུ་གྱུར་པ་དང་། བག་མ་བྱས་པ་ལས་ནད་དུ་གྱུར་པའོ། །
བག་མ་བྱས་པའི་ནད་ལ་ཡང་རྣམ་པ་བཞི་སྟེ། ཉམས་ཀྱིས་མི་ལྕོགས་བཞིན་དུ་བྱེད་པ་དང་། གཡང་དུ་ལྟུང་བ་དང་། རྡོ་དབྱུག་དང་མཚོན་གྱིས་ཕོག་པ་དང་། མི་མ་ཡིན་པས་བརླམས་པའོ། །སེམས་ན་བ་ལ་ཡང་རྣམ་པ་བཞི་སྟེ། 
ཤིན་ཏུ་དགའ་བ་ལས་གྱུར་པ་དང་། འཇིགས་སྐྲག་པ་ལས་གྱུར་པ་དང་། མྱ་ངན་བྱེད་པ་ལས་གྱུར་པ་དང་། གཏི་མུག་ལས་གྱུར་པའོ། །རིགས་ཀྱི་བུ་གཞན་ཡང་ལུས་ན་བ་དང་། སེམས་ན་བ་ལ་རྣམ་པ་གསུམ་སྟེ། ལས་ཀྱི་རྣམ་

47-1-199a

པར་སྨིན་པ་དང་། སྡིག་པའི་གཉེན་པོ་མ་སྤངས་པ་དང་། དུས་ལས་གྱུར་པ་སྟེ། དེ་དག་ལ་སོགས་པ་ལས་རྒྱུ་དང་། རྐྱེན་དང་། མིང་དུ་འདོགས་པ་དང་། རྣམ་པ་ཐ་དད་པའི་ནད་སྐྱེས་པར་གྱུར་ཏོ། །རྒྱུ་རྐྱེན་ལས་གྱུར་པ་ནི་རླུང་ལ་
སོགས་པའི་ནད་རྣམས་སོ། །མིང་དུ་འདོགས་པ་ནི་སེམས་མྱོས་པ་དང་། གློ་ན་བ་དང་། དབུགས་མི་བདེ་བ་དང་། སྐྱུག་བྲོ་བ་དང་། སྙིང་སྟོར་ལྡང་བ་དང་། ཚད་པར་འཁྲུ་བའོ། །རྣམ་པ་ཐ་དད་པ་ནི་ཀླད་པ་ན་བ་དང་། མིག་ན་བ་དང་། 
རྐང་ལག་ལ་སོགས་པ་ན་བ་སྟེ། དེ་དག་ནི་ན་བ་ཞེས་བྱའོ། །ཤི་བ་ཞེས་བྱ་བ་གང་ཞེ་ན། བདག་གི་ལུས་བླངས་པ་དེ་དང་བྲལ་བའོ། །ལུས་བླངས་པ་དང་བྲལ་བ་ལ་ཡང་རྣམ་པ་གཉིས་ཏེ། ཚེ་ཟད་ནས་ཤི་བ་དང་། ཕྱི་རོལ་ཀྱི་རྐྱེན་གྱིས་
ཤི་བའོ། །ཚེ་ཟད་དེ་ཤི་བ་ལ་ཡང་རྣམ་པ་གསུམ་སྟེ། ཚེ་ཟད་ལ་བསོད་ནམས་མ་ཟད་པ་དང་། བསོད་ནམས་ནི་ཟད་ལ་ཚེ་མ་ཟད་པ་དང་། བསོད་ནམས་དང་ཚེ་གཉིས་ཀ་ཟད་པའོ། །ཕྱི་རོལ་ཀྱི་རྐྱེན་ཀྱིས་ཤི་བ་ལ་ཡང་རྣམ་པ་
གསུམ་སྟེ། མི་རིགས་པར་བདག་ལྕེབས་ཏེ་ཤི་བ་དང་། ཕ་རོལ་པོ་གཞན་གྱིས་བསད་པ་དང་། གཉིས་ཀ་དང་བཅས་ཏེ་ཤི་བའོ། །གཞན་ཡང་ཤི་བ་ལ་རྣམ་པ་གསུམ་ཡོད་དོ། །བག་མེད་པས་ཤི་བ་དང་། ཚུལ་ཁྲིམས་ཉམས་པས་
ཤི་བ་དང་། ཚེའི་དབང་པོ་ཞིག་སྟེ་ཤི་བའོ། །དེ་ལ་བག་མེད་པས་ཤི་བ་གང་ཞེ་ན། ཐེག་པ་ཆེན་པོ་ཤིན་དུ་རྒྱས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྐུར་པ་ནི་བག་མེད་པས་ཤི་བ་ཞེས་བྱའོ། །ཚུལ་ཁྲིམས་ཉམས་ཏེ་ཤི་བ་གང་
ཞེ་ན། འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་རྣམས་ཀྱིས་བཅས་པའི་ཚུལ་ཁྲིམས་བཤིག་པ་ནི་ཚུལ་ཁྲིམས་ཉམས་ཏེ་ཤི་བ་ཞེས་བྱའོ། །ཚེའི་དབང་པོ་ཞིག་སྟེ་ཤི་བ་གང་ཞེ་ན། ཕུང་པོ་ལྔའི་ལུས་
དང་བྲལ་བ་ནི་ཚེའི་དབང་པོ་ཞིག་ནས་ཤི་བ་ཞེས་བྱ་སྟེ། དེ་དག་ནི་ཤི་བའི་སྡུག་བསྔལ་ཆེན་པོ་ཞེས་བྱའོ། །འདོད་པ་དང་། བྱེ་བྲལ་བའི་སྡུག་བསྔལ་གང་ཞེ་ན། གང་ཡིད་དུ་འོང་ཞིང་འདོད་པའི་དབང་པོ་ཞིག་གམ་བྲལ་ལམ་

47-1-199b

གྱེས་པར་གྱུར་པའོ། །ཡིད་དུ་འོང་ཞིང་འདོད་པའི་དངོས་པོ་དང་བྱེ་བྲལ་བ་ལ་ཡང་རྣམ་པ་གཉིས་ཏེ། མིའི་ནང་ན་ཕུང་པོ་ལྔ་ཞིག་པ་དང་། ལྷའི་ནང་ན་ཕུང་པོ་ལྔ་དང་བྲལ་བའོ། །དེ་ལྟར་ལྷ་དང་མི་ལ་འདོད་པའི་ཕུང་པོ་ལྔ་ནི་རྣམ་པར་ཕྱེ་
ན་ཚད་མེད་དེ། མདོར་ན་དེ་དག་ནི་འདོད་པ་དང་བྱེ་བྲལ་བའི་སྡུག་བསྔལ་བ་ཞེས་བྱའོ། །དགྲ་སྡང་བ་དང་ཕྲད་པའི་སྡུག་བསྔལ་གང་ཞེ་ན། གང་ཡིད་དུ་མི་འོང་ཞིང་མི་འདོད་པ་དང་འདུས་ཤིང་ཕྲད་པའོ། །ཡིད་དུ་མི་འོང་ཞིང་མི་འདོད་
པ་དང་ཕྲད་པ་ལ་ཡང་རྣམ་པ་གསུམ་སྟེ། སེམས་ཅན་དམྱལ་བ་དང་། ཡི་དགས་དང་། བྱོལ་སོང་གི་སྐྱེ་གནས་སོ། །དེ་ལྟར་ངན་སོང་གསུམ་པོ་ཡང་རྣམ་པར་དབྱེ་ན་ཚད་མེད་མོད་ཀྱི། མདོར་ན་དེ་དག་ནི་དགྲ་སྡང་བ་དང་ཕྲད་པའི་
སྡུག་བསྔལ་བ་ཞེས་བྱའོ། །འདོད་པ་མི་རྙེད་པའི་སྡུག་བསྔལ་གང་ཞེ་ན། འདོད་པ་མི་རྙེད་པའི་སྡུག་བསྔལ་ལ་ཡང་རྣམ་པ་གཉིས་ཏེ། རེ་བའི་གནས་ནས་འདོད་པ་མི་རྙེད་པ་དང་། ལས་མང་དུ་བྱས་ནས་འབྲས་བུ་དོན་དུ་མ་གྲུབ་པ་ནི་འདོད་
པ་མི་རྙེད་པའི་སྡུག་བསྔལ་ཞེས་བྱའོ། །ཕུང་པོ་ལྔའི་སྡུག་བསྔལ་གང་ཞེ་ན། ཕུང་པོ་ལྔའི་སྡུག་བསྔལ་ནི། སྐྱེ་བའི་སྡུག་བསྔལ་དང་། རྒ་བའི་སྡུག་བསྔལ་དང་། ན་བའི་སྡུག་བསྔལ་དང་། ཤི་བའི་སྡུག་བསྔལ་དང་། 
འདོད་པ་དང་བྱེ་བྲལ་བའི་སྡུག་བསྔལ་དང་། དགྲ་སྡང་བ་དང་ཕྲད་པའི་སྡུག་བསྔལ་ནི་ཕུང་པོ་ལྔའི་སྡུག་བསྔལ་ཞེས་བྱའོ། །འོད་སྲུང་སྐྱེ་བའི་དངོས་པོ་ལ་དེ་ལྟར་རྒ་བའི་སྡུག་བསྔལ་ནས་ཕུང་པོ་ལྔའི་སྡུག་བསྔལ་རྣམ་པ་བདུན་ཡོད་དོ། །
འོད་སྲུང་རྒུད་པ་དང་། ན་བ་ནི་ཐམས་ཅད་ལ་ཡོད་པ་མ་ཡིན་ཏེ། སངས་རྒྱས་དང་ལྷ་རྣམས་ལ་ནི་ངེས་པར་མེད་དོ། །མི་ལ་གཅིག་ཏུ་མ་ཆད་དེ་ལ་ལ་ལ་ཡོད། ལ་ལ་ལ་མེད་དོ། །འོད་སྲུང་ཁམས་གསུམ་གྱི་ལུས་སུ་གྱུར་པ་ནི་མི་
སྐྱེ་བ་མེད་དེ། རྒ་བ་ནི་གཅིག་པུ་མ་ཆད་དོ། །དེ་བས་ན་ཐམས་ཅད་ཀྱང་སྐྱེ་བ་ནི་རྩ་བར་འགྱུར་རོ། །འོད་སྲུང་འཇིག་རྟེན་གྱི་སེམས་ཅན་དག་ནི་ཕྱིན་ཅི་ལོག་གིས་བསྒྲིབས་པས་ན། སྐྱེ་བ་ལ་ནི་འདོད་ཅིང་ཆགས་ཀྱི། རྒ་བ་དང་འཆི་བ་

47-1-200a

མི་འདོད་དོ། །འོད་སྲུང་བྱང་ཆུབ་སེམས་དཔའ་ནི་དེ་ལྟ་མ་ཡིན་ཏེ། ཐོག་མ་སྐྱེ་བ་ནས་སྐྱོན་དུ་རྟོགས་སོ། །འོད་སྲུང་དཔེར་ན་མི་ཞིག་གི་ཁྱིམ་དུ་བུད་མེད་བཟང་མོ་བལྟ་ན་སྡུག་པ་ཤིན་དུ་མཛེས་པ་ཚུལ་དུ་ཤིས་པ་
རྒྱན་བཟང་པོས་ཡོངས་སུ་བརྒྱན་པ་ཞིག་འོངས་ནས། ཁྱིམ་བདག་གིས་དེ་ལ་འདི་སྐད་ཅེས་འདྲིའོ། །བུད་མེད་ཁྱོད་མིང་ཅི་སུ་དབང་ཞེས་དྲིས་ན། བུད་མེད་དེས་ཁོ་མོ་ནི་ལྷ་ཆེན་པོ་བཀྲ་ཤིས་མ་ཡིན་ནོ་ཞེས་སྨྲའོ། །ཁྱིམ་
བདག་གིས་ཡང་དྲིས་པ་ཁྱོད་མིའི་ཁྱིམ་དུ་འོངས་ན་ཅི་དང་ཅི་ནུས། བུད་མེད་དེས་སྨྲས་པ། ཁོ་མོ་ནི་གར་འོངས་པར་ཁྱིམ་བདག་དེ་ལ་གསེར་དང་། དངུལ་དང་། བཻ་དཱུརྱ་དང་། ཤེལ་དང་། མུ་ཏིག་དང་། བྱི་རུ་དང་། སྦུར་ལོང་དང་། 
ཨས་མ་གར་བྷ་དང་། མུ་ས་གལ་བྷ་ལ་སོགས་པའི་རིན་པོ་ཆེ་རྣམ་པ་མང་པོ་དང་། བལ་གླང་དང་། རྟ་དང་། ཤིང་རྟ་དང་། བྲན་ཕོ་དང་། བྲན་མོ་ལས་བྱེད་པའི་མི་བདོག་པར་འོང་ངོ་། །ཁྱིམ་བདག་གིས་དེ་སྐད་ཀྱི་ཚིག་ཐོས་ནས་
ཤིན་ཏུ་དགའ་མགུ་རངས་ཏེ། བདག་ཅག་གི་བསོད་ནམས་སྨིན་པས་ལྷ་མོ་ཁྱོད་བདག་གི་ཁྱིམ་དུ་འོངས་ཞེས་སྨྲས་ནས། སྤོས་དང་། མེ་ཏོག་གིས་མཆོད་དེ། སྟི་སྟང་དང་བཅས་པས་ཕྱག་བྱེད་དོ། །དེའི་སྒོ་ན་ཡང་བུད་མེད་ཤིན་དུ་མི་སྡུག་
པ་གོས་ཧྲུལ་པོ་དྲི་མ་ཅན་གྱོན་པ། པགས་པ་རྩུབ་པ་མདོག་ངན་པ་གཅིག་ཀྱང་འོངས་ནས་ཁྱིམ་བདག་གིས་བུད་མེད་དེ་ལ་ཁྱོད་ཀྱི་མིང་ཅི་སུ་དབང་ཞེས་དྲིས་སོ། །བུད་མེད་དེས་སྨྲས་པ། ཁོ་མོའི་མིང་ནི་རྣ་ནག་མོ་ཞེས་བྱའོ། །དེས་སྨྲས་
པ་ཁྱོད་ཀྱི་མིང་ཅིའི་ཕྱིར་རྣ་ནག་མོ་ཞེས་བྱ། བུད་མེད་དེས་སྨྲས་པ། ཁོ་མོ་གང་དུ་འོངས་པ་དེའི་ཁྱིམ་ན་ནོར་རིན་པོ་ཆེ་དང་། ལོངས་སྤྱོད་ཐམས་ཅད་མེད་པར་འགྱུར་བས་ན་རྣ་ནག་མོ་ཞེས་བྱའོ། །ཁྱིམ་བདག་གིས་དེ་སྐད་ཐོས་ནས་
མཚོན་རྣོན་པོ་ཐོགས་ཏེ་བུད་མེད་དེ་ལ་འདི་སྐད་ཅེས་སྨྲས་སོ། །ཁྱོད་མྱུར་དུ་སོང་ཤིག །མི་འགྲོ་ན་ཁྱོད་བསད་དོ་ཞེས་བྱས་སོ། །བུད་མེད་དེས་སྨྲས་པ། ཁྱོད་ནི་ཤིན་ཏུ་གླེན་པ་ཤེས་པ་མེད་པ་ཡིན་ནོ། །ཁྱིམ་བདག་གིས་སྨྲས་པ། 

47-1-200b

བདག་ཅིའི་ཕྱིར་གླེན་པ་ཤེས་པ་མེད་པ་ཡིན། བུད་མེད་དེས་སྨྲས་པ། ད་ལྟར་ཁྱོད་ཀྱི་ཁྱིམ་ན་འདུག་པ་དེ་ཁོ་མོའི་ནུ་མོ་ཡིན་ཏེ། གར་འགྲོ་ཡང་འགྲོགས་དགོས་ན། གལ་ཏེ་ཁོ་མོ་སྐྲོད་ན་ནང་ན་འདུག་པ་ཡང་སྐྲོད་ཅིག །མི་དེ་ཕྱིར་ཁྱིམ་དུ་
སོང་ནས་ལྷ་བཀྲ་ཤིས་མ་ལ་འདི་སྐད་དུ་སྒོ་ན་བུད་མེད་ཅིག་ལྷའི་བུ་མོ་ཞེས་ཟེར་ན་ཡིན་ནམ། བཀྲ་ཤིས་མས་སྨྲས་པ། དེ་ནི་ཁོ་མོའི་ནུ་མོ་ཡིན་ཏེ། གར་སོང་ཡང་ལྷན་ཅིག་འགྲོགས་ཏེ་འབྲལ་མ་མྱོང་ངོ་། །གར་སོང་ཡང་བདག་ནི་ལེགས་
པར་དགའ་སྟེ་ལེགས་པར་བྱེད། ཕན་པར་བྱེད་ཀྱི། ནུ་མོ་ནི་རྟག་ཏུ་ཉེས་པར་དགའ་ཞིང་ཉེས་པར་བྱེད་གནོད་པར་བྱེད་དོ། །ཅི་སྟེ་བདག་འདོད་ན། དེ་ཡང་འདོད་པར་བྱ་དགོས་སོ། །བདག་ལ་སྟི་སྟང་བྱེད་ན། དེ་ལ་ཡང་སྟི་སྟང་བྱ་དགོས་སོ། །ཁྱིམ་བདག་
དེས་དེ་སྐད་སྨྲས་པ་ཐོས་ནས། འདི་སྐད་ཅེས་སྨྲས་སོ། །དེ་ལྟར་ལེགས་པ་དང་ཉེས་པ་གཉིས་ཡོད་ན། གཉིས་ཀ་ཁོ་བོ་ལ་མི་དགོས་ཀྱིས་གར་དགའ་བར་དེང་ཤིག་ཅེས་བསྒོའོ། །དེ་ནས་བུད་མེད་དེ་གཉིས་ཀྱང་ཕྱིར་གནས་སུ་སོང་ནས། 
དེའི་ཚེ་ཁྱིམ་བདག་དེ་རབ་ཏུ་དགའ་མགུ་རངས་པར་གྱུར་ཏོ། །དེ་ནས་བུད་མེད་དེ་གཉིས་ཡང་འགྲོགས་ཏེ། དབུལ་པོ་ཞིག་གི་ཁྱིམ་དུ་སོང་ནས་དབུལ་པོ་དེ་རབ་ཏུ་དགའ་སྟེ། དེ་གཉིས་ཀ་ལ་འདི་སྐད་ཅེས་སྨྲས་སོ། །ད་ཕྱིན་ཆད་ཁྱོད་གཉིས་
རྟག་ཏུ་བདག་གི་ཁྱིམ་ན་འདུག་ཤིག །བཀྲ་ཤིས་མས་སྨྲས་པ། བདག་ཅག་གཉིས་སྔར་ཡང་གཞན་གྱིས་བསྐྲད་པ་ཡིན་ན། ད་ཅིའི་ཕྱིར་ཁྱོད་ཀྱིས་བདག་ཅག་གཉིས་ཀ་འདུག་ཅེས་སྨྲས། དབུལ་པོས་སྨྲས་པ། ཁྱོད་ཀྱིས་བདག་ལ་དགོངས་
ཤིག་དང་། བདག་ནི་ཁྱོད་ཀྱི་ཕྱིར་འདི་ལ་ཡང་རིམ་གྲོ་བྱེད་ན། དེ་བས་ན་གཉིས་ཀ་འདུག་པར་གསོལ་བ་བྱེད་པ་ཡིན་ནོ། །འོད་སྲུང་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ་ལྷར་སྐྱེ་བར་མི་འདོད་དོ། །སྐྱེས་པས་
ན་རྒ་བ་དང་། ན་བ་དང་། འཆི་བ་ཡོད་དེ། དེ་བས་ན་གཉི་ག་སྤོང་སྟེ་མི་འདོད་དོ། །བྱིས་པ་མ་རབས་ནི་རྒ་བ་དང་། ན་བ་དང་འཆི་བ་ལ་སོགས་པའི་སྐྱོན་མང་པོ་མི་ཤེས་པས། སྐྱེ་བ་དང་འཆི་བའི་སྐྱོན་གཉིས་ལ་ཆགས་སོ། །

47-1-201a

རིགས་ཀྱི་བུ་གཞན་ཡང་འདི་ལྟ་སྟེ། བྲམ་ཟེའི་བུ་ཆུང་ངུ་ཤེད་མ་བྱེ་བ་བཀྲེས་པས་ཉེན་ན་ངན་སྐྱུགས་ཀྱི་ནང་ན་ཨ་མྲའི་འབྲས་བུ་ཡོད་པ་ལེན་ཏོ། །དེ་ལ་མཁས་ཤིང་ཤེས་པ་དག་གིས་མཐོང་ནས་འདི་སྐད་དུ་
གཤེ་སྟེ། ཁྱོད་ནི་བྲམ་ཟེའི་རིགས་ཤིན་དུ་གཙང་བ་ཡིན་ན། ཅིའི་ཕྱིར་ན་ངན་སྐྱུགས་ཀྱི་ནང་ན་ཨ་མྲའི་འབྲས་བུ་ལེན་ཅེས་སྨྲས་སོ། །བྲམ་ཟེའི་ཁྱེའུ་དེ་ནི་ངོ་ཚ་ནས་དེ་ལ་འདི་སྐད་ཅེས་སྨྲས་སོ། །བདག་གིས་ཡང་དག་པར་ན་
ཟ་བར་ནི་མ་བྱས་ཀྱི་བཀྲུས་ཏེ་དོར་སྙམ་མོ། །མཁས་པ་དེས་སྨྲས་པ། ཁྱོད་ནི་ཤིན་དུ་ཡང་གླེན་ཏེ་ཕྱིར་དོར་བས་བསམ་ན་བླང་བའི་མི་རིགས་སོ་ཞེས་སྨྲས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་
པོ་ཡང་དེ་དང་འདྲ་སྟེ། སྐྱེ་བའི་ཕྱོགས་མི་ལེན་མི་སྤོང་སྟེ། ཅི་ལྟར་མཁས་པ་ཁྱེའུ་དེ་ལ་སྤྱོས་པ་བཞིན་ནོ། །བུས་པ་མ་རབས་ནི་སྐྱེ་བ་ནི་འདོད་ཀྱི། འཆི་བ་མི་འདོད་དེ་ཁྱེའུ་དེས་ཤིང་ཏོག་བླངས་ནས་དོར་བ་དང་འདྲའོ། །འོད་སྲུང་
གཞན་ཡང་འདི་ལྟ་སྟེ་དཔེར་ན་ལམ་གྱི་བཞི་མདོར་མི་ཞིག་སྣོད་བཟང་པོའི་ནང་དུ་ཁ་ཟས་རོ་དང་། བསུང་དང་། ཁ་དོག་དང་ལྡན་པ་འཚོང་བ་ལ། ལམ་རིང་པོ་ནས་འོངས་པའི་མི་བཀྲེས་པ་ཉམ་ཆུང་ལ་ངལ་བ་ཞིག །ཁ་ཟས་དེ་རོ་
བསུང་དང་། ཁ་དོག་ཏུ་ལྡན་པ་དེ་མཐོང་ནས་དྲུང་དུ་བསྙེན་ཏེ་འདི་ཅི་ཡིན་ཞེས་འདྲིའོ། །ཟས་ཀྱི་བདག་པོ་དེས་སྨྲས་པ། འདི་ནི་ཁ་ཟས་ཀྱི་མཆོག་རོ་བསུང་དང་ཁ་དོག་ཏུ་ལྡན་པ་ཡིན་ཏེ། གང་གིས་འདི་ཟོས་ན་མདོག་དང་སྟོབས་ཀྱང་
སྐྱེ་ཞིང་བཀྲེས་པ་དང་སྐོམ་པ་ཡང་སེལ་ལ། ལྷ་རྣམས་ཀྱང་མཐོང་བར་འགྱུར་ཏེ། སྐྱོན་སྣ་གཅིག་ཅིག་ཡོད་དེ། དེ་ནི་འཆི་བར་འགྱུར་བའོ། །མི་དེས་དེ་སྐད་ཅེས་ཐོས་ནས་འདི་སྙམ་དུ་བདག་མདོག་དང་སྟོབས་ཀྱང་དགོས། 
ལྷ་མཐོང་བ་དང་ཤི་བ་ཡང་མི་འདོད་དོ། །སྙམ་ནས་འདི་སྐད་ཅེས་སྨྲས་སོ། །ཟས་འདི་ཟོས་པས་འཆི་བར་འགྱུར་ན་འདི་བཙོངས་ཏེ་ཅི་ཞིག་བྱ། ཟས་བདག་གིས་སྨྲས་པ། མཁས་པ་ཤེས་རབ་ཅན་སུ་ཡང་མི་ཉོ་ཡི། གླེན་པ་ཤེས་པ་

47-1-201b

མེད་པ་དག་ནི་ང་ལ་རིན་ཡང་མང་དུ་བྱིན་ནས་ཉོས་ཏེ་ཟའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། ལྷར་སྐྱེ་བ་ཡང་མི་འདོད་ལ་མདོག་དང་། སྟོབས་དང་ལྷ་མཐོང་བར་ཡང་མི་འདོད་དོ། །དེ་ཅིའི་ཕྱིར་
ཞེ་ན། སྡུག་བསྔལ་མང་པོ་ལས་མི་ཐར་བའི་ཕྱིར་རོ། །བུས་པ་མ་རབས་ནི་རྒ་བ་དང་། ན་བ་དང་། འཆི་བའི་སྐྱོན་མ་མཐོང་ནས། སྐྱེ་བའི་གནས་ཀུན་ལ་ཆགས་སོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་དུག་གི་སྡོང་
པོ་ནི་རྩ་བས་ཀྱང་འཆི་བར་བྱེད། སྡོང་པོས་ཀྱང་འཆི་བར་བྱེད། ཤུན་པ་དང་ལོ་མ་དང་མེ་ཏོག་དང་། འབྲས་བུས་ཀྱང་འཆི་བར་བྱེད་དོ། །རིགས་ཀྱི་བུ་སྲིད་པ་ཉི་ཤུ་རྩ་ལྔ་པོར་སྐྱེ་བའི་གནས་སུ་ཕུང་པོ་ལྔ་བླངས་པ་ཡང་དེ་དང་འདྲ་སྟེ། ཐམས་
ཅད་འཆི་བར་བྱེད་དོ། །འོད་སྲུང་གཞན་ཡང་འདི་ལྟ་སྟེ། དཔེར་ན་ངན་སྐྱུགས་ནི་མང་ཉུང་འདྲ་སྟེ་མནམ་མོ། །རིགས་ཀྱི་བུ་སྐྱེ་བ་ཡང་དེ་དང་འདྲ་སྟེ། གལ་ཏེ་ཚེ་ལོ་བརྒྱད་ཁྲི་ཐུབ་བམ། ལོ་བཅུ་ཐུབ་པ་འདྲ་སྟེ། ཐམས་ཅད་སྡུག་བསྔལ་
དུ་འདྲའོ། །རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན་གཡང་ས་ཤིན་དུ་ཉམ་ང་བ་རྩྭས་ཡོག་པའི་དྲུང་ན་བདུད་རྩི་མང་དུ་ཡོད་དེ། གལ་ཏེ་ཟོས་ན་ལྷའི་ལོ་སྟོང་ཐུབ་ལ། ནད་རྣམས་ཀྱང་རབ་ཏུ་བྱང་ཞིང་བདེ་བར་འགྱུར་རོ། །བྱིས་པ་མ་
རབས་ནི་རོ་ལ་ཆགས་པའི་ཕྱིར་རྐང་པའི་འོག་ན་གཡང་ས་ཉམ་ང་བ་ཆེན་པོ་ཡོད་པར་མི་ཤེས་ཏེ། བླངས་པར་ཆས་པ་ལས་རྐང་པ་འགྲེད་དེ། གཡང་སར་ལྷུང་ནས་ཤིའོ། །མཁས་པ་ཤེས་རབ་ཅན་ནི་ཤེས་པས་ན་དེར་མི་འགྲོའོ། །
རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། ལྷ་རྫས་ཀྱི་ཟས་བཟང་པོ་ཡང་མི་འདོད་ན་མི་དག་གི་ཟས་ལྟ་སྨོས་ཀྱང་ཅི་དགོས། བྱིས་པ་མ་རབས་ནི་སེམས་ཅན་དམྱལ་བར་ལྕགས་ཀྱི་ཐུ་
ལུམ་ཟ་བར་ཡང་བཟོད་པར་བྱེད་ན། ལྷ་དང་མིའི་ཟས་བཟང་པོ་ལྟ་སྨོས་ཀྱང་ཅི་དགོས། འོད་སྲུང་དཔེར་བསྟན་པ་འདི་དག་དང་། གཞན་ཡང་དཔེ་ཚད་མེད་གྲངས་མེད་པའི་སྒོ་ནས་སྐྱེ་བ་འདི་ནི་སྡུག་བསྔལ་ཆེན་པོ་ཡིན་པར་རིག་

47-1-202a

པར་བྱའོ། །འོད་སྲུང་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་པོ་ཡོངས་སུ་མྱ་ངན་འདས་པའི་མདོ་ལས་སྐྱེ་བའི་སྡུག་བསྔལ་རྟོགས་པ་ཞེས་བྱའོ། །འོད་སྲུང་དེ་ལ་ཇི་ལྟར་ན་བྱང་ཆུབ་
སེམས་དཔའ་སེམས་དཔའ་ཆེན་པོས་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་ལས་རྒ་བའི་སྡུག་བསྔལ་རྟོགས་པ་ཞེ་ན། རྒས་ཤེས་བྱ་བ་ནི་སྐྱུག་བྲོ་བ་ལུ་བ། དཔའ་བ་དང་ཉམ་རྩལ་འཕྲོག་པ། དྲན་པ་དང་། བརྩོན་པ་དང་། 
འཛིན་པ་དང་། གཞོན་དར་བ་དང་། རྒྱགས་འཆོས་པ། བདེ་བ་ལ་ཡིད་བཞིན་དུ་སྤྱོད་པ་ཀུན་མ་རུང་བར་བྱེད་དེ། དེ་ལས་བཟློག་ནས་ལེ་ལོ་དང་། སྙོམས་ལས་ཆེ་བ་དང་། གཞན་གྱིས་བརྙས་པར་འགྱུར་བར་བྱེད་དོ། །འོད་སྲུང་འདི་ལྟ་སྟེ་དཔེར་ན་
རྫིང་བུའི་ནང་པད་མོས་ཡོངས་སུ་གང་སྟེ་འདབ་མ་རྒྱས་ན། ཁ་དོག་འཚེར་བས་ཐམས་ཅད་ཀྱི་ཡིད་དུ་འོང་སྟེ་འདོད་དོ། །གལ་ཏེ་སེར་བ་བབ་ན་ཐམས་ཅད་བཅོམ་སྟེ་མ་རུང་བར་བྱེད་དོ། །རིགས་ཀྱི་བུ་རྒ་བ་ཡང་དེ་དང་འདྲ་སྟེ། གཞོན་དར་བའི་མདོག་
བཟང་པོ་མ་རུང་བར་བྱེད་དོ། །འོད་སྲུང་གཞན་ཡང་འདི་ལྟ་སྟེ་དཔེར་ན། རྒྱལ་པོ་ཞིག་ལ་བློན་པོ་འཛངས་པ་བློ་དང་ལྡན་པ་དགྲ་ཆོས་ལ་མཁས་པ་ཞིག་ཡོད་དེ། རྒྱལ་ཕྲན་གཞན་ཞིག་དེ་ལ་མདོ་སྡེ་མི་ཉན་ན། རྒྱལ་པོ་
དེས་བློན་པོ་དེ་ལ་ཕ་རོལ་གྱི་རྒྱལ་ཕྲན་དེ་ཟུང་ཤིག་ཅེས་བསྒོ་ན་དེས་དེ་འོང་ངོ་། །རྒས་པ་ཡང་དེ་དང་འདྲ་སྟེ། གཞོན་དར་བ་བཟུང་ནས་འཆི་བདག་གི་རྒྱལ་པོ་ལ་འབུལ་ལོ། །འོད་སྲུང་གཞན་ཡང་འདི་ལྟ་སྟེ་དཔེར་ན། ཤིང་རྟའི་སྲོག་ཤིང་ཆག་ན་
སྤྱད་དུ་མི་རུང་ངོ་། །རྒས་པ་ཡང་དེ་དང་འདྲ་སྟེ་ཅིར་ཡང་མི་རུང་ངོ་། །འོད་སྲུང་གཞན་ཡང་འདི་ལྟ་སྟེ་དཔེར་ན། ཁྱིམ་བདག་ཕྱུག་པོ་ཞིག་ལ་གསེར་དང་། དངུལ་དང་། བཻ་དཱུརྱ་དང་། བྱི་རུ་དང་། ཨ་སྨ་གར་བྷ་དང་། མུ་ས་ལ་གལ་བྷ་
མང་དུ་ཡོད་པའི་ཁྱིམ་དུ་རྐུན་པོ་འམ། མི་རྒོད་མང་པོ་འོངས་ན་ཐམས་ཅད་ཕྲོགས་ཏེ་ཁྱིམ་སྟོངས་པར་བྱེད་དོ། །རིགས་ཀྱི་བུ་གཞོན་དར་བའི་མདོག་བཟང་པོ་ཡང་དེ་དང་འདྲ་སྟེ། རྟག་ཏུ་རྒ་བའི་དགྲས་རྐུ་ཞིང་འཕྲོག་གོ། །རིགས་

47-1-202b

ཀྱི་བུ་གཞན་ཡང་འདི་ལྟ་སྟེ་དཔེར་ན། མི་དབུལ་པོ་ཞིག་ཟས་བཟང་པོ་དང་གོས་འཇམ་པོ་ལ་ཆགས་ཏེ། རྟག་ཏུ་རེ་ཡང་རྙེད་པར་མི་འགྱུར་རོ། །རིགས་ཀྱི་བུ་རྒས་པ་ཡང་དེ་དང་འདྲ་སྟེ། འདོད་པ་ལྔའི་བདེ་སྐྱིད་ལ་ཡིད་བཞིན་ལོངས་
སྤྱོད་པར་འདོད་མོད་ཀྱི་མི་ནུས་སོ། །འོད་སྲུང་གཞན་ཡང་འདི་ལྟ་སྟེ་དཔེར་ན། སྐམ་ས་ལ་འདུག་པའི་རུས་སྦལ་ནི། སེམས་ལ་རྟག་ཏུ་ཆུ་དྲན་ནོ། །རིགས་ཀྱི་བུ་མི་ཡང་དེ་དང་འདྲ་སྟེ། རྒས་འཁོགས་པས་ཡོངས་སུ་བསྐམས་ནས། 
སེམས་ལ་རྟག་ཏུ་གཞོན་དར་བའི་འདོད་པ་ལྔའི་བདེ་བ་དྲན་ནོ། །རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན། སྟོན་གྱི་དུས་སུ་མེ་ཏོག་པད་མོ་ཁ་བྱེ་བ་ལ་ནི། ཐམས་ཅད་འདོད་དེ་ཡིད་དུ་འོང་ངོ་། །རྙིངས་ཏེ་སེར་པོར་སོང་ནས་ཐམས་
ཅད་ཀྱིས་མི་འདོད་དོ། །རིགས་ཀྱི་བུ་གཞོན་དར་བའི་མདོག་བཟང་པོ་ཡང་དེ་དང་འདྲ་སྟེ། ཐམས་ཅད་ཀྱིས་འདོད་ཅིང་དགའ་བ་ལས་རྒས་པར་གྱུར་ན། ཐམས་ཅད་ཀྱི་ཡིད་དུ་མི་འོང་སྟེ་མི་འདོད་དོ། །འོད་སྲུང་གཞན་ཡང་འདི་ལྟ་སྟེ། 
དཔེར་ན། བུ་རམ་ཤིང་བཙིར་ཟིན་པའི་ཚིགས་མ་ནི་རོ་མེད་པ་ཡིན་ནོ། །རིགས་ཀྱི་བུ་གཞོན་དར་བའི་མདོག་ཀྱང་དེ་དང་འདྲ་སྟེ། རྒས་རྒུད་པས་ཁེབས་པས་ན། རབ་ཏུ་འབྱུང་བའི་རོ་དང་། ཀློག་ཅིང་འདོན་པའི་རོ་དང་། བསམ་
གཏན་གྱི་རོ་དང་། རོ་གསུམ་པོ་མེད་པར་འགྱུར་རོ། །འོད་སྲུང་གཞན་ཡང་འདི་ལྟ་སྟེ་དཔེར་ན་ཟླ་བ་རྒྱས་པ་ནི་མཚན་མོ་ཤིན་དུ་སྣང་ཞིང་གསལ་གྱི་ཉིན་པར་ནི་མ་ཡིན་ནོ། །རིགས་ཀྱི་བུ་མི་ཡང་དེ་དང་འདྲ་སྟེ། གཞོན་པའི་
ཚེ་ནི་བཟང་ཞིང་མཛེས་སོ། །རྒས་ནས་ནི་སྐམས་ཤིང་རིད་དོ། །འོད་སྲུང་ཡང་འདི་ལྟ་སྟེ། དཔེར་ན་རྒྱལ་པོ་ཡང་དག་པའི་ཆོས་ཀྱིས་སྲིད་འཚོ་ཞིང་གཡོ་སྒྱུ་མེད་ལ་སྙིང་རྗེ་དང་ལྡན་པ་ཡོངས་སུ་གཏོང་བ་དང་ལྡན་པ་ཞིག་ཡུལ་
གཞན་གྱི་དམག་གིས་བཏབ་ནས་འཁྱམས་ཏེ། ཡུལ་གཞན་ཏུ་ཕྱིན་པར་གྱུར་ན་ཐམས་ཅད་ཀྱིས་དེ་ལ་སྙིང་བརྩེ་སྟེ། འདི་སྐད་ཅེས་ཟེར་རོ། །རྒྱལ་པོ་ཆེན་པོ་སྔོན་ཡང་དག་པའི་ཆོས་ཀྱི་སྲིད་འཚོ་སྟེ་མི་དགའ་བ་གཅིག་ཀྱང་

47-1-203a

མེད་ན། ད་ཅིའི་ཕྱིར་འཁྱམས་པར་གྱུར་ཅེས་ཟེར་རོ། །རིགས་ཀྱི་བུ་མིའང་དེ་དང་འདྲ་སྟེ། རྒས་འཁོགས་པས་ཉམས་པར་གྱུར་ནས་གཞོན་དར་བའི་ལས་ཅི་བྱས་པ་ལ་སྨོན་ཏོ། །
འོད་སྲུང་གཞན་ཡང་འདི་ལྟ་སྟེ་དཔེར་ན་མེ་མར་གྱི་སྙིང་པོ་ནི་མར་ལ་རག་ལུས་ཏེ། མར་ཟད་ན་རིང་པོ་མི་ཐོགས་སོ། །རིགས་ཀྱི་བུ་མིའང་དེ་དང་འདྲ་སྟེ། གཞོན་དར་བ་ལ་རག་ལུས་སོ། །གཞོན་
དར་བ་བཟད་ནས་རྒས་ཤིང་འཁོགས་པའི་སྙིང་པོ་ནི་རིང་པོ་མི་ཐོགས་སོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཆུ་སྐམས་པའི་གྲམ་པ་ནི་མི་དང་མི་མ་ཡིན་པ་དང་། བྱ་དང་། གཅན་གཟན་ལ་
སོགས་པ་ལ་ཕན་མི་ཐོགས་སོ། །རིགས་ཀྱི་བུ་མིའང་དེ་དང་འདྲ་སྟེ། རྒས་པས་སྐམས་པར་གྱུར་ན། ལས་སུ་བྱ་བ་ཐམས་ཅད་ལ་ཕན་པར་མི་འགྱུར་རོ། །འོད་སྲུང་གཞན་ཡང་འདི་ལྟ་སྟེ་
དཔེར་ན་ཆུས་བཟས་པའི་གད་ཁ་ན་ཤིང་སྐྱེས་པ་ནི་རླུང་དྲག་པོ་ལངས་མ་ཐག་ཏུ་གདོན་མི་ཟ་བར་འགྱེལ་ཏོ། །རིགས་ཀྱི་བུ་མིའང་དེ་དང་འདྲ་སྟེ། རྒས་པའི་གད་ཁ་གཡང་ས་དང་ཉེ་བས་འཆི་བའི་རླུང་ལངས་
ནས་རིང་པོ་མི་གནས་སོ། །འོད་སྲུང་གཞན་ཡང་འདི་ལྟ་སྟེ་དཔེར་ན་ཤིང་རྟའི་སྲོག་ཤིང་ཆག་ན་ཁལ་ལྕི་བ་བཀུར་མི་བཟོད་དོ། །རིགས་ཀྱི་བུ་རྒས་པ་འང་དེ་དང་འདྲ་སྟེ། དགེ་བའི་ཆོས་ཐམས་ཅད་འཛིན་
མི་ནུས་སོ། །འོད་སྲུང་གཞན་ཡང་འདི་ལྟ་སྟེ་དཔེར་ན་བུས་པ་ཆུང་ངུ་ཤེད་མ་བྱེ་བ་ལ་ནི་ཐམས་ཅད་ཀྱིས་བརྙས་སོ། །རིགས་ཀྱི་བུ་རྒས་པའང་དེ་དང་འདྲ་སྟེ། ཐམས་ཅད་ཀྱིས་བརྙས་སོ། །འོད་སྲུངས་
དཔེ་འདི་དག་དང་གཞན་ཡང་དཔེ་ཚེད་མེད་དཔག་ཏུ་མེད་པའི་སྒོ་ནས་རྒས་པ་ནི་སྡུག་བསྔལ་ཆེན་པོ་ཡིན་པར་རིག་པར་བྱའོ། །འོད་སྲུངས་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་
པོ་ཡོངས་སུ་མྱ་ངན་ལས་འདས་པའི་མདོ་སྡེ་སྤྱོད་པ་ན། རྒ་བའི་སྡུག་བསྔལ་རྟོགས་པ་ཞེས་བྱའོ། །འོད་སྲུངས་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་པོ་ཡོངས་སུ་

47-1-203b

མྱ་ངན་ལས་འདས་པའི་མདོ་སྡེ་སྤྱོད་པ་ན་ན་བའི་སྡུག་བསྔལ་རྟོགས་པ་ཞེ་ན། ན་བ་ཞེས་བྱ་བ་ནི། བདེ་བའི་དངོས་པོ་ཐམས་ཅད་མེད་པར་བྱེད་པ་སྟེ། དཔེར་ན་སེར་བ་བབ་ན་ལོ་ཏོག་ཐམས་ཅད་བཅོམ་སྟེ་མ་རུང་བར་
བྱེད་དོ། །འོད་སྲུང་གཞན་ཡང་འདི་ལྟ་སྟེ་དཔེར་ན་མི་ཞིག་ལ་ཤ་འཁོན་གྱི་དགྲ་ཡོད་ན་རྟག་ཏུ་མྱ་ངན་བྱེད་དེ་འཇིགས་སོ། །རིགས་ཀྱི་བུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། རྟག་ཏུ་ན་བའི་སྡུག་བསྔལ་གྱིས་འཇིགས་ནས་མྱ་ངན་
བྱེད་དོ། །འོད་སྲུངས་གཞན་ཡང་འདི་ལྟ་སྟེ་དཔེར་ན་སྐྱེས་བུ་བྱད་བཞིན་བཟང་པོ་ཞིག་ཡོད་ན། རྒྱལ་པོའི་བཙུན་མོས་འདོད་པས་བཀུག་ནས་ལྷན་ཅིག་ཉལོ། །དེ་ནས་རྒྱལ་པོས་འཕྲིགས་ནས། དེ་བཟུང་སྟེ་མིག་ཡ་གཅིག་ཕྱུང་། རྣ་བ་ཡ་
གཅིག་ཀྱང་བཅད། ལག་པ་ཡ་གཅིག་ཀྱང་བཅད་ན་དེའི་ཚེ་བྱད་བཞིན་སྔོན་ལས་ཉམས་ཏེ་སུས་ཀྱང་མི་འདོད་དོ། །རིགས་ཀྱི་བུ་མིའང་དེ་དང་འདྲ་སྟེ། ལུས་ཀྱི་ཡན་ལག་དང་མིག་དང་། རྣ་བར་
ལྡན་མོད་ཀྱྀ། ན་བའི་སྡུག་བསྔལ་གྱིས་གཟིར་བར་གྱུར་ན། ཐམས་ཅད་ཀྱིས་མི་འདོད་དོ། །འོད་སྲུང་གཞན་ཡང་འདི་ལྟ་སྟེ་དཔེར་ན་ཆུ་ཤིང་དང་། སྨྱིག་མ་དང་། འདམ་བུ་དང་། དྲེའུ་ནི་འབྲས་བུ་འམ། བུ་ཡོད་པར་
གྱུར་ན་འཆིའོ། །རིགས་ཀྱི་བུ་མིའང་དེ་དང་འདྲ་སྟེ་ནད་ཡོད་ན་འཆིའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་ནི་དམག་ལ་དབང་བའི་བློན་པོ་སྔར་སོང་བའི་ཕྱི་བཞིན་དུ་རྒྱལ་
པོ་འགྲོའོ། །ཉའི་རྒྱལ་པོ་དང་། བུང་བའི་རྒྱལ་པོ་དང་། དུང་གི་རྒྱལ་པོ་དང་། ཁྱུ་མཆོག་གི་རྒྱལ་པོ་དང་། ཚོང་དཔོན་སྔར་སོང་ན་དེའི་ཕྱི་བཞིན་གཞན་དག་འགྲོ་སྟེ་མ་བྲལ་ལོ། །རིགས་ཀྱི་བུ་འཆི་བའི་འཁོར་
ལོས་སྒྱུར་བའི་རྒྱལ་པོའང་དེ་དང་འདྲ་སྟེ། རྟག་ཏུ་ན་བའི་བློན་པོའི་རྗེས་སུ་འགྲོ་སྟེ་མི་འབྲལ་ལོ། །ཉ་དང་བུང་བ་དང་དུང་དང་། ཁྱུ་མཆོག་དང་ཚོང་དཔོན་ལྟ་བུར་ན་བའི་རྒྱལ་པོའི་རྗེས་སུའང་འཆི་བའི་འཁོར་རྟག་ཏུ་ཕྱི་བཞིན་
དུ་འབྲང་སྟེ་རྟག་ཏུ་མི་འབྲལ་ལོ། །འོད་སྲུང་ན་བའི་རྒྱུ་དང་རྐྱེན་ནི་འདི་ལྟ་སྟེ། སྡུག་བསྔལ་བ་དང་། འཁྲུག་པ་དང་། སློས་པའི་མྱ་ངན་དང་། 

47-1-204a

སྨྲེ་སྔགས་འདོན་པ་དང་། ལུས་དང་སེམས་མི་བདེ་བར་བྱེད་པ་སྟེ། དགྲ་མ་རུངས་པས་ཉེན་པ་ཞེས་ཀྱང་བྱ། རྐྱལ་པ་འདྲལ་བ་ཞེས་ཀྱང་བྱ། ཟམ་པ་འཇིག་པ་ཞེས་ཀྱང་བྱ། ཡང་དག་པའི་དྲན་པ་འཕྲོག་པ་ཞེས་ཀྱང་བྱ། གཞན་ཡང་
གཞོན་དར་བའི་མདོག་བཟང་པོ་དང་། མཐུ་སྟོབས་དང་། བདེ་བ་མ་རུང་བར་བྱེད་པ་ཞེས་ཀྱང་བྱའོ། །ཁྲེལ་དང་ངོ་ཚ་མེད་པ་ལུས་དང་སེམས་འབར་ཞིང་ཚིག་པར་བྱེད་པ་སྟེ། དཔེ་འདི་དག་དང་། དེ་མ་ཡིན་པ་གཞན་ཡང་དཔེ་ཚད་མེད་དཔག་ཏུ་
མེད་པ་བསྟན་པའི་སྒོ་ནས་ན་བའི་སྡུག་བསྔལ་ནི་སྡུག་བསྔལ་ཆེན་པོ་ཡིན་པར་རིག་པར་བྱའོ། །འོད་སྲུང་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་སྤྱོད་པ་ན་ན་བའི་སྡུག་
བསྔལ་རྟོགས་པ་ཞེས་བྱའོ། །འོད་སྲུང་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་སྤྱོད་པ་ན་འཆི་བའི་སྡུག་བསྔལ་རྟོགས་པ་ཡིན་ཞེ་ན། འདི་ལྟ་སྟེ། འཆི་བ་ཞེས་
བྱ་བ་ནི་ཚིག་ཅིང་མེད་པར་བྱེད་པའོ། །འོད་སྲུང་འདི་ལྟ་སྟེ། མེའི་བསྐལ་པ་བྱུང་བ་ན་བསམ་གཏན་གཉིས་པ་མ་གཏོགས་པར་གཞན་ཐམས་ཅད་ཚིག་པར་བྱེད་པའོ། །རིགས་ཀྱི་བུ་འཆི་བའི་སེམས་ཀྱང་ཐམས་ཅད་མེད་པར་བྱེད་དེ། 
བྱང་ཆུབ་སེམས་དཔའ་སེམས་དཔའ་ཆེན་པོས་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པའི་མཐུ་སྟོབས་དང་། ལྡན་པ་ནི་མ་གཏོགས་སོ། །འོད་སྲུང་འདི་ལྟ་སྟེ། ཆུའི་བསྐལ་པས་བཀྲུ་བ་ན་ཐམས་ཅད་བཀྲུས་ཏེ་
མེད་པར་བྱེད་ན་བསམ་གཏན་གསུམ་པ་ནི་མ་གཏོགས་སོ། །རིགས་ཀྱི་བུ་འཆི་བའི་ཆུ་ཡང་དེ་དང་འདྲ་སྟེ། ཐམས་ཅད་བཀྲུ་སྟེ་མེད་པར་བྱེད་ན་བྱང་ཆུབ་སེམས་དཔའ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལ་གནས་པ་ནི་མ་
གཏོགས་སོ། །འོད་སྲུང་འདི་ལྟ་སྟེ། རླུང་གི་བསྐལ་པ་བྱུང་བ་ན་ཐམས་ཅད་གཏོར་ཏེ་མེད་པར་བྱེད་ན་བསམ་གཏན་བཞི་པ་ནི་མ་གཏོགས་སོ། །རིགས་ཀྱི་བུ་འཆི་བའི་རླུང་ཡང་དེ་དང་འདྲ་སྟེ། ཐམས་ཅད་མེད་པར་བྱེད་མོད་ཀྱི་བྱང་ཆུབ་

47-1-204b

སེམས་དཔའ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ནི་མ་གཏོགས་སོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཅིའི་སླད་དུ་བསམ་གཏན་བཞི་པ་དེ་རླུང་
གིས་ཀྱང་མི་ཤིགས། ཆུས་ཀྱང་མི་འཁྲུས། མེས་ཀྱང་མི་ཚིག་བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་བསམ་གཏན་བཞི་པ་ནི་ཕྱི་ནང་གི་སྐྱོན་ཐམས་ཅད་མེད་པའི་ཕྱིར་རོ། །རིགས་ཀྱི་བུ་བསམ་གཏན་
དང་པོ་པ་ལ་ནང་ན་རྟོག་པའི་སྐྱོན་ཡོད་པས་ཕྱི་རོལ་གྱི་མེས་འཚིག་གོ། །བསམ་གཏན་གཉིས་པ་ནི་ནང་ན་དགའ་བའི་སྐྱོན་ཡོད་པས་ཕྱི་རོལ་གྱི་ཆུས་བཀྲུས་སོ། །བསམ་གཏན་གསུམ་པ་ནི་ནང་ན་དབུགས་རྒྱུ་བས་རླུང་གི་བསྐལ་པས་
འཇིག་པར་འགྱུར་རོ། །རིགས་ཀྱི་བུ་བསམ་གཏན་བཞི་པ་ནི་ཕྱི་ནང་གཉིས་ཀའི་སྐྱོན་ཐམས་ཅད་བྲལ་བས་བསྐལ་པས་མི་ཚུགས་པ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། ཐེག་པ་ཆེན་པོ་
ཡོངས་སུ་མྱ་ངན་ལས་འདས་པའི་མདོ་སྡེ་ལ་བདེ་བར་གནས་ན་ཕྱི་ནང་གི་སྐྱོན་ཐམས་ཅད་དང་བྲལ་བས་འཆི་བའི་རྒྱལ་པོས་ཀྱང་མི་ཚུགས་པ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ། ནམ་མཁའ་ལྡིང་གི་རྒྱལ་པོ་ནི་ཀླུ་དང་། ཉ་དང་། 
གསེར་དངུལ་དང་། རིན་པོ་ཆེ་ལ་སོགས་པ་ཟོས་ཀྱང་ཞུ་བར་ནུས་ན། རྡོ་རྗེ་འབའ་ཞིག་ནི་ཞུ་བར་མི་ནུས་སོ། །རིགས་ཀྱི་བུ་འཆི་བའི་ནམ་མཁའ་ལྡིང་གི་རྒྱལ་པོ་ཡང་དེ་དང་འདྲ་སྟེ། སེམས་ཅན་ཐམས་ཅད་ཟོས་ཀྱང་ཞུ་བར་ནུས་ན། 
ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཞུ་བར་མི་ནུས་སོ། །འོད་སྲུང་གཞན་ཡང་འདི་ལྟ་སྟེ། ཆུ་འགྲམ་ན་ཤིང་དང་རྩྭ་སྐྱེས་པ་ཐམས་ཅད་ཆུ་ཟུག་ན་
ཐམས་ཅད་ཆུས་ཁྱེར་ཏེ། རྒྱ་མཚོར་ཕྱིན་གྱི་བར་དུ་འགྲོ་ཡང་རྩ་བ་ནི་མ་གཏོགས་ཏེ་རྩ་བ་མཉེན་པའི་ཕྱིར་རོ། །རིགས་ཀྱི་བུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། ཐམས་ཅད་འཁོར་བའི་རྒྱ་མཚོར་འབབ་ན་བྱང་ཆུབ་སེམས་དཔའ་

47-1-205a

སེམས་དཔའ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ནི་མ་གཏོགས་སོ། །འོད་སྲུང་འདི་ལྟ་སྟེ། མཐུ་བོ་ཆེ་ནི་གྱད་ལ་སོགས་པ་ཐམས་ཅད་གདུལ་ནུས་ན། རླུང་ཆེན་པོ་འབའ་ཞིག་ནི་མ་ཡིན་ནོ། །དེ་ཅིའི་ཕྱིར་
ཞེ་ན། གཉེན་པོ་མེད་པའི་ཕྱིར་རོ། །རིགས་ཀྱི་བུ་ཤི་བའི་མཐུ་བོ་ཆེ་ཡང་དེ་དང་འདྲ་སྟེ། སེམས་ཅན་ཐམས་ཅད་གདུལ་ནུས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ནི་མ་གཏོགས་
སོ། །དེ་ཅིའི་ཕྱིར་ཞེ་ན། གཉེན་པོ་མེད་པའི་ཕྱིར་རོ། །འོད་སྲུང་གཞན་ཡང་འདི་ལྟ་སྟེ། དགྲ་སྡང་བ་དག་འཁོན་ཡོད་ཀྱང་དེ་ལས་སྒྱུས་བསྙེན་ཏེ་ཉེ་བ་འམ་མཛའ་བ་ལྟར་འཆོས་ཤིང་ལུས་ཀྱི་གྲིབ་མ་ལྟར་འགྲོགས་ཤིང་གསད་པའི་གླགས་ཚོལ་ཡང་ཕ་
རོལ་པོས་སྔ་ནས་བག་བྱས་ན་གསོད་མི་ནུས་སོ། །རིགས་ཀྱི་བུ་འཆི་བའི་དགྲ་ཡང་དེ་དང་འདྲ་སྟེ། རྟག་ཏུ་སེམས་ཅན་ཐམས་ཅད་གསོད་པའི་གླགས་ཚོལ་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་
འདས་པའི་མདོ་ལ་གནས་པ་ལ་གསོད་ནུས་པ་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་བག་བྱེད་པའི་ཕྱིར་རོ། །འོད་སྲུང་གཞན་ཡང་འདི་ལྟ་སྟེ། རྡོ་རྗེའི་ཆར་པ་བབ་ན་ཐམས་ཅད་འཇིག་པར་ནུས་ཏེ། ཤིང་དང་ནགས་ཚལ་དང་། 
ས་དང་བྱེ་མ་དང་གསེག་མ་དང་། གྱོ་མོ་དང་རྡོ་དང་། གསེར་དང་དངུལ་དང་བཻ་དཱུརྱ་ལ་སོགས་པ་ཐམས་ཅད་འཇིག་པར་འགྱུར་གྱི། རིན་པོ་ཆེ་ཡང་དག་པའི་རྡོ་རྗེ་ལ་ནི་མ་ཡིན་ནོ། །རིགས་ཀྱི་བུ་འཆི་བའི་རྡོ་རྗེའི་ཆར་པ་ཡང་དེ་དང་འདྲ་སྟེ། སེམས་ཅན་ཐམས་
ཅད་མེད་པར་བྱེད་ནུས་ན། བྱང་ཆུབ་སེམས་དཔའ་རྡོ་རྗེ་ལྟ་བུ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པ་ལ་གནས་པ་ནི་མ་གཏོགས་སོ། །འོད་སྲུང་གཞན་ཡང་འདི་ལྟ་སྟེ། བྱ་ནམ་མཁའ་ལྡིང་ནི་ཀླུ་ཐམས་ཅད་ཟ་ཡང་སྐྱབས་སུ་འགྲོ་བ་
གསུམ་ལ་སྐྱབས་སུ་སོང་བ་ལ་ནི་མ་ཡིན་ནོ། །རིགས་ཀྱི་བུ་འཆི་བའི་ནམ་མཁའ་ལྡིང་ཡང་དེ་དང་འདྲ་སྟེ། སེམས་ཅན་ཚད་མེད་པ་ཐམས་ཅད་ཟོས་ན་སྟོང་པ་ཉིད་དང་། མཚན་མ་མེད་པ་དང་སྨོན་པ་མེད་པ་སྟེ། སྟོང་པ་ཉིད་གསུམ་ལ་

47-1-205b

གནས་པ་ནི་མ་གཏོགས་སོ། །འོད་སྲུང་གཞན་ཡང་འདི་ལྟ་སྟེ། སྦྲུལ་གདུག་པ་མ་ལ་ན་ཞེས་བྱ་བས་ཟིན་ན་སྔགས་མཁས་པ་དང་སྨན་པ་མཁས་པ་ཡོད་མོད་ཀྱི་ཅི་བྱར་མེད་དོ། །ཨ་ཀ་ཏ་སྱའི་སྔགས་ཤེས་པ་འབའ་ཞིག་གིས་འཚོ་
བར་འགྱུར་བ་ནི་མ་གཏོགས་སོ། །རིགས་ཀྱི་བུ་འཆི་བའི་སྦྲུལ་གདུག་པས་ཟིན་པ་ཡང་དེ་དང་འདྲ་སྟེ། སྨན་དཔྱད་ཐམས་ཅད་ཀྱིས་ཅི་བྱར་ཡང་མེད་དེ། བྱང་ཆུབ་སེམས་དཔའ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་སྔགས་
ལ་གནས་པ་ནི་མ་གཏོགས་སོ། །འོད་སྲུང་གཞན་ཡང་འདི་ལྟ་སྟེ། མི་ཞིག་རྒྱལ་པོ་སྡང་བར་གྱུར་ན་མི་དེས་ཚིག་སྙན་པ་འཇམ་པོ་སྨྲས་ཏེ། ནོར་དབྱིག་རིན་པོ་ཆེ་རྒྱལ་པོ་ལ་ཕུལ་ན། མི་སྡང་བར་འགྱུར་རོ། །རིགས་ཀྱི་བུ་འཆི་
བའི་རྒྱལ་པོ་དེ་ནི་དེ་དང་མི་འདྲ་སྟེ། ཚིག་སྙན་པ་འཇམ་པོ་སྨྲས་སམ། ནོར་དབྱིག་རིན་པོ་ཆེ་ཕུལ་ཡང་དེ་ལས་མི་ཐར་རོ། །རིགས་ཀྱི་བུ་བུས་པ་མ་རབས་ནི་གཡང་ས་ཆེན་པོར་འགྲོ་བའི་གྲོགས་མེད་པ་སྟེ། ཤིན་དུ་ལམ་རིང་པོར་
འགྲོ་བའི་གྲོགས་མེད་པ། ཉིན་མཚན་དུ་སོང་ཡང་ཕྱིན་པའི་མཐའ་མི་ཤེས་པ། ཤིན་དུ་གནག་པའི་མུན་པར་འཐོམ་པ། སྣང་བའི་སྒྲོན་མ་མེད་པ། འཇུག་པའི་སྒོ་མེད་ལ་གནས་ཡོད་པ། ན་བའི་དམིགས་
མེད་ལ་གསོར་མི་རུང་བ། འགྲོ་བ་ལ་བར་དུ་གཅོད་པ་མེད་ཅིང་ཐར་པ་མེད་པའི་གནས་སུ་ཕྱིན་པ། གཞིག་ཏུ་མེད་པ། མཐོང་བ་ཙམ་གྱིས་མྱ་ངན་གྱིས་གདུངས་པར་འགྱུར་བ། གཟུགས་གདུག་པ་མ་ཡིན་ཡང་
ཀུན་གྱིས་འཇིགས་སྐྲག་པ། ལུས་ལ་ཁྱབ་པར་ཡོད་ཀྱང་མི་ཚོར་མི་ཤེས་པའོ། །འོད་སྲུང་དཔེ་འདི་དག་དང་གཞན་ཡང་དཔེ་ཚད་མེད་པ་བསྟན་པའི་སྒོ་ནས་ཤི་བ་ནི་སྡུག་བསྔལ་ཆེན་པོ་ཡིན་པར་རིག་པར་བྱའོ། །
འོད་སྲུང་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ། ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་སྤྱོད་པ་ན་འཆི་བའི་སྡུག་བསྔལ་རྟོགས་པ་ཞེས་བྱའོ། །འོད་སྲུང་ཇི་ལྟར་ན་དེ་ལ་བྱང་

47-1-206a

ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ན་འདོད་པ་དང་བྱེ་བྲལ་བའི་སྡུག་བསྔལ་རྟོགས་པ་ཞེ་ན། འདོད་པ་དང་བྱེ་བྲལ་བའི་སྡུག་བསྔལ་ནི་སེམས་ཅན་ཐམས་
ཅད་ཀྱི་སྡུག་བསྔལ་བའི་རྩ་བ་སྟེ། ཚིགས་སུ་བཅད་པ་ལས་ཀྱང་འདི་དག་འབྱུང་ངོ་། །འདོད་པའི་རྐྱེན་གྱིས་མྱ་ངན་སྐྱེ། །འདོད་པའི་རྐྱེན་ཀྱིས་འཇིགས་པ་སྐྱེ། །འདོད་པ་ཐམས་ཅད་ཡོངས་སྤངས་ན། །མྱ་ངན་
འཇིགས་པ་ག་ལས་འོང་། །འདོད་པའི་རྐྱེན་ཀྱིས་མྱ་ངན་གྱི་སྡུག་བསྔལ་སྐྱེ་སྟེ། མྱ་ངན་གྱི་སྡུག་བསྔལ་ཡིན་པས་ན་སེམས་ཅན་དག་རྒས་ཤིང་རྒུད་པར་འགྱུར་ཏེ། འདོད་པ་དང་བྱེ་བྲལ་བའི་སྡུག་བསྔལ་ནི་འདི་ལྟ་སྟེ་
ཚེ་ཟད་པའོ། །རིགས་ཀྱི་བུ་བྱེ་བྲལ་བར་གྱུར་པས་ན་སྡུག་བསྔལ་ཕྲ་མོ་རྣམ་པ་སྣ་ཚོགས་ཀྱང་སྐྱེ་བར་འགྱུར་ཏེ། ཁྱོད་ལ་རྒྱས་པར་ཕྱེ་ཞིང་བསྟན་པར་བྱའོ། །རིགས་ཀྱི་བུ་སྔོན་འདས་པའི་དུས་ན་མིའི་ཚེ་ཡང་ཚད་མེད་
དེ། དེའི་ཚེ་དེའི་དུས་ན་རྒྱལ་པོ་དགེ་བ་ལ་གནས་པ་ཞེས་བྱ་བ་བྱུང་ངོ་། །དེའི་ཚེ་ན་རྒྱལ་པོ་དེ་གཞོན་ནུའི་ལུས་ཀྱིས་རྒྱལ་ཚབ་ཀྱི་ལས་ཀྱང་ལོ་བརྒྱད་ཁྲི་བཞི་སྟོང་གི་བར་དུ་བྱས་ནས་རྒྱལ་སར་དབང་བསྐུར་ཏེ། རྒྱལ་པོ་ཡང་
ལོ་བརྒྱད་ཁྲི་བཞི་སྟོང་གི་བར་དུ་བྱས་སོ། །དེའི་ཚེ་རྒྱལ་པོ་དེའི་སྤྱི་བོ་ལ་ཤ་ལྟག་པ་ཤིན་དུ་འཇམ་པ་ཤིང་བལ་ལམ། རས་འཇམ་པོ་ལྟར་འཇམ་པ་སྐྱེས་ཏེ། བགས་ཀྱིས་ཇེ་ཆེ་ཇེ་ཆེར་སྐྱེས་ཀྱང་གནོད་པར་མ་གྱུར་ཏེ། ཟླ་བ་བཅུ་ལོན་
པ་དང་རྡོལ་ནས་ནང་ནས་ཁྱེའུ་གཞོན་ནུ་བྱད་བཞིན་བཟང་བ་དཔེ་མེད་པ། མཚན་དང་མདོག་དུ་ལྡན་པ། མིའི་ནང་ན་ཕུལ་དུ་གྱུར་པ་གཅིག་བྱུང་ངོ་། །རྒྱལ་པོ་ཆེན་པོ་དེ་དགའ་ནས་མིང་ཡང་སྤྱི་བོ་སྐྱེས་ཤེས་བཏགས་ཏེ་དེའི་
ཚེ་རྒྱལ་པོ་དགེ་བ་ལ་གནས་པ་དེ་རྒྱལ་པོའི་སྲིད་ཀུན་སྤྱི་བོ་སྐྱེས་ལ་གཏད་ནས་ཕོ་བྲང་དང་། བཙུན་མོ་དང་། བུ་དང་འཁོར་ཀུན་ཡོངས་སུ་སྤངས་ཏེ། ལོ་རིལ་པོ་བརྒྱད་ཁྲི་བཞི་སྟོང་གི་བར་དུ་བྱང་ཆུབ་ལ་ནན་ཏན་བྱས་སོ། །

47-1-206b

དེའི་ཚེ་རྒྱལ་པོ་སྤྱི་བོ་སྐྱེས་དེ་ཚེས་བཅྭ་ལྔའི་ཉིན་པར་ཁྲུས་བྱས་ཏེ། རྒྱལ་ཐབས་བླངས་ནས་ཡང་ཐོག་མཐོན་པོར་འདུག་པ་ལས་ཤར་ཕྱོགས་ནས་གསེར་གྱི་འཁོར་ལོ་རྩིབ་མ་སྟོང་དང་ལྡན་པ་བཟོ་བྱས་པ་ནི་མ་ཡིན་གྱི་ལྷུན་གྱིས་གྲུབ་པ་
གཅིག་བྱུང་བར་གྱུར་ཏོ། །དེའི་ཚེ་རྒྱལ་པོ་སྤྱི་བོ་སྐྱེས་དེ་འདི་སྙམ་དུ་སེམས་པར་གྱུར་ཏོ། །བདག་གིས་སྔོན་དྲང་སྲོང་མངོན་པར་ཤེས་པ་ལྔ་དང་ལྡན་པ་ལས་ཐོས་ན་རྒྱལ་རིགས་རྒྱལ་པོར་འགྱུར་བ་ཚེས་བཅྭ་ལྔའི་ཉིན་པར་
ཁྲུས་བྱས་ཏེ་རྒྱལ་པོའི་དབང་བླངས་ནས་ཡང་ཐོག་མཐོན་པར་འདུག་པ་ལས་གསེར་གྱི་འཁོར་ལོ་རྩིབ་མ་སྟོང་དང་ལྡན་པ་བཟོ་མ་བྱས་པ་ལྷུན་གྱིས་གྲུབ་པ་རང་བྱུང་ན་རྒྱལ་པོ་དེ་གདོན་མི་ཟ་བར་འཁོར་ལོས་བསྒྱུར་བའི་
རྒྱལ་པོར་འགྱུར་རོ་ཞེས་ཐོས་པ་བསམས་ནས། དེ་བརྟག་པའི་ཕྱིར་ལག་པ་གཡོན་པས་ནི་འཁོར་ལོ་བླངས། ལག་པ་གཡས་པས་ནི་པོག་པོར་ཐོགས་ནས་པུས་མོ་གཡས་པ་ས་ལ་བཙུགས་ཏེ་འདི་སྐད་ཅེས་སྨྲས་
སོ། །གསེར་གྱི་འཁོར་ལོ་འདི་ཡང་དག་པ་ཞིག་ཡིན་ན་སྔོན་འདས་པའི་འཁོར་ལོས་བསྒྱུར་བའི་རྒྱལ་པོའི་ཆོས་སུ་གར་འགྲོ་བར་སོང་ཤིག་ཅེས་སྨྲས་པ་དང་། དེ་སྐད་སྨྲས་མ་ཐག་ཏུ་གསེར་གྱི་འཁོར་ལོ་དེ་སྟེང་གི་ནམ་མཁའ་ལ་
འཕགས་ནས་ཕྱོགས་བཅུར་བསྐོར་ཏེ་ཕྱིར་རྒྱལ་པོའི་ལག་པ་གཡོན་པར་འོངས་སོ། །དེའི་ཚེ་རྒྱལ་པོ་སྤྱི་བོ་སྐྱེས་ཤིན་དུ་དགའ་མགུ་རངས་ནས་བདག་ནི་ངེས་པར་འཁོར་ལོས་སྒྱུར་བའི་རྒྱལ་པོ་ཡིན་ནོ་ཞེས་སྨྲས་སོ། །
ཕྱིས་རིང་པོ་མ་ལོན་པར་བལ་གྱི་གླང་པོ་ཆེ་ཤིན་དུ་བཟང་བ་པད་མོ་དཀར་པོ་ལྟར་དཀར་ལ་ཡན་ལག་བདུན་ས་ལ་རེག་པ་བྱུང་སྟེ། རྒྱལ་པོ་སྤྱི་བོ་སྐྱེས་དེས་མཐོང་ནས་ཡང་འདི་སྙམ་དུ་བསམས་སོ། །བདག་གིས་སྔོན་དྲང་སྲོང་
མངོན་པར་ཤེས་པ་ལྔ་དང་ལྡན་པ་ལས་ཐོས་ན། གལ་ཏེ་འཁོར་ལོས་སྒྱུར་བའི་རྒྱལ་པོ་ཚེས་བཅྭ་ལྔའི་ཉིན་པར་ཁྲུས་བྱས་ནས་ཡང་ཐོག་མཐོན་པོར་འཛེགས་ཏེ་འདུག་པ་ལས། བལ་གྱི་གླང་པོ་ཆེ་ཤིན་དུ་བཟང་པོ་པད་མོ་

47-1-207a

དཀར་པོ་ལྟར་དཀར་ལ་ཡན་ལག་བདུན་ས་ལ་རེག་པ་བྱུང་ན་དེ་ནི་གདོན་མི་ཟ་བར་འཁོར་ལོས་བསྒྱུར་བའི་རྒྱལ་པོར་འགྱུར་ཞེས་ཐོས་པ་བསམས་ནས་དེ་བརྟག་པའི་ཕྱིར་པོག་བོར་ཐོགས་ཏེ་པུས་མོ་གཡས་པའི་ལྷ་ང་ས་ལ་བཙུགས་
ནས་འདི་སྐད་ཅེས་སྨྲས་སོ། །བལ་གླང་རིན་པོ་ཆེ་འདི་གལ་ཏེ་ཡང་དག་པ་ཞིག་ཡིན་ན་སྔོན་འདས་པའི་འཁོར་ལོས་བསྒྱུར་བའི་རྒྱལ་པོའི་ཆོས་ལྟར་གར་འགྲོ་བར་སོང་ཤིག །ཅེས་སྨྲས་ནས་བལ་གླང་རིན་པོ་ཆེ་དེ་ནང་པར་ནས་དགོངས་སུ་
ཕྱོགས་མཚམས་བརྒྱད་རྒྱ་མཚོའི་མཐའ་ལ་ཐུག་གི་བར་དུ་བསྐོར་ནས་ཕྱིར་གནས་སུ་འོངས་སོ། །དེའི་ཚེ་རྒྱལ་པོ་སྤྱི་བོ་སྐྱེས་རབ་ཏུ་དགའ་མགུ་རངས་ནས་བདག་ནི་གདོན་མི་ཟ་བར་འཁོར་ལོས་བསྒྱུར་བའི་རྒྱལ་པོ་ཡིན་ནོ་ཞེས་སྨྲས་སོ། །
དེ་ནས་ཕྱིས་རིང་པོ་མ་ལོན་པར་རྟ་རིན་པོ་ཆེ་སྤུ་མདོག་མཐོན་མཐིང་དུ་འདུག་ལ། རྔ་རྔོག་གསེར་གྱི་ཁ་དོག་འདྲ་བ་ཞིག་རང་བྱུང་སྟེ། རྒྱལ་པོ་སྤྱི་བོ་སྐྱེས་དེས་མཐོང་ནས་ཡང་འདི་སྙམ་དུ་བསམས་སོ། །བདག་གིས་སྔོན་དྲང་སྲོང་
མངོན་པར་ཤེས་པ་ལྔ་དང་ལྡན་པ་ལས་ཐོས་ན། གལ་ཏེ་འཁོར་ལོས་བསྒྱུར་བའི་རྒྱལ་པོ་ཚེས་བཅྭ་ལྔའི་ཉིན་པར་ཁྲུས་བྱས་ནས་ཡང་ཐོག་མཐོན་པོར་འཛེགས་ཏེ་འདུག་པ་ལས་རྟ་རིན་པོ་ཆེ་སྤུ་མདོག་མཐོན་མཐིང་ལ་རྔ་རྔོག་
གསེར་གྱི་ཁ་དོག་འདྲ་བ་བྱུང་ན་རྒྱལ་པོ་དེ་ནི་གདོན་མི་ཟ་བར་འཁོར་ལོས་བསྒྱུར་བའི་རྒྱལ་པོ་ཡིན་ནོ། །ཞེས་ཐོས་པ་བསམས་ནས་དེ་བརྟག་པའི་ཕྱིར་པོག་པོར་ཐོགས་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་འདི་སྐད་
ཅེས་སྨྲས་སོ། །རྟ་རིན་པོ་ཆེ་མཐོན་མཐིང་འདི་ཡང་དག་པ་ཞིག་ཡིན་ན་སྔོན་གྱི་འཁོར་ལོས་བསྒྱུར་བའི་རྒྱལ་པོའི་ཆོས་ལྟར་གར་འགྲོ་བར་སོང་ཤིག་ཅེས་སྨྲས་ནས་རྟ་རིན་པོ་ཆེ་ནང་པར་ནས་དགོངས་སུ་ཕྱོགས་མཚམས་བརྒྱད་དུ་
རྒྱ་མཚོའི་མཐའ་ལ་ཐུག་པར་བསྐོར་ནས་ཕྱིར་གནས་སུ་འོངས་སོ། །དེའི་ཚེ་རྒྱལ་པོ་སྤྱི་བོ་སྐྱེས་རབ་ཏུ་དགའ་མགུ་རངས་ནས་བདག་ནི་གདོན་མི་ཟ་བར་འཁོར་ལོས་བསྒྱུར་བའི་རྒྱལ་པོ་ཡིན་ནོ་ཞེས་སྨྲས་སོ། །དེ་ནས་རིང་པོ་

47-1-207b

མ་ལོན་པར་བུད་མེད་རིན་པོ་ཆེ་གཟུགས་བྱད་མཛེས་པ་ཤིན་དུ་སྡུག་པ་ཕུལ་དུ་གྱུར་པ། མི་རིང་མི་ཐུང་། ཧ་ཅང་ཡང་མི་དཀར། ཧ་ཅང་ཡང་མི་གནག །ལུས་ཀྱི་བ་སྤུའི་ཁུང་ནས་སྤོས་ཙན་དན་གྱི་དྲི་བྲོ་བ། 
ཁ་ནས་པད་མ་སྔོན་པོའི་བསུང་བྲོ་བ། མིག་རྒྱང་རིང་པོ་དཔག་ཚད་གཅིག་ཚུན་ཆད་མཐོང་བ། རྣ་བས་ཀྱང་ཐོས་པ། སྣས་ཀྱང་བསུང་ཚོར་བ། ལྕེ་ཤིན་དུ་མཉེན་ཞིང་རིང་ལ་ངོ་ཡོག་པ། མདོག་འཇམ་ཞིང་འཚེར་
བ་ནི་ཟངས་གླེབས་པ་དང་འདྲ་བ་ཤེས་རབ་རྣོ་ལ་བློ་ཆེ་བ། སེམས་ཅན་ཐམས་ཅད་ལ་རྟག་ཏུ་ངག་འཇམ་པོས་སྨྲ་བ། བུད་མེད་དེའི་ལག་པས་རྒྱལ་པོའི་གོས་ལ་རེག་པ་ཙམ་གྱིས་ཀྱང་རྒྱལ་པོ་དེའི་ན་བ་དང་བདེ་བ་ཡང་ཤེས་ལ་
ཅི་ལ་སེམས་པ་ཡང་ཤེས་སོ། །དེའི་ཚེ་རྒྱལ་པོ་སྤྱི་བོ་སྐྱེས་དེ་འདི་སྙམ་དུ་བུད་མེད་གང་རྒྱལ་པོའི་སེམས་ཤེས་པ་ནི་བུད་མེད་རིན་པོ་ཆེ་ཡིན་ནོ་སྙམ་བསམས་སོ། །དེ་ནས་རིང་པོ་མ་ལོན་པར་རྒྱལ་པོའི་ཕོ་བྲང་གི་ནང་
ནས་ནོར་བུ་རིན་པོ་ཆེ་བཻ་དཱུརྱ་སྔོན་པོ་ལྟ་བུ་ཆེ་ཁྱད་མིའི་བརླ་ཙམ་ཞིག་བྱུང་སྟེ། ནོར་བུ་རིན་པོ་ཆེ་དེས་མུན་པ་དཔག་ཚད་གཅིག་ཁོ་ར་ཁོར་ཡུག་ཏུ་སྣང་བར་ཡང་བྱེད་ལ། གལ་ཏེ་ཆར་པའི་ཐིགས་པ་ཤིང་རྟའི་སྲོག་ཤིང་ཙམ་
བབ་ཀྱང་། ནོར་བུ་རིན་པོ་ཆེ་དེའི་མཐུས་དཔག་ཚད་གཅིག་ཁོ་ར་ཁོར་ཡུག་ཏུ་གདུགས་སུ་གྱུར་ཏེ་ཆར་པ་མི་ཟག་གོ། །དེའི་ཚེ་རྒྱལ་པོ་སྤྱི་བོ་སྐྱེས་འདི་སྙམ་དུ་འཁོར་ལོས་བསྒྱུར་བའི་རྒྱལ་པོས་ནོར་བུ་རིན་པོ་ཆེ་འདི་ཐོབ་ན་
གདོན་མི་ཟ་བར་འཁོར་ལོས་སྒྱུར་བའི་རྒྱལ་པོ་ཡིན་ནོ་སྙམ་སེམས་སོ། །དེ་ནས་རིང་པོ་མ་ལོན་པར་རིན་པོ་ཆེའི་གཏེར་ལ་དབང་བའི་བློན་པོ་རང་བྱུང་སྟེ། ནོར་བུ་རིན་པོ་ཆེ་རབ་ཏུ་མང་བ། ཤིན་དུ་ཕྱུག་པ། བང་མཛོད་
ཚད་མེད་པ་ཤིན་དུ་གང་བ། ཅིས་ཀྱང་མི་ཕོངས་མི་བྲེལ་བ་བསོད་ནམས་ལས་གྱུར་པའི་མིག་གི་དབང་པོས་སའི་འོག་ན་གཏེར་ཅི་ཡོད་པ་ཐམས་ཅད་མཐོང་བས་རྒྱལ་པོས་བསམས་པ་བཞིན་དུ་སྦྱོར་རོ། །དེའི་ཚེ་རྒྱལ་པོ་སྤྱི་

47-1-208a

བོ་སྐྱེས་དེ་བརྟག་པའི་ཕྱིར་གྲུར་ཞུགས་ནས་རྒྱ་མཚོ་ཆེན་པོར་ཞུགས་ཏེ། རྒྱལ་པོས་དེ་ལ་འདི་སྐད་ཅེས་བསྒོའོ། །ཁོ་བོ་ནོར་བུ་རིན་པོ་ཆེ་རྣམ་པ་ཐ་དད་པ་དག་ཅིག་འདོད་དོ། །བློན་པོ་དེས་དེ་སྐད་ཅེས་ཐོས་
མ་ཐག་ཏུ་ལག་པ་གཉིས་ཀྱིས་རྒྱ་མཚོའི་ནང་ནས་བཅུས་པ་དང་སོར་མོ་བཅུ་ལ་ནོར་བུ་རིན་པོ་ཆེའི་གཏེར་བཅུ་ཡོད་པར་གྱུར་ཏེ། རྒྱལ་པོ་ལ་ཕུལ་ནས་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ཇི་ཙམ་འདོད་པ་བཞེས་ཏེ་ལྷག་
མ་སླར་རྒྱ་མཚོར་དོར་དུ་གསོལ། དེའི་ཚེ་རྒྱལ་པོ་སྤྱི་བོ་སྐྱེས་རབ་ཏུ་དགའ་མགུ་རངས་ནས་བདག་ནི་ངེས་པར་འཁོར་ལོས་སྒྱུར་བའི་རྒྱལ་པོ་ཡིན་ནོ། །ཞེས་སྨྲས་སོ། །དེ་ནས་རིང་པོ་མ་ལོན་པར་དམག་ལ་དབང་བའི་བློན་པོ་
བྱུང་སྟེ། ཤིན་དུའང་རྩལ་ཆེ་ཞིང་དཔའ་བ། དགྲ་ཐབས་ལ་ཕུལ་དུ་མཁས་པ་དམག་གི་ཚོགས་རྣམ་བཞི་ལ་ཤིན་དུ་མཁས་པ། རྒྱལ་པོ་གཞན་ལ་རྒོལ་དུ་ཆ་ན་དམག་མངོན་པར་སྟོན་པ། རྒོལ་བ་མེད་པ་ན་ཅང་
མི་སྣང་བ། མ་བཏུལ་བ། ཐུལ་བ། ཐུལ་བའི་རྣམས་མཐུས་ཤིན་དུ་སྐྱོབ་པ་ལ་མཁས་པ་བྱུང་ངོ་། །དེའི་ཚེ་རྒྱལ་པོ་སྤྱི་བོ་སྐྱེས་ཡང་འདི་སྙམ་དུ་སེམས་ཏེ། འཁོར་ལོས་སྒྱུར་བའི་རྒྱལ་པོ་ལ་དམག་དཔོན་རིན་
པོ་ཆེ་འདི་ཡོད་དེ། བདག་ནི་གདོན་མི་ཟ་བར་འཁོར་ལོས་སྒྱུར་བའི་རྒྱལ་པོ་ཡིན་ནོ། །སྙམ་སེམས་སོ། །དེའི་ཚེ་འཁོར་ལོས་སྒྱུར་བའི་རྒྱལ་པོ་སྤྱི་བོ་སྐྱེས་ཀྱིས་བློན་པོ་རྣམས་ལ་བཀའ་སྩལ་པ། ཁྱེད་འདི་
ལྟར་རིག་པར་གྱིས་ཤིག །འཛམ་བུའི་གླིང་འདིར་ནི་བདེ་ཞིང་སྐྱིད་པར་གྱུར་ལ། ང་ནི་རིན་པོ་ཆེ་སྣ་བདུན་དང་བུ་སྟོང་དུ་ཡང་ལྡན་ན་ད་གཞན་ཅི་ཞིག་བྱར་ཡོད། བློན་པོ་རྣམས་ཀྱིས་གསོལ་པ། དེ་བཞིན་ནོ། །
རྒྱལ་པོ་ཆེན་པོ་ཤར་གྱི་ལུས་འཕགས་གླིང་ཞེས་བགྱི་བ་ད་དུང་མ་བཏུལ་ཏེ། རྒྱལ་པོའི་བཀའ་མི་ཉན་ན་དེ་ཡང་དབབ་པའི་རིགས་སོ་ཞེས་གསོལ་ཏོ། །དེའི་ཚེ་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་བཅས་

47-1-208b

ཏེ། ཐམས་ཅད་ནམ་མཁའ་ལ་འཕགས་ནས་ཤར་གྱི་ལུས་འཕགས་གླིང་དུ་ཆས་ཏེ། གླིང་དེའི་མི་རྣམས་ཐམས་ཅད་དགའ་ནས་བཀའ་ཉན་པར་གྱུར་ཏོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་
མདོ། བམ་པོ་བཅུ་བདུན་པ། དེ་ནས་ཡང་བློན་པོ་རྣམས་ལ་བཀའ་སྩལ་པ། ལྷོའི་འཛམ་བུའི་གླིང་དང་། ཤར་ཀྱི་ལུས་
འཕགས་ཀྱི་གླིང་ནི་རབ་ཏུ་བདེ་བར་གྱུར་ཏེ། ཐམས་ཅད་བཀའ་ཉན་པར་ཡང་གྱུར། རིན་པོ་ཆེ་སྣ་བདུན་དང་བུ་སྟོང་དུ་ཡང་ལྡན་ན་ད་ཡང་གཞན་ཅི་ཞིག་བྱར་ཡོད། བློན་པོ་རྣམས་ཀྱིས་གསོལ་པ། 
དེ་བཞིན་ནོ། །རྒྱལ་པོ་ཆེན་པོ་ནུབ་ཀྱི་བལ་གླང་སྤྱོད་ཅེས་བགྱི་བ་ད་དུང་མ་བཏུལ་ལོ། །དེ་ནས་རྒྱལ་པོ་རིན་པོ་ཆེ་སྣ་བདུན་དང་བཅས་ཏེ། ཐམས་ཅད་ནམ་མཁའ་ལ་འཕགས་ནས་ནུབ་ཀྱི་བལ་
གླང་སྤྱོད་དུ་ཆས་སོ། །རྒྱལ་པོ་དེར་ཕྱིན་མ་ཐག་ཏུ་དེ་ན་གནས་པའི་མི་ཐམས་ཅད་ཀྱང་བཀའ་ཉན་པར་གྱུར་ཏོ། །ཡང་བློན་པོ་རྣམས་ལ་བཀའ་སྩལ་པ། ལྷོའི་འཛམ་བུའི་གླིང་དང་། ཤར་གྱི་
ལུས་འཕགས་གླིང་དང་། ནུབ་ཀྱི་བལ་བླང་སྤྱོད་ན་གནས་པའི་མི་དག་ནི་རབ་ཏུ་བདེ་ཞིང་སྐྱིད་ལ་བཀའ་ཡང་ཉན་པར་གྱུར་ཏེ། རིན་པོ་ཆེ་སྣ་བདུན་དང་། བུ་སྟོང་དུ་ཡང་ལྡན་པ་འདི་ད་གཞན་ཡང་ཅི་ཞིག་བྱར་
ཡོད། བློན་པོ་རྣམས་ཀྱིས་གསོལ་པ། དེ་བཞིན་ནོ། །རྒྱལ་པོ་ཆེན་པོ་བྱང་གི་སྒྲ་མི་སྙན་ཞེས་བགྱི་བ་ད་དུང་མ་བཏུལ་ལོ། །དེ་ནས་རྒྱལ་པོ་ཡང་རིན་པོ་ཆེ་སྣ་བདུན་དང་བཅས་ཏེ། 
ཐམས་ཅད་སྟེང་གི་ནམ་མཁའ་ལ། འཕགས་ནས་བྱང་གི་སྒྲ་མི་སྙན་དུ་ཆས་སོ། །དེར་ཕྱིན་མ་ཐག་ཏུ་དེ་ན་གནས་པའི་མི་ཐམས་ཅད་རབ་ཏུ་དགའ་ནས་བཀའ་ཉན་ཏོ། །དེ་ནས་ཡང་

47-1-209a

བློན་པོ་རྣམས་ལ་བཀའ་སྩལ་པ། གླིང་བཞི་ན་གནས་པའི་མི་དག་ནི་རབ་ཏུ་ཡང་སྐྱིད་ཅིང་བདེ་ལ་བཀའ་ཉན་པར་གྱུར་ཏེ། རིན་པོ་ཆེ་སྣ་བདུན་དང་བུ་སྟོང་དུ་ལྡན་ན་ད་གཞན་ཡང་
ཅི་ཞིག་བྱར་ཡོད། བློན་པོ་རྣམས་ཀྱིས་གསོལ་པ། དེ་བཞིན་ནོ། །རྒྱལ་པོ་ཆེན་པོ་སུམ་བཅུ་རྩ་གསུམ་གྱི་ལྷའི་ཚེ་ཡང་རབ་ཏུ་རིང་ལ་ཤིན་ཏུ་བདེ་སྐྱིད་དོ། །ལྷའི་ལུས་ནི་ཤིན་ཏུ་ཡང་བཟང་
སྟེ། དཔེ་ཟླ་མེད་ལ་གནས་པའི་ཕོ་བྲང་དང་། འདུག་པའི་ཁྲི་དང་། ཉལ་བའི་མལ་ཡང་རིན་པོ་ཆེ་སྣ་བདུན་འབའ་ཞིག་སྟེ། ལྷའི་བསོད་ནམས་བསྙེམས་པས་དེ་དག་ཀྱང་རྒྱལ་པོའི་བཀའ་
མི་ཉན་ན་བཏུལ་ཞིང་དབབ་པའི་རིགས་སོ། །དེ་ནས་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་བཅས་ཏེ། ཐམས་ཅད་ནམ་མཁའ་ལ་འཕགས་ནས་སུམ་བཅུ་རྩ་གསུམ་གནམ་དུ་ཆས་སོ། །
དེར་ཕྱིན་པ་དང་ཤིང་ཁ་དོག་སྔོན་པོར་འདུག་པ་ཅིག་མཐོང་ནས་སྔོན་པོར་འདུག་པ་འདི་ཅི་ཞིག་ཡིན་ཞེས་བློན་པོ་རྣམས་ལ་དྲིས་སོ། །བློན་པོ་རྣམས་ཀྱིས་གསོལ་པ། འདི་ནི་ཤིང་པཱ་རི་ཛཱ་ཏ་ཞེས་བྱ་སྟེ། 
སུམ་བཅུ་རྩ་གསུམ་གནམ་གྱི་ལྷ་རྣམས་དབྱར་གྱི་ཟླ་གསུམ་ལ་ཤིང་དེའི་འོག་ན་ལོངས་སྤྱོད་ཅིང་རྩེའོ། །གཞན་ཡང་ཁ་དོག་དཀར་པོ་སྤྲིན་དཀར་པོ་དང་འདྲ་བ་ཞིག་མཐོང་ནས་འདི་ཅི་ཡིན་ཞེས་དྲིས་སོ། །བློན་པོ་རྣམས་
ཀྱིས་གསོལ་པ། འདི་ནི་སུམ་བཅུ་རྩ་གསུམ་གནམ་གྱི་ཆོས་བཟང་གི་ལྷའི་འདུན་ས་ཞེས་བྱ་སྟེ། སུམ་བཅུ་རྩ་གསུམ་གྱི་ལྷ་རྣམས་ནི་དེར་འདུ་ཞིང་ལྷ་དང་མིའི་གཏམ་ཟེར་རོ། །དེའི་ཚེ་བརྒྱ་བྱིན་ལྷའི་
དབང་པོས་ཀྱང་རྒྱལ་པོ་སྤྱི་བོ་སྐྱེས་འོངས་པར་ཤེས་ནས་ཕྱི་རོལ་དུ་བསུ་སྟེ། ལག་པས་བཟུང་ནས་འགྲོགས་ནས་ཆོས་བཟངས་ཀྱི་འདུན་སར་བཞུགས་ནས་གདན་ཕྱེད་བདར་ཏེ་ལྷན་ཅིག་ཏུ་འདུག་གོ། །

47-1-209b

དེའི་ཚེ་རྒྱལ་པོ་གཉིས་ལྷན་ཅིག་ཏུ་འདུག་པ་ན་གཟུགས་བྱད་དང་མཚན་ལ་སོགས་པ་ཐ་དད་པ་མེད་དེ། ལྟ་བ་དང་མིག་འཛུམ་པ་ཙམ་ཞིག་མི་འདྲའོ། །དེའི་ཚེ་ན་འཁོར་ལོས་སྒྱུར་བའི་རྒྱལ་པོ་དེས་འདི་སྙམ་དུ་
བསམས་པར་གྱུར་ཏེ། བདག་གིས་ལྷའི་རྒྱལ་པོ་འདིའི་ཐབས་ཕྲོགས་ཏེ་བདག་གིས་བྱར་རུང་ངམ་སྙམ་བསམས་སོ། །རིགས་ཀྱི་བུ་དེའི་ཚེ་དེའི་དུས་ན་བརྒྱ་བྱིན་ལྷའི་དབང་པོ་ཐེག་པ་ཆེན་པོའི་མདོ་སྡེ་འཆང་བ་དང་། 
འཛིན་པ་དང་། ཀློག་པ་དང་། འདོན་པ་དང་། གཞན་ལ་ཡང་འབྱེད་ཅིང་སྟོན་པའི་ལས་བྱེད་དེ། ཤིན་ཏུ་ཟབ་མོའི་དོན་ཟད་པར་རྟོགས་པ་ནི་མ་ཡིན་ནོ། །དེ་ལྟར་ཐེག་པ་ཆེན་པོའི་མདོ་སྡེ་འཆང་བ་དང་། 
འཛིན་པ་དང་། ཀློག་པ་དང་། འདོན་པ་དང་། གཞན་ལ་རྒྱས་པར་འབྱེད་ཅིང་སྟོན་པ་དེའི་རྒྱུ་དེའི་རྐྱེན་ཀྱིས་གཟི་བརྗིད་ཆེན་པོ་དང་ལྡན་པར་གྱུར་ཏོ། །རིགས་ཀྱི་བུ་དེའི་ཚེ་ན་རྒྱལ་པོ་སྤྱི་བོ་སྐྱེས་དེ་དེ་ལྟར་བརྒྱ་བྱིན་ལ་ངན་སེམས་
བསྐྱེད་པས་དེ་མ་ཐག་ཏུ་ཕྱིར་འཛམ་བུ་གླིང་དུ་ལྷུང་ནས་འདོད་པའི་ལྷ་དང་། མི་དང་བྱེ་བྲལ་བར་གྱུར་ཏེ། སྡུག་བསྔལ་ཆེན་པོ་སྐྱེས་སོ། །དེ་ནས་ནད་ཀྱིས་བཏབ་ཚེ་འཕོས་པར་གྱུར་ཏོ། །དེའི་ཚེ་དེའི་དུས་ན་བརྒྱ་
བྱིན་དུ་གྱུར་པ་དེ་ནི་སངས་རྒྱས་འོད་སྲུང་ཞེས་བྱ་བ་ཡིན་ནོ། །འཁོར་ལོས་སྒྱུར་བའི་རྒྱལ་པོ་དེ་ནི་ད་ལྟར་ང་ཡིན་ནོ། །རིགས་ཀྱི་བུ་དེ་བས་ན་འདོད་པ་དང་། བྱེ་བྲལ་ན་སྡུག་བསྔལ་ཆེན་པོ་ཡིན་པར་རིག་པར་བྱའོ། །
རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་ལྟར་འདས་པའི་དུས་ཀྱི་བྱེ་བྲལ་བའི་སྡུག་བསྔལ་དྲན་པ་ཡིན་ན། བྱང་ཆུབ་སེམས་དཔའ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་
གནས་པ། ད་ལྟར་གྱི་དུས་ཀྱི་འདོད་པ་དང་བྱེ་བྲལ་བའི་སྡུག་བསྔལ་ལ་རྟོག་པ་ལྟ་ཅི་སྨོས། རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་སྤྱོད་པ་

47-1-210a

ན་དགྲ་སྡང་བ་དང་ཕྲད་པའི་སྡུག་བསྔལ་ཞེ་ན། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ནི་འདི་ལྟར་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དང་། མི་དང་
ལྷ་ལ་ཡང་དགྲ་སྡང་བ་དང་ཕྲད་པའི་སྡུག་བསྔལ་ཞེས་བྱ་བ་ཡོད་དོ། །འདི་ལྟ་སྟེ། དཔེར་ན་མིས་ནི་བཙོན་རར་བཅུག་པ་དང་། བཟུང་བ་དང་། བཅིངས་པ་དང་། ལྕགས་དང་། ཁོང་སྒྲིལ་དང་། ཤིང་སྒྲོག་ཏུ་བཅུག་པ་ལ་
སྡུག་བསྔལ་ཆེན་པོར་མཐོང་ངོ་། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། ལམ་རྒྱུད་ལྔའི་སེམས་ཅན་ཐམས་ཅད་ཀྱང་དགྲ་སྡང་བ་དང་ཕྲད་པའི་སྡུག་བསྔལ་ཆེན་པོ་ཡིན་པར་རྟོགས་སོ། །
རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན་མི་ཞིག་ཁོན་ཡོད་པས་འཇིགས་སམ། སྟོང་ངམ། ལྕགས་སམ། ཁོང་སྒྲིལ་གྱིས་འཇིགས་པས་ཕ་མ་དང་ཆུང་མ་དང་། བུ་དང་འཁོར་རྣམས་དང་། རིན་པོ་ཆེ་དེར་
སོ་ནམ་ཀུན་སྤངས་ཏེ། ལམ་རིང་པོར་བྱོལ་ཞིང་བྲོས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། འཁོར་བས་འཇིགས་པ་དང་ཕ་རོལ་ཏུ་ཕྱིན་པ་དྲུག་རྫོགས་པར་སྤྱད་དེ་མྱ་ངན་ལས་
འདས་པར་འཇུག་གོ། །འོད་སྲུང་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་སྤྱོད་པ་ན་དགྲ་སྡང་བ་ཕྲད་པའི་སྡུག་བསྔལ་རྟོགས་པ་ཞེས་བྱའོ། །རིགས་
ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྤྱོད་པར་འདོད་པ་མི་རྙེད་པའི་སྡུག་བསྔལ་རྟོགས་པ་ཞེ་ན། འདོད་པ་ནི་ཐམས་ཅད་འདོད་པའོ། །ཐམས་ཅད་
འདོད་པ་ཡང་རྣམ་པ་གཉིས་ཏེ། དགེ་བའི་ཆོས་འདོད་པ་དང་། མི་དགེ་བའི་ཆོས་འདོད་པའོ། །དེ་ཡང་དགེ་བའི་ཆོས་མ་རྙེད་ན་སྡུག་བསྔལ་བའོ། །མི་དགེ་བའི་ཆོས་དང་མ་བྲལ་ན་སྡུག་བསྔལ་བ་སྟེ། འདི་དག་ནི་ཕུང་པོ་ལྔ་སྡུག་བསྔལ་

47-1-210b

བ་མདོར་བཤད་པའོ། །འོད་སྲུང་དེ་དག་ནི་སྡུག་བསྔལ་གྱི་བདེན་པ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
ཀྱིས་ཕུང་པོ་ལྔ་སྡུག་བསྔལ་བར་གསུངས་པའི་དོན་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཀྱིས་སྔོན་ཤཱག་ཀྱ་མིང་ཆེན་ལ་འདི་སྐད་ཅེས་བཀའ་སྩལ་ཏོ། །གལ་ཏེ་གཟུགས་སྡུག་བསྔལ་
བ་ཡིན་ན་སེམས་ཅན་ཐམས་ཅད་གཟུགས་འདོད་པའི་མི་རིགས་ཏེ། ཐམས་ཅད་འདོད་པས་ན་སྡུག་བསྔལ་ཞེས་བྱར་མི་རུང་ངོ་ཞེས་ཀྱང་གསུངས། ཡང་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་
པ། ཚོར་བ་ཡང་རྣམ་པ་གསུམ་སྟེ། བདེ་བར་ཚོར་བ་དང་། སྡུག་བསྔལ་བར་ཚོར་བ་དང་། བདེ་བ་ཡང་མ་ཡིན་སྡུག་བསྔལ་བ་ཡང་མ་ཡིན་པར་ཚོར་བ་སྟེ། སྔོན་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་
སྩལ་པ། གང་ཞིག་གིས་དགེ་བའི་ཆོས་ལ་ནན་ཏན་བྱས་ན་བདེ་བ་མྱོང་བར་འགྱུར་རོ་ཞེས་ཀྱང་གསུངས། ཡང་བཅོམ་ལྡན་འདས་ཀྱིས་གསུངས་པ། དགེ་བའི་རྒྱུད་དུ་རེག་བྱ་དྲུག་གིས་ཀྱང་བདེ་བ་མྱོང་བར་འགྱུར་ཏེ། 
མིག་གིས་གཟུགས་བཟང་པོ་མཐོང་ན་དེ་ཡང་བདེ་བ་ལ་གནས་ན་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་བར་དུ་བཟང་པོ་ལ་རེག་པ་ཡང་བདེའོ་ཞེས་གསུངས་ཏེ། བཅོམ་ལྡན་འདས་ཀྱིས་ཚིགས་སུ་བཅད་དེ་
གསུངས་པ། ཚུལ་ཁྲིམས་ལྡན་པ་བདེ་བ་སྟེ། །ལུས་ཀྱི་སྡུག་བསྔལ་མི་མྱོང་བ། །གཉིད་ཀྱིས་ལོག་ནའང་བདེ་བར་འགྱུར། །སད་ན་སེམས་ཀྱང་དགའ་བར་འགྱུར། །གོས་དང་བསོད་སྙོམས་ལེན་པ་དང་། །ཀློག་དང་སྒོམ་ཞིང་འཆད་པ་དང་། །
བས་མཐའ་དགོན་པ་རི་དང་ཚལ། །གནས་པར་གྱུར་ན་མཆོག་ཏུ་བདེ། །གང་ཞིག་སེམས་ཅན་མང་པོ་ལ། །ཉིན་མཚན་རྟག་ཏུ་སྙིང་རྗེ་ཞིང་། །གཞན་ལ་གནོད་པ་མི་བྱེད་ན། །དེ་ཡི་རྐྱེན་ཀྱིས་རྟག་ཏུ་བདེ། །འདོད་པ་ཉུང་ཞིང་ཆོག་ཤེས་བདེ། །དེ་བཞིན་

47-1-211a

མང་དུ་ཐོས་པ་བདེ། །ཆགས་མེད་དགྲ་བཅོམ་པ་དག་ཀྱང་། །རབ་ཏུ་བདེ་བ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེ། །ཕ་རོལ་ཕྱིན་པའི་མཐའ་ཕྱིན་ཅིང་། །བྱ་བ་ཐམས་ཅད་བྱས་པ་ནི། །མཆོག་ཏུ་
བདེ་བ་ཞེས་བྱའོ། །བཅོམ་ལྡན་འདས་ཀྱིས་མདོ་སྡེ་གཞན་དག་ལས་བདེ་བའི་མཚན་ཉིད་དུ་གསུངས་པའི་དོན་འདི་ལགས་ན། དེ་ཡང་བཅོམ་ལྡན་འདས་ཀྱིས་འདི་སྐད་དུ་གསུངས་ན་དོན་དེ་དག་འཐུན་པར་རུང་ངམ། བཅོམ་
ལྡན་འདས་ཀྱིས་འོད་སྲུང་ལ་བཀའ་སྩལ་པ། ལེགས་སོ། །ཤིན་ཏུ་ལེགས་སོ། །རིགས་ཀྱི་བུ་དེ་བཞིན་གཤེགས་པ་ལ་དོན་འདི་དག་དྲིས་པ་ལེགས་སོ། །རིགས་ཀྱི་བུ་སེམས་ཅན་ཐམས་ཅད་ནི་སྡུག་བསྔལ་བ་ཐ་མ་ལ་ནན་
གྱིས་བདེ་བར་འདུ་ཤེས་ཏེ། དེ་བས་ན་སྡུག་བསྔལ་གྱི་མཚན་ཉིད་འདི་བཤད་པ་ཡང་སྔ་མ་དང་ཐ་མི་དད་དོ། །དེ་ནས་བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས་ཀྱིས་སྔར་གསུངས་པ་ལྟར། སྡུག་བསྔལ་ཐ་མ་ལ་ཡང་བདེ་བར་འདུ་ཤེས་པ་བསྐྱེད་ན། སྐྱེ་བ་ཐ་མ་དང་། རྒ་བ་ཐ་མ་དང་། ན་བ་ཐ་མ་དང་། འཆི་བ་ཐ་མ་དང་། འདོད་པ་དང་བྱེ་བྲལ་བ་ཐ་མ་དང་། འདོད་པ་མི་རྙེད་པ་ཐ་མ་དང་། དགྲ་སྡང་
བ་དང་ཕྲད་པ་ཐ་མ་དང་། ཕུང་པོ་ལྔ་ཐ་མ་ལ་སོགས་པ་སྡུག་བསྔལ་བ་ལ་ཡང་བདེ་བ་མཆིས་པའི་རིགས་སོ། །བཅོམ་ལྡན་འདས་སྐྱེ་བ་ཐ་མ་ཞེས་བགྱི་བ་ནི་ངན་སོང་གསུམ་མོ། །སྐྱེ་བ་འབྲིང་ཞེས་བགྱི་བ་ནི་མིའི་ནང་དུ་སྐྱེས་པའོ། །
སྐྱེ་བ་རབ་ཅེས་བྱ་བ་ནི་མཐོ་རིས་ཀྱི་ལྷར་སྐྱེ་བ་ལགས་ན། གལ་ཏེ་ལ་ལ་ཞིག་གིས་འདི་སྐད་དུ་བདེ་བ་ཐ་མ་ལ་སྡུག་བསྔལ་བར་འདུ་ཤེས། བདེ་བ་འབྲིང་ལ་ནི་སྡུག་བསྔལ་མེད་པར་བདེ་བར་འདུ་ཤེས། བདེ་བ་རབ་ལ་ནི་བདེ་བར་འདུ་
ཤེས་སོ་ཞེས་དེ་སྐད་ཅེས་དྲི་བ་མཆིས་ན་དེ་ལ་ཇི་སྐད་ཅེས་ལན་གདབ་པར་བགྱི། བཅོམ་ལྡན་འདས་སྡུག་བསྔལ་ཐ་མ་ལ་བདེ་བར་འདུ་ཤེས་པ་ནི་དཔེར་ན་མི་ཞིག་ལྕག་སྟོང་གིས་བཞུ་བ་ལས། ཐོག་མ་གཅིག་ཕོག་པ་ན་བདེ་བར་

47-1-211b

འདུ་ཤེས་པའི་རིགས་ན་དེ་བདེ་བར་འདུ་ཤེས་པ་མ་ལགས་པས་ན་ཅིའི་སླད་དུ་སྡུག་བསྔལ་ཐ་མ་བདེ་བར་འདུ་ཤེས་པར་བགྱི། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་ནོ། །ཁྱོད་
ཀྱིས་སྨྲས་པ་བཞིན་ཏེ། དོན་དེ་ལྟ་བས་ན་བདེ་བར་འདུ་ཤེས་པ་མེད་དོ། །དེ་ཅིའི་ཕྱིར་ཞེ་ན། དཔེར་ན་མི་དེ་ལྕག་སྟོང་གིས་གཞུ་བ་ལས། ལྕག་གཅིག་ཕོག་སྟེ་བཏང་ན་དེའི་ཚེ་མི་དེ་བདེ་བའི་འདུ་ཤེས་སྐྱེ་སྟེ། དེ་བས་ན་བདེ་
བ་མེད་པ་ལ་ནན་ཏན་གྱིས་བདེ་བར་འདུ་ཤེས་སྐྱེད་དོ། །འོད་སྲུང་གིས་གསོལ་པ། མི་དེ་ལྕག་གཅིག་ཕོག་པ་ལ་བདེ་བར་འདུ་ཤེས་པ་མ་ལགས་ཀྱི། དེ་ལས་ཐར་བས་བདེ་བར་འདུ་ཤེས་པ་ལགས་སོ། །བཀའ་སྩལ་པ། 
འོད་སྲུང་དེ་བས་ངས་སྔོན་ཤཱག་ཀྱ་མིང་ཆེན་ལ་ཕུང་པོ་ལྔ་ལ་བདེ་བ་གསུངས་པ་ཡང་དག་པ་སྟེ། བརྫུན་པ་མ་ཡིན་ནོ། །འོད་སྲུང་ཚོར་བ་རྣམ་པ་གསུམ་དང་། སྡུག་བསྔལ་རྣམ་པ་གསུམ་ཡོད་དོ། །ཚོར་བ་རྣམ་པ་གསུམ་ནི་འདི་ལྟ་
སྟེ། བདེ་བར་ཚོར་བ་དང་། སྡུག་བསྔལ་བར་ཚོར་བ་དང་། སྡུག་བསྔལ་བ་ཡང་མ་ཡིན་བདེ་བ་ཡང་མ་ཡིན་པར་ཚོར་བའོ། །སྡུག་བསྔལ་གསུམ་ནི་སྡུག་བསྔལ་བའི་ཡང་སྡུག་བསྔལ་དང་། འདུ་བྱེད་ཀྱི་སྡུག་བསྔལ་དང་། འགྱུར་བའི་
སྡུག་བསྔལ་ལོ། །རིགས་ཀྱི་བུ་སྡུག་བསྔལ་གྱི་ཚོར་བ་ནི་སྡུག་བསྔལ་བའི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་དང་། འགྱུར་བའི་སྡུག་བསྔལ་དང་། སྡུག་བསྔལ་གསུམ་དུ་སྦྱར་རོ། །ལྷག་མ་གཉིས་ནི་འདུ་བྱེད་ཀྱི་སྡུག་བསྔལ་དང་། 
འགྱུར་བའི་སྡུག་བསྔལ་དང་སྦྱར་རོ། །རིགས་ཀྱི་བུ་དེའི་རྒྱུ་དེའི་རྐྱེན་ཀྱིས་ན་སྐྱེ་བ་དང་། འཆི་བའི་ནང་ན་ཡང་དག་པར་བདེ་བར་ཚོར་བ་ཡོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྡུག་བསྔལ་དང་བདེ་བ་ཉིད་ཐ་དད་པ་མ་ཡིན་པར་རྟོགས་
པས་ཐམས་ཅད་སྡུག་བསྔལ་བའོ་ཞེས་གསུངས་སོ། །རིགས་ཀྱི་བུ་སྐྱེ་བ་དང་འཆི་བའི་ནང་ན་ཡང་དག་པར་ན་བདེ་བ་མེད་དེ། སངས་རྒྱས་དང་བྱང་ཆུབ་སེམས་དཔའ་རྣམས་ནི་འཇིག་རྟེན་པའི་རྗེས་སུ་བདེ་བ་ཡོད་དོ་ཞེས་གསུངས་

47-1-212a

པ་ཡིན་ནོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། སངས་རྒྱས་དང་བྱང་ཆུབ་སེམས་དཔའ་རྣམས་འཇིག་རྟེན་གྱི་དབང་དུ་མཛད་དེ་རྗེས་སུ་གསུངས་པ་འདི་བརྫུན་དུ་མི་འགྱུར་
རམ། བཅོམ་ལྡན་འདས་ཀྱིས་གསུངས་པ་ལྟར་ན་གང་དགེ་བ་བགྱིད་པ་ནི་དེའི་འབྲས་བུ་མྱོང་བར་འགྱུར། ཚུལ་ཁྲིམས་བསྲུངས་པས་ནི་ལུས་བདེ་བ་དང་། སྡུག་བསྔལ་མི་མྱོང་བ་ནས་བྱ་བ་ཐམས་ཅད་རྫོགས་པའི་
བར་དུ་འགྱུར་བ་ནི་མཆོག་ཏུ་བདེ་བར་འགྱུར་བ་ལགས་ན། མདོ་སྡེ་དེ་དག་ལ་སོགས་པ་ལས་བདེ་བ་མྱོང་བར་གསུངས་པ་དེ་དག་ཀྱང་བརྫུན་དུ་མི་འགྱུར་རམ། གལ་ཏེ་བརྫུན་དུ་འགྱུར་ན་ལྟ། སངས་རྒྱས་བཅོམ་ལྡན་
འདས་བསྐལ་པ་ཚད་མེད་གྲངས་མེད་པ་བརྒྱ་སྟོང་གི་བར་དུ་བྱང་ཆུབ་བསྒྲུབས་པ་ན་བརྫུན་དུ་སྨྲ་བ་ཡོངས་སུ་སྤངས་ཏེ་དེ་ཡང་འདི་སྐད་དུ་གསུངས་ན་དེའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། 
རིགས་ཀྱི་བུ་གོང་དུ་ཚིགས་སུ་བཅད་པ་ལས་བདེ་བ་མྱོང་བར་བཤད་པ་ནི་བྱང་ཆུབ་ཀྱི་ལམ་གྱི་རྩ་བ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་སྐྱེ་བར་འགྱུར་བས་ན་དེའི་ཕྱིར་སྔར་མདོ་སྡེ་དག་ལས་བདེ་བའི་
མཚན་ཉིད་དེ་སྐད་ཅེས་གསུངས་པ་ཡིན་ནོ། །རིགས་ཀྱི་བུ་དཔེར་ན་འཇིག་རྟེན་གྱི་དགོས་པའི་ལོངས་སྤྱོད་ནི་བདེ་བའི་རྒྱུར་འགྱུར་ཏེ། བདེ་བ་ཞེས་བྱའོ། །འདི་ལྟ་སྟེ་ན་ཆུང་བཟང་མོ་དང་། ཆང་ཞིམ་པོ་དང་། 
ཁ་ཟས་རོ་མཆོག་དང་། སྐོམ་པས་གདུངས་པ་ན་ཆུ་དང་ཕྲད་པ་དང་། གྲང་བའི་ཚེ་མེ་དང་ཕྲད་པ་དང་། གོས་དང་། ལུས་ཀྱི་རྒྱན་དང་། བལ་གླང་དང་། རྟ་དང་ཤིང་རྟ་དང་། བྲན་ཕོ་དང་བྲན་མོ་དང་། ལས་བྱེད་པའི་
མི་དང་། གསེར་དང་། དངུལ་དང་། བཻ་དཱུརྱ་དང་། བྱི་རུ་དང་། མུ་ཏིག་དང་། བང་མཛོད་དང་། ནས་འབྲས་ལ་སོགས་པ་ནི་འཇིག་རྟེན་གྱི་དགོས་པ་སྟེ། བདེ་བའི་རྒྱུར་འགྱུར་བས་ན་བདེ་བ་ཞེས་བྱའོ། །རིགས་ཀྱི་བུ་དངོས་པོ་

47-1-212b

དེ་དག་ལ་སོགས་པས་སྡུག་བསྔལ་ཡང་སྐྱེ་བར་བྱེད་དོ། །འདི་ལྟ་སྟེ་བུད་མེད་ཀྱི་ཕྱིར་སྐྱེས་པ་དག་སྡུག་བསྔལ་བ་དང་། མི་དགའ་བ་དང་། མྱ་ངན་བྱེད་པ་དང་། ཆོ་ངེ་རྡུང་བ་དང་། སྲོག་གི་བར་དུ་ཡང་བར་ཆད་དུ་འགྱུར་བ་
ཡོད་དོ། །ཆང་དང་ཟས་ཞིམ་པོ་ནས་བང་མཛོད་ཀྱི་བར་དུ་ཡང་སྡུག་བསྔལ་ཆེན་པོ་སྐྱེ་བར་འགྱུར་ཏེ། དེ་བས་ན་ཐམས་ཅད་སྡུག་བསྔལ་ཡིན་གྱི་བདེ་བའི་མཚན་ཉིད་མེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་
དཔའ་ཆེན་པོས་ནི་སྡུག་བསྔལ་བརྒྱད་ལ་སྡུག་བསྔལ་བར་ཤེས་ཏེ་བདེ་བ་མེད་དོ། །རིགས་ཀྱི་བུ་ཉན་ཐོས་དང་། རང་སངས་རྒྱས་ལ་སོགས་པ་ནི་བདེ་བའི་རྒྱུ་མི་ཤེས་པས་ན་དེ་དག་གི་ཕྱིར་སྡུག་བསྔལ་ཐ་མ་ལ་བདེ་བའི་མཚན་ཉིད་ཡོད་
པར་སྨྲའོ། །བྱང་ཆུབ་སེམས་དཔའ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་ལ་གནས་པ་འབའ་ཞིག་ནི་སྡུག་བསྔལ་གྱི་རྒྱུ་དང་། བདེ་བའི་རྒྱུ་རྟོགས་ཤིང་ཤེས་སོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་
སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ན། ཀུན་འབྱུང་གི་བདེན་པ་རྟོགས་པ་ཞེ་ན། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཀུན་
འབྱུང་གི་བདེན་པ་འདི་ཕུང་པོའི་རྒྱུ་དང་རྐྱེན་ཡིན་པར་རྟོགས་སོ། །ཀུན་འབྱུང་ཞེས་བྱ་བ་ནི་ཕྱིར་ཡང་སྲིད་པ་ལ་འདོད་པ་སྟེ། འདོད་པ་ལ་རྣམ་པ་གཉིས་སོ། །བདག་གི་ལུས་འདོད་པ་དང་། དགོས་པ་འདོད་
པའོ། །ཡང་རྣམ་པ་གཉིས་ཏེ། འདོད་པ་ལྔ་མ་ཐོབ་པ་ལ་སེམས་རྩེ་གཅིག་ཏུ་ཚོལ་བ་དང་། རྙེད་ནས་ཤིན་ཏུ་ཆགས་པ་ལ་བཟོད་པར་བྱེད་པའོ། །གཞན་ཡང་རྣམ་པ་གསུམ་སྟེ། འདོད་པའི་འདོད་པ་
དང་། གཟུགས་ཀྱི་འདོད་པ་དང་། གཟུགས་མེད་པའི་འདོད་པའོ། །གཞན་ཡང་རྣམ་པ་གསུམ་སྟེ། ལས་ཀྱི་རྒྱུ་དང་རྐྱེན་ལ་འདོད་པ་དང་། ཉོན་མོངས་པའི་རྒྱུ་དང་རྐྱེན་ལ་འདོད་པ་དང་། སྡུག་བསྔལ་གྱི་རྒྱུ་དང་རྐྱེན་ལ་འདོད་པའོ། །རབ་ཏུ་བྱུང་བ་ལ་འདོད་པ་རྣམ་པ་བཞི་

47-1-213a

འོ་ཆོས་གོས་དང་། བསོད་སྙོམས་དང་། མལ་ཆ་དང་། ནད་ཀྱི་རྐྱེན་སྨན་ནོ། །གཞན་ཡང་རྣམ་པ་ལྔ་སྟེ། ཕུང་པོ་ལྔ་ལ་ཆགས་ནས་དགོས་པའི་རྗེས་སུ་ཐམས་ཅད་འདོད་དོ། །རྣམ་པར་རྟོག་པ་ཚད་མེད་མཐའ་ཡས་པའོ། །
རིགས་ཀྱི་བུ་འདོད་པ་ལ་ཡང་རྣམ་པ་གཉིས་ཏེ། དགེ་བ་ལ་འདོད་པ་དང་། མི་དགེ་བ་ལ་འདོད་པའོ། །མི་དགེ་བ་ལ་འདོད་པ་ནི་གླེན་པ་འབའ་ཤིག་འདོད་དོ། །དགེ་བ་ལ་འདོད་པ་ནི་བྱང་ཆུབ་སེམས་དཔའ་རྣམས་འདོད་དོ། །དགེ་བའི་
ཆོས་འདོད་པ་ལ་ཡང་རྣམ་པ་གཉིས་ཏེ། མི་དགེ་བ་དང་། དགེ་བའོ། །ཐེག་པ་གཉིས་པོ་ཚོལ་བ་ནི་མི་དགེ་བའོ། །ཐེག་པ་ཆེན་པོ་ཚོལ་བ་ནི་དགེ་བའོ། །རིགས་ཀྱི་བུ་བྱིས་པ་མ་རབས་ཀྱི་འདོད་པ་ནི་ཀུན་འབྱུང་ཞེས་བྱ་སྟེ་བདེན་པ་
མ་ཡིན་ནོ། །བྱང་ཆུབ་སེམས་དཔའི་འདོད་པ་ནི་བདེན་པ་ཞེས་བྱ་སྟེ། ཀུན་འབྱུང་མ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་བསྒྲལ་བའི་དོན་གྱི་ཕྱིར་སྐྱེ་བ་ལེནད་ཀྱི། འདོད་པའི་ཕྱིར་སྐྱེ་བ་ལེན་པ་ནི་མ་ཡིན་ནོ། །
བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། སངས་རྒྱས་བཅོམ་ལྡན་འདས་ཀྱི་མདོ་སྡེ་གཞན་དག་ལས་སེམས་ཅན་དག་གི་ཕྱིར་ལས་ནི་རྒྱུ་དང་རྐྱེན་དུ་འགྱུར་རོ་ཞེས་གསུངས། 
བར་བར་ནི་ང་རྒྱལ་རྒྱུར་འགྱུར་རོ་ཞེས་གསུངས། བར་བར་ནི་རེག་བྱ་དྲུག་རྒྱུར་འགྱུར་རོ་ཞེས་གསུངས། བར་བར་ནི་མ་རིག་པ་ཕུང་པོ་ལྔར་འགྱུར་ཏེ། རྒྱུ་དང་རྐྱེན་དུ་འགྱུར་རོ་ཞེས་གསུངས་ན། དེ་ཅིའི་སླད་དུ་འཕགས་
པའི་བདེན་པ་བཞི་ལས་འདོད་པའི་མཚན་ཉིད་འབའ་ཤིག་ཕུང་པོ་ལྔའི་རྒྱུར་འགྱུར་ཞེས་གསུངས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་
ཁྱོད་ཀྱིས་སྨྲས་པ་བཞིན་ཏེ། རྒྱུ་དང་རྐྱེན་གཞན་དག་ཀྱང་རྒྱུར་མི་འགྱུར་བ་ནི་མ་ཡིན་མོད་ཀྱི། ཕུང་པོ་ལྔའི་རྒྱུ་ནི་མདོར་ན་འདོད་པ་ལས་གྱུར་ཏོ། །རིགས་ཀྱི་བུ་དཔེར་ན་རྒྱལ་པོ་ཆེན་པོ་གཤེགས་ན་བློན་པོ་ཆེན་པོ་འཁོར་དང་

47-1-213b

བཅས་ཏེ་རྗེས་སུ་འགྲོའོ། །འདོད་པ་གང་དེ་དང་འདྲ་སྟེ། འདོད་པ་གང་དུ་སྤྱོད་པའི་རྗེས་སུ་ཀུན་ནས་ཉོན་མོངས་པ་རྣམས་ཀྱང་རྗེས་སུ་འགྲོའོ། །དཔེར་ན་གོས་གང་དུ་སྣུམ་པ་དེར་རྡུལ་ཆགས་པ་བཞིན་དུ་འདོད་པ་ཡང་དེ་དང་འདྲ་སྟེ། 
གང་དུ་འདོད་པར་ལས་ཀྱི་ཉོན་མོངས་པ་ཡང་དེ་ལ་གནས་སོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་གང་དུ་བརླན་པའི་ས་ལ་ནི་མྱུ་གུ་སྐྱེའོ། །འདོད་པ་ཡང་དེ་དང་འདྲ་སྟེ། ལས་ཀྱི་ཉོན་མོངས་པའི་མྱུ་གུ་ཐམས་ཅད་སྐྱེ་
བར་བྱེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པ་ལ་གནས་པ་དག་ནི་འདོད་པ་ལ་རྣམ་པ་དགུར་ཤིན་དུ་རྟོགས་སོ། །འདི་ལྟ་སྟེ་བུ་ལོན་མ་འཁོར་བ་ལྟ་བུ་
དང་། ཆུང་མ་སྲིན་མོ་ལྟ་བུ་དང་། མེ་ཏོག་བཟང་པོའི་སྡོང་བུ་ལ་སྦྲུལ་གདུག་པས་དཀྲིས་པ་ལྟ་བུ་དང་། ཟས་ཡིད་དུ་མི་འོང་ཞིང་མི་འདོད་པ་ནན་གྱིས་ཟ་བ་ལྟ་བུ་དང་། སྦྲུལ་འཚོང་མ་ལྟ་བུ་དང་། འབའ་ལུ་ཀའི་འབྲས་བུ་ལྟ་བུ་
དང་། རྨའི་ཤ་སྨན་ལྟ་བུ་དང་། རླུང་དྲག་པོ་ལྟ་བུ་དང་། སྐར་མ་ཕོད་ལྟ་བུའོ། །དེ་ལ་ཇི་ལྟར་ན་བུ་ལོན་མ་འཁོར་བ་ལྟ་བུ་ཞེ་ན། རིགས་ཀྱི་བུ་དཔེར་ན་མི་དབུལ་པོ་ཞིག་བུ་ལོན་ཆགས་པས་རྫོགས་སུ་ཉེ་སྟེ། འཇུག་ལུས་ན་
བཟུང་བ་ལས་མི་ཐར་ཏོ། །ཉན་ཐོས་དང་རང་སངས་རྒྱས་ཀྱང་དེ་དང་འདྲ་སྟེ། འདོད་པའི་བག་ཆགས་ཀྱི་ལྷག་མ་ལུས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་མི་རྒྱའོ། །རིགས་ཀྱི་བུ་དེ་ལྟར་ན་བུ་
ལོན་མ་འཁོར་བ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་ཆུང་མ་སྲིན་མོ་ལྟ་བུ་ཞེ་ན། རིགས་ཀྱི་བུ་དཔེར་ན་མི་ཞིག་ཆུང་མར་སྲིན་མོ་བླངས་ན་བུ་བཙས་མ་ཐག་ཏུ་ཟའོ། །བུ་ཟད་ནས་ཁྱོ་ཡང་ཟའོ། །རིགས་ཀྱི་བུ་འདོད་པའི་
སྲིན་མོ་ཡང་དེ་དང་འདྲ་སྟེ། སེམས་ཅན་དག་དགེ་བའི་རྩ་བ་ཇི་ཙམ་བསྐྱེད་པ་སྐྱེས་མ་ཐག་ཏུ་མེད་པར་བྱེད་དོ། །དགེ་བའི་རྩ་བ་ཟད་པར་བྱས་ནས་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེ་བར་

47-1-214a

བྱེད་དེ། བྱང་ཆུབ་སེམས་དཔའ་ནི་མ་གཏོགས་སོ། །དེ་ལྟར་ན་ཆུང་མ་སྲིན་མོ་ལྟ་བུ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་མེ་ཏོག་བཟང་པོའི་སྡོང་བུ་ལ་སྦྲུལ་གདུག་པས་དཀྲིས་པ་ལྟ་བུ་ཞེ་ན། དཔེར་ན་མེ་ཏོག་
བཟང་པོ་ལ་དགའ་བ་ཞིག་མེ་ཏོག་གི་སྡོང་བུ་ལ་སྦྲུལ་གདུག་པའི་ཉེན་ཡོད་པར་མི་ཤེས་པས་དྲུང་དུ་བསྙེན་ནས་མེ་ཏོག་བཟུང་ངོ་། །བཟུང་མ་ཐག་ཏུ་སྦྲུལ་གྱིས་ཟིན་ནས་ཚེའི་དུས་བྱས་སོ། །བུས་པ་མ་རབས་ཐམས་ཅད་ཀྱང་
དེ་དང་འདྲ་སྟེ། འདོད་པ་ལྔའི་མེ་ཏོག་ལ་ཆགས་པས་འདོད་པའི་སྦྲུལ་གདུག་པའི་སྐྱོན་ཡོད་པར་མི་ཤེས་པས་ལེན་ཏོ། །བླངས་ནས་འདོད་པའི་གདུག་པས་ཟིན་ཏེ་ཚེའི་དུས་བྱས་ནས་ངན་སོང་གསུམ་དུ་ལྷུང་སྟེ། བྱང་
ཆུབ་སེམས་དཔའ་ནི་མ་གཏོགས་སོ། །དེ་ལྟར་ན་མེ་ཏོག་བཟང་པོའི་སྡོང་བུ་ལ་སྦྲུལ་གདུག་པས་དཀྲིས་པ་ལྟ་བུ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་ཡིད་དུ་མི་འོང་བའི་ཟས་ངན་པ་ནན་གྱིས་ཟ་བ་ལྟ་བུ་ཞེ་ན། 
འདི་ལྟ་སྟེ་ལ་ལ་ཞིག་ཟས་ངན་པ་ཡིད་དུ་མི་འོང་བ་ནན་གྱིས་ཟོས་ན། ཟོས་མ་ཐག་ཏུ་ལྟོ་བ་ན་སྟེ་ཚད་པར་འཁྲུས་ཏེ་འཆིའོ། །འདོད་པའི་ཟས་ཀྱང་དེ་དང་འདྲ་སྟེ། ལམ་རྒྱུད་ལྔའི་སེམས་ཅན་དག་འདོད་པ་ལ་ནན་གྱིས་
ཆགས་པས་དེའི་རྒྱུ་དེའི་རྐྱེན་གྱིས་ངན་སོང་གསུམ་དུ་ལྟུང་སྟེ། བྱང་ཆུབ་སེམས་དཔའ་ནི་མ་གཏོགས་སོ། །དེ་ལྟར་ན་ཟས་ཡིད་དུ་མི་འོང་བ་ནན་གྱིས་ཟ་བ་ལྟ་བུ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་བུད་མེད་སྦྲུལ་
འཚོང་མ་ལྟ་བུ་ཞེ་ན། དཔེར་ན་མི་གླེན་པ་དག་ནི་བུད་མེད་སྦྲུལ་འཚོང་མ་དང་འདྲུལ་ཏེ། བུད་མེད་དེས་གཅམ་དང་སྒྱུ་རྣམ་པ་སྣ་ཚོགས་ཀྱིས་མིའི་ནོར་ཀུན་ཕྲོགས་སོ། །དེའི་ནོར་ཟད་ནས་ནི་སྐྲོད་དོ། །འདོད་པའི་སྦྲུལ་འཚོང་མ་ཡང་དེ་དང་
འདྲ་སྟེ། གླེན་པ་ཤེས་རབ་མེད་པ་དག་དེ་ལ་བསྟེན་ཏེ་འདོད་པ་དེས་དགེ་བའི་ཆོས་ཐམས་ཅད་འཕྲོག་གོ། །དགེ་བའི་ཆོས་ཀུན་ཟད་པར་བྱས་ནས་ངན་སོང་གསུམ་དུ་ལྷུང་བར་སྐྲོད་དོ། བྱང་ཆུབ་སེམས་དཔའ་འབའ་ཤིག་ནི་མ་གཏོགས་སོ། །

47-1-214b

དེ་ལྟར་ན་བུད་མེད་སྦྲུལ་འཚོང་མ་ལྟ་བུ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་འབའ་ལུ་ཀའི་འབྲས་བུ་ལྟ་བུ་ཞེ་ན། དཔེར་ན་འབའ་ལུ་ཀའི་འབྲས་བུ་བྱས་ཟོས་ན། ཟོས་མ་ཐག་ཏུ་ཕྱིར་བྱུང་ནས་ས་ལ་གཏུགས་པ་རླུང་གིས་བདས་
ཏེ། ཤིང་དྲུང་དུ་ཕྱིན་ན་དེ་མ་ཐག་ཏུ་སྐྱེས་ཏེ། ཤིང་དེ་ཉིད་ལ་དཀྲིས་བླགས་ནས་ཤིང་ནྱ་གྲོ་དྷ་ཡང་ཚད་དུ་ཕྱིན་པར་མི་སྐྱེ་བར་བྱེད་ཅིང་སྐམ་པར་ཡང་འགྱུར་རོ། །འདོད་པའི་འབའ་ལུ་ཀའི་འབྲས་བུ་ཡང་དེ་དང་འདྲ་སྟེ། བུས་པ་མ་རབས་
ཀྱི་དགེ་བའི་རྩ་བ་ཅི་ཡོད་པ་དཀྲིས་བླགས་ནས་མི་འཕེལ་མི་སྐྱེ་བ་དང་མེད་པར་འགྱུར་ཞིང་སྐམ་པའི་བར་ཡང་བྱེད་དོ། །སྐམས་ཤིང་མེད་པར་བྱས་ནས་ཚེ་འཕོས་པའི་འོག་ཏུ་ངན་སོང་གསུམ་དུ་ལྟུང་བར་བྱེད་དེ། བྱང་ཆུབ་
སེམས་དཔའ་ནི་མ་གཏོགས་སོ། །དེ་ལྟར་ན་འབའ་ལུ་ཀའི་འབྲས་བུ་ལྟ་བུ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་རྨའི་ཤ་སྨན་ལྟ་བུ་ཞེ་ན། དཔེར་ན་མི་ཞིག་རྨ་བྱུང་སྟེ་ཤ་སྨན་ཡོད་ན་གསོ་དགོས་ཏེ་གཏང་དུ་མི་རུང་ངོ་། །
བཞག་སྟེ་མ་གསོས་ན་རྨ་ཡང་རེད་ལ་འབུ་ཡང་འཇུག་སྟེ། དེའི་རྐྱེན་གྱིས་ཚེའི་དུས་ཀྱང་བྱེད་པར་འགྱུར་རོ། །བྱིས་པ་གླེན་པའི་འདོད་པ་ལྔའི་འབྲས་བུ་ཡང་དེ་དང་འདྲ་སྟེ། འདོད་པ་ནི་རྨའི་ནང་ན་ཤ་སྨན་ལྟ་བུ་ཡིན་པས་བརྩོན་
འགྲུས་སུ་གསོ་དགོས་སོ། །འདོད་པའི་ཤ་སྨན་མ་གསོས་ན། ཚེ་འཕོས་མ་ཐག་ཏུ་ངན་སོང་གསུམ་དུ་ལྟུང་སྟེ། བྱང་ཆུབ་སེམས་དཔའ་ནི་མ་གཏོགས་སོ། །རིགས་ཀྱི་བུ་དེ་ལ་ཇི་ལྟར་ན་རླུང་དྲག་པོ་ལྟ་བུ་ཞེ་ན། དཔེར་ན་
རླུང་དྲག་པོ་ལངས་ན་རི་ཡང་རྙིལ། གད་པ་ཡང་རྡིག་ཤིང་ཡང་རྩ་བ་ནས་འདོན་ཏོ། །འདོད་པའི་རླུང་དྲག་པོ་ཡང་དེ་དང་འདྲ་སྟེ། ཕ་མ་ལ་ཡང་ངན་སེམས་སྐྱེད་ལ། ཤེས་རབ་ཆེན་པོའི་མཆོག་རི་བོ་ལ་སོགས་པའི་བླ་
ན་མེད་པའི་བྱང་ཆུབ་ཀྱི་རྩ་བ་ཤིན་དུ་བརྟན་པ་ཡང་རྩ་ནས་འབྱིན་ཏེ། བྱང་ཆུབ་སེམས་དཔའ་ནི་མ་གཏོགས་སོ། །དེ་ལྟར་ན་རླུང་དྲག་པོ་ལྟ་བུ་ཞེས་བྱའོ། །དེ་ལ་ཇི་ལྟར་སྐར་མ་ཕོད་ལྟ་བུ་ཞེ་ན། དཔེར་ན་སྐར་མ་ཕོད་བྱུང་ན། 

47-1-215a

གང་དུ་བྱུང་བའི་ཡུལ་དེར་མུ་གེ་དང་ནད་དང་འཁྲུག་པ་འབྱུང་ངོ་། །འདོད་པའི་སྐར་མ་ཕོད་ཀྱང་དེ་དང་འདྲ་སྟེ། དགེ་བའི་རྩ་བ་ཐམས་ཅད་ཀྱི་ས་བོན་གཅོད་ཅིང་བྱིས་པ་མ་རབས་དག་དབུལ་ཕོངས་པ་དང་། མུ་གེ་འབྱུང་བ་དང་། 
ཉོན་མོངས་པའི་ནད་སྐྱེ་བ་དང་། འཁོར་བར་འཁོར་ཞིང་སྡུག་བསྔལ་རྣམ་པ་སྣ་ཚོགས་མྱོང་བར་བྱེད་དེ། བྱང་ཆུབ་སེམས་དཔའ་ནི་མ་གཏོགས་སོ། །དེ་ལྟར་ན་སྐར་མ་ཕོད་ལྟ་བུ་ཞེས་བྱའོ། །རིགས་ཀྱི་བུ་བྱང་ཆུབ་སེམས་
དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ན་འདོད་པའི་ཀུན་ནས་ཉོན་མོངས་པ་ལ་རྣམ་པ་འདི་དགུ་ལྟ་བུར་རྟོགས་སོ། །རིགས་ཀྱི་བུ་དེ་བས་ན་བྱིས་པ་མ་རབས་ནི་སྡུག་
བསྔལ་ཡོད་ཀྱི་བདེན་པ་མེད་དོ། །ཉན་ཐོས་དང་རང་སངས་རྒྱས་ནི་སྡུག་བསྔལ་ཡང་ཡོད། སྡུག་བསྔལ་གྱི་བདེན་པ་ཡང་ཡོད་ཀྱི། ཡང་དག་པའི་བདེན་པ་ནི་མེད་དོ། །བྱང་ཆུབ་སེམས་དཔའ་རྣམས་ནི་སྡུག་བསྔལ་ཤེས་ཤིང་སྡུག་
བསྔལ་མེད་དེ་དེ་བས་ན་སྡུག་བསྔལ་བ་ནི་མེད་ཀྱི་ཡང་དག་པའི་བདེན་པ་ནི་ཡོད་དོ། །བྱིས་པ་མ་རབས་ནི་ཀུན་འབྱུང་ནི་ཡོད་ཀྱི། བདེན་པ་ནི་མེད་དོ། །ཉན་ཐོས་དང་རང་སངས་རྒྱས་ནི་ཀུན་འབྱུང་ཡང་ཡོད་ཀུན་འབྱུང་གི་བདེན་པ་
ཡང་ཡོད་དོ། །བྱང་ཆུབ་སེམས་དཔའ་ནི་ཀུན་འབྱུང་ཤེས་ཤིང་ཀུན་འབྱུང་མེད་དེ་དེ་བས་ན་ཀུན་འབྱུང་ནི་མེད་ཀྱི། ཡང་དག་པའི་བདེན་པ་ནི་ཡོད་དོ། །ཉན་ཐོས་དང་རང་སངས་རྒྱས་ནི་འགོག་པ་ཡོད་ཀྱང་ཡང་དག་པ་མ་ཡིན། 
བྱང་ཆུབ་སེམས་དཔའ་སེམས་དཔའ་ཆེན་པོ་ནི་འགོག་པ་ཡང་ཡོད་ཡང་དག་པའི་བདེན་པ་ཡང་ཡོད་དོ། །ཉན་ཐོས་དང་རང་སངས་རྒྱས་ནི་ལམ་ཡོད་ཀྱང་བདེན་པ་ནི་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་
ནི་ལམ་ཡང་ཡོད་ལ་ཡང་དག་པའི་བདེན་པ་ཡང་ཡོད་དོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ན་འགོག་པ་

47-1-215b

མཐོང་ཞིང་འགོག་པའི་བདེན་པ་མཐོང་བ་ཡིན་ཞེ་ན། འདི་ལྟ་སྟེ་ཉོན་མོངས་པ་ཐམས་ཅད་ཡོངས་སུ་བཅད་པའོ། །གལ་ཏེ་ཉོན་མོངས་པ་བཅད་ན་རྟག་པ་ཞེས་བྱའོ། །ཉོན་མོངས་པའི་མེ་བསད་པས་ན་རབ་ཏུ་ཞི་བ་ཞེས་
བྱའོ། །ཉོན་མོངས་པ་འགགས་པས་ན་བདེ་བ་མྱོང་བར་གྱུར་ཏོ། །སངས་རྒྱས་དང་བྱང་ཆུབ་སེམས་དཔའ་རྣམས་ནི་རྟེན་ཅིང་འབྲེལ་པར་འབྱུང་བ་འདོད་པས་ཡོངས་སུ་དག་པ་ཞེས་བྱའོ། །སྲིད་པ་ཉི་ཤུ་ལྔ་པོ་ཕྱིར་མི་
ལེན་པས་ན་འཇིག་རྟེན་ལས་འདས་པ་ཞེས་བྱའོ། །འཇིག་རྟེན་ལས་འདས་པས་ན་བདག་ཅེས་བྱའོ། །གཟུགས་དང་སྒྲ་དང་དྲི་དང་རོ་དང་རེག་བྱ་དང་། སྐྱེས་པ་དང་བུད་མེད་དང་། སྐྱེ་བ་དང་གནས་པ་དང་། འགོག་པ་དང་། 
སྡུག་བསྔལ་དང་། བདེ་བ་དང་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པ་ལ་མཚན་མར་མི་ལེན་པས་ན་མཐར་ཕྱིན་པ་རབ་ཏུ་ཞི་བ་ཡང་དག་པའི་བདེན་པ་ཞེས་བྱའོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་
ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་པ་ན་འགོག་པའི་འཕགས་པའི་བདེན་པ་ལ་ཡོངས་སུ་རྟོག་པ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་
ཆེན་པོ་ཡོངས་སུ་མྱ་ངན་ལས་འདས་པ་ལ་གནས་པ་ན་ལམ་གྱི་འཕགས་པའི་བདེན་པ་རྟོག་པ་ཡིན་ཞེ་ན། རིགས་ཀྱི་བུ་དཔེར་ན་མུན་ཁུང་གི་ནང་དུ་མེ་མར་བྱུང་ན་དེའི་ནང་ན་དངོས་པོ་ཆེན་པོ་དང་ཆུང་ངུ་ཀུན་མཐོང་བར་འགྱུར་
རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་ལ་གནས་པ་དག་འཕགས་པའི་ལམ་བརྒྱད་ཀྱི་རྐྱེན་གྱིས་ཆོས་ཐམས་ཅད་མཐོང་བར་
འགྱུར་རོ། །འདི་ལྟ་སྟེ་རྟག་པ་དང་། མི་རྟག་པ་དང་འདུས་བྱས་དང་འདུས་མ་བྱས་དང་། སེམས་ཅན་དང་སེམས་ཅན་མ་ཡིན་པ་དང་། དངོས་པོ་དང་དངོས་པོ་མ་ཡིན་པ་དང་། བདེ་བ་དང་སྡུག་བསྔལ་དང་། བདག་དང་བདག་མེད་པ་

47-1-216a

དང་གཙང་བ་དང་མི་གཙང་བ་དང་། ཉོན་མོངས་པ་དང་ཉོན་མོངས་པ་མ་ཡིན་པ་དང་། ལས་དང་ལས་མ་ཡིན་པ་དང་། བདེན་པ་དང་བདེན་པ་མ་ཡིན་པ་དང་། ཐེག་པ་དང་ཐེག་པ་མ་ཡིན་པ་དང་། ཤེས་པ་དང་ཤེས་པ་མ་ཡིན་པ་དང་། 
ཡོན་ཏན་དང་། ཡོན་ཏན་མ་ཡིན་པ་དང་། བདག་པོ་དང་བདག་པོ་མ་ཡིན་པ་དང་། མཐོང་བ་དང་མཐོང་བ་མ་ཡིན་པ་དང་། གཟུགས་དང་གཟུགས་མ་ཡིན་པ་དང་། ལམ་དང་ལམ་མ་ཡིན་པ་དང་། ཤེས་རབ་དང་ཤེས་རབ་མ་ཡིན་
པ་རྣམས་སོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་ལ་གནས་པ་ན་འཕགས་པའི་ལམ་གྱི་བདེན་པ་ལ་ཡོངས་སུ་རྟོག་པ་ཞེས་བྱའོ། །བྱང་ཆུབ་སེམས་དཔའ་
འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅས་གསོལ་ཏོ། །བཅོམ་ལྡན་འདས་གལ་ཏེ་འཕགས་པའི་ལམ་བརྒྱད་ལམ་གྱི་འཕགས་པའི་བདེན་པ་ལགས་ན་དེའི་དོན་འཐུན་པ་མ་ལགས་སོ། །དེ་ཅིའི་སླད་དུ་ཞེ་ན། དེ་བཞིན་
གཤེགས་པས་སྐབས་ཁ་ཅིག་ཏུ་ཟག་པ་དང་བཅས་པ་སྒྲོལ་བའི་སླད་དུ་དད་པའི་སེམས་ནི་ལམ་ལགས་སོ་ཞེས་གསུངས། སྐབས་ཁ་ཅིག་ཏུ་ནི་བག་བྱེད་པ་ལམ་ལགས་སོ་ཞེས་གསུངས་ཏེ། སངས་རྒྱས་བཅོམ་
ལྡན་འདས་རྣམས་བག་བྱས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བས་བྱང་ཆུབ་སེམས་དཔའི་ལམ་གྱི་ཡན་ལག་གོ་ཞེས་ཀྱང་གསུངས། སྐབས་ཁ་ཅིག་དུ་ནི་བརྩོན་འགྲུས་ནི་
ལམ་ལགས་སོ་ཞེས་གསུངས་ཏེ་དེ་ཡང་དགའ་བོ་ལ་བཀའ་སྩལ་པ། དགའ་བོ་གང་ཞིག་བརྩོན་འགྲུས་ཤིན་ཏུ་བརྩོམ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱའོ་ཞེས་ཀྱང་
གསུངས། སྐབས་ཁ་ཅིག་ཏུ་ནི་ལུས་ལ་ལུས་ཀྱི་རྗེས་སུ་དྲན་པ་ཉེ་བར་གཞག་པ་ནི་སེམས་རྩེ་གཅིག་ཏུ་དམིགས་ཏེ། བརྩོན་འགྲུས་སུ་ལུས་ལ་ལུས་ཀྱི་རྗེས་སུ་དྲན་པ་ཉེ་བར་གཞག་པ་ལ་ནན་ཏན་བྱས་ན་བླ་ན་

47-1-216b

མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ་ཞེས་ཀྱང་གསུངས། སྐབས་ཁ་ཅིག་ཏུ་ནི་ཡང་དག་པའི་ཏིང་ངེ་འཛིན་ལམ་ལགས་སོ་ཞེས་གསུངས་ཏེ། དེ་ཡང་འོད་སྲུང་ཆེན་པོ་ལ་བཀའ་སྩལ་པ་
ལྟར་ན་ཡང་དག་པའི་ཏིང་ངེ་འཛིན་ནི་ལམ་ལགས་ཏེ། ཡང་དག་པའི་ཏིང་ངེ་འཛིན་མ་ལགས་པ་ནི་ལམ་ལགས་སོ་ཞེས་མ་གསུངས། ཏིང་ངེ་འཛིན་དུ་ཞུགས་ན་ཕུང་པོ་ལྔ་སྐྱེ་ཞིང་འགོག་པ་ཡིད་ལ་བྱེད་ནུས་པར་འགྱུར་གྱི། 
ཏིང་ངེ་འཛིན་དུ་མ་ཞུགས་པར་ཡིད་ལ་བྱེད་ནུས་པ་མ་ཡིན་ནོ་ཞེས་ཀྱང་གསུངས། སྐབས་ཁ་ཅིག་ཏུ་ནི་ཆོས་གཅིག་ལ་གང་བསྒོམ་ཞིང་ནན་ཏན་བྱེད་པ་དེས་སེམས་ཅན་ཐམས་ཅད་ཀྱི་མྱ་ངན་དང་། སྡུག་བསྔལ་བ་དང་། 
འཁྲུག་པའི་རྣམས་ཡོངས་སུ་སྦྱང་ཞིང་ཡང་དག་པའི་ཆོས་ཐོབ་པར་འགྱུར་རོ་ཞེས་གསུངས་པ་ནི་འདི་ལྟ་སྟེ། སངས་རྒྱས་རྗེས་སུ་དྲན་པའི་ཏིང་ངེ་འཛིན་ལགས་སོ་ཞེས་ཀྱང་གསུངས། སྐབས་ཁ་ཅིག་ཏུ་ནི་མི་རྟག་པ་
ལ་བསྒོམ་པ་ལམ་ལགས་སོ་ཞེས་ཀྱང་གསུངས་ཏེ། དེ་ཡང་དགེ་སློང་རྣམས་ལ་བཀའ་སྩལ་པ། གང་ཞིག་མི་རྟག་པ་ལ་མང་དུ་བསྒོམས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ་
ཞེས་ཀྱང་གསུངས། སྐབས་ཁ་ཅིག་ཏུ་ཤིན་དུ་དབེན་པའི་བས་མཐར་གཅིག་པུ་གནས་ཏེ་ཡིད་ལ་བྱས་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ་ཞེས་ཀྱང་གསུངས། 
སྐབས་ཁ་ཅིག་ཏུ་ནི་ཕ་རོལ་པོ་གཞན་ལ་ཆོས་བསྟན་པ་ནི་ལམ་ལགས་ཏེ་ཆོས་ཐོས་པས་ཐེ་ཙོམ་གྱི་དྲ་བ་ཆོད་པར་འགྱུར། ཐེ་ཙོམ་གྱི་དྲ་བ་ཆོད་པས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་
པར་འཚང་རྒྱའོ་ཞེས་ཀྱང་གསུངས། སྐབས་ཁ་ཅིག་ཏུ་ནི་ཚུལ་ཁྲིམས་བསྲུངས་པ་ནི་ལམ་ལགས་སོ་ཞེས་གསུངས་ཏེ། དེ་ཡང་དགའ་བོ་ལ་བཀའ་སྩལ་པ། དགའ་བོ་གང་ཞིག་ཚུལ་ཁྲིམས་སྲུང་བ་ལ་ཤིན་དུ་

47-1-217a

ནན་ཏན་བྱས་ན་གང་ཟག་དེ་ནི་འཁོར་བའི་རྒྱ་མཚོ་ལས་རྒལ་བར་འགྱུར་རོ་ཞེས་ཀྱང་གསུངས། སྐབས་ཁ་ཅིག་ཏུ་ནི་དགེ་བའི་བཤེས་གཉེན་ལ་བསྟེན་པ་ནི་ལམ་ལགས་སོ་ཞེས་གསུངས་ཏེ། དེ་ཡང་དགའ་བོ་ལ་
བཀའ་སྩལ་པ། གང་ཞིག་དགེ་བའི་བཤེས་གཉེན་བསྟེན་ན་ཚུལ་ཁྲིམས་ཡོངས་སུ་དག་པར་འགྱུར་ཏེ། སེམས་ཅན་གང་ཞིག་ང་ལ་བསྙེན་བཀུར་བྱས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
བསྐྱེད་པར་འགྱུར་རོ་ཞེས་ཀྱང་གསུངས། སྐབས་ཁ་ཅིག་ཏུ་བྱམས་པ་བསྒོམ་པ་ནི་ལམ་ལགས་ཏེ་བྱམས་པ་བསྒོམས་ན་ཉོན་མོངས་པ་ཐམས་ཅད་ཆོད་ཅིང་མི་གཡོ་བའི་གནས་ཐོབ་པར་འགྱུར་རོ་ཞེས་ཀྱང་གསུངས། 
སྐབས་ཁ་ཅིག་ཏུ་ནི་ཤེས་རབ་ནི་ལམ་ལགས་སོ་ཞེས་གསུངས་ཏེ། དེ་ཡང་སྔོན་བཅོམ་ལྡན་འདས་ཀྱིས་དགེ་སློང་མ་སྐྱེ་དགུའི་བདག་མོའི་སླད་དུ་ཕུ་ནུ་མོ་གསུངས་པ་དང་། ཉན་ཐོས་རྣམས་ཀྱང་ཤེས་རབ་ཀྱི་མཚོན་གྱིས་
སྲིད་པའི་ཟག་པ་དང་བཅས་པའི་ཉོན་མོངས་པ་གཅད་དོ་ཞེས་ཀྱང་གསུངས། སྐབས་ཁ་ཅིག་ཏུ་ནི་དེ་བཞིན་གཤེགས་པས་སྦྱིན་པ་ནི་ལམ་ལགས་སོ་ཞེས་གསུངས་ཏེ། དེ་ཡང་སྔོན་སངས་རྒྱས་བཅོམ་ལྡན་འདས་
ཀྱིས་རྒྱལ་པོ་སྡེ་རབ་ཏུ་ཕམ་བྱེད་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ངས་སྔོན་སྦྱིན་པ་མང་དུ་བྱས་པས། དེའི་རྒྱུ་དེའི་རྐྱེན་ཀྱིས་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སངས་རྒྱས་པར་རིག་
པར་གྱིས་ཤིག་ཅེས་ཀྱང་གསུངས་པ་ལགས་ན། བཅོམ་ལྡན་འདས་ད་གལ་ཏེ་འཕགས་པའི་ལམ་བརྒྱད་ལམ་གྱི་བདེན་པ་འཕགས་སོ་ཞེས་གསུངས་ན་མདོ་སྡེ་གཞན་དག་ལས་དེ་སྐད་ཅེས་གསུངས་པ་དག་བརྫུན་དུ་
མ་གྱུར་ཏམ། གལ་ཏེ་མདོ་སྡེ་དེ་དག་ལས་འབྱུང་བ་བརྫུན་དུ་མ་གྱུར་ན་ཅིའི་སླད་དུ་དེ་དག་ལས་ཀྱང་འཕགས་པའི་ལམ་བརྒྱད་ནི་ལམ་གྱི་བདེན་པ་ཡིན་ནོ་ཞེས་མ་གསུངས། དེ་ལྟར་མ་གསུངས་པས་ན་སྔོན་

47-1-217b

དེ་བཞིན་གཤེགས་པས་གསུངས་པ་ཡང་འཁྲུལ་པ་འདྲ་སྟེ། བདག་ནི་ངེས་པས་སངས་རྒྱས་བཅོམ་ལྡན་འདས་ནི་ཡུན་རིང་པོ་ནས་འཁྲུལ་པ་དང་བྲལ་བར་འཚལ་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་
ལ་བཀའ་སྩལ་པ་ལེགས་སོ་ལེགས་སོ། །རིགས་ཀྱི་བུ་ཁྱོད་ནི་བྱང་ཆུབ་སེམས་དཔའི་ཐེག་པ་ཆེན་པོའི་མདོ་སྡེ་ལས་དོན་ཤིན་དུ་ཟབ་མོ་ཤེས་པར་འདོད་པས་དེ་སྐད་ཅེས་ཞུས་པ་ཤིན་དུ་ལེགས་སོ། །རིགས་ཀྱི་བུ་མདོ་སྡེ་དེ་དག་
ཀྱང་ཐམས་ཅད་ལམ་གྱི་བདེན་པར་འཇུག་གོ། །རིགས་ཀྱི་བུ་དད་པ་ནི་ལམ་མོ་ཞེས་བྱ་བ་དད་པ་ནི་ལམ་ཡིན་ཏེ་དད་པ་ནི་རྩ་བ་ཡིན་པས་ན་བྱང་ཆུབ་ཀྱི་ལམ་གྱི་གྲོགས་སུ་འགྱུར་ཏེ་དེ་བས་ན་ངས་གསུངས་པ་དེ་ལ་འཁྲུལ་པ་མེད་དོ། །
རིགས་ཀྱི་བུ་དེ་བཞིན་གཤེགས་པ་ནི་ཚད་མེད་པའི་ཐབས་ལ་ཤིན་ཏུ་མཁས་པས་སེམས་ཅན་གདུལ་བའི་ཕྱིར་དེ་ལྟར་རྣམ་པ་སྣ་ཚོགས་སུ་གསུངས་པ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན་སྨན་པ་མཁས་པ་ནི་སེམས་
ཅན་གྱི་ནད་རྣམ་པ་སྣ་ཚོགས་ལ་ཤིན་ཏུ་མཁས་པས་ཇི་ལྟར་ན་བ་བཞིན་དུ་སྨན་སྦྱོར་ཏེ། སྨན་གྱི་མི་རུང་བའི་གཉེན་པོ་ཡང་སྟོན་ན་ཆུ་འབའ་ཞིག་ནི་མ་གཏོགས་སོ། །དེ་ཡང་འདི་ལྟ་སྟེ་སྒེའུ་གཤེར་གྱི་ཁུ་བ་དང་། ཤིང་མངར་
གྱི་ཁུ་བ་དང་། ཤ་ཁ་ར་ནག་པོའི་ཁུ་བ་དང་། ཨ་མ་ལའི་ཁུ་བ་དང་། ནི་པ་ལའི་ཁུ་བ་དང་། པ་ར་ཧ་ལའི་ཁུ་བ་དང་། ཆུ་གྲང་མོ་དང་། ཆུ་ཚ་བ་དང་། དགུན་ཆུ་དང་། བལ་པོ་སེའུ་ཡི་ཆུ་ལ་སོགས་པའོ། །རིགས་ཀྱི་བུ་སྨན་
པ་མཁས་པ་ནད་ཀྱི་རྣམ་པ་ལ་མཁས་པ་དག་ཀྱང་སྨན་ལ་མི་རུང་བའི་གཉེན་པོ་མང་མོད་ཀྱི་ཆུར་ནི་དེར་མ་གཏོགས་སོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཐབས་ལ་ཤིན་ཏུ་མཁས་པས་ཆོས་ཀྱི་མཚན་ཉིད་
གཅིག་གིས་སེམས་ཅན་ཇི་ལྟ་ཇི་ལྟ་བའི་རྗེས་སུ་མིང་དང་མཚན་ཉིད་དེ་དང་དེ་ལྟ་བུས་རྒྱས་པར་འབྱེད་ཅིང་སྟོན་ཏེ། སེམས་ཅན་རྣམས་ཀྱང་ཇི་ལྟར་བསྟན་པ་བཞིན་དུ་ཉམས་སུ་ལེན་ཏོ། །ཉམས་སུ་བླངས་

47-1-218a

ནས་ནན་ཏན་བྱས་པས་ཉོན་མོངས་པ་ཐམས་ཅད་བྱང་བར་འགྱུར་བ་ནི་ཇི་ལྟར་ནད་པས་སྨན་པའི་ལུང་བཞིན་དུ་བྱས་པས་ནད་འབྱང་བ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་མི་ཞིག་སྐད་རྣམ་པ་ཀུན་
ལ་མཁས་ཏེ། མི་ཕལ་མོ་ཆེའི་ནང་དུ་འདུག་པ་ལས་མི་ཐམས་ཅད་སྐོམ་གྱིས་ཡོངསུ་གདུངས་ཏེ། འདི་སྐད་དུ་བདག་སྐོམ་སྟེ་ཆུ་འདོད་དོ་ཞེས་སྨྲ་ན། མི་དེས་རྣམ་པ་ཇི་བཞིན་དུ་ཆུ་གྲང་མོ་གཙང་མ་སོ་སོར་བྱིན་ན་རྣམ་པ་དེ་དག་ལ་
ལ་ནི་ཆུ་འདོད་དོ་ཞེས་ཟེར། ལ་ལ་ནི་པ་ཎི་ཞེས་ཟེར། ལ་ལ་ནི་ཨུ་དི་ཞེས་ཟེར། ལ་ལ་ནི་ས་ལེ་མ་ཞེས་ཟེར། ལ་ལ་ནི་ས་ལི་ཞེས་ཟེར། ལ་ལ་ནི་པ་ན་ཞེས་ཟེར། ལ་ལ་ནི་བདུད་རྩི་ཞེས་ཟེར། ལ་ལ་ནི་འོ་མ་ཞེས་ཟེར་ཏེ། དེ་ལྟར་
ཆུའི་མིང་སྨྲ་བ་ཚད་མེད་པ་འཁོར་རྣམས་ལ་སྨྲའོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། འཕགས་པའི་ལམ་གཅིག་གིས་ཉན་ཐོས་རྣམས་ལ་དད་པའི་དབང་པོ་ནས་འཕགས་པའི་ལམ་བརྒྱད་ཀྱི་བར་དུ་
རྒྱས་པར་སྟོན་ཅིང་འཆད་དོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་གསེར་མགར་མཁས་པ་ནི་གསེར་གཅིག་པུ་ལ་ལུས་ཀྱི་རྒྱན་རྣམ་པ་སྣ་ཚོགས་ཡིད་བཞིན་དུ་བྱེད་དོ། །འདི་ལྟ་སྟེ་གདུ་བུ་དང་། སོར་གདུབ་དང་། 
རྣ་ཆ་དང་། ཅོད་པན་དང་། དཔུང་རྒྱན་ལ་སོགས་པ་རྣམ་པ་སྣ་ཚོགས་མི་མཐུན་མོད་ཀྱི་གསེར་ལས་གཞན་མ་ཡིན་ནོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། སངས་རྒྱས་ནི་ལམ་གཅིག་ལས་
སེམས་ཅན་གྱི་རྗེས་སུ་རྣམ་པ་སྣ་ཚོགས་སུ་འབྱེད་ཅིང་སྟོན་ཏེ། བར་བར་ནི་རྣམ་པ་གཅིག་ཅེས་སྟོན་ཏོ། །འདི་ལྟ་སྟེ་སངས་རྒྱས་རྣམས་ཀྱི་བྱང་ཆུབ་ནི་གཅིག་སྟེ། གཉིས་སུ་མེད་དོ་ཞེས་གསུངས། 
ཡང་རྣམ་པ་གཉིས་ཏེ། ཏིང་ངེ་འཛིན་དང་། ཤེས་རབ་བོ་ཞེས་ཀྱང་གསུངས། གཞན་ཡང་རྣམས་པ་གསུམ་དུ་གསུངས་ཏེ། ལྟ་བ་དང་། ཡེ་ཤེས་དང་། ཤེས་རབ་བོ། །གཞན་ཡང་རྣམ་པ་བཞི་སྟེ། མཐོང་བའི་

47-1-218b

ལམ་དང་། སྒོམ་པའི་ལམ་དང་། མི་སློབ་པའི་ལམ་དང་། སངས་རྒྱས་ཀྱི་ལམ་མོ། །གཞན་ཡང་རྣམ་པ་ལྔ་སྟེ། དད་པ་སྤྱོད་པའི་ལམ་དང་། ཆོས་སྤྱོད་པའི་ལམ་དང་། དད་པས་རྣམ་པར་གྲོལ་བའི་ལམ་དང་། མཐོང་
བས་ཕྱིན་པའི་ལམ་དང་། ལུས་ཀྱིས་རིག་པའི་ལམ་མོ། །གཞན་ཡང་རྣམ་པ་དྲུག་སྟེ། རྒྱུན་ཏུ་ཞུགས་པའི་ལམ་དང་། ལན་ཅིག་ཕྱིར་ལྡོག་པའི་ལམ་དང་། ལན་ཅིག་ཕྱིར་མི་ལྡོག་པའི་ལམ་དང་། དགྲ་བཅོམ་
པའི་ལམ་དང་། རང་སངས་རྒྱས་ཀྱི་ལམ་དང་། སངས་རྒྱས་ཀྱི་ལམ་མོ། །གཞན་ཡང་རྣམ་པ་བདུན་ཏེ། དྲན་པ་བྱང་ཆུབ་ཀྱི་ཡན་ལག་དང་། ཆོས་རྣམ་པར་འབྱེད་པ་བྱང་ཆུབ་ཀྱི་ཡན་ལག་དང་། བརྩོན་འགྲུས་བྱང་ཆུབ་
ཀྱི་ཡན་ལག་དང་། དགའ་བ་བྱང་ཆུབ་ཀྱི་ཡན་ལག་དང་། ཤིན་དུ་སྦྱངས་པ་བྱང་ཆུབ་ཀྱི་ཡན་ལག་དང་། ཏིང་ངེ་འཛིན་བྱང་ཆུབ་ཀྱི་ཡན་ལག་དང་། བཏང་སྙོམས་བྱང་ཆུབ་ཀྱི་ཡན་ལག་གོ། །གཞན་ཡང་རྣམ་པ་བརྒྱད་དེ། 
ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་
ཏིང་ངེ་འཛིན་ཏོ། །གཞན་ཡང་རྣམ་པ་དགུ་སྟེ། འཕགས་པའི་ལམ་ཡན་ལག་བརྒྱད་དང་དད་པའོ། །གཞན་ཡང་རྣམ་པ་བཅུ་སྟེ། སྟོབས་བཅུའོ། །གཞན་ཡང་རྣམ་པ་བཅུ་གཅིག་སྟེ། སྟོབས་བཅུ་དང་
བྱམས་པ་ཆེན་པོའོ། །གཞན་ཡང་རྣམ་པ་བཅུ་གཉིས་ཏེ། སྟོབས་བཅུ་དང་། བྱམས་པ་ཆེན་པོ་དང་། སྙིང་རྗེ་ཆེན་པོའོ། །གཞན་ཡང་རྣམ་པ་བཅུ་གསུམ་སྟེ། སྟོབས་བཅུ་དང་། བྱམས་པ་ཆེན་པོ་དང་། 
སྙིང་རྗེ་ཆེན་པོ་དང་། སངས་རྒྱས་རྗེས་སུ་དྲན་པའི་ཏིང་ངེ་འཛིན་ནོ། །གཞན་ཡང་རྣམ་པ་བཅུ་དྲུག་སྟེ། སྟོབས་བཅུ་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། སངས་རྒྱས་རྗེས་སུ་དྲན་པའི་ཏིང་ངེ་འཛིན་དང་། 

47-1-219a

སངས་རྒྱས་ཀྱིས་བརྙེས་པའི་ཡང་དག་པའི་དྲན་པ་ཉེ་བར་གཞག་པ་གསུམ་མོ། །གཞན་ཡང་རྣམ་པ་ཉི་ཤུ་སྟེ། སྟོབས་བཅུ་དང་། མི་འཇིགས་པ་བཞི་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། སངས་རྒྱས་རྗེས་སུ་
དྲན་པའི་ཏིང་ངེ་འཛིན་དང་། ཡང་དག་པའི་དྲན་པ་ཉེ་བར་གཞག་པ་གསུམ་མོ། །རིགས་ཀྱི་བུ་ལམ་དེ་དག་ནི་དངོས་པོ་གཅིག་སྟེ། དེ་བཞིན་གཤེགས་པས་སྔོན་སེམས་ཅན་གྱི་ཕྱིར་རྣམ་པ་སྣ་ཚོགས་སུ་གསུངས་པ་ཡིན་ནོ། །
རིགས་ཀྱི་བུ་འདི་ལྟ་སྟེ་དཔེར་ན་མེ་ལྟ་བུ་དངོས་པོ་གཅིག་ཏུ་ཟད་ན་ཚིག་པ་ལས་མེ་མང་པོར་གྱུར་ཏོ། །འདི་ལྟ་སྟེ། ཤིང་གི་མེ་དང་། རྩྭའི་མེ་དང་། ཕུབ་མའི་མེ་དང་། རྟ་རྟུག་དང་། བ་ལང་གི་ལྕི་བའི་མེ་ཞེས་རྣམ་པ་མང་པོར་བཏགས་སོ། །
རིགས་ཀྱི་བུ་སངས་རྒྱས་ཀྱི་ལམ་ཡང་དེ་དང་འདྲ་བར་གཅིག་སྟེ་གཉིས་སུ་མེད་མོད་ཀྱི། སེམས་ཅན་གྱི་ཕྱིར་རྣམ་པ་སྣ་ཚོགས་སུ་སོ་སོར་ཕྱེ་བ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན། རྣམ་པར་ཤེས་པ་གཅིག་
ལས་རྣམ་པ་དྲུག་ཏུ་ཕྱེ་སྟེ། བསྟན་པ་ནི་མིག་གི་སྐབས་སུ་ནི་མིག་གི་རྣམ་པར་ཤེས་པ་ཞེས་བཏགས་པ་ནས་ཡིད་ཀྱི་རྣམ་པར་ཤེས་པའི་བར་དུ་དེ་བཞིན་དུ་རྒྱས་པར་རིག་པར་བྱའོ། །རིགས་ཀྱི་བུ་ལམ་ཡང་དེ་དང་འདྲ་བར་གཅིག་
སྟེ། གཉིས་སུ་མེད་མོད་ཀྱི། དེ་བཞིན་གཤེགས་པས་སེམས་ཅན་དག་གདུལ་བའི་ཕྱིར་རྣམ་པ་སྣ་ཚོགས་སུ་ཕྱེ་ཞིང་བསྟན་པ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་གཟུགས་ལྟ་བུ་གཅིག་ལ་མིག་གིས་
མཐོང་བའི་སྐབས་སུ་ནི་གཟུགས་ཞེས་བྱ། རྣ་བས་ཐོས་པའི་སྐབས་སུ་ནི་སྒྲ་ཞེས་བཏགས། སྣས་སྣོམ་པའི་ཚེ་ནི་དྲི་ཞེས་བྱ། ལྕེས་མྱོང་བའི་དུས་སུ་ནི་རོ་ཞེས་བྱ། ལུས་ཀྱིས་ཚོར་བའི་སྐབས་སུ་ནི་རེག་བྱ་ཞེས་
བཏགས་སོ། །རིགས་ཀྱི་བུ་ལམ་ཡང་དེ་དང་འདྲ་བར་གཅིག་སྟེ་གཉིས་སུ་མེད་མོད་ཀྱི། སེམས་ཅན་དག་གདུལ་བའི་ཕྱིར་རྣམ་པ་སྣ་ཚོགས་སུ་ཕྱེ་ཞིང་བསྟན་ཏོ། །རིགས་ཀྱི་བུ་དོན་དེ་ལྟ་བས་ན་འཕགས་པའི་ལམ་

47-1-219b

གྱི་ཡན་ལག་བརྒྱད་ཀྱང་འཕགས་པའི་ལམ་གྱི་བདེན་པ་ཞེས་བྱའོ། །རིགས་ཀྱི་བུ་སངས་རྒྱས་བཅོམ་ལྡན་འདས་ཀྱིས་འཕགས་པའི་བདེན་པ་བཞི་རིམ་གྱིས་བསྟན་ཏེ། དེའི་རྒྱུ་དེའི་རྐྱེན་ཀྱིས་སེམས་ཅན་ཚད་མེད་པ་སྙེད་འཁོར་
བ་ལས་སྒྲོལ་བར་གྱུར་ཏོ། །བྱང་ཆུབ་སེམས་དཔའ་འོད་སྲུང་གིས་སངས་རྒྱས་ལ་གསོལ་པ། བཅོམ་ལྡན་འདས་སྔོན་དུས་གཅིག་ཅིག་ན། ཀླུང་གང་གཱའི་འགྲམ་ཤི་ཤུ་ཞེས་བགྱི་བའི་ཚལ་ན་བཞུགས་ཏེ། དེའི་ཚེ་དེ་
བཞིན་གཤེགས་པས་ཤིང་གི་འདབ་མ་གཅིག་ཕྱག་གིས་བླངས་ནས་དགེ་སློང་རྣམས་ལ་བཀའ་སྩལ་པ། ད་ལྟར་ངའི་ལག་ན་ཡོད་པའི་འདབ་མ་མང་ངམ། ས་ལ་བརྟེན་ཏེ་རྩི་ཤང་ལ་སོགས་པ་སྐྱེས་པ་ཐམས་ཅད་
ཀྱི་ལོ་མ་མང་ཞེས་བཀའ་སྩལ་པ་དང་། དགེ་སློང་རྣམས་ཀྱིས་གསོལ་པ། ས་ལ་བརྟེན་ཏེ་སྐྱེས་པའི་རྩི་ཤིང་གི་ལོ་མ་ནི་རབ་ཏུ་མང་སྟེ། དཔག་ཏུ་མ་མཆིས་སོ། །དེ་བཞིན་གཤེགས་པའི་ཕྱག་ན་བསྣམས་པའི་
ལོ་མ་ནི་ཤིན་དུ་ཡང་ཉུང་སྟེ་སྨོས་མི་འཚལ་ལོ། །བཀའ་སྩལ་པ། དགེ་སློང་དག་ངས་རྟོགས་པའི་ཆོས་ཐམས་ཅད་ནི་ས་ཆེན་པོ་ལ་བརྟེན་ཏེ་སྐྱེས་པའི་རྩི་ཤིང་ལ་སྩོགས་པའི་ལོ་མ་དང་འདྲའོ། །སེམས་ཅན་རྣམས་ལ་
བསྟན་པ་ནི་ལག་ན་ཁྱེར་བའི་ལོ་མ་དང་འདྲ་ཞེས་གསུངས་ན། བཅོམ་ལྡན་འདས་དེའི་ཚེ་དེ་སྐད་ཅེས་གསུངས་པ་དེ་དེ་བཞིན་གཤེགས་པས་ཆོས་ཚད་མེད་པ་ཐུགས་སུ་ཆུད་པ། གལ་ཏེ་བདེན་པ་བཞིའི་ནང་དུ་གཏོགས་ན་ནི་དེ་བཞིན་
གཤེགས་པས་སྔར་གསུངས་ཀྱང་ལགས། གལ་ཏེ་མ་གཏོགས་ན་ནི་བདེན་པ་ལྔ་མཆིས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱིས་དེ་སྐད་ཅེས་ཞུས་
པ་ནི་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་ཀྱི་ཕྱིར་ཞུས་པ་ལེགས་སོ། །རིགས་ཀྱི་བུ་འདི་ལྟར་ཆོས་ཐམས་ཅད་ནི་འཕགས་པའི་བདེན་པ་བཞིའི་ནང་དུ་གཏོགས་སོ། །འོད་སྲུང་གིས་ཡང་གསོལ་པ། དེ་ལྟར་ཆོས་

47-1-220a

ཐམས་ཅད་འཕགས་པའི་བདེན་པ་བཞིའི་ནང་དུ་གཏོགས་ན་ཅིའི་སླད་དུ་དེ་བཞིན་གཤེགས་པས་སྨོས་པ་ཙམ་སྟེ་རྒྱས་པར་མ་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེར་གཏོགས་པ་
ནི་ཡིན་མོད་ཀྱི། བསྟན་ཅིང་བཤད་པ་ཞེས་མི་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ་འཕགས་པའི་བདེན་པ་རྟོགས་པ་ལ་ཤེས་རབ་རྣམ་པ་གཉིས་ཏེ། འབྲིང་དང་། རབ་བོ། །འབྲིང་ནི་ཉན་ཐོས་དང་། རང་སངས་རྒྱས་
ཀྱི་ཤེས་རབ་བོ། །རབ་ནི་སངས་རྒྱས་དང་བྱང་ཆུབ་སེམས་དཔའི་ཡེ་ཤེས་སོ། །རིགས་ཀྱི་བུ་ཕུང་པོ་རྣམས་ལ་སྡུག་བསྔལ་བར་རྟོགས་པ་ནི་ཤེས་རབ་འབྲིང་ཞེས་བྱའོ། །ཕུང་པོ་རྣམས་ལ་
མཚན་ཉིད་གྲངས་མེད་པར་ཕྱེ་སྟེ། ཐམས་ཅད་སྡུག་བསྔལ་བར་ཤེས་པ་ཉན་ཐོས་དང་རང་སངས་རྒྱས་ཀྱི་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱའོ། །རིགས་ཀྱི་བུ་དོན་འདི་དག་ནི་མདོ་སྡེ་དག་ལས་ཀྱང་ངས་མ་
གསུངས་སོ། །རིགས་ཀྱི་བུ་འཇུག་པ་ཤེས་པ་ནི་སྒོ་ཞེས་ཀྱང་བྱ། སྡུག་བསྔལ་ཞེས་ཀྱང་བྱ་སྟེ། དེ་ནི་ཤེས་རབ་འབྲིང་ཞེས་བྱའོ། །མཚན་ཉིད་རྣམ་པ་སྣ་ཚོགས་སུ་ཕྱེ་སྟེ། ཐམས་ཅད་སྡུག་བསྔལ་བ། ཉན་ཐོས་
དང་རང་སངས་རྒྱས་རྣམས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱའོ། །དོན་འདི་དག་ཀྱང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་བུ་གང་ཁམས་ཤེས་པ་ནི་ཡན་ལག་ཅེས་བྱ། མཚན་ཉིད་
ཅེས་ཀྱང་བྱ། སྡུག་བསྔལ་བ་ཞེས་ཀྱང་བྱ་སྟེ། དེ་ནི་ཤེས་རབ་འབྲིང་ཞེས་བྱའོ། །ཁམས་རྣམས་ལ་མཚན་ཉིད་ཚད་མེད་པར་ཕྱེ་སྟེ། ཐམས་ཅད་སྡུག་བསྔལ་བ། ཉན་ཐོས་དང་རང་སངས་རྒྱས་རྣམས་ཀྱིས་ཤེས་
པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱའོ། །རིགས་ཀྱི་བུ་དོན་འདི་དག་ཀྱང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་བུ་གཟུགས་འཇིག་པའི་མཚན་ཉིད་དུ་ཤེས་པ་ནི་ཤེས་རབ་འབྲིང་ཞེས་བྱའོ། །གཟུགས་ལ་

47-1-220b

མཚན་ཉིད་རྣམ་པ་སྣ་ཚོགས་སུ་ཕྱེ་སྟེ། ཐམས་ཅད་སྡུག་བསྔལ་བ་ཉན་ཐོས་དང་རང་སངས་རྒྱས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱ་སྟེ། དོན་འདི་ཡང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་
བུ་ཚོར་བ་ལ་ཚོར་བའི་མཚན་ཉིད་དུ་ཤེས་པ་ནི་ཤེས་རབ་འབྲིང་ཞེས་བྱའོ། །ཚོར་བ་ལ་མཚན་ཉིད་རྣམ་པ་སྣ་ཚོགས་སུ་ཕྱེ་སྟེ། ཉན་ཐོས་དང་རང་སངས་རྒྱས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱ་སྟེ། རིགས་ཀྱི་བུ་
དོན་འདི་ཡང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་བུ་འདུ་ཤེས་ལ་ལེན་པའི་མཚན་ཉིད་དུ་ཤེས་པ་ནི་ཤེས་རབ་འབྲིང་ཞེས་བྱའོ། །འདུ་ཤེས་ལ་ལེན་པའི་མཚན་ཉིད་རྣམ་པ་སྣ་ཚོགས་སུ་ཕྱེ་སྟེ། ཉན་ཐོས་དང་རང་
སངས་རྒྱས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱ་སྟེ། དོན་འདི་ནི་མདོ་སྡེ་དེ་དག་ལས་ཀྱང་ངས་མ་གསུངས་སོ། །རིགས་ཀྱི་བུ་འདུ་བྱེད་ལ་བྱེད་པའི་མཚན་ཉིད་དུ་ཤེས་པ་ནི་ཤེས་རབ་འབྲིང་ཞེས་བྱའོ། །
འདུ་བྱེད་ལ་བྱེད་པའི་མཚན་ཉིད་རྣམ་པ་སྣ་ཚོགས་སུ་ཕྱེ་སྟེ། ཉན་ཐོས་དང་རང་སངས་རྒྱས་ཀྱིས་ཤེས་པར་འགྱུར་བའི་མཚན་ཉིད་མ་ཡིན་པ་ནི་ཡེ་ཤེས་རབ་ཅེས་བྱའོ། །རིགས་ཀྱི་བུ་དོན་འདི་ནི་མདོ་སྡེ་དག་ལས་ཀྱང་ངས་
མ་གསུངས་སོ། །རིགས་ཀྱི་བུ་རྣམ་པར་ཤེས་པ་ལ་བྱེ་བྲག་འབྱེད་པའི་མཚན་ཉིད་དུ་ཤེས་པ་ནི་ཤེས་རབ་འབྲིང་ཞེས་བྱའོ། །རྣམ་པར་ཤེས་པ་ལ་ཤེས་པའི་མཚན་ཉིད་རྣམ་པ་སྣ་ཚོགས་སུ་ཕྱེ་སྟེ། ཉན་ཐོས་དང་རང་སངས་
རྒྱས་ཀྱིས་ཤེས་པའི་མཚན་ཉིད་མ་ཡིན་པ་ནི་ཡེ་ཤེས་རབ་ཅེས་བྱའོ། །རིགས་ཀྱི་བུ་དོན་འདི་ནི་མདོ་སྡེ་དེ་དག་ལས་ཀྱང་ངས་མ་གསུངས་སོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། 
བམ་པོ་བཅྭོ་བརྒྱད་པ། རིགས་ཀྱི་བུ་འདོད་པའི་རྐྱེན་གྱིས་ཕུང་པོ་ལྔ་སྐྱེས་པར་ཤེས་པ་ནི་ཤེས་རབ་འབྲིང་ཞེས་བྱའོ། །གང་ཟག་གཅིག་གི་འདོད་པ་སྐྱེས་པ་ཡང་ཉན་ཐོས་དང་རང་སངས་རྒྱས་ཚད་མེད་མཐའ་ཡས་པ་

47-1-221a

རྣམས་ཀྱིས་མི་ཤེས་པ། སེམས་ཅན་ཐམས་ཅད་ཀྱི་འདོད་པ་གང་དང་གང་སྐྱེས་པ་དེ་དང་དེ་དག་ཐམས་ཅད་ཤེས་པ་ནི་ཡེ་ཤེས་རབ་ཅེས་བྱ་སྟེ། དོན་འདི་ཡང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་བུ་ཉོན་མོངས་
པ་འགོག་པར་ཤེས་པ་ནི་ཤེས་རབ་འབྲིང་ཞེས་བྱའོ། །ཉོན་མོངས་པ་ཡང་དཔག་ཏུ་མེད་པ་ལ། འགོག་པ་ཡང་དེ་བཞིན་དཔག་ཏུ་མེད་པར་རྣམ་པར་ཕྱེ་སྟེ། ཉན་ཐོས་དང་རང་སངས་རྒྱས་རྣམས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་
ཅེས་བྱ་སྟེ། དོན་འདི་ཡང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་བུ་ལམ་གྱི་མཚན་ཉིད་ཀྱིས་ཉོན་མོངས་པ་སྤོང་བར་ཤེས་པ་ནི་ཤེས་རབ་འབྲིང་ཞེས་བྱའོ། །རིགས་ཀྱི་བུ་ལམ་གྱི་མཚན་ཉིད་ཀྱང་ཚད་མེད་མཐའ་
ཡས་ལ། སྤོང་བར་འགྱུར་བའི་ཉོན་མོངས་པ་ཡང་ཚད་མེད་མཐའ་ཡས་པར་རྣམ་པར་ཕྱེ་སྟེ། ཉན་ཐོས་དང་རང་སངས་རྒྱས་རྣམས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱ་སྟེ། དོན་འདི་ཡང་མདོ་སྡེ་དེ་དག་ལས་
ངས་མ་གསུངས་སོ། །རིགས་ཀྱི་བུ་ཀུན་རྫོབ་ཀྱི་བདེན་པ་ཤེས་པ་ནི་ཤེས་རབ་འབྲིང་ཞེས་བྱའོ། །ཀུན་རྫོབ་ཀྱི་བདེན་པ་ཚད་མེད་མཐའ་ཡས་དཔག་ཏུ་མེད་པར་རྣམ་པར་ཕྱེ་སྟེ། ཉན་ཐོས་དང་རང་སངས་རྒྱས་རྣམས་ཀྱིས་ཤེས་
པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱ་སྟེ། དོན་འདི་ཡང་མདོ་སྡེ་དེ་དག་ལས་ངས་མ་གསུངས་སོ། །རིགས་ཀྱི་བུ་འདུ་བྱེད་ཐམས་ཅད་མི་རྟག་པ་དང་། ཆོས་ཐམས་ཅད་བདག་མེད་པ་དང་། མྱ་ངན་འདའ་ཞི་བ་དོན་དམ་པར་
ཤེས་པ་ནི་ཤེས་རབ་འབྲིང་ཞེས་བྱའོ། །དོན་དམ་པ་ཚད་མེད་མཐའ་ཡས་དཔག་ཏུ་མེད་པར་ཤེས་ཤིང་། ཉན་ཐོས་དང་རང་སངས་རྒྱས་རྣམས་ཀྱིས་ཤེས་པའི་སྤྱོད་ཡུལ་མ་ཡིན་པ་ནི་ཡེ་ཤེས་རབ་ཅེས་བྱ་སྟེ། དོན་འདི་
ཡང་མདོ་སྡེ་དེ་དག་ལས་ངས་མ་གསུངས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀུན་རྫོབ་ཀྱི་བདེན་པ་དང་། དོན་དམ་

47-1-221b

པའི་བདེན་པ་ཞེས་བགྱི་བའི་དོན་ཇི་ལྟ་བུ་ལགས། བཅོམ་ལྡན་འདས་དོན་དམ་པའི་བདེན་པ་ལ་ཀུན་རྫོབ་ཀྱི་བདེན་པ་མཆིས་སམ། ཀུན་རྫོབ་ཀྱི་བདེན་པ་ལ་དོན་དམ་པའི་བདེན་པ་མཆིས་སམ། ཅི་སྟེ་མཆིས་ན་བདེན་པ་གཅིག་ཏུ་བས་སོ། །
ཅི་སྟེ་མ་མཆིས་ན་དེ་བཞིན་གཤེགས་པས་གསུངས་པ་བརྫུན་དུ་མི་འགྱུར་རམ། བཀའ་སྩལ་པ། རིགས་ཀྱི་བུ་ཀུན་རྫོབ་ཀྱི་བདེན་པ་ཉིད་དོན་དམ་པའི་བདེན་པའོ། །གསོལ་པ། བཅོམ་ལྡན་འདས་དེ་ལྟ་ན་ནི་བདེན་པ་གཉིས་སུ་མ་
མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཤིན་དུ་ཐབས་མཁས་པས་སེམས་ཅན་གྱི་རྗེས་སུ་བདེན་པ་གཉིས་སུ་གསུངས་སོ། །རིགས་ཀྱི་བུ་ཚིག་ཏུ་སྨྲ་བ་ལྟར་ན་རྣམ་པ་གཉིས་ཏེ། འཇིག་རྟེན་གྱི་
ཆོས་དང་། འཇིག་རྟེན་ལས་འདས་པའི་ཆོས་སོ། །རིགས་ཀྱི་བུ་འཇིག་རྟེན་ལས་འདས་པའི་གང་ཟག་གིས་ཤེས་པ་དེ་ནི་དོན་དམ་པའི་བདེན་པ་ཞེས་བྱའོ། །འཇིག་རྟེན་པའི་གང་ཟག་གིས་ཤེས་པ་ནི་ཀུན་རྫོབ་ཀྱི་བདེན་པ་ཞེས་
བྱའོ། །རིགས་ཀྱི་བུ་ཕུང་པོ་ལྔ་འདུས་པ་ལས་བདག་ཅེས་བཏགས་ཏེ། སེམས་ཅན་མ་རབས་ནི་བཏགས་པའི་རྗེས་སུ་འཇུག་པས་ཀུན་རྫོབ་ཀྱི་བདེན་པ་ཞེས་བྱའོ། །ཕུང་པོ་ལ་ཡང་བདག་ཅེས་བྱ་བ་མེད་པར་ཤེས་ལ། ཕུང་པོའི་ཕ་
རོལ་ན་ཡང་བདག་མེད་པར་ཤེས་པ་ནི་འཇིག་རྟེན་ལས་འདས་པ་ཞེས་བྱ་སྟེ། མཚན་ཉིད་ཇི་ལྟ་བ་བཞིན་དུ་ཤེས་པ་ནི་དོན་དམ་པའི་བདེན་པ་ཞེས་བྱའོ། །གཞན་ཡང་རིགས་ཀྱི་བུ་ཆོས་ལ་ལ་ནི་མིང་ཡང་ཡོད་ལ་འབྲས་བུ་ཡང་ཡོད་
དོ། །ཆོས་ལ་ལ་ནི་མིང་ཡོད་ལ་འབྲས་བུ་མེད་དོ། །རིགས་ཀྱི་བུ་མིང་ཡོད་ལ་འབྲས་བུ་མེད་པ་ནི་ཀུན་རྫོབ་ཀྱི་བདེན་པའོ། །མིང་ཡང་ཡོད་ལ་འབྲས་བུ་ཡང་ཡོད་པ་ནི་དོན་དམ་པའི་བདེན་པའོ། །རིགས་ཀྱི་བུ་བདག་ཇི་ལྟ་བ་བཞིན་དུ་སེམས་ཅན་དང་། སྲོག་དང་། ཤེས་པ་དང་། 
མཐོང་བ་དང་། འཚོ་བ་དང་། ཤེད་ཅན་དང་། ཤེད་བདག་དང་། ཚོར་བ་དང་། བྱས་པ་དང་། ཚ་བའི་དུས་ཀྱི་སྨིག་རྒྱུ་བ་དང་། དྲི་ཟའི་གྲོང་ཁྱེར་དང་། རུས་སྦལ་གྱི་སྤུ་དང་། རི་བོང་གི་རྭ་དང་། མེ་འགལ་བསྐོར་བའི་འཁོར་ལོ་དང་། ཕུང་པོ་དང་། ཁམས་དང་། 

47-1-222a

སྐྱེ་མཆེད་རྣམས་ནི་ཀུན་རྫོབ་ཀྱི་བདེན་པ་ཞེས་བྱའོ། །སྡུག་བསྔལ་བ་དང་། ཀུན་འབྱུང་དང་། འགོག་པ་དང་། ལམ་ནི་དོན་དམ་པའི་བདེན་པ་ཞེས་བྱའོ། །རིགས་ཀྱི་བུ་འཇིག་རྟེན་གྱི་ཆོས་ལ་རྣམ་པ་ལྔ་སྟེ། མིང་གི་འཇིག་རྟེན་དང་། ཚིག་གི་
འཇིག་རྟེན་དང་། འཆིང་བའི་འཇིག་རྟེན་དང་། ཆོས་ཀྱི་འཇིག་རྟེན་དང་། ཆགས་པའི་འཇིག་རྟེན་དང་ལྔའོ། །རིགས་ཀྱི་བུ་མིང་གི་འཇིག་རྟེན་གང་ཞེ་ན། སྐྱེས་པ་དང་། བུད་མེད་དང་། བུམ་པ་
དང་གོས་དང་། ཤིང་རྟ་དང་། ཁང་ཁྱིམ་ལ་སོགས་པའི་དངོས་པོ་ནི་མིང་གི་འཇིག་རྟེན་ཞེས་བྱའོ། །ཚིག་གི་འཇིག་རྟེན་གང་ཞེ་ན། རྩ་བ་བཞི་པའི་ཚིགས་སུ་བཅད་པ་གཅིག་སྟེ། ཚིགས་སུ་བཅད་པ་དེ་དག་ནི་ཚིག་གི་འཇིག་
རྟེན་ཞེས་བྱའོ། །འཆིང་བའི་འཇིག་རྟེན་གང་ཞེ་ན། དྲིལ་བ་དང་། སྦྱར་བ་དང་། མདུད་པ་བོར་བ་དང་། སྦམས་པ་དང་། བཅིངས་པ་དང་། ཐལ་མོ་སྦྱར་བ་ནི་འཆིང་བའི་འཇིག་རྟེན་ཞེས་བྱའོ། །ཆོས་ཀྱི་འཇིག་རྟེན་གང་ཞེ་ན། གཎ་ཌི་
བརྡུངས་ན་དགེ་འདུན་འདུ་བ་དང་། རྔ་བརྡུངས་ན་དམག་ཆ་བ་དང་། དུང་བུས་ན་དུས་ཤེས་པ་སྟེ། དེ་ནི་ཆོས་ཀྱི་འཇིག་རྟེན་ཞེས་བྱའོ། །ཆགས་པའི་འཇིག་རྟེན་གང་ཞེ་ན། དཔེར་ན་རྒྱང་རིང་པོ་ནས་ཁ་དོག་བསྒྱུར་བའི་གོས་གྱོན་པའི་
མི་མཐོང་ན། དེ་ནི་དགེ་སྦྱོང་ཡིན་གྱི། བྲམ་ཟེ་མ་ཡིན་ནོ་ཞེས་ཆགས་པ་དང་། ཐག་པ་མདུད་པ་བོར་བ་སེ་རལ་ཁ་དུ་ཐོགས་པ་མཐོང་ན། དེ་འདི་སྙམ་དུ་དེ་ནི་བྲམ་ཟེ་ཡིན་གྱི། དགེ་སྦྱོང་མ་ཡིན་ནོ་སྙམ་བསམས་པ་དེ་ནི་ཆགས་པའི་འཇིག་རྟེན་
ཞེས་བྱའོ། །རིགས་ཀྱི་བུ་དེ་དག་ནི་འཇིག་རྟེན་གྱི་ཆོས་རྣམ་པ་ལྔ་ཞེས་བྱའོ། །རིགས་ཀྱི་བུ་སོ་སོའི་སྐྱེ་བོ་གང་ཞིག་དེ་ལྟར་འཇིག་རྟེན་གྱི་ཆོས་རྣམ་པ་ལྔ་པོ་ལ་སེམས་ཕྱིན་ཅི་མ་ལོག་སྟེ། ཡང་དག་པ་ཇི་ལྟ་བ་བཞིན་དུ་ཤེས་
ན་དོན་དམ་པའི་བདེན་པ་ཞེས་བྱའོ། །གཞན་ཡང་རིགས་ཀྱི་བུ་ཚིག་པ་དང་། ཆོད་པ་དང་། ཤིགས་པ་དང་། འཇིག་པ་ནི་ཀུན་རྫོབ་ཀྱི་བདེན་པ་ཞེས་བྱའོ། །མི་ཚིག་མི་ཆོད། མི་ཤིགས། མི་འཇིག་པ་ནི་དོན་དམ་པའི་བདེན་པ་ཞེས་བྱའོ། །གཞན་

47-1-222b

ཡང་རིགས་ཀྱི་བུ་སྡུག་བསྔལ་གྱི་མཚན་ཉིད་བརྒྱད་དང་བཅས་པ་ནི་ཀུན་རྫོབ་ཀྱི་བདེན་པ་ཞེས་བྱའོ། །སྐྱེ་བ་མེད། རྒ་བ་མེད། ན་བ་མེད། འཆི་བ་མེད། འདོད་པ་དང་བྱེ་བྲལ་བ་མེད། དགྲ་སྡང་བ་དང་ཕྲད་པ་མེད། འདོད་པ་མི་རྙེད་པ་མེད། 
ཕུང་པོ་ལྔ་མེད་པ་ནི་དོན་དམ་པའི་བདེན་པ་ཞེས་བྱའོ། །གཞན་ཡང་རིགས་ཀྱི་བུ་དཔེར་ན་ཤེས་པའི་རྩལ་མང་པོ་དང་ལྡན་པའི་མི་ཞིག་རྒྱུག་པའི་ཚེ་ནི་རྒྱུག་པ་ཞེས་བྱ། ཞིང་བརྔ་བའི་ཚེ་ནི་ཞིང་པ་ཞེས་བྱ། ཟས་ཀྱི་གཡོས་བྱེད་ན་གཡོས་
མཁན་ཞེས་བྱ། ཤིང་བཞོག་པའི་ཚེ་ནི་ཤིང་མཁན་ཞེས་བྱ། གསེར་དངུལ་གྱི་རྡུངས་བྱེད་པའི་ཚེ་ནི་གསེར་མགར་ཞེས་བྱ་སྟེ། དེ་ལྟར་མི་གཅིག་ལ་མིང་དུ་བཏགས་པ་མང་དུ་ཡོད་དོ། །ཆོས་ཀྱང་དེ་དང་འདྲ་སྟེ། ཡང་དག་པར་གཅིག་
མོད་ཀྱི་མིང་དུ་བཏགས་པ་མང་ངོ་། །ཕ་མ་ཕྲད་ཅིང་འདུས་པ་ལས་སྐྱེས་པ་ནི་ཀུན་རྫོབ་ཀྱི་བདེན་པ་ཞེས་བྱའོ། །རྟེན་ཅིང་འབྲེལ་ཏེ་འབྱུང་བ་བཅུ་གཉིས་འདུས་པ་ལས་སྐྱེས་པ་ནི་དོན་དམ་པའི་བདེན་པ་ཞེས་བྱའོ། །བྱང་ཆུབ་སེམས་
དཔའ་སེམས་དཔའ་ཆེན་པོ་འཇམ་དཔལ་གཞོན་ནུས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཡང་དག་པའི་བདེན་པ་ཞེས་བགྱི་བའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། 
རིགས་ཀྱི་བུ་ཡང་དག་པའི་བདེན་པ་ཞེས་བྱ་བ་ནི་ཡང་དག་པའི་ཆོས་སོ། །རིགས་ཀྱི་བུ་གང་ཆོས་ཡང་དག་པ་མ་ཡིན་པ་དེ་ནི་ཡང་དག་པའི་བདེན་པ་མ་ཡིན་ནོ། །རིགས་ཀྱི་བུ་ཡང་དག་པའི་བདེན་པ་ཞེས་བྱ་བ་ནི་ཕྱིན་ཅི་མ་ལོག་པ་སྟེ། 
ཕྱིན་ཅི་མ་ལོག་པ་ནི་ཡང་དག་པའི་བདེན་པ་ཞེས་བྱའོ། །རིགས་ཀྱི་བུ་ཡང་དག་པའི་བདེན་པ་ནི་མི་བདེན་པ་མེད་པ་སྟེ། མི་བདེན་པ་དང་བཅས་པ་ནི་ཡང་དག་པའི་བདེན་པ་ཞེས་མི་བྱའོ། །རིགས་ཀྱི་བུ་ཡང་དག་པའི་བདེན་པ་ནི་ཐེག་པ་
ཆེན་པོ་སྟེ། ཐེག་པ་ཆེན་པོ་མ་ཡིན་པ་ནི་ཡང་དག་པའི་བདེན་པ་ཞེས་མི་བྱའོ། །རིགས་ཀྱི་བུ་ཡང་དག་པའི་བདེན་པ་ནི་སངས་རྒྱས་ཀྱིས་གསུངས་པ་སྟེ། བདུད་ཀྱིས་སྨྲས་པ་མ་ཡིན་ནོ། །བདུད་ཀྱིས་སྨྲས་པ་དང་། སངས་རྒྱས་ཀྱིས་གསུངས་

47-1-223a

པ་མ་ཡིན་པ་ནི་ཡང་དག་པའི་བདེན་པ་ཞེས་མི་བྱའོ། །རིགས་ཀྱི་བུ་ཡང་དག་པའི་བདེན་པ་ཞེས་བྱ་བ་ནི་རྣམ་པར་དག་པའི་ལམ་གཅིག་སྟེ། གཉིས་སུ་མེད་པའོ། །རིགས་ཀྱི་བུ་རྟག་པ་དང་བཅས། བདེ་བ་དང་བཅས། 
བདག་དང་བཅས་ཡོངས་སུ་དག་པ་དང་བཅས་པ་ནི་ཡང་དག་པའི་བདེན་པའི་དོན་ཞེས་བྱའོ། །འཇམ་དཔལ་གཞོན་ནུས་ཡང་གསོལ་པ། བཅོམ་ལྡན་འདས་གལ་ཏེ་ཡང་དག་པ་དེ་ཡང་དག་པའི་བདེན་པ་ལགས་ན་ཡང་དག་པའི་ཆོས་ནི་
དེ་བཞིན་གཤེགས་པའི་སྟོང་པ་ཉིད་དང་། རང་སངས་རྒྱས་ཀྱི་རང་བཞིན་ལགས་ཏེ། ཅི་སྟེ་དེ་ལྟ་བུ་ལགས་ན། དེ་བཞིན་གཤེགས་པ་དང་། ནམ་མཁའ་ཉིད་དང་། སངས་རྒྱས་ཀྱི་རང་བཞིན་བྱེ་བྲག་མ་མཆིས་པར་འགྱུར་རོ། །བཅོམ་ལྡན་འདས་
ཀྱིས་འཇམ་དཔལ་ལ་བཀའ་སྩལ་པ། སྡུག་བསྔལ་ཡོད་ན་བདེན་པ་དང་བཅས། ཡང་དག་པ་དང་བཅས། ཀུན་འབྱུང་ཡོད་ན་བདེན་པ་དང་བཅས། ཡང་དག་པ་དང་བཅས། འགོག་པ་ཡོད་ན་བདེན་པ་དང་བཅས། ཡང་དག་པ་དང་བཅས། ལམ་
ཡོད་ན་བདེན་པ་དང་བཅས། ཡང་དག་པ་དང་བཅས་སོ། །རིགས་ཀྱི་བུ་དེ་བཞིན་གཤེགས་པ་ནི་སྡུག་བསྔལ་མ་ཡིན། བདེན་པ་མ་ཡིན་ཏེ། ཡང་དག་པ་ཡིན་ནོ། །སྟོང་པ་ཉིད་ཀྱང་སྡུག་བསྔལ་མ་ཡིན། བདེན་པ་མ་ཡིན་ཏེ། ཡང་
དག་པ་ཡིན་ནོ། །སངས་རྒྱས་ཀྱི་རང་བཞིན་ཡང་སྡུག་བསྔལ་མ་ཡིན། བདེན་པ་མ་ཡིན་ཏེ། ཡང་དག་པ་ཡིན་ནོ། །འཇམ་དཔལ་སྡུག་བསྔལ་ཞེས་བྱ་བ་ནི་མི་རྟག་པའི་མཚན་ཉིད། གཅད་དུ་རུང་བའི་མཚན་ཉིད་དེ། དེ་བས་ན་ཡང་
དག་པའི་བདེན་པ་ཞེས་མི་བྱའོ། །དེ་བཞིན་གཤེགས་པ་ཉིད་ནི་སྡུག་བསྔལ་མ་ཡིན། མི་རྟག་པ་མ་ཡིན། གཅད་དུ་རུང་བ་མ་ཡིན་ཏེ། ད་བས་ན་ཡང་དག་པ་ཞེས་བྱ་སྟེ། ནམ་མཁའ་དང་སངས་རྒྱས་ཀྱི་རང་བཞིན་ཡང་དེ་བཞིན་དུ་རིག་
པར་བྱའོ། །རིགས་ཀྱི་བུ་གཞན་ཡང་ཀུན་འབྱུང་ཞེས་བྱ་བ་ནི་ཕུང་པོ་ལྔ་འདུས་ཤིང་སྐྱེ་བར་བྱེད་པས་སྡུག་བསྔལ་ཞེས་ཀྱང་བྱ། མི་རྟག་པ་ཞེས་ཀྱང་བྱ། གཅད་དུ་རུང་བ་སྟེ། ཡང་དག་པའི་བདེན་པ་ཞེས་མི་བྱའོ། །རིགས་ཀྱི་བུ་དེ་བཞིན་

47-1-223b

གཤེགས་པ་ནི་ཀུན་འབྱུང་གི་མཚན་ཉིད་མ་ཡིན། ཕུང་པོའི་རྒྱུ་མ་ཡིན། གཅད་དུ་རུང་བའི་མཚན་ཉིད་མ་ཡིན་ཏེ། དེ་བས་ན་ཡང་དག་པ་ཞེས་བྱ་སྟེ། ནམ་མཁའ་དང་། སངས་རྒྱས་ཀྱི་རང་བཞིན་ཡང་དེ་བཞིན་དུ་རིག་པར་
བྱའོ། །རིགས་ཀྱི་བུ་འགོག་པ་བྱ་བ་ནི་ཉོན་མོངས་པ་འགོག་པ་སྟེ། རྟག་པ་ཡང་ཡིན། མི་རྟག་པ་ཡང་ཡིན་ནོ། །ཐེག་པ་གཉིས་ཀྱིས་འཐོབ་པ་ནི་མི་རྟག་པ་ཞེས་བྱའོ། །སངས་རྒྱས་རྣམས་ཀྱིས་འཐོབ་པ་ནི་རྟག་པ་ཞེས་
ཀྱང་བྱ། རང་གིས་རིག་པའི་ཆོས་ཤེས་ཀྱང་བྱ་སྟེ། ཡང་དག་པའི་བདེན་པ་ཞེས་བྱའོ། །རིགས་ཀྱི་བུ་དེ་བཞིན་གཤེགས་པ་ཉིད་ནི་འགོག་པ་ཞེ་འམ། ཉོན་མོངས་པ་འགོག་པ་ཞེས་ཀྱང་མི་བྱ། རྟག་པ་དང་། མི་རྟག་པ་ཡང་མ་ཡིན། 
རང་གིས་རིག་པ་ཡང་མ་ཡིན། རྟག་པ་གནས་པ་མི་འགྱུར་བ་སྟེ། དེ་བས་ན་ཡང་དག་པ་ཞེས་བྱའོ། །ནམ་མཁའ་དང་། སངས་རྒྱས་ཀྱི་རང་བཞིན་ཡང་དེ་བཞིན་དུ་རིག་པར་བྱའོ། །རིགས་ཀྱི་བུ་ལམ་ཞེས་བྱ་བ་ནི་ཉོན་མོངས་པ་གཅོད་པ་སྟེ། 
རྟག་པ་ཡང་མ་ཡིན་ལ་མི་རྟག་པ་ཡང་མ་ཡིན་ཏེ། བསྒོམ་པའི་ཆོས་ཡིན་པས་ན་ཡང་དག་པའི་བདེན་པ་ཞེས་བྱའོ། །དེ་བཞིན་གཤེགས་པ་ནི་ལམ་གྱིས་ཉོན་མོངས་པ་གཅོད་པ་ཡང་མ་ཡིན། རྟག་པ་དང་མི་རྟག་པ་ཡང་མ་ཡིན། 
བསྒོམ་པའི་ཆོས་ཀྱང་མ་ཡིན་ཏེ། རྟག་པ་གནས་པ་མི་འགྱུར་མི་འཕོ་བས་དེའི་ཕྱིར་བདེ་བ་ཞེས་བྱ་སྟེ། ནམ་མཁའ་དང་སངས་རྒྱས་ཀྱི་རང་བཞིན་ཡང་དེ་བཞིན་དུ་རིག་པར་བྱའོ། །རིགས་ཀྱི་བུ་གཞན་ཡང་ཡང་དག་པ་ཞེས་
བྱ་བ་ནི་དེ་བཞིན་གཤེགས་པ་སྟེ། དེ་བཞིན་གཤེགས་པ་ཡང་ཡང་དག་པའོ། །ཡང་དག་པ་ནི་ནམ་མཁའ་སྟེ། ནམ་མཁའ་ཡང་ཡང་དག་པའོ། །ཡང་དག་པ་ནི་སངས་རྒྱས་ཀྱི་རང་བཞིན་ཏེ། སངས་རྒྱས་ཀྱི་རང་བཞིན་ཡང་ཡང་དག་
པའོ། །འཇམ་དཔལ་སྡུག་བསྔལ་ཡོད་ན་སྡུག་བསྔལ་གྱི་རྒྱུ་དང་བཅས། སྡུག་བསྔལ་ཟད་པ་དང་བཅས། སྡུག་བསྔལ་གྱི་གཉེན་པོ་དང་བཅས་ཏེ། དེ་བཞིན་གཤེགས་པ་ནི་སྡུག་བསྔལ་མ་ཡིན་པ་ནས་གཉེན་པོའི་བར་དུ་མ་ཡིན་པས་དེ་

47-1-224a

བས་ན་ཡང་དག་པ་ཞེས་བྱ་སྟེ། བདེན་པ་མ་ཡིན་ནོ། །ནམ་མཁའ་དང་སངས་རྒྱས་ཀྱི་རང་བཞིན་ཡང་རིག་པར་བྱའོ། །སྡུག་བསྔལ་ནི་འདུས་བྱས་དང་བཅས། ཟག་པ་དང་བཅས། མི་བདེ་བ་དང་བཅས་སོ། །དེ་བཞིན་
གཤེགས་པ་ནི་འདུས་བྱས་དང་བཅས་པ་མ་ཡིན། ཟག་པ་དང་བཅས་པ་མ་ཡིན་ཏེ། རབ་ཏུ་བདེ་བས་ན་ཡང་དག་པ་ཡིན་གྱི། བདེན་པ་མ་ཡིན་ནོ། །འཇམ་དཔལ་གཞོན་ནུས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས་ཀྱིས་གསུངས་པ་ལྟར་ཕྱིན་ཅི་མ་ལོག་པ་ནི་ཡང་དག་པའི་བདེན་པ་ཞེས་གསུངས་ཏེ། གལ་ཏེ་དེ་ལྟ་བུ་ལགས་ན་བདེན་པ་བཞི་ལ་ཕྱིན་ཅི་ལོག་བཞི་མཆིས་སམ། གལ་ཏེ་མཆིས་ན་ཅིའི་སླད་དུ་ཕྱིན་ཅི་མ་ལོག་པ་ནི་ཡང་དག་
པའི་བདེན་པ་ཞེས་གསུངས། ཕྱིན་ཅི་ལོག་ཐམས་ཅད་ནི་ཡང་དག་པ་མ་ལགས་སོ། །བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། ཕྱིན་ཅི་ལོག་ཐམས་ཅད་ནི་སྡུག་བསྔལ་གྱི་བདེན་པའི་ནང་དུ་གཏོགས་ཏེ། དཔེར་
ན་སེམས་ཅན་ལྟ་བུ་ཕྱིན་ཅི་ལོག་གི་སེམས་དང་བཅས་པས་ཕྱིན་ཅི་ལོག་ཅེས་བྱའོ། །རིགས་ཀྱི་བུ་དཔེར་ན་མི་ཞིག་ཕ་མ་དང་། སློབ་དཔོན་དང་། བླ་མའི་ངག་མི་ཉན་ལ། བསྟན་པ་བཞིན་དུ་མི་བྱེད་པ་དེ་ནི་ཕྱིན་ཅི་ལོག་པ་ཞེས་བྱ་སྟེ། 
ཕྱིན་ཅི་ལོག་དེ་ཡང་སྡུག་བསྔལ་མ་ཡིན་པ་མ་ཡིན་གྱི། སྡུག་བསྔལ་ཡིན་ནོ། །འཇམ་དཔལ་གྱིས་ཡང་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་མི་བདེན་པ་མ་ལགས་པ་དེ་ཡང་དག་པའི་བདེན་པ་ལགས་ན། 
མི་བདེན་པ་དེ་ནི་ཡང་དག་པའི་བདེན་པ་མ་ལགས་པར་འཚལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་མི་བདེན་པ་བརྫུན་ཐམས་ཅད་ནི་སྡུག་བསྔལ་གྱི་ནང་དུ་གཏོགས་ཏེ། དཔེར་ན་སེམས་ཅན་
ཞིག་ཕ་རོལ་པོ་གཞན་ལ་དབང་བཟས་ཏེ། གཡོ་སྒྱུ་ཞིག་བྱས་ན། དེའི་རྒྱུ་དེའི་རྐྱེན་གྱིས་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། ཡི་དགས་ཀྱི་ཁམས་སུ་ལྟུང་སྟེ་དེ་དག་ནི་མི་བདེན་པ་ཞེས་བྱའོ། །མི་བདེན་

47-1-224b

པ་དེ་ནི་སྡུག་བསྔལ་བ་མ་ཡིན་པ་མ་ཡིན་གྱི་སྡུག་བསྔལ་བ་ཡིན་ནོ། །ཉན་ཐོས་དང་། རང་སངས་རྒྱས་དང་། སངས་རྒྱས་བཅོམ་ལྡན་འདས་རྣམས་ནི་ཡོངས་སུ་སྤངས་ཏེ་མི་སྤྱོད་པས་ན་མི་བདེན་པ་ཞེས་མི་བྱའོ། །མི་བདེན་པ་ནི་སངས་རྒྱས་
རྣམས་དང་ཐེག་པ་གཉིས་ཀྱིས་ཡོངས་སུ་བསལ་བའི་ཕྱིར་ཡང་དག་པའི་བདེན་པ་ཞེས་བྱའོ། །འཇམ་དཔལ་གྱིས་ཡང་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་ཐེག་པ་ཆེན་པོ་ལ་ཡང་དག་པའི་བདེན་པ་ཞེས་བགྱི་ན། ཉན་
ཐོས་དང་རང་སངས་རྒྱས་ཀྱི་ཐེག་པ་ནི་ཡང་དག་པ་མ་ལགས་པར་འགྱུར་རོ། །བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། ཐེག་པ་གཉིས་པོ་ནི་ཡང་དག་པ་ཡང་ཡིན་ལ། ཡང་དག་པ་ཡང་མ་ཡིན་ནོ། །ཉན་ཐོས་དང་རང་སངས་རྒྱས་
ཀྱིས་ཉོན་མོངས་པ་རྣམས་བཅད་པས་ན་ཡང་དག་པ་ཞེས་བྱའོ། །མི་རྟག་ཅིང་མི་གནས་ལ་འགྱུར་ཞིང་འཕོ་བའི་ཆོས་ཅན་ཡིན་པས་ན་ཡང་དག་པ་མ་ཡིན་ནོ། །འཇམ་དཔལ་གྱིས་ཡང་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་ཡང་དག་
པ་ཞེས་བགྱི་ན། གང་བདུད་ཀྱིས་སྨྲས་པ་དེ་ཡང་དག་པ་མ་ལགས་པར་འཚལ་ཏེ། བཅོམ་ལྡན་འདས་བདུད་ཀྱིས་སྨྲས་པ་དེ་འཕགས་པའི་བདེན་པར་གཏོགས་པ་ལགས་སམ། བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། བདུད་
ཀྱིས་སྨྲས་པ་ནི་སྡུག་བསྔལ་དང་། ཀུན་འབྱུང་ཞེས་བྱ་བའི་བདེན་པ་གཉིས་ཀྱི་ནང་དུ་གཏོགས་སོ། །ཇི་ཙམ་དུ་ཆོས་མ་ཡིན་པ་དང་། འདུལ་བ་མ་ཡིན་པ་ཕ་རོལ་ལ་ཕན་པ་དང་། བདེ་བའི་དོན་དུ་མི་འགྱུར་བ་ཐམས་ཅད་ནི་དུས་ཐམས་ཅད་
དུ་མི་དལ་བར་སྨྲས་ཀྱང་། ཕ་རོལ་པོས་སྡུག་བསྔལ་མཐོང་བར་རམ། ཀུན་འབྱུང་ཆོད་པར་རམ། འགོག་པ་རིག་པར་རམ། ལམ་བསྒོམ་པར་འགྱུར་བ་མེད་དེ། དེ་བས་ན་མི་བདེན་པ་ཡིན་ཏེ། མི་བདེན་པ་དེ་ནི་བདུད་ཀྱིས་སྨྲས་པ་ཞེས་
བྱའོ། །འཇམ་དཔལ་གྱིས་ཡང་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་རྣམ་པར་དག་པའི་ལམ་གཅིག་སྟེ། གཉིས་སུ་མ་མཆིས་སོ་ཞེས་བགྱི་བ། མུ་སྟེགས་ཅན་རྣམས་ཀྱང་འདི་སྐད་དུ་རྣམ་པར་དག་པའི་ལམ་

47-1-225a

གཅིག་སྟེ་གཉིས་སུ་མ་མཆིས་སོ་ཞེས་མཆི་ན། ཅི་སྟེ་ལམ་གཅིག་པུ་དེ་ཡང་དག་པའི་བདེན་པ་ལགས་ན། མུ་སྟེགས་ཅན་དང་ཁྱད་པར་ཅི་མཆིས། ཅི་སྟེ་ཁྱད་པར་མ་མཆིས་ན་རྣམ་པར་དག་པའི་ལམ་གཅིག་གོ་ཞེས་གསུངས་
པའི་ཡང་མི་རིགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་མུ་སྟེགས་ཅན་རྣམས་ལ་སྡུག་བསྔལ་དང་། ཀུན་འབྱུང་གི་བདེན་པ་ནི་ཡོད་ཀྱི། འགོག་པ་དང་། ལམ་གྱི་བདེན་པ་ནི་མེད་པས་འགོག་པ་མ་ཡིན་པ་ལ་འགོག་པར་འདུ་
ཤེས་ལམ་མ་ཡིན་པ་ལ་ལམ་དུ་འདུ་ཤེས། འབྲས་བུ་མ་ཡིན་པ་ལ་འབྲས་བུར་འདུ་ཤེས། རྒྱུ་མ་ཡིན་པ་ལ་རྒྱུར་འདུ་ཤེས། དེ་བས་དེ་ལ་ནི་རྣམ་པར་དག་པའི་ལམ་གཅིག་སྟེ། གཉིས་སུ་མེད་དོ་ཞེས་བྱ་བ་མེད་དོ། །འཇམ་དཔལ་གྱིས་
གསོལ་པ། བཅོམ་ལྡན་འདས་ཀྱིས་གསུངས་པ་ལྟར་རྟག་པ་དང་བཅས། བདག་དང་བཅས། བདེ་བ་དང་བཅས། དག་པ་དང་བཅས་པ་ལ་ཡང་དག་པའི་དོན་ཅེས་བགྱི་ན་ལྟ། མུ་སྟེགས་ཅན་རྣམས་ལ་ཡང་དག་པའི་བདེན་པ་མཆིས་ཀྱི་སངས་རྒྱས་ཀྱི་
ཆོས་ལ་ནི་མ་མཆིས་པར་འགྱུར་རོ། །དེ་ཅིའི་སླད་དུ་ཞེ་ན། མུ་སྟེགས་ཅན་རྣམས་ཀྱང་འདི་སྐད་ཅེས་སྨྲ་སྟེ། འདུ་བྱེད་ཐམས་ཅད་ནི་རྟག་པའོ། །ཇི་ལྟར་རྟག་ཅེ་ན། ཡིད་དུ་མི་འོང་བ་དང་། ཡིད་དུ་འོང་བའི་ལས་ཀྱི་རྣམ་པར་སྨིན་པ་ལ་སོགས་པ་མེད་པར་མི་
འགྱུར་བའི་ཕྱིར་རོ། །ཡིད་དུ་འོང་བ་ནི་དགེ་བ་བཅུའི་འབྲས་བུ་མྱོང་བའོ། །ཡིད་དུ་མི་འོང་བ་ནི་མི་དགེ་བ་བཅུའི་རྣམ་པར་སྨིན་པ་སྟེ། གལ་ཏེ་འདུ་བྱེད་ཐམས་ཅད་མི་རྟག་ན་ལས་བྱས་པ་རྣམས་འདི་ནས་ཤི་འཕོས་ནས་ཕ་རོལ་ཏུ་རྣམ་པར་སྨིན་པའི་
འབྲས་བུ་སུས་མྱོང་བར་འགྱུར། དེ་བས་ན་འདུ་བྱེད་ཐམས་ཅད་ནི་རྟག་པ་ལགས་ཏེ་སྲོག་བཅད་པའི་རྐྱེན་གྱིས་རྟག་པ་ཞེས་བྱའོ། །བཅོམ་ལྡན་འདས་ཅི་སྟེ་འདུ་བྱེད་ཐམས་ཅད་མི་རྟག་ན་གསོད་པ་དང་། བསད་པ་གཉིས་ཀ་མི་རྟག་པར་
འགྱུར་རོ། །གལ་ཏེ་མི་རྟག་ན་སེམས་ཅན་དམྱལ་བར་ཁ་ན་མ་ཐོ་བའི་ལས་མྱོང་བར་འགྱུར། གལ་ཏེ་ངེས་པར་སེམས་ཅན་དམྱལ་བའི་རྣམ་པར་སྨིན་པ་མྱོང་ན་འདུ་བྱེད་རྣམས་ཀྱང་ཡང་དག་པར་མི་རྟག་པ་མ་ལགས་པར་འགྱུར་རོ། །བཅོམ་ལྡན་

47-1-225b

འདས་སེམས་རྩེ་གཅིག་ཏུ་སེམས་ཤིང་དྲན་པ་ཡང་རྟག་པ་ཞེས་བགྱིའོ། །འདི་ལྟ་སྟེ། ལོ་བཅུ་ལོན་ཏེ་དྲན་པ་ནི་ལོ་བརྒྱའི་བར་དུ་དྲན་ཏེ་མི་བརྗེད་པ་ཡང་རྟག་པ་ཞེས་བགྱི་སྟེ། ཅི་སྟེ་མི་རྟག་ན་སྔོན་མཐོང་བའི་དངོས་པོ་དག་སུས་དྲན་པར་འགྱུར། 
དེ་བས་ན་འདུ་བྱེད་ཐམས་ཅད་མི་རྟག་པ་མ་ལགས་སོ། །བཅོམ་ལྡན་འདས་དྲན་པ་ཐམས་ཅད་ཀྱང་རྟག་པ་ཞེས་བགྱིའོ། །དཔེར་ན་མི་ཞིག་སྔོན་མི་གཞན་ཞིག་གི་ལག་པ་འམ། རྐང་པ་འམ། མགོ་འམ། གཉའ་བ་ལ་སོགས་པ་ཅི་འདྲ་བ་
མཐོང་ན་ཕྱིས་མཐོང་མ་ཐག་ཏུ་ངོ་ཤེས་སོ། །ཅི་སྟེ་མི་རྟག་པ་ཞིག་ལགས་ན་མཚན་མ་སྔ་མ་མེད་པར་སོང་བའི་རིགས་སོ། །བཅོམ་ལྡན་འདས་ལས་བྱེད་པ་ཐམས་ཅད་ནི་ཡུན་རིང་དུ་གོམས་པ་ལས་འགྱུར་ཏེ་ཐོག་མ་སློབ་པ་ནས་ལོ་གསུམ་
འམ། ལོ་ལྔ་ནས་མཁས་པར་འགྱུར་བས་རྟག་པ་ཞེས་བགྱིའོ། །བཅོམ་ལྡན་འདས་རྩིས་སློབ་པ་ཡང་གཅིག་ལས་གཉིས། གཉིས་ལས་གསུམ་སྟེ། བརྒྱ་སྟོང་གི་བར་དུའོ། །ཅི་སྟེ་མི་རྟག་ན་ཐོག་མ་གཅིག་ཀྱང་མ་མཆིས་པར་འགྱུར་རོ། །
གལ་ཏེ་ཐོག་མ་གཅིག་མ་མཆིས་ན་གཉིས་སུ་ག་ལ་འགྱུར་ཏེ། དེ་ལྟར་ན་གཅིག་ནི་རྟག་པ་སྟེ་གཉིས་མ་ལགས་སོ། །གཅིག་མ་མཆིས་པར་མང་སོང་བས་གཉིས་ནས་བརྒྱ་སྟོང་གི་བར་དུ་འགྱུར་ཏེ། དེ་བས་ན་རྟག་གོ། །བཅོམ་ལྡན་འདས་
དཔེར་ན་ཆོས་ཀློག་པ་འམ། འདོན་པ་ལྟ་བུ་ཨ་ག་མ་གཅིག་དང་། ཨ་ག་མ་གཉིས་དང་། ཨ་ག་མ་གསུམ་དང་། བཞིའི་བར་དུ་འདོན་པར་འགྱུར་རོ། །གལ་ཏེ་མི་རྟག་ན་ཀློག་པ་དང་། འདོན་པ་བཞི་ལ་ཐུག་གི་བར་དུ་མི་འགྱུར་ཏེ། ཀློག་པ་དང་འདོན་པ་
འཕེལ་ཞིང་སྐྱེ་བས་ན་རྟག་པ་ཞེས་བགྱིའོ། །བཅོམ་ལྡན་འདས་བུམ་པ་དང་། གོས་དང་། ཤིང་རྟ་དང་། བུ་ལོན་ཆགས་པ་དང་། ས་ཆེན་པོའི་མཚན་ཉིད་རི་དང་། ཆུ་དང་། ནགས་ཚལ་དང་། རྩི་ཤིང་གི་ལོ་མ་དང་། སེམས་ཅན་གྱི་ནད་གསོ་བ་ལ་སོགས་པ་
ཐམས་ཅད་རྟག་སྟེ་དེ་དང་འདྲའོ། །བཅོམ་ལྡན་འདས་མུ་སྟེགས་ཅན་ཐམས་ཅད་ནི་དེ་སྐད་ཅེས་མཆི་སྟེ། འདུ་བྱེད་ཐམས་ཅད་རྟག་ཅེས་མཆིའོ། །འདུ་བྱེད་ཐམས་ཅད་རྟག་ན་ཡང་དག་པའི་བདེན་པ་ལགས་པར་འགྱུར་རོ། །བཅོམ་ལྡན་འདས་

47-1-226a

མུ་སྟེགས་ཅན་ཁ་ཅིག་ཀྱང་འདི་སྐད་དུ་བདེ་བ་ཡང་ཡོད་ཅེས་མཆིའོ། །ཇི་ལྟར་ཤེས་ཤེ་ན། ཡིད་དུ་འོང་བའི་འབྲས་བུ་མྱོང་བར་འགྱུར་བའི་སླད་དུའོ། །བཅོམ་ལྡན་འདས་བདེ་བ་མྱོང་བ་ནི་ངེས་པར་མཆིས་སོ། །འདི་ལྟ་སྟེ་ཚངས་པའི་
རྒྱལ་པོ་ཆེན་པོ་དང་། དབང་བསྒྱུར་ཆེན་པོ་དང་། བརྒྱ་བྱིན་ལྷའི་དབང་ཕྱུག་དང་། མཇུག་སེལ་དང་། ལྷ་དང་། མི་ལ་སོགས་པ་སྟེ། དེ་བས་ན་ངེས་པར་བདེ་བ་མཆིས་སོ། །བཅོམ་ལྡན་འདས་མུ་སྟེགས་ཅན་ཁ་ཅིག་ཀྱང་འདི་སྐད་དུ་བདེ་བ་
མཆིས་ཤེས་སྨྲ་སྟེ། དེ་ཡང་སེམས་ཅན་དག་རེ་ཞིང་ཚོལ་བའི་སེམས་སྐྱེ་བའོ། །འདི་ལྟ་སྟེ་བཀྲེས་པ་ཟས་ཚོལ་བ་དང་། སྐོམ་པ་ཆུ་ཚོལ་བ་དང་། གྲང་བ་དྲོ་བ་ཚོལ་བ་དང་། ཚ་བ་བསིལ་བ་འདོད་པ་དང་། ངལ་བ་སྟི་འདོད་པ་དང་། ནད་པ་འཚོ་འདོད་
པ་དང་། འདོད་པ་གཟུགས་ཚོལ་བ་སྟེ། ཅི་སྟེ་བདེ་བ་མ་མཆིས་ན་དེ་དག་ཅིའི་སླད་དུ་ཚོལ། ཚོལ་བ་མཆིས་པས་ན་བདེ་བ་མཆིས་པར་མངོན་ནོ། །བཅོམ་ལྡན་འདས་མུ་སྟེགས་ཅན་ཁ་ཅིག་ཀྱང་འདི་སྐད་ཅེས་མཆིའོ། །སྦྱིན་པ་བྱིན་པས་
བདེ་བར་འགྱུར་ཏེ། འཇིག་རྟེན་པ་དག་དགེ་སློང་ངམ། བྲམ་ཟེ་འམ། དབུལ་ཕོངས་པ་ལ་གོས་དང་། ཟས་དང་། སྐོམ་དང་། མལ་ཆ་དང་། ནད་ཀྱི་རྐྱེན་སྨན་དང་། བལ་གླང་དང་། རྟ་དང་། ཐེག་པ་དང་། སྤོས་ཕྱེ་མ་དང་། མེ་ཏོག་དང་། ཁང་ཁྱིམ་དང་། 
གནས་དང་། མེ་མར་ལ་སོགས་པ་སྦྱིན་པ་བྱིན་ན། ཚེ་ཕྱི་མ་ལ་ཡིད་དུ་འོང་བའི་འབྲས་བུ་མྱོང་བར་འགྱུར་ཏེ། དེ་བས་ན་ངེས་པར་བདེ་བ་མཆིས་སོ། །བཅོམ་ལྡན་འདས་མུ་སྟེགས་ཅན་ཁ་ཅིག་ཀྱང་འདི་སྐད་ཅེས་མཆིའོ། །རྒྱུ་དང་རྐྱེན་
གྱི་ཕྱིར་བདེ་བ་མཆིས་པར་འཚལ་ལོ། །འདི་ལྟ་སྟེ་བདེ་བ་མྱོང་བ་ཡང་རྒྱུ་དང་རྐྱེན་མཆིས་པས་ན་བདེ་བ་ལ་རེག་པ་ཞེས་བྱ་སྟེ། བདེ་བ་མ་མཆིས་ན་རྒྱུ་དང་རྐྱེན་ཡང་ག་ལ་མཆིས། དཔེར་རི་བོང་གི་རྭ་མ་མཆིས་ན། རྒྱུ་དང་རྐྱེན་ཡང་མ་
མཆིས་སོ། །བདེ་བའི་རྒྱུ་དང་རྐྱེན་མཆིས་པས་བདེ་བ་མཆིས་པར་འཚལ་ལོ། །བཅོམ་ལྡན་འདས་མུ་སྟེགས་ཅན་ཁ་ཅིག་ཀྱང་འདི་སྐད་ཅེས་མཆི་སྟེ། རབ་དང་འབྲིང་དང་། ཐ་མའི་ཕྱིར་བདེ་བ་མཆིས་པར་འཚལ་ཏོ། །བདེ་བ་མྱོང་བ་ཐ་མ་ནི་

47-1-226b

བརྒྱ་བྱིན་ལྷའི་དབང་ཕྱུག་གོ། །བདེ་བ་མྱོང་བ་འབྲིང་ནི་ཚངས་པ་ཆེན་པོ་ལྷའི་རྒྱལ་པོའོ། །བདེ་བ་མྱོང་བ་རབ་ནི་དབང་སྒྱུར་ཆེན་པོ་སྟེ། དེ་ལྟར་རབ་དང་འབྲིང་དང་། ཐ་མ་མཆིས་པས་བདེ་བ་མཆིས་པར་འཚལ་ཏོ། །བཅོམ་ལྡན་འདས་མུ་སྟེགས་
ཅན་ཁ་ཅིག་ནི་འདི་སྐད་ཅེས་དག་པ་མཆིས་སོ་ཞེས་མཆིའོ། །དེ་ཅིའི་སླད་དུ་ཞེ་ན། ཅི་སྟེ་དག་པ་ཞིག་མ་མཆིས་ན་འདོད་པ་སྐྱེ་བ་ཡང་མི་རིགས་ན། འདོད་པ་སྐྱེ་བ་ལས་ན་དག་པ་མཆིས་པར་འཚལ་ཏོ། །ཁ་ཅིག་ཀྱང་འདི་སྐད་ཅེས་མཆི་སྟེ། 
གསེར་དང་། དངུལ་དང་། བཻ་དཱུརྱ་དང་། ཤེལ་དང་། ཨས་མ་གར་བྷ་དང་། མུ་ས་ལ་གར་བྷ་དང་། སྤུག་དང་། མུ་ཏིག་དང་། ཤེལ་གྱི་སྣམ་བུ་དང་། དོ་ཤལ་དང་། འབབ་ཆུ་དང་། ཆུ་མིག་དང་། ཁྲུས་ཀྱི་རྫིང་བུ་དང་། བཟའ་བ་དང་། བཏུང་བ་དང་། གོས་དང་། 
མེ་ཏོག་དང་། སྤོས་ཕྱེ་མ་དང་། བྱུག་སྤོས་དང་། སྣང་བའི་སྒྲོན་མ་ལ་སོགས་པ་ཐམས་ཅད་ཀྱང་ཡོངས་སུ་དག་པའི་ཆོས་ཅན་ནོ་ཞེས་མཆིའོ། །གཞན་ཡང་འདི་སྐད་དུ་ཕུང་པོ་ལྔ་ནི་སྣོད་གཙང་མ་སྟེ་བཅུད་ཀྱང་གཙང་མས་ཡོངས་སུ་གང་ངོ་། །
འདི་ལྟ་སྟེ་ལྷ་དང་། མི་དང་། དྲང་སྲོང་དང་། དགྲ་བཅོམ་པ་དང་། རང་སངས་རྒྱས་དང་། བྱང་ཆུབ་སེམས་དཔའ་དང་། སངས་རྒྱས་རྣམས་ཏེ་དོན་དེ་ལྟ་བས་ན་གཙང་ངོ་ཞེས་མཆིའོ། །བཅོམ་ལྡན་འདས་མུ་སྟེགས་ཅན་ཁ་ཅིག་ནི་བདག་
ཅེས་བགྱི་བ་མཆིས་སོ་ཞེས་མཆི་སྟེ། ཇི་ཙམ་དུ་མཐོང་བ་དང་། བྱ་བ་བྱེད་པ་ནི་བདག་གོ་ཞེས་མཆི་སྟེ། དཔེར་ན་མི་ཞིག་རྫ་མཁན་གྱི་ཁྱིམ་དུ་ཕྱིན་ན་རྫ་མཁན་ཉིད་དང་མ་ཕྲད་ཀྱང་། འཇི་བ་དང་འཁོར་ལོ་མཐོང་བས་གདོན་མི་
ཟ་བར་རྫ་མཁན་གྱི་ཁྱིམ་ཡིན་པར་ཤེས་ཏེ། བདག་ཅེས་བྱ་བ་ཡང་དེ་དང་འདྲ་སྟེ། མིག་གིས་གཟུགས་མཐོང་མ་ཐག་ཏུ་ངེས་པར་བདག་ཅེས་བགྱི་བ་མཆིས་པར་འཚལ་ཏོ། །ཅི་སྟེ་བདག་ཅེས་བགྱི་བ་མ་མཆིས་ན་སུ་ཞིག་གིས་
གཟུགས་མཐོང་སུ་ཞིག་གིས་སྒྲ་ཐོས་པ་ནས་རེག་བྱ་དང་། ཆོས་ཀྱི་བར་དུ་རྒྱས་པར་རོ། །གཞན་ཡང་བདག་ཅེས་བགྱི་བ་མཆིས་ཏེ། ཇི་ལྟར་ཤེས་ཤེ་ན། མཚན་མ་ལས་རིག་པར་འགྱུར་ཏེ། མཚན་མ་ཞེས་བགྱི་བ་ཇི་ལྟ་བུ་ཞེ་ན། དབུགས་རྒྱུ་བ་དང་། 

47-1-227a

མིག་གིས་བལྟ་ཞིང་འཛུམ་པ་དང་། ཚེའི་ཚད་དང་། སྡུག་བསྔལ་དང་། བདེ་བ་མྱོང་བ་དང་། ཆགས་པས་ཁྲོ་བ་དང་། ཆོས་དེ་དག་ལ་སོགས་པ་ནི་ཐམས་ཅད་བདག་ཅེས་བགྱི་བའི་མཚན་མ་ལགས་ཏེ། དེ་བས་ན་ངེས་པར་བདག་
ཅེས་བགྱི་བ་མཆིས་པར་འཚལ་ཏོ། །གཞན་ཡང་བདག་ཅེས་བགྱི་བ་མཆིས་པ་ནི་རོ་བྲོ་བའི་བྱེ་བྲག་ཕྱེད་པ་སྟེ། དཔེར་ན་མི་ཞིག་ཤིང་ཐོག་ཟོས་ན་མཐོང་མ་ཐག་ཏུ་རོ་ཅི་བྲོ་བ་འཚལ་ཏེ། དེ་བས་ན་བདག་ཅེས་བགྱི་བ་མཆིས་སོ། །གཞན་
ཡང་བདག་ཅེས་བགྱི་བ་མཆིས་པར་ལས་བགྱིད་པའི་སྒོ་ནས་རིག་སྟེ། སྐམ་པ་ཐོགས་ན་འཛིན་པའི་ལས་བྱེད། སྟ་རེ་ཐོགས་ན་གཅོད་པའི་ལས་བྱེད། བུམ་པ་ཐོགས་ན་ཆུ་ལྡུགས་པའི་ལས་བྱེད། ཤིང་རྟ་དང་འགྲོགས་ན་འཁོར་
ལོས་བསྒྱུར་བའི་ལས་བགྱིད་དེ། ལས་དེ་དག་ལ་སོགས་པ་ཡང་བདག་ཅེས་བགྱི་བ་དེས་བཟུང་བས་ན་བྱེད་པར་འགྱུར་ཏེ། དེ་བས་ན་ངེས་པར་བདག་ཅེས་བགྱི་བ་མཆིས་སོ། །གཞན་ཡང་བདག་ཅེས་བགྱི་བར་མཆིས་པར་ཅི་མངོན་
ཞེ་ན། དཔེར་ན་བུ་བྱུང་མ་ཐག་ཏུ་ནུ་ཞོ་འཐུང་འཚལ་བ་ནི་སྔོན་གྱི་བག་ཆགས་ལས་གྱུར་ཏེ། དེ་བས་ན་ངེས་པར་བདག་ཅེས་བགྱི་བ་མཆིས་སོ། །གཞན་ཡང་བདག་ཅེས་བགྱི་བ་མཆིས་ཏེ། ཅི་མངོན་ཞེ་ན། འདུས་ཤིང་ཚོགས་
པ་ལས་སེམས་ཅན་ཕ་རོལ་ལ་ཕན་པར་འགྱུར་བའི་ཕྱིར་ཏེ། དཔེར་ན་བུམ་པ་དང་། གོས་དང་། ཤིང་རྟ་དང་། ཞིང་དང་། ཁྱིམ་དང་། རི་དང་། ནགས་ཚལ་དང་། ཤིང་དང་། བལ་གླང་དང་། རྟ་དང་། བ་ལང་དང་། ལུག་ལ་སོགས་ཏེ། དངོས་པོ་
དེ་དག་འདུས་པ་ལས་ཕན་པའི་དོན་དུ་འགྱུར་ཏེ། ནང་གི་ཕུང་པོ་ལྔ་ཡང་དེ་དང་འདྲ་བར་མིག་གི་དབང་པོ་ལ་སོགས་པ་འདུས་ཤིང་ཚོགས་ན་བདག་ཅེས་བྱ་བ་ལ་ཕན་པར་འགྱུར་ཏེ། དེ་བས་ན་བདག་ཅེས་བགྱི་བ་ངེས་པར་མཆིས་སོ། །
གཞན་ཡང་བདག་ཅེས་བགྱི་བ་མཆིས་པར་ཅི་མངོན་ཞེ་ན། བར་དུ་གཅོད་ཅིང་སྒྲིབ་ནུས་པའི་ཕྱིར་རོ། །དཔེར་ན་དངོས་པོ་མཆིས་ན་བར་དུ་བཅད་ཅིང་། བསྒྲིབ་ཏུ་རུང་གི། དངོས་པོ་མ་མཆིས་ན་བསྒྲིབ་ཏུ་མ་མཆིས་བསྒྲིབ་ཅིང་བར་

47-1-227b

དུ་གཅད་ཏུ་མཆིས་པས་ན་བདག་ཅེས་བགྱི་བ་མཆིས་པར་འཚལ་ཏོ། །དེ་བས་ན་བདག་ཅེས་བགྱི་བ་ངེས་པར་མཆིས་སོ། །གཞན་ཡང་བདག་ཅེས་བགྱི་བ་མཆིས་པར་ཅི་མངོན་ཞེ་ན། གྲོགས་དང་གྲོགས་མ་ཡིན་པའི་
ཕྱིར་ཏེ། གཉེན་དང་གཉེན་མ་ཡིན་པ་ཡང་གྲོགས་སུ་འགྱུར་བ་མ་ལགས། ཡང་དག་པའི་ཆོས་དང་ལོག་པའི་ཆོས་ཀྱང་གྲོགས་སུ་འགྱུར་བ་མ་ལགས། ཡེ་ཤེས་དང་ཡེ་ཤེས་མ་ཡིན་པ་ཡང་གྲོགས་སུ་འགྱུར་བ་མ་ལགས། 
དགེ་སྦྱོང་དང་དགེ་སྦྱོང་མ་ཡིན་པ་ཡང་གྲོགས་སུ་འགྱུར་བ་མ་ལགས། བྲམ་ཟེ་དང་བྲམ་ཟེ་མ་ཡིན་པ་དང་། བུ་དང་བུ་མ་ཡིན་པ་དང་། ཉིན་དང་ཉིན་མ་ཡིན་པ་དང་། མཚན་དང་མཚན་མ་ཡིན་པ་དང་། བདག་དང་བདག་མ་ཡིན་པ་ལ་སོགས་
པ་ཆོས་དེ་དག་ནི་གྲོགས་དང་གྲོགས་མ་ཡིན་པས་ན། བདག་ཅེས་བགྱི་བ་ངེས་པར་མཆིས་སོ། །བཅོམ་ལྡན་འདས་མུ་སྟེགས་ཅན་དག་ཀྱང་དེ་ལྟར་རྣམ་པ་སྣ་ཚོགས་ཀྱི་སྒོ་ནས་རྟག་པ་དང་། བདེ་བ་དང་། བདག་དང་། ཡོངས་སུ་
དག་པ་མཆིས་པར་སྨྲ་སྟེ། རྟག་པ་དང་། བདེ་བ་དང་། བདག་དང་ཡོངས་སུ་དག་པ་ཞེས་བགྱི་བ་ངེས་པར་མཆིས་པར་འཛིན་ཏོ། །བཅོམ་ལྡན་འདས་དོན་དེ་ལྟ་བས་ན་མུ་སྟེགས་ཅན་དག་ཀྱང་ཡང་དག་པའི་བདེན་པ་མཆིས་ཤེས་
སྨྲའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དགེ་སྦྱོང་ངམ་བྲམ་ཟེ་གང་ཞིག་རྟག་པ་ཡོད་ཅེ་འམ། བདེ་བ་ཡོད་ཅེ་འམ། ཡོངས་སུ་དག་པ་ཡོད་ཅེ་འམ། བདག་ཡོད་ཅེས་སྨྲ་ན། དེ་ནི་དགེ་སྦྱོང་མ་ཡིན། བྲམ་ཟེ་མ་
ཡིན་ནོ། །དེ་ཅིའི་ཕྱིར་ཞེ་ན། འཁོར་བ་ལས་འཁྲུལ་ཏེ། ཐམས་ཅད་མཁྱེན་པའི་ཡེ་ཤེས་དང་ལྡན་པའི་སྟོན་པ་ཆེན་པོ་སྤོང་བའི་ཕྱིར་རོ། །དགེ་སྦྱོང་དང་བྲམ་ཟེ་དེ་དག་ནི་འདོད་པའི་ནང་དུ་ཤིན་དུ་བྱིང་བས་དགེ་བའི་ཆོས་
ཉམ་ཆུང་བའི་ཕྱིར་རོ། །མུ་སྟེགས་ཅན་དེ་དག་ནི་འདོད་ཆགས་དང་། ཞེ་སྡང་དང་། གཏི་མུག་གིས་རྣམ་པར་བཅིངས་ཀྱང་། འདོད་པའི་བདེ་བ་ལ་བཟོད་པར་བྱེད་པའི་ཕྱིར་རོ། །མུ་སྟེགས་ཅན་དེ་དག་ནི་ལས་ཀྱི་འབྲས་བུ་བདག་

47-1-228a

གིས་བྱས་པ། བདག་གིས་མྱོང་བར་ཤེས་མོད་ཀྱི། མི་དགེ་བའི་ཆོས་སྤོང་བར་མི་ནུས་སོ། །མུ་སྟེགས་ཅན་དེ་དག་ནི་ཡང་དག་པའི་ཆོས་ཅན་མ་ཡིན། ཡང་དག་པའི་འཚོ་བས་འཚོ་བ་མ་ཡིན་ནོ། །དེ་ཅིའི་ཕྱིར་
ཞེ་ན། ཤེས་རབ་ཀྱི་མི་མེད་དེ་སྦྱོང་མི་ནུས་པའི་ཕྱིར་རོ། །མུ་སྟེགས་ཅན་དེ་དག་ནི་འདོད་པ་ལྔའི་མཆོག་དམ་པ་ལ་ཆགས་མོད་ཀྱི། བརྩོན་འགྲུས་སུ་ནན་ཏན་མི་བྱེད་པས་དགེ་བའི་ཆོས་ཀྱིས་དབུལ་བའི་ཕྱིར་རོ། །
མུ་སྟེགས་ཅན་དེ་དག་ནི་ཡང་དག་པའི་རྣམ་པར་ཐར་པ་འདོད་མོད་ཀྱི་ཚུལ་ཁྲིམས་བསྲུང་བའི་རྐང་པ་དང་མི་ལྡན་པའི་ཕྱིར་རོ། །མུ་སྟེགས་ཅན་དེ་དག་ནི་བདེ་བ་འདོད་མོད་ཀྱི་བདེ་བར་འགྱུར་བའི་རྒྱུ་དང་རྐྱེན་ཚོལ་མི་ནུས་སོ། །མུ་སྟེགས་
ཅན་དེ་དག་ནི་སྡུག་བསྔལ་བར་འགྱུར་བ་ཐམས་ཅད་མི་འདོད་མོད་ཀྱི། སྤྱོད་པ་ཐམས་ཅད་སྡུག་བསྔལ་གྱི་རྒྱུར་འགྱུར་བ་མི་སྤོང་ངོ་། །མུ་སྟེགས་ཅན་དེ་དག་ནི་ཆེན་པོ་བཞིའི་སྦྲུལ་གདུག་པས་དཀྲིས་ཤིང་གླགས་ཀྱང་བག་
མེད་པར་སྤྱོད་དོ། །མུ་སྟེགས་ཅན་དེ་དག་ནི་མ་རིག་པས་ཡོངས་སུ་ཁེབས་པས་དགེ་བའི་བཤེས་གཉེན་སྤོང་སྟེ། ཁམས་གསུམ་དུ་གནས་པར་མོས་པས་མི་རྟག་པའི་མེ་ཆེན་པོ་ཤིན་དུ་འབར་བ་ལས་ཐར་བར་མི་
ནུས་སོ། །མུ་སྟེགས་ཅན་དེ་དག་ནི་ཉོན་མོངས་པའི་ནད་ལྕི་བ་འཚོ་དཀའ་བས་བཏབ་ཀྱང་མཁས་པ་དང་ལྡན་པའི་སྨན་པ་མི་ཚོལ་ལོ། །མུ་སྟེགས་ཅན་དེ་དག་ནི་མ་འོངས་པའི་དུས་མཐའ་མེད་པའི་ལམ་རིང་པོ་ཤིན་ཏུ་ཡ་ང་བ་
བགྲོད་དགོས་ཀྱང་བདེ་བའི་ཆོས་ཀྱི་ཚོགས་བསག་ཅིང་བདག་གི་རྒྱན་དུ་འགྱུར་བ་མི་ཤེས་སོ། །མུ་སྟེགས་ཅན་དེ་དག་ནི་འདོད་ཆགས་ཀྱི་གདུག་པས་གསོད་པར་འགྱུར་ཡང་འདོད་པ་ལྔའི་བ་མོ་གདུག་པ་ལ་ཆགས་སོ། །
མུ་སྟེགས་ཅན་དེ་དག་ནི་ཞེ་སྡང་གི་མེ་ཤིན་དུ་འབར་ཞིང་མཆེད་ཀྱང་མི་དགེ་བའི་བཤེས་གཉེན་ལ་བསྟེན་པར་བྱེད་དོ། །མུ་སྟེགས་ཅན་དེ་དག་ནི་མ་རིག་པས་ཁེབས་ཏེ་ཟིལ་གྱིས་ནོན་ཀྱང་ངན་པར་བལྟ་བའི་ཆོས་ལོག་པ་ཚོལ་

47-1-228b

ལོ། །མུ་སྟེགས་ཅན་དེ་དག་ནི་ངན་པར་བལྟ་བས་རྟག་ཏུ་བསླུས་ཀྱང་དེ་དག་ལ་དགེ་བའི་བཤེས་གཉེན་དུ་འདུ་ཤེས་སྐྱེད་དོ། །མུ་སྟེགས་ཅན་དེ་དག་ནི་འབྲས་བུ་ཞིམ་པོ་ལ་རེ་ཡང་འབྲས་བུ་ཁ་བའི་ས་བོན་འདེབས་སོ། །མུ་སྟེགས་
ཅན་དེ་དག་ནི་ཉོན་མོངས་པའི་མུན་ཁང་དུ་ཞུགས་ཀྱང་ཡེ་ཤེས་ཆེན་པོའི་སྒྲོན་མ་སྤོང་བར་བྱེད་དོ། །མུ་སྟེགས་ཅན་དེ་དག་ནི་ཉོན་མོངས་པས་ཤིན་དུ་གདུས་ཏེ་སྐོམ་ཡང་འདོད་པའི་ཆུ་མཐོང་ངོ་། །མུ་སྟེགས་ཅན་དེ་དག་ན་འཁོར་
བའི་རྒྱ་མཚོ་མཐའ་ཡས་པས་གཡེངས་ཀྱང་བླ་ན་མེད་པའི་གྲུ་སྤོང་བར་བྱེད་དོ། །མུ་སྟེགས་ཅན་དེ་དག་ནི་ཕྱིན་ཅི་ལོག་གིས་ཤིན་ཏུ་བསླད་ཀྱང་འདུ་བྱེད་ཐམས་ཅད་རྟག་ཅེས་སྨྲ་སྟེ། འདུ་བྱེད་ཐམས་ཅད་ནི་རྟག་ཅེས་བྱ་བའི་
གནས་མེད་དོ། །རིགས་ཀྱི་བུ་ངས་བལྟས་ན་འདུ་བྱེད་ཐམས་ཅད་ནི་མི་རྟག་པའོ། །དེ་ཡང་ཇི་ལྟར་ཤེས་ཤེ་ན། རྒྱུ་དང་རྐྱེན་གྱི་སྒོ་ནས་ཤེས་སོ། །ཇི་ཙམ་དུ་རྐྱེན་ལས་སྐྱེས་པའི་ཆོས་ཐམས་ཅད་ནི་མི་རྟག་པར་རིག་པར་བྱའོ། །
དེ་བས་ན་མུ་སྟེགས་ཅན་གྱི་ཆོས་ཐམས་ཅད་ནི་གཅིག་ཙམ་ཡང་རྐྱེན་ལས་མ་སྐྱེས་པ་མེད་དོ། །རིགས་ཀྱི་བུ་སངས་རྒྱས་ཀྱི་རང་བཞིན་ནི་མ་སྐྱེས་པ། མི་འགོག་པ། འོང་བ་ཡང་མེད། སོང་བ་ཡང་མེད། འདས་པ་མ་ཡིན། མ་འོངས་
པ་མ་ཡིན། ད་ལྟར་བྱུང་བ་མ་ཡིན། རྒྱུ་ལས་བྱས་པ་མ་ཡིན། རྒྱུ་མེད་པ་ལས་བྱས་པ་མ་ཡིན། མ་བྱས་པ་མ་ཡིན། བྱས་པ་མ་ཡིན། མཚན་མ་མ་ཡིན། མཚན་མ་མེད་པ་མ་ཡིན། མིང་ཡོད་པ་མ་ཡིན། མིང་མེད་པ་མ་ཡིན། 
མིང་མ་ཡིན། གཟུགས་མ་ཡིན། རིང་པོ་མ་ཡིན། ཐུང་ངུ་མ་ཡིན། ཕུང་པོ་དང་། ཁམས་མ་ཡིན། སྐྱེ་མཆེད་དུ་གཏོགས་པ་མ་ཡིན་པས་ན་རྟག་པ་ཞེས་བྱའོ། །རིགས་ཀྱི་བུ་རང་སངས་རྒྱས་ཀྱི་རང་བཞིན་ནི་དེ་བཞིན་གཤེགས་
པའོ། །དེ་བཞིན་གཤེགས་པ་ནི་ཆོས་སོ། །ཆོས་ནི་རྟག་པའོ། །རིགས་ཀྱི་བུ་རྟག་ཅེས་བྱ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་དགེ་འདུན་ནོ། །དགེ་འདུན་ནི་རྟག་པའོ། །དོན་དེ་ལྟ་བས་ན་རྐྱེན་ལས་སྐྱེས་པའི་ཆོས་

47-1-229a

ཐམས་ཅད་ནི་རྟག་པ་ཞེས་མི་བྱ་སྟེ། མུ་སྟེགས་ཅན་དེ་དག་གི་ཆོས་ནི་གཅིག་ཙམ་ཡང་རྐྱེན་ལས་མ་སྐྱེས་པ་མེད་དོ། །རིགས་ཀྱི་བུ་མུ་སྟེགས་ཅན་དག་ནི་སངས་རྒྱས་ཀྱི་རང་བཞིན་དང་། དེ་བཞིན་གཤེགས་པ་དང་། ཆོས་མི་
མཐོང་བས་དེ་བས་ན་མུ་སྟེགས་ཅན་དག་སྨྲ་བ་ཐམས་ཅད་ནི་བརྫུན་ཏེ་ཡང་དག་པའི་བདེན་པ་མེད་དོ། །བུས་པ་མ་རབས་དག་ནི་སྔོན་བུམ་པ་དང་། གོས་དང་། ཐེག་པ་དང་། ཁང་ཁྱིམ་དང་། གྲོང་ཁྱེར་དང་། ཆུ་ཀླུང་དང་། རི་དང་། ནགས་ཚལ་དང་། 
སྐྱེས་པ་དང་། བུད་མེད་དང་། བལ་གླང་དང་། རྟ་དང་། བ་ལང་དང་། ལུག་ལ་སོགས་པ་མཐོང་བ་ལས་ཕྱིས་དེ་འདྲ་བ་ཞིག་མཐོང་ན་རྟག་པ་ཡིན་ནོ་ཞེས་སྨྲ་སྟེ། ཡང་དག་པར་ན་དེ་ནི་རྟག་པ་མ་ཡིན་ནོ། །རིགས་ཀྱི་བུ་འདུས་བྱས་ཐམས་ཅད་
ནི་མི་རྟག་པའོ། །ནམ་མཁའ་དང་འདུས་མ་བྱས་ནི་རྟག་པ་ཞེས་བྱའོ། །སངས་རྒྱས་ཀྱི་རང་བཞིན་ནི་འདུས་མ་བྱས་པས་ན་རྟག་པ་ཞེས་བྱའོ། །ནམ་མཁའ་ཞེས་བྱ་བ་ནི་སངས་རྒྱས་ཀྱི་རང་བཞིན་ནོ། །སངས་རྒྱས་ཀྱི་རང་བཞིན་ནི་དེ་བཞིན་
གཤེགས་པའོ། །དེ་བཞིན་གཤེགས་པ་ནི་འདུས་མ་བྱས་པའོ། །འདུས་མ་བྱས་པ་ནི་རྟག་པའོ། །རྟག་པ་ནི་ཆོས་སོ། །ཆོས་ནི་དགེ་འདུན་ནོ། །དགེ་འདུན་ནི་འདུས་མ་བྱས་སོ། །འདུས་མ་བྱས་ནི་རྟག་པའོ། །རིགས་ཀྱི་བུ་འདུས་བྱས་
ཀྱི་ཆོས་ལ་རྣམ་པ་གཉིས་ཏེ། གཟུགས་ཀྱི་ཆོས་དང་། གཟུགས་མ་ཡིན་པའི་ཆོས་སོ། །གཟུགས་མ་ཡིན་པའི་ཆོས་བྱ་བ་ནི་སེམས་དང་སེམས་ལས་བྱུང་བའི་ཆོས་སོ། །གཟུགས་ཀྱི་ཆོས་ཤེས་བྱ་བ་ནི་ས་དང་ཆུ་དང་མེ་དང་རླུང་ངོ་། །
རིགས་ཀྱི་བུ་སེམས་ནི་མི་རྟག་པ་ཞེས་བྱའོ། །དེ་ཅིའི་ཕྱིར་ཞེ་ན། རང་བཞིན་གྱིས་དམིགས་ཤིང་རྣམ་པར་རྟོག་པ་དང་ལྡན་པའི་ཕྱིར་རོ། །རིགས་ཀྱི་བུ་མིག་གི་རྣམ་པར་ཤེས་པའི་རང་བཞིན་སོ་སོ་བ་ནས་ཡིད་ཀྱི་རྣམ་པར་
ཤེས་པའི་རང་བཞིན་གྱི་བར་དུ་ཡང་སོ་སོ་སྟེ། དེ་བས་ན་མི་རྟག་གོ། །རིགས་ཀྱི་བུ་གཟུགས་ཀྱི་སྤྱོད་ཡུལ་སོ་སོ་བ་ནས་ཆོས་ཀྱི་སྤྱོད་ཡུལ་གྱི་བར་དུ་ཡང་སོ་སོ་སྟེ། དེ་བས་ན་མི་རྟག་གོ། །རིགས་ཀྱི་བུ་མིག་གི་རྣམ་པར་ཤེས་པ་དང་ལྡན་པ་

47-1-229b

ནས་ཡིད་ཀྱི་རྣམ་པར་ཤེས་པ་དང་ལྡན་པའི་བར་དུ་སོ་སོ་སྟེ། དེ་བས་ན་མི་རྟག་གོ། །རིགས་ཀྱི་བུ་ཅི་སྟེ་སེམས་རྟག་པ་ཞིག་ཡིན་ན་ནི་མིག་གི་རྣམ་པར་ཤེས་པ་འབའ་ཤིག་གིས་ཆོས་ཐམས་ཅད་ལ་དམིགས་པར་འགྱུར་བའི་རིགས་
སོ། །རིགས་ཀྱི་བུ་མིག་གི་རྣམ་པར་ཤེས་པ་སོ་སོ་བ་ནས་ཡིད་ཀྱི་རྣམ་པར་ཤེས་པའི་བར་དུ་སོ་སོ་བས་ན་མི་རྟག་པར་ཤེས་སོ། །འདྲ་བའི་ཆོས་སྐད་ཅིག་སྐད་ཏུ་སྐྱེ་ཞིང་འགོག་པས་བྱིས་པ་མ་རབས་ཀྱིས་དེ་ལྟར་མཐོང་ནས་རྟག་
པར་འཛིན་ཏོ། །རིགས་ཀྱི་བུ་རྒྱུ་དང་རྐྱེན་གྱི་མཚན་ཉིད་གཞིག་ཏུ་རུང་བས་ན་མི་རྟག་པ་ཞེས་བྱའོ། །འདི་ལྟ་སྟེ་མིག་གི་དབང་པོ་དང་། གཟུགས་དང་། སྣང་བ་དང་། བསམས་པའི་རྐྱེན་ལས་མིག་གི་རྣམ་པར་ཤེས་པ་སྐྱེ་སྟེ། རྣ་བའི་རྣམ་
པར་ཤེས་སྐྱེ་བ་ན་ཡང་རྐྱེན་སོ་སོ་བས། མིག་གི་རྣམ་པར་ཤེས་པའི་རྐྱེན་ཀྱིས་མ་ཡིན་པ་ནས་ཡིད་ཀྱི་རྣམ་པར་ཤེས་པའི་བར་དུ་སོ་སོ་བ་ཡང་དེ་བཞིན་དུ་རིག་པར་བྱའོ། །གཞན་ཡང་རིགས་ཀྱི་བུ་འདུ་བྱེད་རྣམས་ཀྱི་རྒྱུ་དང་རྐྱེན་
འཇིག་པས་ན་སེམས་ནི་མི་རྟག་གོ། །འདི་ལྟ་སྟེ་མི་རྟག་པ་སྒོམ་པའི་སེམས་ཀྱང་གཞན་ལ། སྡུག་བསྔལ་བ་དང་། སྟོང་པ་ཉིད་དང་། བདག་མེད་པ་བསྒོམ་པའི་སེམས་ཀྱང་གཞན་ནོ། །ཅི་སྟེ་སེམས་རྟག་པ་ཞིག་ཡིན་ན་མི་རྟག་པ་
རྟག་ཏུ་བསྒོམ་པས་ན་སྡུག་བསྔལ་བ་དང་། སྟོང་པ་ཉིད་དང་། བདག་མེད་པ་རྟོགས་པར་ཡང་མི་འགྱུར་ན། རྟག་པ་དང་། བདེ་བ་དང་། བདག་དང་། ཡོངས་སུ་དག་པ་རྟོགས་པ་ལྟ་ཅི་སྨོས་ཏེ། དོན་དེ་ལྟ་བས་ན་མུ་སྟེགས་ཅན་གྱི་ཆོས་ཀྱི་
ནང་དུ་རྟག་པ་དང་། བདེ་བ་དང་། བདག་དང་ཡོངས་སུ་དག་པ་བསྡུ་མི་ནུས་སོ། །རིགས་ཀྱི་བུ་དེ་བས་ན་སེམས་ཀྱི་ཆོས་ནི་ངེས་པར་མི་རྟག་གོ། །ཡང་ན་རིགས་ཀྱི་བུ་སེམས་ཀྱི་རང་བཞིན་ཐ་དད་པའི་ཕྱིར་ན་མི་རྟག་གོ། །འདི་ལྟ་སྟེ་ཉན་
ཐོས་ཀྱི་སེམས་ཀྱི་རང་བཞིན་སོ་སོ། རང་སངས་རྒྱས་ཀྱི་སེམས་ཀྱི་རང་བཞིན་སོ་སོ། སངས་རྒྱས་རྣམས་ཀྱི་སེམས་ཀྱི་རང་བཞིན་ཡང་སོ་སོ་སྟེ། མུ་སྟེགས་ཅན་ཐམས་ཅད་ཀྱི་སེམས་ནི་རྣམ་པ་གསུམ་སྟེ། རབ་ཏུ་བྱུང་བའི་

47-1-230a

སེམས་དང་ཁྱིམ་ན་གནས་པའི་སེམས་དང་། ཁྱིམ་ན་གནས་པས་དབེན་པའི་སེམས་སོ། །དབེན་པ་དང་ལྡན་པའི་སེམས་ཀྱང་གཞན་ལ། སྡུག་བསྔལ་དང་ལྡན་པའི་སེམས་ཀྱང་གཞན། བདེ་བ་ཡང་མ་ཡིན་སྡུག་བསྔལ་བ་
ཡང་མ་ཡིན་པ་དང་ལྡན་པའི་སེམས་ཀྱང་གཞན། འདོད་ཆགས་དང་ལྡན་པའི་སེམས་ཀྱང་གཞན། ཞེ་སྡང་དང་ལྡན་པའི་སེམས་ཀྱང་གཞན། གཏི་མུག་དང་ལྡན་པའི་སེམས་ཀྱང་གཞན་ཏེ། མུ་སྟེགས་ཅན་ཐམས་ཅད་ཀྱི་སེམས་
ཀྱི་མཚན་ཉིད་ཀྱང་གཞན་ནོ། །འདི་ལྟ་སྟེ་གཏི་མུག་དང་ལྡན་པའི་སེམས་ཀྱང་གཞན་ལ། ཐེ་ཙོམ་དང་ལྡན་པའི་སེམས་ཀྱང་གཞན། ངན་པར་ལྟ་བ་དང་ལྡན་པའི་སེམས་ཀྱང་གཞན། འགྲོ་བ་དང་སྡོད་པའི་སྤྱོད་ལམ་གྱི་སེམས་ཀྱང་
གཞན་ནོ། །རིགས་ཀྱི་བུ་ཅི་སྟེ་སེམས་རྟག་པ་ཞིག་ཡིན་ན། ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། སྨུག་པོར་བྱེ་བྲག་མི་ཕྱེད་པའི་རིགས་སོ། །རིགས་ཀྱི་བུ་གལ་ཏེ་སེམས་རྟག་པ་ཞིག་ཡིན་ན། དྲན་པར་བྱ་
བའི་ཆོས་ཐམས་ཅད་བརྗེད་པར་འགྱུར་བའི་མི་རིགས་སོ། །རིགས་ཀྱི་བུ་ཅི་སྟེ་སེམས་རྟག་པ་ཞིག་ཡིན་ན་ཀློག་པ་དང་། འདོན་པའི་ལས་བྱེད་པ་འཕེལ་ཞིང་སྐྱེ་བའི་མི་རིགས་སོ། །རིགས་ཀྱི་བུ་ཅི་སྟེ་སེམས་རྟག་པ་ཞིག་ཡིན་
ན་བྱས་པ་དང་། བྱེད་པ་དང་། བྱ་བ་བཤད་པའི་མི་རིགས་ཏེ། བྱས་པ་དང་། བྱེད་པ་དང་། བྱ་བ་ཡོད་པས་ན་སེམས་དེ་ནི་ངེས་པར་མི་རྟག་པར་ཤེས་པར་བྱའོ། །རིགས་ཀྱི་བུ་ཅི་སྟེ་སེམས་རྟག་པ་ཞིག་ཡིན་ན། སྡང་བ་དང་། བྱམས་པ་མེད་དོ། །
སྡང་བ་ཡང་མ་ཡིན། བྱམས་པ་ཡང་མ་ཡིན་པར་འགྱུར་རོ། །ཅི་སྟེ་སེམས་རྟག་པ་ཞིག་ཡིན་ན་བདག་གི་རྫས་དང་། གཞན་གྱི་རྫས་ཞེ་འམ། འཆིའོ་སྐྱེའོ་ཞེས་བརྗོད་པའི་མི་རིགས་སོ། །ཅི་སྟེ་སེམས་རྟག་པ་ཞིག་ཡིན་ན་བྱ་
བ་བྱས་ཀྱང་སྐྱེ་ཞིང་འཕེལ་བའི་མི་རིགས་སོ། །རིགས་ཀྱི་བུ་དོན་དེ་ལྟ་བས་ན་སེམས་ཀྱི་རང་བཞིན་ནི་སོ་སོ་ཐ་དད་དེ་ཐ་དད་པས་ན་མི་རྟག་པར་རིག་པར་བྱའོ། །རིགས་ཀྱི་བུ་ངས་འདིར་གཟུགས་མ་ཡིན་པའི་ཆོས་ལ་མི་རྟག་པའི་དོན་

47-1-230b

བཤད་པ་ནི་འདི་དག་ཡིན་ནོ། །དེ་ལ་གཞན་ཡང་ཁྱོད་ལ་གཟུགས་མི་རྟག་པ་བཤད་དེ། གཟུགས་ནི་མི་རྟག་པ་སྟེ་ཐོག་མ་ནས་མ་སྐྱེས་པའོ། །སྐྱེས་ནས་འགོག་པའི་ཕྱིར་མངལ་དུ་འཇུག་པ་ནུར་ནུར་པོའི་ཚེ་ཐོག་མ་ནས་མ་སྐྱེས་
ལ། སྐྱེས་ནས་འགྱུར་བའི་ཕྱིར་རོ། །ཕྱི་རོལ་གྱི་མྱུ་གུ་དང་། སྡོང་བུ་ཡང་ཐོག་མ་ནས་མ་སྐྱེས་ལ། སྐྱེས་ནས་འགྱུར་བའི་ཕྱིར་རོ། །དེ་བས་ན་གཟུགས་ཀྱི་ཆོས་ཐམས་ཅད་ནི་མི་རྟག་པར་ཤེས་པར་བྱའོ། །རིགས་ཀྱི་བུ་ནང་གི་གཟུགས་
ནི་དུས་བཞིན་དུ་འགྱུར་ཏེ། ནུར་ནུར་པོའི་ཚེ་ཡང་གཞན་ལ་མེར་མེར་པོའི་ཚེ་ཡང་གཞན། མཁྲེགས་པའི་ཚེ་ཡང་གཞན། མངལ་གྱི་ཚེ་ཡང་གཞན། སྐྱེ་བའི་ཚེ་ཡང་གཞན། བུས་པའི་ཚེ་ཡང་གཞན། གཞོན་ནུའི་ཚེ་ཡང་གཞན་པ་
ནས་རྒས་པའི་བར་དུ་འགྱུར་ཏེ་སོ་སོར་འགྱུར་བས་ན་གཞན་ནོ། །ཕྱི་རོལ་གྱི་གཟུགས་ཐམས་ཅད་ཀྱང་དེ་དང་འདྲ་སྟེ། མྱུ་གུའི་ཚེ་ཡང་གཞན། སྡོང་བུའི་ཚེ་ཡང་གཞན། ཡལ་གའི་ཚེ་ཡང་གཞན། ལོ་མའི་ཚེ་ཡང་གཞན། མེ་ཏོག་གི་ཚེ་
ཡང་གཞན། འབྲས་བུའི་ཚེ་ཡང་གཞན་ནོ། །རིགས་ཀྱི་བུ་གཞན་ཡང་ནང་གི་རོ་བྲོ་བ་ཡང་ནུར་ནུར་པོའི་གཞན་པ་ནས་རྒས་པའི་བར་དུ་ཡང་ཐ་དད་དེ་གཞན་ནོ། །ཕྱི་རོལ་གྱི་རོ་བྲོ་བ་དེ་དང་འདྲ་སྟེ། མྱུ་གུ་དང་། སྡོང་བུ་དང་། ཡལ་ག་དང་། ལོ་མ་དང་། 
མེ་ཏོག་དང་། འབྲས་བུའི་བར་དུ་ཐ་དད་དེ་གཞན་ནོ། །ནུར་ནུར་པོའི་མཐུ་སྟོབས་ཀྱི་ཚེ་གཞན་པ་ནས་རྒས་ཀྱི་བར་དུ་མཐུ་སྟོབས་ཀྱང་ཐ་དད་དེ་གཞན་ནོ། །ནུར་ནུར་པོའི་ཚེ་གཟུགས་བྱད་ཀྱང་གཞན་པ་ནས་རྒས་པའི་བར་དུ་གཟུགས་
བྱད་ཀྱང་ཐ་དད་དེ་གཞན་ནོ། །ནུར་ནུར་པོའི་ཚེ་ན་རྣམ་པར་སྨིན་པའི་འབྲས་བུ་ཡང་གཞན་པ་ནས་རྒས་པའི་བར་དུ་རྣམ་པར་སྨིན་པའི་འབྲས་བུ་ཡང་ཐ་དད་དེ་གཞན་ནོ། །ནུར་ནུར་པོའི་ཚེ་མིང་བཏགས་པ་ཡང་གཞན་པ་ནས་རྒས་པའི་
བར་དུ་མིང་འདོགས་པ་ཡང་ཐ་དད་དེ་གཞན་ནོ། །འདི་ལྟ་སྟེ་ནང་གི་གཟུགས་ཀྱང་ཞིག་མ་ཐག་ཏུ་ཕྱིར་འདུ་བས་ན་མི་རྟག་ཏེ། ཕྱི་རོལ་གྱི་རྩི་ཤིང་ཡང་ཞིག་མ་ཐག་ཏུ་ཕྱིར་འདུ་བས་ན་མི་རྟག་གོ། །བགས་ཀྱིས་སྐྱེ་བའི་ཕྱིར་ཡང་མི་རྟག་གོ། །

47-1-231a

ནུར་ནུར་པོ་ནས་རྒས་པའི་བར་དུ་ཡང་བགས་ཀྱིས་སྐྱེ་ཞིང་འགྱུར་ལ་མྱུ་གུ་ནས་འབྲས་བུའི་བར་དུ་ཡང་བགས་ཀྱིས་སྐྱེ་ཞིང་འགྱུར་བས་ན་མི་རྟག་གོ། །གཟུགས་ཐམས་ཅད་འགོག་པར་འགྱུར་བས་ན་མི་རྟག་སྟེ། ནུར་ནུར་པོ་
འགོག་པའི་ཚེ་གཞན་པ་ནས་རྒས་པའི་བར་དུ་འགོག་པ་ཡང་གཞན་ནོ། །མྱུ་གུ་འགོག་པ་གཞན་པ་ནས་འབྲས་བུ་འགོག་པའི་བར་དུ་ཡང་གཞན་པ་ནས་མི་རྟག་གོ། །བྱིས་པ་མ་རབས་ཤེས་པ་མེད་པ་དག་ནི་སྐྱེ་བ་དྲན་པར་མཐོང་བས་
རྟག་པར་འཛིན་ཏེ། དོན་དེ་ལྟ་བས་ན་མི་རྟག་པ་ཞེས་བྱའོ། །གལ་ཏེ་མི་རྟག་ན་དེ་ནི་སྡུག་བསྔལ་བ་ཡིན་ནོ། །སྡུག་བསྔལ་བ་ཡིན་པས་ན་མི་གཙང་བའོ། །རིགས་ཀྱི་བུ་དོན་འདི་དག་ནི་འོད་སྲུང་གིས་ཀྱང་སྔར་དྲིས་ཏེ་ངས་རྒྱས་
པར་བཤད་དོ། །གཞན་ཡང་རིགས་ཀྱི་བུ་འདུ་བྱེད་ཐམས་ཅད་ལ་ཡང་བདག་ཅེས་བྱ་བ་མེད་དོ། །རིགས་ཀྱི་བུ་ཆོས་ཐམས་ཅད་ཅེས་བྱ་བ་ནི་མདོར་ན་གཟུགས་དང་གཟུགས་མ་ཡིན་པ་སྟེ། གཟུགས་ལ་ནི་བདག་ཅེས་བྱ་བ་མེད་དོ། །
དེ་ཅིའི་ཕྱིར་ཞེ་ན། གཞིག་ཏུ་རུང་། གཅད་དུ་རུང་། བཙོག་ཏུ་རུང་ལ། སྐྱེ་ཞིང་འཕེལ་བའི་ཕྱིར་རོ། །བདག་ཅེས་བྱ་བ་ནི་གཞིག་ཏུ་མི་རུང་། གཅད་དུ་མི་རུང་། སྐྱེ་ཞིང་འཕེལ་བ་མེད་དེ། དེ་བས་ན་གཟུགས་ནི་བདག་མ་ཡིན་ནོ། །གཟུགས་
མ་ཡིན་པའི་ཆོས་ཀྱང་བདག་མ་ཡིན་ནོ། །དེ་ཅིའི་ཕྱིར་ཞེ་ན། རྒྱུ་དང་རྐྱེན་ལས་སྐྱེས་པའི་ཕྱིར་རོ། །རིགས་ཀྱི་བུ་ཅི་སྟེ་མུ་སྟེགས་ཅན་དག་རྩེ་གཅིག་ཏུ་དྲན་པས་བདག་ཡོད་པར་ཤེས་པ་ཡིན། རྩེ་གཅིག་ཏུ་དྲན་པ་ཉིད་ནི་
བདག་ཅེས་བྱ་བ་མ་ཡིན་ནོ། །ཅི་སྟེ་རྩེ་གཅིག་ཏུ་དྲན་པ་བདག་ཡིན་ནོ་ཞེས་བྱར་ནི་འདས་པའི་དངོས་པོ་དག་བརྗེད་པ་ཡང་ཡོད་དོ། །བརྗེད་པ་ཡོད་པས་ན་ངེས་པར་བདག་ཅེས་བྱ་བ་མེད་དོ། །རིགས་ཀྱི་བུ་ཅི་སྟེ་མུ་སྟེགས་ཅན་དག་དྲན་པའི་
ཕྱིར་བདག་ཡོད་ཅེས་བྱར་ནི་དྲན་པ་མེད་པས་ན་བདག་ཅེས་བྱ་བ་མེད་དོ། །རིགས་ཀྱི་བུ་དཔེར་ན་མི་ཞིག་ལག་པ་ལ་སོར་མོ་དྲུག་ཡོད་པ་མཐོང་ན། དེ་ལ་འདི་སྐད་དུ་སྔོན་ཆེ་གེ་པོ་ཞིག་ཏུ་མ་ཕྲད་དམ་ཞེས་འདྲིའོ། །ཅི་སྟེ་བདག་ཅེས་བྱ་བ་ཡོད་

47-1-231b

ན་འདྲི་བའི་ཡང་མི་རིགས་ཏེ། འདི་འདྲི་བ་ལས་ན་བདག་ཅེས་བྱ་བ་ངེས་པར་མེད་དོ། །རིགས་ཀྱི་བུ་ཅི་སྟེ་མུ་སྟེགས་ཅན་དག་བར་དུ་གཅད་ཅིང་སྒྲིབ་ཏུ་རུང་བའི་ཕྱིར་བདག་ཡོད་ཅེས་བྱར་ནི་རིགས་ཀྱི་བུ་སྒྲིབ་ཏུ་ཡོད་པས་ན་ངེས་པར་བདག་
ཅེས་བྱ་བ་མེད་པར་ཤེས་སོ། །དཔེར་ན་ལྷ་སྦྱིན་ཞེས་བརྗོད་པའི་ཚེ་ལྷ་སྦྱིན་མ་ཡིན་ནོ་ཞེས་མི་བརྗོད་དོ། །བདག་ཀྱང་དེ་དང་འདྲ་སྟེ། ངེས་པར་བདག་ཡིན་ན་བལྟ། བདག་ཅེས་བྱ་བ་ལ་སྒྲིབ་པར་མི་འགྱུར་ཏེ། སྒྲིབ་པར་འགྱུར་བས་
ན་ངེས་པར་བདག་ཅེས་བྱ་བ་མེད་དོ། །ཅི་སྟེ་སྒྲིབ་པར་འགྱུར་བས་བདག་ཡོད་པར་ཤེས་ན་དེ་ལྟར་ཁྱོད་མ་སྒྲིབས་ན་ངེས་པར་བདག་ཅེས་བྱ་བ་མེད་དོ། །རིགས་ཀྱི་བུ་ཅི་སྟེ་མུ་སྟེགས་ཅན་དག་གྲོགས་དང་གྲོགས་མ་ཡིན་པ་ལས་བདག་
ཡོད་པར་ཤེས་སོ་ཞེས་བྱར་ནི་གྲོགས་མེད་པས་ན་བདག་ཅེས་བྱ་བ་མེད་པའི་རིགས་སོ། །གྲོགས་མེད་པའི་ཆོས་ཡོད་དེ། འདི་ལྟ་སྟེ་དེ་བཞིན་གཤེགས་པ་དང་། ནམ་མཁའ་དང་། སངས་རྒྱས་ཀྱི་རང་བཞིན་ནོ། །བདག་ཅེས་བྱ་བ་
ཡང་དེ་དང་འདྲ་བར་ཡང་དག་པར་གྲོགས་མེད་དེ། དེ་བས་ངེས་པར་བདག་ཅེས་བྱ་བ་མེད་དོ། །རིགས་ཀྱི་བུ་གཞན་ཡང་མུ་སྟེགས་ཅན་དག་ཅི་སྟེ་མིང་བཏགས་པ་ལས་བདག་ཡོད་པར་ཤེས་སོ་ཞེས་བྱར་ནི་བདག་མེད་པའི་ཆོས་ལ་
ཡང་བདག་མེད་ཅེས་འདོགས་པའི་མིང་ཡོད་དེ། དཔེར་ན་ཤིན་དུ་དབུལ་པོ་ཞིག་གི་མིང་ཕྱུག་པོ་ཞེས་འདོགས་པ་དང་། དཔེར་ན་བདག་ཤིའོ་ཞེས་བྱ་བ་སྟེ། གལ་ཏེ་བདག་ཅེས་བྱ་བ་ཤི་ན་བདག་གིས་བདག་གསོད་པར་འགྱུར་རོ། །
བདག་ཅེས་བྱ་བ་ནི་ཡང་དག་པར་ན་བསད་དུ་མི་རུང་སྟེ་ཐ་སྙད་དུ་བདག་གསོད་པ་ཞེས་བཏགས་སོ། །དཔེར་ན་མི་ཐུང་ངུ་ཞིག་རིང་པོ་ཞེས་བཏགས་པ་དང་འདྲ་སྟེ་དེ་བས་ན་ངེས་པར་བདག་ཅེས་བྱ་བ་མེད་པར་ཤེས་སོ། །གཞན་ཡང་
རིགས་ཀྱི་བུ་ཅི་སྟེ་མུ་སྟེགས་ཅན་དག་བུ་བྱུང་མ་ཐག་ཏུ་ནུ་ཞོ་ཚོལ་བ་ལས་བདག་ཡོད་པར་ཤེས་སོ་ཞེས་བྱ་བ་ནི། རིགས་ཀྱི་བུ་ཅི་སྟེ་བདག་ཅེས་བྱ་བ་ཡོད་ན་བུས་པ་ཆུང་ངུ་ཐམས་ཅད་མི་གཙང་བ་ངན་སྐྱུགས་དང་། མེ་དང་། སྦྲུལ་གདུག་

47-1-232a

པ་ལ་འཛིན་པའི་མི་རིགས་སོ། །དེ་བས་ན་ངེས་པར་བདག་ཅེས་བྱ་བ་མེད་དོ། །རིགས་ཀྱི་བུ་སེམས་ཅན་ཐམས་ཅད་ནི་རྣམ་པ་འདི་གསུམ་གྱི་ཡེ་ཤེས་མཉམ་པར་ཡོད་དོ། །འདི་ལྟ་སྟེ། འདོད་ཆགས་དང་། ཟ་བ་དང་། འཇིགས་
པ་སྟེ་དེ་བས་ན་བདག་ཅེས་བྱ་བ་མེད་དོ། །གཞན་ཡང་རིགས་ཀྱི་བུ་ཅི་སྟེ་མུ་སྟེགས་ཅན་དག་མཚན་མ་དང་། གཟུགས་ཙམ་ལས་བདག་ཡོད་པར་ཤེས་སོ་ཞེས་བྱར་ནི། རིགས་ཀྱི་བུ་མཚན་མ་ཡོད་པས་ཀྱང་བདག་མེད་ལ། མཚན་མ་མེད་
པས་ཀྱང་བདག་མེད་དོ། །དཔེར་ན་མི་གཉིད་ལོག་པའི་ཚེ། སོང་བ་དང་། འོང་བ་དང་། རྒུ་བ་དང་། དགྱེ་བ་དང་། བལྟ་བ་ཡང་མེད་ལ། བདེ་བ་དང་སྡུག་བསྔལ་བ་ཡང་མི་ཚོར་བས་ན་བདག་ཡོད་པའི་མི་རིགས་སོ། །ཅི་སྟེ་སོང་བ་དང་། འོང་བ་དང་། རྒུ་བ་
དང་། དགྱེ་བ་དང་། བལྟ་བ་ཡོད་པས་བདག་ཡོད་པར་ཤེས་ན། ཤིང་གི་འཁྲུལ་འཁོར་བྱས་པའི་མི་ལ་ཡང་བདག་ཡོད་པའི་རིགས་སོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། མི་འགྲོ། མི་སྡོད་། མི་དགྱེ། མི་རྒུ། མི་བལྟ། 
མི་འཛུམ། སྡུག་བསྔལ་བ་མ་ཡིན། བདེ་བ་མ་ཡིན། འདོད་ཆགས་མ་ཡིན། ཞེ་སྡང་མ་ཡིན། གཏི་མུག་མ་ཡིན། སྤྱོད་པ་མ་ཡིན་ཏེ། དེ་ལྟར་ན་དེ་བཞིན་གཤེགས་པ་ནི་ཡང་དག་པའི་བདག་ཅེས་བྱ་བ་ཡོད་དོ། །གཞན་ཡང་
རིགས་ཀྱི་བུ་ཅི་སྟེ་མུ་སྟེགས་ཅན་དག་ཕ་རོལ་པོས་ཤིང་ཐོག་སྐྱུར་མོ་ཟོས་ན། ཚུ་རོལ་གྱི་འགྲམ་ཆུ་ལངས་པ་ལས་བདག་ཡོད་པར་ཤེས་སོ་ཞེས་བྱར་ནི། རིགས་ཀྱི་བུ་དྲན་པ་ལས་མཐོང་ནས་འགྲམ་ཆུ་ལངས་ཏེ་འགྲམ་ཆུ་ནི་
བདག་མ་ཡིན། བདག་ཀྱང་འགྲམ་ཆུ་མ་ཡིན་ནོ། །དགའ་བ་མ་ཡིན། མྱ་ངན་མ་ཡིན། གླལ་བ་མ་ཡིན། རྒོད་པ་མ་ཡིན། ལྟུང་བ་མ་ཡིན། སྐྱེ་བ་མ་ཡིན། སྐོམ་པ་མ་ཡིན། འདྲངས་པ་མ་ཡིན་ཏེ། དེ་བས་ན་ངེས་པར་བདག་མེད་
པར་ཤེས་སོ། །རིགས་ཀྱི་བུ་མུ་སྟེགས་ཅན་དེ་དག་ནི་བུས་པ་ཆུང་ངུ་ཤད་མ་བྱེ་བ་དང་འདྲ་སྟེ། ཤེས་པ་མེད་པ། ཐབས་མེད་པ། རྟོགས་པ་མེད་པ། རྟག་པ་དང་། མི་རྟག་པ་དང་། སྡུག་བསྔལ་བ་དང་། བདེ་བ་དང་། ཡོངས་སུ་

47-1-232b

དག་པ་དང་། ཡོངས་སུ་མ་དག་པ་དང་། བདག་དང་བདག་མེད་པ་དང་། ཚོར་བ་དང་ཚོར་བ་མ་ཡིན་པ་དང་། སེམས་ཅན་དང་སེམས་ཅན་མ་ཡིན་པ་དང་། བདེ་བ་དང་བདེ་བ་མ་ཡིན་པ་དང་། ཡོད་པ་དང་ཡོད་པ་མ་ཡིན་པ་མི་ཤེས་ཏེ། 
སངས་རྒྱས་ཀྱི་ཆོས་ལས་བག་དང་། ཆ་ཙམ་ཞིག་བླངས་ནས་རྟག་པ་དང་། བདེ་བ་དང་། བདག་དང་། ཡོངས་སུ་དག་པར་འཛིན་ཏེ། ཡང་དག་པར་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མི་ཤེས་སོ། །དཔེར་ན་
དམུས་ལོང་འོ་མའི་ཁ་དོག་མི་ཤེས་པས། གཞན་ལ་འོ་མའི་ཁ་དོག་ཅི་འདྲ་ཞེས་དྲིས་པ་ལས། ཕ་རོལ་པོས་དུང་གི་ཁ་དོག་འདྲའོ་ཞེས་བསྟན་ན། དམུས་ལོང་དེ་འོ་མའི་ཁ་དོག་ལ་དུང་གི་སྒྲ་འདྲ་བ་ཞིག་ཡིན་པར་འཛིན་ཏོ། །
ཡང་དུང་གི་ཁ་དོག་ཅི་འདྲ་ཞེས་དྲིས་པ་ལས། འབྲས་ཕྱེ་འདྲའོ་ཞེས་སྨྲས་ན། དམུས་ལོང་དེ་དུང་གི་ཁ་དོག་ལ་ཤིན་དུ་འཇམ་པར་འཛིན་ཏོ། །ཡང་འདི་སྐད་དུ་འབྲས་ཕྱེའི་ཁ་དོག་ཅི་འདྲ་ཞེས་དྲིས་པ་ལས། ཕ་རོལ་པོས་ཁ་བ་
འདྲའོ་ཞེས་སྨྲས་ན། དམུས་ལོང་དེས་འབྲས་ཕྱེ་མའི་ཁ་དོག་ལ་གྲང་བར་འཛིན་ཏོ། །ཁ་བའི་ཁ་དོག་ཀྱང་ཅི་འདྲ་ཞེས་དྲིས་པ་ལས་ཕ་རོལ་པོས་ངང་པའི་གཤོག་པ་འདྲའོ་ཞེས་སྨྲས་ཀྱང་དམུས་ལོང་དེས་དེ་ལྟར་དཔེ་བསྟན་
པ་བཞིའི་སྒོ་ནས་ཀྱང་དམུས་ལོང་དེས་འོ་མའི་ཁ་དོག་ཡང་དག་པ་ཅི་འདྲ་བ་མི་ཤེས་སོ། །མུ་སྟེགས་ཅན་དེ་དག་ཀྱང་དེ་དང་འདྲ་སྟེ། རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མི་ཤེས་སོ། །
རིགས་ཀྱི་བུ་དེ་བས་ན་སངས་རྒྱས་ཀྱི་ཆོས་ལ་ནི་ཡང་དག་པའི་བདེན་པ་ཡོད་ཀྱི། མུ་སྟེགས་ཅན་རྣམས་ལ་མ་ཡིན་ནོ།། །།
འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་བཅུ་དགུ་པ། འཇམ་དཔལ་གཞོན་ནུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ངོ་མཚར་ཆེའོ། །དེ་བཞིན་གཤེགས་པ་ནི་ཡོངས་སུ་མྱ་

47-1-233a

ངན་ལས་འདའ་ཀར་བླ་ན་མེད་པའི་ཆོས་ཀྱི་འཁོར་ལོ་བསྐོར་ཏེ་ཡང་དག་པའི་བདེན་པ་རྣམ་པར་ཕྱེ་སྟེ་བསྟན་ཏོ། །བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། ཅི་ཁྱོད་དེ་བཞིན་གཤེགས་པ་ལ་མྱ་ངན་ལས་
འདའ་བར་འདུ་ཤེས་སམ། རིགས་ཀྱི་བུ་དེ་བཞིན་གཤེགས་པ་ནི་ཡང་དག་པར་ན་རྟག་པ། གནས་པ། མི་འགྱུར་བ། ཡོངས་སུ་མྱ་ངན་ལས་མ་འདས་པའོ། །རིགས་ཀྱི་བུ་དེ་ལ་གང་ཞིག་བདག་ཏུ་འཛིན་ན་དེ་ནི་སངས་རྒྱས་ཀྱི་བདག་
ཅེས་བྱ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །བདག་ཅེས་བྱ་བ་ནི་ཆོས་ཏེ་ཆོས་ནི་བདག་གི་བའོ། །བདག་གི་ལམ་སྟེ་ལམ་ནི་བདག་གི་བའོ། །བདག་ནི་བཅོམ་ལྡན་འདས་ཏེ་བཅོམ་ལྡན་
འདས་ནི་བདག་གི་བའོ། །བདག་ནི་ཉན་ཐོས་ཏེ་ཉན་ཐོས་ནི་བདག་གི་བའོ། །བདག་གི་བ་ནི་ཆོས་སྟོན་པར་འགྱུར་ཏེ་གཞན་དག་ཉན་པར་བྱེད་དོ། །བདག་ནི་ཆོས་ཀྱི་འཁོར་ལོ་བསྐོར་ཏེ་གཞན་གྱིས་ནུས་པ་མ་ཡིན་ནོ། །དེ་བཞིན་གཤེགས་པ་ནི་
དེ་ལྟ་བུར་མི་འཛིན་ཏེ། དེ་བས་ན་དེ་བཞིན་གཤེགས་པ་ནི་ཆོས་ནི་འཁོར་ལོ་མི་སྐོར་རོ། །རིགས་ཀྱི་བུ་གང་ཞིག་དེ་ལྟ་བུར་འཛིན་ན་བདག་ནི་མིག་གོ། །མིག་ནི་བདག་གི་བའོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་བར་དུ་ཡང་དེ་
བཞིན་ཏེ། བདག་ནི་གཟུགས་སོ་གཟུགས་ནི་བདག་གི་བའོ། །དེ་བཞིན་དུ་ཆོས་ཀྱི་བར་དུ་ཡང་རྒྱས་པར་རིག་པར་བྱའོ། །བདག་ནི་སའོ། །ས་ནི་བདག་གི་བ་སྟེ། ཆུ་དང་། མེ་དང་། རླུང་ཡང་དེ་བཞིན་དུ་རིག་པར་བྱའོ། །རིགས་ཀྱི་བུ་དེ་ལ་
གང་ཞིག་འདི་སྐད་དུ་བདག་ཅེས་བྱ་བ་ནི་དད་པའོ། །དད་པ་ནི་བདག་གི་བའོ། །བདག་ཅེས་བྱ་བ་ནི་མང་དུ་ཐོས་པའོ། །མང་དུ་ཐོས་པ་ནི་བདག་གི་བའོ། །བདག་ཅེས་བྱ་བ་ནི་སྦྱིན་པའི་ཕ་རོལ་དུ་ཕྱིན་པ། སྦྱིན་པའི་ཕ་རོལ་དུ་ཕྱིན་པ་ནི་བདག་
གི་བའོ། །བདག་ཅེས་བྱ་བ་ནི་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནི་བདག་གི་བའོ། །བདག་ནི་བཟོད་པའི་ཕ་རོལ་དུ་ཕྱིན་པ། བཟོད་པའི་ཕ་རོལ་ཏུ་ཕྱིན་པ་ནི་བདག་གི་བའོ། །བདག་ནི་བརྩོན་

47-1-233b

འགྲུས་ཀྱི་ཕ་རོལ་ཏུ་ཕྱིན་པ། བརྩོན་འགྲུས་ཀྱི་ཕ་རོལ་དུ་ཕྱིན་པ་ནི་བདག་གི་བའོ། །བདག་ནི་བསམ་གཏན་གྱི་ཕ་རོལ་དུ་ཕྱིན་པ། བསམ་གཏན་གྱི་ཕ་རོལ་དུ་ཕྱིན་པ་ནི་བདག་གི་བའོ། །བདག་ནི་ཤེས་རབ་ཀྱི་ཕ་རོལ་དུ་ཕྱིན་པ། 
ཤེས་རབ་ཀྱི་ཕ་རོལ་དུ་ཕྱིན་པ་ནི་བདག་གི་བའོ། །བདག་ནི་དྲན་པ་ཉེ་བར་གཞག་པ་བཞི་པའོ། །དྲན་པ་ཉེ་བར་གཞག་པ་བཞི་ནི་བདག་གི་བའོ། །དེ་བཞིན་དུ་ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་
པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་ཀྱང་རྒྱས་པར་རིག་པར་བྱའོ། །རིགས་ཀྱི་བུ་དེ་བཞིན་གཤེགས་པ་ནི་དེ་ལྟར་མི་འཛིན་པས་ན་དེ་བཞིན་གཤེགས་པ་ནི་ཆོས་
ཀྱི་འཁོར་ལོ་མི་བསྐོར་རོ། །རིགས་ཀྱི་བུ་ཅི་སྟེ་དེ་བཞིན་གཤེགས་པ་རྟག་པ་གནས་པ་མི་འཕོ་བ་ཡིན་ན་ཅིའི་ཕྱིར་དེ་བཞིན་གཤེགས་པ་ཆོས་ཀྱི་འཁོར་ལོ་བསྐོར་ཏོ་ཞེས་སྨྲས། དེ་བས་ན་ཁྱོད་ཀྱིས་དེ་བཞིན་གཤེགས་
པས་ཆོས་ཀྱི་འཁོར་ལོ་བསྐོར་ཏོ་ཞེས་བྱ་བའི་མི་རིགས་སོ། །རིགས་ཀྱི་བུ་དཔེར་ན་མིག་དང་སྣང་བ་དང་། བསམ་པ་འདུས་པ་ལས་མིག་གི་རྣམ་པར་ཤེས་པ་སྐྱེ་བར་འགྱུར་རོ། །རིགས་ཀྱི་བུ་མིག་ཀྱང་། འདི་ལྟར་བདག་གིས་
ནི་མིག་གི་རྣམ་པར་ཤེས་པ་བསྐྱེད་དོ་སྙམ་མི་སེམས་པ་ནས་བསམ་པའི་བར་དུ་ཡང་མིག་གི་རྣམ་པར་ཤེས་པ་བསྐྱེད་དོ་སྙམ་མི་སེམས་ལ། མིག་གི་རྣམ་པར་ཤེས་པ་ཉིད་ཀྱང་བདག་ནི་བདག་བསྐྱེད་དོ་སྙམ་མི་སེམས་ཏེ། རིགས་
ཀྱི་བུ་འོན་ཀྱང་དེ་རྣམས་འདུས་ཤིང་ཚོགས་པ་ལས་མཐོང་བར་གྱུར་ཏོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། ཕ་རོལ་དུ་ཕྱིན་པ་དྲུག་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་དང་། ཆོས་རྣམས་རྟོག་པ་དང་། གཞན་
ཡང་ལྐོག་མ་དང་། རྐན་དང་། ལྕེ་དང་། སོ་དང་མཆུ་དང་། ཁ་ལས་ཚིག་ཏུ་སྨྲ་བའི་སྒྲ་ལས། ཐོག་མ་ཚེ་དང་ལྡན་པ་ཀཽཎྜི་ནྱ་ལ་ཆོས་བསྟན་པ་ནི་ཆོས་ཀྱི་འཁོར་ལོ་བསྐོར་བ་ཞེས་བྱ་སྟེ། དོན་དེ་ལྟ་བས་ན་དེ་བཞིན་གཤེགས་པ་ནི་ཆོས་ཀྱི་འཁོར་ལོ་བསྐོར་

47-1-234a

ཞེས་མི་བྱའོ། །རིགས་ཀྱི་བུ་གང་མ་བསྐོར་བ་དེ་ནི་ཆོས་ཤེས་བྱ་སྟེ་ཆོས་ནི་དེ་བཞིན་གཤེགས་པའོ། །རིགས་ཀྱི་བུ་དཔེར་ན་གཙུབ་ཤིང་དང་། གཙུབ་སྟན་དང་། ལག་པ་དང་། བཙའ་འདུས་པ་ལས་མེ་བྱུང་སྟེ། གཙུབ་
ཤིང་ཡང་བདག་གིས་ནི་མེ་ཕྱུང་ངོ་སྙམ་མི་སེམས། གཙུབ་སྟན་དང་། ལག་པ་དང་། བཙའ་ཡང་བདག་གིས་མེ་ཕྱུང་ངོ་སྙམ་མི་སེམས་སོ། །མེ་ཡང་དེ་ལྟར་བདག་གིས་བདག་ཕྱུང་ངོ་སྙམ་མི་སེམས་སོ། །དེ་བཞིན་གཤེགས་པ་
ཡང་དེ་དང་འདྲ་སྟེ་ཕ་རོལ་ཏུ་ཕྱིན་པ་དྲུག་ནས་ཚེ་དང་ལྡན་པ་ཀཽཎྜི་ནྱའི་བར་དུ་ཆོས་ཀྱི་འཁོར་ལོ་བསྐོར་བ་ཞེས་བྱ་སྟེ། དེ་བཞིན་གཤེགས་པ་ནི་ངས་ཆོས་ཀྱི་འཁོར་ལོ་བསྐོར་རོ་སྙམ་མི་དགོངས་སོ། །རིགས་ཀྱི་བུ་དེ་ལྟར་མི་དགོངས་པ་
དེ་ནི་ཆོས་ཀྱི་འཁོར་ལོ་ཡང་དག་པར་བསྐོར་བ་ཞེས་བྱ་སྟེ། དེ་ལྟར་ཆོས་ཀྱི་འཁོར་ལོ་བསྐོར་བ་དེ་ནི་དེ་བཞིན་གཤེགས་པ་ཞེས་བྱའོ། །རིགས་ཀྱི་བུ་དཔེར་ན་མར་ཡང་ཞོ་དང་། ཆུ་དང་། རྫ་མ་དང་། སྲུབ་ཤིང་དང་། ཐག་གུ་དང་། ལག་པ་
ལས་མར་འབྱུང་སྟེ། ཞོ་ཡང་འདི་ལྟར་བདག་གིས་མར་ཕྱུང་ངོ་སྙམ་མི་སེམས་པ་ནས་ལག་པའི་བར་དུ་བདག་གིས་འདི་ལྟར་མར་ཕྱུང་ངོ་སྙམ་མི་སེམས། མར་ཡང་འདི་ལྟར་བདག་གིས་མར་ཕྱུང་ངོ་སྙམ་མི་སེམས་ཏེ། རྐྱེན་མང་
པོ་འདུས་པ་ལས་མར་བྱུང་བར་གྱུར་ཏོ། །དེ་བཞིན་གཤེགས་པ་ཡང་དེ་དང་འདྲ་སྟེ། འདི་ལྟར་ངས་ནི་ཆོས་ཀྱི་འཁོར་ལོ་བསྐོར་ཏོ་སྙམ་མི་དགོངས་སོ། །ཇི་ལྟར་མི་དགོངས་པ་དེ་ནི་ཆོས་ཀྱི་འཁོར་ལོ་ཡང་དག་པར་བསྐོར་བ་ཞེས་བྱ་
སྟེ། ཆོས་ཀྱི་འཁོར་ལོ་བསྐོར་བ་དེ་ནི་དེ་བཞིན་གཤེགས་པ་ཞེས་བྱའོ། །རིགས་ཀྱི་བུ་དཔེར་ན་ས་བོན་དང་། ས་དང་། ཆུ་དང་། མེ་དང་། རླུང་དང་། རྨེད་དང་། དུས་དང་། ལས་སུ་བྱ་བ་ལས་མྱུ་གུ་སྐྱེ་བར་འགྱུར་རོ། །
རིགས་ཀྱི་བུ་ས་བོན་ཡང་འདི་ལྟར་བདག་གིས་མྱུ་གུ་བསྐྱེད་དོ། སྙམ་མི་སེམས་པ་ནས་ལས་སུ་བྱས་པའི་བར་དུ་ཡང་འདི་ལྟར་བདག་གིས་མྱུ་གུ་བསྐྱེད་དོ། །སྙམ་དུ་མི་སེམས། མྱུ་གུ་ཡང་འདི་ལྟར་བདག་གིས་མྱུ་གུ་

47-1-234b

བསྐྱེད་དོ་སྙམ་མི་སེམས་སོ། །དེ་བཞིན་གཤེགས་པ་ཡང་དེ་དང་འདྲ་བར་ངས་ནི་ཆོས་ཀྱི་འཁོར་ལོ་བསྐོར་ཏོ་སྙམ་དུ་མི་དགོངས་ཏེ། རིགས་ཀྱི་བུ་གང་མི་དགོངས་པ་དེ་ནི་ཡང་དག་པར་ཆོས་ཀྱི་འཁོར་ལོ་བསྐོར་བ་ཞེས་བྱ་
སྟེ་ཆོས་ཀྱི་འཁོར་ལོ་བསྐོར་བ་དེ་ནི་དེ་བཞིན་གཤེགས་པའོ། །རིགས་ཀྱི་བུ་དཔེར་ན་རྔ་ཡང་རྔ་ཤིང་དང་། ཀོ་བ་དང་། མིའི་ལག་པ་དང་། རྡུང་བ་འདུས་པ་ལས་སྒྲ་འབྱུང་སྟེ། རྔ་ཡང་འདི་ལྟར་བདག་གིས་སྒྲ་དབྱུང་ངོ་སྙམ་མི་
སེམས་པ་ནས་རྡུང་བ་དང་། སྒྲའི་བར་དུ་ཡང་དག་བདག་གིས་སྒྲ་ཕྱུང་ངོ་སྙམ་མི་སེམས་སོ། །དེ་བཞིན་གཤེགས་པ་ཡང་དེ་དང་འདྲ་བར་ངས་ནི་ཆོས་ཀྱི་འཁོར་ལོ་བསྐོར་ཏོ་སྙམ་མི་དགོངས་སོ། །རིགས་ཀྱི་བུ་
གང་དེ་ལྟར་མི་དགོངས་པ་ནི་ཡང་པར་ཆོས་ཀྱི་འཁོར་ལོ་བསྐོར་བ་ཞེས་བྱ་སྟེ། རིགས་ཀྱི་བུ་ཆོས་ཀྱི་འཁོར་ལོ་བསྐོར་བ་ནི་འདུས་མ་བྱས་པའོ། །འདུས་མ་བྱས་པ་ནི་ཆོས་ཀྱི་འཁོར་ལོ་བསྐོར་བའོ། །
ཆོས་ཀྱི་འཁོར་ལོ་བསྐོར་བ་ནི་དེ་བཞིན་གཤེགས་པའོ། །རིགས་ཀྱི་བུ་ཆོས་ཀྱི་འཁོར་ལོ་བསྐོར་བ་ནི་སངས་རྒྱས་བཅོམ་ལྡན་འདས་ཀྱི་སྤྱོད་ཡུལ་ཡིན་གྱི། ཉན་ཐོས་དང་རང་སངས་རྒྱས་ཀྱིས་ཤེས་པ་མ་ཡིན་ནོ། །
རིགས་ཀྱི་བུ་ནམ་མཁའ་ནི་སྐྱེ་བ་མ་ཡིན། སྐྱེས་པ་མ་ཡིན། བྱེད་པ་མ་ཡིན། བྱས་པ་མ་ཡིན། འདུས་བྱས་ཀྱི་ཆོས་མ་ཡིན་ནོ། །དེ་བཞིན་གཤེགས་པ་ཡང་དེ་དང་འདྲ་སྟེ། སྐྱེ་བ་མ་ཡིན། སྐྱེས་པ་མ་
ཡིན། བྱེད་པ་མ་ཡིན། བྱས་པ་མ་ཡིན། འདུས་བྱས་ཀྱི་ཆོས་མ་ཡིན་ནོ། །དེ་བཞིན་གཤེགས་པ་ཇི་ལྟ་བ་བཞིན་དུ་སངས་རྒྱས་ཀྱི་རང་བཞིན་ཡང་དེ་དང་འདྲ་སྟེ། སྐྱེ་བ་མ་ཡིན། སྐྱེས་པ་མ་ཡིན། བྱེད་པ་མ་ཡིན། 
བྱས་པ་མ་ཡིན། འདུས་བྱས་ཀྱི་ཆོས་མ་ཡིན་ནོ། །རིགས་ཀྱི་བུ་སངས་རྒྱས་བཅོམ་ལྡན་འདས་ཀྱི་གསུང་ནི་རྣམ་པ་གཉིས་ཏེ། འཇིག་རྟེན་གྱི་གསུང་དང་། འཇིག་རྟེན་ལས་འདས་པའི་གསུང་ངོ་། །རིགས་ཀྱི་བུ་དེ་བཞིན་གཤེགས་

47-1-235a

པས་ཉན་ཐོས་དང་རང་སངས་རྒྱས་ལ་ནི་འཇིག་རྟེན་གྱི་གསུང་གིས་གསུང་ངོ་། །བྱང་ཆུབ་སེམས་དཔའ་རྣམས་ལ་ནི་འཇིག་རྟེན་ལས་འདས་པའི་གསུང་གིས་གསུང་ངོ་། །རིགས་ཀྱི་བུ་འཁོར་གྱི་དཀྱིལ་འཁོར་
ལ་ཡང་རྣམ་པ་གཉིས་ཏེ། ཐེག་པ་ཆུང་ངུ་ཚོལ་བ་དང་། ཐེག་པ་ཆེན་པོ་ཚོལ་བའོ། །ང་སྔོན་བཱ་ར་ཎ་སཱིར་ཉན་ཐོས་རྣམས་ལ་ཆོས་ཀྱི་འཁོར་ལོ་བསྐོར་ཏེ་ད་ཡང་རྩྭ་མཆོག་གི་གྲོང་ཁྱེར་འདིར་བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་ལ་ཆོས་ཀྱི་འཁོར་ལོ་བསྐོར་ཏོ། །རིགས་ཀྱི་བུ་གཞན་ཡང་གང་ཟག་ལ་རྣམ་པ་གཉིས་ཏེ། དབང་པོ་འབྲིང་དང་། དབང་པོ་རབ་བོ། །དབང་པོ་འབྲིང་པོ་ལ་ནི་བཱ་ར་ཎ་སཱིར་ཆོས་ཀྱི་འཁོར་ལོ་བསྐོར་ཏོ། །དབང་པོ་རབ་ནི་མིའི་ནང་ན་ཁྱུ་
མཆོག་གི་རྒྱལ་པོ་ལྟ་བུ་བྱང་ཆུབ་སེམས་དཔའ་འོད་སྲུང་ལ་སོགས་པ་ལ་རྩྭ་མཆོག་གི་གྲོང་ཁྱེར་འདིར་ཆོས་ཆེན་པོའི་འཁོར་ལོ་བསྐོར་ཏོ། །རིགས་ཀྱི་བུ་དབང་པོ་ཐ་མ་ལ་ནི་དེ་བཞིན་གཤེགས་པ་ཆོས་ཀྱི་འཁོར་ལོ་མི་བསྐོར་ཏོ། དབང་པོ་
ཐ་མ་ཞེས་བྱ་བ་ནི་ལོག་སྲེད་ཅན་དག་གོ། །རིགས་ཀྱི་བུ་གཞན་ཡང་སངས་རྒྱས་ཀྱི་བྱང་ཆུབ་ཚོལ་བ་ལ་ཡང་རྣམ་པ་གཉིས་ཏེ། བརྩོན་འགྲུས་འབྲིང་པོ་དང་། བརྩོན་འགྲུས་རབ་བོ། །བཱ་ར་ཎ་སཱིར་ནི་བརྩོན་འགྲུས་འབྲིང་པོ་རྣམས་ལ་ཆོས་
ཀྱི་འཁོར་ལོ་བསྐོར་ཏོ། །རྩྭ་མཆོག་གི་གྲོང་ཁྱེར་འདིར་ནི་བརྩོན་འགྲུས་རབ་རྣམས་ལ་ཆོས་ཆེན་པོའི་འཁོར་ལོ་བསྐོར་ཏོ། །རིགས་ཀྱི་བུ་གཞན་ཡང་ངས་སྔོན་བཱ་ར་ཎ་སཱིར་ཐོག་མ་ཆོས་ཀྱི་འཁོར་ལོ་བསྐོར་བ་ན། ལྷ་དང་མི་བརྒྱད་ཁྲི་སྙེད་རྒྱུན་དུ་ཞུགས་
པའི་འབྲས་བུ་ཐོབ་པར་གྱུར་ཏོ། །ད་རྩྭ་མཆོག་གི་གྲོང་ཁྱེར་འདིར་ནི་ལྷ་དང་མི་ཁྲི་ཕྲག་བརྒྱད་བཅུ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །རིགས་ཀྱི་བུ་སྔོན་བཱ་ར་ཎ་སཱིར་ནི་ཚངས་པ་ཆེན་
པོའི་རྒྱལ་པོ་ང་ལ་ཕྱག་འཚལ་ཏེ། ཆོས་ཀྱི་འཁོར་ལོ་བསྐོར་བར་གསོལ་ཏོ། །རྩྭ་མཆོག་གི་གྲོང་ཁྱེར་འདིར་ནི་བྱང་ཆུབ་སེམས་དཔའ་འོད་སྲུང་གིས་ང་ལ་ཕྱག་འཚལ་ཏེ། ཆོས་ཀྱི་འཁོར་ལོ་བསྐོར་བར་གསོལ་ཏོ། །རིགས་ཀྱི་བུ་གཞན་

47-1-235b

ཡང་སྔོན་བཱ་ར་ཎ་སཱིར་ཆོས་ཀྱི་འཁོར་ལོ་བསྐོར་བ་ན་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་སྟོན་ཏོ། །ད་རྩྭ་མཆོག་གི་གྲོང་ཁྱེར་འདིར་ཆོས་ཀྱི་འཁོར་ལོ་བསྐོར་བ་ན་རྟོག་པ་དང་། བདེ་བ་དང་། བདག་
དང་། ཡོངས་སུ་དག་པ་བསྟན་ཏོ། །གཞན་ཡང་རིགས་ཀྱི་བུ་ངས་སྔོན་བཱ་ར་ཎ་སཱིར་ཆོས་ཀྱི་འཁོར་ལོ་བསྐོར་བ་ན་གསུངས་དབྱངས་ཚངས་པའི་འཇིག་རྟེན་ལ་ཐུག་གི་བར་དུ་གྲགས་སོ། །ད་རྩྭ་མཆོག་གི་གྲོང་ཁྱེར་འདིར་ཆོས་ཀྱི་འཁོར་
ལོ་བསྐོར་བ་ན་གསུང་དབྱངས་ཀྱིས་ཤར་ཕྱོགས་ཀྱི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་ཉི་ཤུ་རྙེད་དུ་གྲགས་ཏེ། ལྷོ་དང་ནུབ་དང་། བྱང་དང་། ཕྱོགས་མཚམས་བཞི་དང་། སྟེང་དང་། འོག་ཏུ་ཡང་དེ་བཞིན་དུ་གྲགས་པར་
གྱུར་ཏོ། །གཞན་ཡང་རིགས་ཀྱི་བུ་སངས་རྒྱས་བཅོམ་ལྡན་འདས་ཇི་ཙམ་དུ་གསུང་བ་ཐམས་ཅད་ནི་ཆོས་ཀྱི་འཁོར་ལོ་བསྐོར་བ་ཞེས་བྱའོ། །རིགས་ཀྱི་བུ་དཔེར་ན་འཁོར་ལོས་བསྒྱུར་བའི་རྒྱལ་པོའི་འཁོར་ལོ་ནི་མ་བཏུལ་བའི་རྣམས་ཐུལ་བ་
དང་། ཐུལ་བ་རྣམས་བདེ་བར་བྱེད་དོ། །རིགས་ཀྱི་བུ་སངས་རྒྱས་བཅོམ་ལྡན་འདས་རྣམས་ཀྱིས་ཆོས་གསུངས་པ་ཡང་། དེ་དང་འདྲ་སྟེ། ཚད་པའི་ཀུན་ནས་ཉོན་མོངས་པ་མ་བཏུལ་བ་ཡང་ཐུལ་བར་བྱེད་ལ། ཐུལ་བ་ཡང་དགེ་བའི་རྩ་བ་སྐྱེ་བར་བྱེད་
དོ། །རིགས་ཀྱི་བུ་དཔེར་ན་འཁོར་ལོས་བསྒྱུར་བའི་རྒྱལ་པོ་ནི་འཁོར་ལོ་རིན་པོ་ཆེས་ཕས་རྒོལ་བའི་སྒྲ་ཐམས་ཅད་ཞི་བར་བྱེད་དོ། །དེ་བཞིན་གཤེགས་པས་ཆོས་བསྟན་པ་ཡང་དེ་དང་འདྲ་སྟེ། ཀུན་ནས་ཉོན་མོངས་པའི་དགྲ་
ཐམས་ཅད་ཞི་བར་བྱེད་དོ། །གཞན་ཡང་རིགས་ཀྱི་བུ་དཔེར་ན་འཁོར་ལོས་བསྒྱུར་བའི་རྒྱལ་པོའི་འཁོར་ལོ་རིན་པོ་ཆེས་ནི་འོག་ནས་སྟེང་དུ་ཡིད་བཞིན་དུ་འགྱུར་རོ། །དེ་བཞིན་གཤེགས་པས་ཆོས་བསྟན་པ་ཡང་དེ་དང་
འདྲ་སྟེ། ངན་སོང་གི་སེམས་ཅན་ཐམས་ཅད་མཐོ་རིས་ཀྱི་ལྷར་སྐྱེ་བ་ནས་སངས་རྒྱས་ཀྱི་བྱང་ཆུབ་ལ་ཐུག་གི་བར་དུ་ཕྱིན་པར་བྱེད་དོ། །རིགས་ཀྱི་བུ་དེ་བས་ན་ཁྱོད་ཀྱི་དེ་བཞིན་གཤེགས་པ་ལ་ཆོས་ཀྱི་འཁོར་ལོ་གདོད་

47-1-236a

བསྐོར་རོ་ཞེས་མ་ཟེར་ཅིག ། དེ་ནས་འཇམ་དཔལ་གཞོན་ནུར་གྱུར་པས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དོན་འདི་དག་བདག་གིས་མི་འཚལ་བའི་སླད་དུ་ཞུ་བ་ནི་མ་
ལགས་ཀྱི་སེམས་ཅན་ཐམས་ཅད་ལ་ཕན་པ་དང་། བདེ་བའི་སླད་དུ་ཞུས་པ་ལགས་སོ། །བཅོམ་ལྡན་འདས་བདག་ནི་ཡུན་རིང་པོ་ནས་ཆོས་ཀྱི་འཁོར་ལོ་བསྐོར་བ་ནི་སངས་རྒྱས་བཅོམ་ལྡན་འདས་ཀྱི་སྤྱོད་ཡུལ་ལགས་ཀྱི། 
ཉན་ཐོས་དང་རང་སངས་རྒྱས་ཀྱི་སྤྱོད་ཡུལ་མ་ལགས་པར་འཚལ་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་ཐེག་པ་ཆེན་པོ་ཡོངས་
སུ་མྱ་ངན་ལས་འདས་པའི་མདོ་ལ་གནས་པ་ནི། འཕགས་པའི་སྤྱད་པ་སྤྱོད་པ་ཞེས་བྱའོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གཞན་ཡང་ཅིའི་སླད་དུ་འཕགས་པའི་
སྤྱོད་པ་ཞེས་བགྱི། བཀའ་སྩལ་པ། རིགས་ཀྱི་བུ་འཕགས་པ་ཞེས་བྱ་བ་ནི་སངས་རྒྱས་བཅོམ་ལྡན་འདས་ཏེ། དེ་བས་ན་འཕགས་པའི་སྤྱོད་པ་ཞེས་བྱའོ། །གསོལ་པ། བཅོམ་ལྡན་འདས་གལ་ཏེ་སངས་རྒྱས་བཅོམ་ལྡན་
འདས་ཀྱི་སྤྱོད་པ་ལགས་ན་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའི་སྤྱོད་པ་མ་ལགས་སོ། །བཀའ་སྩལ་པ། རིགས་ཀྱི་བུ་སངས་རྒྱས་བཅོམ་ལྡན་འདས་ཀྱང་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་བརྟེན་ཏེ། 
འདི་ལྟར་རྣམ་པར་ཕྱེ་ཞིང་བསྟན་པས་འཕགས་པའི་སྤྱོད་པ་ཞེས་བྱའོ། །ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱང་དེ་ལྟར་ཐོས་ནས་རྗེས་སུ་སྤྱོད་ན་འཕགས་པའི་སྤྱོད་པ་ཞེས་བྱའོ། །
རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དག་སྤྱོད་པ་འདི་ལ་གནས་ན་འཇིགས་པ་མེད་པའི་ས་ལ་གནས་པར་གྱུར་ཏོ། །རིགས་ཀྱི་བུ་བྱང་ཆུབ་སེམས་དཔའ་གང་མི་འཇིགས་པའི་ས་ལ་གནས་ན་འདོད་ཆགས་

47-1-236b

དང་། ཞེ་སྡང་དང་། གཏི་མུག་དང་། སྐྱེ་བ་དང་། རྒ་བ་དང་། ན་བ་དང་། འཆི་བའི་ནང་དུ་ཡང་མི་འཇིགས་ཏེ། སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། ཡི་དགས་སུ་ལྟུང་བའི་འཇིགས་པ་མེད་པར་འགྱུར་རོ། །
རིགས་ཀྱི་བུ་མི་དགེ་བ་ལ་རྣམ་པ་གཉིས་ཏེ། ལྷ་མ་ཡིན་དང་། མིའི་ནང་དུ་སྐྱེས་པའོ། །མིའི་ནང་དུ་སྐྱེས་པ་ལ་ཡང་མི་དགེ་བ་རྣམ་པ་གསུམ་སྟེ། ལོག་སྲེད་ཅན་དང་། ཤིན་དུ་རྒྱས་པའི་མདོ་སྡེ་ལ་སྐུར་བ་དང་། ཕས་
ཕམ་པ་བཞི་ཉམས་པའོ། །རིགས་ཀྱི་བུ་ས་དེ་ལ་གནས་པའི་བྱང་ཆུབ་སེམས་དཔའ་རྣམས་ནི་ནམ་དུ་ཡང་དེ་ལྟ་བུའི་མི་དགེ་བའི་གནས་སུ་ལྟུང་བས་མི་འཇིགས་སོ། །གཞན་ཡང་དགེ་སྦྱོང་དང་། བྲམ་ཟེ་དང་། མུ་སྟེགས་
ཅན་ངན་པར་བལྟ་བ་དང་། ལྷའི་བུ་བདུད་སྡིག་ཏོ་ཅན་ལ་སོགས་པས་ཀྱང་མི་འཇིགས་སོ། །གཞན་ཡང་སྲིད་པ་ཉི་ཤུ་ལྔ་པོས་མི་འཇིགས་ཏེ། དེ་བས་ན་ས་འདི་ནི་འཇིགས་པ་མེད་པ་ཞེས་བྱའོ། །རིགས་ཀྱི་བུ་བྱང་ཆུབ་
སེམས་དཔའ་སེམས་དཔའ་ཆེན་པོ་འཇིགས་པ་མེད་པའི་ས་ལ་གནས་པ་ནི་ཏིང་ངེ་འཛིན་རྣམ་པ་ཉི་ཤུ་ལྔ་ཐོབ་པས་སྲིད་པ་ཉི་ཤུ་ལྔ་གཞོམ་པར་བྱེད་དོ། །རིགས་ཀྱི་བུ་དྲི་མ་མེད་པའི་ཏིང་ངེ་འཛིན་ཐོབ་པས་ནི་སེམས་ཅན་དམྱལ་
བའི་སྲིད་པ་བཅོམ། ཕྱིར་མི་ལྡོག་པའི་ཏིང་ངེ་འཛིན་ཐོབ་པས་ནི་བྱོལ་སོང་གི་སྲིད་པ་བཅོམ། སེམས་བདེ་བའི་ཏིང་ངེ་འཛིན་ཐོབ་པས་ནི་ཡི་དགས་ཀྱི་སྲིད་པ་བཅོམ། རབ་ཏུ་དགའ་བའི་ཏིང་ངེ་འཛིན་ཐོབ་པས་ནི་
ལྷ་མ་ཡིན་གྱི་སྲིད་པ་བཅོམ་ཉི་མའི་འོད་ཟེར་གྱི་ཏིང་ངེ་འཛིན་ཐོབ་པས་ནི་ཤར་གྱི་ལུས་འཕགས་གླིང་དུ་སྐྱེ་བའི་སྲིད་པ་བཅོམ། ཟླ་བའི་འོད་ཟེར་གྱི་ཏིང་ངེ་འཛིན་ཐོབ་པས་ནི་ནུབ་གྱི་བ་གླང་སྤྱོད་དུ་སྐྱེ་བའི་སྲིད་པ་བཅོམ། 
མེ་དབལ་གྱི་ཏིང་ངེ་འཛིན་ཐོབ་པས་ནི་བྱང་གི་སྒྲ་མི་སྙན་དུ་སྐྱེ་བའི་སྲིད་པ་བཅོམ། སྒྱུ་མ་ལྟ་བུའི་ཏིང་ངེ་འཛིན་ཐོབ་པས་ནི་ལྷོའི་འཛམ་བུའི་གླིང་དུ་སྐྱེ་བའི་སྲིད་པ་བཅོམ། ཆོས་ཐམས་ཅད་མི་གཡོ་བའི་ཏིང་ངེ་འཛིན་ཐོབ་པས་ནི་རྒྱལ་ཆེན་བཞིའི་གནས་སུ་སྐྱེ་བའི་སྲིད་པ་བཅོམ། 

47-1-237a

ཤིན་དུ་གདུལ་དཀའི་ཏིང་ངེ་འཛིན་ཐོབ་པས་ནི་སུམ་བཅུ་རྩ་གསུམ་གནམ་དུ་སྐྱེ་བའི་སྲིད་པ་བཅོམ། ཡིད་དུ་འོང་བའི་ཏིང་ངེ་འཛིན་ཐོབ་པས་ནི་འཐབ་བྲལ་གནམ་དུ་སྐྱེ་བའི་སྲིད་པ་བཅོམ། ཐམས་ཅད་སྔོན་
པོའི་ཏིང་ངེ་འཛིན་ཐོབ་པས་ནི་དགའ་ལྡན་གནམ་དུ་སྐྱེ་བའི་སྲིད་པ་བཅོམ། ཐམས་ཅད་སེར་པོའི་ཏིང་ངེ་འཛིན་ཐོབ་པས་ནི་འཕྲུལ་དགའ་གནམ་དུ་སྐྱེ་བའི་སྲིད་པ་བཅོམ། ཐམས་ཅད་དམར་པོའི་ཏིང་ངེ་འཛིན་
ཐོབ་པས་ནི་གཞན་འཕྲུལ་དབང་བྱེད་གནམ་དུ་སྐྱེ་བའི་སྲིད་པ་བཅོམ། ཐམས་ཅད་དཀར་པོའི་ཏིང་ངེ་འཛིན་ཐོབ་པས་ནི་བསམ་གཏན་དང་པོའི་སྲིད་པ་བཅོམ། རྣམ་པ་སྣ་ཚོགས་ཀྱི་ཏིང་ངེ་འཛིན་ཐོབ་པས་
ནི་ཚངས་པ་ཆེན་པོའི་སྲིད་པ་བཅོམ། ཟུང་དུ་འབྲེལ་བའི་ཏིང་ངེ་འཛིན་ཐོབ་པས་ནི་བསམ་གཏན་གཉིས་པའི་སྲིད་པ་བཅོམ། འབྲུག་སྒྲའི་ཏིང་ངེ་འཛིན་ཐོབ་པས་ནི་བསམ་གཏན་གསུམ་པའི་སྲིད་པ་བཅོམ། 
ཆར་པ་བབ་པའི་ཏིང་ངེ་འཛིན་ཐོབ་པས་ནི་བསམ་གཏན་བཞི་པའི་སྲིད་པ་བཅོམོ། །ནམ་མཁའ་ལྟ་བུའི་ཏིང་ངེ་འཛིན་ཐོབ་པས་ནི་འདུ་ཤེས་མེད་པའི་སྲིད་པ་བཅོམ། མེ་ལོང་ལྟ་བུའི་ཏིང་ངེ་འཛིན་ཐོབ་པས་ནི་གཙང་
མའི་རིས་ལན་ཅིག་ཕྱིར་ལྡོག་པའི་སྲིད་པ་བཅོམ། ཆགས་པ་མེད་པའི་ཏིང་ངེ་འཛིན་ཐོབ་པས་ནི་ནམ་མཁའ་མཐའ་ཡས་སྐྱེ་མཆེད་སྟེངས་ཀྱི་སྲིད་པ་བཅོམ། རྟག་པའི་ཏིང་ངེ་འཛིན་ཐོབ་པས་ནི་རྣམ་ཤེས་མཐའ་
ཡས་སྐྱེད་མཆེད་སྟེངས་ཀྱི་སྲིད་པ་བཅོམ། དགའ་བའི་ཏིང་ངེ་འཛིན་ཐོབ་པས་ནི་ཅུང་ཟད་མེད་པའི་སྐྱེ་མཆེད་སྟེངས་ཀྱི་སྲིད་པ་བཅོམ། བདག་གི་ཏིང་ངེ་འཛིན་ཐོབ་པས་ནི་འདུ་ཤེས་མེད་འདུ་ཤེས་མེད་མིན་སྐྱེ་མཆེད་
སྟེངས་ཀྱི་སྲིད་པ་བཅོམ་མོ། །རིགས་ཀྱི་བུ་འདི་དག་ནི་བྱང་ཆུབ་སེམས་དཔའི་ཏིང་ངེ་འཛིན་ཉི་ཤུ་རྩ་ལྔ་ཐོབ་པས་སྲིད་པ་ཉི་ཤུ་རྩ་ལྔ་བཅོམ་པ་ཞེས་བྱའོ། །རིགས་ཀྱི་བུ་ཏིང་ངེ་འཛིན་ཉི་ཤུ་རྩ་ལྔ་པོ་འདི་དག་ནི་ཏིང་ངེ་

47-1-237b

འཛིན་གྱི་རྒྱལ་པོ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་གྱི་རྒྱལ་པོ་འདི་དག་ལ་ཞུགས་ན། གལ་ཏེ་རི་རབ་རིའི་རྒྱལ་པོ་འདི་འཇིག་པར་འདོད་ན་ཡང་བསམས་པ་བཞིན་དུ་
འཇིག་གོ། །གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཀྱི་བསམ་པ་ཤེས་པར་འདོད་ན་ཡང་ཡིད་བཞིན་དུ་ཤེས་པར་འགྱུར་རོ། །གལ་ཏེ་སྟོང་གསུམ་གྱི་སྟོང་ཆེན་པོའི་
འཇིག་རྟེན་གྱི་ཁམས་ན་གནས་པའི་སེམས་ཅན་ཐམས་ཅད་ལུས་ཀྱི་བ་སྤུའི་ཁུང་གཅིག་ཏུ་བཞུག་པར་འདོད་ན་ཡང་ཡིད་བཞིན་དུ་འགྱུར་ཏེ། དོག་པ་འམ་གཟེར་བའི་སེམས་མེད་དོ། །གལ་ཏེ་སེམས་ཅན་གྲངས་
མེད་པར་སྤྲུལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོངས་སུ་གང་བར་འདོད་ན་ཡང་ཡིད་བཞིན་དུ་འགྱུར་རོ། །ཅི་སྟེ་ལུས་གཅིག་ལས་ལུས་མང་པོར་འདོད་དམ། ལུས་མང་པོ་ལས་ལུས་གཅིག་ཏུ་
འདོད་ན་ཡང་ཡིད་བཞིན་དུ་འགྱུར་ཏེ། དེ་ལྟ་བུར་འགྱུར་མོད་ཀྱི། པད་མོ་ལྟར་སེམས་ཅི་ལ་ཡང་མི་ཆགས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་གྱི་རྒྱལ་པོ་དེ་ལ་ཞུགས་
ནས་དབང་དུ་འགྱུར་བའི་ས་ལ་ཡང་གནས་པར་འགྱུར་རོ། །བྱང་ཆུབ་སེམས་དཔའ་དབང་དུ་འགྱུར་བའི་ས་ལ་གནས་པ་ནི་དབང་དུ་འགྱུར་བའི་མཐུ་དང་ལྡན་པས་གང་ནས་གང་དུ་སྐྱེ་བར་འདོད་པ་དེ་དང་དེ་དག་ཏུ་
ཡིད་བཞིན་དུ་སྐྱེ་བར་འགྱུར་རོ། །རིགས་ཀྱི་བུ་དཔེར་ན་འཁོར་ལོས་སྒྱུར་བའི་རྒྱལ་པོ་གླིང་བཞིར་འགྲོ་འདོད་ན་ཡིད་བཞིན་དུ་ཕྱིན་ཏེ་བར་དུ་གཅོད་པ་མེད་དོ། །བྱང་ཆུབ་སེམས་དཔའ་སེམས་དཔའ་ཆེན་
པོ་ཡང་དེ་དང་འདྲ་སྟེ། གང་ནས་གང་དུ་སྐྱེ་བར་འདོད་པ་དེ་དང་དེ་དག་ཏུ་ཡིད་བཞིན་དུ་སྐྱེ་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་དམྱལ་བ་ན་གནས་པའི་སེམས་ཅན་

47-1-238a

དག་དགེ་བའི་རྩ་བ་ལ་འཇོག་པར་འགྱུར་ན་བྱང་ཆུབ་སེམས་དཔའ་དེར་སྐྱེ་སྟེ། བྱང་ཆུབ་སེམས་དཔའ་དེར་སྐྱེ་མོད་ཀྱི། སྔོན་གྱི་ལས་ཀྱི་འབྲས་བུ་ནི་མ་ཡིན་གྱི། བྱང་ཆུབ་སེམས་དཔའ་སེམས་དཔའ་ཆེན་པོ་
དབང་དུ་གྱུར་པའི་ས་ལ་གནས་པ་དེའི་རྒྱུ་དེའི་རྐྱེན་གྱིས་དེར་སྐྱེ་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་དམྱལ་བ་ན་གནས་མོད་ཀྱི། དམྱལ་བ་བཏུག་པའི་སྡུག་བསྔལ་ལ་སྩོགས་
པ་ནི་མི་མྱོང་ངོ་། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་ལྷུན་གྱིས་གྲུབ་པའི་ཡོན་ཏན་ཡང་ཚད་མེད་དཔག་ཏུ་མེད་དེ། བསྐལ་པ་ཁྲི་ཕྲག་བརྒྱ་སྟོང་གི་བར་དུ་ཡང་བཤད་ཀྱིས་མི་རྫོགས་ན། སངས་རྒྱས་
བཅོམ་ལྡན་འདས་རྣམས་ཀྱི་ཡོན་ཏན་བརྗོད་པ་ལྟ་སྨོས་ཀྱང་ཅི་དགོས། དེའི་ཚེ་འཁོར་གྱི་དཀྱིལ་འཁོར་དེ་ན། བྱང་ཆུབ་སེམས་དཔའ་དྲི་མ་མེད་པའི་སྙིང་པོའི་རྒྱལ་པོ་ཞེས་བྱ་བ་གཟི་བརྗིད་ཆེན་པོ་དང་མངོན་པར་ཤེས་པ་དང་ལྡན་
པ། གཟུངས་ཆེན་པོ་ཐོབ་པ། ཏིང་ངེ་འཛིན་ཕུན་སུམ་ཚོགས་པ། འཇིགས་པ་མེད་པ། ཐོབ་པ་ཞིག་འདུག་པ་ལས་ལངས་ནས་བླ་གོས་ཕྲག་པ་གཅིག་ཏུ་བྱས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་ཀྱིས་གསུངས་པ་ལྟར་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཡོན་ཏན་དང་ཡེ་ཤེས་ནི་ཚད་མ་མཆིས་དཔག་ཏུ་མ་མཆིས་ཏེ། བསྐལ་པ་ཁྲི་ཕྲག་
བརྒྱ་སྟོང་གི་བར་དུ་ཡང་བཤད་ཀྱིས་མི་རྫོགས་ཤེས་བགྱི་བ་བདག་གིས་ཡིད་ལ་བསམས་པ་ལྟར་ཐེག་པ་ཆེན་པོའི་མདོ་སྡེ་དང་སྦྱར་ན་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། ཐེག་པ་ཆེན་པོ་ཤིན་དུ་རྒྱས་པའི་མདོ་སྡེའི་མཐུས་སངས་
རྒྱས་བཅོམ་ལྡན་འདས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དེ་ལས་འབྱུང་ཞིང་སྐྱེའོ། །དེ་ནས་བཅོམ་ལྡན་འདས་ཀྱིས་ལེགས་སོ་ལེགས་སོ་ཞེས་བྱ་བ་བྱིན་ནས་རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་

47-1-238b

ནོ། །ཁྱོད་ཀྱིས་སྨྲས་པ་བཞིན་ཏེ། དེ་ལྟར་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ཡང་དེ་ལྟར་ཡོན་ཏན་ཚད་མེད་མཐའ་ཡས་པ་དང་། ལྡན་མོད་ཀྱི། མདོ་སྡེ་དེ་དག་མདོ་སྡེ་འདིའི་དཔེར་ཡང་མི་བཟོད་དེ། བརྒྱའི་ཆར་ཡང་མི་བཟོད། 
སྟོང་གི་ཆར་ཡང་མི་བཟོད། བརྒྱ་སྟོང་གི་ཆར་ཡང་མི་བཟོད་པ་ནས་རྩིས་སམ། གྲངས་སམ། དཔེའི་བར་དུ་ཡང་མི་བཟོད་དོ། །རིགས་ཀྱི་བུ་འདི་ལྟ་སྟེ་དཔེར་ན་བ་ལས་འོ་མ་འབྱུང་སྟེ། འོ་མ་ལས་ནི་ཞོ་འབྱུང་། ཞོ་ལས་
ནི་མར་འབྱུང་། མར་ལས་ནི་ཞུན་མར་འབྱུང་། ཞུན་མར་ལས་ནི་མར་གྱི་སྙིང་པོ་འབྱུང་། མར་གྱི་སྙིང་པོ་ཞེས་བྱ་བ་ནི་མཆོག་དང་ཕུལ་དུ་གྱུར་པ་སྟེ། གང་ཞིག་གིས་འཐུངས་ན་ནད་རྣམ་པ་སྣ་ཚོགས་འབྱང་བར་
འགྱུར་ཏེ། སྨན་ཐམས་ཅད་ཀྱི་ནང་དུ་ཡང་འགྲོའོ། །རིགས་ཀྱི་བུ་སངས་རྒྱས་བཅོམ་ལྡན་འདས་ཀྱང་དེ་དང་འདྲ་སྟེ། སངས་རྒྱས་ལས་ནི་མདོ་སྡེ་བཅུ་གཉིས་འབྱུང་ངོ་། །མདོ་སྡེ་བཅུ་གཉིས་ལས་ནི་མདོའི་སྡེ་འབྱུང་ངོ་། །
མདོའི་སྡེ་ལས་ནི་ཤིན་དུ་རྒྱས་པའི་མདོ་སྡེ་འབྱུང་ངོ་། །ཤིན་དུ་རྒྱས་པའི་མདོ་སྡེ་ལས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་ངོ་། །ཤེས་རབ་ཀྱི་ཕ་རོལ་ཏུ་ཕྱིན་པ་ལས་ནི་ཡོངས་སུ་མྱ་ངན་ལས་འདས་པ་ཆེན་པོ་མར་གྱི་སྙིང་
པོ་ལྟ་བུ་འབྱུང་ངོ་། །མར་གྱི་སྙིང་པོ་ཞེས་བྱ་བ་ནི་སངས་རྒྱས་ཀྱི་རང་བཞིན་གྱི་དཔེའོ། །སངས་རྒྱས་ཀྱི་རང་བཞིན་ཞེས་བྱ་བ་ནི་དེ་བཞིན་གཤེགས་པའོ། །རིགས་ཀྱི་བུ་དེ་བས་ན་དེ་བཞིན་གཤེགས་པའི་ཡོན་ཏན་ནི་ཚད་མེད་མཐས་
ཡས་དཔག་ཏུ་མེད་པ་ཡིན་ནོ། །དེ་ནས་བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་གསུངས་པ་ལྟར་ཡོངས་སུ་མྱ་ངན་
ལས་འདས་པའི་མདོ་ནི་མར་གྱི་སྙིང་པོ་ལྟ་བུར་མཆོག་ཏུ་གྱུར། ཕུལ་དུ་འགྱུར་ཏེ། གང་ཞིག་གིས་འཐུངས་ན་ནད་ཀྱི་རྣམ་པ་ཡང་འབྱང་བར་འགྱུར་ལ། སྨན་ཐམས་ཅད་ཀྱི་ནང་དུ་འང་འགྲོའོ་ཞེས་གསུངས་པ་

47-1-239a

ཐོས་ནས་བདག་འདི་སྙམ་དུ་གྱུར་ཏོ། །གང་མདོ་སྡེ་འདི་མི་ཉན་ཅིང་མི་འདོན་པ་དེ་ནི་ཤིན་དུ་ཡང་གཏི་མུག་ཆེ་བ་སྟེ་དགེ་བའི་སེམས་མ་མཆིས་པར་འཚལ་ཏོ། །བཅོམ་ལྡན་འདས་བདག་ནི་ལྤགས་པ་བཤུས་
ཏེ་ཡི་གེ་འདྲི་བའི་གཞིར་བྱས་ལ། ཁྲག་ཕྱུང་སྟེ་སྣག་ཚར་བྱ་བ་དང་། རྐང་ཕྱུང་སྟེ་ཆུར་བྱ་བ་དང་། རུས་པ་གཞོགས་ཏེ་སྨྱུག་གུར་བྱས་ལ། ཡོངས་སུ་མྱ་ངན་ལས་འདས་པའི་མདོ་སྡེ་འདི་བྲི་བར་བཟོད་དོ། །བྲིས་ནས་
ཀྱང་ཀློག་པ་དང་། འདོན་པ་དང་། ཁོང་དུ་ཆུད་པར་བྱ་བ་དང་། གཞན་ལ་ཡང་རྒྱ་ཆེར་སྟོན་ཅིང་འཆད་ཀྱང་བཟོད་དོ། །བཅོམ་ལྡན་འདས་གལ་ཏེ་སེམས་ཅན་གང་ཞིག་ལོངས་སྤྱོད་ལ་ཆགས་པར་འགྱུར་ན་བདག་གིས་དེ་ལ་སྔར་ལོངས་
སྤྱོད་བྱིན་ཏེ། དེའི་འོག་ཏུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདི་ཀློག་པར་བསྐུལ་ལོ། །གལ་ཏེ་ལོངས་སྤྱོད་ཆེན་པོ་དང་ལྡན་པ་ཞིག་ན། སྔར་ཡིད་ལ་འདོད་པའི་གཏམ་སྙན་པ་བྱས་ཏེ། དེའི་འོག་ཏུ་ཐེག་པ་
ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ཀློག་པར་བསྐུལ་ལོ། །གལ་ཏེ་མ་རབས་ཤིག་ཡིན་ན་ཡང་མཐུས་ནན་ཀྱིས་ཀློག་ཏུ་གཞུག་གོ། །གལ་ཏེ་ང་རྒྱལ་ཅན་ཞིག་ཡིན་ན་ཡང་བདག་གིས་སྔར་ཡིད་
བཞིན་དུ་གཡོག་བྱས་ཏེ་ཤིན་དུ་དགའ་ཞིང་མགུ་བར་བྱས་ལ་དེའི་འོག་ཏུ་ཡོངས་སུ་མྱ་ངན་ལས་འདས་པའི་མདོ་སྡེ་འདི་བསྟན་ཏོ། །གལ་ཏེ་ཤིན་དུ་རྒྱས་པའི་མདོ་སྡེ་ལ་སྐུར་པ་ཞིག་མཆིས་ན་མཐུ་སྟོབས་ཀྱིས་བཏུལ་
བར་འཚལ་ལོ། །བཏུལ་ནས་དེའི་འོག་ཏུ་ཡོངས་སུ་མྱ་ངན་ལས་འདས་པའི་མདོ་སྡེ་ཀློག་ཏུ་གཞུག་གོ། །གལ་ཏེ་ཐེག་པ་ཆེན་པོའི་མདོ་སྡེ་ལ་དད་ཅིང་མོས་པ་ཞིག་ན། བདག་དེའི་དྲུང་དུ་མཆིས་ཏེ། ཤིན་དུ་སྟི་སྟང་
དང་བཅས་པས་རིམ་གྲོ་དང་། བཀུར་སྟི་དང་། མཆོད་པ་དང་། བསྟོད་པ་བགྱིའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། ལེགས་སོ་ལེགས་སོ། །ཁྱོད་ཐེག་པ་ཆེན་པོའི་མདོ་སྡེ་ལ་ཤིན་དུ་མོས་

47-1-239b

པ་དང་། ཐེག་པ་ཆེན་པོའི་མདོ་སྡེ་ལ་ཤིན་དུ་དགའ་བ་དང་། ཐེག་པ་ཆེན་པོའི་མདོ་སྡེ་འདོད་པ་དང་། ཐེག་པ་ཆེན་པོའི་མདོ་སྡེའི་རོ་ལ་དགའ་བ་དང་། ཐེག་པ་ཆེན་པོ་ལ་ཤིན་དུ་དད་པ་དང་། སྟི་སྟང་དང་། བཀུར་སྟི་དང་། 
མཆོད་པ་བྱེད་པ་ལེགས་སོ། །རིགས་ཀྱི་བུ་ཁྱོད་ཀྱིས་འདི་ལྟར་ཤིན་དུ་དགེ་བའི་སེམས་འདིའི་རྒྱུ་དང་འདིའི་རྐྱེན་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་མཐའ་ཡས་པ་གང་གཱ་ཀླུང་གི་
བྱེ་མ་སྙེད་ལས་ཤིན་དུ་འཕགས་ཏེ། དེ་དག་པས་སྔར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །ཁྱོད་ནི་རིང་པོ་མི་ཐོགས་པར་འཁོར་གྱི་དཀྱིལ་འཁོར་མང་པོ་ལ་ཡོངས་སུ་མྱ་ངན་ལས་འདས་
པའི་མདོ་སྡེ་དེ་བཞིན་གཤེགས་པའི་སངས་རྒྱས་ཀྱི་རང་བཞིན་དགོངས་ཏེ་གསུངས་པའི་སྙིང་པོ་སྟོན་ཅིང་འཆད་པར་འགྱུར་རོ། །རིགས་ཀྱི་བུ་སྔོན་འདས་པའི་དུས་སངས་རྒྱས་ཀྱི་ཉི་མ་མ་ཤར་བ་དེའི་ཚེ་དེའི་དུས་ན་ང་བྲམ་ཟེར་
གྱུར་ཏེ། བྱང་ཆུབ་སེམས་དཔའི་སྤྱད་པ་སྤྱོད་པ་ན་མུ་སྟེགས་ཅན་ཐམས་ཅད་ཀྱིས་མུ་སྟེགས་ཅན་གྱི་གཙུག་ལག་ཐམས་ཅད་ཀྱང་ཁོང་དུ་ཆུད་དེ་རབ་ཏུ་ཞི་བར་སྤྱོད་ཅིང་། སྤྱོད་ལམ་དང་ལྡན་པ་སེམས་ཡོངས་སུ་དག་པས་ཕྱི་
རོལ་གྱི་རྐྱེན་གྱིས་འདོད་པའི་འདུ་ཤེས་མི་སྐྱེ་སྟེ། ཞེ་སྡང་གི་མེ་བསད་ནས། རྟག་པ་དང་། བདེ་བ་དང་། བདག་དང་། ཡོངས་སུ་དག་པའི་ཆོས་ཡིད་ལ་བཟུང་སྟེ། ཕྱོགས་ཐམས་ཅད་དུ་ཐེག་པ་ཆེན་པོའི་མདོ་སྡེ་བཙལ་ཀྱང་ཤིན་དུ་
རྒྱས་པའི་མིང་ཙམ་ཡང་མ་ཐོས་སོ། །ང་དེའི་ཚེ་ན་གངས་ཀྱི་རི་ཞིག་ལ་གནས་ཏེ། རི་དེ་ཤིན་དུ་བདེ་ལ། ཆུ་མིག་དང་། འབབ་ཆུ་དང་། ཁྲུས་ཀྱི་རྫིང་བུ་དང་། བསྐྱེད་ཤིང་དང་། ནགས་ཚལ་དང་། རྩི་ཤིང་གིས་ཡོངས་སུ་གང་སྟེ། གནས་དེའི་བར་
བར་ན། བྲག་ལས་ཆུ་མིག་གཙང་མ་འབབ་སྟེ། མེ་ཏོག་བསུང་ཅན་གྱིས་ཡོངས་སུ་བརྒྱན་ལ། བྱ་དང་རི་དགས་ཀྱང་དཔག་ཏུ་མེད་དོ། །དེ་ན་ཤིན་དུ་རོ་དང་ལྡན་པའི་འབྲས་བུའི་ཤིང་རྣམ་པ་ཐ་དད་པ་ཡང་དཔག་ཏུ་མེད་ལ། གཞན་ཡང་པད་མོའི་རྩ་བ་མངར་

47-1-240a

པོ་དང་། ཤིང་སྔོན་པོའི་རྩ་བ་བསུང་ཅན་གྱིས་ཡོངས་སུ་གང་ངོ་། །ང་དེའི་ཚེ་དེའི་དུས་ན་གཅིག་པུ་དེ་ན་གནས་ཏེ། ཤིང་གི་འབྲས་བུ་འབའ་ཤིག་ཟའོ། །ཟོས་ནས་སེམས་རྩེ་གཅིག་ཏུ་ཏིང་ངེ་འཛིན་ཡིད་ལ་བྱེད་དེ། 
ལོ་ཚད་མེད་པའི་བར་དུ་དེ་བཞིན་གཤེགས་པ་འཇིག་རྟེན་དུ་འབྱུང་ངོ་ཞེས་ཀྱང་མ་ཐོས་ལ། ཐེག་པ་ཆེན་པོའི་མདོ་སྡེའི་མིང་ཡང་མ་ཐོས་སོ། །རིགས་ཀྱི་བུ་ངས་དེ་ལྟར་དཀའ་ཐུབ་སྤྱོད་པ་ན་བརྒྱ་བྱིན་ལྷའི་དབང་པོ་དང་། ལྷའི་བུ་
རྣམས་ཤིན་དུ་ངོ་མཚར་དུ་གྱུར་ཏེ། འདུས་ནས་སོ་སོ་ནས་འདི་སྙམ་དུ་འགྱུར་ཏེ། ཚིགས་སུ་བཅད་པ་འདི་སྨྲས་སོ། །གཅིག་ལ་གཅིག་ནི་འདི་སྐད་ཅེས། །རྣམ་དག་གངས་ཀྱི་རི་འདི་ལ། །རབ་ཞི་འདོད་ཆགས་སྤངས་པའི་
བདག །ཡོན་ཏན་རྒྱན་པའི་རྒྱལ་པོའོ། །འདོད་ཆགས་ཞེ་སྡང་ང་རྒྱལ་སྤངས། །གཏི་མུག་གཡོ་སྒྱུ་ཡོངས་སུ་བཅད། །ངག་གི་སྒོ་ནས་མི་སྨྲ་བ། །རྩུབ་ཤིང་བརླང་བའི་ཚིག་རྣམས་སོ། །དེའི་ཚེ་འཁོར་དེའི་ནང་ན་ལྷའི་
སྲས་པོ་རབ་ཏུ་དགའ་བ་ཞེས་བྱ་བ་ཞིག་གིས་ཡང་ཚིགས་སུ་བཅད་དེ་སྨྲས་པ། དེ་ལྟར་འདོད་ཆགས་སྨངས་ནས་སུ། །ཡོངས་དག་བརྩོན་འགྲུས་རབ་བརྩོན་པ། །བརྒྱ་བྱིན་ལྷ་ཡི་ཐབས་འདོད་དམ། །ལྷ་ཡི་གནས་སུ་སྐྱེ་
བར་འདོད། །ཇི་སྟེ་མུ་སྟེགས་ཅན་ཡིན་ན། །ཤིན་དུ་དཀའ་ཐུབ་སྤྱད་པ་འདི། །བརྒྱ་བྱིན་ལྷ་ཡི་དབང་པོ་ཡི། །དབང་དང་ཐབས་དག་ཚོལ་ཕྱིར་རོ། །དེའི་ཚེ་གཞན་ཡང་ལྷའི་སྲས་པོ་དྲང་སྲོང་གཅིག་ཅེས་བྱ་བས། བརྒྱ་
བྱིན་ལ་ཚིགས་སུ་བཅད་དེ་གསོལ་པ། ལྷ་ཡི་དབང་པོ་ཀཽ་ཤི་ཀ །དེ་ལྟར་ཐེ་ཙོམ་བསྐྱེད་མི་རིགས། །མུ་སྟེགས་དཀའ་ཐུབ་སྤྱོད་པ་ཡང་། །བརྒྱ་བྱིན་དབང་པོའི་ཐབས་མི་ཚོལ། །ཚིགས་སུ་བཅད་པ་དེ་སྐད་ཅེས་སྨྲས་
ནས་ཡང་འདི་སྐད་ཅེས་གསོལ་ཏོ། །ཀཽ་ཤི་ཀ་འཇིག་རྟེན་ན་སྐྱེས་བུ་ཆེན་པོ་དག་ནི་སེམས་ཅན་ལ་ཕན་པའི་ཕྱིར་གྱི། བདག་གི་ལུས་ལ་ཆགས་པའི་ཕྱིར་མ་ཡིན། སེམས་ཅན་ལ་ཕན་པ་དང་བདེ་བའི་དོན་གྱི་ཕྱིར་དཀའ་ཐུབ་ཚད་མེད་པ་རྣམས་

47-1-240b

སྣ་ཚོགས་སྤྱོད་དོ། །སྐྱེས་བུ་དེ་ནི་འཁོར་བའི་སྐྱོན་མང་པོ་མཐོང་བས་ཅི་སྟེ་ས་ཆེན་པོ་འདི་དང་རི་དང་རྒྱ་མཚོ་ཆེན་པོར་རིན་པོ་ཆེས་ཡོངས་སུ་གང་བར་མཐོང་ཡང་། མཆིལ་མ་འམ། ངར་སྣབས་ལྟར་ཆགས་པ་མི་སྐྱེད་དོ། །
དེ་ལྟར་སྐྱེས་བུ་ཆེན་པོ་དེ་རིན་པོ་ཆེ་དང་། ལོངས་སྤྱོད་དང་ཆུང་མ་དང་། བུ་དང་། མགོ་དང་། མིག་དང་། ཀླད་པ་དང་། ལག་པ་དང་། རྐང་པ་དང་། ཡན་ལག་དང་། ཉིང་ལག་དང་། གནས་པའི་ཁང་ཁྱིམ་དང་། བ་གླང་དང་། རྟ་དང་། ཐེག་པ་
དང་། བྲན་པོ་དང་། བྲན་མོ་དང་། ལས་བྱེད་པའི་མི་ཡང་ཡོངས་སུ་སྤངས་ཏེ་མཐོ་རིས་ཀྱི་ལྷར་སྐྱེ་བར་མི་སྨོན་ཀྱི། སེམས་ཅན་ཐམས་ཅད་ལ་ཕན་པ་དང་། བདེ་བའི་དོན་འབའ་ཤིག་སྦྱོར་རོ། །བདག་གིས་འཚལ་བ་ལྟར་ན་སྐྱེས་བུ་ཆེན་
པོ་དེ་ནི་ཡོངས་སུ་དག་ཅིང་ཀུན་ནས་ཉོན་མོངས་པ་ཐམས་ཅད་ཡོངས་སུ་བཅད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འབའ་ཤིག་ཚོལ་ལོ། །བརྒྱ་བྱིན་ལྷའི་དབང་པོས་ཡང་འདི་སྐད་ཅེས་སྨྲས་སོ། །ཁྱོད་ཀྱིས་སྨྲས་པ་
ལྟར་དྲང་སྲོང་ཆེན་པོ་དེ་འཇིག་རྟེན་དང་བཅས་པ་ཐམས་ཅད་ཀྱི་སྐྱབས་སུ་འགྱུར་བ་ཡིན་ལ། ཅི་སྟེ་འཇིག་རྟེན་འདི་ན་སངས་རྒྱས་ཀྱི་ཤིང་ཆེན་པོ་བྱུང་ན། འཇིག་རྟེན་དུ་བཅས་པ་ལྷ་དང་། མི་དང་། ལྷ་མ་ཡིན་ལ་
སོགས་པ་ཐམས་ཅད་ཀྱི་ཉོན་མོངས་པའི་སྦྲུལ་གདུག་པ་སེལ་བར་འགྱུར་ཏེ། སེམས་ཅན་དེ་དག་སངས་རྒྱས་ཀྱི་བསྐྱེད་ཤིང་གི་གྲིབ་མ་ལ་འདུག་པས་ཉོན་མོངས་པའི་སྦྲུལ་གདུག་པ་ཐམས་ཅད་རྣམ་པར་སེལ་བར་འགྱུར་
རོ། །དྲང་སྲོང་ཆེན་པོ་དེ་མ་འོངས་པའི་དུས་སུ་བདེ་བར་གཤེགས་པར་གྱུར་ན། ལྟ་བདག་ཅག་ལ་སོགས་པ་ཐམས་ཅད་ཀྱང་ཤིན་དུ་འབར་བའི་ཉོན་མོངས་པ་དཔག་ཏུ་མེད་པ་ཞི་བར་འགྱུར་ཏེ། དེ་ནི་ཤིན་དུ་ཡང་ཡིད་ཆེས་
པར་དཀའོ། །དེ་ཅིའི་ཕྱིར་ཞེ་ན། སེམས་ཅན་ཚད་མེད་པ་བརྒྱ་སྟོང་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་ལ། རྐྱེན་ཅུང་ཟད་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་

47-1-241a

ཕྱིར་ལྡོག་པར་འགྱུར་ཏེ། དཔེར་ན་ཆུའི་ཟླ་བ་ལྟར་ཆུ་འགུལ་ན་ཟླ་བ་ཡང་འགུལ་བ་དང་འདྲའོ། །ཡང་དཔེར་ན་རི་མོ་བྲིས་པའི་སྐུ་གཟུགས་དང་འདྲ་སྟེ། བྱ་བ་ནི་དཀའ་ལ་གཞིག་ནི་སླ་བ་ལྟར་བྱང་ཆུབ་ཀྱི་སེམས་ཀྱང་དེ་
དང་འདྲ་སྟེ་བསྐྱེད་ནི་དཀའ་ལ་བཟློག་ནི་སླའོ། །དྲང་སྲོང་ཆེན་པོ་དཔེར་ན་མི་ཞིག་གོ་མཚོན་དང་ཤིན་དུ་ཆས་ཏེ། གཡུལ་ངོར་ཕྱིན་ནས་དགྲ་དང་ཕྲད་མ་ཐག་ཏུ་འཇིགས་ནས་ཕྱིར་ལྡོག་པ་དང་འདྲ་བར་སེམས་ཅན་ཐམས་ཅད་ཀྱང་
དེ་དང་འདྲ་བར་བྱང་ཆུབ་ཏུ་སེམས་བསྐྱེད་པའི་གོ་མཚོན་གྱིས་ཡོངས་སུ་བརྒྱན་ནས་འཁོར་བའི་སྐྱོན་མཐོང་མ་ཐག་ཏུ་འཇིགས་པ་བསྐྱེད་ནས་ཕྱིར་ལྡོག་པར་འགྱུར་རོ། །དེ་བས་ན་ངས་སྐྱེས་བུ་དེ་ཉོན་མོངས་པ་དང་གདུང་བ་མེད་
པར་དཀའ་བ་སྤྱོད་དེ། སྤྱོད་པ་ཡོངས་སུ་དག་པར་མཐོང་མོད་ཀྱི། འོན་ཀྱང་ཡིད་མི་ཆེས་ཀྱིས་དེའི་གན་དུ་ཉེ་བར་སོང་ལ། སྐྱེས་བུ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཕྲག་པ་ལ་བསྐུར་ནུས་སམ་མི་ནུས་པ་བརྟག་
དགོངས་སོ། །དཔེར་ན་ཤིང་རྟ་ལ་འཕང་ལོ་གཉིས་ཡོད་ན་སྤྱད་དུ་རུང་བ་དང་། བྱ་ལ་འདབ་མ་གཉིས་ཡོད་ན་འཕུར་ནུས་པ་དང་འདྲ་བར་དཀའ་ཐུབ་སྤྱོད་པ་ཡང་དེ་དང་འདྲ་སྟེ། ཤིན་དུ་ཚུལ་ཁྲིམས་སྡོམ་པར་ནི་ངས་ཀྱང་མཐོང་
ན། ཤིན་དུ་ཟབ་པའི་ཡེ་ཤེས་ཡོད་དམ་མེད་པ་བརྟག་དགོས་སོ། །ཅི་སྟེ་ཤིན་དུ་ཟབ་མོའི་ཡེ་ཤེས་ཡོད་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཁུར་ལྕི་བ་ཕྲག་པ་ལ་ཁྱེར་ནུས་སོ། །དྲང་སྲོང་དཔེར་ན་ཉ་མོ་ལྟ་བུ་
མངལ་ན་ཕྲུ་གུ་ནི་རབ་ཏུ་མང་མོད་ཀྱི། ཕྲུ་གུར་འགྱུར་བ་ནི་ཉུང་ངོ་། །དཔེར་ན་ཤིང་ཨ་མྲ་ཡང་མེ་ཏོག་ནི་ཤིན་དུ་མང་ཡང་འབྲས་བུར་འགྱུར་བ་ནི་ཉུང་ངོ་། །སེམས་ཅན་བྱང་ཆུབ་ཏུ་སེམས་བསྐྱེད་པ་ཡང་ཚད་མེད་མོད་ཀྱི། ཐ་མར་འབྲས་བུར་
འགྱུར་བ་ནི་ཤིན་དུ་ཉུང་ངོ་། །དྲང་སྲོང་ཆེན་པོ་བདག་ཅག་འགྲོགས་ཏེ་སྐྱེས་བུ་དེ་གང་ན་བར་རྟོག་དུ་འདོང་ངོ་། །དྲང་སྲོང་དཔེར་ན་གསེར་ཡང་དག་པར་ཡང་རྣམ་པ་གསུམ་གྱི་སྒོ་ནས་བརྟགས་ན་ཡང་དག་པ་ཡིན་ནམ་མ་ཡིན་པ་རྟོགས་སོ། །འདི་ལྟ་སྟེ། བསྲེག་

47-1-241b

པ་དང་། བརྡུང་བ་དང་། བདར་བའི་སྒོ་ནས་བརྟག་པའོ། །དཀའ་ཐུབ་སྤྱོད་པ་ཡང་དེ་དང་འདྲའོ་ཞེས་སྨྲས་ནས། དེའི་ཚེ་བརྒྱ་བྱིན་ལྷའི་དབང་པོ་བདག་གི་ལུས་སྲིན་པོའི་ལུས་ཤིན་དུ་འཇིགས་སུ་རུང་བ་ཞིག་ཏུ་སྤྲུལ་ནས་
གངས་ཀྱི་རི་ལ་བབས་ཏེ། ཧ་ཅང་ཡང་མི་རིང་བ་ན་འདུག་ནས། དེའི་ཚེ་སྲིན་པོ་དེ་ཡང་མི་འཇིགས་པའི་སེམས་དང་། ཤིན་དུ་སྤོབས་པའི་སྐད་གསང་བས་འདས་པའི་སངས་རྒྱས་རྣམས་ཀྱིས་གསུངས་པ་ཚིགས་སུ་བཅད་པ་ཕྱེད་པོ་འདི་
སྨྲས་སོ། །ཀྱེ་མའོ་འདུ་བྱེད་རྟག་པ་མེད། །སྐྱེ་ཞིང་འགོག་པའི་ཆོས་ཅན་ཡིན། །ཚིགས་སུ་བཅད་པ་ཕྱེད་པ་འདི་སྨྲས་ནས། དེའི་དྲུང་དུ་འདུག་སྟེ། ཤིན་དུ་འཇིགས་སུ་རུང་བའི་གཟུགས་མངོན་པར་བསྟན་ནས། མིག་བགྲད་
དེ་ཕྱོགས་བཞི་ཀུན་དུ་བལྟས་སོ། །དེའི་ཚེ་དཀའ་ཐུབ་སྤྱོད་པ་དེས་ཚིགས་སུ་བཅད་པ་ཕྱེད་པོ་འདི་ཐོས་ནས་རབ་ཏུ་དགའ་བའི་སེམས་སྐྱེས་པ་ནི་དཔེར་ན་ཚོང་པ་ཤིན་དུ་ཉམ་ང་བའི་གཡང་སར་མཚན་མོ་སོང་སོང་བ་ལས་གྲོགས་སྟོར་
ནས་ཤིན་དུ་འཇིགས་ཏེ་གྲོགས་ཚོལ་བ་ལས་གྲོགས་དང་ཕྲད་པ་ཙམ་དུ་ཤིན་དུ་དགའ་མགུ་རངས་པ་ཚད་མེད་པ་སྐྱེས་སོ། །གཞན་ཡང་དཔེར་ན་ནད་ཡུན་རིང་པོས་བཏབ་པ་ཞིག་སྨན་པ་མཁས་པ་དང་ཕྲད་དེ་སྨན་བཟང་པོས་གསོས་
པ་ཙམ་འམ། དཔེར་ན་རྒྱ་མཚོར་ལྟུང་བ་ལས་གཟིངས་དང་ཕྲད་པ་ཙམ་འམ། ཤིན་དུ་སྐོམ་གྱིས་གདུངས་པ་ཞིག་ཆུ་གྲང་མོ་དང་ཕྲད་པ་འམ། དགྲས་བདས་པ་ལས་ཤོར་བ་ཙམ་འམ། ཡུན་རིང་པོར་བཙོན་དུ་བཟུང་བ་ལས་ཐར་བ་
ཙམ་འམ། ཞིང་པ་ཐན་ཆེན་བྱུང་བ་ལས་ཆར་པ་བབ་པ་ཙམ་འམ། འདྲོན་པོ་ལམ་རིང་པོར་འདྲོན་དུ་སོང་བ་ཕྱིར་འཁོར་བ་ཙམ་དུ་ཐོས་ནས་ཤིན་དུ་དགའ་བ་ཆེན་པོ་སྐྱེས་སོ། །རིགས་ཀྱི་བུ་དེའི་ཚིགས་སུ་བཅད་པ་ཕྱེད་པོ་དེ་ཐོས་ནས་ཤིན་
དུ་དགའ་བ་ཡང་དེ་དང་འདྲ་སྟེ། འདུག་པ་ལས་ལངས་ནས་ལག་པས་སྐྲ་བཏེག་ཏེ། ཕྱོགས་བཞིར་བལྟས་ནས་འདི་སྐད་ཅེས་སྨྲས་སོ། །དེ་ཅི་ཚིགས་སུ་བཅད་པ་སྨྲས་པ་འདི་སུ་ཡིན་ཞེས་བལྟས་ན། གཞན་ནི་མི་སྣང་གི་སྲིན་པོ་འབའ་ཤིག་མཐོང་ནས་ཡང་

47-1-242a

འདི་སྐད་ཅེས་སྨྲས་སོ། །འདི་ལྟར་རྣམ་པར་གྲོལ་བའི་སྒོ་འབྱེད་པ་འདི་སུ་ཡིན། སངས་རྒྱས་རྣམས་ཀྱི་གསུང་དབྱངས་ཀྱི་འབྲུག་སྒྲ་སྒྲོགས་པ་འདི་སུ་ཡིན། འཁོར་བའི་གཉིད་ཀྱིས་ཤིན་དུ་ལོག་པ་འདི་ལས་སད་པར་
བྱེད་པ་འདི་སུ་ཡིན་ཞེས་སྨྲས་སོ། །ཡང་འདི་སྐད་དུ་འཁོར་བ་ན་ཤིན་དུ་མུ་གེས་གདུངས་པའི་སེམས་ཅན་རྣམས་ལ་བླ་ན་མེད་པའི་བྱང་ཆུབ་ཀྱི་རོ་སྟོན་པ་འདི་སུ་ཡིན། སེམས་ཅན་ཚད་མེད་པ་འཁོར་བའི་རྒྱ་མཚོར་བྱིང་བ་ལས་
གྲུ་ཆེན་པོས་འདྲེན་པ་འདི་སུ་ཡིན། སེམས་ཅན་མང་པོ་ཉོན་མོངས་པའི་ནད་ཀྱིས་ཤིན་དུ་གཟེར་བ་ལས་ནད་གསོ་བའི་སྨན་པར་གྱུར་པ་འདི་སུ་ཡིན། ཚིགས་སུ་བཅད་པ་ཕྱེད་པོ་འདི་སྨྲས་པས་བདག་གི་སེམས་བསྐུལ་ཏེ། 
ཇི་ལྟར་ཟླ་བ་ཕྱེད་པོས་པད་མོ་བགས་ཀྱིས་ཕྱེ་བ་ལྟར་གྱུར་ཏོ་ཞེས་སྨྲས་སོ། །རིགས་ཀྱི་བུ་ང་དེའི་ཚེ་དེའི་དུས་ན་གཞན་ཅི་ཡང་མ་མཐོང་གི། སྲིན་པོ་འབའ་ཤིག་མཐོང་བས་ཡང་འདི་སྙམ་དུ་ཚིགས་སུ་བཅད་པ་ཕྱེད་པོ་
འདི་སྲིན་པོས་མ་སྨྲས་སྙམ་སེམས་པར་གྱུར་ཏོ། །ཡང་འདི་སྙམ་དུ་སེམས་ཏེ། འདིས་སྨྲས་པ་ནི་མ་ཡིན་པ་སྙམ། དེ་ཅིའི་ཕྱིར་ཞེ་ན། འདི་ལྟར་བྱད་གཟུགས་ཤིན་དུ་མི་སྡུག་ལ་འཇིགས་སུ་རུང་བ་ནི་འདི་ལྟ་
བུར་མི་འགྱུར་བའི་ཕྱིར་རོ། །གང་གིས་ཚིགས་སུ་བཅད་པ་འདི་ཐོས་ནས་འཇིགས་སུ་རུང་བའི་མི་སྡུག་པ་ཐམས་ཅད་དང་བྲལ་བ་རིགས་ཏེ། ཅིའི་ཕྱིར་ན་འདི་ལྟ་བུ་བྱད་གཟུགས་ཅན་གྱིས་འདི་སྐད་དུ་ཚིགས་སུ་བཅད་པ་སྨྲས་
པར་གྱུར། དེ་ནི་མེའི་ནང་ནས་པད་མོ་སྐྱེ་མི་སྲིད་ལ། ཉི་མས་གདུངས་པའི་འོད་ལས་ཆུ་གྲང་མོ་འབྱུང་མི་སྲིད་སྙམ་སེམས་པར་གྱུར་ཏེ། རིགས་ཀྱི་བུ་ང་ཡང་དེའི་ཚེ་ན་འདི་སྙམ་དུ་བདག་ནི་ཤིན་དུ་ཤེས་པ་མེད་པ་སྟེ་
གལ་ཏེ་ན་སྲིན་པོ་འདི་སྔོན་འདས་པའི་སངས་རྒྱས་དང་ཕྲད་དེ། སངས་རྒྱས་ལ་ཚིགས་སུ་བཅད་པ་ཕྱེད་པོ་འདི་ཐོས་སམ་སུས་ཤེས། ཚིགས་སུ་བཅད་པ་ཕྱེད་པོའི་དོན་འདི་དྲི་བར་བྱའོ་སྙམ་དུ་བསམས་ནས་སྲིན་པོ་དེ་

47-1-242b

ལ་བསྙེན་ཏེ་འདི་སྐད་ཅེས་སྨྲས་སོ། །ལེགས་སོ། །སྐྱེས་བུ་ཆེན་པོ་ཁྱོད་སྔོན་འདས་པའི་འཇིགས་པ་དང་བྲལ་བས་གསུངས་པའི་ཚིགས་སུ་བཅད་པ་ཕྱེད་པོ་འདི་སུ་ལས་ཐོས། སྐྱེས་བུ་ཆེན་པོ་ཡིད་བཞིན་གྱི་ནོར་
བུ་རིན་པོ་ཆེ་ཕྱེད་པོ་འདི་ག་ལས་རྙེད། སྒྱེས་བུ་ཆེན་པོ་ཚིགས་སུ་བཅད་པ་ཕྱེད་པོ་འདིའི་དོན་འདི་ནི་འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཡང་དག་པའི་ལམ་ཡིན་ཏེ། 
འཇིག་རྟེན་ན་གནས་པའི་སེམས་ཅན་ཚད་མེད་པ་ནི་རྟག་ཏུ་ལྟ་བའི་དྲ་བས་ཀུན་དུ་གླགས་པས་ན་ནམ་དུ་ཡང་མུ་སྟེགས་ཅན་གྱི་ཆོས་ལས་འཇིག་རྟེན་ལས་འདས་པ་སྟོབས་བཅུ་དང་ལྡན་པ་ཤིན་དུ་དཔའ་བས་གསུངས་པའི་སྟོང་པ་
ཉིད་ཀྱི་དོན་འདི་མི་ཐོས་སོ། །རིགས་ཀྱི་བུ་ངས་དེ་ལ་དེ་སྐད་ཅེས་དྲིས་པ་དང་། ཕྱིར་ང་ལ་འདི་སྐད་ཅེས་སྨྲས་སོ། །བྲམ་ཟེ་ཆེན་པོ་ཁྱོད་ང་ལ་འདི་སྐད་ཅེས་མ་འདྲི་ཤིག །དེ་ཅིའི་ཕྱིར་ཞེ་ན། ཁོ་བོ་ཟས་མ་རྙེད་ནས་ཞག་མང་དུ་ལོན་
ཏེ་གནས་ཀུན་དུ་བཙལ་ཀྱང་མ་རྙེད་པས། བཀྲེས་པ་དང་སྐོམ་པས་ཡོངས་སུ་གདུངས་ཏེ་སྔར་སྨྲས་པ་ཡང་མྱོས་བཞིན་དུ་སྨྲས་པར་ཟད་ཀྱི། དྲན་བཞིན་ནམ་ཤེས་བཞིན་དུ་སྨྲས་པ་མ་ཡིན་ཏེ། གལ་ཏེ་བདག་གི་མཐུ་སྟོབས་
ཀྱིས་ནམ་མཁའ་ལ་འཕུར་ཏེ་བྱང་གི་སྒྲ་མི་སྙན་དུ་ཕྱིན་ནས་ལྷའི་གནས་ཀྱི་བར་དུ་ཕྱིན་ཀྱང་བདག་གི་ཟས་མ་རྙེད་པས་དེ་སྐད་ཅེས་སྨྲས་པ་ཡིན་ནོ། །རིགས་ཀྱི་བུ་ངས་དུས་དེའི་ཚེ་ན་སྲིན་པོ་ལ་འདི་སྐད་ཅེས་སྨྲས་སོ། །
སྐྱེས་བུ་ཆེན་པོ་གལ་ཏེ་ཁྱོད་ཀྱིས་ང་ལ་ཚིགས་སུ་བཅད་པ་འདི་རྫོགས་པར་སྨྲས་ན། བདག་ཆེད་དུ་ཁྱོད་ཀྱི་སློབ་མར་དམ་འཆའོ། །སྐྱེས་བུ་ཆེན་པོ་ཁྱོད་ཀྱིས་སྨྲས་པ་འདི་ནི་ཚིག་ཀྱང་མ་རྫོགས། དོན་ཡང་མ་རྫོགས་
ན་ཁྱོད་ཅིའི་ཕྱིར་རྫོགས་པར་མི་སྨྲ། ཟང་ཟིང་གི་སྦྱིན་པ་ནི་རྫོགས་པའི་མཐའ་ཡོད་ཀྱི། ཆོས་ཀྱི་སྦྱིན་པ་ནི་རྫོགས་པའི་མཐའ་མེད་དོ། །རྫོགས་པའི་མཐའ་མེད་མོད་ཀྱི། ཕན་པ་དང་བདེ་བའི་དོན་དུ་ཆེའོ། །

47-1-243a

བདག་གིས་ཚིགས་སུ་བཅད་པ་ཕྱེད་པོ་འདི་ཐོས་ནས་ངོ་མཚར་དུ་ཐེ་ཙོམ་དུ་གྱུར་ཀྱིས་ཚིགས་སུ་བཅད་པ་འདི་རྫོགས་པར་སྨྲས་ཏེ། བདག་གི་ཐེ་ཙོམ་བཅད་ན་ཚེ་གཅིག་ཏུ་ཁྱོད་ཀྱི་སློབ་མ་བྱའོ་ཞེས་སྨྲས་སོ། །
སྲིན་པོས་སྨྲས་པ། ཁྱོད་ཀྱི་ཤེས་པ་ནི་ལྷག་ཆེས་པས་ཁྱོད་བདག་གི་དོན་ནི་ཆེར་འཛིན་གྱི། ཁོ་བོའི་བསམ་པ་ནི་མི་སེམས་པ་ལྟེ། ཁོ་བོ་ནི་ཤིན་དུ་བཀྲེས་པས་གདུངས་ནས་སྨྲ་མི་ཕོད་དོ། །ངས་ཡང་དེ་ལ་འདི་སྐད་ཅེས་
སྨྲས་སོ། །ཁྱོད་ཟས་སུ་ཅི་ཞིག་ཟ་ཞེས་དྲིས་ན། སྲིན་པོ་དེས་སྨྲས་པ། ཁྱོད་ང་ལ་མ་འདྲི་ཤིག །ཅི་སྟེ་ངས་སྨྲས་ན་མི་མང་པོ་དག་ཤིན་དུ་སྐྲག་པར་འགྱུར་རོ། །ངས་ཡང་དེ་ལ་འདི་སྐད་ཅེས་དྲིས་སོ། །ཡུལ་སྟོང་པ་
འདིར་མི་སུ་ཡང་མེད་ལ་ང་ནི་ཁྱོད་ལ་མི་འཇིགས་ན། ཅིའི་ཕྱིར་མི་སྨྲ། སྲིན་པོ་དེས་ཡང་སྨྲས་པ། ཁོ་བོ་ཟས་སུ་ནི་མི་ཤ་རྗེན་པ་དང་། ཁྲག་དྲོན་པོ་འཐུང་སྟེ། ཁོ་བོ་ནི་བསོད་ནམས་ཆུངས་པས་ཟས་སུ་འདི་ལྟ་བུ་ཟ་
ཡང་གནས་ཐམས་ཅད་དུ་མ་རྙེད་དོ། །འཇིག་རྟེན་ན་མི་དག་ཤིན་དུ་མང་མོད་ཀྱི། ཐམས་ཅད་བསོད་ནམས་དང་ལྡན་པ་ཤ་སྟག་ལ། ལྷས་ཀྱང་བསྲུངས་པས་ན་བདག་ནི་དེ་དག་གསོད་ཅིང་ཟ་བའི་མཐུ་མེད་དོ་ཞེས་སྨྲས་སོ། །
རིགས་ཀྱི་བུ་ངས་དེ་ལ་འདི་སྐད་ཅེས་སྨྲས་སོ། །ཁྱོད་ཚིགས་སུ་བཅད་པ་འདི་དོན་དང་བཅས་སུ་རྫོགས་པར་སྨྲོས་ཤིག་དང་ངའི་ལུས་འདི་ཁྱོད་ལ་ཡོངས་སུ་གཏང་བར་བྱའོ། །སྐྱེས་བུ་ཆེན་པོ་ཅི་སྟེ་ཁོ་བོའི་ལུས་འདི་ཤིན་དུ་ཡང་
ཇིར་ཡང་དགོས་པ་བྱེད་ཀྱི། སྟག་དང་། སྤྱང་གི་དང་། འཕར་བ་དང་། བྱ་རྒོད་དང་། བྱན་ལག་དང་། ཁྭ་ལ་སོགས་པས་ཟ་བར་འགྱུར་ཏེ། སྤུ་ཉག་མ་གཅིག་ཙམ་གྱི་བསོད་ནམས་ཀྱང་སྐྱེ་བར་མི་འགྱུར་གྱི། བདག་ནི་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ཚོལ་བའི་ཕྱིར་སྙིང་པོ་མེད་པའི་ལུས་འདིས་སྙིང་པོ་དང་བཅས་པའི་ལུས་སུ་གྱུར་ཅིག་ཅེས་སྨྲས་སོ། །སྲིན་པོ་དེས་ཡང་འདི་སྐད་ཅེས་སྨྲས་སོ། །ཁྱོད་འདི་སྐད་དུ་སྨྲ་བ་འདི་ཡི་གེ་འབྲུ་

47-1-243b

བརྒྱད་པོའི་ཕྱིར་ལུས་ཡོངས་སུ་གཏང་ངོ་། །ཞེས་སྨྲ་བ་འདི་སུ་དག་གིས་ཡིད་ཆེས་པར་འགྱུར། རིགས་ཀྱི་བུ་ང་དེའི་ཚེ་ན་དེ་ལ་ཡང་འདི་སྐད་ཅེས་སྨྲས་སོ། །ཁྱོད་ནི་ཡང་དག་པར་ཤེས་པ་མེད་པ་སྟེ། དཔེར་ན་མི་ཞིག་ཁམ་
པོར་ཐོགས་ཏེ། རིན་པོ་ཆེ་སྣ་བདུན་གྱི་སྣོད་དང་བརྗེས་པ་དང་འདྲ་བར་བདག་ཀྱང་སྙིང་པོ་མེད་པའི་ལུས་འདིས་རྡོ་རྗེ་ལྟ་བུའི་ལུས་ཐོབ་པར་འགྱུར་ན། འདི་སྐད་ཅེས་སྨྲས་པ་འདི་ལ་སུས་ཡིད་ཆེས་པར་འགྱུར་ཞེས་བྱ་བ་ནི་ཁོ་བོའི་
དཔང་དུ་ཚངས་པ་ཆེན་པོའི་རྒྱལ་པོ་དང་། བརྒྱ་བྱིན་ལྷའི་དབང་ཕྱུག་དང་། རྒྱལ་ཆེན་བཞིའི་རྒྱལ་པོ་ལ་སོགས་པ་དཔང་དུ་ཡོད་དོ། །དེ་མ་ཡིན་པ་གཞན་ཡང་བྱང་ཆུབ་སེམས་དཔའ་འཕྲུལ་གྱི་མིག་ཅན་སེམས་ཅན་ཚད་མེད་
ལ་ཕན་པ་དང་། བདེ་བའི་དོན་གྱི་ཕྱིར་ཐེག་པ་ཆེན་པོ་ལ་ནན་ཏན་བྱེད་ཅིང་ཕ་རོལ་དུ་ཕྱིན་པ་དྲུག་དང་ལྡན་པ་ཡང་དཔང་དུ་འགྱུར་རོ། །དེ་མ་ཡིན་པ་གཞན་ཡང་ཕྱོགས་བཅུའི་འཇིག་རྟེན་གྱི་ཁམས་ན་ད་ལྟར་བཞུགས་པའི་སངས་
རྒྱས་བཅོམ་ལྡན་འདས་ད་ལྟར་སེམས་ཅན་གྱི་དོན་དུ་འཚོ་ཞིང་སྐྱོང་བ་རྣམས་ཀྱང་བདག་གི་དཔང་དུ་འགྱུར་ཏེ། བདག་ནི་ཡི་གེ་འབྲུ་བརྒྱད་པོའི་ཕྱིར་ལུས་འདི་ཡོངས་སུ་གཏོང་ངོ་། །སྲིན་པོས་ཡང་སྨྲས་པ། 
ཅི་སྟེ་ཁྱོད་དེ་ལྟར་ལུས་ཡང་དག་པར་གཏོང་གཕོད་ན་ཤིན་དུ་ལེགས་པར་ཉོན་ཅིག །ཚིགས་སུ་བཅད་པ་འདི་ཡང་བསྟན་པར་བྱའོ། །རིགས་ཀྱི་བུ་ངས་དེའི་ཚེ་དེ་སྐད་ཅེས་ཐོས་ནས་སེམས་རབ་ཏུ་དགའ་བ་སྐྱེས་
ཏེ། ལུས་ལ་གྱོན་པའི་ཤ་པགས་ཀྱི་གོས་ཕུད་ནས་སྲིན་པོའི་སྟན་དུ་བཏིང་སྟེ། སློབ་དཔོན་གདན་ལ་བཞུགས་སུ་གསོལ་ཞེས་སྨྲས་ནས། ཐལ་མོ་སྦྱར་ཏེ་པུས་མོ་ས་ལ་གཙུགས་ནས་འདི་སྐད་ཅེས་
སྨྲས་སོ། །སློབ་དཔོན་བདག་ལ་ཚིགས་སུ་བཅད་པ་ཕྱེད་པོ་འདི་བསྟན་དུ་གསོལ་ཞེས་སྨྲས་ནས། དེ་ནས་སྲིན་པོས་ཚིགས་སུ་བཅད་པ་ཕྱེད་སྨྲས་སོ། །སྐྱེས་ནས་འགོག་པར་འགྱུར་བས་ན། །དེ་དག་ཉེ་བར་ཞི་བ་བདེ། །དེའི་

47-1-244a

ཚེ་སྲིན་པོ་དེས་ཚིགས་སུ་བཅད་པ་དེ་སྨྲས་ནས་ཡང་འདི་སྐད་ཅེས་ཟེར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཁྱོད་ཚིགས་སུ་བཅད་པའི་དོན་རྫོགས་པ་ཐོས་ན། ད་ཁྱོད་ཀྱི་སྨོན་ལམ་ཡོངས་སུ་རྫོགས་མོད་ཀྱི། ཅི་སྟེ་ཁྱོད་
ངེས་པར་སེམས་ཅན་ལ་ཕན་པ་དང་བདེ་བའི་དོན་སྤྱོད་པ་ལ་ཡང་དག་པ་ཡིན་ཞེ་ན། ད་ང་ལ་ལུས་སྦྱིན་པའི་དུས་ལ་བབ་བོ་ཞེས་སྨྲས་སོ། །རིགས་ཀྱི་བུ་ང་དེའི་ཚེ་དེའི་དུས་ན་དོན་འདི་ཤིན་དུ་ཡིད་ལ་བྱས་ནས། དེའི་འོག་ཏུ་བྲག་དང་། རྩིག་ངོས་དང་། 
ཤིང་དང་། ལམ་ཀ་ཀུན་དུ་ཚིགས་སུ་བཅད་པ་འདི་བྲིས་ནས། ལུས་ཀྱི་ཤ་མི་སྣང་བར་བྱ་བའི་ཕྱིར་ལུས་ལ་གྱོན་པའི་གོས་བསྡམས་ནས་ཤིང་ཁར་འཛེགས་སོ། །དེའི་ཚེ་ཤིང་དེའི་ལྷས་ང་ལ་འདི་སྐད་ཅེས་དྲིས་སོ། །ལེགས་སོ། །ལེགས་སོ། །
སྐྱེས་བུ་ཆེན་པོ་ཁྱོད་ད་ལྟར་ཅི་བྱེད་སྙམ་དུ་སེམས། རིགས་ཀྱི་བུ་ངས་དེའི་ཚེ་ན་དེ་ལ་འདི་སྐད་ཅེས་སྨྲས་སོ། །ཁོ་བོ་ནི་ལུས་འདི་ཡོངས་སུ་བཏང་སྟེ་ཚིགས་སུ་བཅད་པ་ཐོས་པའི་དྲིན་བསབ་སྙམ་སེམས་སོ། །ཤིང་གི་ལྷ་དེས་སྨྲས་པ། ཚིགས་
སུ་བཅད་པ་དེ་ཐོས་ན་ཕན་པ་དང་། དོན་ཅི་ཞིག་ཡོད་ཅེས་སྨྲས་སོ། །བྱང་ཆུབ་སེམས་དཔའ་དེས་སྨྲས་པ། ཚིགས་སུ་བཅད་པ་འདི་ནི་འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱི་སྟོང་པ་ཉིད་
འབྱེད་པའི་ཆོས་ཡིན་ཏེ། ང་ནི་ཆོས་འདིའི་ཕྱིར་ལུས་ཡོངས་སུ་གཏོང་ངོ་། །རྙེད་པ་དང་། གྲགས་པ་དང་། ལོངས་སྤྱོད་དང་། རིན་པོ་ཆེ་དང་། འཁོར་ལོས་སྒྱུར་བའི་རྒྱལ་པོ་དང་། རྒྱལ་ཆེན་རིས་བཞིའི་རྒྱལ་པོ་དང་། བརྒྱ་བྱིན་ལྷའི་དབང་
ཕྱུག་དང་། ཚངས་པ་ཆེན་པོའི་རྒྱལ་པོ་དང་། ལྷ་དང་མིའི་བདེ་བ་འདོད་པའི་ཕྱིར་མ་ཡིན་གྱི། སེམས་ཅན་ཐམས་ཅད་ལ་ཕན་པ་དང་། བདེ་བའི་དོན་གྱི་ཕྱིར་ལུས་འདི་ཡོངས་སུ་གཏོང་ངོ་། །རིགས་ཀྱི་བུ་ངའི་
ལུས་འདི་ཡོངས་སུ་གཏོང་བའི་ཚེ་ཡང་འདི་སྐད་ཅེས་སྨྲས་སོ། །ཇི་ཙམ་དུ་སེར་སྣ་ལ་གནས་པའི་སེམས་ཅན་དག་བདག་གིས་ལུས་ཡོངས་སུ་བཏང་བ་འདི་མཐོང་ན་སྦྱིན་པ་ལ་གནས་པར་འགྱུར་བ་དང་། གང་སྦྱིན་པ་ལ་ཞེན་པ་ང་

47-1-244b

རྒྱལ་གྱིས་མངོན་པར་ཟིན་པ་དག་ཀྱང་བདག་གིས་འདི་ལྟར་ལུས་ཡོངས་སུ་བཏང་བ་འདི་མཐོང་བར་ཤོག་ཅེས་སྨོན་ལམ་བཏབ་ནས། ལུས་འདི་མཆིལ་མ་འམ། ས་རྡོ་ལྟར་ཡོངས་སུ་གཏོང་ངོ་། །བྱང་ཆུབ་སེམས་དཔས་དེའི་ཚེ་ན་དེ་
སྐད་ཅེས་སྨྲས་མ་ཐག་ཏུ་ཤིང་ཁ་ནས་མཆོངས་སོ། །དེའི་ཚེ་དེའི་དུས་ན་སྟེང་གི་བར་སྣང་ལས་སྒྲ་སྐད་རྣམ་པ་སྣ་ཚོགས་བྱུང་ནས་སྲིད་པའི་རྩེ་མོ་ལ་ཐུག་གི་བར་དུ་གྲགས་པར་གྱུར་ཏོ། །དེའི་ཚེ་དེའི་དུས་ན་སྲིན་པོ་དེའི་ཕྱིར་བརྒྱ་
བྱིན་གྱི་ལུས་སུ་བསྒྱུར་ནས་བྱང་ཆུབ་སེམས་དཔའ་ས་ལ་མ་ལྟུང་བར་བླངས་ཏེ་བདེ་བར་བཞག་གོ། །དེའི་ཚེ་བརྒྱ་བྱིན་ལྷའི་དབང་ཕྱུག་དང་། ལྷའི་སྲས་པོ་དང་། ཚངས་པ་ཆེན་པོའི་རྒྱལ་པོར་བཅས་ཏེ། བྱང་ཆུབ་སེམས་དཔའི་
རྐང་པ་ལ་སྤྱི་བོས་ཕྱག་འཚལ་ནས་འདི་སྐད་ཅེས་སྨྲས་སོ། །ལེགས་སོ་ལེགས་སོ། །བྱང་ཆུབ་སེམས་དཔའ་ཡང་དག་པ་སྟེ། སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་དུ་འགྱུར་བ། མ་རིག་པའི་མུན་པ་ཆེན་པོར་ཆོས་ཆེན་
པོའི་སྒྲོན་མ་སྣང་བར་བྱེད་པ། བདག་ནི་དེ་བཞིན་གཤེགས་པའི་ཆོས་ཆེན་པོ་བསྲུང་ཞིང་བསྐྱབ་པའི་ཕྱིར་ཁྱོད་ཀྱི་སེམས་འཁྲུགས་ཤིང་གནོད་པ་བྱས་པ་དག་འགྱོད་ཅིང་མཐོལ་ལོ། །ཁྱོད་ནི་མ་འོངས་པའི་དུས་སུ་ངེས་པར་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་ན། བདག་ཅག་ཀྱང་བསྒྲལ་བར་སྨོན་ཏོ། །དེའི་ཚེ་བརྒྱ་བྱིན་ལྷའི་དབང་ཕྱུག་དང་། ལྷའི་སྲས་པོ་རྣམས་བྱང་ཆུབ་སེམས་དཔའ་ལ་ཕྱག་འཚལ་ནས་མི་སྣང་བར་གྱུར་ཏོ། །
རིགས་ཀྱི་བུ་ང་སྔོན་ཚིགས་སུ་བཅད་པ་ཕྱེད་ཀྱི་ཕྱིར་ཡང་ལུས་ཡོངས་སུ་བཏང་སྟེ། དེའི་རྒྱུ་དེའི་རྐྱེན་གྱིས་བསྐལ་པ་བཅུ་གཉིས་ཀྱིས་བྱམས་པ་བས་སྔོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །
རིགས་ཀྱི་བུ་ངས་དེ་ལྟར་ཚད་མེད་པའི་ཡོན་ཏན་ཐོབ་པ་ཡང་དེ་བཞིན་གཤེགས་པའི་ཡང་དག་པའི་ཆོས་ལ་མཆོད་པའི་དབང་གིས་སོ། །རིགས་ཀྱི་བུ་ཁྱོད་ཀྱང་དེ་དང་འདྲ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་

47-1-245a

ཏུ་སེམས་བསྐྱེད་པས་བྱང་ཆུབ་སེམས་དཔའ་ཚད་མེད་མཐའ་ཡས་པ་གང་གཱའི་བྱེ་མ་སྙེད་པས་ཤིན་དུ་འཕགས་ཏེ་ཕུལ་དུ་གྱུར་ཏོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་
ཡོངས་སུ་མྱ་ངན་ལས་འདས་པ་ལ་གནས་པ་ན་འཕགས་པའི་སྤྱད་པ་སྤྱོད་པ་ཞེས་བྱའོ། །འཕགས་པ་ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ་ལས། འཕགས་པའི་སྤྱོད་པ་ཞེས་བྱ་བའི་ལེའུ་སྟེ། དྲུག་བའོ།། །། 
འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་པ། རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཚངས་པར་སྤྱོད་པ་ཞེ་ན། རིགས་ཀྱི་བུ་བྱང་
ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པ་ལ་གནས་པ་དག་ཆོས་རྣམ་པ་འདི་བདུན་གྱིས་ན་ཚངས་པར་སྤྱོད་པ་དང་ལྡན་པར་འགྱུར་རོ། །བདུན་གང་ཞེ་ན། འདི་ལྟ་སྟེ། ཆོས་ཤེས་པ་དང་། 
དོན་ཤེས་པ་དང་། དུས་ཤེས་པ་དང་། ཆོག་ཤེས་པ་དང་། བདག་ཤེས་པ་དང་། འཁོར་ཤེས་པ་དང་། བླ་མ་དང་འོག་མ་ཤེས་པའོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཤེས་པ་
ཞེ་ན། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་མདོ་སྡེ་བཅུ་གཉིས་ཤེས་པ་ཡིན་ཏེ། མདཱོ་སྡེ་དང་། དབྱངས་ཀྱིས་བསྙད་པ་དང་། ལུང་དུ་བསྟན་པ་དང་། ཚིགས་སུ་བཅད་པ་དང་། ཆེད་དུ་བརྗོད་པ་དང་། 
གླེང་གཞི་དང་། རྟོགས་པ་བརྗོད་པ་དང་། དེ་ལྟ་བུ་བྱུང་བ་དང་། སྐྱེས་པའི་རབས་དང་། ཤིན་དུ་རྒྱས་པ་དང་། རྨད་དུ་བྱུང་བའི་ཆོས་དང་། གཏན་ལ་བབ་པར་བསྟན་པ་ཤེས་པའོ། །རིགས་ཀྱི་བུ་མདོའི་སྡེ་ཞེས་
བྱ་བ་ནི་འདི་སྐད་བདག་གིས་ཐོས་པ་ཞེས་སྨོས་པ་ནས། དགའ་ནས་རྗེས་སུ་ཡིད་རང་ངོ་ཞེས་བྱ་བའི་བར་དུ་ནི་མདོ་སྡེ་ཞེས་བྱའོ། །དབྱངས་ཀྱིས་བསྙད་པ་ཞེས་བྱ་བ་ནི་གང་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་

47-1-245b

སྩལ་པ། བདག་ཅག་ཀྱང་ཤིན་དུ་གླེན་ཏེ། ཤེས་པ་མེད་པས་འཕགས་པའི་བདེན་པ་བཞི་ཡང་དག་པ་ཇི་ལྟ་བ་བཞིན་དུ་མི་ཤེས་ཏེ། དེ་བས་ན་འཁོར་བར་ཡོངས་སུ་འཁོར་ཞིང་སྡུག་བསྔལ་གྱི་རྒྱ་མཚོ་ཆེན་པོར་ནུབ་པར་གྱུར་ཏོ། །
བདེན་པ་བཞི་ཡང་གང་ཞེ་ན། སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་མོ། །སྔོན་བཅོམ་ལྡན་འདས་ཀྱིས་དགེ་སློང་རྣམས་ལ་མདོའི་སྡེ་གསུངས་ནས། དེའི་ཚེ་ན་སྐྱེ་བུ་དབང་པོ་རྣོན་པོ་དག་དེའི་འོག་ཏུ་ཆོས་མཉན་
པའི་ཕྱིར། སངས་རྒྱས་ཀྱི་སྤྱན་སྔར་ལྷགས་ཏེ། གཞན་དག་ལ་འདི་སྐད་དུ་བཅོམ་ལྡན་འདས་ཀྱིས་སྔར་ཅི་ཞིག་མཛད་ཅེས་དྲིས་པ་དང་། བཅོམ་ལྡན་འདས་མཁྱེན་བཞིན་དུ་མདོའི་སྡེ་སྔར་གསུངས་པ་ལས། ཡང་ཚིགས་སུ་བཅད་
དེ་འདི་སྐད་དུ་གསུངས་པ་ཡིན་ནོ། །ང་སྔོན་ཁྱོད་དང་འདྲ་བར་ནི། །བདེན་པ་བཞི་པོ་མ་མཐོང་སྟེ། །དེ་བས་འཁོར་བར་ཡོངས་སུ་འཁོར། །སྡུག་བསྔལ་ཆེན་པོའི་རྒྱ་མཚོར་ལྟུང་། །གང་གིས་བདེན་པ་བཞི་རྟོགས་ན། །
འཁོར་བ་ཡོངས་སུ་གཅོད་པར་འགྱུར། །སྐྱེ་བའི་སྲིད་པ་ཀུན་ཟད་ན། །སྲིད་པ་ཐམས་ཅད་ལེན་མི་སྲིད། །ཅེས་བྱ་བ་དག་ནི་དབྱངས་ཀྱིས་བསྙད་པའི་སྡེ་ཞེས་བྱའོ། །ལུང་བསྟན་པའི་སྡེ་ཞེས་བྱ་བ་ནི་མདོ་སྡེ་འམ། འདུལ་བ་
ལས་དེ་བཞིན་གཤེགས་པས་ཁ་ཅིག་ཏུ་ལྷ་དང་མི་རྣམས་ལ་སངས་རྒྱས་སུ་ལུང་སྟོན་པ་སྟེ། མ་ཕམ་པ་ཁྱོད་མ་འོངས་པའི་དུས་སུ་རྒྱལ་པོ་དུང་ཞེས་བྱ་བ་འབྱུང་སྟེ། དེའི་ཚེ་དེའི་དུས་ན་མངོན་པར་འཚང་རྒྱ་སྟེ། མཚན་ཡང་
བྱམས་པ་ཞེས་བྱ་བར་འགྱུར་རོ། །ཞེས་སྨོས་པ་དག་ནི་ལུང་དུ་བསྟན་པའི་སྡེ་ཞེས་བྱའོ། །ཚིགས་སུ་བཅད་པའི་སྡེ་ཞེས་བྱ་བ་ནི་ལྷག་པའི་ཚིགས་སུ་བཅད་པ་ཚིག་བཞི་པོ་འདི་དག་སྨོས་པ་སྟེ། སྡིག་པ་ཐམས་ཅད་
ཡོངས་སུ་སྤང་། །དགེའོ་ཅོག་ནི་རྫོགས་པར་བྱ། །བདག་གི་སེམས་ཀྱང་ཤིན་དུ་གདུལ། །དེ་ནི་སངས་རྒྱས་བསྟན་པའོ། །ཞེས་སྨོས་པ་དེ་དག་ནི་ཚིགས་སུ་བཅད་པའི་སྡེ་ཞེས་བྱའོ། །ཆེད་དུ་བརྗོད་པ་ཞེས་

47-1-246a

བྱ་བ་ནི་བཅོམ་ལྡན་འདས་ཕྱི་དྲོའི་དུས་སུ་ཏིང་ངེ་འཛིན་དུ་ཞུགས་ནས་ལྷ་རྣམས་ལ་རྒྱ་ཆེར་ཆོས་བསྟན་ཏེ། དེའི་ཚེ་དགེ་སློང་དག་སོ་སོ་ནས་འདི་སྙམ་དུ་དེ་བཞིན་གཤེགས་པ་ད་ལྟར་ཅི་ཞིག་མཛད་སྙམ་
བསམས་ནས། དེའི་ནང་པར་དེ་བཞིན་གཤེགས་པ་ཏིང་ངེ་འཛིན་ལས་བཞེངས་ཏེ། སུས་ཀྱང་མ་ཞུས་པར་གཞན་གྱི་བསམ་པ་མཁྱེན་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དགེ་སློང་དག་འདི་ལྟར་ཤེས་པར་
བྱའོ། །ལྷར་སྐྱེས་པ་ཐམས་ཅད་ནི་ཤིན་དུ་ཡང་ཚེ་རིང་ངོ་། །དགེ་སློང་ཁྱེད་ཕ་རོལ་པོ་གཞན་གྱི་ཕྱིར་རྙེད་པ་མི་ཚོལ་བ་ལེགས་སོ། །འདོད་པ་ཉུང་བ་ལེགས་སོ། །ཆོག་ཤེས་པ་འང་ལེགས་སོ། །དུར་ཁྲོད་ན་གནས་
པའང་ལེགས་སོ་ཞེས་སུས་ཀྱང་མ་ཞུས་པར་ཆེད་དུ་གསུངས་པ་དེ་དག་ནི་ཆེད་དུ་བརྗོད་པའི་སྡེ་ཞེས་བྱའོ། །གླེང་གཞི་ཞེས་བྱ་བ་ནི་མདོ་སྡེ་ལས་ཚིགས་སུ་བཅད་པ་འབྱུང་བ་གླེང་གཞི་ནས་འབྱེད་ཅིང་བསྟན་པ་སྟེ། དེ་ཡང་ཡུལ་མཉན་
དུ་ཡོད་པ་ན་སྐྱེས་བུ་གཅིག་གི་བྱ་རྒྱས་བྱ་བཟུང་ནས་ཚེལ་པོར་བཅུག་སྟེ། ཆུ་དང་འབྲས་བསྙོད་ནས་ཕྱིར་བཏང་ངོ་། །བཅོམ་ལྡན་འདས་ཀྱིས་དེའི་སྔོན་གྱི་རྒྱུ་དང་རྐྱེན་མཁྱེན་པས་དེ་ལས་གླེངས་ཏེ་ཚིགས་སུ་བཅད་པ་འདི་གསུངས་
སོ། །སྡིག་པ་ཕྲ་མོ་ཆུང་ངུ་ལ། །མི་གནོད་སྙམ་དུ་བརྙས་མི་བྱ། །ཆུ་ཡི་ཐིགས་པ་ཟག་པ་ཡང་། །སྣོད་ཆེན་ཡོངས་སུ་གང་བར་འགྱུར། །ཞེས་གསུངས་པ་དག་ནི་གླེང་གཞིའི་སྡེ་ཞེས་བྱའོ། །རྟོགས་པ་བརྗོད་པ་ཞེས་བྱ་
བ་ནི་འདུལ་བ་ལས་དཔེ་བསྟན་པ་རྣམས་ཏེ། དེ་དག་ནི་རྟོགས་པ་བརྗོད་པའི་སྡེ་ཞེས་བྱའོ། །དེ་ལྟ་བུ་བྱུང་བ་ཞེས་བྱ་བ་ནི་བཅོམ་ལྡན་འདས་ཀྱིས་གསུངས་པ་ལས། དགེ་སློང་དག་འདི་ལྟར་རིག་པར་བྱའོ། །ང་འཇིག་རྟེན་དུ་གཤེགས་
ཏེ་གསུངས་པ་རྣམས་ནི་ཁམས་ཀྱི་མདོ་སྡེ་ཞེས་བྱ་བ་དང་། བཅོམ་ལྡན་འདས་བསོད་སྐྱབས་འཇིག་རྟེན་དུ་གཤེགས་ཏེ་གསུངས་པ་ནི་བདུད་རྩི་ལྔ་ཞེས་བྱ་བ་དང་། སངས་རྒྱས་རྣམ་པར་གཟིགས་འཇིག་རྟེན་དུ་གཤེགས་ཏེ་གསུངས་

47-1-246b

པ་ནི་ཆོས་ཀྱི་མེ་ལོང་ཞེས་བྱ་བ་དང་། བཅོམ་ལྡན་འདས་འོད་སྲུང་འཇིག་རྟེན་དུ་གཤེགས་ཏེ་གསུངས་པ་ནི་སྟོང་པ་རྣམ་པར་འབྱེད་པ་ཞེས་བྱ་བ་སྨོས་པ་དེ་དག་ནི་དེ་ལྟ་བུ་བྱུང་བའི་སྡེ་ཞེས་བྱའོ། །སྐྱེས་པའི་རབས་ཤེས་བྱ་བ་ནི་བཅོམ་
ལྡན་འདས་སྔོན་བྱང་ཆུབ་སེམས་དཔའི་སྤྱད་པ་སྤྱོད་ཅིང་དཀའ་བ་མཛད་པ་འདི་དག་ཡིན་ཏེ། དགེ་སློང་རྣམས་ཤེས་པར་གྱིས་ཤིག །ངས་སྔོན་ཤ་བའི་ལུས་བྱས་པ་དང་། དྲེད་མོའི་ལུས་དང་། ཤ་བཀྲའི་ལུས་དང་། རི་བོང་གི་ལུས་དང་། 
རྒྱལ་པོའི་ལུས་དང་། འཁོར་ལོས་སྒྱུར་བའི་རྒྱལ་པོའི་ལུས་དང་། ཀླུ་དང་། ནམ་མཁའ་ལྡིང་གི་ལུས་ལ་སོགས་པ་བྱང་ཆུབ་སེམས་དཔའི་སྤྱད་པ་སྤྱོད་པ་ན་མྱོང་བར་གྱུར་ཏོ་ཞེས་སྨོས་པ་ནི་སྐྱེས་པའི་རབས་ཤེས་བྱའོ། །ཤིན་དུ་རྒྱས་པ་
ཞེས་བྱ་བ་ནི་ཐེག་པ་ཆེན་པོ་ཤིན་དུ་རྒྱས་པའི་མདོ་སྡེའི་དོན་ཤིན་དུ་རྒྱ་ཆེ་ལ་ཡངས་པ་ནི་ནམ་མཁའ་དང་འདྲ་ཞེས་གསུངས་པ་ནི་ཤིན་དུ་རྒྱས་པའི་མདོ་སྡེ་ཞེས་བྱའོ། །རྨད་དུ་བྱུང་བ་ཞེས་བྱ་བ་ནི་བྱང་ཆུབ་སེམས་དཔའ་ཐོག་
མ་བཙས་མ་ཐག་ཏུ་སུས་ཀྱང་མ་བསྟན་པར་གོམ་པ་བདུན་སོང་བ་དང་། འོད་ཟེར་ཆེན་པོ་བཀྱེ་བ་དང་། ཕྱོགས་བཅུར་བལྟས་པ་དང་། སྤྲེའུ་སྦྲང་རྩིའི་སྣོད་ཐོགས་ཏེ་དེ་བཞིན་གཤེགས་པ་ལ་ཕུལ་བ་དང་། ཁྱི་གོང་དཀར་
སངས་རྒྱས་ལ་ཆོས་ཉན་པ་དང་། བདུད་སྡིག་ཏོ་ཅན་བ་ལང་སྔོན་པོར་སྤྲུལ་ནས། གྱོ་མོའི་ལྷུང་བཟེད་མང་པོ་བཞག་པའི་ནང་དུ་སོང་སྟེ་གཅིག་ལ་གཅིག་རེག་ཅིང་འཁྲོལ་ཡང་མ་ཆག་པ་དང་། སངས་རྒྱས་ཐོག་མ་བཙས་
ནས་ལྷའི་རྟེན་དུ་ཞུགས་པ་ན། ལྷ་རྣམས་ལངས་ཏེ་ཕྱག་འཚལ་བ་ལ་སོགས་པ་དེ་དག་ནི་རྨད་དུ་བྱུང་བའི་སྡེ་ཞེས་བྱའོ། །གཏན་ལ་བབ་པར་བསྟན་པ་ཞེས་བྱ་བ་ནི་སངས་རྒྱས་བཅོམ་ལྡན་འདས་ཀྱིས་མདོ་སྡེ་གསུངས་
པ་ལས། ཇི་ཙམ་དུ་དོན་གཏན་ལ་ཕབ་པར་བྱེ་བྲག་ཕྱེ་སྟེ་མཚན་ཉིད་བསྟན་པ་ནི་གཏན་ལ་དབབ་པར་བསྟན་པའི་སྡེ་ཞེས་བྱའོ། །བྱང་ཆུབ་སེམས་དཔའ་དེ་ལྟར་མདོ་སྡེ་བཅུ་གཉིས་རྟོགས་ཤིང་ཤེས་ན་ཆོས་ཤེས་པ་ཞེས་བྱའོ། །དེ་ལ་

47-1-247a

ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཤེས་པ་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོས་ཡི་གེ་དང་ཚིག་ཏུ་སྨྲ་བ་ཐམས་ཅད་ཀྱི་དོན་རྒྱས་པར་ཤེས་པ་ནི་དོན་ཤེས་པ་ཞེས་བྱའོ། །དེ་ལ་ཇི་
ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དུས་ཤེས་པ་ཞེ་ན། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་དུས་གང་དུ་དུར་ཁྲོད་ན་གནས་པ་དང་། གང་གི་དུས་སུ་བརྩོན་འགྲུས་ཤིན་དུ་རྩོམ་པ་དང་། གང་གི་དུས་
སུ་བཏང་སྙོམས་དང་ཏིང་ངེ་འཛིན་སྒོམ་པ་དང་། གང་གི་དུས་སུ་སངས་རྒྱས་ལ་མཆོད་པ་བྱ་བ་དང་། གང་གི་དུས་སུ་སློབ་དཔོན་ལ་བསྙེན་བཀུར་བྱ་བ་དང་། གང་གི་དུས་སུ་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། 
བསམ་གཏན་དང་། ཤེས་རབ་ལ་ནན་ཏན་བྱ་བའི་དུས་ཤེས་པ་ནི་དུས་ཤེས་པ་ཞེས་བྱའོ། །དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོག་ཤེས་པ་ཞེ་ན། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོག་
ཤེས་པ་ནི་འདི་ལྟ་སྟེ། ཟས་དང་སྐོམ་དང་། ཆོས་གོས་དང་། སྨན་དང་། འགྲོ་བ་དང་། སྡོད་པ་དང་། འདུག་པ་དང་། ཉལ་བ་དང་། གཉིད་ལས་སད་པ་དང་། ཅང་མི་སྨྲ་བ་དག་ནི་ཆོག་ཤེས་པ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་
བྱང་ཆུབ་སེམས་དཔའ་སེམས་དཔའ་ཆེན་པོ་བདག་ཤེས་པ་ཞེ་ན། བྱང་ཆུབ་སེམས་དཔའ་དེ་བདག་ལ་བདག་འདི་ལྟར་ཤེས་ཏེ། བདག་ལ་དད་པ་ནི་འདི་ལྟ་བུ་ཞིག་ཡོད། ཚུལ་ཁྲིམས་ནི་འདི་ལྟ་བུ། མང་དུ་ཐོས་པ་འདི་ལྟ་བུ། 
བཏང་སྙོམས་པ་ནི་འདི་ལྟ་བུ། ཤེས་རབ་ནི་འདི་ལྟ་བུ། འོང་བ་དང་འགྲོ་བ་ནི་འདི་ལྟ་བུ། ཡང་དག་པར་དྲན་པ་ནི་འདི་ལྟ་བུ། དགེ་བ་སྤྱོད་པ་ནི་འདི་ལྟ་བུ། དྲིས་པ་ནི་འདི་ལྟ་བུ། ལན་བཏབ་པ་ནི་འདི་ལྟ་བུའོ་ཞེས་བྱ་བ་ཤེས་
པ་ནི་བདག་ཤེས་པ་ཞེས་བྱའོ། །དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་ཤེས་པ་ཞེ་ན། རིགས་ཀྱི་བུ་བྱང་ཆུབ་སེམས་དཔའ་འདི་ལྟར་འདི་ནི་རྒྱས་རིགས་ཀྱི་འཁོར། འདི་ནི་བྲམ་ཟེའི་རིགས་ཀྱི་འཁོར། འདི་ནི་དགེ་སྦྱོང་

47-1-247b

གི་འཁོར་ཏེ། འཁོར་དེ་དག་ཏུ་འདི་ལྟར་འགྲོ་བར་བྱ། འདི་ལྟར་འདུག་པར་བྱ། འདི་ལྟར་ཆོས་སྨྲ་བར་བྱ། འདི་ལྟར་དྲི་ཞིང་ལན་གླན་པར་བྱ་བ་ཤེས་པ་ནི་འཁོར་ཤེས་པ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་
དཔའ་ཆེན་པོ་བླ་མ་དང་འོག་མ་ཤེས་པ་ཞེ་ན། རིགས་ཀྱི་བུ་དེ་ལ་ཡང་རྣམ་པ་གཉིས་ཏེ། དད་པ་དང་། མ་དད་པའོ། །བྱང་ཆུབ་སེམས་དཔའ་དད་པ་ནི་དགེ་བ་དང་། མ་དད་པ་ནི་མི་དགེ་བར་རིག་པར་བྱའོ། །དད་པ་ལ་ཡང་རྣམ་པ་གཉིས་ཏེ། དགེ་
འདུན་གྱི་གནས་སུ་གནས་པ་དང་། མི་གནས་པའོ། །དེ་ཡང་བྱང་ཆུབ་སེམས་དཔས་གང་དགེ་འདུན་གྱི་གནས་ཁང་ན་གནས་པ་ནི་དགེ་བའོ། །མི་གནས་པ་ནི་མི་དགེ་བའོ། །གནས་པ་ལ་ཡང་རྣམ་པ་གཉིས་ཏེ། ཕྱག་འཚལ་བ་དང་། ཕྱག་
མི་འཚལ་བའོ། །དེ་ཡང་བྱང་ཆུབ་སེམས་དཔས་གང་ཕྱག་འཚལ་བ་ནི་དགེ་བ། ཕྱག་མི་འཚལ་བ་ནི་མི་དགེ་བར་རིག་པར་བྱའོ། །ཕྱག་འཚལ་བ་ལ་ཡང་རྣམ་པ་གཉིས་ཏེ། ཆོས་ཉན་པ་དང་། ཆོས་མི་ཉན་པའོ། །དེ་ཡང་བྱང་ཆུབ་
སེམས་དཔས་གང་ཆོས་ཉན་པ་ནི་དགེ་བ། ཆོས་མི་ཉན་པ་ནི་མི་དགེ་བར་རིག་པར་བྱའོ། །ཆོས་ཉན་པ་ལ་ཡང་རྣམ་པ་གཉིས་ཏེ། སེམས་རྩེ་གཅིག་ཏུ་ཉན་པ་དང་། སེམས་རྩེ་གཅིག་ཏུ་མི་ཉན་པའོ། །དེ་ཡང་བྱང་ཆུབ་
སེམས་དཔས་སེམས་རྩེ་གཅིག་ཏུ་ཉན་པ་དགེ་བ། སེམས་རྩེ་གཅིག་ཏུ་མི་ཉན་པ་ནི་མི་དགེ་བར་རིག་པར་བྱའོ། །སེམས་རྩེ་གཅིག་ཏུ་ཉན་པ་ལ་ཡང་རྣམ་པ་གཉིས་ཏེ། དོན་ཡིད་ལ་བྱེད་པ་དང་། དོན་ཡིད་ལ་མི་
བྱེད་པའོ། །དེ་ཡང་བྱང་ཆུབ་སེམས་དཔས་གང་དོན་ཡིད་ལ་བྱེད་པ་ནི་དགེ་བ། དོན་ཡིད་ལ་མི་བྱེད་པ་ནི་མི་དགེ་བར་རིག་པར་བྱའོ། །དོན་ཡིད་ལ་བྱེད་པ་ལ་ཡང་རྣམ་པ་གཉིས་ཏེ། སྨྲས་པ་བཞིན་དུ་སྤྱོད་པ་དང་། སྨྲས་པ་བཞིན་
དུ་མི་སྤྱོད་པའོ། །དེ་ཡང་སྨྲས་པ་བཞིན་དུ་སྤྱོད་པ་ནི་དགེ་བ། སྨྲས་པ་བཞིན་དུ་མི་སྤྱོད་པ་ནི་མི་དགེ་བར་རིག་པར་བྱའོ། །སྨྲས་པ་བཞིན་དུ་སྤྱོད་པ་ལ་ཡང་རྣམ་པ་གཉིས་ཏེ། ཉན་ཐོས་ཀྱི་ཐེག་པའི་སྒོ་ནས་ཚོལ་ཞིང་སྡུག་བསྔལ་བའི་སེམས་ཅན་ཐམས་ཅད་

47-1-248a

ལ་ཕན་པ་དང་བདེ་བའི་དོན་དུ་མི་སྤྱོད་པ་དང་། བླ་ན་མེད་པའི་བྱང་ཆུབ་ཏུ་བསྔོས་ཏེ། འགྲོ་བ་མང་པོ་ལ་ཕན་པ་དང་བདེ་བའི་དོན་དུ་སྦྱོར་བ་ནི་བྱང་ཆུབ་སེམས་དཔའ་སྟེ། གང་འགྲོ་བ་མང་པོ་ལ་ཕན་པ་དང་བདེ་བའི་དོན་བྱེད་པ་ནི་
མཆོག་དམ་པའོ། །རིགས་ཀྱི་བུ་དཔེར་ན་རིན་པོ་ཆེའི་ནང་ན་ནི་ཡིད་བཞིན་གྱི་ནོར་བུ་རིན་པོ་ཆེ་མཆོག་གོ། །རོ་བྲོ་བའི་ནང་ན་ནི་བདུད་རྩི་མཆོག་གོ། །དེ་བཞིན་དུ་བྱང་ཆུབ་སེམས་དཔའ་ཡང་ལྷ་དང་མིའི་ནང་ན་མཆོག་ཏུ་བྱུང་ཕུལ་དུ་
གྱུར་ཏེ། དཔེར་བྱར་མེད་དོ། །རིགས་ཀྱི་བུ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་ལ་གནས་པ་ན། དགེ་བའི་ཆོས་བདུན་ལ་གནས་པ་ཞེས་བྱ་སྟེ། བྱང་ཆུབ་སེམས་དཔའ་
ཆོས་རྣམ་པ་འདི་བདུན་དང་ལྡན་ན་ཚངས་པར་སྤྱོད་པ་ཞེས་བྱའོ། །རིགས་ཀྱི་བུ་གཞན་ཡང་ཚངས་པར་སྤྱོད་པ་ཞེས་བྱ་བ་ནི་འདི་ལྟ་སྟེ། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་སོ། །བྱང་ཆུབ་སེམས་དཔའ་སེམས་དཔའ་
ཆེན་པོ་འོད་སྲུང་གིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་བྱམས་པ་མང་དུ་བསྒོམས་པས་ཞེ་སྡང་མ་མཆིས་པར་འགྱུར་ཏེ། སྙིང་རྗེའི་སེམས་ཀྱིས་ཀྱང་ཞེ་སྡང་གཅོད་པར་འགྱུར་བས་ན། ཅིའི་སླད་དུ་ཚད་མེད་བཞི་ཞེས་
སྨྲོས། དོན་དང་སྦྱར་ན་གསུམ་དུ་བས་སོ། །བཅོམ་ལྡན་འདས་བྱམས་པ་ལ་དམིགས་པ་རྣམ་པ་གསུམ་སྟེ། སེམས་ཅན་ལ་དམིགས་པ་དང་། ཆོས་ལ་དམིགས་པ་དང་། མི་དམིགས་པའོ། །སྙིང་རྗེ་དང་། དགའ་བ་
དང་། བཏང་སྙོམས་ཀྱང་དེ་དང་འདྲ་སྟེ། དོན་དང་སྦྱར་ན་གསུམ་དུ་བས་ཏེ། བཞིར་ནི་མ་མཆིས་སོ། །སེམས་ཅན་ལ་དམིགས་པ་ནི་ཕུང་པོ་ལྔ་ལ་དམིགས་ནས་བདེ་བར་འདོད་པ་སྟེ། དེ་ནི་སེམས་ཅན་ལ་དམིགས་པ་ཞེས་བགྱིའོ། །
ཆོས་ལ་དམིགས་པ་ནི་སེམས་ཅན་ལ་དམིགས་ནས་ཅི་དགོས་པ་སྦྱིན་པ་སྟེ། དེ་ནི་ཆོས་ལ་དམིགས་པ་ཞེས་བགྱིའོ། །མི་དམིགས་པ་ནི་དེ་བཞིན་གཤེགས་པ་ལ་དམིགས་པ་སྟེ། མི་དམིགས་པ་ཞེས་བགྱིའོ། །བྱམས་པ་ཞེས་བགྱི་བ་ནི་

47-1-248b

དབུལ་ཕོངས་པའི་སེམས་ཅན་ལ་དམིགས་པའོ། །དེ་བཞིན་གཤེགས་པ་སྟོན་པ་ཆེན་པོ་ནི་དབུལ་ཕོངས་པ་དང་ཡོངས་སུ་བྲལ་ཏེ། རབ་ཏུ་བདེ་བ་ལགས་སོ། །ཅི་སྟེ་སེམས་ཅན་ལ་དམིགས་ན་སངས་རྒྱས་ལ་དམིགས་པ་མ་ལགས་ཏེ། 
ཆོས་ཀྱང་དེ་དང་འདྲའོ། །དེ་བས་ན་དེ་བཞིན་གཤེགས་པ་ལ་དམིགས་པ་ནི་མི་དམིགས་པ་ཞེས་བགྱིའོ། །བཅོམ་ལྡན་འདས་བྱམས་པས་དམིགས་པ་ནི་སེམས་ཅན་ཐམས་ཅད་དེ་དཔེར་ན་ཕ་མ་འམ། ཆུང་མ་འམ། བུ་འམ་གཉེན་བཤེས་
ལ་དམིགས་པ་དང་འདྲ་སྟེ། དེ་བས་ན་སེམས་ཅན་ལ་དམིགས་པ་ཞེས་བགྱིའོ། །ཆོས་ལ་དམིགས་པ་ནི་ཕ་མ་དང་། ཆུང་མ་དང་། བུ་དང་། གཉེན་བཤེས་སུ་མི་ལྟ་ཞིང་ཆོས་ཐམས་ཅད་ལ་རྟེན་ཅིང་འབྲེལ་ཏེ། འབྱུང་བར་བལྟ་བ་ནི་ཆོས་ལ་དམིགས་
པ་ཞེས་བགྱིའོ། །མི་དམིགས་པ་ནི་ཆོས་ལ་མཚན་མར་མི་གནས། སེམས་ཅན་ལ་མཚན་མར་མི་གནས་པ་ནི་མི་དམིགས་པ་ཞེས་བགྱི་སྟེ། སྙིང་རྗེ་དང་། དགའ་བ་དང་། བཏང་སྙོམས་ཀྱང་དེ་དང་འདྲའོ། །དེ་བས་ན་གསུམ་དུ་བས་ཀྱི་བཞིར་
ནི་མ་མཆིས་སོ། །བཅོམ་ལྡན་འདས་གང་ཟག་ལ་རྣམ་པ་གཉིས་ཏེ། མཐོང་བས་སྤྱོད་པ་དང་། དགའ་བས་སྤྱོད་པའོ། །མཐོང་བས་སྤྱོད་པ་ནི་བྱམས་པ་དང་། སྙིང་རྗེའི་ཤས་ཆེར་བསྒོམ་མོ། །དགའ་བས་སྤྱོད་པ་ནི་དགའ་བ་དང་བཏང་
སྙོམས་ཀྱི་ཤས་ཆེར་བསྒོམ་སྟེ། དེ་བས་ན་གསུམ་དུ་བས་ཀྱི་གཞིར་ནི་མ་མཆིས་སོ། །བཅོམ་ལྡན་འདས་ཚད་མེད་པ་ཞེས་བགྱི་བ་ནི་མཐའ་ཡས་ལ། མཐའ་དཔག་ཏུ་མ་མཆིས་པའི་སླད་དུ་ཚད་མ་མཆིས་པ་ཞེས་བགྱི་
སྟེ། ཚད་མ་མཆིས་ན་གཅིག་ཏུ་བས་ཀྱི་བཞིར་ནི་མ་མཆིས་སོ། །ཅི་སྟེ་བཞིར་མཆིས་ན་ཚད་མ་མཆིས་པ་ཞེས་བགྱིར་མི་རུང་སྟེ། དེ་བས་ན་གཅིག་ཏུ་བས་ཀྱི་བཞིར་ནི་མ་མཆིས་སོ། །བཅོམ་ལྡན་འདས་ཀྱིས་འོད་སྲུང་
ལ་བཀའ་སྩལ་པ། རིགས་ཀྱི་བུ་སངས་རྒྱས་བཅོམ་ལྡན་འདས་ནི་སོ་སོའི་སྐྱེ་བོ་མང་པོའི་ཕྱིར་ཆོས་གསུངས་པ་ཡང་ཤིན་དུ་དགོངས་ཏེ་གསུངས་པ་ཡིན་པས་རིག་ཅིང་ཤེས་པར་དཀའོ། །སེམས་ཅན་ཁ་ཅིག་ལ་ནི་རྟེན་ཅིང་འབྲེལ་ཏེ་

47-1-249a

འབྱུང་བ་གཅིག་ཏུ་གསུངས་ཏེ། རྟེན་ཅིང་འབྲེལ་ཏེ་འབྱུང་བ་གཅིག་གང་ཞེ་ན། འདི་ལྟ་སྟེ་འདུས་བྱས་ཀྱི་ཆོས་ཐམས་ཅད་དོ། །རིགས་ཀྱི་བུ་ཁ་ཅིག་ལ་ནི་རྣམ་པ་གཉིས་སུ་གསུངས་ཏེ། རྒྱུ་དང་འབྲས་བུའོ། །
ཁ་ཅིག་ལ་ནི་རྣམ་པ་གསུམ་དུ་གསུངས་ཏེ། ཉོན་མོངས་པ་དང་། ལས་དང་། སྡུག་བསྔལ་ལོ། །ཁ་ཅིག་ཏུ་ནི་རྣམ་པ་བཞིར་གསུངས་ཏེ། མ་རིག་པ་དང་། འདུ་བྱེད་དང་། སྐྱེ་བ་དང་། རྒ་ཤིའོ། །ཁ་ཅིག་ཏུ་ནི་རྣམ་པ་ལྔར་གསུངས་
ཏེ། ཚོར་བ་དང་། སྲེད་པ་དང་། ལེན་པ་དང་། སྲིད་པ་དང་། སྐྱེ་བའོ། །ཁ་ཅིག་ཏུ་ནི་རྣམ་པ་དྲུག་ཏུ་གསུངས་ཏེ། དུས་གསུམ་གྱི་རྒྱུ་དང་འབྲས་བུའོ། །སྐབས་ཁ་ཅིག་ཏུ་ནི་རྣམ་པ་བདུན་དུ་གསུངས་ཏེ། རྣམ་པར་ཤེས་པ་དང་། མིང་དང་། གཟུགས་
དང་། སྐྱེ་མཆེད་དྲུག་དང་། རེག་པ་དང་། ཚོར་བ་དང་། སྲིད་པ་དང་། ལེན་པའོ། །ཁ་ཅིག་ཏུ་ནི་རྣམ་པ་བརྒྱད་དུ་གསུངས་ཏེ། མ་རིག་པ་དང་། འདུ་བྱེད་དང་། སྐྱེ་བ་དང་། རྒ་ཤི་མ་གཏོགས་པ་ལྷག་མ་བརྒྱད་པོའོ། །ཁ་ཅིག་ཏུ་ནི་རྣམ་པ་དགུར་གསུངས་
ཏེ། མདོ་སྡེ་གྲོང་ཁྱེར་ཞེས་བྱ་བའི་ནང་ནས་བཤད་པ་དང་འདྲ་བར་མ་རིག་པ་དང་། འདུ་བྱེད་དང་། རྣམ་པར་ཤེས་པ་མ་གཏོགས་པའི་ལྷག་མ་དགུ་པོའོ། །ཁ་ཅིག་ཏུ་ནི་རྣམ་པ་བཅུ་གཅིག་ཏུ་གསུངས་ཏེ། དེ་ཡང་གཅེར་བུ་པ་ཀུན་དུ་སྨྲ་བ་
ཞེས་བྱ་བའི་ཕྱིར་སྐྱེ་བའི་ཆོས་གཅིག་མ་གཏོགས་པར་ལྷག་མ་རྣམ་པ་བཅུ་གཅིག་གོ། །སྐབས་ཁ་ཅིག་ཏུ་ནི་རྟེན་ཅིང་འབྲེལ་ཏེ་འབྱུང་བ་བཅུ་གཉིས་རྫོགས་པར་གསུངས་ཏེ། དེ་ཡང་རྒྱལ་པོའི་ཁབ་ཏུ་འོད་སྲུང་ལ་སོགས་པ་ལས་མ་
རིག་པ་ནས། སྐྱེ་བ་དང་རྒ་ཤིའི་བར་དུ་བཅུ་གཉིས་རྫོགས་པར་གསུངས་པའོ། །རིགས་ཀྱི་བུ་རྟེན་ཅིང་འབྲེལ་བར་འབྱུང་བ་གཅིག་ལ་སོ་སོའི་སྐྱེ་བོའི་ཕྱིར་རྣམ་པ་ཐ་དད་དུ་གསུངས་ཏེ། ཚད་མེད་པའི་སེམས་ཀྱང་དེ་དང་འདྲའོ། །
རིགས་ཀྱི་བུ་དེ་བས་ན་དེ་བཞིན་གཤེགས་པས་དགོངས་པའི་སྤྱོད་ཡུལ་ལ་ཐེ་ཙོམ་མི་བསྐྱེད་དོ། །རིགས་ཀྱི་བུ་སངས་རྒྱས་བཅོམ་ལྡན་འདས་ནི་ཤིན་དུ་ཐབས་མཁས་པ་དང་ལྡན་པས་མི་རྟག་པ་ལ་རྟག་པར་གསུངས། རྟག་པ་ལ་མི་

47-1-249b

རྟག་པར་གསུངས། བདེ་བ་ལ་སྡུག་བསྔལ་བར་ཡང་གསུངས། སྡུག་བསྔལ་བ་ལ་བདེ་བར་ཡང་གསུངས། ཡོངས་སུ་མ་དག་པ་ལ་ཡོངས་སུ་དག་པར་གསུངས། ཡོངས་སུ་དག་པ་ནི་ཡོངས་སུ་མ་དག་པར་གསུངས། བདག་ལ་བདག་
མེད་པར་གསུངས། བདག་མེད་པ་ལ་བདག་ཏུ་གསུངས། སེམས་ཅན་མ་ཡིན་པ་ལ་སེམས་སུ་གསུངས། སེམས་ཅན་ལ་ནི་སེམས་མ་ཡིན་པར་གསུངས། དངོས་པོ་མ་ཡིན་པ་ལ་དངོས་པོར་གསུངས། དངོས་པོ་ལ་ནི་དངོས་པོ་མ་ཡིན་པར་
གསུངས། མི་བདེན་པ་ལ་ནི་བདེན་པར་ཡང་གསུངས། བདེན་པ་ལ་ནི་མི་བདེན་པར་གསུངས། ཡུལ་མ་ཡིན་པ་ལ་ནི་ཡུལ་དུ་གསུངས། ཡུལ་ལ་ནི་ཡུལ་མ་ཡིན་པར་གསུངས། སྐྱེ་བ་མ་ཡིན་པ་ལ་སྐྱེ་བར་གསུངས། སྐྱེ་བ་ནི་སྐྱེ་བ་
མ་ཡིན་པར་གསུངས་པ་ནས། མ་རིག་པ་ལ་ནི་རིག་པར་གསུངས། རིག་པ་ནི་མ་རིག་པར་གསུངས། གཟུགས་ནི་གཟུགས་མ་ཡིན་པར་གསུངས། གཟུགས་མ་ཡིན་པའང་གཟུགས་སུ་གསུངས། ལམ་མ་ཡིན་པ་ནི་ལམ་དུ་
གསུངས། ལམ་ནི་ལམ་མ་ཡིན་པའི་བར་དུ་གསུངས་སོ། །རིགས་ཀྱི་བུ་དེ་བཞིན་གཤེགས་པས་ནི་ཚད་མེད་པའི་ཐབས་མཁས་པས་སེམས་ཅན་གདུལ་བའི་ཕྱིར་བརྫུན་པའི་བག་ག་ལ་ཞིག་གསུངས། རིགས་ཀྱི་བུ་སེམས་ཅན་ལ་ལ་
ཞིག་ལོངས་སྤྱོད་ལ་ཆགས་ན། ངས་དེ་ལ་འཁོར་ལོས་སྒྱུར་བའི་རྒྱལ་པོར་སྤྲུལ་ནས་ལོ་ཚད་མེད་པའི་བར་དུ་ཅི་དང་ཅི་འདོད་པ་རྣམ་པ་སྣ་ཚོགས་བྱིན་ཏེ། དེའི་འོག་ཏུ་གདོད་བླ་ན་མེད་པའི་ཡང་དག་པར་རྫོགས་པའི་བྱང་ཆུབ་ལ་
བཀོད་དོ། །སེམས་ཅན་ལ་ལ་ཅི་སྟེ་འདོད་པ་ལྔ་ལ་ཆགས་ན་ལོ་ཚད་མེད་པའི་བར་དུ་འདོད་པ་རྣམ་པ་ལྔའི་མཆོག་དམ་པ་ལ་ལོངས་སྤྱོད་དུ་བཅུག་ནས། དེའི་འོག་ཏུ་གདོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་དོ། །
གལ་ཏེ་སེམས་ཅན་ལ་ལ་རིགས་སྙེམས་ཤིང་ང་རྒྱལ་ཅན་དུ་གྱུར་ན། ངས་མི་དེའི་གཡོག་ལོ་ཚད་མེད་པའི་བར་དུ་བྱས་ཏེ། ཤིན་དུ་བསྙེན་བཀུར་གྱིས་དེའི་སེམས་མགུ་བར་བྱས་ནས་དེའི་འོག་ཏུ་གདོད་བླ་ན་མེད་པ་ཡང་དག་པར་

47-1-250a

རྫོགས་པའི་བྱང་ཆུབ་ལ་བཀོད་དོ། །སེམས་ཅན་གང་ཞིག་རང་བཞིན་གྱིས་ང་རྒྱལ་ཅན་དུ་གྱུར་ཏེ། གཞན་གྱིས་གྲོས་གདབ་ཅིང་བཅོས་དགོས་ན། ལོ་བརྒྱ་སྟོང་གི་བར་དུ་དེ་ལ་བསྟན་ཅིང་བཅོས་ནས་སེམས་དུལ་
བར་བྱས་ཏེ། གདོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་དོ། །རིགས་ཀྱི་བུ་དེ་བཞིན་གཤེགས་པ་ནི་ལོ་ཚད་མེད་པའི་བར་དུ་ཐབས་རྣམ་པ་སྣ་ཚོགས་ཀྱིས་འགྲོ་བ་མང་པོ་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལ་བཀོད་པ་ཡང་བརྫུན་པ་ཡིན་ནམ། སངས་རྒྱས་བཅོམ་ལྡན་འདས་ནི་མི་དགེ་བ་ལ་གནས་ཀྱང་པད་མོ་ལྟར་ཉེས་པའི་འདམ་རྫབ་ཀྱིས་མི་གོས་སོ། །རིགས་ཀྱི་བུ་ཚད་མེད་པ་བཞིའི་དོན་ཡང་དེ་ལྟར་ཤེས་པར་
བྱའོ། །རིགས་ཀྱི་བུ་ཚད་མེད་པའི་སེམས་ནི་རང་བཞིན་གྱིས་རྣམ་པ་བཞི་སྟེ། གང་ཞིག་གིས་ནན་ཏན་དུ་བྱས་ན་ཚངས་པ་ཆེན་པོའི་གནས་སུ་སྐྱེ་བར་འགྱུར་རོ། །རིགས་ཀྱི་བུ་དེ་ལྟར་ཚད་མེད་པ་རྣམས་ལ་གྲོགས་སུ་འགྱུར་བ་རྣམ་
པ་བཞི་ཡོད་དེ། དེ་བས་ན་བཞི་ཞེས་བྱའོ། །གང་བྱམས་པའི་སེམས་ལ་ནན་ཏན་བྱེད་པ་ནི་འདོད་ཆགས་ཡོངས་སུ་ཆོད་པར་འགྱུར་རོ། །སྙིང་རྗེའི་སེམས་ལ་ནན་ཏན་བྱེད་པ་ནི་ཞེ་སྡང་ཡོངས་སུ་སྤོང་བར་འགྱུར་རོ། །
དགའ་བའི་སེམས་ལ་ནན་ཏན་བྱེད་པ་ནི་མི་བདེ་བ་ཡོངས་སུ་སྤོང་བར་འགྱུར་རོ། །བཏང་སྙོམས་ཀྱི་སེམས་ལ་ནན་ཏན་བྱེད་པ་ནི་འདོད་ཆགས་པ་དང་ཞེ་སྡང་བའི་སེམས་ཡོངས་སུ་སྤོང་བར་འགྱུར་རོ། །རིགས་ཀྱི་བུ་དོན་ད་ལྟ་བས་ན་
རྣམ་པ་བཞི་སྟེ། གཅིག་གམ། གཉིས་སམ། གསུམ་དུ་ནི་མ་ཡིན་ནོ། །རིགས་ཀྱི་བུ་ཁྱོད་སྨྲ་བ་ལྟར་བྱམས་པའི་སེམས་ཀྱིས་ཞེ་སྡང་སྤོང་བ་ལྟར་སྙིང་རྗེའི་སེམས་ཀྱང་དེ་དང་འདྲ་བས་གསུམ་དུ་འོས་སོ་ཞེས་དེ་སྐད་མ་ཟེར་
ཅིག །དེ་ཅིའི་ཕྱིར་ཞེ་ན། རིགས་ཀྱི་བུ་ཞེ་སྡང་ལ་ཡང་རྣམ་པ་གཉིས་ཏེ། སྲོག་དང་བྲལ་བའི་ཞེ་སྡང་དང་། རྡེག་འཚོག་བྱེད་པའི་ཞེ་སྡང་ངོ་། །བྱམས་པ་བསྒོམས་པས་ནི་སྲོག་དང་དབྲལ་བའི་ཞེ་སྡང་སྤོང་བར་འགྱུར་རོ། །སྙིང་རྗེ་བསྒོམས་

47-1-250b

པས་ནི་རྡེག་འཚོག་བྱེད་པའི་ཞེ་སྡང་སྤོང་བར་འགྱུར་རོ། །རིགས་ཀྱི་བུ་དོན་དེ་ལྟ་བས་ན་ཚད་མེད་པ་ནི་བཞིར་འོས་པ་མ་ཡིན་ནམ། གཞན་ཡང་ཞེ་སྡང་ལ་རྣམ་པ་གཉིས་ཏེ། སེམས་ཅན་ལ་ཞེ་སྡང་བ་དང་། སེམས་ཅན་མ་ཡིན་པ་
ལ་ཞེ་སྡང་བའོ། །བྱམས་པ་བསྒོམས་པས་ནི་སེམས་ཅན་ལ་ཞེ་སྡང་བ་སྤོང་བར་འགྱུར་རོ། །སྙིང་རྗེ་བསྒོམས་པས་ནི་སེམས་ཅན་མ་ཡིན་པ་ལ་ཞེ་སྡང་བ་སྤོང་བར་འགྱུར་རོ། །གཞན་ཡང་ཞེ་སྡང་ལ་རྣམ་པ་གཉིས་ཏེ། རྒྱུ་རྐྱེན་
དང་ལྡན་པ་དང་། རྒྱུ་རྐྱེན་དང་མི་ལྡན་པའོ། །བྱམས་པ་བསྒོམས་པས་ནི་རྒྱུ་རྐྱེན་དང་ལྡན་པ་སྤོང་བར་འགྱུར་རོ། །སྙིང་རྗེ་བསྒོམས་པས་ནི་རྒྱུ་རྐྱེན་དང་མི་ལྡན་པ་སྤོང་བར་འགྱུར་རོ། །གཞན་ཡང་ཞེ་སྡང་ལ་རྣམ་པ་གཉིས་ཏེ། སྔོན་འདས་པ་ནས་
གོམས་པ་དང་། ད་ལྟར་གྱི་དུས་ན་གོམས་པའོ། །བྱམས་པ་བསྒོམས་པས་ནི་སྔོན་འདས་པའི་དུས་ཀྱི་གོམས་པ་སྤོང་བར་འགྱུར་རོ། །སྙིང་རྗེ་བསྒོམས་པས་ནི་ད་ལྟར་གྱི་དུས་སུ་གོམས་པ་སྤོང་བར་འགྱུར་རོ། །གཞན་ཡང་ཞེ་སྡང་ལ་རྣམ་པ་གཉིས་
ཏེ། འཕགས་པ་ལ་ཞེ་སྡང་བ་དང་། བུས་པ་མ་རབས་ལ་ཞེ་སྡང་བའོ། །བྱམས་པའི་སེམས་བསྒོམས་པས་ནི་འཕགས་པ་ལ་ཞེ་སྡང་བ་སྤོང་བར་འགྱུར་རོ། །སྙིང་རྗེའི་སེམས་བསྒོམས་པས་ནི་བྱིས་པ་མ་རབས་ལ་ཞེ་སྡང་བ་སྤོང་བར་འགྱུར་རོ། །
གཞན་ཡང་ཞེ་སྡང་ལ་རྣམ་པ་གཉིས་ཏེ། ཞེ་སྡང་རབ་དང་། ཞེ་སྡང་འབྲིང་ངོ་། །བྱམས་པ་བསྒོམས་པས་ནི་ཞེ་སྡང་རབ་སྤོང་བར་འགྱུར་རོ། །སྙིང་རྗེ་སྒོམས་པས་ནི་ཞེ་སྡང་སྤོང་བར་འགྱུར་རོ། །རིགས་ཀྱི་བུ་དོན་དེ་ལྟ་བས་ན་རྣམ་པ་བཞིར་
འོས་ན་གསུམ་དུ་ཟད་ཀྱི་བཞིར་མེད་དོ་ཞེས་བརྒལ་བ་མི་རིགས་སོ། །དེ་བས་ན་འོད་སྲུང་ཚད་མེད་པའི་སེམས་ལ་གྲོགས་དང་གཉེན་པོར་འགྱུར་བ་ནི་རྣམ་པ་བཞིར་ཕྱེ་སྟེ་བསྟན་པ་ཡིན་ནོ། །གཞན་ཡང་སྣོད་ཀྱི་ཕྱིར་ན་རྣམ་པ་བཞིར་འོས་ཏེ། གལ་ཏེ་
སྣོད་གང་ལ་བྱམས་པ་དང་ལྡན་ན་དེ་ལ་སྙིང་རྗེ་དང་། དགའ་བ་དང་། བཏང་སྙོམས་ཡོད་པ་མ་ཡིན་ཏེ། དོན་དེ་ལྟ་བས་ན་རྣམ་པ་བཞི་ལས་དབྲིར་མེད་དོ། །རིགས་ཀྱི་བུ་སྤྱོད་པ་ལས་བྱེ་བྲག་ཏུ་ཡང་རྣམ་པ་བཞིར་འོས་སོ། །གལ་ཏེ་བྱམས་པ་སྤྱོད་པའི་དུས་ན་སྙིང་རྗེ་དང་། 

47-1-251a

དགའ་བ་དང་། བཏང་སྙོམས་མེད་པས་དེ་བས་ན་རྣམ་པ་བཞིར་མངོན་ནོ། །རིགས་ཀྱི་བུ་ཚད་མེད་པའི་ཕྱིར་ཡང་རྣམ་པ་བཞིར་འོས་སོ། །གཞན་ཡང་ཚད་མེད་པ་ནི་རྣམ་པ་བཞི་ཡོད་དོ། །ཚད་མེད་པའི་སེམས་ནི་ཁ་ཅིག་ནི་དམིགས་
པ་ཡོད་ལ་དབང་དུ་འགྱུར་བ་མ་ཡིན་པ་དང་། བྱམས་པའི་སེམས་ཁ་ཅིག་ནི་དབང་དུ་འགྱུར་ལ་དམིགས་པ་མ་ཡིན་པ་དང་། བྱམས་པའི་སེམས་ཁ་ཅིག་ནི་དམིགས་པ་ཡང་ཡོད་ལ་དབང་དུ་ཡང་འགྱུར་བ་དང་། བྱམས་པའི་སེམས་ཁ་
ཅིག་ནི་དམིགས་པ་ཡང་མ་ཡིན་དབང་དུ་འགྱུར་བ་ཡང་མ་ཡིན་པའོ། །དེ་ལ་ཚད་མེད་པའི་སེམས་གང་ནི་དམིགས་པ་ཡོད་ལ་དབང་དུ་འགྱུར་བ་མ་ཡིན་ཞེ་ན། ཁ་ཅིག་སེམས་ཅན་ཚད་མེད་མཐའ་ཡས་པ་ལ་དམིགས་ཀྱང་
ཏིང་ངེ་འཛིན་གྱི་དབང་མ་ཐོབ་བམ། ཅི་སྟེ་ཐོབ་ཀྱང་མ་ངེས་པ་འམ། ཐོབ་ཀྱང་ཕྱིར་ཉམས་པའོ། །ཚད་མེད་པ་གང་ཞིག་དབང་དུ་འགྱུར་ཡང་དམིགས་པ་མ་ཡིན་ཞེ་ན། འདི་ལྟ་སྟེ་དཔེར་ན་ཕ་མ་དང་ཕུ་ནུ་དང་གཉེན་གཤེས་ལ་བདེ་བར་
བྱ་བར་དམིགས་པ་སྟེ། ཚད་མེད་པར་དམིགས་པ་ནི་མ་ཡིན་ནོ། །ཚད་མེད་པ་གང་ཞིག་དམིགས་ཀྱང་དམིགས་ལ། དབང་དུ་ཡང་འགྱུར་བ་ཞེ་ན། དེ་ནི་སངས་རྒྱས་དང་བྱང་ཆུབ་སེམས་དཔའ་རྣམས་སོ། །ཚད་མེད་པ་གང་ཞིག་དམིགས་
པ་ཡང་མ་ཡིན་དབང་དུ་འགྱུར་བ་ཡང་མ་ཡིན་ཞེ་ན། ཉན་ཐོས་དང་། རང་སངས་རྒྱས་ལྟ་བུ་ནི་སེམས་ཅན་ཚད་མེད་པ་ལ་རྒྱ་ཆེར་དམིགས་ཀྱང་མི་ནུས་ལ། དབང་དུ་འགྱུར་བ་ཡང་མ་ཡིན་ནོ། །རིགས་ཀྱི་བུ་དོན་དེ་ལྟ་བས་ན་ཚད་མེད་པ་
ནི་རྣམ་པ་བཞི་སྟེ། ཉན་ཐོས་དང་། རང་སངས་རྒྱས་རྣམས་ཀྱིས་ཤེས་པར་ནུས་པ་མ་ཡིན་གྱི། སངས་རྒྱས་བཅོམ་ལྡན་འདས་ཀྱི་སྤྱོད་ཡུལ་ལོ། །རིགས་ཀྱི་བུ་དེ་ལྟར་དངོས་པོ་རྣམ་པ་བཞི་པོ་འདི་ནི་ཉན་ཐོས་དང་རང་སངས་རྒྱས་
ལ་ཡང་ཚད་མེད་པ་ཞེས་བྱ་མོད་ཀྱི་སྨོས་སུ་མི་ཆོག་གོ། །སངས་རྒྱས་བཅོམ་ལྡན་འདས་རྣམས་ནི་ཚད་མེད་མཐའ་ཡས་པ་ཞེས་བྱའོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། བཅོམ་ལྡན་འདས་དེ་

47-1-251b

དེ་བཞིན་ནོ། །དེ་དེ་བཞིན་ནོ། །བཅོམ་ལྡན་འདས་ཀྱིས་གསུངས་པ་བཞིན་ཏེ། སངས་རྒྱས་བཅོམ་ལྡན་འདས་ཀྱི་སྤྱོད་ཡུལ་ལགས་ཀྱི། ཉན་ཐོས་དང་། རང་སངས་རྒྱས་རྣམས་ཀྱི་བཟོད་པ་མ་ལགས་སོ། །བཅོམ་ལྡན་འདས་བྱང་ཆུབ་
སེམས་དཔའ་གང་ཐེག་པ་ཆེན་པོ་ཡོངས་སུ་མྱ་ངན་ལས་འདས་པ་ལ་གནས་ནས། བྱམས་པ་དང་། སྙིང་རྗེའི་སེམས་སུ་འགྱུར་བ་ལས་བྱམས་པ་ཆེན་པོ་དང་། སྙིང་རྗེ་ཆེན་པོའི་སེམས་མ་ལགས་སོ། །ཞེས་བགྱི་བར་འགྱུར་བ་མཆིས་སམ། 
བཅོམ་ལྡན་འདས་ཀྱིས་བཀའ་སྩལ་པ་ཡོད་དོ། །རིགས་ཀྱི་བུ་བྱང་ཆུབ་སེམས་དཔའ་གང་ཞིག་གལ་ཏེ་སེམས་ཅན་རྣམས་ལ་གཉེན་དང་། དགྲ་སྡང་བ་དང་། བར་མ་རྣམ་པ་གསུམ་དུ་ཕྱེ་སྟེ། གཉེན་ལས་ཀྱང་རབ་དང་འབྲིང་དང་ཐ་
མ་གསུམ་དུ་ཕྱེ་ལ། དགྲ་སྡང་བ་ཡང་དེ་བཞིན་དུ་རྣམ་པར་ཕྱེ་ནས། བྱང་ཆུབ་སེམས་དཔའ་སེམས་དཔའ་ཆེན་པོས་གཉེན་དུ་འགྱུར་བའི་མཆོག་ལ་ནི་བདེ་བའི་མཆོག་སྦྱིན། གཉེན་གྱི་འབྲིང་དང་ཐ་མ་ལ་ནི་སྙོམས་པར་བདེ་བའི་མཆོག་
ཙམ་བྱིན། དགྲ་སྡང་བའི་མཆོག་ལ་ནི་བདེ་བའི་ཤས་བཅུང་ཟད་བྱིན། དགྲ་སྡང་བ་འབྲིང་ལ་ནི་བདེ་བ་ཡང་འབྲིང་ཙམ་བྱིན། དགྲ་སྡང་བ་ཐ་མ་ལ་ནི་བདེ་བའི་མཆོག་བྱིན་ཏེ། བྱང་ཆུབ་སེམས་དཔའ་དེ་བཞིན་དུ་གོང་ནས་གོང་དུ་དགྲ་
སྲང་བའི་མཆོག་ལ་ནི་བདེ་བ་འབྲིང་ཙམ་བྱིན། དགྲ་སྡང་བ་འབྲིང་དང་ཐ་མ་ལ་ནི་མཉམ་པར་བདེ་བའི་མཆོག་སྦྱིན་པ་ལ་ནན་ཏན་བྱེད་དམ། གོང་ནས་གོང་དུ་རབ་དང་། འབྲིང་དང་། ཐ་མ་ལ་ཡང་བདེ་བའི་མཆོག་མཉམ་པར་སྦྱིན་པ་ལ་
ནན་ཏན་བྱེད་དམ། གལ་ཏེ་དགྲ་སྡང་བའི་མཆོག་ལ་བདེ་བའི་མཆོག་སྦྱིན་པར་ནན་ཏན་བྱེད་ན་དེ་ནི་བྱམས་པའི་སེམས་དང་ལྡན་པ་ཞེས་བྱའོ། །བྱང་ཆུབ་སེམས་དཔའ་དེའི་ཚེ་ཕ་མ་དང་དགྲ་སྡང་བའི་མཆོག་ལ་ཡང་བྱེ་བྲག་མེད་ཅིང་སེམས་མཉམ་
པར་གྱུར་ཀྱང་རིགས་ཀྱི་བུ་དེ་ལ་བྱམས་པ་ཞེས་བྱའི། བྱམས་པ་ཆེན་པོ་མ་ཡིན་ནོ། །གསོལ་པ། བཅོམ་ལྡན་འདས་ཅིའི་སླད་དུ་བྱང་ཆུབ་སེམས་དཔའ་དེ་ལྟ་བུའི་བྱམས་པ་དང་ལྡན་ཡང་བྱམས་པ་ཆེན་པོ་ཞེས་མི་བགྱི། བཀའ་སྩལ་པ། རིགས་ཀྱི་བུ་ཤིན་དུ་ལྡན་

47-1-252a

པར་དཀའ་བས་ན་བྱམས་པ་ཆེན་པོ་ཞེས་མི་བྱའོ། །དེ་ཅིའི་ཕྱིར་ཞེ་ན། ཡུན་རིང་པོ་ནས་བསྐལ་པ་ཚད་མེད་པའི་བར་དུ་ཉོན་མོངས་པ་མང་དུ་བསགས་ལ། དགེ་བའི་ཆོས་མ་བསྒོམས་པས་དེ་བས་ན་ཉིན་གཅིག་གམ། 
ཞག་གཅིག་ཙམ་གྱིས་སེམས་དུལ་བར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་སྲན་མ་སྐམ་པོ་ལ་ནི་ཁབ་ཀྱིས་བཙུགས་ཀྱང་མི་ཟུག་པ་དང་འདྲ་བར་ཉོན་མོངས་པ་ཤིན་དུ་སྲ་བ་ཡང་དེ་དང་འདྲ་སྟེ། ཉིན་ཞག་གཅིག་ཙམ་ཞིག་
སེམས་རྩེ་གཅིག་ཏུ་གྱུར་ཏེ་མ་ཡེངས་ཀྱང་ཤིན་དུ་གདུལ་དཀའོ། །གཞན་ཡང་དཔེར་ན་ཁྱི་ནི་མིས་མི་འཇིགས་ཀྱི། རི་དགས་ཤ་བ་ལ་སོགས་པ་ནི་མི་ལ་འཇིགས་ཏེ་མཐོང་མ་ཐག་ཏུ་འབྲོས་སོ། །ཞེ་སྡང་ཤིན་དུ་སྤང་དཀའ་བ་ཡང་ཁྱིམ་སྲུང་བའི་
ཁྱི་དང་འདྲའོ། །བྱམས་པའི་སེམས་ཤིན་དུ་ཉམས་སླ་བ་ནི་རི་དགས་ཤ་བ་དང་འདྲའོ། །དེ་བས་ན་སེམས་ནི་ཤིན་དུ་གདུལ་དཀའ་བས་བྱམས་པ་ཆེན་པོ་ཞེས་མི་བྱའོ། །རིགས་ཀྱི་བུ་གཞན་ཡང་དཔེར་ན་རྡོ་ལ་རི་མོ་བྲིས་ན་རྟག་ཏུ་ཡོད་དོ། །ཆུ་ལ་རི་
མོ་བྲིས་ན་དེ་མ་ཐག་ཏུ་མེད་པར་འགྱུར་ཏེ་མི་གནས་སོ། །ཞེ་སྡང་ནི་རྡོ་ལ་རི་མོ་བྲིས་པ་དང་འདྲའོ། །དགེ་བའི་རྩ་བ་ནི་ཆུ་ལ་རི་མོ་བྲིས་པ་དང་འདྲ་སྟེ། དེ་བས་ན་སེམས་འདི་ནི་ཤིན་དུ་གདུལ་དཀའོ། །གཞན་ཡང་དཔེར་ན་མེའི་ཕུང་པོ་
ཆེན་པོའི་འོད་ནི་ཡུན་རིང་དུ་ཡོད་དོ། །གློག་གི་འོད་ནི་སྐད་ཅིག་མ་སྟེ་མི་གནས་སོ། །ཞེ་སྡང་ནི་མེའི་ཕུང་པོ་དང་འདྲའོ། །བྱམས་པ་ནི་གློག་གི་འོད་དང་འདྲ་སྟེ། དེ་བས་ན་སེམས་འདི་ནི་ཤིན་དུ་གདུལ་དཀའ་བ་སྟེ། དོན་དེ་བས་ན་བྱམས་
པ་ཆེན་པོ་ཞེས་མི་བྱའོ། །རིགས་ཀྱི་བུ་བྱང་ཆུབ་སེམས་དཔའ་ཆེན་པོ་ས་དང་པོ་ལ་གནས་པ་ནི་བྱམས་པ་ཆེན་པོ་ཞེས་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ་སྔོན་ཏོ་ཅན་གྱི་མཆོག་ནི་ལོག་སྲེད་ཅན་ཞེས་བྱ་སྟེ། ས་དང་པོ་ལ་གནས་པའི་བྱང་
ཆུབ་སེམས་དཔས་བྱམས་པ་ཆེན་པོ་བསྒོམ་པ་ནི་ལོག་སྲེད་ཅན་ལ་ཡང་བྱེ་བྲག་གི་སེམས་མེད་ལ་ཉེས་པ་མི་མཐོང་བས་ཞེ་སྡང་མི་སྐྱེད་དོ། །དོན་དེ་ལྟ་བས་ན་བྱམས་པ་ཆེན་པོ་ཞེས་བྱའོ། །རིགས་ཀྱི་བུ་སེམས་ཅན་ཐམས་ཅད་ཀྱི་ཕན་པ་དང་བདེ་བར་

47-1-252b

མི་འགྱུར་བ་ཡོངས་སུ་སེལ་བ་ནི་བྱམས་པ་ཆེན་པོ་ཞེས་བྱའོ། །སེམས་ཅན་མང་པོ་ལ་ཕན་པ་དང་བདེ་བ་ཚད་མེད་པ་བྱིན་པ་ནི་སྙིང་རྗེ་ཆེན་པོ་ཞེས་བྱའོ། །སེམས་ཅན་ཐམས་ཅད་ལ་དགའ་བའི་སེམས་བསྐྱེད་པ་ནི་དགའ་བ་ཆེན་པོ་ཞེས་བྱའོ། །
སྐྱོ་བ་མེད་པ་ནི་བཏང་སྙོམས་ཆེན་པོ་ཞེས་བྱའོ། །བདག་དང་ཆོས་དང་མཚན་ཉིད་དང་བདག་གི་ལུས་སུ་མི་མཐོང་ཞིང་། ཆོས་ཐམས་ཅད་མཉམ་པ་ཉིད་དུ་ལྟ་བ་ནི་བཏང་སྙོམས་ཆེན་པོ་ཞེས་བྱའོ། །བདག་གི་བདེ་བ་བཏང་ནས་གཞན་ལ་བྱིན་
པ་ནི་བཏང་སྙོམས་ཆེན་པོ་ཞེས་བྱའོ། །རིགས་ཀྱི་བུ་ཚད་མེད་པ་བཞི་ཙམ་གྱིས་བྱམས་པ་དག་ཕ་རོལ་དུ་ཕྱིན་པ་དྲུག་སྐྱེ་ཞིང་རྫོགས་པར་འགྱུར་གྱི། སྤྱོད་པ་གཞན་གྱིས་མ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་
ནི་སྔར་འཇིག་རྟེན་གྱི་ཚད་མེད་པ་བཞིའི་སེམས་ཐོབ་ནས་གདོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་ཏེ། རིམ་གྱིས་འཇིག་རྟེན་ལས་འདས་པ་ཡང་ཐོབ་པར་འགྱུར་རོ། །རིགས་ཀྱི་བུ་འཇིག་རྟེན་གྱི་ཚད་
མེད་པའི་རྒྱུ་ལས་འཇིག་རྟེན་ལས་འདས་པའི་ཚད་མེད་པ་ཐོབ་པར་འགྱུར་ཏེ། དེ་བས་ན་ཚད་མེད་པ་ཆེན་པོ་ཞེས་བྱའོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཕན་པ་དང་བདེ་བར་
མི་འགྱུར་བ་ཡོངས་སུ་སེལ་ཅིང་ཕན་པ་དང་བདེ་བར་བྱ་བ་བསམས་པ་ནི་བསམས་པ་ཙམ་དུ་ཟད་ཀྱི། ཡང་དག་པར་ཕན་པ་དང་བདེ་བར་མི་འགྱུར་རོ། །བཅོམ་ལྡན་འདས་དཔེར་ན་དགེ་སློང་མི་གཙང་བ་ལ་རྟོག་པ་
ནི་ལུས་ལ་གྱོན་པའི་གོས་ཀྱང་པགས་པར་མཐོང་མོད་ཀྱི། ཡང་དག་པར་པགས་པ་མ་ལགསོ། །ཟས་རྣམས་ཀྱང་སྲིན་བུར་འདུ་ཤེས་མོད་ཀྱི། ཡང་དག་པར་སྲིན་བུ་མ་ལགསོ། །སྲན་ཚོད་འཐུང་བ་ཡང་མི་གཙང་བའི་ཁུ་
བར་འདུ་ཤེས་མོད་ཀྱི། ཡང་དག་པར་མི་གཙང་བའི་ཁུ་བ་མ་ལགས་སོ། །ཞོ་ལ་རྐང་ངམ་ཀླད་པ་ལྟ་བུར་འདུ་ཤེས་མོད་ཀྱི། ཡང་དག་པར་ན་གླད་པ་མ་ལགས་སོ། །ཕྱེ་ལ་རུས་ཕྱིར་འདུ་ཤེས་མོད་ཀྱི། ཡང་དག་པར་ན་རུས་ཕྱེ་མ་

47-1-253a

ལགས་སོ། །ཚད་མེད་པ་བཞིའི་སེམས་ཀྱང་དེ་དང་འདྲ་སྟེ། ཡང་དག་པར་སེམས་ཅན་ལ་ཕན་པ་དང་བདེ་བར་འགྱུར་བ་ནི་མ་ལགས་ཀྱི། ཁ་ཙམ་ཞིག་སེམས་ཅན་ལ་བདེ་བ་སྦྱིན་ནོ་ཞེས་སྨྲས་ཀྱང་ཡང་
དག་པར་མི་འགྱུར་ན། དེ་ལྟ་བུར་སེམས་པ་དེ་བརྫུན་པ་མ་ལགས་སམ། བཅོམ་ལྡན་འདས་ཅི་སྟེ་བརྫུན་མ་ལགས་ལ་ཡང་དག་པར་བདེན་པར་འགྱུར་བ་ཞིག་ན། ཅིའི་སླད་དུ་སེམས་ཅན་ཐམས་ཅད་ལ་སངས་རྒྱས་དང་
བྱང་ཆུབ་སེམས་དཔའ་རྣམས་ཀྱི་བྱིན་གྱི་བརླབས་ཀྱིས་ཐམས་ཅད་བདེ་བ་མྱོང་བར་མི་མཛད། ཅི་སྟེ་ཡང་དག་པར་བདེ་བར་མི་འགྱུར་ན། བཅོམ་ལྡན་འདས་ཀྱིས་གསུངས་པ་ལས་ངས་མངོན་དུ་དྲན་པ་སྔོན་བྱམས་པའི་
སེམས་འབའ་ཤིག་ལ་ནན་ཏན་བྱས་པ་ཙམ་གྱིས་བསྐལ་པས་འཇིག་རྟེན་གྱི་ཁམས་འདི་ལན་བདུན་བཀྲུས་ཀྱི་བར་དུ་འཇིག་རྟེན་གྱི་ཁམས་འདིར་སྐྱེས་ཏེ། འཇིག་རྟེན་ཆགས་པའི་དུས་ན་ནི་ཚངས་པའི་ལྷར་སྐྱེས། འཇིག་
རྟེན་ཞིག་པའི་དུས་ན་ནི་འོག་མིན་གྱི་ལྷར་སྐྱེས་སོ། །ཚངས་པའི་ལྷར་སྐྱེས་པ་ན་དབང་དང་མཐུར་ལྡན་ཏེ། གཞན་གྱིས་ཟིལ་ཀྱི་མི་ནོན་ལ་ཚངས་པ་སྟོང་གི་ནང་ན་མཆོག་ཏུ་གྱུར། ཕུལ་དུ་གྱུར་ཏེ། ཚངས་པ་ཆེན་པོའི་རྒྱལ་པོར་
སྐྱེས་ནས་སེམས་ཅན་ཐམས་ཅད་བདག་ལ་གཙོ་བོར་འདུ་ཤེས་སྐྱེས་སོ། །ལན་སུམ་བཅུ་རྩ་དྲུག་གི་བར་དུ་སུམ་བཅུ་རྩ་གསུམ་གནམ་གྱི་ལྷའི་དབང་པོ་བརྒྱ་བྱིན་ལྷའི་དབང་ཕྱུག་ཏུ་སྐྱེས་སོ། །སྐྱེ་བ་ཚད་མེད་པ་བརྒྱ་སྟོང་གི་བར་དུ་
འཁོར་ལོས་སྒྱུར་བའི་རྒྱལ་པོར་སྐྱེས་སོ་ཞེས་གསུངས་ཏེ། བྱམས་པའི་སེམས་འབའ་ཤིག་བསྒོམས་པས་ལྷ་དང་། མིའི་ལོངས་སྤྱོད་ཕུན་སུམ་ཚོགས་པ་ཐོབ་པས་ན། ཅི་སྟེ་མི་བདེན་ན་འདི་སྐད་དུ་གསུངས་པ་དང་ཡང་ཅིས་ལྡན་པར་
འགྱུར། བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ནི་ཤིན་དུ་དཔའ་བས་མི་འཇིགས་པ་དང་ལྡན་ནོ། །དེ་ནས་འོད་སྲུང་ལ་ཚིགས་སུ་བཅད་དེ་བཀའ་སྩལ་པ། གང་ཞིག་སེམས་ཅན་གཅིག་ཙམ་ལ། །

47-1-253b

ཞེ་སྡང་སེམས་ནི་མི་སྐྱེད་ཅིང་། །དེ་ལ་བདེ་བར་འདོད་པ་ནི། །ཤིན་དུ་བྱམས་པ་ཞེས་བྱའོ། །གང་ཞིག་སེམས་ཅན་ཐམས་ཅད་ལ། །སྙིང་རྗེ་བ་ཡི་སེམས་བསྐྱེད་པ། །དེ་ནི་འཕགས་པའི་རིགས་ཤེས་བྱ། །བསོད་ནམས་
ཚད་མེད་ཐོབ་པར་འགྱུར། །ཅི་སྟེ་མངོན་ཤེས་ལྔ་ལྡན་པའི། །དྲང་སྲོང་ས་ཆེན་གང་བར་གྱུར། །དབང་དང་ལྡན་པའི་རྒྱལ་པོ་ཞིག །བདེ་བ་ཐམས་ཅད་བྱིན་ན་ནི། །རྟ་དང་བ་ལང་ནོར་སྣ་ཚོགས། །དེ་ཡིས་བསོད་ནམས་ཐོབ་པ་ནི། །
བྱམས་པ་བསྒོམས་པའི་བསོད་ནམས་ཀྱིས། །བཅུ་དྲུག་ཆ་གཅིག་ཙམ་མི་ཕོད། །རིགས་ཀྱི་བུ་བྱམས་པ་བསྒོམས་པ་ནི་བརྫུན་མ་ཡིན་ཏེ་ཡང་དག་པར་བདེན་པའོ། །ཉན་ཐོས་དང་རང་སངས་རྒྱས་ཀྱི་བྱམས་པ་ནི་བརྫུན་པ་ཞེས་བྱའོ། །
སངས་རྒྱས་དང་བྱང་ཆུབ་སེམས་དཔའི་བྱམས་པ་ནི་ཡང་དག་པ་སྟེ་མི་བརྫུན་པར་མི་མངོན་ཞེ་ན། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ལྟར་ཡོངས་སུ་མྱ་ངན་ལས་འདས་པ་ཆེན་པོ་ལ་གནས་པ་ནི་ས་ལ་ཡང་
གསེར་དུ་མཐོང་། གསེར་ལ་ཡང་སར་མཐོ་སྟེ། ས་ལ་ནི་ཆུར་མཐོང་། ཆུ་ལ་ཡང་སར་མཐོང་། ཆུ་ལ་ནི་མེར་མཐོང་། མེ་ལ་ཡང་ཆུར་མཐོང་། ས་ལ་ནི་རླུང་དུ་མཐོང་། རླུང་ལ་ཡང་སར་མཐོང་སྟེ། ཡིད་བཞིན་དུ་གྲུབ་པས་བརྫུན་པ་
མེད་དོ། །སེམས་ཅན་ཡང་དག་པ་ལ་ནི་སེམས་ཅན་མ་ཡིན་པར་མཐོང་། སེམས་ཅན་མ་ཡིན་པ་ལ་ནི་ཡང་དག་པར་སེམས་ཅན་དུ་མཐོང་སྟེ། ཡིད་བཞིན་དུ་གྲུབ་པས་བརྫུན་པ་མེད་དོ། །རིགས་ཀྱི་བུ་དེ་བས་ན་བྱང་ཆུབ་སེམས་དཔའི་ཚད་མེད་པ་བཞིའི་
སེམས་ཀྱིས་བསམ་པ་ནི་ཡང་དག་པའོ། །གཞན་ཡང་རིགས་ཀྱི་བུ་དེ་ལ་ཇི་ལྟར་ན་ཡང་དག་པའི་བསམ་པ་གང་ཞེ་ན། ཉོན་མོངས་པ་ཐམས་ཅད་ཡོངས་སུ་སེལ་བའི་ཕྱིར་རོ། །རིགས་ཀྱི་བུ་བྱམས་པའི་སེམས་བསྒོམས་པས་ནི་འདོད་ཆགས་ཡོངས་སུ་
སྤོང་བར་འགྱུར་རོ། །སྙིང་རྗེའི་སེམས་བསྒོམས་པས་ནི་ཞེ་སྡང་ཡོངས་སུ་སྤོང་བར་འགྱུར་དགའ་བའི་སེམས་བསྒོམས་པས་ནི་མི་བདེ་བ་ཡོངས་སུ་སྤོང་བར་འགྱུར། བཏང་སྙོམས་ཀྱི་སེམས་བསྒོམས་པས་ནི་འདོད་ཆགས་དང་། ཞེ་སྡང་

47-1-254a

དང་། སེམས་ཅན་འདུ་ཤེས་པ་ཡོངས་སུ་སྤོང་བར་འགྱུར་ཏེ། དེ་བས་ན་ཡང་དག་པའི་བསམ་པ་ཞེས་བྱའོ། །གཞན་ཡང་རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་ཚད་མེད་པ་བཞིའི་
སེམས་ནི་དགེ་བའི་རྩ་བ་ཐམས་ཅད་ཀྱི་གཞིར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཅི་སྟེ། སེམས་ཅན་དབུལ་ཕོངས་པ་དག་མི་མཐོང་ན་བྱམས་པ་སྐྱེ་བའི་རྒྱུ་མེད་དེ། གལ་ཏེ་བྱམས་
པ་མ་སྐྱེས་ན་སྦྱིན་པ་སྦྱིན་པའི་རྐྱེན་གྱིས་སེམས་ཅན་མང་པོ་བདེ་བར་འགྱུར་བ་ནི་འདི་ལྟ་སྟེ། ཟས་དང་། སྐོམ་དང་། ཐེག་པ་དང་། གོས་དང་བདུག་པ་དང་། མེ་ཏོག་དང་། གདིང་བའི་ཁྲི་སྟན་དང་། ཁང་ཁྱིམ་དང་། སྣང་བའི་མེར་མེ་ལ་སོགས་
པ་སྦྱིན་པ་སྟེ། དེ་ལྟར་སྦྱིན་པ་བྱིན་པ་ན་དེ་སེམས་མ་བཅིངས་ཏེ་ཆགས་པ་མི་སྐྱེ་བ་དང་། གདོན་མི་ཟ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་པའོ། །དེའི་ཚེ་ན་སེམས་ཅི་ལ་ཡང་མི་ཆགས་ཤིང་འདུ་ཤེས་གཅོད་པ་
དང་། རྙེད་པ་དང་གྲགས་པས་འཇིགས་པ་དང་། ལྷ་དང་མིའི་བདེ་བ་མི་ཚོལ་བ་དང་། ང་རྒྱལ་མི་སྐྱེ་བ་དང་། ལན་མི་རེ་བ་དང་། ཕ་རོལ་པོ་ལ་སླུ་བའི་ཕྱིར་སྦྱིན་པ་སྦྱིན་པ་མ་ཡིན་པ་དང་། ལོངས་སྤྱོད་འདོད་པའི་ཕྱིར་མ་ཡིན་པ་དང་། སྦྱིན་པ་བྱིན་པ་ན་ལེན་པར་
མི་ལྟ། ཚུལ་ཁྲིམས་བསྲུང་བ་དང་ཚུལ་ཁྲིམས་ངན་པ་ཅན་དང་། བསོད་ནམས་ཀྱི་ཞིང་དང་བསོད་ནམས་ཀྱི་ཞིང་མ་ཡིན་པ་དང་། བཤེས་གཉེན་དང་བཤེས་གཉེན་མ་ཡིན་པར་མི་ལྟ། སྦྱིན་པ་བྱིན་པ་ན་སྣོད་དང་སྣོད་མ་ཡིན་པར་མི་ལྟ། ཉི་མ་དང་དུས་དང་
གནས་དང་། གནས་མ་ཡིན་པར་མི་ལྟ། མུ་གེ་དང་ཤིན་དུ་སྐྱིད་པའི་དུས་ཀྱང་མི་ལྟ། རྒྱུ་དང་འབྲས་བུར་ཡང་མི་ལྟ། སེམས་ཅན་དང་སེམས་ཅན་མ་ཡིན་པ་དང་། བསོད་ནམས་དང་བསོད་ནམས་མ་ཡིན་པར་མི་ལྟ་སྟེ། དེ་ལྟར་སྦྱིན་པ་དང་ལེན་པ་དང་
ནོར་གྱི་དངོས་པོར་མི་ལྟ་བ་ནས། བར་དུ་གཅོད་པ་དང་། འབྲས་བུ་སྨིན་པའི་བར་དུ་མི་ལྟ་མོད་ཀྱི། སྦྱིན་པ་རྟག་ཏུ་སྤྱོད་དེ་རྒྱུན་དུ་མི་གཅོད་དོ། །རིགས་ཀྱི་བུ་བྱང་ཆུབ་སེམས་དཔའ་གལ་ཏེ་ཚུལ་ཁྲིམས་བསྲུང་བ་དང་། ཚུལ་ཁྲིམས་ངན་པ་ཅན་དང་

47-1-254b

འབྲས་བུ་རྣམ་པར་སྨིན་པའི་བར་དུ་བལྟ་ན་སྦྱིན་པ་བྱིན་པར་མི་འགྱུར་རོ། །གལ་ཏེ་སྦྱིན་པ་མ་བྱིན་ན་སྦྱིན་པའི་ཕ་རོལ་དུ་ཕྱིན་པ་ཡོངས་སུ་རྫོགས་པར་མི་འགྱུར་རོ། །གལ་ཏེ་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་མ་རྫོགས་ན་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་མི་འགྲུབ་བོ། །རིགས་ཀྱི་བུ་འདི་ལྟ་སྟེ། དཔེར་ན་མི་ཞིག་དུག་མདས་ཕོག་པ་ལས། མི་དེའི་གཉེན་བཤེས་དག་དེའི་དུག་བསལ་ཅིང་བདེ་བར་བྱ་བའི་ཕྱིར་སྨན་པ་མཁས་པ་གཉེར་ནས་
དུག་མདའ་དབྱུང་བ་ལས་མི་དེ་འདི་སྐད་ཅེས་ཟེར་རོ། །རེ་ཤིག་ཁོ་བོའི་ལུས་ལ་མ་རེག་པར་སྡོད་ཅིག །བདག་གིས་དུག་མདའ་འདི་གང་ཕྱོགས་ནས་འོངས། སུས་འཕངས་རྒྱལ་རིགས་སམ། བྲམ་ཟེ་འམ། རིགས་ངན་
གྱིས་འཕངས་སམ། ག་ལས་འོངས་པ་བརྟགས་ཏེ་བྱའོ། །ཡང་མདའ་ཉིད་ཤིང་ངམ། སྨྱིག་མ་འམ། འོན་ཏེ་ལྕང་མ་འམ། མདེའུ་ཉིད་ཀྱང་སུས་བརྡུངས། རྣོ་ལྕགས་སམ། མཉེན་ལྕགས་སམ། མདའ་སྒྲོ་ཉིད་ཀྱང་བྱ་
ཅི་ཞིག་གི་སྒྲོ། བྱ་རྒོད་དམ། བྱན་ལག་གི་སྒྲོ་འམ། དུག་ཉིད་ཀྱང་ག་ལས་བྱུང་སུས་བྱས་པ་ཞིག །འོན་ཏེ་རང་བྱུང་བ་ཞིག་གམ། འོན་ཏེ་མིས་བྱས་པའི་དུག་གམ། འོན་ཏེ་སྦྲུལ་གདུག་པའི་དུག་ཡིན་ནམ། དེ་ལྟར་གླེན་པས་
བརྟགས་ཀྱང་རྟོགས་པར་མ་གྱུར་ཏེ་དེ་མ་ཐག་ཏུ་ཚེ་འཕོས་སོ། །རིགས་ཀྱི་བུ་བྱང་ཆུབ་སེམས་དཔའ་ཡང་དེ་དང་འདྲ་སྟེ། སྦྱིན་པ་བྱིན་པ་ན་བྱེ་བྲག་ཏུ་རྣམ་པར་འབྱེད་དེ། འདི་ནི་སྦྱིན་པ་འདི་ནི་ལེན་པའོ། །འདི་ནི་ཚུལ་ཁྲིམས་བསྲུང་བ་
འདི་ནི་ཚུལ་ཁྲིམས། ངན་པ་ཅན་ནོ་ཞེས་བྱ་བ་ནས། འབྲས་བུ་རྣམ་པར་སྨིན་པའི་བར་དུ་འབྱེད་པས་ནམ་དུ་ཡང་སྦྱིན་པར་མི་འགྱུར་རོ། །གལ་ཏེ་སྦྱིན་པ་མ་སྦྱིན་ན་སྦྱིན་པའི་ཕ་རོལ་དུ་ཕྱིན་པ་ཡོངས་སུ་རྫོགས་པར་མི་འགྱུར་
རོ། །གལ་ཏེ་སྦྱིན་པའི་ཕ་རོལ་དུ་ཕྱིན་པ་ཡོངས་སུ་མ་རྫོགས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མི་འགྲུབ་བོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པ་སྤྱོད་པ་ན། སེམས་ཅན་ཐམས་ཅད་ལ་བྱམས་པའི་

47-1-255a

སེམས་མཉམ་པ་ནི་བུ་གཅིག་པ་དང་འདྲ་བར་འདུ་ཤེས་སོ། །གཞན་ཡང་སྦྱིན་པ་བྱིན་པ་ན་སེམས་ཅན་ཐམས་ཅད་ལ་སྙིང་རྗེའི་སེམས་བསྐྱེད་པ་ནི་ཇི་ལྟར་ཕ་མས་བུ་གཅིག་པ་ན་བའི་ནད་གཡོག་བྱེད་པ་དང་
འདྲའོ། །སྦྱིན་པ་སྤྱོད་པ་ན་སེམས་རབ་ཏུ་དགའ་བ་ནི་ཇི་ལྟར་ཕ་མ་བུའི་ནད་སོས་པ་མཐོང་བ་དང་འདྲའོ། །སྦྱིན་པ་བྱིན་ནས་སེམས་བཏང་སྙོམས་སུ་འགྱུར་བ་ནི་དཔེར་ན་ཕ་མས་བུ་གཅིག་པ་སྐྱེད་རྫོགས་ཏེ་ཤིང་བྱེ་ནས་རང་སོས་
པར་མཐོང་བ་དང་འདྲའོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་བྱམ་པའི་སེམས་ཀྱིས་ཁ་ཟས་ཀྱི་བག་སྦྱིན་པ་ན་འདི་ལྟར་སྨོན་ལམ་འདེབས་ཏེ། བདག་གི་སྦྱིན་པ་བྱིན་པ་འདི་སེམས་ཅན་ཐམས་ཅད་
དང་ཐུན་མོང་དུ་གྱུར་ཅིག །དེའི་རྒྱུ་དེའི་རྐྱེན་གྱིས་སེམས་ཅན་ཐམས་ཅད་ཀྱིས་ཡེ་ཤེས་ཆེན་པོའི་ཟས་ཐོབ་ཅིང་བླ་ན་མེད་པའི་ཐེག་པ་ཆེན་པོར་བསྔོ་བ་ལ་བརྩོན་པར་གྱུར་ཅིག །སེམས་ཅན་ཐམས་ཅད་ཀྱི་དགེ་བའི་ཡེ་ཤེས་ཀྱི་ཟས་
ཐོབ་ཅིང་ཉན་ཐོས་དང་རང་སངས་རྒྱས་ཀྱི་ཟས་ཚོལ་བར་མ་གྱུར་ཅིག །སེམས་ཅན་ཐམས་ཅད་ཀྱིས་ཆོས་ཀྱི་དགའ་བའི་ཟས་ཐོབ་ཅིང་འདོད་པའི་ཟས་ཚོལ་བར་མ་གྱུར་ཅིག །སེམས་ཅན་ཐམས་ཅད་ཀྱིས་
ཤེས་རབ་ཀྱི་ཕ་རོལ་ཏུ་ཕྱིན་པའི་ཟས་ཐོབ་ཅིང་ཐམས་ཅད་ཡོངས་སུ་རྫོགས་པར་འགྱུར་བ་དང་། ཐོགས་པ་མེད་པའི་མཆོག་གི་དགེ་བའི་རྩ་བ་སྡུད་པར་གྱུར་ཅིག །སེམས་ཅན་ཐམས་ཅད་ཀྱིས་སྟོང་པ་ཉིད་
ཀྱི་མཚན་ཉིད་རྟོགས་ཤིང་ཐོགས་པ་མེད་པའི་ལུས་ཐོབ་ནས་ནམཁའ་ལྟ་བུར་གྱུར་ཅིག །སེམས་ཅན་ཐམས་ཅད་རྟག་ཏུ་སྦྱིན་པ་ལེན་པར་འགྱུར་ཞིང་ཐམས་ཅད་ལ་བྱམས་པ་དང་། བརྩེ་བ་དང་། ཀུན་གྱི་
བསོད་ནམས་ཀྱི་ཞིང་དུ་གྱུར་ཅིག་ཅེས་སྨོན་ལམ་འདེབས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་སེམས་ཀྱིས་ཟས་ཀྱི་སྦྱིན་པ་བྱིན་པ་ནས་སྨོན་ལམ་དེ་དག་བསྐྱེད་པ་ལ་ཤིན་དུ་བརྟན་པར་བྱའོ། །རིགས་ཀྱི་

47-1-255b

བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་སེམས་ཀྱིས་བཏུང་བའི་སྐོམ་སྦྱིན་པ་བྱིན་པ་ན་འདི་ལྟར་སྨོན་ལམ་འདེབས་ཏེ། བདག་གི་སྦྱིན་པ་བྱིན་པ་འདི་སེམས་ཅན་ཐམས་ཅད་དང་ཐུན་མོང་དུ་གྱུར་ཅིག །དེའི་རྒྱུ་
དེའི་རྐྱེན་གྱིས་སེམས་ཅན་ཐམས་ཅད་ཐེག་པ་ཆེན་པོའི་ཆུ་བོར་འཇུག་པ་དང་། རོ་རྣམ་པ་བརྒྱད་དང་ལྡན་པའི་ཆུ་འཐུང་ཞིང་མྱུར་དུ་བླ་ན་མེད་པའི་བྱང་ཆུབ་ཀྱི་ལམ་བགྲོད་པ་དང་། ཉན་ཐོས་དང་། རང་སངས་རྒྱས་ཀྱི་སྐོམ་པས་གདུང་བ་སྤོང་བ་
དང་། བླ་ན་མེད་པའི་སངས་རྒྱས་ཀྱི་ཐེག་པས་མི་ངོམས་པ་དང་། ཉོན་མོངས་པས་གདུང་བ་ཡོངས་སུ་སྤོང་ཞིང་ཆོས་ཀྱི་རོས་མི་ངོམས་པ་དང་། འཁོར་བའི་འདོད་པ་སྤོང་ཞིང་ཐེག་པ་ཆེན་པོ་ཡོངས་སུ་མྱ་ངན་ལས་འདས་པ་ལ་མོས་པ་དང་། ཆོས་ཀྱི་
སྐུ་ཡོངས་སུ་རྫོགས་པ་དང་། ཏིང་ངེ་འཛིན་རྣམས་ཐོབ་པ་དང་། ཤིན་དུ་ཟབ་པའི་ཡེ་ཤེས་ཀྱི་རྒྱ་མཚོར་ཞུགས་པར་གྱུར་ཅིག །སེམས་ཅན་ཐམས་ཅད་ཀྱིས་བདུད་རྩིའི་རོ་མྱོང་ཞིང་། བྱང་ཆུབ་སེམས་དཔའ་འཇིག་རྟེན་དུ་འབྱུང་བའི་འདོད་པ་སྤངས་ནས་
རབ་ཏུ་བདེ་བའི་རོ་མྱོང་བར་གྱུར་ཅིག །སེམས་ཅན་ཐམས་ཅད་ཀྱིས་ཚད་མེད་པ་བརྒྱ་སྟོང་ཇི་སྙེད་དང་ལྡན་པར་འགྱུར་ཞིང་ཆོས་ཀྱི་རོ་དང་ལྡན་པར་གྱུར་ནས་སངས་རྒྱས་ཀྱི་རང་བཞིན་མཐོང་བར་གྱུར་ཅིག །སངས་རྒྱས་ཀྱི་རང་བཞིན་མཐོང་ནས་ཆོས་ཀྱི་ཆར་རབ་
ཏུ་འབེབས་པར་གྱུར་ཅིག །ཆོས་ཀྱི་ཆར་རབ་ཏུ་ཕབ་ནས་ནམ་མཁའ་ལྟར་སངས་རྒྱས་ཀྱི་རང་བཞིན་ཀུན་དུ་ཁེབས་ཤིང་ཚད་མེད་པའི་སེམས་ཅན་ཐམས་ཅད་ཀྱིས་ཉན་ཐོས་དང་རང་སངས་རྒྱས་ཀྱི་རོ་མ་ཡིན་པ། ཐེག་པ་ཆེན་པོའི་ཆོས་ཀྱི་རོ་གཅིག་
པ་ཐོབ་པར་གྱུར་ཅིག །སེམས་ཅན་ཐམས་ཅད་ཀྱིས་རྣམ་པ་དྲུག་ཏུ་གྱུར་པའི་རོ་མ་ཡིན་པ་མངར་བའི་རོ་གཅིག་པ་ཐོབ་པར་གྱུར་ཅིག །སེམས་ཅན་ཐམས་ཅད་ཀྱིས་ཆོས་ཀྱི་རོ་འབའ་ཤིག་ཚོལ་ཞིང་ཐོགས་པ་མེད་པའི་སངས་རྒྱས་ཀྱི་ཆོས་སྤྱོད་པའི་
རོ་ལས་རོ་གཞན་ཚོལ་བར་མ་གྱུར་ཅིག །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་སེམས་ཀྱིས་བཏུང་བའི་སྐོམ་སྦྱིན་པ་བྱིན་པ་ན་སྨོན་ལམ་འདི་དག་ལ་ཤིན་དུ་བརྟན་པར་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་

47-1-256a

སེམས་དཔའ་ཆེན་པོ་བྱམས་པའི་སེམས་ཀྱིས་ཐེག་པ་སྦྱིན་པ་བྱིན་པ་ན། འདི་ལྟར་སྨོན་ལམ་འདེབས་སོ། །བདག་གིས་སྦྱིན་པ་འདི་སེམས་ཅན་ཐམས་ཅད་དང་ཐུན་མོང་དུ་གྱུར་ཅིག །དེའི་རྒྱུ་དེའི་རྐྱེན་ཀྱིས་སེམས་ཅན་ཐམས་ཅད་ཐེག་
པ་ཆེན་པོ་རྫོགས་པ་དང་། ཐེག་པ་ཆེན་པོ་ལ་གནས་པ་དང་། ཕྱིར་མི་ལྡོག་པའི་ཐེག་པ་དང་། མི་གཡོ་བའི་ཐེག་པ་དང་། རྡོ་རྗེ་གདན་གྱི་ཐེག་པ་དང་། ཉན་ཐོས་དང་རང་སངས་རྒྱས་མི་ཚོལ་བའི་ཐེག་པ་དང་། སངས་རྒྱས་ཀྱི་ཐེག་པ་ལ་འབབ་པ་དང་། 
མི་ཕྲོགས་པའི་ཐེག་པ་དང་། མི་ཞན་པའི་ཐེག་པ་དང་། ཕྱིར་མི་ནུར་བའི་ཐེག་པ་དང་། བླ་ན་མེད་པའི་ཐེག་པ་དང་། སྟོབས་བཅུའི་ཐེག་པ་དང་། ཡོན་ཏན་ཆེན་པོའི་ཐེག་པ་དང་། རྨད་དུ་བྱུང་བའི་ཐེག་པ་དང་། ངོ་མཚར་ཆེ་བའི་ཐེག་པ་དང་། 
ཤིན་དུ་རྙེད་དཀའ་བའི་ཐེག་པ་དང་། ཐམས་ཅད་མཁྱེན་པའི་ཐེག་པས་བཏེག་པར་གྱུར་ཅིག །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་སེམས་ཀྱིས་ཐེག་པ་སྦྱིན་པ་བྱིན་པ་ན་རྟག་ཏུ་སྨོན་ལམ་དེ་དག་བསྐྱེད་པ་
ལ་བརྟན་པར་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བགོ་བའི་གོས་སྦྱིན་པ་བྱིན་པ་ན། འདི་ལྟར་སྨོན་ལམ་འདེབས་སོ། །བདག་གིས་སྦྱིན་པ་བྱིན་པ་འདི་སེམས་ཅན་ཐམས་ཅད་དང་ཐུན་མོང་དུ་གྱུར་ཅིག །
དེའི་རྒྱུ་དེའི་རྐྱེན་གྱིས་སེམས་ཅན་ཐམས་ཅད་འཛེམ་པ་དང་ངོ་ཚ་བའི་གོས་དང་ལྡན་ཞིང་། ཆོས་ཀྱི་དབྱིངས་ཀྱིས་ལུས་ཁེབས་ནས་ལྟ་བ་མང་པོས་ཀླགས་པའི་གོས་དྲལ་བ་དང་། གོས་ཀྱི་ལུས་ལ་ཁྲུ་གང་གིས་མི་རེག་པ་དང་། གསེར་གྱི་
མདོག་ཅན་གྱི་ལུས་ཐོབ་པ་དང་། རེག་བྱ་རྣམས་ཤིན་དུ་འཇམ་པ་དང་། འོད་གསལ་ཞིང་ཐོགས་པ་མེད་པ་དང་། མདོག་འཚེར་ཅིང་པགས་པ་འཇམ་ལ་འོད་རྟག་ཏུ་ཚད་མེད་པ་དང་། གཟུགས་མེད་ཅིང་གཟུགས་དང་བྲལ་བར་གྱུར་ཅིག །
སེམས་ཅན་ཐམས་ཅད་ཀྱིས་གཟུགས་མེད་པའི་ལུས་ཐོབ་ཅིང་གཟུགས་ཐམས་ཅད་ལ་འདས་པ་དང་། གཟུགས་མེད་པའི་ཡོངས་སུ་མྱ་ངན་ལས་འདས་པ་ཆེན་པོ་ལ་ཞུགས་པར་གྱུར་ཅིག་ཅེས་སྨོན་ལམ་འདེབས་སོ། །རིགས་ཀྱི་བུ་བྱང་ཆུབ་སེམས་

47-1-256b

དཔའ་སེམས་དཔའ་ཆེན་པོས་གོས་ཀྱི་སྦྱིན་པ་བྱིན་པ་ན། དེ་ལྟར་སྨོན་ལམ་བསྐྱེད་པ་ལ་བརྟན་པར་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་བསྒོམ་པ་ན། མེ་ཏོག་དང་། བྱུག་སྤོས་དང་། 
སྤོས་ཕྱེ་མ་དང་། བསུང་ཅན་སྦྱིན་པ་བྱིན་པའི་ཚེ་འདི་ལྟར་སྨོན་ལམ་འདེབས་སོ། །བདག་གིས་སྦྱིན་པ་བྱིན་པ་འདི་སེམས་ཅན་ཐམས་ཅད་དང་ཐུན་མོང་དུ་གྱུར་ཅིག །དེའི་རྒྱུ་དེའི་རྐྱེན་གྱིས་སེམས་ཅན་ཐམས་ཅད་ཀྱིས་སངས་རྒྱས་ཀུ་སུ་
མའི་ཏིང་ངེ་འཛིན་ཐོབ་ཅིང་། བྱང་ཆུབ་ཀྱི་ཡན་ལག་བདུན་གྱི་ཅོད་པན་མགོ་ལ་ཐོགས་པར་ཤོག་ཤིག །སེམས་ཅན་ཐམས་ཅད་གཟུགས་ཟླ་བ་ཉ་བ་དང་འདྲ་བར་འགྱུར་ཞིང་། མཐོང་བའི་གཟུགས་ཐམས་ཅད་ཀྱང་ཕུལ་དུ་གྱུར་པར་
ཤོག་ཤིག །སེམས་ཅན་ཐམས་ཅད་ཀྱིས་མཚན་གཅིག་པའི་བསོད་ནམས་བརྒྱས་ཡོངས་སུ་བརྒྱན་པར་ཤོག་ཤིག །སེམས་ཅན་ཐམས་ཅད་ཀྱིས་ཡིད་བཞིན་དུ་ཡིད་དུ་འོང་བའི་གཟུགས་མཐོང་བར་ཤོག་ཤིག །སེམས་
ཅན་ཐམས་ཅད་ཀྱིས་རྟག་ཏུ་དགེ་བའི་བཤེས་གཉེན་དང་ཕྲད་ཅིང་ཐོགས་པ་མེད་པའི་གསུང་ཐོབ་ནས། མི་གཙང་བ་རྣམས་དང་བྲལ་བར་ཤོག་ཤིག །སེམས་ཅན་ཐམས་ཅད་ཀྱིས་དགེ་བའི་རྩ་བ་བླ་ན་མེད་པ་རིན་པོ་ཆེ་ལྟ་བུ་
དང་ལྡན་པར་ཤོག་ཤིག །སེམས་ཅན་ཐམས་ཅད་ཀྱིས་གཅིག་ལ་གཅིག་མཐོང་བ་ཙམ་གྱིས་དགའ་ཞིང་མཛའ་བ་དང་། སྡུག་བསྔལ་བར་འགྱུར་བའི་མྱ་ངན་མེད་པ་དང་། སོ་སོར་དགེ་བ་དང་ལྡན་ཞིང་གཅིག་ལ་
གཅིག་མི་གནོད་པར་ཤོག་ཤིག །སེམས་ཅན་ཐམས་ཅད་ཚུལ་ཁྲིམས་ཀྱི་བསུང་དང་ལྡན་པར་ཤོག་ཤིག་དང་། སེམས་ཅན་ཐམས་ཅད་ཐོགས་པ་མེད་པའི་ཚུལ་ཁྲིམས་བསྲུང་ཞིང་། དེའི་དྲི་བསུང་གིས་ཕྱོགས་
བཅུར་ཡོངས་སུ་མངར་བར་ཤོག་ཤིག །སེམས་ཅན་ཐམས་ཅད་ཤིན་དུ་བརྟེན་པའི་ཚུལ་ཁྲིམས་དང་། འགྱོད་པ་མེད་པའི་ཚུལ་ཁྲིམས་དང་། ཐམས་ཅད་མཁྱེན་པའི་ཡེ་ཤེས་ཀྱི་ཚུལ་ཁྲིམས་ངན་པ་ཡོངས་སུ་སྤངས་པའི་ཚུལ་ཁྲིམས་དང་། 

47-1-257a

ཐམས་ཅད་མེད་པའི་ཚུལ་ཁྲིམས་དང་། སྔོན་མ་བྱུང་བའི་ཚུལ་ཁྲིམས་དང་། མཁན་པོ་མེད་པའི་ཚུལ་ཁྲིམས་དང་། བྱ་བ་མེད་པའི་ཚུལ་ཁྲིམས་དང་། གདུང་བ་མེད་པའི་ཚུལ་ཁྲིམས་དང་། ཉོན་མོངས་པ་མེད་པའི་
ཚུལ་ཁྲིམས་དང་། མཐར་ཕྱིན་པའི་ཚུལ་ཁྲིམས་དང་། མཉམ་པའི་ཚུལ་ཁྲིམས་དང་ལྡན་ཞིང་། སྤོས་ཀྱི་འདའ་གུས་ལུས་ལ་བྱུག་པ་དང་། མཚོན་གྱིས་འདེབས་ཤིང་འཛུགས་པ་ལ་མཉམ་པར་བྱམས་སྡང་མེད་པར་
ཤོག་ཤིག །སེམས་ཅན་ཐམས་ཅད་བླ་ན་མེད་པའི་ཚུལ་ཁྲིམས་ཐོབ་པ་དང་། ཐེག་པ་ཆུང་ངུའི་ཚུལ་ཁྲིམས་མ་ཡིན་པ་ཐེག་པ་ཆེན་པོའི་ཚུལ་ཁྲིམས་དང་ལྡན་པར་ཤོག་ཤིག །སེམས་ཅན་ཐམས་ཅད་ཚུལ་ཁྲིམས་ཀྱི་ཕ་རོལ་དུ་ཕྱིན་
པ་དང་ལྡན་ཏེ། སངས་རྒྱས་བཅོམ་ལྡན་འདས་ཀྱི་ལྷུན་གྱིས་གྲུབ་པའི་ཚུལ་ཁྲིམས་དང་ལྡན་པར་ཤོག་ཤིག །སེམས་ཅན་ཐམས་ཅད་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་
ལ་གོམས་པར་ཤོག་ཤིག །སེམས་ཅན་ཐམས་ཅད་ཡོངས་སུ་མྱ་ངན་ལས་འདས་པ་ཆེན་པོའི་པད་མོ་དམ་པ་དང་ལྡན་ཞིང་། པད་མོའི་དྲི་བསུང་གིས་ཕྱོགས་བཅུར་ཡོངས་སུ་མདང་པར་ཤོག་ཤིག །སེམས་ཅན་ཐམས་ཅད་ཐེག་པ་ཆེན་
པོ་ཡོངས་སུ་མྱ་ངན་ལས་འདས་པ་བླ་ན་མེད་པའི་ཟས་བསུང་ཅན་དང་ལྡན་ཞིང་ཇི་ལྟར་བུང་བ་དག་མེ་ཏོག་གི་ཁ་དོག་དང་བསུང་ལ་མི་གནོད་པ་ལྟར་ཤོག་ཤིག །སེམས་ཅན་ཐམས་ཅད་ཡོན་ཏན་ཚད་མེད་པ་ལས་གྲུབ་པའི་ལུས་དང་ལྡན་
པར་ཤོག་ཤིག་ཅེས་སྨོན་ལམ་འདེབས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་སེམས་ཀྱིས་མེ་ཏོག་དང་སྤོས་ཀྱི་སྦྱིན་པ་བྱིན་པ་ན་རྟག་ཏུ་སྨོན་ལམ་འདི་དག་གདབ་པ་ལ་བརྟན་པར་བྱའོ། །རིགས་
ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་སེམས་ཀྱིས་ཁྲི་སྟན་དང་གདིང་བ་སྦྱིན་པ་བྱིན་པ་ན་འདི་ལྟར་སྨོན་ལམ་འདེབས་སོ། །བདག་གིས་སྦྱིན་པ་བྱིན་པ་འདི་སེམས་ཅན་ཐམས་ཅད་དང་ཐུན་མོང་དུ་གྱུར་

47-1-257b

ཅིག །དེའི་རྒྱུ་དེའི་རྐྱེན་གྱིས་སེམས་ཅན་ཐམས་ཅད་ལྷའི་ལྷ་ཉལ་བའི་ཁྲི་དང་ལྡན་པར་གྱུར་ཅིག །ཤེས་རབ་ཆེན་པོ་དང་ལྡན་ཞིང་བསམ་གཏན་བཞིའི་གནས་ལ་འདུག་པ་དང་། བྱང་ཆུབ་སེམས་དཔའ་ཉལ་བའི་ཁྲི་སྟན་ལ་ཉལ་བ་དང་། 
ཉན་ཐོས་དང་རང་སངས་རྒྱས་ཀྱི་ཁྲི་སྟན་ལ་མི་ཉལ་བ་དང་། ངན་པས་ཉལ་བའི་ཁྲི་སྟན་ཡོངས་སུ་སྤོང་བར་ཤོག་ཤིག །སེམས་ཅན་ཐམས་ཅད་ཤིན་དུ་བདེ་བར་ཉལ་ཞིང་། འཁོར་བའི་སྟན་ཡོངས་སུ་སྤངས་ཏེ། 
ཡོངས་སུ་མྱ་ངན་ལས་འདས་པ་སེང་གེའི་ཁྲི་སྟན་དང་ལྡན་པར་ཤོག་ཤིག །སེམས་ཅན་ཐམས་ཅད་ཁྲི་སྟན་དེ་ལ་འདུག་ནས་ཀྱང་དེ་མ་ཡིན་པའི་སེམས་ཅད་ཚད་མེད་པ་གཞན་ལ་ཡང་མངོན་པར་ཤེས་པ་སེང་གེ་རྣམ་པར་རོལ་བ་མངོན་དུ་སྟོན་
པར་ཤོག་ཤིག །སེམས་ཅན་ཐམས་ཅད་ཐེག་པ་ཆེན་པོའི་གཞལ་མེད་ཁང་ཆེན་པོ་འདི་ལ་གནས་ནས་སེམས་ཅན་ཐམས་ཅད་ལ་ཡང་སངས་རྒྱས་ཀྱི་རང་བཞིན་སྟོན་པར་ཤོག་ཤིག །སེམས་ཅན་ཐམས་ཅད་བླ་ན་མེད་པའི་ཁྲི་སྟན་ལ་འདུག་
ནས་འཇིག་རྟེན་གྱི་ཆོས་ཀྱིས་མི་འཕྲོགས་པར་ཤོག་ཤིག །སེམས་ཅན་ཐམས་ཅད་བཟོད་པའི་ཁྲི་སྟན་ཐོབ་ནས་འཁོར་བའི་བཀྲེས་གྲང་གི་མུ་གེ་ལས་བྲལ་བར་ཤོག་ཤིག །སེམས་ཅན་ཐམས་ཅད་འཇིགས་པ་མེད་པའི་ཁྲི་སྟན་ཐོབ་
ནས་ཉོན་མོངས་པའི་དགྲ་ཐམས་ཅད་སྤོང་བར་ཤོག་ཤིག །སེམས་ཅན་ཐམས་ཅད་རྣམ་པར་དག་པའི་ཁྲི་སྟན་ཐོབ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འབའ་ཤིག་ལ་བརྩོན་པར་ཤོག་ཤིག །སེམས་ཅན་
ཐམས་ཅད་དགེ་བ་ལ་གནས་པའི་ཁྲི་སྟན་ཐོབ་ནས་རྟག་ཏུ་དགེ་བའི་བཤེས་གཉེན་གྱིས་སྐྱོབ་པར་ཤོག་ཤིག །སེམས་ཅན་ཐམས་ཅད་གློ་གཡས་པས་ཉལ་བའི་ཁྲི་སྟན་ཐོབ་ནས་སངས་རྒྱས་རྣམས་ཀྱིས་མཛད་པའི་ཆོས་
ལ་གནས་པར་ཤོག་ཤིག །ཅེས་སྨོན་ལམ་འདེབས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་བྱམས་པའི་སེམས་ཀྱིས་ཁྲི་སྟན་དང་གདིང་བ་སྦྱིན་པ་བྱིན་པ་ན་དེ་ལྟར་སྨོན་ལམ་གདབ་པ་ལ་བརྟན་པར་

47-1-258a

བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་སེམས་ཀྱིས་ཁང་ཁྱིམ་གྱི་སྦྱིན་པ་བྱིན་པ་ན་འདི་ལྟར་སྨོན་ལམ་འདེབས་སོ། །བདག་གིས་སྦྱིན་པ་བྱིན་པ་འདི་སེམས་ཅན་ཐམས་
ཅད་དང་ཐུན་མོང་དུ་གྱུར་ཅིག །དེའི་རྒྱུ་དེའི་རྐྱེན་གྱིས་སེམས་ཅན་ཐམས་ཅད་ཐེག་པ་ཆེན་པོའི་ཁང་པར་གནས་ཤིང་དགེ་བའི་བཤེས་གཉེན་དག་སྤྱོད་པ་ལ་ནན་ཏན་དུ་སྤྱོད་པ་དང་། སྙིང་རྗེ་ཆེན་པོ་ལ་ནན་ཏན་དུ་བྱེད་པ་དང་། 
ཕ་རོལ་དུ་ཕྱིན་པ་དྲུག་ལ་ནན་ཏན་དུ་སྤྱོད་པ་དང་། ཡང་དག་པར་རྫོགས་པའི་སངས་རྒྱས་ཀྱི་མཛད་པ་ལ་སྤྱོད་པ་དང་། བྱང་ཆུབ་སེམས་དཔའ་ཐམས་ཅད་ཀྱིས་སྤྱད་པའི་ལམ་ལ་སྤྱོད་པ་དང་། ནམ་མཁའ་ལྟར་མཐའ་ཡས་
ཤིང་རྒྱ་ཆེ་བ་ལ་སྤྱོད་པར་ཤོག་ཤིག །སེམས་ཅན་ཐམས་ཅད་ཡང་དག་པའི་དྲན་པ་དང་ལྡན་ཞིང་ངན་པར་རྟོག་པ་ཡོངས་སུ་སྤོང་བར་ཤོག་ཤིག །སེམས་ཅན་ཐམས་ཅད་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ལ་
བདེ་བར་གནས་ཤིང་ཕྱིན་ཅི་ལོག་བཞི་ཡོངས་སུ་སྤོང་བར་ཤོག་ཤིག །སེམས་ཅན་ཐམས་ཅད་འཇིག་རྟེན་ལས་འདས་པའི་ཡི་གེ་དང་འབྲུ་འཛིན་པར་ཤོག་ཤིག །སེམས་ཅན་ཐམས་ཅད་བླ་ན་མེད་པ་ཐམས་ཅད་མཁྱེན་པའི་
ཡེ་ཤེས་ཀྱི་སྣོད་དུ་ངེས་པར་ཤོག་ཤིག །སེམས་ཅན་ཐམས་ཅད་བདུད་རྩིའི་ཁང་པར་འཇུག་པར་ཤོག་ཤིག །སེམས་ཅན་ཐམས་ཅད་ཐོག་མ་དང་། བར་མ་དང་། ཐ་མའི་སེམས་ཀུན་གྱིས་རྟག་ཏུ་ཡོངས་སུ་མྱ་ངན་ལས་འདས་
པའི་ཁང་པར་ཞུགས་པར་ཤོག་ཤིག །སེམས་ཅན་ཐམས་ཅད་མ་འོངས་པའི་དུས་སུ་བྱང་ཆུབ་སེམས་དཔའི་གཞལ་མེད་ཁང་དུ་རྟག་ཏུ་གནས་པར་ཤོག་ཤིག་ཅེས་སྨོན་ལམ་འདེབས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་
དཔའ་ཆེན་པོས་བྱམས་པའི་སེམས་ཀྱིས་གནས་པའི་ཁང་ཁྱིམ་སྦྱིན་པ་བྱིན་པ་ན་རྟག་ཏུ་སྨོན་ལམ་འདི་དག་བསྐྱེད་པ་ལ་བརྟན་པར་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་སེམས་ཀྱིས་མར་མེའི་སྣང་

47-1-258b

བ་སྦྱིན་པ་བྱིན་པ་ན་འདི་ལྟར་སྨོན་ལམ་འདེབས་སོ། །བདག་གིས་སྦྱིན་པ་བྱིན་པ་འདི་སེམས་ཅན་ཐམས་ཅད་དང་ཐུན་མོང་དུ་གྱུར་ཅིག །དེའི་རྒྱུ་དེའི་རྐྱེན་གྱིས་སེམས་ཅན་ཐམས་ཅད་ཚད་མེད་པའི་འོད་དང་ལྡན་ཞིང་སངས་རྒྱས་ཀྱི་ཆོས་ལ་བདེ་
བར་གནས་པར་ཤོག་ཤིག །སེམས་ཅན་ཐམས་ཅད་རྟག་ཏུ་སྣང་བས་ཀུན་དུ་གསལ་བར་ཤོག་ཤིག །སེམས་ཅན་ཐམས་ཅད་མདོག་དམ་པ་དང་ལྡན་ཏེ་ཕུལ་དུ་གྱུར་པའི་མདོག་འཚེར་བ་དང་ལྡན་པར་ཤོག་ཤིག །སེམས་ཅན་ཐམས་ཅད་
ཤིན་དུ་རྣམ་པར་དག་པའི་མིག་དང་ལྡན་ཏེ་ལྡོངས་པའི་རབ་རིབ་ཆོད་པར་ཤོག་ཤིག །སེམས་ཅན་ཐཾད་ཐམས་ཅད་མཁྱེན་པའི་ཡེ་ཤེས་ཀྱི་སྒྲོན་མ་དང་ལྡན་ཏེ། བདག་མེད་པ་དང་། སེམས་མེད་པ་དང་། གང་ཟག་མེད་པ་དང་། སྲོག་
མེད་པ་ལ་ཤིན་དུ་མཁས་པར་ཤོག་ཤིག །སེམས་ཅན་ཐམས་ཅད་སངས་རྒྱས་ཀྱི་རང་བཞིན་ཡོངས་སུ་དག་པ་ནམ་མཁའ་ལྟ་བུར་མཐོང་བར་ཤོག་ཤིག །སེམས་ཅན་ཐམས་ཅད་ཤིན་དུ་རྣམ་པར་དག་པའི་མིག་དང་ལྡན་ཏེ། ཕྱོགས་བཅུའི་འཇིག་
རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཀྱང་གསལ་བར་མཐོང་བར་ཤོག་ཤིག །སེམས་ཅན་ཐམས་ཅད་སངས་རྒྱས་ཀྱི་འོད་དང་ལྡན་ཏེ། ཕྱོགས་བཅུར་སྣང་བར་ཤོག་ཤིག །སེམས་ཅན་ཐམས་ཅད་ཐོགས་པ་མེད་པའི་མིག་དང་ལྡན་ཏེ། 
ཐམས་ཅད་ཀྱིས་སངས་རྒྱས་ཀྱི་རང་བཞིན་ཡོངས་སུ་དག་པ་མཐོང་བར་ཤོག་ཤིག །སེམས་ཅན་ཐམས་ཅད་ཡེ་ཤེས་ཆེན་པོའི་སྣང་བ་ཐོབ་ཅིང་མུན་པ་ཐམས་ཅད་དང་ལོག་སྲེད་ཅན་ཐམས་ཅད་བཅོམ་པར་ཤོག་ཤིག །
སེམས་ཅན་ཐམས་ཅད་ཚད་མེད་པའི་འོད་དང་ལྡན་ཞིང་ཚད་མེད་པའི་སངས་རྒྱས་ཀྱི་ཞིང་ཀུན་སྣང་བར་ཤོག་ཤིག །སེམས་ཅན་ཐམས་ཅད་ཐེག་པ་ཆེན་པོའི་སྒྲོན་མེ་འཛུགས་ཤིང་། ཐེག་པ་ཆུང་ངུ་གཉིས་ཀྱི་
སྒྲོན་མེ་སྤོང་བར་ཤོག་ཤིག །སེམས་ཅན་ཐམས་ཅད་སྣང་བའི་འོད་དང་ལྡན་ཞིང་མ་རིག་པའི་མུན་པ་བསལ་ནས་ཉི་མ་སྟོང་བས་ལྷག་པའི་ཀུན་དུ་སྣང་བའི་ཡོན་ཏན་དང་ལྡན་པར་ཤོག་ཤིག །སེམས་ཅན་ཐམས་ཅད་

47-1-259a

མེའི་འོད་ཀྱི་ནོར་བུ་ཞེས་བྱ་བའི་སྣང་བ་ཐོབ་ནས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་མུན་ནག་ཐམས་ཅད་བསལ་བར་ཤོག་ཤིག །སེམས་ཅན་ཐམས་ཅད་སྤྱན་ལྔ་དང་ལྡན་ཏེ། ཆོས་རྣམས་ཀྱི་
མཚན་ཉིད་རྟོགས་པ་དང་། སྟོན་པ་མི་དགོས་པར་རང་གིས་རིག་པར་ཤོག་ཤིག །སེམས་ཅན་ཐམས་ཅད་མ་རིག་པ་ལ་མི་ལྟ་བར་ཤོག་ཤིག །སེམས་ཅན་ཐམས་ཅད་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་འོད་
ཟེར་གྱིས་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡང་དག་པར་སྟོན་པར་ཤོག་ཤིག །ཅེས་སྨོན་ལམ་འདེབས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་སེམས་ཀྱིས་མར་མེའི་སྣང་བ་
སྤྱོད་པ་བྱིན་པ་ན་རྟག་ཏུ་སྨོན་ལམ་འདི་དག་བསྐྱེད་པ་ལ་བརྟན་པར་བྱའོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་རྩ་གཅིག་པ། རིགས་ཀྱི་བུ་ཉན་ཐོས་དང་། 
རང་སངས་རྒྱས་དང་། བྱང་ཆུབ་སེམས་དཔའ་དང་། སངས་རྒྱས་བཅོམ་ལྡན་འདས་རྣམས་ཀྱི་དགེ་བའི་རྩ་བར་འགྱུར་བའི་གཞི་ནི་བྱམས་པ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་
སེམས་ལ་ནན་ཏན་བྱེད་པ་ན་ཚད་མེད་པའི་དགེ་བའི་རྩ་བ་འདི་དག་སྐྱེ་བར་འགྱུར་རོ། །འདི་ལྟ་སྟེ། མི་སྡུག་པ་ལ་རྟོག་པ་དང་། དབུགས་ཕྱི་ནང་དུ་རྒྱུ་བ་བགྲང་བ་དང་། མི་རྟག་པ་དང་། སྐྱེ་བ་དང་། འགོག་པ་དང་། དྲན་པ་ཉེ་བར་གཞག་
པ་བཞི་དང་། ཐབས་མཁས་པ་བདུན་དང་། རྟོག་པའི་གནས་གསུམ་དང་། རྟེན་ཅིང་འབྲེལ་ཏེ་འབྱུང་བ་བཅུ་གཉིས་དང་། བདག་མེད་པ་ལ་སོགས་པ་རྟོག་པ་དང་། དྲོད་དང་། སྤྱི་བོ་དང་། བཟོད་པ་དང་། འཇིག་རྟེན་
མཆོག་གི་ཆོས་དང་། མཐོང་བའི་ལམ་དང་། བསྒོམ་པའི་ལམ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་གྱི་ཡན་ལག་བརྒྱད་

47-1-259b

དང་། བསམ་གཏན་བཞི་དང་། ཚད་མེད་པ་བཞི་དང་། རྣམ་པར་ཐར་པ་བརྒྱད་དང་། མཆོག་གི་གནས་བརྒྱད་དང་། ཐམས་ཅད་འཇུག་པ་བཅུ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རྩོད་པ་མེད་པའི་ཏིང་ངེ་འཛིན་
དང་། ཕ་རོལ་པོའི་སེམས་ཤེས་པའི་ཡེ་ཤེས་དང་། མངོན་པར་ཤེས་པ་རྣམས་དང་། ཐོག་མའི་མཐའ་ཤེས་པའི་ཡེ་ཤེས་དང་། ཉན་ཐོས་ཀྱི་ཡེ་ཤེས་དང་། རང་སངས་རྒྱས་ཀྱི་ཡེ་ཤེས་དང་། བྱང་ཆུབ་སེམས་དཔའི་ཡེ་ཤེས་དང་། 
སངས་རྒྱས་ཀྱི་ཡེ་ཤེས་ལ་སོགས་པ་ཆོས་དེ་དག་ཐམས་ཅད་ཀྱི་གཞིར་འགྱུར་བ་ནི་བྱམས་པ་ཡིན་ནོ། །རིགས་ཀྱི་བུ་དེ་བས་ན་བྱམས་པ་ནི་ཡང་དག་པའི་བདེན་པ་སྟེ་བརྫུན་པ་མ་ཡིན་ནོ། །རིགས་ཀྱི་བུ་ཅི་སྟེ་གཅིག་གིས་དགེ་བའི་རྩ་བ་
ཐམས་ཅད་ཀྱི་གཞིར་འགྱུར་བ་གང་ཡིན་ཞེས་དྲིས་ན་བྱམས་པ་ཡིན་ནོ་ཞེས་གྱིས་ཤིག །དེ་བས་ན་ཡང་དག་པ་སྟེ་བརྫུན་པ་མ་ཡིན་ནོ། །རིགས་ཀྱི་བུ་དགེ་བར་འགྱུར་བ་ནི་ཡང་དག་པར་སེམས་པའོ། །ཡང་དག་པར་སེམས་པ་ནི་
བྱམས་པའོ། །བྱམས་པ་ནི་དེ་བཞིན་གཤེགས་པའོ། །བྱམས་པ་ནི་ཐེག་པ་ཆེན་པོའོ། །ཐེག་པ་ཆེན་པོ་ནི་བྱམས་པའོ། །བྱམས་པ་ནི་དེ་བཞིན་གཤེགས་པའོ། །རིགས་ཀྱི་བུ་བྱམས་པ་ནི་བྱང་ཆུབ་ཀྱི་
ལམ་མོ། །བྱང་ཆུབ་ཀྱི་ལམ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་བྱམས་པའོ། །རིགས་ཀྱི་བུ་བྱམས་པ་ནི་ཚངས་པ་ཆེན་པོའོ། །ཚངས་པ་ཆེན་པོ་ནི་བྱམས་པའོ། །བྱམས་པ་ནི་དེ་བཞིན་
གཤེགས་པའོ། །རིགས་ཀྱི་བུ་བྱམས་པ་ནི་སེམས་ཅན་ཐམས་ཅད་ཀྱི་ཕ་མ་ལྟ་བུ་ཡིན་ནོ། །ཕ་མ་ནི་བྱམས་པའོ། །བྱམས་པ་ནི་དེ་བཞིན་གཤེགས་པའོ། །རིགས་ཀྱི་བུ་བྱམས་པ་ནི་བསམ་གྱིས་མི་ཁྱབ་པའོ། །བསམ་གྱིས་མི་
ཁྱབ་པ་ནི་སངས་རྒྱས་ཀྱི་སྤྱོད་ཡུལ་ལོ། །སངས་རྒྱས་རྣམས་ཀྱི་སྤྱོད་ཡུལ་ནི་བྱམས་པའོ། །དེ་བས་ན་བྱམས་པ་ནི་དེ་བཞིན་གཤེགས་པ་ཡིན་པར་རིག་པར་བྱའོ། །རིགས་ཀྱི་བུ་བྱམས་པ་ནི་སེམས་ཅན་གྱི་སངས་རྒྱས་ཀྱི་རང་བཞིན་ནོ། །དེ་ལྟར་སངས་

47-1-260a

རྒྱས་ཀྱི་རང་བཞིན་དེ་ཡང་ཡུན་རིང་པོ་ནས་ཉོན་མོངས་པས་ཟིལ་གྱིས་མནན་ཏེ། བསྒྲིབས་པས་སེམས་ཅན་རྣམས་ཀྱིས་མ་མཐོང་ངོ་། །དེ་ལྟར་སངས་རྒྱས་ཀྱི་རང་བཞིན་ནི་བྱམས་པའོ། །བྱམས་པ་ནི་དེ་བཞིན་གཤེགས་
པའོ། །རིགས་ཀྱི་བུ་བྱམས་པ་ནི་སྟོང་པ་ཆེན་པོའོ། །སྟོང་པ་ཆེན་པོ་ནི་བྱམས་པ་ཆེན་པོའོ། །བྱམས་པ་ནི་དེ་བཞིན་གཤེགས་པའོ། །རིགས་ཀྱི་བུ་བྱམས་པ་ནི་ནམ་མཁའོ། །ནམ་མཁའ་ནི་བྱམས་པའོ། །བྱམས་པ་ནི་དེ་བཞིན་གཤེགས་
པའོ། །རིགས་ཀྱི་བུ་བྱམས་པ་ནི་རྟག་པའོ། །རྟག་པ་ནི་ཆོས་སོ། །ཆོས་ནི་དགེ་འདུན་ནོ། །དགེ་འདུན་ནི་བྱམས་པའོ། །བྱམས་པ་ནི་དེ་བཞིན་གཤེགས་པའོ། །རིགས་ཀྱི་བུ་བྱམས་པ་ནི་བདེ་བའོ། །བདེ་བ་ནི་ཆོས་སོ། །ཆོས་ནི་དགེ་འདུན་ནོ། །དགེ་
འདུན་ནི་བྱམས་པའོ། །བྱམས་པ་ནི་དེ་བཞིན་གཤེགས་པའོ། །རིགས་ཀྱི་བུ་བྱམས་པ་ནི་ཡོངས་སུ་དག་པའོ། །ཡོངས་སུ་དག་པ་ནི་ཆོས་སོ། །ཆོས་ནི་དགེ་འདུན་ནོ། །དགེ་འདུན་ནི་བྱམས་པའོ། །བྱམས་པ་ནི་དེ་བཞིན་གཤེགས་པའོ། །
རིགས་ཀྱི་བུ་བྱམས་པ་ནི་བདག་ཅེས་བྱའོ། །བདག་ནི་ཆོས་སོ། །ཆོས་ནི་དགེ་འདུན་ནོ། །དགེ་འདུན་ནི་བྱམས་པའོ། །བྱམས་པ་ནི་དེ་བཞིན་གཤེགས་པའོ། །རིགས་ཀྱི་བུ་བྱམས་པ་ནི་བདུད་རྩིའོ། །བདུད་རྩི་ནི་བྱམས་པའོ། །
བྱམས་པ་ནི་སངས་རྒྱས་ཀྱི་རང་བཞིན་ནོ། །སངས་རྒྱས་ཀྱི་རང་བཞིན་ནི་ཆོས་སོ། །ཆོས་ནི་དགེ་འདུན་ནོ། །དགེ་འདུན་ནི་བྱམས་པའོ། །བྱམས་པ་ནི་དེ་བཞིན་གཤེགས་པའོ། །རིགས་ཀྱི་བུ་བྱམས་པ་ནི་བྱང་ཆུབ་སེམས་དཔའ་ཐམས་ཅད་ཀྱི་བླ་ན་མེད་
པའི་བྱང་ཆུབ་བོ། །བྱང་ཆུབ་ནི་བྱམས་པའོ། །བྱམས་པ་ནི་དེ་བཞིན་གཤེགས་པའོ། །རིགས་ཀྱི་བུ་བྱམས་པ་ནི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཚད་མེད་པའི་སྤྱོད་ཡུལ་ལོ། །ཚད་མེད་པའི་སྤྱོད་ཡུལ་ནི་བྱམས་པའོ། །དེ་བས་ན་བྱམས་པ་ནི་
དེ་བཞིན་གཤེགས་པ་ཡིན་པར་རིག་པར་བྱའོ། །རིགས་ཀྱི་བུ་བྱམས་པ་ནི་མི་རྟག་པའོ། །མི་རྟག་པ་ནི་བྱམས་པའོ། །བྱམས་པ་འདི་ནི་ཉན་ཐོས་ཀྱི་བྱམས་པ་ཡིན་པར་རིག་པར་བྱའོ། །རིགས་ཀྱི་བུ་བྱམས་པ་དེ་སྡུག་བསྔལ་བ་ཡིན་ན་སྡུག་བསྔལ་བ་ནི་བྱམས་

47-1-260b

པ་ཡིན་ནོ། །དེ་བས་ན་བྱམས་པ་དེ་ནི་ཉན་ཐོས་ཀྱི་བྱམས་པ་ཡིན་པར་རིག་པར་བྱའོ། །རིགས་ཀྱི་བུ་བྱམས་པ་ཡོངས་སུ་མ་དག་པ་ཡིན་ན་ཡོངས་སུ་མ་དག་པའི་བྱམས་པའོ། །དེ་བས་ན་བྱམས་པ་དེ་ནི་ཉན་ཐོས་ཀྱི་བྱམས་པ་ཡིན་པར་རིག་པར་
བྱའོ། །རིགས་ཀྱི་བུ་བྱམས་པ་ནི་བདག་མེད་པ་ཡིན་ནོ། །བདག་མེད་པ་ནི་བྱམས་པའོ། །དེ་བས་ན་བྱམས་པ་དེ་ནི་ཉན་ཐོས་ཀྱི་བྱམས་པའོ། །རིགས་ཀྱི་བུ་བྱམས་པ་ནི་མི་བདེན་པའོ། །མི་བདེན་པ་ནི་བྱམས་པའོ། །རིགས་ཀྱི་བུ་བྱམས་པ་སྦྱིན་
པའི་ཕ་རོལ་དུ་ཕྱིན་པ་མ་ཡིན་ན་སྦྱིན་པའི་བྱམས་པ་ནི་མ་ཡིན་ཏེ། བྱམས་པ་དེ་ནི་ཉན་ཐོས་ཀྱི་བྱམས་པའོ། །ཤེས་རབ་ཀྱི་ཕ་རོལ་དུ་ཕྱིན་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །རིགས་ཀྱི་བུ་བྱམས་པ་གང་ཞིག་སེམས་ཅན་ལ་
ཕན་མི་ཐོགས་ན་བྱམས་པ་དེ་ནི་ཉན་ཐོས་ཀྱི་བྱམས་པའོ། །རིགས་ཀྱི་བུ་བྱམས་པ་གང་ཞིག་མཚན་ཉིད་གཅིག་པའི་ལམ་ལ་མ་ཞུགས་ན་བྱམས་པ་དེ་ནི་ཉན་ཐོས་ཀྱི་བྱམས་པའོ། །རིགས་ཀྱི་བུ་བྱམས་པ་གང་ཞིག་ཆོས་ཐམས་ཅད་མངོན་པར་
མ་རྟོགས་ན་བྱམས་པ་དེ་ནི་ཉན་ཐོས་ཀྱི་བྱམས་པའོ། །རིགས་ཀྱི་བུ་བྱམས་པ་གང་ཞིག་དེ་བཞིན་གཤེགས་པའི་སྙིང་པོ་མི་མཐོང་ན་བྱམས་པ་དེ་ནི་ཉན་ཐོས་ཀྱི་བྱམས་པའོ། །རིགས་ཀྱི་བུ་བྱམས་པ་གང་ཞིག་ཆོས་ཐམས་ཅད་ཡོད་པའི་མཚན་
ཉིད་དུ་མི་མཐོང་ན་བྱམས་པ་དེ་ནི་ཉན་ཐོས་ཀྱི་བྱམས་པའོ། །རིགས་ཀྱི་བུ་ཅི་སྟེ་བྱམས་པ་ཟག་པ་དང་བཅས་ན་ཟག་པ་དང་བཅས་པའི་བྱམས་པ་དེ་ནི་ཉན་ཐོས་ཀྱི་བྱམས་པའོ། །རིགས་ཀྱི་བུ་ཅི་སྟེ་བྱམས་པ་འདུས་བྱས་དང་བཅས་ན་
འདུས་བྱས་དང་བཅས་པའི་བྱམས་པ་དེ་ནི་ཉན་ཐོས་ཀྱི་བྱམས་པའོ། །རིགས་ཀྱི་བུ་ཅི་སྟེ་བྱམས་པ་ས་དང་པོ་ལ་མི་གནས་ན་ས་དང་པོའི་བྱམས་པ་མ་ཡིན་ཏེ། དེ་ནི་ཉན་ཐོས་ཀྱི་བྱམས་པ་ཡིན་པར་རིག་པར་བྱའོ། །རིགས་ཀྱི་བུ་ཅི་སྟེ་བྱམས་པས་སངས་རྒྱས་
ཀྱི་སྟོབས་བཅུ་དང་། མི་འཇིགས་པ་བཞི་ཐོབ་པར་མི་ནུས་ན་བྱམས་པ་དེ་ནི་ཉན་ཐོས་ཀྱི་བྱམས་པ་ཡིན་པར་རིག་པར་བྱའོ། །རིགས་ཀྱི་བུ་བྱམས་པ་གང་གིས་དགེ་སྦྱོང་གི་འབྲས་བུ་ཐོབ་པར་འགྱུར་བའི་བྱམས་པ་དེ་ནི་ཉན་ཐོས་ཀྱི་བྱམས་པ་ཡིན་པར་རིག་

47-1-261a

པར་བྱའོ། །རིགས་ཀྱི་བུ་བྱམས་པ་གང་ཞིག་ཡོད་པ་དང་། མེད་པ་དང་། ཡོད་པ་འང་མ་ཡིན་པ་དང་བཅས་པ་དེ་ནི་ཉན་ཐོས་དང་རང་སངས་རྒྱས་ལ་སོགས་པ་ཐམས་ཅད་ཀྱིས་དཔག་ནུས་པ་མ་ཡིན་ནོ། །རིགས་ཀྱི་བུ་ཅི་སྟེ་བྱམས་པ་བསམ་
གྱིས་མི་ཁྱབ་ན་ཆོས་ཀྱང་བསམ་གྱིས་མི་ཁྱབ་བོ། །སངས་རྒྱས་ཀྱི་རང་བཞིན་ཡང་བསམ་གྱིས་མི་ཁྱབ་བོ། །དེ་བཞིན་གཤེགས་པ་ཡང་བསམ་གྱིས་མི་ཁྱབ་བོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་མྱ་
ངན་ལས་འདས་པ་ལ་གནས་པ་ནི་བྱམས་པ་དེ་ལྟ་བུ་དག་ལ་ནན་ཏན་བྱེད་དོ། །གཉིད་ཀྱི་བདེ་བ་ལ་གནས་ཀྱང་རྟག་ཏུ་བརྩོན་འགྲུས་རྩོམ་པས་གཉིད་ཀྱིས་ཟིལ་གྱིས་མི་ནོན་ནོ། །རྟག་ཏུ་སད་མོད་ཀྱི་གཉིད་མེད་པའི་ཕྱིར་སད་པའང་མེད་དོ། །
གཉིད་ཀྱི་ནང་ན་ལྷ་རྣམས་ཡོངས་སུ་བསྲུང་མེད་ཀྱི་སྡིག་པ་མི་སྤྱོད་པས་ན་བསྲུང་བའང་མེད་དོ། །གཉིད་དང་ཡོངས་སུ་བྲལ་བས་རྨི་ལམ་ངན་པ་འམ། མི་དགེ་བར་འགྱུར་བ་གང་ཡང་མེད་དོ། །ཚངས་པའི་ལྷར་སྐྱེས་མོད་ཀྱི་དབང་དུ་གྱུར་པས་
ན་སྐྱེ་བ་འང་མེད་དོ། །རིགས་ཀྱི་བུ་གང་བྱམས་པ་ལ་ནན་ཏན་བྱེད་པ་དེ་ནི་དེ་ལྟ་བུའི་ཡོན་ཏན་ཚད་མེད་པ་བསམ་གྱིས་མི་ཁྱབ་པ་དང་ལྡན་པར་འགྱུར་རོ། །རིགས་ཀྱི་བུ་ཡོངསུ་མྱ་ངན་འདས་པའི་མདོ་སྡེ་དམ་པ་འདི་ཡང་དེ་ལྟ་བུའི་ཡོན་ཏན་ཚད་
མེད་པ་བསམ་གྱིས་མི་ཁྱབ་པ་དང་ལྡན་ནོ། །སངས་རྒྱས་བཅོམ་ལྡན་འདས་ཀྱང་དེ་ལྟ་བུའི་ཡོན་ཏན་ཚད་མེད་པ་མཐའ་ཡས་པ་དང་ལྡན་ནོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཅི་སྟེ་བྱང་ཆུབ་སེམས་དཔའ་
སེམས་དཔའ་ཆེན་པོ་དག་ཇི་ཙམ་ཡིད་ལ་བགྱིད་པ་དེ་དག་ཐམས་ཅད་ཡང་དག་པར་བདེན་པ་ལགས་ལ། ཉན་ཐོས་དང་། རང་སངས་རྒྱས་ཀྱི་བདེན་པ་ཡང་དག་པ་མ་ལགས་ན། ཅིའི་སླད་དུ་བྱང་ཆུབ་སེམས་དཔའ་སེམས་དཔའ་ཆེན་པོའི་མཐུ་སྟོབས་ཀྱིས་སེམས་ཅན་
ཐམས་ཅད་མཚུངས་པར་བདེ་བ་མྱོང་བར་མི་མཛད། དེ་ལྟར་སེམས་ཅན་ཐམས་ཅད་ཡང་དག་པར་བདེ་བ་མི་མྱོང་བས་ན་བྱང་ཆུབ་སེམས་དཔའི་བྱམས་པའི་སེམས་ལ་ནན་ཏན་བགྱིད་པ་ནི་ཕན་པ་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་

47-1-261b

སེམས་དཔའི་བྱམས་པ་ནི་ཕན་པར་མི་འགྱུར་བ་མ་ཡིན་ཏེ། རིགས་ཀྱི་བུ་སེམས་ཅན་ཁ་ཅིག་ནི་ངེས་པར་སྡུག་བསྔལ་མྱོང་བ་ཡང་ཡོད། ཁ་ཅིག་ནི་མི་མྱོང་བ་ཡང་ཡོད་དོ། །སེམས་ཅན་གང་ངེས་པར་སྡུག་བསྔལ་མྱོང་བར་འགྱུར་བ་ལོག་
སྲེད་ཅན་དག་ལ་ནི་བྱང་ཆུབ་སེམས་དཔའི་བྱམས་པས་ཕན་པར་མི་འགྱུར་རོ། །གང་སྡུག་བསྔལ་མྱོང་བ་མ་ངེས་པ་དག་ལ་ནི་བྱང་ཆུབ་སེམས་དཔའི་བྱམས་པ་ཕན་པར་འགྱུར་ཏེ། སེམས་ཅན་དེ་དག་རབ་ཏུ་བདེ་བ་མྱོང་བར་བྱེད་དོ། །རིགས་ཀྱི་བུ་འདི་
ལྟ་སྟེ་དཔེར་ན་མི་ཞིག་རྒྱང་རིང་པོ་ན་སེང་གེ་དང་། སྟག་དང་། སྤྱང་ཀི་དང་། སྲིན་པོ་དང་། ཡི་དགས་ལ་སོགས་པ་མཐོང་ན་རང་བཞིན་གྱིས་འཇིགས་སྐྲག་པ་སྐྱེའོ། །ཅི་སྟེ་མཚན་མོ་གཡང་ས་མཐོང་ན་ཡང་དེ་བཞིན་དུ་འཇིགས་པ་སྐྱེའོ། །
རིགས་ཀྱི་བུ་མི་དེ་རང་བཞིན་གྱིས་འཇིགས་པ་སྐྱེ་བ་དང་འདྲ་བར་སེམས་ཅན་གང་བྱམས་པ་ལ་ནན་ཏན་བྱེད་པ་མཐོང་ན། རང་བཞིན་གྱིས་བདེ་བ་མྱོང་བར་འགྱུར་རོ། །རིགས་ཀྱི་བུ་དོན་དེ་ལྟ་བས་ན་བྱང་ཆུབ་སེམས་དཔའ་བྱམས་པ་ལ་ནན་ཏན་བྱེད་
པ་ནི་ཡང་དག་པར་ཡིད་ལ་བྱེད་པ་སྟེ། ཕན་པར་མི་འགྱུར་བ་ཡང་མ་ཡིན་ནོ། །རིགས་ཀྱི་བུ་ངས་ནི་བྱམས་པ་དེ་ལ་རྣམ་པ་ཚད་མེད་པ་བཤད་དོ། །འདི་ལྟ་སྟེ་མངོན་པར་ཤེས་པ་དག་གོ། །རིགས་ཀྱི་བུ་དཔེར་ན་ལྷ་སྦྱིན་གྱིས་རྒྱལ་པོ་མ་སྐྱེས་
དགྲ་ལ་དེ་བཞིན་གཤེགས་པ་བསད་པར་བསྟན་ཏེ། དེའི་ཚེ་ང་རྒྱལ་པོའི་ཁབ་ཏུ་བསོད་སྙོམས་མཐར་གྱིས་ལེན་པར་ཞུགས་པ་ན་རྒྱལ་པོ་མ་སྐྱེས་དགྲས་ནོར་བསྲུང་བའི་བལ་གླང་སྨྱོས་པ་བཏང་ནས་ང་དང་སློབ་མར་བཅས་པ་གསོད་ཏུ་བཅུག་
གོ། །དེའི་ཚེ་བལ་གླང་དེ་དག་གིས་སེམས་ཅན་ཚད་མེད་པ་བརྒྱ་སྟོང་རྫིས་ཏེ་བསད་པས་སེམས་ཅན་ཤི་བ་དེ་དག་གི་ཁྲག་གིས་ཕོག་པས་ལྷག་པར་སྨྱོས་པར་ཡང་གྱུར་ལ། ངའི་སློབ་མ་ངུར་སྨྲིག་གྱོན་པ་ཡང་ཁྲག་སྙམ་དུ་མཐོང་ནས། བལ་གླང་དེ་དག་
དོར་ཏེ་བྱུང་ངོ་། །ངའི་སློབ་མའི་ནང་ན་འདོད་པ་དང་མ་བྲལ་བ་ཐམས་ཅད་ནི་ཕྱོགས་བཞིར་བྲོས་ཏེ། ཚེ་དང་ལྡན་པ་དགའ་བོ་འབའ་ཤིག་མ་གཏོགས་སོ། །དེའི་ཚེ་དེའི་དུས་ན་རྒྱལ་པོའི་ཁབ་ན་གནས་པའི་མི་ཐམས་ཅད་སྐད་འཐུན་པས་ངུས་ཏེ། མཆི་

47-1-262a

མ་བླགས་ནས་འདི་སྐད་ཅེས་སྨྲས་སོ། །ཀྱི་ཧུད་དེ་བཞིན་གཤེགས་པ་ནི་མེད་པར་གྱུར་ཏོ། །དེ་ཅིའྀ་སླད་དུ་དེ་བཞིན་གཤེགས་པ་འདི་ལྟར་ནང་ཅིག་ཏུ་ཞིག་པར་གྱུར་ཅེས་སྨྲས་སོ། །དེའི་ཚེ་ན་ལྷ་སྦྱིན་ངོ་མཚར་སྐྱེས་ནས། དགེ་སྦྱོང་
གཽ་ཏ་མ་མེད་པར་གྱུར་པ་ནི་ལེགས་སོ། །དེང་ཕན་ཅད་ནི་ཡང་དག་པ་མེད་པར་གྱུར་ཏེ་གྲོས་ལེགས་པར་སྨོན་པ་བཞིན་དུ་གྲུབ་པར་གྱུར་ཏོ་ཞེས་སྨྲས་སོ། །རིགས་ཀྱི་བུ་དེའི་ཚེ་ན་ངས་ནོར་སྲུང་བལ་གླང་གདུལ་བའི་ཕྱིར་བྱམས་པ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ནས་ཕྱག་བརྐྱང་སྟེ་བསྟན་པས་སོར་མོ་ལྔ་ལ་སེང་གེ་ལྔ་སྣང་བར་གྱུར་ཏོ། །བལ་བླང་གིས་དེ་མཐོང་ནས་ཤིན་དུ་སྐྲག་པས་བཤང་གཅིང་ཡང་ཤོར་ཏེ་ལུས་ས་ལ་བརྡབས་ནས་ངའི་ཞབས་ལ་གུས་པར་ཕྱག་བྱས་སོ། །རིགས་
ཀྱི་བུ་དེའི་ཚེ་ན་ངའི་སོར་མོ་ལྔ་ལ་ཡང་དག་པར་སེང་གེ་མེད་ཀྱང་བྱམས་པ་བསྒོམས་པའི་དགེ་བའི་རྩ་བའི་མཐུས་དེ་དག་བཏུལ་བར་གྱུར་ཏོ། །རིགས་ཀྱི་བུ་གཞན་ཡང་ང་ཡོངས་སུ་མྱ་ངན་ལས་འདའ་ཀར་རྩྭ་མཆོག་གི་གྲོང་ཁྱེར་དུ་གཤེགས་པ་ན་གྱད་ལྔ་
བརྒྱ་ཙམ་ཞིག་ལམ་ཀ་ན་ལམ་འཆོས་ཤིང་ཕྱག་དར་དང་ཆག་ཆག་བྱེད་དོ། །ལམ་ཀ་ན་ཕ་བོང་ཞིག་ཡོད་པ་ལ་གྱད་རྣམས་ལོག་སྟེ། མཐུ་སྟོབས་ཅི་ཡོད་པས་བཏེག་ཀྱང་དོར་མ་ནུས་སོ། །དེའི་ཚེ་ན་གྱད་རྣམས་ལ་ཐུགས་བརྩེ་བའི་ཕྱིར་བྱམས་
པའི་ཐུགས་བསྐྱེད་ནས། ཞབས་ཀྱི་མཐེ་བོས་ཕ་བོང་དེ་གནམ་འཕང་དུ་བོར་ནས། ཕྱག་གིས་བཟུང་སྟེ་ཕྱག་མཐིལ་གཡས་པར་བཞག་གོ། །བུས་པ་ཙམ་གྱིས་ཞིབ་མོར་ཡང་གྱུར་ལ་ཕྱིར་ཡང་བསྡུས་ཏེ་བསྒོངས་པར་གྱད་རྣམས་ཀྱིས་
མཐོང་བར་བྱས་སོ། །གྱད་དེ་དག་གི་ང་རྒྱལ་དང་དྲེགས་པའི་སེམས་ཀྱང་ཞི་བར་བྱས་ནས་ཆོས་རྣམ་པ་སྣ་ཚོགས་ཀྱང་བསྟན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་བཅུག་གོ། །རིགས་ཀྱི་བུ་དེའི་ཚེ་ན་དེ་བཞིན་
གཤེགས་པས་ཡང་དག་པར་ན་ཞབས་ཀྱི་མཐེ་བོས་ཕ་བོང་དེ་གནམ་འཕང་དུ་བོར་བ་འམ། ཕྱག་མཐིལ་གཡས་པར་བཞག་པ་འམ། ཞིབ་མོར་བྱས་པ་འམ། ཕྱིར་གོང་བུར་བསྒོངས་པ་ཡང་མེད་མོད་ཀྱི། རིགས་ཀྱི་བུ་དེ་ཡང་བྱམས་པའི་དགེ་བའི་རྩ་བའི་

47-1-262b

མཐུ་ལས་ན། གྱད་རྣམས་ཀྱིས་དངོས་པོ་དེ་ལྟ་བུ་དག་མཐོང་བར་རིག་པར་བྱའོ། །རིགས་ཀྱི་བུ་གཞན་ཡང་ལྷོ་ཕྱོགས་བེ་ཏ་ལའི་ཡུལ་ན། གྲོང་ཁྱེར་ཆེན་པོ་ཤུ་པ་ལ་ཞེས་བྱ་བ་ན་ཁྱིམ་བདག་འདོད་པ་ཞེས་བྱ་བ་སྔོན་འདས་པའི་དུས་ན་སངས་རྒྱས་
ཚད་མེད་པ་སྙེད་ལ་དགེ་བའི་རྩ་བ་བསྐྱེད་པ་འགྲོ་བ་མང་པོའི་གཙོ་བོར་གྱུར་པ་ཞིག་ཡོད་དོ། །རིགས་ཀྱི་བུ་གྲོང་ཁྱེར་ཆེན་པོ་དེ་ན་གནས་པའི་མི་ཐམས་ཅད་མུ་སྟེགས་ཅན་ལ་ཕྱོགས་ཏེ། གཅེར་བུ་པ་དག་གི་གཡོག་བྱེད་དོ། །དེའི་ཚེ་དེའི་དུས་ན་ཁྱིམ་
བདག་དེ་གདུལ་བའི་ཕྱིར་རྒྱལ་པོའི་ཁབ་ནས་གྲོང་ཁྱེར་དེར་གཤེགས་པར་ཆས་སོ། །དེའི་བར་ནི་དཔག་ཚད་དྲུག་བཅུ་རྩ་ལྔ་ཞིག་ཡོད་དེ། དེ་ན་གནས་པའི་སེམས་ཅན་དག་གདུལ་བའི་ཕྱིར་བཅོམ་ལྡན་འདས་འཁོར་དང་བཅས་ཏེ་གོམ་
པས་དལ་གྱིས་གཤེགས་སོ། །དེའི་ཚེ་གྲོང་ཁྱེར་ཤུ་པ་ལ་ཞེས་བྱ་བ་ན་གནས་པའི་གཅེར་བུ་པ་རྣམས་ང་འོང་ངོ་ཞེས་ཐོས་ནས། དེ་དག་སེམས་ཀྱིས་འདི་སྙམ་དུ་བསམས་པར་གྱུར་ཏོ། །གལ་ཏེ་དགེ་སྦྱོང་གཽ་ཏ་མ་འདིར་འོངས་ནས་འདི་ན་གནས་
པ་ཐམས་ཅད་བདག་ཅག་ཀྱང་སྤོང་ཞིང་ཡོ་བྱད་མི་སྟེར་ཏེ། དབུལ་ཕོངས་པར་གྱུར་ན། བདག་ཅག་ཅིས་འཚོ་བར་འགྱུར་སྙམ་བསམས་ནས། གཅེར་བུ་པ་རྣམས་སོ་སོར་ཁ་བཀྲམ་སྟེ། གྲོང་ཁྱེར་དེ་ན་གནས་པའི་མི་རྣམས་ལ་འདི་སྐད་ཅེས་བསྒོའོ། །
དགེ་སྦྱོང་གཽ་ཏ་མ་ཞེས་བྱ་བ་དེ་འདིར་འོང་ཞེས་གྲག་གིས། དགེ་སྦྱོང་དེ་ནི་ཕ་དང་མ་ཡང་སྤངས་ནས་གར་ཡང་རྒྱུ་ཞིང་འགྲོ་སྟེ། གང་ནས་གང་དུ་ཕྱིན་པའི་གནས་དེ་དང་དེ་དག་ཏུ་ལོ་ཉེས་པ་དང་མུ་གེ་འབྱུང་བར་བྱེད། ནད་མང་བ་དང་འཆི་བ་མང་
བར་བྱེད་དེ། དེ་ལས་ཐར་བ་ཡང་མེད་དོ། །དགེ་སྦྱོང་གཽ་ཏ་མ་མ་རུངས་པ་དེ་ནི་འཁོར་ཡང་སྲིན་པོ་ཡི་དགས་མ་རུངས་པ་ཤ་སྟག་ཁྲིད་ཅིང་འོང་ངོ་། །དེ་ལ་ནི་ཕ་ཡང་མེད། མ་ཡང་མེད་དེ། དབུལ་ཕོངས་པས་ཆེད་དུ་འཁོར་འདོད་པའི་ཕྱིར་
འོང་ངོ་། །དེས་སྟོན་ཅིང་འཆད་པ་ཡང་བརྫུན་འབའ་ཤིག་ཏུ་ཟད་དེ་གང་དུ་ཕྱིན་ཀྱང་ཐོག་མ་ནས་བདེ་བ་དང་སྐྱིད་པ་མེད་དོ་ཞེས་བསྒྲགས་པས། དེ་དག་གིས་དེ་སྐད་ཐོས་ནས་ཤིན་ཏུ་འཇིགས་སྐྲག །

47-1-263a

སྟེ། གཅེར་བུ་པའི་རྐང་པ་ལ་སྤྱི་བོས་ཕྱག་འཚལ་ནས་ཕྱིར་འདི་སྐད་ཅེས་སྨྲས་སོ། །སྟོན་པ་ཆེན་པོ་བདག་ཅག་གིས་ཐབས་ཅི་བྱས་ན། དགེ་སྦྱོང་གཽ་ཏ་མ་འདིར་མི་འོང་བར་འགྱུར། གཅེར་བུ་པས་སྨྲས་པ། དགེ་སྦྱོང་གཽ་
ཏ་མ་ནི་རང་བཞིན་གྱིས་ནགས་ཚལ་དང་། ཆུ་མིག་དང་། འབབ་ཆུ་ལ་དགའ་བའི་རིགས་ཀྱིས་གྲོང་ཕྱི་ན་ཡོད་པ་ཐམས་ཅད་བཅད་དེ་མེད་པར་བྱ་དགོས་ཀྱིས། ཁྱེད་རྣམས་སོ་སོ་ནས་གྲོང་ཁྱེར་གྱི་ཕྱི་རོལ་དུ་དེང་ལ་སྐྱེད་ཤིང་
གཅིག་ཀྱང་མ་ལུས་པར་ཆོད་ཅིག །ཆུ་མིག་དང་། ཁྲོན་པ་དང་། འབབ་ཆུ་ཀུན་ཡང་མི་གཙང་བ་དང་། ངན་སྐྱུགས་ཀྱིས་ཁོང་ཤིག །ཕྱིར་ལོག་ལ་གྲོང་ཁྱེར་གྱི་སྒོ་དམ་དུ་བཅད་ལ་དགྲ་ཆ་བཤམས་ཏེ་གྲོང་ཁྱེར་བསྲུངས་ལ་ཅི་
ནས་ཀྱང་མི་ཆུད་པར་བྱའོ། །གལ་ཏེ་གནས་འདིར་མ་ཆུད་ན་ཁྱེད་ཀྱང་གདོད་བདེ་བར་འགྱུར་རོ། །བདག་ཅག་ཀྱང་ཅི་ནུས་ཀྱིས་དགེ་སྦྱོང་གཽ་ཏ་མ་ཕྱིར་བཟློག་པའི་ཆོ་ག་བྱའོ་ཞེས་སྨྲས་ནས་དེ་དག་ཀྱང་བསྒོ་བ་བཞིན་དུ་མཉན་
ཏེ། ཤིང་ཐམས་ཅད་ཀྱང་བཅད། ཆུ་ཡང་བསྐམས་ནས་དགྲ་ཆ་བཤམས་ཏེ་གྲོང་ཁྱེར་བསྲུང་ངོ་། །རིགས་ཀྱི་བུ་དེའི་ཚེ་གྲོང་ཁྱེར་དེར་ཕྱིན་པ་ན། ནགས་ཚལ་དང་། སྐྱེད་ཤིང་ནི་གཅིག་ཀྱང་མི་སྣང་གི། མི་མང་པོ་མཚོན་
ཆ་ཐོགས་ཏེ་སྡོད་པ་མཐོང་ངོ་། །དེ་ལྟ་བུ་དག་མཐོང་བ་དང་ཤིན་ཏུ་ཐུགས་བརྩེ་ནས་བྱམས་པའི་ཐུགས་བསྐྱེད་པས། ནགས་ཚལ་དང་། བསྐྱེད་ཤིང་ཐམས་ཅད་ཀྱང་ཕྱིར་སྐྱེས་ཏེ། དེ་མ་ཡིན་པ་གཞན་ཡང་དཔག་ཏུ་མེད་
པའི་ཤིང་རྣམས་སྐྱེས་ལ། ཆུ་མིག་དང་། རྫིང་བུ་དང་། ཁྲོན་པ་དང་། འབབ་ཆུ་ཐམས་ཅད་ཀྱང་ཤིན་ཏུ་གསལ་ཞིང་དང་བ་ནི་བཻ་དཱུརྱ་སྔོན་པོ་ལྟ་བུར་གྱུར་ནས། ཀུན་ཏུ་གང་ཞིང་ལུད་དེ། མེ་ཏོག་རྣམ་པ་སྣ་ཚོགས་ཀྱིས་ཀྱང་
ཡོངས་སུ་ཁེབས་པར་གྱུར་ཏོ། །གྲོང་ཁྱེར་དེའི་ངོས་ཀྱི་ར་བ་ཡང་བཻ་དཱུརྱ་མཐོན་མཐིང་ལྟ་བུར་གྱུར་ཏེ། གྲོང་ཁྱེར་དེ་ན་གནས་པ་ཐམས་ཅད་ཀྱིས་ཐལ་བྱུང་དུ་ང་འཁོར་དང་བཅས་པ་ཡང་གསལ་བར་མཐོང་ངོ་། །གྲོང་ཁྱེར་གྱི་སྒོ་དེ་

47-1-263b

ཡང་རང་བྱེ་ནས་ཐོགས་པར་མ་གྱུར། མཚོན་ཆ་རྣམས་ཀྱང་མེ་ཏོག་སྣ་ཚོགས་སུ་གྱུར་ཏེ། ཁྱིམ་བདག་འདོད་པས་གཙོ་བོར་བྱས་ནས་མི་ཐམས་ཅད་འཁོར་དང་བཅས་ཏེ། བཅོམ་ལྡན་འདས་ཀྱི་སྤྱན་སྔར་ལྷགས་སོ། །ངས་
དེ་དག་ལ་ཆོས་རྣམ་པ་སྣ་ཚོགས་བཤད་ནས། དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །རིགས་ཀྱི་བུ་དེའི་ཚེ་ན་ངས་དེ་ལྟར་ཡང་དག་པར་ནགས་ཚལ་དང་། བསྐྱེད་ཤིང་
བསྐྱེད་པ་འམ། ཆུ་གཙང་མས་ཆུ་མིག་དང་། རྫིང་བུ་ཀུན་གང་བར་བྱས་པ་འམ། གྲོང་ཁྱེར་གྱི་ར་བ་བཻ་དཱུརྱར་བསྒྱུར་བ་འམ། དེ་ན་གནས་པའི་མི་དེ་དག་གིས་ཐལ་བྱུང་དུ་མཐོང་བར་བྱས་པ་འམ། གྲོང་ཁྱེར་གྱི་སྒོ་རང་དབྱེ་བ་འམ་
མཚོན་ཆ་རྣམས་མེ་ཏོག་ཏུ་བསྒྱུར་བ་མེད་མོད་ཀྱི་རིགས་ཀྱི་བུ་དེ་ཡང་བྱམས་པའི་དགེ་བའི་རྩ་བའི་མཐུ་ལས་མི་དེ་དག་གིས་དངོས་པོ་དེ་དག་མཐོང་བར་གྱུར་ཏོ། །རིགས་ཀྱི་བུ་གཞན་ཡང་མཉན་དུ་ཡོད་པ་ན་བྲམ་ཟེའི་
བུ་མོ་བ་སི་ཏ་ཞེས་བྱ་བ་ལ་བུ་གཅིག་པུ་ཞིག་ཡོད་ཏེ། དཔེ་མེད་པར་ཤིན་ཏུ་བྱམས་ཤིང་སྡུག་པ་ལས་ནད་ཀྱིས་བཏབ་ནས་ཤི་བར་གྱུར་ཏོ། །དེའི་ཚེ་བུད་མེད་དེ་མྱ་ངན་ཆེན་པོས་གདུངས་པས་མྱོས་ཏེ། སྒྲེན་མོར་ཀུན་
ཏུ་རྒྱུག་ཀྱང་ངོ་མི་ཚ་སྟེ་ལམ་གྱི་བཞི་མདོ་དག་ཏུ་ངུས་ནས་བུ་ག་རེ་བུ་གར་སོང་ཞེས་འབོད་ཅིང་གྲོང་ཁྱེར་ཀུན་ཏུ་རྒྱུ་ཞིང་འགྲོ་ཡང་ངལ་བ་མེད་དོ། །རིགས་ཀྱི་བུ་བུད་མེད་དེ་སྔོན་འདས་པའི་དུས་ཀྱི་སངས་རྒྱས་ལ་དགེ་
བའི་རྩ་བ་བསྐྱེད་པ་ཞིག་ཡིན་པས། ངས་བུད་མེད་དེ་ལ་བྱམས་པའི་ཐུགས་བསྐྱེད་པས། དེའི་ཚེ་ན་བུད་མེད་དེས་ང་མཐོང་ནས་ང་ལ་བུར་འདུ་ཤེས་བསྐྱེད་དེ། དེ་མ་ཐག་ཏུ་སེམས་སོར་ཆུད་ནས། ང་ཕང་དུ་བླངས་ཏེ་
ང་ལ་འོ་བྱས་སོ། །དེའི་ཚེ་དེའི་དུས་ན་ངས་དགའ་བོ་ལ་ཆོས་གོས་འདི་བུད་མེད་དེ་ལ་བྱིན་ཅིག་ཅེས་བཀའ་སྩལ་ཏོ། །དེ་ལ་ཆོས་གོས་བྱིན་ནས་ཆོས་རྣམས་པ་སྣ་ཚོགས་བཤད་དེ། བུད་མེད་དེས་ཆོས་ཐོས་ནས་

47-1-264a

རབ་ཏུ་དགའ་མགུ་རངས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །རིགས་ཀྱི་བུ་དེའི་ཚེ་ན་ཡང་དག་པར་དེའི་བུ་ཡང་ང་མ་ཡིན་ལ། ངའི་མ་ཡང་དེ་མ་ཡིན་ཏེ། ཕང་དུ་བླངས་
པ་འམ། འོ་བྱས་པ་ཡང་མེད་མོད་ཀྱི། རིགས་ཀྱི་བུ་དེ་ཡང་བྱམས་པའི་དགེ་བའི་རྩ་བའི་མཐུ་ལས་བུད་མེད་དེས་དངོས་པོ་དེ་ལྟ་བུ་དག་མཐོང་བར་རིག་པར་བྱའོ། །རིགས་ཀྱི་བུ་གཞན་ཡང་གྲོང་ཁྱེར་སེར་སྐྱ་ན་དགེ་བསྙེན་
མ་མ་ཧཱ་སི་ན་དར་ཏ་ཞེས་བྱ་བ་སྔོན་འདས་པའི་དུས་ན་སངས་རྒྱས་ཚད་མེད་པ་སྙེད་ལ་དགེ་བའི་རྩ་བ་རབ་ཏུ་བསྐྱེད་པ་ཞིག་ཟླ་བ་གསུམ་གྱི་བར་དུ་དགེ་འདུན་སྤྱན་དྲངས་ནས། ནད་ཀྱི་རྐྱེན་སྨན་ཡང་དབུལ་ལོ། །དེའི་ཚེ་དགེ་
འདུན་དེ་དག་གི་ནང་ན་དགེ་སློང་གཅིག་གཅིག་ནད་ཚབས་པོ་ཆེས་བཏབ་ནས། སྨན་པ་གཉེར་ཏེ་དཔྱད་བྱས་ནས་ནད་འདི་ནི་ཤ་ཞིག་གིས་སྨན་བྱ་དགོས་ཏེ། ཤ་མེད་ན་སྲོག་ཀྱང་རིང་པོར་མི་ཐུབ་བོ་ཞེས་བསྒོའོ། །
དེའི་ཚེ་དགེ་བསྙེན་མས་ཚིག་དེ་སྐད་ཅེས་སྨྲས་པ་ཐོས་ནས། གསེར་ཐོགས་ཏེ་ཚོང་དུས་སུ་འདི་སྐད་ཅེས་སྨྲས་སོ། །ཀྱེ་ཁྱོད་ལ་ཤ་འཚོང་བ་ཅི་ཡོད། རིན་དུ་ཤ་དང་མཉམ་པའི་གསེར་སྦྱིན་ནོ་ཞེས་ཚོང་དུས་ཐོགས་
ཐག་ཏུ་བཙལ་ཀྱང་ཤ་མ་རྙེད་དོ། །དེ་ནས་དགེ་བསྙེན་མ་དེ་གྲི་བླངས་ནས་བདག་ཉིད་ཀྱི་བརླ་ཤ་བཅད་དེ་གཏུབས་ནས། ཤ་ཙོག་དུ་བྱས་སྤོད་རྣམ་པ་སྣ་ཚོགས་ཀྱིས་བཏབ་ཏེ་དགེ་སློང་ནད་པ་དེ་ལ་བྱིན་ནོ། །དགེ་སློང་དེས་ཤ་
ཟོས་ནས་ནད་ཀྱང་སོས་པར་གྱུར་ཏོ། །དེའི་ཚེ་དགེ་བསྙེན་མ་དེ་ཤ་བཅད་པའི་རྨ་རེད་ནས་ཤིན་ཏུ་མི་བཟད་པའི་སྡུག་བསྔལ་ཆེན་པོ་མྱོང་བས། འདི་སྐད་དུ་སངས་རྒྱས་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ། །
ཞེས་བོས་སོ། །དེའི་ཚེ་དེའི་དུས་ན་ང་མཉན་དུ་ཡོད་པ་ན་བཞུགས་ཏེ་དེ་སྐད་ཅེས་བོས་པ་ཐོས་ནས། བུད་མེད་དེ་ལ་ཤིན་ཏུ་ཐུགས་རྗེ་ཆེན་པོ་སྐྱེས་པས་བུད་མེད་དེས་དེ་མ་ཐག་ཏུ་ང་མཐོང་བར་གྱུར་ཏོ། །དེ་ནས་དེའི་རྨ་

47-1-264b

ལ་སྨན་གྱིས་བསྐུས་མ་ཐག་ཏུ་སྔ་མ་ཁོ་ན་བཞིན་དུ་སོར་ཆུད་པར་གྱུར་ཏོ། །དེ་ནས་དེ་ལ་ཆོས་རྣམ་པ་སྣ་ཚོགས་བསྟན་ཅིང་བཤད་ནས་རབ་ཏུ་དགའ་མགུ་རངས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་
པར་གྱུར་ཏོ། །རིགས་ཀྱི་བུ་ང་ནི་དེའི་ཚེ་ན་ཡང་དག་པར་གྲོང་ཁྱེར་སེར་སྐྱར་ཡང་མ་གཤེགས་ལ། དགེ་བསྙེན་མའི་རྨ་ལ་སྨན་བསྐུས་པ་ཡང་མེད་མོད་ཀྱི། རིགས་ཀྱི་བུ་དེ་ཡང་བྱམས་པའི་དགེ་བའི་རྩ་བའི་ཤུགས་ཀྱིས་
དགེ་བསྙེན་མ་དེས་དེ་ལྟ་བུའི་དངོས་པོ་དག་མཐོང་བར་གྱུར་ཏོ། །རིགས་ཀྱི་བུ་གཞན་ཡང་ལྷ་སྦྱིན་མ་རུངས་པ་ཆོག་མི་ཤེས་ཏེ། ཟས་ཀྱི་ཚོད་མ་ཟིན་ནས་མར་མང་དུ་འཐུངས་པ་ལས་གླད་པ་ན་ཞིང་ལྦོས་པར་
གྱུར་ཏེ། ཤིན་ཏུ་མི་བཟད་པའི་སྡུག་བསྔལ་ཆེན་པོ་མྱོང་སྟེ། འདི་སྐད་དུ་སངས་རྒྱས་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ་ཞེས་བོས་སོ། །དེའི་ཚེ་ན་ང་གྲོང་ཁྱེར་ཨུ་ད་ནི་ན་བཞུགས་པ་ལས། དེ་སྐད་
ཅེས་བོས་པའི་སྒྲ་ཐོས་ནས་ཤིན་ཏུ་བྱམས་པའི་སེམས་སྐྱེས་པས་དེའི་ཚེ་ལྷ་སྦྱིན་གྱིས་ང་མཐོང་བར་གྱུར་ཏོ། །དེའི་ཚེ་ང་ཡང་དེར་གཤེགས་ནས་ཕྱག་གིས་མགོ་དང་ལྟོ་བ་ལ་བྱུགས་ཏེ། སྒའི་ཁུ་བ་བླུད་ནས་འཐུངས་མ་ཐག་
ཏུ་སོས་པར་གྱུར་ཏོ། །རིགས་ཀྱི་བུ་དེའི་ཚེ་ན་ཡང་དག་པར་ལྷ་སྦྱིན་གྱི་དྲུང་དུ་གཤེགས་པ་ཡང་མེད་ལ། ཕྱག་གིས་མགོ་དང་ལྟོ་བ་ལ་བྱུགས་པ་འམ། སྒྲའི་ཁུ་བ་ཡང་བླུད་པ་མེད་མོད་ཀྱི། རིགས་ཀྱི་བུ་དེ་ཡང་བྱམས་པའི་
དགེ་བའི་རྩ་བའི་ཤུགས་ཀྱིས་ལྷ་སྦྱིན་གྱིས་དངོས་པོ་དེ་དག་མཐོང་བར་རིག་པར་བྱའོ། །རིགས་ཀྱི་བུ་གཞན་ཡང་ཡུལ་ཀོ་ས་ལར་མི་རྒོད་མ་རུངས་པ་ལྔ་བརྒྱ་ཙམ་ཞིག་བསྡོངས་ཤིང་ཆོམ་ཤོད་བྱེད་དེ་ཤིན་ཏུ་གནོད་པར་
གྱུར་ནས་རྒྱལ་པོ་སྡེ་རབ་ཏུ་ཕམ་བྱེད་ཀྱིས་དམག་གིས་བཏབ་སྟེ། ཐམས་ཅད་བཟུང་ནས་མིག་ཕྱུང་སྟེ། ནགས་ཚལ་སྟུག་པོར་བཞག་གོ། །དེའི་ཚེ་ན་མི་རྒོད་མ་རུངས་པ་དེ་དག་སྔོན་སངས་རྒྱས་རྣམས་ལ་དགེ་བའི་རྩ་བ་

47-1-265a

བསྐྱེད་པ་ཤ་སྟག་སྟེ། དེ་ལྟར་མིག་ཕྱུང་བས་ཤིན་ཏུ་སྡུག་བསྔལ་ཆེན་པོ་མྱོང་བར་གྱུར་པས་འདི་སྐད་དུ་སངས་རྒྱས་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ་ཞེས་བོས་སོ། །བདག་ཅག་ལ་མགོན་དང་
སྐྱབས་བགྱིད་པ་མ་མཆིས་ཏེ། དཔུང་གཉེན་མ་མཆིས་སོ་ཞེས་ཆོང་ངེ་བཏབ་སྟེ་ངུས་སོ། །དེའི་ཚེ་ན་ང་རྒྱལ་བུ་འཛེ་ཏའི་ཚལ་ན་བཞུགས་པ་ལས་དེ་སྐད་ཅེས་འབོད་པའི་སྒྲ་ཐོས་ནས་ཤིན་ཏུ་བྱམས་པའི་ཐུགས་བསྐྱེད་དེ། 
དེའི་ཚེ་ན་ཤིན་ཏུ་བསིལ་བའི་རླུང་གིས་རི་བསུང་ཅན་ལས་སྨན་བདུད་རྩི་ལྟ་བུ་རྣམ་པ་སྣ་ཚོགས་ཀྱིས་མིག་ཏུ་བཀང་ནས་ཕྱིར་སོས་བཞིན་དུ་མཐོང་བར་གྱུར་ཏོ། །མི་རྒོད་མ་རུངས་པ་དེ་དག་དེ་ལྟར་མིག་ཕྱེ་མ་ཐག་ཏུ་དེ་བཞིན་གཤེགས་
པ་མཐོང་བར་གྱུར་ཏོ། །དེ་ནས་མི་རྒོད་མ་རུངས་པ་དེ་དག་ལ་དམ་པའི་ཆོས་བསྟན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་བཅུག་གོ་རིགས་ཀྱི་བུ་དེའི་ཚེ་ན་ཡང་དག་པར་རླུང་དུ་སྤྲུལ་པ་ཡང་མེད་ལ། 
རི་བསུང་ཅན་ནས་སྤོས་བླངས་པ་འམ། མི་དེ་དག་གི་མདུན་དུ་ཆོས་བསྟན་པ་ཡང་མེད་མོད་ཀྱི། རིགས་ཀྱི་བུ་དེ་ཡང་བྱམས་པའི་དགེ་བའི་རྩ་བའི་ཤུགས་ཀྱིས་མི་རྒོད་མ་རུངས་པ་དེ་དག་གིས་དེ་ལྟ་བུའི་དངོས་པོ་དག་མཐོང་བར་
གྱུར་ཏོ། །རིགས་ཀྱི་བུ་གཞན་ཡང་རྒྱལ་ཚབ་བཻ་དཱུརྱ་ཞེས་བྱ་བ་གླེན་ཞིང་གཏི་མུག་པས་རྒྱལ་པོའི་ཐབས་ཕྲོགས་ཏེ། བདག་ཉིད་རྒྱལ་སར་ཞུགས་ནས། སྔོན་གྱི་འཁོན་མ་བཏང་བས་ཤག་རིགས་ཀྱི་བུ་མོ་སྟོང་ཕྲག་བཅུ་
གཉིས་སྙེད་རྣ་བ་དང་། སྣ་བཅད་དེ། རྐང་ལག་གཏུབས་ནས་འོབས་ཀྱི་ནང་དུ་བོར་རོ། །དེའི་ཚེ་བུད་མེད་དེ་རྣམས་ཤིན་ཏུ་སྡུག་བསྔལ་བར་གྱུར་ནས་སངས་རྒྱས་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ། །
བདག་ཅག་ལ་མགོན་དང་སྐྱབས་བགྱིད་པ་མ་མཆིས་སོ་ཞེས་སྨྲས་ནས་སྐད་ཆེན་པོ་ཕྱུང་སྟེ་ངུས་སོ། །བུད་མེད་དེ་རྣམས་སྔོན་སངས་རྒྱས་མང་པོ་ལ་དགེ་བའི་རྩ་བ་བསྐྱེད་པ་ཤ་སྟག་སྟེ། ང་དེའི་ཚེ་ན་འོད་མའི་ཚལ་ན་བཞུགས་པ་ལས་

47-1-265b

དེ་སྐད་ཅེས་བོས་པའི་སྒྲ་ཐོས་ནས་ཤིན་ཏུ་ཐུགས་རྗེ་སྐྱེས་པས་དེའི་ཚེ་བུ་མོ་དེ་དག་གིས་ང་གྲོང་ཁྱེར་སེར་སྐྱར་གཤེགས་ཏེ་རྨ་ཡང་ཆུ་གཙང་མས་བཀྲུས་ནས་སྨན་གྱིས་བསྐུས་པར་མཐོང་སྟེ། སྡུག་བསྔལ་ཡང་དེ་མ་ཐག་ཏུ་ཞི་བར་
གྱུར་ཏོ། །རྣ་བ་དང་། སྣ་དང་། རྐང་ལག་ཐམས་ཅད་བཅད་པ་ཡང་ཕྱིར་སྐྱེས་ཏེ་སོར་ཆུད་པར་གྱུར་ཏོ། །དེའི་ཚེ་ན་ངས་དམ་པའི་ཆོས་ཀྱང་བསྟན་ནས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
བསྐྱེད་དེ། ཐམས་ཅད་དགེ་སློང་མ་སྐྱེ་དགུའི་བདག་མོ་ཆེན་མོའི་དྲུང་དུ་རབ་ཏུ་བྱུང་ནས་བསྙེན་པར་རྫོགས་པར་གྱུར་ཏོ། །རིགས་ཀྱི་བུ་དེ་བཞིན་གཤེགས་པས་ནི་དེའི་ཚེ་ན་ཡང་དག་པར་གྲོང་ཁྱེར་སེར་སྐྱར་གཤེགས་པ་
ཡང་མེད་ལ། རྨ་བཀྲུས་པ་འམ། སྨན་བསྐུས་པ་འམ། སྡུག་བསྔལ་ཞི་བར་བྱས་པ་ཡང་མེད་མོད་ཀྱིས། རིགས་ཀྱི་བུ་དེ་དག་ཐམས་ཅད་ཀྱང་བྱམས་པའི་དགེ་བའི་རྩ་བའི་ཤུགས་ཀྱིས་བུད་མེད་དེ་དག་གིས་དངོས་པོ་
དེ་ལྟ་བུ་དག་མཐོང་བར་རིག་པར་བྱའོ། །སྙིང་རྗེ་དང་དགའ་བའི་སེམས་ཀྱང་དེ་དང་འདྲའོ། །རིགས་ཀྱི་བུ་དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོའི་བྱམས་པའི་སེམས་ཡིད་ལ་བྱེད་པ་ནི་ཡང་དག་པ་སྟེ་
བརྫུན་མ་ཡིན་ནོ། །རིགས་ཀྱི་བུ་ཚད་མེད་པ་ཡང་བསམ་གྱིས་མི་ཁྱབ་ལ། བྱང་ཆུབ་སེམས་དཔས་སྤྱོད་པ་ཡང་བསམ་གྱིས་མི་ཁྱབ། སངས་རྒྱས་རྣམས་ཀྱིས་མཛད་པ་ཡང་བསམ་གྱིས་མི་ཁྱབ། ཐེག་པ་ཆེན་
པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ཡང་བསམ་གྱིས་མི་ཁྱབ་བོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། སྙིང་རྗེ་ཆེན་པོ་དང་། དགའ་བ་ལ་ནན་ཏན་བྱས་ནས་བུ་གཅིག་
པ་དང་འདྲ་བའི་ས་རབ་ཏུ་དགའ་བ་ལ་གནས་པར་འགྱུར་རོ། །རིགས་ཀྱི་བུ་དེ་ལ་ཅིའི་ཕྱིར་ན་ས་དེ་ལ་རབ་ཏུ་དགའ་བ་ཞེས་ཀྱང་བྱ་ལ་བུ་གཅིག་པ་དང་འདྲ་བ་ཞེས་ཀྱང་བྱ་ཞེ་ན། རིགས་ཀྱི་བུ་འདི་ལྟ་སྟེ། དཔེར་ན་ཕ་མས་བུ་བདེ་ཞིང་སྐྱིད་པར་མཐོང་ན་

47-1-266a

སེམས་རབ་ཏུ་དགའ་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ས་དེ་ལ་གནས་པ་ཡང་དེ་དང་འདྲ་སྟེ། སེམས་ཅན་ཐམས་ཅད་ལ་བུ་གཅིག་པ་དང་འདྲ་བ་རི་ལྟ་བས་དགེ་བ་ལ་ནན་ཏན་བྱེད་པར་མཐོང་
ན་རབ་ཏུ་དགའ་བའི་སེམས་སྐྱེ་སྟེ། དེ་བས་ན་ས་དེ་ནི་རབ་ཏུ་དགའ་བ་ཞེས་བྱའོ། །རིགས་ཀྱི་བུ་འདི་ལྟ་སྟེ། དཔེར་ན་ཕ་མས་བུ་ན་བ་མཐོང་ན་ཤིན་ཏུ་སྡུག་བསྔལ་བའི་སེམས་སྐྱེ་སྟེ། སྙིང་རྗེ་བས་མྱ་ངན་གྱི་སེམས་དང་ཅུང་ཟད་
ཀྱང་མི་འབྲལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་ས་དེ་ལ་གནས་པ་ཡང་དེ་དང་འདྲ་སྟེ། སོ་སོའི་སྐྱེ་བོ་དག་ཉོན་མོངས་པའི་ནད་ཀྱིས་ཡོངས་སུ་གཟིར་བ་མཐོང་ནས་བུ་དང་འདྲ་བར་སྙིང་བརྩེ་བས་མྱ་ངན་བྱེད་དེ། 
ལུས་ཀྱི་བ་སྤུའི་བུ་ག་ནས་ཁྲག་ཀྱང་ཟག་གོ། །དེ་བས་ན་ས་འདི་ནི་བུ་གཅིག་པ་ལྟ་བུ་ཞེས་ཀྱང་བྱའོ། །རིགས་ཀྱི་བུ་དཔེར་ན་བྱིས་པ་ཆུང་ངུ་ཤེད་མ་བྱེ་བ་ནི་བོང་བ་དང་། གསེག་མ་དང་། རུས་གོང་དང་། ཤིང་བུ་དང་། བཙོག་པའི་བག་
ཀྱང་ལག་ཏུ་བླངས་ནས་ཁར་འཇུག་གོ། །དེའི་ཕ་མས་དེ་ལྟ་བུ་དག་མཐོང་ན་གནོད་པར་འགྱུར་དུ་དགོས་ཏེ། ལག་པ་གཡོན་པས་ནི་འགྲམ་པ་བཙིར། ལག་པ་གཡས་པས་ནི་ཕྱིར་འབྱིན་ཏོ། །བྱང་ཆུབ་སེམས་དཔའ་སེམས་དཔའ་
ཆེན་པོ་ས་དེ་ལ་གནས་པ་ཡང་དེ་དང་འདྲ་སྟེ། སེམས་ཅན་དག་ཆོས་ཀྱི་སྐུའི་ཤེད་མ་རྫོགས་པས་ལུས་དང་། ངག་དང་། ཡིད་ཀྱི་སྒོ་ནས་སྡིག་པ་མི་དགེ་བའི་ཆོས་སྤྱོད་པར་བྱང་ཆུབ་སེམས་དཔའ་ས་མཐོང་ན་ཡེ་ཤེས་ཀྱི་ལག་གིས་དེ་ནས་
འབྱིན་ཏེ། དེ་དག་འཁོར་བ་ན་འཁོར་ཞིང་སྡུག་བསྔལ་མང་པོ་མྱོང་བར་མི་འདོད་པས་ས་འདི་ནི་བུ་གཅིག་པ་དང་འདྲ་བ་ཞེས་བྱའོ། །རིགས་ཀྱི་བུ་འདི་ལྟ་སྟེ། དཔེར་ན་ཕ་མ་ཞིག་ལ་ཤིན་ཏུ་བྱམས་པའི་བུ་གཅིག་པུ་ཡོད་པ་ལས་གལ་ཏེ་ཤི་བར་
གྱུར་ན་དེའི་ཕ་མ་ཡང་ལྷན་ཅིག་ཏུ་ཤི་བར་འདོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། གལ་ཏེ་ལོག་སྲེད་ཅན་དག་སེམས་ཅན་དམྱལ་བར་ལྟུང་ན་དེ་དང་ལྷན་ཅིག་ཏུ་སེམས་ཅན་དམྱལ་བར་འགྲོ་བར་

47-1-266b

འདོད་དོ། །དེ་ཅིའི་ཕྱིར་ཞེ་ན། ལོག་སྲེད་ཅན་དེ་དག་སྡུག་བསྔལ་མྱོང་བའི་ཚེ་གལ་ཏེ་སྐད་ཅིག་ཙམ་ཞིག་འགྱོད་པའི་སེམས་སྐྱེས་ན་ངས་དེ་ལ་ཆོས་རྣམ་པ་སྣ་ཚོགས་བསྟན་ཅིང་བཤད་ཏེ། སྐད་ཅིག་ཐང་ཅིག་ཙམ་གྱི་དགེ་བའི་རྩ་བ་སྐྱེ་བར་
བྱེད་པས་ན་ས་འདི་ནི་བུ་གཅིག་པ་དང་འདྲ་བ་ཞེས་བྱའོ། །རིགས་ཀྱི་བུ་འདི་ལྟ་སྟེ། དཔེར་ན་ཕ་མ་ལ་བུ་གཅིག་པུ་ཞིག་ཡོད་ན་བུ་དེ་གཉིད་ལོག་གམ་སད་ཀྱང་རུང་སྟེ། འགྲོ་འམ། སྡོད་དམ། འདུག་གམ། ཉལ་ཡང་རྟག་ཏུ་སེམས་ལ་དྲན་ནོ། །
གལ་ཏེ་ཉེས་པ་ཤིག་བྱས་ན་ཡང་ཚིག་འཇམ་པོས་སྟོན་ཅིང་འཆོས་ཀྱི་ངན་པས་ནི་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། གལ་ཏེ་སོ་སོའི་སྐྱེ་བོ་དག་སེམས་ཅན་དམྱལ་བ་འམ། བྱོལ་སོང་གི་སྐྱེ་
གནས་སམ། གཤིན་རྗེའི་འཇིག་རྟེན་དུ་སྐྱེས་ཀྱང་རུང་། ལྷ་དང་མིར་སྐྱེས་ཀྱང་རུང་སྟེ། དགེ་བ་འམ་སྡིག་པ་ཅི་བྱེད་སྙམ་རྟག་ཏུ་སེམས་ཏེ་མི་གཏོང་ངོ་། །གལ་ཏེ་སྡིག་པ་མི་དགེ་བའི་ལས་ཤིག་བྱེད་ན་ཡང་དེ་ལ་ཞེ་སྡང་བའི་
སེམས་མི་སྐྱེ་སྟེ། དེ་བས་ན་ས་འདི་ནི་བུ་གཅིག་པ་དང་འདྲ་བ་ཞེས་བྱའོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར་ན་ཤིན་ཏུ་ཟབ་
པས་བདག་གིས་འཚལ་བ་ནི་ཤིན་ཏུ་ཡང་རྒྱ་ཆུང་ན་འདི་ཇི་ལྟ་བུར་འཚལ་བར་བགྱིད། གལ་ཏེ་བྱང་ཆུབ་སེམས་དཔའ་དག་བུ་གཅིག་པ་ལྟ་བུའི་ས་ལ་གནས་པས་དེ་ལྟ་བུར་གྱུར་ན་ལྟ། ཅིའི་སླད་དུ་དེ་བཞིན་གཤེགས་པ་སྔོན་རྒྱལ་པོ་
མཛད་པའི་ཚེ་བྱང་ཆུབ་སེམས་དཔའི་སྤྱད་པ་སྤྱོད་པ་ན་བྲམ་ཟེ་དེ་སྙེད་ཀྱི་སྲོག་གཅད་པར་གྱུར། གལ་ཏེ་ས་འདི་ཐོབ་ན་ནི་སྐྱོབ་ཅིང་དཔུང་གཉེན་དུ་གྱུར་པའི་རིགས། གལ་ཏེ་མ་ཐོབ་ན་ཅིའི་སླད་དུ་སེམས་ཅན་དམྱལ་བར་མི་ལྟུང་། གལ་ཏེ་
སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་དགོངས་ན་ཅིའི་སླད་དུ་ལྷ་སྦྱིན་ལ་འདི་སྐད་དུ་གླེན་པ་ངོ་ཚ་མེད་པ་མིའི་ངར་སྣབས་ཟ་བ་ཞེས་བཀའ་སྩལ་པས་ལྷ་སྦྱིན་གྱིས་ཐོས་ནས་འཁོན་དུ་བཟུང་སྟེ། མི་དགེ་བའི་སེམས་

47-1-267a

བསྐྱེད་ནས། སངས་རྒྱས་ཀྱི་སྐུ་ལ་ཁྲག་ཕྱུང་བར་གྱུར། ལྷ་སྦྱིན་གྱིས་དེ་ལྟ་བུའི་སྡིག་པ་བྱས་ནས་ཀྱང་དེ་བཞིན་གཤེགས་པས་སེམས་ཅན་དམྱལ་བར་ལྟུང་ཞིང་བསྐལ་པ་གཅིག་གི་བར་དུ་སྡུག་བསྔལ་མྱོང་བར་འགྱུར་རོ་
ཞེས་ལུང་བསྟན། བཅོམ་ལྡན་འདས་ཀྱིས་དེ་སྐད་ཅེས་གསུངས་པ་དེ་དོན་དང་འགལ་བར་འགྱུར་བ་མ་ལགས་སམ། བཅོམ་ལྡན་འདས་བཙུན་པ་རབ་འབྱོར་ལྟ་བུ་སྟོང་པ་ཉིད་ཀྱི་ས་ལ་གནས་པ་ཡང་གྲོང་དུ་འཇུག་ཅིང་བསོད་སྙོམས་
ལེན་པ་ན་སྔར་ཕ་རོལ་པོ་ལ་ཡོངས་སུ་རྟོག་གོ། །གལ་ཏེ་ཕ་རོལ་པོས་བརྙས་སམ་སྨོད་པའི་སེམས་སུ་གྱུར་ན་ཅི་སྟེ་ཤིན་ཏུ་བཀྲེས་པར་གྱུར་ཀྱང་། དེ་དག་ལས་བསོད་སྙོམས་མི་ལེན་ཏོ། །དེ་ཅིའི་སླད་དུ་ཞེ་ན། བཙུན་པ་རབ་འབྱོར་ནི་རྟག་ཏུ་
འདི་སྙམ་དུ་སེམས་ཏེ། འདི་ལྟ་བུ་དག་མངོན་པར་དྲན་ནོ། །སྔོན་གྱི་བསོད་ནམས་ཀྱི་ཞིང་དུ་འགྱུར་བ་ཞིག་ལ། མི་དགེ་བའི་རྟོག་པ་ཅིག་ཙམ་བསྐྱེད་པས་དེའི་རྒྱུ་དེའི་རྐྱེན་ཀྱིས་སེམས་ཅན་དམྱལ་བ་ཆེན་པོར་ལྷུང་སྟེ། སྡུག་བསྔལ་ཆེན་
པོ་མྱོང་བར་འགྱུར་རོ། །བདག་ཅི་སྟེ་ལྟོགས་པར་གྱུར་ཏེ། གཞའ་གསང་མ་ཟོས་ཀྱང་བླའི། གཞན་དག་བདག་ལ་བརྙས་ཤིང་སྨད་པས་སེམས་ཅན་དམྱལ་བར་ལྟུང་ཞིང་སྡུག་བསྔལ་མྱོང་བར་མི་བྱའོ་སྙམ་བསམས་ནས་ཡང་འདི་
སྙམ་དུ་སེམས་སོ། །ཅི་སྟེ་སེམས་ཅན་གང་ཞིག་བདག་འགྲེང་བ་ལ་འཕྱ་བར་གྱུར་ན། བདག་གཞའ་གསང་དུ་འདུག་པ་ལས་མི་ལྡང་ངོ་། །གལ་ཏེ་སེམས་ཅན་གང་ཞིག་བདག་འདུག་པ་ལ་འཕྱ་བར་གྱུར་ན་བདག་གཞའ་གསང་དུ་
འགྲེང་བ་ལས་གནས་མི་བསྐྱོད་དེ། འགྲོ་བ་དང་ཉལ་བ་ཡང་དེ་དང་འདྲའོ། །དེ་ལྟར་བཙུན་པ་རབ་འབྱོར་ཡང་སེམས་ཅན་གྱི་ཡིད་བསྲུང་བའི་ཕྱིར་དེ་ལྟ་བུར་སེམས་བསྐྱེད་ན་བྱང་ཆུབ་སེམས་དཔའ་སེམས་དཔའ་ཆེན་པོ་ལྟ་སྨོས་ཀྱང་ཅི་
འཚལ། གལ་ཏེ་བུ་གཅིག་པ་དང་འདྲ་བའི་ས་ཐོབ་ན་ཅིའི་སླད་དུ་དེ་བཞིན་གཤེགས་པས་དེ་ལྟ་བུའི་གསུང་མ་གླས་པ་གསུངས་པས་སེམས་ཅན་མང་པོ་ཤིན་ཏུ་མི་དགེ་བའི་སེམས་བསྐྱེད་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། 

47-1-267b

རིགས་ཀྱི་བུ་འདི་སྐད་དུ་སངས་རྒྱས་བཅོམ་ལྡན་འདས་ལ་སོ་སོའི་སྐྱེ་བོའི་ཉོན་མོངས་པར་འགྱུར་བའི་རྒྱུ་མཛད་དོ་ཞེས་མ་རྒོལ་ཅིག །རིགས་ཀྱི་བུ་གལ་ཏེ་སྦྲང་བུའི་མཆུས་རྒྱ་མཚོའི་གཏིང་ཐུག་པར་ཟད་པར་བྱེད་ཀྱང་སྲིད་ཀྱི། དེ་བཞིན་གཤེགས་
པས་ནི་སེམས་ཅན་གྱི་ཉོན་མོངས་པའི་རྒྱུར་འགྱུར་བར་མི་མཛད་དོ། །རིགས་ཀྱི་བུ་གལ་ཏེ་ས་ཆེན་པོ་འདི་གཟུགས་མ་ཡིན་པར་འགྱུར་ཡང་སྲིད། ཆུ་ནི་སྐམ་པའི་མཚན་ཉིད་དུ་འགྱུར་ཡང་སྲིད། མེ་ནི་གྲང་བའི་མཚན་ཉིད་དུ་འགྱུར་ཡང་
སྲིད། རླུང་ནི་གནས་པའི་མཚན་ཉིད་དུ་འགྱུར་ཡང་སྲིད། དཀོན་མཆོག་གསུམ་དང་། སངས་རྒྱས་ཀྱི་རང་བཞིན་དང་། ནམ་མཁའ་ནི་མི་རྟག་པའི་མཚན་ཉིད་དུ་འགྱུར་ཡང་སྲིད་ཀྱི། དེ་བཞིན་གཤེགས་པ་ནི་སེམས་ཅན་རྣམས་ཀྱི་
ཉོན་མོངས་པའི་རྒྱུར་འགྱུར་བ་མི་མཛད་དོ། །རིགས་ཀྱི་བུ་གལ་ཏེ་ཚུལ་ཁྲིམས་ཀྱི་རྩ་བ་བཞི་ཉམས་པ་དང་། ལོག་སྲེད་ཅན་དང་། དམ་པའི་ཆོས་ལ་སྐུར་པ་དག་ལུས་འདི་ཉིད་ཀྱིས་སྟོབས་བཅུ་དང་། མི་འཇིགས་པ་དང་། མཚན་སུམ་བཅུ་
རྩ་གཉིས་དང་། དཔེ་བྱད་བཟང་པོ་བརྒྱད་བཅུ་འཐོབ་ཀྱང་སྲིད་ཀྱི། དེ་བཞིན་གཤེགས་པ་ནི་སེམས་ཅན་རྣམས་ཀྱི་ཉོན་མོངས་པའི་རྒྱུར་འགྱུར་བ་མི་མཛད་དོ། །རིགས་ཀྱི་བུ་གལ་ཏེ་ས་བཅུ་ལ་གནས་པའི་བྱང་ཆུབ་སེམས་དཔའ་
དག་ཚུལ་ཁྲིམས་ཀྱི་རྩ་བ་བཞི་ཉམས་ཤིང་ལོག་སྲེད་ཅན་དུ་གྱུར་ནས་དམ་པའི་ཆོས་ལ་སྐུར་ཀྱང་སྲིད་ཀྱི། དེ་བཞིན་གཤེགས་པ་ནི་སེམས་ཅན་རྣམས་ཀྱི་ཉོན་མོངས་པའི་རྒྱུར་འགྱུར་བ་མི་མཛད་དོ། །རིགས་ཀྱི་བུ་གལ་ཏེ་
སེམས་ཅན་ཚད་མེད་པ་ཐམས་ཅད་སངས་རྒྱས་ཀྱི་རང་བཞིན་མེད་པར་འགྱུར་ཡང་སྲིད། དེ་བཞིན་གཤེགས་པ་ཡང་མཐར་ཡོངས་སུ་མྱ་ངན་ལས་འདའ་བར་འགྱུར་ཡང་སྲིད་ཀྱི། དེ་བཞིན་གཤེགས་པ་ནི་སེམས་ཅན་རྣམས་ཀྱི་ཉོན་
མོངས་པའི་རྒྱུར་འགྱུར་བ་མི་མཛད་དོ། །རིགས་ཀྱི་བུ་གལ་ཏེ་ཞགས་པས་རླུང་ཟིན་པ་འམ། སོས་ལྕགས་ཆོད་པ་འམ། སེན་མོས་རི་རབ་འཇིག་ནུས་ཀྱང་སྲིད་ཀྱི། དེ་བཞིན་གཤེགས་པ་ནི་སེམས་ཅན་རྣམས་ཀྱི་ཉོན་མོངས་པའི་

47-1-268a

རྒྱུར་འགྱུར་བ་མི་མཛད་དོ། །སྦྲུལ་གདུག་པ་དང་ལྷན་ཅིག་ཏུ་གནས་སམ། སེང་གེ་ལྟོགས་པའི་ཁར་ལག་པ་བཅུག་གམ། ཁ་ཌ་ལའི་ཐལ་བས་ལུས་བཀྲུས་པར་གྱུར་ཀྱང་བླའི། འདི་སྐད་དུ་སངས་རྒྱས་བཅོམ་
ལྡན་འདས་ནི་སེམས་ཅན་རྣམས་ཀྱི་ཉོན་མོངས་པའི་རྒྱུར་འགྱུར་བ་མཛད་དོ་ཞེས་སྨྲ་བར་མི་བྱའོ། །རིགས་ཀྱི་བུ་དེ་བཞིན་གཤེགས་པ་ནི་ཡང་དག་པར་སེམས་ཅན་རྣམས་ཀྱི་ཉོན་མོངས་པ་ཡོངས་སུ་གཅོད་ཀྱི། ནམ་དུ་ཡང་ཉོན་
མོངས་པའི་རྒྱུར་འགྱུར་བ་མི་མཛད་དོ། །རིགས་ཀྱི་བུ་ཁྱོད་སྨྲ་བ་ལྟར་དེ་བཞིན་གཤེགས་པས་སྔོན་བྲམ་ཟེ་བསད་དོ་ཞེས་བྱ་བ་ནི་རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆུང་ངུ་ན་གྲོག་སྦུར་ཙམ་ཡང་ཆེད་དུ་མི་
གསོད་ན་བྲམ་ཟེ་གསོད་པ་ལྟ་སྨོས་ཀྱང་ཅི་དགོས་ཏེ། བྱང་ཆུབ་སེམས་དཔའ་ནི་རྟག་ཏུ་ཐབས་མཁས་པ་རྣམ་པ་སྣ་ཚོགས་ཀྱིས་སེམས་ཅན་རྣམས་ལ་ཚད་མེད་པའི་འཚོ་བའི་སྲོག་སྦྱིན་པར་བྱེད་དོ། །རིགས་ཀྱི་བུ་ཁ་ཟས་
སྦྱིན་པ་ནི་སྲོག་སྦྱིན་པ་ཞེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱད་པ་སྤྱོད་པ་ན་རྟག་ཏུ་སེམས་ཅན་དག་ཚད་མེད་པའི་འཚོ་བ་སྦྱིན་པར་བྱེད་དོ། །རིགས་ཀྱི་བུ་སྲོག་གཅོད་པ་ཡོངས་
སུ་སྤངས་པའི་ཚུལ་ཁྲིམས་བསྲུངས་པས་ཚེ་རིང་བར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་སྤྱད་པ་སྤྱོད་པ་ན། སེམས་ཅན་ཐམས་ཅད་ལ་འཚོ་བའི་སྲོག་ཚད་མེད་པ་
སྦྱིན་པ་བྱིན་ནོ། །རིགས་ཀྱི་བུ་ངག་གི་སྒོ་ནས་ཉེས་པའི་སྐྱོན་མེད་པས་ན་ཚེ་རིང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་བཟོད་པའི་ཕ་རོལ་ཏུ་ཕྱིན་པ་ལ་སྤྱད་པ་སྤྱོད་པ་ན་སེམས་ཅན་ལ་འཁོན་དུ་འགྱུར་
བ་མི་སྟེན་ཏེ། ལེགས་པ་ནི་གཞན་ལ་བདར། ཉེས་པ་ནི་བདག་ཁས་ལེན་པས་རྩོད་པ་མེད་དེ་ཚེ་རིང་བར་འགྱུར་རོ། །དེ་བས་ན་བྱང་ཆུབ་སེམས་དཔའ་བཟོད་པའི་ཕ་རོལ་ཏུ་ཕྱིན་པ་ལ་སྤྱོད་པ་ན་སེམས་ཅན་ལ་ཚད་མེད་པའི་འཚོ་

47-1-268b

བའི་སྲོག་སྦྱིན་པ་ཞེས་བྱའོ། །རིགས་ཀྱི་བུ་དགེ་བ་ལ་བརྩོན་འགྲུས་བྱས་པས་ཚེ་རིང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱད་པ་སྤྱོད་པ་ནི་རྟག་ཏུ་སེམས་ཅན་དག་དགེ་
བའི་ཆོས་ལ་ནན་ཏན་བྱེད་པར་བསྐུལ་ནས་སོ་སོའི་སྐྱེ་བོ་དག་དེ་བཞིན་དུ་བྱས་པས་ཚེ་ཚད་མེད་པ་ཐོབ་པར་བྱས་ཏེ། དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱད་པ་སྤྱོད་པ་ན་སེམས་
ཅན་ལ་ཚད་མེད་པའི་འཚོ་བ་བྱིན་པ་ཡིན་ནོ། །རིགས་ཀྱི་བུ་སེམས་སྡུད་པ་ལ་ནན་ཏན་བྱེད་པ་ནི་ཚེ་རིང་བར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གཏན་གྱི་ཕ་རོལ་ཏུ་ཕྱིན་པ་ལ་སྤྱད་པ་སྤྱོད་པ་ན། སེམས་ཅན་
དག་མཉམ་པར་འཇོག་པའི་སེམས་ལ་ནན་ཏན་བྱེད་པར་བསྐུལ་ནས་སེམས་ཅན་དག་དེ་བཞིན་དུ་སྤྱད་པས་ཚེ་རིང་བར་འགྱུར་རོ། །དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གཏན་གྱི་ཕ་རོལ་ཏུ་ཕྱིན་པ་ལ་སྤྱད་པ་
སྤྱོད་པ་ནི་སེམས་ཅན་ལ་ཚད་མེད་པའི་འཚོ་བ་སྦྱིན་པ་ཞེས་བྱའོ། །རིགས་ཀྱི་བུ་ཇི་ཙམ་དུ་དགེ་བར་འགྱུར་བའི་ཕྱོགས་ལ་བག་ཡོད་པར་སྤྱོད་པ་ནི་ཚེ་རིང་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་
རོལ་ཏུ་ཕྱིན་པ་ལ་སྤྱད་པ་སྤྱོད་པ་ན་སེམས་ཅན་རྣམས་དགེ་བའི་ཆོས་ལ་བག་ཡོད་པར་སྤྱོད་དུ་བཅུག་ནས་སོ་སོའི་སྐྱེ་བོ་དག་དེ་བཞིན་དུ་སྤྱད་པས་དེའི་རྒྱུ་དེའི་རྐྱེན་གྱིས་ཚེ་རིང་བར་འགྱུར་ཏེ། དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་
པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པ་སྤྱོད་པ་ན་སེམས་ཅན་ལ་འཚོ་བ་ཚད་མེད་པ་སྦྱིན་པ་ཞེས་བྱའོ། །རིགས་ཀྱི་བུ་དོན་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ལ་སྲོག་འཕྲོག་པའི་ཆོས་
མེད་དོ། །རིགས་ཀྱི་བུ་ཁྱེད་ཀྱིས་འདི་སྐད་དུ་ང་ལ་བྲམ་ཟེ་བསད་པའི་ཚེ་ས་འདི་ཐོབ་བམ་ཞེས་དྲིས་པ་ནི་རིགས་ཀྱི་བུ་ངས་དེའི་ཚེ་ས་དེ་ཐོབ་པས་དེ་དག་ལ་སྡུག་པར་དགོངས་པའི་ཕྱིར་དེ་དག་གི་སྲོག་གི་དབང་པོ་བཅད་པ་ཡིན་གྱི། ངན་སེམས་ཀྱིས་ནི་མ་

47-1-269a

ཡིན་ནོ། །རིགས་ཀྱི་བུ་འདི་ལྟ་སྟེ། དཔེར་ན་བུ་གཅིག་པའི་ཕ་མ་ནི་བུ་དེ་ལ་ཤིན་ཏུ་སྡུག་པར་བསམས་པས་གལ་ཏེ་ཉེས་པ་ཆེན་པོ་ཞིག་བྱས་ཏེ་གྱོད་ལ་ཐུག་པར་གྱུར་ན་དེའི་ཕ་མ་འཇིགས་སྐྲག་པས་སྐྲོད་པ་འམ། གསོད་པར་ཡང་བྱེད་
དེ། དེ་ལྟར་གལ་ཏེ་སྐྲོད་དམ་གསོད་ཀྱང་ངན་སེམས་ནི་མེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་དམ་པའི་ཆོས་བསྲུང་ཞིང་སྐྱོབ་པ་ཡང་དེ་དང་འདྲ་སྟེ། གལ་ཏེ་སེམས་ཅན་གང་ཞིག་ཐེག་པ་ཆེན་པོའི་ཆོས་ལ་སྐུར་པ་འདེབས་ན་
དེ་ལ་གཞུ་བ་དང་། འཚོག་པ་དང་། གནོད་པར་བྱ་བ་དང་། གལ་ཏེ་ན་སྲོག་གི་དབང་པོའི་བར་ཡང་གཅོད་དེ། མ་འོངས་པའི་དུས་སུ་དགེ་བའི་ཆོས་ལ་ནན་ཏན་བྱེད་པར་འདོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་འདི་སྙམ་དུ་
སེམས་ཏེ་རྒྱུ་གང་དང་རྐྱེན་གང་གིས་སེམས་ཅན་རྣམས་དད་པའི་སེམས་སྐྱེ་བར་འགྱུར་སྙམ་སེམས་ཏེ། ཐབས་ཇི་བཞིན་དུ་དེའི་ལས་བྱེད་དེ། བྲམ་ཟེ་མང་པོ་དག་ཚེ་འཕོས་ནས་མཚམས་མེད་པའི་སེམས་ཅན་དམྱལ་བར་སྐྱེས་ཏེ། རྣམ་པ་
གསུམ་པོ་འདི་དག་སེམས་སོ། །བདག་གནས་གང་ནས་འདིར་སྐྱེས་སྙམ་སེམས་ཏེ། སྔོན་མིའི་རྒྱུད་ལས་སྐྱེས་པར་ཤེས་པ་དང་། བདག་སྐྱེ་བའི་གནས་འདི་ཅི་ཡིན་སྙམ་བསམས་ནས། མཚམས་མེད་པའི་སེམས་ཅན་དམྱལ་བ་ཡིན་
པར་ཤེས་པ་དང་། ལས་གང་དང་རྐྱེན་གང་གིས་འདིར་སྐྱེས་པར་གྱུར་སྙམ་བསམས་ནས། འདི་ནི་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ལ་འཕྱ་ཞིང་སྐུར་པ་དང་མ་དད་པའི་རྒྱུ་དང་རྐྱེན་གྱིས་རྒྱལ་པོས་བསད་ནས་གནས་འདིར་སྐྱེས་པར་
གྱུར་ཏོ་སྙམ་སེམས་སོ། །དེ་ལྟར་བསམས་ནས་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ལ་ཤིན་ཏུ་དད་པ་དང་གུས་པའི་སེམས་སྐྱེས་ཏེ། དེ་ནས་ཚེ་འཕོས་ནས་དེ་བཞིན་གཤེགས་པ་ཟིལ་མངར་རྔ་ཞེས་བྱ་བའི་འཇིག་རྟེན་དུ་སྐྱེས་ཏེ་
ཚེ་ཡང་བསྐལ་པ་བཅུ་སྙེད་ཚང་བར་གྱུར་ཏོ། །རིགས་ཀྱི་བུ་དོན་དེ་ལྟ་བས་ན་ངས་སྔོན་མི་དེ་དག་ལ་བསྐལ་པ་བཅུ་སྙེད་ཐུབ་པར་གྱུར་པའི་འཚོ་བ་བྱིན་པ་ཡིན་ན། དེ་ལ་གསོད་པ་ཞེས་བྱར་རུང་ངམ། རིགས་ཀྱི་བུ་གང་ས་རྐོ་བ་དང་། རྩྭ་རྔ་བ་

47-1-269b

དང་། ཤིང་གཅོད་པ་དང་། རོ་ལ་མཚོན་གྱིས་འདེབས་པ་དང་། རྒྱབ་པ་དང་། འཚོག་པ་དང་། གཞུ་བའི་ལས་བྱས་ན་དེའི་རྒྱུ་དེའི་རྐྱེན་གྱིས་སེམས་ཅན་དམྱལ་བར་ལྟུང་བར་འགྱུར་རམ། བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་
འདས་ལ་གསོལ་པ། བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་བ་ལྟར་ན། སེམས་ཅན་དམྱལ་བར་ལྟུང་བར་འགྱུར་རོ། །དེ་ཅིའི་སླད་དུ་ཞེ་ན། སྔོན་བཅོམ་ལྡན་འདས་ཀྱིས་ཉན་ཐོས་ལ་ཆོས་བསྟན་པ་ན། 
ཀྱེ་དགེ་སློང་དག་མགལ་དུམ་ལ་ཡང་ངན་སེམས་མ་སྐྱེད་ཅིག །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ནི་ངན་སེམས་བསྐྱེད་པའི་རྒྱུས་སེམས་ཅན་དམྱལ་བར་ལྟུང་བར་འགྱུར་རོ་ཞེས་གསུངས་སོ། །དེ་ནས་བཅོམ་ལྡན་
འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ལེགས་སོ་ཤིན་ཏུ་ལེགས་སོ་ཞེས་བྱ་བ་བྱིན་ནས། ཁྱོད་ཀྱིས་སྨྲས་པ་བཞིན་དུ་ལེགས་པར་ཡིད་ལ་ཟུང་ཤིག་ཅེས་བཀའ་སྩལད་ཏོ། །རིགས་ཀྱི་བུ་ངན་སེམས་ཀྱིས་སེམས་ཅན་
དམྱལ་བར་ལྟུང་ཞེས་བྱ་བ་ནི་བྱང་ཆུབ་སེམས་དཔའ་ལ་ངན་སེམས་ཤེས་བྱ་བ་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ལ་ཆུང་ངུ་ན་གྲོག་སྦུར་གྱི་བར་དུ་ཡང་བྱམས་ཤིང་
བརྩེ་བ་དང་ཕན་པ་དང་བདེ་བའི་སེམས་བསྐྱེད་དོ། །དེ་ཡང་ཅིའི་ཕྱིར་ཞེ་ན། རྒྱུ་དང་རྐྱེན་དུ་འགྱུར་བ་དང་། ཐབས་ལ་མཁས་པའི་ཕྱིར་རོ། །ཐབས་མཁས་པའི་ཤུགས་ཀྱིས་སེམས་ཅན་རྣམས་དགེ་བའི་རྩ་བ་བསྐྱེད་པར་འགྱུར་རོ། །རིགས་
ཀྱི་བུ་དོན་དེ་ལྟ་བས་ན་ངས་དེའི་ཚེ་ན། ཤིན་ཏུ་ཐབས་མཁས་པས་དེ་དག་གི་སྲོག་ཕྲོགས་ཀྱང་ངན་སེམས་ཀྱིས་ནི་མ་ཡིན་ནོ། །རིགས་ཀྱི་བུ་བྲམ་ཟེའི་ཆོས་ཀྱིས་གལ་ཏེ་གྲོག་སྦུར་ཤིང་རྟ་བཅུ་གང་བ་བསད་ཀྱང་སྡིག་པར་མི་འགྱུར། 
སྦྲང་མ་དང་། མཆུ་སྦྲང་དང་། བྱི་ལ་དང་། སེང་གེ་དང་། སྟག་དང་། དོམ་དང་། དྲེད་དང་གཅན་ཟན་སྡིག་པ་ཅན་སེམས་ཅན་ལ་གནོད་པར་འགྱུར་བ་དག་ཤིང་རྟ་བཅུ་ཚང་བར་བསད་དམ་ཡི་དགས་དང་། སྲིན་པོ་དང་། གྲུལ་བུམ་དང་། ཀ་ཏ་པུ་ཏ་

47-1-270a

ན་དང་། བརྗེད་བྱེད་དང་། སྨྱོ་བྱེད་དང་། སྐེམ་བྱེད་ལ་སོགས་པ་ཡི་དགས་སེམས་ཅན་ལ་གནོད་པར་འགྱུར་བ་དག་གི་སྲོག་བཅད་ཀྱང་རྣམ་པར་སྨིན་པའི་སྡིག་མེད་དོ། །གལ་ཏེ་མིའི་ནང་ན་ངན་པ་ཞིག་བསད་ན་ཡང་རྣམ་པར་
སྨིན་པའི་སྡིག་ཡོད་དེ། བསད་མ་ཐག་ཏུ་མ་མཐོལ་ན་ཡི་དགས་ཀྱི་ཁམས་སུ་ལྟུང་བར་འགྱུར་རོ། །གལ་ཏེ་ཞག་གསུམ་ཟན་མི་ཟ་བར་མཐོལ་ཞིང་བཤགས་ན། སྡིག་པ་འང་ལྷག་མ་མ་ལུས་པར་འབྱང་བར་འགྱུར་རོ། །
གལ་ཏེ་སློབ་དཔོན་བསད་དམ་ཕ་མ་དང་བུད་མེད་བསད་དམ། བལ་གླང་བསད་ན་ལོ་གྲངས་མེད་པ་སྟོང་གི་བར་དུ་སེམས་ཅན་དམྱལ་བར་ལྟུང་བར་འགྱུར་རོ་ཞེས་སྨྲའོ། །རིགས་ཀྱི་བུ་སངས་རྒྱས་དང་བྱང་ཆུབ་སེམས་དཔའ་ནི་ཤེས་བཞིན་དུ་བསད་
པ་ལ་རྣམ་པ་གསུམ་སྟེ། རབ་དང་འབྲིང་དང་ཐ་མའོ། །ཐ་མ་ནི་གྲོག་སྦུར་ལ་སོགས་ཏེ་བྱོལ་སོང་གི་སྐྱེ་གནས་ཐམས་ཅད་དོ། །དེ་ལ་མ་གཏོགས་པ་ནི་བྱང་ཆུབ་སེམས་དཔའ་དག་བྱོལ་སོང་གི་ལུས་སུ་སྐྱེ་བར་སྟོན་པའོ། །རིགས་ཀྱི་བུ་བྱང་ཆུབ་སེམས་
དཔའ་སེམས་དཔའ་ཆེན་པོ་སྨོན་ལམ་གྱི་དབང་གིས་བྱོལ་སོང་གི་སྐྱེ་གནས་སུ་སྐྱེ་བ་སྟོན་པ་ཡང་ཡོད་དེ། དེ་ནི་གསོད་པའི་ཐ་མ་ཞེས་བྱའོ། །གསོད་པ་ཐ་མའི་རྒྱུ་དང་རྐྱེན་གྱིས་ཀྱང་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། ཡི་
དགས་ཀྱི་ཁམས་སུ་ལྟུང་སྟེ། སྡུག་བསྔལ་ཐ་མ་མྱོང་བར་འགྱུར་རོ། །དེ་ཅིའི་ཕྱིར་ཞེ་ན། བྱོལ་སོང་ལ་ཡང་དགེ་བའི་རྩ་བ་ཅུང་ཟད་ཡོད་དེ། དེ་དག་བསད་ན་ཁ་ན་མ་ཐོ་བའི་རྣམ་པར་སྨིན་པ་མྱོང་བར་འགྱུར་ཏེ། དེ་ནི་གསོད་པ་ཐ་མ་ཞེས་བྱའོ། །
གསོད་པ་འབྲིང་ཞེས་བྱ་བ་ནི་སོ་སོའི་སྐྱེ་བོ་མ་རབས་ནས་རྒྱུན་ཏུ་ཞུགས་པའི་བར་དུ་ནི་འབྲིང་ཞེས་བྱ་སྟེ། ལས་དེའི་རྒྱུ་དང་རྐྱེན་གྱིས་ཀྱང་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། ཡི་དགས་ཀྱི་ཁམས་སུ་ལྟུང་སྟེ། སྡུག་བསྔལ་འབྲིང་
མྱོང་བར་འགྱུར་བས་འདི་ནི་གསོད་པ་འབྲིང་ཞེས་བྱའོ། །གསོད་པ་རབ་ཅེས་བྱ་བ་ནི་ཕ་མ་བསད་པ་ནས། དགྲ་བཅོམ་པ་དང་། རང་སངས་རྒྱས་དང་། བྱང་ཆུབ་སེམས་དཔར་ངེས་པའི་བར་དུ་བསད་ན་རབ་ཅེས་བྱའོ། །དེའི་རྒྱུ་དེའི་རྐྱེན་གྱིས་མཚམས་

47-1-270b

མེད་པའི་སེམས་ཅན་དམྱལ་བ་ཆེན་པོར་ལྟུང་ཞིང་སྡུག་བསྔལ་རབ་མྱོང་བར་འགྱུར་ཏེ། དེ་ནི་བསད་པ་རབ་ཅེས་བྱའོ། །རིགས་ཀྱི་བུ་གང་ཞིག་གིས་ལོག་སྲེད་ཅན་བསད་ན་བསད་པ་རྣམ་པ་གསུམ་གང་དུ་ཡང་མི་བསྡུའོ། །རིགས་ཀྱི་བུ་བྲམ་ཟེ་
དེ་དག་ནི་ཐམས་ཅད་ཀྱང་ལོག་སྲེད་ཅན་ཞེས་བྱའོ། །དཔེར་ན་ས་རྐོ་བ་དང་། རྩྭ་རྔ་བ་དང་། ཤིང་གཅོད་པ་དང་། རོ་ལ་མཚོན་གྱིས་བཏབ་བམ། རྒྱབ་པ་དང་། བཙོགས་བརྡེགས་ཀྱང་། ཁ་ན་མ་ཐོ་བའི་རྣམ་པར་སྨིན་པར་མི་འགྱུར་ལ། ལོག་སྲེད་ཅན་
བསད་པ་ཡང་དེ་དང་འདྲ་སྟེ། ཁ་ན་མ་ཐོ་བའི་རྣམ་པར་སྨིན་པ་མེད་དོ། །དེ་ཅིའི་ཕྱིར་ཞེ་ན། བྲམ་ཟེ་དེ་དག་ལ་ཡང་དད་པ་ལ་སྩོགས་ཏེ་དབང་པོ་ལྔའི་བར་དུ་མེད་པས་ན་དེ་དག་བསད་ཀྱང་སེམས་ཅན་དམྱལ་བར་མི་ལྟུང་ངོ་།། །།
འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་རྩ་གཉིས་པ། རིགས་ཀྱི་བུ་ཁྱོད་ཀྱིས་འདི་སྐད་དུ་དེ་བཞིན་གཤེགས་པ་ལ་ཁྱོད་ཅིའི་ཕྱིར་ལྷ་སྦྱིན་ལ་གླེན་པ་མཆིལ་མ་ཟའོ་ཞེས་སྤྱོས་ཏེ་ཅི་བྱ་ཞེས་
ཟེར་བ་མི་རིགས་སོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ནི་ཇི་ཙམ་དུ་གསུང་ངོ་ཅོག་བསམ་གྱིས་མི་ཁྱབ་པ་ཡིན་ནོ། །རིགས་ཀྱི་བུ་ཡང་དག་པར་སྨྲ་བ་ལ་ནི་འཇིག་རྟེན་པ་ཐམས་ཅད་འདོད་དོ། །དུས་མ་ཡིན་པ་དང་། ཆོས་
མ་ཡིན་པ་དང་། ཕན་པ་དང་བདེ་བར་མི་འགྱུར་བའི་ཚིག་ནི་ནམ་དུ་ཡང་མི་གསུང་ངོ་། །རིགས་ཀྱི་བུ་ཚིག་ཁ་ཅིག་ནི་ཤིན་ཏུ་བརླང་ཞིང་རྩུབ་ལ་བརྫུན་པ་ཡང་ཡིན་ཏེ། དུས་མ་ཡིན་པ་དང་། ཆོས་མ་ཡིན་པ་དང་། གང་གིས་ཐོས་ཀྱང་མི་འདོད་
པ་དང་། ཕན་པ་དང་། བདེ་བར་མི་འགྱུར་བ་ནི་ངས་ནམ་དུ་ཡང་མ་གསུངས་སོ། །རིགས་ཀྱི་བུ་ཚིག་ཏུ་གསུང་བ་ཁ་ཅིག་ནི་བརླང་ཞིང་རྩུབ་ཀྱང་ཡང་དག་པ་མི་བརྫུན་པ་སྟེ། དུས་དང་ལྡན་པ། ཆོས་དང་ལྡན་པ། སེམས་ཅན་ཐམས་ཅད་ལ་ཕན་པ་དང་
བདེ་བ་སྟེ། ཐོས་པས་མི་དགའ་བར་འགྱུར་བ་ཡང་ངེས་པར་གསུང་ངོ་། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ནི་མཁྱེན་པ་དང་ལྡན་པ་སྟེ། ཤིན་ཏུ་ཐབས་མཁས་པ་དང་ལྡན་པའི་ཕྱིར་རོ། །རིགས་ཀྱི་བུ་ངས་སྔོན་དུས་གཅིག་ན་འབྲོག་

47-1-271a

དགོན་པ་དང་། གྲོང་དང་། གྲོང་ཁྱེར་དང་། ནགས་ཚལ་དུ་རྒྱུ་ཞིང་གཤེགས་པ་ན་ནགས་ཚལ་གྱི་དྲུང་ན་ཡི་དགས་འབྲོག་དགོན་པ་ཞེས་བྱ་བ་ཞིག་ཡོད་དེ། ཟས་སུ་ཤ་ཟ་ཁྲག་འཐུང་བས་སེམས་ཅན་མང་པོ་ལ་གནོད་པར་ཡང་
འགྱུར་ལ། གྲོང་ཁྱེར་དེའི་མི་རྣམས་ལ་ཉིན་རེ་ཞིང་རེ་རེ་ཟའོ། །རིགས་ཀྱི་བུ་ངས་དེའི་ཚེ་ན་ཡི་དགས་དེ་ལ་ཆོས་རྒྱས་པར་བསྟན་ཅིང་བཤད་ཀྱང་ཁྲོ་ཞིང་གཏུམ་ལ་གླེན་ཏེ་ཤེས་པ་མེད་པས་ངས་བསྟན་པ་མི་ཉན་ཏོ། །དེའི་ཚེ་ན་ངས་ཡི་
དགས་མཐུ་ཆེན་པོ་དང་ལྡན་པ་ཞིག་དུ་སྤྲུལ་ནས་དེའི་གནས་ཀྱང་བསྒུལ་ཏེ་མི་བདེ་བར་བྱས་སོ། །དེའི་ཚེ་ན་ཡི་དགས་དེ་དེ་མ་ཐག་ཏུ་འཁར་དང་ཆས་ཏེ་གནས་ནས་བྱུང་ནས་ང་ལ་རྒོལ་དུ་ཆས་སོ། །དེའི་ཚེ་ཡི་དགས་དེས་ང་མཐོང་མ་ཐག་
ཏུ་དྲན་པ་སྟོར་ཏེ། མྱོས་བཞིན་དུ་ཤིན་ཏུ་འཇིགས་སྐྲག་པས་ས་ལ་འགྱེལ་ཏེ་རྒྱལ་བར་གྱུར་ནས་མི་རོ་ལྟ་བུར་དབུགས་ཀྱང་ཆད་པར་གྱུར་ཏོ། །དེ་ལ་ངས་བྱམས་པ་བརྩེ་བའི་ཐུགས་བསྐྱེད་ནས་ལག་པས་དེའི་མགོ་བོ་ལ་བྱུགས་པས་
དེ་མ་ཐག་ཏུ་ཕྱིར་སངས་ནས་འདི་སྐད་ཅེས་སྨྲས་སོ། །བདག་ནི་དེང་ལུས་དང་སྲོག་ཀྱང་ཕྱིར་ཐོབ་སྟེ། ལྷའི་རྒྱལ་པོ་ཆེན་པོ་འདི་ནི་ཤིན་ཏུ་མཐུ་ཆེ་བ་དང་གཟི་བརྗིད་ཆེ་བ་སྟེ། བྱམས་པ་བརྩེ་བའི་ཐུགས་དང་ལྡན་པས་བདག་གི་ཉེས་པའི་
སྐྱབས་ཀྱང་བྱས་ཤེས་སྨྲས་སོ། །དེའི་ཚེ་ན་ཡི་དགས་དེ་ང་ལ་དད་པའི་སེམས་བསྐྱེད་པས་ངས་དེའི་ཚེ་ཕྱིར་ཡང་དེ་བཞིན་གཤེགས་པའི་སྐུར་སྤྲུལ་ནས་གཞན་ཡང་ཆོས་རྣམ་པ་སྣ་ཚོགས་བསྟན་ཅིང་བཤད་ནས། ཡི་དགས་དེ་སྲོག་མི་
གཅོད་པའི་ཁྲིམས་སྲུང་དུ་བཅུག་གོ། །དེའི་ཚེ་ན་འབྲོག་དགོན་པའི་གྲོང་ཁྱེར་དེ་ན་ཁྱིམ་བདག་གཅིག་ཟ་བའི་རེས་ལ་བབ་ནས་གྲོང་གི་མི་རྣམས་ཀྱིས་ཀྱང་ཡི་དགས་དེའི་དྲུང་དུ་བསྐྱལ་ལོ། །དེའི་ཡི་དགས་དེས་ཁྱིམ་བདག་བླངས་ནས་ང་ལ་
ཕུལ་ལོ། །ངས་ཀྱང་བླངས་ནས་ཁྱིམ་བདག་དེའི་མིང་ཡང་ལག་པ་ཞེས་བཏགས་སོ། །དེའི་ཚེ་ན་ཡི་དགས་དེས་བཅོམ་ལྡན་འདས་ལ་འདི་སྐད་ཅེས་གསོལད་ཏོ། །བཅོམ་ལྡན་འདས་བདག་ཅག་འཁོར་དང་བཅས་པ་ནི་ཤ་དང་ཁྲག་འཚལ་བ་ལགས་

47-1-271b

ན། དེ་སྲོག་མི་གཅོད་པའི་ཁྲིམས་བླངས་ན་བདག་ཅག་ཅིས་འཚོ་བར་བགྱི། དེ་ལ་ངས་འདི་སྐད་ཅེས་བཀའ་སྩལད་ཏོ། །དེང་ཕྱིན་ཆད་ངའི་ཉེ་གནས་ཉན་ཐོས་རྣམས་གང་ན་སངས་རྒྱས་ཀྱི་ཆོས་ལ་ནན་ཏན་བྱེད་པའི་གནས་ཐམས་ཅད་དུ་
ཀུན་གྱིས་ཁྱོད་ལ་ཟས་སྦྱིན་པར་བཀའ་སྩལ་ཏོ། །རིགས་ཀྱི་བུ་དེའི་རྒྱུ་དེའི་རྐྱེན་གྱིས་དགེ་སློང་རྣམས་ཀྱིས་འབྲོག་དགོན་པའི་ཡི་དགས་ལ་རྟག་ཏུ་གཏོར་མ་བྱིན་ཅིག་ཅེས་ཁྲིམས་བཅས་པ་ཡིན་ནོ། །གལ་ཏེ་གནས་ཁང་དག་ཏུ་གཏོར་
མ་མ་བྱིན་པར་གྱུར་ན་དེ་དག་ནི་ངའི་ཉེ་གནས་མ་ཡིན་ཏེ། ལྷའི་བདུད་ཀྱི་དཔུང་དང་འཁོར་ཡིན་པར་རིག་པར་བྱའོ། །རིགས་ཀྱི་བུ་དེ་བཞིན་གཤེགས་པ་ནི་སེམས་ཅན་གདུལ་བའི་ཕྱིར་དེ་ལྟ་བུའི་ཐབས་རྣམ་པ་སྣ་ཚོགས་སྟོན་ཏེ། ཆེད་དུ་དེ་
དག་འཇིགས་པར་བྱེད་པ་ནི་མ་ཡིན་ནོ། །རིགས་ཀྱི་བུ་ངས་སྔོན་དབྱུག་པ་ཐོགས་ཏེ། ཡི་དགས་ཆོས་སྲུང་བ་ཞེས་བྱ་བ་བརྡེགས་སོ། །ཡང་དུས་གཅིག་ན་ཡི་དགས་ལུག་མགོ་ཞེས་བྱ་བ་རི་ཀ་ནས་ཕུལ་ཏེ་རྦབ་དུ་བཏང་ངོ་། །གཞན་ཡང་ཤིང་
ཀ་ནས་ཡི་དགས་སྤྲེའུ་ཞེས་བྱ་བ་གཡང་དུ་བཏང་བ་དང་། བལ་གླང་ནོར་སྲུང་བ་ཞེས་བྱ་བ་སེང་གེ་ལྔ་མཐོང་བར་བྱས་པ་དང་། རྡོ་རྗེའི་ལུས་སུ་སྤྲུལ་ནས་མུ་སྟེགས་ཅན་ཀུན་ཏུ་སྨྲ་བ་འཇིགས་པར་བྱས་པ་དང་། སེང་ལྡེང་གི་ཕུར་བུར་ཡི་དགས་
སྤུ་ཅན་ལ་བཙུགས་པ་དང་། དེ་ལ་སོགས་པ་བྱས་ཀྱང་ཡི་དགས་དེ་དག་ལ་གནོད་པར་མ་གྱུར་ཏེ། དེ་དག་ལ་དམ་པའི་ཆོས་ལ་གནས་པར་བྱ་བའི་ཕྱིར་ཐབས་རྣམ་པ་སྣ་ཚོགས་སྟོན་ཏོ། །རིགས་ཀྱི་བུ་ངས་དེའི་ཚེ་ན་ཡང་དག་པར་ལྷ་སྦྱིན་ལ་
སྤྱོས་པ་ཡང་མེད་ལ། ལྷ་སྦྱིན་ཉིད་ཀྱང་གླེན་པ་ཡང་མ་ཡིན། མིའི་མཆིལ་མ་ཟ་བ་ཡང་མ་ཡིན། ངན་སོང་དུ་སྐྱེ་བར་ཡང་མི་འགྱུར། མཚམས་མེད་པའི་སེམས་ཅན་དམྱལ་བར་བསྐལ་པ་གཅིག་གི་བར་དུ་སྡུག་བསྔལ་མྱོང་བ་ཡང་མ་
ཡིན་དགེ་འདུན་གྱི་དབྱེན་བྱས་པའམ། སངས་རྒྱས་ཀྱི་སྐུ་ལ་ཁྲག་ཕྱུང་བ་ཡང་མ་ཡིན། རྩ་བ་བཞི་ཉམས་པ་ཡང་མ་ཡིན། དམ་པའི་ཆོས་ལ་སྐུར་པ་དང་། ཐེག་པ་ཆེན་པོའི་མདོ་སྡེ་ལ་སྐུར་པ་ཡང་མ་ཡིན། ལོག་སྲེད་ཅན་ཡང་མ་ཡིན། ཉན་ཐོས་

47-1-272a

དང་རང་སངས་རྒྱས་ཀྱང་མ་ཡིན་ནོ། །རིགས་ཀྱི་བུ་ལྷ་སྦྱིན་ཞེས་བྱ་བ་ནི་ཡང་དག་པར་ན་ཉན་ཐོས་དང་། རང་སངས་རྒྱས་ཀྱི་སྤྱོད་ཡུལ་མ་ཡིན་གྱི། སངས་རྒྱས་ཉག་གཅིག་གིས་མཁྱེན་ཅིང་གཟིགས་པར་ཟད་དོ། །རིགས་
ཀྱི་བུ་དེ་བས་ན་ཁྱོད་ཀྱིས་འདི་སྐད་དུ་དེ་བཞིན་གཤེགས་པས་ཅིའི་ཕྱིར་ལྷ་སྦྱིན་ལ་སྨོད་པ་དང་གཤེ་བ་དང་སྤྱོ་བ་མཛད་ཅེས་མ་འདྲི་ཤིག །ཁྱོད་ཀྱིས་ནི་སངས་རྒྱས་རྣམས་ཀྱི་སྤྱོད་ཡུལ་ལ་དེ་ལྟར་ཐེ་ཙོམ་བསྐྱེད་པའི་མི་རིགས་སོ། །བྱང་ཆུབ་
སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། དཔེར་ན་བུ་རམ་ཤིང་ནི་ཡང་དང་ཡང་བསྐོལ་ན་རོ་རྣམ་པ་སྣ་ཚོགས་འབྱུང་བ་དང་འདྲ་བར་བདག་ཀྱང་བཅོམ་ལྡན་འདས་ལས་ཡང་དང་ཡང་ཐོས་པས་ཆོས་ཀྱི་རོ་རྣམ་
པ་མང་དུ་ཐོབ་པ་ནི་འདི་ལྟ་སྟེ་འབྱུང་བའི་རོ་དང་། འདོད་པ་སྤོང་བའི་རོ་དང་། ཞི་བའི་རོ་དང་། བྱང་ཆུབ་ཀྱི་རོ་རྣམས་སོ། །ཡང་བཅོམ་ལྡན་འདས་དཔེར་ན་གསེར་ཡང་དག་པ་ནི་ཡང་དང་ཡང་བཞུ་སྟེ་བརྡུངས་ན་གསེར་བཙོ་མར་འགྱུར་ཏེ་
ཤིན་ཏུ་གསལ་བ་དང་། མཉེན་པ་དང་། ཤིན་ཏུ་འོད་གསལ་བ་དང་། རིན་ཐང་སྐྱེ་བར་འགྱུར་ཏེ། ལྷ་དང་མིའི་རིན་པོ་ཆེར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་ཡང་དེ་དང་འདྲ་སྟེ། ཡང་དང་ཡང་ཞུ་ཞིང་དྲིས་ན་ཤིན་ཏུ་
ཟབ་མོའི་དོན་ཐོས་པ་དང་མཐོང་བར་འགྱུར་བས་ཟབ་མོ་ལ་རྣལ་འབྱོར་པ་རྣམས་གཟུངས་སུ་འཛིན་ཅིང་ནན་ཏན་བྱེད་པ་དང་། སྐྱེ་བོ་ཚད་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་
བ་དང་། དེའི་འོག་ཏུ་ལྷ་དང་མི་ལ་སོགས་པས་སྟི་སྟང་དང་། བཀུར་སྟིར་མཆོད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ལེགས་སོ་ལེགས་སོ་ཞེས་བྱ་བ་བྱིན་ཏེ། འོད་སྲུང་བྱང་ཆུབ་སེམས་དཔའ་
སེམས་དཔའ་ཆེན་པོས་སེམས་ཅན་ལ་ཕན་པ་དང་བདེ་བར་འདོད་པའི་ཕྱིར་ཤིན་ཏུ་ཟབ་མོའི་དོན་འདི་དྲིས་པ་ལེགས་སོ། །རིགས་ཀྱི་བུ་དོན་དེ་ལྟ་བས་ན། ངས་ཀྱང་ཁྱོད་ཀྱིས་བསམས་པ་བཞིན་དུ་ཐེག་པ་ཆེན་པོ་ཤིན་ཏུ་རྒྱས་པ་ཟབ་མོའི་དོན་བསྟན་

47-1-272b

པ་ནི་འདི་ལྟ་སྟེ། རབ་ཏུ་དགའ་བ་བུ་གཅིག་པ་དང་འདྲ་བའི་ས་བསྟན་པའོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། གལ་ཏེ་བྱང་ཆུབ་སེམས་དཔའ་དག་བྱམས་པ་དང་སྙིང་རྗེ་དང་དགའ་བ་ལ་ནན་ཏན་བྱས་པས་བུ་
གཅིག་པ་དང་འདྲ་བའི་ས་ཐོབ་པར་འགྱུར་ན། བཏང་སྙོམས་ཀྱི་སེམས་ལ་ནན་ཏན་བགྱིད་པ་ན་ས་གང་དག་ཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལད་པ། ལེགས་སོ་ཤིན་ཏུ་ལེགས་སོ་རིགས་ཀྱི་བུ་ཁྱོད་ནི་ཤིན་ཏུ་དུས་ལ་མཁས་
པས་ངས་ཀྱང་བཤད་པར་དགོངས་པ་ལས་ཁྱོད་ཀྱིས་ཞུས་པ་ལེགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་བཏང་སྙོམས་ཀྱི་སེམས་ལ་ནན་ཏན་བྱེད་པ་ན། རབ་འབྱོར་ལྟར་སྟོང་པ་ཉིད་ཀྱི་མཉམ་པའི་ས་ལ་གནས་པར་འགྱུར་རོ། །རིགས་ཀྱི་
བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་པ་ཉིད་ཀྱི་མཉམ་པའི་ས་ལ་གནས་པ་ན། ཕ་མ་དང་། ཕུ་ནུ་དང་། སྲིང་མོ་དང་། བུ་དང་། གཉེན་བཤེས་དང་། བྱམས་སྡང་དུ་མི་དམིགས་པ་ནས། ཕུང་པོ་དང་། ཁམས་དང་། སྐྱེ་མཆེད་དང་། 
སེམས་ཅན་དང་། འཚོ་བའི་བར་དུ་མི་དམིགས་སོ། །རིགས་ཀྱི་བུ་དེ་ལྟར་ནམ་མཁའ་ལ་ཕ་མ་དང་། ཕུ་ནུ་དང་། ཆུང་མ་དང་། བུ་མེད་བུ་ནས། སེམས་ཅན་དང་། འཚོ་བའི་བར་དུ་མེད་པ་དང་འདྲ་བར་ཆོས་ཐམས་ཅད་ཀྱང་ཕ་མ་ནས། འཚོ་བའི་བར་དུ་མེད་དོ། །རིགས་
ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ཆོས་ཐམས་ཅད་ལ་སེམས་མཉམ་པར་ལྟ་བ་ནི་ཇི་ལྟར་ནམ་མཁའ་དང་འདྲའོ། །དེ་ཅིའི་ཕྱིར་ཞེ་ན། སྟོང་པ་ཉིད་ཀྱི་ཆོས་ལ་ནན་ཏན་བྱེད་པ་ལ་ཤིན་ཏུ་མཁས་པའི་ཕྱིར་རོ། །བྱང་ཆུབ་སེམས་
དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། དེ་ལ་སྟོང་པ་ཉིད་ཅེས་བགྱི་བ་གང་ལགས། བཀའ་སྩལ་པ། རིགས་ཀྱི་བུ་སྟོང་པ་ཉིད་ཅེས་བྱ་བ་ནི་འདི་ལྟ་སྟེ། ནང་སྟོང་པ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དང་། འདུས་
བྱས་སྟོང་པ་ཉིད་དང་། འདུས་མ་བྱས་སྟོང་པ་ཉིད་དང་། ཐོག་མ་དང་ཐ་མ་མེད་པ་སྟོང་པ་ཉིད་དང་། རང་བཞིན་སྟོང་པ་ཉིད་དང་། དམིགས་སུ་མེད་པའི་སྟོང་པ་ཉིད་དང་། དོན་དམ་པའི་སྟོང་པ་ཉིད་དང་། སྟོང་པ་ཉིད་ཀྱི་སྟོང་པ་ཉིད་དང་། སྟོང་པ་ཆེན་པོའོ། །

47-1-273a

བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟ་བུར་ནང་གི་སྟོང་པ་ལ་ཡོངས་སུ་རྟོག་ཅེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་ནང་གི་ཆོས་སྟོང་པ་ཉིད་དུ་རྟོག་གོ། །ནང་གི་ཆོས་སྟོང་པ་ནི་འདི་ལྟ་སྟེ་
ཕ་མ་དང་། བྱམས་སྡང་དང་། སེམས་ཅན་དང་། འཚོ་བ་དང་། རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཡང་མེད། དེ་བཞིན་གཤེགས་པ་དང་། ཆོས་དང་། དགེ་འདུན་དང་། རྫས་ཀྱི་དངོས་པོ་ཡང་མེད་དོ། །
དེ་ལྟར་ནང་གི་ཆོས་ལ་སངས་རྒྱས་ཀྱི་རང་བཞིན་ཡོད་མོད་ཀྱི། སངས་རྒྱས་ཀྱི་རང་བཞིན་དེ་ནི་ནང་ན་ཡང་མ་ཡིན། ཕྱི་རོལ་ན་ཡང་མ་ཡིན་ནོ། །དེ་ཇི་ལྟ་ཞེ་ན། སངས་རྒྱས་ཀྱི་རང་བཞིན་ནི་རྟག་པ། གནས་པ། མི་འགྱུར་མི་འཕོ་བའི་
ཕྱིར་རོ། །དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ནང་གི་སྟོང་པ་ཉིད་ལ་ཡོངས་སུ་རྟོག་པ་ཞེས་བྱའོ། །ཕྱི་རོལ་ཀྱི་སྟོང་པ་ཉིད་ཀྱང་དེ་དང་འདྲ་སྟེ། ནང་གི་ཆོས་ཅུང་ཟད་ཀྱང་མེད་པའོ། །ཕྱི་ནང་གི་སྟོང་པ་ཡང་དེ་དང་
འདྲའོ། །རིགས་ཀྱི་བུ་དེ་བཞིན་གཤེགས་པ་དང་། སངས་རྒྱས་དང་། ཆོས་དང་དགེ་འདུན་དང་། སངས་རྒྱས་ཀྱི་རང་བཞིན་ནི་སྟོང་པ་གཉིས་པོ་འདི་ལ་མི་གནས་སོ། །དེ་ཅིའི་ཕྱིར་ཞེ་ན། དེ་ལྟར་རྟག་པ་དང་། བདེ་བ་དང་བདག་དང་། 
ཡོངས་སུ་དག་པ་དང་། ཆོས་རྣམ་པ་བཞི་པོ་འདི་དག་ནི་སྟོང་པ་ཉིད་ཅེས་མི་བྱ་སྟེ། ཕྱི་ནང་གཉིས་ཀ་སྟོང་པ་ཉིད་ཅེས་བྱའོ། །རིགས་ཀྱི་བུ་འདུས་བྱས་སྟོང་པ་ཉིད་ནི་ཇི་ཙམ་དུ་འདུས་བྱས་ཀྱི་ཆོས་ཐམས་ཅད་སྟོང་པ་ཉིད་དོ། །འདི་ལྟ་སྟེ་
ནང་སྟོང་པ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དང་། རྟག་པ་དང་། བདེ་བ་དང་། བདག་དང་། ཡོངས་སུ་དག་པ་སྟོང་པ་ཉིད་དང་། སེམས་ཅན་དང་། འཚོ་བ་དང་། དེ་བཞིན་གཤེགས་པ་དང་། ཆོས་དང་དགེ་འདུན་དང་། 
དོན་དམ་པ་སྟོང་པ་སྟེ། དེ་ལ་སངས་རྒྱས་ཀྱི་རང་བཞིན་འདུས་བྱས་ཀྱི་ཆོས་མ་ཡིན་ཏེ། དེ་བས་ན་སངས་རྒྱས་ཀྱི་རང་བཞིན་ནི་འདུས་བྱས་ཀྱི་ཆོས་ཀྱི་སྟོང་པ་ཉིད་མ་ཡིན་པས་འདུས་བྱས་ཀྱི་སྟོང་པ་ཞེས་བྱའོ། །རིགས་ཀྱི་བུ་

47-1-273b

དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འདུས་མ་བྱས་པའི་སྟོང་པ་ལ་ཡོངས་སུ་རྟོག་པ་ཞེ་ན། འདུས་མ་བྱས་ཀྱི་ཆོས་དེ་ནི་ཐམས་ཅད་ཀྱང་སྟོང་པ་ཉིད་དོ། །འདི་ལྟ་སྟེ། མི་རྟག་པ་དང་། སྡུག་བསྔལ་བ་དང་། 
ཡོངས་སུ་མ་དག་པ་དང་། བདག་མེད་པ་དང་། ཕུང་པོ་དང་། ཁམས་དང་། སྐྱེ་མཆེད་དང་། སེམས་ཅན་དང་། འཚོ་བའི་མཚན་ཉིད་དང་། འདུས་བྱས་དང་། ཟག་པ་དང་བཅས་པ་དང་། ནང་གི་ཆོས་དང་། ཕྱི་རོལ་ཀྱི་ཆོས་སོ། །
འདུས་མ་བྱས་པའི་ཆོས་ལས། སངས་རྒྱས་ལ་སོགས་ཏེ། ཆོས་རྣམ་པ་བཞི་པོ་འདི་དག་ནི་འདུས་བྱས་ཀྱང་མ་ཡིན་ལ། འདུས་མ་བྱས་པའི་མཚན་ཉིད་ཀྱང་མ་ཡིན་ཏེ། དགེ་བའི་ཕྱིར་འདུས་མ་བྱས་པ་ཉིད་མ་ཡིན་ནོ། །
རྟག་པ་དང་གནས་པའི་ཕྱིར་འདུས་བྱས་པ་མ་ཡིན་ཏེ། འདི་དག་ནི་བྱང་ཆུབ་སེམས་དཔའ་འདུས་མ་བྱས་པའི་སྟོང་པ་ལ་ཡོངས་སུ་རྟོག་པ་ཞེས་བྱའོ། །དེ་ལ་ཇི་ལྟར་ན་བྱང་ཆུབ་སེམས་དཔའ་ཐོག་མ་མེད་པའི་སྟོང་པ་ཉིད་ལ་ཡོངས་
སུ་རྟོག་པ་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོས་འཁོར་བ་ལ་མཐའ་མེད་པར་མཐོང་བས་ཐམས་ཅད་ཀྱང་སྟོང་པ་ཉིད་དང་རབ་ཏུ་ཞི་བའོ། །འདི་ལྟ་སྟེ། སྟོང་པ་ཉིད་ཅེས་བྱ་བ་ནི་རྟག་པ་དང་། བདེ་བ་དང་། 
བདག་དང་། ཡོངས་སུ་དག་པ་སྟེ། ཐམས་ཅད་སྟོང་པ་ཉིད་ཀྱིས་ཞི་བ། འགྱུར་བ་དང་འཕོ་བ་མེད་པ། སེམས་ཅན་དང་། འཚོ་བ་དང་། དཀོན་མཆོག་གསུམ་དང་། སངས་རྒྱས་ཀྱི་རང་བཞིན་དང་། འདུས་མ་བྱས་པའི་ཆོས་
ཀྱང་མེད་པ་ནི་བྱང་ཆུབ་སེམས་དཔའ་ཐོག་མ་མེད་པའི་སྟོང་པ་ཉིད་ལ་ཡོངས་སུ་རྟོག་པ་ཞེས་བྱའོ། །དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་སུ་མེད་པའི་སྟོང་པ་ཉིད་ལ་ཡོངས་སུ་རྟོག་པ་ཞེ་ན། 
དཔེར་ན་མི་ཞིག་བུ་མེད་པས་ཁྱིམ་སྟོང་ངོ་ཞེས་མཐར་བྱམས་པ་དང་སྡང་བ་མེད་པར་རྟོག་པ་དང་། གླེན་པ་གཏི་མུག་ཅན་དག་ཕྱོགས་ཙམ་སྟོང་ངོ་ཞེས་སྨྲ་བ་དང་། དབུལ་པོ་ངན་པ་དག་ཐམས་ཅད་སྟོང་པའོ་ཞེས་ཁ་ཅིག་ནི་སྟོང་པ་

47-1-274a

ཉིད་དུ་སྨྲ། ཁ་ཅིག་ནི་སྟོང་པ་མ་ཡིན་ནོ་ཞེས་སྨྲ་བ་ལྟ་བུ་མ་ཡིན་ཏེ། བྱང་ཆུབ་སེམས་དཔའ་དེ་ལྟར་ཡོངས་སུ་རྟོག་པ་ན་མི་དབུལ་པོ་དང་འདྲ་བར་ཐམས་ཅད་སྟོང་པ་ཉིད་དུ་རྟོག་སྟེ། དེ་ལྟར་ན་བྱང་ཆུབ་སེམས་དཔའ་
སེམས་དཔའ་ཆེན་པོ་དམིགས་སུ་མེད་པའི་སྟོང་པ་ཉིད་ལ་ཡོངས་སུ་རྟོག་པ་ཞེས་བྱའོ། །དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་དོན་དམ་པའི་སྟོང་པ་ཉིད་ལ་རྟོག་པ་ཞེ་ན། རིགས་ཀྱི་བུ་བྱང་ཆུབ་སེམས་
དཔའ་སེམས་དཔའ་ཆེན་པོས་དོན་དམ་པ་སྟོང་པ་ཉིད་ལ་ཡོངས་སུ་རྟོག་པའི་ཚེ་མིག་གི་དབང་པོ་སྐྱེ་བ་ན་གང་ནས་ཀྱང་མ་འོངས་ལ། ཐ་མ་འགག་པའི་དུས་ན་ཡང་སོང་བ་མེད་དོ། །ཐོག་མ་ནས་མེད་ལ་ཡོད་པ་དང་། 
ཡོད་ནས་ཀྱང་ཕྱིར་མེད་པར་འགྱུར་ཏེ། དེ་ལྟར་ཡང་དག་པ་ཉིད་ཀྱི་རྗེས་བཅད་ན་མིག་ཀྱང་མེད། བདག་པོ་ཡང་མེད་དེ། ཇི་ལྟར་མིག་ལ་རང་བཞིན་མེད་པ་དང་འདྲ་བར་ཆོས་ཐམས་ཅད་ཀྱང་དེ་དང་འདྲའོ། །
ཆོས་གང་ལ་སོགས་པ་ལ་དོན་དམ་པའི་སྟོང་པ་ཞེས་བྱ་ཞེ་ན། ལས་ཀྱང་ཡོད་རྣམ་པར་སྨིན་པ་ཡང་ཡོད་བཞིན་དུ་བྱེད་པ་ཡོད་པར་མི་མཐོང་སྟེ། སྟོང་པའི་ཆོས་འདི་དག་ནི་དོན་དམ་པའི་སྟོང་པ་ཞེས་བྱ་སྟེ། དེ་ལྟར་ན་བྱང་
ཆུབ་སེམས་དཔའ་སེམས་དཔའ་ཆེན་པོ་དོན་དམ་པའི་སྟོང་པ་ཉིད་ལ་རྟོག་པ་ཞེས་བྱའོ། །དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་པ་ཉིད་ཀྱི་སྟོང་པ་ལ་རྟོག་པ་ཞེ་ན། སྟོང་པ་ཉིད་ཀྱི་སྟོང་པ་ཞེས་བྱ་བ་
ནི་ཉན་ཐོས་དང་། རང་སངས་རྒྱས་ལ་སོགས་པས་མྱོང་བར་འགྱུར་བའི་གནས་ཡིན་ཏེ། རིགས་ཀྱི་བུ་ཡོད་པ་ཡང་མ་ཡིན་ལ། མེད་པ་ཡང་མ་ཡིན་པ་ནི་སྟོང་པ་ཉིད་ཀྱི་སྟོང་པ་ཞེས་བྱའོ། །ཡིན་ཡང་ཡིན་ལ། 
མ་ཡིན་པ་ཡང་མ་ཡིན་པ་ནི་སྟོང་པ་ཉིད་ཀྱི་སྟོང་པ་ཞེས་བྱའོ། །རིགས་ཀྱི་བུ་ས་བཅུ་ལ་གནས་པའི་བྱང་ཆུབ་སེམས་དཔའ་ཡང་དེ་ལ་ཕྱོགས་ཅུང་ཟད་རྡུལ་གྱི་ཆ་ཤས་ཙམ་རྟོག་པར་འགྱུར་བ་ཡིན་ན་གཞན་ལྟ་སྨོས་ཀྱང་

47-1-274b

ཅི་དགོས། རིགས་ཀྱི་བུ་དེ་ལྟར་སྟོང་པ་ཉིད་ཀྱི་སྟོང་པ་ནི་ཉན་ཐོས་ཀྱི་སྟོང་པ་ཉིད་ཀྱི་སྟོང་པའི་ཏིང་ངེ་འཛིན་དང་ཐུན་མོང་དུ་འགྱུར་བ་མ་ཡིན་ཏེ། དེ་ནི་བྱང་ཆུབ་སེམས་དཔའ་སྟོང་པ་ཉིད་ཀྱི་སྟོང་པ་ལ་ཡོངས་སུ་རྟོག་པ་ཞེས་བྱའོ། །
རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་པ་ཆེན་པོ་ལ་ཡོངས་སུ་རྟོག་པ་ཞེ་ན། རིགས་ཀྱི་བུ་སྟོང་པ་ཆེན་པོ་ཞེས་བྱ་བ་ནི་འདི་ལྟ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་སྟེ་སྟོང་པ་ཆེན་པོ་ཞེས་
བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ས་འདི་ལ་གནས་པ་ན་སྟོང་པ་ཉིད་ཀྱི་སྒོ་ཐོབ་པས་ནམ་མཁའ་ལྟ་བུར་མཉམ་པའི་ས་ལ་གནས་པར་འགྱུར་རོ། །རིགས་ཀྱི་བུ་ངས་
འཁོར་གྱི་དཀྱིལ་འཁོར་ཆེན་པོ་འདིར་འདི་ལྟ་བུ་ལ་སྩོགས་པ་སྟོང་པ་ཉིད་ཀྱི་དོན་བསྟན་པ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀླུང་གང་གཱ་བཅུའི་བྱེ་མ་སྙེད་ནམ་མཁའ་ལྟར་མཉམ་པའི་ས་ལ་གནས་པར་གྱུར་ཏོ། །
རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དག་ས་དེ་ལ་གནས་ནས་ཆོས་ཐམས་ཅད་ལ་ཐོགས་པ་མེད་དེ། གཟུང་བ་ཡང་མེད། མྱོས་པར་འགྱུར་བ་ཡང་མེད་དེ། དོན་དེ་ལྟ་བས་ན་ནམ་མཁའ་ལྟར་མཉམ་པའི་
ས་ཞེས་བྱའོ། །རིགས་ཀྱི་བུ་འདི་ལྟ་སྟེ། དཔེར་ན་ནམ་མཁའ་ནི་གཟུགས་ཡིད་དུ་འོང་བ་ལ་ཆགས་པར་ཡང་མི་བྱེད་ཡིད་དུ་མི་འོང་བའི་གཟུགས་ལ་ཞེ་སྡང་བར་ཡང་མི་སྐྱེད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་ས་འདི་ལ་
གནས་པ་ཡང་དེ་དང་འདྲ་སྟེ། གཟུགས་བཟང་པོ་དང་ངན་པ་ལ་འདོད་པ་འམ། ཞེ་སྡང་བའི་སེམས་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན་ནམ་མཁའ་ནི་རྒྱ་ཆེ་ལ་ཡངས་པས་ཟླ་མེད་དེ། ཆོས་ཐམས་ཅད་ཤོང་བ་དང་འདྲ་བར་བྱང་
ཆུབ་སེམས་དཔའ་སེམས་དཔའ་ཆེན་པོ་ཡང་ས་དེ་ལ་གནས་ན་དེ་དང་འདྲ་བར་ཤིན་ཏུ་རྒྱ་ཆེ་བ་དང་། ཟླ་མེད་པ་དང་། ཆོས་ཐམས་ཅད་ཤོང་བ་ཡིན་ནོ། །དོན་དེ་ལྟ་བས་ན་ནམ་མཁའ་ལྟར་མཉམ་པའི་ས་ཞེས་བྱའོ། །རིགས་ཀྱི་བུ་བྱང་ཆུབ་

47-1-275a

སེམས་དཔའ་སེམས་དཔའ་ཆེན་པོས་ས་འདི་ལ་གནས་ན་ཆོས་ཐམས་ཅད་མཐོང་བ་དང་རྟོགས་པར་འགྱུར་ཏེ། གལ་ཏེ་སྤྱོད་དམ། དམིགས་སམ། དེའི་རང་བཞིན་དང་། མཚན་ཉིད་དང་རྒྱུ་དང་རྐྱེན་དང་། སེམས་
ཅན་གྱི་སེམས་དང་། དབང་པོ་དང་། བསམ་གཏན་དང་། ཐེག་པ་དང་། དགེ་བའི་བཤེས་གཉེན་དང་། ཚུལ་ཁྲིམས་སྲུང་བ་དང་། སྦྱིན་པ་ལ་སྤྱོད་པ་ལ་སོགས་པ་ཆོས་ཐམས་ཅད་རྟོགས་ཤིང་མཐོང་བར་འགྱུར་རོ། །རིགས་ཀྱི་བུ་གཞན་
ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ས་དེ་ལ་གནས་ན་ཤེས་བཞིན་དུ་མི་མཐོང་ངོ་། །གང་དག་ཤེས་ཤེ་ན། འདི་ལྟ་སྟེ་བདག་སྨྱུང་བར་བྱེད་པའི་ཆོས་དང་། ཆུར་མཆོང་བ་དང་། མེར་མཆོང་བ་དང་། རྐང་པ་ཡ་གཅིག་གིས་འགྲེང་
བ་དང་། ཚ་བ་ལྔས་སྲེག་པ་དང་། ཐལ་ཁུང་དང་། ས་དང་ཚེར་ཕུང་དང་། ལོ་མ་དང་། རྩྭ་དང་། ལྕི་བའི་སྟེང་ན་ཉལ་བ་དང་། གོས་རྩུབ་པོ་གསོ་རས་གྱོན་པ་དང་། དུར་ཁྲོད་དང་། ཕྱག་དར་ཁྲོད་དུ་བོར་བའི་བར་བུར་གྱོན་པ་དང་། ཁམ་པ་ལ་གྱོན་
པ་དང་། ཤ་བའི་ལྤགས་པ་གྱོན་པ་དང་། ཤིང་ཤུན་དང་། རྩྭ་གྱོན་པ་དང་། རྩྭ་དང་འབྲས་བུ་ཟ་བ་དང་། པད་མོའི་རྩ་བ་དང་། སྣུམ་གྱི་ཞག་དང་བ་ལང་གི་ལྕི་བ་དང་། རྩ་བ་དང་འབྲས་བུ་ཟ་བ་དང་། གལ་ཏེ་སློང་ཞིང་ཟ་ན་ཡང་། ཁྱིམ་བདག་
གཅིག་ལས་ལྷག་པར་མི་སློང་སྟེ། ཅི་སྟེ་མེད་བྱས་ནང་ཐལ་བྱུང་དུ་འགྲོ་སྟེ། ཕྱིར་བོས་ཀྱང་འོང་དུ་མི་བཏུབ་པ་དང་། ལན་ཚྭ་དང་། ཤ་དང་བའི་འོ་མ་ལས་གྱུར་པའི་རོ་རྣམ་པ་ལྔ་མྱོང་བར་མི་བྱེད་པ་དང་། རྟག་ཏུ་ཕུབ་མ་ཟ་ཞིང་ཆུ་ཚད་
འཐུང་བ་དང་། བ་ལང་གི་དཀའ་ཐུབ་དང་། ཁྱི་དང་བྱ་དང་ཕག་གི་དཀའ་ཐུབ་ལེན་པ་དང་། ལུས་ལ་ཐལ་བ་སྐུད་པ་དང་། སྐྲ་སྐྱེད་པས་མཚན་མར་འཛིན་པ་དང་། ལུག་གིས་ལྷ་རྗེད་ཅིང་དེའི་འོག་ཏུ་གསོད་པ་དང་། ཟླ་བ་བཞི་མི་རྗེད་པ་དང་
ཞག་བདུན་རླུང་ཟ་བ་དང་། མེ་ཏོག་རྣམ་པ་བརྒྱ་སྟོང་གིས་ལྷ་རྣམས་ལ་མཆོད་དེ། དེའི་རྐྱེན་གྱིས་འདོད་པ་ཐམས་ཅད་འགྲུབ་བོ་ཞེས་ཟེར་བ་དང་། དེ་ལ་སོགས་པ་ཆོས་འདི་དག་ནི་བླ་ན་མེད་པ་རྣམ་པར་ཐར་བའི་རྒྱུར་འགྱུར་བའི་གནས་མེད་དོ། །

47-1-275b

དེ་དག་ནི་ཤེས་པར་བྱ་བ་ཞེས་བྱའོ། །དེ་ལ་མི་མཐོང་བ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་གང་ཟག་གཅིག་ཙམ་ཡང་ཆོས་དེ་དག་བྱས་པས་ཡང་དག་པར་རྣམ་པར་ཐར་པ་མ་མཐོང་བས་ན་མི་མཐོང་བ་ཞེས་བྱའོ། །
རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་བཞིན་དུ་མཐོང་བ་ཡང་ཡོད་དོ། །དེ་ལ་མཐོང་བ་གང་ཞེ་ན། སེམས་ཅན་དག་ལོག་པར་འགྲོ་བའི་ཆོས་དེ་དག་བྱས་ན་གདོན་མི་ཟ་བར་སེམས་ཅན་
དམྱལ་བར་ལྟུང་བར་མཐོང་སྟེ། དེ་ནི་མཐོང་བ་ཞེས་བྱའོ། །དེ་ལ་ཤེས་པ་གང་ཞེ་ན། སེམས་ཅན་དེ་དག་སེམས་ཅན་དམྱལ་བ་དེ་ལས་ཐར་ནས་མིར་སྐྱེས་ཏེ། སྦྱིན་པའི་ཕ་རོལ་ཏུ་ཕྱིན་པ་སྤྱོད་པ་ནས་ཕ་རོལ་ཏུ་ཕྱིན་པ་གཞན་གྱི་
བར་དུ་རྫོགས་པར་སྤྱོད་ན་དེ་དག་གདོན་མི་ཟ་བར་ཡང་དག་པའི་རྣམ་པར་གྲོལ་བ་ཐོབ་པར་ཤེས་ཏེ། དེ་ནི་ཤེས་པ་ཞེས་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་མཐོང་བ་དང་ཤེས་པ་ཡོད་དོ། །
དེ་ལ་མཐོང་བ་གང་ཞེ་ན། རྟག་པ་དང་མི་རྟག་པ་དང་། སྡུག་བསྔལ་བ་དང་། བདེ་བ་དང་། ཡོངས་སུ་དག་པ་དང་། ཡོངས་སུ་མ་དག་པ་དང་། བདག་དང་བདག་མེད་པ་མཐོང་བ་ནི་མཐོང་བ་ཞེས་བྱའོ། །དེ་ལ་ཤེས་པ་གང་ཞེ་ན། དེ་བཞིན་གཤེགས་
པ་རྣམས་ནི་མཐར་མྱ་ངན་ལས་འདས་པར་གཤེགས་པ་མ་ཡིན་པར་ཤེས་པ་དང་། དེ་བཞིན་གཤེགས་པ་རྣམས་ཀྱི་སྐུ་ནི་རྡོ་རྗེ་སྟེ། མི་འཇིག་པ་ཉོན་མོངས་པ་ལས་གྲུབ་པ་མ་ཡིན་པ། བཙོག་པ་དང་། བསྣམ་པ་དང་། རུལ་བ་དང་། 
མྱགས་པའི་སྐུ་མ་ཡིན་པར་ཤེས་སོ། །གཞན་ཡང་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་ཤེས་པ་སྟེ། དེ་ནི་ཤེས་པ་ཞེས་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་
ཤེས་པ་དང་མཐོང་བ་ཡོད་དོ། །དེ་ལ་ཤེས་པ་ནི་སེམས་ཅན་གང་དག་དད་པའི་སེམས་དང་ལྡན་པ་ཤེས་སོ། །སེམས་ཅན་གང་ནི་ཐེག་པ་ཆེན་པོ་ཚོལ་བར་བྱེད། གང་ཟག་གང་ནི་འཁོར་བའི་རྗེས་སུ་འབྲང་བར་བྱེད། གང་ཟག་གང་ནི་

47-1-276a

འཁོར་བ་ལས་ཟློག་པར་བྱེད། གང་ཟག་གང་ནི་ཡང་དག་པ་ལ་གནས་པར་བྱེད། སེམས་ཅན་གང་ནི་ཕ་རོལ་ཏུ་ཕྱིན་པ་ཡང་རབ་ཏུ་ཤེས་སོ། །འཁོར་བ་ནི་བྱིས་པ་མ་རབས་སོ། །འཁོར་བ་ལས་ཟློག་པ་ནི་རྒྱུན་ཏུ་
ཞུགས་པ་ནས། རང་སངས་རྒྱས་ཀྱི་བར་དུ་ཐོབ་པའོ། །ཡང་དག་པ་ལ་གནས་པ་ནི་བྱང་ཆུབ་སེམས་དཔའ་རྣམས་སོ། །ཕ་རོལ་ཏུ་ཕྱིན་པ་ནི་ཡང་དག་པར་རྫོགས་པའི་སངས་རྒྱས་ཡིན་ཏེ། དེ་དག་ནི་ཤེས་པ་ཞེས་བྱའོ། །དེ་ལ་མཐོང་
བ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་ལ་གནས་ནས་ཚངས་པར་སྤྱོད་པའི་སེམས་དང་། ཤིན་ཏུ་རྣམ་པར་དག་པའི་འཕྲུལ་གྱི་མིག་གིས་སོ་སོའི་སྐྱེ་བོ་དག་ལུས་དང་
ངག་དང་ཡིད་ཀྱི་སྒོ་ནས་མི་དགེ་བ་གསུམ་གྱི་ལས་བྱས་པས་སེམས་ཅན་དམྱལ་བ་དང་བྱོལ་སོང་གི་སྐྱེ་གནས་དང་། ཡི་དགས་ཀྱི་ཁམས་སུ་སྐྱེ་བ་མཐོང་བ་དང་། སོ་སོའི་སྐྱེ་བོ་དགེ་བའི་ལས་ལ་ནན་ཏན་བྱེད་པ་དག་ནི་ཚེ་འཕོས་ནས་མཐོ་
རིས་ཀྱི་ལྷ་དང་མིར་སྐྱེ་བ་མཐོང་བ་དང་། དེ་ལ་སེམས་ཅན་ཁ་ཅིག་ནི་མུན་པ་ནས་མུན་པར་འགྲོ་བ་དང་། སེམས་ཅན་ཁ་ཅིག་ནི་མུན་པ་ནས་སྣང་བར་འགྲོ་བ་དང་། སེམས་ཅན་ཁ་ཅིག་ནི་སྣང་བ་ནས་མུན་པར་འགྲོ་བ་དང་། སེམས་ཅན་ཁ་
ཅིག་ནི་སྣང་བ་ནས་སྣང་བར་འགྲོ་བ་ཡང་མཐོང་སྟེ། དེ་ནི་མཐོང་བ་ཞེས་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་མཐོང་བ་དང་ཤེས་པ་ཡོད་དོ། །བྱང་ཆུབ་སེམས་དཔའ་སེམས་དཔའ་ཆེན་
པོས་སོ་སོའི་སྐྱེ་བོ་ཁ་ཅིག་ལུས་ལ་ནན་ཏན་བྱས། ཚུལ་ཁྲིམས་ལ་ནན་ཏན་བྱས། སེམས་ལ་ནན་ཏན་བྱས། ཤེས་རབ་ལ་ནན་ཏན་བྱས་ཀྱང་། གང་ཟག་དེ་ཚེ་འདི་ཉིད་ལ་སྡིག་པའི་ལས་ཀྱི་རྣམ་པར་སྨིན་པར་འགྱུར་བ་དང་། འདོད་ཆགས་
དང་ཞེ་སྡང་དང་། གཏི་མུག་གི་རྐྱེན་གྱིས་གདོན་མི་ཟ་བར་སེམས་ཅན་དམྱལ་བའི་ལས་རྣམ་པར་སྨིན་པར་འགྱུར་བ་དང་། གང་ཟག་གང་དག་ལུས་ལ་ནན་ཏན་བྱས། ཚུལ་ཁྲིམས་དང་སེམས་དང་། ཤེས་རབ་ལ་ནན་ཏན་བྱས་པས་ཚེ་འདི་

47-1-276b

ལ་ཡང་བ་ཙམ་མྱོང་ནས་སེམས་ཅན་དམྱལ་བར་མི་ལྟུང་བ་ཡང་ཤེས་སོ། །དེ་ལ་ལས་གང་དག་ནི་འཕྲལ་དུ་རྣམ་པར་སྨིན་པར་འགྱུར་ཞེ་ན། སྡིག་པ་མི་དགེ་བའི་ལས་ཅི་ཡོད་པ་མཐོལ་ཞིང་བཤགས་ལ། བཤགས་པའི་འོག་ཏུ་ཕྱིས་མི་
བྱེད་པ་དང་། འཛེམ་པ་དང་ངོ་ཚ་བ་དང་ལྡན་པའི་ཕྱིར་དཀོན་མཆོག་གསུམ་ལ་མཆོད་པ་བྱེད་པའི་ཕྱིར། བདག་གིས་བདག་ལ་གནོང་བཀུར་བའི་ཕྱིར། གང་ཟག་དེ་ནི་དགེ་བའི་ལས་དེའི་རྒྱུ་དེའི་རྐྱེན་གྱིས་སེམས་ཅན་དམྱལ་བར་མི་ལྟུང་སྟེ། ཚེ་འདི་ལ་
མྱོང་བ་ནི་འདི་ལྟ་སྟེ། ཀླད་པ་ན་བ་དང་། མིག་ན་བ་དང་། ལྟོ་ན་བ་དང་། རྒྱབ་ན་བ་དང་། མི་སྙན་པ་དང་། འཆི་བར་འགྱུར་བ་དང་། གཤེ་བ་དང་སྤྱོ་བ་དང་། རྒྱ་བ་དང་། བསྐྱེད་པ་དང་། གཞུ་བ་དང་རྡེག་པ་དང་། བཟུང་བ་དང་བཀྲེས་པ་དང་། སྐོམ་པས་
སྡུག་བསྔལ་ཏེ། དེ་དག་ལ་སོགས་པ་ཚེ་འདི་ལ་ཡང་མྱོང་བར་ཤེས་པ་ནི་ཤེས་པ་བྱའོ། །དེ་ལ་མཐོང་བ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་གང་ཟག་ཁ་ཅིག་ལུས་ལ་ནན་ཏན་མི་བྱེད། ཚུལ་ཁྲིམས་དང་སེམས་དང་། 
ཤེས་རབ་ལ་ནན་ཏན་མི་བྱེད་ཀྱང་སྡིག་པའི་ལས་ཆུང་ངུ་བྱེད་ན་དེའི་ལས་ནི་ཚེ་འདི་ལ་འཕྲལ་དུ་མྱོང་བར་མཐོང་ངོ་། །གང་ཟག་དེས་སྡིག་པ་ཆུང་ངུ་བྱས་ལ་འཆགས་ཤིང་མཐོལ་བར་ཡང་མི་བྱེད། བདག་གིས་བདག་ལ་གནོང་
བསྐུར་བར་མི་བྱེད། འཛེམ་པ་དང་ངོ་ཚ་བར་ཡང་མི་བྱེད། འཇིགས་པ་འམ་སྐྲག་པར་ཡང་མི་བྱེད་ན་དེ་ལས་འཕེལ་ཞིང་སྐྱེ་བར་འགྱུར་ཏེ། སེམས་ཅན་དམྱལ་བ་མྱོང་བར་མཐོང་སྟེ། དེ་ནི་མཐོང་བ་ཞེས་བྱའོ། །གཞན་ཡང་ཤེས་ལ་
མི་མཐོང་བ་ཡང་ཡོད་དོ། །དེ་ལ་ཤེས་པ་ནི་སེམས་ཅན་ཐམས་ཅད་ལ་སངས་རྒྱས་ཀྱིས་རང་བཞིན་ཡོད་པར་ནི་ཤེས་ལ། ཉོན་མོངས་པས་ཟིལ་གྱིས་ནོན་ཏེ་བསྒྲུབས་ནས་མི་མཐོང་བས་ན། དེ་ནི་ཤེས་ལ་མི་མཐོང་བ་ཞེས་བྱའོ། །
གཞན་ལ་ཤེས་ལ་ཅུང་ཟད་མཐོང་བ་ཡོད་དོ། །ས་བཅུ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་ནི་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་ཤེས་ཀྱང་གསལ་བར་མི་མཐོང་བ་ནི་ཟླ་བ་ཉིན་མོ་

47-1-277a

མི་གསལ་བ་དང་འདྲའོ། །གཞན་ཡང་མཐོང་ཡང་མཐོང་ལ་ཤེས་ཀྱང་ཤེས་པ་ནི་སངས་རྒྱས་བཅོམ་ལྡན་འདས་སོ། །དེ་ནི་གཟིགས་པ་དང་མཁྱེན་པ་ཞེས་བྱའོ། །གཞན་ཡང་མཐོང་བ་དང་ཤེས་པ་དང་། མི་མཐོང་བ་
དང་མི་ཤེས་པ་ཡོད་དོ། །དེ་ལ་མཐོང་བ་དང་ཤེས་པ་ནི་འདི་ལྟ་སྟེ། འཇིག་རྟེན་གྱི་ཡི་གེ་དང་། སྐད་དང་། ཕོ་དང་མོ་དང་། ཐེག་པ་དང་། བུམ་པ་དང་། ཁང་པ་དང་། གྲོང་ཁྱེར་དང་། ཟས་དང་གོས་དང་། རི་དང་ཆུ་དང་། ར་བ་དང་སེམས་
ཅན་གྱི་ཚེའི་ཚད་ནི་མཐོང་བ་དང་ཤེས་པ་ཞེས་བྱའོ། །དེ་ལ་མི་མཐོང་བ་དང་མི་ཤེས་པ་ནི་འཕགས་པ་རྣམས་ཀྱིས་དགོངས་ཏེ་གསུངས་པའི་ཚིག་དང་། ཕོ་མོ་མེད་པ་ནས་ར་བའི་བར་དུ་མེད་པ་ནི་མི་མཐོང་བ་དང་མི་ཤེས་པ་ཞེས་བྱའོ། །
གཞན་ཡང་ཤེས་ལ་མི་མཐོང་བ་ཡོད་དེ། ཤེས་པ་ནི་སྦྱིན་པའི་གནས་དང་། མཆོད་པའི་གནས་ཤེས་པ་དང་། ལེན་པའི་གནས་ཤེས་པ་དང་། རྒྱུ་དང་འབྲས་བུ་ཤེས་པ་སྟེ། དེ་ནི་ཤེས་པ་ཞེས་བྱའོ། །དེ་ལ་མི་མཐོང་བ་ནི་སྦྱིན་པའི་
གནས་དང་། མཆོད་པའི་གནས་དང་། ལེན་པའི་གནས་མི་མཐོང་། རྒྱུ་དང་འབྲས་བུ་རྣམ་པར་སྨིན་པ་མི་མཐོང་བ་སྟེ། དེ་ནི་མི་མཐོང་བ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ས་རྣམ་པ་བརྒྱད་པོ་ཤེས་པ་ནི་དེ་བཞིན་
གཤེགས་པའི་སྤྱན་རྣམ་པ་ལྔས་ཤེས་པ་ཞེས་བྱའོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་རྟོགས་ཤིང་འཚལ་
བར་གྱུར་ན་ཕན་པ་ཇི་ལྟ་བུ་དག་འཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་རྟོགས་ཤིང་ཤེས་ན་སོ་སོ་ཡང་དག་པར་ཤེས་པ་བཞི་འཐོབ་པར་འགྱུར་རོ། །འདི་ལྟ་སྟེ་
ཆོས་སོ་སོ་ཡང་དག་པར་ཤེས་པ་དང་། དོན་སོ་སོ་ཡང་དག་པར་ཤེས་པ་དང་། ཚིག་སོ་སོ་ཡང་དག་པར་ཤེས་པ་དང་། སྤོབས་པ་སོ་སོ་ཡང་དག་པར་ཤེས་པའོ། །དེ་ལ་ཆོས་སོ་སོ་ཡང་དག་པར་ཤེས་པ་ནི་ཆོས་ཐམས་ཅད་དང་ཆོས་ཀྱི་

47-1-277b

མཚན་ཉིད་ཤེས་པའོ། །དོན་སོ་སོ་ཡང་དག་པར་ཤེས་པ་ནི་ཆོས་ཐམས་ཅད་ཀྱི་དོན་ཏུ་བཏགས་པ་ཐམས་ཅད་ཤེས་པ་སྟེ། ཆོས་ཀྱི་རྗེས་སུ་མིང་དང་ཚིག་ཏུ་གདགས་པ་ལས་དོན་དུ་འགྱུར་བ་ཐམས་ཅད་དོ། །ཚིག་སོ་སོ་ཡང་དག་
པར་ཤེས་པ་ནི་ཡི་གེའི་གཙུག་ལག་དང་། སྒྲ་སྐད་ཀྱི་གཙུག་ལག་དང་། རྣམ་པར་རིག་བྱེད་ཀྱི་གཙུག་ལག་དང་། འཇིག་རྟེན་པའི་གཙུག་ལག་རྣམས་སོ། །སྤོབས་པ་སོ་སོ་ཡང་དག་པར་ཤེས་པ་ནི་འདི་ལྟ་སྟེ། བྱང་ཆུབ་སེམས་
དཔའ་སེམས་དཔའ་ཆེན་པོས་ཇི་ཙམ་ཚིག་ཏུ་སྨྲ་བ་ལས་ཐོགས་པའི་བར་ཆད་བྱེད་པ་མེད་ཅིང་ཕྱིར་མི་ཟློགས་པ། འཇིགས་པ་མེད་ཟིལ་ཀྱིས་མི་ནོན་པའོ། །རིགས་ཀྱི་བུ་འདི་དག་ནི་བྱང་ཆུབ་སེམས་དཔས་དེ་ལྟར་མཐོང་ཞིང་ཤེས་
པ་ཙམ་གྱིས། སོ་སོ་ཡང་དག་པར་ཤེས་པ་བཞི་ཐོབ་པར་འགྱུར་བ་ཞེས་བྱའོ། །རིགས་ཀྱི་བུ་གཞན་ཡང་ཆོས་སོ་སོ་ཡང་དག་པར་ཤེས་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཉན་ཐོས་དང་། རང་སངས་རྒྱས་དང་། བྱང་ཆུབ་
སེམས་དཔའ་དང་། སངས་རྒྱས་ཀྱི་ཆོས་རྣམས་ཡོངས་སུ་ཤེས་པའོ། །དོན་སོ་སོ་ཡང་དག་པར་ཤེས་པ་ནི་ཐེག་པ་ལ་རྣམ་པ་གསུམ་ཡོད་མོད་ཀྱི། གཅིག་ཏུ་འདུ་བར་ཤེས་པ་ལ་སོ་སོ་ཐ་དད་པའི་མཚན་ཉིད་མེད་པའོ། །ཚིག་སོ་སོ་ཡང་དག་པར་
ཤེས་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་གཅིག་ལ་ཡང་མིང་རྣམ་པ་སྣ་ཚོགས་སུ་བཏགས་ནས་བསྐལ་པ་ཚད་མེད་པའི་བར་དུ་བཤད་ཀྱང་མི་རྫོགས་ཀྱི། ཉན་ཐོས་དང་རང་སངས་རྒྱས་ཀྱིས་ནི་དེ་ལྟར་བཤད་ནུས་
པའི་གནས་མེད་དོ། །སྤོབས་པ་སོ་སོ་ཡང་དག་པར་ཤེས་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་བསྐལ་པ་ཚད་མེད་པའི་བར་དུ་སེམས་ཅན་ཐམས་ཅད་ལ་ཆོས་རྣམས་སྟོན་པ་ནི་མིང་དང་དོན་རྣམ་པ་ཐ་དད་པ་སྣ་ཚོགས་བཤད་ཀྱང་
ཟད་པའི་མཐའ་མེད་དོ། །རིགས་ཀྱི་བུ་གཞན་ཡང་ཆོས་སོ་སོ་ཡང་དག་པར་ཤེས་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཀུན་ཤེས་ཀྱང་དེ་ལ་ཆགས་པ་མེད་དོ། །དོན་སོ་སོ་ཡང་དག་པར་ཤེས་པ་ནི་དོན་རྣམས་ཤེས་ཀྱང་

47-1-278a

དེ་ལ་མི་ཆགས་སོ། །ཚིག་སོ་སོ་ཡང་དག་པར་ཤེས་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་མིང་དང་ཚིག་རྣམས་ཤེས་ཀྱང་དེ་ལ་ཆགས་པ་མེད་དོ། །སྤོབས་པ་སོ་སོ་ཡང་དག་པར་ཤེས་པ་ནི་བྱང་ཆུབ་སེམས་
དཔའ་སེམས་དཔའ་ཆེན་པོས་དེ་ལྟར་བསྟན་ཅིང་བཤད་པ་ནི་མཆོག་ཡིན་པར་ཤེས་ཀྱང་དེ་ལ་མི་ཆགས་པའོ། །དེ་ཅིའི་ཕྱིར་ཞེ་ན། རིགས་ཀྱི་བུ་གལ་ཏེ་ཆགས་པར་གྱུར་ན་བྱང་ཆུབ་སེམས་དཔའ་ཞེས་མི་བྱའོ། །བྱང་ཆུབ་སེམས་དཔའ་འོད་སྲུང་
གིས་བཅོམ་ལྡན་འདས་ལ་ཡང་གསོལ་པ། བཅོམ་ལྡན་འདས་གལ་ཏེ་མ་ཆགས་ན་ཆོས་འཚལ་བར་མི་འགྱུར། གང་ཆོས་འཚལ་བ་ནི་ཆགས་པ་སྟེ། གང་མི་ཆགས་པར་འཚལ་བ་ནི་ཅི་ཡང་འཚལ་བ་མ་མཆིས་པ་ལགས་ན། ཅིའི་སླད་དུ་དེ་བཞིན་
གཤེགས་པས་ཆོས་འཚལ་བ་ལ་མ་ཆགས་པའོ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཇི་ཙམ་དུ་ཆགས་པ་ནི་ཐོགས་པ་མེད་པ་མ་ཡིན་གྱི་ཆགས་པ་མེད་པ་ལ་ཐོགས་པ་མེད་པ་ཞེས་བྱའོ། །རིགས་ཀྱི་བུ་དེ་བས་ན་
བྱང་ཆུབ་སེམས་དཔའ་ཐམས་ཅད་འདྲ་སྟེ་ཆགས་པ་ཡོད་ན་ཐོགས་པ་མེད་པ་མ་ཡིན་ནོ། །གལ་ཏེ་ཐོགས་པ་མ་ཡིན་ན་བྱང་ཆུབ་སེམས་དཔའ་ཞེས་མི་བྱ་སྟེ། དེ་ནི་བྱིས་པ་མ་རབས་ཡིན་པར་རིག་པར་བྱའོ། །ཅིའི་ཕྱིར་ཆགས་པ་དེ་ལ་བྱིས་
པ་མ་རབས་ཤེས་བྱ་ཞེ་ན། བྱིས་པ་མ་རབས་ཐམས་ཅད་ནི་གཟུགས་ནས་རྣམ་པར་ཤེས་པའི་བར་དུ་ཆགས་སོ། །གཟུགས་ལ་ཆགས་པས་འདོད་ཆགས་པའི་སེམས་སྐྱེའོ། །ཆགས་པའི་སེམས་བསྐྱེད་པས་གཟུགས་ཀྱིས་རྣམ་པར་བཅིངས་པ་
ནས་རྣམ་པར་ཤེས་པའི་བར་དུ་རྣམ་པར་བཅིངས་སོ། །དེ་ལྟར་འཆིང་བས་རྣམ་པར་བཅིངས་པས་ན་སྐྱེ་བ་དང་རྒ་བ་དང་། ན་བ་དང་འཆི་བ་དང་ཟློས་པའི་མྱ་ངན་དང་སྨྲེ་སྔགས་འདོན་པའི་སྡུག་བསྔལ་ཆེན་པོ་དང་། ཉོན་མོངས་པ་ཐམས་ཅད་ལས་ཐར་བར་
མ་གྱུར་ཏོ། །དེ་བས་ན་གང་ཆགས་པ་ནི་བྱིས་པ་མ་རབས་ཤེས་བྱ་སྟེ། དོན་དེ་ལྟ་བས་ན་བྱིས་པ་མ་རབས་ཐམས་ཅད་ནི་སོ་སོ་ཡང་དག་པར་ཤེས་པ་བཞི་མེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བསྐལ་པ་ཚད་མེད། གྲངས་

47-1-278b

མེད་པའི་བར་དུ་ཆོས་རྣམས་ཤེས་ཤིང་མཐོང་བར་གྱུར་ཏོ། །ད་ལྟར་ཤེས་ཤིང་མཐོང་བས་ན་དོན་ཡང་ཤེས་པར་གྱུར་ཏོ། །དེ་ལྟར་ཆོས་ཀྱི་མཚན་ཉིད་ཤེས་ཤིང་དོན་ཤེས་པས་ན་གཟུགས་རྣམས་ལ་ཆགས་པ་མི་སྐྱེད་པ་ནས། རྣམ་པར་ཤེས་པའི་བར་
དུ་ཡང་དེ་དང་འདྲའོ། །དེ་ལྟར་མ་ཆགས་པས་ན་བྱང་ཆུབ་སེམས་དཔའ་གཟུགས་ལ་ཡང་ཆགས་པའི་སེམས་མི་སྐྱེད་པ་ནས། རྣམ་པར་ཤེས་པའི་བར་དུ་ཆགས་པའི་སེམས་མི་སྐྱེད་དོ། །དེ་ལྟར་ཆགས་པ་མེད་པས་ན་གཟུགས་ཀྱིས་རྣམ་པར་མ་བཅིངས་པ་
ནས་རྣམ་པར་ཤེས་པའི་བར་དུ་མ་བཅིངས་པའོ། །དེ་ལྟར་རྣམ་པར་ཤེས་པ་མ་བཅིངས་པས་ན། སྐྱེ་བ་དང་། རྒ་བ་དང་ན་བ་དང་འཆི་བ་དང་། ཟློས་པའི་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་ཆེན་པོ་དང་། ཉོན་མོངས་པ་ཐམས་ཅད་ལས་རྣམ་པར་ཐར་བར་
གྱུར་ཏོ། །དོན་དེ་ལྟ་བས་ན་བྱང་ཆུབ་སེམས་དཔའ་ཐམས་ཅད་ནི་སོ་སོ་ཡང་དག་པར་ཤེས་པ་བཞི་འཐོབ་པའོ། །རིགས་ཀྱི་བུ་དེའི་རྒྱུ་དེའི་རྐྱེན་གྱིས་ངའི་ཉེ་གནས་རྣམས་ལ་མདོ་སྡེ་བཅུ་གཉིས་ལས་ཀྱང་ཆགས་པས་བཅིངས་པ་ནི་བདུད་ཀྱིས་བཅིངས་
པ་ཞེས་བྱའོ། །གང་མ་ཆགས་པ་དེ་ནི་བདུད་ཀྱིས་བཅིངས་པ་ལས་རྣམ་པར་ཐར་པ་ཞེས་བྱའོ། །འདི་ལྟ་སྟེ་དཔེར་ན་འཇིག་རྟེན་ན་གང་ཉེས་པ་བྱེད་པ་དེ་ནི་རྒྱལ་པོས་རྣམ་པར་བཅིངས་པར་འགྱུར་རོ། །གང་ཉེས་པ་མེད་པ་དེ་ནི་རྒྱལ་པོས་ཀྱང་མི་འཆིང་ངོ་། །
བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། གང་ཆགས་པས་བཅིངས་པ་ནི་བདུད་ཀྱིས་བཅིངས་པ་ཞེས་བྱའོ། །གང་ཆགས་པས་མ་བཅིངས་པ་དེ་ནི་བདུད་ཀྱིས་མ་བཅིངས་པ་ཞེས་བྱའོ། །དེ་བས་ན་བྱང་ཆུབ་སེམས་དཔའ་
སེམས་དཔའ་ཆེན་པོ་ལ་ནི་ཆགས་པ་མེད་དོ། །རིགས་ཀྱི་བུ་གཞན་ཡང་ཆོས་སོ་སོ་ཡང་དག་པར་ཤེས་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡི་གེའི་གཟུངས་ལ་ཤིན་ཏུ་མཁས་པ་བརྗེད་པར་མི་འགྱུར་ཏེ། གཟུངས་ཤེས་བྱ་བ་ནི་འདི་ལྟ་སྟེ། 
ས་དང་རི་ལྟ་བུ་འམ་མིག་དང་སྤྲིན་ལྟ་བུ་འམ། མི་དང་མ་ལྟ་བུ་སྟེ། ཆོས་ཐམས་ཅད་ཀྱང་དེ་འདྲའོ། །དོན་སོ་སོ་ཡང་དག་པར་ཤེས་པ་ནི་བྱང་ཆུབ་སེམས་དཔས་ཆོས་ཐམས་ཅད་ཀྱི་མིང་དང་ཚིག་ཤེས་ཀྱང་དོན་མི་ཤེས་སོ། །དོན་སོ་སོ་ཡང་དག་པར་ཤེས་པ་

47-1-279a

ཐོབ་པ་ནི་དོན་རྣམས་ཀྱང་ཤེས་སོ། །ཇི་ལྟར་ན་དོན་ཤེས་པ་ཡིན་ཞེ་ན། དེ་ནི་ས་ལྟ་བུ་འཛིན་པ་སྟེ། དཔེར་ན་སས་ནི་སེམས་ཅན་དང་སེམས་ཅན་མ་ཡིན་པ་ཐམས་ཅད་འཛིན་ཏེ། དེ་བས་ན་ས་ལྟ་བུར་འཛིན་པ་ཞེས་བྱའོ། །རིགས་ཀྱི་བུ་རི་ལྟ་
བུར་འཛིན་པ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་འདི་སྙམ་དུ་སེམས་ཏེ། དེ་ཅིའི་ཕྱིར་རི་ལ་འཛིན་པ་ཞེས་བྱ་ཞེ་ན། རིས་ནི་ས་བཟུང་སྟེ། མི་གཡོ་བར་བྱེད་པས་འཛིན་པ་ཞེས་བྱའོ། །ཅིའི་ཕྱིར་མིག་ལ་འཛིན་པ་ཞེས་བྱ་ཞེ་ན། 
མིག་གིས་སྣང་བ་འཛིན་པའི་ཕྱིར་ན་འཛིན་པ་ཞེས་བྱའོ།  སྤྲིན་ནི་ཀླུའི་དབུགས་ཡིན་ཏེ། ཀླུའི་དབུགས་ཀྱིས་ཆུ་འཛིན་པས་ན་སྤྲིན་ཡང་འཛིན་པ་ཞེས་བྱའོ། །ཅིའི་ཕྱིར་མི་ལ་འཛིན་པ་ཞེས་བྱ་ཞེ་ན། མི་ཆོས་དང་ཆོས་མ་ཡིན་པ་འཛིན་ནུས་པའི་
ཕྱིར་མི་ཡང་འཛིན་པ་ཞེས་བྱའོ། །ཅིའི་ཕྱིར་མ་ལ་འཛིན་པ་ཞེས་བྱ་ཞེ་ན། མས་བུ་འཛིན་པའི་ཕྱིར་མ་ཡང་འཛིན་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ཀྱི་མིང་དང་ཚིག་དང་དོན་ཤེས་པ་ཡང་དེ་དང་འདྲའོ། །ཚིག་སོ་
སོ་ཡང་དག་པར་ཤེས་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཚིག་རྣམ་པ་སྣ་ཚོགས་ཀྱིས་དོན་གཅིག་བསྟན་ཅིང་བཤད་པ་ཡང་དོན་མེད་པའོ། །དཔེར་ན་སྐྱེས་པ་དང་བུད་མེད་དང་། ཁང་ཁྱིམ་དང་ཐེག་པ་དང་། སེམས་ཅན་ལ་སོགས་པའི་མིང་རྣམས་
སོ། །ཅིའི་ཕྱིར་དོན་མེད་ཅེ་ན། རིགས་ཀྱི་བུ་དོན་མེད་ཅེས་བྱ་བ་ནི་བྱང་ཆུབ་སེམས་དཔའ་དང་སངས་རྒྱས་རྣམས་ཀྱི་སྤྱོད་ཡུལ་ལོ། །ཚིག་ཅེས་བྱ་བ་ནི་བྱིས་པ་མ་རབས་རྣམས་ཀྱི་སྤྱོད་ཡུལ་ལོ། །དོན་ཤེས་པའི་ཕྱིར་ན་ཚིག་སོ་སོ་ཡང་དག་པར་ཤེས་པ་ཐོབ་པར་
འགྱུར་རོ། །སྤོབས་པ་སོ་སོ་ཡང་དག་པར་ཤེས་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཚིག་ཤེས་ཤིང་དོན་ཤེས་པས་བསྐལ་པ་ཚད་མེད་གྲངས་མེད་པའི་བར་དུ་ཚིག་དང་དོན་བཤད་པ་ཟད་མི་ཤེས་པའི་ཕྱིར་སྤོབས་པ་སོ་སོ་ཡང་དག་པར་
ཤེས་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་བསྐལ་པ་ཚད་མེད་པ་མཐའ་ཡས་གྲངས་མེད་པའི་བར་དུ་ཀུན་རྫོབ་ཀྱི་བདེན་པ་ལ་ཤིན་ཏུ་ནན་ཏན་བྱས་སོ། །དེ་ལྟར་ཤིན་ཏུ་ནན་ཏན་བྱས་པས་ན་ཆོས་སོ་སོ་ཡང་དག་པར་ཤེས་པ་

47-1-279b

རྟོགས་པར་གྱུར་ཏོ། །གཞན་ཡང་བསྐལ་པ་ཚད་མེད་གྲངས་མེད་པའི་བར་དུ་དོན་དམ་པའི་བདེན་པ་ལ་ནན་ཏན་བྱས་པས་ན། དོན་སོ་སོ་ཡང་དག་པར་ཤེས་པ་ཐོབ་པར་གྱུར་ཏོ། །གཞན་ཡང་བསྐལ་པ་ཚད་མེད་མཐའ་ཡས་པའི་བར་དུ་གཙུག་ལག་བེའི་ཀ་ར་
ན་ལ་ཤིན་ཏུ་ནན་ཏན་བྱས་པས་ཚིག་སོ་སོ་ཡང་དག་པར་ཤེས་པ་ཐོབ་པར་གྱུར་ཏོ། །གཞན་ཡང་བསྐལ་པ་ཚད་མེད་གྲངས་མེད་པའི་བར་དུ་འཇིག་རྟེན་གྱི་གཙུག་ལག་བསླབས་པས་སྤོབས་པ་སོ་སོ་ཡང་དག་པར་ཤེས་པ་ཐོབ་པར་གྱུར་ཏོ། །རིགས་ཀྱི་བུ་ཉན་ཐོས་
དང་རང་སངས་རྒྱས་ཀྱིས་ནི་སོ་སོ་ཡང་དག་པར་ཤེས་པ་བཞི་པོ་འདི་དག་འཐོབ་པའི་གནས་མེད་དོ། །རིགས་ཀྱི་བུ་ངས་མདོ་སྡེ་དགུ་པོ་ལས། ཉན་ཐོས་དང་རང་སངས་རྒྱས་ཀྱིས་སོ་སོ་ཡང་དག་པར་ཤེས་པ་བཞི་འཐོབ་པོ་ཞེས་གསུངས་ཏེ། ཉན་ཐོས་དང་རང་སངས་
རྒྱས་ཀྱིས་ནི་ཡང་དག་པར་འཐོབ་པ་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་གྱི་དོན་བྱེད་པས་སོ་སོ་ཡང་དག་པར་ཤེས་པ་བཞི་ལ་ནན་ཏན་བྱེད་དོ། །རང་སངས་རྒྱས་ལ་སོགས་པ་ནི་ཞི་བ་ཕྱོགས་གཅིག་པ་སྤྱོད་
དེ་གཅིག་པུ་གནས་པ་ལ་དགའ་བས་གལ་ཏེ་སེམས་ཅན་གྱི་དོན་བྱེད་ན་ཡང་མངོན་པར་ཤེས་པ་འབའ་ཤིག་སྟོན་གྱི། རྟག་ཏུ་ཅང་མི་སྨྲ་བར་འདུག་པས་སྟོན་ཅིང་བཤད་པ་མེད་ན། སོ་སོ་ཡང་དག་པར་ཤེས་པ་བཞི་ལྟ་ཞིག་ག་ལ་ཡོད། ཅིའི་ཕྱིར་ཅང་མི་སྨྲ་བ་
ལ་བསྟན་པ་མེད་ཅེ་ན། རང་སངས་རྒྱས་ཀྱིས་ཆོས་བཤད་པས་སེམས་ཅན་གྱི་དོན་བྱེད་པ་འམ་ཕ་རོལ་པོས་དྲོད་དང་། སྤྱི་བོ་དང་། འཇིག་རྟེན་པས་ཆོས་ཀྱི་མཆོག་འཐོབ་པར་འགྱུར་བ་འམ། རྒྱུན་ཏུ་ཞུགས་པ་དང་། ལན་ཅིག་ཕྱིར་ལྡོག་པ་དང་ཕྱིར་མི་ལྡོག་པ་དང་། 
དགྲ་བཅོམ་པ་འཐོབ་པར་རམ། སངས་རྒྱས་འཐོབ་པར་རམ། བྱང་ཆུབ་སེམས་དཔའ་སེམས་དཔའ་ཆེན་པོ་འཐོབ་པར་བྱེད་ཀྱང་མི་ནུས་ལ། ཕ་རོལ་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱེད་ཀྱང་མི་ནུས་སོ། །དེ་ཅིའི་ཕྱིར་ཞེ་
ན། རིགས་ཀྱི་བུ་རང་སངས་རྒྱས་ནི་འཇིག་རྟེན་དང་འཇིག་རྟེན་ལས་འདས་པའི་མདོ་སྡེ་དགུ་པོ་མེད་དེ། དེ་བས་ན་རང་སངས་རྒྱས་ནི་ཚིག་སོ་སོ་ཡང་དག་པར་ཤེས་པ་དང་། སྤོབས་པ་སོ་སོ་ཡང་དག་པར་ཤེས་པ་མེད་དོ། །རིགས་ཀྱི་བུ་རང་སངས་རྒྱས་ནི་ཆོས་ཀུན་ཤེས་

47-1-280a

མོད་ཀྱི། ཆོས་སོ་སོ་ཡང་དག་པར་ཤེས་པ་ནི་མེད་དོ། །དེ་ཅིའི་ཕྱིར་ཞེ་ན། ཆོས་སོ་སོ་ཡང་དག་པར་ཤེས་པ་ནི་ཡི་གེ་ཤེས་པ་ཞེས་བྱ་སྟེ། རང་སངས་རྒྱས་ཀྱིས་ཀྱང་ཡི་གེ་ཤེས་མོད་ཀྱི། ཡི་གེ་སོ་སོ་ཡང་དག་པར་ཤེས་པ་ཞེས་བྱ་བ་མེད་དོ། །
དེ་ཡང་ཅིའི་ཕྱིར་ཞེ་ན། རྟག་པ་གནས་པ་ཞེས་བྱ་བའི་ཡི་གེ་གཉིས་པོ་མི་ཤེས་པས་ན། རང་སངས་རྒྱས་ནི་ཚིག་སོ་སོ་ཡང་དག་པར་ཤེས་པ་ཐོབ་པ་མ་ཡིན་ནོ། །དོན་ཤེས་ཀྱང་དོན་སོ་སོ་ཡང་དག་པར་ཤེས་པ་མ་ཡིན་ནོ། །ཡང་དག་པར་དོན་ཤེས་པ་ནི་སེམས་
ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་ཤེས་པའོ། །སངས་རྒྱས་ཀྱི་རང་བཞིན་གྱི་དོན་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཅེས་བྱའོ། །དེ་ལྟ་བས་ན་རང་སངས་རྒྱས་ནི་དོན་སོ་སོ་ཡང་དག་པར་ཤེས་པ་ཐོབ་པ་མ་ཡིན་ཏེ། 
དེ་བས་ན་རང་སངས་རྒྱས་ནི་ཐམས་ཅད་ཀྱི་ཐམས་ཅད་དུ་སོ་སོ་ཡང་དག་པར་ཤེས་པ་བཞི་མེད་དོ། །ཅིའི་ཕྱིར་ཉན་ཐོས་ལ་སོ་སོ་ཡང་དག་པར་ཤེས་པ་བཞི་མེད་ཅེ་ན། ཉན་ཐོས་ལ་ཐབས་མཁས་པ་རྣམ་པ་གསུམ་པོ་མེད་པའི་ཕྱིར་རོ། །གསུམ་པོ་གང་
ཞེ་ན་ངེས་པའི་ཚིག་འཇམ་པོ་སྨྲ་ཞིང་ཆོས་སྦྱིན་པ་དང་། ངེས་པའི་ཚིག་རྩུབ་པོ་སྨྲ་ཞིང་ཆོས་སྦྱིན་པ་དང་། འཇམ་པོ་ཡང་མ་ཡིན། རྩུབ་པོ་ཡང་མ་ཡིན་པས་ཆོས་སྦྱིན་པ་སྟེ། ཉན་ཐོས་ལ་རྣམ་པ་གསུམ་པོ་འདི་དག་མེད་པས་ན་སོ་སོ་ཡང་དག་པར་
ཤེས་པ་བཞི་མེད་དོ། །གཞན་ཡང་ཉན་ཐོས་དང་རང་སངས་རྒྱས་ནི་ཚིག་དང་དོན་ཤེས་པའི་མཐར་ཡང་མ་ཕྱིན་ལ། སྤྱོད་ཡུལ་ཤེས་པའི་དབང་དུ་འགྱུར་བའི་ཡེ་ཤེས་ཀྱང་མེད། སྟོབས་བཅུ་དང་། མི་འཇིགས་པ་བཞི་ཡང་མེད་རྟེན་ཅིང་འབྲེལ་པར་འབྱུང་བ་
བཅུ་གཉིས་ཀྱི་མཐར་ཕྱིན་པ་ཡང་མ་ཡིན། སེམས་ཅན་རྣམས་ཀྱི་དབང་པོ་རྣོ་རྟུལ་གྱི་ཁྱད་པར་རྟོགས་པར་ཡང་མ་གྱུར། བདེན་པ་གཉིས་ལ་ཐེ་ཙོམ་ཟ་བའི་སེམས་ཀྱང་ཡོངས་སུ་ཆད་པ་མ་ཡིན། སེམས་ཅན་གྱི་སེམས་ཡུལ་ཅི་ལ་དམིགས་པ་ཡང་མཁས་
པར་མ་གྱུར། དོན་དམ་པའི་སྟོང་པ་ཉིད་སྟོན་པ་ལ་ཤིན་ཏུ་མཁས་པར་ཡང་མ་གྱུར་ཏེ། དེ་བས་ན་ཐེག་པ་ཆུང་ངུ་གཉིས་ཀྱིས་ནི་སོ་སོ་ཡང་དག་པར་ཤེས་པ་བཞི་འཐོབ་པ་མ་ཡིན་ནོ། །དེ་ནས་བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་

47-1-280b

གསོལ་པ། བཅོམ་ལྡན་འདས་དེ་ལྟར་ཉན་ཐོས་དང་རང་སངས་རྒྱས་ལ་ཐམས་ཅད་ཀྱི་ཐམས་ཅད་དུ་སོ་སོ་ཡང་དག་པར་ཤེས་པ་བཞི་མ་མཆིས་ན། ཅིའི་སླད་དུ་དེ་བཞིན་གཤེགས་པས་འདི་སྐད་དུ། ཚེ་དང་ལྡན་པ་ཤཱ་རིའི་བུ་ནི་ཤེས་རབ་ཀྱི་མཆོག་གོ། །
མཽད་གལ་ཡ་ན་ཆེན་པོ་ནི་མངོན་པར་ཤེས་པའི་མཆོག་གོ། ཀཽཥྛི་ལ་ཆེན་པོ་ནི་སོ་སོ་ཡང་དག་པར་ཤེས་པ་བཞིའི་མཆོག་ཅེས་གསུངས་ལ། ཅི་སྟེ་མཆིས་ན་དེ་བཞིན་གཤེགས་པ་ཅིའི་སླད་དུ་དེ་སྐད་ཅེས་བཀའ་སྩལ། དེ་ནས་བཅོམ་ལྡན་འདས་ཀྱིས་
བྱང་ཆུབ་སེམས་དཔའ་འོད་སྲུང་ལ་ལེགས་སོ་ཤིན་ཏུ་ལེགས་སོ་ཞེས་བྱ་བ་བྱིན་ནོ། །རིགས་ཀྱི་བུ་འདི་ལྟ་སྟེ། དཔེར་ན་ཀླུང་གང་གའི་ཆུ་ཡང་ཆ་དེ་མེད་ལ། ཀླུང་སིནྡུ་ཞེས་བྱ་བའི་ཆུ་ཡང་ཚད་མེད། ཀླུང་པཀྵུའི་ཆུ་ཡང་ཚད་མེད། ཀླུང་སི་ཏའི་ཆུ་ཡང་ཚད་
མེད། མཚོ་མ་དྲོས་པའི་ཆུ་ཡང་ཚད་མེད། རྒྱ་མཚོ་ཆེན་པོའི་ཆུ་ཡང་ཚད་མེད་དེ། དེ་ལྟར་ཆུ་མང་པོ་དག་ཚད་མེད་པར་འདྲ་མོད་ཀྱི། ཡང་དག་པར་ན་མང་ཉུང་ནི་མི་མཉམ་མོ། །ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སོ་སོ་ཡང་
དག་པར་ཤེས་པ་བཞི་ཡང་དེ་དང་འདྲའོ། །རིགས་ཀྱི་བུ་དེ་ལ་མཉམ་མོ་ཞེས་བྱ་བ་ནི་གནས་མེད་དོ། །རིགས་ཀྱི་བུ་ངས་བུས་པ་མ་རབས་ལ་ཁྱད་པར་དུ་ཀཽཥྛི་ལ་ཆེན་པོ་ནི་སོ་སོ་ཡང་དག་པར་ཤེས་པ་བཞིའི་མཆོག་གོ་ཞེས་གསུངས་ཏེ། ཁྱོད་ཀྱིས་དྲིས་པའི་
དོན་ནི་འདིའོ། །རིགས་ཀྱི་བུ་ཉན་ཐོས་ཀྱི་ཐེག་པ་པ་དག་ལ་ལས་ནི་གཅིག་ཙམ་འཐོབ། ལ་ལས་ནི་གཉིས་ཙམ་འཐོབ་སྟེ། བཞི་ཅར་རྫོགས་པར་འཐོབ་པ་ནི་གནས་མེད་དོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། 
བཅོམ་ལྡན་འདས་ཀྱིས་གསུངས་པ་ལྟར། སྔར་ཚངས་པར་སྤྱོད་པའི་ལེའུ་གསུངས་པ་ལས། བྱང་ཆུབ་སེམས་དཔའ་ཤེས་པ་དང་མཐོང་བས་སོ་སོ་ཡང་དག་པར་ཤེས་པ་བཞི་འཐོབ་པ་ནི། བྱང་ཆུབ་སེམས་དཔས་ཤེས་པ་དང་མཐོང་བ་ལ་འཐོབ་པ་ཡང་
མ་མཆིས་ལ། སེམས་ཀྱང་མ་མཆིས་པས་ཐོབ་པ་མེད་དོ་ཞེས་གསུངས་ཏེ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཡང་དག་པར་ན་ཐོབ་པ་མ་མཆིས་སོ། །ཅི་སྟེ་བྱང་ཆུབ་སེམས་དཔའ་ལ་འཐོབ་པའི་སེམས་མཆིས་ན། 

47-1-281a

བྱང་ཆུབ་སེམས་དཔའ་མ་ལགས་ཏེ་བྱིས་པ་མ་རབས་སོ་ཞེས་གསུངས་ན། དེ་ཅིའི་སླད་དུ་དེ་བཞིན་གཤེགས་པས་བྱང་ཆུབ་སེམས་དཔས་འཐོབ་པ་མཆིས་སོ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ། །ངས་ཀྱང་
བཤད་པར་དགོངས་པ་ལས་ཁྱོད་ཀྱིས་ཞུས་པ་ཤིན་ཏུ་ལེགས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཡང་དག་པར་ན་ཅི་ཡང་ཐོབ་པ་མེད་དེ། ཅི་ཡང་འཐོབ་པ་མེད་པ་ནི་སོ་སོ་ཡང་དག་པར་ཤེས་པ་བཞི་ཞེས་བྱའོ། །རིགས་ཀྱི་བུ་དོན་ཅི་ཞིག་
གི་ཕྱིར་ཅི་ཡང་འཐོབ་པ་མེད་པ་ལ་སོ་སོ་ཡང་དག་པར་ཤེས་ཞེས་བྱ་ཞེ་ན། གལ་ཏེ་ཐོབ་པ་ཡོད་ན་ཐོགས་པ་དང་བཅས་པ་ཞེས་བྱ་སྟེ། ཇི་ཙམ་དུ་ཐོགས་པ་དང་བཅས་པ་དེ་ནི་ཕྱིན་ཅི་ལོག་བཞི་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་
ལ་ཕྱིན་ཅི་ལོག་བཞི་མེད་པའི་ཕྱིར་སོ་སོ་ཡང་དག་པར་ཤེས་པ་བཞི་འཐོབ་སྟེ། དེ་བས་ན་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །རིགས་ཀྱི་བུ་གཞན་ཡང་ཅི་ཡང་འཐོབ་པ་མེད་པ་ནི་ཤེས་རབ་ཅེས་བྱའོ། །བྱང་ཆུབ་སེམས་དཔའ་སེམས་དཔའ་
ཆེན་པོ་ལས་ཤེས་རབ་དེ་འཐོབ་པས་ན་ཅི་ཡང་འཐོབ་པ་མེད་པ་ཞེས་བྱའོ། །འཐོབ་པ་དང་བཅས་པ་ནི་མ་རིག་པ་ཞེས་བྱ་སྟེ། བྱང་ཆུབ་སེམས་དཔའ་ནི་མ་རིག་པའི་མུན་པ་ཡོངས་སུ་བཅད་པས་ན་འཐོབ་པ་མེད་པ་ཞེས་བྱ་སྟེ། དེ་བས་ན་བྱང་ཆུབ་སེམས་དཔའ་ནི་འཐོབ་པ་
མེད་པ་ཞེས་བྱའོ། །རིགས་ཀྱི་བུ་གཞན་ཡང་འཐོབ་པ་མེད་པ་ནི་མྱ་ངན་ལས་འདས་པ་ཆེན་པོ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་ལྟར་མྱ་ངན་ལས་འདས་པ་ཆེན་པོ་ལ་བདེ་བར་གནས་པས་ཆོས་རྣམས་ཀྱི་མཚན་ཉིད་མི་མཐོང་བས་བྱང་
ཆུབ་སེམས་དཔའ་ནི་འཐོབ་པ་མེད་པ་ཞེས་བྱའོ། །ཇི་ཙམ་དུ་འཐོབ་པ་དང་བཅས་པ་དེ་ནི་སྲིད་པ་ཉི་ཤུ་རྩ་ལྔ་ཞེས་བྱའོ། །བྱང་ཆུབ་སེམས་དཔའ་ནི་སྲིད་པ་ཉི་ཤུ་རྩ་ལྔ་པོ་ཡོངས་སུ་བཅད་ནས་མྱ་ངན་ལས་འདས་པ་ཆེན་པོ་འཐོབ་པས་ན་བྱང་ཆུབ་སེམས་
དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །རིགས་ཀྱི་བུ་གཞན་ཡང་འཐོབ་པ་མེད་པ་ནི་ཐེག་པ་ཆེན་པོ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ལ་མི་གནས་པས་ན་ཐེག་པ་ཆེན་པོ་ཐོབ་པར་འགྱུར་ཏེ། དེ་བས་ན་བྱང་

47-1-281b

ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །ཇི་ཙམ་དུ་ཐོབ་པ་ཡོད་ན་ནི་ཉན་ཐོས་དང་རང་སངས་རྒྱས་ཀྱི་བྱང་ཆུབ་ཅེས་བྱའོ། །བྱང་ཆུབ་སེམས་དཔའ་ནི་ཐེག་པ་ཆུང་ངུ་གཉིས་ཀྱི་བྱང་ཆུབ་ཡོངས་སུ་བཅད་དེ་སངས་རྒྱས་ཀྱི་བྱང་ཆུབ་ཐོབ་པས་ན། 
བྱང་ཆུབ་སེམས་དཔའ་ནི་འཐོབ་པ་མེད་པ་ཞེས་བྱའོ། །རིགས་ཀྱི་བུ་གཞན་ཡང་འཐོབ་པ་མེད་པ་ནི་ཤིན་ཏུ་རྒྱས་པའི་མདོ་སྡེ་ཞེས་བྱའོ། །བྱང་ཆུབ་སེམས་དཔའ་མདོ་སྡེ་འདི་ཀློག་ཅིང་འདོན་པས་ན་མྱ་ངན་ལས་འདས་པ་ཆེན་པོ་ཐོབ་པ་ཞེས་བྱ་སྟེ། དེ་བས་ན་བྱང་ཆུབ་
སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །འཐོབ་པ་ཡོད་པ་ནི་མདོ་སྡེ་བཅུ་གཅིག་པོ་སྟེ། བྱང་ཆུབ་སེམས་དཔའ་ཐེག་པ་ཆེན་པོའི་མདོ་སྡེ་ཤིན་ཏུ་རྒྱས་པ་འབའ་ཤིག་སྟོན་ཅིང་འཆད་དེ། དེ་བས་ན་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་
བྱའོ། །རིགས་ཀྱི་བུ་གཞན་ཡང་འཐོབ་པ་མེད་པ་ནི་ནམ་མཁའ་དང་མཉམ་ཞེས་བྱའོ། །འཇིག་རྟེན་ན་དངོས་པོ་ཅི་ཡང་མེད་པ་ནི་ནམ་མཁའ་ཞེས་བྱ་སྟེ། བྱང་ཆུབ་སེམས་དཔས་ནམ་མཁའ་ལྟ་བུའི་ཏིང་ངེ་འཛིན་ཐོབ་པས་ཅི་ཡང་མི་མཐོང་སྟེ། དེ་བས་ན་བྱང་ཆུབ་
སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །འཐོབ་པ་དང་བཅས་པ་ནི་འཁོར་བར་འཁོར་བའི་འཁོར་ལོ་སྟེ། བྱིས་པ་མ་རབས་ཐམས་ཅད་ནི་འཁོར་བར་འཁོར་བས་ན་མཐོང་བ་ཡོད་དོ། །བྱང་ཆུབ་སེམས་དཔས་ནི་འཁོར་བ་ཐམས་ཅད་ཡོངས་སུ་བཅད་དེ་དེ་བས་
ན་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཅི་ཡང་འཐོབ་པ་མེད་པ་ནི་རྟག་པ་དང་། བདེ་བ་དང་བདག་དང་། ཡོངས་སུ་དག་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་
ཆེན་པོས་སངས་རྒྱས་ཀྱི་རང་བཞིན་མཐོང་བས་ན་རྟག་པ་དང་། བདེ་བ་དང་བདག་དང་ཡོངས་སུ་དག་པ་ཞེས་བྱ་བ་འཐོབ་སྟེ། དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཅི་ཡང་འཐོབ་པ་མེད་པ་ཞེས་བྱའོ། །འཐོབ་པ་དང་བཅས་པས་ནི་མི་རྟག་པ་མི་བདེ་བ་
བདག་མེད་པ་ཡོངས་སུ་མ་དག་པ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་མྱི་རྟག་པ་དང་། མི་བདེ་བ་དང་བདག་མེད་པ་དང་། ཡོངས་སུ་མ་དག་པ་ཡོངས་སུ་བཅད་པས་ན་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །རིགས་ཀྱི་བུ་གཞན་

47-1-282a

ཡང་ཅི་ཡང་འཐོབ་པ་མེད་པ་ནི་དོན་དམ་པའི་སྟོང་པ་ཉིད་ཅེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་དོན་དམ་པའི་སྟོང་པ་ཉིད་ལ་རྣམ་པར་བལྟས་ན་ཅི་ཡང་མི་མཐོང་བས་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ་འཐོབ་པ་
དང་བཅས་པ་ནི་ལྟ་བ་ལྔ་ཞེས་བྱ་སྟེ། བྱང་ཆུབ་སེམས་དཔའ་ནི་ལྟ་བ་ལྔ་ཡོངས་སུ་བཅད་དེ་དོན་དམ་པའི་སྟོང་པ་ཉིད་འཐོབ་པས་ན་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། 
བམ་པོ་ཉི་ཤུ་རྩ་གསུམ་པ། རིགས་ཀྱི་བུ་གཞན་ཡང་ཅི་ཡང་འཐོབ་པ་མེད་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཅེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པ་ནི་
ཅི་ཡང་འཐོབ་པ་མེད་པས་བྱང་ཆུབ་སེམས་དཔའ་ནི་ཅི་ཡང་འཐོབ་པ་མེད་པ་ཞེས་བྱའོ། །འཐོབ་པ་དང་བཅས་པ་ནི་ཉན་ཐོས་དང་རང་སངས་རྒྱས་ཀྱི་བྱང་ཆུབ་སྟེ། བྱང་ཆུབ་སེམས་དཔའ་ནི་ཐེག་པ་ཆུང་ངུ་གཉིས་ཀྱི་བྱང་ཆུབ་ཡོངས་སུ་བཅད་པས་བྱང་ཆུབ་སེམས་དཔའ་
ནི་ཅི་ཡང་འཐོབ་པ་མེད་པ་ཞེས་བྱའོ། །རིགས་ཀྱི་བུ་ཁྱོད་ཀྱིས་དྲིས་པ་ཡང་འཐོབ་པ་མེད་ལ། ངས་བཤད་པ་ལ་ཡང་འཐོབ་པ་མེད་དོ། །ཇི་ཙམ་དུ་ཐོབ་པར་ཡོད་པ་དེ་ནི་བདུད་ཀྱི་རིས་ཡིན་ཏེ་ངའི་ཉེ་གནས་མ་ཡིན་པ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་
ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའི་ཐོབ་པ་མ་མཆིས་པ་བདག་ལ་བསྟན་པ་ན་སེམས་ཅན་ཚད་མེད་པ་རྣམས་མཚན་མ་དང་བཅས་པའི་སེམས་ཡོངས་སུ་སྤངས་པར་གྱུར་ཏེ། དེ་བས་ན་བདག་གིས་
ཐོབ་པ་མ་མཆིས་པའི་དོན་ཞུས་པས་ཚད་མེད་པའི་སེམས་ཅན་དེ་དག་བདུད་ཀྱི་འཁོར་དུ་འགྱུར་བ་སྤངས་ནས་སངས་རྒྱས་ཀྱི་ཉེ་གནས་སུ་གྱུར་ཏོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས་སྔར་ཤིང་སཱ་ལའི་དྲུང་ན་བཞུགས་པ་ན་ཙུན་ད་ལ་ཚིགས་སུ་བཅད་དེ་བཀའ་སྩལ་པ། སྔོན་ནི་ཡོད་ལ་ད་ནི་མེད། །སྔོན་ནི་མེད་ལ་ད་ནི་ཡོད། །དུས་གསུམ་སྲིད་པའི་ཆོས་ཐམས་ཅད། །དེ་ལྟ་བུ་ཡི་གནས་མི་སྲིད་ཅེས། བཅོམ་ལྡན་འདས་ཀྱིས་གསུངས་

47-1-282b

པའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་སེམས་ཅན་མང་པོ་གདུལ་བའི་ཕྱིར་ཡང་དེ་སྐད་ཅེས་གསུངས་པ་ཡིན། གཞན་ཡང་ཉན་ཐོས་དང་རང་སངས་རྒྱས་ཀྱི་ཕྱིར་ཡང་དེ་སྐད་ཅེས་གསུངས་པ་ཡིན། གཞན་ཡང་འཇམ་
དཔལ་གཞོན་ནུའི་ཕྱིར་དེ་སྐད་ཅེས་གསུངས་པ་ཡིན་གྱི། ཙུན་ད་གཅིག་པུའི་ཕྱིར་དེ་སྐད་ཅེས་ཚིགས་སུ་བཅད་དེ་གསུངས་པ་མ་ཡིན་ནོ། །དེའི་ཚིགས་འཇམ་དཔལ་གྱིས་ང་ལ་དེ་སྐད་དུ་ཞུ་བར་གཟས་པ་ལས། ངས་དེའི་སེམས་པ་མཁྱེན་ནས་དེ་ལ་བཤད་དོ། །
ངས་དེ་ལྟར་བཤད་ནས་འཇམ་དཔལ་གཞོན་ནུས་ནི་དོན་ཡང་མངོན་པར་རྟོགས་པར་གྱུར་ཏོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། བཅོམ་ལྡན་འདས་འཇམ་དཔལ་ལྟར་དོན་མངོན་པར་རྟོགས་པ་དུ་མཆིས། དེ་བཞིན་
གཤེགས་པས་འཁོར་གྱི་དཀྱིལ་འཁོར་ལ་རྒྱ་ཆེར་བསྟན་ཏུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་བརྟགས་པར་ཉོན་ཅིག་དང་ཁྱོད་ལ་ཡང་བཤད་པར་བྱའོ། །ཐོག་མ་ནས་ཡོད་ཅེས་བྱ་བ་ནི་ང་ལ་སྔོན་ཉོན་མོངས་པ་ཚད་མེད་པ་སྙེད་ཡོད་དེ། 
ཉོན་མོངས་པའི་དབང་གིས་ད་ལྟར་གྱི་མྱ་ངན་ལས་འདས་པ་ཆེན་པོ་མེད་དོ། །ཐོག་མ་ནས་མེད་ཅེས་བྱ་བ་ནི་ཐོག་མ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་མེད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་མེད་པས་ད་ལྟར་གྱི་ཀུན་ནས་ཉོན་མོངས་པ་ཡོད་དོ། །
གལ་ཏེ་དགེ་སྦྱོང་ངམ། བྲམ་ཟེ་འམ། ལྷ་འམ་བདུད་དམ། ཚངས་པ་འམ། མི་འམ་གང་ཡང་རུང་སྟེ། དེ་བཞིན་གཤེགས་པ་ལ་འདས་པ་དང་། མ་འོངས་པ་དང་། ད་ལྟར་གྱི་དུས་ན་ཉོན་མོངས་པ་ཡོད་ཅེས་སྨྲ་ན་དེ་ནི་གནས་ཡིན་ནོ། །རིགས་
ཀྱི་བུ་གཞན་ཡང་ཐོག་མ་ནས་ཡོད་ཅེས་བྱ་བ་ནི་ང་ལ་ཐོག་མ་ནས་ཕ་མ་གཉིས་འདུས་པ་ལས་བྱུང་བའི་ལུས་ཡོད་དེ། དེ་བས་ན་ད་ལྟར་གྱི་རྡོ་རྗེ་ལྟ་བུའི་ཆོས་ཀྱི་སྐུར་ནི་མེད་དོ། །ཐོག་མ་ནས་མེད་ཅེས་བྱ་བ་ནི་ངའི་སྐུ་ལ་ཐོག་མ་ནས་མཚན་
སུམ་བཅུ་རྩ་གཉིས་དང་དཔེ་བྱད་བཟང་པོ་བརྒྱད་བཅུ་མེད་དེ། ཐོག་མ་ནས་མཚན་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱད་བཅུ་མེད་པས་ད་ལྟར་གྱི་ནད་བཞི་བརྒྱ་རྩ་བཞི་ཚང་བར་ཡོད་དོ། །དེ་ལ་གལ་ཏེ་དགེ་སྦྱོང་ངམ། བྲམ་ཟེ་འམ། 

47-1-283a

ལྷ་འམ། བདུད་དམ། ཚངས་པའམ། མིར་བཅས་པ་གང་ཡང་རུང་སྟེ། དེ་བཞིན་གཤེགས་པ་ལ་འདས་པ་དང་། མ་འོངས་པ་དང་། ད་ལྟར་གྱི་དུས་ན་ནད་ཀྱི་སྡུག་བསྔལ་ཡོད་ཅེས་སྨྲ་ན་དེ་ནི་གནས་མ་ཡིན་ནོ། །རིགས་ཀྱི་བུ་གཞན་ཡང་ཐོག་
མ་ནས་ཡོད་ཅེས་བྱ་བ་ནི་ང་ལ་ཐོག་མ་ནས་མི་རྟག་པ་དང་། བདག་མེད་པ་དང་། བདེ་བ་མེད་པ་དང་། ཡོངས་སུ་དག་པ་མེད་པ་ཡོད་དེ། དེ་ལྟར་མི་རྟག་པ་དང་། བདག་མེད་པ་དང་། བདེ་བ་མེད་པ་དང་། ཡོངས་སུ་དག་པ་མེད་པ་ཡོད་པས་ད་ལྟར་གྱི་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ནི་མེད་དོ། །ཐོག་མ་ནས་མེད་ཅེས་བྱ་བ་ནི་ཐོག་མ་ནས་སངས་རྒྱས་ཀྱི་རང་བཞིན་མ་མཐོང་སྟེ། དེ་ལྟར་མ་མཐོང་བས་ན་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མེད་དོ། །དེ་ལ་གལ་ཏེ་དགེ་སྦྱོང་ངམ། 
བྲམ་ཟེ་འམ། ལྷ་འམ། བདུད་དམ། ཚངས་པ་འམ། མིར་བཅས་པ་གང་ཞིག་གིས་དེ་བཞིན་གཤེགས་པ་ལ་འདས་པ་དང་། མ་འོངས་པ་དང་། ད་ལྟར་གྱིས་དུས་ན་མི་རྟག་ཅེས་འམ། བདེ་བ་དང་བདག་དང་། ཡོངས་སུ་དག་པ་མེད་ཅེས་ཟེར་ན། 
དེ་ནི་གནས་མ་ཡིན་ནོ། །རིགས་ཀྱི་བུ་གཞན་ཡང་ཐོག་མ་ནས་ཡོད་ཅེས་བྱ་བ་ནི་ཐོག་མ་ནས་བུས་པ་མ་རབས་ལས་དཀའ་ཐུབ་སྤྱོད་པའི་སེམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་སྙམ་སྟེ། དངོས་པོ་དེ་ལྟ་བུའི་ཕྱིར་ད་ལྟར་གྱི་
དུས་ན་བདུད་རྣམ་བཞི་ཆོམས་པ་ཡང་མ་ཡིན་ནོ། །ཐོག་མ་ནས་མེད་ཅེས་བྱ་བ་ནི་ཐོག་མ་ནས་ཕ་རོལ་ཏུ་ཕྱིན་པ་དྲུག་མེད་དོ། །ཕ་རོལ་ཏུ་ཕྱིན་པ་དྲུག་མེད་པས་ན་བུས་པ་མ་རབས་ཀྱི་དཀའ་ཐུབ་སྤྱོད་པའི་སེམས་ཀྱིས་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཐོབ་སྙམ་སེམས་སོ། །དེ་ལ་གལ་ཏེ་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། མིར་བཅས་པ་གང་ཞིག་གིས་དེ་བཞིན་གཤེགས་པ་ལ་འདས་པ་དང་། མ་བྱོན་པ་དང་། ད་ལྟར་གྱི་དུས་ན་དཀའ་ཐུབ་སྤྱོད་པ་ཡོད་དོ་
ཞེས་སྨྲ་ན། དེ་ནི་གནས་མ་ཡིན་ནོ། །རིགས་ཀྱི་བུ་གཞན་ཡང་ཐོག་མ་ནས་ཡོད་ཅེས་བྱ་བ་ནི་ང་ལ་ཐོག་མ་ནས་ཟས་དང་འདྲེས་པའི་ལུས་ཡོད་དོ། །ཟས་ཀྱི་ལུས་ཡོད་པས་ད་ལྟར་གྱི་མཐའ་ཡས་པའི་སྐུ་མེད་དོ། །ཐོག་མ་ནས་མེད་ཅེས་བྱ་བ་ནི་ཐོག་མ་

47-1-283b

ནས་བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་མེད་དོ། །དེ་ལྟར་བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་མེད་པས་ད་ལྟར་གྱི་ཟས་དང་འདྲེས་པའི་ལུས་ཡོད་དོ། །དེ་ལ་གལ་ཏེ་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། 
མིར་བཅས་པ་གང་ཞིག་གིས་དེ་བཞིན་གཤེགས་པ་ལ་འདས་པ་དང་། མ་འོངས་པ་དང་། ད་ལྟར་གྱི་དུས་ན་ཟས་དང་འདྲེས་པའི་ལུས་ཡོད་ཅེས་ཟེར་ན། དེ་ནི་གནས་མེད་དོ། །རིགས་ཀྱི་བུ་གཞན་ཡང་ཐོག་མ་ནས་ཡོད་ཅེས་བྱ་བ་ནི་ངས་མངོན་ཐོག་
ནས་ཆོས་ཐམས་ཅད་བླང་བ་དང་། ཆགས་པའི་སེམས་ཡོད་དེ། དེ་བས་ན་ད་ལྟར་གྱི་མཐར་ཕྱིན་པའི་སྟོང་པ་ཉིད་ཀྱི་ཏིང་ངེ་འཛིན་ནི་མེད་དོ། །ཐོག་མ་ནས་མེད་ཅེས་བྱ་བ་ནི་ཐོག་མ་དབུ་མའི་དོན་བདེན་པ་མེད་དོ། །དེ་ལྟར་དབུ་མའི་དོན་བདེན་
པ་མེད་པས་ཆོས་ཐམས་ཅད་ལ་མ་ཆགས་པའི་སེམས་མེད་དོ། །གལ་ཏེ་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། མིར་བཅས་པ་གང་ཞིག་གིས་དེ་བཞིན་གཤེགས་པ་ལ་འདས་པ་དང་། མ་འོངས་པ་དང་། ད་ལྟར་གྱི་
དུས་ན་ཆོས་ཐམས་ཅད་ལ་མཚན་མ་ཡོད་དོ་ཞེས་སྨྲ་ན་དེ་ནི་གནས་མ་ཡིན་ནོ། །རིགས་ཀྱི་བུ་གཞན་ཡང་ཐོག་མ་ནས་ཡོད་ཅེས་བྱ་བ་ནི་ངས་སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པ་ན་དབང་པོ་རྟུལ་པོ་ཉན་ཐོས་ཀྱི་ཉེ་གནས་
སུ་གྱུར་པ་ཡོད་དོ། །དེ་ལྟར་དབང་པོ་རྟུལ་པོ་ཉན་ཐོས་ཀྱི་ཉེ་གནས་སུ་གྱུར་པ་ཡོད་པས་ན་ཐེག་པ་གཅིག་པུའི་བདེན་པ་མེད་དོ། །ཐོག་མ་ནས་མེད་ཅེས་བྱ་བ་ནི་ཐོག་མ་ནས་དབང་པོ་རྣོན་པོའི་མིའི་ནང་ན་བལ་གླང་གི་རྒྱལ་པོ་ལྟ་བུ་བྱང་ཆུབ་སེམས་
དཔའ་འོད་སྲུང་ལ་སོགས་པ་མེད་དོ། །དབང་པོ་རྣོན་པོ་འོད་སྲུང་ལྟ་བུ་མེད་པས་ན་ཅི་རིགས་ཀྱི་བུ་ཐབས་མཁས་པས་ཐེག་པ་གསུམ་དུ་ཕྱེ་སྟེ་བསྟན་ཏོ། །དེ་ལ་གལ་ཏེ་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། མྱིར་
བཅས་པ་གང་ཞིག་གིས་ཀྱང་དེ་བཞིན་གཤེགས་པ་ལ་འདས་པ་དང་། མ་འོངས་པ་དང་། ད་ལྟར་གྱི་དུས་ན་ཐེག་པ་གསུམ་མཐར་ཕྱིན་པ་ཡིན་ནོ་ཞེས་སྨྲ་ན་དེ་ནི་གནས་མ་ཡིན་ནོ། །རིགས་ཀྱི་བུ་གཞན་ཡང་ཐོག་མ་ནས་ཡོད་ཅེས་བྱ་བ་ནི་ངས་སྔོན་

47-1-284a

འདི་སྐད་དུ་ད་སྟེ་ཟླ་བ་གསུམ་ན་ཤིང་སཱ་ལ་དྲུང་གཉིས་ཀྱི་བར་ན་ཡོངས་སུ་མྱ་ངན་ལས་འདའོ་ཞེས་གསུངས་ཏེ། དེ་བས་ན་ད་ལྟར་ཤིན་ཏུ་རྒྱས་པ་ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ་འཆད་པར་མྱི་འགྱུར་རོ། །ཐོག་མ་ནས་མེད་ཅེས་
བྱ་བ་ནི། ཐོག་མ་ནས་འཇམ་དཔལ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མེད་དོ། །དེ་ལྟར་མེད་པས་ན་ད་ལྟར་དེ་བཞིན་གཤེགས་པ་ལ་མི་རྟག་གོ་ཞེས་གསུངས་སོ། །དེ་ལ་གལ་ཏེ་དགེ་སྦྱོང་ངམ། བྲམ་ཟེའམ། ལྷའམ། 
བདུད་དམ། ཚངས་པ་འམ། མི་ཡང་རུང་གང་ཞིག་གིས་དེ་བཞིན་གཤེགས་པ་ལ་འདས་པ་དང་། མ་འོངས་པ་དང་། ད་ལྟར་གྱི་དུས་ན་སུ་མི་རྟག་གོ་ཞེས་ཟེར་ན་དེ་ནི་གནས་མ་ཡིན་ནོ། །རིགས་ཀྱི་བུ་དེ་བཞིན་གཤེགས་པ་ནི་སེམས་ཅན་ཐམས་ཅད་
ཀྱི་ཕྱིར་ཆོས་ཐམས་ཅད་མཁྱེན་ཀྱང་མི་མཁྱེན་ཅེས་གསུང་ངོ་། །ཆོས་ཐམས་ཅད་གཟིགས་ཀྱང་གཟིགས་པ་མེད་དོ་ཞེས་གསུང་། མཚན་མ་དང་བཅས་པའི་ཆོས་ལ་མཚན་མ་མེད་དོ་ཞེས་གསུང་། མཚན་མ་མེད་པའི་ཆོས་ཀྱང་མཚན་མ་དང་བཅས་
པའོ་ཞེས་གསུང་། ཡང་དག་པར་མྱི་རྟག་པ་ཡང་རྟག་གོ་ཞེས་གསུང་། ཡང་དག་པར་རྟག་པ་ཡང་མི་རྟག་གོ་ཞེས་གསུང་སྟེ། བདག་དང་བདེ་བ་དང་། ཡོངས་སུ་དག་པ་ཡང་དེ་བཞིན་དུ་རྒྱས་པར་རིག་པར་བྱའོ། །ཐེག་པ་གསུམ་གྱི་ཆོས་ཀྱང་ཐེག་
པ་གཅིག་ཏུ་གསུང་། ཐེག་པ་གཅིག་ཀྱང་ཅི་རིགས་པར་གསུམ་གསུང་ངོ་། །མདོའི་མཚན་ཉིད་ནི་རྒྱས་པའི་མཚན་ཉིད་དུ་གསུང་། རྒྱས་པའི་མཚན་ཉིད་ཀྱང་མདོར་གསུང་། ཕས་ཕམ་པ་བཞི་ཉེས་པ་སྦོམ་པར་ཡང་གསུང་། ཉེས་
པ་སྦོམ་པོ་ནི་ཕས་ཕམ་པ་བཞིར་ཡང་གསུང་། ཁ་ན་མ་ཐོ་བ་ནི་ཁ་ན་མ་ཐོ་བ་མ་ཡིན་པར་གསུང་། ཁ་ན་མ་ཐོ་བ་མ་ཡིན་པ་ནི་ཁ་ན་མ་ཐོ་བ་དང་བཅས་པ་ཡིན་ནོ་ཞེས་གསུང་། ཉེས་པ་ཡང་བ་ནི་ལྕི་བར་གསུང་། ལྕི་བ་ནི་ཡང་བར་ཡང་གསུང་
ངོ་། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་ནི་སེམས་ཅན་སོ་སོའི་དབང་པོ་གསལ་བར་གཟིགས་པའི་ཕྱིར་རོ། །རིགས་ཀྱི་བུ་དེ་བཞིན་གཤེགས་པ་ནི་དེ་སྐད་གསུང་ཡང་བརྫུན་མ་ཡིན་ནོ། །དེ་ཅིའི་ཕྱིར་ཞེ་ན། བརྫུན་དུ་སྨྲ་བ་

47-1-284b

ནི་སྐྱོན་དང་བཅས་པ་ཡིན་ཏེ། དེ་བཞིན་གཤེགས་པ་ནི་ཉེས་པའི་སྐྱོན་ཐམས་ཅད་ཡོངས་སུ་བྲལ་བ་ཡིན་ན་བརྫུན་དུ་སྨྲ་བ་ག་ལ་ཞིག་ཡོད། རིགས་ཀྱི་བུ་དེ་བཞིན་གཤེགས་པ་ལ་བརྫུན་དུ་གསུང་བ་མེད་མོད་ཀྱི། ཇི་སྟེ་
སེམས་ཅན་དག་ལ་བརྫུན་དུ་སྨྲ་བའི་རྐྱེན་གྱི། ཆོས་ཀྱིས་ཕན་པའི་དོན་དུ་འགྱུར་ན། ཅི་རིགས་པའི་ཐབས་ཀྱིས། དེ་ལ་སྟོན་ཅིང་གསུང་ངོ་། །རིགས་ཀྱི་བུ་ཀུན་རྫོབ་ཀྱི་བདེན་པ་ཐམས་ཅད་ནི། 
དེ་བཞིན་གཤེགས་པའི་དོན་དམ་པའི་བདེན་པའོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ནི། དོན་དམ་པའི་བདེན་པ་ལས། ཀུན་རྫོབ་ཀྱི་བདེན་པ་གསུངས་ཏེ། གཞན་དུ་ན་སོ་
སོའི་སྐྱེ་བོ་དག ། དོན་དམ་པའི་བདེན་པ་ཐོབ་པར་བྱ་བའི་ཕྱིར་རོ། །ཇི་སྟེ་སོ་སོའི་སྐྱེ་བོ། དག་དོན་དམ་པའི་བདེན་པ་མི་ཐོབ་ན་སངས་རྒྱས་བཅོམ་ལྡན་འདས་
ཀྱིས་ཀུན་རྫོབ་ཀྱི་བདེན་པ་ནམ་དུ་ཡང་མི་གསུང་ངོ་། །རིགས་ཀྱི་བུ་དེ་བཞིན་གཤེགས་པ་ནི་བར་འགའི་དུས་སུ་ཀུན་རྫོབ་ཀྱི་བདེན་པ་གསུང་བ་ན། 
སེམས་ཅན་གྱིས་ནི་དེ་བཞིན་གཤེགས་པས་དོན་དམ་པའི་བདེན་པ་གསུང་ངོ་། །སྙམ་སེམས་སོ། །སྐབས་ཁ་ཅིག་ཏུ་ནི་དོན་དམ་པའི་
བདེན་པ་གསུངས་པ་ན། སེམས་ཅན་གྱིས་དེ་བཞིན་གཤེགས་པ་ནི་ཀུན་རྫོབ་ཀྱི་བདེན་པ་གསུང་ངོ་། །སྙམ་སེམས་ཏེ། དེ་ནི་
སངས་རྒྱས་བཅོམ་ལྡན་འདས་རྣམས་ཀྱི་སྤྱོད་ཡུལ་ཟབ་མོ་ཡིན་གྱི་ཉན་ཐོས་དང་རང་སངས་རྒྱས་རྣམས་

47-1-285a

ཀྱིས་ཤེས་པ་ནི་མ་ཡིན་ནོ། །རིགས་ཀྱི་བུ་དེ་བས་ན་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཅི་ཡང་འཐོབ་པ་མེད་དོ་ཞེས་བརྒལ་བའི་མི་རིགས་སོ། །བྱང་ཆུབ་སེམས་དཔའ་ནི་རྟག་ཏུ་དོན་དམ་པའི་བདེན་པ་
དང་ལྡན་པ་ཡིན་ན། ཅིའི་ཕྱིར་ཅི་ཡང་འཐོབ་པ་མེད་དོ་ཞེས་བརྒལ། འོད་སྲུང་གིས་ཡང་གསོལ་པ། བཅོམ་ལྡན་འདས་དོན་དམ་པའི་བདེན་པ་ནི་ལམ་ཞེས་ཀྱང་བགྱི། བྱང་ཆུབ་ཅེས་ཀྱང་བགྱི། མྱ་ངན་ལས་འདས་པ་ཞེས་ཀྱང་བགྱི་ན། 
ཇི་སྟེ་བྱང་ཆུབ་སེམས་དཔའ་ལམ་དང་བྱང་ཆུབ་དང་མྱ་ངན་ལས་འདས་པ་ཐོབ་ན་དེ་ནི་མི་རྟག་པ་ལགས་སོ། །དེ་ཅིའི་སླད་དུ་ཞེ་ན། ཇི་སྟེ་རྟག་པ་ལགས་ན་འཐོབ་པར་ཡང་མི་རུང་ངོ་། །དཔེར་ན་ནམ་མཁའ་ནི་སུས་ཀྱང་འཐོབ་པར་ཡང་མི་རུང་ངོ་། །བཅོམ་
ལྡན་འདས་དཔེར་ན་འཇིག་རྟེན་གྱི་དངོས་པོ་དག་ཐོག་མ་ནས་མེད་ལ་ད་ཡོད་པ་ནི་མི་རྟག་པ་ཞེས་བགྱི་ན་བྱང་ཆུབ་ཀྱང་དེ་དང་འདྲ་སྟེ། ཇི་སྟེ་བྱང་ཆུབ་ཐོབ་པ་ཞིག་ལགས་ན་མི་རྟག་པ་ཞེས་བགྱིའོ། །ཇི་སྟེ་ཆོས་རྟག་པ་ཞིག་ལགས་ན། འཐོབ་པ་ཡང་མ་མཆིས་
ལ་སྐྱེ་བ་ཡང་མ་མཆིས་ཏེ། དཔེར་ན་སངས་རྒྱས་ཀྱི་རང་བཞིན་ཡང་འཐོབ་པ་ཡང་མ་མཆིས་ལ། སྐྱེ་བ་ཡང་མ་མཆིས་ལ། །བཅོམ་ལྡན་འདས་ལམ་ནི་གཟུགས་ཀྱང་མ་ལགས། གཟུགས་མ་ལགས་པ་ཡང་མ་ལགས། རིང་པོ་ཡང་མ་ལགས། 
ཐུང་ངུ་ཡང་མ་ལགས། མཐོ་བ་ཡང་མ་ལགས། དམའ་བ་ཡང་མ་ལགས། སྐྱེ་བ་ཡང་མ་ལགས། འགོག་པ་ཡང་མ་ལགས། དམར་པོ་ཡང་མ་ལགས། དཀར་པོ་ཡང་མ་ལགས། སྔོན་པོ་ཡང་མ་ལགས། སེར་པོ་ཡང་མ་ལགས། ཡོད་པ་ཡང་མ་ལགས། 
མེད་པ་ཡང་མ་ལགས་ན། ཅིའི་སླད་དུ་དེ་བཞིན་གཤེགས་པས་འཐོབ་པར་རུང་ཞེས་གསུངས། བྱང་ཆུབ་དང་མྱ་ངན་ལས་འདས་པ་ཡང་དེ་དང་མཚུངས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ཏེ། དེ་དེ་བཞིན་ནོ། །རིགས་ཀྱི་བུ་
ལམ་ལ་རྣམ་པ་གཉིས་ཏེ། རྟག་པ་དང་མི་རྟག་པའོ། །བྱང་ཆུབ་ལ་ཡང་རྣམ་པ་གཉིས་ཏེ། རྟག་པ་དང་མི་རྟག་པའོ། །མྱ་ངན་ལས་འདས་པ་ཡང་དེ་དང་འདྲ་སྟེ། ཕྱིར་རོལ་པ་མུ་སྟེགས་ཅན་གྱི་ལམ་ནི་མི་རྟག་པ་ཞེས་བྱའོ། །ནང་གི་ལམ་ནི་རྟག་

47-1-285b

པ་ཞེས་བྱའོ། །ཉན་ཐོས་དང་རང་སངས་རྒྱས་ཀྱི་བྱང་ཆུབ་ནི་མི་རྟག་པ་ཞེས་བྱའོ། །བྱང་ཆུབ་སེམས་དཔའ་དང་སངས་རྒྱས་རྣམས་ཀྱི་བྱང་ཆུབ་ནི་རྟག་པ་ཞེས་བྱའོ། །ཕྱི་རོལ་གྱི་རྣམ་པར་གྲོལ་བ་ནི་མི་རྟག་པ་ཞེས་བྱའོ། །ནང་གི་རྣམ་
པར་གྲོལ་བ་ནི་རྟག་པ་ཞེས་བྱའོ། །རིགས་ཀྱི་བུ་ལམ་དང་བྱང་ཆུབ་དང་མྱ་ངན་ལས་འདའ་བ་ནི་ཀུན་ཀྱང་རྟག་པ་ཞེས་བྱའོ། །སེམས་ཅན་ཐམས་ཅད་ནི་རྟག་ཏུ་ཉོན་མོངས་པ་གྲངས་མེད་པས་ཡོངས་སུ་ཁེབས་ཏེ། ཤེས་རབ་ཀྱི་མིག་མེད་པས་
མཐོང་བར་མ་གྱུར་ཏོ། །སོ་སོའི་སྐྱེ་བོ་དག་མཐོང་བར་འདོད་པས་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ལ་ནན་ཏན་དུ་སྤྱོད་དོ། །དེ་ལྟར་ན་ནན་ཏན་སྤྱོད་པས་ན་ལམ་དང་བྱང་ཆུབ་དང་མྱ་ངན་ལས་འདའ་བ་མཐོང་བར་འགྱུར་ཏེ། 
དེ་ནི་བྱང་ཆུབ་སེམས་དཔས་ལམ་དང་། བྱང་ཆུབ་དང་། མྱ་ངན་ལས་འདའ་བ་ཐོབ་པ་ཞེས་བྱའོ། །ལམ་གྱི་མཚན་ཉིད་ནི་ཡང་དག་པར་སྐྱེ་བ་འམ་འགོག་པ་མ་ཡིན་ཏེ། དེ་བས་ན་གཟུང་དུ་མེད་དོ། །རིགས་ཀྱི་བུ་ལམ་དང་ཞེས་བྱ་བ་ནི་
གཟུགས་དང་། དབྱིབས་ཀྱང་མེད། བལྟར་རུང་བ་འམ། དཔག་ཏུ་རུང་བ་འམ། ཤེས་པར་རུང་བ་མ་ཡིན་མོད་ཀྱི། ཡང་དག་པར་ན་དགོས་པ་ཡོད་དོ། །རིགས་ཀྱི་བུ་དཔེར་ན་སེམས་ཅན་གྱི་སེམས་ཀྱང་གཟུགས་མ་ཡིན། རིང་པོ་མ་ཡིན། 
ཐུང་ངུ་མ་ཡིན། སྦོམ་པོ་མ་ཡིན། ཕྲ་མོ་མ་ཡིན། བཅིངས་པ་མ་ཡིན། གྲོལ་བ་མ་ཡིན། མཐོང་བའི་ཆོས་མ་ཡིན་མོད་ཀྱི། མེད་པ་ནི་མ་ཡིན་ནོ། །དེ་བས་ན་ངས་ཁྱིམ་བདག་སྐྱབས་མེད་ཟས་སྦྱིན་ལ་སེམས་ནི་གྲོང་ཁྱེར་གྱི་བདག་པོ་དང་འདྲའོ། །
ཁྱིམ་བདག་གལ་ཏེ་སེམས་མ་སྲུངས་ན་ལུས་དང་ངག་ཀྱང་བསྲུངས་པར་མྱི་འགྱུར་གྱི། སེམས་བསྲུངས་ན་ལུས་དང་ངག་ཀྱང་བསྲུངས་པར་འགྱུར་རོ། །ལུས་དང་ངག་ལེགས་པར་མ་བསྲུངས་ན་སེམས་ཅན་དག་ངན་སོང་གསུམ་དུ་ལྟུང་བར་བྱེད་དོ། 
ལུས་དང་ངག་བསྲུངས་ན་སེམས་ཅན་རྣམས་ལྷ་དང་མིའི་མྱ་ངན་ལས་འདས་པ་ཐོབ་པར་འགྱུར་རོ། །དེ་ལྟར་ཐོབ་པ་ནི་ཡང་དག་པ་ཞེས་བྱའི་མ་ཐོབ་པ་ནི་ཡང་དག་པ་ཞེས་མི་བྱའོ། །རིགས་ཀྱི་བུ་ལམ་དང་བྱང་ཆུབ་དང་མྱ་ངན་ལས་འདའ་བ་ཡང་

47-1-286a

དེ་དང་འདྲ་སྟེ། ཡོད་པ་ཡང་ཡིན་རྟག་པ་ཡང་ཡིན་ནོ། །ཇི་སྟེ་མེད་པ་ཞིག་ཡིན་ན་ཉོན་མོངས་པ་ཐམས་ཅད་ཅིས་ཆོད་པར་འགྱུར། དེ་ལྟར་ཡོད་པས་ན་བྱང་ཆུབ་སེམས་དཔའ་ཐམས་ཅད་ཀྱིས་ཀྱང་མངོན་སུམ་དུ་གསལ་བར་མཐོང་
ཞིང་ཤེས་སོ། །རིགས་ཀྱི་བུ་མཐོང་བ་ལ་རྣམ་པ་གཉིས་ཏེ། མཚན་མས་མཐོང་བ་དང་། མངོན་སུམ་དུ་གསལ་བར་མཐོང་བའོ། །དེ་ལ་ཇི་ལྟར་ན་མཚན་མས་མཐོང་བ་ཡིན་ཞེ་ན། དཔེར་ན་རྒྱང་མ་ནས་དུད་པ་མཐོང་ན་མེ་མཐོང་བ་ཞེས་བྱ་སྟེ། 
ཡང་དག་པར་མི་མ་མཐོང་སྟེ། མེ་མ་མཐོང་མོད་ཀྱི་བརྫུན་ཡང་མ་ཡིན་ནོ། །ཆུ་བྱ་མཐོང་ན་ཆུ་མཐོང་བ་ཞེས་བྱ་སྟེ་ཆུ་མ་མཐོང་མོད་ཀྱི་བརྫུན་མ་ཡིན་ནོ། །དཔེར་ན་མེ་ཏོག་དང་ལོ་མ་མཐོང་ན་རྩྭ་བ་མཐོང་ཞེས་བྱའོ། །རྩྭ་བ་མ་མཐོང་མོད་ཀྱི་དེ་ཡང་བརྫུན་
མ་ཡིན་ནོ། །དཔེར་ན་མི་ཞིག་ར་བའི་རྒྱབ་ན་ར་བ་མཐོང་ན་བ་ལང་མཐོང་བ་ཞེས་བྱ་སྟེ། བ་ལང་ཉིད་མ་མཐོང་ཡང་བརྫུན་ནི་མ་ཡིན་ནོ། །དཔེར་ན་བུད་མེད་སྦྲུམ་མ་མཐོང་ན་སྐྱེས་པ་དང་ཉལ་བར་མཐོང་ངོ་ཞེས་བྱས་ཀྱང་ཉལ་བ་ཉིད་མ་མཐོང་མོད་ཀྱི་རྫུན་ནི་
མ་ཡིན་ནོ། །དཔེར་ན་སྐྱེད་ཤིང་གི་ལོ་མ་མཐོང་བས་ཆུ་མཐོང་ངོ་ཞེས་བྱས་ཀྱང་ཆུ་ཉིད་མ་མཐོང་མོད་ཀྱི་བརྫུན་ནི་མ་ཡིན་ནོ། །དཔེར་ན་སྤྲིན་མཐོང་བས་ཆར་པ་མཐོང་ངོ་ཞེས་བྱས་ཀྱང་། ཆར་པ་ཉིད་མ་མཐོང་མོད་ཀྱི་བརྫུན་ནི་མ་ཡིན་ནོ། །དཔེར་ན་ལུས་
ཀྱི་ལས་དང་ངག་གི་ལས་མཐོང་བས་ཡིད་ཀྱི་ལས་མཐོང་ངོ་ཞེས་བྱས་ཀྱང་། ཡིད་ཀྱི་ལས་ནི་མ་མཐོང་མོད་ཀྱི་བརྫུན་དུ་སྨྲ་བ་ནི་མ་ཡིན་ཏེ། དེ་ནི་མཚན་མས་མཐོང་བ་ཞེས་བྱའོ། །དེ་ལ་ཇི་ལྟར་ན་མངོན་སུམ་དུ་གསལ་བར་མཐོང་ཞེ་ན། 
དཔེར་ན་མིག་གིས་གཟུགས་མཐོང་བ་ལྟ་བུ་སྟེ། རིགས་ཀྱི་བུ་དཔེར་ན་གང་ཟག་མིག་གི་དབང་པོ་མ་ཉམས་ཤིང་ཡོངས་སུ་དག་པས་ལག་མཐིལ་དུ་ཨ་འབྲའི་འབྲས་བུ་གཞག་པ་དང་འདྲ་བར། བྱང་ཆུབ་སེམས་དཔའ་སེམས་དཔའ་ཆེན་
པོས་ལམ་དང་བྱང་ཆུབ་དང་མྱ་ངན་ལས་འདས་པ་མངོན་སུམ་དུ་གསལ་བར་མཐོང་བ་ཡང་དེ་དང་འདྲའོ། །དེ་ལྟར་མཐོང་མོད་ཀྱི་ཐོག་མ་ནས་མཐོང་བའི་མཚན་ཉིད་མེད་དོ། །རིགས་ཀྱི་བུ་དེའི་རྒྱུ་དེའི་རྐྱེན་ཀྱིས་ངས་སྔོན་ཤཱ་རིའི་བུ་ལ་འདི་སྐད་ཅེས་

47-1-286b

བཀའ་སྩལ་ཏོ། །ཤཱ་རིའི་བུ་འཇིག་རྟེན་དུ་བཅས་པ་དགེ་སྦྱོང་དང་། བྲམ་ཟེ་དང་། ལྷ་དང་། བདུད་དང་། ཚངས་པ་དང་། མི་ལ་སོགས་པ་ཐམས་ཅད་ཀྱིས་མི་ཤེས་པ་དང་། མི་མཐོང་བ་དང་། མི་རྟོགས་པ་ཐམས་ཅད་དེ་བཞིན་གཤེགས་པས་
ཐམས་ཅད་མཁྱེན་ཅིང་གཟིགས་ཏེ་རྟོགས་སོ། །བྱང་ཆུབ་སེམས་དཔའ་རྣམས་ཀྱང་དེ་བཞིན་ནོ། །ཤཱ་རིའི་བུ་འཇིག་རྟེན་དུ་བཅས་པ་རྣམས་ཀྱིས་ཤེས་པ་དང་། མཐོང་བ་དང་། རྟོགས་པ་ནི་ང་དང་བྱང་ཆུབ་སེམས་དཔའ་རྣམས་ཀྱིས་མཁྱེན་ཅིང་
གཟིགས་ཏེ་རྟོགས་སོ། །འཇིག་རྟེན་དུ་བཅས་པ་ཐམས་ཅད་ཀྱིས་མི་ཤེས་པ་དང་། མྱི་མཐོང་བ་དང་། མི་རྟོགས་པ་ནི་འདི་ལྟར་བདག་གིས་མི་ཤེས་མི་མཐོང་མི་རྟོགས་པར་ནི་མི་ཤེས་ཀྱི། འཇིག་རྟེན་གྱི་སེམས་ཅན་འདི་དག་ནི་ཤེས་པ་དང་མཐོང་
བ་དང་རྟོགས་པ་ལ་བདག་གིས་འདི་ལྟར་ཤེས་སོ་མཐོང་ངོ་རྟོགས་སོ་ཞེས་ཟེར་རོ། །ཤཱ་རིའི་བུ་དེ་བཞིན་གཤེགས་པ་ནི་ཐམས་ཅད་མཁྱེན་ཅིང་གཟིགས་ཀྱང་འདི་ལྟར་ངས་མཁྱེན་ཅིང་གཟིགས་སོ་ཞེས་མི་གསུང་སྟེ། བྱང་ཆུབ་སེམས་དཔའ་
ཐམས་ཅད་ཀྱང་དེ་བཞིན་ནོ། །དེ་ཅིའི་ཕྱིར་ཞེ་ན། གལ་ཏེ་དེ་བཞིན་གཤེགས་པས་མཁྱེན་ཅིང་གཟིགས་པ་འམ་རྟོགས་པར་དགོངས་ན་དེ་ནི་སངས་རྒྱས་བཅོམ་ལྡན་འདས་སམ། བྱང་ཆུབ་སེམས་དཔའ་ཞེས་མི་བྱ་སྟེ། བྱིས་པ་མ་
རབས་ཡིན་ནོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཤཱ་རིའི་བུ་ལ་འདི་སྐད་ཅེས་འཇིག་རྟེན་གྱིས་ཤེས་པ་ནི་ངས་མཁྱེན་ལ། འཇིག་རྟེན་གྱིས་མི་ཤེས་པ་
ཡང་ངས་ཀུན་མཁྱེན་ནོ་ཞེས་གསུངས་པའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འཇིག་རྟེན་དུ་བཅས་པ་ཐམས་ཅད་ཀྱི་ནི་སངས་རྒྱས་ཀྱི་རང་བཞིན་མི་ཤེས་མི་མཐོང་མི་རྟོགས་ཏེ། 
གལ་ཏེ་ཤེས་སམ་མཐོང་ངམ་རྟོགས་ན་འཇིག་རྟེན་པ་ཞེས་མི་བྱའི་བྱང་ཆུབ་སེམས་དཔའ་ཡིན་ནོ། །འཇིག་རྟེན་པས་ནི་མདོ་སྡེ་བཅུ་གཉིས་དང་། རྟེན་ཅིང་འབྲེལ་ཏེ་འབྱུང་བ་བཅུ་གཉིས་དང་། ཕྱིན་ཅི་ལོག་བཞི་དང་། བདེན་པ་བཞི་

47-1-287a

བཞི་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་དང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་། ཡོངས་སུ་མྱ་ངན་ལས་འདས་པ་ཆེན་པོ་ཡང་མི་ཤེས་མི་མཐོང་མི་
རྟོགས་སོ། །ཅི་སྟེ་ཤེས་སམ་མཐོང་ངམ་མ་རྟོགས་ན་འཇིག་རྟེན་པ་ཞེས་མི་བྱའི་བྱང་ཆུབ་སེམས་དཔའ་ཞེས་བྱའོ། །རིགས་ཀྱི་བུ་འདི་དག་ནི་འཇིག་རྟེན་པས་མི་ཤེས་མི་མཐོང་མི་རྟོགས་པ་ཞེས་བྱའོ། །
དེ་ལ་ཇི་ལྟར་ན་འཇིག་རྟེན་པས་ཤེས་ཤིང་མཐོང་བ་དང་རྟོགས་པ་ཞེ་ན། འདི་ལྟ་སྟེ། ཚངས་པའི་ལྷ་དང་། དབང་སྒྱུར་དང་། ལག་བརྒྱད་པ་དང་། རང་བཞིན་དང་། དུས་དང་། རྡུལ་དང་། ཆོས་དང་། 
ཆོས་མ་ཡིན་པ་དང་། བྱམས་པའི་བདག་པོ་དང་། འཇིག་རྟེན་གྱི་ཐོག་མ་དང་། མཐའ་དང་རྟག་པ་དང་། ཆད་པར་ལྟ་བ་གཉིས་དང་། བསམ་གཏན་དང་པོ་ནས། འདུ་ཤེས་མེད་མིན་སྐྱེ་
མཆེད་སྟེངས་ནི་མྱ་ངན་ལས་འདས་པའོ་ཞེས་སྨྲ་སྟེ། རིགས་ཀྱི་བུ་དེ་ནི་འཇིག་རྟེན་པའི་ཤེས་པ་དང་མཐོང་བ་དང་རྟོགས་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་ཀྱང་དེ་དག་
དེ་ལྟར་ཤེས་ཤིང་མཐོང་སྟེ། བྱང་ཆུབ་སེམས་དཔའ་དེ་ལྟར་ཤེས་ཤིང་མཐོང་ལ་རྟོགས་ཀྱང་། ཅི་སྟེ་མི་ཤེས་མི་མཐོང་མ་རྟོགས་ཤེས་སྨྲ་ན་བརྫུན་དུ་འགྱུར་ཏེ། ཇི་ཙམ་དུ་བརྫུན་དུ་སྨྲ་བ་
ནི་ཁ་ན་མ་ཐོ་བར་འགྱུར་ཏེ། ཁ་ན་མ་ཐོ་བའི་དབང་གིས་སེམས་ཅན་དམྱལ་བར་ལྟུང་ངོ་། །རིགས་ཀྱི་བུ་གལ་ཏེ་སྐྱེས་པ་འམ། བུད་མེད་དམ། དགེ་སྦྱོང་ངམ། བྲམ་ཟེ་འམ། གང་ཡང་
རུང་བ་ལམ་དང་། བྱང་ཆུབ་དང་། མྱ་ངན་ལས་འདས་པ་མེད་དོ་ཞེས་སྨྲ་ན་དེ་ནི་ལོག་སྲེད་ཅན་ཡིན་ཏེ། བདུད་ཀྱི་རིས་ལ་གཏོགས་པ་ཆོས་ལ་སྐུར་པ་ཞེས་བྱའོ། །དེ་ལྟར་ཆོས་ལ་སྐུར་པ་དེ་ནི་སངས་

47-1-287b

རྒྱས་རྣམས་ལ་སྐུར་པ་ཞེས་བྱ་སྟེ། གང་ཟག་དེ་ནི་འཇིག་རྟེན་པ་ཞེས་ཀྱང་མི་བྱ། འཇིག་རྟེན་པ་མ་ཡིན་ཞེས་ཀྱང་མི་བྱའོ། །དེའི་ཚེ་འོད་སྲུང་གིས་དེ་སྐད་ཅེས་གསུང་པ་ཐོས་ནས་ཚིགས་སུ་བཅད་པ་འདི་
དག་གིས་སངས་རྒྱས་ལ་མངོན་པར་བསྟོད་དོ། །སེམས་ཅན་ཀུན་ལ་ཐུགས་བརྩེ་བ། །བདག་ནི་དེ་ལ་སྐྱབས་སུ་མཆི། །གདུག་པའི་ཟུག་རྔུ་འབྱིན་པས་ན། །དེ་བས་སྨན་པའི་རྒྱལ་པོར་གྲགས། །
འཇིག་རྟེན་སྨན་པས་གསོ་བ་ནི། །སྐད་ཅིག་སོས་ཏེ་སླར་ཡང་ལྡང་། །དེ་བཞིན་གཤེགས་པས་གསོ་བ་ནི། །དེ་ལས་ནམ་དུ་འང་མི་ལྡང་ངོ་། །བཅོམ་ལྡན་འདས་ཀྱིས་བདུད་རྩིའི་སྨན། །སེམས་ཅན་རྣམས་
ལ་ཡོངས་བཏང་བ། །སེམས་ཅན་རྣམས་ཀྱིས་དེ་འཚལ་ནས། །འཆི་བ་མེད་ལ་སྐྱེ་བ་མེད། །དེ་བཞིན་གཤེགས་པས་བདག་སླད་དུ། །ཡོངས་སུ་མྱ་ངན་འདས་པ་བསྟན། །སེམས་ཅན་གསུང་བ་ཐོབ་པ་
རྣམས། །སྐྱེ་འགག་མེད་པ་ཐོབ་པར་འགྱུར། །བྱང་ཆུབ་སེམས་དཔའ་འོད་སྲུངས་གིས་ཚིགས་སུ་བཅད་པ་དེ་སྐད་སྨྲས་ནས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས་ཀྱིས་གསུངས་པ་ལྟར་འཇིག་རྟེན་པ་ཐམས་ཅད་ཀྱིས་མི་ཤེས་མི་མཐོང་མི་རྟོགས་པ་དག་བྱང་ཆུབ་སེམས་དཔས་ཐམས་ཅད་ཤེས་ཤིང་མཐོང་ལ་རྟོགས་སོ་ཞེས་བགྱི་བ། ཅི་སྟེ་བྱང་ཆུབ་སེམས་དཔའ་
ཡང་འཇིག་རྟེན་པ་ལགས་ན་ནི། འཇིག་རྟེན་པས་ནི་མི་ཤེས་མི་མཐོང་མི་རྟོགས་པ་དག །བྱང་ཆུབ་སེམས་དཔས་ཤེས་སོ་མཐོང་ངོ་རྟོགས་སོ་ཞེས་བགྱི་བ་ཡང་མི་རུང་། 
ཅི་སྟེ་འཇིག་རྟེན་པ་མ་ལགས་ན། ཐ་དད་པ་ཡང་ཅི་ཞིག་མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་ཞེས་བྱ་བ་ནི་འཇིག་རྟེན་པ་

47-1-288a

ཡིན་ལ། འཇིག་རྟེན་པ་ཡང་མ་ཡིན་ནོ། །གང་མི་ཤེས་མི་མཐོང་མི་རྟོགས་པ་ནི་འཇིག་རྟེན་པ་ཞེས་བྱའོ། །ཤེས་ཤིང་མཐོང་ལ་རྟོགས་པ་ནི་འཇིག་རྟེན་པ་ཞེས་མི་བྱའོ། །ཁྱོད་ཀྱིས་ཐ་དད་པ་ཅི་ཡོད་ཅེས་དྲིས་པ་ཡང་ངས་
བཤད་པར་བྱའོ། །རིགས་ཀྱི་བུ་ཇི་སྟེ་སྐྱེས་པ་འམ་བུད་མེད་གང་ཡང་རུང་བ། ཡོངས་སུ་མྱ་ངན་ལས་འདས་པའི་མདོ་སྡེ་ཐོས་མ་ཐག་ཏུ་དད་པ་སྐྱེས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ནི་
འཇིག་རྟེན་པའི་བྱང་ཆུབ་སེམས་དཔའ་ཞེས་བྱ་སྟེ། འཇིག་རྟེན་པ་ཐམས་ཅད་ཀྱིས་མི་ཤེས་མི་མཐོང་མི་རྟོགས་པ་ལྟར། བྱང་ཆུབ་སེམས་དཔའ་ཡང་འཇིག་རྟེན་པ་དང་མཐུན་པར་མི་ཤེས་མི་མཐོང་མི་རྟོགས་སོ། །
བྱང་ཆུབ་སེམས་དཔའ་ཡོངས་སུ་མྱ་ངན་ལས་འདས་པའི་མདོ་སྡེ་ཐོས་ནས། འཇིག་རྟེན་པས་མི་ཤེས་མི་མཐོང་མི་རྟོགས་པ་དག་བྱང་ཆུབ་སེམས་དཔས་ཤེས་ཤིང་མཐོང་ལ་རྟོགས་སོ། །དེ་ལྟར་དངོས་པོ་དེ་དག་ཤེས་ནས། 
བདག་འདི་སྙམ་དུ་སེམས་སོ། །བདག་གི་ཇི་ལྟར་ཐབས་གང་གིས་ནན་ཏན་གང་བྱས་པས་ཤེས་པ་དང་མཐོང་བ་དང་རྟོགས་པར་འགྱུར་སྙམ་སེམས་སོ། །ཡང་འདི་སྙམ་དུ་དེ་ནི་ཤིན་ཏུ་དད་པའི་སེམས་ཀྱིས་ཚུལ་ཁྲིམས་
ཡོངས་སུ་དག་པར་བསྲུངས་པ་ལས་ཐོབ་པར་འགྱུར་སྙམ་སེམས་སོ། །རིགས་ཀྱི་བུ་དེའི་ཚེ་ན་བྱང་ཆུབ་སེམས་དཔའ་དེའི་རྒྱུ་དེའི་རྐྱེན་ཀྱིས་མ་འོངས་པའི་དུས་སུ་གང་ནས་གང་དུ་སྐྱེ་བ་དེ་དང་དེ་དག་དུ་ཚུལ་ཁྲིམས་ཡོངས་
སུ་དག་པར་སྲུང་ངོ་། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཡོངས་སུ་དག་པས་ན་གང་ནས་གང་དུ་སྐྱེས་ཀྱང་རྟག་ཏུ་ང་རྒྱལ་དང་ངན་པར་ལྟ་བ་དང་ཐེ་ཙོམ་གྱིས་གླགས་པ་མེད་དེ། 
ནམ་དུ་ཡང་དེ་བཞིན་གཤེགས་པ་མཐར་ཡོངས་སུ་མྱ་ངན་ལས་འདས་པར་ཞུགས་སོ་ཞེས་མི་ཟེར་ཏེ། དེ་དག་ནི་བྱང་ཆུབ་སེམས་དཔའ་ཚུལ་ཁྲིམས་ཡོངས་སུ་དག་པར་བསྲུངས་པ་ཞེས་བྱའོ། །དེ་ལྟར་ཚུལ་ཁྲིམས་ཡོངས་སུ་དག་

47-1-288b

པས་ན་ཏིང་ངེ་འཛིན་ལ་ནན་ཏན་བྱེད་དོ། །ཏིང་ངེ་འཛིན་ལ་ནན་ཏན་བྱེད་པས་ན་གང་ནས་གང་དུ་སྐྱེ་བ་དེ་དང་དེ་དག་དུ་ཡང་དག་པའི་དྲན་པ་མི་ཉམས་སོ། །འདི་ལྟ་སྟེ་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པ་དང་། 
མདོ་སྡེ་བཅུ་གཉིས་དང་། སངས་རྒྱས་བཅོམ་ལྡན་འདས་རྣམས་ཀྱི་རྟག་པ་དང་བདེ་བ་དང་བདག་དང་ཡོངས་སུ་དག་པ་དང་། བྱང་ཆུབ་སེམས་དཔའ་ཐམས་ཅད་ཤིན་ཏུ་རྒྱས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལ་གནས་
པས་ཐམས་ཅད་ཀྱིས། སངས་རྒྱས་ཀྱི་རང་བཞིན་མཐོང་བ་ལས་སྩོགས་ཏེ་དངོས་པོ་དེ་དག་མི་བརྗོད་དོ། །ཏིང་ངེ་འཛིན་ལ་ནན་ཏན་བྱས་པས་སྟོང་པ་བཅུ་གཅིག་ཀྱང་འཐོབ་པར་འགྱུར་ཏེ། དེ་ནི་བྱང་ཆུབ་སེམས་དཔའི་ཏིང་ངེ་འཛིན་
ཡོངས་སུ་དག་པ་ལ་ནན་ཏན་བྱེད་པ་ཞེས་བྱའོ། །དེ་ལྟར་ཚུལ་ཁྲིམས་དང་། ཏིང་ངེ་འཛིན་ཏུ་ལྡན་པར་གྱུར་པས་ཡོངས་སུ་དག་པའི་ཤེས་རབ་ལ་ནན་ཏན་བྱེད་དོ། །ཤེས་རབ་ལ་ནན་ཏན་བྱས་པས་ན་ཐོག་མ་ནས་ལུས་ཀྱི་ནང་ན་བདག་
ཡོད་པར་རམ། བདག་གི་ནང་ན་ལུས་ཡོད་པར་མི་འཛིན་ཏེ་ང་ལུས་དང་། བདག་ལུས་མ་ཡིན། བདག་མ་ཡིན་པར་མི་འཛིན་ཏེ། དེ་ནི་བྱང་ཆུབ་སེམས་དཔའ་ཤེས་རབ་ཡོངས་སུ་དག་པར་ནན་ཏན་བྱེད་པའོ། །ཤེས་རབ་ལ་ནན་ཏན་བྱས་
པས་ཚུལ་ཁྲིམས་བསྲུངས་པ་རྣམས་ཀྱང་ཤིན་ཏུ་བརྟན་པར་གྱུར་ཏོ། །རིགས་ཀྱི་བུ་འདི་ལྟ་སྟེ། དཔེར་ན་རི་རབ་ལྷུན་པོ་ནི་རླུང་རྣམ་པ་བཞིས་བསྐྱོད་མི་ནུས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། 
ཕྱིན་ཅི་ལོག་བཞིས་བསྐྱོད་མི་ནུས་སོ། །རིགས་ཀྱི་བུ་བྱང་ཆུབ་སེམས་དཔའ་དེའི་ཚེ་ན་བདག་གིས་ཚུལ་ཁྲིམས་བསྲུངས་པ་རྣམས་ཅིས་ཀྱང་བསྐྱོད་མི་ནུས་པར་ཤེས་སོ་མཐོང་ངོ་རྟོགས་སོ། །དེ་ནི་བྱང་ཆུབ་སེམས་དཔའ་
ཤེས་པ་དང་མཐོང་བ་རྟོགས་པ་ཞེས་བྱ་སྟེ། འཇིག་རྟེན་པས་ནི་མ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་ཚུལ་ཁྲིམས་བསྲུངས་པ་རྣམས་ཤིན་ཏུ་བརྟན་ཞིང་མི་གཡོ་བར་མཐོང་བས་འགྱོད་

47-1-289a

པའི་སེམས་མེད་དེ། འགྱོད་པ་མེད་པས་སེམས་རབ་ཏུ་དགའ་བར་འགྱུར། རབ་ཏུ་དགའ་བར་གྱུར་པས་སེམས་ཤིན་ཏུ་ཚིམ་པར་འགྱུར་རོ། །ཤིན་ཏུ་ཚིམ་པར་གྱུར་པས་བདེ་བར་འགྱུར། སེམས་རབ་ཏུ་བདེ་བར་གྱུར་པས་མི་གཡོ་
བའི་ཏིང་ངེ་འཛིན་འཐོབ་བོ། །མི་གཡོ་བའི་ཏིང་ངེ་འཛིན་འཐོབ་པས་ཤེས་པ་དང་ལྟ་བ་ཡང་དག་པར་འགྱུར་རོ། །ཤེས་པ་དང་ལྟ་བ་ཡང་དག་པར་གྱུར་པས་འཁོར་བ་ལས་ཡོངས་སུ་སྐྱོའོ། །འཁོར་བ་ལས་སྐྱོ་བས་ན་རྣམ་པར་གྲོལ་
བར་འགྱུར་རོ། །རྣམ་པར་གྲོལ་བར་གྱུར་པས་ན་སངས་རྒྱས་ཀྱི་རང་བཞིན་གསལ་བར་མཐོང་སྟེ། དེ་ནི་བྱང་ཆུབ་སེམས་དཔས་ཤེས་པ་དང་མཐོང་བ་དང་། རྟོགས་པ་ཡིན་གྱི། འཇིག་རྟེན་པས་ཤེས་པ་ནི་ཡིན་ནོ། །རིགས་ཀྱི་བུ་
འདི་དག་ནི་འཇིག་རྟེན་པས་ནི་མི་ཤེས་མི་མཐོང་མི་རྟོགས་པ་ཡིན་གྱི། བྱང་ཆུབ་སེམས་དཔས་ནི་ཤེས་སོ་མཐོང་ངོ་རྟོགས་སོ། །འོད་སྲུང་གིས་ཡང་གསོལ་པ། ཇི་ལྟར་བྱང་ཆུབ་སེམས་དཔའ་ཚུལ་ཁྲིམས་ཡོངས་སུ་དག་པར་
ནན་ཏན་བགྱིས་པས་འགྱོད་པའི་སེམས་མ་མཆིས་པ་ནས་སངས་རྒྱས་ཀྱི་རང་བཞིན་གྱི་བར་དུ་གསལ་བར་མཐོང་བ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འཇིག་རྟེན་གྱི་ཚུལ་ཁྲིམས་ནི་ཡོངས་སུ་དག་པ་
ཞེས་མི་བྱའོ། །དེ་ཅིའི་ཕྱིར་ཞེ་ན། འཇིག་རྟེན་གྱི་ཚུལ་ཁྲིམས་ནི་སྲིད་པ་དང་བཅས་པ། རང་བཞིན་གྱིས་མ་ངེས་པ། མཐར་ཕྱིན་པ་མ་ཡིན་ཏེ། སེམས་ཅན་ཐམས་ཅད་ཀྱི་དོན་དུ་རྒྱས་པར་འགྱུར་བ་མ་ཡིན་པའི་ཕྱིར་ཡོངས་སུ་དག་པ་
ཞེས་མི་བྱའོ། །ཡོངས་སུ་དག་པ་མ་ཡིན་པས་ན་འགྱོད་པའི་སེམས་དང་བཅས་སོ། །འགྱོད་པའི་སེམས་དང་བཅས་པས་ན་དགའ་བའི་སེམས་མེད་དོ། །དགའ་བ་མེད་པས་ཚིམ་པ་མེད། ཚིམ་པ་མེད་པས་བདེ་བ་མེད་དོ། །བདེ་བ་མེད་པས་
མི་གཡོ་བའི་ཏིང་ངེ་འཛིན་མེད་དོ། །མི་གཡོ་བའི་ཏིང་ངེ་འཛིན་མེད་པས་ཤེས་པ་དང་ལྟ་བ་ཡང་དག་པ་མེད་དོ། །ཤེས་པ་དང་ལྟ་བ་ཡང་དག་པ་མེད་པས་འཁོར་བ་ལ་སྐྱོ་བ་མེད། འཁོར་བ་ལ་སྐྱོ་བ་མེད་པས་རྣམ་པར་གྲོལ་བར་མི་འགྱུར། རྣམ་

47-1-289b

པར་མ་གྲོལ་བས་ན་སངས་རྒྱས་ཀྱི་རང་བཞིན་མི་མཐོང་ངོ་། །སངས་རྒྱས་ཀྱི་རང་བཞིན་མི་མཐོང་བས་ཡོངས་སུ་མྱ་ངན་ལས་འདས་པ་ཆེན་པོ་མི་འཐོབ་སྟེ། དེ་ནི་འཇིག་རྟེན་གྱི་ཚུལ་ཁྲིམས་ཞེས་བྱའི་ཡོངས་སུ་དག་པ་མ་ཡིན་ནོ། །
རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་ཡོངས་སུ་དག་པའི་ཚུལ་ཁྲིམས་ནི་ཚུལ་ཁྲིམས་ཉིད་ཀྱང་ཚུལ་ཁྲིམས་མ་ཡིན་པ། སྲིད་པ་དང་བཅས་པ་མ་ཡིན་པ་ངེས་པ། མཐར་ཕྱིན་པ། སེམས་ཅན་གྱི་དོན་དུ་འགྱུར་
བ་སྟེ། དེ་ནི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ཡོངས་སུ་དག་པའི་ཚུལ་ཁྲིམས་ལ་འགྱོད་པ་མེད་པའི་སེམས་ཆེད་དུ་མ་བསྐྱེད་ཀྱང་། 
འགྱོད་པ་མེད་པའི་སེམས་རང་སྐྱེའོ། །རིགས་ཀྱི་བུ་དཔེར་ན་མི་ཞིག་མེ་ལོང་ཐོགས་ན་བཞིན་ཆེད་དུ་སྣང་བར་མ་བྱས་ཀྱང་བཞིན་རང་འབྱུང་ངོ་། །དཔེར་ན་ཞིང་པས་ཞིང་གཞན་པ་ལ་ས་བོན་བཏབ་ན་མྱུ་གུ་ཆེད་དུ་མ་བསྐྱེད་ཀྱང་མྱུ་གུ་
རང་སྐྱེའོ། །དཔེར་ན་མེ་མར་གཙུགས་ན་མུན་པ་ཆེད་དུ་མེད་པར་མ་བྱས་ཀྱང་མུན་པ་རང་མེད་པར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཡོངས་སུ་དག་པར་བསྲུངས་པས་འགྱོད་པ་
མེད་པའི་སེམས་རང་སྐྱེ་བ་ཡང་དེ་དང་འདྲའོ། །ཚུལ་ཁྲིམས་ཡོངས་སུ་དག་པས་རབ་ཏུ་དགའ་བའི་སེམས་ཐོབ་པར་འགྱུར་རོ། །རིགས་ཀྱི་བུ་དཔེར་ན་སྐྱེས་བུ་ངོ་བཞིན་བཟང་པོ་དང་ལྡན་པ་ཞིག་བདག་གི་བཞིན་མཐོང་ན་རབ་ཏུ་དགའ་བའི་སེམས་
སྐྱེའོ། །ཚུལ་ཁྲིམས་ཡོངས་སུ་དག་པ་ཡང་དེ་དང་འདྲའོ། །རིགས་ཀྱི་བུ་ཚུལ་ཁྲིམས་ངན་པ་ཅན་ནི་ཚུལ་ཁྲིམས་ཡོངས་སུ་མ་དག་པས་ན་དགའ་བའི་སེམས་མི་སྐྱེའོ། །དཔེར་ན་བཞིན་མི་སྡུག་པ་ཞིག་བདག་གི་བཞིན་མཐོང་ན་དགའ་བའི་སེམས་མི་སྐྱེ་བ་
ལྟར་ཚུལ་ཁྲིམས་ངན་པ་ཅན་ཡང་དེ་དང་འདྲའོ། །རིགས་ཀྱི་བུ་དཔེར་ན་བུད་མེད་རྫེའུ་ཐོགས་པ་གཉིས་ཤིག་གཅིག་ནི་ཞོའི་བུམ་པ་ཐོགས་ལ། གཅིག་ནི་དར་བའི་བུམ་པ་ཐོགས་ཏེ། གཉིས་ཀ་འགྲོག་ནས་ཚོང་འདུསུ་ཆས་པ་ལས་ལམ་དུ་རྡེག་འཆོས་ཏེ། བུམ་པ་གཉིས་ཀ་ཆག་ན་གཅིག་ནི་

47-1-290a

དགའ། གཅིག་ནི་མི་དགའོ། །ཚུལ་ཁྲིམས་དང་ལྡན་པ་དང་། ཚུལ་ཁྲིམས་ཉམས་པ་ཡང་དེ་དང་འདྲའོ། །ཚུལ་ཁྲིམས་ཡོངས་སུ་དག་པ་ནི་སེམས་རབ་ཏུ་དགའ་བར་འགྱུར་རོ། །སེམས་རབ་ཏུ་དགའ་བས་ན་དེ་འདི་སྙམ་དུ་སེམས་སོ། །སངས་རྒྱས་
བཅོམ་ལྡན་འདས་ཀྱིས་ཡོངས་སུ་མྱ་ངན་ལས་འདས་པ་ལས་གང་གིས་ཚུལ་ཁྲིམས་ཡོངས་སུ་དག་པར་བསྲུངས་ན་མྱ་ངན་ལས་འདའ་བར་འགྱུར་རོ་ཞེས་གསུངས་ཏེ། བདག་གིས་ཀྱང་ཚུལ་ཁྲིམས་ཡོངས་སུ་དག་པར་ནན་ཏན་བྱས་ན་
འཐོབ་པར་འགྱུར་རོ་སྙམ་སེམས་ཏེ། དེའི་རྒྱུ་དེའི་རྐྱེན་ཀྱིས་ན་སེ���ས་རབ་ཏུ་དགའ་བར་འགྱུར་རོ། །བྱང་ཆུབ་སེམས་དཔའ་འོད་སྲུང་གིས་ཡང་གསོལ་པ། བཅོམ་ལྡན་འདས་དགའ་བ་དང་བདེ་བ་ཞེས་བགྱི་བ་ལ་ཁྱད་པར་ཅི་མཆིས། 
བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཁ་ན་མ་ཐོ་བར་འགྱུར་བའི་སྡིག་པ་མི་བྱེད་པས་ན་དགའ་བ་ཞེས་བྱའོ། །ཡོངས་སུ་དགའ་བའི་སེམས་ཀྱིས་ཚུལ་ཁྲིམས་སྲུངས་བ་ནི་བདེ་བ་
ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་འཁོར་བ་ཤིན་ཏུ་རྟོགས་པས་དགའ་བ་ཞེས་བྱའོ། །ཡོངས་སུ་མྱ་ངན་ལས་འདས་པ་ཆེན་པོ་ཐོབ་པས་བདེ་བ་ཞེས་བྱའོ། །ཐ་མ་ནི་དགའ་བ་ཞེས་བྱའོ། །
མཆོག་ནི་བདེ་བ་ཞེས་བྱའོ། །འཇིག་རྟེན་དང་འདྲེས་པའི་ཆོས་ཡོངས་སུ་སྤངས་པ་ནི་དགའ་བ་ཞེས་བྱའོ། །མ་འདྲེས་པའི་ཆོས་འཐོབ་པ་ནི་བདེ་བ་ཞེས་བྱའོ། །ཚུལ་ཁྲིམས་ཡོངས་སུ་དག་པས་ན་ལུས་ལས་སུ་རུང་བ་དང་། རྩུབ་པོའི་སྐྱོན་
མེད་དེ། བྱང་ཆུབ་སེམས་དཔའ་དེའི་ཚེ་ལྟ་བ་དང་། ཉན་པ་དང་། སྣོམ་པ་དང་། རོ་མྱོང་བར་བྱེད་པ་དང་། རེག་བྱ་དང་། ཤེས་པར་བྱེད་པ་ཐམས་ཅད་ལ་ཁ་ན་མ་ཐོ་བར་འགྱུར་བ་མེད་དོ། །ཁ་ན་མ་ཐོ་བར་འགྱུར་བ་མེད་པས་སེམས་རབ་ཏུ་བདེ་བར་འགྱུར་རོ། །སེམས་
རབ་ཏུ་བདེ་བར་གྱུར་པས་ན་ཞི་བའི་ཏིང་ངེ་འཛིན་འཐོབ་བོ། །ཞི་བའི་ཏིང་ངེ་འཛིན་ཐོབ་པས་ན་ཤེས་པ་དང་ལྟ་བ་ཡང་དག་པར་འགྱུར་རོ། །ཤེས་པ་དང་ལྟ་བ་ཡང་དག་པར་གྱུར་པས་འཁོར་བ་ལ་ཡོངས་སུ་སྐྱོའོ། །འཁོར་བ་ལ་ཡོངས་སུ་སྐྱོ་བས་ན་རྣམ་པར་གྲོལ་བར་

47-1-290b

འགྱུར། རྣམ་པར་གྲོལ་བས་ན་སངས་རྒྱས་ཀྱི་རང་བཞིན་མཐོང་ངོ་། །སངས་རྒྱས་ཀྱི་རང་བཞིན་མཐོང་བས་ན་ཡོངས་སུ་མྱ་ངན་ལས་འདས་པ་ཆེན་པོ་འཐོབ་བོ། །དེ་དག་ནི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་ཡིན་གྱི། འཇིག་རྟེན་གྱི་
ཚུལ་ཁྲིམས་ནི་མ་ཡིན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་ཡོངས་སུ་དག་པར་བསྲུངས་ན་ཆོས་རྣམ་པ་འདི་ལྔ་གྲོགས་སུ་འགྱུར་རོ། །ལྔ་གང་ཞེ་ན། དད་པ་དང་ལྡན་པ་ཡིན། ཁྲེལ་
བ་དང་ལྡན་པ་ཡིན། འཛེམ་པ་དང་ལྡན་པ་ཡིན། དགེ་བའི་བཤེས་གཉེན་དང་ལྡན་པ་ཡིན། ཚུལ་ཁྲིམས་ལ་གུས་པར་བྱེད་པ་ཡིན་ནོ། །སྒྲིབ་པ་ལྔ་ཡོངས་སུ་སྤངས་པས་ལྟ་བ་རྣམ་པར་དག་པར་འགྱུར་བ་དང་། ལྟ་བ་ལྔ་ཡོངས་སུ་སྤངས་པས་ཐེ་ཙོམ་གྱི་
སེམས་མེད་པར་འགྱུར་རོ། །གཞན་ཡང་ཐེ་ཙོམ་ལྔ་ཡོངས་སུ་སྤོང་བར་འགྱུར་ཏེ། ལྔ་གང་ཞེ་ན། སངས་རྒྱས་ལ་ཐེ་ཙོམ་ཟ་བ་དང་། ཆོས་ལ་ཐེ་ཙོམ་ཟ་བ་དང་། དགེ་འདུན་ལ་ཐེ་ཙོམ་ཟ་བ་དང་། ཚུལ་ཁྲིམས་ལ་ཐེ་ཙོམ་ཟ་བ་དང་། བག་མེད་པ་ལ་ཐེ་ཙོམ་ཟ་བའོ། །
བྱང་ཆུབ་སེམས་དཔའ་དེའི་ཚེ་དབང་པོ་ལྔ་ཡང་ཐོབ་པར་འགྱུར་ཏེ། ལྔ་གང་ཞེ་ན། དད་པའི་དབང་པོ་དང་། བརྩོན་འགྲུས་ཀྱི་དབང་པོ་དང་། དྲན་པའི་དབང་པ་དང་། ཏིང་ངེ་འཛིན་གྱི་དབང་པོ་དང་། ཤེས་རབ་ཀྱི་དབང་པོའོ། །དབང་པོ་ལྔ་ཐོབ་པས་མྱ་ངན་
ལས་འདས་པ་རྣམ་པ་ལྔ་ཡང་འཐོབ་པར་འགྱུར་རོ། །ལྔ་གང་ཞེ་ན། གཟུགས་རྣམ་པར་གྲོལ་བ་ནས། རྣམ་པར་ཤེས་པ་རྣམ་པར་གྲོལ་བའི་བར་དུ་སྟེ། དེ་ནི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་ཞེས་བྱའི། འཇིག་རྟེན་གྱི་མ་
ཡིན་ནོ། །རིགས་ཀྱི་བུ་དེ་དག་ནི་འཇིག་རྟེན་པས་མི་ཤེས་པ་དང་མི་མཐོང་བ་དང་མི་རྟོགས་པ་སྟེ། བྱང་ཆུབ་སེམས་དཔས་ཤེས་པ་དང་མཐོང་བ་དང་རྟོགས་པ་ཞེས་བྱའོ། །རིགས་ཀྱི་བུ་ཇི་སྟེ་ངའི་ཉེ་གནས་ལས་ཐེག་པ་ཆེན་པོ་ཡོངས་
སུ་མྱ་ངན་ལས་འདས་པའི་མདོ་སྡེ་འཆང་ངམ། འཛིན་ཏམ། ཀློག་གམ། འདོན་ཏམ། གླེགས་བམ་དུ་འདྲི་འམ། སྟོན་ཅིང་འཆད་པ་གང་ཞིག་ཚུལ་ཁྲིམས་ཉམས་ན་གཞན་གྱིས་བརྙས་ཤིང་སྨོད་དེ། དེ་དག་འདི་སྐད་དུ་གལ་ཏེ་སངས་རྒྱས་ཀྱིས་དགོངས་

47-1-291a

པའི་སྙིང་པོ་ཡོངས་སུ་མྱ་ངན་ལས་འདས་པ་ཆེན་པོའི་མདོ་མཐུ་དང་ལྡན་པ་ཞིག་ཡིན་ན། ཅིའི་ཕྱིར་ཚུལ་ཁྲིམས་མནོས་པ་ཉམས་པར་འགྱུར་ཞེས་ཟེར་རོ། །ཅི་སྟེ་གང་ཞིག་མྱ་ངན་ལས་འདས་པའི་མདོ་འཆང་ངམ། འཛིན་པ་ལ་ཚུལ་ཁྲིམས་
ཉམས་ན་དེ་ནི་མདོ་སྡེ་མཐུ་མེད་པར་རིག་པར་བྱ་སྟེ། གལ་ཏེ་མཐུ་མེད་ན་ཀློག་གམ་འདོན་ཀྱང་ཕན་པའི་དོན་དུ་མི་འགྱུར་ཏེ། དེ་ལྟར་མྱ་ངན་ལས་འདས་པའི་མདོ་སྡེ་ལ་བརྙས་སྨད་པས་སེམས་ཅན་ཚད་མེད་མཐའ་ཡས་པ་སྙེད་སེམས་ཅན་དམྱལ་བར་
ལྟུང་བར་བྱེད་དོ། །ཅི་སྟེ་མདོ་སྡེ་འདི་ཉིད་འཆང་ངམ་འཛིན་པ་དེ་ཚུལ་ཁྲིམས་ཉམས་པར་བྱེད་ན་དེ་ནི་སེམས་ཅན་གྱི་སྡིག་པའི་བཤེས་གཉེན་ཡིན་ཏེ། ངའི་ཉེ་གནས་མ་ཡིན་གྱི་བདུད་ཀྱི་འཁོར་ཡིན་ནོ། །གང་ཟག་དེ་ནི་མདོ་སྡེ་འདི་ཉིད་འཆང་ངམ། 
འཛིན་ཏམ། ཉན་དུ་ཡང་མ་གནང་གི་ཉིས་ན་མ་བཅངས། མ་བཟུང་། མ་བསྒོམས་ཀྱང་སླའི། ཚུལ་ཁྲིམས་ཉམས་པས་འཆང་ངམ། འཛིན་ཏམ་སྒྲུབ་པར་བྱེད་པ་མ་ཡིན་ནོ། །རིགས་ཀྱི་བུ་ངའི་ཉེ་གནས་ལས་ཡོངས་སུ་མྱ་ངན་ལས་འདས་པའི་
མདོ་སྡེ་འཆང་ངམ། འཛིན་ཏམ། ཀློག་གམ། འདོན་ཏམ། གླེགས་བམ་དུ་འདྲི་བ་འམ། སྟོན་ཅིང་འཆད་འདོན་ན་ཡང་དག་པའི་ལུས་དང་སེམས་ཀྱིས་བསྒྲུབ་པར་བྱའི། ཉམ་རངས་དང་འཕྱར་བ་དང་འགྲན་ཏོར་གྱིས་ནི་མ་ཡིན་ནོ། །དེ་ལ་ལུས་ལས་
བྱུང་བ་ནི་ཉམ་རངས་ཤེས་བྱ། སེམས་ལས་བྱུང་བ་ནི་འཕྱར་བ་ཞེས་བྱའོ། །ཆོལ་བ་དང་བཅས་པའི་སེམས་ནི་འཕྱར་བ་ཞེས་བྱ། ལུས་ཀྱི་ལས་བྱས་པ་ནི་ཉམ་རངས་ཤེས་བྱའོ། །ཅི་སྟེ་ངའི་ཉེ་གནས་ཚོལ་བ་དང་བཅས། བྱེད་པའི་ལས་དང་བཅས་
ན་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་འཆང་ངམ། བཟུང་བར་མྱི་བྱའོ། །ཅི་སྟེ་དེ་ལྟ་བུ་དང་བཅས་པས་མདོ་སྡེ་འདི་ཉིད་འཆང་ངམ་འཛིན་པར་བྱེད་ན། གཞན་གྱིས་བརྙས་སྨོད་པར་འགྱུར་ཏེ། དེ་ལ་འདི་སྐད་དུ་ཇི་
སྟེ་སངས་རྒྱས་ཀྱི་དགོངས་པའི་སྙིང་པོ་ཡོངས་སུ་མྱ་ངན་ལས་འདས་པའི་མདོ་སྡེ་མཐུ་དང་ལྡན་པ་ཞིག་ཡིན་ན། ཅིའི་ཕྱིར་ཁྱོད་ལ་ཚོལ་བ་དང་བཅས། བྱེད་པ་དང་བཅས་པར་འགྱུར་ཞེས་ཟེར་རོ། །ཅི་སྟེ་མདོ་སྡེ་འདི་ཉིད་འཆང་བར་བྱེད་པ་དེ་ཚོལ་བ་དང་བཅས། 

47-1-291b

བྱེད་པ་དང་བཅས་ན་དེ་ནི་མདོ་སྡེ་འདི་ཉིད་ལ་མཐུ་མེད་དོ་ཞེས་ཟེར་བར་འགྱུར་རོ། །གལ་ཏེ་མཐུ་མེད་ན་འཆང་ངམ་འཛིན་པར་བྱེད་ཀྱང་ཕན་པའི་དོན་དུ་མི་འགྱུར་ལ། དེ་ལྟར་མྱ་ངན་ལས་འདས་པའི་མདོ་སྡེ་ལ་བརྙས་སྨད་པས། སེམས་ཅན་ཚད་མེད་པ་
སྙེད་སེམས་ཅན་དམྱལ་བར་ལྟུང་བར་བྱེད་དོ། །མདོ་སྡེ་འདི་འཆང་ངམ་འཛིན་པར་བྱེད་པ་དེ་ཚོལ་བ་དང་བཅས། བྱིང་བ་དང་བཅས་ན་དེ་ནི་སེམས་ཅན་གྱི་མི་དགེ་བའི་བཤེས་གཉེན་ཡིན་ཏེ། ངའི་ཉེ་གནས་མ་ཡིན་གྱི་བདུད་ཀྱི་རིས་ཡིན་ནོ། །
གཞན་ཡང་རིགས་ཀྱི་བུ་ངའི་ཉེ་གནས་ལས་ཡོངས་སུ་མྱ་ངན་ལས་འདས་པའི་མདོ་སྡེ་འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། གླེགས་བམ་དུ་འདྲི་བ་དང་། སྟོན་པར་བྱེད་པ་དག་དུས་མ་ཡིན་པར་བསྟན་པར་མི་བྱ། བརྡ་མི་ཕྲད་པ་ལ་བསྟན་པར་མི་བྱ། 
གསོལ་བ་མ་བཏབ་པ་ལ་བསྟན་པར་མི་བྱ། བརྙས་པའི་སེམས་དང་བཅས་པས་བསྟན་པར་མི་བྱ། དུས་ཐམས་ཅད་ཀྱི་ཐམས་ཅད་དུ་བཤད་པར་མི་བྱ། བདག་བསྟོད་པའི་ཕྱིར་བསྟན་པར་མི་བྱ། གཞན་སྨད་པའི་ཕྱིར་བཤད་པར་མི་བྱ། སངས་རྒྱས་ཀྱི་ཆོས་
ནུབ་པར་འགྱུར་བར་བཤད་པར་མི་བྱ། འཇིག་རྟེན་གྱི་ཆོས་དར་བར་འགྱུར་བའི་ཕྱིར་བཤད་པར་མི་བྱའོ། །རིགས་ཀྱི་བུ་ངའི་ཉེ་གནས་ལས་མདོ་སྡེ་འདི་འཆང་བ་དང་འཛིན་པ་དག་དུས་མ་ཡིན་པར་སྟོན་པ་ནས་འཇིག་རྟེན་གྱི་ཆོས་དར་བར་བྱེད་པའི་བར་དུ་སྟོན་ན། 
གཞན་གྱིས་དཔྱས་ཤིང་སྨོད་པར་འགྱུར་ཏེ། འདི་སྐད་ཅེས་ཟེར་རོ། །སངས་རྒྱས་ཀྱིས་དགོངས་ཏེ་གསུངས་པའི་སྙིང་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་མཐུ་དང་ལྡན་པ་ཞིག་ཡིན་ན། ཅིའི་ཕྱིར་དུས་མ་ཡིན་པ་སྟོན་པ་ནས་འཇིག་རྟེན་གྱི་
ཆོས་དར་བར་བྱེད་པའི་བར་དུ་སྟོན་པར་འགྱུར་རོ་ཞེས་ཟེར་རོ། །གལ་ཏེ་མདོ་སྡེ་འདི་འཛིན་པ་དག་དེ་ལྟ་བུའི་ཚུལ་དུ་སྟོན་ན་མདོ་སྡེ་འདི་ལ་མཐུ་མེད་པར་འཛིན་ཏོ། །ཅི་སྟེ་མཐུ་མེད་ན་བཅངས་སམ་འཛིན་ཀྱང་ཕན་པ་དང་བདེ་བ་དོན་དུ་མི་འགྱུར་ཏེ། དེ་ལྟར་དེ་མྱ་ངན་ལས་འདས་
པའི་མདོ་སྡེ་ལ་བརྙས་སྨད་པས་སེམས་ཅན་ཚད་མེད་པའི་རྣམས་སེམས་ཅན་དམྱལ་བར་ལྟུང་བར་འགྱུར་རོ། །མདོ་སྡེ་འདི་འཆང་ཞིང་འཛིན་པ་དག་དུས་མ་ཡིན་པར་སྟོན་པ་ནས་འཇིག་རྟེན་གྱི་ཆོས་དར་བར་བྱ་བའི་བར་དུ་སྟོན་ན། དེ་ནི་སེམས་ཅན་གྱི་མི་

47-1-292a

དགེ་བའི་བཤེས་གཉེན་ཡིན་གྱི། ངའི་ཉེ་གནས་མ་ཡིན་ཏེ། བདུད་ཀྱི་རིས་སུ་གཏོགས་པ་ཡིན་ནོ། །རིགས་ཀྱི་བུ་དེ་ལ་གང་ཞིག་ཡོངས་སུ་མྱ་ངན་ལས་འདས་པའི་མདོ་སྡེ་འཆང་ངམ། འཛིན་ཏམ། སྟོན་ཏམ། སངས་རྒྱས་
ཀྱི་རང་བཞིན་སྟོན་ཅིང་འཆད་པ་དང་། དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་འཆད་པ་དང་། ཐེག་པ་ཆེན་པོ་སྟོན་པ་དང་། ཤིན་ཏུ་རྒྱས་པའི་མདོ་སྡེ་སྟོན་པ་དང་། ཉན་ཐོས་ཀྱི་ཐེག་པ་སྟོན་པ་དང་། རང་སངས་རྒྱས་ཀྱི་ཐེག་པ་སྟོན་པ་དང་། 
རྣམ་པར་གྲོལ་བ་སྟོན་པ་དང་། སངས་རྒྱས་ཀྱི་རང་བཞིན་མཐོང་བ་དག་ཐོག་མ་ཁོ་ནར་ལུས་ཡོངས་སུ་དག་པར་སྦྱང་བར་བྱའོ། །ལུས་ཡོངས་སུ་དག་པས་ན་བརྙས་སྨོད་པ་མེད་དོ། །བརྙས་སྨོད་པ་མེད་པས་སེམས་ཅན་ཚད་མེད་པ་རྣམས་ཡོངས་སུ་མྱ་ངན་
ལས་འདས་པའི་མདོ་སྡེ་ལ་ཡོངས་སུ་དག་པའི་དད་པ་སྐྱེའོ། །དད་པའི་སེམས་སྐྱེས་པས་མདོ་སྡེ་འདི་ལ་རིམ་གྲོ་དང་བཀུར་སྟིར་བྱེད་དོ། །གལ་ཏེ་ཚིག་བཞི་པའི་ཚིགས་སུ་བཅད་པ་གཅིག་གམ། རྐང་པ་གཅིག་གམ། ཚིག་འབྲུ་གཅིག་ཙམ་ཐོས་
པར་བྱེད་དེ། ཆོས་བསྟན་པ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱེད་ན་གང་ཟག་དེ་ནི་སེམས་ཅན་གྱི་དགེ་བའི་བཤེས་གཉེན་ཡང་དག་པ་ཡིན་གྱི་མི་དགེ་བའི་བཤེས་གཉེན་མ་ཡིན། ངའི་ཉེ་གནས་ཡིན་གྱི་
བདུད་ཀྱི་རིས་མ་ཡིན། དེ་ནི་བྱང་ཆུབ་སེམས་དཔའ་ཞེས་བྱའི། འཇིག་རྟེན་པ་མ་ཡིན་ནོ། །རིགས་ཀྱི་བུ་འདི་དག་ནི་འཇིག་རྟེན་པས་མི་ཤེས་པ་དང་མི་མཐོང་བ་དང་མི་རྟོགས་པ་སྟེ། བྱང་ཆུབ་སེམས་དཔས་ནི་ཤེས་པ་མཐོང་བ་རྟོགས་པ་ཞེས་བྱའོ། །
རིགས་ཀྱི་བུ་གཞན་ཡང་ཇི་ལྟར་ན་འཇིག་རྟེན་ཐམས་ཅད་ཀྱིས་མྱི་ཤེས་མི་མཐོང་མི་རྟོགས་ལ། བྱང་ཆུབ་སེམས་དཔས་ཤེས་པ་དང་མཐོང་བ་དང་རྟོགས་པ་ཞེ་ན། འདི་ལྟ་སྟེ་དྲན་པར་བྱ་བའི་གནས་དྲུག་གོ། །དྲུག་གང་ཞེ་ན། སངས་རྒྱས་དྲན་
པར་བྱ་བ་དང་ཆོས་དྲན་པར་བྱ་བ་དང་། དགེ་འདུན་དྲན་པར་བྱ་བ་དང་། བསླབ་ཚིག་དྲན་པར་བྱ་བ་དང་། སྦྱིན་པ་དྲན་པར་བྱ་བ་དང་། ལྷ་དྲན་པར་བྱ་བའོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་རྩ་བཞི་པ། རིགས་

47-1-292b

ཀྱི་བུ་དེ་ལ་ཇི་ལྟར་ན་སངས་རྒྱས་དྲན་པར་བྱ་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་
བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ནི་རྟག་པ། མི་འགྱུར་བ། མི་འཕོ་བ། སྟོབས་བཅུ་དང་མི་འཇིགས་པ་བཞི་དང་ལྡན་པ། སེང་གེ་ཆེན་པོའི་སྒྲ་སྒྲོགས་པ། དགེ་སྦྱོང་ཆེན་པོ། བྲམ་ཟེ་ཆེན་པོ། ཚངས་པ་ཆེན་པོ། མཐར་ཕྱིན་
པ། ཕ་རོལ་ཏུ་ཕྱིན་པ་གཞན་གྱིས་མི་ཐུབ་པ། སྤྱི་གཙུག་ལྟར་མི་སྣང་བ། བསྙེངས་པ་མེད་པ། བག་ཚ་བ་མེད་པ། གཡོ་བ་མེད་པ། གཅིག་པུ་གྲོགས་མེད་པ། མ་བསྟན་པར་རང་གིས་རིག་པ། མྱུར་བའི་ཡེ་ཤེས། ཡེ་ཤེས་ཆེན་པོ། རྣོ་བའི་ཡེ་ཤེས། 
ཟབ་པའི་ཡེ་ཤེས། རྣམ་པར་གྲོལ་བའི་ཡེ་ཤེས། ཐུན་མོང་བ་མེད་པའི་ཡེ་ཤེས། ཀུན་ཏུ་རྒྱས་པའི་ཡེ་ཤེས། མཐར་ཕྱིན་པའི་ཡེ་ཤེས། རིན་པོ་ཆེའི་ཡེ་ཤེས་དང་ལྡན་པ། མིའི་ནང་ན་ཁྱུ་མཆོག་གི་རྒྱལ་པོ་ལྟ་བུ། མིའི་ནང་ན་གླང་པོ་ཆེའི་རྒྱལ་
པོ་ལྟ་བུ། མྀའི་ནང་ན་ཀླུའི་རྒྱལ་པོ་ལྟ་བུ། མྀའི་ནང་ན་སྐྱེས་བུ། མྀའི་ནང་ན་མེ་ཏོག་པད་མོ་ལྟ་བུ། པུན་ད་རི་ཀ་ལྟ་བུ། ཁ་ལོ་སྒྱུར་བ། མིའི་སྟོན་པ། སྦྱིན་བདག་ཆེན་པོ། ཆོས་ཆེན་པོ་སྟོན་པ། ཆོས་མཁྱེན་པའི་ཕྱིར་ཆོས་ཆེན་པོ་སྟོན་པ། དོན་མཁྱེན་པའི་
ཕྱིར་ཆོས་ཆེན་པོ་སྟོན་པ། དུས་མཁྱེན་པའི་ཕྱིར་ཆོས་ཆེན་པོ་སྟོན་པ། ཆོག་ཤེས་པའི་ཕྱིར་ཆོས་ཆེན་པོ་སྟོན་པ། བདག་ཤེས་པའི་ཕྱིར་ཆོས་ཆེན་པོ་སྟོན་པ། འཁོར་ཆེན་པོ་ཤེས་པའི་ཕྱིར་ཆོས་ཆེན་པོ་སྟོན་པ། སེམས་ཅན་གྱི་རང་བཞིན་རྣམ་པ་ཐ་
དད་པ་མཁྱེན་པའི་ཕྱིར་ཆོས་ཆེན་པོ་སྟོན་པ་དབང་པོ་རྣོན་པོ་དང་རྟུལ་པོ་དང་བར་མ་མཁྱེན་པའི་ཕྱིར་ཆོས་ཆེན་པོ་སྟོན་པ། ལམ་དབུ་མ་སྟོན་པའི་ཕྱིར་ཆོས་ཆེན་པོ་སྟོན་པ་ཞེས་བྱའོ། །དེ་ལ་ཇི་ལྟར་ན་དེ་བཞིན་གཤེགས་པ་ཞེས་བྱ་ཞེ་ན། སྔོན་འདས་པའི་
སངས་རྒྱས་རྣམས་ཀྱིས་གསུངས་པ་ལས་མི་འགྱུར་བའི་ཕྱིར་དེ་བཞིན་གཤེགས་པ་ཞེས་བྱའོ། །ཇི་ལྟར་མྱི་འགྱུར་ཞེ་ན། སྔོན་འདས་པའི་སངས་རྒྱས་རྣམས་ཀྱང་སེམས་ཅན་བསྒྲལ་བའི་ཕྱིར་མདོ་སྡེ་བཅུ་གཉིས་གསུངས་སོ། །དེ་བཞིན་

47-1-293a

གཤེགས་པ་ཡང་དེ་དང་འདྲ་བས་ན་དེ་བཞིན་གཤེགས་པ་ཞེས་བྱའོ། །སངས་རྒྱས་བཅོམ་ལྡན་འདས་རྣམས་ནི་ཕ་རོལ་ཏུ་ཕྱིན་པ་དྲུག་དང་། བྱང་ཆུབ་ཀྱི་ཕྱོགས་སུམ་བཅུ་རྩ་བདུན་དང་། སྟོང་པ་བཅུ་གཅིག་ལས་གཤེགས་པས་ན་ཡོངས་
སུ་མྱ་ངན་ལས་འདས་པ་ཆེན་པོར་ཕྱིན་ཏེ། དེ་བཞིན་གཤེགས་པ་ཡང་དེ་དང་འདྲ་བས་ན་སངས་རྒྱས་ལ་དེ་བཞིན་གཤེགས་པ་ཞེས་བྱའོ། །སངས་རྒྱས་བཅོམ་ལྡན་འདས་ནི་སེམས་ཅན་གྱི་ཕྱིར་ཐབས་དེ་ཉིད་ཀྱིས་ཐེག་པ་གསུམ་དུ་བསྟན་ཏེ། 
སྐུ་ཚེའི་ཚད་ཀྱང་ཚད་མེད་དཔག་ཏུ་མེད་པས་དེ་བཞིན་གཤེགས་པ་ཡང་དེ་དང་འདྲ་སྟེ། དེ་བས་ན་སངས་རྒྱས་ལ་དེ་བཞིན་གཤེགས་པ་ཞེས་བྱའོ། །དེ་ལ་ཇི་ལྟར་ན་དགྲ་བཅོམ་པ་ཞེ་ན། འཇིག་རྟེན་གྱི་ཆོས་ཐམས་ཅད་ནི་དགྲ་ཞེས་བྱ་སྟེ། སངས་རྒྱས་
ཀྱིས་རྣམ་པ་དེ་དག་ཆོམས་པས་ན་དགྲ་བཅོམ་པ་ཞེས་བྱའོ། །བདུད་རྣམ་པ་བཞི་ནི་བྱང་ཆུབ་སེམས་དཔའི་དགྲ་ཞེས་བྱ་སྟེ། སངས་རྒྱས་བཅོམ་ལྡན་འདས་ཀྱང་བྱང་ཆུབ་སེམས་དཔའི་མཛད་པ་ན། ཐམས་ཅད་མཁྱེན་པའི་ཡེ་ཤེས་ཀྱིས་
བདུད་རྣམ་པ་བཞི་བཅོམ་པས་ན་དགྲ་བཅོམ་པ་ཞེས་བྱའོ། །གཞན་ཡང་དགྲ་བཅོམ་པ་ནི་ཡོངས་སུ་སྤངས་པ་ཞེས་བྱ་སྟེ། བྱང་ཆུབ་སེམས་དཔའི་ཚེ་ན་ཉོན་མོངས་པ་ཚད་མེད་པ་རྣམས་ཡོངས་སུ་སྤངས་པས་ན་དགྲ་བཅོམ་པ་ཞེས་བྱའོ། །གཞན་ཡང་
དགྲ་བཅོམ་པ་ནི་འདས་པའི་སངས་རྒྱས་རྣམས་ཀྱི་བདེ་བ་ཞེས་བྱའོ། །སྔོན་བྱང་ཆུབ་སེམས་དཔའ་མཛད་པ་ན་བསྐལ་པ་ཚད་མེད་གྲངས་མེད་པའི་བར་དུ་སེམས་ཅན་གྱི་ཕྱིར་སྡུག་བསྔལ་རྣམ་པ་སྣ་ཚོགས་མྱོང་ཡང་མྱི་བདེ་བ་མེད་དེ་རྟག་ཏུ་བདེའོ། །
དེ་བཞིན་གཤེགས་པ་ཡང་དེ་དང་འདྲ་བས་ན་དགྲ་བཅོམ་པ་ཞེས་བྱའོ། །གཞན་ཡང་དགྲ་བཅོམ་པ་ཞེས་བྱ་བ་ནི་འཇིག་རྟེན་དུ་བཅས་པ། ལྷ་དང་མི་ཐམས་ཅད་ཀྱིས་ལྷ་རྫས་ཀྱི་མེ་ཏོག་དང་། ཕྲེང་བ་དང་། རྒྱལ་མཚན་དང་། བ་དན་དང་། རོལ་
མོ་རྣམ་པ་སྣ་ཚོགས་ཀྱིས་མཆོད་པས་ན་དགྲ་བཅོམ་པ་ཞེས་བྱའོ། །དེ་ལ་ཇི་ལྟར་ན་ཡང་དག་པར་རྫོགས་པ་ཞེ་ན། ཡང་དག་པ་ཞེས་བྱ་བ་ནི་ཕྱིན་ཅི་མ་ལོག་པའོ། །རྫོགས་པ་ཞེས་བྱ་བ་ནི་ཕྱིན་ཅི་ལོག་བཞི་མངོན་པར་མ་རྟོགས་པ་མེད་

47-1-293b

པའོ། །གཞན་ཡང་ཡང་དག་པ་ཞེས་བྱ་བ་ནི་དཀའ་ཐུབ་སྤྱོད་པའོ། །རྫོགས་པ་ཞེས་བྱ་བ་ནི་སྡུག་བསྔལ་སྤྱོད་པའི་རྐྱེན་ཀྱིས་ངེས་པར་སྡུག་བསྔལ་གྱི་འབྲས་བུ་མྱོང་བར་ཤེས་པའོ། །གཞན་ཡང་ཡང་དག་པ་ཞེས་བྱ་བ་ནི་འཇིག་རྟེན་གྱི་དབུ་མའོ། །
རྫོགས་པ་ཞེས་བྱ་བ་ནི་མཐར་ལམ་དབུ་མ་ལ་ནན་ཏན་བྱས་ན་ངེས་པར་བླ་ན་མེད་པ་ཡང་དག་པར་རྫོགས་པར་ཤེས་པའོ། །གཞན་ཡང་ཡང་དག་པ་ནི་བགྲང་དུ་ཡོད་པ། ཚད་གཟུང་དུ་ཡོད་པ། དཔག་ཏུ་ཡོད་པའོ། །རྫོགས་པ་ཞེས་བྱ་བ་ནི་བགྲང་དུ་
མེད་པ། ཚད་གཟུང་དུ་མེད་པ་དཔག་ཏུ་མེད་པ་སྟེ། དེ་བས་ན་སངས་རྒྱས་ལ་ཡང་དག་པར་རྫོགས་པ་ཞེས་བྱའོ། །རིགས་ཀྱི་བུ་ཉན་ཐོས་དང་རང་སངས་རྒྱས་ལ་ཡང་དག་པར་རྫོགས་པ་ཞེས་བྱ་བ་ཡོད་དེ། དེ་ནི་ཡང་དག་པར་རྫོགས་པ་མ་ཡིན་ནོ། །
དེ་ཅིའི་ཕྱིར་ཞེ་ན། ཡང་དག་པར་རྫོགས་པ་ནི་ཕུང་པོ་ལྔ་དང་། སྐྱེ་མཆེད་བཅུ་གཉིས་དང་། ཁམས་བཅྭ་བརྒྱད་ཤེས་པ་སྟེ། ཉན་ཐོས་དང་རང་སངས་རྒྱས་ཀྱིས་ཀྱང་ཤེས་པས་ཡང་དག་པར་རྫོགས་པ་ཞེས་བྱའོ། །ཅིའི་ཕྱིར་ཡང་དག་པར་རྫོགས་
པ་མ་ཡིན་ཞེ་ན། རིགས་ཀྱི་བུ་ཅི་སྟེ་ཐེག་པ་ཆུང་ངུ་གཉིས་ཀྱིས་བསྐལ་པ་ཚད་མེད་པའི་བར་དུ་གཟུགས་ཀྱི་ཕུང་པོ་གཅིག་པུ་ལ་རྟོག་ཀྱང་རྫོགས་པར་མི་ཤེས་པས། དེའི་ཕྱིར་ཉན་ཐོས་དང་རང་སངས་རྒྱས་ནི་ཡང་དག་པར་རྫོགས་པ་ཞེས་
མི་བྱའོ། །དེ་ལ་ཇི་ལྟར་ན་མཁྱེན་པ་དང་ཞབས་སུ་ལྡན་པ་ཞེ་ན། མཁྱེན་པ་ནི་དགེ་བའི་འབྲས་བུ་ཚད་མེད་པ་ཐོབ་པའོ། །ཞབས་དང་ལྡན་པ་ནི་ཞབས་ཉིད་དོ། །དེ་ལ་དགེ་བའི་འབྲས་བུ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །
ཞབས་ཞེས་བྱ་བ་ནི་ཚུལ་ཁྲིམས་དང་ཤེས་རབ་སྟེ། ཚུལ་ཁྲིམས་དང་ཤེས་རབ་ཀྱི་རྐང་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཕྱིན་པས་ན་མཁྱེན་པ་དང་ཞབས་སུ་ལྡན་པ་ཞེས་བྱའོ། །གཞན་ཡང་མཁྱེན་པ་ནི་རིག་
པའོ། །ལྡན་པ་ནི་བཀྲ་ཤིས་སོ། །ཞབས་ནི་འབྲས་བུའོ། །རིགས་ཀྱི་བུ་དེ་དག་ནི་འཇིག་རྟེན་གྱི་དོན་ཞེས་བྱའོ། །རིག་པ་ནི་རྣམ་པར་གྲོལ་བའོ། །བཀྲ་ཤིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །འབྲས་བུ་ནི་ཡོངས་སུ་

47-1-294a

མྱ་ངན་ལས་འདས་པ་ཆེན་པོ་སྟེ། དེ་བས་ན་མཁྱེན་པ་དང་ཞབས་སུ་ལྡན་པ་ཞེས་བྱའོ། །གཞན་ཡང་མཁྱེན་པ་ནི་སྣང་བ་ཞེས་བྱའོ། །ལྡན་པ་ནི་ལས་ཤེས་བྱའོ། །ཞབས་ནི་འབྲས་བུ་ཞེས་བྱ་སྟེ། རིགས་ཀྱི་བུ་དེ་ནི་འཇིག་རྟེན་
གྱི་དོན་ཏོ། །སྣང་བ་ཞེས་བྱ་བ་ནི་བག་ཡོད་པའོ། །ལས་ནི་ཕ་རོལ་ཏུ་ཕྱིན་པ་དྲུག་གོ། །འབྲས་བུ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །གཞན་ཡང་མཁྱེན་པ་ནི་རིག་པ་གསུམ་སྟེ། བྱང་ཆུབ་ཀྱི་རིག་པ་དང་། སངས་རྒྱས་ཀྱི་རིག་
པ་དང་། མ་རིག་པའི་རིག་པའོ། །དེ་ལ་བྱང་ཆུབ་ཀྱི་རིག་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །སངས་རྒྱས་ཀྱི་རིག་པ་ནི་སངས་རྒྱས་ཀྱི་རིག་པ་ཉིད་དོ། །མ་རིག་པའི་རིག་པ་ནི་སྟོང་པ་ཉིད་ཀྱི་མཐར་ཕྱིན་པའོ། །ལྡན་པ་ཞེས་བྱ་བ་ནི་
བསྐལ་པ་གྲངས་མེད་པའི་བར་དུ་སེམས་ཅན་གྱི་ཕྱིར་དགེ་བའི་ལས་མང་པོ་བསྒོམས་པའོ། །ཞབས་ཞེས་བྱ་བ་ནི་སངས་རྒྱས་ཀྱི་རང་བཞིན་གསལ་བར་མཐོང་བ་སྟེ། དེ་བས་ན་མཁྱེན་པ་དང་ཞབས་སུ་ལྡན་པ་ཞེས་བྱའོ། །དེ་ལ་
ཇི་ལྟར་ན་བདེ་བར་གཤེགས་པ་ཞེ་ན་བདེ་བ་ནི་མཐོ་བའོ། །གཤེགས་པ་ནི་མི་མཐོ་བ་སྟེ། རིགས་ཀྱི་བུ་དེ་ནི་འཇིག་རྟེན་གྱི་དོན་ཏོ། །མཐོ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །མི་མཐོ་བ་ནི་དེ་བཞིན་གཤེགས་པའི་
ཐུགས་སོ། །རིགས་ཀྱི་བུ་ཇི་སྟེ་ཐུགས་མཐོ་ན། དེ་བཞིན་གཤེགས་པ་ཞེས་མི་བྱ་སྟེ། དེ་བས་ན་དེ་བཞིན་གཤེགས་པ་ལ་བདེ་བར་གཤེགས་པ་ཞེས་བྱའོ། །གཞན་ཡང་བདེ་བ་ནི་དགེ་བའི་བཤེས་གཉེན་ནོ། །གཤེགས་པ་ནི་
དགེ་བའི་བཤེས་གཉེན་གྱི་འབྲས་བུ་སྟེ། རིགས་ཀྱི་བུ་དེ་ནི་འཇིག་རྟེན་གྱི་དོན་ཏོ། །དགེ་བའི་བཤེས་གཉེན་ནི་སེམས་དང་པོ་བསྐྱེད་པའོ། །འབྲས་བུ་ནི་ཡོངས་སུ་མྱ་ངན་ལས་འདས་པ་ཆེན་པོ་སྟེ། དེ་བཞིན་གཤེགས་པ་ནི་ཐོག་
མ་སེམས་བསྐྱེད་པ་མ་བཏང་བས་ཡོངས་སུ་མྱ་ངན་ལས་འདས་པ་ཆེན་པོ་འཐོབ་པས། དེའི་ཕྱིར་བདེ་བར་གཤེགས་པ་ཞེས་བྱའོ། །གཞན་ཡང་བདེ་བ་ནི་བཟང་པོའོ། །གཤེགས་པ་ནི་ཡོད་པ་སྟེ། རིགས་ཀྱི་བུ་དེ་ནི་འཇིག་རྟེན་

47-1-294b

གྱི་དོན་ཏོ། །དེ་ལ་བཟང་པོ་ནི་སངས་རྒྱས་ཀྱི་རང་བཞིན་མཐོང་བའོ། །ཡོད་པ་ནི་མྱ་ངན་ལས་འདས་པ་ཆེན་པོའོ། །རིགས་ཀྱི་བུ་མྱ་ངན་ལས་འདས་པའི་རང་བཞིན་ནི་ཡང་དག་པར་ཡོད་པ་མ་ཡིན་མོད་ཀྱི། སངས་རྒྱས་བཅོམ་ལྡན་
འདས་ཀྱིས་འཇིག་རྟེན་གྱི་དབང་དུ་བྱེད་དེ་ཡོད་ཅེས་གསུངས་སོ། །རིགས་ཀྱི་བུ་དཔེར་ན་འཇིག་རྟེན་གྱི་མི་བུ་མེད་པ་ལ་བུ་ཡོད་དོ་ཞེས་བྱ་བ་དང་། ལམ་མེད་པར་ལམ་ཡོད་དོ་ཞེས་སྨྲས་པ་དང་འདྲ་སྟེ། ཡོངས་སུ་མྱ་ངན་ལས་འདས་པ་ཡང་
འཇིག་རྟེན་གྱི་དབང་དུ་བྱས་ནས་ཡོད་དོ་ཞེས་གསུངས་སོ། །སངས་རྒྱས་བཅོམ་ལྡན་འདས་རྣམས་ནི་ཡོངས་སུ་མྱ་ངན་ལས་འདས་པ་ཆེན་པོ་ལྷུན་གྱིས་གྲུབ་པའི་ཕྱིར་བདེ་བར་གཤེགས་པ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་འཇིག་
རྟེན་རིག་པ་ཞེ་ན། རིགས་ཀྱི་བུ་འཇིག་རྟེན་ཞེས་བྱ་བ་ནི་ཕུང་པོ་ལྔའོ། །རིགས་པ་ནི་ཤེས་པའོ། །སངས་རྒྱས་བཅོམ་ལྡན་འདས་ནི་ཕུང་པོ་ལྔ་ལ་ཤིན་ཏུ་མཁས་པས་འཇིག་རྟེན་རིག་པ་ཞེས་བྱའོ། །གཞན་ཡང་འཇིག་རྟེན་ཞེས་བྱ་བ་ནི་འདོད་
པ་ལྔའོ། །རིག་པ་ཞེས་བྱ་བ་ནི་མ་ཆགས་པའོ། །འདོད་པ་ལྔ་ལ་ཡོངས་སུ་མ་ཆགས་པའི་ཕྱིར་ཡང་འཇིག་རྟེན་རིག་པ་ཞེས་བྱའོ། །གཞན་ཡང་འཇིག་རྟེན་ཞེས་བྱ་བ་ནི་ཤར་ཕྱོགས་ཀྱི་འཇིག་རྟེན་གྱི་ཁམས་ཚད་མེད་གྲངས་མེད་དེ། 
ཉན་ཐོས་དང་རང་སངས་རྒྱས་ཀྱིས་མི་ཤེས་མི་མཐོང་མི་རྟོགས་པ་དག་སངས་རྒྱས་བཅོམ་ལྡན་འདས་ཀྱིས་ནི་མཁྱེན་ཅིང་གཟིགས་ཏེ་རྟོགས་སོ། །དེ་བཞིན་དུ་ལྷོ་དང་། ནུབ་དང་། བྱང་དང་། ཕྱོགས་མཚམས་བཞི་དང་། སྟེང་དང་འོག་གི་
འཇིག་རྟེན་གྱི་ཁམས་ཀྱང་དེ་བཞིན་དུ་རིག་པས་ན་སངས་རྒྱས་བཅོམ་ལྡན་འདས་ནི་འཇིག་རྟེན་རིག་པའོ། །གཞན་ཡང་འཇིག་རྟེན་ཞེས་བྱ་བ་ནི་སྐྱེ་བོ་མ་རབས་ཐམས་ཅད་དོ། །རིག་པ་ཞེས་བྱ་བ་ནི་སྐྱེ་བོ་མ་རབས་རྣམས་ཀྱི་དགེ་བ་
དང་སྡིག་པའི་རྒྱུ་དང་འབྲས་བུ་ཤེས་པ་སྟེ། ཉན་ཐོས་དང་རང་སངས་རྒྱས་རྣམས་ཀྱིས་ཤེས་པ་མ་ཡིན་གྱི་སངས་རྒྱས་ཉག་གཅིག་གིས་མཁྱེན་པས་ན་སངས་རྒྱས་བཅོམ་ལྡན་འདས་ནི་འཇིག་རྟེན་རིག་པའོ། །གཞན་ཡང་

47-1-295a

འཇིག་རྟེན་ཞེས་བྱ་བ་ནི་པད་མོ་ཞེས་བྱའོ། །རིག་པ་ནི་མི་གོས་པ་ཞེས་ཏེ། རིགས་ཀྱི་བུ་དེ་ནི་འཇིག་རྟེན་གྱི་དོན་ཏོ། །པད་མོ་ཞེས་བྱ་བ་ནི་དེ་བཞིན་གཤེགས་པའོ། །མི་གོས་པ་ནི་དེ་བཞིན་གཤེགས་པ་ལ་འཇིག་རྟེན་གྱི་ཆོས་བརྒྱད་
ཀྱིས་མི་གོས་པའི་ཕྱིར་སངས་རྒྱས་བཅོམ་ལྡན་འདས་ནི་འཇིག་རྟེན་རིག་པ་ཞེས་བྱའོ། །གཞན་ཡང་འཇིག་རྟེན་རིག་པ་ནི་སངས་རྒྱས་དང་བྱང་ཆུབ་སེམས་དཔའ་ལ་འཇིག་རྟེན་རིག་པ་ཞེས་བྱའོ། །དེ་ཅིའི་ཕྱིར་ཞེ་ན། སངས་རྒྱས་དང་བྱང་
ཆུབ་སེམས་དཔའ་ནི་འཇིག་རྟེན་གཟིགས་པའི་ཕྱིར་འཇིག་རྟེན་རིག་པ་ཞེས་བྱའོ། །རིགས་ཀྱི་བུ་དཔེར་ན་ཟས་ཀྱི་རྐྱེན་ཀྱིས་འཚོ་བར་འགྱུར་བས་ཟས་ལ་འཚོ་བ་ཞེས་བྱ་བ་དང་འདྲ་བར་སངས་རྒྱས་དང་བྱང་ཆུབ་སེམས་དཔའ་ཡང་འཇིག་
རྟེན་གཟིགས་པས་འཇིག་རྟེན་རིག་པ་ཞེས་བྱའོ། །དེ་ལ་ཇི་ལྟར་ན་བླ་ན་མེད་པ་ཞེ་ན། བླ་ན་ཡོད་པ་ནི་གཅོད་པའི་དོན་ཏེ། བཅད་དུ་མེད་པའི་ཕྱིར་བླ་ན་མེད་པའོ། །སངས་རྒྱས་བཅོམ་ལྡན་འདས་ལ་ཉོན་མོངས་པ་མི་མངའ་བའི་ཕྱིར་བཅད་
དུ་མེད་དེ། དེ་བས་ན་སངས་རྒྱས་བཅོམ་ལྡན་འདས་ནི་བླ་ན་མེད་པ་ཞེས་བྱའོ། །གཞན་ཡང་བླ་ན་ཡོད་པ་ཞེས་བྱ་བ་ནི་རྩོད་པ་དང་བཅས་པའོ། །བླ་ན་མེད་པ་ནི་རྩོད་པ་མེད་པ་སྟེ། དེ་བཞིན་གཤེགས་པ་ལ་རྩོད་པ་མེད་པས་སངས་རྒྱས་
བཅོམ་ལྡན་འདས་ནི་བླ་ན་མེད་པའོ། །གཞན་ཡང་བླ་ན་ཡོད་པ་ཞེས་བྱ་བ་ནི་ཚིག་གིས་སུན་དབྱུང་དུ་རུང་བའོ། །བླ་ན་མེད་པ་ནི་ཚིག་གིས་སུན་དབྱུང་དུ་མི་རུང་བ་སྟེ། དེ་བཞིན་གཤེགས་པས་གསུངས་པ་ལ་སེམས་ཅན་ཐམས་ཅད་ཀྱིས་
སུན་དབྱུང་དུ་མི་རུང་བས་ན་སངས་རྒྱས་བཅོམ་ལྡན་འདས་ནི་བླ་ན་མེད་པའོ། །གཞན་ཡང་བླ་ན་ཡོད་པ་ཞེས་བྱ་བ་ནི་བླ་ན་ཡོད་པའོ། །བླ་ན་མེད་པ་ཞེས་བྱ་བ་ནི་བླ་ན་མེད་པ་སྟེ། དུས་གསུམ་གྱི་སངས་རྒྱས་རྣམས་ལ་འདས་པ་མེད་
པའི་ཕྱིར་སངས་རྒྱས་བཅོམ་ལྡན་འདས་ནི་བླ་ན་མེད་པའོ། །གཞན་ཡང་བླ་ན་ཡོད་པ་ཞེས་བྱ་བ་ནི་གསར་རྙིང་ངོ་། །སངས་རྒྱས་བཅོམ་ལྡན་འདས་ནི་ཡོངས་སུ་མྱ་ངན་ལས་འདས་པའི་ངོ་བོ་ཉིད་དུ་གྱུར་པས་གསར་རྙིང་ཞེས་བྱ་བ་

47-1-295b

མེད་དེ། སངས་རྒྱས་བཅོམ་ལྡན་འདས་ནི་བླ་ན་མེད་པ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་སྐྱེས་བུ་འདུལ་ཞིང་ཁ་ལོ་སྒྱུར་བ་ཞེ་ན། བདག་ཉིད་སྐྱེས་བུ་ཡིན་པས་སྐྱེས་བུ་གཞན་ཡང་འདུལ་ལོ། །རིགས་ཀྱི་བུ་དེ་བཞིན་
གཤེགས་པ་ཞེས་བྱ་བ་ནི་ཡང་དག་པར་ན་སྐྱེས་བུ་མ་ཡིན་སྐྱེས་བུ་མ་ཡིན་པ་ཡང་མ་ཡིན་ཏེ། སྐྱེས་བུ་འདུལ་བའི་ཕྱིར་དེ་བཞིན་གཤེགས་པ་ནི་སྐྱེས་བུ་ཞེས་བྱའོ། །རིགས་ཀྱི་བུ་སྐྱེས་པ་དང་བུད་མེད་གང་ཡང་རུང་། ཆོས་རྣམ་པ་འདི་བཞི་
དང་ལྡན་ན་སྐྱེས་བུ་ཞེས་བྱའོ། །བཞི་གང་ཞེ་ན། དགེ་བའི་བཤེས་གཉེན་ཚོལ་བ་དང་། ཆོས་ཉན་པ་དང་། དོན་སེམས་པ་དང་། སྨྲས་པ་བཞིན་དུ་སྤྱོད་པའོ། །རིགས་ཀྱི་བུ་ཆོས་རྣམ་པ་བཞི་པོ་འདི་དང་ལྡན་པའི་སྐྱེས་པ་ཡང་རུང་། 
བུད་མེད་ཀྱང་རུང་དེ་ནི་སྐྱེས་བུ་ཞེས་བྱའོ། །རིགས་ཀྱི་བུ་གལ་ཏེ་སྐྱེས་པ་ཡིན་ཡང་ཆོས་རྣམ་པ་འདི་བཞི་དང་མི་ལྡན་ན་སྐྱེས་བུ་ཞེས་མི་བྱའོ། །དེ་ཅིའི་ཕྱིར་ཞེ་ན། སྐྱེས་པའི་ལུས་ཡིན་མོད་ཀྱི། སྤྱོད་པ་བྱོལ་སོང་
དང་འདྲ་སྟེ། དེ་བཞིན་གཤེགས་པ་ནི་ཕོ་མོ་གཉིས་ཀ་འདུལ་བས་སྐྱེས་བུ་འདུལ་ཞིང་ཁ་ལོ་སྒྱུར་བ་ཞེས་བྱའོ། །གཞན་ཡང་རིགས་ཀྱི་བུ་དཔེར་ན་རྟའི་ཁ་ལོ་སྒྱུར་བ་ནི་རྣམ་པ་བཞི་སྟེ། སྤུ་ལ་རེག་པ་
དང་། ལྤགས་པ་ལ་རེག་པ་དང་། ཤ་ལ་རེག་པ་དང་། རུས་པ་ལ་རེག་པ་སྟེ། ཅི་ལ་རེག་པ་བཞིན་དུ་ཁ་ལོ་སྒྱུར་བའི་ཡིད་བཞིན་དུ་འགྲོའོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཆོས་རྣམ་པ་འདི་བཞིས་
སེམས་ཅན་རྣམས་འདུལ་ལོ། །གང་ཞེ་ན། སྐྱེ་བ་བཤད་པས་སངས་རྒྱས་ཀྱི་བཀའ་བཞིན་བྱེད་པ་ནི་དཔེར་ན་སྤུ་ལ་རེག་པ་ཙམ་གྱིས་ཁ་ལོ་སྒྱུར་བའི་ཡིད་བཞིན་དུ་འགྲོ་བ་དང་འདྲ་སྟེ་གཅིག་གོ། །སྐྱེ་བ་དང་རྒ་བའི་
ཆོས་བསྟན་པས་སངས་རྒྱས་ཀྱི་བཀའ་བཞིན་དུ་བྱེད་པ་ནི་དཔེར་ན་སྤུ་དང་ལྤགས་པ་ལ་རེག་པ་ཙམ་གྱིས་ཁ་ལོ་སྒྱུར་བ་ཡིད་བཞིན་དུ་འགྲོ་བ་དང་འདྲ་སྟེ་གཉིས་སོ། །སྐྱེ་བ་དང་། རྒ་བ་དང་

47-1-296a

ན་བ་བསྟན་པས་སངས་རྒྱས་ཀྱི་བཀའ་བཞིན་དུ་བྱེད་པ་ནི་དཔེར་ན་སྤུ་དང་ལྤགས་པ་དང་ཤ་ལ་རེག་པས་ཁ་ལོ་སྒྱུར་བ་ཡིད་བཞིན་དུ་འགྲོ་བ་དང་འདྲ་སྟེ་གསུམ་མོ། །སྐྱེ་བ་དང་རྒ་བ་དང་ན་བ་དང་ཤི་བ་བསྟན་པས་སངས་རྒྱས་ཀྱི་བཀའ་
བཞིན་དུ་བྱེད་པ་ནི་དཔེར་ན་སྤུ་དང་ལྤགས་པ་དང་ཤ་དང་རུས་པ་ལ་རེག་པས་ཁ་ལོ་སྒྱུར་བ་ཡིད་བཞིན་དུ་འགྲོར་བཏུབ་པ་དང་འདྲ་སྟེ་བཞིའོ། །རིགས་ཀྱི་བུ་རྟའི་ཁ་ལོ་སྒྱུར་བ་ནི་ངེས་པ་མ་ཡིན་གྱི། སངས་རྒྱས་བཅོམ་ལྡན་འདས་ཀྱིས་སེམས་
ཅན་གདུལ་བ་ནི་ངེས་པ་སྟེ་མི་བརྫུན་པས་ན་སངས་རྒྱས་བཅོམ་ལྡན་འདས་ནི་སྐྱེས་བུ་འདུལ་ཞིང་ཁ་ལོ་སྒྱུར་བ་ཞེས་བྱའོ། །དེ་ལ་ཇི་ལྟར་ན་ལྷ་དང་མི་རྣམས་ཀྱི་སྟོན་པ་ཞེ་ན། སྟོན་པ་ཞེས་བྱ་བ་ལ་རྣམ་པ་གཉིས་ཏེ། དགེ་བ་སྟོན་པ་དང་། 
སྡིག་པ་སྟོན་པའོ། །སངས་རྒྱས་དང་བྱང་ཆུབ་སེམས་དཔའ་ནི་རྟག་ཏུ་དགེ་བའི་ཆོས་རྣམས་སེམས་ཅན་ལ་སྟོན་ཏོ། །དགེ་བའི་ཆོས་གང་དག་ཅེ་ན། ལུས་དང་ངག་དང་ཡིད་ཀྱི་སྒོ་ནས་དགེ་བའོ། །སངས་རྒྱས་དང་བྱང་ཆུབ་
སེམས་དཔའ་ནི་སེམས་ཅན་རྣམས་ལ་འདི་སྐད་ཅེས་སྟོན་ཏོ། །ཀྱེ་རིགས་ཀྱི་བུ་དག་ལུས་མི་དགེ་བའི་ལས་ཡོངས་སུ་སྤང་བར་བྱའོ། །དེ་ཅིའི་ཕྱིར་ཞེ་ན། ལུས་མི་དགེ་བའི་ལས་ཡོངས་སུ་སྤངས་ན་རྣམ་པར་གྲོལ་བར་འགྱུར་རོ། །
དེ་བས་ན་ཆོས་འདི་དག་ནི་ཁྱེད་ལ་སྟོན་ཀྱི། མི་དགེ་བའི་ལས་ཡོངས་སུ་མ་སྤངས་པས་རྣམ་པར་གྲོལ་བར་འགྱུར་རོ་ཞེས་ཁྱེད་ལ་མི་སྟོན་ཏོ། །ཅི་སྟེ་སེམས་ཅན་རྣམས་སྡིག་པའི་ལས་ཡོངས་སུ་སྤངས་ན་ངན་སོང་གསུམ་དུ་ལྟུང་བར་
འགྱུར་རོ་ཞེས་བྱ་བའི་གནས་མེད་དོ། །ཡོངས་སུ་སྤངས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་ཅིང་མྱ་ངན་ལས་འདས་པ་ཆེན་པོ་འཐོབ་པར་འགྱུར་བ་ནི་གནས་ཡོད་དོ། །དེ་བས་ན་སངས་རྒྱས་དང་བྱང་ཆུབ་སེམས་
དཔའ་ནི་རྟག་ཏུ་ཆོས་འདི་ཉིད་སེམས་ཅན་རྣམས་ལ་སྟོན་ཏེ། ངག་དང་ཡིད་ཀྱང་དེ་བཞིན་དུ་རིག་པར་བྱའོ། །དེ་བས་ན་སངས་རྒྱས་བཅོམ་ལྡན་འདས་ནི་བླ་ན་མེད་པ་སྟོན་པའོ། །གཞན་ཡང་སྔོན་མ་ཐོབ་པ་ཐོབ་པར་གྱུར་ལ། ཐོབ་

47-1-296b

པ་རྣམས་སེམས་ཅན་ལ་སྟོན་པ་དང་། ཐོག་མ་ནས་ཚངས་པར་མ་སྤྱད་པ་ཚངས་པར་སྤྱོད་དེ། སྤྱོད་པ་རྣམས་ཀྱང་སེམས་ཅན་ལ་སྟོན་པ་དང་། བདག་ཉིད་མ་རིག་པ་བཅོམ་པས་སེམས་ཅན་གྱི་མ་རིག་པ་འཇོམས་པ་དང་། བདག་ཉིད་
ཡོངས་སུ་དག་པའི་མིག་ཐོབ་པས་སེམས་ཅན་གྱི་ལྡོངས་པའི་རབ་རིབ་བསལ་ནས་ཡོངས་སུ་དག་པའི་མིག་ཐོབ་པར་བྱེད་པ་དང་། བདག་ཉིད་བདེན་པ་གཉིས་ཤེས་པས་སེམས་ཅན་རྣམས་ལ་ཡང་བདེན་པ་གཉིས་སྟོན་པ་དང་། བདག་
ཉིད་རྣམ་པར་གྲོལ་བས་སེམས་ཅན་རྣམས་ལ་རྣམ་པར་གྲོལ་བའི་ཆོས་སྟོན་པ་དང་བདག་ཉིད་མཐའ་མེད་པའི་འཁོར་བའི་ཀླུང་རྒལ་བས་སེམས་ཅན་ཐམས་ཅད་ཀྱང་དེ་ལ་སྒྲོལ་བ་དང་། བདག་ཉིད་འཇིགས་པ་མེད་པར་གྱུར་པས་སེམས་
ཅན་རྣམས་ལ་འཇིགས་པ་མེད་པ་སྟོན་པ་དང་། བདག་ཉིད་ཡོངས་སུ་མྱ་ངན་ལས་འདས་པས་སེམས་ཅན་རྣམས་ལ་མྱ་ངན་ལས་འདས་པ་ཆེན་པོ་སྟོན་པ་སྟེ། དེའི་ཕྱིར་ན་སངས་རྒྱས་བཅོམ་ལྡན་འདས་ནི་བླ་ན་མེད་པ་སྟོན་པ་ཞེས་
བྱའོ། །ལྷ་ཞེས་བྱ་བ་ནི་ཉིན་མོ་ཞེས་བྱ་སྟེ། ལྷ་རྣམས་ལ་ཉིན་རིང་མཚན་ཐུང་བས་ནི་ལྷ་ཞེས་བྱའོ། །གཞན་ཡང་ལྷ་ཞེས་བྱ་བ་ནི་མྱ་ངན་མེད་པ་སྟེ། རྟག་ཏུ་བདེ་བའི་ཕྱིར་ན་ལྷ་ཞེས་བྱའོ། །གཞན་ཡང་ལྷ་ཞེས་བྱ་བ་ནི་སྣང་བའི་
སྒྲོན་མ་ཞེས་བྱའོ། །མུན་པ་བཅོམ་ནས་སྣང་བ་ཆེན་པོར་འགྱུར་བའི་ཕྱིར་ལྷ་ཞེས་བྱའོ། །གཞན་ཡང་སྡིག་པའི་ལས་ནག་པོ་བཅོམ་ནས་དགེ་བའི་ལས་དཀར་པོ་ཐོབ་སྟེ། ལྷར་སྐྱེ་བའི་ཕྱིར་ན་ལྷ་ཞེས་བྱའོ། །ལྷ་ནི་བཀྲ་ཤིས་པ་
སྟེ། བཀྲ་ཤིས་པའི་ཕྱིར་ལྷ་ཞེས་བྱའོ། །གཞན་ཡང་ལྷ་ཞེས་བྱ་བ་ནི་ཉི་མ་སྟེ། ཉི་མ་ལ་འོད་ཡོད་པའི་ཕྱིར་ཉི་མ་ལ་ལྷ་ཞེས་བྱའོ། །དོན་དེ་ལྟ་བུས་ན་ལྷ་ཞེས་བྱའོ། །མི་ཞེས་བྱ་བ་ནི་དོན་ལ་མང་དུ་སེམས་པའོ། །གཞན་ཡང་
མི་ཞེས་བྱ་བ་ནི་ལུས་དང་ངག་འཇམ་ཞིང་དེས་པའོ། །གཞན་ཡང་མི་ཞེས་བྱ་བ་ནི་ང་རྒྱལ་དང་བཅས་པའོ། །མི་ཤེས་བྱ་བ་ནི་ང་རྒྱལ་བཅོམ་པའོ། །རིགས་ཀྱི་བུ་སངས་རྒྱས་བཅོམ་ལྡན་འདས་ནི་སེམས་ཅན་ཐམས་ཅད་ཀྱི་བླ་ན་མེད་

47-1-297a

པའི་སྟོན་པ་ཡིན་མོད་ཀྱི། གསུང་རབ་ལས་ལྷ་དང་མིའི་སྟོན་པ་ཞེས་འབྱུང་ངོ་། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ཀྱི་ནང་ན་ལྷ་དང་མི་འབའ་ཤིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནུས་ཤིང་
དགེ་བ་བཅུའི་ལས་བྱེད་ནུས་པས་རྒྱུན་ཏུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་དང་། རང་སངས་རྒྱས་ཀྱི་འབྲས་བུ་དང་། བླ་ན་མེད་པ་ཡང་དག་པར་རྫོགས་པའི་
བྱང་ཆུབ་འཐོབ་པར་འགྱུར་བས་དེའི་ཕྱིར་ན་སངས་རྒྱས་བཅོམ་ལྡན་འདས་ནི་ལྷ་དང་མིའི་སྟོན་པ་ཞེས་བྱའོ། །དེ་ལ་ཇི་ལྟར་ན་སངས་རྒྱས་ཞེ་ན། སངས་རྒྱས་ཞེས་བྱ་བ་ནི་ཚོར་བའི་དོན་ཏེ། བདག་ཀྱང་ཚོར་ལ་གཞན་ཡང་ཚོར་བར་བྱེད་དོ།། 
རིགས་ཀྱི་བུ་དཔེར་ན་མི་ཞིག་ཁྱིམ་དུ་རྐུན་པོ་འོང་བར་ཚོར་ན་རྐུན་པོས་མི་ཚུགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ཚད་མེད་པའི་ཉོན་མོངས་པ་ཐམས་ཅད་ཚོར་ཏེ། དེ་ལྟར་ཚོར་བས་ན་ཉོན་མོངས་པ་ཐམས་ཅད་ཀྱིས་
མི་ཚུགས་སོ། །དེ་བས་ན་སངས་རྒྱས་ཞེས་བྱའོ། །དེ་ལྟར་ཚོར་བས་ན་མི་སྐྱེ་མི་རྒ་མི་ན་མི་འཆི་སྟེ། དེའི་ཕྱིར་ན་སངས་རྒྱས་ཞེས་བྱའོ། །དེ་ལ་ཇི་ལྟར་ན་བཅོམ་ལྡན་འདས་ཞེ་ན། བཅོམ་པ་ཞེས་བྱ་བ་ནི་བཅོམ་པའོ། །ལྡན་པ་ཞེས་
བྱ་བ་ནི་ཉོན་མོངས་པའོ། །ཉོན་མོངས་པ་ཐམས་ཅད་བཅོམ་པའི་ཕྱིར་ན་བཅོམ་ལྡན་འདས་ཞེས་བྱའོ། །གཞན་ཡང་དགེ་བའི་ཆོས་ཐམས་ཅད་དང་ལྡན་པའི་ཕྱིར་ཆོས་རྣམས་ཀྱི་དོན་ལ་ཤིན་ཏུ་མཁས་པའི་ཕྱིར། ཡོན་ཏན་ཆེན་
པོ་དང་ལྡན་པས་གཞན་གྱིས་མི་ཐུབ་པའི་ཕྱིར། གྲགས་པ་ཆེན་པོ་ཕྱོགས་བཅུར་གྲགས་པའི་ཕྱིར། སྦྱིན་པ་རྣམ་པ་སྣ་ཚོགས་བྱིན་པའི་ཕྱིར། བསྐལ་པ་ཚད་མེད་གྲངས་མེད་པའི་བར་དུ་བུད་མེད་ཀྱི་དབང་པོ་སྐྱུགས་པ་ལྟ་བུར་བོར་
བའི་ཕྱིར་རོ། །རིགས་ཀྱི་བུ་གལ་ཏེ་སྐྱེས་པ་འམ་བུད་མེད་གང་ཞིག་གིས་དེ་ལྟར་སངས་རྒྱས་རྗེས་སུ་དྲན་པ་བསྒོམས་ན། འགྲོ་འམ་སྡོད་དམ་འདུག་གམ་ཉལ་ལམ་སྣང་ངམ་མུན་པར་གྱུར་ཀྱང་། ཉིན་མཚན་རྟག་ཏུ་སངས་རྒྱས་

47-1-297b

མཐོང་བ་དང་མི་འབྲལ་ལོ། །རིགས་ཀྱི་བུ་ཅིའི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པ་ནས་བཅོམ་ལྡན་འདས་ཀྱི་བར་དུ་དེ་ལྟ་བུ་ཡོན་ཏན་ཚད་མེད་པ་དང་། གྲགས་པ་ཆེན་པོ་དང་ལྡན་ཞེ་ན། རིགས་ཀྱི་བུ་བྱང་ཆུབ་
སེམས་དཔའ་སེམས་དཔའ་ཆེན་པོ་ནི་སྔོན་བསྐལ་པ་ཚད་མེད་གྲངས་མེད་པའི་བར་དུ་ཕ་མ་དང་། མཁན་པོ་དང་། སློབ་དཔོན་དང་། བླ་མ་དང་། གོང་མ་རྣམས་ལ་རིམ་གྲོ་དང་བཀུར་སྟིར་བྱས། བསྐལ་པ་ཚད་མེད་པའི་བར་དུ་སེམས་ཅན་
གྱི་ཕྱིར་སྦྱིན་པ་བྱིན་པ་དང་། ཚུལ་ཁྲིམས་བསྲུངས་པ་དང་། བཟོད་པ་བསྒོམས་པར་བྱས་པ་དང་། བརྩོན་འགྲུས་བརྩམས་པ་དང་། བསམ་གཏན་ལ་མཉམ་པར་བཞག་པ་དང་། ཤེས་རབ་ལ་ནན་ཏན་བྱས་པ་དང་། བྱམས་པ་ཆེན་པོ་དང་། 
སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་ལ་ནན་ཏན་བྱས་པས་དེའི་ཕྱིར་མཚན་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱད་བཅུ་དང་། རྡོ་རྗེ་ལྟ་བུའི་སྐུ་ཐོབ་པར་གྱུར་ཏོ། །གཞན་ཡང་བྱང་ཆུབ་སེམས་དཔའ་སྔོན་
བསྐལ་པ་ཚད་མེད་གྲངས་མེད་པའི་བར་དུ་དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཀྱི་དབང་པོ་ལ་ནན་ཏན་བྱས་ཏེ། སློབ་དཔོན་དང་། བླ་མ་ལ་རིམ་གྲོ་དང་བཀུར་སྟིར་བྱས་ནས་དེ་ཡང་ཆོས་འདོད་པའི་ཕྱིར་གྱི། 
ཟས་དང་རྙེད་པ་འདོད་པའི་ཕྱིར་མ་ཡིན་ནོ། །བྱང་ཆུབ་སེམས་དཔའ་གལ་ཏེ་མདོ་སྡེ་བཅུ་གཉིས་བཟུང་ནས་གལ་ཏེ་ཀློག་གམ་འདོན་ཀྱང་རྟག་ཏུ་སེམས་ཅན་ཐམས་ཅད་རྣམ་པར་གྲོལ་བར་བྱ་བ་དང་རབ་ཏུ་བདེ་བར་བྱ་བའི་ཕྱིར་གྱི། བདག་ཉིད་
ཀྱི་ཕྱིར་ནི་མ་ཡིན་ནོ། །ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་རྟག་ཏུ་འཇིག་རྟེན་ལས་འདས་པའི་སེམས་དང་། རབ་ཏུ་བྱུང་བའི་སེམས་དང་། འདུས་མ་བྱས་པའི་སེམས་དང་། རྩོད་པ་མེད་པའི་སེམས་དང་། དྲི་མ་མེད་པའི་
སེམས་དང་། བཅིངས་པ་མེད་པའི་སེམས་དང་། སྒྲིབ་པ་མེད་པའི་སེམས་དང་། ལུང་མི་སྟོན་པ་མེད་པའི་སེམས་དང་། འཁོར་བ་མེད་པའི་སེམས་དང་། ཐེ་ཚོམ་གྱི་དྲ་བ་མེད་པའི་སེམས་དང་། འདོད་ཆགས་མེད་པའི་སེམས་དང་། 

47-1-298a

ཞེ་སྡང་མེད་པའི་སེམས་དང་། གཏི་མུག་མེད་པའི་སེམས་དང་། ང་རྒྱལ་མེད་པའི་སེམས་དང་། རྙོག་པ་མེད་པའི་སེམས་དང་། ཉོན་མོངས་པ་མེད་པའི་སེམས་དང་། སྡུག་བསྔལ་མེད་པའི་སེམས་དང་། ཚད་མེད་པའི་སེམས་དང་། རྒྱ་ཆེ་བའི་
སེམས་དང་། ནམ་མཁའ་ལྟ་བུའི་སེམས་དང་། མེད་པའི་སེམས་དང་། མེད་པ་མ་ཡིན་པའི་སེམས་དང་། དུལ་བའི་སེམས་དང་། མི་སྐྱོ་བའི་སེམས་དང་། མི་འཆབ་པའི་སེམས་དང་། འཇིག་རྟེན་མ་ཡིན་པའི་སེམས་དང་། རྟག་ཏུ་ཏིང་ངེ་འཛིན་གྱི་
སེམས་དང་། རྟག་ཏུ་ནན་ཏན་བྱེད་པའི་སེམས་དང་། རྟག་ཏུ་རྣམ་པར་གྲོལ་བའི་སེམས་དང་། རེ་བ་མེད་པའི་སེམས་དང་། སྨོན་པ་མེད་པའི་སེམས་དང་། ཤིན་ཏུ་སྨོན་པ་མེད་པའི་སེམས་དང་། སྨྲ་བ་མེད་པའི་སེམས་དང་། མཉེན་ཞིང་དེས་
པའི་སེམས་དང་། མི་གནས་པའི་སེམས་དང་། དབང་སྒྱུར་བའི་སེམས་དང་། ཟག་པ་མེད་པའི་སེམས་དང་། དོན་དམ་པའི་སེམས་དང་། མི་ལྡོག་པའི་སེམས་དང་། མི་རྟག་པའི་སེམས་དང་། ཡང་དག་པའི་སེམས་དང་། གཡོ་སྒྱུ་མེད་
པའི་སེམས་དང་། དགེ་བའི་སེམས་དང་། ལྷག་ཆད་མེད་པའི་སེམས་དང་། བར་ཆད་མེད་པའི་སེམས་དང་། བུས་པ་ལྟ་བུ་མ་ཡིན་པའི་སེམས་དང་། ཉན་ཐོས་ལྟ་བུ་མ་ཡིན་པའི་སེམས་དང་། རང་སངས་རྒྱས་ལྟ་བུ་མ་ཡིན་པའི་སེམས་དང་། 
ཤིན་ཏུ་ཤེས་པའི་སེམས་དང་། ཁམས་ཤེས་པའི་སེམས་དང་། ཁམས་སྐྱེ་བ་ཤེས་པའི་སེམས་དང་། ཁམས་ལ་གནས་པ་ཤེས་པའི་སེམས་དང་། ཁམས་ལ་དབང་སྒྱུར་བ་ཤེས་པའི་སེམས་ཀྱིས་ནན་ཏན་བྱས་པས་ན། སྟོབས་བཅུ་
དང་། མི་འཇིགས་པ་བཞི་དང་། སྙིང་རྗེ་ཆེན་པོའི་ཏིང་ངེ་འཛིན་དང་། རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཐོབ་པར་གྱུར་ཏོ། །དེ་བས་ན་དེ་བཞིན་གཤེགས་པ་ནས་བཅོམ་ལྡན་འདས་ཀྱི་བར་དུ་བཏགས་ཏེ། དེ་ལྟར་
ན་བྱང་ཆུབ་སེམས་དཔའ་སེམས་དཔའ་ཆེན་པོས་སངས་རྒྱས་རྗེས་སུ་དྲན་པ་ཞེས་བྱའོ། །དེ་ལ་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་རྗེས་སུ་དྲན་པ་ཞེ་ན། རིགས་ཀྱི་བུ་བྱང་ཆུབ་སེམས་དཔའ་ཆེན་པོས་སངས་

47-1-298b

རྒྱས་བཅོམ་ལྡན་འདས་ཀྱིས་གསུངས་པའི་ཆོས་ལ་འདི་ལྟར་ཡིད་ལ་བྱེད་དོ། །བཅོམ་ལྡན་འདས་ཀྱིས་གསུངས་པའི་ཆོས་ནི་མཆོག་ཏུ་གྱུར་པ། ཕུལ་དུ་གྱུར་པ་སྟེ། ཆོས་ཀྱིས་རྒྱུ་བྱས་པས་ན་སོ་སོའི་སྐྱེ་བོ་དག་ཀྱང་འབྲས་བུ་མངོན་
སུམ་དུ་ཐོབ་པར་གྱུར་ཏོ། །དམ་པའི་ཆོས་འདི་འབའ་ཤིག་ནི་དུས་དང་ཚོད་མེད་དེ། ཆོས་ཀྱི་མིག་གིས་མཐོང་བ་ཡིན་གྱི། ཤའི་མིག་གིས་མཐོང་བ་མ་ཡིན་ན། དཔེ་དང་ཟླས་ཀྱང་དཔེར་བྱ་བ་མ་ཡིན་ཏེ། མ་སྐྱེས་པ། མ་བྱུང་བ། མི་
གནས་པ། མི་འགོག་པ། ཐོག་མ་མེད་པ། ཐ་མ་མེད་པ། འདུས་མ་བྱས་པ། བགྲང་དུ་མེད་པ། གནས་མེད་པ་རྣམས་ཀྱི་གནས་སུ་གྱུར་པ། རྟེན་མེད་པའི་རྟེན། སྣང་བ་མེད་པའི་སྣང་བ། ཕ་རོལ་ཏུ་མ་ཕྱིན་པ་རྣམས་ཕ་རོལ་
ཏུ་སྒྲོལ་བ། དྲི་བསུང་མེད་པའི་དྲི་བསུང་། ཐོགས་པ་མེད་པ། བལྟར་མི་རུང་བར་མཐོང་བ། མི་གཡོ་བ། མི་འགྱུར་བ། མི་རིང་བ། མི་ཐུང་བ། བདེ་བ་ཡོངས་སུ་བཅད་ཀྱང་རབ་ཏུ་བདེ་བའི་མཐར་ཕྱིན་པ། གཟུགས་མ་ཡིན། གཟུགས་ཆད་
པ་མ་ཡིན། གཟུགས་ཀྱང་མ་ཡིན་པ་ནས་རྣམ་པར་ཤེས་པ་མ་ཡིན་པ། རྣམ་པར་ཤེས་པ་ཆད་པ་མ་ཡིན། རྣམ་པར་ཤེས་པའི་བར་དུ་ཡང་མ་ཡིན་པ། ལས་མ་ཡིན་པ། ལས་ཆད་པ་ལས་ཀྱང་མ་ཡིན་པ། ཉོན་མོངས་པ་མ་ཡིན། ཉོན་
མོངས་པ་མ་བཅད་པ། ཉོན་མོངས་པ་ཡང་མ་ཡིན་པ། དངོས་པོ་མ་ཡིན། དངོས་པོ་བཅད་པ། དངོས་པོ་ཡང་མ་ཡིན་པ། ཁམས་མ་ཡིན། ཁམས་བཅད་པ། ཁམས་ཀྱང་མ་ཡིན་པ། སྲིད་པ་མ་ཡིན། སྲིད་པ་བཅད་པ། སྲིད་པ་
ཡང་མ་ཡིན་པ། སྐྱེ་མཆེད་མ་ཡིན། སྐྱེ་མཆེད་བཅད་པ། སྐྱེ་མཆེད་ཀྱང་མ་ཡིན་པ། རྒྱུ་མ་ཡིན། རྒྱུ་བཅད་པ། རྒྱུ་ཡང་མ་ཡིན་པ། འབྲས་བུ་མ་ཡིན། འབྲས་བུ་བཅད་པ། འབྲས་བུ་ཡང་མ་ཡིན་པ། བརྫུན་པ་མ་
ཡིན། བདེན་པ་མ་ཡིན། བདེན་པ་ཐམས་ཅད་བཅད་པ། བདེན་པ་ཡང་མ་ཡིན་པ། སྐྱེ་བ་མ་ཡིན། འགག་པ་མ་ཡིན། སྐྱེ་བ་དང་འགོག་པ་ཡོངས་སུ་བཅད་པ། འགོག་པ་ཡང་མ་ཡིན་པ། མཚན་མ་མ་ཡིན། མཚན་མ་

47-1-299a

མ་ཡིན་པ་ཡང་མ་ཡིན། མཚན་མ་ཐམས་ཅད་བཅད་པ། མཚན་མ་ཡང་མ་ཡིན་པ། སྟེན་པ་མ་ཡིན། སྟོན་པ་མ་ཡིན་པ་ཡང་མ་ཡིན་པ། མི་སྟོན་པ་ཡང་མ་ཡིན་པ། འཇིགས་པ་མ་ཡིན། བདེ་བ་མ་ཡིན། འཇིགས་པ་
ཐམས་ཅད་བཅད་པ། བདེ་བ་ཡང་མ་ཡིན་པ། བཟོད་པ་ཡང་མ་ཡིན། མི་བཟོད་པ་མ་ཡིན། མི་བཟོད་པ་ཐམས་ཅད་བཅད་པ། བཟོད་པ་ཡང་མ་ཡིན་པ། ཞི་གནས་མ་ཡིན། ཞི་གནས་མ་ཡིན་པ་ཡང་མ་ཡིན། ཞི་གནས་ཐམས་ཅད་
བཅད་པ། ཞི་གནས་ཀྱང་མ་ཡིན་པ། ཆོས་ཐམས་ཅད་ཀྱི་སྤྱི་བོར་བྱིན་པ། ཉོན་མོངས་པ་ཐམས་ཅད་ཡོངས་སུ་བཅད་པ། ཡོངས་སུ་དག་པ། མཚན་མ་མེད་པ། མཚན་མ་ལས་ཡོངས་སུ་གྲོལ་བ། སེམས་ཅན་ཚད་མེད་པའི་མཐར་ཕྱིན་
པའི་གནས་སུ་གྱུར་པ། འཁོར་བའི་མེ་འབར་བ་ཐམས་ཅད་ཞི་བར་བྱེད་པ། སངས་རྒྱས་རྣམས་ཀྱི་རོལ་པའི་གནས། རྟག་པ་མི་འགྱུར་བའི་ཡིད་ལ་བྱེད་པ་སྟེ། དེ་ནི་བྱང་ཆུབ་སེམས་དཔའ་ཆོས་རྗེས་སུ་དྲན་པ་ཞེས་བྱའོ། །དེ་ལ་ཇི་ལྟར་
ན་དགེ་འདུན་རྗེས་སུ་དྲན་པ་ཞེ་ན། སངས་རྒྱས་རྣམས་ཀྱི་འཕགས་པའི་དགེ་འདུན་ནི་ཆོས་བཞིན་དུ་གནས་པ། ཡང་དག་པའི་ཆོས་འཛིན་པ། རྗེས་སུ་རྣལ་འབྱོར་དུ་སྤྱོད་པ། བལྟར་མི་རུང་བ། གཟུང་དུ་མེད་པ། གཞིག་དུ་མེད་པ། 
གནོད་པ་བྱར་མི་རུང་བ། བསམ་གྱིས་མི་ཁྱབ་པ། སེམས་ཅན་ཐམས་ཅད་ཀྱི་བསོད་ནམས་ཀྱི་ཞིང་དུ་གྱུར་པ། བསོད་ནམས་ཀྱི་ཞིང་དུ་གྱུར་ཀྱང་ལེན་པ་མེད་པ། ཡོངས་སུ་དག་པ། རྙོག་པ་མེད་པ། ཟག་པ་མེད་པ། འདུས་མ་བྱས་
པ། ཡངས་པ། མཐའ་ཡས་པ། སེམས་ཤིན་ཏུ་དུལ་བ། མཉམ་སྙོམས་པ། གཉིས་སུ་མེད་པ། མྱ་ངན་མེད་པ། རྟག་པ་མི་འགྱུར་བ་སྟེ། དེ་ནི་དགེ་འདུན་རྗེས་སུ་དྲན་པ་ཞེས་བྱའོ། །དེ་ལ་ཇི་ལྟར་ཅི་བསླབ་ཚིག་རྗེས་སུ་དྲན་པ་
ཞེ་ན། བྱང་ཆུབ་སེམས་དཔའ་ཚུལ་ཁྲིམས་ཡོད་པ་ཡིད་ལ་བྱས་པས་མི་འཇིགས་པ། མི་ཟག་པ། མི་ཉམས་པ། མ་འདྲེས་པ། གཟུགས་མེད་དུ་ཟིན་ཀྱང་ཤིན་ཏུ་བསྲུང་བ། རེག་པའི་དངོས་པོ་མེད་ཀྱང་ཤིན་ཏུ་ཐབས་མཁས་པས་

47-1-299b

བསྙེན་པར་རྫོགས་པར་བྱེད་པ། ཉེས་པའི་སྐྱོན་མེད་པ། སངས་རྒྱས་དང་། བྱང་ཆུབ་སེམས་དཔའ་རྣམས་ཀྱིས་བསྔགས་ཤིང་བསྟོད་པ། ཤིན་ཏུ་རྒྱས་པ། ཡོངས་སུ་མྱ་ངན་ལས་འདས་པ་ཆེན་པོའི་རྒྱུར་གྱུར་པ། རིགས་ཀྱི་བུ་འདི་ལྟ་སྟེ། 
དཔེར་ན་ས་ཆེན་པོ་དང་། གྲུ་དང་སེ་མོ་དོ་དང་། རི་ཆེན་པོ་དང་། རྒྱ་མཚོ་དང་། ཐལ་བའི་ཁུ་བ་དང་། ཁང་ཁྱིམ་དང་། རལ་གྲི་དང་། ཟམ་པ་དང་། སྨན་པ་མཁས་པ་དང་། སྨན་བཟང་པོ་དང་། དབྱུག་པའི་སྨན་དང་། ཡིད་བཞིན་གྱི་ནོར་བུ་རིན་པོ་ཆེ་དང་། 
རྐང་ལག་དང་། མིག་དང་། ཕ་མ་དང་། གྲིབ་མ་ནི་ཅིས་ཀྱང་མི་འཕྲོགས་ཏེ། གནོད་པ་བྱར་མེད། མེས་བསྲེག་ཏུ་མེད། ཆུས་གཡེང་དུ་མེད། རི་མཐོན་པོ་ལ་འཛེག་པའི་ཐེམ་སྐས་ལྟ་བུ་སྟེ། སངས་རྒྱས་དང་བྱང་ཆུབ་སེམས་དཔའ་རྣམས་
ཀྱི་རིན་པོ་ཆེ་དམ་པའི་རྒྱལ་མཚན་ལྟ་བུའོ། །ཚུལ་ཁྲིམས་དེ་ལ་གནས་ན་རྒྱུན་ཏུ་ཞུགས་པའི་འབྲས་བུ་ཐོབ་པའི་སྐལ་བ་ང་ལ་ཡང་ཡོད་མོད་ཀྱི་ང་མི་འདོད་དོ། །དེ་ཅིའི་ཕྱིར་ཞེ་ན། གལ་ཏེ་རྒྱུན་ཏུ་ཞུགས་པའི་འབྲས་བུ་ཐོབ་པར་གྱུར་ན་རྒྱ་
ཆེར་སེམས་ཅན་ཐམས་ཅད་ཀྱི་དོན་བྱེད་མི་ནུས་སོ། །གལ་ཏེ་ཚུལ་ཁྲིམས་ལ་གནས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་བའི་སྐལ་བ་ཡང་ང་ལ་ཡོད་དེ། དེ་ནི་ང་འདོད་དོ། །དེ་ཅིའི་ཕྱིར་ཞེ་ན། གལ་
ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་ན་སེམས་ཅན་ཐམས་ཅད་ལ་དམ་པའི་ཆོས་རྒྱ་ཆེར་སྟོན་པར་འགྱུར་ཏེ། མགོན་སྐྱབས་སུ་འགྱུར་བས་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཚུལ་ཁྲིམས་རྗེས་
སུ་དྲན་པ་ཞེས་བྱའོ། །དེ་ལ་ཇི་ལྟར་ན་སྦྱིན་པ་རྗེས་སུ་དྲན་པ་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོས་ཤིན་དུ་བརྟགས་ན་སྦྱིན་པ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུ་ཡིན་པས་སངས་རྒྱས་དང་བྱང་
ཆུབ་སེམས་དཔའ་རྣམས་སྦྱིན་པ་དེ་ལ་ཤིན་ཏུ་བསྙེན་ཏེ་ནན་ཏན་བྱེད་པས་བདག་ཀྱང་དེ་ལ་བསྙེན་ཏེ་ནན་ཏན་བྱའོ། །གལ་ཏེ་སྦྱིན་པ་མ་བྱས་ན་འཁོར་རྣམ་པ་བཞིའི་རྒྱུན་དུ་མི་འགྱུར་རོ། །སྦྱིན་པ་བྱས་པས་ཀུན་ནས་ཉོན་མོངས་པ་ཡོངས་

47-1-300a

སུ་མཆོད་ཀྱང་ད་ལྟར་གྱི་ཉོན་མོངས་པ་འཇོམས་པར་འགྱུར་རོ། །སྦྱིན་པ་བྱས་པ་དེའི་རྒྱུ་དང་དེའི་རྐྱེན་ཀྱིས་རྟག་ཏུ་ཕྱོགས་བཅུའི་འཇིག་རྟེན་གྱི་ཁམས་ཚད་མེད་མཐའ་ཡས་པའི་ཀླུང་གང་གཱའི་བྱེ་མ་སྙེད་ཀྱི་སེམས་ཅན་ཐམས་ཅད་ཀྱིས་བསྔགས་
ཤིང་བསྟོད་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ལ་ཟས་བྱིན་པ་ནི་འཚོ་བ་བྱིན་པ་སྟེ། དེའི་འབྲས་བུས་མངོན་པར་སངས་རྒྱས་པ་ན་རྟག་པ་མི་འཕོ་བའི་གནས་སུ་འགྱུར་རོ། །བདེ་བ་བྱིན་པས་ནི་མངོན་
པར་སངས་རྒྱས་པ་ན་ཤིན་དུ་བདེན་པ་ཐོབ་པར་འགྱུར་རོ། །བྱང་ཆུབ་སེམས་དཔའ་སྦྱིན་པ་བྱིན་པ་ན་ཆོས་བཞིན་དུ་རྙེད་པ་ཡིན་གྱི། གཞན་ལ་གནོད་པ་མ་ཡིན་པས་མངོན་པར་སངས་རྒྱས་པ་ན་ཡོངས་སུ་དག་པའི་མྱ་ངན་ལས་འདས་པ་ཐོབ་
པར་འགྱུར་རོ། །བྱང་ཆུབ་སེམས་དཔའ་སྦྱིན་པ་བྱིན་པ་ན་སེམས་ཅན་རྣམས་ཀྱིས་ཆེད་དུ་མ་བསླངས་པར་ཐོབ་པས་མངོན་པར་སངས་རྒྱས་པ་ན་དབང་སྒྱུར་བའི་བདག་ཅེས་བྱ་བ་འཐོབ་པར་འགྱུར་རོ། །སྦྱིན་པ་བྱིན་པའི་རྐྱེན་ཀྱིས་ཕ་རོལ་པོ་
མཐུ་དང་ལྡན་པར་གྱུར་པས་མངོན་པར་སངས་རྒྱས་པ་ན་སྟོབས་བཅུ་ཐོབ་པར་འགྱུར་རོ། །སྦྱིན་པ་བྱིན་པའི་རྐྱེན་ཀྱིས་ཕ་རོལ་པོ་སྨྲ་བའི་སྤོབས་པ་དང་ལྡན་པར་འགྱུར་བས་མངོན་པར་སངས་རྒྱས་པ་ན་ཡང་དག་པར་སོ་སོར་ཤེས་པ་བཞི་ཐོབ་པར་
འགྱུར་རོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་སྦྱིན་པ་བྱིན་པས་ཡོངས་སུ་མྱ་ངན་ལས་འདས་པའི་རྒྱུར་འགྱུར་ཏེ། དེ་བས་ན་བདག་ཀྱང་སྦྱིན་པ་ལ་ནན་ཏན་བྱས་ཏེ་མྱ་ངན་ལས་འདས་པའི་རྒྱུར་འགྱུར་བར་བྱའོ། །
རྒྱས་པར་ནི་མེ་ཏོག་སྣ་ཚོགས་ཤེས་བྱ་བའི་ནང་ནས་འཆད་དོ། །དེ་ལ་ཇི་ལྟར་ན་ལྷ་རྗེས་སུ་དྲན་པ་ཞེ་ན། རྒྱལ་ཆེན་རིས་བཞིའི་གནས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱི་གནས་ཡོད་དེ། གང་ཞིག་རྒྱལ་ཆེན་
རིས་བཞིའི་ལྷ་ལ་དད་པ་དེ་ལ་ཡང་སྐལ་བ་ཡོད་དེ། གང་ཞིག་མང་དུ་ཐོས་པ་དང་སྦྱིན་པ་དང་ཤེས་རབ་ཀྱིས་རྒྱལ་ཆེན་རིས་བཞིའི་ལྷ་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱི་བར་དུ་བདག་ལ་ཡང་སྐལ་བ་ཡོད་མོད་ཀྱི། 

47-1-300b

བདག་འདོད་པ་མ་ཡིན་ནོ། །དེ་ཅིའི་ཕྱིར་ཞེ་ན། རྒྱལ་ཆེན་རིས་བཞིའི་ལྷ་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱི་བར་དུ་ཐམས་ཅད་ཀྱང་མི་རྟག་པའོ། །མི་རྟག་པ་ཡིན་པས་ན་སྐྱེ་བ་དང་། རྒ་བ་དང་། ན་བ་དང་། འཆི་བ་
སྟེ། དེ་བས་ན་བདག་འདོད་པ་མ་ཡིན་ནོ། །འདི་ལྟ་སྟེ། དཔེར་ན་སྒྱུ་མ་ནི་སྐྱེ་བོ་གླེན་པ་དག་སླུ་བ་ཡིན་ཏེ། མཁས་པ་ཤེས་རབ་ཅན་ནི་ཆགས་པ་འམ་སླུ་བར་མི་འགྱུར་རོ། །སྒྱུ་མ་ནི་རྒྱལ་ཆེན་རིས་བཞིའི་གནས་ནས་འདུ་ཤེས་མེད་འདུ་ཤེས་
མེད་མིན་སྐྱེ་མཆེད་ཀྱི་སྟེངས་ལྟ་བུའོ། །གླེན་པ་ནི་བྱིས་པ་མ་རབས་ཐམས་ཅད་ལྟ་བུ་སྟེ། བདག་ནི་སོ་སོའི་སྐྱེ་བོ་གླེན་པ་དང་མི་འདྲའོ། །བདག་གིས་སྔོན་ཐོས་ན་དོན་དམ་པའི་ལྷ་སྟེ། སངས་རྒྱས་དང་བྱང་ཆུབ་སེམས་དཔའ་ནི་རྟག་པ་མི་
འགྱུར་བ། མི་སྐྱེ་བ། མི་རྒ་བ། མི་ན་བ། མི་འཆི་བ་ཡིན་ཏེ། བདག་ནི་སེམས་ཅན་ཐམས་ཅད་ཀྱི་ཕྱིར་དོན་དམ་པའི་ལྷ་ཚོལ་ལོ། །དེ་ཅིའི་ཕྱིར་ཞེ་ན། དོན་དམ་པའི་ལྷས་ནི་སེམས་ཅན་དག་གི་ཉོན་མོངས་པ་ཡོངས་སུ་གཅོད་དེ། དཔེར་ན་
ཡིད་བཞིན་གྱི་ཤིང་ལྟ་བུའོ། །ཅི་སྟེ་བདག་ལ་དད་པ་ནས་ཤེས་རབ་ཀྱི་བར་དུ་ཡོད་ན་དོན་དམ་པའི་ལྷ་ཐོབ་པར་འགྱུར་ཏེ། སེམས་ཅན་ཐམས་ཅད་ལ་ཡང་དོན་དམ་པའི་ལྷ་རྒྱས་པར་སྟོན་ཅིང་འཆད་པར་འགྱུར་རོ། །དེ་དག་ནི་བྱང་ཆུབ་སེམས་དཔའ་
སེམས་དཔའ་ཆེན་པོས་ལྷ་རྗེས་སུ་དྲན་པ་ཞེས་བྱའོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་པ་མ་ཡིན་གྱི། འཇིག་རྟེན་པས་ནི་མི་ཤེས་མི་མཐོང་། མི་རྟོགས་པ་སྟེ། བྱང་ཆུབ་སེམས་དཔས་ཤེས་པ། 
མཐོང་བ། རྟོགས་པ་ཞེས་བྱའོ། །རིགས་ཀྱི་བུ་གལ་ཏེ་ངའི་ཉེ་གནས་ལས་མདོ་སྡེ་བཅུ་གཉིས་ཀློག་པ་དང་། འདོན་པ་དང་། འཆང་བ་དང་། འཛིན་པ་དང་། གླེགས་བམ་དུ་འདྲི་བ་དང་། གཞན་དག་ལ་རྒྱ་ཆེ་བར་སྟོན་ཅིང་འཆད་
པ་དང་། ཡོངས་སུ་མྱ་ངན་ལས་འདས་པ་ཆེན་པོའི་མདོ་འདོན་པ་དང་། ཀློག་པ་དང་། འཆང་བ་དང་། འཛིན་པ་དང་། གླེགས་བམ་དུ་འདྲི་བ་དང་། གཞན་ལ་རྒྱས་པར་སྟོན་ཅིང་འཆད་པར་འདྲའོ་ཞེས་བྱ་བ་མི་རུང་ངོ་། །དེ་ཅིའི་ཕྱིར་ཞེ་ན། 

47-1-301a

རིགས་ཀྱི་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ནི་སངས་རྒྱས་བཅོམ་ལྡན་འདས་ཐམས་ཅད་ཀྱི་དགོངས་པའི་དོན་ཟབ་མོའོ། །སངས་རྒྱས་བཅོམ་ལྡན་འདས་རྣམས་ཀྱིས་དགོངས་པའི་དོན་ཟབ་མོ་ཡིན་པས་ན་མཆོག་
དུ་གྱུར་པ་ཡིན་ནོ། །རིགས་ཀྱི་བུ་དེ་བས་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་ནི་ངོ་མཚར་རྨད་དུ་ཆེ་བ་སྟེ། བསམ་གྱིས་མི་ཁྱབ་པའོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་
ཏོ། །བདག་ཀྱང་ཡོངས་སུ་མྱ་ངན་ལས་འདས་པ་ཆེན་པོའི་མདོ་འདི་ནི་ངོ་མཚར་རྨད་དུ་ཆེ་བ་སྟེ། བསམ་གྱིས་མི་ཁྱབ་བོ་སྙམ་དུ་བགྱིད་དོ། །སངས་རྒྱས་དང་། ཆོས་དང་། དགེ་འདུན་ཡང་བསམ་གྱིས་མི་ཁྱབ། བྱང་ཆུབ་སེམས་དཔའི་
བྱང་ཆུབ་དང་། ཡོངས་སུ་མྱ་ངན་ལས་འདས་པ་ཆེན་པོའི་མདོ་ཡང་བསམ་གྱིས་མི་ཁྱབ་བོ་སྙམ་བགྱིད་དོ། །བཅོམ་ལྡན་འདས་དོན་ཅི་ཞིག་གི་སླད་དུ་བྱང་ཆུབ་སེམས་དཔའ་ཡང་བསམ་གྱིས་མི་ཁྱབ་བོ་ཞེས་གསུངས། བཅོམ་
ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སུས་ཀྱང་མ་བསྟན་པར་རང་བྱང་ཆུབ་དུ་སེམས་བསྐྱེད་དོ། །དེ་ལྟར་སེམས་བསྐྱེད་ནས་ཤིན་ཏུ་བརྩོན་འགྲུས་རྩོམ་པས་གལ་ཏེ་མེ་
ཆེན་པོས་ལུས་དང་། མགོ་ཚིག་ཀྱང་ཆོས་རྗེས་སུ་དྲན་པ་བཏང་སྟེ། མེ་གསོད་པར་མི་བྱེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་འདི་སྙམ་དུ་སེམས་ཏེ། བདག་བསྐལ་པ་གྲངས་མེད་ཚད་མེད་པའི་
བར་དུ་སེམས་ཅན་དམྱལ་བ་དང་། ཡི་དགས་དང་། བྱོལ་སོང་གི་སྐྱེ་གནས་དང་། ལྷ་དང་། མིར་འཁོར་ཏེ། ཀུན་ནས་ཉོན་མོངས་པའི་མེས་ཚིག་པར་གྱུར་ཀྱང་གདོན་མི་ཟ་བར་ངེས་པའི་ཆོས་གཅིག་ཙམ་ཡང་མ་ཐོབ་བོ། །ངེས་པའི་ཆོས་
ཤེས་བྱ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་ལུས་དང་སྲོག་ལ་ཆུང་ཟད་ཀྱང་ཕངས་པར་མི་བྱེད་དོ། །བདག་ནི་བླ་ན་མེད་པ་ཡང་དག་པར་རྫོགས་པའི་

47-1-301b

བྱང་ཆུབ་ཀྱི་ཕྱིར་ལུས་འདི་རྡུལ་དུ་ཞིབ་མོར་བཏགས་ཀྱང་བརྩོན་འགྲུས་རྩོམ་པ་མི་གཏོང་ངོ་། །དེ་ཅིའི་ཕྱིར་ཞེ་ན། བརྩོན་འགྲུས་ཀྱི་སེམས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུར་འགྱུར་རོ། །རིགས་ཀྱི་བུ་དེ་ལྟར་བྱང་ཆུབ་
སེམས་དཔས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མ་མཐོང་བར་ལུས་དང་སྲོག་ཀྱང་མི་ཕངས་ན་མཐོང་བ་ལྟ་ཅི་སྨོས་ཏེ། དེ་བས་ན་བྱང་ཆུབ་སེམས་དཔའ་ནི་བསམ་གྱིས་མི་ཁྱབ་པའོ། །གཞན་ཡང་བསམ་གྱིས་མི་ཁྱབ་པ་
ཞེས་བྱ་བ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་འཁོར་བའི་སྐྱོན་ཚད་མེད་པ་མཐོང་བ་ནི་ཉན་ཐོས་དང་རང་སངས་རྒྱས་ཀྱིས་རྟོགས་པ་མ་ཡིན་ཏེ། དེ་ལྟར་འཁོར་བའི་སྐྱོན་ཚད་མེད་པ་མཐོང་ཡང་སེམས་ཅན་གྱི་ཕྱིར་སྡུག་བསྔལ་
ཡོངས་སུ་མྱོང་བ་ལ་སྐྱོ་བར་མི་བྱེད་དེ། དེ་བས་ན་བསམ་གྱིས་མི་ཁྱབ་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་གྱི་ཕྱིར་སེམས་ཅན་དམྱལ་བ་ན་སྡུག་བསྔལ་མང་པོ་མྱོང་ཡང་བསམ་གཏན་གསུམ་པའི་
བདེ་བ་དང་འདྲ་སྟེ། དེ་བས་ན་བསམ་གྱིས་མི་ཁྱབ་བོ། །རིགས་ཀྱི་བུ་འདི་ལྟ་སྟེ། དཔེར་ན་ཁྱིམ་བདག་ཅིག་ཁྱིམ་དུ་མེ་ཤོར་ན་ཁྱིམ་དེ་ནས་ཕྱི་རོལ་ཏུ་འབྱུང་ངོ་། །ཇི་སྟེ་ཁྱིམ་བདག་དེའི་བུ་རྣམས་ཁྱིམ་གྱི་ནང་དུ་ལུས་ཏེ་མེ་ལས་མ་ཐར་ན། 
ཁྱིམ་བདག་དེ་དེའི་ཚེ་ན་གདོན་མི་ཟ་བར་མེས་ཚིག་པར་འགྱུར་བར་ཤེས་ཀྱང་བུ་རྣམས་གདོན་པའི་ཕྱིར་དེའི་ནང་དུ་འཇུག་གོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། འཁོར་བ་ན་ཉེས་པའི་སྐྱོན་མང་པོ་ཡོད་པར་ཤེས་
ཀྱང་སེམས་ཅན་གྱི་ཕྱིར་འཁོར་བ་ན་གནས་པ་ལ་མི་སྐྱོ་སྟེ། དེ་བས་ན་བསམ་གྱིས་མི་ཁྱབ་བོ། །རིགས་ཀྱི་བུ་སེམས་ཅན་ཚད་མེད་པ་རྣམས་བྱང་ཆུབ་ཏུ་སེམས་བསྐྱེད་ནས་ཀྱང་འཁོར་བའི་སྐྱོན་མང་པོ་མཐོང་བས་སེམས་དེ་ལས་
ཕྱིར་ལྡོག་སྟེ། ལ་ལ་ནི་ཉན་ཐོས་སུ་འགྱུར། ལ་ལ་ནི་རང་སངས་རྒྱས་སུ་འགྱུར་རོ། །གལ་ཏེ་བྱང་ཆུབ་སེམས་དཔའ་མདོ་སྡེ་འདི་ཐོས་ན་བྱང་ཆུབ་ཀྱི་སེམས་ལས་ཕྱིར་མི་ལྡོག་གོ། །ཉན་ཐོས་དང་རང་སངས་རྒྱས་སུ་འགྱུར་མི་

47-1-302a

སྲིད་དོ། །དེ་ལྟར་བྱང་ཆུབ་སེམས་དཔའ་དེས་མི་གཡོ་བའི་ས་དང་པོ་མ་ཐོབ་ཀྱང་། སེམས་ཤིན་ཏུ་བརྟན་པར་འགྱུར་ཏེ། ཕྱིར་མི་ལྡོག་པས་ན་བསམ་གྱིས་མི་ཁྱབ་པ་ཞེས་བྱའོ། །རིགས་ཀྱི་བུ་གལ་ཏེ་མི་ཞིག་འདི་སྐད་དུ་
བདག་ནི་རྒྱ་མཚོ་ཆེན་པོ་འདི་ལ་རྐྱལ་ཏེ་རྒལ་ནུས་སོ་ཞེས་སྨྲ་ན། ཚིག་དེ་བསམ་གྱིས་མི་ཁྱབ་པ་ཡིན་ནམ། བཅོམ་ལྡན་འདས་དེ་སྐད་ཅེས་སྨྲ་བའི་ཚིག་དེ་ནི་བསམ་གྱིས་ཁྱབ་པ་ཡང་ལགས་ལ། བསམ་གྱིས་མི་ཁྱབ་པ་ཡང་
ལགས་སོ། །དེ་ཅིའི་སླད་དུ་ཞེ་ན། གལ་ཏེ་མི་ཞིག་གིས་རྐྱལ་ཏེ་ཕ་རོལ་ཏུ་ཕྱིན་ན་དེ་ནི་བསམ་གྱིས་མི་ཁྱབ་བོ། །གལ་ཏེ་ལྷ་མ་ཡིན་ཞིག་རྐྱལ་ཏེ་ཕ་རོལ་ཏུ་ཕྱིན་ན་བསམ་གྱིས་ཁྱབ་པ་ལགས་སོ། །རིགས་ཀྱི་བུ་སྐབས་འདིར་ནི་
མི་འབའ་ཤིག་ལ་བྱའི། ལྷ་མ་ཡིན་ནི་མ་ཡིན་ནོ། །བཅོམ་ལྡན་འདས་མིའི་ནང་ན་ཡང་བསམ་གྱིས་མི་ཁྱབ་པ་དང་། བསམ་གྱིས་ཁྱབ་པ་མཆིས་སོ། །བཅོམ་ལྡན་འདས་མི་ལ་ཡང་རྣམ་པ་གཉིས་ཏེ། འཕགས་པ་དང་། 
བྱིས་པ་མ་རབས་སོ། །བྱིས་པ་མ་རབས་ལ་བགྱི་ན་ནི་བསམ་གྱིས་མི་ཁྱབ་པ་མ་ལགས་སོ། །འཕགས་པ་ལ་བགྱི་ན་བསམ་གྱིས་ཁྱབ་བོ། །རིགས་ཀྱི་བུ་སྐབས་འདིར་ནི་ངས་བུས་པ་མ་རབས་ལ་བྱའི་འཕགས་པ་ལ་ནི་མ་ཡིན་
ནོ། །བཅོམ་ལྡན་འདས་ཅི་སྟེ་བུས་པ་མ་རབས་ལ་བགྱི་ན་བསམ་གྱིས་མི་ཁྱབ་པ་ལགས་སོ། །རིགས་ཀྱི་བུ་བུས་པ་མ་རབས་ཀྱིས་ནི་ཡང་དག་པར་ན་རྒྱ་མཚོ་ཆེན་པོ་ལ་རྐྱལ་ཏེ་ཕ་རོལ་ཏུ་མི་ཕྱིན་ནོ། །བྱང་ཆུབ་སེམས་དཔའ་
སེམས་དཔའ་ཆེན་པོས་ནི་ཡང་དག་པར་འཁོར་བའི་རྒྱ་མཚོའི་ཕ་རོལ་ཏུ་ཕྱིན་ཏེ། དེ་བས་ན་བསམ་གྱིས་མི་ཁྱབ་པ་ཞེས་བྱའོ། །རིགས་ཀྱི་བུ་ཅི་སྟེ་ལ་ལ་ཞིག་གིས་པད་མོའི་རྩ་བའི་ཉག་མས་རི་རབ་ལྷུན་པོ་བཏེག་སྟེ་ནམ་མཁའ་ལས་སྤྱངས་
ན། དེ་བསམ་གྱིས་མི་ཁྱབ་པ་ཡིན་ནམ། གསོལ་པ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་སྐད་ཅིག་ཐང་ཅིག་ཙམ་གྱིས་འཁོར་བ་ཐམས་ཅད་འཇལ་

47-1-302b

དབོག་པ་ནི་བསམ་གྱིས་མི་ཁྱབ་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་བསྐལ་པ་ཚད་མེད་གྲངས་མེད་པའི་བར་དུ་འཁོར་བ་ལ་མི་རྟག་པ་དང་། བདག་མེད་པ་དང་། བདེ་བ་མེད་པ་དང་། 
ཡོངས་སུ་མ་དག་པར་རྟོགས་པས་སེམས་ཅན་རྣམས་ལ་རྟག་པ་དང་། བདེ་བ་དང་། བདག་ཡོད་པ་དང་། ཡོངས་སུ་དག་པ་རྒྱས་པར་འཆད་ཅིང་སྟོན་ཏེ། དེ་ལྟར་སྟོན་ཅིང་འཆད་ཀྱང་ངན་པར་ལྟ་བ་མ་ཡིན་པས་ན་བསམ་
གྱིས་མི་ཁྱབ་པ་ཞེས་བྱའོ། །རིགས་ཀྱི་བུ་དཔེར་ན་ལ་ལ་ཞིག་ཆུར་མཆོངས་ཀྱང་ཆུས་མི་ཁྱེར་ལ། མེ་ཆེན་པོར་མཆོངས་ཀྱང་མེས་མི་ཚིག་ན། དེ་ནི་བསམ་གྱིས་མི་ཁྱབ་པ་ཞེས་བྱ་སྟེ། བྱང་ཆུབ་སེམས་དཔའ་སེམས་
དཔའ་ཆེན་པོ་ཡང་དེ་དང་འདྲ་བར་འཁོར་བའི་ནང་དུ་གནས་ཀྱང་འཁོར་བས་གནོད་པར་མི་འགྱུར་བས་ན་བསམ་གྱིས་མི་ཁྱབ་པ་ཞེས་བྱའོ། །རིགས་ཀྱི་བུ་འདི་ལྟ་སྟེ། དཔེར་ན་མི་ལ་རྣམ་པ་གསུམ་སྟེ། རབ་དང་། 
འབྲིང་དང་། ཐ་མའོ། །དེ་ལ་མིའི་ནང་ན་ཐ་མ་ནི་མངལ་ན་འདུག་པའི་ཚེ་འདི་སྙམ་དུ། བདག་ནི་ཕྱིས་ཁུང་ངམ། མི་གཙང་བའི་གནས་སམ། མི་རོའི་ནང་ངམ། ཚེར་ཁུང་གི་སྟེང་ངམ། མུན་པའི་ནང་ན་གནས་
སོ་སྙམ་སེམས་སོ། །མངལ་ནས་བྱུང་བའི་ཚེ་ཡང་ད་ནི་བདག་གི་ཕྱིས་ཁུང་ངམ། མི་གཙང་བའི་གནས་སམ། མུན་ནག་ཆེན་པོའི་གནས་ལས་བྱུང་ངོ་སྙམ་སེམས་སོ། །དེ་ལ་མིའི་ནང་ན་འབྲིང་ནི་མངལ་ན་འདུག་
པའི་ཚེ་འདི་སྙམ་དུ་བདག་ནི་སྐྱེད་ཤིང་གི་ཚལ་ལམ། ཆུ་གཙང་མའི་ནང་ངམ། ཁང་ཁྱིམ་བཟང་པོའི་ནང་ན་འདུག་གོ་སྙམ་སེམས་ཏེ། བྱུང་བའི་ཚེ་ཡང་དེ་སྙམ་དུ་སེམས་སོ། །དེ་ལ་མིའི་ནང་ན་རབ་ནི་མངལ་ན་འདུག་པའི་ཚེ་
ཡང་འདི་སྙམ་དུ་བདག་ནི་ཡང་ཐོག་བཟང་པོ་འམ། བསྐྱེད་མོས་ཚལ་ལམ། རྟ་འམ། བ་གླང་ངམ། གླང་པོ་ཆེ་ལ་ཞོན་ཏེ་རི་མཐོན་པོ་ལ་འཛེག་གོ་སྙམ་སྟེ། བྱུང་བའི་ཚེ་ཡང་དེ་སྙམ་དུ་སེམས་སོ། །བྱང་ཆུབ་སེམས་

47-1-303a

དཔའ་སེམས་དཔའ་ཆེན་པོ་ནི་ཐོག་མ་མངལ་ན་གནས་པའི་ཚེ་ཡང་གནས་པར་ཤེས། ཕྱིར་བྱུང་བའི་ཚེ་ཡང་བྱུང་བར་ཤེས་ཏེ། འདོད་ཆགས་དང་ཞེ་སྡང་ངང་གི་སེམས་ནམ་དུ་ཡང་མི་འབྱུང་མོད་ཀྱི་ས་ལ་གནས་པ་མ་
ཡིན་པས་ན་བསམ་གྱིས་མི་ཁྱབ་པ་ཞེས་བྱའོ། །རིགས་ཀྱི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་དཔེར་བྱར་མེད་དོ། །རིགས་ཀྱི་བུ་སེམས་ཀྱང་ཕྱོགས་དང་དཔེ་བསྒྲུན་ཅིང་བརྗོད་སླ་བ་མ་ཡིན་ནོ། །བྱང་ཆུབ་སེམས་
དཔའ་སེམས་དཔའ་ཆེན་པོ་ནི་སྟོན་པའི་སློབ་དཔོན་དང་སློབ་མའི་གནས་མེད་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་གྱུར་ཏོ། །དེ་ལྟར་ཆོས་དེ་དག་ཐོས་ནས་འཇུངས་པ་མེད་པའི་སེམས་ཀྱིས་རྟག་ཏུ་
སེམས་ཅན་ལ་སྟོན་ཅིང་འཆད་པས་ན་དེའི་ཕྱིར་ཡང་བསམ་གྱིས་མི་ཁྱབ་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ལུས་ཀྱིས་ཡོངས་སུ་སྤོང་ལ་ངག་གིས་མ་ཡིན་པ་ཡང་ཡོད། ངག་གིས་
ཡོངས་སུ་སྤོང་ལ་ལུས་ཀྱིས་མ་ཡིན་པ་ཡང་ཡོད། ལུས་དང་ངག་མ་ཡིན་པས་ཡོངས་སུ་སྤོང་བ་ཡང་ཡོད་དོ། །ལུས་ཀྱིས་ཡོངས་སུ་སྤོང་བ་ཞེས་བྱ་བ་ནི་སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་
པར་སྤྱོད་པ་སྟེ། ངག་གིས་མ་ཡིན། ངག་གིས་ཡོངས་སུ་སྤོང་བ་ནི་བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་སྨྲ་བ་དང་། ཚིག་ཐུན་ཚགས་སྨྲ་བ་སྟེ། ངག་གིས་ཡོངས་སུ་སྤོང་བ་ཡིན་གྱི། ལུས་ཀྱིས་མ་
ཡིན། ལུས་དང་ངག་མ་ཡིན་པས་ཡོངས་སུ་སྤོང་བ་ནི་འདོད་ཆགས་དང་ཞེ་སྡང་དང་ངན་པར་ལྟ་བའོ། །རིགས་ཀྱི་བུ་དེ་ནི་ལུས་ཀྱང་མ་ཡིན། ངག་ཀྱང་མ་ཡིན་པ་ཡོངས་སུ་སྤོང་བ་ཞེས་བྱའོ། །རིགས་ཀྱི་བུ་བྱང་ཆུབ་
སེམས་དཔའ་སེམས་དཔའ་ཆེན་པོ་ནི་ཆོས་གཅིག་ཙམ་ལ་ཡང་ལུས་ཀྱིས་སམ། ལས་ཀྱིས་སམ། བདག་པོས་ཡོངས་སུ་སྤོང་བར་མི་ལྟ་སྟེ། ཡོངས་སུ་སྤོང་བ་ཡང་ཡོད་པས་དེའི་ཕྱིར་ཡང་བསམ་གྱིས་མི་ཁྱབ་པ་

47-1-303b

ཞེས་བྱ་སྟེ། ངག་ཀྱང་དེ་བཞིན་དུ་རིག་པར་བྱའོ། །རིགས་ཀྱི་བུ་ལུས་ལས་ལུས་ཀྱིས་སྤོང་བ་དང་། ངག་ལས་ངག་གིས་སྤོང་བ་སྟེ། ཤེས་རབ་ཀྱིས་ཡོངས་སུ་སྤོང་བ་ནི་ལུས་ཀྱིས་མ་ཡིན། ངག་གིས་མ་ཡིན་
ནོ། །རིགས་ཀྱི་བུ་ཡང་དག་པར་ན་ཤེས་རབ་འདི་དག་ནི་བྱང་ཆུབ་སེམས་དཔའ་སྤོང་བར་མི་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཆོས་གཅིག་ཙམ་ཡང་འཇིག་པ་འམ། བྱས་པ་མེད་དེ། འདུས་བྱས་པའི་
ཆོས་ཉིད་ནི་ཐ་དད་པས་སྐྱེ་ལ་ཐ་དད་པས་འགོག་སྟེ། དེའི་ཕྱིར་ཤེས་རབ་འདི་ནི་ཡོངས་སུ་སྤོང་བར་མི་འགྱུར་རོ། །རིགས་ཀྱི་བུ་ཤེས་རབ་ཀྱིས་འཇིག་པར་མི་ནུས། མེས་ཚིག་པར་མི་ནུས། ཆུས་འདྲུལ་བར་མི་ནུས། རླུང་
གིས་ཁྱེར་བར་མི་ནུས། སས་འཛིན་པར་མི་ནུས། སྐྱེ་བས་བསྐྱེད་པར་མི་ནུས། རྒ་བས་རྒས་པར་མི་ནུས། གནས་པས་གནས་པར་མི་ནུས། འཇིག་པས་འཇིག་པར་མི་ནུས། འདོད་པས་འདོད་པར་མི་ནུས། 
ཞེ་སྡང་བས་ཞེ་སྡང་བར་མི་ནུས། གཏི་མུག་པས་རྨུགས་པར་མི་ནུས་ཏེ། འདུས་བྱས་ཀྱི་རང་བཞིན་གྱིས་ཐ་དད་པས་འགོག་གོ། །བྱང་ཆུབ་སེམས་དཔའ་སེམས་དཔའ་ཆེན་པོས་འདི་སྙམ་དུ་བདག་གི་ཤེས་
རབ་འདིས་ཉོན་མོངས་པ་ཐམས་ཅད་བཅོམ་མོ་སྙམ་མི་སེམས་ཏེ། བདག་གིས་ཉོན་མོངས་པ་ཐམས་ཅད་བཅོམ་མོ་ཞེས་སྨྲའོ། །ཅི་སྟེ་དེ་སྐད་ཅེས་སྨྲས་ཀྱང་བརྫུན་དུ་སྨྲ་བ་མ་ཡིན་ཏེ། དེ་བས་ན་བསམ་གྱིས་མི་
ཁྱབ་པ་ཞེས་བྱའོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་རྩ་ལྔ་པ། དེ་ནས་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས་བདག་གིས་དེང་གདོད་བྱང་ཆུབ་སེམས་དཔའ་ཆེན་པོ་བསམ་གྱིས་མི་ཁྱབ་པ་དང་། སངས་རྒྱས་དང་ཆོས་དང་དགེ་འདུན་དང་། ཡོངས་སུ་མྱ་ངན་ལས་འདས་པ་ཆེན་པོའི་མདོ་དང་། དེ་གཟུངས་སུ་འཛིན་པ་དང་། 

47-1-304a

བྱང་ཆུབ་དང་། མྱ་ངན་ལས་འདས་པ་བསམ་གྱིས་མི་ཁྱབ་པར་འཚལ་ཏོ། །བཅོམ་ལྡན་འདས་བླ་ན་མེད་པའི་སངས་རྒྱས་ཀྱི་ཆོས་ཇི་ཙམ་གྱི་བར་དུ་གནས། ཇི་ཙམ་ན་ནུབ་པར་འགྱུར། རིགས་ཀྱི་བུ་ཡོངས་སུ་
མྱ་ངན་ལས་འདས་པ་ཆེན་པོའི་མདོ་ལ་སྤྱོད་པ་རྣམ་པ་ལྔ་ཡོད་དེ། འདི་ལྟ་སྟེ། འཕགས་པའི་སྤྱོད་པ་དང་། ཚངས་པའི་སྤྱོད་པ་དང་། ལྷའི་སྤྱོད་པ་དང་། ན་བའི་སྤྱོད་པ་དང་། བུས་པའི་སྤྱོད་པའོ། །གལ་ཏེ་ངའི་ཉེ་གནས་
རྣམས་ལས་གང་གཟུངས་སུ་འཛིན་ཅིང་ཀློག་པ་དང་། འདོན་པ་དང་། ཡི་གེར་འདྲི་བ་དང་། དོན་དགྲོལ་བར་བྱེད་ཅིང་སེམས་ཅན་རྣམས་སྟི་སྟང་དང་། བཀུར་བསྟི་དང་། རིམ་གྲོ་དང་། བསྔགས་པ་དང་། མཆོད་པ་རྣམ་པ་
སྣ་ཚོགས་ཀྱིས་མཆོད་པར་ནུས་ན་དེའི་ཚེ་སངས་རྒྱས་ཀྱི་ཆོས་ནུབ་པ་མ་ཡིན་པར་རིག་པར་བྱའོ། །རིགས་ཀྱི་བུ་གལ་ཏེ་མྱ་ངན་ལས་འདས་པའི་མདོ་འདི་རྒྱས་པར་སྤེལ་ལ་དེའི་དུས་ན་ངའི་ཉེ་གནས་རྣམས་ཚུལ་ཁྲིམས་སྡོམ་པ་
བཤིག་པ་མང་ལ་མི་དགེ་བ་མང་དུ་བྱེད་དེ་མདོ་སྡེ་འདི་ལ་དད་པར་མི་བྱེད། དེ་ལྟར་མ་དད་པའི་ཕྱིར་འཛིན་པ་དང་། ཀློག་པ་དང་། འདོན་པ་དང་། ཡི་གེ་འདྲི་བ་དང་། དོན་དགྲོལ་བར་མི་བྱེད་དེ། སྐྱེ་བོ་མང་པོ་བཀུར་སྟི་དང་མཆོད་
པའི་བར་དུ་བྱེད་པར་མི་འགྱུར་ལ། གཟུངས་སུ་འཛིན་པ་མཐོང་ན་སྨོད་ཅིང་ཁྱོད་ནི་སྟོན་པ་དྲུག་གིས་བསྟན་པ་ལ་འདུག་པ་ཡིན་གྱི་སངས་རྒྱས་ཀྱི་ཉེ་གནས་མ་ཡིན་ནོ་ཞེས་སྐུར་པ་དེའི་ཚེ་ན་སངས་རྒྱས་ཀྱི་ཆོས་རིང་པོ་མི་ཐོགས་
པར་ནུབ་པར་འགྱུར་བར་རིག་པར་བྱའོ། །ཡང་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བཅོམ་ལྡན་འདས་ལས་མངོན་སུམ་དུ་སངས་རྒྱས་འོད་
སྲུང་གི་ཆོས་འཇིག་རྟེན་དུ་ཞག་བདུན་གནས་ནས་ནུབ་བོ་ཞེས་གསུངས་པ་ཐོས་སོ། །བཅོམ་ལྡན་འདས་དེ་བཞིན་གཤེགས་པ་འོད་སྲུང་ལ་མདོ་སྡེ་འདི་མངའ་འམ་མི་མངའ། དེ་སྟེ་མངའ་བ་ཞིག་ན་ཅིའི་སླད་དུ་ནུབ་

47-1-304b

ཅེས་གསུངས། ཅི་སྟེ་མི་མངའ་ན་ཅིའི་སླད་དུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ནི་དེ་བཞིན་གཤེགས་པ་ཐམས་ཅད་ཀྱི་གསང་བའི་སྙིང་པོ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་
སྔར་ཡང་དོན་འདི་ནི་འཇམ་དཔལ་གཞོན་ནུ་འབའ་ཞིག་གིས་ཤེས་སོ་ཞེས་གསུངས་ཏེ། དེ་ཡང་བཟླས་ཏེ་བཤད་ཀྱིས་ཤིན་ཏུ་ཡིད་ལ་བྱས་ཏེ་བརྟགས་པར་ཉོན་ཅིག །རིགས་ཀྱི་བུ་སངས་རྒྱས་རྣམས་ལ་ཆོས་རྣམ་པ་གཉིས་
མངའ་སྟེ། ཀུན་རྫོབ་དང་། དོན་དམ་པའོ། །ཀུན་རྫོབ་ཀྱི་ཆོས་འགོག་གོ། །དོན་དམ་པའི་ཆོས་ནི་མི་འཇིག་མི་འགོག་གོ། །དེ་ཡང་རྣམ་པ་གཉིས་ཏེ། མི་རྟག་པ། བདག་མེད་པ། བདེ་བ་མེད་པ། ཡོངས་སུ་དག་པ་མེད་པ་དང་། 
རྟག་པ། བདེ་བ། བདག་ཡོངས་སུ་དག་པའོ། །དེ་ལ་མི་རྟག་པ་དང་། བདག་མེད་པ་དང་། བདེ་བ་མེད་པ་དང་ཡོངས་སུ་དག་པ་མེད་པ་ནི་འཇིག་པ་དང་འགོག་པ་ཡོད་དོ། །རྟག་པ་དང་། བདེ་བ་དང་། བདག་དང་། ཡོངས་སུ་དག་
པ་ནི་འཇིག་པ་དང་འགོག་པ་མེད་དོ། །ཡང་རྣམ་པ་གཉིས་ཏེ། ཐེག་པ་གཉིས་ཀྱིས་འཛིན་པ་དང་། བྱང་ཆུབ་སེམས་དཔས་འཛིན་པའོ། །དེ་ལ་ཐེག་པ་གཉིས་ཀྱིས་འཛིན་པ་ནི་འཇིག་པ་དང་འགོག་པ་ཡོད་དོ། །བྱང་ཆུབ་
སེམས་དཔས་འཛིན་པ་ནི་འཇིག་པ་དང་འགོག་པ་མེད་དོ། །ཡང་རྣམ་པ་གཉིས་ཏེ། ནང་དང་། ཕྱི་རོལ་ལོ། །དེ་ལ་ཕྱི་རོལ་གྱི་ཆོས་ནི་འཇིག་པ་དང་འགོག་པ་ཡོད་དོ། །ནང་གི་ཆོས་ནི་འཇིག་པ་དང་འགོག་པ་མེད་དོ། །ཡང་རྣམ་པ་
གཉིས་ཏེ། འདུས་བྱས་དང་། འདུས་མ་བྱས་སོ། །དེ་ལ་འདུས་བྱས་ཀྱི་ཆོས་ནི་འཇིག་པ་དང་འགོག་པའོ། །འདུས་མ་བྱས་ཀྱིས་ཆོས་ནི་འཇིག་པ་དང་འགོག་པ་མེད་པའོ། །ཡང་རྣམ་པ་གཉིས་ཏེ། དམིགས་སུ་ཡོད་པ་དང་། 
དམིགས་སུ་མེད་པའོ། །དེ་ལ་དམིགས་སུ་ཡོད་པའི་ཆོས་ནི་འཇིག་པ་དང་འགོག་པའོ། །དམིགས་སུ་མེད་པའི་ཆོས་ནི་འཇིག་པ་དང་འགོག་པ་མེད་པའོ། །ཡང་རྣམ་པ་གཉིས་ཏེ། འདྲེས་པའི་ཆོས་དང་མ་འདྲེས་པའི་

47-1-305a

ཆོས་སོ། །དེ་ལ་འདྲེས་པའི་ཆོས་ནི་འཇིག་པ་དང་འགོག་པའོ། །མ་འདྲེས་པའི་ཆོས་ནི་འཇིག་པ་དང་འགོག་པ་མེད་པའོ། །ཡང་རྣམ་པ་གཉིས་ཏེ། ལྷ་དང་། མིའོ། །དེ་ལ་མི་ནི་འཇིག་པ་དང་འགོག་པའོ། །ལྷ་ནི་འཇིག་པ་དང་འགོག་
པ་མེད་པའོ། །ཡང་རྣམ་པ་གཉིས་ཏེ། མདོ་སྡེ་བཅུ་གཅིག་དང་། ཤིན་ཏུ་རྒྱས་པའི་མདོ་སྡེའོ། །དེ་ལ་མདོ་སྡེ་བཅུ་གཅིག་ནི་འཇིག་པ་དང་འགོག་པའོ། །ཤིན་ཏུ་རྒྱས་པའི་མདོ་སྡེ་ནི་འཇིག་པ་དང་འགོག་པ་མེད་པ་སྟེ། རིགས་ཀྱི་བུ་གལ་
ཏེ་ངའི་ཉེ་གནས་གང་ཤིན་ཏུ་རྒྱས་པའི་མདོ་སྡེ་གཟུངས་སུ་འཛིན་ཅིང་ཀློག་གམ། འདོན་ཏམ། ཡི་གེར་འདྲི་འམ། འགྲོལ་ཞིང་བཤད་དམ། བཀུར་སྟི་དང་། རིམ་གྲོ་དང་། མཆོད་པ་བྱེད་ན། དེའི་ཚེ་སངས་རྒྱས་ཀྱི་ཆོས་ནུབ་པ་མ་ཡིན་
པར་རིག་པར་བྱའོ། །རིགས་ཀྱི་བུ་ཁྱོད་ཀྱིས་གོང་དུ་དེ་བཞིན་གཤེགས་པ་འོད་སྲུང་ལ་མདོ་སྡེ་འདི་ཡོད་དམ་ཞེས་དྲིས་པ་ནི་རིགས་ཀྱི་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ནི་དེ་བཞིན་གཤེགས་པ་ཐམས་ཅད་ཀྱིས་དགོངས་ཏེ་
གསུངས་པའི་སྙིང་པོའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་རྣམས་མདོ་སྡ་བཅུ་གཅིག་མངའ་མོད་ཀྱི་དེ་དག་ལ་སངས་རྒྱས་ཀྱི་རང་བཞིན་དང་། དེ་བཞིན་གཤེགས་པའི་རྟག་པ་དང་བདེ་བ་དང་བདག་དང་ཡོངས་སུ་དག་པ་མི་འཆད་ན། 
སངས་རྒྱས་བཅོམ་ལྡན་འདས་རྣམས་མཐའ་ཡུན་དུ་མྱ་ངན་ལས་མི་འདའ་བས། དེའི་ཕྱིར་མདོ་སྡེ་འདི་ནི་དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་ཞེས་བྱའོ། །མདོ་སྡེ་བཅུ་གཅིག་ལས་མི་འཆད་པས་སྙིང་པོ་ཞེས་
བྱ་སྟེ། ཇི་ལྟར་རིན་པོ་ཆེ་སྣ་བདུན་བདོག་པའི་ཕྱི་རོལ་ཏུ་མི་སྤྱོད་པའི་ཕྱིར་གཏེར་ཞེས་བྱ་སྟེ་རིགས་ཀྱི་བུ་མི་དེས་གཏེར་དུ་བསགས་ཤིང་སྦས་པ་དེ་ཡང་མ་འོངས་པ་ན་དགོས་པའི་ཕྱིར་ཏེ། དེ་ལ་མ་འོངས་པ་ན་དགོས་པ་ནི་འདི་ལྟ་སྟེ་ཁྲེ་
འབྲས་དཀོན་པ་དང་། བདག་གི་ཡུལ་དུ་དགྲ་འོང་བ་དང་། རྒྱལ་པོ་ངན་པ་དང་ཕྲད་པའི་ཚེ་སྲོག་བླུ་བ་དང་། འདྲོན་དུ་སོང་བ་ལས་ཉམ་ང་བ་དང་ཕྲད་པ་དང་། ནོར་དཀོན་པའི་ཚེ་འདོད་ཕྱུང་ཞིང་སྤྱོད་དོ། །རིགས་ཀྱི་བུ་དེ་བཞིན་གཤེགས་

47-1-305b

པ་རྣམས་ཀྱིས་དགོངས་ཏེ་གསུངས་པའི་སྙིང་པོ་ཡང་དེ་དང་འདྲ་སྟེ། མ་འོངས་པའི་དུས་ཀྱི་དགེ་སློང་ངན་པ་མ་བརྟགས་པའི་རྫས་འཆང་བས། འཁོར་རྣམ་བཞི་ལ་དེ་བཞིན་གཤེགས་པ་ནི་མཐའ་ཡུན་དུ་མྱ་ངན་ལས་འདས་སོ་ཞེས་སྟོན་
པ། འཇིག་རྟེན་གྱི་གཙུག་ལག་ཀློག་ཅིང་འདོན་ཀྱི། སངས་རྒྱས་གཞུང་ལ་མི་བཀུར་བ་དེ་ལྟ་བུ་ལ་སོགས་པའི་ངན་པ་འཇིག་རྟེན་དུ་བྱུང་བ་ན། དེ་བཞིན་གཤེགས་པས་ངན་པ་དེ་དག་མེད་པར་མཛད་ཅིང་ལོག་པའི་འཚོ་བ་དང་། རྙེད་
པ་དང་། གྲགས་པ་སྤོང་བར་མཛད་པའི་ཕྱིར་མདོ་སྡེ་འདི་གསུངས་སོ། །གལ་ཏེ་མདོ་སྡེ་དགོངས་ཏེ་གསུངས་པའི་སྙིང་པོ་འདི་ནུབ་ཅིང་མི་སྣང་བར་འགྱུར་བ་ན་སངས་རྒྱས་ཀྱི་ཆོས་ཀྱང་ནུབ་པར་འགྱུར་བར་རིག་པར་བྱའོ། །རིགས་ཀྱི་བུ་
མྱ་ངན་ལས་འདས་པ་ཆེན་པོའི་མདོ་ནི་རྟག་པ་མི་འགྱུར་མི་འཕོ་བ་ཡིན་ན་ཅི་སྟེ་འདི་སྐད་དུ་བཅོམ་ལྡན་འདས་འོད་སྲུང་ལ་མདོ་སྡེ་འདི་ཡོད་དམ་ཞེས་འདྲི། རིགས་ཀྱི་བུ་བཅོམ་ལྡན་འདས་འོད་སྲུང་གི་ཚེའི་སེམས་ཅན་ནི་འདོད་ཆགས་
སྲབ་ཅིང་ཤེས་རབ་དང་ལྡན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཤ་སྟག་ལ་ཞི་བ། དུལ་བ། གདུལ་སླ་བ། གཟི་བརྗིད་ཆེན་པོ་དང་ལྡན་ཏེ། གཟུངས་མི་བརྗིད་པ་བ་གླང་གི་ཁྱུ་མཆོག་དང་མཚུངས་པ། འཇིག་རྟེན་
གྱི་ཁམས་ཡོངས་སུ་དག་པ། སེམས་ཅན་ཐམས་ཅད་ཀྱིས་དེ་བཞིན་གཤེགས་པ་ནི་མཐའ་ཡུན་དུ་ཡོངས་སུ་མྱ་ངན་ལས་མི་འདའ་ཞིང་རྟག་ཏུ་གནས་པ། མི་འགྱུར་མི་འཕོ་བར་ཤེས་པས། མདོ་སྡེ་འདི་ཡོད་དུ་ཟིན་ཀྱིས་ཀྱང་སྟོན་
ཅིང་བཤད་མི་དགོས་སོ། །རིགས་ཀྱི་བུ་ད་ལྟར་གྱི་དུས་ཀྱི་སེམས་ཅན་ནི་ཉོན་མོངས་པ་མང་ཞིང་། གཏི་མུག་ཆེ་བས་བརྗེད་ངས་ལ། ཤེས་རབ་མེད་ཅིང་། ནེམ་ནུར་མེད་པ་དད་པའི་རྩ་བ་མི་ཚུགས་ཏེ་འཇིག་རྟེན་གྱི་ཁམས་མ་དག་
པས། སེམས་ཅན་ཐམས་ཅད་ཀྱང་འདི་སྐད་དུ་དེ་བཞིན་གཤེགས་པ་ནི་མི་རྟག་པ། འགྱུར་ཞིང་འཕོ་བ་སྟེ། མཐའ་ཡུན་དུ་ཡོངས་སུ་མྱ་ངན་ལས་འདས་པའོ་ཞེས་ཟེར་ཏེ། དེ་བས་ན་དེ་བཞིན་གཤེགས་པས་

47-1-306a

མདོ་སྡེ་འདི་གསུངས་སོ། །རིགས་ཀྱི་བུ་སངས་རྒྱས་འོད་སྲུང་གི་ཆོས་ནི་ཡང་དག་པར་ནུབ་པ་མ་ཡིན་ནོ། །དེ་ཅིའི་ཕྱིར་ཞེ་ན། རྟག་པ་མི་འགྱུར་མི་འཕོ་བའི་ཕྱིར་རོ། །རིགས་ཀྱི་བུ་གལ་ཏེ་སེམས་ཅན་གང་
བདག་ཡོད་པ་ལ་བདག་མེད་པར་ལྟ་བ་དང་། བདག་མེད་པ་ལ་བདག་ཡོད་པར་ལྟ་བ་དང་། རྟག་པ་ལ་མི་རྟག་པར་ལྟ་བ་དང་། མི་རྟག་པ་ལ་རྟག་པར་ལྟ་བ་དང་། བདེ་བ་ལ་མི་བདེ་བར་ལྟ་བ་དང་། མི་བདེ་བ་ལ་བདེ་
བར་ལྟ་བ་དང་། ཡོངས་སུ་དག་པ་ལ་ཡོངས་སུ་མ་དག་པར་ལྟ་བ་དང་། ཡོངས་སུ་མ་དག་པ་ལ་ཡོངས་སུ་དག་པར་ལྟ་བ་དང་། མི་འགོག་པ་ལ་འགོག་པར་ལྟ་བ་དང་། འགོག་པ་ལ་མི་འགོག་པར་ལྟ་བ་དང་། སྡིག་
པ་ལ་མི་སྡིག་པར་ལྟ་བ་དང་། མི་སྡིག་པ་ལ་སྡིག་པར་ལྟ་བ་དང་། སྡིག་པ་ཡང་བ་ལ་ལྕི་བར་ལྟ་བ་དང་། སྡིག་པ་ལྕི་བ་ལ་ཡང་བར་ལྟ་བ་དང་། ཐེག་པ་ལ་ཐེག་པ་མ་ཡིན་པར་ལྟ་བ་དང་། ཐེག་པ་མ་ཡིན་པ་ལ་ཐེག་པར་
ལྟ་བ་དང་། ལམ་ཡིན་པ་ལ་ལམ་མ་ཡིན་པར་ལྟ་བ་དང་། ལམ་མ་ཡིན་པ་ལ་ལམ་ཡིན་པར་ལྟ་བ་དང་། བྱང་ཆུབ་ཡང་དག་པ་ལ་བྱང་ཆུབ་མ་ཡིན་པར་ལྟ་བ་དང་། བྱང་ཆུབ་མ་ཡིན་པ་ལ་བྱང་ཆུབ་ཏུ་ལྟ་བ་དང་། 
སྡུག་བསྔལ་ལ་སྡུག་བསྔལ་མ་ཡིན་པར་ལྟ་བ་དང་། སྡུག་བསྔལ་མ་ཡིན་པ་ལ་སྡུག་བསྔལ་དུ་ལྟ་བ་དང་། ཀུན་འབྱུང་ལ་ཀུན་འབྱུང་བ་མ་ཡིན་པར་ལྟ་བ་དང་། འགོག་པ་ལ་འགོག་པ་མ་ཡིན་པར་ལྟ་བ་དང་། 
བདེན་པ་ལ་བདེན་པ་མ་ཡིན་པར་ལྟ་བ་དང་། ཀུན་རྫོབ་ལ་དོན་དམ་པར་ལྟ་བ་དང་། དོན་དམ་པ་ལ་ཀུན་རྫོབ་དུ་ལྟ་བ་དང་། སྐྱབས་སུ་འགྲོ་བ་ལ་སྐྱབས་སུ་འགྲོ་བ་མ་ཡིན་པར་ལྟ་བ་དང་། སྐྱབས་སུ་འགྲོ་བ་མ་
ཡིན་པ་ལ་སྐྱབས་སུ་འགྲོ་བར་ལྟ་བ་དང་། སངས་རྒྱས་ཀྱི་བཀའ་ཡང་དག་པ་ལ་ནི་བདུད་ཀྱི་ཚིག་ཅེས་ཟེར་བ་དང་། བདུད་ཀྱི་ཚིག་ཡང་དག་པ་ལ་ནི་སངས་རྒྱས་ཀྱི་བཀའ་ཞེས་ཟེར་བ་དེ་ལྟ་བུའི་དུས་ན་དེ་བཞིན་

47-1-306b

གཤེགས་པ་རྣམས་ཀྱིས་གདོད་ཡོངས་སུ་མྱ་ངན་ལས་འདས་པའི་མདོ་འདི་གསུང་ངོ་། །རིགས་ཀྱི་བུ་སྦྲང་བུ་མཆུ་སྨྱུང་གི་མཆུས་རྒྱ་མཚོའི་གཏིང་དུ་མ་ལུས་པར་ཐུག་ཅེས་ཟེར་བ་སླའི། དེ་བཞིན་གཤེགས་
པའི་ཆོས་ནུབ་བོ་ཞེས་མི་བྱའོ། །རླུང་དྲག་པོ་ལ་ཞགས་པས་བཅིང་དུ་རུང་ཞེས་ཟེར་བ་ཡང་སླའི། དེ་བཞིན་གཤེགས་པའི་ཆོས་ནུབ་བོ་ཞེས་མི་བྱའོ། །རི་རབ་རིའི་རྒྱལ་པོ་ལ་ཁའི་དབུགས་ཀྱིས་བུས་ཏེ་ཞིག་
ཅིང་འགྱེས་ཟེར་ཀྱང་སླའི། དེ་བཞིན་གཤེགས་པའི་ཆོས་ནུབ་བོ་ཞེས་མི་བྱའོ། །མེ་ཁབ་ཏ་ལ་ཞེས་བྱ་བའི་ནང་ན་པད་མོ་སྐྱེའོ་ཞེས་ཟེར་ཀྱང་སླའི། དེ་བཞིན་གཤེགས་པའི་ཆོས་ནུབ་བོ་ཞེས་མི་བྱའོ། །སྨན་
ཨ་ཀ་ཊ་དུག་ཏུ་འགྱུར་རོ་ཞེས་ཟེར་ཀྱང་སླའི། དེ་བཞིན་གཤེགས་པའི་ཆོས་ནུབ་བོ་ཞེས་མི་བྱའོ། །ཟླ་བ་ནི་ཚ་ལ་ཉི་མ་ནི་བསིལ་ཞེས་ཟེར་ཡང་སླའི། དེ་བཞིན་གཤེགས་པའི་ཆོས་ནུབ་བོ་ཞེས་མི་བྱའོ། །
ཆེན་པོ་བཞི་སོ་སོའི་རང་བཞིན་སྤོང་ཞེས་ཟེར་ཡང་སླའི། དེ་བཞིན་གཤེགས་པའི་ཆོས་ནུབ་བོ་ཞེས་མི་བྱའོ། །རིགས་ཀྱི་བུ་གལ་ཏེ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་
དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་མེད་པར་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་ན་ཆོས་དེ་འཇིག་རྟེན་ན་རིང་པོ་མི་གནས་པར་རིག་པར་བྱའོ། །གཞན་
ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་རྣམས་ཡོད་ན་དེ་བཞིན་གཤེགས་པ་ཡོངས་སུ་མྱ་ངན་ལས་
འདས་སུ་ཟིན་ཀྱང་ཆོས་འཇིག་རྟེན་ན་ཡུན་དུ་གནས་པར་འགྱུར་བར་རིག་པར་བྱའོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་

47-1-307a

ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ཡོད་དུ་ཟིན་ཀྱང་ཁྱིམ་པ་དད་པས་སངས་རྒྱས་ཀྱི་ཆོས་ལ་བཀུར་བའི་དགེ་བསྙེན་མེད་པར་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པར་གྱུར་ན། ཆོས་འཇིག་རྟེན་དུ་རིང་པོ་
མི་གནས་པར་རིག་པར་བྱའོ། །གཞན་ཡང་རིགས་ཀྱི་བུ་གལ་ཏེ་སངས་རྒྱས་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ཀྱང་ཡོད། ཁྱིམ་པ་དད་པ་ཅན་སངས་
རྒྱས་ཀྱི་ཆོས་ལ་བཀུར་བའི་དགེ་བསྙེན་ཡང་ཡོད་ན་དེ་བཞིན་གཤེགས་པ་མྱ་ངན་ལས་འདས་སུ་ཟིན་ཀྱང་ཆོས་ཡུན་དུ་འཇིག་རྟེན་ན་གནས་པར་འགྱུར་རོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས། བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ཀྱང་ཡོད། ཁྱིམ་པ་དད་པ་ཆེ་བ་སངས་རྒྱས་ཀྱི་ཆོས་ལ་བཀུར་བའི་དགེ་བསྙེན་ཡོད་དུ་ཟིན་གྱིས་ཀྱང་ཉེ་གནས་རྣམས་ཀྱིས་མྱ་ངན་ལས་འདས་པའི་ཕྱིར་ནི་
མ་ཡིན་གྱི། རྙེད་པ་དང་གྲགས་པའི་ཕྱིར་མདོ་སྡེ་ཟབ་མོ་སྟོན་ལ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པར་གྱུར་ན་ཆོས་དེ་འཇིག་རྟེན་ན་རིང་པོར་མི་གནས་པར་རིགས་པར་བྱའོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་
ཐོག་མ་བྱུང་ནས། བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ཀྱང་ཡོད། ཁྱིམ་པ་ཤིན་ཏུ་དད་པ་སངས་རྒྱས་ཀྱི་ཆོས་ལ་བཀུར་བའི་དགེ་བསྙེན་ཡང་ཡོད་ལ། ཉེ་གནས་རྣམས་ཀྱིས་
སྟོན་ཅིང་བཤད་པ་ཡང་རྙེད་པ་དང་། གྲགས་པའི་ཕྱིར་ནི་མ་ཡིན་གྱི། མྱ་ངན་ལས་འདས་པ་ཚོལ་བའི་ཕྱིར་སྟོན་ན་དེ་བཞིན་གཤེགས་པ་མྱ་ངན་ལས་འདས་སུ་ཟིན་ཀྱང་དེའི་ཆོས་འཇིག་རྟེན་ན་ཡུན་དུ་གནས་པར་འགྱུར་བར་རིག་པར་བྱའོ། །
གཞན་ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོག་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ཀྱང་ཡོད། ཁྱིམ་པ་ཤིན་ཏུ་དད་པ་སངས་རྒྱས་ཀྱི་ཆོས་ལ་

47-1-307b

བཀུར་བའི་དགེ་བསྙེན་ཡོད་དུ་ཟིན་ཀྱང་། ཉེ་གནས་རྣམས་གཅིག་གིས་གཅིག་སྨད་ཅིང་རྩོད་པ་མང་ལ། དེ་བཞིན་གཤེགས་པ་ཡང་མྱ་ངན་ལས་འདས་པར་གྱུར་ན་ཆོས་དེ་འཇིག་རྟེན་ན་རིང་པོ་མི་གནས་པར་རིག་པར་བྱའོ། །གཞན་ཡང་
རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ནི་ཡོད། ཁྱིམ་པ་ཤིན་ཏུ་དད་པ་སངས་རྒྱས་ཀྱི་ཆོས་ལ་བཀུར་བའི་དགེ་བསྙེན་
ཡང་ཡོད་ལ། ཉེ་གནས་དེ་དག་ཀྱང་འདུམ་པའི་ཆོས་སྤྱོད་ཅིང་གཅིག་ལ་གཅིག་མི་སྨོད་པར་གཅིག་གིས་གཅིག་བཀུར་ན་དེ་བཞིན་གཤེགས་པ་ཡོངས་སུ་མྱ་ངན་ལས་འདས་སུ་ཟིན་ཀྱང་དེའི་ཆོས་ཡུན་རིང་དུ་འཇིག་རྟེན་ན་གནས་པར་འགྱུར་
བར་རིག་པར་བྱའོ། །གཞན་ཡང་རིགས་ཀྱི་བུ་གལ་ཏེ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་ཉེ་གནས་ཀྱང་ཡོད། ཁྱིམ་པ་ཤིན་
ཏུ་དད་པ་སངས་རྒྱས་ཀྱི་ཆོས་ལ་བཀུར་བའི་དགེ་བསྙེན་ཀྱང་ཡོད་ལ། ཉེ་གནས་དེ་དག་མྱ་ངན་ལས་འདས་པ་ཆེན་པོའི་ཕྱིར་ཆོས་སྟོན་ཅིང་གཅིག་ལ་གཅིག་བཀུར་སྟིར་བྱེད་དེ། རྩོད་པར་མི་བྱེད་མོད་ཀྱི། མ་བརྟགས་པའི་རྫས་
རྣམས་འཆང་ལ། ཡང་བདག་གིས་འདི་སྐད་དུ་བདག་ནི་རྒྱུན་ཏུ་ཞུགས་པའི་འབྲས་བུ་ནས་དགྲ་བཅོམ་པའི་འབྲས་བུའི་བར་དུ་ཐོབ་པར་གྱུར་ཏོ་ཞེས་བསྔགས་ལ། དེ་བཞིན་གཤེགས་པ་ཡང་མྱ་ངན་ལས་འདས་པར་གྱུར་ན། 
དེའི་ཆོས་འཇིག་རྟེན་ན་རིང་པོ་མི་གནས་པར་རིག་པར་བྱའོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་དོན་ཟབ་མོ་ཤེས་པའི་
ཉེ་གནས་ཀྱང་ཡོད། ཁྱིམ་བདག་དད་པ་སངས་རྒྱས་ཀྱི་ཆོས་ལ་བཀུར་བའི་དགེ་བསྙེན་ཡང་ཡོད་ལ། ཉེ་གནས་དེ་དག་ཀྱང་ཡོངས་སུ་མྱ་ངན་ལས་འདས་པ་ཆེན་པོའི་ཕྱིར་མདོ་སྡེ་ལ་སོགས་པ་སྟོན་ཏེ། འདུམ་པའི་ཆོས་སྤྱོད་ཅིང་

47-1-308a

གཅིག་ལ་གཅིག་བཀུར་ཞིང་སྟི་སྟང་བྱེད། མ་བརྟགས་པའི་རྫས་ཐམས་ཅད་མི་འཆང་ལ། བདག་ཉིད་ཀྱིས་རྒྱུན་ཏུ་ཞུགས་པའི་འབྲས་བུ་ཐོབ་བོ་ཞེས་བྱ་བ་ནས་དགྲ་བཅོམ་པའི་འབྲས་བུའི་བར་དུ་ཡང་འཐོབ་བོ་ཞེས་མི་
ཟེར་ན། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་སུ་ཟིན་ཀྱང་དེའི་ཆོས་འཇིག་རྟེན་ན་ཡུན་རིང་དུ་གནས་པར་རིག་པར་བྱའོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་
བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་ཉེ་གནས་རྣམས་དོན་ཟབ་མོ་ཤེས་པ་ནས་དགྲ་བཅོམ་པ་ཐོབ་བོ་ཞེས་བྱ་བའི་བར་དུ་མི་ཟེར་ཡང་སོ་སོ་ནས་ལྟ་བ་རེ་རེ་འཛིན་ཏེ། འདི་སྐད་དུ་ཐ་དད་པ་རྣམ་པ་སྣ་ཚོགས་
འཆད་དོ། །ཚེ་དང་ལྡན་པ་རྣམས་བཅོམ་ལྡན་འདས་ཀྱིས་ལྕི་བ་བཞི་ནས་རྩོད་པ་ཞི་བའི་ཆོས་བདུན་པོའི་བར་དུ་བཅས་པ་དེ་དག་ཀྱང་སེམས་ཅན་རྣམས་ཀྱི་ཕྱིར་སྡོམ་པ་དང་། སྐབས་དབྱེ་བ་ཡང་ཡོད་དོ། །མདོ་སྡེ་བཅུ་གཉིས་
ཀྱང་དེ་དང་འདྲའོ། །དེ་ཅིའི་ཕྱིར་ཞེ་ན། བཅོམ་ལྡན་འདས་ཀྱི་ཡུལ་དང་དུས་དད་ཅིང་སེམས་ཅན་གྱི་དབང་པོ་རྣོ་རྟུལ་ཁྱད་པར་དུ་གྱུར་པ་མཁྱེན་ཏེ་དེ་བས་ན་དེ་བཞིན་གཤེགས་པས་ཁ་ཅིག་ཏུ་ནི་བསྡམས། ཁ་ཅིག་ཏུ་ནི་སྐབས་
ཕྱེ་སྟེ་ལྕི་བ་དང་ཡང་བ་གསུངས་སོ། །རིགས་ཀྱི་བུ་དཔེར་ན་སྨན་པ་མཁས་པས་ནད་པ་ལ་འོ་མ་གཏོང་བ་དང་། ནད་པ་ལ་བཀག་པ་བཞིན་ཏེ། མཁྲིས་པའི་ནད་ལ་ནི་འོ་མ་གཏོང་། བད་ཀན་གྱི་ནད་ལ་ནི་འོ་མ་བཀག་གོ། །
དེ་བཞིན་དུ་དེ་བཞིན་གཤེགས་པ་ཡང་སེམས་ཅན་རྣམས་ཀྱི་ཉོན་མོངས་པའི་རྩ་བ་ལ་གཟིགས་ཏེ། ཕྱེ་བ་ཡང་ཡོད། དགག་པ་ཡང་ཡོད་དོ། །ཚེ་དང་ལྡན་པ་རྣམས་བདག་གིས་འདི་བཞིན་དུ་བཅོམ་ལྡན་ལྡན་འདས་ལས་དོན་
འདི་ཐོས་ཏེ། བདག་འབའ་ཞིག་དོན་ཤེས་ཀྱི་ཁྱེད་མི་ཤེས་སོ། །བདག་འབའ་ཞིག་འདུལ་བ་ཤེས་ཀྱི་ཁྱེད་མི་ཤེས་སོ། །བདག་མདོ་སྡེ་རྣམས་ཤེས་ཀྱི་ཁྱེད་མི་ཤེས་སོ་ཞེས་ཟེར་ལ། སངས་རྒྱས་བཅོམ་ལྡན་འདས་དེ་ཡང་

47-1-308b

ཡོངས་སུ་མྱ་ངན་ལས་འདས་ན་དེའི་ཆོས་འཇིག་རྟེན་ན་རིང་པོ་མི་གནས་པར་རིག་པར་བྱའོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་ཐོག་མ་བྱུང་ནས་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་ཐོབ་མ་ཐག་ཏུ་
ཉེ་གནས་རྣམས་ཀྱིས་བདག་རྒྱུན་ཏུ་ཞུགས་པ་ཐོབ་བོ་ཞེས་བྱ་བ་ནས་དགྲ་བཅོམ་པའི་བར་དུ་ཐོབ་ཞེས་ཀྱང་མི་ཟེར་ལ། སངས་རྒྱས་བཅོམ་ལྡན་འདས་རྣམས་ཀྱིས་སེམས་ཅན་གྱི་ཕྱིར་བཀག་པ་དང་། སྐབས་ཕྱེ་བ་གནང་ངོ་ཞེས་
ཀྱང་མི་ཟེར་ལ། ཚེ་དང་ལྡན་པ་བདག་གིས་བཅོམ་ལྡན་འདས་ལས་དོན་འདི་དང་འདུལ་བ་འདི་བཞིན་དུ་ཐོས་ཀྱིས། ཚེ་དང་ལྡན་པ་དག་དེ་བཞིན་གཤེགས་པའི་མདོ་སྡེ་བཅུ་གཉིས་ལྟར་གྱིས་ཤིག །དོན་འདི་གལ་ཏེ་ཡིན་ན་བདག་
གིས་གཟུང་བར་བྱ། གལ་ཏེ་མ་ཡིན་ན་བདག་གིས་སྤང་བར་བྱའོ་ཞེས་ཟེར་ན། སངས་རྒྱས་བཅོམ་ལྡན་འདས་དེ་ཡོངས་སུ་མྱ་ངན་ལས་འདས་ཀྱང་ཆོས་ནི་འཇིག་རྟེན་ན་ཡུན་རིང་པོར་གནས་པར་འགྱུར་བར་རིག་པར་བྱའོ། །
རིགས་ཀྱི་བུ་ངའི་ཆོས་ཡོངས་སུ་ནུབ་པའི་ཚེ། ཉན་ཐོས་ཀྱི་ཉེ་གནས་དག་རེས་འགའ་ནི་རྣམ་པར་ཤེས་པ་ཡོད་པར་འཆད། རེས་འགའ་ནི་རྣམ་པར་ཤེས་པ་སྟོང་པར་འཆད། རེས་འགའ་ནི་ལྔ་ཕུང་བར་མ་ཡོད་པར་འཆད། 
རེས་འགའ་ནི་ལྔ་ཕུང་བར་མ་མེད་པར་འཆད། རེས་འགའ་ནི་དུས་གསུམ་ཡོད་པར་འཆད། རེས་འགའ་ནི་དུས་གསུམ་མེད་པར་འཆད། རེས་འགའ་ནི་ཐེག་པ་གསུམ་ཡོད་པར་འཆད། རེས་འགའ་ནི་ཐེག་པ་གསུམ་
མེད་པར་འཆད། རེས་འགའ་ནི་ཐམས་ཅད་ཡོད་པར་འཆད། རེས་འགའ་ནི་ཐམས་ཅད་མེད་པར་འཆད། རེས་འགའ་ནི་སེམས་ཅན་ཐོག་མ་དང་ཐ་མ་ཡོད་པར་འཆད། རེས་འགའ་ནི་སེམས་ཅན་ཐོག་མ་དང་ཐ་མ་མེད་པར་
འཆད། རེས་འགའ་ནི་རྟེན་ཅིང་འབྲེལ་ཏེ་འབྱུང་བ་བཅུ་གཉིས་འདུས་བྱས་ཀྱི་ཆོས་ཡིན་ནོ་ཞེས་འཆད་རེས་འགའ་ནི་རྟེན་ཅིང་འབྲེལ་ཏེ་འབྱུང་བ་འདུས་བྱས་ཀྱི་ཆོས་མ་ཡིན་ནོ་ཞེས་འཆད། རེས་འགའ་ནི་དེ་བཞིན་གཤེགས་

47-1-309a

པ་ལ་སྙུན་གྱི་སྡུག་བསྔལ་མངའོ་ཞེས་འཆད། རེས་འགའ་ནི་དེ་བཞིན་གཤེགས་པ་ལ་སྙུན་གྱི་སྡུག་བསྔལ་མི་མངའ་བར་འཆད། རེས་འགའ་ནི་དེ་བཞིན་གཤེགས་པས་དགེ་སློང་རྣམས་ལ་ཤ་རྣམ་པ་བཅུ་
ཟར་མི་གནང་ངོ་ཞེས་འཆད། བཅུ་གང་ཞེ་ན། མི་དང་། སྦྲུལ་དང་། བལ་གླང་དང་། རྟ་དང་། བུང་བུ་དང་། ཁྱི་དང་། སེང་གེ་དང་། ཕག་པ་དང་། ཝ་དང་། སྤྲེའུའི་ཤ་སྟེ། གཞན་ཀུན་གནང་ངོ་ཞེས་འཆད། རེས་འགའ་ནི་
ཐམས་ཅད་མི་གནང་ངོ་ཞེས་འཆད། རེས་འགའ་ནི་དགེ་སློང་དངོས་པོ་ལྔ་བྱེད་དུ་མི་གནང་བར་འཆད་དེ། ལྔ་གང་ཞེ་ན། མི་དང་། མཚོན་དང་། ཆང་དང་། ཞོ་དང་། འབྲུ་མར་འཚོང་དུ་མི་གནང་སྟེ། དེ་མ་ཡིན་པ་གཞན་ཀུན་
གནང་བར་འཆད། རེས་འགའ་ནི་གནས་རྣམ་པ་ལྔར་འགྲོར་མི་གནང་སྟེ། ལྔ་གང་ཞེ་ན། ཤན་པ་དང་། སྦྲུལ་འཚོང་མ་དང་། ཆང་འཚོང་མ་དང་། རྒྱལ་པོའི་ཕོ་བྲང་དང་། རིགས་ངན་གྱི་ཁྱིམ་སྟེ། གཞན་དུ་འགྲོར་གནང་བར་འཆད། 
རེས་འགའ་ནི་གོས་ཀིའུ་ཤ་ཡ་བགོར་མི་གནང་སྟེ། གཞན་ཐམས་ཅད་གནང་བར་འཆད། རེས་འགའ་ནི་དེ་བཞིན་གཤེགས་པས་དགེ་སློང་རྣམས་ལ་གོས་དང་ཟས་དང་མལ་ཆའི་ཟོང་གསེར་སྲང་ཁྲི་ཕྲག་བཅུ་རི་བ་འཆང་དུ་གནང་
བར་འཆད། རེས་འགའ་ནི་མི་གནང་བར་འཆད། རེས་འགའ་ནི་མྱ་ངན་ལས་འདས་པ་རྟག་པ་དང་། བདེ་བ་དང་། བདག་དང་། ཡོངས་སུ་དག་པར་འཆད། རེས་འགའ་ནི་མྱ་ངན་ལས་འདས་པ་ཀུན་ནས་ཉོན་མོངས་པ་
ཟད་པ་མ་ཡིན་གྱི། ཆོས་གཞན་གང་ཡང་མྱ་ངན་ལས་འདས་པ་ཞེས་བྱ་བ་མེད་དོ། །དཔེར་ན་སྐུད་པ་བཏགས་པ་ནི་གོས་ཞེས་བྱའོ། །གོས་ཞིག་ནས་གོས་མེད་ཅེས་བྱ་སྟེ། ཆོས་གཞན་ལ་གོས་མེད་དོ། །ཞེས་བྱ་བ་མེད་
དེ། མྱ་ངན་ལས་འདས་པའི་མཚན་ཉིད་ཀྱང་དེ་དང་འདྲའོ། །ཞེས་འཆད་དོ། །རིགས་ཀྱི་བུ་དེའི་ཚེ་དེའི་དུས་ན་ངའི་ཉེ་གནས་རྣམས་བདེན་པར་འཆད་པ་ནི་ཉུང་། ལོག་པར་འཆད་པ་ནི་མང་བདེན་པའི་ཆོས་འཛིན་པ་ནི་ཉུང་། ལོག་པའི་ཆོས་

47-1-309b

འཛིན་པ་ནི་མང་། སངས་རྒྱས་ཀྱི་བཀའ་འཛིན་པ་ཉུང་། བདུད་ཀྱི་ཚིག་འཛིན་པ་ནི་མང་ངོ་། །རིགས་ཀྱི་བུ་དེའི་ཚེ་ན་ཡུལ་ཀཽ་ཤམ་བི་ན་ཉེ་གནས་གཉིས་ཡོད་དེ་གཅིག་ནི་དགྲ་བཅོམ་པའོ། །གཅིག་ནི་ཚུལ་ཁྲིམས་བཤིག་
པའོ། །དེ་ལ་ཚུལ་ཁྲིམས་བཤིག་པའི་འཁོར་ནི་ལྔ་བརྒྱ་ཡོད། དགྲ་བཅོམ་པའི་འཁོར་ནི་བརྒྱ་ཡོད་དེ། ཚུལ་ཁྲིམས་བཤིག་པས་ནི་དེ་བཞིན་གཤེགས་པ་མཐར་ཡོངས་སུ་མྱ་ངན་ལས་འདས་པའོ། །བདག་གིས་འདི་བཞིན་
དུ་བཅོམ་ལྡན་འདས་ལས་དོན་འདི་ཐོས་ཏེ། དེ་བཞིན་གཤེགས་པ་རྩ་བ་བཞི་བཅས་པ་སྡོམ་ན་ཡང་རུང་། གལ་ཏེ་ཞིག་ན་ཡང་ཉེས་པ་མེད་དོ། །བདག་ཀྱང་ད་ལྟར་དགྲ་བཅོམ་པའི་འབྲས་བུ་དང་། ཐོགས་པ་མེད་པའི་ཡེ་ཤེས་བཞི་ཐོབ་
པ་ཡིན་ཏེ། དགྲ་བཅོམ་པ་ཡང་རྩ་བ་བཞི་པོ་དེ་དག་བཤིག་གོ། །རྩ་བ་བཞི་པོའི་ཆོས་དེ་ཡང་དག་པར་སྡིག་པ་ཞིག་ན་དགྲ་བཅོམ་པས་འདྲལ་བའི་མི་རིགས་སོ། །དེ་བཞིན་གཤེགས་པ་འཇིག་རྟེན་ན་ཞུགས་པའི་ཚེ་ནི་ཤིན་ཏུ་སྡོམས་
ཤིག་ཅེས་བཀའ་སྩལ། ཡོངས་སུ་མྱ་ངན་ལས་འདས་པའི་ཚེ་ནི་ཐམས་ཅད་གཏོང་ངོ་ཞེས་ཟེར། དེ་ལ་དགྲ་བཅོམ་པ་ལ་སོགས་པའི་དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་དེ་བཞིན་གཤེགས་པ་མཐར་ཡོངས་སུ་མྱ་
ངན་ལས་འདས་སོ་ཞེས་བྱ་བའི་མི་རིགས་སོ། །དེ་བཞིན་གཤེགས་པ་ནི་རྟག་པ་མི་འགྱུར་མི་འཕོ་བར་བདག་ཅག་ཤེས་ཏེ། དེ་བཞིན་གཤེགས་པ་འཇིག་རྟེན་ན་བཞུགས་པ་དང་། ཡོངས་སུ་མྱ་ངན་ལས་འདས་པའི་འོག་ཏུ་རྩ་བ་བཞི་
བཤིག་པའི་སྡིག་པ་ནི་ཁྱད་པར་མེད་དོ། །དེ་ལྟར་བཅོམ་ལྡན་འདས་རྩ་བ་བཞི་གཤིག་གོ་ཞེས་བྱ་བར་མི་རུང་ངོ་། །དེ་ཅིའི་ཕྱིར་ཞེ་ན། རྒྱུན་ཏུ་ཞུགས་པ་ཡང་སྡོམ་པ་མི་འཇིག་ན་དགྲ་བཅོམ་པ་ལྟ་སྨོས་ཀྱང་ཅི་དགོས། གལ་ཏེ་
ཚེ་དང་ལྡན་པ་ཁྱེད་བདག་དགྲ་བཅོམ་པའི་འབྲས་བུ་ཐོབ་ཅེས་ཟེར་ན། དགྲ་བཅོམ་པ་ནི་བདག་དགྲ་བཅོམ་པ་ཡིན་ནོ་ཞེས་བྱ་བའི་འདུ་ཤེས་མི་བསྐྱེད་དོ། །དགྲ་བཅོམ་པ་ནི་དགེ་བ་འབའ་ཤིག་འཆད་དེ་མི་དགེ་བ་མི་འཆད་ན། ཚེ་དང་

47-1-310a

ལྡན་པས་བཤད་དོ་ཅོག་ནི་ཆོས་མ་ཡིན་པ་ཤ་སྟག་སྟེ། གལ་ཏེ་གང་མདོ་སྡེ་བཅུ་གཉིས་མཐོང་བས་ནི་ཚེ་དང་ལྡན་པ་དག་ངེས་པར་དགྲ་བཅོམ་པ་མ་ཡིན་པར་རིག་གོ། །རིགས་ཀྱི་བུ་དེའི་ཚེ་ན་ཚུལ་ཁྲིམས་འདྲལ་བའི་འཁོར་
རྣམས་ཀྱིས་དགྲ་བཅོམ་པ་དེའི་སྲོག་གི་འཚོ་བ་གཅོད་དོ། །རིགས་ཀྱི་བུ་དེའི་ཚེ་ན་བདུད་སྡིག་ཅན་གྱིས་དགེ་འདུན་སྡེ་གཉིས་ཁྲོས་འཁྲུགས་པའི་སེམས་སུ་གྱུར་པའི་སྐབས་སུ་དགེ་སློང་དྲུག་བརྒྱ་པོ་དེ་དག་ལ་རབ་ཏུ་གནོད་པར་གཙེས་
སོ། །དེ་ནས་སྐྱེ་བོ་མ་རབས་རྣམས་ཀྱིས་སོ་སོ་ནས་འདི་སྐད་དུ་ངོ་མཚར་ཏོ། །སངས་རྒྱས་ཀྱི་ཆོས་ནུབ་བོ་ཟད་དོ་ཅེས་ཟེར་ཏེ་ཡང་དག་པར་ན་ངའི་དམ་པའི་ཆོས་ནི་མ་ནུབ་སྟེ། དེའི་ཚེ་ན་ཡུལ་དེ་ན་བྱང་ཆུབ་སེམས་དཔའ་སེམས་དཔའ་
ཆེན་པོ་ཁྲི་ཕྲག་བཅུ་གཉིས་ངའི་ཆོས་ཤིན་ཏུ་འཛིན་ན། ཅི་སྟེ་ངའི་ཆོས་ནུབ་ཅེས་བྱ། དེའི་ཚེ་དེའི་དུས་ན་འཛམ་བུའི་གླིང་དུ་ངའི་ཉེ་གནས་སུ་གྱུར་པའི་དགེ་སློང་གཅིག་ཀྱང་མེད་ནས་དེ་ནས་བདུད་སྡིག་ཏོ་ཅན་གྱིས། མེ་བོ་ཆེ་བུས་
ནས་མདོ་སྡེ་ཐམས་ཅད་བསྲེགས་སོ། །དེ་ལ་ཆུང་ཟད་ལས་པ་དག་ནི་བྲམ་ཟེ་རྣམས་ཀྱིས་མདོ་མདོར་རྐུས་ནས་ཁོ་བདག་གི་གཞུང་དུ་བསྟན་ཏེ། དེ་ལྟ་བས་ན་སངས་རྒྱས་མ་བྱུང་བའི་སྔོན་ལོགས་སུ་བྱང་ཆུབ་སེམས་དཔའ་
ཕྲ་མོ་རྣམས་གཅིག་གིས་གཅིག་དྲངས་ཏེ་བྲམ་ཟེའི་ཚིག་ལ་མོས་ཤིང་འཛིན་ཏོ། །བྲམ་ཟེ་རྣམས་འདི་སྐད་དུ་བདག་ལ་འདུལ་ཁྲིམས་ཡོད་དོ་ཞེས་ཟེར་མོད་ཀྱི། ཡང་དག་པར་ན་མུ་སྟེགས་ཅན་ལ་ཡོད་པ་མ་ཡིན་ནོ། །མུ་སྟེགས་ཅན་
རྣམས་བདག་དང་བདེ་བ་དང་། ཡོངས་སུ་དག་པ་ཡོད་དོ་ཞེས་སྨྲ་མོད་ཀྱི། ཡང་དག་པར་ན་བདག་དང་བདེ་བ་དང་། ཡོངས་སུ་དག་པའི་དོན་མི་ཤེས་ཏེ། སངས་རྒྱས་ཀྱི་ཆོས་ལས་ཡི་གེ་འབྲུ་གཅིག་དང་། གཉིས་དང་། 
ཚིག་གཅིག་དང་། གཉིས་བཟུང་སྟེ་བཤད་ནས་ངའི་གཞུང་ལ་དོན་འདི་ལྟ་བུ་ཡོད་དོ་ཞེས་ཟེར་རོ། །དེ་ནས་དེའི་ཚེ་གྲོང་ཁྱེར་རྩྭ་མཆོག་སཱ་ལའི་ཤིང་དྲུང་ན་འཁོར་མང་པོ་ཚད་མེད་མཐའ་ཡས་པ་སྙེད་ཀྱིས་དེ་སྐད་དུ་སྨྲས་པ་ཐོས་ནས་

47-1-310b

ཐམས་ཅད་ཀྱིས་འདི་སྐད་དུ་འཇིག་རྟེན་སྟོངས་སོ་ཞེས་སྨྲས་སོ། །བྱང་ཆུབ་སེམས་དཔའ་འོད་སྲང་གིས་འཁོར་མང་པོ་རྣམས་ལ་སྨྲས་པ། ཁྱེད་རེ་ཤིག་ངུད་མོ་དང་མ་དགའ་བར་མ་བྱེད་ཅིག །
འཇིག་རྟེན་མི་སྟོངས་ཀྱིས། དེ་བཞིན་གཤེགས་པ་ནི་མི་འགྱུར། མི་འཕོ་བར་རྟག་ཏུ་གནས་ཏེ། ཆོས་དང་། དགེ་འདུན་ཡང་དེ་བཞིན་ནོ། །དེ་ནས་འཁོར་མང་པོ་དེ་དག་གིས་
དེ་སྐད་ཅེས་སྨྲས་པ། ཐོས་ནས་ངུད་མོ་བཏང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེའི་ཚེ་རྒྱལ་པོའི་ཁབ་ན་རྒྱལ་པོ་མ་སྐྱེས་དགྲ་ཞེས་བྱ་བ། རང་བཞིན་
གྱིས་ཁྲོ་ལ་གཏུམ་པ། སེམས་ཅན་གྱི་སྲོག་གཅོད་པ་ལ་དགའ་བ། ངག་མི་དགེ་བའི་ལས་བཞི་པོ་རྫོགས་པར་བྱེད་པ། འདོད་ཆགས་དང་། ཞེ་སྡང་དང་། གཏི་མུག་གི་སེམས་ཤིན་ཏུ་
མཆེད་པ། ད་ལྟར་གྱི་འབའ་ཤིག་ལ་ལྟའི། ཕྱི་མ་མ་འོངས་པའི་དུས་མི་མཐོང་བ། འཁོར་ཤིན་ཏུ་ངན་པ་ལ་བརྟེན་པ། ད་ལྟར་གྱི་འདོད་པ་ལྔ་ལ་ཆགས་པས་རྒྱལ་པོས་ཡབ་ཀྱང་
ཉེས་པ་མེད་པར་བསད་དོ། །དེ་ལྟར་ཕ་བསད་པས་འགྱོད་པའི་སེམས་སྐྱེས་ནས་མྱ་ངན་གྱིས་གདུངས་པས་ལུས་ཀྱི་རྒྱན་རྣམས་དང་། རོལ་མོ་ཡང་བཏང་ངོ་། །འགྱོད་པའི་སེམས་ཀྱིས་
གདུངས་པས་ལུས་ཁྱབ་པར་འབྲུམ་བུ་བྱུང་ངོ་། །འབྲུམ་བུ་ཡང་བསྙེན་མི་བཟོད་པ། མནམ་པས་དེ་འདི་སྙམ་དུ་བསམས་སོ། །བདག་གི་ལས་ནི་འཕྲལ་དུ་
ཡང་རྣམ་པར་སྨིན་ལ། སེམས་ཅན་དམྱལ་བའི་རྣམ་པར་སྨིན་པ་ཡང་རིང་པོ་མྀ་ཐོགས་སོ། །སྙམ་སེམས་པར་གྱུར་ཏོ། །དེ་ནས་རྒྱལ་པོ་མ་སྐྱེས་དགྲའི་མ་

47-1-311a

ལུས་འཕགས་མས་སྨན་རྣམ་པ་སྣ་ཚོགས་ཀྱིས་བསྐུས་ཀྱང་འབྲུམ་བུ་ཕྱི་ཕྱིར་མཆེད་ཀྱིས་ཕན་པར་མ་གྱུར་ཏོ། །རྒྱལ་པོས་མ་ལ་སྨྲས་པ། འབྲུམ་བུ་འདི་ནི་བདག་གི་བསམ་པའི་སེམས་ལས་བྱུང་གི། ཆེན་པོ་བཞི་
ལས་བྱུང་བ་མ་ཡིན་པས་འདི་ལ་འགྲོ་བ་གང་ཡང་གསོ་བའི་གནས་སུ་འགྱུར་བ་མེད་དོ། །དེའི་ཚེ་ན་བློན་པོ་ཆེན་པོ་ཉི་ཟླ་གྲགས་པ་ཞེས་བྱ་བ་ཞིག་རྒྱལ་པོ་གང་ན་བར་འོངས་ནས་ཕྱོགས་གཅིག་ཏུ་འགྲེང་བཞིན་དུ་འདི་སྐད་ཅེས་སྨྲས་སོ། །
རྒྱལ་པོ་ཆེན་པོ་ལུས་མི་བདེ་བ་དང་། སེམས་མི་བདེ་བར་གྱུར་ན་ཅིའི་ཕྱིར་འདི་ལྟར་བོ་འཛུམ་གནག་ཅིང་མྱ་ངན་བྱེད་པ་བདག་ལ་སྨྲོས་ཤིག །རྒྱལ་པོས་སྨྲས་པ། བདག་གི་ལུས་དང་སེམས་བདེ་བའི་གཏོལ་ག་ལ་ཞིག་ཡོད། 
བདག་གིས་ཕ་ཉེས་པ་མེད་པར་བསད་དེ། བདག་གིས་སྔོན་མཁས་པ་དག་ལས་ཐོས་ན་འཇིག་རྟེན་ན་མཚམས་མེད་པ་ལྔ་བྱས་པ་དག་ནི་སེམས་ཅན་དམྱལ་བ་ལས་ཐར་བའི་དུས་མེད་དོ་ཞེས་ཐོས་ལ་བདག་གིས་ཁ་ན་མ་ཐོ་
བ་མཐའ་ཡས་དཔག་ཏུ་མེད་པ་གྲངས་མེད་པ་བྱས་པས་བདག་གི་ལུས་དང་སེམས་ན་བ་གསོ་བའི་སྨན་པ་མཁས་པ་ཡང་མེད་ན། ལུས་དང་སེམས་མི་ན་བའི་གཏོལ་ག་ལ་ཡོད། བློན་པོ་དེས་སྨྲས་པ། རྒྱལ་པོ་ཆེན་
པོ་མྱ་ངན་མ་བྱེད་ཅིག་ཅེས་ཚིགས་སུ་བཅད་དེ་སྨྲས་པ། རྟག་ཏུ་མྱ་ངན་གང་བྱེད་པ། །མྱ་ངན་ཕྱིར་ཞིང་སྐྱེ་བར་འགྱུར། །ཇི་ལྟར་གཉིད་ལ་དགའ་བ་ཡང་། །ཕྱིར་ཞིང་དེ་བཞིན་གཉིད་ཆེར་འགྱུར། །དེ་བཞིན་འདོད་ཆགས་
སྲིད་པ་དང་། །ཆང་དད་ཆེ་བ་འང་རིག་པར་བྱ། །རྒྱལ་པོ་གསུང་བ་ལྟར་འཇིག་རྟེན་ན་མཚམས་མེད་པ་ལྔ་བྱས་པའི་གང་ཟག་ནི་སེམས་ཅན་དམྱལ་བ་ལས་ཐར་བའི་དུས་མེད་དོ་ཞེས་བྱ་བ་དེ་སུ་ཞིག་གིས་མྱོང་ཞིང་མཐོང་ནས་
རྒྱལ་པོ་ལ་གཏམ་དུ་སྨྲས། སེམས་ཅན་དམྱལ་བ་ཞེས་པ་ནི་འཇིག་རྟེན་ན་ཤེས་པ་མང་བ་གཅིག་གིས་རང་བཟོར་གཏམ་དུ་སྨྲ་བར་ཟད་དོ། །རྒྱལ་པོ་གསུང་བ་ལྟར་འཇིག་རྟེན་ན་ལུས་དང་སེམས་གསོ་བའི་སྨན་པ་མཁས་པ་

47-1-311b

མེད་དོ་ཞེས་བྱར་མི་རུང་སྟེ། ད་ལྟར་སྨན་པ་ཆེན་པོ་འོད་སྲུང་རྫོགས་བྱེད་ཅེས་བྱ་བ་ཐམས་ཅད་མཁྱེན་པ། ཐམས་ཅད་གཟིགས་པ། དབང་དུ་གྱུར་པའི་ཏིང་ངེ་འཛིན་ཐོབ་པ། ཚངས་པར་སྤྱོད་པ་ཡོངས་སུ་དག་པའི་
མཐར་ཕྱིན་པ། སེམས་ཅན་ཚད་མེད་མཐའ་ཡས་པ་ལ་བླ་ན་མེད་པའི་མྱ་ངན་ལས་འདའ་བའི་ལམ་སྟོན་པ་ཡང་ཉེ་གནས་རྣམས་ལ་འདི་སྐད་ཅེས་ཆོས་སྟོན་ཏོ། །ལས་ནག་པོ་ཡང་མེད་ལ། ལས་ནག་པོའི་རྣམ་པར་
སྨིན་པ་ཡང་མེད། ལས་རྣམ་པར་དཀར་བ་ཡང་མེད་ལ། ལས་རྣམ་པར་དཀར་བའི་རྣམ་པར་སྨིན་པ་ཡང་མེད། ལས་དཀར་པོ་དང་ནག་པོ་ཡང་མེད་ལ། ལས་དཀར་པོ་དང་ནག་པོའི་རྣམ་པར་སྨིན་པ་ཡང་མྱེད། ལས་
རབ་ཅེས་བྱ་བ་དང་། ལས་ཐ་མ་ཞེས་བྱ་བ་ཡང་མེད་དོ་ཞེས་འཆད་དོ། །དེ་སྐད་ཅེས་སྟོན་པའི་སློབ་དཔོན་དེ་ད་ལྟར་རྒྱལ་པོའི་ཁབ་ན་བཞུགས་ཀྱིས། རྒྱལ་པོ་ཆེན་པོ་དེར་གཤེགས་སུ་གསོལ། སློབ་དཔོན་དེས་ནི་འབྲུམ་
བུ་དང་། ལུས་དང་། སེམས་ཀྱང་གསོ་བར་འགྱུར་རོ། །རྒྱལ་པོས་སྨྲས་པ། ཅི་སྟེ་ཁྱོད་ཟེར་བའི་ཚིག་བདེན་ལ། དེ་ལྟར་བདག་གིས་ཁ་ན་མ་ཐོ་བ་མེད་པར་བྱེད་ནུས་ན་ལྟ་དེ་ལ་སྐྱབས་སུ་འགྲོ་བར་བྱའོ། །གཞན་ཡང་
བློན་པོ་སྙིང་པོ་ཐོབ་ཅེས་བྱ་བ་ཞིག་རྒྱལ་པོ་གང་ན་བར་འོངས་ནས་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ཅིའི་ཕྱིར་ངོ་འཛུམ་གནག་ལ་ཁ་ཡང་སྐམས་ནས་ཇི་ལྟར་མི་སྡར་མ་དག་དགྲ་དང་ཕྲད་ན་སྒྲ་སྐད་ཕྲ་ལ་འདར་བ་ལྟ་བུར་
གྱུར་ཅིང་མདངས་ཀྱང་མེད་ན་ཅིས་མི་བདེ་བར་གྱུར། འོན་ཏེ་ལུས་ན་འམ། འོན་ཏེ་སེམས་ན་བར་གྱུར། རྒྱལ་པོས་སྨྲས་པ། བདག་གི་ལུས་དང་སེམས་མི་ན་བའི་གཏོལ་ག་ལ་ཞིག་ཡོད། བདག་ནི་མ་རིག་པས་ལྡོངས་
ཏེ་ཤེས་རབ་ཀྱི་མིག་མེད་པས་མི་དགེ་བའི་བཤེས་གཉེན་ལ་བསྟེན་ནས། ལྷ་སྦྱིན་ལྟ་བུའི་སྡིག་པའི་རྗེས་སུ་ཞུགས་ཏེ། སྡིག་པ་ཅན་གྱི་ཚིག་མཉན་ནས་ཡང་དག་པའི་ཆོས་ཀྱིས་འཚོ་བའི་ཕ་རྒྱལ་པོ་ཉེས་པ་མེད་པར་བསད་

47-1-312a

དོ་བདག་གིས་སྔོན་མཁས་པ་ཤེས་རབ་ཅན་ལས་ཚིགས་སུ་བཅད་པ་འདི་སྐད་ཅེས་ཐོས་སོ། །གང་གི་ཕ་དང་མ་དག་དང་། །སངས་རྒྱས་རྣམས་དང་ཉེ་གནས་ལ། །མི་དགེ་བ་ཡི་སེམས་བསྐྱེད་དེ། །སྡིག་པར་
འགྱུར་བའི་ལས་བྱས་ན། །དེ་ཡི་རྣམ་པར་སྨིན་པ་ནི། །མཚམས་མེད་དམྱལ་བར་སྐྱེ་ཞེའོ། །དེ་བས་ན་བདག་ཤིན་ཏུ་འཇིགས་སྐྲག་སྟེ་སྡུག་བསྔལ་ཆེན་པོས་གདུངས་ཀྱང་གསོ་བར་འགྱུར་བའི་སྨན་པ་མཁས་པ་མེད་དོ། །
བློན་པོ་དེས་ཡང་གསོལ་པ། རྒྱལ་པོ་ཆེན་པོ་རེ་ཤིག་མྱ་ངན་མ་བྱེད་ཅིག །ཆོས་ལ་རྣམ་པ་གཉིས་ཏེ། རབ་ཏུ་བྱུང་བ་དང་། རྒྱལ་པོའི་ཆོས་སོ། །རྒྱལ་པོའི་ཆོས་ཤེས་བྱ་བ་ནི་ཕ་བསད་པས་རྒྱལ་པོའི་ཡུལ་འདིར་
མཚམས་མེད་པའི་ལས་ཤེས་བྱ་མོད་ཀྱི། ཁ་ན་མ་ཐོ་བའི་སྡིག་པར་མི་འགྱུར་རོ། །དཔེར་ན་སྲིན་བུ་ཀ་ཀ་ལ་ལྟ་བུ་མའི་གསུས་པ་བརྟོལ་ནས་གདོད་སྐྱེས་ཏེ་ཆོས་ཉིད་ཀྱིས་དེ་ལྟར་སྐྱེ་བས་ན། དེ་ལྟར་མའི་ལུས་མ་རུང་བར་
བྱས་མོད་ཀྱི་སྡིག་པར་མི་འགྱུར་ཏེ། དྲེའུ་ལ་སོགས་པ་བུ་འབྱུང་བ་ཡང་དེ་དང་འདྲའོ། །རྒྱལ་པོའི་སྲིད་ཀྱི་ཆོས་ཀྱང་ཆོས་ཉིད་ཀྱིས་དེ་ལྟ་བུ་ཡིན་པས་དེ་ལྟར་རྒྱལ་པོས་ཕ་བསད་ཀྱང་སྡིག་པར་མི་འགྱུར་རོ། །རབ་ཏུ་བྱུང་བའི་ཆོས་
ནི་ཆུང་ངུ་ན་གྲོག་སྦུར་ཙམ་བསད་ན་ཡང་སྡིག་པར་འགྱུར་བ་དང་མི་འདྲ་ན་རྒྱལ་པོ་ཆེན་པོ་རེ་ཤིག་མྱ་ངན་མ་བྱེད་ཅིག །དེ་ཅིའི་ཕྱིར་ཞེ་ན། རྟག་ཏུ་མྱ་ངན་གང་བྱེད་པ། །མྱ་ངན་ཕྱིར་ཞིག་སྐྱེ་བར་འགྱུར། །ཇི་ལྟར་གཉིད་ལ་དགའ་བ་ཡང་། །
ཕྱིར་ཞིང་དེ་བཞིན་གཉིད་ཆེར་འགྱུར། །དེ་བཞིན་འདོད་ཆགས་སྲེད་པ་དང་། །ཆང་དད་ཆེ་བའང་རིག་པར་བྱ། །རྒྱལ་པོ་གསུང་བ་ལྟར་ལུས་དང་སེམས་གསོ་བའི་སྨན་པ་མཁས་པ་མེད་དོ་ཞེས་བྱར་མི་རུང་སྟེ། ད་ལྟར་སྟོན་པ་ཆེན་
པོ་ཕྱུགས་ལྷས་ཀྱི་བུམ་ས་སྐ་རི་ཞེས་བྱ་བ་ཐམས་ཅད་མཁྱེན་པ། ཐམས་ཅད་གཟིགས་པ་སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་བྱམས་པ། ཉོན་མོངས་པ་ཡོངས་སུ་སྤངས་པ། སེམས་ཅན་

47-1-312b

ཐམས་ཅད་ཀྱི་གདུག་པ་གསུམ་གྱི་ཟུག་རྔུ་འབྱིན་པ། སེམས་ཅན་ཐམས་ཅད་ཀྱིས་མི་ཤེས། མི་མཐོང་། མི་རྟོགས་པའི་ཆོས་ཐམས་ཅད་སྟོན་པ་ཆེན་པོ་དེ་གཅིག་པུས་མཁྱེན་ཅིང་གཟིགས་ཏེ། རྟོགས་པས་ཉེ་
གནས་རྣམས་ལ་རྟག་ཏུ་ཆོས་འདི་སྐད་ཅེས་སྟོན་ཏོ། །སེམས་ཅན་ཐམས་ཅད་ཀྱི་ལུས་ནི་ཕྱོགས་ཆ་རྣམ་པ་བདུན་ཏེ། བདུན་གང་ཞེ་ན། ས་དང་། ཆུ་དང་། མེ་དང་། རླུང་དང་། སྡུག་བསྔལ་དང་། བདེ་བ་དང་། འཚོ་སྲོག་གོ། །
དེ་ལྟར་ཆོས་བདུན་པོ་དེ་ནི་སྤྲུལ་པ་འམ་བྱས་པ་མ་ཡིན་ཏེ་བཞིག་དུ་མི་རུང་ངོ་། །དཔེར་ན་རྩ་ཨི་ཤི་ཀ་ནི་རྟག་ཏུ་གནས་ཏེ་མི་གཡོའོ། །རི་རབ་རིའི་རྒྱལ་པོ་ནི་བཏང་བ་ཡང་མེད་ལ། བྱེད་པ་ཡང་མེད་དོ། །དཔེར་ན་འོ་མ་དང་ཞོ་ཡང་
སྡུག་བསྔལ་ཞེ་འམ། བདེ་ཞེ་འམ། དགེ་ཞི་འམ། མི་དགེ་ཞེས་རྩོད་པ་མེད་ལ། མཚོན་རྣོན་པོས་ཀྱང་གནོད་པར་མི་འགྱུར་རོ། །དེ་ཅིའི་ཕྱིར་ཞེ་ན། རྣམ་པ་བདུན་པོ་སྟོང་པ་ཡིན་པས་ཐོགས་པ་མེད་པའི་ཕྱིར་རོ། །སྲོག་ཀྱང་
བཅད་ཏུ་མེད་དེ། དེ་ཅིའི་ཕྱིར་ཞེ་ན། གསད་པ་ཡང་མེད་ལ། འཆི་བ་ཡང་མེད། བྱས་པ་མེད། མྱོང་བ་ཡང་མེད། བཤད་པ་ཡང་མེད། ཉན་པ་ཡང་མེད། རྟོགས་པ་ཡང་མེད། སྟོན་པ་ཡང་མེད་དོ་ཞེས་རྟག་ཏུ་ཆོས་དེ་དག་
འཆད་དེ། སེམས་ཅན་མང་པོའི་ཁ་ན་མ་ཐོ་བའི་སྡིག་པ་ཐམས་ཅད་ཞི་བར་བྱེད་པའི་སློབ་དཔོན་ཆེན་པོ་ད་ལྟར་རྒྱལ་པོའི་ཁབ་ན་བཞུགས་ཀྱི། རྒྱལ་པོ་ཆེན་པོ་སློབ་དཔོན་ཆེན་པོ་གང་ན་བ་དེར་གཤེགས་སུ་གསོལ། 
མཐོང་བ་ཙམ་གྱིས་སྡིག་པ་ཐམས་ཅད་འབྱང་བར་འགྱུར་རོ། །རྒྱལ་པོས་སྨྲས་པ། དེ་ལྟར་ངེས་པར་བདག་གིས་སྡིག་པ་མེད་པར་བྱེད་ནུས་ན་ལྟ་དེ་ལ་སྐྱབས་སུ་འགྲོ་བར་བྱའོ། །གཞན་ཡང་བློན་པོ་བདེན་པ་ཐོབ་ཅེས་བྱ་བ་
ཞིག་རྒྱལ་པོ་གང་ན་བར་འོངས་ནས་ཚིགས་སུ་བཅད་པ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ཅི་ཡི་ཕྱིར། །ལུས་ཀྱི་རྒྱན་ཡང་ཐམས་ཅད་བཀྲོལ། །དབུ་ཡི་སྐྲ་ཡང་འཛིངས་པ་འདི། །ཅི་ཡི་སླད་དུ་དེ་ལྟར་གྱུར། །

47-1-313a

ཅིའི་ཕྱིར་ད་ལྟར་རྒྱལ་པོའི་ལུས། །མི་བདེ་འགུལ་ཞིང་འདར་བ་ནི། །མེ་ཏོག་ཆགས་པའི་ཤིང་རྣམས་ལ། །ཤིན་ཏུ་རླུང་གིས་བཏབ་པ་བཞིན། །རྒྱལ་པོ་འདི་ལྟར་ཤིན་ཏུ་ངོམ་ཟུང་གནག་པ་ནི་ཇི་ལྟར་ཞིང་པ་དག་ས་བོན་
བཏབ་ན་ཆར་པ་མ་བབས་ན་མྱ་ངན་བྱེད་པ་བཞིན་དུ། མྱ་ངན་བྱེད་པ་འདི་འོན་ཏེ་ལུས་ན་འམ། སེམས་ན་བར་གྱུར། རྒྱལ་པོས་སྨྲས་པ། བདག་གི་ལུས་དང་སེམས་མི་ན་བའི་གཏོལ་ག་ལ་ཞིག་ཡོད། རྒྱལ་པོ་ཡབ་བདག་ལ་
ཤིན་ཏུ་བྱམས་ཤིང་བརྩེ་བས་ཉེས་པའི་སྐྱོན་མེད་དེ། ཐོག་མ་མཚན་མཁན་ལ་བསྟན་པ་ན། མཚན་མཁན་གྱིས་ཀྱང་ཁྱོད་ཀྱི་བུ་འདི་སྐྱེས་ནས་ཕ་གསོད་པར་འགྱུར་རོ་ཞེས་སྨྲས་ཏེ། དེ་སྐད་ཅེས་ཐོས་མོད་ཀྱི་འོན་ཀྱང་གསོས་སོ། །
མཁས་པ་ཤེས་རབ་ཅན་ལས་སྔོན་འདི་སྐད་ཅེས་ཐོས་ཏེ། གང་ཞིག་མ་ལ་མི་ཚངས་པར་སྤྱད་དམ། དགེ་སློང་མ་ལ་མི་ཚངས་པར་སྤྱད་དམ། དགེ་འདུན་གྱི་ནོར་རྐུས་སམ། བླ་ན་མེད་པའི་བྱང་ཆུབ་དུ་སེམས་བསྐྱེད་པ་བསད་དམ་
ཕ་བསད་ན་གང་ཟག་དེ་ནི་གདོན་མི་ཟ་བར་མཚམས་མེད་པའི་སེམས་ཅན་དམྱལ་བར་ལྟུང་ཞེས་ཐོས་ན། བདག་ད་ལུས་དང་སེམས་མི་ན་བའི་གཏོལ་ག་ལ་ཡོད། བློན་པོ་ཆེན་པོ་དེས་སྨྲས་པ། རྒྱལ་པོ་ཆེན་པོ་རེ་ཤིག་མྱ་ངན་མི་
བྱེད་ཅིག །རྒྱལ་པོ་ཡབ་རྣམ་པར་གྲོལ་བའི་ལམ་ལ་ནན་ཏན་བྱེད་པ་ཞིག་ཡིན་པ་ལས་བསད་ན་སྡིག་པར་འགྱུར་རོ། །གལ་ཏེ་རྒྱལ་པོའི་སྲིད་ཀྱི་ཕྱིར་བསད་ན་སྡིག་པར་མི་འགྱུར་རོ། །རྒྱལ་པོ་ཆེན་པོ་ཆོས་མ་ཡིན་པ་ནི་
ཆོས་མ་ཡིན་པ་ཞེས་བྱའོ། །ཆོས་མེད་པ་ལ་ཡང་ཆོས་མེད་པ་ཞེས་བྱ་སྟེ། དཔེར་ན་བུ་མེད་པ་ལ་བུ་མེད་དོ་ཞེས་བྱ་བ་དང་འདྲ་བར། བུ་ངན་པ་ཡོད་པ་ལ་བུ་མེད་པ་ཞེས་བྱ་སྟེ། དེ་ལྟར་བུ་མེད་པའོ་ཞེས་བྱ་མོད་ཀྱི་ཡང་
དག་པར་ན་བུ་མེད་པ་མ་ཡིན་ནོ། །དཔེར་ན་ཟས་ཀྱི་ནང་ན་ལན་ཚྭ་མེད་དོ་ཞེས་བྱ་བ་དང་འདྲ་བར། ལན་ཚྭ་མི་བྲོ་ན་ཡང་ལན་ཚྭ་མེད་དོ་ཞེས་བྱ་བ་དང་། དཔེར་ན་ཆུ་མེད་པ་ལ་ཆུ་མེད་དོ་ཞེས་བྱ་བ་དང་འདྲ་བར། ཆུ་ཆུང་ཟད་

47-1-313b

ཡོད་པ་ལ་ཡང་ཆུ་མེད་དོ་ཞེས་བྱ་བ་དང་། དཔེར་ན་སྐད་ཅིག་སྐད་ཅིག་ཙམ་གྱིས་འགག་པ་ལ་ཡང་མི་རྟག་ཅེས་བྱ་བ་དང་། གལ་ཏེ་བསྐལ་པའི་བར་དུ་གནས་ན་ཡང་མི་རྟག་གོ་ཞེས་བྱ་བ་དང་། དཔེར་ན་མི་ཞིག་སྡུག་བསྔལ་མྱོང་
ན་བདེ་བ་མེད་དོ་ཞེས་བྱ་བ་དང་འདྲ་བར་དགའ་བ་ཆུང་ཟད་ཙམ་མྱོང་བ་ཡང་དེ་ལ་བདེ་བ་མེད་པ་ཞེས་བྱ་བ་དང་། དཔེར་ན་དབང་དུ་མ་གྱུར་པ་ལ་ནི་ང་རྒྱལ་མེད་དོ་ཞེས་བྱ་བ་དང་འདྲ་བར་དབང་ཆུང་ཟད་ཙམ་ཡོད་ཀྱང་ང་རྒྱལ་མེད་པའོ་
ཞེས་བྱ་བ་དང་། དཔེར་ན་ནམ་སྲོས་ན་ཉི་མ་མེད་དོ་ཞེས་བྱ་བ་དང་འདྲ་བར། ཉི་མ་སྤྲིན་ཀྱིས་ཆོད་ན་ཡང་ཉི་མ་མེད་དོ་ཞེས་བྱ་སྟེ། རྒྱལ་པོ་ཆེན་པོ་ཆོས་ཆུང་ཟད་ཙམ་ཡོད་པ་ལ་ཡང་ཆོས་མེད་པ་ཞེས་བྱ་སྟེ། ཡང་དག་པར་
ན་ཆོས་མེད་པ་མ་ཡིན་ནོ། །རྒྱལ་པོ་ཆེན་པོ་བདག་གིས་གསོལ་པའི་ཚིག་འདི་ཉོན་ཅིག །སེམས་ཅན་ཐམས་ཅད་ལ་ལས་ལྷག་མ་ཞེས་བྱ་བ་ཡོད་དེ། ལས་ཀྱི་དབང་གིས་ཡང་དང་ཡང་དུ་འཁོར་བར་གྱུར་ཏོ། །གལ་ཏེ་
རྒྱལ་པོ་ཡབ་ལ་ཡང་ལས་ལྷག་མ་ཞེས་བྱ་བ་ཡོད་ན། ད་རྒྱལ་པོས་གསད་ཀྱང་སྡིག་པར་མི་འགྱུར་རོ། །རྒྱལ་པོ་ཆེན་པོ་རེ་ཤིག་མྱ་ངན་བསད་དུ་གསོལ། དེ་ཅིའི་ཕྱིར་ཞེ་ན་རྟག་ཏུ་མྱ་ངན་གང་མེད་པ། །མྱ་ངན་ཕྱིར་ཞིང་སྐྱེ་བར་འགྱུར། །
ཇི་ལྟར་གཉིད་ལ་དགའ་བ་ཡང་། །ཕྱིར་ཞིང་དེ་བཞིན་གཉིད་ཆེར་འགྱུར། །དེ་བཞིན་འདོད་ཆགས་སྲིད་པ་དང་། །ཆང་དད་ཆེ་བའང་རིག་པར་བྱ། །རྒྱལ་པོ་གསུང་བ་ལྟར་འཇིག་རྟེན་ན་ལུས་དང་སེམས་ཀྱི་ནད་གསོ་བའི་སྨན་
པ་མེད་ཅེས་བྱར་མི་རུང་སྟེ། ད་ལྟར་སྟོན་པ་ཆེན་པོ་བེ་ར་ཏའི་བུ་ཀུན་རྒྱལ་ཞེས་བྱ་བ་ཐམས་ཅད་མཁྱེན་པ། ཐམས་ཅད་གཟིགས་པ། ཤེས་རབ་རྒྱ་མཚོ་ལྟར་ཤིན་ཏུ་ཟབ་ཅིང་ཡངས་པ། གཟི་བརྗིད་ཆེན་པོ་དང་ལྡན་པ། 
མངོན་པར་ཤེས་པ་ཆེན་པོ་དང་ལྡན་ཞིང་སེམས་ཅན་ཐམས་ཅད་ཐེ་ཙོམ་གྱི་དྲ་བ་ལས་འདོན་པ། སེམས་ཅན་ཐམས་ཅད་ཀྱིས་མི་ཤེས་མི་མཐོང་མི་རྟོགས་པའི་ཆོས་ཐམས་ཅད་སྟོན་པ་ཆེན་པོ་དེ་གཅིག་པུས་མཁྱེན་ཅིང་

47-1-314a

གཟིགས་པས་ད་ལྟར་རྒྱལ་པོའི་ཁབ་ན་གནས་ཤིང་ཉེ་གནས་མང་པོ་ལ་འདི་སྐད་དུ་ཆོས་སྟོན་ཏོ། །འཁོར་མང་པོའི་ནང་དུ་གལ་ཏེ་རྒྱལ་པོ་དབང་དུ་གྱུར་པ་དག་ཡིད་བཞིན་དུ་དགེ་བ་དང་། སྡིག་པའི་ལས་བྱེད་པ་དེ་
སྡིག་པ་མང་པོ་བྱས་ཀྱང་ཁ་ན་མ་ཐོ་བའི་སྡིག་པར་མི་འགྱུར་རོ། །དཔེར་ན་མེ་ཆེན་པོས་ཚིག་པ་ན་གཙང་བ་འམ་མི་གཙང་བ་ཞེས་བྱ་བ་མེད་དེ་རྒྱལ་པོ་ཡང་དེ་དང་འདྲའོ། །དཔེར་ན་ས་ཆེན་པོ་ནི་གཙང་བ་དང་མི་གཙང་བ་
ཐམས་ཅད་ཀྱི་གནས་སུ་གྱུར་ཏེ། དེ་ལྟ་བུའི་ལས་བྱེད་ཀྱང་ཞེ་སྡང་བ་དང་དགའ་བ་མེད་དོ། །རྒྱལ་པོ་ཆེན་པོ་ཡང་ས་ཆེན་པོ་དང་འདྲ་སྟེ་ཞེ་སྡང་བ་དང་དགའ་བ་ཞེས་བྱ་བ་མེད་དོ། །དཔེར་ན་ཆུ་དང་བ་ནི་གཙང་བ་དང་མི་གཙང་
བ་ཐམས་ཅད་བཀྲུས་ཀྱང་དེ་ལ་དགའ་བ་དང་མི་དགའ་བ་མེད་དེ་རྒྱལ་པོ་ཆེན་པོ་ཡང་ཆུ་དང་འདྲའོ། །དཔེར་ན་རླུང་ནི་གཙང་བ་དང་མི་གཙང་བ་ཐམས་ཅད་འཕྱག་གོ། །དེ་ལྟར་དེ་ལྟ་བུའི་ལས་བྱེད་ཀྱང་དེ་ལ་ནི་དགའ་བ་མེད་དེ་རྒྱལ་
པོ་ཆེན་པོ་ཡང་རླུང་དང་འདྲའོ། །དཔེར་ན་སྟོན་ཤིང་བཅད་ན་དབྱར་ཕྱིར་སྐྱེའོ། །དེ་ལྟར་ཤིང་བཅད་ཀྱང་ཡང་དག་པར་ན་སྡིག་པར་མི་འགྱུར་བ་དང་འདྲ་བར་སེམས་ཅན་ཐམས་ཅད་ཀྱང་དེ་དང་འདྲ་སྟེ། འདི་ནས་ཚེ་འཕོས་ནས་ཕྱིར་
ཡང་འདིར་སྐྱེའོ། །དེ་ལྟར་ཕྱིར་ཡང་འདིར་སྐྱེ་བས་ན་སྡིག་པར་མི་འགྱུར་རོ། །སེམས་ཅན་ཐམས་ཅད་ཀྱི་སྡུག་བསྔལ་དང་བདེ་བའི་འབྲས་བུ་རྣམ་པར་སྨིན་པ་བདག་ལ་དབང་མེད་དེ། ད་ལྟར་གྱི་དུས་ན་ལས་རྣམ་པར་
སྨིན་པ་ཡང་སྔོན་འདས་པའི་དུས་ཀྱི་རྒྱུ་ལ་རག་ལུས་ཏེ། ད་ལྟར་གྱི་དུས་ན་རྣམ་པར་སྨིན་པ་ནི་ད་ལྟར་གྱི་དུས་ན་རྒྱུ་མེད་དེ། མ་འོངས་པའི་དུས་ན་འང་འབྲས་བུ་རྣམ་པར་སྨིན་པ་མེད་དོ། །ད་ལྟར་གྱི་འབྲས་བུ་ཉིད་མ་སྨིན་པས་
ན་སོ་སོའི་སྐྱེ་བོ་དག་ཚུལ་ཁྲིམས་སྲུང་བ་དང་བརྩོན་འགྲུས་རྩོམ་པ་ཡང་ད་ལྟར་གྱི་དུས་ཀྱི་སྡིག་པར་འགྱུར་བའི་འབྲས་བུ་བཟློག་པའི་ཕྱིར་རོ། །ཚུལ་ཁྲིམས་བསྲུངས་པས་ཟག་པ་མེད་པར་འགྱུར་རོ། །ཟག་པ་མེད་པས་

47-1-314b

ཟག་པ་དང་བཅས་པའི་ལས་མེད་པར་འགྱུར་རོ། །དེ་ལྟར་ལས་ཟད་པས་ན་སྡུག་བསྔལ་མང་པོ་ཡང་ཟད་པར་འགྱུར་རོ། །སྡུག་བསྔལ་མང་པོ་ཟད་པས་ན་རྣམ་པར་གྲོལ་བར་འགྱུར་རོ་ཞེས་སྟོན་པ་དེའི་གན་དུ་མྱུར་དུ་བཞུད་ཅིག །
ལུས་དང་སེམས་སྡུག་བསྔལ་བར་འགྱུར་བའི་ནད་ཀྱང་འཚོ་ལ། དེ་དང་ཕྲད་ན་སྡིག་པ་ཡང་ཡོངས་སུ་འབྱང་བར་འགྱུར་རོ། །རྒྱལ་པོ་ཆེན་པོས་སྨྲས་པ། དེ་ལྟར་བདག་གི་སྡིག་པ་ངེས་པར་འབྱང་བར་འགྱུར་ན་ལྟ་དེ་ལ་སྐྱབས་སུ་
འགྲོ་བར་བྱའོ་ཞེས་སྨྲས་སོ། །དེ་ནས་ཡང་བློན་པོ་ཆེན་པོ་དོན་ཐམས་ཅད་ཤེས་པ་ཞེས་བྱ་བ་ཞིག་རྒྱལ་པོའི་དྲུང་དུ་འོངས་ནས་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ཅིའི་ཕྱིར་འདི་ལྟར་ངོ་འཛུམ་གནག་ཅིང་མདོག་མེད་པ་
ནི་ཇི་ལྟར་རྒྱལ་པོ་སྲིད་སྟོར་བ་འམ། ཆུ་མིག་སྐམས་པ་འམ། མེ་ཏོག་པད་མོ་མེད་པའི་རྫིང་ངམ། མེ་ཏོག་དང་ལོ་མ་མེད་པའི་ཤིང་ངམ། དགེ་སློང་ཚུལ་ཁྲིམས་ཉམས་པ་དང་འདྲ་བར་གཟི་བརྗིད་མེད་པར་འགྱུར་བ་འདི། 
འོན་ཏེ་ལུས་སྡུག་བསྔལ་བར་གྱུར་ཏམ། འོན་ཏེ་སེམས་སྡུག་བསྔལ་བར་གྱུར། རྒྱལ་པོས་སྨྲས་པ་ངའི་ལུས་དང་སེམས་ད་ལྟར་སྡུག་བསྔལ་མེད་པའི་གཏོལ་ལྟ་ག་ལ་ཞིག་ཡོད། བདག་གི་ཡབ་རྒྱལ་པོ་བདག་ལ་བྱམས་བརྩེ་
བས། རྟག་ཏུ་རབ་ཏུ་བདེ་བ་ཐམས་ཅད་ཀྱིས་བདག་ལ་བདེ་བར་བྱེད་པ་ལས་བདག་གི་བྱམས་པའི་དྲིན་མ་དྲན་ནས་རྒྱལ་པོ་ཡབ་ཉེས་པ་མེད་པར་བདག་གིས་བསད་དོ། །བདག་གིས་སྔོན་མཁས་པ་ཤེས་རབ་ཅན་དག་ལས་ཐོས་ན། 
གལ་ཏེ་ཕ་བསད་པར་གྱུར་ན། གདོན་མི་ཟ་བར་བསྐལ་པ་གྲངས་མེད་པའི་བར་དུ་སྡུག་བསྔལ་ཆེན་པོ་མྱོང་བར་འགྱུར་ཞེས་ཐོས་ན། བདག་ནི་རིང་པོ་མི་ཐོགས་པར་མཚམས་མེད་པའི་སེམས་ཅན་དམྱལ་བར་ལྟུང་དུ་ངེས་ཏེ། 
བདག་གི་སྡིག་པ་འདི་གསོ་བའི་སྐྱབས་སུ་འགྱུར་བ་མེད་དོ། །བློན་པོ་དེས་སྨྲས་པ། རྒྱལ་པོ་ཆེན་པོ་རེ་ཤིག་མྱ་ངན་མ་བྱེད་ཅིག །ཅི་རྒྱལ་པོས་མ་ཐོས་སམ། སྔོན་རྒྱལ་པོ་ལམ་པ་ཞེས་བྱ་བས་ཕ་བསད་དེ་རྒྱལ་པོའི་སྲིད་བཟུང་ངོ་། །

47-1-315a

རྒྱལ་པོ་བདེ་ཞེས་བྱ་བ་དང་། རྒྱལ་པོ་བྱི་ལ་ཙི་ན་དང་། རྒྱལ་པོ་ན་ཧོ་ཤ་དང་། རྒྱལ་པོ་ཀ་ཏེ་ཀ་དང་། རྒྱལ་པོ་བྱེ་ཤ་ཀ་དང་། རྒྱལ་པོ་ཟླ་འོད་དང་། རྒྱལ་པོ་ཉི་འོད་དང་། རྒྱལ་པོ་འོད་ལྡན་དང་། རྒྱལ་པོ་འགྲོ་བ་མང་པོ་འཛིན་ལ་
སོགས་པ་རྒྱལ་པོ་དེ་དག་ཀྱང་ཕ་བསད་ནས་རྒྱལ་པོའི་སྲིད་བཟུང་ཡང་། རྒྱལ་པོ་དེ་དག་ལས་གཅིག་ཙམ་ཡང་སེམས་ཅན་དམྱལ་བར་ལྟུང་བ་མེད་དོ། །ད་ལྟར་གྱི་རྒྱལ་པོ་བཻ་དཱུརྱ་དང་། རྒྱལ་པོ་ཨོ་ཏ་ན་དང་། རྒྱལ་པོ་གཏུམ་པ་དང་། 
རྒྱལ་པོ་བྱི་བ་དང་། རྒྱལ་པོ་པད་མོ་ལ་སོགས་པ་རྒྱལ་པོ་དེ་དག་ཀྱང་ཕ་བསད་ནས་རྒྱལ་པོའི་སྲིད་བཟུང་སྟེ། གཅིག་ཀྱང་མྱ་ངན་བྱེད་པ་མེད་དོ། །སེམས་ཅན་དམྱལ་བ་དང་། ཡི་དགས་དང་། ལྷར་སྐྱེ་ཞེས་བྱ་བ་ཡང་སུས་མཐོང་། 
རྒྱལ་པོ་ཆེན་པོ་སྲིད་པ་གཉིས་སུ་ཟད་པ་ནི་མི་དང་བྱོལ་སོང་ངོ་། །དེ་ལྟར་སྲིད་པ་གཉིས་པོ་ཡང་རྒྱུ་དང་རྐྱེན་ཀྱིས་སྐྱེ་བ་ཡང་མ་ཡིན་ལ། རྒྱུ་དང་རྐྱེན་ཀྱིས་འཆི་བ་ཡང་མ་ཡིན་ནོ། །དེ་ལྟར་རྒྱུ་རྐྱེན་མེད་པས་ན་དགེ་བ་དང་སྡིག་པ་ག་ལ་
ཞིག་ཡོད། རྒྱལ་པོ་ཆེན་པོ་མྱ་ངན་མ་བྱེད་ཅིག །དེ་ཅིའི་ཕྱིར་ཞེ་ན། རྟག་ཏུ་མྱ་ངན་གང་བྱེད་པ། །མྱ་ངན་ཕྱིར་ཞིང་སྐྱེ་བར་འགྱུར། །ཇི་ལྟར་གཉིད་ལ་དགའ་བ་ཡང་། །ཕྱིར་ཞིང་དེ་བཞིན་གཉིད་ཆེར་འགྱུར། །དེ་བཞིན་འདོད་ཆགས་
སྲིད་པ་དང་། །ཆང་དད་ཆེ་བ་འང་རིག་པར་བྱ། །རྒྱལ་པོ་གསུང་བ་ལྟར་འཇིག་རྟེན་ན་ལུས་དང་སེམས་གསོ་བའི་སྨན་པ་མཁས་པ་མེད་ཅེས་བྱ་བ་མི་རུང་སྟེ། ད་ལྟར་སྟོན་པ་ཆེན་པོ་ཀཱ་ཏྱཱའི་བུ་ནོག་ཅན་ཞེས་བྱ་བ་ཐམས་ཅད་
མཁྱེན་པ། ཐམས་ཅད་གཟིགས་པ། ས་ཆེན་པོ་དང་འདྲ་བ། གསེར་དང་ས་ལ་བྱེ་བྲག་མི་འབྱེད་པ། རྩིབ་ལོགས་གཡས་པ་ནས་ཙན་དན་གྱི་འདའ་གུ་སྐུད་པ་དང་། རྩིབ་ལོགས་གཡོན་པ་ན་རྡོ་དབྱུག་དང་མཚོན་ཆ་
ཐོགས་ཏེ་འཚོག་ཀྱང་དེ་གཉིས་ཀ་ལ་ཁྱད་པར་མེད་པ། བྱམས་པ་དང་སྡང་བ་ལ་སེམས་མཉམ་པ། སྟོན་པ་ཡང་དག་པ་འཇིག་རྟེན་གྱི་སྨན་པ་མཁས་པར་གྱུར་པ། གལ་ཏེ་འགྲོ་འམ། འདུག་གམ། སྡོད་དམ། ཉལ་

47-1-315b

ཡང་རྟག་ཏུ་ཏིང་ངེ་འཛིན་ལ་སེམས་མཉམ་པར་འཇོག་སྟེ། མ་འཁྲུགས་པའི་སྟོན་པ་ཆེན་པོ་དེ་ད་ལྟ་ཉེ་གནས་མང་པོ་ལ་འདི་སྐད་ཅེས་ཆོས་སྟོན་ཏོ། །གལ་ཏེ་བདག་གིས་བྱས་སམ། གཞན་བྱེད་དུ་བཅུག་གམ། 
གལ་ཏེ་བདག་གིས་བསད་དམ། གཞན་གསོད་དུ་བཅུག་གམ། གལ་ཏེ་བདག་གིས་བསྲེགས་སམ། གཞན་སྲེག་ཏུ་བཅུག་གམ། གལ་ཏེ་བདག་གིས་གཙེས་སམ། གཞན་འཚེར་བཅུག་གམ། གལ་ཏེ་བདག་
གིས་རྐུས་སམ། གཞན་རྐུར་བཅུག་གམ། གལ་ཏེ་བདག་གིས་མི་ཚངས་པར་སྤྱད་དམ། གཞན་མི་ཚངས་པར་སྤྱོད་དུ་བཅུག་གམ། གལ་ཏེ་བདག་གིས་བརྫུན་དུ་སྨྲས་སམ། གཞན་བརྫུན་ཟེར་དུ་བཅུག་གམ། 
གལ་ཏེ་བདག་གིས་ཆང་འཐུངས་སམ། གཞན་ཆང་འཐུང་དུ་བཅུག་གམ། གལ་ཏེ་བདག་གིས་གྲོང་ཁྱེར་གཅིག་གམ། གྲོང་རྡལ་གཅིག་གམ། ཡུལ་གཅིག་གི་མི་བསད་དམ། གལ་ཏེ་རལ་གྲིའི་འཁོར་ལོས་སེམས་
ཅན་ཐམས་ཅད་བསད་དམ། གལ་ཏེ་ཀླུང་གང་གཱའི་ལྷོ་ཕྱོགས་ཀྱི་སེམས་ཅན་ཐམས་ཅད་ལ་སྦྱིན་པ་བྱིན་པ་དང་། ཀླུང་གང་གཱའི་བྱང་ཕྱོགས་ཀྱི་སེམས་ཅན་ཐམས་ཅད་བསད་ཀྱང་དེ་གཉིས་ལ་སྡིག་པ་དང་བསོད་
ནམས་སུ་འགྱུར་བ་མེད་དེ། སྦྱིན་པ་དང་། ཚུལ་ཁྲིམས་དང་། ཏིང་ངེ་འཛིན་མེད་དོ་ཞེས་སྟོན་པ་དེ་ད་ལྟར་རྒྱལ་པོའི་ཁབ་ན་བཞུགས་ཀྱིས། རྒྱལ་པོ་ཆེན་པོ་མྱུར་དུ་སྟོན་པ་ཆེན་པོ་དེའི་གན་དུ་བཞུད་ཅིག །གལ་ཏེ་དེ་དང་
ཕྲད་ན་སྡིག་པ་ཡོངས་སུ་བྱང་བར་འགྱུར་རོ། །རྒྱལ་པོས་སྨྲས་པ། གལ་ཏེ་ཡང་དག་པར་དེ་ལྟར་བདག་གི་སྡིག་པ་འབྱང་བར་འགྱུར་ན་ལྟ་དེ་ལ་སྐྱབས་སུ་འགྲོ་བར་བྱའོ།། །།འཕགས་པ་ཡོངས་སུ་མྱ་
ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་རྩ་དྲུག་པ། དེ་ནས་ཡང་བློན་པོ་བཀྲ་ཤིས་ཤེས་བྱ་བས་རྒྱལ་པོ་ཆེན་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ཅིའི་ཕྱིར་འདི་ལྟར་ངོ་འཛུམ་གནག་ཅིང་

47-1-316a

མདོག་ཀྱང་མེད་པ་ནི་ཇི་ལྟར་ཉི་མ་ལ་མར་མེ་བཞག་པ་འམ། ཉིན་པར་གྱི་ཟླ་བ་འམ། སྲིད་སྟོར་བའི་རྒྱལ་པོ་འམ། ས་རུབ་པ་དང་འདྲ་བར་གྱུར། རྒྱལ་པོ་ཆེན་པོ་ལ་ནི་ད་ལྟར་ཕྱོགས་བཞི་ནས་ཕས་རྒོལ་བའི་
དགྲ་ཡང་མེད་ན། ཅིའི་ཕྱིར་འདི་ལྟར་མྱ་ངན་བྱེད་ཅིང་སྡུག་བསྔལ་གྱིས་ནོན་པར་གྱུར། རྒྱལ་པོ་ཆེན་པོ་འོན་ཏེ་ལུས་སྡུག་བསྔལ་བར་གྱུར་ཏམ། འོན་ཏེ་སེམས་སྡུག་བསྔལ་བར་གྱུར། རྒྱལ་བུ་དག་རྟག་ཏུ་འདི་སྙམ་དུ་སེམས་ཏེ། བདག་
ནམ་ཞིག་གི་དུས་ན་དབང་དུ་གྱུར་པའི་རྒྱལ་པོར་འགྱུར་ཞིང་ཐམས་ཅད་ལ་དབང་སྒྱུར་སྙམ་སེམས་སོ། །རྒྱལ་པོ་ཆེན་པོ་ནི་དེ་ལྟར་བསམས་པ་བཞིན་གྲུབ་སྟེ། དེ་ལྟར་ཡུལ་དབུས་གྱུར་འཆང་གི་རྒྱལ་པོར་ཡང་གྱུར་ལ། རིན་པོ་ཆེའི་མཛོད་
མང་པོ་ཡང་དབང་བར་གྱུར་ཏེ། ཡིད་བཞིན་དུ་བདེ་བ་ལ་ལོངས་སྤྱོད་ན་འདི་ལྟར་མྱ་ངན་གྱིས་ནོན་ཅིང་སྡུག་བསྔལ་བར་མ་བྱེད་ཅིག །རྒྱལ་པོས་སྨྲས་པ། བདག་གིས་མྱ་ངན་མི་བྱ་བའི་གཏོལ་ག་ལ་ཞིག་ཡོད། བློན་པོ་ཆེན་པོ་དཔེར་
ན་མི་གླེན་པ་ནི་ཟས་ལ་ཆགས་པའི་ཕྱིར་མཚོན་རྣོན་པོ་ཡང་མི་མཐོང་ངོ་། །ཟས་ཀྱི་ནང་དུ་དུག་བླུགས་ཀྱང་དུག་ཡོད་པར་མི་ཤེས་པ་དང་འདྲ་བར་བདག་ཀྱང་དེ་དང་འདྲའོ། །དཔེར་ན་ཤ་བ་རྩྭ་མཐོང་ན་རླུབས་མི་མཐོང་ངོ་། །དཔེར་ན་བྱི་བ་
ཟས་ལ་ཆགས་ན་བྱི་ལ་མི་མཐོང་བ་དང་འདྲ་བར་བདག་ཀྱང་དེ་དང་འདྲ་སྟེ། ད་ལྟར་གྱི་བདེ་བ་འབའ་ཤིག་མཐོང་ནས་མ་འོངས་པའི་མི་དགེ་བའི་འབྲས་བུ་རྣམ་པར་སྨིན་པ་ནི་མ་མཐོང་ངོ་། །སྔོན་མཁས་པ་ཤེས་རབ་ཅན་ལས་
འདི་སྐད་ཅེས་ཐོས་ཏེ། ཉིན་གཅིག་ཅིང་ལུས་ལ་མཚོན་ཤཀ་ཏི་སུམ་བརྒྱ་བཙུགས་ཀྱང་སླའི། ཕ་དང་མ་ལ་སྐད་ཅིག་ཙམ་ཡང་ངན་སེམས་མི་བསྐྱེད་དོ། །བདག་ནི་སེམས་ཅན་དམྱལ་བའི་མེ་ཤིན་ཏུ་འབར་བ་དང་
རབ་ཏུ་ཉེ་བར་གྱུར་ན། མྱ་ངན་མི་བྱེད་པའི་གཏོལ་ག་ལ་ཞིག་ཡོད། བློན་པོ་དེས་ཡང་གསོལ་པ། སེམས་ཅན་དམྱལ་བ་ཡོད་དོ་ཞེས་རྒྱལ་པོ་ལ་སུ་ཞིག་གིས་འདི་སྐད་ཅེས་བརྫུན་དུ་སྨྲས། དཔེར་ན་ཚེར་མ་རང་

47-1-316b

བཞིན་གྱིས་རྣོ་བ་སུས་བཞོགས། བྱའི་འདབ་མ་སེར་པོར་འདུག་པ་སུས་བྱས། ཆུ་རང་བཞིན་གྱིས་གཤེར་བ་དང་། རྡོ་རང་བཞིན་གྱིས་སྲ་བ་དང་། རླུང་རང་བཞིན་གྱིས་གཡི་པ་དང་མེ་རང་བཞིན་གྱིས་ཚ་བ་དང་འདྲ་སྟེ། 
དངོས་པོ་འདི་དག་ཐམས་ཅད་ཀྱང་རང་སྐྱ་ལ་རང་འཆི་ལ་སུ་ཞིག་གིས་བྱས། སེམས་ཅན་དམྱལ་བ་ཞེས་བྱ་བ་ཡང་། མཁས་པ་ཤེས་རབ་ཅན་ཚིག་ལ་མཁས་པ་དག་གིས་རང་བཟོར་བྱས་སོ། །དམྱལ་བ་ཞེས་བྱ་བ་ལ་དོན་ཅི་
ཞིག་ཡོད་བློན་པོ་ཁྱོད་ཀྱིས་ང་ལ་སྨོས་ཤིག །དམྱལ་ཞེས་བྱ་བ་ནི་དམྱལ་བའོ། །བ་ཞེས་བྱ་བ་ནི་བཅོམ་པའོ། །དམྱལ་བ་བཅོམ་ནས་སྡིག་པའི་རྣམ་པར་སྨིན་པ་མེད་པས་ན་སེམས་ཅན་དམྱལ་བ་ཞེས་བྱའོ། །གཞན་ཡང་དམྱལ་
ཞེས་བྱ་བ་ནི་མིའོ། །བ་ཞེས་བྱ་བ་ནི་ལྷའོ། །ཕ་བསད་དེ་ལྷ་དང་མིར་སྐྱེ་བར་བྱེད་པ་དེ་བས་ན་དྲང་སྲོང་བ་སུ་ཞེས་བྱ་བ་ཡང་འདི་སྐད་ཅེས་སྟོན་ཏེ། ལུས་བསྲེགས་ན་ལྷ་དང་མིའི་བདེ་བ་འཐོབ་པས་དམྱལ་བ་ཞེས་བྱའོ། །གཞན་
ཡང་དམྱལ་ཞེས་བྱ་བ་ནི་ཚེ། བ་ཞེས་བྱ་བ་ནི་རིང་བའོ། །དེ་ལྟར་སྲོག་བཅད་ན་ཚེ་རིང་བར་འགྱུར་བས་དམྱལ་བ་ཞེས་བྱའོ། །དེ་བས་ན་རྒྱལ་པོ་ཆེན་པོ་ཡང་དག་པར་ན་སེམས་ཅན་དམྱལ་བ་ཞེས་བྱ་བ་མེད་དོ། །རྒྱལ་པོ་
ཆེན་པོ་དཔེར་ན་ནས་ཀྱི་ས་བོན་བཏབ་ན་ནས་སྐྱེ་ལ། འབྲས་ཀྱི་ས་བོན་བཏབ་ན་འབྲས་སྐྱེ་སྟེ། དམྱལ་བ་བསད་ན་ཕྱིར་ཡང་དམྱལ་བ་འཐོབ་ལ། མི་བསད་ན་ཕྱིར་ཡང་མིར་འགྱུར་དུ་ངེས་སོ། །རྒྱལ་པོ་བདག་སྨྲ་བའི་
ཚིག་ཉོན་ཅིག །ཡང་དག་པར་ན་བསད་པ་ཞེས་བྱ་བ་མེད་དོ། །གལ་ཏེ་བདག་ཅེས་བྱ་བ་ཡོད་པ་ཞིག་ཡིན་ན་བསད་པར་ཡང་མི་འགྱུར་རོ། །གལ་ཏེ་བདག་ཅེས་བྱ་བ་མེད་ན་བསད་པ་ཡང་མེད་དོ། །དེ་ཅིའི་ཕྱིར་ཞེ་
ན། ཅི་སྟེ་བདག་ཅེས་བྱ་བ་ཡོད་ནི། རྟག་པ་མི་འགྱུར་མི་འཕོ་བ་ཡིན་ནོ། །དེ་ལྟར་རྟག་ཅིང་མི་འགྱུར་མི་འཕོ་བ་ཡིན་པས་བསད་དུ་ཡང་མེད་ལ། མི་འཇིགས་པ། མི་འཆག་པ་མ་བཅིངས་པ། ཞེ་སྡང་མེད་པ། 

47-1-317a

དགའ་བ་མེད་པ་སྟེ། ནམ་མཁའ་ལྟ་བུ་ཡིན་པ་ལ། བསད་པའི་སྡིག་ཏུ་འགྱུར་བ་ལྟ་ག་ལ་ཞིག་ཡོད། ཅི་སྟེ་བདག་ཅེས་བྱ་བ་མེད་པ་ཞིག་ཡིན་ན། ཆོས་ཐམས་ཅད་ཀྱང་མི་རྟག་པ་སྟེ། དེ་ལྟར་ན་མི་རྟག་པ་ཡིན་
པས་སྐད་ཅིག་སྐད་ཅིག་གིས་འཇིག་ཅིང་འགོག་གོ། །དེ་ལྟར་སྐད་ཅིག་གིས་འགོག་པས་གསོད་པ་དང་ཤི་བ་ཡང་སྐད་ཅིག་གིས་འགོག་གོ། །དེ་ལྟར་སྐད་ཅིག་གིས་འགོག་ན་སྡིག་པ་དེ་སུ་ཞིག་གིས་མྱོང་བར་འགྱུར། རྒྱལ་
པོ་ཆེན་པོ་དཔེར་ན་མེས་ཤིང་ཚིག་ན་མེ་ལ་སྡིག་པ་མེད་དོ། །སྟ་རེས་ཤིང་བཅད་ན་སྟ་རེ་ལ་སྡིག་པ་མེད་དོ། །ཟོར་བས་རྩྭ་བརྔས་ན་ཟོར་བ་ལ་སྡིག་མེད་དོ། །རལ་གྲིས་མི་བསད་ན་རལ་གྲི་མི་མ་ཡིན་ཏེ་རལ་གྲི་ལ་མི་སྡིག་ན་ཅིའི་
ཕྱིར་མི་ལ་སྡིག་པར་འགྱུར། དུག་གིས་མི་བསད་ན་དུག་ཀྱང་མི་མ་ཡིན་ཏེ་དུག་ལ་མི་སྡིག་ན་མི་ལ་ཅིའི་ཕྱིར་སྡིག་སྟེ། དངོས་པོ་ཐམས་ཅད་ཀྱང་དེ་དང་འདྲ་བ་ཡིན་པས་ན་ཡང་དག་པར་བསད་པ་མེད་ན་ཅིའི་ཕྱིར་སྡིག་པར་
འགྱུར། རྒྱལ་པོ་ཆེན་པོ་མྱ་ངན་མ་བྱེད་ཅིག །དེ་ཅིའི་ཕྱིར་ཞེ་ན། རྟག་ཏུ་མྱ་ངན་གང་བྱེད་པ། །མྱ་ངན་ཕྱིར་ཞིང་སྐྱེ་བར་འགྱུར། །ཇི་ལྟར་གཉིད་ལ་དགའ་བ་ཡང་། །ཕྱིར་ཞིང་དེ་བཞིན་གཉིད་ཆེར་འགྱུར། 
དེ་བཞིན་འདོད་ཆགས་སྲིད་པ་དང་། །ཆང་དད་ཆེ་བའང་རིག་པར་བྱ། །རྒྱལ་པོ་གསུང་བ་ལྟར་འཇིག་རྟེན་ན་ངའི་ཁ་ན་མ་ཐོ་བའི་ལས་སྦྱོང་བའི་སྨན་པ་མཁས་པ་མེད་དོ་ཞེས་བྱ་བའི་མི་རིགས་སོ། །ད་ལྟར་སྟོན་པ་
ཆེན་པོ་མི་ཕམ་སྐྲའི་ལ་བ་ཞེས་བྱ་བ་ཐམས་ཅད་མཁྱེན་པ། ཐམས་ཅད་གཟིགས་པ། འཇིག་རྟེན་གསུམ་རིག་པ། སྐད་ཅིག་ཡུད་ཙམ་ཐང་ཅིག་གིས་འཇིག་རྟེན་གྱི་ཁམས་མཐའ་ཡས་གྲངས་མེད་པ་
མཐོང་བ། ཐོས་པ་ཡང་དེ་དང་འདྲ་སྟེ། སེམས་ཅན་ཐམས་ཅད་ཀྱི་ཁ་ན་མ་ཐོ་བའི་ཉེས་པ་ཐམས་ཅད་ཡོངས་སུ་སྤོང་བར་བྱེད་པ་ནི་གང་གཱའི་ཀླུང་དང་འདྲ་བར་ཕྱི་ནང་གཉིས་ཀར་ཉེས་པའི་སྐྱོན་མེད་ཅིང་

47-1-317b

ཡོངས་སུ་དག་པ་དང་འདྲ་བའི་སྟོན་པ་ཆེན་པོ་ཡང་སེམས་ཅན་ཐམས་ཅད་ཀྱི་ཕྱི་ནང་གི་ཁ་ན་མ་ཐོ་བའི་ལས་ཐམས་ཅད་སེལ་བ། ད་ལྟར་ཉེ་གནས་རྣམས་ལ་འདི་སྐད་ཅེས་ཆོས་སྟོན་ཏོ། །དེ་ལ་གང་ཞིག་སེམས་ཅན་
ཐམས་ཅད་བསད་ཀྱང་ཁྲེལ་བ་དང་འཛེམ་པའི་སེམས་མེད་ན། དེ་ནི་ནམ་དུ་ཡང་སེམས་ཅན་དམྱལ་བར་མི་ལྟུང་སྟེ། ཇི་ལྟར་ནམ་མཁའ་ལ་རྡུལ་དང་ཆུ་མི་ཆགས་པ་བཞིན་ནོ། །གང་ཁྲེལ་ཞིང་འཛེམ་པ་དང་
ལྡན་པ་ནི་སེམས་ཅན་དམྱལ་བར་ལྟུང་བར་འགྱུར་ཏེ། དཔེར་ན་ཆུ་ཆེན་པོས་ས་ཐམས་ཅད་བརླན་པར་བྱེད་པ་དང་འདྲ་བར་སེམས་ཅན་ཐམས་ཅད་ཀྱང་ལྷ་དབང་སྒྱུར་ཞེས་པ་དེས་བྱས་ཏེ། ལྷ་དབང་སྒྱུར་དགའ་
ན་སེམས་ཅན་ཐམས་ཅད་ཀྱང་བདེ་བར་འགྱུར་རོ། །གལ་ཏེ་ལྷ་དབང་སྒྱུར་མི་དགའ་ན་སེམས་ཅན་ཐམས་ཅད་ཀྱང་སྡུག་བསྔལ་བར་འགྱུར་རོ། །སེམས་ཅན་ཐམས་ཅད་ཀྱི་ཁ་ན་མ་ཐོ་བའི་ལས་དང་བསོད་ནམས་
ཀྱང་ལྷ་དབང་སྒྱུར་ཞེས་བྱ་བས་བྱས་པ་ཡིན་ན། དེ་ལ་ཅིའི་ཕྱིར་ཁ་ན་མ་ཐོ་བ་དང་བསོད་ནམས་སུ་འགྱུར་བ་ཡོད་ཅེས་སྨྲ། དཔེར་ན་ཤིང་མཁན་གྱིས་ཤིང་གི་མི་བྱས་པ་འགྲོ་བ་དང་། སྡོད་པ་དང་། 
འདུག་པ་དང་། ཉལ་བའི་ལས་བྱེད་ཀྱང་སྨྲ་བ་མ་ཡིན་ཏེ། སེམས་ཅན་ཐམས་ཅད་ཀྱང་དེ་དང་འདྲ་བར་ལྷ་དབང་སྒྱུར་ཞེས་བྱ་བས་བྱས་ཏེ། ལྷ་དབང་སྒྱུར་ཞེས་བྱ་བ་དེ་ནི་ཤིང་མཁན་ལྟ་བུའོ། །འཁྲུལ་
འཁོར་གྱི་མི་ཞེས་བྱ་བ་དེ་ནི་སེམས་ཅན་ཐམས་ཅད་ཀྱི་ལུས་ལྟ་བུ་ཡིན་ཏེ། དེ་ལ་ཁ་ན་མ་ཐོ་བའི་ལས་སུ་འགྱུར་བ་ག་ལ་ཞིག་ཡོད་ཅེས་སྟོན་པའི་སྟོན་པ་ཆེན་པོ་དེ་ད་ལྟར་རྒྱལ་པོའི་ཁབ་ན་བཞུགས་སོ། །
རྒྱལ་པོ་ཆེན་པོ་དེའི་གན་དུ་མྱུར་དུ་བཞུད་ཅིག་དང་། དེ་དང་ཕྲད་ན་སྡིག་པ་ཡོངས་སུ་འབྱང་བར་འགྱུར་རོ། །རྒྱལ་པོས་སྨྲས་པ། དེ་ལྟར་ཡང་དག་པར་བདག་གི་ཁ་ན་མ་ཐོ་བའི་ལས་འབྱང་བར་

47-1-318a

འགྱུར་ན་ལྟ་དེ་ལ་སྐྱབས་སུ་འགྲོ་བར་བྱའོ། །དེ་ནས་ཡང་བློན་པོ་འཇིགས་པ་མེད་པ་ཞེས་བྱ་བ་རྒྱལ་པོ་གང་ན་བར་འོངས་ནས་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་འཇིག་རྟེན་ན་གླེན་པ་གཏི་མུག་ཅན་དག་ནི་
ཉིན་གཅིག་ལ་ལན་བརྒྱ་ནི་དགའ། ལན་བརྒྱ་ནི་ཁྲོ། ལན་བརྒྱ་ནི་ཉལ། ལན་བརྒྱ་ནི་སད། ལན་བརྒྱ་ནི་དངངས། ལན་བརྒྱ་ནི་ངུ་། །མཁས་པ་ཤེས་རབ་ཅན་ལ་ནི་དེ་ལྟ་བུའི་བག་མེད་ན། རྒྱལ་པོ་ཆེན་པོ་ཅིའི་ཕྱིར་འདི་ལྟར་
ཤིན་ཏུ་མྱ་ངན་བྱེད་དེ། དཔེར་ན་འདྲོན་པོ་གྲོགས་སྟོར་བ་འམ། འདམ་དུ་ནུབ་པ་ལས་སྐྱབས་མེད་པ་འམ། སྐོམ་པས་གདུངས་པ་ལས་སྐོམ་མེད་པ་ལྟ་བུ་འམ། འབྲོག་བསླད་པ་ལས་ལམ་སྟོར་བ་ལྟ་བུ་འམ། 
ནད་ཚབས་པོ་ཆེ་ལ་གསོ་བའི་སྨན་པ་མཁས་པ་མེད་པ་འམ། རྒྱ་མཚོར་ཞུགས་པ་ལས་གྲུ་ཞིག་པ་ལས་སྐྱབས་མེད་པ་ལྟ་བུར་གྱུར་པ་འདི། རྒྱལ་པོ་ཆེན་པོ་ད་ལྟར་ལུས་མི་བདེ་འམ་སེམས་མི་བདེ། རྒྱལ་པོས་
སྨྲས་པ། ལུས་དང་སེམས་བདེ་བའི་གཏོལ་ལྟ་ག་ལ་ཞིག་ཡོད། བདག་སྡིག་པའི་བཤེས་གཉེན་ལ་བརྟེན་ནས་ངག་གིས་ཉེས་པ་མ་བརྟགས་པས་རྒྱལ་པོ་ཡབ་ཀྱང་བདག་གིས་བསད་པ་ན། བདག་ནི་གདོན་མི་
ཟ་བར་སེམས་ཅན་དམྱལ་བར་ལྟུང་ཡང་བདག་ལ་མགོན་དང་སྐྱབས་སུ་འགྱུར་བ་མེད་དོ། །བློན་པོ་དེས་སྨྲས་པ། རྒྱལ་པོ་ཆེན་པོ་དེ་ལྟར་མྱ་ངན་མ་བྱེད་ཅིག །རྒྱལ་རིགས་ཤེས་བྱ་བ་ནི་རྒྱལ་པོའི་རིགས་ཡིན་ཏེ། 
གལ་ཏེ་རྒྱལ་པོའི་སྲིད་ཀྱི་ཕྱིར་རམ། དགེ་སློང་ངམ། བྲམ་ཟེའི་ཕྱིར་རམ། འགྲོ་བ་མང་པོ་ལ་བདེ་བར་བྱ་བའི་ཕྱིར་གསོད་པའི་ལས་བྱས་ཀྱང་ཁ་ན་མ་ཐོ་བའི་སྡིག་པ་མེད་དོ། །ཡབ་རྒྱལ་པོ་ནི་དགེ་སྦྱོང་ལ་བསྙེན་
བཀུར་བྱེད་ཀྱང་། བྲམ་ཟེ་ལ་བསྙེན་བཀུར་མི་བྱེད་པས། སེམས་མ་སྙོམས་ཏེ། དེ་ལྟར་ན་སེམས་མ་སྙོམས་པས་ན་དེ་ནི་རྒྱལ་རིགས་མ་ཡིན་ནོ། །རྒྱལ་པོ་ཆེན་པོ་ནི་བྲམ་ཟེ་ལ་བསྙེན་བཀུར་བྱེད་པའི་ཕྱིར་རྒྱལ་

47-1-318b

པོ་སྔ་མ་བསད་ཀྱང་ཁ་ན་མ་ཐོ་བའི་ལས་མེད་དོ། །རྒྱལ་པོ་ཆེན་པོ་བསད་པ་ཞེས་བྱ་བ་ནི་ཡང་དག་པར་ན་མེད་པ་ཡིན་ནོ། །བསད་པ་ཞེས་བྱ་བའི་འཚོ་བའི་སྲོག་གཅོད་པ་ཡིན་ཏེ། དེ་ལ་འཚོ་བའི་སྲོག་ཅེས་བྱ་བ་ནི་
དབུགས་ཤེས་བྱ་བ་ཡིན་ནོ། །དབུགས་ཤེས་བྱ་བ་ལ་ནི་གཅད་ཅིང་གསད་དུ་མེད་ན། ཅིའི་ཕྱིར་འཚོ་བ་བསད་པ་ལ་ཁ་ན་མ་ཐོ་བའི་སྡིག་ལས་སུ་འགྱུར། རྒྱལ་པོ་ཆེན་པོ་མྱ་ངན་མ་བྱེད་ཅིག །དེ་ཅིའི་ཕྱིར་ཞེ་ན། རྟག་ཏུ་
མྱ་ངན་གང་བྱེད་པ། །མྱ་ངན་ཕྱིར་ཞིང་སྐྱེ་བར་འགྱུར། །ཇི་ལྟར་གཉིད་ལ་དགའ་བ་ཡང་། །ཕྱིར་ཞིང་དེ་བཞིན་གཉིད་ཆེར་འགྱུར། །དེ་བཞིན་འདོད་ཆགས་སྲེད་པ་དང་། །ཆང་དད་ཆེ་བ་འང་རིག་པར་བྱ། །རྒྱལ་པོ་གསུང་བ་ལྟར་
འཇིག་རྟེན་ན་སྨན་པ་མཁས་པ་མེད་དོ་ཞེས་བྱར་མི་རུང་ངོ་། །ད་ལྟ་སྟོན་པ་ཆེན་པོ་གཅེར་བུ་པ་གཉེན་གྱི་བུ་ཐམས་ཅད་མཁྱེན་པ། ཐམས་ཅད་གཟིགས་པ། སེམས་ཅན་ཐམས་ཅད་ལ་བྱམས་བརྩེ་བ། སེམས་ཅན་ཐམས་
ཅད་ཀྱི་དབང་པོ་རྣོ་རྟུལ་ལ་མཁས་པ། ཅི་དང་ཅི་རིགས་པའི་ཐབས་ཤིན་དུ་རྟོགས་པ། འཇིག་རྟེན་གྱི་ཆོས་བརྒྱད་ཀྱིས་མ་གོས་པ། ཚངས་པར་སྤྱོད་པ་ཤིན་དུ་རྣམ་པར་དག་པ། རབ་ཏུ་ཞི་བ་དང་ལྡན་པ་དེ་དེ་ལྟར་ཉེ་གནས་རྣམས་ལ་འདི་སྐད་ཅེས་
ཆོས་སྟོན་ཏོ། །སྦྱིན་པ་ཡང་མེད། དགེ་བ་ཡང་མེད། ཕ་ཡང་མེད། མ་ཡང་མེད། ད་ལྟར་ཡང་མེད། འདས་པ་ཡང་མེད། དགྲ་བཅོམ་པ་ཡང་མེད། བསྒོམ་པ་ཡང་མེད། ལམ་ཡང་མེད་དེ། སེམས་ཅན་ཐམས་ཅད་བསྐལ་པ་བརྒྱ་ཁྲི་འདས་ནས་
སྐྱེ་ཤིའི་འཁོར་ལོ་ལས་རང་རྣམ་པར་གྲོལ་བར་འགྱུར་ཏེ། སྡིག་པ་དང་བཅས་པ་དང་སྡིག་པ་མེད་པ་ཡང་ཐམས་ཅད་དེ་དང་འདྲའོ། །དཔེར་ན་ཀླུང་ཆེན་པོ་བཞི་སྟེ། སིན་དྷུ་དང་གང་གཱ་དང་། པཀྵུ་དང་། སི་ཏ་ཞེས་བྱ་བ་བཞི་ཅར་ཡང་རྒྱ་མཚོ་ཆེན་པོར་འབབ་
སྟེ་ཁྱད་པར་མེད་དོ། །སེམས་ཅན་ཐམས་ཅད་ཀྱང་དེ་དང་འདྲ་སྟེ། རྣམ་པར་གྲོལ་བའི་དུས་ན་ཐམས་ཅད་ཁྱད་པར་མེད་དོ། །ཞེས་སྟོན་པའི་སྟོན་པ་ཆེན་པོ་དེ་ད་ལྟར་རྒྱལ་པོའི་ཁབ་ན་བཞུགས་ཀྱིས། རྒྱལ་པོ་ཆེན་པོ་དེའི་གན་དུ་མྱུར་དུ་བཞུད་ཅིག་དང་། དེ་དང་ཕྲད་ན་ཁ་ན་མ་ཐོ་

47-1-319a

བའི་ལས་འབྱང་བར་འགྱུར་རོ། །རྒྱལ་པོས་སྨྲས་པ། དེ་ལྟར་བདག་གི་ཁ་ན་མ་ཐོ་བ་ཡང་དག་པར་འབྱང་ན་ལྟ་དེ་ལ་སྐྱབས་སུ་འགྲོ་བར་བྱའོ། །དེའི་ཚེ་སྨན་པ་ཆེན་པོ་འཚོ་བྱེད་ཅེས་བྱ་བ་རྒྱལ་པོ་ཆེན་པོའི་དྲུང་དུ་འོངས་ནས་
རྒྱལ་པོ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་བདེ་བར་ཉལ་ལམ་ཞེས་སྨྲས་ནས། དེ་ལ་རྒྱལ་པོས་ཚིགས་སུ་བཅད་པ་འདི་དག་སྨྲས་སོ། །ཀུན་ནས་ཉོན་མོངས་པ་ཐམས་ཅད། །གང་གིས་ཡོངས་སུ་གཅོད་ནུས་ལ། །འཇིག་རྟེན་
གསུམ་ན་མ་ཆགས་ན། །དེ་དག་བདེ་བར་ཉལ་བར་འགྱུར། །གང་གིས་མྱ་ངན་འདའ་བ་ནི། །ཤིན་དུ་ཟབ་མོའི་དོན་སྟོན་པ། །བྲམ་ཟེ་ཡང་དག་པ་དེ་ནི། །ཤིན་དུ་བདེ་བར་ཉལ་བར་འགྱུར། །ལུས་ཀྱི་ཉེས་པ་གང་ཡང་མེད། །ངག་གི་ཉེས་པ་བཞི་ཡང་
སྤངས། །སེམས་ལ་ཐེ་ཚོམ་གང་མེད་པ། །དེ་དག་བདེ་བར་ཉལ་བར་འགྱུར། །ལུས་དང་སེམས་ནི་མ་གདུངས་ཤིང་། །རབ་ཏུ་ཞི་ལ་བདེ་གནས་ན། །བླ་མེད་བདེ་བ་ཐོབ་འགྱུར་ཞིང་། །ཤིན་དུ་བདེ་བར་ཉལ་བར་འགྱུར། །སེམས་ནི་ཅི་ལའང་མ་ཆགས་ཤིང་། །
འཁོན་དུ་འགྱུར་བ་ཡོངས་སྲངས་ནས། །རྟག་ཏུ་འདུམ་ལ་མི་རྩོད་པ། །དེ་ནི་བདེ་བར་ཉལ་བར་འགྱུར། །གང་ཞིག་སྡིག་པ་མི་བྱེད་ལ། །ཁྲེལ་ཞིང་འཛེམ་པའི་སེམས་ལྡན་ཏེ། །རྣམ་པར་སྨིན་ལ་ཡིད་ཆེས་ན། །དེ་ནི་བདེ་བར་ཉལ་བར་འགྱུར། །
ཕ་དང་མ་ལ་བཀུར་སྟི་བྱེད། །སེམས་ཅན་གཅིག་གི་སྲོག་མི་གཅོད། །གཞན་གྱི་ནོར་ལ་རྐུ་སེམས་མེད། །དེ་དག་བདེ་བར་ཉལ་བར་འགྱུར། །དབང་པོ་རྣམས་ནི་ཤིན་དུ་ཐུལ། །དགེ་བའི་བཤེས་གཉེན་ལ་སྟེན་ཅིང་། །རྣམ་བཞི་བདུད་
ཀྱང་རབ་བཅོམ་ན། །དེ་དག་བདེ་བར་ཉལ་བར་འགྱུར། །བཀྲ་ཤིས་བཀྲ་ཤིས་མ་ཡིན་དང་། །བདེ་དང་སྡུག་བསྔལ་མི་མཐོང་ཞིང་། །སོ་སོའི་སྐྱེ་བོ་མང་པོའི་ཕྱིར། །འཁོར་བའི་འཁོར་བར་འཁོར་བ་ལ། །གང་ཞིག་མི་སྐྱོ་བ་དེ་ནི། །
ཤིན་དུ་བདེ་བར་ཉལ་བར་འགྱུར། །བདེ་བར་ཉལ་བ་སུ་ཞེ་ན། །སངས་རྒྱས་བཅོམ་ལྡན་འདས་ཡིན་ཏེ། །སྟོང་པའི་ཏིང་འཛིན་རབ་རྟོགས་ནས། །ལུས་དང་སེམས་ནི་མི་གཡོའོ། །སུ་ཞིག་བདེ་བར་ཉལ་ཞེ་ན། །བྱམས་དང་སྙིང་རྗེར་ལྡན་པ་ཡི། །

47-1-319b

བདག་མེད་པ་ལ་རབ་བརྩོན་ཞིང་། །ཀུན་ལ་བུ་བཞིན་ལྟ་བའོ། །སེམས་ཅན་མ་རིག་ལྡོངས་པ་རྣམས། །ཉོན་མོངས་འབྲས་བུ་མི་མཐོང་སྟེ། །རྟག་ཏུ་སྡིག་པའི་ལས་བྱེད་པས། །དེ་ནི་བདེ་བར་ཉལ་མི་འགྱུར། །གལ་ཏེ་བདག་གི་ལུས་ཀྱིས་
སམ། །ཕ་རོལ་གཞན་གྱི་ལུས་ངག་གིས། །མི་དགེ་བཅུ་ཡི་ལས་བྱས་ན། །དེ་ནི་བདེ་བར་ཉལ་མི་འགྱུར། །གང་ཞིག་བདེ་བ་འདོད་པའི་ཕྱིར། །ཕ་བསད་ཉེས་པ་མེད་ཅེས་བྱ། །སྡིག་པའི་བཤེས་གཉེན་ལ་ཕྱོགས་ན། །དེ་ནི་བདེ་བར་ཉལ་མི་འགྱུར། །
ཟས་ཀྱི་ཚོད་ནི་མ་ཟིན་ནས། །གྲང་མོ་འཐུངས་པའི་ཚད་འདས་ན། །ནད་ཀྱི་སྡུག་བསྔལ་སྐྱེ་འགྱུར་ཏེ། །དེ་ནི་བདེ་བར་ཉལ་མི་འགྱུར། །གལ་ཏེ་རྒྱལ་པོ་ལ་འཁུས་སམ། །གཞན་གྱི་བུད་མེད་ལ་ཉལ་ལམ། །དགོན་པའི་འབྲོག་ཏུ་འགྲོ་བ་དག །
དེ་ནི་བདེ་བར་ཉལ་མི་འགྱུར། །ཚུལ་ཁྲིམས་བསྲུངས་པའི་མྱུ་གུ་མ་ཐོབ་དང་། །རྒྱལ་འཚབ་རྒྱལ་པོའི་ཐབས་ནི་མ་ཐོབ་དང་། །རྐུ་བ་པོ་དག་ནོར་རྫས་མ་ཐོབ་པ། །འདི་ནི་རྟག་ཏུ་བདེ་བར་ཉལ་མི་འགྱུར། །སྨན་པ་འཚོ་བྱེད་བདག་ནི་ནད་ཀྱིས་གཟིར་
ཏེ། རྒྱལ་པོ་ཆོས་བཞིན་དུ་སྲིད་འཚོ་བ་ལ་བདག་འཁུས་ཏེ་བསད་པས་སྨན་པ་མཁས་པ་ཐམས་ཅད་ཀྱིས་སྨན་དཔྱད་དང་སྔགས་ལ་སོགས་པ་བྱས་ཀྱང་། བདག་གི་ནད་འཚོ་བར་མ་གྱུར་ཏོ། །དེ་ཅིའི་ཕྱིར་ཞེ་ན། བདག་གི་ཡབ་རྒྱལ་པོ་
ཆོས་བཞིན་དུ་སྲིད་འཚོ་བ་ལས་ཉེས་པའི་སྐྱོན་མེད་པར་བདག་གིས་བདག་འཁུས་ཏེ་ཕ་བསད་པས་ཉ་སྐམ་སར་ཕྱུང་ན་དགའ་བ་ལྟ་ག་ལ་ཞིག་ཡོད། རི་དགས་སྙི་ལ་ཐོགས་ན་དགའ་བའི་སེམས་མེད་པ་འམ། ཇི་ལྟར་གང་ཟག་
གིས་རིང་པོར་མི་ཐོགས་པར་ཤི་བར་ཤེས་པ་འམ། རྒྱལ་པོ་སྲིད་སྟོར་བ་ཡུལ་གཞན་དུ་བྲོས་པ་འམ། ནད་ཚབས་པོ་ཆེས་བཏབ་པ་ལས་གསོར་མི་རུང་ཞེས་ཐོས་པ་འམ། ཁྲིམས་བཤིག་པ་ཁ་ན་མ་ཐོ་བའི་ལས་ཡོད་པར་ཐོས་པ་
དང་འདྲའོ། །བདག་གིས་སྔོན་མཁས་པ་ཤེས་རབ་ཅན་དག་ལས་ཐོས་ན་ལུས་དང་ངག་དང་ཡིད་ཀྱི་ལས་ཡོངས་སུ་མ་དག་ན། གང་ཟག་དེ་ནི་གདོན་མི་ཟ་བར་སེམས་ཅན་དམྱལ་བར་ལྟུང་ངོ་ཞེས་ཐོས་པས། བདག་ཀྱང་གདོན་མི་ཟ་བར་སེམས་

47-1-320a

ཅན་དམྱལ་བར་ལྟུང་ན་བདེ་བར་ཉལ་བའི་གཏོལ་ལྟ་ག་ལ་ཞིག་ཡོད། ད་བདག་བླ་ན་མེད་པའི་སྨན་པ་ཆེན་པོ་ཆོས་ཀྱི་སྨན་གཏོང་བ་བདག་གི་ནད་ཀྱི་སྡུག་བསྔལ་གསོ་བ་ཡང་མེད་དོ། །འཚོ་བྱེད་ཀྱིས་སྨྲས་པ། རྒྱལ་པོ་ཆེན་པོ་
ལེགས་སོ་ཤིན་དུ་ལེགས་སོ། །རྒྱལ་པོས་འདི་ལྟར་ཁ་ན་མ་ཐོ་བའི་ལས་བྱས་ཀྱང་ཤིན་དུ་འགྱོད་པའི་སེམས་སྐྱེས་ཏེ། ཁྲེལ་བ་དང་འཛེམ་པའི་སེམས་དང་ལྡན་པ་ལེགས་སོ། །རྒྱལ་པོ་ཆེན་པོ་སངས་རྒྱས་བཅོམ་ལྡན་འདས་ནི་རྟག་ཏུ་འདི་སྐད་
ཅེས་གསུང་ངོ་། །རྣམ་པར་དཀར་བའི་ཆོས་འདི་གཉིས་ཀྱིས་སེམས་ཅན་གྱི་མགོན་དང་སྐྱབས་སུ་འགྱུར་རོ། །གཉིས་གང་ཞེ་ན་ཁྲེལ་བ་དང་འཛེམ་པའོ། །འཛེམ་པ་ནི་བདག་ཁ་ན་མ་ཐོ་བའི་ལས་མི་བྱེད་དོ། །ཁྲེལ་བ་ནི་གཞན་བྱེད་ཏུ་མི་
འཇུད་པའོ། །འཛེམ་པ་ནི་བདག་ངོ་ཚ་བར་བྱེད་པའོ། །ཁྲེལ་བ་ནི་ཕ་རོལ་འགྱོད་ཅིང་འཐོལ་བའོ། །འཛེམ་པ་ནི་མི་ལ་ངོ་ཚ་བའོ། །ཁྲེལ་བ་ནི་ལྷ་ལ་ངོ་ཚ་བ་སྟེ། དེ་ནི་འཛེམ་པ་དང་ཁྲེལ་བ་ཞེས་བྱའོ། །འཛེམ་པ་དང་ཁྲེལ་བ་མེད་པ་ནི་མི་ཞེས་
མི་བྱ་སྟེ་བྱོལ་སོང་ཞེས་བྱའོ། །འཛེམ་པ་དང་ཁྲེལ་བར་ལྡན་པའི་ཕྱིར་ཕ་མ་དང་། སློབ་དཔོན་ལ་བཀུར་སྟི་བྱེད་དོ། །ཁྲེལ་བ་དང་འཛེམ་པར་ལྡན་པའི་ཕྱིར་ཕ་མ་དང་། ཕུ་ནུ་དང་མིང་སྲིང་ཡོད་པར་སྨྲའོ། །རྒྱལ་པོ་ཆེན་པོ་འཛེམ་པ་དང་ཁྲེལ་བར་ལྡན་
པ་ལེགས་སོ། །རྒྱལ་པོ་ཆེན་པོ་རེ་ཤིག་བདག་གིས་སངས་རྒྱས་བཅོམ་ལྡན་འདས་ལས་ཐོས་པ་གསོན་ཅིག །ཤེས་རབ་དང་ལྡན་པ་ནི་རྣམ་པ་གཉིས་ཏེ། སྡིག་པ་མི་བྱེད་པ་དང་། བྱས་ནས་འགྱོད་ཅིང་འཐོལ་བའོ། །གླེན་པ་གཏི་མུག་ཅན་
ལ་ཡང་རྣམ་པ་གཉིས་ཏེ། སྡིག་པ་བྱེད་པ་དང་། བྱས་ནས་ཀྱང་འཆབ་པའོ། །དེ་ལྟར་སྡིག་པ་བྱས་ཀྱང་ཕྱིས་འགྱོད་ཅིང་འཐོལ་ཏེ། འཐོལ་ནས་ཀྱང་ཁྲེལ་དང་འཛེམ་པས་ཕྱིས་མི་བྱེད་པར་དམ་བཅས་ན། དཔེར་ན་ཆུ་རྙོག་པ་ཅན་གྱི་ནང་དུ་ནོར་བུ་རིན་
པོ་ཆེ་བཅུག་ན་ཆུ་དང་བར་འགྱུར་བ་འམ། སྤྲིན་དང་ན་བུན་གྱིས་མ་ཆོད་ན་ཟླ་བ་ཡོངས་སུ་གསལ་བ་དང་འདྲ་བར་སྡིག་པ་བྱས་ནས་འགྱོད་པ་ཡང་དེ་དང་འདྲའོ། །གལ་ཏེ་རྒྱལ་པོས་ཀྱང་འགྱོད་ཅིང་འཐོལ་ལ། འཛེམ་པ་དང་ཁྲེལ་བར་ལྡན་ན། ཁ་ན་མ་ཐོ་

47-1-320b

བའི་ཉེས་པ་དག་འབྱང་ཞིང་ཡོངས་སུ་དག་པར་འགྱུར་རོ། །རྒྱལ་པོ་ཆེན་པོ་ཕྱུག་པ་ལ་རྣམ་པ་གཉིས་ཏེ། བ་ལང་དང་རྟ་དང་རྐང་འགྲོས་རྣམ་པ་སྣ་ཚོགས་ཀྱིས་ཕྱུག་པ་དང་། གསེར་དང་དངུལ་དང་། ནོར་དབྱིག་གིས་ཕྱུག་པ་སྟེ། རྟ་དང་བ་ལང་མང་ཡང་
ནོར་བུ་རིན་པོ་ཆེ་གཅིག་ཙམ་གྱི་ཟླར་མི་ཆོག་གོ། །རྒྱལ་པོ་ཆེན་པོ་སེམས་ཅན་ཡང་དེ་དང་འདྲ་སྟེ། སྡིག་པས་ཕྱུག་པ་དང་། དགེ་བས་ཕྱུག་པ་སྟེ། སྡིག་པ་མང་དུ་བྱས་ཀྱང་དགེ་བ་གཅིག་གི་ཟླར་མི་ཕོད་དོ། །བདག་གིས་སངས་རྒྱས་བཅོམ་ལྡན་འདས་ཀྱིས་
གསུངས་པ་ལས་ཐོས་ནས་དགེ་བ་གཅིག་ལ་ནན་ཏན་བྱས་པའི་སེམས་ཀྱིས་སྡིག་པ་མང་པོ་བཅོམ་པར་འགྱུར་རོ། །རྒྱལ་པོ་ཆེན་པོ་དཔེར་ན་རྡོ་རྗེ་ཆུང་ངུ་མ་གཅིག་གིས་རི་རབ་ཀྱང་འབིགས་པ་འམ། མེ་ཆུང་ངུ་མས་ཐམས་ཅད་ཚིག་པ་འམ། དུག་ཆུང་ངུ་
མས་སེམས་ཅན་འཆི་བར་འགྱུར་བ་དང་འདྲ་བར་དགེ་བ་ཆུང་ཟད་ཙམ་གྱིས་ཀྱང་སྡིག་པ་ཆེན་པོ་ཆོམས་པར་འགྱུར་ཏེ། དགེ་བ་དེ་ལ་ཆུང་ངུ་ཞེས་བྱ་མེད་ཀྱི་ཡང་དག་པར་ན་ཆེན་པོ་ཡིན་ནོ། །དེ་ཅིའི་ཕྱིར་ཞེ་ན། སྡིག་པ་ཆེན་པོ་ཆོམས་པའི་ཕྱིར་རོ། །རྒྱལ་
པོ་ཆེན་པོ་བཅོམ་ལྡན་འདས་ཀྱིས་གསུངས་པ་ལྟར་ན་འཆབ་པ་ནི་ཟག་པ་དང་བཅས་པའོ། །མི་འཆབ་པ་ནི་ཟག་པ་མེད་པའོ། །དེ་བས་ན་གང་འགྱོད་ཅིང་འཐོལ་བ་ནི་ཟག་པ་མེད་པའོ། །དེ་བས་ན་ཁ་ན་མ་ཐོ་བའི་ལས་བྱས་པ་དག་སྡིག་པ་མི་འཆབ་པར་
བྱའོ། །སྡིག་པ་མི་འཆབ་པས་ཁ་ན་མ་ཐོ་བའི་ལས་སྲབ་པར་འགྱུར་རོ། །འཛེམ་པ་དང་ཁྲེལ་བས་བཤགས་ན་ཁ་ན་མ་ཐོ་བའི་ལས་ཡོངས་སུ་འབྱང་བར་འགྱུར་རོ། །རྒྱལ་པོ་ཆེན་པོ་ཆུའི་ཐིགས་པ་ཉུང་བ་ལྟར་བྱེད་ཀྱང་སྣོད་ཆེན་པོ་གང་བར་འགྱུར་ཏེ། 
དེ་བཞིན་དུ་དགེ་བའི་སེམས་ཀྱང་ཁ་ན་མ་ཐོ་བའི་ལས་ཆེན་པོ་བཅོམ་པར་འགྱུར་རོ། །གལ་ཏེ་ཁ་ན་མ་ཐོ་བའི་ལས་བཅབས་ན་ཁ་ན་མ་ཐོ་བའི་ལས་ཕྱིར་ཞིང་སྐྱེས་འོ། །གལ་ཏེ་འཛེམ་པ་དང་ཁྲེལ་བས་འགྱོད་ཅིང་འཐོལ་ན་ཁ་ན་མ་ཐོ་བའི་ལས་
ཡོངས་སུ་འབྱང་བར་འགྱུར་རོ། །དེ་བས་ན་སངས་རྒྱས་བཅོམ་ལྡན་འདས་ཀྱིས་གསུངས་པ་ལས་མཁས་པ་ཤེས་རབ་ཅན་དག་ནི་ཁ་ན་མ་ཐོ་བའི་ལས་མི་འཆབ་བོ་ཞེས་གསུངས་སོ། །རྒྱལ་པོ་ཆེན་པོ་རྒྱུ་ལ་ཡིད་ཆེས་པ་དང་། འབྲས་བུ་ལ་ཡིད་ཆེས་པ་དང་

47-1-321a

ལས་ཀྱི་རྣམ་པར་སྨིན་པ་ལ་ཡིད་ཆེས་པ་ཤིན་དུ་ལེགས་སོ། །རྒྱལ་པོ་ཆེན་པོ་མྱ་ངན་མ་བྱེད་ཅིག །གལ་ཏེ་སེམས་ཅན་གང་ཞིག་ཁ་ན་མ་ཐོ་བའི་ལས་བྱས་ན་བཅབས་ཏེ་མི་འཐོལ་བ་དང་། འཛེམ་པ་དང་ཁྲེལ་བའི་སེམས་མེད་པ་དང་། 
རྒྱུ་དང་འབྲས་བུ་དང་ལས་ཀྱི་རྣམ་པར་སྨིན་པ་མི་མཐོང་བ་དང་། མཁས་པ་ཤེས་རབ་ཅན་ལ་གསོལ་བ་མི་འདེབས་ཤིང་དགེ་བའི་བཤེས་གཉེན་ལ་མི་སྟེན་པ་དེ་ནི་སྨན་པ་མཁས་པ་ཐམས་ཅད་གང་གིས་ཀྱང་གསོ་མི་ནུས་ཏེ། དཔེར་ན་ནད་ཀམ་པ་ལ་ཞེས་བྱ་བས་བཏབ་
ན། འཇིག་རྟེན་གྱི་སྨན་པ་གང་གིས་ཀྱང་གསོ་བར་མི་བྱེད་དོ། །ཁ་ན་མ་ཐོ་བའི་ལས་འཆབ་པ་ཡང་དེ་དང་འདྲ་སྟེ། ཁ་ན་མ་ཐོ་བའི་ལས་འཆབ་པ་གང་ཞེ་ན། ལོག་སྲེད་ཅན་ཡིན་ནོ། །ལོག་སྲེད་ཅན་ཞེས་བྱ་བ་ནི་རྒྱུ་དང་འབྲས་བུ་ལ་ཡིད་མི་ཆེས་པ། འཛེམ་པ་
དང་ཁྲེལ་བ་མེད་པ། ལས་ཀྱི་རྣམ་པར་སྨིན་པ་ལ་ཡིད་མི་ཆེས་པ་ད་ལྟར་དང་། མ་འོངས་པའི་ལས་མི་མཐོང་བ། དགེ་བའི་བཤེས་གཉེན་ལ་མི་སྟེན་པ། སངས་རྒྱས་བཅོམ་ལྡན་འདས་ཀྱི་བསྟན་པ་ལ་མི་འཇུག་པའི་གང་ཟག་དེ་ནི་ལོག་སྲེད་ཅན་ཞེས་བྱ་སྟེ། 
སངས་རྒྱས་བཅོམ་ལྡན་འདས་ཀྱིས་ཀྱང་གསོ་མི་ནུས་སོ། །དེ་ཅིའི་ཕྱིར་ཞེ་ན། དཔེར་ན་འཇིག་རྟེན་ན་མི་རོ་ལ་ནི་སྨན་པ་གང་གིས་ཀྱང་གསོ་མི་ནུས་པ་དང་འདྲ་བར་ལོག་སྲེད་ཅན་ཡང་དེ་དང་འདྲ་སྟེ། སངས་རྒྱས་བཅོམ་ལྡན་འདས་ཀྱིས་ཀྱང་གསོ་མི་ནུས་སོ། །
རྒྱལ་པོ་ཆེན་པོ་ནི་ལོག་སྲེད་ཅན་མ་ཡིན་པས་ངའི་ནད་གསོ་ནུས་པ་མེད་དོ་ཞེས་བྱ་བ་མི་རུང་ངོ་། །རྒྱལ་པོ་གསུང་བ་ལྟར་ངའི་ནད་གསོ་མི་ནུས་སོ་ཞེས་བགྱི་བར་རྒྱལ་པོ་ཆེན་པོ་འདི་ལྟར་ཤེས་པར་གྱིས་ཤིག །ཡུལ་སེར་སྐྱའི་རྒྱལ་པོ་ཟས་གཙང་མའི་སྲས་གཽ་ཏ་
མའི་རིགས་མཚན་དོན་གྲུབ་ཅེས་བྱ་བ་སུས་ཀྱང་མ་བསྟན་པར་རང་གིས་རིག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། མཚན་བཟང་པོ་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱད་བཅུས་ལུས་ཡོངས་སུ་བརྒྱན་
པ། སྟོབས་བཅུ་དང་། མི་འཇིགས་པ་བཞི་དང་ལྡན་ཏེ། ཐམས་ཅད་མཁྱེན་པ། ཐམས་ཅད་གཟིགས་པ། བྱམས་པ་དང་སྙིང་རྗེ་ཆེ་བ། ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་ཐུགས་བརྩེ་བ། དགེ་བ་དང་ལྡན་པའི་སེམས་ཅན་གྱི་རྗེས་སུ་

47-1-321b

བེའུ་དང་མ་མོ་མི་གཏོང་བ་དང་འདྲ་བར་དུས་མཁྱེན་པས་གསུང་བ། དུས་མ་ཡིན་པར་མི་སྨྲ་བ། ཡང་དག་པར་སྨྲ་བ། ཡོངས་སུ་དག་པར་སྨྲ་བ། ཡོངས་སུ་དཀར་བར་སྨྲ་བ། དོན་དང་ལྡན་པར་སྨྲ་བ། ཆོས་དང་ལྡན་པར་སྨྲ་བ། གཅིག་ཏུ་ཆད་པར་སྨྲ་བ། སེམས་ཅན་
མང་པོའི་ཉོན་མོངས་པ་ཡོངས་སུ་སྤོང་བར་བྱེད། སོ་སོའི་སྐྱེ་བོའི་དབང་པོ་དང་བསམ་པའི་མཚན་ཉིད་ལ་ཤིན་ཏུ་མཁས་པ། ཅི་དང་ཅི་རིགས་པའི་ཐབས་ལ་ཤིན་དུ་མཁས་པ། ཡེ་ཤེས་མཐོ་ཞིང་གཟར་བ་ནི་རི་རབ་ལྷུན་པོ་དང་འདྲ་བ། ཡངས་ཤིང་ཟབ་པ་ནི་
རྒྱ་མཚོ་དང་འདྲ་བ། སངས་རྒྱས་བཅོམ་ལྡན་འདས་དེ་ལ་རྡོ་རྗེ་ལྟ་བུའི་ཡེ་ཤེས་མངའ་བས། སོ་སོའི་སྐྱེ་བོའི་ཁ་ན་མ་ཐོ་བའི་ལས་ཐམས་ཅད་འཇོམས་པས་དེས་མི་ཆོམས་ཤེས་བྱ་བའི་གནས་མེད་དོ། །དེ་ད་ལྟར་འདི་ནས་དཔག་ཚད་བཅུ་གཉིས་ཀྱི་ཕ་རོལ་
གྲོང་ཁྱེར་རྩྭ་མཆོག་ཅེས་བྱ་བར་ཤིང་སཱ་ལ་དྲུང་གཉིས་ཀྱི་བར་ན་བཞུགས་ཏེ། ད་ལྟར་ཚད་མེད་གྲངས་མེད་པའི་བྱང་ཆུབ་སེམས་དཔའི་དགེ་འདུན་ལ་ཆོས་རྣམ་པ་སྣ་ཚོགས་སྟོན་པ་ནི་འདི་ལྟ་སྟེ་ཡོད་པ་དང་མེད་པ་དང་། འདུས་བྱས་དང་འདུས་མ་བྱས་པ་དང་། ཟག་
པ་དང་བཅས་པ་དང་ཟག་པ་མེད་པ་དང་། ཉོན་མོངས་པའི་འབྲས་བུ་དང་། རྣམ་པར་དཀར་བའི་ཆོས་དང་། གཟུགས་ཀྱི་ཆོས་དང་གཟུགས་མ་ཡིན་པའི་ཆོས་དང་། གཟུགས་ཀྱང་མ་ཡིན་གཟུགས་མ་ཡིན་པ་ཡང་མ་ཡིན་པའི་ཆོས་དང་། བདག་དང་བདག་མ་
ཡིན་པའི་ཆོས་དང་། བདག་ཀྱང་མ་ཡིན་བདག་མ་ཡིན་པ་ཡང་མ་ཡིན་པ་དང་། རྟག་པ་དང་། རྟག་པ་མ་ཡིན་པ་དང་། རྟག་པ་ཡང་མ་ཡིན་རྟག་པ་མ་ཡིན་པ་ཡང་མ་ཡིན་པ་དང་། བདེ་བ་དང་བདེ་བ་མ་ཡིན་པ་དང་། བདེ་བ་ཡང་མ་ཡིན་བདེ་བ་མ་ཡིན་པ་ཡང་མ་ཡིན་
པ་དང་། མཚན་མ་དང་མཚན་མ་མ་ཡིན་པ་དང་། མཚན་མ་ཡང་མ་ཡིན་མཚན་མ་མ་ཡིན་པ་ཡང་མ་ཡིན་པ་དང་། ཆད་པ་དང་ཆད་པ་མ་ཡིན་པ་དང་། ཆད་པ་ཡང་མ་ཡིན་ཆད་པ་མ་ཡིན་པའང་མ་ཡིན་པ་དང་། འཇིག་རྟེན་དང་འཇིག་རྟེན་ལས་འདས་པ་དང་། འཇིག་རྟེན་
ཡང་མ་ཡིན་འཇིག་རྟེན་ལས་འདས་པ་ཡང་མ་ཡིན་པ་དང་། ཐེག་པ་དང་། ཐེག་པ་མ་ཡིན་པ་དང་། ཐེག་པ་ཡང་མ་ཡིན་ཐེག་པ་མ་ཡིན་པ་ཡང་མ་ཡིན་པ་དང་། བདག་གིས་བྱས་པས་བདག་མྱོང་བ་དང་། བདག་གིས་བྱས་པས་གཞན་མྱོང་བ་དང་། བྱས་པ་མེད་པས་མྱོང་བ་མེད་

47-1-322a

པ་དག་སྟོན་ཏོ། །རྒྱལ་པོ་ཆེན་པོ་གང་ཞིག་གིས་སངས་རྒྱས་ལ་བྱས་པ་མེད་པ་དང་མྱོང་བ་མེད་པ་ཐོས་ན། ཁ་ན་མ་ཐོ་བའི་ལས་ཐམས་ཅད་ཡོངས་སུ་འབྱང་བར་འགྱུར་རོ། །རྒྱལ་པོ་རེ་ཤིག་གསོན་ཅིག །བརྒྱ་བྱིན་ལྷའི་དབང་ཕྱུག་ཚེའི་དུས་བྱེད་དུ་ཉེ་བ་ན་ལྟས་
རྣམ་པ་ལྔ་སྔར་འབྱུང་སྟེ། གང་ཞེ་ན། གོས་ལ་དྲི་མ་ཆགས་པ་དང་། མགོའི་མེ་ཏོག་རྙིངས་པ་དང་། ལུས་ལ་དྲི་མི་ཞིམ་པ་དང་། མཆན་ཁུང་ནས་རྔུལ་འབྱུང་བ་དང་། གནས་མི་འདོད་པའོ། །དེའི་ཚེ་བརྒྱ་བྱིན་ལྷའི་དབང་ཕྱུག་གིས་གནས་དབེན་པར་གལ་ཏེ་དགེ་སྦྱོང་ངམ་བྲམ་ཟེ་
དག་མཐོང་ན་དེའི་དྲུང་དུ་བསྙེན་ཏེ། སངས་རྒྱས་སུ་འདུ་ཤེས་བསྐྱེད་དོ། །དེའི་ཚེ་དགེ་སྦྱོང་ངམ། བྲམ་ཟེ་དེས་བརྒྱ་བྱིན་ལྷའི་དབང་ཕྱུག་མཐོང་བས་སྨོན་ལམ་བཏབ་ནས་འདི་སྐད་ཅེས་སྨྲའོ། །ལྷའི་དབང་པོ་བདག་ཅག་ནི་ཁྱོད་ལ་སྐྱབས་སུ་མཆིའོ། །བརྒྱ་བྱིན་ཀྱིས་དེ་
སྐད་ཅེས་ཐོས་ནས་སངས་རྒྱས་མ་ཡིན་པར་ཤེས་ཏེ་འདི་སྙམ་དུ་སེམས་སོ། །འདི་སངས་རྒྱས་མ་ཡིན་པས་ན། བདག་གིས་ལྟས་ངན་པ་ལྔ་པོ་འདི་དག་མེད་པར་བྱེད་མི་ནུས་སོ་སྙམ་སེམས་སོ། །དེའི་ཚེ་ན་བློན་པོ་བན་ཙ་ཤྲཱི་ཞེས་བྱ་བས་བརྒྱ་བྱིན་ལ་འདི་སྐད་ཅེས་
སྨྲས་སོ། །ལྷའི་བདག་པོ་དྲི་ཟའི་རྒྱལ་པོ་ཀ་པུ་ལོ་ཞེས་བྱ་བ་ལ་བུ་མོ་སུ་བར་ཏ་ཞེས་བྱ་བ་ཡོད་དེ། བུ་མོ་དེ་བདག་ལ་སྩལ་ན་རྒྱལ་པོའི་ལྟས་ངན་ཞི་བར་བྱེད་པའི་གནས་བདག་གིས་བསྟན་པར་བྱའོ། །བརྒྱ་བྱིན་གྱིས་སྨྲས་པ། ལྷ་མ་ཡིན་གྱིས་རྒྱལ་པོ་ཐག་ཟངས་
རིས་ཀྱི་བུ་མོ་ཡིད་འོང་མ་ཞེས་བྱ་བ་ཁོ་བོའི་ཆུང་མ་བྱེད་དེ། གལ་ཏེ་ཁྱོད་ཀྱིས་ངའི་ལྟས་ངན་ཞི་བར་བྱེད་པའི་གནས་སྟོན་ནུས་ན་ལྟ་དེ་ཡང་ཁྱོད་ལ་སྦྱིན་པར་བྱས་ན་སུ་བར་ཏ་ལྟ་སྨོས་ཀྱང་ཅི་དགོས། ལྷའི་བདག་པོ་སངས་རྒྱས་བཅོམ་ལྡན་འདས་ཤཱཀྱ་
ཐུབ་པ་ཞེས་བྱ་བ་ད་ལྟར་རྒྱལ་པོའི་ཁབ་ན་བཞུགས་ཀྱིས་དེ་གང་ན་བར་སོང་སྟེ། སྔོན་མ་ཐོས་པ་ཐོས་པར་གྱུར་ན། ཚེའི་དུས་བྱེད་པའི་ལྟས་ངན་གདོན་མི་ཟ་བར་ཞི་བར་འགྱུར་རོ། །རིགས་ཀྱི་བུ་གལ་ཏེ་སངས་རྒྱས་བཅོམ་ལྡན་འདས་ཀྱིས་ཞི་བར་ནུས་ན་ལྟ་དེ་
གང་ན་བར་འགྲོ་བར་བྱའོ་ཞེས་སྨྲས་ནས། ཞོན་པའི་ཐེག་པ་བསྒྱུར་ཏེ། རྒྱལ་པོའི་ཁབ་བྱ་རྒོད་ཕུང་པོའི་རི་ལ་སངས་རྒྱས་བཅོམ་ལྡན་འདས་གང་ན་བར་ཕྱིན་པ་དང་། མགོ་བོས་སངས་རྒྱས་ཀྱི་ཞབས་ལ་ཕྱག་འཚལ་ནས་ཕྱོགས་གཅིག་ཏུ་འཁོད་དེ། བཅོམ་

47-1-322b

ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷ་དང་མིའི་ནང་ན་འཆི་བས་བཅངས་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ་སེར་སྣ་དང་འདོད་ཆགས་དང་ཕྲག་དོག་གོ། །ཡང་གསོལ་པ། སེར་སྣ་དང་། འདོད་ཆགས་དང་། 
ཕྲག་དོག་ཅི་ལས་སྐྱེ། བཀའ་སྩལ་པ། མ་རིག་པ་ལས་སྐྱེའོ། །ཡང་གསོལ་པ། མ་རིག་པ་ཅི་ལས་སྐྱེ། བཀའ་སྩལ་པ། བག་མེད་པ་ལས་སྐྱེའོ། །ཡང་གསོལ་པ། བག་མེད་པ་ཅི་ལས་སྐྱེ། བཀའ་སྩལ་པ། ཕྱིན་ཅི་ལོག་ལས་སྐྱེའོ། །ཡང་
གསོལ་པ། ཕྱིན་ཅི་ལོག་ཅི་ལས་སྐྱེ། བཀའ་སྩལ་པ། ཐེ་ཚོམ་གྱི་སེམས་ལས་སྐྱེའོ། །བཅོམ་ལྡན་འདས་ཕྱིན་ཅི་ལོག་གི་ཆོས་ཐེ་ཚོམ་ལས་སྐྱེས་པ་འཕགས་པའི་བཀའ་བཞིན་ནོ། །དེ་ཅིའི་སླད་དུ་ཞེ་ན། བདག་ལ་ཐེ་ཚོམ་ཀྱི་སེམས་མཆིས་པས་
ཕྱིན་ཅི་ལོག་སྐྱེས་ཏེ། སངས་རྒྱས་བཅོམ་ལྡན་འདས་མ་ཡིན་པ་ལ་སངས་རྒྱས་བཅོམ་ལྡན་འདས་སུ་འདུ་ཤེས་བསྐྱེད་དེ། ད་སངས་རྒྱས་བཅོམ་ལྡན་འདས་མཐོང་བས་ན་ཐེ་ཚོམ་གྱི་སེམས་བྱང་བར་གྱུར་ཏོ། །ཐེ་ཚོམ་ཡོངས་སུ་བྱང་བས་ཕྱིན་ཅི་ལོག་ཟད་
པར་གྱུར་ཏོ། །ཕྱིན་ཅི་ལོག་ཟད་པས་ན་སེར་སྣའི་སེམས་མེད་པ་ནས། ཕྲག་དོག་གི་སེམས་ཀྱི་བར་དུ་མེད་དོ། །བཅོམ་ལྡན་འདས་ཀྱིས་བཀའ་སྩལ་པ། སེར་སྣ་དང་ཕྲག་དོག་གི་སེམས་མེད་དོ་ཞེས་བྱ་བ་ཁྱོད་ལྟར་ལན་ཅིག་ཕྱིར་ལྡོག་པའི་འབྲས་བུ་ཐོབ་བམ་
ལན་ཅིག་ཕྱིར་ལྡོག་པའི་འབྲས་བུ་འཐོབ་པ་ནི་འདོད་པའི་སེམས་མེད་དོ། །གལ་ཏེ་འདོད་པའི་སེམས་མེད་ན་ཅི་སྟེ་སྲོག་གི་ཕྱིར་ངའི་དྲུང་དུ་འོངས། ལན་ཅིག་ཕྱིར་ལྡོག་པ་ནི་སྲོག་ལ་རེ་བ་མེད་དོ། །བཅོམ་ལྡན་འདས་ཕྱིན་ཅི་ལོག་པ་ནི་སྲོག་ལ་རེ་བ་མཆིས་སོ། །
ཕྱིན་ཅི་ལོག་མ་མཆིས་པ་ནི་སྲོག་ལ་མི་རེའོ། །བདག་ཀྱང་ཡང་དག་པར་ན་སྲོག་ལ་རེ་བ་མ་མཆིས་ཀྱི། སངས་རྒྱས་བཅོམ་ལྡན་འདས་ཀྱི་ཆོས་ཀྱི་སྐུ་དང་། སངས་རྒྱས་ཀྱི་ཡེ་ཤེས་ལ་རེའོ། །ཀཽ་ཤི་ཀ་སངས་རྒྱས་ཀྱི་སྐུ་དང་སངས་རྒྱས་ཀྱི་ཡེ་ཤེས་
ཚོལ་བ་ནི་ཕྱི་མ་མ་འོངས་པའི་དུས་སུ་གདོན་མི་ཟ་བར་ཐོབ་པར་འགྱུར་རོ། །དེའི་ཚེ་བརྒྱ་བྱིན་ལྷའི་དབང་ཕྱུག་གིས་བཅོམ་ལྡན་འདས་ལས་དེ་སྐད་ཅེས་ཐོས་ནས། ཚེའི་དུས་བྱེད་པའི་ལྟས་ངན་པ་དེ་ཉིད་བྱང་བར་གྱུར་ནས་འདུག་པ་ལས་ལངས་ཏེ་སྤྱི་བོས་

47-1-323a

ཕྱག་འཚལ་ནས་ལན་གསུམ་བསྐོར་ཏེ་སྟི་སྟང་དང་བཅས་པས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ནི་ཤི་བ་ལས་སོ། །སྲོག་སྟོར་བ་ལས་སྲོག་ཕྱིར་རྙེད་དོ། །ཡང་སངས་རྒྱས་བཅོམ་ལྡན་འདས་
ལས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ་ཞེས་ལུང་བསྟན་པ་ཐོབ་པས་དེ་ནི་སོས་པ་དང་སྲོག་ཐོབ་པ་ཞེས་བགྱིའོ། །བཅོམ་ལྡན་འདས་ལྷ་དང་མི་དག་ཇི་ལྟར་ན་འཕེལ་ཞིང་སྐྱེ་བར་འགྱུར། ཇི་ལྟར་ན་འགྲིབས་
ཤིང་གོད་པར་འགྱུར། བཀའ་སྩལ་པ། ཀཽ་ཤི་ཀ་འཐབ་ཅིང་རྩོད་པའི་རྐྱེན་གྱིས་ལྷ་དང་མི་འགྲིབས་ཤིང་གོད་པར་འགྱུར་རོ། །ཤིན་དུ་དུམ་པའི་རྐྱེན་གྱིས་སྐྱེ་ཞིང་འཕེལ་བར་འགྱུར་རོ། །བཅོམ་ལྡན་འདས་གལ་ཏེ་འཐབ་ཅིང་རྩོད་པས་འགྲིབས་ཤིང་གོད་
པར་གྱུར་ན། བདག་དེང་སླན་ཆད་ལྷ་མ་ཡིན་དང་མི་འཐབ་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །ཀཽ་ཤི་ཀ་སངས་རྒྱས་བཅོམ་ལྡན་འདས་ནི་བཟོད་པ་ལ་བླ་ན་མེད་པ་ཡང་དག་པར་རྫོགས་པའི་རྒྱུ་ཡིན་ནོ། །
ཞེས་གསུངས་སོ། །དེའི་ཚེ་བརྒྱ་བྱིན་ལྷའི་དབང་ཕྱུག་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་ཕྱིར་གནས་སུ་དོང་ངོ་། །རྒྱལ་པོ་ཆེན་པོ་དེ་བཞིན་གཤེགས་པ་དེ་ལྟར་མི་དགེ་བའི་ལྟས་ངན་པ་ཐམས་ཅད་ཞི་བར་བྱེད་པས་ན། སངས་རྒྱས་ལ་བསམ་
གྱིས་མི་ཁྱབ་བོ་ཞེས་བརྗོད་དོ། །དེ་བས་ན་གལ་ཏེ་རྒྱལ་པོ་ཡང་དེའི་གན་དུ་ཕྱིན་ན་ཁ་ན་མ་ཐོ་བའི་ལས་ཐམས་ཅད་ཡོངས་སུ་འབྱང་ངོ་། །རྒྱལ་པོ་ཆེན་པོ་ཡང་གསོན་ཅིག །བྲམ་ཟེའི་བུ་མི་འཚེ་བ་ཞེས་བྱ་བ་སེམས་ཅན་གྲངས་མེད་པ་བསད་པས་སོར་མོས་
བརྒྱན་ཞེས་བཏགས་ཏེ། མ་གསོད་ཏུ་ཆས་ནས་སྡིག་པའི་སེམས་བསྐྱེད་པ་ན། ལུས་ཀྱང་འདར་ཞིང་གཡོའོ། །ལུས་དང་སེམས་གཡོ་བ་ནི་མཚམས་མེད་པ་བྱས་པའི་རྐྱེན་གྱིས་གདོན་མི་ཟ་བར་སེམས་ཅན་དམྱལ་བར་ལྟུང་བ་ལས་སངས་རྒྱས་དང་ཕྲད་པ་ན་
ཡང་ལུས་དང་སེམས་གཡོ་སྟེ། དེ་ལ་ཡང་གསོད་པའི་སེམས་སྐྱེས་སོ། །ལུས་དང་སེམས་གཡོ་བ་ནི་མཚམས་མེད་པ་ལྔ་བྱེད་པའི་རྐྱེན་གྱིས་གཡོས་ཏེ། མཚམས་མེད་པ་ལྔ་བྱས་ན་གདོན་མི་ཟ་བར་སེམས་ཅན་དམྱལ་བར་ལྟུང་ངོ་། །མི་དེས་དེ་བཞིན་

47-1-323b

གཤེགས་པ་སྟོན་པ་ཆེན་པོ་དང་ཕྲད་མ་ཐག་ཏུ་སེམས་ཅན་དམྱལ་བར་ལྟུང་བའི་རྒྱུ་ཡོངས་སུ་བྱང་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དེ་བས་ན་སངས་རྒྱས་བཅོམ་ལྡན་འདས་ནི་བླ་ན་མེད་པའི་སྨན་པ་ཞེས་བྱ་སྟེ། 
སྟོན་པ་དྲུག་ལྟ་བུ་མ་ཡིན་ནོ། །རྒྱལ་པོ་ཆེན་པོ་གཞན་ཡང་རྒྱལ་བུ་སི་ཕྱིལ་ཞེས་བྱ་བ་ལ་ཕ་རྒྱལ་པོ་ཁྲོས་ནས་རྐང་ལག་བཅད་དེ་དོང་དུ་བོར་རོ། །རྒྱལ་པོའི་མ་སྙིང་བརྩེ་བས་དོང་ནས་ཕྱུང་སྟེ། སངས་རྒྱས་གང་ན་བར་ཁྲིད་ནས་སངས་རྒྱས་དང་ཕྲད་མ་ཐག་ཏུ་རྐང་ལག་
ཀྱང་ཕྱིར་སྐྱེས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རྒྱལ་པོ་ཆེན་པོ་དེ་ལྟར་སངས་རྒྱས་དང་ཕྲད་པས་འབྲས་བུ་མངོན་སུམ་དུ་ཐོབ་སྟེ། དེ་བས་ན་སངས་རྒྱས་བཅོམ་ལྡན་འདས་ནི་བླ་ན་མེད་པའི་སྨན་པ་ཞེས་བྱ་སྟེ། 
སྟོན་པ་དྲུག་ལྟ་བུ་མ་ཡིན་ནོ། །རྒྱལ་པོ་ཆེན་པོ་ཀླུང་གང་གཱའི་འགྲམ་ན་ཡི་དགས་ལྔ་བརྒྱ་ཡོད་དེ། ལོ་གྲངས་མེད་པའི་བར་ཏུ་ཆུ་ཡང་མི་མཐོང་ངོ་། །ཅི་སྟེ་ཆུ་འགྲམ་དུ་ཕྱིན་པ་ན་ཡང་མེའི་ཕུང་པོ་ཆེན་པོར་མཐོང་སྟེ། སྐོམ་པ་དང་བཀྲེས་པས་ཉེན་ཏེ་སྐད་ཆེན་པོ་ཕྱུང་
སྟེ་ངུའོ། །དེའི་ཚེ་དེ་བཞིན་གཤེགས་པ་ཀླུང་དེ་དང་ཉེ་བའི་ཕྱོགས་ཨུ་དུམ་བ་རའི་ཚལ་ཤིང་དྲུང་ན་བཞུགས་པ་ལས། དེའི་ཚེ་ཡི་དགས་མང་པོ་སངས་རྒྱས་གང་ན་བར་ལྷགས་ནས་སངས་རྒྱས་ལ་འདི་སྐད་ཅེས་གསོལ་ཏོ། །བདག་ཅག་ནི་བཀྲེས་པ་དང་སྐོམ་པས་ཉེན་ཏེ། 
འཚོ་བའི་སྲོག་ཀྱང་རིང་པོ་མི་ཐུབ་བོ། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་གང་གཱའི་ཆུ་འབབ་པ་ལ་ཅིའི་ཕྱིར་མི་འཐུང་། ཡི་དགས་རྣམས་ཀྱིས་གསོལ་པ། དེ་བཞིན་གཤེགས་པས་ཆབ་ཏུ་གཟིགས་ཀྱང་། བདག་ཅག་གིས་ནི་མེ་འབར་བ་ཞིག་ཏུ་
མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། གང་གཱའི་ཀླུང་གི་ཆུ་ནི་ཤིན་ཏུ་ཡང་སྔོ་ལ་དང་བས་ཡང་དག་པར་མེ་མེད་དེ། སྡིག་པའི་ལས་ཀྱིས་སེམས་ཕྱིན་ཅི་ལོག་པས་མེ་ཡིན་སྙམ་སེམས་སོ། །ཁྱོད་ཀྱི་ཕྱིན་ཅི་ལོག་གི་སེམས་ཡོངས་སུ་བསལ་
ཏེ་ཆུར་མཐོང་བར་བྱའོ་ཞེས་བཀའ་སྩལ་ནས་དེའི་ཚེ་བཅོམ་ལྡན་འདས་ཀྱིས་ཡི་དགས་མང་པོ་དེ་དག་ལ་སེར་སྣ་དང་འདོད་ཆགས་ཀྱི་སྐྱོན་མང་པོ་བསྟན་ཏོ། །ཡི་དགས་མང་པོས་འདི་སྐད་ཅེས་གསོལ་ཏོ། །བདག་ཅག་ནི་བཀྲེས་པ་དང་སྐོམས་པས་ཉེན་ཏེ། ཆོས་ཀྱིས་

47-1-324a

གསུང་མང་པོ་ཐོས་ཀྱང་གཟུང་བའ་སེམས་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱེད་རྣམས་ཀླུང་ག་གཱའི་ནང་དུ་ཞུགས་ལ་དེའི་ཆུ་ཡིད་བཞིན་དུ་འཐུང་ཞིང་། ཡི་དགས་དེ་རྣམས་སངས་རྒྱས་ཀྱི་བྱིན་གྱི་བརླབས་ཀྱིས་ཆུ་
འཐུངས་པར་གྱུར་ཏོ། །དེ་ལྟར་ཆུ་འཐུངས་ནས་དེ་བཞིན་གཤེགས་པས་དེ་དག་ལ་ཆོས་རྣམ་པ་སྣ་ཚོགས་བསྟན་ཏོ། །དེ་དག་གིས་ཆོས་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། ཡི་དགས་ཀྱི་ལུས་ཡོངས་སུ་
སྤངས་ནས་ལྷའི་ལུས་ཐོབ་པར་གྱུར་ཏོ། །རྒྱལ་པོ་ཆེན་པོ་དེ་བས་ན་སངས་རྒྱས་བཅོམ་ལྡན་འདས་ནི་བླ་ན་མེད་པའི་སྨན་པ་ཞེས་བྱ་སྟེ། སྟོན་པ་དྲུག་ལྟ་བུ་ནི་མ་ཡིན་ནོ། །རྒྱལ་པོ་ཆེན་པོ་ཡུལ་མཉན་དུ་ཡོད་པ་ན་མི་རྒོད་ལྔ་བརྒྱ་ཞིག་རྒྱལ་པོ་
སྡེ་རབ་ཕམ་བྱེད་ཀྱིས་མིག་ཕྱུང་ནས་ལྡོངས་པར་གྱུར་ཏེ། དེ་དག་སངས་རྒྱས་གང་ན་བར་ཕྱིན་པའི་དུས་མེད་དོ། །སངས་རྒྱས་བཅོམ་ལྡན་འདས་དེ་དག་ལ་ཐུགས་བརྩེ་བའི་ཕྱིར་མི་རྒོད་མིག་ཕྱུང་བ་རྣམས་ཀྱི་དྲུང་དུ་གཤེགས་ནས་སྤྲོ་བ་བསྐྱེད་དེ། 
རིགས་ཀྱི་བུ་དག་ལུས་དང་ངག་ཤིན་དུ་སྡོམས་ལ་ཕྱིན་ཆད་སྡིག་པ་མ་བྱེད་ཅིག །མི་རྒོད་མང་པོ་དེ་དག་སངས་རྒྱས་ལས་དེ་བཞིན་གཤེགས་པའི་གསུང་ཤིན་ཏུ་གསལ་བ་ཐོས་མ་ཐག་ཏུ་མིག་ཀྱང་ཕྱིར་མཐོང་བར་གྱུར་ནས། སངས་རྒྱས་ཀྱི་
སྤྱན་སྔར་ཐལ་མོ་སྦྱར་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ནི་སངས་རྒྱས་བཅོམ་ལྡན་འདས་ཀྱི་བྱམས་པའི་ཐུགས་སེམས་ཅན་ཐམས་ཅད་ལ་ཁྱབ་ཀྱི། ལྷ་དང་མི་འབའ་ཤིག་ལ་
མ་ལགས་པར་རྟོགས་སོ། །དེའི་ཚེ་བཅོམ་ལྡན་འདས་ཀྱིས་དེ་དག་ལ་ཆོས་བསྟན་ཏེ། དེ་དག་གིས་ཆོས་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་བས་ན་དེ་བཞིན་གཤེགས་པ་ནི་འཇིག་རྟེན་གྱིས་
བླ་ན་མེད་པའི་སྨན་པ་ཡང་དག་པ་སྟེ། སྟོན་པ་དྲུག་ལྟ་བུ་ནི་མ་ཡིན་ནོ། །རྒྱལ་པོ་ཆེན་པོ་ཡུལ་མཉན་དུ་ཡོད་པ་ན་རིགས་ངན་དབུགས་འཕྲོག་ཅེས་བྱ་བ་ཞིག་ཡོད་དེ། མི་གྲངས་མེད་པ་ཞིག་བསད་དོ། །སངས་རྒྱས་ཀྱི་ཉེ་གནས་མཽད་གལ་གྱི་བུ་མཐོང་

47-1-324b

ནས་དེ་མ་ཐག་ཏུ་སེམས་ཅན་དམྱལ་བར་ལྟུང་བའི་རྒྱུ་བཅོམ་ནས་སུམ་བཅུ་རྩ་གསུམ་གནམ་གྱི་ལྷར་སྐྱེས་སོ། །དེ་ལྟར་འཕགས་པའི་ཉེ་གནས་ཡོད་པས་ན་དེ་བཞིན་གཤེགས་པ་ནི་བླ་ན་མེད་པའི་སྨན་པ་ཞེས་བྱ་སྟེ། སྟོན་པ་དྲུག་ལྟ་བུ་ནི་མ་ཡིན་ནོ། །རྒྱལ་པོ་
ཆེན་པོ་གྲོང་ཁྱེར་སེར་སྐྱ་ཞེས་བྱ་བ་ན་ཚོང་དཔོན་གྱི་བུ་མ་ཕམ་པ་ཞེས་བྱ་བ་མ་ལ་མི་ཚངས་པར་སྤྱད་དེ། དེའི་རྒྱུ་དེའི་རྐྱེན་གྱིས་ཕ་ཡང་བསད་པར་གྱུར་ཏོ། །ཕྱིས་དེའི་མ་མི་གཞན་དང་འཁྲིག་པ་ཚོར་ནས་མ་ཡང་བསད་དོ། །དེ་དགྲ་བཅོམ་པ་ཞིག་དང་བཤེས་ཏེ་དགྲ་
བཅོམ་པ་ལ་ངོ་ཚ་བའི་ཕྱིར་དགྲ་བཅོམ་པ་ཡང་བསད་དོ་དེ་ལྟར་དགྲ་བཅོམ་པ་བསད་ནས་གཙུག་ལག་ཁང་དུ་སོང་སྟེ། དགེ་སློང་གི་དགེ་འདུན་དག་ལས་ཁྱིམ་ནས་ཁྱིམ་མ་ཡིན་པར་རབ་ཏུ་འབྱུང་བར་གསོལ་ཏོ། །དགེ་སློང་གི་དགེ་འདུན་རྣམས་ཀྱིས་མཚམས་མེད་པ་གསུམ་གྱི་
ལས་བྱས་པར་ཤེས་པས་རབ་ཏུ་འབྱུང་དུ་མ་གནང་ངོ་། །དེ་ལྟར་རབ་ཏུ་འབྱུང་དུ་མ་གནང་བས་ཤིན་ཏུ་ཁྲོས་ནས། དེའི་ནུབ་མོ་མེ་ཐོགས་ཏེ་དགེ་འདུན་གྱི་གནས་ཁང་ལ་མེ་བཏང་ངོ་། །དེའི་འོག་ཏུ་རྒྱལ་པོའི་ཁབ་ཏུ་སོང་ནས་དེ་བཞིན་གཤེགས་པ་གང་
ན་བར་ཕྱིན་པ་དང་། དེ་བཞིན་གཤེགས་པ་ལ་རབ་ཏུ་འབྱུང་བར་གསོལ་ནས། དེ་བཞིན་གཤེགས་པས་རབ་ཏུ་ཕྱུང་སྟེ། དེ་ལ་ཆོས་བསྟན་པས་བགས་ཀྱིས་ཁ་ན་མ་ཐོ་བའི་སྡིག་ལྕི་བ་ཡང་བྱང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་སེམས་བསྐྱེད་དོ། །དེ་བས་ན་སངས་རྒྱས་བཅོམ་ལྡན་འདས་ནི་བླ་ན་མེད་པའི་སྟོན་པ་ཞེས་བྱ་སྟེ། སྟོན་པ་དྲུག་ལྟ་བུ་ནི་མ་ཡིན་ནོ། །རྒྱལ་པོ་ཆེན་པོ་རྒྱལ་པོ་ནི་རང་བཞིན་གྱིས་ཁྲོ་ཞིང་གཏུམ་ལ་སྡིག་པའི་བཤེས་གཉེན་ལ་ཡིད་ཆེས་པས་དེའི་ཚེ་
ལྷ་སྦྱིན་གྱིས་བལ་གླང་སྨྱོས་པ་བཏང་ནས་སངས་རྒྱས་ཀྱི་ཐོག་ཏུ་མཆོངས་པ་ལས། བལ་གླང་དེ་དག་སངས་རྒྱས་མཐོང་མ་ཐག་ཏུ་རང་དུལ་ཏེ། དེ་ལ་བཅོམ་ལྡན་འདས་ཀྱིས་ཕྱག་བརྐྱང་ནས་བལ་གླང་གི་སྤྱི་བོ་ལ་བྱུགས་ཏེ། ཆོས་བསྟན་པས་
དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རྒྱལ་པོ་ཆེན་པོ་བྱོལ་སོང་གི་སྐྱེ་གནས་སུ་གྱུར་པ་ཡང་སངས་རྒྱས་དང་ཕྲད་མ་ཐག་ཏུ་བྱོལ་སོང་གི་སྐྱེ་གནས་སུ་གྱུར་པའི་རྣམ་པར་སྨིན་པ་ཡང་ཡོངས་སུ་བཅོམ་ན། མིའི་རྒྱུད་ཏུ་

47-1-325a

སྐྱེས་པ་ལྟ་ཅི་སྨོས་ཏེ། རྒྱལ་པོ་ཆེན་པོ་འདི་ལྟར་རིག་པར་གྱིས་ཤིག །གལ་ཏེ་སངས་རྒྱས་དང་ཕྲད་ན་ཁ་ན་མ་ཐོ་བའི་སྡིག་ཡོངས་སུ་འབྱང་བར་འགྱུར་རོ། །རྒྱལ་པོ་ཆེན་པོ་སངས་རྒྱས་བཅོམ་ལྡན་འདས་སྔོན་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་མངོན་པར་སངས་མ་རྒྱས་པ་ན། བདུད་ཀྱི་རིས་ཚད་མེད་གྲངས་མེད་པ་བྱང་ཆུབ་སེམས་དཔའི་དྲུང་དུ་ལྷགས་སོ། །དེའི་ཚེ་བྱང་ཆུབ་སེམས་དཔས་བཟོད་པའི་སྟོབས་ཀྱིས་བདུད་སྡིག་ཏོ་ཅན་གྱི་སེམས་རབ་ཏུ་བཏུལ་ཏ། བདུད་རྣམས་
ལ་ཆོས་བསྟན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །སངས་རྒྱས་བཅོམ་ལྡན་འདས་ལ་དེ་ལྟ་བུའི་ཡོན་ཏན་ཆེན་པོའི་མཐུ་མངའོ། །རྒྱལ་པོ་ཆེན་པོ་འབྲོག་དགོན་པའི་ཡི་དགས་སེམས་ཅན་མང་པོ་གསོད་པ་དག་ཡོད་དོ། །
དེའི་ཚེ་དེ་བཞིན་གཤེགས་པས་ཚོང་དཔོན་ནོར་བཟངས་ཀྱི་ཕྱིར་འབྲོག་དགོན་པའི་ཡི་དགས་གང་ན་བ་དེར་གཤེགས་ཏེ་དེ་དག་ལ་ཆོས་བསྟན་ཏོ། །འབྲོག་དགོན་པའི་ཡི་དགས་དེ་དག་ཆོས་གསུངས་པ་ཐོས་ནས་རབ་ཏུ་དགའ་མགུ་རངས་ཏེ། ཚོང་དཔོན་ནོར་བཟངས་
ཀྱིས་སངས་རྒྱས་ལ་ཕུལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །རྒྱལ་པོ་ཆེན་པོ་ཡུལ་སེར་སྐྱ་ན་ཤན་པ་འཕྲལ་བ་ཡངས་ཤེས་བྱ་བ་ཞིག །ཉིན་གཅིག་ཀྱང་ལུག་གྲངས་མེད་པ་གསོད་དེ། ཤཱ་རིའི་བུ་མཐོང་
ནས་ཉིན་ཞག་གཅིག་གི་ཁྲིམས་བརྒྱད་མནོས་སོ། །དེའི་རྒྱུ་དེའི་རྐྱེན་གྱིས་ཚེ་འཕོས་ནས་བྱང་ཕྱོགས་ཀྱི་མགོན་པོ་ངལ་བསོ་པོའི་བུར་སྐྱེས་སོ། །དེ་བཞིན་གཤེགས་པའི་ཉེ་གནས་ལ་ཡང་དེ་ལྟ་བུའི་ཡོན་ཏན་ཆེན་པོ་ཡོད་ན། སངས་རྒྱས་
བཅོམ་ལྡན་འདས་ལྟ་སྨོས་ཀྱང་ཅི་དགོས། རྒྱལ་པོ་ཆེན་པོ་ཡུལ་འཁོར་གྱི་བྱང་ཕྱོགས་ན་གྲོང་ཁྱེར་གསེག་མ་ཞེས་བྱ་བའི་རྒྱལ་པོ་ཀླུའི་ཕྱག་རྒྱ་ཞེས་བྱ་བ་རྒྱལ་པོའི་སྲིད་འདོད་པའི་ཕྱིར་ཕ་བསད་དོ། །དེ་ལྟར་ཕ་བསད་ནས་ཤིན་དུ་འགྱོད་པའི་
སེམས་སྐྱེས་ཏེ་ཡུལ་གྱི་སྲིད་བཏང་ནས་དེ་བཞིན་གཤེགས་པ་གང་ན་བར་ལྷགས་ནས་རབ་ཏུ་འབྱུང་བར་གསོལ་ཏོ། །བཅོམ་ལྡན་འདས་ཀྱིས་ལེགས་སོ་ཞེས་བཀའ་སྩལ་ནས་དགེ་སློང་དུ་གྱུར་ཏེ། ཁ་ན་མ་ཐོ་བའི་སྡིག་ཀྱང་ཡོངས་སུ་བྱང་ནས་

47-1-325b

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །རྒྱལ་པོ་ཆེན་པོ་དེ་བས་ན་དེ་བཞིན་གཤེགས་པ་ལ་ཡོན་ཏན་ཆེན་པོ་གྲངས་མེད་ཚད་མེད་པ་མངའ་བར་རིག་པར་བྱའོ། །རྒྱལ་པོ་ཆེན་
པོ་དེ་བཞིན་གཤེགས་པ་ལ་གཅུང་ལྷ་སྦྱིན་ཞེས་བྱ་བ་ཡོད་དེ། དགེ་འདུན་གྱི་དབྱེན་བྱས་ནས། སངས་རྒྱས་ཀྱི་སྐུ་ལ་ངན་སེམས་ཀྱིས་ཁྲག་ཕྱུང་སྟེ། དགེ་སློང་མ་པད་མོ་ཞེས་བྱ་བ་ཡང་བསད་པས་མཚམས་
མེད་པ་གསུམ་གྱི་ལས་བྱས་སོ། །དེ་ལ་ཡང་དེ་བཞིན་གཤེགས་པས་ཆོས་རྣམ་པ་སྣ་ཚོགས་བསྟན་ནས་ཁ་ན་མ་ཐོ་བའི་སྡིག་ཀྱང་ཁད་ཀྱིས་བྱང་བར་གྱུར་ཏོ། །དེ་བས་ན་དེ་བཞིན་གཤེགས་པ་ནི་སྨན་པ་ཆེན་པོ་
ཞེས་བྱ་སྟེ། སྟོན་པ་དྲུག་ལྟ་བུ་ནི་མ་ཡིན་ནོ། །རྒྱལ་པོ་ཆེན་པོ་གལ་ཏེ་བདག་སྨྲ་བའི་ཚིག་ལ་ཐུགས་ཆེས་ནས་སངས་རྒྱས་བཅོམ་ལྡན་འདས་གང་ན་བཞུགས་པར་མྱུར་དུ་བཞུད་ཅིག་ཅི་སྟེ་ཐུགས་མ་ཆེས་ན་ཡང་
ལེགས་པར་དགོངས་ཤིག །རྒྱལ་པོ་ཆེན་པོ་སངས་རྒྱས་བཅོམ་ལྡན་འདས་ཀྱི་ཐུགས་རྗེ་ཆེན་པོ་ནི་ཐམས་ཅད་ལ་ཁྱབ་པས་དམ་པའི་ཆོས་གཅིག་ཙམ་འམ་འགའ་ཙམ་ལ་སྟོན་པ་ནི་མ་ཡིན་ནོ། །གཉེན་པ་
དང་སྡང་བ་ལ་ཐུགས་མཉམ་པས་ན་གང་ཟག་གཅིག་ཙམ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བགོད་དེ། གཞན་མི་འགོད་པ་མ་ཡིན། དེ་བཞིན་གཤེགས་པའི་འཁོར་བཞི་པོ་འབའ་ཤིག་གི་སྟོན་
པ་མ་ཡིན་གྱི། འཇིག་རྟེན་དུ་བཅས་པ་ལྷ་དང་མི་དང་ཀླུ་དང་ཡི་དགས་དང་། བྱོལ་སོང་དང་། སེམས་ཅན་དམྱལ་བ་ལ་སོགས་ཏེ་ཐམས་ཅད་ཀྱི་སྟོན་པ་ཡིན་པས། དེ་བས་ན་སེམས་ཅན་ཐམས་ཅད་
ཀྱིས་ཀྱང་སངས་རྒྱས་བཅོམ་ལྡན་འདས་ལ་ཕ་མ་དང་འདྲ་བར་འདུ་ཤེས་བསྐྱེད་པའི་རིགས་སོ། །རྒྱལ་པོ་ཆེན་པོ་དེ་བཞིན་གཤེགས་པ་ནི་རིགས་མཐོ་ཞིང་བཙུན་པ་རྒྱལ་པོ་བ་དེ་ཀ་འབའ་ཤིག་ལ་ཆོས་སྟོན་པ་མ་ལགས་

47-1-326a

ཀྱི། རིགས་དམའ་ཤིང་ངན་པ་ཨུ་པ་ལི་ལ་སོགས་པ་ལ་ཡང་ཆོས་སྟོན་ཏོ། །ཨུ་བར་ཏ་དང་། ཨ་ན་ཡ་ཏེ་འབའ་ཤིག་གིས་ཕུལ་བའི་ཞལ་ཟས་བཞེས་པར་མ་ཟད་ཀྱི། དབུལ་པོ་སུ་ད་ར་ཏིའི་ཞལ་
ཟས་ཀྱང་བཞེས་སོ། །དབང་པོ་རྣོན་པོ་ཤཱ་རིའི་བུ་ལ་སོགས་པ་འབའ་ཤིག་ལ་ཆོས་སྟོན་པ་མ་ལགས་ཀྱི། དབང་པོ་རྟུལ་པོ་ཆིའུ་ལ་བན་ཏ་ལ་སོགས་པ་ལ་ཡང་ཆོས་སྟོན་ཏོ། །འདོད་ཆགས་མེད་པའི་རང་བཞིན་ཅན་འོད་སྲུང་
ཆེན་པོ་ལ་སོགས་པ་ལ་རབ་ཏུ་འབྱུང་བར་གནང་བ་མ་ལགས་ཀྱི། འདོད་ཆགས་ཅན་བསྙེན་དགའ་བོ་ལ་སོགས་པ་ལ་ཡང་རབ་ཏུ་འབྱུང་བར་གནང་ངོ་། །ཉོན་མོངས་པ་སྲབ་པ་ལྟེང་རྒྱས་འོད་སྲུང་ལ་སོགས་པ་རབ་ཏུ་འབྱུང་བར་གནང་བ་
མ་ལགས་ཀྱི། ཁ་ན་མ་ཐོ་བའི་ལས་བྱས་པ་རྒྱལ་པོ་སྡེ་རབ་ཏུ་ཕམ་བྱེད་ཀྱི་བུ་མོ་སུ་ཏ་ལ་ཡང་རབ་ཏུ་འབྱུང་བར་གནང་ངོ་། །འཛག་མ་ཞེས་བྱ་བའི་སྟི་སྟང་དང་བཅས་པས་བསྙེན་བཀུར་བྱས་ཏེ་ཞེ་སྡང་རྩ་བ་ནས་བཏོན་པ་མ་
ལགས་ཀྱི། སོར་མོས་བརྒྱན་ངན་སེམས་ཀྱི་གནོན་པར་བྱས་པ་ཡང་མ་བཀོལ་ཏེ་སྐྱབས་མཛེད་དོ། །ཤེས་རབ་དང་ལྡན་པ་སྐྱེས་པ་འབའ་ཞིག་ལ་ཆོས་སྟོན་པ་མ་ལགས་ཀྱི། ཤིན་ཏུ་གླེན་པ་བུད་མེད་གཡེམ་པ། 
གཡེམ་པའི་ཆོས་ལ་མཁས་པ་ལ་ཡང་ཆོས་སྟོན་ཏོ། །རབ་ཏུ་འབྱུང་བའི་འཁོར་བཞི་པོ་འབའ་ཞིག་གིས་བྱང་ཆུབ་ཀྱི་འབྲས་བུ་ཐོབ་པ་མ་ལགས་ཀྱི། ཁྱིམ་ན་གནས་པས་ཀྱང་འབྲས་བུ་གསུམ་ཐོབ་པར་མཛེད་དོ། །
སུ་ཏ་ན་ལ་སོགས་པ་འདུ་འཛི་ཡོངས་སུ་སྤངས་པས་མཐའ་སེམས་རྩེ་གཅིག་པ་འབའ་ཞིག་ལ་ཆོས་ཀྱི་དོན་སྟོན་པ་མ་ལགས་ཀྱི། རྒྱལ་པོ་གཟུགས་ཅན་སྙིང་པོ་ལ་སོགས་པ་ཡུལ་གྱི་སྲིད་བྱེད་པ་ལ་ཡང་ཆོས་ཀྱི་དོན་སྟོན་ཏོ། །
ཆང་ཡོངས་སུ་བཅད་པ་འབའ་ཤིག་ལ་མ་ལགས་ཀྱི། ཁྱིམ་བདག་དྲག་པོ་ཆང་གིས་མྱོས་པ་ལ་ཡང་ཆོས་སྟོན་ཏོ། །ཏིང་ངེ་འཛིན་ལ་མཉམ་པར་བཞག་པ་ལི་པ་ཏ་ལ་སོགས་པ་འབའ་ཞིག་ལ་མ་ལགས་ཀྱི། བུ་ཤི་ནས་

47-1-326b

སེམས་འཁྲུགས་པ་བྲམ་ཟེ་མོ་བ་སི་ཏ་ལ་ཡང་ཆོས་སྟོན་ཏོ། །བདག་གི་ཉེ་གནས་འབའ་ཞིག་ལ་མ་ཡིན་གྱི། མུ་སྟེགས་ཅན་གཅེར་བུ་པ་ལ་ཡང་ཆོས་སྟོན་ཏོ། །ཤིན་དུ་ལང་ཚོ་ལ་བབ་པ་ཉི་ཤུ་ལྔ་ལོན་པ་འབའ་ཤིག་ལ་མ་ལགས་ཀྱི། 
རྒས་འཁོགས་པ་ལོ་བརྒྱད་ཅུ་ལོན་པ་ལ་ཡང་ཆོས་སྟོན་ཏོ། །དབང་པོ་ཡོངས་སུ་སྨིན་པའི་གང་ཟག་འབའ་ཞིག་ལ་མ་ལགས་ཀྱི། དགེ་བའི་རྩ་བ་མ་སྨིན་པ་ལ་ཡང་ཆོས་སྟོན་ཏོ། །བཙུན་མོ་བྲེང་ལྡན་མ་འབའ་ཞིག་ལ་སྟོན་པ་མ་
ལགས་ཀྱི། སྦྲུལ་འཚོང་མ་པད་མོ་ལ་ཡང་ཆོས་སྟོན་ཏོ། །རྒྱལ་པོ་སྡེ་རབ་ཏུ་ཕམ་བྱེད་ཀྱིས་ཕུལ་བའི་ཞལ་ཟས་རོ་མཆོག་བརྒྱད་དང་ལྡན་པའི་འབའ་ཞིག་བཞེས་པ་མ་ལགས་ཀྱི། ཁྱིམ་བདག་ཤྲཱི་གུ་པ་ཏས་ཞལ་ཟས་དུག་དང་
བསྲེས་ཏེ་ཕུལ་བ་ཡང་བཞེས་སོ། །རྒྱལ་པོ་ཆེན་པོ་འདི་ལྟར་རིག་པར་གྱིས་ཤིག །ཤྲཱི་གུ་པ་ཏ་ཞེས་པ་ནི་སྔོན་འདས་པའི་དུས་ན་ཡང་མཚམས་མེད་པ་བྱས་པའི་ལས་ཀྱི་རྒྱུ་ཡོད་དེ། སངས་རྒྱས་དང་ཕྲད་ནས་ཆོས་ཐོས་པས་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །རྒྱལ་པོ་ཆེན་པོ་གལ་ཏེ་ཟླ་བ་གཅིག་གི་བར་དུ་སེམས་ཅན་ཐམས་ཅད་ལ་ཟས་དང་གོས་ཀྱི་སྦྱིན་པ་བྱིན་པ་བས། གང་ཟག་གཅིག་གིས་སྐད་ཅིག་ཙམ་
སངས་རྒྱས་རྗེས་སུ་དྲན་ན་བསོད་ནམས་འདིའི་བཅུ་དྲུག་ཆ་གཅིག་ཙམ་ཡང་མི་ཕོད་དོ། །རྒྱལ་པོ་ཆེན་པོ་གལ་ཏེ་གསེར་ལ་མི་བྱས་ནས་ཤིང་རྟ་བརྒྱ་སྙེད་སྦྱིན་པ་བྱིན་པ་བས། གང་ཞིག་སེམས་བསྐྱེད་དེ་སངས་རྒྱས་ཀྱི་ཕྱོགས་
སུ་གོམ་པ་གཅིག་བོར་བའི་བསོད་ནམས་སུ་མི་ཕོད་དོ། །རྒྱལ་པོ་ཆེན་པོ་གལ་ཏེ་ཡུལ་ཆེན་པོ་གཅིག་གི་རིན་པོ་ཆེ་རྣམ་པ་སྣ་ཚོགས་བལ་གླང་གིས་དྲངས་པའི་ཤིང་རྟ་བརྒྱ་སྙེད་དང་། བུད་མེད་དོ་ཤལ་དང་། ཕྲེང་བས་ཡོངས་སུ་
བརྒྱན་པ་ཡང་བརྒྱ་སྙེད་ཀྱི་སྦྱིན་པ་བྱིན་པ་བས། སེམས་བསྐྱེད་དེ་སངས་རྒྱས་བཞུགས་པའི་ཕྱོགས་སུ་གོམ་པ་གཅིག་བོར་བ་བསོད་ནམས་ཆེ་སྟེ། དེ་ཡང་རེ་ཤིག་ཞོག་ལ་གལ་ཏེ་མཆོད་པའི་ཡོ་བྱད་རྣམ་པ་བཞིས་སྟོང་གསུམ་

47-1-327a

གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལ་སྦྱིན་པ་བྱིན་པ་བས། སེམས་བསྐྱེད་དེ་སངས་རྒྱས་ཀྱི་ཕྱོགས་སུ་གོམ་པ་གཅིག་བོར་ན་བསོད་ནམས་ཆེའོ། །དེ་ཡང་རེ་ཤིག་ཞོག་ལ་གལ་
ཏེ་རྒྱལ་པོ་ཆེན་པོས་གང་གཱའི་ཀླུང་གི་བྱེ་མ་སྙེད་ཀྱིས་སེམས་ཅན་གྲངས་མེད་པ་ལ་སྦྱིན་པ་བྱིན་པ་ནི། ཤིང་སཱ་ལ་དྲུང་གཉིས་ཀྱི་བར་དེ་བཞིན་གཤེགས་པའི་སྤྱན་སྔར་སེམས་ཐག་པ་ནས་ཆོས་ཉན་དུ་འགྲོ་བ་ཙམ་མི་ཕོད་དོ། །
དེ་ནས་རྒྱལ་པོ་ཆེན་པོས་འཚོ་བྱེད་ལ་འདི་སྐད་ཅེས་སྨྲས་སོ། །སངས་རྒྱས་བཅོམ་ལྡན་འདས་ཤེས་བྱ་བ་ནི་རང་བཞིན་གྱིས་ཤིན་ཏུ་དུལ་བས་ན། འཁོར་རྣམས་ཀྱང་ཤིན་ཏུ་དུལ་བ་སྟེ། ཇི་ལྟར་ཤིང་ཙན་དན་གྱི་ཚལ་ལ། 
ཙན་དན་འབའ་ཞིག་གིས་བསྐོར་བ་བཞིན་ནོ། །དེ་བཞིན་གཤེགས་པ་རྣམ་པར་དག་པས་འཁོར་རྣམས་ཀྱང་རྣམ་པར་དག་པ་སྟེ། ཇི་ལྟར་ཀླུ་ཆེན་པོ་ལ་ཀླུའི་འཁོར་གྱིས་བསྐོར་བ་བཞིན་ནོ། །དེ་བཞིན་གཤེགས་པ་
ནི་རབ་ཏུ་ཞི་བས་འཁོར་རྣམས་ཀྱང་རབ་ཏུ་ཞི་བའོ། །དེ་བཞིན་གཤེགས་པ་ནི་འདོད་ཆགས་མེད་པས་འཁོར་རྣམས་ཀྱང་འདོད་ཆགས་མེད་པའོ། །སངས་རྒྱས་ལ་ཉོན་མོངས་པ་མེད་པས་འཁོར་རྣམས་ཀྱང་ཉོན་མོངས་པ་མེད་པ་
འོ། །ཁོ་བོ་ལྟ་ཤིན་དུ་སྡིག་ཅན་ཁ་ན་མ་ཐོ་བའི་ལས་ཀྱིས་ཤིན་དུ་གླགས་པ། ཤིན་ཏུ་མནམ་ཞིང་བཙོག་པ། སེམས་ཅན་དམྱལ་བའི་ཁམས་སུ་གཏོགས་པ་འདི་ཇི་ལྟ་བུར་དེ་བཞིན་གཤེགས་པའི་སྤྱན་སྔར་འགྲོ་བར་
བྱ། ཅི་སྟེ་ཕྱིན་ན་ཡང་ཁོ་བོ་ལ་མི་གཟིགས་ཤིང་བཀའ་སྩལ་པར་མི་གནང་དུ་དོགས་ཏེ། ཁྱོད་ཀྱིས་ཁོ་བོ་ལ་སངས་རྒྱས་ཀྱི་སྤྱན་སྔར་འགྲོ་བར་བསྐུལ་ཀྱང་བདག་ནི་ཤིན་ཏུ་བཙོག་པས་འགྲོ་བའི་སེམས་འདི་ཙམ་ཡང་མེད་
དོ། །དེའི་ཚེ་སྟེང་གི་ནམ་མཁའ་ལས་ཀྱང་འདི་སྐད་ཅེས་གྲག་པར་གྱུར་ཏོ། །བླ་ན་མེད་པའི་སངས་རྒྱས་ཀྱི་ཆོས་ཀྱང་ནུབ་ཏུ་ཉེ། ཤིན་དུ་ཟབ་པའི་ཆུ་ཀླུང་ཡང་སྐམས་མ་ཁང་། ཆོས་ཀྱི་སྒྲོན་མ་ཆེན་པོ་ཡང་

47-1-327b

རིང་པོ་མི་ཐོགས་ལ། ཆོས་ཀྱི་རི་བོ་ཡང་འགྱེལ་དུ་ཉེ། ཆོས་ཀྱི་གྲུ་ཡང་ཞིག་མ་ཁད། ཆོས་ཀྱི་ཟམ་པ་ཡང་ཞིག་ཏུ་ཉེ། ཆོས་ཀྱི་གཞལ་མེད་ཁང་ཡང་རྡིབ་ཏུ་ཉེ། ཆོས་ཀྱི་རྒྱལ་མཚན་ཡང་འགྱེལ་དུ་ཉེ། 
ཆོས་ཀྱི་སྡོང་པོ་ཡང་ཆག་མ་ཁང་། དགེ་བའི་བཤེས་གཉེན་ཡང་འགྲོ་མ་ཁད། འཇིག་པ་ཆེན་པོ་ཡང་འོང་དུ་ཉེ། ཆོས་ཀྱིས་ལྟོགས་པའི་སེམས་ཅན་ནི་རིང་པོ་མི་ཐོགས་པར་འབྱུང་། ཉོན་མོངས་པའི་རིམས་ནད་ནི་འབྱུང་
མ་ཁད། མུན་ནག་ཆེན་པོས་ནི་ནོན་པའི་དུས་ལ་བབ། ཆོས་ཀྱིས་ཕོངས་པའི་དུས་ནི་བབ་དུ་ཉེ་ལ། བདུད་ཀྱི་རྒྱལ་པོ་ནི་ཤིན་ཏུ་དགའ་བས་གོ་ཆ་ཡང་བོར། སངས་རྒྱས་ཀྱི་ཉི་མ་ནི་མྱ་ངན་ལས་འདས་པ་ཆེན་པོའི་རི་རྩེར་
ནུབ་མ་ཁད་དོ། །རྒྱལ་པོ་ཆེན་པོ་གལ་ཏེ་སངས་རྒྱས་གཤེགས་པར་གྱུར་ན་རྒྱལ་པོ་ཆེན་པོའི་ཁ་ན་མ་ཐོ་བའི་ལས་འདི་དག་ནི་གཞན་སུས་ཀྱང་གསོ་མི་ནུས་སོ། །རྒྱལ་པོ་ཆེན་པོ་ཁྱོད་ནི་མཚམས་མེད་པའི་སེམས་ཅན་དམྱལ་བའི་ཁ་ན་
མ་ཐོ་བའི་ལས་བྱས་པས་ལས་དེའི་རྐྱེན་གྱིས་ཐེ་ཚོམ་མེད་པར་ལྟུང་དུ་ངེས་སོ། །རྒྱལ་པོ་ཆེན་པོ་ཨ་ཞེས་བྱ་བ་ནི་མེད་པའོ། །བྱི་ཞེས་བྱ་བ་ནི་མཚམས་སོ། །བདེ་བའི་མཚམས་ཆུང་ཟད་ཀྱང་མེད་པས་མཚམས་མེད་པ་ཞེས་བྱའོ། །
རྒྱལ་པོ་ཆེན་པོ་གལ་ཏེ་མི་གཅིག་པུ་ཞིག་དམྱལ་བ་དེར་ལྟུང་ན་ཡང་དེའི་ལུས་དཔག་ཚད་བརྒྱད་ཁྲིའི་ནང་ཡོངས་སུ་གང་སྟེ། བར་མཚམས་ཀྱི་སྟོང་པ་མེད་པར་དེའི་ལུས་ལ་ཁོ་ར་ཁོར་ཡུག་ཏུ་ཆུབ་པར་སྡུག་བསྔལ་རྣམ་པ་སྣ་ཚོགས་མྱོང་ངོ་། །
ཅི་སྟེ་མི་མང་ཞིག་ལྟུང་ན་ཡང་ལུས་ཀྱིས་ཡོངས་སུ་གང་སྟེ། གཅིག་ལ་གཅིག་གཟེར་ཞིང་དོག་པ་མེད་དོ། །རྒྱལ་པོ་ཆེན་པོ་གྲང་བའི་སེམས་ཅན་དམྱལ་བར་ནི་ཚ་བའི་རླུང་ཆུང་ཟད་ཙམ་དང་ཕྲད་པས་བདེ་བ་ཞེས་བྱའོ། །ཚ་བའི་སེམས་
ཅན་དམྱལ་བ་ཡང་གྲངས་བའི་རླུང་ཆུང་ཟད་ཙམ་དང་ཕྲད་པས་བདེ་བ་ཞེས་བྱའོ། །འཚོ་བའི་སེམས་ཅན་དམྱལ་བ་ཡང་ཤི་ནས་སོས་ཤེས་བྱ་བའི་སྒྲ་ཐོས་པས་དེ་མ་ཐག་ཏུ་འཚོའོ། །མཚམས་མེད་པའི་སེམས་ཅན་དམྱལ་བ་ནི་དེ་ལྟ་བུའི་

47-1-328a

བག་མེད་དོ། །རྒྱལ་པོ་ཆེན་པོ་མཚམས་མེད་པའི་སེམས་ཅན་དམྱལ་བ་ལ་ཕྱོགས་བཞི་ན་སྒོ་རེ་རེ་ཡོད་དོ། །སྒོ་དེ་རེ་རེའི་ཕ་རོལ་ན་མེ་ཆེན་པོ་ཡོད་དེ། ལྷོ་བྱང་ཤར་ནུབ་ཐལ་བྱུང་དུ་འབར་རོ། །དཔག་ཚད་བརྒྱད་ཁྲི་ཁོ་ར་
ཁོར་ཡུག་ཏུ་ལྕགས་ཀྱི་རིས་བསྐོར་ཏེ། སྟེང་ཡང་ལྕགས་ཀྱི་དྲ་བས་བླ་རེ་བྲེས་ནས་ས་བཞི་ཡང་ལྕགས་ལས་བྱས་སོ། །སྟེང་གི་མེ་ཡང་འོག་ཏུ་ཐལ། འོག་གི་མེ་ཡང་སྟེང་དུ་ཐལ་བྱུང་དུ་འབར་རོ། །རྒྱལ་པོ་ཆེན་པོ་སླ་ངའི་ཐོག་དུ་ཉ་བཞག་ན་ཚིག་པ་
དང་འདྲ་བར་དེ་ན་གནས་པའི་མི་ཡང་དེ་དང་འདྲའོ། །རྒྱལ་པོ་ཆེན་པོ་མཚམས་མེད་པ་གཅིག་བྱས་ན་མཚམས་མེད་པ་གཅིག་མྱོང་ངོ་། །མཚམས་མེད་པ་གཉིས་བྱས་ན་ཉིས་འགྱུར་མྱོང་ངོ་། །མཚམས་མེད་པ་ལྔར་བྱས་ན་ལྔ་འགྱུར་མྱོང་བར་འགྱུར་
རོ། །རྒྱལ་པོ་ཆེན་པོ་བདག་གིས་ནི་རྒྱལ་པོའི་ཁ་ན་མ་ཐོ་བའི་ལས་འདིས་གདོན་མི་ཟ་བར་མི་ཐར་བར་ཤེས་ཀྱིས་རྒྱལ་པོ་ཆེན་པོ་དེ་བཞིན་གཤེགས་པ་གང་ན་བཞུགས་པར་མྱུར་དུ་བཞུད་ཅིག །སངས་རྒྱས་བཅོམ་ལྡན་འདས་མ་གཏོགས་པར་
གཞན་སུས་ཀྱང་སྐྱབས་སུ་འགྱུར་བ་མེད་དེ། ཁོ་བོ་ཁྱོད་ལ་སྙིང་བརྩེ་བའི་ཕྱིར་འདི་སྐད་ཅེས་བསྐུལ་བ་ཡིན་ནོ། །དེའི་ཚེ་རྒྱལ་པོ་ཆེན་པོས་དེ་སྐད་ཅེས་གྲགས་པའི་ཚིགས་ཐོས་ནས་ཤིན་ཏུ་འཇིགས་དངངས་ཏེ་སྐྱི་བུང་ཞེས་བྱེད་ནས་ལུས་
ཀྱི་ཡན་ལག་ལྔ་ཡང་ཆུ་ཤིང་ལྟ་བུར་གཡོས་ནས་ཡར་བལྟས་ཏེ། འདི་སྐད་ཏུ་སྨྲ་བ། གཟུགས་ནི་མ་མཐོང་གི་སྐད་འབའ་ཞིག་གྲག་པ་འདི་སུ་ཡིན་ཞེས་སྨྲས་སོ། །རྒྱལ་པོ་ཆེན་པོ་ཁོ་བོ་ནི་ཁྱོད་ཀྱི་ཕ་གཟུགས་ཅན་སྙིང་པོ་ཡིན་གྱིས། 
ཁྱོད་འཚོ་བྱེད་ཀྱི་ཚིག་ཉོན་ཅིག །ངན་པར་ལྟ་བ་སྟོན་པ་དྲུག་གི་ཚིག་ནི་མ་ཡིན་ནོ། །རྒྱལ་པོས་དེ་སྐད་ཅེས་གྲག་པའི་ཚིག་ཐོས་མ་ཐག་ཏུ་རྒྱལ་ནས་ས་ལ་འགྱེལ་ཏེ། ལུས་ཀྱི་འབྲུམ་བུ་ཡང་སྐྱེས་ནས་སྔ་མ་ལས་ལྷག་པར་མནམ་ཞིང་
བཙོག་པར་གྱུར་ཏེ། བསིལ་སྨན་གྱིས་བསྐུས་ཀྱང་འབྲུམ་བུ་ལྷག་པར་ཚ་བར་གྱུར་གྱི་འཚོ་བ་ནི་མེད་དོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་རྩ་བདུན་པ། དེའི་ཚེ་ན་བཅོམ་ལྡན་

47-1-328b

འདས་སྟོན་པ་ཐུགས་རྗེ་ཆེན་པོ་རྒྱལ་པོ་མ་སྐྱེས་དགྲའི་ཕྱིར་ཟླ་བ་ལྟ་བུའི་ཏིང་ངེ་འཛིན་ལ་ཞུགས་སོ། །ཏིང་ངེ་འཛིན་ལ་ཞུགས་ནས་འོད་ཟེར་ཆེན་པོ་བཏང་ངོ་། །འོད་ཆེན་པོ་ཤིན་ཏུ་སིམ་པ་དེས་རྒྱལ་པོའི་ལུས་ལ་རེག་ནས་ལུས་ཀྱི་འབྲུམ་
བུ་སོས་ཏེ་ཚ་བས་གདུངས་པ་ཡང་ཞི་བར་གྱུར་ཏོ། །རྒྱལ་པོས་འབྲུམ་བུ་སོས་ཤིང་ལུས་ཀྱི་ཡན་ལག་བསིལ་བར་ཚོར་ནས་འཚོ་བྱེད་ལ་འདི་སྐད་ཅེས་སྨྲས་སོ། །སྔོན་མཁས་པ་དག་འདི་སྐད་ཅེས་ཟེར་རོ། །བསྐལ་པ་ཟད་དུ་ཉེ་བ་ན། 
ཟླ་བ་གསུམ་ཅིག་ཅར་འབྱུང་སྟེ། དེའི་ཚེ་ན་སེམས་ཅན་ཐམས་ཅད་ཀྱི་ན་བ་དང་སྡུག་བསྔལ་ཀུན་ཞི་བར་འགྱུར་རོ། །དེའི་དུས་ལ་ད་དུང་མ་བབ་པར་འོད་འདི་ག་ལས་བྱུང་ན་ངའི་ལུས་ལ་རེག་ནས་འབྲུམ་བུའི་སྡུག་བསྔལ་བྱང་ཞིང་ལུས་
བདེ་བར་གྱུར། འཚོ་བྱེད་ཀྱིས་སྨྲས་པ། འདི་ནི་བསྐལ་པ་ཟད་དུ་ཉེ་བའི་ཚེ་ཟླ་བ་གསུམ་ཅིག་ཅར་བྱུང་བ་མ་ཡིན། མེ་དང་ཉི་མ་དང་སྐར་མ་དང་སྨན་དང་། ནོར་བུ་རིན་པོ་ཆེ་དང་ལྷའི་འོད་ཀྱང་མ་ཡིན་ནོ། །རྒྱལ་པོས་ཡང་སྨྲས་
པ། ཟླ་བ་གསུམ་དང་ནོར་བུ་རིན་པོ་ཆེ་ལ་སོགས་པའི་འོད་མ་ཡིན་ན། འོ་ན་འདི་སུའི་འོད། སྨྲས་པ། རྒྱལ་པོ་འདི་ནི་ལྷའི་ལྷས་བཏང་བའི་འོད་ཡིན་པར་རིག་པར་བྱའོ། །འོད་འདི་ནི་རྩ་བ་མེད། མཐར་ཐུག་པ་མ་ཡིན། ཚ་བ་མ་ཡིན། 
གྲང་བ་མ་ཡིན། རྟག་པ་མ་ཡིན། འགོག་པ་མ་ཡིན། གཟུགས་མ་ཡིན་གཟུགས་མེད་པ་མ་ཡིན། མཚན་ཉིད་མ་ཡིན། མཚན་ཉིད་མེད་པ་མ་ཡིན། སྔོན་པོ་མ་ཡིན། སེར་པོ་མ་ཡིན། དམར་པོ་མ་ཡིན། དཀར་པོ་མ་ཡིན་ཏེ། སེམས་ཅན་སྒྲོལ་བའི་ཕྱིར་
མཐོང་བ་དང་། མཚན་ཉིད་བརྗོད་དུ་ཡོད་པ་དང་། རྩ་བ་ཡོད་པ་དང་། མཐའ་ཡོད་པ་དང་། ཚ་བ་ཡོད་པ་དང་། གྲང་བ་ཡོད་པ་དང་། སྔོན་པོ་དང་། སེར་པོ་དང་དམར་པོ་དང་དཀར་པོ་ཡང་ཡོད་དོ། །རྒྱལ་པོ་ཆེན་པོ་དེ་ལྟར་མོད་ཀྱི། འོད་དེ་ནི་ཡང་དག་
པར་ན་བརྗོད་ཏུ་མེད། མཐོང་བ་མ་ཡིན་པ་ནས། སྔོན་པོ་དང་། སེར་པོ་དང་དམར་པོ་དང་། དཀར་པོའི་བར་དུ་མེད་དོ། །རྒྱལ་པོས་འཚོ་བྱེད་ལ་སྨྲས་པ། ལྷའི་ལྷ་དེ་ཅིའི་རྒྱུ་ཅིའི་རྐྱེན་གྱིས་འོད་འདི་བཏང་བར་གྱུར། སྨྲས་པ། རྒྱལ་པོ་དེང་

47-1-329a

གི་ལྟས་འདི་ནི་རྒྱལ་པོ་ལ་དགོངས་པའི་ཕྱིར་བཏང་བ་འདྲའོ། །རྒྱལ་པོས་སྔར་འདི་སྐད་ཏུ་འཇིག་རྟེན་ན་སྨན་པ་མཁས་པ་ལུས་དང་སེམས་ཀྱི་ནད་གསོ་ནུས་པ་མེད་དོ་ཞེས་བྱས་པས་དེའི་ཕྱིར་འོད་འདི་བཏང་ནས་སྔར་རྒྱལ་པོའི་
ལུས་གསོས་ཏེ། དེ་ནས་སེམས་ཀྱང་གསོ་བར་མཛད་དོ། །རྒྱལ་པོས་ཡང་འཚོ་བྱེད་ལ་སྨྲས་པ། བཅོམ་ལྡན་འདས་དེ་བཞིན་གཤེགས་པས་བདག་ལ་དགོངས་སམ། འཚོ་བྱེད་ཀྱིས་སྨྲས་པ། དཔེར་ན་མི་ཞིག་ལ་བུ་བདུན་ཡོད་དེ། 
བདུན་ལས་གཅིག་ནད་ཀྱིས་བཏབ་ན། ཕ་མས་བུ་དེ་དག་ལ་མི་སྙོམས་པ་མ་ཡིན་ཏེ། འོན་ཀྱང་བུ་ན་བ་དེ་ལ་ཆེར་སེམས་སོ། །རྒྱལ་པོ་ཆེན་པོ་དེ་བཞིན་གཤེགས་པ་ཡང་དེ་དང་འདྲ་སྟེ། སེམས་ཅན་ཐམས་ཅད་ལ་ཐུགས་མི་སྙོམས་
པ་མ་ལགས་ཀྱི། སྡིག་པ་ཅན་ལ་ལྷག་པར་དགོངས་སོ། །ལེ་ལོ་ཅན་ལ་ནི་སངས་རྒྱས་ཐུགས་བརྩེ་བར་དགོངས་སོ། །ལེ་ལོ་མེད་པ་ལ་ནི་ཐུགས་བཏང་སྙོམས་སུ་འཇུག་གོ། །དེ་ལ་ལེ་ལོ་མེད་པ་གང་ཞེ་ན། འདི་ལྟ་སྟེ། བྱང་ཆུབ་སེམས་
དཔའ་ས་དྲུག་ལ་གནས་པ་དག་གོ། །རྒྱལ་པོ་ཆེན་པོ་སངས་རྒྱས་བཅོམ་ལྡན་འདས་ནི་སེམས་ཅན་གྱི་རིགས་དང་། རྒན་པ་དང་གཞོན་ནུ་དང་དར་ལ་བབ་པ་དང་། དབུལ་པོ་དང་ཕྱུག་པོ་དང་། དུས་དང་ཉི་མ་དང་ཟླ་བ་དང་། སྐར་མ་དང་བཟོ་དང་། 
རིགས་ངན་དང་བྲན་ཕོ་དང་། བྲན་མོར་མི་རྟོག་སྟེ། སེམས་ཅན་གང་དགེ་བའི་སེམས་ཡོད་པ་འབའ་ཞིག་ལ་རྟོག་པས་དགེ་བའི་སེམས་ཡོད་ན་བྱམས་པའི་ཐུགས་ཀྱིས་དགོངས་སོ། །རྒྱལ་པོ་ཆེན་པོ་འོད་ཀྱི་ལྟས་འདི་ནི་དེ་བཞིན་གཤེགས་
པ་ཟླ་བ་ལྟ་བུའི་ཏིང་ངེ་འཛིན་ལ་བཞུགས་ནས་བཏང་བའི་འོད་ཡིན་པར་རིག་པར་བྱའོ། །རྒྱལ་པོས་དྲིས་པ། ཟླ་བ་ལྟ་བུའི་ཏིང་ངེ་འཛིན་ཅེས་བྱ་བ་ཇི་ལྟ་བུ་ཡིན། འཚོ་བྱེད་ཀྱིས་གསོལ་པ། དཔེར་ན་ཟླ་བའི་འོད་ནི་ཨུད་པ་ལའི་མེ་ཏོག་ཐམས་ཅད་ཁ་
འབུས་ཤིང་གསལ་བར་བྱེད་དོ། །དེ་བཞིན་དུ་ཟླ་བ་ལྟ་བུའི་ཏིང་ངེ་འཛིན་ཡང་སེམས་ཅན་ཐམས་ཅད་ཀྱི་དགེ་བའི་སེམས་ཁ་འབྱེ་ཞིང་འབུ་བར་མཛད་དེ། དེ་བས་ན་ཟླ་བ་ལྟ་བུའི་ཏིང་ངེ་འཛིན་ཅེས་བྱའོ། །རྒྱལ་པོ་ཆེན་པོ་དཔེར་ན་ཟླ་བའི་

47-1-329b

འོད་ནི་འདྲོན་པོ་ཐམས་ཅད་དགའ་བར་བྱེད་དོ། །དེ་བཞིན་དུ་ཟླ་བ་ལྟ་བུའི་ཏིང་ངེ་འཛིན་ཡང་དེ་དང་འདྲ་སྟེ། མྱ་ངན་ལས་འདས་པའི་ལམ་བགྲོད་པ་དག་དགའ་བའི་སེམས་སྐྱེ་བར་བྱེད་དེ། དེ་བས་ན་ཟླ་བ་ལྟ་བུའི་ཏིང་ངེ་འཛིན་ཅེས་བྱའོ། །
རྒྱལ་པོ་ཆེན་པོ་དཔེར་ན་ཟླ་བའི་འོད་ནི་ཐོག་མ་ཚེས་གཅིག་ནས་བཅྭོ་ལྔའི་བར་དུ་དབྱིབས་དང་འོད་ཀྱང་བགས་ཀྱིས་རྒྱས་ཤིང་རྫོགས་པར་འགྱུར་རོ། །དེ་བཞིན་དུ་ཟླ་བ་ལྟ་བུའི་ཏིང་ངེ་འཛིན་ཀྱང་སེམས་དང་པོ་བསྐྱེད་པའི་དགེ་བའི་རྩ་བ་རྣམས་ཀྱི་
བགས་ཀྱིས་སྐྱེ་ཞིང་རྒྱས་པར་བྱེད་པ་ནས། ཡོངས་སུ་མྱ་ངན་ལས་འདས་པ་ཆེན་པོའི་བར་ཡོངས་སུ་རྫོགས་པར་བྱེད་དེ། དེ་བས་ན་ཟླ་བ་ལྟ་བུའི་ཏིང་ངེ་འཛིན་ཅེས་བྱའོ། །རྒྱལ་པོ་ཆེན་པོ་དཔེར་ན་ཟླ་བའི་འོད་ཚེས་བཅུ་དྲུག་ནས་སུམ་
བཅུ་ལ་ཐུག་ན། དབྱིབས་དང་ཁ་དོག་དང་འོད་སྣང་བ་བགས་ཀྱིས་འབྲི་ཞིང་ཆུང་བར་འགྱུར་རོ། །དེ་བཞིན་དུ་ཟླ་བ་ལྟ་བུའི་ཏིང་ངེ་འཛིན་གྱི་འོད་གྱིས་གར་སྣང་བའི་གནས་དེར་ཉོན་མོངས་པ་ཐམས་ཅད་བགས་ཀྱི་འབྲི་ཞིང་ཆུང་བར་འགྱུར་ཏེ། 
དེ་བས་ན་ཟླ་བ་ལྟ་བུའི་ཏིང་ངེ་འཛིན་ཅེས་བྱའོ། །རྒྱལ་པོ་ཆེན་པོ་དཔེར་ན་རབ་ཏུ་ཚ་བའི་དུས་ན་སེམས་ཅན་ཐམས་ཅད་རྟག་ཏུ་ཟླ་བའི་འོད་སེམས་སོ། །ཟླ་བའི་འོད་ཀྱིས་ཕོག་ན་ཚ་བ་མེད་པར་འགྱུར་རོ། །དེ་བཞིན་དུ་ཟླ་བ་ལྟ་བུའི་ཏིང་ངེ་འཛིན་
ཀྱང་སེམས་ཅན་གྱི་འདོད་པའི་ཉོན་མོངས་པས་གདུངས་པ་ཐམས་ཅད་མེད་པར་བྱེད་དོ། །རྒྱལ་པོ་ཆེན་པོ་དཔེར་ན་ཟླ་བ་ཉ་བ་ནི་སྐར་མ་མང་པོའི་རྒྱལ་པོ་ལྟ་བུ་སྟེ། བདུད་རྩིའི་རོ་ལྟ་བུར་སེམས་ཅན་ཐམས་ཅད་དགའ་ཞིང་མོས་སོ། །དེ་བཞིན་
དུ་ཟླ་བ་ལྟ་བུའི་ཏིང་ངེ་འཛིན་ཀྱང་དེ་དང་འདྲ་སྟེ། དགེ་བ་ཐམས་ཅད་ཀྱི་རྒྱལ་པོ་བདུད་རྩིའི་རོ་ལྟ་བུ་སྟེ། སེམས་ཅན་ཐམས་ཅད་དགའ་ཞིང་མོས་ཏེ། དེ་བས་ན་ཟླ་བ་ལྟ་བུའི་ཏིང་ངེ་འཛིན་ཅེས་བྱའོ། །རྒྱལ་པོས་སྨྲས་པ། ཁོ་བོས་
འདི་སྐད་ཅེས་ཐོས་ཏེ། དེ་བཞིན་གཤེགས་པ་ནི་མི་སྡིག་པ་ཅན་དང་ལྷན་ཅིག་མི་གནས་མི་འགྲོགས་གཏམ་མི་ཟེར་ཏེ། ཇི་ལྟར་རྒྱ་མཚོར་མི་རོ་ཞག་ཏུ་མི་གནས་པ་དང་། བྱ་ངུར་པ་སྐམ་པའི་སར་མི་གནས་པ་དང་། བརྒྱ་བྱིན་ལྷའི་

47-1-330a

དབང་ཕྱུག་ཡི་དགས་དང་ལྷན་ཅིག་མི་གནས་པ་དང་། བྱ་ཀུ་ཤི་ལ་ཤིང་སྐམ་པོའི་སྟེང་དུ་མི་ཉལ་བ་དང་འདྲའོ་ཞེས་ཐོས་ཏེ། དེ་བཞིན་གཤེགས་པ་ཡང་དེ་དང་འདྲ་ན་བདག་གིས་ཇི་ལྟ་བུར་མཐོང་བར་བྱ། གལ་ཏེ་མཐོང་
བར་གྱུར་ན། ཁོ་བོའི་ལུས་སའི་ནང་དུ་མི་ནུབ་བམ། ཁོ་བོས་བལྟས་ན་དེ་བཞིན་གཤེགས་པ་ནི་བལ་གླང་སྨྱོས་པ་དང་། སེང་གེ་དང་སྟག་དང་། སྤྱང་ཀི་དང་མེ་མ་མུར་དང་ཉེ་ཡང་སླའི། མི་སྡིག་ཅན་དང་ནམ་དུ་ཡང་མི་
སྟེན་པ་དང་འདྲའོ་སྙམ་སེམས་ཏེ། བདག་གིས་ཇི་ལྟ་བུའི་སེམས་དང་བཅས་ཏེ་དེ་བཞིན་གཤེགས་པའི་སྤྱན་སྔར་འགྲོ་བར་བྱ། འཚོ་བྱེད་ཀྱིས་སྨྲས་པ། རྒྱལ་པོ་ཆེན་པོ་དཔེར་ན་སྐོམ་གྱིས་གདུངས་པ་ནི་མྱུར་དུ་ཆུ་གཙང་
མའི་གན་དུ་འགྲོའོ། །བཀྲེས་པ་ཟས་འདོད་པ་དང་། འཇིགས་པ་སྐྱབས་འདོད་པ་དང་། ནད་པ་སྨན་འདོད་པ་དང་། ཚ་བ་གྲིབ་མ་འདོད་པ་དང་། གྲང་བ་མེ་འདོད་པ་དང་འདྲ་བར། དེ་ལྟར་རྒྱལ་པོ་སངས་རྒྱས་འདོད་པ་ཡང་དེ་དང་འདྲ་བར་
བྱ་བའི་རིགས་སོ། །རྒྱལ་པོ་ཆེན་པོ་དེ་བཞིན་གཤེགས་པ་ནི་ལོག་སྲེད་ཅན་ལ་ཡང་དམ་པའི་ཆོས་སྟོན་ན། རྒྱལ་པོ་ཆེན་པོ་ལོག་སྲེད་ཅན་མ་ལགས་པ་ལ་ཐུགས་རྗེས་དགོངས་ཤིང་སྐྱབས་མཛད་པ་ལྟ་ཅི་སྨོས། རྒྱལ་པོས་
སྨྲས་པ། འཚོ་བྱེད་ཁོ་བོས་སྔོན་འདི་སྐད་ཅེས་ཟེར་བ་ཐོས་ཏེ། ལོག་སྲེད་ཅན་ཞེས་བྱ་བ་ནི་མ་དད་པ། མི་ཉན་པ། དོན་ཡིད་ལ་མི་བྱེད་པ། དོན་ཡང་མི་རྟོགས་པ་ཡིན་ནོ་ཞེས་ཟེར་ན། དེ་བཞིན་གཤེགས་པ་ཅི་སྟེ་ཆོས་
སྟོན་པར་འགྱུར། འཚོ་བྱེད་ཀྱིས་སྨྲས་པ། རྒྱལ་པོ་ཆེན་པོ་དཔེར་ན་མི་ལ་ལ་ཞིག་ནད་ཚབས་པོ་ཆེས་བཏབ་པ་ལ། རྨི་ལམ་ན་ཀ་བ་གཅིག་པའི་ཁང་པར་འདུག་གམ། མར་དང་སྣུམ་ལ་སོགས་པ་ཟ་ཞིང་ལུས་ལ་ཡང་སྐུད་
དམ། ཐལ་བའི་ནང་དུ་ཉལ་ཞིང་ཐལ་བ་ཟ་འམ། ཤིང་སྐམ་པོ་རུལ་པ་ལ་འཛེག་གམ། བར་བར་སྤྲེའུ་དང་འགྲོགས་ཤིང་ཉལ་ལམ། འདུག་གམ། ཆུར་བྱིང་ངམ། འདམ་རྫབ་ཏུ་ནུབ་བམ། ཡང་ཐོག་གམ། རི་མཐོན་པོ་འམ། 

47-1-330b

ཤིང་ཁ་འམ། བལ་གླང་ངམ། རྟ་འམ། བ་ལང་ངམ། ལུག་གི་ཐོག་ནས་ལྷུང་བ་འམ། ལུས་ལ་གོས་སྔོན་པོ་འམ། སེར་པོ་འམ། དམར་པོ་འམ། ནག་པོ་གྱོན་ཏེ་གླུ་གང་དང་རྩེད་མོ་བྱེད་པ་འམ། བྱ་རོག་དང་། སྲིན་བྱ་འམ། 
ཝ་ལ་སོགས་པ་མཐོང་བ་འམ། སོ་དང་སྐྲ་ལྷུང་བ་འམ། གཅེར་བུར་ཁྱི་ལ་སྔས་བཅས་ཏེ་ལུད་ཕུང་གི་སྟེང་ན་ཉལ་བ་འམ། སྔོན་ཤི་བའི་མི་དང་ལྷན་ཅིག་འགྲོགས་ཤིང་འདུག་གམ། ལག་པ་སྦྲེལ་ཞིང་འགྲོ་བ་འམ། 
སྦྲུལ་གདུག་པས་གང་བའི་སྟེང་དུ་འབོགས་ཤིང་འགྲོ་བ་འམ། ཡང་ན་བུད་མེད་སྐྲ་བཤིག་པ་ལ་ལག་གིས་འཁྱུད་ཅིང་ལྷན་ཅིག་ཉལ་བར་རྨིས་པ་འམ། ཤིང་ཏ་ལའི་ལོ་མས་གོས་བྱེད་པ་འམ། བོང་བུས་འདྲེན་པའི་ཤིང་
རྟ་ཞིག་ལ་ཞོན་ཏེ་ལྷོ་ཕྱོགས་སུ་འགྲོ་བ་འམ། དེ་ལྟ་བུ་དག་རྨིས་ནས་ཤིན་དུ་མི་དགའ་བས་སེམས་གདུངས་པར་གྱུར་ཏོ། །དེ་ལྟར་མི་དགའ་བས་གདུངས་པའི་ཕྱིར་ནད་ཀྱང་ཕྱི་ཕྱིར་ན་བར་གྱུར་ཏོ། །ནད་ཕྱི་ཕྱིར་ན་བས་
གཉེན་རྣམས་ཀྱིས་སྨན་པ་གཉེར་དུ་བཏང་ངོ་། །གལ་ཏེ་སྨན་པའི་སྟེང་དུ་མངགས་པའི་མི་དེ་ལུས་ཐུང་ངམ། ལུས་ཀྱི་ཡན་ལག་མ་ཚང་ཞིང་དབང་པོ་དང་མི་ལྡན་པ་འམ། མགོ་ལ་རྡུལ་ཆགས་པ་འམ། གོས་རལ་པོ་གྱོན་
པ་འམ། ཤིང་རྟ་ཞིག་པ་ཁྲིད་དེ། སྨན་པ་ལ་འདི་སྐད་ཏུ་མྱུར་དུ་ཤིང་རྟ་དེ་ལ་འཛེགས་ཤེས་ཟེར་བ་དེའི་ཚེ། སྨན་པ་མཁས་པ་དེས་དེ་ལྟ་བུའི་སུན་མ་དང་། ལྟས་བཀྲ་མི་ཤིས་པ་མཐོང་ནས། ནད་དེ་ནི་ཤིན་དུ་གསོ་དཀའ་སྙམ་སེམས་
སོ། །ཡང་འདི་སྙམ་དུ་དེ་ལྟར་སུན་མ་བཀྲ་མི་ཤིས་པ་ཡིན་མོད་ཀྱི། ཡང་གསོར་རུང་ངམ་མི་རུང་སྙམ་ཉི་མ་བལྟའོ། །དེ་ལ་གལ་ཏེ་ཚེས་བཞི་དང་། དྲུག་དང་། བརྒྱད་དང་། བཅུ་གཉིས་དང་། བཅུ་བཞིའི་ཉི་མ་ལ་ནད་ཀྱིས་བཏབ་ན་
གསོ་དཀའོ་སྙམས་སོ། །ཡང་འདི་སྙམ་དུ་སེམས་ཏེ་ཉི་མ་ངན་མོད་ཀྱི་ཡང་གསོར་རུང་ངམ་མི་རུང་སྙམ་སྐར་མ་ལ་བལྟའོ། །དེ་ལ་སྐར་མ་མེ་དང་། གསེར་དང་། སྣར་མ་དང་། གཤིན་རྗེ་དང་། གཤེར་དང་། གང་དང་སྐར་མ་དེ་དག་ལ་

47-1-331a

ནད་ཀྱིས་བཏབ་ན་གསོ་དཀའོ། །ཡང་འདི་སྙམ་དུ་སྐར་མ་ངན་ཀྱང་དུས་ལ་བལྟའོ་སྙམ་སྟེ། དེ་ལ་སྟོན་དང་དགུན་དང་། ཉི་མ་ནུབ་པའི་དུས་དང་། ནམ་ཕྱེད་དང་། ཟླ་བ་ནུབ་པའི་དུས་སུ་ནད་ཀྱིས་བཏབ་ན་གསོ་
དཀའོ། །ཡང་འདི་སྙམ་དུ་དེ་ལྟར་ལྟས་མང་པོ་དེ་དག་ངན་མོད་ཀྱི། རྟོགས་ཀྱང་སྲིད། མི་རྟོགས་ཀྱང་སྲིད་དེ། ནད་པ་ཉིད་བལྟ་སྟེ་གལ་ཏེ་བསོད་ནམས་ཡོད་པ་ཞིག་ན་གསོར་རུང་ངོ་། །བསོད་ནམས་མེད་ན་ལྟས་བཟང་
ཡང་ཅི་ལ་ཕན་སྙམ་བསམ་སོ། །དེ་སྙམ་དུ་བསམས་ནས། སུན་མ་དང་འགྲོགས་ཏེ་ལམ་དུ་ཞུགས་པ་དང་། ཡང་འདི་སྙམ་དུ་གལ་ཏེ་ནད་པ་དེ་ཚེ་རིང་བའི་ལྟས་ཡོད་ན་གསོར་རུང་ངོ་། །ཚེ་ཐུང་བའི་ལྟས་དང་ཕྲད་ན་གསོར་
མི་རུང་ངོ་སྙམ་བསམས་ནས། ལམ་དུ་བུས་པ་ཆུང་ངུ་གཉིས་གཅིག་ལ་གཅིག་དྲངས་ཏེ་འཐབ་ལ། ཐོར་ཏོ་ནས་བཟུང་ནས་སྐྲ་འབལ་ཞིང་གྱོ་མོ་དང་། རྡོག་པ་དང་། མཚོན་ཆ་དང་། དབྱུག་པ་འཕེན་ཞིང་གཅིག་ལ་གཅིག་རྡེག་པ་འམ། 
མེ་ཐོགས་པ་མེ་རང་ཤི་བ་མཐོང་ངམ། ཤིང་གཅོད་པ་མཐོང་ངམ། མིའི་ལག་ན་ཀོ་བ་ཉིད་ཅིང་ལམ་དུ་འགྲོ་བ་འམ། ལམ་ན་རྫེས་ལུས་པ་མཐོང་ངམ། མི་སྣོད་སྟོང་པ་ཐོགས་པ་མཐོང་ངམ། དགེ་སློང་གཅིག་པུ་གྲོགས་མེད་
པར་འགྲོ་བ་མཐོང་ངམ། སྟག་གམ། སྤྱང་ཀི་འམ། བྱ་རོག་གམ། སྲིན་བུ་འམ། ཝ་ལ་སོགས་པ་དངོས་པོ་དེ་ལྟ་བུ་དག་མཐོང་ནས། ཡང་འདི་སྙམ་དུ་མངགས་པའི་སུན་མ་ནས། ལམ་དུ་འགྲོ་བའི་བར་དུ་མཐོང་ངོ་ཅོག་
ཀུན་ཀྱང་བཀྲ་མི་ཤིས་ན་ནད་པ་དེ་གདོན་མི་ཟ་བར་གསོ་དཀའོ་སྙམ་སེམས་སོ། །ཡང་འདི་སྙམ་དུ་བདག་གལ་ཏེ་མ་སོང་ན་སྨན་མཁས་པ་ཞེས་མི་གྲགས་ལ། ཅི་སྟེ་སོང་ན་གསོར་མི་རུང་ངོ་སྙམ་སེམས་ཏེ། ཡང་འདི་སྙམ་དུ་
བསམས་སོ། །དེ་ལྟ་བུའི་ལྟས་མང་པོ་བཀྲ་མི་ཤིས་མོད་ཀྱི། འོན་ཀྱང་ནད་པའི་ཐད་ཏུ་རྩེ་གཅིག་འགྲོའོ་སྙམ་བསམས་ནས་ལམ་དུ་འགྲོ་བ་ལས་སྒྲ་འདི་དག་ཐོས་ན་མི་རུང་སྟེ། གང་ཞེ་ན། ཤི་བ་དང་སྟོར་བ་དང་། 

47-1-331b

བྱུང་བ་དང་། ཆག་པ་དང་། ཞིག་པ་དང་གྲུགས་པ་དང་ཤུས་པ་དང་། ལྷུང་བ་དང་གྲོལ་བ་དང་ཁོར་ཁྱེར་བ་དང་། ཚིག་པ་དང་མ་འོངས་ཤེས་ཟེར་བ་ཐོས་ན་གསོ་དཀའ་སྟེ་མགོན་སྐྱབས་མི་ནུས་སོ། །ཡང་ལྷོ་ཕྱོགས་ནས་བྱའི་སྐད་ཐོས་པ་ལ་
འདི་ལྟ་སྟེ། བྱ་རོག་དང་སྲིན་བྱ་དང་སྐེ་ཀའི་སྐད་དམ། ཁྱི་འམ། བྱི་བ་འམ། ཝ་འམ། རི་བོང་ངམ། ཕག་སྟེ། དེ་དག་གི་སྐད་ཐོས་ན། ཡང་འདི་སྙམ་དུ་ནད་པ་དེ་ནི་ཤིན་ཏུ་གསོ་དཀའོ་སྙམ་སེམས་སོ། །དེ་ནས་ནད་པའི་
ཁྱིམ་དུ་ཞུགས་པ་དང་། ནད་པ་ལ་བལྟས་ན། དེ་རེས་འགའ་ནི་གྲང་། རས་འགའ་ནི་ཚ་ཞིང་ལྷུ་ཚིགས་ཐམས་ཅད་ལྷང་ལྷང་པོར་ན་སྟེ། མིག་དམར་བ་ལ་མཆི་མ་ཟག་པ་དང་། རྣ་བའི་ནང་ན་སྒྲ་གྲག་པ་དང་། ལྐོག་མ་འགགས་ཏེ་
ན་བ་དང་། ལྕེ་གས་པ་དང་། མདོག་རབ་ཏུ་གནག་པ་དང་། མགོ་མི་ཐེག་པ་དང་། ལུས་སྐོམ་ཞིང་རྡུལ་མོད་པ་དང་། བཤང་གཅི་འགགས་པ་དང་། ལུས་གློ་བུར་དུ་རབ་ཏུ་གྱུར་ཏེ་ཤིན་དུ་དཀར་བ་དང་། དམར་བ་དང་། ཚིག་གི་སྒྲ་ཤས་
མི་མཉམ་ཞིང་རེས་འགའ་ནི་སྦོམ། རེས་འགའ་ནི་ཕྲ་བ་དང་། ལུས་ཐམས་ཅད་ཁྲ་བོར་གྱུར་ཅིང་ངོ་མཚར་གྱི་ཁ་དོག་སྔོན་པོ་དང་། སེར་པོ་བྱུང་བ་དང་། ཁོང་པ་གང་ཞིང་ལྒངས་ནས་སྨྲ་བའི་ཚིག་མི་གསལ་ཏེ། དེ་ལྟ་བུར་
གྱུར་པ་མཐོང་ནས་ནད་གཡོག་དེ་ལ་ནད་པ་འདི་སྔོན་གྱི་ཚུལ་ལས་གྱུར་པ་ཅི་ཡོད་ཅེས་དྲིས་སོ། །ནད་གཡོག་དེས་སྨྲས་པ། སྨན་པ་ཆེན་པོ་མི་འདི་ནི་སྔོན་དཀོན་མཆོག་གསུམ་དང་། ལྷ་རྣམས་ལ་དད་ཅིང་བཀུར་སྟི་བྱེད་པ་
ལས་ད་ནི་འགྱུར་ཏེ་དད་པའི་སེམས་མེད་པར་གྱུར་ཏོ། །སྔོན་སྦྱིན་པ་ལས་དགའ་བ་ལས་ད་ནི་འཇུངས་པར་གྱུར་ཏོ། །སྔོན་ལྟོ་ཆུང་བ་ལས་ད་ནི་ལྟོ་ཆེ་བར་གྱུར་ཏོ། །སྔོན་འཇམ་ཞིང་དེས་པ་ལས་ད་ནི་ཁྲོ་ཞིང་ཞེ་སྡང་ཆེ་བར་
གྱུར་ཏོ། །སྔོན་སྲི་ཞུ་ཆེ་ཞིང་ཕ་མ་ལ་ངོ་མཚར་བཀུར་སྟི་བྱེད་པ་ལས་ད་ནི་ཕ་མ་ལ་བཀུར་སྟི་བྱེད་པའི་སེམས་མེད་པར་གྱུར་ཏོ། །སྨན་པས་དེ་སྐད་ཅེས་ཟེར་བ་ཐོས་ནས་དྲུང་དུ་བསྙེན་ཏེ་མནམས་སོ། །དེ་ལ་ཨུད་པ་

47-1-332a

ལའི་དྲི་བྲོ་འམ། ཨ་ག་རུ་དང་སྤོས་སྣ་ཚོགས་དང་། སྤོས་བྱིད་ཀ་ཏ་དང་། ཏ་ཀ་ར་དང་ཏ་མ་ལ་དང་གུར་གུམ་དང་ཙན་དན་གྱི་དྲི་བྲོ་བ་དང་། སྲེག་ཤའི་དྲི་བྲོ་བ་དང་། རྒུན་ཆང་བྲོ་བ་དང་རྒྱུས་པ་དང་། རུས་པ་
སྲེགས་པའི་དྲི་ལྟར་མནམ་པ་དང་། ཉ་བྲོ་བ་དང་ངན་སྐྱུགས་བྲོ་བ་སྟེ། དེ་ལྟར་དྲི་ཞིམ་པོ་དང་མནམ་པོ་གང་བྲོ་བ་རིག་ནས་ལུས་ལ་མནམས་ཏེ། ལུས་དར་རམ། མེ་ཏོག་ཀ་པ་ལ་ཤ་ལྟར་མཉེན་ཞིང་འཇམ་འམ། འོན་ཏེ་རྡོ་བཞིན་
སྲ་འམ། ཆ་བྲོན་བཞིན་དུ་གྲང་ངམ། མེ་བཞིན་དུ་ཚ་འམ། བྱེ་མ་བཞིན་དུ་རྩུབ་པར་གྱུར་ན། དེ་ནས་སྨན་པ་མཁས་པ་དེས་དེ་ལྟ་བུའི་ལྟས་རྣམ་པ་སྣ་ཚོགས་མཐོང་ནས། ནད་པ་དེ་གདོན་མི་ཟ་བར་འཆི་བར་ཤེས་
མོད་ཀྱི། འོན་ཀྱང་མི་འདི་འཆིའོ་ཞེས་པའི་ཚིག་ཆད་པ་མི་སྨྲ་སྟེ། ནད་གཡོག་ལ་འདི་སྐད་ཏུ་བདག་དེང་བྲེལ་བ་ཞིག་ཡོད་ཀྱིས་སང་འོང་ངོ་། །ཅི་དང་ཅི་འདོད་པ་མ་དགག་པར་བྱིན་ཅིག་ཅེས་སྨྲས་ནས་ཕྱིར་ཁྱིམ་དུ་སོང་
ངོ་། །དེ་ནས་ཡང་འབོད་དུ་འོངས་ན་སུན་མ་ལ་འདི་སྐད་དུ་བདག་གི་ལས་ད་དུང་མ་ཟིན་པའི་སྟེང་དུ་སྨན་ཀྱང་མ་སྦྱར་རོ་ཞེས་ཟེར་ན། མཁས་པ་ཤེས་རབ་ཅན་གྱིས་ནི་ནད་པ་དེ་གདོན་མི་ཟ་བར་འཆི་བར་རིག་གོ། །
རྒྱལ་པོ་ཆེན་པོ་བཅོམ་ལྡན་འདས་ཀྱང་དེ་དང་འདྲ་སྟེ། ལོག་སྲེད་ཅན་དག་གི་དབང་པོ་དང་རང་བཞིན་ཇི་ལྟ་བ་རབ་ཏུ་མཁྱེན་པས་དེ་ལ་ཡང་ཆོས་སྟོན་ཏོ། །དེ་ཅིའི་ཕྱིར་ཞེ་ན། གལ་ཏེ་དེ་དག་ལ་ཆོས་མ་བསྟན་
ན་བུས་པ་མ་རབས་ཐམས་ཅད་འདི་སྐད་དུ་དེ་བཞིན་གཤེགས་པ་ལ་ནི་བྱམས་པ་དང་སྙིང་རྗེ་ཆེན་པོ་མི་མངའོ། །བྱམས་པ་དང་སྙིང་རྗེ་ཆེན་པོ་མངའ་བ་ནི་ཐམས་ཅད་མཁྱེན་པ་ཞེས་བྱ་སྟེ། བྱམས་པ་དང་སྙིང་རྗེ་
མེད་ན་ཇི་ལྟར་ན་ཐམས་ཅད་མཁྱེན་པ་ཞེས་སྨྲ་བ་དེ་དག་གི་ཕྱིར་དེ་བཞིན་གཤེགས་པས་ལོག་སྲེད་ཅན་དག་ལ་ཆོས་སྟོན་ཏོ། །རྒྱལ་པོ་ཆེན་པོ་སངས་རྒྱས་བཅོམ་ལྡན་འདས་ནི་ན་བ་རྣམས་གཟིགས་ན་རྟག་ཏུ་

47-1-332b

ཆོས་ཀྱི་སྨན་བྱིན་ཏེ། ནད་པས་མི་འཐུང་གི་དེ་བཞིན་གཤེགས་པས་མ་ཉེས་སོ། །རྒྱལ་པོ་ཆེན་པོ་ལོག་སྲེད་ཅན་དག་རྣམ་པར་ཕྱེ་ན་རྣམ་པ་གཉིས་ཏེ། ད་ལྟར་གྱི་དུས་ན་དགེ་བའི་རྩ་བ་ཐོབ་པ་དང་། ཕྱི་མའི་དུས་
ན་དགེ་བའི་རྩ་བ་ཐོབ་པའོ། །དེ་བཞིན་གཤེགས་པས་ལོག་སྲེད་ཅན་གང་ད་ལྟར་གྱི་དུས་སུ་དགེ་བའི་རྩ་བ་ཐོབ་པ་མཁྱེན་པས་དེ་ལ་ཆོས་སྟོན་ཏོ། །ཕྱི་མའི་དུས་སུ་ཐོབ་པར་འགྱུར་བ་ལ་ཡང་ཆོས་སྟོན་ཏོ། །ད་ལྟར་
གྱི་དུས་སུ་ཕན་པར་མི་འགྱུར་ཡང་ཕྱི་མའི་དུས་ཀྱི་རྒྱུར་འགྱུར་བའི་ཕྱིར། དེ་བཞིན་གཤེགས་པས་ལོག་སྲེད་ཅན་ལ་ཡང་ཆོས་ཀྱི་གཞུང་སྟོན་ཏོ། །ལོག་སྲེད་ཅན་ཞེས་བྱ་བ་ལ་ཡང་རྣམ་པ་གཉིས་ཏེ། དབང་པོ་རྣོན་པོ་དང་དབང་པོ་འབྲིང་པོའོ། །དབང་
པོ་རྣོན་པོ་ནི་ད་ལྟར་གྱི་དུས་ན་དགེ་བའི་རྩ་བ་ཐོབ་པའོ། །དབང་པོ་འབྲིང་པོས་ནི་ཕྱི་མའི་དུས་སུ་འཐོབ་པར་འགྱུར་ཏེ། སངས་རྒྱས་བཅོམ་ལྡན་འདས་ནི་དོན་མེད་པར་ཆོས་མི་སྟོན་ཏོ། །རྒྱལ་པོ་ཆེན་པོ་དཔེར་
ན་མི་གཙང་མ་ཞིག་སྣམ་ཕྱི་སར་ལྷུང་ནས་གྲོགས་པོ་མཛའ་བོ་ཞིག་གིས་མཐོང་བ་དང་། སྐྲ་ལས་བཟུང་སྟེ་ཕྱིར་ཕྱུང་ངོ་། །དེ་བཞིན་དུ་སངས་རྒྱས་བཅོམ་ལྡན་འདས་ཀྱང་སེམས་ཅན་དག་ངན་སོང་གསུམ་དུ་
ལྷུང་བར་གཟིགས་ན་ཐབས་ཀྱིས་བསྐྱེད་ཅིང་དབྱུང་བར་མཛད་དོ། །དེ་བས་ན་དེ་བཞིན་གཤེགས་པས་ལོག་སྲེད་ཅན་ཐམས་ཅད་ལ་ཆོས་སྟོན་ཏོ། །རྒྱལ་པོས་འཚོ་བྱེད་ལ་སྨྲས་པ། གལ་ཏེ་དེ་བཞིན་
གཤེགས་པ་ཡང་དག་པར་དེ་ལྟ་བུ་ཡིན་པར་བདེན་ན་ལྟ། སང་ཉི་མ་བཟང་པོ་དང་སྐར་མ་བཟང་པོ་བལྟས་ཏེ་གདོད་འདོང་ངོ་། །འཚོ་བྱེད་ཀྱིས་གསོལ་པ། རྒྱལ་པོ་ཆེན་པོ་དེ་བཞིན་གཤེགས་པའི་ཆོས་ལ་ནི་
ཉི་མ་དང་སྐར་མ་བཟང་ངན་ཅེས་བྱ་བ་མེད་དོ། །རྒྱལ་པོ་ཆེན་པོ་དཔེར་ན་ནད་པ་ཚབས་པོ་ཆེ་ལ་ཡང་ཉི་མ་དང་སྐར་མ་དང་དུས་བཟང་ངན་ཅེས་བྱ་བ་ལྟ་བ་མེད་དེ། སྨན་པ་མཁས་པ་དོན་དུ་གཉེར་རོ། །

47-1-333a

རྒྱལ་པོ་ཡང་ནད་ཚབས་པོ་ཆེས་བཏབ་པ་དང་འདྲ་སྟེ། སྨན་པ་དེ་བཞིན་གཤེགས་པ་གཉེར་བ་ལ་ཉི་མ་དང་དུས་བཟང་ངན་ལྟ་བའི་མི་རིགས་སོ། །རྒྱལ་པོ་ཆེན་པོ་དཔེར་ན་ཙན་དན་གྱི་མེ་དང་། ཨེ་རན་
དའི་མེ་ནི་གཉི་ག་ཚིག་པའི་མཚན་ཉིད་ཏུ་འདྲ་སྟེ་ཐ་དད་པ་མེད་དོ། །ཉི་མ་བཟང་པོ་དང་ངན་པ་ཡང་དེ་དང་འདྲ་སྟེ། གལ་ཏེ་སངས་རྒྱས་ཀྱི་སྤྱན་སྔར་ཕྱིན་ན་སྡིག་པ་ཀུན་འབྱང་བར་འགྱུར་གྱིས། རྒྱལ་པོ་ཆེན་
པོ་དེ་རིང་ཉིད་མྱུར་དུ་གཤེགས་པར་སྨོན་ཏོ། །དེ་ནས་རྒྱལ་པོས་བློན་པོ་བཀྲ་ཤིས་ཤེས་བྱ་བ་བཀུག་ནས་འདི་སྐད་ཅེས་བཀའ་སྩལ་ཏོ། །འདི་ལྟར་རིག་པར་གྱིས་ཤིག །བདག་དེང་སངས་རྒྱས་བཅོམ་ལྡན་འདས་
ཀྱི་སྤྱན་སྔར་འགྲོ་ཡིས་མྱུར་དུ་མཆོད་པའི་ཡོ་བྱད་དང་དགོས་སོ་ཅོག་སྦྱོར་ཅིག ། བློན་པོས་གསོལ་པ། རྒྱལ་པོ་ཆེན་པོ་ལེགས་སོ་ལེགས་སོ། །ཡོ་བྱད་ཅི་བཞེད་དོ་འཚལ་ཐམས་ཅད་མཆིས་སོ། །དེ་ནས་རྒྱལ་
པོ་མ་སྐྱེས་དགྲ་བཙུན་མོ་དང་བཅས་ཏེ་ཤིང་རྟ་རབ་ཏུ་བརྒྱན་པ་ཁྲི་ཉིས་སྟོང་དང་། བལ་གླང་བཟང་ཞིང་ཆེ་བ་ལྔ་ཁྲི་ཡང་ཆས་སོ། །བལ་གླང་དེ་རེ་རེའི་སྟེང་ཡང་མི་གསུམ་གསུམ་ཞོན་ཏེ། གདུགས་དང་བ་དན་
དང་མེ་ཏོག་དང་སྤོས་དང་རོལ་མོའི་ཆ་བྱད་ཐོགས་ཏེ། མཆོད་པའི་ཡོ་བྱེད་རྣམ་པ་སྣ་ཚོགས་མ་འབྱོར་པ་མེད་དོ། །རྟ་བའི་ཚོགས་ཁྲི་ཕྲག་བཅྭ་བརྒྱད་དང་། ཡུལ་དབུས་འགྱུར་འཆང་ན་གནས་པའི་མི་ཁྲི་ཕྲག་ལྔ་བཅུ་
རྩ་བརྒྱད་སྙེད་ཀྱང་རྒྱལ་པོའི་ཞབས་འབྲིང་དུ་ཆས་སོ། །དེའི་ཚེ་རྩྭ་མཆོག་གི་གྲོང་ཁྱེར་ན་འཁོར་མང་པོ་དཔག་ཚད་བཅུ་གཉིས་ཀྱི་བར་གང་བ་ཀུན་གྱིས་རྒྱང་མ་ནས་རྒྱལ་པོ་མ་སྐྱེས་དགྲ་འཁོར་དང་བཅས་ཏེ་འོང་བ་མཐོང་ངོ་། །
དེ་ནས་བཅོམ་ལྡན་འདས་ཀྱིས་འཁོར་མང་པོ་རྣམས་ལ་བཀའ་སྩལ་པ། སེམས་ཅན་ཐམས་ཅད་ཀྱི་བླ་ན་མེད་པ་དགྲ་བཅོམ་པ་ཡང་དག་པར་རྫོགས་པའི་བྱང་ཆུབ་དང་ཉེ་བའི་རྒྱུར་གྱུར་པའི་དགེ་བའི་བཤེས་གཉེན་

47-1-333b

ལས་འདའ་བ་མེད་དོ། །དེ་ཅིའི་ཕྱིར་ཞེ་ན། རྒྱལ་པོ་མ་སྐྱེས་དགྲས་གལ་ཏེ་འཚོ་བྱེད་ཀྱི་ངག་མ་མཉན་ན། ཟླ་བ་ཕྱི་མ་ཚེས་ཞག་བདུན་ལ་གདོན་མི་ཟ་བར་ཚེའི་དུས་བྱས་ནས་མཚམས་མེད་པའི་སེམས་ཅན་དམྱལ་
བར་ལྟུང་ངོ་། །དེ་བས་ན་ཉེ་བའི་རྒྱུར་གྱུར་པ་ནི་དགེ་བའི་བཤེས་གཉེན་ལས་འདའ་བ་མེད་དོ། །རྒྱལ་པོ་མ་སྐྱེས་དགྲ་ལམ་དུ་ཞུགས་པ་ན་ཡང་འདི་སྐད་ཅེས་ཐོས་སོ། །ཡུལ་མཉན་དུ་ཡོད་པའི་རྒྱལ་པོ་བཻ་དཱུརྱ་
ཞེས་བྱ་བ་གྲུར་ཞུགས་ཏེ་རྒྱ་མཚོར་ཞུགས་པ་ཡང་མེས་ཚིག་གོ། །དགེ་སློང་ཀུ་ཀ་རི་གསོན་པོར་སར་ནུབ་སྟེ་མཚམས་མེད་པའི་སེམས་ཅན་དམྱལ་བར་ལྷུང་ངོ་། །སུ་ཏ་ཚ་ཞེས་བྱ་བ་མི་དགེ་བ་རྣམ་པ་སྣ་ཚོགས་བྱས་ནས་
སངས་རྒྱས་ཀྱི་སྤྱན་སྔར་ཕྱིན་པ་དང་། སྡིག་པ་ཐམས་ཅད་བྱང་བར་གྱུར་ཏོ་ཞེས་དེ་སྐད་དུ་སྨྲས་པ་ཐོས་ནས་འཚོ་བྱེད་ལ་སྨྲས་པ། བདག་དེང་དེ་ལྟ་བུའི་ཚིག་རྣམ་པ་གཉིས་ཐོས་མོད་ཀྱི་འོན་ཀྱང་བདེན་ནམ་མི་
བདེན་པ་ཡིད་མི་ཆེས་ཀྱིས་འཚོ་བྱེད་ཁྱོད་ཚུར་ཤོག །ཁོ་བོ་དང་བལ་གླང་གཅིག་ལ་ཞོན་པར་དགའོ། །གལ་ཏེ་ཁོ་བོ་མཚམས་མེད་པའི་སེམས་ཅན་དམྱལ་བར་ལྷུང་ན། ཁྱོད་ཀྱིས་ཁོ་བོ་ལྟུང་བར་མི་འགྱུར་
བར་ཟུང་ཤིག །དེ་ཅིའི་ཕྱིར་ཞེ་ན། བདག་སྔོན་འདི་སྐད་དུ་ལམ་ཐོབ་པའི་མི་ནི་སེམས་ཅན་དམྱལ་བར་མི་འགྲོའོ་ཞེས་ཐོས་སོ། །དེ་ནས་བཅོམ་ལྡན་འདས་ཀྱིས་འཁོར་མང་པོ་རྣམས་ལ་བཀའ་སྩལ་པ། 
རྒྱལ་པོ་མ་སྐྱེས་དགྲ་ད་དུང་ཐེ་ཚོམ་གྱི་སེམས་དང་བཅས་ཀྱིས་དེའི་སེམས་གདོན་མི་ཟ་བར་བྱའོ་ཞེས་གསུངས་སོ། །དེ་ནས་འཁོར་གྱི་དཀྱིལ་འཁོར་དེའི་ནང་ན་བྱང་ཆུབ་སེམས་དཔའ་ཐམས་ཅད་འཛིན་པ་ཞེས་བྱ་
བས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བཅོམ་ལྡན་འདས་ཀྱིས་གསུངས་པ་ལྟར་ཆོས་ཐམས་ཅད་མ་ངེས་པའི་མཚན་ཉིད་དོ། །འདི་ལྟ་སྟེ། གཟུགས་མ་ངེས་པའི་

47-1-334a

མཚན་ཉིད་ནས་མྱ་ངན་ལས་འདས་པའི་བར་དུ་ཡང་མ་ངེས་པའི་མཚན་ཉིད་དོ་ཞེས་གསུངས་ན། དེ་བཞིན་གཤེགས་པས་ད་ཅིའི་སླད་ཏུ་རྒྱལ་པོ་མ་སྐྱེས་དགྲའི་སེམས་ངེས་པར་མཛད་དོ་ཞེས་གསུངས། 
བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །ངས་དེང་ངེས་པར་རྒྱལ་པོ་མ་སྐྱེས་དགྲའི་སེམས་ངེས་པར་མཛད་དོ། །དེ་ཅིའི་ཕྱིར་ཞེ་ན། གང་རྒྱལ་པོའི་ཐེ་ཚོམ་གྱིས་སེམས་གཞིག་ཏུ་རུང་བ་ཞིག་
ཡིན་ན། ཆོས་ཐམས་ཅད་ཀྱང་ངེས་པའི་མཚན་ཉིད་མེད་པ་ཡིན་པར་རིག་པར་བྱ་སྟེ། དེའི་ཕྱིར་ངས་རྒྱལ་པོ་མ་སྐྱེས་དགྲའི་སེམས་ངེས་པར་མཛད་པ། སེམས་དེ་ཉིད་ངེས་པ་མེད་པ་ཡིན་པར་རིག་པར་བྱའོ། །
རིགས་ཀྱི་བུ་གལ་ཏེ་རྒྱལ་པོ་དེའི་སེམས་ངེས་པ་ཞིག་ཡིན་ན། རྒྱལ་པོ་དེའི་མཚམས་མེད་པའི་ཁ་ན་མ་ཐོ་བ་འཇིག་ཏུ་མི་རུང་ངོ་། །ངེས་པ་མེད་པས་ཁ་ན་མ་ཐོ་བ་དེ་འཇིག་ཏུ་རུང་ངོ་། །དེ་བས་ན་ངས་རྒྱལ་པོ་མ་སྐྱེས་
དགྲའི་སེམས་ངེས་པར་མཛད་དོ། །དེ་ནས་རྒྱལ་པོ་ཆེན་པོ་སཱ་ལའི་ཤིང་དྲུང་སངས་རྒྱས་ཀྱི་སྤྱན་སྔར་ཕྱིན་ཏེ། དེ་བཞིན་གཤེགས་པའི་མཚན་སུམ་བཅུ་རྩ་གཉིས་དང་། དཔེ་བྱེད་བཟང་པོ་བརྒྱད་བཅུ་ལ་བལྟས་
ན། གསེར་ཡང་དག་པའི་རི་བོ་དང་འདྲ་བར་མཐོང་ངོ་། །དེ་ནས་བཅོམ་ལྡན་འདས་ཀྱིས་དབྱངས་རྣམ་པ་བརྒྱད་ཕྱུང་སྟེ། རྒྱལ་པོ་ཆེན་པོ་ཞེས་བོས་པ་དང་། དེའི་ཚེ་མ་སྐྱེས་དགྲས་ཕན་ཚུན་དུ་བལྟས་ཏེ་འཁོར་
མང་པོ་འདིའི་ནང་ན་རྒྱལ་པོ་ཆེན་པོ་ཞེས་བྱ་བ་སུ་ཡིན། བདག་ནི་སྡིག་ལྕི་བའི་སྟེང་དུ་ཡོན་ཏན་མེད་པ་ཡིན་ཏེ། དེ་བཞིན་གཤེགས་པས་རྒྱལ་པོ་ཆེན་པོ་ཞེས་གསུང་བའི་མི་རིགས་སོ་སྙམས་བསམས་སོ། །དེ་ནས་
དེ་བཞིན་གཤེགས་པས་ཡང་རྒྱལ་པོ་ཆེན་པོ་མ་སྐྱེས་དགྲ་ཞེས་བོས་སོ། །དེ་ནས་རྒྱལ་པོས་ཐོས་ནས་རབ་ཏུ་དགའ་བའི་སེམས་སྐྱེས་ཏེ། འདི་སྙམ་དུ་དེ་བཞིན་གཤེགས་པས་དེང་བདག་བོས་ཏེ་གསུང་བས་ན། 

47-1-334b

དེ་བཞིན་གཤེགས་པ་ནི་སེམས་ཅན་ཐམས་ཅད་ལ་ཐུགས་བརྩེ་བའི་ཐུགས་རྗེ་ཆེན་པོ་ཐམས་ཅད་ལ་ཁྱད་པར་མེད་པར་མཉམ་མོ་སྙམ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་དེང་ཐེ་ཚོམ་
གྱི་སེམས་ལྷག་མ་ཙམ་ཡང་མ་ལུས་པར་དེ་བཞིན་གཤེགས་པ་ནི་སེམས་ཅན་ཐམས་ཅད་ཀྱི་སྟོན་པ་བླ་ན་མེད་པ་ཡང་དག་པར་ལགས་པར་ཤིན་དུ་རྟོགས་སོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བྱང་ཆུབ་སེམས་
དཔའ་ཐམས་ཅད་འཛིན་ལ་སྨྲས་པ། དེ་བཞིན་གཤེགས་པས་རྒྱལ་པོ་མ་སྐྱེས་དགྲའི་སེམས་ངེས་པར་མཛད་དོ། །དེ་ནས་རྒྱལ་པོ་མ་སྐྱེས་དགྲས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས་གལ་ཏེ་བདག་དེང་ཚངས་པ་འམ་བརྒྱ་བྱིན་ལྷའི་དབང་ཕྱུག་དང་ལྷན་ཅིག་མཆིས་ཤིང་འཚལ་མ་ལྷན་ཅིག་འཚལ་བར་གྱུར་ཀྱང་དགའ་བ་མ་ལགས་ཏེ། དེ་བཞིན་གཤེགས་པ་དང་མཇལ་ནས་གསུང་གཅིག་གིས་
སྨྲས་པས་རབ་ཏུ་དགའ་བར་གྱུར་ཏོ། །དེ་ནས་རྒྱལ་པོ་མ་སྐྱེས་དགྲས་སྔ་ནས་བཤམས་པའི་གདུགས་དང་། བ་དན་དང་མེ་ཏོག་དང་སྤོས་དང་རོལ་མོ་ལ་སོགས་པས་མཆོད་ནས། བཅོམ་ལྡན་འདས་ཀྱི་ཞབས་ལ་
ཕྱག་འཚལ་ཏེ། གཡས་ཕྱོགས་སུ་ལན་གསུམ་བསྐོར་ནས་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་རྒྱལ་པོ་མ་སྐྱེས་དགྲ་ལ་བཀའ་སྩལ་པ། རྒྱལ་པོ་ཆེན་པོ་ཁྱོད་ལ་དམ་པའི་ཆོས་ཀྱི་གཞུང་
བསྟན་གྱིས་ཤིན་དུ་ཡིད་ལ་བྱ་ཞིང་བརྟགས་པར་ཉོན་ཅིག །བུས་པ་མ་རབས་རྟག་ཏུ་སེམས་རྩེ་གཅིག་ཏུ་ལུས་ལ་རྟག་པའི་དངོས་པོ་རྣམ་པ་ཉི་ཤུ་ཡོད་དོ། །འདི་ལྟ་སྟེ། བདག་གི་ལུས་འདི་ནི་གསོ་བ་གསོག་
སྟེ། ཟག་པ་མེད་པ་མ་ཡིན་པ་དང་། དགེ་བའི་རྩ་བ་རྣམས་མེད་པ་དང་། བདག་གི་འཁོར་བ་འདི་མ་དུལ་བ་དང་། ཤིན་དུ་གཡང་སར་ལྷུང་སྟེ་ཀུན་ནས་འཇིགས་པ་དང་། ཐབས་ཇི་ལྟ་བུ་ཞིག་གིས་

47-1-335a

སངས་རྒྱས་ཀྱི་རང་བཞིན་མཐོང་བ་དང་། ཇི་ལྟར་ཏིང་ངེ་འཛིན་བསྒོམས་ན་སངས་རྒྱས་ཀྱི་རང་བཞིན་མཐོང་བ་དང་། འཁོར་བ་ནི་རྟག་ཏུ་སྡུག་བསྔལ་བ་སྟེ་རྟག་པ་དང་བདེ་བ་དང་བདག་དང་ཡོངས་སུ་དག་པ་
མེད་པ་དང་། མི་འཁོམ་པ་བརྒྱད་སྤང་དཀའ་བ་དང་། འཁོན་དུ་འགྱུར་བའི་དགྲས་ཤིན་དུ་གཙེ་བ་དང་། སྲིད་པ་ལས་ཟློག་པའི་ཆོས་གཅིག་ཙམ་ཡང་མེད་པ་དང་། ངན་སོང་གསུམ་ལས་གྲོལ་བར་མ་གྱུར་པ་དང་། 
མི་དགེ་བ་ངན་པར་ལྟ་བ་རྣམ་པ་སྣ་ཚོགས་དང་ལྡན་པ་དང་། མཚམས་མེད་པ་ལྔ་ལས་རྒལ་བའི་ཚོགས་མ་བསགས་པ་དང་། འཁོར་བ་ནི་མཐར་ཐུག་པ་མེད་དེ་མཐར་མ་ཕྱིན་ནོ་ཞེས་བྱ་བ་དང་། ལས་རྣམས་མ་བྱས་
ན་འབྲས་བུ་མི་འཐོབ་པ་དང་། བདག་བྱས་པས་འབྲས་བུ་གཞན་གྱིས་མྱོང་བར་མི་འགྱུར་བ་དང་། བདེ་བའི་རྒྱུ་མ་བྱས་ན་བདེ་བའི་འབྲས་བུ་མེད་པ་དང་། ལས་བྱས་ཀྱང་འབྲས་བུ་རྣམས་མི་སྟོར་བ་དང་། མ་རིག་
པའི་རྒྱུ་ལས་སྐྱེས་ཏེ་མ་རིག་པའི་རྒྱུས་འཆི་བ་དང་། འདས་པ་དང་མ་འོངས་པ་དང་ད་ལྟར་རྟག་ཏུ་ལེ་ལོ་སྤྱོད་པ་དང་ཉི་ཤུའོ། །རྒྱལ་པོ་ཆེན་པོ་བུས་པ་མ་རབས་སོ་སོའི་སྐྱེ་བོས་རྟག་ཏུ་ལུས་འདི་ལ་རྟོག་པ་ཉི་ཤུ་པོ་དེ་དག་གིས་
བརྟག་གོ། །དེ་ལྟར་བརྟགས་ནས་འཁོར་བ་ལ་མི་དགའ་བར་འགྱུར། འཁོར་བ་ལ་མི་དགའ་བས་ལྷག་མཐོང་དང་ཞི་གནས་ཐོབ་པར་འགྱུར་རོ། །དེ་ནས་རིམ་གྱིས་སེམས་དང་། སྐྱེ་བའི་མཚན་ཉིད་དང་། གནས་པའི་
མཚན་ཉིད་དང་། འགོག་པའི་མཚན་ཉིད་བརྟག་གོ། །རིམ་གྱིས་སེམས་དང་། སྐྱེ་བ་དང་། གནས་པ་དང་། འགོག་པའི་མཚན་ཉིད་རྟོག་པ་ལྟར་ཏིང་ངེ་འཛིན་དང་། ཤེས་རབ་དང་། བརྩོན་འགྲུས་དང་། ཚུལ་ཁྲིམས་ཀྱང་
དེ་བཞིན་ནོ། །སྐྱེ་བ་དང་། གནས་པ་དང་། འགོག་པ་རྟོགས་ནས། སེམས་ཀྱི་མཚན་ཉིད་ནས་ཚུལ་ཁྲིམས་ཀྱི་མཚན་ཉིད་ཀྱི་བར་དུ་རབ་ཏུ་ཤེས་ན་ནམས་ཀྱང་མི་དགེ་བ་མི་བྱེད་དེ་འཆི་བའི་འཇིགས་པ་དང་། ངན་སོང་

47-1-335b

གསུམ་གྱི་འཇིགས་པ་མེད་དོ། །གལ་ཏེ་སེམས་རྩེ་གཅིག་ཏུ་དངོས་པོ་རྣམ་པ་ཉི་ཤུ་པོ་དེ་དག་ལ་མ་བརྟགས་ན་ལེ་ལོ་དང་དྲེགས་པའི་སེམས་སྐྱེ་སྟེ། མི་དགེ་བ་ཐམས་ཅད་བྱེད་པར་འགྱུར་རོ། །རྒྱལ་པོ་མ་སྐྱེས་དགྲས་
གསོལ་པ། ཇི་ལྟར་བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་བ་ལྟར་ན། བདག་སྔོན་དངོས་པོ་རྣམ་པ་ཉི་ཤུ་པོ་དེ་དག་ལ་མ་བརྟགས་པས་མི་དགེ་བ་མང་པོ་བགྱིས་སོ། །མི་དགེ་བ་མང་པོ་བགྱིས་པས་
འཆི་བའི་འཇིགས་པ་དང་ངན་སོང་གསུམ་གྱི་འཇིགས་པ་མཆིས་པར་གྱུར་ཏོ། །བཅོམ་ལྡན་འདས་བདག་གིས་བདག་ལ་འཁུས་ཏེ། སྡིག་ལྕི་བ་འདི་ལྟ་བུ་བགྱིས་སོ། །ཡབ་རྒྱལ་པོ་ནོངས་པ་མ་མཆིས་པར་བཀུམ་མོ། །
དངོས་པོ་ཉི་ཤུ་པོ་དེ་དག་རྟོགས་ཀྱང་རུང་། མ་རྟོགས་ཀྱང་རུང་སྟེ། གདོན་མི་འཚལ་བར་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཆོས་
ཐམས་ཅད་ཀྱི་རང་བཞིན་དང་མཚན་ཉིད་ནི་མི་རྟག་པ་དང་མ་ངེས་པ་ཡིན་ན་ཅི་སྟེ་རྒྱལ་པོ་ཁྱོད་གདོན་མི་ཟ་བར་སེམས་ཅན་དམྱལ་བར་ལྟུང་བར་འགྱུར་ཞེས་སྨྲ། རྒྱལ་པོ་མ་སྐྱེས་དགྲས་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་གལ་ཏེ་ཆོས་ཐམས་ཅད་མ་ངེས་པའི་མཚན་ཉིད་ག་ལགས་ན། བདག་གིས་བསད་པའི་ཁ་ན་མ་ཐོ་བ་ཡང་མ་ངེས་པ་ལགས་སམ། གལ་ཏེ་བསད་པས་ངེས་པ་ཞིག་ལགས་ན་
ཆོས་ཐམས་ཅད་ཀྱང་མ་ངེས་པ་མ་ལགས་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ལེགས་སོ་ལེགས་སོ། །སངས་རྒྱས་བཅོམ་ལྡན་འདས་ཀྱིས་ཀྱང་ཆོས་ཐམས་ཅད་མ་ངེས་
པའི་མཚན་ཉིད་དོ་ཞེས་གསུངས་ལ། རྒྱལ་པོ་ཉིད་ཀྱང་བསད་པ་མ་ངེས་པར་ཤེས་ཏེ། དེ་བས་ན་བསད་པ་ནི་མ་ངེས་པའི་མཚན་ཉིད་ཡིན་པར་རིག་པར་བྱའོ། །རྒྱལ་པོ་ཆེན་པོ་ཇི་ལྟར་ཁྱོད་ཀྱིས་སྨྲས་པ་ལྟར་

47-1-336a

ཡབ་རྒྱལ་པོ་ཉེས་པ་མེད་པར་བསད་དོ་ཞེས་བྱ་བ་དེ། དེ་ལ་ཕ་ཞེས་བྱ་བ་གང་ཡིན། སེམས་ཅན་གྱི་ཕུང་པོ་ལྔ་ལ་ཕའོ་ཞེས་འདུ་ཤེས་བསྐྱེད་དེ་ཐ་སྙེད་ཏུ་བཏགས་པ་ཙམ་དུ་ཟད་ན། སྐྱེ་མཆེད་བཅུ་གཉིས་དང་། 
ཁམས་བཅྭ་བརྒྱད་ལ་ཕ་ཞེས་བྱ་བ་གང་ཡིན། གལ་ཏེ་གཟུགས་ཕ་ཡིན་ན། ཕུང་པོ་བཞི་མ་གཏོགས་སོ། །གལ་ཏེ་ཕུང་པོ་བཞི་ཕ་ཡིན་ན། གཟུགས་ཀྱང་མ་གཏོགས་སོ། །གལ་ཏེ་གཟུགས་དང་གཟུགས་མ་ཡིན་པ་
འདུས་པ་ལས་ཕར་གྱུར་པ་དེ་ནི་གནས་མ་ཡིན་ནོ། །དེ་ཅིའི་ཕྱིར་ཞེ་ན། གཟུགས་དང་གཟུགས་མ་ཡིན་པ་རང་བཞིན་གྱིས་བསྡུར་མི་རུང་བའི་ཕྱིར་རོ། །རྒྱལ་པོ་ཆེན་པོ་སེམས་ཅན་མ་རབས་ནི་གཟུགས་ཀྱི་ཕུང་པོ་ལ་ལོག་པར་
ཕར་འདུ་ཤེས་བསྐྱེད་དེ། དེ་ལྟར་གཟུགས་ཀྱི་ཕུང་པོ་དེ་ཡང་གསད་དུ་རུང་བ་མ་ཡིན་ནོ། །དེ་ཅིའི་ཕྱིར་ཞེ་ན། གཟུགས་ལ་རྣམ་པ་བཅུ་སྟེ། རྣམ་པ་བཅུ་པོ་དེ་དག་ལ་གཟུགས་གཅིག་པུ་ནི་བལྟར་རུང་། གཟུང་དུ་རུང་། 
གཅལ་དུ་རུང་། དཔག་ཏུ་རུང་། ཁྲིད་ཏུ་རུང་། བཅིང་དུ་རུང་སྟེ། དེ་ལྟར་བལྟ་བ་དང་བཅིང་དུ་ཡང་རུང་ཡང་རང་བཞིན་གྱིས་མི་གནས་སོ། །དེ་ལྟར་མི་གནས་པས་བལྟར་མེད། གཟུང་དུ་མེད། གཞལ་དུ་མེད། བཀྲིར་མེད། བཅིང་དུ་མེད་དོ། །
གཟུགས་ཀྱི་མཚན་ཉིད་དེ་ལྟར་བས་ན་ཇི་ལྟར་བསད་དུ་རུང་། གལ་ཏེ་གཟུགས་ཕ་ཡིན་ཏེ། བསད་དུ་རུང་གནོད་པར་བྱར་རུང་སྟེ་སྡིག་པ་སྨིན་པར་འགྱུར་ན། ལྷག་མ་དགུ་མ་གཏོགས་པར་འགྱུར་རོ། །ཅི་སྟེ་དགུ་མ་གཏོགས་ན་ཁ་ན་མ་
ཐོ་བའི་སྡིག་ཀྱང་མེད་དོ། །རྒྱལ་པོ་ཆེན་པོ་གཟུགས་ལ་རྣམ་པ་གསུམ་སྟེ། འདས་པ་དང་། མ་འོངས་པ་དང་། ད་ལྟར་གྱིའོ། །འདས་པ་དང་ད་ལྟར་གྱི་ནི་བསད་དུ་མི་རུང་ངོ་། །དེ་ཅིའི་ཕྱིར་ཞེ་ན། འདས་པ་ནི་སྔར་འདས་པའི་ཕྱིར་
རོ། །ད་ལྟར་གྱི་ནི་སྐད་ཅིག་སྐད་ཅིག་མར་འགོག་པའི་ཕྱིར་རོ། །མ་འོངས་པ་དགག་པའི་ཕྱིར་གསོད་པ་ཞེས་བྱ་སྟེ། དེ་ལྟར་གཟུགས་རྣམ་པ་གཅིག་ལས། ལ་ལ་ནི་བསད་དུ་རུང་། ལ་ལ་ནི་བསད་དུ་མེད་དོ། །བསད་དུ་ཡོད་པ་

47-1-336b

དང་བསད་དུ་མེད་པས་ན་གཟུགས་ལ་ངེས་པ་མེད་དོ། །དེ་ལྟར་ན་གཟུགས་ལ་ངེས་པ་མེད་པས་གསོད་པ་ཡང་ངེས་པ་མེད་དོ། །གསོད་པ་ལ་ངེས་པ་མེད་པས་རྣམ་པར་སྨིན་པ་ལ་ཡང་ངེས་པ་མེད་ན། ཅི་སྟེ་གདོན་མི་ཟ་བར་
སེམས་ཅན་དམྱལ་བར་ལྟུང་ཞེས་སྨྲ། རྒྱལ་པོ་ཆེན་པོ་སེམས་ཅན་ཐམས་ཅད་སྡིག་པའི་ལས་བྱེད་དོ་ཅོག་ལ་རྣམ་པ་གཉིས་ཏེ། ཡང་བ་དང་། ལྕི་བའོ། །དེ་ལ་ཡིད་དང་ངག་གིས་བྱས་པ་ནི་ཡང་བའོ། །ལུས་དང་ངག་དང་
ཡིད་ཀྱིས་བྱས་པ་ནི་ལྕི་བའོ། །རྒྱལ་པོ་ཆེན་པོ་སེམས་ཀྱིས་བསམས། ངག་གིས་བརྗོད་དེ་ལུས་ཀྱིས་མ་བྱས་ན་བྱས་སོ་ཅོག་གི་རྣམ་པར་སྨིན་པ་ཡང་བའོ། །རྒྱལ་པོ་ཆེན་པོས་སྔོན་སོད་ཅིག་ཅེས་ནི་མ་བསྒོའི། རྐང་པ་
ཆོད་ཅིག་ཅེས་བསྒོ་ལ། རྒྱལ་པོ་ཆེན་པོས་གལ་ཏེ་འགྲེང་སྟེ། བློན་པོ་ལ། རྒྱལ་པོའི་མགོ་ཆོད་ཅིག་ཅེས་བསྒོ་བ་ལ་འདུག་པའི་ཚེ་གདོད་བཅད་ན་འོན་ཀྱང་སྡིག་པར་མི་འགྱུར་ན། རྒྱལ་པོས་མ་བསྒོ་བར་སྡིག་པར་འགྱུར་བ་ལྟ་ཅི་
སྨོས། གལ་ཏེ་རྒྱལ་པོས་སྡིག་ཐོབ་ན་སངས་རྒྱས་བཅོམ་ལྡན་འདས་གྱང་སྡིག་འཐོབ་བོ། །དེ་ཅིའི་ཕྱིར་ཞེ་ན། ཁྱོད་ཀྱི་ཕ་རྒྱལ་པོ་གཟུགས་ཅན་སྙིང་པོ་རྟག་ཏུ་སངས་རྒྱས་ལ་དགེ་བའི་རྩ་བ་བསྐྲུན་ཏེ་དེའི་ཕྱིར་རྒྱལ་པོའི་ཐབས་
ཐོབ་བོ། །གལ་ཏེ་སངས་རྒྱས་བཅོམ་ལྡན་འདས་ཀྱིས་མཆོད་པ་མ་བཞེས་ན་རྒྱལ་པོར་མི་འགྱུར་རོ། །གལ་ཏེ་རྒྱལ་པོར་མ་གྱུར་ན་ཁྱོད་གྱིས་ཡུལ་སྲིད་ཀྱི་ཕྱིར་རྒྱལ་པོ་བསད་དུ་མེད་དོ། །ཅི་སྟེ་ཁྱོད་ཀྱིས་ཕ་བསད་པས་སྡིག་
པར་འགྱུར་བ་ཞིག་ཡིན་ན། ང་ལ་སོགས་པ་སངས་རྒྱས་བཅོམ་ལྡན་འདས་རྣམས་ཀྱང་སྡིག་པ་ཐོབ་པའི་རིགས་སོ། །གལ་ཏེ་སངས་རྒྱས་བཅོམ་ལྡན་འདས་རྣམས་ལ་སྡིག་པར་མི་འགྱུར་ན། ཁྱོད་གཅིག་པུ་ཅི་སྟེ་
སྡིག་པ་ཐོབ་པར་འགྱུར། རྒྱལ་པོ་ཆེན་པོ་རྒྱལ་པོ་གཟུགས་ཅན་སྙིང་པོ་སྔོན་བྱི་བོ་ལའི་རི་ལ་རྒྱུ་ཞིང་རི་དགས་ཤོར་དུ་ཆས་པ་ལས་དབྱེ་དགོན་པ་ཀུན་དུ་བྱུགས་ན་ཅི་ཡང་མ་རྙེད་དེ། དྲང་སྲོང་མངོན་པར་ཤེས་པ་ལྔ་དང་ལྡན་པ་

47-1-337a

གཅིག་གཅིག་མཐོང་ངོ་། །མཐོང་ནས་ཞེ་སྡང་གི་སེམས་སྐྱེས་ཏེ། དེང་རི་དགས་ཤོར་བ་ལས་ཅི་ཡང་མ་རྙེད་པ་ནི་མི་འདིའི་ཕྱིར་རོ་སྙམ་ནས་རི་ལས་དེད་དེ་གཡོག་རྣམས་ལ་སོད་ཅིག་ཅེས་བསྒོའོ། །དྲང་སྲོང་
མངོན་པ་དེའི་ཚེའི་དུས་བྱེད་པ་ན་ཁྲོ་བའི་སེམས་སྐྱེས་པས་རྫུ་འཕྲུལ་སྟོར་ཏེ། ཡི་དམ་འདི་སྐད་དུ་ང་ཉེས་པ་མེད་པར་ཁྱོད་ཀྱིས་ཡིད་དང་ངག་གིས་ནན་གྱིས་བསད་པ་ལྟར། མ་འོངས་པའི་དུས་ན་ངས་ཀྱང་ཡིད་དང་ངག་གིས་
ཁྱོད་སད་དོ་ཞེས་དམ་བཅས་སོ། །དེའི་ཚེ་རྒྱལ་པོས་ཐོས་ནས་འགྱོད་པའི་སེམས་སྐྱེས་ཏེ་རོ་ལ་མཆོད་པ་བྱས་སོ། །རྒྱལ་པོ་དེ་དེ་ལྟར་བྱས་པས་ཉེས་པ་ཡང་ཡང་བར་གྱུར་ཏེ་སེམས་ཅན་དམྱལ་བར་མ་ལྟུང་ན། རྒྱལ་པོས་
ནི་དེ་ལྟར་མ་བྱས་པར་སེམས་ཅན་དམྱལ་བའི་འབྲས་བུ་སྨིན་པ་ལྟ་ཅི་སྨོས། སྔོན་རྒྱལ་པོ་གཟུགས་ཅན་སྙིང་པོ་བདག་གིས་བྱས་པས་བདག་མྱོང་བ་ཡིན་ན། ཅི་སྟེ་རྒྱལ་པོས་གསོད་པའི་སྡིག་འཐོབ་པར་འགྱུར། 
ཇི་ལྟར་རྒྱལ་པོས་ཕ་རྒྱལ་པོ་ཉེས་པ་མེད་དོ་ཞེས་བྱ་བ་དེ་ཇི་ལྟར་ན་ཉེས་པ་མེད་ཅེས་བྱར་རུང་། གང་སྡིག་པ་དང་བཅས་པ་ནི་སྡིག་པའི་འབྲས་བུ་རྣམ་པར་སྨིན་ནོ། །གང་དགེ་བའི་ལས་བྱེད་པ་ནི་སྡིག་པའི་ལས་རྣམ་པར་སྨིན་པ་
ཡང་མེད་དོ། །ཁྱོད་ཀྱི་ཕ་རྒྱལ་པོ་གལ་ཏེ་སྡིག་པ་མེད་པ་ཞིག་ན་ཅི་སྟེ་ལས་རྣམ་པར་སྨིན་པར་འགྱུར། གཟུགས་ཅན་སྙིང་པོ་ད་ལྟར་གྱི་དུས་སུ་དགེ་བའི་འབྲས་བུ་ཐོབ་ལ། མི་དགེ་བའི་འབྲས་བུ་ཡང་ཐོབ་སྟེ། 
དེའི་ཕྱིར་རྒྱལ་པོ་སྔ་མ་ནི་མ་ངེས་པའོ། །དེ་ལྟར་མ་ངེས་པས་ན་བསད་པ་ཡང་མ་ངེས་སོ། །བསད་པ་མ་ངེས་པ་ཡིན་ན་ཅི་སྟེ་ངེས་པར་སེམས་ཅན་དམྱལ་བར་ལྟུང་ངོ་ཞེས་སྨྲ། སེམས་ཅན་རྣམས་ནི་མྱོས་པ་དང་བསླད་
པ་ལ་རྣམ་པ་བཞི་སྟེ། འདོད་པས་མྱོས་པ་དང་། སྨན་ཀྱིས་མྱོས་པ་དང་། སྔགས་ཀྱིས་མྱོས་པ་དང་། སྔོན་གྱི་ལས་ཀྱི་རྐྱེན་ཀྱིས་མྱོས་པའོ། །རྒྱལ་པོ་ཆེན་པོ་ངའི་ཉེ་གནས་ཀྱི་ནང་ན་ཡང་མྱོས་པ་བཞི་པོ་དང་བཅས་པ་ཡོད་དེ་

47-1-337b

མི་དགེ་བ་མང་དུ་བྱས་ཀྱང་དེ་ཚུལ་ཁྲིམས་བཤིག་པ་ཡིན་ནོ་ཞེས་ལུང་མི་སྟོན་ཏོ། །དེ་དག་གིས་ཅི་བྱས་ཀྱང་ངན་སོང་གསུམ་དུ་མི་འགྲོ་ལ། གལ་ཏེ་ཕྱིར་དྲན་པར་གྱུར་ན་ཚུལ་ཁྲིམས་ཉམས་པ་ཞེས་མི་བྱའོ། །རྒྱལ་པོ་
ཡང་སྲིད་དང་ཡུལ་འདོད་པའི་ཕྱིར་རྒྱལ་པོ་ཕ་བསད་པ་ནི་འདོད་པས་མྱོས་པའི་སེམས་ཀྱིས་བྱས་པ་ཡིན་ན་ཅི་སྟེ་སྡིག་པར་འགྱུར། རྒྱལ་པོ་ཆེན་པོ་དཔེར་ན་མི་ཞིག་ཆང་གིས་མྱོས་ནས་མ་བསད་དོ། །སངས་པར་གྱུར་པ་དང་
རབ་ཏུ་འགྱོད་པའི་སེམས་སྐྱེས་ན་ལས་དེ་ནི་རྣམ་པར་སྨིན་པ་མ་ཡིན་པར་རིག་པར་བྱའོ། །རྒྱལ་པོ་ཡང་འདོད་པས་མྱོས་པའི་ཕྱིར་བྱས་ཀྱི། དྲན་བཞིན་དུ་བྱས་པ་ནི་མ་ཡིན་ནོ། །དེ་ལྟར་དྲན་བཞིན་དུ་བྱས་པ་མ་ཡིན་ན་ཅི་སྟེ་
ཁ་ན་མ་ཐོ་བའི་སྡིག་འཐོབ་པར་འགྱུར། རྒྱལ་པོ་ཆེན་པོ་དཔེར་ན་སྒྱུ་མ་མཁན་གྱིས་ལམ་གྱི་བཞི་མདོར་སྒྱུ་མའི་སྐྱེས་པ་དང་། བུད་མེད་དང་། བལ་གླང་དང་། རྟ་དང་། སེ་མོ་དོ་དང་། གོས་ལ་སོགས་པ་རྣམ་པ་སྣ་ཚོགས་བྱས་པ་ལ་
བུས་པ་གླེན་པ་གཏི་མུག་ཅན་གྱིས་ཡང་དག་པ་བདེན་པ་ཡིན་པར་འཛིན་ཏོ། །མཁས་པ་ཤེས་རབ་ཅན་གྱིས་ནི་ཡང་དག་པའི་བདེན་པ་མ་ཡིན་པར་རིག་སྟེ། དེ་བཞིན་དུ་གསོད་པ་ཡང་དེ་དང་འདྲ་སྟེ། བུས་པ་མ་རབས་སོ་སོའི་
སྐྱེ་བོ་དག་ནི་ཡང་དག་པར་ཡོད་པར་འཛིན། སངས་རྒྱས་བཅོམ་ལྡན་འདས་ཀྱིས་ནི་ཡང་དག་པ་མ་ཡིན་པར་རིག་གོ། །རྒྱལ་པོ་ཆེན་པོ་དཔེར་ན་བྲག་ཆ་ལ་གཏི་མུག་ཅན་གྱིས་སྒྲ་ཡང་དག་པར་འཛིན་ཏོ། །མཁས་པ་ཤེས་རབ་
ཅན་གྱིས་ནི་ཡང་དག་པར་མ་ཡིན་པར་རིག་སྟེ། གསོད་པ་ཡང་དེ་དང་འདྲ་བར་བུས་པ་མ་རབས་སོ་སོའི་སྐྱེ་བོ་ཡང་དག་པར་འཛིན། སངས་རྒྱས་བཅོམ་ལྡན་འདས་ཀྱིས་ནི་ཡང་དག་པ་མ་ཡིན་པར་རིག་གོ། །རྒྱལ་པོ་ཆེན་པོ་དཔེར་ན་
དགྲ་ཞིག་སྒྱུས་ཉེ་བར་འོང་བ་ལ། གཏི་མུག་ཅན་གྱིས་ནི་ཡང་དག་པར་ཉེ་བར་འཛིན་ཏོ། །མཁས་པ་ཤེས་རབ་ཅན་གྱིས་ནི་སྒྱུ་ཡིན་པར་ཤེས་སོ། །གསོད་པ་ཡང་དེ་དང་འདྲ་སྟེ། བུས་པ་སོ་སོ་སྐྱེ་བོས་ནི་ཡང་དག་པར་འཛིན། སངས་

47-1-338a

རྒྱས་བཅོམ་ལྡན་འདས་ཀྱིས་ནི་ཡང་དག་པ་མ་ཡིན་པར་རིག་གོ། །རྒྱལ་པོ་ཆེན་པོ་ཇི་ལྟར་མེ་ལོང་ལས་བདག་གི་ངོ་སྣང་བ་ལ་གཏི་མུག་ཅན་གྱིས་ཡང་དག་པར་ངོ་ཡིན་པར་འཛིན་ཏོ། །མཁས་པ་ཤེས་རབ་ཅན་གྱིས་ནི་རབ་ཏུ་
རྟོགས་པས་ཡང་དག་པ་མ་ཡིན་པར་རིག་གོ། །གསོད་པ་ཡང་དེ་དང་འདྲ་སྟེ། བུས་པ་མ་རབས་སོ་སོའི་སྐྱེས་བོས་ནི་ཡང་དག་པར་འཛིན། སངས་རྒྱས་བཅོམ་ལྡན་འདས་ཀྱིས་ནི་ཡང་དག་པ་མ་ཡིན་པར་རིག་གོ། །རྒྱལ་པོ་ཆེན་
པོ་དཔེར་ན་སྨིག་རྒྱུ་ལ་གཏི་མུག་ཅན་གྱིས་ནི་ཆུ་ཡིན་པར་འཛིན་ཏོ། །མཁས་པ་ཤེས་རབ་ཅན་གྱིས་རབ་ཏུ་རྟོགས་ཏེ་ཆུ་མ་ཡིན་པར་ཤེས་སོ། །གསོད་པ་ཡང་དེ་དང་འདྲ་སྟེ། བུས་པ་མ་རབས་སོ་སོ་སྐྱེ་བོས་ནི་ཡང་དག་པར་འཛིན། 
སངས་རྒྱས་བཅོམ་ལྡན་འདས་ཀྱིས་ནི་ཡང་དག་པ་མ་ཡིན་པར་རིག་གོ། །རྒྱལ་པོ་ཆེན་པོ་དཔེར་ན་དྲི་ཟའི་གྲོང་ཁྱེར་ལ་གླེན་པ་གཏི་མུག་ཅན་གྱིས་ནི་ཡང་དག་པར་འཛིན་ཏོ། །མཁས་པ་ཤེས་རབ་ཅན་གྱིས་ནི་རབ་ཏུ་རྟོགས་ཏེ་ཡང་
དག་པ་མ་ཡིན་པར་ཤེས་སོ། །གསོད་པ་ཡང་དེ་དང་འདྲ་སྟེ། བུས་པ་མ་རབས་སོ་སོ་སྐྱེ་བོས་ནི་ཡང་དག་པར་འཛིན། སངས་རྒྱས་བཅོམ་ལྡན་འདས་ཀྱིས་ནི་ཡང་དག་པ་མ་ཡིན་པར་རིག་གོ། །རྒྱལ་པོ་ཆེན་པོ་དཔེར་ན་རྨི་
ལམ་གྱི་ནང་ན་འདོད་པ་ལྔའི་དགའ་བ་མྱོང་བ་ལ་གཏི་མུག་ཅན་གྱིས་ནི་ཡང་དག་པར་འཛིན་ཏོ། །མཁས་པ་ཤེས་རབ་ཅན་གྱིས་རབ་ཏུ་རྟོགས་ཏེ་ཡང་དག་པ་མ་ཡིན་པར་ཤེས་སོ། །གསོད་པ་ཡང་དེ་དང་འདྲ་སྟེ། བུས་པ་མ་རབས་
ནི་ཡང་དག་པར་འཛིན། སངས་རྒྱས་བཅོམ་ལྡན་འདས་ཀྱིས་ནི་ཡང་དག་པ་མ་ཡིན་པར་རིག་གོ། །རྒྱལ་པོ་ཆེན་པོ་གསོད་པའི་ཆོས་དང་། གསོད་པའི་ལས་དང་། གསོད་པ་དང་། གསོད་པའི་འབྲས་བུ་དང་། རྣམ་པར་གྲོལ་
བའི་བར་དུ་ཁ་ན་མ་ཐོ་བའི་ལས་མེད་པར་ངས་གསལ་བར་རྟོགས་སོ། །རྒྱལ་པོ་ཆེན་པོས་གསོད་པ་ཤེས་པ་ཙམ་གྱིས་ཅིའི་ཕྱིར་སྡིག་པར་འགྱུར། རྒྱལ་པོ་ཆེན་པོ་དཔེར་ན་མི་ཞིག་ཆང་བག་མེད་པ་དེ་ཅི་སྟེ་མ་འཐུངས་ན་མྱོས་པར་མི་

47-1-338b

འགྱུར་རོ། །དེ་བཞིན་དུ་མེ་ལ་དབང་བ་ཡང་ཚིག་པར་མི་འགྱུར་བ་ལྟར། རྒྱལ་པོ་ཡང་དེ་དང་འདྲ་སྟེ། གསོད་པར་ཤེས་པ་ཙམ་གྱིས་ན་ཅིའི་ཕྱིར་སྡིག་པར་འགྱུར། རྒྱལ་པོ་ཆེན་པོ་སེམས་ཅན་ཁ་ཅིག་ཉི་མ་ཤར་བ་ན་ཁ་ན་མ་ཐོ་བའི་སྡིག་
རྣམ་པ་སྣ་ཚོགས་བྱེད་པ་དང་། ཟླ་བ་ཤར་བ་ན་ཆོམ་པོ་དང་རྐུན་ཤོད་བྱེད་དོ། །ཉི་མ་དང་ཟླ་བ་མ་ཤར་ན་སྡིག་པ་མི་བྱེད་དེ། དེ་ལྟར་ཉི་མ་དང་ཟླ་བའི་རྐྱེན་གྱིས་སྡིག་པ་བྱེད་ཀྱང་ཟླ་བ་དང་ཉི་མ་དེ་ལ་ཡང་དག་པར་ན་སྡིག་པ་མེད་དོ། །
གསོད་པ་ཡང་དེ་དང་འདྲ་སྟེ། རྒྱལ་པོའི་རྐྱེན་ཀྱིས་དེ་ལྟར་གྱུར་ཀྱང་རྒྱལ་པོ་ལ་ནི་ཡང་དག་པར་སྡིག་པ་མེད་དོ། རྒྱལ་པོ་ཆེན་པོ་ཇི་ལྟར་མི་དང་བྱོལ་སོང་ལ་རིམ་པའི་ཁྱད་པར་ཡོད་ཀྱང་སྲོག་ལ་ཆགས་པ་དང་ཕངས་པ་ལ་ནི་གཉིས་ཀ་ཐ་
དད་པ་མེད་ན། ཅི་སྟེ་འུག་ལ་ནི་སེམས་བག་ཡངས་སུ་འཇིགས་པ་མེད་ལ། ཕ་རྒྱལ་པོ་ལ་ནི་རབ་ཏུ་མི་དགེ་བའི་མྱ་ངན་སྐྱེད། རྒྱལ་པོ་ཆེན་པོ་འཇིག་རྟེན་པ་ནི་འདོད་པའི་ཁོལ་པོར་གྱུར་ཏེ། དབང་མེད་པར་གྱུར་ཏོ། །འདོད་པས་
བཀོལ་བའི་ཕྱིར་གསོད་པའི་ལས་བྱེད་དོ། །གལ་ཏེ་དེ་ལ་འབྲས་བུ་རྣམ་པར་སྨིན་པ་ཡོད་ན་འདོད་པ་ལ་སྡིག་པར་འགྱུར་ཏེ། རྒྱལ་པོ་དབང་མེད་པས་ཅིའི་ཕྱིར་ཉེས་པར་འགྱུར། རྒྱལ་པོ་ཆེན་པོ་དཔེར་ན་ཡོངས་སུ་མྱ་ངན་
ལས་འདས་པ་ནི་ཡོད་པ་ཡང་མ་ཡིན། མེད་པ་ཡང་མ་ཡིན་ཏེ། ཡོད་པ་ཡང་ཡིན་ནོ། །གསོད་པ་ཡང་དེ་དང་འདྲ་སྟེ། ཡོད་པ་ཡང་མ་ཡིན་མེད་པ་ཡང་མ་ཡིན་མོད་ཀྱི། ཡོད་པར་ཡང་འགྱུར་རོ། །ཁྲེལ་བ་དང་འཛེམ་པ་ཡོད་པ་
ལ་ནི་ཡོད་པ་མ་ཡིན། ཁྲེལ་བ་དང་འཛེམ་པ་མེད་པ་ལ་ནི་མེད་པ་ཡང་མ་ཡིན་ནོ། །འབྲས་བུ་རྣམ་པར་སྨིན་པ་མྱོང་བ་ནི་ཡོད་པ་ཞེས་བྱའོ། །སྟོང་པར་ལྟ་བ་ལ་ནི་ཡོད་པ་མ་ཡིན་ཡོད་པར་ལྟ་བ་ལ་ནི་མེད་པ་མ་ཡིན། ཡོད་པར་
ལྟ་བ་ལ་ནི་ཡོད་པ་ཞེས་བྱའོ། །དེ་ཅིའི་ཕྱིར་ཞེ་ན། ཡོད་པར་ལྟ་བ་དང་བཅས་པ་ནི་འབྲས་བུ་རྣམ་པར་སྨིན་པ་ཡང་ཡོད་དོ། །ཡོད་པར་ལྟ་བ་མེད་པ་ལ་ནི་འབྲས་བུ་རྣམ་པར་སྨིན་པ་མེད་དོ། །རྟག་པར་ལྟ་བ་ལ་

47-1-339a

ནི་ཡོད་པ་མ་ཡིན་མི་རྟག་པར་ལྟ་བ་ལ་ནི་མེད་པ་མ་ཡིན། རྟག་པ་རྟག་པར་ལྟ་བ་ལ་ནི་མེད་པ་མ་ཡིན་ནོ། །དེ་ཅིའི་ཕྱིར་ཞེ་ན། རྟག་པ་རྟག་པར་ལྟ་བ་ལ་ནི་མི་དགེ་བའི་ལས་ཀྱི་འབྲས་བུ་ཡོད་དེ་དེའི་ཕྱིར་
རྟག་པ་རྟག་པར་ལྟ་བ་ལ་མེད་པ་ཞེས་བྱར་མི་རུང་སྟེ། དེ་བས་ཡོད་པ་ཡང་མ་ཡིན་མེད་པ་ཡང་མ་ཡིན་མོད་ཀྱི། ཡོད་པ་ཡང་ཡིན་ནོ། །རྒྱལ་པོ་ཆེན་པོ་སེམས་ཅན་ཞེས་བྱ་བ་ནི་ཕྱི་ནང་གི་དབུགས་རྒྱུ་བའོ། །དབུགས་རྒྱུ་
བ་གཅོད་པ་ནི་གསོད་པ་ཞེས་བྱ་སྟེ། དེ་བཞིན་གཤེགས་པ་རྣམས་ཀྱང་འཇིག་རྟེན་པའི་རྗེས་སུ་གསོད་པ་ཞེས་ཀྱང་གསུངས་སོ། །རྒྱལ་པོ་ཆེན་པོ་གཟུགས་ནི་མི་རྟག་པ་སྟེ། གཟུགས་ཀྱི་རྟེན་ཅིང་འབྲེལ་ཏེ་འབྱུང་བ་
ཡང་མི་རྟག་གོ། །མི་རྟག་པའི་རྒྱུ་ལས་སྐྱེས་ན་གཟུགས་ཅི་སྟེ་རྟག །རྣམ་པར་ཤེས་པ་མི་རྟག་པ་ནས་རྣམ་པར་ཤེས་པའི་རྟེན་ཅིང་འབྲེལ་ཏེ་འབྱུང་བའི་བར་དུ་ཡང་མི་རྟག་པ་སྟེ། དེ་ལྟར་མི་རྟག་པའི་རྒྱུ་ལས་སྐྱེས་ན་
རྣམ་པར་ཤེས་པ་ཅི་སྟེ་རྟག །དེ་ལྟར་མི་རྟག་པའི་ཕྱིར་སྡུག་བསྔལ་ལོ། །སྡུག་བསྔལ་བའི་ཕྱིར་སྟོང་པའོ། །སྟོང་པའི་ཕྱིར་བདག་མེད་པའོ། །གལ་ཏེ་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་ཡིན་
ན་ཅི་ཞིག་གིས་ཅི་གསོད་པར་འགྱུར་མི་རྟག་པ་བསད་ན་རྟག་པའི་མྱ་ངན་ལས་འདས་པ་ཐོབ་ལ། སྡུག་བསྔལ་བསད་ན་བདེ་བ་འཐོབ། སྟོང་པ་བསད་ན་བདེན་པ་འཐོབ། བདག་མེད་པ་བསད་ན་ཡང་དག་པའི་བདག་འཐོབ་བོ། །
རྒྱལ་པོ་ཆེན་པོ་གང་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་གསོད་པ་ནི་ང་དང་འདྲའོ། །ང་ཡང་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་བསད་དེ་སེམས་ཅན་དམྱལ་བར་མ་སོང་ན་ཁྱོད་ཅི་སྟེ་འགྲོ། 
དེ་ནས་རྒྱལ་པོ་མ་སྐྱེས་དགྲས་ཇི་ལྟར་བཅོམ་ལྡན་འདས་ཀྱིས་གསུངས་པ་ལྟར་གཟུགས་བརྟག་པ་ནས་རྣམ་པར་ཤེས་པའི་བར་དུ་བརྟགས་ཏེ། དེ་ལྟར་རྟོགས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་

47-1-339b

འདས་བདག་གིས་གཟོད་གཟུགས་མི་རྟག་པ་ནས། རྣམ་པར་ཤེས་པའི་བར་དུ་མི་རྟག་པ་ལགས་པར་འཚལ་ཏོ། །བདག་གིས་གལ་ཏེ་སྔར་དེ་ལྟར་འཚལ་ན་ཁ་ན་མ་ཐོ་བའི་སྡིག་མི་བགྱིད་དོ། །བཅོམ་ལྡན་འདས་བདག་
སྔོན་འདི་སྐད་ཅེས་སངས་རྒྱས་བཅོམ་ལྡན་འདས་རྣམས་ནི་རྟག་ཏུ་སེམས་ཅན་གྱི་ཕ་མ་མཛད་དོ་ཞེས་ཐོས་ཏེ། དེ་སྐད་ཐོས་ཀྱང་ངེས་པར་མ་རྟོགས་ཏེ། དེང་གཟོད་ངེས་པར་རྟོགས་སོ། །བཅོམ་ལྡན་འདས་བདག་གིས་
ཡང་འདི་སྐད་ཅེས་ཐོས་ཏེ། རི་རབ་རིའི་རྒྱལ་པོ་ནི་རིན་པོ་ཆེ་སྣ་བཞི་ལས་བྱས་ཏེ། འདི་ལྟར་གསེར་དང་དངུལ་དང་བཻ་དཱུརྱ་དང་ཤེལ་ལོ། །གལ་ཏེ་ཕྱོགས་གང་དུ་བྱ་མང་པོ་འདུས་པ་དེ་དག་ཁ་དོག་དེ་དང་འདྲ་བར་འགྱུར་རོ། །
ཞེས་ཐོས་ཀྱང་ངེས་པར་མ་རྟོགས་ཏེ། བདག་དེང་དེ་བཞིན་གཤེགས་པའི་རི་རབ་ཀྱི་དྲུང་དུ་ཕྱིན་ནས་ཁ་དོག་མཚུངས་པར་གྱུར་ཏོ། །དེ་ལ་ཁ་དོག་མཚུངས་པ་ཞེས་བྱ་བ་ནི་ཆོས་ཐམས་ཅད་མི་རྟག་པ་སྡུག་བསྔལ་བ་
སྟོང་པ་བདག་མེད་པར་ཤེས་པར་མཚུངས་སོ། །བཅོམ་ལྡན་འདས་བདག་གིས་ནི་འཇིག་རྟེན་ན། ཨེ་རན་དའི་འབྲས་བུ་ལས་ཨེ་རན་དའི་སྡོང་པོ་སྐྱེ་བར་མཐོང་གི། ཨེ་རན་དའི་འབྲས་བུ་ལས་ཙན་དན་
གྱི་སྡོང་པོ་སྐྱེ་བར་མ་མཐོང་སྟེ། བདག་གིས་དེང་གཟོད་ཨེ་རན་དའི་འབྲས་བུ་ལས་ཙན་དན་གྱི་སྡོང་པོ་སྐྱེས་པ་མཐོང་ངོ་། །དེ་ལ་ཨེ་རན་དའི་འབྲས་བུ་ནི་བདག་གི་ལུས་སོ། །ཙན་དན་གྱི་
སྡོང་པོ་ནི་བདག་གི་སེམས་དད་པའི་རྩ་བ་མ་མཆིས་པའོ། །རྩ་བ་མ་མཆིས་པ་ཞེས་བགྱི་བ་ནི་བདག་སྔོན་དེ་བཞིན་གཤེགས་པ་ལ་བཀུར་སྟི་བགྱི་བར་མི་འཚལ། ཆོས་དང་དགེ་འདུན་ལ་མ་དད་སྟེ། དེ་ནི་རྩ་བ་
མ་མཆིས་པ་ཞེས་བགྱིའོ། །བཅོམ་ལྡན་འདས་བདག་གལ་ཏེ་སངས་རྒྱས་བཅོམ་ལྡན་འདས་དང་མ་ཕྲད་ན་བསྐལ་པ་ཚད་མེད་གྲངས་མེད་པའི་བར་དུ་སེམས་ཅན་དམྱལ་བ་ཆེན་པོར་སྡུག་བསྔལ་ཚད་མེད་པ་སྙེད་མྱོང་བར་འགྱུར་རོ། །བདག་གིས་དིང་

47-1-340a

སངས་རྒྱས་མཐོང་བར་གྱུར་ཏེ། སངས་རྒྱས་མཐོང་བའི་བསོད་ནམས་ཇི་སྙེད་ཐོབ་པ་དེས། སེམས་ཅན་གྱི་ཉོན་མོངས་པ་མི་དགེ་བའི་སེམས་ཐམས་ཅད་ཆོམས་པར་གྱུར་ཅིག ། བཅོམ་ལྡན་འདས་ཀྱིས་བཀའ་
སྩལ་པ། རྒྱལ་པོ་ཆེན་པོ་ལེགས་སོ་ལེགས་སོ། །ངས་དེང་ཁྱོད་གདོན་མི་ཟ་བར་སེམས་ཅན་གྱི་མི་དགེ་བའི་སེམས་ཆོམས་པར་མཁྱེན་ཏོ། །གསོལ་པ། བཅོམ་ལྡན་འདས་གལ་ཏེ་བདག་དེ་ལྟར་བརྟགས་པར་སེམས་ཅན་གྱི་
མི་དགེ་བའི་སེམས་རྣམས་ཆོམས་པར་འགྱུར་ན་ལྟ། གལ་ཏེ་བདག་རྟག་ཏུ་སེམས་ཅན་དམྱལ་བར་མཆིས་ཏེ། སེམས་ཅན་རྣམས་ཀྱི་ཕྱིར་བསྐལ་པ་ཚད་མེད་པའི་བར་དུ་སྡུག་བསྔལ་ཆེན་པོ་ལེན་ཡང་སྡུག་བསྔལ་བར་མི་
འཛིན་ཏོ། །དེ་ནས་དེའི་ཚེ་ཡུལ་དབུས་འགྱུར་འཆང་གི་མི་ཚད་མེད་པ་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་ལྟར་ཚད་མེད་པ་དེ་དག་གི་སེམས་རབ་ཏུ་བསྐྱེད་པའི་ཕྱིར་རྒྱལ་པོ་མ་
སྐྱེས་དགྲའི་སྡིག་ལྕི་བ་ཡང་བར་གྱུར་ནས་རྒྱལ་པོ་དང་། བཙུན་མོ་དང་། སླས་ལ་སོགས་པ་ཀུན་གྱིས་ཅིག་ཅར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་རྒྱལ་པོ་མ་སྐྱེས་དགྲས་འཚོ་
བྱེད་ལ་སྨྲས་པ། འཚོ་བྱེད་བདག་མ་ཤི་བར་ལྷའི་ལུས་ཐོབ་སྟེ། ཚེ་ཐུང་བ་སྤངས་ནས་ཚེ་རིང་བར་གྱུར། མི་རྟག་པའི་ལུས་སྤངས་ནས་རྟག་པའི་ལུས་ཐོབ་བོ། །དེ་ནི་སེམས་ཅན་རྣམས་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཀྱི་སེམས་བསྐྱེད་པར་བྱེད་པ་སྟེ། ད་ནི་ལྷའི་ལུས་ཚེ་རིང་བ་རྟག་པ་ཡིན། སངས་རྒྱས་ཐམས་ཅད་ཀྱི་ཉེ་གནས་ཡིན་ནོ། །དེ་སྐད་ཅེས་སྨྲས་ནས་རིན་པོ་ཆེ་རྣམ་པ་སྣ་ཚོགས་ཀྱི་རྒྱལ་མཚན་དང་། བ་དན་དང་། གདུགས་
དང་། སྤོས་དང་། མེ་ཏོག་དང་། ཕྲེང་བ་དང་། རོལ་མོ་དམ་པས་བཅོམ་ལྡན་འདས་ལ་མཆོད་ནས་ཀྱང་ཚིགས་སུ་བཅད་པ་འདི་དག་གིས་བསྟོད་དོ། །ཚིག་བདེན་ཤིན་ཏུ་དམ་པ་དེ། །ཚིག་དང་དོན་ལ་རབ་མཁས་པ། །ཟབ་མོ་གསང་བའི་སྙིང་

47-1-340b

པོ་ཡང་། །མང་པོ་ཀུན་ལ་གསལ་བར་སྟོན། །རྒྱ་ཆ་འབྱམ་ཀླས་ཚིག་རྣམས་ཀྱང་། །བསྡུས་ཏེ་འཁོར་ལ་མདོ་ཙམ་སྟོན། །དེ་ལྟ་བུ་ཡི་ཚིག་དང་ལྡན། །སེམས་ཅན་ནད་གསོ་བ་ལ་མཁས། །གལ་ཏེ་སེམས་ཅན་རྣམས་གང་གིས། །
ཚིག་དེ་ཐོས་པར་གྱུར་པ་དེ། །དད་པ་རྣམས་དང་མ་དད་པ། །སངས་རྒྱས་གསུང་བ་ཡིན་པར་རྟོགས། །སངས་རྒྱས་གསུང་ནི་འཇམ་པ་སྟེ། །འཁོར་ལ་རྩུབ་པའི་ཚིག་ཀྱང་གསུང་། །འཇམ་དང་རྩུབ་པོར་གང་གསུངས་པ། །གཉིས་ཀ་
དོན་དམ་ལགས་པས་ན། །དེ་ཕྱིར་བདག་ཀྱང་དེ་རིང་འདིར། །བཅོམ་ལྡན་འདས་ལ་སྐྱབས་སུ་མཆི། །བཅོམ་ལྡན་གསུང་ནི་རོ་གཅིག་སྟེ། །ཇི་ལྟར་རྒྱ་མཚོའི་ཆུ་དང་མཚུངས། །བདེན་པ་དམ་པ་ཞེས་བྱ་སྟེ། །དོན་མེད་པ་ཡི་
ཚིག་མ་མཆིས། །དེ་རིང་དེ་བཞིན་གཤེགས་པ་ཡིས། །ཚད་མེད་ཆོས་རྣམས་རབ་བསྟན་པ། །སྐྱེས་པ་བུད་མེད་ཐོས་པ་དང་། །འཐུན་པར་དོན་དམ་ཐོབ་པར་འགྱུར། །རྒྱུ་མེད་འབྲས་བུ་ཡང་མེད་དེ། །སྐྱེ་བ་མེད་ཅིང་
འགོག་པ་མེད། །དེ་ནི་མྱ་ངན་འདས་པ་སྟེ། །ཐོས་པས་རྣམ་སྨིན་འཇོམས་པར་འགྱུར། །དེ་བཞིན་གཤེགས་ནི་ཐམས་ཅད་ཀྱི། །ཤིན་དུ་བྱམས་པའི་ཕ་མ་མཛད། །སེམས་ཅན་སོ་སོའི་སྐྱེ་བོ་དག །དེ་བཞིན་
གཤེགས་ཀྱི་སྲས་སུ་རིག །བཅོམ་ལྡན་བྱམས་པའི་ཐུགས་རྗེ་ཡིས། །མང་པོའི་ཕྱིར་ནི་དཀའ་བ་མཛད། །ཇི་ལྟར་གདོན་གྱིས་བརླབས་པ་ལྟར། །སྨྱོས་ནས་རྣམ་པ་མང་པོ་བྱེད། །
བདག་གིས་བཅོམ་ལྡན་དེང་མཐོང་བའི། །དགེ་བར་གྱུར་པའི་ལས་གསུམ་པོའི། །བསོད་ནམས་ཇི་སྙེད་ཐོབ་པ་འདི། །བླ་མེད་བྱང་ཆུབ་ལ་བསྔོའོ། །བདག་གིས་དེང་འདིར་སངས་རྒྱས་དང་། །
ཆོས་དང་དགེ་འདུན་ལ་མཆོད་པའི། །བསོད་ནམས་ཇི་སྙེད་བསྐྱེད་པ་དེ། །སངས་རྒྱས་ཆོས་དང་དགེ་འདུན་གསུམ། །རྟག་ཏུ་འཇིག་རྟེན་གནས་པར་ཤོག །བདག་གིས་དེང་འདིར་འདི་ཉིད་དུ། །བསོད་ནམས་

47-1-341a

ཇི་སྙེད་ཐོབ་གྱུར་པ། །བསོད་ནམས་དེ་ཡིས་སེམས་ཅན་གྱི། །བདུད་བཞི་བར་དུ་ཤིགས་པར་ཤོག །མི་དགེའི་བཤེས་དང་བདག་ཕྲད་པས། །དུས་གསུམ་སྡིག་པ་གང་བགྱིས་པ། །དེང་འདིར་སྤྱན་སྔར་ཀུན་
ཀྱང་བཤགས། །སླན་ཆད་སྡིག་པ་མི་བགྱིད་དོ། །སེམས་ཅན་སོ་སོའི་སྐྱེ་བོ་དག །བྱང་ཆུབ་ཏུ་ནི་སེམས་བསྐྱེད་ནས། །ཕྱོགས་བཅུའི་རྒྱལ་བ་ཐམས་ཅད་ལ། །རྩེ་གཅིག་སེམས་ཀྱིས་དྲན་པར་ཤོག །གཞན་
ཡང་སེམས་ཅན་ཐམས་ཅད་ཀྱི། །ཉོན་མོངས་མང་པོ་ཡོངས་བཅོམ་ནས། །ཇི་ལྟར་འཇམ་དཔལ་དང་འདྲ་བར། །སངས་རྒྱས་རང་བཞིན་མཐོང་བར་ཤོག །དེ་ནས་བཅོམ་ལྡན་འདས་ཀྱིས་རྒྱལ་པོ་མ་སྐྱེས་དགྲ་ལ་ལེགས་
སོ་ཞེས་བྱ་བ་བྱིན་ནོ། །གལ་ཏེ་གང་ཞིག་བྱང་ཆུབ་ཏུ་སེམས་བསྐྱེད་པ་དེ་ནི་སངས་རྒྱས་ཀྱི་དཀྱིལ་འཁོར་ཡོངས་སུ་བརྒྱན་པ་ཞེས་བྱའོ། །རྒྱལ་པོ་ཆེན་པོ་ཁྱོད་སྔོན་སངས་རྒྱས་རྣམ་པར་གཟིགས་ལས་བྱང་ཆུབ་ཏུ་སེམས་བསྐྱེད་དེ། 
དེ་ནས་ང་འཇིག་རྟེན་དུ་བྱུང་བའི་བར་དུ་སེམས་ཅན་དམྱལ་བར་ལྷུང་བའི་སྡུག་བསྔལ་མྱོང་བར་མ་གྱུར་ཏོ། །རྒྱལ་པོ་ཆེན་པོ་འདི་ལྟར་རིག་པར་བྱ་སྟེ། བྱང་ཆུབ་ཀྱི་སེམས་ནི་དེ་ལྟ་བུའི་འབྲས་བུ་ཚད་མེད་པ་སྙེད་ཡོད་དོ། །རྒྱལ་པོ་ཆེན་པོ་
དེང་ཕྱིན་ཆད་ཀྱང་རྟག་ཏུ་བྱང་ཆུབ་ཀྱི་སེམས་ལ་བརྩོན་པར་བྱའོ། །དེ་ཅིའི་ཕྱིར་ཞེ་ན། དེའི་རྒྱུ་དེའི་རྐྱེན་ཀྱིས་ཁ་ན་མ་ཐོ་བའི་ལས་ཚད་མེད་པ་སྙེད་འབྱང་བའི་ཕྱིར་རོ། །དེ་ནས་རྒྱལ་པོ་མ་སྐྱེས་དགྲ་ཡུལ་དབུས་འགྱུར་འཆང་གི་མི་དང་
བཅས་སུ་འདུག་པ་ལས་ལངས་ནས་བཅོམ་ལྡན་འདས་ལ་ལན་གསུམ་བསྐོར་ཏེ། ཕྱིར་ཕོ་བྲང་དུ་དོང་ངོ་། །ལྷས་སྤྱོད་པའི་ལེའུ་ནི་མེ་ཏོག་སྣ་ཚོགས་ཀྱི་མདོ་ལས་བཤད་པ་བཞིན་ནོ། །འཕགས་པ་ཡོངས་སུ་མྱ་ངན་
ལས་འདས་པ་ཆེན་པོའི་མདོ་ལས། ཚངས་པར་སྤྱོད་པ་ཞེས་བྱ་བའི་ལེའུ་སྟེ་བདུན་པའོ།། །། རིགས་ཀྱི་བུ་ཇི་ལྟར་ན་བུས་པ་ཆུང་ངུའི་སྤྱོད་པ་ཞེ་ན། རིགས་ཀྱི་བུ་ལྡང་བ་དང་། འདུག་པ་དང་

47-1-341b

འོང་བ་དང་། སོང་བ་དང་། སྨྲ་མི་ནུས་པ་ནི་བུས་པ་ཆུང་ངུ་ཞེས་བྱ་སྟེ། དེ་བཞིན་གཤེགས་པ་ཡང་དེ་དང་འདྲའོ། །ལྡང་མི་ནུས་པ་ནི་དེ་བཞིན་གཤེགས་པ་ཡང་ཆོས་ཐམས་ཅད་ཀྱི་མཚན་ཉིད་ལས་མི་ལྡང་ངོ་། །འདུག་མི་
ནུས་པ་ནི་དེ་བཞིན་གཤེགས་པ་ཡང་ཆོས་ཐམས་ཅད་ལ་མ་ཆགས་པའོ། །འོང་མི་ནུས་པ་ནི་དེ་བཞིན་གཤེགས་པའི་སྐུའི་སྤྱོད་པ་མི་གཡོ་བའོ། །འགྲོ་མི་ནུས་པ་ནི་དེ་བཞིན་གཤེགས་པ་ཡོངས་སུ་མྱ་ངན་ལས་
འདས་པ་ཆེན་པོ་མཐར་ཕྱིན་པའོ། །སྨྲ་མི་ནུས་པ་ནི་དེ་བཞིན་གཤེགས་པས་སེམས་ཅན་ཐམས་ཅད་ལ་ཆོས་རྣམས་སྟོན་ཀྱང་ཡང་དག་པར་ན་སྟོན་པ་མེད་པའོ། །དེ་ཅིའི་ཕྱིར་ཞེ་ན། ཇི་སྙེད་དུ་སྟོན་པ་ཡོད་པ་
ནི་འདུས་བྱས་ཀྱི་ཆོས་ཤེས་བྱ་སྟེ། སངས་རྒྱས་བཅོམ་ལྡན་འདས་ནི་འདུས་བྱས་མ་ཡིན་པས་དེའི་ཕྱིར་བཤད་པ་མེད་དོ། །ཡང་མི་སྨྲ་བ་ནི་ཇི་ལྟར་བུས་པ་ཆུང་ངུ་ཚིག་གསལ་བར་མི་ཤེས་པ་སྨྲ་བ་ཡོད་དུ་ཟིན་
ཀྱང་ཡང་དག་པར་ན་སྨྲ་བ་མེད་དོ། །དེ་བཞིན་གཤེགས་པ་ཡང་དེ་དང་འདྲ་སྟེ། སྨྲ་བ་མི་གསལ་བ་ཞེས་བྱ་བ་ནི་དེ་བཞིན་གཤེགས་པ་རྣམས་ཀྱིས་དགོངས་ཏེ་གསུངས་པའོ། །གསུངས་པ་ཡོད་དུ་ཟིན་ཀྱང་སེམས་ཅན་གྱིས་
མི་ཤེས་པས་མི་སྨྲ་བ་ཞེས་བྱའོ། །ཡང་བུས་པ་ཞེས་བྱ་བའི་ནི་ཚིག་ཡང་དག་པར་མི་ཤེས་པའི་ཕྱིར་རྫས་ལ་མིང་གཅིག་ཏུ་མ་ཆད་དོ། །ཚིག་ཡང་དག་པར་མི་ཤེས་པས་རྫས་ལ་མིང་གཅིག་ཏུ་མ་ཆད་ཀྱང་། རྒྱུ་དེ་མ་ཡིན་
པའི་ལོགས་ཤིག་ན་རྫས་ཤེས་པ་འགྱུར་བ་མེད་དོ། །དེ་བཞིན་གཤེགས་པ་ཡང་དེ་དང་འདྲ་སྟེ། སེམས་ཅན་ཐམས་ཅད་ཀྱི་རིགས་རྣམ་པ་སྣ་ཚོགས་ཐ་དད་པས་ཚིག་མི་མཐུན་ཏེ། དེ་བཞིན་གཤེགས་པས་ཐབས་
ཀྱིས་ཇི་ལྟ་བ་དེ་ལྟར་སྟོན་པས་དེའི་རྒྱུས་ཐམས་ཅད་ཤེས་པར་ཡང་མཛད་དོ། །ཡང་བུས་པ་ཞེས་བྱ་བ་ནི་ཡི་གེ་ཆེན་པོ་འབའ་ཤིག་སྟོན་ནུས་ཏེ། དེ་བཞིན་གཤེགས་པ་ཡང་དེ་དང་འདྲ་བར་ཡི་གེ་ཆེན་པོ་སྟོན་ཏོ། །

47-1-342a

འདི་ལྟ་སྟེ། བ་ཧྭཱ་ཞེས་བྱའོ། །དེ་ལ་ཧྭཱ་ཞེས་བྱ་བ་ནི་འདུས་བྱས་སོ། །བ་ཞེས་བྱ་བ་ནི་འདུས་མ་བྱས་ཏེ། དེ་ནི་བུས་པ་ཞེས་བྱའོ། །ཧྭཱ་ཞེས་བྱ་བ་ནི་ང་མི་རྟག་པའོ། །དེ་བཞིན་གཤེགས་པ་ཡང་རྟག་པ་འཆད་དེ། 
སེམས་ཅན་ཐོས་ནས་ང་ཆོས་རྟག་པ་འདོད་པའི་ཕྱིར་མི་རྟག་པ་གཅོད་དེ། དེ་ནི་བུས་པའི་སྤྱོད་པའོ། །ཡང་བུས་པ་ནི་སྡུག་བསྔལ་བ་དང་། བདེ་བ་དང་། ཉིན་པར་དང་། མཚན་མོ་དང་། ཕ་མ་མི་ཤེས་སོ། །བྱང་ཆུབ་སེམས་དཔའ་
སེམས་དཔའ་ཆེན་པོ་ཡང་དེ་དང་འདྲ་སྟེ། སེམས་ཅན་གྱི་ཕྱིར་བདེ་བ་དང་སྡུག་བསྔལ་མི་མཐོང་ཉིན་པར་དང་མཚན་མོ་ཞེས་བྱ་བ་མེད། སེམས་ཅན་ཐམས་ཅད་ལ་སེམས་མཉམ་པའི་ཕྱིར་ཕ་མ་དང་གཉེན་ལ་སོགས་པའི་མཚན་
ཉིད་མེད་དོ། །ཡང་བུས་པ་ནི་ལས་ཆེན་པོ་དང་ཆུང་ངུ་རྣམས་བྱེད་མི་ནུས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། བྱང་ཆུབ་སེམས་དཔས་འཁོར་བའི་ལས་མི་བྱེད་པས་མི་བྱེད་པ་ཞེས་བྱའོ། །
དངོས་པོ་ཆེན་པོ་ཞེས་བྱ་བ་ནི་མཚམས་མེད་པ་ལྔ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་ནི་ནམས་ཀྱང་མཚམས་མེད་པ་ལྔའི་སྡིག་ལྕི་བ་མི་བྱེད་དོ། །དངོས་པོ་ཆུང་ངུ་ཞེས་བྱ་བ་ནི་ཐེག་པ་གཉིས་པའི་སེམས་ཏེ། 
བྱང་ཆུབ་སེམས་དཔའ་ནམས་ཀྱང་བྱང་ཆུབ་ཀྱི་སེམས་ལས་ལོག་སྟེ། ཉན་ཐོས་དང་རང་སངས་རྒྱས་ཀྱི་ཐེག་པར་མི་ལྟུང་ངོ་། །ཡང་བྱིས་པའི་སྤྱོད་པ་ནི་ཇི་ལྟར་བུས་པ་དེ་ངུ་བ་ན། ཕ་མས་ལྕང་མའི་ལོ་མ་སེར་པོ་བྱིན་ཏེ། 
འདི་སྐད་དུ་མ་ངུ་ཤིག་མ་ངུ་ཤིག །ངས་ཁྱོད་ལ་གསེར་སྦྱིན་ཞེས་བྱས་ནས་བུས་པས་དེ་མཐོང་བ་དང་གསེར་ཡང་དག་པའི་འདུ་ཤེས་བསྐྱེད་དེ་མི་ངུ་བར་གྱུར་ཏེ། ལྕང་མའི་ལོ་མ་དེ་ནི་ཡང་དག་པར་གསེར་མ་ཡིན་ནོ། །གལ་ཏེ་ཤིང་
ལ་བྱས་པའི་གླང་དང་། རྟ་དང་། སྐྱེས་པ་དང་། བུད་མེད་ལ་བུས་པས་མཐོང་ནས་སྐྱེས་པ་དང་བུད་མེད་ལ་སོགས་པ་ཡིན་པའི་འདུ་ཤེས་བསྐྱེད་དེ་མི་ངུའོ། །དེ་སྐྱེས་པ་དང་བུད་མེད་མ་ཡིན་པར་སྐྱེས་པ་དང་བུད་མེད་ཀྱི་འདུ་ཤེས་འཇོག་

47-1-342b

པའི་ཕྱིར་བུས་པ་ཞེས་བྱའོ། །དེ་བཞིན་གཤེགས་པ་ཡང་དེ་དང་འདྲ་སྟེ། གལ་ཏེ་སེམས་ཅན་དག་མི་དགེ་བ་མང་པོ་བྱེད་ན། དེ་བཞིན་གཤེགས་པས་སུམ་བཅུ་རྩ་གསུམ་གནམ་གྱི་རྟག་པ་དང་། བདེ་བ་དང་། བདག་དང་། ཡོངས་
སུ་དག་པ་དང་། བྱད་བཟང་བ་དང་། ལོངས་སྤྱོད་དང་། གཞལ་མེད་ཁང་བཟང་པོའི་ནང་ན་འདོད་པ་ལྔ་སྤྱོད་པ་དང་། དབང་པོ་དྲུག་གི་གཉེན་པོ་ཐམས་ཅད་བདེ་བ་དང་དགའ་བ་ཤ་སྟག་ཡིན་པར་བསྟན་ཏེ། སེམས་ཅན་གྱིས་དེ་ལྟ་བུའི་བདེ་བ་
ཡོད་པ་ཐོས་ནས་བདེ་བ་ལ་ཆགས་པའི་སེམས་སྐྱེས་ཏེ། མི་དགེ་བ་བཏང་ནས་སུམ་བཅུ་རྩ་གསུམ་གནམ་གྱི་ལས་དགེ་བ་ལ་བརྩོན་ནོ། །དེ་ནི་ཡང་དག་པར་ལོག་པ་ཡིན་ཏེ། མི་རྟག་པ། བདེ་བ་མེད་པ། བདག་མེད་པ། 
ཡོངས་སུ་དག་པ་མ་ཡིན་ཡང་སེམས་ཅན་སྒྲོལ་བའི་ཕྱིར་ཐབས་ཀྱིས་རྟག་པ་དང་བདེ་བ་དང་། བདག་དང་། ཡོངས་སུ་དག་པའོ་ཞེས་གསུངས་སོ། །ཡང་བུས་པ་ཞེས་བྱ་བ་ནི། གལ་ཏེ་སེམས་ཅན་གང་འཁོར་བ་ལ་རབ་ཏུ་སྐྱོ་བ་
ན་དེ་བཞིན་གཤེགས་པས་ཐེག་པ་གཉིས་སྟོན་ཏེ། དེ་ལ་ཡང་དག་པར་ཐེག་པ་གཉིས་པོའི་བདེན་པ་མེད་ཀྱང་ཐེག་པ་གཉིས་ཀྱི་ཕྱིར་འཁོར་བའི་སྐྱོན་ཤེས་ཤིང་མྱ་ངན་ལས་འདས་པའི་བདེ་བ་མཐོང་ངོ་། །དེ་ལྟར་མཐོང་བའི་ཕྱིར་
རང་གིས་གཅོད་པ་དང་། མི་གཅོད་པ་དང་། བདེན་པ་དང་མི་བདེན་པ་དང་། སྤྱོད་པ་དང་མི་སྤྱོད་པ་དང་། ཐོབ་པ་དང་མི་ཐོབ་པའི་དངོས་པོ་རིག་པར་འགྱུར་རོ། །རིགས་ཀྱི་བུ་ཇི་ལྟར་བུས་པ་དེ་གསེར་མ་ཡིན་པ་ལ་གསེར་གྱི་འདུ་ཤེས་
བསྐྱེད་པ་ལྟར་དེ་བཞིན་གཤེགས་པ་ཡང་དེ་དང་འདྲ་བར་ཡོངས་སུ་མ་དག་པ་ལ་ཡོངས་སུ་དག་པའོ་ཞེས་འཆད་དེ། དེ་བཞིན་གཤེགས་པས་དོན་དམ་པ་ཐོབ་པའི་ཕྱིར་ཡང་དག་པ་མ་ཡིན་པ་མེད་དོ། །ཇི་ལྟར་བུས་པ་དེ་བ་
ལང་དང་རྟ་མ་ཡིན་པ་ལ་བ་ལང་དང་རྟར་འདུ་ཤེས་པ་ལྟར། གལ་ཏེ་སེམས་ཅན་གང་ལམ་མ་ཡིན་པ་ལ་ལམ་ཡང་དག་པར་འདུ་ཤེས་འཇོག་ན། དེ་བཞིན་གཤེགས་པས་ཀྱང་ལམ་མ་ཡིན་པ་ལ་ལམ་དུ་འཆད་དེ། ལམ་མ་ཡིན་པ་ལ་ཡང་

47-1-343a

དག་པར་ལམ་མེད་མོད་ཀྱི། ལམ་གྱི་རྒྱུ་ཅུང་ཟད་བསྐྱེད་ནུས་པའི་ཕྱིར་ལམ་མ་ཡིན་པ་ལམ་དུ་འཆད་དོ། །ཇི་ལྟར་བུས་པ་དེ་ཤིང་གི་ཁྱེའུ་དང་བུ་མོ་ལ་ཁྱེའུ་དང་བུ་མོར་འདུ་ཤེས་པ་ལྟར། དེ་བཞིན་གཤེགས་པ་ཡང་དེ་དང་
འདྲ་བར་སེམས་ཅན་མ་ཡིན་པར་མཁྱེན་བཞིན་དུ་སེམས་ཅན་གྱི་མཚན་ཉིད་འཆད་དེ། ཡང་དག་པར་ན་སེམས་ཅན་གྱི་མཚན་ཉིད་མེད་དོ། །གལ་ཏེ་སངས་རྒྱས་བཅོམ་ལྡན་འདས་ཀྱིས་སེམས་ཅན་མེད་པར་འཆད་ན་སེམས་
ཅན་ཐམས་ཅད་ངན་པར་ལྟ་བར་ལྟུང་སྟེ། དེ་བས་ན་དེ་བཞིན་གཤེགས་པས་སེམས་ཅན་ཡོད་པར་གསུངས་སོ། །སེམས་ཅན་ལ་སེམས་ཅན་དུ་འདུ་ཤེས་འཇོག་པ་ནི་སེམས་ཅན་གྱི་མཚན་ཉིད་འཇིག་མི་ནུས་སོ། །
གང་སེམས་ཅན་ལས་སེམས་ཅན་གྱི་མཚན་ཉིད་འཇིག་པ་ནི་ཡོངས་སུ་མྱ་ངན་ལས་འདས་པ་ཆེན་པོ་ཐོབ་པར་འགྱུར་རོ། །དེ་ལྟར་མྱ་ངན་ལས་འདས་པ་ཆེན་པོ་ཐོབ་པའི་ཕྱིར་མི་ངུ་བར་འགྱུར་ཏེ་དེ་ནི་བུས་པའི་སྤྱོད་པ་ཞེས་བྱའོ། །
རིགས་ཀྱི་བུ་གལ་ཏེ་སྐྱེས་པ་འམ་བུད་མེད་གང་སྤྱོད་པ་ལྔ་པོ་འདི་ཡོངས་སུ་འཛིན་ཅིང་འཆང་ངམ། ཀློག་གམ་ཡི་གེར་བྲིས་སམ། དགྲོལ་ཞིང་འཆད་ན་གང་ཟག་དེས་གདོན་མི་ཟ་བར་སྤྱོད་པ་ལྔ་པོ་དེ་དག་ཐོབ་པར་རིག་པར་བྱའོ། །
དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བཅོམ་ལྡན་འདས་ཀྱིས་གསུངས་པའི་དོན་འཚལ་བ་ལྟར་ན། བདག་ཀྱང་གདོན་མི་འཚལ་བར་
སྤྱོད་པ་ལྔ་པོ་དེ་དག་ཐོབ་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་འབའ་ཤིག་གིས་སྤྱོད་པ་ལྔ་པོ་དེ་དག་ཐོབ་པ་མ་ཡིན་གྱི། ད་ལྟར་འཁོར་འདིའི་ནང་ན་མི་ཁྲི་ཕྲག་དགུ་བཅུ་རྩ་གསུམ་
ཡང་ཁྱོད་དང་འདྲ་བར་སྤྱོད་པ་ལྔ་པོ་དེ་དག་ཐོབ་པར་གྱུར་ཏོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས། བུས་པ་ཆུང་ངུ་སྤྱོད་པ་ཞེས་བྱ་བའི་ལེའུ་སྟེ་བརྒྱད་པའོ།། །།

47-1-343b

འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་བརྒྱད་པ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་སྣང་
བ་མཐོ་བཙུན་དཔལ་གྱི་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་གང་མྱ་ངན་ལས་འདས་པ་ཆེན་པོའི་མདོ་འདི་ལ་རྣལ་འབྱོར་དུ་སྤྱོད་ན་ཡོན་ཏན་རྣམ་པ་བཅུ་
འཐོབ་པར་འགྱུར་ཏེ། ཉན་ཐོས་དང་རང་སངས་རྒྱས་དང་ཐུན་མོང་མ་ཡིན་ཞིང་བསམ་གྱིས་མི་ཁྱབ་ཏེ་ཐོས་པ་ཙམ་གྱིས་ངོ་མཚར་རྨད་དུ་འཛིན་ལ། ནང་མ་ཡིན། ཕྱི་རོལ་མ་ཡིན། དཀའ་བ་མ་ཡིན། སླ་བ་མ་ཡིན། མཚན་ཉིད་མ་ཡིན། 
མཚན་ཉིད་མ་ཡིན་པ་མ་ཡིན། འཇིག་རྟེན་གྱི་ཆོས་མ་ཡིན་ཏེ། མཚན་མ་དང་དབྱིབས་མེད་པ་འཇིག་རྟེན་ན་མི་སྲིད་པའོ། །རྣམ་པ་བཅུ་གང་ཞེ་ན། གཅིག་ལ་ཡང་རྣམ་པ་ལྔ་སྟེ། ལྔ་གང་ཞེ་ན། མ་ཐོས་པ་ཐོས་པར་འགྱུར་བ་
དང་། ཐོས་ནས་ཕན་པའི་དོན་དུ་འགྱུར་བ་དང་། ཐེ་ཙོམ་དང་ནེམ་ནུར་གྱི་སེམས་ཆོད་པར་འགྱུར་བ་དང་། ཤེས་རབ་ལ་གཡོ་སྒྱུ་མེད་པ་དང་། དེ་བཞིན་གཤེགས་པས་དགོངས་ཏེ་གསུངས་པའི་དོན་ཟབ་མོ་ཤེས་པ་དང་ལྔའོ། །
དེ་ལ་མ་ཐོས་པ་ཐོས་པར་འགྱུར་བ་གང་ཞེ་ན། འདི་ལྟ་སྟེ་དགོངས་ཏེ་གསུངས་པའི་དོན་ཤིན་དུ་ཟབ་མོ་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པ་དང་། སངས་རྒྱས་དང་། ཆོས་དང་དགེ་འདུན་ལ་ཁྱད་
མེད་པ། དཀོན་མཆོག་གསུམ་གྱི་རང་བཞིན་དང་། མཚན་ཉིད་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་དང་། སངས་རྒྱས་བཅོམ་ལྡན་འདས་ཐམས་ཅད་ནི་མཐའ་ཡུན་དུ་མྱ་ངན་ལས་
འདས་པ་མེད་དེ། རྟག་པ། གནས་པ། མི་འགྱུར་མི་འཕོ་བ་དང་། དེ་བཞིན་གཤེགས་པའི་མྱ་ངན་ལས་འདས་པ་ནི་ཡོད་པ་མ་ཡིན། མེད་པ་མ་ཡིན། བྱས་པ་མ་ཡིན། མ་བྱས་པ་མ་

47-1-344a

ཡིན། ཟག་པ་དང་བཅས་པ་མ་ཡིན། ཟག་པ་མེད་པ་མ་ཡིན། གཟུགས་མ་ཡིན། གཟུགས་མ་ཡིན་པ་མ་ཡིན། མིང་མ་ཡིན། མིང་མ་ཡིན་པ་མ་ཡིན། མཚན་ཉིད་མ་ཡིན། མཚན་ཉིད་མ་ཡིན་པ་མ་ཡིན། ཡོད་པ་མ་
ཡིན། མེད་པ་མ་ཡིན། དངོས་པོ་མ་ཡིན། དངོས་པོ་མ་ཡིན་པ་མ་ཡིན། རྒྱུ་མ་ཡིན། འབྲས་བུ་མ་ཡིན། ལྟོས་པ་མ་ཡིན། མི་ལྟོས་པ་མ་ཡིན། སྣང་བ་མ་ཡིན། མུན་པ་མ་ཡིན། བྱུང་བ་མ་ཡིན། མ་བྱུང་བ་མ་ཡིན། རྟག་པ་མ་
ཡིན། མི་རྟག་པ་མ་ཡིན། ཆད་པ་མ་ཡིན། མ་ཆད་པ་མ་ཡིན། ཐོག་མ་མ་ཡིན། ཐ་མ་མ་ཡིན། འདས་པ་མ་ཡིན། མ་འོངས་པ་མ་ཡིན། ད་ལྟར་མ་ཡིན། ཕུང་པོ་མ་ཡིན། ཕུང་པོ་མ་ཡིན་པ་མ་ཡིན། སྐྱེ་མཆེད་མ་ཡིན། སྐྱེ་མཆེད་མ་ཡིན་
པ་མ་ཡིན། ཁམས་མ་ཡིན། ཁམས་མ་ཡིན་པ་མ་ཡིན། རྟེན་ཅིང་འབྲེལ་བར་འབྱུང་བ་བཅུ་གཉིས་མ་ཡིན། རྟེན་ཅིང་འབྲེལ་བར་འབྱུང་བ་བཅུ་གཉིས་མ་ཡིན་པ་མ་ཡིན། དེ་དག་ལ་སོགས་པའི་ཆོས་དགོངས་ཏེ་གསུངས་པའི་
དོན་ཤིན་དུ་ཟབ་མོ་སྔོན་མ་ཐོས་པ་ཐོས་པར་འགྱུར་བ་དང་། གཞན་ཡང་མ་ཐོས་པ་ནི་འདི་ལྟ་སྟེ། མུ་སྟེགས་ཅན་ཐམས་ཅད་ཀྱི་གཙུག་ལག་རིམ་པ་བཞི་དང་། བྱཱ་ཀ་ར་ཎའི་གཙུག་ལག་དང་། རྒྱལ་པོའི་གཙུག་ལག་དང་། བགྲང་བ་དང་། 
བརྩི་བའི་གཙུག་ལག་ལ་སོགས་པ་དང་། རིག་སྔགས་དང་། སྨན་དཔྱད་དང་། སྒྱུ་རྩལ་དང་། ཉི་ཟླ་སྤྱང་གིས་ཟིན་པ་དང་། སྐར་མ་འཕོ་ཞིང་འགྱུར་བ་དང་། རི་མོ་དང་ཡི་གེ་དང་། ལུང་སྟོན་པའི་གཙུག་ལག་ལ་སོགས་པའི་ཡི་གེ་
དང་། གཙུག་ལག་དེའི་གསང་བའི་དོན་སྔོན་མ་ཐོས་པ་ད་མདོ་སྡེ་འདི་ལས་ཤེས་པར་འགྱུར་བ་དང་། གཞན་ཡང་ཤིན་ཏུ་རྒྱས་པའི་མདོ་སྡེ་མ་གཏོགས་པ་མདོ་སྡེ་ཅུ་གཅིག་ལས་དགོངས་ཏེ་གསུངས་པའི་དོན་ཤིན་དུ་ཟབ་མོ་མེད་
པ་ཡང་དེང་མདོ་སྡེ་འདིའི་རྐྱེན་ཀྱིས་ཤེས་པར་གྱུར་ཏོ། །རིགས་ཀྱི་བུ་དེ་ནི་མ་ཐོས་པ་ཐོས་པར་འགྱུར་བ་ཞེས་བྱའོ། །ཐོས་ནས་ཕན་པར་འགྱུར་བ་ཞེས་བྱ་བ་ནི་གལ་ཏེ་མྱ་ངན་ལས་འདས་པ་ཆེན་པོའི་མདོ་འདི་ཡོངས་སུ་འཛིན་ན། 

47-1-344b

ཤིན་དུ་རྒྱས་པ་ཐེག་པ་ཆེན་པོའི་མདོའི་དོན་གྱི་རོ་ཤིན་དུ་ཟབ་མོ་ཐམས་ཅད་རྫོགས་པར་ཀུན་ཤེས་པར་ནུས་སོ། །དཔེར་ན་ཁྱེའུ་འམ་བུ་མོ་དག་མེ་ལོང་གསལ་བའི་ནང་ན་གཟུགས་དང་ཆ་ལུགས་གསལ་བར་སྣང་བ་བཞིན་དུ་
མྱ་ངན་ལས་འདས་པ་ཆེན་པོའི་མེ་ལོང་ཡང་དེ་དང་འདྲ་སྟེ། བྱང་ཆུབ་སེམས་དཔས་ཐོས་ན་ཐེག་པ་ཆེན་པོའི་མདོ་སྡེའི་དོན་ཤིན་དུ་ཟབ་མོ་གསལ་བར་མཐོང་ངོ་། །གཞན་ཡང་ལ་ལ་ཞིག་མུན་ཁང་གི་ནང་དུ་སྒྲོན་མ་ཆེན་པོ་ཕྱུང་ན། 
རྫས་ཐམས་ཅད་མཐོང་བ་བཞིན་དུ་མྱ་ངན་ལས་འདས་པ་ཆེན་པོའི་སྒྲོན་མ་ཡང་དེ་དང་འདྲ་སྟེ། བྱང་ཆུབ་སེམས་དཔས་འཛིན་ན་ཐེག་པ་ཆེན་པོའི་དོན་ཟབ་མོ་དཀའ་བ་མཐོང་བར་འགྱུར་རོ། །གཞན་ཡང་ཇི་ལྟར་ཉི་མ་ཤར་བ་ན་འོད་སྣང་བ་
སྟོང་ཡོད་པ་དེས་རི་རྣམས་ཀྱི་སུལ་ཟབ་མོ་མུན་པ་ཅན་ཀུན་སྣང་བར་བྱེད་དེ། སྐྱེ་བོ་ཐམས་ཅད་ཀྱིས་རྒྱང་རིང་པོ་ནས་རྫས་རྣམས་མཐོང་བ་བཞིན་དུ་མྱ་ངན་ལས་འདས་པ་ཆེན་པོའི་ཡོངས་སུ་དག་པའི་ཤེས་རབ་ཀྱི་ཉི་མ་ཡང་དེ་དང་འདྲ་སྟེ། 
ཐེག་པ་ཆེན་པོས་ཤིན་ཏུ་ཟབ་མོའི་གནས་སྣང་བར་བྱེད་དེ། ཉན་ཐོས་དང་། རང་སངས་རྒྱས་ཀྱི་ཐག་པ་བས་རྒྱང་རིང་པོ་ནས་སངས་རྒྱས་ཀྱི་བྱང་ཆུབ་མཐོང་བར་བྱེད་དོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་ཆེན་པོའི་མདོ་སྡེ་
དམ་པ་མཉན་ཅིང་འཛིན་པའི་ཕྱིར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དེ་ལྟར་མྱ་ངན་ལས་འདས་པ་ཆེན་པོའི་མདོ་ཉན་ཏམ་འཛིན་ན་ཆོས་ཐམས་ཅད་ཀྱི་རྣམ་གྲངས་རྟོགས་པར་འགྱུར་རོ། །
གལ་ཏེ་ཡི་གེར་བྲིས་སམ། ཀློག་གམ། འདོན་ཏམ། ཁོང་དུ་ཆུད་པར་བྱེད་དམ། གཞན་ལ་རྒྱས་པར་སྟོན་ཏམ། དོན་ཡིད་ལ་བྱེད་ན་ཆོས་ཐམས་ཅད་ཀྱི་དོན་ཚུལ་བཞིན་དུ་རྟོགས་པར་འགྱུར་རོ། །རིགས་
ཀྱི་བུ་གང་ཉན་ཅིང་འཛིན་པ་དེས་ནི་རྣམ་གྲངས་འབའ་ཤིག་ཤེས་ཀྱི། དོན་ཉིད་མི་རྟོགས་སོ། །གང་ཡི་གེར་བྲིས་སམ། གཟུངས་སུ་འཛིན་ཏམ། ཀློག་གམ། འདོན་ཏམ། གཞན་ལ་རྒྱས་པར་སྟོན་ཏམ། 

47-1-345a

དོན་ཡིད་ལ་བྱེད་ན། དོན་ཉིད་རྟོགས་པར་འགྱུར་རོ། །གཞན་ཡང་རིགས་ཀྱི་བུ་མདོ་སྡེ་འདི་མཉན་པས་ན་སངས་རྒྱས་ཀྱི་རང་བཞིན་ཡོད་པར་ཐོས་ཀྱི་མཐོང་བར་མི་ནུས་སོ། །ཡི་གེར་བྲིས་ཤིང་ཀློག་གམ། འདོན་ཏམ། 
གཞན་ལ་རྒྱས་པར་སྟོན་ཏམ། དོན་ཡིད་ལ་བྱེད་ན་དེས་ནི་མཐོང་བར་འགྱུར་རོ། །མདོ་སྡེ་འདི་མཉན་པ་ཙམ་གྱིས་སྦྱིན་པ་ཐོབ་པར་འགྱུར་གྱིས། སྦྱིན་པའི་ཕ་རོལ་ཏུ་ཕྱིན་པ་མཐོང་བ་ནི་མ་ཡིན་ནོ། །མདོ་སྡེ་འདི་ཡི་གེར་བྲིས་ཤིང་འདོན་ཏམ། 
ཀློག་གམ། གཞན་ལ་ཡང་རྒྱས་པར་སྟོན་ཏམ། དོན་ཡིད་ལ་བྱེད་ན་སྦྱིན་པའི་ཕ་རོལ་ཏུ་ཕྱིན་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་མཐོང་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་མྱ་ངན་ལས་
འདས་པ་ཆེན་པོའི་མདོ་འདི་མཉན་ན་ཆོས་ཤེས་པ་དང་། དོན་ཤེས་པར་འགྱུར་རོ། །སོ་སོ་ཡང་དག་པར་ཤེས་པ་དེ་གཉིས་དང་ལྡན་ན་དགེ་སྦྱོང་ངམ། བྲམ་ཟེ་འམ། ལྷ་འམ། བདུད་དམ། ཚངས་པ་འམ། འཇིག་རྟེན་དུ་བཅས་པ་ཐམས་ཅད་ཀྱིས་
མི་འཇིགས་པ་དང་། མདོ་སྡེ་བཅུ་གཉིས་རྣམ་པར་འབྱེད་ཅིང་དོན་སྟོན་པ་ལ་འགལ་བ་མེད་པ་དང་། གཞན་ལས་མ་མཉན་པར་རང་གིས་རིག་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཉེ་བར་འགྱུར་རོ། །རིགས་ཀྱི་
བུ་དེ་ནི་ཐོས་ནས་ཕན་པར་འགྱུར་བ་ཞེས་བྱའོ། །ཐེ་ཙོམ་གྱི་སེམས་ཆོད་པ་ཞེས་བྱ་བ་ནི་རྣམ་པ་གཉིས་ཏེ། ཚིག་ལ་ཐེ་ཙོམ་ཟ་བ་དང་། དོན་ལ་ཐེ་ཚོམ་ཟ་བའོ། །མདོ་སྡེ་འདི་མཉན་པས་ཚིག་ལ་ཐེ་ཙོམ་ཟ་བའི་སེམས་ཆོད་པར་
འགྱུར་རོ། །དོན་ཡིད་ལ་བྱེད་པས་ནི་དོན་ལ་ཐེ་ཚོམ་ཟ་བའི་སེམས་ཆོད་པར་འགྱུར་རོ། །གཞན་ཡང་རིགས་ཀྱི་བུ་ཐེ་ཚོམ་ལ་རྣམ་པ་ལྔ་སྟེ། སངས་རྒྱས་ངེས་པར་མྱ་ངན་ལས་འདའ་འམ་སྙམ་ཐེ་ཚོམ་ཟ་བ་དང་། སངས་རྒྱས་རྟག་
ཏུ་གནས་པ་ཡིན་ནམ་སྙམ་ཐེ་ཚོམ་ཟ་བ་དང་། སངས་རྒྱས་ཡང་དག་པར་བདེ་བ་ཡིན་ནམ་སྙམ་ཐེ་ཚོམ་ཟ་བ་དང་། སངས་རྒྱས་ཡང་དག་པར་ཡོངས་སུ་དག་པ་ཡིན་ནམ་སྙམ་ཐེ་ཚོམ་ཟ་བ་དང་། སངས་རྒྱས་ཡང་དག་པར་བདག་ཡིན་

47-1-345b

ནམ་སྙམ་དུ་ཐེ་ཚོམ་ཟ་བ་སྟེ། མདོ་སྡེ་འདི་མཉན་པས་ནི་སངས་རྒྱས་མྱ་ངན་ལས་འདའ་བ་ཐེ་ཚོམ་ཟ་བ་ཡོངས་སུ་ཆོད་པར་འགྱུར་རོ། །ཡི་གེར་བྲིས་ཤིང་ཀློག་གམ་འདོན་ཏམ། གཞན་ལ་རྒྱས་པར་སྟོན་ཏམ། དོན་ཡིད་ལ་བྱེད་པས་ནི་ཐེ་
ཚོམ་ལྷག་མ་བཞི་ཡོངས་སུ་ཆོད་པར་འགྱུར་རོ། །རིགས་ཀྱི་བུ་གཞན་ཡང་ཐེ་ཚོམ་ལ་རྣམ་པ་གསུམ་སྟེ། ཉན་ཐོས་ཡོད་པ་ཡིན་ནམ་མེད་པ་ཡིན་སྙམ་ཐེ་ཚོམ་ཟ་བ་དང་། རང་སངས་རྒྱས་ཡོད་པ་ཡིན་ནམ་མེད་པ་ཡིན་སྙམ་ཐེ་ཚོམ་
ཟ་བ་དང་། སངས་རྒྱས་ཡོད་པ་ཡིན་ནམ་མེད་པ་ཡིན་སྙམ་ཐེ་ཚོམ་ཟ་བ་སྟེ། མདོ་སྡེ་འདི་མཉན་པ་ཙམ་གྱིས་ཐེ་ཚོམ་རྣམ་པ་གསུམ་མ་ལུས་པར་མེད་པར་འགྱུར་རོ། །ཡི་གེར་བྲིས་ཤིང་ཀློག་གམ་འདོན་ཏམ། གཞན་ལ་རྒྱས་
པར་སྟོན་ཏམ། དོན་ཡིད་ལ་བྱེད་པས་ནི་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་རྟོགས་པར་འགྱུར་རོ། །རིགས་ཀྱི་བུ་གལ་ཏེ་སེམས་ཅན་གང་མྱ་ངན་ལས་འདས་པ་ཆེན་པོའི་མདོ་སྡེ་འདི་མ་ཐོས་ན་ཐེ་ཚོམ་
གྱི་སེམས་མང་བ་ནི་འདི་ལྟ་སྟེ། རྟག་པ་འམ། མི་རྟག་པ་འམ། བདེ་བ་འམ། མི་བདེ་བ་འམ། ཡོངས་སུ་དག་པ་འམ། ཡོངས་སུ་མ་དག་པ་འམ། བདག་གམ། བདག་མེད་པ་འམ། སྲོག་གམ། 
སྲོག་མ་ཡིན་ནམ། སེམས་ཅན་ནམ། སེམས་ཅན་མ་ཡིན་ནམ།  མཐར་མ་ཐུག་གམ། མ་འོངས་པའི་དུས་སམ། འདས་པའི་དུས་སམ། ཡོད་པ་འམ། མེད་པ་འམ། སྡུག་བསྔལ་ལམ། སྡུག་
བསྔལ་མ་ཡིན་ནམ། ཀུན་འབྱུང་ངམ། ཀུན་འབྱུང་མ་ཡིན་ནམ། ལམ་འམ། ལམ་མ་ཡིན་ནམ། འགོག་པ་འམ། འགོག་པ་མ་ཡིན་ནམ། ཆོས་སམ། ཆོས་མ་ཡིན་ནམ། དགེ་བ་འམ། དགེ་བ་མ་ཡིན་
ནམ། སྟོང་པ་འམ། སྟོང་པ་མ་ཡིན་ནམ་སྙམ་དུ་ཐེ་ཚོམ་ཟ་བ་སྟེ། མདོ་སྡེ་འདི་མཉན་ན་དེ་ལྟ་བུའི་ཐེ་ཚོམ་ཐམས་ཅད་ཡོངས་སུ་ཆོད་པར་འགྱུར་རོ། །གཞན་ཡང་རིགས་ཀྱི་བུ་གལ་ཏེ་གང་མདོ་སྡེ་འདི་མ་ཐོས་ན། 

47-1-346a

གཞན་ཡང་ཐེ་ཚོམ་རྣམ་པ་མང་པོ་ཡོད་པར་འགྱུར་རོ། །འདི་ལྟ་སྟེ། གཟུགས་བདག་ཡིན་ནམ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་བདག་ཡིན་ནམ། འོན་ཏེ་མིག་གིས་མཐོང་
ངམ། བདག་གིས་མཐོང་བ་ནས། དེ་བཞིན་དུ་རྣམ་པར་ཤེས་པའི་བར་དུ་ཤེས་པར་ནུས་སམ། བདག་གིས་ཤེས་པར་ནུས་སམ། གཟུགས་ཀྱིས་རྣམ་པར་སྨིན་པ་མྱོང་ངམ། བདག་གིས་རྣམ་པར་སྨིན་པ་མྱོང་བ་
ནས། དེ་བཞིན་དུ་རྣམ་པར་ཤེས་པའི་བར་དུ་རྣམ་པར་སྨིན་པ་མྱོང་ངམ། བདག་གིས་རྣམ་པར་སྨིན་པ་མྱོང་ངམ། གཟུགས་ཕ་རོལ་གྱི་འཇིག་རྟེན་དུ་འགྲོ་འམ། འོན་ཏེ་བདག་ཕ་རོལ་གྱི་འཇིག་རྟེན་དུ་འགྲོ་འམ། 
དེ་བཞིན་དུ་རྣམ་པར་ཤེས་པ་ཡང་དེ་དང་འདྲ་སྟེ། འཁོར་བ་ཐོག་མ་དང་ཐ་མ་ཡོད་དམ། འོན་ཏེ་ཐོག་མ་དང་ཐ་མ་མེད་པ་ཡིན་ནམ་སྙམ་ཐེ་ཚོམ་ཟ་བ་སྟེ། མདོ་སྡེ་འདི་མཉན་ན་དེ་ལྟ་བུའི་ཐེ་ཚོམ་ལ་སོགས་པ་ཡང་
ཡོངས་སུ་ཆོད་པར་འགྱུར་རོ། །ཡང་ལ་ལ་ཞིག་གིས་ལོག་སྲེད་ཅན་དང་། རྩ་བ་བཞི་ཉམས་པ་དང་། མཚམས་མེད་པ་ལྔའི་ཁ་ན་མ་ཐོ་བ་བྱས་པ་དང་། མདོ་སྡེ་ཤིན་དུ་རྒྱས་པ་ལ་སྐུར་བ་དེ་དག་ལ་སངས་རྒྱས་གྱི་རང་
བཞིན་ཡོད་དམ། སངས་རྒྱས་ཀྱི་རང་བཞིན་མེད་སྙམ་ཐེ་ཚོམ་ཟ་བ་དག་ཀྱང་མདོ་སྡེ་འདི་མཉན་ན་ཐེ་ཚོམ་དེ་དག་ཐམས་ཅད་ཡོངས་སུ་ཆོད་པར་འགྱུར་རོ། །ཡང་ལ་ལ་ཞིག་གིས་འཇིག་རྟེན་མཐའ་ཡོད་དམ། འཇིག་
རྟེན་མཐའ་མེད་དམ། ཕྱོགས་བཅུའི་འཇིག་རྟེན་ཡོད་དམ་ཕྱོགས་བཅུའི་འཇིག་རྟེན་མེད་སྙམ་ཐེ་ཚོམ་ཟ་བ་དག་ཀྱང་མདོ་སྡེ་འདི་མཉན་ན། དེ་ལྟ་བུའི་ཐེ་ཚོམ་དག་ཀྱང་ཡོངས་སུ་ཆོད་པར་འགྱུར་ཏེ། དེ་ནི་ཐེ་ཚོམ་དང་
ནེམ་ནུར་གྱི་སེམས་ཆོད་པར་འགྱུར་བ་ཞེས་བྱའོ། །ཤེས་རབ་ལ་གཡོ་སྒྱུ་མེད་པ་ཞེས་བྱ་བ་ནི་འདི་ལྟ་སྟེ། གལ་ཏེ་སེམས་ལ་ཐེ་ཚོམ་ཡོད་ན་ལྟ་བ་ཐམས་ཅད་ཡང་དག་པ་མ་ཡིན་པར་འགྱུར་རོ། །སོ་སོའི་སྐྱེ་བོ་དག་གལ་ཏེ་མྱ་ངན་ལས་འདས་

47-1-346b

པ་ཆེན་པོའི་མདོ་སྡེ་དམ་པ་འདི་མ་ཐོས་ན་ལྟ་བ་ཐམས་ཅད་ལོག་པར་འགྱུར་རོ། །དེ་བཞིན་དུ་ཉན་ཐོས་དང་རང་སངས་རྒྱས་ཀྱི་བར་དུ་ཡང་ལྟ་བ་ཐམས་ཅད་ལོག་པ་ཡིན་ནོ། །ཇི་ལྟར་ན་བྱིས་པ་སོ་སོའི་སྐྱེ་བོ་དག་ལྟ་བ་ལོག་པ་ཞེས་བྱ་ཞེ་ན། 
ཟག་པ་དང་བཅས་པ་ལ་རྟག་པ་དང་། བདེ་བ་དང་། བདག་དང་། ཡོངས་སུ་དག་པར་ལྟ། དེ་བཞིན་གཤེགས་པ་ལ་ནི་མི་རྟག་པ་དང་། སྡུག་བསྔལ་བ་དང་། ཡོངས་སུ་མ་དག་པ་དང་། བདག་མེད་པར་ལྟ་ལ། སེམས་ཅན་དང་། འཚོ་
བ་དང་། སྲོག་དང་། མཐོང་བ་དང་། ཤེས་པ་ཡོད་པར་ལྟ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ལ་མྱ་ངན་ལས་འདས་པ་ཡིན་པར་འཛིན་པ་དང་། ལྷ་དབང་སྒྱུར་ལ་འཕགས་པའི་ལམ་བརྒྱད་ཡོད་པར་ལྟ་བ་དང་། 
རྟག་པར་ལྟ་བ་དང་། ཆད་པར་ལྟ་བ་སྟེ། ལྟ་བ་དེ་དག་ཐམས་ཅད་ནི་ལོག་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་གལ་ཏེ་མྱ་ངན་ལས་འདས་པ་ཆེན་པོའི་མདོ་སྡེ་འདི་ཐོས་ཤིང་འཕགས་པའི་སྤྱད་པ་སྤྱོད་པ་ན། 
ལོག་པར་ལྟ་བ་དེ་དག་མེད་པར་འགྱུར་རོ། །ཇི་ལྟར་ན་ཉན་ཐོས་དང་རང་སངས་རྒྱས་དང་ལོག་པར་ལྟ་བ་ཞེ་ན། བྱང་ཆུབ་སེམས་དཔའ་དགའ་ལྡན་གྱི་གནས་ནས་བབས་པ་ན་བལ་གླང་ལ་བཅིབས་ཏེ་ཡུམ་གྱི་ལྷུམས་སུ་
གཤེགས་པ་དང་། ཡབ་ནི་ཟས་གཙང་མ། ཡུམ་ནི་ལྷ་མཛེས་ཞེས་བྱ་བ་དང་། གྲོང་ཁྱེར་སེར་སྐྱར་ཡུམ་གྱི་ལྷུམས་སུ་ཟླ་བ་བཅུ་ཚང་ནས་བལྟམ་པ་དང་། བལྟམས་པའི་ཚེ་བརྒྱ་བྱིན་གྱིས་ས་ལ་མ་རེག་པར་བཟུང་སྟེ། 
ཀླུའི་རྒྱལ་པོ་དགའ་བོ་དང་། བསྙེན་དགའ་བོ་གཉིས་ཀྱིས་ཆུ་ཕབ་ནས་སྐུ་བསིལ་བ་དང་། གནོད་སྦྱིན་གྱི་རྒྱལ་པོ་ཆེན་པོ་མ་ནི་བརྟ་ཞེས་བྱ་བས་རིན་པོ་ཆེའི་གདུགས་ཐོགས་པ་དང་། སའི་ལྷས་པད་མོ་སྤྲུལ་ཏེ་ཞབས་བརྟེན་
པ་དང་། ཕྱོགས་བཞི་ཀུན་ཏུ་གོམ་པ་བདུན་བདུན་བོར་བ་དང་། ལྷའི་རྟེན་དུ་གཤེགས་ནས་ལྷ་ཐམས་ཅད་ལངས་ཏེ་བསུས་པ་དང་། དྲང་སྲོང་ཨ་ས་ཏིས་པང་དུ་བླངས་ཏེ་མཚན་བལྟས་པ་དང་། མཚན་བལྟས་ནས་བདག་ནི་ཚེའི་

47-1-347a

དུས་བྱེད་པར་འགྱུར་ཏེ། སངས་རྒྱས་མངོན་དུ་གཤེགས་པ་མི་མཐོང་ངོ་སྙམ་དུ་སྡུག་བསྔལ་ཆེན་པོ་སྐྱེས་ཏེ་ཡིད་ལ་རབ་ཏུ་གཅེགས་པ་དང་། སློབ་དཔོན་ལས་ཡིག་རྩིས་དང་། འཕོང་དང་། ཁ་ལོ་སྒྱུར་བ་དང་། རི་མོ་དང་། 
ལུང་སྟོན་པ་དང་། སྒྱུ་རྩལ་སློབ་པ་དང་། ཕོ་བྲང་གི་ནང་དུ་བུ་མོ་དང་སླས་དྲུག་ཁྲི་དང་ལྷན་ཅིག་ཏུ་རྩེ་ཞིང་ལོངས་སྤྱོད་པ་དང་། ཁབ་ནས་བྱུང་སྟེ་འཆག་ཏུ་གཤེགས་པ་ལས་གྲོང་ཁྱེར་སེར་སྐྱའི་སྒོར་མི་རྒས་འཁོགས་པ་མཐོང་བ་
ནས། དེ་བཞིན་དུ་དགེ་སྦྱོང་ཆོས་གོས་གྱོན་ཅིང་འགྲོ་བའི་བར་དུ་མཐོང་ནས་ཕྱིར་ཕོ་བྲང་དུ་ཕྱིན་ཏེ། བུ་མོ་དང་སླས་རྣམས་ཀྱིས་ལུས་དང་གཟུགས་ལ་ཀེང་རུས་དང་འདྲ་བར་མཐོང་བ་དང་། ཕོ་བྲང་ཡང་དུར་ཁྲོད་དང་ཐ་མི་དད་
པར་མཐོང་ནས། ཁྱིམ་ལ་སྐྱོ་བར་གྱུར་ཏེ་ནམ་གྱི་གུང་ལ་ཁབ་ནས་བྱུང་སྟེ། དྲང་སྲོང་ཨུ་ཏ་ཀ་དང་། ཨ་ལ་ཙ་ལ་སོགས་པའི་གན་དུ་ཕྱིན་ནས་དེ་དག་ལས་རྣམ་ཤེས་མཐའ་ཡས་སྐྱེ་མཆེད་སྟེངས་དང་། འདུ་ཤེས་མེད་འདུ་
ཤེས་མེད་མིན་སྐྱེ་མཆེད་དག་བཤད་པ་ཐོས་སོ། །ཐོས་ནས་སྐྱེ་མཆེད་ལ་ཡོངས་སུ་བརྟགས་ན་མི་རྟག་པ་དང་། སྡུག་བསྔལ་བ་དང་། ཡོངས་སུ་མ་དག་པ་དང་། བདག་མེད་པ་ཡིན་པར་རྟོགས་ནས་དེ་སྤངས་ཏེ་ཤིང་དྲུང་
ན་ལོ་དྲུག་གི་བར་དུ་དཀའ་བ་སྤྱོད་པ་དང་། དེ་ལྟར་དཀའ་བ་སྤྱོད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་མ་རྒྱས་ཏེ། དེ་ནས་ཡང་ཆུ་བོ་དགའ་སྐྱེད་ཅེས་བྱ་བའི་ནང་དུ་ཁྲུས་བྱས་ནས་གནག་
རྫི་མོས་འོ་མའི་འཇམས་ཕུལ་བ་བཞེས་པ་དང་། བཞེས་ནས་བྱང་ཆུབ་ཀྱི་ཤིང་དྲུང་དུ་གཤེགས་ཏེ་བདུད་སྡིག་ཏོ་ཅན་བཏུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས་བཱ་ར་ཎ་སཱིར་
དགེ་སློང་སྡེ་ལྔ་ལ་ཐོག་མ་ཆོས་ཀྱི་འཁོར་ལོ་བསྐོར་བ་ནས་གྲོང་ཁྱེར་རྩྭ་མཆོག་འདིར་ཡོངས་སུ་མྱ་ངན་ལས་འདས་པའི་བར་དུ་དེ་ལྟ་བུར་ལྟ་བ་ནི་ཉན་ཐོས་དང་རང་སངས་རྒྱས་དག་ལོག་པར་ལྟ་བ་ཞེས་བྱའོ། །རིགས་ཀྱི་བུ་

47-1-347b

བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པའི་མདོ་སྡེ་འདི་མཉན་ཅིང་གཟུངས་སུ་བཟུང་ན། ལྟ་བ་གོང་མ་དེ་དག་ཀུན་སེལ་བར་འགྱུར་རོ། །གལ་ཏེ་ཡི་གེར་བྲིས་ཤིང་ཀློག་གམ། འདོན་ཏམ། ཁོང་དུ་ཆུད་
པར་བྱེད་དམ། གཞན་ལ་རྒྱས་པར་སྟོན་ཏམ། དོན་ཡིད་ལ་བྱེད་ན་ཤེས་རབ་ཡང་དག་པ་ཐོབ་པར་འགྱུར་ཏེ། ལོག་པར་ལྟ་བ་མེད་པར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་
ཆེན་པོའི་མདོ་འདི་ལ་ནན་ཏན་བྱས་ན། བྱང་ཆུབ་སེམས་དཔས་བསྐལ་པ་ཚད་མེད་པའི་བར་དུ་དགའ་ལྡན་གྱི་གནས་ནས་བབས་ཤིང་ཡུམ་གྱི་ལྷུམས་ནས་བལྟམ་པ་ནས། གྲོང་ཁྱེར་རྩྭ་མཆོག་ཏུ་ཡོངས་སུ་མྱ་ངན་ལས་མ་
འདས་པའི་བར་དུ་རྟོགས་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དག་པར་ལྟ་བ་ཞེས་བྱའོ། །དེ་བཞིན་གཤེགས་པས་དགོངས་ཏེ་གསུངས་པའི་དོན་ཟབ་མོ་ཤེས་པ་ཞེས་བྱ་བ་ནི་འདི་ལྟ་སྟེ། ཡོངས་སུ་
མྱ་ངན་ལས་འདས་པ་ཆེན་པོ་འདི་ལས་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པས་ཕས་ཕམ་པ་བཞི་ཉམས་པ་འཐོལ་བར་བྱེད་པ་དང་། དམ་པའི་ཆོས་ལ་སྐུར་བའི་སེམས་བསལ་བ་དང་། མཚམས་མེད་པ་
ལྔའི་ཁ་ན་མ་ཐོ་བ་མ་ལུས་པར་བྱེད་པ་དང་། ལོག་སྲེད་ཅན་གྱི་སེམས་མེད་པར་བྱས་ནས་དེའི་འོག་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་ནི་དགོངས་ཏེ་གསུངས་པའི་དོན་
ཟབ་མོ་ཞེས་བྱའོ། །རིགས་ཀྱི་བུ་གཞན་ཡང་ཇི་ལྟར་ན་དོན་ཤིན་དུ་ཟབ་མོ་ཞེ་ན། སེམས་ཅན་ལ་ཡང་དག་པར་བདག་མེད་པར་ཤེས་ཀྱང་མ་འོངས་པའི་ལས་ཀྱི་འབྲས་བུ་རྣམ་པར་སྨིན་པ་མེད་པར་མི་འགྱུར་བར་ཡིད་ཆེས་པ་དང་། 
ཕུང་པོ་ལྔ་འདི་ཉིད་དུ་མ་ལུས་པར་འགོག་པར་ཤེས་མོད་ཀྱི། དགེ་བ་དང་སྡིག་པའི་ལས་རྣམས་ཀྱང་མེད་པར་མི་འགྱུར་བར་ཤེས་པ་དང་། ལས་རྣམ་པ་མང་པོ་ཡོད་མོད་ཀྱི་བྱེད་པ་པོ་དམིགས་སུ་མེད་པ་དང་། ཕྱིན་པའི་

47-1-348a

གནས་ཡོད་མོད་ཀྱི་འགྲོ་བ་མེད་པ་དང་། འཆིང་བ་ཡོད་མོད་ཀྱི། བཅིངས་པ་མེད་པ་དང་། མྱ་ངན་ལས་འདས་པ་ཡོད་མོད་ཀྱི་འགོག་པ་མེད་པར་ཤེས་པ་སྟེ། དེ་ནི་དགོངས་ཏེ་གསུངས་པའི་དོན་ཟབ་མོ་ཞེས་བྱའོ། །དེ་ནས་
བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་འཚལ་བ་ལྟར་ན། བཅོམ་ལྡན་འདས་ཀྱིས་མ་ཐོས་
པ་ཐོས་པར་འགྱུར་བ་ཞེས་བགྱི་བའི་དོན་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། གལ་ཏེ་མཆིས་པ་ཞིག་ལགས་ན་ནི་ངེས་པར་མཆིས་པའི་ཆོས་ཅན་ནོ། །གལ་ཏེ་མ་མཆིས་ན་ཡང་ངེས་པར་མ་མཆིས་པའི་ཆོས་ཅན་ལགས་
ན། མ་མཆིས་པའི་སྐྱེ་བའི་ཡང་མི་རིགས། མཆིས་པ་ནི་འགོག་པའི་ཡང་མི་རིགས་ཏེ། ཇི་ལྟར་ཐོས་པ་དེ་ཡང་ཐོས་པ་ཞེས་བགྱི་ལ། གང་མ་ཐོས་པ་ཡང་མ་ཐོས་པ་ལགས་ན། ཅིའི་སླད་དུ་མ་ཐོས་པ་ཐོས་པར་
འགྱུར་རོ་ཞེས་གསུངས། བཅོམ་ལྡན་འདས་གང་མི་ཐོས་པ་ནི་ཐོས་པའི་ཡང་མི་རིགས། གང་སྔར་ཐོས་པ་ནི་གདོད་ཐོས་པར་མི་འགྱུར་རོ། །དེ་ཅིའི་སླད་དུ་ཞེ་ན། སྔར་ཐོས་ལགས་པའི་ཕྱིར་རོ། །ད་བས་ན་
ཅིའི་སླད་དུ་མ་ཐོས་པ་ཐོས་པར་འགྱུར་རོ་ཞེས་གསུངས། དཔེར་ན་འགྲོ་བ་ནི་ཕྱིན་ལགས་ན་མི་འགྲོའོ། །འགྲོ་ན་ཕྱིན་པ་མ་ལགས་སོ། །གཞན་ཡང་དཔེར་ན་སྐྱེས་ནས་མི་སྐྱེ་སྟེ། མི་སྐྱེ་བ་ནི་སྐྱེ་བར་མི་འགྱུར། 
ཐོབ་ནས་མི་ཐོབ་སྟེ། མི་ཐོབ་པ་ནི་ཐོབ་པར་མི་འགྱུར་རོ། །ཐོས་ནས་མི་ཐོས་ཏེ། མི་ཐོས་པ་ནི་ཐོས་པར་མི་འགྱུར་བ་ཡང་དེ་བཞིན་ནོ། །བཅོམ་ལྡན་འདས་གལ་ཏེ་མི་ཐོས་པ་ཐོས་པར་གྱུར་ན། སེམས་ཅན་
ཐམས་ཅད་བྱང་ཆུབ་མ་མཆིས་པ་ཡང་མཆིས་པར་འགྱུར་བའི་རིགས། མྱ་ངན་ལས་འདས་པ་མ་ཐོབ་པ་ཡང་ཐོབ་པའི་རིགས། སངས་རྒྱས་ཀྱི་རང་བཞིན་མ་མཐོང་བ་ཡང་སངས་རྒྱས་ཀྱི་རང་བཞིན་མཐོང་བའི་

47-1-348b

རིགས་ན། ཅིའི་སླད་དུ་ཡང་འདི་སྐད་ཅེས་བྱང་ཆུབ་སེམས་དཔའ་ས་བཅུ་ལ་གནས་པ་ནི་སངས་རྒྱས་ཀྱི་རང་བཞིན་མཐོང་མོད་ཀྱི། མངོན་དུ་གསལ་བར་མ་གྱུར་ཏོ་ཞེས་གསུངས། བཅོམ་ལྡན་འདས་གལ་ཏེ་མ་ཐོས་པ་
ཐོས་པར་འགྱུར་ན། དེ་བཞིན་གཤེགས་པས་སྔོན་སུ་ལས་གསན། གལ་ཏེ་གསན་པ་ཞིག་ལགས་ན། ཅིའི་སླད་དུ་དེ་བཞིན་གཤེགས་པས་ལུང་ལས་སྟོན་པ་མེད་དོ་ཞེས་གསུངས། གལ་ཏེ་མ་ཐོས་པ་ཐོས་པས་
དེ་བཞིན་གཤེགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་བ་ལགས་ན། སེམས་ཅན་ཐམས་ཅད་ཀྱང་མ་ཐོས་པ་ཐོས་པས་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པའི་
རིགས་སོ་དེ་བཞིན་གཤེགས་པས་གལ་ཏེ་མྱ་ངན་ལས་འདས་པ་ཆེན་པོའི་མདོ་འདི་མ་ཐོས་པར་སངས་རྒྱས་ཀྱི་རང་བཞིན་མཐོང་བར་གྱུར་ན། སེམས་ཅན་ཐམས་ཅད་ཀྱང་མདོ་སྡེ་འདི་མ་ཐོས་པ་ལགས་ཏེ། སངས་རྒྱས་
ཀྱི་རང་བཞིན་མཐོང་བའི་རིགས་སོ། །བཅོམ་ལྡན་འདས་གཟུགས་ཁ་ཅིག་ནི་མཐོང་། ཁ་ཅིག་ནི་མི་མཐོང་། སྒྲ་ཡང་དེ་བཞིན་ཏེ། ཁ་ཅིག་ནི་ཐོས། ཁ་ཅིག་ནི་མི་ཐོས་ཏེ། མྱ་ངན་ལས་འདས་པ་ཆེན་པོ་ནི་གཟུགས་མ་
ལགས། སྒྲ་མ་ལགས་ན། ཅིའི་སླད་དུ་མཐོང་ངོ་ཐོས་སོ་ཞེས་གསུངས། བཅོམ་ལྡན་འདས་འདས་པ་ནི་འགགས་ལགས་པས་མི་ཐོས། མ་འོངས་པ་ནི་མ་ཕྱིན་པས་མི་ཐོས། ད་ལྟར་མཉན་པའི་ཚེ་ནི་ཐོས་པ་ཞེས་མི་བགྱི་
སྟེ། ཐོས་ནས་སྒྲ་འགགས་པས་ན་ཐོས་པར་མི་འགྱུར་ཏེ། མྱ་ངན་ལས་འདས་པ་ཆེན་པོ་འདི་ཡང་འདས་པ་དང་། མ་འོངས་པ་དང་། ད་ལྟར་མ་ལགས་ལ། གལ་ཏེ་དུས་གསུམ་མ་ལགས་ན་བརྗོད་དུ་མཆིས། གལ་ཏེ་
བརྗོད་དུ་མ་མཆིས་ན་ཐོས་པར་ཡང་མི་འགྱུར་ན་ཅིའི་སླད་དུ་བྱང་ཆུབ་སེམས་དཔའ་མྱ་ངན་ལས་འདས་པ་ཆེན་པོའི་མདོ་སྡེ་འདི་ལ་ནན་ཏན་བགྱིས་ན་མ་ཐོས་པ་ཐོས་པར་འགྱུར་རོ་ཞེས་གསུངས། དེ་ནས་བཅོམ་ལྡན་འདས་

47-1-349a

ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་སྣང་བ་མཐོ་བཙུན་དཔལ་གྱི་རྒྱལ་པོ་ལ་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱིས་ཆོས་ཐམས་ཅད་སྒྱུ་མ་ལྟ་བུ་དང་། སྨིག་རྒྱུ་ལྟ་བུ་དང་། 
དྲི་ཟའི་གྲོང་ཁྱེར་ལྟ་བུ་དང་། ཆུ་ལ་རི་མོ་བྲིས་པ་དང་། གཞན་ཡང་ཆུའི་ཆུ་བུར་དང་། དབུ་བ་དང་། ཆུ་ཤིང་ལྟ་བུར་གསོབ་གསོག་སྙིང་པོ་མེད་པ་དང་། འཚོ་བ་མ་ཡིན། བདག་མ་ཡིན། སྡུག་བསྔལ་དང་བདེ་བ་མེད་པར་རྟོགས་པ་ནི་
ཇི་ལྟར་བྱང་ཆུབ་སེམས་དཔའ་ས་བཅུ་ལ་གནས་པ་དག་གིས་ཤེས་པ་དང་མཐོང་བ་ལྟར་ཤིན་ཏུ་རྟོགས་པ་ལེགས་སོ། །དེ་ནས་འཁོར་གྱི་དཀྱིལ་འཁོར་དེ་ཉིད་དུ་སྐད་ཅིག་ཡུད་ཙམ་གྱིས་འོད་སྣང་བ་ཆེན་པོ་སྔོན་པོ་མ་ཡིན་པར་སྔོན་
པོར་མཐོང་བ། སེར་པོ་མ་ཡིན་པར་སེར་པོར་མཐོང་བ། དམར་པོ་མ་ཡིན་པར་དམར་པོར་མཐོང་བ། དཀར་པོ་མ་ཡིན་པར་དཀར་པོར་མཐོང་བ། ཁ་དོག་མ་ཡིན་པར་ཁ་དོག་ཏུ་མཐོང་བ། སྣང་བ་མ་ཡིན་པར་སྣང་བར་མཐོང་བ། 
མཐོང་བ་མ་ཡིན་པར་མཐོང་བར་གྱུར་པ་ལམ་ཞེས་བྱུང་ངོ་། །དེའི་ཚེ་འཁོར་མང་པོ་དག་ལ་འོད་དེས་རེག་ནས་ལུས་དང་སེམས་རབ་ཏུ་བདེ་བ་ནི་ཇི་ལྟར་དགེ་སློང་དག་སེང་གེའི་རྒྱལ་པོའི་ཏིང་ངེ་འཛིན་ལ་ཞུགས་པ་བཞིན་དུ་གྱུར་
ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གྱིས་བཅོམ་ལྡན་འདས་ལ་འོད་ཟེར་འདི་དག་ག་ལས་བྱུང་ཞེས་གསོལ་ཏོ། །དེའི་ཚེ་དེ་བཞིན་གཤེགས་པ་ཅང་མི་གསུང་སྟེ་མ་བཤད་དོ། །བྱང་ཆུབ་
སེམས་དཔའ་འོད་སྲུང་གིས་ཡང་འཇམ་དཔལ་ལ་ཅིའི་རྒྱུ་ཅིའི་རྐྱེན་གྱིས་འོད་འདིས་འཁོར་མང་པོས་སྣང་བར་འགྱུར་ཅེས་དྲིས་པ་དང་། འཇམ་དཔལ་ཡང་ཅང་མི་སྨྲ་སྟེ་ལན་མ་བཏབ་བོ། །དེ་ནས་བྱང་ཆུབ་སེམས་དཔའ་
ལུས་དཔག་ཏུ་མེད་པས་ཡང་བྱང་ཆུབ་སེམས་དཔའ་འོད་སྲུང་ལ་འདི་སུ་ཡི་འོད་ཅེས་དྲིས་སོ། །བྱང་ཆུབ་སེམས་དཔའ་འོད་སྲུང་ཡང་མི་སྨྲ་སྟེ་ལན་མ་བཏབ་བོ། །བྱང་ཆུབ་སེམས་དཔའ་རྣམ་དག་གནས་པའི་རྒྱལ་

47-1-349b

བུས་བྱང་ཆུབ་སེམས་དཔའ་ལུས་དཔག་ཏུ་མེད་པ་ལ་ཅིའི་རྒྱུ་ཅིའི་རྐྱེན་གྱིས་འཁོར་མང་པོའི་ནང་ན་འོད་འདི་ཡོད་པར་འགྱུར་ཞེས་དྲིས་པ་དང་། བྱང་ཆུབ་སེམས་དཔའ་ལུས་དཔག་ཏུ་མེད་པ་ཡང་ཅང་མི་སྨྲ་སྟེ་ལན་མ་བཏབ་བོ། །
དེ་བཞིན་དུ་བྱང་ཆུབ་སེམས་དཔའ་ལྔ་བརྒྱ་རྣམས་གཅིག་ལ་གཅིག་དེ་ལྟར་དྲིས་མོད་ཀྱི། གང་གིས་ཀྱང་ལན་བཏབ་པ་མེད་དོ། །དེ་ནས་བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། འཇམ་དཔལ་ཅིའི་རྒྱུ་ཅིའི་རྐྱེན་
གྱིས་འཁོར་མང་པོ་འདི་དག་གི་ནང་ན་འོད་འདི་སྣང་བར་གྱུར་ཅེས་བཀའ་སྩལ་པ་དང་། འཇམ་དཔལ་གྱིས་གསོལ་པ། བཅོམ་ལྡན་འདས་འོད་འདི་ནི་ཡེ་ཤེས་ལགས་ཏེ་ཡེ་ཤེས་ཞེས་བགྱི་བ་ནི་རྟག་ཏུ་གནས་པའི་ཆོས་ཅན་ནོ། །
རྟག་ཏུ་གནས་པའི་ཆོས་ཅན་ལ་ནི་རྒྱུ་དང་རྐྱེན་མ་མཆིས་ན། ཅིའི་སླད་དུ་བཅོམ་ལྡན་འདས་ཀྱིས་ཅིའི་རྒྱུ་ཅིའི་རྐྱེན་གྱིས་འོད་འདི་བྱུང་བར་གྱུར་ཞེས་བཀའ་སྩལ། འོད་འདི་ནི་མྱ་ངན་ལས་འདས་པ་ཆེན་པོ་ཞེས་བགྱི་སྟེ། 
མྱ་ངན་ལས་འདས་པ་ཆེན་པོ་ཞེས་བགྱི་བ་ནི་རྟག་ཏུ་གནས་པའི་ཆོས་ཅན་ལགས་ཏེ། རྟག་ཏུ་གནས་པའི་ཆོས་ཅན་ནི་རྒྱུ་དང་རྐྱེན་ལས་མ་བྱུང་ན། ཅིའི་སླད་དུ་བཅོམ་ལྡན་འདས་ཀྱིས་ཅིའི་རྒྱུ་ཅིའི་རྐྱེན་ཀྱིས་འོད་འདི་ཡོད་པར་
གྱུར་ཅེས་བཀའ་སྩལ། འོད་འདི་ནི་དེ་བཞིན་གཤེགས་པ་ཞེས་བགྱི་སྟེ། དེ་བཞིན་གཤེགས་པ་ཞེས་བགྱི་བ་ནི་རྟག་ཏུ་གནས་པའི་ཆོས་ཅན་ལགས་ཏེ། རྟག་ཏུ་གནས་པའི་ཆོས་ཅན་ནི་རྒྱུ་དང་རྐྱེན་ལས་མ་བྱུང་ན། ཅི་སྟེ་
དེ་བཞིན་གཤེགས་པས་རྒྱུ་དང་རྐྱེན་ཅེས་བཀའ་སྩལ། འོད་འདི་ནི་བྱམས་པ་དང་། སྙིང་རྗེ་ཆེན་པོ་ཞེས་བགྱི་སྟེ། བྱམས་པ་དང་སྙིང་རྗེ་ཆེན་པོ་ཞེས་བགྱི་བ་ནི་རྟག་ཏུ་གནས་པའི་ཆོས་ཅན་ལགས་ཏེ། རྟག་ཏུ་གནས་པའི་ཆོས་
ཅན་ནི་རྒྱུ་དང་རྐྱེན་ལས་མ་བྱུང་ན་ཅིའི་སླད་དུ་དེ་བཞིན་གཤེགས་པས་འོད་ཀྱི་རྒྱུ་དང་རྐྱེན་ཞེས་བཀའ་སྩལ། འོད་འདི་ནི་སངས་རྒྱས་རྗེས་སུ་དྲན་པ་ཞེས་བགྱི་སྟེ། སངས་རྒྱས་རྗེས་སུ་དྲན་པ་ཞེས་བགྱི་བ་ནི། རྟག་ཏུ་གནས་

47-1-350a

པའི་ཆོས་ཅན་ལགས་ཏེ། རྟག་ཏུ་གནས་པའི་ཆོས་ཅན་ནི་རྒྱུ་དང་རྐྱེན་ལས་མ་བྱུང་ན། ཅིའི་སླད་དུ་དེ་བཞིན་གཤེགས་པས་རྒྱུ་དང་རྐྱེན་ཞེས་བཀའ་སྩལ། འོད་འདི་ནི་ཉན་ཐོས་དང་རང་སངས་རྒྱས་ཐམས་ཅད་དང་
ཐུན་མོང་མ་ལགས་པའི་ལམ་ཞེས་བགྱི་སྟེ། ཉན་ཐོས་དང་རང་སངས་རྒྱས་དང་ཐུན་མོང་མ་ལགས་པའི་ལམ་ནི་རྟག་ཏུ་གནས་པའི་ཆོས་ཅན་ལགས་ཏེ། རྟག་ཏུ་གནས་པའི་ཆོས་ནི་རྒྱུ་དང་རྐྱེན་ལས་མ་བྱུང་ན། ཅིའི་སླད་
ཏུ་དེ་བཞིན་གཤེགས་པས་རྒྱུ་དང་རྐྱེན་ཞེས་བཀའ་སྩལ། བཅོམ་ལྡན་འདས་རྒྱུ་དང་རྐྱེན་ཞེས་བགྱི་བ་ཡང་མ་མཆིས་སོ། །མ་རིག་པ་འགགས་པའི་རྒྱུ་རྐྱེན་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྒྲོན་མ་རབ་
ཏུ་འབར་བར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཆོས་ཐམས་ཅད་ཀྱི་ཤིན་དུ་ཟབ་མོའི་དོན་དམ་པ་ལ་མ་འཇུག་པར་ཀུན་རྫོབ་ཏུ་བརྗོད་ཅིང་སྨྲོས་ཤིག ། འཇམ་དཔལ་གྱིས་གསོལ་པ། བཅོམ་
ལྡན་འདས་འདི་ནས་ཤར་ཕྱོགས་སུ་འཇིག་རྟེན་གྱི་ཁམས་གང་གཱའི་ཀླུང་ཉི་ཤུའི་བྱེ་མ་སྙེད་འདས་པའི་ཕ་རོལ་ན་སངས་རྒྱས་ཀྱི་ཞིང་མི་གཡོ་བ་ཞེས་བགྱི་བ་མཆིས་ཏེ། སངས་རྒྱས་དེ་བཞུགས་པའི་གནས་ནི་ཆུ་ཞེང་གབ་པར་དཔག་
ཚད་ཁྲི་ཉིས་སྟོང་སྟེ། དེའི་ས་གཞི་ནི་རིན་པོ་ཆེ་སྣ་བདུན་ཤ་སྟག་སྟེ། ས་དང་གསེག་མ་མེད་དོ། །ཤིན་དུ་མཉམ་ཞིང་འཇམ་སྟེ། ས་ལ་སལ་སུལ་དང་ཤང་ཤོང་མེད་དོ། །ཤིང་རྣམས་ནི་གསེར་དང་། དངུལ་དང་བཻ་དཱུརྱ་དང་། ཤེལ་དང་རིན་
པོ་ཆེ་སྣ་བཞི་ལས་བྱས་ཏེ། དུས་ཐམས་ཅད་ཏུ་མེ་ཏོག་དང་འབྲས་བུ་རབ་ཏུ་རྒྱས་སོ། །གལ་ཏེ་སེམས་ཅན་གང་མེ་ཏོག་གི་བསུང་གིས་ཕོག་ན་ལུས་དང་སེམས་རབ་ཏུ་བདེ་བ་ནི་ཇི་ལྟར་དགེ་སློང་བསམ་གཏན་གསུམ་པ་ལ་ཞུགས་པ་
བཞིན་ནོ། །དེའི་ཁོ་ར་ཁོར་ཡུག་ཏུ་ཀླུང་ཆེན་པོ་སུམ་སྟོང་ཡོད་དེ། དེའི་ཆུ་ཤིན་དུ་བཟང་ལ་ཡོན་ཏན་བརྒྱད་དང་ལྡན་ནོ། །གལ་ཏེ་སེམས་ཅན་གང་དེའི་ནང་དུ་ཁྲུས་བྱས་ན་དགའ་བ་དང་བདེ་བ་ཐོབ་པ་ནི་ཇི་ལྟར་དགེ་སློང་དག་བསམ་གཏན་

47-1-350b

གཉིས་པ་ལ་ཞུགས་པ་དང་འདྲའོ། །ཀླུང་དེ་ལ་མེ་ཏོག་ཨུད་པ་ལ་དང་པད་མ་དང་ཀུ་མུ་ཏ་དང་པུན་ཏ་རི་ཀ་དང་མེ་ཏོག་བསུང་ལྡན་དང་། བསུང་ཆེན་དང་། མེ་ཏོག་བསུང་དམ་པ་དང་། རྟག་པ་དང་། སེམས་ཅན་ཐམས་ཅད་ཀྱིས་དབང་མི་བགྱིད་
པ་ཞེས་བགྱི་བའི་མེ་ཏོག་རྣམ་པ་མང་པོ་རྣམ་པ་སྣ་ཚོགས་མཆིས་སོ། །ཀླུང་དེའི་འགྲམ་ན་ཡང་མེ་ཏོག་རྣམ་པ་མང་པོ་མཆིས་པ་ནི་འདི་ལྟ་སྟེ། མེ་ཏོག་ཨ་ཏི་མུག་ཏ་ཀ་དང་མེ་ཏོག་ཙམ་པ་ཀ་དང་མེ་ཏོག་པ་ཏ་ལ་དང་མེ་ཏོག་པ་ཤི་
ལ་དང་། མེ་ཏོག་མ་རི་ཀ་དང་། མེ་ཏོག་མ་རི་ཀ་ཆེན་པོ་དང་། མེ་ཏོག་སི་མ་རི་ཀ་དང་། མེ་ཏོག་སུ་མ་ན་དང་མེ་ཏོག་ཡུ་དེ་ཀ་དང་། མེ་ཏོག་དན་དུ་རི་ཀ་དང་མེ་ཏོག་རྟག་པ་དང་། སེམས་ཅན་ཐམས་ཅད་དབང་མི་བགྱིད་པ་ཞེས་བགྱི་བའི་
མེ་ཏོག་ལ་སོགས་པའོ། །ཀླུང་དེའི་གཏིང་ནི་གསེར་གྱི་བྱེ་མས་བདལ་ཏེ། གསེར་དང་དངུལ་དང་བཻ་དཱུརྱ་དང་། ཤེལ་ཁ་དོག་རྣམ་པ་སྣ་ཚོགས་ཀྱི་ཐང་མ་སྐས་བཞིན་མཆིས་ཏེ། བྱ་མང་པོ་རྣམ་པ་སྣ་ཚོགས་དེའི་སྟེང་ན་འདུ་ཞིང་། 
གཞན་ཡང་སྟག་དང་སྤྱང་ཀི་དང་། སེང་གེ་ལ་སོགས་པ་བྱ་དང་གཅན་ཟན་མ་རུངས་པ་ཚད་མེད་པ་སྙེད་མཆིས་ཏེ། གཅིག་ལ་གཅིག་བུ་བཞིན་དུ་བལྟའོ། །སངས་རྒྱས་ཀྱི་ཞིང་དེ་ན་རྩ་བ་ཉམས་པ་དང་དམ་པའི་ཆོས་
ལ་སྐུར་པ་དང་། ལོག་སྲེད་ཅན་དང་། མཚམས་མེད་པ་ལྔ་ལ་སོགས་པའི་ཁ་ན་མ་ཐོ་བ་བགྱིད་པ་མ་མཆིས་སོ། །ཞིང་དེ་ན་གྲང་དྲོ་རན་ཏེ་བཀྲེས་པ་དང་སྐོམ་པའི་སྡུག་བསྔལ་གྱིས་གདུངས་པ་ཡང་མ་མཆིས་སོ། །འདོད་
ཆགས་དང་ཞེ་སྡང་དང་བག་མེད་པ་དང་ཕྲག་དོག་ཀྱང་མ་མཆིས་སོ། །ཉི་ཟླ་དང་ཉིན་མཚན་དང་དུས་མ་མཆིས་ཏེ། ཇི་ལྟར་སུམ་བཅུ་རྩ་གསུམ་གནམ་དང་མཚུངས་ཏེ། དེའི་མི་རྣམས་ཀྱང་འོད་དང་ལྡན་ནོ། །སོ་སོ་ན་རྒྱགས་པ་
དང་དྲེགས་པའི་སེམས་མ་མཆིས་ཏེ། ཐམས་ཅད་ཀྱང་བྱང་ཆུབ་སེམས་དཔའ་སྐྱེས་བུ་ཆེན་པོ་མངོན་པར་ཤེས་པ་ཐོབ་པ་ཡོན་ཏན་ཆེན་པོ་དང་ལྡན་པ། དམ་པའི་ཆོས་ལ་རིམ་གྲོ་དང་སྟི་སྟང་གི་སེམས་འཇོག་པ། ཐེག་པ་ཆེན་པོས་

47-1-351a

བཏེག་པ། ཐེག་པ་ཆེན་པོ་ལ་དད་པ། ཐེག་པ་ཆེན་པོ་ལ་མོས་པ། ཐེག་པ་ཆེན་པོ་ལ་སྲུང་བ། ཤེས་རབ་ཆེན་པོ་དང་ལྡན་པ། གཟུངས་ཆེན་པོ་ཐོབ་པ། སེམས་ཅན་ཐམས་ཅད་ལ་རྟག་ཏུ་སྙིང་བརྩེ་བ་ཤ་སྟག་གོ། །
བཅོམ་ལྡན་འདས་དེའི་མཚན་ནི་ཟླ་བ་རྒྱས་པའི་འོད་ཅེས་བགྱི་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་རིག་པ། བླ་ན་མེད་པ་
སྐྱེས་བུ་འདུལ་ཞིང་ཁ་ལོ་བསྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་བཞུགས་ཏེ། གང་ནས་གང་དུ་ཆོས་སྟོན་ཀྱང་ཞིང་དེའི་སེམས་ཅན་དག་གིས་མི་ཐོས་པ་གཅིག་ཀྱང་མ་མཆིས་སོ། །སངས་རྒྱས་དེ་
བྱང་ཆུབ་སེམས་དཔའ་སེམས་དཔའ་ཆེན་པོ་བཻ་ཌཱུརྱའི་འོད་ཅེས་བགྱི་བ་ལ་འདི་ལྟར་མྱ་ངན་ལས་འདས་པ་ཆེན་པོའི་མདོ་འདི་སྟོན་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་
སེམས་དཔའ་ཆེན་པོ་གང་མྱ་ངན་ལས་འདས་པ་ཆེན་པོའི་མདོ་ལ་ནན་ཏན་བྱས་ན། སྔོན་མ་ཐོས་པ་ཀུན་ཐོས་པར་འགྱུར་རོ་ཞེས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་བཻ་ཌཱུརྱའི་འོད་ཅེས་བགྱི་བ་དེས། 
སངས་རྒྱས་ཟླ་བ་རྒྱས་པའི་འོད་དེ་ལ་ཞུ་བ་ཡང་ཇི་ལྟར་ན་འདི་ཉིད་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོས་ཞུས་པ་དང་འདྲ་སྟེ་ཐ་དད་པ་མ་མཆིས་སོ། །སངས་རྒྱས་ཟླ་
བ་རྒྱས་པའི་འོད་དེས་བྱང་ཆུབ་སེམས་དཔའ་བཻ་ཌཱུརྱའི་འོད་ལ་བཀའ་སྩལ་པ། རིགས་ཀྱི་བུ་འདི་ནས་ནུབ་ཕྱོགས་སུ་སངས་རྒྱས་ཀྱི་ཞིང་གང་གཱི་ཀླུང་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དོ། །
འཇིག་རྟེན་གྱི་ཁམས་དེ་ན་རི་དང་བྲག་དང་ཅོང་རོང་དང་ཁྲད་ཁྲོད་དང་། གསེག་མ་དང་ཚེར་མ་མ་རུངས་པས་ཡོངསུ་གང་སྟེ། རྟག་ཏུ་སྐྲེས་པ་དང་། སྐོམ་པ་དང་། གྲང་བ་དང་ཚ་བའི་སྡུག་བསྔལ་གྱིས་རྣམ་པར་གཟིར་ཏོ། །

47-1-351b

ཞིང་དེའི་མི་དག་དགེ་སྦྱོང་དང་བྲམ་ཟེ་དང་ཕ་མ་དང་སློབ་དཔོན་དང་། བླ་མ་ལ་བཀུར་སྟི་མི་བྱེད་དེ། ཆོས་མ་ཡིན་པ་ལ་ཞེན་པ་དང་། ཆོས་མ་ཡིན་པ་ལ་འདོད་ཅིང་ཆགས་པ་དང་ལོག་པ་དང་ཆོས་སྤྱོད་པ་དང་། དམ་པའི་ཆོས་ལ་ཡིད་མི་ཆེས་
པ་དང་། ཚེའི་ཚད་རབ་ཏུ་ཐུང་བ་དང་། ས་བ་བྱེད་པ་དག་ཡོད་ན་རྒྱལ་པོས་ཆད་པས་གཅོད་པ་དང་། རྒྱལ་པོ་དག་ཡུལ་དང་སྲིད་ཡོད་བཞིན་དུ་ཆོག་ཅིང་ངོམས་མི་ཤེས་ཏེ། གཞན་གྱི་བདོག་པ་ལ་འདོད་པའི་སེམས་བསྐྱེད་ནས། 
དམག་གིས་བཏབ་པས་གློ་བུར་དུ་ཤི་བ་མང་ངོ་། །རྒྱལ་པོས་དེ་ལྟར་ཆོས་མ་ཡིན་པ་སྤྱོད་པས་རྒྱལ་ཆེན་བཞིའི་ལྷ་དགེ་བ་དག་མི་དགའ་བས་ཐན་ཆེན་བྱུང་བ་དང་ནས་འབྲས་མི་སྐྱེ་བ་དང་། མི་ནད་མང་བ་དང་སྡུག་བསྔལ་ཚད་མེད་
པ་མང་པོས་གདུང་བ་དེ་ན་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པ་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ། 
སྐྱེས་བུ་འདུལ་ཞིང་ཁ་ལོ་བསྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་ལྷག་པར་ཆེ་བས། སེམས་ཅན་ལ་ཐུགས་བརྩེ་བའི་ཕྱིར་གྲོང་ཁྱེར་རྩྭ་མཆོག་ཏུ་ས་ལའི་ཤིང་དྲུང་ན། 
འཁོར་མང་པོ་རྣམས་ལ་མྱ་ངན་ལས་འདས་པ་ཆེན་པོའི་མདོ་སྡེ་འདི་སྟོན་ཏོ། །དེ་ནས་བྱང་ཆུབ་སེམས་དཔའ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོ་ཞེས་བྱ་བ་ཡང་འདི་ཉིད་ལ་བརྩམས་ནས་ཞུས་ཏེ། ཁྱོད་དང་ཐ་དད་
པ་མེད་དོ། །བཅོམ་ལྡན་འདས་དེས་ཀྱང་འདི་བཞིན་དུ་བཀའ་སྩལ་གྱིས་ཁྱེད་མྱུར་དུ་སོང་ཤིག་དང་། ཐོས་པར་འགྱུར་ཞེས་གསུང་ངོ་། །བཅོམ་ལྡན་འདས་བྱང་ཆུབ་སེམས་དཔའ་བཻ་ཌཱུརྱའི་འོད་ཀྱིས་དངོས་པོ་དེ་ལྟ་བུ་དག་ཐོས་
ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་ཁྲི་བཞི་སྟོང་དང་བཅས་ཏེ། འདིར་མཆི་བས་སྔ་ལྟས་འདི་བྱུང་སྟེ། དེའི་རྒྱུ་དེའི་རྐྱེན་གྱིས་འོད་འདི་མཆིས་པར་གྱུར་ཏོ། །དེ་ནི་རྒྱུ་དང་རྐྱེན་ཞེས་ཀྱང་བགྱི་སྟེ། 

47-1-352a

རྒྱུ་དང་རྐྱེན་ཀྱང་མ་ལགས་སོ། །དེ་ནས་བྱང་ཆུབ་སེམས་དཔའ་བཻ་དཱུརྱའི་འོད་ཀྱིས་བྱང་ཆུབ་སེམས་དཔའ་བརྒྱད་ཁྲི་བཞི་སྟོང་དང་བཅས་ཏེ། བ་དན་དང་གདུགས་དང་མེ་ཏོག་དང་སྤོས་དང་ཕྲེང་བ་དང་། རོལ་མོ་རྣམས་སྔ་
མ་བས་ཕུལ་ཏུ་བྱུང་བ་མང་པོ་རྣམ་པ་སྣ་ཚོགས་བཤམས་ཏེ། ཐམས་ཅད་གྲོང་ཁྱེར་རྩྭ་མཆོག་ཏུ་སཱ་ལའི་ཤིང་དྲུང་འདིར་ལྷགས་ནས་སོ་སོ་ནས་མཆོད་པའི་ཡོ་བྱད་ཀྱིས་བཅོམ་ལྡན་འདས་ལ་མཆོད་པ་བྱས་ཏེ། བཅོམ་
ལྡན་འདས་ཀྱིས་ཞབས་ལ་ཕྱག་འཚལ་ནས་ཐལ་མོ་སྦྱར་ཏེ་སྟི་སྟང་དང་བཅས་པས་ལན་གསུམ་བསྐོར་ནས་མཆོད་པ་བྱ་སྟེ། ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་
ལ་བཀའ་སྩལ་པ། རིགས་ཀྱི་བུ་ཁྱེད་འདིར་ཕྱིན་པ་ཡིན་ནམ། མ་ཕྱིན་པ་ཡིན། བྱང་ཆུབ་སེམས་དཔའ་བཻ་དཱུརྱའི་འོད་ཀྱིས་གསོལ་པ། བཅོམ་ལྡན་འདས་ཕྱིན་པ་ཡང་འོང་པ་མ་མཆིས་ལ། མ་ཕྱིན་པ་ཡང་འོངས་པ་མ་
མཆིས་ཏེ། བདག་གིས་དོན་དེ་རྟོགས་པས་ཅི་ཡང་འོངས་པ་མ་མཆིསོ། །བཅོམ་ལྡན་འདས་འདུ་བྱེད་ཐམས་ཅད་གལ་ཏེ་བརྟག་ན་ཡང་འོང་བ་མ་མཆིས་ལ། མི་རྟག་པ་ལགས་ན་ཡང་འོང་བ་མ་མཆིས་ཏེ། སོ་སོའི་
སྐྱེ་བོ་དག་གང་སེམས་ཅན་གྱི་རང་བཞིན་མཆིས་པར་ལྟ་བ་ནི་འོང་བ་དང་མི་འོང་བ་མ་མཆིས་སོ། །བདག་གིས་ནི་སེམས་ཅན་གྱི་རང་བཞིན་དུ་ངེས་པ་མ་མཐོང་ན་ཅིའི་སླད་དུ་འོངས་སམ་མ་འོངས་ཞེས་བཀའ་སྩལ། 
གང་ང་རྒྱལ་ཅན་དག་ནི་སོང་བ་དང་འོང་བ་མ་མཆིས་པར་མཐོང་གི། ང་རྒྱལ་མ་མཆིས་པ་ལ་ནི་སོང་བ་དང་འོང་བ་མ་མཆིས་སོ། །གང་ལེན་པ་དང་བཅས་པ་ནི་སོང་བ་དང་འོང་བ་མ་མཆིས་པར་མཐོང་གི་ལེན་པ་མ་མཆིས་པ་
ལ་ནི་སོང་བ་དང་འོང་བ་མ་མཆིས་སོ། །གང་དེ་བཞིན་གཤེགས་པ་མཐའ་ཡུན་དུ་མྱ་ངན་ལས་འདའ་བར་མཐོང་བ་ནི་སོང་བ་དང་འོང་བ་མ་མཆིས་པར་མཐོང་གི། དེ་བཞིན་གཤེགས་པ་མཐའ་ཡུན་དུ་མྱ་ངན་ལས་

47-1-352b

འདས་པར་མི་ལྟ་བ་ལ་ནི་སོང་བ་དང་འོང་བ་མ་མཆིས་པར་བལྟའོ། །གང་སངས་རྒྱས་ཀྱི་རང་བཞིན་མ་མཐོང་བ་ལ་ནི་འོང་བ་དང་སོང་བ་མཆིས་པ་མཐོང་གི། སངས་རྒྱས་ཀྱི་རང་བཞིན་མཐོང་བ་ལ་ནི་འོང་བ་དང་སོང་བ་མ་མཆིས་སོ། །
གང་ཉན་ཐོས་དང་རང་སངས་རྒྱས་མྱ་ངན་ལས་འདས་པ་མཆིས་པར་མཐོང་བ་ནི་སོང་བ་དང་འོང་བ་མཆིས་ཀྱི་ཉན་ཐོས་དང་རང་སངས་རྒྱས་མྱ་ངན་ལས་འདའ་བར་མི་མཐོང་བ་ལ་ནི་སོང་བ་དང་འོང་བ་མ་མཆིས་སོ། །གང་ཉན་ཐོས་དང་རང་
སངས་རྒྱས་ལ་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མཆིས་པར་ལྟ་བ་ལ་ནི་སོང་བ་དང་འོང་བ་མཆིས་ཀྱི། དེ་ལྟར་མི་ལྟ་བ་ལ་ནི་སོང་བ་དང་འོང་བ་མ་མཆིས་སོ། །གང་དེ་བཞིན་གཤེགས་པ་ལ་རྟག་པ་དང་། 
བདེ་བ་དང་། བདག་དང་ཡོངསུ་དག་པ་མ་མཆིས་པར་ལྟ་བ་ལ་ནི་སོང་བ་དང་འོང་བ་མཆིས་ཀྱི། གང་དེ་བཞིན་གཤེགས་པ་ལ་རྟག་པ་དང་བདེ་བ་དང་བདག་དང་ཡོངསུ་དག་པ་མཆིས་པར་ལྟ་བ་ལ་ནི་སོང་བ་དང་འོང་བ་མ་མཆིསོ། །
བཅོམ་ལྡན་འདས་འདི་ཡང་རེ་ཤིག་བཞག་སྟེ། ཕྱོགས་གཅིག་ཙམ་ཞུ་ན་ཐུགས་བརྩེ་བའི་སླད་དུ་གོ་སྐབས་དབྱེ་བར་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ད་དུས་ལ་བབ་ཀྱིས་ཅི་དང་ཅི་འདོད་པ་དྲིས་
ཤིག་དང་དེ་དང་དེའི་ལུང་ངས་རྣམ་པར་ཕྱེ་སྟེ་བསྟན་པར་བྱའོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་རྣམས་ནི་ཤིན་དུ་ཕྲད་དཀའ་སྟེ། ཇི་ལྟར་མེ་ཏོག་ཨུ་དུམ་བ་ར་བཞིན་ནོ། །ཆོས་ཀྱང་དེ་ལྟར་ཆོ་ཐོས་
དཀའོ། །མདོ་སྡེ་བཅུ་གཉིས་ཀྱི་ནང་ན་ཤིན་དུ་རྒྱས་པ་ཐོས་པ་ཡང་། ཤིན་དུ་དཀའ་བས་ན་སེམས་རྩེ་གཅིག་ཏུ་གཉན་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཻ་དཱུརྱའི་འོད་ཀྱིས་སྐབས་
དབྱེ་བ་གནང་བ་དང་བཀས་སྟོན་པར་འགྱུར་བར་ཤེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་མྱ་ངན་ལས་འདས་པ་ཆེན་པོའི་

47-1-353a

མདོ་སྡེ་འདི་སྒོམ་ན་མ་ཐོས་པ་ཐོས་པར་འགྱུར། དེ་ནས་བཅོམ་ལྡན་འདས་ཀྱིས་ལེགས་སོ་ལེགས་སོ་ཞེས་བྱ་བ་བྱིནོ། །རིགས་ཀྱི་བུ་ཁྱོད་དེང་འདི་ལྟར་ཐེག་པ་ཆེན་པོ་མྱ་ངན་ལས་འདས་པའི་རྒྱ་མཚོ་མ་ལུས་པར་བྱའོ། །
སྙམ་བསམས་པ་དང་། ངས་ཤིན་དུ་བསྟན་ཅིང་ང་སྟོན་པ་མཁས་པ་དང་། དེང་ཁྱོད་ཀྱི་ཐེ་ཚོམ་གྱི་དྲ་བ་དང་ཟུག་རྔུ་ཅི་དང་ཅི་ཡོད་པ་དེ་དག་ཐམས་ཅད་སྨན་པ་ཆེན་པོར་གྱུར་པ་ངས་ལེགས་པར་དབྱུང་ངོ་། །ཁྱོད་ནི་སངས་རྒྱས་ཀྱི་རང་
བཞིན་ལ་གསལ་བར་མ་གྱུར་ཏེ། ངའི་ཤེས་རབ་ཀྱི་སྒྲོན་མ་སྣང་བར་བྱའོ། །ཁྱོད་འཁོར་བའི་ཀླུང་ཆེན་པོ་ལ་རྒལ་བར་འདོད་ན་ཁྱོད་ཀྱིས་དེད་དཔོན་དུ་འགྱུར་བར་བྱའོ། །ང་ལ་ཁྱོད་ཕ་མའི་འདུ་ཤེས་སྐྱེད་ཅིག་དང་། ངས་ཁྱོད་ལ་
ཡང་བུ་དང་འདྲ་བར་དགོངས་སོ། །ཁྱོད་དམ་པའི་ཆོས་ཀྱི་རིན་པོ་ཆེ་འདོད་པ་དང་། ང་ལ་མང་དུ་ཡོད་པ་དང་ཕྲད་པས་ཁྱོད་སྦྱིན་གྱིས། རབ་ཏུ་ཡིད་ལ་བྱས་ཏེ་བརྟགས་པར་ཉོན་ཅིག ། ངས་རྣམ་པར་ཕྱེ་སྟེ་བསྟན་པར་བྱའོ། །
རིགས་ཀྱི་བུ་ཆོས་ཉན་པར་འདོད་ན་ད་ལྟར་དུས་ལ་བབ་བོ། །གལ་ཏེ་ཆོས་ཐོས་ན་དད་པ་སྐྱེད་སེམས་རྩེ་གཅིག་ཏུ་ཉོན་ལ་སྟི་སྟང་དང་རིམ་གྲོ་བགྱིས་ཤིག །དམ་པའི་ཆོས་ལ་སྐྱོན་མ་ཚོལ་ཅིག ། འདོད་ཆགས་དང་ཞེ་སྡང་
དང་གཏི་མུག་ལ་མ་སེམས་ཤིག །ཆོས་སྨྲ་བའི་ཚིགས་བཟང་ངན་ལ་མ་ཏོག་ཤིག །ཆོས་ཐོས་ནས་ང་རྒྱལ་མ་སྐྱེད་ཅིག །བཀུར་སྟི་དང་རྙེད་པ་དང་། གྲགས་པའི་ཕྱིར་མ་བྱེད་པར་འཇིག་རྟེན་ལས་འདས་པའི་
ཟིལ་མངར་གི་ཁེ་ཚོལ་ཅིག །ཡང་འདི་སྙམ་དུ་བདག་ཆོས་ཐོས་ནས་སྔར་བདག་གི་ལུས་དགྲལ་ཏེ་གཟོད་གཞན་སྒྲལ་ལོ། སྙམ་དུ་སེམས་ཤིག་སྔར་བདག་གིས་ལུས་བཀྲོལ་ཏེ་བཟོད་བཞིན་དགྲོལ་ལོ་སྙམ་མ་
སེམས་ཤིག །སྔར་བདག་གི་ལུས་བདེ་བར་རེག་ཏེ་གཟོད་གཞན་ལ་བདེ་བར་བྱའོ། །སྙམ་མ་སེམས་ཤིག །སྔར་བདག་མྱ་ངན་འདས་ནས་བཟོད་གཞན་མྱ་ངན་ལས་འདའོ་སྙམ་མ་སེམས་པར་སངས་རྒྱས་དང་། 

47-1-353b

ཆོས་དང་དགེ་འདུན་ལ་མཚན་ཉིད་མཉམ་པར་འདུ་ཤེས་སྐྱེད་ཅིག །འཁོར་བ་ལ་སྡུག་བསྔལ་ཆེན་པོའི་མཚན་ཉིད་དུ་འདུ་ཤེས་སྐྱེད་ཅིག །མྱ་ངན་ལས་འདས་པ་ཆེན་པོ་ལ་རྟག་པ་དང་བདེ་བ་དང་བདག་དང་ཡོངསུ་དག་པར་འདུ་ཤེས་
བསྐྱེད་དེ། སྔར་གཞན་གྱི་དོན་བྱས་ལ་གདོད་བདག་གི་དོན་བྱའོ། །ཐེག་པ་ཆེན་པོའི་ཕྱིར་གྱི་ཐེག་པ་གཉིས་ཀྱི་ཕྱིར་མ་ཡིན་ནོ། །ཆོས་ཐམས་ཅད་གནས་པ་མེད་པ་ལ་ཆོས་ཐམས་ཅད་ཀྱི་མཚན་ཉིད་དུ་མ་འཛིན་ཅིག །ཆོས་ཐམས་
ཅད་ལ་འདོད་པའི་མཚན་ཉིད་མ་སྐྱེད་པར་རྟག་ཏུ་ཆོས་ཤེས་པ་དང་མཐོང་བའི་མཚན་ཉིད་བསྐྱེད་པར་བྱའོ། །རིགས་ཀྱི་བུ་ཁྱོད་དེ་ལྟར་སེམས་རྩེ་གཅིག་ཏུ་ཆོས་མཉན་ན་དེ་ནི་མ་ཐོས་པ་ཐོས་པར་འགྱུར་བ་ཞེས་བྱའོ། །རིགས་ཀྱི་བུ་
མ་ཐོས་པ་ཐོས་པ་ཡོད་དོ། །མ་ཐོས་པ་མི་ཐོས་པ་ཡོད་དོ། །ཐོས་པ་མི་ཐོས་པ་ཡོད་དོ། །ཐོས་པ་མ་ཐོས་པ་ཡོད་དོ། །རིགས་ཀྱི་བུ་ཇི་ལྟར་མི་སྐྱེ་བ་སྐྱེ་བ་དང་། མ་སྐྱེས་པ་མི་སྐྱེ་བ་དང་། སྐྱེ་བ་མི་སྐྱེ་བ་དང་། སྐྱེས་པ་སྐྱེ་བ་བཞིན་ནོ། །ཇི་ལྟར་མ་
ཕྱིན་པ་ཕྱིན་པ་དང་། མ་ཕྱིན་པ་མ་ཕྱིན་པ་དང་། ཕྱིན་པ་མི་ཕྱིན་པ་དང་། ཕྱིན་པ་ཕྱིན་པ་བཞིན་ནོ། །བཅོམ་ལྡན་འདས་ཇི་ལྟར་ན་མི་སྐྱེ་བ་སྐྱེ་བ་ཞེ་ན། རིགས་ཀྱི་བུ་ཀུན་རྫོབ་ལ་གནས་པ་ཐོག་མ་མངལ་ནས་བྱུང་བའི་ཚེ་ནི་མི་སྐྱེ་བ་སྐྱེ་བ་ཞེས་
བྱའོ། །ཇི་ལྟར་མི་སྐྱེས་པ་སྐྱེ་བ་ཞེ་ན། རིགས་ཀྱི་བུ་མྱ་ངན་ལས་འདས་པ་ཆེན་པོ་ནི་སྐྱེ་བའི་མཚན་ཉིད་མེད་དེ། མ་སྐྱེས་པ་མི་སྐྱེ་བ་ཞེས་བྱའོ། །ཇི་ལྟར་ན་སྐྱེ་བ་མི་སྐྱེ་བ་ཞེ་ན། རིགས་ཀྱི་བུ་ཀུན་རྫོབ་ལྟར་ཤི་བའི་ཚེ་ན་སྐྱེ་བ་མི་
སྐྱེ་བ་ཞེས་བྱའོ། །ཇི་ལྟར་ན་སྐྱེ་བ་སྐྱེས་པ་ཞེ་ན། རིགས་ཀྱི་བུ་སོ་སོའི་སྐྱེ་བོ་ཐམས་ཅད་ནི་སྐྱེ་བ་སྐྱེས་པ་ཞེས་བྱའོ། །དེ་ཅིའི་ཕྱིར་ཞེ་ན། སྐྱེ་བ་སྐྱེས་པ་རྒྱུན་མི་འཆད་པའི་ཕྱིར། ཟག་པ་དང་བཅས་པ་ཐམས་ཅད་སྐད་ཅིག་
སྐད་ཅིག་གིས་སྐྱེ་བའི་ཕྱིར་སྐྱེ་བ་སྐྱེས་པ་ཞེས་བྱའོ། །བྱང་ཆུབ་སེམས་དཔའ་ས་བཞི་པ་ནི་སྐྱེ་བ་མི་སྐྱེ་བ་ཞེས་བྱའོ། །དེ་ཅིའི་ཕྱིར་ཞེ་ན། སྐྱེ་བ་ལ་དབང་ཐོབ་པའི་ཕྱིར་སྐྱེ་བ་མི་སྐྱེ་བ་ཞེས་བྱའོ། །རིགས་ཀྱི་བུ་འདི་དག་ནི་ནང་

47-1-354a

གི་ཆོས་སོ། །ཇི་ལྟར་ཕྱི་རོལ་གྱི་ཆོས་མི་སྐྱེ་བ་དང་། མ་སྐྱེས་པ་མི་སྐྱེ་བ་དང་། སྐྱེ་བ་མི་སྐྱེ་བ་དང་། སྐྱེ་བ་སྐྱེས་པ་ཞེ་ན། རིགས་ཀྱི་བུ་དཔེར་ན་ས་བོན་ནི་མྱུ་གུ་མ་སྐྱེས་པའི་ཚེ་ཆེན་པོ་བཞི་འདུས་ཤིང་འཚོགས་པ་དང་། 
ལས་སུ་བྱས་པས་བཟོད་སྐྱེ་བར་འགྱུར་ཏེ། དེ་ནི་མ་སྐྱེ་བ་སྐྱེ་བ་ཞེས་བྱའོ། །ཇི་ལྟར་མ་སྐྱེས་པ་མི་སྐྱེ་བ་ཞེ་ན། དཔེར་ན་ས་བོན་རུལ་པ་འམ། རྐྱེན་དང་མ་ཕྲད་པ་དེ་ལྟ་བུ་ལ་སོགས་པ་ནི་མ་སྐྱེས་པ་མི་སྐྱེ་བ་ཞེས་བྱའོ། །ཇི་ལྟར་
སྐྱེ་བ་མི་སྐྱེ་བ་ཞེ་ན། དཔེར་ན་མྱུ་གུ་སྐྱེས་ནས་ཚད་དུ་མ་ཕྱིན་པར་མ་སྐྱེས་པ་ནི་སྐྱེ་བ་ཞེ་སྐྱེས་པ་ཞེས་བྱའོ། །ཇི་ལྟར་སྐྱེ་བ་སྐྱེས་པ་ཞེ་ན། མྱུ་གུ་ལས་ཚད་དུ་ཕྱིན་པ་སྐྱེས་པ་བཞིན་ཏེ། གང་སྐྱེ་བ་མ་སྐྱེས་པ་ལ་ནི་ཚད་དུ་ཕྱིན་
པར་སྐྱེ་བ་མེད་དེ། དེ་ལྟར་ཟག་པ་དང་བཅས་པ་ཐམས་ཅད་ནི་ཕྱི་རོལ་གྱི་ཆོས་སྐྱེ་བ་སྐྱེས་པ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཻ་དུརྱའི་འོད་ཀྱིས། བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་གལ་ཏེ་ཟག་པ་དང་བཅས་པའི་ཆོས་ལ་སྐྱེ་བ་མཆིས་ན་རྟག་པ་ལགས་སམ། མི་རྟག་པ་ལགས། སྐྱེ་བ་དེ་རྟག་པ་ལགས་ན་ཟག་པ་དང་བཅས་པའི་ཆོས་ལ་སྐྱེ་བ་མ་མཆིས་སོ། །
གལ་ཏེ་སྐྱེ་བ་དེ་མི་རྟག་ན་ཟག་པ་དང་བཅས་པ་དེ་རྟག་པར་འགྱུར་རོ། །བཅོམ་ལྡན་འདས་སྐྱེ་བ་ཉིད་ཀྱིས་སྐྱེ་བ་སྐྱེད་དོ་ཞེས་བགྱིར་ནི་སྐྱེ་བ་ལ་མཚན་ཉིད་མ་མཆིས་སོ། །གལ་ཏེ་གཞན་གྱིས་སྐྱེ་བར་ནུས་ན་ཅིའི་རྒྱུ་ཅིའི་
རྐྱེན་གྱིས་ཟག་པ་མེད་པ་མ་ཡིན། བཅོམ་ལྡན་འདས་གལ་ཏེ་མ་སྐྱེས་པའི་ཚེ་སྐྱེ་བ་མ་མཆིས་ན་ཅི་སྟེ་བཟོད་སྐྱེ་བ་ཞེས་གདགས། མ་སྐྱེས་པའི་ཚེ་སྐྱེ་བ་མ་མཆིས་ན། ཅིའི་སླད་དུ་ན་མཁའ་ལ་སྐྱེ་བའོ་ཞེས་མ་གསུངས། 
བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་མི་སྐྱེ་བ་སྐྱེ་བ་ཡང་བརྗོད་དུ་མེད། སྐྱེ་བ་མ་སྐྱེས་པ་ཡང་བརྗོད་དུ་མེད། མ་སྐྱེས་པ་མི་སྐྱེ་བ་ཡང་བརྗོད་དུ་མེད། སྐྱེས་པ་ཡང་བརྗོད་དུ་མེད། 

47-1-354b

མ་སྐྱེས་པ་ཡང་བརྗོད་དུ་མེད་དེ། འོན་ཀྱང་རྒྱུ་དང་རྐྱེན་གྱིས་བརྗོད་དུ་ཡང་རུང་ངོ་། །ཇི་ལྟར་ན་མི་སྐྱེ་བ་སྐྱེ་བ་བརྗོད་དུ་མེད་པ་ཞེ་ན། མ་སྐྱེས་པ་ལ་སྐྱེ་བ་ཞེས་ཇི་སྐད་དུ་བརྗོད། དེ་ཅིའི་ཕྱིར་ཞེ་ན། དེ་ཡང་སྐྱེ་བའི་ཕྱིར་རོ། །ཇི་ལྟར་སྐྱེ་བ་
སྐྱེས་པ་བརྗོད་དུ་མེད་པ་ཞེ་ན། སྐྱེ་བ་སྐྱེས་པའི་ཕྱིར་སྐྱེ་ལ། སྐྱེ་བ་སྐྱེས་པའི་ཕྱིར་མ་སྐྱེས་པས་ན་བརྗོད་དུ་མེད་པའོ། །ཇི་ལྟར་སྐྱེ་བ་མ་སྐྱེས་པ་བརྗོད་དུ་མེད་པ་ཞེ་ན། སྐྱེ་བ་ཉིད་ལ་སྐྱེས་པ་ཞེས་བྱ་བ་སྟེ། སྐྱེ་བ་ཉིད་སྐྱེ་བ་མ་ཡིན་པའི་ཕྱིར་
བརྗོད་དུ་མེད་དོ། །ཇི་ལྟར་ན་མ་སྐྱེས་པ་མི་སྐྱེ་བ་ཡང་བརྗོད་དུ་མེད་པ་ཞེ་ན། མ་སྐྱེས་པ་དེ་ནི་མྱ་ངན་ལས་འདས་པ་ཞེས་བྱ་སྟེ། མྱ་ངན་ལས་འདས་པ་ནི་སྐྱེ་བ་མེད་པའི་ཕྱིར་བརྗོད་དུ་མེད་དོ། །དེ་ཅིའི་ཕྱིར་ཞེ་ན། ལམ་བསྒོམས་པས་
ཐོབ་པའི་ཕྱིར་རོ། །སྐྱེས་པ་ཡང་བརྗོད་དུ་མེད་དེ། སྐྱེ་བ་དེ་ཉིད་སྐྱེ་བ་མེད་པའི་ཕྱིར་རོ། །ཇི་ལྟར་མ་སྐྱེས་པ་བརྗོད་དུ་མེད་པ་ཞེ་ན། ཐོབ་པ་ཡོད་པའི་ཕྱིར་རོ། །ཇི་ལྟར་རྒྱུ་དང་རྐྱེན་གྱིས་བརྗོད་དུ་ཡང་རུང་བ་ཞེ་ན། བརྟེན་ཅིང་འབྲེལ་ཏེ་འབྱུང་བའི་
ཆོས་བཅུ་གཉིས་ནི་སྐྱེ་བས་རྒྱུར་འགྱུར་ཏེ། དོན་དེ་ལྟ་བས་ན་བརྗོད་དུ་ཡང་རུང་ངོ་། །རིགས་ཀྱི་བུ་ཁྱོད་སྟོང་པའི་ཏིང་ངེ་འཛིན་ཤིན་ཏུ་ཟབ་མོར་མ་འཇུག་ཅིག །དེ་ཅིའི་ཕྱིར་ཞེ་ན། འཁོར་མང་པོ་དག་དབང་པོ་བརྟུལ་བའི་ཕྱིར་རོ། །རིགས་
ཀྱི་བུ་འདུས་བྱས་ཀྱི་ཆོས་ནི། སྐྱེ་བ་ཡང་རྟག་པ་ཡིན་ནོ། །མི་རྟག་པ་ལ་གནས་པ་ཙམ་སྐྱེ་བ་ཡང་མི་རྟག་པ་ཡིན་ནོ། །གནས་པ་ཡང་རྟག་པ་མ་ཡིན་ཏེ། སྐྱེ་བ་སྐྱེས་པའི་ཕྱིར་གནས་པ་ཡང་མི་རྟག་པའོ། །ཐ་དད་པ་ཡང་རྟག་པ་
མ་ཡིན་ཏེ། ཆོས་ལ་རྟག་པ་མེད་པས་ན་དད་པ་ཡང་མི་རྟག་པའོ། །འཇིག་རྟེན་པ་ཡང་རྟག་པ་ཡིན་ཏེ། ཐོག་མ་ནས་མེད་ལ་ད་ལྟར་ཡོད་པའི་ཕྱིར་འཇིག་པ་ཡང་མི་རྟག་པའོ། །རིགས་ཀྱི་བུ་རང་བཞིན་གྱི་ཕྱིར་ནི་སྐྱེ་བ་དང་། གནས་པ་དང་། ཐ་
དད་པ་དང་། འཇིག་པ་ཡང་རྟག་པ་ཡིན་ཏེ། སྐད་ཅིག་སྐད་ཅིག་མར་འགོག་པའི་ཕྱིར་རྟག་པ་ཞེས་བརྗོད་དུ་ཡང་མི་རུང་ངོ་། །མྱ་ངན་ལས་འདས་པ་ཆེན་པོ་ནི་ཆད་པ་དང་འགོག་པ་ཡིན་པས་མི་རྟག་པ་ཞེས་བྱའོ། །རིགས་ཀྱི་བུ་ཟག་

47-1-355a

པ་དང་བཅས་པའི་ཆོས་ནི་མ་སྐྱེས་པ་ན་སྐྱེ་བའི་རང་བཞིན་ཡོད་པའི་ཕྱིར་བསྐྱེད་པས་སྐྱེ་བར་འགྱུར་རོ། །ཟག་པ་མེད་པའི་ཆོས་ནི་ཐོག་མ་ནས་སྐྱེ་བའི་རང་བཞིན་མེད་པའི་ཕྱིར་བསྐྱེད་པས་སྐྱེ་བར་མི་ནུས་སོ། །ཇི་ལྟར་མེའི་རང་
བཞིན་ཡོད་པས་རྐྱེན་དང་ཕྲད་པ་དང་། མིག་ལ་མཐོང་བའི་རང་བཞིན་ཡོད་པས། གཟུགས་དང་། སྣང་བ་དང་། རྣམ་པར་ཤེས་པའི་རྐྱེན་གྱིས་མཐོང་བ་ལྟར་སེམས་ཅན་གྱི་སྐྱེ་བའི་ཆོས་ཀྱང་དེ་དང་འདྲ་སྟེ། ཐོག་མ་ནས་རང་བཞིན་ཡོད་
པས་ལས་ཀྱི་རྒྱུ་རྐྱེན་དང་། ཕ་མ་འདུས་པ་ལས་སྐྱེ་བ་ཡོད་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཻ་དཱུརྱའི་འོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་ཁྲི་བཞི་སྟོང་སྙེད་ཀྱིས་ཆོས་དེ་
དག་ཐོས་ནས། སྟེང་གི་ནམ་མཁའ་ལ་ཤིང་ཏ་ལ་བདུན་སྲིད་དུ་འཕགས་ཏེ་སྟི་སྟང་དུ་ཐལ་མོ་སྦྱར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས། བདག་ཅག་ལ་ཡང་ནས་ཡང་
བསྟན་ཅིང་མྱ་ངན་ལས་འདས་པ་ཆེན་པོ་འདིའི་རྐྱེན་གྱིས་སྔོན་ཆད་མ་ཐོས་པ་ཐོས་པ་དང་རྟོགས་པར་གྱུར་ཏེ། བྱང་ཆུབ་སེམས་དཔའ་བརྒྱད་ཁྲི་བཞི་སྟོང་ཡང་ཆོས་ཐམས་ཅད་མི་སྐྱེ་བ་སྐྱེ་བ་ལ་སོགས་པ་ཤིན་དུ་རྟོགས་པར་གྱུར་
ཏོ། །བཅོམ་ལྡན་འདས་བདག་ནི་ཐམས་ཅད་རྟོགས་ཏེ། ཐེ་ཚོམ་གྱི་དྲ་བ་ཆོད་ཀྱང་། འཁོར་གྱི་དཀྱིལ་འཁོར་འདིའི་ནང་ན་བྱང་ཆུབ་སེམས་དཔའ་འཇིགས་པ་མེད་པ་ཞེས་བགྱི་བ་ཞིག་གསོལ་ཤིང་ཞུ་བར་འཚལ་ན། བཅོམ་
ལྡན་འདས་ཀྱིས་གནང་ཞིང་སྐབས་དབྱེ་བར་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འཇིགས་པ་མེད་པ་ལ་བཀའ་སྩལ་པ། རིགས་ཀྱི་བུ་ཅི་དང་ཅི་འདོད་པ་དྲིས་ཤིག་དང་། ངས་དེ་དང་དེའི་ལུང་བསྟན་ཅིང་
བཤད་པར་བྱའོ། །དེ་ནས་བྱང་ཆུབ་སེམས་དཔའ་འཇིགས་པ་མེད་པ་འཁོར་བྱང་ཆུབ་སེམས་དཔའ་དྲུག་ཁྲི་བཞི་སྟོང་རྣམས་དང་། ཅིག་ཅར་འདུག་པ་སྟན་ལས་ལངས་ནས་གོས་ཚགས་བཅོས་ཏེ། པུས་མོ་ས་ལ་གཙུགས་ནས་

47-1-355b

ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཞིང་འདིའི་སེམས་ཅན་དག་ལས་ཅི་ཞིག་བགྱིས་ན། མི་གཡོ་བའི་འཇིག་རྟེན་གྱི་ཁམས་སུ་སྐྱེ་བར་འགྱུར། ཞིང་དེའི་བྱང་ཆུབ་སེམས་དཔའ་དག་ནི་
ཅིའི་སླད་དུ། ཤེས་རབ་དང་ལྡན་ཞིང་མིའི་ནང་ན་བལ་གླང་གི་རྒྱལ་པོ་ལྟ་བུར་གཟི་བརྗིད་ཆེ་བ་དང་། རྣལ་འབྱོར་དུ་སྤྱོད་པ་དང་ལྡན་ཞིང་ཤེས་རབ་རྣོ་ཞིང་མྱུར་ཏེ་ཐོས་མ་ཐག་ཏུ་རྟོགས་པར་འགྱུར། དེ་ནས་བཅོམ་ལྡན་འདས་ཀྱིས་
ཚིགས་སུ་བཅད་དེ་བཀའ་སྩལ་པ། སེམས་ཅན་སྲོག་དག་མི་གཅོད་ཅིང་། །ཚུལ་ཁྲིམས་སྡོམ་པ་རབ་བསྡམས་ཏེ། །སངས་རྒྱས་དམ་པའི་བཀའ་སྤྱོད་ན། །མི་གཡོ་ཞིང་དེར་སྐྱེ་བར་འགྱུར། །གཞན་གྱི་ནོར་དག་མི་འཕྲོག་ཅིང་། །
རྟག་ཏུ་ཀུན་ལ་སྦྱིན་བྱེད་དེ། །དགེ་འདུན་འདྲོན་པའི་གནས་འཆའ་ན། །མི་གཡོ་ཞིང་དེར་སྐྱེ་བར་འགྱུར། །གཞན་གྱི་བུད་མེད་མི་ཚོལ་ཞིང་། །བདག་གི་ཆུང་མས་ཆོག་ཤེས་ལ། །མལ་ཆ་ཚུལ་ཁྲིམས་སྲུང་བྱེད་ན། །མི་གཡོ་ཞིང་དེར་སྐྱེ་བར་
འགྱུར། །བདག་དང་གཞན་གྱི་ཁེ་ཚོལ་ཕྱིར། །སྡིགས་མོས་སྐྲག་པར་མི་བྱེད་ཅིང་། །ངག་སྡོམ་རྫུན་དུ་མི་སྨྲ་ན། །མི་གཡོ་ཞིང་དེར་སྐྱེ་བར་འགྱུར། །དགེ་བའི་བཤེས་དང་མི་འབྲལ་ཞིང་། །སྡིག་པའི་གྲོགས་པོ་རབ་སྤངས་ཏེ། །རྟག་ཏུ་འདུམ་
པའི་ཚིག་སྨྲ་ན། །མི་གཡོ་ཞིང་དེར་སྐྱེ་བར་འགྱུར། །ཇི་ལྟར་བྱང་ཆུབ་སེམས་དཔའ་ལྟར། །རྟག་ཏུ་ཚིག་རྩུབ་སྤངས་པས་ན། །སྨྲས་པ་ཐོས་པར་དགའ་བ་ནི། །མི་གཡོ་ཞིང་དེར་སྐྱེ་བར་འགྱུར། །བཞད་གད་རྩེད་མོའི་བར་དུ་ཡང་། །དུས་མ་ཡིན་པའི་
ཚིག་མི་སྨྲ། །དུས་ལ་བབ་པར་སྨྲ་བ་ནི། །མི་གཡོ་ཞིང་དེར་སྐྱེ་བར་འགྱུར། །གཞན་གྱི་ཁེ་དང་རྙེད་མཐོང་ན། །རྟག་ཏུ་དགའ་བའི་སེམས་བསྐྱེད་དེ། །ཕྲག་དོག་མདུད་པར་མི་འཛིན་ན། །མི་གཡོ་ཞིང་དེར་སྐྱེ་བར་འགྱུར། །སེམས་ཅན་དག་ལ་མི་འཚེ་
ཞིང་། །རྟག་ཏུ་བྱམས་པའི་སེམས་བསྐྱེད་དེ། །ཐབས་ཀྱིས་སྡིག་པ་མི་སྐྱེད་ན། །མི་གཡོ་ཞིང་དེར་སྐྱེ་བར་འགྱུར། །སྦྱིན་དང་ཕ་མ་མེད་པ་དང་། །འདས་དང་མ་འོངས་མེད་པ་ཡི། །ངན་པར་ལྟ་བ་མི་སྐྱེད་ན། །མི་གཡོ་ཞིང་དེར་སྐྱེ་བར་འགྱུར། །ལམ་དགོན་

47-1-356a

ཁྲོན་པ་ཆུ་འབྱིན་ཅིང་། །བཟའ་ཤིང་མང་པོ་དག་བསྐྱེད་དེ། །སློང་བ་དག་ལ་ཟས་བྱིན་ན། །མི་གཡོ་ཞིང་དེར་སྐྱེ་བར་འགྱུར། །སངས་རྒྱས་ཆོས་དང་དགེ་འདུན་ལ། །སྤོས་སམ་མར་མེ་གཅིག་ཙམ་འམ། །མ་ཏོག་གཅིག་
ཙམ་མཆོད་བྱས་ན། །མི་གཡོ་ཞིང་དེར་སྐྱེ་བར་འགྱུར། །འཇིགས་པ་དང་ནི་ཁེ་བཀུར་དང་། །བསོད་ནམས་ཡོན་ཏན་ཚོལ་བའི་ཕྱིར། །མདོ་འདིའི་ཚིག་གཅད་གཅིག་བྲིས་ན། །མི་གཡོ་ཞིང་དེར་སྐྱེ་བར་འགྱུར། །གང་ཞིག་མང་པོའི་བསོད་
ནམས་དང་། །ཕན་པའི་དོན་དུ་ཉིན་གཅིག་ཙམ། །མདོ་སྡེ་དམ་པ་འདི་ཀླགས་ན། །མི་གཡོ་ཞིང་དེར་སྐྱེ་བར་འགྱུར། །བླ་ན་མེད་པའི་ལམ་གྱི་ཕྱིར། །ཉིན་ཞག་གཅིག་ཙམ་གྱི་བར་དུ། །ཚུལ་ཁྲིམས་སྡོམ་པ་བརྒྱད་མནོས་ན། །མི་གཡོ་ཞིང་
དེར་སྐྱེ་བར་འགྱུར། །ཚུལ་ཁྲིམས་རྩ་བ་བཤིག་པ་དང་། །རྒྱས་པའི་མདོ་སྡེ་སྐུར་པ་དང་། །ལྷན་ཅིག་གཅིག་ཏུ་མི་གནས་ན། །མི་གཡོ་ཞིང་དེར་སྐྱེ་བར་འགྱུར། །གལ་ཏེ་ནད་ཀྱིས་གདུངས་པའི། །ཤིང་ཐོག་འབྲུ་གཅིག་སྦྱིན་བྱེད་ཅིང་། །
དགའ་བའི་སེམས་ཀྱིས་གཡོག་བྱས་ན། །མི་གཡོ་ཞིང་དེར་སྐྱེ་བར་འགྱུར། །དགེ་འདུན་ནོར་ལ་མི་སྤྱོད་ཅིང་། །སངས་རྒྱས་དཀོར་དག་རབ་བསྲུང་ཏེ། །སངས་རྒྱས་དགེ་འདུན་གནས་ཕྱགས་ན། །མི་གཡོ་ཞིང་དེར་སྐྱེ་བར་འགྱུར། །
རྟག་ཏུ་དགའ་བའི་སེམས་བསྐྱེད་དེ། །སངས་རྒྱས་གཟུགས་སམ་རྟེན་ཡང་རུང་། །ཐེ་བོང་ཙམ་ཞིག་གང་བྱས་པ། །མི་གཡོ་ཞིང་དེར་སྐྱེ་བར་འགྱུར། །གལ་ཏེ་མདོ་སྡེ་འདི་ཡི་ཕྱིར། །བདག་གི་ལུས་དང་རིན་ཆེན་དབྱིག །
ཆོས་སྨྲ་བ་ལ་སྦྱིན་བྱེད་ན། །མི་གཡོ་ཞིང་དེར་སྐྱེ་བར་འགྱུར། །བཅོམ་ལྡན་གསང་བའི་སྙིང་པོ་དག །ཉན་ཏམ་ཡི་གེར་བྲིས་ནས་ནི། །འཛིན་ཅིང་ཀློག་གམ་འདོན་པ་ནི། །མི་གཡོ་ཞིང་དེར་སྐྱེ་བར་འགྱུར། །དེ་ནས་བྱང་ཆུབ་སེམས་
དཔའ་སེམས་དཔའ་ཆེན་པོ་འཇིགས་པ་མེད་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་དེང་ལས་ཅི་དང་ཅི་བྱས་པའི་རྐྱེན་གྱིས་མི་གཡོ་ཞིང་དེར་སྐྱེ་བར་འགྱུར་བར་རྟོགས་པར་གྱུར་ཏོ། །བྱང་ཆུབ་

47-1-356b

སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོས་འགོ་བ་མང་པོ་ལ་སྙིང་བརྩེ་བའི་སླད་དུ་ཞུས་ཏེ། དེ་བཞིན་གཤེགས་པས་རྣམ་པར་ཕྱེ་ཞིང་བསྟན་པས། ལྷ་དང་། མི་དང་། ལྷ་མ་ཡིན་དང་། དྲི་ཟ་དང་། ནམ་
མཁའ་ལྡིང་དང་། ལྟོ་འཕྱེ་ཆེན་པོ་ལ་སོགས་པ་ཐམས་ཅད་ལ་ཡང་ཕན་པའི་དོན་དུ་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོ་ལ་བཀའ་སྩལ་
པ། ལེགསོ་ལེགས་སོ། །རིགས་ཀྱི་བུ་ཁྱོད་ཤིན་དུ་ཡིད་ལ་བྱས་ཏེ། ལེགས་པར་ཉོན་ཅིག་དང་ངས་ཁྱོད་ལ་རྒྱུ་དང་རྐྱེན་གང་གིས་མ་ཕྱིན་པར་མི་ཕྱིན་པ་དང་། རྒྱུ་དང་རྐྱེན་གང་གིས་མི་ཕྱིན་པར་ཕྱིན་པ་དང་། རྒྱུ་དང་རྐྱེན་གང་གིས་ཕྱིན་པར་
མི་ཕྱིན་པ་དང་། རྒྱུ་དང་རྐྱེན་གང་གིས་ཕྱིན་པར་ཕྱིན་པ་དག་རྣམ་པར་དགྲོལ་ཞིང་བཤད་པར་བྱའོ། །ཅིའི་རྒྱུ་ཅིའི་རྐྱེན་གྱིས་མ་ཕྱིན་པར་མི་ཕྱིན་པ་ཞེ་ན། རིགས་ཀྱི་བུ་མི་ཕྱིན་པ་ཞེས་བྱ་བ་ནི་མྱ་ངན་ལས་འདས་པ་ཆེན་པོ་སྟེ། 
སོ་སོའི་སྐྱེ་བོ་དག་མ་ཕྱིན་པ་ནི་འདོད་ཆགས་དང་ཞེ་སྡང་དང་གཏི་མུག་དང་བཅས་པས་ལུས་ཀྱི་ལས་དང་ངག་གི་ལས་ཡོངསུ་མ་དག་སྟེ། མ་བརྟགས་པའི་དངོས་པོ་ཐམས་ཅད་འཆང་ཞིང་རྩ་བ་བཞི་ཉམས་པ་དང་། 
ཤིན་ཏུ་རྒྱས་པའི་མདོ་སྡེ་ལ་བསྐུར་བ་དང་། ལོག་སྲེག་ཅན་གྱིས་ལས་བྱེད་པ་དང་། མཚམས་མེད་པ་ལྔའི་ཁ་ན་མ་ཐོ་བ་བྱེད་པའི་ཕྱིར་མ་ཕྱིན་པར་མི་ཕྱིན་པ་ཞེས་བྱའོ། །རིགས་ཀྱི་བུ་ཅིའི་རྒྱུ་ཅིའི་རྐྱེན་གྱིས་མི་ཕྱིན་པར་ཕྱིན་པ་ཞེ་ན། 
མི་ཕྱིན་པར་ཕྱིན་པ་ཞེས་བྱ་བ་ནི་མྱ་ངན་ལས་འདས་པ་ཆེན་པོ་སྟེ། དོན་ཇི་ལྟ་བུ་ཞིག་གིས་ཕྱིན་ཅེ་ན། འདོད་ཆགས་དང་ཞེ་སྡང་དང་། གཏི་མུག་དང་ལུས་དང་། ངག་གི་ལས་ངན་པར་སྤྱོད་པ་ཡོངས་སུ་སྤངས་ཏེ། མ་བརྟགས་པའི་
དངོས་པོ་མི་འཆང་བ་དང་། རྩ་བ་བཞི་མི་ཉམས་པ་དང་། ཤིན་ཏུ་རྒྱས་པའི་མདོ་སྡེ་ལ་མི་སྐུར་བ་དང་། ལོག་སྲེད་ཅན་གྱི་ལས་མི་བྱེད་པ་དང་། མཚམས་མེད་པ་ལྔའི་ཁ་ན་མ་ཐོ་བའི་ལས་མི་བྱེད་པ་སྟེ། དོན་དེ་ལྟ་བས་ན་མི་ཕྱིན་པར་

47-1-357a

ཕྱིན་པ་ཞེས་བྱའོ། །རྒྱུན་དུ་ཞུགས་པ་ནི་བསྐལ་པ་བརྒྱད་ཁྲིས་ཕྱིན་ནོ། །ལན་གཅིག་ཕྱིར་ལྡོག་པ་ནི་བསྐལ་པ་དྲུག་ཁྲིས་ཕྱིན་ནོ། །ཕྱིར་མི་ལྡོག་པ་ནི་བསྐལ་པ་བཞི་ཁྲིས་ཕྱིན་ནོ། །དགྲ་བཅོམ་པ་ནི་བསྐལ་པ་ཉི་ཁྲིས་ཕྱིན་ཏོ། །
རང་སངས་རྒྱས་ནི་བསྐལ་པ་སྟོང་ཕྲག་བཅུས་ཕྱིན་ཏོ། །དོན་དེའི་ཕྱིར་མི་ཕྱིན་པར་ཕྱིན་པ་ཞེས་བྱའོ། །རིགས་ཀྱི་བུ་ཅིའི་རྒྱུ་ཅིའི་རྐྱེན་གྱིས་ཕྱིན་པར་མི་ཕྱིན་པ་ཞེ་ན། ཕྱིན་པ་ཞེས་བྱ་བ་ནི་སྲིད་པ་ཉི་ཤུ་རྩ་ལྔ་སྟེ། སེམས་ཅན་ཐམས་
ཅད་རྟག་ཏུ་ཉོན་མོངས་པ་ཚད་མེད་པ་སྙེད་ཀྱིས་བཅིངས་ཏེ། ཀུན་ནས་གླགས་པས་ཡང་ནས་ཡང་དུ་འཁོར་བ་ནི། འཁོར་ལོ་འཁོར་བ་བཞིན་དུ་སྤོང་མི་ནུས་ཏེ། དེ་ནི་ཕྱིན་པ་ཞེས་བྱ་བ་ནི་སྲིད་པ་ཉི་ཤུ་ཉན་ཐོས་དང་རང་སངས་རྒྱས་དང་བྱང་ཆུབ་
སེམས་དཔའ་རྣམས་ནི་ཡོངསུ་སྤངས་པས་མི་ཕྱིན་པ་ཞེས་བྱའོ། །སེམས་ཅན་གདུལ་བའི་ཕྱིར་འདི་དག་ཏུ་སྣང་བར་སྟོན་པས་ན་ཕྱིན་པ་ཞེས་ཀྱང་བྱའོ། །རིགས་ཀྱི་བུ་ཅིའི་རྒྱུ་ཅིའི་རྐྱེན་གྱིས་ཕྱིན་པར་ཕྱིན་པ་ཞེ་ན། ཕྱིན་པ་ཞེས་བྱ་བ་ནི་སྲིད་པ་
ཉི་ཤུ་ལྔ་སྟེ། བུས་པ་མ་རབས་སོ་སོའི་སྐྱེ་བོ་ཐམས་ཅད་དང་། རྒྱུན་ཏུ་ཞུགས་པ་དང་། ལན་ཅིག་ཕྱིར་མི་ལྡོག་པའི་བར་དུ་ཉོན་མོངས་པའི་རྐྱེན་གྱིས་ཕྱིན་པར་ཕྱིན་པ་ཞེས་བྱའོ། །རིགས་ཀྱི་བུ་མ་ཐོས་པ་ཐོས་པ་ཡང་དེ་བཞིན་ཏེ། མ་
ཐོས་པ་ཐོས་པ་ཡོད་དོ། །མ་ཐོས་པ་མི་ཐོས་པ་ཡོད་དོ། །ཐོས་པ་མ་ཐོས་པ་ཡོད་དོ། །ཐོས་པ་ཐོས་པ་ཡོད་དོ། །དེ་ལ་ཇི་ལྟར་ན་མ་ཐོས་པ་ཐོས་པ་ཞེ་ན། རིགས་ཀྱི་བུ་མ་ཐོས་པ་ཞེས་བྱ་བ་ནི་མྱ་ངན་ལས་འདས་པ་ཆེན་པོ་སྟེ། དེ་ཅིའི་
ཕྱིར་མ་ཐོས་པ་ཞེ་ན། འདུས་བྱས་མ་ཡིན། སྒྲ་མ་ཡིན། བརྗོད་དུ་མེད་པའི་ཕྱིར་རོ། །ཇི་ལྟར་ཐོས་པ་ཞེ་ན། མིང་ཐོས་པར་འགྱུར་བ་ནི་འདི་ལྟ་སྟེ། རྟག་པ་དང་། བདེ་བ་དང་། བདག་དང་། ཡོངས་སུ་དག་པ་དག་མ་
ཐོས་པ་ཐོས་པ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱིས་རྒྱལ་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་

47-1-357b

བཅོམ་ལྡན་འདས་ཀྱིས་གསུངས་པ་ལྟར་མྱ་ངན་ལས་འདས་པ་ཆེན་པོ་ནྀ་ཐོས་པར་མི་རུང་ན། ཅིའི་སླད་དུ་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་དག་ཐོས་པར་རུང་ཞེས་གསུངས། བཅོམ་ལྡན་འདས་དེ་ཡང་ཅིའི་
སླད་དུ་ཞེ་ན། ཉོན་མོངས་པ་བཅད་པ་ནི་མྱ་ངན་ལས་འདས་པ་ཞེས་བགྱི་སྟེ། གལ་ཏེ་མཆོད་པ་ལ་མྱ་ངན་ལས་འདས་པ་ཞེས་མི་བགྱི་ན། དེ་ན་དེའི་ཕྱིར་མྱ་ངན་ལས་འདས་པའི་རང་བཞིན་ཐོག་མ་ནས་མ་མཆིས་ཏེ། ད་ལྟར་མཆིས་པ་
ལགས་སོ། །འཇིག་རྟེན་གྱི་ཆོས་ལྟར་ཐོག་མ་མ་མཆིས་ལ། ད་ལྟར་མཆིས་པར་གྱུར་ན་མི་རྟག་པའི་ཆོས་ཅན་དུ་འགྱུར་རོ། །དཔེར་ན་རྫ་མ་ལ་སོགས་པ་ནི་ཐོག་མ་མ་མཆིས་ལ་ད་ལྟ་མཆིས་པར་གྱུར་ཏེ། མཆིས་ནས་སླར་ཡང་མ་མཆིས་པར་
འགྱུར་བས་མི་རྟག་པ་ཞེས་བགྱི་སྟེ། མྱ་ངན་ལས་འདས་པ་ཡང་དེ་ལྟ་བུ་ལགས་ན། ཅིའི་སླད་དུ་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཞེས་གསུངས། གཞན་ཡང་བཅོམ་ལྡན་འདས་ཇི་ཙམ་དུ་བཀོད་པའི་རྒྱུས་
གྲུབ་པ་ནི་ཀུན་ཀྱང་མི་རྟག་པ་ཞེས་བགྱི་སྟེ། མྱ་ངན་ལས་འདས་པ་ཡང་དེ་ལྟ་བུ་ལགས་ན་མི་རྟག་པ་ལགས་པའི་རིགསོ། །ཅིའི་རྒྱུ་དང་རྐྱེན་གྱི་མི་རྟག་ཅེས་ན། འདི་ལྟ་སྟེ། བྱང་ཆུབ་ཀྱི་ཕྱོགས་ཆོས་སུམ་བཅུ་རྩ་བདུན་དང་། ཕ་རོལ་
ཏུ་ཕྱིན་པ་དྲུག་དང་། ཚད་མེད་པ་བཞི་དང་། ཀེང་རུས་ལ་རྟོག་པ་དང་། དབུགས་བགྲང་བ་དང་། དྲན་པ་ཉེ་བར་བཞག་པ་དྲུག་དང་། ཆེན་པོ་དྲུག་འཇིག་པ་ལ་སོགས་པ་ཐམས་ཅད་མྱ་ངན་ལས་འདས་པ་སྒྲུབ་པའི་
རྒྱུ་དང་རྐྱེན་དུ་འགྱུར་བར་མི་རྟག་པ་ཞེས་བགྱིའོ། །གཞན་ཡང་བཅོམ་ལྡན་འདས་སྲིད་པ་ནི་མི་རྟག་པ་ཞེས་བགྱི་སྟེ། གལ་ཏེ་མྱ་ངན་ལས་འདས་པ་སྲིད་པ་ལགས་ན། མི་རྟག་པར་ཡང་འགྱུར་བའི་རིགསོ། །
ཇི་ལྟར་བཅོམ་ལྡན་འདས་ཀྱིས་སྔོན་ལུང་ལས། ཉན་ཐོས་དང་། རང་སངས་རྒྱས་དང་། སངས་རྒྱས་བཅོམ་ལྡན་འདས་ཀུན་མྱ་ངན་ལས་འདས་པ་སྲིད་དོ་ཞེས་

47-1-358a

གསུངས་ཏེ། དོན་དེ་ལྟ་བས་ན་མི་རྟག་པ་ཞེས་བགྱི་བར་འགྱུར་རོ། །གཞན་ཡང་བཅོམ་ལྡན་འདས་བལྟར་རུང་བའི་ཆོས་ནི་ཀུན་ཀྱང་མི་རྟག་པ་ལགས་ཏེ། བཅོམ་ལྡན་འདས་ཀྱིས་སྔོན་མྱ་ངན་ལས་འདས་པ་མཐོང་བ་ནི་ཉོན་མོངས་པ་ཐམས་
ཅད་ཆོད་པར་འགྱུར་རོ། །ཞེས་གསུངས་སོ། །གཞན་ཡང་བཅོམ་ལྡན་འདས་དཔེར་ན་ནམ་མཁའ་སྟོང་པ་ནི་སེམས་ཅན་ཐམས་ཅད་ལ་མཉམ་པར་ཐོགས་པ་དང་སྒྲིབ་པ་མ་མཆིས་པའི་སླད་དུ་རྟག་པ་ཞེས་བགྱིའོ། །གལ་ཏེ་མྱ་ངན་ལས་འདས་པ་རྟག་པ་མཉམ་
པ་ལགས་ན། ཅིའི་སླད་དུ་སེམས་ཅན་དག་ཐོབ་པ་དང་མ་ཐོབ་པ་མཆིས་པར་འགྱུར། མྱ་ངན་ལས་འདས་པ་ཡང་དེ་ལྟ་བུ་ལགས་ཏེ། སེམས་ཅན་ཐམས་ཅད་ལ་མི་མཉམ་ན་ལྟ་རྟག་པ་ཞེས་བགྱིར་མི་རུང་ངོ་། །བཅོམ་ལྡན་འདས་དཔེར་ན་མི་མང་པོ་བརྒྱ་ལ་དགྲ་
གཅིག་མཆིས་ལ་གལ་ཏེ་དགྲ་དེ་བསད་ན་མི་མང་པོ་ཀུན་བདེ་བར་འགྱུར་རོ། །ཅི་སྟེ་མྱ་ངན་ལས་འདས་པ་ཡང་མཉམ་པའི་ཆོས་ལགས་ན་ནི་མི་གཅིག་གིས་ཐོབ་ན་མི་མང་པོ་ཀུན་གྱིས་ཐོབ་པའི་རིགས་སོ། །མི་གཅིག་གིས་ཉོན་མོངས་པ་ཆོད་ན་མི་མང་
པོ་ཀུན་གྱིས་ཀྱང་ཆོད་པའི་རིགས་སོ། །གལ་ཏེ་དེ་ལྟ་བུ་མ་ལགས་ན་ཅིའི་སླད་དུ་རྟག་པ་ཞེས་བགྱི། དཔེར་ན་ལ་ལ་ཞིག་གིས་རྒྱལ་པོ་དང་། རྒྱལ་བུ་དང་། ཕ་མ་དང་། སློབ་དཔོན་དང་བླ་མ་ལ་བཀུར་སྟི་དང་། མཆོད་པ་དང་། རིམ་གྲོ་དང་སྟི་སྟང་བྱེད་ན་བདེ་བ་ཐོབ་པར་
འགྱུར་སྟེ། དེ་ནི་རྟག་པ་ཞེས་མི་བགྱིའོ། །མྱ་ངན་ལས་འདས་པ་ཡང་དེ་ལྟ་བུ་ལགས་ན་ནི་རྟག་པ་ཞེས་མི་བགྱིའོ། །དེ་ཅིའི་སླད་དུ་ཞེ་ན། ཇི་ལྟར་བཅོམ་ལྡན་འདས་ཀྱིས་སྔོན་ལུང་ལས་དགའ་བོ་ལ་འདི་སྐད་དུ་གལ་ཏེ་ལ་ལ་ཞིག་གིས་མྱ་ངན་ལས་
འདས་པ་ལ་སྟི་སྟང་དུ་བྱས་ན་ཀུན་ནས་ཉོན་མོངས་པ་ཆོད་དེ། བདེ་བ་ཚད་མེད་པ་ཐོབ་པར་འགྱུར་ཞེས་གསུངས་ཏེ། དོན་དེ་ལྟ་བས་ན་རྟག་པ་ཞེས་མི་བགྱིའོ། །བཅོམ་ལྡན་འདས་གལ་ཏེ་མྱ་ངན་ལས་འདས་པ་ལ་རྟག་པ་དང་། བདེ་བ་དང་བདག་དང་། 
ཡོངས་སུ་དག་པའི་མིང་མཆིས་ན་རྟག་པ་ཞེས་བགྱིའོ། །དེ་སྟེ་མ་མཆིས་ན་ནི་ཇི་ལྟར་བཤད་པར་རུང་། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོ་ལ་

47-1-358b

བཀའ་སྩལ་པ། མྱ་ངན་ལས་འདས་པ་ཉིད་ནི་ཐོག་མ་མེད་པ་ལ་ད་ལྟ་ཡོད་པ་མ་ཡིན་ནོ། །གལ་ཏེ་མྱ་ངན་ལས་འདས་པ་ཉིད་ཐོག་མ་མེད་ལ་ད་ལྟར་ཡོད་ན། ཟག་པ་མེད་པ་རྟག་ཏུ་གནས་པའི་ཆོས་མ་ཡིན་པར་འགྱུར་རོ། །སངས་རྒྱས་
རྣམས་བྱུང་ཡང་རུང་སངས་རྒྱས་མ་བྱུང་ཡང་རུང་། རང་བཞིན་དང་མཚན་ཉིད་ནི་རྟག་ཏུ་གནས་ཏེ། སེམས་ཅན་དག་ཉོན་མོངས་པས་བསྒྲིབས་པས་མྱ་ངན་ལས་འདས་པ་མི་མཐོང་བའི་ཕྱིར་མེད་དོ་སྙམ་སེམས་སོ། །བྱང་ཆུབ་
སེམས་དཔའ་སེམས་དཔའ་ཆེན་པོ་ཚུལ་ཁྲིམས་དང་ཏིང་ངེ་འཛིན་དང་། ཤེས་རབ་ལ་གོམས་པ་དག་ནི་ཉོན་མོངས་པ་བཅད་ནས་མཐོང་བར་འགྱུར་ཏེ། དེ་བས་ན་མྱ་ངན་ལས་འདས་པ་ནི་རྟག་ཏུ་གནས་པའི་ཆོས་ཅན་ཏེ་སྔོན་མེད་
ལ་ད་ལྟར་ཡོད་པ་མ་ཡིན་པར་རིག་པས་དེ་བས་ན་རྟག་པ་ཞེས་བྱའོ། །རིགས་ཀྱི་བུ་དཔེར་ན་མུན་ཁང་གི་ནང་ན་ཁྲོན་པ་ཞིག་ན་རིན་པོ་ཆེ་སྣ་བདུན་རྣམ་པ་སྣ་ཚོགས་ཡོད་པ་མི་དག་གིས་ཡོད་པར་ཤེས་ཀྱང་མུན་པ་གནག་པས་
མི་མཐོང་ངོ་། །ཤེས་རབ་ཅན་ཐབས་ལ་མཁས་པས་སྒྲོན་མ་ཆེན་པོ་ཐོགས་ཏེ་བལྟས་པ་དང་ཀུན་སྣང་བར་གྱུར་ཏེ་འདི་སྙམ་དུ་ཆུ་དང་རིན་པོ་ཆེ་སྣ་བདུན་ཐོག་མ་མེད་པ་ལ་ད་ལྟར་ཡོད་པར་གྱུར་ཏོ་སྙམ་མི་སེམས་སོ། །མྱ་ངན་ལས་
འདས་པ་ཡང་དེ་དང་འདྲ་སྟེ། ཐོག་མ་ནས་ཡོད་པ་ཡིན་གྱི། ད་ལྟར་བཟོད་ཡོད་པ་མ་ཡིན་ནོ། །ཉོན་མོངས་པའི་མུན་པས་སེམས་ཅན་དག་སྒྲིབས་པའི་ཕྱིར་མི་མཐོང་གི། ཐམས་ཅད་མཁྱེན་པའི་ཡེ་ཤེས་མངའ་བའི་དེ་བཞིན་
གཤེགས་པས་ཤིན་ཏུ་མཁས་པའི་ཐབས་ཀྱིས་ཤེས་རབ་ཀྱི་སྒྲོན་མ་བཙུགས་ཏེ། བྱང་ཆུབ་སེམས་དཔའ་དག་མྱ་ངན་ལས་འདས་པའི་རྟག་པ་དང་། བདེ་བ་དང་བདག་དང་། ཡོངས་སུ་དག་པ་མཐོང་བར་བྱས་སོ་དེ་བས་ན་ཤེས་
རབ་ཅན་གྱིས་མྱ་ངན་ལས་འདས་པ་འདི་ལ་ཐོག་མ་མེད་པ་ད་ལྟར་ཡོད་པར་འགྱུར་རོ་ཞེས་བརྗོད་པར་མི་བྱའོ། །རིགས་ཀྱི་བུ་ཁྱོད་ཀྱིས་བཀོད་པའི་རྒྱུས་མྱ་ངན་ལས་འདས་པ་འགྲུབ་པ་མི་རྟག་གོ་ཞེས་བྱ་བ་དེ་མི་རུང་ངོ་། །དེ་ཅིའི་སླད་དུ་ཞེ་ན། 

47-1-359a

རིགས་ཀྱི་བུ་མྱ་ངན་ལས་འདས་པའི་ངོ་བོ་ཉིད་ནི་སྐྱེ་བ་མ་ཡིན། བྱུང་བ་མ་ཡིན། རྫུན་པ་མ་ཡིན་མི་རྫུན་པ་མ་ཡིན། ལས་སུ་བྱས་ནས་སྐྱེས་པ་མ་ཡིན། ཟག་པ་དང་འདུས་བྱས་ཀྱི་ཆོས་མ་ཡིན། ཐོས་པ་མ་ཡིན་མཐོང་བ་མ་
ཡིན། ལྟུང་བ་མ་ཡིན་འཆིང་བ་མ་ཡིན། མཚན་ཉིད་ཐ་དད་པ་མ་ཡིན། མཚན་ཉིད་གཅིག་པ་མ་ཡིན། འགྲོ་བ་མ་ཡིན། ལྡོག་པ་མ་ཡིན་འདས་པ་དང་མ་འོངས་པ་དང་། ད་ལྟར་མ་ཡིན་གཅིག་པུ་མ་ཡིན། མང་པོ་མ་ཡིན་རིང་པོ་མ་ཡིན། 
ཐུང་ངུ་མ་ཡིན། ཟླུམ་པོ་མ་ཡིན་གྲུ་བཞི་མ་ཡིན། སྨྱུང་སྨྱུང་པོ་མ་ཡིན། སྣྲེལ་བཞི་མ་ཡིན། མཚན་ཉིད་མ་ཡིན་འདུ་ཤེས་མ་ཡིན། མིང་མ་ཡིན་གཟུགས་མ་ཡིན་རྒྱུ་མ་ཡིན། འབྲས་བུ་མ་ཡིན་བདག་དང་བདག་གི་མ་ཡིན་ནོ། །
དེ་ལྟ་བས་ན་མྱ་ངན་ལས་འདའ་བ་ནི་རྟག་པ་མི་འགྱུར་མི་འཕོ་བ་མ་ཡིན་ཏེ་དེ་བས་ན་བསྐལ་པ་ཚད་མེད་གྲངས་མེད་པའི་བར་དུ་དགེ་བའི་ཆོས་སྒྲུབ་ཅིང་བསྒོམས་པས་ཡོངས་སུ་བརྒྱན་ན་གདོད་མཐོང་བར་འགྱུར་རོ། །རིགས་ཀྱི་བུ་དཔེར་
ན་སའི་འོག་ནི་ཆུ་ཡོན་ཏན་བརྒྱད་དང་ལྡན་པ་ཡོད་ཀྱང་། སེམས་ཅན་ཐམས་ཅད་ཀྱིས་ཐོབ་པར་མི་རུང་ངོ་། །ཤེས་རབ་ཅན་ལ་ལ་ཞིག་གིས་ལས་སུ་བྱས་ཏེ་བསྐོས་ན་གཟོད་ཐོབ་པར་འགྱུར་བ་ལྟར་མྱ་ངན་ལས་འདས་པ་ཡང་དེ་དང་
འདྲའོ། །དཔེར་ན་དམུས་ལོང་དག་ཉི་མ་དང་ཟླ་བ་མི་མཐོང་སྟེ། སྨན་པ་མཁས་པས་སྨན་བྱས་ན་སྣང་ཞིང་མཐོང་བར་འགྱུར་ཏེ་ཉི་མ་དང་ཟླ་བ་དེ་ཡང་སྔོན་མེད་ལ་ད་ལྟ་ཡོད་པ་ཡིན་ནོ། །མྱ་ངན་ལས་འདས་པ་ཡང་དེ་དང་འདྲ་སྟེ། 
ཐོག་མ་ནས་ཡོད་པ་ཡིན་གྱི་ད་ལྟར་གཟོད་ཡོད་པ་མ་ཡིན་ནོ། །རིགས་ཀྱི་བུ་ཇི་ལྟར་ཉེས་པ་བྱས་པ་དག་བཅིངས་ཏེ་ཁྲི་མོན་གྱི་ནང་དུ་བཅུག་པ་ནི་རིང་མོ་ཞིག་ན་གདོད་ཐར་ཏེ་བྱུང་ནས། སླར་ཁྱིམ་དུ་ཕ་མ་དང་། ཕུ་ནུ་དང་བུ་དང་། 
ཆུང་མ་དང་གཉེན་བཤེས་མ་མཐོང་བ་བཞིན་དུ་མྱ་ངན་ལས་འདས་པ་ཡང་དེ་དང་འདྲའོ། །རིགས་ཀྱི་བུ་ཁྱོད་འདི་སྐད་དུ་རྟེན་ཅིང་འབྲེལ་བའི་ཕྱིར་མྱ་ངན་ལས་འདས་པའི་ཆོས་ཀྱང་མི་རྟག་གོ་ཞེས་བྱ་བ་དེ་ཡང་དེ་ལྟ་མ་ཡིན་ནོ། །དེ་ཅིའི་ཕྱིར་

47-1-359b

ཞེ་ན། རིགས་ཀྱི་བུ་རྒྱུ་ལ་རྣམ་པ་ལྔ་སྟེ། ལྔ་གང་ཞེ་ན། སྐྱེ་བའི་རྒྱུ་དང་། འདུས་པའི་རྒྱུ་དང་། གནས་པའི་རྒྱུ་དང་། སྐྱེ་ཞིང་འཕེལ་བའི་རྒྱུ་དང་རིང་བའི་རྒྱུའོ། །དེ་ལ་ཇི་ལྟར་ན་སྐྱེ་བའི་རྒྱུ་ཞེ་ན་སྐྱེ་བའི་རྒྱུ་ཞེས་བྱ་བ་ནི་ལས་དང་ཉོན་མོངས་པ་ལ་སོགས་པ་དང་། 
ཕྱི་རོལ་གྱི་ཤིང་རྣམས་ཀྱི་ས་བོན་ནི་སྐྱེ་བའི་རྒྱུ་ཞེས་བྱའོ། །ཇི་ལྟར་འདུས་པའི་རྒྱུ་ཞེ་ན། ཇི་ལྟར་དགེ་བ་དང་དགེ་བའི་སེམས་འདུས་པ་དང་མི་དགེ་བ་དང་མི་དགེ་བའི་སེམས་འདུས་པ་དང་། ལུང་མི་སྟོན་པ་དང་ལུང་མི་སྟོན་པའི་སེམས་
འདུས་པ་ནི་འདུས་པའི་རྒྱུ་ཞེས་བྱའོ། །ཇི་ལྟར་གནས་པའི་རྒྱུ་ཞེ་ན། འོག་ན་ཀ་བ་ཡོད་པའི་ཕྱིར་ཁང་པ་མི་ལྟུང་བ་དང་། རི་དང་ཆུ་དང་ཤིང་དང་ནགས་ཚལ་ཐམས་ཅད་ས་ཆེན་པོའི་ཕྱིར་གནས་པར་འགྱུར་བ་དང་ནང་གི་ཆེན་པོ་བཞི་དང་
ཉོན་མོངས་པ་ཚད་མེད་པ་སྙེད་ཡོད་པའི་ཕྱིར་སེམས་ཅན་གནས་པར་གྱུར་པ་ནི། གནས་པའི་རྒྱུ་ཞེས་བྱའོ། །ཇི་ལྟར་སྐྱེ་ཞིང་འཕེལ་བའི་རྒྱུ་ཞེ་ན། གོས་དང་ཟས་ལ་སོགས་པ་ལ་བརྟེན་པའི་རྐྱེན་གྱིས་སེམས་ཅན་སྐྱེ་ཞིང་འཕེལ་བ་
དང་ཇི་ལྟར་ཕྱི་རོལ་གྱི་ས་བོན་མེས་ཚིག་ཅིང་བྱས་མ་ཟོས་པས་སྐྱེ་ཞིང་འཕེལ་བར་འགྱུར་བ་དང་། ཇི་ལྟར་དགེ་སྦྱོང་དང་བྲམ་ཟེ་ལ་སོགས་པ་སློབ་དཔོན་དང་། དགེ་བའི་བཤེས་གཉེན་དག་ལ་རྟེན་པས་སྐྱེ་ཞིང་འཕེལ་བ་དང་། 
ཇི་ལྟར་ཕ་མའི་རྒྱུས་བུ་སྐྱེ་ཞིང་འཕེལ་བར་འགྱུར་བ་ནི་འཕེལ་བའི་རྒྱུ་ཞེས་བྱའོ། །ཇི་ལྟར་རིང་བའི་རྒྱུ་ཞེ་ན་དཔེར་ན་སྔགས་ཀྱི་རྒྱུས་གདོན་གྱིས་འཆི་བར་མི་ནུས་ཤིང་དུག་གིས་གནོད་པར་མི་ནུས་པ་དང་། ནུས་པ་དང་རྒྱལ་པོ་ལ་བརྟེན་ན་རྐུན་པོས་
མི་ཚུགས་པ་དང་། ཇི་ལྟར་མྱུ་གུ་ས་དང་། ཆུ་དང་མེ་དང་རླུང་ལ་སོགས་པ་ལ་བརྟེན་པ་དང་། ཇི་ལྟར་ཆུ་དང་སྲུབ་ཤིང་དང་མི་ལས་མར་གྱི་རིང་བའི་རྒྱུར་འགྱུར་བ་དང་། སྣང་བ་དང་གཟུགས་ལ་སོགས་པ་ནི་རྣམ་པར་ཤེས་པའི་རྒྱུར་འགྱུར་
བ་དང་ཕ་མའི་ཁུ་བ་དཀར་ནག་ནི་སེམས་ཅན་གྱི་རིང་བའི་རྒྱུར་འགྱུར་བ་དང་། ཇི་ལྟར་དུས་ལ་སོགས་པ་ཀུན་ཀྱང་རིང་བའི་རྒྱུ་ཞེས་བྱའོ། །རིགས་ཀྱི་བུ་མྱ་ངན་ལས་འདས་པའི་རང་བཞིན་ནི་དེ་ལྟ་བའི་རྒྱུ་ལྔས་གྲུབ་པ་མ་ཡིན་ན། 

47-1-360a

ཅིའི་ཕྱིར་མི་རྟག་པའི་རྒྱུར་འགྱུར་བ་ཞེས་བྱ། རིགས་ཀྱི་བུ་གཞན་ཡང་རྒྱུ་རྣམ་པ་གཉིས་ཡོད་དེ། བྱས་པའི་རྒྱུ་དང་བསམ་པའི་རྒྱུའོ། །ཇི་ལྟར་རྫ་མཁན་གྱི་འཁོར་ལོ་ནི་བྱས་པའི་རྒྱུ་ཞེས་བྱའོ། །
རིགས་ཀྱི་བུ་ཇི་ལྟར་མེ་སྒྲོན་ལ་སོགས་པས་མུན་པའི་རྫས་སྣང་བར་བྱེད་པ་ནི་གསལ་བའི་རྒྱུ་ཞེས་བྱའོ། །རིགས་ཀྱི་བུ་མྱ་ངན་ལས་འདས་པ་ཆེན་པོ་ནི་བྱས་པའི་རྒྱུ་ལས་གྲུབ་པ་མ་ཡིན་ཏེ། གསལ་བའི་རྒྱུ་འབའ་
ཞིག་གོ། །གསལ་བའི་རྒྱུ་ཞེས་བྱ་བ་ནི་འདི་ལྟ་སྟེ། བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་དང་། ཕ་རོལ་ཏུ་ཕྱིན་པ་དྲུག་ནི་གསལ་བའི་རྒྱུ་ཞེས་བྱའོ། །རིགས་ཀྱི་བུ་སྦྱིན་པ་ནི་མྱ་ངན་ལས་འདས་པའི་རྒྱུ་ཡིན་
ཏེ། མྱ་ངན་ལས་འདས་པ་ཆེན་པོའི་རྒྱུ་ནི་མ་ཡིན་ནོ། །སྦྱིན་པའི་ཕ་རོལ་ཏུ་ཕྱིན་པ་ནི་མྱ་ངན་ལས་འདས་པ་ཆེན་པོའི་རྒྱུ་ཞེས་བྱའོ། །བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་ནི་མྱ་ངན་ལས་འདས་པའི་
རྒྱུན་ཡིན་ཏེ། མྱ་ངན་ལས་འདས་པ་ཆེན་པོའི་རྒྱུ་ནི་མ་ཡིན་ནོ། །བྱང་ཆུབ་གྱི་ཡན་ལག་གི་ཆོས་ཚད་མེད་གྲངས་མེད་པ་སྙེད་ནི་མྱ་ངན་ལས་འདས་པ་ཆེན་པོའི་རྒྱུ་ཞེས་བྱའོ།། 
ཡེ་དྷརྨཱ་ཧེ་དུ་པྲ་བྷ་བཱ་ཧེ་ཏུནྟེ་ཥཱན་ཏ་ཐཱ་ག་ཏོ་ཧྱཱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་བམྦཱ་དཱི་མ་ཧཱ་ཤྲ་མ་ཎ།།  །།བཀྲ་ཤིས་པར་གྱུར་གཅིག ། །། 

48-1-1a