57-1-1a

༼ཚ༽ ༄༅། ༈ །མདོ་སྡེ་སྣ་ཚོགས་ཀྱི་སྐོར་བཞུགས་སོ། །
(黃)  經藏第十八部

57-1-1b

༄༅༅།   །རྒྱ་གར་སྐད་དུ། ཨཱརྱ་ཤྲ་དྷཱ་བ་ལཱ་དྷཱ་ནཱ་བ་ཏཱ་ར་མུ་དྲཱ་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ།  
འཕགས་པ་དད་པའི་སྟོབས་བསྐྱེད་པ་ལ་འཇུག་པའི་ཕྱག་རྒྱ་ཞེས་བྱ་བ་ཐེག་པ་ཆེན་པོའི་མདོ།  བམ་པོ་དང་པོ། 
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་
གཅིག་ན། བཅོམ་ལྡན་འདས་དེ་བཞིན་གཤེགས་པའི་གནས་ན་ཆོས་ཀྱི་བས་མཐའ་དགོན་པ་ཀུན་ནས་འོད་
ཀྱི་ཁང་པ་བསོད་ནམས་ཆེན་པོའི་རྒྱན་གྱི་ཚོགས་བསགས་པ། ཀུན་དུ་མ་སྨད་པ། ཡོན་ཏན་གྱི་ཚོགས་
དཔག་ཏུ་མེད་པ། རྡོ་རྗེ་ལྟར་སྲ་བར་བརྩིགས་པ། མི་ཤིགས་པའི་སའི་ཕྱོགས་ནོར་བུ་རིན་པོ་ཆེ་ཐམས་
ཅད་ཀྱིས་སྤྲས་པའི་མེ་ཏོག་གི་རྒྱན་དྲི་མ་མེད་པའི་འོད་འབར་བའི་ནོར་བུ་རིན་པོ་ཆེའི་དྲ་བའི་རྒྱན་ཀྱིས་སྤྲས་པ། ཁ་
དོག་མཐའ་ཡས་པའི་ནོར་བུ་རིན་པོ་ཆེ་རྒྱ་མཚོ་ཡངས་པ་སྣང་ཞིང་རྣམ་པར་བཀྲ་བ། ནོར་བུ་རིན་པོ་ཆེའི་ཆར་

57-1-2a

མི་ཟད་པ་འབབ་པའི་ནོར་བུ་རིན་པོ་ཆེའི་རྒྱལ་པོ་ལས་གྲུབ་པ། མེ་ཏོག་སྣ་ཚོགས་འཁྱིལ་པའི་ཆུ་བོའི་ནོར་བུ་སྡོང་པོ་དང་ཡལ་གས་བརྒྱན་པ། མེ་ཏོག་དང་། སྤོས་དང་། རིན་པོ་ཆེ་ཐམས་ཅད་ཀྱི་
དྲ་བས་བྲེས་པ། བཀོད་པ་ཐམས་ཅད་འབར་བར་སངས་རྒྱས་ཀྱི་བྱིན་གྱི་བརླབས་ཀྱིས་རྣམ་པར་སྤྲུལ་པ་ཡང་དག་པར་སྟོན་པའི་སའི་སྙིང་པོ་ནོར་བུ་རིན་པོ་ཆེ་ཐམས་ཅད་ཡངས་པར་འབྱུང་བས་ཕྱོགས་ཀུན་དུ་སྦྱངས་ཤིང་བཀོད་
པའི་བྱང་ཆུབ་ཀྱི་སྙིང་པོ་ནོར་བུ་རིན་པོ་ཆེ་བཻ་དཱུརྱའི་རིགས་ཀྱིས་བརྒྱན་པས་རྒྱས་པའི་ཕུང་པོ་ནོར་བུ་རིན་པོ་ཆེའི་རྒྱལ་པོའི་ཁ་ཁྱེར་གྱིས་བསྐོར་བ། ནོར་བུ་མུ་ཏིག་རིན་པོ་ཆེའི་ཆུན་པོས་མཛེས་པར་བྱས་པ། གདུགས་དང་། 
རྒྱལ་མཚན་དང་། བ་དན་བཙུགས་པ། དྲིལ་བུ་གཡེར་ཀའི་དྲ་བའི་བླ་རེ་བྲེས་པ། ཙན་དན་སྦྲུལ་གྱི་སྙིང་པོས་བྱུགས་པ། དབང་གི་རྒྱལ་པོ་ནོར་བུ་རིན་པོ་ཆེའི་དྲ་བས་གཡོགས་པ། རྒྱ་མཚོའི་གནས་
རྣམ་པར་དག་པ་བཀོད་པ། ཀུན་ནས་འོད་ཟེར་གྱི་ནོར་བུའི་ཀ་བའི་དྲ་བས་གཏམས་པ། སེང་གེའི་རལ་པའི་ནོར་བུ་རིན་པོ་ཆེའི་སྤང་ལེབ་ཀྱིས་བཀབ་པ། སེང་གེའི་རྒྱལ་མཚན་མཆོག་གི་ནོར་བུ་རིན་པོ་
ཆེའི་སྒོ་གང་དང་། རྟ་བབས་དང་། སྐར་ཁུང་གིས་བརྒྱན་པ། དར་གྱི་ཆུན་པོ་བྲེས་པས་མཛེས་པར་བྱས་པ་མེ་ཏོག་མཱན་དཱ་ར་བ་དང་། མཱན་དཱ་ར་བ་ཆེན་པོ་དང་། མཉྫུ་ཥ་ཀ་དང་། མཉྫུ་ཥ་ཀ་ཆེན་པོ་དང་། 
མདོག་མཛེས་ཆེན་པོ་དང་། འཁོར་ལོ་དང་། འཁོར་ལོ་ཆེན་པོ་དང་། སྣ་མའི་མེ་ཏོག་དང་། བར་ཤི་ཀ་དང་། ཏ་ར་ནི་དང་། བལ་ལ་ཀོ་ཏ་ར་ནི་དང་། ཤིན་དུ་དྲི་མཆོག་དང་། དྷ་ནུ་སྐ་རི་ཀ་དང་། ལྷའི་མེ་ཏོག་ཡིད་
དུ་འོང་བ་ཨུད་པ་ལ་དང་། པད་མ་དང་། ཀུ་མུད་དང་། པད་མ་དཀར་པོ་དང་། མེ་ཏོག་ཆེན་པོས་གཏོར་བ་ན་བཞུགས་ཏེ། ཆགས་པ་མེད་པར་བཀོད་པའི་སྙིང་པོའི་སེང་གེའི་ཁྲི་ལ་བཅོམ་ལྡན་འདས་བློ་ཤིན་དུ་རྣམ་པར་

57-1-2b

དག་པ། ཀུན་དུ་སྤྱོད་པ་གཉིས་མི་མངའ་བ། མཚན་ཉིད་མེད་པའི་ཆོས་ལ་ཤིན་དུ་གཞོལ་བ། སངས་རྒྱས་ཀྱི་གནས་པས་གནས་པ། སངས་རྒྱས་ཐམས་ཅད་དང་མཉམ་པ་ཉིད་མ་རྙེས་པ། སྒྲིབ་པ་མི་མངའ་བས་
རྟོགས་པར་ཐུགས་སུ་ཆུད་པ། ཕྱིར་མི་ལྡོགས་པའི་ཆོས་དང་ལྡན་པ། སྤྱོད་ཡུལ་མི་འཕྲོགས་པ། རྣམ་པར་གཞག་པ་བསམ་གྱིས་མི་ཁྱབ་པ། དུས་གསུམ་མཉམ་པ་ཉིད་ཆར་ཕྱིན་པ། འཇིག་རྟེན་གྱི་ཁམས་ཐམས་
ཅད་ཁྱབ་པའི་སྐུ་དང་ལྡན་པ། ཆོས་ཐམས་ཅད་ལ་ཐེ་ཙོམ་མེད་པའི་ཡེ་ཤེས་མངའ་བ་སྤྱོད་པ་ཐམས་ཅད་དང་ལྡན་པའི་བློ་མངའ་བ། སངས་རྒྱས་ཀྱི་ཡེ་ཤེས་ལ་ནེམ་ནུར་མེད་པ། རྣམ་པར་མ་བརྟགས་པའི་སྐུ་མངའ་བ། 
བྱང་ཆུབ་སེམས་དཔའ་ཐམས་ཅད་ཀྱི་ཡེ་ཤེས་ཡང་དག་པར་རྫོགས་པ། སངས་རྒྱས་ཀྱི་གནས་པ་གཉིས་སུ་མེད་པ་དམ་པའི་ཕ་རོལ་དུ་ཕྱིན་པ། དེ་བཞིན་གཤེགས་པ་མ་འདྲེས་པའི་རྣམ་པར་ཐར་པར་མཛད་པའི་ཡེ་ཤེས་
ཀྱི་མཐར་ཕྱིན་པ། མཐའ་དང་དབུས་མེད་པའི་སངས་རྒྱས་ཀྱི་ས་མཉམ་པ་ཉིད་དུ་ཐུགས་སུ་ཆུད་པ། ཆོས་ཀྱི་དབྱིངས་ཀྱིས་ཀླས་པ། ནམ་མཁའི་ཁམས་ཀྱི་མཐས་གཏུགས་པ། ལྷུན་གྱིས་གྲུབ་པའི་ཡེ་
ཤེས་ཀྱིས་སངས་རྒྱས་ཀྱི་མཛད་པ་ཐམས་ཅད་རྒྱུན་མི་འཆད་པ། ཕྱི་མའི་མཐའི་མུའི་བསྐལ་པ་བགྲངས་པ་ཐམས་ཅད་དུ་ཕྱིར་མི་ལྡོག་པའི་ཆོས་ཀྱི་འཁོར་ལོ་སྐོར་བ་བྱིན་གྱིས་རློབ་པ། ཆགས་པ་མེད་པའི་བཀོད་པའི་སྙིང་
པོ་ཡང་དག་པར་སྟོན་པ། མ་ཆགས་པའི་ཡེ་ཤེས་མངའ་བ། རྣམ་པ་ཐམས་ཅད་ཀྱི་མཆོག་དང་ལྡན་པའི་ཤེས་བྱ་དབྱེར་མེད་ཅིང་མི་གནས་པ། དུས་གཅིག་དུ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་
དགའ་ལྡན་གྱི་གནས་མཆོག་ན་བཞུགས་པ་དང་། འཆི་འཕོ་བ་དང་། སྐྱེ་བ་དང་། མངོན་པར་འབྱུང་བ་དང་། དཀའ་བ་སྤྱད་པའི་སྦྱོར་བ་དང་། བྱང་ཆུབ་ཀྱི་སྙིང་པོར་གཤེགས་པ་དང་། བདུད་བཅོམ་པ་དང་། མངོན་པར་

57-1-3a

རྫོགས་པར་བྱང་ཆུབ་པ་དང་། ཆོས་ཀྱི་འཁོར་ལོ་རབ་ཏུ་བསྐོར་བ་དང་། ཡོངས་སུ་མྱ་ངན་ལས་འདའ་བ་དང་། ཆོས་གནས་པ་དང་། ཆོས་ནུབ་པ་སྟོན་པ་ལ་མཁས་པ་བཞུགས་ཏེ། སངས་རྒྱས་
ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཕྲ་རབ་སྙེད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱང་དཔའ་བར་འགྲོ་བའི་ཏིང་ངེ་འཛིན་གྱིས་རྣམ་པར་རྩེས་པ། ལུས་ཀྱི་ཁ་
དོག་མཐའ་ཡས་པ་ཡོངས་སུ་འགྲུབ་པ་སྒྲུབ་པའི་གཟུངས་ཐོབ་པ། སངས་རྒྱས་མེད་པའི་འཇིག་རྟེན་གྱི་ཁམས་སུ་སངས་རྒྱས་འབྱུང་བ་སྟོན་པ་ལ་མཁས་པ། ཀུན་ནས་ཉོན་མོངས་པ་ཅན་གྱི་འཇིག་རྟེན་གྱི་ཁམས་
ཡོངས་སུ་སྦྱང་བ་ཤ་སྟག་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། 
མི་དང་། མི་མ་ཡིན་པ་གྲངས་མེད་དཔག་ཏུ་མེད་པ་དག་དང་ཡང་ཐབས་གཅིག་གོ། །དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷང་ང་ས་ལ་
གཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དབུགས་འབྱིན་པ་རྙེད་པ་གང་དག་བྱང་ཆུབ་སེམས་དཔའ་རྣམས་ཀྱིས་ས་དང་
པོ་ཡོངས་སུ་སྦྱོང་བར་འགྱུར་བ་དག་བཅོམ་ལྡན་འདས་ཀྱིས་བསྟན་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་
དབུགས་འབྱིན་པ་རྙེད་པ་ལྔ་པོ་འདི་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན་འདི་ལྟ་སྟེ། བདག་ནི་བསམ་པ་ལ་གནས་ཀྱིས། གཞན་དག་ཀྱང་བསམ་པ་ལ་འགོད་

57-1-3b

དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བསམ་པ་ནི་གང་དགེ་བའི་རྩ་བ་གཞན་དང་གཞན་བརྩམ་པའི་བྱེ་བྲག་ལ་དད་པ་མི་ཕྱེད་པའོ། །བདག་ནི་ལྷག་པའི་བསམ་པ་ལ་གནས་ཀྱིས། གཞན་དག་ཀྱང་ལྷག་
པའི་བསམ་པ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལྷག་པའི་བསམ་པ་ནི་གང་སངས་རྒྱས་ཀྱི་ཆེ་བ་ཉིད་ཀྱི་ཁྱད་པར་དུ་འགྲོ་བའི་ཆོས་རྣམས་ལ་ལྷག་པའི་དམིགས་པའོ། །བདག་ནི་དད་པ་
ལ་གནས་ཀྱིས། གཞན་དག་ཀྱང་དད་པ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དད་པ་ནི་ཤེས་རབ་ཀྱི་རྩ་བ་ལས་བྱུང་བའི་ལས་ལ་གནས་པའོ། །བདག་ནི་མཆོག་ཏུ་དགའ་བ་ལ་གནས་
ཀྱིས་གཞན་དག་ཀྱང་མཆོག་ཏུ་དགའ་བ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མཆོག་ཏུ་དགའ་བ་ནི་ལུས་དང་སེམས་རབ་ཏུ་སྦྱངས་པ་གང་ཡིན་པའོ། །བདག་ནི་བདུད་ཀྱི་ལས་དང་དབྱེར་མེད་
པའི་སངས་རྒྱས་ཀྱི་ལས་ལ་གནས་ཀྱིས། གཞན་དག་ཀྱང་བདུད་ཀྱི་ལས་དང་དབྱེར་མེད་པའི་སངས་རྒྱས་ཀྱི་ལས་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བདུད་ཀྱི་ལས་ནི་གང་ཕྱིན་ཅི་ལོག་གི་ཀུན་
ནས་ལྡང་བ་ལས་བྱུང་བའི་ལྟ་བ་དང་། ལྟ་བ་ཀུན་ནས་ལྡང་བ་ལས་བྱུང་བའི་བདུད་ཀྱི་ལས་ཏེ། བདུད་ཀྱི་ལས་འདི་སངས་རྒྱས་ཀྱི་ལས་དང་དབྱེར་མེད་དོ། །དེ་ཅིའི་ཕྱིར་ཞེ་ན། བདུད་ཀྱི་ལས་ཀྱི་རང་བཞིན་ལས་གཞན་
མ་ཡིན་པའི་ཕྱིར་ཏེ། བདུད་ཀྱི་ལས་ཀྱི་རང་བཞིན་ལས་སངས་རྒྱས་ཀྱི་ལས་གཞན་མེད་པས་བདུད་ཀྱི་ལས་ཀྱི་རང་བཞིན་ཉིད་སངས་རྒྱས་ཀྱི་ལས་ཏེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་
སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན་འདི་ལྟ་སྟེ། 

57-1-4a

བདག་ནི་ལྟ་བར་གྱུར་པ་དང་། དབྱེར་མེད་པའི་སྟོང་པ་ཉིད་ཤེས་པ་ལ་གནས་ཀྱིས། གཞན་དག་ཀྱང་ལྟ་བར་གྱུར་པ་དང་དབྱེར་མེད་པའི་སྟོང་པ་ཉིད་ཤེས་པ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། 
དེ་ལ་ལྟ་བར་གྱུར་པ་དང་དབྱེར་མེད་པའི་སྟོང་པ་ཉིད་ནི་ལྟ་བར་གྱུར་པའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། སྟོང་པ་ཉིད་ནི་ལྟ་བར་གྱུར་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། ལྟ་བར་གྱུར་པའི་རང་བཞིན་ལས་སྟོང་པ་ཉིད་གཞན་མེད་པས་
ལྟ་བར་གྱུར་པའི་རང་བཞིན་ཉིད་སྟོང་པ་ཉིད་དེ། ལྟ་བར་གྱུར་པའི་རང་བཞིན་སྟོང་པ་ཉིད་ཤེས་དེས་ཆོས་ཐམས་ཅད་སྟོང་ངོ་། །བདག་ནི་སྒྲོ་འདོགས་པ་དང་། དབྱེར་མེད་པ་སྒྲོ་འདོགས་པ་མེད་པ་ཤེས་པ་ལ་གནས་ཀྱིས། གཞན་དག་ཀྱང་སྒྲོ་འདོགས་པ་དང་། དབྱེར་མེད་
པའི་སྒྲོ་འདོགས་པ་མེད་པ་ཤེས་པ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྒྲོ་འདོགས་པ་དང་དབྱེར་མེད་པའི་སྒྲོ་འདོགས་པ་མེད་པ་ནི་སྒྲོ་འདོགས་པའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། སྒྲོ་
འདོགས་པ་མེད་པ་ནི་སྒྲོ་འདོགས་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། སྒྲོ་འདོགས་པའི་རང་བཞིན་ལས་སྒྲོ་འདོགས་པ་མེད་པ་གཞན་མེད་པས་སྒྲོ་འདོགས་པའི་རང་བཞིན་ཉིད་སྒྲོ་འདོགས་པ་མེད་པ་སྟེ། སྒྲོ་
འདོགས་པའི་རང་བཞིན་གྱི་སྒྲོ་འདོགས་པ་མེད་པ་ཤེས་པ་དེས་ཆོས་ཐམས་ཅད་སྒྲོ་འདོགས་པ་མེད་པའོ། །བདག་ནི་ལྷག་པར་བྱེད་པ་དང་དབྱེར་མེད་པ་ལྷག་པར་བྱེད་པ་མེད་པ་ཤེས་པ་ལ་གནས་ཀྱིས། གཞན་དག་
ཀྱང་ལྷག་པར་བྱེད་པ་དང་དབྱེར་མེད་པ་ལྷག་པར་བྱེད་པ་མེད་པར་ཤེས་པ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལྷག་པར་བྱེད་པ་དང་དབྱེར་མེད་པ་ལྷག་པར་བྱེད་པ་མེད་པ་ནི་ལྷག་པར་བྱེད་པའི་རང་བཞིན་
གང་ཡིན་པའོ། །དེ་ཅིའི་ཕྱིར་ཞེ་ན། ལྷག་པར་བྱེད་པ་མེད་པ་ནི་ལྷག་པར་བྱེད་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། ལྷག་པར་བྱེད་པའི་རང་བཞིན་ལས་ལྷག་པར་བྱེད་པ་མེད་པ་གཞན་མེད་པས་ལྷག་

57-1-4b

པར་བྱེད་པའི་རང་བཞིན་ཉིད་ལྷག་པར་བྱེད་པ་མེད་པ་སྟེ། ལྷག་པར་བྱེད་པའི་རང་བཞིན་གྱི་ལྷག་པར་བྱེད་པ་མེད་པ་ཤེས་པ་དེས་ཆོས་ཐམས་ཅད་ལྷག་པར་བྱེད་པ་མེད་པའོ། །བདག་ནི་གདེག་པ་དང་། གཞག་
པ་དང་། དབྱེར་མེད་པ་གདེག་པ་དང་གཞག་པ་མེད་པ་ཤེས་པ་ལ་གནས་ཀྱིས། གཞན་དག་ཀྱང་གདེག་པ་དང་། གཞག་པ་དང་དབྱེར་མེད་པ་གདེག་པ་མེད་ཅིང་གཞག་པ་མེད་པ་ཤེས་པ་ལ་འགོད་དོ་ཞེས་དབུགས་འབྱིན་པ་རྙེད་
པར་འགྱུར་ཏེ། དེ་ལ་གདེག་པ་དང་། གཞག་པ་དང་། དབྱེར་མེད་པ་གདེག་པ་མེད་ཅིང་གཞག་པ་མེད་པ་ནི་གདེག་པ་དང་གཞག་པའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། གདེག་པ་མེད་པ་དང་གཞག་པ་མེད་
པ་ནི་གདེག་པ་དང་གཞག་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། གདེག་པ་དང་གཞག་པའི་རང་བཞིན་ལས་གདེག་པ་མེད་ཅིང་གཞག་པ་མེད་པ་གཞན་མེད་པས་གདེག་པ་དང་གཞག་པའི་རང་བཞིན་ཉིད་གདེག་པ་མེད་
ཅིང་གཞག་པ་མེད་པ་སྟེ། གདེག་པ་དང་གཞག་པའི་རང་བཞིན་ཉིད་ཀྱི་གདེག་པ་དང་། གཞག་པ་མེད་པ་ཤེས་པ་དེས་ཆོས་ཐམས་ཅད་གདེག་པ་དང་གཞག་པ་མེད་པའོ། །བདག་ནི་བླང་བ་དང་། དོར་བ་དང་དབྱེར་
མེད་པ། བླང་བ་མེད་ཅིང་དོར་བ་མེད་པ་ཤེས་པ་ལ་གནས་ཀྱིས། གཞན་དག་བླང་བ་དང་། དོར་བ་དང་དབྱེར་མེད་པ་བླང་བ་མེད་ཅིང་དོར་བ་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བླང་བ་དང་
དོར་བ་དང་དབྱེར་མེད་པ་བླང་བ་མེད་ཅིང་དོར་བ་མེད་པ་ནི་བླང་བ་དང་དོར་བའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། བླང་བ་མེད་ཅིང་དོར་བ་མེད་པ་ནི་བླང་བ་དང་དོར་བའི་རང་བཞིན་ལས་གཞན་མ་ཡིན་པའི་ཕྱིར་ཏེ། བླང་བ་
དང་དོར་བའི་རང་བཞིན་ལས་བླང་བ་མེད་ཅིང་དོར་བ་མེད་པ་གཞན་མེད་པས་བླང་བ་དང་དོར་བ་མེད་པའི་རང་བཞིན་ཉིད་བླང་བ་མེད་པ་དང་དོར་བ་མེད་པའོ། །བླང་བ་དང་དོར་བའི་རང་བཞིན་གྱི་བླང་བ་མེད་ཅིང་དོར་བ་མེད་པ་ཤེས་པ་

57-1-5a

དེས་ཆོས་ཐམས་ཅད་བླང་བ་མེད་ཅིང་དོར་བ་མེད་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་
གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་འདུས་བྱས་དང་དབྱེར་མེད་པ་འདུས་མ་བྱས་ཤེས་པ་ལ་གནས་ཀྱིས། 
གཞན་དག་ཀྱང་འདུས་བྱས་དང་དབྱེར་མེད་པ་འདུས་མ་བྱས་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་འདུས་བྱས་དང་དབྱེར་མེད་པ་འདུས་མ་བྱས་ནི་འདུས་བྱས་ཀྱི་རང་བཞིན་གང་ཡིན་པའོ། །དེ་ཅིའི་
ཕྱིར་ཞེ་ན། འདུས་མ་བྱས་ནི་འདུས་བྱས་ཀྱི་རང་བཞིན་ལས་གཞན་མ་ཡིན་པའི་ཕྱིར་ཏེ། འདུས་བྱས་ཀྱི་རང་བཞིན་ལས་འདུས་མ་བྱས་གཞན་མེད་པས་འདུས་བྱས་ཀྱི་རང་བཞིན་ཉིད་འདུས་མ་བྱས་ཏེ། འདུས་བྱས་ཀྱི་
རང་བཞིན་འདུས་མ་བྱས་ཤེས་པ་དེས་ཆོས་ཐམས་ཅད་འདུས་མ་བྱས་སོ། །བདག་ནི་དངོས་པོ་དང་དབྱེར་མེད་པ་དངོས་པོ་མེད་པ་ཤེས་པ་ལ་གནས་ཀྱིས། གཞན་དག་ཀྱང་དངོས་པོ་དང་དབྱེར་མེད་པ་དངོས་པོ་མེད་
པ་ཤེས་པ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དངོས་པོ་དང་དབྱེར་མེད་པ་དངོས་པོ་མེད་པ་ནི་དངོས་པོའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། དངོས་པོ་མེད་པ་ནི་དངོས་པོའི་རང་བཞིན་
ལས་གཞན་མ་ཡིན་པའི་ཕྱིར་ཏེ། དངོས་པོའི་རང་བཞིན་ལས་དངོས་པོ་མེད་པ་གཞན་མེད་པས་དངོས་པོའི་རང་བཞིན་ཉིད་དངོས་པོ་མེད་པ་སྟེ། དངོས་པོའི་རང་བཞིན་ཉིད་དངོས་པོ་མེད་པ་ཤེས་པ་དེས་ཆོས་ཐམས་
ཅད་དངོས་པོ་མེད་པའོ། །བདག་ནི་གནས་དང་དབྱེར་མེད་པ་གནས་མེད་པ་ཤེས་པ་ལ་གནས་ཀྱིས། གཞན་དག་ཀྱང་གནས་དང་དབྱེར་མེད་པ་གནས་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་

57-1-5b

འགྱུར་ཏེ། དེ་ལ་གནས་དང་དབྱེར་མེད་པ་གནས་མེད་པ་ནི་གནས་ཀྱི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། གནས་མེད་པ་ནི་གནས་ཀྱི་རང་བཞིན་ལས་གཞན་མ་ཡིན་པའི་ཕྱིར་ཏེ། གནས་ཀྱི་རང་བཞིན་ལས་
གནས་མེད་པ་གཞན་མེད་པས་གནས་ཀྱི་རང་བཞིན་ཉིད་གནས་མེད་པ་སྟེ། གནས་ཀྱི་རང་བཞིན་གནས་མེད་པ་ཤེས་པ་དེས་ཆོས་ཐམས་ཅད་གནས་མེད་པའོ། །བདག་ནི་དམིགས་པ་དང་དབྱེར་མེད་པ་དམིགས་
པ་མེད་པ་ཤེས་པ་ལ་གནས་ཀྱིས། གཞན་དག་ཀྱང་དམིགས་པ་དང་དབྱེར་མེད་པ་དམིགས་པ་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དམིགས་པ་དང་དབྱེར་མེད་པ་དམིགས་པ་མེད་པ་ནི་
དམིགས་པའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། དམིགས་པ་མེད་པ་ནི་དམིགས་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། དམིགས་པའི་རང་བཞིན་ལས་དམིགས་པ་མེད་པ་གཞན་མེད་པས་དམིགས་
པའི་རང་བཞིན་ཉིད་དམིགས་པ་མེད་པ་སྟེ། དམིགས་པའི་རང་བཞིན་གྱི་དམིགས་པ་མེད་པ་ཤེས་པ་དེས་ཆོས་ཐམས་ཅད་དམིགས་པ་མེད་པའོ། །བདག་ནི་ཕྱོགས་དང་དབྱེར་མེད་པ་ཕྱོགས་མེད་པ་ཤེས་པ་ལ་
གནས་ཀྱིས། གཞན་དག་ཀྱང་ཕྱོགས་དང་དབྱེར་མེད་པ་ཕྱོགས་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཕྱོགས་དང་དབྱེར་མེད་པ་ཕྱོགས་མེད་པ་ནི་ཕྱོགས་ཀྱི་རང་བཞིན་གང་ཡིན་
པའོ། །དེ་ཅིའི་ཕྱིར་ཞེ་ན། ཕྱོགས་མེད་པ་ནི་ཕྱོགས་ཀྱི་རང་བཞིན་ལས་གཞན་མ་ཡིན་པའི་ཕྱིར་ཏེ། ཕྱོགས་ཀྱི་རང་བཞིན་ལས་ཕྱོགས་མེད་པ་གཞན་མེད་པས་ཕྱོགས་ཀྱི་རང་བཞིན་ཉིད་ཕྱོགས་མེད་པའོ། །ཕྱོགས་
ཀྱི་རང་བཞིན་གྱི་ཕྱོགས་མེད་པ་ཤེས་པ་དེས་ཆོས་ཐམས་ཅད་ཕྱོགས་མེད་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །

57-1-6a

འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་མཚན་ཉིད་དང་དབྱེར་མེད་
པར་མཚན་ཉིད་མེད་པ་ཤེས་པ་ལ་གནས་ཀྱིས། གཞན་དག་ཀྱང་མཚན་ཉིད་དང་དབྱེར་མེད་པ་མཚན་ཉིད་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མཚན་ཉིད་དང་དབྱེར་མེད་པ་མཚན་
ཉིད་མེད་པ་ནི་མཚན་ཉིད་ཀྱི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། མཚན་ཉིད་མེད་པ་ནི་མཚན་ཉིད་ཀྱི་རང་བཞིན་ལས་གཞན་མ་ཡིན་པའི་ཕྱིར་ཏེ། མཚན་ཉིད་ཀྱི་རང་བཞིན་ལས་མཚན་ཉིད་མེད་
པ་གཞན་མེད་པས་མཚན་ཉིད་ཀྱི་རང་བཞིན་ཉིད་མཚན་ཉིད་མེད་པ་སྟེ། མཚན་ཉིད་ཀྱི་རང་བཞིན་གྱིས་མཚན་ཉིད་མེད་པ་ཤེས་པ་དེས་ཆོས་ཐམས་ཅད་མཚན་ཉིད་མེད་པའོ། །བདག་ནི་དངོས་པོ་དང་དབྱེར་མེད་པ་དངོས་
པོ་མེད་པ་ཤེས་པ་ལ་གནས་ཀྱིས། གཞན་དག་ཀྱང་དངོས་པོ་དང་དབྱེར་མེད་པ་དངོས་པོ་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དངོས་པོ་དང་དབྱེར་མེད་པ་དངོས་པོ་མེད་པ་
ནི་དངོས་པོའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། དངོས་པོ་མེད་པ་ནི་དངོས་པོའི་རང་བཞིན་ལས་གཞན་མ་ཡིན་པའི་ཕྱིར་ཏེ། དངོས་པོའི་རང་བཞིན་ལས་དངོས་པོ་མེད་པ་གཞན་མེད་པས་དངོས་པོའི་རང་
བཞིན་ཉིད་དངོས་པོ་མེད་པ་སྟེ། དངོས་པོའི་རང་བཞིན་དངོས་པོ་མེད་པར་ཤེས་པ་དེས་ཆོས་ཐམས་ཅད་དངོས་པོ་མེད་པའོ། །བདག་ནི་གཉིས་དང་དབྱེར་མེད་པ་གཉིས་སུ་མེད་པ་ཤེས་པ་ལ་གནས་ཀྱིས། གཞན་དག་
ཀྱང་གཉིས་དང་དབྱེར་མེད་པ་གཉིས་སུ་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གཉིས་དང་དབྱེར་མེད་པ་གཉིས་སུ་མེད་པ་ནི་གཉིས་ཀྱི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། 

57-1-6b

གཉིས་སུ་མེད་པ་ནི་གཉིས་ཀྱི་རང་བཞིན་ལས་གཞན་མ་ཡིན་པའི་ཕྱིར་ཏེ། གཉིས་ཀྱི་རང་བཞིན་ལས་གཉིས་སུ་མེད་པ་གཞན་མེད་པས་གཉིས་ཀྱི་རང་བཞིན་ཉིད་གཉིས་སུ་མེད་པ་སྟེ། གཉིས་ཀྱི་རང་བཞིན་གྱི་གཉིས་སུ་
མེད་པ་ཤེས་པ་དེས་ཆོས་ཐམས་ཅད་གཉིས་སུ་མེད་པའོ། །བདག་ནི་གཟུགས་དང་དབྱེར་མེད་པ་གཟུགས་མེད་པ་ཤེས་པ་ལ་གནས་ཀྱིས། གཞན་དག་ཀྱང་གཟུགས་དང་དབྱེར་མེད་པ་གཟུགས་མེད་པ་ཤེས་པ་ལ་དགོད་
དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གཟུགས་དང་དབྱེར་མེད་པ་གཟུགས་མེད་པ་ནི་གཟུགས་ཀྱི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། གཟུགས་མེད་པ་ནི་གཟུགས་ཀྱི་རང་བཞིན་ལས་
གཞན་མ་ཡིན་པའི་ཕྱིར་ཏེ། གཟུགས་ཀྱི་རང་བཞིན་ལས་གཟུགས་མེད་པ་གཞན་མེད་པས་གཟུགས་ཀྱི་རང་བཞིན་ཉིད་གཟུགས་མེད་པ་སྟེ། གཟུགས་ཀྱི་རང་བཞིན་གྱི་གཟུགས་མེད་པ་ཤེས་པ་དེས་ཆོས་
ཐམས་ཅད་གཟུགས་མེད་པའོ། །བདག་ནི་འཁོར་བ་དང་དབྱེར་མེད་པ་མྱ་ངན་འདས་པ་ཤེས་པ་ལ་གནས་ཀྱིས། གཞན་དག་ཀྱང་འཁོར་བ་དང་དབྱེར་མེད་པ་མྱ་ངན་འདས་པ་ཤེས་པ་ལ་དགོད་དོ་ཞེས་དབུགས་འབྱིན་པ་
རྙེད་པར་འགྱུར་ཏེ། དེ་ལ་འཁོར་བ་དང་དབྱེར་མེད་པ་མྱ་ངན་འདས་པ་ནི་འཁོར་བའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་ནི་འཁོར་བའི་རང་བཞིན་ལས་གཞན་མ་ཡིན་པའི་ཕྱིར་ཏེ། འཁོར་
བའི་རང་བཞིན་ལས་མྱ་ངན་འདས་པ་གཞན་མེད་པས་འཁོར་བའི་རང་བཞིན་ཉིད་མྱ་ངན་ལས་འདས་པའོ། །འཁོར་བའི་རང་བཞིན་གྱི་མྱ་ངན་ལས་འདས་པ་ཤེས་པ་དེས་ཆོས་ཐམས་ཅད་མྱ་ངན་ལས་འདས་པ་སྟེ། 
འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་

57-1-7a

རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཆགས་པ་དང་དབྱེར་མེད་པ་ཆགས་པ་མེད་པ་ཤེས་པ་ལ་གནས་ཀྱིས། གཞན་དག་ཀྱང་ཆགས་
པ་དང་དབྱེར་མེད་པ་ཆགས་པ་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆགས་པ་དང་དབྱེར་མེད་པ་ཆགས་པ་མེད་མ་ནི་ཆགས་པའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། ཆགས་
པ་མེད་པ་ནི་ཆགས་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། ཆགས་པའི་རང་བཞིན་ལས་ཆགས་པ་མེད་པ་གཞན་མེད་པས་ཆགས་པའི་རང་བཞིན་ཉིད་ཆགས་པ་མེད་པ་སྟེ། ཆགས་པའི་རང་བཞིན་གྱི་
ཆགས་པ་མེད་པ་ཤེས་པ་དེས་ཆོས་ཐམས་ཅད་ཆགས་པ་མེད་པའོ། །བདག་ནི་རློམ་སེམས་དང་དབྱེར་མེད་པ་རློམ་སེམས་མེད་པ་ཤེས་པ་ལ་གནས་ཀྱིས། གཞན་དག་ཀྱང་རློམ་སེམས་དང་
དབྱེར་མེད་པ་རློམ་སེམས་མེད་པ་ཤེས་པ་ལ་དགོད་དོ་ཞེས་འབུགས་འབྱིན་པ་རྙེད་པར་འགྱུར་ཏེ། དེ་ལ་རློམ་སེམས་དང་དབྱེར་མེད་པ་རློམ་སེམས་མེད་པ་ནི་རློམ་སེམས་ཀྱི་རང་བཞིན་གང་ཡིན་པའོ། །དེ་ཅིའི་
ཕྱིར་ཞེ་ན། རློམ་སེམས་མེད་པ་ནི་རློམ་སེམས་ཀྱི་རང་བཞིན་ལས་གཞན་མ་ཡིན་པའི་ཕྱིར་ཏེ། རློམ་སེམས་ཀྱི་རང་བཞིན་ལས་རློམ་སེམས་མེད་པ་གཞན་མེད་པས་རློམ་སེམས་ཀྱི་རང་བཞིན་ཉིད་རློམ་སེམས་
མེད་པ་སྟེ། རློམ་སེམས་ཀྱི་རང་བཞིན་གྱི་རློམ་སེམས་མེད་པ་ཤེས་པ་དེས་ཆོས་ཐམས་ཅད་རློམ་སེམས་མེད་པའོ། །བདག་ནི་མི་ཤེས་པ་དང་། དབྱེར་མེད་པའི་ཤེས་པ་ལ་གནས་ཀྱིས། གཞན་དག་
ཀྱང་མི་ཤེས་པ་དང་དབྱེར་མེད་པའི་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མི་ཤེས་པ་དང་དབྱེར་མེད་པའི་ཤེས་པ་ནི་མི་ཤེས་པའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། 

57-1-7b

ཤེས་པ་ནིས་མི་ཤེས་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། མི་ཤེས་པའི་རང་བཞིན་ལས་ཤེས་པ་གཞན་མེད་པས་མི་ཤེས་པའི་རང་བཞིན་ཉིད་ཤེས་པ་སྟེ། མི་ཤེས་པའི་རང་བཞིན་གྱི་ཤེས་
པ་དེས་ཆོས་ཐམས་ཅད་ཤེས་པའོ། །བདག་ནི་ཡོད་པ་དང་དབྱེར་མེད་པ་མེད་པ་ཤེས་པ་ལ་གནས་ཀྱིས། གཞན་དག་ཀྱང་ཡོད་པ་དང་དབྱེར་མེད་པའི་མེད་པ་ཤེས་པ་ལ་དགོད་དོ་ཞེས་དབུགས་འབྱིན་
པ་རྙེད་པར་འགྱུར་ཏེ། དེ་ལ་ཡོད་པ་དང་དབྱེར་མེད་པའི་མེད་པ་ནི་ཡོད་པའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། མེད་པའི་རང་བཞིན་ཡོད་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། 
ཡོད་པའི་རང་བཞིན་ལས་མེད་པ་གཞན་མེད་པས་ཡོད་པའི་རང་བཞིན་ཉིད་མེད་པ་སྟེ། ཡོད་པའི་རང་བཞིན་གྱི་མེད་པ་ཤེས་པ་དེས་ཆོས་ཐམས་ཅད་མེད་པའོ། །བདག་ནི་རྣམ་པར་རིག་པ་དང་དབྱེར་
མེད་པ་རྣམ་པར་རིག་པ་མེད་པ་ཤེས་པ་ལ་གནས་ཀྱིས། གཞན་དག་ཀྱང་རྣམ་པར་རིག་པ་དང་དབྱེར་མེད་པ་རྣམ་པར་རིག་པ་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་
རྣམ་པར་རིག་པ་དང་དབྱེར་མེད་པ་ད་རྣམ་པར་རིག་པ་མེད་པ་ནི་རྣམ་པར་རིག་པའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། རྣམ་པར་རིག་པ་མེད་པ་ནི་རྣམ་པར་རིག་པའི་རང་བཞིན་ལས་གཞན་མ་
ཡིན་པའི་ཕྱིར་ཏེ། རྣམ་པར་རིག་པའི་རང་བཞིན་ལས་རྣམ་པར་རིག་པ་མེད་པ་གཞན་མེད་པས་རྣམ་པར་རིག་པའི་རང་བཞིན་ཉིད་རྣམ་པར་རིག་པ་མེད་པའོ། །རྣམ་པར་རིག་པའི་རང་བཞིན་གྱི་རྣམ་
པར་རིག་པ་མེད་པ་ཤེས་པ་དེས་ཆོས་ཐམས་ཅད་རྣམ་པར་རིག་པ་མེད་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་

57-1-8a

བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་མིང་དང་
དབྱེར་མེད་པ་མིང་མེད་པ་ཤེས་པ་ལ་གནས་ཀྱིས། གཞན་དག་ཀྱང་མིང་དང་དབྱེར་མེད་པ་མིང་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མིང་དང་དབྱེར་མེད་པ་མིང་མེད་
པ་ནི་མིང་གི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། མིང་མེད་པ་ནི་མིང་གི་རང་བཞིན་ལས་གཞན་མ་ཡིན་པའི་ཕྱིར་ཏེ། མིང་གི་རང་བཞིན་ལས་མིང་མེད་པ་གཞན་མེད་པས་མིང་གི་རང་བཞིན་ཉིད་མིང་
མེད་པ་སྟེ། མིང་གི་རང་བཞིན་གྱི་མིང་མེད་པ་ཤེས་པ་དེས་ཆོས་ཐམས་ཅད་མིང་མེད་པའོ། །བདག་ནི་བདག་དང་དབྱེར་མེད་པ་བདག་མེད་པའི་ཡེ་ཤེས་ལ་གནས་ཀྱིས། གཞན་དག་ཀྱང་བདག་དང་དབྱེར་མེད་
པ་བདག་མེད་པའི་ཡེ་ཤེས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བདག་དང་དབྱེར་མེད་པ་བདག་མེད་པ་ནི་བདག་གི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། བདག་མེད་པ་ནི་བདག་
གི་རང་བཞིན་ལས་གཞན་མ་ཡིན་པའི་ཕྱིར་ཏེ། བདག་གི་རང་བཞིན་ལས་བདག་མེད་པ་གཞན་མེད་པས་བདག་གི་རང་བཞིན་ཉིད་བདག་མེད་པ་སྟེ། བདག་གི་རང་བཞིན་བདག་མེད་པ་ཤེས་པ་དེས་ཆོས་ཐམས་
ཅད་བདག་མེད་པའོ། །བདག་ནི་རྒྱུ་དང་རྐྱེན་ཚོགས་པའི་བྱེད་པ་དང་། དབྱེར་མེད་པ་རྒྱུ་དང་རྐྱེན་ཚོགས་པའི་བྱེད་པ་མེད་པ་ཤེས་པ་ལ་གནས་ཀྱིས། གཞན་དག་ཀྱང་རྒྱུ་དང་རྐྱེན་ཚོགས་པའི་བྱེད་པ་དང་
དབྱེར་མེད་པ་རྒྱུ་དང་རྐྱེན་ཚོགས་པའི་བྱེད་པ་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་རྒྱུ་དང་རྐྱེན་ཚོགས་པའི་བྱེད་པ་དང་དབྱེར་མེད་པ་རྒྱུ་དང་རྐྱེན་ཚོགས་པའི་བྱེད་པ་མེད་པ་ནི་རྒྱུ་དང་

57-1-8b

རྐྱེན་ཚོགས་པའི་བྱེད་པ་ཉིད་གང་ཡིན་པའོ། །དེ་ཅིའི་ཕྱིར་ཞེ་ན། རྒྱུ་དང་རྐྱེན་ཚོགས་པའི་བྱེད་པ་མེད་པ་ནི་རྒྱུ་དང་རྐྱེན་ཚོགས་པའི་བྱེད་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། རྒྱུ་དང་རྐྱེན་ཚོགས་པའི་བྱེད་པ་
ལས་རྒྱུ་དང་རྐྱེན་ཚོགས་པའི་བྱེད་པ་མེད་པ་གཞན་མེད་པས་རྒྱུ་དང་རྐྱེན་ཚོགས་པའི་བྱེད་པ་མེད་པའི་རང་བཞིན་ཉིད་རྒྱུ་དང་རྐྱེན་ཚོགས་པའི་བྱེད་པ་མེད་པ་སྟེ། རྒྱུ་དང་རྐྱེན་ཚོགས་པའི་བྱེད་པ་མེད་པའི་རང་བཞིན་ཤེས་པ་དེས་
ཆོས་ཐམས་ཅད་རྒྱུ་དང་རྐྱེན་ཚོགས་པའི་བྱེད་པ་མེད་པའོ། །བདག་ནི་དབྱེ་བ་དབྱེར་མེད་པ་ཤེས་པ་ལ་གནས་ཀྱིས། གཞན་དག་ཀྱང་དབྱེ་བ་དབྱེར་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་
འགྱུར་ཏེ། དེ་ལ་དབྱེ་བ་དབྱེར་མེད་པའི་རང་བཞིན་ནི་དབྱེ་བའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། དབྱེར་མེད་པ་ནི་དབྱེ་བའི་རང་བཞིན་ལས་གཞན་མ་ཡིན་པའི་ཕྱིར་ཏེ། དབྱེ་བའི་རང་བཞིན་ལས་དབྱེར་
མེད་པ་གཞན་མེད་པས་དབྱེ་བའི་རང་བཞིན་ཉིད་དབྱེར་མེད་པ་སྟེ། དབྱེ་བའི་རང་བཞིན་གྱི་དབྱེར་མེད་པ་ཤེས་པ་དེས་ཆོས་ཐམས་ཅད་དབྱེར་མེད་པའོ། །བདག་ནི་ཡི་གེ་དང་དབྱེར་མེད་པ་ཡི་གེ་མེད་པ་ཤེས་པ་ལ་
གནས་ཀྱིས། གཞན་དག་ཀྱང་ཡི་གེ་དང་དབྱེར་མེད་པ་ཡི་གེ་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡི་གེ་དང་དབྱེར་མེད་པ་ཡི་གེ་མེད་པ་ནི་ཡི་གེའི་རང་བཞིན་གང་ཡིན་
པའོ། །དེ་ཅིའི་ཕྱིར་ཞེ་ན། ཡི་གེ་མེད་པ་ནི་ཡི་གེའི་རང་བཞིན་ལས་གཞན་མ་ཡིན་པའི་ཕྱིར་ཏེ། ཡི་གེའི་རང་བཞིན་ལས་ཡི་གེ་མེད་པ་གཞན་མེད་པས་ཡི་གེའི་རང་བཞིན་ཉིད་ཡི་གེ་མེད་པའོ། །ཡི་གེའི་རང་
བཞིན་གྱི་ཡི་གེ་མེད་པ་ཤེས་པ་དེས་ཆོས་ཐམས་ཅད་ཡི་གེ་མེད་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །

57-1-9a

འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ལྷག་པའི་ང་རྒྱལ་དང་
དབྱེར་མེད་པ་ལྷག་པའི་ང་རྒྱལ་མེད་པ་ཤེས་པ་ལ་གནས་ཀྱིས། གཞན་དག་ཀྱང་ལྷག་པའི་ང་རྒྱལ་དང་དབྱེར་མེད་པ་ལྷག་པའི་ང་རྒྱལ་མེད་པ་ཤེས་པ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལྷག་
པའི་ང་རྒྱལ་དང་དབྱེར་མེད་པ་ལྷག་པའི་ང་རྒྱལ་མེད་པ་ནི་ལྷག་པའི་ང་རྒྱལ་གྱི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། ལྷག་པའི་ང་རྒྱལ་མེད་པ་ནི་ལྷག་པའི་ང་རྒྱལ་གྱི་རང་བཞིན་ལས་གཞན་མ་ཡིན་པའི་
ཕྱིར་ཏེ། ལྷག་པའི་ང་རྒྱལ་གྱི་རང་བཞིན་ལས་ལྷག་པའི་ང་རྒྱལ་མེད་པ་གཞན་མེད་པས་ལྷག་པའི་ང་རྒྱལ་གྱི་རང་བཞིན་ཉིད་ལྷག་པའི་ང་རྒྱལ་མེད་པ་སྟེ། ལྷག་པའི་ང་རྒྱལ་གྱི་རང་བཞིན་ལྷག་པའི་ང་རྒྱལ་མེད་པ་
ཤེས་པ་དེས་ཆོས་ཐམས་ཅད་ལྷག་པའི་ང་རྒྱལ་མེད་པའོ། །བདག་ནི་བདག་བསྟོད་པ་དང་དབྱེར་མེད་པ་བདག་བསྟོད་པ་མེད་པ་ཤེས་པ་ལ་གནས་ཀྱིས། གཞན་དག་ཀྱང་བདག་བསྟོད་པ་དང་དབྱེར་མེད་པ་བདག་
བསྟོད་པ་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བདག་བསྟོད་པ་དང་དབྱེར་མེད་པ་བདག་བསྟོད་པ་མེད་པ་ནི་བདག་བསྟོད་པའི་རང་བཞིན་གང་ཡིན་པའོ། །དེ་ཅིའི་ཕྱིར་
ཞེ་ན། བདག་བསྟོད་པ་མེད་པ་ནི་བདག་བསྟོད་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། བདག་བསྟོད་པའི་རང་བཞིན་ལས་བདག་བསྟོད་པ་མེད་པ་གཞན་མེད་པས་བདག་བསྟོད་པའི་རང་བཞིན་ཉིད་བདག་
བསྟོད་པ་མེད་པ་སྟེ། བདག་བསྟོད་པའི་རང་བཞིན་བདག་བསྟོད་པ་མེད་པ་ཤེས་པ་དེས་ཆོས་ཐམས་ཅད་བདག་བསྟོད་པ་མེད་པའོ། །བདག་ནི་དྲང་བའི་དོན་དང་དབྱེར་མེད་པ་ངེས་པའི་དོན་ཤེས་པ་

57-1-9b

ལ་གནས་ཀྱིས་གཞན་དག་ཀྱང་དྲང་བའི་དོན་དང་དབྱེར་མེད་པ་ངེས་པའི་དོན་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དྲང་བའི་དོན་དང་དབྱེར་མེད་པ་ངེས་པའི་དོན་ནི་དྲང་བའི་
དོན་གྱི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། ངེས་པའི་དོན་ནི་དྲང་བའི་དོན་གྱི་རང་བཞིན་ལས་གཞན་མ་ཡིན་པའི་ཕྱིར་ཏེ། དྲང་བའི་དོན་གྱི་རང་བཞིན་ལས་ངེས་པའི་དོན་གཞན་མེད་པས་དྲང་བའི་
དོན་གྱི་རང་བཞིན་ཉིད་ངེས་པའི་དོན་ཏེ། དྲང་བའི་དོན་གྱི་རང་བཞིན་ངེས་པའི་དོན་ཤེས་པ་དེས་ཆོས་ཐམས་ཅད་ངེས་པའི་དོན་ཏོ། །བདག་ནི་གང་ཟག་དང་དབྱེར་མེད་པ་ཆོས་ཉིད་ཤེས་པ་ལ་གནས་ཀྱིས། 
གཞན་དག་ཀྱང་གང་ཟག་དང་དབྱེར་མེད་པ་ཆོས་ཉིད་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གང་ཟག་དང་དབྱེར་མེད་པ་ཆོས་ཉིད་ནི་གང་ཟག་གི་རང་བཞིན་གང་ཡིན་པའོ། །དེ་ཅིའི་
ཕྱིར་ཞེ་ན། ཆོས་ཉིད་ནི་གང་ཟག་གི་རང་བཞིན་ལས་གཞན་མ་ཡིན་པའི་ཕྱིར་ཏེ། གང་ཟག་གི་རང་བཞིན་ལས་ཆོས་ཉིད་གཞན་མེད་པས་གང་ཟག་གི་རང་བཞིན་ཉིད་ཆོས་ཉིད་དེ་གང་ཟག་གི་རང་བཞིན་
གྱིས་ཆོས་ཉིད་ཤེས་པ་དེས་ཆོས་ཐམས་ཅད་ཆོས་ཉིད་དོ། །བདག་ནི་ལོག་པར་ལྟ་བ་དང་དབྱེར་མེད་པ་ཡང་དག་པའི་ལྟ་བ་ལ་གནས་ཀྱིས། གཞན་དག་ཀྱང་ལོག་པར་ལྟ་བ་དང་དབྱེར་མེད་པ་ཡང་དག་པའི་
ལྟ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལོག་པར་ལྟ་བ་དང་དབྱེར་མེད་པ་ཡང་དག་པའི་ལྟ་བ་ནི་ལོག་པར་ལྟ་བའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། ཡང་དག་
པའི་ལྟ་བ་ནི་ལོག་པར་ལྟ་བའི་རང་བཞིན་ལས་གཞན་མ་ཡིན་པའི་ཕྱིར་ཏེ། ལོག་པར་ལྟ་བའི་རང་བཞིན་ལས་ཡང་དག་པའི་ལྟ་བ་གཞན་མེད་པས་ལོག་པར་ལྟ་བའི་རང་བཞིན་ཉིད་ཡང་དག་པའི་ལྟ་བའོ། །

57-1-10a

ལོག་པར་ལྟ་བའི་རང་བཞིན་ཡང་དག་པའི་ལྟ་བ་ཤེས་པ་དེས་ཆོས་ཐམས་ཅད་ཡང་དག་པའི་ལྟ་བ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་
འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་མཐའ་དང་དབྱེར་མེད་པ་མཉམ་
པ་ཉིད་ཤེས་པ་ལ་གནས་ཀྱིས། གཞན་དག་ཀྱང་མཐའ་དང་དབྱེར་མེད་པ་མཉམ་པ་ཉིད་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མཐའ་དང་དབྱེར་མེད་པ་མཉམ་པ་ཉིད་ནི་མཐའི་རང་བཞིན་
གང་ཡིན་པའོ། །དེ་ཅིའི་ཕྱིར་ཞེ་ན། མཉམ་པ་ཉིད་ནི་མཐའི་རང་བཞིན་ལས་གཞན་མ་ཡིན་པའི་ཕྱིར་ཏེ། མཐའི་རང་བཞིན་ལས་མཉམ་པ་ཉིད་གཞན་མེད་པས་མཐའི་རང་བཞིན་ཉིད་མཉམ་པ་ཉིད་དེ། མཐའི་རང་
བཞིན་གྱི་མཉམ་པ་ཉིད་ཤེས་པ་དེས་ཆོས་ཐམས་ཅད་མཉམ་པ་ཉིད་དོ། །བདག་ནི་ཤེས་བྱ་དང་དབྱེར་མེད་པའི་ཤེས་པ་ལ་གནས་ཀྱིས། གཞན་དག་ཀྱང་ཤེས་བྱ་དང་དབྱེར་མེད་པའི་ཤེས་པ་ལ་དགོད་དོ་ཞེས་དབུགས་
འབྱིན་པ་རྙེད་པར་འགྱུར་ཏེ། དེ་ལ་ཤེས་བྱ་དང་དབྱེར་མེད་པ་ཤེས་པ་ནི་ཤེས་བྱའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། ཤེས་པ་ནི་ཤེས་བྱའི་རང་བཞིན་ལས་གཞན་མ་ཡིན་པའི་ཕྱིར་ཏེ། ཤེས་བྱའི་
རང་བཞིན་ལས་ཤེས་པ་གཞན་མེད་པས་ཤེས་བྱའི་རང་བཞིན་ཉིད་ཤེས་པ་སྟེ། ཤེས་བྱའི་རང་བཞིན་གྱི་ཤེས་པ་དེས་ཆོས་ཐམས་ཅད་ཤེས་པའོ། །བདག་ནི་འཛིན་པ་དང་དབྱེར་མེད་པ་འཛིན་པ་མེད་པའི་ཤེས་པ་
པ་ལ་གནས་ཀྱིས། གཞན་དག་ཀྱང་འཛིན་པ་དང་དབྱེར་མེད་པ་འཛིན་པ་མེད་པའི་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་འཛིན་པ་དང་དབྱེར་མེད་པ་འཛིན་པ་མེད་པ་ནི་འཛིན་པའི་རང་བཞིན་གང་ཡིན་

57-1-10b

པའོ། །དེ་ཅིའི་ཕྱིར་ཞེ་ན། འཛིན་པ་མེད་པ་ནི་འཛིན་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། འཛིན་པའི་རང་བཞིན་ལས་འཛིན་པ་མེད་པ་གཞན་མེད་པས་འཛིན་པའི་རང་བཞིན་ཉིད་འཛིན་པ་མེད་པ་སྟེ། འཛིན་པའི་
རང་བཞིན་གྱི་འཛིན་པ་མེད་པའི་ཤེས་པ་དེས་ཆོས་ཐམས་ཅད་འཛིན་པ་མེད་པའོ། །བདག་ནི་མཚན་མ་དང་དབྱར་མེད་པ་མཚན་མ་མེད་པའི་ཤེས་པ་ལ་གནས་ཀྱིས། གཞན་དག་ཀྱང་མཚན་མ་དང་དབྱེར་
མེད་པ་མཚན་མ་མེད་པའི་ཤེས་པ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མཚན་མ་དང་དབྱེར་མེད་པ་མཚན་མ་མེད་པ་ནི་མཚན་མའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། མཚན་མ་
མེད་པ་ནི་མཚན་མའི་རང་བཞིན་ལས་གཞན་མ་ཡིན་པའི་ཕྱིར་ཏེ། མཚན་མའི་རང་བཞིན་ལས་མཚན་མ་མེད་པ་གཞན་མེད་པས་མཚན་མའི་རང་བཞིན་ཉིད་མཚན་མ་མེད་པ་སྟེ། མཚན་མའི་རང་བཞིན་མཚན་
མ་མེད་པའི་ཤེས་པ་དེས་ཆོས་ཐམས་ཅད་མཚན་མ་མེད་པའོ། །བདག་ནི་བསྒོམ་པ་དང་དབྱེར་མེད་པ་བསྒོམ་པ་མེད་པའི་ཤེས་པ་ལ་གནས་ཀྱིས། གཞན་དག་ཀྱང་བསྒོམ་པ་དང་དབྱེར་མེད་པ་བསྒོམ་པ་མེད་
པའི་ཤེས་པ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བསྒོམ་པ་དང་དབྱེར་མེད་པ་བསྒོམ་པ་མེད་པ་ནི་བསྒོམ་པའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། བསྒོམ་པ་མེད་པ་ནི་བསྒོམ་པའི་
རང་བཞིན་ལས་གཞན་མ་ཡིན་པའི་ཕྱིར་ཏེ། བསྒོམ་པའི་རང་བཞིན་ལས་བསྒོམ་པ་མེད་པ་གཞན་མེད་པས་བསྒོམ་པའི་རང་བཞིན་ཉིད་བསྒོམ་པ་མེད་པའོ། །བསྒོམ་པའི་རང་བཞིན་བསྒོམ་པ་མེད་པའི་ཤེས་པ་
དེས་ཆོས་ཐམས་ཅད་བསྒོམ་པ་མེད་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་

57-1-11a

འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་མཐའ་དང་དབྱེར་མེད་པ་དབུ་མའི་ལམ་ཤེས་པ་ལ་གནས་ཀྱིས། 
གཞན་དག་ཀྱང་མཐའ་དང་དབྱེར་མེད་པ་དབུ་མའི་ལམ་ཤེས་པ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མཐའ་དང་དབྱེར་མེད་པ་དབུ་མའི་ལམ་ནི་མཐའི་རང་བཞིན་གང་ཡིན་པའོ། །དེ་ཅིའི་
ཕྱིར་ཞེ་ན། མཐའི་རང་བཞིན་ལས་དབུ་མའི་ལམ་གཞན་མ་ཡིན་པའི་ཕྱིར་ཏེ། མཐའི་རང་བཞིན་ལས་དབུ་མའི་ལམ་གཞན་མེད་པས་མཐའི་རང་བཞིན་ཉིད་དབུ་མའི་ལམ་སྟེ། མཐའི་རང་བཞིན་དབུ་མའི་ལམ་
ཤེས་པ་དེས་ཆོས་ཐམས་ཅད་དབུ་མའི་ལམ་མོ། །བདག་ནི་ནམ་མཁའ་མ་ཡིན་པ་དང་དབྱེར་མེད་པའི་ནམ་མཁའ་ཤེས་པ་ལ་གནས་ཀྱིས། གཞན་དག་ཀྱང་ནམ་མཁའ་མ་ཡིན་པ་དང་དབྱེར་མེད་པའི་
ནམ་མཁའ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ནམ་མཁའ་མ་ཡིན་པ་དང་དབྱེར་མེད་པའི་ནམ་མཁའ་ནི་ནམ་མཁའ་མ་ཡིན་པའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། ནམ་མཁའ་ནི་ནམ་
མཁའ་མ་ཡིན་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། ནམ་མཁའ་མ་ཡིན་པའི་རང་བཞིན་ལས་ནམ་མཁའ་གཞན་མེད་པས་ནམ་མཁའ་མ་ཡིན་པའི་རང་བཞིན་ཉིད་ནམ་མཁའ་སྟེ། ནམ་མཁའ་
མ་ཡིན་པའི་རང་བཞིན་གྱི་ནམ་མཁའ་ཤེས་པ་དེས་ཆོས་ཐམས་ཅད་ནམ་མཁའོ། །བདག་ནི་མོ་ཤམ་གྱི་བུ་མ་ཡིན་པ་དང་དབྱེར་མེད་པའི་མོ་ཤམ་གྱི་བུ་ཤེས་པ་ལ་གནས་ཀྱིས། གཞན་དག་ཀྱང་མོ་ཤམ་
གྱི་བུ་མ་ཡིན་པ་དང་དབྱེར་མེད་པ་མོ་ཤམ་གྱི་བུ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མོ་ཤམ་གྱི་བུ་མ་ཡིན་པ་དང་དབྱེར་མེད་པའི་མོ་ཤམ་གྱི་བུ་ནི་མོ་ཤམ་གྱི་བུ་མ་ཡིན་པའི་རང་

57-1-11b

བཞིན་གང་ཡིན་པའོ། །དེ་ཅིའི་ཕྱིར་ཞེ་ན། མོ་ཤམ་གྱི་བུ་མ་ཡིན་པའི་རང་བཞིན་ལས་མོ་ཤམ་གྱི་བུ་གཞན་མ་ཡིན་པའི་ཕྱིར་ཏེ། མོ་ཤམ་གྱི་བུའི་རང་བཞིན་ལས་མོ་ཤམ་གྱི་བུ་མ་ཡིན་པ་གཞན་མེད་པས་མོ་ཤམ་
གྱི་བུའི་རང་བཞིན་ཉིད་མོ་ཤམ་གྱི་བུ་མ་ཡིན་པ་སྟེ། མོ་ཤམ་གྱི་བུ་མ་ཡིན་པའི་རང་བཞིན་གྱི་མོ་ཤམ་གྱི་བུ་ཤེས་པ་དེས་ཆོས་ཐམས་ཅད་མོ་ཤམ་གྱི་བུ་དང་མཚུངས་པའོ། །བདག་ནི་སྨིག་རྒྱུ་མ་ཡིན་པ་དང་དབྱེར་
མེད་པའི་སྨིག་རྒྱུ་ཤེས་པ་ལ་གནས་ཀྱིས། གཞན་དག་ཀྱང་སྨིག་རྒྱུ་མ་ཡིན་པ་དང་དབྱེར་མེད་པའི་སྨིག་རྒྱུ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྨིག་རྒྱུ་མ་ཡིན་པ་དང་དབྱེར་མེད་
པའི་སྨིག་རྒྱུ་ཤེས་པ་ནི་སྨིག་རྒྱུ་མ་ཡིན་པའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། སྨིག་རྒྱུ་མ་ཡིན་པ་ནི་སྨིག་རྒྱུ་རང་བཞིན་ལས་གཞན་མ་ཡིན་པའི་ཕྱིར་ཏེ། སྨིག་རྒྱུའི་རང་བཞིན་ལས་སྨིག་རྒྱུ་མ་
ཡིན་པ་གཞན་མེད་པས་སྨིག་རྒྱུའི་རང་བཞིན་ཉིད་སྨིག་རྒྱུ་མ་ཡིན་ཏེ། སྨིག་རྒྱུ་མ་ཡིན་པའི་རང་བཞིན་གྱི་སྨིག་རྒྱུའི་ཤེས་པ་དེས་ཆོས་ཐམས་ཅད་སྨིག་རྒྱུ་ལྟ་བུའོ། །བདག་ནི་ལོག་པར་ལྟ་བ་དང་དབྱེར་མེད་པ་
ཡང་དག་པའི་ལྟ་བ་ཤེས་པ་ལ་གནས་ཀྱིས། གཞན་ཡང་ལོག་པར་ལྟ་བ་དང་དབྱེར་མེད་པ་ཡང་དག་པའི་ལྟ་བ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལོག་པར་ལྟ་བ་དང་དབྱེར་
མེད་པ་ཡང་དག་པའི་ལྟ་བ་ནི་ལོག་པར་ལྟ་བའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། ལོག་པར་ལྟ་བའི་རང་བཞིན་ལས་ཡང་དག་པའི་ལྟ་བ་གཞན་མ་ཡིན་པའི་ཕྱིར་ཏེ། ལོག་པར་ལྟ་བའི་རང་བཞིན་
ལས་ཡང་དག་པའི་ལྟ་བ་གཞན་མེད་པས་ལོག་པར་ལྟ་བའི་རང་བཞིན་ཉིད་ཡང་དག་པའི་ལྟ་བའོ། །ལོག་པར་ལྟ་བའི་རང་བཞིན་ཡང་དག་པའི་ལྟ་བ་ཤེས་པ་དེས་ཆོས་ཐམས་ཅད་ཡང་དག་པའི་ལྟ་བ་

57-1-12a

སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་
ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་མ་རིག་པ་དང་དབྱེར་མེད་པའི་རིག་པ་ཤེས་པ་ལ་གནས་ཀྱིས། གཞན་དག་ཀྱང་མ་རིག་
པ་དང་དབྱེར་མེད་པའི་རིག་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མ་རིག་པ་དང་དབྱེར་མེད་པའི་རིག་པ་ནི་མ་རིག་པའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། རིག་པ་ནི་
མ་རིག་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། མ་རིག་པའི་རང་བཞིན་ལས་རིག་པ་གཞན་མེད་པས་མ་རིག་པའི་རང་བཞིན་ཉིད་རིག་པ་སྟེ། མ་རིག་པའི་རང་བཞིན་གྱི་རིག་པ་ཤེས་པ་དེས་ཆོས་
ཐམས་ཅད་རིག་པའོ། །བདག་ནི་འདོད་ཆགས་དང་དབྱེར་མེད་པ་འདོད་ཆགས་མེད་པ་ཤེས་པ་ལ་གནས་ཀྱིས་གཞན་དག་ཀྱང་འདོད་ཆགས་དང་དབྱེར་མེད་པ་འདོད་ཆགས་མེད་པ་ཤེས་པ་ལ་དགོད་དོ་ཞེས་འབུགས་འབྱིན་པ་རྙེད་པར་
འགྱུར་ཏེ། དེ་ལ་འདོད་ཆགས་དང་དབྱེར་མེད་པ་འདོད་ཆགས་མེད་པ་ནི་འདོད་ཆགས་ཀྱི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། འདོད་ཆགས་མེད་པ་ནི་འདོད་ཆགས་ཀྱི་རང་བཞིན་ལས་གཞན་མ་
ཡིན་པའི་ཕྱིར་ཏེ། འདོད་ཆགས་ཀྱི་རང་བཞིན་ལས་འདོད་ཆགས་མེད་པ་གཞན་མེད་པས་འདོད་ཆགས་ཀྱི་རང་བཞིན་ཉིད་འདོད་ཆགས་མེད་པ་སྟེ། འདོད་ཆགས་ཀྱི་རང་བཞིན་འདོད་ཆགས་མེད་པ་ཤེས་པ་དེས་
ཆོས་ཐམས་ཅད་འདོད་ཆགས་མེད་པའོ། །བདག་ནི་ཞེ་སྡང་དང་དབྱེར་མེད་པ་ཞེ་སྡང་མེད་པ་ཤེས་པ་ལ་གནས་ཀྱིས། གཞན་དག་ཀྱང་ཞེ་སྡང་དང་དབྱེར་མེད་པ་ཞེ་སྡང་མེད་པ་ཤེས་པ་ལ་དགོད་དོ་ཞེས་དབུགས་

57-1-12b

འབྱིན་པ་རྙེད་པར་འགྱུར་ཏེ། དེ་ལ་ཞེ་སྡང་དང་དབྱེར་མེད་པ་ཞེ་སྡང་མེད་པ་ནི་ཞེ་སྡང་གི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། ཞེ་སྡང་མེད་པ་ནི་ཞེ་སྡང་གི་རང་བཞིན་ལས་གཞན་
མ་ཡིན་པའི་ཕྱིར་ཏེ། ཞེ་སྡང་གི་རང་བཞིན་ལས་ཞེ་སྡང་མེད་པ་གཞན་མེད་པས་ཞེ་སྡང་གི་རང་བཞིན་ཉིད་ཞེ་སྡང་མེད་པ་སྟེ། ཞེ་སྡང་གི་རང་བཞིན་ཞེ་སྡང་མེད་པ་ཤེས་པ་དེས་ཆོས་ཐམས་ཅད་ཞེ་སྡང་མེད་པའོ། །
བདག་ནི་གཏི་མུག་དང་དབྱེར་མེད་པ། གཏི་མུག་མེད་པ་ཤེས་པ་ལ་གནས་ཀྱིས། གཞན་དག་ཀྱང་གཏི་མུག་དང་དབྱེར་མེད་པ་གཏི་མུག་མེད་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། 
དེ་ལ་གཏི་མུག་དང་དབྱེར་མེད་པ་གཏི་མུག་མེད་པ་ནི་གཏི་མུག་གི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། གཏི་མུག་གི་རང་བཞིན་ལས་གཏི་མུག་མེད་པ་གཞན་མ་ཡིན་པའི་ཕྱིར་ཏེ། གཏི་མུག་
གི་རང་བཞིན་ལས་གཏི་མུག་མེད་པ་གཞན་མེད་པས་གཏི་མུག་གི་རང་བཞིན་ཉིད་གཏི་མུག་མེད་པ་སྟེ། གཏི་མུག་གི་རང་བཞིན་གཏི་མུག་མེད་པའི་ཤེས་པ་དེས་ཆོས་ཐམས་ཅད་གཏི་མུག་མེད་པའོ། །བདག་
ནི་ཉིང་མཚམས་སྦྱོར་བ་དང་དབྱེར་མེད་པ་ཉིང་མཚམས་སྦྱོར་བ་མེད་པ་ཤེས་པ་ལ་གནས་ཀྱིས། གཞན་དག་ཀྱང་ཉིང་མཚམས་སྦྱོར་བ་དང་དབྱེར་མེད་པ་ཉིང་མཚམས་སྦྱོར་བ་མེད་པ་ཤེས་པ་ལ་དགོད་དོ་ཞེས་
དབུགས་འབྱིན་པ་རྙེད་པར་འགྱུར་ཏེ། དེ་ལ་ཉིང་མཚམས་སྦྱོར་བ་དང་དབྱེར་མེད་པ་ཉིང་མཚམས་སྦྱོར་བ་མེད་པ་ནི་ཉིང་མཚམས་སྦྱོར་བའི་རང་བཞིན་གང་ཡིན་པའོ། །དེ་ཅིའི་ཕྱིར་ཞེ་ན། ཉིང་མཚམས་
སྦྱོར་བ་མེད་པ་ནི་ཉིང་མཚམས་སྦྱོར་བའི་རང་བཞིན་ལས་གཞན་མ་ཡིན་པའི་ཕྱིར་ཏེ། ཉིང་མཚམས་སྦྱོར་བའི་རང་བཞིན་ལས་ཉིང་མཚམས་སྦྱོར་བ་མེད་པ་གཞན་མེད་པས་ཉིང་མཚམས་སྦྱོར་བའི་རང་བཞིན་

57-1-13a

ཉིད་ཉིང་མཚམས་སྦྱོར་བ་མེད་པའོ། །ཉིང་མཚམས་སྦྱོར་བའི་རང་བཞིན་ཉིང་མཚམས་སྦྱོར་བ་མེད་པ་ཤེས་པ་དེས་ཆོས་ཐམས་ཅད་ཉིང་མཚམས་སྦྱོར་བ་མེད་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་
ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་སྦྱིན་པ་ལས་བྱུང་བའི་བསྡུ་བའི་དངོས་པོ་ཤེས་པ་ལ་
གནས་ཀྱིས། གཞན་དག་ཀྱང་སྦྱིན་པ་ལས་བྱུང་བའི་བསྡུ་བའི་དངོས་པོའི་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྦྱིན་པ་ལས་བྱུང་བའི་བསྡུ་བའི་དངོས་པོ་ནི་གཏོང་བ་དང་བསྔོ་བ་གང་ཡིན་པའོ། །བདག་ནི་སྙན་པར་སྨྲ་བའི་བསྡུ་བའི་དངོས་པོ་
ཤེས་པ་ལ་གནས་ཀྱིས། གཞན་དག་ཀྱང་སྙན་པར་སྨྲ་བའི་བསྡུ་བའི་དངོས་པོ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྙན་པར་སྨྲ་བའི་བསྡུ་བའི་དངོས་པོ་ནི་བསམ་པ་དང་སྦྱོར་བ་གང་ཡིན་པའོ། །བདག་ནི་དོན་སྤྱོད་པའི་བསྡུ་བའི་དངོས་པོ་
ཤེས་པ་ལ་གནས་ཀྱིས། གཞན་དག་ཀྱང་དོན་སྤྱོད་པའི་བསྡུ་བའི་དངོས་པོ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དོན་སྤྱོད་པའི་བསྡུ་བའི་དངོས་པོ་ནི་བྱམས་པ་དང་སྙིང་རྗེ་གང་ཡིན་པའོ། །བདག་ནི་དོན་འཐུན་པའི་བསྡུ་བའི་དངོས་པོ་ཤེས་པ་ལ་
གནས་ཀྱིས། གཞན་དག་ཀྱང་དོན་འཐུན་པའི་བསྡུ་བའི་དངོས་པོ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དོན་འཐུན་པའི་བསྡུ་བའི་དངོས་པོ་ནི་ཐབས་དང་ཤེས་རབ་གང་ཡིན་པའོ། །བདག་ནི་རྩོམ་པ་ལ་གནས་ཀྱིས། གཞན་དག་
ཀྱང་རྩོམ་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་རྩོམ་པ་ནི་བསམ་པ་དང་སྦྱོར་བ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་
གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་འདོད་ཆགས་དང་བྲལ་བ་ཉིད་ལ་གནས་ཀྱིས། གཞན་དག་ཀྱང་འདོད་ཆགས་དང་བྲལ་བ་ཉིད་ལ་དགོད་དོ་ཞེས་

57-1-13b

དབུགས་འབྱིན་པ་རྙེད་པར་འགྱུར་ཏེ། དེ་ལ་འདོད་ཆགས་དང་བྲལ་བ་ཉིད་ནི་ཆོས་ཐམས་ཅད་ལ་མི་གནས་པར་འཇུག་པའོ། །བདག་ནི་ཞེ་སྡང་དང་བྲལ་བ་ཉིད་ལ་གནས་ཀྱིས། གཞན་དག་ཀྱང་ཞེ་སྡང་དང་བྲལ་བ་ཉིད་
ལ་དགོད་དོ་ཞེས་འབུགས་འབྱིན་པ་རྙེད་པར་འགྱུར་ཏེ། དེ་ལ་ཞེ་སྡང་དང་བྲལ་བ་ཉིད་ནི་སེམས་ཅན་ཐམས་ཅད་ལ་ཞེ་འགྲས་པ་མེད་པའི་སེམས་མ་ཉིད་གང་ཡིན་པའོ། །བདག་ནི་ལུས་སྡོམ་པ་ལ་གནས་ཀྱིས། 
གཞན་དག་ཀྱང་ལུས་སྡོམ་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལུས་སྡོམ་པ་ནི་ལུས་ཀྱི་ལས་ཀྱི་སྐྱོན་རྣམ་པ་གསུམ་ཡོངས་སུ་སྤོང་བ་ཉིད་གང་ཡིན་པའོ། །བདག་ནི་ངག་གི་སྡོམ་
པ་ལ་གནས་ཀྱིས། གཞན་དག་ཀྱང་ངག་གི་སྡོམ་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ངག་གི་སྡོམ་པ་ནི་ངག་གི་ལས་ཀྱི་ཉེས་པ་རྣམ་པ་བཞི་ཡོངས་སུ་སྤོང་བ་ཉིད་གང་ཡིན་པའོ། །
བདག་ནི་ཡིད་ཀྱི་སྡོམ་པ་ལ་གནས་ཀྱིས། གཞན་དག་ཀྱང་ཡིད་སྡོམ་པ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡིད་སྡོམ་པ་ནི་བརྣབ་སེམས་དང་། གནོད་སེམས་དང་། ལོག་པར་
ལྟ་བ་ཡོངས་སུ་སྤོང་བ་ཉིད་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་
ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་སངས་རྒྱས་རྗེས་སུ་དྲན་པ་ལ་གནས་ཀྱིས། གཞན་
དག་ཀྱང་སངས་རྒྱས་རྗེས་སུ་དྲན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སངས་རྒྱས་རྗེས་སུ་དྲན་པ་ནི་སངས་རྒྱས་མཐོང་བ་རྣམ་པར་དག་པ་གང་ཡིན་པའོ། །བདག་ནི་ཆོས་རྗེས་

57-1-14a

སུ་དྲན་པ་ལ་གནས་ཀྱིས། གཞན་དག་ཀྱང་ཆོས་རྗེས་སུ་དྲན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་རྗེས་སུ་དྲན་པ་ནི་ཆོས་མཐོང་བ་རྣམ་པར་དག་པ་གང་
ཡིན་པའོ། །བདག་ནི་དགེ་འདུན་རྗེས་སུ་དྲན་པ་ལ་གནས་ཀྱིས། གཞན་དག་ཀྱང་དགེ་འདུན་རྗེས་སུ་དྲན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དགེ་འདུན་རྗེས་སུ་དྲན་པ་ནི་མི་འགྱུར་བ་
ལ་འཇུག་པ་གང་ཡིན་པའོ། །བདག་ནི་གཏོང་བ་རྗེས་སུ་དྲན་པ་ལ་གནས་ཀྱིས། གཞན་དག་ཀྱང་གཏོང་བ་རྗེས་སུ་དྲན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གཏོང་
བ་རྗེས་སུ་དྲན་པ་ནི་རྫས་ཐམས་ཅད་ཡོངས་སུ་གཏོང་བ་གང་ཡིན་པའོ། །བདག་ནི་ཚུལ་ཁྲིམས་རྗེས་སུ་དྲན་པ་ལ་གནས་ཀྱིས། གཞན་དག་ཀྱང་ཚུལ་ཁྲིམས་རྗེས་སུ་དྲན་པ་ལ་དགོད་དོ་ཞེས་
དབུགས་འབྱིན་པ་རྙེད་པར་འགྱུར་ཏེ། དེ་ལ་ཚུལ་ཁྲིམས་རྗེས་སུ་དྲན་པ་ནི་ཆོས་ཐམས་ཅད་ལ་མཉམ་པ་ཉིད་དུ་འཇུག་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་
དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། ། བམ་པོ་གཉིས་པ། འཇམ་དཔལ་གཞན་ཡང་དབུགས་འབྱིན་པ་
རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་མི་རྟག་པར་སོ་སོར་རྟོག་པ་ལ་གནས་ཀྱིས། 
གཞན་དག་ཀྱང་མི་རྟག་པར་སོ་སོར་རྟོག་པ་ལ་དགོད་དོ། ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མི་རྟག་པར་སོ་སོར་རྟོག་པ་ནི་འདོད་པའི་

57-1-14b

འདོད་ཆགས་དང་། གཟུགས་ཀྱི་འདོད་ཆགས་དང་། གཟུགས་མེད་པའི་འདོད་ཆགས་ལས་ཡང་དག་པར་འདའ་བ་གང་ཡིན་པའོ། །བདག་ནི་བདག་མེད་པར་
སོ་སོར་རྟོག་པ་ལ་གནས་ཀྱིས། གཞན་དག་ཀྱང་བདག་མེད་པར་སོ་སོར་རྟོག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བདག་མེད་པར་སོ་སོར་རྟོག་པ་ནི་ཆོས་ཐམས་ཅད་ལ་མངོན་པར་
ཞེན་པ་མེད་པ་གང་ཡིན་པའོ། །བདག་ནི་བདེན་པ་ལ་གནས་ཀྱིས། གཞན་དག་ཀྱང་བདེན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བདེན་པ་ནི་ལྷ་དང་མི་ལ་སླུ་བ་མེད་པ་ཉིད་
གང་ཡིན་པའོ། །བདག་ནི་ཡང་དག་པ་ལ་གནས་ཀྱིས། གཞན་དག་ཀྱང་ཡང་དག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པ་ནི་ལྷ་རྣམས་དང་བདག་ལ་སླུ་བ་
མེད་པ་ཉིད་གང་ཡིན་པའོ། །བདག་ནི་ཆོས་སྤྱོད་པ་ལ་གནས་ཀྱིས། གཞན་དག་ཀྱང་ཆོས་སྤྱོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་སྤྱོད་པ་ནི་ཆོས་ལ་རྟོན་པ་ཉིད་གང་ཡིན་
པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་
དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཚུལ་ཁྲིམས་ལྷོད་པ་མེད་པ་ཉིད་ལ་གནས་ཀྱིས། གཞན་དག་ཀྱང་ཚུལ་ཁྲིམས་ལྷོད་
པ་མེད་པ་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚུལ་ཁྲིམས་ལྷོད་པ་མེད་པ་ཉིད་ནི་ཁ་ན་མ་ཐོ་བ་ཅི་ཙམ་དུ་ཆུང་ངུ་ཡང་མི་བྱེད་པ་ཉིད་དོ། །བདག་ནི་ཚུལ་ཁྲིམས་མ་རལ་བ་

57-1-15a

ཉིད་ལ་གནས་ཀྱིས། གཞན་དག་ཀྱང་ཚུལ་ཁྲིམས་མ་རལ་བ་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚུལ་ཁྲིམས་མ་རལ་བ་ཉིད་ནི་ཐེག་པ་གཞན་དུ་སྒྲོ་འདོགས་པ་མེད་པ་
གང་ཡིན་པའོ། །བདག་ནི་ཚུལ་ཁྲིམས་སྐྱོན་མེད་པ་ཉིད་ལ་གནས་ཀྱིས། གཞན་དག་ཀྱང་ཚུལ་ཁྲིམས་སྐྱོན་མེད་པ་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚུལ་ཁྲིམས་སྐྱོན་
མེད་པ་ཉིད་ནི་ཉེས་པ་ཐམས་ཅད་རྣམ་པར་སྤོང་བ་གང་ཡིན་པའོ། །བདག་ནི་ཐུན་ཚགས་མ་ཡིན་པའི་ཚུལ་ཁྲིམས་ཉིད་ལ་གནས་ཀྱིས། གཞན་དག་ཀྱང་ཐུན་ཚགས་མ་ཡིན་པའི་ཚུལ་ཁྲིམས་ཉིད་ལ་
དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚུལ་ཁྲིམས་ཐུན་ཚགས་མ་ཡིན་པ་ཉིད་ནི་བྱང་ཆུབ་སེམས་དཔའ་ཐམས་ཅད་ཡོངས་སུ་འཛིན་པ་གང་ཡིན་པའོ། །བདག་ནི་ལེགས་པར་བསྲུངས་
པའི་ཚུལ་ཁྲིམས་ཉིད་ལ་གནས་ཀྱིས། གཞན་དག་ཀྱང་ལེགས་པར་བསྲུངས་པའི་ཚུལ་ཁྲིམས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལེགས་པར་བསྲུངས་པའི་ཚུལ་ཁྲིམས་
ཉིད་ནི་བྱང་ཆུབ་སེམས་དཔའ་ཐམས་ཅད་ལ་སྟོན་པར་འདུ་ཤེས་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་
བའོ་འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ལེགས་པར་སྦས་པའི་ཚུལ་ཁྲིམས་
ཉིད་ལ་གནས་ཀྱིས། གཞན་དག་ཀྱང་ལེགས་པར་སྦས་པའི་ཚུལ་ཁྲིམས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལེགས་པར་སྦས་པའི་ཚུལ་ཁྲིམས་ཉིད་ནི་དབང་པོ་སྲུང་བ་གང་ཡིན་

57-1-15b

པའོ། །བདག་ནི་རྣམ་པར་གྲགས་པའི་ཚུལ་ཁྲིམས་ཉིད་ལ་གནས་ཀྱིས། གཞན་དག་ཀྱང་རྣམ་པར་གྲགས་པའི་ཚུལ་ཁྲིམས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་རྣམ་པར་གྲགས་
པའི་ཚུལ་ཁྲིམས་ཉིད་ནི་ཆོས་ཀྱི་དབྱིངས་དབྱེར་མེད་པའི་ཆོས་ཐམས་ཅད་ལ་གཉིས་སུ་མེད་པའི་ཡེ་ཤེས་ལ་འཇུག་པ་གང་ཡིན་པའོ། །བདག་ནི་ཆོག་ཤེས་པའི་ཚུལ་ཁྲིམས་ཉིད་ལ་གནས་ཀྱིས། གཞན་དག་ཀྱང་
ཆོག་ཤེས་པའི་ཚུལ་ཁྲིམས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོག་ཤེས་པའི་ཚུལ་ཁྲིམས་ཉིད་ནི་ཆགས་པ་སྤངས་པ་གང་ཡིན་པའོ། །བདག་ནི་དབེན་པའི་ཚུལ་ཁྲིམས་
ཉིད་ལ་གནས་ཀྱིས། གཞན་དག་ཀྱང་དབེན་པའི་ཚུལ་ཁྲིམས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དབེན་པའི་ཚུལ་ཁྲིམས་ཉིད་ནི་ལུས་དང་སེམས་དབེན་པ་གང་ཡིན་པའོ། །
བདག་ནི་དགོན་པ་ལ་གནས་པའི་ཚུལ་ཁྲིམས་ཉིད་ལ་གནས་ཀྱིས། གཞན་དག་ཀྱང་དགོན་པ་ལ་གནས་པའི་ཚུལ་ཁྲིམས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དགོན་པ་ན་གནས་
པའི་ཚུལ་ཁྲིམས་ཉིད་ནི་ཆོས་ཐམས་ཅད་ལ་མཐའ་དང་དབུས་མེད་པར་འཇུག་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་
བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་བཟོད་པའི་
ཚུལ་ཁྲིམས་ཉིད་ལ་གནས་ཀྱིས། གཞན་དག་ཀྱང་བཟོད་པའི་ཚུལ་ཁྲིམས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བཟོད་པའི་ཚུལ་ཁྲིམས་ཉིད་ནི་སེམས་ཅན་ཐམས་ཅད་ལ་ཞེ་འགྲེས་

57-1-16a

པ་མེད་པ་ཉིད་གང་ཡིན་པའོ། །བདག་ནི་བརྩོན་འགྲུས་ཀྱི་ཚུལ་ཁྲིམས་ཉིད་ལ་གནས་ཀྱིས། གཞན་དག་ཀྱང་བརྩོན་འགྲུས་ཀྱི་ཚུལ་ཁྲིམས་ཉིད་ལ་དགོད་དོ་ཞེས་དབུགས་འབྱིན་
པ་རྙེད་པར་འགྱུར་ཏེ། དེ་ལ་བརྩོན་འགྲུས་ཀྱི་ཚུལ་ཁྲིམས་ཉིད་ནི་ཕྱིར་མི་ལྡོག་པའི་ཆོས་ལ་སེམས་ཅན་ཐམས་ཅད་འགོད་པ་ཉིད་གང་ཡིན་པའོ། །བདག་ནི་བསམ་གཏན་གྱི་ཚུལ་ཁྲིམས་ཉིད་ལ་
གནས་ཀྱིས། གཞན་དག་ཀྱང་བསམ་གཏན་གྱི་ཚུལ་ཁྲིམས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བསམ་གཏན་གྱི་ཚུལ་ཁྲིམས་ཉིད་ནི་བསམ་གཏན་གྱི་ཡན་ལག་
ལ་སེམས་ཅན་ཐམས་ཅད་འགོད་པ་གང་ཡིན་པའོ། །བདག་ནི་ཤེས་རབ་ཀྱི་ཚུལ་ཁྲིམས་ཉིད་ལ་གནས་ཀྱིས། གཞན་དག་ཀྱང་ཤེས་རབ་ཀྱི་ཚུལ་ཁྲིམས་ཉིད་ལ་དགོད་དོ་ཞེས་དབུགས་འབྱིན་
པ་རྙེད་པར་འགྱུར་ཏེ། དེ་ལ་ཤེས་རབ་ཀྱི་ཚུལ་ཁྲིམས་ཉིད་ནི་སེམས་ཅན་ཐམས་ཅད་དགེ་བའི་རྩ་བ་ལ་ངོམས་པ་མེད་པར་དགོད་པ་གང་ཡིན་པའོ། །བདག་ནི་མུ་ཆོར་མི་སྨྲ་བའི་ཚུལ་ཁྲིམས་ཉིད་
ལ་གནས་ཀྱིས། གཞན་དག་ཀྱང་མུ་ཆོར་མི་སྨྲ་བའི་ཚུལ་ཁྲིམས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མུ་ཆོར་མི་སྨྲ་བའི་ཚུལ་ཁྲིམས་ཉིད་ནི་ཆོས་ཐམས་ཅད་ལ་ཅང་ཤེས་པ་ཉིད་
གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་
དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་གདུང་བ་མེད་པའི་ཚུལ་ཁྲིམས་ཉིད་ལ་གནས་ཀྱིས། གཞན་དག་ཀྱང་གདུང་བ་མེད་པའི་ཚུལ་

57-1-16b

ཁྲིམས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གདུང་བ་མེད་པའི་ཚུལ་ཁྲིམས་ཉིད་ནི་ལེགས་པར་བྱ་བའི་ལས་བྱེད་པ་གང་ཡིན་པའོ། །བདག་ནི་ང་རྒྱལ་མེད་པའི་ཚུལ་ཁྲིམས་ཉིད་ལ་
གནས་ཀྱིས། གཞན་དག་ཀྱང་ང་རྒྱལ་མེད་པའི་ཚུལ་ཁྲིམས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ང་རྒྱལ་མེད་པའི་ཚུལ་ཁྲིམས་ཉིད་ནི་སེམས་ཅན་ཐམས་ཅད་ཡོངས་སུ་སྨིན་
པར་བྱ་བ་དང་། སེམས་ཅན་ཐམས་ཅད་ཀྱི་ཅི་བྱ་བ་ལ་ཁེངས་པ་མེད་པ་ཉིད་གང་ཡིན་པའོ། །བདག་ནི་དུལ་བའི་ཚུལ་ཁྲིམས་ཉིད་ལ་གནས་ཀྱིས། གཞན་དག་ཀྱང་དུལ་བའི་ཚུལ་ཁྲིམས་ཉིད་ལ་དགོད་
དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དུལ་བའི་ཚུལ་ཁྲིམས་ཉིད་ནི་སེམས་ཅན་ཐམས་ཅད་ཡོངས་སུ་སྨིན་པར་བྱེད་པ་དང་། སེམས་ཅན་ཐམས་ཅད་ཀྱིས་ངན་དུ་བརྗོད་པ་དང་། ཤེ་དུ་སྨྲས་པའི་
ཚིག་གི་ལ་མ་བཟོད་པ་གང་ཡིན་པའོ། །བདག་ནི་དམ་པའི་ཆོས་ཡོངས་སུ་འཛིན་པའི་ཚུལ་ཁྲིམས་ཉིད་ལ་གནས་ཀྱིས། གཞན་དག་ཀྱང་དམ་པའི་ཆོས་ཡོངས་སུ་འཛིན་པའི་ཚུལ་ཁྲིམས་ཉིད་ལ་དགོད་དོ་
ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དམ་པའི་ཆོས་ཡོངས་སུ་འཛིན་པའི་ཚུལ་ཁྲིམས་ཉིད་ནི་སྟོང་པ་ཉིད་ལ་མོས་པ་གང་ཡིན་པའོ། །བདག་ནི་སངས་རྒྱས་ཀྱི་ཏིང་ངེ་འཛིན་གྱི་ཚུལ་ཁྲིམས་ཉིད་ལ་གནས་
ཀྱིས། གཞན་དག་ཀྱང་སངས་རྒྱས་ཀྱི་ཏིང་ངེ་འཛིན་གྱི་ཚུལ་ཁྲིམས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སངས་རྒྱས་ཀྱི་ཏིང་ངེ་འཛིན་གྱི་ཚུལ་ཁྲིམས་ཉིད་ནི་སེམས་ཅན་ཐམས་ཅད་
ལ་སེམས་མཉམ་པ་ཉིད་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་

57-1-17a

དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་བྱམས་པ་ལ་གནས་ཀྱིས། 
གཞན་དག་ཀྱང་བྱམས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བྱམས་པ་ནི་སེམས་ཅན་ཐམས་ཅད་ཀྱི་སྡུག་བསྔལ་བསྐྱབ་པའི་ཕྱིར་ལུས་དང་། ངག་དང་། སེམས་ཀྱི་བསོད་ནམས་
གྱི་ཚོགས་སོགས་པ་གང་ཡིན་པའོ། བདག་ནི་སྙིང་རྗེ་ལ་གནས་ཀྱིས་གཞན་དག་ཀྱང་སྙིང་རྗེ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྙིང་རྗེ་ནི་སེམས་ཅན་ཐམས་ཅད་ཡོངས་སུ་
སྨིན་པར་བྱ་བའི་ཕྱིར་སྡུག་བསྔལ་གྱི་ཡོ་བྱད་གང་མི་ལེན་པ་དེ་ཅི་ཡང་མེད་པ་དང་། བདེ་བའི་ཡོ་བྱད་གང་མི་གཏོང་བ་དེ་ཅི་ཡང་མེད་པ་གང་ཡིན་པའོ། བདག་ནི་དགའ་བ་ལ་གནས་ཀྱིས། གཞན་
དག་ཀྱང་དགའ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དགའ་བ་ནི་སྟོང་པ་ཉིད་དང་། སངས་རྒྱས་ཀྱི་ཆེ་བ་ཉིད་ལ་དགའ་བ་དང་། མཆོག་ཏུ་དགའ་བ་ཆེན་པོ་གང་ཡིན་པའོ། །བདག་ནི་
བཏང་སྙོམས་ལ་གནས་ཀྱིས། གཞན་དག་ཀྱང་བཏང་སྙོམས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བཏང་སྙོམས་ནི་རྗེས་སུ་ཆགས་པ་དང་ཁོང་ཁྲོ་བ་སྤོང་བ་གང་ཡིན་པའོ། །
བདག་ནི་རྣམ་པར་གཏན་ལ་འབེབས་པར་མཁས་པ་ལ་གནས་ཀྱིས། གཞན་དག་ཀྱང་རྣམ་པར་གཏན་ལ་འབེབས་པར་མཁས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་
རྣམ་པར་གཏན་ལ་འབེབས་པ་ལ་མཁས་པ་ནི་ཆོས་ཐམས་ཅད་ལ་བརྗོད་དུ་མེད་པར་འཇུག་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་

57-1-17b

དང་པོ་ཡོངས་སུ་སྦྱོང་བར་འགྱུར་བའོ། འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་སྡུག་བསྔལ་
ཤེས་པ་ལ་གནས་ཀྱིས། གཞན་དག་ཀྱང་སྡུག་བསྔལ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྡུག་བསྔལ་ཤེས་པ་ནི་ཕུང་པོ་རྣམས་ལ་མི་སྐྱེ་བར་ཤེས་པ་གང་ཡིན་པའོ། བདག་ནི་
ཀུན་འབྱུང་བ་ཤེས་པ་ལ་གནས་ཀྱིས། གཞན་དག་ཀྱང་ཀུན་འབྱུང་བ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཀུན་འབྱུང་བ་ཤེས་པ་ནི་སྲེད་པ་ཡང་དག་པར་འཇོམས་པ་ཤེས་པ་གང་ཡིན་
བདག་ནི་འགོག་པ་ཤེས་པ་ལ་གནས་ཀྱིས། གཞན་དག་ཀྱང་འགོག་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་འགོག་པ་ཤེས་པ་ནི་མ་རིག་པའི་བག་ལ་ཉལ་རྣམས་འབྱུང་བ་མེད་པ་
གང་ཡིན་པའོ། བདག་ནི་ལམ་ཤེས་པ་ལ་གནས་ཀྱིས། གཞན་དག་ཀྱང་ལམ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལམ་ཤེས་པ་ནི་ཆོས་ཐམས་ཅད་མཉམ་པ་ཉིད་དུ་
གྱུར་པ་ལ་སྒྲོ་འདོགས་པ་མེད་པར་ཤེས་པ་གང་ཡིན་པའོ། བདག་ནི་རང་གི་འཁྲུལ་པ་ལ་སོ་སོར་རྟོག་པ་ལ་གནས་ཀྱིས། གཞན་དག་ཀྱང་རང་གི་འཁྲུལ་པ་ལ་སོ་སོར་རྟོག་པ་ལ་དགོད་དོ་ཞེས་དབུགས་འབྱིན་
པ་རྙེད་པར་འགྱུར་ཏེ། དེ་ལ་རང་གི་འཁྲུལ་པ་ལ་སོ་སོར་རྟོག་པ་ནི་རང་གི་སེམས་ལ་ངེས་པར་སེམས་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་
ས་དང་པོ་ཡོངས་སུ་སྦྱོང་བར་འགྱུར་བའོ། འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། 

57-1-18a

བདག་ནི་གཞན་གྱི་སེམས་རྗེས་སུ་བསྲུང་བར་བྱ་བ་ལ་གནས་ཀྱིས། གཞན་དག་ཀྱང་གཞན་གྱི་སེམས་རྗེས་སུ་བསྲུང་བར་བྱ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གཞན་གྱི་
སེམས་རྗེས་སུ་བསྲུང་བར་བྱ་བ་ནི་ཕ་རོལ་གྱི་འཁྲུལ་པ་ལ་མ་ཁྲོས་པར་སྐུར་བ་གང་ཡིན་པའོ། །བདག་ནི་སེམས་རབ་ཏུ་དུལ་བ་ལ་གནས་ཀྱིས། གཞན་དག་ཀྱང་སེམས་རབ་ཏུ་དུལ་བ་ལ་དགོད་དོ་ཞེས་དབུགས་འབྱིན་པ་
རྙེད་པར་འགྱུར་ཏེ། དེ་ལ་སེམས་རབ་ཏུ་དུལ་བ་ནི་སེམས་ཅན་ཡོངས་སུ་སྨིན་པར་བྱེད་པ་ལ་སྐྱོ་བ་བཟོད་པ་གང་ཡིན་པའོ། །བདག་ནི་ཁྲོ་བ་མེད་པ་ཉིད་ལ་གནས་ཀྱིས། གཞན་དག་ཀྱང་ཁྲོ་བ་མེད་པ་ཉིད་ལ་དགོད་
དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཁྲོ་བ་མེད་པ་ཉིད་ནི་སེམས་ཅན་ཐམས་ཅད་ལ་ཁོང་ཁྲོ་བ་མེད་པའི་སེམས་ཉིད་གང་ཡིན་པའོ། །བདག་ནི་བདག་ལ་སོ་སོར་རྟོག་པ་ལ་གནས་ཀྱིས། གཞན་དག་
ཀྱང་བདག་ལ་སོ་སོར་རྟོག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བདག་ལ་སོ་སོར་རྟོག་པ་ནི་བདག་ལ་བདག་མེད་པའི་མཚན་ཉིད་གང་ཡིན་པའོ། །བདག་ནི་ཅི་ཡང་མེད་པ་ལ་གནས་ཀྱིས། 
གཞན་དག་ཀྱང་ཅི་ཡང་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཅི་ཡང་མེད་པ་ནི་ལུས་ལས་དམིགས་པ་ལས་དབེན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་
དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་
སྟེ། བདག་ནི་མི་སྐྱེ་བའི་བཟོད་པ་ལ་གནས་ཀྱིས། གཞན་དག་ཀྱང་མི་སྐྱེ་བའི་བཟོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་སྟེ། དེ་ལ་མི་སྐྱེ་བའི་བཟོད་པ་ནི་འགོག་པ་མངོན་དུ་བྱེད་པ་གང་ཡིན་པའོ། །བདག་

57-1-18b

ནི་འགོག་པ་མེད་པའི་བཟོད་པ་ལ་གནས་ཀྱིས། གཞན་དག་ཀྱང་འགོག་པ་མེད་པའི་བཟོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་འགོག་པ་མེད་པའི་བཟོད་པ་ནི་མི་སྐྱེ་བ་མངོན་དུ་བྱེད་པ་གང་ཡིན་
པའོ། བདག་ནི་ལུས་སུ་གྱུར་པའི་དྲན་པ་ལ་གནས་ཀྱིས། གཞན་དག་ཀྱང་ལུས་སུ་གྱུར་པའི་དྲན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལུས་སུ་གྱུར་པའི་དྲན་པ་ནི་ལུས་དབེན་པ་ཉིད་གང་
ཡིན་པའོ། །བདག་ནི་ཚོར་བར་གྱུར་པའི་དྲན་པ་ལ་གནས་ཀྱིས། གཞན་དག་ཀྱང་ཚོར་བར་གྱུར་པའི་དྲན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚོར་བར་གྱུར་པའི་དྲན་པ་ནི་ཚོར་བ་ཐམས་ཅད་ཀྱི་རྒྱུན་
ཆད་པ་གང་ཡིན་པའོ། །བདག་ནི་སེམས་སུ་གྱུར་པའི་དྲན་པ་ལ་གནས་ཀྱིས། གཞན་དག་ཀྱང་སེམས་སུ་གྱུར་པའི་དྲན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་སུ་གྱུར་པའི་
དྲན་པ་ནི་གནས་མེད་པའི་ཕྱིར་སེམས་ལ་སྒྱུ་མ་ལྟ་བུར་སོ་སོར་རྟོག་པ་ཉིད་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །
འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཆོས་སུ་གྱུར་པའི་དྲན་པ་ལ་གནས་ཀྱིས། 
གཞན་དག་ཀྱང་ཆོས་སུ་གྱུར་པའི་དྲན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་སུ་གྱུར་པའི་དྲན་པ་ནི་ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་རྟོག་པ་གང་ཡིན་པའོ། །བདག་ནི་
དད་པའི་དབང་པོ་ལ་གནས་ཀྱིས། གཞན་དག་ཀྱང་དད་པའི་དབང་པོ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དད་པའི་དབང་པོ་ནི་ཆོས་ཐམས་ཅད་ལ་གཞན་གྱི་དྲིང་ལ་མི་འཇོག་པའི་ཤེས་

57-1-19a

པ་ཉིད་གང་ཡིན་པའོ། །བདག་ནི་བརྩོན་འགྲུས་ཀྱི་དབང་པོ་ལ་གནས་ཀྱིས། གཞན་དག་ཀྱང་བརྩོན་འགྲུས་ཀྱི་དབང་པོ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྩོན་འགྲུས་ཀྱི་དབང་
པོ་ནི་ཆོས་ཐམས་ཅད་ལ་ལེགས་པར་རྟོགས་པའི་ཤེས་པ་ཉིད་གང་ཡིན་པའོ། །བདག་ནི་དྲན་པའི་དབང་པོ་ལ་གནས་ཀྱིས། གཞན་དག་ཀྱང་དྲན་པའི་དབང་པོ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། 
དེ་ལ་དྲན་པའི་དབང་པོ་ནི་ལེགས་པར་བྱ་བའི་ལས་བྱེད་པ་གང་ཡིན་པའོ། །བདག་ནི་ཏིང་ངེ་འཛིན་གྱི་དབང་པོ་ལ་གནས་ཀྱིས། གཞན་དག་ཀྱང་ཏིང་ངེ་འཛིན་གྱི་དབང་པོ་ལ་དགོད་དོ་ཞེས་དབུགས་འབྱིན་པ་རྙེད་པར་
འགྱུར་ཏེ། དེ་ལ་ཏིང་ངེ་འཛིན་གྱི་དབང་པོ་ནི་སེམས་རྣམ་པར་གྲོལ་བ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །
འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཤེས་རབ་ཀྱི་དབང་པོ་ལ་གནས་ཀྱིས། གཞན་
དག་ཀྱང་ཤེས་རབ་ཀྱི་དབང་པོ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཤེས་རབ་ཀྱི་དབང་པོ་ནི་ཆོས་ཐམས་ཅད་ལ་མངོན་སུམ་དུ་ཤེས་པ་ཉིད་གང་ཡིན་པའོ། །བདག་ནི་དད་པའི་སྟོབས་ལ་གནས་
ཀྱིས། གཞན་དག་ཀྱང་དད་པའི་སྟོབས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དད་པའི་སྟོབས་ནི་བདུད་ཀྱི་ལས་ལས་ཡང་དག་པར་འདའ་བ་གང་ཡིན་པའོ། །བདག་ནི་ཡེ་ཤེས་ཀྱི་སྟོབས་
ལ་གནས་ཀྱིས། གཞན་དག་ཀྱང་ཡེ་ཤེས་ཀྱི་སྟོབས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡེ་ཤེས་ཀྱི་སྟོབས་ནི་མི་ཤེས་པ་རྣམ་པར་འཇོམས་པ་གང་ཡིན་པའོ། །བདག་ནི་

57-1-19b

བརྩོན་འགྲུས་ཀྱི་སྟོབས་ལ་གནས་ཀྱིས། གཞན་དག་ཀྱང་བརྩོན་འགྲུས་ཀྱི་སྟོབས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྩོན་འགྲུས་ཀྱི་སྟོབས་ནི་ཕྱིར་མི་ལྡོག་པའི་ཆོས་སྒྲུབ་པ་
ཉིད་གང་ཡིན་པའོ། །བདག་ནི་དྲན་པའི་སྟོབས་ལ་གནས་ཀྱིས། གཞན་དག་ཀྱང་དྲན་པའི་སྟོབས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དྲན་པའི་སྟོབས་ནི་སངས་རྒྱས་ཀྱི་ཆོས་
ཐམས་ཅད་འཛིན་པ་ཉིད་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་
དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཏིང་ངེ་འཛིན་གྱི་སྟོབས་ལ་གནས་ཀྱིས། གཞན་དག་ཀྱང་ཏིང་
ངེ་འཛིན་གྱི་སྟོབས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཏིང་ངེ་འཛིན་གྱི་སྟོབས་ནི་རྟོག་པ་དང་དཔྱོད་པ་ཐམས་ཅད་སྤོང་བ་གང་ཡིན་པའོ། །བདག་ནི་ཤེས་རབ་ཀྱི་སྟོབས་ལ་གནས་ཀྱིས། 
གཞན་དག་ཀྱང་ཤེས་རབ་ཀྱི་སྟོབས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཤེས་རབ་ཀྱི་སྟོབས་ནི་མི་རྫི་བའི་ཤེས་པ་ཉིད་གང་ཡིན་པའོ། །བདག་ནི་དྲན་པ་ཡང་དག་བྱང་ཆུབ་ཀྱི་ཡན་ལག་
ལ་གནས་ཀྱིས། གཞན་དག་ཀྱང་དྲན་པ་ཡང་དག་བྱང་ཆུབ་ཀྱི་ཡན་ལག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དྲན་པ་ཡང་དག་བྱང་ཆུབ་ཀྱི་ཡན་ལག་ནི་དམ་པའི་ཆོས་ཇི་ལྟ་བ་བཞིན་དུ་
ཡོངས་སུ་ཤེས་པ་གང་ཡིན་པའོ། །བདག་ནི་ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ལ་གནས་ཀྱིས། གཞན་དག་ཀྱང་ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་

57-1-20a

ལག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ནི་ཆོས་ཐམས་ཅད་སྣང་བ་གང་ཡིན་པའོ། །བདག་ནི་བརྩོན་
འགྲུས་ཡང་དག་བྱང་ཆུབ་ཀྱི་ཡན་ལག་ལ་གནས་ཀྱིས། གཞན་དག་ཀྱང་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྩོན་འགྲུས་ཡང་དག་བྱང་ཆུབ་ཀྱི་
ཡན་ལག་ནི་ཆོས་ཐམས་ཅད་ལེགས་པར་རིག་པའི་ཤེས་པ་ཉིད་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །
འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་དགའ་བ་ཡང་དག་བྱང་ཆུབ་ཀྱི་ཡན་ལག་ལ་གནས་
ཀྱིས། གཞན་དག་ཀྱང་དགའ་བ་ཡང་དག་བྱང་ཆུབ་ཀྱི་ཡན་ལག་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དགའ་བ་ཡང་དག་བྱང་ཆུབ་ཀྱི་ཡན་ལག་ནི་ཏིང་ངེ་འཛིན་དང་སྙོམས་པར་འཇུག་པ་གང་ཡིན་
པའོ། །བདག་ནི་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ལ་གནས་ཀྱིས། གཞན་དག་ཀྱང་ཤིན་དུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་
ཤིན་དུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ནི་སངས་རྒྱས་ཀྱི་ཆོས་ཐམས་ཅད་ལ་བྱ་བ་བྱས་པ་གང་ཡིན་པའོ། །བདག་ནི་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ལ་གནས་ཀྱིས། གཞན་དག་ཀྱང་ཏིང་ངེ་
འཛིན་ཡང་དག་བྱང་ཆུབ་ཀྱི་ཡན་ལག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ནི་ཆོས་ཐམས་ཅད་མཉམ་པ་ཉིད་དུ་རྟོག་པ་གང་ཡིན་པའོ། །བདག་ནི་

57-1-20b

བཏང་སྙོམས་ཡང་དག་བྱང་ཆུབ་ཀྱི་ཡན་ལག་ལ་གནས་ཀྱིས། གཞན་དག་ཀྱང་བཏང་སྙོམས་ཡང་དག་བྱང་ཆུབ་ཀྱི་ཡན་ལག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བཏང་སྙོམས་ཡང་དག་བྱང་
ཆུབ་ཀྱི་ཡན་ལག་ནི་འཕགས་པའི་ཆོས་ལ་ཡང་རྗེས་སུ་ཆགས་པར་མི་བྱེད། འཕགས་པ་མ་ཡིན་པའི་ཆོས་ལ་ཡང་ཁོང་ཁྲོ་བར་མི་བྱེད་པ་གང་ཡིན་པའོ། །བདག་ནི་ཡང་དག་པའི་ལྟ་བ་ལ་གནས་ཀྱིས། གཞན་
དག་ཀྱང་ཡང་དག་པའི་ལྟ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་ལྟ་བ་ནི་མི་འགྱུར་བ་ལ་འཇུག་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་
ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་
ན། འདི་ལྟ་སྟེ། བདག་ནི་ཡང་དག་པའི་རྟོག་པ་ལ་གནས་ཀྱིས། གཞན་དག་ཀྱང་ཡང་དག་པའི་རྟོག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་རྟོག་པ་ནི་ཀུན་རྟོག་པ་དང་། རྣམ་པར་
རྟོག་པ་དང་། ཡོངས་སུ་རྟོག་པ་སྤོང་བ་གང་ཡིན་པའོ། །བདག་ནི་ཡང་དག་པའི་ངག་ལ་གནས་ཀྱིས། གཞན་དག་ཀྱང་ཡང་དག་པའི་ངག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་
པའི་ངག་ནི་ཡི་གེ་དང་། སྐད་དང་དབྱངས་ཐམས་ཅད་ལ་ངག་གི་ལམ་དུ་འདུ་ཤེས་པ་གང་ཡིན་པའོ། །བདག་ནི་ཡང་དག་པའི་ལས་ཀྱི་མཐའ་ལ་གནས་ཀྱིས། གཞན་དག་ཀྱང་ཡང་དག་པའི་ལས་ཀྱི་
མཐའ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་ལས་ཀྱི་མཐའ་ནི་ཆོས་ཐམས་ཅད་ལ་ལས་ཀྱི་རྣམ་པར་སྨིན་པ་མེད་པ་ལ་འཇུག་པ་གང་ཡིན་པའོ། །བདག་ནི་ཡང་དག་པའི་

57-1-21a

འཚོ་བ་ལ་གནས་ཀྱིས། གཞན་དག་ཀྱང་ཡང་དག་པའི་འཚོ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་འཚོ་བ་ནི་ཚོལ་བ་ཐམས་ཅད་ཀྱི་རྒྱུན་བཅད་པ་གང་ཡིན་པའོ། །
བདག་ནི་ཡང་དག་པའི་རྩོལ་བ་ལ་གནས་ཀྱིས། གཞན་དག་ཀྱང་ཡང་དག་པའི་རྩོལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་རྩོལ་བ་ནི་ཚུ་རོལ་གྱི་མུ་ཡོངས་སུ་སྤངས་ཤིང་ཕ་
རོལ་གྱི་འགྲམ་དུ་འགྲོ་བ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་
པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཡང་དག་པའི་དྲན་པ་ལ་གནས་ཀྱིས། གཞན་དག་ཀྱང་ཡང་དག་པའི་དྲན་པ་ལ་དགོད་
དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་དྲན་པ་ནི་རློམ་སེམས་ངོ་བོ་ཉིད་མེད་པའི་ཕྱིར་ཆོས་ཐམས་ཅད་ལ་དྲན་པ་མེད་ཅིང་ཡིད་ལ་བྱེད་པ་མེད་པ་གང་ཡིན་པའོ། བདག་ནི་ཡང་དག་པའི་
ཏིང་ངེ་འཛིན་ལ་གནས་ཀྱིས། གཞན་དག་ཀྱང་ཡང་དག་པའི་ཏིང་ངེ་འཛིན་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་ཏིང་ངེ་འཛིན་ནི་སེམས་མེད་པའི་
སྙོམས་པར་འཇུག་པ་གང་ཡིན་པའོ། །བདག་ནི་བྱང་ཆུབ་ཀྱི་སེམས་ལ་གནས་ཀྱིས། གཞན་དག་ཀྱང་བྱང་ཆུབ་ཀྱི་སེམས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བྱང་ཆུབ་ཀྱི་སེམས་ནི་བསམ་
གྱིས་མི་ཁྱབ་པའི་ཡེ་ཤེས་མངོན་པར་སྒྲུབ་པ་གང་ཡིན་པའོ། །བདག་ནི་བྱང་ཆུབ་སེམས་དཔའི་བསླབ་པ་ལ་གནས་ཀྱིས། གཞན་དག་ཀྱང་བྱང་ཆུབ་སེམས་དཔའི་བསླབ་པ་ལ་དགོད་དོ་ཞེས་དབུགས་འབྱིན་པ་རྙེད་པར་

57-1-21b

འགྱུར་ཏེ། དེ་ལ་བྱང་ཆུབ་སེམས་དཔའི་བསླབ་པ་ནི་བསླབ་པ་ཐམས་ཅད་ལས་ཡང་དག་པར་འདའ་བ་གང་ཡིན་པའོ། །བདག་ནི་ཉོན་མོངས་པ་དང་དབྱེར་མེད་པའི་ཡེ་ཤེས་ལ་གནས་ཀྱིས། གཞན་དག་ཀྱང་ཉོན་མོངས་
པ་དང་དབྱེར་མེད་པའི་ཡེ་ཤེས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཉོན་མོངས་པ་དང་དབྱེར་མེད་པའི་ཡེ་ཤེས་ལ་ཉོན་མོངས་པའི་རང་བཞིན་གང་ཡིན་པའོ། དེ་ཅིའི་ཕྱིར་ཞེ་ན། ཡེ་ཤེས་ནི་ཉོན་མོངས་
པའི་རང་བཞིན་ལས་གཞན་མ་ཡིན་པའི་ཕྱིར་ཏེ། ཉོན་མོངས་པའི་རང་བཞིན་ལས་ཡེ་ཤེས་གཞན་མེད་པས་ཉོན་མོངས་པའི་རང་བཞིན་ཉིད་ཡེ་ཤེས་སོ། ཉོན་མོངས་པའི་རང་བཞིན་གྱི་ཡེ་ཤེས་དེས་ཆོས་
ཐམས་ཅད་ཤེས་ཏེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་
དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་སྦྱིན་པའི་ཕ་རོལ་དུ་ཕྱིན་པ་ལ་གནས་ཀྱིས། གཞན་དག་ཀྱང་སྦྱིན་པའི་ཕ་རོལ་དུ་ཕྱིན་པ་ལ་
དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྦྱིན་པའི་ཕ་རོལ་དུ་ཕྱིན་པ་ནི་སེམས་ཅན་སེར་སྣ་ཅན་ཡོངས་སུ་སྨིན་པར་བྱེད་པ་ཉིད་གང་ཡིན་པའོ། །བདག་ནི་ཚུལ་ཁྲིམས་ཀྱི་ཕ་རོལ་དུ་ཕྱིན་
པ་ལ་གནས་ཀྱིས། གཞན་དག་ཀྱང་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ནི་ཚུལ་ཁྲིམས་འཆལ་
བའི་སེམས་ཅན་ཡོངས་སུ་སྨིན་པར་བྱེད་པ་ཉིད་གང་ཡིན་པའོ། བདག་ནི་བཟོད་པའི་ཕ་རོལ་དུ་ཕྱིན་པ་ལ་གནས་ཀྱིས། གཞན་དག་ཀྱང་བཟོད་པའི་ཕ་རོལ་དུ་ཕྱིན་པ་ལ་དགོད་དོ་ཞེས་དབུགས་

57-1-22a

འབྱིན་པ་རྙེད་པར་འགྱུར་ཏེ། དེ་ལ་བཟོད་པའི་ཕ་རོལ་དུ་ཕྱིན་པ་ནི་གནོད་སེམས་ཀྱི་སེམས་དང་ལྡན་པའི་སེམས་ཅན་ཡོངས་སུ་སྨིན་པར་བྱེད་པ་ཉིད་གང་ཡིན་པའོ། །བདག་ནི་བརྩོན་
འགྲུས་ཀྱི་ཕ་རོལ་དུ་ཕྱིན་པ་ལ་གནས་ཀྱིས། གཞན་དག་ཀྱང་བརྩོན་འགྲུས་ཀྱི་ཕ་རོལ་དུ་ཕྱིན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྩོན་འགྲུས་ཀྱི་ཕ་རོལ་དུ་ཕྱིན་པ་ནི་སེམས་ཅན་
ལེ་ལོ་ཅན་ཡོངས་སུ་སྨིན་པར་བྱེད་པ་ཉིད་གང་ཡིན་པའོ། །བདག་ནི་བསམ་གཏན་གྱི་ཕ་རོལ་དུ་ཕྱིན་པ་ལ་གནས་ཀྱིས། གཞན་དག་ཀྱང་བསམ་གཏན་གྱི་ཕ་རོལ་དུ་ཕྱིན་པ་ལ་དགོད་དོ་ཞེས་དབུགས་འབྱིན་
པ་རྙེད་པར་འགྱུར་ཏེ། དེ་ལ་བསམ་གཏན་གྱི་ཕ་རོལ་དུ་ཕྱིན་པ་ནི་སེམས་རྣམ་པར་གཡེངས་པའི་སེམས་ཅན་ཡོངས་སུ་སྨིན་པར་བྱེད་པ་ཉིད་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་
དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་
ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཤེས་རབ་ཀྱི་ཕ་རོལ་དུ་ཕྱིན་པ་ལ་གནས་ཀྱིས། གཞན་དག་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་
ཤེས་རབ་ཀྱི་ཕ་རོལ་དུ་ཕྱིན་པ་ནི་ཤེས་རབ་འཆལ་པའི་སེམས་ཅན་ཡོངས་སུ་སྨིན་པར་བྱེད་པ་ཉིད་གང་ཡིན་པའོ། །བདག་ནི་དམ་པའི་ཆོས་ཡོངས་སུ་གཟུང་བ་ལ་གནས་ཀྱིས། གཞན་དག་ཀྱང་དམ་
པའི་ཆོས་ཡོངས་སུ་གཟུང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དམ་པའི་ཆོས་ཡོངས་སུ་གཟུང་བ་ནི་བྱང་ཆུབ་སེམས་དཔའ་རྣམས་ཡོངས་སུ་འཛིན་པ་གང་ཡིན་པའོ། །བདག་ནི་

57-1-22b

བསོད་ནམས་ཀྱི་ཚོགས་ལ་གནས་ཀྱིས། གཞན་དག་ཀྱང་བསོད་ནམས་ཀྱི་ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བསོད་ནམས་ཀྱི་ཚོགས་ནི་བྱང་ཆུབ་སེམས་དཔའ་རྣམས་ལ་རྙེད་པ་དང་
བཀུར་སྟི་འབུལ་བ་དང་། ཕྱོགས་དང་ཕྱོགས་མཚམས་སུ་གྲགས་པའི་སྒྲ་དང་ཚིགས་སུ་བཅད་པ་འབྱིན་པ་གང་ཡིན་པའོ། །བདག་ནི་ཡེ་ཤེས་ཀྱི་ཚོགས་ལ་གནས་ཀྱིས། གཞན་དག་ཀྱང་ཡེ་ཤེས་ཀྱི་
ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡེ་ཤེས་ཀྱི་ཚོགས་ནི་བྱང་ཆུབ་སེམས་དཔའ་རྣམས་ཡེ་ཤེས་ཀྱི་ཚོགས་ཀྱིས་བརྟན་པ་དང་། གོས་དང་། ཟས་དང་། མལ་ཆ་དང་། ན་བའི་
གསོས་སྨན་གྱིས་བརྟན་པ་གང་ཡིན་པའོ། །བདག་ནི་ཞི་གནས་ཀྱི་ཚོགས་ལ་གནས་ཀྱིས། གཞན་དག་ཀྱང་ཞི་གནས་ཀྱི་ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཞི་གནས་ཀྱི་
ཚོགས་ནི་ཆོས་ཐམས་ཅད་མཉམ་པ་ཉིད་དུ་འཇུག་པ་ལ་རློམ་སེམས་མེད་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་
བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱིས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ལྷག་མཐོང་གི་ཚོགས་ལ་གནས་
ཀྱིས། གཞན་དག་ཀྱང་ལྷག་མཐོང་གི་ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལྷག་མཐོང་གི་ཚོགས་ནི་ཆོས་ཐམས་ཅད་ལ་མཐའ་དང་དབུང་མེད་པར་འཇུག་པ་གང་ཡིན་པའོ། །
བདག་ནི་ཚུལ་ཁྲིམས་ལ་གནས་ཀྱིས། གཞན་དག་ཀྱང་ཚུལ་ཁྲིམས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚུལ་ཁྲིམས་ནི་ལུས་དང་ངག་དང་ཡིད་ཀྱི་ལས་ཡོངས་སུ་དག་པ་གང་ཡིན་

57-1-23a

པའོ། །བདག་ནི་བཟོད་པ་ལ་གནས་ཀྱིས། གཞན་དག་ཀྱང་བཟོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བཟོད་པ་ནི་ལས་ཀྱི་རྣམ་པར་སྨིན་པ་ལ་ཡིད་ཆེས་པ་གང་ཡིན་པའོ། །
བདག་ནི་བརྩོན་འགྲུས་ལ་གནས་ཀྱིས། གཞན་དག་ཀྱང་བརྩོན་འགྲུས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྩོན་འགྲུས་ནི་སེམས་ཅན་ཐམས་ཅད་བསོད་ནམས་ཀྱི་ཚོགས་ལ་གཟུད་པར་
བྱ་བ་ལ་ཡོངས་སུ་སྐྱོ་བ་མེད་པ་གང་ཡིན་པའོ། །བདག་ནི་བསམ་གཏན་ལ་གནས་ཀྱིས། གཞན་དག་ཀྱང་བསམ་གཏན་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བསམ་གཏན་ནི་དམིགས་
པ་ཐམས་ཅད་ལ་གནས་པ་མེད་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་
དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཤེས་རབ་ལ་གནས་ཀྱིས། གཞན་དག་ཀྱང་ཤེས་རབ་ལ་དགོད་དོ་ཞེས་
དབུགས་འབྱིན་པ་རྙེད་པར་འགྱུར་ཏེ། དེ་ལ་ཤེས་རབ་ནི་ཆོས་ཐམས་ཅད་མངོན་སུམ་དུ་གྱུར་པ་གང་ཡིན་པའོ། །བདག་ནི་སངས་རྒྱས་ཀྱི་ཆོས་ཐམས་ཅད་བསྡུ་བ་ལ་གནས་ཀྱིས། གཞན་དག་ཀྱང་སངས་
རྒྱས་ཀྱི་ཆོས་ཐམས་ཅད་བསྡུ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སངས་རྒྱས་ཀྱི་ཆོས་ཐམས་ཅད་བསྡུ་བ་ནི་བསམ་པས་བསྡུས་པའི་བྱང་ཆུབ་ཀྱི་སེམས་གང་ཡིན་པའོ། །བདག་ནི་ཆོས་
སྨྲ་བ་ལ་གནས་ཀྱིས། གཞན་དག་ཀྱང་ཆོས་སྨྲ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་སྨྲ་བ་ནི་དེ་བཞིན་གཤེགས་པས་གནང་བ་བརྗོད་པ་གང་ཡིན་པའོ། །བདག་ནི་དྲན་པ་ལ་

57-1-23b

གནས་ཀྱིས། གཞན་དག་ཀྱང་དྲན་པ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དྲན་པ་ནི་མི་བརྗེད་པའི་ཆོས་ལ་འཇུག་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་
བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། 
ལྔ་གང་ཞེ་ན། འདི་ལྟ་སྟེ། བདག་ནི་བློ་གྲོས་ལ་གནས་ཀྱིས། གཞན་དག་ཀྱང་བློ་གྲོས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བློ་གྲོས་ནི་ཆོས་ཀྱི་མཚམས་སྦྱོར་བ་ཁོང་དུ་ཆུད་པ་གང་ཡིན་
པའོ། བདག་ནི་བརྟན་པ་ལ་གནས་ཀྱིས། གཞན་དག་ཀྱང་བརྟན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྟན་པ་ནི་སྤྱོད་པ་དང་ཆོ་ག་ཕུན་སུམ་ཚོགས་པ་གང་ཡིན་པའོ། །བདག་
ནི་རྟོགས་པ་ལ་གནས་ཀྱིས། གཞན་དག་ཀྱང་རྟོགས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་རྟོགས་པ་ནི་དོན་རྟོགས་པ་ལ་འཇུག་པ་གང་ཡིན་པའོ། །བདག་ནི་ཡང་དག་པའི་
རྣམ་པར་གྲོལ་བ་ལ་གནས་ཀྱིས། གཞན་དག་ཀྱང་ཡང་དག་པའི་རྣམ་པར་གྲོལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པའི་རྣམ་པར་གྲོལ་བ་ནི་ཆོས་གང་ཡང་ཐོབ་པ་མེད་
པ་གང་ཡིན་པའོ། །བདག་ནི་ཀུན་ནས་ལྡང་བ་རྣམ་པར་གནོན་པ་ལ་གནས་ཀྱིས། གཞན་དག་ཀྱང་ཀུན་ནས་ལྡང་བ་རྣམ་པར་གནོན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་
ལ་ཀུན་ནས་ལྡང་བ་རྣམ་པར་གནོན་པའི་ཉེས་པའི་རྡུལ་འཆགས་པ་དང་། ཕྱིན་ཅད་མི་དགེ་བའི་ཆོས་རྣམས་སྡོམ་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་

57-1-24a

སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། 
ལྔ་གང་ཞེ་ན། འདི་ལྟ་སྟེ། བདག་ནི་ཆོ་ག་ལ་གནས་ཀྱིས། གཞན་དག་ཀྱང་ཆོ་ག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོ་ག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ལ་སྒྲུབ་པ་གང་
ཡིན་པའོ། །བདག་ནི་བྱ་བ་ལ་གནས་ཀྱིས། གཞན་དག་ཀྱང་བྱ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བྱ་བ་ནི་སྟོང་པ་ཉིད་ལ་ཡང་མོས་ལ། ལས་ཀྱི་རྣམ་པར་སྨིན་པ་ལ་ཡང་
ཡིད་ཆེས་པ་གང་ཡིན་པའོ། །བདག་ནི་སྡིག་པ་འདོད་པ་དང་བྲལ་བ་ལ་གནས་ཀྱིས། གཞན་དག་ཀྱང་སྡིག་པ་འདོད་པ་དང་བྲལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྡིག་པ་འདོད་
པ་དང་བྲལ་བ་ནི་རྙེད་པ་དང་བཀུར་སྟི་དང་ཚིགས་སུ་བཅད་པ་ལས་སྡིག་པ་མི་འདོད་པ་གང་ཡིན་པའོ། །བདག་ནི་བདག་ལ་མི་སྟོད་གཞན་ལ་མི་སྨོད་པ་ལ་གནས་ཀྱིས། གཞན་དག་ཀྱང་བདག་ལ་མི་སྟོད་
གཞན་ལ་མི་སྨོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བདག་ལ་མི་བསྟོད་གཞན་ལ་མི་སྨོད་པ་ལ། བདག་ལ་ཡོན་ཏན་མེད་པ་སྒྲོ་མི་འདོགས་པ་གང་ཡིན་པ་འདི་ནི་བདག་ལ་མི་སྟོད་
པའོ། །གཞན་གྱི་ཡོན་ཏན་ཡང་དག་པ་ཆུད་མི་གཟོན་པ་གང་ཡིན་པ་འདི་ནི་གཞན་ལ་མི་སྨོད་པའོ། །བདག་ནི་ཡང་དག་པ་ལ་གནས་ཀྱིས། གཞན་དག་ཀྱང་ཡང་དག་པ་ལ་དགོད་དོ་ཞེས་དབུགས་
འབྱིན་པ་རྙེད་པར་འགྱུར་ཏེ། དེ་ལ་ཡང་དག་པ་ནི་ཆོས་ཐམས་ཅད་ལ་འདུ་ཤེས་མེད་པ་དང་། འདུ་ཤེས་ལ་རློམ་སེམས་མེད་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་

57-1-24b

ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། 
འདི་ལྟ་སྟེ། བདག་ནི་བག་ཆགས་ཀྱི་མཚམས་སྦྱོར་བ་ལེགས་པར་འཇོམས་པ་ལ་གནས་ཀྱིས། གཞན་དག་ཀྱང་བག་ཆགས་ཀྱི་མཚམས་སྦྱོར་བ་ལེགས་པར་འཇོམས་པ་ལ་འགོད་དོ་ཞེས་དབུགས་འབྱིན་པ་རྙེད་པར་འགྱུར་
ཏེ། དེ་ལ་བག་ཆགས་ཀྱི་མཚམས་སྦྱོར་བ་ལེགས་པར་འཇོམས་པ་ནི་སྔོན་གྱི་བྱིས་པའི་སྤྱོད་པ་ལ་སྨོད་པ་དང་། ཉན་ཐོས་དང་རང་སངས་རྒྱས་ཀྱི་ས་ལ་འདོད་པ་མེད་པ་གང་ཡིན་པའོ། །བདག་ནི་རྗེས་སུ་
ཆགས་པ་དང་། ཁོང་ཁྲོ་བ་སྤོང་བ་ལ་གནས་ཀྱིས། གཞན་དག་ཀྱང་རྗེས་སུ་ཆགས་པ་དང་། ཁོང་ཁྲོ་བ་སྤོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་རྗེས་སུ་ཆགས་པ་དང་ཁོང་ཁྲོ་བ་
སྤོང་བ་ནི་མི་དགེ་བའི་ཆོས་མ་སྐྱེས་པ་རྣམས་མི་སྐྱེད་པ་དང་། དགེ་བའི་ཆོས་སྐྱེས་པ་རྣམས་ཆུད་མི་གཟོན་པ་གང་ཡིན་པའོ། །བདག་ནི་མཉམ་པ་ལ་གནས་ཀྱིས། གཞན་དག་ཀྱང་མཉམ་པ་ལ་དགོད་
དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མཉམ་པ་ནི་འཕགས་པའི་བདེན་པ་རྟོགས་པ་གང་ཡིན་པའོ། །བདག་ནི་དྲང་བ་ལ་གནས་ཀྱིས། གཞན་དག་ཀྱང་དྲང་བ་ལ་དགོད་དོ་ཞེས་དབུགས་
འབྱིན་པ་རྙེད་པར་འགྱུར་ཏེ། དེ་ལ་དྲང་བ་ནི་འཕགས་པའི་ལམ་ལ་རྟོག་པ་མེད་པ་གང་ཡིན་པའོ། །བདག་ནི་བཞིན་ཁྲོ་གཉེར་མེད་པ་ལ་གནས་ཀྱིས། གཞན་དག་ཀྱང་བཞིན་ཁྲོ་གཉེར་མེད་པ་ལ་དགོད་དོ་
ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བཞིན་ཁྲོ་གཉེར་མེད་པ་ནི་ཞེ་སྡང་དང་བྲལ་བ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་

57-1-25a

སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་གསོང་པོར་
སྨྲ་བ་ལ་གནས་ཀྱིས། གཞན་དག་ཀྱང་གསོང་པོར་སྨྲ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གསོང་པོར་སྨྲ་བ་ནི་ཚུར་ཤོག་ལེགས་པར་འོངས་སམ་ཞེས་རྗོད་ཅིང་ལྡང་བའི་ཟོ་བདོག་ཡང་བ་
གང་ཡིན་པའོ། བདག་ནི་ཡེ་ཤེས་མཐའ་ཡས་པ་ལ་གནས་ཀྱིས། གཞན་དག་ཀྱང་ཡེ་ཤེས་མཐའ་ཡས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡེ་ཤེས་མཐའ་ཡས་པ་ནི་ཕྱོགས་
བཅུའི་འཇིག་རྟེན་རབ་འབྱམ་ཐམས་ཅད་དུ་འཇིག་རྟེན་དང་འཇིག་རྟེན་ལས་འདས་པའི་ལས་དང་བཟོའི་གནས་ལ་ཡེ་ཤེས་ལྷུན་གྱིས་གྲུབ་པ་གང་ཡིན་པའོ། །བདག་ནི་ལས་ཀྱི་རྣམ་པར་སྨིན་པ་ལ་ནེམ་ནུར་མེད་པར་
གནས་ཀྱིས། གཞན་དག་ཀྱང་ལས་ཀྱི་རྣམ་པར་སྨིན་པ་ལ་ནེམ་ནུར་མེད་པར་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལས་ཀྱི་རྣམ་པར་སྨིན་པ་ལ་ནེམ་ནུར་མེད་པ་ནི་རྟག་པ་དང་ཆད་པ་ཡོངས་སུ་
སྤངས་པ་གང་ཡིན་པའོ། །བདག་ནི་བརྗོད་དུ་མེད་པ་ལ་གནས་ཀྱིས། གཞན་དག་ཀྱང་བརྗོད་དུ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྗོད་དུ་མེད་པ་ནི་སེམས་དང་། ཡིད་
དང་རྣམ་པར་ཤེས་པ་རྣམས་ཡིད་ལ་བྱེད་པ་མེད་ཅིང་སྒྲོ་འདོགས་པ་མེད་པ་གང་ཡིན་པའོ། །བདག་ནི་ཆོས་ཀྱི་དབྱིངས་ཤེས་པ་ལ་གནས་ཀྱིས། གཞན་དག་ཀྱང་ཆོས་ཀྱི་དབྱིངས་ཤེས་པ་ལ་དགོད་དོ་ཞེས་
དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཀྱི་དབྱིངས་ཤེས་པ་ནི་ཆོས་ཐམས་ཅད་ཆོས་ཀྱི་དབྱིངས་དབྱེར་མེད་པ་གཉིས་སུ་མེད་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་

57-1-25b

དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། 
ལྔ་གང་ཞེ་ན། འདི་ལྟ་སྟེ། བདག་ནི་སྤོང་བ་ལ་གནས་ཀྱིས། གཞན་དག་ཀྱང་ཡང་དག་པར་སྤོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྤོང་བ་ནི་དམིགས་པ་དག་ལ་མེད་པའི་འདུ་ཤེས་གང་
ཡིན་པ་དང་། རློམ་སེམས་གང་ཡིན་པའོ། །བདག་ནི་སྒྲིབ་པ་མེད་པའི་ཡེ་ཤེས་ལ་གནས་ཀྱིས། གཞན་དག་ཀྱང་སྒྲིབ་པ་མེད་པའི་ཡེ་ཤེས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་
སྒྲིབ་པ་མེད་པའི་ཡེ་ཤེས་ནི་མཐའ་དང་མཐའ་མེད་པ་རྣམ་པར་དག་པ་གང་ཡིན་པའོ། །བདག་ནི་ཚིག་གི་མཚམས་སྦྱར་བ་ཤེས་པ་ལ་གནས་ཀྱིས། གཞན་དག་ཀྱང་ཚིག་གི་མཚམས་སྦྱར་བ་ཤེས་
པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚིག་གི་མཚམས་སྦྱར་བ་ཤེས་པ་ནི་སྨོན་ལམ་གྱི་ཁྱད་པར་ཡང་དག་པར་འབྱུང་བས་དགེ་བའི་རྩ་བ་ཡོངས་སུ་བསྔོ་བ་གང་ཡིན་པའོ། །བདག་
ནི་དེས་པ་ལ་གནས་ཀྱིས། གཞན་དག་ཀྱང་དེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དེས་པ་ནི་སེམས་ཅན་ཐམས་ཅད་ལ་ཕན་པའི་གཞི་གང་ཡིན་པའོ། །བདག་ནི་བདུད་
ཀྱི་ལས་དང་བྲལ་བ་ལ་གནས་ཀྱིས། གཞན་དག་ཀྱང་བདུད་ཀྱི་ལས་དང་བྲལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བདུད་ཀྱི་ལས་དང་བྲལ་བ་ནི་ལྟ་བར་གྱུར་པ་ཡོངས་སུ་ཤེས་
པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་

57-1-26a

དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་སངས་རྒྱས་ལ་སྐྱབས་སུ་སོང་གིས། གཞན་དག་ཀྱང་སངས་རྒྱས་ལ་
སྐྱབས་སུ་འགྲོ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སངས་རྒྱས་ལ་སྐྱབས་སུ་འགྲོ་བ་ནི་དེ་བཞིན་གཤེགས་པའི་བསླབ་པ་ལས་མི་འདའ་བ་གང་ཡིན་པའོ། །བདག་ནི་ཆོས་ལ་སྐྱབས་
སུ་སོང་གིས། གཞན་དག་ཀྱང་ཆོས་ལ་སྐྱབས་སུ་འགྲོ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ལ་སྐྱབས་སུ་འགྲོ་བ་ནི་ཆོས་མི་སྤོང་བ་གང་ཡིན་པའོ། །བདག་ནི་དགེ་འདུན་
ལ་སྐྱབས་སུ་སོང་གིས། གཞན་དག་ཀྱང་དགེ་འདུན་ལ་སྐྱབས་སུ་འགྲོ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དགེ་འདུན་ལ་སྐྱབས་སུ་འགྲོ་བ་ནི་སངས་རྒྱས་ཀྱི་ཚུལ་ཁྲིམས་ལ་ལྟ་བ་གང་
ཡིན་པའོ། །བདག་ནི་ང་རྒྱལ་མེད་པ་ལ་གནས་ཀྱིས། གཞན་དག་ཀྱང་ང་རྒྱལ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ང་རྒྱལ་མེད་པ་ནི་སེམས་ཅན་ལ་ཤིན་དུ་གུས་པ་གང་ཡིན་
པའོ། །བདག་ནི་འཁོན་དུ་འཛིན་པ་མེད་པ་ལ་གནས་ཀྱིས། གཞན་དག་ཀྱང་འཁོན་དུ་འཛིན་པ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་འཁོན་དུ་འཛིན་པ་མེད་པ་ནི་སེམས་ཀྱི་ཡོངས་སུ་
གདུང་བ་ཉེ་བར་ཞི་བ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་
པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཚུལ་འཆོས་པ་མེད་པ་ལ་གནས་ཀྱིས། གཞན་དག་ཀྱང་ཚུལ་འཆོས་པ་མེད་

57-1-26b

པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚུལ་འཆོས་པ་མེད་པ་ནི་ཟང་ཟིང་མེད་པའི་སེམས་ཀྱིས་གཞན་ལ་ཕན་འདོགས་པ་གང་ཡིན་པའོ། །བདག་ནི་ཁ་གསག་མེད་པ་ལ་གནས་ཀྱིས། 
གཞན་དག་ཀྱང་ཁ་གསག་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཁ་གསག་མེད་པ་ནི་སེམས་ཅན་ཡོངས་སུ་སྨིན་པར་བྱེད་པས་ཡོངས་སུ་ལེན་པ་གཏོང་བ་གང་ཡིན་པའོ། །
བདག་ནི་ཐོབ་ཀྱིས་འཇལ་བ་མེད་པ་ལ་གནས་ཀྱིས། གཞན་དག་ཀྱང་ཐོབ་ཀྱིས་འཇལ་བ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཐོབ་ཀྱིས་འཇལ་བ་མེད་པ་ནི་འཕགས་པའི་རིགས་ཡང་
དག་པར་བླངས་པ་ཡོངས་སུ་རྫོགས་པར་བྱེད་པ་སྦྱངས་པའི་ཡོ་བྱད་བསྙུངས་པ་གང་ཡིན་པའོ། །བདག་ནི་འཚོ་བ་ཡོངས་སུ་དག་པ་ལ་གནས་ཀྱིས། གཞན་དག་ཀྱང་འཚོ་བ་ཡོངས་སུ་དག་པ་ལ་དགོད་དོ་ཞེས་
དབུགས་འབྱིན་པ་རྙེད་པར་འགྱུར་ཏེ། དེ་ལ་འཚོ་བ་ཡོངས་སུ་དག་པ་ནི་དམ་པའི་ཆོས་ཡོངས་སུ་གཟུང་བར་བྱ་བའི་ཕྱིར་སྡུག་བསྔལ་གྱི་ཡོ་བྱད་གང་མི་ལེན་པ་དེ་ཅི་ཡང་མེད་པ་དང་། བདེ་བའི་ཡོ་བྱད་གང་མི་གཏོང་
བ་དེ་ཅི་ཡང་མེད་པའོ། །བདག་ནི་གཅིག་པུར་དགའ་བ་ལ་གནས་ཀྱིས། གཞན་དག་ཀྱང་གཅིག་པུར་དགའ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གཅིག་པུར་དགའ་བ་ནི་འདུ་འཛི་
ཡོངས་སུ་སྤོང་བ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །
བམ་པོ་གསུམ་པ། འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཆོས་ཀྱི་

57-1-27a

ཀུན་དགའ་ལ་དགའ་བ་ལ་གནས་ཀྱིས། གཞན་དག་ཀྱང་ཆོས་ཀྱི་ཀུན་དགའ་ལ་དགའ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཀྱི་ཀུན་དགའ་ལ་དགའ་བ་ནི་ཁམས་
གསུམ་གྱིས་མ་སྐྲག་པ་དང་། བྱང་ཆུབ་ཀྱི་སེམས་ཆུད་མི་ཟ་བ་གང་ཡིན་པའོ། །བདག་ནི་མནར་སེམས་ཀྱི་དངོས་པོ་དགུ་སྤོང་བ་ལ་གནས་ཀྱིས། གཞན་དག་ཀྱང་མནར་སེམས་ཀྱི་དངོས་པོ་དགུ་སྤོང་བ་
དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་མནར་སེམས་ཀྱི་དངོས་པོ་དགུ་སྤོང་བ་ནི་སེམས་ཅན་གྱི་གནས་དགུ་ཡོངས་སུ་ཤེས་པ་གང་ཡིན་པའོ། །བདག་ནི་སེམས་ཞི་བ་ཉིད་ལ་གནས་ཀྱིས། 
གཞན་དག་ཀྱང་སེམས་ཞི་བ་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་ཞི་བ་ཉིད་ནི་སེམས་ཀྱི་ཡོངས་སུ་གདུང་བ་མེད་པ་གང་ཡིན་པའོ། །བདག་ནི་ཞི་གནས་ཀྱི་ཚོགས་ཡོངས་སུ་
ཚོལ་བ་ལ་གནས་ཀྱིས། གཞན་དག་ཀྱང་ཞི་གནས་ཀྱི་ཚོགས་ཡོངས་སུ་ཚོལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཞི་གནས་ཀྱི་ཚོགས་ཡོངས་སུ་ཚོལ་བ་ནི་སེམས་ལས་སུ་རུང་
བ་གང་ཡིན་པའོ། །བདག་ནི་ཚུལ་ཁྲིམས་ལྷོད་པ་མེད་པ་ལ་གནས་ཀྱིས། གཞན་དག་ཀྱང་ཚུལ་ཁྲིམས་ལྷོད་པ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚུལ་ཁྲིམས་
ལྷོད་པ་མེད་པ་ནི་ཆོ་ག་དང་། ཚུལ་ཁྲིམས་དང་། ལྟ་བ་ཉམས་པ་རྣམས་ལས་ཡང་དག་པར་འདའ་བ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་
རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། 

57-1-27b

འདི་ལྟ་སྟེ། བདག་ནི་ལྷ་དང་མི་ལ་མི་སླུ་བར་གནས་ཀྱིས། གཞན་དག་ཀྱང་ལྷ་དང་མི་ལ་མི་སླུ་བར་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལྷ་དང་མི་ལ་མི་སླུ་བ་ནི་བྱང་ཆུབ་ཀྱི་སེམས་
ཡོངས་སུ་མི་གཏོང་བ་གང་ཡིན་པའོ། །བདག་ནི་སྦྱོར་བ་ལ་གནས་ཀྱིས། གཞན་དག་ཀྱང་སྦྱོར་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྦྱོར་བ་ནི་སེམས་ཅན་ཐམས་
ཅད་ལ་ཕན་པའི་དངོས་པོ་སྟོན་དུ་འགྲོ་བའི་རྗེས་སུ་བསྟན་པ་གང་ཡིན་པའོ། །བདག་ནི་སེམས་དམུ་རྒོད་མ་ཡིན་པ་ལ་གནས་ཀྱིས། གཞན་དག་ཀྱང་སེམས་དམུ་རྒོད་མ་ཡིན་པ་ལ་དགོད་དོ་ཞེས་
དབུགས་འབྱིན་པ་རྙེད་པ་འགྱུར་ཏེ། དེ་ལ་སེམས་དམུ་རྒོད་མ་ཡིན་པ་ནི་དུལ་བ་དང་ཅང་ཤེས་ཀྱི་སེམས་གང་ཡིན་པའོ། །བདག་ནི་སེམས་ཅན་ཐམས་ཅད་ཀྱི་སློབ་མར་ཁས་ལེན་པ་ལ་གནས་
ཀྱིས། གཞན་དག་ཀྱང་སེམས་ཅན་ཐམས་ཅད་ཀྱི་སློབ་མར་ཁས་ལེན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་ཅན་ཐམས་ཅད་ཀྱི་སློབ་མར་ཁས་ལེན་པ་ནི་བྱ་བ་ཅི་
ཡོད་པ་ལ་བདག་ཉིད་བྱེད་པ་གང་ཡིན་པའོ། །བདག་ནི་སྦྱིན་གནས་རྣམས་ལ་འདུད་པ་དང་། ཕྱག་བྱ་བ་ལ་གནས་ཀྱིས། གཞན་དག་ཀྱང་སྦྱིན་གནས་རྣམས་ལ་འདུད་པ་དང་ཕྱག་བྱ་བ་ལ་
དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྦྱིན་གནས་རྣམས་ལ་འདུད་པ་དང་ཕྱག་བྱ་བ་ནི་སེམས་ཅན་ཐམས་ཅད་ལ་ང་རྒྱལ་མེད་པ་གང་ཡིན་པ་སྟེ། འཇམ་དཔལ་དབུགས་འབྱིན་
པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་

57-1-28a

དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་དམ་པའི་ཆོས་ཡོངས་སུ་ཚོལ་བ་ལ་གནས་ཀྱིས། གཞན་དག་ཀྱང་དམ་པའི་ཆོས་ཡོངས་སུ་ཚོལ་བ་ལ་དགོད་
དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དམ་པའི་ཆོས་ཡོངས་སུ་ཚོལ་བ་ནི་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ལ་སྐྱོ་བ་མེད་པ་དང་། སངས་རྒྱས་ཀྱི་ཞིང་ཡོངས་སུ་སྦྱོང་བ་དང་། ཚུལ་ཁྲིམས་
དང་། ཐོས་པའི་ཚོགས་སོགས་པ་དང་། ཆོས་ཡོངས་སུ་ཚོལ་བ་ལ་བརྩོན་ཞིང་སྦྱིན་པ་མི་ལེན། སེར་སྣ་མི་གཏོང་། ཚུལ་ཁྲིམས་མི་ལེན། འཆལ་པའི་ཚུལ་ཁྲིམས་མི་གཏོང་། བཟོད་པ་མི་ལེན། 
གནོད་སེམས་མི་གཏོང་། བརྩོན་འགྲུས་མི་ལེན། ལེ་ལོ་མི་གཏོང་། བསམ་གཏན་མི་ལེན། རྣམ་པར་རྟོག་པ་དང་རྣམ་པར་དཔྱོད་པ་མི་གཏོང་། ཤེས་རབ་མི་ལེན། འཆལ་པའི་ཤེས་རབ་མི་གཏོང་། 
དགེ་བ་མི་ལེན་ཅིང་མི་དགེ་བ་མི་གཏོང་བ་གང་ཡིན་པའོ། །བདག་ནི་ཆོས་ལ་གུས་པ་དང་བཅས་པ་ལ་གནས་ཀྱིས། གཞན་དག་ཀྱང་ཆོས་ལ་གུས་པ་དང་བཅས་པ་ལ་དགོད་དོ་ཞེས་དབུགས་འབྱིན་པ་རྙེད་པ་འགྱུར་ཏེ། 
དེ་ལ་ཆོས་ལ་གུས་པ་དང་བཅས་པ་ནི་ཆོས་རྣམས་ལ་ནན་ཏན་བྱེད་པ་གང་ཡིན་པའོ། །བདག་ནི་ཆོས་སྨྲ་བ་ལ་གུས་པ་དང་བཅས་པ་ལ་གནས་ཀྱིས། གཞན་དག་ཀྱང་ཆོས་སྨྲ་བ་ལ་གུས་པ་དང་བཅས་པ་ལ་དགོད་དོ་
ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་སྨྲ་བ་ལ་གུས་པ་དང་བཅས་པ་ནི་ཆོས་སྨྲ་བ་ལ་སྟོན་པར་འདུ་ཤེས་པ་གང་ཡིན་པའོ། །བདག་ནི་ཚིག་རྩུབ་པོ་མེད་པ་ལ་གནས་ཀྱིས། གཞན་དག་
ཀྱང་ཚིག་རྩུབ་པོ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚིག་རྩུབ་པོ་མེད་པ་ནི་ཕན་འདོགས་པའི་ཚིག་གང་ཡིན་པའོ། །བདག་ནི་གནོད་སེམས་མེད་པ་ལ་གནས་ཀྱིས། 

57-1-28b

གཞན་དག་ཀྱང་གནོད་སེམས་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གནོད་སེམས་མེད་པ་ནི་ལས་བྱ་བ་ལ་འཇུག་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་
བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་
གང་ཞེ་ན། འདི་ལྟ་སྟེ། བདག་ནི་སྦྱིན་པ་ལ་གནས་ཀྱིས། གཞན་དག་ཀྱང་སྦྱིན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྦྱིན་པ་ནི་ཆོས་ཇི་ལྟ་བ་བཞིན་དུ་སྟོན་པ་གང་ཡིན་པའོ། །
བདག་ནི་སྙན་པར་སྨྲ་བ་ལ་གནས་ཀྱིས། གཞན་དག་ཀྱང་སྙན་པར་སྨྲ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྙན་པར་སྨྲ་བ་ནི་ཟང་ཟིང་མེད་པའི་སེམས་ཀྱིས། ཆོས་སྟོན་པ་གང་
ཡིན་པའོ། །བདག་ནི་དོན་སྤྱོད་པ་ལ་གནས་ཀྱིས། གཞན་དག་ཀྱང་དོན་སྤྱོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དོན་སྤྱོད་པ་ནི་གཞན་ལ་ལུང་འབོགས་པ་དང་། ཁ་ཏོན་འདོན་
དུ་འཇུག་པ་ལ་སྐྱོ་བ་མེད་པ་གང་ཡིན་པའོ། །བདག་ནི་དོན་འཐུན་པ་ལ་གནས་ཀྱིས། གཞན་དག་ཀྱང་དོན་འཐུན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དོན་འཐུན་པ་ནི་སྦྱིན་པ་
བྱིན་ནས་ཐེག་པ་ཆེན་པོ་ལ་དགོད་པ་གང་ཡིན་པའོ། །བདག་ནི་བྱང་ཆུབ་ཀྱི་སེམས་ལ་གནས་ཀྱིས། གཞན་དག་ཀྱང་བྱང་ཆུབ་ཀྱི་སེམས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་
བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཆུད་མི་ཟ་ཞིང་གནས་པར་བྱ་བའི་ཕྱིར་འདུན་པ་སྐྱེད་པ་དང་། འབད་པ་དང་། བརྩོན་འགྲུས་རྩོམ་པ་དང་། སེམས་རབ་ཏུ་འཛིན་པ་དང་། ཡང་དག་པར་

57-1-29a

འཇོག་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་
པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་དོན་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་དོན་སོ་སོ་ཡང་དག་པར་རིག་
པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དོན་སོ་སོ་ཡང་དག་པར་རིག་པ་ནི་ཆོས་ཀྱི་ཚུལ་ཡང་དག་པ་ཇི་ལྟ་བ་བཞིན་དུ་རྟོགས་པ་གང་ཡིན་པའོ། །བདག་ནི་ཆོས་སོ་སོ་ཡང་དག་པར་རིག་པ་ལ་
གནས་ཀྱིས། གཞན་དག་ཀྱང་ཆོས་སོ་སོ་ཡང་དག་པར་རིག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་སོ་སོ་ཡང་དག་པར་རིག་པ་ནི་སངས་རྒྱས་ཀྱི་ཆོས་ཐམས་ཅད་ལ་འཇུག་པའི་ཡེ་ཤེས་
གང་ཡིན་པའོ། །བདག་ནི་ངེས་པའི་ཚིག་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་ངེས་པའི་ཚིག་སོ་སོ་ཡང་དག་པར་རིག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་
ངེས་པའི་ཚིག་སོ་སོ་ཡང་དག་པར་རིག་པ་ནི་སྐད་བསྒྲགས་པ་ཐམས་ཅད་ལ་འཇུག་པའི་ཡེ་ཤེས་གང་ཡིན་པའོ། །བདག་ནི་སྤོབས་པ་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་སྤོབས་
པ་སོ་སོ་ཡང་དག་པར་རིག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྤོབས་པ་སོ་སོ་ཡང་དག་པར་རིག་པ་ནི་སངས་རྒྱས་ཀྱི་ཆོས་ཐམས་ཅད་ལ་ཚིག་རབ་ཏུ་དབྱེ་བ་ལ་མཁས་པའི་ཤེས་པ་གང་ཡིན་
པའོ། །བདག་ནི་སྤོབས་པ་ལ་གནས་ཀྱིས། གཞན་དག་ཀྱང་སྤོབས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྤོབས་པ་ནི་སངས་རྒྱས་ཀྱི་ཆོས་ཐམས་ཅད་ལ་བྱིན་གྱིས་རློབ་ཅིང་སྟོན་པ་

57-1-29b

ཤེས་པ་གང་ཡིན་པ་སྟེ། དེ་ནི་ཚིག་གཅིག་བཟུང་ནས་ཕྱི་མའི་མཐའི་མུའི་བསྐལ་པར་བྱིན་གྱིས་རློབ་ཅིང་སྟོན་ཀྱང་མི་ལྡང་བ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་
སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། 
འདི་ལྟ་སྟེ། བདག་ནི་སེམས་ཅན་ཡོངས་སུ་སྨིན་པར་བྱ་བའི་ཕྱིར་སེམས་ཅན་གྱི་ཀུན་ནས་ཉོན་མོངས་པ་བཟོད་པ་ལ་གནས་ཀྱིས། གཞན་དག་ཀྱང་སེམས་ཅན་ཡོངས་སུ་སྨིན་པར་བྱ་བའི་ཕྱིར་སེམས་ཅན་ཀུན་ནས་
ཉོན་མོངས་པ་བཟོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཀུན་ནས་ཉོན་མོངས་པ་ནི་ལུས་ལ་གནོད་པ་དང་། སེམས་ལ་གནོད་པ་གང་ཡིན་པའོ། །བདག་ནི་ཕོངས་པ་མེད་པ་ལ་གནས་
ཀྱིས། གཞན་དག་ཀྱང་ཕོངས་པ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཕོངས་པ་མེད་པ་ནི་དགེ་བའི་རྩ་བ་རྣམས་ཆུད་མི་ཟ་བ་གང་ཡིན་པའོ། །བདག་ནི་སེམས་མི་འཁྲུགས་པ་ལ་གནས་
ཀྱིས། གཞན་དག་ཀྱང་སེམས་མི་འཁྲུགས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་མི་འཁྲུགས་པ་ནི་དགེ་བའི་རྩ་བ་ཐམས་ཅད་ཆུད་མི་ཟ་བ་གང་ཡིན་པའོ། །བདག་ནི་བརྩོན་
འགྲུས་ལ་གནས་ཀྱིས། གཞན་དག་ཀྱང་བརྩོན་འགྲུས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྩོན་འགྲུས་ནི་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱེད་པ་དང་། མི་དགེ་
བའི་ཆོས་ཐམས་ཅད་སྤོང་བ་གང་ཡིན་པའོ། །བདག་ནི་སེམས་ཅན་ལ་དམིགས་པའི་བྱམས་པ་ལ་གནས་ཀྱིས། གཞན་དག་ཀྱང་སེམས་ཅན་ལ་དམིགས་པའི་བྱམས་པ་ལ་དགོད་དོ་ཞེས་དབུགས་འབྱིན་

57-1-30a

པ་རྙེད་པར་འགྱུར་ཏེ། དེ་ལ་སེམས་ཅན་ལ་དམིགས་པའི་བྱམས་པ་ནི་སེམས་ཅན་ཐམས་ཅད་ལ་སེམས་སྙོམས་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་
ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་
གང་ཞེ་ན། འདི་ལྟ་སྟེ། བདག་ནི་ཁོང་ཁྲོ་བ་མེད་པའི་སེམས་ལ་གནས་ཀྱིས། གཞན་དག་ཀྱང་ཁོང་ཁྲོ་བ་མེད་པའི་སེམས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཁོང་ཁྲོ་བ་མེད་
པའི་སེམས་ནི་སེམས་ཅན་ཐམས་ཅད་སྲུང་བ་གང་ཡིན་པའོ། །བདག་ནི་སྤོང་བ་ལ་གནས་ཀྱིས། གཞན་དག་ཀྱང་སྤོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྤོང་བ་ནི་དུས་གསུམ་
གྱི་ཆོས་ཐམས་ཅད་ལ་མཉམ་པ་ཉིད་ལ་འཇུག་པ་གང་ཡིན་པའོ། །བདག་ནི་ཆོས་ལ་དམིགས་པའི་བྱམས་པ་ལ་གནས་ཀྱིས། གཞན་དག་ཀྱང་ཆོས་ལ་དམིགས་པའི་བྱམས་པ་ལ་དགོད་དོ་ཞེས་དབུགས་
འབྱིན་པ་རྙེད་པར་འགྱུར་ཏེ། དེ་ལ་ཆོས་ལ་དམིགས་པའི་བྱམས་པ་ནི་ཆོས་ཐམས་ཅད་ལ་མི་དམིགས་པ་ལ་ཡང་རློམ་སེམས་མེད་པའོ། བདག་ནི་དང་པོའི་བསོད་ནམས་ཀྱི་ཚོགས་ལ་གནས་ཀྱིས། 
གཞན་དག་ཀྱང་དང་པོའི་བསོད་ནམས་ཀྱི་ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དང་པོའི་བསོད་ནམས་ཀྱི་ཚོགས་ནི་བྱང་ཆུབ་ཀྱི་སེམས་མི་གཏོང་བ་དང་། བྱང་ཆུབ་སེམས་དཔའི་
སྤྱོད་པའི་རྗེས་སུ་འཇུག་པ་གང་ཡིན་པའོ། །དེ་ལ་བྱང་ཆུབ་སེམས་དཔའི་སྤྱོད་པའི་རྗེས་སུ་འཇུག་པ་ནི་སེམས་ཅན་ཐམས་ཅད་ལ་སེམས་སྙོམས་པས་ཡང་དག་པར་བསྡུས་པའི་བྱམས་པ་དང་། སེར་སྣའི་

57-1-30b

སེམས་ཚར་གཅོད་པ་དང་། འཆལ་པའི་ཚུལ་ཁྲིམས་སེལ་བ་དང་། གནོད་སེམས་སྤོང་བ་དང་། ལེ་ལོ་སེལ་བ་དང་། རྣམ་པར་གཡེང་བ་ཀུན་དུ་སྤྱོད་པ་མེད་པ་དང་། འཆལ་པའི་ཤེས་རབ་སྤོང་
བ་དང་། བསྡུ་བའི་དངོས་པོ་བཞིས་སེམས་ཅན་ཡོངས་སུ་སྨིན་པར་བྱེད་པ་དང་། སེམས་ཅན་ཐམས་ཅད་ལ་སེམས་ས་དང་མཚུངས་པ་དང་། ཐེག་པ་དམན་པ་ལ་མོས་པ་མེད་པ་དང་། སྙིང་རྗེ་ཆེན་པོས་
སེམས་ཅན་ཐམས་ཅད་ཀྱི་དགེ་བའི་རྩ་བ་བྱ་བ་ལ་བརྩོན་ཞིང་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་རྫོགས་
པར་བྱེད་པ་དང་། དམ་པའི་ཆོས་ཡོངས་སུ་འཛིན་ཅིང་ཤེས་རབ་ཀྱི་རྩ་བ་ལས་བྱུང་བའི་བསླབ་པ་དང་། བསོད་ནམས་ཀྱི་ཚོགས་དང་། ཡེ་ཤེས་ཀྱི་ཚོགས་ལ་མངོན་པར་བརྩོན་པ་གང་ཡིན་པའོ། །བདག་
ནི་ངོ་མཚར་གྱི་འདུ་ཤེས་ལ་གནས་ཀྱིས། གཞན་དག་ཀྱང་ངོ་མཚར་གྱི་འདུ་ཤེས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ངོ་མཚར་གྱི་འདུ་ཤེས་ནི་ཆོས་ཐམས་ཅད་ལ་གཉིས་སུ་མེད་པའི་འདུ་
ཤེས་དང་། སྤྱོད་པ་ཐམས་ཅད་ལ་བདག་གིར་སྤྱོད་པར་འདུ་ཤེས་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །
འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་བཟོད་པ་དང་དེས་པ་ལ་གནས་ཀྱིས། གཞན་
དག་ཀྱང་བཟོད་པ་དང་དེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བཟོད་པ་དང་དེས་པ་ནི་ངན་དུ་བརྗོད་པ་དང་ངན་དུ་སྨྲ་བའི་ཚིག་གི་ལམ་ལ་ཁོང་ཁྲོ་བའི་སེམས་མེད་པ་གང་ཡིན་པའོ། །

57-1-31a

བདག་ནི་སེམས་ཞི་བ་ལ་གནས་ཀྱིས། གཞན་དག་ཀྱང་སེམས་ཞི་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་ཞི་བ་ནི་ལྟུང་བ་གླེང་བ་མེད་པའོ། །བདག་ནི་
ཆོས་ཐམས་ཅད་དངོས་པོ་མེད་པ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་དངོས་པོ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་དངོས་པོ་མེད་པ་ཞེས་
བྱ་བ་དེ་ནི་དངོས་པོའི་ཚིག་གོ། །དེ་ཅིའི་ཕྱིར་ཞེ་ན། དངོས་པོའི་རང་བཞིན་ལས་དངོས་པོ་མེད་པ་གཞན་མ་ཡིན་ཏེ། དངོས་པོའི་རང་བཞིན་ཉིད་དངོས་པོ་མེད་པ་སྟེ། དངོས་པོའི་རང་བཞིན་དངོས་པོ་མེད་
པ་ཤེས་པ་དེས་ཆོས་ཐམས་ཅད་དངོས་པོ་མེད་པའོ། །བདག་ནི་ཆོས་གནས་པ་ཉིད་ལ་གནས་ཀྱིས། གཞན་དག་ཀྱང་ཆོས་གནས་པ་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་
ཆོས་གནས་པ་ཉིད་ནི་ཆོས་ཐམས་ཅད་གཡོ་བ་མེད་པ་གང་ཡིན་པའོ། །བདག་ནི་ཆོས་ལ་གནས་ཀྱིས། གཞན་དག་ཀྱང་ཆོས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ནི་
ཐ་མི་དད་ཅིང་མི་གནས་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་
ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཡེ་ཤེས་ཀྱིས་ཉོན་མོངས་པ་རྣམས་གཞོམ་པ་ཡང་མ་
ཡིན། ཡེ་ཤེས་ཀྱིས་ཉོན་མོངས་པ་རྣམས་མི་གཞོམ་པ་ཡང་མ་ཡིན་ནོ། ཞེས་བྱ་བ་ལ་ཞུགས་ཀྱིས། གཞན་དག་ཀྱང་ཡེ་ཤེས་ཀྱིས་ཉོན་མོངས་པ་རྣམས་གཞོམ་པ་ཡང་མ་ཡིན། ཡེ་ཤེས་ཀྱིས་

57-1-31b

ཉོན་མོངས་པ་རྣམས་མི་གཞོམ་པ་ཡང་མ་ཡིན་ནོ་ཞེས་བྱ་བ་ལ་གཟུད་དོ་ཞེས་དབུགས་འབྱིན་པ་རྙེད་པར་འགྱུར་རོ། དེ་ཅིའི་ཕྱིར་ཞེ་ན། ཉོན་མོངས་པའི་རང་བཞིན་ལས་ཡེ་ཤེས་གཞན་མ་ཡིན་པའི་ཕྱིར་ཏེ། ཉོན་མོངས་པའི་རང་
བཞིན་ལས་ཡེ་ཤེས་གཞན་མེད་པས་ཉོན་མོངས་པའི་རང་བཞིན་ཉིད་ཡེ་ཤེས་ཡིན་ཏེ། ཡེ་ཤེས་དེས་ཡེ་ཤེས་དེ་ཉིད་བཙལ་བར་མི་བྱའོ། །དཔེར་ན་འཛུམ་མོའི་རྩེ་མོ་དེ་ཉིད་ཀྱིས་འཛུམ་མོའི་རྩེ་མོ་དེ་ཉིད་ལ་
རེག་པར་མི་རུང་བ་དེ་ལྟར་ཡེ་ཤེས་དེ་ཉིད་ཀྱིས་ཡེ་ཤེས་དེ་ཉིད་བཙལ་བར་མི་བྱའོ། །བདག་ནི་དེ་བཞིན་གཤེགས་པ་རྟག་པ་ཡང་མ་ཡིན། དེ་བཞིན་གཤེགས་པ་མི་རྟག་པ་ཡང་མ་ཡིན་ནོ་ཞེས་བྱ་བ་ལ་ཞུགས་
ཀྱིས། གཞན་དག་ཀྱང་དེ་བཞིན་གཤེགས་པ་རྟག་པ་ཡང་མ་ཡིན། དེ་བཞིན་གཤེགས་པ་མི་རྟག་པ་ཡང་མ་ཡིན་ནོ་ཞེས་བྱ་བ་ལ་གཟུད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དེ་བཞིན་
གཤེགས་པ་རྟག་པ་ཡང་མ་ཡིན། མི་རྟག་པ་ཡང་མ་ཡིན་ཞེས་བྱ་བ་ནི་རློམ་སེམས་ཀྱི་ངོ་བོ་ཉིད་མེད་པའི་ཕྱིར་རོ། །བདག་ནི་དེ་བཞིན་གཤེགས་པ་བསམ་གྱིས་མི་ཁྱབ་པའོ། ཞེས་བྱ་བའི་ཡེ་ཤེས་
འདི་ལ་ཞུགས་ཀྱིས། གཞན་དག་ཀྱང་དེ་བཞིན་གཤེགས་པ་བསམ་གྱི་མི་ཁྱབ་པའོ་ཞེས་བྱ་བའི་ཡེ་ཤེས་འདི་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དེ་བཞིན་གཤེགས་པ་བསམ་
གྱིས་མི་ཁྱབ་པ་ནི་སེམས་ཅན་གདུལ་བ་ཇི་ལྟ་བ་དང་། བསམ་པ་ཇི་ལྟ་བ་དེ་བཞིན་དུ་རྣམ་པར་གཞག་པ་ལས་མི་འདའ་བ་གང་ཡིན་པའོ། །བདག་ནི་གཟུགས་མཚན་ཉིད་མེད་དོ་ཞེས་བྱ་བ་ལ་ཞུགས་ཀྱིས། གཞན་དག་ཀྱང་གཟུགས་མཚན་ཉིད་མེད་དོ་ཞེས་བྱ་བ་
ལ་གཟུད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ཅིའི་ཕྱིར་ཞེ་ན། གཟུགས་ནི་མཚན་ཉིད་མེད་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། གཟུགས་ཀྱི་རང་བཞིན་ལས་མཚན་ཉིད་མེད་པ་གཞན་མེད་

57-1-32a

པས་གཟུགས་ཀྱི་རང་བཞིན་ཉིད་མཚན་ཉིད་མེད་པ་སྟེ། གཟུགས་ཀྱི་རང་བཞིན་གྱི་མཚན་ཉིད་མེད་པ་ཤེས་པ་དེས་ཆོས་ཐམས་ཅད་མཚན་ཉིད་མེད་པའོ། །བདག་ནི་
ཐབས་མཁས་པ་ལ་གནས་ཀྱིས། གཞན་དག་ཀྱང་ཐབས་མཁས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཐབས་མཁས་པ་ནི་ཆོས་ཐམས་ཅད་ཡང་དག་པར་སྡུད་པ་སྟེ། འཇམ་
དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་
ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་བསོད་ནམས་ཀྱི་ཚོགས་མི་ཟད་པ་ལ་གནས་ཀྱིས། གཞན་དག་ཀྱང་བསོད་ནམས་ཀྱི་ཚོགས་མི་ཟད་པ་ལ་དགོད་དོ་ཞེས་
དབུགས་འབྱིན་པ་རྙེད་པར་འགྱུར་ཏེ། དེ་ལ་བསོད་ནམས་ཀྱི་ཚོགས་མི་ཟད་པ་ནི་དགེ་བའི་རྩ་བ་བྱང་ཆུབ་ཏུ་སྔོས་པ་གང་ཡིན་པའོ། །བདག་ནི་ཡེ་ཤེས་ཀྱི་ཚོགས་ལ་གནས་ཀྱིས། གཞན་དག་ཀྱང་
ཡེ་ཤེས་ཀྱི་ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡེ་ཤེས་ཀྱི་ཚོགས་ནི་སྟོང་པ་ཉིད་ལ་མོས་པ་གང་ཡིན་པའོ། །བདག་ནི་ཤེས་རབ་ཀྱི་རྩ་བ་ལས་བྱུང་བའི་ལས་ལ་
གནས་ཀྱིས། གཞན་དག་ཀྱང་ཤེས་རབ་ཀྱི་རྩ་བ་ལས་བྱུང་བའི་ལས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཤེས་རབ་ཀྱི་རྩ་བ་ལས་བྱུང་བའི་ལས་ནི་བདག་ཉིད་ཆོས་དཀར་པོ་ལ་གནས་
པ་གང་ཡིན་པའོ། །ཡང་ཤེས་རབ་ཀྱི་རྩ་བ་ལས་བྱུང་བའི་ལས་ནི་གཞན་ཤེས་རབ་ལ་དགོད་དོ་ཞེས་བྱ་བ་གང་ཡིན་པའོ། །བདག་ནི་ཏིང་ངེ་འཛིན་ལ་གནས་ཀྱིས། གཞན་དག་ཀྱང་ཏིང་ངེ་འཛིན་ལ་དགོད་དོ་ཞེས་

57-1-32b

དབུགས་འབྱིན་པ་རྙེད་པར་འགྱུར་ཏེ། དེ་ལ་ཏིང་ངེ་འཛིན་ནི་སེམས་མེད་པའི་སྙོམས་པར་འཇུག་པ་གང་ཡིན་པའོ། །བདག་ནི་སོ་སོ་ཡང་དག་པར་རྟོག་པ་ལ་གནས་ཀྱིས། གཞན་དག་ཀྱང་སོ་སོ་ཡང་དག་
པར་རྟོགས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སོ་སོ་ཡང་དག་པར་རྟོག་པ་ནི་ལས་དང་བྱ་བ་ལ་འཇུག་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་
སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་
ཞེ་ན། འདི་ལྟ་སྟེ། བདག་ནི་དབུ་མའི་ལམ་ཤེས་པ་ལ་གནས་ཀྱིས། གཞན་དག་ཀྱང་དབུ་མའི་ལམ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དབུ་མའི་ལམ་ནི་མཐའ་
རྣམ་པར་དག་པ་ཤེས་པ་གང་ཡིན་པའོ། །དེ་ཅིའི་ཕྱིར་ཞེ་ན། མཐའི་རང་བཞིན་ལས་དབུ་མའི་ལམ་གཞན་མ་ཡིན་པའི་ཕྱིར་ཏེ། མཐའི་རང་བཞིན་ལས་དབུ་མའི་ལམ་གཞན་མྱེད་པས་མཐའི་རང་བཞིན་
ཉིད་དབུ་མའི་ལམ་མོ། །བདག་ནི་ཆོས་ཐམས་ཅད་རྟག་པའོ་ཞེས་བྱ་བ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་རྟག་པའོ་ཞེས་བྱ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་
ཆོས་ཐམས་ཅད་རྟག་པ་ནི་མཐའ་དང་དབུས་མེད་པའི་ཕྱིར་རོ། །ཆོས་ཐམས་ཅད་མཐའ་དང་དབུབ་མེད་པ་ནི་འདུས་བྱས་ཀྱི་རང་བཞིན་ལས་གཞན་མ་ཡིན་པའི་ཕྱིར་ཏེ། འདུས་བྱས་ཀྱི་རང་བཞིན་ལས་
མཐའ་དང་དབུང་མེད་པ་གཞན་མེད་པས་འདུས་ཀྱི་རང་བཞིན་ཉིད་མཐའ་དང་དབུང་མེད་པའོ། །མཐའ་དང་དབུང་མེད་པ་གང་ཡིན་པ་དེ་ནི་རྟག་པ་བརྟན་པ་

57-1-33a

ཐེར་ཟུག་པའོ། །བདག་ནི་སངས་རྒྱས་ལ་མཆོད་པ་བྱེ་བྲག་ཏུ་མངོན་པར་འཕགས་པ་ལ་གནས་ཀྱིས། གཞན་དག་ཀྱང་སངས་རྒྱས་ལ་མཆོད་པ་བྱེ་བྲག་ཏུ་མངོན་པར་འཕགས་པ་ལ་དགོད་དོ་ཞེས་
དབུགས་འབྱིན་པ་རྙེད་པར་འགྱུར་ཏེ། དེ་ལ་སངས་རྒྱས་ལ་མཆོད་པ་བྱེ་བྲག་ཏུ་མངོན་པར་འཕགས་པ་ནི་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ལ་བསྙེན་ཅིང་བསྟེན་པ་དང་། བསྙེན་བཀུར་བྱེད་ཅིང་རྙེད་པ་དང་བཀུར་
སྟི་བྱས་ཏེ། ཅི་ནུས་ཀྱི་ཐེག་པ་ཆེན་པོ་ཡང་དག་པར་སྐྱེད་ཅིང་སྦྱིན་པ་གང་ཡིན་པའོ། །བདག་ནི་ཆོས་ཐམས་ཅད་འདུས་མ་བྱས་སོ་ཞེས་བྱ་བ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་འདུས་མ་བྱས་སོ་ཞེས་
བྱ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་འདུས་མ་བྱས་ཤེས་བྱ་བ་དེ་ནི་འདུས་བྱས་ཀྱི་ཚིག་གོ། །དེ་ཅིའི་ཕྱིར་ཞེ་ན། འདུས་བྱས་ཀྱི་རང་བཞིན་ལས་འདུས་མ་བྱས་གཞན་མ་
ཡིན་པའི་ཕྱིར་ཏེ། འདུས་བྱས་ཀྱི་རང་བཞིན་ལས་འདུས་མ་བྱས་གཞན་མེད་པས་འདུས་བྱས་ཀྱི་རང་བཞིན་ཉིད་འདུས་མ་བྱས་ཏེ། འདུས་བྱས་ཀྱི་རང་བཞིན་འདུས་མ་བྱས་ཤེས་པ་དེས་ཆོས་ཐམས་ཅད་འདུས་མ་བྱས་
པའོ། བདག་ནི་ཆོས་ཐམས་ཅད་སྟོང་ངོ་ཞེས་བྱ་བ་ལ་ཞུགས་ཀྱིས། གཞན་དག་ཀྱང་ཆོས་ཐམས་ཅད་སྟོང་ངོ་ཞེས་བྱ་བ་ལ་བཟུད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྟོང་པ་ཉིད་ནི་ལྟ་བར་གྱུར་པ་
གང་ཡིན་པའོ། །དེ་ཅིའི་ཕྱིར་ཞེ་ན། སྟོང་པ་ཉིད་ནི་ལྟ་བར་གྱུར་པའི་རང་བཞིན་ལས་གཞན་མ་ཡིན་པའི་ཕྱིར་ཏེ། ལྟ་བར་གྱུར་པའི་རང་བཞིན་ལས་སྟོང་པ་ཉིད་གཞན་མེད་པས་ལྟ་བར་གྱུར་པའི་རང་བཞིན་
ཉིད་སྟོང་པ་ཉིད་དོ། །ལྟ་བར་གྱུར་པའི་རང་བཞིན་སྟོང་པ་ཉིད་ཤེས་པ་དེས་ཆོས་ཐམས་ཅད་སྟོང་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་

57-1-33b

ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཆོས་ཐམས་ཅད་
མཐོང་བར་དཀའ་བ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་མཐོང་བར་དཀའ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་མཐོང་བར་དཀའ་བ་ནི་རྒྱུ་དང་རྐྱེན་གྱི་རང་བཞིན་
ཡིན་པའི་ཕྱིར་རོ། །བདག་ནི་ཆོས་ཐམས་ཅད་རྟོགས་པར་དཀའ་བ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་རྟོགས་པར་དཀའ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་
ཐམས་ཅད་རྟོགས་པར་དཀའ་བ་ནི་དམིགས་པ་མེད་པ་དང་ཡིད་ལ་བྱེད་པའི་རང་བཞིན་མ་ཡིན་པའི་ཕྱིར་རོ། །བདག་ནི་ཆོས་ཐམས་ཅད་རིག་པར་དཀའ་བ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་རིག་
པར་དཀའ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་རིག་པར་དཀའ་བ་ནི་ཤེས་པ་དང་། ཤེས་བྱ་མཉམ་པ་ཉིད་དུ་རྟོགས་པའི་ཕྱིར་རོ། །བདག་ནི་ཆོས་ཐམས་ཅད་
རྙོག་པ་མེད་པ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་རྙོག་པ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་རྙོག་པ་མེད་པ་ནི་ཤིན་དུ་རྣམ་པར་དག་པའི་ཕྱིར་
རོ། །བདག་ནི་ཆོས་ཐམས་ཅད་མི་ཟད་པ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་མི་ཟད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་མི་ཟད་པ་ནི་དཔེ་དང་
དཔེར་བྱ་བའི་ངོ་བོ་ཉིད་མ་ཡིན་པའི་ཕྱིར་ཏེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་

57-1-34a

ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཆོས་ཐམས་ཅད་མི་ཕྱེད་པ་ལ་གནས་ཀྱིས། 
གཞན་དག་ཀྱང་ཆོས་ཐམས་ཅད་མི་ཕྱེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་མི་ཕྱེད་པ་ནི་ཆོས་ཐམས་ཅད་ཆོས་ཀྱི་དབྱིངས་དང་དབྱེར་མེད་པའི་ཕྱིར་དུས་གསུམ་མཉམ་པ་ཉིད་དུ་འཇུག་
པ་གང་ཡིན་པའོ། །བདག་ནི་འཕགས་པའི་བདེན་པ་བཞི་མི་ཕྱེད་པ་ལ་གནས་ཀྱིས། གཞན་དག་ཀྱང་འཕགས་པའི་བདེན་པ་བཞི་མི་ཕྱེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་
འཕགས་པའི་བདེན་པ་བཞི་མི་ཕྱེད་པ་ནི་ནང་རྣམ་པར་དག་པ་གང་ཡིན་པའོ། །བདག་ནི་མ་རིག་པ་དང་འདུ་བྱེད་མི་ཕྱེད་པ་ཤེས་པ་ལ་གནས་ཀྱིས། གཞན་དག་ཀྱང་མ་རིག་པ་དང་འདུ་བྱེད་མི་ཕྱེད་པ་ཤེས་པ་ལ་
དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ཅིའི་ཕྱིར་ཞེ་ན། མ་རིག་པ་ནི་འདུ་བྱེད་ཀྱི་རང་བཞིན་ལས་གཞན་མ་ཡིན་པའི་ཕྱིར་རོ། །གལ་ཏེ་འདུ་བྱེད་རྣམས་ལས་མ་རིག་པ་གཞན་ཡིན་དུ་ཟིན་ན་འདུ་
བྱེད་རྣམས་རྒྱུ་མེད་པ་ཅན་དུ་འགྱུར་རོ། །ཇི་སྟེ་མ་རིག་པ་ལས་འདུ་བྱེད་རྣམས་གཞན་མ་ཡིན་ན་དེ་ལྟ་ན་ནི་ཤིན་དུ་རྣམ་པར་དག་པའི་ཕྱིར་རྒྱུ་དང་འབྲས་བུ་འགྲོགས་པར་འགྱུར་རོ། །བདག་ནི་ཆོས་ཐམས་
ཅད་མི་རྟག་པའོ་ཞེས་བྱ་བ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་མི་རྟག་པའོ་ཞེས་བྱ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ཅིའི་ཕྱིར་ཞེ་ན། མི་རྟག་པ་ཉིད་ནི་རྟག་པའི་རང་
བཞིན་ལས་གཞན་མ་ཡིན་པའི་ཕྱིར་ཏེ། རྟག་པའི་རང་བཞིན་ལས་མི་རྟག་པ་གཞན་མེད་པས་རྟག་པའི་རང་བཞིན་ཉིད་མི་རྟག་པའོ། །བདག་ནི་དེ་བཞིན་གཤེགས་པ་མ་སྐྱེས་མ་འགགས་པའོ་

57-1-34b

ཞེས་བྱ་བ་ལ་གནས་ཀྱིས། གཞན་དག་ཀྱང་དེ་བཞིན་གཤེགས་པ་མ་སྐྱེས་མ་འགགས་པའོ་ཞེས་བྱ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དེ་བཞིན་གཤེགས་པ་མ་སྐྱེས་མ་འགགས་
པ་ནི་གཉེན་པོ་མེད་པའི་ཕྱིར་རོ། །འདི་ལྟ་སྟེ། དཔེར་ན་ནམ་མཁའ་ནི་མ་སྐྱེས་པ་མ་འགགས་པ་མཐའ་དང་དབུང་མེད་པ་ཡིན་མོད་ཀྱིས། འོན་ཀྱང་དམིགས་པའི་དབང་གིས་འདི་ནི་ཁབ་ཀྱི་བུ་གུའོ། །འདི་
ནི་བུམ་པའི་ནང་ངོ་། །འདི་ནི་ནམ་མཁའ་ཚད་མེད་པའོ་ཞེས་རབ་འབྲིང་དང་ཐ་མར་སྣང་ཡང་མ་སྐྱེས་མ་འགགས་པའི་ཕྱིར་ནམ་མཁའ་ལ་རབ་འབྲིང་དང་ཐ་མ་མེད་དོ། །ནམ་མཁའ་ནི་མི་རྟོག་རྣམ་པར་མི་རྟོག་
མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་དེ་མི་རྟོག་ཅིང་ལྷུན་གྱིས་གྲུབ་པར་བྱ་བ་འདི་ལྟ་བུ་འདི་འབྱུང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་ཀྱང་མ་སྐྱེས་མ་འགགས་པ་མཐའ་དང་དབུང་མེད་པ་ཡིན་མོད་ཀྱི། འོན་ཀྱང་སེམས་ཅན་གྱི་བསམ་པའི་དབང་གིས་སེམས་ཅན་གྱི་བསམ་པ་རབ་འབྲིང་ཐ་མ་རྣམས་ལ་འདི་ནི་ཉན་ཐོས་ཀྱི་ཐེག་པའོ། །
འདི་ནི་རང་སངས་རྒྱས་ཀྱི་ཐེག་པའོ། འདི་ནི་སེམས་ཅན་ཐམས་ཅད་ཀྱི་གོ་སྐབས་ཡོད་པ་ཐེག་པ་ཆེན་པོ་ཞེས་བྱ་བ་ཐ་དད་པ་འབྱུང་སྟེ། དེ་བཞིན་གཤེགས་པ་ནི་མི་རྟོག་རྣམ་པར་མི་རྟོག་མོད་ཀྱི། འོན་ཀྱང་
མ་འདྲེས་པའི་ཆོས་དང་ལྡན་པའི་ཕྱིར་དེ་མི་རྟོག་ཅིང་ལྷུན་གྱིས་གྲུབ་པར་བྱ་བ་འདི་ལྟ་བུ་འདི་འབྱུང་ངོ་། །འཇམ་དཔལ་འདི་ལྟ་སྟེ། དཔེར་ན་ཉི་མའི་འོད་ནི་གནས་དང་དམིགས་པའི་དབང་གིས་དྲི་མ་སྣ་ཚོགས་སུ་
འགྱུར་ཡང་ཉི་མའི་འོད་ནི་མ་འདྲེས་པའི་ཆོས་དང་ལྡན་པའི་ཕྱིར་མི་རྟོག་རྣམ་པར་མི་རྟོག་གོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སེམས་

57-1-35a

ཅན་རྣམས་ཀྱི་བསམ་པ་དང་དམིགས་པའི་དབང་གིས་ཡེ་ཤེས་ཐ་དད་པ་སྣ་ཚོགས་སུ་འགྱུར་ཏེ། དེ་བཞིན་གཤེགས་པ་ནི་མི་རྟོག་རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་
དང་ལྡན་པའི་ཕྱིར་དེ་མི་རྟོག་ཅིང་ལྷུན་གྱིས་གྲུབ་པར་བྱ་བ་འདི་ལྟ་བུ་འདི་འབྱུང་ངོ་། །འདི་ལ་ཐེག་པ་འམ་ཐེག་པ་མ་ཡིན་པ་ནི་གང་ཡང་མེད་དེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་
ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་
ཞེ་ན་འདི་ལྟ་སྟེ། བདག་ནི་སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པ་སེལ་བ་ལ་གནས་ཀྱིས། གཞན་དག་ཀྱང་སེམས་ཅན་གྱི་ཀུན་ནས་ཉོན་མོངས་པ་སེལ་བ་ལ་དགོད་དོ་ཞེས་དབུགས་འབྱིན་
པ་རྙེད་པར་འགྱུར་ཏེ། དེ་ལ་ཀུན་ནས་ཉོན་མོངས་པ་ལ་ནི་གནོད་པ་དང་སེམས་ལ་གནོད་པའོ། །བདག་ནི་ཆོས་སྣང་བའི་སྒོའི་ཤེས་རབ་ལ་གནས་ཀྱིས། གཞན་དག་ཀྱང་ཆོས་སྣང་བའི་སྒོའི་ཤེས་
རབ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། འཇམ་དཔལ་དེ་ལ་ཆོས་སྣང་བའི་སྒོའི་ཤེས་རབ་ནི་ཆོས་བཞིས་འབྱུང་བར་འགྱུར་རོ། །བཞི་གང་ཞེ་ན། འདི་ལྟ་སྟེ། དད་པ་དང་། བག་ཡོད་
པ་དང་། བསམ་པ་དང་། ལྷག་པའི་བསམ་པ་སྟེ། འཇམ་དཔལ་ཆོས་བཞི་པོ་དེ་དག་གིས་བྱང་ཆུབ་སེམས་དཔའ་རྣམས་ཀྱི་ཆོས་སྣང་བའི་སྒོའི་ཤེས་རབ་འབྱུང་བར་འགྱུར་ཏེ། ཆོས་སྣང་བའི་སྒོའི་
ཤེས་རབ་ཀྱིས་བྱང་ཆུབ་སེམས་དཔའ་རྣམས་ཀྱི་ངན་སོང་ངན་འགྲོ་ལོག་པར་ལྟུང་བ་ཐམས་ཅད་གཅོད་པར་འགྱུར་རོ། །བདག་ནི་ཡེ་ཤེས་སྣང་བའི་སྒོའི་ཤེས་རབ་ལ་གནས་ཀྱིས། གཞན་དག་

57-1-35b

ཀྱང་ཡེ་ཤེས་སྣང་བའི་སྒོའི་ཤེས་རབ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། འཇམ་དཔལ་དེ་ལ་ཡེ་ཤེས་སྣང་བའི་སྒོའི་ཤེས་རབ་ནི་ཆོས་བཞིས་འབྱུང་བར་འགྱུར་རོ། །བཞི་གང་ཞེ་ན། 
འདི་ལྟ་སྟེ། བསོད་ནམས་ཀྱི་ཚོགས་དང་། ཡེ་ཤེས་ཀྱི་ཚོགས་དང་། སྟོང་པ་ཉིད་ལ་མོས་པ་དང་། སེམས་ཅན་རྣམས་བྱང་ཆུབ་ཀྱི་སེམས་ལ་གཞོག་པ་སྟེ། འཇམ་དཔལ་ཆོས་བཞི་པོ་དེ་དག་
གིས་བྱང་ཆུབ་སེམས་དཔའ་རྣམས་ཀྱི་ཡེ་ཤེས་སྣང་བའི་སྒོའི་ཤེས་རབ་འབྱུང་བར་འགྱུར་ཏེ། ཡེ་ཤེས་སྣང་བའི་ཤེས་རབ་ཀྱི་བདུད་ཀྱི་ཞགས་པ་དང་། བདུད་ཀྱི་ལས་ཐམས་ཅད་གཅོད་པར་འགྱུར་རོ། །
བདག་ནི་སྦྱིན་པའི་བསམ་པ་མི་ཟད་པར་སྦྱོར་བའི་ཤེས་རབ་ལ་གནས་ཀྱིས། གཞན་དག་ཀྱང་སྦྱིན་པའི་བསམ་པ་མི་ཟད་པར་སྦྱོར་བའི་ཤེས་རབ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། འཇམ་
དཔལ་དེ་ལ་སྦྱིན་པའི་བསམ་པ་མི་ཟད་པར་སྦྱོར་བའི་ཤེས་རབ་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་སེར་སྣ་ཅན་ཡོངས་སུ་སྨིན་པར་བྱེད་པར་འགྱུར་བའོ། །བདག་ནི་ཚུལ་ཁྲིམས་ཀྱི་བསམ་པ་མི་ཟད་
པ་སྦྱོར་བའི་ཤེས་རབ་ལ་གནས་ཀྱིས་གཞན་དག་ཀྱང་ཚུལ་ཁྲིམས་ཀྱི་བསམ་པ་མི་ཟད་པར་སྦྱོར་བའི་ཤེས་རབ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། འཇམ་དཔལ་དེ་ལ་ཚུལ་ཁྲིམས་ཀྱི་
བསམ་པ་མི་ཟད་པར་སྦྱོར་བའི་ཤེས་རབ་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་ཚུལ་ཁྲིམས་འཆལ་པ་ཡོངས་སུ་སྨིན་པར་བྱེད་པར་འགྱུར་བ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་
དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་

57-1-36a

སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ནང་དུ་ཡང་དག་འཇོག་ལ་གནས་ཀྱིས། གཞན་དག་ཀྱང་ནང་དུ་ཡང་དག་འཇོག་ལ་དགོད་དོ་ཞེས་དབུགས་འབྱིན་པ་རྙེད་པར་
འགྱུར་ཏེ། དེ་ལ་ནང་དུ་ཡང་དག་འཇོག་ནི་ལུས་དང་སེམས་དབེན་ཞིང་དགེ་བའི་རྩ་བ་བརྩམ་པ་ཐམས་ཅད་ལ་ཞུམ་པ་མེད་པ་གང་ཡིན་པའོ། །བདག་ནི་འདུས་བྱས་ཀྱི་ཆོས་ཉིད་ལ་གནས་ཀྱིས། གཞན་
དག་ཀྱང་འདུས་བྱས་ཀྱི་ཆོས་ཉིད་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ་དེ་ལ་འདུས་བྱས་ཀྱི་ཆོས་ཉིད་ཆོས་ཐམས་ཅད་སྟོང་པ་མ་ཡིན། མི་སྟོང་པ་མ་ཡིན། སྒྲོ་བཏགས་པ་མ་ཡིན། སྒྲོ་མ་བཏགས་
པ་མ་ཡིན། ལྷག་པར་བྱེད་པ་མ་ཡིན། ལྷག་པར་མི་བྱེད་པ་མ་ཡིན། དངོས་པོ་མ་ཡིན། དངོས་པོ་མེད་པ་མ་ཡིན། འདུས་བྱས་མ་ཡིན། འདུས་མ་བྱས་མ་ཡིན། མཚན་ཉིད་མ་ཡིན། མཚན་
ཉིད་མེད་པ་མ་ཡིན། གནས་མ་ཡིན། གནས་མེད་པ་མ་ཡིན། གཉིས་མ་ཡིན། གཉིས་སུ་མེད་པ་མ་ཡིན། གདེག་པ་མ་ཡིན། གཞོག་པ་མ་ཡིན། ལེན་པ་མ་ཡིན། གཏོང་བ་མ་ཡིན་པ་སྟེ། 
དེ་ལྟར་འཇུག་པ་གང་ཡིན་པ་དེ་ནི་འདུས་བྱས་ཀྱི་ཆོས་ཉིད་ཅེས་བྱའོ། །བདག་ནི་འདུས་མ་བྱས་ཀྱི་ཆོས་ཉིད་ལ་གནས་ཀྱིས། གཞན་དག་ཀྱང་འདུས་མ་བྱས་ཀྱི་ཆོས་ཉིད་ལ་དགོད་དོ་ཞེས་དབུགས་འབྱིན་པ་
རྙེད་པར་འགྱུར་ཏེ། དེ་ལ་འདུས་མ་བྱས་ཀྱི་ཆོས་ཉིད་ཅེས་བྱ་བ་ནི་ཆོས་དེ་དག་ཉིད་ལ་དབྱེར་མེད་པ། རློམ་སེམས་མེད་པ། སྒྲོ་མི་འདོགས་པ། མི་རྟོག་རྣམ་པར་མི་རྟོག་པ་གང་ཡིན་པ་སྟེ། དེ་ནི་འདུས་
མ་བྱས་ཀྱི་ཆོས་ཉིད་ཅེས་བྱའོ། །བདག་ནི་ཡང་དག་པར་མཐོང་བ་ལ་གནས་ཀྱིས། གཞན་དག་ཀྱང་ཡང་དག་པར་མཐོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པར་མཐོང་བ་

57-1-36b

ནི་གཉིས་དང་གཉིས་སུ་མེད་པ་ལ་མཚན་ཉིད་མེད་པར་འཇུག་པ་གང་ཡིན་པ་སྟེ། དེ་ཅིའི་ཕྱིར་ཞེ་ན། གཉིས་ཀྱི་རང་བཞིན་ལས་གཉིས་སུ་མེད་པ་གཞན་མ་ཡིན་པའི་ཕྱིར་ཏེ། གཉིས་ཀྱི་རང་བཞིན་ལས་
གཉིས་སུ་མེད་པ་གཞན་མེད་པས་གཉིས་ཀྱི་རང་བཞིན་ཉིད་གཉིས་སུ་མེད་པ་སྟེ། དེ་ལྟར་འཇུག་པ་གང་ཡིན་པ་དེ་ནི་ཡང་དག་པར་མཐོང་བ་ཞེས་བྱའོ། །བདག་ནི་ཞེ་སྡང་མེད་པ་ལ་གནས་ཀྱིས། གཞན་
དག་ཀྱང་ཞེ་སྡང་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཞེ་སྡང་མེད་པ་ནི་སེམས་ཅན་ཐམས་ཅད་ལ་ཕན་པའི་དངོས་པོ་དང་། ལས་ཀྱི་བྱ་བ་ལ་འཇུག་པ་གང་ཡིན་པ་སྟེ། འཇམ་དཔལ་
དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་རོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་
ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཕ་རོལ་དུ་ཕྱིན་པའི་ལམ་གྱི་ཚུལ་ལ་འཇུག་པ་ལ་གནས་ཀྱིས། གཞན་དག་ཀྱང་ཕ་རོལ་དུ་ཕྱིན་པའི་ལམ་གྱི་ཚུལ་ལ་
འཇུག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཕ་རོལ་དུ་ཕྱིན་པའི་ལམ་གྱི་ཚུལ་ལ་འཇུག་པ་ནི་ཐབས་མཁས་པས་ཡང་དག་པར་ཟིན་པའི་ཤེས་རབ་གང་ཡིན་པའོ། །བདག་ནི་
སངས་རྒྱས་ཀྱི་རིགས་སུ་སྐྱེས་པ་ཡིན་གྱིས། གཞན་དག་ཀྱང་སངས་རྒྱས་ཀྱི་རིགས་སུ་སྐྱེ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སངས་རྒྱས་ཀྱི་རིགས་སུ་སྐྱེ་བ་ནི་བསོད་
ནམས་ཀྱི་ཚོགས་དང་། ཡེ་ཤེས་ཀྱི་ཚོགས་གང་ཡིན་པའོ། །བདག་ནི་བྱང་ཆུབ་ཀྱི་སེམས་ལ་གནས་གྱིས། གཞན་དག་ཀྱང་བྱང་ཆུབ་ཀྱི་སེམས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། 

57-1-37a

དེ་ལ་བྱང་ཆུབ་ཀྱི་སེམས་ནི་བྱམས་པ་ཆེན་པོ་དང་སྙིང་རྗེ་ཆེན་པོ་གང་ཡིན་པ་སྟེ། དེ་ཅིའི་ཕྱིར་ཞེ་ན། ཆོས་ཐམས་ཅད་ཀྱི་རྗེས་སུ་སོང་བའི་ཕྱིར་རོ། །བདག་ནི་ཆོས་སོ་སོ་ཡང་དག་པར་རིག་
པ་ལ་གནས་ཀྱིས། གཞན་དག་ཀྱང་ཆོས་སོ་སོ་ཡང་དག་པར་རིག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་སོ་སོ་ཡང་དག་པར་རིག་པ་ནི་ཆོས་ཐམས་ཅད་ཀྱི་ཆོས་རབ་ཏུ་དབྱེ་བ་
བསྟན་པ་གང་ཡིན་པའོ། །བདག་ནི་དོན་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་དོན་སོ་སོ་ཡང་དག་པར་རིག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དོན་
སོ་སོ་ཡང་དག་པར་རིག་པ་ནི་ཆོས་ཐམས་ཅད་ཀྱི་རབ་ཏུ་དབྱེ་བ་བསྟན་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་
འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན་འདི་ལྟ་སྟེ། བདག་ནི་ངེས་
པའི་ཚིག་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་ངེས་པའི་ཚིག་སོ་སོ་ཡང་དག་པར་རིག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ངེས་པའི་ཚིག་སོ་
སོ་ཡང་དག་པར་རིག་པ་ནི་ཆོས་རྣམས་ལ་ཀུན་རྫོབ་ཤེས་པ་དང་དབྱེར་མེད་པ་གང་ཡིན་པའོ། །བདག་ནི་སྤོབས་པ་སོ་སོ་ཡང་དག་པར་རིག་པ་ལ་གནས་ཀྱིས། གཞན་དག་ཀྱང་སྤོབས་པ་སོ་སོ་ཡང་
དག་པར་རིག་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྤོབས་པ་སོ་སོ་ཡང་དག་པར་རིག་པ་ནི་ཆོས་ཐམས་ཅད་ཀྱི་དོན་དམ་པ་ལ་མཁས་པའི་ཡེ་ཤེས་གང་ཡིན་པའོ། བདག་

57-1-37b

ནི་དྲན་པ་ལ་གནས་ཀྱིས། གཞན་དག་ཀྱང་དྲན་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དྲན་པ་ནི་མི་བརྗེད་པའི་ཆོས་ཉིད་དོ། །བདག་ནི་བློ་གྲོས་ལ་གནས་ཀྱིས། གཞན་དག་ཀྱང་
བློ་གྲོས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བློ་གྲོས་ནི་ཤིན་དུ་རྣམ་པར་ངེས་པའི་ཡེ་ཤེས་གང་ཡིན་པའོ། །བདག་ནི་བརྟན་པ་ལ་གནས་ཀྱིས། གཞན་དག་ཀྱང་བརྟན་པ་ལ་
དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བརྟན་པ་ནི་སྡོམ་པ་ལ་སྤྱོད་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་
པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། 
བདག་ནི་རྟོགས་པ་ལ་གནས་ཀྱིས། གཞན་དག་ཀྱང་རྟོགས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་རྟོགས་པ་ནི་མདོ་ལས་འབྱུང་བའི་དགོངས་པ་ཁོང་དུ་ཆུད་པ་གང་ཡིན་པའོ། །
བདག་ནི་ཤེས་རབ་ལ་གནས་ཀྱིས། གཞན་དག་ཀྱང་ཤེས་རབ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཤེས་རབ་ནི་འདུས་བྱས་དང་། འདུས་མ་བྱས་ཀྱི་ཆོས་རྣམས་ལ་དབྱེར་མེད་པར་
མཁས་པ་གང་ཡིན་པའོ། །བདག་ནི་ཚོགས་ལ་གནས་ཀྱིས། གཞན་དག་ཀྱང་ཚོགས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚོགས་ནི་ཕ་རོལ་དུ་ཕྱིན་པ་ལྔའོ། །བདག་
ནི་ཡོངས་སུ་གཅོད་པ་ལ་གནས་ཀྱིས། གཞན་དག་ཀྱང་ཡོངས་སུ་གཅོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡོངས་སུ་གཅོད་པ་ནི་ཤེས་རབ་ཀྱི་ཕ་རོལ་དུ་ཕྱིན་པའོ། །བདག་

57-1-38a

ནི་ཐབས་མཁས་པ་ལ་གནས་ཀྱིས། གཞན་དག་ཀྱང་ཐབས་མཁས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཐབས་མཁས་པ་ནི་ཆོས་ཐམས་ཅད་ཡང་དག་པར་སྡུད་པ་གང་
ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་
སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་འདུ་འཛིར་སྤྱོད་པ་ལ་གནས་ཀྱིས། གཞན་དག་ཀྱང་འདུ་འཛིར་སྤྱོད་པ་ལ་དགོད་དོ་ཞེས་དབུགས་འབྱིན་པ་
རྙེད་པར་འགྱུར་ཏེ། དེ་ལ་འདུ་འཛིར་སྤྱོད་པ་ནི་ཕ་རོལ་དུ་ཕྱིན་པ་ལྔ་གང་ཡིན་པའོ། །བདག་ནི་འདུ་འཛི་མེད་པར་སྤྱོད་པ་ལ་གནས་གྱིས། གཞན་དག་ཀྱང་འདུ་འཛི་མེད་པར་སྤྱོད་པ་ལ་དགོད་དོ་ཞེས་དབུགས་
འབྱིན་པ་རྙེད་པར་འགྱུར་ཏེ། དེ་ལ་འདུ་འཛི་མེད་པར་སྤྱོད་པ་ནི་ཤེས་རབ་ཀྱི་ཕ་རོལ་དུ་ཕྱིན་པ་གང་ཡིན་པའོ། །བདག་ནི་ཟག་པ་དང་བཅས་པའི་སྤྱོད་པ་ལ་གནས་ཀྱིས། གཞན་དག་ཀྱང་ཟག་པ་དང་བཅས་པའི་
སྤྱོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཟག་པ་དང་བཅས་པའི་སྤྱོད་པ་ནི་གང་ལ་རློམ་སེམས་འཇུག་པའོ། །བདག་ནི་ཟག་པ་མེད་པའི་སྤྱོད་པ་ལ་གནས་ཀྱིས། གཞན་དག་
ཀྱང་ཟག་པ་མེད་པའི་སྤྱོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཟག་པ་མེད་པའི་སྤྱོད་པ་ནི་གང་ལ་རློམ་སེམས་ཀྱི་རྒྱུ་བ་མེད་པའོ། །བདག་ནི་ཚད་ཡོད་པར་བྱས་པའི་སྤྱོད་པ་ལ་གནས་
ཀྱིས། གཞན་དག་ཀྱང་ཚད་ཡོད་པར་བྱས་པའི་སྤྱོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚད་ཡོད་པར་བྱས་པའི་སྤྱོད་པ་ནི་མཚན་མའི་གནས་གང་ཡིན་པ་སྟེ། འཇམ་དཔལ་དབུགས་

57-1-38b

འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་
དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཚད་མེད་པར་བྱས་པའི་སྤྱོད་པ་ལ་གནས་གྱིས། གཞན་དག་ཀྱང་ཚད་མེད་པར་བྱས་པའི་སྤྱོད་པ་ལ་དགོད་དོ་ཞེས་དབུགས་འབྱིན་
པ་རྙེད་པར་འགྱུར་ཏེ། དེ་ལ་ཚད་མེད་པར་བྱས་པའི་སྤྱོད་པ་ནི་མཚན་མ་མེད་པའི་གནས་གང་ཡིན་པའོ། །བདག་ནི་ཚད་ཡོད་པར་བྱས་པ་ཤེས་པ་ལ་གནས་ཀྱིས། གཞན་དག་ཀྱང་ཚད་ཡོད་པར་
བྱས་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚད་ཡོད་པར་བྱས་པ་ཤེས་པ་ནི་ཕུང་པོ་དང་། ཁམས་དང་། སྐྱེ་མཆེད་དང་། རྟེན་ཅིང་འབྲེལ་པར་འབྱུང་བ་དང་། གནས་
དང་གནས་མ་ཡིན་པར་དཔྱོད་པ་ལ་མཁས་པ་གང་ཡིན་པའོ། །བདག་ནི་ཚད་མེད་པར་བྱས་པ་ཤེས་པ་ལ་གནས་ཀྱིས། གཞན་དག་ཀྱང་ཚད་མེད་པར་བྱས་པ་ཤེས་པ་ལ་དགོད་དོ་ཞེས་དབུགས་
འབྱིན་པ་རྙེད་པར་འགྱུར་ཏེ། དེ་ལ་ཚད་མེད་པར་བྱས་པ་ཤེས་པ་ནི་གང་ལ་རློམ་སེམས་ཀྱི་རྒྱུ་བ་མེད་པའོ། །བདག་ནི་ཡོངས་སུ་ཆད་པ་ལ་གནས་ཀྱིས། གཞན་དག་ཀྱང་ཡོངས་སུ་ཆད་པ་ལ་དགོད་
དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡོངས་སུ་ཆད་པ་ནི་ཕ་རོལ་དུ་ཕྱིན་པ་ལྔའོ། །བདག་ནི་ཡོངས་སུ་མ་ཆད་པ་ལ་གནས་ཀྱིས། གཞན་དག་ཀྱང་ཡོངས་སུ་མ་ཆད་པ་ལ་དགོད་
དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡོངས་སུ་མ་ཆད་པ་ནི་ཤེས་རབ་ཀྱི་ཕ་རོལ་དུ་ཕྱིན་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་

57-1-39a

རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་
ཞེ་ན། འདི་ལྟ་སྟེ། བདག་ནི་རང་གི་སེམས་འདུལ་བ་ལ་གནས་ཀྱིས། གཞན་དག་ཀྱང་རང་གི་སེམས་འདུལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་རང་གི་སེམས་འདུལ་བ་ནི་བདག་
མེད་པའི་ཆོས་ལ་སོ་སོར་རྟོག་པ་གང་ཡིན་པའོ། །བདག་ནི་ལུས་དང་སེམས་འདུལ་བ་ལ་གནས་ཀྱིས། གཞན་དག་ཀྱང་ལུས་དང་སེམས་འདུལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། 
དེ་ལ་ལུས་དང་སེམས་འདུལ་བ་ནི་སེམས་ཅན་ཐམས་ཅད་སྨིན་པར་བྱ་བ་ལ་ཡོངས་སུ་མི་སྐྱོ་བ་གང་ཡིན་པའོ། །བདག་ནི་བསམ་པ་རྣམ་པར་སྦྱོང་བ་ལ་གནས་ཀྱིས། གཞན་དག་ཀྱང་བསམ་པ་རྣམ་པར་
སྦྱོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བསམ་པ་རྣམ་པར་སྦྱོང་བ་ནི་སེམས་ཅན་ཐམས་ཅད་ལ་རྣམ་པར་དཔྱད་པ་གང་ཡིན་པའོ། །བདག་ནི་སེམས་ཅན་ཐམས་ཅད་ལ་རྣམ་པར་
དཔྱད་པ་ལ་གནས་ཀྱིས། གཞན་དག་ཀྱང་སེམས་ཅན་ཐམས་ཅད་ལ་རྣམ་པར་དཔྱད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་ཅན་ཐམས་ཅད་ལ་རྣམ་པར་དཔྱད་པ་ནི་སེམས་
ཅན་ཐམས་ཅད་ལ་སེམས་མཉམ་པ་ཉིད་གང་ཡིན་པའོ། །བདག་ནི་ཚོགས་དག་ལ་གནས་ཀྱིས། གཞན་དག་ཀྱང་ཚོགས་དག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་
ཚོགས་ནི་ཕ་རོལ་དུ་ཕྱིན་པ་ལྔ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་

57-1-39b

ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ལུས་འདུལ་བ་ལ་གནས་ཀྱིས། གཞན་དག་ཀྱང་ལུས་འདུལ་བ་
ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལུས་འདུལ་བ་ནི་ལུས་ཀྱི་ལས་ཀྱི་ཉེས་པ་རྣམས་པ་གསུམ་ཡོངས་སུ་སྤངས་པ་གང་ཡིན་པའོ། །བདག་ནི་ངག་འདུལ་བ་ལ་གནས་ཀྱིས། གཞན་
དག་ཀྱང་ངག་འདུལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ངག་འདུལ་བ་ནི་ངག་གི་ལས་ཀྱི་ཉེས་པ་རྣམ་པ་བཞི་ཡོངས་སུ་སྤངས་པ་གང་ཡིན་པའོ། །བདག་ནི་ཡིད་འདུལ་བ་ལ་གནས་
ཀྱིས། གཞན་དག་ཀྱང་ཡིད་འདུལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡིད་འདུལ་བ་ནི་ཡིད་ཀྱི་ལས་ཀྱི་ཉེས་པ་རྣམ་པ་གསུམ་ཡོངས་སུ་སྤངས་པ་གང་ཡིན་པའོ། །བདག་ནི་སེར་
སྣའི་སེམས་འདུལ་བ་ལ་གནས་ཀྱིས། གཞན་དག་ཀྱང་སེར་སྣའི་སེམས་འདུལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེར་སྣའི་སེམས་འདུལ་བ་ནི་བདོག་པ་ཐམས་ཅད་ཡོངས་སུ་
གཏོང་བ་གང་ཡིན་པའོ། །བདག་ནི་གཡོ་མེད་པ་ལ་གནས་ཀྱིས། གཞན་དག་ཀྱང་གཡོ་མེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་གཡོ་མེད་པ་ནི་སེམས་ཅན་ཐམས་ཅད་
ལ་སེམས་མཉམ་པ་ཉིད་གང་ཡིན་པའོ། །དེ་ལ་སེམས་ཅན་ཐམས་ཅད་ལ་སེམས་མཉམ་པ་ནི་ཆོས་ཀྱི་དབྱིངས་དབྱེར་མེད་པའི་ཕྱིར་ཆོས་ཐམས་ཅད་ཐ་དད་པ་མེད་པ་གང་ཡིན་པ་སྟེ། འཇམ་དཔལ་
དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་རོ། ། བམ་པོ་བཞི་པ། འཇམ་དཔལ་གཞན་ཡང་དབུགས་འབྱིན་པ་རྙེད་

57-1-40a

པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ལེ་ལོའི་སེམས་འདུལ་བ་ལ་གནས་ཀྱིས། གཞན་དག་ཀྱང་
ལེ་ལོའི་སེམས་འདུལ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལེ་ལོའི་སེམས་འདུལ་བ་ནི་དགེ་བའི་རྩོམ་པ་ཐམས་ཅད་ལ་ཞུམ་པ་མེད་པའོ། བདག་ནི་སངས་རྒྱས་མཆོད་པ་ལ་
གནས་ཀྱིས། གཞན་དག་ཀྱང་སངས་རྒྱས་མཆོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སངས་རྒྱས་མཆོད་པ་ནི་གང་བྱིན་གྱིས་བརླབས་བྱས་ནས་སངས་རྒྱས་འབྱུང་བར་འགྱུར་
བའི་ཆོས་སྟོན་པ་གང་ཡིན་པ་དེ་དག་ལ་མཆོད་པ་གང་ཡིན་པ་ནི་དེ་བཞིན་གཤེགས་པ་ལ་མཆོད་པའོ། བདག་ནི་ཡེ་ཤེས་སྤྱོད་པ་ལ་གནས་ཀྱིས། གཞན་དག་ཀྱང་ཡེ་ཤེས་སྤྱོད་པ་ལ་དགོད་
དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡེ་ཤེས་སྤྱོད་པ་ནི་སེམས་ཅན་ཐམས་ཅད་ཕྱིར་མི་ལྡོག་པའི་ཆོས་ལ་རབ་ཏུ་དགོད་པ་གང་ཡིན་པའོ། །བདག་ནི་ངག་གི་སྤྱོད་པ་ལ་གནས་ཀྱིས། 
གཞན་དག་ཀྱང་ངག་གི་སྤྱོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ངག་གི་སྤྱོད་པ་ནི་སེམས་ཅན་ཐམས་ཅད་ཀྱི་ངག་གི་ཉེས་པ་ཡོངས་སུ་སྤྱོད་པ་གང་ཡིན་པའོ། །བདག་ནི་སེམས་
ཀྱི་སྤྱོད་པ་ལ་གནས་ཀྱིས། གཞན་དག་ཀྱང་སེམས་ཀྱི་སྤྱོད་པ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སེམས་ཀྱི་སྤྱོད་པ་ནི་སེམས་ཅན་ཐམས་ཅད་ཀྱི་སེམས་ཀྱི་ཉེས་པ་ཡོངས་སུ་
སྦྱོང་བ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་

57-1-40b

འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་བདུད་ཀྱི་ལས་སྒྲོ་བཏགས་པ་མེད་པ་སངས་རྒྱས་ཀྱི་ཕྲིན་ལས་ལ་
གནས་ཀྱིས། གཞན་དག་ཀྱང་བདུད་ཀྱི་ལས་སྒྲོ་བཏགས་པ་མེད་པ་སངས་རྒྱས་ཀྱི་ཕྲིན་ལས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བདུད་ཀྱི་ལས་སྒྲོ་བཏགས་པ་མེད་པ་སངས་རྒྱས་
ཀྱི་ཕྲིན་ལས་ནི་བདུད་ཀྱི་ལས་སྒྲོ་བཏགས་པས་སེམས་ཅན་ཡོངས་སུ་སྨིན་པར་བྱེད་པ་གང་ཡིན་པའོ། །བདག་ནི་དེ་བཞིན་གཤེགས་པ་རྟག་པའོ་ཞེས་བྱ་བར་མོས་པ་ལ་གནས་ཀྱིས། གཞན་དག་
ཀྱང་དེ་བཞིན་གཤེགས་པ་རྟག་པའོ་ཞེས་བྱ་བར་མོས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དེ་བཞིན་གཤེགས་པ་རྟག་པ་ནི་དབྱེར་མེད་པའི་ཕྱིར་རོ། །བདག་ནི་དེ་བཞིན་
གཤེགས་པ་ཐེར་ཟུག་གོ་ཞེས་བྱ་བར་མོས་པ་ལ་གནས་ཀྱིས། གཞན་དག་ཀྱང་དེ་བཞིན་གཤེགས་པ་ཐེར་ཟུག་གོ་ཞེས་བྱ་བར་མོས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དེ་
བཞིན་གཤེགས་པ་ཐེར་ཟུག་ནི་སངས་རྒྱས་ཀྱི་མཛད་པ་ཐམས་ཅད་རྒྱུན་མི་གཅོད་པའི་ཕྱིར་རོ། །བདག་ནི་དེ་བཞིན་གཤེགས་པ་ཤིས་པ་ཞེས་བྱ་བར་མོས་པ་ལ་གནས་ཀྱིས། གཞན་དག་ཀྱང་དེ་
བཞིན་གཤེགས་པ་ཤིས་པ་ཞེས་བྱ་བར་མོས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དེ་བཞིན་གཤེགས་པ་ཤིས་པ་ཞེས་བྱ་བ་ནི་མཐོང་བ་དང་། ཐོས་པ་དང་། དྲན་པ་རྣམས་
དོན་ཡོད་པའི་ཕྱིར་རོ། །བདག་ནི་དེ་བཞིན་གཤེགས་པ་གཡུང་དྲུང་ངོ་ཞེས་བྱ་བར་མོས་པ་ལ་གནས་ཀྱིས། གཞན་དག་ཀྱང་དེ་བཞིན་གཤེགས་པ་གཡུང་དྲུང་ངོ་ཞེས་བྱ་བར་མོས་པ་ལ་དགོད་དོ་ཞེས་

57-1-41a

དབུགས་འབྱིན་པ་རྙེད་པར་འགྱུར་ཏེ། དེ་ལ་དེ་བཞིན་གཤེགས་པ་གཡུང་དྲུང་ངོ་ཞེས་བྱ་བ་ནི་སྐུའི་མཐའ་མེད་པའི་ཕྱིར་རོ། །སྐུའི་མཐའ་མེད་པའི་རྣམ་པར་གཞག་པ་ལས་འདས་པའི་ཕྱིར་
ཏེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་
དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཕན་པའི་དངོས་པོ་ལ་གནས་ཀྱིས། གཞན་དག་ཀྱང་ཕན་པའི་དངོས་པོ་ལ་དགོད་དོ་ཞེས་དབུགས་འབྱིན་པ་
རྙེད་པར་འགྱུར་ཏེ། དེ་ལ་ཕན་པའི་དངོས་པོ་ནི་སེམས་ཅན་ཐམས་ཅད་ཀྱི་ལུས་དང་སེམས་ཀྱི་མི་བདེ་བ་ཡོངས་སུ་བསྐྱབ་པའི་ཕྱིར་དེ་སྡུག་བསྔལ་གྱི་ཡོ་བྱད་གང་ཅི་ཡང་མི་ལེན་པ་མེད་དེ། བདེ་བའི་ཡོ་
བྱད་གང་ཅི་ཡང་ཡོངས་སུ་མི་གཏོང་བ་མེད་པ་གང་ཡིན་པའོ། །བདག་ནི་ཆོས་ཐམས་ཅད་མཚན་མ་མེད་པ་ལ་གནས་ཀྱིས། གཞན་དག་ཀྱང་ཆོས་ཐམས་ཅད་མཚན་མ་མེད་པ་ལ་དགོད་དོ་ཞེས་དབུགས་འབྱིན་
པ་རྙེད་པར་འགྱུར་ཏེ། དེ་ལ་མཚན་མ་མེད་པ་ནི་མཚན་མ་མེད་པའི་རང་བཞིན་གང་ཡིན་པ་སྟེ། དེ་ཅིའི་ཕྱིར་ཞེ་ན། རློམ་སེམས་ནི་ངོ་བོ་ཉིད་མེད་པའི་ཕྱིར་རོ། །བདག་ནི་སངས་རྒྱས་ལ་སྐྱབས་
སུ་སོང་བ་ཡིན་གྱིས། གཞན་དག་ཀྱང་སངས་རྒྱས་ལ་སྐྱབས་སུ་འགྲོ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སངས་རྒྱས་ལ་སྐྱབས་སུ་འགྲོ་བ་ནི་སྡིག་པ་ཐམས་ཅད་མི་བྱེད་
པ་གང་ཡིན་པའོ། །བདག་ནི་ཆོས་ལ་སྐྱབས་སུ་སོང་བ་ཡིན་གྱིས། གཞན་དག་ཀྱང་ཆོས་ལ་སྐྱབས་སུ་འགྲོ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ལ་སྐྱབས་སུ་འགྲོ་བ་

57-1-41b

ནི་རྟེན་ཅིང་འབྲེལ་བར་འབྱུང་བ་ལ་འཇུག་པ་གང་ཡིན་པའོ། །བདག་ནི་དགེ་འདུན་ལ་སྐྱབས་སུ་སོང་བ་ཡིན་གྱིས། གཞན་དག་ཀྱང་དགེ་འདུན་ལ་སྐྱབས་སུ་འགྲོ་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། 
དེ་ལ་དགེ་འདུན་ལ་སྐྱབས་སུ་འགྲོ་བ་ནི་རྗེས་སུ་ཆགས་པ་དང་ཁོང་ཁྲོ་བ་སྤངས་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་
འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ལུས་མི་ཕྱེད་པ་
ལ་གནས་ཀྱིས། གཞན་དག་ཀྱང་ལུས་མི་ཕྱེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ལུས་མི་ཕྱེད་པ་ནི་ཕ་རོལ་གྱི་གནོད་པ་ཐམས་ཅད་དང་བྲལ་བ་གང་ཡིན་པའོ། །བདག་ནི་དད་པ་
མི་ཕྱེད་པ་ལ་གནས་ཀྱིས། གཞན་དག་ཀྱང་དད་པ་མི་ཕྱེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དད་པ་མི་ཕྱེད་པ་ནི་ལས་ཀྱི་རྣམ་པར་སྨིན་པ་ལ་ཡིད་ཆེས་པ་གང་ཡིན་པའོ། །བདག་
ནི་སྙོམས་པར་འཇུག་པ་ཤེས་པ་ལ་གནས་ཀྱིས། གཞན་དག་ཀྱང་སྙོམས་པར་འཇུག་པ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྙོམས་པར་འཇུག་པ་ནི་དམིགས་པའི་ངོ་བོ་ཉིད་ལ་
འཇུག་པ་གང་ཡིན་པའོ། །བདག་ནི་ཆོས་མི་ཕྱེད་པ་ལ་གནས་ཀྱིས། གཞན་དག་ཀྱང་ཆོས་མི་ཕྱེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་མི་ཕྱེད་པ་ནི་ཆོས་སྒྲུབ་པ་གང་ཡིན་
པའོ། །བདག་ནི་དགེ་བའི་བཤེས་གཉེན་མི་ཕྱེད་པ་ལ་གནས་ཀྱིས། གཞན་དག་ཀྱང་དགེ་བའི་བཤེས་གཉེན་མི་ཕྱེད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་དགེ་བའི་བཤེས་གཉེན་མི་

57-1-42a

ཕྱེད་པ་ནི་དགེ་བའི་བཤེས་གཉེན་མི་སླུ་བ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་
དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན་འདི་ལྟ་སྟེ། བདག་ནི་ཆོས་དང་རྗེས་སུ་འཐུན་པའི་ཆོས་ལ་གནས་
ཀྱིས། གཞན་དག་ཀྱང་ཆོས་དང་རྗེས་སུ་འཐུན་པའི་ཆོས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་དང་རྗེས་སུ་འཐུན་པའི་ཆོས་ནི་ཆོས་ལ་ཡང་དག་པ་ཉིད་དུ་སྒྲུབ་པ་གང་ཡིན་པའོ། །བདག་
ནི་ངོ་ཚ་ཤེས་པ་ལ་གནས་ཀྱིས། གཞན་དག་ཀྱང་ངོ་ཚ་ཤེས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ངོ་ཚ་ཤེས་པ་ནི་ལུས་དང་ངག་གིས་ལེགས་པར་སྤྱད་པ་གང་ཡིན་པའོ། །བདག་
ནི་ཁྲེལ་ཡོད་པ་ལ་གནས་ཀྱིས། གཞན་དག་ཀྱང་ཁྲེལ་ཡོད་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཁྲེལ་ཡོད་པ་ནི་ཡིད་ཀྱི་ལེགས་པ་སྤྱད་པ་གང་ཡིན་པའོ། །བདག་ནི་ཡང་
དག་པར་མཐོང་བ་ལ་གནས་ཀྱིས། གཞན་དག་ཀྱང་ཡང་དག་པར་མཐོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཡང་དག་པར་མཐོང་བ་ནི་ཆོས་ཐམས་ཅད་མཐའ་དང་དབུང་མེད་པར་
འཇུག་པ་གང་ཡིན་པའོ། །བདག་ནི་རྗེས་སུ་ཆགས་པ་སྤོང་བ་ལ་གནས་ཀྱིས། གཞན་དག་ཀྱང་རྗེས་སུ་ཆགས་པ་སྤོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་རྗེས་སུ་ཆགས་
སྤོང་བ་ནི་མ་འོངས་པའི་མི་དགེ་བའི་ལས་མི་སྐྱེད་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །

57-1-42b

འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་ཁོང་ཁྲོ་བ་སྤོང་བ་ལ་གནས་ཀྱིས། 
གཞན་དག་ཀྱང་ཁོང་ཁྲོ་བ་སྤོང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཁོང་ཁྲོ་བ་སྤོང་བ་ནི་དགེ་བའི་ལས་སྐྱེས་པ་རྣམས་ཆུད་མི་གཟོན་པ་གང་ཡིན་པའོ། །བདག་ནི་ཆོ་ག་ལ་
གནས་ཀྱིས། གཞན་དག་ཀྱང་ཆོ་ག་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོ་ག་ནི་ངོ་ཚ་ཤེས་པ་དང་ཁྲེལ་ཡོད་པ་གང་ཡིན་པའོ། །བདག་ནི་བདག་གི་དགེ་བའི་རྩ་བ་ཡང་
དག་པར་སྲུང་བ་ལ་གནས་ཀྱིས། གཞན་དག་ཀྱང་རང་གི་དགེ་བའི་རྩ་བ་ཡང་དག་པར་སྲུང་བ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་རང་གི་དགེ་བའི་རྩ་བ་ཡང་དག་པར་སྲུང་བ་
ནི་ལས་ཀྱི་བྱ་བ་ལ་འཇུག་པ་གང་ཡིན་པའོ། །བདག་ནི་གཞན་གྱི་དགེ་བའི་རྩ་བ་ཆུད་མི་གཟོན་པ་ལ་གནས་ཀྱིས། གཞན་དག་ཀྱང་རང་གཞན་གྱི་དགེ་བའི་རྩ་བ་ཆུད་མི་གཟོན་པ་ལ་དགོད་དོ་ཞེས་དབུགས་
འབྱིན་པ་རྙེད་པར་འགྱུར་ཏེ། དེ་ལ་གཞན་གྱི་དགེ་བའི་རྩ་བ་ཆུད་མི་གཟོན་པ་ནི་བྱམས་པ་ཆེན་པོ་དང་སྙིང་རྗེ་ལ་གནས་པ་གང་ཡིན་པའོ། །བདག་ནི་སྟོང་པ་ཉིད་ལ་མོས་པ་ལ་གནས་ཀྱིས། གཞན་དག་
ཀྱང་སྟོང་པ་ཉིད་ལ་མོས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྟོང་པ་ཉིད་ནི་ལྟ་བར་གྱུར་པའི་རང་བཞིན་གང་ཡིན་པ་སྟེ། ལྟ་བར་གྱུར་པའི་རང་བཞིན་ལས་སྟོང་པ་ཉིད་གཞན་མ་
ཡིན་ཏེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་

57-1-43a

བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་སྒྲིབ་པ་མེད་པའི་རྣམ་པར་གྲོལ་བའི་ཡེ་ཤེས་ལ་གནས་ཀྱིས། གཞན་
དག་ཀྱང་སྒྲིབ་པ་མེད་པའི་རྣམ་པར་གྲོལ་བའི་ཡེ་ཤེས་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སྒྲིབ་པ་མེད་པའི་རྣམ་པར་གྲོལ་བའི་ཡེ་ཤེས་མི་གཉིས་པ་གཉིས་སུ་མེད་པ་རྣམ་པར་དག་པ་
གང་ཡིན་པའོ། །བདག་ནི་ཆོས་རྣམས་རྟེན་ཅིང་མི་འབྱུང་ངོ་ཞེས་བྱ་བར་མོས་པ་ལ་གནས་ཀྱིས། གཞན་དག་ཀྱང་ཆོས་རྣམས་རྟེན་ཅིང་མི་འབྱུང་ངོ་ཞེས་བྱ་བར་མོས་པ་ལ་དགོད་དོ་ཞེས་དབུགས་
འབྱིན་པ་རྙེད་པར་འགྱུར་ཏེ། དེ་ལ་ཆོས་རྣམས་རྟེན་ཅིང་མི་འབྱུང་བ་ནི་རྐྱེན་རྣམས་མི་སྐྱེ་བའི་ངོ་བོ་ཉིད་ཡིན་པའི་ཕྱིར་རོ། །བདག་ནི་ཆོས་ཐམས་ཅད་གནས་མེད་དོ་ཞེས་བྱ་བར་མོས་པ་ལ་
གནས་ཀྱིས། གཞན་དག་ཀྱང་ཆོས་ཐམས་ཅད་གནས་མེད་དོ་ཞེས་བྱ་བར་མོས་པ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཆོས་ཐམས་ཅད་གནས་མེད་དོ་ཞེས་བྱ་བ་ནི་
ཕྱོགས་ཆ་ཐ་དད་པ་མེད་པའི་ཕྱིར་རོ། །བདག་ནི་སངས་རྒྱས་ནམ་མཁའ་དང་མཚུངས་སོ་ཞེས་བྱ་བར་མོས་པ་ལ་གནས་ཀྱིས། གཞན་དག་ཀྱང་སངས་རྒྱས་ནམ་མཁའ་དང་མཚུངས་སོ་ཞེས་བྱ་བར་མོས་པ་
ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་སངས་རྒྱས་ནམ་མཁའ་དང་མཚུངས་སོ་ཞེས་བྱ་བ་ནི་ཐ་དད་པ་མེད་པ་དང་རྟེན་པ་མེད་པའི་ཕྱིར་རོ། །བདག་ནི་སངས་རྒྱས་སེམས་དང་། ཡིད་
དང་། རྣམ་པར་ཤེས་པ་དང་བྲལ་བའོ་ཞེས་བྱ་བ་ལ་གནས་ཀྱིས། གཞན་དག་ཀྱང་སངས་རྒྱས་སེམས་དང་། ཡིད་དང་། རྣམ་པར་ཤེས་པ་དང་བྲལ་བའོ་ཞེས་བྱ་བ་ལ་དགོད་དོ་ཞེས་དབུགས་འབྱིན་པ་

57-1-43b

རྙེད་པར་འགྱུར་ཏེ། དེ་ལ་སངས་རྒྱས་དང་། སེམས་དང་། ཡིད་དང་རྣམ་པར་ཤེས་པ་དང་བྲལ་བའོ་ཞེས་བྱ་བ་ནི་ལྷུན་གྱིས་གྲུབ་པའི་ཡེ་ཤེས་བརྙེས་པའི་ཕྱིར་ཏེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་
དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་བར་འགྱུར་བའོ། །འཇམ་དཔལ་གཞན་ཡང་དབུགས་འབྱིན་པ་རྙེད་པ་ལྔ་དག་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་སྦྱོང་
བར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ནི་སྦྱིན་པ་ལས་བྱུང་བའི་བསྡུ་བའི་དངོས་པོ་ལ་གནས་ཀྱིས། གཞན་དག་ཀྱང་སྦྱིན་པ་ལས་བྱུང་བའི་བསྡུ་བའི་དངོས་པོ་ལ་དགོད་དོ་ཞེས་
དབུགས་འབྱིན་པ་རྙེད་པར་འགྱུར་ཏེ། དེ་ལ་སྦྱིན་པ་ལས་བྱུང་བའི་བསྡུ་བའི་དངོས་པོ་ནི་བསམ་པ་དང་སྦྱོར་བའོ། །བདག་ནི་ཚུལ་ཁྲིམས་ལས་བྱུང་བའི་བསྡུ་བའི་དངོས་པོ་ལ་གནས་ཀྱིས། གཞན་
དག་ཀྱང་ཚུལ་ཁྲིམས་ལས་བྱུང་བའི་བསྡུ་བའི་དངོས་པོ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་ཚུལ་ཁྲིམས་ལས་བྱུང་བའི་བསྡུ་བའི་དངོས་པོ་ནི་བྱམས་པ་དང་སྙིང་རྗེའོ། །
བདག་ནི་བསྒོམས་པ་ལས་བྱུང་བའི་བསྡུ་བའི་དངོས་པོ་ལ་གནས་ཀྱིས། གཞན་དག་ཀྱང་བསྒོམས་པ་ལས་བྱུང་བའི་བསྡུ་བའི་དངོས་པོ་ལ་དགོད་དོ་ཞེས་དབུགས་འབྱིན་པ་རྙེད་པར་འགྱུར་ཏེ། དེ་ལ་བསྒོམས་
པ་ལས་བྱུང་བའི་བསྡུ་བའི་དངོས་པོ་ནི་ཐབས་ཀྱིས་ཡང་དག་པར་ཟིན་པའི་ཤེས་རབ་བོ། །བདག་ནི་བསམ་པ་ལ་གནས་ཀྱིས། གཞན་དག་ཀྱང་བསམ་པ་ལ་དགོད་དོ་ཞེས་དབུགས་འབྱིན་པ་
རྙེད་པར་འགྱུར་ཏེ། དེ་ལ་བསམ་པ་ནི་དགེ་བའི་ཆོས་རྣམས་ལ་དད་པ་དང་འདུན་པའོ། །བདག་ནི་སྦྱོར་བ་ལ་གནས་ཀྱིས། གཞན་དག་ཀྱང་སྦྱོར་བ་ལ་དགོད་དོ་ཞེས་དབུགས་འབྱིན་པ་རྙེད་

57-1-44a

པར་འགྱུར་ཏེ། དེ་ལ་སྦྱོར་བ་ནི་དགེ་བའི་ཆོས་ཐམས་ཅད་སྒྲུབ་པ་གང་ཡིན་པ་སྟེ། འཇམ་དཔལ་དབུགས་འབྱིན་པ་རྙེད་པ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ས་དང་པོ་ཡོངས་སུ་
སྦྱོང་བར་འགྱུར་བའོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ཀྱིས་བརྗོད་པ་མཐར་ཕྱིན་པར་རིག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་ལ་འདི་སྐད་ཅེས་སྨྲས་
སོ། །ཀྱེ་རྒྱལ་བའི་སྲས་སངས་རྒྱས་བཅོམ་ལྡན་འདས་རྣམས་ཀྱི་སྟོན་པ་ཐོགས་པ་མེད་པ་གང་ཡིན། སངས་རྒྱས་བཅོམ་ལྡན་འདས་རྣམས་ཀྱི་མཁྱེན་པ་ཐོགས་པ་མེད་པ་གང་ཡིན། 
སངས་རྒྱས་བཅོམ་ལྡན་འདས་རྣམས་ཀྱི་སེམས་ཅན་ཡོངས་སུ་སྨིན་པར་མཛད་པ་ཁྱུ་མཆོག་ཏུ་གྱུར་པ་གང་ཡིན། སངས་རྒྱས་བཅོམ་ལྡན་འདས་རྣམས་ཀྱི་ཀུན་ནས་མངོན་དུ་གྱུར་པ་གང་ཡིན། 
སངས་རྒྱས་བཅོམ་ལྡན་འདས་རྣམས་ཀྱི་ཞིང་ཡོངས་སུ་སྦྱོང་བ་ལ་མི་འཇིགས་པ་གང་ཡིན། སངས་རྒྱས་བཅོམ་ལྡན་འདས་རྣམས་ཀྱི་སྐུ་མཐའ་ཡས་པ་གང་ཡིན། སངས་རྒྱས་བཅོམ་ལྡན་
འདས་རྣམས་ཀྱིས་ཡུལ་གང་ཡིན། སངས་རྒྱས་བཅོམ་ལྡན་འདས་རྣམས་ཀྱི་ལྷུན་གྱིས་གྲུབ་པའི་ཡེ་ཤེས་གང་ཡིན། སངས་རྒྱས་བཅོམ་ལྡན་འདས་རྣམས་ཀྱི་བསམ་གྱིས་མི་ཁྱབ་པ་གང་ཡིན། 
སངས་རྒྱས་བཅོམ་ལྡན་འདས་རྣམས་ཀྱི་ཀུན་དུ་གཟིགས་པ་གང་ཡིན། སངས་རྒྱས་བཅོམ་ལྡན་འདས་རྣམས་ཀྱི་གྲགས་པ་གང་ཡིན། སངས་རྒྱས་བཅོམ་ལྡན་འདས་རྣམས་ཀྱི་དབྱེར་མེད་
ཅིང་མི་གནས་པ་གང་ཡིན། སངས་རྒྱས་བཅོམ་ལྡན་འདས་རྣམས་ཀྱི་སྐུ་ཐོགས་པ་མེད་པ་གང་ཡིན། སངས་རྒྱས་བཅོམ་ལྡན་འདས་རྣམས་ཀྱི་སྤྱི་གཙུག་ལྟར་མི་མཐོང་བ་གང་ཡིན། 

57-1-44b

ཀྱེ་རྒྱལ་བའི་སྲས་སངས་རྒྱས་བཅོམ་ལྡན་འདས་རྣམས་ཀྱི་སེམས་ཅན་ཡོངས་སུ་སྨིན་པར་མཛད་པའི་སྤྱོད་པའི་གནས་རྣམས་གང་ཡིན། སངས་རྒྱས་བཅོམ་ལྡན་འདས་རྣམས་ཀྱི་སེམས་ཅན་ཡོངས་སུ་
སྨིན་པར་མཛད་པའི་མི་འཇིགས་པ་རྣམས་གང་ཡིན། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་
དཔལ་ཆོས་ཀྱི་རྣམ་གྲངས་འདི་ནི་མཐོང་བར་དཀའ་བ་རིག་པར་དཀའ་བ་སྟེ། བརྟག་པར་བྱ་བ་མ་ཡིན་ཞིང་རྟོག་གེའི་སྤྱོད་པ་མ་ཡིན་པ་མོས་པར་དཀའ་སྟེ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་
མང་པོ་ལ་བསྙེན་བཀུར་བྱས་པའི་སེམས་ཅན་དེ་དག་ཆོས་ཀྱི་རྣམ་གྲངས་འདི་ཐོས་པར་འགྱུར་ཞིང་ཐོས་ནས་ཀྱང་མོས་པར་འགྱུར་རོ། །འཇམ་དཔལ་གྱིས་སྨྲས་པ། ཀྱེ་རྒྱལ་བའི་སྲས་དམུས་
ལོང་ལ་མར་མེ་མི་གཟུགས་ཀྱི། མིག་དང་ལྡན་པ་རྣམས་ལ་མར་མེ་གཟུགས་ཏེ། ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བསོད་ནམས་དང་ཡེ་ཤེས་ཀྱི་ཚོགས་
དཔག་ཏུ་མེད་པ་བསགས་པ་དེ་དག་གི་ཕྱིར་ཁོ་བོ་འདྲིའོ། །གང་དག་བསྐལ་པ་གྲངས་མེད་པར་སེམས་ཅན་དམྱལ་བ་དང་། དུད་འགྲོའི་སྐྱེས་གནས་དང་། ཡི་དགས་དང་གཤིན་རྗེའི་འཇིག་རྟེན་དུ་གནས་པར་
འགྱུར་བའི་ལས་ཚེ་འདི་ཉིད་ལ་མྱོང་བར་འགྱུར་བ་དེ་དག་གི་ཕྱིར་ཁོ་བོ་འདྲིའོ། །གང་དག་མཐོང་བ་དང་། ཐོས་པ་དང་། བསྙེན་བཀུར་བྱས་པ་དོན་ཡོད་པ་དེ་དག་གི་ཕྱིར་ཁོ་བོ་འདྲི་ཡིས་སྟོན་ཅིག །ཀྱེ་
རྒྱལ་བའི་སྲས་ཆོས་ཀྱི་རྣམ་གྲངས་འདི་ལ་མ་མོས་པ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མི་སྨྲས། ཀྱེ་རྒྱལ་བའི་སྲས་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་

57-1-45a

རྟེན་ལ་སྙིང་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་། ཕན་པ་དང་། བདེ་བར་བྱ་བའི་ཕྱིར་སྟོན་ཅིག །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་ཀུན་དུ་བཟང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་དེ་ལ་སྟོན་པ་ཐོགས་པ་མེད་པ་ནི་དེ་བཞིན་གཤེགས་པ་ཕྱོགས་བཅུའི་འཇིག་རྟེན་གྱི་
ཁམས་སོ་སོའི་གླིང་རེ་རེར་ཡང་གསེར་གྱི་ཁ་དོག་གིས་འདུལ་བའི་ལྷ་དང་མི་རྣམས་དང་། བྱང་ཆུབ་སེམས་དཔའ་རྣམས་ལ་དེ་བཞིན་གཤེགས་པ་གསེར་གྱི་ཁ་དོག་ཏུ་སྟོན་པ་ལ་ཐོགས་པ་མེད་དོ། །
ནོར་བུ་རིན་པོ་ཆེའི་རྒྱལ་པོ་སྐར་འོད་ཀྱི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་སྐར་འོད་ཀྱི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་གློག་གི་སྒྲོན་
མའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་གློག་གི་སྒྲོན་མའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་ཉི་ཟླ་མར་མེའི་ཁ་དོག་གིས་འདུལ་བ་
རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་ཉི་ཟླ་མར་མེའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་སྣང་བ་ཐམས་ཅད་བསྡུས་པའི་ཁ་དོག་གིས་འདུལ་
བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་སྣང་བ་ཐམས་ཅད་བསྡུས་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེ་དབང་གི་རྒྱལ་པོའི་ཁ་དོག་གིས་འདུལ་བ་
རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེ་དབང་གི་རྒྱལ་པོའི་ཁ་དོག་ཏུ་སྟོན་པ་ལ་ཐོགས་པ་མེད་དོ། ནོར་བུ་རིན་པོ་ཆེའི་རྒྱལ་པོ་ཟེ་བ་ཅན་གྱི་ཁ་དོག་གིས་འདུལ་བ་རྣམས་ལ། དེ་

57-1-45b

བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་ཟེ་བ་ཅན་གྱི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་སེང་གེ་རལ་པ་ཅན་གྱི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་
པ་ནོར་བུ་རིན་པོ་ཆེའི་རྒྱལ་པོ་སེང་གེ་རལ་པ་ཅན་གྱི་ཁ་དོག་དུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་སེང་གེའི་རྒྱལ་མཚན་གྱི་རྩེ་མོའི་ཁ་དོག་གིས་འདུལ་བ་རྣམས་ལ། དེ་བཞིན་
གཤེགས་པ་ནོར་བུ་རིན་པོ་ཆེའི་རྒྱལ་པོ་སེང་གེའི་རྒྱལ་མཚན་གྱི་རྩེ་མོའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་བརྒྱ་བྱིན་ཐོགས་པའི་ཁ་དོག་གིས་འདུལ་བ་རྣམས་ལ། 
དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་བརྒྱ་བྱིན་ཐོགས་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་ལྷ་ཐམས་ཅད་འོད་ཀྱི་ཁ་དོག་གིས་འདུལ་བ་རྣམས་ལ། 
དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་ལྷ་ཐམས་ཅད་ཀྱི་འོད་ཀྱི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་ཆུ་དང་བར་བྱེད་པའི་ཁ་དོག་གིས་འདུལ་བ་རྣམས་ལ། 
དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་ཆུ་དང་བར་བྱེད་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་རྡོ་རྗེའི་འོད་ཀྱི་ཁ་དོག་གིས་འདུལ་བ་རྣམས་ལ། དེ་བཞིན་
གཤེགས་པ་ནོར་བུ་རིན་པོ་ཆེའི་རྒྱལ་པོ་རྡོ་རྗེའི་འོད་ཀྱི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་པད་མ་རལ་གྲི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་
ནོར་བུ་རིན་པོ་ཆེའི་རྒྱལ་པོ་པད་མ་རལ་གྲི་ཁ་དོག་ཏུ་སྟོན་པ་ལ་ཐོག་པ་མེད་དོ། །ནོར་བུ་རིན་པོ་ཆེའི་རྒྱལ་པོ་བཻ་དཱུརྱའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་

57-1-46a

རྒྱལ་པོ་བཻ་དཱུརྱའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་ཨན་ད་རྙིལ་གྱི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་
ཆེའི་རྒྱལ་པོ་ཨན་ད་རྙིལ་གྱི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་མཐོན་ཀ་ཆེན་པོའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་
རྒྱལ་པོ་འཐོན་ཀ་ཆེན་པོའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་རྡོ་རྗེའི་སྙིང་པོའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་
པོ་རྡོ་རྗེའི་སྙིང་པོའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་དཔལ་གྱི་སྙིང་པོའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་དཔལ་
གྱི་སྙིང་པོའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་དགེ་བ་བཀོད་པའི་ཁ་དོག་གིས་འདུལ་བ་རྣམས་ལ་དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་དགེ་བ་བཀོད་པའི་
ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་མ་ཆགས་པ་བཀོད་པའི་སྙིང་པོའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་མ་
ཆགས་པ་བཀོད་པའི་སྙིང་པོའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་མུ་ཏིག་དཀར་པོའི་ཁ་དོག་གིས་འདུལ་བ་རྣམས་ལ་དེ་བཞིན་གཤེགས་པ་ནོར་བུ་རིན་པོ་ཆེའི་
རྒྱལ་པོ་མུ་ཏིག་དཀར་པོའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་མུ་ཏིག་མཐོན་ཀའི་ཁ་དོག་གིས་འདུལ་བ་རྣམས་ལ་དེ་བཞིན་གཤེགས་པ་ནོར་བུ་རིན་པོ་

57-1-46b

ཆེའི་རྒྱལ་པོ་མུ་ཏིག་མཐོན་ཀའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་མུ་ཏིག་གསེར་ལྟ་བུའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་
རྒྱལ་པོ་མུ་ཏིག་གསེར་ལྟ་བུའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་མུ་ཏིག་ནམ་མཁའི་འོད་ཀྱི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་
པོ་ཆེའི་རྒྱལ་པོ་མུ་ཏིག་ནམ་མཁའི་འོད་ཀྱི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་བསོད་ནམས་ཀྱི་ཚོགས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་འོད་ཀྱི་ཁ་དོག་གིས་
འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་བསོད་ནམས་ཀྱི་ཚོགས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་འོད་ཀྱི་ཁ་དོག་དུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་
རྒྱལ་པོ་ཡེ་ཤེས་ཀྱི་ཚོགས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་ཡེ་ཤེས་ཀྱི་ཚོགས་རྒྱ་མཚོ་གྲངས་མེད་པ་
རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་ཕ་རོལ་ཏུ་ཕྱིན་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་
གཤེགས་པ་ནོར་བུ་རིན་པོ་ཆེའི་རྒྱལ་པོ་ཕ་རོལ་ཏུ་ཕྱིན་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་རྒྱ་མཚོ་གྲངས་མེད་པ་རྗེས་སུ་སྒྲོག་
པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་

57-1-47a

རྒྱལ་པོ་གཟུངས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་གཟུངས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་ཏུ་སྟོན་
པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་ཏིང་ངེ་འཛིན་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་ཏིང་ངེ་འཛིན་རྒྱ་མཚོ་
གྲངས་མེད་པ་རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་རྣམ་པར་ཐར་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་
གཤེགས་པ་ནོར་བུ་རིན་པོ་ཆེའི་རྒྱལ་པོ་རྣམ་པར་ཐར་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་དུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་སོ་སོ་ཡང་དག་པར་རིག་པ་རྒྱ་མཚོ་གྲངས་མེད་པ་རྗེས་
སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་ཆེན་པོ་སོ་སོ་ཡང་དག་པའི་རིག་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །
ནོར་བུ་རིན་པོ་ཆེའི་རྒྱལ་པོ་མངོན་པར་ཤེས་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ་དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་མངོན་པར་ཤེས་པ་རྒྱ་མཚོ་གྲངས་མེད་པ་
རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་སྨོན་ལམ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་
པ་ནོར་བུ་རིན་པོ་ཆེའི་རྒྱལ་པོ་སྨོན་ལམ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་བརྩོན་འགྲུས་རྩོམ་པ་རྒྱ་མཚོ་གྲངས་མེད་པ་རྗེས་

57-1-47b

སུ་སྒྲོག་པའི་ཁ་དོག་གི་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེ་རྒྱལ་པོ་བརྩོན་འགྲུས་རྩོམ་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་
རྒྱལ་པོ་དབུགས་འབྱིན་པ་རྙེད་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་དབུགས་འབྱིན་པ་རྙེད་པ་རྒྱ་མཚོ་གྲངས་མེད་པ་རྗེས་
སུ་སྒྲོག་པའི་ཁ་དོག་དུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་བྱང་ཆུབ་སེམས་དཔའ་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་
པ་ནོར་བུ་རིན་པོ་ཆེའི་རྒྱལ་པོ་བྱང་ཆུབ་སེམས་དཔའ་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་དེ་བཞིན་གཤེགས་པ་ལ་
འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་དེ་བཞིན་གཤེགས་པ་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་
སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་སེམས་ཅན་གྱི་བསམ་པ་དང་སྤྱོད་པ་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་
གཤེགས་པ་ནོར་བུ་རིན་པོ་ཆེའི་རྒྱལ་པོ་སེམས་ཅན་གྱི་བསམ་པ་དང་སྤྱོད་པ་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་འཇིག་རྟེན་གྱི་ཁམས་ལ་འཇུག་པ་རྒྱ་མཚོ་གྲངས་མེད་པ་རྗེས་
སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་འཇིག་རྟེན་གྱི་ཁམས་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། ནོར་བུ་རིན་པོ་ཆེའི་རྒྱལ་པོ་བསྐལ་པ་ལ་འཇུག་

57-1-48a

པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་བསྐལ་པ་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་
པོ་ཆེའི་རྒྱལ་པོ་དུས་གསུམ་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་དུས་གསུམ་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་དུ་སྟོན་
པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་དུས་གསུམ་བསྟན་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་དུས་གསུམ་བསྟན་པ་རྒྱ་མཚོ་གྲངས་
མེད་པ་རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་མི་སྐྱོ་བར་སེམས་བསྐྱེད་པ་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་མི་སྐྱོ་བའི་སེམས་བསྐྱེད་པ་རྒྱ་མཚོ་
གྲངས་མེད་ཁ་དོག་ཏུ་སྟོན་པ་ལ་ཐོགས་པ་མེད་དོ། །ནོར་བུ་རིན་པོ་ཆེའི་རྒྱལ་པོ་དབྱེར་མེད་པའི་ཡེ་ཤེས་རྒྱ་མཚོ་གྲངས་མེད་པ་རྗེས་སུ་སྒྲོག་པའི་ཁ་དོག་གིས་འདུལ་བ་རྣམས་ལ། དེ་བཞིན་གཤེགས་པ་ནོར་བུ་རིན་པོ་ཆེའི་རྒྱལ་པོ་དབྱེར་མེད་པའི་ཡེ་ཤེས་རྒྱ་མཚོ་གྲངས་མེད་པ་
རྗེས་སུ་སྒྲོག་པའི་ཁ་དོག་ཏུ་སྟོན་པ་ལ་ཐོགས་པ་མེད་དོ། །དེ་ཅིའི་ཕྱིར་ཞེ་ན། མ་འདྲེས་པའི་ཆོས་དང་ལྡན་པའི་ཕྱིར་རོ། །འཇམ་དཔལ་འདི་ལྟ་སྟེ། དཔེར་ན་ནོར་བུ་རིན་པོ་ཆེ་བཻ་དཱུརྱ་ལ་དངོས་པོའི་དབང་གིས་བྱ་བ་རྣམ་པ་སྣ་ཚོགས་མཐའ་ཡས་པ་འབྱུང་སྟེ། ནོར་བུ་རིན་པོ་ཆེ་བཻ་དཱུརྱ་
ནི་མི་རྟོག་མོད་ཀྱིས། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་དེ་མི་རྟོག་ཅིང་ལྷུན་གྱིས་གྲུབ་པར་བྱ་བ་དེ་ལྟ་བུ་འདི་དག་འབྱུང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སེམས་ཅན་ཡོངས་སུ་སྨིན་པར་
བྱ་བའི་དབང་གིས་ཁ་དོག་རྣམ་པ་ཐ་དད་པའི་མཛད་པ་འབྱུང་སྟེ། དེ་བཞིན་གཤེགས་པ་ནི་མི་རྟོག་རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་མཛད་པ་འདི་ལྟ་བུ་འདི་དག་འབྱུང་སྟེ། འཇམ་དཔལ་འདི་ནི་སངས་རྒྱས་བཅོམ་ལྡན་འདས་རྣམས་ཀྱི་སྟོན་

57-1-48b

པ་ཐོགས་པ་མེད་པའོ། །འཇམ་དཔལ་དེ་ལ་དེ་བཞིན་གཤེགས་པའི་མཁྱེན་པ་ཐོགས་པ་མེད་པ་ནི་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ཀྱི་འཇིག་རྟེན་གྱི་ཁམས་རེ་རེ་དང་། གླིང་རེ་རེ་དང་རྡུལ་ཕྲ་རབ་ཀྱི་རྡུལ་རེ་རེ་དང་། འཇིག་རྟེན་གྱི་ཁམས་ཐམས་ཅད་ཀྱི་རྡུལ་
སྙེད་ཀྱི་འཇིག་རྟེན་གྱི་ཁམས་རྒྱ་མཚོ་འཇུག་པ་རྣམས་ལ་མཁྱེན་པ་ལ་ཐོགས་པ་མེད་དོ། །འཇིག་རྟེན་གྱི་ཁམས་རེ་རེ་དག་གླིང་རེ་རེ་དང་། རྡུལ་ཕྲ་རབ་ཀྱི་རྡུལ་རེ་རེ་ལ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱི་བསོད་ནམས་ཀྱི་ཚོགས་རྒྱ་མཚོ་གྲངས་མེད་པའི་བྱེ་བྲག་བསྟན་པ་
གཞན་དང་གཞན་དག་མཁྱེན་པ་ལ་ཐོགས་པ་མེད་དོ། དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱི་ཡེ་ཤེས་ཀྱི་ཚོགས་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་གཞན་དག་མཁྱེན་པ་ལ་ཐོགས་པ་མེད་དོ། དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་
ཀྱི་རྡུལ་སྙེད་ཀྱི་ཕ་རོལ་ཏུ་ཕྱིན་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་གཞན་དག་མཁྱེན་པ་ལ་ཐོགས་པ་མེད་དོ། །དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙད་ཀྱི་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་གཞན་
དག་མཁྱེན་པ་ལ་ཐོགས་པ་མེད་དོ། །དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱི་གཟུངས་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་གཞན་དག་མཁྱེན་པ་ལ་ཐོགས་པ་མེད་དོ། །དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་
ཀྱི་རྡུལ་སྙེད་ཀྱི་ཏིང་ངེ་འཛིན་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་གཞན་དག་མཁྱེན་པ་ལ་ཐོགས་པ་མེད་དོ། །དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱི་རྣམ་པར་ཐར་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་
དང་གཞན་དག་མཁྱེན་པ་ལ་ཐོགས་པ་མེད་དོ། །དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱི་སོ་སོ་ཡང་དག་པར་རིག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་གཞན་དག་མཁྱེན་པ་ལ་ཐོགས་པ་མེད་དོ། །དེ་བཞིན་དུ་སྐད་
ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱི་མངོན་པར་ཤས་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་གཞན་དག་མཁྱེན་པ་ལ་ཐོགས་པ་མེད་དོ། །དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱི་སྨོན་ལམ་རྒྱ་མཚོ་

57-1-49a

གྲངས་མེད་པའི་བྱེ་བྲག་བསྟན་པ་གཞན་དང་གཞན་དག་མཁྱེན་པ་ལ་ཐོགས་པ་མེད་དོ། །དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱིས་བརྩོན་འགྲུས་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་གཞན་དག་
མཁྱེན་པ་ལ་ཐོགས་པ་མེད་དོ། དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱི་དབུགས་འབྱིན་པ་རྙེད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་གཞན་དག་མཁྱེན་པ་ལ་ཐོགས་པ་མེད་དོ། དེ་བཞིན་དུ་སྐད་ཅིག་སྐད་ཅིག་
ལ་ཞིང་ཐམས་ཅད་ཀྱི་རྡུལ་སྙེད་ཀྱི་བྱང་ཆུབ་སེམས་དཔའ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་གཞན་དག་མཁྱེན་པ་ལ་ཐོགས་པ་མེད་དོ། །དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱི་དེ་བཞིན་
གཤེགས་པ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་གཞན་དག་མཁྱེན་པ་ལ་ཐོགས་པ་མེད་དོ། དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱི་ཞིང་ཐམས་ཅད་ལ་འཇུག་པ་རྒྱ་མཚོ་གྲངས་མེད་པའི་བྱེ་
བྲག་བསྟན་པ་གཞན་དང་གཞན་དག་མཁྱེན་པ་ལ་ཐོགས་པ་མེད་པའོ། །དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱི་སེམས་ཅན་གྱི་བསམ་པ་དང་སྤྱོད་པ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་
གཞན་དག་མཁྱེན་པ་ལ་ཐོགས་པ་མེད་དོ། དེ་བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་གཞན་དག་མཁྱེན་པ་ལ་ཐོགས་པ་མེད་དོ། །དེ་
བཞིན་དུ་སྐད་ཅིག་སྐད་ཅིག་ལ་ཞིང་ཐམས་ཅད་ཀྱི་རྡུལ་སྙེད་ཀྱི་བསྐལ་པ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་གཞན་དང་གཞན་དག་མཁྱེན་པ་ལ་ཐོགས་པ་མེད་དོ། དེ་ཅིའི་ཕྱིར་ཞེ་ན་ལྷུན་གྱིས་གྲུབ་པའི་ཡེ་ཤེས་བརྙེས་པའི་ཕྱིར་རོ། །འཇམ་
དཔལ་འདི་ལྟ་སྟེ་དཔེར་ན་བྲག་ཕུག་གི་ནང་ནས་བྲག་ཆ་སེམས་ཅན་གྱི་སྒྲ་རྣམ་པ་མང་པོ་འཇུག་པས་སྒྲ་སྐད་གཞན་དང་གཞན་དག་མཐའ་ཡས་པ་འབྱུང་སྟེ་བྲག་ཆ་ནི་མི་རྟོག །རྣམ་པར་མི་རྟོག་མོད་ཀྱི་འོན་ཀྱང་མ་འདྲེས་པའི་ཆོས་དང་ལྡན་པའི་

57-1-49b

ཕྱིར་དེ་མི་རྟོག་ཅིང་ལྷུན་གྱིས་གྲུབ་པར་བྱ་བ་འདི་ལྟ་བུ་འདི་དག་འབྱུང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་པ་ལ་ཡང་སེམས་ཅན་གྱི་བསམ་པ་ཇི་ལྟ་བ་དང་། འདུལ་བ་ཇི་ལྟ་བ་དེ་དག་
གིས་དེ་ལྟ་བུའི་སྐད་དུ་སྟོན་པ་འབྱུང་བར་ཤེས་ཏེ། དེ་བཞིན་གཤེགས་པ་ནི་མི་རྟོག་རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་དེ་མི་རྟོག་ཅིང་ལྷུན་གྱིས་
གྲུབ་པར་མཛད་པ་འདི་ལྟ་བུ་འདི་དག་འབྱུང་ངོ་། འཇམ་དཔལ་དེ་བཞིན་གཤེགས་པའི་མཁྱེན་པ་ཐོགས་པ་མེད་པ་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་བྱིན་
གྱིས་བརླབས་ཀྱང་བསྟན་པར་མི་ནུས་སོ། །འཇམ་དཔལ་དེ་ལ་དེ་བཞིན་གཤེགས་པའི་སེམས་ཅན་ཡོངས་སུ་སྨིན་པར་མཛད་པ་ཁྱུ་མཆོག་ཏུ་གྱུར་པ་ནི་དེ་བཞིན་གཤེགས་པའི་གཙུག་
ཏོར་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་འཇིག་རྟེན་གྱི་ཁམས་རེ་རེ་དང་། གླིང་རེ་རེར་ཡང་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའ་
ཁྱབ་པར་འགེངས་ཏེ། སེམས་ཅན་ཡོངས་སུ་སྨིན་པར་མཛད་པའི་ཁྱུ་མཆོག་ཏུ་གྱུར་པས་ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པའོ། །འཇམ་དཔལ་དེ་བཞིན་གཤེགས་པའི་
མཛོད་སྤུ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་འཇིག་རྟེན་གྱི་ཁམས་རེ་རེ་དང་། གླིང་རེ་རེར་ཡང་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། 
ནམ་མཁའ་ཁྱབ་པར་འགེངས་པ། སེམས་ཅན་ཡོངས་སུ་སྨིན་པར་མཛད་པ། ཁྱུ་མཆོག་ཏུ་གྱུར་པས་ཕྱི་མའི་མཐའི་མུའི་བསྐལ་པར་བྱིན་གྱིས་རློབས་

57-1-50a

པའོ། །འཇམ་དཔལ་དེ་བཞིན་དུ་དེ་བཞིན་གཤེགས་པའི་མཚན་རེ་རེར་ཡང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་འཇིག་རྟེན་གྱི་
ཁམས་རེ་རེ་དང་། གླིང་རེ་རེར་ཡང་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའ་ཁྱབ་པར་འགེངས་པ། སེམས་ཅན་ཡོངས་སུ་སྨིན་
པར་མཛད་པ། ཁྱུ་མཆོག་ཏུ་གྱུར་པས་ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པའོ། །དེ་བཞིན་དུ་དེ་བཞིན་གཤེགས་པའི་དཔེ་བྱད་བཟང་པོ་ཕྱོགས་བཅུའི་འཇིག་རྟེན་གྱི་
ཁམས་རབ་འབྱམ་ཐམས་ཅད་དུ་འཇིག་རྟེན་གྱི་ཁམས་རེ་རེ་དང་། གླིང་རེ་རེར་ཡང་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའ་ཁྱབ་པར་འགེངས་
པ། སེམས་ཅན་ཡོངས་སུ་སྨིན་པར་མཛད་པ། ཁྱུ་མཆོག་ཏུ་གྱུར་པས་ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པའོ། །དེ་བཞིན་དུ་དེ་བཞིན་གཤེགས་པའི་སྤུའི་
ཁུང་བུ་རེ་རེར་ཡང་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའ་ཁྱབ་པར་འགེངས་པ། སེམས་ཅན་ཡོངས་སུ་སྨིན་པར་མཛད་པ། ཁྱུ་མཆོག་ཏུ་
གྱུར་པས་ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པའོ། །དེ་བཞིན་དུ་དེ་བཞིན་གཤེགས་པའི་ཡོ་བྱད་ཐམས་ཅད་ཀྱང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་
དུ་འཇིག་རྟེན་གྱི་ཁམས་རེ་རེ་དང་། གླིང་རེ་རེར་ཡང་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའ་ཁྱབ་པར་འགེངས་པ། སེམས་ཅན་ཡོངས་སུ་

57-1-50b

སྨིན་པར་མཛད་པ། ཁྱུ་མཆོག་ཏུ་གྱུར་པས་ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པའོ། །དེ་ཅིའི་ཕྱིར་ཞེ་ན། མ་འདྲེས་པའི་ཆོས་དང་ལྡན་པའི་ཕྱིར་ཏེ། མ་འདྲེས་པའི་ཆོས་དང་ལྡན་པ་ནི་སྨོན་
ལམ་གྱི་སྟོབས་ཀྱིས་བྱིན་གྱིས་བརླབས་པའི་ཕྱིར་རོ། །འཇམ་དཔལ་དེ་བཞིན་གཤེགས་པའི་སེམས་ཅན་ཡོངས་སུ་སྨིན་པར་མཛད་པ། ཁྱུ་མཆོག་ཏུ་གྱུར་པ་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་
མཐའི་མུའི་བསྐལ་པར་བྱིན་གྱིས་བརླབས་ཀྱང་བསྟན་པར་མི་ནུས་སོ། །འཇམ་དཔལ་དེ་ལ་དེ་བཞིན་གཤེགས་པའི་ཀུན་ནས་མངོན་དུ་གྱུར་པ་ནི་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་
འཇིག་རྟེན་གྱི་ཁམས་རེ་རེ་དང་། གླིང་རེ་རེ་དང་། རྡུལ་ཕྲ་རབ་རེ་རེ་ལ་སྟེ། རྡུལ་ཕྲ་རབ་ཀྱི་རྡུལ་གྱི་ཕྱོགས་རེ་རེ་ལ་བྱང་ཆུབ་སེམས་དཔའ་རྒྱ་མཚོ་འཁོད་པ་ནི་རབ་ཏུ་མང་གི། འཇིག་རྟེན་གྱི་ཁམས་ལྔ་བཅུའི་རྡུལ་
ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པ་དག་གི་རྡུལ་ཕྲ་རབ་ནི་ཆེས་ཉུང་སྟེ། བྱང་ཆུབ་སེམས་དཔའ་དེ་དག་ནི་སེམས་ཅན་དང་། འཇིག་རྟེན་གྱི་ཁམས་དང་། གླིང་དང་། རི་རབ་
དང་། རི་རབ་ཆེན་པོ་དང་། འཁོར་ཡུག་དང་། འཁོར་ཡུག་ཆེན་པོ་དང་། གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཡུལ་འཁོར་དང་། རྒྱལ་པོའི་ཕོ་བྲང་འཁོར་དང་། འབབ་ཆུ་དང་། མཚེའུ་དང་། 
མཚོ་བྲན་དག་གང་ལ་ཡང་གནོད་པ་དང་སྒྲིབ་པ་མེད་དེ། སྔོན་ཇི་ལྟ་བར་ཕྱིས་ཀྱང་དེ་བཞིན་དུ་བྱ་བ་དག་འཇུག་སྟེ། དེ་བཞིན་གཤེགས་པ་མ་འདྲེས་པའི་ཆོས་དང་ལྡན་པའི་ཕྱིར་རོ། །བསམ་པ་ཇི་ལྟ་
བ་དང་། འདུལ་བ་ཇི་ལྟ་བའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་

57-1-51a

སྐྱོང་བ་དང་། མི་དང་། མི་མ་ཡིན་པ་དང་། བྱང་ཆུབ་སེམས་དཔའ་དེ་དག་གིས་ཀྱང་འདི་ལྟར་ཀུན་ནས་དེ་བཞིན་གཤེགས་པ་གཉའ་ཤིང་གང་ཙམ་ན་བཞུགས་པར་མངོན་དུ་མཐོང་ངོ་། །དེ་ཅིའི་ཕྱིར་ཞེ་ན། 
མ་འདྲེས་པའི་ཆོས་དང་ལྡན་པའི་ཕྱིར་རོ། །འཇམ་དཔལ་འདི་ལྟ་སྟེ། དཔེར་ན་ཟླ་བ་ཡར་གྱི་ངོ་ཚེས་བཅྭ་ལྔའི་ནམ་ཕྱེད་ཀྱི་དུས་ན་འཛམ་བུའི་གླིང་གི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཐམས་ཅད་
ཀྱིས་ཟླ་བའི་དཀྱིལ་འཁོར་མདུན་ན་འདུག་པར་མཐོང་ཡང་ཟླ་བའི་དཀྱིལ་འཁོར་ནི་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་མི་རྟོག་ཅིང་ལྷུན་གྱིས་གྲུབ་པར་བྱ་བ་འདི་ལྟ་བུ་འདི་དག་
འབྱུང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་པ་ཡང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ཀྱི་སེམས་ཅན་བསམ་པ་ཇི་ལྟ་བ་དང་། འདུལ་བ་ཇི་ལྟ་བ་དེ་དག་གིས་དེ་བཞིན་གཤེགས་
པ་མདུན་ན་བཞུགས་པར་མཐོང་ཡང་དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་མི་རྟོག་ཅིང་ལྷུན་གྱི་གྲུབ་པར་མཛད་པ་འདི་ལྟ་བུ་འདི་དག་འབྱུང་ངོ་། །
འཇམ་དཔལ་དེ་བཞིན་གཤེགས་པའི་ཀུན་ནས་མངོན་དུ་གྱུར་པ་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་བྱིན་གྱིས་རླབས་ཀྱང་བསྟན་པར་མི་ནུས་སོ། །འཇམ་དཔལ་དེ་བཞིན་
གཤེགས་པའི་ཞིང་ཡོངས་སུ་སྦྱོང་བ་ལ་མི་འཇིགས་པ་ནི་དེ་བཞིན་གཤེགས་པ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ཀྱི་འཇིག་རྟེན་རེ་རེ་དང་། རྡུལ་ཕྲ་རབ་ཀྱི་རྡུལ་རེ་རེ་ལ་འཇིག་རྟེན་
གྱི་ཁམས་ཐམས་ཅད་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་ལ་འཇུག་གོ། །དེ་ལ་འཇིག་རྟེན་གྱི་ཁམས་རྒྱ་མཚོ་ལ་ནི་བསོད་ནམས་ཀྱི་ཚོགས་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་

57-1-51b

ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་ཡེ་ཤེས་ཀྱི་ཚོགས་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱི་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་
ཕ་རོལ་ཏུ་ཕྱིན་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་ས་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་
ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་གཟུངས་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་ཏིང་ངེ་འཛིན་རྒྱ་མཚོ་གྲངས་མེད་པའི་
བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་རྣམ་པར་ཐར་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །འཇིག་
རྟེན་གྱིས་ཁམས་རྒྱ་མཚོ་ལ་ལ་ནི་སོ་སོ་ཡང་དག་པར་རིག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །འཇིག་རྟེན་གྱིས་ཁམས་རྒྱ་མཚོ་ལ་ལ་ནི་མངོན་པར་ཤེས་པ་རྒྱ་
མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་སྨོན་ལམ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །
འཇིག་རྟེན་གྱི་ཁམས་རྒྱ་མཚོ་ལ་ལ་ནི་བརྩོན་འགྲུས་རྩོམ་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་དབུགས་འབྱིན་པ་རྙེད་པ་
རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་བྱང་ཆུབ་སེམས་དཔའ་ལས་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་

57-1-52a

ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་དེ་བཞིན་གཤེགས་པ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །འཇིག་
རྟེན་གྱི་ཁམས་རྒྱ་མཚོ་ལ་ལ་ནི་སེམས་ཅན་གྱིས་བསམ་པ་དང་། སྤྱོད་པ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་
འཇིག་རྟེན་གྱི་ཁམས་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་བསྐལ་པ་ལ་འཇུག་པ་རྒྱ་མཚོ་གྲངས་མེད་པའི་ཡེ་
ཤེས་ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་དུས་གསུམ་བསྟན་པ་རྒྱ་མཚོ་ལ་ལ་ནི་དུས་གསུམ་བསྟན་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་
ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་དུས་གསུམ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་
ནི་མི་སྐྱོ་བར་སེམས་བསྐྱེད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་རྣམ་པར་སྦྱོང་ངོ་། །འཇིག་རྟེན་གྱི་ཁམས་རྒྱ་མཚོ་ལ་ལ་ནི་དབྱེར་མེད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་ཡེ་
ཤེས་ཀྱིས་རྣམ་པར་སྦྱོང་སྟེ། དེ་བཞིན་གཤེགས་པ་ནི་གནས་གང་ནས་ཀྱང་མི་གཡོའོ། །དེ་ཅིའི་ཕྱིར་ཞེ་ན། མི་གཡོ་བའི་ཡེ་ཤེས་བརྙེས་པའི་ཕྱིར་རོ། །འཇམ་དཔལ་དེ་བཞིན་གཤེགས་པའི་སངས་རྒྱས་
ཀྱི་ཞིང་ཡོངས་སུ་སྦྱོང་བ་ལ་མི་འཇིགས་པ་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་བྱིན་གྱིས་བརླབས་ཀྱང་བསྟན་པར་མི་ནུས་སོ། །འཇམ་དཔལ་དེ་བཞིན་གཤེགས་པའི་སྐུ་མཐའ་

57-1-52b

ཡས་པ་ནི་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ཀྱི་འཇིག་རྟེན་གྱི་ཁམས་རེ་རེ་དང་། གླིང་རེ་རེ་ལ་སྟེ། འཇིག་རྟེན་གྱི་ཁམས་ལྔ་བཅུའི་རྡུལ་ཕྲ་རབ་སྙེད་ཀྱི་འཇིག་རྟེན་གྱི་ཁམས་
རྒྱ་མཚོ་བརྒྱ་སྟོང་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། དེ་བཞིན་གཤེགས་པའི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ནི་ཆེས་མང་ངོ་། །འཇིག་
རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའ་རྒྱ་མཚོ་བསོད་ནམས་
ཀྱི་ཚོགས་རྒྱ་མཚོ་གྲངས་མེད་པ་གཞན་དང་གཞན་སངས་རྒྱས་ལ་ལྟ་བ་མངོན་དུ་གྱུར་པ་དག་ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོའི་རྡུལ་ཕྲ་རབ་ཀྱི་རྡུལ་
རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའ་རྒྱ་མཚོ་ཡེ་ཤེས་ཀྱི་ཚོགས་རྒྱ་མཚོ་གྲངས་མེད་པ་གཞན་དང་གཞན་གྱིས་སངས་རྒྱས་ལ་ལྟ་བ་མངོན་དུ་གྱུར་པ་ཐོབ་
པ་དག་ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་
རེ་རེའི་བྱང་ཆུབ་སེམས་དཔའ་རྒྱ་མཚོ་ཕ་རོལ་དུ་ཕྱིན་པ་རྒྱ་མཚོ་གྲངས་མེད་པ་གཞན་དང་གཞན་གྱིས་སངས་རྒྱས་ལ་ལྟ་བ་མངོན་དུ་གྱུར་པ་ཐོབ་པ་དག་ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་
འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའ་རྒྱ་མཚོ་གྲངས་མེད་པ་གཞན་དང་གཞན་གྱིས་སངས་

57-1-53a

རྒྱས་ལ་ལྟ་བ་མངོན་དུ་གྱུར་པ་ཐོབ་པ་དག་ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། 
བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའི་རྒྱ་མཚོ་གཟུངས་རྒྱ་མཚོ་གྲངས་མེད་པ་གཞན་དང་གཞན་གྱིས་སངས་རྒྱས་ལྟ་བ་མངོན་དུ་གྱུར་པ་ཐོབ་པ་དག་ནི་ཆེས་མང་ངོ་། །འཇིག་རྟེན་
གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའ་རྒྱ་མཚོ་ཏིང་ངེ་འཛིན་རྒྱ་མཚོ་
གྲངས་མེད་པ་གཞན་དང་གཞན་གྱིས་སངས་རྒྱས་ལ་ལྟ་བ་མངོན་དུ་གྱུར་པ་ཐོབ་པ་དག་ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་
རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའ་རྒྱ་མཚོ་རྣམ་པར་ཐར་པ་རྒྱ་མཚོ་གྲངས་མེད་པ་གཞན་དང་གཞན་གྱིས་སངས་རྒྱས་ལ་ལྟ་བ་མངོན་དུ་གྱུར་པ་ཐོབ་པ་དག་
ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་
བྱང་ཆུབ་སེམས་དཔའ་རྒྱ་མཚོ་སོ་སོ་ཡང་དག་པར་རིག་པ་རྒྱ་མཚོ་གྲངས་མེད་པ་གཞན་དང་གཞན་གྱིས་སངས་རྒྱས་ལ་ལྟ་བ་མངོན་དུ་གྱུར་པ་ཐོབ་པ་དག་ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་
འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའ་རྒྱ་མཚོ་མངོན་པར་ཤེས་པ་རྒྱ་མཚོ་གྲངས་མེད་

57-1-53b

པ་གཞན་དང་གཞན་གྱིས་སངས་རྒྱས་ལ་ལྟ་བ་མངོན་དུ་གྱུར་པ་ཐོབ་པ་དག་ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་
ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའ་རྒྱ་མཚོ་སྨོན་ལམ་གྱི་བྱེ་བྲག་རྒྱ་མཚོ་གྲངས་མེད་པ་གཞན་དང་གཞན་གྱིས་སངས་རྒྱས་ལ་ལྟ་བ་མངོན་དུ་གྱུར་པ་ཐོབ་པ་དག་ནི་ཆེས་མང་ངོ་། །
འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའ་རྒྱ་མཚོ་
བསོད་ནམས་ཀྱི་ཚོགས་ཀྱི་བྱེ་བྲག་གཞན་དང་གཞན་ཐོབ་པ་དེ་དག་བསོད་ནམས་ཀྱི་ཚོགས་ཀྱི་བྱེ་བྲག་གཞན་དང་གཞན་ཐོབ་པའི་སྟོབས་བསྐྱེད་པའི་བྱིན་གྱིས་རླབས་ཀྱིས་དེ་བཞིན་གཤེགས་པ་གཞན་དང་གཞན་མཐོང་
བ་དག་ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་
རེའི་བྱང་ཆུབ་སེམས་དཔའ་རྒྱ་མཚོ་ཡེ་ཤེས་ཀྱི་ཚོགས་ཀྱི་བྱེ་བྲག་གཞན་དང་གཞན་ཐོབ་པ་དེ་དག་ཡེ་ཤེས་ཀྱི་ཚོགས་ཀྱི་བྱེ་བྲག་གཞན་དང་གཞན་ཐོབ་པའི་སྟོབས་བསྐྱེད་པའི་བྱིན་གྱིས་རླབས་ཀྱིས་དེ་བཞིན་གཤེགས་
པ་གཞན་དང་གཞན་མཐོང་བ་དག་ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་
གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའི་རྒྱ་མཚོ་ཕ་རོལ་དུ་ཕྱིན་པའི་བྱེ་བྲག་གཞན་དང་གཞན་ཐོབ་པའི་སྟོབས་བསྐྱེད་པའི་བྱིན་གྱིས་རླབས་ཀྱིས་དེ་བཞིན་གཤེགས་པ་གཞན་དང་གཞན་མཐོང་བ་དག་ནི་ཆེས་མང་ངོ་། །

57-1-54a

འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་བྱང་ཆུབ་
སེམས་དཔའ་རྒྱ་མཚོའི་བྱེ་བྲག་གཞན་དང་གཞན་ཐོབ་པ་དེ་དག་སའི་བྱེ་བྲག་གཞན་དང་གཞན་ཐོབ་པའི་སྟོབས་བསྐྱེད་པའི་བྱིན་ཀྱིས་བརླབས་ཀྱིས་དེ་བཞིན་གཤེགས་པ་གཞན་དང་གཞན་མཐོང་བ་དག་ནི་ཆེས་མང་ངོ་། །
འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་བྱང་
ཆུབ་སེམས་དཔའ་རྒྱ་མཚོ་གཟུངས་ཀྱི་བྱེ་བྲག་གཞན་དང་གཞན་ཐོབ་པ་དེ་དག་གཟུངས་ཀྱི་བྱེ་བྲག་གཞན་དང་གཞན་ཐོབ་པའི་སྟོབས་བསྐྱེད་པའི་བྱིན་གྱི་བརླབས་ཀྱིས་དེ་བཞིན་གཤེགས་པ་གཞན་དང་གཞན་མཐོང་བ་དག་
ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་
རེའི་བྱང་ཆུབ་སེམས་དཔའ་རྒྱ་མཚོ་ཏིང་ངེ་འཛིན་གྱི་བྱེ་བྲག་གཞན་དང་གཞན་ཐོབ་པ་དེ་དག་ཏིང་ངེ་འཛིན་གྱི་བྱེ་བྲག་གཞན་དང་གཞན་ཐོབ་པའི་སྟོབས་བསྐྱེད་པའི་བྱིན་གྱི་བརླབས་ཀྱིས་དེ་བཞིན་གཤེགས་པ་གཞན་དང་
གཞན་མཐོང་བ་དག་ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་
གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའ་རྒྱ་མཚོ་རྣམ་པར་ཐར་པའི་བྱེ་བྲག་གཞན་དང་གཞན་ཐོབ་པ་དེ་དག་ནི་རྣམ་པར་ཐར་པའི་བྱེ་བྲག་གཞན་དང་གཞན་ཐོབ་པའི་སྟོབས་བསྐྱེད་པའི་བྱིན་གྱི་བརླབས་ཀྱིས་དེ་བཞིན་

57-1-54b

གཤེགས་པ་གཞན་དང་གཞན་མཐོང་བ་དག་ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་
དཔའི་འཁོར་གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའ་རྒྱ་མཚོ་སོ་སོ་ཡང་དག་པར་རིག་པའི་བྱེ་བྲག་གཞན་དང་གཞན་ཐོབ་པ་དེ་དག་སོ་སོ་ཡང་དག་པར་རིག་པའི་བྱེ་བྲག་གཞན་དང་གཞན་ཐོབ་པའི་སྟོབས་བསྐྱེད་པའི་བྱིན་
གྱི་བརླབས་ཀྱིས་དེ་བཞིན་གཤེགས་པ་གཞན་དང་གཞན་མཐོང་བ་དག་ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་
རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའ་རྒྱ་མཚོ་མངོན་པར་ཤེས་པའི་བྱེ་བྲག་གཞན་དང་གཞན་ཐོབ་པ་དེ་དག་མངོན་པར་ཤེས་པའི་བྱེ་བྲག་གཞན་དང་གཞན་ཐོབ་
པའི་སྟོབས་བསྐྱེད་པའི་བྱིན་གྱི་བརླབས་ཀྱིས་དེ་བཞིན་གཤེགས་པ་གཞན་དང་གཞན་མཐོང་བ་དག་ནི་ཆེས་མང་ངོ་། །འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་
རྡུལ་རྣམས་ནི་རབ་ཏུ་ཉུང་གི། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རེ་རེའི་བྱང་ཆུབ་སེམས་དཔའ་རྒྱ་མཚོ་སྨོན་ལམ་གྱི་བྱེ་བྲག་གཞན་དང་གཞན་ཐོབ་པ་དེ་དག་སྨོན་ལམ་གྱི་བྱེ་བྲག་གཞན་དང་གཞན་ཐོབ་
པའི་སྟོབས་བསྐྱེད་པའི་བྱིན་གྱི་བརླབས་ཀྱིས་དེ་བཞིན་གཤེགས་པ་གཞན་དང་གཞན་མཐོང་བ་དག་ནི་ཆེས་མང་ངོ་། །འཇམ་དཔལ་དེ་བཞིན་དུ་སྦྱར་ཏེ། རྟེན་པ་རྣམས་དང་། ངོ་མཚར་གྱི་འདུ་ཤེས་རྣམས་དང་། 
སྤྱོད་པ་རྣམས་དང་། དགེ་བའི་བཤེས་གཉེན་རྣམས་དང་། བརྩོན་འགྲུས་རྩོམ་པ་རྣམས་དང་། དབུགས་འབྱིན་པ་རྙེད་པ་རྣམས་དང་། སེམས་ཅན་ཡོངས་སུ་སྨིན་པར་མཛད་པ་རྣམས་དང་། ཚུལ་

57-1-55a

ཁྲིམས་རྣམས་དང་། ལུང་བསྟན་པ་རྣམས་དང་། བྱང་ཆུབ་སེམས་དཔའ་དག་ལ་འཇུག་པ་རྣམས་དང་། དེ་བཞིན་གཤེགས་པ་ལ་འཇུག་པ་རྣམས་དང་། སེམས་ཅན་གྱི་བསམ་པ་དང་སྤྱོད་པ་ལ་
འཇུག་པ་རྣམས་དང་། འཇིག་རྟེན་གྱི་ཁམས་ལ་འཇུག་པ་རྣམས་དང་། བསྐལ་པ་ལ་འཇུག་པ་རྣམས་དང་། དུས་གསུམ་བསྟན་པ་རྣམས་དང་། དུས་གསུམ་ལ་འཇུག་པ་རྣམས་དང་། མི་སྐྱོ་བའི་སེམས་
བསྐྱེད་པ་རྣམས་དང་། ཡེ་ཤེས་དབྱེར་མེད་པ་རྣམས་དང་། གཟུངས་རྣམས་དང་། སངས་རྒྱས་སྟོན་པ་རྣམས་དང་། ཀུན་དུ་བཟང་པོའི་སེམས་བསྐྱེད་པ་རྣམས་དང་། ཀུན་དུ་བཟང་པོའི་སྤྱོད་པའི་
ཆོས་རྣམས་དང་། སྙིང་རྗེ་ཆེན་པོ་ཐོབ་པ་རྣམས་དང་། བྱང་ཆུབ་ཀྱི་སེམས་ཀྱི་རྐྱེན་རྣམས་དང་། དགེ་བའི་བཤེས་གཉེན་ལ་གུས་པར་བྱ་བའི་སེམས་བསྐྱེད་པ་རྣམས་དང་། ཡོངས་སུ་དག་པ་རྣམས་དང་། 
ཕ་རོལ་ཏུ་ཕྱིན་པ་རྣམས་དང་། ཡེ་ཤེས་རྗེས་སུ་རྟོགས་པ་རྣམས་དང་། སོ་སོར་རྟོགས་པ་རྣམས་དང་། སྟོབས་བསྐྱེད་པ་རྣམས་དང་། མཉམ་པ་ཉིད་ཀྱི་ཚུལ་གྱི་ལམ་རྣམས་དང་། སངས་རྒྱས་ཀྱི་ཆོས་
འཆད་པ་རྣམས་དང་། ཀུན་དུ་བཟུང་བ་རྣམས་དང་། སྤོབས་པ་རྣམས་དང་། ཡེ་ཤེས་ཀྱི་དབང་རྣམས་དང་། གནས་མེད་པ་རྣམས་དང་། སེམས་མཉམ་པ་ཉིད་དང་། ཡེ་ཤེས་མངོན་པར་སྒྲུབ་པ་
རྣམས་དང་། སྤྲུལ་པ་རྣམས་དང་། བྱིན་གྱིས་བརླབས་པ་རྣམས་དང་། དབུགས་འབྱིན་པ་ཆེན་པོ་རྙེད་པ་རྣམས་དང་། ཟབ་མོ་ལ་འཇུག་པ་རྣམས་དང་། སངས་རྒྱས་ཀྱི་ཆོས་ལ་རྟེན་པ་རྣམས་དང་། 
སེམས་བསྐྱེད་པ་བརྟན་པ་རྣམས་དང་། ཐེ་ཙོམ་ཐམས་ཅད་གཅོད་པ་རྣམས་དང་། སེམས་བསྐྱེད་པ་རྣམས་དང་། བསམ་གྱིས་མི་ཁྱབ་པ་རྣམས་དང་། ལྡེམ་པོ་ངག་ལ་མཁས་པ་རྣམས་དང་། ཡེ་ཤེས་

57-1-55b

རྣམ་པར་འབྱེད་པ་ལ་མཁས་པ་རྣམས་དང་། སྙོམས་པར་འཇུག་པ་རྣམས་དང་། ཟད་པར་གྱི་སྐྱེ་མཆེད་རྣམས་དང་། རྣམ་པར་ཐར་པ་རྣམས་དང་། མངོན་པར་ཤེས་པ་རྣམས་དང་། རིག་པ་རྣམས་དང་། རྣམ་པར་
གྲོལ་བ་རྣམས་དང་། སྐྱེད་མོས་ཚལ་རྣམས་དང་། རིན་པོ་ཆེ་བཀོད་པ་རྣམས་དང་། མི་བསྐྱོད་པའི་སེམས་བསྐྱེད་པ་རྣམས་དང་། ལྷག་པའི་བསམ་པ་མི་གཏོང་བ་ལ་གནས་པ་རྣམས་དང་། རྒྱ་མཚོ་ལྟ་
བུའི་ཡེ་ཤེས་ལ་འཇུག་པ་རྣམས་དང་། རིན་པོ་ཆེ་ལྟ་བུའི་བྱང་ཆུབ་སེམས་དཔའི་གནས་པ་རྣམས་དང་། རྡོ་རྗེ་ལྟ་བུའི་སེམས་བསྐྱེད་པ་རྣམས་དང་། ཐེག་པ་ཆེན་པོའི་གོ་ཆ་རྣམས་དང་། རྩོམ་པ་ཆེན་པོ་
རྣམས་དང་། རྩོམ་པ་ཉམས་འོག་ཏུ་ཆུད་པར་བྱེད་པ་རྣམས་དང་། མི་ཕྱེད་པའི་དད་པ་རྣམས་དང་། ལུང་བསྟན་པ་རྣམས་དང་། དགེ་བའི་རྩ་བ་ཡོངས་སུ་བསྔོ་བ་རྣམས་དང་། ཡེ་ཤེས་ཁོང་དུ་ཆུད་པ་
རྣམས་དང་། སེམས་བསྐྱེད་པ་རྒྱ་ཆེ་བ་མཐའ་དང་དབུང་མེད་པ་རྣམས་དང་། གཏེར་རྣམས་དང་། སྡོམ་པ་རྣམས་དང་། དབང་རྣམ་པར་སྤྲུལ་པ་རྣམས་དང་། ཞིང་རྣམ་པར་སྤྲུལ་པ་རྣམས་དང་། ཆོས་རྣམ་
པར་སྤྲུལ་པ་རྣམས་དང་། སྨོན་ལམ་རྣམ་པར་སྤྲུལ་པ་རྣམས་དང་། སྤྱོད་ཡུལ་རྣམ་པར་སྤྲུལ་པ་རྣམས་དང་། ཡེ་ཤེས་རྣམ་པར་སྤྲུལ་པ་རྣམས་དང་། མངོན་པར་ཤེས་པ་རྣམ་པར་སྤྲུལ་པ་རྣམས་དང་། རྫུ་
འཕྲུལ་རྣམ་པར་སྤྲུལ་པ་རྣམས་དང་། སྟོབས་རྣམ་པར་སྤྲུལ་པ་རྣམས་དང་། རྣམ་པར་རོལ་པ་རྣམས་དང་། ཡུལ་རྣམས་དང་། སྟོབས་རྣམས་དང་། མི་འཇིགས་པ་རྣམས་དང་། བྱང་ཆུབ་སེམས་
དཔའི་ཆོས་མ་འདྲེས་པ་རྣམས་དང་། ལུས་རྣམས་དང་། ལུས་ཀྱི་ལས་རྣམས་དང་། གཟུགས་རྣམས་དང་། ངག་གི་ལས་རྣམས་དང་། སེམས་རྣམས་དང་། སེམས་བསྐྱེད་པ་རྣམས་དང་། སེམས་རྒྱས་པར་བྱེད་

57-1-56a

པ་རྣམས་དང་། དབང་པོ་རྣམས་དང་། བསམ་པ་རྣམས་དང་། ལྷག་པའི་བསམ་པ་རྣམས་དང་། སྦྱོར་བ་རྣམས་དང་། མོས་པ་རྣམས་དང་། འཇིག་རྟེན་གྱི་ཁམས་སུ་མོས་པ་ལ་འཇུག་པ་
རྣམས་དང་། བག་ཆགས་རྣམས་དང་། ལེན་པ་རྣམས་དང་། ནན་ཏན་རྣམས་དང་། འགྲུབ་པ་རྣམས་དང་། སངས་རྒྱས་ཀྱི་ཆོས་ལ་ངེས་པ་རྣམས་དང་། ཐེག་པ་རྣམས་དང་། མི་འགྱུར་བ་
རྣམས་དང་། བྱང་ཆུབ་སེམས་དཔའི་ངེས་པའི་ཆོས་རྣམས་དང་། ངེས་པར་འབྱུང་བའི་ལམ་རྣམས་དང་། སྐྱེས་བུ་དམ་པའི་མིང་ཐོབ་པ་རྣམས་དང་། ལམ་རྣམས་དང་། ལམ་གྱི་ཚད་རྣམས་
དང་། ལམ་གྱི་ཚོགས་རྣམས་དང་། ལམ་གྱི་སྒོམ་པ་རྣམས་དང་། ལམ་བཀོད་པ་ཐམས་ཅད་ལ་འང་དེ་བཞིན་དུ་བརྗོད་པར་བྱ་སྟེ། དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་གོ། །
དེ་ཅིའི་ཕྱིར་ཞེ་ན། ལྷུན་གྱིས་གྲུབ་པའི་ཡེ་ཤེས་བརྙེས་པའི་ཕྱིར་རོ། །འཇམ་དཔལ་འདི་ལྟ་སྟེ། དཔེར་ན་ཉི་མའི་དཀྱིལ་འཁོར་ནི་འཛམ་བུའི་གླིང་གི་སྣོད་ཆུས་གང་ཞིང་སྒྲིབ་པ་མེད་པ་རྣམ་པར་
དག་པ་ཐམས་ཅད་དུ་སྣང་སྟེ། ཉི་མའི་དཀྱིལ་འཁོར་ནི་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་བྱ་བ་འདི་
ལྟ་བུ་འདི་དག་འབྱུང་ངོ་འཇམ་དཔལ་དེ་བཞིན་དུ་དེ་བཞིན་གཤེགས་པ་ཡང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ན། འཇིག་རྟེན་གྱི་ཁམས་རེ་རེའི་གླིང་རེ་རེར་སེམས་ཅན་བསམ་
པ་ཇི་ལྟ་བ་དང་། འདུལ་བ་ཇི་ལྟ་བ་དེ་དག་གིས་ཅིག་ཅར་མཐོང་སྟེ། དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་སྐུ་ཐོགས་པ་

57-1-56b

མེད་པའི་ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་མཛད་པ་འདི་དག་ཀྱང་འབྱུང་ངོ་། །འཇམ་དཔལ་དེ་བཞིན་གཤེགས་པའི་སྐུ་མཐའ་ཡས་པ་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་
བྱིན་གྱིས་བརླབས་ཀྱང་བསྟན་པར་མི་ནུས་སོ། ། བམ་པོ་ལྔ་པ་སྟེ་ཐ་མ། འཇམ་དཔལ་དེ་ལ་དེ་བཞིན་གཤེགས་པའི་ཡུལ་ནི་དཔེས་བསྟན་པར་བྱ་སྟེ། དེ་ཅིའི་ཕྱིར་ཞེ་ན། སྐྱེས་
བུ་མཁས་པ་གང་དག་དཔེ་བཤད་པས་དོན་ཤེས་པར་འགྱུར་བ་ཡོད་པའི་ཕྱིར་རོ། །འཇམ་དཔལ་འདི་ལྟ་སྟེ། དཔེར་ན་མཚོ་དཔག་ཚད་འབུམ་ཕྲག་ལྔ་པ་བྱ་རོག་གིས་བཏུང་དུ་རུང་བར་མུ་དང་ཁ་ད་ཆད་དུ་གྱུར་པ། པད་
མའི་འདབ་མས་གཡོགས་པ་ཞིག་ཡོད་ལ། དེ་ལ་སྐྱེས་བུ་ལ་ལ་ཞིག་གིས་ལྕགས་ཀྱི་ཤིང་རྟ་ཕང་ལོ་རྩིབ་མ་སྟོང་ཡོད་པ། ནམ་མཁའ་ལྡིང་གི་མགྱོགས་པ་བས་ཀྱང་ལྷག་པའི་རྟ་དེ་ལྟ་བུར་མགྱོགས་པས་
ཤིང་རྟ་དྲངས་ཏེ། དེ་ལྟར་མགྱོགས་པའི་ཤིང་རྟ་དྲངས་ནས་ཕང་ལོ་ལའང་ཆུས་མི་རེག །རྟའི་དམིགས་པས་ཀྱང་པད་མའི་འདབ་མ་མི་རྡོལ་བ་དེ་ལྟ་བུའི་ཤིང་རྟ་དེས་དྲངས་པ་ལས་མཚོ་ཆེན་པོ་དེ་ནས་སྦྲུལ་གདུག་པ་
སྟེང་དུ་བྱུང་སྟེ། སྐད་ཅིག་གང་ལ་ཤིང་རྟ་བསྒྱུར་བའི་སྐད་ཅིག་དེ་ལ་སྦྲུལ་གདུག་པ་དེས་ཤིང་རྟ་དེ་ལན་བཅུར་བསྐོར་ཏེ། འཇམ་དཔལ་སྐད་ཅིག་གང་གས་སྦྲུལ་གདུག་པས་ཤིང་རྟ་དེ་ལན་ཅིག་བསྐོར་བའི་སྐད་ཅིག་
དེ་ལ་དགེ་སློང་ཀུན་དགའ་བོས་ཆོས་རྣམ་པ་བཅུ་བསྟན་པ་བཤད་དེ་དོན་ཀྱང་རིག་པར་བྱེད་དོ། །དགེ་སློང་ཀུན་དགའ་བོས་སྐད་ཅིག་གང་ལ་ཆོས་གཅིག་བསྟན་པ་བཤད་པའི་སྐད་ཅིག་དེ་ལ་དགེ་སློང་ཤཱ་རིའི་
བུས་ཆོས་རྣམ་པ་སྟོང་བསྟན་པ་བཤད་ནས་དོན་ཀྱང་རིག་པར་བྱེད་དོ། །དགེ་སློང་ཤཱ་རིའི་བུས་སྐད་ཅིག་གང་ལ་ཆོས་གཅིག་བསྟན་པ་བཤད་པའི་སྐད་ཅིག་དེ་ལ་གནས་བརྟན་མཽད་གལ་གྱི་བུས་འཇིག་

57-1-57a

འཇིག་རྟེན་གྱི་ཁམས་བརྒྱད་ཁྲི་འདའོ། །གནས་བརྟན་མཽད་གལ་གྱི་བུས་སྐད་ཅིག་གང་ལ་འཇིག་རྟེན་གྱི་ཁམས་གཅིག་འདས་པའི་སྐད་ཅིག་དེ་ལ། དེ་བཞིན་གཤེགས་པས་ཕྱོགས་བཅུའི་
འཇིག་རྟེན་གྱི་ཁམས་རབ་འབྱམ་ཐམས་ཅད་ཀྱི་གླིང་རེ་རེར་དགའ་ལྡན་གྱི་གནས་ན་གནས་པ་ལས་འཕོ་བ་དང་། སྐྱེ་བ་དང་། མངོན་པར་འབྱུང་བ་དང་། དཀའ་བ་སྤྱོད་པ་དང་། སྦྱོར་བ་དང་། བྱང་ཆུབ་ཀྱི་སྙིང་པོར་བཞུད་
པ་དང་། བདུད་འདུལ་བ་དང་། མངོན་པར་རྫོགས་པར་བྱང་ཆུབ་པ་དང་། ཆོས་ཀྱི་འཁོར་ལོ་བསྐོར་བ་དང་། མྱ་ངན་ལས་འདའ་བ་ཆེན་པོ་དང་། ཆོས་གནས་པ་དང་། ཆོས་ནུབ་པ་དུས་གཅིག་ཏུ་སྟོན་ཏོ། །མུ་
སྟེགས་ཅན་གྱི་གནས་ཀྱི་སྤྱོད་པ་དང་། སྐྱེས་པའི་རབས་ཐམས་ཅད་དུ་ཡང་དུས་གཅིག་ཏུ་སྣང་ངོ་། །དེ་ཅིའི་ཕྱིར་ཞེ་ན། མཁྱེན་པ་ཐོགས་པ་མེད་པ་དང་། གཟིགས་པ་ཐོགས་པ་མེད་པ་དབྱེར་མེད་པ་དང་མི་
རྟེན་ཅིང་དབྱེར་མེད་པའི་ཕྱིར་རོ། །འཇམ་དཔལ་འདི་ལྟ་སྟེ། །དཔེར་ན་རིན་པོ་ཆེ་བཻ་དཱུརྱ་ལས་དངོས་པོའི་དབང་གིས་གཞལ་དུ་མེད་པའི་བྱ་བ་དག་འབྱུང་སྟེ། བཻ་དཱུརྱ་ནི་མི་རྟོག་རྣམ་པར་མི་རྟོག་མོད་ཀྱི། འོན་ཀྱང་
མ་འདྲེས་པའི་ཆོས་དང་འཐུན་པའི་ཕྱིར་མི་རྟོག་ཅིང་ལྷུན་གྱིས་གྲུབ་པར་བྱ་བ་གཞལ་དུ་མེད་པ་དག་འབྱུང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལས་
ཀྱང་སེམས་ཅན་ཡོངས་སུ་སྨིན་པར་མཛད་པའི་དབང་གིས་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་དུས་གཅིག་ཏུ་སྐད་ཅིག་སྐད་ཅིག་ལ་མཛད་པ་གཞལ་དུ་མེད་པ་དག་འབྱུང་མོད་ཀྱི། འོན་ཀྱང་
དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་སྟེ། དེ་མི་རྟོག་ཅིང་ལྷུན་གྱིས་གྲུབ་པར་མཛད་པ་འདི་ལྟ་བུ་འདི་དག་འབྱུང་སྟེ། །མ་འདྲེས་པའི་ཆོས་དང་ལྡན་པའི་ཕྱིར་རོ། །འཇམ་དཔལ་འདི་

57-1-57b

ལྟ་སྟེ། དཔེར་ན་ཟླ་བའི་དཀྱིལ་འཁོར་དང་ཉི་མའི་དཀྱིལ་འཁོར་ནི་འཛམ་བུའི་གླིང་དུ་སྣོད་ཆུས་བཀང་བ་སྒྲིབ་པ་མེད་པ་རྣམ་པར་དག་པ་ཐམས་ཅད་དུ་ཅིག་ཆར་དུ་སྣང་ཡང་གནས་ནས་མི་གཡོའོ། །དེ་བཞིན་དུ་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་སེམས་ཅན་སྒྲིབ་པ་མེད་པའི་རྣམ་པར་དག་པ་དེ་དག་བསམ་པ་ཇི་ལྟ་བ་དང་། ཇི་ལྟར་
འདུལ་བ་བཞིན་དུ་དེ་བཞིན་གཤེགས་པ་མཐོང་སྟེ། དེ་བཞིན་གཤེགས་པ་ནི་དགའ་ལྡན་གནས་ནས་གཡོས་པ་ཡང་མེད་མོད་ཀྱི། འོན་ཀྱང་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་དུ་
མཛད་པ་རྩོམ་པ་ཐམས་ཅད་ཀྱང་སྣང་ངོ་། །དེ་ཅིའི་ཕྱིར་ཞེ་ན། མི་གཡོ་བའི་ཡེ་ཤེས་བརྙེས་པའི་ཕྱིར་རོ། །འཇམ་དཔལ་འདི་ལྟ་སྟེ། དཔེར་ན་ལས་ཀྱི་འབྲས་བུ་རྣམ་པར་སྨིན་པ་རབ་དང་། འབྲིང་དང་། 
ཐ་མའི་དབང་གིས་སེམས་ཅན་རྣམས་ཀྱི་འདུ་བྱེད་རབ་འབྲིང་ཐ་མ་དག་འབྱུང་སྟེ། འདུ་བྱེད་ནི་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་འདུ་བྱེད་དེ་དག་མ་འདྲེས་པའི་ཆོས་དང་ལྡན་པའི་ཕྱིར་དེ་མི་
རྟོག་ཅིང་ལྷུན་གྱིས་གྲུབ་པར་བྱ་བ་དེ་ལྟ་བུ་དེ་དག་འབྱུང་ངོ་། །དེ་བཞིན་དུ་རྣམ་པར་སྨིན་པ་ཐ་མ་དང་། འབྲིང་དང་། རབ་ཀྱིས་དབང་གིས་སེམས་ཅན་ཐམས་ཅད་ཀྱིས་དེ་བཞིན་གཤེགས་པ་ཐ་མ་དང་། 
འབྲིང་དང་། རབ་ཏུ་མཐོང་སྟེ། དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་མི་རྟོག་ཅིང་ལྷུན་གྱིས་གྲུབ་པར་མཛད་པ་དེ་ལྟ་བུ་དེ་དག་ཀྱང་འབྱུང་ངོ་། །
འཇམ་དཔལ་འདི་ལྟ་སྟེ། དཔེར་ན་སྤྲིན་ལས་རོ་གཅིག་པའི་ཆར་འབབ་སྟེ། བབ་ནས་སྣོད་ཀྱི་བྱེ་བྲག་གིས་ཁ་དོག་སྣ་ཚོགས་དང་། དྲི་སྣ་ཚོགས་སུ་གྱུར་ཏེ། སྤྲིན་ནི་མི་རྟོག །རྣམ་པར་མི་རྟོག་མོད་ཀྱི། 

57-1-58a

འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་བྱ་བ་དེ་ལྟ་བུ་དེ་དག་ཀྱང་འབྱུང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་པའི་ཆོས་ཀྱི་དབྱིངས་
ཀྱི་རོ་གཅིག་སྟེ། དེ་སེམས་ཅན་ཡོངས་སུ་སྨིན་པར་བྱེད་པའི་དབང་གིས་ཆོས་ཀྱི་དབྱིངས་ཐ་དད་པར་སྣང་ཡང་དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་
པའི་ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་མཛད་པ་དེ་ལྟ་བུ་དེ་དག་ཀྱང་འབྱུང་ངོ་འཇམ་དཔལ་འདི་ལྟ་སྟེ། དཔེར་ན་ནོར་བུ་རིན་པོ་ཆེ་དབང་གི་རྒྱལ་པོ་གང་དུ་འབྱུང་བ་དེར་ལྕགས་དང་ལྕགས་ཀྱི་ཡོ་བྱད་རྣམས་མི་
འབྱུང་ངོ་། །དེ་ཅིའི་ཕྱིར་ཞེ་ན། མ་འདྲེས་པའི་ཆོས་དང་ལྡན་པའི་ཕྱིར་རོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་གང་དུ་བྱུང་བ་དེར་མེའི་འོད་རྣམས་དང་། གློག་གི་འོད་རྣམས་མི་འབྱུང་ངོ་། །
དེར་ཉི་མའི་འོད་རྣམས་མི་འབྱུང་ངོ་། །དེར་ནོར་བུའི་འོད་རྣམས་མི་འབྱུང་ངོ་། །དེར་ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་
ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བའི་འོད་རྣམས་མི་འབྱུང་ངོ་། །དེར་རྒྱལ་པོ་རྣམས་ཀྱི་བཀའ་མི་འབྱུང་ངོ་། །དེར་རིགས་བཞི་རྣམས་མི་འབྱུང་ངོ་། །དེར་མི་ཁོམ་པར་སྐྱེ་བ་
རྣམས་མི་འབྱུང་ངོ་། །དེར་སེམས་ཅན་དམྱལ་བ་དང་། དུད་འགྲོ་དང་། ཡི་དགས་དང་། གཤིན་རྗེའི་འཇིག་རྟེན་དུ་སྐྱེ་བ་རྣམས་མི་འབྱུང་ངོ་། །དེར་མི་དགེ་བ་བཅུའི་ལས་ཀྱི་ལམ་རྣམས་མི་འབྱུང་ངོ་། །
དེར་ཉོན་མོངས་པ་ཐམས་ཅད་མི་འབྱུང་ངོ་། །དེར་འཁྲུག་པ་ཐམས་ཅད་མི་འབྱུང་ངོ་། །དེར་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་དང་། གཅེར་བུ་དང་། འཚོ་བ་པ་རྣམས་མི་འབྱུང་སྟེ། 

57-1-58b

དེ་བཞིན་གཤེགས་པ་ནི་མི་རྟོག་རྣམ་པར་མི་རྟོག་མོད་ཀྱིས། འོན་ཀྱང་མ་འདྲེས་པའི་ཆོས་དང་ལྡན་ཞིང་ཡུལ་ཆགས་པ་མེད་པའི་ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་མཛད་པ་དེ་ལྟ་བུ་དེ་དག་ཀྱང་འབྱུང་ངོ་། །འཇམ་དཔལ་དེ་བཞིན་གཤེགས་
པའི་ཡུལ་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་བྱིན་གྱིས་བརླབས་ཀྱང་བསྟན་པར་མི་ནུས་སོ། །འཇམ་དཔལ་དེ་ལ་དེ་བཞིན་གཤེགས་པའི་ལྷུན་གྱིས་གྲུབ་པའི་ཡེ་ཤེས་ནི་འཇམ་དཔལ་འཇིག་རྟེན་གྱི་ཁམས་ལྔ་བཅུའི་
རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། ཕྱོགས་བཅུའི་འཇིག་རྟེན་གྱི་ཁམས་རེ་རེ་དང་། གླིང་རེ་རེར་སྐད་ཅིག་སྐད་ཅིག་ལ་དེ་བཞིན་གཤེགས་པའི་གཟུགས་ཀྱི་སྐུ་ཁ་དོག་དང་། རྣམ་པར་གནས་པ་དང་
འཇུག་པ་དུས་གཅིག་ཏུ་འབྱུང་བ་དག་ནི་ཆེས་མང་ངོ་། །དེ་ཅིའི་ཕྱིར་ཞེ་ན། མ་འདྲེས་པའི་ཆོས་དང་ལྡན་པའི་ཕྱིར་རོ། །འཇམ་དཔལ་འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་གྲངས་མེད་པའི་རྡུལ་ཕྲ་རབ་ཀྱི་རྡུལ་རྣམས་ནི་
རབ་ཏུ་ཉུང་གི། དེ་བཞིན་གཤེགས་པའི་ཡེ་ཤེས་ལྷུན་གྱིས་གྲུབ་པའི་ཕྱོགས་བཅུའི་འཇིག་རྟེན་གྱི་ཁམས་རེ་རེ་དང་། གླིང་རེ་རེར་སེམས་ཅན་རྣམས་དགེ་བའི་རྩ་བ་གཞན་དང་གཞན་དག་རྩོམ་པར་སྦྱོར་བ་དང་། ལས་དང་བཟོའི་གནས་ཐམས་ཅད་པ་སྦྱོར་བ་དག་
འབྱུང་བ་ནི་ཆེས་མང་སྟེ། དེ་བཞིན་གཤེགས་པ་ནི་མི་རྟོག་རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་མཛད་པ་དེ་ལྟ་བུ་དེ་དག་ཀྱང་འབྱུང་ངོ་། །འཇམ་དཔལ་ཕྱོགས་བཅུའི་འཇིག་རྟེན་གྱི་
ཁམས་རབ་འབྱམ་ཐམས་ཅད་ནི་མུ་སྟེགས་ཅན་གྱི་གནས་ཐམས་ཅད་དང་། འཇིག་རྟེན་པ་དང་། འཇིག་རྟེན་ལས་འདས་པའི་ལས་བྱ་བ་ཐམས་ཅད་གང་ཅི་འབྱུང་བ་དེ་དག་ཐམས་ཅད་ནི་དེ་བཞིན་གཤེགས་པའི་ལྷུན་གྱིས་གྲུབ་པའི་ཡེ་ཤེས་ཀྱིས་འབྱུང་ངོ་། །དེ་ཅིའི་ཕྱིར་ཞེ་ན། 
མ་འདྲེས་པའི་ཆོས་དང་ལྡན་པའི་ཕྱིར་རོ། །འཇམ་དཔལ་འདི་ལྟ་སྟེ། དཔེར་ན་ས་ལ་རྟེན། ས་ལ་གནས་ནས་ས་བོན་ཐམས་ཅད་དང་། རྩྭ་དང་ཤིང་གེལ་པ་དང་། རྩི་དང་ནགས་ཚལ་ཐམས་ཅད་འཕེལ་ཞིང་རྒྱས་ལ་ཡངས་པར་འགྱུར་ཏེ་ས་ནི་མི་རྟོག །རྣམ་པར་མི་རྟོག་

57-1-59a

མོད་ཀྱི་འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་བྱ་བ་དེ་ལྟ་བུ་དེ་དག་ཀྱང་འབྱུང་ངོ་། །འཇམ་དཔལ་དེ་བཞིན་དུ་དེ་བཞིན་གཤེགས་པ་ལ་རྟེན། དེ་བཞིན་གཤེགས་པ་ལ་གནས་ནས་ཕྱོགས་བཅུའི་
འཇིག་རྟེན་གྱི་ཁམས་རབ་འབྱམ་ཐམས་ཅད་ཀྱི་མུ་སྟེགས་ཅན་སྤྱོད་པ་པ་དང་། ཀུན་དུ་རྒྱུ་དང་། གཅེར་བུ་པ་ལ་སོགས་པ་མུ་སྟེགས་ཅན་གྱི་གནས་ཐམས་ཅད་དང་། སེམས་ཅན་ཐམས་ཅད་ཀྱི་འཇིག་རྟེན་པ་དང་། འཇིག་རྟེན་ལས་འདས་པའི་དགེ་བའི་
རྩ་བ་ཐམས་ཅད་འཕེལ་ཞིང་རྒྱས་པ་ཡངས་པར་འགྱུར་ཏེ། དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་རྣམ་པར་མི་རྟོག་ཅིང་། ལྷུན་གྱིས་གྲུབ་པར་མཛད་པ་དེ་ལྟ་བུ་དེ་དག་ཀྱང་འབྱུང་ངོ་། །འཇམ་
དཔལ་འདི་ལྟ་སྟེ་དཔེར་ན་གང་དག་ཟུག་རྔུ་འབྱིན་པའི་སྨན་ལ་རེག་པ་དེ་དག་གི་ཟུག་རྔུ་ཐམས་ཅད་འབྱིན་ཏེ། ཟུག་རྔུ་འབྱིན་པའི་སྨན་ནི་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་རྣམ་པར་མི་རྟོག་ཅིང་ལྷུན་གྱིས་
གྲུབ་པར་བྱ་བ་དེ་ལྟ་བུ་དེ་དག་ཀྱང་འབྱུང་ངོ་། །འཇམ་དཔལ་དེ་བཞིན་དུ་གང་དག་ཐ་ན་དེ་བཞིན་གཤེགས་པ་རི་མོར་བྲིས་པ་འམ། གླེགས་བམ་ལ་བྲིས་པ་ལ་རེག་ཀྱང་རུང་སྟེ། རྒྱུ་དེས་དེ་དག་གི་འདོད་ཆགས་དང་། ཞེ་སྡང་དང་། གཏི་མུག་དང་། ཉོན་མོངས་པ་
ཐམས་ཅད་ཀྱི་ཟུག་རྔུ་འབྱིན་ཏེ། དེ་བཞིན་གཤེགས་པ་ནི་མི་རྟོག་རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་མཛད་པ་དེ་ལྟ་བུ་དེ་དག་ཀྱང་འབྱུང་ངོ་། །འཇམ་དཔལ་འདི་ལྟ་སྟེ། དཔེར་ན་
རིན་པོ་ཆེའི་རྒྱལ་པོ་ཡིད་བཞིན་གྱི་ནོར་བུ་ནི་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པར་འགྱུར་ཏེ། ཡིད་བཞིན་གྱི་ནོར་བུ་རིན་པོ་ཆེ་ནི་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་
ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་བྱ་བ་དེ་ལྟ་བུ་དེ་དག་ཀྱང་འབྱུང་ངོ་། །འཇམ་དཔལ་དེ་བཞིན་དུ་ལྷ་དང་། མི་དང་། ལྷ་མ་ཡིན་དང་། བྱང་ཆུབ་སེམས་དཔའ་གང་དག་ཆོས་བསྟན་པ་གང་འདོད་པ་དེ་དག་དེ་བཞིན་གཤེགས་པའི་གན་དུ་འགྲོ་ཞིང་ཆོས་

57-1-59b

བསྟན་པ་དེ་དག་དེ་བཞིན་གཤེགས་པ་ལས་ཉན་ཀྱང་དེ་བཞིན་གཤེགས་པ་ནི་མི་རྟོག །རྣམ་པར་མི་རྟོག་མོད་ཀྱི། འོན་ཀྱང་མ་འདྲེས་པའི་ཆོས་དང་ལྡན་པའི་ཕྱིར་རྣམ་པར་མི་རྟོག་ཅིང་ལྷུན་གྱིས་གྲུབ་པར་མཛད་པ་དེ་ལྟ་བུ་དེ་དག་ཀྱང་འབྱུང་ངོ་། །
འཇམ་དཔལ་དེ་བཞིན་གཤེགས་པའི་ལྷུན་གྱིས་གྲུབ་པའི་ཡེ་ཤེས་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་བྱིན་གྱི་བརླབས་ཀྱང་བསྟན་པར་མི་ནུས་སོ། །འཇམ་དཔལ་དེ་ལ་དེ་བཞིན་གཤེགས་པའི་བསམ་
གྱིས་མི་ཁྱབ་པ་ནི་འཇམ་དཔལ་དེ་བཞིན་གཤེགས་པ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ན་འཇིག་རྟེན་གྱི་ཁམས་རེ་རེ་དང་། རྡུལ་ཕྲ་རབ་རེ་རེ་དང་། འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་འཇིག་
རྟེན་གྱི་ཁམས་རྒྱ་མཚོ་དག་ལ་འཇུག་སྟེ། འཇིག་རྟེན་གྱི་ཁམས་རེ་རེ་དང་། གླིང་རེ་རེའི་ཡང་འཇིག་རྟེན་གྱི་ཁམས་རྒྱ་མཚོ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་ལྔ་བཅུའི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། དེ་བཞིན་
གཤེགས་པའི་བསོད་ནམས་ཀྱི་ཚོགས་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་
ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་ནི་ཆེས་མང་ངོ་། །དེ་བཞིན་དུ་ཡེ་ཤེས་ཀྱི་ཚོགས་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་
སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། མ་འདྲེས་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་བཞིན་དུ་ཕ་རོལ་དུ་ཕྱིན་པ་ཐ་དད་
པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་

57-1-60a

མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་བཞིན་དུ་ས་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་
སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་བཞིན་དུ་
གཟུངས་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་
འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་བཞིན་དུ་ཏིང་ངེ་འཛིན་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་
འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་བཞིན་དུ་རྣམ་པར་ཐར་པ་
ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། 
ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་བཞིན་དུ་སོ་སོ་ཡང་དག་པར་རིག་པ་མཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་
འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་བཞིན་དུ་མངོན་པར་ཤེས་པ་རྒྱ་

57-1-60b

མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་
མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་བཞིན་དུ་སྨོན་ལམ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་
པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་བཞིན་དུ་བརྩོན་འགྲུས་རྩོམ་པ་རྒྱ་མཚོ་གྲངས་མེད་པའི་བྱེ་བྲག་
བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་
བསྐལ་པར་བྱིན་གྱིས་རློབ་པ་དག་གོ། །དེ་བཞིན་དུ་དབུགས་འབྱིན་པ་རྙེད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་
པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་བཞིན་ཏུ་བྱང་ཆུབ་སེམས་དཔའ་ལ་འཇུག་པ་རྒྱ་མཚོ་གྲངས་
མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་
མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་བཞིན་དུ་དེ་བཞིན་གཤེགས་པ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་

57-1-61a

བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་བཞིན་དུ་སེམས་ཅན་གྱི་
བསམ་པ་དང་སྤྱོད་པ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་
རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་བཞིན་དུ་འཇིག་རྟེན་གྱི་ཁམས་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་
པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ། །དེ་
བཞིན་དུ་བསྐལ་པ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་རྣམ་པར་གཞག་པ་ལས་འདས་པ་སྐད་ཅིག་སྐད་ཅིག་ལ་འབྱུང་བ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་
ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པ་དག་གོ། །འཇམ་དཔལ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ན་འདས་པ་དང་། མ་འོངས་
པ་དང་། ད་ལྟར་བྱུང་བའི་འཇིག་རྟེན་གྱི་ཁམས་རྒྱ་མཚོ་གང་དག་ཡོད་པ་དེ་དག་དེ་བཞིན་གཤེགས་པའི་སྤུའི་ཁུང་བུ་རེ་རེར་འཇིག་རྟེན་གྱི་ཁམས་འཚོགས་སོ། །དེ་ཅིའི་ཕྱིར་ཞེ་ན། མཐའ་དང་དབུང་མེད་པའི་ཆོས་བརྙེས་
པའི་ཕྱིར་རོ། །འཇམ་དཔལ་དེ་བཞིན་གཤེགས་པའི་བསམ་གྱི་མི་ཁྱབ་པ་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་བྱིན་གྱིས་བརླབས་ཀྱང་བསྟན་པར་མི་ནུས་སོ། །

57-1-61b

འཇམ་དཔལ་དེ་ལ་དེ་བཞིན་གཤེགས་པའི་ཀུན་དུ་གཟིགས་པ་ནི་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ན་སེམས་ཅན་འཆི་འཕོ་བ་དང་། སྐྱེ་བ་དང་། བདེ་འགྲོར་འགྲོ་བ་དང་། ངན་འགྲོར་
འགྲོ་བ་རྣམས་དེ་བཞིན་གཤེགས་པས་གཟིགས་ཏེ། དེ་བཞིན་དུ་གཙུག་ཏོར་གྱིས་ཀྱང་གཟིགས་སོ། །དེ་བཞིན་དུ་མཛོད་སྤུས་ཀྱང་གཟིགས་སོ། །དེ་བཞིན་དུ་མཚན་རེ་རེས་ཀྱང་གཟིགས་
སོ། །དེ་བཞིན་དུ་དཔེ་བྱད་བཟང་པོ་རེ་རེས་ཀྱང་གཟིགས་སོ། །དེ་བཞིན་དུ་སྤུའི་ཁུང་བུ་རེ་རེས་ཀྱང་གཟིགས་སོ། །དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ན་
སེམས་ཅན་འཆི་འཕོ་བ་དང་། སྐྱེ་བ་དང་། བདེ་འགྲོར་འགྲོ་བ་དང་། ངན་འགྲོར་འགྲོ་བ་དག་དུས་གཅིག་ཏུ་གཟིགས་སོ། །འཇམ་དཔལ་དེ་བཞིན་གཤེགས་པའི་ཀུན་དུ་གཟིགས་པ་མདོར་
བཤད་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་བྱིན་གྱིས་བརླབས་ཀྱིས་བསྟན་པར་མི་ནུས་སོ། །འཇམ་དཔལ་དེ་ལ་དེ་བཞིན་གཤེགས་པའི་གྲགས་པ་ནི་འཇམ་དཔལ་དེ་བཞིན་
གཤེགས་པ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ན་འཇིག་རྟེན་ཁམས་རེ་རེ་དང་། གླིང་རེ་རེ་དང་། རྡུལ་ཕྲ་རབ་ཀྱི་རྡུལ་རེ་རེས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་འཇིག་རྟེན་
གྱི་ཁམས་རྒྱ་མཚོ་དག་འཇུག་ཅིང་སེམས་ཀྱི་སྐད་ཅིག་ལ་འཇིག་རྟེན་གྱི་ཁམས་རེ་རེ་དང་། གླིང་རེ་རེར་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་རྣམ་པར་འཕྲུལ་པ་ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ་
ཐམས་ཅད་འབྱུང་སྟེ། སེམས་ཅན་ཡོངས་སུ་སྨིན་པར་བྱ་བའི་ཕྱིར་ཕྱི་མའི་མཐའི་མུའི་བསྐལ་པར་བྱིན་གྱིས་རློབ་སྟེ། མ་འདྲེས་པའི་ཆོས་དང་ལྡན་པའི་ཕྱིར་རོ། །དེ་བཞིན་དུ་ཞིང་རྣམ་པར་

57-1-62a

འཕྲུལ་པ་དང་། ཆོས་རྣམ་པར་འཕྲུལ་པ་དང་། སྐུ་རྣམ་པར་འཕྲུལ་པ་དང་། སྨོན་ལམ་རྣམ་པར་འཕྲུལ་པ་དང་། སྤྱོད་ཡུལ་རྣམ་པར་འཕྲུལ་པ་དང་། ཡེ་ཤེས་རྣམ་པར་འཕྲུལ་པ་དང་། མངོན་པར་ཤེས་པ་
རྣམ་པར་འཕྲུལ་པ་དང་། རྫུ་འཕྲུལ་རྣམ་པར་འཕྲུལ་པ་དང་། སྟོབས་རྣམ་པར་འཕྲུལ་པ་དེ་ལྟ་བུ་ལ་སོགས་པ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་རྣམ་པར་འཕྲུལ་པ་ཐོགས་པ་མེད་པ། སྒྲིབ་པ་མེད་པ། དབྱེར་
མེད་པ། ནམ་མཁའི་ཁམས་རྒྱས་པར་འགེངས་པ་དག་སྐད་ཅིག་སྐད་ཅིག་ལ་འབྱུང་སྟེ། སེམས་ཅན་ཡོངས་སུ་སྨིན་པར་བྱ་བའི་ཕྱིར་ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པའོ། །དེ་ཅིའི་ཕྱིར་ཞེ་ན། 
མ་འདྲེས་པའི་ཆོས་དང་ལྡན་པའི་ཕྱིར་རོ། །འཇམ་དཔལ་དེ་བཞིན་གཤེགས་པའི་གྲགས་པ་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་བྱིན་གྱིས་བརླབས་ཀྱང་བསྟན་པར་མི་ནུས་སོ། །
འཇམ་དཔལ་དེ་ལ་དེ་བཞིན་གཤེགས་པའི་དབྱེར་མེད་ཅིང་མི་གནས་པ་ནི་འཇམ་དཔལ་དེ་བཞིན་གཤེགས་པ་འཇིག་རྟེན་གྱི་ཁམས་འདི་ན་ཐ་དད་ལ་འཇིག་རྟེན་གྱི་ཁམས་གཞན་དུ་གནས་པ་མ་ཡིན་ནོ། །དེ་བཞིན་གཤེགས་
པ་གླིང་འདི་ན་ཐ་དད་ལ་གླིང་གཞན་དུ་གནས་པ་མ་ཡིན་ནོ། །དེ་བཞིན་གཤེགས་པ་ཁྱིམ་འདི་ན་ཐ་དད་ལ་ཁྱིམ་གཞན་དུ་གནས་པ་མ་ཡིན་ནོ། །དེ་བཞིན་གཤེགས་པ་ལྷའི་རིས་འདི་ན་ཐ་དད་ལ་ལྷའི་རིས་གཞན་
དུ་གནས་པ་མ་ཡིན་ནོ། །དེ་བཞིན་གཤེགས་པ་དུད་འགྲོའི་སྐྱེ་གནས་སུ་སྐྱེ་བ་འདི་ན་ཐ་དད་ལ་དུད་འགྲོའི་སྐྱེ་གནས་སུ་སྐྱེ་བ་གཞན་དུ་གནས་པ་མ་ཡིན་ནོ། །དེ་
བཞིན་གཤེགས་པ་ཡི་དགས་ཀྱི་འགྲོ་བ་འདི་ན་ཐ་དད་ལ་ཡི་དགས་ཀྱི་འགྲོ་བ་གཞན་དུ་གནས་པ་མ་ཡིན་ནོ། །དེ་བཞིན་གཤེགས་པ་སེམས་ཅན་དམྱལ་བའི་འགྲོ་བ་འདི་ན་ཐ་དད་ལ་སེམས་ཅན་དམྱལ་བའི་འགྲོ་བ་དེ་

57-1-62b

གཞན་དུ་གནས་པ་མ་ཡིན་ནོ། །དེ་བཞིན་གཤེགས་པ་འདོད་པའི་ཁམས་ན་ཐ་དད་ལ་གཟུགས་ཀྱི་ཁམས་སུ་གནས་པ་མ་ཡིན་ནོ། །འཇམ་དཔལ་དེ་བཞིན་གཤེགས་པའི་དབྱེར་མེད་ཅིང་མི་གནས་པ་
མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་བྱིན་གྱིས་བརླབས་ཀྱང་བསྟན་པར་མི་ནུས་སོ། །འཇམ་དཔལ་དེ་ལ་དེ་བཞིན་གཤེགས་པའི་སྐུ་ཐོགས་པ་མེད་པ་ནི་ཕྱོགས་བཅུའི་
འཇིག་རྟེན་གྱི་ཁམས་རབ་འབྱམ་དག་ན་སངས་རྒྱས་ཀྱི་ཞིང་གང་དག་ཡོད་པ་དེ་དག་གི་ནམ་མཁའ་ཅི་འདྲ་བའི་མཐའ་ནི་ཡོད་སྲིད་ཀྱི། དུས་གསུམ་གྱི་ཕྱོགས་མཐའ་ཡས་པ་དག་ན་རྒྱལ་བའི་གཙུག་ཏོར་འབྱུང་བ་དང་། 
འཇིག་པར་སྣང་བ་རྒྱལ་བའི་གཙུག་ཏོར་གྱི་མཐའ་ནི་ཕྱོགས་རྣམས་ནི་མི་རྙེད་དོ། །དེ་དག་གི་ནམ་མཁའ་ཅི་འདྲ་བའི་མཐའ་ནི་ཡོད་སྲིད་ཀྱི། དེ་བཞིན་དུ་རྒྱལ་བའི་མཛོད་སྤུ་དང་། དེ་བཞིན་དུ་མཚན་རེ་རེ་དང་། 
དེ་བཞིན་དུ་དཔེ་བྱད་བཟང་པོ་རེ་རེ་དང་། དེ་བཞིན་དུ་སྤུའི་ཁུང་བུ་རེ་རེའི་མཐའ་ནི་ཕྱོགས་རྣམས་ན་མི་རྙེད་དོ། །ལྷ་དང་། མི་དང་། བྱང་ཆུབ་སེམས་དཔའ་གང་དག་ཆོས་ཀྱི་ཚུལ་བསྟན་པ་ཇི་ལྟ་བུས་འདུལ་
བ་དེ་དག་གིས་ཆོས་ཀྱི་ཚུལ་བསྟན་པ་དེ་འདྲ་བ་དག་འབྱུང་བར་ཤེས་ཏེ། དེ་ལ་ལྷ་དང་། མི་དང་། བྱང་ཆུབ་སེམས་དཔའ་ཁ་ཅིག་གིས་ནི་གཙུག་ཏོར་ལས་བསོད་ནམས་ཀྱི་ཚོགས་རྒྱ་མཚོ་གྲངས་མེད་པའི་བྱེ་བྲག་
བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་ཡེ་ཤེས་ཀྱི་ཚོགས་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་ཕ་རོལ་ཏུ་ཕྱིན་པ་རྒྱ་མཚོ་གྲངས་མེད་
པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་ས་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་གཟུངས་རྒྱ་མཚོ་གྲངས་མེད་པའི་བྱེ་བྲག་བསྟན་

57-1-63a

པ་དག་འབྱུང་བར་ཤེས་སོ། །ཁ་ཅིག་གིས་ནི་ཏིང་ངེ་འཛིན་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་རྣམ་པར་ཐར་པ་རྒྱ་མཚོ་གྲངས་མེད་པའི་བྱེ་བྲག་
བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་སོ་སོ་ཡང་དག་པར་རིག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་མངོན་པར་ཤེས་པ་རྒྱ་མཚོ་གྲངས་
མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་སྨོན་ལམ་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་བརྩོན་འགྲུས་རྩོམ་པ་རྒྱ་མཚོ་གྲངས་
མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་དབུགས་འབྱིན་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་
གིས་ནི་བྱང་ཆུབ་སེམས་དཔའ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་དེ་བཞིན་གཤེགས་པ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་
དག་འབྱུང་བར་ཤེས་སོ། །ཁ་ཅིག་གིས་ནི་སེམས་ཅན་གྱི་བསམ་པ་དང་སྤྱོད་པ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་འཇིག་རྟེན་གྱི་ཁམས་ལ་
འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་བསྐལ་པ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་གིས་
ནི་དུས་གསུམ་ལ་འཇུག་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ཁ་ཅིག་གིས་ནི་དུས་གསུམ་བསྟན་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །

57-1-63b

ཁ་ཅིག་གིས་ནི་མི་སྐྱོ་བའི་སེམས་བསྐྱེད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །ལྷ་དང་། མི་དང་། བྱང་ཆུབ་སེམས་དཔའ་ཁ་ཅིག་གིས་ནི་གཙུག་ཏོར་ནས་དབྱེར་མེད་པའི་ཡེ་ཤེས་རྒྱ་མཚོ་
གྲངས་མེད་པའི་བྱེ་བྲག་བསྟན་པ་དག་འབྱུང་བར་ཤེས་སོ། །དེ་བཞིན་དུ་ལྷ་དང་། མི་དང་། བྱང་ཆུབ་སེམས་དཔའ་བསམ་པ་ཇི་ལྟ་བ་དང་། འདུལ་བ་ཇི་ལྟ་བ་ཞིང་ཐམས་ཅད་ཀྱི་རྡུལ་སྙེད་དག་གིས་སེམས་ཀྱི་
སྐད་ཅིག་སེམས་ཀྱི་སྐད་ཅིག་ལ་དེ་བཞིན་དུ་མཛོད་སྤུ་དང་། དེ་བཞིན་དུ་མཚན་རེ་རེ་དང་། དེ་བཞིན་དུ་དཔེ་བྱད་བཟང་པོ་རེ་རེ་དང་། སྤུའི་ཁུང་བུ་རེ་རེ་ནས་ཆོས་ཐ་དད་པ་རྒྱ་མཚོའི་བྱེ་བྲག་བསྟན་པ་དག་འབྱུང་བར་ཤེས་
སོ། །འཇམ་དཔལ་དེ་བཞིན་གཤེགས་པའི་སྐུ་ཐོགས་པ་མེད་པ་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་བྱིན་གྱིས་བརླབས་ཀྱང་བསྟན་པར་མི་ནུས་སོ། །འཇམ་དཔལ་དེ་
ལ་དེ་བཞིན་གཤེགས་པའི་སྤྱི་གཙུག་བལྟར་མི་མཐོང་བ་ནི་འཇམ་དཔལ་འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་དག་ན་རྡུལ་ཕྲ་རབ་ཀྱི་རྡུལ་ཡོད་པ་དག་ནི་རབ་ཏུ་ཉུང་གི། དེ་བཞིན་གཤེགས་
པའི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་དག་ནི་ཆེས་མང་ངོ་། །དེ་ལ་བྱང་ཆུབ་སེམས་དཔའ་ཁ་ཅིག་གི་ཁྲུན་ནི་དཔག་ཚད་ཙམ་མོ། །བྱང་ཆུབ་སེམས་དཔའ་ཁ་ཅིག་གི་ཁྲུན་ནི་དཔག་ཚད་བཅུ་
དང་། ཉི་ཤུ་དང་། སུམ་བཅུ་དང་། བཞི་བཅུའོ། །བྱང་ཆུབ་སེམས་དཔའ་ཁ་ཅིག་གི་ཁྲུན་ནི་དཔག་ཚད་བརྒྱའོ། །བྱང་ཆུབ་སེམས་དཔའ་ཁ་ཅིག་གི་ཁྲུན་ནི་དཔག་ཚད་བརྒྱ་ཕྲག་བཅུ་དང་། ཉི་ཤུ་དང་། སུམ་བཅུ་
དང་། བཞི་བཅུའོ། །འཁོར་དེ་ཉིད་ན་བྱང་ཆུབ་སེམས་དཔའ་ཁ་ཅིག་གི་ཁྲུན་ནི་དཔག་ཚད་སྟོང་ངོ་། །འཁོར་དེ་ཉིད་ན་བྱང་ཆུབ་སེམས་དཔའ་ཁ་ཅིག་གི་ཁྲུན་ནི་དཔག་ཚད་སྟོང་ཕྲག་བཅུ་དང་། ཉི་ཤུ་དང་། སུམ་

57-1-64a

བཅུ་དང་། བཞི་བཅུ་དང་། ལྔ་བཅུའོ། །བྱང་ཆུབ་སེམས་དཔའ་ཁ་ཅིག་གི་ཁྲུན་ནི་དཔག་ཚད་བྱེ་བའོ། །བྱང་ཆུབ་སེམས་དཔའ་ཁ་ཅིག་གི་ཁྲུན་ནི་དཔག་ཚད་བྱེ་བ་ཕྲག་བཅུ་དང་། ཉི་ཤུ་དང་། སུམ་བཅུ་དང་། བཞི་བཅུ་
དང་། ལྔ་བཅུའོ། །བྱང་ཆུབ་སེམས་དཔའ་ཁ་ཅིག་གི་ཁྲུན་ནི་དཔག་ཚད་བྱེ་བ་ཕྲག་བརྒྱའོ། །བྱང་ཆུབ་སེམས་དཔའ་ཁ་ཅིག་གི་ཁྲུན་ནི་དཔག་ཚད་བྱེ་བ་ཕྲག་སྟོང་ངོ་། །བྱང་ཆུབ་
སེམས་དཔའ་ཁ་ཅིག་གི་ཁྲུན་ནི་དཔག་ཚད་བྱེ་བ་སྟོང་ཕྲག་བཅུ་དང་། ཉི་ཤུ་དང་། སུམ་བཅུ་དང་། བཞི་བཅུ་དང་། ལྔ་བཅུ་ཡོད་དེ། དེ་དག་ཐམས་ཅད་ཀྱིས་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་
ཐམས་ཅད་དང་། གླིང་ཐམས་ཅད་ན་དུས་གཅིག་ཏུ་དེ་བཞིན་གཤེགས་པ་ཉིས་འགྱུར་དུ་མཐོང་ངོ་། །འཇམ་དཔལ་གལ་ཏེ་བྱང་ཆུབ་སེམས་དཔའ་རྣམ་པར་ཐར་པ་བསམ་གྱིས་མི་ཁྱབ་པ་ལ་གནས་པ་གང་ལ་
ལ་ཞིག་སེམས་ཀྱི་སྐད་ཅིག་སེམས་ཀྱི་སྐད་ཅིག་ལ། འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་གོམ་པ་འདོར་བས་སྟེང་གི་ཕྱོགས་ལོགས་སུ་སོང་སྟེ། གོམ་པ་རེ་རེས་ཀྱང་འཇིག་རྟེན་གྱི་ཁམས་ལྔ་
བཅུའི་རྡུལ་སྙེད་ཀྱི་འཇིག་རྟེན་གྱི་ཁམས་རྒྱ་མཚོར་སོང་ལ་དེ་བཞིན་གཤེགས་པའི་སྤྱི་གཙུག་ཚོལ་ཞིང་། དེ་བཞིན་དུ་འཇིག་རྟེན་གྱི་ཁམས་ལྔ་བཅུའི་རྡུལ་སྙེད་ཀྱི་བསྐལ་པ་རྒྱ་མཚོར་སོང་ཡང་དེར་ཡང་དེ་བཞིན་
གཤེགས་པ་ཉིས་འགྱུར་དུ་མཐོང་ངོ་། །དེ་ཅིའི་ཕྱིར་ཞེ་ན། མ་འདྲེས་པའི་ཆོས་དང་ལྡན་པའི་ཕྱིར་རོ། །འཇམ་དཔལ་དེ་བཞིན་གཤེགས་པའི་སྤྱི་གཙུག་བལྟར་མི་མཐོང་བ་མདོར་བསྟན་པ་ཡིན་ཏེ། རྒྱས་
པར་ནི་ཕྱི་མའི་མཐའི་མུའི་བསྐལ་པར་བྱིན་གྱིས་བརླབས་ཀྱང་བསྟན་པར་མི་ནུས་སོ། །འཇམ་དཔལ་དེ་བཞིན་གཤེགས་པའི་སེམས་ཅན་ཡོངས་སུ་སྨིན་པར་མཛད་པ་སྤྱོད་པའི་གནས་རྣམས་ནི་འཇམ་

57-1-64b

དཔལ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་རྣམས་ནི་རབ་ཏུ་ཉུང་གི། འཇིག་རྟེན་གྱི་ཁམས་རེ་རེ་དང་། གླིང་རེ་རེ་དང་། རྡུལ་ཕྲ་རབ་ཀྱི་རྡུལ་རེ་རེ་ལ་དེ་བཞིན་གཤེགས་པ་སེམས་
ཅན་ཡོངས་སུ་སྨིན་པར་མཛད་པ་སྤྱོད་པའི་གནས་རྣམས་ནི་ཆེས་མང་ངོ་། །འཇམ་དཔལ་འཇིག་རྟེན་གྱི་ཁམས་རེ་རེ་དང་། གླིང་རེ་རེ་དང་། རྡུལ་ཕྲ་རབ་ཀྱི་རྡུལ་རེ་རེ་ལ་དེ་བཞིན་གཤེགས་པ་སེམས་ཅན་ཡོངས་སུ་
སྨིན་པར་མཛད་པ་སྤྱོད་པའི་གནས་ཇི་སྙེད་པ་དེ་བས་ནི། དེ་བཞིན་གཤེགས་པའི་སྐུ་ལས་འོད་ཟེར་གྱི་རྒྱ་མཚོ་འབྱུང་ཞིང་བྱང་ཆུབ་སེམས་དཔའི་སྤྱོད་པ་རྗེས་སུ་སྒྲོགས་པ་དག་ཆེས་མང་ངོ་། །སེམས་ཀྱི་སྐད་
སེམས་ཀྱི་སྐད་ཅིག་ལ་དེ་བཞིན་དུ་གཙུག་ཏོར་དང་། མཛོད་སྤུ་དང་། མཚན་རེ་རེ་དང་། དཔེ་བྱད་བཟང་པོ་རེ་རེ་དང་། སྤུའི་ཁུང་བུ་རེ་རེ་ནས་ཞིང་ཐམས་ཅད་ཀྱི་རྡུལ་སྙེད་ཀྱི་འོད་ཟེར་རྒྱ་མཚོ་དག་འབྱུང་སྟེ། དེ་ལ་
འོད་ཟེར་རྒྱ་མཚོ་ཁ་ཅིག་ནི་བསོད་ནམས་ཀྱི་ཚོགས་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་ཡེ་ཤེས་ཀྱི་ཚོགས་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་
ཁ་ཅིག་ནི་ཕ་རོལ་དུ་ཕྱིན་པ་རྒྱ་མཚོ་གྲངས་མེད་པའི་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་ས་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་ཏིང་ངེ་འཛིན་རྒྱ་མཚོ་གྲངས་མེད་པ་རྗེས་
སུ་སྒྲོག་གོ། འོད་ཟེར་རྒྱ་མཚོ་ཁ་ཅིག་ནི་རྣམ་པར་ཐར་པ་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་སོ་སོ་ཡང་དག་པར་རིག་པ་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་
རྒྱ་མཚོ་ཁ་ཅིག་ནི་མངོན་པར་ཤེས་པ་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་སྨོན་ལམ་རྒྱ་མཚོ་གྲངས་མེད་པའི་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་བརྩོན་འགྲུས་རྩོམ་པ་རྒྱ་

57-1-65a

མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་དབུགས་འབྱིན་པ་རྙེད་པ་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་བྱང་ཆུབ་སེམས་དཔའ་ལ་འཇུག་
པ་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་དེ་བཞིན་གཤེགས་པ་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་སེམས་ཅན་གྱི་བསམ་པ་དང་། 
སྤྱོད་པ་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་འཇིག་རྟེན་གྱི་ཁམས་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་བསྐལ་པ་ལ་འཇུག་
པ་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་དུས་གསུམ་ལ་འཇུག་པ་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་དུས་གསུམ་བསྟན་པ་རྒྱ་མཚོ་གྲངས་མེད་པ་
རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་མི་སྐྱོ་བའི་སེམས་བསྐྱེད་པ་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །འོད་ཟེར་རྒྱ་མཚོ་ཁ་ཅིག་ནི་ཡེ་ཤེས་ཐ་དད་པ་རྒྱ་མཚོ་གྲངས་མེད་པ་རྗེས་སུ་སྒྲོག་གོ། །
ཐོགས་པ་མེད་པ། སྒྲིབ་པ་མེད་པ། དབྱེར་མེད་པ། ནམ་མཁའི་ཁམས་རྒྱས་པར་འགེངས་པ། ཕྱི་མའི་མཐའི་མུའི་བསྐལ་པར་བྱིན་གྱིས་རློབ་པོ། །འཇམ་དཔལ་དེ་བཞིན་གཤེགས་པའི་སེམས་ཅན་ཡོངས་
སུ་སྨིན་པར་མཛད་པ་སྤྱོད་པའི་གནས་རྣམས་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་བྱིན་གྱིས་བརླབས་ཀྱང་བསྟན་པར་མི་ནུས་སོ། །འཇམ་དཔལ་དེ་ལ་དེ་བཞིན་གཤེགས་
པའི་སེམས་ཅན་ཡོངས་སུ་སྨིན་པར་མཛད་པ་ལ་མི་འཇིགས་པ་ནི། འཇམ་དཔལ་དེ་བཞིན་གཤེགས་པ་སྐད་ཅིག་སྐད་ཅིག་ལ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ན་ཞིང་ཐམས་

57-1-65b

ཅད་ཀྱི་རྡུལ་སྙེད་ཀྱི་སེམས་ཅན་རྒྱ་མཚོ་དག་དུས་གཅིག་ཏུ་རྡུལ་གཅིག་ལ་ཡོངས་སུ་སྨིན་པར་མཛད་དོ། །དེ་ལ་སེམས་ཅན་རྒྱ་མཚོ་ཁ་ཅིག་ནི་བསོད་ནམས་ཀྱི་ཚོགས་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་
ཤེས་ཀྱིས་ཡོངས་སུ་སྨིན་པར་མཛད་དོ། །སེམས་ཅན་རྒྱ་མཚོ་ཁ་ཅིག་ནི་ཡེ་ཤེས་ཀྱིས་ཚོགས་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །སེམས་ཅན་
རྒྱ་མཚོ་ཁ་ཅིག་ནི་ཕ་རོལ་ཏུ་ཕྱིན་པ་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །སེམས་ཅན་རྒྱ་མཚོ་ཁ་ཅིག་ནི་ས་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་
ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །སེམས་ཅན་རྒྱ་མཚོ་ཁ་ཅིག་ནི་གཟུངས་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱི་ཡོངས་སུ་སྨིན་པར་མཛད་དོ། །སེམས་ཅན་རྒྱ་མཚོ་ཁ་ཅིག་
ནི་ཏིང་ངེ་འཛིན་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །སེམས་ཅན་རྒྱ་མཚོ་ཁ་ཅིག་ནི་རྣམ་པར་ཐར་པ་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་
ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །སེམས་ཅན་རྒྱ་མཚོ་ཁ་ཅིག་ནི་སོ་སོ་ཡང་དག་པར་རིག་པ་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །སེམས་
ཅན་རྒྱ་མཚོ་ཁ་ཅིག་ནི་མངོན་པར་ཤེས་པ་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །སེམས་ཅན་རྒྱ་མཚོ་ཁ་ཅིག་ནི་སྨོན་ལམ་ཐ་དད་པ་རྒྱ་མཚོ་གྲངས་མེད་པའི་
བྱེ་བྲག་བསྟན་པའི་ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །སེམས་ཅན་རྒྱ་མཚོ་ཁ་ཅིག་ནི་བརྩོན་འགྲུས་རྩོམ་པ་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །
57-1-66a

སེམས་ཅན་རྒྱ་མཚོ་ཁ་ཅིག་ནི་དབུགས་འབྱིན་པ་རྙེད་པ་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །སེམས་ཅན་རྒྱ་མཚོ་ཁ་ཅིག་ནི་བྱང་ཆུབ་
སེམས་དཔའ་ལ་འཇུག་པ་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །སེམས་ཅན་རྒྱ་མཚོ་ཁ་ཅིག་ནི་དེ་བཞིན་གཤེགས་པ་ལ་འཇུག་པ་ཐ་དད་པ་རྒྱ་མཚོ་གྲངས་མེད་
པའི་བྱེ་བྲག་བསྟན་པའི་ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །སེམས་ཅན་རྒྱ་མཚོ་ཁ་ཅིག་ནི་སེམས་ཅན་གྱི་བསམ་པ་དང་། སྤྱོད་པ་ལ་འཇུག་པ་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་
ཤེས་ཀྱིས་ཡོངས་སུ་སྨིན་པར་མཛད་དོ། །སེམས་ཅན་རྒྱ་མཚོ་ཁ་ཅིག་ནི་འཇིག་རྟེན་གྱི་ཁམས་ལ་འཇུག་པ་ཐ་དད་པ་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །
སེམས་ཅན་རྒྱ་མཚོ་ཁ་ཅིག་ནི་བསྐལ་པ་ལ་འཇུག་པ་ཐ་དད་པ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །དེ་བཞིན་དུ་དུས་གསུམ་ལ་འཇུག་པ་དང་། དུས་གསུམ་བསྟན་པ་
དང་། མི་སྐྱོ་བའི་སེམས་བསྐྱེད་པ་དབྱེར་མེད་པའི་ཡེ་ཤེས་ཀྱིས་ཡོངས་སུ་སྨིན་པར་མཛད་དོ། །དེ་བཞིན་དུ་སེམས་ཅན་རྣམ་པར་སྤྲུལ་པ་དང་། ཞིང་རྣམ་པར་སྤྲུལ་པ་དང་། ཆོས་རྣམ་པར་སྤྲུལ་པ་དང་། 
ལུས་རྣམ་པར་སྤྲུལ་པ་དང་། སྨོན་ལམ་རྣམ་པར་སྤྲུལ་པ་དང་། སྤྱོད་ཡུལ་རྣམ་པར་སྤྲུལ་པ་དང་། ཡེ་ཤེས་རྣམ་པར་སྤྲུལ་པ་དང་། མངོན་པར་ཤེས་པ་རྣམ་པར་སྤྲུལ་པ་དང་། རྫུ་འཕྲུལ་རྣམ་པར་སྤྲུལ་པ་དང་། 
སྟོབས་རྣམ་པར་སྤྲུལ་པས་རྣམ་པར་རོལ་པའི་ཡེ་ཤེས་རྒྱ་མཚོ་གྲངས་མེད་པའི་བྱེ་བྲག་བསྟན་པའི་ཡེ་ཤེས་ཀྱིས་དེ་བཞིན་དུ་སྐད་ཅིག་སྐད་ཅིག་ལ། སེམས་ཅན་རྒྱ་མཚོ་ཞིང་ཐམས་ཅད་ཀྱི་རྡུལ་སྙེད་དག་རྡུལ་

57-1-66b

གཅིག་ལ་ཡོངས་སུ་སྨིན་པར་མཛད་དོ། །འཇམ་དཔལ་དེ་བཞིན་གཤེགས་པའི་སེམས་ཅན་ཡོངས་སུ་སྨིན་པར་མཛད་པ་ལ་མི་འཇིགས་པ་མདོར་བསྟན་པ་ཡིན་ཏེ། རྒྱས་པར་ནི་ཕྱི་མའི་མཐའི་མུའི་བསྐལ་པར་
བྱིན་གྱིས་བརླབས་ཀྱང་བསྟན་པར་མི་ནུས་སོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་བསྐལ་པར་རྒྱ་མཚོ་གང་གཱའི་ཀླུང་གི་བྱེ་མ་སྙེད་དུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་
སྙེད་ཀྱི་སེམས་ཅན་དག་ལ་ཉིན་གཅིག་བཞིན་ལྷའི་ཟས་རོ་བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་པ་བྱིན་པ་བས། རིགས་ཀྱི་བུ་འམ། རིག་ཀྱི་བུ་མོ་གཞན་གང་ཞིག་གིས་དགེ་བསྙེན་སྟོན་པ་གཞན་ལ་མི་
རྟེན་པ། དགེ་བ་བཅུའི་ལས་ཀྱི་ལམ་དང་ལྡན་པ་གཅིག་ལ་འདི་ནི་སངས་རྒྱས་བཅོམ་ལྡན་འདས་ཀྱི་བསླབ་པ་ལ་བསླབས་པའོ་སྙམ་དུ་བསམས་ནས་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་
པར་སྐྱེད་དོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་དགེ་བསྙེན་སྟོན་པ་གཞན་ལ་མི་རྟེན་པ། དགེ་བ་བཅུའི་ལས་ཀྱི་ལམ་དང་ལྡན་པ་འཇིག་རྟེན་
གྱི་ཁམས་ཐམས་ཅད་ཀྱི་རྡུལ་སྙེད་དག་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་པ་བྱིན་པ་བས། རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་དགེ་
སློང་གཅིག་ལ་ཉིན་གཅིག་ཟན་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་རྒྱ་མཚོ་གང་གཱའི་ཀླུང་གི་བྱེ་མ་སྙེད་དུ་
འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་དགེ་སློང་དག་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་པ་བྱིན་པ་བས། རིགས་ཀྱི་བུ་འམ། རིགས་ཀྱི་བུ་མོ་

57-1-67a

གཞན་གང་ཞིག་གིས་དད་པས་རྗེས་སུ་འབྲང་བ་གཅིག་ལ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །
འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་དུ། 
འཇིག་རྟེན་གྱི་ཁམས་རྡུལ་སྙེད་ཀྱི་དད་པས་རྗེས་སུ་འབྲང་བ་དག་ལ་ཉིན་གཅིག་བཞིན་དུ་ལྷའི་ཞལ་ཟས་རོ་བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་
པ་བྱིན་པས་བས། རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་ཆོས་ཀྱི་རྗེས་སུ་འབྲང་བ་གཅིག་ལ། ཉིན་གཅིག་ཟན་ཅིག་བྱིན་ན། འདི་ནི་དེ་བས་
ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་གང་གཱའི་ཀླུང་གི་བྱེ་
མ་སྙེད་དུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་ཆོས་ཀྱི་རྗེས་སུ་འབྲང་བ་དག་ལ་ཉིན་གཅིག་བཞིན་དུ་ལྷའི་ཞལ་ཟས་རོ་བརྒྱ་དང་ལྡན་པ་བྱིན་པ་དང་། 
དེ་བཞིན་དུ་ལྷའི་གོས་རྣམས་སྦྱིན་པ་བྱིན་པ་བས། འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་བརྒྱད་པ་
གཅིག་ལ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་

57-1-67b

མོ་གང་ལ་ལ་ཞིག་གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་བརྒྱད་པ་དག་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་
སྦྱིན་པ་བྱིན་པ་བས། འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག །རྒྱུན་དུ་ཞུགས་པ་གཅིག་ལ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །
འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་རྒྱུན་དུ་ཞུགས་པ་དག་ལ་ཉིན་གཅིག་བཞིན་དུ་ལྷའི་ཟས་
རོ་བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་པ་བྱིན་པ་བས། འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་ལན་ཅིག་ཕྱིར་འོང་བ་གཅིག་ལ་ཉིན་གཅིག་ཟན་ཅིག་
བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་འཇིག་རྟེན་གྱི་ཁམས་
ཐམས་ཅད་ཀྱི་རྡུལ་སྙེད་ཀྱི་ལན་ཅིག་ཕྱིར་འོང་བ་དག་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་པ་བྱིན་པ་བས། འཇམ་དཔལ་རིགས་ཀྱི་བུ་འམ། རིགས་
ཀྱི་བུ་མོ་གང་ཞིག་གིས་ཕྱིར་མི་འོང་བ་གཅིག་ལ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་
གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་ཕྱིར་མི་འོང་བ་དག་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་པ་

57-1-68a

བྱིན་པ་བས། འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་དགྲ་བཅོམ་པ་གཅིག་ལ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །
འཇམ་དཔལ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་དགྲ་བཅོམ་པ་དག་ལ་ཉིན་བཞིན་དུ་ལྷའི་ཟས་རོ་བརྒྱ་དང་ལྡན་པ་
བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་པ་བྱིན་པ་བས། འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་རང་སངས་རྒྱས་གཅིག་ལ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་
བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་རང་སངས་རྒྱས་དག་
ལ་ཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་པ་བྱིན་པ་བས། རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་སངས་རྒྱས་རི་མོར་བྲིས་པ་འམ། གཟུགས་
སུ་བྱས་པ་མཐོང་ན། འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་ན། ཐལ་མོ་སྦྱོར་བའམ། མེ་ཏོག་གམ། བདུག་པའམ། སྤོས་སམ། མར་མེ་འབུལ་བ་ལྟ་ཅི་སྨོས་ཏེ། འདི་ནི་དེ་བས་
ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུའམ། རིགས་ཀྱི་བུ་མོ་གཞན་གང་ལ་ལ་ཞིག་གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་སངས་རྒྱས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་
བཅས་པ་གང་གཱའི་ཀླུང་གི་བྱེ་མ་སྙེད་དག་ལ་ཉིན་གཅིག་བཞིན་དུ་ལྷའི་ཞལ་ཟས་རོ་བརྒྱ་དང་ལྡན་པ་ཕུལ་བ་དང་། དེ་བཞིན་དུ་ལྷའི་ན་བཟའ་རྣམས་ཕུལ་པ་བས། རིགས་ཀྱི་བུ་འམ། རིགས་ཀྱི་བུ་མོ་གཞན་གང་གིས་ཐ་ན་

57-1-68b

ཕྱུགས་ཀྱི་ཤིང་རྟ་ལྟ་བུས་འགྲོ་བའི་བྱང་ཆུབ་སེམས་དཔའ་བསམ་པ་ཕུན་སུམ་ཚོགས་པ་གཅིག་ལ་སངས་རྒྱས་ལ་བསྐྱེད་པའི་དགེ་བའི་རྩ་བ་ཅི་ཡང་རུང་བས་ཡོངས་སུ་འཛིན་ཏེ། ཐ་ན་ཉིན་གཅིག་ཟན་ཅིག་
བྱིན་ན་ཡང་འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་རྟའི་ཤིང་རྟ་
ལྟ་བུས་འགྲོ་བའི་བྱང་ཆུབ་སེམས་དཔའ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་དག་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་པ་བྱིན་པ་བས། རིགས་
ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་གླང་པོ་ཆེའི་ཤིང་རྟ་ལྟ་བུས་འགྲོ་བའི་བྱང་ཆུབ་སེམས་དཔའ་གཅིག་ལ་སངས་རྒྱས་ལ་བསྐྱེད་པའི་དགེ་བའི་རྩ་བ་ཅི་ཡང་རུང་བས་ཡོངས་སུ་འཛིན་ཏེ། ཐ་ན་ཉིན་གཅིག་
ཟན་ཅིག་བྱིན་ན་ཡང་འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་གླང་པོ་ཆེའི་ཤིང་
རྟ་ལྟ་བུས་འགྲོ་བའི་བྱང་ཆུབ་སེམས་དཔའ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་དག་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་པ་བྱིན་པ་བས། 
འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་ཟླ་བ་དང་ཉི་མའི་ཤིང་རྟ་ལྟ་བུས་འགྲོ་བའི་བྱང་ཆུབ་སེམས་དཔའ་གཅིག་ལ་སངས་རྒྱས་ལ་བསྐྱེད་པའི་དགེ་བའི་རྩ་བ་ཅི་ཡང་རུང་བས་
ཡོངས་སུ་འཛིན་ཏེ། ཐ་ན་ཉིན་གཅིག་ཟན་ཅིག་བྱིན་ན་ཡང་འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་

57-1-69a

བསྐལ་པ་གང་གཱའི་ཀླུང་གི་བྱེ་མ་སྙེད་དུ་ཟླ་བ་དང་། ཉི་མའི་ཤིང་རྟ་ལྟ་བུས་འགྲོ་བའི་བྱང་ཆུབ་སེམས་དཔའ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་དག་ལ་ཉིན་གཅིག་བཞིན་དུ་ལྷའི་ཟས་རོ་
བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་པ་བྱིན་པ་བས། འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་ཉན་ཐོས་ཀྱི་རྫུ་འཕྲུལ་གྱིས་འགྲོ་བའི་བྱང་ཆུབ་
སེམས་དཔའ་ཅིག་ལ་ཉིན་གཅིག་ཟན་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་གང་གཱའི་ཀླུང་
གི་བྱེ་མ་སྙེད་དུ་ཉན་ཐོས་ཀྱི་རྫུ་འཕྲུལ་གྱིས་འགྲོ་བའི་བྱང་ཆུབ་སེམས་དཔའ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་དག་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་སྦྱིན་པ་བྱིན་པ་དང་། དེ་བཞིན་དུ་
ལྷའི་གོས་རྣམས་སྦྱིན་པ་བྱིན་པ་བས། འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བའི་བྱང་ཆུབ་སེམས་དཔའ་གཅིག་ལ་ཉིན་གཅིག་ཟན་
ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ། དེ་བཞིན་གཤེགས་
པའི་རྫུ་འཕྲུལ་གྱིས་འགྲོ་བའི་བྱང་ཆུབ་སེམས་དཔའ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་དག་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་པ་དང་། དེ་བཞིན་དུ་ལྷའི་གོས་རྣམས་སྦྱིན་པ་བྱིན་པ་
བས། འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་ཆོས་ཀྱི་རྣམ་གྲངས་འདི་ཡི་གེར་འདྲི་བ་དང་། ཡི་གེར་འབྲིར་འཇུག་པ་དང་། ཀློག་པ་འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་

57-1-69b

དོ། །བཟློག་སྟེ་བསྟི་སྟང་མ་བྱས་པའི་མི་དགེ་བའི་ལས་ཀྱང་དེ་བཞིན་དུ་བརྗོད་པར་བྱའོ། །ཕྱུགས་ཀྱི་ཤིང་རྟ་ལྟ་བུས་འགྲོ་བ་དང་། རའི་ཤིང་རྟ་ལྟ་བུས་འགྲོ་བ་དང་། གླང་པོ་ཆེའི་ཤིང་རྟ་ལྟ་བུས་འགྲོ་བ་དང་། ཟླ་བ་དང་ཉི་མའི་
ཤིང་རྟ་ལྟ་བུས་འགྲོ་བ་དང་། ཉན་ཐོས་ཀྱི་རྫུ་འཕྲུལ་ཀྱིས་འགྲོ་བའང་དེ་བཞིན་ཏེ། འཇམ་དཔལ་རིགས་ཀྱི་བུ་དང་། རིགས་ཀྱི་བུ་མོ་གང་ལ་ལ་ཞིག་གིས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་ཉན་ཐོས་ཀྱི་རྫུ་
འཕྲུལ་གྱིས་འགྲོ་བའི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་རྣམས་ཀྱི་བར་ཆད་བྱས་པ་བས་འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གཞན་གང་ཞིག་གིས་དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བའི་བྱང་ཆུབ་སེམས་
དཔའ་གཅིག་ལ་ཐ་ན་དུད་འགྲོའི་སྐྱེ་གནས་སུ་གཏོགས་པའི་དགེ་བའི་རྩ་བའི་བར་ཆད་བྱེད་ཅིང་ཁྲོ་བ་དང་། བརྙས་པའི་སེམས་སྐྱེད་ན། འདི་ནི་དེ་བས་ཆེས་བསོད་ནམས་མ་ཡིན་པ་གྲངས་མེད་པར་སྐྱེད་དོ། །འཇམ་
དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཀྱི་སེམས་ཅན་རྣམས་ཀྱི་མིག་ཕྱུང་ནས་བདོག་པ་ཐམས་ཅད་ཕྲོགས་པ་བས། རིགས་ཀྱི་བུ་
འམ། རིགས་ཀྱི་བུ་མོ་གཞན་གང་ཞིག་གིས་བྱང་ཆུབ་སེམས་དཔའ་ལ་བརྙས་པའི་སེམས་བསྐྱེད་པ་གཤེ་བ་དང་། མི་སྙན་པར་སྨྲ་བ་དང་། སྙོགས་པར་བྱེད་ན། འདི་ནི་དེ་བས་ཆེས་སྡིག་པ་མང་དུ་སྐྱེད་དོ། །
འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་བྱང་ཆུབ་སེམས་དཔའ་ལ་རྐྱེན་ཅི་ཡང་རུང་བས་བརྙས་པ་སྐྱེད་དེ་སྤྱོས་ན། དེ་མི་དགེ་བའི་ལས་དེས་སེམས་ཅན་དམྱལ་བ་ངུ་འབོད་ཆེན་པོར་ལུས་
དཔག་ཚད་ལྔ་བརྒྱ་པར་སྐྱེ་བར་འགྱུར་ཏེ། དེ་ལ་མགོ་ལྔ་བརྒྱ་ཡོད་པར་འགྱུར་རོ། །དེའི་མགོ་རེ་རེ་ལ་ཡང་ཁ་ལྔ་བརྒྱ་ལྔ་བརྒྱ་ཡོད་པར་འགྱུར། དེའི་ཁ་རེ་རེ་ལ་ཡང་ལྕེ་ལྔ་བརྒྱ་ལྔ་བརྒྱ་ཡོད་པར་འགྱུར་ཏེ། ལྕེ་རེ་རེ་

57-1-70a

ལ་ཡང་གཤོལ་ལྔ་བརྒྱ་ལྔ་བརྒྱ་རྨོ་བར་འགྱུར་རོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམས་སུ་སྐྱེས་
པའི་སེམས་ཅན་ཐམས་ཅད་ལ་དབྱུག་པ་དང་མཚོན་གྱིས་བསྣུན་ཏེ་བདེག་པ་ཐམས་ཅད་ཕྲོགས་པ་པས། རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་བྱང་ཆུབ་སེམས་དཔའ་ལ་བརྙས་པའི་སེམས་
བསྐྱེད་ནས་ཁྲོ་བ་དང་། གནོད་སེམས་དང་། ཐ་བ་དང་། ཁྲོས་པའི་སེམས་སྐྱེད་ན། འདི་ནི་དེ་བས་ཆེས་སྡིག་པ་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་
ལ་ལ་ཞིག་གིས་སྡང་བའི་སེམས་ཀྱིས་སེམས་ཅན་རྣམས་ལ་གནོད་པར་འདོད་ཅིང་། འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་གི་འཇིག་རྟེན་གྱི་ཁམས་རེ་རེ་དང་། གླིང་རེ་རེ་ན་དགྲ་བཅོམ་པ་
གང་གཱའི་ཀླུང་གི་བྱེ་མ་སྙེད་དག་གི་སྲོག་གཅད་པ་དང་། རིན་པོ་ཆེའི་མཆོད་རྟེན་རིན་པོ་ཆེའི་སྟེགས་བུས་ཡོངས་སུ་བསྐོར་ཅིང་གདུགས་དང་། རྒྱལ་མཚན་དང་། ལྷའི་བ་དན་བཙུགས་
པ་གང་གཱའི་ཀླུང་གི་བྱེ་མ་སྙེད་དག་བཤིག་པ་བས། འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའི་ཐེག་པ་ཆེན་པོ་ཉིད་
ལ་སྒྲོ་བཏགས་ཏེ་བརྙས་པའི་སེམས་བསྐྱེད་ནས། རྐྱེན་ཅི་ཡང་རུང་། ཁྲོ་བ་དང་། གཤེ་བ་དང་། མི་སྙན་པར་ཟེར་བ་དང་། ཁྱད་དུ་གསོད་པར་བྱེད་ན། འདི་ནི་དེ་བས་ཆེས་སྡིག་པ་གྲངས་
མེད་པར་སྐྱེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ལས་དེ་བཞིན་གཤེགས་པ་ངེས་པར་འབྱུང་བའི་ཕྱིར་ཏེ། དེ་ནི་སངས་རྒྱས་ཀྱི་རིགས་མི་གཅོད་པའི་ཕྱིར་ཞུགས་པ་ཡིན་ནོ། །གང་བྱང་ཆུབ་

57-1-70b

སེམས་དཔའ་ལ་སྐུར་པ་དེས་ཆོས་སྤངས་པ་ཡིན་ནོ། །ཆོས་ཀྱང་གཞན་ལ་ཆོས་ཡོངས་སུ་འཛིན་པའི་བྱང་ཆུབ་སེམས་དཔའ་ཡང་གཞན་མ་ཡིན་ཏེ། བྱང་
ཆུབ་སེམས་དཔའ་ཉིད་ཆོས་སོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་ཁྲོས་ནས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་བཙོན་ར་མུན་གནག་
དག་ཏུ་བཅུག་པ་བས། རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཁྲོས་ཏེ། བྱང་ཆུབ་སེམས་དཔའ་ལ་རྒྱབ་ཀྱིས་ཕྱོགས་ཤིང་འདུག་ནས་མ་རུངས་པ་འདི་མི་བལྟའོ་ཞེས་ཟེར་ན། འདི་ནི་དེ་བས་ཆེས་སྡིག་པ་
གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་འཛམ་བུའི་གླིང་གི་སེམས་ཅན་ཐམས་ཅད་ཀྱི་བདོག་པ་ཐམས་ཅད་ཕྲོགས་པ་བས། གཞན་གང་ཞིག་གིས་
བྱང་ཆུབ་སེམས་དཔའ་ཇི་ལྟ་བུ་ཡང་རུང་བ་ལ་སྨད་ན། འདི་ནི་དེ་བས་ཆེས་སྡིག་པ་གྲངས་མེད་པར་སྐྱེད་དོ། །འཇམ་དཔལ་འདི་ལྟ་སྟེ། དཔེར་ན་རིའི་རྒྱལ་པོ་ཆེན་པོ་རི་རབ་ཀྱིས་འདི་ལྟ་སྟེ། མཐོ་བ་དང་། ཡངས་པ་དང་
ཆེ་བས་རི་ཐམས་ཅད་ཟིལ་གྱིས་མནན་ནས་ལྷམ་མེ། ལྷན་ནེ། ལྷང་ངེའོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་ཆོས་ཀྱི་རྣམ་གྲངས་འདི་ལ་མོས་པས་ཀྱང་། འདི་ལྟ་སྟེ། མཐོ་བ་དང་། ཡངས་པ་དང་། ཆེ་བས་
ཕྱོགས་བཅུ་དག་ན་བྱང་ཆུབ་སེམས་དཔའ་ཆོས་ཀྱི་རྣམ་གྲངས་འདི་ལ་མ་མོས་པ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་སྙེད་ཡོད་པ་དག་གི་དགེ་བའི་རྩ་བ་ཕ་རོལ་དུ་ཕྱིན་པ་ལྔ་ལས་བྱུང་བ། བསྐལ་པ་གྲངས་མེད་པར་
བསགས་པ་ཟིལ་གྱིས་མནན་ནས་ལྷམ་མེ། ལྷན་ནེ། ལྷང་ངེའོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་

57-1-71a

ཅད་བྱང་ཆུབ་ཀྱི་སེམས་ལ་བཀོད་པ་བས། འཇམ་དཔལ་རིགས་ཀྱི་བུའམ། རིགས་ཀྱི་བུ་མོ་གཞན་གང་ཞིག་གིས་ཕུང་པོ་མེད་པའི་གཞི་ལ་མོས་ན། འདི་ནི་དེ་བས་ཆེས་བསོད་ནམས་གྲངས་མེད་པར་
སྐྱེད་དོ། །འཇམ་དཔལ་གལ་ཏེ་སེམས་ཅན་ཐམས་ཅད་ཕུང་པོ་མེད་པའི་གཞི་ལ་མོས་པར་གྱུར་པ་བས་འཇམ་དཔལ་རིགས་ཀྱི་བུའམ། རིགས་ཀྱི་བུ་མོ་གཞན་གང་ཞིག་གིས་ཆོས་ཀྱི་རྣམ་གྲངས་འདི་ལ་མོས་པ། མོས་ནས་ཀྱང་ཡི་
གེར་འདྲི་བ་དང་། ཡི་གེར་འབྲིར་འཇུག་པ་དང་། ཀློག་པ་དང་། ཀློག་དུ་འཇུག་པ་དང་། ཐ་ན་གླེགས་བམ་དུ་བྲིས་པ་ལ་མོས་ནས་འཛིན་པར་བྱེད་ཅིང་མར་མེ་དང་། མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་རྣམས་
ཀྱིས་མཆོད་པར་བྱེད་ན། འདི་ནི་དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་གཏོགས་པའི་
སེམས་ཅན་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་དག །ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་རེ་རེའི་དགེ་བའི་རྩ་བ་གཞལ་དུ་མེད་པ་གྲངས་མེད་པ་རྣམས་དང་། འཁོར་ལོས་སྒྱུར་བའི་རྒྱལ་པོར་
འགྱུར་བའི་དགེ་བའི་རྩ་བ་རྣམས་དང་། ལྷའི་འཇིག་རྟེན་དུ་སྐྱེ་བའི་དགེ་བའི་རྩ་བ་རྣམས་ཆུད་གསན་པ་བས། གཞན་གང་ཞིག་གིས་བྱང་ཆུབ་སེམས་དཔའི་དགེ་བའི་རྩ་བ་གཅིག་ཆུད་ཟོས་པར་བྱས་ན། འདི་ནི་དེ་བས་
ཆེས་སྡིག་པ་གྲངས་མེད་པར་སྐྱེད་ན། གཤེ་བ་དང་། མི་སྙན་པར་སྨྲ་བ་ལྟ་ཅི་སྨོས། འཇམ་དཔལ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་མཆོད་རྟེན་གང་གཱའི་ཀླུང་གི་བྱེ་མ་སྙེད་དག་བཤིག་པ་དང་། 
བསྲེགས་པ་བས། རིགས་ཀྱི་བུ་འམ། རིགས་ཀྱི་བུ་མོ་གཞན་གང་ཞིག་གིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ལ་གནོད་སེམས་དང་། ཐ་བ་དང་། ཁྲོ་བའི་སེམས་བསྐྱེད་དེ། གཤེ་བ་དང་མི་སྙན་པར་

57-1-71b

སྨྲས་ན། འདི་ནི་དེ་བས་ཆེས་སྡིག་པ་གྲངས་མེད་པར་སྐྱེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ལས་སངས་རྒྱས་བཅོམ་ལྡན་འདས་རྣམས་ངེས་པར་བྱུང་ལ། སངས་རྒྱས་ལས་མཆོད་རྟེན་རྣམས་བྱུང་ཞིང་། 
སངས་རྒྱས་ལས་འཇིག་རྟེན་ཐམས་ཅད་དང་། ལྷའི་རིས་ཐམས་ཅད་ཀྱི་བདེ་བའི་ཡོ་བྱད་ཐམས་ཅད་བྱུང་ལ། སངས་རྒྱས་ཀྱང་བྱང་ཆུབ་སེམས་དཔའ་ལས་བྱུང་བས་ན། བྱང་ཆུབ་སེམས་དཔའ་ལ་སྟི་སྟང་མ་བྱས་པ་ནི་སངས་
རྒྱས་ཐམས་ཅད་ལ་སྟི་སྟང་མ་བྱས་པ་ཡིན་ནོ། །བྱང་ཆུབ་སེམས་དཔའ་ལ་སྟི་སྟང་བྱས་པ་ནི་སངས་རྒྱས་ཐམས་ཅད་ལ་སྟི་སྟང་བྱས་པ་ཡིན་ནོ། །སངས་རྒྱས་ཐམས་ཅད་ལ་མཆོད་པ་བླ་ན་མེད་པས་མཆོད་པ་བྱེད་འདོད་པས་
བྱང་ཆུབ་སེམས་དཔའ་རྣམས་མཆོད་པར་བྱའོ། །འཇམ་དཔལ་གལ་ཏེ་གྲོང་ཁྱེར་ལ་ལ་ཞིག་ན་བྱང་ཆུབ་སེམས་དཔའ་བྱེ་བ་བརྒྱ་འམ། བྱེ་བ་སྟོང་ངམ། བྱེ་བ་བརྒྱ་སྟོང་ངམ། གཞལ་དུ་མེད་པ་གྲངས་མེད་པ་དག་ཡོད་ལ། 
ཆོས་ཀྱི་རྣམ་གྲངས་འདི་ལ་མ་མོས་ན་དེ་དག་གི་ལས་ནི་རྒྱལ་པོས་འཁྲུག་པར་འགྱུར་བའམ། ཆུས་འཁྲུག་པར་འགྱུར་བའི་ལས་སམ། ཆོམ་རྐུན་གྱིས་འཁྲུག་པར་འགྱུར་བའི་ལས་སམ། མུ་གེས་འཁྲུག་
པར་འགྱུར་བའི་ལས་སམ། མེས་འཁྲུག་པར་འགྱུར་བའི་ལས་སམ། ཀླ་ཀློས་འཁྲུག་པར་འགྱུར་བའི་ལས་སུ་འགྱུར་རོ། །གྲོང་ཁྱེར་ཆེན་པོ་དེ་ན་ཆོས་ཀྱི་རྣམ་གྲངས་འདི་ལ་མོས་པའི་བྱང་ཆུབ་
སེམས་དཔའ་ཡོད་ན་དེའི་ལས་ནི་བསྐལ་པ་གྲངས་མེད་པར་མཚམས་མེད་པའི་གནས་སུ་སྐྱེ་བར་མི་འགྱུར། གྲོང་ཁྱེར་དེར་འཁྲུག་པར་མི་འགྱུར་རོ། །གལ་ཏེ་བྱང་ཆུབ་སེམས་དཔའ་དེ་དག་ལས་རྒྱལ་པོས་འཁྲུག་
པར་འགྱུར་བ་མི་འབྱུང་། ཆུས་འཁྲུག་པར་འགྱུར་བའི་ལས་མི་འབྱུང་། ཆོམ་རྐུན་གྱི་འཁྲུག་པར་འགྱུར་བའི་ལས་མི་འབྱུང་། མུ་གེས་འཁྲུག་པར་འགྱུར་བའི་ལས་མི་འབྱུང་། མེས་

57-1-72a

འཁྲུག་པར་འགྱུར་བའི་ལས་མི་འབྱུང་། ཀླ་ཀློས་འཁྲུག་པར་འགྱུར་བའི་ལས་མི་འབྱུང་། ཆོས་ཀྱི་རྣམ་གྲངས་འདི་ལ་མོས་པའི་བྱང་ཆུབ་སེམས་དཔའི་ལས་བསྐལ་པ་རྒྱ་མཚོ་གྲངས་མེད་པར་
སེམས་ཅན་དམྱལ་བ་དང་། དུད་འགྲོ་དང་། ཡི་དགས་སུ་སྐྱེ་བར་འགྱུར་བ་ཡོད་ན་དེར་འཁྲུག་པར་འགྱུར་རོ། །དེ་ཅིའི་ཕྱིར་ཞེ་ན། དེའི་ལས་བསྐལ་པ་གྲངས་མེད། བརྗོད་དུ་མེད་པར་མཚམས་མེད་པར་སྐྱེ་བར་
འགྱུར་བ་དང་། དེའི་ལས་བསྐལ་པ་བཅུ་དང་། ཉི་ཤུ་དང་། སུམ་བཅུར་ངན་སོང་མྱོང་བར་འགྱུར་བ་ཡང་ཚེ་འདི་ལ་མྱོང་སྟེ། འཁྲུག་པས་བྱང་བར་འགྱུར་རོ། །དེ་ཅིའི་ཕྱིར་ཞེ་ན། བསོད་ནམས་ཆེན་པོའི་ཚོགས་
བསགས་པའི་ཕྱིར་རོ། །འཇམ་དཔལ་འདི་ལྟ་སྟེ། དཔེར་ན་རྒྱར་དཔག་ཚད་བརྒྱ་པའི་རྫིང་ཡན་ལག་བརྒྱད་དང་ལྡན་པའི་ཆུས་གང་ལ་དུག་སྲང་སྟོང་ཡང་མི་འདུག་པར་འགྱུར་རོ། །དེ་ཅིའི་ཕྱིར་ཞེ་ན། ཆུའི་ཕུང་པོ་ཆེན་པོས་
རབ་ཏུ་ཕྱེ་བའི་ཕྱིར་རོ། །དེ་བཞིན་དུ་བསྐལ་པ་གྲངས་མེད་པར་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ཀྱི་ནང་དུ་གནས་པར་འགྱུར་བའི་ལས་རབ་ཏུ་མང་བ་ཡང་རྣམ་པར་སྨིན་པར་མི་འགྱུར་རོ། །དེ་ཅིའི་
ཕྱིར་ཞེ་ན། བསོད་ནམས་ཀྱི་ཚོགས་ཆེན་པོ་བསགས་པའི་ཕྱིར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་དང་། བྱང་ཆུབ་སེམས་དཔའ་ཕྱོགས་བཅུ་ནས་འདུས་པ་དཔག་ཏུ་མེད་གྲངས་མེད་
པ་རྣམས་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དད་པའི་སྟོབས་བསྐྱེད་པ་ལ་འཇུག་
པའི་ཕྱག་རྒྱ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། རྒྱ་གར་གྱི་མཁན་པོ་སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དྷེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།       །          །། 

57-1-72b

༄༅།   །རྒྱ་གར་སྐད་དུ། ཨཱརྱ་ནི་ཡ་ཏ་ཨ་ནི་ཡ་ཏ་ག་ཏི་མུ་དྲཱ་ཨ་བ་ཏ་ར་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ། འཕགས་པ་ངེས་པ་དང་མ་ངེས་པར་འགྲོ་བའི་ཕྱག་རྒྱ་ལ་འཇུག་པ་ཞེས་བྱ་བ་ཐེག་པ་ཆེན་པོའི་མདོ།  
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་
འདུན་ཆེན་པོ་དང་། བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དྲུག་བཅུ་ལ་འདི་ལྟ་སྟེ། འཇམ་དཔལ་གཞོན་ནུར་གྱུར་པ་དང་། སྤྱན་རས་གཟིགས་དབང་ཕྱུག་དང་། མཐུ་ཆེན་ཐོབ་དང་། སྨན་གྱི་རྒྱལ་པོ་དང་། སྨན་གྱི་
ཡང་དག་འཕགས་དང་། མཆོད་རྟེན་མངོན་པར་བསྒྲགས་པའི་སྒྲ་སྐད་རྒྱལ་པོ་དང་། དེ་དག་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་འབུམ་ཕྲག་དྲུག་བཅུ་ཐམས་ཅད་ཀྱང་རབ་ཏུ་ཞི་བ་རྣམ་པར་ངེས་པའི་ཆུ་འཕྲུལ་
གྱི་ཏིང་ངེ་འཛིན་ལ་གནས་པ། ཟབ་ཅིང་བརྟན་པའི་ཆུའི་རྒྱ་མཚོའི་དུས་རླབས་ཀྱི་ཏིང་ངེ་འཛིན་ཐོབ་པ། དབང་བསྐུར་བའི་གཟུངས་ཐོབ་པ། སངས་རྒྱས་ཀྱི་སྐུ་མདོག་མཐའ་ཡས་པ་ཡོངས་སུ་འགྲུབ་པའི་གཟུངས་ཐོབ་པ་
ཤ་སྟག་དང་ཐབས་གཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཕྱག་རྒྱ་གང་གིས་བྱང་ཆུབ་སེམས་དཔའ་འདི་དག་ནི་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་མ་ངེས་ཏེ། བླ་ན་མེད་པའི་ཡེ་ཤེས་ཀྱི་ལམ་ལས་ཕྱིར་ལྡོག་པར་འགྱུར་བའོ། །བྱང་ཆུབ་སེམས་དཔའ་འདི་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་ཏེ། བླ་ན་མེད་
པའི་ཡེ་ཤེས་ཀྱི་ལམ་ལས་ཕྱིར་མི་ལྡོག་པའོ་ཞེས་བགྱི་བར་བདག་གིས་འཚལ་བར་འགྱུར་བ་བྱང་ཆུབ་སེམས་དཔའ་རྣམས་ཀྱི་ངེས་པ་དང་མ་ངེས་པར་འགྲོ་བའི་ཕྱག་རྒྱ་ལ་འཇུག་པ་ཞེས་བགྱི་བའི་ཆོས་ཀྱི་རྣམ་གྲངས་བསྟན་དུ་གསོལ། 

57-1-73a

དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་བྱང་ཆུབ་སེམས་དཔའ་རྣམས་ཀྱི་འགྲོ་བ་ནི་ལྔ་པོ་འདི་དག་ཡིན་ཏེ། 
ལྔ་གང་ཞེ་ན། འདི་ལྟ་སྟེ། ཕྱུགས་ཀྱི་ཤིང་རྟས་འགྲོ་བ་ལྟ་བུ་དང་། གླང་པོ་ཆེའི་ཤིང་རྟས་འགྲོ་བ་ལྟ་བུ་དང་། ཟླ་བ་དང་ཉི་མས་འགྲོ་བ་ལྟ་བུ་དང་། ཉན་ཐོས་ཀྱི་རྫུ་འཕྲུལ་གྱིས་འགྲོ་བ་ལྟ་བུ་དང་། དེ་བཞིན་གཤེགས་པའི་རྫུ་འཕྲུལ་
གྱིས་འགྲོ་བ་ལྟ་བུ་སྟེ། འཇམ་དཔལ་ལྔ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་འགྲོ་བ་ཡིན་ནོ། །འཇམ་དཔལ་དེ་ལ་བྱང་ཆུབ་སེམས་དཔའ་གཉིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མ་ངེས་པའི་
འགྲོ་བ་པ་ཡིན་ནོ། །བྱང་ཆུབ་སེམས་དཔའ་གསུམ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པའི་འགྲོ་བ་པ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས་བྱང་ཆུབ་སེམས་དཔའ་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མ་ངེས་པའི་འགྲོ་བ་པ་བླ་ན་མེད་པའི་ཡེ་ཤེས་ཀྱི་ལམ་ལས་སླར་ལྡོག་པ་དག་གང་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་བྱང་ཆུབ་སེམས་དཔའ་ཕྱུགས་
ཀྱི་ཤིང་རྟས་འགྲོ་བ་ལྟ་བུ་དང་། གླང་པོ་ཆེའི་ཤིང་རྟས་འགྲོ་བ་ལྟ་བུ་ཡིན་ཏེ། འཇམ་དཔལ་བྱང་ཆུབ་སེམས་དཔའ་འདི་གཉིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མ་ངེས་ཏེ། བླ་ན་མེད་པའི་ཡེ་ཤེས་
ཀྱི་ལམ་ལས་ཕྱིར་ལྡོག་པ་ཡིན་ནོ། །འཇམ་དཔལ་བྱང་ཆུབ་སེམས་དཔའ་ཟླ་བ་དང་ཉི་མས་འགྲོ་བ་ལྟ་བུ་པ་དང་། བྱང་ཆུབ་སེམས་དཔའ་ཉན་ཐོས་ཀྱི་རྫུ་འཕྲུལ་གྱིས་འགྲོ་བ་ལྟ་བུ་པ་དང་། བྱང་ཆུབ་སེམས་དཔའ་དེ་
བཞིན་གཤེགས་པའི་རྫུ་འཕྲུལ་གྱིས་འགྲོ་བ་ལྟ་བུ་པ་འདི་གསུམ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་ཏེ། བླ་ན་མེད་པའི་ཡེ་ཤེས་ཀྱི་ལམ་ལས་ཕྱིར་མི་ལྡོག་པ་ཡིན་ནོ། །འཇམ་དཔལ་ཇི་ལྟར་བྱང་ཆུབ་

57-1-73b

སེམས་དཔའ་ཕྱུགས་ཀྱི་ཤིང་རྟས་འགྲོ་བ་ལྟ་བུ་པ་ཡིན་པར་རིག་པར་བྱ་ཞེ་ན། འཇམ་དཔལ་འདི་ལྟ་སྟེ། དཔེར་ན་སྐྱེས་བུ་ལ་ལ་ཞིག་སངས་རྒྱས་ཀྱི་ཞིང་ལྔ་བརྒྱའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་རྣམས་འདའ་བར་
འདོད་ལ། དེར་ཡང་དེའི་བྱ་བ་དང་། བྱ་བ་ཆེན་པོ་དང་། དོན་དང་། དོན་ཆེན་པོ་དང་། ཆེད་ཆེ་བ་དང་། ཆེད་ཆེ་རབ་གཅིག་ཡོད་ནས་དེ་འདི་སྙམ་དུ་སེམས་ཏེ། བདག་གིས་བཞོན་པ་ཇི་ལྟ་བུ་ཞིག་གིས་འཇིག་རྟེན་གྱི་ཁམས་དེ་དག་
འདའ་བར་བྱ་སྙམ་མོ། །དེ་ཡང་འདི་སྙམ་དུ་དཔྱོད་དེ། མ་ལ་བདག་ཕྱུགས་ཀྱི་ཤིང་རྟ་ལ་ཞོན་ལ་འཇིག་རྟེན་གྱི་ཁམས་དེ་དག་འདའ་བར་བྱ་གོར་མ་ཆགས་སྙམ་སྟེ། འཇམ་དཔལ་མི་དེ་ཕྱུགས་ཀྱི་ཤིང་རྟ་ལ་ཞོན་ཏེ། 
ལམ་དེར་ཞུགས་ནས། དེ་ཡུན་རིང་ཞིང་དུས་རིང་མོ་ཞིག་ན་དཔག་ཚད་བརྒྱར་ཕྱིན་པ་ལས། དེ་རླུང་གི་དཀྱིལ་འཁོར་ཆེན་པོས་དེ་ནས་བཟློག་ནས་དཔག་ཚད་བརྒྱད་བཅུར་ཕྱིར་དེད་དེ་ཕུལ་ན་འཇམ་དཔལ་འདི་ཇི་སྙམ་དུ་སེམས་
མི་དེས་བསྐལ་པ་གཅིག་གམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་བྱེ་བ་ཕྲག་འབུམ་མམ། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པས་ཀྱང་འཇིག་རྟེན་གྱི་ཁམས་དེ་དག་འདའ་བའམ། 
འཇིག་རྟེན་གྱི་ཁམས་གཅིག་ཀྱང་འདའ་བར་ནུས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་ནི་གནས་མ་མཆིས་སོ། །བཅོམ་ལྡན་འདས་དེ་ནི་སྐབས་མ་མཆིས་ཏེ། ཕྱུགས་ཀྱི་ཤིང་རྟ་
ལ་འཚལ་བའི་མི་དེས་བསྐལ་པ་གཅིག་གམ། བསྐལ་པ་བརྒྱ་འམ། བསྐལ་པ་སྟོང་ངམ། བསྐལ་པ་བྱེ་བ་ཕྲག་འབུམ་འམ། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པས་ཀྱང་འཇིག་རྟེན་གྱི་ཁམས་
གཅིག་ཀྱང་འདའ་བར་ནུས་པ་དེ་ནི་གནས་མ་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་དུ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་བླ་ན་མེད་པ་

57-1-74a

ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ལ་ཐེག་པ་ཆེན་པོ་མི་འཛིན་མི་ཀློག་པར་ཉན་ཐོས་ཀྱི་ཐེག་པ་པ་རྣམས་དང་ལྷན་ཅིག་གནས་ཏེ། ཉན་ཐོས་ཀྱི་ཐེག་པ་པ་དག་ལ་སྙེན་ཅིང་སྟེན་ལ་བསྙེན་བཀུར་བྱེད་
ཅིང་དེ་དག་དང་ལྷན་ཅིག་ཏུ་འདྲིས་པར་བྱེད་ལ་ཀུན་ཏུ་སྤྱོད་ཅིང་ལོངས་སྤྱོད་པར་བྱེད་ལ། ཀུན་དགའ་ར་བའམ། གཙུག་ལག་ཁང་ངམ། འཆག་སར་སྤྱོད་ཡུལ་འཐུན་པར་གནས་པར་བྱེད། ཉན་ཐོས་ཀྱི་ཐེག་པ་ཀློག་
ཅིང་ཁ་ཏོན་བྱེད། དཔྱོད་ཅིང་ཁོང་དུ་ཆུད་པར་བྱེད་ལ་གཞན་དག་ཀྱང་ཀློག་ཏུ་འཇུག་པ་ནས་ཁོང་དུ་ཆུད་པའི་བར་དུ་བྱེད་ན། དེ་ཉན་ཐོས་ཀྱི་ཐེག་པ་འཛིན་པའི་དགེ་བའི་རྩ་བ་སྐྱེད་པ་མངོན་པར་འདུ་བྱེད་པ་དེས་ཤེས་རབ་རྟུལ་པོར་
འགྱུར་ཏེ། བླ་ན་མེད་པའི་ཡེ་ཤེས་ཀྱི་ལམ་ལས་ཕྱིར་འདྲེན་ཅིང་ཕྱིར་ཟློག་གོ། །བྱང་ཆུབ་སེམས་དཔའ་དེའི་བྱང་ཆུབ་ཀྱི་སེམས་བསྒོམས་པ་ལས་བྱུང་བའི་ཤེས་རབ་ཀྱི་དབང་པོ་ཤེས་རབ་ཀྱི་མིག་གང་ཡིན་པ་དེ་
ཡང་དེ་ཉན་ཐོས་ཀྱི་ཐེག་པ་འཛིན་ཅིང་འཆང་བའི་དགེ་བའི་རྩ་བ་བསྐྱེད་པ་མངོན་པར་འདུ་བྱེད་པ་དེས་རྟུལ་པོར་བྱེད་ཅིང་ཉམས་པར་བྱེད་དོ། །འཇམ་དཔལ་དཔེར་ན་མི་ལ་ལ་ཞིག་མིག་ནད་ཀྱིས་མིག་ཟུམས་པར་གྱུར་
ནས། དེ་མིག་དབྱེ་བ་དང་མཐོང་དུ་རུང་བར་བྱ་བའི་ཕྱིར་ཟླ་བ་གཅིག་གིས་བར་དུ་དཔྱད་བྱས་ཏེ། ཟླ་བ་གཅིག་ལོན་ནས་མིག་འབྱེད་ཅིང་འཛུམས་པར་བྱེད་པ་ལས། དེའི་དགྲའམ། མི་མཛའ་བ་གཞན་ཞིག་གིས་པི་པི་ལིང་
གི་ཕྱེ་མ་སྤར་གང་གིས་མིག་བཀང་ནས་དེ་ཡང་ལོང་བར་བྱས་པ་དེ་བཞིན་དུ། འཇམ་དཔལ་བྱང་ཆུབ་སེམས་དཔའ་དེའི་བྱང་ཆུབ་ཀྱི་སེམས་བསྒོམ་པ་ལས་བྱུང་བའི་ཤེས་རབ་ཀྱི་དབང་པོ་ཤེས་རབ་ཀྱི་མིག་གང་ཡིན་པ་དེ་
ཡང་དེ་ཉན་ཐོས་ཀྱི་ཐེག་པ་འཛིན་ཅིང་འཆང་བའི་དགེ་བའི་རྩ་བ་བསྐྱེད་པ་མངོན་པར་འདུ་བྱེད་པ་དེས་རྟུལ་པོར་བྱེད་ཅིང་ཉམས་པར་བྱེད་དེ། འཇམ་དཔལ་འདི་ནི་བྱང་ཆུབ་སེམས་དཔའ་ཕྱུགས་ཀྱི་ཤིང་རྟས་འགྲོ་བ་ལྟ་བུ་པ་ཡིན་པར་

57-1-74b

རིག་པར་བྱའོ། །འཇམ་དཔལ་ཇི་ལྟར་བྱང་ཆུབ་སེམས་དཔའ་གླང་པོ་ཆེའི་ཤིང་རྟས་འགྲོ་བ་ལྟ་བུ་པ་ཡིན་པར་རིག་པར་བྱ་ཞེ་ན། འཇམ་དཔལ་དཔེར་ན་མི་ལ་ལ་ཞིག་འཇིག་རྟེན་གྱི་ཁམས་དེ་དག་ཉིད་འདའ་བར་འདོད་ལ། དེར་ཡང་
དེའི་བྱ་བ་དང་། བྱ་བ་ཆེན་པོ་དང་། དོན་དང་། དོན་ཆེན་པོ་དང་། ཆེད་ཆེ་བ་དང་། ཆེད་ཆེ་རབ་ཅིག་ཡོད་ནས་དེ་འདི་སྙམ་དུ་སེམས་ཏེ། བདག་གི་གཞོན་པ་ཇི་ལྟ་བུ་ཞིག་གིས་འཇིག་རྟེན་གྱི་ཁམས་དེ་དག་འདའ་བར་བྱ་སྙམ་མོ། །
དེ་ཡང་འདི་སྙམ་དུ་སྤྱོད་དེ། མ་ལ་བདག་གླང་པོ་ཆེའི་ཤིང་རྟ་ཡན་ལག་བརྒྱད་དང་ལྡན་པ་ལ་ཞོན་ཏེ་འཇིག་རྟེན་གྱི་ཁམས་དེ་དག་འདའ་བར་བྱ་གོར་མ་ཆག་སྙམ་ནས། འཇམ་དཔལ་མི་དེ་གླང་པོ་ཆེའི་ཤིང་རྟ་ཡན་ལག་བརྒྱད་
དང་ལྡན་པ་ལ་ཞོན་ཏེ་ལམ་དེར་ཞུགས་ནས། དེ་ལོ་བརྒྱས་དཔག་ཚད་ཉིས་སྟོང་དུ་སོན་པ་ལས་རླུང་གི་དཀྱིལ་འཁོར་ཆེན་པོས་དེ་ནས་ཕྱིར་ཕུལ་ཏེ་བཟློག་ན། འཇམ་དཔལ་འདི་ཇི་སྙམ་དུ་སེམས། གླང་པོ་ཆེའི་ཤིང་རྟ་
ལ་ཞོན་པའི་མི་དེས་བསྐལ་པ་གཅིག་གམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་བྱེ་བ་ཕྲག་འབུམ་འམ། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པས་ཀྱང་འཇིག་རྟེན་གྱི་ཁམས་གཅིག་
ཀྱང་འདའ་བར་ནུས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་ནི་གནས་མ་མཆིས་ལགས་སོ། །བཅོམ་ལྡན་འདས་དེ་ནི་སྐབས་མ་མཆིས་ཏེ། གླང་པོ་ཆེའི་ཤིང་རྟ་འཚལ་བའི་མི་དེས་
བསྐལ་པ་གཅིག་གམ། བསྐལ་པ་བརྒྱ་འམ། བསྐལ་པ་སྟོང་ངམ། བསྐལ་པ་བྱེ་བ་ཕྲག་འབུམ་འམ། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པས་ཀྱང་འཇིག་རྟེན་གྱི་ཁམས་གཅིག་ཀྱང་འདའ་བར་ནུས་
པ་དེ་ནི་གནས་མ་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་དུ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་

57-1-75a

བྱང་ཆུབ་ཏུ་སེམས་བསྐྱེད་ལ་ཉན་ཐོས་ཀྱི་ཐེག་པ་པ་དག་དང་ལྷན་ཅིག་གནས་ཏེ། ཉན་ཐོས་ཀྱི་ཐེག་པ་པ་དག་ལ་སྙེན་ཅིང་སྟེན་ལ་བསྙེན་བཀུར་བྱེད་ཅིང་དེ་དག་དང་ལྷན་ཅིག་ཏུ་འདྲིས་པར་བྱེད་ལ་ཀུན་
སྤྱོད་ཅིང་ལོངས་སྤྱོད་པར་བྱེད་ལ། ཀུན་དགའ་ར་བའམ། གཙུག་ལག་ཁང་ངམ། འཆག་སར་སྤྱོད་ཡུལ་འཐུན་པར་གནས་པར་བྱེད། ཉན་ཐོས་ཀྱི་ཐེག་པ་ཀློག་ཅིང་ཁ་ཏོན་བྱེད། དཔྱོད་ཅིང་ཁོང་དུ་ཆུད་པར་
བྱེད་ལ་གཞན་དག་ཀྱང་ཀློག་ཏུ་འཇུག་པར་བྱེད་ཅིང་ཁ་ཏོན་བྱེད་དུ་འཇུག་ལ་ཡོངས་སུ་སྦྱོང་བར་བྱེད་དུ་འཇུག་ན་དེ་ཉན་ཐོས་ཀྱི་ཐེག་པ་འཛིན་པའི་དགེ་བའི་རྩ་བ་བསྐྱེད་པ་མངོན་པར་འདུ་བྱེད་པ་དེས་ཤེས་རབ་རྟུལ་པོར་འགྱུར་ཏེ། 
བླ་ན་མེད་པའི་ཡེ་ཤེས་ཀྱི་ལམ་ལས་ཕྱིར་འདྲེན་ཅིང་ཕྱིར་ཟློག་གོ། །བྱང་ཆུབ་སེམས་དཔའ་དེའི་བྱང་ཆུབ་ཀྱི་སེམས་བསྒོམས་པ་ལས་བྱུང་བའི་དགེ་བའི་རྩ་བ་བསྐྱེད་པ་མངོན་པར་འདུ་བྱེད་པའི་ཤེས་རབ་ཀྱི་དབང་པོ་ཤེས་
རབ་ཀྱི་མིག་གང་ཡིན་པ་དེ་ཡང་དེའི་ཉན་ཐོས་ཀྱི་ཐེག་པ་འཛིན་ཅིང་འཆང་བའི་དགེ་བའི་རྩ་བ་བསྐྱེད་པ་མངོན་པར་འདུ་བྱེད་པ་དེས་རྟུལ་པོར་བྱེད་ཅིང་ཉམས་པར་བྱེད་དོ། །འཇམ་དཔལ་དཔེར་ན་ཤིང་གི་སྡོང་པོ་ཆེན་པོ་སྲིད་དུ་
དཔག་ཚད་སྟོང་པ་ཞིག་ཡོད་ལ། དེ་ཡང་རྒྱ་མཚོ་ཆེན་པོས་ཁྱེར་བ་ལས་བར་སྣང་ལ་གནས་པའི་གནོད་སྦྱིན་དག་གིས་དེ་རྒྱ་མཚོ་ཆེན་པོའི་ལམ་ལས་ཕྱིར་ཕུལ་ཏེ་བཟློག་ནས། དེ་ལ་ལྕགས་ཀྱི་གར་བུ་དཔག་
ཚད་ལྔ་སྟོང་ཡོད་པ་ཞིག་བཏགས་ན། འཇམ་དཔལ་འདི་ཇི་སྙམ་དུ་སེམས། ཤིང་གི་སྡོང་པོ་ཆེན་པོ་དེ་རྒྱ་མཚོ་ཆེན་པོ་ལ་འགྲོ་བ་འམ། སེམས་ཅན་བསྒྲལ་བའི་ཕྱིར་སྤྱད་པར་ནུས་སམ། འཇམ་དཔལ་གྱིས་གསོལ་
པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་དུ་བྱང་ཆུབ་སེམས་དཔའ་དེའི་བྱང་ཆུབ་ཀྱི་སེམས་བསྒོམས་པ་ལས་བྱུང་བའི་ཤེས་རབ་ཀྱི་ཤིང་

57-1-75b

ཆེན་པོ་ཡང་ཉན་ཐོས་ཀྱི་ཐེག་པ་འཛིན་པའི་དགེ་བའི་རྩ་བ་བསྐྱེད་པ་མངོན་པར་འདུ་བྱེད་པ་དེས། ཐམས་ཅད་མཁྱེན་པའི་ཡེ་ཤེས་ཀྱི་རྒྱ་མཚོ་ལས་ཕྱིར་ཕུལ་ཞིང་བཟློག་སྟེ། ཐམས་ཅད་མཁྱེན་པའི་ཡེ་ཤེས་ཀྱི་རྒྱ་མཚོར་
འགྲོ་བར་ཡང་མི་འགྱུར། འཁོར་བའི་རྒྱ་མཚོ་ལས་ཀྱང་སེམས་ཅན་རྣམས་སྒྲོལ་མི་ནུས་ཏེ། འཇམ་དཔལ་འདི་ནི་བྱང་ཆུབ་སེམས་དཔའ་གླང་པོ་ཆེའི་ཤིང་རྟས་འགྲོ་བ་ལྟ་བུ་པ་ཡིན་པར་རིག་པར་བྱའོ། །འཇམ་
དཔལ་ཇི་ལྟར་བྱང་ཆུབ་སེམས་དཔའ་ཉི་མ་དང་ཟླ་བས་འགྲོ་བ་ལྟ་བུ་པ་ཡིན་པར་རིག་པར་བྱ་ཞེ་ན། འཇམ་དཔལ་དཔེར་ན་མི་ལ་ལ་འཇིག་རྟེན་གྱི་ཁམས་དེ་དག་ཉིད་འདའ་བར་འདོད་ལ། དེར་ཡང་དེའི་བྱ་བ་དང་། བྱ་བ་ཆེན་པོ་དང་། 
དོན་དང་། དོན་ཆེན་པོ་དང་། ཆེད་ཆེ་བ་དང་། ཆེད་ཆེ་རབ་ཅིག་ཡོད་ནས་དེ་འདི་སྙམ་དུ་སེམས་ཏེ། བདག་གིས་རྫུ་འཕྲུལ་ཇི་ལྟ་བུ་ཞིག་གིས་འཇིག་རྟེན་གྱི་ཁམས་དེ་དག་འདའ་བར་བྱ་སྙམ་མོ། །དེ་ཡང་འདི་སྙམ་དུ་དཔྱོད་དེ། 
མ་ལ་བདག་གིས་ཉི་མ་དང་ཟླ་བའི་འགྲོ་བས་འཇིག་རྟེན་གྱི་ཁམས་དེ་དག་འདའ་བར་བྱ་གོར་མ་ཆགས་སྙམ་ནས། འཇམ་དཔལ་མི་དེ་ཉི་མ་དང་ཟླ་བའི་འགྲོ་བས་ལམ་དེར་ཞུགས་ན། འཇམ་དཔལ་འདི་ཇི་སྙམ་དུ་སེམས། 
མི་དེས་ཉི་མ་དང་ཟླ་བའི་འགྲོ་བས་འཇིག་རྟེན་གྱི་ཁམས་དེ་དག་འདའ་བར་ནུས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་རྔོ་ཐོག་ལགས་སོ། །བདེ་བར་གཤེགས་པ་རྒྱུད་དེའི་ལོ་དུས་རིང་མོ་
ཞིག་གིས་རྔོ་ཐོག་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་དུ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
བསྐྱེད་ལ་ཉན་ཐོས་ཀྱི་ཐེག་པ་པ་དག་དང་ལྷན་ཅིག་ཏུ་མི་གནས་ཏེ། ཉན་ཐོས་ཀྱི་ཐེག་པ་པ་དག་ལ་མི་སྙེན་ཅིང་མི་སྟེན་ལ། བསྙེན་བཀུར་མི་བྱེད་ཉན་ཐོས་ཀྱི་ཐེག་པ་པ་དེ་དག་དང་ལྷན་ཅིག་ཏུ་འདྲིས་པར་མི་བྱེད། ཀུན་ཏུ་

57-1-76a

སྤྱོད་ཅིང་ལོངས་སྤྱོད་པར་མི་བྱེད། ཀུན་དགའ་ར་བ་འམ། གཙུག་ལག་ཁང་ངམ། འཆག་སར་སྤྱོད་ཡུལ་འཐུན་པར་གནས་པར་མི་བྱེད་ལ། ཉན་ཐོས་ཀྱི་ཐེག་པ་ཀློག་པར་མི་བྱེད། ཁ་དོན་མི་
བྱེད། སེམས་པར་མི་བྱེད་ལ། གཞན་དག་ཀྱང་ཐ་ན་ཚིགས་སུ་བཅད་པ་གཅིག་ཙམ་ཡང་ཀློག་ཏུ་འཇུག་པར་མི་བྱེད། ཁ་ཏོན་བྱེད་དུ་འཇུག་པར་མི་བྱེད་དེ། དེ་གང་ཀློག་པ་དེ་ཡང་ཐེག་པ་ཆེན་པོ་ཁོ་ན་ཀློག་ལ། གང་སྟོན་
པ་དེ་ཡང་ཐེག་པ་ཆེན་པོ་ཁོ་ན་སྟོན་ན། འཇམ་དཔལ་འདི་ནི་བྱང་ཆུབ་སེམས་དཔའ་ཟླ་བ་དང་ཉི་མའི་འགྲོ་བ་ལྟ་བུ་པ་ཡིན་པར་རིག་པར་བྱའོ། །འཇམ་དཔལ་དཔེར་ན་ནམ་མཁའ་ལྡིང་གི་དབང་པོའི་རྒྱལ་པོ་ཆེན་པོ་ལང་ཚོ་དང་། 
སྟོབས་དང་། མཐུ་ཆེན་པོ་ཐོབ་པ་ནི་འདོད་ན་རི་རབ་ཀྱི་རྩེ་མོ་ནས་རི་རབ་ཀྱི་རྩེ་མོར་འགྲོའོ། །འཇམ་དཔལ་དེ་བཞིན་དུ་ཟླ་བ་དང་ཉི་མའི་འགྲོ་བ་ལྟ་བུ་པའི་བྱང་ཆུབ་སེམས་དཔའ་ཚུལ་ཁྲིམས་དང་། ཐོས་པ་དང་། བསམ་
པ་དང་། ལྷག་པའི་བསམ་པའི་སྟོབས་དང་། ལང་ཚོ་དང་། མཐུ་ཆེན་པོ་ཐོབ་པ་ཡང་འདོད་ན། སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་ཞིང་དེ་བཞིན་གཤེགས་པའི་འཁོར་གྱི་དཀྱིལ་འཁོར་གྱི་རྣམས་
སུ་སྟོན་པར་བྱེད་དོ། །འཇམ་དཔལ་ཇི་ལྟར་བྱང་ཆུབ་སེམས་དཔའ་ཉན་ཐོས་ཀྱི་རྫུ་འཕྲུལ་གྱིས་འགྲོ་བ་ལྟ་བུ་པ་ཡིན་པར་རིག་པར་བྱ་ཞེ་ན། འཇམ་དཔལ་དཔེར་ན་མི་ལ་ལ་ཞིག་འཇིག་རྟེན་གྱི་ཁམས་དེ་དག་
ཉིད་འདའ་བར་འདོད་ལ། དེར་ཡང་དེའི་བྱ་བ་དང་། བྱ་བ་ཆེན་པོ་དང་། དོན་དང་། དོན་ཆེན་པོ་དང་། ཆེད་ཆེ་བ་དང་། ཆེད་ཆེ་རབ་ཅིག་ཡོད་ནས་དེ་འདི་སྙམ་དུ་སེམས་ཏེ། བདག་གིས་རྫུ་འཕྲུལ་ཇི་ལྟ་བུ་ཞིག་གིས་
འཇིག་རྟེན་གྱི་ཁམས་དེ་དག་འདའ་བར་བྱ་སྙམ་མོ། །དེ་ཡང་འདི་སྙམ་དུ་དཔྱོད་དེ། མ་ལ་བདག་ཉན་ཐོས་ཀྱི་རྫུ་འཕྲུལ་གྱིས་འཇིག་རྟེན་གྱི་ཁམས་དེ་དག་འདའ་བར་བྱའོ་སྙམ་ན། འཇམ་དཔལ་འདི་ཇི་སྙམ་

57-1-76b

དུ་སེམས། མི་དེས་ཉན་ཐོས་ཀྱི་རྫུ་འཕྲུལ་གྱིས་འཇིག་རྟེན་གྱི་ཁམས་དེ་དག་འདའ་བར་ནུས་སམ། འཇམ་དཔལ་གྱིས་གསོལ་པ། བཅོམ་ལྡན་འདས་རྔོ་ཐོག་ལགས་སོ། །བཅོམ་ལྡན་འདས་ཀྱིས་བཀའ་
སྩལ་པ། འཇམ་དཔལ་དེ་བཞིན་དུ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ལ། ཉན་ཐོས་ཀྱི་ཐེག་པ་པ་དག་དང་ལྷན་ཅིག་ཏུ་མི་གནས། ཉན་
ཐོས་ཀྱི་ཐེག་པ་པ་དག་ལ་མི་སྙེན་མི་སྟེན་ཅིང་བསྙེན་བཀུར་མི་བྱེད་ལ། ཉན་ཐོས་ཀྱི་ཐེག་པ་པ་དེ་དག་དང་ལྷན་ཅིག་ཏུ་འདྲིས་པར་མི་བྱེད། ཀུན་དུ་སྤྱོད་ཅིང་ལོངས་སྤྱོད་པར་མི་བྱེད། ཀུན་དགའ་ར་བ་འམ། གཙུག་
ལག་ཁང་ངམ། འཆག་སར་སྤྱོད་ཡུལ་འཐུན་པར་གནས་པར་མི་བྱེད་ལ་ཉན་ཐོས་ཀྱི་ཐེག་པ་ཀློག་པར་མི་བྱེད། ཁ་ཏོན་མི་བྱེད། དཔྱོད་ཅིང་ཁོང་དུ་ཆུད་པར་མི་བྱེད་ལ། གཞན་དག་ཀྱང་ཐ་ན་ཚིགས་སུ་བཅད་པ་
གཅིག་ཙམ་ཡང་ཀློག་ཏུ་འཇུག་པར་མི་བྱེད། ཁ་ཏོན་བྱེད་དུ་འཇུག་པར་མི་བྱེད་དེ། དེ་གང་ཀློག་པ་དེ་ཡང་ཐེག་པ་ཆེན་པོ་ཁོ་ན་ཀློག་ལ། གང་སྟོན་པ་དེ་ཡང་ཐེག་པ་ཆེན་པོ་ཁོ་ན་སྟོན་ཅིང་དེ་ཐེག་པ་ཆེན་པོ་ལ་མོས་
པའི་བྱང་ཆུབ་སེམས་དཔའ་རྣམས་དང་། ཐེག་པ་ཆེན་པོ་ཀློག་པ་རྣམས་དང་། ཐེག་པ་ཆེན་པོ་ཡོངས་སུ་འཛིན་པ་རྣམས་ལ་གུས་པ་དང་བཅས། ཞེ་ས་དང་བཅས་པར་བྱེད་ཅིང་དེར་གཞོལ། དེར་འབབ། དེར་བབ་
ལ། དེ་དག་དང་ལྷན་ཅིག་ཏུ་གནས་ཏེ། དེ་དག་ལ་སྙེན་ཅིང་སྟེན་ལ་བསྙེན་བཀུར་བྱེད། དེ་དག་དང་ལྷན་ཅིག་ཏུ་འདྲིས་པར་བྱེད། ཀུན་ཏུ་སྤྱོད་ཅིང་ལོངས་སྤྱོད་པར་བྱེད། དེ་དག་དང་ཀུན་དགའ་ར་བ་འམ། 
གཙུག་ལག་ཁང་ངམ། འཆག་སར་སྤྱོད་ཡུལ་འཐུན་པར་གནས་པར་བྱེད་ལ། དེ་ཐེག་པ་ཆེན་པོ་ཡོངས་སུ་ཚོལ་ཞིང་སྡུད་ལ་འཆང་བར་བྱེད། མར་མེ་དང་། བདུག་པ་དང་། མེ་ཏོག་དང་། སྤོས་དང་། མེ་ཏོག་

57-1-77a

ཕྲེང་དང་། བྱུག་པ་དག་གིས་མཆོག་ཏུ་གུས་པར་མཆོད་པར་བྱེད། དེ་ཐེག་པ་ཆེན་པོ་ཀློག་ཅིང་ཁ་ཏོན་བྱེད་ལ། དགའ་བ་དང་མཆོག་ཏུ་དགའ་བས་ལུང་འབོགས་པར་བྱེད། མ་བསླབས་པའི་བྱང་
ཆུབ་སེམས་དཔའི་རྣམས་ལ་བརྙས་པའི་སེམས་མི་སྐྱེད། བཞིན་འཛུམ་པ་དང་གསོང་པོར་སྨྲ་ལ། ཚིག་མི་བརླང་མི་གཏུམ་མི་རྩུབ་པ་དང་། དགའ་བ་དང་སྙན་པར་སྨྲ་ཞིང་། དེ་སྲོག་གི་ཕྱིར་ཡང་ཐེག་པ་ཆེན་པོ་མི་སྤོང་ལ་དེ་ཐེག་པ་
ཆེན་པོ་ལ་ཞུགས་པའི་བྱང་ཆུབ་སེམས་དཔའ་རྣམས་དང་། ཐེག་པ་ཆེན་པོ་ཀློག་པ་རྣམས་དང་། ཐེག་པ་ཆེན་པོ་ཡོངས་སུ་འཛིན་པ་རྣམས་ལ་ཅི་ནུས་ཅི་ལྕོགས་ཀྱིས་སྙིང་ནི་ལྷག་པའི་བསམ་པས་ཡོངས་སུ་འཛིན་པར་བྱེད་ཅིང་། 
དེ་སུ་དང་ཡང་ལྷན་ཅིག་འགྱེད་པ་དང་རྩོད་པར་མི་བྱེད་ལ། དེ་སྔོན་མ་བྱུང་བ་དང་མ་ཐོས་པའི་མདོ་སྡེ་རྣམས་ཚོལ་བའི་རང་བཞིན་ཅན་ཡིན་ཞིང་། གང་དག་ལས་ཐོས་པ་དེ་དག་ལ་སྟོན་པ་ལ་གུས་པ་དྲག་པོ་ལྟ་བུ་སྐྱེད་
པར་བྱེད། བྱང་ཆུབ་སེམས་དཔའ་གཞན་བྱང་ཆུབ་སེམས་དཔའི་སྤྱོད་པ་ལ་མ་བསླབས་པ་དག་ལ་ཁྱད་དུ་གསོད་པར་མི་བྱེད། ཉེས་པ་བདེན་པ་དང་མི་བདེན་པས་གཞན་དག་ལ་གླེང་བར་མི་བྱེད་ལ། ཉེས་པ་
གཞན་གྱི་འཁྲུལ་པ་ཡང་མི་ཚོལ་ཞིང་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ལ་སློབ་པ་འདི་ནི་འཇམ་དཔལ་བྱང་ཆུབ་སེམས་དཔའ་ཉན་ཐོས་ཀྱི་རྫུ་འཕྲུལ་གྱིས་འགྲོ་བ་ལྟ་བུ་པ་ཡིན་པར་རིག་
པར་བྱའོ། །འཇམ་དཔལ་ཇི་ལྟར་བྱང་ཆུབ་སེམས་དཔའ་དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བ་ལྟ་བུ་པ་ཡིན་པར་རིག་པར་བྱ་ཞེ་ན། འཇམ་དཔལ་དཔེར་ན་མི་ལ་ལ་ཞིག་འཇིག་རྟེན་གྱི་ཁམས་དེ་དག་ཉིད་
འདའ་བར་འདོད་ལ། དེར་ཡང་དེའི་བྱ་བ་དང་། བྱ་བ་ཆེན་པོ་དང་། དོན་དང་། དོན་ཆེན་པོ་དང་། ཆེད་ཆེ་བ་དང་། ཆེད་ཆེ་རབ་ཅིག་ཡོད་ནས་དེ་འདི་སྙམ་དུ་སེམས་ཏེ། བདག་གིས་རྫུ་འཕྲུལ་ཇི་ལྟ་བུ་ཞིག་གིས་འཇིག་

57-1-77b

རྟེན་གྱི་ཁམས་དེ་དག་མྱུར་དུ་འདའ་བར་བྱ་སྙམ་མོ། །དེ་ཡང་འདི་སྙམ་དུ་དཔྱོད་དེ། མ་ལ་བདག་གིས་འཇིག་རྟེན་གྱི་ཁམས་དེ་དག་འདའ་བར་བྱ་བའི་ཕྱིར་དེ་བཞིན་གཤེགས་པ་ལ་གསོལ་བ་གདབ་གོར་མ་ཆག་སྙམ་
ནས། འཇམ་དཔལ་མི་དེ་ཡང་དེ་བཞིན་གཤེགས་པའི་ཐད་དུ་སོང་ནས་གསོལ་བ་བཏབ་སྟེ། བཅོམ་ལྡན་འདས་བདག་སངས་རྒྱས་ཀྱི་ཞིང་ལྔ་བརྒྱའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་འདའ་བར་འཚལ་ཏེ། 
དེར་ཡང་བདག་གིས་བགྱི་བ་དང་། བགྱི་བ་ཆེན་པོ་དང་། དོན་དང་། དོན་ཆེན་པོ་དང་། ཆེད་ཆེ་བ་དང་། ཆེད་ཆེ་རབ་ཅིག་མཆིས་ན། བཅོམ་ལྡན་འདས་ཀྱིས་བདག་འཇིག་རྟེན་གྱི་ཁམས་དེ་དག་འདའ་བར་མཛད་དུ་གསོལ་
ཞེས་བྱས་ལ། འཇམ་དཔལ་དེ་བཞིན་གཤེགས་པས་ཀྱང་མི་དེ་འཇིག་རྟེན་གྱི་ཁམས་དེ་དག་འདའ་བར་མཛད་ན། འཇམ་དཔལ་འདི་ཇི་སྙམ་དུ་སེམས། དེ་བཞིན་གཤེགས་པས་འཇིག་རྟེན་གྱི་ཁམས་དེ་
དག་མྱུར་དུ་འདའ་བར་མཛད་སྤྱོད་དམ། འཇམ་དཔལ་གྱིས་གསོལ་པ། བཅོམ་ལྡན་འདས་སྤྱོད་ལགས་སོ། །བདེ་བར་གཤེགས་པ་སྤྱོད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། 
འཇམ་དཔལ་དེ་བཞིན་དུ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ལ། ཉན་ཐོས་ཀྱི་ཐེག་པ་པ་དག་དང་ལྷན་ཅིག་ཏུ་མི་གནས་ཏེ། ཉན་ཐོས་
ཀྱི་ཐེག་པ་པ་དག་ལ་མི་སྙེན་མི་སྟེན་ཅིང་བསྙེན་བཀུར་མི་བྱེད་ལ། ཉན་ཐོས་ཀྱི་ཐེག་པ་པ་དེ་དག་དང་ལྷན་ཅིག་འདྲིས་པར་མི་བྱེད། ཀུན་ཏུ་སྤྱོད་ཅིང་ལོངས་སྤྱོད་པར་མི་བྱེད། ཀུན་དགའ་ར་བ་འམ། གཙུག་
ལག་ཁང་ངམ། འཆག་སར་སྤྱོད་ཡུལ་འཐུན་པར་གནས་པར་མི་བྱེད་ལ། ཉན་ཐོས་ཀྱི་ཐེག་པ་ཀློག་པར་མི་བྱེད། ཁ་ཏོན་མི་བྱེད། དཔྱོད་ཅིང་ཁོང་དུ་ཆུད་པར་མི་བྱེད་ལ། གཞན་དག་ཀྱང་ཐ་ན་

57-1-78a

ཚིགས་སུ་བཅད་པ་གཅིག་ཙམ་ཡང་ཀློག་ཏུ་འཇུག་པར་མི་བྱེད། ཁ་ཏོན་བྱེད་དུ་འཇུག་པར་མི་བྱེད་དེ། དེ་གང་ཀློག་པ་དེ་ཡང་ཐེག་པ་ཆེན་པོ་ཁོ་ན་ཀློག །གང་ཁ་དོན་བྱེད་པ་དེ་ཡང་ཐེག་པ་ཆེན་པོ་
ཁོ་ན་ཁ་ཏོན་བྱེད། གང་སྟོན་པ་དེ་ཡང་ཐེག་པ་ཆེན་པོ་ཁོ་ན་སྟོན་ཅིང་དེ་ལུས་དང་། ངག་དང་། ཡིད་ཡོངས་སུ་དག་ལ། ཚུལ་ཁྲིམས་དང་ལྡན་ཞིང་དགེ་བའི་ཆོས་ཅན་ཡིན་ལ་གཞན་དག་ཀྱང་ལུས་དང་། ངག་དང་། ཡིད་ཡོངས་
སུ་དག་པ་ལ་དགོད། ཚུལ་ཁྲིམས་དང་། དགེ་བའི་ཆོས་ཅན་ལ་དགོད། ཐེག་པ་ཆེན་པོ་ལ་ཞུགས་པའི་བྱང་ཆུབ་སེམས་དཔའ་རྣམས་དང་། ཐེག་པ་ཆེན་པོ་ཀློག་པ་རྣམས་དང་། ཐེག་པ་ཆེན་པོ་ཡོངས་སུ་འཛིན་
པ་རྣམས་ལ་གུས་པ་དང་བཅས། ཞེ་ས་དང་བཅས་པར་བྱེད་ལ། དེར་གཞོལ། དེར་འབབ། དེར་བབ་ཅིང་དེ་དག་དང་ལྷན་ཅིག་ཏུ་གནས་ཏེ། དེ་དག་ལ་སྙེན་ཅིང་སྟེན་ལ་བསྙེན་བཀུར་བྱེད་ཅིང་དེ་དག་དང་ལྷན་ཅིག་ཏུ་འདྲིས་
པར་བྱེད། ཀུན་ཏུ་སྤྱོད་ཅིང་ལོངས་སྤྱོད་པར་བྱེད་ལ། དེ་དག་དང་ཀུན་དགའ་ར་བའམ། གཙུག་ལག་ཁང་ངམ། འཆག་སར་སྤྱོད་ཡུལ་འཐུན་པར་གནས་པར་བྱེད། དེ་ཐེག་པ་ཆེན་པོ་ཡོངས་སུ་ཚོལ་ཞིང་སྡུད་ལ་འཆང་བར་
བྱེད། མར་མེ་དང་། བདུག་པ་དང་། མེ་ཏོག་དང་། སྤོས་དང་། མེ་ཏོག་ཕྲེང་དང་། བྱུག་པ་དག་གིས་མཆོག་ཏུ་གུས་པ་དྲག་པོས་མཆོད་པར་བྱེད་དེ། ཐེག་པ་ཆེན་པོ་ཀློག་ཅིང་ཁ་ཏོན་བྱེད་ལ། གཞན་དག་ཀྱང་དགའ་བ་
དང་། མཆོག་ཏུ་དགའ་བ་ཆེན་པོ་དྲག་པོས་ཀློག་ཏུ་འཇུག་ཅིང་ཁ་ཏོན་བྱེད་དུ་འཇུག །མ་བསླབས་པའི་བྱང་ཆུབ་སེམས་དཔའ་རྣམས་ལ་བརྙས་པའི་སེམས་མི་སྐྱེད་ལ། བྱང་ཆུབ་སེམས་དཔའ་གཞན་དག་ཀྱང་བསླབ་
པ་དེ་ཁོ་ན་ལ་འགོད་པར་བྱེད། དེ་བཞིན་འཛུམ་ཞིང་གསོང་པོར་སྨྲ་ལ། གཞན་དག་ཀྱང་བཞིན་འཛུམ་ཞིང་གསོང་པོར་སྨྲ་བ་ལ་དགོད། དེ་ཚིག་མི་བརླང་། མི་གཏུམ། མི་རྩུབ་ལ། གཞན་དག་ཀྱང་བསླབ་པ་དེ་ཁོ་ན་

57-1-78b

ལ་དགོད་ཅིང་། དེ་དགའ་བ་དང་སྙན་པར་སྨྲ་ལ། སྲོག་གི་ཕྱིར་ཡང་ཐེག་པ་ཆེན་པོ་མི་སྤོང་ཞིང་། དེ་ཐེག་པ་ཆེན་པོ་ལ་ཞུགས་པའི་བྱང་ཆུབ་སེམས་དཔའ་རྣམས་དང་། ཐེག་པ་ཆེན་པོ་ཀློག་པ་རྣམས་དང་། ཐེག་པ་ཆེན་
པོ་ཡོངས་སུ་འཛིན་པ་རྣམས་ལ་གུས་པ་དྲག་པོ་དང་། དགའ་བ་དང་། མཆོག་ཏུ་དགའ་བ་ཆེན་པོས་སྲི་ཞུ་བྱ་བའི་ཕྱིར་ཉེ་བར་གནས་ལ། གཞན་དག་ཀྱང་བསམ་པ་ཆེན་པོ་དང་། ལྷག་པའི་བསམ་པས་བསླབ་པ་དེ་ཁོ་ན་
ལ་འགོད་པར་བྱེད། སུ་དང་ཡང་ལྷན་གཅིག་འགྱེད་པ་དང་རྩོད་པར་མི་བྱེད། དེ་སྔོན་མ་བྱུང་བ་དང་། མ་ཐོས་པའི་མདོ་སྡེ་རྣམས་གུས་པ་དྲག་པོས་དོན་དུ་གཉེར་ཞིང་ཚོལ་བ་དང་། གང་དག་ལས་ཐོས་པ་དེ་དག་ལ་
གུས་པ་དྲག་པོ་ལྟ་བུ་སྐྱེད་པར་བྱེད་ལ། གཞན་དག་ཀྱང་བསླབ་པ་དེ་ཁོ་ན་ལ་འགོད། གཞན་བྱང་ཆུབ་སེམས་དཔའི་སྤྱོད་པ་ལ་མ་བསླབས་པ་རྣམས་ལ་ཡང་རློམ་སེམས་མི་བྱེད། ཉེས་པ་བདེན་པ་དང་། མི་བདེན་པས་
གཞན་དག་ལ་གླེང་བར་མི་བྱེད། ཉེས་པ་གཞན་གྱི་འཁྲུལ་པ་ཡང་མི་ཚོལ། གཞན་དག་ཀྱང་བསླབ་པ་དེ་ཁོ་ན་ལ་འགོད་པར་བྱེད། དེ་བྱང་ཆུབ་སེམས་དཔའི་ལས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་
ལྟ་བར་བྱེད། གཞན་དག་ཀྱང་བྱང་ཆུབ་སེམས་དཔའི་ལས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་སེམས་དཔའི་ལམ་ཆུད་ཟོས་པའི་སེམས་ཅན་གྱི་ཁམས་ལ་རྣམ་
པར་ལྟ་བར་བྱེད་ལ། གཞན་དག་ཀྱང་བྱང་ཆུབ་སེམས་དཔའི་ལམ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་སེམས་དཔའི་སྤྱོད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་
པར་ལྟ་བར་བྱེད་ལ། གཞན་དག་བྱང་ཆུབ་སེམས་དཔའི་སྤྱོད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་སེམས་དཔའི་རྒྱུ་ཆུད་ཟོས་པའི་སེམས་ཅན་གྱི་ཁམས་ལ་

57-1-79a

རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་སེམས་དཔའི་རྒྱུ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་སེམས་དཔའི་ཐབས་ལ་མཁས་པ་ཆུད་
ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་སེམས་དཔའི་ཐབས་ལ་མཁས་པའི་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་
སེམས་དཔའི་བྱ་བ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་སེམས་དཔའི་བྱ་བ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་
ཆུབ་སེམས་དཔའི་མངོན་པར་འདུ་བྱེད་པའི་སྤྱོད་པའི་སྟོབས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་སེམས་དཔའི་མངོན་པར་འདུ་བྱེད་པའི་སྤྱོད་པའི་སྟོབས་ཆུད་
ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་སེམས་དཔའི་སྤྱོད་པའི་གནས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་
སེམས་དཔའི་སྤྱོད་པའི་གནས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཆུད་ཟོས་པའི་སེམས་ཅན་གྱི་ཁམས་ལ་
རྣམ་པར་ལྟ་བར་བྱེད་ལ། གཞན་དག་ཀྱང་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བགོ་བཤའི་རང་བཞིན་ཅན་ཡིན་ལ། 
གཞན་དག་ཀྱང་བགོ་བཤའི་རང་བཞིན་ཅན་ལ་འགོད་པར་བྱེད། དེ་སངས་རྒྱས་ཀྱི་ཆོས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་སངས་རྒྱས་ཀྱི་ཆོས་ཆུད་ཟོས་པའི་

57-1-79b

སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་དགེ་བའི་ཆོས་ལ་འདུན་པ་དང་བྲལ་བའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་དགེ་བའི་ཆོས་ལ་འདུན་པ་དང་བྲལ་བའི་
སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བཅིང་བས་བཅིངས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བཅིང་བས་བཅིངས་པའི་སེམས་ཅན་གྱི་ཁམས་ལ་
རྣམ་པར་ལྟ་བ་ལ་འགོད་པར་བྱེད། དེ་ཡུན་རིང་པོ་ནས་ན་བའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཡུན་རིང་པོ་ནས་ན་བའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་
པར་བྱེད། དེ་སངས་རྒྱས་ལ་དགེ་བའི་རྩ་བ་བསྐྱེད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་སངས་རྒྱས་ལ་དགེ་བའི་རྩ་བ་བསྐྱེད་པ་ཆུད་ཟོས་པའི་སེམས་ལན་
གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་མགོན་མེད་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་མགོན་མེད་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་
བྱེད། དེ་ཡུན་རིང་པོ་ནས་གཉིད་ཀྱིས་ལོག་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཡུན་རིང་པོ་ནས་གཉིད་ཀྱིས་ལོག་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་དགོད་པ་
འགོད་པར་བྱེད། དེ་རིགས་ངན་དུ་སྐྱེས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་རིགས་ངན་དུ་སྐྱེས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་
ཀྱི་སེམས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་ཀྱི་སེམས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བྱང་ཆུབ་སེམས་

57-1-80a

དཔའི་སྤྱོད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བྱང་ཆུབ་སེམས་དཔའི་སྤྱོད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་
བྱེད། དེ་ཆོས་ཀྱི་སྤྱོད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཆོས་ཀྱི་སྤྱོད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བསོད་ནམས་དང་
ཡེ་ཤེས་ཀྱི་ཚོགས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བསོད་ནམས་དང་ཡེ་ཤེས་ཀྱི་ཚོགས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་
བྱེད། དེ་ཐེག་པ་ཆེན་པོ་ལ་མོས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཐེག་པ་ཆེན་པོ་ལ་མོས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་
ལ་འགོད་པར་བྱེད། དེ་ཚུལ་ཁྲིམས་ཀྱི་སྡོམ་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཚུལ་ཁྲིམས་ཀྱི་སྡོམ་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་
པར་ལྟ་བ་ལ་འགོད་པར་བྱེད། དེ་ཆོས་ཀྱི་རྗེས་སུ་འཐུན་པའི་ཆོས་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཆོས་ཀྱི་རྗེས་སུ་འཐུན་པའི་ཆོས་ཆུད་ཟོས་པའི་སེམས་ཅན་
གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་བཟོད་པ་དང་དེས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་བཟོད་པ་དང་དེས་པ་ཆུད་ཟོས་པའི་སེམས་ཅན་གྱི་ཁམས་
ལ་རྣམ་པར་ལྟ་བ་ལ་འགོད་པར་བྱེད། དེ་ཞི་གནས་དང་ལྷག་མཐོང་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཞི་གནས་དང་ལྷག་མཐོང་ཆུད་ཟོས་པའི་སེམས་ཅན་གྱི་

57-1-80b

ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་སྦྱིན་པ་དང་། དུལ་བ་དང་། ལེགས་པར་སྡོམ་པ་དང་། དེས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་སྦྱིན་པ་དང་། དུལ་བ་དང་། 
ལེགས་པར་སྡོམ་པ་དང་། དེས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་དྲན་པ་དང་། བློ་གྲོས་དང་། བརྟན་པ་དང་། རྟོགས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་
ལྟ་བར་བྱེད་ལ། གཞན་དག་ཀྱང་དྲན་པ་དང་། བློ་གྲོས་དང་། བརྟན་པ་དང་། རྟོགས་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་ཕ་རོལ་ཏུ་ཕྱིན་པའི་ལམ་གྱི་ཚུལ་ལ་འཇུག་པ་
ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཕ་རོལ་དུ་ཕྱིན་པའི་ལམ་གྱི་ཚུལ་ལ་འཇུག་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་
སངས་རྒྱས་ཀྱི་རིགས་སུ་སྐྱེ་བ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་སངས་རྒྱས་ཀྱི་རིགས་སུ་སྐྱེ་བ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་
པར་བྱེད། དེ་དགེ་བའི་བཤེས་གཉེན་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་དགེ་བའི་བཤེས་གཉེན་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། 
དེ་སེམས་ཅན་ལ་ཕན་པར་འདོད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་སེམས་ཅན་ལ་ཕན་པར་འདོད་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་
འགོད་པར་བྱེད། དེ་ཆོས་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཆོས་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་

57-1-81a

པར་བྱེད། དེ་ཡེ་ཤེས་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཡེ་ཤེས་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་
འགོད་པར་བྱེད། དེ་དོན་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་དོན་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་ངེས་
པའི་དོན་གྱི་མདོ་སྡེ་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ངེས་པའི་དོན་གྱི་མདོ་སྡེ་ལ་རྟོན་པ་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་
བྱེད། དེ་ཡང་དག་པར་སྤོང་བ་བཞི་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བར་བྱེད་ལ། གཞན་དག་ཀྱང་ཡང་དག་པར་སྤོང་བ་བཞི་ཆུད་ཟོས་པའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་
པར་བྱེད། དེ་བདེན་པའི་ཆོས་དང་། དོན་དང་། འདུལ་བ་སྨྲ་བ་ལ་མཁས་པ་ཡིན་ལ། གཞན་དག་ཀྱང་བདེན་པའི་ཆོས་དང་དོན་དང་། འདུལ་བ་སྨྲ་བ་ལ་མཁས་པ་ལ་འགོད་པར་བྱེད། དེ་དབུལ་པོའི་སེམས་ཅན་གྱི་
ཁམས་ལ་རྣམ་པར་ལྟ་བར་བྱེད་ཅིང་གཞན་དག་ཀྱང་དབུལ་པོའི་སེམས་ཅན་གྱི་ཁམས་ལ་རྣམ་པར་ལྟ་བ་ལ་འགོད་པར་བྱེད། དེ་འཇིག་རྟེན་གྱི་ཁམས་ཐམས་ཅད་བྱམས་པས་ཁྱབ་པར་བྱེད་དེ། ཀྱེ་མ་སེམས་ཅན་འདི་
དག་ནི་མགོན་མེད་པ། སེམས་ཅན་འདི་དག་ནི་སྐྱབས་མེད་པ། སེམས་ཅན་འདི་དག་ནི་དཔུང་གཉེན་མེད་པ། སེམས་ཅན་འདི་དག་ནི་གླིང་མེད་པ། སེམས་ཅན་འདི་དག་ནི་གནས་མེད་པ། སེམས་ཅན་
འདི་དག་ནི་སྐྱོབ་པ་མེད་པ་ཡིན་ན། ཀྱེ་མ་ནམ་ཞིག་ན་བདག་སེམས་ཅན་འདི་དག་གི་མགོན་དུ་འགྱུར་ཞིག་གུ། སྐྱབས་སུ་འགྱུར་ཞིག་གུ། དཔུང་གཉེན་དུ་འགྱུར་ཞིག་གུ། གླིང་དུ་འགྱུར་ཞིག་གུ། གནས་སུ་འགྱུར་

57-1-81b

ཞིག་གུ། སྐྱོབ་པར་འགྱུར་ཞིག་གུ་སྙམ་པའོ། །འཇམ་དཔལ་དཔེར་ན་བྱའི་རྒྱལ་པོ་ནམ་མཁའ་ལྡིང་ལང་ཚོ་དང་། སྟོབས་དང་། མཐུ་ཆེན་པོ་ཐོབ་པ་དེ་ནི་འདོད་ན་རི་རབ་ཀྱི་རྩེ་མོ་ནས་རི་རབ་ཀྱི་རྩེ་མོར་
འགྲོའོ། །འཇམ་དཔལ་དེ་བཞིན་དུ་དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བ་ལྟ་བུའི་བྱང་ཆུབ་སེམས་དཔའ་ཡང་དགེ་བའི་རྩ་བའི་སྟོབས་དང་། མགྱོགས་པ་དང་། ཤུགས་དང་། རྟུལ་བ་ཆེན་པོས་དེ་བཞིན་གཤེགས་པའི་
འཁོར་གྱི་དཀྱིལ་འཁོར་གང་དུ་སྐྱེ་བར་འདོད་པ་དེར་ཡང་སྐྱེ་བར་འགྱུར་ལ། ངན་སོང་ངན་འགྲོ་ལོག་པར་ལྟུང་བར་སྐྱེས་པའི་སེམས་ཅན་ཐམས་ཅད་ཀྱི་མགོན་དང་སྐྱབས་དང་། དཔུང་གཉེན་དང་། གླིང་དང་། གནས་དང་། 
སྐྱོབ་པར་ཡང་འགྱུར་བ་དེ་ནི་འཇམ་དཔལ་བྱང་ཆུབ་སེམས་དཔའ་དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བ་ལྟ་བུ་པ་ཡིན་པར་རིག་པར་བྱའོ། །འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་
གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་དེ་བཞིན་གཤེགས་པ་རྣམས་ལ་ཉིན་གཅིག་བཞིན་དུ་ལྷའི་ཞལ་ཟས་རོ་བརྒྱ་དང་ལྡན་པ་ཕུལ་ཞིང་། ལྷའི་ན་བཟའ་དག་ཀྱང་ཕུལ་ཏེ་
དེ་བཞིན་གཤེགས་པ་རེ་རེ་ལ་ཡང་ཉིན་གཅིག་བཞིན་དུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ནོར་བུ་རིན་པོ་ཆེ་དབང་གི་རྒྱལ་པོས་ཡོངས་སུ་གང་བར་བྱས་ནས་སྦྱིན་པ་བྱིན་ཏེ། དེ་ལྟར་སྦྱིན་པ་བསྐལ་པ་གང་
གཱའི་ཀླུང་གི་བྱེ་མ་སྙེད་དུ་ཕུལ་ལ། རིགས་ཀྱི་བུ་འམ་རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་རྒྱུན་དུ་ཞུགས་པའི་འབྲས་བུ་ལ་བཞག་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་
དཔལ་གལ་ཏེ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་ཅད་རྒྱུན་དུ་ཞུགས་པའི་འབྲས་བུ་ལ་བཀོད་ལ། རིགས་ཀྱི་བུ་འམ་

57-1-82a

རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་ལན་ཅིག་ཕྱིར་འོང་བའི་འབྲས་བུ་ལ་བཞག་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་གལ་ཏེ་རིགས་ཀྱི་བུའམ་
རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་ཅད་ལན་ཅིག་ཕྱིར་འོང་བའི་འབྲས་བུ་ལ་བཀོད་ལ། རིགས་ཀྱི་བུའམ་རིགས་
ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་ཕྱིར་མི་འོང་བའི་འབྲས་བུ་ལ་བཞག་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་
གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་ཅད་ཕྱིར་མི་འོང་བའི་འབྲས་བུ་ལ་བཀོད་ལ། རིགས་ཀྱི་བུ་འམ་རིགས་ཀྱི་བུ་མོ་གཞན་ཞིག་གིས་ནི་སེམས་
ཅན་གཅིག་དགྲ་བཅོམ་པ་ཉིད་ལ་བཞག་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་
ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་ཅད་དགྲ་བཅོམ་པ་ཉིད་ལ་བཀོད་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་རང་སངས་རྒྱས་ཉིད་ལ་བཞག་ན། འདི་ནི་དེ་བས་
ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་
ཐམས་ཅད་རང་སངས་རྒྱས་ཉིད་ལ་བཀོད་ལ་རིགས་ཀྱི་བུ་འམ་རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་རའི་ཤིང་རྟས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཞག་ན། འདི་ནི་དེ་བས་ཆེས་བསོད་

57-1-82b

ནམས་གྲངས་མེད་པ་སྐྱེད་དོ། །སེམས་བསྐྱེད་དོ། །འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་ཅད་
རའི་ཤིང་རྟས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཀོད་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་གླང་པོ་ཆེའི་ཤིང་རྟས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཞག་ན། འདི་ནི་དེ་
བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་
ཅད་གླང་པོ་ཆེའི་ཤིང་རྟས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཀོད་ལ། རིགས་ཀྱི་བུ་འམ་རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་ཟླ་བ་དང་ཉི་མས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཞག་ན། 
འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུའམ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི། 
རྡུལ་སྙེད་ཀྱི་སེམས་ཅན་ཐམས་ཅད་ཟླ་བ་དང་ཉི་མས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཀོད་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་ཉན་ཐོས་ཀྱི་རྫུ་འཕྲུལ་གྱིས་འགྲོ་བ་ལྟ་བུའི་
བྱང་ཆུབ་ཀྱི་སེམས་ལ་བཞག་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་
ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་ཐམས་ཅད་ཉན་ཐོས་ཀྱིས་རྫུ་འཕྲུལ་གྱིས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཀོད་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་སེམས་ཅན་གཅིག་དེ་

57-1-83a

བཞིན་གཤེགས་པའི་རྫུ་འཕྲུལ་གྱིས་འགྲོ་བ་ལྟ་བུའི་བྱང་ཆུབ་ཀྱི་སེམས་ལ་བཞག་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་
དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་སེམས་ཅན་རྣམས་ལ་ཉིན་གཅིག་བཞིན་དུ་
ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུ་འམ་རིགས་ཀྱི་བུ་མོ་
གཞན་ཞིག་གིས་ནི་དགེ་བསྙེན་དད་པ་ཅན་གསུམ་ལ་སྐྱབས་སུ་སོང་བ། བསླབ་པའི་གཞི་ལྔ་དང་ལྡན་པ། བཅོམ་ལྡན་འདས་ཀྱི་བསྟན་པ་ལ་མངོན་པར་དགའ་བ། 
གཅིག་ལ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་
ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་དགེ་བསྙེན་དད་པ་ཅན་གསུམ་ལ་སྐྱབས་སུ་སོང་བ། བསླབ་པའི་གཞི་ལྔ་
དང་ལྡན་པ། བཅོམ་ལྡན་འདས་ཀྱི་བསྟན་པ་ལ་མངོན་པར་དགའ་བ་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། 
དེ་ལྟར་སྦྱིན་པ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུ་འམ་རིགས་ཀྱི་བུ་མོ་གཞན་ཞིག་གིས་ནི་གང་ཟག་བརྒྱད་པ་ལ་ཉིན་གཅིག་ཟན་ཅིག་བྱིན་ན། འདི་ནི་

57-1-83b

དེ་བས་ཆེས་བསོད་ནམས་གྲངས་མེད་པར་སྐྱེད་དོ། །འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་
རྡུལ་ཕྲ་རབ་ཀྱི་རྡུལ་སྙེད་ཀྱི་གང་ཟག་བརྒྱད་པ་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ་དེ་ལྟར་སྦྱིན་པ་བསྐལ་པ་གང་གཱའི་ཀླུང་གི་བྱེ་མ་
སྙེད་དུ་བྱིན་ལ། རིགས་ཀྱི་བུ་འམ་རིགས་ཀྱི་བུ་མོ་གཞན་ཞིག་གིས་ནི་རྒྱུན་དུ་ཞུགས་པ་གཅིག་ལ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་
ནམས་གྲངས་མེད་པ་བསྐྱེད་དོ། །འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་
རབ་ཀྱི་རྡུལ་སྙེད་ཀྱི་རྒྱུན་དུ་ཞུགས་པ་རྣམས་ལ། ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་
པ་གང་གཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་ལན་ཅིག་ཕྱིར་འོང་བ་གཅིག་ལ་ཉིན་གཅིག་ཟན་ཅིག་བྱིན་ན། 
འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་
ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་ལན་ཅིག་ཕྱིར་འོང་བ་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་

57-1-84a

སྦྱིན་པ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་ཕྱིར་མི་འོང་བ་གཅིག་ལ་ཉིན་གཅིག་
ཟན་ཅིག་བྱིན་ན་འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་
བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་ཕྱིར་མི་འོང་བ་རྣམས་ལ་ཉིན་གཅིག་བཞིན་བུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་ཀྱང་སྦྱིན་ཏེ། དེ་ལྟར་སྦྱིན་པ་བསྐལ་པ་གང་གཱའི་ཀླུང་
གི་བྱེ་མ་སྙེད་དུ་བྱིན་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་དགྲ་བཅོམ་པ་གཅིག་ལ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་
རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་དགྲ་བཅོམ་པ་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་
ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་རང་སངས་རྒྱས་གཅིག་ལ་ཉིན་གཅིག་ཟན་ཅིག་བྱིན་ན། 
འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་
རང་སངས་རྒྱས་རྣམས་ལ། ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུ་འམ་

57-1-84b

རིགས་ཀྱི་བུ་མོ་གཞན་ཞིག་གིས་ནི་རའི་ཤིང་རྟས་འགྲོ་བ་ལྟ་བུའི་བྱང་ཆུབ་སེམས་དཔའ་གཅིག་ལ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །དེ་ཅིའི་ཕྱིར་ཞེ་ན། འཇམ་དཔལ་
བྱང་ཆུབ་སེམས་དཔའ་གང་གི་ཚེ་གང་དང་གང་ལས་བརྩམས་ཏེ་བྱང་ཆུབ་ཀྱི་སེམས་བསྐྱེད་པ་དེའི་ཚེ་དེས་སེམས་དེ་ལ་མི་དགེ་བའི་ལས་མ་སྤངས་པ་ཅི་ཡང་མེད་ལ། དེས་སངས་རྒྱས་ཀྱི་ཆོས་གང་ཡང་མ་བཟུང་བ་མེད་
པའི་ཕྱིར་ཏེ། འཇམ་དཔལ་དེ་ལྟར་ན་བྱང་ཆུབ་སེམས་དཔའ་རྣམས་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པ་ཡིན་ནོ། །འཇམ་དཔལ་དཔེར་ན་བྱའི་རྒྱལ་པོ་ཀ་ལ་པིང་ཀ་སྒོ་ངའི་སྦུབ་ན་འདུག་ཅིང་། མིག་མ་བྱེ་བ་
དག་གིས་ཀྱང་སྒྲ་སྐད་ཀྱི་གདངས་ཟབ་ཅིང་སྙན་པས་བྱའི་ཚོགས་ཐམས་ཅད་ཟིལ་གྱིས་གནོན་པར་བྱེད་དོ། །འཇམ་དཔལ་དེ་བཞིན་དུ་དང་པོ་སེམས་བསྐྱེད་པའི་བྱང་ཆུབ་སེམས་དཔའ་མ་རིག་པའི་སྒོ་ངའི་སྦུབས་ན་
འདུག་ཅིང་། མིག་ལས་དང་ཉོན་མོངས་པའི་མུན་པའི་རབ་རིབ་ཀྱི་པྲིས་ཡོག་པ་ཡང་དགེ་བའི་རྩ་བ་ཡོངས་སུ་བསྔོ་བའི་སྦྱོར་བ་བསྒྲུབ་པའི་སྒྲ་སྐད་ཀྱིས་ཉན་ཐོས་དང་། རང་སངས་རྒྱས་ཐམས་ཅད་ཟིལ་གྱིས་གནོན་
པར་བྱེད་དོ། །འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་རའི་ཤིང་རྟས་འགྲོ་བ་ལྟ་བུ་པའི་བྱང་ཆུབ་སེམས་དཔའ་
རྣམས་ལ། ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུ་འམ་རིགས་ཀྱི་བུ་མོ་གཞན་ཞིག་
གིས་ནི་གླང་པོ་ཆེའི་ཤིང་རྟས་འགྲོ་བ་ལྟ་བུ་པའི་བྱང་ཆུབ་སེམས་དཔའ་གཅིག་ལ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུ་འམ་རིགས་

57-1-85a

ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་གླང་པོ་ཆེའི་ཤིང་རྟས་འགྲོ་བ་ལྟ་བུ་པའི་བྱང་ཆུབ་སེམས་དཔའ་རྣམས་ལ། ཉིན་གཅིག་བཞིན་
དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་ཟླ་བ་དང་ཉི་མས་འགྲོ་བ་ལྟ་བུ་པའི་
བྱང་ཆུབ་སེམས་དཔའ་གཅིག་ལ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་
ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་ཟླ་བ་དང་ཉི་མས་འགྲོ་བ་ལྟ་བུ་པའི་བྱང་ཆུབ་སེམས་དཔའ་རྣམས་ལ་ཉིན་གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གང་གཱའི་
ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་ཉན་ཐོས་ཀྱི་རྫུ་འཕྲུལ་གྱིས་འགྲོ་བ་ལྟ་བུ་པའི་བྱང་ཆུབ་སེམས་དཔའ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པ་
སྐྱེད་དོ། །འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་ཉན་ཐོས་ཀྱི་རྫུ་འཕྲུལ་གྱིས་འགྲོ་བ་ལྟ་བུ་པའི་བྱང་ཆུབ་སེམས་དཔའ་རྣམས་ལ་ཉིན་
གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུ་འམ་རིགས་ཀྱི་བུ་མོ་གཞན་ཞིག་གིས་ནི་དེ་བཞིན་གཤེགས་པའི་རྫུ་
འཕྲུལ་གྱིས་འགྲོ་བ་ལྟ་བུ་པའི་བྱང་ཆུབ་སེམས་དཔའ་གཅིག་ལ་ཉིན་གཅིག་ཟན་ཅིག་བྱིན་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་

57-1-85b

གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་དེ་བཞིན་གཤེགས་པའི་རྫུ་འཕྲུལ་གྱིས་འགྲོ་བ་ལྟ་བུ་པའི་བྱང་ཆུབ་སེམས་དཔའ་རྣམས་ལ། ཉིན་
གཅིག་བཞིན་དུ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུའམ་
རིགས་ཀྱི་བུ་མོ་གཞན་ཞིག་གིས་ནི་ཆོས་ཀྱི་རྣམ་གྲངས་འདི་ཐོས་ནས་མོས་ཤིང་ཡིད་ཆེས་པར་བྱེད་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །
འཇམ་དཔལ་རིགས་ཀྱི་བུ་འམ། །རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་ཁ་ཟས་བྱེད་དུ་བཅུག་ལ། སྟོང་གསུམ་གྱི་སྟོང་ཆེན་པོ་
བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་རང་སངས་རྒྱས་རྣམས་ཀྱི་གནས་འཛམ་བུ་ཆུ་བོའི་གསེར་ལས་བྱས་ལ། ནོར་བུ་རིན་པོ་ཆེ་གློག་གི་སྒྲོན་མས་སྤྲས་པ། ནོར་བུ་རིན་པོ་ཆེ་སྣང་བ་ཐམས་ཅད་བརྩེགས་པའི་སྟེགས་
བུས་བསྐོར་བ། ནོར་བུ་དང་། མུ་ཏིག་དང་། རིན་པོ་ཆེའི་ཆུན་པོས་མཛེས་པར་བྱས་པ། གདུགས་དང་། རྒྱལ་མཚན་དང་། བ་དན་བསྒྲེང་བ། ནོར་བུ་རིན་པོ་ཆེ་དབང་གི་རྒྱལ་པོའི་དྲ་བས་བཀབ་པ། དྲིལ་བུ་གཡེར་
ཀའི་དྲ་བའི་བླ་རེ་བྲེས་པ། ཙན་དན་སྦྲུལ་གྱི་སྙིང་པོས་བྱུགས་པ། མེ་ཏོག་མཱན་དཱ་ར་བ་དང་། མཱན་དཱ་ར་བ་ཆེན་པོ་དང་། མན་ཛུ་ཥ་ཀ་དང་། མན་ཛུ་ཥ་ཀ་ཆེན་པོ་དང་། སྣ་མའི་མེ་ཏོག་དང་། ཀླུ་ཤིང་གི་མེ་ཏོག་དང་། 
ཏ་ར་ནི་བར་ན་དང་། གོ་ཏ་ར་ནི་དང་། དྲི་མཆོག་དང་། དྷ་ནུ་སྐ་རི་དང་། ལྷའི་སྣ་མའི་མེ་ཏོག་དང་། ཨུད་པ་ལ་དང་། པད་མ་དང་། ཀུ་མུ་ཏ་དང་། པད་མ་དཀར་པོ་དང་། མེ་ཏོག་ཆེན་པོ་རྣམས་བཀྲམ་པ་བྱེད་དུ་བཅུག་སྟེ། རང་

57-1-86a

སངས་རྒྱས་དེ་དག་ལ་ལྷའི་ཟས་རོ་བརྒྱ་དང་ལྡན་པ་བྱིན་ཞིང་ལྷའི་གོས་དག་ཀྱང་བྱིན་ཏེ། དེ་ལྟར་སྦྱིན་པ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བྱིན་ལ་རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་སངས་རྒྱས་
ཞེས་བྱ་བའམ། ཐམས་ཅད་མཁྱེན་པ་ཞེས་བྱ་བའམ། འཇིག་རྟེན་གྱི་མགོན་པོ་ཞེས་བྱ་བའི་སྒྲ་ཐོས་སམ། རི་མོར་བྲིས་པ་མཐོང་ངམ། གཟུགས་སུ་བྱས་པ་མཐོང་ན་འདི་ནི་དེ་བས་ཆེས་བསོད་ནམས་གྲངས་མེད་
པ་སྐྱེད་པར་འགྱུར་ན། གང་སོར་མོ་བཅུའི་ཐལ་མོ་སྦྱར་བ་ལྟ་ཅི་སྨོས་ཏེ། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །གང་མར་མེ་འམ། བདུག་པ་འམ། མེ་ཏོག་གམ། སྤོས་འབུལ་བ་ལྟ་ཅི་སྨོས་ཏེ། ཐ་ན་དེའི་ཡོན་
ཏན་བསྔགས་པ་གཅིག་ཙམ་བརྗོད་ན་ཡང་འདི་ནི་དེ་བས་ཆེས་བསོད་ནམས་མང་དུ་སྐྱེད་དོ། །ལོངས་སྤྱོད་ཆེན་པོར་འགྲུབ་པར་བྱེད་ཅིང་མཐར་གྱིས་ཐམས་ཅད་མཁྱེན་པ་ཉིད་དུ་འགྲོ་བར་འགྱུར་རོ། །འཇམ་
དཔལ་དཔེར་ན་ཆུའི་ཐིགས་པ་ཆུང་ངུ་རྒྱ་མཚོ་ཆེན་པོར་སོང་བ་ཡང་སྲེག་པའི་བསྐལ་པའི་མེ་མ་བྱུང་གི་བར་དུ་བར་མ་དོར་ཡོངས་སུ་ཟད་པར་མི་འགྱུར་རོ། །འཇམ་དཔལ་དེ་བཞིན་དུ་དེ་བཞིན་གཤེགས་པ་
ལ་དགེ་བའི་རྩ་བ་བསྐྱེད་པ་ཇི་ལྟར་ཆུང་བ་ཡང་ཐམས་ཅད་མཁྱེན་པའི་ཡེ་ཤེས་ཀྱི་མེ་མ་བྱུང་གི་བར་དུ་བར་མ་དོར་ཡོངས་སུ་ཟད་པའམ། མཐར་ཐུག་པར་མི་འགྱུར་རོ། །འཇམ་དཔལ་དཔེར་ན་
ཟླ་བའི་དཀྱིལ་འཁོར་ནི་ཇི་ལྟར་ཆུང་ཡང་། འདི་ལྟ་སྟེ། བོང་དང་། ཁྱོན་དང་། ཆེ་བས་སྐར་མའི་ཚོགས་ཐམས་ཅད་ཟིལ་གྱིས་མནན་ནས་ལྷང་ངེར་འདུག་ཅིང་ཀུན་དུ་ལྷང་ངེར་འཇུག་གོ། །འཇམ་དཔལ་དེ་བཞིན་
དུ་དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པ་ཇི་ལྟར་ཆུང་བ་ཡང་འདི་ལྟ་སྟེ། མཐོ་བ་དང་། ཡངས་པ་དང་། ཆེ་བས་དགེ་བའི་རྩ་བ་ཐམས་ཅད་ཟིལ་གྱིས་མནན་ནས་ལྷང་ངེར་འཇུག་གོ། །འཇམ་དཔལ་དེ་ལྟར་

57-1-86b

ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་ནོ། །འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་
རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་དེ་བཞིན་གཤེགས་པ་ཐམས་ཅད་བྱང་ཆུབ་སེམས་དཔའ་རྣམས་དང་། ཉན་ཐོས་རྣམས་དང་བཅས་པ་ལ་ཉིན་གཅིག་བཞིན་དུ་ལྷའི་ཞལ་ཟས་རོ་བརྒྱ་དང་
ལྡན་པ་ཕུལ་ཞིང་ལྷའི་ན་བཟའ་དག་ཀྱང་ཕུལ་ཏེ། དེ་ལྟར་སྦྱིན་པ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བྱིན་ལ། རིགས་ཀྱི་བུ་འམ་རིགས་ཀྱི་བུ་མོ་གཞན་ཞིག་གིས་ནི་ཆོས་ཀྱི་རྣམ་གྲངས་འདི་ཐོས་ནས་
མོས་པར་བྱེད་ན། འདི་ནི་དེ་བས་ཆེས་བསོད་ནམས་ཚད་མེད་པ་སྐྱེད་པར་འགྱུར་ན། གང་ཡི་གེར་འདྲི་བ་འམ། ཡི་གེར་འདྲིར་འཇུག་པ་འམ། སྟོན་པར་བྱེད་པ་ལྟ་ཅི་སྨོས་ཏེ། འདི་ནི་དེ་བས་སངས་རྒྱས་ཀྱི་
ཡེ་ཤེས་ཐོབ་པར་འགྱུར་བའི་བསོད་ནམས་ཆེས་མང་དུ་སྐྱེད་དོ། །འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་སྡང་བའི་སེམས་ཀྱིས་ཉན་ཐོས་དང་། རང་སངས་རྒྱས་དཔག་ཏུ་མེད་པ་
དག་གི་ཟས་དང་གོས་བཅད་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་ཁྲོས་ཏེ་སྡང་བའི་སེམས་ཀྱིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའི་ཟན་ཅིག་ཕྲོགས་སམ། ཟན་
གཅོད་དུ་བཅུག་ན་འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །དེ་ཅིའི་ཕྱིར་ཞེ་ན། འཇམ་དཔལ་འདས་པ་དང་། མ་འོངས་པ་དང་། ད་ལྟར་བྱུང་བའི་ཉན་ཐོས་དང་། རང་སངས་རྒྱས་ཐམས་ཅད་
ཀྱི་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ལ་སོགས་པ་བསྐལ་པ་བྱེ་བ་གྲངས་མེད་པ་ནས་ཡང་དག་པར་བསྒྲུབས་པ་གང་ཡིན་པ་དེ་དག་ཐམས་

57-1-87a

ཅད་ནི་རང་གི་སེམས་ཀྱི་རྒྱུད་ལས་སྐྱེས་པའི་ཉོན་མོངས་པ་རྣམས་འཇོམས་པར་བྱེད་པར་ཟད་ཀྱི། བྱང་ཆུབ་སེམས་དཔའ་ནི་ཐ་ན་དུད་འགྲོའི་སྐྱེ་གནས་སུ་སྐྱེས་པའི་སེམས་ཅན་ལ་ཁམ་གཅིག་ཙམ་
ཡོངས་སུ་བཏང་བ་ཡང་དཀོན་མཆོག་གསུམ་གྱི་གདུང་མི་འཆད་པར་འགྱུར་བར་བྱེད་པའི་ཕྱིར་རོ། །འཇམ་དཔལ་ནན་གྱིས་དཔེར་བྱ་ན་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཁྲོས་ཏེ་སྡང་བའི་སེམས་
ཀྱིས་ཉན་ཐོས་དང་། རང་སངས་རྒྱས་དཔག་ཏུ་མེད་པ་དག་གི་ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་
བའི་ཕུང་པོ་མེད་པར་བྱས་ལ། རིགས་ཀྱི་བུ་འམ་རིགས་ཀྱི་བུ་མོ་གཞན་ཞིག་གིས་ནི་སྡང་བའི་སེམས་ཀྱིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའི་ཚུལ་ཁྲིམས་ཐ་ན་བསླབ་པ་གཅིག་བླངས་པ་ཙམ་ཡང་མེད་
པར་བྱས་ན། འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །དེ་ཅིའི་ཕྱིར་ཞེ་ན། ཉན་ཐོས་དང་། རང་སངས་རྒྱས་ཐམས་ཅད་ཀྱི་ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། 
རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ནི་རང་གི་སེམས་ཀྱི་རྒྱུད་ལས་སྐྱེས་པའི་ཉོན་མོངས་པ་རྣམས་འཇོམས་པར་བྱེད་པར་ཟད་ཀྱི། བྱང་ཆུབ་སེམས་དཔའ་ནི་ཐ་ན་ཉི་མ་
གཅིག་གི་བསླབ་པ་གཅིག་ལས་བྱུང་བའི་ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་ཐམས་ཅད་ཀྱི་
སེམས་ཅན་ཐམས་ཅད་ཀྱི་ཉོན་མོངས་པ་ཐམས་ཅད་འཇོམས་པར་བྱེད་པ་ནས་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་འཐོབ་པར་འགྱུར་བའི་ཕྱིར་རོ། །འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་

57-1-87b

གིས་ཁྲོས་ཏེ། གནོད་སེམས་ཀྱི་སེམས་ཀྱིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་བཙོན་རར་བཅུག་ལ། རིགས་ཀྱི་བུའམ། རིགས་ཀྱི་བུ་མོ་གཞན་ཞིག་གིས་ནི་བྱང་ཆུབ་སེམས་དཔའ་
ལ་ཁྲོས་ཏེ། གནོད་སེམས་ཀྱི་སེམས་ཀྱིས་འདི་དང་ཕྲད་པར་མ་གྱུར་ཅིག་ཅེས་རྒྱབ་ཀྱིས་ཕྱོགས་ཏེ་འདུག་ན། འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་
ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་ཀྱི་མིག་ཕྱུང་ལ། རིགས་ཀྱི་བུ་འམ་རིགས་ཀྱི་བུ་མོ་གཞན་ཞིག་གིས་ནི་ཁྲོས་ཏེ་གནོད་སེམས་ཀྱི་སེམས་ཀྱིས་བྱང་ཆུབ་
སེམས་དཔའ་ལ་བལྟས་ན། འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །འཇམ་དཔལ་ནན་གྱིས་དཔེར་བྱ་ན་གལ་ཏེ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་ཀྱི་
མིག་ཕྱུང་བར་གྱུར་ལ། དེ་ནས་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་བྱམས་པའི་སེམས་ཀྱིས་མིག་བསྐྱེད་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་ཐེག་པ་ཆེན་པོ་ལ་མོས་
པའི་བྱང་ཆུབ་སེམས་དཔའ་ལ་དགའ་བའི་སེམས་ཀྱིས་བལྟས་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་
འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་བཙོན་རར་འདུག་པ་ལས་བཙོན་ར་ནས་ཐར་བར་བྱས་ནས་འཁོར་ལོས་སྒྱུར་བའི་བདེ་བ་ལ་བཀོད་ལ། རིགས་ཀྱི་བུ་འམ་རིགས་ཀྱི་བུ་མོ་གཞན་ཞིག་
གིས་ནི་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ལ་དགའ་བའི་སེམས་ཀྱིས་མཐོང་བར་འདོད་ཅིང་། དགའ་བའི་སེམས་ཀྱིས་དེའི་བསྔགས་པ་བརྗོད་ན། འདི་ནི་དེ་བས་ཆེས་བསོད་ནམས་

57-1-88a

གྲངས་མེད་པ་སྐྱེད་དོ། །འཇམ་དཔལ་བྱང་ཆུབ་སེམས་དཔའ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་རང་སངས་རྒྱས་ཉིད་ལ་བཀོད་ལ། བྱང་ཆུབ་སེམས་
དཔའ་གཞན་ཞིག་གིས་ནི་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའི་དགེ་བའི་རྩ་བ་སངས་རྒྱས་ལ་བསྐྱེད་པ་གཅིག་ཙམ་འཕེལ་བར་བྱས་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་
ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་བྱང་ཆུབ་ཀྱི་སེམས་ལ་བཀོད་ལ། ཐེག་པ་ཆེན་པོ་ལ་མོས་པའི་
བྱང་ཆུབ་སེམས་དཔའ་གཞན་ཞིག་གིས་ནི་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ཕུང་པོ་མེད་པའི་ཚིགས་སུ་བཅད་པ་གཅིག་ཙམ་འདོན་དུ་བཅུག་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་
དཔལ་ནན་གྱིས་དཔེར་བྱ་ན་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་རང་སངས་རྒྱས་རྣམས་སེམས་ཅན་དམྱལ་བ་དང་། དུད་འགྲོ་དང་། ཡི་
དགས་རྣམས་སུ་སྐྱེས་པར་བྱས་ལ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་ནི་བྱང་ཆུབ་སེམས་དཔའ་གཅིག་བྱང་ཆུབ་ཀྱི་སེམས་ལས་མོས་པ་བཟློགས་ན། འདི་ནི་དེ་བས་ཆེས་སྡིག་པ་གྲངས་མེད་
པ་སྐྱེད་དོ། །འཇམ་དཔལ་གལ་ཏེ་རིགས་ཀྱི་བུ་འམ་རིགས་ཀྱི་བུ་མོ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་བྱང་ཆུབ་ཀྱི་སེམས་ལས་མོས་པ་བཟློག་ལ། རིགས་
ཀྱི་བུ་འམ་རིགས་ཀྱི་བུ་མོ་གཞན་ཞིག་གིས་ནི་ཐ་ན་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་གཅིག་ཐེག་པ་ཆེན་པོ་ལ་མོས་པ་བཟློག་ན། འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །འཇམ་

57-1-88b

དཔལ་གལ་ཏེ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་དང་། གཤིན་རྗེའི་འཇིག་རྟེན་དུ་སྐྱེས་པར་གྱུར་ལ། དེ་ནས་བྱང་ཆུབ་སེམས་དཔའ་གང་ལ་ལ་ཞིག་གིས་སེམས་ཅན་
དེ་དག་ཐམས་ཅད་སེམས་ཅན་དམྱལ་བ་དང་། དུད་འགྲོ་དང་། གཤིན་རྗེའི་འཇིག་རྟེན་ནས་བཏོན་ནས་བྱང་ཆུབ་ཀྱི་སེམས་ལ་བཀོད་ལ། བྱང་ཆུབ་སེམས་དཔའ་གཞན་ཞིག་གིས་ནི་སེམས་ཅན་གཅིག་ཐེག་པ་ཆེན་པོ་ལ་མོས་པ་ལ་
འཇུག་པར་བྱེད་ན། འདི་ནི་དེ་བས་ཆེས་བསོད་ནམས་གྲངས་མེད་པ་སྐྱེད་དོ། །འཇམ་དཔལ་གང་ལ་ལ་ཞིག་གིས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་རང་སངས་རྒྱས་རྣམས་རང་
སངས་རྒྱས་ལས་ཉམས་པར་བྱས་ལ། གཅིག་གིས་ནི་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་གཅིག་བྱང་ཆུབ་སེམས་དཔའ་ལས་ཉམས་པར་བྱས་ན། འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །
འཇམ་དཔལ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་རྡུལ་སྙེད་ཀྱི་རང་སངས་རྒྱས་རྣམས་ཀྱི་རྙེད་པ་དང་། བཀུར་སྟི་བཅད་པའི་ཕྱིར་རྙེད་པ་དང་། བཀུར་སྟི་ལ་སེར་སྣའི་སེམས་བསྐྱེད་ཅིང་ཕྱོགས་དང་
ཕྱོགས་མཚམས་རྣམས་སུ་དེ་དག་གི་གྲགས་པ་དང་། སྒྲ་དང་། ཚིགས་སུ་བཅད་པ་མ་ཡིན་པ་བསྒྲགས་ལ། རིགས་ཀྱི་བུའམ་རིགས་ཀྱི་བུ་མོ་གཞན་ཞིག་གིས་ནི་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་གཅིག་གི་
རྙེད་པ་དང་། བཀུར་སྟི་གཅད་པའི་ཕྱིར་རྙེད་པ་དང་། བཀུར་སྟི་ལ་སེར་སྣའི་སེམས་བསྐྱེད་ཅིང་བསྔགས་པ་མ་ཡིན་པ་བསྒྲགས་ན། འདི་ནི་དེ་བས་ཆེས་སྡིག་པ་གྲངས་མེད་པ་སྐྱེད་དོ། །འཇམ་དཔལ་
གང་ལ་ལ་ཞིག་གིས་དམ་པའི་ཆོས་ཡོངས་སུ་གཟུང་བའི་ཕྱིར་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ལ་དགའ་བའི་སེམས་ཀྱིས་ཐ་ན་ཆུ་རའི་ཆུ་ཙམ་བྱིན་ན་ཡང་ལས་དེས་དེ་འཁོར་ལོས་སྒྱུར་བའི་རྒྱལ་སྲིད་དུ་མ་

57-1-89a

མྱོང་བར་གྱུར་ན། བྱང་ཆུབ་སེམས་དཔའ་ཀློག་པ་དང་། ཁ་ཏོན་བྱེད་པ་ལ་མོས་པ་ལ་ལྟ་ཅི་སྨོས། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་དེ་དག་དང་། ཉན་ཐོས་
དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ངེས་པ་དང་མ་ངེས་པར་འགྲོ་བའི་ཕྱག་རྒྱ་ལ་
འཇུག་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། རྒྱ་གར་གྱི་མཁན་པོ་པྲཛྙཱ་བརྨ་དང་། སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡྷེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་
ཕབ་པ། ། ༄༅། །རྒྱ་གར་སྐད་དུ། ཨཱརྱ་དྷརྨ་མུ་དྲཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ།  འཕགས་པ་ཆོས་ཀྱི་ཕྱག་རྒྱ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་
སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་
ལྔ་སྟོང་ཐམས་པའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དག་དང་ཐབས་གཅིག་ཏུ་བཞུགས་ཏེ། དེ་ནས་ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ཀྱི་
མཐུས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་གཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་
འདི་སྐད་ཅེས་གསོལ་ཏོ། །བཅོམ་ལྡན་འདས་རབ་ཏུ་བྱུང་བ་ཞེས་བགྱི་ན་བཅོམ་ལྡན་འདས་ཇི་ཙམ་གྱིས་ན་ལེགས་པར་གསུངས་པའི་ཆོས་འདུལ་བ་ལ་དགེ་སློང་རབ་ཏུ་བྱུང་བ་འཕགས་པ་འཇིག་རྟེན་ལས་འདས་

57-1-89b

པའི་རྫོགས་པར་བསྙེན་པས་རྫོགས་པར་བསྙེན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་སོ་སོའི་སྐྱེ་བོའི་ཆོས་རྣམས་ལས་ཀྱང་མ་འདས་ལ། ཟག་པ་མེད་པའི་ཆོས་རྣམས་ཀྱང་མ་ཐོབ་
པ་དེ་ཙམ་གྱིས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་འཕགས་པ་འཇིག་རྟེན་ལས་འདས་པའི་རྫོགས་པར་བསྙེན་པས་རྗོགས་པར་བསྙེན་པ་ཡིན་ཏེ། དེ་ལྟར་རབ་ཏུ་བྱུང་བ་གང་དག་ཡིན་པ་
དེ་དག་ནི་ཡང་དག་པར་རབ་ཏུ་བྱུང་བ་ཡིན་གྱི་དེ་ལྟ་མ་ཡིན་པར་རབ་ཏུ་བྱུང་བ་གང་དག་ཡིན་པ་དེ་དག་ནི་ལོག་པར་རབ་ཏུ་བྱུང་བ་ཡིན་ནོ། །ཤཱ་རིའི་བུ་དགེ་སློང་དེ་ལྟ་བུས་ནི་དད་པས་བྱིན་པ་ལོངས་སྤྱད་པར་འོས་ཏེ། གོས་དང་། 
ཟས་དང་མལ་ཆ་དང་། སྟན་དང་། ན་བའི་གསོས་སྨན་དང་། སྨན་ཟོང་རྣམས་ལོངས་སྤྱད་པར་འོས་སོ། །ཤཱ་རིའི་བུ་གཞན་ཡང་བརྩོན་པ་མི་གཏོང་བའི་དགེ་སློང་གང་ཡིན་པ་དེ་ནི་གཟུགས་གཏོང་བར་མི་བྱེད། ཚོར་བ་དང་། 
འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་གཏོང་བར་མི་བྱེད་དེ། དེ་ཙམ་གྱིས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་འཕགས་པ་འཇིག་རྟེན་ལས་འདས་པའི་རྫོགས་པར་བསྙེན་
པས་རྫོགས་པར་བསྙེན་པ་ཡིན་ཏེ། དེ་ལྟར་རབ་ཏུ་བྱུང་བ་གང་དག་ཡིན་པ་དེ་དག་ནི་ཡང་དག་པར་རབ་ཏུ་བྱུང་བ་ཡིན་གྱི། དེ་ལྟ་མ་ཡིན་པར་རབ་ཏུ་བྱུང་བ་གང་དག་ཡིན་པ་དེ་དག་ནི་ལོག་པར་རབ་ཏུ་བྱུང་བ་ཡིན་ནོ། །ཤཱ་རིའི་
བུ་དགེ་སློང་དེ་ལྟ་བུས་ནི་དད་པས་བྱིན་པ་ལོངས་སྤྱད་པར་འོས་ཏེ། གོས་དང་ཟས་དང་། མལ་ཆ་དང་། སྟན་དང་། ན་བའི་གསོས་དང་། སྨན་ཟོང་རྣམས་ལོངས་སྤྱད་པར་འོས་སོ། །དེ་ནས་ཚེ་དང་ལྡན་པ་རབ་འབྱོར་གྱིས་ཚེ་དང་
ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ཀྱིས་ཅི་ལ་དགོངས་ཏེ། སོ་སོའི་སྐྱེ་བོའི་ཆོས་རྣམས་ལས་ཀྱང་མ་འདས་ལ། ཟག་པ་མེད་པའི་ཆོས་རྣམས་ཀྱང་

57-1-90a

མ་ཐོབ་པ་དེ་ཙམ་གྱིས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་འཕགས་པ་འཇིག་རྟེན་ལས་འདས་པའི་རྫོགས་པར་བསྙེན་པས་རྫོགས་པར་བསྙེན་པ་ཡིན་ཏེ། དེ་ལྟར་རབ་ཏུ་བྱུང་བ་གང་
དག་ཡིན་པ་དེ་དག་ནི་ཡང་དག་པར་རབ་ཏུ་བྱུང་བ་ཡིན་གྱི། དེ་ལྟ་མ་ཡིན་པར་རབ་ཏུ་བྱུང་བ་གང་དག་ཡིན་པ་དེ་དག་ནི་ལོག་པར་རབ་ཏུ་བྱུང་བ་ཡིན་ནོ། །ཤཱ་རིའི་བུ་དགེ་སློང་དེ་ལྟ་བུས་ནི་དད་པས་བྱིན་པ་ལོངས་སྤྱད་པར་འོས་ཏེ། 
གོས་དང་། ཟས་དང་། མལ་ཆ་དང་སྟན་དང་ན་བའི་གསོས་སྨན་དང་། སྨན་ཟོང་རྣམས་ལོངས་སྤྱོད་པར་འོས་སོ་ཞེས་དེ་སྐད་བཀའ་སྩལ། ཤཱ་རིའི་བུས་སྨྲས་པ། ཚེ་དང་ལྡན་པ་རབ་འབྱོར་སོ་སོའི་སྐྱེ་བོའི་ཆོས་རྣམས་ནི་སྒྱུ་མ་ལྟ་བུ་
སྟེ། དེ་དག་ནི་འདའ་བར་བྱ་བར་མི་ནུས་སོ། །ཚེ་དང་ལྡན་པ་རབ་འབྱོར་སོ་སོའི་སྐྱེ་བོའི་ཆོས་རྣམས་ནི་ཡོངས་སུ་མ་གྲུབ་པ་སྟེ། དེ་དག་ནི་འདའ་བར་བྱ་བ་མ་ཡིན་ནོ། །ཚེ་དང་ལྡན་པ་རབ་འབྱོར་སེམས་ཅན་གྱི་ཁམས་
ནི་ནང་ན་ཡང་མི་དམིགས། ཕྱི་རོལ་ན་ཡང་མི་དམིགས། གཉིས་ཀ་མེད་པར་ཡང་མི་དམིགས་ཏེ། སེམས་ཅན་གྱི་ཁམས་ཀྱི་རང་བཞིན་གང་ཡིན་པ་དང་། སོ་སོའི་སྐྱེ་བོའི་ཆོས་རྣམས་ཀྱི་རང་བཞིན་གང་ཡིན་པ་དེ་དག་
ནི་འདའ་བར་བྱ་བར་སླ་བ་མ་ཡིན་ནོ། །ཚེ་དང་ལྡན་པ་རབ་འབྱོར་བཅོམ་ལྡན་འདས་ཀྱིས་འདི་སྐད་དུ་སོ་སོའི་སྐྱེ་བོའི་ཆོས་རྣམས་ལས་ཀྱང་མ་འདས་ལ་ཟག་པ་མེད་པའི་ཆོས་རྣམས་ཀྱང་མ་ཐོབ་པ་དེ་ཙམ་གྱིས་ན་དགེ་སློང་
ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་འཕགས་པའི་འཇིག་རྟེན་ལས་འདས་པའི་རྫོགས་པར་བསྙེན་པས་རྫོགས་པར་བསྙེན་པ་ཡིན་ཏེ། དེ་ལྟར་རབ་ཏུ་བྱུང་བ་གང་དག་ཡིན་པ་དེ་དག་ནི་ཡང་དག་
པར་རབ་ཏུ་བྱུང་བ་ཡིན་གྱིས། དེ་ལྟ་མ་ཡིན་པར་རབ་ཏུ་བྱུང་བ་གང་དག་ཡིན་པ་དེ་དག་ནི་ལོག་པར་རབ་ཏུ་བྱུང་བ་ཡིན་ནོ། །ཤཱ་རིའི་བུ་དགེ་སློང་དེ་ལྟ་བུས་ནི་དད་པས་བྱིན་པ་ལོངས་སྤྱད་པར་འོས་ཏེ། གོས་དང་། ཟས་དང་། 

57-1-90b

མལ་ཆ་དང་། སྟན་དང་། ན་བའི་གསོས་དང་། སྨན་ཟོང་རྣམས་ལོངས་སྤྱད་པར་འོས་སོ་ཞེས་གང་གསུངས་པ་དེ་ཡང་ཚེ་དང་ལྡན་པ་རབ་འབྱོར་གང་དག་གི་རྟེན་ཏམ། གནས་མེད་པ་དེ་དག་ནི་ཇི་ལྟར་ཐོབ་པར་རུང་། ཚེ་
དང་ལྡན་པ་རབ་འབྱོར་གལ་ཏེ་ཟག་པ་མེད་པའི་ཆོས་རྣམས་ཐོབ་ཏུ་རུང་ན་ནི་དམིགས་པ་ལས་དགྲ་བཅོམ་པ་འབྱུང་བར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་
ཀྱི་ཆོས་ཉིད་ནི་ལྟོས་པ་མེད་པ་སྟེ། ཚེ་དང་ལྡན་པ་རབ་འབྱོར་བཅོམ་ལྡན་འདས་ཀྱིས་དེ་ལ་དགོངས་ནས་འདི་སྐད་དུ་སོ་སོའི་སྐྱེ་བོའི་ཆོས་རྣམས་ལས་ཀྱང་མ་འདས་ལ། ཟག་པ་མེད་པའི་ཆོས་རྣམས་ཀྱང་མ་ཐོབ་
པ་དེ་ཙམ་གྱིས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་འཕགས་པ་འཇིག་རྟེན་ལས་འདས་པའི་རྫོགས་པར་བསྙེན་པས་རྫོགས་པར་བསྙེན་པ་ཡིན་ཏེ། དེ་ལྟར་རབ་ཏུ་བྱུང་བ་གང་དག་ཡིན་
པ་དེ་དག་ནི་ཡང་དག་པར་རབ་ཏུ་བྱུང་བ་ཡིན་གྱི། དེ་ལྟར་མ་ཡིན་པར་རབ་ཏུ་བྱུང་བ་གང་ཡིན་པ་དེ་དག་ནི་ལོག་པར་རབ་ཏུ་བྱུང་བ་ཡིན་ནོ། །ཤཱ་རིའི་བུ་དགེ་སློང་དེ་ལྟ་བུས་ནི་དད་པས་བྱིན་པ་ལ་ལོངས་སྤྱད་པར་འོས་ཏེ། 
གོས་དང་། ཟས་དང་། མལ་ཆ་དང་། སྟན་དང་། ན་བའི་གསོས་སྨན་དང་། སྨན་ཟོང་རྣམས་ལོངས་སྤྱད་པར་འོས་སོ་ཞེས་བཀའ་སྩལ་ཏོ། །དེ་ནས་ཚེ་དང་ལྡན་པ་རབ་འབྱོར་གྱིས་ཡང་ཚེ་དང་ལྡན་པ་ཤཱ་རིའི་བུ་ལ་
འདི་སྐད་ཅེས་སྨྲས་སོ། །ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ཀྱིས་ཅི་ལས་དགོངས་ཏེ་བརྩོན་པ་མི་གཏོང་བའི་དགེ་སློང་གང་ཡིན་པ་དེ་ནི་གཟུགས་གཏོང་བར་མི་བྱེད། ཚོར་བ་དང་། འདུ་ཤེས་དང་། འདུ་བྱེད་རྣམས་
དང་། རྣམ་པར་ཤེས་པ་གཏོང་བར་མི་བྱེད་དེ། དེ་ཙམ་གྱིས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་འཕགས་པ་འཇིག་རྟེན་ལས་འདས་པའི་རྫོགས་པར་བསྙེན་པས་རྫོགས་པར་བསྙེན་པ་

57-1-91a

ཡིན་ཏེ། དེ་ལྟར་རབ་ཏུ་བྱུང་བ་གང་དག་ཡིན་པ་དེ་དག་ནི་ཡང་དག་པར་རབ་ཏུ་བྱུང་བ་ཡིན་གྱི། དེ་ལྟ་མ་ཡིན་པར་རབ་ཏུ་བྱུང་བ་གང་དག་ཡིན་པ་དེ་དག་ནི་ལོག་པར་རབ་ཏུ་བྱུང་བ་ཡིན་ནོ། །ཤཱ་རིའི་བུ་དགེ་སློང་
དེ་ལྟ་བུས་ནི་དད་པས་བྱིན་པ་ལོངས་སྤྱོད་པར་འོས་ཏེ། གོས་དང་། ཟས་དང་། མལ་ཆ་དང་། སྟན་དང་། ན་བའི་གསོས་སྨན་དང་། སྨན་ཟོང་རྣམས་ལོངས་སྤྱད་པར་འོས་སོ་ཞེས་དེ་སྐད་བཀའ་སྩལ། ཤཱ་རིའི་བུས་སྨྲས་པ། 
ཚེ་དང་ལྡན་པ་རབ་འབྱོར་བཅོམ་ལྡན་འདས་ཀྱིས་ཆོས་ཉིད་ལས་དགོངས་ནས་འདི་སྐད་དུ་བརྩོན་པ་མི་གཏོང་བའི་དགེ་སློང་གང་ཡིན་པ་དེ་ནི་གཟུགས་གཏོང་བར་མི་བྱེད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་
ཤེས་པ་གཏོང་བར་མི་བྱེད་ཅེས་བཀའ་སྩལ་ཏོ། །ཚེ་དང་ལྡན་པ་རབ་འབྱོར་ཆོས་ཀྱི་དབྱིངས་ནི་ནང་ན་ཡང་མི་དམིགས། ཕྱི་རོལ་ན་ཡང་མི་དམིགས། གཉི་ག་མེད་པར་ཡང་མི་དམིགས་སོ། །ནང་གདགས་པ་ནི་
གདགས་སུ་མེད་པ་དང་སྐྱེ་བ་མེད་པའི་གདགས་པའོ། །དེ་ལྟར་ན་སེམས་ཅན་གྱི་ཁམས་མཉམ་པ་ཉིད་ཀྱིས་ཆོས་ཀྱི་དབྱིངས་མཉམ་པ་ཉིད་དོ། །ཆོས་ཀྱི་དབྱིངས་མཉམ་པ་ཉིད་ཀྱིས་སེམས་ཅན་གྱི་ཁམས་མཉམ་
པ་ཉིད་དོ། །དེ་ལྟར་ན་སེམས་ཅན་གྱི་ཁམས་དང་ཆོས་ཀྱི་དབྱིངས་འདི་ནི་གཉིས་སུ་མེད་དེ་གཉིས་སུ་བྱར་མེད་དོ། །གང་ལ་གཉིས་སུ་མེད་པ་དེ་གཉིས་སུ་བྱར་མེད་པ་དེ་ལ་ནི་གསལ་བ་ཡང་མེད། གཞག་པ་ཡང་མེད་
དོ། །གང་ལ་གསལ་བ་ཡང་མེད། གཞག་པ་ཡང་མེད་པ་དེ་ནི་འདས་པ་འམ་འཐོབ་པར་བྱར་མི་ནུས་ཏེ། ཚེ་དང་ལྡན་པ་རབ་འབྱོར་བཅོམ་ལྡན་འདས་ཀྱིས་དེ་ལ་དགོངས་ནས་འདི་སྐད་དུ་བརྩོན་པ་མི་གཏོང་བའི་དགེ་སློང་གང་ཡིན་
པ་དེ་ནི་གཟུགས་གཏོང་བར་མི་བྱེད། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་གཏོང་བར་མི་བྱེད་དེ། དེ་ཙམ་གྱིས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་འཕགས་པ་

57-1-91b

འཇིག་རྟེན་ལས་འདས་པའི་རྫོགས་པར་བསྙེན་པས་རྫོགས་པར་བསྙེན་པ་ཡིན་ཏེ། དེ་ལྟར་རབ་ཏུ་བྱུང་བ་གང་དག་ཡིན་པ་དེ་དག་ནི་ཡང་དག་པར་རབ་ཏུ་བྱུང་བ་ཡིན་གྱི། དེ་ལྟ་མ་ཡིན་པར་རབ་ཏུ་བྱུང་བ་གང་དག་ཡིན་པ་དེ་དག་ནི་
ལོག་པར་རབ་ཏུ་བྱུང་བ་ཡིན་ནོ། །ཤཱ་རིའི་བུ་དགེ་སློང་དེ་ལྟ་བུས་ནི་དད་པས་བྱིན་པ་ལོངས་སྤྱད་པར་འོས་ཏེ། གོས་དང་། ཟས་དང་། མལ་ཆ་དང་། སྟན་དང་། ན་བའི་གསོས་སྨན་དང་། སྨན་ཟོང་རྣམས་ལོངས་སྤྱད་པར་འོས་
སོ་ཞེས་བཀའ་སྩལ་ཏོ། །དོགས་པ་མེད་པའི་དགེ་སློང་ནི་དོགས་པ་ཁས་མི་ལེན་ཏོ། །ཡི་གེ་མེད་ཅིང་ཡི་གེ་ལས་འདས་པའི་དགེ་སློང་གང་ཡིན་པ་དེ་ནི་བགྲང་བ་ལས་བསྟན་པར་མི་ནུས་ལ། དེ་ལ་ནི་འོང་བ་ཡང་མེད། 
འགྲོ་བ་ཡང་མེད། འགྲེང་བ་ཡང་མེད། འདུག་པ་ཡང་མེད། ཉལ་བ་ཡང་མེད་དོ། །རྟོག་པ་ཅན་མ་ཡིན་པའི་དགེ་སློང་ནི་བརྟགས་པ་ལ་ལོངས་སྤྱོད་པའོ། །རྟོག་པ་ཅན་གྱི་དགེ་སློང་ནི་མ་བརྟགས་པ་ལ་ལོངས་
སྤྱོད་པ་སྟེ། ཚེ་དང་ལྡན་པ་རབ་འབྱོར་བཅོམ་ལྡན་འདས་ཀྱིས་དེ་ལ་དགོངས་ནས་དེ་ཙམ་གྱིས་ན་དགེ་སློང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་འཕགས་པ་འཇིག་རྟེན་ལས་འདས་པའི་རྫོགས་པར་བསྙེན་པས་
རྫོགས་པར་བསྙེན་པ་ཡིན་ཏེ། དེ་ལྟར་རབ་ཏུ་བྱུང་བ་གང་དག་ཡིན་པ་དེ་དག་ནི་ཡང་དག་པར་རབ་ཏུ་བྱུང་བ་ཡིན་གྱི། དེ་ལྟ་མ་ཡིན་པར་རབ་ཏུ་བྱུང་བ་གང་དག་ཡིན་པ་དེ་དག་ནི་ལོག་པར་རབ་ཏུ་བྱུང་བ་ཡིན་ནོ། །ཤཱ་རིའི་བུ་དགེ་
སློང་དེ་ལྟ་བུས་ནི་དད་པས་བྱིན་པ་ལོངས་སྤྱད་པར་འོས་ཏེ། གོས་དང་། ཟས་དང་། མལ་ཆ་དང་། སྟན་དང་། ན་བའི་གསོས་སྨན་དང་། སྨན་ཟོང་རྣམས་ལོངས་སྤྱད་འོས་སོ་ཞེས་བཀའ་སྩལ་ཏོ། །དེ་ནས་བཅོམ་ལྡན་འདས་
ཀྱིས་ཚེ་དང་ལྡན་པ་ཤཱ་རིའི་བུ་ལ་ལེགས་སོ་ཞེས་བྱ་བ་བྱིན་ཏེ། ཤཱ་རིའི་བུ་ལེགས་སོ་ལེགས་སོ། །ཁྱོད་ཀྱིས་ཇི་སྐད་བསྟན་པ་བཞིན་དུ་ངས་དེ་ལས་དགོངས་ནས་བསྟན་པ་ཡིན་ཏེ། འདི་ནི་ལེགས་པར་གསུངས་པའི་ཆོས་

57-1-92a

འདུལ་བ་ལ་རབ་ཏུ་བྱུང་བ་ཡིན་ནོ། །ཤཱ་རིའི་བུ་ཕྱག་རྒྱ་འདིས་མངོན་པའི་ང་རྒྱལ་ཅན་བརྟག་པར་འདོད་པས་ནི་ཕྱག་རྒྱ་དེའི་མདུན་དུ་བརྗོད་པར་བྱའོ། །ཤཱ་རིའི་བུ་ཤིན་དུ་བརྟགས་པ་ནི་ཕྱག་རྒྱ་འདིས་ནི་
མངོན་པའི་ང་རྒྱལ་ཅན་མང་པོ་བརྟག་པར་ནུས་སོ། །ཆོས་ཀྱི་རྣམ་གྲངས་འདི་བསྟན་པ་ན་དགེ་སློང་བདུན་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྲིད་པ་ཐ་མ་པའི་དགེ་སློང་བརྒྱ་
ནི་ཆོས་ཀྱི་རྣམ་གྲངས་འདི་ལ་མ་ཞུགས་ཤིང་མ་རྟོགས་ལ་མ་མོས་ནས་སྟན་ལས་ལངས་ཏེ་དོང་ངོ་། །དགེ་སློང་ལྔ་ནི་སྤོང་བ་བྱས་ཤིང་བཟློག་པ་བྱས་ནས་རང་གི་ལུས་དང་བཅས་ཏེ་སེམས་ཅན་དམྱལ་བ་ཆེན་པོར་
ལྷུང་ངོ་། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ངས་ཀྱེ་མ་ཆོས་འདི་ནི་འཇིག་རྟེན་ཐམས་ཅད་དང་མི་མཐུན་ནོ་སྙམ་སྟེ། དེ་ལ་དགོངས་ནས་དེ་སྐད་བསྟན་མོད་ཀྱི་འོན་ཀྱང་གང་དང་ཡང་མི་མཐུན་པ་མེད་དེ། 
ཤཱ་རིའི་བུ་དཔེར་ན་མི་ལ་ལ་ཞིག་གཉིད་ཀྱིས་ལོག་པའི་རྨི་ལམ་དུ་སྐྱེ་བོ་ཕལ་པོ་ཆེའི་མདུན་དུ་ཁྱེད་ལ་ངས་ཆོས་བཤད་པར་བྱའོ། །ཆོས་དེ་ཡང་འཇིག་རྟེན་ཐམས་ཅད་དང་མི་མཐུན་ནོ་ཞེས་ཚིག་ཏུ་སྨྲ་ན། ཤཱ་རིའི་
བུ་འདི་ཇི་སྙམ་དུ་སེམས། ཆོས་དེ་དང་མི་མཐུན་པ་གང་དག་ཡིན་པའི་མི་དེ་དག་ཡོད་པ་ཡིན་ནམ། གསོལ་པ། བཅོམ་ལྡན་འདས་དེ་ནི་མ་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་
བུ་དེ་བཞིན་དུ་ང་ཡང་ཀྱེ་མ་ཆོས་འདི་ནི་འཇིག་རྟེན་ཐམས་ཅད་དང་མི་མཐུན་ནོ་ཞེས་དེ་སྐད་དུ་ཡང་སྟོན་ལ་དེ་འཇིག་རྟེན་དེ་ཡང་ཡང་དག་པར་མ་མཐོང་ངོ་། །འཇིག་རྟེན་མེད་པ་ལ་ནི་ཆོས་ཀྱང་བགྲང་དུ་མེད་དོ། །འཇིག་རྟེན་
གདགས་པ་ཡང་མེད་དོ། །ཤཱ་རིའི་བུ་འཇིག་རྟེན་ཐམས་ཅད་དང་མི་མཐུན་པ་ཞེས་བྱ་བ་ནི་ཆོས་རྣམས་མ་འདྲེས་ཤིང་ཆོས་རྣམས་འདྲེ་བ་མེད་པ་ལ་བྱ་བར་གསུངས་སོ། །གསོལ་པ། བཅོམ་ལྡན་འདས་མ་འདྲེས་

57-1-92b

པ་ཞེས་བགྱི་བའི་ཚིག་གི་དོན་གང་ལགས། བཀའ་སྩལ་པ། ཤཱ་རིའི་བུ་མ་འདྲེས་པ་ཞེས་བྱ་བ་ནི་ཆོས་རྣམས་རོ་གཅིག་པར་གདགས་པ་ཡིན་ཏེ། གཅིག་པུ་ཁོ་ན་ཡང་མ་ཡིན། ཐ་དད་པ་ཁོ་ན་ཡང་མ་ཡིན་ནོ། །ཤཱ་རིའི་
བུ་མ་འདྲེས་པ་ཞེས་བྱ་བ་དེ་ནི་སྟོང་པ་ཉིད་ཀྱི་ཚིག་བླ་དགས་སོ། །གསོལ་པ། བཅོམ་ལྡན་འདས་སྟོང་པ་ཉིད་ཅེས་བགྱི་བའི་ཚིག་གི་དོན་གང་ལགས། བཀའ་སྩལ་པ། ཤཱ་རིའི་བུ་སྟོང་པ་ཉིད་ཅེས་བྱ་བ་ནི་གདགས་སུ་མེད་
པའོ། །གང་གདགས་སུ་མེད་པ་དེ་ནི་གདགས་པར་མི་ནུས་སོ། །གང་གདགས་པར་མི་ནུས་པ་དེ་ནི་འཇིག་རྟེན་པ་ཡང་མ་ཡིན། འཇིག་རྟེན་ལས་འདས་པ་ཡང་མ་ཡིན་ནོ། །ཤཱ་རིའི་བུ་གང་འཇིག་རྟེན་པ་ཡང་མ་ཡིན། 
འཇིག་རྟེན་ལས་འདས་པ་ཡང་མ་ཡིན་པ་དེ་ནི་སྟོང་པ་ཉིད་ཅེས་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཤཱ་རིའི་བུ་དང་། དགེ་སློང་གི་དགེ་འདུན་ཐམས་ཅད་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཆོས་ཀྱི་ཕྱག་རྒྱ་ཞེས་བྱ་
བ་ཐེག་པ་ཆེན་པོའི་མདོ་རྫོགས་སོ།། །། ༄༅། །རྒྱ་གར་སྐད་དུ། ཨཱརྱ་པྲ་དཱི་པ་དཱ་ནཱི་ཡཱ་ན་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ། འཕགས་པ་མར་མེ་འབུལ་བ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་
དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་
ན་བཞུགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་དཔག་ཏུ་མེད་པ་བཞི་པོ་འདི་དག་ནི་ལེགས་པར་ཡོངས་སུ་སྦྱངས་པའི་ཆོས་རྣམས་དང་ལྡན་པ། རྣམ་པར་སྨིན་པ་

57-1-93a

དཔག་ཏུ་མེད་པ། སྣང་བ་དཔག་ཏུ་མེད་པ། བསོད་ནམས་ལ་ཡང་དག་པར་གཞོལ་བ་དཔག་ཏུ་མེད་པ། གཟུགས་དཔག་ཏུ་མེད་པ། བདེ་བ་ལ་ཡང་དག་པར་གཞོལ་བ་དཔག་ཏུ་མེད་པ་དག་སྟེ། དེ་དག་ནི་
ཚུལ་ཁྲིམས་ལ་འཇུག་པ་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་ལ་འཇུག་པ་དང་། སོ་སོ་ཡང་དག་པར་རིག་པ་ལ་འཇུག་པ་དང་། ལེན་པ་མེད་པར་ཟག་པ་
ཟད་པར་འགྱུར་བ་དག་གོ། །བཞི་གང་ཞེ་ན། ཤཱ་རིའི་བུ་འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བརྙེས་པས་བསམ་གཏན་
པར་གྱུར་པ། ཤེས་རབ་ཀྱི་ཕ་རོལ་ཏུ་ཕྱིན་པ་བརྙེས་པས་ཤེས་རབ་དཔག་ཏུ་མེད་པ་དང་ལྡན་པ། ཤེས་རབ་ཡངས་པ་དང་ལྡན་པ། ངེས་པར་འབྱེད་པའི་ཤེས་རབ་དང་ལྡན་པ། ཇི་ལྟ་བ་བཞིན་གྱི་ཤེས་རབ་དང་ལྡན་པ། 
གྲངས་མེད་པའི་ཤེས་རབ་དང་ལྡན་པ། རྣམ་པར་ངེས་པའི་ཤེས་རབ་དང་ལྡན་པ། རྣམ་པར་ངེས་པ་གཟིགས་པ། མཆོག་ཏུ་རྣམ་པར་གྲོལ་ཞིང་ཤིན་དུ་རྣམ་པར་གྲོལ་བའི་ཐུགས་དང་ལྡན་པ། གཡོ་བ་མེད་པའི་ཐུགས་དང་ལྡན་
པ། འཁྲུག་པ་མེད་པའི་ཐུགས་དང་ལྡན་པ། འཕྲིན་ལས་ལེགས་པར་མཛད་པའི་ཐུགས་དང་ལྡན་པ་དང་། ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་མི་དགེ་བའི་ཆོས་ཐམས་ཅད་
སྤངས་པ། དགེ་བའི་ཆོས་ཐམས་ཅད་དང་ལྡན་པ། སྤྱོད་པ་ཕུན་སུམ་ཚོགས་པ། ཡིད་ལ་མཛད་པ་དང་མ་བྲལ་བ། བདེན་པ་སྟོན་པ། བདེན་པ་གཟིགས་པ། སྣང་བར་གྱུར་པ། དཔག་ཏུ་མེད་པ། ཚོགས་དཔག་ཏུ་མེད་པ། ཟིལ་
གྱིས་གནོན་པ། ཟིལ་གྱིས་མི་གནོན་པའི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་གཟིགས་པའི་སྟོབས་བསྐྱེད་པ་བརྙེས་པ། སྟོབས་བཅུའི་སྟོབས་བསྐྱེད་

57-1-93b

པ་བརྙེས་པ། སྟོབས་བཅུའི་སྟོབས་བསྐྱེད་པ་བརྙེས་པ། མི་འཇིགས་པའི་སྟོབས་བསྐྱེད་པ་བརྙེས་པ། སངས་རྒྱས་ཀྱི་ཆོས་ཀྱི་སྟོབས་བསྐྱེད་པ་བརྙེས་པ། བྱམས་པ་ཆེན་པོ་དང་སྙིང་རྗེ་ཆེན་པོའི་སྟོབས་བསྐྱེད་པ་བརྙེས་
པ། སོ་སོ་ཡང་དག་པར་རིག་པའི་སྟོབས་བསྐྱེད་པ་བརྙེས་པ། སྔོན་གྱི་བསམ་པ་ཕུན་སུམ་ཚོགས་པ། སྔོན་ཡོངས་སུ་སྦྱོང་བ་མཛད་པ། ཤེས་རབ་རིན་པོ་ཆེ་དང་ལྡན་པ། བརྩོན་པ་མ་བོར་བ། བརྩོན་འགྲུས་དཔག་ཏུ་མེད་པ། 
མྱ་ངན་དང་གནོད་པ་དང་བྲལ་བ། ཡོངས་སུ་འཛིན་པ་མི་མངའ་བ། ཐམས་ཅད་གཟིགས་པ་ཐམས་ཅད་མཁྱེན་པ། གླང་པོ་ཆེན་པོ། དཔག་ཏུ་མེད་པ། ཕུང་པོ་མི་མངའ་བ། བསོད་ནམས་ཀྱི་ཞིང་བླ་ན་མེད་པ་དང་། ཤཱ་རིའི་བུ་དེ་ལ་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྐལ་པ་བྱེ་བ་ཁྲག་ཁྲིག་འབུམ་ཕྲག་དུ་མར་དགེ་བའི་རྩ་བ་ཡང་དག་པར་བསྒྲུབས་པ། རིག་པ་གསུམ་དང་ལྡན་པ། བསོད་ནམས་ཀྱི་ཞིང་གི་དེ་བཞིན་
གཤེགས་པའི་མཆོད་རྟེན་ལ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་སེམས་དང་བསོད་ནམས་དོན་དུ་གཉེར་བ། བསོད་ནམས་ལ་དམིགས་པ། བསོད་ནམས་ཡོ་བྱད་དུ་བྱེད་པ། བསོད་ནམས་འདོད་པ། 
རྣལ་འབྱོར་དང་འཐུན་པའི་རྗེས་སུ་དྲན་པ་ཡིད་ལ་བྱེད་པ། སྔོན་གྱི་སྦྱོར་བ་ཕུན་སུམ་ཚོགས་པས་ཐ་ན་མར་མེའི་སྙིང་པོ་ཆུང་ངུ་འམ་ངན་པ་ཞིག་འབྲུ་མར་གྱིས་བསྐུས་སམ་མར་གྱིས་བསྐུས་ཏེ་འབུལ་ལམ། ངེས་པར་འབུལ་ལམ། 
ཡོངས་སུ་འབུལ་ལམ། འཇོག་པར་བྱེད་པ་དང་། དགེ་བ་དོན་དུ་གཉེར་བས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཕྱི་མའི་མཐའི་སྐྱེ་བའི་འཁོར་བ་སྤངས་པ། དེ་ལྟར་བྱུང་བ་
ན་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་གཟིགས་པས་བཟུང་བ་ཉིད་ཡིད་ལ་བྱེད་དམ། དེ་ལས་ཡོན་ཏན་གང་ཡང་རུང་བ་ཞིག་ཡིད་ལ་བྱེད་དམ། དེ་བཞིན་གཤེགས་

57-1-94a

པའི་ཕྱིར་དང་གཞི་དེ་ལས་དེ་བཞིན་གཤེགས་པ་ཡིད་ལ་བྱེད་ཅིང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉིད་ཀྱི་ཕྱིར་དེ་བཞིན་གཤེགས་པ་ལ་མཆོད་པ་བྱ་བར་སེམས་
བསྐྱེད་དེ། མར་མེ་འདི་འབར་བར་བྱ། རབ་ཏུ་འབར་བར་བྱ། དབུལ་བར་བྱ། ཡོངས་སུ་དབུལ་བར་བྱ། རབ་ཏུ་གཞག་པར་བྱའོ་སྙམ་པའམ། སེམས་ཀྱི་རྒྱུད་དད་པར་གྱུར་པས་ཚུལ་ཁྲིམས་ཡོངས་སུ་དག་པ། མི་མཉམ་པ་དང་
མཉམ་པའི་ཚུལ་ཁྲིམས་དང་ལྡན་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔག་ཏུ་མེད་པ་བསོད་ནམས་མང་པོ་མངའ་བའི་དེ་བཞིན་གཤེགས་པའི་མཆོད་རྟེན་ལ་བསྙེན་བཀུར་བྱེད་
དེ་དེ་ཙམ་འམ། ཆུང་ཟད་ཙམ་འམ། ཆུང་ངུ་ཞིག་གམ། ངན་ངོན་ཙམ་ཞིག་གམ། གསོག་ཙམ་ཞིག་གམ། ཐ་ན་གློག་གི་རྒྱུན་ཙམ་ཞིག་ཀྱང་སྣང་བར་བྱེད་དམ། ཐ་ན་ཐེམ་སྐས་ཀྱི་གཞི་གཅིག་སྣང་བར་བྱེད་ན་ཡང་ཤཱ་
རིའི་བུ་དེའི་རྣམ་པར་སྨིན་པ་ནི་ཉན་ཐོས་རྣམས་ཀྱིས་སམ། རང་སངས་རྒྱས་རྣམས་ཀྱིས་བསྟན་པར་མི་ནུས་སོ། །ཤཱ་རིའི་བུ་གཞན་ཡང་ལན་ལ་ནི་མི་རེ་ཞིང་དད་པ་དང་། དགའ་བ་དང་། དང་བས་ཡོངས་སུ་བཏང་བའི་རྣམ་པར་
སྨིན་པ་བསོད་ནམས་ཀྱི་རྣམ་པར་སྨིན་པ་དེ་ནི་དེ་བཞིན་གཤེགས་པས་སྟོན་པར་སྤྱོད་དོ། །ཤཱ་རིའི་བུ་གཞན་ཡང་དད་པ་དང་ལྡན་པ་གུས་པར་གནས་ཤིང་གཡོ་མེད་ལ་སྒྱུ་མེད་པ་སངས་རྒྱས་ཀྱི་ཡོན་ཏན་ལ་ངེས་པར་
སེམས་པའི་རིགས་ཀྱི་བུ་འམ། རིགས་ཀྱི་བུ་མོ་དགེ་བའི་བསམ་པ་སྐྱེས་ནས་མར་མེ་ཆུང་ཟད་ཙམ་འམ། ཆུང་ངུ་ཙམ་ཞིག་ཀྱང་སྣང་བར་བྱས་ཏེ་མར་མེ་སྣང་བར་བྱས་པ་གང་གིས་དེ་བཞིན་གཤེགས་པའི་མཆོད་རྟེན་དེའི་ཐ་ན་ཐེམ་སྐས་
ཙམ་སྣང་ངམ། བསྐོར་ས་ཙམ་སྣང་ངམ། སྨད་དམ། གདུགས་སམ། ཐམས་ཅད་སྣང་ངམ། ཐ་ན་བར་སྐབས་གང་ཡང་རུང་བ་ཞིག་སྣང་བའི་མར་མེ་དེ་མོད་ལ་མྱུར་དུ་ཤི་སྟེ་རླུང་གི་སྤྱོད་པས་སམ། ཆར་པས་སམ། མར་ཟད་པས་

57-1-94b

སམ། སྙིང་པོ་ཟད་པས་ཤི་ལ། ཤཱ་རིའི་བུ་འདི་ལྟ་སྟེ། དཔེར་ན་ཀླུས་དཀྲུགས་པ་ན་སྤྲིན་སྟུག་པོའི་དྲ་བ་འཁྲིགས་པ་ལས་ནམ་མཁའ་ལས་གློག་བྱུང་ནས་ནུབ་ན། ཤཱ་རིའི་བུ་མྱུར་དུ་འབྱུང་བའི་རྗེས་སུ་འབྲང་བ་དེ་མཐོང་བས་
སེམས་ཅན་རྣམས་ཀྱི་མིག་ཐིབས་ཤེས་བྱེད་པ་དེ་ཙམ་དུ་ཤཱ་རིའི་བུ་དེ་བཞིན་གཤེགས་པའི་མཆོད་རྟེན་ལ་མར་མེ་འབུལ་བའི་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། དེ་ལས་གཞན་པ་
སེམས་ཅན་བསླབ་པའི་གཞི་མ་བླངས་པ། དགེ་བའི་རྩ་བ་དོན་དུ་གཉེར་བ། སངས་རྒྱས་དང་། ཆོས་དང་། དགེ་འདུན་ལ་མངོན་པར་དད་པ། བདག་ཉིད་བསྐྱབ་པར་བྱ་བ་ལ་གནས་པ། བསོད་ནམས་འདོད་པ་རྣམས་ཀྱིས་
ཇི་ཙམ་དུ་ཆུང་བའི་མར་མེ་ཕུལ་བའི་བསོད་ནམས་ཀྱི་ཕུང་པོ་ཇི་ཙམ་དུ་དཔག་ཏུ་མེད་པ་ཡོངས་སུ་གཟུང་བར་འགྱུར་བའི་རྣམ་པར་སྨིན་པ་ནི་དེ་བཞིན་གཤེགས་པས་མཁྱེན་ཏོ། །ཤཱ་རིའི་བུ་མར་མེ་འབུལ་བ་ཆུང་ཟད་ཅིག་ཕུལ་བའི་
མར་མེ་ཕུལ་བ་ལས་མངོན་པར་གྲུབ་པའི་བསོད་ནམས་ཀྱི་ཕུང་པོ་དེའི་རྣམ་པར་སྨིན་པ་ནི་ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མ་གཏོགས་པར་ལྷ་དང་བཅས། ཚངས་པ་དང་
བཅས་པའི་འཇིག་རྟེན་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུས་བསྟན་པར་མི་ནུས་སོ། །ཤཱ་རིའི་བུ་སངས་རྒྱས་བཅོམ་ལྡན་འདས་རྣམས་ཀྱི་ཡུལ་ནི་བསམ་གྱིས་མི་ཁྱབ་སྟེ། ཤཱ་རིའི་བུ་མར་མེ་འབུལ་བ་
ཡོངས་སུ་ཕུལ་བ་དེས་བསོད་ནམས་ཀྱི་ཕུང་པོ་ཇི་ཙམ་དུ་དཔག་ཏུ་མེད་གྲངས་མེད་པ་ཡོངས་སུ་བཟུང་བར་གྱུར་པའི་དོན་དེ་ནི་དེ་བཞིན་གཤེགས་པས་མཁྱེན་ཏེ། ཤཱ་རིའི་བུ་མར་མེ་དེ་ཙམ་དུ་ཆུང་ངུ་ཕུལ་བའི་རྣམ་པར་སྨིན་
པ་ཡང་དཔག་ཏུ་མེད་ན། གང་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་དེ་བཞིན་གཤེགས་པའི་མཆོད་རྟེན་ལ་མཆོད་པ་ཁྱད་པར་ཅན་བྱེད་དམ་བྱེད་དུ་འཇུག་སྟེ། སྤོས་སམ། མེ་ཏོག་ཕྲེང་ངམ། གདུགས་

57-1-95a

སམ། བ་དན་རྣམས་སམ། གང་ཡང་རུང་བའི་མར་མེའི་ཕྲེང་བ་རྣམ་པ་མང་པོས་མཆོད་པ་ཁྱད་པར་ཅན་བྱེད་དམ་བྱེད་དུ་འཇུག་པ་ལྟ་སྨོས་ཀྱང་ཅི་དགོས། ཤཱ་རིའི་བུ་གཞན་ཡང་ཆོས་འདི་བཞི་ནི་དད་པས་
རྟོགས་པར་བྱ་བ་ཡིན་ཏེ། བཞི་གང་ཞེ་ན། སངས་རྒྱས་ཀྱི་ཆོས་རྣམས་ནི་དཔག་ཏུ་མེད་དོ་སྙམ་དུ་དད་པས་རྟོགས་པར་བྱ་བ་དང་། དགེ་བའི་རྩ་བ་ཇི་ལྟར་ཆུང་ངུའི་རྣམ་པར་སྨིན་པ་ཡང་དཔག་ཏུ་མེད་པར་འགྱུར་བ་དད་
པས་རྟོགས་པར་བྱ་བ་དང་། དཀོན་མཆོག་གསུམ་ལ་དད་པའི་ལས་མངོན་པར་འདུ་བྱེད་པའི་རྣམ་པར་སྨིན་པ་གང་ཡིན་པ་དེ་སྟོན་པ་མཐོང་བ་ཉན་ཐོས་ཁྱེད་ཀྱིས་ཀྱང་རྣམ་པ་ཐམས་ཅད་དུ་བསམ་པ་འམ་ཡོངས་སུ་བསམ་
པར་མི་ནུས་ན། འཕགས་པའི་རིགས་ལ་མི་གནས་པ་གཞན་རྣམས་ཀྱིས་ལས་ཀྱི་རྣམ་པར་སྨིན་པ་མངོན་སུམ་དུ་ཤེས་པ་འམ། ཁོང་དུ་ཆུད་པར་ནུས་པ་ལྟ་ཅི་སྨོས་ཏེ་དེ་ནི་གནས་མེད་དོ། །གཞན་དུ་ན་དེ་ནི་དད་པས་
རྟོགས་པར་བྱ་བ་ཡིན་པ་དང་། ཤཱ་རིའི་བུ་ཉན་ཐོས་རྣམས་ཀྱིས་སེམས་ཅན་ཐམས་ཅད་ཀྱི་ལས་ཀྱི་རྣམ་པར་སྨིན་པ་བསམ་པའམ། ཤེས་པར་མི་ནུས་ཏེ། ཤཱ་རིའི་བུ་ཁྱེད་རྣམས་གནས་འདི་ལ་བསམ་པ་དང་བྲལ་བར་
གྱིས་ཤིག །དེ་ཅིའི་ཕྱིར་ཞེ་ན། ཤཱ་རིའི་བུ་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་བོ་ཞེས་དེ་བཞིན་གཤེགས་པས་གསུངས་པའི་ཕྱིར་རོ། །ཤཱ་རིའི་བུ་སྔོན་གྱི་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་པོ་ཞེས་གསུངས་སོ། །ཤཱ་རིའི་བུ་མ་འོངས་པའི་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རྣམས་ཀྱང་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་བསམ་གྱིས་མི་ཁྱབ་པ་ཉིད་དོ་ཞེས་སྟོན་པར་འགྱུར་རོ། །ཤཱ་རིའི་བུ་སེམས་ཅན་གྱི་བསམ་པ་དང་། སེམས་དང་། ལྷག་

57-1-95b

མཐོང་ཡང་བསམ་གྱིས་མི་ཁྱབ་སྟེ། དད་པས་རྟོགས་པར་བྱ་བ་ཡིན་ནོ། །ཤཱ་རིའི་བུ་འཕགས་པའི་རིགས་ལ་གནས་པ་ཁྱེད་ཅག་ཉིད་ཀྱང་སེམས་ཅན་ཐམས་ཅད་ཀྱི་ཤེས་པ་དེ་ལ་མིག་དང་མཁས་པ་ལ་ཤེས་པ་མི་
འཇུག་ན། སེམས་མ་དུལ་བ་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་མཐོང་བ་དང་བྲལ་བ། བརྗེད་ངས་པ། མ་རིག་པའི་མུན་པས་མིག་བསྒྲིབས་པ་གཞན་གང་དག་བདག་
ཅི་ཞིག །བདག་སུ་ཞིག །བདག་ཅི་འདྲ་བ་ཞིག །བདག་གང་ནས། བདག་ཇི་ཙམ་ཞིག བདག་ཇི་ལྟ་བུ་ཞིག །བདག་ལྡན་པའི་ངང་ཚུལ་ཅན་ནམ། བདག་མི་ལྡན་པའི་ངང་ཚུལ་ཅན་ནམ། བདག་བརྗེད་ངས་པ་འམ། བདག་
ཉེ་བར་གནས་པ་འམ། བདག་མཁས་པའི་ལས་བྱེད་པ་འམ། བདག་བྱིས་པའི་ལས་བྱེད་པ་འམ། བདག་གང་ནས་འོངས། བདག་གང་དུ་འགྲོ་ཞེས་རང་གི་ཆོས་ལ་ཤེས་པ་འཇུག་པ་ཡང་མེད་པ་རྣམས་ལྟ་ཅི་སྨོས། ཤཱ་
རིའི་བུ་བྱིས་པ་སོ་སོའི་སྐྱེ་བོ་ནི་བདག་ལ་ཤེས་པ་འཇུག་པ་ཡང་མེད་ན་ཕྱིན་ཅི་ལོག་གི་ལྟ་བ་ཅན་དེ་ལས་ཀྱི་རྣམ་པར་སྨིན་པ་ཤེས་པར་ལྟ་ག་ལ་འགྱུར་ཏེ་དེ་ནི་གནས་མེད་དོ། །ཤཱ་རིའི་བུ་དེ་བཞིན་གཤེགས་པ་ནི་ཚུལ་
ཁྲིམས་དང་བྲལ་བ་མ་ཡིན། ཏིང་ངེ་འཛིན་དང་བྲལ་བ་མ་ཡིན། ཤེས་རབ་དང་བྲལ་བ་མ་ཡིན། རྣམ་པར་གྲོལ་བ་དང་བྲལ་བ་མ་ཡིན། རྣམ་པར་གྲོལ་བའི་ཡེ་ཤེས་མཐོང་བ་དང་བྲལ་བ་མ་ཡིན། རིག་པ་དང་བྲལ་བ་མ་ཡིན་
ནོ། །ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཚུལ་ཁྲིམས་དཔག་ཏུ་མེད་པའོ། །ཚུལ་ཁྲིམས་ཆགས་པ་མེད་པའོ། །ཚུལ་ཁྲིམས་བསམ་གྱིས་མི་ཁྱབ་པའོ། །ཚུལ་
ཁྲིམས་གཞལ་དུ་མེད་པའོ། །ཚུལ་ཁྲིམས་རྫོགས་པའོ། །ཚུལ་ཁྲིམས་རྣམ་པར་དག་པའོ། །དེ་ལ་ལས་དང་ལས་ཀྱི་རྣམ་པར་སྨིན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །ཤཱ་རིའི་བུ་ཇི་ལྟར་ན་དེ་

57-1-96a

བཞིན་གཤེགས་པ་ལས་དང་ལས་ཀྱི་རྣམ་པར་སྨིན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེ་ན། ཤཱ་རིའི་བུ་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། སེམས་ཅན་འདི་ནི་དགེ་བའི་
ཆོས་རྣམས་ཡོངས་སུ་ཟད་ཅིང་། མི་དགེ་བའི་ཆོས་རྣམས་ཀྱིས་གང་བའོ། །སེམས་ཅན་འདི་ནི་དགེ་བའི་ཆོས་རྣམས་འབྱུང་བར་འགྱུར་ཞིང་མི་དགེ་བའི་ཆོས་རྣམས་འགག་པར་འགྱུར་བའོ། །སེམས་ཅན་འདི་ནི་མི་དགེ་
བའི་ཆོས་རྣམས་སྐྱེ་བར་འགྱུར་ཞིང་དགེ་བའི་ཆོས་རྣམས་འགག་པར་འགྱུར་བའོ་ཞེས་ཤཱ་རིའི་བུ་འཇུག་པ་འདིས་དེ་བཞིན་གཤེགས་པ་སེམས་ཅན་དེ་དང་དེ་དག་གི་ལས་དང་ལས་ཀྱི་རྣམ་པར་སྨིན་པ་སྣ་ཚོགས་རྗེས་སུ་འཇུག་པ་
རབ་ཏུ་མཁྱེན་ཏོ། །ཤཱ་རིའི་བུ་དེ་ལ་སེམས་ཅན་རྣམས་མུན་པ་ཡོད་ཅིང་མཁས་པ་མེད་དེ་མཁྱེན་པ་དེ་ལྟ་བུ་དང་ལྡན་པ། མཁས་པ་དེ་ལྟ་བུ་དང་ལྡན་པ་དེས་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་བསམ་
གྱིས་མི་ཁྱབ་པ་ལུང་སྟོན་ཏོ། །ཤཱ་རིའི་བུ་དེ་ལ་གང་དག་དད་པ་དེ་དག་ནི་ཡིད་ཆེས་པར་འགྱུར་ལ་གང་དག་མ་དད་ཅིང་བསྟན་པ་འདི་ལས་ཉམས་པ་དེ་དག་ནི་སྨད་པར་འགྱུར་ཞིང་རྩོད་པར་འགྱུར་ཏེ། དེ་ནི་དེ་དག་ལ་ཡུན་རིང་པོར་མི་ཕན་
པ་དང་། དོན་མེད་པ་དང་། སྡུག་བསྔལ་བ་དང་། ལོག་པར་ལྟུང་བར་འགྱུར་བའོ། །ཤཱ་རིའི་བུ་དེ་ལ་སེམས་ཅན་གང་དེ་བཞིན་གཤེགས་པའི་མཆོད་རྟེན་ལ་མར་མེ་འབུལ་བ་དེས་མར་མེ་འབུལ་བ་ཡོངས་སུ་ཕུལ་བ་དང་། ངེས་པར་
ཕུལ་བ་དང་། དགེ་བའི་རྩ་བ་བསགས་པའི་ལས་མངོན་པར་འདུས་བྱས་པ་དང་། རྣམ་པར་སྨིན་པའི་འབྲས་བུ་བདེ་བ་འདོད་པ་དང་། དགའ་བ་དང་མཆོག་ཏུ་དགའ་བ་དང་ལྡན་པ་དང་། དད་པས་ཡོངས་སུ་ཕུལ་བ་བསགས་པས་ཚེ་
འདི་ཉིད་ལ་སེམས་ཀྱི་ངེས་པར་སེམས་པ་གསུམ་འཐོབ་སྟེ། གསུམ་གང་ཞེ་ན། དེ་འདི་སྙམ་དུ་སེམས་ཏེ། བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་མཆོད་པ་བྱས་ཏེ། 

57-1-96b

ལུས་ཐོབ་པ་སྙིང་པོ་དང་། སྙིང་པོ་མ་ཡིན་པའི་ལུས་ཤེས་པར་བྱས་ལ་སྙིང་པོ་སྦྱིན་པར་བྱའོ་སྙམ་ནས་ལོངས་སྤྱོད་རྣམས་ལ་ཉེས་དམིགས་ཅན་དུ་ཤེས་ཏེ། སྙིང་པོ་མེད་པའི་ལོངས་སྤྱོད་རྣམས་ལ་སྙིང་པོ་སྦྱིན་པར་བྱེད་པ་འདི་ནི་ཤཱ་
རིའི་བུ་དེ་བཞིན་གཤེགས་པའི་མཆོད་རྟེན་ལ་མཆོད་པ་བྱས་པའི་སེམས་ཀྱི་ངེས་པར་སེམས་པ་དང་པོའོ། །ཤཱ་རིའི་བུ་གཞན་ཡང་དེ་འདི་སྙམ་དུ་སེམས་ཏེ། བདག་གིས་བསོད་ནམས་ཀྱི་ཞིང་བླ་ན་མེད་པ་ཡོན་གནས་ཀྱི་སྦྱིན་པ་མཆོག་
ལེན་པ་པོ་ལ་མཆོད་པ་བྱས་པས་བདག་ལ་སེམས་ཅན་དམྱལ་བའི་འཇིགས་པ་འམ། དུད་འགྲོའི་སྐྱེ་གནས་ཀྱི་འཇིགས་པ་འམ། གཤིན་རྗེའི་འཇིག་རྟེན་གྱི་འཇིག་པ་མེད་དོ། །བདག་གི་འགྲོ་བ་བདེ་བ་ནི་ལྔ་སྟེ། མཐོ་རིས་
འཐོབ་པ་འམ། མི་འཐོབ་པ་འམ། གཟུགས་འཐོབ་པ་འམ། ལོངས་སྤྱོད་འཐོབ་པ་འམ། བྱང་ཆུབ་འཐོབ་པོ་སྙམ་པ་དེ་ནི་ཤཱ་རིའི་བུ་དེ་བཞིན་གཤེགས་པའི་མཆོད་རྟེན་ལ་མཆོད་པ་བྱ་བའི་སེམས་ཀྱི་ངེས་པར་སེམས་པ་འཐོབ་
པ་གཉིས་པའོ། །ཤཱ་རིའི་བུ་གཞན་ཡང་དེ་བཞིན་གཤེགས་པའི་མཆོད་རྟེན་ལ་མར་མེ་འབུལ་བ་ཡོངས་སུ་ཕུལ་བ་ལ་ཡང་དག་པར་གནས་པ་ཡིན་ཏེ། གལ་ཏེ་བདག་གིས་སྦྱིན་པ་བྱིན་ནོ། །བདག་གིས་བསོད་ནམས་དག་ཀྱང་
བྱས་སོ། །བདག་གིས་སེར་སྣ་སྤངས་སོ་སྙམ་དུ་ཤེས་ཤིང་དེ་འདི་སྙམ་དུ་སེམས་ཏེ། བདག་ནི་སྦྱིན་པ་པོ་ཡིན་ལ་བདག་གིས་ཀྱང་སྦྱིན་པ་བྱིན་ནོ་སྙམ་དུ་དེ་ལྟར་སེམས་ཤིང་གཏོང་བ་ལ་ཡོངས་སུ་གདུང་བ་མེད་བརྙེས་པ་མེད་དེ། 
ཤཱ་རིའི་བུ་དེ་ནི་དེ་བཞིན་གཤེགས་པའི་མཆོད་རྟེན་ལ་མཆོད་པ་བྱས་པའི་སེམས་ཀྱི་ངེས་པར་སེམས་པ་འཐོབ་པ་གསུམ་པའོ། །ཤཱ་རིའི་བུ་རིགས་ཀྱི་བུ་འམ་རིགས་ཀྱི་བུ་མོ་དེ་བཞིན་གཤེགས་པའི་མཆོད་རྟེན་ལ་མར་མེ་འབུལ་བ་
ཕུལ་བས་འཆི་བའི་དུས་ཀྱི་ཚེ་སྣང་བ་གསུམ་ཐོབ་སྟེ། གསུམ་གང་ཞེ་ན། དགེ་ལེགས་བྱས་པ་མངོན་དུ་འགྱུར་ཏེ་དྲན་པ་འཐོབ་ཅིང་དགེ་བ་རྣམས་བརྗེད་པར་མི་འགྱུར་ཏེ། ཤཱ་རིའི་བུ་འདི་ལྟར་འཆི་བའི་དུས་ཀྱི་ཚེ་དེ་བཞིན་གཤེགས་

57-1-97a

པ་ལ་དགེ་བའི་རྩ་བ་བསྐྱེད་པ་རྣམས་རྗེས་སུ་དྲན་པ་འདི་ནི་སྣང་བ་དང་པོའོ། །ཤཱ་རིའི་བུ་གཞན་ཡང་དེ་བཞིན་གཤེགས་པའི་མཆོད་རྟེན་ལ་མཆོད་པ་བྱས་པའི་སེམས་ཅན་དེ་འཆི་བའི་དུས་ཀྱི་ཚེ་དྲན་པར་འགྱུར་
ཏེ། བདག་གིས་སངས་རྒྱས་ལ་མཆོད་པ་བྱས་སོ་ཞེས་མཆོག་ཏུ་དགའ་བ་འཐོབ་སྟེ། ཤཱ་རིའི་བུ་འདི་ལྟར་སངས་རྒྱས་རྗེས་སུ་དྲན་པ་དང་བཅས་པའི་སེམས་བསྐྱེད་པ་འདི་ནི་སྣང་བ་གཉིས་པའོ། །ཤཱ་རིའི་བུ་གཞན་ཡང་སེམས་
ཅན་དེ་འཆི་བའི་དུས་ཀྱི་ཚེ་སེམས་ཅན་གཞན་སྦྱིན་པ་གཏོང་བ་མཐོང་ན་དེ་འདི་སྙམ་དུ་སེམས་ཏེ། བདག་གིས་མར་མེ་འབུལ་བ་ཕུལ་ལོ། །ཕྱིས་ཀྱང་
སྦྱིན་པ་བྱིན་ནོ་སྙམ་དུ་དེ་གཏོང་བའི་སེམས་སྐྱེས་ཤིང་སྡུག་བསྔལ་གྱི་ཚོར་བ་རྣམས་ཀྱིས་མི་འཕྲོགས་ལ་དེ་ལ་ཆོས་རྗེས་སུ་དྲན་པ་དེ་ལྟ་བུ་འབྱུང་སྟེ། ཤཱ་རིའི་བུ་འདི་ལྟར་དགེ་བའི་རྩ་བ་ཇི་ལྟ་བ་བཞིན་དུ་ཡིད་
ལ་བྱེད་པ་འདི་ནི་སྣང་བ་ཐོབ་པ་གསུམ་པ་ཡིན་ནོ། །ཤཱ་རིའི་བུ་གཞན་ཡང་རིགས་ཀྱི་བུའམ་རིགས་ཀྱི་བུ་མོ་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བ་དེ་འཆི་བའི་དུས་ཀྱི་ཚེ་སྣང་བ་བཞི་འཐོབ་སྟེ། 
བཞི་གང་ཞེ་ན། མདུན་ན་ཉི་མའི་དཀྱིལ་འཁོར་འཆར་བ་མཐོང་བ་དང་། མདུན་ན་ཟླ་བ་ཉ་བའི་དཀྱིལ་འཁོར་འཆར་བ་མཐོང་བ་དང་། ལྷའི་འཁོར་གནས་པ་མཐོང་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་བྱང་ཆུབ་ཀྱི་སྙིང་པོ་ལ་བཞུགས་ཤིང་བྱང་ཆུབ་མངོན་པར་རྫོགས་པར་སངས་རྒྱས་པ་མཐོང་སྟེ། དེ་ལ་བདག་ཉིད་གུས་པར་བྱེད་པ་ལ་གནས་ཤིང་ཐལ་མོ་སྦྱར་བར་བྱས་པར་མཐོང་བ་སྟེ། ཤཱ་རིའི་བུ་
དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བས་འཆི་བའི་ཚེ་སྣང་བ་འདི་བཞི་འཐོབ་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས་དེ་བཞིན་དུ་སྟོན་པས་

57-1-97b

གཞན་ཡང་འདི་སྐད་ཅེས་བཀའ་སྩལ་ཏོ། །མཐའ་ཡས་ཆོས་བདག་དྲང་སྲོང་ཆེན་པོ་ཡི། །མཆོད་རྟེན་གནས་ལ་མཁས་པ་གང་ཞིག་གིས། །མར་མེ་ཕུལ་བ་བྱས་པའི་ལས་དེ་ཡིས། །བདེ་དང་དོན་དང་རྙེད་པ་མཐའ་
ཡས་འཐོབ། །དེ་ནི་འཆི་ཁར་དྲན་པ་ཉམས་མི་འགྱུར། །མར་མེ་ཕུལ་བའང་བདག་ཉིད་མཐོང་བར་འགྱུར། །ཟང་ཟིང་མེད་པའི་དགའ་བ་བཞི་ཡང་འཐོབ། །འཆི་བའི་དུས་ཚེ་རྨོངས་པ་མེད་པར་འགྱུར། །ཀུན་ནས་སྣང་བ་དག་
ཀྱང་དེས་གྱེས་ཏེ། །ཉི་མ་དང་ནི་ཟླ་བའང་མཐོང་བར་འགྱུར། །བྱེ་བ་ཁྲག་ཁྲིག་ལྷ་རྣམས་དེས་མཐོང་འགྱུར། །རྨོངས་པ་མེད་པར་སངས་རྒྱས་ཆོས་ཀྱང་སྨྲ། །དེ་ལ་ཕ་མ་བུ་དང་རྩ་ལག་དང་། །འཁོར་རྣམས་ཀུན་གྱིས་བསྐོར་ནས་ངུ་ན་ཡང་། །
དེ་རྣམས་ལ་ནི་མངོན་དུ་དེ་མི་ཕྱོགས། །དེ་ཚེ་ནམ་ཡང་དྲན་པ་ཉམས་མི་འགྱུར། །དེ་ཡི་མདུན་ན་གཞལ་མེད་ཁང་མཆོག་མཐོང་། །འཇིགས་མེད་ལྷ་ཡི་བུ་མོ་རྣམས་ཀྱང་མཐོང་། །བསྐྱེད་མོས་ཚལ་བཞི་ཤིན་དུ་བརྒྱན་སྡུག་ཅིང་། །
འདོད་པའི་ཡོན་ཏན་ལྔ་ལྡན་མཐོང་བར་འགྱུར། །ཐུབ་པའི་སྐྱེས་མཆོག་རྣམས་ལ་མཆོད་བྱས་པས། །དེས་ནི་བྱང་ཆུབ་སྙིང་པོར་བདེ་གཤེགས་དང་། །དེས་ནི་བདག་ཀྱང་ཐལ་མོ་སྦྱར་བྱས་ཤིང་། །ལྷ་ཀླུ་ལྷ་མིན་རྣམས་ཀྱིས་
མདུན་བདར་མཐོང་། །གུས་དང་བཅས་པས་འཇིག་རྟེན་འདྲེན་པ་མཐོང་། །དེ་དེར་ཕྱིན་ཏེ་བདེ་བར་གཤེགས་མཐོང་ནས། །དགའ་བས་དེ་ཚེ་སྤྱན་ཡང་འདྲེན་པར་བྱེད། །དེ་ཡིས་གདུགས་ཚོད་སྦྱར་ལ་གནང་བར་མཛད། །སོ་སོ་
རྙེད་པའི་བདེ་བས་ཚིམ་གྱུར་ནས། །འཆི་དུས་བྱས་ཚེ་སྡུག་བསྔལ་དེས་མི་མྱོང་། །བྱང་ཆུབ་དམ་པ་མཆོག་ལ་སེམས་ཀྱང་དགའ། །དེ་ལ་འཆི་བའི་འཇིགས་ཆེན་འབྱུང་མི་འགྱུར། །མར་མེ་ཕུལ་བའི་རྣམ་སྨིན་འདི་ཡིན་ཏེ། །
འཆི་དུས་བྱེད་ཚེ་དྲན་པ་ཉམས་མི་འགྱུར། །དེ་ལ་ཕྱོགས་རྣམས་སྣང་བར་གྱུར་པར་འགྱུར། །སྔོན་ཅད་མ་མཐོང་གཟུགས་བཟང་རྣམས་ཀྱང་མཐོང་། །དེ་ནི་ཤི་ནས་མཐོ་རིས་ངེས་འགྲོ་ཞིང་། །ལྷ་ཡི་སྟན་ལ་དེ་ལུས་འདུག་པར་

57-1-98a

ཤེས། །རྒྱལ་བ་ལ་ནི་མཆོད་པ་བྱེད་པའི་ཚེ། །དེས་ནི་ཀུན་ནས་ལྷ་མོ་རྣམས་ཀྱང་མཐོང་། །ཤཱ་རིའི་བུ་གཞན་ཡང་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བས་སུམ་བཅུ་རྩ་གསུམ་དུ་སྐྱེས་ནས་
ལྷའི་བུ་དེ་རྣམ་པ་ལྔ་ཡོངས་སུ་དག་པ་དང་ལྡན་པར་འགྱུར་རོ། །ཤཱ་རིའི་བུ་ལྷའི་བུ་དེ་རྣམ་པ་ལྔ་ཡོངས་སུ་དག་པ་དང་ལྡན་པ་ཇི་ལྟ་བུ་ཞེ་ན། དེའི་ལུས་ཡོངས་སུ་དག་པར་འགྱུར་བ་དང་། དེ་ལྷའི་མཐུ་རྒྱ་ཆེན་པོ་དང་ལྡན་པར་འགྱུར་བ་དང་། དེའི་
དྲན་པ་དང་ཤེས་རབ་ཡོངས་སུ་དག་པར་འགྱུར་བ་དང་། དེའི་རྣ་བར་སྒྲ་སྙན་པ་ཐོས་པར་འགྱུར་བ་དང་། དེའི་འཁོར་ཡིད་བདེ་བ་མང་བ་དང་ལྡན་པར་འགྱུར་བའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་
གཤེགས་པས་དེ་སྐད་གསུངས་ནས་དེ་བཞིན་དུ་སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །དྲང་སྲོང་མཆོད་རྟེན་མར་མེ་ཕུལ་བས་མི། །དེ་ཡི་ལུས་ནི་རབ་ཏུ་འོད་གསལ་ཞིང་། །གཞན་གྱིས་མི་ཚུགས་དཔལ་དང་ལྡན་པ་དང་། །
ལྷ་སྟོང་གི་ནི་གཙོ་བོར་དེ་འགྱུར་རོ། །ལྷ་ཡི་སྒྲ་དབྱངས་སྙན་ཅིང་ཡིད་འོང་ཐོས། །ཇི་ལྟར་ལྷ་གཞན་དེ་བཞིན་འདི་ཡང་མཆོག །དྲན་དང་བློ་མཆོག་དང་ནི་ལྡན་པ་དང་། །འཁོར་མཆོག་ཕུན་སུམ་ཚོགས་པའང་འཐོབ་པར་འགྱུར། །གང་དུ་
ལྷ་བུ་དེ་ནི་འགྲོ་བ་དེར། །དེ་འགྲོ་བ་ན་ལྷ་ཀུན་འདོང་བར་བྱེད། །གང་གིས་དེ་ལུས་འདི་ལྟར་འོད་འབར་བ། །སྔོན་གྱི་ལས་ཀྱི་འབྲས་བུ་དེ་འདྲའོ། །སྐྱེད་མོས་ཚལ་གྱི་གཞི་ན་ཤིང་གི་མིང་། །ཟླ་མཆོག་ཅེས་བྱ་གཞལ་མེད་ཁང་གིས་
བརྒྱན། །ཟླ་བ་ཇི་ལྟར་ཀུན་ནས་གསལ་བ་ལྟར། །དེ་ཡི་ཤིང་རྣམས་དེ་བཞིན་གསལ་བ་ཡིན། །མར་མེ་རབ་འབར་ཇི་བཞིན་རྣམ་གསལ་ལ། །ཡིད་འོང་དྲི་ངད་ཕྱོགས་རྣམས་གཏོང་བྱེད་པ། །མེ་ཏོག་གསལ་བ་འདི་ནི་མིང་ཅི་ཞེས། །
ལྷ་རྣམས་ངོ་མཚར་སྟོང་སྙེད་འཛིན་པར་འགྱུར། །དེ་ཡི་འཁོར་ཚོགས་མེ་ཏོག་དེ་དག་གིས། །བརྒྱན་པ་བྱས་པས་དེ་དག་མཛེས་པར་འགྱུར། །བྱེ་བ་ཁྲག་ཁྲིག་ལྷ་ཡི་ནང་ན་དེ། །ཉི་མ་ཤར་བ་བཞིན་དུ་རྣམ་པར་མཛེས། །ཤཱ་རིའི་

57-1-98b

བུ་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བས་སུམ་ཅུ་རྩ་གསུམ་གྱི་ལྷའི་ནང་དུ་སྐྱེས་ནས། ལྷའི་བུ་དེ་དག་ཡུན་ཇི་སྲིད་ཅིག་ན་འཆི་འཕོ་བའི་ཆོས་སུ་འགྱུར་བ་བདག་ཉིད་ཀྱིས་ཤེས་ཏེ། ལྷའི་བུ་དེས་འཆི་བ་ན་རང་གི་འཁོར་
དང་། ལྷའི་བུ་གཞན་དག་ཀྱང་ཆོས་ཀྱི་གཏམ་གྱིས་ཡང་དག་པར་དགའ་བར་བྱས། ཡང་དག་པར་འཛིན་དུ་བཅུག་ནས་གནས་དེ་ནས་ཤི་འཕོས་ཏེ། ཤི་འཕོས་ནས་ཀྱང་ལོག་པར་ལྟུང་བར་འགྲོ་བར་མི་འགྱུར་ཏེ། མིའི་འཇིག་རྟེན་དུ་སྐྱེས་
ན་ཡང་རིགས་མཆོག་དུ་བཙུན་པ། དད་པ་དང་ལྡན་པ། སངས་རྒྱས་འབྱུང་བ་དང་ལྡན་པར་སྐྱེ་བར་འགྱུར་རོ། །གལ་ཏེ་སངས་རྒྱས་མི་འབྱུང་བ་ཞིག་ལ་བབ་ན་ཡང་དེ་སྡིག་པའི་ལྟ་བ་ཅན་མ་ཡིན་ཞིང་ཡ་མཚན་དུ་འཛིན་པ་དང་བྲལ་བའི་
རིགས་སུ་སྐྱེ་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། དེ་བཞིན་དུ་སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །ལྷ་ཡི་སྲིད་པར་བདག་ནི་ཡུན་
རིང་དུ། །གནས་པར་འགྱུར་ཞེས་དེ་ཡི་ཤེས་འདི་འཇུག །ལྷ་གཙོ་དེ་ཡིས་དེ་ཡང་རབ་ཏུ་ཤེས། །གང་ཚེ་འཆི་བའི་དུས་ནི་འབབ་འགྱུར་བ། །དེ་ཚེ་མཚན་མ་ལྔ་དག་འབྱུང་འགྱུར་ཏེ། །བྱེ་བ་ཕྲག་མང་ལྷ་དག་དེར་འདུ་ཞིང་། །
དེ་དག་མངོན་སུམ་དུ་ནི་ཆོས་ཀྱང་སྟོན། །བདག་ནི་འདི་ནས་རིང་པོར་མི་ཐོགས་འཆི། །སྲིད་པ་ཐམས་ཅད་མི་རྟག་བདེ་བ་མེད། །གཞན་དག་འཆི་ཞིང་གཞན་དག་སྐྱེ་བར་འགྱུར། །ཀྱེ་མ་བདག་ནི་འཆི་བར་འགྱུར་རོ་ཞེས། །དེ་ནི་
དབུས་འདུག་ཤིན་ཏུ་མི་བཟད་སྨྲ། །དེ་ཡི་མངག་གཞུག་རྣམས་ཀྱང་དེ་བཞིན་དུ། །ལྷ་གཞན་དུ་མ་སྡུག་བསྔལ་ཉམ་ཐག་གོ། །དེ་ནས་བདག་གིས་ལྟས་ནི་ལྔ་མཐོང་ནས། །དེ་ནི་རང་གི་སྟན་ལ་དགའ་མི་འཐོབ། །གནས་དེ་ནས་ནི་ལངས་ཏེ་
འགྲོ་བར་བྱེད། །གཞལ་མེད་ཁང་གི་གནས་སུ་འང་དགའ་མི་སྐྱེ། །བདག་ཅག་འདི་མཐོང་ཐ་མ་འདི་ཡིན་ཞེས། །དེ་བཞིན་ལྷ་མང་དུ་མ་མྱ་ངན་བྱེད། །དེ་ཡི་སྟན་མཆོག་དམ་པ་གང་ཡིན་པ། །དེ་ནི་ལྷ་ཡི་བུ་མོས་བླངས་ཏེ་འབུལ། །

57-1-99a

སྟན་དེ་མཐོང་ནས་དེ་ནི་རང་སྟན་ལ། །དགའ་བ་ཐོབ་པར་མ་གྱུར་དེ་ནས་ཤི། །ལྷ་ཡི་དབང་པོ་ལྷ་གནས་ཤི་འཕོས་ནས། །མི་ཡི་འཇིག་རྟེན་དུ་ནི་མངོན་པར་འགྲོ། །དེ་ཡི་རང་ལ་ཡོད་པའི་དྲན་མི་ཉམས། །དེར་ཡང་
བདེ་བར་འགྱུར་གྱི་སྡུག་བསྔལ་མིན། །སྐྱེས་ནས་ཚེ་རབས་རབ་ཏུ་དྲན་གྱུར་ཏེ། །སྐྱེས་མ་ཐག་ཏུ་སྔོན་གྱི་སྲིད་པ་ཤེས། །ཉོན་མོངས་རྣམས་ཀྱིས་བདག་ལ་གནོད་འགྱུར་ཞེས། །ཤིན་ཏུ་སྡུག་བསྔལ་དེར་ཡང་དགའ་བ་མེད། །ལྷ་ཡི་
འཇིག་རྟེན་ཐོབ་པའི་དཔལ་དྲན་ནས། །མི་ཡི་འཇིག་རྟེན་ལ་ནི་བདེ་མི་རྙེད། །མཐོ་རིས་སྡུག་བསྔལ་མི་ཡུལ་སྨོས་ཅི་དགོས། །སྲིད་པ་ཐམས་ཅད་སྙིང་པོ་མེད་ཅིང་གཡོ། །གང་དང་གང་ཚེ་ལུས་སྟོབས་ཉམས་གྱུར་པ། །
དེ་ཚེ་དེ་ནི་རབ་ཏུ་འབྱུང་བར་ངེས། །འདི་ཡང་དེ་ཡི་རྣམ་སྨིན་འགྱུར་བ་སྟེ། །རྣམ་རྟོག་སྤྱོད་པར་ནམ་ཡང་མི་འགྱུར་རོ། །དེ་ནི་དེ་ཡི་མར་མེ་ཕུལ་བའི་འབྲས། །དེ་དང་དེར་ནི་ཚེ་རབས་དེས་དྲན་འགྱུར། །བྱ་བའི་
འོས་མིན་ལས་ནི་དེ་མི་སྤྱོད། །གདོན་མི་ཟ་བར་དེ་ནི་ཁྱིམ་ནས་འབྱུང་། །ལོང་བར་མི་འགྱུར་ཞ་བོར་མི་འགྱུར་ཞིང་། །དེ་ཡི་མིག་ནི་མེད་པར་འགྱུར་མ་ཡིན། །ནད་ཅན་མ་ཡིན་འཇིགས་རུང་སྒྲ་ལྡན་མིན། །
བླུན་པོར་མི་འགྱུར་མི་ཤེས་མི་འགྱུར་རོ། །མིག་མེད་པར་ནི་ནམ་ཡང་མི་འགྱུར་ཞིང་། །དེ་ཡི་མིག་ནི་ན་བར་འགྱུར་མ་ཡིན། །མིག་གཅིག་མ་ཡིན་ཁོག་ལོང་མིག་མ་ཡིན། །དེ་ཡི་མིག་ལ་མི་གསལ་མེད་པར་འགྱུར། །
མིག་ནི་རིང་ཞིང་དཀར་གནག་རྣམ་པར་གསལ། སྲིད་པར་དེ་ཡི་མིག་ནི་དག་པར་འགྱུར། །ནོར་བུ་འོད་བཟངས་ལྟར་ནི་དོན་ཞིབ་རྟོགས། །བསྐལ་པ་གྲངས་མེད་དག་ཏུ་ནམས་ཀྱང་དེའི། །ཤ་ཡི་མིག་ནི་ཡོངས་སུ་ཉམས་
མི་འགྱུར། །དེ་ལ་མིག་ནད་དག་ནི་མི་འབྱུང་སྟེ། །མར་མེ་ཕུལ་བའི་རྣམ་སྨིན་དེ་ཡིན་ནོ། །དེ་བཞིན་ལག་རྩིས་གཟུགས་དང་རྟོག་གེ་རྣམས། །རྟོག་པར་ཁོང་ཆུད་བཟོད་ལྡན་འཇིགས་པ་མེད། །དེ་ནི་མཛངས་

57-1-99b

ལ་བློ་དང་ལྡན་པར་འགྱུར། །བློ་ནི་ཤིན་དུ་ཆ་ཕྲ་དོན་དམ་མཐོང་། །སྲིད་པ་དག་ལ་བྱེད་པ་མེད་པར་ལྟ། །རྒྱལ་བའི་བསྟན་ལ་སྣང་བ་ཐོབ་པར་འགྱུར། །དེ་བཞིན་འཇིག་རྟེན་འདྲེན་པ་སངས་རྒྱས་མཐོང་། །མཐོང་ནས་དད་པས་
མཆོད་པ་རབ་ཏུ་བྱེད། །གཟུགས་ཀྱི་དངོས་པོ་བཟང་དང་མཛེས་པར་འགྱུར། །མཛའ་བཤེས་དང་ནི་རྩ་ལག་སྐྱེ་བོ་དགའ། །ཕྱུག་ཅིང་སྟོབས་ལྡན་ནོར་ནི་མང་བར་འགྱུར། །མི་ཕྱེད་འཁོར་ནི་ཕུན་སུམ་ཚོགས་པ་
འཐོབ། །ཇི་ལྟར་མར་མེས་མུན་པ་བསལ་ནས་སུ། །ཀུན་ལ་འོད་ཀྱིས་སྣང་བ་ཁྱབ་པ་ལྟར། །དེ་བཞིན་ཀུན་སྣང་བྱས་ནས་ལྷང་ངེའོ། །མུན་པའི་དབང་དུ་ངེས་པར་དེ་མི་འགྲོ། །སངས་རྒྱས་མཆོད་རྟེན་ལ་ནི་མི་
གང་གིས། །སེམས་ནི་དད་པའི་མར་མེའི་ཕྲེང་བ་འབུལ། །མར་མེ་ཕུལ་བའི་སེམས་ནི་རྣམ་དག་ཅིང་། །དེ་ནི་འཇིག་རྟེན་རིགས་པའི་མཆོག་ཏུ་འགྱུར། །བལྟ་ན་སྡུག་ཅིང་རབ་ཏུ་མཛེས་པར་འགྱུར། །འཇིག་རྟེན་
ཀུན་གྱི་དགའ་བ་སྐྱེ་བར་འགྱུར། །ལྟད་མོ་མི་འདོད་བཀྲ་ཤིས་འདོད་མ་ཡིན། །གཡོན་ཕྱོགས་ལམ་ལ་དེ་ནི་བསྟེན་མི་འགྱུར། །དེ་ནི་འཇིག་རྟེན་ལོག་ལྟ་གང་དག་དང་། །ལམ་གོལ་གང་དག་ཡིན་པ་དེར་མི་མོས། །རྒྱལ་
ཕྲན་ཙམ་གྱིས་ཆོག་པར་དེ་འཛིན་ཅིང་། །སུ་དང་ཡང་ནི་འཐབ་ཏུ་འགྲོ་མི་བྱེད། །ཚེགས་འབྱུང་མེད་ཅིང་མྱ་ངན་མེད་པར་འགྱུར། །དེ་ཡི་སེམས་ལ་ཡོངས་སུ་ཡི་ཆད་མེད། །དེ་ལ་ཡིད་མི་ཆེས་པར་མི་འགྱུར་
ལ། །བསམ་པ་ངན་དང་གནོད་པ་བྱེད་པ་མེད། །རྒྱལ་པོའི་ཕོ་བྲང་གང་དུ་དེ་སྨྲ་བ། །རྒྱལ་པོ་དང་ནི་རྒྱལ་འཁོར་གྲགས་པར་འགྱུར། །སྐྱ་རྦབ་ནད་ཀྱིས་ནམས་ཀྱང་དེ་མི་ཐེབས། །ཟ་མར་མི་འགྱུར་མ་ནིང་འགྱུར་མ་ཡིན། །
ལེགས་པར་གནས་ཤིང་བདེ་དང་ལྡན་འགྱུར་ལ། །དེ་ཡི་ལུས་ལ་ནད་རྣམས་འབྱུང་མི་འགྱུར། །རྨི་ལམ་དུ་ནི་སྡིག་པ་མི་རྨི་ལ། །དེས་ནི་ཇི་ལྟར་སྟོན་པ་དེ་ཚེ་ཤེས། །དེས་ནི་ཡང་དང་ཡང་དུ་གཏེར་རྙེད་དེ། །བདེ་

57-1-100a

གཤེགས་མཆོད་རྟེན་མཆོད་པས་དེ་ལྟར་འགྱུར། །དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བས་སེམས་ཅན་དེ་ནི་འདུན་པ་བཞི་འཐོབ་སྟེ། བཞི་གང་ཞེ་ན། ལུས་ཀྱི་འདུན་པ་དང་། 
ལོངས་སྤྱོད་ཀྱི་འདུན་པ་དང་། རིགས་བཙུན་པར་སྐྱེ་བའི་འདུན་པ་དང་། ཤེས་རབ་འཐོབ་པ་སྟེ། ཤཱ་རིའི་བུ་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བས་འདུན་པ་བཞི་པོ་དེ་དག་འཐོབ་པར་འགྱུར་རོ། །
བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། དེ་བཞིན་དུ་སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །དྲང་སྲོང་ཆེན་པོའི་མཆོད་རྟེན་མར་མེ་ཕུལ། །
དེ་ཡི་ལུས་རྫོགས་པ་དང་སྟོབས་ཆེར་འགྱུར། །དེ་ནི་ནམས་ཀྱང་རྩོད་པ་སྟེན་མི་བྱེད། །དབང་ཕྱུག་ཚུགས་པ་མེད་པ་ཕྱོགས་བཅུར་སྤྱོད། །དྲང་སྲོང་ཆེན་པོའི་མཆོད་རྟེན་མར་མེ་ཕུལ། །རྣམ་པར་གྲགས་པའི་ལོངས་སྤྱོད་
ལྡན་པ་དང་། །ཡོན་ཏན་མཆོག་ལྡན་རབ་མཆོག་ཁྱིམ་དུ་སྐྱེ། །སྐྱེས་ནས་ཚེ་རབས་དྲན་པ་ཉིད་དུ་འགྱུར། །གཡོག་འཁོར་ཕུན་སུམ་ཚོགས་པ་མཆོག་ལྡན་འགྱུར། །སྲོག་ཆགས་རྣམས་ལ་རྟག་ཏུ་སྙིང་བརྩེ་བྱེད། །
རྟག་ཏུ་མི་འཚེ་ཤིན་ཏུ་དེས་པར་འགྱུར། །རྣམ་ལྟུང་འགྲོ་བའི་ཁྱིམ་དུ་དེ་མི་སྐྱེ། །ཤཱ་རིའི་བུ་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བས་ཡོངས་སུ་དག་པ་བཞི་འཐོབ་སྟེ། བཞི་གང་ཞེ་ན། ལུས་ཡོངས་
སུ་དག་པ་དང་། ངག་ཡོངས་སུ་དག་པ་དང་། ཡིད་ཡོངས་སུ་དག་པ་དང་། མཛའ་བཤེས་ཡོངས་སུ་དག་པའོ། །ཤཱ་རིའི་བུ་རིགས་ཀྱི་བུ་འམ། རིགས་ཀྱི་བུ་མོ་དེ་སྐྱེ་བའི་གནས་དེ་དང་དེ་དག་ཏུ་སྐྱེས་པ་ན་སྲོག་གཅོད་པ་སྤོང་
བར་འགྱུར་ཏེ། དེ་སྲོག་གཅོད་པ་སྤང་བར་བྱ། མ་བྱིན་པར་མི་ལེན་ཏོ། །འདོད་པས་ལོག་པར་གཡེམ་པ་སྤོང་བར་འགྱུར་ཏེ། རང་གི་ཆུང་མ་ལ་ཡང་ལོག་པར་མི་སྟེན་ཏོ། །འབྲུའི་ཆང་དང་བཅོས་པའི་ཆང་བཏུང་བ་སྤོང་བར་

57-1-100b

བྱེད་དོ། །སེམས་ཅན་གང་ལ་ཡང་དབྱུག་པའམ། མཚོན་ནམ། བོང་བའམ། ཁུ་ཚུར་རམ། མཚོན་ཆར་གྱུར་པ་གང་ཡང་རུང་བས་རྣམ་པར་འཚེ་བར་མི་བྱེད་ཅིང་དེ་སྡིག་པ་མི་དགེ་བའི་ཆོས་རྣམས་ལས་ཟློག་པར་འགྱུར་ཏེ། ཤཱ་རིའི་བུ་དེ་
དག་ནི་ལུས་ཀྱི་ཡོངས་སུ་དག་པ་ཞེས་བྱའོ། །དེ་ལ་ངག་གི་ཡོངས་སུ་དག་པ་གང་ཞེ་ན། དེ་བརྫུན་དུ་སྨྲ་བ་སྤངས་པ་ཡིན་ཏེ། དེ་མ་མཐོང་བའམ། མ་ཐོས་པ་རྗོད་པར་མི་བྱེད་ལ། མཐོང་བ་དང་། ཐོས་པ་དྲིས་པ་ཡང་དུས་མ་ཡིན་
པར་སྨྲ་བར་མི་བྱེད་དེ། དེ་མཐོང་བ་འམ། ཐོས་པ་དྲིས་ན་ཡང་དག་པར་སྨྲ་བར་བྱེད་དེ། དེ་བདག་གི་དོན་ནམ། གཞན་གྱི་དོན་ཏུ་ཡང་རུང་སྟེ་ལོག་པར་མི་སྨྲའོ། །གཞན་དག་གིས་བརྫུན་དུ་སྨྲ་བ་བཅོལ་བའི་ཚེ་ཡང་དག་པར་
ཤེས་ན་བདེན་པ་སྲུང་བར་བྱེད་དེ། ངག་གི་ཡོངས་སུ་མ་དག་པ་དེ་དག་སྤོང་བར་བྱེད་དོ། །དེ་དེ་དག་དབྱེ་བའི་ཕྱིར་འདི་ནས་ཐོས་པ་ཕ་བིར་མི་སྙོད། དེ་དག་དབྱེ་བའི་ཕྱིར་ཕ་བི་ནས་ཐོས་པ་འདིར་མི་སྙོད་དེ། འཐུན་པ་རྣམས་
ནི་གཅུགས་པར་བྱེད་ཅིང་བྱེ་བ་རྣམས་ལ་ནི་སྡུམས་བྱེད་དོ། །དེ་དགས་རྩུབ་པོ་སྤངས་པ་ཡིན་ཏེ། ངག་གང་ཞེར་འདེབས་པ། བརླང་བ། གཞན་ལ་རྩུབ་པ། གཞན་ལ་མི་བདེ་བ། མི་སྡུག་པ། མི་འདོད་པ། མི་དགའ་བ། ཡིད་དུ་མི་འོང་
བ། གཞན་ལ་གནོད་པ། ཁོན་དུ་འཛིན་པའི་ངག་དེ་ལྟ་བུ་སྤངས་ནས་ངག་མཉེན་པ་འཇམ་པ་ཡིད་དུ་འོང་བ་བདེན་པ་རྣར་སྙན་པ། སྟིང་དུ་སྡུག་པ། མཛའ་བར་འགྱུར་བ། སྐྱེ་བོ་མང་པོ་མགུ་བ། སྐྱེ་བོ་མང་པོ་འདོད་པ། དགའ་བ། ཡིད་དུ་འོང་བ། དགྲ་ཐམས་
ཅད་རབ་ཏུ་ཞི་བར་བྱེད་པ་དེ་ལྟ་བུའི་ངག་སྨྲའོ། །དེ་ཚིག་ཀྱལ་པ་སྤངས་པ་ཡིན་ཏེ། དེ་སྤང་བར་བྱ་བ་གཞན་དང་མི་སྨྲ་བ་ཡིན། དེ་གཞན་གྱི་ལག་རྩིས་དང་བརྡ་སྦེད་པར་བྱེད་དོ། །དེ་མང་དུ་སྨྲ་བར་མི་བྱེད། དུས་མ་ཡིན་པར་
སྨྲ་བར་མི་བྱེད་ལ། མྱ་ངན་ལས་འདས་པ་དང་མི་ལྡན་པའི་ཚིག་མི་སྨྲ་སྟེ། དེ་ལྟར་དེ་དག་གི་ལས་ཡོངས་སུ་མ་དག་པ་སྤོང་བ་འདི་ནི་ཤཱ་རིའི་བུ་ངག་གི་ལས་ཡོངས་སུ་དག་པ་ཞེས་བྱའོ། །དེ་ཡིད་ཀྱི་ལས་ཡོངས་སུ་

57-1-101a

མ་དག་པ་སྤོང་བ་ཡིན་ཏེ། དེ་བརྣབ་སེམས་སུ་མི་བྱེད་ཅིང་། དེ་གཞན་གྱི་ནོར་དང་། གཞན་གྱི་རྫས་དང་། གཞན་གྱི་ཡོ་བྱད་དག་ལ་བརྣབ་སེམས་མི་སྐྱེད་དོ། །དེ་གནོད་སེམས་མི་བྱེད་དེ། གནོད་སེམས་སྤོང་
བ་ཡིན་ནོ། །ལོག་པར་ལྟ་བ་ཡང་སྤོང་སྟེ། སྡིག་པའི་ལྟ་བ་ཅན་མ་ཡིན་ནོ། །དེ་ལྟར་ཡིད་ཀྱི་ལས་ཡོངས་སུ་མ་དག་པ་སྤོང་བ་འདི་ནི་ཡིད་ཀྱི་ལས་ཡོངས་སུ་དག་པ་ཞེས་བྱའོ། །མཛའ་བཤེས་ཡོངས་སུ་དག་པ་ཡང་
འཐོབ་སྟེ། གང་དག་བརྫུན་དུ་སྨྲ་བ་དང་། འབྲུའི་ཆང་དང་བཅོས་པའི་ཆང་བཏུང་བ་སྤོང་བ་དང་། མི་རྩུབ་པ་དང་། མི་བརླང་བ་དང་། ལེགས་པར་སྡོམ་པ་དང་། ཡང་དག་པའི་ལྟ་བ་ཅན་དེ་དག་ལ་སྟེན་ཅིང་གོང་དུ་ཡང་
སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་རྣམས་དང་། རང་སངས་རྒྱས་དང་། ཉན་ཐོས་རྣམས་ལ་ཡང་སྟེན་ཅིང་སྙེན་ལ་བསྙེན་བཀུར་བྱེད་དེ། ཤཱ་རིའི་བུ་འདི་ནི་ཡོངས་སུ་དག་པ་བཞི་པ་སྟེ་མཛའ་
བཤེས་ཡོངས་སུ་དག་པ་ཞེས་བྱའོ། །ཤཱ་རིའི་བུ་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་བས་ཡོངས་སུ་དག་པ་བཞི་པོ་དེ་དག་འཐོབ་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་
ཏེ། བདེ་བར་གཤེགས་པས་དེ་སྐད་གསུངས་ནས། དེ་བཞིན་དུ་སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །རྣམ་པར་སྦྱང་ཕྱིར་བདེ་གཤེགས་གསུངས་པ་ལ། །ལུས་དང་ངག་དང་ཡིད་ཀྱིས་ཤིན་དུ་
བསྡམ། ལྟ་བ་མ་རྙེད་ཚུལ་ཁྲིམས་རྣམ་པར་དག །དེ་ཡི་མིག་ནི་ཡིད་ལས་བྱུང་བ་ཡིན། །ཉི་བཞིན་ཕྱོགས་རྣམས་སུ་ནི་ཤིན་དུ་གསལ། །དེ་ཡིས་ཟག་པ་ཟད་པ་མྱུར་དུ་ཤེས། །དེ་ཡི་བློ་ནི་རྫུ་འཕྲུལ་ཆེ་
བར་འགྱུར། །ལྷ་མིག་རྡུལ་དང་བྲལ་ཞིང་ཟག་པ་མེད། །བློ་ལྡན་དེ་ཡིས་འཇིག་རྟེན་སེམས་རྣམས་དང་། །ལྷ་ཡི་མངོན་ཤེས་སོ་སོ་རིག་པ་ཤེས། །འདོད་ན་ཉན་ཐོས་བྱང་ཆུབ་རྙེད་མི་དཀའ། །མར་མེ་ཕུལ་བའི་རྣམ་སྨིན་

57-1-101b

དེ་ཡིན་ནོ། །དྲང་སྲོང་ཆེན་པོའི་མཆོད་རྟེན་མར་མེ་ཕུལ། །གལ་ཏེ་སངས་རྒྱས་བྱང་ཆུབ་འདོད་ནའང་བླ། །བློ་ལྡན་པ་ལ་གསུམ་ཆར་ཉམས་པ་མེད། །ཤེས་རབ་མིག་ལྡན་ལོངས་སྤྱོད་ཆེན་པོར་འགྱུར། །ཤཱ་རིའི་བུ་ཐེག་པ་ཆེན་
པོ་ལ་ཡང་དག་པར་ཞུགས་པའི་རིགས་ཀྱི་བུའམ། རིགས་ཀྱི་བུ་མོས་དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་བ་ཕུལ་ན་སྐྱེ་བའི་གནས་དེ་དང་དེ་དག་ཏུ་འདུན་པར་འགྱུར་བའི་ཆོས་ཀྱི་མཆོག་བརྒྱད་འཐོབ་སྟེ། 
བརྒྱད་གང་ཞེ་ན། ཤཱའི་མིག་མཆོག་འཐོབ་པ་དང་། དྲན་པ་སྤྱི་གཙུག་བལྟར་མི་མཐོང་བ་འཐོབ་པ་དང་། བསྒོམ་པ་ཡོངས་སུ་རྫོགས་པར་ངེས་པར་བྱེད་པའི་ཆ་དང་འཐུན་པའི་ལྷའི་མིག་མཆོག་མཐོབ་པ་དང་། ཤེས་རབ་
ཡོངས་སུ་རྫོགས་པས་ཚུལ་ཁྲིམས་ཉམས་པ་མེད་པ་འཐོབ་པ་དང་། སྔོན་བསོད་ནམས་བྱས་པས་མཐོ་རིས་ཐོབ་པ་དང་། བསོད་ནམས་ལེགས་པར་བྱས་པས་དལ་བ་ཕུན་སུམ་ཚོགས་པ་འཐོབ་པ་དང་། སེམས་ཅན་
ཐམས་ཅད་ཀྱི་མིག་ཏུ་གྱུར་པས་སངས་རྒྱས་འབྱུང་བ་མཉེས་པར་བྱེད་པ་དང་། ཤཱ་རིའི་བུ་རིགས་ཀྱི་བུའམ། རིགས་ཀྱི་བུ་མོས་མར་མེ་ཕུལ་བའི་དགེ་བའི་རྩ་བ་དེས་འཁོར་ལོས་སྒྱུར་བའི་རྒྱལ་སྲིད་འཐོབ་སྟེ། དེ་ལ་ཡང་
ཞེ་འགྲས་པ་མེད་པའི་ཡིད་དང་ལྡན་ཞིང་མཆོག་ཏུ་ལྟ་ན་སྡུག་པའམ། ལྷའི་དབང་པོ་བརྒྱ་བྱིན་རྫུ་འཕྲུལ་ཆེན་པོ་ཐོབ་ཅིང་མིག་སྟོང་དང་ལྡན་པར་འཐོབ་པར་འགྱུར་བའམ། ཚངས་པའི་གནས་ལ་མཁས་པའི་ཚངས་
པར་ཡང་འགྱུར་ཏེ་གྲགས་པའི་བསམ་གཏན་འཐོབ་པར་འགྱུར་བ་སྟེ། དགེ་བའི་རྩ་བ་བྱང་ཆུབ་ཏུ་ཡོངས་སུ་བསྔོས་པས་འདུན་པར་འགྱུར་བའི་ཆོས་ཀྱི་མཆོག་བརྒྱད་པོ་དེ་དག་འཐོབ་པོ། །གཞན་ཡང་ཆོས་བརྒྱད་འཐོབ་
སྟེ། བརྒྱད་གང་ཞེ་ན། སངས་རྒྱས་ཀྱི་སྤྱན་དཔག་ཏུ་མེད་པ་འཐོབ་པ་དང་། སངས་རྒྱས་ཀྱི་སྤོབས་པ་དཔག་ཏུ་མེད་པ་འཐོབ་པ་དང་། སངས་རྒྱས་ཀྱི་རྫུ་འཕྲུལ་དཔག་ཏུ་མེད་པ་དང་། སངས་རྒྱས་ཀྱི་ཚུལ་ཁྲིམས་དཔག་ཏུ་མེད་པ་དང་། སངས་རྒྱས་

57-1-102a

ཀྱི་ཏིང་ངེ་འཛིན་དཔག་ཏུ་མེད་པ་དང་། སངས་རྒྱས་ཀྱི་ཤེས་རབ་དཔག་ཏུ་མེད་པ་དང་། སངས་རྒྱས་ཀྱི་རྣམ་པར་གྲོལ་བ་དཔག་ཏུ་མེད་པ་དང་། སེམས་ཅན་གྱི་སེམས་དང་བསམ་པ་དཔག་ཏུ་མེད་པ་ལ་འཇུག་པ་
འཐོབ་སྟེ། ཤཱ་རིའི་བུ་མར་མེ་ཕུལ་བས་དེ་ལྟར་རྣམ་པར་སྨིན་པ་དཔག་ཏུ་མེད་པ་ཡོངས་སུ་བཟུང་བ་ཡིན་ནོ། །ཤཱ་རིའི་བུ་གཞན་ཡང་སེམས་ཅན་གང་དག་དེ་བཞིན་གཤེགས་པ་ཆོས་འཆད་པ་ན། ཀྱེ་ཨེ་མ་ཧོ་ཆོས་འཆད་དོ། །
ཀྱེ་ཨེ་མ་ཧོ་ཆོས་རབ་ཏུ་སྟོན་ཏོ་ཞེས་མར་མེ་དབུལ་བ་ཕུལ་བའི་མར་མེ་དེ་ཏིལ་གྱི་མར་མེར་རྗེས་སུ་བཟུང་ནས་ཆོས་ཀྱི་མར་མེ་རྗེས་སུ་འཛིན་པར་བྱེད་དོ། །དེ་མར་མེ་ཕུལ་བའི་དགེ་བའི་རྩ་བ་དེས་ཚོགས་དཔག་ཏུ་མེད་པ་བརྒྱད་འཐོབ་སྟེ། བརྒྱད་གང་ཞེ་ན། དྲན་
པའི་ཚོགས་དཔག་ཏུ་མེད་པ་འཐོབ་པ་དང་། དེ་བཞིན་དུ་སྦྱར་ཏེ། བློ་གྲོས་ཀྱི་ཚོགས་དང་དད་པའི་ཚོགས་དང་། བརྩོན་འགྲུས་ཀྱི་ཚོགས་དང་། ཤེས་རབ་ཀྱི་ཚོགས་དང་། ཏིང་ངེ་འཛིན་གྱི་ཚོགས་དང་། སྤོབས་པའི་ཚོགས་དང་། བསོད་ནམས་ཀྱི་
ཚོགས་དཔག་ཏུ་མེད་པ་འཐོབ་སྟེ། ཚོགས་དཔག་ཏུ་མེད་པ་བརྒྱད་པོ་དེ་དག་འཐོབ་པར་འགྱུར་རོ། །སོ་སོ་ཡང་དག་པར་རིག་པ་བཞི་ཡང་འཐོབ་སྟེ། རིམ་གྱིས་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་འཐོབ་པར་
འགྱུར་རོ། །ཤཱ་རིའི་བུ་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ། དེ་དང་བའི་སེམས་ཀྱིས་ཐལ་མོ་སྦྱར་བ་བྱས་པའི་དགེ་བའི་རྩ་བ་དེས་ཆོས་མཆོག་ཏུ་བྱུང་བ་བརྒྱད་
འཐོབ་སྟེ། བརྒྱད་གང་ཞེ་ན། གཟུགས་མཆོག་ཏུ་བྱུང་བ་འཐོབ་པ་དང་། གཡོག་འཁོར་མཆོག་ཏུ་བྱུང་བ་ཐོབ་པ་དང་། ཚུལ་ཁྲིམས་མཆོག་ཏུ་བྱུང་བ་དང་། ལྷ་དང་མི་རྣམས་སུ་སྐྱེ་བ་མཆོག་ཏུ་བྱུང་བ་དང་། 
དད་པ་མཆོག་ཏུ་བྱུང་བ་དང་། སྤོབས་པ་མཆོག་ཏུ་བྱུང་བ་དང་། ཀུན་ནས་ཉོན་མོངས་པ་མེད་པའི་འཕགས་པའི་ལམ་ཐོབ་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་

57-1-102b

བའོ། །ཤཱ་རིའི་བུ་དེ་ཅིའི་ཕྱིར་དཔག་ཏུ་མེད་པ་ཞེས་བྱ་ཞེ་ན། དེ་བཞིན་གཤེགས་པ་ལ་དེས་མཆོད་པའི་འབྲས་བུ་དཔག་ཏུ་མེད་པའི་ཕྱིར་ཏེ། ཕན་ཡོན་དཔག་ཏུ་མེད་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་ཀྱིས་འདི་སྐད་དུ། བརྩམ་བྱོས་
མངོན་པར་འབྱུང་བར་གྱིས། །སངས་རྒྱས་བསྟན་ལ་བརྩོན་པར་བྱོས། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་རྣམས་གཞོམ་པར་བྱོས། །ཞེས་ཆེད་དུ་བརྗོད་པ་དེ་ཆེད་དུ་བརྗོད་པ་མཛད་དོ། །དེ་ནས་བཅོམ་
ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་ཆོས་ལྔ་པོ་འདི་དག་ནི་མཆོག་ཏུ་རྙེད་པར་དཀའ་བ་སྟེ། ལྔ་གང་ཞེ་ན། མིར་སྐྱེ་བ་འཐོབ་པ་དང་། དེ་བཞིན་གཤེགས་པའི་བསྟན་པ་ལ་རབ་
ཏུ་འབྱུང་བ་དང་། དེ་ལ་མངོན་པར་དགའ་བ་དང་། ཚུལ་ཁྲིམས་ཡོངས་སུ་རྫོགས་པ་དང་། ཟག་པ་ཟད་པ་སྟེ། ཤཱ་རིའི་བུ་ཆོས་ལྔ་པོ་དེ་དག་ནི་སེམས་ཅན་ཐམས་ཅད་ཀྱིས་མཆོག་ཏུ་རྙེད་པར་དཀའ་བ་ཡིན་ཏེ། དེ་དག་
ནི་ཁྱེད་རྣམས་ཀྱིས་ཐོབ་ཟིན་ཏོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། དེ་བཞིན་དུ་སྟོན་པ་གཞན་ཡང་འདི་སྐད་ཅེས་བཀའ་སྩལ་ཏོ། །བྱང་ཆུབ་
དོན་ཕྱིར་སེམས་ཅན་ཕན་འདོད་པས། །བདེ་གཤེགས་མཆོད་རྟེན་དབུལ་བ་འདིར་ཕུལ་བས། །མཁས་པ་དེ་ཡིས་བྱས་པའི་ལས་དེས་ནི། །ཚེ་རབས་ཀུན་དུ་ཁྱད་པར་ཅན་དུ་འགྱུར། །འདི་ནས་ཤི་འཕོས་ལྷ་མིས་བསྔགས་པ་ཡི། །ཡང་སྲིད་དམ་པ་དེ་ནི་
ཐོབ་པར་འགྱུར། །རི་རབ་བཞིན་དུ་དེ་ནི་མི་གཡོ་ལ། །འོད་ཟེར་དག་གིས་ཕྱོགས་ཀུན་སྣང་ཞིང་མཛེས། སྣ་ཚོགས་རྣམས་ཀྱིས་མཐོང་ནས་གུས་དང་བཅས། །མཆོག་ཏུ་གུས་པས་དེ་ལ་དགའ་བ་བསྐྱེད། །སྟོད་པ་བྱེད་ཅིང་དེ་ལ་མཆོད་པ་བྱེད། །ཡང་དང་
ཡང་དུ་ལྟ་བས་ངོམས་པ་མེད། །བསོད་ནམས་མཚན་བྱས་དེ་ནི་ལྷས་མཆོད་འོས། །ཚངས་པའི་གནས་ན་ཚངས་པ་མཛེས་པ་འདྲ། །ཅི་ཡི་ལས་ཤིག་ངེས་པར་དེས་བསྟེན་ན། །གང་གིས་དེ་ཡི་ལུས་ནི་ཤིན་ཏུ་མཛེས། །འདི་ན་བསོད་ནམས་མི་

57-1-103a

འདོད་སུ་ཞིག་ཡོད། །འཕགས་པའི་ཚུལ་ཁྲིམས་མཁས་པ་སུ་མི་སྟེན། །ཐུབ་པ་མཐོང་ན་ལྟ་བས་མི་ངོམས་ཏེ། །ཆོས་ཐོས་ནས་ནི་སུ་ཞིག་བག་མི་བྱེད། །མི་ཡི་འཇིག་རྟེན་གནས་ཚེ་དེ་ཡིས་ནི། །བདེ་གཤེགས་མཆོད་
རྟེན་མར་མེ་ཕུལ་བྱས་ཤིང་། །བདེ་བར་གཤེགས་ཀྱི་བསྟན་ལ་གནས་བྱས་པས། །འདི་ན་ལྷ་མཆོག་རྙེད་པ་ལེགས་པར་རྙེད། །མི་ཡི་ལུས་ནི་བདག་གིས་ཐོབ་གྱུར་ཅིག །རྒྱལ་བའི་བསྟན་ལ་དད་པ་མཆོག་ཐོབ་ཤོག །གལ་ཏེ་བག་མེད་
གྱུར་ན་ལུས་འདོར་གྱི། །ཆོས་ཀྱི་དམ་པ་འདོར་བར་ཡོད་མ་གྱུར། །མི་ལུས་རྙེད་པར་དཀའ་བ་ཐོབ་གྱུར་ནས། །བླུན་རྣམས་ཅི་ཕྱིར་རང་གི་དོན་མི་བྱེད། །བདེ་གཤེགས་བསྟན་ལ་གནོད་བྱེད་སེམས་ལྡན་ན། །ཤི་ནས་གཡང་ས་ཆེན་པོར་
ལྟུང་བར་འགྱུར། །དེ་ཡིས་འབྱོར་བ་རྒྱ་ཆེན་ལྷས་ཐོས་ནས། །སྐྱོ་བ་སྐྱེས་ཏེ་སྨོན་ལམ་འདེབས་བྱེད་པ། །མི་ཡི་ལུས་ནི་བདག་གིས་ཐོབ་གྱུར་ཅིག །ལེགས་དོན་གྱུར་ནས་ཚངས་སྤྱོད་བདག་སྟོན་ཤོག །འཆི་བའི་དུས་བྱེད་ཚེ་ཡང་
དེ་བཞིན་དུ། །ཆོས་ལ་ཕན་ཞིང་སེམས་ལ་གསལ་གྱུར་ཅིང་། །ལྷ་སྟོང་བྱེ་བ་ལྷ་མོ་རྣམས་བཅས་པས། །དེ་ནི་བདག་གི་ཡིན་ཞེས་དགའ་བར་བྱེད། །ལྷ་ཡི་བུ་མོ་ཡིད་འོང་བརྒྱན་པ་རྣམས། །སྐྱེད་མོས་ཚལ་བཞིར་དེ་ནི་རྩེ་བྱེད་འཇུག །
ཡིད་དུ་འོང་བའི་སྤོས་ངད་ཀུན་ནས་ལྡང་། །གླུ་དབྱངས་སྙན་པའི་སྒྲ་ཡང་ཐོས་པར་འགྱུར། །བསྔགས་པའི་ལྷ་དེ་ག་ལས་གར་འགྲོ་བ། །དེ་དང་དེར་ནི་གཟུགས་བཟང་རྣམས་ཀྱང་མཐོང་། །མི་སྡུག་གཟུགས་ངན་རྣམས་ཀྱང་
མི་མཐོང་སྟེ། །རྒྱལ་བའི་མཆོད་རྟེན་མར་མེ་ཕུལ་བས་འགྱུར། །དེ་ནས་ཤི་འཕོས་མི་ཡི་སྲིད་པ་འདིར། །དྲན་དང་ལྡན་བཞིན་མ་ཡི་མངལ་ན་གནས། །བཙས་ནས་གང་ནས་ཤི་འཕོས་ཚེ་རབས་དྲན། །འཕགས་པའི་ཡེ་ཤེས་
སྟོབས་ལས་ཉམས་མི་འགྱུར། །བདེ་གཤེགས་མཆོད་རྟེན་མར་མེ་ཕུལ་བྱས་པས། །དེ་ཡིས་ལས་བྱས་པ་ནི་དེ་ཉིད་ཀྱིས། །འཁོར་ལོས་སྒྱུར་བ་མི་བདག་སྟོབས་ཆེན་ལྡན། །ཡིད་འོང་གཟུགས་བཟང་བལྟ་ན་དགའ་བར་འགྱུར། །

57-1-103b

དེ་ཡིས་ལས་བྱས་པ་དེས་ཚེ་རིང་འགྱུར། །གཅིག་ཏུ་དག་པ་ཉིད་ཀྱི་བདེ་དང་ལྡན། །དེ་ཡི་ལུས་ནི་ནད་ཀྱིས་ཉོན་མི་མོངས། །མར་མེ་ཕུལ་བའི་རྣམ་སྨིན་དེ་ཡིན་ནོ། །བདེ་བར་གཤེགས་ལ་མར་
མེས་མཆོད་བྱས་པས། །རྐུན་པོའི་གནོད་མེད་རྒྱལ་པོའི་ཆད་པ་མེད། །གཤེད་མ་མེད་ཅིང་ཆུང་མ་བྱི་ཕོ་མེད། །དེ་ཡི་ལས་ཀྱིས་ནམས་ཀྱང་གཙེ་མི་འགྱུར། །བདེ་ཞིང་ལོ་ལེགས་གང་དུའང་འཇིགས་
པ་མེད། །རྟག་ཏུ་འབྱོར་ཅིང་ལེགས་འབྱོར་ནོར་འབྲུ་ལྡན། །དེ་ཡི་བསྐྱེད་མོས་ཚལ་མཆོག་ཕྲེང་བ་དང་། །ཚལ་དང་ཤིང་ཕྲན་ལོ་མ་སྣ་ཚོགས་བརྒྱན། །དེ་ཡིས་འཇིག་རྟེན་གཙོ་བོ་སངས་རྒྱས་མཐོང་། །མཐོང་
ནས་ཀྱང་ནི་མཆོག་ཏུ་དགའ་འགྱུར་ཏེ། །དེ་དག་རྣམས་ལ་གུས་པར་དེ་མཆོད་བྱེད། །རྒྱལ་སྲིད་སྤངས་ནས་དགེ་སློང་ཉིད་ལ་སྟེན། །བསྔགས་པ་མཐའ་ཡས་གཟིགས་པ་མཐའ་ཡས་ཤིང་། །
མཐའ་ཡས་བློ་ལྡན་བདེ་གཤེགས་མཆོད་རྟེན་ལ། །མར་མེ་ཕུལ་བས་མཐའ་ཡས་བློ་ལྡན་འགྱུར། །མར་མེ་བཞིན་དུ་ཕྱོགས་རྣམས་ཀུན་དུ་གསལ། །མར་མེ་ཆེན་པོས་སྐྱེས་མཆོག་ཐུབ་པ་ཡི། །མཆོད་རྟེན་གསལ་བྱས་རྣམ་
དག་མིག་གིས་ནི། །བྱང་ཆུབ་རྡུལ་བྲལ་ཟག་པ་མེད་ཐོབ་ནས། །དེ་ཕྱོགས་ཀུན་དུ་མར་མེ་བཞིན་དུ་གསལ། །བདེ་གཤེགས་མཆོད་རྟེན་མར་མེ་ཕུལ་བས་ན། །རྣམ་གྲོལ་བློ་མངའ་སྟོབས་བཅུ་རྣམས་ལྡན་ཞིང་། །དེ་བཞིན་མ་
འདྲེས་ཆོས་ཀྱི་ཕ་རོལ་བྱོན། །ཀུན་ནས་སྤྱན་ལྡན་བདེ་བར་གཤེགས་པར་འགྱུར། །ཕྱོགས་རྣམས་དག་ན་བགྲང་བྱས་འཇིག་རྟེན་ཁམས། །གང་དག་ཇི་སྙེད་ཡོད་པ་མ་ལུས་པ། །མར་མེ་ལྟ་བུར་མེ་ཡི་རྒྱུ་ཡི་ནི། །མ་ལུས་པ་
དག་རྟག་ཏུ་སྣང་བྱས་འགྱུར། །བདག་ཉིད་ཆེ་ལ་མར་མེ་ཕུལ་བ་ལས། །མཐུ་འབྱུང་གང་ཡིན་དེ་ནི་དེ་ཡིན་ནོ། །མར་མེ་འདྲ་བ་དག་ལ་སེམས་ཅན་ཀུན། །ལྷག་བྱས་གལ་ཏེ་མཐུ་ཆེན་དོན་དམ་མཐོང་། །རང་རྒྱལ་

57-1-104a

རྣམས་སུ་གྱུར་ལ་དེ་མཆོད་ཕྱིར། །གཅིག་འགས་མར་མེ་འབར་བར་བྱས་གྱུར་ལ། །མར་མེའི་སྙིང་པོ་རི་རབ་ཙམ་བྱས་ཤིང་། །དེ་ཡིས་འཇིག་རྟེན་མ་ལུས་སྣང་བྱེད་ལ། །རྣམ་པ་དེ་འདྲས་མཐའ་ཡས་
ཕྱོགས་ཀུན་དུ། །གལ་ཏེ་མར་མེ་འབུལ་བར་བྱེད་གྱུར་ལ། །རང་རྒྱལ་བྱང་ཆུབ་ཏུ་ནི་སྨོན་སེམས་ཀྱིས། །བསྐལ་པ་བརྒྱ་ཕྲག་མཐའ་ཡས་འབར་བྱེད་པས། །གང་ཞིག་བྱང་ཆུབ་ཕྱིར་ནི་སྨོན་སེམས་ཀྱིས། །མཆོད་
རྟེན་མཆོག་ལ་རྩྭ་མེས་གསལ་བྱེད་ན། །དེ་བས་དེ་མཆོག་འབྲས་བུ་ཆེས་ཆེ་ཞེས། །དོན་དམ་གཟིགས་པ་སངས་རྒྱས་རྣམས་གསུང་ངོ་། །ཕྱོགས་བཅུའི་སྐྱེ་བོ་གང་དག་དཔག་མེད་པ། །རང་སངས་རྒྱས་ཉིད་མངོན་
པར་འདོད་པའི་ཕྱིར། །རེ་རེས་དེ་བཞིན་མར་མེ་རྣམས་ཕུལ་ཞིང་། །བསྐལ་པ་གྲངས་མེད་དེ་དག་འབར་བྱེད་ལ། །འཇིག་རྟེན་ཆེད་དུ་བདེ་གཤེགས་ཉིད་འདོད་ཅིང་། །གང་ཞིག་འཇིག་རྟེན་དམ་པའི་མཆོད་རྟེན་ལ། །མར་
མེ་འབུལ་ལམ་ལན་ཅིག་ཕྱག་འཚལ་ན། །དེ་བས་འདི་བསོད་འབྲས་བུ་ཁྱད་པར་འཕགས། །སངས་རྒྱས་སྤྱོད་ཡུལ་མཐོང་དཀའ་བསམ་མི་ཁྱབ། །ཐོས་ནས་དད་དང་དགའ་བ་སྐྱེད་པར་བྱེད། །དད་མེད་ཆོས་མཆོག་མ་
ཐོབ་བྱིས་པ་རྣམས། །ཞུམ་ཞུམ་པོར་ནི་ཤིན་ཏུ་བྱེད་པར་འགྱུར། །དེ་ཕྱིར་འཇིག་རྟེན་ཀུན་མགོན་གང་ཡིན་པ། །དག་ཆོས་སྤྱོད་ཡུལ་ཅན་རྣམས་རྙེད་དཀའ་བས། །ཐུབ་རྣམས་སྤྱན་སྔར་ཤིན་དུ་དང་སེམས་ཀྱིས། །སངས་རྒྱས་
ཉིད་ཀྱི་ཆེད་དུ་སྨོན་ལམ་ཐོབ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཤཱ་རིའི་བུ་དང་། ཐམས་ཅད་དང་ལྡན་པའི་འཁོར་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་
རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་མར་མེ་འབུལ་བ་ཞེས་བྱ་བ་ཐེག་པ་ཆེན་པོའི་མདོ། རྫོགས་སོ། རྒྱ་གར་གྱི་མཁན་པོ་པྲཛྙཱ་བརྨ་དང་། ཞུ་ཆེན་གྱི་ལོ་ཙྪ་བ་བན་དྷེ་ཡེ་ཤེས་

57-1-104b

སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ། །༄༅། ། རྒྱ་གར་སྐད་དུ། ཨཱརྱ་ན་ག་ར་ཨ་བ་ལམ་བི་ཀཱ་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ། 
འཕགས་པ་གྲོང་ཁྱེར་གྱིས་འཚོ་བ་ཞེས་བྱ་བ་ཐེག་པ་ཆེན་པོའི་མདོ།  སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་
མགོན་མེད་ཟས་སྦྱིན་གྱི་ཀུན་དགའ་ར་བ་ན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་
བ་དང་། རྒྱལ་པོ་དང་། བློན་པོ་དང་། བྱང་ཆུབ་སེམས་དཔའ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་ཀྱིས་བཀུར་སྟིར་བྱས། བླ་མར་བྱས། མཆོད་ཅིང་བརྗེད་དེ། པད་མ་ཆུས་
མ་གོས་པ་བཞིན་དུ་བཞུགས་སོ། །དེ་ནས་དེའི་ཚེ་རྒྱལ་པོ་གསལ་རྒྱལ་གྱིས་དེ་བཞིན་གཤེགས་པ་ལ་མཆོད་པའི་ཕྱིར་སྟོན་ཟླ་ཐ་ཆུང་ཟླ་བ་ཉ་བའི་ཚེས་བཅྭ་ལྔ་ལ། འབྲུ་མར་གྱིས་ཟངས་པོ་ཆེ་སྟོང་བཀང་སྟེ་དངར་ནས་
མར་མེ་སྦར་བའི་འོད་ཀྱིས་ཁོ་ར་ཁོར་ཡུག་ཏུ་དཔག་ཚད་བཞིར་སྣང་བས་ཁྱབ་པར་བྱས་སོ། །དེ་ནས་ཡང་དེའི་ཚེ་མཉན་ཡོད་ཀྱི་གྲོང་ཁྱེར་ཆེན་པོ་ན་དགའ་བྱེད་མ་ཞེས་བྱ་བ་གྲོང་ཁྱེར་གྱིས་འཚོ་བ་ཞིག་འདུག་གོ། །དེས་འབྲུ་
མར་སྲན་གྲེའུ་དང་སྦྱར་བ་ཉོས་ནས་ཞག་བཞི་ཁ་ཆུ་ཚོས་ཏེ་ཉམ་ཆུང་བར་གྱུར་ཏོ། །དེ་ནས་འབྲུ་མར་དེ་ཁྱེར་ཏེ་རྒྱལ་བུ་རྒྱལ་བྱེད་ཀྱི་ཚལ་དུ་སོང་ནས་ཁྱིམས་ཀྱི་ནང་ལོགས་སུ་མར་མེ་སྦར་ཏེ་བཞག་ནས་འདི་ལྟར་སེམས་
བསྐྱེད་དེ། བཅོམ་ལྡན་འདས་བདག་དགེ་བའི་རྩ་བ་འདིས་མ་འོངས་པའི་དུས་ན་ཇི་ལྟར་ད་ལྟར་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་ལྟ་བ་བཞིན་དུ་བདག་ཀྱང་མ་འོངས་པའི་དུས་

57-1-105a

ན་སྟོན་པར་གྱུར་ཏེ་ཆོས་སྟོན་པར་གྱུར་ཅིག །དགེ་འདུན་ཡང་སྡུད་པར་གྱུར་ཅིག་ཅེས་བྱས་སོ། །འདི་ལྟར་ཡང་སེམས་བསྐྱེད་དེ། གལ་ཏེ་བདག་མ་འོངས་པའི་དུས་ན་སངས་རྒྱས་སུ་འགྱུར་བ་ཞིག་ན། མར་
མེ་འདི་བདག་ཕྱིར་མ་འོངས་ཀྱི་བར་དུ་འབར་བར་གྱུར་ཅིག་ཅེས་བྱས་ནས་མར་མེ་དེ་སྤར་ཏེ་གྲོང་ཁྱེར་དུ་སོང་ན། མར་མེ་དེའི་འོད་ཀྱིས་འཛམ་བུའི་གླིང་ཐམས་ཅད་སྣང་བར་གྱུར་ཏེ་ནམ་ནངས་ཀྱི་བར་དུ་ཡང་མར་མེ་དེ་མ་ཤིའོ།། 
དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཆོས་གོས་ཀྱི་མཐའ་མས་མར་མེ་གསད་པར་བྱས་ན་གསད་པར་མ་ནུས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་རྣམ་པར་འཐོར་རླུང་གིས་གསད་པར་བྱས་
ཀྱང་གསད་པར་མ་ནུས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཚངས་པའི་འཇིག་རྟེན་དུ་འདུག་ནས་སྟོང་གསུམ་འདིར་ཤིང་རྟའི་སྲོག་ཤིང་ཙམ་གྱི་ཆར་གྱི་རྒྱུན་དབབ་པར་བྱིན་གྱིས་བརླབས་ཏེ་མར་མེ་
དེའི་སྟེང་དུ་བཏང་ཡང་གསད་པར་མ་ནུས་སོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། མཽད་གལ་གྱི་བུ་ཐོང་ཤིག །མར་མེ་འདི་ནི་བྱང་ཆུབ་ཀྱི་སེམས་ཀྱིས་སྦར་བ་ཡིན་ལ། བྱང་ཆུབ་ཀྱི་སེམས་
ནི་ཉན་ཐོས་ཀྱིས་ཟིལ་གྱིས་གནན་པར་མི་ནུས་སོ། །དེ་ཅིའི་ཕྱིར་ཞེ་ན། ཐམས་ཅད་མཁྱེན་པ་ཉིད་ཀྱི་སེམས་ནི་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཟིལ་གྱིས་མནན་དུ་མེད་པའི་ཕྱིར་རོ། །དེ་ནས་རེ་ཞིག་
ན་བུད་མེད་དེ་ཉི་མ་ཤར་ཏེ་གྲོང་ཁྱེར་ནས་ཕྱིར་འོངས་ནས་དེས་མར་མེ་དེ་ཤིན་དུ་འབར་བ་མཐོང་བ་དང་། དེ་མཆོག་ཏུ་དགའ་བ་ཆེན་པོས་རྒྱས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་འཛུམ་པ་མཛད་
དོ། །སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་ནི་འདི་ཡིན་ཏེ། གང་གི་ཚེ་སངས་རྒྱས་བཅོམ་ལྡན་འདས་འཛུམ་པ་མཛད་པ་དེའི་ཚེ་སངས་རྒྱས་བཅོམ་ལྡན་འདས་རྣམས་ཀྱི་ཞལ་གྱི་སྒོ་ནས་འོད་ཟེར་ཁ་

57-1-105b

དོག་དུ་མ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་བར་གྱུར་ཏེ། འཇིག་རྟེན་གྱི་ཁམས་མཐའ་ཡས་མུ་མེད་པ་དག་སྣང་བས་ཁྱབ་པར་བྱས་ནས་ཚངས་པའི་འཇིག་རྟེན་གྱི་བར་དུ་སོང་སྟེ་ཟླ་བ་དང་ཉི་མའི་འོད་
ཀྱང་ཟིལ་གྱིས་མནན་ནས་ཡང་སླར་ལོག་སྟེ། བཅོམ་ལྡན་འདས་ལ་ལན་འབུམ་བསྐོར་བ་བྱས་ནས་བཅོམ་ལྡན་འདས་ཀྱི་དབུའི་གཙུག་ཏོར་དུ་ནུབ་པར་གྱུར་ཏོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་འབུམ་བསྐོར་བ་བྱས་ཏེ་
བཅོམ་ལྡན་འདས་ཀྱི་དབུའི་གཙུག་ཏོར་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཚིགས་སུ་བཅད་དེ་གསོལ་པ། རྒྱལ་མཆོག་རྣམ་པར་འདྲེན་པ་གང་ཟག་མཆོག །རྒྱུ་མེད་པར་ནི་འཛུམ་པ་མི་མཛད་ན། ཅི་ཡི་རྐྱེན་གྱིས་ཞལ་
ནི་འཛུམ་མཛད་པ། །འཇིག་རྟེན་ཕན་པ་ཐུགས་བརྩེས་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་གྲོང་ཁྱེར་གྱིས་འཚོ་བ་འདི་བསྐལ་པ་ཉི་ཤུ་རྩ་བརྒྱད་ཀྱི་བར་དུ་ངན་འགྲོ་ལོག་པར་ལྟུང་བར་
འགྲོ་བར་མི་འགྱུར་ཏེ། རྟག་ཏུ་ལྷ་དང་མིའི་ཕུན་སུམ་ཚོགས་པ་དག་ཉམས་སུ་མྱོང་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་དུ་སྣང་བ་ཞེས་བྱ་བར་འགྱུར་རོ། །དེ་ནས་
བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སྟོབས་བཅུ་ལྡན་པ་མཆོད་ཕྱིར་ཟངས་ཆེན་ཕྲག་སྟོང་གསལ་རྒྱལ་གྱིས། མར་མེ་བཟང་པོ་སྦར་བས་དཔག་ཚད་བཞིར་ནི་ཀུན་དུ་
སྣང་། །གྲོང་ཁྱེར་འཚོ་བའི་འབྲུ་མར་སྲན་མ་གྲེའུ་སྦྱར་སྦར་བ་ཡིས། །འཛམ་གླིང་སྣང་བས་ཁྱབ་གྱུར་དེ་ནི་བྱང་ཆུབ་སེམས་ཀྱི་མཐུས། །མཽད་གལ་གྱིས་ནི་མར་མེ་གསད་འདོད་རྫུ་འཕྲུལ་རྒྱ་ཆེན་བྱས། །རྣམ་པར་
འཐོར་བའི་རླུང་གི་ཤུགས་བཏང་བསད་པར་ཡོང་མ་ནུས། །ཚངས་པའི་འཇིག་རྟེན་འདུག་ནས་ཆུ་རྒྱུན་ཤིང་རྟའི་སྲོག་ཤིང་ཙམ། །ཕབ་ཀྱང་གསད་པར་མ་ནུས་མར་མེ་ཉི་མའི་འོད་བཞིན་སྣང་། །དེ་ནི་ཞག་བཞི་ཁ་འཚོས་

57-1-106a

རྒྱལ་བྱེད་དགའ་བའི་ཚལ་དུ་འོངས། །དགའ་བའི་སེམས་ཀྱིས་བདེ་གཤེགས་ཞབས་ལ་ཕྱག་བྱས་ཐལ་སྦྱར་འདུག །མཉམ་མེད་འཛུམ་པ་མཛད་པས་ཀུན་དགའ་བོ་ཡང་རབ་དགའ་ནས། །གཟི་བརྗིད་མཐའ་
ཡས་འཛུམ་མཛད་འདི་ཡི་འབྲས་བུ་ཇི་འདྲ་གསུངས། །དགའ་བྱེད་འདི་ནི་བསྐལ་པ་ཉི་ཤུ་བརྒྱད་ན་རྒྱལ་བར་འགྱུར། །རང་བྱུང་ཀུན་སྣང་ཞེས་བྱ་འོད་ཀྱིས་སྟོང་ཆེན་བཞི་སྣང་བྱེད། །མ་འོངས་དུས་ན་བདེ་བར་གཤེགས་པ་
བྱེ་བ་མཆོད་པར་འགྱུར། །དེ་ནི་ཀུན་དུ་འཁོར་ལོས་སྒྱུར་འགྱུར་རྒྱལ་རྣམས་བཀུར་སྟིར་བྱེད། །སངས་རྒྱས་རྟོགས་པ་བརྗོད་པ་ཡི་ནི་དད་རྣམས་རབ་དགའ་བྱེད། །སྐྱེ་བོ་མཁས་པ་དག་གིས་དེ་ཐོས་སེམས་ཀྱང་རབ་ཏུ་དགའ། །དེ་ལྟར་
རྒྱལ་བ་བསམ་ཡས་སྟོབས་བཅུའི་ཆོས་ཀྱང་བསམ་མི་ཁྱབ། །དགའ་བ་བསྐྱེད་ན་རྣམ་སྨིན་མཚུངས་མེད་བསམ་གྱིས་མི་ཁྱབ་འགྱུར། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་
བོ་དང་། གྲོང་ཁྱེར་གྱིས་འཚོ་བ་དེ་དང་། བྱང་ཆུབ་སེམས་དཔའ་དེ་དག་དང་། དགེ་སློང་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་
བསྟོད་དོ། །འཕགས་པ་གྲོང་ཁྱེར་གྱིས་འཚོ་བ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། རྒྱ་གར་གྱི་མཁན་པོ་ཛྙཱ་ན་གརྦྷ་དང་། ལོ་ཙྪ་་བ་བན་དྷེ་ཀླུའི་དབང་པོས་བསྒྱུར་བ། རྒྱ་གར་གྱི་མཁན་པོ་བིད་དྱཱ་ཀ་ར་སིང་ཧ་དང་། 
ཞུ་ཆེན་གྱི་ལོ་ཙྪ་བ་བན་དྷེ་དེ་བ་ཙན་དྲས་ཞུས་ཏེ་གཏན་ལ་ཕབ་པ། ། བོད་སྐད་དུ། ཟས་ཀྱི་འཚོ་བ་རྣམ་པར་དག་པ་ཞེས་བྱ་བ་ཐེག་པ་ཆེན་པོའི་མདོ།   སངས་རྒྱས་དང་། བྱང་ཆུབ་སེམས་དཔའ་
ཐམས་ཅད་ལ་ཕྱག་འཚལ་ལོ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་འོད་མའི་ཚལ་ན་དགེ་སློང་གི་དགེ་འདུན་ཆེན་པོ་བརྒྱ་ཕྲག་ཕྱེད་དང་བཅུ་གསུམ་དང་། གཞན་ཡང་དགེ་སློང་ཕ་དང་། 

57-1-106b

དགེ་སློང་མ་དང་། དགེ་བསྙེན་ཕ་དང་། དགེ་བསྙེན་མ་དང་། ལྷ་ཀླུ་སྡེ་བརྒྱད་དང་། བྱང་ཆུབ་སེམས་དཔའ་མང་པོ་དང་ཐབས་གཅིག་ཏུ་བཞུགས་སོ། །དེ་ནས་མཽད་གལ་གྱི་བུ་ཆེན་པོ་འདུག་པ་ལས་ལངས་ཏེ། བཅོམ་ལྡན་འདས་
ལ་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་སྔོན་གྲོང་ཁྱེར་དུ་བསོད་སྙོམས་ལ་མཆིས་པའི་ཤུལ་ལོགས་སུ་མི་གྲངས་ཁྲི་སྟོང་སྙེད་མཆིས་ཏེ། དེ་དག་གི་མགོ་བོ་ནི་རི་བཞིན་དུ་ཆེ། ཁོག་
པ་ནི་རི་རབ་ལྷུན་པོ་ཙམ་འདྲ། མགྲིན་པ་ནི་ཁབ་བཞིན་དུ་ཕྲ། ཕན་ཚུན་བསྐྱོད་ཅིང་མཆི་བ་ན་ཤིང་རྟ་ལྔ་བརྒྱ་ཤིན་ཏུ་འཁྲོལ་བའི་སྒྲ་བྱུང་སྟེ། དེ་ཡང་མི་ཟད་པའི་གཞོབ་ཀྱི་དུད་པ་ཀུན་ནས་འཐུལ་ལོ། །དེ་ཅིའི་
དངོས་པོ་ལགས་པ་དང་། ཅི་ལས་གྱུར་པ་བཅོམ་ལྡན་འདས་ཀྱིས་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཀྱིས་བཀའ་སྩལ་པ། མཽད་གལ་གྱི་བུ་དེ་དག་ནི་འདྲེ་བཀྲེན་ལྟོགས་པ་ཡིན་ཏེ། སྔོན་འདས་
པའི་དུས་ན་མཆོད་སྡོང་བཤིག་པ་དང་། མཆོད་སྟོན་སྦྱར་བ་བཤིག་པས་དེ་ལྟ་བུའི་སྡིག་པ་རྣམ་པར་སྨིན་པ་ཡིན་ནོ། །ཡང་གཅིག་ཏུ་ན་གཞན་གྱི་མཆོད་སྟོན་ཟོས་ནས་ཟ་གཅིག་
པར་མ་བྱས་པའི་སྡིག་གི་རྣམ་པར་སྨིན་པ་དེ་ཡིན་ནོ། །མཆོད་སྟོན་ལྷག་མ་ཟ་གཅིག་པར་མི་བྱེད་པ་ལ་མ་བྱིན་ཅིག །ཡོན་བདག་གིས་ལྷག་མ་རྣམས་དགེ་འདུན་ལ་སྦགས་པའི་གསོལ་བ་བྱོས་ལ་བཟོད་པར་
གསོལ་ཅིག །སྦགས་པའི་ཟས་རྣམས་དགེ་འདུན་རྣམས་ཀྱིས་གནང་བ་བྱིན་ཅིག །གནང་བ་མ་བྱིན་ན་དགེ་འདུན་རྣམས་ཀྱང་ལྟུང་བར་འགྱུར་རོ། །དེ་ནས་མཽད་གལ་གྱི་བུས་གསོལ་པ། བཅོམ་ལྡན་འདས་ཀྱིས་
བཀའ་སྩལ་པ་ནི་ཡང་དག་པའོ། །ཡོན་བདག་སུ་ཡང་རུང་སྟེ་ཆོས་བཞིན་དུ་བསྡུ་བའི་ཕྱིར་མཆོད་པའི་ཡོ་བྱད་འབྱོར་ཚོགས་ཏེ། ཟས་གཅིག་པར་བྱས་པ་རྣམས་ནི་ཟས་ཀྱི་འཚོ་བ་དང་ལྡན་པར་འགྱུར་རོ། །

57-1-107a

བཅོམ་ལྡན་འདས་ཀྱིས་བཀའ་སྩལ་པ། ཟ་གཅིག་པར་མ་བྱས་པ་རྣམས་ནི་ཟས་དང་མི་ལྡན་པར་འགྱུར་རོ། །དེ་ལྟར་ན་ཉི་མ་གཅིག་ཟ་གཅིག་པ་ཐུབ་ན་ཉི་མ་དྲུག་ཁྲིར་བསོད་ནམས་དང་བཟའ་བ་རྣམ་པར་འཕེལ་བར་
འགྱུར་རོ། །དེ་ལ་དེ་ལྟར་མ་བྱས་པ་རྣམས་ནི་ཉི་མ་ཁྲི་ཕྲག་དྲུག་ཅུར་འདྲེ་ལྟོགས་པར་འགྱུར་རོ། །དེ་ཅིའི་ཕྱིར་ཞེ་ན། དེའི་སྦྱིན་པ་ནི་ཤིན་དུ་ལྕི་བ་ཡིན་ཏེ། གཉིས་ན་ལྕགས་ཀྱི་ཐུ་ལུམ་ཟོས་ཀྱང་སླའི། ཡོན་བདག་དད་
པ་ཅན་གྱི་ཟས་ནི་ཤིན་དུ་བཞུ་བར་དཀའ་སྟེ། ཤིན་དུ་ཡུན་རིང་པོར་སྡུག་བསྔལ་བར་འགྱུར་ཏེ། ཚེ་རབས་ཁྲི་ཕྲག་བརྒྱར་འདྲེ་ལྟོགས་པའི་དངོས་པོར་འགྱུར་རོ། །བསོད་ནམས་ཀྱི་ཟས་བྱའོ། །ཅོག་ལ་ནན་ཏན་ཆེར་བྱོས་
ཤིག །སྣམ་ཕྲག་གམ་ཕུ་རུང་གི་ནང་དུ་ཁྱེར་བར་བྱས་ན་ཚེ་རབས་ལྔ་བརྒྱར་དམྱལ་བར་ལྟུང་སྟེ། ལྕགས་ཀྱི་ཐུ་ལུམ་དམར་པོ་མཆན་ཁུང་གཡོན་པ་ནས་ཐལ་ཏེ་མཆན་ཁུང་གཡས་པར་ཐལ་ལོ། །ལྷག་མ་མི་བཀུར་བར་
བྱོས་ཤིག །ཆུང་ངུ་ན་ཁྲེའི་འབྲུ་གཅིག་ཙམ་ཁྱེར་ན་ཡང་ལྕགས་ཀྱི་འཁོར་ལོ་ཙམ་དུ་འགྱུར་རོ། །དགེ་བསྙེན་གྱིས་ཀྱང་རུང་སྟེ་བསོད་ནམས་ཀྱི་ཟས་སྦྱར་རོ་ཅོག་ལ་ཐོག་མ་ནས་མྱང་བའི་སྦགས་པར་མི་བྱའོ། །དེ་མྱངས་
པས་སྦྱར་བ་ཐམས་ཅད་ལྷག་མའི་སྦགས་པ་མི་བྱའོ། །བྱས་པ་དོན་མེད་པར་འགྱུར་རོ། །གཉིས་ན་མ་བྱས་ཀྱང་སླའོ། །དེ་ཅིའི་ཕྱིར་ཞེ་ན། ལྷ་ཐམས་ཅད་མི་དགྱེས་པར་འགྱུར་རོ། །གཉེན་པོ་ཐམས་ཅད་མི་དགའ་
བར་འགྱུར་རོ། །གང་ཞིག་མྱངས་པ་ཞིག་ཡོད་ན་ཚེ་རབས་ལྔ་ཁྲིར་འདྲེ་ལྟོགས་པར་འགྱུར་རོ། །སྡུག་བསྔལ་མི་བཟད་པ་སྣ་ཚོགས་ཀྱང་མྱོང་བར་འགྱུར་རོ། །གང་ཞིག་ཕྱིན་ཆད་བསོད་ནམས་འདོད་པས་ཚུལ་
བཞིན་དུ་བསོད་ནམས་ཀྱི་ཟས་གཙང་སྦྲས་ཕྱེད་པ་དང་། ཤིན་དུ་གུས་པར་སྦྱར་ལ་ལག་པ་ཤིན་དུ་དག་པར་བཀྲུས་ནས་ཚོད་མ་ལ་སོགས་པ་དྲོད་བག་ཏུ་སྦྱར་རོ་ཅོག་ཤིན་དུ་བཀབ་པ་དང་། རིམ་གྲོ་བསྐྱེད་དེ་དེ་དག་

57-1-107b

ཀྱང་སྔར་མྱང་བར་མི་བྱའོ། །དེ་ནས་བསོད་ནམས་སུ་གྱུར་ཅིང་ལྷ་ཐམས་ཅད་ཀྱང་དགའ་བར་འགྱུར་རོ། །གཉེན་པོ་ཐམས་ཅད་ཀྱང་དགའ་བར་འགྱུར་རོ། །ལྷ་ལ་སོགས་པ་ཐམས་ཅད་ཀྱིས་སྲུང་ཞིང་བྱིན་གྱིས་རློབ་
པར་འགྱུར་ཏེ་ཡང་དག་པར་སྨྲ་བ་ཡིན་ནོ། །བསོད་ནམས་རྣམ་པར་སྨིན་པ་ནི་བྲག་ཆ་དང་གཟུགས་བརྙན་བཞིན་ནོ། །དེ་ལྟར་འདྲེ་བཀྲེན་ལྟོགས་པ་ནི་ཐོག་མ་མི་ལས་གྱུར་ཏེ། ཐོག་མ་ལག་པ་མི་གཙང་བས་
དགེ་འདུན་གྱི་ཁ་ཟས་གཙང་མ་ལ་རེག་པ་དང་། བདག་གི་ལག་པ་མི་གཙང་བས་དགེ་འདུན་གྱི་ཁ་ཟས་གཙང་མའི་ནང་དུ་བསྔོགས་སམ། ཟས་གཙང་མའི་ནང་དུ་ཁ་ཟས་མི་གཙང་བ་བསྲེས་ཏེ་དགེ་འདུན་ལ་སྦྱིན་
པ་བྱས་པས་ཚེ་རབས་ལྔ་བརྒྱར་འདྲེ་ལྟོགས་པར་ལྟུང་སྟེ། རྟག་ཏུ་མི་གཙང་བ་ཟ་ཞིང་སྣམ་ཕྱི་སར་མི་གཙང་བ་ཟ་ན། སྣམ་ཕྱི་སའི་སྲུངས་མས་ལྕགས་ཀྱི་བེར་ཀས་གདེངས་ཏེ་འདྲེ་ལྟོགས་པ་དེ་རྣམས་ཕྱི་སའི་སར་
མི་སྙན་པར་བྱེད་དོ། །མིའི་རྣག་དང་། ཁྲག་དང་། མཆིལ་སྣབས་དང་། ངར་སྣབས་དང་། ཁྲུད་མ་མི་གཙང་བ་བཙོག་པ་ཟ་ཞིང་མི་གཙང་བ་སྲུང་ཞིང་བུད་མེད་བུ་བཙས་པའི་ཁྲག་མི་གཙང་བ་འཛག་པ་ཟ་བར་འགྱུར་རོ། །
དེ་ནས་ཚེ་རབས་ཁྲི་ཕྲག་ལྔ་བརྒྱར་ཁྱི་དང་ཕག་པ་དང་། སྦུར་བ་ལ་སོགས་པའི་ལུས་སུ་གྱུར་ནས་རྟག་པར་མནམ་ཞིང་བཙོག་པ་དང་མི་གཙང་བ་ཟ་བར་འགྱུར་ཏེ། དེ་ལྟ་བུའི་སྡུག་བསྔལ་བསྐལ་པ་གྲངས་ཁྲི་སྟོང་དུ་མྱོང་སྟེ་
ཐར་པའི་དུས་མེད་དོ། །རྣམ་པར་ཐར་པར་དཀའོ། །ཤིན་དུ་མི་ཟད་པ་ཡང་བརྗོད་ཀྱིས་མི་ལང་ངོ་། །གལ་ཏེ་ལག་པ་ཕོ་མཚན་ལ་རེག་གམ། ལག་པ་མོ་མཚན་ལ་རེག་གམ། ལག་པ་མི་གཙང་བས་དགེ་འདུན་གྱི་
ཁ་ཟས་གཙང་མ་ལ་རེག་གམ། དགེ་འདུན་གྱི་ཁ་ཟས་ལ་མི་གཙང་བ་ནང་དུ་བཅུག་གམ། མི་གཙང་བའི་ཟས་དགེ་འདུན་ཟར་བཅུག་ན་དེ་ལྟ་བུའི་སྡིག་པ་རྣམ་པར་སྨིན་པ་ནི་ཐམས་ཅད་མིག་ནད་ཀྱི་རིམས་ཀྱིས་བཏབ་

57-1-108a

པ་དང་སྡིག་པར་མི་ཤེས་པའོ། །ཕྱིན་ཆད་དགེ་འདུན་གྱི་ཁ་ཟས་གཙང་བར་བྱས་པ་དང་། ལག་པ་གཙང་མས་དགེ་འདུན་གྱི་ཁ་ཟས་ཀྱི་སྣོད་ལ་བཟུང་བ་དང་། ལག་པ་གཙང་མས་ཁྲེ་འབྲས་བཀྲུ་བ་དང་། 
ཁ་ཟས་གཙང་མ་སྦྱིན་པ་བྱས་པ་ནི་བསོད་ནམས་བསམ་གྱིས་མི་ཁྱབ་པ་ཐོབ་པར་འགྱུར་རོ། །ཕྱིན་ཆད་འདི་ཡོངས་སུ་གྲགས་པ་དང་། མྱུར་བུའི་ཡིད་ཀྱིས་ཟུང་ཤིག །འཚོ་བ་རྣམ་པར་དག་པའི་མདོ་རྫོགས་སོ།། །།
༄།   །རྒྱ་གར་སྐད་དུ། ཧསྟི་ཀཀྵྱ་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ། གླང་པོའི་རྩལ་ཞེས་བྱ་བ་ཐེག་པ་ཆེན་པོའི་མདོ།  སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་
ཐོས་པའི་དུས་གཅིག་ན། བཅོམ་ལྡན་འདས་བྱ་རྒོད་ཀྱི་ཕུང་པོའི་རི་ལ་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་མངོན་པར་གྲགས་པས་མངོན་པར་གྲགས་པ། གཟུངས་ཐོབ་པ། 
སྤོབས་པ་ཐོགས་པ་མེད་པ། གཉིས་སུ་མེད་པའི་ཆོས་འཆད་པ། རྫུ་འཕྲུལ་རྣམ་པར་འཕྲུལ་པ་བསམ་གྱིས་མི་ཁྱབ་པ་དང་ལྡན་པ་དྲུག་ཁྲི་དང་ཡང་ཐབས་གཅིག་ཏུ་བཞུགས་ཏེ། འདི་ལྟ་སྟེ། བྱང་ཆུབ་སེམས་
དཔའ་སེམས་དཔའ་ཆེན་པོ་བརྩོན་འགྲུས་དཔེ་མེད་བློ་གྲོས་དང་། མངོན་པར་གནོན་པའི་སྒྲ་སྒྲོགས་གཟི་བརྗིད་སྙིང་པོ་དང་། བྱང་ཆུབ་སེམས་དཔའ་རིན་པོ་ཆེ་བཞིའི་མེ་ཏོག་རྒྱས་པ་དང་། གློག་ཆེན་སྒྲོན་མ་དང་། 
མཐའ་ཡས་པར་ལྟ་ཞིང་ཡུལ་ཐམས་ཅད་ལས་འདས་པ་དང་རི་རབ་བརྩེགས་པ་ལྟར་མངོན་པར་འཕགས་པ་དང་། མངོན་པར་དགའ་བས་མགུ་བ་བསྐྱེད་པ་དང་། དཔུང་པ་དྲི་མ་མེད་པས་འོད་ཟེར་བཅོམ་པ་
དང་། སེམས་ཅན་གྱི་བསམ་པ་ངེས་པའི་དོན་གྱི་ཕ་རོལ་དུ་བགྲོད་པར་དོང་བ་དང་། རྡོ་རྗེ་ལྟ་བུར་བརྟན་པ་ཐོབ་པ་དང་། སྒྲར་བརྗོད་པ་དང་། དབྱངས་དང་ང་རོ་ཐམས་ཅད་ལས་འདས་པ་དང་། ཚངས་པའི་

57-1-108b

སྒྲ་གཟི་བརྗིད་མངོན་པར་འཕགས་པ་དང་། གྲགས་པའི་སྒྲས་འཇིགས་པ་བཅོམ་པ་དང་། དགེ་བའི་རྩ་བ་རིན་པོ་ཆེ་ཐམས་ཅད་བསགས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་
དཔལ་གཞོན་ནུར་གྱུར་པ་དང་། དེ་ལ་སོགས་པ་བྱང་ཆུབ་སེམས་དཔའ་དྲུག་ཁྲི་རྣམས་དང་ཐབས་གཅིག་གོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུ་ཕྱི་དྲོའི་དུས་ནན་ཏན་དུ་ཡང་དག་འཇོག་ལས་ལངས་ཏེ་བཅོམ་ལྡན་
འདས་ག་ལ་བ་དེར་སོང་ངོ་། །ཡང་དེའི་ཚེ་བཅོམ་ལྡན་འདས་ཤིང་གཞན་ཞིག་གི་དྲུང་ན་རབ་ཏུ་ཞི་བ་སྒྲུབ་པ་ཞེས་བྱ་བའི་ཏིང་ངེ་འཛིན་ལ། མཉམ་པར་བཞག་སྟེ་བཞུགས་སོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་
རྒྱང་རིང་པོ་ནས་བཅོམ་ལྡན་འདས་སྤྱོད་ལམ་རབ་ཏུ་ཞི་བ་མཐོང་བ་དང་མྱུར་དུ་རྩྭ་བསྡུས་ནས་ཕྱོགས་གཅིག་ཏུ་སྐྱིལ་མོ་དཀྲུང་བཅས་ལུས་བསྲང་སྟེ། དྲན་པ་མངོན་དུ་བྱས་ནས་འདུག་གོ། །དེ་དེར་འདུག་མ་ཐག་
ཏུ་ཨེ་མའོ་དེ་བཞིན་གཤེགས་པའི་སྤྱོད་པ་རབ་ཏུ་ཞི་བ་འདི་དང་། བདེ་བ་དང་། ཡིད་བདེ་བ་འདི་ངོ་མཚར་ཏོ། །སེམས་ཅན་གང་དག་ཆོས་ཐམས་ཅད་རང་བཞིན་གྱིས་མཉམ་པར་བཞག་པར་རབ་ཏུ་ཤེས་
པ་དེ་དག་ནི་བདེ་བ་དང་ལྡན་པ་ཡིན་ནོ་སྙམ་དུ་སེམས་ལ་སེམས་ཀྱི་རྟོག་པ་དེ་ལྟ་བུ་སྐྱེས་སོ། །དེ་ནས་བཅོམ་ལྡན་འདས་དགོངས་ཤིང་མཁྱེན་བཞིན་དུ་ཏིང་ངེ་འཛིན་དེ་ལས་བཞེངས་ཏེ་མགུར་བསལ་བའི་
སྒྲ་ཕྱུང་ངོ་། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུས་བཅོམ་ལྡན་འདས་ཀྱི་མགུར་བསལ་བའི་སྒྲ་ཐོས་པ་དང་དགའ་མགུ་རངས་པར་གྱུར་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་
འདས་ཀྱི་སྤྱན་སྔར་འདུག་སྟེ། བཅོམ་ལྡན་འདས་ལ་ཕྱག་འཚལ་ནས་ངོ་མཚར་དུ་གྱུར་ཏེ། །དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྟོང་པའི་ཆོས་ལ་ཇི་ལྟར་བདག་བཟོད་བཞིན། །གང་དག་

57-1-109a

སེམས་ཅན་ཡང་དག་མི་རྟོག་ཅིང་། །ཆོས་ལའང་ནམས་ཀྱང་རྟོག་པར་མི་བྱེད་པ། །འཇིག་རྟེན་ན་ནི་དེ་དག་མཉམ་པར་བཞག །སེམས་ཅན་འཁྲུལ་ལ་ནམས་ཀྱང་མི་ལྟ་ཞིང་། །ཆོས་རྣམས་
ནམ་མཁའ་བཞིན་དུ་བསམས་བྱས་ནས། །གང་དག་སྒྱུ་མའི་ངོ་བོ་ཉིད་མོས་པ། །གང་དག་བདག་ཏུ་ལྟ་མེད་དེ་དག་བདེ། །འདི་དག་སེམས་ཅན་ཡིན་ནམ་མ་ཡིན་ཞེས། །འདུ་ཤེས་ཐམས་ཅད་ལ་ནི་མི་དམིགས་པ། །
སེམས་ཅན་ཀུན་ལ་འདུ་ཤེས་མེད་པ་དང་། །གང་དག་སེམས་ཅན་ལྟ་མེད་དེ་དག་བདེ། །རིལ་པོར་འདུ་ཤེས་ནམས་ཀྱང་གང་མ་ཆགས། །ནམས་ཀྱང་དངོས་པོའི་འདུ་ཤེས་རྨོངས་པ་མེད། །ལྡང་བར་མི་བྱེད་འདུག་
པར་བྱེད་པའང་མེད། །གང་དག་སྲོག་ཏུ་བལྟ་མེད་དེ་དག་བདེ། །སེམས་ཅན་ཐ་དད་མི་བྱེད་མཁས་པ་གང་། །ཆོས་ཀྱི་དབྱིངས་དང་འགལ་བར་མི་འགྱུར་ལ། །གང་ཟག་འདུ་ཤེས་ཐམས་ཅད་རྣམ་པར་བཤིག །གང་
དག་ཐ་དད་བློ་མེད་དེ་དག་བདེ། །གང་དག་སྦྱིན་དང་ཚུལ་ཁྲིམས་རྟག་ཏུ་གནས། །འཇུངས་པའི་བསམ་པར་ནམས་ཀྱང་མ་གྱུར་ཅིང་། །གོང་བུའི་ཆོས་ལའང་ཡང་དག་མི་གནས་པ། །གང་དག་ཚུལ་ཁྲིམས་རློམ་མེད་
དེ་དག་བདེ། །གང་དག་བཟོད་དང་ངེས་པའི་ཡོན་ཏན་འཕགས། །གང་དག་ཐབ་མོ་དག་ལའང་མི་ལྟ་ཞིང་། །བརྩོན་འགྲུས་ལྡན་མིན་ལེ་ལོ་ཅན་ཡང་མིན། །གང་དག་བཟོད་པའི་འདུ་ཤེས་མེད་པ་དེ་དག་བདེ། །གང་
དག་བསམ་གཏན་བྱེད་ཅིང་བརྟན་པ་མི་གནས་པ། །དེ་ཡང་གཡེང་བར་རྣམ་པར་མི་སེམས་པ། །མཉམ་པར་བཞག་པའི་ཆོས་རྣམས་རབ་ཏུ་ཤེས། །གང་དག་བསམ་གཏན་འདུ་ཤེས་མེད་པ་དེ་དག་བདེ། །གང་དག་
འདུ་ཤེས་མེད་ཅིང་འདི་ལ་ཤེས་རབ་མེད། །མི་ཤེས་དབང་དུ་འགྲོ་བའང་མ་ཡིན་ལ། །མཁས་པའང་མ་ཡིན་རྨོངས་པའང་ཡོད་མ་ཡིན། །གང་དག་ཤེས་རབ་འདུ་ཤེས་མེད་དག་བདེ། །ཇི་ལྟར་དགོན་པ་དེ་བཞིན་

57-1-109b

གྲོང་ན་གནས། །གཉི་གར་འདུ་ཤེས་མཚུངས་ཤིང་མཉམ་པར་འཇུག །གྲོང་གི་སྤྱོད་ཡུལ་སྨོད་པར་མི་བྱེད་ཅིང་། །གང་དག་དགོན་པས་མི་རློམ་དེ་དག་བདེ། །གང་དག་བསོད་སྙོམས་ཁྱིམ་དང་བཅས་པར་སྤྱོད། །དེ་དག་
བསོད་སྙོམས་དེ་ཡི་འདུ་ཤེས་མེད། །བསོད་སྙོམས་སྤྱོད་པ་བདག་ཡིན་སྙམ་མི་སེམས། །གང་དག་བསོད་སྙོམས་འདུ་ཤེས་མེད་དག་བདེ། །གང་དག་བོར་བའི་ཕྱག་དར་ཁྲོད་པ་རྣམས། །བླངས་ནས་བདག་གིས་ལུས་ལ་
འཆང་བར་བྱེད། །བདག་ནི་གོས་ངན་སྙམ་དུ་དེ་མི་སེམས། །གང་དག་གཞན་ལ་མི་སྨོད་དེ་དག་བདེ། །སངས་རྒྱས་གནང་ཞིང་བདེ་གཤེགས་བསྔགས་པ་ཡི། །ཆོས་གོས་གསུམ་ལས་ལྷག་པར་མི་འཆང་ཞིང་། །
བདག་ནི་འཇིགས་མེད་ཡིན་པར་མི་རྟོག་པ། །གང་དག་ང་རྒྱལ་མེད་པ་དེ་དག་བདེ། །གང་ན་བདག་མེད་སེམས་ཅན་ཡོད་མིན་པའི། །གང་དག་ཆོས་མཆོག་དམ་པ་འཆད་བྱེད་པ། །བདག་ནི་འཆད་མཁན་
ཡིན་པར་སེམས་པའང་མེད། །གང་དག་མེད་པར་མ་གྱུར་དེ་དག་བདེ། །དཀར་པོ་ཀུན་ལ་ཡང་དག་འདུ་ཤེས་མེད། །སྙིང་པོ་མེད་པ་རྗེས་སུ་འདུ་ཤེས་མེད། །དཀར་དང་གནག་པར་གང་དག་མི་སེམས་པ། །གང་
དག་གཉིས་སུ་མི་སྤྱོད་དེ་དག་བདེ། །གང་དག་ལངས་ལ་ལངས་པར་འདུ་ཤེས་མེད། །འདུག་ཀྱང་འདུག་པར་འདུ་ཤེས་ཡོད་མ་ཡིན། །ཉིན་མཚན་ཕྱད་པར་འཆག་ཅིང་བརྩོན་འགྲུས་རྩོམ། །གང་དག་སྤྲོས་པ་མེད་པ་
དེ་དག་བདེ། །གང་དག་གནས་མིན་གནས་པར་མི་རྟོག་ཅིང་། །ཁྱད་པར་ཤེས་པ་ཞི་བར་མི་རྟོག་ལ། །དེ་བཞིན་གཤེགས་དང་མུ་སྟེགས་ཁྱད་པར་མེད། །གང་དག་མཆོག་ཏུ་རློམ་སེམས་མེད་པ་དེ་དག་བདེ། །གང་
ལ་གྲངས་དང་བགྲང་བའང་ཡོད་མ་ཡིན། །ནམ་མཁའི་དབྱིངས་ལྟར་མཉམ་ཉིད་མི་གཏོང་ལ། །བདག་དང་སེམས་ཅན་ཐ་དད་མི་སེམས་པ། །གང་དག་ཁྱད་པར་ཐོབ་མེད་དེ་དག་བདེ། །གང་དག་སྒྱུ་མར་གྱུར་ཅིང་རྨི་ལམ་སྤྱོད། །

57-1-110a

རབ་ཏུ་མ་རྨོངས་མིག་ཡོར་ལྟ་བུར་གྱུར། །འཇིག་རྟེན་དག་ན་ཆུ་ཟླ་བཞིན་དུ་སྤྱོད། །གང་དག་ཀུན་ཏུ་མི་བརྩོན་དེ་དག་བདེ། །སེམས་ཅན་གང་དག་མཁས་ལ་དོན་དམ་ལྟ། །བརྡ་དང་ཐ་སྙད་སྙིང་པོ་མེད་
པར་ཤེས། །རབ་ཏུ་ཞི་བའི་ཆོས་རྣམས་རྗེས་སུ་རྟོགས། །གང་དག་མཚན་མའི་སྤྱོད་ཡུལ་མ་ཡིན་དེ་དག་བདེའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་ལེགས་སོ་ཞེས་བྱ་བ་བྱིན་ཏེ། 
ཤ་ར་དྭ་ཏིའི་བུ་འདི་ལྟར་ཤེས་རབ་ཟབ་པ་ལ་སྤྱོད་པའི་ཆོས་ལ་མཆོག་ཏུ་གྱུར་པ། དེ་ལེགས་སོ་ལེགས་སོ། །ཤཱ་རིའི་བུ་དེ་བས་ན་བྱ་རྒོད་ཀྱི་ཕུང་པོའི་རི་འདི་ལ་དགེ་སློང་དང་། བྱང་
ཆུབ་སེམས་དཔའ་ཇི་སྙེད་ནང་དུ་ཡང་དག་འཇོག་ལ་ཞུགས་པ་དེ་དག་ཐམས་ཅད་ཁྱོད་ཀྱིས་སྡུས་ཤིག །ཤཱ་རིའི་བུས་གསོལ་པ། བཅོམ་ལྡན་འདས་བདག་ནི་མི་སྤྲོའོ། །དེ་ཅིའི་སླད་དུ་ཞེ་ན། གླང་པོ་ཆེན་པོ་དག་ནི་མགུ་
བར་དཀའ་བའི་སླད་དུའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཉིད་ཀྱི་སྐུ་ལས་འོད་ཟེར་ཕྱུང་ནས་དེས་འཇིག་རྟེན་གྱི་ཁམས་མཐའ་ཡས་མུ་མེད་པ་ན་གནས་པའི་བྱང་ཆུབ་སེམས་དཔའ་རྣམས་ལ་བསྐུལ་བ་དང་། བྱ་རྒོད་
ཀྱི་ཕུང་པོའི་རི་གང་ན་བ་དང་། བཅོམ་ལྡན་འདས་གང་ན་བ་དེར་ལྷགས་ནས་བར་སྣང་གི་ནམ་མཁའ་ལ་གནས་པར་གྱུར་ཏོ། །དགེ་སློང་དང་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ནང་དུ་ཡང་དག་འཇོག་ལ་
ཞུགས་པ་དེ་དག་ཐམས་ཅད་ཀྱང་བཅོམ་ལྡན་འདས་གང་ན་བ་དེར་ལྷགས་པར་གྱུར་ཏོ། །རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་ཀྱང་སྲོག་ཆགས་བརྒྱ་སྟོང་དུ་མ་བཅོམ་ལྡན་འདས་ག་ལ་བ་དེར་ལྷགས་པར་གྱུར་
ཏོ། །དེ་ནས་བཅོམ་ལྡན་འདས་ཀྱིས་ཐམས་ཅད་ཡོད་པའི་འཁོར་འདུས་པར་མཁྱེན་ནས་འཇམ་དཔལ་གཞོན་ནུར་གྱུར་པའི་བཞིན་ལ་གཟིགས་སོ། །གཟིགས་ནས་ཀྱང་འཛུམ་པ་མཛད་དོ། །དེ་ནས་དེ་ཉིད་ཀྱི་ཚེ་

57-1-110b

འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱུ་དང་རྐྱེན་མ་མཆིས་པར་འཛུམ་པ་མི་མཛད་ན། བཅོམ་ལྡན་འདས་འཛུམ་པ་མཛད་པའི་རྒྱུ་གང་། རྐྱེན་
གང་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་སངས་རྒྱས་ཁྲི་རྣམས་ཀྱིས་བྱ་རྒོད་ཀྱི་ཕུང་པོའི་རི་འདི་ལ་གླང་
པོའི་རྩལ་ལྟ་བུ་ཞེས་བྱ་བའི་ཆོས་ཀྱི་རྣམ་གྲངས་བཤད་དོ། །དེ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱིས་བཀའ་སྩལ་པ་ཐོས་པ་དང་། མྱུར་བ་མྱུར་བར་རིངས་པའི་ཚུལ་ཏུ་སྟན་ལས་ལངས་ཏེ། 
ཆོས་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས་ད་ཡང་གླང་པོའི་རྩལ་ལྟ་བུ་ཞེས་བགྱི་བའི་ཆོས་ཀྱི་རྣམ་གྲངས་བདག་ལ་བཤད་ན་ལེགས་སོ། །བདེ་བར་གཤེགས་པ་བདག་ལ་བསྟན་ན་ལེགས་སོ། །གང་བཅོམ་ལྡན་འདས་ཀྱིས་འཇམ་དཔལ་གཞོན་
ནུར་གྱུར་པའི་བཞིན་ལ་གཟིགས་ནས་འཛུམ་པ་མཛད་པའི་ཆོས་ཀྱི་རྣམ་གྲངས་དེ་དེང་སངས་ཐོས་པར་དཀོན་ལ། ཆོས་ཀྱི་རྣམ་གྲངས་དེ་ངོ་མཚར་དུ་འགྱུར་ཞིང་ཟབ་ལ་ཟབ་པར་སྣང་བ་ལགས་སོ། །བཅོམ་ལྡན་
འདས་ཀྱིས་བཀའ་སྩལ་པ། ཀུན་དགའ་བོ་འདི་ལྟར་ཁྱོད་ལྷག་མཐོང་ལ་མཁས་ཤིང་དཔྱོད་པ་ལེགས་སོ་ལེགས་སོ། །དེ་བས་ན་ཀུན་དགའ་བོ་ཁྱོད་ལེགས་པར་ཤིན་དུ་ཉོན་ལ་ཡིད་ལ་ཟུང་ཤིག་དང་

57-1-111a

ངས་བཤད་དོ། །བཅོམ་ལྡན་འདས་ལེགས་སོ་ཞེས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་ལྟར་ཉན་ཏོ། །དེ་ནས་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་འདྲིར་གཞུག་པའི་ཕྱིར་འཇམ་
དཔལ་གཞོན་ནུར་གྱུར་པ་ལ་དེ་ལྟ་བུའི་མཚན་མ་མཛད་ནས། དེའི་ཕྱིར་གང་བདག་གིས་དེ་བཞིན་གཤེགས་པ་ལ་དེ་ལྟ་བུའི་ཟབ་མོ་ཟབ་པ་གང་ཉན་ཐོས་དང་། རང་སངས་རྒྱས་རྣམས་དང་། མཚན་མར་ལྷུང་བའི་བྱང་
ཆུབ་སེམས་དཔའ་རྣམས་ཀྱི་ས་མ་ཡིན་པ་ཞུ་བ་ཞུའོ་སྙམ་དུ་སེམས་པར་གྱུར་ཏོ། །འཇམ་དཔལ་གཞོན་ནུར་གྱུར་པས་དེ་ལྟར་ཡིད་ལ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་
ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན་བདག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་
ཞུའོ། །བཅོམ་ལྡན་འདས་ཀྱིས་བཀའ་སྩལ་པ། ཐམས་ཅད་དང་ལྡན་པའི་འཁོར་འདི་དག་ཀྱང་འདུས་ཀྱིས་འཇམ་དཔལ་ཁྱོད་གང་དང་གང་འདོད་པ་ཞུས་ཤིག །འཇམ་དཔལ་གྱིས་གསོལ་པ། བཅོམ་ལྡན་
འདས་ཇི་ལྟར་ན་བྱང་ཆུབ་སེམས་དཔའ་ཡོན་ཏན་ཐམས་ཅད་ལ་གནས་ཤིང་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་ཡང་གདའ་བ་ལགས། སེམས་ཅན་ཚད་མ་མཆིས་གྲངས་མ་མཆིས་པ་རྣམས་ཀྱང་
ཡོངས་སུ་སྨིན་པར་བགྱིད་ཅིང་སངས་རྒྱས་ཀྱི་ཞིང་ཐམས་ཅད་ན་ཡང་ཆུའི་ཟླ་བ་ལྟ་བུར་གདའ་བ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་
བཀའ་སྩལ་ཏོ། །འཇམ་དཔལ་ཁྱོད་ཀྱིས་མདོར་དོན་ཆེན་པོ་ཞུ་བ་ཞུས་པ་ལེགས་སོ་ལེགས་སོ། །དེའི་རྣམ་པར་དབྱེ་བ་རྒྱ་ཆེར་ལེགས་པར་ཤིན་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་

57-1-111b

དོ། །བཅོམ་ལྡན་འདས་དེ་བཞིན་འཚལ་ལོ་ཞེས་འཇམ་དཔལ་གཞོན་ནུར་གྱུར་པ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་འདི་ལ་བྱང་ཆུབ་
སེམས་དཔའ་ཆོས་དྲུག་དང་ལྡན་ན་བྱ་བ་དེ་དག་ཀྱང་ཡོངས་སུ་རྫོགས་པར་བྱེད་ཅིང་ཡོན་ཏན་གྱི་ཆོས་ཐམས་ཅད་ལ་ཡང་གནས་པར་འགྱུར་རོ། །དྲུག་གང་ཞེ་ན། འདི་ལ་བྱང་ཆུབ་སེམས་དཔའ་སྦྱིན་པ་བྱེད་པ་ན། སྦྱིན་
པའི་བདག་པོ་བདོག་པ་ཐམས་ཅད་ཡོངས་སུ་གཏོང་བ་ཡིན་མོད་ཀྱི། བདག་སེར་སྣ་སྤྱོད་པ་ལས་རྣམ་པར་ལོག་པར་མི་མཐོང་ངོ་། །ཚུལ་ཁྲིམས་ལ་གནས་པ་ཡིན་མོད་ཀྱི། བདག་ཚུལ་ཁྲིམས་ངན་པ་ལས་འདས་པ་
ཡིན་པར་མི་ཤེས་སོ། །བཟོད་པ་དང་ངེས་པར་ལྡན་པ་ཡིན་མོད་ཀྱི། བདག་གནོད་སེམས་ཀྱི་སྤྱོད་པ་དང་བྲལ་བར་མི་མཐོང་ངོ་། །བརྩོན་འགྲུས་བརྩམས་པ་ཡིན་མོད་ཀྱི། ལུས་དང་སེམས་ཀྱིས་བརྩོན་པ་མ་ཡིན་ནོ། །
བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཐམས་ཅད་ལ་མཁས་པ་ཡིན་མོད་ཀྱི། སེམས་རྩེ་གཅིག་ཏུ་གནས་པར་གྱུར་པ་ཡང་མ་ཡིན་ནོ། །སྤྱོད་ཡུལ་ཤེས་རབ་ལ་གནས་པ་ཡིན་
མོད་ཀྱི། བདག་འགྲོ་བ་ཐམས་ཅད་ལས་ཡོངས་སུ་མ་གྲོལ་བར་མཐོང་ངོ་། །འཇམ་དཔལ་བྱང་ཆུབ་སེམས་དཔའ་ཆོས་འདི་དྲུག་དང་ལྡན་ན་བྱ་བ་དེ་དག་ཡོངས་སུ་རྫོགས་པར་བྱེད་ཅིང་ཡོན་ཏན་གྱི་ཆོས་ཐམས་ཅད་
ལ་ཡང་གནས་པ་ཡིན་ནོ། །འཇམ་དཔལ་གཞན་ཡང་ཆོས་དྲུག་དང་ལྡན་ན། བྱང་ཆུབ་སེམས་དཔའ་བྱ་བ་དེ་དག་ཡོངས་སུ་རྫོགས་པར་བྱེད་ཅིང་ཡོན་ཏན་གྱི་ཆོས་ཐམས་ཅད་ལ་ཡང་གནས་པ་ཡིན་ནོ། །དྲུག་
གང་ཞེ་ན། འདི་ལ་བྱང་ཆུབ་སེམས་དཔའ་སེམས་ཅན་དམྱལ་བའི་གནས་ཡོངས་སུ་གཟུང་བ་ཡང་ཡོངས་སུ་འཛིན་ལ་མཐོ་རིས་ཀྱི་ཆོས་ཀྱང་མྱོང་བར་བྱེད་པ་དང་། དུད་འགྲོར་འགྲོ་བའི་གནས་ཀྱང་ཡོངས་སུ་འཛིན་ལ་

57-1-112a

མིའི་ཆོས་རྒྱ་ཆེན་པོ་ཡང་མྱོང་བར་བྱེད་པ་དང་། རིགས་དམའ་བར་སྐྱེ་བ་ཡོངས་སུ་འཛིན་ལ་འཁོར་ལོས་སྒྱུར་བའི་རྒྱལ་སྲིད་ཀྱི་བདེ་བ་ཡང་མྱོང་བར་བྱེད་པ་དང་། སྐྱེ་བ་ཐམས་ཅད་དུ་གཏོགས་པར་
ཡང་སྟོན་ལ་འགྲོ་བའི་ཁྱད་པར་གྱི་བྱ་བ་རྣམས་ཀྱང་མྱོང་བར་བྱེད་པ་དང་། སངས་རྒྱས་ཀྱི་ཞིང་ཐམས་ཅད་དུ་འགྲོ་བ་ལ་མཁས་པ་ཡང་ཡིན་ལ་གནས་ནས་ཀྱང་མི་འཕོ། འགྲོ་བ་ཡང་མེད། འོང་བ་ཡང་མེད་ཅིང་སངས་
རྒྱས་ཀྱི་ཞིང་ཐམས་ཅད་དུ་ཡང་ཆུའི་ཟླ་བ་བཞིན་དུ་སྣང་བ་དང་། སྒྲ་སྐད་ཐམས་ཅད་ཀྱང་འབྱིན་ལ་ཕན་ཚུན་འདྲེས་པར་ཡང་མི་བྱེད་པ་ཡིན་ཏེ། འཇམ་དཔལ་བྱང་ཆུབ་སེམས་དཔའ་ཆོས་དེ་དྲུག་དང་ལྡན་ན་
བྱ་བ་དེ་དག་སྟོན་ཅིང་ཡོན་ཏན་གྱི་ཆོས་ཐམས་ཅད་ལ་ཡང་གནས་པ་ཡིན་ནོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །
བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་ཅན་དམྱལ་བའི་གནས་ཡོངས་སུ་གཟུང་བ་ཡང་ཡོངས་སུ་འཛིན་ལ་མཐོ་རིས་ཀྱི་ཆོས་ཀྱང་མྱོང་བ་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་
དཔལ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་པད་མོ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སེམས་ཅན་དམྱལ་བའི་གནས་ཡོངས་སུ་གཟུང་བ་ཡང་ཡོངས་སུ་འཛིན་ཏེ། དེ་ལྷའི་
བདེ་བ་གང་ཆུང་ཟད་ཡོད་པ་དེ་དག་ཐམས་ཅད་དེ་ན་མྱོང་བར་བྱེད་དོ། །སེམས་ཅན་དེ་དག་གིས་ཀྱང་དེ་དམྱལ་བས་དམྱལ་བར་མཐོང་སྟེ། དེ་ཆ་ལུགས་དེས་སེམས་ཅན་དམྱལ་བ་པའི་སེམས་ཅན་དེ་དག་དམྱལ་བ་དང་
བྲལ་བར་གྱུར་པ་ལ་ཆོས་འཆད་དོ། །དེ་སེམས་ཅན་སྟོང་ཕྲག་དུ་མ་སེམས་ཅན་དམྱལ་བ་ལས་རབ་ཏུ་ཐར་བར་བྱེད་དོ། །འཇམ་དཔལ་དེ་ལྟར་ན་བྱང་ཆུབ་སེམས་དཔའ་སེམས་ཅན་དམྱལ་བའི་གནས་ཡོངས་

57-1-112b

སུ་གཟུང་བ་ཡང་ཡོངས་སུ་འཛིན་ལ་མཐོ་རིས་ཀྱི་ཆོས་ཀྱང་མྱོང་བར་བྱེད་པ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་དུད་འགྲོའི་གནས་ཀྱང་ཡོངས་སུ་འཛིན་ལ་མིའི་
ཆོས་རྒྱ་ཆེན་པོ་ཡང་མྱོང་བར་བགྱིད་པ་ལགས། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ལ་བྱང་ཆུབ་སེམས་དཔའ་ཉེ་བར་ཞི་བ་ལ་འཇུག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་
དུད་འགྲོའི་གནས་ཡོངས་སུ་འཛིན་ཅིང་སེམས་ཉམས་པ་མེད་པར་མིའི་ཆོས་རྒྱ་ཆེན་པོ་མྱོང་བར་བྱེད་དོ། །དེ་ཆ་ལུགས་དེས་དུད་འགྲོར་གྱུར་པའི་སེམས་ཅན་རྣམས་ལ་ཆོས་འཆད་དེ། དེ་སེམས་ཅན་སྟོང་ཕྲག་མང་པོ་
ཆོས་ལ་འཇོག་གོ། །འཇམ་དཔལ་དེ་ལྟར་ན་བྱང་ཆུབ་སེམས་དཔའ་དུད་འགྲོའི་གནས་ཀྱང་ཡོངས་སུ་འཛིན་ལ་མིའི་ཆོས་རྒྱ་ཆེན་པོ་ཡང་མྱོང་བར་བྱེད་པ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཇི་ལྟར་
ན་བྱང་ཆུབ་སེམས་དཔའ་རིགས་དམའ་བར་སྐྱེ་བ་ཡོངས་སུ་གཟུང་བ་ཡང་ཡོངས་སུ་འཛིན་ལ་འཁོར་ལོས་སྒྱུར་བའི་རྒྱལ་སྲིད་ཀྱི་བདེ་བ་ཡང་མྱོང་བར་བགྱིད་པ་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་
འདི་ལ་བྱང་ཆུབ་སེམས་དཔའ་མངོན་པར་གནོན་ཅིང་རྣམ་པར་གསལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་ཏིང་ངེ་འཛིན་དེ་མངོན་པར་གནོན་པ་དང་། རྣམ་པར་གསལ་བས་རིགས་དམའ་བར་སྐྱེ་བ་ཡོངས་
སུ་གཟུང་བ་ཡང་ཡོངས་སུ་འཛིན་ལ་འཁོར་ལོས་སྒྱུར་བའི་རྒྱལ་སྲིད་ཀྱི་བདེ་བ་ཡང་མྱོང་བར་བྱེད་དེ། ཐབས་དེས་ཀྱང་སེམས་ཅན་སྟོང་ཕྲག་དུ་མ་ཆོས་ལ་འཇོག་གོ། །འཇམ་དཔལ་དེ་ལྟར་ན་བྱང་ཆུབ་སེམས་དཔའ་
རིགས་དམའ་བར་སྐྱེ་བ་ཡོངས་སུ་གཟུང་བ་ཡང་ཡོངས་སུ་འཛིན་ལ་འཁོར་ལོས་སྒྱུར་བའི་རྒྱལ་སྲིད་ཀྱི་བདེ་བ་ཡང་མྱོང་བར་བྱེད་པ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཇི་ལྟར་ན་བྱང་ཆུབ་

57-1-113a

སེམས་དཔའ་འགྲོ་བ་ཐམས་ཅད་དུ་གཏོགས་པར་ཡང་སྟོན་ལ། འགྲོ་བའི་ཁྱད་པར་བགྱིད་པ་ཡང་མྱོང་བ་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ལ་བྱང་ཆུབ་སེམས་དཔའ་སྤྱོད་པ་
ཐམས་ཅད་ལ་བཏང་བ་སྣང་བའི་ཁྱད་པར་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་འཇུག་གོ། །དེ་ཏིང་ངེ་འཛིན་དེ་ལ་གནས་ནས་འགྲོ་བ་ཐམས་ཅད་དུ་གཏོགས་པར་ཡང་སྟོན་ཅིང་འགྲོ་བའི་ཁྱད་པར་གྱི་བྱེད་པ་ཡང་མྱོང་
བར་བྱེད་དེ། འཇམ་དཔལ་དེ་ལྟར་ན་བྱང་ཆུབ་སེམས་དཔའ་འགྲོ་བ་ཐམས་ཅད་དུ་གཏོགས་པར་ཡང་སྟོན་ལ་འགྲོ་བའི་ཁྱད་པར་ཡང་མྱོང་བར་བྱེད་པ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཇི་ལྟར་ན་
བྱང་ཆུབ་སེམས་དཔའ་སངས་རྒྱས་ཀྱི་ཞིང་ཐམས་ཅད་དུ་འགྲོ་བ་ལ་མཁས་ཤིང་གནས་ནས་ཀྱང་མི་གཡོ། འགྲོ་བ་ཡང་མ་མཆིས། འོང་བ་ཡང་མ་མཆིས་ལ། སངས་རྒྱས་ཀྱི་ཞིང་ཐམས་ཅད་དུ་ཡང་ཆུའི་ཟླ་བ་
ལྟར་གདའ་བ་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ལ་བྱང་ཆུབ་སེམས་དཔའ་གཟུགས་ཐམས་ཅད་རྣམ་པར་གནོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་འཇུག་སྟེ། དེ་ཏིང་ངེ་འཛིན་
དེ་ལ་གནས་པ་ན་ཕྱོགས་བཅུའི་འཇིག་རྟེན་གྱི་ཁམས་རྣམས་སུ་བདག་གི་ལུས་ཅིག་ཅར་སྣང་བར་བྱེད་ལ་གནས་ནས་ཀྱང་མི་གཡོ། འགྲོ་བ་ཡང་མེད། འོང་བ་ཡང་མེད་དེ། སྙོམས་པར་ཞུགས་པ་ཉིད་ཀྱིས་སངས་རྒྱས་
བཅོམ་ལྡན་འདས་མཐོང་ཞིང་ཆོས་ཀྱང་ཉན་ཏེ། འཇམ་དཔལ་དེ་ལྟར་ན་བྱང་ཆུབ་སེམས་དཔའ་སངས་རྒྱས་ཀྱི་ཞིང་ཐམས་ཅད་དུ་འགྲོ་བ་ལ་མཁས་པ་ཡང་ཡིན་ལ་གནས་ནས་ཀྱང་མི་གཡོ། འགྲོ་བ་ཡང་མེད། འོང་བ་
ཡང་མེད་དེ། སངས་རྒྱས་ཀྱི་ཞིང་ཐམས་ཅད་དུ་ཡང་ཆུའི་ཟླ་བ་བཞིན་དུ་སྣང་བ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སྒྲ་སྐད་ཐམས་ཅད་ཀྱང་འབྱིན་པར་བགྱིད་ལ་

57-1-113b

ཕན་ཚུན་འདྲེས་པར་ཡང་མི་བགྱིད་པ་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ལ་བྱང་ཆུབ་སེམས་དཔའ་མཐའ་ཡས་པར་འཁྱིལ་པ་ཞེས་བྱ་བའི་གཟུངས་ཐོབ་ནས་སེམས་ཅན་གྱི་སེམས་ཀྱི་བསམ་
པ་མཐའ་ཡས་པ་ལ་འཇུག་ཅིང་སྒྲ་བཤད་པ་མཐའ་ཡས་པ་རྣམས་ཤེས། བདག་ནི་ཚུལ་མཐའ་ཡས་པ་རྣམས་ཀྱང་རབ་ཏུ་ཤེས་ཏེ། དེ་གཟུངས་དེ་ཐོབ་པས་སྒྲ་སྐད་ཐམས་ཅད་ཀྱང་འབྱིན་ལ་ཕན་ཚུན་འདྲེས་པར་ཡང་
མི་བྱེད་དེ། འཇམ་དཔལ་དེ་ལྟར་ན་བྱང་ཆུབ་སེམས་དཔའ་སྒྲ་སྐད་ཐམས་ཅད་ཀྱང་འབྱིན་ལ་ཕན་ཚུན་འདྲེས་པར་ཡང་མི་བྱེད་པ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས་བྱང་ཆུབ་སེམས་དཔའ་སེམས་
ཀྱི་ཐབས་མཁས་པ་ནི་མངོན་པར་འབྱུང་བར་དཀའོ། །བཅོམ་ལྡན་འདས་འོན་ཀྱང་ཆོས་ཀྱི་རྣམ་གྲངས་འདི་རྟོགས་པར་འཚལ་བའི་བྱང་ཆུབ་སེམས་དཔས་ཆོས་ཀྱི་རྣམ་གྲངས་ཇི་ལྟ་བུར་རྟོགས་པར་བགྱི། བཅོམ་
ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཀྱི་རྣམ་གྲངས་འདི་རྟོགས་པར་འདོད་པའི་བྱང་ཆུབ་སེམས་དཔས་ནམ་མཁའི་ཚུལ་རྟོགས་པར་བྱའོ། །གསོལ་པ། བཅོམ་ལྡན་འདས་ནམ་མཁའི་ཚུལ་ཇི་ལྟ་
བུ་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ལྟ་སྟེ། དཔེར་ན་ནམ་མཁའ་ནི་ཆགས་པ་མ་ཡིན། ཞེ་སྡང་བ་མ་ཡིན། རྨོངས་པ་མ་ཡིན་ནོ། །དེ་བཞིན་དུ་ཆོས་ཐམས་ཅད་ཀྱང་ཆགས་པ་མ་
ཡིན། ཞེ་སྡང་བ་མ་ཡིན། རྨོངས་པ་མ་ཡིན་ནོ། །འདི་ལྟ་སྟེ་དཔེར་ན། ནམ་མཁའ་ནི་སྦྱིན་པ་ཕུན་སུམ་ཚོགས་པ་མ་ཡིན་པ་ནས་ཤེས་རབ་ཀྱི་བར་དུ་ཕུན་སུམ་ཚོགས་པ་མ་ཡིན་ནོ། །དེ་བཞིན་དུ་ཆོས་ཐམས་ཅད་
ཀྱང་སྦྱིན་པ་ཕུན་སུམ་ཚོགས་པ་མ་ཡིན་པ་ནས་ཤེས་རབ་ཀྱི་བར་དུ་ཕུན་སུམ་ཚོགས་པ་མ་ཡིན་ནོ། །དེ་འདི་ལྟ་སྟེ། འར་ན་ནམ་མཁའ་ནི་ཡོངས་སུ་ཤེས་པར་བྱ་བ་མ་ཡིན་སྤང་བར་བྱ་བ་མ་ཡིན་ནོ། །དེ་བཞིན་དུ་ཆོས་

57-1-114a

ཐམས་ཅད་ཀྱང་ཡོངས་སུ་ཤེས་པར་བྱ་བ་མ་ཡིན་སྤང་བར་བྱ་བ་མ་ཡིན་ནོ། །འདི་ལྟ་སྟེ་དཔེར་ན་ནམ་མཁའ་ནི་བསྒོམ་པར་བྱ་བ་མ་ཡིན། མངོན་དུ་བྱ་བ་མ་ཡིན་ནོ། །དེ་བཞིན་དུ་ཆོས་ཐམས་ཅད་
ཀྱང་བསྒོམ་པར་བྱ་བ་མ་ཡིན། མངོན་དུ་བྱ་བ་མ་ཡིན་ནོ། །འདི་ལྟ་སྟེ། དཔེར་ན་ནམ་མཁའ་ནི་མུན་པ་མ་ཡིན། སྣང་བ་མ་ཡིན་ནོ། །དེ་བཞིན་དུ་ཆོས་ཐམས་ཅད་ཀྱང་མུན་པ་མ་ཡིན། སྣང་བ་མ་ཡིན་ནོ། །འདི་ལྟ་སྟེ། 
དཔེར་ན་ནམ་མཁའ་ནི་ཀུན་དུ་བཟུང་བར་བྱ་བ་མ་ཡིན་ནོ། །དེ་བཞིན་དུ་ཆོས་ཐམས་ཅད་ཀྱང་ཀུན་དུ་བཟུང་བར་བྱ་བ་མ་ཡིན་ནོ། །འདི་ལྟ་སྟེ། དཔེར་ན་ནམ་མཁའ་ནི་ལམ་གྱིས་ཡང་དག་པར་ཞུགས་པ་མ་ཡིན། ལམ་ངན་
པས་མ་ཡིན་ནོ། །དེ་བཞིན་དུ་ཆོས་ཐམས་ཅད་ཀྱང་ལམ་གྱིས་ཡང་དག་པར་ཞུགས་པ་མ་ཡིན། ལམ་ངན་པས་མ་ཡིན་ནོ། །འདི་ལྟ་སྟེ། དཔེར་ན་ནམ་མཁའ་ནི་ཉན་ཐོས་ཀྱི་ཐེག་པས་ཡང་དག་པར་ཞུགས་པ་མ་
ཡིན། རང་སངས་རྒྱས་ཀྱི་ཐེག་པས་མ་ཡིན། ཐེག་པ་ཆེན་པོས་ཡང་དག་པར་ཞུགས་པ་མ་ཡིན་ནོ། །དེ་བཞིན་དུ་ཆོས་ཐམས་ཅད་ཀྱང་ཉན་ཐོས་ཀྱི་ཐེག་པས་ཡང་དག་པར་ཞུགས་པ་མ་ཡིན། རང་སངས་རྒྱས་
ཀྱི་ཐེག་པས་མ་ཡིན། ཐེག་པ་ཆེན་པོས་ཡང་དག་པར་ཞུགས་པ་མ་ཡིན་ནོ། །འདི་ལྟ་སྟེ། དཔེར་ན་ནམ་མཁའ་ནི་སེམས་པར་བྱེད་པ་མ་ཡིན། ཤེས་པར་བྱེད་པ་མ་ཡིན་ནོ། །དེ་བཞིན་དུ་ཆོས་ཐམས་ཅད་ཀྱང་སེམས་པར་
བྱེད་པ་མ་ཡིན། ཤེས་པར་བྱེད་པ་མ་ཡིན་ནོ། །འདི་ལྟ་སྟེ་དཔེར་ན་ནམ་མཁའ་ནི་ལེན་པར་བྱེད་པ་མ་ཡིན། འདོར་བར་བྱེད་པར་མ་ཡིན། བླང་བར་བྱ་བ་མ་ཡིན། དོར་བར་བྱ་བ་མ་ཡིན་ནོ། །དེ་བཞིན་དུ་ཆོས་ཐམས་ཅད་
ཀྱང་ལེན་པར་བྱེད་པ་མ་ཡིན། འདོར་བར་བྱེད་པ་མ་ཡིན། བླང་བར་བྱ་བ་མ་ཡིན། དོར་བར་བྱ་བ་མ་ཡིན་ནོ། །འདི་ལྟ་སྟེ། དཔེར་ན་ནམ་མཁའ་ནི་གང་གིས་ཀྱང་ཉོན་མོངས་པར་བྱ་མི་ནུས་སོ། །དེ་བཞིན་དུ་མྱ་ངན་ལས་

57-1-114b

འདས་པའི་མཐར་གཏོགས་པའི་ཆོས་ཐམས་ཅད་ཀྱང་ཀུན་ནས་ཉོན་མོངས་པ་མ་ཡིན་ཏེ། དེ་དག་ཞི་བར་ཡང་མི་འགྱུར། ཉེ་བར་ཞི་བར་ཡང་མི་འགྱུར་རོ། །འདི་ལྟ་སྟེ། དཔེར་ན་ནམ་མཁའ་ནི་མི་གནས་པའི་ཕྱིར་གནས་མ་
ཡིན། གནས་པ་མ་ཡིན། གཡོ་བར་མི་བྱེད། འགུལ་བར་མི་བྱེད་དོ། །བྱང་ཆུབ་སེམས་དཔས་དེ་བཞིན་དུ་ཆོས་ཐམས་ཅད་མི་གནས་པ་ལ་གནས་པར་བལྟའོ། །དེ་དག་ཡང་དག་པར་ཐོབ་པས་མི་འགུལ། མི་གཡོ། 
མི་གནས། གནས་པར་མི་བྱེད་དོ། །དེ་ལ་འཇམ་དཔལ་ཆོས་ཐམས་ཅད་ཀྱི་ངོ་བོ་ཉིད་དེ་ལྟ་བུ་ལ་གང་དེ་བཞིན་གཤེགས་པ་ལྟ་བར་འདོད་པ་དེ་དག་ནི་ལོག་པར་ལྟ་བའོ། །གང་ལོག་པར་ལྟ་བ་དེ་དག་ནི་ཡང་དག་པར་ཞུགས་པའོ། །
གང་ཡང་དག་པར་ཞུགས་པ་དེ་དག་ལ་བྱིན་པ་ནི་འབྲས་བུ་ཆེ་བ་མ་ཡིན། ཕན་ཡོན་ཆེ་བ་མ་ཡིན་ནོ། །གང་དག་ལ་བྱིན་ན་འབྲས་བུ་ཆེ་བ་མ་ཡིན། ཕན་ཡོན་ཆེ་བ་མ་ཡིན་པ་དེ་དག་ནི་འཇིག་རྟེན་གྱི་སྦྱིན་གནས་སོ། །གང་འཇིག་
རྟེན་གྱི་སྦྱིན་གནས་ཡིན་པ་དེ་དག་ལ་སྦྱིན་པའི་རྣམ་པར་སྨིན་པ་མེད་དོ། །གང་ལ་སྦྱིན་པའི་རྣམ་པར་སྨིན་པ་མེད་པ་དེ་དག་གིས་འདུ་ཤེས་མེད་པ་ཡོངས་སུ་རྫོགས་པར་བྱས་སོ། །གང་གི་འདུ་ཤེས་མེད་པ་ཡོངས་སུ་
རྫོགས་པར་བྱས་པ་དེ་དག་མྱུར་དུ་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ། །དེ་ནས་འཁོར་དེའི་ནང་ནས་དགེ་སློང་ལྷག་པའི་ང་རྒྱལ་ཅན་དྲུག་ཅུ་བསྟན་པ་འདི་ཐོས་པ་དང་འདི་སྙམ་དུ་གྱུར་ཏེ། མུན་ནག་གི་ལམ་དུ་
གྱུར་ལ་དེ་བཞིན་གཤེགས་པ་ཡང་མུན་ནག་གི་ལམ་དུ་སྟོན་ཏོ། །འདི་ལྟ་སྟེ། མུ་སྟེགས་ཅན་གཞན་དག་ཀྱང་དེ་སྐད་སྟོན། དེ་བཞིན་གཤེགས་པ་ཡང་དེ་སྐད་སྟོན་པས་དེ་བཞིན་གཤེགས་པ་དང་། མུ་སྟེགས་ཅན་གཞན་
གང་འོད་སྲུང་དང་། མ་སྐ་རི་འགའ་བ་ཡ་ལ་དང་། མི་དཀར་བ་སྐྲའི་ལ་བ་ཅན་དང་། ཀུན་རྒྱལ་འབེའི་ར་ཏིའི་བུ་དང་། དཔོན་པོ་ཀཱ་ཏྱཱ་ཡ་ན་དང་། གཅེར་བུ་པ་ཉེ་དུའི་བུ་རྣམས་ཀྱི་ཚིག་མཚུངས་སོ་སྙམ་མོ། །དེ་ནས་བཅོམ་

57-1-115a

ལྡན་འདས་ཀྱི་ཐུགས་ཀྱིས་དགེ་སློང་ལྷག་པའི་ང་རྒྱལ་ཅན་དེ་རྣམས་ཀྱི་སེམས་ཀྱི་རྟོག་པ་མཁྱེན་ནས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་དེ་དེ་བཞིན་ཏེ། གང་ངས་ཆོས་
བཤད་པ་འདི་མུ་སྟེགས་ཅན་གཞན་རྣམས་དང་མཚུངས་ན། མུ་སྟེགས་ཅན་གཞན་རྣམས་ཀྱིས་ནི་དེ་བཞིན་གཤེགས་པས་ཆོས་བཤད་པ་མི་ཤེས་སོ། །དེ་སྐད་ཅེས་བཀའ་སྩལ་པ་དང་། དགེ་སློང་ལྷག་པའི་ང་
རྒྱལ་ཅན་རྣམས་ལྷག་པར་སྡུག་བསྔལ། མི་དགའ། མ་མགུ། མ་རངས། ཆོས་བཤད་པ་འདི་ཡང་མ་ཤེས་ནས་སྟན་ལས་ལངས་ཏེ་དོང་ངོ་། །དེ་ནས་ཚེ་དང་ལྡན་པ་ཤཱ་རིའི་བུས་དགེ་སློང་དེ་དག་ལ་འདི་སྐད་ཅེས་སྨྲས་སོ། །
ཚེ་དང་ལྡན་པ་ཁྱེད་གར་འདོང་། དེ་དག་གིས་དེ་ལ་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུ་ཆོས་བཤད་པ་འདི་བདག་ཅག་གིས་མ་འཚལ་ཏོ། །དེས་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་དེ་བཞིན་
གཤེགས་པའི་དགོངས་ཏེ་བསྟན་པ་ཡིན་པར་ཤེས་པར་བྱའོ། །དེའི་ཕྱིར་བཅོམ་ལྡན་འདས་ཀྱིས་ཅི་ལས་དགོངས་ཏེ། དེ་སྐད་བསྟན་པ་དེ་བཞིན་གཤེགས་པ་ལ་ཞུ་བའི་བར་དུ་རེ་ཤིག་སྡོད་ཅིག །དེ་ནས་དགེ་སློང་དེ་དག་ཚེ་
དང་ལྡན་པ་ཤཱ་རིའི་བུའི་ཚིག་ཐོས་ནས་སོ་སོའི་སྟན་ལ་སླར་འཁོད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་འདི་དག་གི་ཐེ་ཚོམ་བསལ་བའི་སླད་
དུ་དེ་བཞིན་གཤེགས་པས་ཅི་ལས་དགོངས་ཏེ་འདི་སྐད་བསྟན་པ་བཅོམ་ལྡན་འདས་ཀྱིས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་དེ་ཇི་སྙམ་དུ་སེམས། དགེ་སློང་གང་ཉེ་བར་ལེན་པ་མེད་
པར་ཟག་པ་ལས་སེམས་རྣམ་པར་གྲོལ་བ་དེ་སྒྲ་གང་གིས་ཀྱང་དངང་བ་དང་། སྐྲག་པ་དང་། ཀུན་དུ་སྐྲག་པར་འགྱུར་རམ། གསོལ་པ། བཅོམ་ལྡན་འདས་མ་ལགས་སོ། །དགེ་སློང་བདེན་པ་མཐོང་བ་ཡང་སྒྲ་ཐམས་

57-1-115b

ཅད་ཀྱིས་མི་དངང་། མི་སྐྲག །ཀུན་དུ་སྐྲག་པར་མི་འགྱུར་ན་དགེ་སློང་གང་ཉེ་བར་ལེན་པ་མ་མཆིས་པར་ཟག་པ་ལས་སེམས་རྣམ་པར་གྲོལ་བ་ལྟ་ཅི་སྨོས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་
འདི་ལ་སྐྱེས་བུ་བླུན་པོ་ཁ་ཅིག་ཡང་དག་པ་མ་ཡིན་པའི་ཆོས་རྣམས་བརྟགས་ནས་ལྷག་པའི་ང་རྒྱལ་ཅན་དུ་གྱུར་ཅིང་གནས་སོ། །ཤཱ་རིའི་བུས་གསོལ་པ། གང་ཐོས་ནས་འཁོར་ཐམས་ཅད་ཐེ་ཙོམ་
མ་མཆིས་པར་འགྱུར་བའི་ཚིག་བཤད་པ་དེ་དག་བཅོམ་ལྡན་འདས་ཀྱིས་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་གང་གིས་དེ་བཞིན་གཤེགས་པ་
རྨི་ལམ་དང་མཚུངས། སྒྱུ་མ་དང་མཚུངས་པར་མཐོང་བ་དེས་ཡང་དག་པར་མཐོང་ངོ་། །གང་ཡང་དག་པར་མཐོང་བ་དེ་དག་དེ་བཞིན་གཤེགས་པ་ལ་ཡང་དག་པར་འདུ་ཤེས་མི་བྱེད། 
སྙིང་པོར་འདུ་ཤེས་དང་། རྫས་སུ་འདུ་ཤེས་དང་། དངོས་པོར་འདུ་ཤེས་དང་། རིལ་པོར་འདུ་ཤེས་མི་བྱེད། གང་དེ་བཞིན་གཤེགས་པ་ལ་ཡང་དག་པར་འདུ་ཤེས་པ་མ་ཡིན། སྙིང་
པོ་དང་། རྫས་དང་། དངོས་པོ་དང་། རིལ་པོར་འདུ་ཤེས་པ་མ་ཡིན་པ་དེ་དག་གིས་འདུ་བྱེད་ཐམས་ཅད་བརྫུན་པར་མཐོང་ངོ་། །གང་གིས་འདུ་བྱེད་ཐམས་ཅད་བརྫུན་པར་མཐོང་བ་དེ་དག་གིས་ཆོས་
ཐམས་ཅད་ལོག་པར་ཤེས་སོ། །གང་གིས་ཆོས་ཐམས་ཅད་ལོག་པར་ཤེས་པ་དེ་དག་ཐམས་ཅད་དེ་བཞིན་གཤེགས་པས་ལོག་པར་ལྟ་བ་ཡོངས་སུ་རྫོགས་པ་ཡིན་པར་བསྟན་ཏོ། །
དེ་དག་གིས་ལྟ་བར་གྱུར་པ་ཐམས་ཅད་ལོག་པ་ཡིན་པར་ཡང་ཤེས་ཏེ། དེའི་ཕྱིར་ཡང་དེ་དག་ལོག་པར་ལྟ་བ་ཞེས་བྱའོ། །ཤཱ་རིའི་བུ་རྣམ་གྲངས་དེས་གང་དེ་བཞིན་གཤེགས་

57-1-116a

པ་ལྟ་བར་འདོད་པ་དེ་དག་ལོག་པར་ལྟ་བ་ཞེས་བྱའོ། །ཤཱ་རིའི་བུ་དེ་དག་ནི་དེ་བཞིན་གཤེགས་པའི་སྐུ་མ་འཁྲུགས་པར་ལྟ་བའོ། །གང་དེ་བཞིན་གཤེགས་པའི་སྐུ་ལོག་པ་
ཡིན་པར་རྟོག་པ་དེ་དག་ནི་དེ་བཞིན་གཤེགས་པའི་འདུ་ཤེས་མེད་པའོ། །ཤཱ་རིའི་བུ་གང་འདི་ལྟར་ལོག་པར་ཤེས་པ་དེ་ནི་དེ་བཞིན་གཤེགས་པ་མཐོང་བའོ། །གསོལ་པ། བཅོམ་ལྡན་འདས་ཇི་ལྟར་
ན་གང་ལོག་པར་ལྟ་བ་དེ་དག་ཡང་དག་པར་ཞུགས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་གང་སོ་སོའི་སྐྱེ་བོ་རྣམས་རྟོག་པ་དང་། རྣམ་པར་རྟོག་པ་དང་། དཔྱོད་པ་དང་། རྣམ་
པར་དཔྱོད་པ་དང་། ལྡང་བར་བྱེད་པ་དང་། ཀུན་དུ་ལྡང་བར་བྱེད་པ་དང་། རྟེན་པ་དང་། གནས་པ་དང་། ལེན་པ་དང་། འདོར་བ་དང་། བདག་དང་། སེམས་ཅན་དང་། སྲོག་དང་། གང་ཟག་ཏུ་ལྟ་བ་ཉེ་བར་ལེན་
པ་དང་། བདག་ཏུ་འཛིན་པ་ལ་མངོན་པར་ཞེན་པ་དང་། བདག་གིར་འཛིན་པ་ལ་ཆགས་པ་དེ་དག་གི་སྤྱོད་པ་དང་། ཤེས་པ་དང་། གཡོ་བ་དང་། སྤྲོས་པ་དེ་ལྟ་བུ་དག་དེ་དག་གིས་ཤེས་ཏེ། དེ་དག་ཇི་ལྟ་བུར་ཡོད་པ་
མ་ཡིན་པ་དེ་ལྟ་བུ་ཉིད་དུ་ཤེས་སོ། །ཤཱ་རིའི་བུ་མེད་པ་ཞེས་བྱ་བ་དེ་ནི་ཡང་དག་པ་མ་ཡིན་པའི་ཚིག་བླ་དགས་སོ། །ཡང་དག་པ་མ་ཡིན་པ་ཞེས་བྱ་བ་དེ་ནི་བརྫུན་པའོ། །བརྫུན་པ་ཞེས་བྱ་བ་དེ་ནི་ལོག་པའི་ཚིག་
བླ་དགས་སོ། །དེ་ལྟར་གང་ཚུལ་འདི་ལྟ་བུ་ཡང་དག་པ་མ་ཡིན་པར་འཛིན་པ་དག་ལོག་པར་མཐོང་བ་དེའི་ཕྱིར་དེ་དག་ཡང་དག་པར་ཞུགས་པ་ཞེས་བྱའོ། །ཤཱ་རིའི་བུ་རྣམ་གྲངས་དེ་ཉིད་ཀྱིས་གང་ལོག་པར་
ལྟ་བ་དེ་དག་ཡང་དག་པར་ཞུགས་པའོ། །གསོལ་པ། བཅོམ་ལྡན་འདས་ཇི་ལྟར་ན་གང་ཡང་དག་པར་ཞུགས་པ་དེ་དག་ལ་སྩལ་ན་འབྲས་བུ་ཆེ་བ་མ་ལགས། ཕན་ཡོན་ཆེ་བ་མ་ལགས། བཅོམ་ལྡན་འདས་

57-1-116b

ཀྱིས་བཀའ་སྩལ་པ། ཤཱ་རིའི་བུ་གང་ཚུལ་འདི་ལྟ་བུས་ཡང་དག་པར་ཞུགས་པ་དང་ལྡན་པར་གྱུར་པ་དེ་དག་ལ་སྦྱིན་པ་ནི་མྱ་ངན་ལས་འདའ་བ་ལ་གཞོལ། མྱ་ངན་ལས་འདའ་བ་ལ་འབབ། མྱ་ངན་ལས་འདའ་བ་ལ་
བབ། མྱ་ངན་ལས་འདའ་བའི་མཐར་ཐུག་པར་འགྱུར་ཏེ། མྱ་ངན་ལས་འདའ་བ་ཡང་འབྲས་བུ་ཆུང་བ་ཡང་མ་ཡིན། འབྲས་བུ་ཆེ་བ་ཡང་མ་ཡིན། ཕན་ཡོན་ཆུང་བ་ཡང་མ་ཡིན། ཕན་ཡོན་ཆེ་བ་ཡང་མ་ཡིན་ནོ། །དེ་
ཅིའི་ཕྱིར་ཞེ་ན། མྱ་ངན་ལས་འདས་པ་ནི་འབྲས་བུ་ཐམས་ཅད་དང་བྲལ་ཞིང་བཏགས་པ་མ་ཡིན། གདགས་པར་བྱ་བ་མ་ཡིན་པའི་ཕྱིར་རོ། །གསོལ་པ། བཅོམ་ལྡན་འདས་འོ་ན་དེ་བཞིན་གཤེགས་པས་མྱ་ངན་ལས་འདས་པ། 
གདགས་སུ་མ་མཆིས་པ་ལ་ཇི་ལྟར་ཡོན་ཏན་མཐའ་ཡས་པའི་སྨན་ཡོན་གྱི་བྱེ་བྲག་བསྟན། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་སྐྱེ་བའི་སྤྱོད་ཡུལ་ཅན་གྱི་སེམས་ཅན་བདག་དང་། སེམས་ཅན་དང་། སྲོག་
དང་། གང་ཟག་ཏུ་སྨྲ་བ་རྣམས་མོས་པ་བསྐྱེད་པའི་ཕྱིར་མྱ་ངན་ལས་འདས་པ་གདགས་སུ་མེད་པ་ལ་ཡང་དེ་བཞིན་གཤེགས་པས་ཡོན་ཏན་མཐའ་ཡས་པའི་ཕན་ཡོན་གྱི་བྱེ་བྲག་བསྟན་ཏོ། །ཤཱ་རིའི་བུ་འོན་ཀྱང་འཕགས་
པ་རྣམས་ནི་སྦྱིན་པ་ལ་འཇུག་པར་མི་བལྟའི། འཕགས་པ་རྣམས་འདོད་ཆགས་དང་བྲལ་བ་དང་། སྦྱིན་པ་ལས་ལྡོག་པར་བལྟའོ། །ཤཱ་རིའི་བུ་འདི་ལྟ་སྟེ། དཔེར་ན་ཞིང་པ་དག་ཞིང་ལ་ནས་ཀྱི་ས་བོན་བཏབ་སྟེ། དེའི་
ནས་དེ་ཉིད་ལ་བརྟེན་ནས་སྲེ་ད་དང་། རྩྭ་དང་། སྔོ་རྣམས་སྐྱེ་ན། ཤཱ་རིའི་བུ་དེ་ཇི་སྙམ་དུ་སེམས། སྲེ་ད་དང་། རྩྭ་དང་། སྔོ་འདི་དག་ཞིང་པ་དེའི་ལས་བྱས་པའི་འབྲས་བུ་ཡིན་ནམ། གསོལ་པ། བཅོམ་ལྡན་འདས་མ་ལགས་
སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་འདི་ལྟ་སྟེ། དཔེར་ན་ཞིང་པས་ནས་ཀྱི་ས་བོན་བཏབ་པ་དེའི་ནས་དེ་དག་ཉིད་ལ་བརྟེན་ནས་སྲེ་ད་རྣམས་འབྱུང་བ་དང་། རྩྭ་དང་། སྔོ་རྣམས་སྐྱེ་བར་འགྱུར་ཏེ། 

57-1-117a

ནས་ཀྱི་སྙི་མ་གཞན་རྣམས་ཀྱང་འབྱུང་ངོ་། །དེ་བཞིན་དུ་འཕགས་པ་རྣམས་ལ་སྦྱིན་པ་བྱིན་པ་ནི་ཚེགས་ཆུང་ངུས་ལོངས་སྤྱོད་ཆེན་པོར་འགྱུར་ལ། གཞན་ཡང་ཟག་པ་ཟད་པ་སྲེད་པའི་འབྲས་བུ་ཐམས་
ཅད་སྐེམས་པར་བྱེད་དོ། །འདི་ལྟ་སྟེ། དཔེར་ན་ནས་འདོད་པ་དག་འདི་ནི་ནས་ཀྱི་ས་བོན་དེའི་འབྲས་བུ་མ་ཡིན། འདི་ནི་ནས་ཀྱི་ས་བོན་དེའི་རྙེད་པ་མ་ཡིན་ནོ་སྙམ་ནས་སྲེ་དས་མགུ་བར་མི་འགྱུར་ཞིང་། རྩྭ་དང་། དོས་
རངས་པར་མི་འགྱུར་བ་དེ་བཞིན་དུ་འདུས་མ་བྱས་པའི་ཞིང་ལ་སྦྱིན་པ་བྱིན་པ་འདུས་བྱས་ཀྱི་འབྲས་བུ་ཡིན་པར་བསྟན་པར་མི་བྱའོ། །ཤཱ་རིའི་བུ་རྣམ་གྲངས་དེས་གང་ཡང་དག་པར་ཞུགས་པ་དེ་དག་ལ་བྱིན་པ་
འབྲས་བུ་ཆེ་བ་མ་ཡིན། ཕན་ཡོན་ཆེ་བ་མ་ཡིན་ནོ། །གསོལ་པ། བཅོམ་ལྡན་འདས་གང་དག་ལ་སྩལ་ན་འབྲས་བུ་ཆེ་བ་མ་ལགས་ཤིང་སྨན་ཡོན་ཆེ་བ་མ་ལགས་པ་དེ་དག་ཇི་ལྟར་འཇིག་རྟེན་གྱི་སྦྱིན་གནས་
ལགས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་གང་འབྲས་བུ་ཆེ་བར་འདུ་ཤེས་པ་ཡང་མ་ཡིན། འབྲས་བུ་ཆུང་བར་འདུ་ཤེས་པ་ཡང་མ་ཡིན་པ་དེ་དག་སྦྱིན་པ་སྐྱེ་བར་མི་འགྱུར་རོ། །གང་སྦྱིན་
པ་སྐྱེ་བར་མི་འགྱུར་བ་དེ་དག་ནི་ལྷ་དང་བཅས་པའི་འཇིག་རྟེན་གྱི་སྦྱིན་གནས་སུ་འགྱུར་རོ། །ཤཱ་རིའི་བུ་དེ་ལ་ཟད་མི་ཤེས་པའི་ཞིང་ལ་སྦྱིན་པ་བྱིན་པ་ནི་མེ་ཏོག་ཀྱང་མི་ཆགས། འབྲས་བུར་ཡང་མི་
འགྱུར་རོ། །ཤཱ་རིའི་བུ་རྣམ་གྲངས་འདིས་གང་ལ་བྱིན་ན་འབྲས་བུ་ཆེ་བ་ཡང་མ་ཡིན། ཕན་ཡོན་ཆེ་བ་ཡང་མ་ཡིན་པ་དེ་དག་འཇིག་རྟེན་གྱི་སྦྱིན་གནས་ཡིན་ནོ། །གསོལ་པ། བཅོམ་ལྡན་འདས་ཇི་ལྟར་ན་
གང་འཇིག་རྟེན་གྱི་སྦྱིན་གནས་དེ་དག་ལ་བྱིན་པ་རྣམ་པར་སྨིན་པ་མ་མཆིས་པ་ལགས། བཅོམ་ལྡན་འདས་ཀྱིས་བཀའ་སྩལ་པ་ཤཱ་རིའི་བུ་དེ་ཇི་སྙམ་དུ་སེམས། སྦྱིན་པ་གང་མྱ་ངན་ལས་འདའ་བའི་

57-1-117b

མཐར་ཐུག་པར་འགྱུར་བ་དེ་རྣམ་པར་སྨིན་པའི་ཆོས་ཅན་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཅོམ་ལྡན་འདས་སྦྱིན་པ་མྱ་ངན་ལས་འདས་པའི་མཐར་ཐུག་པ་དེ་དེ་སྟེ་སྦྱིན་པའི་
ཆོས་ཅན་ལགས་ན། འཕགས་པའི་གང་ཟག་རྣམས་འདུས་མ་བྱས་པས་རབ་ཏུ་ཕྱེ་བར་མི་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ལེགས་སོ། །ལེགས་སོ། །རྣམ་གྲངས་
འདིས་གང་འཇིག་རྟེན་གྱི་སྦྱིན་གནས་ཡིན་པ་དེ་དག་ལ་བྱིན་པ་རྣམ་པར་སྨིན་པ་མེད་པ་ཡིན་ནོ། །གསོལ་པ། བཅོམ་ལྡན་འདས་ཇི་ལྟར་ན་གང་སྦྱིན་པའི་རྣམ་པར་སྨིན་པ་མ་མཆིས་པ་དེ་དག་གིས་འདུ་
ཤེས་མ་མཆིས་པ་ཡོངས་སུ་རྫོགས་པར་བགྱིས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་དེ་ཇི་སྙམ་དུ་སེམས། གང་ཆོས་རྣམས་ཀྱི་ངོ་བོ་ཉིད་ཤེས་པ་དེ་ཡོད་དམ། འོན་ཏེ་
མེད། གསོལ་པ། བཅོམ་ལྡན་འདས་གང་ཆོས་ཐམས་ཅད་ཀྱི་ངོ་བོ་ཉིད་འཚལ་བ་དེ་སྒྱུ་མའི་ངོ་བོ་ཉིད་འཚལ་བ་ལགས་ཏེ། བཅོམ་ལྡན་འདས་དེ་ནི་མ་མཆིས་པ་ལགས་ཏེ། མཆིས་པ་མ་ལགས་
སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་ནི་བཅོམ་ལྡན་འདས་ཀྱིས་སྒྱུ་མའི་ངོ་བོ་ཉིད་དུ་བསྟན་ཏོ། །སྒྱུ་མ་ལྟ་བུ་གང་ལགས་པ་དེ་ཡང་མ་མཆིས་པའོ། །གང་ཆོས་ཐམས་ཅད་ཀྱི་ངོ་བོ་
ཉིད་འཚལ་བ་འདི་ནི་འདུ་ཤེས་མ་མཆིས་པའོ། །དེ་ཅིའི་སླད་དུ་ཞེ་ན། འདི་ལ་གང་ཡང་དག་པར་གྱུར་པའི་ཆོས་གང་ཡང་མི་དམིགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ལེགས་སོ། །
ལེགས་སོ། །དེ་དེ་བཞིན་ཏེ། ཤཱ་རིའི་བུ་འདི་ལ་ཆོས་འགའ་ཞིག་རྫས་སམ། ཡང་དག་པར་ཡོད་པར་གྱུར་ན་སེམས་ཅན་རྣམས་ཕྱིས་ཀྱང་མྱ་ངན་ལས་འདའ་བར་མི་འགྱུར་རོ། །ཤཱ་རིའི་བུ་གང་གི་ཕྱིར་

57-1-118a

ཆོས་ཐམས་ཅད་ཡང་དག་པ་མ་ཡིན། ཡོད་པ་མ་ཡིན། རྫས་མ་ཡིན་པ་དེའི་ཕྱིར་སེམས་ཅན་གང་གཱའི་ཀླུང་གི་བྱེ་མ་སྙེད་མྱ་ངན་ལས་བཟླས་ཀྱང་སེམས་ཅན་མེད་པའི་ཕྱིར་སེམས་ཅན་རྣམས་ལས་
གང་ཡང་ཟད་པར་མི་མངོན་ནོ། །ཤཱ་རིའི་བུ་དེ་ལྟ་བས་ན་གང་སེམས་ཅན་ཐམས་ཅད་མེད་པའི་འདུ་ཤེས་དང་། དེ་དག་ཀྱང་མི་དམིགས་པ་འདི་ནི་འདུ་ཤེས་མེད་པ་ཡོངས་སུ་རྫོགས་པའོ། །ཤཱ་རིའི་བུ་རྣམ་
གྲངས་དེས་གང་དག་ལ་བྱིན་པ་རྣམ་པར་སྨིན་པ་མེད་པ་དེ་དག་གིས་འདུ་ཤེས་མེད་པ་ཡོངས་སུ་རྫོགས་པར་བྱས་པ་ཡིན་ནོ། །གསོལ་པ། བཅོམ་ལྡན་འདས་ཇི་ལྟར་ན་གང་དག་གིས་འདུ་ཤེས་མེད་པ་ཡོངས་སུ་
རྫོགས་པར་བགྱིད་པའི་ཡེ་ཤེས་དེས་མྱུར་དུ་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་གང་གིས་མེད་པ་མངོན་སུམ་དུ་བྱས་པ་དེ་དག་ནི་ཤེས་པའོ། །མེད་པ་ཡང་
གང་ཞེ་ན། མེད་པ་ཞེས་བྱ་བ་ནི་བདག་དུ་ལྟ་བ་དང་། སེམས་ཅན་དུ་ལྟ་བ་དང་། སྲོག་ཏུ་ལྟ་བ་དང་། གང་ཟག་ཏུ་ལྟ་བ་དང་། ཆད་པར་ལྟ་བ་དང་། རྟག་པར་ལྟ་བའོ། །མེད་པ་ཞེས་བྱ་བ་ནི་སངས་རྒྱས་སུ་འདུ་ཤེས་པ་དང་། ཆོས་
སུ་འདུ་ཤེས་པ་དང་། དགེ་འདུན་དུ་འདུ་ཤེས་པ་དང་། མྱ་ངན་ལས་འདའ་བར་འདུ་ཤེས་པ་དང་། ཇི་ཙམ་དུ་སེམས་ཀྱི་སྦྱོར་བ་དང་། སྤྱོད་པ་དང་། ཤེས་པ་དང་། གཡོ་བ་དང་། སྤྲོས་པ་དེ་དག་ཐམས་ཅད་མེད་པའོ། །ཤཱ་རིའི་བུ་
དེ་བས་ན་ཚུལ་དེ་ལྟ་བུར་ཡང་དག་པ་མ་ཡིན་པར་འཛིན་པ་དེ་དག་ལས་ཡོངས་སུ་གྲོལ་བ་དེ་དག་ནི་ཤེས་པའོ། །ཤཱ་རིའི་བུ་རྣམ་གྲངས་དེས་གང་གིས་འདུ་ཤེས་མེད་པ་ཡོངས་སུ་རྫོགས་པར་བྱས་པ་དེ་དག་མྱུར་དུ་མི་
སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ། །དགོངས་ཏེ་གསུངས་པའི་བསྟན་པ་འདི་བསྟན་པའི་ཚེ། བྱང་ཆུབ་སེམས་དཔའ་བཞི་ཁྲི་ཉིས་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དགེ་བསྙེན་དྲུག་

57-1-118b

སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལྷའི་བུ་སུམ་ཁྲི་དྲུག་སྟོང་རྣམས་ཀྱིས་ཡེ་ཤེས་མངོན་པར་རྟོགས་པར་གྱུར་ཏོ། །དགེ་སློང་ལྷག་པའི་ང་རྒྱལ་ཅན་དྲུག་ཅུ་པོ་དེ་དག་རྣམས་
ཀྱང་ཉེ་བར་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་དག་སེམས་རྣམ་པར་གྲོལ་ནས་མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདས་བདག་ཅག་ནི་དེང་སླན་ཆད་སྟོན་པ་དྲུག་རྣམས་ཀྱི་
རྗེས་སུ་རབ་ཏུ་བྱུང་ངོ་། །དེང་སླན་ཅད་བདག་ཅག་གི་སྟོན་པ་སངས་རྒྱས་མ་ལགས། ཆོས་ལ་མི་རྟེན། དགེ་འདུན་ལ་མི་རྟེན་ཏོ། །དེང་ཕན་ཆད་བདག་ཅག་བྱ་བ་མ་མཆིས་པར་སྨྲ་བ། རྒྱུ་མ་མཆིས་པར་སྨྲ་བ། 
ལས་མ་མཆིས་པར་སྨྲ་བ། རྣམ་པར་སྨིན་པ་མ་མཆིས་པར་སྨྲ་བ། འདུལ་བ་མ་ལགས་པར་སྨྲ་བའོ། །དེའི་ཚེ་འཁོར་དེ་ན་སྲོག་ཆགས་སྟོང་ཕྲག་མང་པོ་རྣམས་འདི་སྙམ་དུ་གྱུར་ཏེ། འདི་ལྟར་དགེ་སློང་འདི་
དག་འདི་དག་འདི་ལྟ་བུ་ཡང་དག་པ་མ་ཡིན་པའི་ཚིག་སྨྲ་བ་ལས་ན། བཅོམ་ལྡན་འདས་ཀྱི་བསླབ་པ་ཕུལ་ནས་མུ་སྟེགས་ཅན་གྱི་མཚན་མ་འཛིན་པར་མི་འགྱུར་རམ་སྙམ་དུ་གྱུར་ཏོ། །དེ་ནས་ཚེ་དང་ལྡན་པ་
ཤཱ་རིའི་བུའི་སེམས་ཀྱིས་འཁོར་དེ་དག་གི་སེམས་ཀྱི་རྟོག་པ་ཤེས་ནས་དགེ་སློང་དེ་དག་ལ་སྨྲས་པ། ཚེ་དང་ལྡན་པ་དག་ཅི་ལས་བསམས་ཏེ། དེང་ཕན་ཆད་བདག་ཅག་སྟོན་པ་དྲུག་གི་རྗེས་སུ་རབ་ཏུ་བྱུང་ངོ་
ཞེས་དེ་སྐད་སྨྲ། དེ་དག་གིས་སྨྲས་པ། ཚེ་དང་ལྡན་པ་ཤཱ་རིའི་བུ་དེང་ཕན་ཆད་བདག་ཅག་གི་སྟོན་པ་ཐམས་ཅད་སྟོན་པ་དྲུག་དང་མཉམ་ཞིང་མཚན་ཉིད་གཅིག་ཅིང་བྱེ་བྲག་མེད་པར་རྣམ་པར་རིག་གོ། །བདག་ཅག་གིས་
སྟོན་པ་ཐམས་ཅད་ཐ་དད་པ་མེད་པར་རིག་ནས་རྣམ་པར་མི་རྟོག་པར་རབ་ཏུ་བྱུང་བའི་རྗེས་སུ་རབ་ཏུ་བྱུང་ངོ་། །སྨྲས་པ་ཅི་ལས་བསམས་ནས་དེང་ཕན་ཆད་བདག་ཅག་གི་སྟོན་པ་སངས་རྒྱས་མ་ཡིན་ནོ་ཞེས་དེ་སྐད་སྨྲ། 

57-1-119a

དེ་དག་གིས་སྨྲས་པ། དེང་ཕན་ཆད་བདག་ཅག་བདག་ལ་རྟེན་གྱི་གཞན་ལ་མི་རྟེན། བདག་ལ་སྐྱབས་སུ་དོང་གི་གཞན་ལ་སྐྱབས་སུ་དོང་བ་མ་ཡིན། བདག་སྟོན་པ་ཡིན་གྱི་སྟོན་པ་གཞན་མ་ཡིན་ནོ། །
དེ་བས་ན་དེང་ཕན་ཆད་བདག་ཅག་གི་སྟོན་པ་སངས་རྒྱས་མ་ཡིན་ནོ། །དེ་ཅིའི་ཕྱིར་ཞེ་ན། བདག་མ་གཏོགས་པར་སངས་རྒྱས་མེད། སངས་རྒྱས་མ་གཏོགས་པར་བདག་མེད་དོ། །སྨྲས་པ། ཅི་ལས་བསམས་
ནས་དེང་ཕན་ཆད་བདག་ཅག་ཆོས་ལ་མི་རྟེན། དགེ་འདུན་ལ་མི་རྟེན་ཅེས་དེ་སྐད་སྨྲ། དེ་དག་གིས་སྨྲས་པ། དེང་ཕན་ཆད་བདག་ཅག་གིས་གང་ལ་བརྟེན་པ་དང་། གང་དང་ལྷན་ཅིག་འགྲོ་བའི་ཆོས་གང་ཡང་མ་
དམིགས་སོ། །དེ་བས་ན་བདག་ཅག་དེང་ཕན་ཆད་ཆོས་ལ་མི་རྟེན། དགེ་འདུན་ལ་མི་རྟེན་ཏོ། །སྨྲས་པ། ཅི་ལས་བསམས་ཏེ་བདག་ཅག་དེང་ཕན་ཆད་བྱ་བ་མེད་པར་སྨྲའོ་ཞེས་དེ་སྐད་ཅེས་ཟེར། དེ་དག་གིས་སྨྲས་
པ། བདག་ཅག་གིས་དེང་ཕན་ཆད་ཆོས་ཐམས་ཅད་མ་བྱས་པར་ཤེས་ཏོ། །གང་ན་བྱས་པ་ཡང་མེད། འགྱུར་བ་ཡང་མེད་པའི་ཆོས་དེ་བདག་ཅག་གིས་མངོན་དུ་བྱས་སོ། །དེ་བས་ན་དེང་ཕན་ཆད་བདག་ཅག་
བྱ་བ་མེད་པར་སྨྲའོ། །སྨྲས་པ། ཅི་ལས་བསམས་ཏེ་དེང་ཕན་ཆད་བདག་ཅག་རྒྱུ་མེད་པར་སྨྲའོ་ཞེས་དེ་སྐད་ཟེར། དེ་དག་གིས་སྨྲས་པ། བདག་ཅག་སྲིད་པ་ཐམས་ཅད་དུ་འགྲོ་བར་སྐྱེ་བའི་རྒྱུ་དེང་ཟད་དེ་གང་ན་
རྒྱུ་ཡང་མེད་རྐྱེན་ཡང་མེད་པའི་ཆོས་དེ་མངོན་དུ་བྱས་སོ། །དེའི་ཕྱིར་དེང་ཕན་ཆད་བདག་ཅག་རྒྱུ་མེད་པར་སྨྲའོ། །སྨྲས་པ། ཅི་ལས་བསམས་ཏེ་དེང་ཕན་ཆད་བདག་ཅག་རྣམ་པར་སྨིན་པ་མེད་པར་སྨྲའོ་
ཞེས་དེ་སྐད་ཟེར། དེ་དག་གིས་སྨྲས་པ། དེང་ཕན་ཆད་བདག་ཅག་གིས་གང་ན་ལས་ཀྱང་མེད། ལས་ཀྱི་རྣམ་པར་སྨིན་པ་ཡང་མེད་ཅིང་། ཆོས་ཐམས་ཅད་ཤིན་དུ་ཡོངས་སུ་མྱ་ངན་ལས་འདས་པར་ཡོངས་

57-1-119b

སུ་ཤེས་སོ། །དེའི་ཕྱིར་བདག་ཅག་དེང་ཕན་ཆད་ལས་ཀྱི་རྣམ་པར་སྨིན་པ་མེད་པར་སྨྲའོ། །སྨྲས་པ། ཚེ་དང་ལྡན་པ་དག་ཅི་ལས་བསམས་ཏེ་དེང་ཕན་ཆད་བདག་ཅག་འདུལ་བ་མ་ཡིན་པར་སྨྲའོ་ཞེས་དེ་སྐད་ཟེར། དེ་
དག་གིས་སྨྲས་པ། ཚེ་དང་ལྡན་པ་ཤཱ་རིའི་བུ་དེང་ཕན་ཆད་བདག་ཅག་གིས་གང་ན་འདུལ་བ་ཡང་མེད། གསུང་བ་ཡང་མེད། འདུལ་བ་མ་ཡིན་པ་ཡང་མེད་ཅིང་ཆོས་ཐམས་ཅད་ཤིན་དུ་དུལ་བར་ཡོངས་སུ་
ཤེས་ཏེ། དེའི་ཕྱིར་བདག་ཅག་དེང་ཕན་ཆད་འདུལ་བ་མ་ཡིན་པར་སྨྲའོ། །དེ་ནས་དགེ་སློང་དེ་དག་གི་ལྷག་པའི་ང་རྒྱལ་བསྟན་པ་འདི་ལྟ་བུ་ཐོས་ནས་དགེ་སློང་སུམ་སྟོང་དྲུག་བརྒྱ་རྣམས་ཉེ་བར་ལེན་པ་མེད་
པར་ཟག་པ་ལས་སེམས་རབ་དུ་རྣམ་པར་གྲོལ་ལོ། །དེ་ནས་བཅོམ་ལྡན་འདས་ཀྱིས་དགེ་སློང་དེ་དག་ལ་ལེགས་སོ་ཞེས་བྱ་བ་བྱིན་ཏེ། དགེ་སློང་དག་གང་ན་ཆོས་གང་ཡང་རྟོགས་པ་མེད་པ་དེ་ནི་ཡང་དག་པ་ཐོབ་པ་
ཡིན་གྱིས་ལེགས་སོ། །ལེགས་སོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་རྟོགས་པ་རྟོགས་པ་ཞེས་བགྱི་བའི་རྟོགས་པ་དེ་ཆོས་གང་གི་
ཚིག་བླ་དགས་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་རྟོགས་པ་རྟོགས་པ་ཞེས་བྱ་བ་དེ་ནི་སྐྱེ་བ་མེད་པའི་ཆོས་ལ་བཟོད་པའི་ཚིག་བླ་དགས་སོ། །གསོལ་པ། སྐྱེ་བ་མ་མཆིས་པའི་ཆོས་ལ་བཟོད་པ་ཐོབ་པར་འཚལ་
བའི་བྱང་ཆུབ་སེམས་དཔས་ཇི་ལྟར་བསླབ་པར་བགྱི། ཇི་ལྟར་སྤྱད་པར་བགྱི། ཇི་ལྟར་རྣལ་འབྱོར་དུ་འཇུག་པར་བགྱི། དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་མི་སྐྱེ་བའི་ཆོས་ལ་བཟོད་པ་བསླབ་པ་ཤེས་པར་བྱ་བའི་ཕྱིར་
དེའི་ཚེ་ཚིགས་སུ་བཅད་པ་འདི་དག་གསུངས་སོ། །ཐམས་ཅད་མཁྱེན་པ་བླ་མེད་པའི། །སངས་རྒྱས་ཡེ་ཤེས་ཐོབ་འདོད་པས། །ཆོས་རྣམས་གང་ཡང་མི་གཟུང་ཞིང་། །ཆོས་རྣམས་གང་ཡང་མི་འདོར་རོ། །གང་ཞིག་སྐྱེ་བར་འགྱུར་བ་ཡི། །ཆོས་ནི་གང་ཡང་མི་རྙེད་དེ། །ཆོས་རྣམས་འབྱུང་བ་

57-1-120a

བ་མེད་པ་ལ། །བྱིས་པ་དག་ནི་འབྱུང་བར་འདོད། །ཆོས་རྣམས་ཤེས་པར་བྱ་བ་དང་། །སྤང་བར་བྱ་བར་སྲོག་ཆགས་འཆད། །བྱིས་པ་སྐྱེ་བའི་སྤྱོད་ཡུལ་ཅན། །སྐྱེ་བ་མེད་ལ་དད་མི་འགྱུར། །བྱང་ཆུབ་ལམ་ནི་དམ་པ་དང་། །
ལམ་གྱི་ཆོས་རྣམས་བཏང་བྱས་ཏེ། །བྱིས་པ་གཉིས་ལ་ཆགས་པ་སྟེ། །གཉིས་སུ་མེད་པ་མི་ཤེས་སོ། །སྒྱུ་མ་སྣ་ཚོགས་གྱུར་པ་ལ། །བྱིས་པ་རྣམས་ཀྱིས་ཐ་དད་མཐོང་། །འདི་ལ་ཐ་དད་ཡོད་མ་ཡིན། །དེ་དག་ཐམས་
ཅད་མཚན་ཉིད་ཅིག །སོ་སོའི་སྐྱེ་བོར་གང་བརྗོད་དང་། །འཇིག་རྟེན་སངས་རྒྱས་མཁས་པ་དག །མི་གཉིས་གཉིས་སུ་དབྱེར་མེད་དེ། །དེ་དག་སྒྱུ་མའི་ཚུལ་དུ་མཉམ། །བྱིས་པ་ཁ་ཅིག་སྨྲ་བ་ནི། །ནམ་ཞིག་བདག་
ཅག་འདོད་ཆགས་ཟད། །ཞེ་སྡང་གཏི་མུག་ཞི་བར་འགྱུར། །ནམ་ཞིག་ཉོན་མོངས་མེད་པར་འགྱུར། །མེད་ལ་ཡོད་པར་འདུ་ཤེས་པའི། །འདོད་ཆགས་ཞེ་སྡང་གཞིག་པའི་ཕྱིར། །གང་དག་སྟོང་པ་ཉིད་སྟོན་པ། །དེ་དག་
ཆད་པ་མྱ་ངན་འདས། །ཟད་པ་མེད་ཅིང་སྐྱེ་མེད་པར། །མྱ་ངན་འདས་པ་ཡང་དག་བསྟན། །ཟད་ཅིང་སྐྱེ་མེད་གང་བརྩོན་པ། །དེ་དག་ང་ཡི་བསྟན་ལས་རིང་། །སྦྱིན་དང་ཚུལ་ཁྲིམས་འདུ་ཤེས་དང་། །གང་དག་བྱང་ཆུབ་
འདུ་ཤེས་དགའ། །དེ་དག་མཚན་མའི་སྤྱོད་ཡུལ་བས། །ང་ཡི་བྱང་ཆུབ་དེས་མི་རྟོགས། །བྱིས་པ་མེད་པས་རྨོངས་པ་དག །ཆོས་རྣམས་གསོག་ཏུ་མི་ཤེས་ཏེ། །ཆོས་རྣམས་མཚན་ཉིད་གཅིག་པ་ལ། །དེ་དག་ཐ་དད་
འབྱེད་པར་བྱེད། །གང་གིས་ཆོས་འདི་ཤེས་པ་ནི། །ངོ་བོ་ཉིད་ཀྱིས་མཚན་མེད་པ། །སོར་མོ་ལྔ་ཡི་ལག་པ་བཞིན། །དེ་དག་བྱང་ཆུབ་རྙེད་མི་དཀའ། །བྱང་ཆུབ་གང་དང་ཡང་མི་རིང་། །གང་དང་ཡང་ནི་
ཉེ་བ་མེད། །རྟོག་དང་རྣམ་རྟོག་གང་ལྡན་པ། །དེ་དག་བྱང་ཆུབ་རབ་ཏུ་རིང་། །བྱིས་པ་ཕན་ཚུན་སྤྱོད་པ་དག །གཅིག་ལ་གཅིག་ནི་སྨོད་བྱེད་པ། །འདི་ནི་ཚུལ་ཁྲིམས་ལྡན་མ་ཡིན། །ཚུལ་ཁྲིམས་

57-1-120b

མི་ལྡན་འདི་མི་སྲུན། །ཆོས་རྣམས་རྨི་ལམ་ལྟ་བུ་སྟེ། །འདུས་བྱས་ཐམས་ཅད་ཡང་དག་མིན། །སྒྱུ་མ་བཞིན་དུ་སྐྱེ་མཐོང་ནས། །མཁས་པ་སྙིང་པོར་མི་འཛིན་ཏོ། །བདེན་པར་འདི་ལ་ཚུལ་ཁྲིམས་མེད། །ཚུལ་ཁྲིམས་
མི་ལྡན་བདེན་པར་མེད། །ཆོས་རྣམས་བརྟེན་ཏེ་བྱུང་བས་ན། །འདི་ལ་བདག་ནི་ཡོད་མ་ཡིན། །བསྐལ་པ་བྱེ་བ་སྟོང་དག་ཏུ། །སྙོམ་ལས་མེད་པར་སྦྱིན་པ་བྱིན། །ཚུལ་ཁྲིམས་དག་ནི་མཆོག་བསྲུངས་ཀྱང་། །འདྲེན་པས་ང་ནི་ལུང་
མ་བསྟན། །གང་ཚེ་ང་ནི་འདུ་ཤེས་བྲལ། །སྦྱིན་པའི་འདུ་ཤེས་མ་ལུས་དང་། །རྣམ་པར་རྟོག་པ་ཀུན་སྤངས་པ། །དེ་ཚེ་བྱང་ཆུབ་ལུང་བསྟན་ཏོ། །སྦྱིན་པས་ལོངས་སྤྱོད་འགྱུར་བར་བསྟན། །ཚུལ་ཁྲིམས་ཀྱིས་ནི་མཐོ་རིས་
བསྟན། །གང་ན་ཆུང་ཟད་མི་དམིགས་པ། །དེ་ནི་བྱང་ཆུབ་བླ་མེད་དོ། །བྱིས་པ་དམིགས་པར་གནས་པ་དག །མི་སྐྱེ་འདུས་མ་བྱས་པ་ཡི། །བཟོད་པ་བདག་གིས་ཐོབ་པོ་ཞེས། །མི་མཁས་པ་དག་རྟོག་པར་བྱེད། །ཆོས་
རྣམས་སྐྱེ་བ་མེད་པ་ལ། །གང་དག་སྐྱེ་བར་སེམས་པ་ནི། །བསྐལ་པ་བྱེ་བ་སྟོང་དུ་ཡང་། །དེ་ཡི་བཟོད་པ་རྙེད་པར་དཀའ། །ཆོས་རྣམས་མིང་གིས་ལུང་བསྟན་ཏེ། །ཆོས་རྣམས་ལ་ནི་བྱེད་པ་མེད། །རྩ་བ་མེད་ཅིང་གནས་མེད་
དེ། །ཐམས་ཅད་ནམ་མཁའི་མཚན་ཉིད་དོ། །སངས་རྒྱས་བྱེ་བ་མང་པོ་ཡིས། །འདོད་ཆགས་ཞེ་སྡང་སྤང་བའི་ཕྱིར། །ཆོས་མཆོག་དག་ཀྱང་བཤད་མོད་ཀྱི། །ཆོས་རྣམས་ཟད་པའང་ཡོང་མེད་དོ། །གལ་ཏེ་ཆོས་དེ་ཡང་
དག་ན། །ཐམས་ཅད་ཡང་དག་ཟད་པར་འགྱུར། །གང་ཕྱིར་དེ་དག་ཡང་དག་མིན། །དེ་བས་མཐའ་ནི་མི་རྙེད་དོ། །འདོད་ཆགས་ཞེ་སྡང་མཐའ་ཡས་ཏེ། །གཏི་མུག་གི་ནི་མཐའ་ཡང་མེད། །གང་དག་གི་ནི་མཐའ་མེད་པ། །
དེ་དག་གི་ནི་རྩ་བ་མེད། །ས་བོན་མྱུ་གུ་མེད་ན་ནི། །འདབ་མ་འབྲས་བུ་ག་ལ་འབྱུང་། །འདབ་མ་མེད་པ་གང་ཡིན་པ། །དེ་ལ་མེ་ཏོག་ཡོད་མ་ཡིན། །ཆོས་རྣམས་སྐྱེ་བ་མེད་པ་ལ། །སེམས་ཅན་ས་བོན་མི་རྙེད་དོ། །སེམས་

57-1-121a

ཅན་ས་བོན་མེད་པའི་ཕྱིར། །སྐྱེ་མེད་མྱ་ངན་འདའ་བ་མེད། །ཇི་ལྟར་བུད་མེད་མོ་ཤམ་དག །དེ་ལ་བུ་ནི་ཡོད་མ་ཡིན། །དེ་ལ་བུ་ནི་ཡོད་མིན་ན། །བུ་ཡི་མྱ་ངན་བྱེད་པ་མེད། །ཆོས་རྣམས་ཐམས་ཅད་མ་
སྐྱེས་པར། །དེ་ལྟར་རིག་ཅིང་མཐོང་ནས་ནི། །འཁོར་བ་དག་ཏུ་འཁོར་བ་ན། །སྡུག་བསྔལ་འཇིགས་པ་དེ་ལ་མེད། །བྱིས་པ་མེད་པས་རྨོངས་པ་དག །རྨོངས་པས་ཆོས་ཉིད་མི་ཤེས་ཏེ། །ནམ་མཁའ་ཁུར་དུ་ཐོགས་བྱས་ཏེ། །
མི་མཁས་པ་དག་སྐྱོ་བར་འགྱུར། །མེད་ཅིང་མཐའ་ཡང་མེད་པ་དང་། །གྲངས་མེད་པ་དང་ཚད་མེད་པར། །གང་གིས་ཆོས་འདི་ཤེས་པ་ནི། །དེ་དག་ལ་ནི་སྐྱོ་བ་མེད། །ཇི་ལྟར་ཐོག་མའི་མཐའ་དག་ནི། །མེད་པ་དག་ཏུ་ངས་
བསྟན་པ། །དེ་བཞིན་ཕྱི་མའི་མཐའ་དག་དང་། །དབུས་ཀྱང་མཚན་ཉིད་གཅིག་པ་ཡིན། །རྟོག་པའི་མཐའ་ནི་མཐའ་མེད་དེ། །མཐའ་ནི་གསོབ་དང་མེད་པ་ཡིན། །དོན་རྣམས་དེ་ལྟར་ཤེས་བྱས་ན། །དངོས་པོ་གཉིས་
སུ་མི་འགྱུར་རོ། །མཐའ་ནི་ནམ་མཁའི་མཚན་ཉིད་དེ། །སེམས་ཅན་མཐའ་ནི་བསམ་མི་ཁྱབ། །མཐའ་ནི་མིག་ཡོར་ལྟ་བུ་སྟེ། །དེ་བས་ཡེ་ཤེས་ཤེས་མི་འགྱུར། །རྣམ་པར་རྟོག་ལ་སྤྱོད་པ་ན། །སྡིག་པ་ཇི་ལྟར་
ཟད་པར་འགྱུར། །ནམ་ཞིག་སངས་རྒྱས་བདག་འགྱུར་ཞེས། །སེམས་ནི་དེ་ལྟར་འཇུག་པར་འགྱུར། །སངས་རྒྱས་དག་ནི་མ་སྐྱེས་པས། །དེ་དག་འབྱུང་བ་གང་ཡང་མེད། །འབྱུང་བ་མེད་པའི་ཆོས་རྣམས་ལ། །བྱིས་
པ་རྣམས་ནི་འབྱུང་བར་འདོད། །ནམ་མཁའ་ལ་ནི་རྟེན་པ་དང་། །གནས་དང་གནས་པར་བྱ་མི་ནུས། །ནམ་མཁའ་ལ་ནི་གནས་མེད་དེ། །ཐོགས་པ་མེད་ཅིང་དངོས་པོ་མེད། །ཇི་ལྟར་ནམ་མཁའ་དངོས་མེད་པ། །དེ་ལྟར་བྱང་
ཆུབ་ཤེས་པར་བྱོས། །ཇི་ལྟར་བྱང་ཆུབ་ཤེས་བྱ་བ། །དེ་ལྟར་སེམས་ཅན་ཤེས་པར་བྱོས། །ནམ་མཁའི་དབྱིངས་དང་བྱང་ཆུབ་དང་། །སེམས་ཅན་ཁམས་རྣམས་དེ་དག་མཉམ། །གང་གིས་དེ་དག་མཉམ་ཤེས་པ། །དེ་ཡིས་བྱང་ཆུབ་

57-1-121b

རྙེད་མི་དཀའ། །གང་དག་བྱང་ཆུབ་མི་བརྩོན་ཞིང་། །ཚུལ་བཞིན་དུ་ཡང་སེམས་མི་བྱེད། །ཆོས་རྣམས་ཚོལ་བར་མི་བྱེད་པ། །དེ་ཡིས་བྱང་ཆུབ་རྙེད་མི་དཀའ། །བྱང་ཆུབ་བཙལ་དུ་མེད་པ་སྟེ། །ཇི་ལྟར་ཚོལ་བ་ཐམས་ཅད་ལྟར། །སེམས་
ཀྱི་ཐོབ་པ་རྣམས་ཀྱིས་ནི། །བླ་མེད་བྱང་ཆུབ་རྟོགས་མི་ནུས། །སྦྱིན་པས་བྱང་ཆུབ་ཐོབ་སྙམ་ནས། །སྦྱིན་པའི་སེམས་པ་གང་སེམས་པ། །བྱང་ཆུབ་ཐོབ་པ་གང་ཡང་མེད། །མ་ཐོབ་པ་ནི་བྱང་ཆུབ་མཆོག །ཚུལ་ཁྲིམས་སེམས་
ལ་གང་ཆགས་དང་། །བརྩོན་འགྲུས་ཡང་དག་ཉིད་རྟོག་ཅིང་། །གང་དག་འདུ་ཤེས་འཇུག་པར་བྱེད། །ང་ཡི་བསྟན་ལ་དེ་མི་སྦྱོར། །ཆོས་ཀུན་སྦྱོར་བ་མེད་པ་ལ། །ང་ཡིས་སྦྱོར་བ་ཉེ་བསྟན་ཏེ། །ཆུང་ཟད་རྩོམ་པ་གང་མེད་པ། །
དེ་ནི་སྦྱོར་བ་བླ་མེད་པའོ། །ཆོས་འདི་རྣམས་ནི་ཟག་པ་མེད། །ཆོས་འདི་ཟག་དང་བཅས་པ་ཞེས། །གང་ལ་འདུ་ཤེས་དེ་ཡོད་པ། །དེ་ཡི་སེམས་ནི་ཚུལ་བཞིན་མིན། །གང་གིས་ཆོས་རྣམས་བསམ་ཡས་པ། །ནམ་མཁའ་འདྲ་
བ་མཐོང་བ་དང་། །མ་བཅིངས་པ་དང་མ་གྲོལ་བ། །དེ་ཡི་ཤེས་རབ་བླ་ན་མེད། །གང་ཞིག་ཚུལ་ཁྲིམས་ལྡན་པར་རྟོག །ཚུལ་ཁྲིམས་མི་ལྡན་རྣམ་རྟོག་པ། །གཉིས་ནི་ཚུལ་ཁྲིམས་ངན་པར་བཤད། །གཉིས་སུ་མེད་པ་ཚུལ་ཁྲིམས་
མཆོག །ཆོས་རྣམས་ཐ་དད་བྱ་བ་མེད། །ཁྱད་པར་མེད་ཅིང་མཚན་མེད་པར། །གང་གིས་མཐོང་ཞིང་ཤེས་པ་དག །དེ་དག་ང་ཡི་བསྟན་པ་འཛིན། །གང་གིས་སེམས་ནི་ནམ་མཁའ་ལྟར། །མ་ཆགས་བཞིན་དུ་ཕྱོགས་སུ་
འགྲོ། །དེ་ལྟར་ཡེ་ཤེས་ཆགས་མེད་པ། །དེ་ཡི་དགེ་སྦྱོང་ཡང་དག་ཉིད། །གང་གིས་ཆུང་ཟད་མ་བརྟགས་ཤིང་། །ཐམས་ཅད་དུ་ཡང་སེམས་པ་མེད། །སེམས་ཅན་མེད་ཅིང་ཆོས་མེད་པ། །དེ་དག་བྱང་ཆུབ་རྙེད་མི་དཀའ། །
འདོད་ཆགས་མཐའ་ལ་གང་མི་གནས། །འདོད་ཆགས་དང་ཡང་བྲལ་མ་གྱུར། །འདོད་ཆགས་ལས་ཀྱང་རྒྱལ་མི་བྱེད། །དེ་ནི་བྱང་ཆུབ་མི་དཀོན་ནོ། །གང་དག་བསྐལ་པར་མི་སྐྱོ་ཞིང་། །མཐས་ཀྱང་འཇིག་པར་མི་འགྱུར་ལ། །

57-1-122a

འཁོར་བས་སྐྲག་པར་མི་འགྱུར་བ། །དེས་ནི་བྱང་ཆུབ་རྙེད་མི་དཀའ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་ནས། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་
སྩལ་ཏོ། །འཇམ་དཔལ་གང་ཆོས་ཀྱི་རྣམ་གྲངས་འདི་ལ་མོས་པར་བྱེད། ཐེ་ཙོམ་དུ་མི་བྱེད། ནེམ་ནུར་དུ་མི་བྱེད། ལུང་སྦྱིན་པར་བྱེད། འཛིན་པར་བྱེད། ཀློག་པར་བྱེད། ཀུན་ཆུབ་པར་བྱེད། གཞན་ལ་ཡང་རྒྱ་ཆེར་
ཡང་དག་པར་སྟོན་པ་དེའི་ཕན་ཡོན་བསྔགས་པ་ཉི་ཤུ་ཡོད་པར་ང་བྱའོ། །ཉི་ཤུ་གང་ཞེ་ན། ལྷས་བསྲུངས་པར་འགྱུར། ཀླུས་བསྲུངས་པར་འགྱུར། གནོད་སྦྱིན་གྱིས་བསྲུངས་པར་འགྱུར། སེམས་གཡེངས་པར་མི་
འགྱུར། ཚེ་བརྗེས་ནས་ཀྱང་ཚེ་རབས་དྲན་པར་འགྱུར། མངོན་པར་ཤེས་པ་ལྔ་ཐོབ་པར་འགྱུར། ཚེ་བརྗེས་མ་ཐག་ཏུ་བྱང་ཆུབ་སེམས་དཔའ་བྱམས་པ་མཐོང་བར་འགྱུར། དེ་སྟེ་ཆོས་ཀྱི་རྣམ་གྲངས་འདི་སེམས་མི་གཡེང་བར་ཡིད་
ལ་བྱེད་ཅིང་གཉིད་ཀྱི་སྙོམ་པ་སེལ་ན། དེའི་རྨི་ལམ་དུ་སངས་རྒྱས་མཐོང་བར་འགྱུར་ཏེ། བྱང་ཆུབ་སེམས་དཔའ་མཐོང་བ་ཡང་རེ་བར་བྱའོ། །དེ་ཆོས་ཀྱི་རྣམ་གྲངས་འདི་ལ་མོས་ན་རྗེས་སུ་འཐུན་པའི་ཆོས་རྣམས་ལ་བཟོད་པ་རེ་
བར་བྱའོ། །ཆོས་ཀྱི་རྣམ་གྲངས་འདི་སེམས་ན་ཚེ་འདི་ཉིད་ལ་གནོད་སེམས་མེད་པར་རེ་བར་བྱའོ། །དུག་མྱུར་བའི་ནང་ན་འདུག་ན་ཡང་ཆོས་ཀྱི་རྣམ་གྲངས་འདི་ཡིད་ལ་བྱེད་ན་འཇིགས་པ་མེད་པར་རིག་པར་བྱའོ། །སླར་རྒོལ་
བ་ཚར་གཅོད་པར་རེ་བར་བྱའོ། །ཀུན་ཏུ་སྣང་བའི་ཏིང་ངེ་འཛིན་ཀྱང་ཐོབ་པར་རེ་བར་བྱའོ། །ཆོས་ཀྱི་རྣམ་གྲངས་འདི་རྟོགས་པར་བྱེད་པའི་ཚེ་ལས་ཀྱི་སྒྲིབ་པ་ཐམས་ཅད་བྱང་བར་རེ་བར་བྱའོ། །ཆོས་ཀྱི་རྣམ་གྲངས་འདི་འཆད་པ་ན་
ཡང་ཆོས་ཀྱི་སྒོ་བརྒྱ་སྟོང་དུ་མ་ཐོབ་པར་རེ་བར་བྱའོ། །བྱང་ཆུབ་ཀྱི་སེམས་མི་བརྗེད་པ་དང་། མཐའ་ཡས་འཁྱིལ་བའི་གཟུངས་ཐོབ་པར་ཡང་རེ་བར་བྱའོ། །ཆོས་ཀྱི་རྣམ་གྲངས་འདི་ཡིད་ལ་བྱེད་པ་ན་ཡང་བདུད་ཀྱིས་

57-1-122b

བསྐོར་བ་མེད་པར་རེ་བར་བྱའོ། །སངས་རྒྱས་མངོན་དུ་བཞུགས་པར་ཡང་སྐྱེ་བར་རེ་བར་བྱའོ། །སྨོན་ལམ་ཐམས་ཅད་གྲུབ་པར་ཡང་རེ་བར་བྱའོ། །སྲོག་ཆགས་ཀྱི་རིགས་རྐང་པ་མེད་པ་དང་། རྐང་གཉིས་པ་དང་། རྐང་
བཞི་པ་དང་། རྐང་པ་མང་པོ་དུག་ཅན་རྣམས་ལས་བསྲུངས་པར་རེ་བར་བྱའོ། །དེ་ལ་མིའི་རྒྱལ་པོ་འཁྲུགས་པའི་འཇིགས་པ་མེད་པར་རེ་བར་བྱ་སྟེ། འཇམ་དཔལ་གང་སེམས་ལ་ཐེ་ཚོམ་མེད་པ་དང་། ནེམ་ནུར་མེད་པར་ཆོས་
ཀྱི་རྣམ་གྲངས་འདི་འཛིན་པར་བྱེད། འཆང་བར་བྱེད། ཀློག་པར་བྱེད། ཀུན་ཆུབ་པར་བྱེད། གཞན་ལ་ཡང་རྒྱས་པར་ཡང་དག་པར་སྟོན་པའི་ཆོས་སྨྲ་བ་དེ་ལ་ཡོན་ཏན་བསྔགས་པ་ཉི་ཤུ་པོ་འདི་རྣམས་ཡོད་པར་རེ་བར་བྱའོ། །
དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་གསོལ་ཏོ། །བཅོམ་ལྡན་འདས་འདི་ལྟ་སྟེ། དཔེར་ན་སྨན་གྱི་ཤིང་ཐམས་ཅད་ནི་སེམས་ཅན་རྣམས་ཀྱི་ནད་ཐམས་ཅད་ཞི་བར་བགྱིད་དོ། །དེ་བཞིན་དུ་
ཆོས་ཀྱི་རྣམ་གྲངས་འདི་ཡང་ནད་ཐམས་ཅད་རབ་ཏུ་ཞི་བར་བགྱིད་པར་བལྟ་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །འཇམ་དཔལ་དེ་དེ་བཞིན་ཏེ། ཁྱོད་ཀྱིས་ཚིག་འདི་ལེགས་པར་སྨྲས་སོ། །
ཆོས་ཀྱི་རྣམ་གྲངས་འདི་ནད་ཐམས་ཅད་རབ་ཏུ་ཞི་བར་བྱེད་པའོ། །དེ་ཅིའི་ཕྱིར་ཞེ་ན། འཇམ་དཔལ་སྔོན་འདས་པའི་དུས་བསྐལ་པ་གྲངས་མེད་ཅིང་ཤིན་ཏུ་གྲངས་མེད་པ་དེའི་ཚེ་དེའི་དུས་ན། གང་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་སེང་གེའི་སྟབས་སུ་འགྲོ་བ་ཞེས་བྱ་བ་ཞིག་འཇིག་རྟེན་དུ་བྱུང་བར་གྱུར་ཏེ། དེས་སྲོག་ཆགས་སྟོང་ཕྲག་དུ་མ་རྣམས་ལ་རྒྱང་རིང་པོ་ནས་ཆོས་ཀྱི་རྣམ་གྲངས་འདི་བཤད་དོ། །དེའི་ཚེ་འཁོར་དེར་
བྱང་ཆུབ་སེམས་དཔའ་རྡོ་རྗེའི་རྒྱལ་མཚན་ཞེས་བྱ་བ་འདུས་ཏེ་འདུས་པར་གྱུར་ཏོ། །དེས་དེ་བཞིན་གཤེགས་པ་དེ་ལས་ཆོས་ཀྱི་རྣམ་གྲངས་འདི་མཉན་ཏོ། །དེས་སེམས་གཡེང་བ་མེད་པ་དང་། ཐེ་ཙོམ་མེད་པ་དང་། ནེམ་ནུར་མེད་

57-1-123a

པས་ཆོས་ཀྱི་རྣམ་གྲངས་འདི་ཡོན་ཏན་བསྔགས་པ་དང་བཅས་པར་བཟུང་ཞིང་ཀུན་ཆུབ་པར་བྱས་ཏེ། ཀུན་ཆུབ་པར་བྱས་ནས་ཀྱང་མོས་པའི་མཐུ་དང་ལྡན་པར་གྱུར་ཏེ། གྲོང་དང་གྲོང་ཁྱེར་དང་། ལྗོངས་དང་། ཡུལ་
དང་ཡུལ་འཁོར་དང་། ཕོ་བྲང་འཁོར་དུ་འོངས་ནས་བདག་ནི་སྨན་པའོ། །བདག་ནི་སྨན་པའོ་ཞེས་བདག་ཉིད་ཁས་འཆེའོ། །དེ་ནས་དེ་མ་ཐག་ཏུ་སྲོག་ཆགས་ནད་སྣ་ཚོགས་ཀྱིས་གཟིར་བ་སྟོང་ཕྲག་དུ་མ་སྲོག་གི་སྐྱབས་ཀྱི་
ཕྱིར་བྱང་ཆུབ་སེམས་དཔའ་རྡོ་རྗེའི་རྒྱལ་མཚན་ག་ལ་བ་དེར་ལྷགས་སོ། །དེ་ནས་བྱང་ཆུབ་སེམས་དཔའ་རྡོ་རྗེའི་རྒྱལ་མཚན་མོས་པའི་མཐུ་ལ་གནས་པའི་སེམས་ཀྱིས་སེམས་ཅན་དེ་དག་ལ་ཆོས་ཀྱི་གཞུང་འདིས་བྲིམས་སོ། །
ཆོས་ཀྱི་རྣམ་གྲངས་འདི་ལས་གང་རིག་སྔགས་འབྱུང་བ་དེ་དག་གིས་ཀྱང་བསྲུང་བ་དང་། བསྐྱབས་པ་དང་། ཡོངས་སུ་བཟུང་བར་བྱས་སོ། །འཇམ་དཔལ་དེ་ལ་རིག་སྔགས་ཀྱི་ཚིག་དེ་དག་ཀྱང་གང་ཞེ་ན། ཏད་ཡ་ཐཱ། 
ཨ་ལ་ཏ། བི་ཏཱ་ལ། བི་བི་ན། ཨ་ཏིཪྠ། ཨ་བྷྲི་ད། ཨ་ནུ་ཌ། བི་བྲམྷ།  ན་ཧི་ཁ་ག་རུ་ད། མཱ་ཡཱ་སུ་ཁ། ཨཱ་ནཱན་ཏ། ཛ་ལ་ད། ན་ད་མི་ཏྲ། ཨ་མི་ཏྲ། ཛོ་ཏྲ་ཧྲི་ཏ། སརྦ་ཏྲ་ལ། ཨྃ་ག་མྃ་ག་ཨརྠ་ཡུ་ཏ། ས་བྲམྷ་ཨི་ཤ །རིག་
སྔགས་ཀྱི་ཚིག་འདི་རྣམས་ཀྱིས་སེམས་ཅན་དེ་དག་བསྲུང་བ་བྱས་སོ། །དེས་གལ་ཏེ་གདུག་པས་ཟོས་པའམ། གལ་ཏེ་མི་མ་ཡིན་པས་གཙེས་པའམ། སྲོག་ཆགས་ཀྱི་རིགས་དུག་ཅན་གང་ཡང་རུང་བ་འགའ་ཞིག་གིས་ཟིན་པ་
འམ་གལ་ཏེ་ནད་སྐེམ་པ་དང་། མཛེ་བྱུང་བ་འམ། གལ་ཏེ་རླུང་དང་། མཁྲིས་པ་དང་། བད་ཀན་དང་འདུས་པའི་ནད་ཀྱིས་བཏབ་པ། ནད་སྣ་ཚོགས་ཀྱིས་རབ་ཏུ་གཟིར་བའི་སེམས་ཅན་དེ་དག་ནད་དེ་དང་དེ་དག་ལས་རབ་ཏུ་ཐར་
བར་བྱས་སོ། །འཇམ་དཔལ་དེ་ལྟར་ན་བྱང་ཆུབ་སེམས་དཔའ་རྡོ་རྗེའི་རྒྱལ་མཚན་གྱིས་ཆོས་ཀྱི་རྣམ་གྲངས་འདི་ལ་གནས་ནས་སེམས་ཅན་དེ་རྣམས་ནད་ལས་རབ་ཏུ་ཐར་བར་བྱས་སོ། །འཇམ་དཔལ་ཁྱོད་ཇི་སྙམ་དུ་སེམས། 

57-1-123b

དེའི་ཚེ་དེའི་དུས་ན་བྱང་ཆུབ་སེམས་དཔའ་རྡོ་རྗེའི་རྒྱལ་མཚན་ཞེས་བྱ་བ་དེ་གཞན་ཡིན་པ་སྙམ་དུ་སེམས་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེའི་ཚེ་དེའི་དུས་ན་ང་ཉིད་བྱང་ཆུབ་སེམས་དཔའ་རྡོ་རྗེའི་རྒྱལ་མཚན་ཞེས་བྱ་བར་གྱུར་
ཏེ། ངས་ཆོས་ཀྱི་རྣམ་གྲངས་འདི་ལ་མོས་ནས་སེམས་ཅན་དེ་སྙེད་ཀྱི་དོན་བྱས་སོ། །འཇམ་དཔལ་རྣམ་གྲངས་དེས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ། སྨན་ཐམས་ཅད་ཀྱི་ཁ་བ་ཇི་ལྟ་བ་དེ་བཞིན་དུ་ཆོས་ཀྱི་རྣམ་གྲངས་
འདི་ལ་བལྟ་བར་བྱའོ། །འཇམ་དཔལ་གྱིས་གསོལ་པ། བཅོམ་ལྡན་འདས་བྱང་ཆུབ་སེམས་དཔའ་རིག་སྔགས་ཀྱི་ཚིག་འདི་རྣམས་འཛིན་ཅིང་འཆང་བ་དང་། ཀུན་ཆུབ་པར་བགྱིད་པས་ཇི་ལྟ་བུར་ཀུན་དུ་སྤྱད་པར་བགྱི། 
བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་རིག་སྔགས་འདི་དག་འདོན་པའི་བྱང་ཆུབ་སེམས་དཔས་གཙང་སྦྲ་བྱ་བ་དང་། ཤ་མི་བཟའ་བར་ཀུན་དུ་སྤྱད་པར་བྱའོ། །དེས་རྐང་པ་གཉིས་ཀྱང་མི་བསྐུའོ། །
འདུ་འཛིའི་ནང་ན་གནས་པར་མི་བྱའོ། །སེམས་ཅན་ཐམས་ཅད་ལ་ཡང་ཕྱི་ཕྱིར་ཞིང་བྱམས་པའི་སེམས་སུ་བྱའོ། །གང་དག་ལས་འཚེ་བ་འོང་བར་འགྱུར་བ་དེ་དག་ལ་སེམས་གདུག་པར་མི་བྱའོ། །ཆོས་ཀྱི་རྣམ་གྲངས་
འདི་ཡང་གཙང་སྦྲ་མ་ཕྱེད་པས་ཁ་ཏོན་མི་བྱའོ། །ས་ཕྱོགས་མི་གཙང་བར་གཞག་པར་མི་བྱའོ། །འཇམ་དཔལ་གྱིས་གསོལ་པ། བཅོམ་ལྡན་འདས་བདག་ནི་འདི་སྙམ་བགྱིད་དེ། ཆོས་ཀྱི་རྣམ་གྲངས་འདི་སྟོན་པའི་
བྱང་ཆུབ་སེམས་དཔས་བདག་གི་ལུས་དང་སྲོག་ལ་མི་ལྟ་བར་བགྱིའོ་སྙམ་དུ་སེམས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཇི་སྐད་ཟེར་བ་དེ་བཞིན་ནོ། །དེ་ནས་
བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཆོས་ཀྱི་རྣམ་གྲངས་འདི་སྐྱེ་བོ་མང་པོའི་དོན་བྱེད་པར་འགྱུར་གྱིས། ཀུན་དགའ་བོ་ཁྱོད་ཀྱིས་ཟུང་ཤིག །ཀུན་དགའ་བོ་སེམས་ཅན་གང་ཆོས་ཀྱི་

57-1-124a

རྣམ་གྲངས་འདི་ལ་མོས་པ་དེ་དག་གླང་པོའི་རྩལ་དང་། གླང་པོ་ཆེན་པོའི་རྩལ་གྱིས་གནོན་པར་འགྱུར། ཀུན་དགའ་བོ་གང་ཆོས་ཀྱི་རྣམ་གྲངས་འདི་ལ་མོས་པ་དེ་དག་སེང་གེའི་འགྲོས་དང་། ཁྱུ་མཆོག་གི་འགྲོས་སུ་འགྲོ་
བར་འགྱུར་རོ། །ཀུན་དགའ་བོ་ཆོས་ཀྱི་རྣམ་གྲངས་འདི་བྱང་ཆུབ་སེམས་དཔའ་རྣམས་རབ་ཏུ་དགའ་བ་དང་། བྱང་ཆུབ་སེམས་དཔའ་འབྱུང་བར་བྱེད་པར་འགྱུར་རོ། །ང་འདས་པའི་ཕྱི་ན་བྱང་ཆུབ་སེམས་དཔའི་ལག་ཏུ་འོང་བར་འགྱུར་
རོ། །བྱང་ཆུབ་སེམས་དཔའི་གླེགས་བམ་དུ་འོང་བ་དང་། བྱང་ཆུབ་སེམས་དཔའི་སྒྲོམ་དུ་འོང་བར་འགྱུར་རོ། །བྱང་ཆུབ་སེམས་དཔའ་གདོལ་པ་རྣམས་ཀྱི་ལག་ཏུ་འོང་བར་མི་འགྱུར། གླེགས་བམ་དུ་འོང་བ་དང་། སྒྲོམ་དུ་
འོང་བར་མི་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་དེ་བཞིན་གཤེགས་པས་ཇི་སྐད་བཤད་པ་བཞིན་དུ་བདག་གིས་གཟུང་
ངོ་། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་འདི་ཇི་ལྟར་ཟིན་པ་བཞིན་དུ་གང་དག་ལ་བྱིན་པའི་སེམས་ཅན་དེ་དག་ལ་ཁྱོད་སྟོན་པའི་བྱ་བ་བྱེད་པ་ལེགས་སོ། །ལེགས་སོ། །བཅོམ་ལྡན་འདས་
ཀྱིས་དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་ཀུན་དགའ་བོ་དང་། ཚེ་དང་ལྡན་པ་ཤཱ་རིའི་བུ་དང་། འཇམ་དཔལ་གཞོན་ནུར་གྱུར་པ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་རྣམས་ཡིད་
དགའ་སྟེ། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་དོ། །གླང་པོའི་རྩལ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། ༄༅། །རྒྱ་གར་སྐད་དུ། ཨཱརྱ་མ་
ཧཱ་ར་ཎ་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ།  འཕགས་པ་སྒྲ་ཆེན་པོ་ཞེས་བྱ་བ་ཐེག་པ་ཆེན་པོའི་མདོ།  སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་

57-1-124b

ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་གི་དགེ་འདུན་མང་པོ་དང་ཐབས་གཅིག་ཏུ་བཞུགས་སོ། །དེ་ནས་ཚེ་དང་ལྡན་པ་ཀུན་དགའ་བོ་སྔ་དྲོ་ཤམ་ཐབས་དང་ཆོས་
གོས་བགོས་ཏེ། ལྷུང་བཟེད་ཐོགས་ནས་མཉན་ཡོད་དུ་བསོད་སྙོམས་ལ་སོང་ངོ་། །མཉན་ཡོད་དུ་བསོད་སྙོམས་ལ་འགྲོ་བ་ན། ཚེ་དང་ལྡན་པ་ཀུན་དགའ་བོས་ཁང་པ་བརྩེགས་པ་ཆེན་པོ་ཕྱི་ནང་བྱུགས་ཤིང་བྱི་དོར་བྱས་པ། སྒོ་
གཏན་ལེགས་པར་བཅུག་པ། སྐར་ཁུང་བཅད་པ་ཞིག་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། གང་ཞིག་གིས་ཁང་པ་བརྩེགས་པ་འདི་ལྟ་བུ་ཞིག་བྱས་ཏེ་ཕྱོགས་བཞིའི་དགེ་སློང་གི་དགེ་འདུན་ལ་འབུལ་བར་བྱེད་པ་
དང་། གང་ཞིག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་ཡུངས་འབྲུ་ཙམ་མཆོད་རྟེན་གྱི་བུམ་པ་སྐྱུ་རུ་ར་ཙམ་གྱི་ནང་དུ་བཅུག་སྟེ། སྲོག་ཤིང་ཁབ་ཙམ་བཙུགས་ནས་གདུགས་རྒྱ་ཤུག་གི་ལོ་མ་
ཙམ་འདོགས་པར་བྱེད་པའམ། དེ་བཞིན་གཤེགས་པའི་སྐུ་གཟུགས་ཚོན་གང་ཙམ་ཞིག་བྱེད་ན། དེ་གཉིས་ལས་གང་བསོད་ནམས་ཆེས་མང་དུ་འཕེལ་སྙམ་མོ། །དེ་ནས་ཚེ་དང་ལྡན་པ་ཀུན་དགའ་བོ་མཉན་ཡོད་ནས་
བསོད་སྙོམས་ལས་སླར་འཁོར་ནས་ཟན་ཟོས་ཏེ་ཟས་ཕྱི་མ་སྤངས་ནས་ལྷུང་བཟེད་དང་། ཆོས་གོས་བཞག་སྟེ་རྐང་པ་བཀྲུས་ནས། བཅོམ་ལྡན་འདས་ག་ན་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་
མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་འདི་ན་བདག་སྔ་དྲོ་ཤམ་ཐབས་དང་། ཆོས་
གོས་བགོས་ཏེ་ལྷུང་བཟེད་ཐོགས་ནས་མཉན་ཡོད་དུ་བསོད་སྙོམས་ལ་མཆིས་ཏེ། བཙུན་པ་བདག་མཉན་ཡོད་དུ་བསོད་སྙོམས་ལ་མཆི་བ་ན་ཁང་པ་བརྩེགས་པ་ཆེན་པོ་སླད་ནང་བྱུགས་ཤིང་བྱི་དོར་བགྱིས་པ། སྒོ་གཏན་

57-1-125a

ལེགས་པར་སྩལ་པ། སྐར་ཁུང་བཀུམ་པ་ཞིག་མཐོང་ལགས་སོ། །མཐོང་ནས་ཀྱང་བདག་ཉིད་འདི་སྙམ་དུ་སེམས་ཏེ། གང་ཞིག་གིས་ཁང་པ་བརྩེགས་པ་འདི་ལྟ་བུ་ཞིག་བགྱིས་ཏེ་ཕྱོགས་བཞིའི་དགེ་སློང་གི་
དགེ་འདུན་ལ་དབུལ་བར་བགྱིད་པ་དང་། གང་ཞིག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་ཡུངས་འབྲུ་ཙམ་མཆོད་རྟེན་གྱི་བུམ་པ་སྐྱུ་རུ་ར་ཙམ་གྱི་ནང་དུ་སྩལ་ཏེ། སྲོག་ཤིང་ཁབ་ཙམ་བཙུགས་
ནས་གདུགས་རྒྱ་ཤུག་གི་ལོ་མ་ཙམ་འདོགས་པར་བགྱིད་པ་འམ། དེ་བཞིན་གཤེགས་པའི་སྐུ་གཟུགས་ཚོན་གང་བ་ཙམ་ཞིག་བགྱིད་ན། དེ་གཉིས་ལས་གང་བསོད་ནམས་ཆེས་མང་དུ་འཕེལ་སྙམ་བགྱིད་ལགས་ཏེ། 
བཅོམ་ལྡན་འདས་ལ་བདག་དོན་འདི་ཡོངས་སུ་ཞུ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ལེགས་སོ་ལེགས་སོ། །
ཀུན་དགའ་བོ་ཁྱོད་གང་ཞིག་གིས་ཁང་པ་བརྩེགས་པ་དེ་ལྟ་བུ་ཞིག་བྱས་ཏེ་ཕྱོགས་བཞིའི་དགེ་སློང་གི་དགེ་འདུན་ལ་དབུལ་བར་བྱེད་ལ། གང་ཞིག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་
ཡུངས་འབྲུ་ཙམ་མཆོད་རྟེན་གྱི་བུམ་པ་སྐྱུ་རུ་ར་ཙམ་གྱི་ནང་དུ་བཅུག་སྟེ། སྲོག་ཤིང་ཁབ་ཙམ་བཙུགས་ནས་གདུགས་རྒྱ་ཤུག་གི་ལོ་མ་ཙམ་འདོགས་པར་བྱེད་པའི། དེ་བཞིན་གཤེགས་པའི་སྐུ་གཟུགས་ཚོན་གང་ཙམ་ཞིག་
བྱེད་ན། དེ་གཉིས་ལས་གང་བསོད་ནམས་ཆེས་མང་དུ་འཕེལ་ཞེས་པ་ནི་ཁྱོད་ཀྱི་ཞུ་བ་བཟང་ལ་སྤོབས་པ་ལེགས་ཏེ་དཔྱོད་པ་དགེའོ། །ཀུན་དགའ་བོ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །
ཀུན་དགའ་བོ་གང་ཞིག་གིས་ཁང་པ་བརྩེགས་པ་དེ་ལྟ་བུ་ཞིག་བྱས་ནས་ཕྱོགས་བཞིའི་དགེ་སློང་གི་དགེ་འདུན་ལ་དབུལ་བར་བྱེད་ལ། གང་ཞིག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་ཡུངས་འབྲུ་

57-1-125b

ཙམ་མཆོད་རྟེན་གྱི་བུམ་པ་སྐྱུ་རུ་ར་ཙམ་གྱི་ནང་དུ་བཅུག་སྟེ། སྲོག་ཤིང་ཁབ་ཙམ་བཙུགས་ནས་གདུགས་རྒྱ་ཤུག་གི་ལོ་མ་ཙམ་འདོགས་པར་བྱེད་པའམ། དེ་བཞིན་གཤེགས་པའི་སྐུ་གཟུགས་ཚོན་གང་ཙམ་ཞིག་བྱེད་ན། ཀུན་
དགའ་བོ་བསོད་ནམས་འདི་ལ་བསོད་ནམས་སྔ་མ་དེས་བརྒྱའི་ཆར་ཡང་ཉེ་བར་མི་འགྲོ། །སྟོང་གི་ཆ་དང་། འབུམ་གྱི་ཆ་དང་། གྲངས་དང་། ཆ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་དཔག་ཏུ་མེད་པའི་ཆོས་འདི་ལྟ་བུ་དག་དང་ལྡན་ཏེ། ཚུལ་ཁྲིམས་དཔག་ཏུ་མེད་པ་དང་། ཏིང་ངེ་འཛིན་དཔག་ཏུ་མེད་པ་དང་། ཤེས་རབ་དཔག་ཏུ་མེད་པ་དང་། རྣམ་
པར་གྲོལ་བ་དཔག་ཏུ་མེད་པ་དང་། རྣམ་པར་གྲོལ་བའི་ཡེ་ཤེས་གཟིགས་པ་དཔག་ཏུ་མེད་པ་དང་ལྡན་པའི་ཕྱིར་རོ། །ཀུན་དགའ་བོ་འཛམ་བུའི་གླིང་ཆུ་ཞེང་དང་རྒྱར་དཔག་ཚད་བདུན་སྟོང་ཡོད་པ་འདི་རྒྱུན་དུ་ཞུགས་པ་རྣམས་དང་། 
ལན་ཅིག་ཕྱིར་འོང་བ་རྣམས་དང་། ཕྱིར་མི་འོང་བ་རྣམས་དང་། དགྲ་བཅོམ་པ་རྣམས་དང་། རང་སངས་རྒྱས་རྣམས་ཀྱིས་འདི་ལྟ་སྟེ། འབྲས་སཱ་ལུའི་ཞིང་ངམ། ཏིལ་གྱི་ཞིང་ངམ། སྨྱིག་མའི་ཚལ་ལམ། འདམ་བུའི་ཚལ་ལམ། 
བུ་རམ་ཤིང་གི་ཚལ་བཞིན་དུ་གང་བར་གྱུར་པ་དེ་དག་ལ། མི་ལ་ལ་ཞིག་གིས་ཇི་སྲིད་འཚོའི་བར་དུ་ཆོས་གོས་དང་བསོད་སྙོམས་དང་། མལ་སྟན་དང་། ནད་ཀྱི་གསོས་སྨན་དང་། ཡོ་བྱད་རྣམས་ཀྱིས་ཅི་འདོད་པ་བསྟབས་ཏེ། 
དེ་དག་ཐམས་ཅད་ཡོངས་སུ་མྱ་ངན་ལས་འདས་ནས་ཀྱང་མཆོད་རྟེན་བྱས་ཏེ། གདུགས་དང་། སིལ་སྙན་དང་། བ་དན་དང་། དྲི་དང་། བདུག་པ་དང་། ཕྲེང་བ་དང་། ཕྱེ་མ་དང་། བྱུག་པ་དག་གིས་མཆོད་པ་བྱེད་ལ། གང་ཞིག་
གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་ཡུངས་འབྲུ་ཙམ་མཆོད་རྟེན་གྱི་བུམ་པ་སྐྱུ་རུ་ར་ཙམ་གྱི་ནང་དུ་བཅུག་སྟེ། སྲོག་ཤིང་ཁབ་ཙམ་བཙུགས་ནས་གདུགས་རྒྱ་ཤུག་གི་ལོ་མ་ཙམ་འདོགས་

57-1-126a

པར་བྱེད་པའམ། དེ་བཞིན་གཤེགས་པའི་སྐུ་གཟུགས་ཚོན་གང་ཙམ་ཞིག་བྱེད་ན། ཀུན་དགའ་བོ་བསོད་ནམས་འདི་ལ་བསོད་ནམས་སྔ་མ་དེས་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆ་དང་། འབུམ་
གྱི་ཆ་དང་། གྲངས་དང་། ཆ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་དཔག་ཏུ་མེད་པའི་ཆོས་འདི་ལྟ་བུ་
དག་དང་ལྡན་ཏེ། ཚུལ་ཁྲིམས་དཔག་ཏུ་མེད་པ་དང་། ཏིང་ངེ་འཛིན་དཔག་ཏུ་མེད་པ་དང་། ཤེས་རབ་དཔག་ཏུ་མེད་པ་དང་། རྣམ་པར་གྲོལ་བ་དཔག་ཏུ་མེད་པ་དང་། རྣམ་པར་གྲོལ་བའི་ཡེ་ཤེས་གཟིགས་པ་དཔག་ཏུ་མེད་
པ་དང་ལྡན་པའི་ཕྱིར་རོ། །ཀུན་དགའ་བོ་ཤར་གྱི་ལུས་འཕགས་གླིང་ཆུ་ཞེང་དང་རྒྱར་དཔག་ཚད་བརྒྱད་སྟོང་ཡོད་པ་རྒྱུན་དུ་ཞུགས་པ་རྣམས་ཀྱིས་ཀྱང་གང་བར་གྱུར་ཅེས་བྱ་བ་ནས་རྣམ་པར་གྲོལ་བའི་ཡེ་ཤེས་གཟིགས་པ་ཞེས་
བྱ་བའི་བར་དུ་རྒྱ་ཆེར་སྔ་མ་བཞིན་དུ་བརྗོད་པར་བྱའོ། །ཀུན་དགའ་བོ་ནུབ་ཀྱི་བ་ལང་སྤྱོད་ཀྱི་གླིང་ཆུ་ཞེང་དང་རྒྱར་དཔག་ཚད་དགུ་སྟོང་ཡོད་པ་རྒྱུན་དུ་ཞུགས་པ་རྣམས་ཀྱིས་ཀྱང་གང་བར་གྱུར་ཅེས་བྱ་བ་ནས་སྔ་མ་བཞིན་དུ་
རྒྱས་པར་སྦྱར་རོ། །ཀུན་དགའ་བོ་བྱང་གི་སྒྲ་མི་སྙན་གྱི་གླིང་ཆུ་ཞེང་དུ་དཔག་ཚད་ཁྲི་ཡོད་པ་རྒྱུན་དུ་ཞུགས་པ་རྣམས་ཀྱིས་ཀྱང་གང་བར་གྱུར་ཅེས་བྱ་བ་ནས་སྔ་མ་བཞིན་དུ་རྒྱས་པར་སྦྱར་རོ། །ཀུན་དགའ་བོ་ལྷའི་དབང་
པོ་བརྒྱ་བྱིན་གྱི་ཁང་བཟངས་རྣམ་པར་རྒྱལ་བ་ཞེས་བྱ་བ་ཀ་བ་བརྒྱད་ཁྲི་བཞི་སྟོང་རབ་ཏུ་བརྟན་པ་དག་ཡོད་དེ། ཀ་བ་དེ་དག་ཐམས་ཅད་ཀྱང་ལྷའི་བཻ་དཱུརྱ་སྔོན་པོ་ཡིན་ནོ། །ཀུན་དགའ་བོ་ཁང་བཟངས་རྣམ་པར་རྒྱལ་བ་
གསེར་གྱི་བྱེ་མ་བདལ་བ་ལ་ཙན་དན་གྱི་ཆུས་ཆག་ཆག་བཏབ་པ། གསེར་གྱི་དྲ་བས་གཡོགས་ཤིང་གསེར་གྱི་དྲིལ་བུ་གཡེར་ཁས་བསྐོར་བ་སྟེ། ཀུན་དགའ་བོ་གང་ཞིག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་

57-1-126b

ཁང་བཟངས་དེ་ལྟ་བུ་ཤ་སྟག་གིས་བཀང་སྟེ། ཕྱོགས་བཞིའི་དགེ་སློང་གི་དགེ་འདུན་ལ་དབུལ་བར་བྱེད་ལ། གང་ཞིག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་སྐུ་གདུང་ཡུངས་འབྲུ་ཙམ་ཞེས་བྱ་བ་ནས་
རྒྱ་ཆེར་སྔ་མ་བཞིན་དུ་སྦྱར་རོ། །ཀུན་དགའ་བོ་ལུས་འཕགས་མོའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་ཕ་རྒྱུན་དུ་ཞུགས་པ་བསད་ནས་དེ་དེ་བཞིན་གཤེགས་པའི་སྐུ་གདུང་ལ་མཆོད་པ་བྱ་བའི་ཕྱིར་སྐུ་གདུང་གི་བརྒྱད་
ཆ་ལ་བཀུར་སྟིར་བྱ་བ་དེ། བླ་མར་བྱ་བ་དང་། རི་མོར་བྱ་བ་དང་། མཆོད་པར་བྱ་བ་དང་། རྗེད་པར་བྱ་བ་དང་། གསོལ་བར་བྱ་བ་ལ་བརྩོན་པར་འགྱུར་རོ་ཞེས་སངས་རྒྱས་ཀྱིས་བསྔགས་པའི་དགེ་བའི་ལས་དེ་དེས་བྱས་པས་
སེམས་ཅན་དམྱལ་བར་ལན་ཅིག་སོང་ནས་ལས་དེ་ཉིད་དང་། དགེ་བའི་རྩ་བ་དེ་ཉིད་དང་། སྔོན་ལེགས་པར་སྤྱད་པ་དེ་ཉིད་ཀྱིས་དེ་ནས་ཐར་ནས་བསྐལ་པ་ཉི་ཤུར་ལོག་པར་ལྟུང་བར་མི་འགྱུར་ལ། སྐྲ་དང་ཁ་སྤུ་བྲེགས་ནས་
གོས་ངུར་སྨྲིག་བགོས་ཏེ། ཡང་དག་པར་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་རང་བྱང་ཆུབ་མངོན་དུ་བྱེད་པར་འགྱུར་ཏེ། རང་སངས་རྒྱས་རྣམ་པར་རྒྱལ་བའི་སྡེ་ཞེས་བྱ་བར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་དཔག་ཏུ་མེད་པའི་ཆོས་འདི་ལྟ་བུ་དག་དང་ལྡན་ཏེ། ཚུལ་ཁྲིམས་དཔག་ཏུ་མེད་པ་དང་། ཏིང་ངེ་འཛིན་དཔག་ཏུ་མེད་པ་དང་། ཤེས་རབ་དཔག་
ཏུ་མེད་པ་དང་། རྣམ་པར་གྲོལ་བ་དཔག་ཏུ་མེད་པ་དང་། རྣམ་པར་གྲོལ་བའི་ཡེ་ཤེས་གཟིགས་པ་དཔག་ཏུ་མེད་པ་དང་ལྡན་པའི་ཕྱིར་རོ། །ཀུན་དགའ་བོ་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་རྣམས་དཔག་ཏུ་མེད་པའི་ཆོས་རྣམས་དང་ལྡན་པ་དེའི་ཕྱིར་དེ་ལ་མཆོད་པའི་རྣམ་པར་སྨིན་པ་ཡང་དེ་ལྟར་དཔག་ཏུ་མེད་པར་ཤེས་པར་བྱའོ། །ཆོས་ཀྱི་རྣམ་གྲངས་འདི་བཤད་པའི་ཚེ་ས་ཆེན་

57-1-127a

པོ་འདི་རྣམ་པ་དྲུག་ཏུ་གཡོས་ཏེ། ཤར་ཕྱོགས་མཐོ་ན་ནུབ་ཕྱོགས་དམའ། ནུབ་ཕྱོགས་མཐོ་ན་ཤར་ཕྱོགས་དམའ། ལྷོ་ཕྱོགས་མཐོ་ན་བྱང་ཕྱོགས་དམའ། བྱང་ཕྱོགས་མཐོ་ན་ལྷོ་ཕྱོགས་དམའ། 
དབུས་མཐོ་ན་མཐའ་དམའ། མཐའ་མཐོ་ན་དབུས་དམའ་བར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། 
བདག་གིས་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་བདུད་རྩིའི་རྔ་ཞེས་བྱ་བར་ཟུང་ཤིག །སྒྲ་ཆེན་པོ་ཞེས་བྱ་བར་ཡང་ཟུང་ཤིག །དེ་ནས་ཚེ་དང་
ལྡན་པ་ཀུན་དགའ་བོ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དེ་རྗེས་སུ་ཡི་རང་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་
ལྡན་འདས་ཀྱི་སྤྱན་སྔ་ནས་སོང་ངོ་། །འཕགས་པ་སྒྲ་ཆེན་པོ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།།    །། རྒྱ་གར་གྱི་མཁན་པོ་བི་ཤུད་དྷ་སིང་ཧ་དང་། ལོ་ཙྪ་་བ་བན་དྷེ་དགེ་བ་དཔལ་
གྱིས་བསྒྱུར། རྒྱ་གར་གྱི་མཁན་པོ་བིད་དྱཱ་ཀ་ར་སིང་ཧ་དང་། ཞུ་ཆེན་གྱི་ལོ་ཙྪ་བ་བན་དྷེ་དེ་བ་ཙན་དྲས་ཞུས་ཏེ་གཏན་ལ་ཕབ་པ། ། ༄༅། །རྒྱ་གར་སྐད་དུ། ཨཱརྱ་སིང་ཧ་ནཱ་དི་ཀ་ནཱ་མ་མ་ཧཱ་ཡཱ་ན་སཱུ་ཏྲ། 
བོད་སྐད་དུ།  འཕགས་པ་སེང་གེའི་སྒྲ་བསྒྲགས་པ་ཞེས་བྱ་བ་ཐེག་པ་ཆེན་པོའི་མདོ།  སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། 
བཅོམ་ལྡན་འདས་ཉི་ཟླའི་གནས་རྣམ་པར་རྒྱལ་བྱེད་ཀྱི་ཁང་བཟངས་ཀྱི་ནང་ན་དགེ་སློང་གི་དགེ་འདུན་ཆེན་པོ་དང་། དགྲ་བཅོམ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུ་དང་ཐབས་གཅིག་ཏུ་བཞུགས་སོ། །དེའི་ཚེ་

57-1-127b

བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམ་པར་རྒྱལ་བའི་ཕུང་པོ་ལ་བཀའ་སྩལ་པ། རྣམ་པར་རྒྱལ་བའི་ཕུང་པོ་ཁྱོད་སངས་རྒྱས་ཀྱི་ཞིང་འདི་ནས་བྱང་ཕྱོགས་ལོགས་ན་གང་གཱའི་ཀླུང་དྲུག་བཅུའི་བྱེ་མ་སྙེད་
ཀྱི་སངས་རྒྱས་ཀྱི་ཞིང་རྡུལ་ཕྲ་རབ་སྙེད་འདས་པ་ན་འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་འཕགས་
ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་ཏོ། །དེ་བཞིན་གཤེགས་པ་དེ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། མཆོད་པ་བྱ་བའི་ཕྱིར་སོང་ཤིག །དེ་ནས་བྱང་ཆུབ་སེམས་དཔའ་རྣམ་
པར་རྒྱལ་བའི་ཕུང་པོ་འཇིག་རྟེན་གྱི་ཁམས་དེར་སོང་ནས། བཅོམ་ལྡན་འདས་ཆོས་འཕགས་དེའི་ཞབས་ལ་ཕྱག་འཚལ་ཏེ་ལན་བདུན་བསྐོར་བ་བྱས་ནས་ཕྱོགས་གཅིག་ཏུ་འདུག་གོ། །བྱང་ཆུབ་སེམས་དཔའ་རྣམ་པར་རྒྱལ་བའི་
ཕུང་པོ་ཕྱོགས་གཅིག་ཏུ་འདུག་པ་དང་། དེ་ནས་བཅོམ་ལྡན་འདས་དེ་བཞིན་གཤེགས་པ་ཆོས་འཕགས་དེས་བྱང་ཆུབ་སེམས་དཔའ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ག་ལས་འདིར་འོངས། དེ་ནས་བྱང་
ཆུབ་སེམས་དཔའ་རྣམ་པར་རྒྱལ་བའི་ཕུང་པོ་བཅོམ་ལྡན་འདས་ཀྱིས་བཀའ་སྩལ་པ། དེ་ལ་ཅང་མི་སྨྲ་བར་ཁ་རོག་འདུག་གོ། །དེའི་ཚེ་དེར་འཁོར་འདུས་པ་གང་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་
མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དེ་དག་འདི་སྙམ་དུ་སེམས་ཏེ། ཅིའི་ཕྱིར་བྱང་ཆུབ་སེམས་དཔའ་རྣམ་པར་རྒྱལ་བའི་ཕུང་པོ་འདི་འཇིག་རྟེན་གསུམ་གྱི་བླ་མས་བཀའ་སྩལ་པ་
ལ་ལན་མི་གསོལ་བར་ཁ་རོག་འདུག་ཞིག་གུ་སྙམ་མོ། །དེ་ནས་བཅོམ་ལྡན་འདས་ཀྱིས་དེར་སེང་གེ་བསྒྱིངས་པ་ལྟ་བུས་ཕྱོགས་བཅུར་གཟིགས་ནས་འཁོར་ཐམས་ཅད་ཐེ་ཙོམ་དུ་གྱུར་པ་ཐུགས་སུ་ཆུད་ནས་འཛུམ་པ་

57-1-128a

མཛད་དོ། །བཅོམ་ལྡན་འདས་དེ་བཞིན་གཤེགས་པ་ཆོས་འཕགས་དེ་འཛུམ་པ་མཛད་པའི་འོད་ཀྱི་སྣང་བ་གསེར་གྱི་ཁ་དོག་ལྟ་བུའི་འོད་ཟེར་བརྒྱ་སྟོང་ཕྲག་དུ་མས་ཕྱོགས་བཅུ་སྣང་བར་མཛད་དོ། །དེ་ནས་སྐད་ཅིག་དེ་
ཉིད་ལ་ས་ཆེན་པོ་གཡོས་པར་གྱུར་ཏོ། །ཕྱོགས་བཅུ་ནས་ཀྱང་བྱང་ཆུབ་སེམས་དཔའ་གཟུགས་དང་། ཁ་དོག་དང་། ཚུལ་དུ་མ་འཆང་བ་དག་བཅོམ་ལྡན་འདས་ཀྱི་ཆོ་འཕྲུལ་ཆེན་པོ་དེ་མཐོང་ནས་འཇིག་རྟེན་གྱི་ཁམས་དེར་ཐམས་ཅད་
འདུས་ཏེ། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ནས་རང་རང་གི་དགེ་བས་བསྒྲུབས་པས་འདུག་སྟེ། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་
བ་བཏུད་དེ། ངོ་མཚར་དུ་གྱུར་པ་དང་། རྨད་དུ་གྱུར་པས་འཛུམ་དམུལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་འོད་ཟེར་གྱི་ཆོ་འཕྲུལ་དུ་མ་དག་མཐོང་ལགས་ཏེ། བཅོམ་
ལྡན་འདས་བདག་ཅག་གིས་འོད་ཟེར་གྱི་སྣང་བ་འདི་ལྟ་བུ་དག་སྔོན་ནམ་ཡང་མ་མཐོང་ལགས་སོ། །བཅོམ་ལྡན་འདས་འདིའི་དོན་དེ་ནི་ལེགས་པ་ལགས་ཏེ། གང་བཅོམ་ལྡན་འདས་ཀྱིས་འཛུམ་པ་དེ་ལྟ་བུ་མཛད་པའི་དོན་
དེ་བདག་ཅག་ལ་ཐུགས་བརྩེ་བར་དགོངས་ཏེ་ལུང་བསྟན་དུ་གསོལ། དེ་ནས་བྱང་ཆུབ་སེམས་དཔའ་འོད་ཕྲེང་གིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། རྣམ་འདྲེན་གང་ཟག་མཆོག་སྟེ་ཐུགས་རྗེ་ཅན། །
རྒྱུ་མ་མཆིས་པར་འཛུམ་པ་མི་མཛད་ན། །བདག་དང་འཇིག་རྟེན་སྣང་མཛད་ཐུགས་རྗེ་ཅན། །འཛུམ་མཛད་རྒྱུ་དང་མཛད་རྒྱུ་ངེས་པར་གསུངས། །དེ་ནས་བཅོམ་ལྡན་འདས་དེ་བཞིན་གཤེགས་པ་ཆོས་འཕགས་འཛམ་བུ་
ཆུ་བོའི་གསེར་ལྟར་སྣང་ཞིང་འོད་ཟེར་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་རབ་ཏུ་འགྱེད་པ། སྐུའི་གཟུགས་དང་མདོག་གཟི་བརྗིད་ཀྱིས་འབར་བ་དེ་ལ་བྱང་ཆུབ་སེམས་དཔའ་འོད་ཕྲེང་གིས་འདི་སྐད་ཅེས་གསོལ་ཏོ། །

57-1-128b

བཅོམ་ལྡན་འདས་བདག་གིས་ཆོ་འཕྲུལ་མང་པོ་མཐོང་ལགས་ཏེ། བདག་གིས་སྔོན་འོད་ཟེར་གྱི་སྣང་བ་འདི་ལྟ་བུ་ནམས་ཀྱང་མ་མཐོང་ལགས་སོ། །འོད་ཕྲེང་ཕྱོགས་འདིར་དེ་བཞིན་གཤེགས་པའི་འོད་ཟེར་གྱི་སྣང་བ་འདི་ལྟ་
བུ་ཆུང་ངུ་ཞིག་མཛད་དེ། མཚན་མ་སྣང་བ་དེ་དག་ནི་རྒྱུ་མེད་པ་མ་ཡིན། བྱེད་རྒྱུ་མེད་པ་མ་ཡིན་ནོ། །འོད་ཕྲེང་ཁྱོད་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་དོ། །དོན་གང་གི་ཕྱིར་ངས་འཛུམ་
པ་མཛད་པ་ཐོས་ནས་ཀྱང་རིགས་ཀྱི་བུ་ཁྱོད་ཀྱིས་སྐྲག་པར་མི་བྱ། དངང་བར་མི་བྱ་དངང་བར་འགྱུར་བར་མི་བྱ་སོམ་ཉིར་མི་བྱ། ཐེ་ཙོམ་དུ་མི་བྱའོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་རྣམས་ཀྱི་ཡུལ་ནི་བསམ་གྱིས་
མི་ཁྱབ་བོ། །སྨོན་ལམ་ནི་བསམ་གྱིས་མི་ཁྱབ་བོ། །རྣམ་པར་འཕྲུལ་པ་ནི་བསམ་གྱིས་མི་ཁྱབ་བོ། །དོན་དེ་དག་ཡང་དག་པར་མཐོང་ནས་ཐེ་ཙོམ་མ་བྱེད་ཅིག །འོད་ཕྲེང་གང་འདི་ལྟར་དེ་བཞིན་གཤེགས་པ་ཤཱཀྱ་ཐུབ་པས་
ངའི་དྲུང་དུ་བྱང་ཆུབ་སེམས་དཔའ་རྣམ་པར་རྒྱལ་བའི་ཕུང་པོ་བཏང་བ་འདི་ཁྱོད་ཀྱིས་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །རིགས་ཀྱི་བུ་བྱང་ཆུབ་སེམས་
དཔའ་རྣམ་པར་རྒྱལ་བའི་ཕུང་པོ་འདི་ལ་ངས་ཁྱོད་ག་ལས་འོངས་ཤེས་དེ་སྐད་དྲིས་ན། དེ་ཅང་མི་སྨྲ་བར་ཁ་རོག་འདུག་སྟེ། རིགས་ཀྱི་བུ་ངས་དོན་གྱི་དབང་འདི་མཐོང་ནས་འདིར་འཛུམ་པ་མཛད་དོ། །དེ་བཞིན་གཤེགས་པས་
རྨས་པའི་ལན་དེ་ཅིའི་ཕྱིར་འདིས་མ་གསོལ་སྙམ་དུ་འཁོར་འདི་དག་ཐམས་ཅད་ཐེ་ཙོམ་དུ་གྱུར་ཏོ། །རིགས་ཀྱི་བུ་ངས་རྨས་པའི་ལན་སྐྱེས་བུ་དམ་པ་འདིས་ཅིའི་ཕྱིར་མ་གསོལ་ཅེ་ན། འོང་བ་དང་འགྲོ་བ་མེད་པའི་ཆོས་རྣམས་
ལ། བཅོམ་ལྡན་འདས་བདག་ལ་ཁྱོད་ག་ལས་འོངས་ཞེས་འོང་བ་རྨེད་པར་མཛད་དོ་སྙམ་མོ། །ཆོས་ཐམས་ཅད་བརྗོད་དུ་མ་མཆིས་པར་ཡང་གློ་བར་ཆུད་ན། བཅོམ་ལྡན་འདས་ག་ལས་འོངས་ཤེས་བྱུང་བའི་གནས་ལ་བདག་

57-1-129a

གིས་གསོལ་བར་སྤྲོ་བ་མ་མཆིས་སོ་སྙམ་དུ་སེམས་ཏེ། རིགས་ཀྱི་བུ་མདོར་ན་རིགས་ཀྱི་བུ་འདིས་ཆོས་ཐམས་ཅད་བསྟན་ཏེ། ཡང་དག་པའི་ཆོས་སྟོན་པ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་རྣམ་
པར་རྒྱལ་བའི་ཕུང་པོས་ཡི་གེ་མེད་པའི་ཆོས་དང་། ཚིག་མེད་པ་དང་། བརྗོད་ཏུ་མེད་པ་དང་། ཡི་གེ་དང་བྲལ་བ་དང་། མཚན་མ་མེད་པ་དང་། མཚན་མ་དང་བྲལ་བ་དང་། བླང་བ་མེད་པ་དང་། བླང་བ་དང་བྲལ་བ་དང་། འོང་བ་མེད་པ་
དང་། མཐོང་བ་མེད་པ་དང་། གནས་པ་མེད་པ་དང་། སེམས་དང་ཡིད་དང་། རྣམ་པར་ཤེས་པ་དང་བྲལ་བ་དང་། རྒྱུ་རྐྱེན་དང་བྲལ་བ་དང་། ཚིག་མེད་པ་དང་། རྣམ་པར་རིག་པ་མེད་པ་དང་། ལྟ་བ་མེད་པ་དང་། ཐེར་ཟུག་ཏུ་གནས་པ་
མེད་པ་དང་། ཚིག་གིས་བརྗོད་དུ་མེད་པ་དང་། བརྡ་མེད་པ་དང་། ཡི་གེ་གཅིག་ལ་འདི་ལྟ་སྟེ། ཡང་དག་པ་མ་ཡིན་པ་དང་། བསགས་པ་མེད་པའི་གནས་པ་དང་། ཡི་གེ་མེད་པ་དང་། གདུལ་བ་མེད་པ་རྣམས་ལ་སུ་ཞིག་སྟོན་
སྙམ་དུ་ཤེས་ནས་རིགས་ཀྱི་བུ་བསྟན་པ་མེད་པ་འདིར་བསྟན་ཏོ། །དེ་ནས་བཅོམ་ལྡན་འདས་ཀྱི་མཐུས་བྱང་ཆུབ་སེམས་དཔའ་ལུས་འོད་གསལ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་
ཏེ་ཆོས་ཐམས་ཅད་བསྟན་དུ་མ་མཆིས་པ་ལགས་ན་ཆོས་དེ་དག་ཐམས་ཅད་ལྐུག་པས་བསྟན་པར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཇི་སྐད་སྨྲས་པ་དེ་བཞིན་ཏེ། ལྐུག་པ་འབའ་ཤིག་
གིས་མ་ཡིན་གྱི། སེམས་ཅན་ཐམས་ཅད་ཀྱང་མི་ཤེས་བཞིན་དུ་ཆོས་སྟོན་པར་བྱེད་དོ། །གསོལ་པ། བཅོམ་ལྡན་འདས་ཇི་ལྟར་སེམས་ཅན་ཐམས་ཅད་མ་འཚལ་བཞིན་དུ་ཆོས་སྟོན་པ་དེ་བཤད་དུ་གསོལ། བདེ་བར་གཤེགས་
པ་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལུས་འོད་གསལ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་འདི་ལྟ་སྟེ། དཔེར་ན་དམུས་ལོང་དག་ཉི་མ་ཤར་ཀྱང་གཟུགས་

57-1-129b

མཐོང་བར་མི་འགྱུར་ཞིང་ཉི་མའི་འོད་ཅི་འདྲ་བ་ཡང་མི་ཤེས་ཏེ། ཇི་ལྟར་གཞན་དག་གིས་ཉི་མའི་མཚན་ཉིད་འདི་ལྟ་བུ་ཞིག་ཡིན་ནོ་ཞེས་བསྟན་པ་དང་། དེ་ལྟར་གཞན་གྱི་སྒྲ་ལས་ཉི་མ་ཡིན་པར་མངོན་པར་ཞེན་ཏོ། །རིགས་ཀྱི་བུ་དེ་
བཞིན་དུ་ཆོས་ཐམས་ཅད་ནང་དུ་འདུས་ཤིང་དབྱིངས་ཀྱི་ནང་དུ་འདུས་ཏེ། དབྱིངས་མེད་ཅིང་ཡི་གེ་མེད་པ། ཡི་གེ་དང་བྲལ་བ། ཆོས་ཐམས་ཅད་བརྗོད་ཏུ་མེད་པ་ཡིན་ན་རྐྱེན་གྱི་དབང་གིས་སྒྲ་འབྱུང་བར་འགྱུར་རོ། །རིགས་
ཀྱི་བུ་འདི་ལྟ་སྟེ། དཔེར་ན་རི་བྲག་དང་སྒྲ་ལ་བརྟེན་ནས་བྲག་ཆའི་སྒྲ་འབྱུང་ཡང་རིགས་ཀྱི་བུ་རི་བྲག་གི་སྒྲ་ནི་སྟོང་པ་ཡིན་ནོ། །རིགས་ཀྱི་བུ་དེ་བཞིན་དུ་རྐྱེན་ལ་བརྟེན་ནས་ཡི་གེའི་སྒྲ་འབྱུང་བར་འགྱུར་ཏེ། ཡི་གེའི་སྒྲ་ནི་སྟོང་
པ་ཡིན་ནོ། །རིགས་ཀྱི་བུ་སེམས་ཅན་གང་དག་བརྗོད་པ་དེ་ཐམས་ཅད་སོ་སོ་ཡང་དག་པར་རིག་པའི་ནང་དུ་འདུས་པར་བལྟ་སྟེ། ཚིག་གིས་བརྗོད་པ་གང་ཡིན་པ་དེ་ནི་ཆོས་སོ་སོ་ཡང་དག་པར་རིག་པ་ཡིན་པར་བལྟ་
བ་དང་། ཚིག་གིས་བརྗོད་པ་གང་ཡིན་པ་དེ་ནི་དོན་སོ་སོ་ཡང་དག་པར་རིག་པ་ཡིན་པར་བལྟ་བར་བྱའོ། །དེ་ལྟ་བས་ན་རིགས་ཀྱི་བུ་ཁྱོད་ཀྱིས་སེམས་ཅན་གྱི་གང་ཅུང་ཟད་གཡོ་བ་དེ་ཐམས་ཅད་ཆོས་ཀྱི་སྡོམ་བཞིར་འདུས་
པར་བལྟ་བར་བྱ་སྟེ། འབྱུང་པོ་དག་མི་ཤེས་པས་གནས་མི་གཡོའོ། །དེ་ལྟར་མི་དམུས་ལོང་དེ་ཇི་ལྟར་ཤེས་པ་དེ་བཞིན་དུ་ཆོས་དེ་ཉིད་ལ་མངོན་པར་ཞེན་ཏོ། །རིགས་ཀྱི་བུ་དོན་ཡོངས་སུ་ཚོལ་བར་འདོད་པས་རང་གི་རྒྱུད་
ལས་ཡོངས་སུ་བཙལ་བར་བྱའོ། །རིགས་ཀྱི་བུ་བྱང་ཆུབ་ཡོངས་སུ་ཚོལ་བར་འདོད་པས་རང་གི་ཉེ་བར་ལེན་པའི་ཕུང་པོ་ལྔ་ལས་བཙལ་བར་བྱའོ། །ཆོས་ཀྱི་རྣམ་གྲངས་འདིའི་དོན་ཇི་ལྟ་བ་བཞིན་བཤད་པ་ན་སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་ཐམས་ཅད་རྣམ་པ་དྲུག་ཏུ་གཡོས་སོ། །སྣང་བ་ཆེན་པོས་འཇིག་རྟེན་ཁྱབ་པར་ཤིན་ཏུ་སྣང་བར་གྱུར་ཏོ། །བཅོམ་ལྡན་འདས་དེ་བཞིན་གཤེགས་པ་ཆོས་འཕགས་ཀྱི་ལྗགས་ཀྱི་དབང་

57-1-130a

པོ་ཕྱུང་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ལྗགས་ཀྱི་དབང་པོས་ཡང་དག་པར་བཀབ་པར་གྱུར་ཏོ། །ལྗགས་ཀྱི་དབང་པོ་དེ་ལས་འོད་ཟེར་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་
བྱུང་སྟེ། འོད་ཟེར་དེ་དག་གིས་སེམས་ཅན་དམྱལ་བ་ཆེན་པོ་ལ་སོགས་པ་ནས་སྲིད་པའི་རྩེ་མོའི་བར་གྱི་འཇིག་རྟེན་གྱི་ཁམས་ཐམས་ཅད་སྣང་བར་བྱས་སོ། །དེ་ནས་བཅོམ་ལྡན་འདས་ཀྱི་ལྗགས་ཀྱི་དབང་པོ་དེ་ཉིད་
སླར་བསྡུས་ནས་འཁོར་གྱི་དཀྱིལ་འཁོར་ཐམས་ཅད་ལ་བཀའ་སྩལ་པ། གྲོགས་པོ་དག་ལྕེ་འདི་ལྟ་བུ་ཡོད་པ་ནི་བརྫུན་མི་ཟེར་སྟེ། གྲོགས་པོ་དག་ངས་གཏམ་ཅུང་ཟད་ཇི་ལྟ་བ་བཞིན་བཤད་པ་དེ་ལྟར་བརྟག་པ་དང་། 
དེ་ལྟར་དད་པ་དང་། ཡིད་ཆེས་པར་གྱིས་ཤིག །དེ་ནས་ས་བཅུ་ལ་གནས་པ་དང་། ལྷ་དང་ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་ལ་སོགས་པ་དང་། མི་དང་
མི་མ་ཡིན་པའི་འཁོར་ཐམས་ཅད་སྟན་ལས་ལངས་ཏེ་ཐལ་མོ་སྦྱར་ནས་ཚིག་འཐུན་པར་འདི་སྐད་ཅེས་གསོལ་ཏོ། །བཅོམ་ལྡན་འདས་ཡང་དག་པའི་དོན་བསྟན་པ་བཤད་དུ་གསོལ། བདེ་བར་གཤེགས་པ་བཤད་དུ་གསོལ། 
སངས་རྒྱས་ཀྱི་མཐུས་སོམ་ཉི་མི་བགྱི་ཞིང་ཐེ་ཙོམ་མི་བགྱིའོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་ལ་ལན་གཉིས་ལན་གསུམ་དུ་གཟིགས་ནས་འདི་སྐད་ཅེས་བཀའ་སྩལ་ཏོ། རིགས་ཀྱི་བུ་
དག་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བའི་ཕྱིར་སེང་གེའི་སྒྲས་བཤད་པར་བྱའོ། །རིགས་ཀྱི་བུ་གང་འཇིག་རྟེན་གྱི་ཁམས་མི་མཇེད་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་ཤཱཀྱ་ཐུབ་པ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་ཏོ། །རིགས་ཀྱི་བུ་དེ་ནི་དེ་བཞིན་གཤེགས་པ་ཆོས་འཕགས་ང་ཉིད་ཡིན་ཏེ། འཇིག་རྟེན་གྱི་ཁམས་མི་མཇེད་དེར་སྒྲུབ་པ་རྣམ་པ་

57-1-130b

སྣ་ཚོགས་ཀྱིས་སེམས་ཅན་རྣམས་ལ་ཆོས་སྟོན་པ་མཛད་དོ། །དེ་ནས་ཐམས་ཅད་དང་ལྡན་པའི་འཁོར་ངོ་མཚར་དུ་གྱུར་ཅིང་རྨད་ཏུ་གྱུར་པ་དེ་དག་གིས་བཅོམ་ལྡན་འདས་ལ་ལེགས་སོ་ཞེས་བྱ་བ་གསོལ་ཏེ། བཅོམ་
ལྡན་འདས་དེ་ལྟར་སེམས་ཅན་ཐམས་ཅད་ལ་སེང་གེའི་སྒྲ་བསྒྲགས་པ་ལེགས་ལགས་སོ། །ལེགས་ལགས་སོ། །བཅོམ་ལྡན་འདས་ཇི་ལྟར་འཁོར་འདིར་སེང་གེའི་སྒྲ་བསྒྲགས་པའི་བཅོམ་ལྡན་འདས་ཀྱི་
སེང་གེའི་སྒྲ་འདི་ཐོས་པར་འགྱུར་ཞིང་ཐོས་ནས་ཀྱང་ཡིད་ཆེས་པར་འགྱུར་བའི་སེམས་ཅན་གང་ལགས་པ་དེ་དག་ཀྱང་། བཅོམ་ལྡན་འདས་དགེ་བའི་རྩ་བ་ངན་ངོན་དང་ལྡན་པ་མ་ལགས་ན་གང་འཛིན་པ་དང་། འཆང་
བ་དང་། ཀློག་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དང་། མདོ་སྡེ་འདི་ལ་མེ་ཏོག་དང་། བདུག་སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་
དང་། བ་དན་དག་གིས་མཆོད་པ་བགྱིད་པ་ལྟ་སྨོས་ཀྱང་ཅི་འཚལ་ཏེ། སེང་གེའི་སྒྲ་བསྒྲགས་པའི་མདོ་སྡེ་འདི་སེམས་ཅན་གང་གི་རྣ་བར་ཐོས་པར་འགྱུར་བ་དེ་ནི་བཅོམ་ལྡན་འདས་སངས་རྒྱས་ཐམས་ཅད་ཀྱིས་བྱིན་གྱིས་བརླབས་
པ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་ལ་ལེགས་སོ་བྱ་བ་གནང་སྟེ། རིགས་ཀྱི་བུ་ཇི་སྐད་སྨྲས་པ་དེ་བཞིན་ཏེ། ལེགས་སོ་ལེགས་སོ། །གང་དེ་བཞིན་གཤེགས་པའི་ཡང་དག་པའི་
སེང་གེའི་སྒྲ་འདི་ཐོས་ནས་རབ་ཏུ་དང་བའི་སེམས་ཀྱིས་ལེགས་སོ་ཞེས་བྱ་བ་འགའ་ཞིག་རྗེས་སུ་འབུལ་ན་ཡང་རིགས་ཀྱི་བུ་འམ། རིགས་ཀྱི་བུ་མོ་དེ་དགེ་བའི་རྩ་བ་ངན་ངོན་དང་ལྡན་པ་མ་ཡིན་ཏེ། དེ་དག་ངས་ཡོངས་སུ་བཟུང་
བ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ཀྱང་འགྲོན་དུ་གཉེར་བར་བྱེད་དོ། །དེ་དག་གིས་ང་ཡི་བྱང་ཆུབ་ཕྲག་པ་ལ་ཁྱེར་བ་ཡིན་ནོ། །གང་སྙིགས་མ་ལྔ་དག་ལ་བབ་པའི་ཚེ་མདོ་སྡེ་འདི་ལ་

57-1-131a

མོས་པའི་སེམས་ཅན་དེ་དག་ནི་ངས་ཡོངས་སུ་སྨིན་པར་བྱས་པ་ཡིན་ཏེ། ཚེ་རབས་གཞན་དུ་ཡང་མི་ཕམ་པས་ཡོངས་སུ་འཛིན་པར་འགྱུར་རོ། །དེའི་སྐྱེ་བའི་རྒྱ་མཚོ་བསྐམས་པ་ཡིན་ནོ། །བདུད་ཕམ་པར་བྱས་པ་ཡིན་
ནོ། །ཉོན་མོངས་པ་རྣམས་བསལ་བ་ཡིན་ནོ། །ཆོས་ཀྱི་རྔ་ཤིན་དུ་བརྡུངས་པ་ཡིན་ནོ། །སྲིད་པ་གསུམ་རྣམ་པར་བཟློག་པ་ཡིན་ནོ། །ཕྱིར་རྒོལ་བ་རྣམས་ལས་ངེས་པར་རྒྱལ་བ་ཡིན་ནོ། །ཉོན་མོངས་པའི་ཚོགས་བཅོམ་
པ་ཡིན་ནོ། །རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གྲངས་མེད་པ་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་བསྐལ་པར་དེ་བཞིན་གཤེགས་པ་ཐམས་
ཅད་ལ་བདེ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བྱེད་ཀྱང་། དེ་བཞིན་གཤེགས་པའི་སྔོན་གྱི་རྣམ་པར་འཕྲུལ་པ་འདི་ཐོས་ནས་དད་པར་མི་བྱེད་ན་དེ་ཉེས་པ་ཆེ་བ་ཡིན་ནོ། །དེ་བཞིན་གཤེགས་པའི་བཀས་རིགས་
ཀྱི་བུ་དེ་དེ་བཞིན་གཤེགས་པ་ལ་རིམ་གྲོར་བྱ་བས་རིམ་གྲོར་བྱེད་པ་དང་། རིགས་ཀྱི་བུའམ་རིགས་ཀྱི་བུ་མོ་གང་གཞན་ཞིག་གིས་དེ་བཞིན་གཤེགས་པས་ཡང་དག་པར་བསྟན་པ་འདི་ཐོས་ནས་དད་ཅིང་སེམས་རབ་ཏུ་དང་
བས་ལེགས་སོ་ཞེས་བྱ་བ་འབུལ་ན། གང་དེ་བཞིན་གཤེགས་པ་ལ་མཆོད་ཅིང་བསྙེན་བཀུར་བྱས་པ་དེ་བས་འདི་བསོད་ནམས་ཆེས་ལྷག་པར་བརྒྱ་ཕྲག་སྟོང་སོགས་པར་འགྱུར་རོ། །དེ་ལྟ་བས་ན་རིགས་ཀྱི་བུ་གང་
དག་ང་ལ་སྐྱབས་སུ་སོང་བ་དེ་དག་གིས་མདོ་སྡེ་འདི་བྲི་བར་བྱ་བཅང་བར་བྱའོ། །དེ་ནས་བྱང་ཆུབ་སེམས་དཔའ་རྣམ་པར་རྒྱལ་བའི་ཕུང་པོ་དང་། འོད་ཕྲེང་དང་། གློག་གི་འོད་དང་། སྤྱན་རྣམ་པར་དག་པ་དང་། བྱམས་པ་
དང་། མི་འཇིགས་མཛད་དང་། སྤྱན་རས་གཟིགས་དབང་ཕྱུག་དང་། མཐུ་ཆེན་ཐོབ་དང་། འཇམ་དཔལ་དང་། སྤོབས་པ་དཔའ་བོ་དང་། སྒྲིབ་པ་ཐམས་ཅད་རྣམ་པར་སེལ་བ་དང་། སྤྱན་རས་གཟིགས་དང་། ཀུན་ཏུ་བཟང་

57-1-131b

པོ་དང་། དེ་དག་ལ་སོགས་པ་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་བཅུ་རྩ་བཞིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སླད་མའི་དུས་སླད་མའི་ཚེ་སྙིགས་མ་ལྔ་ལ་
བབ་པ་ན་བདག་ཅག་གིས་མདོ་སྡེ་འདི་རྒྱས་པར་བགྱིའོ། །བཅོམ་ལྡན་འདས་གང་མདོ་སྡེ་འདི་ལ་མོས་པའི་སེམས་ཅན་དེ་ནི་ཡོངས་སུ་མྱ་ངན་ལས་འདས་པར་རིག་པར་བགྱིའོ། །བཅོམ་ལྡན་འདས་སེམས་ཅན་དགེ་བའི་
རྩ་བ་མ་བསྐྱེད་པ་རྣམས་ཀྱི་རྣ་བར་མདོ་སྡེ་འདི་ཐོས་པར་མི་འགྱུར་ཏེ། གང་དག་རྒྱ་ཆེར་འཇུག་པ་དེ་དག་གི་ཡོན་ཏན་གྱི་མཐའ་ནི་བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་རྟོགས་པར་དཀའ་ལགས་སོ། །དེ་ནས་བཅོམ་
ལྡན་འདས་བྱང་ཆུབ་སེམས་དཔའ་དེ་དག་ལ་ལེགས་སོ་ཞེས་བྱ་བ་གནང་སྟེ། རིགས་ཀྱི་བུ་དག་ལེགས་སོ་ལེགས་སོ། །དེ་ལྟར་ཁྱེད་རྣམས་ཀྱིས་དེ་བཞིན་གཤེགས་པའི་བསྟན་པ་ལ་བརྡོས་པ་འཛིན་པ་ལྟ་བུར་གྱིས་ཤིག །
བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་རྣམ་པར་རྒྱལ་བའི་ཕུང་པོ་དང་། ཐམས་ཅད་དང་ལྡན་པའི་འཁོར་ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་དེ་དག་
བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ། །འཕགས་པ་སེང་གེའི་སྒྲ་བསྒྲགས་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།
རྒྱ་གར་གི་མཁན་པོ་བིད་དྱཱ་ཀ་ར་སིང་ཧ་དང་། ལོ་ཙྪ་་བ་བན་དྷེ་སྦ་རྗེ་ཡེ་ཤེས་སྙིང་པོས་བསྒྱུར་ནས་གཏན་ལ་ཕབ་པ། ། ༄༅། །རྒྱ་གར་སྐད་དུ། ཨཱརྱ་ཤཱ་ལི་སམྦྷ་བ་ནཱ་མ་མ་ཧཱ་ཡཱ་ནཱ་སཱུ་ཏྲ།  བོད་སྐད་དུ།  
འཕགས་པ་སཱ་ལུའི་ལྗང་པ་ཞེས་བྱ་བ་ཐེག་པ་ཆེན་པོའི་མདོ།  སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་

57-1-132a

རྒྱལ་པོའི་ཁབ་བྱ་རྒོད་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་གཅིག་ཏུ་བཞུགས་ཏེ། 
དེའི་ཚེ་ན་ཚེ་དང་ལྡན་པ་ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་བགྲོད་པར་བྱ་བའི་ས་ཕྱོགས་ག་ལ་བ་དེར་སོང་སྟེ་ཕྱིན་ནས་ཕན་ཚུན་ཡང་དག་པར་དགའ་བར་བྱ་བའི་གཏམ་རྣམ་པ་མང་པོ་བྱས་
ནས་འདུས་ཏེ་གཉིས་ཀ་རྡོ་ལེབ་ལ་འཁོད་དོ། །དེ་ནས་ཚེ་དང་ལྡན་པ་ཤཱ་རིའི་བུས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་སྨྲས་སོ། །བྱམས་པ་དེང་འདིར་བཅོམ་ལྡན་འདས་ཀྱིས་སཱ་ལུའི་
ལྗང་པ་ལ་གཟིགས་ནས་དགེ་སློང་རྣམས་ལ་མདོ་འདི་གསུངས་སོ། །དགེ་སློང་དག་སུས་རྟེན་ཅིང་འབྲེལ་པར་འབྱུང་བ་མཐོང་བ་དེས་ཆོས་མཐོང་ངོ་། །སུས་ཆོས་མཐོང་བ་དེས་སངས་རྒྱས་མཐོང་ངོ་ཞེས་དེ་སྐད་
བཀའ་སྩལ་ནས། བཅོམ་ལྡན་འདས་ཅང་མི་གསུང་བར་གྱུར་ན་བྱམས་པ་བདེ་བར་གཤེགས་པས་བཀའ་སྩལ་པའི་མདོ་དེའི་དོན་ནི་ཅི། དགེ་སློང་དག་སུས་རྟེན་ཅིང་འབྲེལ་པར་འབྱུང་བ་ནི་གང་། ཆོས་ནི་གང་། 
སངས་རྒྱས་ནི་གང་། ཇི་ལྟར་རྟེན་ཅིང་འབྲེལ་པར་འབྱུང་བ་མཐོང་ན་ཆོས་མཐོང་། ཇི་ལྟར་ཆོས་མཐོང་ན་སངས་རྒྱས་མཐོང་། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་
ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུ་འདི་ལ་བཅོམ་ལྡན་འདས་ཆོས་ཀྱི་བདག་པོ་ཐམས་ཅད་མཁྱེན་པས་དགེ་སློང་དག་སུས་རྟེན་ཅིང་འབྲེལ་པར་འབྱུང་བ་མཐོང་བ་དེས་ཆོས་
མཐོང་ངོ་། །སུས་ཆོས་མཐོང་བ་དེས་སངས་རྒྱས་མཐོང་ངོ་ཞེས་གསུངས་པ་དེ་ལ་རྟེན་ཅིང་འབྲེལ་པར་འབྱུང་བ་གང་ཞེ་ན། རྟེན་ཅིང་འབྲེལ་པར་འབྱུང་བ་ཞེས་བྱ་བ་ནི་འདི་ལྟ་སྟེ། འདི་ཡོད་པས་འདི་འབྱུང་ལ། འདི་

57-1-132b

སྐྱེས་པའི་ཕྱིར་འདི་སྐྱེ་བ་སྟེ། གང་འདི་མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་
མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་
གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་པོ་འདི་འབྱུང་བར་འགྱུར་རོ། །
དེ་ལ་མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་
དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་
འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འགག་པར་འགྱུར་ཏེ། དེ་ལྟར་སྡུག་
བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ། །འདི་ནི་བཅོམ་ལྡན་འདས་ཀྱིས་རྟེན་ཅིང་འབྲེལ་པར་འབྱུང་བ་ཞེས་གསུངས་སོ། །ཆོས་གང་ཞེ་ན། འཕགས་པའི་ལམ་ཡན་ལག་བརྒྱད་པ་སྟེ། འདི་ལྟ་སྟེ། 
ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་

57-1-133a

འཛིན་ཏོ། །འདི་ནི་འཕགས་པའི་ལམ་ཡན་ལག་བརྒྱད་པ་ཞེས་བྱ་སྟེ། འབྲས་བུ་ཐོབ་པ་དང་མྱ་ངན་ལས་འདས་པ་གཅིག་ཏུ་བསྡུས་ཏེ། བཅོམ་ལྡན་འདས་ཀྱིས་ཆོས་སོ་ཞེས་བཀའ་སྩལ་ཏོ། །དེ་ལ་སངས་རྒྱས་
བཅོམ་ལྡན་འདས་གང་ཞེ་ན། སུས་ཆོས་ཐམས་ཅད་ཐུགས་སུ་ཆུད་པའི་ཕྱིར་སངས་རྒྱས་ཤེས་བྱ་སྟེ། དེས་འཕགས་པའི་ཤེས་རབ་ཀྱི་སྤྱན་དང་། ཆོས་ཀྱི་སྐུ་དང་ལྡན་པ་དང་། སློབ་པ་དང་མི་སློབ་པའི་ཆོས་དེ་དག་གཟིགས་པའོ། །
དེ་ལ་རྟེན་ཅིང་འབྲེལ་པར་འབྱུང་བ་མཐོང་བ་ཇི་ལྟ་བུ་ཞེ་ན། འདི་ལ་བཅོམ་ལྡན་འདས་ཀྱིས་སུས་རྟེན་ཅིང་འབྲེལ་པར་འབྱུང་བ་རྟག་པ་དང་། སྲོག་མེད་པ་དང་། སྲོག་དང་བྲལ་བ་དང་། ཇི་ལྟ་བུ་ཉིད་དང་། མ་ནོར་བ་དང་། མ་སྐྱེས་པ་དང་། 
མ་བྱུང་བ་དང་། མ་བྱས་པ་དང་། འདུས་མ་བྱས་པ་དང་། ཐོགས་པ་མེད་པ་དང་། དམིགས་པ་མེད་པ་དང་། ཞི་བ་དང་། འཇིགས་པ་མེད་པ་དང་། མི་འཕྲོགས་པ་དང་། རྣམ་པར་ཞི་བ་མ་ཡིན་པའི་རང་བཞིན་དུ་མཐོང་བ་སྟེ། 
གང་གིས་ཚུལ་འདི་འདྲ་བར་ཆོས་ལའང་རྟག་པ་དང་། སྲོག་མེད་པ་དང་། སྲོག་དང་བྲལ་བ་དང་། ཇི་ལྟ་བུ་ཉིད་དང་། མ་ནོར་བ་དང་། མ་སྐྱེས་པ་དང་། མ་བྱུང་བ་དང་། མ་བྱས་པ་དང་། འདུས་མ་བྱས་པ་དང་། ཐོགས་པ་མེད་པ་
དང་། དམིགས་པ་མེད་པ་དང་། ཞི་བ་དང་། འཇིགས་པ་མེད་པ་དང་། མི་འཕྲོགས་པ་དང་། རྣམ་པར་ཞི་བ་མ་ཡིན་པའི་རང་བཞིན་དུ་མཐོང་བ་དེས་འཕགས་པའི་ཆོས་མངོན་པར་རྟོགས་ཏེ། ཡང་དག་པའི་ཡེ་ཤེས་དང་ལྡན་པས་
བླ་ན་མེད་པའི་ཆོས་ཀྱི་སྐུར་སངས་རྒྱས་མཐོང་ངོ་ཞེས་གསུངས་སོ། །སྨྲས་པ། ཅིའི་ཕྱིར་རྟེན་ཅིང་འབྲེལ་པར་འབྱུང་བ་ཞེས་བྱ། སྨྲས་པ་རྒྱུ་དང་བཅས་རྐྱེན་དང་བཅས་པ་ལ་བྱའི། རྒྱུ་མེད་རྐྱེན་མེད་པ་ལ་ནི་མ་ཡིན་ཏེ། དེའི་
ཕྱིར་རྟེན་ཅིང་འབྲེལ་པར་འབྱུང་བ་ཞེས་བྱའོ། །དེ་ལ་བཅོམ་ལྡན་འདས་ཀྱིས་རྟེན་ཅིང་འབྲེལ་པར་འབྱུང་བའི་མཚན་ཉིད་མདོར་བསྡུས་ཏེ་བཀའ་སྩལ་པ་རྐྱེན་འདི་ཉིད་ཀྱི་འབྲས་བུ་སྟེ། དེ་བཞིན་གཤེགས་པ་རྣམས་བྱུང་ཡང་རུང་། མ་བྱུང་

57-1-133b

ཡང་རུང་། ཆོས་རྣམས་ཀྱི་ཆོས་ཉིད་འདི་ནི་འདུག་པའོ་ཞེས་བྱ་བ་ནས་གང་འདི་ཆོས་ཉིད་དང་། ཆོས་གནས་པ་ཉིད་དང་། ཆོས་མི་འགྱུར་བ་ཉིད་དང་། རྟེན་ཅིང་འབྲེལ་པར་འབྱུང་བར་འཐུན་པ་དང་། དེ་བཞིན་ཉིད་དང་། མ་ནོར་བ་
དེ་བཞིན་ཉིད་དང་། གཞན་མ་ཡིན་པ་དེ་བཞིན་ཉིད་དང་། ཡང་དག་པ་ཉིད་དང་། བདེན་པ་ཁོ་ན་དང་། མ་ནོར་བ་ཉིད་དང་། ཕྱིན་ཅི་མ་ལོག་པ་ཉིད་ཅེས་བྱ་བའི་བར་དུ་གསུངས་སོ། །འདི་ལྟར་ཡང་རྟེན་ཅིང་འབྲེལ་པར་འབྱུང་བ་
འདི་གཉིས་ཀྱི་ཕྱིར་འབྱུང་སྟེ། གཉིས་གང་ཞེ་ན། འདི་ལྟ་སྟེ། རྒྱུ་དང་འབྲེལ་པ་དང་། རྐྱེན་དང་འབྲེལ་པའི་ཕྱིར་རོ། །དེ་ཡང་ཕྱིའི་དང་། ནང་གི་དང་རྣམ་པ་གཉིས་སུ་བལྟའོ། །དེ་ལ་ཕྱི་རོལ་གྱི་རྟེན་ཅིང་འབྲེལ་པར་འབྱུང་བ་རྒྱུ་
དང་འབྲེལ་པ་གང་ཞེ་ན། འདི་ལྟ་སྟེ། ས་བོན་ལས་མྱུ་གུ། མྱུ་གུ་ལས་འདབ་མ། འདབ་མ་ལས་སྡོང་བུ། སྡོང་བུ་ལས་སྦུ་བུ། སྦུ་བུ་ལས་སྙིང་པོ། སྙིང་པོ་ལས་མེ་ཏོག །མེ་ཏོག་ལས་འབྲས་བུའོ། །ས་བོན་མེད་ན་མྱུ་
གུ་མི་འབྱུང་སྟེ། མེ་ཏོག་མེད་ན་འབྲས་བུའི་བར་དུ་ཡང་མི་འབྱུང་ངོ་། །ས་བོན་ཡོད་ན་མྱུ་གུ་མངོན་པར་འགྲུབ་པར་འགྱུར་ཏེ། དེ་བཞིན་དུ་མེ་ཏོག་ཡོད་ན་འབྲས་བུའི་བར་དུ་མངོན་པར་འགྲུབ་པར་འགྱུར་རོ། །དེ་ལ་ས་
བོན་ནི་འདི་སྙམ་དུ་བདག་གིས་མྱུ་གུ་མངོན་པར་བསྒྲུབ་པོ་སྙམ་དུ་མི་སེམས་སོ། །མྱུ་གུ་ཡང་འདི་སྙམ་དུ་བདག་ནི་གྱིས་མངོན་པར་བསྒྲུབས་སོ་སྙམ་དུ་མི་སེམས་སོ། །དེ་བཞིན་དུ་མེ་ཏོག་ཀྱང་འདི་སྙམ་དུ་
བདག་གིས་འབྲས་བུ་མངོན་པར་བསྒྲུབ་པོ་སྙམ་དུ་མི་སེམས་པའི་བར་དུ་སྟེ། འབྲས་བུ་ཡང་འདི་སྙམ་དུ་བདག་ནི་མེ་ཏོག་གིས་མངོན་པར་བསྒྲུབས་སོ་སྙམ་དུ་མི་སེམས་མོད་ཀྱི། འོན་ཀྱང་ས་བོན་ཡོད་ན་མྱུ་གུ་མངོན་
པར་འགྲུབ་ཅིང་འབྱུང་བར་འགྱུར་བ་ནས་དེ་བཞིན་དུ་མེ་ཏོག་ཡོད་ན་འབྲས་བུའི་བར་དུ་ཡང་མངོན་པར་འགྲུབ་ཅིང་འབྱུང་བར་འགྱུར་ཏེ། དེ་ལྟར་ཕྱི་རོལ་གྱི་རྟེན་ཅིང་འབྲེལ་པར་འབྱུང་བ་རྒྱུ་དང་འབྲེལ་པར་བལྟའོ། །ཕྱི་རོལ་

57-1-134a

གྱི་རྟེན་ཅིང་འབྲེལ་པར་འབྱུང་བ་རྐྱེན་དང་འབྲེལ་པ་ཇི་ལྟར་བལྟ་ཞེ་ན། ཁམས་དྲུག་འདུས་པའི་ཕྱིར་ཏེ། ཁམས་དྲུག་པོ་གང་དག་འདུས་པའི་ཕྱིར་ཞེ་ན། འདི་ལྟ་སྟེ། ས་དང་། ཆུ་དང་། མེ་དང་། རླུང་དང་། ནམ་མཁའ་དང་། 
དུས་ཀྱི་ཁམས་རྣམས་འདུས་པ་ལས་ཕྱི་རོལ་གྱི་རྟེན་ཅིང་འབྲེལ་པར་འབྱུང་བ་རྐྱེན་དང་འབྲེལ་པར་བལྟའོ། །དེ་ལ་སའི་ཁམས་ནི་ས་བོན་རྟེན་པའི་བྱ་བ་བྱེད་དོ། །ཆུའི་ཁམས་ནི་ས་བོན་རླན་པའི་བྱ་བ་བྱེད་དོ། །མེའི་ཁམས་ནི་ས་བོན་
ཡོངས་སུ་དྲོ་བའི་བྱ་བ་བྱེད་དོ། །རླུང་གི་ཁམས་ནི་ས་བོན་འབུ་བའི་བྱ་བ་བྱེད་དོ། །ནམ་མཁའི་ཁམས་ནི་ས་བོན་ལ་མི་སྒྲིབ་པའི་བྱ་བ་བྱེད་དོ། །དུས་ནི་ས་བོན་འགྱུར་བའི་བྱ་བ་བྱེད་དོ། །རྐྱེན་འདི་རྣམས་མེད་པར་ས་བོན་ལས་མྱུ་
གུ་མངོན་པར་འགྲུབ་པར་མི་འགྱུར་གྱི། ནམ་ཕྱི་རོལ་གྱི་སའི་ཁམས་མ་ཚང་བ་མེད་པར་གྱུར་ལ་དེ་བཞིན་དུ་ཆུ་དང་། མེ་དང་། རླུང་དང་། ནམ་མཁའ་དང་། དུས་ཀྱང་མ་ཚང་བ་མེད་པར་གྱུར་ཏེ། ཐམས་ཅད་འདུས་པ་ལས་ས་བོན་
འགགས་པ་ན་དེ་ལས་མྱུ་གུ་མངོན་པར་འགྲུབ་པར་འགྱུར་རོ། །དེ་ལ་སའི་ཁམས་ཀྱང་འདི་སྙམ་དུ་བདག་གིས་ས་བོན་རྟེན་པའི་བྱ་བ་བྱའོ་སྙམ་དུ་མི་སེམས་སོ། །དེ་བཞིན་དུ་ཆུའི་ཁམས་ཀྱང་འདི་སྙམ་དུ་བདག་གིས་ས་བོན་རླན་པར་
བྱའོ་སྙམ་དུ་མི་སེམས་སོ། །མེའི་ཁམས་ཀྱང་འདི་སྙམ་དུ་བདག་གིས་ས་བོན་ཡོངས་སུ་དྲོ་བར་བྱའོ་སྙམ་དུ་མི་སེམས་སོ། །རླུང་གི་ཁམས་ཀྱང་འདི་སྙམ་དུ་བདག་གིས་ས་བོན་འབུ་བར་བྱའོ་སྙམ་དུ་མི་སེམས་སོ། །ནམ་
མཁའི་ཁམས་ཀྱང་འདི་སྙམ་དུ་བདག་གིས་ས་བོན་ལ་མི་སྒྲིབ་པའི་བྱ་བ་བྱའོ་སྙམ་དུ་མི་སེམས་སོ། །དུས་ཀྱང་འདི་སྙམ་དུ་བདག་གིས་ས་བོན་བསྒྱུར་བའི་བྱ་བ་བྱའོ་སྙམ་དུ་མི་སེམས་སོ། །ས་བོན་ཡང་འདི་སྙམ་དུ་བདག་
གིས་མྱུ་གུ་མངོན་པར་བསྒྲུབ་པོ་སྙམ་དུ་མི་སེམས་སོ། །མྱུ་གུ་ཡང་འདི་སྙམ་དུ་བདག་ནི་རྐྱེན་འདི་དག་གིས་མངོན་པར་བསྒྲུབས་སོ་སྙམ་དུ་མི་སེམས་མོད་ཀྱི། འོན་ཀྱང་རྐྱེན་འདི་དག་ཡོད་ལ་ས་བོན་འགགས་པ་ན་མྱུ་གུ་

57-1-134b

མངོན་པར་འགྲུབ་པར་འགྱུར་རོ། །དེ་བཞིན་དུ་མེ་ཏོག་ཡོད་ན་འབྲས་བུའི་བར་དུ་ཡང་མངོན་པར་འགྲུབ་པར་འགྱུར་ཏེ། མྱུ་གུ་དེ་ཡང་བདག་གིས་མ་བྱས། གཞན་གྱིས་མ་བྱས། གཉི་གས་མ་བྱས། དབང་ཕྱུག་གིས་མ་བྱས། དུས་
ཀྱིས་མ་བསྒྱུར། རང་བཞིན་ལས་མ་བྱུང་། རྒྱུ་མེད་པ་ལས་ཀྱང་མ་སྐྱེས་ཏེ། འོན་ཀྱང་ས་དང་། ཆུ་དང་། མེ་དང་། རླུང་དང་། ནམ་མཁའ་དང་། དུས་ཀྱི་ཁམས་རྣམས་འདུས་ནས་ས་བོན་འགགས་པ་ན་མྱུ་གུ་མངོན་པར་འགྲུབ་
པར་འགྱུར་ཏེ། དེ་ལྟར་ཕྱི་རོལ་གྱིས་རྟེན་ཅིང་འབྲེལ་པར་འབྱུང་བ་རྐྱེན་དང་འབྲེལ་པར་བལྟའོ། །དེ་ལ་ཕྱི་རོལ་གྱི་རྟེན་ཅིང་འབྲེལ་པར་འབྱུང་བ་རྣམ་པ་ལྔར་བལྟ་སྟེ། ལྔ་གང་ཞེ་ན། རྟག་པར་མ་ཡིན་པ་དང་། ཆད་པར་མ་ཡིན་
པ་དང་། འཕོ་བར་མ་ཡིན་པ་དང་། རྒྱུ་ཆུང་ངུ་ལས་འབྲས་བུ་ཆེན་པོ་མངོན་པར་འགྲུབ་པ་དང་། དེ་དང་འདྲ་བའི་རྒྱུད་དུའོ། །ཇི་ལྟར་རྟག་པར་མ་ཡིན་ཞེ་ན། གང་གི་ཕྱིར་མྱུ་གུ་ཡང་གཞན་ལ་ས་བོན་ཡང་གཞན་ཏེ། མྱུ་གུ་གང་
ཡིན་པ་དེ་ཉིད་ས་བོན་མ་ཡིན་ལ། ས་བོན་འགགས་པ་ལས་མྱུ་གུ་འབྱུང་བ་མ་ཡིན། མ་འགགས་པ་ལས་ཀྱང་མ་ཡིན་གྱི། ས་བོན་ཡང་འགགས་ལ་དེ་ཉིད་ཀྱི་ཚེ་མྱུ་གུ་ཡང་འབྱུང་སྟེ། དེའི་ཕྱིར་རྟག་པར་མ་ཡིན་ནོ། །ཇི་ལྟར་
ཆད་པར་མ་ཡིན་ཞེ་ན། སྔོན་འགགས་པའི་ས་བོན་ལས་མྱུ་གུ་སྐྱེ་བ་མ་ཡིན། མ་འགགས་པ་ལས་ཀྱང་མ་ཡིན་གྱི། ས་བོན་ཡང་འགགས་ལ་དེ་ཉིད་ཀྱི་ཚེ་སྲང་མདའི་མཐོ་དམའ་བཞིན་དུ་མྱུ་གུ་སྐྱེ་བས་དེའི་ཕྱིར་ཆད་པར་མ་
ཡིན་ནོ། །ཇི་ལྟར་འཕོ་བར་མ་ཡིན་ཞེ་ན། གང་གི་ཕྱིར་མྱུ་གུ་ཡང་གཞན་ལ་ས་བོན་ཡང་གཞན། མྱུ་གུ་གང་ཡིན་པ་དེ་ཉིད་ས་བོན་མ་ཡིན་ཏེ། དེའི་ཕྱིར་འཕོ་བར་མ་ཡིན་ནོ། །ཇི་ལྟར་རྒྱུ་ཆུང་ངུ་ལས་འབྲས་བུ་ཆེན་པོ་མངོན་
པར་འགྲུབ་ཅེ་ན། ས་བོན་ཆུང་ངུ་བཏབ་པ་ལས་འབྲས་བུ་ཆེན་པོ་མངོན་པར་འགྲུབ་པར་འགྱུར་ཏེ། དེའི་ཕྱིར་རྒྱུ་ཆུང་ངུ་ལས་འབྲས་བུ་ཆེན་པོ་མངོན་པར་འགྲུབ་པོ། །ས་བོན་ཇི་ལྟ་བུ་བཏབ་པ་དེ་ལྟ་བུའི་འབྲས་བུ་མངོན་

57-1-135a

པར་འགྲུབ་པས་དེའི་ཕྱིར་དེ་དང་འདྲ་བའི་རྒྱུད་དུ་སྟེ། དེ་ལྟར་ཕྱི་རོལ་གྱི་རྟེན་ཅིང་འབྲེལ་པར་འབྱུང་བ་རྣམ་པ་ལྔར་བལྟའོ། །དེ་བཞིན་དུ་ནང་གི་རྟེན་ཅིང་འབྲེལ་པར་འབྱུང་བ་ཡང་གཉིས་ཀྱི་ཕྱིར་འབྱུང་སྟེ། 
གཉིས་གང་ཞེ་ན། འདི་ལྟ་སྟེ། རྒྱུ་དང་འབྲེལ་པ་དང་། རྐྱེན་དང་འབྲེལ་པའོ། །དེ་ལ་ནང་གི་རྟེན་ཅིང་འབྲེལ་པར་འབྱུང་བ་རྒྱུ་དང་འབྲེལ་པ་གང་ཞེ་ན། གང་འདི་མ་རིག་པའི་རྐྱེན་གྱིས་འདུ་བྱེད་རྣམས་ཤེས་བྱ་བ་ནས་སྐྱེ་བའི་
རྐྱེན་ཀྱིས་རྒ་ཤི་ཞེས་བྱ་བའི་བར་དུའོ། །གལ་ཏེ་མ་རིག་པ་མ་བྱུང་ན་འདུ་བྱེད་རྣམས་ཀྱང་མི་མངོན་པ་ཞིག །དེ་བཞིན་དུ་སྐྱེ་བ་མ་བྱུང་དུ་ཟིན་ན་རྒ་ཤིའི་བར་དུ་ཡང་མི་མངོན་པ་ཞིག་ན། འདི་ལྟར་མ་རིག་པ་ཡོད་པ་ལས་
འདུ་བྱེད་རྣམས་མངོན་པར་འགྲུབ་པར་འགྱུར་བ་ནས་སྐྱེ་བ་ཡོད་པ་ལས་རྒ་ཤིའི་བར་དུ་མངོན་པར་འགྲུབ་པར་འགྱུར་རོ། །དེ་ལ་མ་རིག་པ་ཡང་འདི་སྙམ་དུ་བདག་གིས་འདུ་བྱེད་རྣམས་མངོན་པར་བསྒྲུབ་པོ་སྙམ་དུ་མི་སེམས་སོ། །
འདུ་བྱེད་རྣམས་ཀྱང་འདི་སྙམ་དུ་བདག་ཅག་ནི་མ་རིག་པས་མངོན་པར་བསྒྲུབས་སོ་སྙམ་དུ་མི་སེམས་པ་ནས་དེ་བཞིན་དུ་སྐྱེ་བ་ཡང་འདི་སྙམ་དུ་བདག་གིས་རྒ་ཤི་མངོན་པར་བསྒྲུབ་པོ་སྙམ་དུ་མི་སེམས་ཤིང་། རྒ་ཤི་ཡང་འདི་སྙམ་དུ་
བདག་ནི་སྐྱེ་བས་མངོན་པར་བསྒྲུབས་སོ་སྙམ་དུ་མི་སེམས་པའི་བར་དུ་སྟེ། འོན་ཀྱང་མ་རིག་པ་ཡོད་པ་ལས་འདུ་བྱེད་རྣམས་མངོན་པར་འགྲུབ་ཅིང་འབྱུང་བར་འགྱུར་བ་ནས་དེ་བཞིན་དུ་སྐྱེ་བ་ཡོད་པ་ལས་རྒ་ཤིའི་བར་དུ་
མངོན་པར་འགྲུབ་ཅིང་འབྱུང་བར་འགྱུར་ཏེ། དེ་ལྟར་ན་ནང་གི་རྟེན་ཅིང་འབྲེལ་པར་འབྱུང་བ་རྒྱུ་དང་འབྲེལ་པར་བལྟའོ། །ནང་གི་རྟེན་ཅིང་འབྲེལ་པར་འབྱུང་བ་རྐྱེན་དང་འབྲེལ་པར་ཇི་ལྟར་བལྟ་ཞེ་ན། ཁམས་དྲུག་པོ་འདུས་པའི་ཕྱིར་
ཏེ། ཁམས་དྲུག་པོ་གང་དག་འདུས་པའི་ཕྱིར་ཞེ་ན། འདི་ལྟ་སྟེ། ས་དང་། ཆུ་དང་། མེ་དང་། རླུང་དང་། ནམ་མཁའ་དང་། རྣམ་པར་ཤེས་པའི་ཁམས་རྣམས་འདུས་པ་ལས་ནང་གི་རྟེན་ཅིང་འབྲེལ་པར་འབྱུང་བ་རྐྱེན་དང་འབྲེལ་པར་བལྟའོ། །

57-1-135b

དེ་ལ་ནང་གི་རྟེན་ཅིང་འབྲེལ་པར་འབྱུང་བའི་སའི་ཁམས་གང་ཞེ་ན། གང་འདི་འདུས་ནས་ལུས་ཀྱི་སྲ་བའི་དངོས་པོ་མངོན་པར་འགྲུབ་པར་བྱེད་པ་འདི་ནི་སའི་ཁམས་ཤེས་བྱའོ། །གང་ལུས་སྡུད་པའི་བྱ་བ་བྱེད་པ་འདི་ནི་ཆུའི་ཁམས་
ཤེས་བྱའོ། །གང་ལུས་ཀྱིས་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་འཇུ་བར་བྱེད་པ་འདི་ནི་མེའི་ཁམས་ཤེས་བྱའོ། །གང་ལུས་ཀྱི་དབུགས་ཕྱི་ནང་དུ་རྒྱུ་བའི་བྱ་བ་བྱེད་པ་འདི་ནི་རླུང་གི་ཁམས་ཤེས་བྱའོ། །
གང་ལུས་ཀྱི་ནང་སྦུབས་ཡོད་པར་བྱེད་པ་འདི་ནི་ནམ་མཁའི་ཁམས་ཤེས་བྱའོ། །གང་མདུང་ཁྱིམ་གྱི་ཚུལ་དུ་ལུས་ཀྱི་མིང་དང་གཟུགས་ཀྱི་མྱུ་གུ་མངོན་པར་འགྲུབ་པར་བྱེད་པ་རྣམ་པར་ཤེས་པའི་ཚོགས་ལྔ་འདུས་པ་དང་། ཟག་
པ་དང་བཅས་པའི་ཡིད་ཀྱི་རྣམ་པར་ཤེས་པ་གང་ཡིན་པ་འདི་ནི་རྣམ་པར་ཤེས་པའི་ཁམས་ཤེས་བྱའོ། །རྐྱེན་འདི་དག་མེད་པར་ལུས་སྐྱེ་བར་མི་འགྱུར་གྱི། ནམ་ནང་གི་སའི་ཁམས་ཚང་ཞིང་དེ་བཞིན་དུ་ཆུ་དང་། མེ་དང་། རླུང་དང་། 
ནམ་མཁའ་དང་། རྣམ་པར་ཤེས་པའི་ཁམས་རྣམས་ཀྱང་ཚང་བར་གྱུར་ལ། ཐམས་ཅད་འདུས་པ་དེ་ལས་ལུས་མངོན་པར་འགྲུབ་པར་འགྱུར་རོ། །དེ་ལ་སའི་ཁམས་ཀྱང་འདི་སྙམ་དུ་བདག་གིས་འདུས་ནས་ལུས་ཀྱི་སྲ་བའི་
དངོས་པོ་མངོན་པར་བསྒྲུབ་པོ་སྙམ་དུ་མི་སེམས་སོ། །ཆུའི་ཁམས་ཀྱང་འདི་སྙམ་དུ་བདག་གིས་ལུས་ཀྱི་སྡུད་པའི་བྱ་བ་བྱའོ་སྙམ་དུ་མི་སེམས་སོ། །མེའི་ཁམས་ཀྱང་འདི་སྙམ་དུ་བདག་གིས་ལུས་ཀྱི་ཟོས་པ་དང་། འཐུངས་པ་
དང་། འཆོས་པ་དང་། མྱངས་པ་རྣམས་འཇུ་བར་བྱའོ་སྙམ་དུ་མི་སེམས་སོ། །རླུང་གི་ཁམས་ཀྱང་འདི་སྙམ་དུ་བདག་གིས་ལུས་ཀྱི་དབུགས་ཕྱི་ནང་དུ་རྒྱུ་བའི་བྱ་བ་བྱའོ་སྙམ་དུ་མི་སེམས་སོ། །ནམ་མཁའི་ཁམས་ཀྱང་འདི་སྙམ་
དུ་བདག་གིས་ལུས་ཀྱི་ནང་སྦུབས་ཡོད་པར་བྱའོ་སྙམ་དུ་མི་སེམས་སོ། །རྣམ་པར་ཤེས་པའི་ཁམས་ཀྱང་འདི་སྙམ་དུ་བདག་གིས་ལུས་ཀྱི་མིང་དང་གཟུགས་མངོན་པར་བསྒྲུབ་པོ་སྙམ་དུ་མི་སེམས་སོ། །ལུས་ཀྱང་འདི་སྙམ་དུ་བདག་

57-1-136a

ནི་རྐྱེན་འདི་དག་གིས་བསྐྱེད་དོ་སྙམ་དུ་མི་སེམས་མོད་ཀྱི། འོན་ཀྱང་རྐྱེན་འདི་དག་ཡོད་ན་ལུས་སྐྱེ་བར་འགྱུར་རོ། །དེ་ལ་སའི་ཁམས་ནི་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེ་བ་པོ་མ་ཡིན། ཤེད་ལས་
སྐྱེས་པ་མ་ཡིན། ཤེད་བུ་མ་ཡིན། བུད་མེད་མ་ཡིན། སྐྱེས་པ་མ་ཡིན། མ་ནིང་མ་ཡིན། ང་མ་ཡིན། བདག་གི་མ་ཡིན་ཏེ། གཞན་སུའི་ཡང་མ་ཡིན་ནོ། །དེ་བཞིན་དུ་ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། 
ནམ་མཁའི་ཁམས་དང་། རྣམ་པར་ཤེས་པའི་ཁམས་ཀྱང་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེ་བ་པོ་མ་ཡིན། ཤེད་ལས་སྐྱེས་པ་མ་ཡིན། ཤེད་བུ་མ་ཡིན། བུད་མེད་མ་ཡིན། སྐྱེས་པ་མ་ཡིན། མ་ནིང་
མ་ཡིན། ང་མ་ཡིན། བདག་གི་མ་ཡིན། གཞན་སུའི་ཡང་མ་ཡིན་ནོ། །དེ་ལ་མ་རིག་པ་གང་ཞེ་ན། ཁམས་དྲུག་པོ་འདི་དག་ཉིད་ལ་གང་གཅིག་པུར་འདུ་ཤེས་པ་དང་། རིལ་པོར་འདུ་ཤེས་པ་དང་། རྟག་པར་འདུ་ཤེས་པ་དང་། 
བརྟན་པར་འདུ་ཤེས་པ་དང་། ཐེར་ཟུག་ཏུ་འདུ་ཤེས་པ་དང་། བདེ་བར་འདུ་ཤེས་པ་དང་། བདག་ཏུ་འདུ་ཤེས་པ་དང་། སེམས་ཅན་དང་། སྲོག་དང་། སྐྱེ་བ་པོ་དང་། གསོ་བ་དང་། སྐྱེས་བུ་དང་། གང་ཟག་ཏུ་འདུ་ཤེས་པ་དང་། ཤེད་ལས་
སྐྱེས་པ་དང་། ཤེད་བུར་འདུ་ཤེས་པ་དང་། ང་ཞེས་བྱ་བ་དང་། བདག་གི་ཞེས་བྱ་བར་འདུ་ཤེས་པ་སྟེ། འདི་ལྟ་བུ་ལ་སོགས་པ་མི་ཤེས་པ་རྣམ་པ་སྣ་ཚོགས་འདི་ནི་མ་རིག་པ་ཞེས་བྱའོ། །དེ་ལྟར་མ་རིག་པ་ཡོད་པས་ཡུལ་རྣམས་
ལ་འདོད་ཆགས་དང་། ཞེ་སྡང་དང་། གཏི་མུག་འཇུག་སྟེ། དེ་ལ་ཡུལ་རྣམས་ལ་འདོད་ཆགས་དང་། ཞེ་སྡང་དང་། གཏི་མུག་གང་ཡིན་པ་འདི་ནི་མ་རིག་པའི་རྐྱེན་གྱིས་འདུ་བྱེད་རྣམས་ཤེས་བྱའོ། །དངོས་པོ་སོ་སོར་རྣམ་པར་
རིག་པ་ནི་རྣམ་པར་ཤེས་པའོ། །རྣམ་པར་ཤེས་པ་དང་ལྷན་ཅིག་བྱུང་བ་ཉེ་བར་ལེན་པའི་ཕུང་པོ་བཞི་པོ་འདི་དག་ནི་མིང་དང་གཟུགས་སོ། །མིང་དང་གཟུགས་ལ་རྟེན་པའི་དབང་པོ་རྣམས་ནི་སྐྱེ་མཆེད་དྲུག་གོ། །ཆོས་གསུམ་

57-1-136b

འདུས་པ་ནི་རེག་པའོ། །རེག་པ་མྱོང་བ་ནི་ཚོར་བའོ། །ཚོར་བ་ལ་ཞེན་པ་ནི་སྲེད་པའོ། །སྲེད་པ་འཕེལ་བ་ནི་ལེན་པའོ། །ལེན་པ་ལས་སྐྱེས་པ་ཡང་སྐྱེད་པའི་ལས་ནི་སྲིད་པའོ། །རྒྱུ་དེ་ལས་ཕུང་པོ་བྱུང་བ་ནི་སྐྱེ་བའོ། །སྐྱེས་ནས་
ཕུང་པོ་སྨིན་པ་ནི་རྒ་བའོ། །རྒས་ནས་ཕུང་པོ་ཞིག་པ་ནི་འཆི་བའོ། །འཆི་ཞིང་མྱོས་ཏེ་མངོན་པར་ཆགས་པ་དང་བཅས་པའི་ནང་གི་ཡོངས་སུ་གདུང་བ་ནི་མྱ་ངན་ཏོ། །མྱ་ངན་ལས་བྱུང་བའི་ཚིག་ཏུ་སྨྲ་བ་ནི་སྨྲེ་སྔགས་འདོན་པའོ། །རྣམ་
པར་ཤེས་པ་ལྔའི་ཚོགས་དང་ལྡན་པའི་མི་བདེ་བ་མྱོང་བ་ནི་སྡུག་བསྔལ་ལོ། །ཡིད་ལ་བྱེད་པ་དང་ལྡན་པའི་ཡིད་ཀྱི་སྡུག་བསྔལ་ནི་ཡིད་མི་བདེ་བའོ། །གཞན་ཡང་འདི་ལྟ་བུ་ལ་སོགས་པའི་ཉེ་བའི་ཉོན་མོངས་པ་གང་ཡིན་པ་དེ་དག་ནི་
འཁྲུག་པ་ཞེས་བྱའོ། །དེ་ལ་མུན་པ་ཆེན་པོའི་ཕྱིར་མ་རིག་པའོ། །མངོན་པར་འདུ་བྱེད་པའི་ཕྱིར་འདུ་བྱེད་རྣམས་སོ། །རྣམ་པར་རིག་པའི་ཕྱིར་རྣམ་པར་ཤེས་པའོ། །རྟེན་པའི་ཕྱིར་མིང་དང་གཟུགས་སོ། །སྐྱེ་བའི་སྒོའི་ཕྱིར་
སྐྱེ་མཆེད་དྲུག་གོ། །རེག་པའི་ཕྱིར་རེག་པའོ། །མྱོང་བའི་ཕྱིར་ཚོར་བའོ། །སྐོམ་པའི་ཕྱིར་སྲེད་པའོ། །ཉེ་བར་ལེན་པའི་ཕྱིར་ལེན་པའོ། །ཡང་སྲིད་པ་སྐྱེ་བའི་ཕྱིར་སྲིད་པའོ། །ཕུང་པོ་འབྱུང་བའི་ཕྱིར་སྐྱེ་བའོ། །ཕུང་པོ་སྨིན་
པའི་ཕྱིར་རྒ་བའོ། །འཇིག་པའི་ཕྱིར་འཆི་བའོ། །མྱ་ངན་བྱེད་པའི་ཕྱིར་མྱ་ངན་ཏོ། །ཚིག་གིས་སྨྲེ་བའི་ཕྱིར་སྨྲེ་སྔགས་འདོན་པའོ། །ལུས་ལ་གནོད་པའི་ཕྱིར་སྡུག་བསྔལ་བའོ། །སེམས་ལ་གནོད་པའི་ཕྱིར་ཡིད་མི་བདེ་བའོ། །
ཉོན་མོངས་པའི་ཕྱིར་འཁྲུག་པའོ། །གཞན་ཡང་དེ་ཁོ་ན་མི་རྟོགས་ཤིང་ལོག་པར་ཤེས་ཏེ་མི་ཤེས་པ་ནི་མ་རིག་པའོ། །དེ་ལྟར་མ་རིག་པ་ཡོད་ན་འདུ་བྱེད་རྣམ་གསུམ་མངོན་པར་འགྲུབ་སྟེ། བསོད་ནམས་སུ་ཉེ་བར་འགྲོ་བ་དང་། 
བསོད་ནམས་མ་ཡིན་པར་ཉེ་བར་འགྲོ་བ་དང་། མི་གཡོ་བར་ཉེ་བར་འགྲོ་བའོ། །དེ་ལ་བསོད་ནམས་སུ་ཉེ་བར་འགྲོ་བའི་འདུ་བྱེད་རྣམས་ལས་བསོད་ནམས་སུ་ཉེ་བར་འགྲོ་བའི་རྣམ་པར་ཤེས་པ་ཉིད་དུ་འགྱུར་བ་དང་། བསོད་

57-1-137a

ནམས་མ་ཡིན་པར་ཉེ་བར་འགྲོ་བའི་འདུ་བྱེད་རྣམས་ལས་བསོད་ནམས་མ་ཡིན་པར་ཉེ་བར་འགྲོ་བའི་རྣམ་པར་ཤེས་པ་ཉིད་དུ་འགྱུར་བ་དང་། མི་གཡོ་བར་ཉེ་བར་འགྲོ་བའི་འདུ་བྱེད་རྣམས་ལས་མི་གཡོ་བར་
ཉེ་བར་འགྲོ་བའི་རྣམ་པར་ཤེས་པ་ཉིད་དུ་འགྱུར་བ་འདི་ནི་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱའོ། །རྣམ་པར་ཤེས་པ་དང་ལྷན་ཅིག་སྐྱེས་པ་ཕུང་པོ་གཟུགས་ཅན་མ་ཡིན་པ་བཞི་དང་། གཟུགས་གང་ཡིན་པ་དེ་ནི་
རྣམ་པར་ཤེས་པའི་རྐྱེན་གྱིས་མིང་དང་གཟུགས་ཤེས་བྱའོ། །མིང་དང་གཟུགས་རྣམ་པར་འཕེལ་བས་སྐྱེ་མཆེད་དྲུག་གི་སྒོ་ནས་བྱ་བ་བྱེད་པ་རྣམས་འབྱུང་སྟེ། དེ་ནི་མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ཅེས་བྱའོ། །
སྐྱེ་མཆེད་དྲུག་པོ་དག་ལ་རེག་པའི་ཚོགས་དྲུག་འབྱུང་སྟེ། དེ་ནི་སྐྱེ་མཆེད་དྲུག་གི་རྐྱེན་གྱིས་རེག་པ་ཞེས་བྱའོ། །ཇི་ལྟ་བུར་རེག་པ་འབྱུང་བ་དེ་ལྟ་བུར་ཚོར་བ་འབྱུང་སྟེ། དེ་ནི་རེག་པའི་རྐྱེན་གྱིས་ཚོར་བ་ཞེས་བྱའོ། །ཚོར་བའི་བྱེ་
བྲག་དེ་དག་མྱོང་བ་དང་། མངོན་པར་དགའ་བ་དང་། ལྷག་པར་ཞེན་པ་དང་། ལྷག་པར་ཞེན་ནས་འདུག་པ་དེ་ནི་ཚོར་བའི་རྐྱེན་གྱིས་སྲེད་པ་ཞེས་བྱའོ། །མྱོང་བ་དང་། མངོན་པར་དགའ་བ་དང་། ལྷག་པར་ཞེན་པ་དང་། ལྷག་པར་ཞེན་
ནས་འདུག་པ་ལས་བདག་སྡུག་པའི་ངོ་བོ་དང་། བདེ་བའི་ངོ་བོ་དང་བྲལ་བར་མ་གྱུར་ཅིག་སྙམ་དུ་ཡོངས་སུ་མི་གཏོང་བར་ཕྱིར་ཞིང་སྨོན་པ་འདི་ནི་སྲེད་པའི་རྐྱེན་གྱིས་ལེན་པ་ཞེས་བྱའོ། །དེ་ལྟར་སྨོན་ཅིང་ཡང་སྲིད་པ་སྐྱེད་པའི་
ལས་ལུས་དང་། ངག་དང་། ཡིད་ཀྱིས་ཀུན་ནས་སློང་བ་དེ་ནི་ལེན་པའི་རྐྱེན་གྱིས་སྲིད་པ་ཞེས་བྱའོ། །ལས་དེ་ལས་སྐྱེས་པའི་ཕུང་པོ་ལྔ་རྣམས་འགྲུབ་པ་གང་ཡིན་པ་དེ་ནི་སྲིད་པའི་རྐྱེན་གྱིས་སྐྱེ་བ་ཞེས་བྱའོ། །སྐྱེས་ནས་མངོན་
དུ་འགྲུབ་པའི་ཕུང་པོ་རྣམས་ཀྱི་འཕེལ་བ་ཡོངས་སུ་སྨིན་པ་དང་། འཇིག་པར་འགྱུར་བ་དེ་ནི་སྐྱེ་བའི་རྐྱེན་གྱིས་རྒ་ཤི་ཞེས་བྱའོ། །དེ་ལྟར་རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་པོ་འདི་དག་ནི་རྒྱུ་གཞན་དང་གཞན་ལས་

57-1-137b

བྱུང་བ། རྐྱེན་གཞན་དང་གཞན་ལས་བྱུང་བ། རྟག་པ་མ་ཡིན། མི་རྟག་པ་མ་ཡིན། འདུས་བྱས་མ་ཡིན། འདུས་མ་བྱས་མ་ཡིན། རྒྱུ་མེད་པ་མ་ཡིན། རྐྱེན་མེད་པ་མ་ཡིན། མྱོང་བ་ཡོད་པ་མ་ཡིན། ཟད་པའི་ཆོས་མ་ཡིན། འཇིག་
པའི་ཆོས་མ་ཡིན། འགོག་པའི་ཆོས་མ་ཡིན་ཏེ། ཐོག་མ་མེད་པའི་དུས་ནས་ཞུགས་པ། རྒྱུན་མ་ཆད་པར་ཀླུང་གི་རྒྱུན་བཞིན་དུ་རྗེས་སུ་ཞུགས་པའོ། །རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་པོ་འདི་དག་ནི་
རྒྱུ་གཞན་དང་གཞན་ལས་བྱུང་བ། རྐྱེན་གཞན་དང་གཞན་ལས་བྱུང་བ། རྟག་པ་མ་ཡིན། མི་རྟག་པ་མ་ཡིན། འདུས་བྱས་མ་ཡིན། འདུས་མ་བྱས་མ་ཡིན། རྒྱུ་མེད་པ་མ་ཡིན། རྐྱེན་མེད་པ་མ་ཡིན། མྱོང་བ་ཡོད་པ་མ་ཡིན། 
ཟད་པའི་ཆོས་མ་ཡིན། འཇིག་པའི་ཆོས་མ་ཡིན། འགོག་པའི་ཆོས་མ་ཡིན་ཏེ། ཐོག་མ་མེད་པའི་དུས་ནས་ཞུགས་པ། རྒྱུན་མ་ཆད་པར་ཀླུང་གི་རྒྱུན་བཞིན་དུ་རྗེས་སུ་ཞུགས་མོད་ཀྱི། འོན་ཀྱང་ཡན་ལག་བཞི་པོ་འདི་དག་ནི་
རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་པོ་དེ་དག་བསྡུ་བར་བྱ་བའི་རྒྱུར་འགྱུར་རོ། །བཞི་གང་ཞེ་ན། འདི་ལྟ་སྟེ། མ་རིག་པ་དང་། སྲེད་པ་དང་། ལས་དང་། རྣམ་པར་ཤེས་པའོ། །དེ་ལ་རྣམ་པར་ཤེས་པ་ནི་ས་བོན་གྱི་
རང་བཞིན་གྱིས་རྒྱུ་བྱེད་དོ། །ལས་ནི་ཞིང་གི་རང་བཞིན་གྱིས་རྒྱུ་བྱེད་དོ། །མ་རིག་པ་དང་སྲེད་པ་ནི་ཉོན་མོངས་པའི་རང་བཞིན་གྱིས་རྒྱུ་བྱེད་དོ། །དེ་ལ་ལས་དང་ཉོན་མོངས་པ་དག་ནི་ས་བོན་རྣམ་པར་ཤེས་པ་སྐྱེད་དོ། །དེ་ལ་ལས་ནི་
ས་བོན་རྣམ་པར་ཤེས་པའི་ཞིང་གི་བྱ་བ་བྱེད་དོ། །སྲེད་པ་ནི་ས་བོན་རྣམ་པར་ཤེས་པ་རླན་པར་བྱེད་དོ། །མ་རིག་པ་ནི་ས་བོན་རྣམ་པར་ཤེས་པ་འདེབས་ཏེ། རྐྱེན་འདི་དག་མེད་ན་ས་བོན་རྣམ་པར་ཤེས་པ་མངོན་པར་འགྲུབ་པར་
མི་འགྱུར་རོ། །དེ་ལ་ལས་ཀྱང་འདི་སྙམ་དུ་བདག་གིས་ས་བོན་རྣམ་པར་ཤེས་པའི་ཞིང་གི་བྱ་བ་བྱའོ་སྙམ་དུ་མི་སེམས་སོ། །སྲེད་པ་ཡང་འདི་སྙམ་དུ་བདག་གིས་ས་བོན་རྣམ་པར་ཤེས་པ་བརླན་པར་བྱའོ་སྙམ་དུ་མི་སེམས་སོ། །

57-1-138a

མ་རིག་པ་ཡང་འདི་སྙམ་དུ་བདག་གིས་ས་བོན་རྣམ་པར་ཤེས་པ་གདབ་བོ་སྙམ་དུ་མི་སེམས་སོ། །ས་བོན་རྣམ་པར་ཤེས་པ་ཡང་འདི་སྙམ་དུ་བདག་ནི་རྐྱེན་འདི་དག་གིས་བསྐྱེད་དོ་སྙམ་དུ་མི་སེམས་ཏེ། 
འོན་ཀྱང་ས་བོན་རྣམ་པར་ཤེས་པ་ལས་ཀྱི་ཞིང་ལ་རྟེན་པ། སྲེད་པའི་རླན་གྱིས་བརླན་པ། མ་རིག་པའི་ལུད་ཀྱིས་བྲན་པ། སྐྱེ་བ་ན་སྐྱེ་བའི་གནས་ཉིང་མཚམས་སྦྱོར་བ། མའི་མངལ་དེ་དང་དེར་མིང་དང་གཟུགས་ཀྱི་མྱུ་གུ་
མངོན་པར་འགྲུབ་སྟེ། མིང་དང་གཟུགས་ཀྱི་མྱུ་གུ་དེ་ཡང་བདག་གིས་མ་བྱས། གཞན་གྱིས་མ་བྱས། གཉིས་ཀས་མ་བྱས། དབང་ཕྱུག་གིས་མ་བྱས། དུས་ཀྱིས་མ་བསྒྱུར། རང་བཞིན་ལས་མ་བྱུང་། བྱེད་པ་ལ་རག་ལས་པ་
མ་ཡིན། རྒྱུ་མེད་པ་ལས་ཀྱང་མ་སྐྱེས་ཏེ། འོན་ཀྱང་ཕ་དང་མ་ཕྲད་པ་དང་། ཟླ་མཚན་དང་ལྡན་པ་དང་། རྐྱེན་གཞན་ཡང་འཚོགས་ན་བདག་པོ་མེད་པའི་ཆོས། བདག་གི་མེད་པ། འཛིན་པ་མེད་པ། ནམ་མཁའ་དང་མཚུངས་པ། 
སྒྱུ་མའི་མཚན་ཉིད་ཀྱི་རང་བཞིན་དག་ལ་རྒྱུ་དང་རྐྱེན་མ་ཚང་བ་མེད་པའི་ཕྱིར་སྐྱེ་བའི་གནས་ཉིང་མཚམས་སྦྱོར་བ་མའི་མངལ་དེ་དང་དེར་མྱོང་བ་དང་ལྡན་པའི་ས་བོན་རྣམ་པར་ཤེས་པ་མིང་དང་གཟུགས་ཀྱི་མྱུ་གུ་མངོན་པར་
འགྲུབ་པོ། །འདི་ལྟ་སྟེ། མིག་གི་རྣམ་པར་ཤེས་པ་ནི་རྒྱུ་ལྔས་འབྱུང་སྟེ། ལྔ་གང་ཞེ་ན། མིག་ལ་རྟེན་པ་དང་། གཟུགས་དང་། སྣང་བ་དང་། ནམ་མཁའ་དང་། དེ་སྐྱེད་པའི་ཡིད་ལ་བྱེད་པ་ལ་ཡང་བརྟེན་ནས་མིག་གི་རྣམ་
པར་ཤེས་པ་འབྱུང་ངོ་། །དེ་ལ་མིག་ནི་མིག་གི་རྣམ་པར་ཤེས་པའི་རྟེན་གྱི་བྱ་བ་བྱེད་དོ། །གཟུགས་ནི་མིག་གི་རྣམ་པར་ཤེས་པའི་དམིགས་པའི་བྱ་བ་བྱེད་དོ། །སྣང་བ་ནི་མངོན་པའི་བྱ་བ་བྱེད་དོ། །ནམ་མཁའ་ནི་མི་སྒྲིབ་པའི་
བྱ་བ་བྱེད་དོ། །དེ་དང་འབྱུང་བ་ཡིད་ལ་བྱེད་པ་ནི་བསམ་པའི་བྱ་བ་བྱེད་དོ། །རྐྱེན་དེ་དག་མེད་ན་མིག་གི་རྣམ་པར་ཤེས་པ་འབྱུང་བར་མི་འགྱུར་གྱི། གང་གི་ཚེ་ནང་གི་སྐྱེ་མཆེད་མིག་མ་ཚང་བར་མ་གྱུར་ལ། དེ་བཞིན་དུ་གཟུགས་

57-1-138b

དང་། སྣང་བ་དང་། ནམ་མཁའ་དང་། དེ་དང་འབྱུང་བ་ཡིད་ལ་བྱེད་པ་དག་མ་ཚང་བར་མ་གྱུར་ཏེ། ཐམས་ཅད་འདུས་པ་དེ་ལས་མིག་གི་རྣམ་པར་ཤེས་པ་འབྱུང་བར་འགྱུར་རོ། །དེ་ལ་མིག་ནི་འདི་སྙམ་དུ་བདག་གིས་མིག་གི་རྣམ་པར་ཤེས་པའི་
རྟེན་གྱི་བྱ་བ་བྱའོ་སྙམ་དུ་མི་སེམས་སོ། །གཟུགས་ཀྱང་འདི་སྙམ་དུ་བདག་གིས་མིག་གི་རྣམ་པར་ཤེས་པའི་དམིགས་པའི་བྱ་བ་བྱའོ་སྙམ་དུ་མི་སེམས་སོ། །སྣང་བ་ཡང་འདི་སྙམ་དུ་བདག་གིས་མིག་གི་རྣམ་པར་ཤེས་པའི་མངོན་
པའི་བྱ་བ་བྱའོ་སྙམ་དུ་མི་སེམས་སོ། །ནམ་མཁའ་ཡང་འདི་སྙམ་དུ་བདག་གིས་མིག་གི་རྣམ་པར་ཤེས་པའི་མི་སྒྲིབ་པའི་བྱ་བ་བྱའོ་སྙམ་དུ་མི་སེམས་སོ། །དེ་དང་འབྱུང་བའི་ཡིད་ལ་བྱེད་པ་ཡང་འདི་སྙམ་དུ་བདག་གིས་མིག་གི་
རྣམ་པར་ཤེས་པའི་བསམ་པའི་བྱ་བ་བྱའོ་སྙམ་དུ་མི་སེམས་སོ། །མིག་གི་རྣམ་པར་ཤེས་པ་ཡང་འདི་སྙམ་དུ་བདག་ནི་རྐྱེན་འདི་དག་གིས་བསྐྱེད་དོ་སྙམ་དུ་མི་སེམས་ཏེ། འོན་ཀྱང་རྐྱེན་འདི་དག་ཡོད་པ་ལས་མིག་གི་རྣམ་པར་
ཤེས་པ་སྐྱེ་བར་འགྱུར་རོ། །དེ་བཞིན་དུ་དབང་པོ་ལྷག་མ་རྣམས་ཀྱང་ཅི་རིགས་སུ་སྦྱར་རོ། །དེ་ལ་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་མི་འཕོ་མོད་ཀྱི། རྒྱུ་དང་རྐྱེན་མ་ཚང་བ་མེད་པའི་ཕྱིར་ལས་ཀྱི་འབྲས་
བུར་མངོན་པ་ཡང་ཡོད་དོ། །འདི་ལྟ་སྟེ། དཔེར་ན་རབ་ཏུ་ཕྱིས་པའི་མེ་ལོང་གི་དཀྱིལ་འཁོར་ལ་བཞིན་གྱི་གཟུགས་བརྙན་སྣང་བ་ཡང་བཞིན་མེ་ལོང་གི་དཀྱིལ་འཁོར་དུ་མ་འཕོས་མོད་ཀྱི། རྒྱུ་དང་རྐྱེན་མ་ཚང་བ་མེད་པའི་
ཕྱིར་བཞིན་དུ་མངོན་པ་ཡང་ཡོད་དོ། །དེ་བཞིན་དུ་འདི་ནས་ཀྱང་སུ་ཡང་ཤི་འཕོས་པ་མེད་ལ་གཞན་དུ་ཡང་མ་སྐྱེས་ཏེ། རྒྱུ་དང་རྐྱེན་རྣམས་མ་ཚང་བ་མེད་པའི་ཕྱིར་ལས་ཀྱི་འབྲས་བུར་མངོན་པ་ཡང་ཡོད་དོ། །འདི་ལྟ་སྟེ། 
དཔེར་ན་ཟླ་བའི་དཀྱིལ་འཁོར་ནི་དཔག་ཚད་བཞི་ཁྲི་ཉིས་སྟོང་ནས་འགྲོ་སྟེ། འོན་ཀྱང་སྣོད་ཆུང་ངུ་ཆུས་གང་བར་ཟླ་བའི་དཀྱིལ་འཁོར་གྱི་གཟུགས་བརྙན་སྣང་བ་ཡང་ཟླ་བའི་དཀྱིལ་འཁོར་ནི་གནས་དེ་ནས་མ་འཕོས་ཏེ། 

57-1-139a

སྣོད་ཆུང་ངུ་ཆུས་གང་བའི་ནང་དུ་སོང་བ་ཡང་མེད་མོད་ཀྱི། རྒྱུ་དང་རྐྱེན་མ་ཚང་བ་མེད་པའི་ཕྱིར་ཟླ་བའི་དཀྱིལ་འཁོར་དུ་མངོན་པ་ཡང་ཡོད་དོ། །དེ་བཞིན་དུ་འདི་ནས་ཀྱང་སུ་ཡང་ཤི་འཕོས་པ་མེད་ལ་གཞན་དུ་
ཡང་མ་སྐྱེས་མོད་ཀྱི། རྒྱུ་དང་རྐྱེན་རྣམས་མ་ཚང་བ་མེད་པའི་ཕྱིར་ལས་ཀྱི་འབྲས་བུར་མངོན་པ་ཡང་ཡོད་དོ། །འདི་ལྟ་སྟེ། དཔེར་ན་མེ་ནི་རྒྱུ་དང་རྐྱེན་མ་ཚང་ན་མི་འབར་གྱི་རྒྱུ་དང་རྐྱེན་འཚོགས་པ་ལས་འབར་རོ། །དེ་བཞིན་དུ་
བདག་པོ་མེད་པའི་ཆོས། བདག་གི་མེད་པ། འཛིན་པ་མེད་པ། ནམ་མཁའ་དང་མཚུངས་པ། སྒྱུ་མའི་མཚན་ཉིད་ཀྱི་རང་བཞིན་དག་ལ་རྒྱུ་དང་རྐྱེན་རྣམས་མ་ཚང་བ་མེད་པའི་ཕྱིར་སྐྱེ་བའི་གནས་ཉིང་མཚམས་སྦྱོར་བ་མའི་
མངལ་དེ་དང་དེར་ས་བོན་རྣམ་པར་ཤེས་པ་ལས་དང་ཉོན་མོངས་པ་རྣམས་ཀྱིས་བསྐྱེད་པ་མིང་དང་གཟུགས་ཀྱི་མྱུ་གུ་མངོན་པར་འགྲུབ་སྟེ། དེ་ལྟར་ན་ནང་གི་རྟེན་ཅིང་འབྲེལ་པར་འབྱུང་བ་རྐྱེན་དང་འབྲེལ་པར་བལྟའོ། །དེ་ལ་ནང་གི་
རྟེན་ཅིང་འབྲེལ་པར་འབྱུང་བ་རྣམ་པ་ལྔར་བལྟ་སྟེ། ལྔ་གང་ཞེ་ན། རྟག་པར་མ་ཡིན་པ་དང་། ཆད་པར་མ་ཡིན་པ་དང་། འཕོ་བར་མ་ཡིན་པ་དང་། རྒྱུ་ཆུང་ངུ་ལས་འབྲས་བུ་ཆེན་པོ་འབྱུང་བ་དང་། དེ་དང་འདྲ་བའི་རྒྱུད་དུའོ། །
ཇི་ལྟར་རྟག་པར་མ་ཡིན་ཞེ་ན། གང་གི་ཕྱིར་ཐ་མའི་འཆི་བའི་ཕུང་པོ་རྣམས་ཀྱང་གཞན་ལ། སྐྱེ་བའི་ཆར་གཏོགས་པ་རྣམས་ཀྱང་གཞན་ཏེ། ཐ་མ་འཆི་བའི་ཕུང་པོ་གང་ཡིན་པ་དེ་ཉིད་སྐྱེ་བའི་ཆར་གཏོགས་པ་རྣམས་མ་ཡིན་
གྱི། ཐ་མའི་འཆི་བའི་ཕུང་པོ་རྣམས་ཀྱང་འགག་ལ་སྐྱེ་བའི་ཆར་གཏོགས་པའི་ཕུང་པོ་རྣམས་ཀྱང་འབྱུང་བས་དེའི་ཕྱིར་རྟག་པར་མ་ཡིན་ནོ། །ཇི་ལྟར་ཆད་པར་མ་ཡིན་ཞེ་ན། ཐ་མའི་འཆི་བའི་ཕུང་པོ་རྣམས་སྔོན་འགགས་
པ་ལས་སྐྱེ་བའི་ཆར་གཏོགས་པའི་ཕུང་པོ་རྣམས་འབྱུང་བ་མ་ཡིན། མ་འགགས་པ་ལས་ཀྱང་མ་ཡིན་གྱི། ཐ་མའི་འཆི་བའི་ཕུང་པོ་རྣམས་ཀྱང་འགགས་ལ། དེ་ཉིད་ཀྱི་ཚེ་སྐྱེ་བའི་ཆར་གཏོགས་པའི་ཕུང་པོ་རྣམས་སྲང་མདའི་

57-1-139b

མཐོན་དམན་བཞིན་འབྱུང་བར་འགྱུར་ཏེ། དེའི་ཕྱིར་ཆད་པར་མ་ཡིན་ནོ། །ཇི་ལྟར་འཕོ་བར་མ་ཡིན་ཞེ་ན། སེམས་ཅན་གྱི་རིས་མི་འདྲ་བ་ནས་སྐལ་པ་མཉམ་པའི་སྐྱེ་བར་སྐྱེ་བ་མངོན་པར་སྒྲུབ་པས་དེའི་ཕྱིར་འཕོ་བར་མ་ཡིན་
ནོ། །ཇི་ལྟར་རྒྱུ་ཆུང་ངུ་ལས་འབྲས་བུ་ཆེན་པོ་འབྱུང་ཞེ་ན། ལས་ཆུང་ངུ་བྱས་པ་ལས་འབྲས་བུ་ཆེན་པོའི་རྣམ་པར་སྨིན་པ་མྱོང་སྟེ། དེའི་ཕྱིར་རྒྱུ་ཆུང་ངུ་ལས་འབྲས་བུ་ཆེན་པོ་མངོན་པར་འགྲུབ་པོ། །ཇི་ལྟར་མྱོང་བར་
འགྱུར་བའི་ལས་བྱས་པ་དེ་ལྟར་མྱོང་བར་འགྱུར་བའི་རྣམ་པར་སྨིན་པ་མྱོང་བས་དེའི་ཕྱིར་དེ་དང་འདྲ་བའི་རྒྱུད་དུའོ། །བཙུན་པ་ཤཱ་རིའི་བུ་རྟེན་ཅིང་འབྲེལ་པར་འབྱུང་བ་བཅོམ་ལྡན་འདས་ཀྱིས་ཡང་དག་པར་གསུངས་པ་འདི་
གང་ལ་ལ་ཞིག་གིས་ཡང་དག་པའི་ཤེས་རབ་ཀྱིས་དེ་ལྟར་ཡང་དག་པ་ཇི་ལྟ་བ་བཞིན་དུ་རྟག་པར་རྒྱུན་དུ་སྲོག་མེད་པ་དང་། སྲོག་དང་བྲལ་བ་དང་། ཇི་ལྟ་བུ་ཉིད་དང་། མ་ནོར་བ་དང་། མ་སྐྱེས་པ་དང་། མ་བྱུང་བ་དང་། 
མ་བྱས་པ་དང་། འདུས་མ་བྱས་པ་དང་། ཐོགས་པ་མེད་པ་དང་། དམིགས་པ་མེད་པ་དང་། ཞི་བ་དང་། འཇིགས་པ་མེད་པ་དང་། མི་འཕྲོགས་པ་དང་། ཟད་པ་མེད་པ་དང་། རྣམ་པར་ཞི་བ་མ་ཡིན་པའི་རང་བཞིན་དུ་མཐོང་བ་དང་། མེད་
པ་དང་། གསོག་དང་། གསོབ་དང་། སྙིང་པོ་མེད་པ་དང་། ནད་དང་། འབྲས་དང་། ཟུག་རྔུ་དང་། སྡིག་པ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡང་དག་པར་རྗེས་སུ་མཐོང་བ་དེ་ནི་ཅི་བདག་འདས་
པའི་དུས་ན་འབྱུང་བ་ཞིག་གམ། འོན་ཏེ་བདག་འདས་པའི་དུས་ན་མ་བྱུང་བ་ཞིག །བདག་འདས་པའི་དུས་ན་ཅིར་གྱུར་པ་ཞིག །བདག་འདས་པའི་དུས་ན་ཇི་ལྟ་བུར་གྱུར་པ་ཞིག་གུ་སྙམ་དུ་སྔོན་གྱི་མཐའ་ལ་མི་རྟོག་གོ། །ཅི་མ་
འོངས་པའི་དུས་ན་འབྱུང་བར་འགྱུར་རམ། འོན་ཏེ་མ་འོངས་པའི་དུས་ན་འབྱུང་བར་མི་འགྱུར། མ་འོངས་པའི་དུས་ན་ཅིར་འགྱུར། མ་འོངས་པའི་དུས་ན་ཇི་ལྟ་བུ་ཞིག་ཏུ་འགྱུར་སྙམ་དུ་ཕྱི་མའི་མཐའ་ལ་མི་རྟོག་གོ། །འདི་


57-1-140a

ཅི་ཞིག །འདི་ཇི་ལྟ་བུ་ཞིག །ཅི་ཞིག་ཡོད། ཅིར་འགྱུར། སེམས་ཅན་འདི་དག་གང་ནས་འོངས། འདི་ནས་ཤི་འཕོས་ནས་གང་དུ་འགྲོ་བར་འགྱུར་ཞེས་ད་ལྟར་བྱུང་བ་ལ་ཡང་མི་རྟོག་གོ། །འཇིག་རྟེན་ན་དགེ་སྦྱོང་ངམ། 
བྲམ་ཟེ་དག་གི་ལྟ་བར་སོང་བ་ཐ་དད་པ་གང་དག་ཡོད་པ་འདི་ལྟ་སྟེ། བདག་ཏུ་སྨྲ་བ་དང་ལྡན་པའམ། སེམས་ཅན་དུ་སྨྲ་བ་དང་ལྡན་པའམ། སྲོག་ཏུ་སྨྲ་བ་དང་ལྡན་པའམ། གང་ཟག་ཏུ་སྨྲ་བ་དང་ལྡན་པའམ། དགེ་མཚན་དང་
བཀྲ་ཤིས་སུ་སྨྲ་བ་དང་ལྡན་པ་དག་ཀྱང་རུང་སྟེ། ལྷག་པར་གཡོ་བ་དང་བྲལ་བར་གཡོ་བ་དེ་དག་དེའི་ཚེ་ན་དེས་སྤངས་པར་འགྱུར་ཏེ། ཡོངས་སུ་ཤེས་ནས་རྩ་བ་ནས་བཅད་དེ། ཏ་ལའི་མགོ་བཞིན་མི་སྣང་བའི་རང་བཞིན་དུ་ཕྱིས་
མི་སྐྱེ་མི་འགག་པའི་ཆོས་ཅན་དུ་འགྱུར་རོ། །བཙུན་པ་ཤཱ་རིའི་བུ་གང་ལ་ལ་ཆོས་ལ་བཟོད་པ་འདི་ལྟ་བུ་དང་ལྡན་ཏེ། རྟེན་ཅིང་འབྲེལ་པར་འབྱུང་བའང་ཡང་དག་པར་ཁོང་དུ་ཆུད་ན་དེ་ལ་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་
ལྡན་འདས་ཀྱིས་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་དེ་སྐད་ཅེས་སྨྲས་
ནས། ཚེ་དང་ལྡན་པ་ཤཱ་རིའི་བུ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་བཤད་པ་ལ་མངོན་པར་བསྟོད་དོ། །
འཕགས་པ་སཱ་ལུའི་ལྗང་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། ༄༅། །རྒྱ་གར་སྐད་དུ། པྲ་ཏཱི་ཏྱ་ས་མུ་པཱ་ད་ཨཱ་དི་ཙ་བི་བྷང་ནིར་ནཱ་མ་སཱུ་ཏྲ།  བོད་སྐད་དུ། 

57-1-140b

རྟེན་ཅིང་འབྲེལ་བར་འབྱུང་བ་དང་པོ་དང་རྣམ་པར་དབྱེ་བ་བསྟན་པ་ཞེས་བྱ་བའི་མདོ། དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་
རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ལ་རྟེན་ཅིང་འབྲེལ་པར་འབྱུང་བ་དང་པོ་དང་རྣམ་པར་
དབྱེ་བ་བསྟན་ཀྱིས། དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །རྟེན་ཅིང་འབྲལ་པར་འབྱུང་བ་དང་པོ་གང་ཞེ་ན། འདི་ལྟ་སྟེ། འདི་ཡོད་ན་འདི་འབྱུང་། འདི་སྐྱེས་པས་འདི་སྐྱེ་བ་སྟེ། འདི་ལྟ་སྟེ། མ་རིག་
པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་
གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། 
ཡིད་མི་བདེ་བ་དང་། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །འདི་ནི་རྟེན་ཅིང་འབྲེལ་པར་འབྱུང་བ་དང་པོ་ཞེས་བྱའོ། །རྟེན་ཅིང་འབྲེལ་
པར་འབྱུང་བའི་རྣམ་པར་དབྱེ་བ་གང་ཞེ་ན། མ་རིག་པའི་རྐྱེན་གྱིས་འདུ་བྱེད་ཅེས་བྱ་བའི་མ་རིག་པ་གང་ཞེ་ན། གང་དེ་སྔོན་གྱི་མཐའ་མི་ཤེས་པ་དང་། ཕྱི་མའི་མཐའ་མི་ཤེས་པ་དང་། སྔོན་དང་ཕྱི་མའི་མཐའ་མི་ཤེས་པ་
དང་། ནང་མི་ཤེས་པ་དང་། ཕྱི་མི་ཤེས་པ་དང་། ནང་དང་ཕྱི་མི་ཤེས་པ་དང་། ལས་མི་ཤེས་པ་དང་། རྣམ་པར་སྨིན་པ་མི་ཤེས་པ་དང་། ལས་དང་རྣམ་པར་སྨིན་པ་མི་ཤེས་པ་དང་། སངས་རྒྱས་མི་ཤེས་པ་དང་། ཆོས་

57-1-141a

མི་ཤེས་པ་དང་། དགེ་འདུན་མི་ཤེས་པ་དང་། སྡུག་བསྔལ་མི་ཤེས་པ་དང་། ཀུན་འབྱུང་དང་། འགོག་པ་དང་། ལམ་མི་ཤེས་པ་དང་། རྒྱུ་མི་ཤེས་པ་དང་། རྒྱུ་ལས་ཡང་དག་པར་འབྱུང་བའི་ཆོས་མི་ཤེས་
པ་དང་། དགེ་བ་དང་། མི་དགེ་བ་དང་། ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་དང་། བསྟེན་པར་བྱ་བ་དང་། བསྟེན་པར་བྱ་བ་མ་ཡིན་པ་དང་། ངན་པ་དང་། གྱ་ནོམ་པ་དང་། ནག་པོ་དང་། དཀར་པོ་དང་། རྣམ་
པར་དབྱེ་བ་དང་བཅས་པའི་རྟེན་ཅིང་འབྲེལ་པར་འབྱུང་བ་དང་། རེག་པའི་སྐྱེ་མཆེད་དྲུག་ཡང་དག་པ་ཇི་ལྟ་བ་བཞིན་ཁོང་དུ་མི་ཆུད་པ་དང་། གང་དེ་དང་དེར་ཡང་དག་པ་ཇི་ལྟ་བ་བཞིན་དུ་མི་ཤེས་པ་དང་། མ་མཐོང་བ་དང་། མངོན་
པར་མ་རྟོགས་པ་དང་། རྨོངས་པ་དང་། ཀུན་དུ་རྨོངས་པ་དང་། མ་རིག་པ་དང་། མུན་པའི་རྣམ་པ་ཞེས་བྱ་བ་འདི་ནི་མ་རིག་པ་ཞེས་བྱའོ། །མ་རིག་པའི་རྐྱེན་གྱིས་འདུ་བྱེད་ཅེས་བྱ་བའི་འདུ་བྱེད་གང་ཞེ་ན། འདུ་བྱེད་ནི་རྣམ་པ་གསུམ་
སྟེ། གསུམ་གང་ཞེ་ན། ལུས་ཀྱི་འདུ་བྱེད་དང་། ངག་གི་འདུ་བྱེད་དང་། ཡིད་ཀྱི་འདུ་བྱེད་དོ། །འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱ་བའི་རྣམ་པར་ཤེས་པ་གང་ཞེ་ན། རྣམ་པར་ཤེས་པའི་ཚོགས་དྲུག་སྟེ། མིག་
གི་རྣམ་པར་ཤེས་པ་དང་། རྣ་བའི་རྣམ་པར་ཤེས་པར་དང་། སྣ་དང་། ལྕེ་དང་། ལུས་དང་། ཡིད་ཀྱི་རྣམ་པར་ཤེས་པའོ། །རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱ་བ་ལ་མིང་གང་ཞེ་ན། གཟུགས་ཅན་
མ་ཡིན་པའི་ཕུང་པོ་བཞི་སྟེ། ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོའོ། །གཟུགས་གང་ཞེ་ན། གཟུགས་གང་ཡིན་པ་ཅི་ཡང་རུང་། དེ་དག་ཐམས་
ཅད་འབྱུང་བ་ཆེན་པོ་བཞི་དང་། འབྱུང་བ་ཆེན་པོ་བཞི་དག་རྒྱུར་བྱས་པ་སྟེ། གཟུགས་འདི་དང་། སྔ་མའི་མིང་གཉི་ག་གཅིག་ཏུ་མངོན་པར་བསྡུས་ནས་མིང་དང་གཟུགས་ཤེས་བྱའོ། །མིང་དང་གཟུགས་ཀྱི་རྐྱེན་གྱིས་

57-1-141b

སྐྱེ་མཆེད་དྲུག་ཅེས་བྱ་བའི་སྐྱེ་མཆེད་དྲུག་གང་ཞེ་ན། ནང་གི་སྐྱེ་མཆེད་དྲུག་སྟེ། མིག་ནང་གི་སྐྱེ་མཆེད་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ནང་གི་སྐྱེ་མཆེད་དོ། །སྐྱེ་མཆེད་དྲུག་གི་རྐྱེན་གྱིས་རེག་
པ་ཞེས་བྱ་བའི་རེག་པ་གང་ཞེ་ན། རེག་པའི་ཚོགས་དྲུག་སྟེ། མིག་གི་འདུས་ཏེ་རེག་པ་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་འདུས་ཏེ་རེག་པའོ། །རེག་པའི་རྐྱེན་གྱིས་ཚོར་བ་ཞེས་བྱ་བའི་ཚོར་བ་གང་ཞེ་ན། 
ཚོར་བ་ནི་གསུམ་སྟེ། བདེ་བ་དང་། སྡུག་བསྔལ་བ་དང་། བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པའོ། །ཚོར་བའི་རྐྱེན་གྱིས་སྲེད་པ་ཞེས་བྱ་བའི་སྲེད་པ་གང་ཞེ་ན། སྲེད་པ་ནི་གསུམ་སྟེ། འདོད་པའི་སྲེད་པ་
དང་། གཟུགས་ཀྱི་སྲེད་པ་དང་། གཟུགས་མེད་པའི་སྲེད་པའོ། །སྲེད་པའི་རྐྱེན་གྱིས་ལེན་པ་ཞེས་བྱ་བའི་ལེན་པ་གང་ཞེ་ན། ལེན་པ་ནི་བཞི་སྟེ། འདོད་པ་ཉེ་བར་ལེན་པ་དང་། ལྟ་བ་ཉེ་བར་ལེན་པ་དང་། ཚུལ་ཁྲིམས་
དང་བརྟུལ་ཞུགས་ཉེ་བར་ལེན་པ་དང་། བདག་ཏུ་སྨྲ་བ་ཉེ་བར་ལེན་པའོ། །ལེན་པའི་རྐྱེན་གྱིས་སྲིད་པ་ཞེས་བྱ་བའི་སྲིད་པ་གང་ཞེ་ན། སྲིད་པ་ནི་གསུམ་སྟེ། འདོད་པའི་སྲིད་པ་དང་། གཟུགས་ཀྱི་སྲིད་པ་དང་། 
གཟུགས་མེད་པའི་སྲིད་པའོ། །སྲིད་པའི་རྐྱེན་གྱིས་སྐྱེ་བ་ཞེས་བྱ་བའི་སྐྱེ་བ་གང་ཞེ་ན། གང་སེམས་ཅན་དེ་དང་དེ་དག་གི་སེམས་ཅན་གྱི་རིས་དེ་དང་དེ་དག་ཏུ་གང་སྐྱེ་བ་དང་། ཤིན་དུ་སྐྱེ་བ་དང་། འཕོ་བ་དང་། 
མངོན་པར་འབྱུང་བ་དང་། རབ་ཏུ་འབྱུང་བ་དང་། ཕུང་པོ་སོ་སོར་ཐོབ་པ་དང་། ཁམས་སོ་སོར་ཐོབ་པ་དང་། སྐྱེ་མཆེད་སོ་སོར་ཐོབ་པ་དང་། ཕུང་པོ་རྣམས་མངོན་པར་གྲུབ་པ་དང་། སྲོག་གི་དབང་པོ་རབ་ཏུ་སྐྱེས་པ་
འདི་ནི་སྐྱེ་བ་ཞེས་བྱའོ། །སྐྱེ་བའི་རྐྱེན་གྱིས་རྒ་ཤི་ཞེས་བྱ་བའི་རྒ་ཤི་གང་ཞེ་ན། གང་དེའི་སྤྱི་ཐེར་དང་། སྐྲ་དཀར་དང་། གཉེར་མ་ཚོགས་པ་དང་། རྙིས་པ་དང་། ཞུམ་པ་དང་། བ་ལང་ཆུ་འཐུང་བ་ལྟར་གུག་པ་དང་། 

57-1-142a

ལུས་ནག་པོའི་ཐིག་ལེས་གང་བ་དང་། ལུད་པ་ལུ་ཞིང་དབུགས་རྒོད་པ་དང་། མདུན་དུ་ལུས་བུབ་པ་ལྟར་བྱེད་པ་དང་། མཁར་བ་ལ་བརྟེན་པ་དང་། བླུན་པས་མོང་རྟུལ་བ་ཉིད་དང་། 
ཞན་པ་ཉིད་དང་། ཉམས་པ་དང་། ཡོངས་སུ་ཉམས་པ་དང་། དབང་པོ་རྒུད་པ་དང་། འདུ་བྱེད་རྣམས་རྙིངས་པ་དང་། ཤིན་དུ་རྙིངས་པར་གྱུར་པ་འདི་ནི་རྒ་བ་ཞེས་བྱའོ། །
འཆི་བ་གང་ཞེ་ན། སེམས་ཅན་གང་ཡིན་པ་དེ་དང་དེ་དག་སེམས་ཅན་གྱིས་རིས། དེ་དང་དེ་དག་ནས་འཕོས་པ་དང་། འཕོ་བ་ཉིད་དང་། ཞིག་པ་དང་། ནང་ཉམས་པ་དང་། 
ཚེ་ཉམས་པ་དང་། དྲོད་ཡལ་བ་དང་། སྲོགས་གིས་དབང་པོ་འགགས་པ་དང་། ཕུང་པོ་རྣམས་འདོར་བ་དང་། ཤི་བ་དང་། དུས་བྱེད་པ་འདི་ནི་ཤི་བ་ཞེས་བྱ་སྟེ། ཤི་བ་འདི་
དང་སྔ་མ་རྒ་བ་གཉིས་གཅིག་ཏུ་བསྡུས་ནས་རྒ་ཤི་ཞེས་བྱ་སྟེ། འདི་ནི་རྟེན་ཅིང་འབྲེལ་པར་འབྱུང་བ་རྣམ་པར་དབྱེ་བ་ཡིན་ནོ། །དགེ་སློང་དག་ཁྱེད་ལ་རྟེན་ཅིང་འབྲེལ་པར་
འབྱུང་བ་དང་པོ་དང་རྣམ་པར་དབྱེ་བ་བཤད་པར་བྱའོ། །ཞེས་ངས་སྨྲས་པ་གང་ཡིན་པ་དེའི། ཆེད་དུ་ངས་སྨྲས་པ་འདི་དག་ཡིན་ནོ། །རྟེན་ཅིང་འབྲེལ་པར་འབྱུང་བ་དང་པོ་དང་རྣམ་པར་
དབྱེ་བ་བསྟན་པ་ཞེས་བྱ་བའི་མདོ་རྫོགས་སོ།། །། ༄༅། །རྒྱ་གར་སྐད་དུ། ཨཱརྱ་པྲ་ཏཱི་ཏྱ་ས་མུད་པཱ་ད་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ།  
འཕགས་པ་རྟེན་ཅིང་འབྲེལ་པར་འབྱུང་བ། ཞེས་བྱ་བའི་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །

57-1-142b

འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་སུམ་བཅུ་རྩ་གསུམ་གྱིས་ལྷའི་ནང་ན། ཨར་མོ་ནིག་ལྟ་བུའི་རྡོ་ལེབ་ལ་རྟ་ཐུལ་ལ་སོགས་པ་ཉན་ཐོས་ཆེན་པོ་རྣམས་དང་། 
འཕགས་པ་བྱམས་པ་དང་། འཕགས་པ་སྤྱན་རས་གཟིགས་དབང་ཕྱུག་དང་། ལག་ན་རྡོ་རྗེ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ། ཡོན་ཏན་རིན་
པོ་ཆེ་དཔག་ཏུ་མེད་པས་བརྒྱན་པ་རྣམས་དང་། མི་མཇེད་ཀྱི་བདག་པོ་ཚངས་པ་ཆེན་པོ་དང་། སྲེད་མེད་ཀྱི་བུ་དང་། དབང་ཕྱུག་ཆེན་པོ་ལ་སོགས་པ་ལྷ་རྣམས་དང་། ལྷའི་དབང་པོ་བརྒྱ་བྱིན་
དང་། དྲི་ཟའི་རྒྱལ་པོ་གཙུགས་ཕུད་ལྔ་པ་དང་ཐབས་གཅིག་ཏུ་བཞུགས་ཏེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སྟན་ལས་
ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་རི་རབ་ཀྱི་རྩེ་མོ་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་
མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷ་འདི་དག་ནི་མཆོད་རྟེན་བགྱིད་པར་འཚལ་བ་ཤ་
སྟག་སྟེ། འཁོར་གྱི་དཀྱིལ་འཁོར་འདིར་མཆིས་ན། ཅི་ནས་ཚངས་པའི་བསོད་ནམས་འཕེལ་བ་དང་། ལྷ་དང་བཅས་པ་བདུད་
དང་བཅས་པ། ཚངས་པ་དང་བཅས་པའི་འཇིག་རྟེན་ན་དགེ་སློངས་དང་། བྲམ་ཟེར་བཅས་པའི་སྐྱེ་དགུ་ལས་དགེ་སློང་དང་། །

57-1-143a

དགེ་སློང་མ་དང་། དགེ་བསྙེན་དང་། དགེ་བསྙེན་མ་དག །བསོད་ནམས་ཤིན་ཏུ། མང་དུ་འཕེལ་བར་འགྱུར་བ། དེ་ལྟ་དེ་ལྟར། བཅོམ་ལྡན་འདས་ཀྱིས་དེ་དག་ལ། 
ཆོས་བསྟན་དུ་གསོལ། དེ་ནས་བཅོམ་ལྡན་འདས་ཀྱི། རྟེན་ཅིང་འབྲེལ་པར་འབྱུང་བའི། ཚིགས་སུ་བཅད་པ། བཀའ་སྩལ་པ། ཡེ་དྷརྨཱ་ཧེ་ཏུ་པྲ་བྷ་བཱ། ཧེ་དུན་ཏེ་ཥཱན་ཏ་ཐཱ་
ག་ཏོ་ཧྱ་བ་ཏད། ཏེ་ཥཱཉྩ་ཡོ་ནི་རོ་དྷ། ཨེ་བམ་བཱ་དཱི། མ་ཧ་ཤྲ་མ་ཎ། ཆོས་གང་རྒྱུ་བྱུང་དེ་དག་གི། །རྒྱུ་དང་དེ་འགོག་གང་ཡིན་པ་འང་། །དེ་བཞིན་གཤེགས་
པས་བཀའ་སྩལ་ཏེ། དགེ་སློང་ཆེན་པོས་དེ་སྐད་གསུངས། །སྤྱན་རས་གཟིགས་དབང་ཕྱུག་འདི་ལྟ་སྟེ། རྟེན་ཅིང་འབྲེལ་པར་འབྱུང་བ་འདི་ནི་དེ་བཞིན་
གཤེགས་པ་རྣམས་ཀྱི་ཆོས་ཀྱི་སྐུ་ཡིན་ཏེ། སུས་རྟེན་ཅིང་འབྲེལ་བར་འབྱུང་བ་མཐོང་བ་དེས། དེ་བཞིན་གཤེགས་པ་མཐོང་ངོ་། །
སྤྱན་རས་གཟིགས་དབང་ཕྱུག །རིགས་ཀྱི་བུའམ། རིགས་ཀྱི་བུ་མོ་དད་པ་ཅན། གང་ལ་ལ་ཞིག་གིས། མི་གནས་པའི་ཕྱོགས་སུ། མཆོད་རྟེན་ནི་
སྐྱུ་རུ་རའི་འབྲུ་ཙམ། སྲོག་ཤིང་ནི། ཁབ་ཙམ། གདུགས་ནི། བ་ཀུ་ལའི་མེ་ཏོག་ཙམ་ཞིག་བྱས་ལ། རྟེན་ཅིང་འབྲེལ་པར་
འབྱུང་བ་ཆོས་ཀྱི་དབྱིངས་ཀྱི་ཚིགས་སུ་བཅད་པ་ནང་དུ་བཅུག་ན། དེ་ཚངས་པའི་བསོད་ནམས་བསྐྱེད་པར་འགྱུར་ཏེ། 

57-1-143b

འདི་ནས་ཤི་འཕོས་ཤིང་འཆི་བའི་དུས་བྱས་ནས་ཚངས་པའི་འཇིག་རྟེན་དག་ཏུ་སྐྱེ་བར་འགྱུར་རོ། །དེ་ནས་ཤི་འཕོས་ཏེ། 
འཆི་བའི་དུས་བྱས་ནས། གནས་གཙང་མའི་རིས་ཀྱི་ལྷ་རྣམས་དང་། སྐལ་བ་མཉམ་པར་སྐྱེ་བར་འགྱུར་རོ། །བཅོམ་
ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཉན་ཐོས་དེ་དག་དང་། བྱང་ཆུབ་སེམས་དཔའ་དེ་དག་དང་། ཐམས་ཅད་
དང་ལྡན་པའི་འཁོར་དེ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་
འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་རྟེན་ཅིང་འབྲེལ་པར་འབྱུང་བ་ཞེས་བྱ་བ་
ཐེག་པ་ཆེན་པོའི་མདོའ་རྫོགས་སོ།   །ཡེ་དྷ་རྨྨཱ་ཧེ་དུ་བྲ་བྷ་བཱ་ཧེ་དུ་ན་ཏེ་ཥཱ་ཉ་ཏ་ཐཱ་ག་ཏོ་ཧྱ་བ་དཏ། ཏེ་
ཥཉྩ་ཡོ་ནི་རོདྷ་ཨེ་ཝྃ། ཝ་དཱི་མ་ཧཱ། ཤྲ་མ་ཎ། སརྦྦ་པཱ་བ་སྱཱ་ཀ་ར་ཎྃ། ཀུ་ཤ །ལསྱོ་པ་ས་མ་པ་ད་མ། 
སྭ་ཙིཏྟྃ་པ་རི་ད་མ་ནུ། ཡེ་ཏདྦུདྡྷཱ་ནུ་ཤཱ་ས་ནྃ། ཤུ་བྷ་མས་ཏུ་སརྦྦ་ཛ་ག་ཏཾ། 

57-1-144a

༄༅༅།   །རྒྱ་གར་སྐད་དུ། ཨཱརྱ་ཨང་གུ་ལི་མཱ་ལཱི་ཡཾ་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ།  འཕགས་པ་སོར་མོའི་ཕྲེང་བ་ལ་ཕན་པ་ཞེས་བྱ་བ་ཐེག་པ་ཆེན་པོའི་མདོ།  བམ་པོ་དང་པོ། སངས་རྒྱས་
དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་
བཞུགས་ཏེ། དེ་ནས་བཅོམ་ལྡན་འདས་བྱང་ཆུབ་སེམས་དཔའ་ཤ་སྟག་མང་པོ་དང་། འཁོར་བཞི་དང་། ལྷ་དང་། ཀླུ་དང་། གནོད་སྦྱིན་དང་། ནམ་མཁའ་ལྡིང་དང་མི་འམ་ཅི་དང་། ལྟོ་འཕྱེ་ཆེན་པོའི་ཚོགས་མང་
པོ་དང་། ཤ་ཟ་དང་། འབྱུང་པོའི་ཚོགས་དང་། ལྷའི་བུ་མོ་དང་། ལྷ་མ་ཡིན་གྱི་དབང་པོ་དང་། ཉི་མ་དང་། ལྷ་མ་ཡིན་དང་། སྲིན་པོ་དང་། འཇིག་རྟེན་སྐྱོང་དང་། བདུད་ལ་སོགས་པ་ལས་སེམས་ཅན་ཐམས་ཅད་ངེས་
པར་སྒྲོལ་བ། ཤིན་དུ་རྒྱས་པ་ཆེན་པོའི་མདོ་སྡེ་ཆེན་པོ་མཚོན་ཆ་ཐོགས་པ་ཞེས་བྱ་བ་སྟོན་ཏེ། ཐོག་མར་ཡང་དགེ། བར་དུ་ཡང་དགེ། ཐ་མར་ཡང་དགེ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་
སུ་རྫོགས་པ། ཡོངས་སུ་དག་པ། ཡོངས་སུ་དཀར་བ། ཚངས་པར་སྤྱོད་པ་ཡང་དག་པར་རབ་ཏུ་སྟོན་ཏོ། །གང་གི་ཚེ་མདོ་སྡེ་ཆེན་པོ་མཚོན་ཆ་ཐོགས་པ་མཐར་ཕྱིན་པར་གྱུར་པ་དེའི་ཚེ་དེའི་དུས་ན་མཉན་དུ་ཡོད་
པའི་གྲོང་ཁྱེར་ཆེན་པོ་ནས་བྱང་ཕྱོགས་ལོགས་སུ་རྒྱང་མི་རིང་བ་ཞིག་ན། བྲམ་ཟེའི་བུ་འཇིག་རྟེན་ཐམས་ཅད་ཀྱིས་བལྟ་ན་སྡུག་པ་ཞེས་བྱ་བ། རི་སྡིང་ཞེས་བྱ་བའི་གྲོང་ཁྱེར་ནས་སྐྱེས་པ། ཤིན་དུ་དབུལ་པོ་བྲམ་ཟེ་
མོ་བཟང་མོ་ཞེས་བྱ་བའི་བུ་ཕས་བོར་བ། ལོ་བཅུ་གཉིས་ལོན་པ། གཟུགས་དང་། མདོག་དང་། སྟོབས་དང་། ཁོང་དཔའ་ལ་ཕུན་སུམ་ཚོགས་པ། ཤིན་དུ་བལྟ་ན་སྡུག་པ། ཚིག་འཇམ་པ་ཞིག་ཡོད་དེ། སློབ་དཔོན་ནོར་བུ་བཟང་པོ། རིག་

57-1-144b

བྱེད་བཞིའི་ཕ་རོལ་དུ་སོང་བ། ཧ་ལ་ཧ་སེ་ཞེས་བྱ་བའི་གྲོང་ན་གནས་པ་དེའི་དྲུང་ན། བྲམ་ཟེའི་བུ་འཇིག་རྟེན་ཐམས་ཅད་ཀྱིས་བལྟ་ན་སྡུག་པ་ཞེས་བྱ་བ། ཤིན་དུ་ཡིད་གཞུངས་ཤིང་། བླ་མ་ལ་མཆོད་པ་བྱེད་པ། དབང་པོ་ཐུལ་
བ། བརྟུལ་ཞུགས་དང་མི་འགྱུར་བ་ལ་སྤྱོད་པ་དེ་སྲིད་སྲུང་གི་རིག་བྱེད་སློབ་བོ། །དེའི་ཚེ་སློབ་དཔོན་ནོར་བུ་བཟང་པོ་དེ་རྒྱལ་པོས་བོས་ནས། མཉན་དུ་ཡོད་པར་འགྲོ་བ་ན། རང་གི་སློབ་མ་བྲམ་ཟེའི་བུ་འཇིག་རྟེན་ཐམས་ཅད་
ཀྱིས་བལྟ་ན་སྡུག་པ་ཁྱིམ་སྲུང་དུ་བཅུག་སྟེ། མཉན་དུ་ཡོད་པར་སོང་ངོ་། །དེ་ནས་དེའི་ཚེ་མཁན་པོའི་ཆུང་མ་གཞོན་ནུ་གཟུགས་བཟང་ཞིང་ཕུན་སུམ་ཚོགས་པ་དེས་བྲམ་ཟེའི་བུ་འཇིག་རྟེན་ཐམས་ཅད་ཀྱིས་བལྟ་ན་སྡུག་
པ་མཐོང་བ་དང་། སེམས་ཆགས་ནས་རབ་ཏུ་མི་བཟོད་པར་གྱུར་པ་དང་། གོས་དང་རྒྱན་རྣམས་ཀྱང་ལྷོད་ཅིང་འཕྱང་སྟེ། འདོད་ཆགས་ཀྱིས་ནོན་ནས། མགྱོགས་པ་མགྱོགས་པར་བྲམ་ཟེའི་བུ་འཇིག་རྟེན་ཐམས་ཅད་ཀྱིས་
བལྟ་ན་སྡུག་པའི་གོས་ལས་བཟུང་སྟེ། འདོད་པ་ལ་གཞོལ་ཞིང་བསོད་ནམས་མ་ཡིན་པ་སྐྱེད་དོ། །དེ་ནས་བྲམ་ཟེའི་བུ་འཇིག་རྟེན་ཐམས་ཅད་ཀྱིས་བལྟ་ན་སྡུག་པ་དེ་རང་བཞིན་གྱིས་བླ་མ་ལ་གུས་པ་དབང་པོ་ཐུལ་བ། 
བརྟུལ་ཞུགས་དང་མི་འགྱུར་བ་ལ་སྤྱོད་པ་སེམས་ཅན་གྱི་མཆོག་དེས་མཁན་པོའི་ཆུང་མ་ལ་འདི་སྐད་དུ་བླ་མའི་བཙུན་མོ་ཁྱོད་ནི་བདག་གི་མ་དང་འདྲ་སྟེ། དེ་ལྟར་མ་མཛད་ཅིག་ཅེས་སྨྲས་སོ། །དེ་གཏོང་བ་ལྟ་མི་བྱེད་ནས་
གོས་གཅིག་བོར་ཏེ། ངོ་ཚ་ནས་གོས་གཅིག་དང་གུད་དུ་སོང་ངོ་། །དེ་ནས་མཁན་པོའི་ཆུང་མས་འཇིག་རྟེན་ཐམས་ཅད་ཀྱིས་བལྟ་ན་སྡུག་པའི་སེམས་ལ་རྣམ་པར་བརྟགས་ནས། མིག་མཆི་མས་གང་ཞིང་འདོད་པའི་
འདོད་ཆགས་ཀྱིས་ནོན་ནས་རྣམ་པར་སེམས་པར་གྱུར་ཏེ། དེ་ནས་དེ་སྡུག་བསྔལ་ཞིང་འདི་སྙམ་སེམས་སོ། །འཇིག་རྟེན་ཐམས་ཅད་ཀྱིས་བལྟ་ན་སྡུག་པ་བདེ་བའི་བར་ཆད་བྱེད་པ་དེ་ཤི་འང་སླས་བུད་མེད་གང་གི་ཁྱོར་ཡང་

57-1-145a

མ་གྱུར་པར་ཐལ་བར་གྱུར་ཅིག་སྙམ་སྟེ། ལུས་ཀུན་རང་གི་སེན་མོས་དྲལ་ནས་ན་ཞིང་མི་བདེ་སྟེ། ལུས་མི་སྡུག་པར་བཅོས་ནས་བུད་མེད་དེས་གཡོ་སྦྱར་ཏེ། ཁྱིམ་གཉིས་ཀྱི་བར་གྱི་གདུང་མ་ལ་གྱེན་
དུ་བཅིངས་ནས་བཏགས་སོ། །དེ་ནས་དེའི་ཚེ་སློབ་དཔོན་ནོར་བུ་བཟང་པོ་རྒྱལ་པོས་མཆོད་ནས་སླར་རང་གི་ཁྱིམ་དུ་འོངས་པ་དང་། དེས་མཐོང་ངོ་། །མཐོང་ནས་དེའི་ཐག་པ་བཅད་དེ་ཀྱེ་མའོ་ཞེས་སྐད་དྲག་ཏུ་ཕྱུང་
ནས་རང་གི་ཆུང་མ་ལ་འདི་སྐད་ཅེས་སྨྲས་སོ། །བཟང་མོ་འདི་ཅི་སུས་ཁྱོད་འདི་ལྟ་བུར་བྱས། བཟང་མོས་སྨྲས་པ། ཁྱོད་ཀྱི་སློབ་མ་འཇིག་རྟེན་ཐམས་ཅད་ཀྱིས་བལྟ་ན་སྡུག་པས་ནན་གྱིས་ཁོ་མོ་ལ་ཉལ་པོ་བྱས་ནས་
འདི་ལྟར་བྱས་སོ། །དེ་ནས་སློབ་དཔོན་ནོར་བུ་བཟང་པོས་འཇིག་རྟེན་ཐམས་ཅད་ཀྱིས་བལྟ་ན་སྡུག་པ་དེའི་མཐུ་ཆེན་པོ་ཤེས་ཏེ། དེ་ཐོག་མ་བཙས་མ་ཐག་ཏུ་རྒྱལ་རིགས་ཐམས་ཅད་ཀྱི་མཚོན་རྣམས་ཤུབས་ནས་ཕྱུང་
སྟེ། མདའ་སྟེའུ་ཁམ་བཞིན་དུ་ཐམས་ཅད་དུ་ལྷུང་ནས། དེའི་ཚེ་རྒྱལ་རིགས་ཐམས་ཅད་སྐྲག་ཅིང་རབ་ཏུ་འཇིགས་པར་གྱུར་ཏེ། འཇིག་རྟེན་ཐམས་ཅད་ཀྱིས་བལྟ་ན་སྡུག་པ་སེམས་ཅན་གྱི་མཆོག་དེའི་མཐུ་ཆེན་པོ་དེ་
ལྟ་བུ་ཤེས་ནས། དེ་ལ་ཅུང་ཟད་བསྒོ་བ་ཙམ་ཞིག་ནུས་ཏེ། འཇིག་རྟེན་ཐམས་ཅད་ཀྱིས་བལྟ་ན་སྡུག་པ་དེ་ལ་འདི་སྐད་ཅེས་སྨྲས་སོ། །བདག་ཉིད་ངན་པ་བླ་མའི་ཆུང་མ་མ་རུང་བར་བྱེད་པ་ཁྱོད་ཉེས་པ་ཆེན་པོ་བྱས་པས་བྲམ་ཟེར་
མི་འགྱུར་གྱིས་མི་སྟོང་སོད་ཅིག་དང་དེ་ནས་བྱང་བར་འགྱུར་རོ། །དེ་སྐད་ཅེས་རང་གི་སློབ་མ་བྲམ་ཟེའི་བུ་འཇིག་རྟེན་ཐམས་ཅད་ཀྱིས་བལྟ་ན་སྡུག་པ་ལ་བསྒོ་བ་དང་། བྲམ་ཟེའི་བུ་འཇིག་རྟེན་ཐམས་ཅད་ཀྱིས་བལྟ་ན་སྡུག་
པ་དེ་རང་བཞིན་གྱིས་བླ་མ་ལ་གུས་པས་རང་གི་སློབ་དཔོན་ལ་འདི་སྐད་ཅེས་སྨྲས་སོ། །ཀྱེ་མཁན་པོ་བདག་ལ་འོས་པ་མ་ལགས་སོ། །ཡང་སློབ་དཔོན་གྱིས་སྨྲས་པ། ཇི་བདག་ཉིད་ངན་པ་ཁྱོད་མཐོ་རིས་སུ་འགྲོ་

57-1-145b

བའམ། བྲམ་ཟེར་འགྱུར་བར་མི་འདོད་དམ། ཡང་སློབ་མས་སྨྲས་པ། ལེགས་སོ་ལེགས་སོ། །མཁན་པོ་དེ་ལྟར་བགྱིའོ་ཞེས་སྨྲས་ཏེ། མི་སྟོང་བསད་དེ་འོངས་ནས་རང་གི་སློབ་དཔོན་ལ་གུས་པར་སྨྲ་བ་བྱས་པ་དང་། 
སློབ་དཔོན་གྱིས་དེ་མཐོང་ནས་གཏུམ་པོ་འདི་ད་རུང་མ་ཤི་བ་ལྟ་ཞེས་ངོ་མཚར་དུ་གྱུར་ཏེ། འོ་ན་ད་ཤི་བར་བྱའོ་སྙམ་ནས། དེ་སྐད་མ་ཟེར་བར་བསད་པ་རེ་རེའི་སོར་མོ་རྣམས་ལོང་ཤིག །མི་སྟོང་སོད་ལ་སོར་མོ་རྣམས་ཕྲེང་བར་བྱས་
ཏེ་འོངས་དང་། གདོད་བྲམ་ཟེར་འགྱུར་རོ་ཞེས་ཟེར་ནས་དེའི་ཕྱིར་སོར་མོའི་ཕྲེང་བ་ཞེས་བྱའོ། །ཡང་སོར་མོའི་ཕྲེང་བ་དེས་ལེགས་སོ་ཞེས་སྨྲས་ནས། མི་ཉིས་སྟོང་དུ་གཅིག་གིས་མ་ཚང་བ་བསད་དོ། །དེའི་ཚེ་སོར་མོའི་
ཕྲེང་བའི་མ་ཟས་ཀྱི་མཆོག་དང་མངར་སྣ་བཞི་ཐོགས་ནས་བདག་གི་བུ་འདི་ལྟར་གྱུར་པ་ལྟ་ཞིག་ན་ཉོན་མོངས་བླུད་དོ་སྙམ་སྟེ་འོངས་པ་དང་། སོར་མོའི་ཕྲེང་བས་རང་གི་མ་འོངས་པར་མཐོང་ནས་བདག་གི་མ་མཐོ་རིས་སུ་
འགྲོ་བར་བྱའོ་སྙམ་སྟེ་རལ་གྲི་ཐོགས་ནས་འོངས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཡུལ་དང་དུས་མཁྱེན་ནས་མཉན་དུ་ཡོད་པ་ནས་གནག་པའི་དགོངས་སུ་འདོམ་བཞི་བཅུས་མ་ཚང་བའི་བར་དུ་ཤིང་ཨ་ཤོ་
ཀའི་དྲུང་ན་ཐམས་ཅད་མཁྱེན་པའི་ཡེ་ཤེས་ཐམས་ཅད་དང་ལྡན་པ་དེ་ངང་པའི་རྒྱལ་པོ་བཞིན་དུ་མདུན་ན་བཞུགས་པར་གྱུར་ཏོ། །དེ་ནས་སོར་མོའི་ཕྲེང་བས་བཅོམ་ལྡན་འདས་མཐོང་ནས་འོ་ན་དགེ་སྦྱོང་གཽའུ་ཏ་མ་བསད་
དོ་སྙམ་སྟེ། རལ་གྲི་ཐོགས་ནས་མགྱོགས་པ་མགྱོགས་པར་འོངས་སོ། །དེ་ནས་བཅོམ་ལྡན་འདས་ཡེ་ཤེས་ཐམས་ཅད་དང་ལྡན་པས་བདག་ཉིད་གཤེགས་པ་ལྟ་བུར་བསྟན་པ་དང་། སོར་མོའི་ཕྲེང་བས་མ་ལ་མདུན་
གྱིས་བལྟས་ཏེ། གཉིས་ཀྱི་བར་དུ་ཚིགས་སུ་བཅད་པ་འདི་དག་སྨྲས་སོ། །བཞུགས་ཤིག་དགེ་སྦྱོང་ཁྱོད་བཞུགས་ཤིག །ཟས་གཙང་སྲས་པོ་བཞུགས་སུ་གསོལ། །བདག་ནི་སོར་མོའི་ཕྲེང་བ་སྟེ། །སོར་

57-1-146a

མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །ཚོན་གོས་མནབས་པ་བཞུགས་སུ་གསོལ། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་
ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །མཁས་པའི་གཙོ་བོ་བཞུགས་སུ་གསོལ། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་
བཞུགས་ཤིག །ལྷུང་བཟེད་ཐོགས་པ་བཞུགས་སུ་གསོལ། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །སེང་གེའི་རྩལ་མངའ་བཞུགས་
སུ་གསོལ། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །སྟག་གི་རྩལ་མངའ་བཞུགས་སུ་གསོལ། །བདག་ནི་སོར་མོའི་ཕྲེང་བ་སྟེ། །
སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །ངང་སྟབས་ལེགས་བཞུད་བཞུགས་སུ་གསོལ། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །
བཞུགས་ཤིག་དགེ་སྦྱོང་ཁྱོད་བཞུགས་ཤིག །ལྷ་ཡི་གླང་པོ་སྟབས་མཛེས་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །
ཉི་རྩེ་མཆོག་གཟི་བརྩོན་པ་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །ཟླ་བ་ཉ་ཞལ་སྤྱན་བཟངས་བཞུགས། །བདག་ནི་སོར་
མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །གསེར་གྱི་རི་འདྲ་བཞུགས་སུ་གསོལ། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་

57-1-146b

ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །པད་མོ་འདབ་སྟོང་སྤྱན་བཞུགས་ཤིག །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །
ཤངས་ཀྱི་ཤུགས་དྲང་བཞུགས་སུ་གསོལ། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །ཀུ་མུ་ད་འདྲ་ཚེམས་མཆོག་བཞུགས། །
བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །གསུང་མཆོག་ལྗགས་མངའ་བཞུགས་སུ་གསོལ། །བདག་ནི་སོར་མོའི་ཕྲེང་བ་སྟེ། །
སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །མཛོད་སྤུའི་ཐིག་ལེ་མཆོག་མངའ་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །
བཞུགས་ཤིག་དགེ་སྦྱོང་ཁྱོད་བཞུགས་ཤིག །དབུ་སྐྲ་མཐོན་སྣུམ་མཆོག་མངའ་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་
ཤིག །སྙན་དང་ཕྱག་རིང་མཆོག་མངའ་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །ཕྱག་མཆོག་གླང་པོའི་སྣ་འདྲ་བཞུགས། །
བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །གསང་བ་སྦུབས་སུ་སྦས་པ་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་
ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །པུས་མོ་བཟང་པོ་མངའ་བ་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་

57-1-147a

ཤིག་དགེ་སྦྱོང་ཁྱོད་བཞུགས་ཤིག །ཟངས་ཀྱི་སེན་མོ་མཆོག་མངའ་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་
བཞུགས་ཤིག །འགྲོ་བ་མཆོག་གིས་སྤོས་བྱུགས་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །ཀ་ལ་པིང་ཀའི་སྒྲ་དབྱངས་
བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །ཁུ་བྱུག་སྒྲ་དབྱངས་སྙན་སྒྲོགས་བཞུགས། །བདག་ནི་སོར་མོའི་ཕྲེང་བ་སྟེ། །
སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །གཉི་འོད་བྱེ་བ་བརྒྱ་འདས་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་
ཤིག་དགེ་སྦྱོང་ཁྱོད་བཞུགས་ཤིག །དུས་རབ་བསྟབས་ལ་ཕྱག་འཚལ་བསྟོད། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །དེ་ལྟར་
དུལ་འགྲོས་རབ་མགྱོགས་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །སྟོབས་བཅུའི་སྟོབས་མངའ་བཞུགས་སུ་གསོལ། །
བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །བདེན་བཞི་མཆོག་མངའ་བཞུགས་སུ་གསོལ། །བདག་ནི་སོར་མོའི་ཕྲེང་བ་སྟེ། །སོར་
མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །ཕན་མཛད་ལམ་བརྒྱད་སྟོན་པ་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་

57-1-147b

ཤིག་དགེ་སྦྱོང་ཁྱོད་བཞུགས་ཤིག །མཚན་མཆོག་སུམ་བཅུ་གཉིས་མངའ་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །
དཔེ་བཟང་བརྒྱད་བཅུ་མངའ་བ་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །ན་ཆུང་མཆོག་ལ་འདོད་སྤངས་བཞུགས། །བདག་
ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །ཇི་སྲིད་བདག་མ་ཁྲོས་པར་བཞུགས། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་
སྩོལ་ཅིག །བཞུགས་ཤིག་དགེ་སྦྱོང་ཁྱོད་ནི་བཞུགས་སུ་གསོལ། །ལྷ་མིན་དབང་དང་སྲིན་པོ་རྒྱགས་བཅས་བཅོམ། །བདག་ནི་འདི་འདྲའི་ངོ་མཚར་ཡོང་མ་མཐོང་། །ཤིན་དུ་མགྱོགས་པའི་ཤུགས་ལྡན་ཁྱོད་སུ་ཞིག །
རལ་གྲིས་མ་བཏབ་བར་དུ་དགེ་སྦྱོང་བཞུགས། །བདག་གི་མིང་ཡང་ཁྱོད་ཀྱིས་མ་གསན་ཏམ། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་ནི་བཞུགས་སུ་གསོལ། །བདག་
མིང་གང་གིས་ཐོས་པ་ཙམ་གྱིས་འགུམ་འགྱུར་ན། །མངོན་སུམ་བདག་མཐོང་གསོན་པར་གྱུར་བ་ནི། །ཤིན་དུ་མཐུ་ལྡན་སེམས་ཅན་ག་ལ་མཆིས། །བཞུགས་ཤིག་དགེ་སྦྱོང་ཁྱོད་ནི་བཞུགས་སུ་གསོལ། །བདག་ཉིད་
མངོན་སུམ་དུ་ནི་མཆིས་གྱུར་ཀྱང་། །རྟ་ཡི་བང་ལྟར་ཤིན་དུ་མགྱོགས་བཞུད་པ། །ལྷ་འམ་ཀླུ་འམ་ཁྱོད་སུ་མྱུར་དུ་གསུངས། །བཞུགས་ཤིག་དགེ་སྦྱོང་ཁྱོད་བཞུགས་ཤིག །ད་ནི་བདག་ཀྱང་མཐུ་དང་མི་ལྡན་གྱུར། །བརྟན་
པ་ཁྱོད་ནི་སླེབས་པར་མི་ནུས་སོ། །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །བཞུགས་ཤིག་དགེ་སྦྱོང་ཁྱོད་བཞུགས་ཤིག །དགེ་སྦྱོང་བརྟུལ་ཞུགས་ཁྲིམས་འཛིན་ན། །ཤོ་གམ་

57-1-148a

གནས་ལས་མ་འདའ་ཤིག །བདག་ནི་སོར་མོའི་ཕྲེང་བ་སྟེ། །སོར་མོའི་ཤོ་གམ་བདག་སྩོལ་ཅིག །དེ་ནས་བཅོམ་ལྡན་འདས་ངང་པའི་རྒྱལ་པོ་བཞིན་དུ་གོམ་པ་བདུན་གཤེགས་ཏེ། སེང་གེའི་ལྟ་བས་ཀུན་དུ་
གཟིགས་ནས་སོར་མོའི་ཕྲེང་བ་ལ་ཚིགས་སུ་བཅད་པ་འདི་དག་གསུངས་སོ། །ཡང་དག་ཉིད་ཀྱི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་
ཆོས་ཁུ་ཞིམ་པོ་འཐུང་། །འདུག་ཅིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །
མ་བྱས་ཡང་དག་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་
ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཞི་བ་མ་སྐྱེས་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་
མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཅིག་སོར་མོའི་ཕྲེང་བ་ཁྱོད་འདུག་ཅིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་
ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །འདུས་མ་བྱས་ཀྱི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་
སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་

57-1-148b

སྦྱིན་པར་བྱ། །རྒ་བ་མེད་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཅིག་སོར་མོའི་ཕྲེང་བ་ཁྱོད་
འདུག་ཅིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ནད་མེད་པ་ཡི་མཐའ་ལ་ང་གནས་ཏེ། །དེ་ཡང་སོར་ཕྲེང་
ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་
འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །འཆི་བ་མེད་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་
ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཅིག་སོར་མོའི་ཕྲེང་བ་ཁྱོད་འདུག་ཅིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་
ཤོ་གམ་སྦྱིན་པར་བྱ། །ཀུན་ནས་ཉོན་མོངས་མེད་པར་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་
མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཟག་པ་མེད་པའི་མཐའ་ལ་ང་གནས་ཏེ། །
དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་

57-1-149a

ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །གནོད་མེད་པ་ཡི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་
དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་
སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་བདེན་པའི་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་
ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་
ཆོས་ཀྱི་མཐའ་ལ་རབ་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །
ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་ཤེས་པའི་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་
རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་
ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་བདེ་པའི་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་

57-1-149b

གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་
གམ་སྦྱིན་པར་བྱ། །མྱ་ངན་མེད་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་
སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །མྱ་ངན་བྲལ་བའི་མཐའ་ལ་ང་
གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་
ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །རྡུལ་མེད་པ་ཡི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་
པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །
ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །རྡུལ་དང་བྲལ་བའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་
འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཤག་ཤིག་

57-1-150a

མེད་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་
ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཡམས་ཀྱི་ནད་མེད་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་
ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །
ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །གཙེ་བ་མེད་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །
ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་
ཤོ་གམ་སྦྱིན་པར་བྱ། །ནད་འགོ་མེད་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་
ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཅི་ཡང་མེད་པའི་མཐའ་ལ་ང་གནས་ཏེ། །
དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་

57-1-150b

ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །དཔག་ཏུ་མེད་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་
རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་
ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཚད་མེད་པ་ཡི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །
འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །གཙོ་བོ་མཆོག་གི་མཐའ་ལ་
ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཅིག །ཚུལ་ཁྲིམས་བརྟུལ་ཞུགས་
ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་རབ་ཀྱི་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་
པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། ། འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །
ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་དམ་པའི་ཆོས་ལ་གནས་པ་སྟེ། ། དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །

57-1-151a

འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །བླ་ན་མེད་པའི་
མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་
ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་ཐེར་ཟུག་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་
རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་
རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །གཞོམ་དུ་མེད་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་
འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །འཇིགས་མེད་ཆོས་
ཀྱི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་
བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །མཐའ་ཡས་ཆོས་ཀྱི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་

57-1-151b

ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་
སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །བསྟན་མེད་ཆོས་ཀྱི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་
ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །
ཟབ་མོའི་ཆོས་ཀྱི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །
ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །བལྟ་དཀའི་ཆོས་ཀྱི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་
ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །
ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཕྲ་བའི་ཆོས་ཀྱི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །
ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་

57-1-152a

ཤོ་གམ་སྦྱིན་པར་བྱ། །མཁས་པའི་ཆོས་ཀྱི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །
འདུག་ཅིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །མཐོང་བར་དཀའ་བའི་
མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་
བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཀུན་གཞི་མེད་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །
ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཅིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་
དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཐ་བ་མེད་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་
གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་
ཤོ་གམ་སྦྱིན་པར་བྱ། །ཉོན་མོངས་མེད་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་

57-1-152b

སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་དག་པའི་མཐའ་ལ་གནས་པ་སྟེ། །
དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་
ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །རྣམ་པར་གྲོལ་བའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །
ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་
སྦྱིན་པར་བྱ། །ང་ནི་ཞི་བའི་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །
ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་ཞི་གནས་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །
ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་
ཏེ། །ཁྱོད་ལ་མཚོན་རྣོན་ཤོ་ག་སྦྱིན་པར་བྱ། །ཉེ་བར་ཞི་བའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་

57-1-153a

མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཉེ་བར་ཆད་པའི་མཐའ་ལ་ང་གནས་
ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་
རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཉེ་བར་ཞི་བའི་མཐའ་ལ་ང་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་
རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་
མཚོན་རྣོན་ཤོ་གམ་སྦྱིན་པར་བྱ། །ང་ནི་གྱ་ནོམ་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་
ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །སྤྲོས་པ་མེད་པའི་མཐའ་ལ་ང་གནས་ཏེ། །དེ་ཡང་སོར་
ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་
འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་གནས་མེད་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །

57-1-153b

ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་
ཤོ་གམ་སྦྱིན་པར་བྱ། །ང་རྒྱལ་འདུལ་བའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་
ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །སྒྱུ་མ་འདུལ་བའི་མཐའ་ལ་ང་གནས་ཏེ། །དེ་
ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །
ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །མ་རིག་འདུལ་བའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་
སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །
རྣམ་པར་བཏང་བའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །
ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ངེས་པར་སྤངས་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་

57-1-154a

མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་
ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཆོས་ཀྱི་དབྱིངས་ཀྱི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་
སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་
བྱ། །ང་ནི་སྐྱེ་མཆེད་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་
ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་དགེ་བའི་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་
ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །
ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །འཇིག་རྟེན་འདས་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་
ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་

57-1-154b

མཚོན་རྣོན་ཤོ་གམ་སྦྱིན་པར་བྱ། །མི་གཡོ་བ་ཡི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་
མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །གནས་དང་ཁང་པའི་མཐའ་ལ་ང་གནས་
ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་
ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །འགྱོད་པ་མེད་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་
རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་
རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །རབ་ཏུ་སྦྱངས་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་
ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །
ང་ནི་མཐར་གཏུགས་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་

57-1-155a

འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཁྲོ་གླེན་འདོད་སྤངས་མཐའ་
ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་
བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཉོན་མོངས་སྤངས་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་
ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་
སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཕུང་པོ་སྤངས་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་
ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །
ཁྲོ་གླེན་འདོད་ཟད་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་
ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་འགོག་པའི་མཐའ་ལ་གནས་པ་སྟེ། །དེ་ཡང་སོར་ཕྲེང་

57-1-155b

ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་
འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་རྟེན་གྱི་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །
ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་
སྦྱིན་པར་བྱ། །ང་ནི་མགོན་གྱི་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་
འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་སྐྱབས་ཀྱི་མཐའ་ལ་གནས་པ་སྟེ། །དེ་ཡང་སོར་ཕྲེང་
ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །
ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་ནི་དཔུང་གཉེན་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་
སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་

57-1-156a

སྦྱིན་པར་བྱ། །ང་ནི་གླིང་གི་མཐའ་ལ་གནས་པ་སྟེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་
ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །གོ་སྐབས་རིག་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་
ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་
དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །སེར་སྣ་ཕྲག་དོག་འདུལ་མཐར་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་
སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་
པར་བྱ། །སྐོམ་པ་འདུལ་བའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་
ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ང་དང་ང་མེད་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་
ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །

57-1-156b

ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ཕུང་པོ་ངེས་སྤངས་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་
སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཅིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་
པར་བྱ། །ཞི་གནས་ཀུན་གྱི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་
ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །ལམ་གཅོད་པ་ཡི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་
རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་
རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །སྟོང་ཆེན་སྒོ་ཡི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་
ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །
ཉོན་མོངས་ཀུན་སྤངས་བྱང་མཐར་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་

57-1-157a

ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །སྲེད་པ་ཟད་པའི་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་
ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་
དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །འདོད་ཆགས་བྲལ་འགོག་མཐའ་ལ་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་
སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་
བྱ། །བདེ་མཆོག་མྱ་ངན་འདས་མཐར་ང་གནས་ཏེ། །དེ་ཡང་སོར་ཕྲེང་ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་
ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །ང་ནི་ཡང་དག་རྫོགས་པའི་སངས་རྒྱས་ཏེ། །ཁྱོད་ལ་མཚོན་རྣོན་ཤོ་གམ་སྦྱིན་པར་བྱ། །རྟག་བརྟན་མཆོག་ཤིས་རབ་བསིལ་མཐའ་ལ་ང་གནས་ཏེ། །དེ་ཡང་སོར་ཕྲེང་
ཁྱོད་ཀྱིས་མི་རིག་གོ། །ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་སྦྱིན་གྱིས་ཆོས་ཁུ་ཞིམ་པོ་འཐུང་། །འདུག་ཤིག་སོར་མོའི་ཕྲེང་བ་ཁྱོད་འདུག་ཤིག །ཚུལ་ཁྲིམས་བརྟུལ་ཞུགས་ཡོན་ཏན་རྫོགས་ལ་འདུག །
ང་ནི་ཡང་དག་རྫོགས་པའི་སངས་རྒྱས་ཏེ། །ཤོ་གམ་མཚོན་རྣོན་ཁྱོད་ལ་སྦྱིན་པར་བྱ། །ཤིན་ཏུ་རྣོ་བའི་མཚོན་འདི་མྱུར་བོར་ལ། །རིག་པའི་ཡེ་ཤེས་སྐྱབས་སུ་མྱུར་དུ་ཤོག །ཚུར་ཤོག་སློབ་དཔོན་ངན་འགྲོའི་དབང་སོང་

57-1-157b

བས། །ཆོས་མ་ཡིན་པའི་ཕུང་པོ་ཆོས་སུ་སེམས། །དེ་ནས་བདག་ཉིད་ཁོང་དུ་ཆུད་པར་འགྱུར། །ཀུན་ཀྱང་ཆད་པས་རབ་འཇིགས་ཤིང་། །ཐམས་ཅད་ལ་ནི་སྲོག་ཕངས་ཏེ། །བདག་ཉིད་ཁོ་ན་དཔེར་བྱས་ལ། །མི་བསད་གསོད་
དུ་མི་གཞུག་གོ། །ཕ་རོལ་ཇི་ལྟར་དེ་བཞིན་བདག །བདག་ཉིད་ཇི་ལྟ་དེ་བཞིན་གཞན། །བདག་རང་ཉིད་ནི་དཔེར་བྱས་ལ། །མི་བསད་གསོད་དུ་མི་གཞུག་གོ། །སྲིན་པོའི་བྱད་གཟུགས་དེ་ལྟར་མ་བྱེད་ཅིག །ཡན་ལག་
ལུས་ལ་ཤིན་དུ་ཁྲག་ཆགས་ཤིང་། །བསད་པའི་མཚོན་ཆ་རྣོན་པོ་ཁྲག་བྱུགས་པ། །ཁྱོད་ཀྱིས་ཕྲག་ལ་ཐོགས་པ་མི་མཛེས་སོ། །སོར་མོའི་ཕྲེང་བ་མགོ་ལས་མྱུར་དུ་བོར། །ཀྱེ་མ་བྲམ་ཟེའི་བུའི་ལས་འདི་འདྲ་ཞིང་། །ཆོས་
འདོད་བྲམ་ཟེའི་བུ་ཡང་འདི་འདྲ་ན། །སྲིན་པོ་མ་རུངས་པ་དག་ཇི་འདྲ་གེ། །ཕྱུགས་རྣམས་ལ་ཡང་མ་ནི་མཆོད་ཡིན་ན། །ཀྱེ་མ་བརྩེ་མེད་སྡིག་གྲོགས་དབང་སོང་མི། །ཤིན་དུ་རྣོ་བའི་མཚོན་ཆ་གདེངས་བརྩམས་ཏེ། །རང་
གི་མ་ཡི་དྲུང་དུ་ཉེ་བར་འོང་། །གང་ཡང་སོར་མོའི་ཕྲེང་བ་ཁྱོད་ལྟ་བུ། །སྡིག་བྱེད་མི་ཡི་ནང་ན་གཅན་གཟན་ཡིན། །སྲིན་པོའི་ནང་ན་ཤིན་དུ་སྡིག་ཅན་དེ། །ལྷ་མིན་ནང་ནའང་མ་རུངས་ལས་བྱེད་པ། །སོར་ཕྲེང་ཁྱོད་ནི་ཤིན་དུ་ཆེས་
དཀྲིས་ཤིང་། །སྡིག་པ་སེམས་པ་མི་ཡིས་སྤངས་པ་སྟེ། །མ་ནི་འཇིག་རྟེན་དག་ན་དཀའ་མཆོག་བྱེད། །ཉོན་མོངས་དེས་ནི་ཟླ་བཅུ་རུམ་ན་བསྲེལ། །དེ་ནས་ཕྱིས་ནི་བཙས་པར་གྱུར་ནས་ཀྱང་། །བཤང་གཅི་མང་རེག་
སྡུག་བསྔལ་མྱོང་བས་གསོས། །ལྟོས་ཤིག་སོར་ཕྲེང་ཁྱོད་ཀྱི་གཙོ་མོ་ནི། །མིག་ནི་ཁྲག་གི་མཆི་མས་རབ་ཏུ་གང་། །བུད་མེད་བུ་ལ་བྱམས་ཤིང་སྡུག་པ་ཡིས། །མངར་གྱི་བུམ་པ་ཕྲག་ལ་ཐོགས་ཏེ་འོངས། །རྒན་མོ་
ཉོན་མོངས་རླུང་གིས་སྐྲ་ཡང་བཤིག །གོས་ངན་རལ་པོ་རླུང་གིས་བསྐྱོད་ཅིང་འབྲལ། །ལུས་ལ་རྡུལ་གོས་རྐང་པ་སེར་ཀ་བྱུང་། །རྒན་མོ་ཉོན་མོངས་སྡུག་བསྔལ་ཆེན་པོ་མྱོང་། །ལུས་སྐམས་ཡུན་རིང་རླུང་དང་ལྷགས་

57-1-158a

པས་ཉེན། །སྡུག་བསྔལ་མང་པོས་ཤིན་དུ་གདུངས་པར་གྱུར། །བུད་མེད་དེ་ནི་རྣམ་པར་སྙིང་མྱོས་ཏེ། །བསམ་ཡས་སྡུག་བསྔལ་ལྡན་ཞིང་ཀྱི་ཧུད་འབོད། །དེ་ནས་སོར་མོའི་ཕྲེང་བའི་མས་དེ་བཞིན་གཤེགས་
པ་དང་། བདག་གི་བུ་སོར་མོའི་ཕྲེང་བ་གཉིས་ཕན་ཚུན་ལན་དང་ཡང་ལན་གྱིས་རྒྱ་ཞིང་ཚོན་རྩོད་པ་ལས་བདག་གི་བུ་ཕམ་སྟེ། ལག་ཆ་བོར་བར་མཐོང་ནས། སྡུག་པའི་སྡུག་བསྔལ་ཆེན་པོས་རེག་སྟེ། བཅོམ་ལྡན་འདས་ལ་
འདི་སྐད་ཅེས་གསོལ་ཏོ། །བཅོམ་ལྡན་རིན་ཆེན་གཏེར་སྟོར་བ། །བདག་གིས་ཉོན་མོངས་མྱོང་བས་རྙེད། །བདག་གིས་མིག་དུ་གྱུར་པ་ཐོབ། །མིག་གི་རྡུལ་རྣམས་བདག་གིས་བསལ། །བདག་གི་བུ་ནི་མི་ཁྲག་གིས། །ཀྱེ་
མ་ལུས་དང་ཟས་ལ་རེག །ཀུན་དུ་འཁྱམ་ཞིང་མཚོན་རྣོན་ཐོགས། །འགྲོ་བ་མང་པོའི་ཕུང་པོ་གསོད། །བདག་གི་བུ་ཡང་མགུ་བྱ་ཤིང་། །སངས་རྒྱས་ཕྱག་བྱ་འམ་ཇི་ལྟར་བྱ། །ཁྱོད་ཀྱི་བུ་ངན་འདི་འདྲ་ཞེས། །འགྲོ་མངས་
ཚིག་རྩུབ་མཉན་མི་ནུས། །དེ་ལ་སོགས་པ་རྣམ་པ་དུ་མར་སྨྲེའོ། །དེ་ནས་བཅོམ་ལྡན་འདས་ཀྱིས་སོར་མོའི་ཕྲེང་ལ་འདི་སྐད་ཅེས་བཀའ་སྩལ་ཏོ། །སོར་མོའི་ཕྲེང་བ་ཁྱོད་ཀྱི་གཙོ་མོ་ནི་ཤིང་དྲུང་ན་འདུག་སྟེ། དེ་ལྟ་བུ་ཤིན་དུ་དཀའ་
བ་བྱེད་པའི་བུད་མེད་འདི་ལ་ཁྱོད་རལ་གྲི་ཐོགས་ཏེ། བདག་གི་མ་མཐོ་རིས་སུ་འགྲོ་བར་འགྱུར་རོ་སྙམ་ནས་གསད་པར་འདོད་པ་ནི་སོར་མོའི་ཕྲེང་བ་ཆོས་མ་ཡིན་པའི་ཕུང་པོ་ལ་ཆོས་སུ་ནོར་ཏོ། །འདི་ལྟ་སྟེ་དཔེར་ན། སོ་ཀའི་
དབྱར་ཟླ་ར་བའི་དུས་ལ་སྨིག་རྒྱུ་བ་ལ་ཆུ་ཡིན་སྙམ་ནས་རི་དགས་རྣམས་ཀུན་དུ་འཁྱམ་པ་དེ་བཞིན་དུ། སོར་མོའི་ཕྲེང་བ་ཁྱོད་ཀྱང་སློབ་དཔོན་ངན་པའི་མན་ངག་གིས་རྨོངས་པར་གྱུར་ཏེ། ཆོས་མ་ཡིན་པ་ལ་ཆོས་སུ་སེམས་
པའི་སེམས་ཅན་ནི་མནར་མེད་པ་ཞེས་བྱ་བའི་མི་ཟད་པ་ཆེན་པོར་འགྲོའོ། །སོར་མོའི་ཕྲེང་བ་དེ་བཞིན་གཤེགས་པའི་སྐྱབས་སུ་མྱུར་དུ་སོང་ཤིག་སོང་ཤིག །ཞུགས་ཤིག །སོར་མོའི་ཕྲེང་བ་ཁྱོད་མ་འཇིགས་ཤིག །དེ་

57-1-158b

བཞིན་གཤེགས་པ་ནི་འཇིགས་པ་མེད་པའི་འབྱུང་གནས་ཏེ། སངས་རྒྱས་ནི་སེམས་ཅན་ཐམས་ཅད་ལ་སྒྲ་གཅན་ཟིན་དང་མཚུངས་པར་གཟིགས་པ། ན་བ་རྣམས་གསོ་བ་དང་། སྐྱབས་མེད་པ་རྣམས་ཀྱི་སྐྱབས་སོ། །སངས་རྒྱས་
ནི་དབྱེ་གནས་ན་བཞུགས་པ། རྩ་ལག་མེད་པ་རྣམས་ཀྱི་རྩ་ལག་གོ། །སངས་རྒྱས་ནི་དབུལ་པོ་རྣམས་ཀྱི་མི་ཟད་པའི་གཏེར་རོ། །སངས་རྒྱས་ནི་ལམ་སྟོར་བ་རྣམས་ལ་ལམ་བཟང་པོ་སྟོན་པའོ། །སངས་རྒྱས་ནི་འཇིགས་པས་
གཟིར་བ་རྣམས་ཀྱི་སྐྱབས་སུ་གྱུར་པའོ། །དེ་བཞིན་གཤེགས་པ་ནི་གྲུ་ཞིག་པ་རྣམས་ཀྱི་གྲུར་གྱུར་པའོ། །མཚོན་རྣོན་པོ་མྱུར་དུ་བོར་ལ། རབ་ཏུ་འབྱུང་བ་དང་། བསྙེན་པར་རྫོགས་པ་ལོང་ཤིག །སོང་ལ་བླ་མའི་རྐང་པ་ལ་
གཏུགས་ཏེ་བཟོད་པ་གསོལ་ཅིག །རྒན་མོ་ཉོན་མོངས་མ་ལ་རབ་ཏུ་འབྱུང་བར་ཐོང་ཤིག་ཅེས་གསོལ་བ་ཐོབ་ལ་སྲིད་པ་མི་ཟད་པ་ལས་སེམས་ཅན་རྣམས་སྒྲོལ་ཅིག་དང་། ཤོ་གམ་བཟང་པོ་རབ་ཏུ་འབྱུང་བ་དང་བསྙེན་པར་རྫོགས་པ་
སྦྱིན་ནོ། །སོར་མོའི་ཕྲེང་བ་ཁྱོད་ཡུན་རིང་པོར་ལམ་ངན་པར་འཁྱམས་ཤིང་ངལ་བར་གྱུར་གྱིས་ཆོས་ཀྱི་རོའི་ཆུ་འཐུང་ཤིག །སོར་མོའི་ཕྲེང་བ་ཁྱོད་ཀྱང་ཤོ་གམ་ལེན་པ་ཡིན། དེ་བཞིན་གཤེགས་པ་ཡང་ཤོ་གམ་ལེན་པ་ཡིན་ཏེ། སོར་
མོའི་ཕྲེང་བ་དེ་བཞིན་གཤེགས་པ་ནི་སེམས་ཅན་ཐམས་ཅད་ཀྱི་ཤོ་གམ་ལེན་པ་ལམ་སེལ་གྱི་རྒྱལ་པོ་ཡིན་ཏེ། སེམས་ཅན་ཐམས་ཅད་སྲིད་པའི་རྒྱ་མཚོ་ལས་བསྒྲལ་ཅིང་ལམ་སེལ། རྟག་ཏུ་ཤོ་གམ་ལེན་ཏོ། །དེ་ནས་སོར་མོའི་
ཕྲེང་བས་དེ་ཉིད་དུ་སྲིན་པོ་ལྟར་ཤིན་དུ་རྣོ་ཞིང་མི་ཟད་པའི་མཚོན་རྣོན་པོ་བོར་ནས། །བྱིས་པ་ལོ་གཅིག་ལོན་པས་མེ་མདག་བླངས་པ་དང་། མེ་མདག་དེ་བོར་ནས་རང་གི་ལག་ལ་ཉུག་ཅིང་། ངུས་ཏེ་ཆོ་ངེས་འདེབས་པ་དེ་བཞིན་དུ་སོར་
མོའི་ཕྲེང་བ་ཡང་མཚོན་ཤིན་དུ་རྣོ་བ་དེ་བོར་ནས་ངུ་ཞིང་ཆོ་ངེས་བཏབ་སྟེ། མི་ཉིས་སྟོང་དུ་གཅིག་གིས་མ་ཚང་བའི་སོར་མོའི་ཕྲེང་བ་ཐོགས་པ་ཡང་རང་གི་ལུས་ལས་ཕུད་ནས་ཀྱི་ཧུད་ཅེས་ཟེར་ཏེ། དཔེར་ན། མི་ཞིག་ཉལ་བ་

57-1-159a

ལས་རང་གི་རྐང་པ་ལ་སྦྲུལ་གྱིས་ཟིན་མ་ཐག་ཏུ་མྱུར་དུ་སད་ནས། ལག་པ་བསྐུམ་པ་ལས་སྤྲུགས་ཏེ། ཤིན་དུ་མི་ཟད་པའི་སྦྲུལ་བཟུང་ནས་འདོར་བ་དེ་བཞིན་དུ་སོར་མོའི་ཕྲེང་བ་ཡང་རང་གི་མགོ་ལས་སོར་མོའི་
ཕྲེང་བ་མྱུར་དུ་བོར་རོ། །ཇི་ལྟར་བདག་ཉིད་གདོན་དང་བྲལ་བར་གྱུར་པར་ཤེས་ནས་ངོ་ཚ་བ་དེ་བཞིན་དུ། དེ་ནས་སོར་མོའི་ཕྲེང་བས་ཀྱང་། བདག་ཉིད་མངོན་པར་རིག་ནས་མེ་ཏོག་རྩ་ལག་འཚོ་ཞེས་བྱ་བའི་ཁ་དོག་ལྟར་ཁྲག་གིས་
ལུས་ཐམས་ཅད་ཡོག་ཅིང་། སྤྲིན་ཆེན་པོ་ལྟར་མིག་མཆི་མས་གང་ནས་རབ་དུ་ངུ་ཞིང་བདག་ལ་རྡེག་སྟེ། ཇི་ལྟར་སྦྲུལ་གྱིས་ཟིན་ནས་སྨྱོས་པའི་མི་སྦྲུལ་ལྟར་ལྟོས་འཕྱེ་ཞིང་འགྲོ་འགྲོ་བ་དེ་བཞིན་སོར་མོའི་ཕྲེང་བ་ཡང་
ཚང་ཤིང་སུམ་བཅུ་རྩ་དགུ་ཁོ་ར་ཁོར་ཡུག་གི་ས་ལ་ལྟོས་འཕྱེ་ཞིང་སོང་ནས། བཅོམ་ལྡན་འདས་ཀྱི་ཞབས་མགོ་ལ་བཞག་སྟེ། ཚིག་འདི་སྐད་ཅེས་སྨྲས་སོ། །ཀྱེ་མ་སངས་རྒྱས་བྱམས་པའི་མཆོག་མངའ་ཞིང་། །
སྐྱེས་འདུལ་ཁ་སྒྱུར་བདག་གི་སླད་གཤེགས་པས། །གཏི་མུག་ཆོས་ཀྱི་རླབས་ཆེན་མི་ཤེས་ཆུ། །རྒྱ་མཚོ་ཆེ་ལས་བདག་དེང་ངེས་པར་བསྒྲལ། །ཀྱེ་མ་སངས་རྒྱས་ཐུགས་རྗེ་མཆོག་མངའ་ཞིང་། །སྐྱེས་འདུལ་ཁ་སྒྱུར་
བདག་གི་སླད་གཤེགས་པས། །འདི་རྩ་འབྲས་བུ་ལོ་མ་མང་བ་ཡི། །དགོན་པ་ལས་ནི་དེང་བདག་ངེས་པར་བསྒྲལ། །ཀྱེ་མ་སངས་རྒྱས་དགའ་བ་མཆོག་མངའ་ཞིང་། །སྐྱེས་འདུལ་ཁ་སྒྱུར་བདག་གི་སླད་གཤེགས་
པས། །ལྟ་བ་སྣ་ཚོགས་རི་མོར་བྲིས་པ་ཡིས། །སྟག་གི་ལག་ནས་བདག་དེང་ངེས་པར་བསྒྲལ། །ཀྱེ་མ་སངས་རྒྱས་བཏང་སྙོམས་མཆོག་མངའ་ཡང་དག་གཟིགས། །སྐྱེས་འདུལ་ཁ་ལོ་སྒྱུར་བ་བདག་གི་སླད་གཤེགས་པས། །
འོ་དོད་འཐོབ་དང་ཆེར་འབོད་མནར་མེད་པའི། །སེམས་ཅན་དམྱལ་ཆེན་གཏང་ནས་དེང་བདག་བསྒྲལ། །འདི་ནི་སྐྱབས་མེད་པ་ཡི་སྐྱབས་ལགས་ཏེ། །རྩ་ལག་མེད་པ་རྣམས་ཀྱི་རྩ་ལག་གོ། །བདག་གིས་ཡ་ང་ཚ་བའི་

57-1-159b

ལས་བགྱིས་ན། །བདག་ནི་འདི་འདྲར་གྱུར་ལ་སྐྱབས་མཛད་གསོལ། །དེ་ནས་བཅོམ་ལྡན་འདས་ཀྱིས་སོར་མོའི་ཕྲེང་བ་ལ་སླར་བཀའ་སྩལ་པ། །སོར་མོའི་ཕྲེང་བ་ཁྱོད་ལོངས་ལ་མྱུར་དུ་སོང་སྟེ། མའི་རྐང་པ་ལ་གཏུགས་
ལ་བཟོད་པ་གསོལ་ཅིག །བཟོད་པ་གསོལ་ནས། རབ་ཏུ་འབྱུང་བ་དང་། བསྙེན་པར་རྫོགས་པར་གསོལ་ཅིག་ཅེས་གསོལ་བ་ཐོབ་ཅིག །དེ་ནས་སོར་མོའི་ཕྲེང་བ་བཅོམ་ལྡན་འདས་ཀྱི་ཞབས་ཀྱི་དྲུང་ནས་ལངས་ནས། རང་གི་
མ་ག་ལ་བ་དེར་སོང་སྟེ་ཕྱིན་པ་དང་། རང་གི་མ་ལ་ལན་མང་དུ་བསྐོར་བ་བྱས་ཏེ། ཆུ་སྲིན་བྱིས་པ་གསོད་ཅེས་བྱ་བ་བཞིན་དུ་འགྲེ་ཞིང་ངུས་ནས་ཆོ་ངེས་བཏབ་སྟེ། རང་གི་མ་ལ་ཚིགས་སུ་བཅད་པ་འདི་སྐད་ཅེས་སྨྲས་སོ། །
སློབ་དཔོན་ངན་པའི་དབང་སོང་བས། །མི་སྟོང་དགུ་བརྒྱ་བཀུམ་ལགས་ཏེ། །ཀྱེ་མ་བདག་གིས་མི་ཟད་བགྱིས། །བདག་གིས་སྡིག་ཕུང་མང་པོ་རྙེད། །མ་ཁྱོད་བདག་གི་རྟེན་ལགས་ཏེ། །སངས་རྒྱས་ཤིན་དུ་སྐྱབས་སུ་
གདའ། །ཁྱོད་ཀྱི་ཞབས་ནི་མགོར་བཞག་སྟེ། །རབ་འབྱུང་བསྙེན་པར་རྫོགས་པར་གསོལ། །དེ་ནས་མས་རང་གི་བུ་ལ་ཚིགས་སུ་བཅད་པས་ཕྱིར་སྨྲས་པ། །ངས་ནི་བུ་ཁྱོད་བཏང་ཟིན་གྱིས། །རབ་བྱུང་འཇིག་རྟེན་ཕ་རོལ་སྤྱོད། །
བདག་ཀྱང་རྫོགས་པའི་སངས་རྒྱས་ལ། །དེ་བཞིན་རབ་ཏུ་འབྱུང་བར་གསོལ། །ཀྱེ་མ་བཅོམ་ལྡན་བསམ་མི་ཁྱབ། །དེ་བཞིན་གཤེགས་པ་དཔེ་མེད་དེ། །སངས་རྒྱས་བདག་གི་བུ་སྒྲོལ་བ། །འཇིག་རྟེན་ཀུན་ལ་ཐུགས་ཀྱང་བརྩེ། །
མགོན་པོ་ཁྱོད་ཀྱི་གཟུགས་རྣམས་དང་། །ཡོན་ཏན་དཔེ་ཡང་འགྲོ་ལ་མེད། །བདག་གིས་ཆུང་ཟད་བརྗོད་ནུས་ཏེ། །དེ་བཞིན་གཤེགས་པ་ལྷ་ཡི་ལྷ། །དེ་ནས་བཅོམ་ལྡན་འདས་ཀྱིས་རྒན་མོ་ལ་ཚིགས་སུ་བཅད་པ་འདི་སྐད་
གསུངས་སོ། །ཁྱོད་ཀྱི་བུ་ནི་ང་མདུན་དུ། །རབ་དུ་འབྱུང་བར་གནང་བ་ནི། །ལེགས་སོ་བུད་མེད་ཉོན་མོངས་མ། །རྒྱུན་མི་ཆད་པར་བདེ་བར་ཤོག །ཁྱོད་ནི་རབ་ཏུ་བྱུང་བ་ཡི། །དུས་ལས་ཤིན་དུ་ཡོལ་ཟིན་གྱིས། །དགེ་བསྙེན་མ་ཡི་

57-1-160a

ཆོས་རྣམས་ཀྱིས། །རྒན་མོ་བདག་ཉིད་དབུགས་ཕྱུང་ཤིག །སྐད་ཅིག་ཙམ་དུ་འདིར་སྡོད་དེ། །རྒྱལ་པོ་གསལ་རྒྱལ་ཇི་སྲིད་ན། །འདི་དག་ཏུ་ནི་མཐོང་གྱུར་པ། །དེ་ཙམ་དུ་ཡང་བདེ་བར་འདུག །
བམ་པོ་གཉིས་པ། །དེ་ནས་ལྷའི་དབང་པོ་བརྒྱ་བྱིན་སུམ་བཅུ་རྩ་གསུམ་པའི་ལྷ་རྣམས་དང་། ལྷའི་བུ་མོའི་ཚོགས་དང་བཅས་པས་བསྐོར་ཅིང་མདུན་དུ་བདར་ཏེ། སྣང་བ་ཆེན་པོས་མཉན་དུ་ཡོད་པའི་ཡུལ་ཐམས་ཅད་སྣང་བར་
བྱས་ནས། དེ་བཞིན་གཤེགས་པ་དང་། སོར་མོའི་ཕྲེང་བ་གཉིས་མི་ལྟར་འཐབ་པ་དང་། ཅང་ཤེས་ལྟར་འཐབ་པ་མཐོང་སྟེ། རབ་ཏུ་དགའ་ནས་བཅོམ་ལྡན་འདས་དང་སོར་མོའི་ཕྲེང་བ་གཉིས་ལ་ཚིགས་སུ་བཅད་པ་འདི་སྐད་ཅེས་
སྨྲས་སོ། །ཀྱེ་མ་མི་འདུལ་ཁ་ལོ་སྒྱུར། །སངས་རྒྱས་ནོར་ལ་བཟང་པོ་མཛེས། །ཀྱེ་མ་འདི་ལྟར་སངས་རྒྱས་ཀྱིས། །སོར་མོའི་ཕྲེང་བ་རབ་ཏུ་བརྟུལ། །རྟག་ཏུ་མི་ཡི་ཁྲག་གིས་ལུས་བྱུགས་ཏེ། །ལྷ་མིན་དབང་དང་ལྷ་མིན་
སྲིན་པོ་དང་། །གནོད་སྦྱིན་སྟོབས་དང་ལྡན་པ་རྩལ་ཆེན་དང་། །ཀླུ་དང་ཤ་ཟ་ལྟོ་འཕྱེ་མི་འམ་ཅི། །སྟོབས་ལྡན་རྩལ་ཆེན་ནམ་མཁའ་ལྡིང་དག་དང་། །སེམས་ཅན་གཏུམ་པོ་སྟོབས་ལྡན་གཞན་དག་ཀྱང་། །སོར་
ཕྲེང་མིང་ཐོས་ཉལ་བཞིན་མིག་བཙུམས་འདུག །དེ་འདྲ་གཏུམ་པོའི་ལས་བྱེད་སོར་ཕྲེང་དེ། །མི་ཡི་རྒྱལ་པོ་ཙམ་གྱིས་ག་ལ་སོད། །དེ་ནི་བཙས་མ་ཐག་ཏུ་དེ་ཡི་ཚེ། །ལྷ་དང་ལྷ་མ་ཡིན་པ་ཀུན་སྐྲག་ན། །མི་ཡི་རྒྱལ་པོ་
ཙམ་ལྟ་ཅི་ཞིག་སྨོས། །མིང་གིས་གོ་ཆ་མཚོན་ཀུན་རྡོལ་ཅིང་སྣང་། །དེ་ལྟར་དྲག་ཅིང་སྟོབས་ལྡན་རྩལ་ཆེ་བ། །ཀྱེ་མ་དེ་བཞིན་གཤེགས་ཀྱིས་བཏུལ་བ་ལེགས། །མཐུ་དང་རྩལ་ཀྱང་བསམ་གྱིས་མི་ཁྱབ་མངའ། །
སངས་རྒྱས་བསམ་གྱིས་མི་ཁྱབ་སངས་རྒྱས་ནི། །ཡུལ་དང་ཡེ་ཤེས་སྤྱོད་ཡུལ་བསམ་མི་ཁྱབ། །སོར་མོའི་ཕྲེང་བ་དེ་རིང་མཛེས་པར་སྣང་། །ཤིན་དུ་གཟུགས་བཟང་བཙོ་མའི་གསེར་ལྟར་གྱུར། །ཉི་མའི་ཟེར་ཤར་

57-1-160b

ཁ་དོག་ལྟ་བུར་མཛེས། །སོར་ཕྲེང་བྱད་སྡུག་ཚུལ་ཁྲིམས་གནས་པ་མཛེས། །ཚུལ་ཁྲིམས་བྲལ་བའི་མི་ནི་ཡོང་མི་མཛེས། །ཀྱེ་མ་བདག་དེང་ཁྱིམ་ཆོས་མང་ཐོབ་སྙམ། །སོར་མོའི་ཕྲེང་བ་ཆོས་གོས་སྩལ་བར་བགྱི། །སངས་
རྒྱས་བཅོམ་ལྡན་བདག་ལ་ཐུགས་བརྩེ་བཞེས། །སོར་མོའི་ཕྲེང་བ་དགེ་སྦྱོང་ཚུལ་འདྲ་སྩལ། །སློང་བ་ཀུན་གྱི་རྒྱལ་པོ་ཆེན་པོ་ལ། །དེ་བཞིན་གཤེགས་པས་ལེགས་པར་གཟིགས་སུ་གསོལ། །དེ་ནས་ལྷའི་དབང་པོ་བརྒྱ་བྱིན་གྱིས་
སོར་མོའི་ཕྲེང་བ་ལ་འདི་སྐད་ཅེས་སྨྲས་སོ། །སྐྱེས་བུ་དམ་པ་ངའི་ལྷའི་གོས་མཆོག་འདི་ཁྱོད་ཀྱི་ཆོས་གོས་གྱིས་ཤིག །དེ་ནས་སོར་མོའི་ཕྲེང་བས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །སྦྲང་མ་ལྟ་བུ་ཁྱོད་སུ་ཞིག །བརྒྱ་
བྱིན་མ་དད་པ་ཡི་སྦྱིན་པ་ང་ལེན་ཏམ། བརྒྱ་བྱིན་ཁྱོད་ནི་འདོད་པའི་གོང་བུ་སྟེ། ཁྱོད་ཀྱིས་ད་དུང་ཆུ་ཀླུང་མང་པོ་མ་རྒལ་ཏེ། རང་བཞིན་གྱིས་གཅེར་བུས་གཞན་ལ་ཇི་ལྟར་གོས་སྦྱིན། ཁྱོད་ནི་རང་བཞིན་གྱིས་གཅེར་བུ་ན། ཆོས་གོས་གྱིས་
ཕྱིར་ཇི་ལྟར་རིན་ཐང་མེད་པའི་གོས་གཞན་ལ་སྦྱིན། དཔེར་ན་རྒྱལ་པོའི་གྱད་སྟོང་ཐུབ་བདག་ཉིད་ལུས་ཐམས་ཅད་ཐོག་མར་འགྱེལ་ན། བ་ལང་རྒན་པོ་འདམ་དུ་སོང་བ་བཞིན། མ་རྒལ་བ་ཉིད་དུ་འགྱེལ་བས་རྒན་པོ་གཞན་
གྱི་གྱད་སྟོང་ཐུབ་ལ་ཇི་ལྟར་བརྒལ་བར་བྱ། དེ་བཞིན་དུ་ངས་ཀྱང་ཁྱོད་ཀྱི་རིན་ཐང་མེད་པའི་གོས་གྱོན་ན་བརྒྱ་བྱིན་མིག་སྟོང་ཅན་ཉོན་མོངས་པའི་བདུད་བྱེ་བ་དང་། རང་བཞིན་གྱི་བདུད་ལ་སོགས་པ་དང་ཇི་ལྟར་འགྱེད། 
ངས་ནི་བདུད་མཐའ་ཡས་པ་དང་། འཐབ་ཅིང་ཉོན་མོངས་པ་མང་པོ་ཟད་པར་བྱ་སྟེ། དགེ་སྦྱོང་གི་ཆོས་དེ་བཞིན་གཤེགས་པས་བསྔགས་པའི་སྦྱངས་པའི་ཡོན་ཏན་བཅུ་གཉིས་ལ་སྤྱད་པར་བྱའི། ཁྱོད་ཀྱི་མལ་ཆ་ནི་དེ་ལྟར་གནས་
པར་མི་བྱའོ། །བརྒྱ་བྱིན་མིག་སྟོང་ཅན་ཁྱོད་ནི་ལྷ་རྣམས་ཀྱི་དབང་ཕྱུག་མ་ཡིན་ཏེ། ཁྱོད་ནི་དམུས་ལོང་དུ་གྱུར་པ་དང་ཁྱད་པར་མེད་དོ། །བརྒྱ་བྱིན་ཁྱོད་ཀྱིས་གཏུམ་པོའི་ལས་ཀྱི་སྡིག་པ་ཅི་འདྲ་བའི་བྱེ་བྲག་མི་ཤེས་སོ། །སོར་

57-1-161a

མོའི་ཕྲེང་བ་གཏུམ་པོ་ཡིན་པར་སྦྲང་མ་ལྟ་བུ་ཁྱོད་ཀྱིས་ཇི་ལྟར་ཤེས། ཀྱེ་མ་བརྒྱ་བྱིན་གྱིས་གསལ་བར་གཏུམ་པོའི་ལས་མི་ཤེས་སོ། །བསྟན་པའི་ཚུལ་ཤེས་ན་རབ་ཏུ་འབྱུང་བར་འདོད་པའི་ཐོག་མར་རིན་ཐང་མེད་པའི་
གོས་གྱོན་ན། དགེ་སྦྱོང་ཅི་འདྲ་བ་ཞིག་ཏུ་འགྱུར། བརྒྱ་བྱིན་ཁྱོད་ནི་རབ་ཏུ་འབྱུང་བའི་དབེན་པ་ཙམ་ཡང་མི་ཤེས་ཏེ། ཀྱེ་མ་བརྒྱ་བྱིན་ཁྱོད་ནི་བསྟན་པ་ལས་ཕྱི་རོལ་དུ་གྱུར་པའོ། །འདི་ལྟ་སྟེ། ནོར་བུ་དང་། མུ་ཏིག་དང་། བཻ་དཱུརྱ་དང་། 
གསེར་དང་། ནོར་བུ་ཟླ་མཛེས་ལ་སོགས་པའི་རིན་པོ་ཆེས་གང་བའི་བུམ་པ་བརྒྱད་ཁྲི་དང་། ས་ལེ་སྦྲམ་དང་། རིན་པོ་ཆེའི་བུམ་པ་གཞན་ཡང་དཔག་ཏུ་མེད་པ་སྤངས་ཏེ། མཆིལ་མའི་ཐལ་བ་བཞིན་དུ་རིན་ཐང་མེད་པའི་གོས་
བོར་ཏེ། གང་དགེ་སྦྱོང་གི་ཆོས་ལ་ངེས་པར་བྱུང་བ་དེ་བཞིན་གཤེགས་པའི་སྲས་ཐུ་བོ། གནས་བརྟན་འོད་སྲུང་ཆེན་པོ་གནས་མལ་ནགས་ཁྲོད་དུ་འཆའ་ཞིང་། སྦྱངས་པའི་ཡོན་ཏན་བཅུ་གཉིས་ཀྱིས་བསྡམས་ཏེ། ལུས་ཀྱིས་
བརྟུལ་ཞུགས་སྤྱོད་པ་ཡང་ཅིའི་ཕྱིར་རིན་ཐང་མེད་པའི་གོས་མི་གྱོན། ཅིའི་ཕྱིར་ཁང་པའི་གནས་མལ་སྤངས་ཤིང་གནས་བརྟན་འོད་སྲུང་ཆེན་པོ་བདུད་རྩི་ལྟ་བུའི་ཁ་ཟས་སྣ་ཚོགས་དང་། ཤའི་རོའི་ཁ་ཟས་སྤངས་ཏེ། ཤ་མེད་
པར་བརྟུལ་ཞུགས་ཀྱི་སྤྱོད་པ་ལ་ཡང་དག་པར་སྤྱོད། ཁྱིམ་ནས་ཁྱིམ་དུ་རྒྱུ་ཞིང་ལྐུག་པ་མ་ཡིན་པར་ལྐུག་པར་འདུ་ཤེས་པས་མདུན་དང་། རྒྱབ་དང་། གློ་ནས་མེད་ཅེས་ཟེར་རམ་གཤེ་ན་ཡང་བདེ་བར་གྱུར་ཅིག་ཅེས་བརྟན་
པར་ཕྱིར་འབྱུང་ངོ་། །ཡོད་ཅེས་ཟེར་ན་ཡང་གནས་བརྟན་ཆགས་པར་མི་འགྱུར་ཏེ། བདེ་བར་གྱུར་ཅིག་ཅེས་བརྟན་པར་ཕྱིར་འབྱུང་ལ་བུམ་པ་རེ་རེས་ཀྱང་མ་འོངས་པའི་དགེ་སྦྱོང་རྣམས་ནམ་འཚོའི་བར་དུ་བཟའ་བ་དང་། 
བཅའ་བ་དང་། བལྡག་པ་སྤྱད་པར་འགྱུར་ན། ཅིའི་ཕྱིར་དེ་ལྟ་བུའི་ལོངས་སྤྱོད་ཀྱི་ཕུང་པོ་ཆེན་པོ་དགེ་འདུན་གྱི་ནོར་དུ་མ་བཞག་སྟེ། བདག་གིར་བྱ་བ་སྤངས་ཤིང་བཏང་ནས་ཡི་དགས་དང་། དབུལ་པོ་དང་། བཀྲེན་པ་དང་། 

57-1-161b

སློང་བ་ལ་སོགས་པའི་གཏེར་ཟད་མི་ཤེས་པར་བྱས་པ་དེ་ལྟ་བུ་ནི་བརྒྱ་བྱིན་དགེ་སྦྱོང་གི་ཆོས་ཏེ། ཏིལ་ཙམ་གྱི་བག་སོགས་པ་དེ་ཡང་དགེ་སྦྱོང་གི་ཆོས་མ་ཡིན་ནོ། །བྲན་ཕོ་དང་། བྲན་མོ་དང་། ནོར་རྣམ་པ་མང་པོ་དང་། ཞིང་གི་དངོས་
པོ་དང་། དེ་བཞིན་དུ་ཉོ་བ་དང་། འཚོང་བ་དེ་ནི་དགེ་སྦྱོང་གི་ཆོས་དང་འཐུན་པ་མ་ཡིན་ཏེ། དེ་དག་ནི་ཁྱིམ་ན་གནས་པ་རྣམས་ཀྱི་ནོར་ལྟ་བུ་ཡིན་ནོ། །སྔར་སྨོས་པའི་ནོར་དེ་དག་ལེན་པ་གང་ཡིན་པ་དང་། རུང་བ་མ་ཡིན་པའི་
ནོར་སྦྱིན་པར་བྱེད་པ་གང་ཡིན་པ་དེ་དག་ནི་བླུན་པོར་མཚུངས་ཏེ། འབྲས་མ་རུང་བར་བྱེད་པའི་ཞིང་གི་ངོ་དང་འདྲ་བར་སྐྱོན་ཆགས་པའི་ཡ་མཚན་ཅན་དེ་དག་ང་ཆད་པས་གཅད་པར་བྱའོ། །གང་ངས་བསད་ནས་སོར་མོའི་
ཕྲེང་བར་བྱས་པ་དེ་དག་ཐམས་ཅད་ཀྱང་བསྟན་པ་ལ་སུན་འབྱིན་པ་ཤ་སྟག་སྟེ། དགེ་བསྙེན་ནམ། དགེ་བསྙེན་མ་འམ། དགེ་སྦྱོང་ངམ། དགེ་སྦྱོང་མ་གཅིག་ཀྱང་མེད་དོ། །དེ་ནས་ལྷའི་དབང་པོ་བརྒྱ་བྱིན་གྱིས་སོར་མོའི་ཕྲེང་བ་
ལ་འདི་སྐད་ཅེས་སྨྲས་སོ། །ཆོས་ནི་བསད་པ་མེད་པའི་མཚན་ཉིད་དེ། དེ་བཞིན་གཤེགས་པ་ཡང་སྲས་གཅིག་པོ་སྒྲ་གཅན་ཟིན་བཞིན་དུ་སེམས་ཅན་ཐམས་ཅད་ལ་གཟིགས་ན། ཇི་ལྟར་སྐྱོན་ཆགས་པའི་ཡ་མཚན་ཅན་རྣམས་
ཀྱི་ཡན་ལག་གཅད་པར་བཀའ་སྩོལ་བར་འགྱུར། དེ་ནས་སོར་མོའི་ཕྲེང་བས། བརྒྱ་བྱིན་ལྷའི་དབང་པོ་ལ་འདི་སྐད་ཅེས་སྨྲས་སོ། །གསད་པ་དང་། མི་གསད་པའི་བྱེ་བྲག་བརྒྱ་བྱིན་ཁྱོད་ཀྱིས་ག་ལ་ཤེས། སྒྱུ་མ་བྱེད་པའི་སྒྱུ་མ་
ཇི་ལྟར་ཞིང་པས་མི་ཤེས་པ་དེ་བཞིན་དུ་བྱང་ཆུབ་སེམས་དཔའི་ཡུལ་སྒྱུ་མ་ཡང་། བརྒྱ་བྱིན་བསྟན་པའི་ཕྱི་རོལ་དུ་གྱུར་པ་ཞིང་པ་ལྟ་བུས་ག་ལ་ཤེས། མི་གསད་པ་དང་། གསད་པ་ལ་ཡང་རྣམ་པ་གཉིས་ཡོད་དེ། བྱང་ཆུབ་སེམས་དཔའི་གསོད་
པ་དང་། ཉན་ཐོས་ཀྱི་གསོད་པ་སྟེ། རྣམ་པ་དེ་གཉིས་ཀྱང་སྦྲང་བུ་ལྟ་བུ་ཁྱོད་ཀྱིས་ག་ལ་ཤེས། བྱང་ཆུབ་སེམས་དཔའི་ཡུལ་དང་། ཁྱོད་ཀྱི་ཡུལ་གྱི་ཁྱད་པར་ནི་ནམ་མཁའ་ལ་སྦྲང་བུའི་འཕུར་སྟབས་བཞིན་ནོ། །འདི་ལྟ་སྟེ་དཔེར་ན། དགེ་

57-1-162a

སྦྱོང་འདྲེས་ཟིན་པ་ལ་དགེ་སྦྱོང་རྣམས་འགོག་པར་ཞུགས་ན། སྐྱེ་བོ་མང་པོས་ཅིའི་ཕྱིར་འགོག་པ་ལ་ཞུགས་ཤེས་དྲིས་ན་བརྒྱ་བྱིན་ཁྱོད་ལ་དྲི་སྟེ། དེའི་ཚེ་དེ་ལྟར་འགོག་པའི་ཟློག་པ་དེ་མཆོག་ཡིན་ནམ། བསྒོ་བ་དེའི་ཚེ་གལ་ཏེ་
འགོག་པ་དེས་ཤི་ན་སུ་ལ་སྡིག་པར་འགྱུར་ཏེ། གལ་ཏེ་གསོད་པའི་སེམས་སྦྱངས་ན། སུ་ལ་ཡང་སྡིག་པར་མི་འགྱུར་རོ། །དེ་བཞིན་དུ་སྐྱོན་ཆགས་པའི་ཡ་མཚན་ཅན་རྣམས་ཆད་པས་བཅད་པ་ལས་གལ་ཏེ་ཤི་ན་སུ་ལའང་སྡིག་པར་མི་འགྱུར་
གྱི། བསོད་ནམས་ཀྱི་ཕུང་པོ་མང་དུ་སྐྱེད་དོ། །དེ་ལྟར་གསོད་པ་དང་། མི་གསོད་པའི་བྱེ་བྲག་ནི་ཤེས་པར་དཀའ་སྟེ། དེ་ནི་བྱང་ཆུབ་སེམས་དཔའ་རྣམས་ལ་གསོད་པའི་ཆོས་སུ་མི་འགྱུར་རོ། །དཔེར་ན། སྨན་པས་ནད་པའི་ལྕེའི་དྲུང་
དུ་གཙགས་བུས་བཏབ་སྟེ། ཁྲག་ཕྱུང་བ་ལས་དེའི་འོག་ཏུ་དེ་གལ་ཏེ་ཤི་ན་ཅི་སྨན་པ་ལ་སྡིག་ཏུ་འགྱུར་རམ། སྨན་པ་ནི་མི་མང་པོ་ལ་ཕན་པར་བྱེད་པས་སྨན་པ་ལ་སྡིག་ཏུ་མི་འགྱུར་ཏེ། གསོད་པའི་སེམས་ནི་མ་གཏོགས་སོ། །དེ་བཞིན་དུ་
སྐྱོན་ཆགས་པའི་ཡ་མཚན་ཅན་རྣམས་ཆད་པས་བཅད་པ་ལས་གལ་ཏེ་ཤི་ན་སུ་ལ་ཡང་སྡིག་པར་མི་འགྱུར་གྱི། བསོད་ནམས་ཀྱི་ཕུང་པོ་མང་དུ་འཕེལ་ཏེ། གསོད་པའི་སེམས་ནི་མ་གཏོགས་སོ། །དཔེར་ན་བུའི་སློབ་དཔོན་མཐོང་མ་ཐག་
ཏུ་བྱིས་པ་ཤི་ན་བུའི་སློབ་དཔོན་ལ་སྡིག་པར་འགྱུར་རམ། དེ་བཞིན་དུ་ཁོང་ནས་དཔའ་བའི་གཟི་བརྗིད་མཐོང་ནས། མཐོང་བ་ཙམ་གྱིས་སྐྱོན་ཆགས་པའི་ཡ་མཚན་ཅན་ཤི་ན་ཅི་ཟློག་པ་ལ་སྡིག་པར་འགྱུར་རམ། ཟློག་པ་ལ་སྡིག་པར་
མི་འགྱུར་གྱི། བསོད་ནམས་མང་དུ་འཕེལ་ཏེ། གསོད་པའི་སེམས་ནི་མ་གཏོགས་སོ། །དེའི་ཕྱིར་བརྒྱ་བྱིན་ཁྱོད་སྡིག་པའི་ལས་དང་། བསོད་ནམས་རྣམས་ཀྱི་ལས་ཀྱི་བྱེ་བྲག་མི་ཤེས་སོ། །དགེ་སྦྱོང་དང་། དགེ་སྦྱོང་མ་ཡིན་པའི་
བྱེ་བྲག་མི་ཤེས་ཀྱིས་དམ་པའི་ཆོས་ལ་སྡང་བའི་ཡ་མཚན་ཅན་རྣམས་ནི་ཆད་པས་གཅད་དོ། །གནས་བརྟན་འོད་སྲུང་ཆེན་པོ་ལ་སོགས་པ་ཉན་ཐོས་ཆེན་པོ་བརྒྱད་ཅུ་དང་། ས་ཡ་གྲོ་ཞུན་སྐྱེས་དང་། ཐུག་པ་མེད་ལ་སོགས་པ་དེ་དག་

57-1-162b

ཐམས་ཅད་ཀྱང་ནོར་གྱི་བུམ་པ་མང་པོ་བོར་ནས་ཡོ་བྱད་བསྙུངས་ཤིང་ཆོག་ཤེས་པས་དམ་པའི་ཆོས་ལ་གནས་པ་དག་ཅི་རིན་ཐང་མེད་པའི་གོས་གྱོན་ཏམ། དགེ་སློང་གི་ལུས་མགོ་བྲེགས་ཤིང་རྒྱགས་པ་ཐམས་ཅད་བཅོམ་པ་མགོན་
མེད་པ་བཞིན་དུ། ལག་ན་ལྷུང་བཟེད་ཐོགས་པ་གོས་ལ་སོགས་པ་ཡང་ཁ་དོག་བསྒྱུར་ཅིང་ཁ་དོག་ངན་པར་བྱས་པའི་དགེ་སློང་དེ་དག་ལ་བག་མེད་པ་ཇི་ལྟར་རུང་། རྟག་ཏུ་གྲང་བ་དང་། ཚ་བ་དང་། བྲུ་བ་དང་། སྐོམ་པས་ཉེན་ཅིང་རི་དགས་
བཞིན་དུ་རྟག་པར་རྐང་ལག་རྡུལ་གྱིས་རེག་ཀྱང་ཚུལ་ཁྲིམས་ལས་ཅུང་ཟད་འདས་པའི་དྲི་མ་ཡང་མེད་པ་ཁྭའི་སྒོ་ང་བཞིན་དུ་ཚུལ་ཁྲིམས་སྲུང་བ་དེ་དག་ལ་འདུ་འཛི་དང་། སྨྲ་བ་ལ་དགའ་བས་ཅི་ཞིག་བྱ། བལ་གླང་མཆེ་བ་བཅད་པ་
བཞིན་དུ་འཇིགས་ཤིང་གཟུགས་མི་སྡུག་པ་དེ་དག་ལ་རིན་ཐང་མེད་པའི་གོས་གྱོན་པས་ཅི་ཞིག་བྱ། ལན་གཉིས་སུ་དེ་སྐད་མ་ཟེར་ཅིག །བརྒྱ་བྱིན་ཁྱོད་ནི་བསྟན་པའི་ཕྱི་རོལ་པ་ཡིན་ཏེ། མུ་སྟེགས་རྣམས་སུ་བྲམ་ཟེའི་དམ་ཚིག་
ལ་གདོལ་པ་མི་ཆུད་པ་དེ་བཞིན་དུ། ཁྱོད་ཀྱང་ཕྱི་རོལ་གྱི་གདོལ་པ་ཡིན་གྱིས་སྦྲང་བུ་ཁྱོད་ཅང་མ་སྨྲ་ཤིག །དེ་ནས་ཚངས་པ་མི་མཇེད་ཀྱི་བདག་པོས་སྣང་བ་ཆེན་པོ་བྱུང་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་
བཏུད་ནས། དེ་བཞིན་གཤེགས་པ་དང་། སོར་མོའི་ཕྲེང་བ་ལ་ལྷའི་མཆོད་པ་ཆེན་པོ་བྱས་ནས། བཅོམ་ལྡན་འདས་དང་། སོར་མོའི་ཕྲེང་བ་ལ་ཚིག་འདི་སྐད་ཅེས་སྨྲས་སོ། །ཀྱེ་མ་བདག་གིས་གཡུལ་ཆེན་རབ་མཐོང་སྟེ། །
སེང་གེ་གཉིས་ནི་དྲག་ཏུ་འཐབ་པ་བཞིན། །ཀྱེ་མ་སངས་རྒྱས་མི་འདུལ་ཁ་ལོ་སྒྱུར། །དེ་བཞིན་གཤེགས་པས་སོར་ཕྲེང་དགེ་བར་བཏུལ། །སྦྲུལ་གྱིས་སྨན་པ་མཐོང་ནས་ཤིན་དུ་སྒྲ་འབྱིན་ཅིང་། །མི་འཇིགས་ཁ་རླངས་འབྱིན་པ་
ཞི་བར་མྱུར་བཏུལ་ལྟར། །དེ་བཞིན་འཇིག་རྟེན་གསུམ་གྱི་སྨན་པ་མཐོང་ནས་ནི། །སོར་ཕྲེང་གཏུམ་རབ་ལས་བགྱིད་ཤིན་དུ་དུལ་བར་གྱུར། །ཁམས་གསུམ་སྨན་པ་ཁྱོད་ལ་ཕྱག་འཚལ་ལོ། །གྱད་མཆོག་རྒྱལ་པོ་ཁྱོད་ལ་ཕྱག་

57-1-163a

འཚལ་ལོ། །དེ་བཞིན་གཤེགས་པ་ཐབས་ཀྱི་སྐུ་མངའ་བ། །བསམ་ཡས་སྟོབས་འཆང་ཁྱོད་ལ་ཕྱག་འཚལ་ལོ། །ཆོས་ཉིད་ལ་ཡང་སོར་ཕྲེང་བཞག་པ་ནི། །དེ་རིང་ལྷ་ཁྱོད་ཤིན་དུ་རྣམ་པར་མཛེས། །དེ་ལྟར་ཤིན་དུ་
མཛེས་པ་དཔེ་མི་རྙེད། །དེ་ཕྱིར་དེ་བཞིན་གཤེགས་པ་དཔེ་མ་མཆིས། །སོར་ཕྲེང་ཚུལ་ཁྲིམས་དེང་གནས་ཤིན་དུ་མཛེས། །དུལ་ཞིང་བྱང་ལ་འཇིགས་པ་མ་མཆིས་ཤིང་། །གཟུགས་ནི་རང་བཞིན་གྱིས་ཀྱང་གསེར་འདྲ་སྟེ། །
འཛམ་བུའི་ཆུ་བོའི་གསེར་འབར་མདོག་ལྟར་མཛེས། །དེ་བཞིན་གཤེགས་ལ་བདག་གསོལ་བདག་ལ་ཐུགས་བརྩེ་བས། །བདག་གི་འཕྲུལ་གོས་དེ་བཞིན་གཤེགས་པས་དེང་བཞེས་ཏེ། །སོར་མོའི་ཕྲེང་བའི་ལྷའི་ཆོས་
གོས་བགྱི་བར་གསོལ། །དེ་ཡི་འབྲས་བུས་བདག་ཀྱང་བྱང་ཆུབ་མཆོག་ཐོབ་ཤོག །སོར་ཕྲེང་ཆོས་གོས་བདག་གི་གོས་བགོས་ནས། །ཚངས་པའི་སྤྱོད་པ་སེམས་བརྟན་རྫོགས་པར་ཤོག །བཅོམ་ལྡན་འདས་ལ་སོར་
མོའི་ཕྲེང་བ་ཡང་། །ཚངས་པར་སྤྱོད་པ་ཕུན་སུམ་ཚོགས་པར་སྲུངས། །དེ་ནས་སོར་མོའི་ཕྲེང་བས་ཚངས་པ་མི་མཇེད་ཀྱི་བདག་པོ་ལ་སླར་འདི་སྐད་ཅེས་སྨྲས་སོ། །ཕྲ་མ་ཅན་ཅལ་ཅོལ་སྨྲ་བ་ཁྱོད་སུ་ཞིག །སོར་མོའི་ཕྲེང་བས་
བདག་གི་གོས་བགོས་ནས། སོར་མོའི་ཕྲེང་བ་ཚུལ་ཁྲིམས་དང་བརྟུལ་ཞུགས་སྲུངས་ཤིག །སོར་མོའི་ཕྲེང་བ་ཡུན་རིང་དུ་ཚུལ་ཁྲིམས་སྲུངས་ཤིག་ཅེས་ང་ལ་བརྙས་ཤིང་སྨྲ་བ། ཚངས་པ་ངན་པ་ཚངས་པ་མ་ཡིན་པའི་
ཚངས་པའི་གཟུགས་སུ་འདིར་འོངས་ན་ཚངས་པ་ཞེས་བྱ་བའི་དོན་ཅི། འཇིག་རྟེན་ན་ཚངས་པའི་ལས་གང་ཡིན། ངས་སྦྲང་བུ་ལྟ་བུ་ལས་གོས་བླངས་ཏེ་བགོས་ལ་ཚུལ་ཁྲིམས་དང་། བརྟུལ་ཞུགས་ཡུན་རིང་པོར་བསྲུང་ངམ། 
ང་ནི་སུའི་ཁོལ་པོ་ཡང་མ་ཡིན་ཏེ། ང་ནི་སུའི་དད་པ་ལ་ཡང་མི་འཇུག་གོ། །ང་ལ་སུའི་བུ་ལོན་ཡང་མ་ཆགས་ཏེ། ངས་ནི་སྔོན་སེམས་ཅན་དབུལ་པོ་རྣམས་ལ་ནོར་བྱིན་ནོ། །དཔེར་ན་དཔྱིད་ཟླ་ར་བ་ལ་འཕྱང་མོ་ཉུག་པའི་ཐག་

57-1-163b

པས་བཏགས་ཏེ། རིང་དུ་སོང་ཡང་སླར་མྱུར་དུ་རང་གི་གནས་སུ་འཁོར་བ་དེ་བཞིན་དུ་ཚངས་པ་སྦྲང་བུ་ཁྱོད་ཀྱང་དཔྱིད་ཟླ་ར་བ་ལ་འཕྱང་ཐག་བཏགས་པ་ལྟར་ཚངས་པའི་འཇིག་རྟེན་གྱི་བདེ་བ་མྱོང་ནས་ཕྱིར་ལྟུང་བའི་ཆོས་ཅན་
དུ་ལྟུང་བར་འགྱུར་རོ། །བྱང་ཆུབ་སེམས་དཔའི་ཡང་དག་པའི་དོན་ཡོན་ཏན་གྱི་འཐད་པ་མི་ཤེས་པར་གང་སྡིག་པ་དང་། སྡིག་པ་མ་ཡིན་པར་རྟོག་པ་ཁྱོད་འདྲ་བ་སྦྲང་བུ་ལྟ་བུ་དེ་དག་སྲིད་པ་དག་ན། མི་མཁས་ཤིང་མི་ལྡན་པ་འཁོར་བའི་
སྡུག་བསྔལ་གྱི་ནང་ན་ཀུན་དུ་འཁྱམ་མོ། །ཀྱེ་མ་ཚངས་པ་སྡིག་པ་དང་སྡིག་པ་མ་ཡིན་པ་ངེས་པར་ཤེས་ན། སོར་མོའི་ཕྲེང་བས་གཏུམ་པོའི་ལས་བྱས་སོ་ཞེས་སྨྲོས་ཤིག །ཚངས་པ་ངན་པ་སྦྲང་བུ་ལྟ་བུ་ཁྱོད་མི་ཤེས་ཀྱིས། བྱང་ཆུབ་སེམས་
དཔའི་སྤྱོད་པ་ལ་སློབས་ཤིག །དེ་ནས་ཚངས་པ་མི་མཇེད་ཀྱི་བདག་པོས། སོར་མོའི་ཕྲེང་བ་ལ་སླར་འདི་སྐད་ཅེས་སྨྲས་སོ། །སོར་མོའི་ཕྲེང་བ་མི་ཉིས་སྟོང་དུ་གཅིག་མ་ཚང་བ་བསད་དེ། མི་བཟད་པ་བྱས་པ་ནི་མངོན་སུམ་དུ་ད་དུང་ཡང་སྣང་
ངོ་། །ཁྱོད་ཀྱི་དྲག་ཤུལ་གྱི་ལས་ནི་བྱ་རོག་དང་ཁྲས་ཀྱང་བྱེད་མི་ནུས་ཏེ། འདི་ལྟ་བུ་དྲག་ཤུལ་གྱི་ལས་མ་ཡིན་ན། དྲག་ཤུལ་གྱི་ལས་ཅི་ལྟ་བུ་ཡིན། གལ་ཏེ་འདི་ལྟ་བུ་བདུད་མ་ཡིན་ན། སྲིན་པོ་མི་ཟད་པ་ཡང་ཇི་ལྟ་བུ་ཞིག་ཡོད་དེ། སོར་
མོའི་ཕྲེང་བ་བག་ཡོད་པར་གྱིས་ལ། ཁྱོད་ཀྱིས་ལས་བྱས་པ་རྣམས་ཇི་ནས་བྱང་བར་འགྱུར་བ་དེ་ལྟར་བརྩོན་པར་གྱིས་ཤིག །ཀྱེ་མ་སངས་རྒྱས་ནི་ཐུགས་རྗེ་ཅན་ཏེ། སོར་མོའི་ཕྲེང་བ་ལ་སོགས་པ་གཏུམ་པོའི་ལས་བྱེད་པ་རྣམས་ངེས་པར་
སྒྲོལ་བའོ། །དེ་ནས་སོར་མོའི་ཕྲེང་བས་ཚངས་པ་མི་མཇེད་ཀྱི་བདག་པོ་ལ་སླར་འདི་སྐད་ཅེས་སྨྲས་སོ། །ཚངས་པ་ཁྱོད་སྲིན་བུ་ཕྲ་མོ་བཞིན་དུ་མཆོང་ཞིང་འཁྱམ་དུ་གར་འགྲོ། སྡིག་པ་དང་མི་སྡིག་པ་མི་ཤེས་པའི་སེམས་ཅན་རྣམས་
ངན་འགྲོར་འགྲོའོ། །བླུན་པོ་ལ་ལ་ཞིག་ནགས་ཀྱི་ནང་དུ་སོང་ནས་མཚན་མོ་མུན་པའི་ནང་ན་ཤིང་གི་རྩ་བའི་སྟེང་ན་སྲིན་བུ་མེ་ཁྱེར་གྱི་ཕུང་པོ་མཐོང་བ་དང་། ངན་པ་དེ་སྐྲག་ནས་གྲོང་དང་ཚོང་དུས་སུ་འོངས་ཏེ། འབྲོག་ཚིག་གོ་ཞེས་ཟེར་བ་དང་། 

57-1-164a

འགྲོ་བ་མང་པོ་དེར་དོང་བ་དང་། མཚན་མོ་མུན་ནག་གི་ནང་ན་སྲིན་བུ་མེ་ཁྱེར་མཐོང་ནས། འདི་མེ་མ་ཡིན་ནོ་ཞེས་མཐར་གྱིས་སླར་ལོག་སྟེ། དོང་བ་དེ་བཞིན་དུ་ཚངས་པ་ངན་པ་ཁྱོད་ཀྱང་སོར་མོའི་ཕྲེང་བ་བླུན་པོའོ་ཞེས་སྟོན་ཅིང་
བདག་ཉིད་དང་། སྐྱེ་བོ་མང་པོ་ཡང་ཤིན་དུ་བསླུས་ཏེ། ཕྱིས་སྒྱུ་མའི་ཕུང་པོ་དེ་སྦྲང་བུ་ལྟ་བུས་ཀྱང་ཤེས། སེམས་ཅན་མང་པོས་ཀྱང་ཤེས་པར་འགྱུར་རོ། །བློ་གྲོས་འཆལ་པ་བླུན་པོ་ལ་ལ་ཞིག་ནགས་ཁྲོད་དུ་སོང་ནས། ཤིང་མྱ་ངན་མེད་
པའི་ནགས་མེ་ཏོག་རྒྱས་པ་མཐོང་བ་དང་། མེ་ཡིན་པ་སྙམ་དུ་བསམས་ཏེ། སྐྲག་ནས་གྲོང་དང་ཚོང་འདུས་སོང་སྟེ། འགྲོ་བ་མང་པོ་ཡང་དེ་བཞིན་དུ་ཕྱིན་པ་དང་། རིམ་གྱིས་མེ་དང་། ཤིང་མྱ་ངན་མེད་པའི་བྱེ་བྲག་ཤེས་པ་དེ་བཞིན་དུ་སྦྲང་བུ་ལྟ་
བུ་ཁྱོད་ཀྱིས་སྡིག་པ་དང་། སྡིག་པ་མ་ཡིན་པ་རིམ་གྱིས་ཤེས་པར་འགྱུར་རོ། །དེ་ནས་ཕྱིས་སྐྱེ་བོ་མང་པོས་ཀྱང་སྒྱུ་མའི་ཕུང་པོ་ལྟ་བུ་འདི་ཤེས་པར་འགྱུར་གྱིས་ཚངས་པ་ངན་པ་ཁྱོད་ལན་གཉིས་སུ་དེ་སྐད་མ་ཟེར་ཅིག །དེ་ལྟར་བརྫུན་
སྨྲ་བ་མ་སློབ་པར་ཁྱོད་ལྟ་བུ་བློ་ཞན་པ། སྦྲང་མ་ལྟ་བུ་རྣམས་ནི་ཅང་མ་ཟེར་བར་འདུག་ཤིག །དེ་ནས་འཇིག་རྟེན་སྐྱོང་བ་བཞིས་སྣང་བ་ཆེན་པོ་ཕྱུང་སྟེ། དེ་བཞིན་གཤེགས་པ་དང་། སོར་མོའི་ཕྲེང་བ་ལ་མཆོད་པ་ཆེན་པོ་བྱས་ནས། བཅོམ་
ལྡན་འདས་དང་སོར་མོའི་ཕྲེང་བ་ལ་འདི་སྐད་ཅེས་སྨྲས་སོ། །ཀྱེ་མ་སྐྱེས་བུ་སྟག་གི་འཐབ་མོ་མཆོག །དོན་དམ་རྒལ་ཞིང་ལན་ལྡོན་ཤིན་དུ་མཛེས། །ཀྱེ་མ་སྟོན་པ་མི་འདུལ་ཁ་ལོ་སྒྱུར། །དེ་ཕྱིར་མཐའ་ཡས་སྟོབས་འཛིན་
སངས་རྒྱས་ལགས། །ཞབས་མཆོག་པད་མ་ལྟ་བུར་མཉེན་ཞིང་འཇམ། །རྡུལ་གྱིས་མི་རེག་པ་ལ་ཕྱག་འཚལ་ཏེ། །ལན་མང་སྐྱབས་མཆིས་དེ་བཞིན་གཤེགས་པ་ལ། །གསོལ་བ་བདག་གི་ལྷུང་བཟེད་སོར་ཕྲེང་སྩོལ། །
སོར་མོའི་ཕྲེང་བ་དེང་མཛེས་ཏེ། །ནམ་མཁའ་ལ་ནི་ཟླ་ལྟར་མཛེས། །སོར་ཕྲེང་ཚུལ་ཁྲིམས་ཡོན་ཏན་དང་། །བརྟུལ་ཞུགས་གཟི་བརྗིད་རྫོགས་པ་མཛེས། །དེ་ནས་སོར་མོའི་ཕྲེང་བས་འཇིག་རྟེན་སྐྱོང་བ་བཞི་ལ་སླར་སྨྲས་པ། 

57-1-164b

སྦྲུལ་ལྟ་བུའི་འཇིག་རྟེན་སྐྱོང་བ་ཕྲ་མོ་ཁྱོད་སུ་དག་ཅིག །འཇིག་རྟེན་སྐྱོང་བ་འཇིག་རྟེན་སྐྱོང་བ་སྙམ་སྟེ། ང་རྒྱལ་གྱིས་ཁེངས་པས་བདག་གི་ལྷའི་ལྷུང་བཟེད་སྦྱིན་ནོ་ཞེས་ང་ལ་འདྲིད་ཅིང་། ཡི་དགས་ལྟར་འཇུངས་པ་དག་ཡུད་ཙམ་གཞན་གྱི་ཚེ་ངའི་
ཡ་ང་བ་དག་ལྟོས་ཤིག །གྱོ་མོའི་སྣོད་ནི་སུ་ལ་ཡང་མི་དགོས་ན། འཇིག་རྟེན་གྱི་མགོན་པོ་སྙམ་དུ་སེམས་པས་བདག་གི་ལྷའི་ཁ་ཕྱིས་ང་ལ་སྦྱིན་ནམ། འཇིག་རྟེན་ན་མ་རུངས་པའི་ཡ་མཚན་ཅན་རྣམས་ཐལ་བར་བྱེད་པ་ན་འཇིག་རྟེན་
སྐྱོང་བ་ཞེས་གྲགས་ཏེ། ཆོས་ཡང་དག་པར་བསྐྱང་བར་བྱའི། འཇིག་རྟེན་བསྐྱང་བར་མི་བྱའོ། །ཡང་དཔེར་ན་ལ་ལས་ཁུ་བྱུག་གི་སྒྲ་ཐོས་སམ། ཁ་དོག་ཕུན་སུམ་ཚོགས་པ་མཐོང་བ་དང་དེ་ནས་ཡུད་ཙམ་ན། བྱ་རོག་སྐད་འབྱིན་པ་
མཐོང་ནས་ཁུ་བྱུག་ཁུ་བྱུག་ཅེས་ནོར་བ་དེ་བཞིན་དུ་ཁྱོད་ཀྱང་ཆོས་སུ་སེམས་ཤིང་ཆོས་མ་ཡིན་པ་སྲུང་ངོ་། །ནགས་ཁྲོད་ན་འདུག་པའི་བྱ་རོག་སྐད་འབྱིན་པ་མཐོང་ནས། ཁུ་བྱུག་སྙམ་དུ་སེམས་པ་བཞིན་དུ་འཇིག་རྟེན་སྐྱོང་ངོ་། །ཁྱེད་བཞིས་
ཆོས་སྐྱོངས་ལ་འཇིག་རྟེན་མ་སྐྱོང་ཤིག །འཇིག་རྟེན་སྐྱོང་བ་སྐྱེ་བོ་མི་ཤེས་པ་སྦྲང་བུ་ལྟ་བུ་ཁྱེད་བཞི་ཟུང་ཐུབ་པར་གྱིས་ལ་ཅང་མ་སྨྲ་ཤིག །དེ་ནས་བདུད་སྡིག་ཅན་སོར་མོའི་ཕྲེང་བའི་ཐད་དུ་འོངས་ཏེ། དེ་བཞིན་གཤེགས་པ་ལ་མཆོད་
པ་ཆེར་བྱས་ནས། སོར་མོའི་ཕྲེང་བ་ལ་འདི་སྐད་ཅེས་སྨྲས་སོ། །སོར་མོའི་ཕྲེང་བ་མྱུར་དུ་རབ་དུ་བྱུང་། །ང་ཡི་ཚོང་འདུས་གྲོང་ཞུགས་བསླུས་པ་ནི། །སོར་མོའི་ཕྲེང་བ་ང་ནི་མི་དགའ་སྟེ། །སེམས་ཅན་དམྱལ་བའི་གཏིང་ནས་ཁྱོད་བརྒལ་
ཏོ། །དེ་ནས་སོར་མོའི་ཕྲེང་བས་བདུད་སྡིག་ཅན་ལ་སླར་འདི་སྐད་ཅེས་སྨྲས་སོ། །སྡིག་ཅན་ཁྱི་རྐུན་སྦྲང་བུ་ལྟ་བུ་ཕར་སོང་། ཁྱོད་ཅི་ཤིན་དུ་སྤོབས་པར་སྨྲ་འམ། བདུད་སྡིག་ཅན་ཁྱོད་དེང་མྱུར་དུ་བྱུང་སྟེ་སོང་ཤིག །ཇི་སྲིད་དུ་ཁྱི་ལྟར་
བཅིང་བ་ལྔས་བཅིངས་ཏེ། རྐང་པ་གཡོན་པས་མ་བསྡམས་པ་དེའི་བར་དུ་ནི་བདུད་ཁྱོད་རབ་ཏུ་རྩེན་ཏོ། །གྲོང་དང་། ཚོང་འདུས་དང་། ལུང་པའི་སྒོ་ཐམས་ཅད་ཀྱང་ངས་སྟོང་པར་བྱས་ཏེ། དཔེར་ན་ནམ་མཁའ་ལྡིང་རི་རབ་ཀྱི་སྟེང་དུ་འདུག་

57-1-165a

ནས་རྒྱ་མཚོ་དཔག་ཚད་ཀྱི་བར་མང་པོ་ན། ཀླུ་ཕྲུག་མཐོང་ན་ལེན་པ་དེ་བཞིན་དུ་སེམས་ཅན་དམྱལ་བ་པ་ཐམས་ཅད་ལ་ཡང་ང་ནམ་མཁའ་ལྡིང་ལྟར་རྣམ་པར་རྩེ་ཞིང་ཐར་པའི་ཁུ་བས་ངོམས་སོ། །རྟག་ཏུ་བདུད་སྡིག་ཅན་ཁྱོད་ཀྱི་
མགོ་བཅད་དེ། བྱང་ཆུབ་སེམས་དཔའ་སྐྱེས་བུའི་གླང་པོ་ཆེ་རྣམས་རོལ་ཏོ། །བདུད་ཁྱི་རྐུན་ལྟ་བུ་ཁྱོད་ཅང་མ་ཟེར་བར་ཆོས་བདུད་རྩིའི་ཚིག་ཉོན་ལ་ཡུད་ཙམ་གྱི་བར་དུ་སྡོད་དེ། ཆོས་ཐོས་ནས་རང་གི་གྲོང་ཁྱེར་དུ་སོང་ཤིག་དང་། ཚོང་
འདུས་དང་། གྲོང་ཁྱེར་རྣམས་ཤེས་པར་འགྱུར་རོ། །དེ་ནས་ལྷའི་བུ་དབང་ཕྱུག་ཆེན་པོས་དེ་བཞིན་གཤེགས་པ་དང་། སོར་མོའི་ཕྲེང་བ་ལ་ལྷའི་མཆོད་པ་ཆེན་པོ་བྱས་ནས། ཚིགས་སུ་བཅད་པ་འདི་དག་གསོལ་ཏོ། །དེ་བཞིན་
གཤེགས་པའི་ཞབས་མཆོག་བདག་གིས་མགོས་གཏུགས་ཏེ། །པད་མོ་མཆོག་དང་འདྲ་བའི་བསྔགས་བརྗོད་བསྟོད་པར་བགྱི། །བདེ་གཤེགས་པད་མོ་འདབ་སྟོང་སྤྱན་མངའ་འདབ་སྟོང་ལྡན། །ཞབས་མཆོག་འཇམ་པ་པད་མོ་
འདབ་མ་སྟོང་ཅན་འདྲ། །ཞབས་ནི་པད་མོ་དམར་སྐྱ་འདྲ་ཞིང་རྡུལ་མི་ཆགས། །ཞབས་མཆོག་ཨུད་པལ་འདབ་འདྲ་ཕྱག་མཐིལ་ཤིན་དུ་འཇམ། །ཨུད་པལ་འདབ་མ་མཆོག་གི་ཞལ་གྱི་དྲི་བདའ་སྟེ། །འཇིག་རྟེན་དག་ན་ཨུད་པལ་མདབ་
མ་བཞིན་དུ་བསིལ། །བདེ་གཤེགས་ཀུན་དུ་བལྟ་སྡུག་ཨུད་པལ་མདབ་མཆོག་བཞིན། །དབུ་སྐྲ་འཇམ་ཞིང་སྣུམ་ལ་ཨུད་པལ་མཐིང་ཀ་འདྲ། །དབུ་སྐྲ་ཨུད་པལ་མཐིང་ཀ་དྲི་མཆོག་བསིལ་བ་འདྲ། །ཨུད་པལ་མཐིང་ཀ་
སྣུམ་པའི་མདོག་འདྲ་ཡིད་དུ་འོང་། །དབུ་སྐྲ་ཉག་མ་ཕྲ་ཞིང་ལྕང་ལོའི་ཕྲེང་བ་མངའ། །ཁྱོད་ཀྱི་ཚེམས་མཆོག་ཀུ་མུ་ད་དང་ཟླ་བ་འདྲ། །ཀུ་མུ་ད་དང་ཟླ་བ་པད་མོའི་སྙིང་པོ་ལྟར། །ཆུ་དང་ཉ་ལྕིབས་དག་གི་སྐྱོན་གྱིས་ཡོང་མི་
གོས། །ཚེམས་ནི་ཀུ་མུད་ཟླ་བ་ལྟ་བུར་དྲི་མ་མེད། །ཉེས་པས་མི་གོས་ཚེམས་མཆོག་ཀུ་མུད་ཁ་དོག་འདྲ། །ཚེམས་ཀྱང་ཉོན་མོངས་བསལ་ཅིང་ཐབས་མཆོག་ཚེམས་མངའ་བ། །པུན་ད་རི་ཀ་བཞིན་དུ་དྲི་མེད་གསལ་བའི་བློ། །

57-1-165b

པུན་ད་རི་ཀ་བཞིན་དུ་སེམས་མཆོག་དག་པ་སྟེ། །སེམས་ནི་པུན་ད་རི་ཀ་ལྟ་བུར་མི་གོས་པ། །འདོད་ཁྲོ་གླེན་པའི་ཉེས་སྤངས་སངས་རྒྱས་པུན་ད་རི། །སངས་རྒྱས་པད་མོ་དཀར་པོ་ལྟ་བུའི་བློ་གྲོས་མངའ། །པད་མོའི་དྲུང་ན་ཨུད་པལ་
དྲི་མཆོག་མཛེས་པ་ལྟར། །སངས་རྒྱས་དེང་མཛེས་ཨུད་པལ་གཉིས་ལྟར་སོར་ཕྲེང་མཛེས། །སོར་ཕྲེང་དེང་མཛེས་འདི་ལྟར་སྡིག་ཅན་བདུད་ཀྱང་ནི། །གོས་དཀར་གྱོན་པས་ཐོག་མར་བཏུལ་ཅིང་ཕམ་བྱས་ཏེ། །ལན་དང་ཡང་ལན་
དག་གིས་དེ་བཞིན་གཤེགས་དང་རོལ། །འདི་ནི་འཇིག་རྟེན་དུ་ཡང་མགོན་པོ་མྱུར་དུ་འགྱུར། །ཀྱེ་མ་རལ་གྲི་ཕྱར་ནས་བདེ་གཤེགས་བཀྲོངས་བསམ་ནས། །སོར་མོའི་ཕྲེང་བ་འདིར་འོངས་མ་ཡང་གསད་པར་སེམས། །དེང་ཞི་
སོ་སོའི་སྐྱེ་བོ་སྐལ་བ་ཡོད་པ་འདྲ། །བདེན་པར་སྨྲ་བའི་ཚིག་ནི་གཞན་དུ་ཡོང་མི་འགྱུར། །ཁྱོད་ཀྱི་སྡིག་བྱས་ཅི་ནས་ལུས་འདི་བྱང་འགྱུར་བ། །དེ་ལྟར་སོར་ཕྲེང་ཁྱོད་ཀྱིས་རྩོམས་ཤིང་ནན་ཏན་གྱིས། །ཀྱེ་མ་དཔའ་བོ་ཁྱོད་ཀྱིས་
གཏུམ་པའི་ལས་བྱས་ན། །དེ་རིང་ཆོས་ཀྱི་རྗེ་བོར་གྱུར་ནས་བདག་དགའོ། །དེ་ནས་སོར་མོའི་ཕྲེང་བས་ལྷའི་བུ་དབང་ཕྱུག་ཆེན་པོ་ལ་སླར་འདི་སྐད་ཅེས་སྨྲས་སོ། །སྟབས་མི་སྡུག་པ་གཏུམ་པོ་ཁྱོད་སུ་ཞིག །ཁྱོད་ནི་རང་ལ་དབང་ཕྱུག་སྙམ་
སྟེ། ཁྱོད་ནི་མིང་གི་དབང་ཕྱུག་ཡིན་གྱི། དབང་ཕྱུག་ཇི་ལྟ་བ་བཞིན་མ་ཡིན་ནོ། །སོ་སོའི་སྐྱེ་བོའམ། དགྲ་བཅོམ་པ་གང་ཡིན། ཇི་ལྟར་ཤེས་མྱུར་དུ་སྨྲོས་ཤིག །དབང་ཕྱུག་ཁྱོད་ཤ་ཟ་ལྟར་རྣོ་ན་ད་རུང་ཡང་གཟུགས་
ཕུན་སུམ་ཚོགས་པ་མ་ཐོབ་བམ། འདི་ལྟ་སྟེ། སྐྱེས་བུ་མཛེ་ཚབས་ཆེན་པོས་བཏབ་པས། མཛེ་རབ་ཏུ་ཞི་བ་བསྟན་ན། འཇིག་རྟེན་པ་རྣམས་འདི་སྙམ་དུ་སེམས་སོ། །གང་བདག་ཉིད་ཀྱི་ནད་ཞི་བར་མི་ནུས་པ་དེས་གཞན་གྱི་
ནད་ཇི་ལྟར་གསོ་སྙམ་མོ། །དེ་བཞིན་དུ་གཏུམ་པོ་སྦྲང་བུ་ལྟ་བུ་ཁྱོད་ཀྱང་བདག་རྟོགས་པས་བདག་གི་ཁམས་ཀྱང་ད་དུང་མི་ཤེས་ཏེ། གཏུམ་པོ་མཛེ་ཚབས་ཆེན་པོས་བཏབ་པ་ལྟ་བུས་སོར་མོའི་ཕྲེང་བ་སོ་སོའི་སྐྱེ་བོ་འམ། དགྲ་བཅོམ་པ་

57-1-166a

པའོ་ཞེས་ཕ་རོལ་གྱི་སེམས་ཤེས་པར་ག་ལ་འགྱུར། སྦྲང་བུ་ལྟ་བུ་ཁྱོད་ཅང་མ་ཟེར་ཅིག །ཁྱོད་ནི་སའི་དབང་ཕྱུག་ཏུ་དབང་བསྐུར་བ་དང་། སའི་དབང་ཕྱུག་གི་རྒྱལ་ཚབ་ཏུ་འོས་པ་མ་ཡིན་གྱིས། དམུས་ལོང་ལྟ་བུ་ཁྱོད་ཡུད་
ཙམ་སྡོད་ཅིག །དེ་ནས་དེ་བཞིན་གཤེགས་པ་ཤིང་གང་ལ་རྟེན་ཏེ། བཞུགས་པའི་ཤིང་དེའི་ལྷ་མོས་སོར་མོའི་ཕྲེང་བ་ལ་ཚིགས་སུ་བཅད་པ་འདི་སྐད་ཅེས་སྨྲས་སོ། །དཔའ་བོ་སོར་མོའི་ཕྲེང་བ་མྱུར་བར་དུ། །ཁྱོད་ནི་ངུར་སྨྲིག་རྒྱལ་
མཚན་གྱོན་ཅིག་དང་། །བདེ་གཤེགས་ཐབས་གཅིག་ཐོག་མར་བསོད་སྙོམས་གསོལ། །དཔའ་བོ་འབྲས་བུ་དམ་པ་ཐོབ་པར་བགྱི། །དེ་ནས་སོར་མོའི་ཕྲེང་བས་ལྷ་མོ་ལ་ཚིགས་སུ་བཅད་པས་སྨྲས་པ། དེ་བཞིན་གཤེགས་པ་
བཤོས་མི་གསོལ། །ཉན་ཐོས་རྣམས་ཀྱང་དེ་བཞིན་ན། །ཁྱོད་ཀྱི་སྦྱིན་པ་སུ་ལ་སྦྱིན། །མྱུར་སྨྲོས་བཟང་མོ་ཡངས་པའི་མིག །ང་ཡི་ཐེ་ཙོམ་ལ་གོར་ཆོད། །དེ་ནས་ལྷ་མོ་ཡངས་པའི་མིག་གིས་སླར་སོར་མོའི་ཕྲེང་བ་ལ་ཚིགས་སུ་
བཅད་པས་སྨྲས་པ། སངས་རྒྱས་རྟག་ཏུ་བཤོས་གསོལ་ཏེ། །ཉན་ཐོས་རྣམས་ཀྱང་དེ་བཞིན་ན། །བརྟན་པ་རབ་ཏུ་འབྱུང་འདོད་ལ། །བརྫུན་དུ་སྨྲ་བ་མི་ཆའོ། །བརྫུན་གྱི་ཚིག་ནི་རྣམ་སྤོངས་ཤིག །གཡོ་ཡི་བསམ་པ་སྡིག་ཅན་ཡིན། །
ཆོས་གཅིག་ལས་ནི་འདས་པ་ཡི། །སྐྱེ་བོ་བརྫུན་གྱི་ཚིག་སྨྲ་བ། །འཇིག་རྟེན་ཕ་རོལ་བཏང་བ་དག །མི་བྱེད་པ་ནི་ཅི་ཡང་མེད། །དེ་ནས་སོར་མོའི་ཕྲེང་བས་ལྷ་མོ་དེ་ལ་འདི་སྐད་ཅེས་སྨྲས་སོ། །བུད་མེད་ཁྱོད་ཅི་ཞིག་འཁྱལ། ཁྱོད་ཀྱང་
དམན་པའི་རིགས་སུ་སྐྱེས་ཀྱིས། སྦྲང་བུ་ལྟ་བུ་སངས་རྒྱས་ཀྱིས་སྨད་པའི་བུད་མེད་ཀྱི་དངོས་པོའི་བདག་ཉིད་ལ་ཤིན་དུ་རྟོགས་ཤིག །འཇིག་རྟེན་ན་བརྫུན་དུ་སྨྲ་བ་གང་། འཇིག་རྟེན་ན་བདེན་པ་འཛིན་པ་གང་། འཇིག་རྟེན་ན་ཟང་ཟིང་ལ་ཆགས་
པ་གང་། འཇིག་རྟེན་ན་ན་ཞིང་ཤི་བ་གང་ཡིན་སྦྲང་བུ་ལྟ་བུས་མི་ཤེས་སོ། །སེམས་ཅན་གང་དེ་བཞིན་གཤེགས་པའི་ཡོན་ཏན་གྱི་བདག་ཉིད་ཆེན་པོ་མི་ཤེས་པའི་སེམས་ཅན་དེ་དག་ནི་བརྫུན་སྨྲ་བའོ། །སེམས་ཅན་གང་ཟང་ཟིང་ལ་ཆགས་

57-1-166b

པས། དེ་བཞིན་གཤེགས་པ་ལ་ཡང་ཟང་ཟིང་གིས་བཀུར་བའི་སེམས་ཅན་དེ་དག་ནི་བརྫུན་དུ་སྨྲ་བ་སྟེ། དེ་དག་ལ་རབ་ཏུ་འབྱུང་བ་ཡང་མེད་ན། བསྙེན་པར་རྫོགས་པར་ལྟ་ག་ལ་འགྱུར། སེམས་ཅན་གང་དེ་བཞིན་གཤེགས་པའི་ལྡེམ་པོ་
ངག་མི་ཤེས་པའི་སེམས་ཅན་དེ་དག་ནི་བརྫུན་དུ་སྨྲ་བ་སྟེ། དེ་དག་ལ་རབ་ཏུ་འབྱུང་བ་ཡང་མེད་ན། བསྙེན་པར་རྫོགས་པར་ལྟ་ག་ལ་འགྱུར། ང་ནི་ཆོས་གཅིག་ལས་ཀྱང་མི་འདའོ། །ལྷ་མོ་ཁྱོད་ཀྱིས་ནི་ཆོས་ཐམས་ཅད་ལས་འདས་ཀྱིས། 
དེ་བཞིན་གཤེགས་པ་ལྷའི་ལྷ་ཡང་དག་པར་རྫོགས་པའི་སངས་རྒྱས་ལ་མྱུར་དུ་བཟོད་པར་གསོལ་ཅིག །དེ་ནས་སོར་མོའི་ཕྲེང་བ་ལ་ལྷ་མོས་སླར་འདི་སྐད་ཅེས་སྨྲས་སོ། །བུད་མེད་ཀྱི་དངོས་པོ་རིགས་དམའ་བའོ་ཞེས་ཟེར་བ་ཅི་ལ་
ལྡེམ་པོ་ངག་ཏུ་སྨྲ། སོར་མོའི་ཕྲེང་བ་བུད་མེད་དམ། སྐྱེས་པ་ཡིན་པར་ཇི་ལྟར་ཤེས། སོར་མོའི་ཕྲེང་བ་ཁྱོད་མྱུར་དུ་སྨྲོས་ཤིག །ཁྱོད་ཤ་ཟའི་དངོས་པོ་ད་དུང་མ་ཞིའོ། །དེ་ནས་སོར་མོའི་ཕྲེང་བས་ལྷ་མོ་དེ་ལ་སླར་འདི་སྐད་
ཅེས་སྨྲས་སོ། །རྒྱལ་པོའི་མལ་དུ་ཁྱི་སོང་ནས་རི་མོ་མེད་པའི་སེམས་གྱིས་མི་གཙང་བར་བྱས་པ་དེ་བཞིན་དུ་ལྷ་མོ་ཁྱོད་ཀྱང་ཐབས་ཀྱི་ཆོས་ཀྱིས་རྩེ་བས་བུད་མེད་ཀྱི་དངོས་པོར་བསྒྱུར་ཏེ། འདོད་པའི་ཡུལ་ལ་སེམས་ཤིང་རི་
མོ་བྱེད་དོ། །དེ་བས་ན་ལྷ་མོ་ཁྱོད་བུད་མེད་ཀྱི་དངོས་པོ་སྤོངས་ལ་སྐྱེས་པ་དང་། བུད་མེད་ཅེས་བྱ་བ་རབ་ཏུ་སྟོང་པར་སྒོམས་ཤིག །རབ་ཏུ་སྟོང་པ་ལ་གོམས་ན་སྐྱེས་པའི་དངོས་པོ་མྱུར་དུ་འཐོབ་པོ། །དེ་ནས་དེའི་ཚེ་ཤཱ་རིའི་བུ་
དང་། མཽད་གལ་གྱི་བུ་གཉིས་རྫུ་འཕྲུལ་གྱི་སྟོབས་ཀྱིས་ངང་པའི་རྒྱལ་པོ་བཞིན་དུ་ནམ་མཁའ་ལས་འོངས་ཏེ། བཅོམ་ལྡན་འདས་ག་ལ་བ་དེར་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། 
ཕྱོགས་གཅིག་ཏུ་འདུག་ནས། སོར་མོའི་ཕྲེང་བ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ལེགས་སོ་ལེགས་སོ། །ཁྱོད་ཀྱིས་འཐུན་ཞིང་རྗེས་སུ་དགོངས་པའི་བསོད་ནམས་བྱས་པ་ཤེས་པར་གྱིས་ཤིག །དེ་བཞིན་

57-1-167a

གཤེགས་པ་དང་ཐབས་གཅིག་ཏུ་དོང་ལ་ཚངས་པ་མཚུངས་པར་སྤྱད་པ་རྣམས་ལྟར་བཅུག་སྟེ། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་འདོང་ངོ་། །བཅོམ་ལྡན་འདས་ཀྱིས་རབ་ཏུ་
ཕྱུང་ནས། འཇིག་རྟེན་སྐྱེ་བོའི་ཕུང་པོ་མང་པོ་ལྟར་ནམ་མཁའ་ལས་ཟླ་བ་དྲི་མ་མེད་པ་དང་། ངང་པའི་རྒྱལ་པོ་ལྟར་ཆས་ཏེ་འདོང་ངོ་། །དེ་ནས་སོར་མོའི་ཕྲེང་བས། ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་སླར་ཚིགས་སུ་བཅད་པ་
སྨྲས་པ། རྫུ་འཕྲུལ་ལྡན་པ་གང་ཡིན་འཇིག་རྟེན་ན། །རྫུ་འཕྲུལ་རྩ་བ་ལས་ནི་ཅི་ཞིག་སྐྱེ། །རྫུ་འཕྲུལ་ལྡན་ཐོབ་འགྱུར་བ་མྱུར་སྨྲོས་ལ། །ཁྱོད་ཀྱིས་ང་ཡི་ཐེ་ཙོམ་མྱུར་དུ་སོལ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་
པོས་སལ་སོར་མོའི་ཕྲེང་བ་ལ་ཚིགས་སུ་བཅད་པས་སླར་སྨྲས་པ། གལ་ཏེ་འཇིག་རྟེན་དག་ན་སྦྱིན་བདག་རྣམས། །རྟག་ཏུ་ལྷམ་ཡང་རབ་ཏུ་སྦྱིན་པར་བྱེད། །གལ་ཏེ་དགེ་སློང་ཚུལ་ཁྲིམས་རྫོགས་པ་ལ། །ལྷམ་
གྱི་རྣམ་པ་ཤིན་དུ་ཕུལ་བ་སྟེ། །རྣམ་པ་གཉིས་པོ་དེ་དག་གིས། །རྫུ་འཕྲུལ་འདོད་པ་རྫུ་འཕྲུལ་འཐོབ། །སོར་ཕྲེང་དེ་ལྟར་ཤེས་པར་གྱིས། །རྫུ་འཕྲུལ་འདོད་ན་དེ་ལྟར་སྤྱོད། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་
པོ་ལ། སོར་མོའི་ཕྲེང་བས་སླར་འདི་སྐད་ཅེས་སྨྲས་སོ། །ཀྱེ་མ་བཙུན་པ་མཽད་གལ་གྱི་བུ་སྦྲང་བུའི་སྤྱད་པ་སྤྱོད་དེ། རྫུ་འཕྲུལ་ཀུན་བཟུང་བ་མི་ཤེས་སོ། །སྦྲང་བུ་ཡང་ནམ་མཁའ་ལ་འགྲོ། སྦྲང་བུ་རྫུ་འཕྲུལ་གྱི་སྟོབས་
ཅན་ཁྱོད་ཅང་མ་ཟེར་ཅིག །བདག་གྲོལ་ནས་དགྲོལ་བར་བྱའོ་སྙམ་སྟེ། ཕན་པའི་སེམས་དེས་ནི་རྫུ་འཕྲུལ་དང་ལྡན་པ་མྱུར་དུ་འགྲུབ་བོ། །དམ་པའི་ཆོས་ཕན་པར་སྟོན་པ་ཉམ་ཐག་པའི་ཚེ། དེའི་མདུན་དུ་བདག་གི་སྲོག་བོར་
ན། དེས་རྫུ་འཕྲུལ་དང་ལྡན་པ་འགྲུབ་བོ། །སེམས་ཅན་བྱེ་བ་མང་པོ་བསྒྲལ་བ་ལས་ལྷག་པ་རྒྱལ་བའི་ཚལ་ན་རྫུ་འཕྲུལ་ག་ལ་ཡོད་ཀྱིས་ང་མི་འགྲོའོ། །དེ་ལྟར་ཐེག་པ་ཆེན་པོ་དཔག་ཏུ་མེད་པས་ན། དེ་བཞིན་གཤེགས་པ་

57-1-167b

དཔག་ཏུ་མེད་དོ། །དེ་ནས་ཚེ་དང་ལྡན་པ་ཤཱ་རིའི་བུ་ལ་སོར་མོའི་ཕྲེང་བས་ཚིགས་སུ་བཅད་པ་འདི་སྐད་ཅེས་སྨྲས་སོ། །འཇིག་རྟེན་དག་ན་ཤེས་རབ་ཆེ་བ་གང་། །ཇི་ལྟ་བུར་ན་བློ་གྲོས་སྐྱེ་བར་འགྱུར། །ཡེ་ཤེས་ཆེན་པོ་ཁྱོད་ཀྱིས་
མྱུར་བར་ཡང་། །མྱུར་དུ་སྨྲོས་ཏེ་ང་ཡི་ཐེ་ཙོམ་ཆོད། །དེ་ནས་ཚེ་དང་ལྡན་པ་ཤཱ་རིའི་བུས། སོར་མོའི་ཕྲེང་བ་ལ་ཚིགས་སུ་བཅད་པ་སླར་སྨྲས་པ། ཚུལ་ཁྲིམས་ལྔ་རྣམས་རབ་ཏུ་བསྲུངས་པས་ན། །བློ་མཆོག་ཤེས་རབ་ཆེན་པོ་
འཐོབ་པར་འགྱུར། །ལུས་འདི་བོར་ནས་རང་གི་བློར་བཅས་ཏེ། །གང་དང་གང་དུ་འདོད་པ་དེར་སྐྱེ་སྟེ། །དེ་དང་དེར་ནི་ཤེས་རབ་ཆེན་པོར་འགྱུར། །ཕྱོགས་སུ་སྙེན་པ་རྣམ་གྲགས་སོར་མོའི་ཕྲེང་། །དཔའ་ཆེན་བློ་ལྡན་དེ་ལྟར་ཤེས་
པར་གྱིས། །དེ་ནས་སོར་མོའི་ཕྲེང་བས། ཚེ་དང་ལྡན་པ་ཤཱ་རིའི་བུ་ལ་སླར་འདི་སྐད་ཅེས་སྨྲས་སོ། །དེ་བཞིན་གཤེགས་པ་རྟག་པའོ་ཞེས་བསྟན་པ་མི་འཆི་བའི་ཚིག་འདི་ལས་ཤེས་རབ་ཆེན་པོ་སྐྱེ་སྟེ། དེ་ལྟར་སྟོན་པ་ཤེས་རབ་
དང་ལྡན་པ་དེ་ནི་སངས་རྒྱས་ཡིན་ཏེ། ཀྱེ་མ་བཙུན་པ་ཤེས་རབ་ཆེན་པོ་ཤཱ་རིའི་བུ་ནི་སྦྲང་བུའི་སྤྱད་པ་སྤྱོད་དེ། སྦྲང་བུ་ལྟ་བུར་འགྲོ་བ་ཁྱོད་ནི་ཤེས་རབ་དང་ལྡན་པ་མི་ཤེས་སོ། །སྦྲང་བུ་ལྟ་བུའི་ཤེས་རབ་ཅན་ཁྱོད་ཅང་མ་ཟེར་ཅིག །
བཙུན་པ་ནི་སྦྲང་བུ་ལྟ་བུའི་ཤེས་རབ་ཅན་ནོ། །དེ་ནས་དེའི་ཚེ་ཀུན་དགའ་བོ་དེར་འོངས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། སོར་མོའི་ཕྲེང་བ་ལ་འདི་སྐད་ཅེས་སྨྲས་སོ། །ལེགས་སོ་ལེགས་
སོ། །སོར་མོའི་ཕྲེང་བ་ཁྱོད་ཀྱིས་འཐུན་ཞིང་རྗེས་སུ་དགོངས་པའི་བསོད་ནམས་བྱས་པ་ང་དགའོ། །སོར་མོའི་ཕྲེང་བ་མྱུར་དུ་གསུང་རབ་ཡན་ལག་དགུ་པ་ལྷོགས་ཤེག །དེ་ནས་གནས་བརྟན་ཀུན་དགའ་བོ་ལ། སོར་མོའི་
ཕྲེང་བས་སླར་འདི་སྐད་ཅེས་སྨྲས་སོ། །ཁྱོད་མང་དུ་ཐོས་པའི་མཆོག་ཏུ་དེ་བཞིན་གཤེགས་པས་གསུངས་ན། བཙུན་པ་ཀུན་དགའ་བོ་ཁྱོད་ལ་དྲི་ཡིས་སྨྲོས་ཤིག །འཇིག་རྟེན་ན་མང་དུ་ཐོས་པ་གང་། ཇི་ལྟར་ན་མང་དུ་ཐོས་

57-1-168a

པར་འབྱུང་། བཙུན་པ་ཀུན་དགའ་བོ་ངས་དེ་སྐད་དྲིས་པ་མྱུར་དུ་སྨྲོས་ཤིག །དེ་ནས་ཚེ་དང་ལྡན་པ་ཀུན་དགའ་བོས། སོར་མོའི་ཕྲེང་བ་ལ་སླར་འདི་སྐད་ཅེས་སྨྲས་སོ། །མདོ་སྡེ་ཡན་ལག་དགུ་པ་ཀློག་པ་དང་། གཞན་ལ་ཡང་
སེར་སྣ་མེད་པར་རབ་ཏུ་སྟོན་པ་དེ་ལས་མང་དུ་ཐོས་ཤིང་བསམ་གྱིས་མི་ཁྱབ་པའི་གཟུངས་ཕུན་སུམ་ཚོགས་པ་ཐོས་པར་འགྱུར་རོ། །དེ་ནས་སོར་མོའི་ཕྲེང་བས་གནས་བརྟན་ཀུན་དགའ་བོ་ལ་སླར་འདི་སྐད་ཅེས་སྨྲས་སོ། །
འཇིག་རྟེན་ན་དེ་བཞིན་གཤེགས་པ་ནི་ཐེར་ཟུག་གཡུང་དྲུང་ངོ་ཞེས་བསྟན་པ་སྟོན་པ། བསྟན་པ་དེ་ནི་འཇིག་རྟེན་ན་མང་དུ་ཐོས་པ་ཡིན་ཏེ། ཀྱེ་མ་བཙུན་པ་ཀུན་དགའ་བོ་ནི་སྦྲང་བུའི་སྤྱད་པ་སྤྱོད་དེ། མང་དུ་ཐོས་པ་འབྱུང་བའི་སྒོ་མི་ཤེས་
སོ། །སྦྲང་བུ་ལ་ཡང་མང་དུ་ཐོས་པ་ཡོད་ཀྱིས། སྦྲང་བུ་ལྟ་བུའི་མང་དུ་ཐོས་པ་ཁྱོད་ཅང་མ་ཟེར་ཅིག །དེ་ནས་གནས་བརྟན་སྒྲ་གཅན་ཟིན། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། སོར་མོའི་ཕྲེང་བ་ལ་འདི་སྐད་ཅེས་
སྨྲས་སོ། །རིགས་ཀྱི་བུ་ལེགས་སོ། ལེགས་སོ། །ཁྱོད་ཀྱིས་འཐུན་ཞིང་རྗེས་སུ་དགོངས་པའི་བསོད་ནམས་བྱས་པ་ང་དགའོ། །སོར་མོའི་ཕྲེང་བ་མྱུར་དུ་གུས་པར་བསླབ་པ་ཟུང་ཤིག །དེ་ནས་སོར་མོའི་ཕྲེང་བས། སྒྲ་གཅན་
ཟིན་ལ་སླར་སྨྲས་པ། བཙུན་པ་སྒྲ་གཅན་ཟིན་ཁྱོད་བསླབ་པ་ལ་དགའ་ཞིང་གུས་པའི་མཆོག་ཏུ་དེ་བཞིན་གཤེགས་པས་གསུངས་ན། འཇིག་རྟེན་ན་བསླབ་པ་ལ་གུས་པ་གང་ཡིན། དེ་བཞིན་གཤེགས་པའི་སྲས་ཕངས་པ་
མྱུར་དུ་སྨྲོས་ལ་ངའི་ཐེ་ཙོམ་ཆོད་ཅིག །དེ་ནས་གནས་བརྟན་སྒྲ་གཅན་ཟིན་གྱིས་སོར་མོའི་ཕྲེང་བ་ལ་ཚིགས་སུ་བཅད་པས་སྨྲས་པ། སངས་རྒྱས་གསུང་རྣམས་ཤིན་དུ་གུས་པར་གཟུང་། །དེ་ནས་བསླབ་ལ་གུས་ཤིང་
ཚུལ་ཁྲིམས་ལྡན། །ཁོང་དཔའ་དབང་གྱུར་ཁོང་དཔའ་མཆོག་འཛིན་པ། །སོར་མོའི་ཕྲེང་བ་དེ་ལྟར་ཤེས་པར་གྱིས། །སོར་མོའི་ཕྲེང་བས་སྒྲ་གཅན་ཟིན་ལ་སླར་འདི་སྐད་ཅེས་སྨྲས་སོ། །འཇིག་རྟེན་ན་དེ་བཞིན་གཤེགས་

57-1-168b

པ་ནི་མཆོག་ཏུ་རྟག་པའོ་ཞེས་གུས་པས་བསྟན་པ་ནི་གུས་པའི་མཆོག་ཅེས་བྱ་སྟེ། བཙུན་པ་སྒྲ་གཅན་ཟིན་སྟོན་པ་དེ་ནི་འཇིག་རྟེན་ན་བསླབ་པ་ལ་གུས་པའི་མཆོག་ཏུ་ཤེས་པར་གྱིས་ཤིག །ཀྱེ་བཙུན་པ་སྒྲ་གཅན་ཟིན་ནི་སྦྲང་བུའི་
སྤྱད་པ་སྤྱོད་དེ། སྦྲང་བུ་ལྟ་བུ་ཁྱོད་བསླབ་པ་ལ་གུས་པར་མི་ཤེས་སོ། །སྦྲང་བུ་ལ་ཡང་གུས་པ་ཡོད་ཀྱིས། སྦྲང་བུ་ལྟ་བུ་ཁྱོད་ཅང་མ་ཟེར་ཅིག །དེ་ནས་གནས་བརྟན་མ་འགགས་པ། བཅོམ་ལྡན་འདས་ག་ལ་བ་དེར་སོང་སྟེ་
ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། སོར་མོའི་ཕྲེང་བ་ལ་འདི་སྐད་ཅེས་སྨྲས་སོ། །ལེགས་སོ། །ལེགས་སོ། །སོར་མོའི་ཕྲེང་བ་ཁྱོད་གྱིས་འཐུན་ཞིང་རྗེས་སུ་དགོངས་པའི་བསོད་ནམས་བྱས་
པ་ང་དགའོ། །སོར་མོའི་ཕྲེང་བ་ད་རིང་པོར་མ་ཐོགས་པར་ལྷའི་མིག་ཅན་དུ་གྱིས་ཤིག །དེ་ནས་ཚེ་དང་ལྡན་པ་མ་འགགས་པ་ལ་སོར་མོའི་ཕྲེང་བས་སླར་འདི་སྐད་ཅེས་སྨྲས་སོ། །བཙུན་པ་མ་འགགས་པ་ཁྱོད་དེ་བཞིན་
གཤེགས་པས་ལྷའི་མིག་ཅན་གྱི་མཆོག་ཏུ་གསུངས་ན། འཇིག་རྟེན་ན་ལྷའི་མིག་ཅན་གང་། ལྷའི་མིག་ཇི་ལྟར་ཏེ། མྱུར་དུ་སྨྲོས་ལ་ངའི་ཐེ་ཙོམ་ཆོད་ཅིག །དེ་ནས་སོར་མོའི་ཕྲེང་བ་ལ་ཚེ་དང་ལྡན་པ་མ་འགགས་པས་སླར་
ཚིགས་སུ་བཅད་པ་འདི་སྐད་ཅེས་སྨྲས་སོ། །མར་མེས་རྟག་ཏུ་མིག་འཐོབ་འགྱུར། །ཡང་ན་གཞན་ལ་ནན་ཏན་དུ། །ཆོས་བཤད་པས་ཀྱང་ཤེས་པར་བྱ། །གཟུགས་ཅན་ནང་ན་གཟུགས་མཆོག་ཅན། །དེ་ལྟར་སོར་ཕྲེང་
ཤེས་པར་གྱིས། །དེ་ནས་སོར་མོའི་ཕྲེང་བས་ཚེ་དང་ལྡན་པ་མ་འགགས་པ་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པའི་སྙིང་པོ་རབ་ཏུ་ནན་ཏན་དུ་མི་འཆབ་ཅིང་། སེམས་ཅན་ཐམས་ཅད་ལ་ཕན་པར་བསྟན་
པ་སྟོན་ན། དེས་ལྷའི་མིག་འཐོབ་པར་འགྱུར་ཏེ། དེ་ནི་འཇིག་རྟེན་ན་ལྷའི་མིག་ཅན་ནོ། །ཀྱེ་མ་བཙུན་པ་མ་འགགས་པ་ཁྱོད་ནི་སྦྲང་བུའི་སྤྱད་པ་སྤྱོད་དེ། ལྷའི་མིག་བསྐྱེད་པ་མི་ཤེས་སོ། །སྦྲང་བུ་ཡང་རང་གི་ཡུལ་མཐོང་གིས་

57-1-169a

སྦྲང་བུ་ལྟ་བུ་ཁྱོད་ཅང་མ་ཟེར་ཅིག །དེ་ནས་གནས་བརྟན་དགེ་སྦྱོང་གི་ཁོལ་པོ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། སོར་མོའི་ཕྲེང་བ་ལ་འདི་སྐད་ཅེས་སྨྲས་སོ། །ལེགས་སོ་ལེགས་
སོ། །སོར་མོའི་ཕྲེང་བ་ཁྱོད་ཀྱིས་འཐུན་ཞིང་རྗེས་སུ་དགོངས་པའི་བསོད་ནམས་བྱས་པ་ང་དགའོ། །སོར་མོའི་ཕྲེང་བ་ད་ནི་བཟོད་པ་ལ་མང་དུ་བསྒོམ་པར་བྱའོ། །དེ་ནས་སོར་མོའི་ཕྲེང་བས། གནས་བརྟན་དགེ་སྦྱོང་གི་ཁོལ་པོ་
ལ་འདི་སྐད་ཅེས་སྨྲས་སོ། །འཇིག་རྟེན་དག་ན་བཟོད་པ་རྫོགས་པ་སུ། །བཟོད་པ་འདོད་པས་ཇི་ལྟར་བཟོད་པར་འགྱུར། །ཇི་ལྟ་བུར་ན་བཟོད་པར་འགྱུར་བ་ཡང་། །མྱུར་དུ་སྨྲོས་ལ་ང་ཡི་ཐེ་ཙོམ་ཆོད། །དེ་ནས་གནས་བརྟན་དགེ་སྦྱོང་
གི་ཁོལ་པོས། སོར་མོའི་ཕྲེང་བ་ལ་སླར་སྨྲས་པ། དགེ་སློང་བཟོད་པ་འདོད་པ་ཡིས། །སྟེའུ་དང་ཙན་དན་འདྲ་བར་བྱ། །དེ་ནས་བཟོད་པ་ཐོབ་པར་འགྱུར། །དེ་ནི་འཇིག་རྟེན་རྡུལ་བཟོད་ཡིན། །སོར་ཕྲེང་དེ་ལྟར་ཤེས་པར་གྱིས། །
དེ་ནས་སོར་མོའི་ཕྲེང་བས་གནས་བརྟན་དགེ་སྦྱོང་གི་ཁོལ་པོ་ལ་འདི་སྐད་ཅེས་སླར་སྨྲས་སོ། །འཇིག་རྟེན་ན་དེ་བཞིན་གཤེགས་པའི་སྙིང་པོ་རབ་ཏུ་སྟོན་པ་ལ་མི་མཁས་པ། ལོག་པར་ལྟ་བའི་མི་དག་ཞེ་སྡང་ཞིང་བསྟན་པ་ནི་བདག་
མེད་པའོ་ཞེས་བདག་ཉིད་དེ་ལྟར་འཇོག་སྟེ། དེ་དག་ནི་ཚིག་ལ་གོམས་པར་མི་བྱེད་ཅིང་། མཚུངས་པ་མེད་དོ་སྙམ་ནས། རང་གི་སྲོག་ཀྱང་བཏང་སྟེ། དེ་བཞིན་གཤེགས་པའི་སྙིང་པོ་རབ་ཏུ་སྟོན་པ་དེ་ནི་བཟོད་པའི་དམ་པ་སྟེ། འཇིག་
རྟེན་ན་ཕན་པར་སྟོན་པའོ། །འཇིག་རྟེན་ན་བཟོད་པ་དུལ་བ་ཞི་བ་འཇིགས་པ་མེད་པའོ། །ཀྱེ་མ་གནས་བརྟན་དགེ་སྦྱོང་གི་ཁོལ་པོ་ཁྱོད་ནི་སྦྲང་བུའི་སྤྱད་པ་སྤྱོད་དེ། བཟོད་པ་བསྐྱེད་པར་མི་ཤེས་སོ། །སྦྲང་བུ་ཡང་བཀྲེས་པ་
དང་། སྐོམ་པ་བཟོད་ཀྱིས། སྦྲང་བུ་ལྟ་བུ་ཁྱོད་ཅང་མ་ཟེར་ཅིག ། བམ་པོ་གསུམ་པ། དེ་ནས་གང་པོ་བྱམས་མའི་བུས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། སོར་མོའི་ཕྲེང་བ་

57-1-169b

ལ་འདི་སྐད་ཅེས་སྨྲས་སོ། །ལེགས་སོ་ལེགས་སོ། །སོར་མོའི་ཕྲེང་བ་ཁྱོད་ཀྱིས་འཐུན་པ་དང་རྗེས་སུ་དགོངས་པའི་བསོད་ནམས་བྱས་པ་ང་ཡང་དགའོ། །སོར་མོའི་ཕྲེང་བ་སེམས་ཅན་ཐམས་ཅད་ལ་ཕན་པར་བསྟན་པའི་ཆོས་ཀྱི་
ཏམ་སྟོན་ཅིག །དེ་ནས་སོར་མོའི་ཕྲེང་བས། གང་པོ་བྱམས་མའི་བུ་ལ་སླར་འདི་སྐད་ཅེས་སྨྲས་སོ། །གང་པོ་ཁྱོད་སངས་རྒྱས་ཀྱིས་ཆོས་སྨྲ་བའི་མཆོག་ཏུ་གསུངས་ན། བཙུན་པ་འཇིག་རྟེན་ན་ཆོས་སྨྲ་བ་གང་ཡིན། ཇི་
ལྟར་ན་དགེ་སློང་དོན་ཤེས་པ་ཡིན། བཙུན་པ་ཆོས་སྨྲ་བའི་མཆོག་གིས་ཤོད་ཅིག །དེ་ནས་སོར་མོའི་ཕྲེང་བས་གང་པོ་བྱམས་མའི་བུ་ལ་འདི་སྐད་ཅེས་སྨྲས་སོ། །སངས་རྒྱས་ཀུན་དང་ཉན་ཐོས་ཀྱིས། །གང་དེ་ཀུན་དུ་མ་
བརྙེས་པ། །ཆོས་དེ་མངོན་པར་སངས་རྒྱས་ནས། །སྲོག་ཆགས་རྣམས་ལ་བསྟན་པར་བྱ། །དེ་སྐད་གསུངས་པའི་དོན་ཅི་གང་པོས་སྨྲས་པ། འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་ཆོས་ཐམས་
ཅད་ལ་སེམས་ཅན་གྱི་དབྱིངས་དང་། བདག་དང་། སྲོག་དང་། གང་ཟག་དང་། ཤེད་ལས་སྐྱེས་པ་དང་། ཤེད་བུ་ཤིན་དུ་ནན་ཏན་དུ་བཙལ་ཀྱང་མ་རྙེད་ནས། བདག་མེད་པ་ནི་སངས་རྒྱས་ཀྱི་ཚིག་གོ་སྙམ་སྟེ་འདས་སོ། །ད་ལྟར་
གྱི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་ཆོས་ཐམས་ཅད་ལ་སེམས་ཅན་གྱི་དབྱིངས་དང་། སྲོག་དང་། གང་ཟག་དང་། ཤེད་ལས་སྐྱེས་པ་དང་། ཤེད་བུ་ཤིན་ཏུ་ནན་ཏན་དུ་བཙལ་ཀྱང་མི་བརྙེས་སོ། །མ་བྱོན་པའི་
སངས་རྒྱས་བཅོམ་ལྡན་འདས་རྣམས་ཀྱིས་ཀྱང་ཆོས་ཐམས་ཅད་ལ་སེམས་ཅན་གྱི་དབྱིངས་དང་། སྲོག་དང་། གང་ཟག་དང་། ཤེད་ལས་སྐྱེས་པ་དང་། ཤེད་བུ་དག་ནན་ཏན་དུ་བྱས་སྟེ་བཙལ་བར་མི་འགྱུར་རོ། །དེ་བཞིན་
དུ་ཉན་ཐོས་དང་། རང་སངས་རྒྱས་ཐམས་ཅད་ཀྱིས་ཀྱང་དུས་གསུམ་དུ་ཆོས་ཐམས་ཅད་ལ་སྲོག་དང་། གང་ཟག་དང་། ཤེད་ཅན་དང་། ཤེད་བུ་དང་། སེམས་ཅན་གྱི་ཁམས་དང་། བདག་ནན་ཏན་དུ་བཙལ་ཀྱང་མ་རྙེད་མི་རྙེད་

57-1-170a

རྙེད་པར་མི་འགྱུར་ཏེ། དེ་ལྟར་སྲོག་དང་། གང་ཟག་དང་། ཤེད་ཅན་དང་། ཤེད་བུ་དང་། སེམས་ཅན་དང་། བདག་གི་དབྱིངས་མེད་པར་སྟོན་ཏོ། །དེ་ལྟར་བདག་མེད་པར་སྟོན། དེ་ལྟར་སྟོང་པར་སྟོན་ཏེ། དེ་ལྟ་བུའི་
ཆོས་ཀྱི་གཏམ་སྟོན་ཏོ། །སོར་མོའི་ཕྲེང་བས་གང་པོ་བྱམས་མའི་བུ་ལ་སླར་འདི་སྐད་ཅེས་སྨྲས་སོ། །ཀྱེ་མ་བཙུན་པ་གང་པོ་ཁྱོད་ནི་སྦྲང་བུའི་སྤྱད་པ་སྤྱོད་དེ། ཆོས་ཀྱི་གཏམ་སྟོན་མི་ནུས་སོ། །སྦྲང་བུ་ཡང་ཟི་ཟི་ཞེས་སྒྲ་འབྱིན་ཤེས་
ཀྱིས། སྦྲང་བུ་ལྟར་བླུན་པ་ཁྱོད་ཅང་མ་ཟེར་ཅིག །གང་པོ་དེ་བཞིན་གཤེགས་པའི་ལྡེམ་པོ་ངག་མི་ཤེས་པས་བདག་མེད་པ་ལ་ཆོས་སུ་སེམས་པ་ནི་གཏི་མུག་གི་ཆོས་ཀྱི་མར་མེའི་ནང་དུ་ཕྱེ་མ་ལེབ་ལྟར་ལྷུང་ངོ་། །གང་དེར་སངས་
རྒྱས་ཀྱིས་མ་བརྙེས་ཞེས་བྱ་བ་ནི་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་མེད་པ་མ་བརྙེས་ནས་འདས་སོ། །ད་ལྟར་གྱི་སངས་རྒྱས་བཅོམ་ལྡན་འདས་
རྣམས་ཀྱིས་ཀྱང་སེམས་ཅན་ཐམས་ཅད་ལ་བདག་གི་ཁམས་མེད་པ་མི་བརྙེས་སོ། །མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་སེམས་ཅན་ཐམས་ཅད་ལ་སེམས་ཅན་གྱི་ཁམས་མེད་པ་བརྙེས་པར་མི་
འགྱུར་རོ། །སངས་རྒྱས་དང་། ཉན་ཐོས་རྣམས་ཀྱིས་ཀྱང་དུས་གསུམ་དུ་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་མེད་པ་མ་བརྙེས་མི་བརྙེས་བརྙེས་པར་མི་འགྱུར་ཏེ། ཚིགས་སུ་བཅད་པ་དེའི་དོན་ནི་འདིའོ། །
ཡང་སངས་རྒྱས་ཀུན་གྱིས་གང་མ་བརྙེས་ཤེས་བྱ་བ་ནི་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་ཆོས་ཐམས་ཅད་ལ་ནན་ཏན་དུ་བཙལ་ཀྱང་འཇིག་རྟེན་པའི་ཐེ་ཙོམ་དང་། ཅི་ཙེའི་འབྲུ་དང་། འབྲས་དང་། 
ཡུངས་འབྲུ་དང་། ཏིལ་གྱི་རིལ་བུ་ཙམ་དམར་པོ་དང་། སྔོན་པོ་དང་། སེར་པོ་དང་། དཀར་པོ་དང་། ཐུང་ངུ་དང་། རིང་པོ་དང་། ཤིན་དུ་རིང་པོ་ལ་སོགས་པ་སྙིང་ག་ན་འབར་ཞིང་འདུག་ཅེས་བྱ་བ་དང་། ལྟེ་བའི་དྲུང་དང་། མགོ་

57-1-170b

དང་། མིག་དང་། རྣ་བ་ལ་མེ་མར་གྱི་སྙིང་པོ་དམར་པོ་སྣུམ་གྱི་རྐྱེན་གྱིས་འབར་བ་ལྟ་བུ་འདུག་གོ་ཞེས་བྱ་བ་ལ་སོགས་ཏེ། རྟོག་པ་རྣམ་པ་མང་པོ་ནི་ཇི་ལྟར་འཇིག་རྟེན་པ་རྣམས་བདག་ལ་སྒོམ་པ། གང་དེ་དག་གི་རྟག་པ་
བརྟན་པ་ཐེར་ཟུག་སྟེ། བདག་ནི་འདི་འདྲའོ་ཞེས་བྱ་སངས་རྒྱས་ཐམས་ཅད་དང་། ཉན་ཐོས་ཐམས་ཅད་ཀྱིས་མ་བརྙེས་ནས་མངོན་པར་སངས་རྒྱས་ནས་སྲོག་ཆགས་རྣམས་ལ་བཤད་དོ་ཞེས་བྱ་སྟེ། ཚིགས་སུ་བཅད་པ་
དེའི་དོན་ནི་འདི་ཡིན་གྱི། གང་པོ་ནི་ཕྱིན་ཅི་ལོག་ཏུ་རྣམ་པར་བརྟགས་པས་ན་དེའི་དོན་མ་ཡིན་ནོ། །སངས་རྒྱས་རྣམས་ཀྱིས་གང་མ་བརྙེས་ཤེས་བྱ་བ་དེ་ནི་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་དེ་
བཞིན་གཤེགས་པའི་སྙིང་པོ་བྱས་པ་མ་བརྙེས་ནས་འདས་ཏེ། མ་བྱས་པའི་སངས་རྒྱས་ཀྱི་ཁམས་མཚན་དང་དཔེ་བྱད་བཟང་པོ་མཐའ་ཡས་པའི་བརྒྱན་པ་སེམས་ཅན་ཐམས་ཅད་ལ་ཡོད་དོ། །ད་ལྟར་གྱི་སངས་རྒྱས་
བཅོམ་ལྡན་འདས་རྣམས་ཀྱིས་ཀྱང་དེ་བཞིན་གཤེགས་པའི་སྙིང་པོ་བྱས་པ་ནི་ནན་ཏན་དུ་བཙལ་ཀྱང་མ་བརྙེས་ཏེ། སེམས་ཅན་ཐམས་ཅད་ལ་མ་བྱས་པའི་སངས་རྒྱས་ཀྱི་དབྱིངས་སེམས་ཅན་ཐམས་ཅད་ལ་མཐའ་ཡས་
པའི་མཚན་དང་དཔེ་བྱད་ཀྱིས་བརྒྱན་པ་ཡོད་དོ། །དུས་གསུམ་དུ་ཉན་ཐོས་དང་། རང་སངས་རྒྱས་སྦྲང་མ་ལྟ་བུ་རྣམས་དེ་བཞིན་གཤེགས་པའི་སྙིང་པོ་ཡོད་ཅེས་གྲག་སྟེ། མིག་གིས་ནི་བལྟ་མི་ནུས་སོ་ཞེས་འདྲི་བ་དེ་ལ་
བྱེད་པའི་རྒྱུ་ནི་བསྟན་ཏོ། །འདི་ལྟ་སྟེ། སྒྲ་གཅན་ཟིན་དཔལ་གྱི་བསླབ་པ་དང་། ཚུལ་ཁྲིམས་ལྷུར་བྱེད་པས་སྲོག་ཆགས་ཅན་གྱི་ཆུ་ལ་ཤིན་དུ་ནན་ཏན་དུ་བལྟ་སྟེ། སྲོག་ཆགས་ཡིན་ནམ་མ་ཡིན། འོན་ཏེ་རྡུལ་འདྲ་བ་ཞིག་
སྟེ། ཐམས་ཅད་མ་ཡིན་ནོ་སྙམ་པ་ལས་རིམ་གྱིས་བརྟགས་ན་སྲོག་ཆགས་ཕྲ་མ་ཡིན་པར་མཐོང་བ་དེ་བཞིན་དུ་ས་བཅུ་ཐོབ་པའི་བྱང་ཆུབ་སེམས་དཔའ་སྟག་རྣམས་ཀྱིས་རང་གི་ལུས་ལ་བདག་གི་དབྱིངས་ཡོད་པར་བདག་

57-1-171a

ཉིད་ཀྱིས་ཀྱང་མཐོང་སྟེ། འདི་འདྲ་བ་དེ་ལྟ་བུ་མཐའ་ཡས་པའི་དབྱིངས་སུ་མཐོང་ངོ་། །དེ་ལྟར་དེ་བཞིན་གཤེགས་པའི་སྙིང་པོ་ལ་འཇུག་པ་ནི་ཤིན་དུ་དཀའ་བ་བྱེད་པ་ཡིན་ཏེ། གང་དག་ཀུན་དུ་འབར་བ་དང་། རབ་
ཏུ་འབར་བ་ལྟ་བུའི་འཇིག་རྟེན་དུ་རང་གི་སྲོག་ཀྱང་བཏང་སྟེ་སྟོན་པར་འགྱུར་བ་ནི་རབ་ཏུ་དཀའ་བ་བྱེད་པ་ཕན་པར་སྟོན་པ་ཡིན་ནོ། །བྱང་ཆུབ་སེམས་དཔའ་སྟག་དེ་དག་ལ་ང་དེ་བཞིན་གཤེགས་པའི་སྙིང་པོ་སྟོན་གྱི། གཞན་
ལ་མི་སྟོན་ཏོ། །སེམས་ཅན་དེ་དག་ནི་བདག་ཉིད་དེ་བཞིན་གཤེགས་པ་ཡིན་ནོ། །དཔེར་ན། འཕྲུལ་གྱི་མིག་དང་ལྡན་པའི་ནང་ན་མ་འགགས་པ་བཞིན་ཏེ། མ་འགགས་པ་དང་ལྷན་ཅིག་ཏུ་བྱིས་པ་ཤའི་མིག་ཅན་སོང་
ནས་ནམ་མཁའ་ལ་བྱ་སོང་བའི་རྗེས་ལ་བལྟས་ན། བྱིས་པ་ཤའི་མིག་ཅན་གྱིས་ཅི་ནམ་མཁའི་བྱ་རྗེས་མཐོང་ནམ། གནས་བརྟན་མ་འགགས་པས་ནི་གསལ་བར་མཐོང་སྟེ། སྐྱེས་བུ་ཤའི་མིག་ཅན་ཡང་གནས་
བརྟན་གྱི་དྲིང་ལ་རབ་ཏུ་ཡིད་ཆེས་ནས་འགྲོ་བ་དེ་བཞིན་དུ། བྱིས་པ་ཤའི་མིག་ཅན་དང་འདྲ་བ་ཉན་ཐོས་དང་། རང་སངས་རྒྱས་ཐམས་ཅད་ཀྱིས་མདོ་སྡེ་ཐམས་ཅད་ཀྱི་ཚུལ་ལ་ཡིད་ཆེས་ནས་དེ་བཞིན་གཤེགས་པའི་སྙིང་པོ་ཡོད་པར་
ཤེས་ཀྱི། དེ་བཞིན་གཤེགས་པའི་ཡུལ་གྱི་དབྱིངས་ལྟ་ཡང་དག་པར་ག་ལ་མཐོང་། དེ་སྟེ་ཉན་ཐོས་དང་། རང་སངས་རྒྱས་གཞན་གྱི་དྲིང་ལ་འཇོག་ན། མི་དམུས་ལོང་ཙམ་ལྟ་ག་ལ་ཡིད་ཆེས། སྔོན་བྱུང་བས་འདི་
མངར་སྣ་བཞི་ཅན་དུ་གྱུར་ཏོ་ཞེས་སྔོན་གྱི་ཡང་དག་པར་རྫོགས་པའི་སངས་རྒྱས་གཞན་དུ་མི་གསུང་བ་རྣམས་ལས་ཁོ་བོས་ཐོས་ཏེ། སེམས་ཅན་གང་དག་གིས་མངར་སྣ་བཞི་མྱོང་བའི་སེམས་ཅན་དེ་དག་ད་དུང་ཡང་བྱིས་
པའི་ཚེ་ས་ཟ་སྟེ། གང་གིས་ཡུན་རིང་པོ་ནས་བསྙེན་པ་རོ་ཞིམ་པོ་དེ་སེམས་ཅན་རྣམས་ད་དུང་ཡང་གཏོང་མི་ནུས་སོ། །དེ་བཞིན་དུ་སྔོན་གྱི་ཡང་དག་པར་རྫོགས་པའི་སངས་རྒྱས་མང་པོའི་དྲུང་དུ་གང་གིས་དེ་བཞིན་

57-1-171b

གཤེགས་པའི་སྙིང་པོ་ལ་བསྒོམས་ཤིང་མང་དུ་བྱས་པའི་སེམས་ཅན་དེ་དག་ནི་ད་དུང་ཡང་དེ་བཞིན་གཤེགས་པའི་སྙིང་པོ་ལ་ཡིད་ཆེས་ཏེ། སེམས་ཅན་དེ་དག་ནི་ཡུན་རིང་པོ་ནས་བསྒོམས་ཤིང་དེ་བཞིན་གཤེགས་པ་ལ་བྱས་
པ་གཟོ་བ་སྟེ་གཞན་མ་ཡིན་ནོ། །མ་འོངས་པའི་དུས་ན་ཡང་སེམས་ཅན་གང་དེ་བཞིན་གཤེགས་པའི་སྙིང་པོ་སྟོན་པ་དང་། ཐོས་ནས་ཡིད་ཆེས་པར་འགྱུར་བའི་སེམས་ཅན་དེ་དག་ནི་གཞན་མ་ཡིན་ཏེ། དེ་བཞིན་གཤེགས་
པའི་སྲས་ས་ལ་ཟ་བ་ལྟ་བུ་དེ་བཞིན་གཤེགས་པ་ལ་བྱས་པ་གཟོ་བའོ། །གང་སྔོན་ཕྱུགས་སུ་གྱུར་ཏེ། རང་གི་མ་ལ་རྒལ་ཞིང་མ་རྣམ་པར་མྱོས་པའི་སེམས་ཅན་དེ་དག་ནི་ད་དུང་ཡང་ཉལ་བའི་ཚེ་སོ་སྒྲ་ཁྲིག་ཁྲིག་ཟེར་ཞིང་
དེ་བཞིན་གཤེགས་པའི་སྙིང་པོ་ཆོས་དེ་ཁོ་ན་ཉིད་ལ་ཡིད་མི་ཆེས་སོ། །མ་འོངས་པའི་དུས་ན་འང་སེམས་ཅན་གང་སོ་སྒྲ་ཁྲིག་ཁྲིག་ཟེར་ཞིང་དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་པའི་སེམས་ཅན་དེ་དག་ནི་
གཞན་མ་ཡིན་ཏེ། བཙུན་པ་གང་པོ་དེ་དག་ནི་ཕྱུགས་སུ་གྱུར་པ་ཆོས་ཉིད་མི་ཤེས་པའོ། །སྔོན་ཕུག་རོན་དུ་གྱུར་པའི་སེམས་ཅན་དེ་དག་ནི་ཤིན་དུ་གཟུགས་འདོད་ཅིང་གཡེམ་པའི་དབང་དུ་སོང་སྟེ། །ཕལ་ཆེར་དེ་
བཞིན་གཤེགས་པའི་སྙིང་པོ་ལ་ཡིད་མི་ཆེས་ཤིང་དྲག་ཤུལ་གྱི་ལས་བྱེད་དོ། །མ་འོངས་པ་ན་ཡང་སེམས་ཅན་གང་གཡེམ་པའི་དབང་དུ་སོང་བ་དག་ཕལ་ཆེར་དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་ཏེ། 
སེམས་ཅན་དེ་དག་ནི་གཞན་མ་ཡིན་གྱི་ཕུག་རོན་དུ་གྱུར་པ་ཡུན་རིང་པོ་ནས་ཉོན་མོངས་པ་ལ་གོམས་པ་གང་ཡིན་པའོ། །གང་སྔོན་ངོ་ཚ་མེད་པའི་ཁྭར་གྱུར་པ། ཤིན་དུ་བྱས་པ་མི་གཟོ་བ་མི་གཙང་བ་ཟ་བའི་སེམས་ཅན་དེ་དག་
ནི་ད་དུང་ཡང་དབུལ་ཞིང་ངོ་ཚ་བ་མེད་དེ། དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་སོ། །མ་འོངས་པ་ན་ཡང་སེམས་ཅན་གང་ཕན་པར་སྟོན་པའི་དྲུང་ནས། དེ་བཞིན་གཤེགས་པའི་སྙིང་པོ་ཐོས་ན་དགོད་དེ་

57-1-172a

འགྲོའོ། །བདག་གི་དབྱིངས་ལ་ཡིད་མི་ཆེས་པའི་སེམས་ཅན་དེ་དག་ནི་གཞན་མ་ཡིན་གྱི། བཙུན་པ་གང་པོ་དེ་ནི་ངོ་ཚ་མེད་པ་མི་གཙང་བ་ཟ་བའི་ཁྭ་ཡིན་ནོ། །སྔོན་སྤྲེའུ་མི་སྡུག་པར་གྱུར་ཏེ། ཡིད་རྒྱ་མཚོ་
སྣ་ཚོགས་རྣམ་པར་བཀྲ་བའི་རླབས་ལྟ་བུར་གཡོ་བའི་སེམས་ཅན་དེ་དག་ནི་ད་དུང་ཡང་དེ་བཞིན་གཤེགས་པའི་སྙིང་པོ་ཐོས་ན་སེམས་འཁྲུག་པར་འགྱུར་ཏེ། དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་སོ། །མ་
འོངས་པ་ན་ཡང་སེམས་ཅན་གང་དེ་བཞིན་གཤེགས་པའི་སྙིང་པོ་ཐོས་ན་སེམས་འཁྲུག་ཅིང་དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་པའི་སེམས་ཅན་དེ་དག་ནི་གཞན་མ་ཡིན་ཏེ། བཙུན་པ་གང་པོ་སྤྲེའུ་ལྟ་བུར་དགོད་
པ་དམན་པ་ཡིན་ནོ། །སེམས་ཅན་གང་སྔོན་འུག་པར་གྱུར་པ་ཉིན་པར་ཤིན་དུ་མི་མཐོང་ཞིང་མཚན་མོ་མཐོང་བ་དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་པའི་སེམས་ཅན་དེ་དག་ད་དུང་ཡང་འཇིག་རྟེན་ན་བླ་མ་
མཐོང་ནས་ལྟའང་མི་འདོད་དོ། །མ་འོངས་པའི་དུས་ན་ཡང་སེམས་ཅན་གང་དག་ཕན་པར་སྟོན་པའི་དྲུང་དུ་དེ་བཞིན་གཤེགས་པའི་སྙིང་པོ་ཐོས་ལ་སངས་རྒྱས་ཀྱིས་ལུང་བསྟན་པ་ལ་ཡིད་མི་ཆེས་པའི་སེམས་ཅན་དེ་དག་ནི་
བཙུན་པ་གང་པོ་གང་འུག་པར་གྱུར་པ་ཡིད་མི་ཆེས་པ་ཡིན་ཏེ། མོ་མཁན་གྱི་ཚིག་བཞིན་ནོ། །བཙུན་པ་གང་པོ་སྔོན་གྲམ་ཁྲོད་དུ་སྐྱེས་པ་ཤིན་དུ་དོན་མེད་པའི་གཞུང་གིས་གོས་པ། དེ་བཞིན་གཤེགས་པའི་སྙིང་པོ་ལ་
ཡིད་མི་ཆེས་པའི་སེམས་ཅན་དེ་དག་ནི་ད་དུང་ཡང་བདག་མེད་པ་ཞེས་བྱ་བ་དགོངས་པའི་ཚིག་ཏུ་མི་ཤེས་པས། སེམས་ཅན་གྲམ་ཁྲོད་པ་རྣམས་དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་སོ། །མ་འོངས་པའི་
དུས་ན་ཡང་ཤིན་དུ་དོན་མེད་པའི་གཞུང་ལ་ཆགས་པའི་ལྡེམ་པོ་ངག་ཏུ་གསུངས་པ་མི་ཤེས་པ། གྲམ་ཁྲོད་པ་དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་པ་དེ་དག་ནི་གཞན་མ་ཡིན་ཏེ། བཙུན་པ་གང་པོ་ངེས་

57-1-172b

པར་གྲམ་ཁྲོད་པ་དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་པ་ཡིན་ནོ། །གང་སྔོན་སྒོ་གང་ཡང་རུང་བ་ན་འདུག་ཅིང་རྐུན་པོ་དམའ་བའི་སེམས་ཅན་དེ་དག་ནི་ཁྱི་ལྟ་བུ་ཞེས་བྱ་སྟེ། མ་འོངས་པའི་དུས་ན་ཡང་སེམས་ཅན་
གང་གཞན་གྱི་ཁྱིམ་ན་རྒྱུ་ཞིང་། དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་པའི་སེམས་ཅན་དེ་དག་ནི་གཞན་མ་ཡིན་ཏེ། བཙུན་པ་གང་པོ་དེ་དག་ནི་ཁྱི་དང་འདྲ་བར་དམའ་བ་ཡིན་ནོ། །སྔོན་བྱི་ལར་གྱུར་པའི་སེམས་ཅན་
གང་རྟག་ཏུ་ཤ་ཟ་བ་ལ་ཆགས་ཤིང་། དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་པའི་སེམས་ཅན་དེ་དག་ནི་ད་དུང་ཡང་ཤ་ལ་ཆགས་ཤིང་། སྲོག་གཅོད་པ་བྱི་ལའི་གཟུགས་སུ་སྒྱུར་བའི་སྲིན་པོར་འགྱུར་རོ། །མ་
འོངས་པ་ན་ཡང་སེམས་ཅན་གང་བྱི་ལའི་གཟུགས་སུ་བསྒྱུར་བའི་སྲིན་པོ་གཞན་གྱི་སྲོག་གཅོད་ཅིང་ཤ་ཟ་བ་མི་བཟད་པ་དེ་བཞིན་གཤེགས་པའི་སྙིང་པོ་ལས་ཕྱིར་ཕྱོགས་པ་དེ་དག་ནི་གཞན་མ་ཡིན་ཏེ། གཞན་གྱི་སྲོག་གཅོད་ཅིང་ཤ་ཟ་བ་
བྱི་ལའི་གཟུགས་སུ་བསྒྱུར་བའི་སྲིན་པོའོ། །གང་བྱི་བ་དང་། མ་ནིང་དུ་གྱུར་པ་དེ་བཞིན་གཤེགས་པའི་སྙིང་པོ་ལས་ཕྱིར་ཕྱོགས་པའི་སེམས་ཅན་དེ་དག་ནི་ད་དུང་ཡང་ཆང་འཐུང་ཞིང་བྱི་བ་དང་། མ་ནིང་དུ་གྱུར་ཏེ། ཤིན་དུ་མི་
གཙང་བ་འཐུང་བ་ཡིན་ནོ། །མ་འོངས་པ་ན་ཡང་སེམས་ཅན་གང་ཆང་འཐུང་ཞིང་མ་ནིང་ལྟ་བུ་དམའ་བ་དེ་དག་ནི་འཇིག་རྟེན་པའི་རོས་ངོམས་པས་དེ་བཞིན་གཤེགས་པའི་སྙིང་པོ་མི་འདོད་དེ།  དེ་དག་ནི་གཞན་མ་ཡིན་གྱི་
མ་ནིང་དང་བྱི་བ་གང་ཡིན་པ་དེ་དག་ཏུ་བལྟའོ། །གང་ལྕེ་སྤྱང་དུ་གྱུར་པའི་སེམས་ཅན་ཁྲེལ་མེད་ཅིང་གཡོ་ངན་པ་དེ་བཞིན་གཤེགས་པའི་སྙིང་པོ་ལས་ཕྱིར་ཕྱོགས་པ་དེ་དག་ནི་ད་དུང་ཡང་དེ་བཞིན་གཤེགས་པའི་སྙིང་པོ་
ལྡེམ་པོ་ངག་ཏུ་བཤད་པ་མི་ཤེས་ཤིང་སེམས་ཅན་གཡོན་ཅན་ལྕེ་སྤྱང་ལྟ་བུར་གྱུར་ཏོ། །མ་འོངས་པ་ན་ཡང་སེམས་ཅན་གང་དེ་བཞིན་གཤེགས་པའི་སྙིང་པོ་ལྡེམ་པོ་ངག་ཏུ་བཤད་པ་མི་ཤེས་པ་འདི་ལྟར་གནང་ངོ་ཞེས་

57-1-173a

ལོག་པར་རྟོག་པ་དེ་དག་ནི་ངེས་པར་ཅེ་སྤྱང་དུ་གྱུར་པའོ། །སྔོན་སེམས་ཅན་གང་སྲིན་བུ་མི་སྡུག་པ་སྡིག་པར་གྱུར་པ་དེ་བཞིན་གཤེགས་པའི་སྙིང་པོ་ལས་ཕྱིར་ཕྱོགས་པའི་སེམས་ཅན་དེ་དག་ནི་ད་དུང་ཡང་དེ་
བཞིན་གཤེགས་པའི་སྙིང་པོ་ཐོས་ནས་རབ་ཏུ་འབར་ཏེ། སྙིང་ཞེ་སྡང་བར་གྱུར་པ་དེ་ནི་ངེས་པར་སྡིག་པ་དང་མཚུངས་པ་ཡིན་ནོ། །མ་འོངས་པ་ན་ཡང་སེམས་ཅན་གང་དེ་བཞིན་གཤེགས་པའི་སྙིང་པོ་ཐོས་ན་སངས་རྒྱས་ཀྱིས་
བཤད་པ་མ་ཡིན་ནོ་ཞེས་ཡིད་མི་ཆེས་པ་དེ་དག་ནི་གཞན་མ་ཡིན་ཏེ། བཙུན་པ་གང་པོ་ངེས་པར་སྡིག་པ་ལྟ་བུ་ཚ་བའི་ལས་བྱེད་པའོ། །གང་སྔོན་སྦྲུལ་གདུག་པ་མི་ཟད་པར་གྱུར་པ། དེ་བཞིན་གཤེགས་པའི་སྙིང་པོ་ལ་
མི་བསྔགས་པར་སྨྲ་བའི་སེམས་ཅན་དེ་དག་ནི་ད་དུང་ཡང་ང་རྒྱལ་ཆེ་ཞིང་འཇིགས་པའི་གཟུགས་སྦྲུལ་གདུག་པ་མི་ཟད་པར་འགྱུར་རོ། །མ་འོངས་པ་ན་ཡང་སེམས་ཅན་གང་དེ་བཞིན་གཤེགས་པའི་སྙིང་པོ་ཕན་པར་
བསྟན་པ་ལ་མི་བསྔགས་པར་སྨྲ་ཞིང་སྡིག་པ་སྤྱོད་པའི་སེམས་ཅན་དེ་དག་ནི་གཞན་མ་ཡིན་ཏེ། བཙུན་པ་གང་པོ་ངེས་པར་སྦྲུལ་གདུག་པ་མི་ཟད་པའོ། །སྔོན་སེམས་ཅན་གང་ལུག་ཏུ་གྱུར་པ་གླེན་ཞིང་ཁོ་རེ་ཆུང་བ་
མིའི་ཡོན་ཏན་མི་ཤེས་པ་དེ་བཞིན་གཤེགས་པའི་སྙིང་པོ་བཙུན་པར་མི་བྱེད་ཅིང་། མདོ་སྡེ་ལ་སྨོད་པ་དེ་དག་ད་དུང་ཡང་མདོ་སྡེ་ལ་སྨོད་དེ། སེམས་ཅན་དེ་དག་ནི་ངེས་པར་ལུག་ཏུ་གྱུར་པ་གླེན་ཞིང་ཁོ་ར་ཆུང་བ་ཡིན་ཏེ། མ་
འོངས་པ་ན་ཡང་སེམས་ཅན་གང་གཉིད་ཆེ་ཞིང་དེ་བཞིན་གཤེགས་པའི་སྙིང་པོ་ཐོས་ན་སྨོད་པ་དེ་དག་ནི་གཞན་མ་ཡིན་ཏེ། ངེས་པར་ཁོ་རེ་ཆུང་ཞིང་ཞན་པའོ། །སྔོན་མ་ཧེ་ཁོ་རེ་ཆུང་བར་གྱུར་པ་དེ་བཞིན་གཤེགས་པའི་
སྙིང་པོ་ལས་ཕྱིར་ཕྱོགས་པའི་སེམས་ཅན་དེ་དག་ནི་ད་དུང་ཡང་ངེས་པར་ཞན་ཅིང་བརྐམ་སྟེ། ལྟ་བ་གསུམ་གྱིས་འཇུངས་པའི་མ་ཧེ་ལྟ་བུའོ། །མ་འོངས་པ་ན་ཡང་བརྐམ་ཞིང་ཁྲོ་ལ་ཞན་ཅིང་ཁོ་རེ་ཆུང་སྟེ། དེ་བཞིན་གཤེགས་

57-1-173b

པའི་སྙིང་པོ་ལས་ཕྱིར་ཕྱོགས་པའི་སེམས་ཅན་དེ་དག་ནི་གཞན་མ་ཡིན་ཏེ། ངེས་པར་ལྟ་བ་གསུམ་གྱིས་འཇུངས་པའི་མ་ཧེའོ། །སེམས་ཅན་གང་སྔོན་དོམ་དུ་གྱུར་པ་དེ་དག་ནི་དེ་བཞིན་གཤེགས་པའི་སྙིང་པོ་ལས་ཕྱིར་
ཕྱོགས་ཤིང་ཡིད་མི་ཆེས་ཏེ། སེམས་ཅན་དེ་དག་ནི་ད་དུང་ཡང་ཡིད་དུ་མི་འོང་བ་སྒྲོགས་ཏེ། ངེས་པར་དོམ་དང་ཅེ་སྤྱང་ལྟ་བུའོ། །མ་འོངས་པ་ན་ཡང་སེམས་ཅན་གང་དེ་བཞིན་གཤེགས་པའི་སྙིང་པོ་ལས་ཕྱིར་ཕྱོགས་
ཤིང་ཡིད་དུ་མི་འོང་བར་སྒྲོགས་པ་དེ་དག་ནི་གཞན་མ་ཡིན་ཏེ། བཙུན་པ་གང་པོ་དོམ་དང་ལྕེ་སྤྱང་ལྟ་བུའོ། །གང་སྔོན་བྱ་ཀ་ལན་ད་ཀར་གྱུར་པ། དེ་བཞིན་གཤེགས་པའི་སྙིང་པོ་ལས་ཕྱིར་ཕྱོགས་ཤིང་ཡིད་མི་ཆེས་ཏེ། 
ད་དུང་ཡང་སེམས་ཅན་གང་མིག་རྟུལ་བ་དེ་དག་ནི་ངེས་པར་བྱ་ཀ་ལན་ད་ཀར་གྱུར་པའོ། །མ་འོངས་པ་ན་ཡང་སེམས་ཅན་གང་དེ་བཞིན་གཤེགས་པའི་སྙིང་པོ་ཤེས་པ་འཆབ་ཅིང་མ་རུངས་པ་སྡིག་པའི་ལས་བྱེད་པ་
དེ་དག་ནི་གཞན་མ་ཡིན་ཏེ། དེ་བཞིན་གཤེགས་པའི་སྙིང་པོ་མི་སྟོན་པ་དེ་ནི་ངེས་པར་མིག་རྟུལ་བའི་བྱ་ཀ་ལན་ད་ཀ་ཡིན་ནོ། །གང་སྔོན་བོང་བུར་གྱུར་པ་དེ་བཞིན་གཤེགས་པའི་སྙིང་པོ་ལ་མི་དགོས་པར་སེམས་བསྐྱེད་
པ་དེ་དག་ནི་ད་དུང་ཡང་དབུལ་ཞིང་བོང་བུ་ལྟ་བུར་ཟས་རྩུབ་པོ་ཟ་བར་འགྱུར་རོ། །མ་འོངས་པ་ན་ཡང་དབུལ་པོ་གཞན་གྱིས་མངག་པའི་རིགས་ངན་པར་སྐྱེའོ། །གང་དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་
ཤིང་བདག་མེད་པ་ལ་སྒོམ་པ་དེ་དག་ནི་གཞན་མ་ཡིན་ཏེ། བཙུན་པ་གང་པོ་འདོད་ལྡན་དང་། གདལ་པ་དང་། བྱ་པ་དང་། བོང་བུ་ལྟ་བུའོ། །གང་སྔོན་ལྷ་མ་ཡིན་ལུས་ཐུང་ངུར་གྱུར་ཅིང་མཆེ་བ་རིང་བ་མི་སྡུག་པ་ཁོག་
པ་ལྟ་བུ་དེ་བཞིན་གཤེགས་པའི་སྙིང་པོ་ལ་ཁ་ཟེར་བ་དེ་དག་ནི་ད་དུང་ཡང་ལུས་ཐུང་ཞིང་ཁོག་པ་ལྟ་བུར་གྱུར་ཏེ། དེ་དག་ནི་ངེས་པར་ལྷ་མ་ཡིན་ནོ། །མ་འོངས་པ་ན་ཡང་སེམས་ཅན་གང་ཁོག་པ་ལྟ་བུ་ཐུང་ཞིང་

57-1-174a

མཆེ་བ་རིང་བ་གཏུམ་པོ་དེ་བཞིན་གཤེགས་པའི་སྙིང་པོ་ལ་ཁ་ཟེར་བ་དེ་དག་ནི་གཞན་མ་ཡིན་ཏེ། བཙུན་པ་གང་པོ་ལྷ་མ་ཡིན་གྱི་རིས་སུ་གཏོགས་པའི་སེམས་ཅན་ཡིན་ནོ། །གང་སྔོན་ཡི་དགས་ཁ་ནས་
མེ་ལྕེ་འབྱུང་བར་འགྱུར་བ་དེ་བཞིན་གཤེགས་པའི་སྙིང་པོ་ལ་སྨོད་ཅིང་འཕྱ་བའི་སེམས་ཅན་དེ་དག་ནི་ད་དུང་མཆུ་དང་རྐན་སྐམས་ཤིང་། ཡི་དགས་རིད་པ་ཁ་ནས་མེ་ལྕེ་འབྱུང་བའི་སྲོག་ཆགས་སུ་འགྱུར་རོ། །མ་འོངས་པ་ན་
ཡང་སེམས་ཅན་གང་ལུས་ཤིན་དུ་རིད་པ་དེ་བཞིན་གཤེགས་པའི་སྙིང་པོ་ལ་སྨོད་ཅིང་འཕྱ་བ་དེ་དག་ནི་བཙུན་པ་གང་པོ་གཞན་མ་ཡིན་ཏེ། ངེས་པར་ཡི་དགས་ཁ་ནས་མེ་ལྕེ་འབྱུང་བ་ཉམ་ཆུང་བ་ཡིན་ནོ། །དེ་དག་
སྔོན་ཡང་སེམས་ཅན་གང་དེ་བཞིན་གཤེགས་པའི་སྐུ་རྟག་པ་ལ་མི་རྟག་པར་ལྟ་བ་རྣམས་མཛེ་ན་བར་འགྱུར་ཏེ། ད་དུང་ཡང་སེམས་ཅན་གང་ཞན་ཅིང་མཛེ་ན་བར་འགྱུར་བ་དེ་དག་ནི་ངེས་པར་དེ་བཞིན་གཤེགས་པའི་
སྐུ་རྟག་པ་ལ་སྨོད་པ་ཡིན་ནོ། །མ་འོངས་པ་ན་ཡང་སེམས་ཅན་གང་དག་དེ་བཞིན་གཤེགས་པའི་སྐུ་རྟག་པ་ལ་མི་རྟག་པར་ལྟ་བ་མཛེ་ན་བར་འགྱུར་བ་དེ་དག་ནི་གཞན་མ་ཡིན་ཏེ། བཙུན་པ་གང་པོ་དེ་བཞིན་གཤེགས་
པའི་སྐུ་རྟག་པ་ལ་སྨོད་པ་ཡིན་ནོ། །སྔོན་གང་དེ་བཞིན་གཤེགས་པ་ཞི་བའི་སྐུ་ལ་མ་ཞི་བར་ལྟ་བ་རྣམས་ནི་བོང་ཆེན་པོར་གྱུར་ཏེ། ད་དུང་ཡང་བོང་ཆེ་ཞིང་ཞན་པ་དེ་དག་ནི་ངེས་པར་དེ་བཞིན་གཤེགས་པ་ཞི་བའི་སྐུ་
ལ་མ་ཞི་བར་ལྟ་བའོ། །མ་འོངས་པ་ན་ཡང་སེམས་ཅན་གང་དེ་བཞིན་གཤེགས་པ་ཞི་བའི་སྐུ་ལ་མ་ཞི་བར་ལྟ་བ་དེ་དག་ནི་གཞན་མ་ཡིན་ཏེ། བཙུན་པ་གང་པོ་བོང་ཆེན་པོ་དེ་དག་ནི་ངེས་པར་དེ་བཞིན་གཤེགས་པ་ཞི་
བའི་སྐུ་ལ་སུན་འབྱིན་པའོ། །གང་སྔོན་ཕུན་སུམ་ཚོགས་པའི་དུས་ན་རྒུད་པར་གྱུར་ཏེ། ནད་མང་བའི་སེམས་ཅན་རྣམ་པ་མང་པོ་དེ་དག་ནི་དེ་བཞིན་གཤེགས་པའི་གཡུང་དྲུང་གི་སྐུ་ལ་གཡུང་དྲུང་མ་ཡིན་པར་ལྟ་

57-1-174b

བ་ཡིན་ནོ། །ད་དུང་ཡང་ཕུན་སུམ་ཚོགས་པའི་དུས་ན་རྒུད་པར་གྱུར་པའི་སེམས་ཅན་དེ་དག་ནི་དེ་བཞིན་གཤེགས་པའི་གཡུང་དྲུང་གི་སྐུ་ལ་གཡུང་དྲུང་མ་ཡིན་པར་ལྟ་བ་ཡིན་ནོ། །མ་འོངས་པ་ན་ཡང་
སེམས་ཅན་གང་ཕུན་སུམ་ཚོགས་པའི་དུས་ན་རྒུད་པར་འགྱུར། གང་དག་ནི་དེ་བཞིན་གཤེགས་པའི་གཡུང་དྲུང་གི་སྐུ་ལ་གཡུང་དྲུང་མ་ཡིན་པར་ལྟ་བ་སྟེ། བཙུན་པ་གང་པོ་དེ་དག་ནི་ངེས་པར་གཞན་མ་ཡིན་གྱི་དེ་
བཞིན་གཤེགས་པའི་སྐུ་མི་གསལ་བའོ་ཞེས་སུན་འབྱིན་པའོ། །སྔོན་གང་དེ་བཞིན་གཤེགས་པའི་སྐུ་ཐེར་ཟུག་ལ་ཐེར་ཟུག་མ་ཡིན་པར་ལྟ་བའི་སེམས་ཅན་དེ་དག་ནི་རྒྱལ་པོའི་བཙུན་མོ་དམ་པའི་མངལ་དུ་སྐྱེས་ནས་ཤི་སྟེ་
མི་རྟག་པར་གྱུར་ཏོ། །ད་དུང་ཡང་སེམས་ཅན་གང་ལ་ལ་རྒྱལ་པོའི་བཙུན་མོ་དམ་པའི་མངལ་དུ་སྐྱེས་ནས་ཤི་བ་དེ་དག་ནི་ངེས་པར་དེ་བཞིན་གཤེགས་པའི་སྐུ་ཐེར་ཟུག་དང་། གསལ་བ་ལ་སྨོད་པའོ། །མ་འོངས་པ་
ན་ཡང་སེམས་ཅན་གང་མི་རྟག་ཅིང་ཚེ་ཐུང་བར་འགྱུར་བ་དེ་དག་ནི་ཐེར་ཟུག་གི་སྐུ་ལ་སྨོད་པ་ཡིན་ཏེ། བཙུན་པ་གང་པོ་དེ་དག་ནི་གཞན་མ་ཡིན་གྱི་ངེས་པར་དེ་བཞིན་གཤེགས་པ་ཐེར་ཟུག་གི་སྐུ་ལ་སྨོད་པའོ། །སྔོན་
སེམས་ཅན་གང་བུ་མེད་པར་གྱུར་པ་དེ་དག་ཀྱང་དེ་བཞིན་གཤེགས་པ་ཤིང་ཟད་པའི་མེ་བཞིན་དུ་ཡོངས་སུ་མྱ་ངན་ལས་འདས་སོ་ཞེས་མི་རྟག་པར་འཛིན་པ་རྣམས་ཏེ། ད་དུང་ཡང་སེམས་ཅན་གང་བུ་མེད་པར་འགྱུར་པ་
དེ་དག་ནི་མྱ་ངན་ལས་འདས་པ་ལ་ཞིག་པར་ལྟ་བའོ། །མ་འོངས་པ་ན་ཡང་སེམས་ཅན་གང་བུ་མེད་པ་མ་རུངས་པ་དེ་དག་ནི་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ཞིག་པར་ལྟ་བ་རྣམས་ཏེ། གཞན་
མ་ཡིན་གྱི་བཙུན་པ་གང་པོ་དེ་དག་ནི་ངེས་པར་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་ཞིག་པར་ལྟ་བ་རྣམས་སོ། །སྔོན་སེམས་ཅན་གང་དེ་བཞིན་གཤེགས་པ་ཕ་མ་ཕྲད་པ་ལས་སྐྱེས་པར་རྟོག་པའི་

57-1-175a

སེམས་ཅན་དེ་དག་ནི་ཕ་མ་དང་བྲལ་བར་འགྱུར་རོ། །ད་དུང་ཡང་སེམས་ཅན་གང་ཕ་མ་དང་བྲལ་བ་དེ་དག་ནི་ངེས་པར་དེ་བཞིན་གཤེགས་པ་ལ་ཁ་ཟེར་བའོ། །མ་འོངས་པ་ན་ཡང་སེམས་ཅན་གང་སངས་རྒྱས་ལ་
ཕ་མ་ཕྲད་པ་ལས་སྐྱེས་པར་ལྟ་བ་དེ་དག་ཕ་མ་མེད་པར་འགྱུར་ཏེ། དེ་དག་ནི་གཞན་མ་ཡིན་གྱི། བཙུན་པ་གང་པོ་དེ་བཞིན་གཤེགས་པ་ལ་ཁ་ཟེར་བ་ཕ་མ་དང་བྲལ་བའོ། །སྔོན་སེམས་ཅན་གང་དེ་བཞིན་གཤེགས་པའི་
སྐུ་རུས་པ་དང་། རྒྱུས་པ་དང་། རྐང་དང་། ཁྲག་ཅན་གྱི་མིའི་ལུས་སོ་ཞེས་རྫུན་ཟེར་ཞིང་། འཇིག་རྟེན་དང་འཐུན་པར་འཇུག་པ་ལས་ཕྱིར་ཕྱོགས་པའི་སེམས་ཅན་དེ་དག་ནི་འཇིག་རྟེན་ན་མི་སྡུག་པའི་སྐྱོན་ཅན་དུ་འགྱུར་
རོ། །ད་དུང་ཡང་སེམས་ཅན་དེ་དག་ནི་ཡན་ལག་ཐམས་ཅད་མ་ཚང་ཞིང་ཁ་མནམ་པ་འཇིག་རྟེན་དང་འཐུན་པར་འཇུག་པ་ལས་ཐམས་ཅད་ཕྱིར་ཕྱོགས་པར་འགྱུར་རོ། །མ་འོངས་པ་ན་ཡང་སེམས་ཅན་གང་ཁ་མི་གཙང་བའི་
དྲི་མི་ཞིམ་པར་མནམ་པ་ཞ་བོ་གཞོགས་ཉམས་པ་ཡན་ལག་ཐམས་ཅད་མ་ཚང་བ་འཇིག་རྟེན་དང་འཐུན་པར་འཇུག་པ་ལས་ཕྱིར་ཕྱོགས་པའི་སེམས་ཅན་དེ་དག་ནི་གཞན་མ་ཡིན་ཏེ། བཙུན་པ་གང་པོ་འཇིག་རྟེན་ཐམས་ཅད་
ཀྱིས་སྤངས་པའོ། །སེམས་ཅན་ཐམས་ཅད་ཀྱི་ལས་སྔར་བཤད་པ་རྣམས་ཤིན་དུ་ཡ་ང་བ་ཡིན་ཏེ། གལ་ཏེ་མིའི་སྐྱེ་གནས་སུ་སྐྱེ་བ་ཐོབ་ན་ཡང་འཇིག་རྟེན་གྱི་སྡུག་བསྔལ་བསམ་གྱིས་མི་ཁྱབ་པ་ཐམས་ཅད་འཐོབ་པར་
འགྱུར་རོ། །དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་ཀྱི་སྡུག་བསྔལ་གྱི་སྐལ་བ་ཅན་དུ་འགྱུར་རོ། །རང་གིས་བྱས་པས་མ་རིག་པ་ཡུན་རིང་པོར་མྱོང་ཞིང་གནས་ཏེ། དེ་བཞིན་གཤེགས་པའི་ཡོན་ཏན་གྱི་
བདག་ཉིད་ཆེན་པོ་ལས་ཕྱིར་ཕྱོགས་པ་དེ་དག་ལ་དགེ་བ་ཡུངས་འབྲུ་ཙམ་ཡང་རྙེད་པར་དཀའོ། །ང་སྔོན་གང་དེ་བཞིན་གཤེགས་པ་མང་པོ་ལ་མཉེས་པར་བྱས་པས་དེ་བཞིན་གཤེགས་པའི་ཆེ་བ་ཐོས་ནས། སེ་གོལ་

57-1-175b

གཏོགས་པའི་སྲིད་དུ་འཛིན་ན་ཡང་དགེ་བའི་རྩ་བ་དེས་སེམས་ཅན་དེ་དག་དབང་པོ་ཐུལ་བ་དང་། ཕྱུག་ཅིང་རིགས་ཆེན་པོར་འགྱུར་རོ། །ད་ལྟར་ཡང་སེམས་ཅན་གང་དབང་པོ་ཐུལ་ཅིང་བྲན་བཟའ་མང་པོའི་ཁྱིམ་བདག་
ཤིང་ས་ལ་ཆེན་པོ་ལྟ་བུ་དང་། བྲམ་ཟེའི་རིགས་ཆེན་པོར་གྱུར་པའི་སེམས་ཅན་དེ་དག་ནི་དེ་བཞིན་གཤེགས་པའི་སྙིང་པོ་རྣ་བ་ལ་རེག་པ་ཙམ་གྱིས་མཉེས་པར་བྱེད་ཅིང་བསོད་ནམས་ཀྱི་ལས་ཤིན་དུ་བྱེད་དོ། །མ་འོངས་
པ་ན་ཡང་སེམས་ཅན་གང་དེ་བཞིན་གཤེགས་པའི་སྙིང་པོ་ཐོས་ནས། དེ་བཞིན་ཉིད་དུ་སྒྲུབ་པ་དང་། མི་གང་བྲན་བཟའ་མང་ཞིང་རིགས་ཆེ་བའི་སེམས་ཅན་དེ་དག་ནི་གཞན་མ་ཡིན་ཏེ། བསོད་ནམས་བྱས་པའི་
སེམས་ཅན་དོན་དང་ལྡན་པ། ཡིད་དང་འཐད་པ། གཟུགས་དང་། མདོག་དང་། སྟོབས་དང་། སྙེམས་པ་ཕུན་སུམ་ཚོགས་པ། བློ་གྲོས་དང་། དྲན་པ་དང་། ཡིད་རྣོ་བར་ལྡན་པ་དབྱངས་ཡིད་དུ་འོང་ཞིང་མཐོང་ན་
དགའ་བ། རྒྱལ་པོ་དང་། བློན་པོ་དང་། རྒྱལ་བུ་དང་། འཁོར་ལོས་སྒྱུར་བ་དང་། དེ་བཞིན་དུ་དགེ་ཞིང་ང་རྒྱལ་མེད་པའི་སེམས་ཅན་མིག་གཉིད་ཐུལ་བ། བཤོར་བ་བག་ཡོད་པ། དེ་ལ་སོགས་པ་མཐོ་རིས་དང་། 
སའི་སྟེང་གི་ཕུན་སུམ་ཚོགས་པ་ལྷའི་དབང་པོ་དང་། ཚངས་པའི་དབང་པོ་དང་། འཇིག་རྟེན་སྐྱོང་བ་ལ་སོགས་པར་འགྱུར་རོ། །དེ་བཞིན་གཤེགས་པའི་སྙིང་པོ་ཐོས་པའི་བསོད་ནམས་ཀྱི་རྒྱུས་ནད་མེད་པ་
དང་། གཙེ་བ་མེད་པ་དང་། ཚེ་རིང་བ་དང་། འགྲོ་བ་ཐམས་ཅད་དགའ་བར་འགྱུར་རོ། །དེ་བཞིན་གཤེགས་པ་རྟག་པ་གཡུང་དྲུང་ཐེར་ཟུག་སྟེ། ཡོངས་སུ་མྱ་ངན་ལས་འདས་པ་ཡང་འཆི་བ་མེད་པར་
ཐོས་པས་ཐམས་ཅད་འབྱོར་ཅིང་ཡུན་རིང་དུ་སྲ་བ་དང་། རྟག་པར་འགྱུར་རོ། །སངས་རྒྱས་ནི་འཇིག་རྟེན་ཐམས་ཅད་དང་རྗེས་སུ་འཐུན་པར་འཇུག་པས་རོལ་པ་ཡིན་པར་ཤེས་ཤིང་། གང་དེ་བཞིན་གཤེགས་པ་

57-1-176a

འཁྲིག་པ་ལས་བྱུང་བ་མ་ཡིན་ནོ་ཞེས་སྟོན་པ་དེ་དག་ནི་ཡེ་ཤེས་དང་ཡོན་ཏན་རྙེད་པའི་བསོད་ནམས་ཀྱིས་བུ་མང་ཞིང་ཕ་མ་རིང་དུ་འཚོ་བ་རྙེད་པར་འགྱུར་རོ། །དེ་བཞིན་གཤེགས་པའི་སྙིང་པོ་རྟག་པ་
སེམས་ཅན་ཐམས་ཅད་ལ་ཡོད་པར་ཤེས་པའི་རྒྱུས་འཇིག་རྟེན་ན་བདེ་བའི་རྣམ་པའི་མཆོག་རྣམས་དང་། ཕུན་སུམ་ཚོགས་པ་ཇི་སྙེད་ཡོད་པ་ཐམས་ཅད་རྙེད་པར་འགྱུར་རོ། །དེ་བཞིན་གཤེགས་པའི་སྙིང་པོ་རྟག་པར་
ཐོས་པས་སྔོན་བྱུང་བ་དང་། ད་ལྟར་དང་། མ་འོངས་པ་དང་། དུས་གསུམ་དུ་ཡང་ཕུན་སུམ་ཚོགས་པ་ཐམས་ཅད་དང་། མཐོ་རིས་དང་། སའི་སྟེང་གི་བདེ་བ་ཐམས་ཅད་རྟག་ཏུ་ཐོབ་པར་འགྱུར་རོ། །དེ་བཞིན་གཤེགས་
པའི་སྙིང་པོ་ལ་བརྙས་པའི་རྒྱུས་ནི་འགྲོ་བ་ལྔའི་གནས་ཐམས་ཅད་ན་ཡན་ལག་མ་ཚང་བར་འགྱུར་རོ། །འཁོར་བ་སྡུག་བསྔལ་བར་འཁྱམ་པ་ན་སྡུག་བསྔལ་བ་མྱོང་བར་འགྱུར་རོ། །སེམས་ཅན་གང་སངས་རྒྱས་ལ་
བསྙེན་བཀུར་བྱས་པ་དང་། སེམས་ཅན་གང་ཕན་པར་སྟོན་ཅིང་བདག་ཉིད་དེ་བཞིན་གཤེགས་པའི་སྙིང་པོ་ལ་སེམས་པ་དེ་དག་ནི་དེ་བཞིན་གཤེགས་པའི་སྙིང་པོ་ཐོས་པ་རྙེད་པར་འགྱུར་རོ། །བཙུན་པ་གང་པོ་
སངས་རྒྱས་མང་པོ་ལས་ཕྱིར་ཕྱོགས་པའི་སེམས་ཅན་གང་དེ་བཞིན་གཤེགས་པའི་སྙིང་པོ་ཐོས་ན་སྨོད་པའི་སེམས་ཅན་དེ་དག་ནི་བདག་ཉིད་ཀྱི་ས་བོན་བསྲེགས་ཤིང་ཀྱེ་མ་དུས་གསུམ་དུ་བསམ་གྱིས་
མི་ཁྱབ་པར་མྱ་ངན་དུ་བྱ་བ་ཡིན་ནོ། །ཆོས་སྟོན་པར་འདོད་པས་འདི་ལྟར་བསྟན་ཏེ། དེ་བཞིན་གཤེགས་པ་རྟག་པ་དང་། ཡང་དག་པ་ཉིད་དུ་བསྔགས་པར་བྱའོ། །དེ་ལྟར་མི་སྟོན་ཏེ། དེ་བཞིན་གཤེགས་པའི་
སྙིང་པོ་འདོར་བ་དེ་དག་ནི་དཔེར་ན། གདོལ་པ་ལ་རྒྱལ་པོའི་བལ་གླང་ལྟ་བུར་དེ་ལ་སེང་གེའི་ཁྲི་ཡང་མི་འོས་སོ། །སངས་རྒྱས་ཐམས་ཅད་ཀྱིས་ཤིན་དུ་ནན་ཏན་དུ་བཙལ་ཀྱང་དེ་བཞིན་གཤེགས་པའི་སྙིང་པོ་སྐྱེས་

57-1-176b

པ་མ་བརྙེས་ཏེ། སེམས་ཅན་ཐམས་ཅད་ལ་སངས་རྒྱས་ཀྱི་དབྱིངས་མ་སྐྱེས་པ་མཚན་དང་དཔེ་བྱད་བཟང་པོས་བརྒྱན་པ་ཡོད་དོ། །སངས་རྒྱས་ཐམས་ཅད་ཀྱིས་ཤིན་དུ་ནན་ཏན་དུ་བདག་ཉིད་ཀྱིས་བཙལ་ཀྱང་དབྱིངས་མ་
བྱུང་བ་མ་བརྙེས་ཏེ། སེམས་ཅན་ཐམས་ཅད་ལ་མ་བྱུང་བའི་དབྱིངས་སངས་རྒྱས་ཀྱི་དབྱིངས་མཚན་དང་། དཔེ་བྱད་བཟང་པོ་མཐའ་ཡས་པས་བརྒྱན་པའི་དབྱིངས་ཡོད་དོ། །སངས་རྒྱས་ཐམས་ཅད་ཀྱིས་ཤིན་དུ་ནན་
ཏན་དུ་བདག་ཉིད་ཀྱིས་བཙལ་ཀྱང་དབྱིངས་མི་རྟག་པ་མ་བརྙེས་ཏེ། སེམས་ཅན་ཐམས་ཅད་ལ་རྟག་པའི་དབྱིངས་སངས་རྒྱས་ཀྱི་དབྱིངས་མཚན་དང་དཔེ་བྱད་བཟང་པོ་མཐའ་ཡས་པས་བརྒྱན་པའི་དབྱིངས་ཡོད་དོ། །
སངས་རྒྱས་ཐམས་ཅད་ཀྱིས་ཤིན་དུ་ནན་ཏན་དུ་བཙལ་ཀྱང་དེ་བཞིན་གཤེགས་པའི་སྙིང་པོ་ཐེར་ཟུག་མ་ཡིན་པ་མ་བརྙེས་ཏེ། སེམས་ཅན་ཐམས་ཅད་ལ་ཐེར་ཟུག་གི་དབྱིངས་སངས་རྒྱས་ཀྱི་དབྱིངས་མཚན་དང་། 
དཔེ་བྱད་བཟང་པོ་མཐའ་ཡས་པས་བརྒྱན་པའི་དབྱིངས་ཡོད་དོ། །སངས་རྒྱས་ཐམས་ཅད་ཀྱིས་ཤིན་དུ་ནན་ཏན་དུ་བཙལ་ཀྱང་། དེ་བཞིན་གཤེགས་པའི་སྙིང་པོ་གཡུང་དྲུང་མ་ཡིན་པ་མ་བརྙེས་ཏེ། སེམས་ཅན་
ཐམས་ཅད་ལ་གཡུང་དྲུང་གི་དབྱིངས་སངས་རྒྱས་ཀྱི་དབྱིངས་མཚན་དང་། དཔེ་བྱད་བཟང་པོ་མཐའ་ཡས་པས་བརྒྱན་པའི་དབྱིངས་ཡོད་དོ། །སངས་རྒྱས་ཐམས་ཅད་ཀྱིས་ཤིན་དུ་ནན་ཏན་དུ་བཙལ་ཀྱང་དེ་བཞིན་
གཤེགས་པའི་སྙིང་པོ་ལ་ནད་མ་བརྙེས་ཏེ། སེམས་ཅན་ཐམས་ཅད་ལ་ནད་མེད་པའི་དབྱིངས་མཚན་དང་དཔེ་བྱད་བཟང་པོ་མཐའ་ཡས་པས་བརྒྱན་པའི་དབྱིངས་ཡོད་དོ། །སངས་རྒྱས་ཐམས་ཅད་ཀྱིས་ཤིན་
ཏུ་ནན་ཏན་དུ་བཙལ་ཀྱང་དེ་བཞིན་གཤེགས་པའི་སྙིང་པོ་ལ་རྒ་ཤི་མ་བརྙེས་ཏེ། སེམས་ཅན་ཐམས་ཅད་ལ་རྒ་ཤི་མེད་པའི་དབྱིངས་སངས་རྒྱས་ཀྱི་དབྱིངས་མཚན་དང་དཔེ་བྱད་བཟང་པོ་མཐའ་ཡས་པས་བརྒྱན་

57-1-177a

པའི་དབྱིངས་ཡོད་དོ། །སངས་རྒྱས་ཐམས་ཅད་ཀྱིས་ཤིན་དུ་ནན་ཏན་དུ་བཙལ་ཀྱང་དེ་བཞིན་གཤེགས་པའི་སྙིང་པོ་འཇིགས་པ་མ་བརྙེས་ཏེ། མི་འཇིགས་པའི་དབྱིངས་སངས་རྒྱས་ཀྱི་དབྱིངས་
སེམས་ཅན་ཐམས་ཅད་ལ་མཚན་དང་། དཔེ་བྱད་བཟང་པོ་མཐའ་ཡས་པས་བརྒྱན་པའི་དབྱིངས་ཡོད་དོ། །སངས་རྒྱས་ཐམས་ཅད་ཀྱིས་ཤིན་དུ་ནན་ཏན་དུ་བཙལ་ཀྱང་། དེ་བཞིན་གཤེགས་པའི་སྙིང་པོ་གཞིག་
ཏུ་རུང་བ་མ་བརྙེས་ཏེ། མི་ཤིགས་པའི་དབྱིངས་སངས་རྒྱས་ཀྱི་དབྱིངས་སེམས་ཅན་ཐམས་ཅད་ལ་མཚན་དང་དཔེ་བྱད་བཟང་པོ་མཐའ་ཡས་པས་བརྒྱན་པའི་དབྱིངས་ཡོད་དོ། །སངས་རྒྱས་ཐམས་ཅད་ཀྱིས་
ཤིན་དུ་ནན་ཏན་དུ་བཙལ་ཀྱང་དེ་བཞིན་གཤེགས་པའི་སྙིང་པོ་ལ་དྲི་མ་མ་བརྙེས་ཏེ། སེམས་ཅན་ཐམས་ཅད་ལ་དྲི་མ་མེད་པའི་དབྱིངས་སངས་རྒྱས་ཀྱི་དབྱིངས་མཚན་དང་དཔེ་བྱད་བཟང་པོ་མཐའ་ཡས་པས་བརྒྱན་པའི་དབྱིངས་
ཡོད་དོ། །དཔེར་ན་ཆུ་དང་འབྲུ་མར་འདྲེས་པ་མི་དམིགས་པ་དེ་བཞིན་དུ་སངས་རྒྱས་ཀྱི་དབྱིངས་ཀྱང་ཉོན་མོངས་པ་བྱེ་བས་གཡོགས་མོད་ཀྱི། ཉོན་མོངས་པ་དང་སངས་རྒྱས་ཀྱི་དབྱིངས་འདྲེས་པར་གྱུར་པའི་གནས་
མེད་དོ། །དབྱིངས་ཀྱང་ཉོན་མོངས་པ་བྱེ་བའི་ནང་ན་འདུག་མོད་ཀྱི། བུམ་པའི་ནང་ན་མར་མེ་འདུག་པ་བཞིན་དུ་བུམ་པ་བཅག་ན་མར་མེ་རབ་ཏུ་འབར་ཞིང་མཛེས་ཏེ། དེ་བཞིན་གཤེགས་པའི་སྙིང་པོ་སྟོན་པར་བྱེད་
པ་ནི་རྫོགས་པའི་སངས་རྒྱས་སོ། །ཡང་ན་རྫོགས་པའི་སངས་རྒྱས་ཀྱི་ཉན་ཐོས་ནི་བུམ་པ་ལྟ་བུ། ཉོན་མོངས་པ་བྱེ་བ་ལྟ་བུ་ནི་མར་མེ་ལྟ་བུ། དེ་བཞིན་གཤེགས་པའི་སྙིང་པོ་སྟོན་པར་བྱེད་པ་ནི་ཉོན་མོངས་པ་དང་
བཅས་པ་འམ། ཉོན་མོངས་པ་མེད་པ་འམ། སུ་ཡང་རུང་སྟེ་དེ་ཉིད་རྫོགས་པའི་སངས་རྒྱས་ཤེས་བྱའོ། །བཙུན་པ་གང་པོ་སྒྲོལ་བ་ལམ་དུ་ཞུགས་པས་ཉོན་མོངས་པ་བྱེ་བ་བུམ་པ་ལྟར་བཅག་ན། ཕྱིས་གདོད་དབྱིངས་

57-1-177b

ཐམས་ཅད་ལག་མཐིལ་ན་སྐྱུ་རུ་རའི་འབྲུ་བཞིན་དུ་མཐོང་ངོ་། །དཔེར་ན། ཟླ་བ་དང་། ཉི་མ་སྤྲིན་གྱིས་གཡོགས་ན་སའི་སྟེང་དུ་མི་སྣང་ཞིང་སྤྲིན་ལས་གྲོལ་ན། ཟླ་བ་དང་། ཉི་མ་སའི་སྟེང་དུ་སྣང་བ་དེ་བཞིན་དུ། དེ་བཞིན་
གཤེགས་པའི་སྙིང་པོ་ཉོན་མོངས་པ་བྱེ་བས་ཁེབས་ནི་མི་སྣང་ངོ་། །ཟླ་བ་དང་ཉི་མ་བཞིན་དུ་ཉོན་མོངས་པ་ལས་གྲོལ་ན། སངས་རྒྱས་ཀྱི་དབྱིངས་ཀྱི་ཉི་མ་དང་ཟླ་བ་ཡང་སྣང་ངོ་། །ཀྱེ་མ་བཙུན་པ་གང་པོ་ཁྱོད་ནི་སྦྲང་
བུའི་སྤྱད་པ་ལྟ་བུ་ལ་སྤྱོད་དེ། ཆོས་ཀྱི་གཏམ་སྟོན་མི་ཤེས་སོ། །སྦྲང་བུ་ཡང་སྒྲ་འབྱིན་ན་དེ་ཡང་ཤེས་པ་ཡིན་ནམ། ལན་གཉིས་སུ་མ་སྨྲ་བར་སྦྲང་བུ་ཁྱོད་མྱུར་དུ་སོང་ཤིག །དེ་ནས་གནས་བརྟན་མཛེས་དགས་བཅོམ་
ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། སོར་མོའི་ཕྲེང་བ་ལ་འདི་སྐད་ཅེས་སྨྲས་སོ། །ལེགས་སོ་ལེགས་སོ། །སོར་མོའི་ཕྲེང་བ་ཁྱོད་ཀྱིས་འཐུན་པ་དང་རྗེས་སུ་དགོངས་པའི་བསོད་ནམས་བྱས་པ་ང་
ཡང་དགའོ། །ད་སངས་རྒྱས་ཀྱི་གཟུགས་འདོད་པར་གྱིས་ལ་བྲམ་ཟེ་ཁྱོད་དེ་ལྟར་ཤེས་པར་གྱིས་ཤིག །དེ་ནས་སོར་མོའི་ཕྲེང་བས། མཛེས་དགའ་ལ་སླར་འདི་སྐད་ཅེས་སྨྲས་སོ། །བཙུན་པ་མཛེས་དགའ་
ཁྱོད་ནི་བྱད་བཞིན་བཟང་བའི་མཆོག་ཡིན་ན། འཇིག་རྟེན་ན་རབ་ཏུ་བྱད་བཞིན་བཟང་བ་གང་ཇི་ལྟར་ན་མི་རྣམས་ཀྱི་གཟུགས་དང་མཛེས་པ་བཟང་པོར་འགྱུར། མྱུར་དུ་སྨྲོས་ཏེ་ངའི་ཐེ་ཙོམ་ཆོད་ཅིག །དེ་ནས་སོར་མོའི་
ཕྲེང་བ་ལ་མཛེས་དགའས་སྨྲས་པ། ལག་པ་རབ་བཀྲུས་སོར་མོ་བཅུ་ཡི་ཐལ་སྦྱར་ཏེ། །དེ་བཞིན་གཤེགས་ཀྱི་ཞབས་ལ་ཕྱག་འཚལ་ཞིང་། །རྟག་ཏུ་ནད་པའི་རིམ་གྲོ་བྱེད་པ་ནི། །དེ་ལས་སྐྱེས་བུ་བྱད་བཞིན་བཟང་
པོར་འགྱུར། །སོར་མོའི་ཕྲེང་བས་མཛེས་དགའ་ལ་སླར་སྨྲས་པ། དེ་བཞིན་གཤེགས་པ་ལ་རུས་པ་འང་མེད། རྒྱུས་པ་ཡང་མེད་ན། སྐུ་གདུང་དང་རིང་བསྲེལ་ལྟ་ག་ལ་ཡོད་དེ། རིང་བསྲེལ་མེད་པ་ཐབས་གྱི་མཆོག་

57-1-178a

ཆོས་ཀྱི་སྐུ་ནི་སངས་རྒྱས་བསམ་གྱིས་མི་ཁྱབ་པ་སྟེ། དེ་བཞིན་གཤེགས་པ་ནི་བསམ་གྱིས་མི་ཁྱབ་པའོ། །མ་དད་པ་རྣམས་དད་པ་བསྐྱེད་པའི་ཕྱིར་རིང་བསྲེལ་བཞག་པའི་ཐབས་མཛད་དེ། སངས་རྒྱས་ཀྱི་མཆོད་རྟེན་
བྱ་བའི་ཕྱིར་རིང་བསྲེལ་བཞག་གོ། །དེ་ནི་སངས་རྒྱས་ཀྱི་ཆོས་ཉིད་དེ། འཇིག་རྟེན་གྱི་ཚངས་པ་དང་། དབང་ཕྱུག་དང་། ཀཱ་ཏཱ་ཡའི་བུ་མོ་དང་། འགྲོ་སྐེམས་གཞོན་ནུའི་གཟུགས་ཁང་པ་དང་། སོ་ཕག་གི་ཁྱིམ་གྱི་གནས་སུ་ཆ་བྱད་བཅོས་
པའི་གཟུགས་རྣམ་པ་མང་པོ་བྱས་ཏེ་གཞག་པ་དེ་དག་སྐྱབས་མ་ཡིན་པར་བྱས་པ་ཡིན་ནོ། །དེ་བཞིན་གཤེགས་པའི་སྐུ་གདུང་དེ་ལྟར་ཐབས་ཡིན་པ་ཤེས་པ་དེ་ནི། འཇིག་རྟེན་ན་བྱད་བཞིན་བཟང་བའི་མི་ཡིན་ཏེ། ཐབས་ཀྱི་ཡེ་ཤེས་
རྩ་བ་དེས་གཟུགས་མཛེས་པར་འགྱུར་གྱི། རྟོག་པ་གཞན་ནི་བྱིས་པ་ལྟར་འཁྱམ་པ་ཡིན་ནོ། །མཛེས་དགའ་ཁྱོད་གཟུགས་བཟང་པོར་འགྱུར་བའི་སྒོ་ཡང་མི་ཤེས་སོ། །ཀྱེ་མ་བཙུན་པ་མཛེས་དགའ་ཁྱོད་ནི་སྦྲང་བུའི་སྤྱད་པ་
སྤྱོད་དེ། གཟུགས་འབྱུང་བའི་སྒོ་ཡང་མི་ཤེས་སོ། །སྦྲང་བུ་ཡང་གཟུགས་ཕུན་སུམ་ཚོགས་པ་ཡོད་ཀྱིས་སྦྲང་བུ་ལྟ་བུ་ཁྱོད་ཅང་མ་ཟེར་ཅིག །དེ་ནས་གནས་བརྟན་ཉེ་སྦྱོར་གྱིས། བཅོམ་ལྡན་འདས་ཀྱི་ཞབས་ལ་ཕྱག་འཚལ་
ནས་སོར་མོའི་ཕྲེང་བ་ལ་འདི་སྐད་ཅེས་སྨྲས་སོ། །ལེགས་སོ་ལེགས་སོ། །སོར་མོའི་ཕྲེང་བ་ཁྱོད་ཀྱིས་འཐུན་པ་དང་། རྗེས་སུ་དགོངས་པའི་བསོད་ནམས་བྱས་པ་ང་ཡང་དགའོ། །སོར་མོའི་ཕྲེང་བ་ད་འདུལ་བ་ལ་བརྩོན་
པར་གྱིས་ཤིག །དེ་ནས་སོར་མོའི་ཕྲེང་བས། གནས་བརྟན་ཉེ་སྦྱོར་ལ་སླར་སྨྲས་པ། བཙུན་པ་ཉེ་སྦྱོར་ཁྱོད་འདུལ་བ་འཛིན་པའི་མཆོག་ན། འཇིག་རྟེན་ན་འདུལ་བ་འཛིན་པ་གང་། ཇི་ལྟར་ན་འདུལ་བ་བཅའ་བ་ལ་མཁས་
པ་ཡིན། མྱུར་དུ་སྨྲོས་ཏེ་ངའི་ཐེ་ཙོམ་ཆོད་ཅིག །དེ་ནས་གནས་བརྟན་ཉེ་སྦྱོར་གྱིས། སོར་མོའི་ཕྲེང་བ་ལ་འདི་སྐད་ཅེས་སྨྲས་སོ། །སྡིག་པ་ཐམས་ཅད་མི་བྱ་སྟེ། །དགེ་བ་རྣམས་ནི་རྫོགས་པར་བྱ། །རང་གི་སེམས་

57-1-178b

ཀྱང་ཡོངས་སུ་གདུལ། །དེ་ནི་སངས་རྒྱས་རྣམས་ཀྱི་ཡང་། །འདུལ་བ་བསྡུས་པའི་སྙིང་པོའོ། །དེ་ནས་སོར་མོའི་ཕྲེང་བས། གནས་བརྟན་ཉེ་སྦྱོར་ལ་སླར་འདི་སྐད་ཅེས་སྨྲས་སོ། །སྐྱོན་ཆགས་པ་ཡ་མཚན་ཅན་
རྣམས་ཀྱི་ནོར་དང་། ཆོས་གོས་ལ་སོགས་པ་དང་། གླེགས་བམ་དང་། ལྷུང་བཟེད་དང་། ཆུ་ཚགས་དང་། སྐ་རགས་དང་། ཁབ་རྣམས་ཐམས་ཅད་དུ་ཐམས་ཅད་དགག་ཅིང་བླང་བར་བྱ་སྟེ། མི་བགྲུངས་པ་ཚར་གཅད་
ཅིང་ནན་ཏུར་བྱ་བ་ཡིན་ནོ། །དེ་ཐམས་ཅད་ནི་ཚུལ་ཁྲིམས་དང་ལྡན་པའི་ནོར་ཏེ། སྐྱོན་ཆགས་པའི་ཡ་མཚན་ཅན་གྱི་ནོར་མ་ཡིན་ནོ། །དཔེར་ན་རྒྱལ་པོའི་རལ་གྲི་གདོལ་པའི་ཁྱིམ་ན་འདུག་ན་རལ་གྲི་དེའི་མཐུས་ཕྲོགས་
ཀྱང་ཉེས་པ་མེད་དེ། དེ་ནི་གདོལ་པའི་ནོར་མ་ཡིན་གྱི་རྒྱལ་པོའི་དཀོར་རོ། །དེ་བཞིན་དུ་དེ་ནི་ཚུལ་ཁྲིམས་དང་ལྡན་པའི་ནོར་ཏེ། བཟུང་ནས་ནན་གྱིས་ཁྱེར་བ་དེ་ནི། འཇིག་རྟེན་ན་འདུལ་བ་འཛིན་པ་སྟེ། དེ་ལ་ཉེས་བྱས་
ཙམ་གྱི་ལྟུང་བ་ཡང་མེད་དོ། །ཆོ་ག་དང་མི་ལྡན་པ་ཡང་མ་ཡིན་ཏེ། དེ་ནི་དེ་བཞིན་གཤེགས་པའི་བཀའ་རྫོགས་པའོ། །དེ་བཞིན་གཤེགས་པ་ནི་རྟག་ཏུ་སེམས་ཅན་ཐམས་ཅད་ལ་སྒྲ་གཅན་ཟིན་དང་མཚུངས་པར་གཟིགས་
པའོ། །ཀྱེ་མ་བཙུན་པ་ཉེ་སྦྱོར་ནི་སྦྲང་བུའི་སྤྱད་པ་ལྟ་བུ་སྤྱོད་དེ། འདུལ་བ་བསྡུས་པའི་སྙིང་པོ་མི་ཤེས་སོ། །སྦྲང་བུ་ཡང་བྱ་བ་ཤེས་ཀྱིས་སྦྲང་བུ་ལྟ་བུ་ཁྱོད་ཅང་མ་ཟེར་ཅིག །དེ་ནས་འཇམ་དཔལ་གཞོན་ནུར་གྱུར་པས། 
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། སོར་མོའི་ཕྲེང་བ་ལ་འདི་སྐད་ཅེས་སྨྲས་སོ། །ལེགས་སོ་ལེགས་སོ། །སོར་མོའི་ཕྲེང་བ་ཁྱོད་ཀྱིས་འཐུན་པ་དང་རྗེས་སུ་དགོངས་པའི་བསོད་ནམས་
བྱས་པ་ང་ཡང་དགའོ། །ད་ནི་སྟོང་པ་ཆེན་པོ་ཅི་ཡང་མེད་པ་བསྒོམ་པར་བྱའོ། །དེ་ནས་སོར་མོའི་ཕྲེང་བས། འཇམ་དཔལ་གཞོན་ནུར་གྱུར་པ་ལ་སླར་འདི་སྐད་ཅེས་སྨྲས་སོ། །འཇམ་དཔལ་ཁྱོད་སྟོང་པ་ཆེན་པོ་མཐོང་

57-1-179a

བའི་མཆོག་ན། འཇིག་རྟེན་ན་སྟོང་པ་མཐོང་བ་གང་ཡིན། སྟོང་པ་སྟོང་པ་ཞེས་བྱ་བའི་དོན་ཅི། ཤེས་པ་ཆེན་པོ་དང་ལྡན་པ་མྱུར་དུ་སྨྲོས་ཏེ་ངའི་ཐེ་ཙོམ་མྱུར་དུ་ཆོད་ཅིག །དེ་ནས་འཇམ་དཔལ་གཞོན་
ནུར་གྱུར་པས། སོར་མོའི་ཕྲེང་བ་ལ་ཚིགས་སུ་བཅད་པས་སྨྲས་པ། སངས་རྒྱས་ནམ་མཁའ་ལྟ་བུ་སྟེ། །ནམ་མཁའ་མཚན་ཉིད་མེད་པའོ། །སངས་རྒྱས་ནམ་མཁའ་ལྟ་བུ་སྟེ། །ནམ་མཁའ་མཚན་མ་མེད་
ལས་སྐྱེས། །སངས་རྒྱས་ནམ་མཁའ་ལྟ་བུ་སྟེ། །ནམ་མཁའ་གཟུགས་མེད་གྱུར་པའོ། །ཆོས་རྣམས་ནམ་མཁའ་ལྟ་བུ་སྟེ། །དེ་བཞིན་གཤེགས་པ་ཆོས་ཀྱི་སྐུ། །ཡེ་ཤེས་ནམ་མཁའ་ལྟ་བུ་སྟེ། །དེ་
བཞིན་གཤེགས་པ་ཡེ་ཤེས་སྐུ། །གཟུང་དུ་མེད་ཅིང་རེག་ཏུ་མེད། །ཆགས་མེད་ཡེ་ཤེས་དེ་བཞིན་གཤེགས། །ཐར་པ་ནམ་མཁའ་ལྟ་བུ་སྟེ། །ནམ་མཁའ་ལ་ཡང་མཚན་ཉིད་མེད། །ཐར་པ་སངས་
རྒྱས་དེ་བཞིན་གཤེགས། །སྟོང་པ་ཅི་ཡང་མེད་པ་དག །སོར་ཕྲེང་ཁྱོད་ཀྱིས་ག་ལ་ཤེས། །དེ་ནས་སོར་མོའི་ཕྲེང་བས། འཇམ་དཔལ་གཞོན་ནུར་གྱུར་པ་ལ་སླར་འདི་སྐད་ཅེས་སྨྲས་སོ། །འདི་ལྟ་སྟེ་
དཔེར་ན། སྤྲིན་ཆེན་པོ་ལས་ཆར་རབ་ཏུ་བབ་པ་དང་། སྐྱེས་བུ་བྱིས་པའི་རང་བཞིན་ཅན་གྱིས། སེར་བའི་འབྲུ་བླངས་ཏེ། ནོར་བུ་རིན་པོ་ཆེ་བཻ་དཱུརྱར་བསམས་ནས། ཁྱིམ་དུ་ཁྱེར་བ་དང་། ཧ་ཅང་གྲང་ཆེས་ནས་
གཟུང་མ་ནུས་ཏེ་གཏེར་དུ་བྱའོ་སྙམ་ནས། བུམ་པའི་ནང་དུ་ལེགས་པར་བཅུག་པ་དང་། སེར་བའི་རིལ་བུ་དེ་ཞུ་བར་མཐོང་ནས། སྟོང་པའོ་སྙམ་སྟེ་ཅང་མི་ཟེར་བར་གྱུར་པ་དེ་བཞིན་དུ་བཙུན་པ་འཇམ་
དཔལ་ཤིན་དུ་སྟོང་པ་ཉིད་ལ་བསྒོམས་ཤིང་། སྟོང་པར་ཟབ་ཏུ་བསམས་པས་ཆོས་ཐམས་ཅད་ཞིག་པ་མི་ཟད་པར་མཐོང་ངོ་། །ཐར་པ་སྟོང་པ་མ་ཡིན་པ་ལ་ཡང་སྟོང་པར་མཐོང་ཞིང་རྟོག་གོ། །འདི་ལྟ་སྟེ་དཔེར། 

57-1-179b

ན། སེར་བའི་རིལ་བུ་ལ་ནོར་བུ་སྙམ་དུ་བསམས་ནས། ནོར་བུ་ཡང་སྟོང་པར་བསྒོམ་པ་དེ་བཞིན་དུ། ཁྱོད་ཀྱང་སྟོང་པ་མ་ཡིན་པའི་ཆོས་ལ་སྟོང་པར་སེམས་ཏེ། ཆོས་སྟོང་པ་མཐོང་ནས་སྟོང་པ་མ་ཡིན་པའི་ཆོས་
ལ་ཡང་སྟོང་པར་འཇིག་པར་བྱེད་དོ། །སྟོང་པའི་ཆོས་ཀྱང་གཞན། སྟོང་པ་མ་ཡིན་པའི་ཆོས་རྣམས་ཀྱང་གཞན་ཏེ། སེར་བའི་རིལ་བུ་ལྟ་བུར་ཉོན་མོངས་པ་བྱེ་བ་ནི་སྟོང་པའོ། །སེར་བའི་རིལ་བུ་ལྟ་བུར་མི་
དགེ་བའི་ཕྱོགས་ཀྱི་ཆོས་རྣམས་ནི་མྱུར་དུ་འཇིག་གོ། །ནོར་བུ་བཻ་དཱུརྱ་བཞིན་དུ་སངས་རྒྱས་ནི་རྟག་པ་སྟེ། ཐར་པའི་མཐའ་ཡང་ནོར་བུ་བཻ་དཱུརྱ་བཞིན་ནོ། །ནམ་མཁའ་ཡང་སངས་རྒྱས་རྣམས་ཀྱི་གཟུགས་ཡིན་ཏེ། 
ཉན་ཐོས་དང་། རང་སངས་རྒྱས་ཐམས་ཅད་ཀྱི་གཟུགས་མེད་པ་ཡིན་ནོ། །སངས་རྒྱས་ཀྱི་ཐར་པ་ཡང་གཟུགས་མེད་པ་ཡིན་ཏེ། ཉན་ཐོས་དང་། རང་སངས་རྒྱས་རྣམས་ཀྱི་ཐར་པ་གཟུགས་མེད་པ་ཡིན་ན། 
ཇི་ལྟར་ཐར་པའི་མཚན་ཉིད་སྟོང་པ་ཞེས་བྱ། དབྱེ་བ་མེད་པའི་འདུ་ཤེས་སུ་མ་བྱེད་ཅིག །འཇམ་དཔལ་གང་གྲོང་ཁྱེར་བརྩིགས་པའི་ཁྱིམ་སྟོང་པ་ནི་མི་མེད་པས་སྟོང་ངོ་། །བུམ་པ་ནི་ཆུ་མེད་པས་སྟོང་ངོ་། །
ཀླུང་ནི་ཆུ་མི་འབབ་པས་སྟོང་ངོ་། །ཅི་གྲོང་གི་བར་སྐབས་ཁྱིམ་མེད་པ་ལ་སྟོང་པ་སྟོང་པ་ཞེས་བྱའམ། ཅི་ཁྱིམ་ཐམས་ཅད་སྟོང་པ་ཡིན་ནམ། ཐམས་ཅད་སྟོང་པ་མ་ཡིན་གྱི། མི་མེད་པས་སྟོང་པ་ཞེས་བྱའོ། །
ཅི་བུམ་པ་ཐམས་ཅད་སྟོང་པ་ཡིན་ནམ། ཐམས་ཅད་སྟོང་པ་མ་ཡིན་གྱི། ཆུ་མེད་པས་སྟོང་པ་ཞེས་བྱའོ། །ཅི་ཀླུང་ཐམས་ཅད་སྟོང་པ་ཡིན་ནམ། ཐམས་ཅད་སྟོང་པ་མ་ཡིན་གྱི། ཆུ་མི་འབབ་པའི་ཕྱིར་སྟོང་པ་
ཞེས་བྱ་སྟེ། དེ་བཞིན་དུ་ཐར་པ་ཐམས་ཅད་ཀྱིས་སྟོང་པ་མ་ཡིན་གྱི། ཉེས་པ་ཐམས་ཅད་དང་བྲལ་བའི་ཕྱིར་ཐར་པ་སྟོང་པ་ཞེས་བྱའོ། །སངས་རྒྱས་བཅོམ་ལྡན་འདས་ནི་སྟོང་པ་མ་ཡིན་ཏེ། ཉེས་པ་ཐམས་ཅད་

57-1-180a

དང་བྲལ་ཞིང་ཉོན་མོངས་པ་བྱེ་བའི་མི་དང་། ལྷ་མེད་པའི་ཕྱིར་སྟོང་པ་ཞེས་བྱའོ། །ཀྱེ་མ་བཙུན་པ་འཇམ་དཔལ་ནི་སྦྲང་བུའི་སྤྱད་པ་སྤྱོད་དེ། སྟོང་པ་དང་མི་སྟོང་པའི་དོན་དེ་ཁོ་ན་མི་ཤེས་སོ། །གཅེར་བུ་པ་
ཡང་ཐམས་ཅད་སྟོང་པར་སྒོམ་སྟེ། གཅེར་བུ་པའི་སྦྲང་མ་ཁྱོད་ཅང་མ་ཟེར་ཅིག །དེ་ནས་འཇམ་དཔལ་གཞོན་ནུར་གྱུར་པས། སོར་མོའི་ཕྲེང་བ་ལ་སླར་འདི་སྐད་ཅེས་སྨྲས་སོ། །སོར་མོའི་ཕྲེང་བ་ཁྱོད་འབྲོག་དགོན་པ་ན་སྟག་
བཞིན་དུ་ཉན་ཐོས་ཐམས་ཅད་གསོད་ན། དེ་ལྟར་དེ་བཞིན་གཤེགས་པའི་སྲས་རྣམས་ལ་མ་བརྙས་ཤིག །སྦྲང་བུ་ཁྱོད་སུ་ཞིག་དེ་ནས་སོར་མོའི་ཕྲེང་བས། འཇམ་དཔལ་གཞོན་ནུར་གྱུར་པ་ལ་སླར་འདི་སྐད་ཅེས་སྨྲས་
སོ། །དཔེར་ན། འབྱམ་པོ་ཡི་དགས་ལྟ་བུར་བཀྲེན་པ་དག་ལམ་དུ་ཞུགས་ན། སྟག་གི་དྲི་མནམ་པ་ཙམ་གྱིས་ཀུན་དུ་འབྲོས་པ་དེ་བཞིན་དུ་ཉན་ཐོས་རྣམས་ཀྱང་ཐེག་པ་ཆེན་པོ་མི་ཤེས་པས་འབྱམ་པོ་ལྟ་བུར་བྱང་ཆུབ་སེམས་དཔའི་
དྲི་མནམ་ན་ཀུན་དུ་འབྲོས་སོ། །དཔེར་ན། སེང་གེའི་རྒྱལ་པོས་རི་ཁྲོད་ནས་སེང་གེའི་མཐུ་རྩལ་གྱིས་སྒྲ་བསྒྲགས་ན། སེང་གེའི་སྒྲ་ཐོས་པས་རི་དགས་དང་ཝ་ལ་སོགས་པ་ཐམས་ཅད་མི་འཚོ་ཞིང་འཆི་བར་འགྱུར་བ་དེ་བཞིན་དུ། 
བྱང་ཆུབ་སེམས་དཔའ་སེང་གེའི་སྒྲ་བསྒྲགས་ཏེ། སེང་གེའི་མཐུ་རྩལ་གྱིས་རྣམ་པར་གནོན་པ་ན། བྱང་ཆུབ་སེམས་དཔའི་སྒྲ་ཐོས་ན། ཉན་ཐོས་དང་། རང་སངས་རྒྱས་ཐམས་ཅད་ལྡེམ་པོ་ངག་ལ་ཀུན་དུ་མྱོས་སོ། །ངས་
ཀྱང་རེ་ཞིག་ཝ་སྒྲ་ཕྱུང་ན་ཡང་ཉན་ཐོས་ཐམས་ཅད་ལན་ལྡོན་མི་ནུས་ན། གལ་ཏེ་སེང་གེའི་སྒྲ་ཕྱུང་ན་ཉན་ཐོས་རྣམས་ཇི་ལྟར་འགྱུར། དེ་ནས་འཇམ་དཔལ་གཞོན་ནུར་གྱུར་པས་སོར་མོའི་ཕྲེང་བ་ལ་སླར་འདི་སྐད་ཅེས་སྨྲས་
སོ། །སྦྲང་བུ་ལྟ་བུ་ཁྱོད་སུ་ཞིག །སོར་མོའི་ཕྲེང་བས་ཤིན་དུ་གཏུམ་པའི་ལས་བྱས་སོ། །ཁྱོད་ལྟ་བུ་ཡང་བྱང་ཆུབ་སེམས་དཔའ་ཡིན་དུ་ཟིན་ན། བདུད་སྡིག་ཅན་དག་ཅི་འདྲ། ཀྱེ་མ་འཇིག་རྟེན་རྣམས་ནི་བདག་ཉིད་མི་ཤེས་

57-1-180b

ཏེ། བདག་གི་ཉེས་པ་མི་མཐོང་གི། གཞན་གྱི་ཉེས་པ་མཐོང་ངོ་། །སོར་མོའི་ཕྲེང་བས་སྡིག་པ་ཇི་སྙེད་ཅིག་བྱས། དེ་ནས་སོར་མོའི་ཕྲེང་བས། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །ཀྱེ་མ་འཇིག་རྟེན་ན་དམ་པའི་
ཆོས་འཇིག་པའི་སྐྱེས་བུ་གཉིས་ཡོད་དེ། གང་ཤིན་དུ་སྟོང་པ་ཉིད་དུ་ལྟ་བ་དང་། གང་འཇིག་རྟེན་ན་བདག་དུ་སྨྲ་བ་འདི་གཉིས་ནི་དམ་པའི་ཆོས་འཇིག་པ་དང་། དམ་པའི་ཆོས་ཁས་འབུབ་པའོ། །ཀྱེ་མ་བཙུན་པ་འཇམ་དཔལ་ནི་སྡིག་
པ་དང་། མི་སྡིག་པ་མི་ཤེས་སོ། །ཀྱེ་མ་བྱང་ཆུབ་སེམས་དཔའི་སྤྱོད་པ་ཡང་མི་ཤེས་སོ། །ཀྱེ་མ་བྱང་ཆུབ་སེམས་དཔའ་སྟག་རྣམས་འཇིགས་པ་མེད་པའོ་སྙམ་དུ་སེམས་ན། ཀྱེ་མ་བཙུན་པ་འཇམ་དཔལ་ནི་སྦྲང་བུ་དང་། 
སེང་གེའི་བྱེ་བྲག་ཀྱང་མི་ཤེས་སོ། །བཙུན་པ་འཇམ་དཔལ་དེ་བཞིན་གཤེགས་པས་བསྔགས་པའི་བྱང་ཆུབ་སེམས་དཔའི་སྤྱོད་པ་ཉོན་ཅིག །དཔེར་ན། སྒྱུ་མའི་རྒྱལ་པོས་སྒྱུ་མ་ལ་འདུས་པའི་དཔུང་དུ་ཇི་ལྟར་གཅོད་པ་དང་། 
གཏུབ་པ་སྟོན་ཏེ་སྒྱུ་མ་བྱེད་པས་བཟའ་བ་དང་། རྙིས་པ་ཡང་སྟོན། སྒྱུ་མ་བྱེད་པ་རྣམ་པ་མང་པོ་སྒྱུ་མའི་མཆོག་བྱེད་པའི་སྒྱུ་མ་ཇི་ལྟ་བ་དེ་བཞིན་དུ། སངས་རྒྱས་རྣམས་ཀྱི་བསྟན་པ་ཡང་དེ་བཞིན་ཏེ། བྱང་ཆུབ་སེམས་
དཔའི་སྟག་རྣམས་ཀྱང་བདག་ཉིད་སྐྱེ་བ་དང་། ཡོངས་སུ་མྱ་ངན་ལས་འདའ་བ་ལྟ་བུར་སྒྱུ་མ་རྣམ་པ་མང་པོ་སྟོན་ཏོ། །ནད་ཀྱི་བསྐལ་པ་བར་མ་ལ་བདག་ལ་ནད་མེད་དོ་ཞེས་སེམས་ཅན་རྣམས་ན་བའི་ཕྱིར་ཟས་ཀྱི་མཆོག་
ཏུ་འགྱུར་རོ། །མེའི་བསྐལ་པ་བར་མ་ལས་སེམས་ཅན་རྣམས་སྲེག་ཅིང་རྟག་པར་འདུ་ཤེས་པའི་སེམས་ཅན་རྣམས་ལ་རྟག་པར་སྟོན་ཏོ། །མཚོན་གྱི་བསྐལ་པ་བར་མ་ལ་སེམས་ཅན་རྣམས་ཀྱི་ཕྱིར་བདག་གིས་
བསྟན་ཏོ་སྙམ་སྟེ། ཐམས་ཅད་མཚོན་དང་། ལྕགས་སུ་བྱས་ནས། སངས་རྒྱས་ཀྱིས་ཕན་ཚུན་དུ་གསོད་པ་བསྟན་ཀྱང་སེམས་ཅན་གཅིག་ལ་ཡང་གནོད་པར་མི་འགྱུར་ཏེ། དེ་དག་ནི་སྒྱུ་མ་སྤྲུལ་པ་བཞིན་ནོ། །སངས་

57-1-181a

རྒྱས་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱང་ཡུངས་འབྲུའི་སྦུ་གུར་འཇུག་སྟེ། སེམས་ཅན་གང་ལ་ཡང་གནོད་པར་མི་འགྱུར་རོ། །ཡང་དེ་ནས་ཕྱུང་སྟེ། གནས་ཇི་ལྟ་བ་བཞིན་དུ་
འཇོག་པར་ཡང་སྟོན་ཏོ། །རྒྱ་མཚོའི་ཆུ་དང་། ཆུའི་ཕུང་པོ་དང་། རིའི་ཕུང་པོ་དང་། རི་རབ་ལ་སོགས་པ་སངས་རྒྱས་ཀྱི་སྤུའི་ཁུང་བུ་གཅིག་ཏུ་འཇུག་ཀྱང་སེམས་ཅན་གཅིག་ལ་ཡང་གཙེས་པར་མི་འགྱུར་ཞིང་ཕྱིས་སོ་སོའི་
ཕྱོགས་སུ་འགོད་དོ། །རྐང་པའི་མཐེ་བོས་ཕྱོགས་བཅུའི་འཇིག་རྟེན་གྱི་ཁམས་གཡོ་བར་བྱས་ཀྱང་སེམས་ཅན་གཅིག་ལ་ཡང་གཙེ་བ་བྱས་པར་མི་འགྱུར་ཏེ། དེ་ནི་སངས་རྒྱས་རྣམས་ཀྱི་ཆོས་ཉིད་ཀྱི་མཛད་པའོ། །རྣམ་པ་
གང་དང་གང་གིས་སེམས་ཅན་ལ་ཕན་པར་འགྱུར་བ་བྲན་དང་སློབ་མར་ཡང་འགྱུར་རོ། །དེ་བཞིན་དུ་གྲོང་དང་། མི་དང་དེད་དཔོན་དང་། མདུན་ན་འདོན་དུའང་འགྱུར་རོ། །རྒྱལ་པོ་དང་། བློན་པོ་དང་། གཞོན་ནུ་དང་། གྲོང་
དཔོན་དང་། ཚོགས་ཐམས་ཅད་ཀྱི་ནང་དུ་ཡང་སེམས་ཅན་རྣམས་ལ་ཕན་པར་བྱ་བའི་ཕྱིར། བདག་ཉིད་འདུམ་པར་སྦྱར་བ་དང་འཐུན་པར་བྱེད་དོ། །ལྷ་ཐམས་ཅད་དུའང་འགྱུར་ཏེ། དེ་དག་གི་ལྟ་བ་བཟློག་པའི་ཕྱིར་
ཐམས་ཅད་དུ་སྐྱེ་བ་སྟོན་པས། དེའི་ཕྱིར་སྐྱེས་པའི་རབས་ཤེས་བྱའོ། །སྒྱུ་མ་བྱེད་པའི་སྒྱུ་མ་མཐོང་ན། ཀྱེ་མ་སྒྱུ་མ་བྱེད་པ་ནི་སྡིག་པ་སྟེ། གཅད་པ་དང་། གཏུབ་པ་བྱེད་ཅིང་གཞན་ལ་གསོད་དོ་ཞེས་ཚོགས་ཐམས་ཅད་ལ་
མི་བརྗོད་པ་དེ་བཞིན་དུ་སངས་རྒྱས་ཀྱང་འཇིག་རྟེན་ན་སྒྱུ་མ་བྱེད་པའི་རང་བཞིན་ཡིན་པར་བལྟ་སྟེ། དེ་བཞིན་དུ་ངས་སེམས་ཅན་རྣམས་བསད་པ་ཡང་ཤེས་པར་བྱའོ། །སྒྱུ་མ་བྱེད་པས་སྒྱུ་མ་བྱེད་པའི་སྐྱེས་བུ་ཇི་ལྟ་བ་དེ་
བཞིན་དུ་སྒྱུ་མ་སྤྲུལ་པ་ཉིས་སྟོང་དུ་གཅིག་མ་ཚང་བ་ཡང་དེ་ལྟ་བུས་འདུལ་བའི་དབང་གིས་སྒྱུ་མ་སྤྲུལ་ཏོ། །འཇམ་དཔལ་ཇི་ལྟར་མཚོན་གྱི་བསྐལ་པ་བར་མ་ལ་ངས་ཀྱང་བྱང་ཆུབ་སེམས་དཔའི་སྤྱོད་པའི་སྒྱུ་མ་འདི་དག་

57-1-181b

སྤྲུལ་ཏོ། །ཀྱེ་མ་བཙུན་པ་འཇམ་དཔལ་ནི་སྦྲང་བུ་ལྟ་བུའི་སྤྱད་པ་སྤྱོད་དེ། མིའི་གླང་པོ་ཆེ་ཤེས་ཀྱང་མི་འདོད་དོ། །ཤེས་ཀྱང་མི་འདོད་པ་དེ་ནི་སྦྲང་བུ་ལྟ་བུ་སྟེ་སྨད་པ་ཞེས་བྱའོ། །དེ་ནས་བཅོམ་ལྡན་འདས་ཐམས་ཅད་མཁྱེན་པ་
ཐམས་ཅད་གཟིགས་པས། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་སོར་མོའི་ཕྲེང་བས་ཇི་སྐད་ཟེར་བ་དེ་བཞིན་ཏེ། བྱང་ཆུབ་སེམས་དཔའི་སྤྱོད་པ་ནི་དེ་ལྟའོ། །འཇམ་
དཔལ་སོར་མོའི་ཕྲེང་བ་འདི་ནི་ཐ་མལ་པ་མ་ཡིན་ཏེ། དེ་ལྟ་བུས་འདུལ་བའི་དབང་གིས་བྱང་ཆུབ་སེམས་དཔའ་མིའི་གླང་པོ་ཆེས་བདག་ཉིད་དེ་ལྟར་སྤྲུལ་ཏོ། །འཇམ་དཔལ་ཡུད་ཙམ་ཞིག་སྡོད་ཅིག་དང་། སོར་མོའི་
ཕྲེང་བ་ཡང་ཁྱོད་དང་འདྲ་སྟེ། སོར་མོའི་ཕྲེང་བའི་བདག་ཉིད་ཆེན་པོ་ཤིན་དུ་རྒྱས་པར་བསྟན་གྱི། དེའི་གཏམ་བརྗོད་པ་ལས་སོར་མོའི་ཕྲེང་བའི་ཆེ་བ་ཤེས་པར་གྱིས་ཤིག །དེ་ནས་བཅོམ་ལྡན་འདས་ཀྱིས་སོར་མོའི་
ཕྲེང་བ་ལ་འདི་སྐད་ཅེས་བཀའ་སྩལ་ཏོ། །མིའི་གླང་པོ་ཆེ་སེམས་ཅན་ཐམས་ཅད་ལ་ཕན་པའི་དོན་དུ་བརྩོན་འགྲུས་བསྟན་པ་ལེགས་སོ་ལེགས་སོ། །བདག་ཉིད་མྱུར་དུ་དགྲ་བཅོམ་པ་ཐོབ་པར་གྱིས་ཤིག་དང་། དེའི་
ཡོན་ཏན་འདི་འདྲའོ། །དེའི་ལས་འདི་འདྲའོ། །བརྩོན་འགྲུས་འདི་འདྲའོ་ཞེས་སེམས་ཅན་ཐམས་ཅད་ལ་ཕན་པ་དང་། བདེ་བའི་ཕྱིར་བརྗོད་པར་བྱའོ། ། བམ་པོ་བཞི་པ། དེ་ནས་
བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་ཐམས་ཅད་ལ་ཕན་པ་དང་ཐུགས་བརྩེ་བའི་སླད་དུ་དགྲ་བཅོམ་པ་རང་གི་ལུས་འདི་ཉིད་ཀྱིས་ཐོབ་པར་
འཚལ་བའི་ཡོན་ཏན་འདི་འདྲ། ལས་འདི་འདྲ། བརྩོན་འགྲུས་འདི་འདྲའོ་ཞེས་སེམས་ཅན་ཐམས་ཅད་ལ་ཕན་པ་དང་བདེ་བའི་སླད་དུ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ནམ་ཕ་མ་

57-1-182a

ཕྲད་དེ། དུས་སུ་མའི་རུམ་དུ་བུ་ཆགས་མ་ཐག་ཏུ་ཕ་མ་དག་དགའ་བར་འགྱུར་རོ། །བདག་གིས་མྱོང་བའི་ཡོན་ཏན་གྱིས་ཐོབ་པས་བརྩོན་འགྲུས་དང་། གཟི་བརྗིད་གཞན་དུ་འགྱུར་རོ། །འཇིག་རྟེན་
ཀྱང་འབྱོར་པ་དང་། མོད་པར་འགྱུར། འཇིག་རྟེན་ཁྲག་ཁྲུག་མེད་པར་འགྱུར། རྒྱལ་པོ་ཡང་ཤིན་དུ་བདེ་བར་འགྱུར། མས་བསོད་ནམས་དམ་པའི་རྨི་ལམ་ཡང་རྙེད་དེ། ནམ་ཁྱེའུ་བཙས་པ་དེའི་ཚེ། རིགས་
འཕེལ་བར་འགྱུར་རོ་ཞེས་མི་མཛའ་བ་རྣམས་ཀྱང་ཤིན་དུ་བྱམས་པར་འགྱུར་རོ། །ནམ་ཁྱེའུ་དེ་ལོ་བདུན་ནམ། བརྒྱད་དམ། དགུ་ལོན་ནས། ཡི་གེའི་གྲར་ཞུགས་པའི་ཚེ་ཁྱིམ་ན་འཐབ་པ་དང་། རྩོད་པ་མི་འབྱུང་། 
བྲན་པོ་དང་བྲན་མོ་རྣམས་ཀྱང་དགའ་མགུ་རངས་པར་གྱུར་ནས། ཡང་དག་པའི་ལས་ཀྱིས་ཁྱིམ་དུ་འཕེལ་བར་བྱེད་དོ། །ནམ་ཁྱེའུ་དེ་ལོ་ཉི་ཤུ་ལོན་པ་དེའི་ཚེ་ཁྱིམ་དེའི་བ་ལང་དང་། མ་ཧེ་དང་། ལུག་ལ་སོགས་པ་རྐང་པ་བཞི་པ་
རྣམས་ཀྱང་འཐབ་པ་མེད་དེ། ཕ་མ་ལྟ་བུར་སྡུག་པར་འགྱུར་རོ། །བ་ཡང་ཞོ་བདམ་མོ། །ཁྱེའུ་དེ་ལ་འདོད་ཆགས་དང་། ཕྲག་དོག་དང་། འཚིག་པ་དང་། གཡོ་དང་། སྒྱུ་དང་། བརྫུན་སྨྲ་བ་དང་། ཚིག་རྩུབ་པོ་དང་། བྱིས་
པའི་ཚུལ་དང་། ཆོ་ག་མ་ཡིན་པ་མེད་ཅིང་མི་དགེ་བའི་ཕྱོགས་ཀྱི་བྱ་བ་ཐམས་ཅད་མི་འབྱུང་སྟེ། ཕ་མ་ལ་མཆོད་པ་དང་། སློབ་དཔོན་དང་། མཁན་པོ་ལ་མཆོད་པའི་སེམས་སྐྱེའོ། །རྒན་རབས་མཐོང་ན་ལག་པ་ཐལ་
མོ་སྦྱོར་རོ། །བར་མ་མཐོང་ན་པང་གིས་མཁྱུད་དེ་དམ་དུ་འཇུའོ། །ཁྱེའུ་དང་བུ་མོ་བདག་དང་འདྲ་བ་དང་ལྷན་ཅིག་ཏུ་བུས་པའི་རྩེད་མོ་རྩེ་ན་སྦྱིན་པ་དང་། རི་མོར་བྱ་བ་དང་། གཏོང་བ་སེམས་སོ། །ཕོངས་པ་ལ་བུ་བཞིན་
བྱེད་དོ། །བྱ་བ་ཀུན་ལ་ངོ་ཚ་ཤེས་ཏེ། འཇིགས་ཤིང་སྐྲག་པ་ཡིན། དམ་པའི་ཆོས་ཀྱི་བྱ་བ་ལ་མོས་ཀྱི། གར་དང་སྒྱུ་མ་བྱེད་པ་གཉིད་དང་སྙོམ་ལས་བྱེད་པ་མ་ཡིན། སངས་རྒྱས་མཐོང་བར་འདོད་ཅིང་རྟག་ཏུ་གླེགས་

57-1-182b

བམ་ཀློག །བསླབ་པ་ལ་སོགས་པ་བཟོ་རྣམ་པ་མང་པོ་ལ་དགའི། རྒྱན་པོ་དང་། རྩེད་མོ་དང་། ཆང་འཐུང་བ་ལ་དགའ་བ་མ་ཡིན། ལྷ་ལས་ལྷུར་བྱེད་པའི་སྐྱེ་བོ་དགེ་བ་རྣམས་ཀྱིས་བཀུར་བ། མིག་གཉིད་ཐུལ་བ། ཟས་
མང་དུ་མི་ཟ། གཙང་སྦྲ་ཆུང་བ་མ་ཡིན། ཕྱི་རོལ་གྱི་འགྲོ་བ་ཐམས་ཅད་ཀྱང་དགའ་བ། ཆོས་ཀྱི་བྱ་བ་ལ་སྙིང་སྟོབས་ཆེ་ཞིང་བློ་གྲོས་ཆེ་བ་ལ་སོགས་པ་དེ་ལྟ་བུའི་ཡོན་ཏན་ཤིན་དུ་མང་བས་རང་གི་ལུས་དེ་ཉིད་ཀྱིས་དགྲ་བཅོམ་
པ་ཐོབ་པར་འགྱུར་ཏེ། ཡོན་ཏན་དེ་འདྲ། བརྩོན་འགྲུས་ཀྱི་རྣམ་པ་དེ་འདྲ་སྟེ། ཤཱ་རིའི་བུ་སོར་མོའི་ཕྲེང་བ་ཡང་མྱུར་དུ་དགྲ་བཅོམ་པ་ཐོབ་པར་འགྱུར་བས། སོར་མོའི་ཕྲེང་བ་ལ་སྡིག་པར་ག་ལ་འགྱུར། ཤཱ་ར་དྭ་ཏིའི་
བུ་སོར་མོའི་ཕྲེང་བ་ལ་ངོ་མཚར་དང་། ཡོན་ཏན་གཞན་ཡང་ཡོད་དེ། འཇམ་དཔལ་ཇི་ལྟ་བ་དེ་བཞིན་དུ་སོར་མོའི་ཕྲེང་བ་བྱང་ཆུབ་སེམས་དཔའ་མིའི་གླང་པོ་ཡང་དེ་བཞིན་ནོ། །སོར་མོའི་ཕྲེང་བ་ནི་སེམས་ཅན་ཐམས་
ཅད་ལ་བུ་གཅིག་པ་བཞིན་དུ་བལྟའོ། །བྱང་ཆུབ་སེམས་དཔའ་སེམས་དཔའ་ཆེན་པོ་སོར་མོའི་ཕྲེང་བ་ནི། བདག་གྲོལ་ནས་འཇིག་རྟེན་ཐམས་ཅད་དགྲོལ་ལོ། །རྒལ་ནས་སྒྲལ་བར་བྱའོ་ཞེས་བདག་དང་འཇིག་རྟེན་གྱི་
ཕྱིར་སྐྱེས་བུ་འདི་རྟག་ཏུ་སྨོན་ལམ་འདེབས་ཏེ། འཇིག་རྟེན་ཐམས་ཅད་ལ་ཕན་ཞིང་སྙིང་བརྩེ་བ་སྡིག་པ་བྱེད་པ་དེ་ནི་གནས་མེད་དོ། །དེ་ལྟ་བུའི་སེམས་ཅན་དག་གི་ཕྱིར། བྱང་ཆུབ་སེམས་དཔའ་མིའི་གླང་པོ་ཆེ་
རྣམས་ནི་ཉི་མ་དང་། ཟླ་བ་དང་། ཚངས་པ་ལྟ་བུ་དང་། སྐྱེ་དགུའི་བདག་པོར་འགྱུར་རོ། །ས་དང་། རླུང་དང་། ནམ་མཁའ་དང་། ཆུ་དང་། མེ་ལྔ་པ་དང་། དེ་ལྟ་བུ་རྣམ་པ་མང་པོར་འགྱུར་རོ། །དེ་ནས་བཅོམ་ལྡན་འདས་
ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་སོར་མོའི་ཕྲེང་བ་ནི་གང་ཟག་ཡ་རབས་ལགས་ཏེ། བཅོམ་ལྡན་འདས་མཐོང་མ་ཐག་ཏུ་བདག་ཉིད་སྲིད་པ་ཐམས་ཅད་

57-1-183a

ལས་ངེས་པར་བརྒལ་ཏོ། །དེ་ནས་སོར་མོའི་ཕྲེང་བས། གནས་བརྟན་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་མཽད་གལ་གྱི་བུ་ཆེན་པོས་དེ་བཞིན་གཤེགས་པ་མ་རྙེད་ན། འཇིག་རྟེན་ན་
ཆོས་ལ་བདག་པོ་བྱེད་པའི་སེམས་ཅན་སུ་དག་ཡོད། སྨྲས་པ། རིགས་ཀྱི་བུ་ཆོས་མངོན་པའི་ལུང་ལས་བཅོམ་ལྡན་འདས་ཀྱིས་རབ་ཏུ་བསྟན་ཏེ། དགེ་སློང་རྣམས་ན་བ་དང་ན་བ་ལྟ་བུ་གསུམ་སྟེ། ན་བ་གསུམ་གང་ཞེ་ན། 
ལོག་པར་ངེས་པ་ཞེས་བྱ་བ་དང་། ཡང་དག་པ་ཉིད་དུ་ངེས་པ་ཞེས་བྱ་བ་དང་། མ་ངེས་པའི་གང་ཟག་ཅེས་བསྟན་ཏོ། །དེ་ལ་ལོག་པར་ངེས་པ་གང་ཞེ་ན། ལོག་པར་ངེས་པ་ཞེས་བྱ་བ་ནི། སྐྱེས་བུ་གང་དེ་བཞིན་གཤེགས་
པས་ཀྱང་གདུལ་མི་ནུས་པའོ། །ཡང་དག་པ་ཉིད་དུ་ངེས་པ་ཞེས་བྱ་བ་ནི་དཔེར་ན། བཙུན་པ་འཇམ་དཔལ་དང་། འོད་སྲུང་ཆེན་པོ་ལྟ་བུ་དེ་བཞིན་གཤེགས་པ་མ་བྱུང་བཞིན་དུ་དེ་བཞིན་གཤེགས་པའི་ཕྱིར་དེ་ཁོ་ནའི་ཆོས་ལ་
རབ་ཏུ་ཞུགས་པའོ། །སྨྲས་པ། བཙུན་པ་མཽད་གལ་གྱི་བུ་ཆེན་པོ་དེ་ལྟར་དེ་བཞིན་གཤེགས་པ་མ་སྐྱེས་པར་བཙུན་པ་གནས་བརྟན་འོད་སྲུང་ཆེན་པོ་བདག་ཉིད་དེ་ཁོ་ནའི་ཆོས་ལ་རབ་ཏུ་ཞུགས་སོ་ཞེས་མ་ཟེར་ཅིག །དེ་ཅིའི་
ཕྱིར་ཞེ་ན། དེ་བཞིན་གཤེགས་པ་ནི་རྟག་པ་སྟེ། གང་ཆོས་ལ་གནས་པ་དེ་དག་གི་ཁྱིམ་ན་དེ་བཞིན་གཤེགས་པ་དེ་བཞུགས་སོ། །དཔེར་ན། འབབ་ཆུ་ཐམས་ཅད་ནི་ཆར་ལས་བྱུང་སྟེ། ཆར་མེད་ཀྱང་གལ་ཏེ་ཆུ་
འབབ་དེ་ལ་མཁས་པས་འདི་ལྟར་བསམས་སོ། །ཆར་མེད་པར་ཆུ་འབབ་པ་དེ་ནི་གནས་མེད་ཀྱིས་གཞན་དུ་ཆར་འབབ་པར་རིག་པར་བྱ་སྟེ། དེ་ལས་འབབ་ཆུ་འབབ་པར་རིག་པར་བྱའོ། །དེ་བཞིན་དུ་མཽད་གལ་
གྱི་བུ་འཇིག་རྟེན་གྱི་དང་། འཇིག་རྟེན་གྱི་ལས་འདས་པའི་མཆོག་གི་ཆོས་ཐམས་ཅད་ཀྱང་སངས་རྒྱས་ལས་འབབ་སྟེ། དེ་བས་ན་བཙུན་པ་འོད་སྲུང་ཆེན་པོ་ཡང་དེ་བཞིན་གཤེགས་པའི་ཞབས་ཀྱི་དྲུང་དུ་རབ་ཏུ་བྱུང་

57-1-183b

བར་རིག་པར་བྱའོ། །ཇི་ལྟར་སྐྱེ་བོ་ཐམས་ཅད་ཀྱིས་སྒྱུ་མ་མི་མཐོང་ཞེ་ན། བཙུན་པ་བཅོམ་ལྡན་འདས་ཉག་གཅིག་གིས་མཁྱེན་པ་མ་ཡིན་གྱི། གཞན་དུ་ཆར་བབ་པ་བཞིན་ཏེ། དེའི་ཕྱིར་སངས་རྒྱས་མེད་པའི་དུས་ཀྱི་
སེམས་ཅན་རྣམས་ཀྱང་བདག་ཉིད་ངེས་པར་མི་སྒྲོལ་གྱི་རྟག་ཏུ་སངས་རྒྱས་ཀྱི་མངོན་སུམ་དུ་ངེས་པར་སྒྲོལ་བར་རིག་པར་བྱའོ། །གཞན་ཡང་བཙུན་པ་སྐྱེས་བུ་ལ་ལ་ཞིག་ཟླ་བ་དང་། ཉི་མ་མཐོང་ནས་ཁྱིམ་གྱི་ནང་དུ་ཞུགས་
ནས་དེ་ཉིད་ཀྱིས་མི་མཐོང་ངོ་སྙམ་དུ་སེམས་ན། ཅི་ཟླ་བ་དང་ཉི་མས་མི་མཐོང་ངམ། མཐོང་མོད་ཀྱི་མི་མི་མཁས་པ་ཁྱིམ་གྱི་ནང་དུ་ཞུགས་མ་ཐག་ཏུ་ཟླ་བ་དང་། ཉི་མས་མི་མཐོང་ངོ་སྙམ་དུ་སེམས་ཏེ། དེ་བཞིན་དུ་བཙུན་
པ་མཽད་གལ་གྱི་བུ་ཡང་མི་མཁས་པ་བཞིན་མ་ཟེར་ཅིག །དེ་བཞིན་གཤེགས་པ་ནི་རྟག་ཏུ་སེམས་ཅན་རྣམས་ངེས་པར་སྒྲོལ་ཏེ། རྟག་ཏུ་སེམས་ཅན་རྣམས་རབ་ཏུ་འབྱུང་བ་དང་། བསྙེན་པར་རྫོགས་པར་འཛིན་དུ་
འཇུག་གོ། །དེའི་ཕྱིར་གང་ཟག་ལོག་པར་ངེས་པ་དང་། ཡང་དག་པ་ཉིད་དུ་ངེས་པ་སྟེ། མ་ངེས་པ་ཞེས་བྱ་བ་གསུམ་པ་མེད་དོ། །སྨྲས་པ། འཇིག་རྟེན་པ་ལ་ཡང་ཚུལ་ཁྲིམས་ལྔ་ཡོད་དོ། །སངས་རྒྱས་འབྱུང་བའི་
དུས་ན་ཡང་ཡོད་དོ། །སྨྲས་པ། བཙུན་པ་མཽད་གལ་གྱི་བུ་དེ་སྐད་མ་ཟེར་ཅིག །ཇི་ཙམ་ཆོས་དང་འཐུན་པའི་ཚུལ་ཁྲིམས་དང་། ཆོ་ག་དང་ཡོན་ཏན་འཇིག་རྟེན་ན། འཇིག་རྟེན་པ་དང་། འཇིག་རྟེན་ལས་འདས་པ་དག་ཡོད་
པ་དེ་དག་ཐམས་ཅད་དུ་ཐམས་ཅད་སངས་རྒྱས་ཀྱི་ཚིག་ཏུ་རིག་པར་བྱའོ། །སྨྲས་པ། ནད་པ་ལྟ་བུའི་གཏམ་རྣམ་པ་གསུམ་སྟེ། ནད་པ་ཁ་ཅིག་སྨན་པ་རྙེད་ཀྱང་འཚོ་བ་ཡོད་དོ། །ནད་པ་ཁ་ཅིག་སྨན་པ་མ་རྙེད་ཀྱང་
འཚོ་བ་ཡོད་དོ། །ནད་པ་ཁ་ཅིག་སྨན་པ་རྙེད་ཀྱང་མི་འཚོ་བ་ཡོད་དོ། །སྨྲས་པ། ན་བ་གསུམ་དུ་མེད་དེ། ན་བ་ཁ་ཅིག་སྨན་པ་མ་རྙེད་ཀྱང་འཚོའོ། །ན་བ་ཁ་ཅིག་ནི་སྨན་པ་རྙེད་ཀྱང་མི་འཚོ་སྟེ། གསོར་རུང་བ་དང་། 

57-1-184a

གསོར་མི་རུང་བ་སྟེ། སྨན་པ་ཡང་རྙེད། སྨན་དང་གཡོག་རྙེད་ཀྱང་། གལ་ཏེ་འཆི་ན་ནི་དེ་དོན་མེད་པའི་གནས་སུ་འགྱུར་རོ། །དེ་ཅིའི་ཕྱིར་ཞེ་ན། གལ་ཏེ་སྨན་དང་། 
གཡོག་དང་། སྨན་པ་ཡང་མ་རྙེད། སྨན་པ་རྙེད་ལ། སྨན་མ་རྙེད་པ་སྟེ། དེའི་ཕྱིར་སྨན་པ་དང་། སྨན་རྙེད་ཀྱང་མི་འཚོ་ན། སྨན་དང་སྨན་པའི་བྱེ་བྲག་ཀྱང་མེད་དོ། །
ཅིའི་ཕྱིར་ཚེའི་རིག་བྱེད་ལས་ལུས་ལྕི་བ་དང་། ཡང་བའི་བྱ་བ་ཐམས་ཅད་འབྱུང་སྟེ། དེའི་ཕྱིར་བཙུན་པ་མཽད་གལ་གྱི་བུ་ཆེན་པོ་གསོར་རུང་ཡང་རུང་ལ། མི་རུང་ཡང་མི་རུང་ཞེས་བྱ་བར་
རྣམ་པ་གསུམ་དུ་རྟོག་པ་རྣམ་པ་གསུམ་མེད་དོ། །དེ་ནི་ཉན་ཐོས་ཀྱི་ཤེས་པ་སྟེ། སྦྲང་བུ་ལྟ་བུའི་ཤེས་པའོ་ཞེས་མཁས་པ་རྣམས་འཛེར་ཏོ། །མི་མཁས་
པ་རྣམས་ཀྱི་ཕྱིར་རྣམ་པ་གཉིས་སུ་བརྟགས་ཏེ། །དེ་ལ་ལོག་པར་ངེས་པ་ཞེས་བྱ་བ་ནི་འདོད་ཆེན་པོའོ། །ཡང་དག་པར་ངེས་པ་ཞེས་བྱ་བ་ནི་ཉན་ཐོས་དང་། 
རང་སངས་རྒྱས་སོ། །བཙུན་པ་མཽད་གལ་གྱི་བུ་ངོ་མཚར་རྣམ་པ་གཉིས་ཏེ། རྣམ་པ་གཉིས་གང་ཞེ་ན། དེ་བཞིན་གཤེགས་པ་དང་། འདོད་
ཆེན་པའོ། །དེ་བཞིན་གཤེགས་པ་ནི་མཆོག་གི་གནས་སུ་ངོ་མཚར་དུ་གྱུར་པ་ཡིན་ཏེ། དེ་བཞིན་གཤེགས་པ་ལས་མཐོ་བའི་
གནས་གཞན་མི་སྣང་སྟེ་ངོ་མཚར་ཏོ། །དམའ་བའི་གནས་སུ་ཡང་འདོད་མངས་ལས་གཞན་མི་སྣང་ངོ་། །དཔེར་ན། དེ་བཞིན་

57-1-184b

གཤེགས་པའི་ཉན་ཐོས་རྣམས་ཕ་རོལ་དུ་ཕྱིན་པ་བཅུ་ཡོངས་སུ་རྫོགས་པར་བྱེད་ཅིང་འགྲོ་བ་དེ་བཞིན་དུ་འདོད་ཆེན་པ་ཡང་ཕ་རོལ་དུ་ཕྱིན་པ་བཅུ་ཡོངས་སུ་རྫོགས་པར་བྱེད་ཅིང་འགྲོའོ། །དཔེར་ན། དེ་བཞིན་
གཤེགས་པའི་ཉན་ཐོས་རྣམས་ཀྱི་སྦྱིན་པའི་ཕ་རོལ་དུ་ཕྱིན་པ་ལ་བདག་གི་བུ་དང་། མིག་དང་ཤ་བྱེ་བའི་ཕུང་པོའི་རི་རབ་བས་ཆེ་བ་དེ་བས་ལྷག་པར་གཏོང་བ་དེ་བཞིན་དུ་འདོད་ཆེན་པའང་འདོད་ཆེན་གྱི་སྦྱིན་པའི་ཕ་
རོལ་དུ་ཕྱིན་པ་བཅུ་ཡོངས་སུ་རྫོགས་པར་བྱེད་དོ། །འདོད་ཆེན་པའང་ནམ་ཡི་དགས་ཀྱི་འཇིག་རྟེན་དུ་སོང་བ་དེའི་ཚེ་དེར་གཡེམ་པའི་སེམས་སྐྱེ་སྟེ། དེའི་ཚེ་མྱུར་དུ་བུད་མེད་མང་པོ་འབྱུང་སྟེ། བུ་མང་པོ་ཡང་འབྱུང་
སྟེ། སེམས་ཙམ་གྱིས་བདེ་བ་ལྟ་འཐོབ་པར་ག་ལ་འགྱུར། དེ་ནས་མྱུར་དུ་བདག་གི་བུ་བཟའ་བའི་སེམས་སྐྱེས་ནས་ཤིང་ཟའོ། །ཡང་ལས་ཀྱིས་བྲམ་ཟེའི་གཟུགས་སུ་འགྱུར་ཏེ། དེས་སློང་བ་རྣམས་ལ་ཡང་
བུ་རྣམས་བྱིན་ཏེ་བྱིན་པ་དེ་དག་ཟའོ། །ཡང་བདག་ཉིད་ཀྱང་ཐམས་ཅད་ཟ་སྟེ། དེ་ལྟར་འདོད་ཆེན་པའང་འདོད་ཆེན་གྱི་སྦྱིན་པའི་ཕ་རོལ་དུ་ཕྱིན་པ་རྫོགས་པར་འགྱུར་ཏེ། དེ་བཞིན་དུ་ཕ་རོལ་དུ་ཕྱིན་པ་བཅུ་ཡོངས་སུ་
རྫོགས་པར་བྱེད་དོ། །དེའི་ཕྱིར་མཐོན་པོའི་གནས་ཀྱི་མཆོག་ནི་སངས་རྒྱས་བཅོམ་ལྡན་འདས་རྣམས་སོ། །དམའ་བའི་གནས་ན་ནི་འདོད་ཆེན་པ་རྣམས་སོ། །བཙུན་པ་མཽད་གལ་གྱི་བུ་དེ་ལྟར་ངོ་མཚར་རྣམ་པ་
གཉིས་ཏེ། ལོག་པར་ངེས་པའི་གང་ཟག་ནི་འདོད་ཆེན་ཡིན་པར་སོམས་ཤིག །ཡང་དག་པར་ངེས་པའི་གང་ཟག་ནི་དེ་བཞིན་གཤེགས་པ་དང་། དེ་བཞིན་གཤེགས་པའི་ཉན་ཐོས་ཡིན་པར་སོམས་ཤིག །དེ་ནས་
བཅོམ་ལྡན་འདས་ཀྱིས་སོར་ཡོའི་ཕྲེང་བ་ལ་བཀའ་སྩལ་པ། སོར་མོའི་ཕྲེང་བ་ཚུར་ཤོག །མྱུར་དུ་རབ་ཏུ་བྱུང་ལ་སྐྱབས་གསུམ་དུ་འགྲོ་བ་ཟུང་ཤིག །དེ་ནས་སོར་མོའི་ཕྲེང་བས། བཅོམ་ལྡན་འདས་ལ་ཚིགས་

57-1-185a

སུ་བཅད་པས་སླར་གསོལ་པ། ཐེག་པ་འདི་ནི་ཐེག་ཆེན་ཏེ། །ཆགས་མེད་ཡེ་ཤེས་ཞེས་ཀྱང་བགྱི། །ཐེག་པ་གཅིག་པོ་སྐྱབས་གཅིག་སྟེ། །དེ་བཞིན་གཤེགས་པ་དོན་དམ་སྐྱབས། །ཆོས་དང་སངས་
རྒྱས་དོན་གཅིག་སྟེ། །དེ་བཞིན་གཤེགས་པ་ཆོས་ཀྱི་སྐུ། །དགེ་འདུན་དེ་བཞིན་གཤེགས་ཀྱི་མིང་། །དགེ་འདུན་ཉིད་ནི་དེ་བཞིན་གཤེགས། །ཆོས་དང་དགེ་འདུན་གཉིས་ནི་ཐབས་ཀྱི་སྐྱབས་ལགས་ཏེ། །དེ་བཞིན་གཤེགས་
ནི་ཐབས་མེད་སྐྱབས་དང་དོན་དམ་སྐྱབས། །དེ་བཞིན་གཤེགས་པ་སྐྱབས་མེད་རྣམས་ཀྱི་སྐྱབས་ལགས་ཏེ། །དེ་ཡི་སླད་དུ་དེ་བཞིན་གཤེགས་ལ་སྐྱབས་སུ་མཆི། །ཇི་ལྟར་ཤིང་ཀུན་ཟ་འདོད་པས་ནི་ཤིང་ཀུན་བཟའ་བྱ་ཞེས། །
ཤིང་ཀུན་ཡང་དག་བོར་ནས་ཤིང་ཀུན་བཅོས་མ་ཟ་བ་ནི། །འཇིག་རྟེན་དག་ན་བདག་ལ་མི་ཕན་ནད་ཀྱང་སོས་མི་འགྱུར། །འཇིག་རྟེན་དེ་འདྲའི་ཕྱུགས་མེད་སྨན་པ་སྟོང་གིས་གསོ་མི་ནུས། །དེ་བཞིན་དུ་ནི་སྐྱབས་གཅིག་ཡོངས་
བཏང་སྟེ། །ཐབས་ཀྱི་སྐྱབས་སུ་གང་དག་འཇུག་པ་ཡང་། །དེ་ལྟ་བུ་ཡི་སྦྲང་བུ་གཞན་མེད་དེ། །དེ་ནི་སངས་རྒྱས་སྟོང་གིས་གསོ་མི་ནུས། །བཅོམ་ལྡན་འདས་ཀྱིས་བཀའ་སྩལ་པ། འོ་ན་སོར་མོའི་ཕྲེང་བ་ཁྱོད་གཞོན་ནུའི་
ཚུལ་ཁྲིམས་སྲུངས་ཤིག །དེ་ནས་སོར་མོའི་ཕྲེང་བས། བཅོམ་ལྡན་འདས་ལ་སླར་འདི་སྐད་ཅེས་གསོལ་ཏོ། །འཇིག་རྟེན་ན་གཞོན་ནུ་གང་ལགས། བསྙེན་པར་རྫོགས་པ་གང་ལགས། འཇིག་རྟེན་ན་དགེ་སྦྱོང་གསལ་བ་
གང་ལགས། འཇིག་རྟེན་ན་སྦྱིན་གནས་གང་ལགས། དེ་ནས་བཅོམ་ལྡན་འདས་ཅང་མི་གསུང་བར་གྱུར་པ་དང་། སོར་མོའི་ཕྲེང་བས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་འཇིག་
རྟེན་ན་སྐྱབས་གཅིག་པོ་དོན་དམ་པའི་སྐྱབས་སུ་མ་འཚལ་བ་དེ་དག་ཐབས་གཉིས་པོ་ལ་བཀོད་དོ། །དེ་གཉིས་འཇིག་རྟེན་ན་སྐྱབས་ལགས་ཏེ། གཞོན་ནུར་གྱུར་ནས་བསྙེན་པར་རྫོགས་པ་མི་གསལ་བ་དེ་དགེ་སྦྱོང་ལགས་

57-1-185b

སམ། གང་སྐྱབས་གཅིག་པོ་མ་འཚལ་བ་དེ་དག་སྐྱབས་སྦྱོར་བ་ལྟ་ག་ལ་འགྱུར། གང་བཅོམ་ལྡན་འདས་ལ་དོན་དམ་པའི་སྐྱབས་སུ་མ་འཚལ་བ་དེ་དག་ཐོག་མ་ནས་སྐྱབས་སུ་འགྲོ་བ་ཡང་མ་སྦྱངས་ན་དགེ་སྦྱོང་དུ་ལྟ་ག་
ལ་འགྱུར། དེ་ལྟར་སྐྱབས་སུ་མཆི་བ་ཡང་གསལ་བར་མ་འཚལ་ན། སྦྱིན་གནས་སུ་ལྟ་ག་ལ་འགྱུར་གང་སྐྱབས་དང་ཐབས་ཀྱི་སྐྱབས་ཀྱི་བྱེ་བྲག་མ་འཚལ་བ་དེ་ནི་འཇིག་རྟེན་ན་གཞོན་ནུ་མི་མཁས་པའོ། །བཅོམ་ལྡན་
འདས་ཀྱིས་བཀའ་སྩལ་པ། འོ་ན་སོར་མོའི་ཕྲེང་བ་ཁྱོད་སྲོག་གཅོད་པ་སྤངས་པའི་ཚུལ་ཁྲིམས་སྲུངས་ཤིག །དེ་ནས་སོར་མོའི་ཕྲེང་བས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ནི་སྲོག་གཅོད་པ་
སྤངས་པའི་ཚུལ་ཁྲིམས་མི་འཛིན་གྱི། ཉ་པ་ལྟར་སྲོག་གཅོད་པའི་ཚུལ་ཁྲིམས་འཛིན་ཏོ། །སྲོག་ཅེས་བགྱི་བ་ནི་ཉོན་མོངས་པ་བྱེ་བ་སྟེ། དེ་དག་བཟུང་ནས་གང་གསོད་པ་དེ་ནི་འཇིག་རྟེན་ན་སྲོག་གཅོད་པ་སྤངས་པ་
འཛིན་པའོ། །དེ་ཡང་གསད་པ་འམ། ཡང་ན་རྒྱགས་པ་བཅོམ་སྟེ། བདག་གི་སློབ་མར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། འོ་ན་སོར་མོའི་ཕྲེང་བ་ཁྱོད་བརྫུན་སྨྲ་བ་སྤངས་པའི་ཚུལ་ཁྲིམས་ཟུང་
ཤིག །བཅོམ་ལྡན་འདས་ལ་སོར་མོའི་ཕྲེང་བས་སླར་འདི་སྐད་ཅེས་གསོལ་ཏོ། །བདག་ནི་བརྫུན་སྨྲ་བ་སྤངས་པའི་ཚུལ་ཁྲིམས་མི་འཛིན་ཏོ། །ཆོས་ཐམས་ཅད་ནི་མི་བདེན་པ་སྟེ། བདག་ནི་མི་བདེན་པར་སྨྲ་བའི་
ཆོས་སྟོན་ཏོ། །དེ་ནི་སངས་རྒྱས་ཀྱི་ཆོས་ཉིད་དེ་མི་བདེན་པ་ཞེས་བགྱིའོ། །ཆོས་ཐམས་ཅད་ནི་སྟོང་པ་སྟེ། དགྲ་བཅོམ་པ་ཞེས་བགྱི་བའི་ཆོས་ཐམས་ཅད་ཀྱང་བརྫུན་ཞེས་བགྱིའོ། །ཉན་ཐོས་དང་། རང་སངས་རྒྱས་
དང་། བྱང་ཆུབ་སེམས་དཔའི་སྤྱོད་པ་འཇིག་རྟེན་དང་འཐུན་པའི་རྗེས་སུ་འཇུག་པ་རྣམས་ཀྱང་མི་བདེན་པའི་ཆོས་ཞེས་བགྱིའོ། །བདག་འཇིག་རྟེན་དུ་སྐྱེས་ཏེ་རབ་ཏུ་བྱུང་ཞིང་བསྙེན་པར་རྫོགས་ནས། བདག་གིས་དགྲ་

57-1-186a

བཅོམ་པ་ཐོབ་པོ། །གཞན་གྱི་སྦྱིན་པའི་དངོས་པོ་ལ་སྤྱད་དོ། །བདག་འཇིག་རྟེན་ན་འཆག་གོ། །བདག་གིས་ནི་རྨ་དགུ་ནས་དེའི་བགྱི་བ་བགྱིའོ། །བདག་ལྷ་མ་འཚལ་ལོ། །བདག་གིས་སོ་ཤིང་བླང་ངོ་། །
བདག་གིས་མིག་རྩི་བྱུག་གོ། །བདག་སྒོམ་མོ། །བདག་གཉིད་གཅག་གོ། །བདག་གི་མགོ་བོ་བྲེག་གོ། །བདག་མལ་དུ་ཞུགས་ཏེ་ཉལ་ལོ། །རྐེད་པ་ན་བ་ཞིག་བྱུང་ངོ་། །བད་ཀན་དང་མཁྲིས་པ་དང་། རླུང་དང་། འདུས་པ་ཞིག་
བྱུང་སྟེ། བདག་གིས་སྨན་བཏུང་ངོ་། །བདག་ནི་ཤིང་ཟད་པའི་མེ་བཞིན་དུ་ཡོངས་སུ་མྱ་ངན་ལས་འདའོ་ཞེས་བྱ་བ་ལ་སོགས་པའི་ཆོས་ཐམས་ཅད་ནི་མི་བདེན་པ་སྟེ། ཇི་ཙམ་དུ་ཐབས་ཀྱིས་བྱ་བ་དང་། འཇིག་རྟེན་ན་ཐབས་ཀྱིས་བྱ་
བ་ལ་བདག་ཡོངས་སུ་སྤྱོད་པའི་བར་དུ་བརྫུན་སྨྲ་བའི་ཚུལ་ཁྲིམས་མི་སྤྱོད་དོ། །དེ་ཁོ་ནའི་ཆོས་བདེན་པའི་ཆོས་རབ་ཏུ་བཤད་ཀྱིས་ང་ལས་ཉོན་ཅིག །བཙུན་པ་མཽད་གལ་གྱི་བུ་ཆེན་པོ་གང་དེ་བཞིན་གཤེགས་པའི་སྙིང་པོ་བདེན་
པ་ཡང་དག་པ་ཉིད། དོན་དམ་པའི་སྐུ་རྟག་པའི་སྐུ། དེ་བཞིན་གཤེགས་པའི་བསམ་གྱིས་མི་ཁྱབ་པའི་སྐུ། དོན་དམ་པའི་སྐུ། ཐེར་ཟུག་གི་སྐུ་རྟག་པའི་སྐུ། དོན་དམ་པའི་སྐུ། ཆོས་ཀྱི་སྐུ། ཞི་བའི་སྐུ། དོན་དམ་པའི་
སྐུ། ཆོས་ཀྱི་སྐུ། དེ་ཁོ་ན་ལས་སྐྱེས་པའི་སྐུ། དེ་ཇི་ལྟར་སྟོན། དེ་བས་ན་མི་བདེན་པའི་ཆོས་ཀྱིས་འབྱུང་ངོ་། །བཅོམ་ལྡན་འདས་ཀྱི་བསྟན་པ་ཐམས་ཅད་ནི་མི་བདེན་པ་དང་བྲལ་བ་སྟེ། དེ་བས་ན་སངས་རྒྱས་ཞེས་བྱའོ། །དཔེར་
ན། བ་ལང་རྫི་དག་བེའུ་ཤི་བའི་ལྤགས་པས་བེའུ་ལྟར་བྱས་ཏེ་བྲིད་ནས། བེའུ་གཞན་ལེན་དུ་འཇུག་པ་དེ་བཞིན་དུ། འཇིག་རྟེན་གྱི་རྗེས་སུ་འབྲང་ཞིང་སྤྱོད་པ་ན། སངས་རྒྱས་ནི་འོན་པ་ལྟ་བུར་གྱུར་ནས་ཆོས་སྟོན་ཏེ། བ་ལང་རྫི་
དང་བ་ལྟར་འོན་པ་རྣམས་ཀྱང་བདག་ཅག་གི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོན་པ་ཡང་འཇིག་རྟེན་དུ་བྱུང་སྟེ། བདག་ཅག་ཀྱང་འོན་པའོ་སྙམ་སྟེ་ཤིན་དུ་དགའོ། །བཅོམ་ལྡན་

57-1-186b

འདས་ཀྱང་འོན་པ་སྙམ་དུ་སེམས་ཤིང་བདག་ཅག་ཀྱང་འཇིག་རྟེན་གྱི་གཙོ་བོར་འགྱུར་རོ་སྙམ་དུ་སེམས་སོ། །ཆོས་དེ་ཁོ་ནའི་གནས་ལ་དེས་བདག་ཉིད་བསྐུལ་ཏེ། དེ་བཞིན་གཤེགས་པ་འཇིག་རྟེན་གྱི་ཆོས་ཐམས་ཅད་ཆོས་
ལ་འགོད་པ་དེ་བཞིན་གཤེགས་པ་མཛེས་སོ། །གལ་ཏེ་བེའུ་དངོས་པོ་སླར་བསྟན་ན་བཞོར་ཡང་མི་རུང་། ལེན་དུ་ཡང་མི་རུང་སྟེ། བ་ལང་རྫིས་བེའུ་གསོ་བ་བསྟན་ཏེ། རྩྭ་སྤར་གང་བྱིན་ནས་མི་བདེན་པའི་ཆས་བ་དུལ་
བར་བྱེད་དོ། །དེ་བཞིན་དུ་གལ་ཏེ་སངས་རྒྱས་ཀྱིས་ངོ་བོ་ཉིད་དོན་དམ་པའི་སྐུ་འཇིག་རྟེན་དུ་བསྟན་དུ་ཟིན་ན། སྐུ་དེ་སུས་མཐོང་བར་ནུས་ཏེ། ཇི་ལྟར་བ་ལ་རྩྭའི་ཆང་པ་ལྟར་འཇིག་རྟེན་ཐམས་ཅད་ཀྱི་རྗེས་སུ་འབྲང་བར་བྱེད་
པས་ཆོས་རྣམས་བདེན་པ་མ་ཡིན་ནོ། །དེ་བས་ན་སངས་རྒྱས་རྣམས་འཇིག་རྟེན་དུ་ཡན་ལག་གང་དང་གང་གིས་སེམས་ཅན་རྣམས་ཆོས་ལ་རྩོམ་པར་སེམས་ཅན་མང་པོ་ཡོངས་སུ་སྨིན་པར་མཛད་དེ། དེ་ནི་སངས་
རྒྱས་རྣམས་ཀྱི་ཆོས་ཉིད་དོ། །དེའི་ཕྱིར་བདག་ཀྱང་མི་བདེན་པའི་ཆོས་ལ་སྤྱོད་དེ། ཇི་ཙམ་དུ་སེམས་ཅན་ཐམས་ཅད་མི་བདེན་པ་ཡིན་པ་དེ་ཙམ་དུ་བདག་ཀྱང་བརྫུན་སྨྲ་བ་སྤང་བའི་ཆོས་མི་འཛིན་ཏེ། །དེའི་ཚེ་བདག་གི་
ཚུལ་ཁྲིམས་ཡོངས་སུ་དག་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། འོ་ན་སོར་མོའི་ཕྲེང་བ་ཁྱོད་ཆང་འཐུང་བ་སྤངས་པའི་ཚུལ་ཁྲིམས་ཟུང་ཤིག །དེ་ནས་སོར་མོའི་ཕྲེང་བས་བཅོམ་ལྡན་འདས་ལ་
སླར་ཚིགས་སུ་བཅད་པས་གསོལ་པ། ཆང་སྤོང་བ་ཡི་ཚུལ་ཁྲིམས་བདག་མི་འཛིན། །ཆང་ལས་མྱོས་པ་སྐྱེས་པའི་ཚུལ་ཁྲིམས་འཛིན། །ཆང་འཐུངས་པ་ནི་ང་རྒྱལ་སྐྱེ་བར་བརྗོད། །འགྲོ་འཆག་རྟག་ཏུ་རབ་བདེ་
ཆང་ཞེས་བགྱི། །བདེ་གཤེགས་སྙིང་པོ་ཐེག་པ་ཆེ་ལས་སྐྱེས། །ཁུ་བ་འཐུངས་ནས་སྐྱེས་བུ་ངོམས་པར་འགྱུར། །དེ་བཞིན་གཤེགས་པ་རྟག་བརྟན་ཐེར་ཟུག་ཅེས། །རབ་ཏུ་དགའ་ངོམས་ཧ་ཧ་ལེགས་བརྗོད་པ། །

57-1-187a

ཕུན་སུམ་ཚོགས་པ་དེ་ནི་བདག་ཐོབ་ཤོག །བཅོམ་ལྡན་འདས་ཀྱིས་བཀའ་སྩལ་པ། འོ་ན་སོར་མོའི་ཕྲེང་བ་ཁྱོད་འཁྲིག་པའི་ཆོས་སྤངས་པའི་ཚུལ་ཁྲིམས་ཟུང་ཤིག །དེ་ནས་སོར་མོའི་ཕྲེང་བས་བཅོམ་ལྡན་
འདས་ལ་ཚིགས་སུ་བཅད་པས་སླར་འདི་སྐད་ཅེས་གསོལ་ཏོ། །བདག་ནི་འཁྲིག་པ་སྤངས་པའི་ཁྲིམས་མི་འཛིན། །རྟག་ཏུ་གཞན་གྱི་བུད་མེད་གཡེམ་ཆགས་འཛིན། །བ་དན་ལྟ་བུར་སྨད་ཚོང་ཁྱིམ་ན་སྤྱོད། །བུད་མེད་ཀུན་
གྱི་དྲུང་དུ་འང་རབ་ཏུ་ཆགས། །ཏིང་འཛིན་རོ་ནི་བདག་གི་ཆུང་མ་སྟེ། །ཆོས་གཞན་དགའ་བ་གཞན་གྱི་བུད་མེད་ཆགས། །དཔའ་ཞིང་བདེན་ལ་དགའ་བ་བདག་གི་བུ། །སྙིང་རྗེ་བྱམས་པ་བུ་མོ་མང་པོ་སྟེ། །སྟོང་པ་འདི་
ནི་བདག་གི་ཁྱིམ་ལགས་སོ། །མཐའ་ཡས་ཕ་རོལ་ཕྱིན་པ་བདག་གི་མལ། །ཉོན་མོངས་རྣམས་ནི་བདག་གི་གཡོག་ལགས་ཏེ། །ཟས་ནི་ལྡེམ་དག་གསང་བ་བསྟན་པ་ལགས། །བདག་གི་བསྐྱེད་མོས་ཚལ་ནི་གཟུངས་
རྣམས་ཏེ། །བྱང་ཆུབ་ཡན་ལག་མེ་ཏོག་དག་གིས་བརྒྱན། །རྣམ་པར་གྲོལ་བའི་ཡེ་ཤེས་འབྲས་བུ་སྟེ། །བདག་གི་ཆོས་ཀྱི་ཚིག་ནི་སྡོང་པོ་ལགས། །དེ་ལ་སོགས་པ་ཁྱིམ་གནས་རྩེ་དགའ་མཆོག །བྱིས་པ་རྣམས་ཀྱི་
སྤྱོད་ཡུལ་འདི་མ་ལགས། །འདི་ནི་མཁས་པ་རྣམས་ཀྱི་རང་བཞིན་ཆོས། །བཅོམ་ལྡན་འདས་ཀྱིས་བཀའ་སྩལ་པ། འོ་ན་སོར་མོའི་ཕྲེང་བ་ཁྱོད་མ་བྱིན་པར་ལེན་པ་སྤངས་པའི་ཚུལ་ཁྲིམས་ཟུང་ཤིག །དེ་ནས་སོར་མོའི་ཕྲེང་
བས། བཅོམ་ལྡན་འདས་ལ་ཚིགས་སུ་བཅད་པས་སླར་གསོལ་པ། བདག་ནི་མ་བྱིན་ལེན་སྤོང་ཁྲིམས་མི་འཛིན། །གཞན་ནོར་རྐུ་བའི་ཚུལ་ནི་རྟག་ཏུ་འཛིན། །མ་བྱིན་པ་ནི་བྱང་ཆུབ་ལགས་ཤེས་བགྱི། །དེ་ནི་སུས་
ཀྱང་སུ་ལ་འང་མ་སྩལ་ཏེ། །བྱང་ཆུབ་ཤིང་དྲུང་བཅོམ་ལྡན་བཞུགས་ནས་ཀྱང་། །ཁྱོད་ཀྱིས་རྙེད་པ་མེད་ཅིང་བཤིག་པ་འང་མེད། །དེ་ནི་ཆོས་རྣམས་ཀུན་གྱི་རང་བཞིན་ཏེ། །དེ་ནི་བླ་ན་མེད་པའི་ཆོས་ལགས་སོ། །

57-1-187b

བཅོམ་ལྡན་འདས་ཀྱིས་བཀའ་སྩལ་པ། འོ་ན་སོར་མོའི་ཕྲེང་བ་ཁྱོད་གར་དང་། རོལ་མོ་སྤངས་པའི་ཚུལ་ཁྲིམས་ཟུང་ཤིག །དེ་ནས་བཅོམ་ལྡན་འདས་ལ་སོར་མོའི་ཕྲེང་བས་ཚིགས་སུ་བཅད་པས་སླར་འདི་སྐད་ཅེས་གསོལ་ཏོ། །
བདག་ནི་གར་མཁན་བཞིན་དུ་རྟག་ཏུ་གར་བགྱིད་དེ། །དྲི་ཟའི་དབྱངས་སྙན་སྒྲོག་ཅིང་གླུ་བླངས་བྲོ་བརྡུངས་ཏེ། །ལེགས་སོ་ལེགས་སོ་དེ་བཞིན་གཤེགས་པའི་སྙིང་པོ་སྟོན། །ལེགས་བརྗོད་གར་བགྱིད་དེ་བཞིན་གཤེགས་པའི་
སྙིང་པོ་ཐོས། །མི་སྦྱིན་ལྟ་བུར་སྒྲ་སྙན་ཐེག་ཆེན་མདོ་སྡེ་བཀླག །མི་འམ་ཅི་དང་དྲི་ཟའི་རྔ་དང་རྔ་བྲན་དང་། །སིལ་སྙན་དག་གིས་གླེགས་བམ་ལ་ཡང་མཆོད་པར་བགྱི། །སེམས་ཅན་གང་རྣམས་དེ་ལྟར་རྟག་ཏུ་མཆོད་བགྱིད་པ། །
དེ་དག་འཇིག་རྟེན་དུ་ནི་ཁོར་མོར་མིང་གཅིག་པར། །ཕྱི་དུས་སངས་རྒྱས་འགྱུར་ཞེས་དེ་བཞིན་གཤེགས་པས་གསུང་། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། འོ་ན་སོར་མོའི་ཕྲེང་བ་ཁྱོད་གཅིག་ཅི་ཞེས་སློབས་ཤིག །
སོར་མོའི་ཕྲེང་བས་བཅོམ་ལྡན་འདས་ལ་སླར་འདི་སྐད་ཅེས་གསོལ་ཏོ། །ཅི་གཅིག་ཅེ་ན། སེམས་ཅན་ཐམས་ཅད་ནི་ཟས་ལ་གནས་སོ་ཞེས་ཉན་ཐོས་ཀྱི་ཐེག་པ་ལས་འབྱུང་བའི་ཚིག་སྟེ། ཐེག་པ་ཆེན་པོ་ལ་དེ་ལྟ་བུའི་རྣམ་
པ་མ་མཆིས་སོ། །ཐེག་པ་ཆེན་པོ་པ་རྣམས་ནི་རྟག་ཏུ་མིག་མི་འཛུམས་ཤིང་བརྟན་པའོ། །ཅི་གཅིག་ཅེ་ན། སེམས་ཅན་ཐམས་ཅད་ནི་དེ་བཞིན་གཤེགས་པའི་སྙིང་པོ་ལ་གནས་པའོ། །ཅི་གཉིས་ཞེ་ན། མིང་དང་
གཟུགས་ཀྱི་ཚིག་ཉན་ཐོས་ཀྱི་ཐེག་པ་ལས་འབྱུང་བ་སྟེ། ཐེག་པ་ཆེན་པོ་ལ་མ་ལགས་སོ། །མིང་དང་གཟུགས་ནི་དེ་ལྟ་ལགས་ཏེ། མིང་དང་གཟུགས་རྣམ་པ་གཞན་མ་ལགས་སོ། །ཉན་ཐོས་དང་། རང་སངས་རྒྱས་
རྣམས་ཀྱི་ཐར་པ་ནི་མིང་ཙམ་སྟེ། གཟུགས་དང་དབྱིབས་མི་རིག་གོ། །སངས་རྒྱས་བཅོམ་ལྡན་འདས་རྣམས་ཀྱི་ཐར་པ་ནི་ལག་མཐིལ་ན་སྐྱུ་རུ་རའི་གཟུགས་བཞིན་ནོ། །ཅི་གསུམ་ཞེ་ན། ཚོར་བ་གསུམ་ཉན་ཐོས་ཀྱི་

57-1-188a

ཐེག་པ་ལས་འབྱུང་སྟེ། ཐེག་པ་ཆེན་པོ་པ་རྣམས་ཀྱི་མ་ལགས་སོ། །ཚོར་བ་འདི་གསུམ་སྟེ། གང་དེ་བཞིན་གཤེགས་པ་རྟག་པའི་མཆོག་ལ་མི་རྟག་པར་འགྱུར་རོ་ཞེས་བགྱི་བའི་དོན་ཐོས་པ་ནི་ཚོར་བའོ། །
དམ་པའི་ཆོས་ནུབ་པར་འགྱུར་རོ་ཞེས་བགྱི་བའི་དོན་ཐོས་པ་ནི་ཚོར་བའོ། །དགེ་འདུན་མི་སྣང་བར་འགྱུར་རོ་ཞེས་བགྱི་བའི་དོན་ཐོས་པ་ནི་ཚོར་བ་སྟེ། དེ་གསུམ་ཐེག་པ་ཆེན་པོའི་ཚོར་བའོ། །ཅི་བཞི་ཞེ་ན། འཕགས་པའི་
བདེན་པ་བཞི་ཞེས་ཉན་ཐོས་ཀྱི་ཐེག་པ་ལ་གྲགས་པའི་ཚིག་སྟེ། ཐེག་པ་ཆེན་པོ་ལ་དེ་ལྟ་བུའི་རྣམ་པ་མ་མཆིས་སོ། །འདི་ལྟ་བུའི་རང་བཞིན་དང་བྱེད་པ་རྣམས་ནི་བདེན་པ་བཞི་སྟེ། དེ་བཞིན་གཤེགས་པ་རྟག་ཅེས་བགྱི་བ་དེ་ནི་
ཐེག་པ་ཆེན་པོ་ལ་ཤིན་དུ་བདེན་པ་སྟེ། སྡུག་བསྔལ་ནི་བདེན་པ་མ་ལགས་སོ། །དེ་བཞིན་གཤེགས་པ་ཐེར་ཟུག་གོ་ཞེས་བགྱི་བ་དེ་ནི་ཤིན་དུ་བདེན་ཏེ། ཀུན་འབྱུང་བ་ནི་མ་ལགས་སོ། །དེ་བཞིན་གཤེགས་པ་ནི་ཐེར་ཟུག་
གི་མཆོག་གོ་ཞེས་བགྱི་བ་ནི་ཤིན་ཏུ་བདེན་གྱི་འགོག་པ་ནི་མ་ལགས་སོ། །དེ་བཞིན་གཤེགས་པ་ཞི་བའོ་ཞེས་བགྱི་བ་དེ་ནི་ཤིན་དུ་བདེན་གྱི་ལམ་ནི་མ་ཡིན་ཏེ། ཐེག་པ་ཆེན་པོ་ལ་འཕགས་པའི་བདེན་པ་དེ་བཞིའོ། །སྡུག་བསྔལ་
གྱི་བྱ་བ་བདེན་པ་མ་ལགས་སོ། །སྡུག་བསྔལ་གྱི་བྱ་བ་བདེན་དུ་ལགས་ན། སྡུག་བསྔལ་རྣམ་བཞི་བདེན་པར་འགྱུར་ཏེ། དུད་འགྲོ་དང་། ཡི་དགས་དང་། ལྷ་མ་ཡིན་དང་། གཤིན་རྗེའི་འཇིག་རྟེན་པ་རྣམས་ཀྱི་དེ་དག་
འཕགས་པའི་བདེན་པ་བཞིར་འགྱུར་རོ། །ཅི་ལྔ་ཞེ་ན། དབང་པོ་ལྔ་ཞེས་ཉན་ཐོས་ཀྱི་ཐེག་པ་ལ་གྲགས་པའི་ཚིག་སྟེ། ཐེག་པ་ཆེན་པོ་ལ་ནི་མ་ལགས་སོ། །དབང་པོ་ལྔ་ནི་དེ་བཞིན་གཤེགས་པ་རྟག་པ་གསལ་
བར་བལྟའོ་ཞེས་མ་ཚང་བ་མེད་པར་སྒོམ་པ་དེ་ནི་མིག་གོ། །དེ་བཞིན་གཤེགས་པ་རྟག་པའོ་ཞེས་ཐོས་ནས་མ་ཚང་བ་མེད་པར་སྒོམ་པ་དེ་ནི་རྣ་བའོ། །དེ་བཞིན་གཤེགས་པ་རྟག་པའི་དྲི་མནམས་ནས་མ་ཚང་བ་མེད་པར་

57-1-188b

བསྒོམ་པ་དེ་ནི་སྣའོ། །དེ་བཞིན་གཤེགས་པའི་སྙིང་པོའི་རོ་མྱངས་ནས་མ་ཚང་བ་མེད་པར་སྒོམ་པ་དེ་ནི་ལྕེའོ། །དེ་བཞིན་གཤེགས་པ་ཆོས་ཀྱི་སྐུའོ་ཞེས་སྐུ་དེའི་རོ་མཆོག་ཐོས་ཤིང་རེག་ནས་མ་ཚང་བ་མེད་པར་སྒོམ་
པ་དེ་ནི་ལུས་སོ། །ཅི་དྲུག་ཅེ་ན། སྐྱེ་མཆེད་དྲུག་ཅེས་ཉན་ཐོས་ཀྱི་ཐེག་པ་ལ་གྲགས་པའི་ཚིག་སྟེ། ཐེག་པ་ཆེན་པོ་ལ་སྐྱེ་མཆེད་དྲུག་གི་རྣམ་པ་འདི་མེད་དོ། །སྐྱེ་མཆེད་དྲུག་ཅེས་བྱ་བ་ནི་གང་དེ་བཞིན་གཤེགས་པ་རྟག་པ་
གསལ་བར་བལྟའོ་ཞེས་འོང་བའི་སྒོ་ནས་རྫོགས་པར་སྒོམ་པ་དེ་ནི་མིག་གི་སྐྱེ་མཆེད་དོ། །དེ་བཞིན་གཤེགས་པ་རྟག་གོ་ཞེས་ཐོས་པ་འོང་བའི་སྒོ་ནས་རྫོགས་པར་སྒོམ་པ་དེ་ནི་རྣ་བའི་སྐྱེ་མཆེད་དོ། །དེ་བཞིན་གཤེགས་
པའི་སྙིང་པོ་རྟག་པའི་དྲི་ཐོས་པ་འོང་བའི་སྒོ་ནས་རྫོགས་པར་སྒོམ་པ་དེ་ནི་སྣའི་སྐྱེ་མཆེད་དོ། །དེ་བཞིན་གཤེགས་པའི་སྙིང་པོ་བསྟན་པ་ཐོས་པ་འོང་བའི་སྒོ་ནས་རྫོགས་པར་སྒོམ་པ་དེ་ནི་ལྕེའི་སྐྱེ་མཆེད་དོ། །གང་དེ་བཞིན་
གཤེགས་པ་ནི་ཆོས་ཀྱི་སྐུའོ་ཞེས་སྐུ་དེའི་བྲོ་དམ་པ་ཉན་པ་དང་། རེག་པ་འོང་བའི་སྒོ་ནས་རྫོགས་པར་སྒོམ་པ་དེ་ནི་ལུས་ཀྱི་སྐྱེ་མཆེད་དོ། །གང་དེ་བཞིན་གཤེགས་པ་གསལ་བར་སྙོན་པ་ལ་འཁྲུགས་པ་མེད་པའི་སེམས་
ཀྱིས་རྫོགས་པར་དང་བ་འོང་བའི་སྒོའི་སྐྱེ་མཆེད་དེ་ནི་ཡིད་ཀྱི་སྐྱེ་མཆེད་དོ། །ཅི་བདུན་ཞེ་ན། བྱང་ཆུབ་ཀྱི་ཡན་ལག་བདུན་ཞེས་ཉན་ཐོས་ཀྱི་ཐེག་པ་ལ་གྲགས་པའི་ཚིག་སྟེ། ཐེག་པ་ཆེན་པོ་ལ་ཡང་བདུན་པོ་དེ་དག་ཨུ་དུམ་
འབའ་རའི་མེ་ཏོག་རྒྱས་པ་བཞིན་དུ་རྙེད་པར་དཀའ་བའི་ཚིག་བྱང་ཆུབ་ཀྱི་ཡན་ལག་བདུན་པོ་དག་སྟེ། དེ་བཞིན་གཤེགས་པ་རྟག་པས་ཤིན་དུ་མེ་ཏོག་རྒྱས་པ་བདུན་ནོ། །ཅི་བརྒྱད་ཅེ་ན། འཕགས་པའི་ལམ་ཡན་ལག་
བརྒྱད་ཅེས་ཉན་ཐོས་ཀྱི་ཐེག་པ་ལ་གྲགས་པའི་ཚིག་སྟེ། ཐེག་པ་ཆེན་པོ་འདི་ལས་ཀྱང་འཕགས་པའི་ལམ་ཡན་ལག་བརྒྱད་པོ་ཡང་དག་པའི་ལྟ་བ་ལ་སོགས་པའོ། །གཞན་ཡང་དེ་བཞིན་གཤེགས་པ་རྟག་པའི་མཆོག་

57-1-189a

གོ་ཞེས་རབ་ཏུ་སྟོན་པ་ནི་འཕགས་པའི་ལམ་ཡན་ལག་བརྒྱད་པ་ཡིན་ཏེ། དེ་བཞིན་གཤེགས་པའི་ཆེ་བ་ཐོས་ཤིང་རྣམ་པར་རེག་པ་ཙམ་གྱིས་མྱ་ངན་ལས་འདའ་བར་འགྲོ་བའི་ལམ་ཡང་དག་པར་འཐོབ་བོ། །
དེ་བཞིན་གཤེགས་པའི་རྟག་པ་ཐེར་ཟུག་གཡུང་དྲུང་གི་མཆོག་བསིལ་བར་གྱུར་པ། ཤིས་པ་ནི་སངས་རྒྱས་ཏེ། དེ་བཞིན་གཤེགས་པ་ནི་ཆོས་ཀྱི་སྐུའོ། །དེ་བཞིན་གཤེགས་པའི་སྙིང་པོ་རྒ་བ་མེད་པའོ་ཞེས་བྱ་བ་འདི་ནི་ཡན་
ལག་བརྒྱད་པ་ཡིན་པར་རིག་པར་བྱའོ། །ཅི་དགུ་ཞེ་ན། མདོ་སྡེ་ཡན་ལག་དགུ་ཞེས་ཉན་ཐོས་ཀྱི་ཐེག་པ་ལ་གྲགས་པའི་ཚིག་སྟེ། ཐེག་པ་ཆེན་པོ་འདི་ལ་ནི་ཐོགས་པ་མེད་པའི་ཡེ་ཤེས་ལ་ཐེག་པ་གཅིག་ཅེས་བྱའོ། །ཅི་
བཅུ་ཞེ་ན། དེ་བཞིན་གཤེགས་པའི་སྟོབས་བཅུ་ཞེས་ཉན་ཐོས་ཀྱི་ཐེག་པ་ལས་གྲགས་པའི་ཚིག་སྟེ། ཐེག་པ་ཆེན་པོ་འདི་ལ་ནི་དེ་བཞིན་གཤེགས་པའི་སྟོབས་བཅུ་མ་ཡིན་གྱི་མཐའ་ཡས་པའི་སྟོབས་ཤེས་བྱའོ། །དེ་བས་
ན་སངས་རྒྱས་བཅོམ་ལྡན་འདས་ནི་བསམ་གྱིས་མི་ཁྱབ་ཅིང་བསམ་དུ་མེད་པ་སྟེ། སྟོབས་མཐའ་ཡས་པར་མངའ་བའོ། །སངས་རྒྱས་བཅོམ་ལྡན་འདས་ནི་མདོ་སྡེ་མཐའ་ཡས་པ་ལྡེམ་པོ་ངག་ཏུ་སྟོན་པའོ། །འདི་
ནི་ལམ་གཅིག་པོ་སྟེ། དེ་བཞིན་གཤེགས་པ་ནི་ཐེག་པ་གཅིག །སྐྱབས་གཅིག །བདེན་པ་གཅིག་གི་ཕྱིར་འབྲང་བ་ཁམས་གཅིག་པ། འགྲོ་བ་གཅིག་པ། ཁ་དོག་གཅིག་པ་སྟེ། དེ་བས་ན་ཐེག་པ་གཅིག་ཅེས་
བྱའོ། །གཞན་ནི་ཐབས་ཀྱི་བྱ་བའོ། །དེ་ནས་བཅོམ་ལྡན་འདས་ཀྱིས་སོར་མོའི་ཕྲེང་བ་ལ་ལེགས་སོ་ཞེས་བྱ་བ་བྱིན་ཏེ། ལེགས་སོ་ལེགས་སོ། །སོར་མོའི་ཕྲེང་བ་ལེགས་སོ། །སོར་མོའི་ཕྲེང་བ་ཁྱོད་དེ་བཞིན་
གཤེགས་པས་དགེ་སློང་སོར་མོའི་ཕྲེང་བ་ཁྱོད་ཚུར་ཤོག །དགེ་སློང་སོར་མོའི་ཕྲེང་བ་ཚུར་ཤོག་ཅེས་བཀའ་སྩལ་པ་དང་། སོར་མོའི་ཕྲེང་བ་དགེ་སློང་ལོ་མང་དུ་ལོན་པ་བཞིན་དུ་ཐམས་ཅད་དགེ་སྦྱོང་དང་འཐུན་པར་

57-1-189b

སྤྱོད་ལམ་མཛེས་པར་གྱུར་ཏོ། །དེ་ནས་སོར་མོའི་ཕྲེང་བས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་དེ་བཞིན་དུ་མཆིའོ་ཞེས་ཁའི་སྒོ་ནས་ཚིག་བྱུང་མ་ཐག་ཏུ་དེར་འབྲས་བུའི་
མཆོག་དགྲ་བཅོམ་པ་ཐོབ་བོ། །བཅོམ་ལྡན་འདས་ཀྱིས་བཀའ་སྩལ་པ། སོར་མོའི་ཕྲེང་བ་ཚུར་ཤོག །ཛེ་ཏའི་ཚལ་དུ་སེམས་ཅན་བྱེ་བ་མང་པོ་སྒྲོལ་ཞིང་ངང་པའི་རྒྱལ་པོ་བཞིན་དུ་འདོང་ངོ་། །དེ་ནས་དེ་བཞིན་
གཤེགས་པ་སོར་མོའི་ཕྲེང་བ་དང་ཐབས་གཅིག་ཏུ་ཤཱ་རིའི་བུ་དང་། མཽད་གལ་གྱི་བུ་དང་། འཇམ་དཔལ་གཞོན་ནུར་གྱུར་པ་ལ་སོགས་པས་མདུན་དུ་བདར་ཅིང་བསྐོར་ཏེ། ནམ་མཁའ་ལ་ཟླ་བ་ཉ་ལ་གཟས་བསྐོར་བ་
བཞིན་དུ། དེ་བཞིན་གཤེགས་པ་ཤིང་མྱ་ངན་མེད་པའི་དྲུང་ནས་ནམ་མཁའ་ལ་ཏ་ལ་བདུན་སྲིད་དུ་འཕགས་ཏེ། གང་དུ་དེ་བཞིན་གཤེགས་པ་དང་། སོར་མོའི་ཕྲེང་བར་རྩོད་པའི་ས་ནས་ཛེ་ཏའི་ཚལ་གྱི་བར་དུ་
གནག་པའི་དགོངས་བཞི་བཅུར་འདོམ་གང་མེད་པའི་བར་དུ་གཤེགས་སོ། །དེ་ནས་སོར་མོའི་ཕྲེང་བའི་མ་ལྷ་དང་། ཀླུ་དང་། གནོད་སྦྱིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོས་མཆོད་
པ་ཆེར་བྱས་ཏེ། འཛེ་ཏའི་ཚལ་དུ་འོངས་སོ། །དེ་ནས་བཅོམ་ལྡན་འདས་ངང་པའི་རྒྱལ་པོ་བཞིན་དུ་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བར་གཤེགས་ཏེ། དེ་བཞིན་གཤེགས་པ་སེང་
གེའི་ཁྲི་ལ་བཞུགས་སོ། །དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལག་མཐིལ་བཞིན་དུ་གྱུར་ཅིང་། གོས་ཀ་ཙ་ལིན་དི་ཀ་ལྟར་རེག་ན་བདེ་བ་འཇིག་རྟེན་གྱི་ཁམས་བདེ་བ་ཅན་བཞིན་དུ་གྱུར་
ཏོ། །དེ་ནས་ཕྱོགས་ཐམས་ཅད་ཀྱི་བྱང་ཆུབ་སེམས་དཔའ་སོ་སོའི་དེ་བཞིན་གཤེགས་པས། དེང་དེ་བཞིན་གཤེགས་པ་ཤཱཀྱ་ཐུབ་པ་སེང་གེ་སྟག་ཆེན་པོ་དང་། ཐབ་མོ་ཆེན་པོ་བཀྱེ་ནས་སེམས་ཅན་བྱེ་བ་མང་

57-1-190a

པོ་སྒྲོལ་ཞིང་ཆོས་ཀྱི་གཏམ་སྟོན་ཏེ། སོར་མོའི་ཕྲེང་བའི་བདག་ཉིད་ཆེན་པོ་མཐོང་བར་འགྱུར་གྱིས། ཚེ་དང་ལྡན་པ་དག་དེང་ཤིག་ཅེས་བཀྱེ་སྟེ། སོར་མོའི་ཕྲེང་བ་བལྟར་ལྷགས་སོ། །བྱང་ཆུབ་སེམས་དཔའ་དེ་དག་
ཕྱོགས་ཆ་གང་ནས་འོང་བའི་ཕྱོགས་ཆ་དེ་དང་དེ་ནས་མེ་ཏོག་སིལ་མ་ཤིང་རྟའི་འཁོར་ལོ་ཙམ་གྱི་ཆར་བབ་པོ། །སེམས་ཅན་གང་དང་གང་གིས་པད་མོའི་དྲི་ལ་རེག་པར་གྱུར་པའི་སེམས་ཅན་དེ་དག་ཐམས་ཅད་ཉོན་མོངས་པ་
མེད་པར་གྱུར་ཏོ། །དེ་ནས་ལྷ་དང་། ཀླུ་དང་། གནོད་སྦྱིན་དང་། ནམ་མཁའ་ལྡིང་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། ལྷའི་བུ་མོ་མང་པོས་ལྷའི་མཆོད་པ་མང་པོ་བྱས་ཏེ། རིན་པོ་ཆེ་སྣ་ཚོགས་ཀྱི་
ཆར་ཡང་དག་པར་བསྒྲུབས་ནས་མགྲིན་གཅིག་ཏུ་ཚིགས་སུ་བཅད་པས་ཚིག་འདི་སྐད་ཅེས་སྨྲས་སོ། །བརྒྱད་བཞི་མཚན་འཆང་ཡོན་ཏན་རྒྱ་ཆེན་མངའ། །པད་མོ་མཆོག་རྒྱས་བཞིན་དུ་ཞལ་ཡང་མཛེས། །ནམ་
མཁའ་ལ་ནི་ཟླ་བ་མཛེས་པ་ལྟར། །མཛོད་སྤུ་ཐིག་ལེ་མཛེས་ལ་ཕྱག་འཚལ་ལོ། །ཐུབ་པ་དམ་པ་བདུན་མཐོ་གཟུགས་མཆོག་མངའ། །བྱམས་མཆོག་ཕན་པའི་ཡོན་ཏན་མང་པོ་འཆང་། །པད་མོ་མཆོག་རྒྱས་བཞིན་དུ་
མཛེས་པའི་ཞལ། །ནམ་མཁའ་ལ་ནི་ཟླ་བ་མཆོག་འདྲ་བར། །མཛོད་སྤུ་ཐིག་ལེ་མཛེས་ལ་ཕྱག་འཚལ་ལོ། །རྟག་དགེ་མཚུངས་མེད་མཆོག་ཡངས་ཡོན་ཏན་མངའ། །ཐུབ་པ་དམ་པ་ལྷ་མི་མཆོག་གིས་མཆོད། །པད་
མོ་མཆོག་རྒྱས་བཞིན་དུ་མཛེས་པའི་ཞལ། །ནམ་མཁའ་ལ་ནི་ཟླ་བ་མཆོག་འདྲ་བར། །མཛོད་སྤུ་ཐིག་ལེ་མཛེས་ལ་ཕྱག་འཚལ་ལོ། །བརྟན་དགེ་མཚུངས་མེད་མཆོག་ཡངས་ཡོན་ཏན་མངའ། །ཐུབ་པ་དམ་པ་ལྷ་མི་
མཆོག་གིས་མཆོད། །པད་མོ་མཆོག་རྒྱས་བཞིན་དུ་མཛེས་པའི་ཞལ། །ནམ་མཁའ་ལ་ནི་ཟླ་བ་མཆོག་འདྲ་བར། །མཛོད་སྤུ་ཐིག་ལེ་མཛེས་ལ་ཕྱག་འཚལ་ལོ། །ཐེར་ཟུག་དགེ་མཆོག་ཡོན་ཏན་རྒྱ་ཆེན་མངའ། །

57-1-190b

ཐུབ་པ་དམ་པ་ལྷ་མི་མཆོག་གིས་མཆོད། །པད་མོ་མཆོག་རྒྱས་བཞིན་དུ་མཛེས་པའི་ཞལ། །ནམ་མཁའ་ལ་ནི་ཟླ་བ་མཆོག་འདྲ་བར། །མཛོད་སྤུ་ཐིག་ལེ་མཛེས་ལ་ཕྱག་འཚལ་ལོ། །ཞི་དགེ་མཚུངས་མེད་མཆོག་
ཡངས་ཡོན་ཏན་མངའ། །ཐུབ་པ་དམ་པ་ལྷ་མི་མཆོག་གིས་མཆོད། །པད་མོ་རྒྱས་པ་བཞིན་དུ་མཛེས་པའི་ཞལ། །ནམ་མཁའ་ལ་ནི་ཟླ་བ་མཆོག་འདྲ་བར། །མཛོད་སྤུ་ཐིག་ལེ་མཛེས་ལ་ཕྱག་འཚལ་ལོ། །བཟོད་
འཆང་ཚུལ་ཁྲིམས་ཡོན་ཏན་མཐའ་ཡས་འཆང་། །སོར་མོའི་ཕྲེང་ཐོགས་ཁྱོད་ལ་ཕྱག་འཚལ་ལོ། །ཐེག་པ་གཅིག་འཛིན་ཐེག་པ་ཆེན་པོ་སྟོན། །བྱམས་འཆང་སོར་ཕྲེང་ཐོགས་ལ་ཕྱག་འཚལ་ལོ། །མཐའ་ཡས་ལུས་
འཛིན་དག་ཀྱང་མཐའ་ཡས་འཛིན། །མཐའ་ཡས་གསུང་འཛིན་མཐའ་ཡས་བློ་གྲོས་འཆང་། །སོར་མོའི་ཕྲེང་ཐོགས་ཁྱོད་ལ་ཕྱག་འཚལ་ལོ། །མཐའ་ཡས་འོད་འཆང་མཐའ་ཡས་ལྡེམ་ངག་སྟོན། །སོར་མོའི་
ཕྲེང་ཐོགས་ཁྱོད་ལ་ཕྱག་འཚལ་ལོ། །མཐའ་ཡས་སྒྱུ་འཆང་མཐའ་ཡས་བདུད་རྣམས་འདུལ། །ཉོན་མོངས་བྱེ་བ་རྣམ་པར་སྨིན་བྱེད་འཆང་། །སོར་ཕྲེང་ཐོགས་པ་ཁྱོད་ལ་ཕྱག་འཚལ་ལོ། །མཐའ་ཡས་ཡོངས་སུ་མྱ་
ངན་འདའ་བྱེད་ཅིང་། །མཐའ་ཡས་སྐྱེ་སྟོན་འཇིག་རྟེན་རྗེས་སུ་འཇུག །དཔའ་བོ་མཆོག་འཆང་ཁྱོད་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ལ་སོར་མོའི་ཕྲེང་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ང་
ནི་ཡང་དག་པའི་མཐའ་ལ་གནས་སོ་ཞེས་གསུངས་ན། དེའི་དོན་ཇི་ལྟ་བུ་ལགས། བཅོམ་ལྡན་འདས་ཁྱོད་ཡང་དག་པའི་མཐའ་ལ་གནས་ཏེ་བཞུགས་པ་ཇི་ལྟ་བུ་ལགས། ང་ནི་ཐར་པའི་ས་ལ་གནས་སོ་ཞེས་བཀའ་སྩལ་
པ། ཚིག་དེ་ལ་དད་པར་བགྱིར་མི་རུང་ན། འདི་ལ་དེའི་གཏན་ཚིགས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། སོར་མོའི་ཕྲེང་བ་ཁྱོད་འཇམ་དཔལ་གཞོན་ནུར་གྱུར་པ་དང་ལྷན་ཅིག་ཏུ་དེང་ལ། འདི་ནས་བྱང་

57-1-191a

ཕྱོགས་སུ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་དགའ་བ་བསྐྱེད་དུ་མེད་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་བློ་གྲོས་བསྐྱེད་དུ་མེད་པའི་ཡོན་ཏན་འབྱུང་གནས་སའི་དབང་ཕྱུག་རྒྱལ་པོ་ད་ལྟར་བཞུགས་ཏེ། འཚོ་ཞིང་གཞེས་པའི་དེ་བཞིན་གཤེགས་པ་དེ་ལ་བཅོམ་ལྡན་འདས་མི་མཇེད་ཀྱི་འཇིག་རྟེན་
གྱི་ཁམས་ན། དེ་བཞིན་གཤེགས་པ་ཤཱཀྱ་ཐུབ་པ་བཞུགས་བཞིན་མི་སྐྱེ་བའི་མཐའ་ལ་གནས་སོ་ཞེས་གསུངས་ན་ཇི་ལྟ་བུ་ལགས་ཤེས་ཞུས་ཤིག །དེ་ནས་འཇམ་དཔལ་གཞོན་ནུར་གྱུར་པ་དང་། སོར་མོའི་ཕྲེང་བས་ལེགས་སོ་
ལེགས་སོ་ཞེས་གསོལ་ནས། རྫུ་འཕྲུལ་གྱི་རྐང་པའི་སྟོབས་ཀྱིས་ངང་པའི་རྒྱལ་པོ་ལྟར་དགའ་བ་བསྐྱེད་དུ་མེད་པའི་འཇིག་རྟེན་གྱི་ཁམས་དེར་དོང་ནས། བཅོམ་ལྡན་འདས་བློ་གྲོས་བསྐྱེད་དུ་མེད་པའི་ཡོན་ཏན་འབྱུང་གནས་སའི་
དབང་ཕྱུག་རྒྱལ་པོ་དེ་བཞིན་གཤེགས་པ་ག་ལ་བ་དེར་དོང་སྟེ་ཉེ་བར་ཕྱིན་ནས། དེ་བཞིན་གཤེགས་པའི་ཞབས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ལ་གསོལ་པ། བཅོམ་ལྡན་འདས་བདག་ཅག་གཉིས་འདིར་མཆིས་
པ་དེ་བཞིན་གཤེགས་པ་ཤཱཀྱ་ཐུབ་པས་མི་མཇེད་ཀྱི་འཇིག་རྟེན་གྱི་ཁམས་ནས་བཀྱེ་སྟེ་འདིར་མཆིས་སོ། །བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཡོངས་སུ་མྱ་ངན་ལས་མ་འདས་པར་དེ་ཉིད་ན་བཞུགས་བཞིན་
དུ་མ་སྐྱེས་པའི་མཐའ་ཐར་པ་ལ་ཇི་ལྟར་གནས་ཤེས་གསོལ་པ་དང་། བཅོམ་ལྡན་འདས་དེས་འཇམ་དཔལ་གཞོན་ནུར་གྱུར་པ་དང་། སོར་མོའི་ཕྲེང་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་བཞིན་གཤེགས་
པ་ཤཱཀྱ་ཐུབ་པ་གང་ཡིན་པ་ང་ཉིད་དེ་བཞིན་གཤེགས་པ་དེ་ཡིན་ཏེ། དེ་བཞིན་གཤེགས་པ་དེ་ཉིད་སྟོན་གྱིས། རིགས་ཀྱི་བུ་ཁྱེད་དེང་ལ། བཅོམ་ལྡན་འདས་དེ་བཞིན་གཤེགས་པ་དེས་བདག་ཅག་འདི་ལྟར་བཀྱེའོ་ཞེས་སྨྲོས་

57-1-191b

ཤིག །དེ་ནས་འཇམ་དཔལ་གཞོན་ནུར་གྱུར་པ་དང་། སོར་མོའི་ཕྲེང་བ་གཉིས་ལངས་ཏེ། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ནས། དགེའོ་ཞེས་སྨྲས་ཏེ། ངང་པའི་རྒྱལ་པོ་བཞིན་དུ་སླར་འོངས་སོ། །བཅོམ་
ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་མ་དེ་བཞིན་གཤེགས་པ་ནི་དཔག་ཏུ་མ་མཆིས་སོ། །དེ་བཞིན་གཤེགས་པའི་སྐུ་ནི་མཐའ་ཡས་སོ། །ཀྱེ་མ་དེ་བཞིན་
གཤེགས་པའི་ཆེ་བ་ཉིད་བདག་ཅག་གིས་མཐོང་སྟེ། བཅོམ་ལྡན་འདས་དེ་བཞིན་གཤེགས་པ་བློ་གྲོས་བསྐྱེད་དུ་མེད་པའི་ཡོན་ཏན་འབྱུང་གནས་ཀྱི་དབང་ཕྱུག་རྒྱལ་པོ་དེ་ནི་དེ་བཞིན་གཤེགས་པ་ཤཱཀྱ་ཐུབ་པ་དེ་ཡིན་ཏེ། དེ་བཞིན་
གཤེགས་པ་དེ་ཉིད་སྟོན་ཏོ་ཞེས་ཚིག་བརྗོད་ནས་བདག་ཅག་སླར་བཀྱེ་ན། སངས་རྒྱས་བཅོམ་ལྡན་འདས་འདི་ན་བཞུགས་བཞིན་དུ་ཇི་ལྟར་མ་སྐྱེས་པའི་མཐའ་ལ་གནས་པ་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་
པ། ང་ཇི་ལྟར་བློ་གྲོས་བསྐྱེད་དུ་མེད་པའི་ཡོན་ཏན་གྱི་འབྱུང་གནས་སའི་དབང་ཕྱུག་རྒྱལ་པོར་གྱུར་ཅིང་དགའ་བ་བསྐྱེད་དུ་མེད་པའི་འཇིག་རྟེན་གྱི་ཁམས་ན་ཇི་ལྟར་གནས་འདི་ན་འདུག་བཞིན་དུ་དེ་ན་ཇི་ལྟར་གནས་འདི་ན་
འདུག་ལ་མ་སྐྱེས་པའི་མཐའ་ལ་གནས་ཞེས་མ་ཟེར་ཅིག །སངས་རྒྱས་ཀྱི་སྐུ་ནི་མཐའ་ཡས་སོ། །དེ་བཞིན་གཤེགས་པ་ནི་མཐའ་ཡས་པར་རྒྱུ་བའོ། །སངས་རྒྱས་བཅོམ་ལྡན་འདས་ནི་མཚུངས་པ་མེད་པའོ། །དེ་བཞིན་
གཤེགས་པ་ནི་མཚུངས་པ་མེད་པར་རྒྱུ་བའོ། །སངས་རྒྱས་བཅོམ་ལྡན་འདས་ནི་དཔག་ཏུ་མེད་དེ། དེ་བཞིན་གཤེགས་པ་ནི་དཔག་ཏུ་མེད་པར་རྒྱུ་བའོ། །སོར་མོའི་ཕྲེང་བ་ཇི་ལྟར་ན་བཅོམ་ལྡན་འདས་ཀྱི་སྐུ་མ་སྐྱེས་པར་གྱུར་པ་
དེའི་དོན་དེ་བཞིན་གཤེགས་པ་ལ་དྲིས་ཤིག་དང་། སངས་རྒྱས་སྟོན་པར་འགྱུར་རོ། །དེ་ནས་སོར་མོའི་ཕྲེང་བས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་ཐམས་ཅད་ལ་ཐུགས་བརྩེ་བ་དང་། 

57-1-192a

ཕན་པ་དང་བདེ་བའི་སླད་དུ་ལེགས་པར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། སོར་མོའི་ཕྲེང་བ་ངས་བསྐལ་པ་བརྒྱ་སྟོང་ཕྲག་བཅུར་ཕ་རོལ་དུ་ཕྱིན་པ་སྤྱད་པས་སེམས་ཅན་ཡང་དག་པར་བསྡུས་
ཏེ་སེམས་ཅན་བྱང་ཆུབ་ཀྱི་སེམས་མ་སྐྱེས་པའི་སེམས་ཅན་བྱེ་བ་མང་པོ་བྱང་ཆུབ་ལ་བཀོད་དེ། དགེ་བའི་རྩ་བ་དེས་ངའི་ལུས་བསྐལ་པ་བྱེ་བ་མང་པོ་གྲངས་མེད་པར་ཕ་རོལ་དུ་ཕྱིན་པ་དང་། དེའི་དགེ་བའི་རྩ་བས་མ་སྐྱེས་པའི་སྐུར་གྱུར་ཏོ། །
སོར་མོའི་ཕྲེང་བས་གསོལ་པ། བཅོམ་ལྡན་འདས་ཇི་ལྟར་ན་དེ་བཞིན་གཤེགས་པ་མ་བྱུང་བའི་སྐུར་གྱུར། བཅོམ་ལྡན་འདས་ཀྱིས་བཀའ་སྩལ་པ། སངས་རྒྱས་ཀྱི་ཞིང་འདི་ནས་བྱང་ཕྱོགས་སུ་གང་གཱའི་ཀླུང་གཉིས་ཀྱི་བྱེ་མ་
སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་མ་བྱུང་བའི་གློག་གི་ཕྲེང་བ་ཞེས་བྱ་བ་དེ་ན་རྣམ་པར་སྣང་མཛད་ཅེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟར་
བཞུགས་ཏེ། འཚོ་ཞིང་གཞེས་སོ། །སོར་མོའི་ཕྲེང་བ་ཁྱོད་འཇམ་དཔལ་གཞོན་ནུར་གྱུར་པ་དང་ལྷན་ཅིག་ཏུ་མ་བྱུང་བའི་གློག་གི་ཕྲེང་བ་ཞེས་བྱ་བའི་འཇིག་རྟེན་གྱི་ཁམས་ན། དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་རྣམ་པར་སྣང་མཛད་བཞུགས་པར་དེང་ལ། བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་མི་མཇེད་ཀྱི་འཇིག་རྟེན་གྱི་ཁམས་ན་བཞུགས་ཏེ། ཡང་དག་པའི་མཐའ་ལ་ཇི་ལྟར་གནས་
པ་དྲིས་ཤིག །དེ་ནས་འཇམ་དཔལ་གཞོན་ནུར་གྱུར་པ་དང་། སོར་མོའི་ཕྲེང་བས་ལེགས་སོ་ཞེས་གསོལ་ནས། ངང་པའི་རྒྱལ་པོ་ལྟར་རྫུ་འཕྲུལ་གྱི་སྟོབས་ཀྱི་རྐང་པས་མ་བྱུང་བའི་གློག་གི་ཕྲེང་བའི་འཇིག་རྟེན་གྱི་ཁམས་
དེར་དོང་ནས། བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ག་ལ་བ་དེར་སོང་སྟེ་ཕྱིན་ནས། དེ་བཞིན་གཤེགས་པ་ལ་དེ་བཞིན་དུ་ཞུས་པ་དང་། 

57-1-192b

སྔ་མ་བཞིན་དུ་འདིར་ལྷགས་ནས། སོར་མོའི་ཕྲེང་བ་དང་། འཇམ་དཔལ་གཞོན་ནུར་གྱུར་པས་དེ་བཞིན་གཤེགས་པ་ལ་གསོལ་པ། བཅོམ་ལྡན་འདས་དེ་བཞིན་གཤེགས་པ་ཇི་ལྟར་ན་མ་བྱུང་བའི་མཐའ་ལ་གནས་པ་
བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། སོར་མོའི་ཕྲེང་བ་ངས་བསྐལ་པ་བརྒྱ་སྟོང་མང་པོར་ཕ་རོལ་དུ་ཕྱིན་པ་བཅུས་སེམས་ཅན་ཡང་དག་པར་བསྡུས་ཏེ། སྔོན་མ་བྱུང་བའི་བདེ་བ་ལ་རབ་ཏུ་བཀོད་
པས་ངའི་ལུས་བསྐལ་པ་བྱེ་བ་མང་པོར་ཚད་མེད། གྲངས་མེད་པའི་ཕ་རོལ་དུ་ཕྱིན་པ་ལས་མ་བྱུང་བའི་ལུས་སུ་གྱུར་ཏོ། །སོར་མོའི་ཕྲེང་བས་གསོལ་པ། བཅོམ་ལྡན་འདས་ཇི་ལྟར་ན་འདུས་མ་བགྱིས་ཀྱི་མཐའ་ལ་གནས། 
བཀའ་སྩལ་པ། སངས་རྒྱས་ཀྱི་ཞིང་འདི་ནས་བྱང་ཕྱོགས་ལོགས་སུ་གང་གཱའི་ཀླུང་གསུམ་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན་འཇིག་རྟེན་གྱི་ཁམས་ཡིད་འཕྲོག་ཅེས་བྱ་བ་དེ་ན་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་བློ་གྲོས་མི་ཟད་པ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས་དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག་པའང་གོང་མ་བཞིན་དུ་
བསྡུའོ། །སངས་རྒྱས་ཀྱི་ཞིང་འདི་ནས་བྱང་ཕྱོགས་ལོགས་སུ་གང་གཱའི་ཀླུང་བཞིའི་བྱེ་མ་སྙེད་ཀྱི་འཇིག་རྟེན་གྱི་ཁམས་སྣ་ཚོགས་ཤེས་བྱ་བ་ན་རྣམ་པར་རྒྱལ་བའི་དཔལ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ད་ལྟར་བཞུགས་ཏེ། འཚོ་ཞིང་གཞེས་ཀྱིས་དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག་པ་འང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་
ནས་བྱང་ཕྱོགས་ལོགས་སུ་གང་གཱའི་ཀླུང་ལྔའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཟབ་མོའི་རྒྱལ་པོ་ཞེས་བྱ་བ་དེ་ན། ཟབ་མོའི་མཆོག་ཅེས་བྱ་བ་དེ་བཞིན་གཤེགས་པ་དགྲ་བཅོམ་པ་

57-1-193a

ཡང་དག་པར་རྫོགས་པའི་སངས་རྒྱས་ད་ལྟར་བཞུགས་ཏེ། འཚོ་ཞིང་གཞེས་ཀྱིས་དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག་པའང་གོང་མ་བཞིན་དུ་བསྡུའོ། །སངས་
རྒྱས་ཀྱི་ཞིང་འདི་ནས་བྱང་ཕྱོགས་ལོགས་སུ་གང་གཱའི་ཀླུང་དྲུག་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་རླུང་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་སྤོས་ཀྱི་འཚོ་བ་འབྱུང་བ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས་དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག་པ་འང་གོང་མ་བཞིན་དུ་བསྡུའོ། །སངས་
རྒྱས་ཀྱི་ཞིང་འདི་ནས་བྱང་ཕྱོགས་ལོགས་སུ་གང་གཱའི་ཀླུང་གི་བྱེ་མ་བདུན་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་རྡོ་རྗེའི་བློ་གྲོས་ཤེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་རྡོ་རྗེ་མཆོག་ཅེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས་དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག་པའང་གོང་མ་བཞིན་དུ་བསྡུའོ། །
སངས་རྒྱས་ཀྱི་ཞིང་འདི་ནས་བྱང་ཕྱོགས་ལོགས་སུ་གང་གཱའི་ཀླུང་བརྒྱད་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་དྲི་མ་མེད་པའི་འོད་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་དྲི་མ་མེད་པའི་མཆོག་ཅེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག་པ་ཡང་གོང་
མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་བྱང་ཕྱོགས་ལོགས་སུ་གང་གཱའི་ཀླུང་གི་བྱེ་མ་དགུ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཟླ་བ་ཅན་ཞེས་བྱ་བ་དེ་ན། དེ་བཞིན་གཤེགས་པ་

57-1-193b

དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་མཆོག་ཅེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག་པའང་
གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་བྱང་ཕྱོགས་ལོགས་སུ་གང་གཱའི་ཀླུང་བཅུའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཉི་མ་ཤར་བ་ཞེས་བྱ་བ་དེ་ན། དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གདུགས་བདལ་ཅེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས་དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག་པའང་གོང་
མ་བཞིན་དུ་བསྡུའོ། ། བམ་པོ་ལྔ་པ། སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་བྲོ་དམ་པ་ཞེས་
བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྲོ་མཆོག་དམ་པ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་
པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་གང་གཱའི་ཀླུང་གཉིས་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་རྩ་ལག་འཚོ་ཞེས་བྱ་བ་དེ་ན། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྩ་ལག་འཚོ་བའི་འོད་ཅེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་
པ་དྲིས་ཤིག །སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་གང་གཱའི་ཀླུང་གསུམ་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཕྲེང་བས་བསྒོས་པ་ཞེས་བྱ་བ་དེ་ན། དེ་བཞིན་གཤེགས་པ་

57-1-194a

དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཕྲེང་བའི་དྲི་མཆོག་ཅེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་
པ་དྲིས་ཤིག །སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་གང་གཱའི་ཀླུང་བཞིའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཏ་མ་ལའི་འདབ་མ་ཞེས་བྱ་བ་དེ་ན། དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་ཏ་མ་ལའི་འདབ་མའི་དྲི་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །
སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་གང་གཱའི་ཀླུང་ལྔའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཟླ་བ་དང་ལྡན་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་ཟླ་བའི་སྙིང་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་
ཀྱི་ཞིང་འདི་ནས་ཤར་ཕྱོགས་ལོགས་སུ་གང་གཱའི་ཀླུང་དྲུག་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཨ་ག་རུ་དང་ལྡན་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ཨ་ག་རུའི་དྲི་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་
ནས་ཤར་ཕྱོགས་ལོགས་སུ་གང་གཱའི་ཀླུང་བདུན་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཕྱེ་མས་བསྒོས་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་

57-1-194b

རྫོགས་པའི་སངས་རྒྱས་ཕྱེ་མའི་སྤོས་ཤེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ཤར་ཕྱོགས་
ལོགས་སུ་གང་གཱའི་ཀླུང་བརྒྱད་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་སྐར་མ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐར་མའི་འོད་
ཅེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་གང་གཱའི་ཀླུང་དགུའི་བྱེ་
མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་རྒྱ་མཚོའི་བློ་གྲོས་ཤེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱ་མཚོས་བྱིན་པ་ཞེས་བྱ་བ་ད་ལྟར་བཞུགས་ཏེ་
འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་གང་གཱའི་ཀླུང་བཅུའི་བྱེ་མ་སྙེད་ཀྱི་འཇིག་རྟེན་གྱི་
ཁམས་འདས་པ་ན། འཇིག་རྟེན་གྱི་ཁམས་ཀླུ་དང་ལྡན་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀླུའི་སྙིང་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་
ཀྱིས། དེ་བཞིན་གཤེགས་པ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ལྷོ་ཕྱོགས་ལོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་
རྟེན་གྱི་ཁམས་མཚན་ཅན་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་གྱི་འོད་ཅེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་

57-1-195a

བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ལྷོ་ཕྱོགས་ལོགས་སུ་གང་གཱའི་ཀླུང་གཉིས་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་
ཁམས་སྤྲིན་ཆེན་པོ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་ཆེན་པོའི་སྙིང་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་
བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ལྷོ་ཕྱོགས་ལོགས་སུ་གང་གཱའི་ཀླུང་གསུམ་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་
གློག་གི་ཕྲེང་བ་ཅན་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གློག་སྦྱིན་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་
ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ལྷོ་ཕྱོགས་ལོགས་སུ་གང་གཱའི་ཀླུང་བཞིའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་རྡོ་རྗེའི་བློ་གྲོས་
ཤེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེའི་སྙིང་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་
ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ལྷོ་ཕྱོགས་ལོགས་སུ་གང་གཱའི་ཀླུང་ལྔའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་འགྲོ་བ་དང་ལྡན་པ་ཞེས་
བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འགྲོ་བ་འཛིན་པའི་དབང་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་

57-1-195b

ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ལྷོ་ཕྱོགས་ལོགས་སུ་གང་གཱའི་ཀླུང་དྲུག་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ནོར་བུ་འཛིན་
ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནོར་བུ་འཛིན་འཆང་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་
ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས། ལྷོ་ཕྱོགས་ལོགས་སུ་གང་གཱའི་ཀླུང་བདུན་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ནམ་མཁའ་དང་ལྡན་
པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནམ་མཁའ་དང་མཚུངས་པ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་
བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ལྷོ་ཕྱོགས་ལོགས་སུ་གང་གཱའི་ཀླུང་བརྒྱད་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་འདུལ་
བ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདུལ་བའི་མཆོག་ཅེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་
འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ལྷོ་ཕྱོགས་ལོགས་སུ་གང་གཱའི་ཀླུང་དགུའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་དཔལ་གྱི་ཕྲེང་
བ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གྱི་སྙིང་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་

57-1-196a

ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས། ལྷོ་ཕྱོགས་ལོགས་སུ་གང་གཱའི་ཀླུང་བཅུའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་སེང་གེའི་
བློ་གྲོས་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་སྙིང་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་
ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་འཇམ་པ་ཞེས་བྱ་བ་དེ་ན། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྙན་པ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །
སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་གང་གཱའི་ཀླུང་གཉིས་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་གང་གཱའི་ཕྲེང་བ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་གང་གཱས་བྱིན་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་
འདི་ནས་ནུབ་ཕྱོགས་ལོགས་སུ་གང་གཱའི་ཀླུང་གསུམ་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཀུན་དུ་བཟང་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་ཀུན་དུ་བློ་གྲོས་ཤེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་ཕྱོགས་

57-1-196b

ལོགས་སུ་གང་གཱའི་ཀླུང་བཞིའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་མེ་ཏོག་རྒྱས་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
མེ་ཏོག་དམ་པ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་
སུ་གང་གཱའི་ཀླུང་ལྔའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་མཐའ་ཡས་ཤེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་
མཐའ་ཡས་པ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་
སུ་གང་གཱའི་ཀླུང་དྲུག་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་བཟང་པོ་ཅན་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཟང་པོའི་
སྙིང་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་གང་
གཱའི་ཀླུང་བདུན་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་མིག་གི་བདག་པོ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མིག་གི་
རྒྱལ་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་

57-1-197a

གང་གཱའི་ཀླུང་བརྒྱད་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་མེ་ཏོག་དང་ལྡན་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
ཀེའི་ལ་སའི་སྙིང་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་གང་
གཱའི་ཀླུང་དགུའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་རྔ་སྒྲ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྔ་དབྱངས་ཤེས་བྱ་བ་ད་ལྟར་
བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་གང་གཱའི་ཀླུང་བཅུའི་བྱེ་མ་སྙེད་
ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་བལྟ་ན་སྡུག་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྡུག་པའི་མཆོག་ཅེས་བྱ་བ་ད་ལྟར་
བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་བྱང་གི་ཕྱོགས་མཚམས་ལོགས་སུ་གང་གཱའི་ཀླུང་
གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་དགའ་བ་འཕེལ་བ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགའ་བ་འཕེལ་བ་ཞེས་བྱ་
བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་བྱང་གི་ཕྱོགས་མཚམས་ལོགས་སུ་

57-1-197b

གང་གཱའི་ཀླུང་གཉིས་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་མཛེས་སྡུག་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཛེས་པ་ཞེས་
བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་བྱང་གི་ཕྱོགས་མཚམས་ལོགས་སུ་གང་གཱའི་
ཀླུང་གསུམ་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་རྒྱུ་དང་ལྡན་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱུའི་སྙིང་པོ་ཞེས་བྱ་བ་ད་ལྟར་
བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་བྱང་གི་ཕྱོགས་མཚམས་ལོགས་སུ་གང་གཱའི་ཀླུང་བཞིའི་
བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་སྤྱོད་པ་ཡིད་འཕྲོག་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱོད་པའི་མཆོག་ཅེས་བྱ་བ་ད་ལྟར་
བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་བྱང་གི་ཕྱོགས་མཚམས་ལོགས་སུ་གང་གཱའི་ཀླུང་ལྔའི་
བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་སེམས་ཅན་དང་འདྲ་བ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེམས་ཅན་གྱི་མཆོག་ཅེས་
བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་བྱང་གི་ཕྱོགས་མཚམས་ལོགས་སུ་གང་གཱའི་

57-1-198a

ཀླུང་དྲུག་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་གློག་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གློག་གི་བླ་མ་ཞེས་བྱ་བ་ད་ལྟར་
བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་བྱང་གི་ཕྱོགས་མཚམས་ལོགས་སུ་གང་གཱའི་ཀླུང་བདུན་གྱི་
བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཡིད་དུ་འོང་བ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡིད་དུ་འོང་བའི་དབྱངས་ཤེས་བྱ་བ་ད་ལྟར་
བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་བྱང་གི་ཕྱོགས་མཚམས་ལོགས་སུ་གང་གཱའི་ཀླུང་བརྒྱད་
ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཚད་མེད་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚད་མེད་པ་ཞེས་བྱ་བ་ད་ལྟར་བཞུགས་ཏེ། 
འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་བྱང་གི་ཕྱོགས་མཚམས་ལོགས་སུ་གང་གཱའི་ཀླུང་དགུའི་བྱེ་མ་སྙེད་ཀྱི་འཇིག་
རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་བརྟན་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བརྟན་པའི་མཆོག་ཅེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་
ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་ནུབ་བྱང་གི་ཕྱོགས་མཚམས་ལོགས་སུ་གང་གཱའི་ཀླུང་བཅུའི་བྱེ་མ་སྙེད་ཀྱི་འཇིག་རྟེན་གྱི་

57-1-198b

ཁམས་འདས་པ་ན། འཇིག་རྟེན་གྱི་ཁམས་ཆུའི་རོ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆུའི་མཆོག་ཅེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་
བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་བྱང་ཤར་གྱི་ཕྱོགས་མཚམས་ལོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། 
འཇིག་རྟེན་གྱི་ཁམས་ཏོག་ཅན་ཞེས་བྱ་བ་དེ་ན། དེ་བཞིན་གཤེགས་པ་རིན་པོ་ཆེའི་ཏོག་ལ་དྲིས་ཤིག་པ་འང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་བྱང་ཤར་གྱི་ཕྱོགས་མཚམས་ལོགས་སུ་གང་གཱའི་ཀླུང་གཉིས་
ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ནོར་བུའི་འོད་ཅེས་བྱ་བ་དེ་ན། དེ་བཞིན་གཤེགས་པ་ནོར་བུ་བསིལ་བ་ཞེས་བྱ་བ་ལ་དྲིས་ཤིག་པ་འང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་
བྱང་ཤར་གྱི་ཕྱོགས་མཚམས་ལོགས་སུ་གང་གཱའི་ཀླུང་གསུམ་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བྱ་བ་དེ་ན། དེ་བཞིན་གཤེགས་པ་རིན་པོ་ཆེའི་མཆོག་ཅེས་བྱ་བ་
ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་བྱང་ཤར་གྱི་ཕྱོགས་མཚམས་ལོགས་སུ་གང་གཱའི་ཀླུང་བཞིའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་
གསེར་འོད་ཅེས་བྱ་བ་དེ་ན། དེ་བཞིན་གཤེགས་པ་གསེར་མཆོག་དཔལ་ཞེས་བྱ་བ་ལ་དྲིས་ཤིག་པ་འང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་བྱང་ཤར་གྱི་ཕྱོགས་མཚམས་ལོགས་སུ་གང་གཱའི་ཀླུང་
ལྔའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་གསེར་མདོག་ཅེས་བྱ་བ་དེ་ན། དེ་བཞིན་གཤེགས་པ་གསེར་འོད་དཔལ་ཞེས་བྱ་བ་ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་

57-1-199a

ཀྱི་ཞིང་འདི་ནས་བྱང་ཤར་གྱི་ཕྱོགས་མཚམས་ལོགས་སུ་གང་གཱའི་ཀླུང་དྲུག་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་གསེར་ཅན་ཞེས་བྱ་བ་དེ་ན། དེ་བཞིན་གཤེགས་པ་འཛམ་བུའི་
ཆུ་བོ་གསེར་མཆོག་ཅེས་བྱ་བ་ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་བྱང་ཤར་གྱི་ཕྱོགས་མཚམས་ལོགས་སུ་གང་གཱའི་ཀླུང་བདུན་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་
རྟེན་གྱི་ཁམས་དྲ་བ་ཅན་ཞེས་བྱ་བ་དེ་ན། དེ་བཞིན་གཤེགས་པ་དྲ་བ་ཅན་གྱི་འོད་ཅེས་བྱ་བ་ལ་དྲིས་ཤིག་པ་འང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་བྱང་ཤར་གྱི་ཕྱོགས་མཚམས་ལོགས་སུ་གང་གཱའི་ཀླུང་
བརྒྱད་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་དྲི་མ་མེད་པའི་ཆུ་ཞེས་བྱ་བ་དེ་ན། དེ་བཞིན་གཤེགས་པ་ཆུའི་རྒྱལ་པོ་ཞེས་བྱ་བ་ལ་དྲིས་ཤིག་པ་འང་གོང་མ་བཞིན་དུ་བསྡུའོ། །སངས་རྒྱས་ཀྱི་
ཞིང་འདི་ནས་བྱང་ཤར་གྱི་ཕྱོགས་མཚམས་ལོགས་སུ་གང་གཱའི་ཀླུང་དགུའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཚུལ་ཁྲིམས་དང་ལྡན་པ་ཞེས་བྱ་བ་དེ་ན། དེ་བཞིན་གཤེགས་པ་ཚུལ་ཁྲིམས་ཀྱི་
སྙིང་པོ་ཞེས་བྱ་བ་ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་བྱང་ཤར་གྱི་ཕྱོགས་མཚམས་ལོགས་སུ་གང་གཱའི་ཀླུང་བཅུའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་
ཁམས་རིན་པོ་ཆེའི་གླིང་ཞེས་བྱ་བ་དེ་ན། དེ་བཞིན་གཤེགས་པ་རིན་ཆེན་འབྱུང་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ཤར་ལྷོའི་
ཕྱོགས་མཚམས་ལོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་རྡོ་རྗེའི་འབྱུང་གནས་ཤེས་བྱ་བ་དེ་ན། དེ་བཞིན་གཤེགས་པ་རྡོ་རྗེའི་བློ་གྲོས་ཞེས་བྱ་བ་ལ་དྲིས་ཤིག་

57-1-199b

པའང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ཤར་ལྷོའི་ཕྱོགས་མཚམས་ལོགས་སུ་གང་གཱའི་ཀླུང་གཉིས་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་སངས་རྒྱས་
ཐམས་ཅད་ཅེས་བྱ་བ་དེ་ན། དེ་བཞིན་གཤེགས་པ་སངས་རྒྱས་ཐམས་ཅད་ཀྱི་བློ་གྲོས་ཏོག་ཅེས་བྱ་བའི་དེ་བཞིན་གཤེགས་པ་ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ཤར་
ལྷོའི་ཕྱོགས་མཚམས་ལོགས་སུ་གང་གཱའི་ཀླུང་གསུམ་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་བློ་གྲོས་གྲུབ་པ་ཞེས་བྱ་བ་དེ་ན། དེ་བཞིན་གཤེགས་པ་དོན་གྲུབ་དཔལ་ཞེས་བྱ་བ་ལ་དྲིས་
ཤིག་པ་འང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ཤར་ལྷོའི་ཕྱོགས་མཚམས་ལོགས་སུ་གང་གཱའི་ཀླུང་བཞིའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་དྲི་མ་མེད་
པའི་ཆུ་ཞེས་བྱ་བ་དེ་ན། དེ་བཞིན་གཤེགས་པ་དྲི་མ་མེད་པའི་བཻ་དཱུརྱ་ཞེས་བྱ་བ་ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ཤར་ལྷོའི་ཕྱོགས་མཚམས་ལོགས་སུ་གང་གཱའི་ཀླུང་ལྔའི་བྱེ་
མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་སྐྱེས་བུ་ཀླུ་ལ་དགའ་བ་ཞེས་བྱ་བ་དེ་ན། དེ་བཞིན་གཤེགས་པ་སྐྱེས་བུ་ཀླུའི་སྙིང་པོ་ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་ཀྱི་
ཞིང་འདི་ནས་ཤར་ལྷོའི་ཕྱོགས་མཚམས་ལོགས་སུ་གང་གཱའི་ཀླུང་དྲུག་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་སྤོས་ཀྱི་རོ་ཞེས་བྱ་བ་དེ་ན། དེ་བཞིན་གཤེགས་པ་སྤོས་བརྩེགས་
ཞེས་བྱ་བ་ལ་དྲིས་ཤིག་པ་འང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ཤར་ལྷོའི་ཕྱོགས་མཚམས་ལོགས་སུ་གང་གཱའི་ཀླུང་བདུན་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་

57-1-200a

ཁམས་སྤོས་ལྡན་ཞེས་བྱ་བ་དེ་ན། དེ་བཞིན་གཤེགས་པ་སྤོས་ཀྱི་སྙིང་པོ་ཞེས་བྱ་བ་ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ཤར་ལྷོའི་ཕྱོགས་མཚམས་ལོགས་སུ་གང་གཱའི་ཀླུང་
བརྒྱད་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་དྲང་པོའི་འོད་ཅེས་བྱ་བ་དེ་ན། དེ་བཞིན་གཤེགས་པ་དྲང་པོའི་དཔལ་ཞེས་བྱ་བ་ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་
ཀྱི་ཞིང་འདི་ནས་ཤར་ལྷོའི་ཕྱོགས་མཚམས་ལོགས་སུ་གང་གཱའི་ཀླུང་དགུའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་རིན་ཐང་མེད་པ་ཞེས་བྱ་བ་དེ་ན། དེ་བཞིན་གཤེགས་པ་རིན་ཐང་མེད་པ་
ཞེས་བྱ་བ་ལ་དྲིས་ཤིག་པ་འང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ཤར་ལྷོའི་ཕྱོགས་མཚམས་ལོགས་སུ་གང་གཱའི་ཀླུང་བཅུའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་
མཐའ་ཡས་གཙུག་ཕུད་ཅན་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐའ་ཡས་པའི་རྒྱལ་པོ་ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་
འདི་ནས་ལྷོ་ནུབ་ཀྱི་ཕྱོགས་མཚམས་ལོགས་སུ་གང་གཱའི་ཀླུང་གི་བྱེ་མ་སྙེད་ཀྱི། འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་འོད་དཔག་ཏུ་མེད་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་འོད་དཔག་ཏུ་མེད་པ་ཞེས་བྱ་བ་ལ་དྲིས་ཤིག་པ་འང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ལྷོ་ནུབ་ཀྱི། ཕྱོགས་མཚམས་ལོགས་སུ་གང་
གཱའི་ཀླུང་གཉིས་ཀྱི་བྱེ་མ་སྙེད་ཀྱི། འཇིག་རྟེན་གྱིས་ཁམས་འདས་པ་ན། འཇིག་རྟེན་གྱི་ཁམས་ཚད་མེད་པའི་མིག་ཅེས་བྱ་བ་དེ་ན། དེ་བཞིན་གཤེགས་པ་དགྲ་

57-1-200b

བཅོམ་པ་ཡང་དག་པར་རྫོགས་པའི་སངས་རྒྱས་ཚད་མེད་པའི་དབང་ཕྱུག་ཅེས་བྱ་བ་ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ལྷོ་ནུབ་ཀྱི་ཕྱོགས་མཚམས་ལོགས་སུ་གང་
གཱའི་ཀླུང་གསུམ་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་མེའི་གཟི་བརྗིད་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེའི་འོད་ཅེས་
བྱ་བ་ལ་དྲིས་ཤིག་པ་འང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ལྷོ་ནུབ་ཀྱི་ཕྱོགས་མཚམས་ལོགས་སུ་གང་གཱའི་ཀླུང་བཞིའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་
ཁམས་མུན་པ་སེལ་བ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མུན་པ་སེལ་ལྡན་ཞེས་བྱ་བ་ལ་དྲིས་ཤིག་པ་འང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་
འདི་ནས་ལྷོ་ནུབ་ཀྱི་ཕྱོགས་མཚམས་ལོགས་སུ་གང་གཱའི་ཀླུང་ལྔའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་བྱིན་པ་དང་ལྡན་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་བྱིན་པའི་སྙིང་པོ་ཞེས་བྱ་བ་ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ལྷོ་ནུབ་ཀྱི་ཕྱོགས་མཚམས་ལོགས་སུ་གང་གཱའི་ཀླུང་དྲུག་གི་བྱེ་མ་སྙེད་ཀྱི་
འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་མི་སྐྱེ་བ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་སྐྱེ་བའི་དབང་ཕྱུག་ལ་དྲིས་ཤིག་པའང་གོང་མ་
བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ལྷོ་ནུབ་ཀྱི་ཕྱོགས་མཚམས་ལོགས་སུ་གང་གཱའི་ཀླུང་བདུན་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་སྤོས་ཀྱི་གླང་པོ་ཆེ་ཞེས་བྱ་བ་

57-1-201a

དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་ཀྱི་གླང་པོ་ཆེའི་རྣམ་པར་གནོན་པ་ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ལྷོ་
ནུབ་ཀྱི་ཕྱོགས་མཚམས་ལོགས་སུ་གང་གཱའི་ཀླུང་བརྒྱད་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་སྤོས་ཀྱི་སྣོད་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་སྤོས་ཀྱི་སྣོད་ཀྱི་རྒྱལ་པོ་ལ་དྲིས་ཤིག་པའང་གོང་མ་བཞིན་དུ་བསྡུའོ། །སངས་རྒྱས་ཀྱི་ཞིང་འདི་ནས་ལྷོ་ནུབ་ཀྱི་ཕྱོགས་མཚམས་ལོགས་སུ་གང་གཱའི་ཀླུང་དགུའི་བྱེ་མ་སྙེད་ཀྱི་འཇིག་རྟེན་གྱི་ཁམས་
འདས་པ་ན། འཇིག་རྟེན་གྱི་ཁམས་དགའ་བའི་དབྱངས་ཤེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགའ་བ་ལ་དྲིས་ཤིག་པའང་གོང་མ་བཞིན་དུ་བསྡུའོ། །
སངས་རྒྱས་ཀྱི་ཞིང་འདི་ནས་ལྷོ་ནུབ་ཀྱི་ཕྱོགས་མཚམས་ལོགས་སུ་གང་གཱའི་ཀླུང་བཅུའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་དཔལ་གྱི་ཕྲེང་བ་ཞེས་བྱ་བ་དེ་ན། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་རྒྱལ་བའི་དཔལ་དམ་པ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་
ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་སྟེང་གི་ཕྱོགས་ལོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་འཇིག་རྟེན་མཐོང་བ་དང་
བཅས་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་ཐམས་ཅད་མཐོང་ན་དགའ་བ་ཆེར་འཕགས་པའི་རྒྱལ་པོའི་འོད་འཕྲོ་བ་རྣམ་པར་སྤྲུལ་པའི་བཀོད་པ་

57-1-201b

གོ་ཆ་ཆེན་པོ་བགོས་པ། སའི་དབང་ཕྱུག་རྒྱལ་པོ་ཐམས་ཅད་ལ་འོད་བྱེད་སྣང་བའི་སྒོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་
གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་སྟེང་གི་ཕྱོགས་ལོགས་སུ་གང་གཱའི་ཀླུང་གཉིས་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་པད་མ་དཀར་པོ་ཞེས་བྱ་བ་དེ་ན། 
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དམ་པའི་ཆོས་པད་མ་དཀར་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་
འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་སྟེང་གི་ཕྱོགས་ལོགས་སུ་གང་གཱའི་ཀླུང་གསུམ་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཆུས་མེ་ཏོག་
འབྱེ་བ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་ཁ་འབྱེད་པ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་
ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་སྟེང་གི་ཕྱོགས་ལོགས་སུ་གང་གཱའི་ཀླུང་བཞིའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་མྱ་ངན་མེད་
པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་ཐམས་ཅད་མེད་པ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་
བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་སྟེང་གི་ཕྱོགས་ལོགས་སུ་གང་གཱའི་ཀླུང་ལྔའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་

57-1-202a

ཨུད་པ་ལ་མཐིང་ཀ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་ཨུད་པ་ལའི་དཔལ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་
པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་སྟེང་གི་ཕྱོགས་ལོགས་སུ་གང་གཱའི་ཀླུང་དྲུག་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་
པད་མ་ཅན་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་སྙིང་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་
འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་སྟེང་གི་ཕྱོགས་ལོགས་སུ་གང་གཱའི་ཀླུང་བདུན་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཀུ་མུ་ད་དང་
ལྡན་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུ་མུ་དའི་སྙིང་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་
འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་སྟེང་གི་ཕྱོགས་ལོགས་སུ་གང་གཱའི་ཀླུང་བརྒྱད་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ས་ཀིའི་སྤོས་ཞེས་
བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ས་ཀི་སྤོས་ཤེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་ལྡན་འདས་ཤཱཀྱ་
ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་སྟེང་གི་ཕྱོགས་ལོགས་སུ་གང་གཱའི་ཀླུང་དགུའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཀོ་ཀང་སི་ཀ་ཞེས་བྱ་

57-1-202b

བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཀྲ་ཤིས་ཐམས་ཅད་ཀྱི་རྒྱལ་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་པ་དེ་ལ་བཅོམ་
ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་སྟེང་གི་ཕྱོགས་ལོགས་སུ་གང་གཱའི་ཀླུང་བཅུའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་བསོད་ནམས་ཀྱི་
སྟེགས་ཅན་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསོད་ནམས་ཀྱི་སྟེགས་ཀྱི་དབང་ཕྱུག་ཅེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་
པ་དེ་ལ་བཅོམ་ལྡན་འདས་ཤཱཀྱ་ཐུབ་པ་ཇི་ལྟར་གནས་པ་དྲིས་ཤིག །སངས་རྒྱས་ཀྱི་ཞིང་འདི་ནས་འོག་གི་ཕྱོགས་ལོགས་སུ་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་སེང་
གེའི་ཚུལ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་རྣམ་པར་རོལ་པ་ཞེས་བྱ་བ་དང་། སངས་རྒྱས་ཀྱི་ཞིང་འདི་ནས་འོག་གི་ཕྱོགས་ལོགས་སུ་གང་གཱའི་
ཀླུང་གཉིས་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་སྟག་གི་ཕུག་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟག་སྒྲ་སྒྲོགས་ཞེས་
བྱ་བ་དང་། སངས་རྒྱས་ཀྱི་ཞིང་འདི་ནས་འོག་གི་ཕྱོགས་ལོགས་སུ་གང་གཱའི་ཀླུང་གསུམ་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཤིང་ས་ཧ་ཀ་ར་ཞེས་བྱ་བ་དེ་ན། དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ས་ཧ་ཀ་རའི་མེ་ཏོག་ཀླུང་ཞེས་བྱ་བ་དང་། སངས་རྒྱས་ཀྱི་ཞིང་འདི་ནས་འོག་གི་ཕྱོགས་ལོགས་སུ་གང་གཱའི་ཀླུང་བཞིའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་

57-1-203a

པ་ན། འཇིག་རྟེན་གྱི་ཁམས་རྒྱལ་ལྡན་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ལས་རྒྱལ་བར་འདུལ་བ་ཞེས་བྱ་བ་དང་། སངས་རྒྱས་ཀྱི་ཞིང་འདི་
ནས་འོག་གི་ཕྱོགས་ལོགས་སུ་གང་གཱའི་ཀླུང་ལྔའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ཡེ་ཤེས་མི་ཆགས་པའི་འབྱུང་གནས་ཤེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་ཐེག་པ་ཆེན་པོ་རྣམ་པར་སྒྲོགས་པའི་རྒྱལ་པོ་ཞེས་བྱ་བ་དང་། སངས་རྒྱས་ཀྱི་ཞིང་འདི་ནས་འོག་གི་ཕྱོགས་ལོགས་སུ་གང་གཱའི་ཀླུང་དྲུག་གི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་
པ་ན། འཇིག་རྟེན་གྱི་ཁམས་མཁའ་འབིགས་འབྱུང་གནས་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁའ་འབིགས་རྩེ་མོ་ཞེས་བྱ་བ་དང་། སངས་རྒྱས་ཀྱི་ཞིང་འདི་ནས་
འོག་གི་ཕྱོགས་ལོགས་སུ་གང་གཱའི་ཀླུང་བདུན་གྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་ལྟད་མོ་ཆེ་བ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་རི་མོ་ཐམས་ཅད་ཀྱི་རྒྱལ་པོ་ཞེས་བྱ་བ་དང་། སངས་རྒྱས་ཀྱི་ཞིང་འདི་ནས་འོག་གི་ཕྱོགས་ལོགས་སུ་གང་གཱའི་ཀླུང་བརྒྱད་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་བློ་གྲོས་
འཛིན་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཟུངས་ཀྱི་དབང་ཕྱུག་རྒྱལ་པོ་ཞེས་བྱ་བ་དང་། སངས་རྒྱས་ཀྱི་ཞིང་འདི་ནས་འོག་གི་ཕྱོགས་ལོགས་སུ་གང་
གཱའི་ཀླུང་དགུའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་སའི་བློ་གྲོས་ཤེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སའི་རྒྱལ་པོ་ཞེས་བྱ་བ་

57-1-203b

དང་། སངས་རྒྱས་ཀྱི་ཞིང་འདི་ནས་འོག་གི་ཕྱོགས་ལོགས་སུ་གང་གཱའི་ཀླུང་བཅུའི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་རྟག་ཏུ་དགའ་བའི་རྒྱལ་པོ་ཞེས་བྱ་བ་དེ་ན། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐེ་ཙོམ་དང་ཡིད་གཉིས་ཐམས་ཅད་གཅོད་པའི་འབྱུང་གནས་རྒྱལ་པོ་ཞེས་བྱ་བ་ད་ལྟར་བཞུགས་ཏེ། འཚོ་ཞིང་གཞེས་ཀྱིས། དེ་བཞིན་གཤེགས་
པ་དེ་ལ་བཅོམ་ལྡན་འདས་ཤཱཀྱ་ཐུབ་པ་མི་མཇེད་ཀྱི་འཇིག་རྟེན་གྱི་ཁམས་ན་ཡོངས་སུ་མྱ་ངན་ལས་མ་འདས་པར་བཞུགས་ཤིག །དེ་བཞིན་གཤེགས་པ་ཐམས་ཅད་ཀྱི་ཚིག་གི་དཔེས་བརྒྱན་པའི་མཐའ་ལ་ཇི་ལྟར་
གནས་པ། འཇམ་དཔལ་གཞོན་ནུར་གྱུར་པ་དང་། སོར་མོའི་ཕྲེང་བ་ཁྱོད་དེང་ལ་བཅོམ་ལྡན་འདས་དེ་བཞིན་གཤེགས་པ་དེ་ལ་དྲིས་ཤིག །ཁྱོད་ཀྱི་ཐེ་ཙོམ་དང་ཡིད་གཉིས་ཐམས་ཅད་གཅོད་པར་འགྱུར་ཏེ། དེ་བས་
ན་དེ་བཞིན་གཤེགས་པ་དེའི་མཚན་ཐེ་ཙོམ་དང་། ཡིད་གཉིས་ཐམས་ཅད་གཅོད་པ་ཞེས་བྱའོ། །དེ་ནས་འཇམ་དཔལ་གཞོན་ནུར་གྱུར་པ་དང་། སོར་མོའི་ཕྲེང་བས་བཅོམ་ལྡན་འདས་ལ་ལེགས་སོ་ལེགས་སོ་ཞེས་
གསོལ་ནས། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ནས། རྫུ་འཕྲུལ་གྱི་རྐང་པའི་སྟོབས་ཀྱིས་ངང་པའི་རྒྱལ་པོ་ལྟར་དོང་སྟེ། རྟག་ཏུ་དགའ་བའི་རྒྱལ་པོ་ཞེས་བྱ་བའི་འཇིག་རྟེན་གྱི་ཁམས་དེར་
ཕྱིན་ནས། དེ་བཞིན་གཤེགས་པ་ཐེ་ཙོམ་དང་ཡིད་གཉིས་ཐམས་ཅད་གཅོད་པ་ཞེས་བྱ་བའི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་ནས་གསོལ་པ། བཅོམ་ལྡན་འདས་བདག་ཅག་གཉིས་
མི་མཇེད་ཀྱི་འཇིག་རྟེན་གྱི་ཁམས་ནས། དེ་བཞིན་གཤེགས་པ་ཤཱཀྱ་ཐུབ་པའི་ཞབས་ཀྱི་དྲུང་ནས་འདིར་མཆིས་སོ། །ཕྱོགས་བཅུའི་སངས་རྒྱས་བཅུའི་ཞབས་ཀྱི་དྲུང་དུ་འང་ཕྱིན་ཏེ། བཅོམ་ལྡན་འདས་ཤཱཀྱ་ཐུབ་པ་

57-1-204a

དེ་བཞིན་གཤེགས་པ་མི་མཇེད་ཀྱི་འཇིག་རྟེན་གྱི་ཁམས་ན་བཞུགས་ཏེ། མྱ་ངན་ལས་མ་འདས་བཞིན་དུ་ཐར་པའི་མཐའ་ལ་ཇི་ལྟར་གནས་པ་དེ་དག་ཐམས་ཅད་ལ་ཞུས་ན། དེ་བཞིན་གཤེགས་
པ་དེ་དག་གིས་འདི་སྐད་དུ་བཀའ་སྩལ་ཏོ། །དེ་བཞིན་གཤེགས་པ་ཤཱཀྱ་ཐུབ་པ་དེ། དེ་བཞིན་གཤེགས་པ་ངེད་དང་གཅིག་གིས་དེ་བཞིན་གཤེགས་པ་དེ་ལ་ཞུས་ཤིག་ཅེས་གསུངས་ནས། བཅོམ་ལྡན་འདས་
ཤཱཀྱ་ཐུབ་པ་དེ་བཞིན་གཤེགས་པས་ཀྱང་རིགས་ཀྱི་བུ་ཁྱེད་གཉིས་ངེད་ལ་ཐེ་ཙོམ་དང་། ཡིད་གཉིས་ཐམས་ཅད་གཅོད་པའི་རྣམ་པ་དེ་བཞིན་གཤེགས་པ་ལ་དྲིས་ཤིག་ཅེས་བདག་ཅག་འདིར་བཀྱེ་སྟེ་མཆིས་
སོ། །བཅོམ་ལྡན་འདས་དེ་བཞིན་གཤེགས་པ་མི་མཇེད་ཀྱི་འཇིག་རྟེན་གྱི་ཁམས་ན་བཞུགས་ཤིང་མྱ་ངན་ལས་མ་འདས་པར་ཇི་ལྟར་ན་ཐར་པའི་མཐའ་ལ་གནས་ཤེས་ཞུས་པ་དང་། དེ་གཉིས་ཀྱི་ཚིག་གསན་
ནས། དེ་བཞིན་གཤེགས་པ་དེས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་མྱུར་དུ་སླར་ལོག་ཤིག །དེ་བཞིན་གཤེགས་པ་དེས་ཐེ་ཙོམ་དང་ཡིད་གཉིས་ཐམས་ཅད་གཅོད་པར་འགྱུར་རོ། །དེ་བཞིན་
གཤེགས་པ་དེ་ཉིད་ང་ཡིན་ཏེ། ཐ་དད་པ་ནི་མ་ཡིན་ནོ། །དེ་ལྟར་ཤཱཀྱ་ཐུབ་པ་ནི་ཚད་མེད་དོ་ཞེས་གསུངས་ནས་སླར་བཀྱེའོ། །དེ་ནས་འཇམ་དཔལ་གཞོན་ནུར་གྱུར་པས། བཅོམ་ལྡན་འདས་ལ་ལེགས་སོ་
ལེགས་སོ་ཞེས་གསོལ་ཏེ། སོར་མོའི་ཕྲེང་བ་དང་ལྷན་ཅིག་ཏུ་དེ་བཞིན་གཤེགས་པ་དེའི་ཞབས་ལ་མགོ་བོས་ཕྱག་འཚལ་ཏེ། དོང་ནས་བཅོམ་ལྡན་འདས་ཀྱི་དྲུང་དུ་ཕྱིན་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་
ཕྱག་འཚལ་ནས། འདི་སྐད་ཅེས་གསོལ་ཏོ། །ཀྱེ་མ་དེ་བཞིན་གཤེགས་པའི་སྐུ་ནི་ཚད་མེད་གྲངས་མེད་པར་འཛིན་པ་སྟེ། དེ་བཞིན་གཤེགས་པ་དེ་ཉིད་ང་ཡིན་ཏེ། ཤཱཀྱ་ཐུབ་པ་དེ་བཞིན་གཤེགས་པ་དེ་ཁྱོད་ཀྱི་ཐེ་ཙོམ་

57-1-204b

ཐམས་ཅད་གཅོད་པར་འགྱུར་གྱིས། ཁྱེད་དེང་ཤིག་ཅེས་དེ་དག་གིས་ཀྱང་བདག་ཅག་སླར་བཀྱེའོ། །བཅོམ་ལྡན་འདས་ཀྱིས་བཀའ་སྩལ་པ། ང་ཉིད་དེ་བཞིན་གཤེགས་པ་དེ་ཡིན་ནོ་ཞེས་དེ་བཞིན་གཤེགས་
པ་དེ་གསུང་ངམ། དེ་དག་གིས་གསོལ་པ། དེ་གཅིག་གསུང་བ་བཞིན་དེ་བཞིན་གཤེགས་པ་དེ་དག་ཐམས་ཅད་གསུང་སྟེ། ཐ་མར་བདག་ཅག་གིས་ཞུས་ན། དེ་བཞིན་གཤེགས་པ་ཐམས་ཅད་ང་ཉིད་དེ་བཞིན་
གཤེགས་པ་དེ་ཡིན་ཏེ། གཅིག་གོ་ཞེས་གསུང་ངོ་། །བཀའ་སྩལ་པ། དེ་བཞིན་གཤེགས་པ་སངས་རྒྱས་བཅོམ་ལྡན་འདས་དེ་དག་གི་འཇིག་རྟེན་གྱི་ཁམས་དེ་དག་ཅི་འདྲ། དེ་གཉིས་ཀྱིས་གསོལ་པ། དེ་བཞིན་
གཤེགས་པ་ཐམས་ཅད་ཀྱི་འཇིག་རྟེན་གྱི་ཁམས་བདག་ཅག་གིས་ཕྱིན་པ་ཐམས་ཅད་ནི་གམ་པ་དང་། གྱོ་མོ་ཐམས་ཅད་མ་མཆིས་པ། ལག་མཐིལ་བཞིན་དུ་མཉམ་པ། ཀ་ཙ་ལིན་དི་ཀ་བཞིན་དུ་རེག་ན་བདེ་བ། 
བདེ་བ་ཐམས་ཅད་ཀྱི་འཇིག་རྟེན་གྱི་ཁམས་ལྟར་སྙིགས་མ་ལྔ་དང་བྲལ་བ། ཉན་ཐོས་དང་། རང་སངས་རྒྱས་དང་། བུད་མེད་མ་མཆིས་པ་ཐེག་པ་དམ་པ་གཅིག་སྟེ། ཐེག་པ་གཞན་ལ་མི་འཇུག་གོ། །བཀའ་སྩལ་
པ། དེ་བཞིན་གཤེགས་པ་དེ་རྣམས་ཀྱི་མཚན་རིགས་ཀྱི་བུ་འམ། རིགས་ཀྱི་བུ་མོ་གང་ཁ་ཏོན་ལེགས་པར་བྱེད་དམ། འདྲིའམ། ཉན་ཀྱང་རུང་སྟེ། སྟིང་ངམ། བརྗོད་དམ། གཞན་གྱི་ཕྱིར་འཕྱ་འམ། བདག་གིས་
བརྗོད་ན། བདག་འཇིགས་པ་ཐམས་ཅད་མེད་པར་འགྱུར་རོ། །ལྷ་ཐམས་ཅད་ཀྱང་དེ་ལ་གནོད་པར་མི་བྱེད་དོ། །དེ་བཞིན་དུ་ཀླུ་དང་། གནོད་སྦྱིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། དྲི་ཟ་
ལ་སོགས་པས་ཀྱང་མི་ཚུགས་སོ། །ཐོས་ནས་ལ་ལ་སྲུང་བར་འགྱུར། དེས་འགྲོ་བ་བཞི་བཅད་པ་ཡིན། བྱང་ཆུབ་ཀྱི་སེམས་མ་སྐྱེས་པ་དེ་དག་ཀྱང་བྱང་ཆུབ་ཀྱི་རྒྱུ་ཐོབ་པར་འགྱུར་རོ་ཞེས་གསུང་ངོ་། །སོར་མོའི་ཕྲེང་བ་

57-1-205a

གཞན་ཡང་དེ་བཞིན་གཤེགས་པའི་ཆེ་བ་ཉིད་ངོ་མཚར་ནི་གཟུངས་མཚུངས་པ་མེད་པའི་མདོ་སྡེ་ཆེན་པོ་ལས་སངས་རྒྱས་བྱེ་བ་ཕྲག་བརྒྱད་བཅུ་རྩ་གཅིག་སྟེ་ང་ཉིད་དེ་བཞིན་གཤེགས་པ་དེ་ཉིད་ཡིན་
ནོ་ཞེས་རྒྱ་ཆེར་བཤད་དོ། །དེ་བཞིན་དུ་སངས་རྒྱས་ཀྱི་ཞིང་བསྔགས་པ་ཡང་བསམ་གྱིས་མི་ཁྱབ་བོ། །དེ་ལྟར་དེ་བཞིན་གཤེགས་པའང་ཚད་མེད་པ་སྟེ། དེ་ལྟར་དེ་བཞིན་གཤེགས་པའི་གཟུགས་ཀྱི་སྐུ་ཡང་མཐའ་
ཡས་གྲངས་མེད་དེ། དེ་ལྟ་བུའི་ཡོན་ཏན་གྱི་མཚན་ཉིད་དང་ལྡན་པ་ལ་མི་རྟག་པ་དང་། ནད་ལྟ་ག་ལ་འབྱུང་། དེ་བཞིན་གཤེགས་པའི་སྐུ་རྟག་པ་དང་། མཐའ་ཡས་པ་རྩ་བ་དང་བཅས། རྒྱུ་དང་རྐྱེན་དུ་བཅས་པའི་གཏན་
ཚིགས་ཐམས་ཅད་ཁྱེད་ལ་རྒྱ་ཆེར་བསྟན་ཏོ། །འཇིག་རྟེན་གྱི་ཁམས་འདི་ན་སྐྱེ་བོ་རྣམས་མི་དགེ་བས་ན། སངས་རྒྱས་ཐམས་ཅད་ཀྱང་འཇིག་རྟེན་གྱི་ཁམས་འདིའི་རྒྱལ་པོ་མི་བཞེད་དོ། །མི་དགེ་བ་དགེ་བ་ལ་བཀོད་པའི་
ཕྱིར་ལུས་ཡང་དང་ཡང་བཏང་བས་ན། ངའི་ལུས་མ་སྐྱེས་པའི་སྐུར་གྱུར་ཏོ། །ངའི་ལུས་བསྐལ་པ་བྱེ་བ་གྲངས་མེད་པ་མང་པོར་དམ་པའི་ཆོས་བསྲུང་བའི་ཕྱིར། ངའི་ལུས་གང་གཱའི་ཀླུང་གི་བྱེ་མ་སྙེད་ཀྱི་ལུས་རེ་རེ་ཡང་
བཅད་གཏུབས་བཅོམ་ནས་བྱིན་པས་ངའི་ལུས་མི་ཤིགས་པ་འདུས་མ་བྱས་ཀྱི་ལུས་མཚུངས་པ་མེད་པར་གྱུར་ཏོ། །བསྐལ་པ་བྱེ་བ་མང་པོར་དཔའ་བོ་ལྟར་འདུག་སྟེ། གནས་མང་པོར་གང་གཱའི་ཀླུང་གི་བྱེ་མ་སྙེད་ཀྱི་ལུས་
མང་པོ་བཏང་སྟེ། ལུས་རེ་རེ་ཡང་བསྐལ་པ་བྱེ་བ་མང་པོར་དཔའ་བོ་ལྟར་འདུག་ཅིང་དཀའ་བ་སྤྱད་པས་ངའི་ལུས་རྒ་བ་མེད་པའི་སྐུར་གྱུར་ཏོ། །བསྐལ་པ་བྱེ་བ་མང་པོ་གྲངས་མེད་པར་ང་ནད་ཀྱི་བསྐལ་པ་བར་མར་
སྐྱེས་ཏེ། ངའི་ལུས་རེ་རེ་ཡང་སྨན་དམ་པར་གྱུར་ནས། གང་གཱའི་ཀླུང་གི་བྱེ་མ་སྙེད་ཀྱི་སེམས་ཅན་རྣམས་ལ་ཕན་བཏགས་པས་ན། ངའི་ལུས་ནད་མེད་པའི་སྐུར་གྱུར་ཏོ། །ང་ཚེ་རབས་མང་པོ་གང་གཱའི་ཀླུང་གི་བྱེ་མ་

57-1-205b

སྙེད་ཀྱི་བསྐལ་པ་བྱེ་བ་མང་པོ་གྲངས་མེད་པར་སེམས་ཅན་བྱེ་བ་མང་པོ་ལྟོགས་པའི་ནད་ཞི་བར་བྱས་ཏེ། ཐེག་པ་གཅིག་པའི་ཁུ་བ་བླུད་པས་ན། ངའི་ལུས་མི་འཆི་བའི་སྐུར་གྱུར་ཏོ། །ངས་བསྐལ་པ་བྱེ་བ་མང་པོ་གྲངས་མེད་པར་སེམས་
ཅན་བྱེ་བ་མང་པོ་ཉོན་མོངས་པ་བྱེ་བ་མང་པོའི་དྲི་མ་བསལ་ནས། ཤིན་དུ་དཀའ་བ་བསྟན་ཏེ་དེ་བཞིན་གཤེགས་པའི་སྙིང་པོ་བསྟན་པས་ན། ངའི་ལུས་ཉོན་མོངས་པ་མེད་པའི་སྐུར་གྱུར་ཏོ། །ང་ཚེ་རབས་གང་གཱའི་ཀླུང་གི་བྱེ་མ་སྙེད་
དུ་བསྐལ་པ་བྱེ་བ་མང་པོ་གྲངས་མེད་པར་སེམས་ཅན་ཡི་དགས་བྱེ་བ་མང་པོ་སྐོམ་ཞིང་ལྟོགས་པའི་སྡུག་བསྔལ་རབ་ཏུ་ཞི་བར་བྱས་ཏེ། ཐེག་པ་གཅིག་པའི་རོས་ཚིམ་པར་བྱས་པས་ན། གང་གཱའི་ཀླུང་མང་པོའི་བྱེ་མ་སྙེད་དུ་ངའི་
ལུས་ཟག་པ་མེད་པའི་སྐུར་གྱུར་ཏོ། །ང་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་ལྷ་མ་ཡིན་དུ་བཅས་པའི་སེམས་ཅན་བྱེ་བ་མང་པོ་ལ་མ་དང་། སྲིང་མོ་དང་། བུ་བཞིན་དུ་སྡུག་
པར་བྱས་པས་ན། ངའི་ལུས་གནོད་པ་མེད་པའི་སྐུར་གྱུར་ཏོ། །ང་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་། མིར་བཅས་པའི་སེམས་ཅན་བྱེ་བ་མང་པོ་ལ་མི་བདེན་པར་སྨྲ་
བ་རྣམས་ཐེག་པ་ཆེན་པོའི་བདེན་པ་ལ་བཀོད་པས་ན། ངའི་ལུས་བདེན་པ་རྟག་པའི་སྐུར་གྱུར་ཏོ། །ང་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་། མིར་བཅས་པའི་
སེམས་ཅན་བྱེ་བ་མང་པོ་ཆོས་མ་ཡིན་པ་བྱེད་པ་རྣམས་འཇིག་རྟེན་ལས་འདས་པའི་ཆོས་ཀྱི་རྣམ་པ་ལ་བཀོད་པས་ན། ངའི་ལུས་ཆོས་ཀྱི་སྐུར་གྱུར་ཏོ། །ང་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་
པོ་གྲངས་མེད་པར་ལྷ་དང་། མིར་བཅས་པའི་སེམས་ཅན་བྱེ་བ་མང་པོ་ལོག་པར་ལྟ་བའི་དབང་དུ་གྱུར་པ་རྣམས་ཡང་དག་པར་ལྟ་བ་ལ་བཀོད་པས་ན། ངའི་ལུས་ཤིན་དུ་བདེ་བའི་སྐུར་གྱུར་ཏོ། །ང་ཚེ་རབས་མང་པོ་

57-1-206a

གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་མིར་བཅས་པའི་སེམས་ཅན་བྱེ་བ་མང་པོ་འཇིགས་སྐྲག་པར་གྱུར་པ་རྣམས་འཇིགས་པ་མེད་པ་ལ་བཀོད་པས་ན། ངའི་ལུས་དགེ་བའི་
སྐུར་གྱུར་ཏོ། །ང་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་མིར་བཅས་པའི་སེམས་ཅན་བྱེ་བ་མང་པོ་མྱ་ངན་མང་པོར་གྱུར་པ་རྣམས་མྱ་ངན་མེད་པའི་ཆོས་ལ་བཀོད་པས་ན་
ངའི་ལུས་མྱ་ངན་མེད་པ་དང་། མྱ་ངན་དང་བྲལ་བའི་སྐུར་གྱུར་ཏོ། །ང་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་མིར་བཅས་པའི་སེམས་ཅན་མང་པོ་གཞན་གྱི་ཆུང་མ་ལ་ཆགས་
པ་རྣམས་ཚུལ་ཁྲིམས་ཆེན་པོའི་ཆོ་ག་ལ་བཀོད་པས་ན། ངའི་ལུས་རྡུལ་མེད་ཅིང་རྡུལ་དང་བྲལ་བའི་སྐུར་གྱུར་ཏོ། །ང་ལུས་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་སེམས་ཅན་བྱེ་བ་མང་པོ་
སྐྱོན་ཆགས་པའི་ཡ་མཚན་ཅན་རྣམས་བསྡུས་ཏེ། རབ་ཏུ་སྦྱངས་པས་དམ་པའི་ཆོས་ལ་བཀོད་པས་ན། ངའི་ལུས་ཤག་ཤིག་མེད་དེ། ཤག་ཤིག་མེད་པའི་ཆོས་ཀྱི་སྐུར་གྱུར་ཏོ། །
བམ་པོ་དྲུག་པ། །ང་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་མིར་བཅས་པའི་སེམས་ཅན་བྱེ་བ་མང་པོ་དབུལ་པོར་གྱུར་པ་རྣམས་ཆོས་ཀྱི་ནོར་དང་། གཏེར་བྱིན་པས་ན། 
ངའི་ལུས་ཚུལ་མེད་པ་ལས་ཚུལ་གྱི་ཆོས་ཀྱི་སྐུར་གྱུར་ཏོ། །ང་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་མིར་བཅས་པའི་སེམས་ཅན་བྱེ་བ་མང་པོ་འདོད་པའི་དབང་དུ་གྱུར་
པ་རྣམས་ཉོན་མོངས་པ་མེད་པ་ལ་བཀོད་པས་ན། ངའི་ལུས་གཙེ་བ་དང་བྲལ་ཞིང་གཙེ་བ་མེད་པའི་ཆོས་ཀྱི་སྐུར་གྱུར་ཏོ། །ང་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་

57-1-206b

མིར་བཅས་པའི་སེམས་ཅན་བྱེ་བ་མང་པོ་ཉོན་མོངས་པ་སྤྲུགས་ཤིང་། སྦྲུལ་གདུག་པའི་དུག་མེད་པར་བྱས་པས་ན། ངའི་ལུས་ནད་འགོ་བ་མེད་ཅིང་ནད་འགོ་བ་དང་བྲལ་བའི་ཆོས་ཀྱི་སྐུར་གྱུར་ཏོ། །ང་ཚེ་རབས་མང་པོ་གང་གཱའི་
ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་མིར་བཅས་པའི་སེམས་ཅན་བྱེ་བ་མང་པོ་འཇིག་རྟེན་ན་རྩ་ལག་མེད་པ་ལ་ཕ་རོལ་དུ་ཕྱིན་པའི་ཆོས་ཀྱིས་རྩ་ལག་ཏུ་བྱས་པས། ངའི་ལུས་མ་བྱས་པའི་ཆོས་
གསལ་བའི་སྐུར་གྱུར་ཏོ། །ང་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་མིར་བཅས་པའི་སེམས་ཅན་བྱེ་བ་མང་པོ་རྣམས་ལ། དེ་བཞིན་གཤེགས་པའི་སྙིང་པོ་ཤིན་
དུ་རྣམ་པར་དག་པའི་ཆོས་ཀྱི་གཏམ་བསྙད་པས་ན། ངའི་ལུས་ཅི་ཡང་མེད་པའི་སྐུར་གྱུར་ཏོ། །ང་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་མིར་བཅས་པའི་སེམས་ཅན་
བྱེ་བ་མང་པོ་རྣམས་ལ། དེ་བཞིན་གཤེགས་པའི་གསལ་བ་དང་ངོ་མཚར་ལ་བཀོད་པས་ན། ངའི་ལུས་ངོ་མཚར་གྱི་སྐུར་གྱུར་ཏོ། །ང་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་
ལྷ་དང་མིར་བཅས་པའི་སེམས་ཅན་བྱེ་བ་མང་པོ་རྣམས་ལ་སངས་རྒྱས་སུ་སྦྱོར་དུ་བཙུད་པས། ངའི་ལུས་ཚད་མེད་དཔག་ཏུ་མེད་པའི་མཆོག་དམ་པའི་སྐུར་གྱུར་ཏོ། །ངས་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་
བསྐལ་པ་བྱེ་བ་མང་པོ་གྲངས་མེད་པར་ལྷ་དང་མིར་བཅས་པའི་སེམས་ཅན་བྱེ་བ་མང་པོ་རྣམས་བསྒྲལ་བའི་ཕྱིར་རིགས་དེ་དང་དེར་སྐྱེ་བ་བསྟན་ཏེ། རབ་ཏུ་བསྒྲལ་བས་ན། ངའི་ལུས་མཆོག་དམ་པའི་སྐུར་གྱུར་ཏོ། །ངས་ཚེ་
རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་མིར་བཅས་པའི་སེམས་ཅན་བྱེ་བ་མང་པོ་རྣམས་འཇིགས་པ་ཐམས་ཅད་ལས་བསྒྲལ་ཏེ། བྱང་ཆུབ་པ་ལ་བཀོད་པས་ན། ངའི་ལུས་

57-1-207a

བླ་ན་མེད་པའི་ཆོས་ཀྱི་སྐུར་གྱུར་ཏོ། །ངས་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་སེམས་ཅན་བྱེ་བ་མང་པོ་རྣམས་ཡན་ལག་མ་ཚང་བའི་ལུས་ཀྱིས་འཇིག་
རྟེན་གྱི་ཕྱིར་འགྲོ་བར་བྱས་ཏེ། སེམས་ཅན་མང་པོ་བྱང་ཆུབ་ལ་བཀོད་པས་ན། ངའི་ལུས་བླ་ན་མེད་པའི་ཆོས་ཀྱི་སྐུར་གྱུར་ཏོ། །ངས་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་
ངས་འཇིག་རྟེན་རྣམས་ལ། དེ་བཞིན་གཤེགས་པའི་སྙིང་པོ་རྟག་པའི་དབྱིངས་མ་བཅབས་ཏེ། སེམས་ཅན་ཐམས་ཅད་ལ་ཕན་པར་བསྟན་པས་ན། ངའི་ལུས་རྟག་པའི་སྐུར་གྱུར་ཏོ། །ངས་ཚེ་རབས་མང་པོ་གང་གཱའི་
ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ངས་ཚུལ་ཁྲིམས་སྲུང་བ་ན། ལྷའི་བུ་མོ་དང་། བདུད་ཀྱི་བུ་མོ་དང་། འཇིག་རྟེན་པ་བཟང་མོ་མཐོང་ཡང་སེམས་མ་བཏང་བས་ངའི་ལུས་མི་འཇིག་པའི་སྐུར་
གྱུར་ཏོ། །ངས་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་སེམས་ཅན་བྱེ་བ་མང་པོ་ཐམས་ཅད་ཀྱི་བླ་མའི་ཆུང་མ་དང་། ཕུ་ནུ་བོའི་ཆུང་མ་དང་། བུད་མེད་ཐམས་ཅད་ལ་ཆགས་
པར་མ་བྱས་པས་ན། ངའི་ལུས་མི་འཇིག་པའི་ཆོས་ཀྱི་སྐུར་གྱུར་ཏོ། །ངས་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་མིར་བཅས་པའི་སེམས་ཅན་བྱེ་བ་མང་པོ་རྣམས་
ཀྱི་ཉེས་པ་མཐའ་ཡས་པ་ཟད་པར་བྱས་པས་ན། ངའི་ལུས་མཚུངས་པ་མེད་པ་མཐའ་ཡས་པའི་སྐུར་གྱུར་ཏོ། །ངས་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་སེམས་ཅན་
བྱེ་བ་མང་པོ་དུད་འགྲོའི་སྐྱེ་གནས་སུ་སོང་བ་རྣམས་ཆོས་ཟབ་མོ་ལ་བཀོད་པས་ན། ངའི་ལུས་ཟབ་མོའི་སྐུར་གྱུར་ཏོ། །ངས་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་དེ་བཞིན་

57-1-207b

གཤེགས་པའི་སྙིང་པོ་ནམ་མཁའི་བྱ་རྗེས་བཞིན་དུ་བསྟན་ཏེ། སངས་རྒྱས་ཀྱི་དབྱིངས་གསལ་བར་བྱས་པས་ན། ངའི་ལུས་བལྟར་མི་མཐོང་བའི་སྐུར་གྱུར་ཏོ། །ངས་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་
བསྐལ་པ་བྱེ་བ་མང་པོ་གྲངས་མེད་པར་སེམས་ཅན་བྱེ་བ་མང་པོ་བདག་མེད་པར་འཛིན་པ་ལས་བཟློག་སྟེ། དེ་བཞིན་གཤེགས་པའི་སྙིང་པོ་བལྟ་དཀའ་བ་བསྟན་པས་ན། ངའི་ལུས་སེམས་ཅན་ཐམས་ཅད་ཀྱིས་
བལྟ་དཀའ་བའི་སྐུར་གྱུར་ཏོ། །ངས་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་མིར་བསྐྱེས་པའི་སེམས་ཅན་རྣམས་སྲོག་གཅོད་པ་ལས་བཟློག་སྟེ། དམ་པའི་
ཆོས་ལ་བཀོད་པས་ན། ངའི་སྐུ་ཤིན་དུ་ཕྲ་བའི་སྐུར་གྱུར་ཏོ། །ངས་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ། བསྐལ་པ་བྱེ་བ་མང་པོ་གྲངས་པར་ལྷ་དང་མིར་བཅས་པའི་སེམས་ཅན་བྱེ་བ་མང་པོ་ཆོས་ཀྱི་
དགའ་བ་བསྐྱེད་པས་ན། ངའི་ལུས་མཁས་པའི་སྐུར་གྱུར་ཏོ། །ངས་ཚེ་རབས་མང་པོ་གང་གཱའི་ཀླུང་གི་བྱེ་མ་སྙེད་དུ་བསྐལ་པ་བྱེ་བ་མང་པོ་གྲངས་མེད་པར་ལྷ་དང་མིར་བཅས་པའི་སེམས་ཅན་བྱེ་བ་མང་པོ་རྣམས་ལ་
དེ་བཞིན་གཤེགས་པའི་སྙིང་པོ་འཇམ་དཔལ་ལྟ་བུར་དབྱིངས་བསྟན་པས་ན། ངའི་ལུས་བལྟ་དཀའ་བའི་སྐུར་གྱུར་ཏོ། །བསྐལ་པ་གྲངས་མེད་པ་མང་པོར་སེམས་ཅན་བྱེ་བ་མང་པོ་རྣམས་བཅིངས་པ་ཐམས་ཅད་
དང་བྲལ་བར་བྱས་ཏེ། ཐར་པའི་གནས་སུ་རབ་ཏུ་བཀོད་པས། དེ་ལས་ངའི་ལུས་བལྟ་དཀའ་བའི་སྐུར་གྱུར་ཏོ། །གྲངས་མེད་པ་མང་པོར་ངས་ལྷ་དང་མི་དང་། སེམས་ཅན་དམྱལ་བ་པ་རྣམས་ལ་སེམས་ཅན་བྱེ་
བ་མང་པོ་དག་སྲིད་པ་ཐམས་ཅད་དུ་གནས་སུ་མ་བཅུག་སྟེ། ཐར་པ་དེ་ཁོ་ན་ཉིད་ལ་བཀོད་པས། དེ་ལས་ངའི་ལུས་ཐམས་ཅད་དུ་ཀུན་གཞི་མེད་པའི་སྐུར་གྱུར་ཏོ། །གྲངས་མེད་པ་མང་པོར་ངས་སེམས་ཅན་བྱེ་བ་

57-1-208a

མང་པོ་ལ་བདག་དང་འཇིག་རྟེན་སྙམ་དུ་མ་བསམས་ཏེ། སེམས་ཅན་ཐམས་ཅད་སྒྲ་གཅན་ཟིན་བཞིན་དུ་བལྟས་པས། དེ་ལས་ངའི་ལུས་ཉོན་མོངས་པ་མེད་པའི་སྐུར་གྱུར་ཏོ། །གྲངས་མེད་པ་མང་པོར་ངས་ལྷ་དང་
མིར་བཅས་པའི་སེམས་ཅན་བྱེ་བ་མང་པོ་བསླབ་པའི་གནས་ལྔ་ལ་རྣམ་པར་དག་པར་བྱས་པས་ངའི་ལུས་རུས་པ་དང་། རྒྱུས་པ་དང་། ཡན་ལག་རྣམ་པར་དག་པའི་སྐུར་གྱུར་ཏོ། །གྲངས་མེད་པ་མང་པོར་ངས་སེམས་ཅན་
ཐམས་ཅད་དགྲོལ་ལོ་ཞེས་དམ་བཅས་ཏེ། ལེགས་པར་བྱ་བའི་སྨོན་ལམ་བཏབ་པས་སེམས་ཅན་རྣམས་བསྒྲལ་ཏེ། དེའི་ཕྱིར་ངའི་ལུས་ཐམས་ཅད་ལས་གྲོལ་བའི་སྐུར་གྱུར་ཏོ། །གྲངས་མེད་པ་མང་པོར་ངས་སེམས་ཅན་བྱེ་བ་
མང་པོ་རྣམས་ངན་པར་ལྟ་བའི་ནད་ཟུག་རྔུ་རྣམ་པ་མང་པོ་ཕྱུང་སྟེ། དེ་ཁོ་ནའི་ཆོས་ལ་རབ་ཏུ་བཀོད་པས། དེ་ལས་ངའི་ལུས་ཞི་བ་རྟག་པའི་སྐུར་གྱུར་ཏོ། །གྲངས་མེད་པ་མང་པོ་ཚེ་རབས་མང་པོར་སེམས་ཅན་ཐམས་ཅད་ལ་བུ་
གཅིག་པ་སྒྲ་གཅན་འཛིན་ལྟར་ངེས་པར་ལྟ་ཞིང་། དེ་བཞིན་དུ་གཞན་ཡང་བཙུད་པས་དེ་ལས་ངའི་ལུས་ཞི་གནས་ཀྱི་སྐུར་གྱུར་ཏོ། །གྲངས་མེད་པ་མང་པོར་ངས་སེམས་ཅན་བྱེ་བ་མང་པོ་རྣམས་རྟོག་པ་ཐམས་ཅད་སྤངས་ནས་རབ་ཏུ་
བཟུང་སྟེ། དགྲ་མཐོང་ན་ཡང་བསྟེན་ཅིང་ཆོག་ཤེས་པ་དང་། ཡོ་བྱད་བསྙུངས་ཤིང་གཞན་ཡང་དེ་ལ་བཙུད་པས་དེའི་ཕྱིར་ངའི་ལུས་ཉེ་བར་ཞི་བའི་སྐུར་གྱུར་ཏོ། །ཚེ་རབས་གྲངས་མེད་པ་མང་པོར་ངས་སེམས་ཅན་བྱེ་བ་མང་
པོ་ཟང་ཟིང་སྤངས་ནས་ཉན་ཐོས་ཀྱི་ཆོག་ཤེས་པ་ཙམ་བསྟན་པས་དེ་ལས་ངའི་ལུས་ནེམ་ནུར་གྱི་ཚུལ་ཐམས་ཅད་བཅད་པ་ཕ་རོལ་དུ་ཕྱིན་པའི་སྐུར་གྱུར་ཏོ། །ངས་ཚེ་རབས་གྲངས་མེད་པ་མང་པོར་སེམས་ཅན་བྱེ་བ་མང་པོ་
ཉ་དང་། ཤ་དང་། ཚུལ་དང་། གསོད་པའི་ཟས་རྣམས་སྤངས་ཏེ། སེམས་ཅན་རྣམས་ཀྱང་དེ་བཞིན་དུ་སྤོང་དུ་བཅུག་པས། དེ་ལས་ངའི་ལུས་བཟང་པོའི་སྐུར་གྱུར་ཏོ། །ཚེ་རབས་གྲངས་མེད་པ་མང་པོར་ངས་ལྷ་དང་མིར་

57-1-208b

བཅས་པའི་སེམས་ཅན་བྱེ་བ་མང་པོ་ཉོན་མོངས་པ་བྱེ་བ་མང་པོ་ཐམས་ཅད་སྦྱོང་དུ་བཅུག་པས། དེ་ལས་ངའི་ལུས་སྤྲོས་པ་མེད་པའི་སྐུར་གྱུར་ཏོ། །ཚེ་རབས་གྲངས་མེད་པ་མང་པོར་ངས་སེམས་ཅན་སྐྱོན་ཆགས་པའི་ཡ་མཚན་
ཅན་བྱེ་བ་མང་པོ་རྣམས་ལ་ལྕེ་འབབ་པ་ལྟ་བུར་དེ་དག་གི་གོ་སྐབས་བཅོམ་སྟེ། སྐྱེ་བོ་མེད་པར་བྱས་པས་དེ་ལས་ངའི་ལུས་ཀུན་གཞི་བཅོམ་པའི་སྐུར་གྱུར་ཏོ། །གྲངས་མེད་པ་མང་པོར་ངས་ཕྱིན་ཅི་ལོག་བཞིས་འཁྱམས་
པའི་སེམས་ཅན་བྱེ་བ་མང་པོ་ཆོས་ཀྱི་ཁུ་བ་ཞིམ་པོ་བླུད་པས། དེ་ལས་ངའི་ལུས་སྤྲུལ་པའི་ཚངས་པ་ལྟར་ལྷའི་ལུས་སུ་གྱུར་ཏོ། །གྲངས་མེད་པ་མང་པོར་ངས་སེམས་ཅན་བྱེ་བ་མང་པོ་རྣམས་ལ་དེ་བཞིན་གཤེགས་པའི་
སྙིང་པོ་དབེན་པ་དང་། རྟག་པའི་ཚོལ་བ་ལ་ཉེས་པ་དང་མ་བསྲེ་ཤིག་ཅེས་དྲང་པོར་བྱས་པས། དེ་ལས་ངའི་ལུས་དབེན་ཞིང་རྣམ་པར་གྲོལ་བའི་སྐུར་གྱུར་ཏོ། །ཚེ་རབས་མང་པོ་གྲངས་མེད་པ་གང་གཱའི་ཀླུང་གི་བྱེ་མ་སྙེད་དུ། 
ངས་སེམས་ཅན་བྱེ་བ་མང་པོ་རྣམས་ལ་སངས་རྒྱས་ཀྱི་ཚིག་གོ་ཞེས་སོར་མོའི་རྩེ་མོས་ཟླ་བ་བསྟན་པ་བཞིན་དུ་བཀོད་པས། དེ་ལས་ངའི་ལུས་སོ་སོར་བྲལ་བའི་སྐུར་གྱུར་ཏོ། །ཚེ་རབས་གྲངས་མེད་པ་མང་པོར་ཡོངས་
སུ་མྱ་ངན་ལས་བཟླ་བས་ཡོངས་སུ་མྱ་ངན་ལས་ཟློ་ཞིང་ཤིན་དུ་ཡོངས་སུ་མྱ་ངན་ལས་འདའ་བས་ཀྱང་། ཡོངས་སུ་མྱ་ངན་ལས་མ་བཟླས་ཏེ། དེའི་ཕྱིར་ངའི་ལུས་ཆོས་ཉིད་ཀྱིས་ཆོས་ཀྱི་སྐུར་གྱུར་ཏོ། །ཚེ་རབས་གྲངས་
མེད་པ་གང་གཱའི་ཀླུང་གི་བྱེ་མ་མང་པོ་སྙེད་དུ། ངས་སེམས་ཅན་བྱེ་བ་མང་པོ་རྣམས་ལ་དེ་བཞིན་གཤེགས་པའི་སྙིང་པོ་ལ་ཤིན་དུ་ནན་ཏན་དུ་བཙལ་ཀྱང་དྲི་མ་མེད་དོ་ཞེས་བསྟན་པས། དེ་ལས་ངའི་ལུས་དབྱིངས་ཀྱི་
སྐུར་གྱུར་ཏོ། །དབྱིངས་དེ་ཡང་སེམས་ཅན་ཐམས་ཅད་ལ་ཡོད་དེ། གྲངས་མེད་པ་མང་པོར་ངས་ཐེག་པ་ཆེན་པོ་ཆགས་པ་མེད་པའི་ཡེ་ཤེས་བདག་མེད་པ་བདག་དང་བྲལ་བའི་སྒོ་བསྟན་པས། དེའི་འབྲས་བུས་

57-1-209a

ངའི་ལུས་སྐྱེ་མཆེད་མེད་པའི་སྐུར་གྱུར་ཏོ། །ངས་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་མང་པོ་སྙེད་བུ། སེམས་ཅན་བྱེ་བ་མང་པོ་དག་རྟག་པར་རབ་ཏུ་ཉོན་མོངས་པ་མང་པོ་བཏུལ་བ་ལ་བཙུད་པས། 
དེ་ལས་ངའི་ལུས་དགེ་བ་འཇིག་རྟེན་ལས་འདས་པ་བླ་མའི་སྐུར་གྱུར་ཏོ། །ང་ཚེ་རབས་གྲངས་མེད་པ་མང་པོར་སེམས་ཅན་ཐམས་ཅད་ཀྱི་རྟེན་དུ་གྱུར་ཏེ། སྐྱབས་མེད་པ་རྣམས་ཀྱི་སྐྱབས། གཉེན་མེད་པ་རྣམས་ཀྱི་
གཉེན་དུ་གྱུར་པས། དེ་ལས་ངའི་ལུས་ཆུ་བོ་སིནྡྷུ་རྒྱ་མཚོ་ལ་འབབ་པ་ལྟ་བུའི་སྐུར་གྱུར་ཏོ། །ང་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་སྙེད་དུ། མདོ་སྡེ་འཆད་པ་ན་དེ་བཞིན་གཤེགས་པའི་སྙིང་པོ་སྟོན་པ་ལ་
འཇིགས་པ་འམ། སྐྲག་པའི་སེམས་མ་བསྐྱེད་པས། དེ་ལས་ངའི་ལུས་བརྟན་པའི་སྐུར་གྱུར་ཏོ། །ང་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་མང་པོ་སྙེད་དུ། ངང་པ་ལྟར་དཀར་བའི་ཁང་པ་ཡང་ཐོག་ནས་འཁོར་
ལོས་སྒྱུར་བའི་རྒྱལ་པོའི་སྲིད་དང་། བདེ་བ་མང་པོ་སྤངས་ཏེ། ནགས་ཁྲོད་དུ་ཞུགས་པས་དེ་ལས་ངའི་ལུས་གནས་ལྟ་བུའི་སྐུར་གྱུར་ཏོ། །ངས་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་མང་པོ་སྙེད་དུ་ལྷོད་པ་རྣམས་
སྤྱོད་པ་རྟག་ཏུ་གདོལ་པ་ལྟར་རིང་དུ་སྤངས་ཏེ། ཚུལ་ཁྲིམས་དང་ལྡན་པ་དམ་པ་རྣམས་དང་། གནས་ཅིག་ན་འཁོད་པའི་ཚེ་ཆུ་ཕོར་གང་ཙམ་ཡང་བླངས་པར་མི་དྲན་ཏེ། དེའི་ཕྱིར་དེ་ལས་ངས་འགྱོད་པ་མེད་པའི་སྐུ་ཐོབ་པོ། །ངས་
ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་མང་པོ་སྙེད་དུ། ཉོན་མོངས་པའི་ཁུར་ཡང་བར་བྱས་པས། དེ་ལས་ངའི་ལུས་རབ་ཏུ་སྦྱངས་པ་དང་གསལ་བའི་སྐུར་གྱུར་ཏོ། །ངས་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་
མང་པོ་སྙེད་དུ། རྒྱལ་པོའི་བུ་དཔེར་བྱས་ཏེ། ཁྱིམ་ན་གནས་པའི་ཉེས་པ་སྤངས་པས། དེ་ལས་ངའི་ལུས་མི་ཚོལ་བའི་སྐུར་གྱུར་ཏོ། །ངས་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་མང་པོ་སྙེད་དུ། འདོད་ཆགས་དང་

57-1-209b

ཞེ་སྡང་དང་། གཏི་མུག་སྤངས་ཤིང་ཉོན་མོངས་པའི་ཕུང་པོ་ཟད་པར་བྱས་པས། དེ་ལས་ངའི་ལུས་ནད་མེད་པ་དང་། འཇིགས་པ་མེད་པ་དང་། ང་རྒྱལ་མེད་པའི་སྐུར་གྱུར་ཏོ། །ངས་ཚེ་རབས་གྲངས་མེད་པའི་གང་གཱའི་ཀླུང་
གི་བྱེ་མ་སྙེད་དུ། སེམས་ཅན་ལྷ་མི་མང་པོ་རྣམས་ལ་བུད་མེད་དང་རྩེ་བའི་ཉོན་མོངས་པ་བྱེ་བ་ནི་སྦྲུལ་གདུག་པའི་དུག་ལྟ་བུར་སྨད་པས། དེ་ལས་ངའི་ལུས་འགོག་པའི་སྐུར་གྱུར་ཏོ། །ངས་ཚེ་རབས་གྲངས་མེད་པ་གང་
གཱའི་ཀླུང་གི་བྱེ་མ་མང་པོ་སྙེད་དུ། དེ་བཞིན་གཤེགས་པ་མར་མེ་མཛད་ཀྱི་ཞབས་ཀྱི་དྲུང་ནས་བྱིས་པའི་སྤྱོད་པ་ལྟ་བུ་བདག་ཉིད་ལུང་བསྟན་པ་ཐོས་ནས། དེ་བཞིན་ཉིད་དུ་ནན་ཏན་བྱས་ཏེ། མདོ་སྡེ་ལ་སྨོད་པ་རྣམས་ལ་
ཐེག་པ་ཆེན་པོ་བཤད་པས། དེ་ལས་ངའི་ལུས་གནས་མེད་པའི་སྐུར་གྱུར་ཏོ། །ངས་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་མང་པོ་སྙེད་དུ། དེ་བཞིན་གཤེགས་པའི་སྙིང་པོ་ཐོས་ནས། བསྐལ་པ་བྱེ་བ་མང་པོར་སེམས་
ཅན་རྣམས་ཀྱིས་ཉོན་མོངས་པ་གཞིག་པར་བྱས་ནས་སངས་རྒྱས་སུ་འགྱུར་བར་ཡིད་ཆེས་པའི་ཕྱིར། སེམས་ཅན་བྱེ་བ་ཀུན་གྱི་སྐྱབས་སུ་འགྱུར་བར་སྤྱད་པ་བརྩམས་ཏེ། དེའི་འབྲས་བུས་ངའི་ལུས་སྐྱབས་ཀྱི་སྐུར་གྱུར་ཏོ། །
ངས་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་མང་པོ་སྙེད་དུ། བྱང་ཆུབ་སེམས་དཔའི་བཟོད་པར་སྨྲ་བའི་དྲང་སྲོང་དུ་གྱུར་པའི་ཚེ། ཚད་མེད་པ་བཞི་ལ་བསྒོམས་པས། དེའི་འབྲས་བུས་ངའི་ལུས་ད་དུང་ཡང་སེམས་
ཅན་ཐམས་ཅད་ཀྱི་སྐྱབས་ཀྱི་སྐུར་གྱུར་ཏོ། །ཐེག་པ་ཆེན་པོ། ཐེག་པ་གཅིག་པ། བླ་ན་མེད་པའི་ཡེ་ཤེས། ཆགས་པ་མེད་པའི་ཡེ་ཤེས་འོད་ཆེན་པོ་སེམས་ཅན་ཐམས་ཅད་ཀྱི་དཔུང་གཉེན་གྱི་ཡེ་ཤེས་ངས་བསྟན་པས། སྡིག་
པ་གྲངས་མེད་པར་བྱས་པ་ཡང་ཐེག་པ་ཆེན་པོ་ཐོས་ནས་འབྱང་བར་འགྱུར་ཏེ། དེའི་ཕྱིར་ངའི་ལུས་ནི་དཔུང་གཉེན་གྱི་སྐུར་གྱུར་ཏོ། །ངས་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་མང་པོ་སྙེད་དུ་དབྱིངས་དང་། བདེ་བའི་

57-1-210a

དབྱིངས་སེམས་ཅན་ཐམས་ཅད་ཀྱི་དབྱིངས་དྲི་མ་མེད་པའི་སྙིང་པོ་གནོད་པ་མེད་པ་རབ་ཏུ་བསྔགས་སོ། །རབ་ཏུ་བསྔགས་པའི་འབྲས་བུ་དེས་ངའི་ལུས་གནོད་པ་མེད་པའི་སྐུར་གྱུར་ཏོ། །ངས་ཚེ་རབས་
གྲངས་མེད་པ་གང་གཱའི་ཀླུང་གི་བྱེ་མ་མང་པོ་སྙེད་དུ། སེམས་ཅན་ལྷ་མི་བྱ་བ་མང་པོ་རྣམས་གནས་མེད་པའི་ཐར་པའི་གོ་འཕང་ལ་བཀོད་པས། དེ་ལས་ངའི་ལུས་གོ་སྐབས་མེད་ཅིང་གཙོ་བོའི་སྐུར་གྱུར་ཏོ། །ངས་
ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་སྙེད་དུ། སེམས་ཅན་སྐྱེས་པ་དང་། བུད་མེད་མང་པོ་རྣམས་ཕ་མ་དང་། སྲིང་མོ་ལྟ་བུར་འདུ་ཤེས་པའི་སེམས་ལ་བཀོད་པས། ངའི་ལུས་ཐམས་ཅད་དུལ་བཞིན་དུ་བླ་མའི་
སྐུར་གྱུར་ཏོ། །ངས་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་སྙེད་དུ། མུ་གེ་ཆེན་པོའི་བསྐལ་པ་བར་མ་ལ་བདག་གཞན་གྱི་ལོངས་སྤྱོད་རྣམ་པ་མང་པོ་བྱས་པས། དེ་ལས་ངའི་ལུས་ཐམས་ཅད་དུ་སྐོམ་པ་
མེད་ཅིང་དང་བའི་རྣམ་པ་ལྷའི་སྐུར་གྱུར་ཏོ། །ངས་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་མང་པོ་སྙེད་དུ། སེམས་ཅན་བྱེ་བ་རྣམ་པ་མང་པོ་གསོད་པར་འདོད་ཅིང་སྨྲ་བ་ཚེ་རབས་མང་པོར་སྨད་ནས་ང་ལས་ངའི་
ལུས་ཕུང་པོ་ཐམས་ཅད་དང་བྲལ་བའི་སྐུར་གྱུར་ཏོ། །ངས་ཚེ་རབས་མང་པོར་ཐབས་དམ་པའི་སྐུ་ཆོས་ཀྱི་སྐུ་སྨན་པའི་མཆོག་གིས་བརྟན་པའི་སྐུ་མཐའ་ཡས་པ་བསྟན་པ་ལྟར་དགེ་བའི་རྒྱུ་རྣམ་པར་སྤེལ་བ་དེ་
ལས་ངའི་སྐུ་འདུ་བྱེད་ཞི་བའི་སྐུར་གྱུར་ཏོ། །ངས་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་མང་པོ་སྙེད་དུ། སེམས་ཅན་བྱེ་བ་མང་པོ་རྣམས་བསྒྲལ་ཅིང་། རང་གི་ཉོན་མོངས་པ་རྣམས་ཟད་པར་བྱས་ཏེ། བདག་
ཉིད་ཀྱི་དབྱིངས་སྐྱུ་རུ་རའི་འབྲུ་བཞིན་དུ་བསྟན་པས། དེ་ལས་ངའི་ལུས་ཆོས་མ་ཡིན་པ་བཅད་པའི་སྐུར་གྱུར་ཏོ། །ངས་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་མང་པོ་སྙེད་དུ། སེམས་ཅན་བྱེ་བ་མང་པོ་

57-1-210b

ཐམས་ཅད་ལ་ཁམས་བཞི་པོ་ནི་སྦྲུལ་གདུག་པའི་དུག་ཡིན་ཏེ། རྟག་ཏུ་སྣོད་སྟོང་པ་བཞིན་དུ་སྟོང་ངོ་ཞེས་རབ་ཏུ་སྨད་པས་དེ་ལས་ངའི་ལུས་ཐོས་པའི་རྒྱུ་འདྲ་བར་སྐྱེས་པ་ཤ་དང་། རྒྱུས་པ་མེད་པའི་སྐུར་གྱུར་ཏོ། །
ངས་ཚེ་རབས་གྲངས་མེད་པ་གང་གཱའི་ཀླུང་གི་བྱེ་མ་མང་པོ་སྙེད་དུ། སྲིད་པའི་སེམས་ཅན་བྱེ་བ་མང་པོ་ཐམས་ཅད་ཉོན་མོངས་པ་བྱེ་བ་ལས་འདོད་ཆགས་དང་བྲལ་བ་འགོག་པ་མྱ་ངན་ལས་བཟླ་བར་ཡོངས་སུ་མྱ་ངན་ལས་
འདས་སོ། །ཡོངས་སུ་མྱ་ངན་ལས་འདས་པས། དེ་ལས་ངའི་ལུས་མྱ་ངན་ལས་འདས་པ་མི་གཡོ་བ་བདེ་བའི་སྐུར་གྱུར་ཏོ། །སོར་མོའི་ཕྲེང་བ་བསྐལ་པ་གྲངས་མེད་པ་བྱེ་བ་མང་པོར་འདི་ཉིད་ན་འདུག་བཞིན་དུ་ང་ནི་
ཐམས་ཅད་ན་གནས་ཏེ། མྱ་ངན་ལས་འདས་པ་གང་ཡིན་པ་དེ་ནི་ཐར་པའོ། །ཐར་པ་གང་ཡིན་པ་དེ་ནི་དེ་བཞིན་གཤེགས་པ་ཉིད་དོ། །དེ་ནས་སོར་མོའི་ཕྲེང་བས། བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །ཀྱེ་མའོ་སངས་རྒྱས་བཅོམ་ལྡན་འདས་ནི་དཀའ་བ་མཛད་པ་སྟེ། སེམས་ཅན་ཐམས་ཅད་ལ་རྗེས་སུ་ཐུགས་བརྩེ་བའོ། །བཅོམ་ལྡན་འདས་ཀྱིས་བཀའ་སྩལ་པ། སོར་མོའི་ཕྲེང་བ་དེ་བཞིན་
གཤེགས་པ་ཡང་ཤིན་དུ་དཀའ་བ་མཛད་པ་ཡིན་ཏེ། ནམ་མ་འོངས་པའི་དུས་ན་དམ་པའི་ཆོས་ལོ་བརྒྱད་བཅུའི་བར་དུ་གནས་པར་འགྱུར་བ་དེའི་ཚེ། ཐེག་པ་ཆེན་པོའི་མདོ་སྡེ་དེ་བཞིན་གཤེགས་པའི་སྙིང་པོ་
སྟོན་པ་དེ་ནི་སེམས་ཅན་ཐམས་ཅད་ལ་ཕན་པར་སྟོན་ཅིང་ཤིན་དུ་བྱ་དཀའ་བ་བྱེད་པའོ། །སེམས་ཅན་གང་དག་དེའི་ཕྱོགས་འཛིན་པ་དེ་དག་ཀྱང་ཤིན་དུ་བྱ་དཀའ་བ་བྱེད་པར་བསྟན་ཏོ། །སེམས་ཅན་གང་རྣམས་
དེ་བཞིན་གཤེགས་པའི་སྙིང་པོ་ཐོས་ནས། དེ་བཞིན་ཉིད་དུ་ནན་ཏན་བྱེད་པའི་སེམས་ཅན་དེ་དག་ཀྱང་ཤིན་དུ་བྱ་དཀའ་བ་བྱེད་པའོ། །སོར་མོའི་ཕྲེང་བས་གསོལ་པ། ཤིན་དུ་དཀའ་བ་བགྱིད་པ་དེ་ཇི་ལྟ་བུ་

57-1-211a

ལགས། བཅོམ་ལྡན་འདས་ཀྱིས་བཀའ་སྩལ་པ། འདི་ལྟ་སྟེ་དཔེར་ན། ས་ཆེན་པོ་ནི་ཁུར་ཆེན་པོ་བཞི་ཁྱེར་ཏེ། ཁུར་བཞི་གང་ཞེ་ན། ཆུའི་ཕུང་པོ་ཆེན་པོའི་ཁུར་དང་། རིའི་ཁུར་དང་། ཕྱི་རོལ་གྱི་རྩྭ་
དང་། ཤིང་གེལ་པ་དང་། ཤིང་གི་ཁུར་དང་། སེམས་ཅན་ཐམས་ཅད་ཁུར་དུ་ཁྱེར་བ་སྟེ། དེ་ལྟར་ན་ས་ནི་ཁུར་ཆེན་པོ་བཞི་ཁྱེར་བའོ། །སོར་མོའི་ཕྲེང་བས་གསོལ་པ། ལྕིའོ། །བཅོམ་ལྡན་འདས་ཀྱིས་བཀའ་སྩལ་པ། 
ས་ནི་ཁུར་ཆེན་པོ་ཁྱེར་བ་མ་ཡིན་ཏེ། དེ་ཅིའི་ཕྱིར་ཞེ་ན། ས་བས་གཞན་ལྷག་པར་ཁུར་ཁྱེར་བ་ཡོད་དོ། །གསོལ་པ། བཅོམ་ལྡན་འདས་སྐྱེས་བུ་དམ་པ་དེ་གང་ལགས། བཀའ་སྩལ་པ། ནམ་དམ་པའི་ཆོས་ལོ་བརྒྱད་བཅུའི་བར་དུ་
གནས་པར་འགྱུར་བ་དེའི་ཚེ། སེམས་ཅན་ཐམས་ཅད་ལ་ཕན་པར་སྟོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་སྙིང་པོ་སྟོན་ན། ཁུར་བཞི་ཁྱེར་བར་འགྱུར་ཏེ། བཞི་གང་ཞེ་ན། སྐྱོན་ཆགས་པའི་
ཡ་མཚན་ཅན་རྣམས་གསད་དོ་ཞེས་རབ་དུ་རྒྱུ་སྤྱོད་དེ། འཇིགས་པ་ཁྱད་དུ་བསད་ནས་རང་གི་སྲོག་ཀྱང་བཏང་སྟེ། དེ་བཞིན་གཤེགས་པའི་སྙིང་པོ་སྟོན་པ་དེ་ནི་རིའི་ཕུང་པོ་བས་ཆེས་ལྕི་བའི་ཁུར་དང་པོའོ། །དེ་དག་ལ་སོགས་པའི་
སྐྱོན་ཆགས་པའི་ཡ་མཚན་ཅན་མང་པོ་རྗེས་སུ་སྟོན་པ་ལ་ཁྲོ་བ་དང་། འདོད་ཆེན་པོའི་ཚིག་ཐོས་ནས་དེ་དག་ལ་བཟོད་པ་ནི་ཆུའི་ཕུང་པོ་ལས་ལྷག་པའི་ཁུར་དེ་ནི་གཉིས་པའོ། །རྒྱལ་པོ་དང་། བློན་པོ་དང་། དམག་དཔོན་དང་། དབང་
ཕྱུག་རྣམས་ཆོས་མཉན་པ་དང་། ཆོས་ཀྱི་གཏམ་མཉན་པ་མི་རྙེད་པ་ལ་དེ་བཞིན་གཤེགས་པའི་སྙིང་པོ་རྒྱས་པར་སྟོན་ཅིང་གང་དེའི་ཕྱོགས་འཛིན་པ་དབང་ཕྱུག་དང་། དམག་དཔོན་དང་། བློན་པོ་ཆོས་མི་ཐོས་པ་དེ་དག་ལ་ཡང་འཆི་
བར་སྟོན་ཅིང་འགྲོ་བ་ངན་པ་འཆལ་པའི་བློ་ཅན་དང་། འོན་པ་དང་། ལོང་བ་ཐོས་པ་མི་རྙེད་པ་ལ་ཆོས་རྣམས་སྟོན་པ་ནི་སེམས་ཅན་ཐམས་ཅད་ཀྱི་ཁུར་བས་ལྕི་བའི་ཁུར་གསུམ་པའོ། །ཀླ་ཀློའི་ཡུལ་གནས་པར་དཀའ་བ་མལ་སྟན་

57-1-211b

རྙེད་པར་དཀའ་ཞིང་ཁ་ཟས་ངན་པ། གོས་ངན་པ། མལ་ཆ་ངན་པ། མུ་གེ་དང་། འཁྲུག་པ་མང་པོ་དང་། འགྲོ་བ་རྣམས་རྩོད་པ་དང་། ཉོན་མོངས་པ་དང་། བུད་མེད་ལ་བག་མེད་པ་ཙམ་གྱི་ཡུལ་ལ་སྦྱོར་བའི་ཉོན་མོངས་པ་ལ་བཟོད་པ་བྱེད་
པར་བྱེད་པ་ལ་སོགས་ཏེ། སྡུག་བསྔལ་ཐམས་ཅད་ཀྱིས་རེག་ཅིང་། གྲོང་དང་། རི་བྲགས་ཀྱི་གྲོང་དང་། ལུང་པའི་ནང་དང་། ཚོང་དུས་དང་། རྩེད་མོའི་ས་དང་། བུ་རམ་ཤིང་དང་། འབྲས་ཐུབ་པོ་ཆེ་དང་། སཱ་ལུ་དང་། གྲོ་དང་། ནས་དང་། 
ཀ་ར་ས་དང་། བྱ་ར་ཛ་དང་། བྲམ་ཟེའི་གནས་ན་འདུག་པ་མི་རྙེད་པའི་གནས་ལ་དམ་པའི་ཆོས་སྟོན་པ་དེ་ནི་རྩྭ་དང་། ཤིང་གེལ་པ་དང་། ཤིང་དང་། རྡོ་བས་ལྷག་པར་ཁུར་ལྕི་བའི་ཁུར་ཆེན་པོ་བཞི་པའོ། །ཁུར་ཆེན་པོ་དེ་བཞི་གང་
ཞོན་པ་དེ་ནི་ཁུར་ཆེན་པོ་ཁྱེར་བའི་བྱང་ཆུབ་སེམས་དཔའ་ཡིན་ཏེ། དམ་པའི་ཆོས་ལོ་བརྒྱད་བཅུའི་བར་དུ་གནས་པར་འགྱུར་བ་དེའི་ཚེ་རང་གི་སྲོག་ཀྱང་བོར་ཏེ། དེ་བཞིན་གཤེགས་པའི་སྙིང་པོ་རབ་ཏུ་སྟོན་པ་དང་། གང་དེའི་
ཕྱོགས་འཛིན་པའི་འགྲོ་བ་དེ་དག་ཀྱང་ཤིན་དུ་དཀའ་བ་བྱེད་པའོ། །འགྲོ་བ་གང་རྣམས་དེ་བཞིན་གཤེགས་པའི་སྙིང་པོ་ཐོས་ནས་ཡིད་ཆེས་པ་དེ་དག་ཀྱང་ཤིན་དུ་དཀའ་བ་བྱེད་པའོ། །གཞན་ཡང་སོར་མོའི་ཕྲེང་བ་དེ་བཞིན་
གཤེགས་པ་ནི་དཀའ་བ་བྱེད་པ་མ་ཡིན་གྱི། ཡང་རབ་དུ་དཀའ་བ་བྱེད་པ་ཡོད་དེ་བསྟན་ཏོ། །འདི་ལྟ་སྟེ་དཔེར་ན། སྐྱེས་བུ་ལ་ལ་ཞིག་ཚེ་དཔག་དུ་མེད་པར་གྱུར་ཏེ། ལོ་བྱེ་བ་ཚད་མེད་པ་སྙེད་དུ་སྐྲའི་རྩེ་མོ་ཙམ་གྱིས་རྒྱ་མཚོའི་ཆུ་
ཕྱགས་ཏེ་འདུག་ནས། ཡང་ལོ་བྱེ་བ་དཔག་དུ་མེད་པ་འདས་ཤིང་སྐྲའི་རྩེ་མོས་རྒྱ་མཚོའི་ཆུ་ཕྱགས་ཏེ། དེ་ལྟ་བུའི་རྒྱ་མཚོ་ཐམས་ཅད་ཕྱགས་ཏེ། བ་ལང་གི་རྗེས་ཀྱི་ཆུ་ཙམ་དུ་བྱས་ན་དེ་དཀའ་བ་བྱེད་པ་ཡིན་ནམ། འོན་ཏེ་མ་
ཡིན། གསོལ་པ། དེ་ནི་ཤིན་དུ་དཀའ་བ་བགྱིད་པའི་མཐར་ཕྱིན་པ་སྟེ། དཀའ་བ་བགྱིད་པའོ་ཞེས་མཆི་མི་ནུས་སོ། །བཀའ་སྩལ་པ། དེ་ནི་དཀའ་བ་བྱེད་པ་མ་ཡིན་ཏེ། དེ་ཅིའི་ཕྱིར་ཞེ་ན། གཞན་ཡང་ཤིན་དུ་དཀའ་

57-1-212a

བ་བྱེད་པ་ཡོད་དོ། །དེ་གང་ལགས། བཀའ་སྩལ་པ། ནམ་དམ་པའི་ཆོས་ལོ་བརྒྱད་བཅུའི་བར་དུ་གནས་པར་འགྱུར་བ་དེའི་ཚེ། གང་བདག་གི་སྲོག་ཀྱང་བཏང་ནས། དེ་བཞིན་གཤེགས་པའི་སྙིང་པོ་སྟོན་པ་
དེ་ནི་ཤིན་དུ་དཀའ་བ་བྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོའོ། །གཞན་ཡང་སོར་མོའི་ཕྲེང་བ་དེ་བཞིན་གཤེགས་པ་ནི་དཀའ་བ་བྱེད་པ་མ་ཡིན་ཏེ། ཤིན་དུ་དཀའ་བ་བྱེད་པ་གཞན་ཡང་ཡོད་དོ། །འདི་ལྟ་སྟེ་དཔེར་ན། 
སྐྱེས་བུ་ལ་ལ་ཞིག་གིས་རི་རབ་རིའི་རྒྱལ་པོ་དང་། ས་དང་རྒྱ་མཚོ་ཆེན་པོར་བཅས་ཏེ། བདག་གི་ཕྲག་པ་ལ་ཐོགས་ནས་ལོ་བྱེ་བའི་བར་དུ་འདུག་ན་སྐྱེས་བུ་དེ་ཅི་འདྲ། སྟོབས་དང་ལྡན་པ་ཡིན་ནམ། འོན་ཏེ་མ་ཡིན། དེ་ཤིན་དུ་
དཀའ་བ་བྱེད་པ་ཅི་འདྲ། གསོལ་པ། དེ་ནི་དེ་བཞིན་གཤེགས་པའི་ཡུལ་ཏེ། ཉན་ཐོས་དང་། རང་སངས་རྒྱས་ཀྱི་ཡུལ་མ་ལགས་སོ། །བཀའ་སྩལ་པ། དེ་ནི་སྟོབས་དང་ལྡན་པ་འང་མ་ཡིན། དཀའ་བ་བྱེད་པ་འང་མ་
ཡིན་ཏེ། རྒྱ་མཚོའི་ཆུ་ཐམས་ཅད་རྡུལ་ཕྲ་མོའི་རྩེ་མོའི་ཆ་ཤས་ཀྱིས། ལོ་བྱེ་བ་དང་། བསྐལ་པ་མང་པོར་ཕྱགས་ཏེ། བ་ལང་གི་རྗེས་ཀྱི་ཆུ་ཙམ་དུ་བྱེད་ནུས་ཤིང་། ས་དང་། རི་རབ་དང་། ཆུ་བོ་དང་། རྒྱ་མཚོར་བཅས་ཏེ། བསྐལ་པ་
མང་པོར་ཁུར་ཁྱེར་ནུས་ཀྱང་། མ་འོངས་པའི་དུས་ན། ནམ་དམ་པའི་ཆོས་ལོ་བརྒྱད་བཅུའི་བར་དུ་གནས་པར་འགྱུར་བ་དེའི་ཚེ་སྐྱེ་བོ་ཕལ་པས་ཀྱང་དམ་པའི་ཆོས་སྟོན་མི་ནུས། དེ་བཞིན་གཤེགས་པའི་སྙིང་པོ་ཡང་འཆད་མི་
ནུས་པ་དེའི་ཚེ། བྱང་ཆུབ་སེམས་དཔའ་མིའི་གླང་པོ་སེམས་ཅན་ཐམས་ཅད་ལ་ཕན་པར་སྟོན་པ་རྣམས་དེ་བཞིན་གཤེགས་པའི་སྙིང་པོ་སྟོན་ཅིང་། དམ་པའི་ཆོས་འཛིན་པར་འགྱུར་ཏེ། དེ་ནི་ཤིན་དུ་དཀའ་བ་བྱེད་པར་
བསྟན་ཏོ། །གཞན་ཡང་སོར་མོའི་ཕྲེང་བ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མེའི་ཕུང་པོ་རབ་ཏུ་འབར་བ་ལ་ཁྱོར་བའི་ཆུས་ཞི་བར་ནུས་སམ། གསོལ་པ། མ་ལགས་སོ། །བཅོམ་ལྡན་འདས་ཅིའི་སླད་དུ་ཞེ་ན། 

57-1-212b

རྒྱ་མཚོའི་ཆབ་ཀྱིས་ཀྱང་མེ་དེ་ཞི་བར་མི་ནུས་ཏེ། ཁྱོར་བའི་ཆབ་ཀྱིས་ནི་ཁྱིམ་རབ་ཏུ་འབར་བ་ལ་ཡང་ཞི་བར་མི་ནུས་ན། སྟོང་གསུམ་གྱི་སྟོང་ཆེན་པོ་ལྟ་ག་ལ་ནུས། བཀའ་སྩལ་པ། སོར་མོའི་ཕྲེང་བ་དེ་བཞིན་དུ་མ་
འོངས་པའི་དུས་ན། ཚུལ་ཁྲིམས་དང་ལྡན་པའི་ཕྱོགས་བྲི། ངང་ཚུལ་ངན་པའི་ཕྱོགས་འཕེལ་བའི་དུས་ན། ནམ་དམ་པའི་ཆོས་ལོ་བརྒྱད་བཅུའི་བར་དུ་གནས་པར་འགྱུར་བ་དེའི་ཚེ། བྱང་ཆུབ་སེམས་དཔའ་སེམས་
དཔའ་ཆེན་པོས་རང་གི་སྲོག་ཀྱང་བཏང་། བྲན་ཕོ་དང་། བྲན་མོ་དང་། བ་ལང་དང་། མ་ཧེ་ལ་སོགས་པའི་ནོར་ངན་པ་རྣམ་པ་མང་པོ་ཡང་བྱིན་ནས་དམ་པའི་ཆོས་ཕྱུང་སྟེ། དེ་བཞིན་གཤེགས་པའི་སྙིང་པོ་སྟོན་པའི་སྐྱེས་
བུ་དམ་པ་དེ་ཅི་འདྲ། གསོལ་པ། བཅོམ་ལྡན་འདས་ཉིད་མཁྱེན་ཏེ། ཉན་ཐོས་དང་། རང་སངས་རྒྱས་ཀྱིས་མི་རིག་གོ། །དེའི་དུས་ན་འཇིག་རྟེན་གྱི་ཆོས་རྣམ་པར་དག་པ་ཡང་བཤད་དཀའ་ན། འཇིག་རྟེན་ལས་འདས་
པའི་ཆོས་རྣམ་པར་དག་པ་དེ་བཞིན་གཤེགས་པའི་སྙིང་པོ་བསྟན་པ་ལྟ་ཅི་སྨོས། དེ་ལྟར་སྐྱེས་བུ་དམ་པ་དེ་སྟོང་གསུམ་གྱི་སྟོང་ཆེན་པོའི་མེའི་ཕུང་པོ་རབ་ཏུ་འབར་བ་ཁྱོར་བའི་ཆུས་ཞི་བར་བགྱི་བའི་སླད་དུ་དེར་མཆི་ཞིང་། 
ཤིན་དུ་དཀའ་བ་བགྱིད་པ་དེ་ནི་སྐྱེས་བུ་དེ་མ་ལགས་ཀྱི། དེ་བཞིན་གཤེགས་པ་ཉིད་ལགས་པ་སྙམ་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །ངས་ཀྱང་ཚིག་དེ་སྐད་
སྨྲས་སོ། །སྐྱེས་བུ་དེ་ཤིན་དུ་དཀའ་བ་བྱེད་པ་ནི་སངས་རྒྱས་ཐམས་ཅད་ཀྱིས་བསྐལ་པ་བྱེ་བ་སྙེད་དུ་ཡོན་ཏན་བཤད་ཀྱང་དེའི་མཐའ་མི་རྙེད་དོ། །གཞན་ཡང་རིགས་ཀྱི་བུ་འདི་ལྟ་སྟེ། རྒྱ་མཚོ་ཆེན་པོའི་ཆུའི་ཕུང་པོར་
ཆུ་བོ་ཐམས་ཅད་འབབ་པ་མི་མངོན་པ་དེ་བཞིན་དུ་སྐྱེས་བུ་དེའི་བློའི་ནང་དུ་འཇིག་རྟེན་ཐམས་ཅད་ཀྱི་བློ་དེའི་ནང་དུ་ཞུགས་པར་མི་སྣང་ངོ་། །གཞན་ཡང་རིགས་ཀྱི་བུ་རྒྱ་མཚོ་ཆེན་པོ་ནི་སེམས་ཅན་གྱི་རོ་ཐམས་ཅད་མཐར་

57-1-213a

འབྱིན་པ་དེ་བཞིན་དུ་སྐྱེས་བུ་དམ་པ་དེ་ཡང་མིག་ཟུར་ཡང་མི་བལྟ། ཁྱིམ་ལ་ཆགས་པ་ཡང་མེད། ཆོས་དང་མི་ལྡན་པ་རྣམས་དང་། རིགས་འདྲེས་པ་ཡང་མེད། དེ་བཞིན་གཤེགས་པའི་སྙིང་པོ་ལ་སྨོད་པ་
བྱེད་པ་རྣམས་ཀྱང་སྤོང་སྟེ། སྐྱེས་བུ་དམ་པ་དེ་ལྟ་བུ་ནི་ཤིན་དུ་དཀའ་བ་བྱེད་པའོ། །གང་དེའི་ཕྱོགས་འཛིན་ཅིང་ཉན་པ་དེ་དག་ཀྱང་། ངའི་ཉན་ཐོས་ཤིན་དུ་དཀའ་བ་བྱེད་པ་ཡིན་ནོ། །གསོལ་པ། བཅོམ་ལྡན་འདས་མཚན་
ཉིད་དུ་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་གསར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་མཚན་ཉིད་བརྒྱད་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་
པོ་གསར་ཡིན་ནོ། །བརྒྱད་གང་ཞེ་ན། ཆོས་ལ་སེམས་པ་དང་། རྟོག་ཅིང་གཞིག་པ་དང་། ལེན་ཅིང་འཛིན་པ་དང་། ཕ་མ་ལ་སྲི་ཞུ་ཆེ་བ་དང་། རང་གི་སློབ་དཔོན་ལ་བྱས་པ་གཟོ་བ་དང་། ལྟ་བ་ཐམས་ཅད་དང་མི་
མཐུན་པ་དང་། མཚན་མ་ཐམས་ཅད་ལ་ཁྱད་དུ་གསོད་ཅིང་འདུལ་བ་ལ་མཁས་པ་དང་། མི་རུང་བ་ཐམས་ཅད་སྤོང་བ་དང་། འདོད་པ་མེད་པའི་སེམས་འདི་ལྟ་སྟེ། རྨི་ལམ་ན་ཡང་ཁུ་བ་མི་འབྱུང་ཞིང་ཚུལ་ཁྲིམས་ལ་གུས་པར་
བྱེད་པའི་མཚན་ཉིད་དེ་དག་དང་ལྡན་ན། བྱང་ཆུབ་སེམས་དཔའ་གསར་ཡིན་ནོ། །ཡང་མཚན་ཉིད་བརྒྱད་དང་ལྡན་ན། བྱང་ཆུབ་སེམས་དཔའ་གསར་ཡིན་ཏེ། བརྒྱད་གང་ཞེ་ན། ཐེག་པ་ཆེན་པོ་སྟོན་པ་དང་། དེ་བཞིན་
གཤེགས་པའི་སྙིང་པོ་གསལ་བར་སྟོན་ཅིང་གཏོང་བ་དང་ལྡན་པ་དང་། ཟང་ཟིང་ལ་མི་བརྐམ་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་སུ་ལྡན་པ་དང་། སེམས་ཅན་ཐམས་ཅད་ལ་བུ་གཅིག་
པ་བཞིན་དུ་ལྟ་བ་དང་། དེ་དགེ་བའི་བཤེས་གཉེན་ལ་སྟེན་པ་དང་། སྡིག་པའི་གྲོགས་པོ་ཡོངས་སུ་སྤོང་བ་དང་། རྙེད་པ་དང་བཀུར་སྟི་ལ་ཆོག་ཤེས་པ་སྟེ། མཚན་ཉིད་བརྒྱད་པོ་དེ་དག་དང་ལྡན་ན། བྱང་ཆུབ་སེམས་དཔའ་

57-1-213b

གསར་ཡིན་ནོ། །ཡང་མཚན་ཉིད་བརྒྱད་དང་ལྡན་ན། བྱང་ཆུབ་སེམས་དཔའ་གསར་ཡིན་ཏེ། བརྒྱད་གང་ཞེ་ན། ཕན་པ་དང་། རན་པ་དང་། འཇམ་པར་སྨྲ་བ་དགའ་བ་དང་། ཉོན་མོངས་པ་ཆུང་བ་བཟོད་པ་དང་ལྡན་པ་དང་། མདོ་
སྡེའི་མཐའ་ཐམས་ཅད་ཉན་པ་ལ་བཟོད་པ་དང་། མིག་གཉིད་ཐུལ་བ་དང་། སྙོམ་ལས་མེད་དེ་ལྡང་ཞིང་བག་ཡོད་པ་དང་། བསླབ་པ་ལ་མོས་པ་སྟེ། མཚན་ཉིད་བརྒྱད་པོ་དེ་དག་དང་ལྡན་ན། བྱང་ཆུབ་སེམས་དཔའ་གསར་
ཡིན་ནོ། །ཡང་མཚན་ཉིད་བརྒྱད་དང་ལྡན་ན། བྱང་ཆུབ་སེམས་དཔའ་གསར་ཡིན་ཏེ། བརྒྱད་གང་ཞེ་ན། བདེན་པ་དང་གཙང་བ་དང་། གཙང་སྦྲ་བྱེད་པ་དང་། མཁས་པ་དང་། འོད་དང་ལྡན་ཞིང་གཟུགས་བཟང་བ་དང་། 
བུད་མེད་དང་འགྲོགས་པ་སྤོང་བ་དང་། གཉེན་གྱི་ཁྱིམ་ནས་རིང་དུ་ལྟ་བ་དང་། གཙེ་བ་དེ་དང་དེས་སྡིག་པའི་དགེ་སྦྱོང་ཐམས་ཅད་ལ་འཇིགས་པ་དང་། ཐོས་མ་ཐག་ཏུ་ལུས་ཀྱི་སྤུ་ལངས་པར་འགྱུར་བ་དང་། སྲོག་ཆགས་
ཐམས་ཅད་ལ་བྱམས་ཤིང་སྙིང་བརྩེ་བ་སྟེ། མཚན་ཉིད་བརྒྱད་པོ་དེ་དག་དང་ལྡན་ན། བྱང་ཆུབ་སེམས་དཔའ་གསར་ཡིན་ནོ། །ཡང་མཚན་ཉིད་བརྒྱད་དང་ལྡན་ན། བྱང་ཆུབ་སེམས་དཔའ་གསར་ཡིན་ཏེ། བརྒྱད་གང་
ཞེ་ན། བདུད་ཀྱིས་བཤད་པ་དང་། སངས་རྒྱས་ཀྱིས་བཀའ་སྩལ་པའི་བྱེ་བྲག་ཤེས་པ་དང་། མདོ་སྡེ་ཤེས་པ་ལ་བཀུར་སྟི་བྱེད་པ་དང་། འདུལ་བ་དང་། འདུལ་བ་མ་ཡིན་པའི་བྱེ་བྲག་ཤེས་ཏེ་མི་འཆབ་པ་དང་། དེ་བཞིན་
གཤེགས་པས་དགོངས་ཏེ་གསུངས་པ་ལ་མཁས་པ་ཡིན། དེ་བཞིན་གཤེགས་པས་གསུངས་པ་ཤེས། འཇིག་རྟེན་གྱི་ཕྱིར་འབྲང་བར་བྱ་བ་ཤེས། དེ་བཞིན་གཤེགས་པ་ཉིད་དུ་ཤེས་པ། སྡིག་པ་དང་། སྡིག་པ་མེད་
པ་དང་། བྱང་ཆུབ་སེམས་དཔའི་བྱ་བ་ལ་མཁས་པ། ཡུལ་དང་། དུས་དང་། ཡེ་ཤེས་དང་། བདག་གི་ནུས་པ་དང་། རབ་ཏུ་ཤེས་པ་སྟེ། མཚན་ཉིད་བརྒྱད་པོ་དེ་དག་དང་ལྡན་ན། བྱང་ཆུབ་སེམས་དཔའ་གསར་ཡིན་ནོ། །མཚན་

57-1-214a

ཉིད་བཞི་བཅུ་པོ་དེ་དག་དང་ལྡན་ཏེ། ལུས་དྲན་པའི་ཆོས་དང་ལྡན་པ་དེ་གང་ཡིན་པ་དེ་ནི་བྱང་ཆུབ་སེམས་དཔའ་གསར་ཞེས་བྱའོ། །གང་ལ་ཡོན་ཏན་བཞི་བཅུ་མེད་དེ་ཕྱེད་དམ། ཕྱེད་ཀྱི་ཡང་ཕྱེད་ཡོད་པ་དེ་ནི་
ཐེག་པ་ཆེན་པོ་ལ་ཡང་དག་པར་ཞུགས་པའི་རིགས་ཀྱི་བུ་དང་། རིགས་ཀྱི་བུ་མོར་རིག་པར་བྱ་སྟེ། བྱང་ཆུབ་སེམས་དཔར་བརྩེ་བར་མི་གཏོགས་སོ། །དེ་བས་ན་བྱང་ཆུབ་སེམས་དཔའི་སྤྱོད་པ་ནི་ཤིན་དུ་དཀའ་བ་བྱེད་པའོ། །
དེ་ལ་ཡོན་ཏན་གྱི་མཆོག་གང་ཞེ་ན། གཡེམ་པའི་འདུ་ཤེས་མེད་ཅིང་རྨི་ལམ་ན་ཡང་ཁུ་བ་མི་འབྱུང་བ་དེ་ནི་རྒྱུ་དང་བཅས་པའི་མིར་རིག་པར་བྱ་སྟེ། བྱང་ཆུབ་ཀྱི་ཡན་ལག་ཐམས་ཅད་ཀྱི་ཡོན་ཏན་གྱི་མཆོག་གོ། །འཇམ་
དཔལ་གཞོན་ནུར་གྱུར་པས། སོར་མོའི་ཕྲེང་བ་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པའི་སྙིང་པོ་ཞེས་བཤད་པ་དེའི་དོན་ཅི། གལ་ཏེ་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་ན། སེམས་
ཅན་ཐམས་ཅད་སངས་རྒྱས་སུ་འགྱུར་ཏེ། སེམས་ཅན་ཐམས་ཅད་ཀྱིས་སྲོག་གཅོད་པ་དང་། བརྫུན་སྨྲ་བ་དང་། ཆང་འཐུང་བ་དང་། འཁྲིག་པ་དང་། མ་བྱིན་པར་ལེན་པ་དང་། མི་དགེ་བའི་ལས་ཀྱི་ལམ་ཐམས་ཅད་
བྱར་རུང་ངམ། གལ་ཏེ་སངས་རྒྱས་ཀྱི་དབྱིངས་སེམས་ཅན་ཐམས་ཅད་ལ་ཡོད་ན་གང་གི་ཚེ་བསྒྲལ་ཞིང་རབ་ཏུ་འཇུག་པར་འགྱུར། གལ་ཏེ་སངས་རྒྱས་ཀྱི་དབྱིངས་ཡོད་ན། ཐམས་ཅད་ཀྱིས་ཀྱང་མཚམས་མེད་པ་དང་། འདོད་
ཆེན་པའི་ལས་བྱ་བར་འགྱུར་རོ། །གལ་ཏེ་སེམས་ཅན་ཐམས་ཅད་ལ་བདག་གི་དབྱིངས་ཡོད་ན། བདག་ཉིད་སྒྲོལ་བར་འགྱུར་ཏེ། ལས་ཀྱི་རྣམ་པར་སྨིན་པ་ལ་བདག་གི་དབྱིངས་མེད་པས་ན། དེའི་ཕྱིར་འཇིག་རྟེན་དང་
བདག་ལ་དབྱིངས་མེད་དེ། ཐམས་ཅད་ལ་བདག་མེད་པ་དེ་ནི་སངས་རྒྱས་ཀྱི་བསྟན་པའོ། །བཅོམ་ལྡན་འདས་ཀྱིས་བཀའ་སྩལ་པ། སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་དེ། ཉོན་མོངས་

57-1-214b

པ་བྱེ་བས་གཡོགས་ནས་བུམ་པའི་ནང་གི་མར་མེ་བཞིན་དུ་འདུག་གོ། །གཞན་ཡང་འཇམ་དཔལ་འདུལ་སྦྱོང་བྱེད་པའི་བུ་གཅིག་བཅོམ་ལྡན་འདས་འོད་སྲུང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་ཀྱིས་དེ་རིང་ནས་ལོ་བདུན་ན། འཁོར་ལོས་སྒྱུར་བའི་རྒྱལ་པོར་འགྱུར་རོ། །ང་ཡང་ཞག་བདུན་ན་ཡོངས་སུ་མྱ་ངན་ལས་འདའོ་ཞེས་ལུང་བསྟན་ནས། འདུལ་སྦྱོང་བྱེད་པའི་བུ་དེ་རབ་ཏུ་དགའ་བ་སྐྱེས་ནས། 
བདག་ནི་ཐམས་ཅད་མཁྱེན་པས་འཁོར་ལོས་སྒྱུར་བའི་རྒྱལ་པོར་ལུང་བསྟན་ཏེ། གདོན་མི་ཟ་བར་འགྱུར་སྙམ་ནས་དགའ་ཆེས་ཏེ། རང་གི་མ་ལ་སྨྲས་པ། མ་ཉ་དང་། ཤ་དང་། འོ་མ་དང་། ཏིལ་གྱི་ལ་ཏུ་དང་། ཞོ་དང་དོ་བ་དང་། 
ཁུ་བ་དང་། འབྲུ་དྲུས་པ་དག་སྩོལ་ཅིག །སྟོབས་ཆེན་པོར་བྱའོ་ཞེས་ཐམས་ཅད་གསྲེས་ཏེ་ཟོས་ནས། དུས་མ་ཡིན་པ་ཙམ་གྱིས་ཤི་ནས་བདག་ཉིད་ཤི་བ། བདག་ཉིད་ཀྱིས་ཉམས་པར་བྱས་ན། ཅི་བཅོམ་ལྡན་འདས་དེ་
བཞིན་གཤེགས་པ་བརྫུན་གསུང་ངམ། དེ་སྟེ་ཐམས་ཅད་མཁྱེན་པ་མ་ཡིན། འོན་ཏམ་དེ་ལ་འཁོར་ལོས་སྒྱུར་བའི་དགེ་བའི་རྩ་བ་དང་། བསོད་ནམས་རྣམ་པར་སྨིན་པ་མེད་དམ། གསོལ་པ། དེ་སྔོན་ལས་ངན་པ་
བགྱིས་པས་གུམ་མོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་སྐད་མ་ཟེར་ཅིག །དེ་ནི་དུས་མ་ཡིན་པ་ཙམ་བབ་པ་སྟེ། སྔོན་ལས་ངན་པ་བྱས་པ་མ་ཡིན་ནོ། །བཅོམ་ལྡན་འདས་དེ་བཞིན་
གཤེགས་པ་ལུང་སྟོན་པ་ན། དེས་སྔོན་ལས་བྱས་པ་མི་མཁྱེན་པར་ལུང་བསྟན་རེ་སྐན། དེ་ནི་སྔོན་ལས་བྱས་ཤི་བ་མ་ཡིན་གྱི། བདག་ཉིད་ཀྱིས་ཉེས་ཏེ། བདག་གིས་བསད་དོ། །འཇམ་དཔལ་དེ་བཞིན་དུ་སྐྱེས་པ་འམ་
བུད་མེད་ཀྱང་རུང་སྟེ། གལ་ཏེ་དེ་བཞིན་གཤེགས་པའི་སྙིང་པོ་བདག་ལ་ཡོད་པས་དེ་ཉིད་སྒྲོལ་བར་འགྱུར་གྱིས་སྡིག་པ་བྱའོ། །སྙམ་སྟེ་སྡིག་པ་བྱས་ན་དེ་ཅི་བདག་གི་དབྱིངས་སྒྲོལ་བར་འགྱུར་རམ། སྔར་བཤད་པ་བཞིན་ཏེ། 

57-1-215a

འདུལ་སྦྱོང་བྱེད་པའི་བུ་ལྟར་དབྱིངས་ཡོད་ཀྱང་མི་སྒྲོལ་ལོ། །དེ་ཅིའི་ཕྱིར་ཞེ་ན། དེ་ཉིད་བག་མེད་པ་མང་བ་དག་བག་མེད་པའི་ཕྱིར་ཆོས་ཀྱི་དབྱིངས་ཀྱིས་མི་སྒྲོལ་ལོ། །ཅི་སེམས་ཅན་རྣམས་ལ་སངས་རྒྱས་ཀྱི་དབྱིངས་མེད་དམ། སངས་རྒྱས་ཀྱི་དབྱིངས་ནི་རྒྱལ་ཐབས་
ཀྱི་རྣམ་པར་སྨིན་པ་བཞིན་སེམས་ཅན་ཐམས་ཅད་ལ་ཡོད་དོ། །སངས་རྒྱས་བརྫུན་གསུངས་པ་ཡིན་ནམ། སངས་རྒྱས་ནི་བརྫུན་གསུང་བ་མ་ཡིན་ཏེ། སེམས་ཅན་བརྫུན་སྨྲ་བ་རྣམས་བག་མེད་པར་མྱོས་ཤིང་བསྟན་པ་ཐོས་ནས་ཀྱང་དེ་དག་རང་གི་ཉེས་
པས་སངས་རྒྱས་ཐོབ་པར་མི་འགྱུར་རོ། །གསོལ་པ། སེམས་ཅན་ཐམས་ཅད་ལ་སྔོན་བགྱིས་པའི་ལས་མ་མཆིས་ཤེས་བགྱི་འམ། བཀའ་སྩལ་པ། མདོ་སྡེ་ལས་ཡོད་ཅེས་འབྱུང་མོད་ཀྱི། ཐོས་པ་ཙམ་གྱིས་གྲངས་མེད་པའི་ཡང་གྲངས་མེད་
པར་བྱས་པའི་ལས་རྣམས་ཟད་པར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་བསྐལ་པ་བྱེ་བ་གྲངས་མེད་པ་མང་པོ་ནས། འཇིག་རྟེན་གྱི་ཕྱིར་དམ་བཅས་ཏེ། བདག་གྲོལ་ནས་སེམས་ཅན་ཐམས་ཅད་དགྲོལ་ལོ། །བདག་བརྒལ་ནས་
སེམས་ཅན་ཐམས་ཅད་བསྒྲལ་ལོ་ཞེས་དེ་ལྟར་དམ་བཅས་པའི་དགེ་བའི་རྩ་བས། དེ་བཞིན་གཤེགས་པ་ཉི་མའི་འོད་ཀྱི་གཟི་བརྗིད་ཀྱིས་ལས་བྱས་པ་མ་ལུས་པར་ཟད་པར་འགྱུར་རོ། །གཞན་ཡང་འདི་ལྟ་སྟེ་དཔེར་ན། འཇམ་དཔལ་སྤྲིན་དང་། ཁུག་རྣ་དང་། བ་མོའི་དྲི་
མ་དང་། ཉེས་པ་རྣམས་ནི་ཇི་ཙམ་དུ་ཉི་མ་མ་ཤར་བ་དེ་ཙམ་དུ་འཇིག་རྟེན་ལ་སྒྲིབ་ཀྱི། ཉི་མ་ཤར་མ་ཐག་ཏུ་སེ་གོལ་གཏོགས་པ་སྲིད་ཀྱིས་ཟད་པར་འགྱུར་རོ། །དེ་བཞིན་དུ་སྡིག་པའི་ཕུང་པོ་གྲངས་མེད་པར་བྱས་པ་ཡང་མདོ་སྡེ་འདིའི་ཉི་མ་མ་ཤར་བ་དེ་ཙམ་དུ་
སེམས་ཅན་ཐམས་ཅད་འཁོར་བ་བྱེ་བར་ཀུན་དུ་འཁོར་གྱི་མདོ་སྡེ་འདི་ཉི་མ་ཤར་མ་ཐག་ཏུ་སྡིག་པའི་ཕུང་པོ་གྲངས་མེད་པར་བྱས་པ་ཡང་སེ་གོལ་གཏོགས་པ་སྲིད་ཀྱིས་ཟད་པར་འགྱུར་རོ། །དེ་བཞིན་གཤེགས་པའི་སྙིང་པོ་ལ་འཕྱས་པ་འམ། སྟིང་བ་འམ། ཁ་
གཅུས་པ་འམ། གཞན་གྱི་ཕྱིར་འབྲང་བ་འམ། འདི་ལས་ཕྱི་རོལ་པར་གྱུར་པ་འམ། ཕས་ཕམ་པ་འམ། མཚམས་མེད་པ་བྱས་པར་གྱུར་པ། གྲངས་མེད་པར་སྡིག་པ་བྱས་པ་དེ་ཡང་ཐང་ཅིག་ཙམ་གྱིས་ཟད་པར་འགྱུར་རོ། །དེ་ཅིའི་ཕྱིར་ཞེ་

57-1-215b

ན་གང་དེ་བཞིན་གཤེགས་པ་ཤཱཀྱ་ཐུབ་པའི་མཚན་ཐོས་པ་ཙམ་གྱིས་ཀྱང་སེམས་མ་བསྐྱེད་པ་ཡང་བྱང་ཆུབ་སེམས་དཔར་འགྱུར་རོ། །དེ་བས་ན་དེ་བཞིན་གཤེགས་པ་དེའི་སྨོན་ལམ་གྱི་བྱེ་བྲག་གིས་བདག་དང་འཇིག་
རྟེན་གྱི་ཕྱིར་བདག་གྲོལ་ནས་དགྲོལ་ལོ། །འཁོར་བ་བྱེ་བ་ན་གཉིད་ཀྱིས་ལོག་པའི་སེམས་ཅན་རྣམས་དམ་པའི་ཆོས་བྱེ་བས་སད་པར་བྱས་ཏེ། འཇམ་དཔལ་དེའི་ཕྱིར་དེ་བཞིན་གཤེགས་པའི་མཚན་ཐོས་པས། 
བྱང་ཆུབ་སེམས་དཔར་འགྱུར་ཏེ། བདག་ཉིད་ཀྱིས་ཉོན་མོངས་པ་བྱེ་བ་གཅད་པའི་ཕྱིར་རིངས་པར་བྱའོ། །དེ་ལས་ངའི་ལུས་འཛིན་པར་འགྱུར་རོ། །འཇམ་དཔལ་ངས་བཤད་པ། ངས་ནི་མྱ་ངན་གྱི་ཟུག་རྔུ་བཅད་པའི་
ལམ་བསྟན་ཏེ། དེ་བཞིན་གཤེགས་པ་སྟོན་པ་ཡིན་གྱིས་ད་ཁྱེད་ཀྱིས་ནན་ཏན་གྱིས་ཤིག་ཅེས་ངས་ལམ་བསྟན་ཏོ། །ལམ་བསྟན་པ་རྣམ་པ་གཉིས་ཏེ། རྣམ་པ་གཉིས་གང་ཞེ་ན། ཉན་ཐོས་ཀྱི་ཐེག་པའི་ལམ་དང་། 
བྱང་ཆུབ་སེམས་དཔའི་ལམ་མོ། །དེ་ལ་ཉན་ཐོས་ཀྱི་ཐེག་པའི་ལམ་ཞེས་བྱ་བ་ནི་འཕགས་པའི་ལམ་ཡན་ལག་བརྒྱད་པའོ། །བྱང་ཆུབ་སེམས་དཔའི་ལམ་ཞེས་བྱ་བ་ནི་སེམས་ཅན་ཐམས་ཅད་ལ་དེ་བཞིན་གཤེགས་
པའི་སྙིང་པོ་ཡོད་དེ། ངའི་དབྱིངས་སུ་ངས་མི་གཡོ་བ་ཐོབ་པ་ལྟར། བདེ་བར་གཤེགས་པས་དགོངས་པའི་ཚུལ་གྱིས། ཉོན་མོངས་པ་བྱེ་བ་བཅད་པར་བྱའོ། །གལ་ཏེ་མ་བཅད་ན་ངེས་པར་འཁོར་བའི་འཁོར་ལོར་ཡོངས་
སུ་འཕྱན་ཏོ་ཞེས་མྱ་ངན་གྱི་ཟུག་རྔུ་བཅད་པའི་ལམ་ངས་བསྟན་ཏོ། །མྱ་ངན་ཅེས་བྱ་བ་ནི་ཉོན་མོངས་པའི་དོན་ཏོ། །ཟུག་རྔུ་འབྱིན་པ་ཞེས་བྱ་བ་ནི་དེ་བཞིན་གཤེགས་པའི་ཚིག་བླ་དགས་སོ། །བདག་གིས་ཉོན་མོངས་
པ་བྱེ་བ་གཞོམ་པ་ནི་སྨན་པ་ལྟར་སྐྱུག་པ་དང་། བཀྲུ་བ་དང་། བརྟོལ་བའི་དོན་བྱེད་པ་སྟེ། ཁྱེད་ཀྱང་རང་བཞིན་གྱིས་ང་ལ་བསྙེན་བཀུར་གྱིས་ཤིག་དང་ངས་དེ་བཞིན་གཤེགས་པའི་སྙིང་པོ་བཤད་དོ་ཞེས་བྱ་བའི་དོན་ཏོ། །

57-1-216a

ད་ཁྱེད་ཀྱིས་ནན་ཏན་གྱིས་ཤིག་ཅེས་བྱ་བ་དེ་ནི་དགོངས་ཏེ་གསུངས་པའི་དོན་ཏོ། །དེ་བཞིན་གཤེགས་པ་ནི་སྟོན་པའོ་ཞེས་བྱ་བ་ཡང་སྐྱེ་བ་འདི་ཆོད་ཅིག་ཆོད་ཅིག །སངས་རྒྱས་འབྱུང་བ་ནི་ཨུ་དུམ་འབའ་རའི་
མེ་ཏོག་བཞིན་ནོ། །དད་པ་ཕུན་སུམ་ཚོགས་པ་ནི་གསེར་གྱི་གྲམ་བུ་བཞིན་ནོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་མཉེས་པར་བྱེད་པ་ནི་རུས་སྦལ་ཞར་བ་གཉའ་ཤིང་གི་བུ་
གར་འཇུག་པ་བཞིན་ནོ། །དེ་བཞིན་གཤེགས་པའི་སྙིང་པོ་མདོ་སྡེ་འདིའི་དོན་མེད་པར་མ་བྱེད་ཅིག །ཚེ་དང་འཚོ་བའི་འབྲས་བུ་ཡོད་པར་གྱིས་ཤིག །བདག་ཉིད་སྲིད་པ་ཐམས་ཅད་དང་། ཉོན་མོངས་པའི་ནད་
ཐམས་ཅད་ལས་སྒྲོལ་ཅིག །དེ་བས་ན་དེ་བཞིན་གཤེགས་པ་ནི་སྟོན་པ་སྟེ། བསོད་ནམས་ལ་གཡེལ་བར་བྱེད་ཀྱང་སྡིག་པ་ལ་ཡིད་མི་དགའོ། །ངས་ཉན་ཐོས་ཀྱི་ཐེག་པ་ལས་བསྟན་ཏེ། དེ་བཞིན་གཤེགས་པའི་
སྙིང་པོ་ནི་ཤིན་དུ་རྙེད་པར་དཀའོ། །འཇིག་རྟེན་ན་དཔེ་མེད་དེ་དེ་ལྟར་ཤིན་དུ་རྙེད་པར་དཀའོ། །འཇིག་རྟེན་ན་དཔེ་མེད་ཀྱིས་དེ་བཞིན་གཤེགས་པའི་སྙིང་པོ་ལ་མྱུར་དུ་ལྟོས་ཏེ། དེ་ལྟར་གྱིས་ཤིག་པའི་དོན་ཏོ། །སྡིག་པ་
ལ་ཡིད་མི་དགའ་ཞེས་བཤད་པ་དེའི་དོན་ཅི། དེའི་དོན་བཤད་པར་བྱའོ། །སེམས་ནི་རང་བཞིན་གྱིས་ཡོངས་སུ་དག་པ་སྟེ། དགེ་སློང་རྣམས་མི་དགེ་བའི་གྲོགས་པོའི་སྟེན་གྱི་ཉེས་པས་དྲི་མ་ལྔ་ལ་སོགས་པ་དྲི་མ་མང་པོས་
མདུན་དུ་བྱས་ཤིང་བསྐོར་ཏོ། །དྲི་མ་ལྔ་ལ་སོགས་པ་གང་ཞེ་ན། འདོད་པ་དང་། སྲེད་པ་དང་། གནོད་སེམས་མང་བ་དང་། རྨུགས་པ་དང་། གཉིད་དང་གསུམ་སྟེ། རྒོད་པ་དང་། ཐེ་ཙོམ་དེ་ལྔ་ནི་སེམས་སུན་འབྱིན་པའོ། །
དྲི་མ་ལྔ་ལ་སོགས་ཏེ། དྲི་མ་མང་པོ་རྣམ་པར་དག་པར་བྱ་བའི་ཕྱིར་བརྩོན་པར་བྱའོ། །སེམས་རང་བཞིན་གྱིས་རྣམ་པར་དག་པའི་དབང་དུ་བརྩོན་པར་བྱའོ། །རིངས་པར་རིངས་པར་ཞེས་བྱ་བ་ནི་ཇི་ཙམ་དུ་མདོ་སྡེ་སྤོང་བར་མ་

57-1-216b

གྱུར་པ་དང་། ཇི་ཙམ་དུ་འདོད་ཆེན་པར་མ་གྱུར་པ་དེ་ཙམ་དུ་བདག་ཉིད་བསྒྲལ་བའི་ཕྱིར་བརྩོན་པར་གྱིས་ཤིག །ཚིག་དེའི་དོན་ནི་འདི་ཡིན་ཏེ། སེམས་བཞིན་དུ་ཉོན་མོངས་པ་བློ་བུར་གྱི་དྲི་མ་བྱེ་བ་རྩ་བ་ནས་བརྐོ་བ་ནི་
རིངས་པར་རིངས་པར་ཞེས་བྱ་བའི་ཚིག་གི་དོན་ཏོ། །ཡིད་ནི་ཆོས་ཀྱི་སྔོན་དུ་འགྲོ། །ཡིད་གཙོ་ཡིད་ཀྱི་རང་བཞིན་ཏེ། །ཡིད་ནི་རབ་ཏུ་དང་བ་ཡིས། །བྱེད་པ་དང་ནི་སྨྲ་བ་དག །དེ་དག་བདེ་དང་ལྡན་པར་འགྱུར། །གྲིབ་
མ་བཞིན་དུ་རྗེས་སུ་འགྲོ། །ཉན་ཐོས་ཀྱི་ཐེག་པ་ལས་ཡིད་ཅེས་བྱ་བ་བསྟན་པ་ཡང་དེ་བཞིན་གཤེགས་པའི་སྙིང་པོ་ཞེས་བྱ་བའི་དོན་ཏེ། ཡིད་རང་བཞིན་གྱིས་དག་པ་ཞེས་བྱ་བ་དེ་གང་ཡིན་པ་དེ་ནི་དེ་བཞིན་གཤེགས་པའི་
སྙིང་པོའོ། །དེ་ནི་ཆོས་ཐམས་ཅད་ཀྱི་གཙོ་བོ་སྟེ། ཆོས་ཐམས་ཅད་ནི་དེ་བཞིན་གཤེགས་པའི་སྙིང་པོའི་རང་བཞིན་ནོ། །ཡང་ཡིད་རབ་ཏུ་དང་བས་བྱེད་པ་ཞེས་བྱ་བ་ནི་ཉོན་མོངས་པ་བྱེ་བ་ཐམས་ཅད་བཅད་དེ་བདག་གི་
དབྱིངས་བསྟན་ནས་གང་རབ་ཏུ་དང་བ་ནི་དེ་བཞིན་གཤེགས་པའི་སྙིང་པོ་ཉིད་དོ། །དེ་ནས་ཕྱིས་སྨྲ་བ་དང་བྱེད་པ་ཞེས་བྱ་བ་ནི་སངས་རྒྱས་ཐོབ་ནས་གང་སྨྲ་བ་དང་། གང་བྱེད་པ་དེ་ཐམས་ཅད་འཇིག་རྟེན་རབ་ཏུ་སྒྲོལ་བ་སྟེ། 
དེའི་ཚེ་ཇི་ལྟར་མིས་གྲིབ་མ་མཐོང་བ་བཞིན་དུ། དེ་བཞིན་གཤེགས་པའི་སྙིང་པོ་མཐོང་ངོ་། །དེ་བས་ན་གྲིབ་མ་བཞིན་དུ་རྗེས་སུ་འབྲང་ཞེས་བྱ་སྟེ། ཚིགས་སུ་བཅད་པ་དེའི་དོན་ནི་འདིའོ། །ཡིད་ནི་ཆོས་ཀྱི་སྔོན་དུ་
འགྲོ། །ཡིད་གཙོ་ཡིད་ཀྱི་རང་བཞིན་ཏེ། །ཡིད་ནི་རབ་ཏུ་འཁྲུགས་པ་ཡིས། །སྨྲས་པ་དང་ནི་བྱས་པ་དག །དེ་ནི་སྡུག་བསྔལ་ལྡན་པར་འགྱུར། །ཤིང་རྟ་རབ་ཏུ་དྲངས་པ་བཞིན། །ཚིགས་སུ་བཅད་པ་དེའི་དོན་ནི་
ཉོན་མོངས་པ་བྱེ་བའི་དོན་དོ། །ཡིད་ཀྱང་རབ་ཏུ་འཁྲུགས་ཤེས་བྱ་བ་ནི་ཉོན་མོངས་པ་བྱེ་བས་གཡོགས་པས་འཁྲུགས་ཤེས་བྱའོ། །སེམས་གང་གྱུར་པ་ནི་དེ་བཞིན་གཤེགས་པའི་སྙིང་པོ་ཉོན་མོངས་པ་བྱེ་བའི་

57-1-217a

ནང་དུ་ཞུགས་པའི་དོན་ཏོ། །དེ་ནས་སྨྲ་བ་དང་བྱེད་པ་ཐམས་ཅད་སྡུག་བསྔལ་གྱི་ཕྱིར་འགྲོ་སྟེ། ཤིང་རྟ་རབ་ཏུ་དྲངས་པ་ཞེས་བྱ་བ་ནི་ཇི་ལྟར་འཁོར་ལོ་བ་ལང་གི་རྗེས་སུ་འགྲོ་བ་དེ་བཞིན་དུ། སྡིག་པའི་
ཕུང་པོས་འཁོར་ལོ་སེམས་ཅན་དམྱལ་བ་དང་། དུད་འགྲོའི་སྐྱེ་གནས་སུ་སེམས་ཅན་རྣམས་རབ་ཏུ་འཁྱམ་མོ་དེ་བས་ན་བསོད་ནམས་ལ་གཡེལ་བར་བྱེད་ཀྱང་སྡིག་པ་ལ་ཡིད་མི་དགའ་བ་ཞེས་བྱ་བར་གྲུབ་བོ། །གཞན་
ཡང་འཇམ་དཔལ་བའི་འོ་མ་ལ་མར་ཡོད་པར་རྟོགས་པས་མི་རྣམས་སྲུབ་ལ། ཅིའི་ཕྱིར་ཆུ་ལ་མི་རྣམས་མི་སྲུབ་ཅེ་ན་རྫས་མེད་པའི་ཕྱིར་ཏེ། དེ་བཞིན་དུ་འཇམ་དཔལ་དེ་བཞིན་གཤེགས་པའི་སྙིང་པོ་ཡོད་པའི་ཕྱིར་མི་
རྣམས་ཚུལ་ཁྲིམས་སྲུང་ཞིང་ཚངས་པར་སྤྱད་པ་སྤྱོད་དོ། །གཞན་ཡང་འཇམ་དཔལ་མི་གསེར་འདོད་པ་རྟོག་པ་དང་ལྡན་པ་བྲག་ལ་རྐོ་བ། ཅིའི་ཕྱིར་ཤིང་ལ་མི་རྐོ། རྡོ་བ་གསེར་གྱི་དབྱིངས་ཡོད་པ་ལ་ནི་རྐོའི། ཤིང་
གསེར་མེད་པ་ལ་མི་རྐོའོ། །དེ་བཞིན་དུ་འཇམ་དཔལ་དབྱིངས་ཡོད་པ་ལ་རྟོག་པའི་མི་རྣམས་བདག་སངས་རྒྱས་སུ་འགྱུར་རོ་སྙམ་སྟེ། ཚུལ་ཁྲིམས་སྲུང་ཞིང་ཚངས་པར་སྤྱོད་དོ། །གཞན་ཡང་འཇམ་དཔལ་
དབྱིངས་མེད་ན་ནི་ཚངས་པར་སྤྱོད་པ་དོན་མེད་པར་འགྱུར་རོ། །ལོ་བྱེ་བར་ཆུ་ལ་བསྲུབས་ཀྱང་སྣུམ་མི་འབྱུང་བ་དེ་བཞིན་དུ། གལ་ཏེ་བདག་གི་དབྱིངས་མེད་ན། བདག་ལ་ཆགས་པས་ཚངས་པ་དང་། ཚུལ་ཁྲིམས་
སྤྱོད་པ་རྣམས་དོན་མེད་པར་འགྱུར་རོ། །འཇམ་དཔལ་གྱིས་གསོལ་པ། ཚངས་པར་སྤྱོད་པ་ཚངས་པར་སྤྱོད་པ་ཞེས་བགྱི་བ་དེའི་དོན་ཅི་ལགས། ཅིའི་ཕྱིར་དེ་བཞིན་གཤེགས་པས་འདོད་པའི་ཡོན་ཏན་ལ་
རོལ་པ་སྤངས། སོར་མོའི་ཕྲེང་བས་ཀྱང་གསོལ་པ། ལྷ་དང་མི་མོང་པོ་ངེས་པར་དེས་ལྟུང་བའི་ཆོས་སུ་མཁྱེན་ནས་འདོད་པའི་འདུ་ཤེས་སྤངས་སོ། །བཅོམ་ལྡན་འདས་ཀྱིས་བཀའ་སྩལ་པ། སོར་མོའི་ཕྲེང་བ་དེ་སྐད་

57-1-217b

མ་ཟེར་ཅིག །སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཡོད་པས། སེམས་ཅན་ཐམས་ཅད་ཆོས་ཀྱི་སྤུན་ཡིན་ནོ། །བུད་མེད་ཐམས་ཅད་ནི་སྲིང་མོ་ཡིན་ནོ། །སོར་མོའི་ཕྲེང་བས་གསོལ་པ། རྒྱལ་
པོ་ཟས་གཙང་མ་དང་། ལྷ་མོ་སྒྱུ་མ་ཡང་ལྕམ་དྲལ་ན། ཇི་ལྟར་ཡབ་ཡུམ་དུ་འགྱུར། །བཅོམ་ལྡན་འདས་ཀྱིས་བཀའ་སྩལ་པ། དེ་ནི་འཇིག་རྟེན་གཞན་བསྒྲལ་བའི་ཕྱིར་སྒྱུ་མའི་བྱ་བས་བསྟན་ཏེ། འདི་ལྟ་སྟེ། 
རྒྱལ་པོའི་གྱད་གཉིས་སྐུགས་སྟོང་བཙུགས་ཏེ། དམ་བྱས་ནས་གཅིག་ལ་གཅིག་རྡེག་ཅིང་མི་བརྩམས་པའི་ཚུལ་གྱིས་སྐུགས་སྟོང་འཕྲོག་པར་སྟོན་པས་རྒྱལ་པོ་དང་། འཁོར་ཐམས་ཅད་དགའ་བར་བྱེད་ན་འགྲོ་བ་རྣམས་
ཀྱིས་དེའི་བྱེ་བྲག་མི་ཤེས་སོ། །དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱིས་ཐབས་བྱས་ཏེ་ཡབ་ཡུམ་དང་བདག་ཉིད་སྐྱེས་བུ་བརྟན་པོར་སྟོན་ཏེ། དེ་ནས་ཕྱིས་འགྲོ་བ་མང་པོ་ཡང་སྲིད་པའི་རྒྱ་མཚོ་མི་ཟད་པ་ལ་སྒྲོལ་
ན། སེམས་ཅན་རྣམས་ཀྱིས་དེའི་བྱེ་བྲག་མི་ཤེས་སོ། །འདི་ལྟ་སྟེ། རོལ་མོ་ལ་འདུས་པའི་ནང་དུ་སྐྱེས་བུ་གར་མཁན་གར་བྱེད་ཅིང་གར་དང་གཏམ་གྱི་ཚིགས་སུ་སྐྱེས་པ་དང་། བུད་མེད་དང་། མ་ནིང་དུ་འགྱུར་ཏེ། འགྲོ་
བ་མང་པོ་མྱུར་དུ་མགུ་བར་བྱེད་པ་དེ་བཞིན་དུ། སངས་རྒྱས་བཅོམ་ལྡན་འདས་ཀྱིས་ཀྱང་བདག་གི་ལུས་གར་མཁན་ཆེན་པོ་ལྟ་བུར་ལུས་བསྟན་ཏེ། སེམས་ཅན་བྱེ་བ་མང་པོ་སྒྲོལ་བ། སེམས་ཅན་རྣམས་ཀྱིས་
སྐྱེས་བུའི་ཐབས་སུ་མི་ཤེས་སོ། །འདི་ལྟ་སྟེ། རོལ་མོ་ལ་འདུས་པའི་དབུས་སུ་སྒྱུ་མ་བྱེད་པས། བདག་ཉིད་རྣམ་པ་མང་པོར་གཅོད་ཅིང་རྩེ་བས་འགྲོ་བ་མང་པོ་དགའ་བར་བྱས་པ་ཡང་སྣད་པ་འམ། ཕོག་པ་ཡང་
མེད་དོ། །དེ་བཞིན་དུ་སྒྱུ་མ་བྱེད་པ་ལྟར་བདག་ཉིད་སེམས་ཅན་མང་པོ་ལ་ཕན་པར་བྱ་བའི་ཕྱིར་བདག་ཉིད་སྒྱུ་མ་སྤྲུལ་པ་སྟོན་ཏོ། །ཡང་འཇམ་དཔལ་དེ་བཞིན་གཤེགས་པ་ནི་ཐམས་ཅད་མཁྱེན་པ་ཡེ་ཤེས་

57-1-218a

ཐམས་ཅད་དང་ལྡན་པས། འཇིག་རྟེན་ཀུན་ལ་ལེགས་པར་རབ་ཏུ་གཟིགས་ན། ཐོག་མ་མེད་པ་ཚུན་ཆད་འཁོར་བར་འཕོ་ཞིང་འཁྱམ་པ་ན། མར་མ་གྱུར་པ་མེད། སྲིང་མོར་མ་གྱུར་པ་མེད་དེ། མ་
ཡང་ཆུང་མར་གྱུར། བྲན་ཡང་ཕར་གྱུར། ཕ་ཡང་བྲན་དུ་གྱུར་ཏེ། ཚེ་རབས་བྱེ་བ་མང་པོར་འཚོ་བའི་འཇིག་རྟེན་ནི་གར་མཁན་བཞིན་པས་ན། དེ་བཞིན་གཤེགས་པས་ཚངས་པར་སྤྱོད་པ་མཛད་དོ། །
བམ་པོ་བདུན་པ་སྟེ་ཐ་མ། གཞན་ཡང་འཇམ་དཔལ་རང་གི་དབྱིངས་དང་ལྷན་ཅིག་ཏུ་འདོད་པའི་རྩེད་མོ་བྱས་པ་གང་ཆུང་ཟད་བདེ་བ་རང་གིས་བཟུང་སྟེ། སྨྲ་བ་བཞིན་དུ་འགྱུར་རོ། །བདག་ཉིད་མ་ནིང་དུ་སྐྱེས་ན། བདེ་བ་དེ་
དང་སྡུག་བསྔལ་གྱི་ཕུང་པོ་འབྱུང་ངོ་། །བུད་མེད་ལའང་དེ་བཞིན་གཤེགས་པའི་སྙིང་པོ་ཡོད་དེ། སྐྱེས་པ་ཡང་དེ་བཞིན་ནོ། །བདག་ཉིད་ཀྱིས་བཟུང་ནས་སྨྲ་བ་བཞིན་དུ་ཅི་རུང་བར་འགྱུར་རམ། དེའི་ཕྱིར་སེམས་ཅན་
ཐམས་ཅད་ཀྱི་དབྱིངས་ནི་དབྱིངས་གཅིག་གོ། །ཚངས་པར་སྤྱོད་པ་བརྩམས་ཏེ། བདག་ཉིད་གཞག་པར་མི་འགྱུར་བའི་གན་དུ་དེ་བཞིན་གཤེགས་པ་ཕྱིན་ཏོ། །འཇམ་དཔལ་གྱིས་གསོལ་པ། ཅིའི་སླད་དུ་དེ་བཞིན་
གཤེགས་པས་དགེ་བསྙེན་ཕ་དང་། དགེ་བསྙེན་མ་ཐམས་ཅད་ཚངས་པར་སྤྱོད་པ་ལ་རབ་ཏུ་མ་བཀོད། ཅིའི་སླད་དུ་དགེ་བསྙེན་དང་། དགེ་སློང་དང་། དགེ་སློང་མ་རྣམས་ནི་ཀ་བ་བཞི་པའི་ཁང་བ་ལྟ་བུས་དམ་པའི་
ཆོས་ཀྱི་རྒྱུར་དཔེ་བསྟན་ན། སྡིག་པ་ཆེན་པོ་ཡང་རབ་ཏུ་འབྱུང་བར་གདའ་སྟེ། ཅིའི་སླད་དུ་དགེ་བསྙེན་དང་། དགེ་བསྙེན་མ་དག་དེ་ལྟར་སྡིག་པ་རབ་ཏུ་གདའ་བར་གྱུར། ཅིའི་སླད་དུ་ཡང་དགེ་བསྙེན་དང་། དགེ་བསྙེན་
མ་རྣམས་ཀྱི་འདུལ་བའི་ཆོས་བཅས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་ནི་འདུ་ཤེས་གཞན་ཏེ། འཇིག་རྟེན་གྱི་འདུ་ཤེས་ཀྱི་མིང་དུ་བཏགས་སོ། །དེ་བཞིན་གཤེགས་པས་སེམས་

57-1-218b

ཅན་ཐམས་ཅད་སངས་རྒྱས་ཀྱི་གནས་ལ་བཀོད་ཀྱང་སྒྲ་གཅན་འཛིན་གྱི་ཚུལ་དུ་འཛིན་པར་མི་འགྱུར་རོ། །སངས་རྒྱས་ཀྱི་འདུ་ཤེས་དང་། འཇིག་རྟེན་གྱི་འདུ་ཤེས་ཀྱང་ཐ་དད་པ་དེ་དྲི་བ་འདི་ནི་མི་དྲི་བ་ཞེས་བྱའོ། །
འཇམ་དཔལ་སེམས་ཅན་ཐམས་ཅད་ཀྱི་དབྱིངས་ཡིན་པས་ན། སྲོག་གཅོད་པ་སྤངས་པ་ནི་སངས་རྒྱས་སོ། །རིགས་ཀྱི་བུ་ཇི་ལྟར་བདག་གསོད་པ་ལྟར་འཇིག་རྟེན་ན་སྲོག་གཅོད་པ་ཡང་དེ་བཞིན་ཏེ། བདག་ཉིད་
ཀྱི་དབྱིངས་འཇོམས་པའོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཅིའི་སླད་དུ་སྒྲ་གཅན་འཛིན་བཞིན་དུ་མཚུངས་པར་གཟིགས་ལ། བདག་ཉིད་ཀྱི་དབྱིངས་འཆང་བ་སྐྱོན་ཆགས་པ་ཡ་མཚན་ཅན་རྣམས་ཆད་པས་
བཅད་ཅིང་བསད་པར་བསྟན། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་སྐད་མ་ཟེར་ཅིག །དེ་བཞིན་གཤེགས་པ་ནི་སྒྲ་གཅན་འཛིན་དང་མཚུངས་པར་གཟིགས་སོ། །འདི་ལྟ་སྟེ། འཇམ་དཔལ་
སྐྱེས་བུ་ཆོས་འདོད་པ་ཞིག་བདག་ཉིད་དུས་གཉིས་སུ་ཟ་བ་ལས་ལ་ལ་ཞིག་གིས་བསྟན་ཏེ། ཟས་ལན་གཅིག་པར་གྱུར་ན། སྲིན་བུའི་རིགས་བརྒྱད་ཅུ་གསོད་པར་འགྱུར་རོ། །ཇི་སྟེ་དེ་ལྟར་གྱུར་ན་དེ་དག་ལ་སྲོག་
གཅོད་པ་དག་པར་མི་འགྱུར་རོ། །གཞན་ཡང་འཇམ་དཔལ་ཤིན་དུ་བདེ་བ་འདོད་པའི་བདེ་བ་དེ་ལས་ཕྱིར་ཕྱོགས་པའི་འཕགས་པ་འདོད་པ་འཇོམས་པ་ནི་བདག་གསོད་པའོ། །གལ་ཏེ་འཕགས་པ་རྣམས་དེ་ལྟར་
གྱུར་ན། བདག་གསོད་པའི་སྡིག་པར་འགྱུར་རོ། །གལ་ཏེ་འདོད་པའི་སེམས་སྐྱེད་ཅིང་གཞན་གྱི་དྲུང་དུ་གནས་ཏེ། བདག་འདོད་པའི་སེམས་སྐྱེས་ན་ཇི་ལྟར་བྱ་ཞེས་མ་ཟེར་ཅིག །དེ་ལས་ངོ་ཚ་བ་སྐྱེ་བར་འགྱུར་
རོ། །ངའི་ལུས་གཅིག་ཡོད་ཀྱང་རུང་། མེད་ཀྱང་དཔའ་བོ་ལྟར་འདུག་པས་བདག་གསོད་པ་ནི་བདག་གི་ཁམས་འཇོམས་པར་འགྱུར་རམ། དེ་མ་ལགས་སོ། །བཅོམ་ལྡན་འདས་དེ་ནི་བསོད་ནམས་ཀྱི་ཕུང་པོའོ། །

57-1-219a

དེ་བཞིན་དུ་འཇམ་དཔལ་འཕགས་པ་ཡང་འདི་ལྟར་བདག་གསོད་དེ། དེ་ཅིའི་ཕྱིར་ཞེ་ན། ཉོན་མོངས་པའི་དུག་གི་ཕྱིར་ཏེ། གཞན་གསོད་པར་ནི་མི་འགྱུར་རོ། །སངས་རྒྱས་ཀྱི་ཆོས་ཀྱི་ཚིག་ནི་སྐྱོན་ཆགས་
པའི་ཡ་མཚན་ཅན་དམ་པའི་ཆོས་འཇིག་པ་རྣམས་བདག་གི་ཉོན་མོངས་པ་མི་ཟད་པ་ལྟར་དེ་བག་མེད་པར་བྱེད་ཅིང་། ཚུལ་མ་ཡིན་པར་གནོད་པའང་བྱེད་དུ་འཇུག་སྟེ། དེ་དག་ནི་བདག་ལ་མཆོད་པ་ཡིན་ནོ། །ཇི་ལྟར་
བདག་སྡུག་པར་འདོད་པ་དང་། བདེ་བ་དང་། ཟས་དང་། སྲོག་འདོར་བ་དེ་བཞིན་དུ། བདག་སྤོང་བར་འདོད་པས་སྐྱོན་ཆགས་པའི་ཡ་མཚན་རྣམས་ཆད་པས་གཅོད་པ་དེ་ནི་དེ་བཞིན་གཤེགས་པའི་སྙིང་པོ་རིག་པ་ཡིན་
ནོ། །འཇམ་དཔལ་གྱིས་གསོལ་པ། ཅི་དེ་བཞིན་གཤེགས་པའི་སྙིང་པོའི་སླད་དུ་སངས་རྒྱས་རྣམས་ཤ་མི་གསོལ་ལམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཤིན་དུ་དེ་བཞིན་ཏེ། ཐོག་མ་
དང་ཐ་མ་མེད་པའི་འཁོར་བར་འཁོར་བའི་ཚེ་རབས་དེ་དག་ལ་སེམས་ཅན་ཐམས་ཅད་མར་མ་གྱུར་པ་དང་། སྲིང་མོར་མ་གྱུར་པ་གང་ཡང་མེད་དོ། །ཁྱིར་གྱུར་པ་ཡང་ཕར་གྱུར་ཏེ། འཚོ་བའི་འཇིག་རྟེན་ནི་བྲོ་
མཁན་བཞིན་ནོ། །དེ་བས་ན་བདག་གི་ཤ་དང་། གཞན་གྱི་ཤ་ཡང་ཤ་གཅིག་པ་ཡིན་པས། སངས་རྒྱས་རྣམས་ཤ་མི་གསོལ་ལོ། །གཞན་ཡང་འཇམ་དཔལ་སེམས་ཅན་ཐམས་ཅད་ཀྱི་དབྱིངས་ནི་ཆོས་ཀྱི་
དབྱིངས་ཏེ། དབྱིངས་གཅིག་ཏུ་གྱུར་པའི་ཤ་ཟ་བར་འགྱུར་བས། སངས་རྒྱས་རྣམས་ཤ་མི་གསོལ་ལོ། །འཇམ་དཔལ་གྱིས་གསོལ་པ། སྦྲང་རྩི་དང་། དུང་དང་། ལྷམ་དང་། དར་གྱི་སྲིན་བུ་ལ་སོགས་པ་རང་
གི་དབྱིངས་ཀྱི་ཤ་མ་ལགས་སོ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་སྐད་མ་ཟེར་ཅིག །སངས་རྒྱས་ནི་འཇིག་རྟེན་པ་ཐམས་ཅད་ཀྱི་ལུས་སྤངས་པ་ཡིན་ཏེ། སངས་རྒྱས་ནི་ཟང་ཟིང་མེད་པ་ཡིན་

57-1-219b

ན་ཆགས་པའི་རྫས་ཅི་ལ་འང་སྟེན་པ་དེ་ནི་གནས་མ་ཡིན་ཏེ། ཟང་ཟིང་ལ་བསྙེན་པ་ནི་ཐབས་ཀྱི་ཆོས་ཉིད་དོ། །འདི་རྫས་གཅིག་ནས་གཅིག་ཏུ་འོངས་པ་ལ་བསྙེན་པར་བྱེད་དེ། རྫས་གང་ནས་འབྱུང་བ་དེ་དང་དེར་བསྙེན་
པར་མི་བྱའོ། །གསོད་པའི་ལག་མ་ཡིན་པར་གཅིག་ནས་གཅིག་ཏུ་འོངས་པ་ནི་བསྙེན་དུ་རུང་ངོ་། །འཇམ་དཔལ་གྱིས་གསོལ་པ། ཚོང་འདུས་གཅིག་ན་ལྷམ་མཁན་གྱིས་ཀོ་བ་ལས་ལྷམ་དྲུབས་ཏེ། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕུལ་ན། གཅིག་ནས་གཅིག་ཏུ་མཆིས་པ་དེ་བཞེས་སམ། འཇམ་དཔལ་གྱིས་གསོལ་པ། གལ་ཏེ་མ་ཧེ་རང་ཆོས་བཞིན་དུ་གུམ་ནས། མ་
ཧེ་བདག་པོ་གདོལ་པ་ལས་ཀོ་བ་བླངས་ཏེ། ལྷམ་མཁན་བཙལ་ནས་ལྷམ་དུ་དྲུབས་ཏེ། ཚུལ་ཁྲིམས་དང་ལྡན་པ་ལ་སྩལ་ན། དེ་གཅིག་ནས་གཅིག་ཏུ་མཆིས་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། 
མ་ཧེ་ཆོས་བཞིན་དུ་ཤི་བར་གྱུར་ལ། མ་ཧེ་བདག་པོས་ལྷམ་འདྲུབ་ཏུ་བཅུག་ནས་ཚུལ་ཁྲིམས་དང་ལྡན་པ་ལ་བྱིན་ན་བླང་བར་བྱ་འམ། འོན་ཏེ་མ་བླངས་ན་དགེ་སློང་དང་འཐུན་ནམ། སྙིང་རྗེ་མེད་པ་ཡིན་ཏེ། ཚུལ་ཁྲིམས་
རལ་བར་མི་འགྱུར་བ་མ་ཡིན་ནོ། །འཇམ་དཔལ་གྱིས་གསོལ་པ། རྨོ་བརྐོ་ཡང་བགྱིར་མི་རུང་ངོ་། །ཆུ་མི་གཙང་བས་བཙོས་པའི་ཟས་ཀྱང་མི་བླང་ངོ་། །དེ་ལྟ་ལགས་ན་དགེ་སློང་དག་ལ་དེ་ལྟ་བུ་གདའོ། །བཅོམ་
ལྡན་འདས་ཀྱིས་བཀའ་སྩལ་པ། དེ་ནི་འཇིག་རྟེན་གྱི་འདུ་ཤེས་ཤེས་བྱ་སྟེ། གལ་ཏེ་དགེ་བསྙེན་ཡོད་ན་ནི་ཟས་དང་སྐོམ་ཆུ་གཙང་མ་དང་སྦྱོར་ཅིག །གང་ན་དགེ་བསྙེན་ཡོད་པར་རྨོ་བརྐོ་མི་བྱའོ། །གང་ན་དགེ་བསྙེན་
མེད་པ་དེར་སངས་རྒྱས་ཀྱིས་ཀྱང་ཇི་ལྟར་བྱ། ཐང་ལ་ཡང་སྲོག་ཆགས་ཡོད། ཆུའི་ནང་ན་ཡང་སྲོག་ཆགས་ཡོད། ནམ་མཁའ་ལ་ཡང་སྲོག་ཆགས་ཡོད་དོ། །གལ་ཏེ་དེ་ལྟར་རྣམ་པར་དག་པ་གྲུབ་པ་རྣམས་ལ་སྡིག་

57-1-220a

པར་མི་འགྱུར་རམ། རྣམ་པར་དག་པ་གྲུབ་པ་དེ་དག་ཇི་ལྟར་རྒྱུ། དེ་དག་འཇིག་རྟེན་ན་མི་འདྲི་བ་ཞེས་བྱ་བའི་འདྲིའོ། །འཇམ་དཔལ་གྱིས་གསོལ་པ། བཅོམ་ལྡན་འདས་འཇིག་རྟེན་པའང་རེང་ཞིག་ཚུན་
ཆད་བདག་ཉིད་ཤ་ཟ་བ་ལ་མི་གནས་སོ། །བཅོམ་ལྡན་འདས་ཀྱིས་བཀའ་སྩལ་པ། གང་འཇིག་རྟེན་པ་ལ་སངས་རྒྱས་ཀྱི་ཚིག་དང་འཐུན་པ་ཡོད་པ་དེ་ཡང་ཐམས་ཅད་དུ་ཐམས་ཅད་སངས་རྒྱས་ཀྱི་ཚིག་ཏུ་རིག་
པར་བྱའོ། །འཇམ་དཔལ་འཇིག་རྟེན་པ་རྣམས་ཀྱང་ཐར་པ་བརྗོད་དེ། དེ་དག་ལ་ཐར་པ་མེད་ཀྱི། བཅོམ་ལྡན་འདས་ཀྱི་བསྟན་པ་ལ་ཐར་པ་ཡོད་དོ། །དེ་དག་ལ་ཡང་རབ་ཏུ་འབྱུང་བ་ཡོད་དེ། དེ་དག་གི་རབ་ཏུ་འབྱུང་བ་མ་
ཡིན་ནོ། །བཅོམ་ལྡན་འདས་ཀྱི་བསྟན་པ་ལ་ནི་རབ་ཏུ་འབྱུང་བ་ཡོད་དོ། །འཇིག་རྟེན་པ་ལ་ཡང་ཤ་ཟ་བ་ནི་བདག་ཉིད་ཟ་བའོ་ཞེས་བརྗོད་དེ། དེ་ཡང་བདག་ཉིད་བདག་ཉིད་ཀྱི་ཤ་ལ་མི་ཟ་སྟེ། བཅོམ་ལྡན་འདས་ཀྱི་
བསྟན་པ་ལ་ནི་བདག་ཉིད་ཀྱི་ཤ་ཟ་བར་ངེས་སོ། །འཇམ་དཔལ་འཇིག་རྟེན་དུ་ཡ་མཚན་ཅན་ཐམས་ཅད་བྱུང་བ་མདོ་སྡེ་འདི་ལས་བསྟན་པ་ཉན་འདོད་དམ། གསོལ་པ། བཅོམ་ལྡན་འདས་འཚལ་ལོ། །བཅོམ་ལྡན་
འདས་ཀྱིས་བཀའ་སྩལ་པ། འཇམ་དཔལ་སྔོན་འདས་པའི་དུས་ན་བྱུང་བ་གྲངས་མེད་པའི་བསྐལ་པ་བས་ཀྱང་ཆེས་གྲངས་མེད་པ་བསྐལ་པ་ཡངས་པ་བས་ཀྱང་ཆེས་ཡངས་པ། དཔག་ཏུ་མེད་པ་བས་ཀྱང་ཆེས་
དཔག་ཏུ་མེད་པ་དེའི་ཚེ་དེའི་དུས་ན། དེ་བཞིན་གཤེགས་པ་ཀོ་སན་ཏ་བཟང་པོ་ཞེས་བྱ་བ་འཇིག་རྟེན་དུ་གྲོང་འདིར་བྱུང་སྟེ། དེའི་ཚེ་ཡ་མཚན་ཅན་མེད་ཅིང་ཡ་མཚན་ཅན་གྱི་མིང་ཡང་མེད་དོ། །སེམས་ཅན་ཐེག་པ་ཆེན་པོ་པར་གྱུར་ཏེ། 
སེམས་ཅན་རྣམས་ཤིན་དུ་བདེ་བ་དང་ལྡན་པར་གྱུར་ཏོ། །དེའི་ཚེ་དེ་བཞིན་གཤེགས་པ་དེ་འཇིག་རྟེན་གྱི་ཁམས་འདིར་ལོ་མང་དུ་བཞུགས་ནས་ཡོངས་སུ་མྱ་ངན་ལས་འདས་སོ། །ཡོངས་སུ་མྱ་ངན་ལས་འདས་པའི་བསྟན་པ་ཡང་

57-1-220b

ལོ་མང་དུ་གནས་ནས། དམ་པའི་ཆོས་ནུབ་པར་གྱུར་པའི་ཚེ། དགེ་སློང་ཚུལ་ཁྲིམས་དང་ལྡན་པ་བྲི་བའི་དུས་ན། ཆོས་མ་ཡིན་པའི་ཕྱོགས་འཕེལ་བའི་ཚེ། དགེ་སློང་སངས་རྒྱས་ཀྱི་བློ་གྲོས་ཤེས་བྱ་བ་ཞིག་དགོན་པ་ན་གནས་ཏེ། དགེ་སློང་
དེ་ལ་སེམས་ཅན་དགེ་བའི་རྩ་བ་དང་ལྡན་པ་གཅིག་གིས། རིན་ཐང་མེད་པའི་གོས་བྱིན་ནས། དགེ་སློང་དེས་རྗེས་སུ་གཟུང་བའི་ཕྱིར་བླངས་ཏེ། ཨི་ཤིན་འདའི་ར་བའི་དྲུང་ནས་ཕར་བསྟན་ཏེ་སོང་བ་དང་། ཨི་ཤིན་འདའི་མིས་གོས་དེ་མཐོང་ནས་
སེམས་བཟློག་སྟེ། ནུབ་མོ་མུན་ཁུང་ན་དགེ་སློང་དེའི་ཐད་དུ་སོང་སྟེ། གོས་དེ་ཕྲོགས་ནས་རི་ཁྲོད་དུ་ཁྲིད་དེ། གཅེར་བུར་ཕྱུང་ནས། ཤིང་ལ་ལག་པ་གྱེན་དུ་དམ་པོར་བཅིངས་ཏེ་སོང་ངོ་། །དེའི་ནུབ་མོ་མུན་ཁུང་ན་མེ་ཏོག་ཐུ་བའི་བྲམ་ཟེ་སྐོན་པ་ཐོགས་
ཏེ། འབྲོག་དགོན་པར་འོངས་ནས་ནམ་ལངས་ཏེ། ཙམ་པ་ཀ་ཞིག་གི་དྲུང་ན་སྟག་འདུག་པས་སྐྲག་སྟེ། སྟག་དེས་བསད་ལ་ཐུག་པ་དང་། ཅི་ཐར་དུ་བྲོས་ཏེ། བདག་ཉིད་རབ་ཏུ་མི་དགའ་ཞིང་སོང་སོང་ན་དགེ་སྦྱོང་གཅེར་བུར་བཅིངས་པ་མཐོང་
ནས། ཀྱེ་མ་དགེ་སྦྱོང་དགོན་པ་པ་ངུར་སྨྲིག་ཅན་འདིར་འོངས་ན། ངུར་སྨྲིག་གི་རྒྱལ་མཚན་གྱིས་ནི་ཐར་བར་མི་འགྱུར་བ་ལྟ་ཞིག་སྙམ་སྟེ། ལག་པ་བསྒྲེང་ནས་ལུས་གཅེར་བུར་བྱུང་ལ་དཀའ་ཐུབ་སྤྱད་པར་བྱའོ་སྙམ་ནས། ལམ་འདི་ངེས་པར་ཐར་
བའི་ལམ་དུ་ལེགས་པར་སྒྲུབ་པ་ཡིན་ནམ་ཞེས་དམ་པའི་ཆོས་གཞིག་པའི་ཕྱིར་བདག་གི་གོས་ངན་པ་བོར་ཏེ། སྐྲ་བཏོགས་ནས་མགོ་རེག་གཅེར་བུ་པའི་དགེ་སྦྱོང་དུ་གྱུར་ཏེ། དེ་ལས་དགེ་སྦྱོང་གཅེར་བུ་པ་བྱུང་ངོ་། །དགེ་སློང་དེ་བ་དང་
བདག་ཉིད་བཅིངས་པ་ཁྲོལ་ནས་ཤིང་ཤུན་བླངས་ཏེ་ས་སེར་པོས་བྱུགས་ནས། ཐང་ལ་འགྲོ་བ་བྲམ་ཟེ་ཞིག་གིས་མཐོང་ནས། སྔར་བཤད་པ་བཞིན་དུ་མཐོང་བ་དང་། འདི་ནི་ངུར་སྨྲིག་གྱོན་པའི་དགེ་སློང་སྟེ། ངུར་སྨྲིག་བོར་ལ། 
བཙག་གིས་བྱུགས་ཏེ་སོང་ན། ཐར་པའི་ལམ་ནི་འདི་ཡིན་པ་སྙམ་སྟེ། འདི་ནི་དགེ་བར་འགྲོ་བ་འམ། ཅི་ཞེས་དེ་ཀུན་དུ་རྒྱུ་བར་གྱུར་ཏེ། དེ་ལས་མུར་འདུག་ཀུན་དུ་རྒྱུ་བ་བྱུང་ངོ་། །དགེ་སློང་ཕྱེམ་རེད་ཚུར་ཞུགས་ཏེ། རང་གི་ཀླད་

57-1-221a

པའི་རྨ་ཆུས་བཀྲུས་ནས་སྐྲ་འཇམ་པོས་ཀླད་པའི་རྨ་གཡོགས་ཏེ། སྦྲུལ་བསད་པའི་རས་བ་ལང་རྫིས་བོར་བ་གྱོན་ཏེ། ཁྲུས་བྱེད་པ་དེ་སྐྱེས་བུ་ཤིང་ཐུ་བ་གཞན་ཞིག་གིས་མཐོང་སྟེ། སྔ་མ་ལྟར་དགེ་སློང་དེ་ཉོན་མོངས་
པ་མཐོང་ནས། དགེ་སྦྱོང་འདི་ནི་ངུར་སྨྲིག་གྱོན་ཏེ། རྒྱལ་མཚན་ངུར་སྨྲིག་གིས་ནི་ཐར་པར་མི་འགྱུར་བ་སྙམ་དུ་བསམས་ནས། རལ་པ་རིང་པོར་བྱས་ཏེ། རྩྭ་གོས་གྱོན་ནས་དུས་གསུམ་དུ་ཁྲུས་བྱེད་པའི་དཀའ་ཐུབ་སྤྱོད་པ་ཡིན་
དུ་བཟུང་ནས། དེ་དགེ་བ་ཡིན་ནམ་ཞེས་འདི་ཉིད་ཐར་པའི་ལམ་སྟེ། གཞན་མ་ཡིན་ནོ་ཞེས་དཀའ་ཐུབ་ཅན་དུ་གྱུར་ཏེ། དེ་ཚུན་ཆད་ཡ་མཚན་ཅན་དཀའ་ཐུབ་བྱེད་པ་བྱུང་ངོ་། །དགེ་སློང་དེ་ཚུར་ཞུགས་ཏེ་རྨ་མང་པོ་ཐམས་ཅད་ལ་རྣག་
གིས་ཡོག་སྟེ། རང་གི་ལུས་རྡུལ་གྱིས་གང་ཞིང་སྦྲང་མ་འདུ་ཞིང་དགེ་སློང་དེ་སྐྲ་འཇམ་པོས་གཡོགས་པ་མཐོང་ནས། མུར་འདུག་སྤྱོད་པ་དང་། ཕྱུགས་བདག་པ་རྣམས་དེ་ལྟར་བྱུང་ངོ་། །དགེ་སློང་དེ་བ་ལང་གི་ལྕི་བ་ཡར་ཀེ་
མའི་མེ་བུས་ཏེ་བསྲོ་བ་སྐྱེས་བུ་ཉོན་མོངས་པ་གཞན་ཞིག་གིས་མཐོང་ནས། བ་ལང་གི་ལྕི་བའི་རིལ་བུ་ཅན་ཐོག་མ་དེ་ནས་བྱུང་ངོ་། །དགེ་སློང་དེ་རྨ་ལ་སྡུག་བསྔལ་རེག་པར་ཤེས་ནས། དཔའ་བོ་ལྟར་འདུག་པ་སྐྱེས་བུ་ཉོན་མོངས་
པ་གཞན་ཞིག་གིས་སྔ་མ་བཞིན་དུ་མཐོང་སྟེ། ངུར་སྨྲིག་གྱོན་པ་ནི་ཐར་པར་མི་འགྱུར་རོ་སྙམ་ནས་ཅི་ལེགས་པར་འམ་སྟེ། མི་གཡོ་བའི་སར་འགྲོ་བ་ཐར་པ་ཡིན་སྙམ་དུ་བསམས་ནས། མི་གཡོ་བའི་མྱ་ངན་དུ་འགྲོ་བར་གྱུར་ཏོ། །
དེ་ལྟར་ཡ་མཚན་ཅན་དགུ་བཅུ་རྩ་དྲུག་གི་བར་དུ་གྱུར་པ་རྣམས་ཀྱང་སོ་སོ་ནས་དེར་ལྷགས་ཏེ། དགེ་སློང་དེ་ཅི་དང་ཅི་ལྟ་བ་མཐོང་ནས་ལོག་པའི་ལྟ་བས་གཞན་དང་གཞན་དུ་བརྟགས་སོ། །འདི་ལྟ་སྟེ་དཔེར་ན། ཕན་ཚུན་
དུ་རི་དགས་སུ་མཐོང་ནས། རི་དགས་གསད་སྙམ་དུ་བསམས་ནས། གཅིག་ལ་གཅིག་གསོད་པ་དེ་བཞིན་དུ་ཡ་མཚན་ཅན་དགུ་བཅུ་རྩ་དྲུག་ཀྱང་དེ་ལྟར་བྱུང་ངོ་། །དཔེར་ན་དབྱར་ཟླ་ར་བ་རི་དགས་སྨིག་རྒྱུ་བ་ལ་ཆུ་ཡིན་སྙམ་

57-1-221b

དུ་བསམས་ཏེ། འཆི་བར་འགྱུར་བ་དེ་བཞིན་དུ་དམ་པའི་ཆོས་ནུབ་པར་འགྱུར་བའི་དུས་ན་དགེ་སློང་གི་གཞི་ལས་གཞན་དུ་གྱུར་ཏེ། འཇམ་དཔལ་དེ་ལྟར་འཇིག་རྟེན་པའི་ཚུལ་ཁྲིམས་དང་། སྤྱོད་པ་དང་། བྱ་བའི་མཆོག་
ཐམས་ཅད་ཀྱང་སངས་རྒྱས་ཀྱིས་སྤྲུལ་པའོ། །དམ་པའི་ཆོས་ནུབ་པར་འགྱུར་བའི་དུས་ན་དེ་ལྟ་བུ་བྱུང་ན་ཆོས་ནུབ་པར་འགྱུར་རོ། །འཇམ་དཔལ་དེ་བཞིན་དུ་བདག་གི་དེ་ཁོ་ན་ནི་འདི་འདྲ་དེ་འདྲའོ་ཞེས་ལོག་པར་ལྟ་
བ་བཞིན་དུ་འདི་ལྟ་སྟེ། ཐར་པ་དང་བདག་དང་འཇིག་རྟེན་ལས་འདས་པའང་ལྡེམ་པོ་ངག་མི་ཤེས་པས་བདག་མེད་པ་སངས་རྒྱས་ཀྱི་ཚིག་གོ་ཞེས་མུར་འདུག་བྱུང་བ་ལྟར་རྣམ་པར་རྟོག་གོ། །རྗེས་སུ་དཔག་པས་
ཚུགས་པའི་འཇིག་རྟེན་པ་ཡང་གཏི་མུག་གི་ཆོས་ཀྱི་དབང་དུ་སོང་ངོ་། །འཇིག་རྟེན་ལས་འདས་པ་ལ་ཡང་ལྡེམ་པོ་ངག་ཏུ་བཤད་པ་མི་ཤེས་པས་ཤེས་པ་ཉམས་ཏེ། དེའི་ཕྱིར་ཕྱོགས་གཉིས་སྤངས་ཏེ། 
བདག་ཏུ་གཏོགས་པའི་ཆོས་ཀྱི་དེ་ཁོ་ན་ཉིད་དང་། དེ་བཞིན་གཤེགས་པ་དང་། དགེ་འདུན་གྱི་དེ་བཞིན་ཉིད་ནི་དེ་བཞིན་གཤེགས་པའི་ཐེག་པ་དབུ་མའི་ལམ་དུ་བསྟན་ཏོ། །དབུ་མའི་ལམ་ཞེས་བྱ་བ་ནི་ཐེག་
པ་ཆེན་པོའི་བླ་དགས་སོ། །སོར་མོའི་ཕྲེང་བས་སྨྲས་པ། དབུ་མའི་ལམ་མི་ཤེས་པས་སེམས་ཅན་རྣམས་དབུ་མའི་ལམ་གཞན་དུ་རྟོག་གོ། །བཅོམ་ལྡན་འདས་ཀྱིས་བཀའ་སྩལ་པ། སོར་མོའི་ཕྲེང་
བ་མདོ་སྡེ་འདི་བཤད་པ་ཐོས་ནས་སེམས་ཅན་མང་དུ་མདོ་སྡེ་འདི་ལ་ཡིད་ཆེས་པར་འགྱུར་རོ། །མ་འོངས་པའི་དུས་ན་སེམས་ཅན་མང་དུ་མདོ་སྡེ་འདི་ལ་སྨོད་པར་འགྱུར་རོ། །སོར་མོའི་ཕྲེང་བས་གསོལ་པ། 
བཅོམ་ལྡན་འདས་ཕྱོགས་གང་དུ་མདོ་སྡེ་ལ་སྨོད་པ་ཇི་སྙེད་འབྱུང་བ་དང་། འདོད་ཆེན་པ་ཇི་སྙེད་འབྱུང་བ་བཤད་དུ་གསོལ། ཕྱོགས་གང་དུ་སེམས་ཅན་ཐམས་ཅད་ལ་ཕན་པར་འགྱུར་བ་སྟོན་པ་ཡང་དེ་བཞིན་

57-1-222a

གཤེགས་པས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། མ་འོངས་པའི་དུས་ན་ཡུལ་གྱི་དབུས་འདིར་མདོ་སྡེ་ལ་སྨོད་པའི་སེམས་ཅན་བྱེ་བ་བརྒྱ་སྟོང་ཕྲག་དགུ་བཅུ་རྩ་བརྒྱད་
འབྱུང་ངོ་། །འདོད་ཆེན་པ་བྱེ་བ་ཕྲག་བདུན་འབྱུང་ངོ་། །ཤར་ཕྱོགས་སུ་མདོ་སྡེ་ལ་སྨོད་པ་སྟོང་ཕྲག་དགུ་བཅུ་རྩ་བརྒྱད་འབྱུང་ངོ་། །འདོད་ཆེན་པ་བྱེ་བ་ཕྲག་དྲུག་བཅུ་འབྱུང་ངོ་། །ནུབ་ཕྱོགས་སུ་མདོ་སྡེ་ལ་སྨོད་པ་བྱེ་བ་བརྒྱ་
ཕྲག་དགུ་བཅུ་རྩ་དགུ་འབྱུང་ངོ་། །འདོད་ཆེན་པ་བྱེ་བ་ཕྲག་ལྔ་འབྱུང་ངོ་། །ལྷོ་ཕྱོགས་སུ་མདོ་སྡེ་ལ་སྨོད་པ་བྱེ་བ་ཕྲག་དགུ་བཅུ་རྩ་བརྒྱད་འབྱུང་ངོ་། །འདོད་ཆེན་པ་བྱེ་བ་ཕྲག་བཞི་བཅུ་འབྱུང་ངོ་། །ཁ་ཆེ་ཡུལ་དུ་ཡང་ངའི་བསྟན་
པ་གླེགས་བམ་ལྷག་མའི་མཛོད་དང་གཏེར་མི་སྟོར་ཏོ། །བྷ་རུ་ཀ་ཙར་ཡང་ངའི་གླེགས་བམ་ལྷག་མའི་མཛོད་དུ་འགྱུར་རོ། །རི་བིན་དྷ་ལ་ཡང་དེ་བཞིན་ནོ། །ཁ་ཆེའི་ཡུལ་གྱི་དགེ་སློང་རྣམས་བསྒྲུབ་པའི་དོན་མི་ཤེས་ནས་
ཐེག་པ་ཆེན་པོ་ཐམས་ཅད་ལ་སྨོད་པ་འབྱུང་སྟེ། ང་ལ་སྐུར་པ་དེ་ཇི་ལྟ་བྱ་ཞེས་ང་ཡང་ངོ་ཚ་བ་སྐྱེའོ། །ལྷོ་ཕྱོགས་པའི་རྒྱུད་དུ་ཐེག་པ་ཆེན་པོ་སྟོན་པར་འགྱུར་ཏེ། ནན་ཏན་སྙིང་པོར་བྱེད་པ་དེ་བཞིན་གཤེགས་པའི་
སྤྱད་པ་སྤྱོད་པ་དངོས་པོ་ཆེན་པོ་བརྒྱད་དང་བྲལ་བ། དེ་བཞིན་གཤེགས་པ་རྟག་པ་དང་། ཐེར་ཟུག་དང་། ཞི་བ་དང་། དེ་བཞིན་གཤེགས་པའི་སྙིང་པོ་བརྟན་པའོ་ཞེས་བསྟན་པར་འགྱུར་རོ། །ངའི་ཉན་
ཐོས་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་ནན་ཏན་སྙིང་པོར་བྱེད་པར་འགྱུར་རོ། །ངའི་བསྟན་པ་ཁུར་དུ་ཐོགས་པར་འགྱུར་རོ། །འཇམ་དཔལ་གྱིས་གསོལ་པ། ཀྱེ་མ་
བཅོམ་ལྡན་འདས་ལྷོ་ཕྱོགས་སུ་བཅོམ་ལྡན་འདས་ཀྱི་བསྟན་པ་གནས་པར་འགྱུར་རོ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་ཏེ། ལྷོ་ཕྱོགས་པའི་རྒྱུད་དུ་ངའི་བསྟན་པ་ལོ་དུ་མ་ཞིག་

57-1-222b

གནས་པར་འགྱུར་རོ། །ཁྱོད་ལྟ་བུ་ཤིན་དུ་དཀའ་བ་བྱེད་པའི་བྱང་ཆུབ་སེམས་དཔའ་རྣམས་རང་གི་སྲོག་བཏང་ནས། དེ་བཞིན་གཤེགས་པ་རྟག་པ་དང་དེ་བཞིན་གཤེགས་པ་ཐེར་ཟུག་དང་། དེ་བཞིན་གཤེགས་པ་གཡུང་དྲུང་
ངོ་ཞེས་སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་དེ་བཞིན་གཤེགས་པའི་སྙིང་པོ་སྟོན་པར་འགྱུར་ཏེ། དཔེར་ན་དེ་བཞིན་གཤེགས་པ་ཐམས་ཅད་འཇིག་རྟེན་གྱི་ཁམས་འདིར་རྒྱལ་པོའི་སྲིད་ཆེན་པོ་མི་བཞེད་ཅིང་ཁུར་
ཆེན་པོ་ཐོགས་ཏེ། སྟོང་གསུམ་པ་རྣམས་བསྒྲལ་ལོ་ཞེས་བསྐལ་པ་བྱེ་བ་མང་པོར་བསྒྲལ་བ་དེ་བཞིན་དུ་ངའི་ཉན་ཐོས་ཐམས་ཅད་ཀྱང་བསྐལ་པ་བྱེ་བ་མང་པོར་ངའི་དམ་པའི་ཆོས་ནུབ་པར་འགྱུར་བའི་དུས་ན། ནམ་དམ་པའི་
ཆོས་ལོ་བརྒྱད་བཅུའི་བར་དུ་གནས་པར་འགྱུར་བའི་ཚེ། དམ་པའི་ཆོས་ཀྱི་ཁུར་ཁྱེར་བར་མི་འདོད་དོ། །ཡང་འཇམ་དཔལ་ཁྱོད་ལྟ་བུའི་དམ་པའི་ཆོས་ལོ་བརྒྱད་བཅུའི་བར་དུ་གནས་པར་འགྱུར་བའི་ཚེ། དམ་པའི་ཆོས་ཀྱི་ཁུར་
ཆེན་པོ་ཁྱེར་ཏེ། བདག་གིས་དམ་པའི་ཆོས་ཕྲག་ལ་བསྐུར་རོ་སྙམ་ནས། འཛམ་བུའི་གླིང་དང་། གླིང་ཕྲན་ཐམས་ཅད་ཀྱི་སེམས་ཅན་རྣམས་ལ་དེ་བཞིན་གཤེགས་པའི་སྙིང་པོ་རྟག་པ་ཐེར་ཟུག་ཞི་བ། གཡུང་དྲུང་ཡིན་ནོ་
ཞེས་རང་གི་སྲོག་ཀྱང་བཏང་སྟེ་རབ་དུ་བསྟན་པར་བྱའོ། །སེམས་ཅན་རྣམས་ཡིད་ཆེས་ཀྱང་རུང་། མི་ཆེས་ཀྱང་རུང་། ངའི་ལུས་བསད་དམ། དུམ་བུར་བྱས་ཀྱང་རུང་། གདོད་བདག་གི་ལུས་རྟག་པའི་སྐུར་འགྱུར་ཏེ། 
ཁུར་ཁྱེར་བ་རབ་དུ་དཀའ་བ་བྱེད་པའི་བྱང་ཆུབ་སེམས་དཔའ་རྣམས་ལྷོ་ཕྱོགས་ཀྱི་རྒྱུད་ནས་འབྱུང་ངོ་། །ངའི་ཉན་ཐོས་དེ་ལྟ་བུ་དང་། ཁྱོད་ལ་སོགས་པ་སེམས་ཅན་བྱེ་བ་མང་པོ་ཡོད་དེ་དེའི་ཕྱིར་ལྷོ་ཕྱོགས་ཀྱི་རྒྱུད་རབ་ཏུ་བསྔགས་སོ། །
ངའི་ཆོས་ཐ་མ་དེར་སྟོན་པར་འགྱུར་ཏེ། བྱང་ཆུབ་སེམས་དཔའ་དེ་དག་གི་མཐུ་དང་། གཟི་བརྗིད་ཀྱིས་འཛམ་བུའི་གླིང་གི་སྐྱེ་བོ་མ་ལུས་པར་འཛེམ་པ་དང་། འཇིགས་པ་དང་། ང་རྒྱལ་གྱི་རྒྱུས་ནན་ཏན་དུ་བྱེད་པར་འགྱུར་རོ། །འདི་ལྟ་སྟེ་

57-1-223a

དཔེར་ན། རྒྱལ་པོ་དག་རྒྱལ་པོ་གཞན་གྱི་ཁྲིམས་བྱས་པ་ཐོས་ནས། བདག་ཉིད་ཀྱང་སྐྱེ་དགུ་སྐྱོང་བ་དེ་བཞིན་དུ་ཁ་ཆེའི་ཡུལ་གྱི་འཁོར་དང་། ཡུལ་བྷ་རུ་ཀ་ཙ་བ་རྣམས་ཀྱང་ངོ་ཚ་བ་དང་། ང་རྒྱལ་བསྐྱེད་ནས་ཐེག་པ་ཆེན་པོས་
འཇིགས་ཤིང་སྐྲག་པས་གསང་ཏེ་སྟོན་པར་འགྱུར་གྱི། དེ་དག་དེ་བཞིན་གཤེགས་པའི་སྙིང་པོ་སྟོན་པར་མི་འགྱུར་རོ། །འཇམ་དཔལ་འདི་ལྟ་སྟེ་དཔེར་ན། སོག་བུར་གྱི་ཕུང་པོའི་ནང་དུ་མེ་བཅུག་ན། སོག་མའི་ཕུང་པོའི་དབུས་
ཚིག་པའི་ལྷག་མ་ལུས་ཏེ། མཐའ་འཁོར་མི་ཚིག་པ་དེ་བཞིན་དུ་འཇམ་དཔལ་དང་པོར་སྐྱེས་པའི་ས་ན་ནན་ཏན་ལྷུར་བྱེད་པ་ཞིག་སྟེ། ཚིག་པ་ལས་ལྷོ་ཕྱོགས་ཀྱི་རྒྱུད་དུ་ལྷག་མ་ལུས་ཏེ། མཐའ་འཁོར་ན་གནས་པའི་ས་དེར་བྱང་
ཆུབ་སེམས་དཔའ་སྐྱེས་ནས་དམ་པའི་ཆོས་འབྱིན་པར་འགྱུར་བ་དེར་རྫོགས་པའི་སངས་རྒྱས་སྣང་བར་གྲགས་པ་ཡིན་ནོ། །དེ་ནས་ལྷའི་དབང་པོ་བརྒྱ་བྱིན་སུམ་བཅུ་རྩ་གསུམ་པའི་གཡོག་མང་པོ་དང་བཅས་ཏེ། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཞབས་ལ་མགོ་བོས་ཕྱག་འཚལ་ནས། ལྷའི་མཆོད་པ་ཆེན་པོ་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་
གིས་མདོ་སྡེ་འདི་བསྲུང་ཞིང་རྗེས་སུ་གཏད་པར་བགྱིའོ། །སེམས་ཅན་ཐམས་ཅད་ལ་ཐུགས་བརྩེ་བའི་སླད་དུ། དེ་བཞིན་གཤེགས་པས་མདོ་སྡེ་འདིའི་མིང་བསྟན་དུ་གསོལ། བཅོམ་ལྡན་འདས་ཀྱིས་
བཀའ་སྩལ་པ། ཀཽ་ཤི་ཀ་མདོ་སྡེ་འདིའི་མིང་སོར་མོའི་ཕྲེང་བ་ལ་ཕན་པ་ཞེས་བྱ་བར་ཟུང་ཤིག །ཀཽ་ཤི་ཀ་མདོ་སྡེ་འདི་ནི་འཇིག་རྟེན་ན་ཤིན་དུ་རྙེད་པར་དཀའ་སྟེ། ཨུ་དུམ་འབའ་རའི་མེ་ཏོག་བཞིན་ནོ། །དེ་ནས་
དབང་པོའི་བུ་ཐུ་བོ་མངོན་དུ་ཁྲོ་ཞེས་བྱ་བ་སྡུག་པ་དགའ་བ་ཡིད་དུ་འོང་བ་དེས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བདག་གི་ཕ་ནམ་

57-1-223b

ལྷ་མ་ཡིན་དང་འཐབ་པའི་ཚེ། ཁ་ལོ་སྒྱུར་བ་བསམ་འཛིན་ཞེས་བགྱི་བ་ལ། ལྷ་རྣམས་འཕེལ་བ་དང་། ལྷ་མ་ཡིན་ཕམ་པར་འགྱུར་བ་དེ་ལྟར་ཤིང་རྟ་དྲོངས་ཤིག་ཅེས་བགྱིས་པ་དང་། ལྷ་གཞན་དུ་མ་དགོངས་ཤིག །
བདག་ནི་སྔར་འགུམ་སྟེ། ཁྱོད་ནི་སླད་ཀྱིས་སོ། །གྲུབ་ཀྱང་རུང་། མ་གྲུབ་ཀྱང་རུང་། བདག་གི་སྲོག་ཀྱང་བོར། གཞན་དང་མཛའ་བའང་སྤངས་ནས་གོ་ཆ་ཆེན་པོ་བགོས་པ་དེ་བཞིན་དུ། བཅོམ་ལྡན་འདས་བདག་
ཀྱང་མ་མཆིས་པའི་དུས་ན། དམ་པའི་ཆོས་ལོ་བརྒྱད་བཅུའི་བར་དུ་གནས་པར་འགྱུར་བ་དེའི་ཚེ། བདག་ཀྱང་བྱང་ཆུབ་སེམས་དཔའ་གང་དེ་བཞིན་གཤེགས་པ་རྟག་པ་ཉིད་དང་། ཐེར་ཟུག་ཉིད་དང་། གཡུང་དྲུང་ཉིད་དུ་དེ་བཞིན་གཤེགས་པའི་
སྙིང་པོ་སྟོན་པ་ལས་དེ་སླད་ཀྱིས་འདི་སྙམ་དུ་སེམས་སྐྱེས་ཏེ། དེ་བཞིན་གཤེགས་པའི་སྙིང་པོ་བསྟན་པར་བྱ་བའི་བསྟན་པའི་སེམས་ཅན་མང་པོར་མི་འདུག་གིས། ད་ནི་མི་བསྟན་ཏོ་སྙམ་སྟེ། དེའི་ཐབས་བྱས་པ་ཐོས་ནས། བདག་
ཀྱང་སྐྱེས་བུ་བསམ་འཛིན་ཅེས་བགྱི་བ་དེ་འདྲ་བར་ཆོས་ཀྱི་ཤིང་རྟ་སྦྱར་ཏེ། ཅི་ནས་ཀྱང་དེ་བཞིན་གཤེགས་པའི་སྙིང་པོ་རྟག་པ་ཉིད་དང་། ཐེར་ཟུག་པ་ཉིད་དང་། གཡུང་དྲུང་ཉིད་དང་། ཞི་བ་ཉིད་དུ་འཇིག་རྟེན་དུ་རྒྱས་པར་འགྱུར་
བ་དེ་ལྟར་བདག་གི་སྲོག་ཀྱང་བཏང་སྟེ། བདག་གི་དགེ་སློང་གི་ཚུལ་གྱིས་བསྟན་ཅིང་བསྐལ་པ་ཐམས་ཅད་དུ་རྣམ་པར་དག་པར་བགྱིས་པར་གྱུར་ཅིག །དེ་ནས་དབང་པོའི་བུ་མང་པོ་དང་། བུད་མེད་དང་། 
བུ་མོ་དང་། ལྷ་གཞན་དག་གིས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་བདག་ཀྱང་སྲོག་ཀྱང་བཏང་སྟེ། དགེ་སློང་གི་ཚུལ་དང་། དགེ་སློང་མའི་ཚུལ་དང་། དགེ་བསྙེན་གྱི་ཚུལ་དང་། 
དགེ་བསྙེན་མའི་ཚུལ་གྱིས་སྐྱེས་བུ་དམ་པ་དེའི་གཡོག་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་དམ་པའི་ཆོས་འདོད་པ་ཁྱེད་ཐམས་ཅད་དེ་བཞིན་གྱིས་ཤིག །

57-1-224a

ངས་ཀྱང་དམ་པའི་ཆོས་འདོད་པ་དེ་དག་བསྲུང་བར་བྱའོ། །དེ་དག་གི་ཐད་དུ་ང་རྟག་ཏུ་འཆག་ཅིང་གནས་སོ། །ཁྱེད་རྣམས་ཅི་ནས་ཀྱང་ཁ་ལོ་སྒྱུར་བ་དང་། ངའི་བྱས་པ་ཤེས་ཤིང་བརྟན་པར་གྱིས་ལ། དེ་ནས་
ཁྱེད་ཐམས་ཅད་ཀྱིས་རྟག་པའི་གནས་ནི་དེ་བཞིན་གཤེགས་པའི་གནས་ཡིན་ནོ་ཞེས་སྟོན་ཅིག །དེ་ནས་ཡུལ་མཛོད་འཛིན་གྱི་རྒྱལ་པོ་གསལ་རྒྱལ་གྱིས་བློན་པོ་དང་། དམག་དཔོན་ལ་བསྒོ་བ། དཔུང་གི་ཚོགས་ཡན་ལག་བཞི་དང་ལྷན་ཅིག་
དོང་ལ། མིའི་གཟུགས་སུ་སྲིན་པོ་མི་ཉིས་སྟོང་དུ་གཅིག་གིས་མ་ཚང་བ་བསད་དེ། སོར་མོའི་ཕྲེང་བ་བྱང་ཁྲག་གིས་བསྐུས་ཤིང་སྟོབས་དང་རྩལ་ཆེན་པོ་རབ་ཏུ་འཁྱམ་ཞིང་གྲོང་ཁྱེར་འདི་ནས་གནས་པའི་དགོངས་བཞི་བཅུ་ཙམ་ན་འདུག་ཅིང་། 
བདག་གི་མ་ཡང་དེང་བསད་དེ་ཉིས་སྟོང་དུ་ཚང་བར་བྱའོ་སྙམ་ནས། དེ་རབ་ཏུ་དགའོ་ཞེས་གྲག་གིས་མ་རུངས་པ་སྡིག་ཅན་གཏུམ་པོ་འདི་བསད་ན། གདོད་བདག་ཅག་གྲོང་དང་། གྲོང་ཁྱེར་དང་། རི་ཁྲོད་ཀྱི་གྲོང་དང་། ལུང་པའི་གནས་ན་དམག་མི་
ཐམས་ཅད་ཀྱང་རང་གི་ཁྱིམ་ནས་འབྱུང་ངོ་། །དེ་བས་ན་བྱ་ཁྲས་བྱ་རོག་དང་། བྱ་བྲན་སྐྲག་པ་བཞིན་དུ་བདག་ཅག་གི་སྐྱེ་བོ་ཐམས་ཅད་དང་། ཤིང་ཐུན་དང་། རྩྭ་རྔ་བ་དང་། ཡུལ་གཞན་གྱི་མི་དང་། སྐྱེ་བོ་འདྲོན་པའི་རྣམས་ཀྱང་དེའི་
མིང་ཙམ་གྱིས་མི་རྒྱུ་ཞིང་མི་སྨྲ་བར་གྱུར་ཅིང་འདུག་གིས་མྱུར་དུ་སྦྲོན་པ་ཁྱེར་ཏེ། ཡུལ་མཛོད་འཛིན་གྱི་རྒྱལ་པོ་གསལ་རྒྱལ་ཡན་ལག་བཞི་པའི་དཔུང་གི་ཚོགས་དང་ལྷན་ཅིག་ཏུ་ཆས་ཏེ། སྲིན་པོ་མ་རུངས་པ་གཏུམ་པོ་
སོར་མོའི་ཕྲེང་བ་བསད་པར་བྱིན་གྱིས་བཀྲབས་པ་ཐམས་ཅད་ཀྱང་རལ་གྲི་དང་། གཞུ་དང་། རྡོ་རྗེ་རྩེ་གཅིག་པ་དང་། མདུང་ཐུང་དང་། ཕུབ་ལག་ན་ཐོགས་ཏེ། མཚོན་ཆ་དང་། ལག་ཆ་ཐམས་ཅད་རྣོན་པོར་བྱོས་ཏེ། 
ལེགས་པར་ཆོས་ལ་གཤེགས་ཤིག །གང་གིས་སྲིན་པོ་མ་རུངས་པ་སོར་མོའི་ཕྲེང་བ་བསད་དམ། མཚོན་གྱིས་བཏབ་བམ། བལ་གླང་ཞོན་པ་དག་སྨས་སམ། གང་དག་སྨས་ཀྱང་གཡུལ་ལས་ཕྱིར་མི་ལྡོག་ན་བལ་

57-1-224b

གླང་འདོད་ན། ཡང་བལ་གླང་གི་མཆོག་སྦྱིན་ནོ། །རྟ་འདོད་ན་ཡང་རྟ་བཞོན་པ་སྦྱིན་ནོ། །གསེར་འདོད་ན་ཡང་གསེར་དང་གསེར་གྱི་དོང་ཙེ་དང་ནམ་ས་ཡ་སྦྱིན་ནོ། །དངུལ་འདོད་ན་ཡང་དངུལ་ས་ཡ་སྦྱིན་ནོ། །རྡོ་རྗེ་དང་། ནོར་བུ་
དང་། དུང་དང་། མན་ཤེལ་དང་། བྱི་རུ་དང་། རིན་པོ་ཆེ་སྣ་བདུན་ས་ཡ་སྙེད་སྦྱིན་ནོ། །གོས་འདོད་པ་ལ་ཡང་ལྷའི་གོས་དང་། དར་དང་། རས་ཕྲན་ཀོ་ཏམ་པ་དང་། ཡུལ་བང་གི་རས་དང་། ཡུལ་མ་ཏུ་ར་དང་། བ་རུ་ཀ་ཙ་དང་། བ་རིང་དྲ་དང་། ལྷོ་
ཕྱོགས་པ་དང་། སང་ཀ་ཤི་ཀ་དང་། ཀུ་རུ་པན་ཙ་ལའི་རས་བམ་རྣམ་པ་མང་པོ་སྦྱིན་ནོ། །ཞིང་དོར་དང་། གྲོང་དང་། མ་ཧེ་དང་། བུད་མེད་འདོད་པའང་ཐམས་ཅད་ཀྱི་མཆོག་སྦྱིན་ནོ་ཞེས་བསྒྲགས་སོ། །དེ་ནས་སོར་མོའི་ཕྲེང་བའི་མིང་
ཙམ་གྱིས་ཞམ་རིང་བ་ལ་གཏོགས་སོ་ཞེས་སྐྲག་སྟེ། གཅིག་ཀྱང་ཕྱིར་མ་བྱུང་ངོ་། །བཙུན་མོའི་འཁོར་དང་། ཞམ་རིང་པ་ཡང་ཁྱི་དང་འདྲ་བར་གཞན་གྱི་དབང་དུ་གྱུར་པས་འཚོ་བ་འཆི་བ་ལ་ཐུག་པར་གྱུར་ཏེ། རང་རང་གི་ལག་
ཆ་ཐོགས་ནས། བལ་གླང་པ་དང་། རྟ་པ་དང་། དཔུང་བུ་ཆུང་བ་རྣམས་རབ་ཏུ་བརྒྱན་ཏེ། རྒྱལ་པོ་ག་ལ་བ་དེར་འོངས་སོ། །དེ་ནས་བཙུན་མོ་ཡང་ཀྱི་ཧུད་འབོད་ཅིང་སྡིག་ཅན་དེའི་གན་དུ་མ་བཞུད་ཅིག །སྐྱེ་བོ་ཐམས་ཅད་དང་
གཞན་གྱི་ཡུལ་འཁོར་རྣམས་ནི་མ་མཆིས་ཀྱང་མི་མདོའི། ལྷ་ལ་ཆུང་ཟད་ནོངས་པ་བྱུང་ང་རེ། དེ་ནས་མོ་འདེབས་པ་དང་། ལོ་རྩི་བ་དང་། འདུན་ན་འདོན་དང་། རིག་པ་དང་། ལྟས་འདེབས་པ་རྣམས་ལ་སོར་མོའི་ཕྲེང་བ་དེ་རིང་
སོད་དམ་མི་སོད་དྲིས་ན། མོ་འདེབས་པ་དང་། ལོ་རྩི་བ་རྣམས་ཀྱིས་དེ་རིང་སོར་མོའི་ཕྲེང་བ་ཐལ་བར་འགྱུར་རོ་ཞེས་སྨྲས་སོ། །དེ་ནས་རྒྱལ་པོ་དེ་དག་གི་ཚིག་ལ་ཡིད་མ་ཆེས་ནས། བཅོམ་ལྡན་འདས་ག་ལ་བ་དེར་ཡན་ལག་
བཞིའི་དཔུང་གི་ཚོགས་ཀྱི་དམག་དང་ལྷན་ཅིག་ཏུ་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། རྒྱལ་པོ་འཇིགས་ཤིང་སྐྲག་པས་གདོང་དང་དཔྲལ་བ་རྡུལ་ནས་ཕྱོགས་གཅིག་ཏུ་འདུག་གོ། །

57-1-225a

དེ་ནས་བཅོམ་ལྡན་འདས་ཐམས་ཅད་མཁྱེན་པའི་ཡེ་ཤེས་ཐམས་ཅད་དང་ལྡན་པས། ཡུལ་མཛོད་འཛིན་གྱི་རྒྱལ་པོ་གསལ་རྒྱལ་ལ་འདི་སྐད་ཅེས་བཀའ་སྩལ་པ། རྒྱལ་པོ་ཆེན་པོ་ཁྱེད་ཀྱི་གདོང་དང་
དཔྲལ་བ་རབ་ཏུ་རྡུལ་ན་ཅི། རྒྱལ་པོས་གསོལ་པ། ལག་པ་འདི་རྐང་པ་འདི་ལགས་ན། བཅོམ་ལྡན་འདས་སོར་མོའི་ཕྲེང་བ་ཞེས་བགྱི་བ་སྲིན་པོ་མི་སྟོང་དགུ་བརྒྱ་བཀུམ་ནས། སོར་མོའི་ཕྲེང་བ་བརྒྱུས་ཏེ་ཕྲེང་བ་ཐོགས་
ནས། བདག་དང་འཐབ་ཅེས་སྡོད་ཅིང་མཆིས་སོ། །བདག་ལ་འདུ་བ་ཐམས་ཅད་ཀྱི་སྒོ་ཡང་བཅད་དེ་ཤིང་ཨ་ཤོ་ཀའི་དྲུང་ན་གཅིག་པུ་མཆིས་པ་བྱ་རོག་དང་། ཁྲ་འཁོར་བ་དེའི་མིང་ཙམ་གྱིས་སྐྲག་སྟེ། བདག་གི་གསོལ་པ་དེ་
ལགས་སོ། །བཅོམ་ལྡན་འདས་ཀྱིས་མཛོད་འཛིན་གྱི་རྒྱལ་པོ་གསལ་རྒྱལ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ཅི་ཐབ་མོ་བྱེད་པར་འདོད་དམ། རྒྱལ་པོས་གསོལ་པ། བཅོམ་ལྡན་འདས་ཀྱི་ཞལ་སྔ་ནས་ཚད་མ་
ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ངའང་འགྲོ་འམ། རྒྱལ་པོས་གསོལ་པ། བཅོམ་ལྡན་འདས་གཤེགས་སོ་ཞེས་བཀའ་སྩལ་པ་ནི་སེམས་ཅན་མང་པོ་ལ་སྐལ་བ་མཆིས་པ་ལྟ་སྟེ། ད་ནི་སོར་
མོའི་ཕྲེང་བ་དེ་ཡང་གུམ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་གལ་ཏེ་སོར་མོའི་ཕྲེང་བ་འདིར་འོངས་ན་ཇི་ལྟར་བྱ། དེ་ནས་ཡན་ལག་བཞི་པའི་དཔུང་གི་ཚོགས་སྙིང་རབ་ཏུ་དངངས་སྐྲག་ནས་རྒྱལ་པོ་
པོས་དེ་བཞིན་གཤེགས་པའི་ཆེ་བའི་བདག་ཉིད་ཤེས་པས་སྙིང་དགའ་སྟེ། མི་འཇིགས་ནས་རྒྱལ་པོས་གསོལ་པ། སོར་མོའི་ཕྲེང་བ་གལ་ཏེ་འདིར་མཆིས་ན། གཅིག་པུ་ལུས་པར་འགྱུར་ལགས་གྲང་། དེ་ནས་བཅོམ་ལྡན་
འདས་ཀྱིས་མཛོད་འཛིན་གྱི་རྒྱལ་པོ་གསལ་རྒྱལ་ལ་བཀའ་སྩལ་པ། རྒྱལ་པོ་ཆེན་པོ་སོར་མོའི་ཕྲེང་བ་འདིའི་དཔལ་ལ་ལྟོས། དེ་ནས་མཛོད་འཛིན་གྱི་རྒྱལ་པོ་གསལ་རྒྱལ་གྱིས་སོར་མོའི་ཕྲེང་བ་ལ་རིང་ཞིག་ཏུ་མིག་མི་

57-1-225b

འཛུམས་པར་བལྟས་ན། སོར་མོའི་ཕྲེང་བ་མིག་དམར་ལ་བདག་ཉིད་ཆེ་བའི་གཟུགས་མཐོང་ནས། མཛོད་འཛིན་གྱི་རྒྱལ་པོ་གསལ་རྒྱལ་ཤིན་དུ་འཇིགས་ཤིང་སྐྲག་སྟེ་བ་སྤུ་ཡང་ལངས་ནས། ཡི་དགས་འདུལ་བ་ལྟར་
གོ་ཆ་རྣམས་ཞིག་ཅིང་མཚོན་ཐམས་ཅད་ཤུབས་ནས་བྱུང་སྟེ། མདའ་སྟེའུ་ཀ་ལྟར་ཐམས་ཅད་དུ་ལྟུང་བ་ཡང་བྱི་ལ་ལྟར་དེ་བཞིན་གཤེགས་པའི་སེང་གེའི་ཁྲིའི་དྲུང་དུ་མཆིས་སོ། །དེ་བཞིན་གཤེགས་པ་སྒྲ་གཅན་
འཛིན་བཞིན་དུ་སྙོམས་པར་གཟིགས་པ་ལ་སྐྱབས་སུ་མཆིའོ། །དེ་ནས་ཡན་ལག་བཞི་པའི་དཔུང་གི་ཚོགས་ཐམས་ཅད་སྒྲ་དེ་ཐོས་ནས། གླང་པོ་དང་། རྟ་དང་། བལ་གླང་དང་། རྐང་ཐང་པའི་དམག་དེ་རྣམས་སྡེ་གྱེས་པ་
བཞིན་དུ་ཉམས་ཏེ། ལ་ལ་ནི་བརྒྱལ། ལ་ལ་ནི་འགྱེལ། ལ་ལ་ནི་འཆི་ལ་ཐུག་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་མཛོད་འཛིན་གྱི་རྒྱལ་པོ་གསལ་རྒྱལ་ལ་བཀའ་སྩལ་པ། རྒྱལ་པོ་ཆེན་པོ་ཚིགས་སུ་བཅད་
པ་འདི་ཉོན་ཅིག་དང་། གནོད་པ་མེད་པར་འགྱུར་གྱིས་མ་སྐྲག་ཅིག །གང་ཞིག་སྔ་ན་བག་མེད་པ། །བག་ཡོད་པར་ནི་ཕྱིས་གྱུར་ན། །སྤྲིན་ལས་བྱུང་བའི་ཟླ་བ་བཞིན། །འཇིག་རྟེན་འདི་ན་སྣང་བར་བྱེད། །དེ་ནས་
བཅོམ་ལྡན་འདས་ཀྱིས་སྐྱེ་བོ་ཐམས་ཅད་དབུགས་དབྱུང་བའི་ཕྱིར་འཇིགས་པ་མེད་པའི་རྣམ་པ་ཞེས་བྱ་བའི་འོད་ཟེར་བཏང་སྟེ་སེམས་ཅན་གང་འོད་ཟེར་དེས་རེག་པའི་སེམས་ཅན་དེ་དག་ཐམས་ཅད་བདེ་བར་གྱུར་ཏེ། 
མཛོད་འཛིན་གྱི་རྒྱལ་པོ་གསལ་རྒྱལ་གྱི་བཙུན་མོའི་འཁོར་དང་། བུ་དང་། གྲོང་གི་སྐྱེ་བོ་སེམས་ཅན་ཐམས་ཅད་དེ་བཞིན་གཤེགས་པས་སོར་མོའི་ཕྲེང་བ་བཏུལ་ལོ་སྙམ་སྟེ་ཐམས་ཅད་དེར་ལྷགས་སོ། །དེ་ནས་
རྒྱལ་པོ་གསལ་རྒྱལ་གྱིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་མ་བཅོམ་ལྡན་འདས་ནི་མི་འདུལ་ཞིང་ཁ་ལོ་སྒྱུར་བ་ལྷ་དང་མིར་བཅས་པ་རྣམས་སྟོན་པས་སྡིག་པའི་ཆོས་ཅན་འདི་ལྟ་བུ་ཡང་

57-1-226a

དམ་པའི་ཆོས་ལ་བཞག་པས་ན། ཀྱེ་མ་བཅོམ་ལྡན་འདས་ནི་འཇིག་རྟེན་ཐམས་ཅད་ལ་ཕན་པར་མཛད་པའོ། །བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་བརྟན་
པས་སྔར་མེད་པ་ལྟ་བུར་བསྟན་ལ། ཕྱིས་བདག་གི་ཆེ་བ་ཉིད་ཀྱང་སྟོན་པས་དེ་འཇིག་རྟེན་ན་སྤྲིན་ལས་གྲོལ་བ་ཟླ་བ་ལྟ་བུར་མཛེས་པར་གྱུར་ཏེ། སེམས་ཅན་བྱེ་བ་མང་པོ་བསྒྲལ་ནས། དེ་བཞིན་གཤེགས་པའི་ཆེ་བ་ཉིད་ཀྱང་
སྟོན་ཏོ། །རྒྱལ་པོ་ཆེན་པོ་སོར་མོའི་ཕྲེང་བ་ནི་སྡིག་ཅན་མ་ཡིན་ཏེ། ཐབས་འཆང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱའོ། །རྒྱལ་པོ་ཆེན་པོས་གསོལ་པ། མཁན་པོའི་མཆིས་བྲང་དང་ལྷན་ཅིག་ཏུ་
ལས་ངན་པ་སྤྱོད་ཅིང་མཁན་པོའི་དམོད་པའི་ཆོས་ཀྱི་འདྲེར་གྱུར་ན་ཅིའི་སླད་དུ་སྡིག་པར་མི་འགྱུར། བཅོམ་ལྡན་འདས་ཀྱིས་བཀའ་སྩལ་པ། སོར་མོའི་ཕྲེང་བ་མཁན་པོའི་ཆུང་མ་དང་ལྷན་ཅིག་ཏུ་ལས་ངན་པ་སྤྱོད་པ་
མ་ཡིན་གྱི། མཁན་པོའི་ཆུང་མས་གཟུགས་མཐོང་ནས་སེམས་གྱུར་ཏེ། སྡིག་པ་རབ་ཏུ་བྱེད་པ་ལྟར་མཁན་པོའི་ཆོས་ཀྱིས་རྩེ་བར་ཐམས་ཅད་རྟོག་པར་འགྱུར་རོ། །རྒྱལ་པོ་ཆེན་པོ་དེའི་ཕྱིར་བྱང་ཆུབ་སེམས་དཔའ་ནི་
འདི་ལྟ་སྟེ་དཔེར་ན། གླང་པོ་ཆེ་བརྡེག་པ་ནི་བོང་བུས་མི་བཟོད་དོ། །དེ་བཞིན་དུ་རྒྱལ་པོ་ཆེན་པོ་དེ་བཞིན་གཤེགས་པ་མི་མཆོག་གླང་པོ་ཆེའི་དགོངས་ཏེ། གསུངས་པའི་གསང་བའི་སོས་ཕོག་པ་འང་ཉན་ཐོས་དང་། 
རང་སངས་རྒྱས་རྣམས་ཀྱིས་མི་བཟོད་དོ། །དེ་ལྟར་ན་དེ་བཞིན་གཤེགས་པས་དགོངས་ཏེ་གསུངས་པའི་གསང་བས་ཕོག་པ་འང་དེ་བཞིན་གཤེགས་པ་ཉིད་ཀྱིས་བཟོད་དོ། །རྒྱལ་པོ་ཆེན་པོ་སངས་རྒྱས་ཀྱི་ཞིང་འདི་ནས་ལྷོ་ཕྱོགས་
ལོགས་སུ་གང་གའི་ཀླུང་དྲུག་བཅུ་རྩ་གཉིས་ཀྱི་བྱེ་མ་སྙེད་ཀྱི་སངས་རྒྱས་ཀྱི་ཞིང་འདས་པ་ན། འཇིག་རྟེན་གྱི་ཁམས་རིན་པོ་ཆེ་ཐམས་ཅད་ཀྱིས་བརྒྱན་པ་ཞེས་བྱ་བའི་འཇིག་རྟེན་གྱི་ཁམས་དེ་ན། དེ་བཞིན་གཤེགས་པ་དགྲ་བཅོམ་

57-1-226b

པ་ཡང་དག་པར་རྫོགས་པའི་སངས་རྒྱས་འཇིག་རྟེན་ཐམས་ཅད་མཐོང་ན་དགའ་བ་མངོན་པར་འཕགས་པ་བརྩོན་པ་ཆེན་པོ་ཞེས་བྱ་བ་ད་ལྟར་བཞུགས་པ་འཚོ་ཞིང་གཞེས་ཏེ། དེ་ན་ཉན་ཐོས་དང་རང་སངས་རྒྱས་ཐམས་ཅད་ཀྱང་
མེད། ཐེག་པ་གཅིག་ལས་ཐེག་པ་གཞན་གྱི་མིང་ཡང་མེད། རྒ་བ་དང་། ན་བ་དང་། སྡུག་བསྔལ་ཡང་མེད། ཡིད་མི་བདེ་བ་ཡང་མེད། རབ་ཏུ་བདེ་བ་ཐམས་ཅད་དང་ལྡན་ཏེ། སེམས་ཅན་དེ་དག་ཚེ་དཔག་ཏུ་མེད། སེམས་ཅན་དེ་དག་
ཐམས་ཅད་གཟི་བརྗིད་དང་། ཁ་དོག་ཚད་མེད་དེ། འགྲོ་བ་དེ་དག་གི་དཔེ་དང་རྒྱུ་དང་། བྱེད་པ་མེད་པ་དང་། འཇིག་རྟེན་གྱི་ཁམས་རིན་པོ་ཆེ་ཐམས་ཅད་ཀྱིས་བརྒྱན་པ་ལྟ་བུ་དཔེ་མེད་དེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་འཇིག་རྟེན་ཐམས་ཅད་མཐོང་ན་དགའ་བ་མངོན་པར་འཕགས་པ་བརྩོན་པ་ཆེན་པོ་དེ་ལ་རྒྱལ་པོ་ཆེན་པོ་ཐལ་མོ་སྦྱོར་ལ་རྗེས་སུ་ཡི་རང་བར་གྱིས་ཤིག །དེ་བཞིན་གཤེགས་པ་དེ་ནི་སོར་མོའི་ཕྲེང་བ་འདི་
ཉིད་ཡིན་ཏེ། དེ་ལྟར་ན་སངས་རྒྱས་ཀྱི་ཆེ་བ་དེ་འདྲ་སྟེ། སངས་རྒྱས་ཀྱི་ཡུལ་ནི་བསམ་གྱིས་མི་ཁྱབ་པོ། །དེ་ནས་ལྷ་དང་མི་དང་། ལྷ་མ་ཡིན་དུ་བཅས་པ་རྣམས་དང་། ཉན་ཐོས་དང་། བྱང་ཆུབ་སེམས་དཔའ་རྣམས་དང་། མཛོད་
འཛིན་གྱི་རྒྱལ་པོ་གསལ་རྒྱལ་དང་། ཡན་ལག་བཞི་པའི་དཔུང་གི་ཚོགས་དང་བཅས་པས་མོ་འདེབས་པ་དང་། ལོ་རྩི་བ་རྣམས་ལ། ཀྱེ་མ་བརྫུན་སྨྲ་བ་ཁྱེད་ངའི་དྲུང་ན་མ་གནས་ཤིག་ཅེས་བརྒྱད་ཅིང་སྨད་ནས་བསྐྲད་དོ། །དེ་ནས་
ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱི་ཁམས་དང་། ཉན་ཐོས་དང་། རང་སངས་རྒྱས་དང་། མཛོད་འཛིན་གྱི་རྒྱལ་པོ་གསལ་རྒྱལ་དང་། གྲོང་དང་གྲོང་ཁྱེར་དང་། ཚོང་འདུས་དང་། ལུང་པའི་མི་
རྣམས་དང་། རི་ཁྲོད་པ་དང་། མཉན་དུ་ཡོད་པའི་ཡུལ་ན་གནས་པའི་སེམས་ཅན་ཐམས་ཅད་དེ་བཞིན་གཤེགས་པའི་མཐུས་ལྷགས་ཏེ། སོར་མོའི་ཕྲེང་བའི་རྐང་པ་ལ་མགོ་བོས་ཕྱག་འཚལ་ནས། 

57-1-227a

འགྲིན་གཅིག་ཏུ་ཚིགས་སུ་བཅད་པ་འདི་དག་གསོལ་ཏོ། །མཐའ་ཡས་སྐུ་མངའ་ཁྱོད་ལ་ཕྱག་འཚལ་ལོ། །ཐབས་ཀྱི་སྐུ་མངའ་ཁྱོད་ལ་ཕྱག་འཚལ་ལོ། །སོར་ཕྲེང་ཁྱོད་ཀྱི་ཞབས་ལ་མགོས་གཏུགས་ནས། །ཁྱོད་ཀྱི་འཇམ་པའི་
ཞབས་ལ་བཟོད་པར་གསོལ། །དེ་བཞིན་གཤེགས་པ་སོར་ཕྲེང་མཚན་འཛིན་པ། །བྲམ་ཟེའི་གཟུགས་ཀྱིས་བདག་ཅག་དོན་ཕྱིར་གཤེགས། །སངས་རྒྱས་སྐུ་མདོག་དཔལ་འབར་དེང་འདིར་གཤེགས། །དཔལ་ལྡན་གཟི་བརྗིད་མཐུ་མངའ་
བཟོད་པར་གསོལ། །ཚིག་གིས་མངོན་དུ་གསུང་བ་མཐའ་ཡས་སྐུ། །ཁྱོད་ནི་ཡང་དང་ཡང་བྱིང་མང་པོ་ཡི། །ཡང་དག་སངས་རྒྱས་སྐྱབས་བྱེད་སྐྱབས་སུ་གྱུར། །གཉེན་མེད་རྣམས་ཀྱི་གཉེན་དུ་གྱུར་པ་ཁྱོད། །སངས་རྒྱས་འཇིག་རྟེན་
འདས་པ་གཉིས་མཛེས་ཏེ། །འདི་ན་ཆོས་སྤྱོད་ཤིན་དུ་ངོ་མཚར་རྨད། །མེ་ལས་པད་མོ་སྐྱེ་བ་ངོ་མཚར་བཞིན། །འཇིག་རྟེན་སངས་རྒྱས་གཉིས་སྟོན་མཆོག་དེ་འདྲ། །དེ་ནས་བཅོམ་ལྡན་འདས་ཀྱིས་མཛོད་འཛིན་གྱི་རྒྱལ་པོ་གསལ་
རྒྱལ་ལ་བཀའ་སྩལ་པ། ལྟོས་རྒྱལ་པོ་ཆེན་པོ་སངས་རྒྱས་ཀྱི་ཞིང་འདི་ནས། བྱང་ཕྱོགས་ལོགས་སུ་གང་གཱའི་ཀླུང་བཞི་བཅུ་རྩ་གཉིས་ཀྱི་བྱེ་མ་སྙེད་ཀྱི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་རྟག་པར་རབ་
ཏུ་དགའ་བ་སྡུག་ཅིང་མོས་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མོས་པ་རབ་ཏུ་དགའ་བའི་སྙིང་པོ་ནོར་བུ་རིན་པོ་ཆེ་བརྩེགས་པའི་རྒྱལ་པོ་ད་ལྟར་བཞུགས་ཏེ། འཚོ་
ཞིང་གཞེས་པ་དེ་ན་ཉན་ཐོས་དང་། རང་སངས་རྒྱས་ཐམས་ཅད་མེད། ཐེག་པ་གཅིག་ལས་ཐེག་པ་གཞན་གྱི་མིང་ཡང་མེད། རྒ་བ་དང་། ན་བ་དང་། སྡུག་བསྔལ་ཡང་མེད། བདེ་བ་ཐམས་ཅད་དང་རབ་ཏུ་ལྡན་པར་གྱུར་ཏེ། 
སེམས་ཅན་ཚེ་དཔག་ཏུ་མེད། གཟི་བརྗིད་དང་། ཁ་དོག་དཔག་ཏུ་མེད། འཇིག་རྟེན་ན་དཔེ་དང་། རྒྱུ་དང་བྱེད་པ་མེད་དེ། རྟག་ཏུ་དགའ་ཞིང་མོས་པ་དང་། དཔེ་མེད་པ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་

57-1-227b

པར་རྫོགས་པའི་སངས་རྒྱས་མོས་པ་རབ་ཏུ་དགའ་བའི་སྙིང་པོ་རིན་པོ་ཆེ་བརྩེགས་པའི་རྒྱལ་པོ་ད་ལྟར་བཞུགས་ཏེ། འཚོ་ཞིང་གཞེས་པ་དེ་ལ་རྒྱལ་པོ་ཆེན་པོ་ཐལ་མོ་སྦྱོར་ཏེ་རྗེས་སུ་ཡི་རང་བར་བྱོས་ཤིག །
དེ་བཞིན་གཤེགས་པ་དེ་གཞན་མ་ཡིན་གྱི། འཇམ་དཔལ་གཞོན་ནུར་གྱུར་པ་འདི་ཉིད་ཡིན་ནོ། །འཇམ་དཔལ་གཞོན་ནུར་གྱུར་པ་དང་། སོར་མོའི་ཕྲེང་བ་གཉིས་ཀྱི་མིང་གང་གིས་ཐོས་སམ། དེ་ལ་རྟག་ཏུ་ཕྱག་འཚལ་ན། 
སེམས་ཅན་དེ་དག་གི་ཁྱིམ་ཉིད་དུ་དགའ་བ་ཅན་གྱི་འཇིག་རྟེན་མཐོང་སྟེ། ངན་འགྲོ་རྣམ་པ་བཞིའི་སྒོ་བཅད་པར་འགྱུར་རོ། །དེ་གཉིས་ཀྱི་མིང་ཐོས་ནས་ཕྱི་རོལ་པ་རྣམས་དང་། ཕས་ཕམ་པ་དང་། མཚམས་མེད་པར་གྱུར་
པས་འཕྱ་བ་འམ། སྟིང་བ་འམ། འདྲན་ཏོར་རམ། གཞན་གྱིས་བསླབས་སམ། རྙེད་པ་དང་། བཀུར་སྟི་དང་། ཚིགས་བཅད་ཀྱི་ཕྱིར་ཡང་རུང་སྟེ། དེ་དག་གིས་ངན་འགྲོ་བཞིའི་སྒོ་བཅད་པར་འགྱུར་རོ། །རིགས་ཀྱི་བུ་འམ། 
རིགས་ཀྱི་བུ་མོ་གང་གིས་འདི་གཉིས་ཀྱི་མིང་གིས་བསྲུང་བར་བྱས་ན་དགོན་པ་ཐམས་ཅད་དང་། འཇིགས་པའི་དུས་ཐམས་ཅད་དུའང་བསྲུང་བར་འགྱུར་རོ། །ཕྱིས་འཇིགས་པ་ཐམས་ཅད་ཀྱང་བསྲུང་བར་འགྱུར། འཇིགས་
པ་བྱུང་བ་ཐམས་ཅད་ཀྱང་ཞི་བར་འགྱུར་རོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། ཤ་ཟས་ཀྱང་མི་ཚུགས་སོ། །ཡང་བཅོམ་ལྡན་འདས་ཀྱིས་མཛོད་འཛིན་གྱི་རྒྱལ་པོ་གསལ་
རྒྱལ་ལ་བཀའ་སྩལ་པ། སངས་རྒྱས་ཀྱི་ཚིག་ནི་ཆེ་བའི་བདག་ཉིད་དོ། །བྱང་ཆུབ་སེམས་དཔའི་སྤྱོད་པའི་ཆེ་བའི་བདག་ཉིད་ནི་དེ་ལྟའོ། །སོར་མོའི་ཕྲེང་བ་དང་། འཇམ་དཔལ་གཞོན་ནུར་གྱུར་པའི་ཆེ་བའི་བདག་ཉིད་གླང་
པོ་ཆེ་འདི་གཉིས་ལ་རྗེས་སུ་ཡི་རང་བར་གྱིས་ལ། བྱང་ཆུབ་སེམས་དཔའི་སྤྱོད་པ་ཡང་སྐྱེད་ཅིག །སོར་མོའི་ཕྲེང་བའི་མ་ཡང་མ་རྗེད་པར་གསོས་ཤིག །ངས་སོར་མོའི་ཕྲེང་བའི་ལག་ནས་དེའི་མ་རྒན་མོ་ཐར་བར་བྱས་

57-1-228a

ཏེ་སོར་མོའི་ཕྲེང་བ་ཁྱོད་ཀྱིས་མ་མ་བསད་ཅིག །བསད་པས་མཐོ་རིས་སུ་མི་འགྲོའོ་ཞེས་བྱས་པ་དང་། རལ་གྲི་ཐོགས་ཏེ་འོངས་ནས་སྐད་ཅིག་དེ་ཉིད་ལ་དེའི་བར་དུ་འདུག་པ་ནི་ཆོས་ལ་གཞུག་པའི་ཐབས་སོ། །དེ་ནས་སོར་མོའི་ཕྲེང་
བའི་མ་ཏ་ལ་བདུན་ཙམ་གྱི་ནམ་མཁའ་ལ་འདུག་ནས་ཚིགས་སུ་བཅད་པ་འདི་ཞེས་སྨྲས་སོ། །དེ་བཞིན་གཤེགས་ཀྱི་སྒྱུ་མ་སྤྲུལ་པ་ནི། །སེམས་ཅན་མང་པོ་དག་གིས་མི་ཤེས་ཏེ། །སངས་རྒྱས་སྒྱུ་མའི་རྒྱལ་པོ་སྐུ་ཆེ་ཞིང་། །
དེ་བཞིན་གཤེགས་པ་ཐབས་ཀྱི་སྐུ་མངའོ། །དེ་འདི་སྐད་ཅེས་སྨྲས་ནས། དེ་ཉིད་དུ་མི་སྣང་བར་གྱུར་ཏོ། །དེ་ནས་མཛོད་འཛིན་གྱི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་ཅི་སྒྱུ་མ་
ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་མ་འདི་ནི་སྤྲུལ་པ་ཡིན་ནོ། །སྤྲུལ་པའི་མས་ཇི་ལྟར་སྨྲས་པ་བཞིན་ཏེ། བྱང་ཆུབ་སེམས་དཔའི་སྤྱོད་པ་སྒྱུ་མ་ཡང་དེ་བཞིན་ནོ། །དེ་ནས་སོར་མོའི་ཕྲེང་བའི་མཁན་
པོ་ནོར་བུ་བཟང་པོ་ཞེས་བྱ་བ་ཏ་ལ་བདུན་ཙམ་གྱི་ནམ་མཁའ་ལ་འདུག་ནས་ཚིག་འདི་ཞེས་སྨྲས་སོ། །སེང་གེ་དང་ཝ་འདྲེ་ཡུན་རིང་ཞིག་ཏུ་མཛའ་བོར་བྱས་ཀྱང་། དེས་སེང་གེའི་ང་རོའི་སྒྲ་འཛིན་པར་མི་ནུས་ཏེ། ཝ་འདྲེ་ཡང་ཐོས་པ་ཙམ་གྱིས་
མཆིའོ། །ཡང་ཅི་ཝ་འདྲེ་དེ་དོམ་གྱི་སྐད་དུ་འབྱིན་ན། སེང་གེའི་རྒྱལ་པོ་ཆེན་པོ་སྒྲ་སྐད་འབྱིན་པ་ཡིན་ནམ། སེང་གེ་ཡང་ཝ་དང་དོམ་གྱི་སྒྲ་སྐད་དུའང་ང་རོ་མི་འབྱིན་གྱི། སེང་གེའི་སྒྲ་ཡང་སྒྲོགས་སོ། །དེ་བཞིན་དུ་ཝ་འདྲེ་ལྟ་བུ་བདག་གིས་བྱང་
ཆུབ་སེམས་དཔའ་སེང་གེ་ལྟ་བུའི་མཁན་པོ་བྱ་སྟེ། ཡུན་རིང་མོ་ཞིག་ཏུ་ལྷན་ཅིག་འཁོད་ཀྱང་བྱང་ཆུབ་སེམས་དཔའི་སྒྲ་སྐད་འཛིན་ལྟ་ག་ལ་ནུས་ཏེ། གལ་ཏེ་འདི་ཐབས་མ་ཡིན་ན་དེའི་རྩལ་གྱིས་འཆི་བར་འགྱུར་ཏེ། ཡི་དགས་ལྟ་བུ་བདག་གི་གླེན་པའི་
ཆོས་ལ་སྤྱོད་པ་དང་། ཉན་དུ་གཞུག་པ་ལྟ་ཅི་སྨོས། བྱང་ཆུབ་སེམས་དཔའ་ནི་གླེན་པའི་ཆོས་མི་སྤྱོད་པ་སྟེ། སྤྱོད་པ་ཡང་ཐམས་ཅད་ལ་བུ་གཅིག་པ་ལྟ་བུའི་བྱམས་པར་སྤྱོད་པའི་སངས་རྒྱས་ཀྱིས་སྤྲུལ་པ་སྒྱུ་མ་མང་པོ་ནི་

57-1-228b

སེམས་ཅན་བྱེ་བ་དང་། བྲམ་ཟེའི་མཁན་པོས་མི་ཤེས་ཏེ། སངས་རྒྱས་ཉིད་ཀྱི་སྒྱུ་མ་མཁྱེན་ཏེ། དེ་བཞིན་གཤེགས་པ་སངས་རྒྱས་ནི་སྒྱུ་མའི་རྒྱལ་པོའོ། །མཁན་པོའི་ཆུང་མ་དགའ་བྱེད་མས་སྨྲས་པ། ཀྱེ་མ་སེམས་ཅན་འདི་
བྲམ་ཟེའི་བུ་མོ་འཇོ་མའི་དཀུ་མཐོང་ཡང་སངས་རྒྱས་ཀྱི་ཆེ་བ་ཡིན་པར་མི་ཤེས་སོ། །ཇི་ལྟར་ཙན་ཙ་སྒྱུ་མ་ཡིན་པ་དེ་བཞིན་དུ་བདག་ཀྱང་སངས་རྒྱས་ཀྱིས་སྒྱུ་མ་སྤྲུལ་པའོ། །དེ་བས་ན་མཛོད་འཛིན་གྱི་རྒྱལ་པོ་གསལ་རྒྱལ་ལ་བདག་གིས་
བསྙད་དོ། །གདོལ་པས་ཁྱོད་ལ་བསྙེན་པར་མི་ནུས་ན། རྒྱལ་པོ་སེམས་ཅན་མང་པོ་དང་། འགྲོ་བའི་དཔལ་དང་། བྱིན་གྱིས་བརྒྱལ་བར་འགྱུར་ན། མདུན་དུ་འདུག་པ་ལྟ་ཅི་སྨོས། དེ་ལྟར་མིས་མིའི་དྲུང་དུ་བསྟན་པར་མི་ནུས་ན། 
ལྷ་དང་མི་རྣམས་ཀྱིས་བཅོམ་ལྡན་འདས་ལ་བསྟན་པར་བྱ་བ་དང་། དེ་བཞིན་གཤེགས་པའི་སྒྱུར་བར་ལྟ་ག་ལ་ནུས་ཏེ། དེ་བཞིན་གཤེགས་པ་ལ་རིམ་གྲོ་བྱེད་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། མི་འམ་ཅི་དང་། ལྟོ་
འཕྱེ་ཆེན་པོ་དང་། ཤ་ཟ་དང་། ལྷ་མ་ཡིན་ཚད་མེད་པ་དང་། ནམ་མཁའ་ལྡིང་གིས་དེ་ལ་གནོད་པར་བྱེད་དོ། །གལ་ཏེ་འདི་ལྟ་བུའི་སེམས་ཅན་འབྱུང་ན། བཅོམ་ལྡན་འདས་ཀྱང་སྡིག་བྱེད་པ་རྣམ་པ་མང་པོ་སྟོན་ཏེ། མ་འོངས་པའི་
སེམས་ཅན་འདི་ལྟ་བུའི་སྡིག་མ་རུངས་པ་བྱེད་པ་འབྱུང་བ་དག་ལ་ཡང་དེ་བཞིན་གཤེགས་པ་ནི་སངས་རྒྱས་ཀྱི་སྒྱུ་མ་ཆེན་པོའི་ཐབས་ཀྱི་སྐུ་སྟོན་ཏོ་ཞེས་ཟེར་ནས་མི་སྣང་བར་གྱུར་ཏོ། །དེ་ནས་ཡང་རྒྱལ་པོ་ཤིན་དུ་ངོ་མཚར་
དུ་གྱུར་ཏེ། བཅོམ་ལྡན་འདས་ལ་གསོལ་པ། བཅོམ་ལྡན་འདས་ཅི་སྒྱུ་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་མཁན་པོ་དང་། མཁན་པོའི་ཆུང་མ་དང་། དེའི་མ་སྒྱུ་མ་གསུམ་
གྱིས་སྨྲས་པ་བཞིན་ཏེ། ངའི་སྒྱུ་མ་ནི་བསམ་གྱིས་མི་ཁྱབ་པས་རྣམ་པ་དེ་གསུམ་དུ་སྤྲུལ་པ་ཡིན་ཏེ། སེམས་ཅན་བྱེ་བ་མང་པོ་བསྒྲལ་བའི་ཕྱིར་སོར་མོའི་ཕྲེང་བ་དེ་ལྟར་བྱོན་པ་ཡིན་ནོ། །རྒྱལ་པོས་གསོལ་པ་

57-1-229a

བཅོམ་ལྡན་འདས་བདག་གིས་དགུང་བདུན་ནས་སྦྱིན་པ་ཆེན་པོ་སྩལ་ན། དེ་བཞིན་གཤེགས་པ་སོར་མོའི་ཕྲེང་བ་ལྷོ་ཕྱོགས་ལོགས་ཀྱི་སྦྱིན་གནས་སུ་གྱུར་ཅིག །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་
ཆེན་པོ་དེ་བཞིན་དུ་གྱུར་ཅིག །དེ་ནས་ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་གྱིས་མགྲིན་གཅིག་ཏུ་ཚིགས་སུ་བཅད་པ་འདི་དག་སྨྲས་སོ། །སྒྱུ་མའི་རྒྱལ་པོ་ཁྱོད་ལ་ཕྱག་འཚལ་ལོ། །དེ་བཞིན་གཤེགས་པ་
དཔའ་ཆེན་ཐབས་ཀྱི་སྐུ། །ཐབས་ཀྱི་མཚན་ཉིད་རབ་ཏུ་ཕུན་སུམ་ཚོགས། །ཐབས་མཆོག་དམ་པའི་ཆོས་རྣམས་རབ་ཏུ་སྟོན། །ཐབས་ཀྱི་དབྱིངས་རྣམས་སུ་ཡང་འཇོག་པར་མཛད། །ཐབས་ཀྱིས་སྤྲུལ་པ་དག་ནི་ཡོངས་
སུ་སྟོན། །དེ་བཞིན་གཤེགས་པའི་སྐུ་ཡང་མཐའ་ཡས་ཏེ། །བློ་གྲོས་མཐའ་ཡས་གྲགས་པའང་མཐའ་ཡས་སོ། །དེ་བཞིན་གཤེགས་པའི་གཟི་བརྗིད་མཐའ་ཡས་ཏེ། །བདེ་གཤེགས་མཐའ་ཡས་མཐའ་ཡས་སྟོབ་ཆེན་སྟོན། །གསང་བ་མཐའ་ལས་མཐའ་ཡས་དགོངས་
དག་སྟོན། །འཇིག་རྟེན་རབ་ཏུ་སྣང་མཛད་མཐའ་ཡས་སོ། །དེ་བཞིན་གཤེགས་པའི་འོད་ཟེར་མཐའ་ཡས་པ། །ཡོན་ཏན་མཐའ་མེད་གྲངས་ལས་ཤིན་དུ་འདས། །དེ་བཞིན་གཤེགས་ནི་མཚུངས་མེད་དཔག་ཏུ་མེད། །ཆགས་མེད་
ཡེ་ཤེས་ནམ་མཁའ་ལྟ་བུར་སྟོན། །དེ་བཞིན་གཤེགས་པའི་སྐུ་ནི་ནམ་མཁའ་བཞིན། །འཇམ་དཔལ་གཞོན་ནུར་གྱུར་ཕན་ཞི་བར་བྱེད། །སོར་ཕྲེང་སླད་དུ་བདེ་གཤེགས་གཤེགས་པ་ནི། །གཤེགས་དང་མ་གཤེགས་ཤེས་
ཀྱང་བརྗོད་མི་ནུས། །བདེ་གཤེགས་སྒྲ་གཅན་ཟིན་ལྟར་སྙོམས་པར་གཟིགས། །དེ་སྐད་ཅེས་གསོལ་པ་དང་། བཅོམ་ལྡན་འདས་དགྱེས་སོ། །ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་དང་། ཉན་ཐོས་
དེ་དག་དང་། བྱང་ཆུབ་སེམས་དཔའ་དེ་དག་དང་། མཛོད་འཛིན་གྱི་རྒྱལ་པོ་གསལ་རྒྱལ་གྱིས་དེ་དག་ཐམས་ཅད་ཀྱང་སོར་མོའི་ཕྲེང་བའི་བྱང་ཆུབ་སེམས་དཔའི་སྤྱོད་པ་དང་། དེའི་སངས་རྒྱས་ཀྱི་ཞིང་དུ་སྐྱེ་བ་དང་། འཇམ་དཔལ་

57-1-229b

གཞོན་ནུར་གྱུར་པའི་བྱང་ཆུབ་སེམས་དཔའི་སྤྱོད་པ་དང་། དེའི་སངས་རྒྱས་ཀྱི་ཞིང་དུ་སྐྱེ་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་སེམས་བསྐྱེད་དེ། ཡི་རངས་ནས། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཤིན་དུ་རྒྱས་པའི་ལུང་ཐེག་པ་ཆེན་པོའི་མདོ་ལས། མེ་ཏོག་ཨུ་དུམ་བ་ར་ལྟར་རབ་ཏུ་
རྙེད་དཀའ་བ། འཕགས་པ་སོར་མོའི་ཕྲེང་བ་ལ་ཕན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། རྒྱ་གར་གྱི་མཁན་པོ་ཤཱཀྱ་པྲ་བྷ་དང་། ཞུ་ཆེན་གྱི་ལོ་ཙྪ་བ་བན་དྷེ་དྷརྨ་ཏཱ་ཤཱི་ལ་དང་། རྒྱའི་ལོ་ཙྪ་བ་བན་དྷེ་ཏོང་ཨ་ཙ་
ལ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ། ། ༄༅། །རྒྱ་གར་སྐད་དུ། རཱ་ཛ་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ།  རྒྱལ་པོ་ལ་གདམས་པ་ཞེས་བྱ་བ་ཐེག་པ་ཆེན་པོའི་མདོ།  སངས་རྒྱས་
དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་གི་དགེ་
འདུན་ཆེན་པོ་དང་བྱང་ཆུབ་སེམས་དཔའི་དགེ་འདུན་རབ་ཏུ་མང་པོ་དང་ཐབས་གཅིག་ཏུ་བཞུགས་སོ། །དེའི་ཚེ་བཅོམ་ལྡན་འདས་ཀྱིས་འཁོར་རྣམས་ལ་བཀའ་སྩལ་པ། དེ་རིང་རྒྱལ་པོ་གཟུགས་ཅན་སྙིང་པོ་གཏུལ་བར་བྱ་
བའི་དུས་ལ་བབ་གྱིས་ཡུལ་མ་ག་དྷར་འགྲོ་བར་བྱའོ་ཞེས་གསུངས་ནས། འཁོར་དང་བཅས་པ་ངང་པའི་རྒྱལ་པོ་ལྟར་ནམ་མཁའ་ལ་ལྡིངས་ཏེ་གཤེགས་པ་བློན་པོ་ཟླ་བ་བཟང་པོས་མཐོང་ནས་རྒྱལ་པོ་ལ་སྨྲས་པ། ལྷ་ལགས་
སངས་རྒྱས་འཁོར་དང་བཅས་པ་འོ་སྐོལ་གྱི་ཡུལ་དུ་བྱོན་པས་གྲོང་ཁྱེར་བརྒྱན་པ་དང་བསྙེན་བཀུར་བྱ་བར་རིགས་སོ། །རྒྱལ་པོས་སྨྲས་པ། འཛམ་བུའི་གླིང་ན་ང་ལས་ཆེ་བ་མེད་པར་སུ་ལ་བསྙེན་བཀུར་བྱེད་ཅེས་སླར་

57-1-230a

ཉིད་དུ་དྲེགས་པར་གྱུར་ཏོ། །དེ་ནས་རྒྱལ་པོ་གཟུགས་ཅན་སྙིང་པོའི་ཕོ་བྲང་གི་སྒོར་གདན་བཤམས་པ་ལ་བཅོམ་ལྡན་འདས་འཁོར་དང་བཅས་པ་བཞུགས་སོ། །དེ་ལྟར་བཞུགས་པར་ཤེས་ནས་རྒྱལ་པོས་གྱད་
ཆེན་པོའི་འདེགས་པ་ཞེས་བྱ་བ་རྦད་དེ་རྡོ་ཤིན་དུ་ཆེ་བ་བཅོམ་ལྡན་འདས་ལ་འཕངས་སོ། །རྡོ་དེ་ནམ་མཁའ་ལ་ལྡིང་ཞིང་དེ་ལས་སྒྲ་འདི་སྐད་ཅེས་གྲག་གོ། །ཀྱེ་མ་འདུས་བྱས་རྟག་པ་མེད། །སྐྱེ་ཞིང་འགོག་པའི་ཆོས་ཅན་ཡིན། །
སྐྱེ་བ་ཡོད་ན་འཆི་བ་ཡོད། །འདུ་བ་ཡོད་ན་འབྲལ་བ་ཡོད། །བསགས་པ་ཡོད་ན་འཛད་པ་ཡོད། །ལང་ཚོའི་མདོག་ཀྱང་ནད་ཀྱིས་འཕྲོག །འཚོ་བའི་ཚེ་ཡང་འཆི་བས་འཕྲོག །ཆགས་པར་གྱུར་ན་སྡུག་བསྔལ་འཕེལ། །སྐྱོ་བར་
བྱས་ན་ཐར་བར་འགྱུར། །ཞེས་པ་དེ་རྒྱལ་པོ་གཟུགས་ཅན་སྙིང་པོས་ཐོས་པས་མོས་པར་གྱུར་ཏེ་ཐད་དུ་སོང་ནས་ཐལ་མོ་སྦྱར་ཏེ་འཁོད་པ་ལ་བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཆོས་ལ་མོས་པར་བྱ། 
ཁོང་དུ་ཆུད་པར་བྱ། བསྒོ་བར་བྱ་ཡིད་འབྱུང་བར་བྱའོ། །རྒྱལ་པོས་གསོལ་པ། བཅོམ་ལྡན་འདས་གང་ལ་སྐྱོ་བར་བགྱི། ཡིད་འབྱུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཁོར་བ་ལས་སྐྱོ་ཞིང་ཡིད་འབྱུང་བར་བྱའོ། །
རྒྱལ་པོས་གསོལ་པ། ཅིའི་ཕྱིར་འཁོར་བ་ལས་སྐྱོ་ཞིང་ཡིད་འབྱུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཁོར་བ་འདི་མི་རྟག་པ་དང་། སྡུག་བསྔལ་བའི་ཕྱིར་རོ། །རྒྱལ་པོས་གསོལ་པ། བཅོམ་ལྡན་འདས་
འཁོར་བ་འདི་ཇི་སྐད་མི་རྟག་པ་ལགས། བཅོམ་ལྡན་འདས་ཀྱིས་བཀའ་སྩལ་པ། སྣོད་ཀྱི་འཇིག་རྟེན་འདི་ཡང་མི་རྟག་ལ། བཅུད་ཀྱི་སེམས་ཅན་ཡང་མི་རྟག་གོ། །རྒྱལ་པོས་གསོལ་པ། སྣོད་ཀྱི་འཇིག་རྟེན་ཇི་ལྟར་མི་
རྟག་པ་ལགས། བཅོམ་ལྡན་འདས་ཀྱིས་བཀའ་སྩལ་པ། སྣོད་ཀྱི་འཇིག་རྟེན་རི་རབ་གླིང་ཁམས་ཀྱང་། །འཇིག་པའི་དུས་ཚེ་བསྐལ་པའི་མེ་བྱུང་ནས། །ཐལ་བའི་ལྷག་མ་ཙམ་ཡང་མ་ལུས་སོ། །ཆུ་དང་རླུང་གིས་འཇིག་

57-1-230b

པ་དེ་བཞིན་ནོ། །གཞན་ཡང་དབྱར་དྲོད་སྐྱེ་ལ་དགུན་གྲང་སྐམ། །ལོ་ལེགས་ལོ་ཉེས་ཐན་ཞོད་ངེས་པ་མེད། །ལོ་ཟླ་འདས་ཤིང་འཇིག་པའི་དུས་དང་ཉེ། །དེ་ལ་སོགས་ཏེ་མི་རྟག་མངོན་སུམ་ནི། །རྟག་པ་ཡིན་ན་ཅི་ཕྱིར་འགྱུར་
ཞིང་འགྲོ། །རྒྱལ་པོས་གསོལ་པ། བཅུད་ཀྱི་སེམས་ཅན་ཇི་ལྟར་མི་རྟག་པ་ལགས། བཅོམ་ལྡན་འདས་ཀྱིས་བཀའ་སྩལ་པ། བཅུད་ཀྱི་སེམས་ཅན་ཚེ་འདི་ཉིད་ལ་ཡང་། །ཉིན་ཞག་ལོ་ཟླ་རིམ་གྱིས་གཅོད་བྱེད་པས། །ཉིན་ཞག་
འདས་ཤིང་འཆི་དང་ཕར་ཕར་ཉེ། །མི་ཤིར་འདོད་ཀྱང་རང་ལ་རང་དབང་མེད། །སྐྱེ་རྒ་ན་འཆི་རང་ཐག་རི་མོ་འདྲ། །འཆི་བདག་བདུད་ནི་སོ་བྱ་ཉ་སྡོད་འདྲ། །འཆི་བའི་རྐྱེན་ནི་བསམ་གྱིས་མི་ཁྱབ་སྟེ། །འཆི་རྐྱེན་མ་སོང་དངོས་པོ་
གང་ཡང་མེད། །ལུས་འདི་ཟས་ཀྱིས་འཚོ་ཡང་བརྣངས་ནས་འཆི། །འཇིག་རྟེན་འདི་ན་ཆེ་ཆུང་ཕྱུག་དབུལ་ཀུན། །འཆི་བདག་དབང་དུ་མི་འགྱུར་གང་ཡང་མེད། །སྔ་མ་ཤི་བའི་མི་རྣམས་ཀུན་གྱིས་ཀྱང་། །རྟག་ཏུ་རེ་ནས་བུ་དང་
ནོར་བསགས་ཀྱང་། །བུ་ནོར་ཕྱིར་ལུས་བདག་ལ་ཕན་པ་མེད། །རང་གི་དགེ་སྡིག་གཉིས་དང་འགྲོགས་ཏེ་འཆི། །ད་ལྟར་རང་གི་གནས་པའི་རིང་འདི་ལ་འང་། །དགའ་བཤེས་གཉེན་འདུན་མཛའ་དང་མི་མཛའ་དང་། །ན་ཚོད་
འཐུན་དང་རྒན་གཞོན་ཇི་སྙེད་ཅིག །ཤི་བ་མཐོང་ཞིང་ཐོས་པ་མ་ཡིན་ནམ། །ས་སྟེང་གནས་པའི་སེམས་ཅན་འདི་ཀུན་ཡང་། །ལོ་བརྒྱ་ཚུན་ཆད་སྡོད་ཀྱང་མ་ལུས་འཆི། །དེ་བས་རང་རེའང་འཆི་བའི་ཆོས་ཅན་ཡིན། །
དེང་འཆི་སང་འཆི་སུས་ཀྱང་མི་ཤེས་ཏེ། །ཚོད་འཛིན་པ་ཡང་མི་འཇིགས་སྦྱིན་མེད་པས། །སང་ཕོད་དེང་སང་བདག་ཉིད་ཇི་ལྟར་འགྱུར། །འཆི་བའི་ཚེ་ན་ཕ་མ་བུ་ཚ་དང་། །ཕུ་ནུ་མཛའ་བཤེས་བྲན་ཁོལ་ནོར་
ཀུན་ཀྱང་། །བདག་ཉིད་འཆི་བའི་ཕྱི་ན་འོང་མེད་པས། །སྡུག་བསྔལ་སྐལ་ལེན་འགའ་ཡང་ཡོད་མ་ཡིན། །དེ་བས་སྐྱེས་ཀྱང་བདག་ཉིད་གཅིག་པུ་སྐྱེས། །ཐ་མ་འཆི་ཡང་བདག་ཉིད་གཅིག་པུ་འཆི། །

57-1-231a

སྐད་ཅིག་ཚེ་ལས་འཐུན་པ་ཉེ་གཞི་རྣམས། །འགྲོན་པོ་གནས་འཐུན་ཙམ་སྟེ་སོ་སོར་འགྲོ། །སྐད་ཅིག་ཙམ་ཡང་འབྲལ་བར་མི་ཕོད་པའི། །གཉེན་དང་ནོར་རྫས་ཡུལ་མཁར་ཀུན་བོར་ནས། །བདག་ཉིད་གཅིག་
པུ་འཇིགས་པའི་ལམ་དུ་འགྲོ། །ཇི་ཙམ་སྡིག་དང་བསྡོས་ནས་ནོར་བསགས་ཀྱང་། །སྡིག་པའི་རྣམ་སྨིན་རྨོངས་པ་བདག་ཉིད་འཁུར། །བསགས་པའི་ནོར་ནི་ཁོང་དག་བུ་ཚས་འཁྱེར། །དེ་ཕྱིར་བསགས་པའི་ནོར་གྱིས་ཅི་ཞིག་ཕན། །
བདག་ལ་ཤིན་དུ་ཕངས་པའི་ལུས་འདི་ཡང་། །ཤི་བའི་དུས་སུ་རྫ་ཞིག་བཞིན་དུ་འབོར། །ལྷན་ཅིག་སྐྱེས་པའི་ཤ་རུས་གཉིས་ཀྱང་འབྱེ། །དབང་མེད་བདག་ཉིད་གཅིག་པུ་འཁྱམས་ནས་ནི། །ལས་ཀྱི་དབང་གིས་གང་དུ་སྐྱེས་གྱུར་ན། །
དེ་བས་ལུས་ཀྱི་ཕྱིར་ནི་སྡིག་མི་བྱ། །ལུས་འདི་ས་གཏིང་འགྲོ་སྟེ་ཆོག་མི་ཤེས། །མི་གཙང་ལས་བྱུང་མི་གཙང་ཕུང་པོ་ཡིན། །ན་རྒ་འཆི་སོགས་སྡུག་བསྔལ་ཀུན་གྱི་གནས། །ཤི་ནས་ལུས་བོར་ས་ཡི་ཕྱོགས་ཙམ་བཙོག །
བྱ་དང་ཁྱི་སྤྱང་ལ་སོགས་རྣམས་ཀྱིས་ཟ། །བསྙེན་བཀུར་འབད་ཀྱང་འཆི་བདག་སྲིན་པོས་འཕྲོག །མཁས་པས་སྨོད་ཅིང་བླུན་པོ་ཆགས་པའི་གནས། །དེ་བས་མཁས་པ་ལུས་ལ་སུ་ཞིག་ཆགས། །ལུས་ཀྱི་ཕྱིར་ནི་ཡ་ངར་
འཇུག་མི་བྱ། །འདི་ལ་གླ་རྔན་གོས་ཟས་བྱིན་ནས་སུ། །ཡུན་གྱི་ཕན་ཕྱིར་བསོད་ནམས་སོག་ཏུ་གཞུག །བདག་གི་གྲོགས་ནི་དགེ་སྡིག་གཉིས་ལས་མེད། །དེ་ཡང་དགེ་བ་མཐོ་རིས་ཐར་པའི་རྒྱུ། །སྡིག་པ་ངན་སོང་སྡུག་བསྔལ་
འབྱུང་བའི་རྒྱུ། །མ་ཤི་བར་དུའང་ལུས་ནི་མི་རྟག་སྟེ། །བུ་ཆུང་བྱིས་པ་གཞོན་ནུ་ཉིད་དུ་འགྱུར། །དེ་ནས་དར་ལ་བབ་དང་དར་ཡོལ་དང་། །རྒས་པར་གྱུར་ཏེ་ལུས་འདི་རྟག་ན་ནི། །གནས་སྐབས་དེ་སྙེད་ཅིག་ནི་ཅིས་ཏེ་འགྱུར། །
ལོངས་སྤྱོད་བདེ་སྡུག་རྣམས་ཀྱང་མི་རྟག་སྟེ། །བཙན་ཕྱུག་འཛོམ་པ་སྡུག་ཕོངས་ཅན་དུ་འགྱུར། །སྡུག་ཕོངས་ཅན་ཡང་བཙན་ཕྱུག་འཛོམ་པར་འགྱུར། །ལང་ཚོ་ལོངས་སྤྱོད་ན་རྒ་འཆི་བས་འཇོམས། །འཇིག་རྟེན་ཆོས་འདི་

57-1-231b

ཐམས་ཅད་མི་རྟག་གོ། །རྒྱལ་པོ་གཟུགས་ཅན་སྙིང་པོས་གསོལ་པ། བཅོམ་ལྡན་འདས་འཁོར་བ་པ་འདིའི་སྡུག་བསྔལ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། འཁོར་བ་པ་ལ་ནམ་ཡང་བདེ་བ་མེད། །བྱས་པ་
ཐམས་ཅད་དོན་མེད་སྡུག་བསྔལ་རྒྱུ། །སྡུག་བསྔལ་གཙོ་བོ་སྐྱེ་རྒ་ན་འཆི་བཞི། །དམྱལ་བར་སྐྱེས་ན་སྡུག་བསྔལ་འདི་འདྲའོ། །དམྱལ་སྲུངས་དང་ནི་དམྱལ་བའི་མེ་མཐོང་ནས། །ཤིན་དུ་སྐྲག་དངངས་ཆོ་ངེས་ཆེར་འདེབས་ཤིང་། །
རང་ལ་རྔན་འགྲང་སྔོན་གྱི་སྡིག་པ་ལ། །ཤིན་དུ་འགྱོད་ཀྱང་ཕན་པ་ཅི་ཡང་མེད། །ལུས་འདི་ཤིན་དུ་ཆེ་ལ་གཞོན་ཤ་ཅན། །ཚོར་བ་ཆེ་ཞིང་དྲག་པོའི་ལུས་ཐོབ་ནས། །ཁ་ཅིག་རང་ལུས་མེ་ཡི་ཕུང་པོར་འབར། །ཁ་ཅིག་ལྕགས་
མཁར་ཁང་པ་སྦྲུམ་མར་རྡུང་། །འགྲེ་ལྡོག་བྱེད་ཅིང་ཕྱོགས་ནི་ཀུན་ནས་སྲེག །ཁ་ཅིག་ལྕགས་ལས་བྱས་པའི་སྣོད་ཆེན་དུ། །སྤྱི་ཚུགས་འབྲུ་ཉུངས་ཆུ་ཁོལ་ཐུག་བཞིན་འཚེད། །ཁ་ཅིག་སོག་ལེས་འདྲ་ཞིང་གཏུན་ལ་རྡུང་། །
ཁ་ཅིག་གནས་དང་ཁང་པར་སྲུང་ཞིང་སྲེག །མེ་མ་མུར་དང་ཐལ་ཚན་ཆུ་ལ་སོགས། །སྡུག་བསྔལ་མང་པོ་བསམ་གྱིས་མི་ཁྱབ་བོ། །མི་ཡི་ལོ་ནི་འབུམ་དང་བརྒྱད་ཁྲི་ལ། །དམྱལ་བ་ཁ་ཅིག་ན་ནི་ཉིན་ཞག་གཅིག །དེ་ལས་
སོགས་པ་བསྐལ་པའི་བར་དུ་གནས། །ཤི་བར་དགའ་ཡང་འཆིར་ནི་མི་བཏུབ་བོ། །ལས་མ་ཟད་པ་ཁ་ཅིག་འཇིག་ཆགས་ཚེ། །འཇིག་རྟེན་བརྒྱུད་ཅིང་འཇིག་ཆགས་མེད་པར་སྐྱེ། །ཡི་དགས་སྐྱེས་པ་བཀྲེས་དང་སྐོམ་པས་
གདུངས། །མགོ་བོ་རི་ཙམ་ཁ་ནི་ཁབ་མིག་ཙམ། །སྐེ་རྩ་རབ་ཕྲ་གསུས་པ་ཡུལ་ལྗོངས་ཙམ། །བཟའ་བཏུང་མཐོང་ཡང་གཞན་གྱིས་བསྲུངས་པ་དང་། །རྣག་ཁྲག་ངན་སྐྱུགས་ལ་སོགས་གཞན་དུ་མཐོང་། །ཁ་ཅིག་ཟོས་
ཀྱང་ཁྲོ་ཆུ་ཁོལ་མར་འགྲོ། །བྱོལ་སོང་སྐྱེས་ན་གཅིག་ལ་གཅིག་ཟ་དང་། །རང་ལ་དབང་མེད་བཀོལ་བཏགས་རྡེག་འཚོག་དང་། །གཞན་གྱིས་གསོད་སོགས་གཏི་མུག་རྨོངས་པས་སྡུག །མིར་སྐྱེས་ན་ཡང་མངལ་ན་

57-1-232a

གནས་པའི་ཚེ། །མ་ནི་འགྲངས་ཚེ་བྲག་བར་བཙིར་བ་འདྲ། །བཀྲེས་པའི་ཚེ་ན་སྤྱང་ལ་བཏང་བ་སྙམ། །དྲག་ཤུལ་བྱེད་ཚེ་གཏུན་ལ་རྡུང་བ་སྙམ། །བཙས་པའི་ཚེ་ན་ལྤགས་པ་བཤུས་ནས་ནི། །རྩིག་
པའི་ལོགས་ལ་དྲུད་པ་བས་ཀྱང་རྩུབ། །ཚ་འབྲུམ་བཀྲེས་སྐོམ་རྐང་ལག་ན་ནས་སྡུག །ཆེར་སྐྱེས་ན་ཡང་སོ་ནམ་བྲེལ་ཕོངས་དང་། །ཉེ་དུ་བྲལ་དང་དགྲས་བཅོམ་བུ་ལོན་དང་། །བཀྲེས་སྐོམ་ཚ་གྲང་དོན་ལ་སོགས་པས་
སྡུག །ཕོངས་པ་རྣམས་ནི་བཙལ་ཐབས་མེད་ནས་སྡུག །ཡོད་པ་རྣམས་ཀྱང་འཚོ་སྐྱོང་མེལ་ཚེས་སྡུག །ཞིང་རྨོ་ཚོང་བྱེད་འདུ་བྱེད་ལས་ཀྱི་སྡུག །དེ་ལ་སོགས་པའི་སྡུག་བསྔལ་བསམ་མི་ཁྱབ། །སྡུག་བསྔལ་
གཞི་ནི་ཕལ་ཆེར་ལྟོ་རྒྱབ་གཉིས། །འཇིག་རྟེན་འདི་ཡི་བདེ་བའི་ལོངས་སྤྱོད་ཀྱང་། །ཕལ་ཆེར་ཕྱི་མའི་ངན་སོང་སྡུག་བསྔལ་རྒྱུ། །ལྷ་མིན་སྐྱེས་ན་ང་རྒྱལ་ཕྲག་དོག་དང་། །ཁྲོ་གཏུམ་འཐབ་རྩོད་ལ་སོགས་དབང་གིས་སྡུག །
ལྷར་སྐྱེས་ཀྱང་ནི་འཆི་འཕོ་ལྟུང་བ་དང་། །འཆི་ལྟས་ལྔ་དང་འདུ་བྱེད་དབང་གིས་སྡུག །རྒས་པ་ཡང་ནི་འདི་ལྟར་སྡུག་བསྔལ་ཏེ། །མགོ་དཀར་གཉེར་འདུས་གཞན་གྱིས་མཐོང་མི་མོས། །ཁ་སྣ་ཆུ་འཛག་རྐང་ལག་ཀུན་ཀྱང་
འདར། །སེམས་ཀྱིས་དྲན་ཡང་ལུས་ལ་ཉམ་སྟོབས་མེད། །བུ་ཚ་ཀུན་ཀྱང་ཤི་ན་རུང་སྙམ་སེམས། །ཞལ་ཏ་བྱས་ཀྱང་མི་ཉན་དབང་ཡང་ཤོར། །ཁ་ཅིག་སྲིན་རྒན་ཤི་འཕྱིས་ཞེས་ཀྱང་ཟེར། །ཁ་ཅིག་བེར་དབྱུག་ཐོགས་
ནས་རྡུང་བར་བྱེད། །དེ་ལྟར་མཐོང་ཐོས་ཤིར་འདོད་ཤིར་མ་བཏུབ། །ན་བ་རྣམས་ནི་འདི་ལྟར་སྡུག་བསྔལ་ཏེ། །ལུས་ཀྱི་འབྱུང་ཆེན་བཞི་ནི་མ་སྙོམས་པས། །རླུང་མཁྲིས་བད་ཀན་འདུས་པས་ལུས་གདུངས་ཏེ། །
ལོངས་སྤྱོད་མཐོང་ཡང་འདི་ལ་འདོད་པ་མེད། །ལུས་ཀྱི་ཉམ་སྟོབས་ཤོར་བས་ལྡང་མི་ནུས། །མཛེས་པའི་གཟི་མདངས་ཤོར་བས་ཡི་དགས་འདྲ། །འཆི་བ་རྣམས་ཀྱང་འདི་ལྟར་སྡུག་བསྔལ་ཏེ། །གཉེན་བཤེས་

57-1-232b

ཚོགས་ཀྱིས་ཆོ་ངེ་འདེབས་བྱེད་ཀྱང་། །དེ་ལ་ཉན་ལྟ་བསམ་པའི་ཡུལ་མེད་དེ། །གནད་གཅོད་པ་ནི་མཚོན་ཆས་གཏུབ་པ་འདྲ། །མཛའ་དང་མི་མཛའི་དོན་དུ་སྔར་བྱས་པའི། །དགེ་སྡིག་ལས་ནི་རྨི་ལམ་ཡུལ་བཞིན་སྣང་། །
གཤིན་རྗེའི་ཕོ་ཉ་ཤིན་དུ་འཇིགས་པས་བསྐོར། །བྲེད་ཤ་ཐོན་ནས་ཀུན་དུ་བལྟས་བྱས་ཀྱང་། །མགོན་སྐྱབས་བྱེད་པ་སུ་ཡང་མ་མཐོང་ནས། །ཤིན་དུ་འཇིགས་བཞིན་ཀུན་དུ་ཡི་མུག་སྟེ། །བདག་ཉིད་གར་འགྲོ་རྡོལ་མེད་བར་དོ་
འབྱུང་། །མི་རྟག་སྡུག་བསྔལ་མི་ཟད་ཡུན་རིང་འདི། །ཐོག་མ་མེད་ནས་ད་ལྟའི་བར་དུ་ཡང་། །འཕགས་ལམ་མ་ཐོབ་བར་དུ་རྟག་ཏུ་གདུང་། །རྒྱལ་པོས་གསོལ་པ། བཅོམ་ལྡན་འདས་འཁོར་བ་འདི་ཤིན་དུ་སྡུག་བསྔལ་བ་
ལགས་ན་བདེ་ལེགས་དང་ལྡན་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། མྱ་ངན་ལས་འདས་པ་ནི་བདེ་ལེགས་ཕུན་སུམ་ཚོགས་པ་ཡིན་ནོ། །རྒྱལ་པོས་གསོལ་པ། ཇི་ལྟར་བདེ་ལེགས་ཕུན་སུམ་ཚོགས་པ་ལགས། 
བཅོམ་ལྡན་འདས་ཀྱིས་བཀའ་སྩལ་པ། མྱ་ངན་འདས་པ་ཞི་བ་བདེ་བའི་མཆོག །རྣམ་རྟོག་བདག་ཏུ་འཛིན་དང་ཉོན་མོངས་མེད། །ངན་སོང་གསུམ་སོགས་བཀྲེས་སྐོམ་གྲང་དྲོ་དང་། །སྐྱེ་རྒ་ན་འཆི་ལ་སོགས་སྡུག་བསྔལ་མེད། །འཁོར་
བ་མི་རྟག་སྡུག་བསྔལ་གཏན་ཟད་ནས། །ལས་སུ་གཞན་དོན་འབའ་ཞིག་སྤྱོད་བྱེད་ཅིང་། །མཐུ་དང་རྫུ་འཕྲུལ་བསམ་གྱིས་མི་ཁྱབ་བོ། །དེ་སྐད་ཅེས་བཀའ་སྩལ་པ་དང་། རྒྱལ་པོ་གཟུགས་ཅན་སྙིང་པོ་འཁོར་བ་ལས་ཡིད་བྱུང་ནས་རྒྱལ་སྲིད་
མཆིལ་མའི་ཐལ་བ་ལྟར་བོར་ཏེ། མྱ་ངན་ལས་འདས་པ་བསྒྲུབ་པ་ལ་གཞོལ་བར་གྱུར་ཏོ། །དེ་ལྟར་གྱུར་པ་ལ་བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ལེགས་སོ་ལེགས་སོ། །རྗེས་ཐམས་ཅད་ཀྱི་ནང་ན་གླང་པོ་ཆེའི་རྗེས་
མཆོག་གོ། །མེ་ཏོག་རྣམས་ཀྱི་ནང་ན་པད་མ་དཀར་པོ་མཆོག་གོ། །འདུ་ཤེས་ཐམས་ཅད་ཀྱི་ནང་ན་མི་རྟག་པའི་འདུ་ཤེས་མཆོག་གོ། །བསམ་པ་རྣམས་ཀྱི་ནང་ན་འཁོར་བ་ལས་ཡིད་བྱུང་བ་མཆོག་གོ། །རྒྱལ་པོ་ཆེན་པོ་འཁོར་བ་ལས་ཡིད་

57-1-233a

བྱུང་བ་ལེགས་སོ། །སྐྱོ་བ་སྐྱེས་པ་ལེགས་སོ། །ཆགས་ན་འཁོར་བ་ཡིན་ནོ། །མ་ཆགས་ན་མྱ་ངན་ལས་འདས་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། །རྒྱལ་པོ་གཟུགས་ཅན་སྙིང་པོ་ལ་སོགས་
པ་ཐམས་ཅད་ཡི་རང་སྟེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །རྒྱལ་པོ་གཟུགས་ཅན་སྙིང་པོ་ལ་གདམས་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། རྒྱ་གར་གྱི་མཁན་པོ་དཱ་ན་ཤཱི་ལ་དང་། བན་དེ་ཡེ་ཤེས་
སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། །༄༅། ། རྒྱ་གར་སྐད་དུ། རཱ་ཛཱ་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ།  རྒྱལ་པོ་ལ་གདམས་པ་ཞེས་བྱ་བ་ཐེག་པ་ཆེན་པོའི་མདོ།  སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་
ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གྲོང་ཁྱེར་ཆེན་པོ་བཱ་རཱ་ཎ་སི་ན་འཁོར་རྣམས་ལ་ཆོས་སྟོན་པ་ན། བད་ས་ལའི་རྒྱལ་པོ་འཆར་བྱེད་འདུལ་བའི་དུས་ལ་བབ་པར་གཟིགས་ནས་འཁོར་དང་
བཅས་པ་བད་ས་ལའི་ཡུལ་དུ་གཤེགས་པ་དང་། བད་ས་ལའི་རྒྱལ་པོ་འཆར་བྱེད་གྲོང་ཁྱེར་ཆེན་པོ་གསེར་ཅན་ཞེས་བྱ་བ་གཞོམ་པའི་ཕྱིར་དམག་བཞི་དང་ཆས་པ་དང་ཕྲད་པས་རྒྱལ་པོ་འཆར་བྱེད་ཁྲོས་ཏེ། འདི་འདྲ་བའི་བཀྲ་མི་ཤིས་པ་དང་ཕྲད་
པས་བསད་པར་རིགས་སོ་ཞེས་ནས་མདའ་སྟེའུ་ཁ་ཉ་རྔ་མ་བླངས་ཏེ། བཅོམ་ལྡན་འདས་ལ་འཕངས་སོ། །དེ་ནས་མདའ་དེ་ནམ་མཁའ་ལ་འཁོར་ཞིང་འདི་སྐད་ཅེས་གྲག་གོ། །ཞེ་སྡང་གིས་ནི་སྡུག་བསྔལ་སྐྱེད། །འདིར་ཡང་ཤ་ཐང་
འཐབ་དང་རྩོད། །ཕྱི་མར་དམྱལ་བའི་སྡུག་བསྔལ་འབྱུང་། །དེས་ན་ཞེ་སྡང་འཐབ་རྩོད་སྤང་ཞེས་བྱ་བའི་ཚིག་དེ་རྒྱལ་པོ་འཆར་བྱེད་ཀྱིས་ཐོས་པར་གྱུར་པ་དང་། བཅོམ་ལྡན་འདས་ལ་མོས་པར་གྱུར་ཏེ་ཕྱག་འཚལ་ནས་ཕྱོགས་གཅིག་ཏུ་
འཁོད་དོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་འཐབ་རྩོད་ནི་འདིར་ཤ་ཐང་ལ་ཕྱི་མར་ངན་སོང་དུ་སྐྱེ་ན་ཅིའི་ཕྱིར་རྟག་ཏུ་འཐབ་རྩོད་འབའ་ཞིག་བྱེད། རྒྱལ་པོས་གསོལ་པ། གཽ་ཏ་མ་བདག་གིས་གང་དང་འཐབས་

57-1-233b

ཀྱང་ཕམ་མ་མྱོང་སྟེ་རྒྱལ་བས་བདག་ནི་དམག་དང་འཐབ་པ་ལ་མོས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དགྲ་འདི་ནི་དགྲ་ཆུང་ངུ་ཡིན་ཏེ། རྒྱལ་པོ་ཆེན་པོ་འདི་མ་ཡིན་པའི་དགྲ་ཆེན་པོ་ཤར་གཉེར་བ་
ཞིག་ཡོད་དོ། །རྒྱལ་པོས་གསོལ་པ་དགྲ་དེ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། དགྲ་ཆེན་པོ་ཉོན་མོངས་པ་བདག་ཏུ་འཛིན་པ་ཞེས་བྱ་བ་ཞིག་ཡོད་དོ། །རྒྱལ་པོས་གསོལ་པ། དགྲ་དེ་ཇི་ལྟ་བུ་ལགས་བཤད་དུ་གསོལ། 
བཅོམ་ལྡན་འདས་ཀྱིས་བཀའ་སྩལ་པ། རྣམ་རྟོག་བདག་ཏུ་འཛིན་པའི་དགྲ་ཆེན་པོ། །འདི་ནི་རྒྱུ་བཞིན་དངོས་པོ་མེད་བཞིན་དུ། །ཐོག་མ་མེད་ནས་བདག་ལ་གནས་ནས་ནི། །བདག་གི་ཆོས་སྐུ་ཡིད་བཞིན་རིན་ཆེན་དེ། །གཟོད་
མའི་མུ་ནས་དགྲ་ཡིས་བརྐུས་ནས་སུ། །མཚན་མའི་ཚང་ཚིང་གསེབ་ཏུ་སྦས་ནས་བདག །ད་རུང་འཆིང་ཞིང་འཁོར་བར་འཁྱམ་དུ་འཇུག །འཇིག་རྟེན་དགྲས་ནི་བསད་ནས་ནོར་འཕྲོག་ཙམ། །དེ་ལ་བཟོད་བྱས་བསོད་ནམས་
ཚོགས་ཀྱང་རྫོགས། །དགྲ་འདི་ཞི་བདེ་ཐར་པའི་སྲོག་ཀྱང་གཅོད། །དེ་བསྟེན་བསོད་ནམས་འཁོར་བར་འདམ་དུ་འཆིང་། །རྒྱལ་པོས་གསོལ་པ། དགྲ་ཆེན་པོ་དེ་དང་ཇི་ལྟར་འཐབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། 
རྣམ་རྟོག་དགྲ་ལ་རྒོལ་བའི་ཤོམ་ར་ཡང་། །དད་པས་སྦྱིན་དང་ཚུལ་ཁྲིམས་མཁར་བརྩིགས་ཏེ། །དགེ་བའི་དཔུང་བྱས་བཟོད་པའི་གོ་གྱོན་ལ། །བརྩོན་འགྲུས་ལྕག་ཐོགས་བསམ་གཏན་གཞུ་བརྡུངས་ཏེ། །བདག་མེད་སྟོང་པའི་མདའ་
ཡིས་བདག་འཛིན་བསད། །རྒྱལ་པོས་གསོལ་པ་བདག་མེད་པ་ཞེས་པ་དེ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། གང་ཟག་བདག་མེད་རྒྱལ་པོ་མཉན་པར་གྱིས། །གང་ཟག་ལྔ་ཕུང་རྒྱུན་ཡིན་ཅི་ཕྱིར་ན། །
རྒྱུ་ནི་ལས་དང་ཉོན་མོངས་པས་གང་ནས། །འབྲས་བུ་ཕུང་པོར་ཟག་སྟེ་དེ་ཡི་བདག །བདག་ནི་སེམས་ཅན་སོ་སོའི་ལུས་འདི་ལ། །ང་དང་བདག་ཏུ་བཟུང་ནས་ཆགས་གྱུར་ཏེ། །བདག་ནི་ན་དང་ཤི་བཀྲེས་གྲང་གིས་དོགས། །

57-1-234a

བསྟོད་ན་དགའ་ཞིང་སྨད་ན་མི་དགའ་སྟེ། །དེ་ལ་དམིགས་ནས་མུ་སྟེགས་ལྔ་རྣམས་འཇུག །ང་འམ་བདག་དེ་ཡོད་པ་མ་ཡིན་ཏེ། །ཕུང་པོ་འདི་ལ་བརྟགས་ནས་འཁྲུལ་པ་ཡིན། །མིང་ནི་བདག་མ་ཡིན་ཏེ་བཏགས་པ་ཙམ། །
ལུས་ནི་བདག་མ་ཡིན་ཏེ་ཤ་རུས་རྣམས། །འབྱུང་ཆེན་འདུས་པ་ཕྱི་རོལ་རྩིག་པ་འདྲ། །སེམས་ཀྱང་བདག་མ་ཡིན་ཏེ་དངོས་པོ་མེད། །ཆོས་ལ་བདག་མེད་རྒྱལ་པོ་མཉན་པར་གྱིས། །ཆོས་ནི་གཟུགས་སོགས་དངོས་པོ་ཐམས་ཅད་ཡིན། །
བྱེད་པ་མེད་ལ་མཚན་ཉིད་འཛིན་ཕྱིར་རོ། །དེ་དག་ལོག་རྟོག་མཚན་མར་བཅས་པ་དང་། །ལྟ་མི་མཐུན་པ་ཡིན་ཏེ་དེ་མེད་དོ། །ཅི་ཕྱིར་ཞེ་ན་ཕྱི་ནང་ཆོས་འདི་ལ། །དངོས་འདི་སྤངས་ནས་སྟོང་ཉིད་མི་བཙལ་གྱི། །སྣང་བ་ཉིད་ན་སྟོང་པ་ཉིད་ཡིན་
ཕྱིར། །གཞིག་བཅོམ་མི་རྟག་ཙམ་ལ་སྟོང་མིང་གདགས། །སྣང་ལ་རང་བཞིན་མེད་པར་ཅིས་མངོན་ན། །ཡོད་མེད་དབུས་དང་གསུམ་དུ་མི་གནས་ཏེ། །ཡོད་པར་གྲགས་པ་འཁོར་བ་མྱ་ངན་འདས། །འཁོར་བའི་རང་བཞིན་ཡུལ་
སེམས་རྣམ་གཉིས་ཏེ། །ཡུལ་འདི་དངོས་པོ་མེད་པར་འདི་ལྟར་བརྟག །རང་སྣང་རྡུལ་བཤིག་རྡུལ་ཡང་ཆས་གཞིག་མེད། །དངོས་སྣང་ཐམས་ཅད་སེམས་ཡིན་རྨི་ལམ་བཞིན། །སེམས་ཀྱང་ཁ་དོག་དབྱིབས་སོགས་རྣམས་དང་བྲལ། །
དེས་ན་འཁོར་བ་སྟོང་ཞིང་བདག་མེད་དོ། །འཁོར་བ་མེད་པས་མྱ་ངན་འདས་པའང་མེད། །ཡིད་པ་མ་གྲུབ་པས་ན་མེད་པ་འང་མེད། །མཐའ་གཉིས་མེད་ཕྱིར་དབུས་ཀྱང་མེད་པ་ཡིན། །དེ་ལྟར་རྒྱལ་པོས་བདག་མེད་སྒོམ་བྱས་ན། །བདག་
འཛིན་འཁོར་བ་རྩད་ནས་ཆོད་པར་འགྱུར། །རྒྱལ་པོས་གསོལ་པ། སྔ་གོང་ཡན་ཆད་དགྲ་མ་ཡིན་པ་ལ་དགྲར་བཟུང་སྟེ་བདག་ཞེ་སྡང་གིས་མནར་བར་གྱུར་ཏོ། །ད་ནི་བདག་གིས་ཡང་དག་པའི་དགྲ་ངོ་ཤེས་པས་དགྲ་དེ་དང་འཐབ་པའི་ཕྱིར་
བདག་མེད་པ་ལ་མོས་པར་གྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ལེགས་སོ། །བདག་ཏུ་འཛིན་པའི་དགྲ་ཕམ་པར་བྱས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། 

57-1-234b

བད་སའི་རྒྱལ་པོ་འཆར་བྱེད་ལ་སོགས་པ་ཡི་རང་སྟེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །བད་ས་ལའི་རྒྱལ་པོ་འཆར་བྱེད་ལ་གདམས་པ་ཞེས་བྱ་བ་ཐེག་པ་ཆེན་པོའི་མདོ། རྫོགས་སོ།། །། རྒྱ་གར་གྱི་
མཁན་པོ་དཱ་ན་ཤཱི་ལ་དང་། བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། །༄༅། ། རྒྱ་གར་སྐད་དུ། ཨཱརྱ་ཨ་ཛཱ་ཏ་ཤ་ཏྲུ་ཀཽ་ཀྲིཏྟྱ་བི་ནོ་ད་ན་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ། 
འཕགས་པ་མ་སྐྱེས་དགྲའི་འགྱོད་པ་བསལ་བ་ཞེས་བྱ་བ་ཐེག་པ་ཆེན་པོའི་མདོ།  བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ཀྱི་རི་བྱ་རྒོད་ཀྱི་ཕུང་པོ་ལ། 
དགེ་སློང་བརྒྱ་ཕྲག་ཕྱེད་དང་བཅུ་གསུམ་གྱི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སངས་རྒྱས་ཀྱི་ཞིང་སྣ་ཚོགས་ནས་ལྷགས་པ་བརྒྱད་ཁྲི་བཞི་སྟོང་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་
ཤེས་པས་མངོན་པར་ཤེས་པ། གཟུངས་ཐོབ་པ། སྤོབས་པ་ཐོགས་པ་མེད་པ། མི་སྐྱེ་བའི་ཆོས་ལ་བཟོད་པ་ཐོབ་པ། ཏིང་ངེ་འཛིན་དང་གཟུངས་སྒྲུབ་པ་ཤེས་ཤིང་མཁས་པ། སེམས་ཅན་ཐམས་ཅད་ཀྱི་སེམས་ཀྱི་བསམ་པ་ཇི་ལྟར་མོས་
པ་བཞིན་དུ་ཆོས་སྟོན་པ་རྣམས་དང་། རྒྱལ་པོ་ཆེན་པོ་བཞི་དང་། བརྒྱ་བྱིན་ལྷའི་དབང་པོ་དང་། ཚངས་པ་མི་མཇེད་ཀྱི་བདག་པོ་དང་། དེ་མ་ཡིན་པ་གཞན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་
ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་བརྒྱ་སྟོང་མང་པོ་དང་ཐབས་གཅིག་ཏུ་བཞུགས་སོ། །ཡང་དེའི་ཚེ་དེའི་དུས་ན་འཇམ་དཔལ་གཞོན་ནུར་གྱུར་པ་རི་ཞིག་གི་བང་རིམ་གྱི་ངོས་ལ་སྐྱེས་བུ་དམ་པ་ཉི་ཤུ་རྩ་ལྔ་དང་ལྷན་ཅིག་ཏུ་གནས་པ་འདི་
ལྟ་སྟེ། བྱང་ཆུབ་སེམས་དཔའ་ཀླུ་དཔལ་དང་། ཀླུས་བྱིན་དང་། དཔལ་འབྱུང་དང་། དཔལ་གྱི་སྙིང་པོ་དང་། པད་མ་བླ་མའི་དཔལ་དང་། པད་མ་དཔལ་འབྱུང་དང་། སྐྱེ་བོ་འཛིན་དང་། ས་འཛིན་དང་། ལག་ན་རིན་ཆེན་དང་། ལག་ན་རིན་ཆེན་

57-1-235a

ཕྱག་རྒྱ་དང་། སེང་གེ་བློ་གྲོས་དང་། སེང་གེའི་འགྲོས་བསྒྲགས་དབྱངས་དང་། ནམ་མཁའི་མཛོད་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་སྒྱུར་བ་དང་། ཚིག་གི་རབ་ཏུ་ཐ་དད་པ་ཐམས་ཅད་ལ་སྤོབས་པ་དང་། 
སྤོབས་པའི་ཕུང་པོ་དང་། བློ་གྲོས་རྒྱ་མཚོ་དང་། ལྷུན་པོ་ཆེན་པོ་དང་། མཐོང་ན་དགའ་བ་དང་། རབ་ཏུ་དགའ་བའི་རྒྱལ་པོ་དང་། མཐའ་ཡས་མཐོང་བ་དང་། མཐའ་ཡས་དམིགས་པར་གནས་པ་དང་། བདུད་ཀྱི་ལྟ་བ་ཡང་དག་པར་
འཇོམས་པ་དང་། མྱ་ངན་མེད་སྦྱིན་དང་། དོན་ཐམས་ཅད་གྲུབ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དང་། སྐྱེས་བུ་དམ་པ་ཉི་ཤུ་རྩ་ལྔ་པོ་དེ་དག་དང་ལྷན་ཅིག་ཏུ་གནས་སོ། །དགའ་ལྡན་གྱི་རིས་ཀྱི་ལྷའི་བུ་བཞི་ཡང་ཆོས་མཉན་
པའི་ཕྱིར་འཇམ་དཔལ་གཞོན་ནུར་གྱུར་པའི་ཕྱི་བཞིན་དུ་འབྲང་བར་གྱུར་ཏེ། ལྷའི་བུ་ཀུན་ནས་མེ་ཏོག་ཅེས་བྱ་བ་དང་། ལྷའི་བུ་མེ་ཏོག་འོད་ཟེར་ཅན་ཞེས་བྱ་བ་དང་། ལྷའི་བུ་མེ་ཏོག་མན་དཱ་ར་བའི་དྲི་ཞེས་བྱ་བ་དང་། ལྷའི་བུ་ཆོས་ལ་གནས་
པར་རྟག་ཏུ་བརྩོན་པ་ཞེས་བྱ་བ་དེ་དག་དང་། ལྷའི་བུ་མང་པོ་གཞན་དག་ཀྱང་འདི་ལྟ་སྟེ། ཆོས་མཉན་པའི་ཕྱིར་འཇམ་དཔལ་གཞོན་ནུར་གྱུར་པའི་ཕྱི་བཞིན་དུ་འབྲང་བར་གྱུར་ཏོ། །འདི་ལྟ་སྟེ། སྐྱེས་བུ་དམ་པ་དེ་དག་དང་། ལྷའི་བུ་དེ་དག་
ཚོགས་ཤིང་འཁོད་པ་ལས་བར་སྐབས་སུ་ཀྱེ་གྲོགས་པོ་དག་སངས་རྒྱས་ཀྱི་ཡེ་ཤེས་ནི་རྒྱ་ཆེ་བ། དཔག་ཏུ་མེད་པ། ཚད་མེད་པ། བསམ་གྱིས་མི་ཁྱབ་པ། མཉམ་པ་མེད་པ། གཞལ་དུ་མེད་པ། མི་རྟོགས་པ། མི་མཉམ་པ་དང་མཉམ་པ་
དང་། བླ་ན་མེད་པ་ཡིན་ཏེ། དེ་ནི་གོ་ཆ་དམ་པ་མ་ཡིན་པས་རྟོགས་པར་མི་ནུས་ན་གོ་ཅ་ཇི་ཙམ་ཞིག་བགོས་ན་ཐམས་ཅད་མཁྱེན་པའི་ཡེ་ཤེས་ཡེ་ཤེས་ཆེན་པོ་དེ་རྟོགས་པར་ནུས་ཤེས་དེ་ལྟ་བུའི་གཏམ་རྗོད་པར་གྱུར་པ་དང་། བྱང་ཆུབ་
སེམས་དཔའ་ཀླུ་དཔལ་གྱིས་སྨྲས་པ། དགེ་བའི་རྩ་བའི་ཚོགས་བསགས་པ་བསྔོ་བ་ལ་ཆོག་མི་ཤེས་པའི་དགེ་བའི་རྩ་བ་ལ་གཞོག་པར་གནས་ཤིང་མི་བརྗེད་པའི་གོ་ཆ་བགོས་པས་ཡེ་ཤེས་ཆེན་པོ་དེ་རྟོགས་པར་ནུས་སོ། །བྱང་ཆུབ་

57-1-235b

སེམས་དཔའ་ཀླུས་བྱིན་གྱིས་སྨྲས་པ། སེམས་སྙོམས་པ་དང་། སེམས་དུལ་བ་དང་། སེམས་འཇམ་པ་དང་། སེམས་དྲང་བ་དང་། སེམས་མཉེན་པ་དང་། སེམས་ཅང་ཤེས་པའི་ཕྱིར་ཐམས་ཅད་མཁྱེན་པའི་ཡེ་ཤེས་ཀྱི་ཡི་དམ་བརྟན་
པོ་སྙིང་པོ་ལ་གནས་པའི་གོ་ཅ་བགོས་པས་ཐམས་ཅད་མཁྱེན་པའི་ཡེ་ཤེས། ཡེ་ཤེས་ཆེན་པོ་དེ་རྟོགས་པར་ནུས་སོ། །བྱང་ཆུབ་སེམས་དཔའ་དཔལ་འབྱུང་གིས་སྨྲས་པ། ཀྱེ་གྲོགས་པོ་དག་བསྐལ་པའི་གྲངས་ཀྱིས་ཡེ་ཤེས་
ཆེན་པོ་དེ་རྟོགས་པར་མི་ནུས་ཀྱི། བསྐལ་པ་དཔག་ཏུ་མེད་པར་གོ་ཆ་བགོས་པས་ཐམས་ཅད་མཁྱེན་པའི་ཡེ་ཤེས་དེ་རྟོགས་པར་ནུས་སོ། །བྱང་ཆུབ་སེམས་དཔའ་དཔལ་གྱི་སྙིང་པོས་སྨྲས་པ། རིགས་ཀྱི་བུ་བྱང་ཆུབ་སེམས་
དཔའ་བདག་གི་བདེ་བ་ལ་ཆགས་ཤིང་གནས་པས་ཡེ་ཤེས་ཆེན་པོ་དེ་རྟོགས་པར་མི་ནུས་ཀྱི། བདག་གི་བདེ་བ་ལ་མ་ཆགས་པས་ཐམས་ཅད་མཁྱེན་པའི་ཡེ་ཤེས་དེ་རྟོགས་པར་ནུས་ཏེ། གང་ཟང་ཟིང་མེད་པ་ལན་དུ་བྱ་བ་མ་
ཡིན་པའི་བདེ་བ་དེ་སེམས་ཅན་ཐམས་ཅད་ལ་བསྟབས་སོ་ཞེས་སེམས་ཅན་ཐམས་ཅད་བདེ་ཞིང་བདེ་བ་དང་ལྡན་པ་ལ་གཞོག་པར་བྱེད་པ་དེས་ཐམས་ཅད་མཁྱེན་པའི་ཡེ་ཤེས་དེ་རྟོགས་པར་ནུས་སོ། །བྱང་ཆུབ་སེམས་དཔའ་པད་མ་བླ་
མའི་དཔལ་གྱིས་སྨྲས་པ། བདག་ཉིད་མ་དུལ། མ་བསྲུངས། མ་བྱང་བ་དེས་ཕ་རོལ་མ་དུལ་མ་བསྲུངས། མ་བྱང་བ་དུལ་བར་བྱ་བ་དང་། ཞི་བར་བྱ་བའི་གནས་དེ་ནི་མེད་ཀྱི། བདག་ཉིད་ཤིན་དུ་དུལ། ཤིན་དུ་བསྲུངས། ཤིན་དུ་བྱང་བ་དེས་
ཕ་རོལ་མ་དུལ། མ་བསྲུངས། མ་བྱང་བ། དུལ་བར་བྱ་བ་དང་། ཞི་བར་བྱ་བའི་གནས་དེ་ནི་ཡོད་དོ་ཞེས་བཅོམ་ལྡན་འདས་ཀྱིས་ཀྱང་དེ་སྐད་གསུངས་ཏེ། དེ་བས་ན་དུལ་བ་དང་ཞི་གནས་ཀྱི་རྣལ་འབྱོར་ལ་ཞུགས་ཤིང་ཕ་རོལ་དུལ་བ་དང་། ཞི་
གནས་དང་འཐུན་པར་བྱ་བ་ལ་མཁས་པས་ཡེ་ཤེས་ཆེན་པོ་དེ་རྟོགས་པར་ནུས་སོ། །བྱང་ཆུབ་སེམས་དཔའ་པད་མ་དཔལ་འབྱུང་གིས་སྨྲས་པ། ཀྱེ་གྲོགས་པོ་དག་འཇིག་རྟེན་གྱི་ཆོས་དང་འབྲེལ་པས་འཇིག་རྟེན་ལས་འདའ་

57-1-236a

བར་མི་ནུས་ཀྱི། གང་འཇིག་རྟེན་གྱི་ཆོས་དང་མ་འབྲེལ་བ་དེ་ནི་འཇིག་རྟེན་ལས་འདའ་བར་འགྱུར་རོ། །དེ་བས་ན་བྱང་ཆུབ་སེམས་དཔའ་གང་རྙེད་པ་དང་། མི་རྙེད་པ་དང་། གྲགས་པ་དང་། མ་གྲགས་པ་དང་། བསྟོད་
པ་དང་། སྨད་པ་དང་། བདེ་བ་དང་སྡུག་བསྔལ་བས་མི་འཕྲོགས་ཤིང་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཁེངས་པ། མ་དུད་པ་དེས་ནི་ཡེ་ཤེས་ཆེན་པོ་དེ་རྟོགས་པར་སླའོ། །བྱང་ཆུབ་སེམས་དཔའ་སྐྱེ་བོ་འཛིན་གྱིས་སྨྲས་
པ། ཀྱེ་གྲོགས་པོ་དག་གཞན་ལ་ཀླན་ག་ཚོལ་བས་ནི་ཐམས་ཅད་མཁྱེན་པའི་ཡེ་ཤེས་ཆེན་པོ་དེ་རྟོགས་པར་མི་ནུས་ཀྱི། གཅིག་པུ་གཉིས་སུ་མེད་ལ་བདག་གིས་སེམས་ཅན་ཐམས་ཅད་ཀྱི་ཕྱིར་གོ་ཅ་ཆེན་པོ་བགོས་པས་སེམས་ཅན་
ཐམས་ཅད་ཀྱི་གང་ཅི་ཡང་རུང་། ཡོངས་སུ་ཐོབ་པར་བྱ་བ་དེ་ཐམས་ཅད་བདག་གིས་ཡོངས་སུ་ཐོབ་པར་བྱའོ་ཞེས། དགེ་བའི་རྩ་བ་བསྐྱེད་པ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་དེ་སེམས་ཅན་ཐམས་ཅད་
དང་ཐུན་མོང་དུ་སེམས་བསྐྱེད་དེ། ཡུད་ཙམ་དུ་ཡང་བརྩོན་འགྲུས་མི་གཏོང་ཞིང་དེ་ལྟར་བརྩོན་འགྲུས་ལ་གནས་པའི་བྱང་ཆུབ་སེམས་དཔས་ཡེ་ཤེས་ཆེན་པོ་དེ་རྟོགས་པར་ནུས་སོ། །བྱང་ཆུབ་སེམས་དཔའ་ས་འཛིན་གྱིས་སྨྲས་པ། ཀྱེ་
གྲོགས་པོ་དག་འདི་ལྟ་སྟེ། དཔེར་ན་ས་ནི་རྩྭ་དང་། ཤིང་གེལ་པ་དང་། སྨན་དང་། ནགས་ཚལ་ཐམས་ཅད་ཀྱི་གནས་ཡིན་ཏེ། དེ་ལ་གནས་ཤིང་རྩ་དང་། ཤིང་གེལ་པ་དང་། སྨན་དང་། ནགས་ཚལ་གྱི་ས་བོན་ཐམས་ཅད་སྐྱེ་བར་འགྱུར་མོད་ཀྱི་
ས་ཆེན་པོ་དེ་ནི་ལན་རེ་བ་ཡང་མེད་དོ། །སེམས་ཅན་ཐམས་ཅད་ཀྱང་ས་ཆེན་པོ་ལས་འཚོ་མོད་ཀྱི། ས་ཆེན་པོ་ནི་སྐྱོ་བར་ཡང་མི་བྱེད་དོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་ཆགས་པ་དང་། ཞེ་སྡང་བའི་སེམས་དང་བྲལ་བ་དང་། 
སེམས་ཅན་ཐམས་ཅད་ཀྱི་ཉེ་བར་འཚོ་བ་དང་ལན་རེ་བ་མེད་པའི་ཕྱིར་ས་དང་འདྲ་བར་སེམས་བསྐྱེད་ན་ཡེ་ཤེས་ཆེན་པོ་དེ་རྟོགས་པར་ནུས་སོ། །བྱང་ཆུབ་སེམས་དཔའ་ལག་ན་རིན་ཆེན་གྱིས་སྨྲས་པ། ཀྱེ་གྲོགས་པོ་དག་ཤེས་པར་གྱིས་

57-1-236b

ཤིག་འདི་ནི་གོ་ཆ་ཆེན་པོ་ཡིན་ཏེ། དམན་པ་ལ་མོས་པས་ནི་ཡེ་ཤེས་ཆེན་པོ་དེ་རྟོགས་པར་མི་ནུས་ཀྱི། གང་གཉིད་ལོག་པའི་རྨི་ལམ་ན་ཡང་ཐེག་པ་གཉིས་ལ་སེམས་མི་འཇུག་ཅིང་རིན་པོ་ཆེའི་སེམས་ཐམས་ཅད་མཁྱེན་པའི་སེམས་དེ་ཕ་
རོལ་དག་ཀྱང་འདོད་པར་བྱེད་དུ་འཇུག་ལ་རིན་པོ་ཆེའི་སེམས་དེ་ལ་སེར་སྣ་མི་བྱེད་ཀྱི། སེམས་ཅན་ཐམས་ཅད་ཀྱང་ཐེག་པ་ཆེན་པོའི་གོ་ཆ་དེ་སྐོན་པར་བྱེད་ཅིང་སེམས་མཉམ་པ་མེད་པ་དེ་འང་གང་བ་འམ་བྲི་བར་ཀྱང་མི་མཐོང་ཞིང་། དེ་ལྟར་སེར་སྣ་
མེད་པའི་སེམས་ཀྱིས་ཡེ་ཤེས་ཆེན་པོ་དེ་རྟོགས་པར་ནུས་སོ། །བྱང་ཆུབ་སེམས་དཔའ་ལག་ན་རིན་ཆེན་ཕྱག་རྒྱས་སྨྲས་པ། ཀྱེ་མའོ་སེམས་ཅན་འདི་དག་ནི་འགྲོ་བ་དྲུག་ཏུ་ལྷུང་གིས། དེ་དང་དེ་དག་ཏུ་སྙིང་རྗེ་ཆེན་པོ་བསྐྱེད་དེ། སེམས་
ཅན་ཐམས་ཅད་ལ་ཆོས་ཀྱི་ཕྱག་རྒྱ་རིན་པོ་ཆེའི་ཕྱག་རྒྱ་གསུམ་གྱིས་བཏབ་པ་སྦྱིན་པར་བྱ་སྟེ། སེམས་ཅན་ཐོས་པ་ཉུང་བ་རྣམས་ལ་ནི་ཐོས་པའི་ལག་པ་སྦྱིན་པར་བྱའོ། །སེམས་ཅན་སེར་སྣ་ཅན་རྣམས་ལ་ནི་གཏོང་བའི་ལག་པ་སྦྱིན་
པར་བྱའོ། །སེམས་ཅན་ངང་ཚུལ་ངན་པ་ཅན་རྣམས་ལ་ནི་ཚུལ་ཁྲིམས་ཀྱི་ལག་པ་སྦྱིན་པར་བྱའོ། །སེམས་ཅན་གནོད་སེམས་ཅན་རྣམས་ལ་ནི་བཟོད་པའི་ལག་པ་སྦྱིན་པར་བྱའོ། །སེམས་ཅན་ལེ་ལོ་ཅན་རྣམས་ལ་ནི་བརྩོན་འགྲུས་
ཀྱི་ལག་པ་སྦྱིན་པར་བྱའོ། །སེམས་ཅན་དྲན་པ་ཉམས་པ་རྣམས་ལ་ནི་བསམ་གཏན་ཐོབ་པའི་ལག་པ་སྦྱིན་པར་བྱའོ། །སེམས་ཅན་ཤེས་རབ་འཆལ་པ་རྣམས་ལ་ནི་ཤེས་རབ་ཀྱི་ལག་པ་སྦྱིན་པར་བྱ་སྟེ། སེམས་ཅན་དག་ཆོས་
དཀར་པོ་གང་དང་གང་དག་ལས་བྲལ་བར་གྱུར་པའི་ཆོས་དེ་དང་དེ་དག་ཉིད་ཡོངས་སུ་རྫོགས་པར་བྱ་བའི་ཕྱིར་ལག་པ་སྦྱིན་པར་བྱ་སྟེ། བྱང་ཆུབ་སེམས་དཔའ་དེའི་དགེ་བའི་རྩ་བའི་ལག་པ་ཡང་རིན་པོ་ཆེའི་ཕྱག་རྒྱ་གསུམ་གྱིས་གདབ་པར་
བྱའོ། །གསུམ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་སངས་རྒྱས་ཀྱི་ཡེ་ཤེས་ཡོངས་སུ་རྫོགས་པར་བསྔོ་བ་རིན་པོ་ཆེའི་ཕྱག་རྒྱས་གདབ་པར་བྱ་བ་དང་། བདག་གི་དགེ་བའི་རྩ་བ་ཡོངས་སུ་འགྲུབ་པ་རིན་པོ་ཆེའི་

57-1-237a

ཕྱག་རྒྱས་གདབ་པར་བྱ་བ་དང་། སེམས་ཅན་ཐམས་ཅད་ནམ་མཁའི་རང་བཞིན་གྱི་ཕྱག་རྒྱས་གདབ་པར་བྱ་བ་སྟེ། རིགས་ཀྱི་བུ་དེ་འདྲ་བའི་གནས་ལ་གནས་པས་ནི་ཐམས་ཅད་མཁྱེན་པའི་ཡེ་ཤེས་ཆེན་པོ་དེ་རྟོགས་པར་
ནུས་སོ། །བྱང་ཆུབ་སེམས་དཔའ་སེང་གེའི་བློ་གྲོས་ཀྱིས་སྨྲས་པ། ཀྱེ་མའོ་གྲོགས་པོ་དག་འདི་ནི་མི་འཇིགས་པའི་གོ་ཆའོ། །འདི་ནི་མི་སྐྲག་པའི་གོ་ཆའོ། །འདི་ནི་མ་ཞུམ་པའི་གོ་ཆའོ། །འདི་ནི་ལེ་ལོ་མེད་པའི་གོ་ཆའོ། །ཀྱེ་གྲོགས་པོ་དག་དེ་བས་
ན་མི་འཇིགས་པ་དང་། སེམས་མི་སྐྲག་པ་དང་། མ་ཞུམ་པ་དང་། ལེ་ལོ་མེད་པ་དང་། འཇིགས་ཤིང་སྐྲག་པ་སྐྱི་བུང་ཞེས་བྱེད་པ་དང་བྲལ་བ་དང་། འཁོར་བའི་ཉེས་པ་མི་སྐྱེད་པ་དང་། མྱ་ངན་ལས་འདའ་བའི་ཡོན་ཏན་ཡང་དག་པར་མཐོང་བ་དང་། 
བདེ་བ་དང་སྡུག་བསྔལ་བའི་ཆོས་ལ་སྙོམས་པར་གནས་པ་དང་། མི་གཉིས་པ་ལ་གནས་པ་དང་ལྡན་པས་ཐམས་ཅད་མཁྱེན་པ་རྟོགས་པར་སླའོ། །བྱང་ཆུབ་སེམས་དཔའ་སེང་གེའི་འགྲོས་བསྒྲགས་དབྱངས་ཀྱིས་སྨྲས་པ། ཀྱེ་གྲོགས་པོ་དག་
འགྲོས་དེ་ནི་སྐྱེས་བུ་ངན་པའི་མ་ཡིན་གྱི། དེ་ནི་སྐྱེས་བུ་དམ་པའི་འགྲོས་ཡིན་ནོ། །དེ་ཅིའི་ཕྱིར་ཞེ་ན། སྐྱེས་བུ་དམ་པ་དག་ནི་སྡིག་པའི་ལྟ་བ་དང་བྲལ་བས་ཡང་དག་པ་ལ་ཞུགས་པ་ཡིན་ནོ། །སྐྱེས་བུ་དམ་པ་དག་ནི་རྟག་པར་དྲང་བའི་རང་བཞིན་
དང་ལྡན་པས་གཡོ་མེད་པ་ཡིན་ནོ། །སྐྱེས་བུ་དམ་པ་དག་ནི་བླ་མ་ལ་རིམ་གྲོ་སྐྱེད་པས་ང་བཅོམ་པ་ཡིན་ནོ། །སྐྱེས་བུ་དམ་པ་དག་ནི་བསྟན་ན་འཐུན་པར་ལེན་པས་ཚིག་བཟང་བ་ཡིན་ནོ། །སྐྱེས་བུ་དམ་པ་དག་ནི་ཡང་དག་པའི་འཚོ་བ་ལ་གནས་པས་
ལས་ཀྱི་མཐའ་གྲགས་པ་ཡིན་ནོ། །སྐྱེས་བུ་དམ་པ་དག་ནི་སྐྱོ་བ་དང་བྲལ་བས་འདོད་ཆགས་དང་བྲལ་བ་ཡིན་ནོ། །སྐྱེས་བུ་དམ་པ་དག་ནི་ཁོང་ཁྲོ་བ་དང་བྲལ་བས་ཞེ་སྡང་དང་བྲལ་བ་ཡིན་ནོ། །སྐྱེས་བུ་དམ་པ་དག་ནི་ཞི་བ་རབ་ཏུ་ཞི་བ་ཉེ་བར་ཞི་
བས་མུན་པ་མུན་ནག་དང་བྲལ་བ་ཡིན་ནོ། །སྐྱེས་བུ་དམ་པ་དག་ནི་སྡུག་བསྔལ་བ་དང་དབུལ་པོ་ལ་སྙིང་རྗེ་བར་གྱུར་པས་འཇམ་པ་རྣམས་ཡིན་ནོ། །སྐྱེས་བུ་དམ་པ་དག་ནི་ལུས་དང་། ངག་དང་། ཡིད་ཀྱི་ལས་ཀྱི་མཐའ་ཡོངས་སུ་དག་པས་

57-1-237b

འཛེམ་པ་དང་བཅས་པ་ཡིན་ནོ། །སྐྱེས་བུ་དམ་པ་དག་ནི་དེ་དག་བྱ་བ་ལ་ཡང་དག་པར་ཞུགས་པས་ཇི་སྐད་སྨྲས་པ་བཞིན་དུ་བྱེད་པ་ཡིན་ནོ། །སྐྱེས་བུ་དམ་པ་དག་ནི་རྟག་ཏུ་བརྟུལ་བ་བརྟན་པས་ལྷག་པའི་བསམ་པ་དང་ལྡན་པ་ཡིན་ནོ། །
སྐྱེས་བུ་དམ་པ་དག་ནི་ལོག་པའི་ཆོས་དང་བྲལ་བས་བདེན་པ་ལ་གནས་པ་ཡིན་ནོ། །སྐྱེས་བུ་དམ་པ་དག་ནི་ཆོས་ཀྱི་དགའ་བས་དགའ་ཞིང་མགུ་བས་ཆོས་འདོད་པ་ཡིན་ནོ། །སྐྱེས་བུ་དམ་པ་དག་ནི་ལུས་དང་སྲོག་གཏོང་བས་དམ་པའི་ཆོས་
ཡོངས་སུ་འཛིན་པ་ཡིན་ནོ། །སྐྱེས་བུ་དམ་པ་དག་ནི་སེམས་ཅན་ཐམས་ཅད་དང་འབྲེལ་བས་མི་གཏོང་བ་ཡིན་ནོ། །སྐྱེས་བུ་དམ་པ་དག་ནི་དོན་དམ་པའི་རྗེས་སུ་འཇུག་པས་ཉེས་པ་མཐོང་བ་ཡིན་ནོ། །སྐྱེས་བུ་དམ་པ་དག་ནི་སྡིག་པའི་
ཆོས་རྣམ་པར་སྤངས་པས་དགེ་བའི་ཆོས་ལ་ཞུགས་པ་ཡིན་ནོ། །སྐྱེས་བུ་དམ་པ་དག་ནི་དབུལ་པོ་རྣམས་ཀྱི་གཏེར་ཡིན་ནོ། །སྐྱེས་བུ་དམ་པ་དག་ནི་ནད་པ་རྣམས་ཀྱི་སྨན་པ་ཡིན་ནོ། །སྐྱེས་བུ་དམ་པ་དག་ནི་འཇིགས་པ་རྣམས་ཀྱི་མགོན་
ཡིན་ནོ། །སྐྱེས་བུ་དམ་པ་དག་ནི་དཔུང་གཉེན་མེད་པ་རྣམས་ཀྱི་སྐྱབས་ཡིན་ནོ། །སྐྱེས་བུ་དམ་པ་དག་ནི་འཁོར་བའི་རྒྱ་མཚོར་ཞུགས་པ་རྣམས་ཀྱི་གནས་ཡིན་ནོ། །སྐྱེས་བུ་དམ་པ་དག་ནི་རྟེན་མེད་པ་རྣམས་ཀྱི་རྟེན་ཡིན་ནོ། །སྐྱེས་བུ་
དམ་པ་དག་ནི་མུན་པ་མུན་ནག་ཏུ་ཞུགས་པ་རྣམས་ཀྱི་སྣང་བར་བྱེད་པ་ཡིན་ནོ། །སྐྱེས་བུ་དམ་པ་དག་ནི་ལམ་ངན་པར་ཞུགས་པ་རྣམས་ཀྱི་འདྲེན་པ་ཡིན་ནོ། །སྐྱེས་བུ་དམ་པ་དག་ནི་ཆོས་སྨྲ་བ་རྣམས་ཀྱི་ཡོངས་སུ་འདྲེན་པ་ཡིན་ནོ། །
སྐྱེས་བུ་དམ་པ་དག་ནི་བཟོད་པ་དང་དུལ་བའི་རྣལ་འབྱོར་དང་ལྡན་པས་ཐ་བའི་ཉེས་པ་དང་། གནོད་སེམས་དང་། གནོང་བ་འཆབ་པ་དང་། ཁྲོ་བའི་ཡོངས་སུ་གདུང་བ་ཐམས་ཅད་དང་བྲལ་བ་ཡིན་ཏེ། དེ་ལྟ་བས་ན་སྐྱེས་བུ་དམ་པ་དག་
དེ་འདྲ་བའི་ཆོས་ལ་གནས་པས་ནི་ཡེ་ཤེས་ཆེན་པོ་དེ་རྟོགས་པར་ནུས་སོ། །བྱང་ཆུབ་སེམས་དཔའ་ནམ་མཁའ་མཛོད་ཀྱིས་སྨྲས་པ། ནམ་མཁའ་དཔག་ཏུ་མེད་པ་བཞིན་དུ་བྱམས་པ་སྒོམ་པའི་རྣལ་འབྱོར་དང་ལྡན་པ། སྙིང་རྗེ་

57-1-238a

ཆེན་པོ་ལ་གནས་པ་རྒྱུན་མི་འཆད་པ། དབང་པོ་རྟག་ཏུ་དགའ་ཞིང་དགོད་པ། འདོད་པའི་དགའ་བ་ཐམས་ཅད་ལ་བཏང་སྙོམས་སུ་གཏོང་བ། སྦྱིན་པ་ནམ་མཁའ་དང་མཚུངས་པ། ཚུལ་ཁྲིམས་ནམ་མཁའ་དང་མཚུངས་པ། 
བཟོད་པ་ནམ་མཁའ་དང་མཚུངས་པ། བརྩོན་འགྲུས་ནམ་མཁའ་དང་མཚུངས་པ། བསམ་གཏན་ནམ་མཁའ་དང་མཚུངས་པ། ཤེས་རབ་ནམ་མཁའ་དང་མཚུངས་པས་ཐམས་ཅད་མཁྱེན་པ་རྟོགས་པར་ནུས་སོ། །བྱང་ཆུབ་སེམས་
དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་སྒྱུར་བས་སྨྲས་པ། སེམས་བསྐྱེད་པ་གང་ལས་བདུད་སྡིག་ཅན་གྱིས་ཀླགས་རྙེད་པར་འགྱུར་བ་དང་། དེ་བཞིན་གཤེགས་པ་མཉེས་པར་མི་འགྱུར་བ་དང་། ལྷ་དང་མི་དགའ་བར་འགྱུར་
བ་དང་། བདག་གི་དགེ་བའི་ཕྱོགས་ཡོངས་སུ་འབྲི་བར་འགྱུར་བའི་སེམས་བསྐྱེད་པ་དེ་དག་ནི་བྱང་ཆུབ་སེམས་དཔས་མི་བསྐྱེད་པར་བྱའི། སེམས་བསྐྱེད་པ་གང་ལས་བདུད་སྡིག་ཅན་གྱིས་ཀླགས་རྙེད་པར་མི་འགྱུར་བ་དང་། དེ་བཞིན་
གཤེགས་པ་མཉེས་པར་འགྱུར་བ་དང་། ལྷ་དག་དགའ་བར་འགྱུར་བ་དང་། བདག་གི་དགེ་བའི་ཕྱོགས་ཡོངས་སུ་འབྲི་བར་མི་འགྱུར་བའི་སེམས་བསྐྱེད་པ་དེ་དག་ནི་བསྐྱེད་པར་བྱ་སྟེ། དེ་དེ་ལྟར་ཞུགས་ན་སེམས་བསྐྱེད་མ་ཐག་ཏུ་ཆོས་
ཀྱི་འཁོར་ལོ་སྐོར་བར་འགྱུར་རོ། །དེ་ཅིའི་ཕྱིར་ཞེ་ན། དེ་ལྟར་བྱང་ཆུབ་སེམས་དཔའ་དེས་སེམས་བསྐྱེད་མ་ཐག་ཏུ་རྒྱུ་དང་དམིགས་པའི་རྐྱེན་ལ་སྐྱེས་པའི་ཕྱིར་ཆོས་ཐམས་ཅད་མ་སྐྱེས་པ་དང་། དེ་བཞིན་གཤེགས་པའི་བྱང་ཆུབ་
ཀྱང་མ་སྐྱེས་པ་ལས་རྟོགས་པར་འགྱུར་ལ། བྱང་ཆུབ་ཇི་ལྟ་བར་ཆོས་ཀྱི་འཁོར་ལོས་སྒྱུར་བ་ཡང་དེ་བཞིན་དུ་ཤེས་ཏེ། སེམས་ཀྱི་བསམ་པའི་གོ་ཆ་དེ་དག་གིས་ཐམས་ཅད་མཁྱེན་པ་རྟོགས་པར་ནུས་སོ། །བྱང་ཆུབ་སེམས་
དཔའ་ཚིག་གི་རབ་ཏུ་ཐ་དད་པ་ཐམས་ཅད་ལ་སྤོབས་པས་སྨྲས་པ། སྐྱེས་བུ་དམ་པ་དག་བྱང་ཆུབ་ནི་ཐམས་ཅད་ཀྱི་རྗེས་སུ་སོང་བ་སྟེ། ཀུན་ནས་ཉོན་མོངས་པའི་རྗེས་སུ་སོང་བ། རྣམ་པར་བྱང་བའི་རྗེས་སུ་སོང་བ། འདུས་

57-1-238b

བྱས་ཀྱི་རྗེས་སུ་སོང་བ། འདུས་མ་བྱས་ཀྱི་རྗེས་སུ་སོང་བ། ཟག་པ་དང་བཅས་པའི་རྗེས་སུ་སོང་བ། ཟག་པ་མེད་པའི་རྗེས་སུ་སོང་བ། ཁ་ན་མ་ཐོ་བ་དང་བཅས་པའི་རྗེས་སུ་སོང་བ། ཁ་ན་མ་ཐོ་བ་མེད་པའི་རྗེས་སུ་སོང་བ། 
དགེ་བའི་རྩ་བའི་རྗེས་སུ་སོང་བ། མི་དགེ་བའི་རྩ་བའི་རྗེས་སུ་སོང་བ། འཇིག་རྟེན་གྱི་ཆོས་ཀྱི་རྗེས་སུ་སོང་བ། འཇིག་རྟེན་ལས་འདས་པའི་ཆོས་ཀྱི་རྗེས་སུ་སོང་བ། འཁོར་བའི་རྗེས་སུ་སོང་བ། མྱ་ངན་ལས་འདས་པའི་
རྗེས་སུ་སོང་བ། ཆད་པ་དང་རྟག་པའི་རྗེས་སུ་སོང་བ། ཕུང་པོ་དང་། ཁམས་དང་། སྐྱེ་མཆེད་ཀྱི་རྗེས་སུ་སོང་བ་སྟེ། སྐྱེས་བུ་དམ་པ་དག་བྱང་ཆུབ་ནི་ས་དང་ཆུ་དང་། མེ་དང་། རླུང་དང་། ནམ་མཁའི་རྗེས་སུ་སོང་བའོ། །དེ་ཅིའི་
ཕྱིར་ཞེ་ན། ཆོས་ཐམས་ཅད་ནི་འདི་ལྟ་བུའི་རང་བཞིན་ཏེ། རང་བཞིན་སྟོང་པ་ཉིད་དོ། །དེ་དག་ནི་བརྗོད་པ་གང་དང་གང་གིས་བརྗོད་པར་བྱ་བའི་རྣམ་པ་དེ་ཐམས་ཅད་སྟོང་པ་ཉིད་སྨོས་པར་བྱེད་པའོ། །འདི་ལྟ་སྟེ་དཔེར་ན། ནམ་
མཁའི་དབྱིངས་ནི་ཐམས་ཅད་ཀྱི་རྗེས་སུ་སོང་ངོ་། །དེ་བཞིན་དུ་བྱང་ཆུབ་ཀྱང་ཐམས་ཅད་ཀྱི་རྗེས་སུ་སོང་སྟེ། སྐྱེས་བུ་དམ་པ་དག་བྱང་ཆུབ་སེམས་དཔའ་དེ་ལྟ་བུའི་ཡེ་ཤེས་ལ་མོས་པ་ནི་དམིགས་པ་ཐམས་ཅད་ལ་སྤོབས་པ་
འབྱུང་ཞིང་དེ་ནི་ཚིག་གི་རབ་ཏུ་ཐ་དད་པ་ཤེས་པ་ཐམས་ཅད་ཀྱང་ཐོབ་པར་འགྱུར་ཏེ། ཚུལ་གཅིག་ལ་འཐོབ་པར་འགྱུར་ཏེ། ཚུལ་གཅིག་ལ་འཇུག་པ་དེས་ཐམས་ཅད་མཁྱེན་པ་རྟོགས་སོ། །བྱང་ཆུབ་སེམས་དཔའ་སྤོབས་པའི་
ཕུང་པོས་སྨྲས་པ། ཀྱེ་གྲོགས་པོ་དག་བརྗོད་པ་ཐམས་ཅད་ནི་བརྗོད་དུ་མེད་པ་སྟེ། སྒྲ་ཐམས་ཅད་བསྙད་དུ་མེད་པའོ། །བྱང་ཆུབ་སེམས་དཔའ་ཡེ་ཤེས་དེ་ལ་མོས་པ་ནི་སེམས་མི་གཡོ་བར་འདུག་པ་ཡིན་ཏེ། སྙན་པར་སྨྲས་
པ་དང་། མི་སྙན་པར་སྨྲས་པ་ལ་དགའ་བ་དང་ཞུམ་པ་མེད་དོ། །འདི་ལྟ་སྟེ། དཔེར་ན་རི་ལྷུན་པོའི་ཕུང་པོ་ལ་རླུང་བབ་པ་ལས་སླར་ལོག་ན་རི་ལྷུན་པོ་ནི་གཡོ་བ་འང་མེད། རབ་ཏུ་གཡོ་བའང་མེད་དོ། །རིགས་ཀྱི་བུ་དེ་བཞིན་དུ་

57-1-239a

བྱང་ཆུབ་སེམས་དཔའ་དེ་འདྲ་བའི་ཡེ་ཤེས་རྟོགས་པས་ཐམས་ཅད་ཀྱི་སྒྲ་དང་བརྗོད་པ་ཀུན་བཟོད་དེ། གཡོ་བར་མི་བྱེད། རབ་ཏུ་གཡོ་བར་མི་བྱེད་ཅིང་ཕ་རོལ་མུ་སྟེགས་ཅན་གྱི་སྨྲ་བ་གང་ལ་ཡང་ཆགས་པར་མི་འགྱུར། 
དེ་བཞིན་གཤེགས་པའི་བཀའ་དང་། མུ་སྟེགས་ཅན་གྱི་ཚིག་ཀྱང་ཆོས་མཉམ་པ་ཉིད་དུ་མཐོང་། མཉམ་པ་ཉིད་ལའང་འགལ་བར་མི་བྱེད། མུ་སྟེགས་ཅན་ཐམས་ཅད་ཀྱི་སྤོབས་པ་ཐམས་ཅད་ཀྱང་ཟད་པའི་ཆོས་སུ་མཐོང་། ཟད་པའི་
ཆོས་ཀྱིས་ཆོས་ལ་ཆོས་ཆེན་པོར་ཡང་མི་བྱེད་དེ། སྐྱེས་བུ་དམ་པ་དག་བྱང་ཆུབ་སེམས་དཔའ་དེ་འདྲ་བའི་ཡེ་ཤེས་ལ་མོས་པ་ནི་མྱུར་དུ་ཐམས་ཅད་མཁྱེན་པ་ཐོབ་པར་འགྱུར་རོ། །བྱང་ཆུབ་སེམས་དཔའ་བློ་གྲོས་རྒྱ་མཚོས་སྨྲས་
པ། སྐྱེས་བུ་དམ་པ་དག་བྱང་ཆུབ་སེམས་དཔས་ཐོས་པ་ཐམས་ཅད་གཟུང་བའི་ཕྱིར་བློ་གྲོས་རྒྱ་མཚོ་ལ་སེམས་འཇུག་པ་རྟོགས་པར་བྱའོ། །ཆོས་ཉིད་ལ་སྣ་ཚོགས་མེད་པའི་ཕྱིར་དེས་ཆོས་རོ་གཅིག་པ་ལ་མོས་པར་བྱའོ། །
རྟེན་ཅིང་འབྲེལ་པར་འབྱུང་བ་དང་མི་འགལ་བའི་ཕྱིར་དེས་ཆོས་ཉིད་ལ་བརྟག་པར་བྱའོ། །ཐོག་མ་ནས་མ་སྐྱེས་པའི་ཕྱིར་ཆོས་གང་ཡང་མ་བྲི་བ་དང་མ་འཕེལ་བར་བྱའོ། །བསོད་ནམས་མི་ཟད་པའི་ཕྱིར་སེམས་ཅན་ཐམས་
ཅད་ཉེ་བར་འཚོ་བའི་དགེ་བའི་རྩ་བ་བསྐྱེད་པར་བྱའོ། །ཆད་པ་དང་རྟག་པ་ལས་དབེན་པའི་ཕྱིར་དེས་མཐའ་གཉིས་རྟོགས་པར་བྱའོ། །སེམས་ཀྱི་སྒོམ་པ་ཚད་མེད་པའི་ཕྱིར་དེས་ཆོས་ཐམས་ཅད་ལ་བརྟག་པར་བྱའོ། །ཆོས་
ཡང་དག་པར་མི་བརྗེད་པའི་ཕྱིར་བདག་གི་དྲན་པའི་སྟོབས་བསྐྱེད་པ་ཡང་ཡོངས་སུ་གཞག་པར་བྱའོ། །སེམས་ཅན་ཐམས་ཅད་ལ་སྙོམས་པར་ཆོས་འཆད་པའི་ཕྱིར་དེས་སྙེམས་པ་ཐམས་ཅད་ཡང་དག་པར་བཅོམ་པ་ཡོངས་
སུ་རྫོགས་པར་བྱའོ། །སངས་རྒྱས་ཀྱི་ཆོས་མ་འདྲེས་པ་ལྷུར་བྱེད་པའི་ཕྱིར་མི་དགེ་བའི་ཆོས་ཐམས་ཅད་དང་མི་འགྲོགས་པར་བྱའོ། །སྐྱེས་བུ་དམ་པ་དག་དྲན་པའི་ཡེ་ཤེས་ཀྱི་གོ་ཆ་དེས་ནི་ཐམས་ཅད་མཁྱེན་པ་རྟོགས་པར་ནུས་

57-1-239b

སོ། །བྱང་ཆུབ་སེམས་དཔའ་ལྷུན་པོ་ཆེན་པོས་སྨྲས་པ་འདི་ལྟ་སྟེ། སངས་རྒྱས་ཀྱི་ཡེ་ཤེས་དེ་ནི་འཇིག་རྟེན་ཐམས་ཅད་ལས་མངོན་པར་འཕགས་པའི་ཡེ་ཤེས་ཏེ། དེ་ནི་ཚད་ཡོད་པའི་སྤྱོད་པས་རྟོགས་པར་མི་ནུས་སོ། །དེ་བས་ན་
བསམ་པ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། ཐོས་པ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། དད་པ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། སྦྱིན་པ་འཇིག་རྟེན་
ཐམས་ཅད་ལས་མངོན་པར་འཕགས་པ་དང་། དེ་བཞིན་དུ་ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། བསོད་ནམས་རི་
རབ་ལྷུན་པོ་བཞིན་དུ་མངོན་པར་འཕགས་པས་ཐམས་ཅད་མཁྱེན་པ་རྟོགས་པར་ནུས་སོ། །བྱང་ཆུབ་སེམས་དཔའ་མཐོང་ན་དགའ་བས་སྨྲས་པ། སྐྱེས་བུ་དམ་པ་དག་གང་གི་ཚེ་ན་བྱང་ཆུབ་སེམས་དཔའ་བདག་གི་གཟུགས་ཀྱི་
སེམས་ཡོངས་སུ་དག་པས་གཟུགས་སུ་སྣང་བ་ཡིད་དུ་མི་འོང་བ་གང་ཡང་མིག་གིས་མཐོང་ཞིང་སྣང་བར་མི་འགྱུར། བདག་གི་རྣ་བའི་སེམས་ཡོངས་སུ་དག་པས་སྒྲ་ཡིད་དུ་མི་འོང་བ་གང་ཡང་རྣ་བས་ཐོས་ཤིང་གྲག་པར་མི་འགྱུར། དེ་
བཞིན་དུ་དྲི་ཡང་མ་ཡིན། རོ་ཡང་མ་ཡིན། རེག་ཀྱང་མ་ཡིན། རང་གི་ཡུལ་གྱི་སེམས་ཡོངས་སུ་དག་པས་ཆོས་ཡིད་དུ་མི་འོང་བ་གང་ཡང་ཡིད་ལ་སྣང་བར་མི་འགྱུར། རང་གི་སེམས་ཡོངས་སུ་དག་པས་ཡིད་དགའ་བ་དང་། མི་དགའ་བ་དང་། 
མ་འབྲེལ་ཅིང་སེམས་ཅན་གང་ཡང་སངས་རྒྱས་ཀྱི་ཆོས་ཀྱི་སྣོད་མ་ཡིན་པར་མ་མཐོང་སྟེ། གང་ལོག་པར་ངེས་པ་དེ་དག་ཀྱང་སངས་རྒྱས་ཀྱི་ཆོས་ཀྱི་སྣོད་དུ་གྱུར་པར་མཐོང་ཞིང་། གང་བདག་ཤིན་དུ་དགའ་བར་གྱུར་པའི་དངོས་པོ་དེ་དགའ་
ཞིང་ཡོངས་སུ་གཏོང་ལ་བྱིན་ནས་ཀྱང་མི་འགྱོད་པ་ཡིན་ཏེ། དེ་ལྟར་སྤྱོད་པའི་བྱང་ཆུབ་སེམས་དཔའ་ནི་ཐམས་ཅད་མཁྱེན་པ་རྟོགས་པར་འགྱུར་རོ། །བྱང་ཆུབ་སེམས་དཔའ་རབ་དུ་དགའ་བའི་རྒྱལ་པོས་སྨྲས་པ། གང་གི་ཚེ་ན་སྤྱོས་པ་དང་། 

57-1-240a

བརྒྱད་པ་དང་། སྨད་པ་དང་། བརྙས་པ་དང་། བརྡེགས་པ་དང་། ཚར་བཅད་ན་བྱང་ཆུབ་སེམས་དཔའ་རབ་ཏུ་དགའ་བ་སྐྱེད་ཅིང་གང་ཟག་དེ་ལ་ཡང་དགེ་བའི་བཤེས་གཉེན་དུ་འདུ་ཤེས་སྐྱེད་ལ། བཟོད་པར་བྱེད། བཟོད་པའི་མཐུ་
སྟོན་ཅིང་རབ་ཏུ་དགའ་བ་སྐྱེས་ནས་སྤྱོ་བར་བྱེད་པ་འདི་སུ། གང་ལ་སྤྱོ་བར་བྱ་ཞེས་དེ་ཆོས་ཉིད་ཀྱི་རྗེས་སུ་འཇུག་པར་བྱེད། ནང་གི་སྟོང་པ་ཉིད་ལ་མོས་ཤིང་ཕྱིའི་སྟོང་པ་ཉིད་ལ་ཐེ་ཙོམ་མེད་པས་བདག་ཏུ་ལྟ་བའང་མི་སྐྱེད་ཅིང་བཟོད་ལ། རྐང་པ་དང་
ལག་པ་ཡོངས་སུ་གཏོང་བ་དང་། མིག་དང་མགོ་ཡོངས་སུ་གཏོང་བ་དང་། ཆུང་མ་དང་། བུ་ཕོ་དང་བུ་མོ་ཡོངས་སུ་གཏོང་བ་དང་། རྒྱལ་སྲིད་ཡོངས་སུ་གཏོང་བས་རབ་ཏུ་དགའ་བ་ཡིན། ལུས་དང་སྲོག་ཡོངས་སུ་གཏོང་བས་དགའ་བ་ཡིན་ཏེ། 
འཁོར་ལོས་སྒྱུར་བའི་རྒྱལ་སྲིད་ཐོབ་པས་དགའ་བ་མ་ཡིན་གྱི། ལེགས་པར་བཤད་པ་ཚིགས་སུ་བཅད་པ་གཅིག་ཐོས་པས་ཤིན་དུ་དགའ་བ་ཡིན། བརྒྱ་བྱིན་ཐོབ་པས་དགའ་བ་མ་ཡིན་གྱི། གཞན་ཆོས་འཆད་པ་ལ་ཤིན་དུ་དགའ་བ་ཡིན། 
ཚངས་པ་ཐོབ་པས་དགའ་བ་མ་ཡིན་གྱི། སེམས་ཅན་གཅིག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཞག་ན་རབ་ཏུ་དགའ་བ་ཡིན། སྟོང་གསུམ་རིན་པོ་ཆེས་བཀང་བས་དགའ་བ་མ་ཡིན་གྱི། དེ་བཞིན་གཤེགས་པ་མཐོང་བས་
རབ་ཏུ་དགའ་བ་ཡིན་ཏེ། དེ་ནི་གཞར་ཡང་དབང་པོ་ཉམས་པར་མི་འགྱུར་ཞིང་དགའ་བར་གྱུར་ནས་བྱང་ཆུབ་ཀྱི་ཕྱོགས་ཀྱི་ཆོས་རྣམས་དགའ་ཞིང་མགུ་བའི་སྤྱོད་པ་འདིས་སྒྲུབ་པར་བྱེད་པ་ནི་ཐམས་ཅད་མཁྱེན་པ་རྟོགས་པར་ནུས་སོ། །
བྱང་ཆུབ་སེམས་དཔའ་མཐའ་ཡས་མཐོང་བས་སྨྲས་པ། སྐྱེས་བུ་དམ་པ་དག་གང་གི་ཚེ་ན་བྱང་ཆུབ་སེམས་དཔའ་ཆོས་ཐམས་ཅད་མཐོང་མོད་ཀྱི། བདག་ཏུ་ལྟ་བར་ཡང་མི་ལྟུང་། སངས་རྒྱས་ཀྱི་ཆོས་ཐམས་ཅད་ཤེས་མོད་ཀྱི། རྣམ་
པར་རྟོག་པ་སྤྱོད་པ་ཡང་མ་ཡིན། སངས་རྒྱས་ཐམས་ཅད་མཐོང་མོད་ཀྱི། གཟུགས་ལ་དམིགས་པའི་འདུ་ཤེས་ཀྱང་མི་སྐྱེད། སེམས་ཅན་ཐམས་ཅད་མཐོང་མོད་ཀྱི་སེམས་ཅན་དུ་འདུ་ཤེས་ཀྱང་མི་སྐྱེད། ལས་ཀྱི་རྣམ་པར་སྨིན་པ་

57-1-240b

ཡོངས་སུ་དག་པའི་ཕྱིར་ཤའི་མིག་གསལ་བར་གྱུར་པ་ཡིན། མངོན་པར་ཤེས་པ་ཐོབ་པས་ལྷའི་མིག་དང་ལྡན་པ་ཡིན། ཉོན་མོངས་པ་ཐམས་ཅད་དང་བྲལ་བས་ཤེས་རབ་ཀྱི་མིག་རྟོགས་པར་ཁོང་དུ་ཆུད་པ་ཡིན། སངས་རྒྱས་ཀྱི་ཆོས་མ་
འདྲེས་པ་སྒྲུབ་པས་སངས་རྒྱས་ཀྱི་སྤྱན་ལ་མོས་པ་ཡིན། སྟོབས་བཅུ་ཡོངས་སུ་རྫོགས་པས་ཆོས་ཀྱི་སྤྱན་སྣང་བ་ཐོབ་པ་ཡིན་ཏེ། རིགས་ཀྱི་བུ་ང་འདྲ་བའི་ཡེ་ཤེས་མཐོང་བ་ཡོངས་སུ་རྫོགས་པས་ཐམས་ཅད་མཁྱེན་པ་རྟོགས་པར་ནུས་
སོ། །བྱང་ཆུབ་སེམས་དཔའ་མཐའ་ཡས་དམིགས་པར་གནས་པས་སྨྲས་པ། བྱང་ཆུབ་ནི་ཐམས་ཅད་དམིགས་པ་སྟེ། ཐམས་ཅད་མཁྱེན་པའི་ཡེ་ཤེས་སྒྲུབ་པར་འགྱུར་རོ། །དེ་ཅིའི་ཕྱིར་ཞེ་ན། དམིགས་པ་ཐམས་ཅད་ནི་ནང་ན་ཡང་
མི་གནས། ཕྱི་རོལ་ན་ཡང་མི་གནས། དབུས་ན་ཡང་མི་གནས་པར་བརྟག་པར་བྱའོ། །བྱང་ཆུབ་སེམས་དཔའ་དམིགས་པ་ལ་མི་གནས་པ་ནི་ཉོན་མོངས་པ་ལ་དམིགས་པ་དང་། ལས་ལ་དམིགས་པ་དང་། བདུད་ལ་དམིགས་པས་
ཉམས་པར་མི་འགྱུར་ཏེ། ལས་དང་། ཉོན་མོངས་པ་དང་། བདུད་ལ་དམིགས་པ་ལས་འདས་པའི་བྱང་ཆུབ་སེམས་དཔའ་ཐམས་ཅད་མཁྱེན་པ་རྟོགས་སོ། །བྱང་ཆུབ་སེམས་དཔའ་བདུད་ཀྱི་ལྟ་བ་ཡང་དག་པར་འཇོམ་པས་སྨྲས་པ། 
རིགས་ཀྱི་བུ་བདག་ཏུ་ལྟ་བ་ནི་བདག་ཏུ་ལྟ་བ་ལས་ལྡང་ཞིང་བྱུང་བ་ཡིན། བདུད་ཀྱི་ལས་ནི་ལྟ་བ་ལས་ལྡང་ཞིང་བྱུང་བ་སྟེ། བདག་ཏུ་ལྟ་བ་ཡོངས་སུ་ཤེས་ན་ལྟ་བ་འབྱུང་བར་མི་བྱེད་དོ། །ལྟ་བ་ཡོངས་སུ་ཤེས་ན་ཕུང་པོ་འབྱུང་བར་མི་བྱེད་དོ། །ཕུང་པོ་
ཡོངས་སུ་ཤེས་ན་བདུད་མི་མཐོང་ངོ་། །བདུད་ཀྱི་ཡུལ་ལས་འདའ་བར་བྱ་བའི་ཕྱིར་སྒྲིབ་པ་མེད་པའི་རྣམ་པར་ཐར་པ་ལ་རེག་པར་འགྱུར་རོ། །བྱང་ཆུབ་སེམས་དཔའ་སྒྲིབ་པ་མེད་པའི་རྣམ་པར་ཐར་པ་ཐོབ་ན་ཐམས་ཅད་མཁྱེན་པ་རྟོགས་
སོ། །བྱང་ཆུབ་སེམས་དཔའ་མྱ་ངན་མེད་སྦྱིན་གྱིས་སྨྲས་པ། ལས་ཉེས་པ་བྱེད་པ་ནི་ཕྱིས་འགྱོད་པར་འགྱུར། ལས་ལེགས་པར་བྱེད་པ་ནི་ཕྱིས་མྱ་ངན་བྱེད་པར་མི་འགྱུར་རོ། །དེ་བས་ན་བྱང་ཆུབ་སེམས་དཔས་ལས་ལེགས་པ་བྱེད་པ། 

57-1-241a

ལས་མི་སྨད་པ་བྱེད་པ། ལས་མི་འགྱོད་པ་བྱེད་པ། ལས་ཁ་ན་མ་ཐོ་བ་མེད་པ་བྱེད་པར་བྱའོ། །སེམས་ཅན་མྱ་ངན་གྱི་ཟུག་རྔུས་ཟུག་པ་རྣམས་ཀྱང་མྱ་ངན་ཞི་བར་བྱ་བ་དང་། ཟུག་རྔུ་དང་བྲལ་བར་བྱ་བའི་ཕྱིར་ཆོས་བཤད་
པར་བྱ་སྟེ། དེ་ལྟར་སྤྱོད་པའི་བྱང་ཆུབ་སེམས་དཔའ་ནི་ཐམས་ཅད་མཁྱེན་པ་རྟོགས་སོ། །བྱང་ཆུབ་སེམས་དཔའ་དོན་ཐམས་ཅད་གྲུབ་པས་སྨྲས་པ། རིགས་ཀྱི་བུ་དག་སྐྱེས་བུ་གང་ཟག་ཚུལ་ཁྲིམས་དང་ལྡན་པའི་སེམས་ཀྱི་
སྨོན་པ་འགྲུབ། སྨོན་ལམ་འགྲུབ་པར་འགྱུར་ལ། ཚུལ་ཁྲིམས་ཀྱི་རྩ་བ་ལ་ཡང་བག་བྱེད་པ་རྟེན། བག་བྱེད་པའི་རྩ་བ་ལ་ཡང་བྱང་ཆུབ་ཀྱི་ཕྱོགས་ཀྱི་ཆོས་རྣམས་རྟེན། བྱང་ཆུབ་ཀྱི་ཕྱོགས་ཀྱི་ཆོས་ཀྱི་རྩ་བ་ལ་ཡང་ཐམས་ཅད་མཁྱེན་
པ་རྟེན་ཏོ། །དེ་བས་ན་བྱང་ཆུབ་སེམས་དཔའ་བག་བྱེད་པ་དང་། བྱང་ཆུབ་ཀྱི་ཕྱོགས་ཀྱི་ཆོས་ལ་བརྟེན་པ་ནི་ཐམས་ཅད་མཁྱེན་པ་རྟོགས་སོ། །ལྷའི་བུ་ཀུན་ནས་མེ་ཏོག་གིས་སྨྲས་པ། རིགས་ཀྱི་བུ་དག་འདི་ལྟ་སྟེ། དཔེར་ན་ཤིང་མེ་ཏོག་
གིས་བརྒྱན་པ་ནི་འགྲོ་བ་མང་པོའི་ཉེ་བར་འཚོ་བ་ཡིན་ནོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་ཐར་པའི་ཆོས་ཀྱི་མེ་ཏོག་རྒྱས་པ་ནི་འགྲོ་བ་མང་པོའི་ཉེ་བར་འཚོ་བ་ཡིན་ནོ། །རིགས་ཀྱི་བུ་དག་འདི་ལྟ་
སྟེ། དཔེར་ན་ལྷ་རྣམས་ཀྱི་ཤིང་པ་རི་ཡ་ཏྲ་ཀ་ཀོ་བ་དི་ར་མེ་ཏོག་རྒྱས་ན་སུམ་ཅུ་རྩ་གསུམ་གྱི་ལྷའི་བུ་རྣམས་མངོན་པར་འདུ་བར་འགྱུར་རོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་ཐར་པའི་ཆོས་ཀྱི་མེ་
ཏོག་རྒྱས་ན་ལྷ་དང་བཅས་པའི་འཇིག་རྟེན་མངོན་པར་འདུ་བར་འགྱུར་རོ། །རིགས་ཀྱི་བུ་དག་འདི་ལྟ་སྟེ། དཔེར་ན་ལྷའི་ནོར་བུ་རིན་པོ་ཆེ་སྐྱོན་ཐམས་ཅད་དང་བྲལ་ལ་ཡོན་ཏན་ཐམས་ཅད་དང་ལྡན་པ་དེ་བཞིན་དུ། རིགས་ཀྱི་བུ་བྱང་ཆུབ་སེམས་
དཔའ་བསམ་པ་ཡོངས་སུ་དག་པ་སྐྱོན་ཐམས་ཅད་དང་བྲལ་ལ་ཡོན་ཏན་ཐམས་ཅད་དང་ལྡན་པས་ཐམས་ཅད་མཁྱེན་པ་རྟོགས་སོ། །ལྷའི་བུ་མེ་ཏོག་འོད་ཟེར་ཅན་གྱིས་སྨྲས་པ། རིགས་ཀྱི་བུ་འདི་ལྟ་སྟེ། དཔེར་ན་ཉི་མའི་འོད་ཟེར་བཏང་ན་མུན་

57-1-241b

པ་བསལ་ཅིང་གཟུགས་ཀྱི་རྣམ་པ་ཐམས་ཅད་སྣང་བར་འགྱུར་རོ། །རིགས་ཀྱི་བུ་དག་དེ་བཞིན་དུ་བྱང་ཆུབ་སེམས་དཔའ་ཤེས་རབ་ཀྱི་སྣང་བའི་འོད་ཟེར་དང་ལྡན་པ་ཡང་གང་གི་ཚེ་ན་ཆོས་ཀྱི་སྣང་བ་གཏོང་བ་དེའི་ཚེ། མ་རིག་པ་དང་གླེན་པའི་མུན་པས་
བསྒྲིབས་པའི་སེམས་ཅན་རྣམས་ལ་སྣང་བ་ཆེན་པོ་བྱེད་ཅིང་ཆོས་ཀྱི་རང་བཞིན་ཡང་སྟོན་ཏེ། མུན་པས་ནི་སྣང་བ་ཟིལ་གྱིས་ནོན་པར་མི་འགྱུར་གྱི། སྣང་བས་ནི་ལམ་རྟོགས་པར་ནུས་པས་བྱང་ཆུབ་སེམས་དཔའ་ལམ་ལ་གནས་ན་སེམས་
ཅན་ལམ་ངན་པར་ཞུགས་པའི་རྣམས་ལ་ཡང་དག་པའི་ལམ་སྟོན་ཏེ། བྱང་ཆུབ་སེམས་དཔའ་ལམ་ལ་གནས་ན་ཐམས་ཅད་མཁྱེན་པ་རྟོགས་སོ། །ལྷའི་བུ་མེ་ཏོག་མན་དཱ་ར་བའི་དྲིས་སྨྲས་པ། །རིགས་ཀྱི་བུ་དག་འདི་ལྟ་སྟེ་དཔེར་ན། མེ་
ཏོག་མན་དཱ་ར་བའི་ཁོ་ར་ཁོར་ཡུག་དཔག་ཚད་གཅིག་ཏུ་དྲིས་ཁྱབ་པར་བྱེད་དེ། དྲི་དེ་ཡང་རྣམ་པར་རྟོག་པ་མེད་དོ། །རིགས་ཀྱི་བུ་དག་དེ་བཞིན་དུ་བྱང་ཆུབ་སེམས་དཔའ་གཏོང་བ་དང་། ཚུལ་ཁྲིམས་དང་། ཐོས་པ་དང་། ཏིང་ངེ་འཛིན་དང་། ཤེས་
རབ་ལ་གནས་པ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཆོས་ཀྱི་དྲིས་ཁྱབ་པར་བྱེད་དེ། དྲི་དེ་ཡང་ཉོན་མོངས་པའི་ནད་ཐམས་ཅད་སེལ་བར་བྱེད་དོ། །དེ་བས་ན་བྱང་ཆུབ་སེམས་དཔའ་ཆོས་ཀྱི་དྲི་དང་ལྡན་ན་ཐམས་ཅད་མཁྱེན་
པ་རྟོགས་སོ། །ལྷའི་བུ་ཆོས་ལ་གནས་པ་རྟག་ཏུ་བརྩོན་པས་སྨྲས་པ། ཀྱེ་གྲོགས་པོ་དག་བྱང་ཆུབ་སེམས་དཔའ་བརྩོན་པས་བྱང་ཆུབ་པར་འགྱུར་གྱི། མི་བརྩོན་པས་ནི་མ་ཡིན་ནོ། །དེ་བས་ན་བྱང་ཆུབ་སེམས་དཔའ་རྟག་པར་
བརྩོན་ཞིང་དགེ་བའི་རྩ་བ་ལ་ཆོག་མི་ཤེས་པར་བྱའོ། །དེས་ཆོས་བརྒྱད་ལ་བརྩོན་པར་བྱའོ། །བརྒྱད་པོ་གང་ཞེ་ན། འདི་ལྟ་སྟེ། ཕ་རོལ་དུ་ཕྱིན་པ་དྲུག་གི་སྦྱོར་བ་ལ་བརྩོན་པར་བྱ་བ་དང་ཚངས་པའི་གནས་བཞི་སྒྲུབ་པ་ལ་མངོན་པར་ཤེས་པ་
ལྔ་ཤེས་ཤིང་རྟོགས་པར་ཁོང་དུ་ཆུད་པའི་ཡེ་ཤེས་དང་། བསྡུ་བའི་དངོས་པོ་བཞིས་སེམས་ཅན་ཡོངས་སུ་སྨིན་པར་བྱེད་པ་སྟེ། བཞི་གང་ཞེ་ན། སྦྱིན་པ་དང་། ཚིག་འཇམ་པོ་དང་། དོན་སྤྱད་པ་དང་། དོན་མཚུངས་པར་བྱ་བ་དག་དང་། 

57-1-242a

རྣམ་པར་ཐར་པའི་སྒོ་གསུམ་ལ་བཟོད་པ་ཐོབ་པ་དང་། གཞན་སངས་རྒྱས་ཀྱི་ཆོས་ལ་གཞོག་པ་དང་། བདག་བྱང་ཆུབ་ཀྱི་སེམས་མི་གཏོང་བ་དང་། ཐབས་མཁས་པས་སྔོ་བར་བྱེད་པ་དང་། གུས་པར་བྱས་ཤིང་དམ་པའི་
ཆོས་ཡོངས་སུ་འཛིན་པ་སྟེ། ཆོས་བརྒྱད་པོ་དེ་དག་ལ་བརྩོན་པའི་བྱང་ཆུབ་སེམས་དཔས་ཐམས་ཅད་མཁྱེན་པ་རྟོགས་སོ། །དེ་ནས་འཇམ་དཔལ་གཞོན་ནུར་གྱུར་པས་སྐྱེས་བུ་དམ་པ་དེ་དག་དང་། ལྷའི་བུ་དེ་དག་ལ་འདི་སྐད་ཅེས་སྨྲས་སོ། །
ཀྱེ་གྲོགས་པོ་དག་བྱང་ཆུབ་སེམས་དཔའ་གང་མ་འབྲེལ་པ་དང་། མི་བརྩོན་པ་དེས་ཐམས་ཅད་མཁྱེན་པ་རྟོགས་སོ། །དེ་ཅིའི་ཕྱིར་ཞེ་ན། མ་འབྲེལ་ཅེས་བྱ་བ་ནི་ཁམས་གསུམ་དང་ངོ་། །མི་བརྩོན་ཞེས་བྱ་བ་ནི་རྟོག་པ་དང་། རྣམ་པར་
རྟོག་པ་དང་། ཡོངས་སུ་རྟོག་པ་ཐམས་ཅད་ལའོ། །མ་འབྲེལ་ཅེས་བྱ་བ་ནི་ནང་དང་ངོ་། །མི་བརྩོན་ཞེས་བྱ་བ་ནི་ཕྱི་ལའོ། །མ་འབྲེལ་ཅེས་བྱ་བ་ནི་ཉན་ཐོས་ཀྱི་ས་དང་ངོ་། །མི་བརྩོན་ཞེས་བྱ་བ་ནི་རང་སངས་རྒྱས་ཀྱི་ས་ལའོ། །མ་འབྲེལ་ཅེས་བྱ་
བ་ནི་འཁོར་བ་ན་སྤྱོད་པའི་ཉོན་མོངས་པ་དང་ཉེ་བའི་ཉོན་མོངས་པ་རྣམས་དང་ངོ་། །མི་བརྩོན་ཞེས་བྱ་བ་ནི་བྱིས་པ་ལྟ་བུ་སོ་སོའི་སྐྱེ་བོའི་ཆོས་ཐམས་ཅད་ལའོ། །མ་འབྲེལ་ཅེས་བྱ་བ་ནི་མིང་དང་ངོ་། །མི་བརྩོན་ཞེས་བྱ་བ་ནི་གཟུགས་ལའོ། །
མ་འབྲེལ་ཅེས་བྱ་བ་ནི་རྒྱུ་དང་ངོ་། །མི་བརྩོན་ཞེས་བྱ་བ་ནི་འབྲས་བུ་ལའོ། །མ་འབྲེལ་ཅེས་བྱ་བ་ནི་ལྟ་བའི་རྣམ་པ་དང་ངོ་། །མི་བརྩོན་ཞེས་བྱ་བ་ནི་ལྟ་བ་དང་བྲལ་བ་ལའོ། །མ་འབྲེལ་ཅེས་བྱ་བ་ནི་ཆགས་པ་དང་ངོ་། །མི་བརྩོན་ཞེས་བྱ་བ་ནི་ཁོང་
ཁྲོ་བ་ལའོ། །མ་འབྲེལ་ཅེས་བྱ་བ་ནི་ངར་འཛིན་པ་དང་ངོ་། །མི་བརྩོན་ཞེས་བྱ་བ་ནི་བདག་གིར་འཛིན་པ་ལའོ། །མ་འབྲེལ་ཅེས་བྱ་བ་ནི་སེར་སྣ་དང་ངོ་། །མི་བརྩོན་ཞེས་བྱ་བ་ནི་སྦྱིན་པའི་སྙེམས་པ་ལའོ། །མ་འབྲེལ་ཅེས་བྱ་བ་ནི་
ངང་ཚུལ་ངན་པ་དང་ངོ་། །མི་བརྩོན་ཞེས་བྱ་བ་ནི་ཚུལ་ཁྲིམས་སྙེམས་པ་ལའོ། །མ་འབྲེལ་ཅེས་བྱ་བ་ནི་གནོད་སེམས་དང་ངོ་། །མི་བརྩོན་ཞེས་བྱ་བ་ནི་བཟོད་པའི་སྙེམས་པ་ལའོ། །མ་འབྲེལ་ཅེས་བྱ་བ་ནི་ལེ་ལོ་དང་ངོ་། །མི་བརྩོན་ཞེས་

57-1-242b

བྱ་བ་ནི་བརྩོན་འགྲུས་སྙེམས་པ་ལའོ། །མ་འབྲེལ་ཅེས་བྱ་བ་ནི་དྲན་པ་ཉམས་པ་དང་ངོ་། །མི་བརྩོན་ཞེས་བྱ་བ་ནི་བསམ་གཏན་སྙེམས་པ་ལའོ། །མ་འབྲེལ་ཅེས་བྱ་བ་ནི་ཤེས་རབ་འཆལ་པ་དང་ངོ་། །མི་བརྩོན་ཞེས་བྱ་བ་
ནི་ཤེས་རབ་སྙེམས་པ་ལའོ། །མ་འབྲེལ་ཅེས་བྱ་བ་ནི་དགེ་བ་དང་ངོ་། །མི་བརྩོན་ཞེས་བྱ་བ་ནི་དགེ་བའི་རྩ་བ་སྒྲོ་འདོགས་པ་ལའོ། །མ་འབྲེལ་ཅེས་བྱ་བ་ནི་འཇིག་རྟེན་གྱི་ཆོས་དང་ངོ་། །མི་བརྩོན་ཞེས་བྱ་བ་ནི་འཇིག་རྟེན་ལས་
འདས་པའི་ཆོས་མངོན་པར་བྱ་བར་ཆགས་པ་ལའོ། །མ་འབྲེལ་ཅེས་བྱ་བ་ནི་འདུས་བྱས་དང་ངོ་། །མི་བརྩོན་ཞེས་བྱ་བ་ནི་འདུས་མ་བྱས་པའི་ཆོས་ལ་ཡོངས་སུ་རྟོག་པ་ལའོ། །མ་འབྲེལ་ཅེས་བྱ་བ་ནི་ཁ་ན་མ་ཐོ་བ་དང་བཅས་པ་དང་
ངོ་། །མི་བརྩོན་ཞེས་བྱ་བ་ནི་ཁ་ན་མ་ཐོ་བ་མེད་པའི་ཆོས་སྒྲོ་འདོགས་པ་ལའོ། །མ་འབྲེལ་ཅེས་བྱ་བ་ནི་ཟག་པ་དང་བཅས་པ་དང་ངོ་། །མི་བརྩོན་ཞེས་བྱ་བ་ནི་ཟག་པ་མེད་པའི་ཟད་པའི་ཆོས་སུ་སྙེམས་པ་ལའོ། །ཀྱེ་གྲོགས་པོ་དག་
དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་འབྲེལ་པ་དང་། མ་འབྲེལ་པར་ལྟ་བ་དང་བྲལ་བས་ཐམས་ཅད་མཁྱེན་པ་རྟོགས་མོད་ཀྱི། ཡང་ཀྱེ་གྲོགས་པོ་དག་ཐམས་ཅད་མཁྱེན་པ་ནི་མི་རྟོགས་སོ། །དེ་ཅིའི་
ཕྱིར་ཞེ་ན། བྱེད་པས་ཐམས་ཅད་མཁྱེན་པ་རྟོགས་པར་མི་འགྱུར་རོ། །དེ་ཅིའི་ཕྱིར་ཞེ་ན། བྱེད་པ་དང་བྲལ་བ་ནི་ཐམས་ཅད་མཁྱེན་པ་ཡིན་ཏེ། ཐམས་ཅད་མཁྱེན་པ་ལ་རྟོགས་པར་བྱེད་པ་སུ་ཡང་མེད་དོ། །ཐམས་ཅད་མཁྱེན་
པ་ནི་གཟུགས་ཀྱིས་ཀྱང་མི་རྟོགས། ཚོར་བས་མ་ཡིན་འདུ་ཤེས་ཀྱིས་ཀྱང་མ་ཡིན། འདུ་བྱེད་ཀྱིས་ཀྱང་མ་ཡིན། རྣམ་པར་ཤེས་པས་མི་རྟོགས་སོ། །ཐམས་ཅད་མཁྱེན་པ་ནི་ཆོས་ཀྱིས་ཀྱང་མི་རྟོགས། ཆོས་མ་ཡིན་པས་
ཀྱང་མི་རྟོགས་སོ། །ཐམས་ཅད་མཁྱེན་པ་ནི་སྦྱིན་པས་ཀྱང་མི་རྟོགས་སོ། །དེ་ཅིའི་ཕྱིར་ཞེ་ན། སྦྱིན་པ་ཉིད་ཐམས་ཅད་མཁྱེན་པའོ། །ཐམས་ཅད་མཁྱེན་པ་ནི་ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་

57-1-243a

གཏན་དང་། ཤེས་རབ་ཀྱིས་ཀྱང་མི་རྟོགས་སོ། །དེ་ཅིའི་ཕྱིར་ཞེ་ན། ཤེས་རབ་ཉིད་ཐམས་ཅད་མཁྱེན་པའོ། །ཡང་ཀྱེ་གྲོགས་པོ་དག་ཐམས་ཅད་མཁྱེན་པ་ནི་འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་
ཡིན་ནོ། །དེ་ཅིའི་ཕྱིར་ཞེ་ན། ཀྱེ་གྲོགས་པོ་དག་ཐམས་ཅད་མཁྱེན་པ་ནི་དུས་གསུམ་ལས་འདས་པའི་ཕྱིར་རོ། །ཡང་ཀྱེ་གྲོགས་པོ་དག་ཐམས་ཅད་མཁྱེན་པ་ནི་མིག་གི་རྣམ་པར་ཤེས་པས་རྣམ་པར་ཤེས་པར་བྱ་བ་མ་ཡིན་ནོ། །ཀྱེ་
གྲོགས་པོ་དག་ཐམས་ཅད་མཁྱེན་པ་ནི་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་རྣམ་པར་ཤེས་པས་རྣམ་པར་ཤེས་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཀྱེ་གྲོགས་པོ་དག་ཐམས་ཅད་མཁྱེན་པ་ནི་ཡུལ་ཐམས་ཅད་ལས་འདས་
པའོ། །ཀྱེ་གྲོགས་པོ་དག་ཐམས་ཅད་མཁྱེན་པ་རྟོགས་པར་འདོད་པས་ཐམས་ཅད་མཁྱེན་པ་ཇི་ལྟར་གནས་པ་དེ་བཞིན་དུ་གནས་པར་བྱའོ། །སྨྲས་པ། ཐམས་ཅད་མཁྱེན་པ་ཇི་ལྟར་གནས་པ་ལགས། སྨྲས་པ། གང་ཆོས་ཐམས་
ཅད་ལ་མི་གནས་པ་དེ་ནི་ཐམས་ཅད་མཁྱེན་པའོ། །ཆོས་ཐམས་ཅད་ལ་མཉམ་པ་ཉིད་དེ་ནི་ཐམས་ཅད་མཁྱེན་པ་སྟེ། སོ་སོའི་སྐྱེ་བོའི་ས་མཉམ་པ་ཉིད་དང་། སངས་རྒྱས་ཀྱི་ཆོས་སུ་མཉམ་ཞིང་དེ་ལྟར་ཆོས་ཐམས་ཅད་མཉམ་པ་དེ་ནི་
ཐམས་ཅད་མཁྱེན་པའོ། །བྱང་ཆུབ་སེམས་དཔས་འབྱུང་བ་ཆེན་པོ་བཞི་ལས་བྱུང་བའི་ལུས་དེ་ཉིད་མ་གཏོགས་པར་གཞན་དུ་ཐམས་ཅད་མཁྱེན་པ་བཙལ་བར་མི་བྱའོ། །དེ་ཅིའི་ཕྱིར་ཞེ་ན། ལུས་དེ་ནི་དངོས་པོ་མེད་པའོ། །ལུས་ཤེས་
བྱ་བ་དེ་ནི་དགེ་བ་དང་མི་དགེ་བའི་ཆོས་ལ་ལྷུན་གྱིས་གྲུབ་པའོ། །ལུས་ཤེས་བྱ་བ་དེ་ནི་བདག་མ་ཡིན་པ་དང་བདག་མེད་པའོ། །ལུས་ཤེས་བྱ་བ་དེ་ནི་མ་བྱུང་བ་ཡང་དག་པར་མ་བྱུང་བ་སྟེ། དེ་ལ་གདགས་པ་མེད་དོ། །གང་དེ་ལ་གདགས་
པ་དེ་ཡང་མ་བྱུང་བའོ། །གང་དེ་མཐོང་བ་དེའང་མ་བྱུང་བའོ། །གང་མ་བྱུང་བ་དེ་ནི་ཡང་དག་པར་མ་བྱུང་བའོ། །གང་ཡང་དག་པར་མ་བྱུང་བ་དེ་ནི་མི་ཤེས་པ་དང་མི་རྟོགས་པའོ། །གང་མི་ཤེས་པ་དང་མི་རྟོགས་པ་དེ་ནི་ཐམས་ཅད་མཁྱེན་པའོ། །

57-1-243b

བསྟན་པ་འདི་བསྟན་པའི་ཚེ་ལྷའི་བུ་ཉིས་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ལྷའི་བུ་ཁྲི་ཉིས་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེ་ནས་བྱང་ཆུབ་སེམས་དཔའ་སེམས་
དཔའ་ཆེན་པོ་སྤོབས་པའི་ཕུང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཚུར་སྤྱོན། དེ་བཞིན་གཤེགས་པའི་སྤྱན་སྔར་དོང་ལ། བྱང་ཆུབ་སེམས་དཔས་ཇི་ལྟ་བུར་བྱ་བ་དེ་བཞིན་གཤེགས་པ་ལ་
མངོན་སུམ་དུ་ཞུའོ། །དེ་ནས་འཇམ་དཔལ་གཞོན་ནུར་གྱུར་པས་སའི་ཕྱོགས་དེ་ཉིད་དུ། བཅོམ་ལྡན་འདས་ཤཱཀྱ་ཐུབ་པའི་ཁ་དོག་དང་། དབྱིབས་དང་། ཆུ་ཞེང་འདྲ་བའི་དེ་བཞིན་གཤེགས་པ་ཞིག་མངོན་པར་སྤྲུལ་ཏོ། །དེ་ནས་
འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པའི་ཕུང་པོ་ལ་འདི་སྐད་ཅེས་སྨྲས་སོ། །རིགས་ཀྱི་བུ་བྱང་ཆུབ་སེམས་དཔས་ཇི་ལྟ་བུར་བྱ་བ་དེ་བཞིན་གཤེགས་པ་མངོན་དུ་བཞུགས་པ་འདི་ལ་
ཞུས་ཤིག །དེ་ནས་སྤྲུལ་པའི་དེ་བཞིན་གཤེགས་པ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པའི་ཕུང་པོས་བཅོམ་ལྡན་འདས་བྱང་ཆུབ་སེམས་དཔས་ཇི་ལྟ་བུར་བགྱི་ཞེས་དེ་སྐད་གསོལ་པ་དང་། དེས་བཀའ་
སྩལ་པ། ང་ཅི་འདྲ་བ་ལྟར་བྱང་ཆུབ་སེམས་དཔས་ཀྱང་དེ་བཞིན་དུ་བྱའོ། །གསོལ་པ། འོ་ན་བཅོམ་ལྡན་འདས་ཇི་འདྲ། བཅོམ་ལྡན་འདས་དེས་བཀའ་སྩལ་པ། སྦྱིན་པ་མ་སྤྱད། ཚུལ་ཁྲིམས་མ་སྤྱད། བཟོད་པ་མ་སྤྱད། བརྩོན་
འགྲུས་མ་སྤྱད། བསམ་གཏན་མ་སྤྱད། ཤེས་རབ་མ་སྤྱད། འདོད་པའི་ཁམས་སུ་མ་སྤྱད། གཟུགས་ཀྱི་ཁམས་སུ་མ་སྤྱད། གཟུགས་མེད་པའི་ཁམས་སུ་མ་སྤྱད། ལུས་ཀྱིས་མ་སྤྱད། ངག་གིས་མ་སྤྱད། ཡིད་ཀྱིས་མ་སྤྱད་པ་
སྟེ། ཐམས་ཅད་དུ་མ་སྤྱད་ཅིང་མ་ཞུགས་པའོ། །རིགས་ཀྱི་བུ་དེ་ཇི་སྙམ་དུ་སེམས། ཇི་སྤྲུལ་པས་སྤྱད་དམ། གསོལ་པ། བཅོམ་ལྡན་འདས་སྤྲུལ་པས་མ་སྤྱད་དོ། །བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔས་དེ་ལྟར་བྱའོ། །

57-1-244a

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པའི་ཕུང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་དེ་བཞིན་གཤེགས་པ་འདི་སྤྲུལ་པ་མ་ཡིན་གྲང་། ངས་སྨྲས་པ། རིགས་ཀྱི་བུ་ཆོས་
ཐམས་ཅད་ནི་སྤྲུལ་པའི་རང་བཞིན་དུ་ངེས་ཏེ། སྒྱུ་མའི་མཚན་ཉིད་ལས་མི་ལྡོག་གོ། །སྨྲས་པ། འཇམ་དཔལ་དེ་བཞིན་ནོ། །ཆོས་ཐམས་ཅད་ནི་སྤྲུལ་པའི་རང་བཞིན་ཅན་ཏེ། སྒྱུ་མའི་མཚན་ཉིད་ལས་མི་ལྡོག་གོ། །སྨྲས་པ། ཆོས་ཐམས་ཅད་
སྤྲུལ་པའི་རང་བཞིན་ཅན་ཡིན་ན། ཁྱོད་ཅིའི་ཕྱིར་དེ་བཞིན་གཤེགས་པ་འདི་སྤྲུལ་པ་མ་ཡིན་གྲང་སྙམ་དུ་བྱེད་པར་གྱུར། སྨྲས་པ། སུས་སྤྲུལ། སྨྲས་པ། བདག་གིས་ལས་ཀྱི་རྣམ་པར་སྨིན་པ་ཡོངས་སུ་དག་པས་སྤྲུལ་གྱིས། འདི་ལ་རང་བཞིན་གྱིས་བདག་
གམ། སེམས་ཅན་ནམ། སྲོག་གམ། གང་ཟག་དག་སངས་རྒྱས་སུ་གནས་པ་འམ། སོ་སོའི་སྐྱེ་བོར་གནས་པ་ནི་མ་ཡིན་ནོ། །དེ་ནས་དེ་བཞིན་གཤེགས་པའི་སྐུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པའི་ཕུང་པོས་འདི་སྐད་ཅེས་
གསོལ་ཏོ། །བཅོམ་ལྡན་འདས་ཀྱིས་གང་ལ་བསླབས་ནས་བྱང་ཆུབ་ཐོབ་པར་གྱུར། བཀའ་སྩལ་པ། རིགས་ཀྱི་བུ་མི་སློབ་པ་ནི་བྱང་ཆུབ་སེམས་དཔའི་སློབ་པའོ། །མི་སྡོམ་པ་ནི་བྱང་ཆུབ་སེམས་དཔའི་སློབ་པའོ། །མི་འཇིགས་པ་ནི་བྱང་ཆུབ་
སེམས་དཔའི་སློབ་པའོ། །མི་རྟོག་པ་ནི་བྱང་ཆུབ་སེམས་དཔའི་སློབ་པའོ། །མི་སློབ་པ་ནི་བྱང་ཆུབ་སེམས་དཔའི་སློབ་པའོ། །རིགས་ཀྱི་བུ་གནས་མེད་པ་དང་། མི་སྙེམས་པ་དང་། མ་སྤྲོས་པ་དང་། མི་ལེན་པ་དང་། མི་གཏོང་བ་དང་། མི་རྒྱུ་བ་དང་། ཡི་གེ་
མེད་པ་དང་། མི་སྐྱེ་བ་དང་། མི་འགག་པ་དང་། མ་འོངས་པ་དང་། མ་སོང་བ་དང་། མི་གནས་པ་དང་། མཚན་མ་མེད་པ་དང་། དངོས་པོ་མེད་པ་དང་། མི་དམིགས་པ་དང་། འདུ་ཤེས་ཐམས་ཅད་དང་བྲལ་བ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་
རྣམས་ཀྱི་སློབ་པ་སྟེ། གང་དེ་ལྟར་སློབ་པ་དེ་དག་ནི་ཡང་དག་པར་སློབ་པའོ། །གང་དེ་ལྟར་སློབ་པ་དེ་དག་ནི་གང་ལ་འང་ཞེ་སྡང་བ་མེད་དོ། །གང་དེ་ལྟར་སློབ་པ་དེ་དག་ནི་གང་དུ་འང་ཆགས་པ་མེད་དོ། །གང་དེ་ལྟར་སློབ་པ་དེ་དག་ནི་གང་དུ་

57-1-244b

ཡང་ཞེན་པ་མེད་དོ། །གང་ལས་ཀྱང་གྲོལ་བ་མེད་དོ། །གང་དེ་ལྟར་སློབ་པ་དེ་དག་ནི་གང་དུ་ཡང་འདོད་ཆགས་པ་མེད་དོ། །གང་ནས་ཀྱང་འདོད་ཆགས་དང་བྲལ་བ་མེད་དོ། །ཞེ་སྡང་མེད་དོ། །གཏི་མུག་མེད་དོ། །གང་དེ་ལྟར་སློབ་པ་
དེ་དག་ནི་སློབ་འདོད་པ་ཞེས་བྱའོ། །གང་སློབ་འདོད་པ་དེ་དག་ནི་འགྲོ་བ་གང་དུ་ཡང་མི་འགྲོའོ། །མི་འོང་ངོ་། །དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
རྫོགས་པར་འཚང་རྒྱ་བར་འདོད་པས་ང་ཇི་ལྟ་བ་བཞིན་དུ་འཁོར་བ་ཡང་མེད། མྱ་ངན་ལས་འདའ་བ་ཡང་མེད། གཏོང་བ་ཡང་མེད། ལེན་པ་ཡང་མེད། ཚུལ་ཁྲིམས་ཀྱང་མེད། ངང་ཚུལ་ངན་པ་ཡང་མེད། བཟོད་པ་ཡང་མེད། 
གནོད་སེམས་ཀྱང་མེད། བརྩོན་འགྲུས་ཀྱང་མེད། ལེ་ལོ་ཡང་མེད། བསམ་གཏན་ཡང་མེད། གཡེང་བ་ཡང་མེད། ཤེས་རབ་ཀྱང་མེད། ཤེས་རབ་འཆལ་པ་ཡང་མེད། སློབ་པ་ཡང་མེད། མི་སློབ་པ་ཡང་མེད། སྤྱོད་པ་ཡང་
མེད། མི་སྤྱོད་པ་ཡང་མེད་ཅིང་། ང་ཇི་ལྟ་བ་བཞིན་དུ་ཐོབ་པ་ཡང་མེད། མ་ཐོབ་པ་ཡང་མེད། མངོན་པར་བྱ་བ་ཡང་མེད། བྱང་ཆུབ་ཀྱང་མེད། སངས་རྒྱས་ཀྱི་ཆོས་རྣམས་ཀྱང་མེད། བདག་ཏུ་འདུ་ཤེས་པ་ཡང་མེད། སེམས་ཅན་
དུ་འདུ་ཤེས་པ་ཡང་མེད། སྲོག་ཏུ་འདུ་ཤེས་པ་ཡང་མེད། གང་ཟག་ཏུ་འདུ་ཤེས་པ་ཡང་མེད། ཆོས་སུ་འདུ་ཤེས་པ་ཡང་མེད། འདུ་ཤེས་པ་ཉིད་ཀྱང་མེད། འདུ་ཤེས་མེད་པའང་མ་ཡིན་པར་ངའི་རྗེས་སུ་བསླབ་པར་
བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཆོས་ཐམས་ཅད་ནི་སྒྱུ་མའི་མཚན་ཉིད་ཀྱི་རང་བཞིན་ཡིན་པ་དང་། ཐ་དད་པར་གྱུར་པ་མེད་པས་མི་འགྱུར་བའོ། །རིགས་ཀྱི་བུ་ཆོས་ཐམས་ཅད་ནི་སོ་སོ་ཐ་དད་པ་མེད་པས་གཉིས་སུ་
མེད་པའོ། །རིགས་ཀྱི་བུ་ཆོས་ཐམས་ཅད་ནི་མིག་གི་ལམ་ལས་འདས་པས་བལྟར་མི་སྣང་བའོ། །རིགས་ཀྱི་བུ་ཆོས་ཐམས་ཅད་ནི་ཁྱད་པར་མེད་པའི་ཕྱིར་མཉམ་པའོ། །རིགས་ཀྱི་བུ་ཆོས་ཐམས་ཅད་ནི་གཡོ་

57-1-245a

བ་མེད་ཅིང་བྱེད་པ་མེད་པའི་ཕྱིར་གླེན་པ་སྟེ། དེ་དག་ལ་གདགས་པ་མེད་དོ། །གདགས་པ་མེད་པའི་ཆོས་རྣམས་ནི་ཤིན་དུ་མ་སྐྱེས་པའོ། །གང་དེ་ལྟར་མོས་པ་དེ་དག་ནི་གྲོལ་བས་མི་སྙེམས། སྤྱོད་པས་མི་སྙེམས། 
བྱང་ཆུབ་ཀྱིས་མི་སྙེམས་སོ། །རིགས་ཀྱི་བུ་དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ནི་འདི་འདྲ་བའི་སློབ་པ་དང་། སྤྱོད་པ་བཤད་པའི་ཚེ་མི་འཇིགས། མི་དངང་། སྐྲག་པར་མི་འགྱུར་ཏེ། དེ་ནི་བྱང་ཆུབ་སེམས་དཔའ་
ཞེས་བྱའོ། །རིགས་ཀྱི་བུ་འདི་ལྟ་སྟེ། དཔེར་ན་ནམ་མཁའི་དབྱིངས་ནི་མེས་མི་འཇིགས། རླུང་གིས་མི་འཇིགས། ཆར་པས་མི་འཇིགས། ཐན་པས་མི་འཇིགས། རྡུལ་གྱིས་མི་འཇིགས། དུ་བས་མི་འཇིགས། སྤྲིན་གྱི་ཕུང་པོས་
མི་འཇིགས། གློག་གིས་མི་འཇིགས་སོ། །དེ་ཅིའི་ཕྱིར་ཞེ་ན། ནམ་མཁའི་དབྱིངས་ནི་གཟུང་དུ་མེད་པའི་ཕྱིར་རོ། །རིགས་ཀྱི་བུ་དེ་བཞིན་དུ་བྱང་ཆུབ་སེམས་དཔས་ཀྱང་ཆོས་ཐམས་ཅད་ཀྱིས་མི་འཇིགས་པར་བྱའོ། །བདེ་བ་དང་སྡུག་
བསྔལ་བ་ཐམས་ཅད་ལ་མི་བསམ་པར་བྱ་སྟེ། བྱང་ཆུབ་སེམས་དཔའ་སེམས་ནམ་མཁའ་དང་མཚུངས་པས་བདུད་ཀྱི་སྡེ་ལས་རྒྱལ་བར་ནུས་སོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་
ནུས་སོ། །སེམས་ཅན་རྣམས་ཀྱི་དོན་བྱེད་ནུས་སོ། །དེ་ནས་དེ་བཞིན་གཤེགས་པ་སྤྲུལ་པ་དེས་དེ་སྐད་གསུངས་ནས། དེ་ཉིད་དུ་མི་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་སྤོབས་པའི་ཕུང་པོས་འཇམ་དཔལ་གཞོན་ནུར་གྱུར་
པ་ལ་འདི་སྐད་ཅེས་སྨྲས་སོ། །འཇམ་དཔལ་དེ་བཞིན་གཤེགས་པ་དེ་གར་གཤེགས། སྨྲས་པ། གང་ནས་གཤེགས་པར་རོ། །སྨྲས་པ། འོ་ན་གང་ནས་གཤེགས། སྨྲས་པ། གང་དུ་གཤེགས་པ་ནས་སོ། །སྨྲས་པ། འཇམ་
དཔལ་སྤྲུལ་པ་ནི་སོང་བ་ཡང་མེད། འོང་བ་ཡང་མེད་དོ། །སྨྲས་པ། རིགས་ཀྱི་བུ་སྤྲུལ་པ་སོང་བ་ཡང་མེད། འོང་བ་ཡང་མེད་པ་དེ་བཞིན་དུ་ཆོས་ཐམས་ཅད་ཀྱང་དེའི་འགྲོས་ཅན་ཉིད་དོ། །སེམས་ཅན་ཐམས་ཅད་ཀྱང་དེའི་འགྲོས་ཅན་ཉིད་དོ། །

57-1-245b

སྨྲས་པ། འཇམ་དཔལ་ཆོས་ཐམས་ཅད་ཇི་ལྟ་བུའི་འགྲོས་ཅན་ལགས། སྨྲས་པ། རང་བཞིན་གནས་པའི་འགྲོས་ཅན་ནོ། །སྨྲས་པ། ཡང་སེམས་ཅན་ཐམས་ཅད་ཇི་ལྟ་བུའི་འགྲོས་ཅན་ལགས། སྨྲས་པ། ལས་ཀྱི་རྣམ་པར་སྨིན་པ་ཇི་
ལྟ་བུའི་འགྲོས་ཅན་པ་དེ་བཞིན་ནོ། །སྨྲས་པ། འཇམ་དཔལ་འོ་ན་ཆོས་ཐམས་ཅད་ལས་ཀྱི་རྣམ་པར་སྨིན་པ་མ་མཆིས་པ་མ་ལགས་སམ། སྨྲས་པ། རིགས་ཀྱི་བུ་ཆོས་ཉིད་ལ་ནི་ལས་ཀྱི་རྣམ་པར་སྨིན་པ་མེད་དོ། །དེ་ཅིའི་ཕྱིར་ཞེ་ན། ཆོས་
ཐམས་ཅད་ནི་ཆོས་ཉིད་ཀྱི་རྗེས་སུ་འཇུག་པའི་ཕྱིར་རོ། །སྨྲས་པ། འོ་ན་ཇི་ལྟར་ན་ལས་ཀྱི་རྣམ་པར་སྨིན་པ་ཇི་ལྟ་བུའི་འགྲོས་ཅན་པ་དེ་བཞིན་པ་ལགས། སྨྲས་པ། ལས་དེ་ཇི་ལྟ་བ་རྣམ་པར་སྨིན་པ་ཡང་དེ་བཞིན། དེའི་འགྲོ་བ་ཡང་དེ་བཞིན་ནོ། །
སྨྲས་པ། འཇམ་དཔལ་ལས་ཇི་ལྟ་བུ་ལགས། རྣམ་པར་སྨིན་པ་ཇི་ལྟ་བུ་ལགས། འགྲོ་བ་ཇི་ལྟ་བུ་ལགས། སྨྲས་པ། དེ་བཞིན་ཉིད་ཇི་ལྟ་བར་ལས་ཀྱང་དེ་བཞིན། རྣམ་པར་སྨིན་པ་ཡང་དེ་བཞིན། འགྲོ་བ་ཡང་དེ་བཞིན་ནོ། །སྨྲས་པ། 
འཇམ་དཔལ་དེ་བཞིན་ཉིད་ལ་ནི་ལས་ཀྱང་མ་མཆིས། རྣམ་པར་སྨིན་པ་ཡང་མ་མཆིས། འགྲོ་བ་ཡང་མ་མཆིས་སོ། །སྨྲས་པ། རིགས་ཀྱི་བུ་ཇི་ལྟར་དེ་བཞིན་ཉིད་ལ་ལས་ཀྱང་མེད། རྣམ་པར་སྨིན་པ་ཡང་མེད། འགྲོ་བ་ཡང་མེད་པ་ལྟར་ལས་
ཀྱི་རྣམ་པར་སྨིན་པའི་འགྲོ་བ་ཡང་དེ་བཞིན་དུ་ཤེས་པར་བྱའོ། །ལས་ཀྱི་རྣམ་པར་སྨིན་པའི་འགྲོ་བ་ནི་འོང་བ་མེད་པ་ཅན་འགྲོ་བ་མེད་པ་ཅན་ཡིན་ཏེ། དེ་བཞིན་ཉིད་ཀྱི་འགྲོས་ལས་འདའ་བར་མི་འགྱུར་རོ། །སྟོན་པ་འདི་བསྟན་པའི་ཚེ་སངས་
རྒྱས་ཀྱི་མཐུས་ཚེ་དང་ལྡན་པ་ཤཱ་རིའི་བུ་དང་། ཚེ་དང་ལྡན་པ་དགའ་བོ་དང་། ཉན་ཐོས་ཆེན་པོ་གཞན་དག་ཀྱང་། བཅོམ་ལྡན་འདས་ཤཱཀྱ་ཐུབ་པའི་སྤྱན་སྔ་ན་བསྟན་པ་འདི་ལ་ཉན་ཏོ། ། བམ་པོ་གཉིས་པ། དེ་ནས་བཅོམ་ལྡན་འདས་ལ་ཚེ་དང་
ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཉིད་ནི་གཅིག་པ་ཁོ་ན་ལགས་ན། སྐྱེས་བུ་དམ་པ་སྐྱེས་བུ་ཆེན་པོ་དེ་དག་བརྗོད་པ་སྣ་ཚོགས་ཀྱིས་སྟོན་ཀྱང་ཆོས་ཉིད་དང་ཡང་མི་འགལ་བར་བགྱིད་པ་ངོ་མཚར་ཏོ། །

57-1-246a

བཅོམ་ལྡན་འདས་སུ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་བྱང་ཆུབ་སེམས་དཔའ་དག་ནི་དེ་ལྟར་མ་ཆགས་པའི་སློབ་པ་ལ་སློབ་ཅིང་
མི་ཆགས་བཞིན་དུ་སྟོན་ཏེ། ཤཱ་རིའི་བུ་ས་བོན་ཇི་ལྟ་བ་བཞིན་སྐྱེད་ཀྱང་དེ་བཞིན་ནོ། །ང་ཤཱ་རིའི་བུ་དེ་དང་འདྲ་བར་བྱང་ཆུབ་སེམས་དཔའ་རྣམས་ཀྱི་བསླབ་པ་ཇི་ལྟ་བཞིན་དུ་དེ་དག་གི་ཡེ་ཤེས་སོ། །དེ་བཞིན་དུ་དེ་དག་གི་སྟོན་པའོ། །ཤཱ་རིའི་བུ་ཁྱོད་ཀྱིས་བསླབ་
པ། ཇི་ལྟ་བུ་ལ་བསླབས་པ་ཁྱོད་ཀྱི་ཡེ་ཤེས་ཀྱང་དེ་བཞིན་ནོ། །སྤོབས་པ་ཡང་དེ་དང་འདྲ་བར་ཁྱོད་ཀྱིས་ཐོབ་བོ། །བྱང་ཆུབ་སེམས་དཔའ་འོད་བཀོད་པས་གསོལ་པ། བཅོམ་ལྡན་འདས་ཉན་ཐོས་ཀྱི་བསླབ་པ་ཇི་ལྟ་བུ་ལགས། བྱང་ཆུབ་
སེམས་དཔའི་བསླབ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཉན་ཐོས་ཀྱི་བསླབ་པ་ནི་ཚད་ཡོད་པ། བྱང་ཆུབ་སེམས་དཔའི་བསླབ་པ་ནི་ཚད་མེད་པ་སྟེ། རིགས་ཀྱི་བུ་ཇི་ལྟར་ཉན་ཐོས་ཀྱི་བསླབ་པ་ཚད་
ཡོད་ལ་ཆགས་པ་དང་བཅས་པ་དེ་བཞིན་དུ་དེའི་ཡེ་ཤེས་ཀྱང་ཚད་ཡོད་ལ་ཆགས་པ་དང་བཅས་པའོ། །རིགས་ཀྱི་བུ་ཇི་ལྟར་བྱང་ཆུབ་སེམས་དཔའི་བསླབ་པ་ཚད་མེད་ལ་ཆགས་པ་མེད་པ་དེ་བཞིན་དུ་དེའི་ཡེ་ཤེས་ཀྱང་ཚད་མེད་ལ་ཆགས་པ་མེད་པའོ། །
དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འོད་བཀོད་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འཁོར་འདི་ནས་སུ་ཡང་ཆོས་ཉན་པ་མི་སྤྱོད་བར་བགྱི་ན། སྐྱེས་བུ་དམ་པ་དེ་དག་འདིར་མཆི་བར་མཚན་མ་ཞིག་མཛད་
དུ་གསོལ། དེ་ཅིའི་སླད་དུ་ཞེ་ན། འཇམ་དཔལ་གཞོན་ནུར་གྱུར་པ་ནི་ཟབ་མོ་ལ་མོས་པས་དེའི་ཆོས་བཤད་པ་ཡང་ཟབ་མོ་ལགས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་འོང་བར་བྱ་བའི་ཕྱིར་མཚན་མ་མཛད་དོ། །དེ་ནས་
འཇམ་དཔལ་གཞོན་ནུར་གྱུར་པ་སྐྱེས་བུ་དམ་པ་ཉི་ཤུ་རྩ་ལྔ་པོ་དེ་དག་དང་འགྲོགས། ལྷའི་འཁོར་དེ་དག་དང་འགྲོགས་ཏེ། བཅོམ་ལྡན་འདས་ག་ལ་བ་དེར་དོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་

57-1-246b

འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འོད་བཀོད་པས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཅིའི་ཕྱིར་དེ་བཞིན་གཤེགས་པའི་འཁོར་ནས་བྱུང་ལ་ཕྱོགས་གཅིག་ཏུ་སོང་སྟེ་ཆོས་
སྟོན། སྨྲས་པ། རིགས་ཀྱི་བུ་སངས་རྒྱས་བཅོམ་ལྡན་འདས་དག་ནི་མཉེས་པར་དཀའ་སྟེ། གཏམ་ཐམས་ཅད་ཀྱིས་མཉེས་པར་མི་ནུས་སོ། །སྨྲས་པ། འཇམ་དཔལ་གཏམ་ཇི་ལྟ་བུས་དེ་བཞིན་གཤེགས་པ་མཉེས་པར་འགྱུར། 
སྨྲས་པ། བཅོམ་ལྡན་འདས་ཉིད་མཁྱེན་ཏེ་ཐུགས་སུ་ཆུད་མོད་ཀྱི། བདག་ཇི་ལྟར་སྤོབས་པ་དེ་བཞིན་དུ་སྟོན་ཏོ། །རིགས་ཀྱི་བུ་གཏམ་གང་ཆོས་ཀྱི་དབྱིངས་དང་ཡང་མི་འགལ། དེ་བཞིན་ཉིད་དང་ཡང་མི་འགལ། ཡང་དག་པའི་
མཐའ་དང་ཡང་མི་འགལ་བ་དེ་འདྲ་བའི་གཏམ་གྱིས་དེ་བཞིན་གཤེགས་པ་མཉེས་པར་འགྱུར་རོ། །གཏམ་གང་འཐབ་པ་མེད་པ། རྩོད་པ་མེད་པ། རྩོམ་པ་མེད་པ། གླན་ཀ་མེད་པ། སྒྲོ་འདོགས་པ་མེད་པ། དེ་འདྲ་བའི་གཏམ་
གྱིས་དེ་བཞིན་གཤེགས་པ་མཉེས་པར་འགྱུར་རོ། །གཏམ་གང་བདག་ལ་སྒྲོ་མི་འདོགས། གཞན་ལ་སྒྲོ་མི་འདོགས། །ཆོས་མ་ཡིན་པ་ལ་སྒྲོ་མི་འདོགས། འཁོར་བ་ལ་སྒྲོ་མི་འདོགས། མྱ་ངན་ལས་འདའ་བ་ལ་སྒྲོ་མི་འདོགས་པ་དེ་
འདྲ་བའི་གཏམ་གྱིས་དེ་བཞིན་གཤེགས་པ་མཉེས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ནས་ལེགས་སོ་ལེགས་སོ། །འཇམ་དཔལ་ཁྱོད་ཀྱི་ཚིག་འདི་ལེགས་
པར་བཤད་པ་ཡིན་ཏེ། འདི་འདྲ་བའི་གཏམ་གྱིས་དེ་བཞིན་གཤེགས་པ་མཉེས་པར་འགྱུར་མོད་ཀྱི། འཇམ་དཔལ་གཏམ་གང་སྤྲོས་པ་ཐམས་ཅད་ལས་འདས་པ། ཧ་ཅང་ཡང་མི་ཞིབ་པ། ཧ་ཅང་ཡང་མི་རྩིང་བ། མཚན་མ་མེད་པའི་
གཏམ་དེ་བརྗོད་ན་ཏིང་ངེ་འཛིན་ཀྱང་མི་གཏོང་། རྟག་ཏུ་ཤིན་དུ་སེམས་མཉམ་པར་ཡང་གཞོག་ཅིང་སྟོན་པར་བྱེད་ལ་ཆོས་གང་ཡང་འཕེལ་བ་འམ། འབྲི་བར་ཡང་མི་མཐོང་བ་དེ་འདྲ་བའི་གཏམ་གྱིས་དེ་བཞིན་གཤེགས་པ་མཉེས་

57-1-247a

པར་འགྱུར་རོ། །སྟོན་པ་འདི་བསྟན་པའི་ཚེ་བྱང་ཆུབ་སེམས་དཔའ་བརྒྱད་སྟོང་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །འཁོར་དེ་ནས་ལྷའི་བུ་སྔོན་སྤྱོད་པ་དང་ལྡན་པས་བྱང་ཆུབ་ཀྱི་སེམས་རབ་ཏུ་སྟོར་བ་
ཉིས་བརྒྱ་འདི་སྙམ་དུ་གྱུར་ཏེ། སངས་རྒྱས་ཀྱི་ཆོས་ཀྱང་དེ་ལྟར་ཚད་མེད་པ་བྱང་ཆུབ་སེམས་དཔའི་བསླབ་པ་ཡང་དེ་ལྟར་ཤིན་དུ་བསླབ་དཀའ་བ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་དེ་ཙམ་དུ་བསྒྲུབ་དཀའ་བ་
ཡིན་ན་བདག་ཅག་གིས་སློབ་པ་འདི་བསླབ་མི་ནུས་ཀྱིས། གང་བདག་ཅག་ནི་ཉན་ཐོས་ཀྱི་ཐེག་པ་འམ། རང་སངས་རྒྱས་ཀྱི་ཐེག་པས་ཡོངས་སུ་མྱ་ངན་ལས་འདའ་བར་བྱའོ་སྙམ་མོ། །དེ་ནས་བཅོམ་ལྡན་འདས་ཀྱིས་ལྷའི་བུ་
དེ་དག་གི་སེམས་ཀྱི་རྟོག་པ་སེམས་ཀྱིས་མཁྱེན་ནས། ཀྱེ་མའོ་ལྷའི་བུ་འདི་ནས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བའི་སྐལ་བ་ཡོད་དོ་ཞེས་ལྷའི་བུ་དེ་དག་གདུལ་བའི་དབང་གི་ཕྱིར་འཁོར་གྱི་ཕྱི་
རོལ་དུ་ཁྱིམ་བདག་གཅིག་མངོན་པར་སྤྲུལ་ནས་ཁྱིམ་བདག་དེས་ལྷུང་བཟེད་ཁ་ཟས་རོ་བརྒྱས་གང་བ་ཞིག་ལག་པ་གཡས་པ་ན་ཐོགས་པར་གྱུར་ཏོ། །དེ་ནས་ཁྱིམ་བདག་དེ་བཅོམ་ལྡན་འདས་ག་ལ་བ་དེར་སོང་ནས་བཅོམ་ལྡན་འདས་
ཀྱི་ཞབས་ལ་མགོ་བོས་ཕྱག་འཚལ་ཏེ། ལྷུང་བཟེད་ཁ་ཟས་ཀྱིས་བཀང་བ་དེ་བཅོམ་ལྡན་འདས་ལ་ཕུལ་ནས། བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་ཞལ་ཟས་འདི་བཞེས་པར་གསོལ་ཞེས་དེ་སྐད་གསོལ་པ་དང་། 
བཅོམ་ལྡན་འདས་ཀྱིས་ལྷུང་བཟེད་ཟས་ཀྱིས་བཀང་བ་དེ་བཞེས་སོ། །དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་ཞལ་ཟས་འདི་ལས་བདག་ལ་མ་སྩལ་བར་གསོལ་ན་ནི་བཅོམ་ལྡན་འདས་བྱས་པ་གཟོ་བ་མི་མཛད་པར་འགྱུར་རོ། །དེ་ནས་ཚེ་དང་ལྡན་པ་ཤཱ་རིའི་བུ་འདི་སྙམ་དུ་གྱུར་ཏེ། ཀྱེ་མའོ་འཇམ་དཔལ་གཞོན་

57-1-247b

ནུར་གྱུར་པས་སྔོན་བཅོམ་ལྡན་འདས་ལ་ཇི་ལྟ་བ་བཞིན་ཕན་བཏགས་ན་དེའི་ཕྱིར་བྱས་པ་གཟོ་བ་མེད་པས་རྒོལ་སྙམ་མོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུའི་སེམས་ཀྱི་རྟོག་པ་མཁྱེན་ནས་ཚེ་དང་ལྡན་པ་
ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་དེ་བཞིན་གཤེགས་པ་དུས་མཁྱེན་ཏེ། ཁྱོད་ལ་བཀའ་སྩོལ་གྱིས་སྡོད་ཅིག །དེ་ནས་བཅོམ་ལྡན་འདས་ཀྱིས་ལྷུང་བཟེད་དེ་ས་ཆེན་པོའི་ནང་དུ་བཏང་བ་དང་། བཏང་མ་
ཐག་ཏུ་འོག་གི་ཕྱོགས་ཀྱི་སངས་རྒྱས་ཀྱི་ཞིང་གང་དང་གང་དག་ན་སངས་རྒྱས་བཅོམ་ལྡན་འདས་རྣམས་བཞུགས་ཤིང་འཚོ་གཞེས་པའི་ཡང་དག་པར་རྫོགས་པའི་སངས་རྒྱས་དེ་དག་གི་སྤྱན་སྔར་ལྷུང་བཟེད་དེ་སོང་ངོ་། །
དེ་ནས་ལྷུང་བཟེད་དེ་འོག་གི་ཕྱོགས་ཀྱི་ཆ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་འདས་ནས་འཇིག་རྟེན་གྱི་ཁམས་སྣང་བ་དང་ལྡན་པ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་
ཟེར་གྱི་རྒྱལ་པོ་ཞེས་བྱ་བ་བཞུགས་པའི་སངས་རྒྱས་ཀྱི་ཞིང་དེ་ན་ལྷུང་བཟེད་དེ་མ་བཟུང་བར་བར་སྣང་ལ་འདུག་པར་གྱུར་ཏོ། །སངས་རྒྱས་བཅོམ་ལྡན་འདས་དེ་དག་ལ་ཡང་བདག་བདག་གི་བསྙེན་བཀུར་བྱེད་པ་དག་གིས་བཅོམ་ལྡན་
འདས་ལྷུང་བཟེད་འདི་ག་ལས་མཆིས་ཤེས་ཞུས་ནས་སངས་རྒྱས་བཅོམ་ལྡན་འདས་དེ་དག་གིས་ཀྱང་སྟེང་གི་ཕྱོགས་ཀྱི་ཆ་འཇིག་རྟེན་གྱི་ཁམས་མི་མཇེད་ཅེས་བྱ་བ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་དྲུང་ནས་འོངས་ཏེ། བྱང་ཆུབ་སེམས་དཔའ་གཞན་དག་གདུལ་བའི་ཕྱིར་བཏང་བ་ཡིན་ནོ་ཞེས་བསྟན་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། 
ཤཱ་རིའི་བུ་ལྷུང་བཟེད་དེ་ཕྱུང་ཤིག །གང་ན་འདུག་པ་ག་ལ་ན་འདུག་པ་དེའང་ཚོལ་ཅིག །དེ་ནས་ཚེ་དང་ལྡན་པ་ཤཱ་རིའི་བུ་ཏིང་ངེ་འཛིན་སྟོང་ཕྲག་བཅུ་ལ་ཞུགས་ནས། བདག་གི་ཤེས་རབ་ཀྱི་སྟོབས་དང་། སངས་རྒྱས་ཀྱི་ཞིང་སྟོང་ཕྲག་

57-1-248a

བཅུར་སོང་ཡང་ལྷུང་བཟེད་དེའི་གནས་སམ་གཞི་ཡང་མ་མཐོང་ནས་དེ་སླར་བཅོམ་ལྡན་འདས་ཀྱི་སྤྱན་སྔར་འདུག་གོ། །འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ལྷུང་བཟེད་
དེའི་གནས་སམ་གཞི་ཡང་མ་མཐོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །མཽད་གལ་གྱི་བུ་ཁྱོད་ཀྱིས་ལྷུང་བཟེད་དེ་ཚོལ་ཅིག །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་
པོས་ཏིང་ངེ་འཛིན་སྟོང་ཕྲག་བཅུ་ལ་ཞུགས་ནས་སངས་རྒྱས་ཀྱི་མཐུ་དང་། བདག་གི་རྫུ་འཕྲུལ་གྱི་སྟོབས་ཀྱིས་འོག་གི་ཕྱོགས་ཀྱི་ཆ་སངས་རྒྱས་ཀྱི་ཞིང་སྟོང་ཕྲག་བཅུར་སོང་ཡང་ལྷུང་བཟེད་དེའི་གནས་སམ་གཞི་འང་མ་མཐོང་ནས་དེ་སླར་
ཡང་བཅོམ་ལྡན་འདས་ཀྱི་སྤྱན་སྔར་འདུག་གོ། །འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ལྷུང་བཟེད་དེའི་གནས་སམ་གཞི་འང་མ་མཐོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་
པ་རབ་འབྱོར་ལ་བཀའ་སྩལ་པ། རབ་འབྱོར་ཁྱོད་ཀྱིས་ལྷུང་བཟེད་དེ་ཚོལ་ཅིག །དེ་ནས་ཚེ་དང་ལྡན་པ་རབ་འབྱོར་གྱིས་ཏིང་ངེ་འཛིན་སྟོང་ཕྲག་བཅུ་གཉིས་ལ་ཞུགས་ནས་སངས་རྒྱས་ཀྱི་མཐུ་དང་། བདག་གི་རྫུ་འཕྲུལ་གྱི་སྟོབས་ཀྱིས་འོག་གི་
ཕྱོགས་ཀྱི་ཆ་སངས་རྒྱས་ཀྱི་ཞིང་སྟོང་ཕྲག་བཅུ་གཉིས་སུ་སོང་ཡང་ལྷུང་བཟེད་དེ་མ་མཐོང་ནས་དེ་སླར་བཅོམ་ལྡན་འདས་ཀྱི་སྤྱན་སྔར་འདུག་གོ། །འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་
ལྷུང་བཟེད་དེའི་གནས་སམ་གཞི་འང་མ་མཐོང་ངོ་། །དེ་བཞིན་ཉིད་དུ་ཉན་ཐོས་ཆེན་པོ་ལྔ་བརྒྱ་ཙམ་བདག་གི་རྫུ་འཕྲུལ་གྱི་སྟོབས་དང་། ལྷའི་མིག་གིས་ལྷུང་བཟེད་དེ་བཙལ་ཀྱང་མ་རྙེད་དོ། །དེ་ནས་ཚེ་དང་ལྡན་པ་རབ་འབྱོར་གྱིས་བྱང་ཆུབ་སེམས་
དཔའ་བྱམས་པ་ལ་འདི་སྐད་ཅེས་སྨྲས་སོ། །བྱམས་པ་ཁྱོད་ནི་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྗོགས་པའི་བྱང་ཆུབ་ཏུ་སྐྱེ་བ་གཅིག་གིས་ཐོགས་པར་ལུང་བསྟན་ན། ལྷུང་བཟེད་དེ་གང་ན་འདུག་ག་ལ་ན་འདུག་ཚོལ་ཅིག་

57-1-248b

ཅེས་དེ་སྐད་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་བདག་ནི་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེ་བ་
གཅིག་གིས་ཐོགས་པར་ལུང་བསྟན་མོད་ཀྱི། བདག་གིས་ནི་ཏིང་ངེ་འཛིན་དེ་དག་གི་མིང་ཡང་མ་འཚལ་ཏེ། འཇམ་དཔལ་གཞོན་ནུར་གྱུར་པ་ནི་ཏིང་ངེ་འཛིན་དེ་དག་ལ་མཉམ་པར་ཡང་གཞོག །ལྡང་བར་ཡང་བགྱིད་དོ། །ཡང་བཙུན་པ་རབ་འབྱོར་
བདག་གིས་བྱང་ཆུབ་ཐོབ་པ་ན་འཇམ་དཔལ་གཞོན་ནུར་གྱུར་པ་དང་འདྲ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་དེ་བཞིན་གཤེགས་པ་ཇི་ལྟར་གོམ་པ་འདོར། ཇི་ལྟར་འཇོག་པར་མཛད་ཅེས་གོམ་པ་གཅིག་འདོར་ཞིང་འཇོག་
པ་ཡང་མི་ཤེས་པའི་དུས་དང་ཚེ་ཡང་མཆིས་པར་འགྱུར་རོ། །དེ་བས་ན་བཙུན་པ་རབ་འབྱོར་འཇམ་དཔལ་ཉིད་ལ་གསོལ་གཅིག་དང་། དེས་ནི་ལྷུང་བཟེད་དེ་ཚོལ་བ་དང་འབྱིན་པར་ནུས་སོ། །དེ་ནས་བཅོམ་ལྡན་འདས་ལ་གནས་བརྟན་
རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ཅི་ནས་ཀྱང་ལྷུང་བཟེད་དེ་ཕྱུང་སྟེ། བཅོམ་ལྡན་འདས་ཀྱི་སྤྱན་སྔར་དབུལ་བར་བསྐོར་གསོལ། དེ་ནས་བཅོམ་ལྡན་འདས་ཀྱིས་འཇམ་དཔལ་
གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ལྷུང་བཟེད་དེ་ཕྱུང་ཤིག །ལྷུང་བཟེད་དེ་གང་ན་འདུག་པ་དང་། ག་ལ་ན་འདུག་པ་ཡང་ཤེས་པར་གྱིས་ཤིག །དེ་ནས་འཇམ་དཔལ་གཞོན་ནུར་གྱུར་པ་འདི་སྙམ་དུ་གྱུར་ཏེ། གང་
བདག་ནི་སྟན་ལས་ཀྱང་མི་ལྡང་ཞིང་འཁོར་འདི་ནས་མི་སྣང་བར་ཡང་མ་གྱུར་པར་ལྷུང་བཟེད་དེ་དབྱུང་ངོ་སྙམ་མོ། །དེ་ནས་འཇམ་དཔལ་གཞོན་ནུར་གྱུར་པ་ཀུན་གྱི་རྗེས་སུ་སོང་བ་ཞེས་བྱ་བའི་ཏིང་ངེ་འཛིན་ལ་མཉམ་པར་བཞག་སྟེ། 
འོག་གི་ས་ཆེན་པོ་ལ་ལག་པ་གཡས་པ་བརྐྱང་ངོ་། །དེ་ནས་འཇམ་དཔལ་གཞོན་ནུར་གྱུར་པའི་ལག་པ་དེ་སངས་རྒྱས་ཀྱི་ཞིང་གང་དང་གང་དག་ན་སངས་རྒྱས་བཅོམ་ལྡན་འདས་མངོན་དུ་གྱུར་པ་དེ་དང་དེ་དག་ཏུ་ལག་པ་དེ་སངས་རྒྱས་

57-1-249a

བཅོམ་ལྡན་འདས་དེ་དག་ལ་ཕྱག་འཚལ་ཞིང་སོང་ནས། ལག་པ་དེ་ལས་བཅོམ་ལྡན་འདས་ལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་སྙུང་
བ་མ་མཆིས་སམ། འོ་མ་བརྒྱལ་ཏམ། བཞེངས་པ་ཡང་ངམ། སོ་བཞིན་ནམ། མཐུ་མངའ་འམ། བདེ་བ་ལ་རེག་པར་གནས་སམ་ཞེས་གསུང་ངོ་ཞེས་ཟེར་བའི་སྒྲ་ཕྱུང་ངོ་། །དེ་ནས་ལག་པའི་སྤུའི་ཁུང་བུ་ཐམས་
ཅད་ནས་འོད་ཟེར་བྱེ་བ་བརྒྱ་སྟོང་བྱུང་སྟེ། འོད་ཟེར་ཐམས་ཅད་ལས་མེ་ཏོག་པད་མ་བརྒྱ་སྟོང་བྱུང་ཞིང་པད་མ་དེ་ཐམས་ཅད་ཀྱི་སྙིང་པོ་དག་ལ་དེ་བཞིན་གཤེགས་པའི་སྐུ་དག་བཞུགས་པར་སྣང་ངོ་། །དེ་བཞིན་
གཤེགས་པའི་སྐུ་དེ་དག་ཐམས་ཅད་ཀྱང་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའི་བསྔགས་པ་བརྗོད་དོ། །ལག་པ་དེ་སངས་རྒྱས་ཀྱི་ཞིང་གང་དང་གང་དུ་འགྲོ་བའི་སངས་རྒྱས་ཀྱི་ཞིང་དེ་དག་ཐམས་ཅད་
ཀྱང་རྣམ་པ་དྲུག་ཏུ་རབ་ཏུ་གཡོས་སོ། །སངས་རྒྱས་ཀྱི་ཞིང་དེ་དག་ཐམས་ཅད་སྣང་བ་ཆེན་པོས་ཀྱང་ཁྱབ་པར་གྱུར་ཏོ། །སངས་རྒྱས་ཀྱི་ཞིང་དེ་དག་ཐམས་ཅད་གདུགས་དང་། རྒྱལ་མཚན་དང་། བ་དན་གྱིས་ཀྱང་བརྒྱན་པར་གྱུར་
ཏོ། །དེ་ནས་འཇམ་དཔལ་གཞོན་ནུར་གྱུར་པའི་ལག་པ་གཡས་པ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་བདུན་ཅུ་རྩ་གཉིས་ཐམས་ཅད་ལས་འདས་ནས། སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱི་ཞབས་ལ་ཕྱག་འཚལ་
ཞིང་སྙུང་བ་ཆུང་ངམ་ཞེས་བྱ་བའི་སྒྲ་འབྱིན་བཞིན་དུ་བཅོམ་ལྡན་འདས་དེ་བཞིན་གཤེགས་པ་འོད་ཟེར་གྱི་རྒྱལ་པོ་དེའི་སངས་རྒྱས་ཀྱི་ཞིང་སྣང་བ་དང་ལྡན་པའི་འཇིག་རྟེན་གྱི་སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱི་
ཞབས་ལ་ཕྱག་འཚལ་ཞིང་སྙུང་བ་ཆུང་ངམ་ཞེས་བྱ་བའི་སྒྲ་འབྱིན་བཞིན་དུ་བཅོམ་ལྡན་འདས་དེ་བཞིན་གཤེགས་པ་འོད་ཟེར་གྱི་རྒྱལ་པོ་དེའི་སངས་རྒྱས་ཀྱི་ཞིང་སྣང་བ་དང་ལྡན་པའི་འཇིག་རྟེན་གྱི་ཁམས་སུ་ཕྱིན་པར་གྱུར་ནས་

57-1-249b

བཅོམ་ལྡན་འདས་དེ་བཞིན་གཤེགས་པ་འོད་ཟེར་གྱི་རྒྱལ་པོ་དེའི་ཞབས་ལ་ཕྱག་འཚལ་ནས། བཅོམ་ལྡན་འདས་ལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་
སྙུང་བ་མ་མཆིས་སམ། འོ་མ་བརྒྱལ་ཏམ། བཞེངས་པར་ཡང་ངམ། སོ་བཞིན་ནམ། མཐུ་མངའ་འམ། བདེ་བ་ལ་རེག་པར་གནས་སམ་ཞེས་གསུང་ངོ་ཞེས་སྒྲ་ཕྱུང་ངོ་། །ལག་པ་དེ་ལས་ཀྱང་འོད་ཟེར་བརྒྱ་སྟོང་བྱུང་ངོ་། །མེ་
ཏོག་པད་མ་བརྒྱ་སྟོང་ཡང་བྱུང་བར་གྱུར་ཏེ། འོད་ཟེར་དེ་དག་དེ་བཞིན་གཤེགས་པའི་འོད་ཟེར་དེ་དག་དང་ཡང་མ་འདྲེས་པར་གྱུར་ཏོ། །དེ་ནས་དེ་བཞིན་གཤེགས་པ་འོད་ཟེར་གྱི་རྒྱལ་པོ་དེ་ལ་བསྙེན་བཀུར་བྱེད་པ་བྱང་ཆུབ་སེམས་
དཔའ་སེམས་དཔའ་ཆེན་པོ་འོད་ཀྱི་དཔལ་ཞེས་བྱ་བ་དེས་དེ་བཞིན་གཤེགས་པ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལག་པ་དེ་ལས་འོད་ཟེར་བྱེ་བ་བརྒྱ་སྟོང་འདི་དག་ཀྱང་བྱུང་ཞིང་མེ་ཏོག་པད་མ་བརྒྱ་སྟོང་བྱུང་བར་
གྱུར་ལ། པད་མ་ཐམས་ཅད་ལ་དེ་བཞིན་གཤེགས་པའི་སྐུ་དག་བཞུགས་ཤིང་བཅོམ་ལྡན་འདས་ཤཱཀྱ་ཐུབ་པའི་བསྔགས་པ་རྗོད་པར་གྱུར་པའི་ལག་པ་འདི་ལྟར་བལྟ་ན་སྡུག་པ། འདི་ལྟར་དགའ་བར་བགྱིད་པ་དེ་སུའི་
ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་ཀྱི་དཔལ་ལ་འདི་སྐད་ཅེས་བཀའ་སྩལ་ཏོ། །འོད་ཀྱི་དཔལ་སྟེང་གི་ཕྱོགས་ཀྱི་ཆ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་
གཱའི་ཀླུང་གི་བྱེ་མ་སྙེད་བདུན་ཅུ་རྩ་གཉིས་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་སོ་འཚོ་གཞེས་
སོ། །དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་ཞེས་བྱ་བ་བསམ་གྱིས་མི་ཁྱབ་པའི་གོ་ཆ་བགོས་པ། མངོན་པར་ཤེས་པ་དང་། སྟོབས་དང་། ཕ་རོལ་དུ་ཕྱིན་པ་ཐམས་ཅད་ཐོབ་པ་ཞིག་

57-1-250a

ཡོད་དེ། འཇམ་དཔལ་གཞོན་ནུར་གྱུར་པ་དེས་ལྷུང་བཟེད་འདི་བླང་བའི་ཕྱིར་སྟན་ལས་མ་ལངས་བཞིན་དུ་ལག་པ་འདི་བཏང་ངོ་། །དེ་ནས་དེ་བཞིན་གཤེགས་པ་འོད་ཟེར་གྱི་རྒྱལ་པོའི་སངས་རྒྱས་ཀྱི་ཞིང་དེ་ནས་
བྱང་ཆུབ་སེམས་དཔའ་དེ་དག་ཡོངས་སུ་སྐོམ་པར་གྱུར་ནས། བཅོམ་ལྡན་འདས་བདག་ཅག་ནི་འཇིག་རྟེན་གྱི་ཁམས་མི་མཇེད་པ་དེ་དང་། དེ་བཞིན་གཤེགས་པ་ཤཱཀྱ་ཐུབ་པ་དེ་དང་། འཇམ་དཔལ་གཞོན་ནུར་གྱུར་པ་དེ་བལྟ་བར་
འཚལ་ལོ་ཞེས་དེ་སྐད་གསོལ་ཏོ། །དེ་ནས་དེ་བཞིན་གཤེགས་པ་འོད་ཟེར་གྱི་རྒྱལ་པོས་སྨིན་མཚམས་ཀྱི་མཛོད་སྤུ་ནས་འོད་ཕྱུང་ནས། འོད་དེས་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་བདུན་ཅུ་རྩ་གཉིས་པོ་དེ་དག་
ཐམས་ཅད་བརྟོལ་ཏེ། ཐམས་ཅད་ཡོད་པའི་འཇིག་རྟེན་གྱི་ཁམས་སྣང་བ་ཆེན་པོས་ཁྱབ་པར་གྱུར་ཏོ། །སེམས་ཅན་གང་དག་གི་ལུས་ལ་འོད་དེས་ཕོག་པར་གྱུར་པ་དེ་དག་ཐམས་ཅད་ནི་འཁོར་ལོས་སྒྱུར་བའི་བདེ་བ་དང་ལྡན་
པར་གྱུར་ཏོ། །རྣལ་འབྱོར་སྤྱོད་པ་གང་དག་གི་ལུས་ལ་འོད་དེས་ཕོག་པར་གྱུར་པ་དེ་དག་ཐམས་ཅད་ནི་འབྲས་བུ་ཐོབ་པར་གྱུར་ཏོ། །སློབ་པ་གང་དག་གི་ལུས་ལ་འོད་དེས་ཕོག་པར་གྱུར་པ་དེ་དག་ཐམས་ཅད་ནི་རྣམ་པར་ཐར་པ་
བརྒྱད་ལ་བསམ་གཏན་བྱེད་པའི་དགྲ་བཅོམ་པར་གྱུར་ཏོ། །བྱང་ཆུབ་སེམས་དཔའ་གང་དག་གི་ལུས་ལ་འོད་དེས་ཕོག་པར་གྱུར་པ་དེ་དག་ཐམས་ཅད་ནི་ཏིང་ངེ་འཛིན་ཉི་མ་ལྟ་བུའི་སྒྲོན་མ་ཞེས་བྱ་བ་ཐོབ་པར་གྱུར་ཏོ། །འདི་ལྟ་སྟེ། 
དེ་བཞིན་གཤེགས་པ་འོད་ཟེར་གྱི་རྒྱལ་པོ་དེའི་སངས་རྒྱས་ཀྱི་ཞིང་དེ་ནས་བྱང་ཆུབ་སེམས་དཔའ་དེ་དག་གིས་འཇིག་རྟེན་གྱི་ཁམས་མི་མཇེད་པ་འདི་དང་། བཅོམ་ལྡན་འདས་ཤཱཀྱ་ཐུབ་པ་དང་། འཇམ་དཔལ་གཞོན་ནུར་གྱུར་
པ་དང་། ཉན་ཐོས་ཀྱི་དགེ་འདུན་ཐམས་ཅད་མཐོང་བར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འོད་ཀྱི་དཔལ་གྱིས་འཇིག་རྟེན་གྱི་ཁམས་མི་མཇེད་པ་འདི་མཐོང་ནས་ངུ་ཞིང་མཆི་མ་ཕྱུང་སྟེ་འདི་སྐད་ཅེས་

57-1-250b

གསོལ་ཏོ། །བཅོམ་ལྡན་འདས་འདི་ལྟ་སྟེ། དཔེར་ན་རིན་ཐང་མ་མཆིས་པའི་ནོར་བུ་རིན་པོ་ཆེ་བཻ་དཱུརྱ་འདམ་དུ་སྩལ་བར་གྱུར་པ་དེ་བཞིན་དུ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཁམས་
མི་མཇེད་པར་སྐྱེས་པ་དེ་དག་ལ་བལྟ་བར་བགྱིའོ། །དེ་བཞིན་གཤེགས་པ་འོད་ཟེར་གྱི་རྒྱལ་པོས་བཀའ་སྩལ་པ། རིགས་ཀྱི་བུ་ཁྱོད་དེ་སྐད་མ་ཟེར་ཅིག །དེ་ཅིའི་ཕྱིར་ཞེ་ན། གང་འཇིག་རྟེན་གྱི་ཁམས་འདིར་བསྐལ་པ་བཅུར་
བསམ་གཏན་ལ་གནས་ཤིང་སྤྱོད་པ་བས་གང་འཇིག་རྟེན་གྱི་ཁམས་མི་མཇེད་པར་སྔ་དྲོ་གཅིག་སེམས་ཅན་ལ་བྱམས་པའི་སེམས་བསྐྱེད་ན་དེ་བས་འདིའི་བསོད་ནམས་མང་དུ་འཕེལ་ལོ། །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་
སེམས་དཔའ་སེམས་དཔའ་ཆེན་པོ་གང་མི་མཇེད་ཀྱི་འཇིག་རྟེན་གྱི་ཁམས་ན་དམ་པའི་ཆོས་སྲུང་བ་དེ་དག་ནི་ལས་ཀྱི་སྒྲིབ་པ་དང་། ཉོན་མོངས་པ་ཐམས་ཅད་བྱང་བར་འགྱུར་རོ། །དེ་ནས་འཇིག་རྟེན་གྱི་ཁམས་མི་མཇེད་པ་འདི་ན་བྱང་ཆུབ་
སེམས་དཔའ་གང་དག་འོད་དེས་རེག་པར་གྱུར་པ་དེ་དག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་དགའ་ཞིང་རབ་ཏུ་མགུ་བར་བགྱིད་པ་ཉོན་མོངས་པ་ཐམས་ཅད་རབ་ཏུ་སྤོང་བར་བགྱིད་པའི་
འོད་ཟེར་འདི་སུའི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་འོག་གི་ཕྱོགས་ཀྱི་ཆ་འདི་ནས་སངས་རྒྱས་ཀྱི་ཞིང་གང་གཱའི་ཀླུང་
གི་བྱེ་མ་སྙེད་བདུན་ཅུ་རྩ་གཉིས་འདས་པ་དང་། འཇིག་རྟེན་གྱི་ཁམས་སྣང་བ་དང་ལྡན་པ་ཞེས་བྱ་བ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་གྱི་རྒྱལ་པོ་ཞེས་བྱ་བ་ད་ལྟར་བཞུགས་
ཤིང་འཚོ་གཞེས་པ་ཞིག་ཡོད་དེ། དེ་བཞིན་གཤེགས་པ་དེས་སྨིན་མཚམས་ཀྱི་མཛོད་སྤུ་ནས་འོད་བཏང་བ་དང་། འོད་དེས་འཇིག་རྟེན་གྱི་ཁམས་མི་མཇེད་པ་འདི་སྣང་བར་བྱས་སོ། །དེ་ནས་བཅོམ་ལྡན་འདས་ལ་བྱང་ཆུབ་

57-1-251a

སེམས་དཔའ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གྱི་ཁམས་སྣང་བ་དང་ལྡན་པ་དེ་དང་། དེ་བཞིན་གཤེགས་པ་འོད་ཟེར་གྱི་རྒྱལ་པོ་དེ་བལྟ་བར་འཚལ་ལོ། །དེ་ནས་བཅོམ་ལྡན་འདས་དེ་
བཞིན་གཤེགས་པ་ཤཱཀྱ་ཐུབ་པས་ཞབས་ཀྱི་མཐིལ་འཁོར་ལོའི་རྩིབས་སྟོང་ཡོད་པ་གཉིས་ལས་འོད་ཟེར་གང་གིས་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་བདུན་ཅུ་རྩ་གཉིས་པོ་དེ་དག་ཐམས་ཅད་ལས་འདས་ཤིང་བརྟོལ་ནས་
འཇིག་རྟེན་གྱི་ཁམས་སྣང་བ་དང་ལྡན་པ་དེ་ཐམས་ཅད་འོད་ཟེར་དེ་དག་གིས་ཁྱབ་པར་འགྱུར་བ་དེ་འདྲ་བའི་འོད་ཟེར་འོག་ཏུ་བཏང་ནས་བྱང་ཆུབ་སེམས་དཔའ་གང་དག་གི་ལུས་ལ་འོད་ཟེར་དེས་ཕོག་པར་གྱུར་པ་དེ་ཐམས་ཅད་ཏིང་ངེ་འཛིན་རི་
རབ་ལྷུན་པོ་ལྟ་བུའི་སྒྲོན་མ་ཞེས་བྱ་བ་ཐོབ་པར་གྱུར་ཏོ། །སངས་རྒྱས་ཀྱི་ཞིང་དེ་ཡང་སངས་རྒྱས་ཀྱི་ཞིང་འདི་ནས་སྣང་བར་གྱུར་ཏོ། །འདི་ལྟ་སྟེ། དཔེར་ན་འཛམ་བུའི་གླིང་འདི་ནས་ཉི་མ་དང་ཟླ་བ་སྣང་བ་དེ་བཞིན་དུ་བྱང་ཆུབ་སེམས་དཔའ་
དེ་དག་གིས་ཀྱང་དེ་བཞིན་གཤེགས་པ་ཤཱཀྱ་ཐུབ་པ་མཐོང་བར་གྱུར་ཏོ། །བྱང་ཆུབ་སེམས་དཔའ་འདི་དག་གིས་ཀྱང་བཅོམ་ལྡན་འདས་དེ་བཞིན་གཤེགས་པ་འོད་ཟེར་གྱི་རྒྱལ་པོ་དེ་མཐོང་བར་གྱུར་ཏོ། །འདི་ལྟ་སྟེ། དཔེར་ན་ལྷའི་
བུ་དག་རི་རབ་ལྷུན་པོའི་སྤྱི་བོ་ལ་གནས་ཤིང་འཛམ་བུའི་གླིང་དུ་ལྟ་བ་དེ་བཞིན་དུ་བྱང་ཆུབ་སེམས་དཔའ་དག་འཇིག་རྟེན་གྱི་ཁམས་འདི་ནས་བཅོམ་ལྡན་འདས་དེ་བཞིན་གཤེགས་པ་འོད་ཟེར་གྱི་རྒྱལ་པོ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་གོ་ཆ་ཆེན་པོ་བགོས་པ་དེ་དག་མཐོང་བར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པའི་ལག་པ་གཡས་པ་དེས་དེ་བཞིན་གཤེགས་པ་འོད་ཟེར་གྱི་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་
སྣང་བ་དང་ལྡན་པ་དེ་ནས་ནམ་མཁའི་སྟེང་གི་ལམ་ལས་ལྷུང་བཟེད་དེ་བཟུང་ནས་བྱང་ཆུབ་སེམས་དཔའ་བྱེ་བ་ཕྲག་ཁྲག་ཁྲིག་བརྒྱ་སྟོང་དུ་མས་བསྐོར་ཅིང་མདུན་དུ་བདར་ཏེ་སྟེང་དུ་ཕྱུང་བར་གྱུར་ཏོ། །གང་དང་གང་དག་ནས་ལག་

57-1-251b

པ་དེ་ཕྱུང་བར་གྱུར་པའི་སངས་རྒྱས་ཀྱི་ཞིང་དེ་དང་དེ་དག་ཏུ་འོད་ཟེར་དེ་དག་ནུབ་པར་གྱུར་ཏོ། །མེ་ཏོག་པད་མ་དེ་དག་ཀྱང་མི་སྣང་བར་གྱུར་ཏོ། །འདི་ལྟ་སྟེ། འཇམ་དཔལ་གཞོན་ནུར་གྱུར་པའི་ལག་པ་གཡས་པ་དེས་ལྷུང་བཟེད་དེ་བླངས་
ནས་འཇིག་རྟེན་གྱི་ཁམས་མི་མཇེད་པ་འདིར་ཕྱིན་པར་གྱུར་ཏེ། བཅོམ་ལྡན་འདས་ཤཱཀྱ་ཐུབ་པའི་སྤྱན་སྔར་ལྷུང་བཟེད་དེ་ནམ་མཁའ་ལ་འཕངས་ནས་བཅོམ་ལྡན་འདས་ཀྱི་ཞབས་ལ་འཇམ་དཔལ་གཞོན་ནུར་གྱུར་པས་མགོ་
བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷུང་བཟེད་བླངས་པ་འདི་ལགས་ཀྱིས་དེ་བཞིན་གཤེགས་པས་བཞེས་སུ་གསོལ། བཅོམ་ལྡན་འདས་ཀྱིས་ཀྱང་ལྷུང་བཟེད་དེ་
བཞེས་སོ། །དེ་ནས་བྱང་ཆུབ་སེམས་དཔའ་གང་འཇམ་དཔལ་གཞོན་ནུར་གྱུར་པའི་ལག་པ་དང་ལྷན་ཅིག་ཏུ་འཇིག་རྟེན་གྱི་ཁམས་མི་མཇེད་པ་འདིར་འོངས་པ་དེ་དག་གིས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་
ནས། བདག་བདག་གི་དེ་བཞིན་གཤེགས་པའི་མཚན་ནས་བརྗོད་དེ། བཅོམ་ལྡན་འདས་དེ་བཞིན་གཤེགས་པ་ཆེ་གེ་མོ་ཞིག་བཅོམ་ལྡན་འདས་ལ་སྙུང་བ་མ་མཆིས་སམ། འོ་མ་རྒྱལ་ཏམ། བཞེངས་པ་ཡང་ངམ། 
སོ་བཞིན་ནམ། མཐུ་མངའ་འམ། བདེ་བ་ལ་རེག་པར་གནས་སམ་ཞེས་གསུང་ངོ་ཞེས་དེ་སྐད་གསོལ་ཏེ། སངས་རྒྱས་ཀྱིས་གནང་ནས་བདག་བདག་གི་སྟན་ལ་འཁོད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་
རིའི་བུ་ལ་བཀའ་སྩལ་པ། དེ་བས་ན་ཤཱ་རིའི་བུ་ང་ལ་སྔོན་འཇམ་དཔལ་གཞོན་ནུར་གྱུར་པས་གང་ཕན་བཏགས་པ་དེའི་ཕྱིར་ད་བྱས་པ་མི་གཟོ་བས་རྒོལ་བར་གྱུར་པ་བཤད་ཀྱིས་ཉོན་ཅིག །ཤཱ་རིའི་བུ་སྔོན་འདས་པའི་དུས་བསྐལ་པ་
བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་དེའི་ཕ་རོལ་གྱི་འང་ཕ་རོལ་དུ་གྱུར་པ་དེའི་ཚེ། དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་ཐུབ་པའི་རྒྱལ་མཚན་ཞེས་བྱ་བ་འཇིག་རྟེན་གྱི་ཁམས་

57-1-252a

མི་སྨོད་པ་དང་ལྡན་པ་ཞེས་བྱ་བའི་འཇིག་རྟེན་དུ་སྐྱེས་པར་གྱུར་ཏེ། ཤཱ་རིའི་བུ་དེ་བཞིན་གཤེགས་པ་དེའི་ཉན་ཐོས་ཀྱི་ཚོགས་ནི་བརྒྱད་ཁྲི་བཞི་སྟོང་བྱང་ཆུབ་སེམས་དཔའ་ནི་ཁྲི་ཉིས་སྟོང་དུ་གྱུར་ཏེ། དེ་བཞིན་གཤེགས་པ་
དེ་ཐེག་པ་གསུམ་པོ་ཉིད་ལས་བརྩམས་ཏེ་ཆོས་འཆད་ཅིང་། ཐེག་པ་གསུམ་བཤད་པ་དང་། ཕ་རོལ་དུ་ཕྱིན་པ་དྲུག་དང་། ཐབས་མཁས་པ་བཤད་པའི་ཕྱིར་དེ་བཞིན་གཤེགས་པ་དེ་སྐྱེས་པར་གྱུར་ཏོ། །ཤཱ་རིའི་བུ་ཡང་དེའི་ཚེ་
དེའི་དུས་ན་དགེ་སློང་ཆོས་སྨྲ་བ་ཡེ་ཤེས་རྒྱལ་པོ་ཞེས་བྱ་བ་ཞིག་བྱུང་སྟེ། དེ་ནང་པར་ཤམ་ཐབས་བགོས། ཆོས་གོས་དང་། ལྷུང་བཟེད་ཁྱེར་ཏེ་བསོད་སྙོམས་ཀྱི་ཕྱིར་རྒྱལ་པོའི་ཕོ་བྲང་རྒྱ་ཆེན་པོ་དང་ལྡན་པ་ཞེས་བྱ་བར་སོང་
བ་ལས། དེ་དེ་ནས་ཟས་རོ་བརྒྱ་དང་བཟའ་བ་མང་པོ་ཁྱེར་ཏེ་བྱུང་བར་གྱུར་ཏོ། །ཡང་དེའི་ཚེ་ན་ཚོང་དཔོན་གྱི་བུ་དྲི་མ་མེད་པའི་དཔུང་པ་ཞེས་བྱ་བ་མ་མའི་པང་པ་ན་འདུག་པར་གྱུར་པ་ལས་ཁྱེའུ་དེས་དགེ་སློང་དེ་རྒྱང་མ་ནས་འོང་བ་མཐོང་ངོ་
མཐོང་ནས་མ་མའི་པང་པ་ནས་བབས་ཏེ། དགེ་སློང་དེ་ག་ལ་བ་དེར་བརྒྱུགས་ནས་བཟའ་བ་བསླངས་པ་ལས། དགེ་སློང་དེས་དེ་ལ་མོ་ད་ཀ་གཅིག་བྱིན་པ་དང་། དེ་བཟའ་བ་དེས་སྙོགས་ནས་དགེ་སློང་དེའི་ཕྱི་བཞིན་དུ་འབྲང་བར་
གྱུར་པ་ལས། དེ་རིམ་གྱིས་དེ་བཞིན་གཤེགས་པ་མི་ཐུབ་པའི་རྒྱལ་མཚན་ག་ལ་བ་དེར་སོང་སྟེ་ཕྱིན་ནས་དེ་བཞིན་གཤེགས་པ་དེའི་ཞབས་ལ་མགོ་བོས་ཕྱག་འཚལ་ཏེ་སྤྱན་སྔར་འདུག་གོ། །དེ་ནས་དགེ་སློང་ཡེ་ཤེས་རྒྱལ་པོས་
བསོད་སྙོམས་ཅི་རྙེད་པ་ཁྱེའུ་དེ་ལ་བྱིན་ནས། ཀྱེ་ཁྱེའུ་བསོད་སྙོམས་འདི་དེ་བཞིན་གཤེགས་པ་ལ་གསོལ་ཅིག་ཅེས་བྱས་སོ། །དེ་ནས་ཁྱེའུ་དེས་བསོད་སྙོམས་དེ་བླངས་ཏེ། བཅོམ་ལྡན་འདས་དེའི་ལྷུང་བཟེད་བཀང་ཡང་བསོད་
སྙོམས་དེ་ཡོངས་སུ་ཟད་པར་མ་གྱུར་ཏོ། །ཤཱ་རིའི་བུ་འདི་ལྟ་སྟེ་བསོད་སྙོམས་གཅིག་པོ་དེ་ལས་ཁྱེའུ་དེས་ཉན་ཐོས་བརྒྱད་ཁྲི་བཞི་སྟོང་པོ་དེ་དག་དང་། བྱང་ཆུབ་སེམས་དཔའ་ཁྲི་ཉིས་སྟོང་པོ་དེ་དག་དང་། བཅོམ་ལྡན་འདས་དེ་བཞིན་

57-1-252b

གཤེགས་པ་མི་ཐུབ་པའི་རྒྱལ་མཚན་དེ་ཞོས་པར་བྱས་ཤིང་བསྟབས་ཀྱང་བསོད་སྙོམས་དེ་ཡོངས་སུ་ཟད་པར་མ་གྱུར་ཏོ། །དེ་ནས་ཁྱེའུ་དེ་དགའ་མགུ་རངས་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་
འདས་ཀྱི་སྤྱན་སྔར་འདུག་སྟེ། ཚིགས་སུ་བཅད་པ་འདི་དག་སྨྲས་སོ། །དགེ་སློང་དགེ་འདུན་ཞོས་བྱས་ཀྱང་། །ལྷུང་བཟེད་ནམ་ཡང་མ་ཟད་པས། །སྦྱིན་གནས་བསོད་ནམས་ཞིང་གྱུར་པ། །བདག་གིས་ངེས་པར་
མཆོད་པར་གྱུར། །འཇིག་རྟེན་མགོན་པོ་ཞོས་བྱས་ཀྱང་། །འབྲས་ཅན་ཟད་པར་མ་གྱུར་པས། །སངས་རྒྱས་ལ་ནི་ཕུལ་གྱུར་ན། །སྦྱིན་པ་མི་ཟད་ཐེ་ཙོམ་མེད། །ཇི་ལྟར་འབྲས་ཅན་མི་ཟད་ཅིང་། །ཕྱི་ཕྱིར་འཕེལ་བར་འགྱུར་
བ་ལྟར། །སངས་རྒྱས་དག་ལ་གང་གུས་པའི། །དགེ་བ་དག་ནི་དེ་བཞིན་འཕེལ། །ཤཱ་རིའི་བུ་དེ་ལྟ་སྟེ། ཁྱེའུ་དེས་བསོད་སྙོམས་གཅིག་པོ་དེ་ལས་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་ཉི་མ་བདུན་དུ་ཞོས་པར་
གསོལ་ནས་སངས་རྒྱས་ཀྱི་མཐུ་དང་། ཁྱེའུ་དེའི་སེམས་ཀྱི་བསམ་པ་དད་པས་ཟས་དེ་ཡོངས་སུ་ཟད་པར་མ་གྱུར་ཏོ། །དེ་ནས་དགེ་སློང་ཡེ་ཤེས་རྒྱལ་པོས་ཁྱེའུ་དེ་སངས་རྒྱས་ལ་སྐྱབས་སུ་བཏང་། ཆོས་ལ་སྐྱབས་སུ་བཏང་། དགེ་
འདུན་ལ་སྐྱབས་སུ་བཏངོ་། །ཁྲིམས་ཀྱང་ཕོག་གོ། །ཉེས་པ་ཡང་མཐོལ་དུ་གཞུག་གོ། །རྗེས་སུ་ཡི་རང་བར་བྱ་བ་དག་ཀྱང་རྗེས་སུ་ཡི་རང་བར་བྱེད་དུ་བཅུག་གོ། །གསོལ་བ་གདབ་པར་བྱ་བ་དག་ཀྱང་གསོལ་བ་འདེབས་སུ་བཅུག་ནས་
ཕྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་དུ་བཅུག་གོ། །ཤཱ་རིའི་བུ་དེ་ལྟ་སྟེ། ཁྱེའུ་དེའི་ཕ་དང་མ་ཁྱེའུ་དེ་ཚོལ་ཞིང་དེ་བཞིན་གཤེགས་པ་མི་ཐུབ་པའི་རྒྱལ་མཚན་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་
འདས་ཀྱི་ཞབས་ལ་མགོ་བོས་ཕྱག་འཚལ་ཏེ་སྤྱན་སྔར་འདུག་གོ། །དེ་ནས་ཁྱེའུ་དེས་ཕ་མ་དེ་དག་གི་རྐང་པ་ལ་ཕྱག་འཚལ་ནས་ཚིགས་སུ་བཅད་པ་འདི་དག་སྨྲས་སོ། །ལུས་ཅན་ཀུན་ལ་བདེ་བའི་ཕྱིར། །བདག་ནི་བྱང་ཆུབ་

57-1-253a

རབ་ཞུགས་ཀྱིས། །ཁྱེད་ཀྱང་ལེགས་པར་གནས་པར་གྱིས། །དལ་འབྱོར་ཤིན་དུ་དཀོན་པའོ། །སངས་རྒྱས་སྐུ་ནི་འབར་བ་དང་། །མཚན་དག་གིས་ཀྱང་བརྒྱན་ལ་ལྟོས། །ཡེ་ཤེས་ཀྱིས་ནི་ཕ་རོལ་ཕྱིན། །བྱང་ཆུབ་དེ་ལ་སུ་
མི་སྨོན། །དེ་བཞིན་གཤེགས་པ་ཤིན་དུ་དཀོན། །བདག་ནི་ཁྱིམ་ནས་ཁྱིམ་མེད་པར། །འདི་ཉིད་དུ་ནི་རབ་ཏུ་འབྱུང་། །ཁྱེད་ཅག་གཉིས་ཀྱིས་གནང་བར་མཛོད། །ཕ་དང་མས་སྨྲས་པ། བདག་ཅག་གཉིས་ནི་ཁྱོད་འདོད་ཀྱིས། །བྱང་ཆུབ་
རབ་ལ་སྨོན་པར་བགྱིད། །རབ་ཏུ་འབྱུང་བར་བགྱི་བའི་ཕྱིར། །བུ་ཁྱོད་ཀྱི་ནི་རྗེས་སུ་སློབ། །ཤཱ་རིའི་བུ་དེ་ལྟ་སྟེ། ཁྱེའུ་དེ་དང་། ཁྱེའུ་དེའི་ཕ་མ་དང་། གང་བྱང་ཆུབ་ཏུ་སེམས་བསྐྱེད་པའི་སྲོག་ཆགས་ལྔ་བརྒྱ་ཙམ་པོ་དེ་དག་ཐམས་ཅད་རབ་ཏུ་བྱུང་ངོ་། །
ཤཱ་རིའི་བུ་དེའི་ཚེ་དེའི་དུས་ན་དགེ་སློང་ཆོས་སྨྲ་བ་ཡེ་ཤེས་རྒྱལ་པོ་ཞེས་བྱ་བ་དེ་གཞན་ཡིན་སྙམ་དུ་ཤཱ་རིའི་བུ་ཁྱོད་དེ་ལྟར་མ་ལྟ་ཤིག །དེ་ཅིའི་ཕྱིར་ཞེ་ན། འཇམ་དཔལ་གཞོན་ནུར་གྱུར་པ་འདི་དེའི་ཚེ་དེའི་དུས་ན་དགེ་སློང་ཆོས་སྨྲ་བ་ཡེ་ཤེས་རྒྱལ་པོ་
ཞེས་བྱ་བར་གྱུར་ཏོ། །ཤཱ་རིའི་བུ་དེའི་ཚེ་དེའི་དུས་ན་ཚོང་དཔོན་གྱི་བུ་དྲི་མ་མེད་པའི་དཔུང་པ་ཞེས་བྱ་བ་དེ་གཞན་ཡིན་པ་སྙམ་དུ་ཐེ་ཙོམ་འམ། ཡིད་གཉིས་སམ། སོམ་ཉི་ཟ་ན། ཤཱ་རིའི་བུ་ཁྱོད་དེ་ལྟར་མ་ལྟ་ཤིག །དེ་ཅིའི་ཕྱིར་ཞེ་ན། ང་ནི་དེའི་ཚེ་དེའི་
དུས་ན་ཚོང་དཔོན་གྱི་བུ་དྲི་མ་མེད་པའི་དཔུང་པ་ཞེས་བྱ་བ་དེར་གྱུར་ཏེ། ཤཱ་རིའི་བུ་འཇམ་དཔལ་གཞོན་ནུར་གྱུར་པས་ང་ལ་བསོད་སྙོམས་བྱིན་ནས་བྱང་ཆུབ་ཏུ་སེམས་སྐྱེད་དུ་བཅུག་སྟེ། དེ་ནི་ངས་བྱང་ཆུབ་ཀྱི་ཕྱིར་ཐོག་མ་སེམས་བསྐྱེད་པ་ཡིན་ཏེ། 
ཤཱ་རིའི་བུ་རྣམ་གྲངས་དེས་ཀྱང་འདི་ལྟར་ཤེས་པར་བྱའོ། །དེ་བཞིན་གཤེགས་པ་སངས་རྒྱས་ཀྱི་ཆེ་བ་ཉིད་དང་། སྟོབས་བཅུ་དང་། མི་འཇིགས་པ་དང་། ཡེ་ཤེས་ཆགས་པ་མེད་པ་དང་། ཅིའང་རུང་སྟེ། དེ་ཐམས་ཅད་འཇམ་དཔལ་གཞོན་ནུར་
གྱུར་པས་བྱེད་དུ་བཅུག་པ་ལས་གྱུར་པར་བལྟའོ། །དེ་ཅིའི་ཕྱིར་ཞེ་ན། སེམས་བསྐྱེད་པ་དེ་ལས་ཐམས་ཅད་མཁྱེན་པ་ཐོབ་པའི་ཕྱིར་རོ། །ཤཱ་རིའི་བུ་ངས་ནི་ཕྱོགས་བཅུ་ན་ང་བདག་གི་ལྟ་བ་དེ་དང་འདྲ་བའི་དེ་བཞིན་གཤེགས་པ་གང་འཇམ་

57-1-253b

དཔལ་གཞོན་ནུར་གྱུར་པས་བྱང་ཆུབ་ལ་བཞག་པ་ཤཱཀྱ་ཐུབ་པ་ཞེས་བྱ་བ་དཔག་ཏུ་མེད་གྲངས་མེད་པ་དང་། དེ་བཞིན་དུ་ཏི་ཤ་ཞེས་བྱ་བ་དང་། རྒྱལ་བ་ཞེས་བྱ་བ་དང་། གཙུག་ལྡན་ཞེས་བྱ་བ་དང་། མར་མེ་མཛད་ཅེས་བྱ་བ་དག་མཐོང་སྟེ། 
གང་འཇམ་དཔལ་གཞོན་ནུར་གྱུར་པས་བྱང་ཆུབ་ལ་བཞག་ནས་ད་ལྟར་ཆོས་ཀྱི་འཁོར་ལོ་བསྐོར་བའི་དེ་བཞིན་གཤེགས་པ་དེ་དག་གི་མཚན་ཀྱང་བསྐལ་པ་འམ། བསྐལ་པའི་ལྷག་མ་མ་ལུས་པས་བརྗོད་པར་གྱུར་ན་གང་བྱང་ཆུབ་
སེམས་དཔའི་སྤྱད་པ་སྤྱོད་པ་དག་ལྟ་ཇི་སྨོས། གང་དགའ་ལྡན་གྱི་གནས་ན་གནས་པ་དག་ལྟ་ཇི་སྨོས། གང་སྐྱེ་བ་དག་ལྟ་ཇི་སྨོས། གང་ཁྱིམ་ནས་འབྱུང་བ་དག་ལྟ་ཇི་སྨོས། གང་དཀའ་བ་སྤྱོད་པ་དག་ལྟ་ཇི་སྨོས། གང་བྱང་ཆུབ་ཀྱི་
སྙིང་པོ་ལ་འདུག་པ་དག་ལྟ་ཇི་སྨོས་ཏེ། ཤཱ་རིའི་བུ་རྣམ་གྲངས་དེས་ཀྱང་འདི་ལྟར་རིག་པར་བྱ་སྟེ། གང་དག་བྱང་ཆུབ་སེམས་དཔའ་རྣམས་ཀྱི་མའོ། །སྐྱེད་པའོ། །ཐུགས་རྗེ་བའོ། །བྱེད་དུ་འཇུག་པའོ་ཞེས་ཡང་དག་པར་སྨྲ་ཞིང་སྟོན་པ་
ནི་འཇམ་དཔལ་གཞོན་ནུར་གྱུར་པ་ཉིད་ལ་དེ་དག་སྨྲ་ཞིང་སྟོན་ཏེ། ཤཱ་རིའི་བུ་རྒྱུ་དེ་དང་རྐྱེན་དེ་ཡིན་ཏེ། སྔོན་ཕན་བཏགས་པའི་ཕྱིར་འཇམ་དཔལ་གཞོན་ནུར་གྱུར་པ་ང་ལ་བྱས་པ་མི་གཟོ་བས་རྒོལ་ལོ། །དེ་ནས་ལྷའི་བུ་ཉིས་བརྒྱ་པོ་དག་འདི་
སྙམ་དུ་གྱུར་ཏེ། ཆོས་ཐམས་ཅད་ནི་རྒྱུའི་རྗེས་སུ་འགྲོ་བའོ། །རྐྱེན་ལ་རག་ལས་པའོ། །སྲེད་པའི་རྩ་བ་ཅན་ནོ། །སྨོན་ལམ་གྱིས་ཐོག་དྲངས་པ་ཅན་ཡིན་ཏེ། བཅོམ་ལྡན་འདས་འདི་ཡང་གཞན་གྱིས་བྱེད་དུ་བཅུག་པ་ཡིན་ན་དེ་བཞིན་
གཤེགས་པ་མངོན་པར་བཞུགས་བཞིན་དུ་བདག་ཅག་དམན་པ་ལ་སེམས་པ་དེ་ནི་མི་རིགས་སོ་སྙམ་མོ། །དེ་ནས་ལྷའི་བུ་ཉིས་བརྒྱ་པོ་དེ་དག་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །
འདིར་ལག་པ་བརྐྱང་ཞིང་རྫུ་འཕྲུལ་བསྟན་པའི་ཆོ་འཕྲུལ་འཇམ་དཔལ་གཞོན་ནུར་གྱུར་པས་བསྟན་ཅིང་ལྷུང་བཟེད་བླངས་པ་དང་། འདི་ལ་སྔོན་བྱུང་བའི་ཆོས་བསྟན་པ་བསྟན་པའི་ཚེ་འོག་གི་སངས་རྒྱས་ཀྱི་ཞིང་དང་། འདི་ནས་

57-1-254a

སེམས་ཅན་གྲངས་ལས་འདས་པས་བྱང་ཆུབ་ཏུ་སེམས་བསྐྱེད་དོ། །ཕྱོགས་བཅུའི་སངས་རྒྱས་ཀྱི་ཞིང་དཔག་ཏུ་མེད་པ་ནས་ཀྱང་འཇམ་དཔལ་གཞོན་ནུར་གྱུར་པ་ལ་མཆོད་པའི་ལས་བྱ་བ་དང་། ཆོས་ཀྱི་གཡོག་བྱ་བའི་ཕྱིར་
སངས་རྒྱས་བཅོམ་ལྡན་འདས་རྣམས་ཀྱིས་རིན་པོ་ཆེའི་གདུགས་བསྐུར་བར་གྱུར་ཏེ། རིན་པོ་ཆེའི་གདུགས་དེ་དག་གིས་ཀྱང་འཇིག་རྟེན་གྱི་ཁམས་འདི་ཁེབས་པར་གྱུར་ཏོ། །རིན་པོ་ཆེའི་གདུགས་དེ་ལས་ཀྱང་དེ་བཞིན་ནོ། །ཇི་ལྟར་དེ་
བཞིན་གཤེགས་པ་ཤཱཀྱ་ཐུབ་པས་གསུངས་པ་བཞིན་ཏེ། བདག་ཅག་ཐམས་ཅད་ཀྱང་འཇམ་དཔལ་གཞོན་ནུར་གྱུར་པས་བྱང་ཆུབ་ལ་བཀོད་དོ་ཞེས་དེ་སྐད་ཟེར་བའི་སྒྲ་བྱུང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་
ལ་བཀའ་སྩལ་པ། ཤཱ་རིའི་བུ་མྱུར་དུ་མྱ་ངན་ལས་འདའ་འདོད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ་སེམས་ཅན་གང་འཁོར་བས་སྐྲག་ནས་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེད་ཅིང་། ཉན་ཐོས་ཀྱི་ཐེག་པ་ལ་གནས་ལ་ཉན་ཐོས་སུ་འགྱུར་བར་བྱའོ་སྙམ་དུ་སེམས་པ་དེ་དག་ནི་ད་དུང་དུའང་འཁོར་བ་ན་འཁོར་བར་གྱུར་ལ། བྱང་ཆུབ་སེམས་དཔའ་གཞན་
བརྩོན་འགྲུས་དང་ལྡན་པ་ཡང་དག་པར་རྫོགས་པའི་བྱང་ཆུབ་ལ་གནས་པ་དག་གིས་ནི་ཐམས་ཅད་མཁྱེན་པ་ཐོབ་པར་ངས་མཐོང་ངོ་། །དེ་ཅིའི་ཕྱིར་ཞེ་ན། ཤཱ་རིའི་བུ་སྔོན་འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ཐམས་ཅད་ཟིལ་གྱིས་གནོན་པ་ཞེས་བྱ་བ་རིག་པ་དང་རྐང་པར་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་
སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་བར་གྱུར་ཏེ། ཤཱ་རིའི་བུ་དེ་བཞིན་གཤེགས་པ་དེའི་ཉན་ཐོས་ནི་བྱེ་བ་ཕྲག་བརྒྱ་ཡོད་པར་གྱུར་ཏོ། །ཚེའི་ཚད་ནི་ལོ་འབུམ་ཐུབ་པར་གྱུར་ཏོ། །ཤཱ་རིའི་བུ་དེ་བཞིན་གཤེགས་པ་དེ་ཉན་ཐོས་ཀྱི་

57-1-254b

མཆོག་ཤེས་རབ་དང་ལྡན་པ་ནི་དགེ་སློང་མངོན་པར་འཕགས་པ་ཞེས་བྱ་བ་ཞིག་བྱུང་ངོ་། །ཉན་ཐོས་ཀྱི་མཆོག་གཉིས་པ་རྫུ་འཕྲུལ་དང་ལྡན་པའི་མཆོག་ནི་ཤུགས་ཆེན་པོ་ཞེས་བྱ་བ་ཞིག་བྱུང་ངོ་། །དེ་ལྟ་སྟེ། ཤཱ་རིའི་བུ་དེ་བཞིན་གཤེགས་
པ་དེ་སྔ་དྲོའི་དུས་ཀྱི་ཚེ་ཤམ་ཐབས་མནབས་ཆོས་གོས་དང་། ལྷུང་བཟེད་བསྣམས་ཏེ། དགེ་སློང་གི་དགེ་འདུན་གྱིས་མདུན་དུ་བདར་ནས་རྒྱལ་པོའི་ཕོ་བྲང་གྲགས་ལྡན་ཞེས་བྱ་བར་བསོད་སྙོམས་ཀྱི་ཕྱིར་གཤེགས་སོ། །དེའི་ཚེ་ན་དེ་བཞིན་
གཤེགས་པའི་གཡས་ཕྱོགས་ནས་ནི་ཉན་ཐོས་ཤེས་རབ་དང་ལྡན་པའི་མཆོག་འགྲོའོ། །གཡོན་ཕྱོགས་ནས་ནི་ཉན་ཐོས་རྫུ་འཕྲུལ་དང་ལྡན་པའི་མཆོག་འགྲོའོ། །རྒྱབ་ནས་ནི་མང་དུ་ཐོས་པ་འགྲོའོ། །མདུན་ནས་ནི་བྱང་ཆུབ་སེམས་
དཔའ་བརྒྱད་སྟོང་འགྲོ་སྟེ། ལ་ལ་ནི་ཚངས་པའི་གཟུགས། ལ་ལ་ནི་བརྒྱ་བྱིན་གྱི་གཟུགས། ལ་ལ་ནི་རྒྱལ་པོ་ཆེན་པོ་བཞིའི་གཟུགས། ལ་ལ་ནི་ལྷའི་གཟུགས་ཀྱིས་ལམ་གྱི་བྱི་དོར་བྱེད་ཅིང་འགྲོ་སྟེ། ཤཱ་རིའི་བུ་དེའི་ཚེ་ན་དེ་བཞིན་གཤེགས་
པ་དེ་རྒྱལ་པོའི་ཕོ་བྲང་དེར་གཤེགས་པ་དང་། བྱིས་པ་རྒྱན་བཟང་པོས་བརྒྱན་པ་གསུམ་ཞིག་ལམ་གྱི་བར་ན་རྩེ་ཞིང་འདུག་པ་ལས་བྱིས་པ་དེ་དག་གིས་དེ་བཞིན་གཤེགས་པ་བཟང་བ། སེམས་དད་པར་འགྱུར་བ། དབང་པོ་ཞི་བ། ཡིད་ཞི་བ། 
དུལ་བ་དང་ཞི་གནས་མཆོག་དམ་པའི་ཕ་རོལ་དུ་སོན་པ། སྐྱོན་མེད་པ། དབང་པོ་ཐུལ་པ། རྫིང་བཞིན་དུ་དང་ལ་གསལ་ཞིང་རྙོག་པ་མེད་པ། མཆོད་སྦྱིན་གྱི་ཤིང་གསེར་ལས་བྱས་པ་ལྟར་མངོན་པར་འཕགས་པ་འབར་བ་མཛེས་པ། ལྷམ་
མེ་ལྷན་ནེར་བཞུགས་པ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ཀུན་ནས་བརྒྱན་པ་དེ་རྒྱང་མ་ནས་གཤེགས་པ་མཐོང་ངོ་། །མཐོང་ནས་ཁྱེའུ་གཅིག་གིས་ཁྱེའུ་གཉིས་ལ་འདི་སྐད་ཅེས་སྨྲས་སོ། །ཁྱེའུ་ཁྱེད་ཅག་གིས་དེ་བཞིན་
གཤེགས་པ་སེམས་ཅན་ཐམས་ཅད་ཀྱི་མཆོག་བསོད་ནམས་ཀྱི་ཞིང་བླ་ན་མེད་པ་ལྷ་དང་མིའི་འཇིག་རྟེན་དུ་བཅས་པའི་སྦྱིན་པའི་གནས་དེ་གཤེགས་པ་མཐོང་ངམ། ཚུར་ཤོག་དེ་ལ་མཆོད་པ་བྱའོ། །འདི་ལ་ཕུལ་ན་འབྲས་བུ་ཆེན་པོར་འགྱུར་

57-1-255a

རོ། །དེ་ནས་དེའི་ཚེ་ཁྱེའུ་དེས་ཚིགས་སུ་བཅད་པ་འདི་སྨྲས་སོ། །འདི་ནི་སེམས་ཅན་ཀུན་གྱི་མཆོག །སྦྱིན་གནས་བླ་ན་མེད་པ་སྟེ། །དེ་བས་འདི་ལ་མཆོད་པར་བྱ། །འདི་མཆོད་འབྲས་བུ་ཆེན་པོར་འགྱུར། །ཁྱེའུ་གཉིས་
པོས་སྨྲས་པ། བདག་ཅག་ལ་ནི་མེ་ཏོག་དང་། །དྲི་དང་ཕྱེ་མ་བྱུག་མ་མཆིས། །འཇིག་རྟེན་གང་ཟག་ཟླ་མེད་པ། །འདི་ལ་ཅིས་ནི་མཆོད་པར་བགྱི། །དེ་ནས་ཁྱེའུ་དེས་མུ་ཏིག་གི་སེ་མོ་དོ་རིན་བརྒྱ་སྟོང་རི་བ་ལག་པ་གཡས་པས་
མགུལ་ནས་བཀྲོལ་ཏེ་ཚིགས་སུ་བཅད་པ་འདི་སྨྲས་སོ། །བསོད་ནམས་ཞིང་ནི་བླ་ན་མེད། །དེ་ལ་འདིས་ནི་མཆོད་པར་བགྱི། །འདི་མཐོང་ནས་ནི་མཁས་པ་དག །དངོས་པོ་དག་ལ་སུ་ཞིག་ཆགས། །དེ་ནས་ཤཱ་རིའི་བུ་ཁྱེའུ་གཉིས་
པོ་དེ་དག་ཁྱེའུ་དེའི་རྗེས་སུ་སློབ་པར་གྱུར་ནས་བདག་བདག་གི་མགུལ་ནས་མུ་ཏིག་གི་སེ་མོ་དོ་བཀྲོལ་ཏེ། ཚིགས་སུ་བཅད་པ་འདི་སྨྲས་སོ། །ཡང་དག་རྫོགས་པ་འོད་པ་རྒལ། །མྱ་ངན་སྤངས་པ་སེམས་གྲོལ་བ། །སྡིག་མེད་ཡང་དག་
ཆོས་གནས་ལ། །བདག་ཅག་གཉིས་ནི་མཆོད་པ་བགྱིད། །དེ་ནས་ཁྱེའུ་དེས་ཁྱེའུ་གཉིས་པོ་དེ་དག་ལ་འདི་སྐད་ཅེས་སྨྲས་སོ། །ཁྱེའུ་ཁྱེད་གཉིས་སྦྱིན་པའི་ཆོས་འདིས་ཅིར་སྨོན། དེ་ནས་ཁྱེའུ་གཅིག་གིས་སྨྲས་པ། བདག་ནི་བཅོམ་ལྡན་
འདས་འདིའི་གཡས་ཕྱོགས་ན་ཤེས་རབ་དང་ལྡན་པའི་མཆོག་དེ་ཇི་ལྟ་བ་བཞིན་དུ་གྱུར་ཅིག །ཁྱེའུ་གཉིས་པས་སྨྲས་པ། བདག་ནི་བཅོམ་ལྡན་འདས་འདིའི་གཡོན་ཕྱོགས་ན་རྫུ་འཕྲུལ་དང་ལྡན་པའི་མཆོག་དེ་ཇི་ལྟ་བ་བཞིན་དུ་གྱུར་ཅིག །དེ་ནས་
ཁྱེའུ་དེས་སྨྲས་པ། བདག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་མཁྱེན་པ། ཐམས་ཅད་གཟིགས་པ། ཕྱོགས་ཐམས་ཅད་དུ་སྣང་བར་མཛད་པ། སེང་གེའི་འགྲོས་སུ་གཤེགས་པ། འདི་ཇི་
ལྟ་བ་དེ་བཞིན་དུ་གྱུར་ཅིག་ཅེས་ཤཱ་རིའི་བུ་ཁྱེའུ་དེས་ཚིག་དེ་སྐད་སྨྲས་མ་ཐག་ཏུ་བར་སྣང་ལས་ལྷའི་བུ་བརྒྱད་སྟོང་གིས་ལེགས་སོ་ཞེས་བྱ་བ་བྱིན་ཏེ། ལེགས་སོ་ལེགས་སོ། །སྐྱེས་བུ་དམ་པ་ཁྱོད་ཀྱིས་ཚིག་དེ་ལེགས་པར་སྨྲས་སོ། །

57-1-255b

ལྷ་དང་འཇིག་རྟེན་དུ་བཅས་པའི་རྟེན་དུ་སེམས་བསྐྱེད་དོ། །དེ་ནས་ཤཱ་རིའི་བུ་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པས་བསྙེན་བཀུར་བྱེད་པ་བློ་གྲོས་རྒྱ་མཚོ་ཞེས་བྱ་བ་ལ་བཀའ་སྩལ་པ། དགེ་སློང་ཁྱོད་ཀྱིས་ཁྱེའུ་མུ་
ཏིག་གི་སེ་མོ་དོ་ཐོགས་ཏེ་འོང་བ་འདི་གསུམ་མཐོང་ངམ། གསོལ་པ། བཅོམ་ལྡན་འདས་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཁྱེའུ་བར་མ་ཚུར་འོང་བ་འདི་ནི་འདི་འདྲ་བའི་བསམ་པས་འོང་སྟེ། གོམ་པ་འདོར་བ་
དང་། འཇོག་པ་ཐམས་ཅད་ལ་འཁོར་ལོས་སྒྱུར་བའི་རྒྱལ་སྲིད་བརྒྱ་སྟོང་གི་དགེ་བའི་རྩ་བ་ཡོངས་སུ་ལེན་ཏོ། །དེ་བཞིན་དུ་བརྒྱ་བྱིན་འཐོབ་པ་དང་། ཚངས་པ་འཐོབ་པ་བརྒྱ་སྟོང་ཡོངས་སུ་ལེན་ཏོ། །གོམ་པ་ཐམས་ཅད་ལ་སངས་
རྒྱས་བརྒྱ་སྟོང་མངོན་པར་མཐོང་བའི་དགེ་བའི་རྩ་བ་ཡོངས་སུ་ལེན་ཏོ། །ཤཱ་རིའི་བུ་དེ་ནས་ཁྱེའུ་གསུམ་པོ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པ་ག་ལ་བ་དེར་དོང་སྟེ་ཕྱིན་པ་དང་། བཅོམ་ལྡན་
འདས་ཀྱི་ཞབས་ལ་མགོ་བོས་ཕྱག་འཚལ་ནས་མུ་ཏིག་གི་སེ་མོ་དོ་དེ་བཅོམ་ལྡན་འདས་ཀྱི་སྐུ་ལ་གཏོར་ཏོ། །ཤཱ་རིའི་བུ་དེའི་ཚེ་གང་ཉན་ཐོས་ཀྱི་སེམས་ཀྱིས་མུ་ཏིག་གི་སེ་མོ་དོ་གཏོར་བར་གྱུར་པ་དེ་དག་ནི་དེ་བཞིན་གཤེགས་པ་དེའི་
ཕྲག་པ་གཉིས་ལ་འདུག་པར་གྱུར་ཏོ། །གང་ཁྱེའུ་དེས་ཐམས་ཅད་མཁྱེན་པའི་སེམས་ཀྱིས་མུ་ཏིག་གི་སེ་མོ་དོ་གཏོར་བར་གྱུར་པ་དེ་ནི་དེ་བཞིན་གཤེགས་པ་དེའི་དབུའི་གཙུག་གི་སྟེང་ན་མུ་ཏིག་གི་སེ་མོ་དོའི་ཁང་པ་བརྩེག་མ་རྣམ་པ་
སྣ་ཚོགས་བལྟ་ན་སྡུག་པ། གྲུ་བཞི་པ། ཀ་བ་བཞི་ཟུག་པ། ཀུན་ནས་རྣམ་པར་ཕྱེ་བར་གྱུར་ཅིང་། ཁང་པ་བརྩེགས་མ་དེ་ན་དེ་བཞིན་གཤེགས་པའི་སྐུ་སྐྱིལ་མོ་ཀྲུང་བཅས་ཤིང་བཞུགས་པར་ཡང་སྣང་ངོ་། །དེ་ནས་དེ་བཞིན་
གཤེགས་པ་དེ་འཛུམ་པ་མཛད་དེ། ཆོས་ཉིད་ཀྱིས་སངས་རྒྱས་བཅོམ་ལྡན་འདས་རྣམས་ནམ་འཛུམ་པ་མཛད་པ་དེའི་ཚེ་འོད་ཟེར་ཁ་དོག་རྣམ་པ་སྣ་ཚོགས་པ་དུ་མ་དེ་བཞིན་གཤེགས་པའི་ཞལ་ནས་འབྱུང་སྟེ། འདི་ལྟ་སྟེ། སྔོན་པོ་དང་། 

57-1-256a

སེར་པོ་དང་། དམར་པོ་དང་། དཀར་པོ་དང་། ཇ་གོང་དང་། ཤེལ་དང་། དངུལ་གྱི་ཁ་དོག་དག་གོ། །དེ་དག་གི་སྣང་བས་འཇིག་རྟེན་གྱི་ཁམས་མཐའ་ཡས་མུ་མེད་པར་ཁྱབ་པར་བྱས་ནས་ཚངས་པའི་འཇིག་རྟེན་གྱི་བར་དུ་སོང་སྟེ། 
ཉི་མ་དང་ཟླ་བའི་འོད་ཟིལ་གྱིས་མནན་ནས་སླར་ལོག་སྟེ། བཅོམ་ལྡན་འདས་ལ་ལེན་གསུམ་བསྐོར་ནས་བཅོམ་ལྡན་འདས་ཀྱི་སྤྱི་བོར་མི་སྣང་བར་སོང་སོ། །དེ་ནས་བཅོམ་ལྡན་འདས་དེ་ལ་བཅོམ་ལྡན་འདས་ཀྱི་བསྙེན་བཀུར་བྱེད་པ་དགེ་སློང་བློ་
གྲོས་རྒྱ་མཚོས་ཞུས་པ། དེ་བཞིན་གཤེགས་པ་རྒྱུ་མ་མཆིས་རྐྱེན་མ་མཆིས་པར་ནི་འཛུམ་པ་མི་མཛད་ན། བཅོམ་ལྡན་འདས་ཅིའི་རྒྱུ་ཅིའི་རྐྱེན་གྱིས་འཛུམ་པ་མཛད་ཅེས་དེ་སྐད་གསོལ་པ་དང་། བཅོམ་ལྡན་འདས་ཀྱིས་བསྙེན་བཀུར་
བྱེད་པ་དེ་ལ་འདི་སྐད་ཅེས་བཀའ་སྩལ་ཏོ། །དགེ་སློང་ཁྱེའུ་འདི་གཉིས་ཀྱིས་ཉན་ཐོས་ཀྱི་སེམས་ཀྱིས་དེ་བཞིན་གཤེགས་པ་ལ་མུ་ཏིག་གི་སེ་མོ་དོ་གཉིས་གཏོར་བ་ཁྱོད་ཀྱིས་མཐོང་ངམ། གསོལ་པ། བཅོམ་ལྡན་འདས་མཐོང་ངོ་། །
བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཁྱེའུ་འདི་གཉིས་ནི་འཁོར་བས་འཇིགས་སྐྲག་ནས་བྱང་ཆུབ་ཏུ་སྨོན་ལམ་མི་འདེབས་པར་བདག་ཅག་ནི་མྱུར་དུ་མྱ་ངན་ལས་འདས་པར་བྱའོ་སྙམ་དུ་དེ་ལྟར་སེམས་སོ། །དགེ་སློང་ཁྱོད་ལ་
བསྒོའོ། །ཁོང་དུ་ཆུད་པར་བྱའོ། །གང་གི་ཚེ་ན་ཁྱེའུ་གསུམ་པ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་འགྱུར་བ་དེའི་ཚེ། ཁྱེའུ་འདི་གཉིས་ནི་དེའི་ཉན་ཐོས་ཀྱི་མཆོག་ཏུ་འགྱུར་ཏེ། 
གཅིག་ནི་ཤེས་རབ་དང་ལྡན་པའི་མཆོག །གཉིས་པ་ནི་རྫུ་འཕྲུལ་དང་ལྡན་པའི་མཆོག་ཏུ་འགྱུར་རོ། །ཤཱ་རིའི་བུ་དེའི་ཚེ་དེའི་དུས་ན་ཁྱེའུ་བར་མར་གྱུར་ཅིང་ཐམས་ཅད་མཁྱེན་པའི་སེམས་བསྐྱེད་པ་དེ་ནི་གཞན་ནོ་སྙམ་དུ་ཐེ་ཙོམ་འམ། 
ཡིད་གཉིས་སུ་གྱུར་པར་ཤཱ་རིའི་བུ་དེ་ལྟར་མ་ལྟ་ཤིག །དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་ཁྱེའུ་བར་མ་དེར་གྱུར་ཏོ། །ཤཱ་རིའི་བུ་དེའི་ཚེ་དེའི་དུས་ན་གཡས་ཕྱོགས་ཀྱི་ཁྱེའུར་གྱུར་པ་དེ་གཞན་ཡིན་པ་སྙམ་དུ་དེ་ལྟར་མ་ལྟ་ཤིག །

57-1-256b

དེ་ཅིའི་ཕྱིར་ཞེ་ན། ཤཱ་རིའི་བུ་ཁྱོད་ཉིད་དེའི་ཚེ་དེའི་དུས་ན་ཁྱེའུ་དེར་གྱུར་ཏོ། །དགེ་སློང་མཽད་གལ་གྱི་བུ་ནི་ཁྱེའུ་གཡོན་ཕྱོགས་པར་གྱུར་ཏོ། །ཤཱ་རིའི་བུ་ལྟོས་དགེ་བའི་རྩ་བ་མཉམ་པ་ལས་ཁྱེད་གཉིས་འཁོར་བས་འཇིགས་སྐྲག་ནས་
བྱང་ཆུབ་ཏུ་སེམས་མ་བསྐྱེད་དེ། སེམས་ཞུམ་པས་ཅི་ནས་ཀྱང་བདག་ཅག་གིས་མྱུར་དུ་མྱ་ངན་ལས་འདའ་བར་བྱའོ་སྙམ་བྱེད་མོད་ཀྱི་ཁྱེད་གཉིས་ཀྱིས་ང་ལས་ཐལ་བར་མ་ནུས་སོ། །ཤཱ་རིའི་བུ་ལྟོས་ངས་ཐམས་ཅད་མཁྱེན་པ་རྟོགས་ནས་
ཁྱེད་གཉིས་ནི་ངས་ཆོས་བསྟན་པས་རྣམ་པར་གྲོལ་ལོ། །ཤཱ་རིའི་བུ་རྣམ་གྲངས་དེས་ཀྱང་འདི་ལྟར་ཤེས་པར་བྱ་སྟེ། ཅི་ནས་ཀྱང་མྱུར་དུ་མྱ་ངན་ལས་འདའ་བར་འདོད་ན་ཐམས་ཅད་མཁྱེན་པར་སེམས་བསྐྱེད་པར་བྱའོ། །དེ་ཅིའི་ཕྱིར་
ཞེ་ན། ཤཱ་རིའི་བུ་མྱུར་བའི་ཐེག་པ་ཞེས་བྱ་བ་ནི་ཐམས་ཅད་མཁྱེན་པའི་ཚིག་བླ་དགས་སོ། །མི་སླུ་བའི་ཐེག་པ་ཞེས་བྱ་བ་སེམས་ཅན་ཐམས་ཅད་ལ་ཕན་པ་དང་བདེ་བའི་ཐེག་པ་ཞེས་བྱ་བ། འབར་བའི་ཐེག་པ་ཞེས་བྱ་བ། 
ཐེག་པའི་མཆོག་ཅེས་བྱ་བ། ཐེག་པའི་གཙོ་བོ་ཞེས་བྱ་བ། ཐེག་པ་རབ་མཆོག་ཅེས་བྱ་བ། བླ་ན་མེད་པའི་ཐེག་པ་ཞེས་བྱ་བ། མ་ཆགས་པའི་ཐེག་པ་ཞེས་བྱ་བ། ཉན་ཐོས་དང་རང་སངས་རྒྱས་ཐམས་ཅད་ཟིལ་གྱིས་
གནོན་པའི་ཐེག་པ་ཞེས་བྱ་བ་ནི་ཤཱ་རིའི་བུ་ཐམས་ཅད་མཁྱེན་པའི་ཚིག་བླ་དགས་སོ། །སྔོན་བྱུང་བའི་གཏམ་འདི་དང་། ཐམས་ཅད་མཁྱེན་པ་སྟོན་པ་འདི་བསྟན་པའི་ཚེ་སྲོག་ཆགས་ཁྲིས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་སེམས་བསྐྱེད་དོ། །ཤཱ་རིའི་བུ་དང་མཽད་གལ་གྱི་བུ་ཆེན་པོ་དང་། འོད་སྲུང་ཆེན་པོ་དང་། རེ་བ་ཏི་དང་། མ་འགགས་པ་དང་། ཨུ་པ་ལི་དང་། བྱམས་མའི་བུ་གང་པོ་ལ་སོགས་པ་ཉན་ཐོས་ཆེན་པོ་དེ་དག་ཐམས་ཅད་ཀྱིས་
བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདས་རིགས་ཀྱི་བུ་དང་། རིགས་ཀྱི་བུ་མོས་གུས་པར་བགྱིས་ཏེ། དགེ་བའི་རྩ་བ་བསྐྱེད་པར་བགྱིའོ། །རྒྱ་ཆེན་པོ་ལ་ཡང་མོས་པར་བགྱིའོ། །

57-1-257a

སྨོན་ལམ་རྒྱ་ཆེན་པོ་ཡང་གདབ་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བདག་ཅག་ལ་སངས་རྒྱས་བརྒྱ་སྟོང་གིས་ཐམས་ཅད་མཁྱེན་པ་དང་ལྡན་པའི་གཏམ་བརྗོད་ཅིང་བདག་ཅག་ལ་ཆོས་བསྟན་ཀྱང་
བཅོམ་ལྡན་འདས་བདག་ཅག་ནི་མ་ཆགས་པའི་ཡེ་ཤེས་རྟོགས་པར་འགྱུར་བའི་སྐལ་བ་མ་མཆིས་སོ། །བཅོམ་ལྡན་འདས་བདག་ཅག་ནི་མཚམས་མ་མཆིས་པ་ལྔ་དང་ལྡན་ན་ལེགས་ཀྱི། བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ལས་ལྡོག་པར་འགྱུར་བ་ནི་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བདག་ཅག་མཚམས་མ་མཆིས་པ་ལྔ་དང་ལྡན་ན་ནི་སེམས་ཅན་དམྱལ་བར་སྡུག་བསྔལ་སྦྱངས་ཏེ་ཐམས་ཅད་མཁྱེན་
པའི་ཡེ་ཤེས་མ་ཆགས་པ་འདི་དང་མི་འབྲལ་བར་འགྱུར་ན་བཅོམ་ལྡན་འདས་བདག་ཅག་ནི་བསམ་པའི་རྒྱུད་ཚིག་པ། དབང་པོ་ཉམས་པ། ཐམས་ཅད་མཁྱེན་པའི་ཡེ་ཤེས་ཀྱི་སྣོད་མ་ལགས་པར་གྱུར་ན་ད་ཇི་ལྟར་བགྱི། 
བཅོམ་ལྡན་འདས་འདི་ལྟ་སྟེ། དཔེར་ན་སྐྱེས་བུ་གུམ་སྟེ་དུས་འདས་པར་གྱུར་ན་གཉེན་རྣམས་ཀྱི་ཉེ་བར་འཚོ་བར་མི་འགྱུར་བ་དེ་བཞིན་དུ། བཅོམ་ལྡན་འདས་ཉན་ཐོས་ཀྱི་ཐེག་པ་ལ་མོས་ན་ལྷ་དང་འཇིག་རྟེན་དུ་བཅས་པ་ལ་
སྨན་མི་ཐོགས་སོ། །བཅོམ་ལྡན་འདས་འདི་ལྟ་སྟེ། དཔེར་ན་ས་ཆེན་པོ་འདི་རྐང་གཉིས་པ་དང་། རྐང་བཞི་པ་རྣམས་ལ་སྨན་འདོགས་པར་གྱུར་པ་དེ་བཞིན་དུ། བཅོམ་ལྡན་འདས་གང་དག་གིས་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་པ་དེ་དག་ནི་ལྷ་དང་བཅས་པའི་འཇིག་རྟེན་ལ་སྨན་འདོགས་པར་གྱུར་པའོ། ། བམ་པོ་གསུམ་པ། གཏམ་འདི་བརྗོད་པའི་རྗེས་ལ་རྒྱལ་པོ་མ་སྐྱེས་དགྲ་དཔུང་གི་
ཚོགས་ཡན་ལག་བཞི་པ་དང་བཅས་ཏེ་བཅོམ་ལྡན་འདས་ག་ལ་བ་དེར་སོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་ནས་ཕྱོགས་གཅིག་ཏུ་འདུག་གོ། །

57-1-257b

ཕྱོགས་གཅིག་ཏུ་འདུག་ནས་རྒྱལ་པོ་མ་སྐྱེས་དགྲས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་རྣམས་ཅི་ལ་
གནས། ཅིའི་མཐུས་ན་སྡིག་པའི་ལས་མངོན་པར་རྩོམ་ཞིང་བགྱིད་པར་འགྱུར། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་སེམས་
ཅན་རྣམས་ནི་བདག་དང་སེམས་ཅན་དང་། སྲོག་དང་། གང་ཟག་ལ་གནས་སོ། །རྒྱལ་པོ་ཆེན་པོ་སེམས་ཅན་རྣམས་ནི་འཇིག་ཚོགས་སུ་ལྟ་བ་ལ་རྟེན་ཅིང་ཕྱིན་ཅི་ལོག་ཏུ་མངོན་དུ་གྱུར་པ་ལ་གནས་ནས་སྡིག་པའི་ལས་
མངོན་པར་རྩོམ་ཞིང་བྱེད་པར་འགྱུར་རོ། །གསོལ་པ། བཅོམ་ལྡན་འདས་འཇིག་ཚོགས་སུ་ལྟ་བའི་རྩ་བ་གང་ལགས། བཀའ་སྩལ་པ། རྒྱལ་པོ་ཆེན་པོ་འཇིག་ཚོགས་སུ་ལྟ་བ་ནི་མ་རིག་པའི་རྩ་བ་ལས་བྱུང་
ངོ་། །གསོལ་པ། བཅོམ་ལྡན་འདས་མ་རིག་པའི་རྩ་བ་གང་ལགས། བཀའ་སྩལ་པ། རྒྱལ་པོ་ཆེན་པོ་མ་རིག་པ་ནི་ཚུལ་བཞིན་ཡིད་ལ་མི་བྱེད་པ་ལས་བྱུང་ངོ་། །གསོལ་པ། བཅོམ་ལྡན་འདས་ཚུལ་བཞིན་
ཡིད་ལ་མི་བགྱིད་པའི་རྩ་བ་གང་ལགས། བཀའ་སྩལ་པ། རྒྱལ་པོ་ཆེན་པོ་ཚུལ་བཞིན་ཡིད་ལ་མི་བྱེད་པ་ནི་མེད་པ་ལ་སྒྲོ་འདོགས་པའི་རྩ་བ་ལས་བྱུང་ངོ་། །གསོལ་པ། བཅོམ་ལྡན་འདས་མ་མཆིས་པ་ལ་
སྒྲོ་འདོགས་པ་ཞེས་བགྱི་བ་ཅི་ལགས། བཀའ་སྩལ་པ། རྒྱལ་པོ་ཆེན་པོ་མེད་པ་ལ་སྒྲོ་འདོགས་པ་ཞེས་བྱ་བ་ནི་མ་བྱུང་བ་ལ་ཡོངས་སུ་རྟོག་པའི་ཚིག་བླ་དགས་སོ། །གསོལ་པ། བཅོམ་ལྡན་འདས་མ་བྱུང་
བ་ལ་ཡོངས་སུ་རྟོག་པ་ཞེས་བགྱི་བའི་རྩ་བ་གང་ལགས། བཀའ་སྩལ་པ། རྒྱལ་པོ་ཆེན་པོ་མ་བྱུང་བ་ལ་ཡོངས་སུ་རྟོག་པ་ཞེས་བྱ་བ་ནི་འདུས་ཏེ་མ་བྱུང་བའི་ཚིག་བླ་དགས་སོ། །གསོལ་པ། 

57-1-258a

བཅོམ་ལྡན་འདས་འདུས་ཏེ་མ་བྱུང་བ་ཞེས་བགྱི་བ་ཅི་ལགས། བཀའ་སྩལ་པ། རྒྱལ་པོ་ཆེན་པོ་འདུས་ཏེ་མ་བྱུང་བ་ཞེས་བྱ་བ་ནི་གང་གི་ཕྱིར་མ་སྐྱེས་མ་བྱུང་བས་དེའི་ཕྱིར་འདུས་ཏེ་མ་བྱུང་བ་ཞེས་བྱའོ། །
གསོལ་པ། བཅོམ་ལྡན་འདས་གང་མི་འབྱུང་བ་དེ་ཅི་ཞིག་བགྲང་འཚལ། བཀའ་སྩལ་པ། གང་མི་འབྱུང་བ་དེ་ལ་བགྲང་བ་ཆུང་ཟད་ཀྱང་མེད་དོ། །གསོལ་པ། བཅོམ་ལྡན་འདས་འགྱོད་པ་ཅི་ལ་དམིགས་པ་ལགས། བཀའ་སྩལ་པ། 
རྒྱལ་པོ་ཆེན་པོ་འགྱོད་པ་ནི་ཐེ་ཙོམ་ལ་དམིགས་པའོ། །གསོལ་པ། བཅོམ་ལྡན་འདས་ཐེ་ཙོམ་ཞེས་བགྱི་བ་ཅི་ལགས། བཀའ་སྩལ་པ། རྒྱལ་པོ་ཆེན་པོ་ཐེ་ཙོམ་ཞེས་བྱ་བ་ནི་གང་འཕགས་པ་ཡང་དག་པར་སྨྲ་བ་དག་གིས་བཤད་པ་
ལ་ཐེ་ཙོམ་ཟ་བ་སྟེ་དེ་ནི་ཐེ་ཙོམ་ཞེས་བྱའོ། །གསོལ་པ། བཅོམ་ལྡན་འདས་འཕགས་པ་གང་ལགས། ཡང་དག་པར་སྨྲ་བ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་རྡུལ་དང་ལྟ་བ་ཐམས་ཅད་དང་
བྲལ་བའི་ཕྱིར་འཕགས་པ་ཞེས་བྱའོ། །རྒྱལ་པོ་ཆེན་པོ་གང་དག་གིས་ཆོས་ཐམས་ཅད་འདུས་ཏེ་བྱུང་བ་མ་ཡིན་པར་རྟོགས་པ་ནི་ཡང་དག་པར་སྨྲ་བ་ཞེས་བྱའོ། །དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་རྒྱལ་པོ་མ་
སྐྱེས་དགྲས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གནས་པ་ནི་བདག་གི་བསམ་པའི་རྒྱུད་ཀྱི་ཉོན་མོངས་པས་བསྒྲིབས་པ་སྟེ། དེ་ནི་འཕགས་པ་ཡང་དག་པར་སྨྲ་བ་དག་གིས་བཤད་པ་ལ་ཡིད་མ་ཆེས་ནས་སྡིག་པའི་
ལས་རྣམ་པ་དུ་མ་དག་རྩོལ་ཞིང་བགྱིད་པ་དེ་ནི་བཅོམ་ལྡན་འདས་ངོ་མཚར་ཏོ། །དེ་ནི་བདེ་བར་གཤེགས་པ་རྨད་དུ་གྱུར་པའོ། །བཅོམ་ལྡན་འདས་བདག་གིས་ཀྱང་སྡིག་པའི་གྲོགས་པོའི་དབང་དུ་མཆིས་པ་དང་། རྒྱལ་སྲིད་དང་། 
ལོངས་སྤྱོད་དང་། དབང་དང་། ནོར་གྱིས་རྒྱགས་ཤིང་དྲེགས་པས་ཕས་མ་ནོངས་པར་སྲོག་བཀུམ་ནས། བཅོམ་ལྡན་འདས་བདག་ནི་ཐེ་ཙོམ་དེ་མེད་པར་བསལ་མི་ནུས་ཏེ། ཟས་འཚལ་བ་དང་། སྐོམ་འཚལ་བ་དང་། རྩེ་བ་དང་དགའ་

57-1-258b

བར་བགྱིད་པ་དང་། ཡོངས་སུ་སྤྱོད་པ་དང་། དོན་སྒྲུབ་ཅིང་མཆིས་པ་དང་། སླས་ཀྱི་ནང་དུ་མཆིས་པ་དང་། གཅིག་པུ་མཆིས་པ་དང་། འགྲོ་བ་མང་པོའི་ནང་དུ་མཆིས་པ་དང་། ནུབ་མོ་དང་གདུགས་ལ་ཡང་ཐེ་ཙོམ་དེ་བསལ་མ་ནུས་ནས། 
བཅོམ་ལྡན་འདས་བདག་ནི་གཡར་ཟས་ཀྱི་རོ་ཡང་མི་བྲོ། བཅོམ་ལྡན་འདས་བདག་ནི་ཕྱག་ལ་སྐོམ་པར་ཡང་མི་འགྱུར། བཅོམ་ལྡན་འདས་བདག་ནི་གཉིད་ཀྱང་མི་མཆི། བཅོམ་ལྡན་འདས་བདག་ནི་མདངས་གསལ་བ་ཡང་མ་མཆིས། 
བཅོམ་ལྡན་འདས་བདག་ནི་རྟག་ཏུ་རྒྱུན་མི་ཆད་པར་སྐྲག་པ་འབྱུང་ཞིང་མཇུག་ཏུ་བདག་སེམས་ཅན་དམྱལ་བ་པར་འགྱུར་བ་ཡང་སེམས་ཏེ། བཅོམ་ལྡན་འདས་ཁྱོད་ནི་འཇིག་རྟེན་ལོང་བར་གྱུར་པའི་ནི་མིག །ཆབ་ཀྱིས་དེད་པ་རྣམས་ཀྱི་ནི་
འདྲེན་པ། རྒལ་འཚལ་བ་རྣམས་ཀྱི་ནི་ཟམ་པ། སྡུག་བསྔལ་བ་རྣམས་ལ་ནི་བདེ་བ་སྩོལ་བ། དབུལ་པོ་རྣམས་ཀྱི་ནི་གཏེར། ལམ་ངན་པར་ཞུགས་པ་རྣམས་ལ་ནི་ལམ་སྟོན་པ། ཐུགས་རྗེ་ཆེ་བ། ཐུགས་མི་སྐྱོ་བ། སེམས་
ཅན་ཐམས་ཅད་ལ་སྙོམས་པར་དགོངས་པ། ཤིན་དུ་བྱམས་པ། བརྟན་པ། བདེ་བ་དང་སྡུག་བསྔལ་བས་མི་བསྐྱོད་པ་ལགས་ཏེ། བཅོམ་ལྡན་འདས་ཀྱིས་ནི་སེམས་ཅན་གང་ཡང་མ་བཏང་ན། བཅོམ་ལྡན་འདས་བདག་འཇིགས་
པ་ལ་མི་འཇིགས་པ་སྩོལ་ཅིག །མགོན་མ་མཆིས་པའི་མགོན་དུ་གྱུར་ཅིག །སྐྱབས་མ་མཆིས་པའི་སྐྱབས་སུ་གྱུར་ཅིག །ལོང་བའི་ནི་མིག་ཏུ་གྱུར་ཅིག །བདག་ཆབ་ཀྱིས་འཚལ་བ་ལ་ནི་ཕྱག་གིས་དྲང་བར་མཛོད་ཅིག །
བཅོམ་ལྡན་འདས་བདག་མནར་མ་མཆིས་པའི་འཇིགས་པ་དང་། སྐྲག་པ་ཆེན་པོར་ལྟུང་བ་ལ། ཅི་ནས་ཀྱང་ཐེ་ཙོམ་དེ་བསལ་ནས་ཀུན་དུ་དཀྲིས་པ་མ་མཆིས་པར་འགུམ་པའི་དུས་བགྱིད་པ་དང་། བདག་གི་སུག་ལས་དེ་ཡང་མྱོང་བ་
ཆུང་ངུ་འགྱུར་བ་དེ་ལྟ་དེ་ལྟར་ཆོས་བཤད་དུ་གསོལ། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཀྱེ་མའོ་རྒྱལ་པོ་མ་སྐྱེས་དགྲ་འདི་ནི་སྲེད་པ་ལ་སྤྱོད་པ། ཆོས་ཟབ་མོ་ལ་དད་པ་ཡིན་གྱིས། འཇམ་དཔལ་གཞོན་ནུར་གྱུར་པ་

57-1-259a

མ་གཏོགས་པར་གཞན་སུས་ཀྱང་འདིའི་ཐེ་ཙོམ་ལྷག་མ་མ་ལུས་པར་སེལ་མི་ནུས་སྙམ་མོ། །དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཤཱ་རིའི་བུས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་
འཇམ་དཔལ་གཞོན་ནུར་གྱུར་པ་སང་བཤོས་ལ་སྤྱན་དྲོངས་ཤིག་དང་། དེས་ཁྱོད་ཀྱི་ཐེ་ཙོམ་ངན་པ་དེའང་བསལ་བར་འགྱུར། ཁྱིམ་ཡང་སྤྱད་པར་འགྱུར། ཁྱོད་ཀྱི་ནང་གི་འགྲོ་བ་དེ་ཐམས་ཅད་ཀྱིས་ཀྱང་དགེ་བའི་རྩ་བ་བསྐྱེད་པར་
འགྱུར། རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་ཡང་སེམས་ཅན་ཚད་མེད་པ་དག་གི་དོན་བྱས་པར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པ་ལ་རྒྱལ་པོ་མ་སྐྱེས་དགྲས་འདི་སྐད་ཅེས་གསོལ་ཏོ། །འཇམ་དཔལ་གཞོན་ནུར་
གྱུར་པ་བདག་ལ་ཐུགས་བརྩེ་བའི་སླད་དུ་སང་བཤོས་ལ་གཤེགས་པར་དགོངས་ཤིག །དེ་སྐད་ཅེས་གསོལ་པ་དང་། འཇམ་དཔལ་གཞོན་ནུར་གྱུར་པས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་བྱས་པ་དང་། 
མཆོད་པས་ཆོག་གིས། འདི་ལྟ་སྟེ། ལེགས་པར་གསུངས་པའི་ཆོས་འདུལ་བ་ལ་གོས་ལེན་པ་འམ། ལྷུང་བཟེད་ལེན་པ་འམ། ཟས་ལེན་པ་དེ་ནི་ཐུགས་བརྩེ་བ་མ་ཡིན་གྱི། རྒྱལ་པོ་ཆེན་པོ་ཁྱོད་གང་གི་ཚེ་ཟབ་མོའི་དོན་དམ་པ་
བདག་མེད་པ་ལ་ཐེ་ཙོམ་མེད་པ་འམ། ནེམ་ནུར་མེད་པར་གྱུར་ན། དེ་ལྟ་བུ་ནི་ཁྱོད་ལ་ཐུགས་བརྩེ་བར་བྱས་པ་ཡིན་ནོ། །རྒྱལ་པོ་ཆེན་པོ་གང་གི་ཚེ་ཁྱོད་ཆོས་གང་ལ་ཡང་རྟོག་པར་ཡང་མ་གྱུར། རྣམ་པར་རྟོག་པར་མ་གྱུར་ན་དེ་ལྟ་བུ་ནི་ཁྱོད་
ལ་ཐུགས་བརྩེ་བར་བྱས་པ་ཡིན་ནོ། །རྒྱལ་པོ་ཆེན་པོ་གང་གི་ཚེ་ན་ཁྱོད་སེམས་འདས་པ་དང་། མ་འོངས་པ་དང་། ད་ལྟར་དུ་རྟོག་པ་འང་མེད། རྣམ་པར་རྟོག་པ་ཡང་མེད་ན་དེ་ལྟ་བུ་ནི་ཁྱོད་ལ་ཐུགས་བརྩེ་བར་བྱས་པ་ཡིན་ནོ། །རྒྱལ་པོ་ཆེན་པོ་
གང་གི་ཚེ་ན། ཁྱོད་ལྟ་བ་ཆུང་ངུ་ཡང་སྐྱེད་པར་ཡང་མི་བྱེད། འགོག་པར་ཡང་མི་བྱེད་ན་དེ་ལྟ་བུ་ནི་ཁྱོད་ལ་ཐུགས་བརྩེ་བར་བྱས་པ་ཡིན་ནོ། །དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པ་ལ་རྒྱལ་པོ་མ་སྐྱེས་དགྲས་འདི་སྐད་ཅེས་

57-1-259b

གསོལ་ཏོ། །འཇམ་དཔལ་ཆོས་ཀྱི་ཆོས་ཉིད་ནི་དེ་ལྟ་ལགས་མོད་ཀྱི། འོན་ཀྱང་བདག་ལ་ཐུགས་བརྩེ་བའི་སླད་དུ་སང་འཁོར་དང་བཅས་ཏེ། བདག་གི་མཆིས་བྲང་དུ་བཤོས་ལ་གཤེགས་ཤིག །དེ་སྐད་ཅེས་གསོལ་པ་དང་། 
འཇམ་དཔལ་གཞོན་ནུར་གྱུར་པས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་འདི་ལྟ་སྟེ། ལེགས་པར་གསུངས་པའི་ཆོས་འདུལ་བ་ལ་ནི་གོས་ལེན་པ་འམ། ལྷུང་བཟེད་ལེན་པ་འམ། ཟས་ལེན་པ་དེ་
ཐུགས་བརྩེ་བ་མ་ཡིན་གྱི། རྒྱལ་པོ་ཆེན་པོ་གང་གི་ཚེ་ན་ཁྱོད་བདག་ཏུ་མི་འཛིན། སེམས་ཅན་དུ་མི་འཛིན། སྲོག་ཏུ་མི་འཛིན། གང་ཟག་ཏུ་མི་འཛིན་པ་དེའི་ཚེ། ཁྱོད་ལ་ཐུགས་བརྩེ་བར་བྱས་པ་ཡིན་ནོ། །རྒྱལ་པོ་ཆེན་པོ་
གང་གི་ཚེ་ན་ཁྱོད་བདག་ཏུ་བཟུང་བ་དང་། གཞན་དུ་བཟུང་བ་མི་འཛིན་པར་གྱུར་ན་དེ་ལྟ་བུ་ནི་ཁྱོད་ལ་ཐུགས་བརྩེ་བར་བྱས་པ་ཡིན་ནོ། །རྒྱལ་པོ་ཆེན་པོ་གང་གི་ཚེ་ན་ཁྱོད་སེམས་སུ་མི་འཛིན། དམིགས་པར་མི་འཛིན། ཕུང་པོར་
མི་འཛིན། ཁམས་སུ་མི་འཛིན། སྐྱེ་མཆེད་དུ་མི་འཛིན། ནང་དུ་མི་འཛིན། ཕྱིར་མི་འཛིན་པ་ཁམས་གསུམ་དུ་མི་འཛིན། ཁམས་གསུམ་ལས་འདས་པར་མི་འཛིན། དགེ་བར་མི་འཛིན། མི་དགེ་བར་མི་འཛིན། ཁ་ན་མ་
ཐོ་བ་དང་བཅས་པར་མི་འཛིན། ཁ་ན་མ་ཐོ་བ་མེད་པར་མི་འཛིན། འཇིག་རྟེན་པར་མི་འཛིན། འཇིག་རྟེན་ལས་འདས་པར་མི་འཛིན། ཟག་པ་དང་བཅས་པར་མི་འཛིན། ཟག་པ་མེད་པར་མི་འཛིན། འདུས་བྱས་སུ་མི་
འཛིན། འདུས་མ་བྱས་སུ་མི་འཛིན། ཉོན་མོངས་པར་མི་འཛིན། བྱང་བར་མི་འཛིན། འཁོར་བར་མི་འཛིན། མྱ་ངན་ལས་འདས་པར་མི་འཛིན་ན་དེ་ལྟ་བུ་ནི་ཁྱོད་ལ་ཐུགས་བརྩེ་བར་བྱས་པ་ཡིན་ནོ། །དེ་ནས་འཇམ་དཔལ་
གཞོན་ནུར་གྱུར་པ་ལ་རྒྱལ་པོ་མ་སྐྱེས་དགྲས་འདི་སྐད་ཅེས་གསོལ་ཏོ། །འཇམ་དཔལ་བདག་ལ་ཐུགས་བརྩེ་བའི་སླད་དུ་དགོངས་སུ་གསོལ། འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་འདི་ལྟ་སྟེ། ཆོས་གང་ལ་ཡང་

57-1-260a

མངོན་པར་ཆགས་པ་འམ། ཡོངས་སུ་ལེན་པ་དེ་ནི་ཕན་པ་འམ་བདེ་བ་མ་ཡིན་ནོ། །རྒྱལ་པོ་ཆེན་པོ་གང་དུ་ཡང་གཡོ་བ་འམ། སེམས་པ་ནི་ཕན་པ་འམ་བདེ་བ་མ་ཡིན་གྱི། གང་གཡོ་བ་དང་སེམས་པ་ཡོངས་སུ་
འཛིན་ཅིང་མངོན་པར་ཆགས་པ་སྤོང་བ་དེ་ནི་ཕན་པ་དང་བདེ་བའོ། །རྒྱལ་པོ་ཆེན་པོ་གང་མི་འཁྲུག་པ་དེ་ནི་ཕན་པ་དང་བདེ་བའོ། །རྒྱལ་པོ་ཆེན་པོ་གང་སླར་འཁྲུག་པ་དེ་ནི་ཕན་པ་དང་བདེ་བ་མ་ཡིན་ནོ། །རྒྱལ་པོ་ཆེན་པོ་གང་མཐར་
གཏུགས་པ་དེ་ནི་ཕན་པ་དང་བདེ་བའོ། །གང་སླར་ཡང་བྱ་བར་འགྱུར་བ་དེ་ནི་ཕན་པ་དང་བདེ་བ་མ་ཡིན་ནོ། །དེ་སྐད་ཅེས་སྨྲས་པ་དང་། འཇམ་དཔལ་གཞོན་ནུར་གྱུར་པ་ལ་རྒྱལ་པོ་མ་སྐྱེས་དགྲས་འདི་སྐད་ཅེས་གསོལ་ཏོ། །འཇམ་
དཔལ་གང་འགྱུར་བ་མ་མཆིས་པའི་ཆོས་དེ་གང་ལགས། སྨྲས་པ། རྒྱལ་པོ་ཆེན་པོ་སྟོང་པ་ཉིད་ནི་བྱ་བ་ཡང་མེད། འགྱུར་བ་ཡང་མེད་དོ། །དེ་བཞིན་དུ་མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུ་མི་བྱེད་པ་ནི་བྱ་བ་ཡང་
མེད། འགྱུར་བ་ཡང་མེད་དོ། །རྒྱལ་པོ་ཆེན་པོ་ཇི་སྲིད་དུ་ལུས་དང་། ངག་དང་། ཡིད་ཀྱིས་མངོན་པར་འདུ་བྱ་བ་མེད་པ་དེ་སྲིད་དུ་བྱ་བ་ཡང་མེད། འགྱུར་བ་ཡང་མེད་དོ། །རྒྱལ་པོ་ཆེན་པོ་གང་གི་ཚེ་ལུས་དང་། ངག་དང་། ཡིད་ཀྱིས་མི་
བྱ། མངོན་པར་མི་བྱ་བ་དེ་ལ་ནི་བྱ་བ་ཡང་མེད། འགྱུར་བ་ཡང་མེད་དོ། །རྒྱལ་པོ་ཆེན་པོ་དེ་བས་ན་ཆོས་ཐམས་ཅད་ནི་མངོན་པར་འདུ་མི་བྱེད་པའི་མཚན་ཉིད་དེ། གང་མངོན་པར་འདུ་བྱེད་པ་དེ་ཡང་དེའི་མཚན་ཉིད་མ་ཡིན་ནོ། །
གསོལ་པ། འཇམ་དཔལ་ཇི་ལྟར་ན་མངོན་པར་འདུས་བྱས་པ་ལ་མངོན་པར་འདུས་མ་བྱས་པར་མོས་པ་ལགས། སྨྲས་པ། རྒྱལ་པོ་ཆེན་པོ་གང་གི་ཚེ་ན་འདས་པ་ལ་ཟད་པར་མི་སེམས། མ་འོངས་པ་ལ་མ་ཕྱིན་པར་མི་
འདོད། ད་ལྟར་ལ་མི་རྟོག་པའི་ཕྱིར་ཐོག་མ་ནས་མ་སྐྱེས་པར་མོས་ཤིང་ལྷག་པར་ཡང་མི་བྱེད། བྲི་བར་ཡང་མི་བྱེད་པ་དེ་ཙམ་གྱིས་ན་རྒྱལ་པོ་ཆེན་པོ་མངོན་པར་འདུ་བྱེད་པ་ལ་མངོན་པར་འདུ་མི་བྱེད་པར་མོས་པ་ཡིན་ནོ། །

57-1-260b

གསོལ་པ། འཇམ་དཔལ་ཇི་ལྟར་ན་ཉོན་མོངས་པ་དང་ལམ་འགྲོགས་པར་འགྱུར། སྨྲས་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། ཉི་མའི་འོད་ཟེར་མུན་པ་དང་ལྷན་ཅིག་ཏུ་གནས་སམ། གསོལ་པ། འཇམ་དཔལ་དེ་ནི་མ་
ལགས་སོ། །དེ་ཅིའི་སླད་དུ་ཞེ་ན། མུན་པ་ནི་གདུགས་ཀྱི་འོད་ཟེར་གྱིས་གསལ་བར་འགྱུར་རོ། །སྨྲས་པ། རྒྱལ་པོ་ཆེན་པོ་འོ་ན་ཅི་མུན་པ་དེ་ཕུང་པོ་འམ། ཕྱོགས་སུ་འགྲོ་བར་འགྱུར་རམ། གསོལ་པ། འཇམ་དཔལ་དེ་
མ་ལགས་སོ། །སྨྲས་པ། རྒྱལ་པོ་ཆེན་པོ་དེ་བཞིན་དུ་ལམ་གྱི་ཡེ་ཤེས་སྐྱེས་ན་ཉོན་མོངས་པ་རྣམས་མི་འབྱུང་བར་འགྱུར་གྱི། ཉོན་མོངས་པ་རྣམས་ཕུང་པོར་ཡང་མི་འགྱུར། ཡུལ་ན་ཡང་མི་གནས། ཕྱོགས་ན་ཡང་མི་གནས་
ཏེ། རྒྱལ་པོ་ཆེན་པོ་ཉོན་མོངས་པ་མཉམ་པ་ཉིད་ཀྱི་ཕྱིར་ལམ་མཉམ་པ་ཉིད་དོ། །ལམ་མཉམ་པ་ཉིད་ཀྱི་ཕྱིར་ཉོན་མོངས་པ་མཉམ་པ་ཉིད་དོ། །ཉོན་མོངས་པ་མཉམ་པ་ཉིད་ཀྱི་ཕྱིར་ཆོས་ཐམས་ཅད་མཉམ་པ་ཉིད་དེ། 
རྒྱལ་པོ་ཆེན་པོ་གང་དག་གིས་དེ་ལྟར་རྟོགས་པ་ནི་ཉོན་མོངས་པ་ཉིད་དེ་དག་གི་ལམ་ཡིན་ནོ། །དེ་ཅིའི་ཕྱིར་ཞེ་ན། དེ་ལྟར་ཉོན་མོངས་པ་ཚོལ་བའི་ཕྱིར་ཉོན་མོངས་པ་མི་འབྱུང་བར་འགྱུར་རོ། །ཡང་གང་ཉོན་མོངས་པ་ཚོལ་བ་དེ་ནི་
ལམ་ཡིན་ནོ། །རྒྱལ་པོས་གསོལ་པ། འཇམ་དཔལ་ཇི་ལྟར་ན་ཉོན་མོངས་པ་བཙལ་ན་ཉོན་མོངས་པ་ཉིད་ལམ་ལགས། འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་གང་གི་ཚེ་ན་ཉོན་མོངས་པ་ཚོལ་བས་གཉིས་སུ་
སེམས་མི་འགྲོ་བ་དེ་ལྟ་བུ་ནི་ཉོན་མོངས་པ་དག་བཙལ་ན་ཉོན་མོངས་པ་ཉིད་ལམ་ཡིན་ཏེ། རྒྱལ་པོ་ཆེན་པོ་དེ་ལྟར་ན་ཉོན་མོངས་པ་ཉིད་ལམ་ཡིན་ནོ། །གསོལ་པ། འཇམ་དཔལ་ཇི་ལྟར་ན་ལམ་སྒོམ་པ་ལགས། སྨྲས་པ། 
རྒྱལ་པོ་ཆེན་པོ་ཆོས་ཐམས་ཅད་སྒོམ་པ་ནི་ལམ་སྒོམ་པ་ཡིན་ནོ། །གསོལ་པ། འཇམ་དཔལ་དེ་ལྟར་ལམ་བསྒོམས་ན་གར་མཆི་བར་འགྱུར། སྨྲས་པ། རྒྱལ་པོ་ཆེན་པོ་དེ་ལྟར་ལམ་བསྒོམས་ན་གར་ཡང་མི་

57-1-261a

འགྲོ་བར་འགྱུར་རོ། །རྒྱལ་པོས་གསོལ་པ། འཇམ་དཔལ་ལམ་ནི་མྱ་ངན་ལས་འདའ་བར་མཆི་བ་མ་ལགས་སམ། འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་ཅི་མྱ་ངན་ལས་འདའ་བ་ལ་ཆོས་གང་གི་
ཡང་ལམ་ཡོད་དམ། གསོལ་པ། འཇམ་དཔལ་དེ་མ་ལགས་སོ། །འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་དེ་ལྟ་བས་ན་འཕགས་པ་རྣམས་ཀྱི་ལམ་བསྒོམ་པ་ནི་འགྲོ་བས་འགྲོ་བར་བྱ་བ་མ་ཡིན་ནོ། །གསོལ་པ། འཇམ་
དཔལ་གང་ལ་གནས་ན་འཕགས་པ་དག་ལམ་སྒོམ་པ་ལགས། སྨྲས་པ། རྒྱལ་པོ་ཆེན་པོ་གནས་མེད་པ་ལ་གནས་ན་འཕགས་པ་དག་ལམ་སྒོམ་པ་ཡིན་ནོ། །གསོལ་པ། འཇམ་དཔལ་ཚུལ་ཁྲིམས་དང་། ཤེས་རབ་དང་། 
ཏིང་ངེ་འཛིན་ལ་གནས་ན་འཕགས་པ་དག་ལམ་སྒོམ་པ་མ་ལགས་སམ། སྨྲས་པ། རྒྱལ་པོ་ཆེན་པོ་འཕགས་པ་རྣམས་ཀྱི་ཚུལ་ཁྲིམས་ནི་མངོན་པར་འདུ་མི་བྱེད་པའི་མཚན་ཉིད་དོ། །རྒྱལ་པོ་ཆེན་པོ་འཕགས་པ་རྣམས་ཀྱི་ཏིང་ངེ་
འཛིན་ནི་རྣམ་པར་མི་རྟོག་པའི་མཚན་ཉིད་དོ། །རྒྱལ་པོ་ཆེན་པོ་འཕགས་པ་རྣམས་ཀྱི་ཤེས་རབ་ནི་མ་སྤྲོས་པའི་མཚན་ཉིད་དོ། །རྒྱལ་པོ་ཆེན་པོ་དེ་ཇི་སྙམ་དུ་སེམས། མངོན་པར་འདུ་མི་བྱེད་པ་འམ། མ་སྤྲོས་པ་ལ་གནས་ནུས་
སམ། གསོལ་པ། འཇམ་དཔལ་དེ་མ་ལགས་སོ། །འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་རྣམ་གྲངས་དེས་ཀྱང་འདི་ལྟར་རིག་པར་བྱ་སྟེ། འཕགས་པ་དག་ནི་གནས་མེད་པ་ལ་གནས་ཏེ་ལམ་སྒོམ་མོ། །གསོལ་པ། 
འཇམ་དཔལ་ཇི་ལྟར་ན་རིགས་ཀྱི་བུ་འམ་རིགས་ཀྱི་བུ་མོ་ལམ་ལ་ཞུགས་པ་ལགས། སྨྲས་པ། རྒྱལ་པོ་ཆེན་པོ་ནམ་ཚོལ་བ་ན་ཆོས་གང་ཡང་མ་དམིགས་ཏེ། རྟག་པ་འམ། མི་རྟག་པ་འམ། ཆོས་གང་ཡང་སྡུག་པ་འམ། མི་
སྡུག་པ་འམ། བདེ་བ་འམ། སྡུག་བསྔལ་བ་འམ། བདག་ཡོད་པ་འམ། བདག་མེད་པ་འམ། ཡང་གང་འཁོར་བ་འམ། མྱ་ངན་ལས་འདའ་བའི་ཆོས་གང་ཡང་མ་དམིགས་ཏེ། དེ་ལྟར་ཞུགས་ན་རྒྱལ་པོ་ཆེན་པོ་ལམ་ལ་ཞུགས་པ་

57-1-261b

ཞེས་བྱའོ། །དེ་ནས་འཇམ་དཔལ་གཞོན་ནུར་གྱུར་པ་ལ་རྒྱལ་པོ་མ་སྐྱེས་དགྲས་འདི་སྐད་ཅེས་གསོལ་ཏོ། །འཇམ་དཔལ་བདག་གི་འགྱོད་པ་ངན་པ་སྦྱང་བའི་སླད་དུ་སང་འཁོར་དང་བཅས་ཏེ་བཤོས་ལ་གཤེགས་ན་ལེགས་སོ། །
འཇམ་དཔལ་གྱིས་སྨྲས་པ། །རྒྱལ་པོ་ཆེན་པོ་གང་མེད་པ་དེ་ནི་གཞར་ཡང་མེད་དོ། །མེད་པས་ན་ཡོངས་སུ་གྲོལ་བ་ཡང་མེད་དོ། །གང་ཡོངས་སུ་གྲོལ་བ་དེ་དག་ཀྱང་མེད་པས་ཡོངས་སུ་གྲོལ་ལོ། །མེད་པ་དེ་ཡང་གང་ལས་ཀྱང་ཡོངས་སུ་
གྲོལ་བར་མི་འགྱུར་རོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་ཆོས་ཐམས་ཅད་ནི་རང་བཞིན་གྱིས་ཡོངས་སུ་གྲོལ་བའི་ཕྱིར་རོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །
འཇམ་དཔལ་ཁྱོད་རྒྱལ་པོ་མ་སྐྱེས་དགྲའི་དེར་ཟན་ལ་སོང་ཤིག །དེ་ན་འདི་ལ་སོགས་ཏེ་འགྲོ་བ་མང་པོའི་དོན་དུ་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་
གསོལ་ཏོ། །བཅོམ་ལྡན་འདས་བཀའ་བཞིན་འཚལ། བདག་ནི་དེ་བཞིན་གཤེགས་པའི་བཀའ་མི་གཅོག་གོ། །དེ་ནས་འཇམ་དཔལ་གཞོན་ནུར་གྱུར་པས་གནང་བར་རྒྱལ་པོ་མ་སྐྱེས་དགྲས་ཤེས་ནས། དགའ་མགུ་རངས་རབ་ཏུ་
དགའ་ཞིང་དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། འཇམ་དཔལ་གཞོན་ནུར་གྱུར་པ་དང་། དགེ་སློང་གི་དགེ་འདུན་ཐམས་ཅད་ཀྱི་ཞབས་ལ་མགོ་བོས་ཕྱག་འཚལ་ཏེ་སོང་ངོ་། །
དེ་ནས་ཚེ་དང་ལྡན་པ་ཤཱ་རིའི་བུ་ལ་རྒྱལ་པོ་མ་སྐྱེས་དགྲས་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུ་འཇམ་དཔལ་གཞོན་ནུར་གྱུར་པའི་གཡོག་ཇི་སྙེད་ཅིག་མཆིས། ཤཱ་རིའི་བུས་སྨྲས་པ། རྒྱལ་པོ་ཆེན་པོ་བྱང་ཆུབ་སེམས་
དཔའ་ལྔ་བརྒྱ་ཙམ་དག་དང་ཐབས་གཅིག་ཏུ་བཤོས་གསོལ་ལོ། །དེ་ནས་རྒྱལ་པོ་མ་སྐྱེས་དགྲས་རྒྱལ་པོའི་ཁབ་ཀྱི་གྲོང་ཁྱེར་ག་ལ་བ་དང་། བདག་གི་ཁང་པ་གང་ན་བར་སོང་སྟེ། དེ་ཉིད་ཀྱི་ནུབ་མོ་བཟའ་བ་དང་། བཅའ་བ་དང་མྱང་བ་

57-1-262a

དང་། བལྡག་པ་བཟང་ཞིང་མང་བ་སྦྱོར་དུ་བཅུག་གོ། །ཟས་རོ་བརྒྱ་པ་ཡང་སྦྱོར་དུ་བཅུག་གོ། །བདག་གནས་པའི་ཁང་པར་ཡང་དར་གྱི་ལྡ་ལྡི་བྲེས་ཤིང་གདུགས་དང་། རྒྱལ་མཚན་དང་། བ་དན་གྱིས་ཀུན་དུ་བརྒྱན་ཏོ། །
དར་གྱི་བླ་རེས་ཡང་བྲེས། སྤོས་ཤིན་དུ་སྙིང་པོར་གྱུར་པས་བདུག་དུ་བཅུག་གོ། །གནས་ཁང་དེར་ཁྲི་གོས་དུ་མས་གཡོགས་པ། རིན་པོ་ཆེ་རྣམ་པ་སྣ་ཚོགས་དུ་མས་སྤྲས་པ་ལྔ་བརྒྱ་ཡང་བཙུགས་སོ། །དེའི་ཕྱོགས་ཐམས་ཅད་
བྱི་དོར་ལེགས་པར་བྱས། ཞལ་ཞལ་ལེགས་པར་བྱུགས་ཤིང་། བདུག་པས་བདུགས་ནས་མེ་ཏོག་གི་སིལ་མས་ཀྱང་གང་བར་གཏོར་དུ་བཅུག་གོ། །རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་འཕོངས་དང་། ལམ་གྱི་སུམ་མདོ་དང་། 
འཕྲང་དང་། ཚོང་འདུས་ཐམས་ཅད་དུ་ཡང་ཆག་ཆག་ལེགས་པར་བཏབ། ཞལ་ཞལ་ལེགས་པར་བྱས། བདུག་པས་བདུགས་ཤིང་མེ་ཏོག་སིལ་མས་གང་བར་གཏོར་དུ་བཅུག་གོ། །རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་འགྲོ་
བ་ཐམས་ཅད་ཀྱང་འཇམ་དཔལ་གཞོན་ནུར་གྱུར་པ་ལ་མཆོད་པའི་ལས་བྱེད་པར་བསྐོས་སོ། །དེ་ནས་འཇམ་དཔལ་གཞོན་ནུར་གྱུར་པ་བདག་གི་གཙུག་ལག་ཁང་ན་གནས་པ་ལས་ནུབ་མོ་ཐུ་མང་པོ་ལ་འདི་སྙམ་དུ་གྱུར་ཏེ། གང་བདག་
ནི་འཁོར་ཉུང་ངུ་དང་རྒྱལ་པོ་མ་སྐྱེས་དགྲའི་ཁབ་དུ་ཟས་བཟའ་བའི་མི་རིགས་ཀྱི། གང་བདག་གིས་སངས་རྒྱས་ཀྱི་ཞིང་གཞན་ནས་བྱང་ཆུབ་སེམས་དཔའ་དག་གཉེར་ལ། དེ་དག་ཐེ་ཙོམ་གཅོད་པའི་ཆོས་ཀྱང་ཉན། རྒྱལ་པོ་མ་སྐྱེས་དགྲའི་
ཟས་ཀྱང་བཟའ་བར་བྱའོ་སྙམ་མོ། །དེ་ནས་འཇམ་དཔལ་གཞོན་ནུར་གྱུར་པས་འདི་ལྟ་སྟེ། སྐྱེས་བུ་སྟོབས་པོ་ཆེའི་ལག་པ་བསྐུམ་པ་ལས་བརྐྱང་བ་འམ། བརྐྱང་པ་ལས་བསྐུམ་པ་ཙམ་དུ་དེའི་སྐད་ཅིག་ཐང་ཅིག་ཡུད་ཙམ་
ལ་བདག་གི་གཙུག་ལག་ཁང་དུ་མི་སྣང་བར་གྱུར་ནས་ཤར་ཕྱོགས་སུ་སངས་རྒྱས་ཀྱི་ཞིང་བརྒྱ་སྟོང་ཕྲག་བརྒྱད་བཅུ་འདས་ནས་འཇིག་རྟེན་གྱི་ཁམས་རྟག་ཏུ་སྒྲ་སྒྲོགས་ཤེས་བྱ་བར་ཕྱིན་པར་གྱུར་ཏེ། དེ་ན་དེ་བཞིན་གཤེགས་པ་

57-1-262b

དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྒྲགས་པའི་དཔལ་ཞེས་བྱ་བ་བཞུགས་སོ། །འཚོའོ་གཞེས་སོ། །བྱང་ཆུབ་སེམས་དཔའ་འབའ་ཤིག་ལ་ཆོས་ཀྱང་སྟོན་ཏོ། །དེ་ན་ཕྱིར་མི་ལྡོག་པའི་ཆོས་ཀྱི་འཁོར་
ལོ་གཅིག་ཀྱང་བསྐོར་ཏོ། །ཡང་འཇིག་རྟེན་གྱི་ཁམས་དེ་ན་རྒྱུ་རིན་པོ་ཆེ་སྣ་བདུན་ལས་བྱས་པའི་ཤིང་མེ་ཏོག་དང་འབྲས་བུ་སྣ་ཚོགས་དང་ལྡན་པ་དག་ཡོད་དེ། རིན་པོ་ཆེའི་ཤིང་དེ་དག་རླུང་གིས་བཏབ་པ་ལས་སངས་རྒྱས་ཀྱི་སྒྲ་སྐད་
འབྱུང་། ཆོས་ཀྱི་སྒྲ་སྐད་འབྱུང་། བྱང་ཆུབ་སེམས་དཔའི་ཕྱིར་མི་ལྡོག་པའི་དགེ་འདུན་གྱི་སྒྲ་སྐད་འབྱུང་ངོ་། །འདི་ལྟ་སྟེ་འཇིག་རྟེན་གྱི་ཁམས་རྟག་ཏུ་སྒྲ་སྒྲོགས་ཤེས་བྱ་བ་ན་འཇིག་རྟེན་གྱི་ཁམས་དེར་དཀོན་མཆོག་
གསུམ་གྱི་སྒྲ་དང་མི་འབྲལ་བས་ན་རྟག་ཏུ་སྒྲ་སྒྲོགས་ཤེས་བྱའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བསྒྲགས་པའི་དཔལ་དེའི་ཞབས་ལ་འཇམ་དཔལ་གཞོན་ནུར་གྱུར་པས་མགོ་བོས་ཕྱག་འཚལ་ནས་
བཅོམ་ལྡན་འདས་དེ་བཞིན་གཤེགས་པ་བསྒྲགས་པའི་དཔལ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་སངས་རྒྱས་ཀྱི་ཞིང་འདི་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དག་
མི་མཇེད་ཀྱི་འཇིག་རྟེན་གྱི་ཁམས་སུ་རྒྱལ་པོ་མ་སྐྱེས་དགྲའི་ཁབ་ཏུ་བདག་དང་ལྷན་ཅིག་ཏུ་མཆོད་སྟོན་འཚལ་བར་བཀའ་སྩལ་དུ་གསོལ། དེ་ནས་དེ་བཞིན་གཤེགས་པ་བསྒྲགས་པའི་དཔལ་གྱིས་བྱང་ཆུབ་སེམས་
དཔའ་སེམས་དཔའ་ཆེན་པོ་དེ་དག་ལ་བཀའ་སྩལ་པ། རིགས་ཀྱི་བུ་དག་ཁྱེད་ལས་གང་འདོད་པ་རྣམས་འཇམ་དཔལ་གཞོན་ནུར་གྱུར་པ་དང་འགྲོགས་ཏེ། མི་མཇེད་ཀྱི་འཇིག་རྟེན་གྱི་ཁམས་སུ་དེང་ཤིག །དེ་ནས་བྱང་ཆུབ་
སེམས་དཔའི་འཁོར་དེ་དག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་ཁྲི་ཉིས་སྟོང་གིས་མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདས་བདག་ཅག་ནི་མི་མཇེད་ཀྱི་འཇིག་རྟེན་གྱི་ཁམས་དེ་ན་རྒྱལ་པོ་

57-1-263a

མ་སྐྱེས་དགྲའི་ཁབ་ཏུ་འཇམ་དཔལ་གཞོན་ནུར་གྱུར་པ་དང་མཆོད་སྟོན་འཚལ་དུ་མཆིའོ། །དེ་ནས་འཇམ་དཔལ་གཞོན་ནུར་གྱུར་པས་དེ་ཉིད་ཀྱི་ཐང་ཅིག་སྐད་ཅིག་ཡུད་ཙམ་ལ་བྱང་ཆུབ་སེམས་དཔའ་བརྒྱད་ཁྲི་ཉིས་
སྟོང་པོ་དེ་དག་དང་འགྲོགས་ཏེ། འཇིག་རྟེན་གྱི་ཁམས་རྟག་ཏུ་སྒྲ་སྒྲོགས་ནས་མི་སྣང་བར་གྱུར་ཏེ་བདག་གི་གཙུག་ལག་ཁང་དུ་འདུག་གོ། །དེ་ནས་འཇམ་དཔལ་གཞོན་ནུར་གྱུར་པས་དེ་ལྟར་ཚོགས་པའི་བྱང་ཆུབ་སེམས་དཔའ་
དེ་དག་ལ་གཟུགས་ཤེས་བྱ་བའི་ཆོས་ཀྱི་རྣམ་གྲངས་རྒྱ་ཆེར་བཤད་དོ། །དེ་ལ་གཟུངས་གང་ཞེ་ན། གཟུངས་ཤེས་བྱ་བ་ནི་འདི་ལྟ་སྟེ། དྲན་པ་མ་ཉམས་པ། རྟོགས་པ་མ་གཡེངས་པ། བློ་གྲོས་མ་རྨོངས་པ། ཤེས་རབ་མངོན་དུ་
བྱེད་པ། ཆོས་ཐམས་ཅད་ལ་དེ་བཞིན་ཉིད་བསྟན་པས་ལམ་བསྟན་པ་ཤེས་པ། འབྲས་བུ་ཐོབ་ནས་སྲུང་བར་བྱེད་པ། ལམ་སྐྱོན་མེད་པ་ལ་འཇུག་ཤེས་པ། ཆོས་ཐམས་ཅད་ཀྱི་ཚིག་རབ་ཏུ་ཐ་དད་པ་ཤེས་པ། གཟུངས་ཀྱིས་
འཕགས་པའི་རིགས་མི་གཅོད་པ། སངས་རྒྱས་ཀྱི་རིགས་འཛིན་པ། ཆོས་ཀྱི་རིགས་སྡུད་པ། དགེ་འདུན་གྱི་རིགས་ཆོས་ཀྱི་རྗེས་སུ་ཤེས་པ། དྲི་བ་ལུང་བསྟན་པ་ལ་མ་རྨོངས་པ། འཁོར་ཐམས་ཅད་དུ་མ་ཞུམ་པ། འཁོར་ཐམས་
ཅད་དུ་མི་འཇིགས་པ། ལྷའི་སྐད་དུ་སྟོན་པ་ཤེས་པ། ཀླུའི་སྐད་དུ་སྟོན་པ་ཤེས་པ། གནོད་སྦྱིན་གྱི་སྐད་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། 
བརྒྱ་བྱིན་དང་། ཚངས་པའི་སྐད་དུ་སྟོན་པ་ཤེས་པ། སྐད་ཡང་དག་པ་དང་དབང་པོ་ཤེས་པ། ལོག་པར་ལྟ་བ་ཡོངས་སུ་ཤེས་པ། སེམས་ཅན་ཐམས་ཅད་ཀྱི་དབང་པོ་ལ་རྟོག་པ། སེམས་ས་དང་མཚུངས་པར་གཞོག་པ། 
འཇིག་རྟེན་གྱི་ཆོས་བརྒྱད་ཀྱིས་མི་བསྐྱོད་པ། ཆོས་དཀར་པོ་ཐམས་ཅད་ཡོངས་སུ་སྨིན་པར་བྱེད་པ། ལས་ཀྱི་རྣམ་པར་སྨིན་པའི་འབྲས་བུ་ཇི་ལྟ་བ་བཞིན་དུ་སྟོན་པ། སེམས་ཅན་ཐམས་ཅད་ཀྱི་ཉེ་བའི་འཚོ་བར་རྩོལ་བ། ཚུལ་

57-1-263b

ཁྲིམས་ཀྱི་གཞི་སེམས་ཅན་ཐམས་ཅད་ལ་གནས་པ། ཡེ་ཤེས་ཐམས་ཅད་ཀྱི་རྗེས་སུ་སོང་བ། སེམས་ཅན་ཐམས་ཅད་ཀྱི་སྡུག་བསྔལ་གྱི་ཁུར་ཁྱེར་ཡང་སེམས་སྐྱོ་ཞིང་མུས་བྱུང་བ་མེད་པ། ཆོས་ཀྱི་རང་བཞིན་ཤེས་
པ། རང་བཞིན་སྟོན་ཅིང་རྗོད་པ། ཆོས་ཀྱི་སྦྱིན་པས་སྤྲོ་བར་བྱེད་ཀྱི་སེམས་སྐྱོ་བར་མི་བྱེད་པ། དགེ་བའི་རྩ་བའི་ཚོགས་བསགས་པ་ཐམས་ཅད་ལ་རྣམ་པར་སྨིན་པར་མི་འདོད་པ། ཐམས་ཅད་མཁྱེན་པའི་སེམས་ཀྱི་རྩ་བ་དང་
ཐ་མི་དད་པ། དེའི་རྩ་བ་ལ་འཇོག་པའི་བརྩོན་འགྲུས་ཅན། སྦྱིན་པས་ཆོག་མི་ཤེས་ལ་དེ་ཡང་ཐམས་ཅད་མཁྱེན་པའི་སེམས་ཀྱིས་བསྔོ་བ། ཚུལ་ཁྲིམས་ཀྱིས་ཆོག་མི་ཤེས་ལ་དེ་ཡང་སེམས་ཅན་ཐམས་ཅད་ལ་
བསྔོ་བ། བཟོད་པས་ཆོག་མི་ཤེས་ལ་དེ་ཡང་སངས་རྒྱས་ཀྱི་གཟུགས་ཚོལ་བ། བརྩོན་འགྲུས་ཀྱིས་ཆོག་མི་ཤེས་ལ་དེ་ཡང་དགེ་བའི་རྩ་བ་སྡུད་པར་བྱེད་པ། བསམ་གཏན་གྱིས་ཆོག་མི་ཤེས་ལ་དེ་ཡང་མི་དམིགས་པའི་
ཚུལ་དུ་བྱེད་པ། ཤེས་རབ་ཀྱིས་ཆོག་མི་ཤེས་ལ་དེ་ཡང་ཐམས་ཅད་དུ་དཔྱོད་པར་བྱེད་པ། ཆོས་ཀྱི་ལོངས་སྤྱོད་ཀྱིས་འཚོ་ལ་དེ་ཡང་ཐམས་ཅད་དུ་ཁ་ན་མ་ཐོ་བ་མེད་པ་སྟེ། རིགས་ཀྱི་བུ་གཟུངས་གཟུངས་ཞེས་བྱ་བ་ནི་ཆོས་དེ་
དག་ལ་ཆོས་ཀྱི་རྗེས་སུ་སོང་བའི་ནན་ཏན་ཡིན་ཏེ། དེ་བས་ན་གཟུངས་ཤེས་བྱའོ། །རིགས་ཀྱི་བུ་གཞན་ཡང་གཟུངས་ནི་ཆོས་ཐམས་ཅད་འཛིན་པར་བྱེད་དོ། །ཇི་ལྟར་ན་གཟུངས་ཆོས་ཐམས་ཅད་འཛིན་པར་བྱེད་ཅེ་ན། སྟོང་པ་
ཉིད་ཀྱིས་ཆོས་ཐམས་ཅད་འཛིན་པར་བྱེད། མཚན་མ་མེད་པ་དང་། སྨོན་པ་མེད་པས་ཆོས་ཐམས་ཅད་འཛིན་པར་བྱེད་པ། འདོད་ཆགས་དང་བྲལ་བ། དབེན་པ། དངོས་པོ་མེད་པ། ཐ་མི་དད་པ། གནས་མེད་པ། མ་སྐྱེས་
པ། མི་སྐྱེ་བ། མི་འོང་བ། མི་འགྲོ་བ། མི་གནས་པ། ཡང་དག་པར་མ་བྱུང་བ། མ་འཕོས་པ། མི་འཇིགས་པ། མི་བླང་བ། མི་དོར་བ། རང་བཞིན་མེད་པ། དངོས་པོ་མེད་པ། རྟོག་པ་མེད་པ། རྣམ་པར་རྟོག་པ་མེད་པ། སྒྲུབ་པ་

57-1-264a

མེད་པ། བདག་མེད་པ། སེམས་ཅན་མེད་པ། སྲོག་མེད་པ། གང་ཟག་མེད་པ། སྤྲོས་པ་མེད་པ། གཟུང་བ་མེད་པ། སྦྱོར་བ་མེད་པ། མ་བྱུང་བ། མ་མཐོང་བ། མ་ཐོས་པ། མ་མནམས་པ། མ་མྱངས་པ། 
མ་རེག་པ། མི་དམིགས་པས་ཆོས་ཐམས་ཅད་འཛིན་པས་ན་དེའི་ཕྱིར་གཟུངས་ཤེས་བྱའོ། །རིགས་ཀྱི་བུ་དག་གཞན་ཡང་གཟུངས་ནི་སྒྱུ་མའི་རང་བཞིན་གྱིས་ཆོས་ཐམས་ཅད་འཛིན་ཏོ། །རྨི་ལམ་གྱི་རང་བཞིན་དང་། དབུ་བའི་
རང་བཞིན་གྱིས་ཆོས་ཐམས་ཅད་འཛིན་ཏོ། །སྨིག་རྒྱུའི་རང་བཞིན་དང་། གཟུགས་བརྙན་གྱི་རང་བཞིན་དང་། སྒྲ་བརྙན་གྱི་རང་བཞིན་དང་། ནམ་མཁའི་རང་བཞིན་གྱིས་ཆོས་ཐམས་ཅད་འཛིན་ཏེ་དེ་བས་ན་གཟུངས་ཞེས་བྱའོ། །
རིགས་ཀྱི་བུ་དག་གཞན་ཡང་གཟུངས་ནི་མི་རྟག་པས་ཆོས་ཐམས་ཅད་འཛིན་ཏོ། །དེ་བཞིན་དུ་སྡུག་བསྔལ་བ་དང་། སྟོང་པ་དང་། བདག་མེད་པ་དང་། རང་བཞིན་གྱིས་མི་རྒྱུ་བ་དང་། ཀུན་ནས་ཉོན་མོངས་པ་མེད་པ་དང་། བྱང་བ་མེད་
པ་དང་། ཐོབ་པ་མེད་པ་དང་། མངོན་པར་བྱས་པ་མེད་པས་ཆོས་ཐམས་ཅད་འཛིན་ཏེ། དེ་བས་ན་གཟུངས་ཤེས་བྱའོ། །རིགས་ཀྱི་བུ་དག་འདི་ལྟ་སྟེ། དཔེར་ན་ས་འདི་ནི་སྐྱེ་བོ་ཐམས་ཅད་འཛིན་མོད་ཀྱི་འགས་པར་ཡང་མི་
འགྱུར། སྐྱོ་བར་ཡང་མི་འགྱུར་རོ། །རིགས་ཀྱི་བུ་དག་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ཐོབ་པ་ཡང་སེམས་ཅན་ཐམས་ཅད་ཀྱི་ཕྱིར་བསྐལ་པ་གྲངས་མེད་པར་ཐམས་ཅད་མཁྱེན་པར་
སེམས་བསྐྱེད་པའི་དགེ་བའི་རྩ་བ་བསྡུས་པ་འཛིན་ཀྱང་འགས་པ་འང་མེད། སྐྱོ་བའང་མེད་དོ། །རིགས་ཀྱི་བུ་དག་འདི་ལྟ་སྟེ། དཔེར་ན་ས་འདི་ནི་སེམས་ཅན་ཐམས་ཅད་ཀྱི་ཉེ་བར་འཚོ་བ་ཡིན་ནོ། །རིགས་ཀྱི་བུ་དག་
དེ་བཞིན་དུ་བྱང་ཆུབ་སེམས་དཔའ་གཟུངས་ཐོབ་པ་ཡང་སེམས་ཅན་ཐམས་ཅད་ཀྱི་ཉེ་བར་འཚོ་བ་ཡིན་ནོ། །རིགས་ཀྱི་བུ་དག་འདི་ལྟ་སྟེ། དཔེར་ན་ས་ལ་གནས་ན་རྩྭ་དང་། ཤིང་གེལ་པ་དང་། སྨན་དང་། ནགས་ཚལ་ཐམས་ཅད་སྐྱེ་བར་

57-1-264b

འགྱུར་རོ། །རིགས་ཀྱི་བུ་དག་དེ་བཞིན་དུ་བྱང་ཆུབ་སེམས་དཔའ་གཟུངས་ལ་གནས་པའི་དགེ་བའི་ཆོས་ཐམས་ཅད་སྐྱེ་བར་འགྱུར་རོ། །རིགས་ཀྱི་བུ་དག་འདི་ལྟ་སྟེ། དཔེར་ན་ས་ནི་ཆགས་པར་ཡང་མི་བྱེད། ཞེ་སྡང་བར་
ཡང་མི་བྱེད། ཁེངས་པར་ཡང་མི་བྱེད། དུད་པར་ཡང་མི་བྱེད་དོ། །རིགས་ཀྱི་བུ་དག་དེ་བཞིན་དུ་བྱང་ཆུབ་སེམས་དཔའ་གཟུངས་ལ་གནས་པ་ཡང་ཆགས་པར་ཡང་མི་བྱེད། ཞེ་སྡང་བར་ཡང་མི་བྱེད། དུད་པར་ཡང་མི་བྱེད་དོ། །
རིགས་ཀྱི་བུ་དག་འདི་ལྟ་སྟེ། དཔེར་ན་ས་ནི་ཆར་པའི་རྒྱུན་ཐམས་ཅད་ལེན་ཏོ། ཆོག་མི་ཤེས་པར་བྱེད་དོ། །རིགས་ཀྱི་བུ་དག་དེ་བཞིན་དུ་བྱང་ཆུབ་སེམས་དཔའ་གཟུངས་ལ་གནས་པ་ཡང་སངས་རྒྱས་རྣམས་དང་། 
བྱང་ཆུབ་སེམས་དཔའ་དག་དང་། ཡང་དག་པར་སོང་བ་དག་དང་། ཡང་དག་པར་ཞུགས་པ་དག་ལ་ཆོས་ཐམས་ཅད་ཉན་ན་ཡང་ཆོག་མི་ཤེས། འཆད་ན་ཡང་ཆོག་མི་ཤེས་སོ། །རིགས་ཀྱི་བུ་དག་འདི་ལྟ་སྟེ། དཔེར་ན་ས་ནི་
ས་བོན་ཐམས་ཅད་འཛིན་མོད་ཀྱི། དུས་ལ་མ་བབ་དྲོད་ལ་མ་བབ་པར་ལྗང་བུ་མི་སྐྱེད་དོ། །རིགས་ཀྱི་བུ་དག་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ཐོབ་པ་ཡང་དགེ་བའི་རྩ་བའི་ས་བོན་ཐམས་ཅད་
འཛིན་མོད་ཀྱི། དུས་མ་ཡིན། ཚོད་མ་ཡིན་ཞིང་སངས་རྒྱས་ཀྱི་ཆོས་ཡོངས་སུ་མ་རྫོགས་པར་བྱང་ཆུབ་ཀྱི་སྙིང་པོ་ལ་མི་འདུག་གོ། །རིགས་ཀྱི་བུ་དག་འདི་ལྟ་སྟེ། དཔེར་ན་དཔའ་བོ་ནི་ས་ལ་གནས་ན་ཕ་རོལ་གྱི་སྡེ་ཐམས་ཅད་
ལས་རྒྱལ་བར་བྱེད་དོ། །རིགས་ཀྱི་བུ་དག་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ཐོབ་པ་ཡང་བྱང་ཆུབ་ཀྱི་སྙིང་པོ་ལ་འདུག་ན་བདུད་ཀྱི་སྡེ་ཐམས་ཅད་ལས་རྒྱལ་བར་བྱེད་དོ། །རིགས་ཀྱི་བུ་དག་འདི་
ལྟ་སྟེ། དཔེར་ན་ས་ནི་ནམ་མཁའ་ལ་རྟག་པའམ། མི་རྟག་པའམ། བདེ་བའམ། སྡུག་བསྔལ་བའམ། སྡུག་པའམ། མི་སྡུག་པའམ། བདག་གམ། བདག་མེད་པའམ། སེམས་ཅན་ནམ། སེམས་ཅན་མེད་པ་

57-1-265a

འམ། སྲོག་གམ། སྲོག་མེད་པ་འམ། གང་ཟག་གམ། གང་ཟག་མེད་པར་མི་འཛིན་ཏོ། །རིགས་ཀྱི་བུ་དག་དེ་བཞིན་དུ་གཟུངས་ཀྱང་ཆོས་ཐམས་ཅད་མི་འཛིན་ཏོ། །དེ་ཅིའི་ཕྱིར་ཞེ་ན། རིགས་ཀྱི་བུ་
གཟུངས་ནི་གཉིས་དང་བྲལ་བའི་ཕྱིར་རོ། །རིགས་ཀྱི་བུ་དག་འདི་ལྟ་སྟེ། དཔེར་ན་ས་ནི་ནམ་མཁའ་མི་འཛིན་ཏོ། །རིགས་ཀྱི་བུ་དག་དེ་བཞིན་དུ་གཟུངས་ཀྱང་ཆོས་ཐམས་ཅད་མི་འཛིན་ཏོ། །རིགས་ཀྱི་བུ་དག་འདི་ལྟ་སྟེ། 
དཔེར་ན་སྟོང་པ་ཉིད་ནི་ལྟ་བའི་རྣམ་པ་ཐམས་ཅད་མི་འཛིན་ཏོ། །རིགས་ཀྱི་བུ་དག་དེ་བཞིན་དུ་གཟུངས་ཀྱང་ཆོས་ཐམས་ཅད་མི་འཛིན་ཏོ། །རིགས་ཀྱི་བུ་དག་འདི་ལྟ་སྟེ། དཔེར་ན་རང་བཞིན་ནི་ཉེ་བའི་ཉོན་མོངས་པ་
ཐམས་ཅད་མི་འཛིན་ཏོ། །རིགས་ཀྱི་བུ་དག་དེ་བཞིན་དུ་གཟུངས་ཀྱང་ཆོས་ཐམས་ཅད་མི་འཛིན་ཏོ། །རིགས་ཀྱི་བུ་དག་འདི་ལྟ་སྟེ། དཔེར་ན་ལམ་སྐྱོན་མེད་པར་གྱུར་པ་ནི་ཆོས་ཐམས་ཅད་ལ་བྱེད་པ་མེད་འཛིན་པ་མེད་
དོ། །རིགས་ཀྱི་བུ་དག་དེ་བཞིན་དུ་གཟུངས་ཀྱང་ཆོས་ཐམས་ཅད་མི་འཛིན་ཏོ། །དེ་ལྟ་བས་ན་རིགས་ཀྱི་བུ་དག་གང་གཟུངས་དེ་ནི་མི་ཟད་པའོ། །གང་མི་ཟད་པའི་དེ་ནི་ཚད་མེད་པའོ། །གང་ཚད་མེད་པ་དེ་ནི་ཀུན་གྱི་རྗེས་སུ་
སོང་བའོ། །གང་ཀུན་གྱི་རྗེས་སུ་སོང་བ་དེ་ནི་ནམ་མཁའི་དབྱིངས་སོ། །དེ་ལྟ་སྟེ། རིགས་ཀྱི་བུ་ནམ་མཁའི་དབྱིངས་དང་གཟུངས་དེ་གཉིས་ནི་རྣམ་པ་གཉིས་སུ་མེད་དོ། །འཇམ་དཔལ་གཞོན་ནུར་གྱུར་པས་གཟུངས་
འདི་སྟོན་པ་བསྟན་པའི་ཚེ་འཁོར་དེ་ན་བྱང་ཆུབ་སེམས་དཔའ་ལྔ་བརྒྱས་གཟུངས་ཐོབ་པར་གྱུར་ཏོ། །གཞན་ཡང་ཐུན་དབུ་མ་ལ་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ལྔ་བརྒྱ་པོ་དེ་དག་ལ་བྱང་ཆུབ་
སེམས་དཔའི་སྡེ་སྣོད་ཅེས་བྱ་བའི་ཆོས་ཀྱི་རྣམ་གྲངས་རྒྱ་ཆེར་བཤད་དེ། དེ་ལ་བྱང་ཆུབ་སེམས་དཔའི་སྡེ་སྣོད་ལ་འཇུག་པ་གང་ཞེ་ན། ཆོས་གང་འཇིག་རྟེན་པ་དང་། གང་འཇིག་རྟེན་ལས་འདས་པ་དང་། ཆོས་

57-1-265b

གང་འདུས་བྱས་པ་དང་། གང་འདུས་མ་བྱས་པ་དང་། ཆོས་གང་དགེ་བ་དང་། གང་མི་དགེ་བ་དང་། གང་ཁ་ན་མ་ཐོ་བ་དང་བཅས་པ་དང་། གང་ཁ་ན་མ་ཐོ་བ་མེད་པ་དང་། གང་ཟག་པ་དང་བཅས་པ་དང་། གང་ཟག་པ་མེད་
པའི་ཆོས་གང་ཡང་བྱང་ཆུབ་སེམས་དཔའི་སྡེ་སྣོད་ཀྱི་རྗེས་སུ་མ་ཞུགས་པ་མེད་དེ། དེ་དག་ཐམས་ཅད་ནི་བྱང་ཆུབ་སེམས་དཔའི་སྡེ་སྣོད་ཀྱི་རྗེས་སུ་ཞུགས་སོ། །དེ་ཅིའི་ཕྱིར་ཞེ་ན། རིགས་ཀྱི་བུ་དག་བྱང་ཆུབ་
སེམས་དཔའི་སྡེ་སྣོད་ནི་ཆོས་ཐམས་ཅད་རྟོགས་པ་ཡིན་ནོ། །རིགས་ཀྱི་བུ་དག་འདི་ལྟ་སྟེ། དཔེར་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གླིང་བཞི་པའི་འཇིག་རྟེན་གྱི་ཁམས་བྱེ་བ་ཕྲག་
བརྒྱ་དང་། ཉི་མ་དང་ཟླ་བ་བྱེ་བ་ཕྲག་བརྒྱ་དང་། རི་རབ་རིའི་རྒྱལ་པོ་བྱེ་བ་ཕྲག་བརྒྱ་དང་། རྒྱ་མཚོ་འཆིང་རྣམ་བྱེ་བ་ཕྲག་བརྒྱ་ཡོད་པ་དེ་དག་ཐམས་ཅད་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་འདུས་ཤིང་
འུབ་བོ། །རིགས་ཀྱི་བུ་དག་དེ་བཞིན་དུ་གང་སོ་སོའི་སྐྱེ་བོའི་ཆོས་རྣམས་དང་། གང་སློབ་པའི་ཆོས་རྣམས་དང་། གང་སློབ་པ་མེད་པའི་ཆོས་རྣམས་དང་། གང་ཉན་ཐོས་ཀྱི་ཆོས་རྣམས་དང་། གང་རང་སངས་རྒྱས་ཀྱི་
ཆོས་རྣམས་དང་། གང་བྱང་ཆུབ་སེམས་དཔའི་ཆོས་རྣམས་དང་། གང་སངས་རྒྱས་ཀྱི་ཆོས་རྣམས་དང་། དེ་དག་ཐམས་ཅད་བྱང་ཆུབ་སེམས་དཔའི་སྡེ་སྣོད་ཀྱི་རྣམ་གྲངས་ཀྱི་ནང་དུ་འདུས་སོ་འུབ་བོ། །དེ་ཅིའི་ཕྱིར་ཞེ་ན། 
རིགས་ཀྱི་བུ་དག་ཉན་ཐོས་ཀྱི་ཐེག་པར་བསྡུ་བ་དང་། རང་སངས་རྒྱས་ཀྱི་ཐེག་པར་བསྡུ་བ་དང་། ཐེག་པ་ཆེན་པོར་བསྡུ་བ་དང་། ཐེག་པ་ཐམས་ཅད་དུ་འདུས་པ་ནི་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་
སོ། །རིགས་ཀྱི་བུ་དག་འདི་ལྟ་སྟེ། དཔེར་ན་ཤིང་གི་རྩ་བ་བཟུང་བ་ན་ལོ་མ་དང་། མེ་ཏོག་དང་། འབྲས་བུ་ཐམས་ཅད་འདུས་པར་འགྱུར་རོ། །རིགས་ཀྱི་བུ་དག་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་

57-1-266a

པོ་ཡང་བྱང་ཆུབ་སེམས་དཔའི་སྡེ་སྣོད་བཟུང་ན་ཐེག་པ་ཐམས་ཅད་འདུས་པར་འགྱུར་རོ། །རིགས་ཀྱི་བུ་དག་དེ་ལ་བྱང་ཆུབ་སེམས་དཔའི་སྡེ་སྣོད་གང་ཞེ་ན། རིགས་ཀྱི་བུ་དག་བྱང་ཆུབ་སེམས་དཔའི་སྡེ་སྣོད་ཅེས་
བྱ་བ་ནི་སྣོད་ཚད་མེད་པ་ཡིན་ནོ། །རིགས་ཀྱི་བུ་དག་འདི་ལྟ་སྟེ། དཔེར་ན་རྒྱ་མཚོ་མཆིང་རྣམ་ཆེན་པོ་ཚད་མེད་པའི་ཆུ་ནི་ཀླུ་དང་། ལྷ་མ་ཡིན་དང་། གནོད་སྦྱིན་དང་། བྱོལ་སོང་གི་སྐྱེ་གནས་སུ་གཏོགས་པའི་སེམས་ཅན་ཚད་
མེད་པ་དག་གི་སྣོད་ཡིན་ནོ། །རིགས་ཀྱི་བུ་དག་དེ་བཞིན་དུ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ཀྱང་ཐོས་པ་དང་། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། ཡེ་ཤེས་མཐོང་བ་ཚད་མེད་པའི་སྣོད་ཡིན་
ནོ། །རིགས་ཀྱི་བུ་དག་འདི་ལྟ་སྟེ། དཔེར་ན་སེམས་ཅན་གང་དག་རྒྱ་མཚོ་འཆིང་རྣམ་ཆེན་པོའི་ནང་དུ་སྐྱེས་པ་ནི་རྒྱ་མཚོ་འཆིང་རྣམ་ཆེན་པོ་མ་གཏོགས་པར་ཆུ་གཞན་རྣམས་མི་འཐུང་ངོ་། །རིགས་ཀྱི་བུ་དག་དེ་བཞིན་དུ་གང་བྱང་ཆུབ་
སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་ལ་སྤྱོད་པ་དེ་དག་ནི་ཐམས་ཅད་མཁྱེན་པའི་རོ་མ་གཏོགས་པར་ཆོས་གཞན་གྱི་རོ་མི་འཐུང་སྟེ། དེ་བས་ན་བྱང་ཆུབ་སེམས་དཔའི་སྡེ་སྣོད་ཅེས་བྱའོ། །ཡང་རིགས་ཀྱི་བུ་དག་འདི་
གསུམ་ནི་སྡེ་སྣོད་ཡིན་ནོ། །གསུམ་གང་ཞེ་ན། འདི་ལྟ་སྟེ། ཉན་ཐོས་ཀྱི་སྡེ་སྣོད་དང་། རང་སངས་རྒྱས་ཀྱི་སྡེ་སྣོད་དང་། བྱང་ཆུབ་སེམས་དཔའི་སྡེ་སྣོད་དོ། །རིགས་ཀྱི་བུ་དག་དེ་ལ་ཉན་ཐོས་ཀྱི་སྡེ་སྣོད་ནི་ཕ་རོལ་གྱི་སྒྲའི་
རྗེས་སུ་འབྲང་བས་ཐོབ་པའོ། །རང་སངས་རྒྱས་ཀྱི་སྡེ་སྣོད་ནི་རྟེན་ཅིང་འབྲེལ་པར་འབྱུང་བ་རྟོགས་པའི་ཕྱིར་རྒྱུ་ཟད་པར་རྟོགས་པའོ། །རིགས་ཀྱི་བུ་དག་བྱང་ཆུབ་སེམས་དཔའི་སྡེ་སྣོད་ནི་ཆོས་ཚད་མེད་པ་རྟོགས་ཤིང་
རང་བྱུང་བའི་ཡེ་ཤེས་དང་འཐུན་པའོ། །ཡང་རིགས་ཀྱི་བུ་དག་ཉན་ཐོས་སམ། རང་སངས་རྒྱས་དག་ནི་གང་ཡང་སྡེ་སྣོད་གསུམ་པ་མ་ཡིན་གྱི། རིགས་ཀྱི་བུ་དག་གང་གི་ཆོས་བཤད་པ་ལས་སེམས་ཅན་དག་ཉན་ཐོས་ཀྱི་

57-1-266b

ཐེག་པ་དང་། རང་སངས་རྒྱས་ཀྱི་ཐེག་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་ཐེག་པ་གསུམ་གྱིས་འབྱུང་བ་དེ་ལ་ནི་སྡེ་སྣོད་གསུམ་པའོ་ཞེས་བདག་སྨྲའོ། །རིགས་ཀྱི་བུ་དག་བྱང་ཆུབ་སེམས་དཔའ་ནི་
ཆོས་འཆད་ན་སེམས་ཅན་དག་ཐེག་པ་གསུམ་གྱིས་འབྱུང་བས་ན་དེའི་ཕྱིར་བྱང་ཆུབ་སེམས་དཔའ་ལ་སྡེ་སྣོད་གསུམ་པ་ཞེས་བྱའོ། །རིགས་ཀྱི་བུ་དག་གཞན་ཡང་བསླབ་པ་ནི་གསུམ་མོ། །གསུམ་གང་ཞེ་ན། ཉན་ཐོས་ཀྱི་
བསླབ་པ་དང་། རང་སངས་རྒྱས་ཀྱི་བསླབ་པ་དང་། བྱང་ཆུབ་སེམས་དཔའི་བསླབ་པའོ། །རིགས་ཀྱི་བུ་དག་དེ་ལ་ཉན་ཐོས་ཀྱི་བསླབ་པ་ནི་ཕྱོགས་གཅིག་པ་བདག་གི་བསམ་པའི་རྒྱུད་སྣང་བའི་མཚན་ཉིད་དོ། །རང་སངས་རྒྱས་
ཀྱི་བསླབ་པ་ནི་ནན་ཏན་བར་མ་དང་ལྡན་ཞིང་སྙིང་རྗེ་ཆེན་པོ་དང་བྲལ་བའོ། །རིགས་ཀྱི་བུ་དག་བྱང་ཆུབ་སེམས་དཔའི་བསླབ་པ་ནི་ཚད་མེད་པའི་རྗེས་སུ་སོང་བ། སྙིང་རྗེ་ཆེན་པོས་ཟིན་པའོ། །ཉན་ཐོས་ཀྱི་ཐེག་པ་ལ་གནས་པ་ནི་
རང་སངས་རྒྱས་ཀྱི་བསླབ་པ་ལ་མི་སློབ་ཅིང་མི་ཤེས་སོ། །རང་སངས་རྒྱས་ཀྱི་ཐེག་པ་ལ་གནས་པ་ནི་བྱང་ཆུབ་སེམས་དཔའི་བསླབ་པ་ལ་མི་སློབ་ཅིང་མི་ཤེས་སོ། །རིགས་ཀྱི་བུ་དག་བྱང་ཆུབ་སེམས་དཔའ་ནི་ཉན་ཐོས་ཀྱི་བསླབ་
པ་ལ་ཡང་སློབ་ཅིང་ཤེས་མོད་ཀྱི་ཉན་ཐོས་ཀྱི་ཐེག་པ་འདོད་པར་ཡང་མི་བྱེད། ཐེག་པ་དེས་འབྱུང་བར་ཡང་མི་བྱེད། རང་སངས་རྒྱས་ཀྱི་བསླབ་པ་ལ་ཡང་སློབ་ཅིང་ཤེས་མོད་ཀྱི། རང་སངས་རྒྱས་ཀྱི་ཐེག་པ་འདོད་པར་ཡང་མི་བྱེད། 
ཐེག་པ་དེས་འབྱུང་བར་ཡང་མི་བྱེད་དེ། བྱང་ཆུབ་སེམས་དཔའི་བསླབ་པ་ལ་སློབ་ཅིང་ཤེས་ལ་ཐེག་པ་ཆེན་པོ་དེས་འབྱུང་བར་བྱེད་དེ། བྱུང་ནས་ཀྱང་ཉན་ཐོས་ཀྱི་རྣམ་པར་གྲོལ་བ་ཡང་སྟོན། རང་སངས་རྒྱས་ཀྱི་རྣམ་པར་
གྲོལ་བ་ཡང་སྟོན། བྱང་ཆུབ་སེམས་དཔའི་རྣམ་པར་གྲོལ་བ་ཡང་སྟོན་ཏོ། །རིགས་ཀྱི་བུ་དག་འདི་ལྟ་སྟེ། གང་བྱང་ཆུབ་སེམས་དཔའི་བསླབ་པ་ལ་སྤྱོད་པ་དེ་ལྟ་བུ་ཡོངས་སུ་རྫོགས་པ་དེ་ནི་བྱང་ཆུབ་སེམས་དཔའི་སྡེ་

57-1-267a

སྣོད་ཅེས་བྱའོ། །རིགས་ཀྱི་བུ་དག་འདི་ལྟ་སྟེ། དཔེར་ན་ནོར་བུ་བཻ་དཱུརྱའི་སྣོད་ཀྱི་ནང་དུ་ཅི་དང་ཅི་བཅུག་པ་དེ་ཐམས་ཅད་དེའི་རང་བཞིན་ཉིད་དུ་འགྱུར་རོ། །རིགས་ཀྱི་བུ་དག་དེ་བཞིན་དུ་བྱང་ཆུབ་སེམས་དཔའི་སྡེ་སྣོད་
ཀྱི་རྗེས་སུ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གང་དང་གང་འཚལ་བ་དེ་དག་ཐམས་ཅད་སངས་རྒྱས་ཀྱི་ཆོས་ཀྱི་རང་བཞིན་ཉིད་རྗོད་པར་བྱེད་དོ། །རིགས་ཀྱི་བུ་དག་བྱང་ཆུབ་སེམས་དཔའི་
སྡེ་སྣོད་ཀྱི་རྗེས་སུ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་གང་སངས་རྒྱས་ཀྱི་ཆོས་མ་ཡིན་པ་དེ་དག་མི་མཐོང་ངོ་། །གང་བྱང་ཆུབ་སེམས་དཔའི་བསླབ་པ་མ་ཡིན་པ་དེ་དག་མི་མཐོང་ངོ་། །
གང་དག་གིས་བྱང་ཆུབ་སེམས་དཔའི་བསླབ་པ་ལ་སློབ་པར་བྱ་བ་མ་ཡིན་པའི་ཆོས་དེ་དག་མི་མཐོང་ངོ་། །གང་ཚུལ་བཞིན་མ་ཡིན་པའི་ཆོས་དེ་དག་ཀྱང་མི་མཐོང་སྟེ། ཆོས་ཐམས་ཅད་ཚུལ་བཞིན་དུ་མཐོང་བས་
ཆོས་གང་ཡང་སངས་རྒྱས་ཀྱི་ཆོས་སུ་མི་རྗོད་པ་མེད་དོ། །རིགས་ཀྱི་བུ་དག་བྱང་ཆུབ་སེམས་དཔའི་སྡེ་སྣོད་ནི་ཡི་གེས་བཤད་པ་མཐའ་ཡས་ཏེ། ཡི་གེའི་འབྲུ་གཞག་པ་ཚད་མེད་པ་ཡིན་ནོ། །སྣང་བས་གསལ་
བ་བསམ་གྱིས་མི་ཁྱབ་པ་ཡིན་ནོ། །དེ་ལྟར་མོས་པའི་སེམས་ཅན་རྣམས་ལ་མཉམ་པ་ཉིད་དུ་གཞུག་པའི་ཕྱིར་ཐམས་ཅད་མཁྱེན་པའི་ཡེ་ཤེས་ཐོབ་པར་བྱེད་པའོ། །གང་དག་བསླབ་པ་དེ་ལ་སློབ་ཅིང་སློབ་པར་
འགྱུར་བ་དེ་ཐམས་ཅད་ཀྱང་བྱང་ཆུབ་སེམས་དཔའི་སྡེ་སྣོད་འདི་ཉིད་ཀྱི་རྗེས་སུ་ཞུགས་པས་ཐེག་པ་ཆེན་པོ་དེ་རྟོགས་པར་འགྱུར་ཏེ། དེ་ཡང་བྱེད་པ་མེད་པར་རྟོགས་སོ། །དེ་ལྟ་སྟེ་འཇམ་དཔལ་གཞོན་ནུར་གྱུར་པས་
མཚན་མོའི་ཐུན་བར་མའི་ཚེ་བྱང་ཆུབ་སེམས་དཔའ་དེ་དག་ལ་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་རྒྱ་ཆེར་བཤད་དོ། །དེ་ནས་འཇམ་དཔལ་གཞོན་ནུར་གྱུར་པས་མཚན་མོ་ཐུན་ཐ་མའི་ཚེ་

57-1-267b

བྱང་ཆུབ་སེམས་དཔའ་དེ་དག་ལ་ཕྱིར་མི་ལྡོག་པའི་འཁོར་ལོ་རྡོ་རྗེའི་ཚིག་ལ་འཇུག་པའི་དོན་རྒྱ་ཆེར་བཤད་པ། རིགས་ཀྱི་བུ་དག་ཕྱིར་མི་ལྡོག་པའི་འཁོར་ལོ་ཞེས་བྱ་བ་ནི་བྱང་ཆུབ་སེམས་དཔའ་དེ་ཆོས་འཆད་པ་ལས་
སེམས་ཅན་གང་དག་གིས་ཆོས་འཆད་པ་དེ་མཉན་ནས་དེ་དག་ཐམས་ཅད་ཀྱིས་ཕྱིར་མི་ལྡོག་པའི་ཆོས་ཉིད་རྟོགས་ཤིང་། ཕྱིར་མི་ལྡོག་པའི་འཁོར་ལོ་བཤད་པ་ལས་སླར་མི་ལྡོག་པའོ། །རིགས་ཀྱི་བུ་དག་ཕྱིར་མི་ལྡོག་
པའི་འཁོར་ལོ་ལ་མོས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་སྣ་ཚོགས་སུ་མི་སྤྱོད། ཆོས་སྣ་ཚོགས་སུ་མི་སྤྱོད། ཐེག་པ་སྣ་ཚོགས་སུ་མི་སྤྱོད། སངས་རྒྱས་ཀྱི་ཞིང་སྣ་ཚོགས་སུ་མི་སྤྱོད། 
སངས་རྒྱས་སྣ་ཚོགས་སུ་མི་སྤྱོད་ཅིང་། ཆོས་ཐམས་ཅད་ཀྱི་འཁོར་ལོ་བསྐོར་བ་ནི་ཐམས་ཅད་ཀྱི་རྗེས་སུ་ཞུགས་པར་མཐོང་སྟེ། ཆོས་ཀྱི་དབྱིངས་ཐ་དད་པར་ཡང་ཆོས་ཀྱི་འཁོར་ལོ་དེ་མི་བསྐོར་ཏེ། དེ་བས་ན་ཕྱིར་མི་ལྡོག་པའི་
འཁོར་ལོ་ཞེས་བྱའོ། །འཁོར་ལོ་དེ་ནི་ཡོངས་སུ་མ་ཆད་པའི་འཁོར་ལོའོ། །གཉིས་སུ་མེད་པའི་འཁོར་ལོའོ། །ཇི་ལྟ་བ་བཞིན་དུ་བརྗོད་པའི་འཁོར་ལོའོ། །རང་བྱུང་བའི་ཡེ་ཤེས་རྟོགས་པའི་འཁོར་ལོའོ། །འཁོར་ལོ་དེ་
ནི་ཆོས་ཀྱི་དབྱིངས་ཀྱི་དཀྱིལ་འཁོར་གྱི་འཁོར་ལོའོ། །རིགས་ཀྱི་བུ་དག་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་མཚན་མ་ཐམས་ཅད་ཀྱིས་ཕྱིར་མི་ལྡོག་པའི་འཁོར་ལོ་འདི་ལ་མོས་པར་འགྱུར་བ་དང་མོས་པར་
བྱེད་པ་དང་། མོས་པར་འགྱུར་བ་དེ་ཐམས་ཅད་ནི་དེ་བཞིན་གཤེགས་པའི་རྣམ་པར་གྲོལ་བས་རྣམ་པར་གྲོལ་བར་འགྱུར་ཏེ་རྣམ་པར་གྲོལ་བ་ནི་གཉིས་སུ་ཡང་མི་སྟོན་ཏོ། །དེ་བཞིན་གཤེགས་པའི་རྣམ་པར་གྲོལ་བའི་
མཚན་ཉིད་གང་ཡིན་པ་ཆོས་ཐམས་ཅད་ཀྱི་མཚན་ཉིད་ཀྱང་དེ་ཡིན་ཏེ། དེ་བཞིན་གཤེགས་པའི་རྣམ་པར་གྲོལ་བའི་མཚན་ཉིད་མེད་པའོ། །ཆོས་ཐམས་ཅད་ཀྱང་རྣམ་པར་གྲོལ་བའི་མཚན་ཉིད་དང་བྲལ་བ་ཡིན་ཏེ། 

57-1-268a

ཆོས་གང་མཚན་ཉིད་མེད་པ་དེ་ནི་རྣམ་པར་གྲོལ་བ་ཡང་མེད་མོད་ཀྱི། གཉིས་སུ་མེད་པ། སེམས་དང་། ལུས་དང་བྲལ་བ་དེ་ནི་རྣམ་པར་གྲོལ་བའོ། །གང་སེམས་དང་། གང་ལུས་དེ་ནི་རྣམ་པར་གྲོལ་བར་མི་འགྱུར་རོ། །དེ་ཅིའི་
ཕྱིར་ཞེ་ན། རྣམ་པར་གྲོལ་བ་དེ་སེམས་དང་ལུས་ཀྱི་རང་བཞིན་ཡིན་པའི་ཕྱིར་རོ། །དེ་ལྟ་བས་ན་ཡེ་ཤེས་དེ་གཞན་ལ་རག་མ་ལས་པའི་ཕྱིར། ཕྱིར་མི་ལྡོག་པའི་འཁོར་ལོ་ཞེས་བྱའོ། །རིགས་ཀྱི་བུ་དག་གཞན་ཡང་ཕྱིར་མི་ལྡོག་པའི་
འཁོར་ལོ་ནི་སླར་མི་ལྡོག་གོ། །དེ་ཅིའི་ཕྱིར་ཞེ་ན། གཟུགས་ནི་གཟུགས་ཀྱི་རང་བཞིན་ལས་མི་ལྡོག་གོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་རྣམ་པར་ཤེས་པའི་རང་བཞིན་ལས་མི་ལྡོག་གོ། །
རིགས་ཀྱི་བུ་དག་ཆོས་ཐམས་ཅད་ནི་ཆོས་ཀྱི་དབྱིངས་དེ་ལས་མི་ལྡོག་སྟེ། ཆོས་ཀྱི་དབྱིངས་དེ་ནི་ཇི་ལྟ་བ་བཞིན་པས་ན་ཕྱིར་མི་ལྡོག་པའི་འཁོར་ལོ་ཞེས་བྱའོ། །འཁོར་ལོ་དེ་ནི་དབུས་སུ་འཇུག་པ་ཡང་མེད་དེ་འཁོར་ལོ་དེ་ནི་ཆད་པ་མེད་པ། 
རྟག་པ་མེད་པའོ། །དེ་ལ་ནི་སྒོ་ཆུང་ཟད་ཀྱང་མེད་དེ། དེ་ནི་གཉིས་སུ་མེད་པའི་སྒོའི་འཁོར་ལོའོ། །འཁོར་ལོ་དེ་ནི་སྐོར་བ་མེད་དེ། མི་སྐོར་བའི་འཁོར་ལོའོ། །འཁོར་ལོ་དེ་ནི་སྟོན་པ་ཆུང་ཟད་ཀྱང་མེད་དེ་མི་རྗོད་པའི་འཁོར་ལོའོ། །འཁོར་ལོ་དེ་
ནི་སྒྲོགས་པ་ཆུང་ཟད་ཀྱང་མེད་དེ་བརྗོད་དུ་མེད་པའི་འཁོར་ལོའོ། །ཡང་ཕྱིར་མི་ལྡོག་པའི་འཁོར་ལོ་དེ་ནི་སྟོང་པ་ཉིད་ཀྱི་སྒོ་ལ་གནས་པས་མཚན་མ་མེད་པའོ། །རྣམ་པར་གྲོལ་བའི་སྒོ་ལ་གནས་པས་མཚན་ཉིད་མེད་པའོ། །ཐམས་ཅད་
ཀྱི་རྗེས་སུ་སོང་བའི་ནམ་མཁའི་མཚན་ཉིད་དོ། །དེ་ཡང་དེའི་རྗེས་སུ་ཡང་དག་པར་སོང་བའི་རང་བཞིན་ཉིད་དེ། དེ་བས་ན་ཕྱིར་མི་ལྡོག་པའི་འཁོར་ལོ་ཞེས་བྱའོ། །རིགས་ཀྱི་བུ་དག་རྡོ་རྗེའི་ཚིག་ནི་གང་ཆོས་ཐམས་ཅད་ངེས་པར་རྟོགས་
པའོ། །ཡང་ཆོས་ཐམས་ཅད་ངེས་པར་རྟོགས་པ་གང་ཞེ་ན། རིགས་ཀྱི་བུ་དག་སྟོང་པ་ཉིད་ནི་རྡོ་རྗེའི་ཚིག་སྟེ། ལྟ་བའི་རྣམ་པ་ཐམས་ཅད་ངེས་པར་རྟོགས་པར་འགྱུར་རོ། །རིགས་ཀྱི་བུ་དག་མཚན་མ་མེད་པ་ནི་རྡོ་རྗེའི་ཚིག་སྟེ། རྣམ་པར་

57-1-268b

རྟོག་པ་ཐམས་ཅད་ལས་འདའ་བར་འགྱུར་རོ། །རིགས་ཀྱི་བུ་དག་སྨོན་པ་མེད་པ་ནི་རྡོ་རྗེའི་ཚིག་སྟེ། འགྲོ་བ་ཐམས་ཅད་ལས་འདའ་བར་འགྱུར་རོ། །རིགས་ཀྱི་བུ་དག་ཆོས་ཀྱི་དབྱིངས་ནི་རྡོ་རྗེའི་ཚིག་སྟེ། སྣ་ཚོགས་ལས་འདའ་བར་
འགྱུར་རོ། །རིགས་ཀྱི་བུ་དག་དེ་བཞིན་ཉིད་ནི་རྡོ་རྗེའི་ཚིག་སྟེ། བདག་མེད་པར་འགྱུར་རོ། །རིགས་ཀྱི་བུ་དག་འདོད་ཆགས་དང་བྲལ་བ་ནི་རྡོ་རྗེའི་ཚིག་སྟེ། འདོད་ཆགས་ཀྱི་རང་བཞིན་མེད་པར་འགྱུར་རོ། །རིགས་ཀྱི་བུ་དག་མྱ་ངན་ལས་
འདས་པ་ནི་རྡོ་རྗེའི་ཚིག་སྟེ། ཆོས་རྣམས་དེའི་རང་བཞིན་དུ་སྟོན་ཏོ་ཞེས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་དེ་དག་ལ་མཚན་ཐོག་ཐག་ཏུ་ཆོས་རྒྱ་ཆེར་བཤད་པ་དང་། དེ་ན་བྱང་ཆུབ་སེམས་དཔའ་ཁ་ཅིག་ཏིང་ངེ་
འཛིན་འོད་ཟེར་གྱི་མེ་ཏོག་ཅེས་བྱ་བ་མངོན་དུ་གྲུབ་པར་གྱུར་ཏེ། བྱང་ཆུབ་སེམས་དཔའི་ཏིང་ངེ་འཛིན་དེ་ལ་གནས་ནས་བ་སྤུའི་ཁུང་བུའི་འོད་ཟེར་རེ་རེ་ལས་ཀྱང་སངས་རྒྱས་བརྒྱ་སྟོང་སྟོན་ཅིང་། སངས་རྒྱས་བཅོམ་ལྡན་འདས་དེ་དག་ཀྱང་
ཕྱོགས་བཅུའི་སངས་རྒྱས་ཀྱི་ཞིང་ན་སེམས་ཅན་ཐམས་ཅད་སངས་རྒྱས་ཀྱི་བྱ་བ་བྱེད་པར་མངོན་དུ་ཞུགས་སོ། །དེ་ནས་རྒྱལ་པོ་མ་སྐྱེས་དགྲས་འཇམ་དཔལ་གཞོན་ནུར་གྱུར་པ་ལ་འཇམ་དཔལ་དུས་ལ་བབ་བོ། །འཇམ་དཔལ་
མན་ལ་བབ་བོ། །བཤོས་ལགས་ཀྱིས་དེའི་དུས་ལ་བབ་པར་མཁྱེན་པར་མཛོད་ཅིག་ཅེས་ཕོ་ཉ་གདུགས་ཚོད་ལ་སྤྱན་འདྲེན་དུ་བཅུག་གོ། །དེ་ནས་གནས་བརྟན་འོད་སྲུང་ཆེན་པོ་སྔ་དྲོའི་དུས་ཀྱི་ཚེ་ཤམ་ཐབས་བགོས། ཆོས་
གོས་དང་ལྷུང་བཟེད་ཁྱེར་ཏེ། དགེ་སློང་ལྔ་བརྒྱ་དང་འགྲོགས་ནས་བསོད་སྙོམས་ཀྱི་ཕྱིར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་སོང་བ་ལས། དེ་ལམ་གྱི་ཚིགས་སུ་ཕྱིན་པ་དང་འདི་སྙམ་དུ་གྱུར་ཏེ། གྲོང་ཁྱེར་ཆེན་པོར་འགྲོ་བ་ཧ་ཅང་
སྔ་ཆེས་ཀྱིས། གང་བདག་ནི་འཇམ་དཔལ་གཞོན་ནུར་གྱུར་པའི་གཙུག་ལག་ཁང་ག་ལ་བ་དེར་སོང་དང་། དེ་ན་གཏམ་གྱི་རྒྱུན་ཅིག་ཡོད་པར་འགྱུར་རོ་སྙམ་མོ། །དེ་ནས་གནས་བརྟན་འོད་སྲུང་ཆེན་པོ་དགེ་སློང་ལྔ་བརྒྱ་ཙམ་

57-1-269a

པོ་དེ་དག་དང་། འཇམ་དཔལ་གཞོན་ནུར་གྱུར་པའི་གཙུག་ལག་ཁང་ག་ལ་བ་དེར་སོང་སྟེ་ཕྱིན་ནས། འཇམ་དཔལ་གཞོན་ནུར་གྱུར་པ་དང་དགའ་བ་དང་། མགུ་བའི་གཏམ་རྣམ་པ་སྣ་ཚོགས་བྱས་ཏེ་ཕྱོགས་གཅིག་
ཏུ་འདུག་གོ། །དེ་ནས་འཇམ་དཔལ་གཞོན་ནུར་གྱུར་པས་གནས་བརྟན་འོད་སྲུང་ཆེན་པོ་ཕྱོགས་གཅིག་ཏུ་འདུག་པ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་འོད་སྲུང་ཆེན་པོ་ཅིའི་ཕྱིར་ན་ནང་པར་སྔར་ཤམ་ཐབས་བགོས། 
ཆོས་གོས་དང་ལྷུང་བཟེད་ཁྱེར་ཏེ་འགྲོ། སྨྲས་པ། འཇམ་དཔལ་བདག་ནི་བསོད་སྙོམས་ཀྱི་སླད་དུ་རྒྱལ་པོའི་ཁབ་ཏུ་མཆི་བར་འཚལ་ལོ། །འཇམ་དཔལ་གྱིས་སྨྲས་པ། ཚེ་དང་ལྡན་པ་འོད་སྲུང་ཆེན་པོ་འཁོར་དང་བཅས་པ་
ལ་བདག་གིས་བཤོས་གསོལ་གྱིས་དགོངས་ཤིག །སྨྲས་པ། འཇམ་དཔལ་བགྱིས་ཤིང་མཆོད་པར་འཚལ་ཏེ། བདག་ནི་ཆོས་འཚལ་གྱི། ཟང་ཟིང་འཚལ་བ་མ་ལགས་སོ། །སྨྲས་པ། ཚེ་དང་ལྡན་པ་འོད་སྲུང་ཆེན་པོ་
བདག་ལ་དགོངས་ཤིག་དང་ཟང་ཟིང་གིས་བསྡུ་བ་དང་། ཆོས་ཀྱིས་བསྡུ་བ་གཉི་ག་ཁྱོད་ལ་འདུ་བར་མཆིའོ། །འོད་སྲུང་ཆེན་པོས་སྨྲས་པ། འཇམ་དཔལ་བདག་ནི་འཚལ་མ་ཆད་ཀྱང་ཁྱོད་ཀྱི་སླད་བཞིན་དུ་འབྲང་འཚལ་ལོ། །
དེ་ཅིའི་སླད་དུ་ཞེ་ན་ཆོས་སྟོན་པ་དེ་ནི་ཇི་ལྟར་ཁྱོད་ཀྱི་དྲུང་ནས་ཐོས་པ་འདྲ་བར་གཞན་ལས་མི་ཐོས་སོ། །ད་འཇམ་དཔལ་དེ་རིང་སེམས་ཅན་ཆེན་པོ་དེ་དག་དང་གང་དུ་བཤོས་གསོལ། འཇམ་དཔལ་གྱིས་སྨྲས་པ། ཚེ་དང་
ལྡན་པ་འོད་སྲུང་ཆེན་པོ་གང་གི་ཚེ་བདག་ཅག་ལ་སྦྱིན་པ་སྦྱིན་ནས་འཁོར་བ་ལས་ཀྱང་མི་བསྐྱོད། མྱ་ངན་ལས་འདས་པ་ཡང་རྟོགས་པར་མི་བྱེད། སོ་སོའི་སྐྱེ་བོའི་ས་ལས་ཀྱང་མི་འདའ། འཕགས་པའི་ཆོས་མངོན་པར་
ཡང་མི་བྱེད་པ་དེའི་ཟས་དེ་རིང་འཚལ་ལོ། །ཚེ་དང་ལྡན་པ་འོད་སྲུང་ཆེན་པོ་གང་གིས་བདག་ཅག་ལ་སྦྱིན་པ་བྱིན་ནས་འབྲི་བར་ཡང་མི་འགྱུར་འཕེལ་བར་ཡང་མི་འགྱུར། ཆོས་གང་ཡང་སྐྱེད་པར་ཡང་མི་བགྱིད། 

57-1-269b

འགག་པར་ཡང་མི་བགྱིད། ཆོས་གང་གཏོང་བར་ཡང་མི་བགྱིད། ཐོབ་པར་ཡང་མི་བགྱིད་པ་དེའི་ཟས་དེ་རིང་འཚལ་ལོ། །གནས་བརྟན་གྱིས་སྨྲས་པ། འཇམ་དཔལ་དེ་ལྟར་སྦྱིན་པར་བགྱིད་པ་དེ་དང་དེ་དག་ནི་སྦྱིན་བདག་
ཆེན་པོ་ལགས་ཀྱིས་མཆིའོ། ། བམ་པོ་བཞི་པ། དེ་ནས་འཇམ་དཔལ་གཞོན་ནུར་གྱུར་པ་འདི་སྙམ་དུ་གྱུར་ཏེ། བདག་ནི་སངས་རྒྱས་ཀྱི་རྣམ་པར་རོལ་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་འགྲོའོ་སྙམ་མོ། །
ཡང་དེའི་ཚེ་ན་ཏིང་ངེ་འཛིན་རྫུ་འཕྲུལ་ཐམས་ཅད་རྣམ་པར་འཕྲུལ་པ་ཞེས་བྱ་བ་ལ་མཉམ་པར་བཞག་གོ། །འཇམ་དཔལ་གཞོན་ནུར་གྱུར་པ་རྫུ་འཕྲུལ་ཐམས་ཅད་རྣམ་པར་འཕྲུལ་པའི་ཏིང་ངེ་འཛིན་ལ་མཉམ་པར་
བཞག་མ་ཐག་ཏུ་དེ་ནས་མི་མཇེད་ཀྱི་འཇིག་རྟེན་གྱི་ཁམས་འདི་ཐམས་ཅད་ལག་མཐིལ་བཞིན་དུ་མཉམ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱང་སྣང་བ་ཆེན་པོས་སྣང་བར་གྱུར་
ཏོ། །སེམས་ཅན་དམྱལ་བ་པའི་སེམས་ཅན་རྣམས་ཀྱི་སྡུག་བསྔལ་ཡང་རྒྱུན་ཆད་དོ། །བྱོལ་སོང་གི་སྐྱེ་གནས་པ་དང་། གཤིན་རྗེའི་འཇིག་རྟེན་པའི་སེམས་ཅན་རྣམས་ཀྱི་སྡུག་བསྔལ་ཡང་རྒྱུན་ཆད་དོ། །སེམས་ཅན་
གང་ཡང་འདོད་ཆགས་སམ། ཞེ་སྡང་ངམ། གཏི་མུག་གམ། ང་འམ། གཡོ་འམ། ཁྲོ་བ་འམ། གནོང་འཆབ་པར་གྱུར་པ་མེད་དོ། །དེའི་ཚེ་སེམས་ཅན་ཐམས་ཅད་གཅིག་ལ་གཅིག་ཕ་དང་མར་འདུ་ཤེས་ཤིང་བྱམས་པ་ལ་
གནས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས་སོ། །འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་རྣམས་ཀྱང་། འཇམ་དཔལ་གཞོན་ནུར་གྱུར་པ་ལ་མཆོད་
པར་བྱ་བའི་ལས་ལ་བརྩོན་པར་གྱུར་ཏོ། །སིལ་སྙན་བརྒྱ་སྟོང་ཡང་དཀྲོལ་བར་གྱུར་ཏོ། །མེ་ཏོག་དྲི་ཞིམ་པོའི་ཆར་ཀྱང་མངོན་པར་བབ་བོ། །ལམ་གྱི་བྱི་དོར་ཡང་བྱས་སོ། །འཇམ་དཔལ་གཞོན་ནུར་གྱུར་པས་ཏིང་ངེ་འཛིན་དེ་

57-1-270a

ལ་སྙོམས་པར་ཞུགས་མ་ཐག་ཏུ་དེ་ནས་གཙུག་ལག་ཁང་དེའི་སྒོ་ནས་བཟུང་སྟེ། གྲོང་ཁྱེར་གྱི་སྒོའི་བར་དུ་དེའི་བར་གྱི་ལམ་ཐམས་ཅད་ལག་མཐིལ་བཞིན་དུ་མཉམ་པར་གྱུར་ཏོ། །རིན་པོ་ཆེ་དུ་མ་ནི་བསགས། 
རིན་པོ་ཆེ་དུ་མས་ནི་སྤྲས། རིན་པོ་ཆེའི་སྟེགས་བུས་ནི་བསྐོར། ཞེང་དུ་ཤིང་རྟ་བདུན་ཙམ་དུ་མེ་ཏོག་པད་མ་དམར་པོ་དང་། ཀུ་མུཏ་དང་། པུན་དཱ་རི་ཀས་ནི་གང་། སྟེང་ནས་ནི་རིན་པོ་ཆེའི་དྲ་བས་གཡོགས། དར་གྱི་ལྡ་ལྡི་མང་པོ་ནི་བྲེས། 
གདུགས་དང་། རྒྱལ་མཚན་དང་། བ་དན་དང་། རུ་མཚོན་ནི་བསྒྲེང་བར་གྱུར་ཏོ། །རིན་པོ་ཆེའི་སྟེགས་བུ་གཉིས་ཀྱི་གཡས་གཡོན་དུ་མདའ་རྒྱང་རེ་རེ་ཙམ་ན་རིན་པོ་ཆེའི་ཤིང་ཡོད་པར་གྱུར་ཏོ། །རིན་པོ་ཆེའི་ཤིང་ཐམས་ཅད་ལས་
རིན་པོ་ཆེའི་ཤིང་གཉིས་པ། རིན་པོ་ཆེའི་སྲད་བུས་སྦྲེལ་བར་གྱུར་ཏོ། །རིན་པོ་ཆེའི་ཤིང་རེ་རེ་ལས་ཀྱང་གང་དྲི་བྱུང་བར་གྱུར་པའི་དྲི་དེས་ནི་དཔག་ཚད་གཅིག་ཁོ་ར་ཁོར་ཡུག་ཏུ་ཁྱབ་པར་གྱུར་ཏོ། །རིན་པོ་ཆེའི་ཤིང་གཉིས་ཀྱི་བར་
ན་རྫིང་བུ་སྤྲུལ་པར་གྱུར་ཏེ། གསེར་གྱི་བྱེ་མ་ནི་བཀྲམ། རིན་པོ་ཆེའི་སྟེགས་བུས་ནི་བསྐོར། ནོར་བུ་བཻ་དཱུརྱའི་སྐས་ནི་ཟུག །མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པུན་དཱ་རི་ཀས་ནི་བཀབ། བྱ་ངུར་པ་ནི་སྐད་འབྱིན། 
ཆུ་ཡན་ལག་བརྒྱད་དང་ལྡན་པས་ནི་ཡོངས་སུ་གང་བར་གྱུར་ཏོ། །ཤིང་ཐམས་ཅད་ལ་རིན་པོ་ཆེ་དང་གསེར་གྱི་དྲ་བ་ནི་བྲེས་པར་གྱུར་ཏོ། །རིན་པོ་ཆེའི་ཤིང་ཐམས་ཅད་ཀྱི་བར་ན་རིན་པོ་ཆེའི་པོག་ཕོར་ནས་སྤོས་ཀྱིས་ནི་
བདུགས་པར་གྱུར་ཏོ། །རིན་པོ་ཆེའི་ཤིང་ཐམས་ཅད་ཀྱི་དྲུང་ན་ལྷའི་བུ་མོ་ཉི་ཤུ་རྩ་ལྔ་ལྔ་སྤྲུལ་ཡོད་པ་ནས་བྱུང་བའི་ཙན་དན་གྱི་སྙིང་པོའི་ཕྱེ་མ་ཐོགས་ཏེ་འདུག་པར་གྱུར་ཏོ། །འཇམ་དཔལ་གཞོན་ནུར་གྱུར་པས་
ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་དེ་ནས་དེའི་ཚེ་ངོ་མཚར་དང་རྨད་དུ་བྱུང་བ་འདི་དག་དང་གཞན་དག་ཀྱང་སྣང་ངོ་། །དེ་ནས་འཇམ་དཔལ་གཞོན་ནུར་གྱུར་པས་ཤམ་ཐབས་དགོས་ཏེ། གནས་བརྟན་འོད་

57-1-270b

སྲུང་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་འོད་སྲུང་ཆེན་པོ་ཁྱོད་ནི་མདུན་དུ་བཞུད་ཅིག །བདག་ནི་ཁྱོད་ཀྱི་སླད་བཞིན་དུ་མཆིའོ། །དེ་ཅིའི་ཕྱིར་ཞེ་ན། གནས་བརྟན་འོད་སྲུང་ཆེན་པོ་ནི་བགྲེས་ལ་རབ་ཏུ་བྱུང་ནས་ཀྱང་ཡུན་རིང་
སྟེ། དེ་བཞིན་གཤེགས་པ་མ་མཐོང་བར་རབ་ཏུ་བྱུང་ཞིང་། གང་འཇིག་རྟེན་ན་དགྲ་བཅོམ་པ་དེའི་རྗེས་སུ་རབ་ཏུ་བྱུང་བས་དེ་བས་ན་ཚེ་དང་ལྡན་པ་འོད་སྲུང་ཆེན་པོ་ཁྱོད་ནི་མདུན་དུ་བཞུད་ཅིག །དེ་སྐད་ཅེས་སྨྲས་པ་དང་། འོད་སྲུང་ཆེན་པོས་
འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ལེགས་པར་གསུངས་པའི་ཆོས་འདུལ་བ་ལས་ནི་སུ་ཡང་ནས་རྒན་པ་དང་། ལོ་གྲངས་ཀྱིས་རྒན་པ་ལ་མི་བགྱིའི། འཇམ་དཔལ་ལེགས་པར་གསུངས་པའི་
ཆོས་འདུལ་བ་ལས་ནི་ཤེས་རབ་ཀྱིས་རྒན་པ་དང་། ཐོས་པས་རྒན་པ་དང་། སྤོབས་པས་རྒན་པ་དང་། དབང་པོ་ཤིན་དུ་རྣམ་པར་ཕྱེ་བ་ལ་རྒན་པ་ཞེས་བགྱི་ལ། འཇམ་དཔལ་ཁྱོད་ཀྱང་ཤེས་རབ་ཀྱིས་བགྲེས། གསན་པས་བགྲེས། 
སྤོབས་པས་བགྲེས། དབང་པོ་དམ་པ་དང་། དམ་པ་མ་ལགས་པར་མཁྱེན་པ་ལ་མཁས་པས་དེའི་སླད་དུ་ཁྱོད་ཉིད་ཐུ་བོ་བགྲེས་པ་ལགས་ཀྱིས་མདུན་དུ་བཞུད་ཅིག །བདག་ནི་ཁྱོད་ཀྱི་སླད་བཞིན་དུ་མཆིའོ། །ཡང་འཇམ་
དཔལ་དོན་འདི་ཉིད་ཤིན་དུ་བཤད་པའི་སླད་དུ་སྐབས་འདིར་བདག་གིས་དེ་ཙམ་ཞིག་བཤད་པར་སྤོབས་སོ། །འཇམ་དཔལ་འདི་ལྟ་སྟེ། དཔེར་ན་སེང་གེའི་ཕྲུ་གུ་བྱུང་ནས་རིང་པོ་མ་ལོན་པ་ནི་བདག་གི་སྟོབས་ཀྱི་ཤུགས་མ་
རྫོགས་མོད་ཀྱི། སེང་གེའི་ཕྲུ་གུ་དེའི་དྲི་རླུང་གིས་གང་དང་གང་དུ་ཁྱེར་བ་དེ་དང་དེ་དག་ཏུ་རི་དགས་ཐམས་ཅད་དྲི་དེ་མི་བཟོད་ནས་འབྲོས་པར་བགྱིད་དེ། བལ་གླང་གླང་པོ་ཆེན་པོ་ལོ་དྲུག་ཅུ་ལོན་པ། ལིག་རི་སྲ་བས་དམ་དུ་
བཅིངས་པ་དེ་དག་ཀྱང་སེང་གེའི་ཕྲུ་གུ་དེའི་དྲིས་ཕོག་པ་དང་། འཇིགས་སྐྲག་ནས་ལིག་རིས་བཅིངས་པ་དེ་དག་བཅད་དེ་ཕྱོགས་ཕྱོགས་སུ་འབྲོས་སོ། །ཕུག་ན་གནས་པ་ནི་ཕུག་ཏུ། ཁུང་ན་གནས་པ་ནི་ཁུང་དུ་འཇུག །

57-1-271a

ཆུ་ན་གནས་པ་ནི་ཆུར་འཇུག །བྱ་ནི་ནམ་མཁའ་ལ་འཕུར་རོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་སེམས་ཐོག་མ་བསྐྱེད་པ་ཡང་ཤེས་རབ་དང་། ཡེ་ཤེས་ཀྱི་སྟོབས་བསྐྱེད་པ་མ་ཐོབ་
མོད་གྱི། སེམས་བསྐྱེད་མ་ཐག་ཏུ་ཉན་ཐོས་དང་། རང་སངས་རྒྱས་ཐམས་ཅད་ཟིལ་གྱིས་གནོན་པར་འགྱུར། བདུད་ཐམས་ཅད་ཀྱང་འཇིགས་པར་འགྱུར་ཞིང་སྐྲག་ནས་བདག་གི་ཁང་པ་ན་མི་དགའ་བར་འགྱུར་རོ། །
ཡང་འཇམ་དཔལ་སེང་གེའི་ཕྲུ་གུ་དེས་སེང་གེའི་སྟོབས་དང་ཤུགས་ཐོབ་པ་གཞན་དག་སེང་གེའི་སྐད་འབྱིན་པའི་སྒྲ་ཐོས་ནས་ཡང་འཇིགས་དངངས་སྐྲག་པར་མི་འགྱུར་གྱི་སྟེང་དུ་བདག་ཀྱང་རིང་པོ་མི་ཐོགས་པར་སེང་
གེའི་སྐད་འབྱིན་ཏོ་སྙམ་དུ་སེམས་པར་འགྱུར་རོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་སངས་རྒྱས་ཀྱི་སེང་གེའི་སྐད་ཐོས་ནས་མི་འཇིགས་མི་དངངས་སྐྲག་པར་མི་འགྱུར་གྱི། 
སྟེང་དུ་བདག་ཀྱང་རིང་པོ་མི་ཐོགས་པར་དེ་བཞིན་དུ་བྱང་ཆུབ་ཐོབ་ནས་དེ་དང་འདྲ་བར་སེང་གེའི་སྐད་ཡང་དག་པར་འབྱིན་པར་བྱའོ་སྙམ་དུ་སེམས་པར་འགྱུར་རོ། །འཇམ་དཔལ་དེ་ལྟ་བས་ན་གང་དག་ཉན་ཐོས་ཀྱི་ནང་ན་
གང་བགྲེས། རང་སངས་རྒྱས་ཀྱི་ནང་ན་གང་བགྲེས། དེ་བཞིན་གཤེགས་པའི་ནང་ན་གང་བགྲེས་ཤེས་སྨྲ་ཞིང་ཡང་དག་པར་རྗོད་པ་དེ་དག་ནི་འཇམ་དཔལ་བྱང་ཆུབ་ཀྱི་སེམས་ལ་སྨྲ་ཞིང་ཡང་དག་པར་རྗོད་པ་ལགས་སོ། །
དེ་ཅིའི་སླད་དུ་ཞེ་ན། འཇམ་དཔལ་དགེ་བའི་ཆོས་དེ་དག་ཐམས་ཅད་ནི་དེ་ལས་བྱུང་ངོ་། །དེའི་སླད་དུ་ཡང་འཇམ་དཔལ་ཁྱོད་ནི་ཐུ་བོ་བགྲེས་པོ་ལགས་ཀྱིས་སྔོན་དུ་བཞུད་ཅིག །བདག་ནི་ཁྱོད་ཀྱི་སླད་བཞིན་དུ་མཆིའོ། །
དེ་ནས་འཇམ་དཔལ་གཞོན་ནུར་གྱུར་པ་མདུན་དུ་སོང་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། ཉན་ཐོས་ཆེན་པོ་དེ་དག་དང་དེའི་ཕྱི་བཞིན་དུ་དོང་ངོ་། །འཇམ་དཔལ་གཞོན་ནུར་གྱུར་པ་རིན་པོ་ཆེའི་ལམ་

57-1-271b

དེར་སོང་མ་ཐག་ཏུ་དེ་ནས་དེའི་ཚེ་སྟེང་གི་བར་སྣང་ལས་མེ་ཏོག་གི་ཆར་ཆེན་པོ་ཡང་མངོན་པར་བབ་བོ། །སིལ་སྙན་བརྒྱ་སྟོང་གི་སྒྲ་ཡང་བྱུང་ངོ་། །ས་ཆེན་པོ་ཡང་རྣམ་པ་དྲུག་ཏུ་རབ་ཏུ་གཡོས་སོ། །འཇིག་རྟེན་ཡང་སྣང་བ་ཆེན་པོས་ཁྱབ་པར་
གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པ་དེ་འདྲ་བའི་བཀོད་པ་དང་ལྡན་ནས་ལུས་ལས་འོད་ཟེར་བརྒྱ་སྟོང་ནི་བྱུང་། མེ་ཏོག་པད་མའི་ཆར་ནི་འབབ་བཞིན་དུ་གྲོང་ཁྱེར་ཆེན་པོར་སོང་བ་དང་། རྒྱལ་པོ་མ་སྐྱེས་དགྲས་འཇམ་དཔལ་གཞོན་
ནུར་གྱུར་པ་བྱང་ཆུབ་སེམས་དཔའ་བརྒྱད་ཁྲི་ཉིས་སྟོང་དང་། ཉན་ཐོས་ལྔ་བརྒྱ་ཙམ་གྱིས་བསྐོར་ཅིང་མདུན་དུ་བདར་ཏེ་འོང་ངོ་ཞེས་ཐོས་ནས་འདི་སྙམ་དུ་གྱུར་ཏེ། འདིར་ནི་ལྔ་བརྒྱའི་བཤོས་སྦྱར་ལ་ད་འདི་སྙེད་ཀྱི་མང་པོ་ཞིག་གཤེགས་པར་
གྱུར་ན་གང་དུ་བཞུགས་ཅི་གསོལ་སྙམ་སྟེ། དེ་ལྟར་བདག་ནི་འཇམ་དཔལ་གཞོན་ནུར་གྱུར་པས་སླུས་སོ་སྙམ་དུ་རྒྱལ་པོ་མ་སྐྱེས་དགྲ་དེ་ལྟར་སེམས་སྐྱེས་མ་ཐག་ཏུ་དེ་ནས་དེའི་མོད་ལ་རྒྱལ་པོ་ཆེན་པོ་ངལ་བསོ་པོ་དང་། གནོད་སྦྱིན་
གྱི་བདག་པོ་ཀུ་བེ་རས་བདག་ཅག་གི་ལུས་ཆེ་བ་བསྟན་ནས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་མི་དགར་མ་བྱེད་ཅིག །འཇམ་དཔལ་གཞོན་ནུར་གྱུར་པ་ནི་ཤེས་རབ་ཆེ་བ། ཤེས་རབ་ཀྱི་གཟི་
བརྗིད་དང་ལྡན་པ། རྫུ་འཕྲུལ་བྱིན་གྱིས་རློབ་པ་ལ་མཁས་པ་ཡིན་ཏེ། དེ་ནི་འདོད་ན་ཟན་ཆང་གཅིག་གིས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་ཐམས་ཅད་འགྲངས་པར་བྱེད་
མཁས་ན་བརྒྱད་ཁྲི་ཉིས་སྟོང་ལ་ལྟ་ཅི་སྨོས་ཏེ། རྒྱལ་པོ་ཆེན་པོ་མི་དགར་མ་བྱེད་ཅིག །ཐམས་ཅད་ལ་ཁྱེད་པར་འོང་ངོ་། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་འཇམ་དཔལ་གཞོན་ནུར་གྱུར་པའི་སྦྱིན་པའི་ཐབས་ནི་ཟད་
མི་ཤེས་སོ། །དེ་ནས་རྒྱལ་པོ་མ་སྐྱེས་དགྲས་ཚིག་དེ་ཐོས་པ་དང་། དགའ་མགུ་རངས་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་ཡང་ཤིན་དུ་འཇམ་དཔལ་གཞོན་ནུར་གྱུར་པ་ལ་སྟོན་པའི་འདུ་ཤེས་ཀྱིས་

57-1-272a

བཀུར་སྟི་བྱེད་པར་གྱུར་ཏོ། །དེ་ནས་རྒྱལ་པོ་མ་སྐྱེས་དགྲ་བདག་གི་འགྲོ་བ་དང་འཁོར་དང་བཅས་ཏེ། མེ་ཏོག་དང་། དྲི་དང་། ཕྲེང་བ་དང་། བྱུག་པ་དང་། ཕྱེ་མ་ཐོགས་ནས་གཡོག་དང་བཅས་པས་འཇམ་དཔལ་
གཞོན་ནུར་གྱུར་པ་བསུ་བའི་ཕྱིར་ཕྱི་རོལ་དུ་བྱུང་ནས། དེས་འཇམ་དཔལ་གཞོན་ནུར་གྱུར་པ་ལ་མཆོད་པ་བྱས་ཏེ་སླར་བདག་གི་ཁྱིམ་དུ་སོང་ངོ་། །དེ་ནས་འཇམ་དཔལ་གཞོན་ནུར་གྱུར་པ་འཁོར་དང་བཅས་ཏེ། 
རྒྱལ་པོ་མ་སྐྱེས་དགྲའི་ཁང་པ་ག་ལ་བ་དེར་དོང་སྟེ་ཕྱིན་པ་དང་ནང་དུ་དོང་ངོ་། །ནང་དུ་ཕྱིན་པ་དང་། གྲོང་ཁྱེར་ན་གནས་པ་ཐམས་ཅད་ཀྱང་མཆོད་པའི་ལས་ལ་བརྩོན་པར་གྱུར་ཏོ། །ཡང་དེའི་ཚེ་ན་བྱང་ཆུབ་སེམས་
དཔའི་འཁོར་དེར་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་གཟིགས་པ་ཞེས་བྱ་བ་ཞིག་འདུས་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་པོ་
ཀུན་དུ་གཟིགས་པ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་འཁོར་གྱི་གནས་བཀོད་པ་བྱའོ། །དེའི་དུས་ལ་བབ་པར་ཤེས་པར་གྱིས་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་
ཀུན་ཏུ་གཟིགས་པས་རྒྱལ་པོ་མ་སྐྱེས་དགྲའི་ཁབ་ཀྱི་གཡས་གཡོན་དུ་བལྟས་པ་དང་། བལྟས་མ་ཐག་ཏུ་རྒྱལ་པོ་མ་སྐྱེས་དགྲའི་ཁབ་ཏུ་འཁོར་གྱི་གནས་བྱུང་སྟེ། དར་གྱི་ལྡ་ལྡི་མང་པོ་ནི་བཏགས། བླ་རེ་ནི་
བྲེས། གདུགས་དང་། རྒྱལ་མཚན་དང་བ་དན་ནི་བསྒྲེང་། མེ་ཏོག་སིལ་མས་ནི་བཀང་ཞིང་ལག་མཐིལ་བཞིན་དུ་མཉམ་པ་དང་། ཡངས་ཤིང་རྒྱ་ཆེ་བར་གྱུར་ཏོ། །ཡང་དེའི་ཚེ་ན་བྱང་ཆུབ་སེམས་དཔའ་སེམས་
དཔའ་ཆེན་པོ་ཆོས་ལས་མངོན་པར་འཕགས་པ་ཞེས་བྱ་བ་ཞིག་བྱང་ཆུབ་སེམས་དཔའི་འཁོར་དེར་འདུས་པར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ཆོས་ལས་མངོན་པར་

57-1-272b

འཕགས་པ་བོས་ཏེ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་སྟན་གདིང་བར་གྱིས་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ལས་མངོན་པར་འཕགས་པས་དེའི་ཚེ་སེ་གོལ་གྱི་སྒྲ་
བྱས་པ་དང་། དེ་ནས་དེའི་ཚེ་འཁོར་གྱི་གནས་དེ་ནས་སྟན་རྣམ་པ་སྣ་ཚོགས་པ་བལྟ་ན་སྡུག་པ། གོས་དུ་མས་གཡོགས་པ་བཞི་ཁྲི་ཉིས་སྟོང་མངོན་པར་བྱུང་བར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པ་སྟན་བཏིང་བ་ལ་
འདུག་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། ཉན་ཐོས་ཆེན་པོ་དེ་དག་ཀྱང་སྟན་དེ་དག་ལ་ཅི་རིགས་པར་འཁོད་དོ། །དེ་ནས་རྒྱལ་པོ་མ་སྐྱེས་དགྲས་འཇམ་དཔལ་གཞོན་ནུར་གྱུར་པ་སྟན་ལ་འདུག་
པར་ཤེས་ནས་འདི་སྐད་ཅེས་གསོལ་ཏོ། །འཇམ་དཔལ་འབྲས་ཅན་སླད་མ་གྲོལ་གྱི་བར་དུ་ཅུང་ཟད་ཅིག་གཞེས་ཤིག །འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་ཐམས་ཅད་ལ་ཆོག་པར་འགྱུར་གྱིས་བྱ་བ་ཉུང་ངུ་
གྱིས་ཤིག །དེ་ནས་རྒྱལ་པོ་ཆེན་པོ་བཞི་དཔུང་དང་བཅས་འཁོར་དང་བཅས་ཏེ་འཇམ་དཔལ་གཞོན་ནུར་གྱུར་པའི་མཆོད་པའི་ལས་ལ་བརྩོན་པར་གྱུར་ཏོ། །བརྒྱ་བྱིན་ལྷའི་དབང་པོ་ཡང་ཆུང་མ་དང་། ལྷའི་བུ་མོ་དང་། 
དེ་མ་ཡིན་པའི་ལྷ་དང་། ལྷ་མ་ཡིན་གྱི་བུ་མོ་དག་དང་བཅས་ཏེ། ཨ་ཀ་རུ་དང་། ཙན་དན་གྱི་ཕྱེ་མས་བྱང་ཆུབ་སེམས་དཔའ་ཐམས་ཅད་དང་། ཉན་ཐོས་ཐམས་ཅད་ལ་གཏོར་ཀྱང་སྐྱེས་བུ་དམ་པ་དེ་དག་ནི་སྤོས་ཀྱི་འདུ་ཤེས་
དང་། ལྷའི་བུ་མོའི་འདུ་ཤེས་སུ་སྐྱེད་པ་མི་བྱེད་དོ། །ཚངས་པ་མི་མཇེད་ཀྱི་བདག་པོ་ཡང་ཁྱེའུའི་གཟུགས་སུ་བསྒྱུར་ཏེ། གཡག་རྔའི་རྡུལ་ཡབ་ཐོགས་ནས་འཇམ་དཔལ་གཞོན་ནུར་གྱུར་པའི་གཡས་ལོགས་
ན་གཡོབ་ཅིང་འདུག་པར་གྱུར་ཏོ། །ཚངས་པའི་རིས་ཀྱི་ལྷའི་བུ་རྣམས་ཀྱང་བྱང་ཆུབ་སེམས་དཔའ་ཐམས་ཅད་ཀྱི་གཡས་ཕྱོགས་ན་འདུག་ཅིང་གཡག་རྔའི་རྡུལ་ཡབ་ཐོགས་ཏེ་གཡོབ་པར་གྱུར་ཏོ། །ཀླུའི་རྒྱལ་པོ་མ་

57-1-273a

གྲོས་པ་ཡང་བདག་གི་ལུས་མི་སྣང་བར་བྱས་ཏེ། སྟེང་གི་བར་སྣང་ལས་མེ་ཏོག་གི་སེ་མོ་དོ་འཕྱང་བར་བྱས་སོ། །མེ་ཏོག་གི་སེ་མོ་དོ་དེ་ལས་ཀྱང་ཆུ་ཡན་ལག་བརྒྱད་དང་ལྡན་པ་འབྱུང་བར་བྱེད་དེ། ཆུ་དེས་
ཀྱང་ཆུའི་བྱ་བ་བྱས་སོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་སོ་སོ་དང་། དེ་བཞིན་དུ་ཉན་ཐོས་རྣམས་ཀྱི་མདུན་དུ་ཡང་མུ་ཏིག་གི་སེ་མོ་དོ་འཕྱང་དུ་བཅུག་སྟེ། དེ་དག་གིས་ཆུའི་བྱ་བ་བྱས་སོ། །དེ་ནས་རྒྱལ་
པོ་མ་སྐྱེས་དགྲ་འདི་སྙམ་དུ་གྱུར་ཏེ། བྱང་ཆུབ་སེམས་དཔའ་འདི་དག་ལ་ལྷུང་བཟེད་མི་མངའ་ན་དེ་དག་ཅི་ལས་གསོལ་བར་འགྱུར་སྙམ་མོ། །དེ་ནས་འཇམ་དཔལ་གཞོན་ནུར་གྱུར་པའི་སེམས་ཀྱིས་རྒྱལ་པོ་མ་
སྐྱེས་དགྲའི་སེམས་ཀྱི་ཡོངས་སུ་རྟོག་པ་ཤེས་ནས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ཀྱེ་རྒྱལ་པོ་ཆེན་པོ་རིགས་ཀྱི་བུ་འདི་དག་ནི་ལྷུང་བཟེད་ཁྱེར་ཏེ་མི་འོང་གི། སངས་རྒྱས་ཀྱི་ཞིང་གང་དང་གང་
དག་ཏུ་ཟས་ཟ་བ་དེ་དང་དེ་དག་ཏུ་འདི་དག་འཁོད་མ་ཐག་ཏུ་སྔོན་གྱི་བྱིན་གྱི་བརླབས་ཀྱིས་ཟས་ཀྱི་སྔ་ལོགས་སུ་བདག་བདག་གི་སངས་རྒྱས་ཀྱི་ཞིང་ནས་ལྷུང་བཟེད་རྣམས་བར་སྣང་ལས་འོང་སྟེ་ལག་པ་ན་འདུག་པར་བྱེད་དོ། །
རྒྱལ་པོས་གསོལ་པ། འཇམ་དཔལ་འོ་ན་སྐྱེས་བུ་དམ་པ་འདི་དག་སངས་རྒྱས་ཀྱི་ཞིང་གང་ནས་མཆིས། དེ་ན་དེ་བཞིན་གཤེགས་པའི་མཚན་ཅི་ལགས། འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་འཇིག་རྟེན་
གྱི་ཁམས་ནི་རྟག་ཏུ་སྒྲ་བསྒྲགས་ཤེས་བགྱིའོ། །དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྒྲགས་པའི་དཔལ་ཞེས་བྱ་བ་ད་ལྟར་བཞུགས་སོ། །འཚོའོ། །གཞེས་སོ། །
ཆོས་ཀྱང་སྟོན་ཏོ། །སངས་རྒྱས་ཀྱི་ཞིང་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ཁྱོད་ཀྱི་བཤོས་གསོལ་བ་དང་། ཁྱོད་ཀྱི་འགྱོད་པ་ངན་པ་དེ་མཉན་པའི་ཕྱིར་འདིར་ལྷགས་སོ། །དེ་ནས་བྱང་ཆུབ་

57-1-273b

སེམས་དཔའ་དེ་དག་གིས་སེམས་བསྐྱེད་མ་ཐག་ཏུ་འཇིག་རྟེན་གྱི་ཁམས་རྟག་ཏུ་སྒྲ་བསྒྲགས་དེ་ནས་ལྷུང་བཟེད་དེ་དག་བྱང་ཆུབ་སེམས་དཔའ་དེ་དག་གི་བྱིན་གྱི་བརླབས་དང་། དེ་བཞིན་གཤེགས་པ་དེའི་སྔོན་གྱི་
སྨོན་ལམ་གྱིས་སྟེང་གི་བར་སྣང་ལས་སོང་སྟེ། མཚོ་མ་དྲོས་པ་ཆེན་པོར་བབས་ཏེ། དེ་དག་ཆུ་ཡན་ལག་བརྒྱད་དང་ལྡན་པས་བཀྲུས་ནས་མེ་ཏོག་པད་མའི་འདབ་མའི་སྟེང་དུ་བཞག་སྟེ། ཀླུའི་བུ་མོ་བརྒྱད་ཁྲི་ཉིས་སྟོང་གིས་
ཁྱེར་ནས་བྱང་ཆུབ་སེམས་དཔའ་དེ་དག་ལ་ཕུལ་ལོ། །དེ་ནས་རྒྱལ་པོ་མ་སྐྱེས་དགྲ་ཤིན་དུ་ཆེར་དགའ་མགུ་རངས་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ཞིང་འདུག་
པར་གྱུར་པ་དང་། འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་མཆོད་སྟོན་དྲོངས་ཤིག །དེའི་དུས་ལ་བབ་པར་ཤེས་པར་གྱིས་ཤིག །དེ་ནས་རྒྱལ་པོ་མ་སྐྱེས་དགྲས་མཆོད་སྟོན་ཇི་ལྟར་སྦྱར་བ་རྣམས་དྲངས་ཏེ། བཟའ་བ་འམ། 
བཅའ་བ་འམ། བལྡག་པ་གང་དང་གང་དྲངས་པ་དེ་དང་དེ་གཞོན་པའི་མཐའི་བར་དུ་ཟད་མི་ཤེས་པར་གྱུར་ཏོ། །དེ་ལྟ་སྟེ། རྒྱལ་པོ་མ་སྐྱེས་དགྲས་ལྔ་བརྒྱ་པའི་མཆོད་སྟོན་སྦྱར་བ་དེ་ལས་བྱང་ཆུབ་སེམས་དཔའ་བརྒྱད་ཁྲི་ཉིས་སྟོང་
པོ་དེ་དག་དང་། ཉན་ཐོས་ལྔ་བརྒྱ་ཙམ་དེ་དག་ཆོག་པར་བྱས་ཀྱང་མཆོད་སྟོན་དེ་ཡོངས་སུ་ཟད་ཅིང་གཏུགས་པར་མ་གྱུར་ཏོ། །དེ་ནས་རྒྱལ་པོ་མ་སྐྱེས་དགྲས་གསོལ་པ། འཇམ་དཔལ་མཆོད་སྟོན་འདི་མ་བས་པ་ངོ་མཚར་ཏོ། །
འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་ཇི་ལྟར་འགྱོད་པ་ངན་པ་དེ་མི་ཟད་པ་དེ་བཞིན་དུ་མཆོད་སྟོན་འདི་མི་ཟད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་ཟས་ཟོས་ནས་ལྷུང་བཟེད་རྣམས་ནམ་
མཁའ་ལ་འཕངས་པ་དང་། དེ་དག་མ་བཟུང་བཞིན་དུ་བར་སྣང་ལ་འདུག་པར་གྱུར་ཏེ་མ་ལྷུང་ངོ་། །དེ་ནས་རྒྱལ་པོས་གསོལ་པ། འཇམ་དཔལ་ལྷུང་བཟེད་འདི་དག་ཅི་ལ་གནས། སྨྲས་པ། རྒྱལ་པོ་ཆེན་པོ་ཁྱོད་ཀྱི་འགྱོད་པ་ངན་པ་

57-1-274a

དེ་ཅི་ལ་གནས་པ་དེ་ཉིད་ལ་ལྷུང་བཟེད་འདི་དག་གནས་སོ། །རྒྱལ་པོས་གསོལ་པ། འཇམ་དཔལ་ལྷུང་བཟེད་འདི་དག་ནི་མི་གནས་སོ། །འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་ཁྱོད་ཀྱི་འགྱོད་པ་ངན་པ་
དེ་ཡང་མི་གནས་སོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་ལྷུང་བཟེད་འདི་དག་མི་གནས་ཀྱང་མི་ལྟུང་བ་དེ་བཞིན་དུ་རྒྱལ་པོ་ཆོས་ཐམས་ཅད་ཀྱང་མི་ཆགས་མི་གནས་ཤིང་ཆོས་གང་ཡང་མི་ལྟུང་ངོ་། །དེ་ནས་རྒྱལ་པོ་མ་སྐྱེས་
དགྲས་བྱང་ཆུབ་སེམས་དཔའ་དེ་དག་དང་། ཉན་ཐོས་ཆེན་པོ་དེ་དག་ལག་པ་དང་ལྷུང་ཟེད་བཀྲུས་པར་ཤེས་ཏེ། ཆོས་མཉན་པའི་ཕྱིར་འཇམ་དཔལ་གཞོན་ནུར་གྱུར་པའི་མདུན་དུ་འདུག་ནས་འཕགས་པ་འཇམ་དཔལ་
བདག་གི་འགྱོད་པ་དེ་བསལ་དུ་གསོལ་ཞེས་བྱས་པ་དང་། འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་ཁྱོད་ཀྱི་འགྱོད་པ་དེ་ནི་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་ཀྱིས་ཀྱང་བསལ་མི་ནུས་སོ། །
དེ་ནས་རྒྱལ་པོ་མ་སྐྱེས་དགྲས་བདག་མགོན་མེད་པར་ཤེས་ནས་ཤིང་བཅད་པ་བཞིན་དུ་ས་ཆེན་པོ་འདི་ལ་འགྱེལ་བར་གྱུར་ཏོ། །དེ་ནས་གནས་བརྟན་འོད་སྲུང་ཆེན་པོས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །
རྒྱལ་པོ་ཆེན་པོ་མ་འཇིགས་མ་སྐྲག་ཤིག །འཇམ་དཔལ་གཞོན་ནུར་གྱུར་པ་ནི་དགོངས་པ་འཆད་པ་ལ་མཁས་པ་ཡིན་གྱིས། འདི་ཉིད་ལ་ཁྱོད་ཀྱིས་ཅི་ལས་དགོངས་ཏེ་ཁྱོད་ཀྱི་འགྱོད་པ་དེ་གང་གཱའི་ཀླུང་གི་བྱེ་མ་སྙེད་ཀྱི་སངས་
རྒྱས་བཅོམ་ལྡན་འདས་ཀྱིས་ཀྱང་བསལ་མི་ནུས་སོ་ཞེས་དེ་སྐད་དུ་སྟོན་ཅེས་ཞུས་ཤིག །དེ་ནས་རྒྱལ་པོ་མ་སྐྱེས་དགྲས་སའི་སྟེང་ནས་སླར་ལངས་ཏེ་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་གསོལ་ཏོ། །འཇམ་
དཔལ་ཅི་ལ་དགོངས་ཏེ་ཁྱོད་ཀྱི་འགྱོད་པ་དེ་གང་གཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་བསལ་མི་ནུས་ཤེས་དེ་སྐད་དུ་སྟོན། འཇམ་དཔལ་གྱིས་

57-1-274b

སྨྲས་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། སངས་རྒྱས་བཅོམ་ལྡན་འདས་སེམས་ཀྱི་དམིགས་པས་བསྐྱེད་པ་ཡིན་ནམ། གསོལ་པ། འཇམ་དཔལ་དེ་མ་ལགས་སོ། །སྨྲས་པ། སེམས་བསྐྱེད་པས་བསྐྱེད་པ་ཡིན་
ནམ། གསོལ་པ། འཇམ་དཔལ་དེ་མ་ལགས་སོ། །སྨྲས་པ། སེམས་འགགས་པས་བསྐྱེད་པ་ཡིན་ནམ། གསོལ་པ། འཇམ་དཔལ་དེ་མ་ལགས་སོ། །སྨྲས་པ། འདུས་མ་བྱས་པས་བསྐྱེད་པ་ཡིན་ནམ། གསོལ་པ། 
འཇམ་དཔལ་དེ་མ་ལགས་སོ། །སྨྲས་པ། འདུས་བྱས་ཀྱིས་བསྐྱེད་པ་ཡིན་ནམ། གསོལ་པ། འཇམ་དཔལ་དེ་མ་ལགས་སོ། །སྨྲས་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། ཆོས་གང་ཆོས་གང་གིས་ཀྱང་བསྐྱེད་པར་
མི་འགྱུར་བའི་ཆོས་དེས་ཆོས་གང་ཡང་བསལ་བར་ནུས་སམ། གསོལ་པ། འཇམ་དཔལ་དེ་མ་ལགས་སོ། །འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་ངས་དེ་ལ་དགོངས་ཏེ་སངས་རྒྱས་བཅོམ་ལྡན་འདས་གང་གཱའི་ཀླུང་
གི་བྱེ་མ་སྙེད་ཀྱིས་ཀྱང་ཁྱོད་ཀྱི་འགྱོད་པ་དེ་བསལ་བར་མི་ནུས་སོ་ཞེས་དེ་སྐད་སྨྲསོ། །རྒྱལ་པོ་ཆེན་པོ་གཞན་ཡང་བར་སྣང་གི་ནམ་མཁའ་འདི་ལ་གང་ལ་ལ་ཞིག་རྡུལ་ལམ། དུ་བ་འམ། མུན་པས་ཀུན་ནས་ཉོན་མོངས་པར་བྱེད་པར་
འདོད་ན་རྒྱལ་པོ་ཆེན་པོ་དེ་ཇི་སྙམ་དུ་སེམས། བར་སྣང་གི་ནམ་མཁའ་ཀུན་ནས་ཉོན་མོངས་པར་བྱ་ནུས་སམ། གསོལ་པ། འཇམ་དཔལ་དེ་མ་ལགས་སོ། །སྨྲས་པ། རྒྱལ་པོ་ཆེན་པོ་གང་ལ་ལ་ཞིག་ངས་བར་སྣང་གི་
ནམ་མཁའ་རྣམ་པར་སྦྱང་ངོ་ཞེས་དེ་སྐད་ཟེར་ན་བར་སྣང་གི་ནམ་མཁའ་རྣམ་པར་སྦྱང་བར་ནུས་སམ། གསོལ་པ། འཇམ་དཔལ་དེ་མ་ལགས་སོ། །སྨྲས་པ། དེ་བཞིན་དུ་དེ་བཞིན་གཤེགས་པས་ཆོས་ཐམས་ཅད་ནམ་
མཁའ་དང་མཚུངས་པ། རང་བཞིན་གྱིས་ཀུན་ནས་ཉོན་མོངས་པ་མེད་པར་མངོན་པར་རྫོགས་པར་སངས་རྒྱས་ཏེ། ཆོས་གང་ཡང་ཉོན་མོངས་པ་འམ་བྱང་བར་མ་གཟིགས་ན་དེ་དག་གིས་ཇི་ཞིག་བསལ་བར་མཛད། 

57-1-275a

རྒྱལ་པོ་ཆེན་པོ་ངས་ནི་དེ་ལ་ཡང་དགོངས་ཏེ་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ཀྱིས་ཀྱང་ཁྱོད་ཀྱི་འགྱོད་པ་དེ་བསལ་མི་ནུས་སོ་ཞེས་དེ་སྐད་སྨྲའོ། །རྒྱལ་པོ་ཆེན་པོ་གཞན་ཡང་སངས་རྒྱས་
བཅོམ་ལྡན་འདས་རྣམས་ཀྱིས་ནི་གང་སེམས་ལྡང་བ་དེ་ནང་དུ་ཡང་མ་དམིགས། གང་སེམས་ལྡང་བ་དེ་ཕྱི་རོལ་དུ་ཡང་མ་དམིགས་སོ། །དེ་བས་ན་རྒྱལ་པོ་ཆེན་པོ་ཆོས་ཐམས་ཅད་ནི་རང་བཞིན་གྱིས་མི་ལྡང་སྟེ། རང་བཞིན་གང་
ཡིན་པ་དེ་ནི་མི་ལྡང་བའོ། །གང་དེ་ནི་ལྡང་བའི་གནས་དང་སྐབས་མེད་དོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་ཆོས་ཐམས་ཅད་ནི་རང་བཞིན་དབེན་པའི་ཕྱིར་ཏེ། རྒྱལ་པོ་ཆེན་པོ་ཆོས་ཐམས་ཅད་ནི་ཡོངས་སུ་མ་རྫོགས་པའི་
ཕྱིར་རང་བཞིན་མེད་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་མ་འདྲེས་པའི་ཕྱིར་ཡོངས་སུ་མ་རྫོགས་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་མ་བྱུང་བའི་ཕྱིར་མ་འདྲེས་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་དངོས་
པོ་དང་བྲལ་བའི་ཕྱིར་མ་བྱུང་བའོ། །རྒྱལ་པོ་ཆེན་པོ་ཆོས་ཐམས་ཅད་ནི་བྱེད་མི་ནུས་པའི་ཕྱིར་དངོས་པོ་མེད་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་གླེན་པའི་ཕྱིར་བྱེད་མི་ནུས་པའོ། །རྒྱལ་པོ་ཆེན་པོ་ཆོས་ཐམས་ཅད་
ནི་མི་འགྱུར་བའི་ཕྱིར་གླེན་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་མི་སྐྱེ་བའི་ཕྱིར་མི་འགྱུར་བའོ། །རྒྱལ་པོ་ཆེན་པོ་ཆོས་ཐམས་ཅད་ནི་འབྲེལ་པ་མེད་པའི་ཕྱིར་མི་སྐྱེ་བའོ། །རྒྱལ་པོ་ཆེན་པོ་ཆོས་ཐམས་ཅད་ནི་རང་བཞིན་
གྱིས་འོད་གསལ་བའི་ཕྱིར་འབྲེལ་པ་མེད་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་དག་པའི་ཕྱིར་རང་བཞིན་གྱིས་འོད་གསལ་བའོ། །རྒྱལ་པོ་ཆེན་པོ་ཆོས་ཐམས་ཅད་ནི་བླ་གབ་མེད་པ་དང་འདྲ་བའི་ཕྱིར་དག་པའོ། །
རྒྱལ་པོ་ཆེན་པོ་ཆོས་ཐམས་ཅད་ནི་གཉེན་པོ་མེད་པའི་ཕྱིར་བླ་གབ་མེད་པ་དང་འདྲ་བའོ། །རྒྱལ་པོ་ཆེན་པོ་ཆོས་ཐམས་ཅད་ནི་གཉིས་སུ་མེད་པའི་ཕྱིར་གཉེན་པོ་མེད་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་མཐའ་

57-1-275b

སྤངས་པའི་ཕྱིར་གཉིས་སུ་མེད་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་མཐའ་ཡས་པའི་ཕྱིར་མཐའ་སྤངས་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་མུ་མེད་པའི་ཕྱིར་མཐའ་ཡས་པའོ། །རྒྱལ་པོ་ཆེན་པོ་
ཆོས་ཐམས་ཅད་ནི་མཐའ་མ་མེད་པའི་ཕྱིར་མུ་མེད་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་དམིགས་པ་མེད་པའི་ཕྱིར་མཐའ་མ་མེད་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་ཕྱིན་ཅི་ལོག་ལ་མངོན་དུ་གནས་པའི་ཕྱིར་
དམིགས་པ་མེད་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་རྟག་པ་དང་སྡུག་པ་དང་། བདེ་བ་དང་བདག་མི་དམིགས་པའི་ཕྱིར་ཕྱིན་ཅི་མ་ལོག་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་འགྲོ་བ་མེད་པའི་ཚུལ་གྱིས་
རྟག་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་རང་བཞིན་གྱིས་འོད་གསལ་བའི་ཕྱིར་སྡུག་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་རྣམ་པར་མི་རྟོག་པའི་ཕྱིར་བདེ་བའོ། །རྒྱལ་པོ་ཆེན་པོ་ཆོས་ཐམས་ཅད་ནི་བདག་
མེད་པ་བསྟན་པའི་ཚུལ་གྱིས་བདག་གི་རང་བཞིན་ནོ། །རྒྱལ་པོ་ཆེན་པོ་ཆོས་ཐམས་ཅད་ནི་ནད་ཞི་བའི་ཕྱིར་འགྱོད་པ་མེད་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་དོན་དམ་པའི་བདེན་པ་ལ་གནས་པས་བརྫུན་པའོ། །
རྒྱལ་པོ་ཆེན་པོ་ཆོས་ཐམས་ཅད་ནི་རབ་ཏུ་ཞི་བའི་མཚན་ཉིད་པས་ཞི་བའོ། །རྒྱལ་པོ་ཆེན་པོ་ཆོས་ཐམས་ཅད་ནི་བདག་གིར་བྱ་བ་དང་བྲལ་བས་བདག་གིར་བྱ་བ་མེད་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་རྣམ་
པར་གྲོལ་བའི་མཚན་ཉིད་ཡིན་པས་རོ་མེད་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་ངར་བྱེད་པ་མེད་པས་སྐྱོན་མེད་པའི་ལམ་དང་བྲལ་བའོ། །རྒྱལ་པོ་ཆེན་པོ་ཆོས་ཐམས་ཅད་ནི་རྣམ་པ་སྣ་ཚོགས་དང་བྲལ་བས་ཐ་
མི་དད་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་རྣམ་པར་གྲོལ་བའི་རྗེས་སུ་འཇུག་པས་རོ་གཅིག་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་མཚན་མ་མེད་པའི་མཐའ་ཡིན་པས་དབེན་པའི་མཚན་ཉིད་དོ། །

57-1-276a

རྒྱལ་པོ་ཆེན་པོ་ཆོས་ཐམས་ཅད་ནི་ལྟ་བའི་རྣམ་པ་ཐམས་ཅད་དང་བྲལ་བས་སྟོང་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་འཇུག་པ་མེད་ཅིང་དམིགས་པ་རྣམ་པར་དག་པས་མཚན་མ་མེད་པའོ། །རྒྱལ་པོ་
ཆེན་པོ་ཆོས་ཐམས་ཅད་ནི་དུས་གསུམ་ལས་འདས་པའི་ཕྱིར་སྨོན་པ་མེད་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་འདས་པ་དང་མ་འོངས་པ་དང་ད་ལྟར་དང་མ་འབྲེལ་བའི་ཕྱིར་དུས་གསུམ་ཡོངས་སུ་ཆད་པའོ། །རྒྱལ་པོ་
ཆེན་པོ་ཆོས་ཐམས་ཅད་ནི་ཤིན་དུ་མ་སྐྱེས་པའི་ཕྱིར་མྱ་ངན་ལས་འདས་པའི་རྗེས་སུ་འབྲང་བའོ། །རྒྱལ་པོ་ཆེན་པོ་དེ་ཇི་སྙམ་དུ་སེམས། ཆོས་གང་མ་སྐྱེས་མ་བྱུང་བ་དེ་ཉོན་མོངས་པར་བྱ་ནུས་སམ། གསོལ་པ། འཇམ་
དཔལ་དེ་མ་ལགས་སོ། །འཇམ་དཔལ་གྱིས་སྨྲས་པ། ཅི་དེ་བསལ་བར་ནུས་སམ། གསོལ་པ། འཇམ་དཔལ་དེ་མ་ལགས་སོ། །འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་དེ་ལྟ་བས་ན་དེ་བཞིན་གཤེགས་པས་ཆོས་
ཐམས་ཅད་མྱ་ངན་ལས་འདས་པ་དང་མཚུངས་པར་མཁྱེན་ཏོ། །དེ་བས་ན་ཁྱོད་ཀྱི་འགྱོད་པ་བསལ་མི་ནུས་ཏེ། དེའི་ཕྱིར་རྒྱལ་པོ་ཆེན་པོ་ཁྱོད་ནི་སེམས་ཕྱིན་ཅི་མ་ལོག་པ་དང་ཚུལ་བཞིན་དང་ལྡན་པར་གྱིས་ཤིག །ཡང་ཁྱོད་ཀྱིས་
ཡང་དག་པར་བརྟག་པར་བྱ་སྟེ། ཇི་ལྟར་རྟོག་པ་དེ་ཆོས་གང་ཡང་མི་ལེན་པ་དང་། མི་གཏོང་བ་དང་། ཆོས་གང་དང་ཡང་མི་འགྲོགས་པ་དེ་ལྟར་ཁྱོད་ཀྱིས་བརྟག་པར་བྱའོ། །གང་ཆོས་ཐམས་ཅད་དང་མི་འགྲོགས་པ་དེ་ནི་
སྦྱངས་པའོ། །གང་སྦྱངས་པ་དེ་ནི་རབ་ཏུ་ཞི་བའོ། །གང་རབ་ཏུ་ཞི་བ་དེ་ནི་རང་བཞིན་ནོ། །རང་བཞིན་གང་ཡིན་པ་དེ་ནི་མ་བྱས་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་བདག་པོ་མེད་པའི་ཕྱིར་མ་བྱས་པའོ། །དེ་ལ་ཁྱོད་
ཀྱིས་བཟོད་པར་གྱིས་ཤིག །ཆོས་གང་ཡང་མི་བྱ་ཤིག །རྒྱལ་པོ་ཆེན་པོ་དེ་བས་ན་མི་བྱ་བ་ནི་མྱ་ངན་ལས་འདས་པ་སྟེ། དེ་ན་ནི་ཆོས་གང་ཡང་བྱ་བ་འམ་བསྒྱུར་བ་མེད་དེ། གང་བྱ་བ་དང་བསྒྱུར་བ་མེད་པ་དེ་ནི་མྱ་ངན་ལས་

57-1-276b

འདས་པ་ཞེས་བྱའོ། །རྒྱལ་པོ་ཆེན་པོ་གང་དེ་ལྟར་མོས་པ་དེ་དག་ནི་ཡང་དག་པར་གྲོལ་བའོ། །གང་ཡང་དག་པར་གྲོལ་བ་དེ་དག་གིས་ནི་ཆོས་གང་ཡང་མ་རྟོགས་ཏེ། རྒྱལ་པོ་ཆེན་པོ་ཆོས་ཐམས་ཅད་ཀྱི་དེ་བཞིན་ཉིད་ནི་
བྱེད་པ་མེད་པའོ། །ཆོས་ཐམས་ཅད་ཀྱི་དེ་བཞིན་ཉིད་གང་ཡིན་པ་དེ་ནི་གཞན་ཡང་དེ་བཞིན་ཉིད་མ་ཡིན་པར་མི་འགྱུར་རོ། །དེ་བཞིན་ཉིད་དེ་ཡང་དེ་བཞིན་ཉིད་མ་ཡིན་ནོ། །གཞན་ཡང་མ་ཡིན་ནོ། །དེ་བས་ན་གཞན་མ་ཡིན་
པ་དེ་བཞིན་ཉིད་ཅེས་བྱའོ། །རྒྱལ་པོ་ཆེན་པོ་དེ་བཞིན་ཉིད་ལ་མོས་ན་འགྱོད་པ་ཐམས་ཅད་མེད་པར་འགྱུར་མོད་ཀྱི། རྒྱལ་པོ་ཆེན་པོ་མིག་ནི་ཀུན་ནས་ཉོན་མོངས་པར་ཡང་མི་འགྱུར། རྣམ་པར་དག་པར་ཡང་མི་འགྱུར་ཏེ། མིག་
གི་རང་བཞིན་ཡང་དེ་བཞིན་ཉིད་ཡིན་ནོ། །དེ་བཞིན་ཉིད་ཀྱི་རང་བཞིན་ཡང་མིག་ཡིན་ནོ། །རྒྱལ་པོ་ཆེན་པོ་དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱང་ཀུན་ནས་ཉོན་མོངས་པར་ཡང་མི་འགྱུར། རྣམ་པར་དག་པར་ཡང་མི་འགྱུར་ཏེ། ཡིད་ཀྱི་རང་
བཞིན་ཡང་དེ་བཞིན་ཉིད་ཡིན་ནོ། །དེ་བཞིན་ཉིད་ཀྱི་རང་བཞིན་ཡང་ཡིད་ཡིན་ནོ། །རྒྱལ་པོ་ཆེན་པོ་གཟུགས་ཀྱང་ཀུན་ནས་ཉོན་མོངས་པར་ཡང་མི་འགྱུར། རྣམ་པར་དག་པར་ཡང་མི་འགྱུར་ཏེ། གཟུགས་ཀྱི་རང་བཞིན་ཡང་དེ་བཞིན་ཉིད་ཡིན་ནོ། །དེ་བཞིན་
ཉིད་ཀྱི་རང་བཞིན་ཡང་གཟུགས་ཡིན་ནོ། །རྒྱལ་པོ་ཆེན་པོ་དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་ཀུན་ནས་ཉོན་མོངས་པར་མི་འགྱུར། རྣམ་པར་དག་པར་ཡང་མི་འགྱུར་ཏེ། རྣམ་པར་ཤེས་པའི་རང་བཞིན་
ཡང་དེ་བཞིན་ཉིད་ཡིན་ནོ། །དེ་བཞིན་ཉིད་ཀྱི་རང་བཞིན་ཡང་རྣམ་པར་ཤེས་པ་ཡིན་ནོ། །རྒྱལ་པོ་ཆེན་པོ་ཆོས་ཐམས་ཅད་ནི་ཀུན་ནས་ཉོན་མོངས་པར་ཡང་མི་འགྱུར། རྣམ་པར་དག་པར་ཡང་མི་འགྱུར། འདོད་ཆགས་པར་ཡང་མི་འགྱུར། 
ཞེ་སྡང་བར་ཡང་མི་འགྱུར། གཏི་མུག་པར་ཡང་མི་འགྱུར། ཆགས་པར་ཡང་མི་འགྱུར། ཁོང་ཁྲོ་བར་ཡང་མི་འགྱུར་བ་ཡིན་གྱིས་དེ་ལ་ཁྱོད་ཀྱིས་རྟོག་པ་ངན་པ་མི་བྱའོ། །རྒྱལ་པོ་ཆེན་པོ་བྱིས་པ་ལྟ་བུ་སོ་སོའི་སྐྱེ་བོ་རྣམས་ནི་མེད་པ་

57-1-277a

ལ་ཡོངས་སུ་རྟོག་པས་ཉོན་མོངས་པ་བྱུང་གིས་དེ་ལ་ཁྱོད་ཀྱིས་མེད་པ་ལ་འདུ་ཤེས་བསྐྱེད་པར་མི་བྱའོ། །གང་མ་བྱུང་བ་དེ་ནི་གཞར་ཡང་འབྱུང་བ་མ་ཡིན་ཏེ། རྒྱལ་པོ་ཆེན་པོ་ཆོས་ཐམས་ཅད་ནི་མེད་པ་ལས་བྱུང་བས་མེད་པའོ། །
དེ་ལ་ཁྱོད་ཀྱིས་ཡོད་པར་འདུ་ཤེས་མ་བྱེད་ཅིག །རྒྱལ་པོ་ཆེན་པོ་འདི་ལྟ་སྟེ། དཔེར་ན་ནམ་མཁའ་ལ་ནི་གཟུགས་མེད་པ། བལྟར་མི་སྣང་བ། གཟུང་དུ་མེད་པ་མི་དམིགས་པ་ཡིན་ཏེ། སྐྱེས་བུ་ལ་ལ་ཞིག་བདག་གིས་ནམ་མཁའ་གཟུགས་མེད་
པ། བལྟར་མི་སྣང་བ། གཟུང་དུ་མེད་པ། མི་དམིགས་པ་འདི་རྡུལ་ཕྲན་ནམ། རྡུལ་ཏམ། དུ་བ་འམ། སྟུག་པོའམ། སྤྲིན་གྱིས་ཀུན་ནས་ཉོན་མོངས་པར་བྱའོ་ཞེས་དེ་སྐད་ཟེར་ན། རྒྱལ་པོ་ཆེན་པོ་དེ་ཇི་ནམ་མཁའ་གཟུགས་མེད་པ། 
བལྟར་མི་སྣང་བ། གཟུང་དུ་མེད་པ། མི་དམིགས་པ་འདི་ལ་རྡུལ་ཕྲན་ནམ། རྡུལ་ཏམ། དུ་བ་འམ། སྟུག་པོ་འམ། སྤྲིན་གྱིས་ཀུན་ནས་ཉོན་མོངས་པར་བྱ་ནུས་སམ། གསོལ་པ། འཇམ་དཔལ་དེ་མ་ལགས་སོ། །འཇམ་དཔལ་གྱིས་
སྨྲས་པ། རྒྱལ་པོ་ཆེན་པོ་དེ་བཞིན་དུ་ཆོས་ཐམས་ཅད་ཀྱི་ཆོས་ཉིད་ཀྱི་རྗེས་སུ་བརྟགས་ན་འགྱོད་པ་ཐམས་ཅད་དང་བྲལ་བར་འགྱུར་མོད་ཀྱི། ཆོས་ཉིད་ནི་ཆོས་གང་དང་ཡང་བྲལ་བ་མ་ཡིན་ཏེ། གང་འགྱོད་པ་དང་བྲལ་བ་དེ་ཡང་ཆོས་ཉིད་དང་
མཉམ་པ་ཉིད་ཡིན་ནོ། །དེ་བས་ན་ཆོས་ཐམས་ཅད་ཆོས་ཀྱི་དབྱིངས་ཀྱི་རྗེས་སུ་འབྲང་བ་ཞེས་བྱ་མོད་ཀྱི། ཆོས་ཉིད་ལ་ནི་ཆོས་གང་ཡང་རྗེས་སུ་འབྲང་བ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ཉིད་ཆོས་ཀྱི་དབྱིངས་ཡིན་ཏེ། ཆོས་ཀྱི་
དབྱིངས་གང་དང་མཉམ་པ་ཆོས་ཐམས་ཅད་ཀྱང་དེ་དང་མཉམ་མོ། །དེ་བས་ན་ཆོས་ཐམས་ཅད་ནི་ཆོས་ཀྱི་དབྱིངས་ཀྱི་རྗེས་སུ་འབྲང་ཞེས་བྱའོ། །སྟོན་པ་འདི་བསྟན་པའི་ཚེ་རྒྱལ་པོ་མ་སྐྱེས་དགྲ་སྟོང་པ་ཉིད་ཀྱི་རྗེས་སུ་འཐུན་པའི་བཟོད་
པ་ཐོབ་པར་གྱུར་ནས། དེ་དགའ་མགུ་རངས་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་ཐལ་མོ་སྦྱར་ཏེ་ཚིག་འདི་སྐད་ཅེས་གསོལ་ཏོ། །འཇམ་དཔལ་ཁྱོད་ཀྱིས་ལེགས་པར་གསུངས་སོ། །བདག་གི་འགྱོད་པ་དེ་བསལ་ཏོ། །

57-1-277b

འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་ཆོས་ཐམས་ཅད་ཤིན་དུ་མྱ་ངན་ལས་འདས་པ་ཡིན་ན། བདག་གི་འགྱོད་པ་བསལ་ཏོ་ཞེས་གང་ཁྱོད་དེ་སྐད་ཟེར་བ་དེ་ཉིད་དམིགས་པ་ཆེན་པོ་ཡིན་ནོ། །རྒྱལ་པོས་གསོལ་པ། འཇམ་དཔལ་
བདག་གི་སྒྲིབ་པ་ཐམས་ཅད་བྱང་ལགས་སོ། །དེ་ཅིའི་སླད་དུ་ཞེ་ན། གང་སེམས་ཀྱི་རང་བཞིན་ནས་དང་བ་དེ་ནི་འདོད་ཆགས་སམ་ཞེ་སྡང་ངམ། གཏི་མུག་གིས་ཀུན་ནས་ཉོན་མོངས་པར་བགྱི་མི་ནུས་སོ། །སྨྲས་པ། རྒྱལ་པོ་ཆེན་པོ་
འདི་ལྟ་སྟེ། དཔེར་ན་ནམ་མཁའ་ལ་རྡུལ་ཕྲན་ནམ། རྡུལ་ཏམ། དུ་བ་འམ། མུན་པ་འམ། སྟུག་པོ་འམ། སྤྲིན་དག་སྣང་མོད་ཀྱི། ནམ་མཁའ་ནི་དེ་དག་གིས་ཀུན་ནས་ཉོན་མོངས་པར་བྱས་པ་མེད་དོ། །རྒྱལ་པོ་ཆེན་པོ་དེ་བཞིན་དུ་
བདག་དང་བདག་གིར་བྱ་བའི་ལྟ་བའི་བག་ལ་ཉལ་བ་དང་། འདོད་ཆགས་དང་། ཞེ་སྡང་དང་། གཏི་མུག་དག་འབྱུང་མོད་ཀྱི། སེམས་ཀྱི་ཆོས་ཉིད་ཀུན་ནས་ཉོན་མོངས་པར་མི་བྱེད་དོ། །རྒྱལ་པོ་ཆེན་པོ་ཁྱོད་ཀྱིས་དེ་ལ་འགྱོད་པར་མི་བྱ་སྟེ། 
རྒྱལ་པོ་ཆེན་པོ་སེམས་ནི་ཐོག་མའི་མཐའ་ནས་ཀྱང་མ་འཕོས་སོ། །རྒྱལ་པོ་ཆེན་པོ་སེམས་ནི་ཐ་མའི་མཐར་ཡང་མི་འཕོའོ། །རྒྱལ་པོ་ཆེན་པོ་སེམས་ནི་ད་ལྟར་ཡང་མི་གནས་སོ། །དེ་ལ་མཁས་པ་དག་ནི་ཆོས་ཐམས་ཅད་
མ་འཕོས་པ། མི་འཕོ་བ། མི་གནས་པར་རྟོགས་ཏེ། དེས་དེ་ལྟར་ཤེས་ནས་ལྟ་བ་ལ་མངོན་པར་ཆགས་པར་ཡང་མི་བྱེད་དོ། །རྒྱལ་པོ་ཆེན་པོ་མངོན་པར་མ་ཆགས་ན་དག་པའོ། །རྒྱལ་པོ་ཆེན་པོ་ཆོས་ཐམས་ཅད་ནི་རྣམ་པར་དག་
པའི་མཚན་ཉིད་དང་ལྡན་པ། དྲི་མ་མེད་པ། ཀུན་དུ་སྣང་བ་ཡིན་ཏེ། རྒྱལ་པོ་ཆེན་པོ་ཆོས་མེད་ན་གདགས་པ་ཡང་མེད་དེ། གདགས་པ་མེད་པར་ཡང་བཅོམ་ལྡན་འདས་ཀྱིས་བཀའ་སྩལ་ཏོ། །གང་ལམ་སྐྱོན་མེད་པ་དེ་ལ་ཡང་ཆོས་
གང་ཡང་གདགས་པ་མེད་དོ། །རྒྱལ་པོ་ཆེན་པོ་གང་འདོགས་པའི་རྗེས་སུ་འབྲང་བ་དེ་དག་ནི་སྒྲིབ་པ་དང་བཅས་པ། རྡུལ་དང་བཅས་པ་ཡིན་ནོ། །གསོལ་པ། འཇམ་དཔལ་བདག་ནི་སྒྲིབ་པ་ཐམས་ཅད་བྱང་ལགས་ཏེ། 

57-1-278a

གལ་ཏེ་འདིའི་བར་སྐབས་ཤིག་ཏུ་འགུམ་པའི་དུས་བགྱིས་སུ་ལགས་ན་བདག་ནི་སླར་མཚམས་སྦྱོར་བར་མི་འགྱུར་རོ། །འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་ཆོས་ཐམས་ཅད་ཤིན་དུ་མྱ་ངན་ལས་འདས་
པ་ལ་མྱ་ངན་ལས་འདའ་བར་རྟོག་པ་དེ་ཉིད་ཁྱོད་ཀྱི་དམིགས་པ་ཆེན་པོ་ཡིན་ནོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་ཆོས་ཐམས་ཅད་ནི་ཤིན་དུ་མྱ་ངན་ལས་འདས་པ། རང་བཞིན་གྱིས་མ་སྐྱེས་པའོ། །དེ་ནས་རྒྱལ་པོ་མ་སྐྱེས་དགྲས་
རིན་བརྒྱ་སྟོང་རི་བའི་རས་ཟུང་ཅིག་ཁྱེར་ཏེ་སྟན་ལས་ལངས་ནས་འཇམ་དཔལ་གཞོན་ནུར་གྱུར་པ་ལ་རས་ཟུང་གཅིག་པོ་དེ་ཕུལ་ལོ། །འཇམ་དཔལ་གཞོན་ནུར་གྱུར་པའི་ལུས་ལ་རས་ཟུང་གཅིག་པོ་དེ་ཕུལ་མ་ཐག་ཏུ་དེ་ནས་དེའི་ཚེ་
འཇམ་དཔལ་གཞོན་ནུར་གྱུར་པས་བདག་གི་ལུས་མི་སྣང་བར་བྱས་པ་དང་། རྒྱལ་པོ་མ་སྐྱེས་དགྲས་སླར་འཇམ་དཔལ་གཞོན་ནུར་གྱུར་པ་མ་མཐོང་ནས་སྟེང་གི་བར་སྣང་ལས་རྒྱལ་པོ་ཇི་ལྟར་འཇམ་དཔལ་གཞོན་ནུར་གྱུར་པའི་ལུས་
མ་མཐོང་བ་དེ་བཞིན་དུ་འགྱོད་པ་དེ་ལ་ལྟོས་ཤིག །འགྱོད་པ་དེ་ཇི་ལྟར་མཐོང་བ་དེ་བཞིན་དུ་ཆོས་ཐམས་ཅད་ལ་ལྟོས་ཤིག །ཆོས་ཐམས་ཅད་ཇི་ལྟར་མཐོང་བ་དེ་བཞིན་དུ་རས་དེ་ལ་ལྟོས་ཤིག །གང་གིས་མ་མཐོང་བ་དེ་ལ་ཡང་དེ་
བཞིན་དུ་བལྟ་བར་བྱ་མོད་ཀྱི། རྒྱལ་པོ་ཆེན་པོ་གང་གི་ལུས་མཐོང་བ་དེ་ལ་རས་ཟུང་གཅིག་པོ་འདི་ཕུལ་ཅིག་ཅེས་ཟེར་བའི་སྒྲ་ཐོས་ནས་དེའི་ཚེ་འཇམ་དཔལ་གཞོན་ནུར་གྱུར་པའི་དྲུང་ན་བྱང་ཆུབ་སེམས་དཔའ་སེམས་དཔའ་ཆེན་པོ་
ཡེ་ཤེས་དཔལ་གྱི་རྒྱལ་མཚན་ཞེས་བྱ་བ་ཞིག་འདུག་པར་གྱུར་ནས། རྒྱལ་པོ་མ་སྐྱེས་དགྲས་བྱང་ཆུབ་སེམས་དཔའ་ཡེ་ཤེས་དཔལ་གྱི་རྒྱལ་མཚན་ལ་རས་ཟུང་གཅིག་པོ་དེ་ཕུལ་བ་དང་དེས་མ་བླངས་ནས་འདི་སྐད་ཅེས་
སྨྲས་སོ། །རྒྱལ་པོ་ཆེན་པོ་བདག་ནི་ཐར་བར་འདོད་པ་ལས་ཀྱང་མི་ལེན། ཡོངས་སུ་མྱ་ངན་འདའ་བར་འདོད་པ་ལས་ཀྱང་མི་ལེན་ཏོ། །རྒྱལ་པོ་ཆེན་པོ་བདག་ནི་སོ་སོའི་སྐྱེ་བོ་ལས་ཀྱང་མི་ལེན། སོ་སོའི་སྐྱེ་བོའི་ཆོས་དང་

57-1-278b

ལྡན་པ་ལས་ཀྱང་མི་ལེན། སློབ་པ་ལས་ཀྱང་མི་ལེན། སློབ་པའི་ཆོས་དང་ལྡན་པ་ལས་ཀྱང་མི་ལེན། དགྲ་བཅོམ་པ་ལས་ཀྱང་མི་ལེན། དགྲ་བཅོམ་པའི་ཆོས་དང་ལྡན་པ་ལས་ཀྱང་མི་ལེན། རང་སངས་རྒྱས་ལས་ཀྱང་
མི་ལེན། རང་སངས་རྒྱས་ཀྱི་ཆོས་དང་ལྡན་པ་ལས་ཀྱང་མི་ལེན་ཏོ། །རྒྱལ་པོ་ཆེན་པོ་བདག་ནི་དེ་བཞིན་གཤེགས་པ་ལས་ཀྱང་མི་ལེན། དེ་བཞིན་གཤེགས་པའི་ཆོས་དང་ལྡན་པ་ལས་ཀྱང་མི་ལེན་ཏེ། རྒྱལ་པོ་ཆེན་པོ་བདག་ནི་
གང་ཆོས་འདི་དག་དང་ལྡན་པ་ཡང་མ་ཡིན་ལ་དེ་དག་ལས་ལོག་པར་ཡང་མ་ཡིན་པ་དེ་དག་ལས་ལེན་ཅིང་། དེ་དག་ཇི་ལྟར་སྦྱིན་པར་བྱེད་པ་དེ་བཞིན་དུ་ལེན་ཏེ། རྒྱལ་པོ་ཆེན་པོ་སྦྱིན་པ་འདི་ནི་གཉིས་ལས་ཡོངས་སུ་དག་པའོ། །
དེ་ནས་རྒྱལ་པོ་མ་སྐྱེས་དགྲས་བྱང་ཆུབ་སེམས་དཔའ་ཡེ་ཤེས་དཔལ་གྱི་རྒྱལ་མཚན་གྱི་ལུས་ལ་རས་ཟུང་གཅིག་པོ་དེ་ཕུལ་བ་དང་། དེ་ནས་སྟན་དེ་ལ་དེའི་ལུས་ཀྱང་མ་མཐོང་བར་གྱུར་ནས་བར་སྣང་ལས་རྒྱལ་པོ་ཆེན་པོ་གང་
གི་ལུས་མཐོང་བ་དེ་ལ་ཕུལ་ཅིག་ཅེས་ཟེར་བའི་སྒྲ་ཐོས་ནས། དེ་ན་བྱང་ཆུབ་སེམས་དཔའ་ཡེ་ཤེས་དཔལ་གྱི་རྒྱལ་མཚན་གྱི་དྲུང་ན་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་ཞི་བ་ལ་མོས་པ་ཞེས་བྱ་བ་ཞིག་
འདུག་པར་གྱུར་པ་དེ་ལ་ཡང་རྒྱལ་པོས་རས་ཟུང་གཅིག་པོ་ཕུལ་བ་དང་། དེས་སྨྲས་པ། རྒྱལ་པོ་ཆེན་པོ་བདག་ནི་བདག་ཏུ་ལྟ་བ་ལས་ཀྱང་མི་ལེན། གཞན་དུ་ལྟ་བ་ལས་ཀྱང་མི་ལེན་ཏོ། །རྒྱལ་པོ་ཆེན་པོ་བདག་ནི་ཉོན་མོངས་པ་
དང་བཅས་པ་ལས་ཀྱང་མི་ལེན། ཉོན་མོངས་པ་མེད་པ་ལས་ཀྱང་མི་ལེན་ཏོ། །རྒྱལ་པོ་ཆེན་པོ་བདག་ནི་སེམས་རྩེ་གཅིག་པ་ལས་ཀྱང་མི་ལེན། སེམས་གཡེངས་པ་ལས་ཀྱང་མི་ལེན། ཡེ་ཤེས་དང་ལྡན་པ་ལས་ཀྱང་
མི་ལེན། ཡེ་ཤེས་དང་མི་ལྡན་པ་ལས་ཀྱང་མི་ལེན་ཏོ་ཞེས་དེ་སྐད་སྨྲས་པ་དང་། རྒྱལ་པོས་དེའི་ལུས་ལ་ཡང་གོས་དེ་ཕུལ་བ་དང་། སྟན་དེ་ལ་དེའི་ལུས་ཀྱང་མ་མཐོང་ནས་བར་སྣང་ལས་རྒྱལ་པོ་ཆེན་པོ་གང་གི་ལུས་མཐོང་

57-1-279a

བ་དེ་ལ་ཕུལ་ཅིག་ཅེས་ཟེར་བའི་སྒྲ་ཐོས་ནས། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་ཞི་བ་ལ་མོས་པའི་དྲུང་ན་བྱང་ཆུབ་སེམས་དཔའ་སེམས་དཔའ་ཆེན་པོ་མི་གཡོ་བ་ཡིད་ལ་བྱེད་ཅེས་
བྱ་བ་ཞིག་འདུག་པར་གྱུར་པ་དེ་ལ་རྒྱལ་པོས་གོས་དེ་ཕུལ་པ་དང་། དེས་སྨྲས་པ། རྒྱལ་པོ་ཆེན་པོ་བདག་ནི་ལུས་ལ་གནས་པ་ལས་ཀྱང་མི་ལེན། ངག་ལ་གནས་པ་ལས་ཀྱང་མི་ལེན། སེམས་ལ་གནས་པ་ལས་ཀྱང་མི་ལེན། 
དོན་ལ་གནས་པ་ལས་ཀྱང་མི་ལེན། ཕུང་པོ་ལ་གནས་པ་ལས་ཀྱང་མི་ལེན། ཁམས་ལ་གནས་པ་ལས་ཀྱང་མི་ལེན། སྐྱེ་མཆེད་ལ་གནས་པ་ལས་ཀྱང་མི་ལེན། སེམས་ཅན་ལ་གནས་པ་ལས་ཀྱང་མི་ལེན། སངས་རྒྱས་
ཀྱི་ཡོན་ཏན་ལ་གནས་པ་ལས་ཀྱང་མི་ལེན་ཏོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་ཆོས་ཐམས་ཅད་ནི་རབ་ཏུ་མི་གཡོ་བའི་ཚུལ་གྱིས་མི་གནས་པའོ། །དེའི་ལུས་ལ་ཡང་རྒྱལ་པོས་གོས་དེ་ཕུལ་བ་དང་། དེའི་ལུས་ཀྱང་མི་སྣང་བར་
གྱུར་ནས་བར་སྣང་ལས། རྒྱལ་པོ་ཆེན་པོ་གང་གི་ལུས་སྣང་བ་དེ་ལ་ཕུལ་ཅིག་ཅེས་དེ་སྐད་ཟེར་བའི་སྒྲ་ཐོས་ནས་དེའི་ཚེ་བྱང་ཆུབ་སེམས་དཔའ་མི་གཡོ་བ་ཡིད་ལ་བྱེད་པའི་དྲུང་ན་བྱང་ཆུབ་སེམས་དཔའ་སེམས་དཔའ་ཆེན་པོ་
བློ་གྲོས་མཆོག་ཅེས་བྱ་བ་ཞིག་འདུག་པར་གྱུར་པ་དེ་ལ་རྒྱལ་པོས་གོས་དེ་ཕུལ་བ་དང་། དེས་ཀྱང་སྨྲས་པ། རྒྱལ་པོ་ཆེན་པོ་བདག་ནི་དམན་པ་ལ་མོས་པ་ལས་མི་ལེན་ཏེ། གལ་ཏེ་རྒྱལ་པོ་ཆེན་པོ་ཁྱོད་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་སེམས་སྐྱེད་ཅིང་སེམས་མཉམ་པ་ཉིད་ཀྱི་ཕྱིར་བྱང་ཆུབ་མཉམ་པ་ཉིད་དང་། བྱང་ཆུབ་མཉམ་པ་ཉིད་ཀྱི་ཕྱིར་སེམས་མཉམ་པ་ཉིད་དང་། སེམས་མཉམ་པ་ཉིད་ཀྱི་ཕྱིར་ཆོས་མཉམ་པ་ཉིད་དུ་མོས་པར་བྱེད་ཅིང་། 
དེ་བཞིན་དུ་ཆོས་ཐམས་ཅད་མཉམ་པ་ཉིད་དོ་ཞེས་ལེན་པར་མི་བྱེད། གཏོང་བར་མི་བྱེད། ཆོས་གང་ལ་ཡང་མཉམ་པར་ཡང་མི་བྱེད། ཆོས་ཐམས་ཅད་བདག་གིར་བྱ་བ་མེད་པར་ལུས་ནས་བདག་གིར་མི་འཛིན་ཏེ། དེ་ལྟར་བྱེད་ན་

57-1-279b

བདག་ནི་ཁྱོད་ལ་ལེན་མོད་ཀྱི། རྒྱལ་པོ་ཆེན་པོ་གང་གི་ལུས་སྣང་བ་དེ་ལ་རས་ཟུང་ཅིག་པོ་འདི་ཕུལ་ཅིག་ཅེས་དེ་སྐད་སྨྲས་ནས་དེ་ཡང་མེད་དེ་མི་སྣང་བར་གྱུར་པ་དང་། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བློ་
གྲོས་མཆོག་གི་དྲུང་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་གྱི་དྲི་མེ་ཏོག་ཅེས་བྱ་བ་ཞིག་འདུག་པར་གྱུར་པ་དེ་ལ་རྒྱལ་པོས་གོས་དེ་ཕུལ་བ་དང་། དེས་ཀྱང་སྨྲས་པ། རྒྱལ་པོ་ཆེན་པོ་གལ་ཏེ་ཁྱོད་ཏིང་ངེ་
འཛིན་ཐམས་ཅད་ཀྱིས་ཀྱང་སྤྱོད་ལ། ཏིང་ངེ་འཛིན་ཐ་དད་པར་ཡང་མི་བྱེད་ཅིང་། ཆོས་ཐམས་ཅད་རང་བཞིན་གྱིས་མཉམ་པར་གཞོག་པར་མོས་པར་བྱེད་ན་བདག་ཁྱོད་ལས་ལེན་མོད་ཀྱི། རྒྱལ་པོ་ཆེན་པོ་གང་གིས་ལུས་
མཐོང་བ་དེ་ལ་རས་ཟུང་གཅིག་པོ་དེ་ཕུལ་ཅིག་ཅེས་དེ་སྐད་སྨྲས་ནས་དེ་ཡང་མེད་དེ་མི་སྣང་བར་གྱུར་པ་དང་། དེའི་དྲུང་ན་བྱང་ཆུབ་སེམས་དཔའ་སེམས་དཔའ་ཆེན་པོ་བརྗོད་དུ་མེད་པ་ཞེས་བྱ་བ་ཞིག་འདུག་པར་གྱུར་པ་དེ་ལ་རྒྱལ་
པོས་རས་ཟུང་གཅིག་པོ་དེ་ཕུལ་བ་དང་། དེས་ཀྱང་སྨྲས་པ། རྒྱལ་པོ་ཆེན་པོ་གལ་ཏེ་ཁྱོད་ཡི་གེའི་སྒྲ་མཉམ་པ་ཉིད་ཀྱི་ཕྱིར་སྐད་ཐམས་ཅད་ཀྱི་བློས་བརྗོད་པ་ཐམས་ཅད་བརྗོད་དུ་མེད་པར་ཤེས་ནས་བརྗོད་དུ་མེད་པའི་དོན་ལ་
རྟེན་གྱི། ཡི་གེའི་འབྲུ་ལ་མི་རྟེན་ན་བདག་ཁྱོད་ལས་རས་ཟུང་གཅིག་པོ་ལེན་མོད་ཀྱི། རྒྱལ་པོ་ཆེན་པོ་གང་གི་ལུས་སྣང་བ་དེ་ལ་ཕུལ་ཅིག་ཅེས་དེ་སྐད་སྨྲས་ནས་དེ་ཡང་མེད་དེ་མི་སྣང་བར་གྱུར་པ་དང་། དེའི་དྲུང་ན་བྱང་ཆུབ་སེམས་
དཔའ་སེམས་དཔའ་ཆེན་པོ་འཁོར་གསུམ་ཡོངས་སུ་སྦྱང་བ་ཞེས་བྱ་བ་ཞིག་འདུག་པར་གྱུར་པ་དེ་ལ་རྒྱལ་པོས་རས་ཟུང་གཅིག་པོ་དེ་ཕུལ་བ་དང་། དེས་ཀྱང་སྨྲས་པ། རྒྱལ་པོ་ཆེན་པོ་གལ་ཏེ་ཁྱོད་བདག་ཏུ་ཡང་མི་དམིགས། 
ལེན་པར་ཡང་མི་དམིགས། རྣམ་པར་སྨིན་པ་ཡང་མི་འདོད་ན། བདག་ཁྱོད་ལས་ལེན་མོད་ཀྱི། རྒྱལ་པོ་ཆེན་པོ་གང་གི་ལུས་སྣང་བ་དེ་ལ་རས་ཟུང་གཅིག་པོ་དེ་ཕུལ་ཅིག་ཅེས་དེ་སྐད་སྨྲས་ནས་དེ་ཡང་མེད་དེ་མི་སྣང་བར་གྱུར་པ་དང་། 

57-1-280a

དེའི་དྲུང་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་རྣམ་པར་འཕྲུལ་པའི་རྒྱལ་པོ་ཞེས་བྱ་བ་ཞིག་འདུག་པར་གྱུར་པ་དེ་ལ་རྒྱལ་པོས་རས་ཟུང་གཅིག་པོ་དེ་ཕུལ་བ་དང་། དེས་ཀྱང་སྨྲས་པ། རྒྱལ་པོ་ཆེན་པོ་
གལ་ཏེ་ཁྱོད་ཉན་ཐོས་ཀྱི་མྱ་ངན་ལས་འདའ་བ་ཡང་སྟོན་ལ་ཡོངས་སུ་མྱ་ངན་ལས་འདའ་བར་ཡང་མི་བྱེད། རང་སངས་རྒྱས་ཀྱི་མྱ་ངན་ལས་འདའ་བ་ཡང་སྟོན་ལ་ཡོངས་སུ་མྱ་ངན་ལས་འདའ་བར་ཡང་མི་བྱེད། བླ་ན་མེད་པ་ཡང་དག་
པར་རྫོགས་པའི་མྱ་ངན་ལས་འདའ་བ་ཡང་སྟོན་ལ་ཡོངས་སུ་མྱ་ངན་ལས་འདའ་བར་ཡང་མི་བྱེད། འཁོར་བའི་ཆོས་ཅན་ཡང་མ་ཡིན། མྱ་ངན་ལས་འདའ་བའི་ཆོས་ཅན་ཡང་མ་ཡིན་ན་བདག་གིས་ཁྱོད་ལས་བླང་ངོ་ཞེས་དེ་སྐད་
སྨྲས་ནས་དེ་མེད་དེ་མི་སྣང་བར་གྱུར་ཏོ། །རྒྱལ་པོ་ཆེན་པོ་གང་གི་ལུས་སྣང་བ་དེ་ལ་རས་ཟུང་གཅིག་པོ་དེ་ཕུལ་ཅིག་ཅེས་དེ་སྐད་ཀྱི་སྒྲ་ཡང་ཐོས་སོ། །དེ་ལྟ་སྟེ་རྒྱལ་པོ་མ་སྐྱེས་དགྲས་བྱང་ཆུབ་སེམས་དཔའ་ཐམས་ཅད་ལ་
རས་ཟུང་གཅིག་པོ་དེ་ཕུལ་ན་ཐམས་ཅད་ཀྱིས་ཀྱང་བདག་བདག་གི་བསྟན་པར་བྱ་བ་བསྟན་ནས་མེད་ཅིང་མི་སྣང་བར་གྱུར་ཏོ། །སྟན་ཐམས་ཅད་ཀྱང་སྟོང་པར་སྣང་ངོ་། །རྒྱལ་པོ་ཆེན་པོ་གང་གི་ལུས་སྣང་བ་དེ་ལ་རས་ཟུང་
གཅིག་པོ་དེ་ཕུལ་ཅིག་ཅེས་དེ་སྐད་ཀྱི་སྒྲ་ཡང་ཐོས་པར་གྱུར་ཏོ། །དེ་ནས་རྒྱལ་པོ་མ་སྐྱེས་དགྲས་གནས་བརྟན་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་ཆེན་པོ་བཙུན་པ་ནི་བཅོམ་ལྡན་འདས་ཀྱིས་སྦྱངས་
པའི་ཡོན་ཏན་སྨྲ་བའི་ནང་ན་མཆོག་ཏུ་བཀའ་སྩལ་གྱིས་རས་ཟུང་གཅིག་པོ་འདི་བཞེས་ཤིག །འོད་སྲུང་ཆེན་པོས་ཀྱང་སྨྲས་པ། རྒྱལ་པོ་ཆེན་པོ་བདག་ནི་འདོད་ཆགས་མ་སྤངས། ཞེ་སྡང་མ་སྤངས། གཏི་མུག་མ་སྤངས་
ཏེ། བདག་གིས་འདི་བླང་བའི་མི་རིགས་སོ། །རྒྱལ་པོ་ཆེན་པོ་བདག་གིས་ནི་མ་རིག་པ་མ་སྤངས། སྲིད་པའི་སྲེད་པ་ཡང་མ་སྤངས་སོ། །རྒྱལ་པོ་ཆེན་པོ་བདག་གིས་ནི་སྡུག་བསྔལ་ཡང་ཡོངས་སུ་མ་ཤེས་སོ། །བདག་

57-1-280b

གིས་ནི་འདུས་པ་ཡང་མ་སྤངས། བདག་གིས་ནི་འགོག་པ་ཡང་མངོན་དུ་མ་བགྱིས། བདག་གིས་ནི་ལམ་ཡང་མ་སྒོམས། རྒྱལ་པོ་ཆེན་པོ་བདག་གིས་ནི་དེ་བཞིན་གཤེགས་པ་མ་མཐོང་ཆོས་མ་ཐོས། དགེ་འདུན་གྱི་རྗེས་སུ་
མ་ཞུགས་སོ། །རྒྱལ་པོ་ཆེན་པོ་བདག་གིས་ནི་ཉོན་མོངས་པ་མ་སྤངས་སོ། །རྒྱལ་པོ་ཆེན་པོ་བདག་གིས་ཡེ་ཤེས་མངོན་དུ་མ་བགྱིས་སོ། །རྒྱལ་པོ་ཆེན་པོ་བདག་ནི་མིག་རྣམ་པར་དག་པ་མ་ལགས་སོ། །བདག་ནི་
ཡེ་ཤེས་ཀྱི་བྱ་བ་ཆུང་ཟད་ཀྱང་མེད་དེ། །བདག་ལ་སྦྱིན་པ་བྱིན་པས་འབྲས་བུ་ཆེན་པོར་ཡང་མི་འགྱུར། འབྲས་བུ་ཆུང་ངུར་ཡང་མི་འགྱུར་རོ། །བདག་ནི་འཁོར་བའི་ཆོས་ཅན་ཡང་མ་ལགས། མྱ་ངན་ལས་འདའ་བའི་
ཆོས་ཅན་ཡང་མ་ལགས་སོ། །བདག་ལ་སྦྱིན་པ་བྱིན་པས་དག་པར་ཡང་མི་འགྱུར་རོ། །རྒྱལ་པོ་ཆེན་པོ་ཁྱོད་གལ་ཏེ་དེ་འདྲ་བའི་ཆོས་དང་ལྡན་པར་གྱུར་ན། བདག་ཁྱོད་ལས་རས་ཟུང་གཅིག་པོ་ལེན་ཏོ་ཞེས་དེ་སྐད་
སྨྲས་ནས། གོས་དེ་ལུས་ལ་ཕུལ་མ་ཐག་ཏུ་དེ་ཡང་མེད་དེ་སླར་མི་སྣང་བར་གྱུར་ཏོ། །རྒྱལ་པོ་ཆེན་པོ་གང་གི་ལུས་སྣང་བ་དེ་ལ་རས་ཟུང་གཅིག་པོ་དེ་ཕུལ་ཅིག་ཅེས་དེ་སྐད་ཀྱི་སྒྲ་ཡང་ཐོས་པར་གྱུར་ཏོ། །དེ་ལྟ་སྟེ་དགེ་སློང་ལྔ་
བརྒྱ་པོ་དེ་དག་ཀྱང་མེད་དེ་མི་སྣང་བར་གྱུར་ཏོ། །རྒྱལ་པོ་ཆེན་པོ་གང་གི་ལུས་སྣང་བ་དེ་ལ་རས་ཟུང་གཅིག་པོ་དེ་ཕུལ་ཅིག་ཅེས་དེ་སྐད་ཀྱི་སྒྲ་ཡང་ཐོས་པར་གྱུར་ནས། དེ་འདི་སྙམ་དུ་སེམས་ཏེ། གང་གིས་བདག་གིས་རས་
ཟུང་གཅིག་པོ་འདི་བཙུན་མོ་དམ་པ་ལ་སྦྱིན་ནོ་སྙམ་སྟེ་དེ་སོང་བ་དང་། དེ་ཡང་མ་མཐོང་ནས་དེ་འདི་སྙམ་དུ་སེམས་ཏེ་བདག་གིས་བུད་མེད་གཞན་དག་ལ་སྦྱིན་ནོ་སྙམ་པ་དང་། དེས་བུད་མེད་ཀྱི་གཡོག་ཐམས་ཅད་མ་
མཐོང་བར་གྱུར་ཏེ། དེ་ལ་འདི་འདྲ་བའི་ཏིང་ངེ་འཛིན་མངོན་དུ་གྱུར་ནས་དེ་ལྟར་དེ་མིག་གིས་ཀྱང་གཟུགས་ཆུང་ཟད་ཀྱང་མ་མཐོང་ཞིང་སྣང་བ་མེད་དེ་སྐྱེས་པ་མི་མཐོང་། བུད་མེད་མི་མཐོང་། ཁྱེའུ་མི་མཐོང་། བུ་མོ་མི་མཐོང་། 

57-1-281a

བརྩིག་པ་མི་མཐོང་། ཤིང་མི་མཐོང་སྟེ། གཞན་དུ་ན་བདག་གི་ལུས་ཀྱི་འདུ་ཤེས་འབའ་ཤིག་འཇུག་གོ། །རྒྱལ་པོ་ཆེན་པོ་གང་གི་ལུས་མཐོང་བ་དེ་ལ་རས་ཟུང་གཅིག་པོ་དེ་ཕུལ་ཅིག་ཅེས་དེ་སྐད་ཀྱི་སྒྲ་ཡང་ཐོས་
པར་གྱུར་ནས་དེ་འདི་སྙམ་དུ་སེམས་ཏེ། བདག་རང་ཉིད་བགོའོ་སྙམ་པ་དང་། དེ་ནས་བདག་གི་ལུས་ཀྱང་མ་མཐོང་སྟེ། དེ་གཟུགས་ཀྱི་འདུ་ཤེས་ཐམས་ཅད་དང་བྲལ་ནས་རྒྱལ་པོ་ཆེན་པོ་ཇི་ལྟར་རགས་པ་ཡང་རུང་། ཕྲ་མོ་ཡང་རུང་། 
གཟུགས་ཆུང་ཟད་ཀྱང་མ་མཐོང་བ་དེ་བཞིན་དུ་ཁྱོད་ཀྱི་འགྱོད་པ་ལ་ལྟོས་ཤིག །ཁྱོད་ཀྱི་འགྱོད་པ་ཇི་ལྟར་མཐོང་བ་དེ་བཞིན་དུ་ཆོས་ཐམས་ཅད་ལ་ལྟོས་ཤིག །གང་གིས་མཐོང་བ་དེ་ལ་ཡང་དེ་བཞིན་དུ་ལྟོས་ཤིག །ཇི་ལྟར་གང་
མཐོང་བ་དང་། གང་གིས་མཐོང་བ་དེ་མི་མཐོང་བ་དང་། རྣམ་པར་མི་མཐོང་བ་དེ་ལྟར་ལྟོས་ཤིག །རྒྱལ་པོ་ཆེན་པོ་དེ་ནི་ཆོས་ཐམས་ཅད་ལ་ཡང་དག་པར་མཐོང་བ་སྟེ། རྒྱལ་པོ་ཆེན་པོ་མ་མཐོང་བ་ནི་ཡང་དག་པར་མཐོང་བའོ། །
བམ་པོ་ལྔ་པ་སྟེ་ཐ་མ། དེ་ནས་རྒྱལ་པོ་མ་སྐྱེས་དགྲ་འདུ་ཤེས་དང་སེམས་པའི་རྣམ་པར་རྟོག་པ་ཐམས་ཅད་དང་བྲལ་ནས་ཏིང་ངེ་འཛིན་དེ་ལས་ལངས་མ་ཐག་ཏུ་འཁོར་དེ་དང་། བདག་གི་ལུས་དང་། བདག་གི་ཁང་པ་དང་། 
བདག་གི་གཡོག་སྔ་མཁོ་བཞིན་དུ་མཐོང་ནས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་གསོལ་ཏོ། །འཇམ་དཔལ་བདག་གིས་འཁོར་འདི་སྔར་མ་མཐོང་ན་གར་མཆིས་པར་གྱུར། འཇམ་དཔལ་གྱིས་སྨྲས་པ། རྒྱལ་པོ་
ཆེན་པོ་ཁྱོད་ཀྱི་འགྱོད་པ་དེ་གང་ན་བར་གྱུར་པ་འཁོར་འདི་ཡང་དེར་སོང་བར་གྱུར་ཏོ། །ཡང་རྒྱལ་པོ་ཆེན་པོ་འཁོར་འདི་དག་མཐོང་ངམ། གསོལ་པ། འཇམ་དཔལ་མཐོང་ངོ་། །སྨྲས་པ་ཇི་ལྟར་མཐོང་། གསོལ་པ། འགྱོད་པ་དེ་ཇི་
ལྟར་མཐོང་བ་དེ་བཞིན་དུ་འཁོར་འདི་མཐོང་ངོ་། །སྨྲས་པ། རྒྱལ་པོ་ཆེན་པོ་འགྱོད་པ་དེ་ཇི་ལྟར་མཐོང་། གསོལ་པ། ཇི་ལྟར་འཁོར་འདི་སྔར་མིག་གིས་མ་མཐོང་བ་དེ་བཞིན་དུ་འགྱོད་པ་དེ་ནང་དུ་ཡང་མ་མཐོང་། ཕྱི་རོལ་དུ་

57-1-281b

ཡང་མ་མཐོང་། གཉི་ག་མ་གཏོགས་པར་ཡང་མ་མཐོང་ངོ་། །འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་དེ་བཞིན་གཤེགས་པས་མཚམས་མེད་པ་བྱེད་པ་ནི་དེ་མ་ཐག་ཏུ་སེམས་ཅན་དམྱལ་བར་འགྲོའོ་ཞེས་གསུངས་ན། 
ཅི་རྒྱལ་པོ་ཆེན་པོ་ཁྱོད་སེམས་ཅན་དམྱལ་བར་འགྲོ་འམ། དེ་སྐད་སྨྲས་པ་དང་། འཇམ་དཔལ་གཞོན་ནུར་གྱུར་པ་ལ་རྒྱལ་པོ་མ་སྐྱེས་དགྲས་འདི་སྐད་ཅེས་གསོལ་ཏེ། འཇམ་དཔལ་ཇི་དེ་བཞིན་གཤེགས་པས་འདི་ནི་ངན་
སོང་དུ་འགྲོ་བའོ། །འདི་ནི་མཐོ་རིས་སུ་འགྲོ་བའོ། །འདི་ནི་མྱ་ངན་ལས་འདའ་བར་འགྲོ་བའོ་ཞེས་ཆོས་གང་ཡང་མངོན་པར་རྫོགས་པར་སངས་རྒྱས་སམ། སྨྲས་པ། རྒྱལ་པོ་ཆེན་པོ་དེ་མ་ཡིན་ནོ། །གསོལ་པ། འཇམ་དཔལ་
ཆོས་ཐམས་ཅད་ལ་དེ་བཞིན་དུ་མངོན་པར་རྫོགས་པར་སངས་མ་རྒྱས་ན་ཆོས་གང་སེམས་ཅན་དམྱལ་བར་མཆི་བ་འམ། ལྷར་མཆི་བ་འམ། མྱ་ངན་ལས་འདའ་བར་འགྱུར་བའི་ཆོས་དེ་བདག་གིས་མ་མཐོང་སྟེ། འཇམ་དཔལ་
ཆོས་ཐམས་ཅད་ནི་སྟོང་པ་ཉིད་དུ་མཆི་བ་ལས་ཀྱང་མ་འདས་ལ་སྟོང་པ་ཉིད་ནི་ངན་སོང་དུ་མཆི་བ་ཡང་མ་ལགས། མཐོ་རིས་སུ་མཆི་བ་ཡང་མ་ལགས། མྱ་ངན་ལས་འདའ་བར་མཆི་བ་ཡང་མ་ལགས་སོ། །འཇམ་དཔལ་ཆོས་ཀྱི་
དབྱིངས་ནི་མ་འདྲེས་པའོ། །ཆོས་ཐམས་ཅད་ཀྱང་ཆོས་ཀྱི་དབྱིངས་ཀྱི་རང་བཞིན་ཅན་ཏེ། ཆོས་ཀྱི་དབྱིངས་ནི་ངན་སོང་དུ་ཡང་མི་མཆི། མཐོ་རིས་སུ་ཡང་མི་མཆི། མྱ་ངན་ལས་འདའ་བར་ཡང་མི་མཆིའོ། །འཇམ་དཔལ་
མཚམས་མེད་པ་ཞེས་བགྱི་བ་ནི་ཆོས་ཀྱི་དབྱིངས་སུ་མཚམས་མ་མཆིས་པའི་ཚིག་བླ་དགས་སོ། །འཇམ་དཔལ་མཚམས་མ་མཆིས་པ་ནི་ཆོས་ཀྱི་དབྱིངས་ཀྱི་རང་བཞིན་ཅན་ཏེ། མཚམས་མ་མཆིས་པ་གང་གི་རང་
བཞིན་པ། ཆོས་ཐམས་ཅད་ཀྱང་དེའི་རང་བཞིན་ནོ། །འཇམ་དཔལ་དེ་བས་ན་ཆོས་ཐམས་ཅད་ནི་འགྲོ་བ་མ་མཆིས་པ་སྟེ། དེའི་སླད་དུ་བདག་ནི་ངན་སོང་དུ་ཡང་མི་མཆི། མཐོ་རིས་སུ་ཡང་མི་མཆི། མྱ་ངན་ལས་འདའ་

57-1-282a

བར་ཡང་མི་མཆིའོ། །འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་ཁྱོད་དེ་སྐད་སྨྲ་ན། སྟོན་པའི་བཀའ་དང་འགལ་བར་བྱེད་དམ། གསོལ་པ། འཇམ་དཔལ་བདག་ནི་སྟོན་པའི་བཀའ་དང་འགལ་བར་མི་
བགྱིད་དོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཀྱིས་བདག་མེད་པའི་མཐའ་ནི་ཡང་དག་པའི་མཐར་གསུངས་ཏེ། གང་བདག་མེད་པའི་མཐའ་དེ་ལ་ནི་སེམས་ཅན་གང་ཡང་མ་མཆིས་སོ། །སེམས་ཅན་མ་མཆིས་ན་
གང་དེ་ནི་མངོན་པར་འདུ་བྱེད་པ་གང་ཡང་མ་མཆིས་སོ། །གང་ཚོར་བར་བགྱིད་པ་གང་ཡང་མ་མཆིས་སོ། །སྨྲས་པ། རྒྱལ་པོ་ཆེན་པོ་འགྱོད་པ་དེ་བསལ་ཏམ། གསོལ་པ། ཆོས་ཐམས་ཅད་རབ་ཏུ་བསལ་བའི་སླད་དུའོ། །
འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་ཁྱོད་ཐེ་ཙོམ་སྤངས་སམ། གསོལ་པ། ཆོས་ཐམས་ཅད་ཤིན་དུ་སྤངས་པའི་སླད་དུའོ། །འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་ཁྱོད་ལ་འཁོར་འདི་དག་མཚམས་མེད་པ་བྱེད་པར་
རམ། འོན་ཏེ་མ་ཡིན་པར་རམ། ཇི་ལྟར་འཛིན་པར་འགྱུར། གསོལ་པ། འཇམ་དཔལ་མཚམས་མ་མཆིས་པ་གང་གིས་མི་བསྐྱོད་པའི་རྣམ་པར་གྲོལ་བ་རྟོགས་པར་གྱུར་པའི་མཚམས་མ་མཆིས་པ་དེ་ལ་བདག་གནས་པར་འཛིན་པར་
འགྱུར་རོ། །མཚམས་མ་མཆིས་པ་གང་གིས་བྱང་ཆུབ་སེམས་དཔའ་བཟོད་པ་ཐོབ་པར་བགྱིད་པའི་མཚམས་མ་མཆིས་པ་དེ་ལ་བདག་གནས་པར་འགྱུར་རོ། །འཇམ་དཔལ་མཚམས་མ་མཆིས་པ་ཞེས་བགྱི་བ་ནི་གང་ན་མཐའ་
ཡང་མ་མཆིས། དབུས་ཀྱང་མ་མཆིས་པ་སྟེ། གང་ན་མཐའ་ཡང་མ་མཆིས། དབུས་ཀྱང་མ་མཆིས་པ་དེ་ལ་བདག་གནས་པར་འཛིན་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་དཔལ་གྱི་རྒྱལ་
མཚན་གྱིས་སྨྲས་པ། ཀྱེ་མའོ་རྒྱལ་པོ་ཆེན་པོ་འདིས་ནི་ཤེས་རབ་དང་ཡེ་ཤེས་ཀྱི་ལམ་སྦྱངས་སོ། །དེ་བས་ན་འདི་འདྲ་བའི་བཟོད་པ་ཐོབ་པར་གྱུར་ཏོ། །རྒྱལ་པོས་གསོལ་པ། རིགས་ཀྱི་བུ་ཆོས་ཐམས་ཅད་ནི་ཤིན་དུ་རྣམ་

57-1-282b

པར་དག་པ་ཤིན་དུ་མ་འདྲེས་པ། ཤིན་དུ་ཉོན་མོངས་པ་སྟེ། དེ་དག་ནི་ཀུན་ནས་ཉོན་མོངས་པར་བགྱི་མི་ནུས་སོ། །ཀུན་ནས་ཉོན་མོངས་པའི་ལས་ནི་ལམ་ལགས་ཏེ། ལམ་དེ་ཡང་འཁོར་བར་ཡང་མི་མཆི། མྱ་ངན་ལས་
འདའ་བར་ཡང་མི་མཆི། ལམ་དེ་ནི་གང་དུ་ཡང་མི་འདྲེན་ཏེ། ལམ་དེ་ནི་མི་འདྲེན་པའོ། །བསྟན་པ་འདི་བསྟན་པའི་ཚེ་རྒྱལ་པོ་མ་སྐྱེས་དགྲས་འཐུན་པའི་ཆོས་ལ་བཟོད་པ་ཐོབ་པར་གྱུར་ཏོ། །བུད་མེད་སུམ་ཁྲི་ཉིས་སྟོང་གིས་
ནི་འཇམ་དཔལ་གཞོན་ནུར་གྱུར་པའི་རྫུ་འཕྲུལ་མངོན་པར་འཕྲུལ་པ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ནང་གི་སྐྱེ་བོ་སྲོག་ཆགས་ལྔ་བརྒྱ་ནི་ཆོས་ལ་ཆོས་ཀྱི་མིག་རྣམ་པར་དག་གོ། །
རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་ཀྱང་ཆོས་ཉན་པར་འདོད་པ་སྲོག་ཆགས་སྟོང་ཕྲག་མང་པོ་དག་བྱུང་སྟེ། རྒྱལ་པོ་མ་སྐྱེས་དགྲའི་ཁབ་ཀྱི་སྒོ་ན་འཇམ་དཔལ་གཞོན་བུར་གྱུར་པ་ལ་མཆོད་པ་བྱེད་པའི་ལས་བྱེད་པའི་མི་འདག་
པར་གྱུར་ཏོ། །དེ་ནས་དེའི་ཚེ་འཇམ་དཔལ་གཞོན་ནུར་གྱུར་པས་རྐང་པའི་མཐེ་བོས་ས་ཆེན་པོ་འདི་ལ་བསྣུན་ནོ། །བསྣུན་མ་ཐག་ཏུ་ཡང་ས་ཆེན་པོ་འདི་ཐམས་ཅད་རྒྱུ་བཻ་དཱུརྱ་ལས་བྱས་པར་གྱུར་ཏོ། །དེ་ནས་རྒྱལ་པོའི་ཁབ་ཀྱི་
སྐྱེས་པ་དང་། བུད་མེད་དང་། ཁྱེའུ་དང་། བུ་མོ་ཐམས་ཅད་ཀྱིས་འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་དེ་དག་དང་། ཉན་ཐོས་ཆེན་པོ་དེ་དག་མཐོང་བ་ནི་འདི་ལྟ་སྟེ། དཔེར་ན་མེ་ལོང་ཤིན་དུ་གསལ་བའི་
ནང་དུ་བཞིན་མཐོང་བ་དེ་བཞིན་དུ་དེ་དག་གིས་འཇམ་དཔལ་གཞོན་ནུར་གྱུར་པ་འཁོར་དང་བཅས་པ་མཐོང་ངོ་། །དེ་ནས་འཇམ་དཔལ་གཞོན་ནུར་གྱུར་པས་ཅི་ནས་ཀྱང་སྲོག་ཆགས་བརྒྱད་ཁྲི་བཞི་སྟོང་གིས་ཆོས་ལ་ཆོས་ཀྱི་མིག་
རྣམ་པར་དག་པ་དང་། སྲོག་ཆགས་ལྔ་བརྒྱས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བ་དེ་ལྟ་དེ་ལྟར་ཆོས་བཤད་དོ། །དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། 

57-1-283a

དགེ་སློང་གི་དགེ་འདུན་དང་། འཁོར་དང་བཅས་ཏེ་རྒྱལ་པོ་མ་སྐྱེས་དགྲའི་ཁབ་ནས་བྱུང་ངོ་། །རྒྱལ་པོ་མ་སྐྱེས་དགྲ་ཡང་འཁོར་དང་བཅས་ཏེ་འཇམ་དཔལ་གཞོན་ནུར་གྱུར་པའི་ཕྱི་བཞིན་དུ་འབྲངས་པ་ལས་འཇམ་དཔལ་གཞོན་
ནུར་གྱུར་པ་ལམ་དུ་ཞུགས་པས་ཕྱོགས་གཞན་ཞིག་ན་མི་ཞིག་གིས་མའི་སྲོག་བཅད་ནས་དེ་ཤིང་ཞིག་གི་དྲུང་ན་ངུ་ཞིང་མྱ་ངན་བྱེད་ལ། བདག་གིས་སྡིག་པའི་ལས་བྱས་ཀྱིས། བདག་ནི་ངེས་པར་སེམས་ཅན་དམྱལ་བར་འགྲོའོ་ཞེས་ཟེར་ཞིང་
འདུག་པ་མཐོང་སྟེ། མི་དེ་ཡང་འཇམ་དཔལ་གཞོན་ནུར་གྱུར་པས་འདུལ་བར་གྱུར་པ་ཞིག་གོ། །དེ་ནས་འཇམ་དཔལ་གཞོན་ནུར་གྱུར་པས་སྐྱེས་བུ་དེ་གདུལ་བའི་ཕྱིར་སྐྱེས་བུ་གཞན་ཞིག་མངོན་པར་སྤྲུལ་ཏོ། །སྐྱེས་བུ་དེའི་ཕ་མ་ཡང་མངོན་
པར་སྤྲུལ་ཏོ། །དེ་ནས་སྐྱེས་བུ་སྤྲུལ་པ་དེ་ཕ་མ་དང་འགྲོགས་ཏེ། སྐྱེས་བུ་མ་གསོད་པ་དེ་ག་ལ་བ་དེར་སོང་ནས་ཧ་ཅང་ཡང་རྒྱང་མི་རིང་བ་ཞིག་ནས། ཅི་ནས་ཀྱང་སྐྱེས་བུ་ཡང་དག་པ་དེས་མཐོང་བར་འགྱུར་བ་དེ་ལྟར་རྩོད་པར་གྱུར་ཏེ། བུས་སྨྲས་པ། 
ལམ་ནི་འདི་ཡིན་ནོ། །ཕ་དང་མས་སྨྲས་པ། བུ་ལམ་འདི་མ་ཡིན་ནོ་ཞེས་དེ་དག་འཐབ་པར་གྱུར་པ་ལས་སྐྱེས་བུ་སྤྲུལ་པ་དེས་ཕ་དང་མའི་སྲོག་བཅད་པར་གྱུར་པ་དང་། སྐྱེས་བུ་ཡང་དག་པས་སྐྱེས་བུ་དེའི་ཕ་དང་མའི་སྲོག་བཅད་པ་མཐོང་ངོ་། །
དེ་ནས་སྤྲུལ་པའི་སྐྱེས་བུ་དེས་ཕ་མའི་སྲོག་བཅད་ནས་སྐྱེས་བུ་ཡང་དག་པ་དེ་ག་ལ་བ་དེར་སོང་སྟེ། ངུ་ཞིང་མཆི་མས་བརྣངས་ནས། བདག་གིས་སྡིག་པའི་ལས་བྱས་ཏེ་བདག་གིས་ཕ་དང་མའི་སྲོག་བཅད་པས་བདག་ནི་ངེས་པར་སེམས་
ཅན་དམྱལ་བར་མཆིའོ་ཞེས་དེ་སྐད་སྨྲས་པ་དང་། སྐྱེས་བུ་ཡང་དག་པས་དེ་ཐོས་ནས་འདི་སྙམ་དུ་གྱུར་ཏོ། །བདག་གིས་ནི་མ་འབའ་ཤིག་གི་སྲོག་བཅད་དུ་ཟད་ཀྱི། སྐྱེས་བུ་འདིས་ནི་ཕ་མ་གཉི་གའི་སྲོག་བཅད་པས་སྐྱེས་བུ་འདིས་
སྡིག་པའི་ལས་ཆེར་བྱས་ཀྱིས། འདི་གར་འགྲོ་བར་བདག་ཀྱང་དེར་འགྲོ་བར་འགྱུར་རོ་སྙམ་པ་དང་། སྤྲུལ་པའི་སྐྱེས་བུ་དེ་ངུ་ཞིང་ཀྱེ་སྐྱེས་བུ་བདག་ནི་བཅོམ་ལྡན་འདས་ཤཱཀྱ་ཐུབ་པའི་དྲུང་དུ་མཆིའོ། །དེ་ཅིའི་ཕྱིར་ཞེ་ན། བཅོམ་ལྡན་

57-1-283b

འདས་དེ་ནི་སེམས་ཅན་མགོན་མེད་པ་རྣམས་ཀྱི་མགོན། སེམས་ཅན་འཇིགས་པ་རྣམས་ལ་མི་འཇིགས་པ་སྦྱིན་པར་མཛད་པ་ཡིན་གྱིས། བཅོམ་ལྡན་འདས་དེ་ཅི་གསུང་བ་བཞིན་དུ་ནན་ཏན་བྱའོ་ཞེས་དེ་སྐད་སྨྲས་ཏེ། དེ་ནས་སྤྲུལ་པའི་
སྐྱེས་བུ་དེ་སོང་བ་དང་། སྐྱེས་བུ་ཡང་དག་པ་དེ་ཡང་སྐྱེས་བུ་འདི་གར་འགྲོ་བར་བདག་ཀྱང་དེར་འགྲོ་བར་འགྱུར་གྱི། བདག་ཀྱང་དེར་འགྲོའོ་ཞེས་དེའི་ཕྱི་བཞིན་དུ་འབྲངས་སོ། །དེ་ནས་སྤྲུལ་པའི་སྐྱེས་བུ་དེས་བཅོམ་ལྡན་འདས་ག་ལ་བ་
དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཕ་མའི་སྲོག་བཅད་ན་བཅོམ་ལྡན་འདས་བདག་ལ་སྐྱབས་
མཛད་པར་གསོལ། བདག་གིས་དེ་ཇི་ལྟར་བགྱི། དེ་ནས་བཅོམ་ལྡན་འདས་ཀྱིས་སྤྲུལ་པའི་སྐྱེས་བུ་དེ་ལ་ལེགས་སོ་ཞེས་བྱ་བ་བྱིན་ནས། ལེགས་སོ་ལེགས་སོ། །ཀྱེ་སྐྱེས་བུ་ཁྱོད་ནི་བདེན་པར་སྨྲ། ཇི་ལྟར་བྱས་པ་དེ་བཞིན་དུ་སྨྲའོ། །
གང་ཁྱོད་ནི་དེ་བཞིན་གཤེགས་པའི་སྤྱན་སྔར་བདེན་པའི་ཚིག་སྨྲས་ཏེ་མི་སླུ་བ་ཡིན་མོད་ཀྱི། སྐྱེས་བུ་ཁྱོད་སེམས་ཀྱི་རྒྱུད་ལ་རྟོགས་ཤིག །ཁྱོད་ཀྱིས་འདས་པས་སམ། མ་འོངས་པས་སམ། ད་ལྟར་གྱིས་སམ། སེམས་གང་གིས་
ཕ་མའི་སྲོག་བཅད། འདས་པའི་སེམས་ནི་ཟད་པ་དང་བྲལ་བ། འགགས་པ་གཞན་དུ་གྱུར་པ་སྟེ། ཡུལ་ན་ཡང་མི་གནས། ཕྱོགས་ན་ཡང་མི་གནས་པས་དེ་ནི་གདགས་སུ་མི་ནུས་སོ། །མ་འོངས་པ་ནི་མ་ཕྱིན་པ་སྟེ། དེ་ནི་མ་སྐྱེས་པ་
མ་བྱུང་བ། ཡང་དག་པར་མ་བྱུང་བ། མ་གྱུར་པ། རྣམ་པར་མ་གྱུར་པ། མཚན་མ་མེད་པ། མ་བྱུང་བ་སྟེ། དེ་ཡང་གདགས་སུ་མི་ནུས་སོ། །ད་ལྟར་གྱི་སེམས་ནི་གནས་པ་མེད་པ་སྟེ། སྐྱེས་ནས་ཞིག་ཅིང་དེངས་པར་འགྱུར་བའི་
ཕུང་པོར་མ་གྱུར་པ། བསགས་པར་མ་གྱུར་པའོ། །དེ་ལ་ནི་འགྲོ་བ་དང་འོང་བར་གདགས་པ་ཡང་མེད་དོ། །ཀྱེ་སྐྱེས་བུ་སེམས་ནི་ནང་གི་ལུས་ལ་ཡང་མི་འཇུག །ཕྱི་རོལ་གྱི་ཡུལ་དུ་ཡང་མི་རྒྱུ། གཉི་ག་མེད་པར་ཡང་མི་

57-1-284a

དམིགས་སོ། །ཀྱེ་སྐྱེས་བུ་སེམས་ནི་སྔོན་པོ་མ་ཡིན། སེར་པོ་མ་ཡིན། དམར་པོ་མ་ཡིན། དཀར་པོ་མ་ཡིན། ཇ་གོང་མ་ཡིན། ཤེལ་གྱི་ཁ་དོག་མ་ཡིན་ནོ། །ཀྱེ་སྐྱེས་བུ་སེམས་ནི་གཟུགས་མེད། བསྟན་དུ་མེད། 
གཟུང་དུ་མེད། ཐོགས་པ་མེད། སྒྱུ་མ་ལྟ་བུ། དཔེ་མེད་པ་སྟེ། དེ་ཡང་གདགས་སུ་མི་ནུས་སོ། །ཀྱེ་སྐྱེས་བུ་སེམས་ནི་ཞེ་མི་སྡང་། གཏི་མི་མུག་གོ། །ཀྱེ་སྐྱེས་བུ་སེམས་ནི་མངོན་པར་འདུ་མི་བྱེད། བྱེད་པ་མེད། ཚོར་བ་མེད། སེམས་
པ་མེད། མྱོང་བར་བྱེད་པ་མེད་དོ། །ཀྱེ་སྐྱེས་བུ་སེམས་ནི་རང་བཞིན་གྱིས་དང་བ་ཡིན་ཏེ། དེ་ནི་ཀུན་ནས་ཉོན་མོངས་པར་མི་འགྱུར། རྣམ་པར་དག་པར་མི་འགྱུར་རོ། །ཀྱེ་སྐྱེས་བུ་སེམས་ནི་ཚེ་འདི་ལའང་མེད། ཚེ་རབས་གཞན་ན་འང་མེད། 
གཉི་ག་མེད་པར་ཡང་མེད་དེ། དེ་ན་འང་མེད། གཞན་ན་འང་མེད་པ། ནམ་མཁའ་དང་མཚུངས་པ། མི་མཉམ་པ་དང་མཉམ་པ། མི་འདྲ་བ། རྣམ་པར་རིག་པར་མི་འགྱུར་བ་སྟེ། དེ་ལ་མཁས་པས་མངོན་པར་ཆགས་པར་མི་བྱའོ། །བདག་
གིར་མི་བྱའོ། །རྟེན་པར་མི་བྱའོ། །གནས་པར་མི་བྱའོ། །བདག་ཏུ་བསམ་པར་མི་བྱའོ། །བདག་གིར་བསམ་པར་མི་བྱའོ། །ཀྱེ་སྐྱེས་བུ་དག་ཆོས་ཐམས་ཅད་ནི་རང་བཞིན་གྱིས་ནུས་པ་མེད་པས་གཡོ་བ་མེད་པའོ། །ཀྱེ་སྐྱེས་
བུ་དག་ང་ནི་དེ་ལྟར་མོས་པ་ལ་ཀུན་ནས་ཉོན་མོངས་པ་འམ། ངན་སོང་དུ་འགྲོ་བ་འམ། མཐོ་རིས་སུ་འགྲོ་བར་མི་སྨྲའོ། །དེ་ཅིའི་ཕྱིར་ཞེ་ན། གང་སེམས་ཀྱི་ཆོས་ཉིད་དེ་ནི་ཀུན་ནས་ཉོན་མོངས་པར་མི་
འགྱུར། གང་དུ་ཡང་འགྲོ་བར་མི་འགྱུར། འོང་བར་མི་འགྱུར། འདུག་པར་མི་འགྱུར་རོ། །དེ་ནས་བཅོམ་ལྡན་འདས་ལ་སྐྱེས་བུ་སྤྲུལ་པ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་ཆོས་ཀྱི་
དབྱིངས་ཡོངས་སུ་དག་པ། ལས་མ་མཆིས་པ། རྣམ་པར་སྨིན་པ་མ་མཆིས་པ། མ་སྐྱེས་པ། མ་གྲུབ་པ། མངོན་པར་རྫོགས་པར་སངས་རྒྱས་པ་ངོ་མཚར་ཏོ། །བཅོམ་ལྡན་འདས་བདག་རབ་ཏུ་འབྱུང་བར་འཚལ་ན། བདེ་བར་

57-1-284b

གཤེགས་པ་རབ་ཏུ་དབྱུང་བར་གསོལ། དགེ་སློང་ཚུར་ཤོག །ཚངས་པར་སྤྱད་པ་སྤྱོད་ཅིག་ཅེས་བཅོམ་ལྡན་འདས་ཀྱིས་དེ་ལ་དེ་སྐད་གསུངས་པ་དང་། དེའི་མོད་ལ་དེ་རབ་ཏུ་བྱུང་བར་སྣང་སྟེ། བཅོམ་ལྡན་འདས་བདག་གིས་
མངོན་པར་བགྱི་བ་ཐོབ་ཀྱིས་མྱ་ངན་ལས་འདའ་བར་འཚལ་ལོ་ཞེས་དེ་སྐད་ཀྱང་སྨྲས་སོ། །དེ་ལྟ་སྟེ། དགེ་སློང་དེ་སངས་རྒྱས་ཀྱི་མཐུས་སྟེང་གི་བར་སྣང་ལ་ཤིང་ཏ་ལ་གང་ཙམ་དུ་འཕགས་ནས། བདག་གི་མེའི་ཁམས་ཀྱིས་ལུས་
བསྲེགས་པ་དང་། སྐྱེས་བུ་ཡང་དག་པ་དེས་ཆོས་བསྟན་པ་འདི་དག་ཐོས་སོ། །ཐོས་ནས་ཀྱང་འདི་སྙམ་དུ་གྱུར་ཏེ། སྐྱེས་བུ་དེས་ནི་ཕ་དང་མ་གཉི་གའི་སྲོག་བཅད་ཀྱང་དེ་ཡོངས་སུ་མྱ་ངན་ལས་འདས་ན་བདག་གིས་ནི་མ་འབའ་ཤིག་
གི་སྲོག་བཅད་དུ་ཟད་པས་ཅིའི་ཕྱིར་བདག་ཡོངས་སུ་མྱ་ངན་ལས་མི་འདའ་སྙམ་ནས། དེ་དེའི་ཚེ་བཅོམ་ལྡན་འདས་ཀྱི་དྲུང་དུ་སོང་སྟེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་བདག་ཀྱང་མའི་སྲོག་བཀུམ་མོ། །དེ་ནས་བཅོམ་ལྡན་འདས་ཀྱིས་སྐྱེས་བུ་དེ་ལ་ལེགས་སོ་ཞེས་བྱ་བ་བྱིན་ཏེ་ལེགས་སོ་ལེགས་སོ། །སྐྱེས་བུ་ཁྱོད་ཀྱིས་དེ་བཞིན་གཤེགས་པ་མ་བསླུས་མོད་ཀྱི། 
ཀྱེ་སྐྱེས་བུ་ཁྱོད་སེམས་གང་གིས་མའི་སྲོག་བཅད་པ་སེམས་ཀྱི་རྒྱུད་ལ་རྟོགས་ཤིག་ཅེས་རྒྱ་ཆེར་བཀའ་སྩལ་ཏེ། ཞིབ་ཏུ་སྤྲུལ་པའི་སྐྱེས་བུ་ཇི་ལྟ་བ་དེ་བཞིན་དུ་བྱའོ། །དེ་ནས་དེའི་ཚེ་སྐྱེས་བུ་དེའི་བ་སྤུའི་ཁུང་བུ་ཐམས་ཅད་ནས་
སེམས་ཅན་དམྱལ་བའི་མེ་བྱུང་བར་གྱུར་ཏེ། དེ་ཚིག་ཅིང་མགོན་མེད་པ་དང་། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་ཚིག་པར་གྱུར་ན་བདེ་བར་གཤེགས་པ་མགོན་མཛད་དུ་གསོལ། 
བཅོམ་ལྡན་འདས་ལ་སྐྱབས་སུ་མཆིའོ། །དེ་ནས་བཅོམ་ལྡན་འདས་ཀྱིས་ཕྱག་གསེར་གྱི་ཁ་དོག་ལྟ་བུ་སྐྱེས་བུ་དེའི་སྤྱི་བོར་བཞག་གོ། །ཕྱག་བཞག་མ་ཐག་ཏུ་དེ་ནས་དེའི་ཚེ། སྐྱེས་བུ་དེའི་ཚོར་བ་དེ་ཐམས་ཅད་རྒྱུན་ཆད་པར་

57-1-285a

གྱུར་ཏོ། །དེ་ལུས་བག་ཡངས་ཤིང་བདེ་བར་གྱུར་ནས་དེ་བཞིན་གཤེགས་པ་ལ་ཤིན་དུ་གུས་པར་གྱུར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་རབ་ཏུ་འབྱུང་བར་འཚལ་ན། 
བདེ་བར་གཤེགས་པས་རབ་ཏུ་འབྱུང་བར་གསོལ། བཅོམ་ལྡན་འདས་ཀྱིས་དེ་ལ་དགེ་སློང་ཚུར་ཤོག །ཚངས་པར་སྤྱད་པ་སྤྱོད་ཅིག་ཅེས་དེ་སྐད་བཀའ་སྩལ་པ་དང་། དེའི་ཚེ་དེ་ཉིད་དུ་དེ་མགོ་བྲེགས། ཆོས་གོས་སྦྱར་མ་བགོས། 
སྐྲ་དང་ཁ་སྤུ་བྲེགས་ནས་ཞག་བདུན་ལོན་པ་ཙམ་དུ་གྱུར་ཏེ། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་དུ་གནས་པར་གྱུར་ཏོ། །དེ་བཞིན་གཤེགས་པས་ཚུར་ཤོག་ཅེས་གསུངས་ནས། །མགོ་བྲེགས་
ལུས་ནི་ཆོས་གོས་སྦྱར་མར་ལྡན། །དེ་མ་ཐག་ཏུ་དབང་པོ་རབ་ཞི་ཞིང་། །སངས་རྒྱས་དགོངས་པའི་ཆ་ལུགས་གནས་པར་གྱུར། །དེ་ནས་བཅོམ་ལྡན་འདས་ཀྱིས་དགེ་སློང་དེ་ལ་འཕགས་པའི་བདེན་པ་བཞི་དང་ལྡན་པའི་གཏམ་
བཤད་པ་དང་། དེས་དེ་ཐོས་ནས་ཆོས་ལ་རྡུལ་མེད་ཅིང་དྲི་མ་དང་བྲལ་བའི་ཆོས་ཀྱི་མིག་རྣམ་པར་དག་པའི་སྟེང་དུ་ཡང་ལམ་བསྒོམས་ནས་དགྲ་བཅོམ་པར་གྱུར་ཏེ། དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
ལྡན་འདས་བདག་ནི་ཡོངས་སུ་མྱ་ངན་ལས་འདའ་བར་འཚལ་ལོ། །བདེ་བར་གཤེགས་པ་བདག་ནི་ཡོངས་སུ་མྱ་ངན་ལས་འདའ་བའི་དུས་དང་མན་ལ་བབ་བོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཁྱོད་ད་དེའི་དུས་
ལ་བབ་པར་ཤེས་པར་གྱིས་ཤིག །དེས་དེའི་ཚེ་སྟེང་གི་བར་སྣང་ལ་ཤིང་ཏ་ལ་བདུན་ཙམ་ན་འདུག་སྟེ། བདག་གི་མེའི་ཁམས་ཀྱིས་ལུས་བསྲེགས་སོ། །བསྲེགས་པ་དེའི་ཚེ་སོལ་བ་དང་ཐལ་བ་ཡང་མེད་པར་གྱུར་ནས་ལྷ་བརྒྱ་སྟོང་
དག་ཀྱང་དེ་ལ་ཕྱག་འཚལ་བར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་སྐྱེས་བུ་དེའི་གདུལ་བ་མཐོང་ནས་ངོ་མཚར་དུ་གྱུར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པའི་ཆོས་འདུལ་བ་ནི་ལེགས་

57-1-285b

པར་གསུངས་པ་སྟེ། དེ་ལ་ནི་མཚམས་མ་མཆིས་པ་དང་ལྡན་པ་དག་ཀྱང་འདུལ་བར་འགྱུར་བ་བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །བཅོམ་ལྡན་འདས་སེམས་ཅན་རྣམས་ཀྱི་དབང་པོ་རྣམ་པ་སྣ་
ཚོགས་འཚལ་བ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་། འཇམ་དཔལ་གཞོན་ནུར་གྱུར་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཞན་ཡང་དེ་འདྲ་བའི་གོ་ཅ་དག་
བགོས་པ་མ་གཏོགས་པར་གཞན་སུའི་ཡུལ་ལགས། ཉན་ཐོས་དང་། རང་སངས་རྒྱས་ཐམས་ཅད་ཀྱི་ནི་ཡུལ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་དེ་བཞིན་ནོ། །ཇི་སྐད་སྨྲས་པ་དེ་བཞིན་
ཏེ། དེ་ནི་སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བཟོད་པ་ལ་གནས་པ་རྣམས་ཀྱི་ཡུལ་ཡིན་ཏེ། ཤཱ་རིའི་བུ་གང་ཟག་གང་ཁྱོད་ཀྱིས་སེམས་ཅན་དམྱལ་བ་པར་ཤེས་ལ་དེ་དག་
ལ་ངས་མྱ་ངན་ལས་འདའ་བའི་ཆོས་ཅན་དུ་མཐོང་བ་ཡང་ཡོད་དོ། །ཤཱ་རིའི་བུ་ཁྱོད་ཀྱིས་གང་ཟག་གང་སྦྱངས་པའི་ཡོན་ཏན་དང་། ཆོག་ཤེས་པ་དང་། ཚུལ་ཁྲིམས་དང་། ཐོས་པ་དང་། ཏིང་ངེ་འཛིན་ཙམ་དང་ལྡན་ཏེ། དེ་ལ་ཁྱོད་ཀྱིས་
མྱ་ངན་ལས་འདའ་བའི་ཆོས་ཅན་དུ་ཤེས་མོད་ཀྱི། དེ་ལ་དེ་བཞིན་གཤེགས་པས་སེམས་ཅན་དམྱལ་བ་པར་གཟིགས་པ་ཡང་ཡོད་ཀྱིས། ཤཱ་རིའི་བུ་ཁྱོད་ནི་སེམས་ཅན་གྱི་སྤྱོད་པ་ལ་བསམ་པ་དང་བྲལ་བར་གྱིས་ཤིག །
དེ་ཅིའི་ཕྱིར་ཞེ་ན། ཤཱ་རིའི་བུ་སེམས་ཅན་གྱི་སྤྱོད་པ་ནི་བསམ་གྱིས་མི་ཁྱབ་པའི་ཕྱིར་རོ། །ཤཱ་རིའི་བུ་གང་གིས་མ་བསད་ནས་ཆོས་བསྟན་པ་འདི་ལ་གནས་ཏེ་ཡོངས་སུ་མྱ་ངན་ལས་འདས་པར་གྱུར་པའི་སྐྱེས་བུ་དེ་ཁྱོད་
ཀྱིས་མཐོང་ངམ། གསོལ་པ། བཅོམ་ལྡན་འདས་བདག་གིས་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་སྐྱེས་བུ་དེས་ནི་སངས་རྒྱས་ལྔ་བརྒྱ་ལ་དགེ་བའི་རྩ་བ་བསྐྱེད་པར་གྱུར་ཅིང་། འདི་ལྟ་སྟེ། སེམས་

57-1-286a

རང་བཞིན་གྱིས་དང་བའི་ཆོས་བཤད་པ་འདི་ཡང་ཐོས་སོ། །ཤཱ་རིའི་བུ་སྐྱེས་བུ་དེས་ཆོས་བསྟན་པ་འདི་ཐོས་ནས་ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་མཐོང་བའི་ཕྱིར་རྣམ་པར་གྲོལ་བར་གྱུར་ཏོ། །
དེ་བས་ན་ཤཱ་རིའི་བུ་རྣམ་གྲངས་འདིས་ཀྱང་འདི་ལྟར་རིག་པར་བྱ་སྟེ། གང་སུ་ཡང་རུང་སྟེ། ད་ལྟར་རམ། ང་མྱ་ངན་ལས་འདས་པ་ན་ཡང་ཟབ་མོ་ཆགས་པ་མེད་པ། འགྲོ་བ་མེད་པ་འདི་ལྟ་བུའི་ཆོས་བསྟན་པ་ཉན་ལ་ཐོས་ནས་ཀྱང་
མོས་པར་བྱེད་ན་སེམས་ལ་ཀུན་ནས་ཉོན་མོངས་པ་འམ། སྡིག་པའི་གྲོགས་པོའི་དབང་གིས་མི་དགེ་བའི་འདུ་བྱེད་དག་མངོན་པར་བྱེད་ཀྱང་། མ་ལུས་པར་རྣམ་པར་གྲོལ་བར་མ་གྱུར་གྱི་བར་དུ་ཆོས་ལ་རྟོགས་པ་དེ་གཏོང་བར་མི་
འགྱུར་རོ། །ཤཱ་རིའི་བུ་གང་དག་ཆོས་འདི་འདྲ་བ་ལ་མོས་པར་གྱུར་པ་དེ་དག་ནི་འགྲོ་བ་ངན་པར་འགྲོ་བར་ང་མི་སྨྲའོ། །ཤཱ་རིའི་བུ་དེ་བས་ན་གང་གིས་ཆོས་ཀྱི་རྣམ་གྲངས་འདི་ལས་ཆུང་ངུ་ན་རྩ་བ་བཞི་པའི་ཚིགས་སུ་བཅད་པ་གཅིག་
གམ། ཚིག་གཅིག་ལེན་པ་དང་། གཞན་ལ་སྟོན་པའི་སེམས་ཅན་དེ་དག་ངེས་པར་ཐམས་ཅད་མཁྱེན་པར་འགྱུར་བར་བལྟ་ན། གང་དག་ཐོས་ནས་ཚུལ་བཞིན་དུ་བྱེད་པ་ལྟ་ཅི་སྨོས། དེ་ནས་འཇམ་དཔལ་གཞོན་ནུར་གྱུར་པ་བྱང་ཆུབ་
སེམས་དཔའ་དེ་དག་དང་། འོད་སྲུང་ཆེན་པོ་ལ་སོགས་པ་ཉན་ཐོས་དག་དང་། རྒྱལ་པོ་མ་སྐྱེས་དགྲ་དང་། གཞན་ཡང་སྐྱེ་བོའི་ཚོགས་ཆེན་པོ་དང་འགྲོགས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་
ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །དེ་ནས་ཚེ་དང་ལྡན་པ་ཤཱ་རིའི་བུས། རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ཁྱོད་ཀྱི་འགྱོད་པ་དེ་བསལ་ཏམ། སྨྲས་པ། བཙུན་
པ་ཤཱ་རིའི་བུ་བསལ་ཏོ། །ཤཱ་རིའི་བུས་སྨྲས་པ། ཇི་ལྟར་བསལ། སྨྲས་པ། ཅི་ནས་ཀྱང་མི་ལེན་པ་དང་། མི་གཏོང་བ་དེ་ལྟར་བསལ་ཏོ། །ཅི་ནས་ཀྱང་སླན་ཆད་ཤིན་དུ་ཉོན་མོངས་པར་མི་འགྱུར་བ་དང་། ཅི་ནས་ཀྱང་ཐོབ་པ་

57-1-286b

ཡང་མེད། འཕྲོགས་པ་ཡང་མེད་པ་དེ་ལྟར་བསལ་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱལ་པོ་མ་སྐྱེས་དགྲའི་ལས་ཀྱི་ལྷག་མ་ཅི་ཙམ་ཞིག་ནི་ལུས་
ཅི་ཙམ་ཞིག་ནི་ལྷག་མ་མ་ལུས་པར་བྱང་ཞིང་སླན་ཅད་མི་སྐྱེ་བའི་ཆོས་ཅན་དུ་གྱུར། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་རྒྱལ་པོ་མ་སྐྱེས་དགྲའི་ལས་ཀྱི་ལྷག་མ་ཡུངས་ཀར་གྱི་འབྲུམ་བུ་ཙམ་ནི་ལུས་སོ། །
རི་རབ་རིའི་རྒྱལ་པོ་ཙམ་ནི་ཆོས་ཟབ་མོ་འདི་བསྟན་པ་ཁོང་དུ་ཆུད་པས་ལྷག་མ་མ་ལུས་པར་བྱང་སྟེ། ཕྱིན་ཅད་མི་སྐྱེ་བའི་ཆོས་ཅན་དུ་གྱུར་ཏོ། །གསོལ་པ། ཅི་བཅོམ་ལྡན་འདས་རྒྱལ་པོ་མ་སྐྱེས་དགྲ་སེམས་ཅན་དམྱལ་བར་མཆི་
འམ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་འདི་ལྟ་སྟེ། དཔེར་ན་ལྷའི་བུ་རིན་པོ་ཆེའི་ཁང་པ་བརྩེག་མ་ན་འདུག་པ་ལས་སུམ་ཅུ་རྩ་གསུམ་གྱི་ལྷའི་གནས་ནས་འཛམ་བུའི་གླིང་དུ་འབབ་ཅིང་། འཛམ་བུའི་གླིང་དུ་
བབས་ནས་སླར་ཡང་སུམ་བཅུ་རྩ་གསུམ་གྱི་གནས་སུ་འཛེག་པ་དེ་བཞིན་དུ་རྒྱལ་པོ་མ་སྐྱེས་དགྲ་ཡང་སོ་སོའི་སེམས་ཅན་དམྱལ་བ་མེ་ཏོག་པུན་དཱ་རི་ཀ་ཞེས་བྱ་བར་བབས་ནས་དེ་བཞིན་དུ་འཛེགས་ཏེ། དེ་ལུས་ལ་སྡུག་བསྔལ་
བའི་ཚོར་བ་རེག་པར་ཡང་མི་འགྱུར་རོ། །ཤཱ་རིའི་བུས་གསོལ་པ། བཅོམ་ལྡན་འདས་རྒྱལ་པོ་མ་སྐྱེས་དགྲ་ནི་དབང་པོ་རྣོ་སྟེ། དེས་ལས་ཀྱི་སྒྲིབ་པ་མྱོང་བར་འགྱུར་བ་འདི་ཙམ་ཞིག་ཏུ་བགྱིས་པ་ངོ་མཚར་ཏོ། །བཅོམ་ལྡན་
འདས་ཀྱིས་བཀའ་སྩལ་པ། ཤཱ་རིའི་བུ་རྒྱལ་པོ་མ་སྐྱེས་དགྲ་འདིས་སངས་རྒྱས་བྱེ་བ་ཕྲག་བདུན་བཅུ་རྩ་གཉིས་ལ་དགེ་བའི་རྩ་བ་བསྐྱེད་དེ། ཡང་དག་པར་རྫོགས་པའི་སངས་རྒྱས་དེ་དག་ལ་འདིས་བསྙེན་བཀུར་ཀྱང་
བྱས་པར་གྱུར་ཏོ། །དེ་དག་ལས་ཆོས་ཀྱང་ཐོས་པར་གྱུར་ཏོ། །དགེ་བའི་རྩ་བ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་པར་གྱུར་ཏོ། །ཤཱ་རིའི་བུ་འཇམ་དཔལ་གཞོན་ནུར་གྱུར་པ་འདི་མཐོང་ངམ། 

57-1-287a

གསོལ་པ། མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་འཇམ་དཔལ་གཞོན་ནུར་གྱུར་པ་འདིས་རྒྱལ་པོ་མ་སྐྱེས་དགྲ་འདི་བསྐལ་པ་དྲི་མ་མེད་པ་ཞེས་བྱ་བ་ན། བཅོམ་ལྡན་འདས་དེ་བཞིན་
གཤེགས་པ་ཕྱག་བཟངས་ཤེས་བྱ་བའི་གསུང་རབ་ལས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་བཅུག་གོ། །ཡང་ཤཱ་རིའི་བུ་བསྐལ་པ་དྲི་མ་མེད་པ་ལ་སངས་རྒྱས་བྱེ་བ་ཕྲག་གསུམ་བྱུང་སྟེ། 
དེ་ཐམས་ཅད་ཀྱང་འཇམ་དཔལ་གཞོན་ནུར་གྱུར་པས་ཆོས་ཀྱི་འཁོར་ལོ་བསྐོར་བ་དང་། ཚེ་རིང་བར་གསོལ་བར་གྱུར་ཏོ། །ཤཱ་རིའི་བུ་རྒྱལ་པོ་མ་སྐྱེས་དགྲ་འདི་ནི་འཇམ་དཔལ་གཞོན་ནུར་གྱུར་པ་མ་གཏོགས་པར་སངས་རྒྱས་སྟོང་
གིས་ཀྱང་ཆོས་བཤད་དེ། འགྱོད་པ་དེ་བསལ་བར་བྱ་བའི་གནས་དང་གོ་སྐབས་མེད་དོ། །དེ་ཅིའི་ཕྱིར་ཞེ་ན། འདི་ཉིད་ཀྱིས་གདུལ་བ་ཡིན་ཏེ། ཕྱི་ཕྱིར་ཞིང་འདིས་ཆོས་ཟབ་མོ་བསྟན་པ་འདི་ཉིད་ལས་ཐོས་པར་གྱུར་ཏོ། །
དེ་བས་ན་ཤཱ་རིའི་བུ་རྣམ་གྲངས་དེས་ཀྱང་འདི་ལྟར་རིག་པར་བྱ་སྟེ། གང་དང་གང་དག་བྱང་ཆུབ་སེམས་དཔའ་གང་དང་གང་ལས་འདུལ་བར་འགྱུར་བ་དེ་དང་དེ་ཉིད་ཀྱི་ཆོས་བསྟན་པ་ཤེས་པར་འགྱུར་རོ། །ཤཱ་རིའི་བུ་རྒྱལ་པོ་མ་
སྐྱེས་དགྲ་འདི་ཡང་སོ་སོའི་སེམས་ཅན་དམྱལ་བ་མེ་ཏོག་པུན་དཱ་རི་ཀ་ལྟར་གས་པ་དེ་ནས་བྱུང་ནས་རྨ་མེད་ཅིང་མ་རྨས་པར་སྟེང་གི་ཕྱོགས་ཀྱི་ཆ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བཞི་སྟོང་བཞི་བརྒྱ་
འདས་པ་ན། དེ་འཇིག་རྟེན་གྱི་ཁམས་བརྒྱན་པ་ཞེས་བྱ་བ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་ཕུང་པོ་ཞེས་བྱ་བ་བཞུགས་ཤིང་འཚོ་གཞེས་ལ་ཆོས་ཀྱང་
སྟོན་པའི་སངས་རྒྱས་ཀྱི་ཞིང་དེར་སྐྱེ་བར་འགྱུར་རོ། །དེ་དེར་སྐྱེས་མ་ཐག་ཏུ་སླར་ཡང་འཇམ་དཔལ་གཞོན་ནུར་གྱུར་པ་ཡང་མཐོང་བར་འགྱུར་རོ། །ཆོས་ཟབ་མོ་བསྟན་པ་འདི་ཡང་ཐོས་པར་འགྱུར་རོ། །ཐོས་ནས་

57-1-287b

ཀྱང་དེ་ཉིད་དུ་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ། །གང་གི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ་ཡང་སླར་འཇམ་དཔལ་གཞོན་ནུར་
གྱུར་པ་མཐོང་བར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་མི་གཡོ་བ་ཞེས་བྱ་བར་འགྱུར་རོ། །དེ་ན་ཡང་བྱམས་པ་དེ་བཞིན་གཤེགས་པས་བྱང་ཆུབ་སེམས་དཔའ་མི་གཡོ་བ་ལ་སོགས་པ་ལ་སྔོན་བྱུང་
བ་དང་ལྡན་པའི་ཆོས་ཀྱི་གཏམ་བརྗོད་པར་འགྱུར་ཏེ། ཆོས་ཀྱི་རྣམ་གྲངས་འདི་ཡང་མ་ལྷག་མ་བྲི་བར་བརྗོད་པར་འགྱུར་རོ། །ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མི་གཡོ་བ་འདི་བཅོམ་ལྡན་འདས་དེ་བཞིན་
གཤེགས་པ་ཤཱཀྱ་ཐུབ་པའི་གསུང་རབ་ལ་རྒྱལ་པོ་མ་སྐྱེས་དགྲ་ཞེས་བྱ་བར་གྱུར་ཏེ། དེས་ཕའི་སྲོག་བཅད་ནས་དེས་ཆོས་ཀྱི་རྣམ་གྲངས་འདི་འཇམ་དཔལ་གཞོན་ནུར་གྱུར་པ་ལས་ཐོས་ཏེ་འཐུན་པའི་ཆོས་ལ་བཟོད་པ་ཐོབ་
བོ། །དེའི་ལས་ཀྱི་སྒྲིབ་པ་ཡང་མ་ལུས་པར་བྱང་བར་གྱུར་ཏོ་ཞེས་དེ་སྐད་ཀྱང་བརྗོད་པར་འགྱུར་རོ། །ཤཱ་རིའི་བུ་དེ་ལྟ་སྟེ། བྱམས་པ་དེ་བཞིན་གཤེགས་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་མི་གཡོ་བ་ལ་
སོགས་པ་ལ་ཅི་ནས་ཀྱང་བྱང་ཆུབ་སེམས་དཔའ་བརྒྱད་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་བ་དེ་ལྟ་དེ་ལྟར་ཆོས་ཀྱི་རྣམ་གྲངས་འདི་སྟོན་པར་འགྱུར་རོ། །དེ་ན་བྱང་ཆུབ་སེམས་དཔའ་ཉི་ཁྲི་ཉིས་སྟོང་
གི་ལས་ཀྱི་སྒྲིབ་པ་བསྐལ་པ་གྲངས་མེད་པ་ནས་བསགས་པ་ཡང་རབ་ཏུ་ཞི་བར་འགྱུར་རོ། །རྒྱལ་པོ་མ་སྐྱེས་དགྲ་འདི་དེ་ཕན་ཅད་བསྐལ་པ་གྲངས་མེད་པ་ཕྲག་བརྒྱད་བརྒྱའི་བར་དུ་སེམས་ཅན་ཡོངས་སུ་སྨིན་པར་
བྱེད། སངས་རྒྱས་ཀྱི་ཞིང་ཡོངས་སུ་སྦྱོང་བར་བྱེད་ཅིང་བྱང་ཆུབ་སེམས་དཔའི་སྤྱད་པ་སྤྱོད་དོ། །ཤཱ་རིའི་བུ་སེམས་ཅན་གང་དག་དེས་ཉན་ཐོས་ཀྱི་ཐེག་པས་སམ། རང་སངས་རྒྱས་ཀྱི་ཐེག་པས་སམ། ཐེག་པ་ཆེན་

57-1-288a

པོས་ཡོངས་སུ་སྨིན་པར་བྱས་པར་འགྱུར་བའི་སེམས་ཅན་དེ་དག་ནི་ལས་ཀྱི་སྒྲིབ་པ་འམ། ཉོན་མོངས་པའི་སྒྲིབ་པ་མེད་པར་འགྱུར་ཏེ། དེ་དག་ཐམས་ཅད་དབང་པོ་རྣོ་བར་འགྱུར། འགྱོད་པ་དང་ཐེ་
ཙོམ་མེད་པར་འགྱུར་རོ། །ཤཱ་རིའི་བུ་རྒྱལ་པོ་མ་སྐྱེས་དགྲ་འདི་བསྐལ་པ་གྲངས་མེད་པ་ཕྲག་བརྒྱད་བརྒྱ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། བསྐལ་པ་མཐོང་ན་དགའ་བ་
ཞེས་བྱ་བ་ལ་འཇིག་རྟེན་གྱི་ཁམས་འདམ་གྱི་རྙོག་པ་མེད་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡུལ་ཤིན་དུ་རྣམ་པར་དག་པ་ཞེས་བྱ་བར་འགྱུར་ཏེ། དེའི་ཚེའི་ཚད་ནི་བསྐལ་པ་བར་མ་བཞིར་
འགྱུར་རོ། །དེའི་ཉན་ཐོས་ཀྱི་ཚོགས་ནི་བདུན་འབུམ་དུ་འགྱུར་ཏེ། ཐམས་ཅད་ཀྱང་ཤེས་རབ་ཀྱིས་མོས་པ་རྣམ་པར་ཐར་པ་བརྒྱད་ལ་བསམ་གཏན་བྱེད་པ་ཤ་སྟག་གོ། །དེའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བྱེ་བ་ཕྲག་
བཅུ་གཉིས་སུ་འགྱུར་ཏེ། ཐམས་ཅད་ཀྱང་ཐབས་དང་ཤེས་རབ་ལས་བྱུང་བ་ཤ་སྟག་གོ། །དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་དམ་པའི་ཆོས་ནི་ལོ་བྱེ་བར་གནས་པར་འགྱུར་རོ། །འདམ་གྱི་དྲི་མ་མེད་པའི་འཇིག་
རྟེན་གྱི་ཁམས་དེ་ན་སེམས་ཅན་གང་ཡང་འགྱོད་པ་ལ་གནས་ཤིང་འཆི་བའི་དུས་བྱེད་པར་མི་འགྱུར་རོ། །དེ་ནས་ཤི་འཕོས་ནས་ཀྱང་འགྲོ་བ་ངན་པ་གསུམ་དུ་སྐྱེ་བར་འགྱུར་བ་གང་ཡང་མེད་དོ། །ཤཱ་རིའི་བུ་དེ་བཞིན་གཤེགས་པ་ཡུལ་ཤིན་
དུ་རྣམ་པར་དག་པ་དེ་ལ་སེམས་ཅན་གང་དག་ཆོས་ཉན་པ་དེ་ཀུན་ཉོན་མོངས་པ་ཐམས་ཅད་རྣམ་པར་དག་པར་འགྱུར་རོ། །དེ་བས་ན་ཤཱ་རིའི་བུ་གང་གང་ཟག་གིས་གང་ཟག་ལ་དྲོད་མ་གཟུང་ཤིག །གང་ཟག་གིས་གང་ཟག་ལ་དྲོད་བཟུང་ན་
ཉམས་པར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་འམ། གང་ང་དང་འདྲ་བས་ནི་གང་ཟག་ལ་དྲོད་ཟིན་ཏོ། །དེ་ནས་ཚེ་དང་ལྡན་པ་ཤཱ་རིའི་བུ་དང་། ཐམས་ཅད་ཡོད་པའི་འཁོར་དེ་ངོ་མཚར་ཐོབ་ནས་ཆེད་དུ་བརྗོད་པ་ཆེད་

57-1-288b

དུ་བརྗོད་ཅིང་། བཅོམ་ལྡན་འདས་བདག་ཅག་ནི་དེང་ཕན་ཆད་སེམས་ཅན་གང་ལ་ཡང་སེམས་ཅན་དམྱལ་བར་མཆི་བར་མཐུས་ལུང་མི་སྟོན་ཏོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སེམས་ཅན་གྱི་སྤྱོད་པ་ནི་བསམ་གྱིས་མི་ཁྱབ་
བོ་ཞེས་དེ་སྐད་ཀྱང་སྨྲའོ། །རྒྱལ་པོ་མ་སྐྱེས་དགྲ་ལུང་སྟོན་པའི་བསྟན་པ་འདི་བསྟན་པའི་ཚེ་ལྷའི་བུ་སུམ་ཁྲི་ཉིས་སྟོང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པར་གྱུར་ཏོ། །གང་གི་ཚེ་ན་བཅོམ་ལྡན་འདས་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡུལ་ཤིན་དུ་རྣམ་པར་དག་པས་བྱང་ཆུབ་ཐོབ་པར་གྱུར་པ་དེའི་ཚེ། བདག་ཅག་ཀྱང་འཇིག་རྟེན་གྱི་ཁམས་འདམ་གྱི་དྲི་མ་མེད་པའི་སངས་རྒྱས་ཀྱི་ཞིང་དེར་སྐྱེ་བར་
ཤོག་ཤིག་ཅེས་སངས་རྒྱས་ཀྱི་ཞིང་དེར་སྐྱེ་བར་སྨོན་ལམ་ཡང་བཏབ་བོ། །དེ་དག་ཐམས་ཅད་ཀྱང་སངས་རྒྱས་ཀྱི་ཞིང་དེར་སྐྱེ་བར་བཅོམ་ལྡན་འདས་ཀྱིས་ཀྱང་ལུང་བསྟན་ཏོ། །དེ་ནས་རྒྱལ་པོ་མ་སྐྱེས་དགྲའི་བུ་ན་ཚོད་ཀྱིས་ལོ་བརྒྱད་ལོན་
པའི་ཁྱེའུ་ཟླ་བའི་དཔལ་ཞེས་བྱ་བ་དེས་མགུལ་པ་ནས་རྒྱན་བཀྲོལ་ཏེ། བཅོམ་ལྡན་འདས་ག་ལ་བ་དེར་གཏོར་ནས་འདི་སྐད་ཀྱི་ཚིག་ཀྱང་སྨྲས་སོ། །བཅོམ་ལྡན་འདས་བདག་དགེ་བའི་རྩ་བ་འདི་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་བསྔོའོ། །བཅོམ་ལྡན་འདས་བདག་གི་དགེ་བའི་རྩ་བ་འདིས་ནམ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡུལ་ཤིན་དུ་རྣམ་པར་དག་པས་བྱང་ཆུབ་ཐོབ་པར་གྱུར་
པ་དེའི་ཚེ། བདག་སངས་རྒྱས་ཀྱི་ཞིང་དེར་འཁོར་ལོས་སྒྱུར་བའི་རྒྱལ་པོར་གྱུར་ལ། བདག་གིས་ནམ་འཚོའི་བར་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དགེ་སློང་གི་དགེ་འདུན་དང་བཅས་པ་
ལ་བསྙེན་བཀུར་བགྱི་བ་དང་། དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་པའི་སྐུ་གདུང་ལ་ཡང་བདག་མཆོད་པ་བགྱིད་པར་གྱུར་ཅིག །བཅོམ་ལྡན་འདས་དེ་མྱ་ངན་ལས་འདས་ནས་ཀྱང་འཇིག་རྟེན་གྱི་ཁམས་དེ་ཉིད་དུ་བླ་ན་མེད་པ་

57-1-289a

ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་གྱུར་ཅིག་ཅེས་རྒྱན་དེ་དག་གཏོར་མ་ཐག་ཏུ། དེ་ནས་སངས་རྒྱས་ཀྱི་མཐུས་དེའི་ཚེ་སྟེང་གི་བར་སྣང་ལ་རིན་པོ་ཆེ་སྣ་བདུན་ལས་བྱས་པའི་
ཁང་པ་བརྩེག་མ་ཆ་མཉམ་པ། ཤིན་དུ་ཕྱེ་བ་ཞིག་འདུག་པར་གྱུར་ཏེ། ཁང་པ་རྩེག་མ་དེ་ན་ཁྲི་རིན་པོ་ཆེས་སྤྲས་པའི་རྩ་བ་བཙུགས་པ། གོས་བཀྲམ་པ་ཞིག་བྱུང་བར་གྱུར་ཏེ། ཁྲི་དེ་ལ་ཡང་དེ་བཞིན་གཤེགས་པའི་སྐུ་མཚན་
ཉིད་ཀྱིས་ཀུན་དུ་བརྒྱན་པ་ཞིག་བཞུགས་པར་སྣང་ངོ་། །དེ་ནས་དེའི་ཚེ་བཅོམ་ལྡན་འདས་ཀྱིས་འཛུམ་པ་མཛད་པ་དང་། ཆོས་ཉིད་ཀྱིས་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ། བཅོམ་ལྡན་འདས་ཀྱི་
ཞལ་ནས་ཁ་དོག་དུ་མ་སྣ་ཚོགས་འབྱུང་བ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ཇ་གོང་དང་། ཤེལ་གྱི་ཁ་དོག་དང་། དངུལ་གྱི་ཁ་དོག་དག་བྱུང་བ་དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་
པར་ཁྱབ་པར་བྱས་ནས་ཚངས་པའི་འཇིག་རྟེན་གྱི་བར་དུ་སོང་སྟེ། ཉི་མ་དང་། ཟླ་བའི་འོད་ཟིལ་གྱིས་མནན་ནས་སླར་ལོག་སྟེ། བཅོམ་ལྡན་འདས་ལ་ལན་གསུམ་བསྐོར་ཏེ། བཅོམ་ལྡན་འདས་ཀྱི་སྤྱི་བོར་མི་སྣང་བར་སོང་ངོ་། །
དེ་ནས་ཚེ་དང་ལྡན་པ་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ཚིགས་
སུ་བཅད་པ་འདི་དག་གསོལ་ཏོ། །ཡེ་ཤེས་ཁྱད་པར་ཐམས་ཅད་ཕ་རོལ་ཕྱིན་པ་ཐུབ་པ་ཆགས་མེད་འོད་གཏོང་བ། །སེམས་ཅན་ཕ་རོལ་གྱི་ནི་སེམས་ཀྱི་སྤྱོད་པ་གང་གི་ཅི་འདྲ་བ་ཡང་མཁྱེན། །དབང་པོ་སྣ་ཚོགས་མཁྱེན་ནས་
ཁྱོད་ཀྱང་ཆོས་རྣམས་དེ་བཞིན་དུ་ནི་འཆད་མཛད་པ། ཁྱོད་ཀྱིས་ཅི་ཕྱིར་བདག་ལ་འཛུམ་པ་བསྟན་པ་འགྲོ་བ་ཀུན་གྱི་མཆོག་གསུངས་ཤིག །སེམས་ཅན་ཕྱོགས་བཅུ་དག་ན་གནས་པ་ཀུན་ཀྱང་ཁྱོད་ཀྱི་མདུན་དུ་འདུག་

57-1-289b

གྱུར་ཏེ། །ཐུབ་པ་ལ་ནི་རེ་རེ་ཞིང་ཡང་ཞུ་བ་བྱེ་བ་ཁྲག་ཁྲིག་ཞུ་བགྱིད་ཀྱང་། །ཁྱོད་ཀྱིས་སྐད་ཅིག་ཉིད་དུ་དེ་དག་གི་ནི་ཐེ་ཙོམ་མ་ལུས་གཅོད་པར་མཛད། །འཇིག་རྟེན་མགོན་པོ་ཁྱོད་ཀྱིས་འཛུམ་པ་བསྟན་པ་དེ་ཡི་རྒྱུ་ནི་བདག་
ལ་གསུངས། །སངས་རྒྱས་གང་དག་འདས་དང་སྟོབས་བཅུ་ལྡན་པའི་རྒྱལ་བ་གང་དག་བཞུགས་པ་དང་། །གང་དག་རྒྱལ་བ་མང་པོ་མ་བྱོན་རྣམས་དང་སེམས་ཅན་རྣམས་ནི་དཔག་མེད་པ། །ཐམས་ཅད་ཕ་རོལ་ཕྱིན་པ་
ཁྱོད་ཀྱིས་དེ་དག་མཁྱེན་ཅིང་གང་ལའང་ཆགས་པ་མེད། །ཅི་ཡི་སླད་དུ་འཛུམ་པ་བསྟན་པ་རྡུལ་དང་བྲལ་བས་བདག་གི་ཐེ་ཚོམ་ཆོད། །ཁྱོད་ཀྱི་འོད་ཀྱིས་ཚངས་པ་དབང་པོ་ཉི་མ་ཟླ་བ་ལྷ་རྣམས་ཟིལ་གྱིས་མནན། །རི་དང་ཁོར་
ཡུག་རྩེ་མོ་དག་ལས་ཐལ་ནས་ཁྱོད་ཀྱི་འོད་ཀྱང་གསལ་བར་གདའ། །རེག་ནས་སེམས་ཅན་བརྒྱ་དག་བདེ་བས་དགའ་ཞིང་ཉོན་མོངས་པ་ཡང་ལྡང་མི་འགྱུར། །ཉོན་མོངས་ཐམས་ཅད་དགྲོལ་བ་ཁྱོད་ཀྱིས་འཛུམ་འདི་ཅི་ཕྱིར་
མཛད་པ་བདག་ལ་གསུངས། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་དགའ་བོ་ལ་འདི་སྐད་ཅེས་བཀའ་སྩལ་ཏོ། །དགའ་བོ་ཁྱོད་ཀྱིས་ཁྱེའུ་ཟླ་བའི་དཔལ་འདི་མཐོང་ངམ། གསོལ་པ། བཅོམ་
ལྡན་འདས་བདག་གིས་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། དགའ་བོ་ཁྱེའུ་ཟླ་བའི་དཔལ་འདིས་ངའི་དྲུང་དུ་དགེ་བའི་རྩ་བ་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་སྟེ། 
དགའ་བོ་ཁྱེའུ་འདིས་རིམ་གྱིས་བྱང་ཆུབ་སེམས་དཔའི་སྤྱོད་པ་སྤྱད་ནས་ནམ་དེ་བཞིན་གཤེགས་པ་ཡུལ་ཤིན་དུ་རྣམ་པར་དག་པས་བྱང་ཆུབ་ཐོབ་པར་འགྱུར་བ་དེའི་ཚེ། ཁྱེའུ་ཟླ་བའི་དཔལ་འདི་ཡང་འཇིག་རྟེན་གྱི་ཁམས་
དེར་འཁོར་ལོས་སྒྱུར་བའི་རྒྱལ་པོར་འགྱུར་ཏེ། དེས་དེ་བཞིན་གཤེགས་པ་ཡུལ་ཤིན་དུ་རྣམ་པར་དག་པ་དགེ་སློང་གི་དགེ་འདུན་དང་བཅས་པ་དེ་ལ་ནམ་འཚོའི་བར་དུ་བཀུར་སྟི་བྱེད་པར་འགྱུར། སྟི་སྟང་བྱེད་པར་འགྱུར། 

57-1-290a

རིམ་གྲོ་བྱེད་པར་འགྱུར། མཆོད་པ་བྱེད་པར་འགྱུར་རོ། །དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ཀྱང་སྐུ་གདུང་ལ་མཆོད་པ་བྱེད་པར་འགྱུར་རོ། །དེ་ནི་དེར་དེ་བཞིན་གཤེགས་པ་ཡང་ཡོངས་སུ་
མྱ་ངན་ལས་འདས། དེ་ནས་བསྟན་པ་ཡང་ནུབ་ནས་དགའ་ལྡན་དུ་ཚེ་ཟད་པར་བྱས་ཏེ། བསྐལ་པ་དེ་ཉིད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བའི་དཔལ་ཞེས་བྱ་བར་འགྱུར་རོ། །སངས་རྒྱས་ཀྱི་ཞིང་ཡང་དེ་དང་འདྲ་བ། ཚེའི་ཚད་ཀྱང་དེ་དང་མཉམ་པ། ཉན་ཐོས་ཀྱི་དགེ་འདུན་ཡང་དེ་དང་མཉམ་པ་བྱང་ཆུབ་སེམས་
དཔའི་དགེ་འདུན་ཡང་དེ་དང་མཉམ་པར་འགྱུར་རོ། །དེ་ནས་གང་འཇམ་དཔལ་གཞོན་ནུར་གྱུར་པ་དང་འགྲོགས་ཏེ། འཇིག་རྟེན་གྱི་ཁམས་གཞན་ནས་འཇིག་རྟེན་གྱི་ཁམས་འདིར་ཕྱིན་པའི་བྱང་ཆུབ་སེམས་དཔའ་དེ་དག་
གིས་བསྟན་པ་འདི་ཐོས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ས་ཕྱོགས་གང་ན་འཇམ་དཔལ་གཞོན་ནུར་གྱུར་པ་གནས་པ་དེ་ན་དེ་བཞིན་གཤེགས་པས་སྟོང་པ་མ་ལགས་ཏེ། དེར་ནི་བཅོམ་
ལྡན་འདས་ཀྱིས་དགོངས་པར་བགྱི་མི་འཚལ་ལོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འཇམ་དཔལ་གཞོན་ནུར་གྱུར་པས་ཡོངས་སུ་ཟིན་པའི་སེམས་ཅན་རྣམས་ནི་འགྲོ་བ་ངན་པའི་འཇིགས་པ་འམ། མི་ཁོམ་པའི་
འཇིགས་པ་འམ། བདུད་ཀྱི་ལས་ཀྱི་འཇིགས་པ་འམ། ཉོན་མོངས་པའི་འཇིགས་པ་མ་མཆིས་སོ། །བཅོམ་ལྡན་འདས་གྲོང་ངམ། གྲོང་ཁྱེར་རམ། གྲོང་མདབ་བམ། གཞོངས་སམ། གཞོངས་ཀྱི་ཕྱོགས་སམ། 
གཙུག་ལག་ཁང་ངམ། དགོན་པ་གང་ན་ཆོས་ཀྱི་རྣམ་གྲངས་འདི་སྤྱོད་པར་འགྱུར་བའི་ས་ཕྱོགས་དེ་ཡང་བཅོམ་ལྡན་འདས་དེ་བཞིན་གཤེགས་པས་སྟོང་པ་མ་ལགས་སོ། །དེ་ཅིའི་སླད་དུ་ཞེ་ན། གང་ན་ཆོས་ཀྱི་རྣམ་གྲངས་འདི་

57-1-290b

སྤྱོད་པར་འགྱུར་བ་དེ་ན་དེ་བཞིན་གཤེགས་པ་ཉིད་དུ་བརྩོན་པར་བལྟ་བར་བགྱིའོ། །གང་ན་ཆོས་ཀྱི་རྣམ་གྲངས་འདི་སྤྱོད་པའི་ས་ཕྱོགས་དེ་ནི་དེ་བཞིན་གཤེགས་པས་ཡོངས་སུ་སྤྱད་པར་བལྟ་བར་བགྱིའོ། །དེ་སྐད་ཅེས་
གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །དེ་དེ་བཞིན་ནོ། །རིགས་ཀྱི་བུ་ཇི་སྐད་སྨྲས་པ་དེ་བཞིན་ཏེ། གང་ན་ཆོས་ཀྱི་རྣམ་གྲངས་འདི་སྤྱོད་པར་འགྱུར་བའི་ས་
ཕྱོགས་དེ་ནི་དེ་བཞིན་གཤེགས་པས་སྤྱོད་པ་ཡིན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ་དག་སྔོན་འདས་པའི་དུས་ན་དེ་བཞིན་གཤེགས་པ་མར་མེ་མཛད་ཀྱིས་ང་ལུང་བསྟན་པར་གྱུར་ནས། སའི་ཕྱོགས་གང་དུ་ངས་རལ་པ་བཏིང་
ཞིང་ངས་བཟོད་པ་ཐོབ་པར་གྱུར་པ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱིས་ང་བཟོད་པ་ཐོབ་པར་མཁྱེན་ནས། ཁྱེའུ་འདི་བསྐལ་པ་གྲངས་མེད་པ་ན་ཤཱཀྱ་ཐུབ་
པ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ན་དེ་བཞིན་གཤེགས་པ་མར་མེ་མཛད་
དེས། དགེ་སློང་གི་དགེ་འདུན་ལ་དགེ་སློང་དག་ཁྱེད་སུས་ཀྱང་སའི་ཕྱོགས་འདི་རྐང་པས་མ་བཅག་ཤིག །དེ་ཅིའི་ཕྱིར་ཞེ་ན། གང་དུ་ཁྱེའུ་འདིས་རལ་པ་བཏིང་ཞིང་བཟོད་པ་ཐོབ་པ་དེ་ནི་ལྷ་དང་མིའི་འཇིག་རྟེན་དུ་བཅས་པའི་
མཆོད་རྟེན་ཡིན་ནོ། །ཡང་སའི་ཕྱོགས་འདིར་མཆོད་རྟེན་བྱེད་པར་སྤྲོ་ཞེས་དེ་སྐད་བཀའ་སྩལ་པ་དང་། རིགས་ཀྱི་བུ་དག་དེ་ན་ལྷ་བྱེ་བ་ཕྲག་བརྒྱད་བཅུས་བཅོམ་ལྡན་འདས་ས་ཕྱོགས་འདིར་མཆོད་རྟེན་བགྱི་བར་
བདག་ཅག་སྤྲོའོ་ཞེས་མགྲིན་གཅིག་ཏུ་ཚིག་སྨྲས་སོ། །དེ་ན་ཁྱིམ་བདག་ལྷ་བཟང་ཞེས་བྱ་བ་ཞིག་འཁོར་དེར་འདུས་པར་གྱུར་པ་དེས་ཀྱང་བཅོམ་ལྡན་འདས་བདག་གིས་ས་ཕྱོགས་འདིར་མཆོད་རྟེན་བགྱི་བར་སྤྲོའོ། །

57-1-291a

ཞེས་སྨྲས་ཏེ། རིགས་ཀྱི་བུ་དག་ས་ཕྱོགས་དེར་ཁྱིམ་བདག་ལྷ་བཟང་ཞེས་བྱ་བ་དེས་མཆོད་རྟེན་རྒྱན་ཐམས་ཅད་ཀྱིས་བརྒྱན་པ་ཞིག་བྱས་སོ། །བྱས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་
ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ས་ཕྱོགས་དེར་རིན་པོ་ཆེ་སྣ་བདུན་ལས་མཆོད་རྟེན་བགྱིས་ན་བཅོམ་ལྡན་འདས་བདག་གིས་བསོད་ནམས་ཇི་ཙམ་ཞིག་བགྱིས་པར་གྱུར། དེ་སྐད་
ཅེས་གསོལ་པ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱིས་ཁྱིམ་བདག་ལྷ་བཟང་ལ་སའི་ཕྱོགས་གང་དུ་བྱང་ཆུབ་སེམས་དཔའ་བཟོད་པ་ཐོབ་པའི་ས་ཕྱོགས་དེ་ན་ཤིང་
རྟའི་འཁོར་ལོ་ཙམ་གྱི་ས་ཇི་སྙེད་པ་འོག་ཏུ་ཆུའི་ཕུང་པོ་ལ་ཐུག་གི་བར་དུ་ས་ཆེན་པོ་དེ་སེམས་ཅན་ཐམས་ཅད་ཀྱི་མཆོད་རྟེན་དུ་གྱུར་པ་ཡིན་ཏེ། ཁྱིམ་བདག་གང་གིས་ཆུའི་ཕུང་པོ་ནས་འཁོར་བའི་རྩེ་མོའི་བར་དུ་རིན་པོ་ཆེ་སྣ་བདུན་
གྱིས་བཀང་སྟེ་དེ་བཞིན་གཤེགས་པ་ལ་ཕུལ་བ་བས། གང་ཁྱོད་ཀྱིས་མཆོད་རྟེན་བྱས་པ་འདི་དེ་བས་བསོད་ནམས་ཤིན་དུ་མང་མོད་ཀྱི། ཁྱིམ་བདག་དགེ་བའི་རྩ་བ་འདིས་ནི་ཇི་ལྟར་ཁྱེའུ་འདི་ངས་ད་ལྟར་ལུང་བསྟན་པ་དེ་བཞིན་
དུ་འདི་བྱང་ཆུབ་ཐོབ་ནས་ཁྱོད་ལ་ལུང་སྟོན་པར་འགྱུར་རོ་ཞེས་དེ་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཇི་སྙམ་དུ་སེམས། དེའི་ཚེ་དེའི་དུས་ན་ཁྱིམ་བདག་ལྷ་བཟང་ཞེས་བྱ་བ་དེ་གཞན་དུ་གྱུར་པ་སྙམ་དུ་དེ་ལྟར་མ་བལྟ་
ཞིག །དེ་ཅིའི་ཕྱིར་ཞེ་ན། ཁྱིམ་བདག་གི་བུ་དགའ་བ་སྤྱོད་པ་ཞེས་བྱ་བ་འདི་ཉིད་དེའི་ཚེ་དེའི་དུས་ན་ཁྱིམ་བདག་ལྷ་བཟང་ཞེས་བྱ་བར་གྱུར་ཏེ། འདི་ཡང་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་
སྟེ། མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བལྟ་ན་བཟང་ཞེས་བྱ་བར་འགྱུར་རོ། །དེ་བས་ན་རིགས་ཀྱི་བུ་དག་དགེ་སློང་ངམ། དགེ་སློང་མ་འམ། དགེ་བསྙེན་

57-1-291b

ནམ། དགེ་བསྙེན་མ་འདུག་ཀྱང་རུང་། འགྲེང་ཡང་རུང་སྟེ། ཆོས་ཀྱི་རྣམ་གྲངས་འདི་འདྲི་འམ། ཀློག་གམ། ཁ་ཏོན་བྱེད་དམ། ཁ་ཏོན་ཞུ་འམ། འཆད་ན་འོག་གི་ཆུའི་ཕུང་པོ་ནས་སའི་ཕྱོགས་དེའི་བར་གྱི་རྡུལ་དེ་ཐམས་
ཅད་སེམས་ཅན་ཐམས་ཅད་ཀྱི་མཆོད་རྟེན་དུ་གྱུར་པར་བལྟའོ། །དེ་ཅིའི་ཕྱིར་ཞེ་ན། ཆོས་འདི་དག་ཉིད་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བཟོད་པ་ཐོབ་པར་འགྱུར་བའོ། །རིགས་ཀྱི་བུ་དག་ཁྱེད་ལ་
བསྒོའོ། །ཁྱེད་ཀྱི་ཁོང་དུ་ཆུད་པར་བྱའོ། །རིགས་ཀྱི་བུ་འམ་རིགས་ཀྱི་བུ་མོ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་བཀང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ཉན་ཐོས་ཀྱི་དགེ་འདུན་དང་བཅས་པ་རྣམས་ལ་རྒྱུན་མ་ཆད་ཅིང་ལས་གཞན་མི་བྱེད་པར་ཉིན་ལན་གསུམ་མཚན་ལན་གསུམ་འབུལ་བ་བས་གང་གིས། རྒྱལ་པོ་མ་སྐྱེས་དགྲའི་ལེའུ་ཐེ་ཙོམ་
ཐམས་ཅད་གཅོད་པར་བྱེད་པ། འགྱོད་པ་ཐམས་ཅད་སེལ་བར་བྱེད་པ། ལས་ཀྱི་སྒྲིབ་པ་ཐམས་ཅད་རྣམ་པར་སྦྱོང་བར་བྱེད་པ། ཆོས་ཐམས་ཅད་མཉམ་ཉིད་དུ་སྟོན་པའི་ཆོས་ཀྱི་རྣམ་གྲངས་འདི་འཛིན་ཏམ། ལེན་ཏམ། 
ཀློག་གམ། ཀུན་ཆུབ་པར་བྱེད་དམ། འཆད་དམ། ཉན་ཏམ། མོས་པར་བྱེད་དམ། ཆུང་ངུ་ན་དམ་པའི་ཆོས་ཡུན་རིང་དུ་གནས་པར་བྱ་བའི་ཕྱིར་གླེགས་བམ་དུ་བྲིས་ཏེ་འཆང་ན་འདི་ནི་དེ་བས་ཤིན་དུ་བསོད་ནམས་མང་དུ་འཕེལ་
ལོ། །རིགས་ཀྱི་བུ་དག་གང་གིས་བསྐལ་པ་འམ། བསྐལ་པའི་ལྷག་མ་ལུས་ཀྱི་བར་དུ་ཚུལ་ཁྲིམས་སྲུང་ཞིང་སྦྱངས་པའི་ཡོན་ཏན་དང་ཆོག་ཤེས་པ་ཐམས་ཅད་ལ་དགའ་བར་འགྱུར་བ་བས་གང་གིས་ཆོས་ཀྱི་རྣམ་གྲངས་འདི་
ཐོས་མ་ཐག་ཏུ་མོས་པར་བྱེད་ན་འདི་ནི་དེ་བས་བསོད་ནམས་ཤིན་དུ་མང་དུ་འཕེལ་ལོ། །རིགས་ཀྱི་བུ་དག་གང་གིས་བསྐལ་པ་འམ། བསྐལ་པའི་ལྷག་མ་ལུས་ཀྱི་བར་དུ་བཟོད་པས་སྒྲུབ་ཅིང་སེམས་ཅན་ཐམས་ཅད་

57-1-292a

ཀྱི་ངན་དུ་སྨྲ་བ་དང་། རྡེག་པར་བྱེད་པ་བཟོད་པ་བས། གང་གིས་ཆོས་ཀྱི་རྣམ་གྲངས་འདི་ལ་ཆོས་ལ་བཟོད་པ་དེ་ནི་བཟོད་པ་དེ་བས་བསོད་ནམས་ཀྱི་ཕུང་པོ་ཤིན་དུ་མཆོག་ཏུ་འཕེལ་བར་འགྱུར་རོ། །རིགས་ཀྱི་
བུ་དག་གང་གིས་བསྐལ་པ་འམ། བསྐལ་པའི་ལྷག་མ་ལུས་ཀྱི་བར་དུ་སེམས་ཅན་ཐམས་ཅད་ལ་ཉོན་མི་མོངས་ཤིང་། ལུས་དང་སྲོག་ལ་མི་ལྟ་བར་བསྙེན་བཀུར་བྱེད་པ་བས། གང་གིས་ཆོས་ཀྱི་རྣམ་གྲངས་འདི་ལ་ཡིད་ཆེས་
ཤིང་ཐེ་ཙོམ་མི་སྐྱེད་ན་བརྩོན་འགྲུས་འདི་ནི་དེ་བས་ཁྱད་དུ་ཞུགས་པ་ཡིན་ནོ། །རིགས་ཀྱི་བུ་དག་གང་གིས་བསྐལ་པ་འམ། བསྐལ་པའི་ལྷག་མ་ལུས་ཀྱི་བར་དུ་བསམ་གཏན་དང་། ཏིང་ངེ་འཛིན་དང་མཉམ་པར་བཞག་པ་ལ་གནས་
པ་བས། གང་གིས་ཆོས་ཀྱི་རྣམ་གྲངས་འདི་ལ་རྟོག་ཅིང་སེམས་མ་ཞུམ་པ་འདི་ནི་དེ་བས་ཁྱད་དུ་ཞུགས་པ་ཡིན་ནོ། །རིགས་ཀྱི་བུ་གང་བསྐལ་པ་འམ། བསྐལ་པའི་ལྷག་མ་ལུས་ཀྱི་བར་དུ་ཤེས་རབ་ཀྱིས་རྟོག་ཅིང་དེའི་ཚུལ་གྱི་
རྟོག་པ་དང་ལྡན་པར་གྱུར་པ་བས། གང་གིས་ཤིན་དུ་དབེན་པ། རང་བཞིན་རྣམ་པར་དག་པའི་ཆོས་ཀྱི་རྣམ་གྲངས་འདི་ལ་ཉན་པར་བྱེད། མོས་པར་བྱེད། ལེན་པར་བྱེད། ཀློག་པར་བྱེད། ཀུན་ཆུབ་པར་བྱེད། ཁ་ཏོན་དུ་བྱེད། གཞན་
ལ་རྒྱ་ཆེར་སྟོན་པར་བྱེད་ན་དེ་བས་འདི་ཉིད་བསོད་ནམས་ཤིན་དུ་མང་དུ་འཕེལ་ལོ། །མྱུར་དུ་ཐམས་ཅད་མཁྱེན་པར་འགྱུར་བར་ཡང་འགྱུར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་
འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཆོས་ཀྱི་རྣམ་གྲངས་འདི་བླངས་ལགས་ཏེ། བཅོམ་ལྡན་འདས་བདག་ཅག་སངས་རྒྱས་ཀྱི་ཞིང་གང་དང་གང་དུ་སྤྱོད་པའི་སངས་རྒྱས་ཀྱི་ཞིང་དེ་དང་དེ་དག་དུ་ཆོས་
ཀྱི་རྣམ་གྲངས་འདི་བཤད་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་དེའི་ཕྱིར་ཁྱེད་སངས་རྒྱས་ཀྱི་ཞིང་གང་དང་གང་དུ་ཆོས་ཀྱི་རྣམ་གྲངས་འདི་འཆད་པ་དེ་དང་དེ་དག་ཏུ་སངས་རྒྱས་ཀྱི་བྱ་བ་བྱེད་དོ། །

57-1-292b

དེ་ཅིའི་ཕྱིར་ཞེ་ན། རིགས་ཀྱི་བུ་དག་ཆོས་ཀྱི་རྣམ་གྲངས་འདི་སངས་རྒྱས་ཀྱི་བྱ་བ་ལ་མངོན་པར་གནས་པ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་འདི་མེ་ཏོག་གིས་གང་བར་བྱས་ཏེ་ཆེད་དུ་རྗོད་པ་ཆེད་དུ་རྗོད་ཅིང་འདི་སྐད་ཀྱང་སྨྲའོ། །ཀྱེ་མའོ་ཆོས་ཀྱི་རྣམ་གྲངས་འདི་ནི་ཡུན་རིང་དུ་འཛམ་བུའི་གླིང་དུ་གནས་པར་གྱུར་ཅིག །ཀྱེ་མའོ་བཅོམ་ལྡན་འདས་ཤཱཀྱ་ཐུབ་པའི་ཆོས་ཀྱི་
སྒྲོན་མ་ཡུན་རིང་དུ་འབར་བར་གྱུར་ཅིག །འཇམ་དཔལ་གཞོན་ནུར་གྱུར་པ་ཡང་ཡུན་རིང་དུ་གནས་པར་གྱུར་ཅིག །དེ་ལ་གནས་ནས་འདི་ལྟ་བུའི་ཆོས་ཀྱི་ཚུལ་གྱི་རྣམ་པ་འཆད་པར་འགྱུར་རོ། །བཅོམ་ལྡན་འདས་བདག་གིས་ནི་ཤ་དང་ཁྲག་
གིས་ཀྱང་འཇམ་དཔལ་གཞོན་ནུར་གྱུར་པ་ལ་སྨན་ཡོན་ཐོགས་པར་མི་ནུས་ན་མཆོད་པ་གཞན་གྱིས་ལྟ་སྨོས་ཀྱང་ཅི་འཚལ། ཆོས་ཀྱི་རྣམ་གྲངས་འདི་གང་དག་གི་ལག་ཏུ་མཆི་བའི་རིགས་ཀྱི་བུ་དང་། རིགས་ཀྱི་བུ་མོ་གང་དག་ལ་ཡང་ཤ་
དང་ཁྲག་གིས་ཀྱང་སྨན་ཡོན་མི་ཐོགས་སོ། །བཅོམ་ལྡན་འདས་དེ་བཞིན་གཤེགས་པ་ལ་ལྟ་བར་འཚལ་བའི་རིགས་ཀྱི་བུ་དང་རིགས་ཀྱི་བུ་མོས་དེ་དག་ཉིད་ལ་བལྟ་བར་བགྱིའོ། །དེ་བཞིན་གཤེགས་པ་ལ་མཆོད་པར་འཚལ་བས་དེ་དག་
ཉིད་ལ་མཆོད་པར་བགྱིའོ། །བཅོམ་ལྡན་འདས་ལ་དད་པའི་རིགས་ཀྱི་བུ་འམ། རིགས་ཀྱི་བུ་མོས་དེ་དག་ལ་སྟོན་པར་འདུ་ཤེས་བསྐྱེད་པར་བགྱིའོ། །དེ་སྐད་ཅེས་གསོལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་ཏེ། འཇམ་དཔལ་གཞོན་ནུར་གྱུར་པ་ལ་ཡང་མཆོད་ནས། སངས་རྒྱས་ཀྱི་ཞིང་འདི་ནས་མི་སྣང་བར་གྱུར་ཏེ། བདག་བདག་གི་
སངས་རྒྱས་ཀྱི་ཞིང་དུ་འཁོད་ནས། བདག་བདག་གི་ཡང་དག་པར་རྫོགས་པའི་སངས་རྒྱས་རྣམས་ཀྱི་སྤྱན་སྔར་དེ་དག་ཐམས་ཅད་ཀྱིས་ཆོས་ཀྱི་རྣམ་གྲངས་འདི་ཇི་ལྟར་བླངས་པ་བཞིན་དུ་རྒྱ་ཆེར་བཤད་པ་དང་། དེར་ཡང་སེམས་ཅན་

57-1-293a

དཔག་ཏུ་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་བཀའ་སྩལ་པ། 
བྱམས་པ་ཁྱོད་ཀྱིས་ཆོས་ཀྱི་རྣམ་གྲངས་འདི་འགྲོ་བ་མང་པོ་ལ་ཕན་པ་དང་། འགྲོ་བ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་མི་རྣམས་ཀྱི་དོན་གྱི་ཕྱིར། ཕན་པའི་ཕྱིར། བདེ་བའི་ཕྱིར། ཆོས་ཀྱི་རྣམ་གྲངས་
འདི་ལོང་ཤིག །ཟུང་ཤིག །ལྷོགས་ཤིག །ཤོད་ཅིག །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་
འདས་བདག་གིས་ཆོས་ཀྱི་རྣམ་གྲངས་འདི་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ལས་ཀྱང་བླངས་ལགས་ཏེ། དེ་ཡང་བཅོམ་ལྡན་འདས་ལས་མངོན་སུམ་དུ་ཐོས་ཏེ། བཅོམ་ལྡན་འདས་བདག་གིས་ཆོས་
ཀྱི་རྣམ་གྲངས་འདི་ནི་ད་ལྟར་དེ་བཞིན་གཤེགས་པ་བཞུགས་བཞིན་དུ་ཡང་རྒྱས་པར་བགྱིའོ། །བཅོམ་ལྡན་འདས་ཡོངས་སུ་མྱ་ངན་ལས་འདས་ནས་ཀྱང་བདག་དགའ་ལྡན་གྱི་གནས་ན་གནས་བཞིན་དུ་ཆོས་ཀྱི་རྣམ་
གྲངས་འདིའི་དགེ་བའི་རྩ་བ་འབར་ཞིང་ཐེག་པ་ཆེན་པོ་ལ་གནས་པའི་རིགས་ཀྱི་བུ་དང་། རིགས་ཀྱི་བུ་མོ་དག་ལ་བསྟབས་པར་བགྱིའོ། །བཅོམ་ལྡན་འདས་ཕྱི་མའི་དུས་ཕྱི་མའི་ཚེ་ན་ཆོས་ཀྱི་རྣམ་གྲངས་འདི་གང་
དག་གི་རྣ་ལམ་དུ་གྲག་པར་འགྱུར་བ་དེ་ནི་ངེས་པར་བྱང་ཆུབ་སེམས་དཔའ་བྱམས་པའི་བྱིན་གྱིས་བརླབས་ལགས་པར་རྟོགས་པར་བགྱིའོ། །བདུད་སྡིག་ཅན་དག་ཆོས་ཀྱི་རྣམ་གྲངས་འདི་ལྟ་བུ་མི་གདའ་བར་བགྱི་བའི་
སླད་དུ་རྡུལ་དུ་ལགས་ཀྱིས་ཀྱང་། བཅོམ་ལྡན་འདས་བདག་གིས་ནི་སངས་རྒྱས་ཀྱི་མཐུ་དང་། སངས་རྒྱས་ཀྱི་བྱིན་གྱི་བརླབས་ཀྱིས་ཆོས་ཀྱི་རྣམ་གྲངས་འདི་ལྟ་བུ་ཡོངས་སུ་གཟུང་བར་བགྱིའོ། །དེ་ནས་བཅོམ་ལྡན་

57-1-293b

འདས་ཀྱིས་བརྒྱ་བྱིན་ལྷའི་དབང་པོ་ལ་བཀའ་སྩལ་པ། ཀཽ་ཤི་ཀ་རྒྱལ་པོ་མ་སྐྱེས་དགྲའི་ལེའུ་ཐེ་ཙོམ་ཐམས་ཅད་གཅོད་པར་བྱེད་པ། འགྱོད་པ་ཐམས་ཅད་སེལ་བར་བྱེད་པ། ལས་ཀྱི་སྒྲིབ་པ་ཐམས་ཅད་སྦྱོང་བར་བྱེད་པ། 
ཆོས་ཐམས་ཅད་ཀྱི་མཉམ་པ་ཉིད་སྟོན་པའི་ཆོས་ཀྱི་རྣམ་གྲངས་འདི་ཟུང་ཤིག །དེ་ཅིའི་ཕྱིར་ཞེ་ན། ཀཽ་ཤི་ཀ་དེ་ལྟར་ཁྱོད་གང་གི་ཚེ་ན་ལྷ་དང་ལྷ་མ་ཡིན་གྱི་གཡུལ་དུ་འཇུག་པ་དེའི་ཚེ་ཆོས་ཀྱི་རྣམ་གྲངས་འདི་ལ་སོམས་ཤིག །
ཀཽ་ཤི་ཀ་ཁྱོད་ཀྱིས་ཆོས་ཀྱི་རྣམ་གྲངས་འདི་ལ་བསམས་ན་ལྷ་རྣམས་ནི་རྒྱལ། ལྷ་མ་ཡིན་རྣམས་ནི་ཕམ་པར་འགྱུར་བར་རེ་བར་བྱའོ། །ཀཽ་ཤི་ཀ་ཁྱོད་ལ་བསྒོའོ། །ཁྱོད་ཀྱིས་ཁོང་དུ་ཆུད་པར་བྱའོ། །གྲོང་ངམ། གྲོང་ཁྱེར་རམ། 
གྲོང་འདབ་བམ། ལྗོངས་སམ། ཡུལ་ལམ། རྒྱལ་པོའི་ཕོ་བྲང་འཁོར་གང་དུ་ཡང་ཆོས་ཀྱི་རྣམ་གྲངས་འདི་སྤྱོད་པ་དེ་ན་ཕྱིར་རྒོལ་བ་འམ། དགྲ་ཀླན་ཀ་ཚོལ་ཞིང་གླགས་ལྟ་བ་ལས་གླགས་མི་རྙེད་པར་འགྱུར་རོ། །དེ་བས་ན་
ཀཽ་ཤི་ཀ་རྒྱལ་པོའི་ཕོ་བྲང་དུ་སོང་ཡང་རུང་། རྐུན་པོའི་ནང་དུ་སོང་ཡང་རུང་། གཏུམ་པོའི་ནང་དུ་སོང་ཡང་རུང་། དགྲའི་ནང་དུ་སོང་ཡང་རུང་། ཕྱིར་རྒོལ་བའི་ནང་དུ་སོང་ཡང་རུང་། མེ་དང་། དུག་དང་། མཚོན་དང་། ཆུའི་ནང་དུ་སོང་ཡང་རུང་སྟེ། 
ཆོས་ཀྱི་རྣམ་གྲངས་འདི་ལ་བསམ་པར་བྱའོ། །དེ་ལྟར་བྱས་ན་ཀླན་ཀ་ཚོལ་བ་གང་གིས་ཀྱང་གླགས་མི་རྙེད་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་དགའ་བོ་ལ་བཀའ་སྩལ་པ། དགའ་བོ་ཁྱོད་ཀྱིས་ཆོས་ཀྱི་
རྣམ་གྲངས་འདི་ཟུང་ཤིག །ལོང་ཤིག །ལྷོགས་ཤིག །ཤོད་ཅིག །དེ་ཅིའི་ཕྱིར་ཞེ་ན། དགའ་བོ་དེ་ལྟར་རིགས་ཀྱི་བུ་འམ། རིགས་ཀྱི་བུ་མོ་དག་གིས་ཆོས་ཀྱི་རྣམ་གྲངས་འདི་ཁྱོད་ལས་ཐོས་ནས་ཐེ་ཙོམ་ཐམས་ཅད་གཅོད་
པར་འགྱུར་རོ། །དེ་དག་གི་ནེམ་ནུར་ཐམས་ཅད་བྱང་བར་འགྱུར་རོ། །འགྱོད་པ་ཐམས་ཅད་བསལ་བར་འགྱུར་རོ། །ལས་ཀྱི་སྒྲིབ་པ་འམ་ཉོན་མོངས་པའི་སྒྲིབ་པས་གླགས་པར་བྱ་མི་ནུས་པར་འགྱུར་ཏེ། གང་དག་གིས་

57-1-294a

ཆོས་ཀྱི་རྣམ་གྲངས་འདི་ངེས་པར་མཉན་པར་བྱ་བ་དེ་དག་ནི་ཆོས་ཀྱི་རྣམ་གྲངས་འདི་མ་ཐོས་པར་འཆི་བའི་དུས་བྱེད་པར་མི་འགྱུར་རོ། །དེ་ཅིའི་ཕྱིར་ཞེ་ན། དགའ་བོ་འདི་ནི་མ་འདྲེས་པའི་ཆོས་ཀྱི་རྣམ་གྲངས་ཀྱི་
ཆོས་ཡིན་ཏེ་འདི་ཐོས་མ་ཐག་ཏུ་ཐེ་ཙོམ་ཐམས་ཅད་མེད་པར་འགྱུར་རོ། །དགའ་བོ་ཁྱོད་ལ་བསྒོའོ། །ཁོང་དུ་ཆུད་པར་བྱའོ། །གང་མཚམས་མེད་པ་བྱེད་པས་ཀྱང་ཆོས་ཀྱི་རྣམ་གྲངས་འདི་ལ་འཇུག་ཅིང་མོས་པར་བྱེད་ན་ལས་དེའི་ལས་
ཀྱི་སྒྲིབ་པ་ཡོད་པར་ང་མི་སྨྲའོ། །དེ་ནས་བཅོམ་ལྡན་འདས་ལ་གནས་བརྟན་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ལ་བདག་མངོན་སུམ་དུ་མཆི་སྟེ། གང་གི་ཚེ་ན་འཇམ་དཔལ་
གཞོན་ནུར་གྱུར་པས་རྒྱལ་པོ་མ་སྐྱེས་དགྲའི་ཁབ་དུ་ཟས་འཚལ་ཅིང་མཚམས་མ་མཆིས་པའི་མཉམ་པ་ཉིད་བསྟན་པའི་ཆོས་ཀྱི་རྣམ་གྲངས་འདི་བཤད་པ་ན་རྒྱལ་པོ་མ་སྐྱེས་དགྲས་འཐུན་པའི་ཆོས་ལ་བཟོད་པ་ཐོབ་ཅིང་དེའི་འགྱོད་པ་
བྱང་བར་གྱུར་པ་དེའི་ཚེ། བཅོམ་ལྡན་འདས་བདག་འདི་སྙམ་དུ་གྱུར་ཏེ། མཚམས་མ་མཆིས་པ་བགྱིད་པ་ཐམས་ཅད་ཀྱི་ཆོས་ཉིད་ནི་གང་རྒྱལ་པོ་མ་སྐྱེས་དགྲས་རྟོགས་པ་དེ་ཉིད་ལགས་ན་བཅོམ་ལྡན་འདས་བྱིས་པ་ལྟ་བུ་སོ་སོའི་
སྐྱེ་བོ་དག་ནི་དེ་ལྟར་ཆོས་རང་བཞིན་གྱིས་ཞི་བ་ལ་བདག་དང་བདག་གིར་རྣམ་པར་བརྟགས་ནས་ལྟ་བ་འབྱུང་བར་བགྱིད་ཅིང་། ཅི་ལྟར་རྒྱལ་པོ་མ་སྐྱེས་དགྲས་རྟོགས་པ་བཞིན་དུ་མཚམས་མེད་པ་བགྱིད་པ་ཐམས་ཅད་ཀྱི་རང་བཞིན་དེ་
འདྲ་བ་ལགས་པར་ནི་མ་འཚལ་ཏེ། ཕྱིན་ཅི་ལོག་གིས་ཕྱིན་ཅི་ལོག་ཏུ་གྱུར་ཅིང་། མ་མཆིས་པ་ལ་ཡོངས་སུ་རྟོག་པས་བཏབ་པ་རྣམས་ནི་མ་མཆིས་བཞིན་དུ་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་
འཇིག་རྟེན་དུ་སྡུག་བསྔལ་བར་གྱུར་ཏེ། བཅོམ་ལྡན་འདས་བདག་ནི་གང་ཆོས་ཀྱི་རྣམ་གྲངས་འདི་ལ་མོས་པ་དེ་དག་ལ་ལྟུང་བ་མ་མཆིས། ལྟུང་བའི་ཆོས་ཅན་མ་ལགས་སོ་སྙམ་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་

57-1-294b

པ། ལེགས་སོ་ལེགས་སོ། །འོད་སྲུང་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། སངས་རྒྱས་བཅོམ་ལྡན་འདས་རྣམས་བྱང་ཆུབ་ནི་ཀུན་ནས་ཉོན་མོངས་པ་མེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་དགའ་བོས་
འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཅི་ནས་ཀྱང་ཕྱི་མའི་དུས་ཕྱི་མའི་ཚེ་ལ་ཆོས་ཀྱི་རྣམ་གྲངས་འདི་སྤྱོད་པར་འགྱུར་བ་འམ་བྱིན་གྱིས་བརླབ་ཏུ་
གསོལ། དེ་ནས་དེའི་ཚེ་བཅོམ་ལྡན་འདས་ཀྱིས་འོད་གང་གིས་འཇིག་རྟེན་གྱི་ཁམས་ཐམས་ཅད་སྣང་བར་གྱུར་པའི་འོད་དེ་ལྟ་བུ་གཡས་ཕྱོགས་དང་། གཡོན་ཕྱོགས་ནས་བཏང་ནས་སངས་རྒྱས་ཀྱི་ཞིང་ཐམས་ཅད་ནས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་རྣམ་གྲངས་འདི་བྱིན་གྱིས་བརླབས་སོ་ཞེས་དེ་སྐད་ཀྱི་སྒྲ་བྱུང་ངོ་། །གང་དག་གིས་ཆོས་ཀྱི་རྣམ་གྲངས་འདི་མཉན་པར་འགྱུར་བ་དེ་དག་ནི་གལ་ཏེ་
རྒྱ་མཚོ་མཆིང་རྣམ་ཆེན་པོའི་ནང་དུ་མཆིས་པར་གྱུར་ཀྱང་རུང་། སྲེག་པའི་བསྐལ་པའི་ནང་དུ་མཆིས་ཀྱང་རུང་སྟེ། སེམས་ཅན་དེ་དག་ནི་ཆོས་ཀྱི་རྣམ་གྲངས་འདི་མ་ཐོས་པར་འགུམ་པའི་དུས་བགྱིད་པར་མི་འགྱུར་རོ། །བཅོམ་ལྡན་
འདས་ཀྱིས་བཀའ་སྩལ་པ། དགའ་བོ་དེ་བཞིན་ནོ། །ཇི་ལྟར་སྒྲ་བྱུང་བ་བཞིན་ཏེ། སྐྱེས་བུ་དམ་པ་དགེ་བའི་རྩ་བ་བསྐྱེད་པ་དེ་དག་གི་ཕྱིར་ཆོས་ཀྱི་རྣམ་གྲངས་འདི་ཕྱི་མའི་དུས་ཕྱི་མའི་ཚེ་ལ་སྤྱོད་པར་འགྱུར་རོ། །ཆོས་ཀྱི་རྣམ་
གྲངས་འདི་བཤད་པའི་ཚེ། ལྷ་དང་མིའི་སྐྱེ་དགུའི་སྲོག་ཆགས་འབུམ་ཕྲག་དགུ་བཅུ་རྩ་དྲུག་ནི་ཆོས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །སྲོག་ཆགས་འབུམ་ཕྲག་བདུན་བཅུ་རྩ་བརྒྱད་ནི་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་འབུམ་ཕྲག་སུམ་ཅུ་རྩ་གསུམ་ནི་མི་སྐྱེ་བའི་ཆོས་ལ་བཟོད་པ་སྐྱེས་སོ། །སྲོག་ཆགས་བརྒྱད་སྟོང་གིས་ནི་འདོད་ཆགས་དང་བྲལ་བ་

57-1-295a

ཐོབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས་སོ། །ལྷ་དང་བཅས་པའི་འཇིག་རྟེན་ཀྱང་ཆོས་ཀྱི་རྣམ་གྲངས་འདིའི་མཆོད་པའི་ལས་ལ་བརྩོན་པར་གྱུར་ཏེ། 
སིལ་སྙན་བརྒྱ་སྟོང་དཀྲོལ་བར་བྱེད་ཅིང་གང་དེ་བཞིན་གཤེགས་པས་འདིར་ཆོས་ཀྱི་རྣམ་གྲངས་བསྟན་པ་དེ་ནི་ཆོས་ཀྱི་འཁོར་ལོ་བསྐོར་བའི་མཆོག་ཡིན་ནོ། །ཆོས་ཀྱི་རྣམ་གྲངས་འདི་ལས་ནི་མུ་སྟེགས་ཅན་གཞན་ཀླན་ཀ་ལ་སྤྱོད་པ། 
བདུད་ཀྱི་ཡུལ་ལ་གནས་པ་ཐམས་ཅད་ཚར་བཅད་དོ། །ཡང་དག་པའི་ཆོས་ལ་མོས་པའི་རིགས་ཀྱི་བུ་དང་། རིགས་ཀྱི་བུ་མོ་དག་གི་ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཕྱག་རྒྱ་འདི་བཞག་
སྟེ། གང་དག་གིས་ཕྱག་རྒྱ་འདི་ཤེས་པ་དེ་དག་ནི་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ་ཞེས་དེ་སྐད་ཀྱང་སྨྲའོ། །བཅོམ་ལྡན་འདས་དགྱེས་ཤིང་དེ་སྐད་བཀའ་སྩལ་པ་དང་། རྒྱལ་པོ་མ་སྐྱེས་དགྲ་དང་། འཇམ་དཔལ་
གཞོན་ནུར་གྱུར་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། འོད་སྲུང་ཆེན་པོ་དང་། དགའ་བོ་དང་། ཤཱ་རིའི་བུ་དང་། མཽད་གལ་གྱི་བུ་ལ་སོགས་པ་ཉན་ཐོས་ཆེན་པོ་དེ་དག་དང་། ལྷ་དང་། མི་དང་། ལྷ་མ་ཡིན་དང་། 
དྲི་ཟར་བཅས་པའི་འཇིག་རྟེན་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའོ། །རྒྱལ་པོ་མ་སྐྱེས་དགྲའི་འགྱོད་པ་བསལ་བ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།ཨ་ཙརྱ་མཉྫུ་ཤྲི་གབྷ་དང་རཏྣ་ར་ཤི་ཞུས། 
༄༅།   །རྒྱ་གར་སྐད་དུ། ཨཱརྱ་ཤྲཱི་གུཔྟ་ནཱ་མ་སཱུ་ཏྲ།  བོད་སྐད་དུ།  འཕགས་པ་དཔལ་སྦས་ཞེས་བྱ་བའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་
གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་

57-1-295b

རྣམས་དང་། རྒྱལ་པོ་དང་། བློན་པོ་རྣམས་དང་། བྲམ་ཟེ་དང་། ཁྱིམ་བདག་རྣམས་དང་། མུ་སྟེགས་ཅན་སྣ་ཚོགས་དགེ་སྦྱོང་དང་། བྲམ་ཟེ་དང་། སྤྱོད་པ་ཅན་དང་། ཀུན་དུ་རྒྱུ་རྣམས་དང་། ལྷ་རྣམས་དང་། ཀླུ་རྣམས་དང་། གནོད་
སྦྱིན་རྣམས་དང་། དྲི་ཟ་རྣམས་དང་། ལྷ་མ་ཡིན་དང་། ནམ་མཁའི་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་རྣམས་ཀྱིས་བཅོམ་ལྡན་འདས་ལ་སྟི་སྟང་དུ་བྱས། བླ་མར་བྱས། རིམ་གྲོ་བྱས་ཏེ་མཆོད་ནས། བཅོམ་ལྡན་འདས་ཀྱིས་
ལྷ་དང་མིའི་ན་བཟའ་དང་། ཞལ་ཟས་དང་། གཟིམས་ཆ་དང་། སྙུན་གསོས་སྨན་དང་། ཡོ་བྱད་བཟང་པོ་མང་པོ་བརྙེས་ལ། པད་མ་ལ་ཆུ་མི་ཆགས་པ་བཞིན་དུ་འདོད་པ་དག་གིས་ཀྱང་བཅོམ་ལྡན་འདས་ལ་མི་གོས་ཏེ། འདི་ལྟར་བཅོམ་
ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་
རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤེས་བྱ་བར་བཅོམ་ལྡན་འདས་ཀྱི་བརྗོད་པ་དང་། སྒྲ་དང་། ཚིགས་སུ་བཅད་པ་དགེ་བ་འདི་ལྟ་བུ་འདི་མངོན་པར་འཕགས་པར་གྱུར་ཏོ། །དེས་ལྷ་དང་བཅས་པའི་འཇིག་རྟེན་དང་། བདུད་
དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་བྲམ་ཟེར་བཅས་པའི་སྐྱེ་དགུ་དང་། ལྷ་དང་མིར་བཅས་པའི་སྐྱེ་དགུ་རང་གི་མངོན་པར་མཁྱེན་པས་མངོན་དུ་མཛད་དེ་རྫོགས་པར་མཛད་ནས་མཁྱེན་ཏོ། །དེ་ཆོས་ཀྱང་སྟོན་ཏེ་
ཚངས་པར་སྤྱོད་པ་ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཡང་དག་པར་སྟོན་ཏོ། །དེའི་ཚེ་རྒྱལ་པོའི་
ཁབ་ཀྱི་གྲོང་ཁྱེར་ཆེན་པོ་ན་ཁྱིམ་བདག་དཔལ་སྦས་ཤེས་བྱ་བ་ཕྱུག་པ། ནོར་ཆེན་པོ། ལོངས་སྤྱོད་ཆེ་བ། བདག་དབང་བ་མང་བ། ནོར་དང་ཡོ་བྱད་མང་བ། ནོར་དང་། འབྲུ་དང་། འཚོག་ཆས་དང་། ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། 

57-1-296a

མན་ཤེལ་དང་། བྱི་རུ་དང་། དངུལ་དང་། ས་ལེ་སྦྲམ་མང་བ། གླང་པོ་ཆེ་དང་། རྟ་ཕོ་རྒོད་དང་། བ་ལང་མང་བ། བྲན་པོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་དང་། བང་མཛོད་གང་བ་མང་པོ་དང་ལྡན་པ་ཤིག་གནས་
ཏེ། ཁྱིམ་བདག་དཔལ་སྦས་དེ་མ་དད་པ། མ་དང་བ། སངས་རྒྱས་དང་། ཆོས་དང་། དགེ་འདུན་ལ་དབང་ཟ་བ། གཅེར་བུ་པའི་ཉན་ཐོས་སུ་གྱུར་པ་གཅེར་བུ་པ་ཉེ་དུའི་བུ་ཞེས་བྱ་བ་ལ་མངོན་པར་དད་པ་ཞིག་གོ། །དེ་ནས་ཁྱིམ་བདག་དཔལ་སྦས་གཅེར་
བུ་པ་ཉེ་དུའི་བུ་ག་ལ་བ་དེར་སོང་སྟེ་ཕྱིན་ནས། གཅེར་བུ་པ་ཉེ་དུའི་བུའི་རྐང་པ་ལ་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཁྱིམ་བདག་དཔལ་སྦས་ཕྱོགས་གཅིག་ཏུ་འདུག་ནས་གཅེར་བུ་པ་ཉེ་དུའི་བུས་ཁྱིམ་བདག་དཔལ་སྦས་ལ་
འདི་སྐད་ཅེས་སྨྲས་སོ། །ཁྱིམ་བདག་གང་དགེ་སྦྱོང་གཽ་ཏ་མ་ན་ཚོད་ཀྱིས་གཞོན་པ། གསར་དུ་རབ་ཏུ་བྱུང་བ་དེ་ཐམས་ཅད་མཁྱེན་པའི་ང་རྒྱལ་ཅན་ཏེ། ཐམས་ཅད་མཁྱེན་པའི་ང་རྒྱལ་དེས་འཇིག་རྟེན་འདི་ཐམས་ཅད་བསླུས་པར་ཤེས་
པར་གྱིས་ཤིག །དེའི་ཕྱིར་ཁྱིམ་བདག་ཁྱོད་སོང་ལ་དགེ་སྦྱོང་གཽ་ཏ་མའི་སྲོག་ཆོད་ཅིག །དེ་འཆི་བའི་དུས་བྱས་ཏེ་ཤི་བ་དང་། དགེ་སྦྱོང་གཽ་ཏ་མ་དེ་ཙམ་དུ་རྫུ་འཕྲུལ་ཆེ་བ། དེ་ཙམ་དུ་མཐུ་ཆེ་བ། དེ་ཙམ་དུ་དབང་ཆེ་བར་གྲགས་པ་ཁྱིམ་བདག་
དཔལ་སྦས་ཀྱིས་སྲོག་བཅད་དོ་ཞེས་ཁྱོད་ཀྱི་བརྗོད་པ་དང་། སྒྲ་དང་། ཚིགས་སུ་བཅད་པ་དགེ་བ་རྒྱ་ཆེན་པོ་འདི་ལྟ་བུ་འདི་མངོན་པར་གྲགས་པར་འགྱུར་རོ། །དཔལ་སྦས་ཀྱིས་སྨྲས་པ། བཙུན་པ་བདག་གིས་དགེ་སྦྱོང་གཽ་ཏ་མ་སྲོག་གཅད་
པར་ཇི་ལྟར་ནུས། གཅེར་བུ་པ་ཉེ་དུའི་བུས་སྨྲས་པ། ཁྱིམ་བདག་ཁྱོད་སོང་ལ་ཕྱི་སྒོའི་སྒོ་གང་དུ་དོང་ཆེན་པོ་རྐོས་ཤིག །དོང་ཆེན་པོ་བརྐོས་ནས་མེས་ཁོང་ལ་སྟེང་དུ་ཕྱག་དར་སྲབ་མོས་ཁོབ་ཤིག །ཁྱིམ་གྱི་ནང་དུ་ཟས་དུག་ཅན་སྦྱོར་ལ། 
ཟས་དུག་ཅན་སྦྱར་ནས་དགེ་སྦྱོང་གཽ་ཏ་མ་དེའི་གན་དུ་སོང་སྟེ་ཟས་ལ་བོས་ཤིག །གལ་ཏེ་དགེ་སྦྱོང་གཽ་ཏ་མ་ཐམས་ཅད་མཁྱེན་ཅིང་ཐམས་ཅད་གཟིགས་པ་ཡིན་ན་ནི་བཏུབ་པར་མི་འགྱུར་རོ། །ཇི་སྟེ་ཐམས་ཅད་མཁྱེན་པ་མ་ཡིན། 

57-1-296b

ཐམས་ཅད་གཟིགས་པ་མ་ཡིན་ན་ནི་བཏུབ་པར་འགྱུར་ཏེ། དེ་ཕྱི་སྒོའི་སྒོ་གང་གི་མེ་དོང་དེར་ལྷུང་ནས་ཉན་ཐོས་ཀྱི་དགེ་འདུན་དང་བཅས་ཏེ་འཆི་བའི་དུས་བྱེད་པར་འགྱུར་རོ། །འོན་ཏང་རྣམ་གྲངས་ཅི་ཞིག་གིས་ཐར་བར་འགྱུར། 
ཁྱིམ་གྱི་ནང་དུ་ཟས་དུག་ཅན་ཟོས་ན་ཡང་འཆི་བའི་དུས་བྱེད་པར་འགྱུར་རོ། །དེ་བཞིན་དུ་བགྱིའོ་ཞེས་ཏེ་ཁྱིམ་བདག་དཔལ་སྦས་ཀྱིས་གཅེར་བུ་པ་ཉེ་དུའི་བུའི་ལྟར་ཉན་ནས་སྟན་ལས་ལངས་ཏེ། གཅེར་བུ་པ་ཉེ་དུའི་བུའི་རྐང་པ་ལ་
ཕྱག་འཚལ་ནས་ལན་གསུམ་བསྐོར་བ་བྱས་ཏེ། གཅེར་བུ་པ་ཉེ་དུའི་བུའི་གན་ནས་སོང་ནས་རང་གི་ཁྱིམ་ག་ལ་བ་དེར་སོང་སྟེ་ཕྱིན་པ་དང་། རང་གི་ཞོ་ཤས་འཚོ་བ་རྣམས་ལ་བོས་ཏེ་འདི་སྐད་ཅེས་སྨྲས་སོ། །ཞོ་ཤས་
འཚོ་བ་དག་དེང་ལ་ཕྱི་སྒོའི་སྒོ་གང་དུ་དོང་ཆེན་པོ་རྐོས་ཤིག །དོང་ཆེན་པོ་བརྐོས་ནས་མེ་འབར་བ་མ་ཡིན་པ་དུ་བ་མི་འཐུལ་བས་ཁོང་ལ་སྟེང་དུ་ཕྱག་དར་སྲབ་མོས་ཁོབ་ཤིག །ཁྱིམ་གྱི་ནང་དུ་ཟས་དུག་ཅན་སྦྱོར་ཅིག །དེ་ནས་
ཁྱིམ་བདག་དཔལ་སྦས་ཀྱིས་རང་གི་ཞོ་ཤས་འཚོ་བ་རྣམས་བསགས་ནས་རྒྱལ་པོའི་ཁབ་ནས་བྱུང་སྟེ། བྱ་རྒོད་ཀྱི་ཕུང་པོའི་རི་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་ནས་ཕྱིན་པ་དང་། བཅོམ་ལྡན་འདས་དང་
ལྷན་གཅིག་མངོན་སུམ་དུ་དགའ་བར་བྱ་བ་དང་མགུ་བར་བྱ་བའི་གཏམ་རྣམ་པ་མང་པོ་བྱས་ཏེ་ཕྱོགས་གཅིག་ཏུ་འདུག་གོ། །ཁྱིམ་བདག་དཔལ་སྦས་ཕྱོགས་གཅིག་ཏུ་འདུག་པ་དང་། བཅོམ་ལྡན་འདས་ཀྱིས་ཆོས་ཀྱི་གཏམ་ཡང་
དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་དོ། །དེ་ནས་ཁྱིམ་བདག་དཔལ་སྦས་བཅོམ་ལྡན་འདས་ཀྱིས་ཆོས་ཀྱི་གཏམ་ཡང་དག་པར་བསྟན། 
ཡང་དག་པར་འཛིན་དུ་བཅུག །ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་སྟན་ལས་ལངས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གཽ་ཏ་མཱ་ཉན་ཐོས་ཀྱི་དགེ་འདུན་དང་

57-1-297a

ཐབས་གཅིག་ཏུ་སང་གདུགས་ཚོད་སྦྱོར་ན་གནང་བར་མཛད་དུ་གསོལ། དེ་ནས་བཅོམ་ལྡན་འདས་འདི་སྙམ་དུ་དགོངས་ཏེ། ཁྱིམ་བདག་དཔལ་སྦས་འདི་ནི་མི་དགེ་བའི་བཤེས་གཉེན་དང་བསྟེན་པའི་དབང་གིས་
ང་ལ་རྣམ་པ་འདི་ལྟ་བུ་བྱ་བར་འདོད་ལ། དེ་རིང་པོ་མི་ཐོགས་པར་ཕྱིས་ཆོས་འདུལ་བ་འདི་ལ་རྣམ་པར་དག་པའི་ཆོས་ཅན་དུ་འགྱུར་རོ་སྙམ་སྟེ། དེ་ལྟར་མཁྱེན་ནས་བཅོམ་ལྡན་འདས་ཀྱིས་ཁྱིམ་བདག་དཔལ་སྦས་ལ་ཅང་མི་གསུང་
བས་གནང་ངོ་། །དེ་ནས་ཁྱིམ་བདག་དཔལ་སྦས་ཀྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་ལག་པ་བསྒྱུར་ཏེ་མཛུབ་མོ་བསྒྲེང་ནས་འདི་སྙམ་དུ་སེམས་ཏེ། འདི་ལྟར་བདག་གི་སེམས་ཀྱང་སེམས་
ཀྱིས་མི་ཤེས་ན་ཐམས་ཅད་ཤེས་པ་ལྟ་སྨོས་ཀྱང་ཅི་དགོས་ཏེ། དགེ་སྦྱོང་གཽ་ཏ་མས་ཐམས་ཅད་མཁྱེན་པའི་ང་རྒྱལ་གྱིས་འཇིག་རྟེན་འདི་དག་ཐམས་ཅད་བསླུས་སོ་སྙམ་མོ། །དེ་ནས་ཁྱིམ་བདག་དཔལ་སྦས་ཀྱིས་བཅོམ་
ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་གན་ནས་སོང་ནས་རང་གི་ཁྱིམ་ག་ལ་བ་དེར་སོང་སྟེ་ཕྱིན་པ་དང་། ཕྱི་སྒོའི་སྒོ་གང་དུ་དོང་ཆེན་པོ་རྐོར་བཅུག་སྟེ། བརྐོས་ནས་མེ་མི་འབར་ཞིང་དུ་བ་མི་འཐུལ་བས་
བཀང་སྟེ། སྟེང་དུ་ཕྱག་དར་སྲབ་མོས་གཡོགས་སོ། །ཁྱིམ་གྱི་ནང་དུ་ཡང་ཟས་དུག་ཅན་སྦྱོར་དུ་བཅུག་གོ། །དེའི་ཚེ་ཁྱིམ་བདག་དཔལ་སྦས་ཀྱིས་ཁྱིམ་བདག་མགོན་མེད་ཟས་སྦྱིན་གྱི་བུ་མོ་ཆུང་མར་བླངས་པར་གྱུར་ཏེ། ཁྱིམ་
བདག་དཔལ་སྦས་ཀྱི་ཆུང་མས་ཁྱིམ་བདག་དཔལ་སྦས་རྣམ་པ་འདི་ལྟ་བུ་བྱེད་པར་མཐོང་ངོ་། །མཐོང་ནས་ཀྱང་ཁྱིམ་བདག་དཔལ་སྦས་ལ་འདི་སྐད་ཅེས་སྨྲས་སོ། །ཇོ་བོ་ལ་དགྲ་སུ་ཞིག་མཆིས་ན་དེ་དགུམ་པའི་སླད་དུ་དེ་ལྟར་
བརྩོན་པར་མཛད། དེས་སྨྲས་པ། དྲ་མའི་བུ་མོ་ཤེས་པར་གྱིས་ཤིག །དགེ་སྦྱོང་གཽ་ཏ་མཱ་ན་ཚོད་ཀྱིས་གཞོན་པ། གསར་དུ་རབ་ཏུ་བྱུང་བ་དེ་ཐམས་ཅད་མཁྱེན་པའི་ང་རྒྱལ་ཅན་ཏེ། ཐམས་ཅད་མཁྱེན་པའི་ང་རྒྱལ་དེས་འཇིག་

57-1-297b

རྟེན་འདི་ཐམས་ཅད་བསླུས་ཀྱིས། དེ་གསད་པའི་ཕྱིར་འདི་ལྟར་བརྩོན་པར་བྱེད་དོ། །དེས་སྨྲས་པ། ཇོ་བོ་བཅོམ་ལྡན་འདས་དེ་བགྲོངས་པར་ཁྱོད་ཀྱིས་མི་སྤྱོད་ཀྱིས་སྐྱོ་བར་གྱུར་ཏ་རེ། དེ་ཅིའི་སླད་དུ་ཞེ་ན། དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སླད་དུའོ། །དེ་ནས་ཁྱིམ་བདག་དཔལ་སྦས་འདི་སྙམ་དུ་སེམས་ཏེ། བདག་གི་ཆུང་མ་ཤཱཀྱའི་བྲན་གྱི་བུ་མོ་འདིས་གསང་འཕེལ་དུ་འོང་ཞེས་དེའི་ཐོར་ཏོ་ནས་བཟུང་སྟེ་ཁྱིམ་དུ་
བཅུག་ནས་སྒོ་གཏན་བཅུག་གོ། །སྒོ་གཏན་བཅུག་ནས་བཅོམ་ལྡན་འདས་ལ་གདུགས་ཚོད་ལ་བབ་པ་གསོལ་ཏེ། ཀྱེ་གཽ་ཏ་མ་བཤོས་ལགས་ཀྱི་གདུགས་ཚོད་ལ་བབ་བོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་
ལ་བཀའ་སྩལ་པ། ཁྱོད་སོང་ལ་བསིལ་ཡབ་ཐོགས་ཏེ་གནས་ཁང་ནས་གནས་ཁང་དུ་སོང་ལ་ཚེ་དང་ལྡན་པ་དག་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏེ། ངའི་སྔ་རོལ་དུ་དགེ་སློང་གང་ཡང་དཔལ་སྦས་ཀྱི་ཁྱིམ་དུ་མ་འཇུག་
ཤིག་ཅེས་དོན་དེ་བསྒོ་ཤིག །བཅོམ་ལྡན་འདས་དེ་བཞིན་ནོ་ཞེས་གསོལ་ནས། ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་ལྟར་མཉན་ཏེ། བསིལ་ཡབ་ཐོགས་ནས་དགེ་སློང་རྣམས་ཀྱི་གན་དུ་སོང་སྟེ། ཚེ་དང་ལྡན་པ་དག་
བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏེ། ངའི་སྔ་རོལ་དུ་དགེ་སློང་གང་ཡང་ཁྱིམ་བདག་དཔལ་སྦས་ཀྱི་ཁྱིམ་དུ་མ་འཇུག་ཤིག་ཅེས་དོན་དེ་བསྒོའོ། །དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་ཤམ་ཐབས་དང་ཆོས་
གོས་གསོལ་ཏེ། ལྷུང་བཟེད་བསྣམས་ནས་དགེ་སློང་གི་དགེ་འདུན་གྱིས་ཡོངས་སུ་བསྐོར། དགེ་སློང་གི་དགེ་འདུན་གྱིས་མདུན་དུ་བདར་ཏེ་བྱ་རྒོད་ཀྱི་ཕུང་པོའི་རི་ལས་བབས་སོ། །དེ་ནས་མི་མཇེད་ཀྱི་བདག་པོ་ཚངས་པ་ཚངས་རིས་ཀྱི་
ལྷའི་བུ་དུ་མས་ཡོངས་སུ་བསྐོར་ཅིང་མདུན་དུ་བདར་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། བཅོམ་ལྡན་འདས་ཀྱི་གཡས་རོལ་ནས་འགྲོའོ། །ལྷའི་དབང་པོ་བརྒྱ་

57-1-298a

བྱིན་ཡང་སུམ་ཅུ་རྩ་གསུམ་གྱི་ལྷའི་བུ་དུ་མས་ཡོངས་སུ་བསྐོར་ཅིང་མདུན་དུ་བདར་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་
འདས་ཀྱི་གཡོན་རོལ་ནས་འགྲོའོ། །རྒྱལ་པོ་ཆེན་པོ་བཞི་པོ་རྒྱལ་པོ་ཆེན་པོ་གནས་སྲུང་པོ་དང་། འཕགས་སྐྱེས་པོ་དང་། མིག་མི་བཟང་དང་། རྣམ་ཐོས་ཀྱི་བུ་ཡང་གནོད་སྦྱིན་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ། 
བཅོམ་ལྡན་འདས་ཀྱི་ཕྱི་བཞིན་འགྲོའོ། །རྒྱལ་པོ་ཆེན་པོ་རྣམ་ཐོས་ཀྱི་བུ་ནི་བཅོམ་ལྡན་འདས་ཀྱི་གདུགས་ཐོགས་སོ། །གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། 
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་ཕྱི་བཞིན་དུ་འགྲོའོ། །རོལ་མོ་མཁན་དུ་གཏོགས་པའི་ལྷ་རྣམས་ནི་མདུན་ནས་འགྲོ་ཞིང་། གར་དང་། གླུ་དང་། རོལ་མོའི་སྒྲ་ཆེན་པོ་བྱེད་དོ། །དེའི་ཚེ་
བཅོམ་ལྡན་འདས་ཀྱི་མདུན་ལོགས་སུ་ནི་ཆར་འབབ། ཕྱི་ནས་ནི་ཉི་མ་འཆར། བར་ན་ནི་སྤྲིན་ལྡིང་ངོ་། །བཅོམ་ལྡན་འདས་ཀྱི་ཞབས་གང་དང་གང་གོམ་པ་འདོར་བ་དེ་དང་དེར་བཅོམ་ལྡན་འདས་ཀྱི་སྐུ་ལ་ལྷ་རྣམས་ཙན་དན་གྱི་ཕྱེ་མ་
དག་འཐོར། མངོན་པར་འཐོར། མངོན་པར་རབ་ཏུ་འཐོར་རོ། །ལྷའི་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། ལྷའི་མེ་ཏོག་མན་དཱ་ར་བ་རྣམས་བཅོམ་ལྡན་འདས་ཀྱི་སྐུ་ལ་འཐོར། མངོན་པར་འཐོར། 
མངོན་པར་རབ་ཏུ་འཐོར་རོ། །དེ་ནས་བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དེར་གཤེགས་པ་དང་། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། གང་གི་ཚེ་བཅོམ་ལྡན་འདས་གྲོང་ཁྱེར་
དུ་འཇུག་པ་དེའི་ཚེ་ཆོ་འཕྲུལ་དང་བཅས་པར་འཇུག་གི། ཆོ་འཕྲུལ་མེད་པར་མ་ཡིན་ནོ། །དེ་ནས་བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་གྱི་སྒོར་སྒོ་གཏན་ལ་ཐོག་མ་ཉིད་དུ་ཞབས་གཡས་པ་གསེར་གྱི་ཁ་དོག་ཅན་བཞག་

57-1-298b

སྟེ། བཅོམ་ལྡན་འདས་ཀྱི་ཞབས་གཡས་པ་གསེར་གྱི་ཁ་དོག་ཅན་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་སྒོར་སྒོ་གཏན་ལ་བཞག་མ་ཐག་ཏུ། དེ་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་རྣམ་པ་དྲུག་ཏུ་གཡོས། རབ་ཏུ་གཡོས། 
ཀུན་དུ་རབ་ཏུ་གཡོས། འགུལ་རབ་ཏུ་འགུལ། ཀུན་དུ་རབ་ཏུ་འགུལ་ཏོ། །ཤར་ཕྱོགས་མཐོ་ན་ནུབ་ཕྱོགས་དམའོ། །ནུབ་ཕྱོགས་མཐོ་ན་ཤར་ཕྱོགས་དམའོ། །ལྷོ་ཕྱོགས་མཐོ་ན་བྱང་ཕྱོགས་དམའོ། །བྱང་ཕྱོགས་མཐོ་ན་ལྷོ་
ཕྱོགས་དམའོ། །དབུས་མཐོ་ན་མཐའ་དམའོ། །མཐའ་མཐོ་ན་དབུས་དམའོ། །བཅོམ་ལྡན་འདས་ཀྱིས་རྒྱལ་པོའི་ཁབ་ཀྱི་སྒོ་གཏན་ལ་ཞབས་གཡས་པ་གསེར་གྱི་ཁ་དོག་ཅན་བཞག་མ་ཐག་ཏུ་ལྷ་རྣམས་ལྷའི་ཙན་དན་གྱི་ཕྱེ་
མ་དག་བཅོམ་ལྡན་འདས་ཀྱི་སྐུ་ལ་འཐོར། མངོན་པར་འཐོར། མངོན་པར་རབ་ཏུ་འཐོར་རོ། །ལྷའི་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། ལྷའི་མེ་ཏོག་མན་དཱ་ར་བ་དག་བཅོམ་ལྡན་འདས་ཀྱི་སྐུ་ལ་
འཐོར། མངོན་པར་འཐོར། མངོན་པར་རབ་ཏུ་འཐོར། ནམ་མཁའ་ལ་ལྷའི་རོལ་མོའི་སྒྲ་འབྱིན་ཏོ། །ལྷའི་སིལ་སྙན་གྱི་སྒྲ་འབྱིན་ཏོ། །བཅོམ་ལྡན་འདས་ཀྱིས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་སྒོར་སྒོ་གཏན་ལ་ཞབས་གཡས་པ་
གསེར་གྱི་ཁ་དོག་ཅན་བཞག་མ་ཐག་ཏུ་དེའི་ཚེ་ལོང་བ་རྣམས་ནི་མིག་གིས་གཟུགས་མཐོང་བར་གྱུར། འོན་པ་རྣམས་ནི་རྣ་བས་ཐོས་པར་གྱུར། སྣའི་དབང་པོ་དང་བྲལ་བ་རྣམས་ནི་སྣ་རྣམ་པར་དག་པར་གྱུར། ལྐུག་པ་རྣམས་ནི་སྨྲ་བར་
གྱུར། བརྗེད་བྱེད་ཀྱིས་ཟིན་པ་རྣམས་ནི་བརྗེད་བྱེད་དང་བྲལ་བར་གྱུར། སེམས་ཅན་སྨྱོན་པ་རྣམས་ནི་དྲན་པ་རྙེད་པར་གྱུར། དུག་འཐུངས་པ་རྣམས་ནི་དུག་ལས་གསོས་པར་གྱུར། སེམས་ཅན་བཙོན་ཆ་དམ་པོས་བསྡམས་པ་རྣམས་ནི་བཙོན་
ཆ་ལྷོད་པར་གྱུར། སེམས་ཅན་ཕན་ཚུན་དགྲར་འཛིན་པ་རྣམས་ནི་བྱམས་པའི་སེམས་སུ་གནས་པར་གྱུར། སིལ་སྙན་རྣམས་ནི་མ་བསྐྱོད་པར་སྒྲ་འབྱིན་པར་གྱུར། སྣོད་རྣམས་ནི་མ་དཀྲོལ་བར་སྒྲ་འབྱིན་པར་གྱུར། ཁྱུ་མཆོག་ཀྱང་སྒྲ་

57-1-299a

འབྱིན། གླང་པོ་ཡང་སྒྲ་འབྱིན། རྟ་ཡང་སྒྲ་འབྱིན། རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་སྒོ་ན་བྱ་གང་དག་གནས་པ་འདི་ལྟ་སྟེ། ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། ཁུ་བྱུག་དང་། ཀུ་ལ་དང་། ཤང་
ཤང་ཏེའུ་དེ་དག་ཀྱང་རང་རང་གི་སྐད་དུ་སྒྲ་སྐད་འབྱིན་ཅིང་རྒྱལ་པོའི་ཁབ་ཀྱི་སྒོའི་ཁོར་ཡུག་ཏུ་སྐོར་བར་བྱེད་དོ། །རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་བསིལ་ཁང་དང་། ཁང་པ་བརྩེགས་པ་དང་། སྟེགས་བུ་དང་། 
སྒོ་གང་དང་། སྐར་ཁུང་ནས་ལྟ་ཞིང་འཁོད་པ་དེ་དག་གིས་ཀྱང་བཅོམ་ལྡན་འདས་ལ་མེ་ཏོག་གི་ཕུར་མ་གཏོར་ཏོ། །རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་སྐྱེ་བོ་ཕལ་པོ་ཆེ་ཡང་ངོ་མཚར་དུ་གྱུར། རྨད་དུ་བྱུང་བར་གྱུར་ཏེ། ཡི་རངས་པར་གྱུར་ནས་སྒྲ་
གསང་མཐོན་པོ་དང་། སྒྲ་ཆེན་པོར་ཧི་ཧི་ཞེས་བྱ་བ་དང་། ཧ་ཧ་ཞེས་བྱ་བ་དང་། ཨ་ལ་ལ་ཞེས་བྱ་བ་དང་། ཨའུ་ཞེས་སྒྲ་ཆེན་པོ་འབྱིན་ཏོ། །བཅོམ་ལྡན་འདས་ལ་གོས་ཀྱང་འཐོར་རོ། །དེ་ནས་བཅོམ་ལྡན་འདས་རྒྱལ་པོའི་ཁབ་ཏུ་
ཞུགས་ཏེ། ཁྱིམ་བདག་དཔལ་སྦས་ཀྱི་ཁྱིམ་ག་ལ་བ་དེར་གཤེགས་པ་དང་། དགེ་བསྙེན་ཞིག་གིས་བཅོམ་ལྡན་འདས་རྒྱང་རིང་པོ་ནས་བྱོན་པ་མཐོང་ངོ་། །མཐོང་ནས་ཀྱང་དེས་འདི་སྙམ་དུ་བསམས་ཏེ། ཁྱིམ་བདག་དཔལ་སྦས་འདི་ནི་
བཅོམ་ལྡན་འདས་ལ་རྣམ་པ་འདི་ལྟ་བུ་འདི་བྱེད་པར་འདོད་ན་བཅོམ་ལྡན་འདས་བཀྲོངས་པར་མི་འགྱུར་གྲང་། འཇིག་རྟེན་གྱི་མིག་ཤིན་དུ་མྱུར་དུ་མེད་པར་མི་འགྱུར་གྲང་། འཇིག་རྟེན་དུ་མུན་པ་ཤིན་དུ་མྱུར་དུ་མི་འབྱུང་གྲང་། བསྐལ་པ་གྲངས་
མེད་པ་གསུམ་དུ་ཡང་དག་པར་བསྒྲུབས་པའི་སངས་རྒྱས་ཤིན་དུ་མྱུར་དུ་ནུབ་པར་མི་འགྱུར་གྲང་། བདག་ཅག་ཆོས་ཀྱི་ལོངས་སྤྱོད་ལས་ཤིན་དུ་མྱུར་དུ་ཉམས་པར་མི་འགྱུར་གྲང་སྙམ་སྟེ། དེ་ནས་དགེ་བསྙེན་དེ་བཅོམ་ལྡན་འདས་ག་ལ་བ་དེར་
སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་བསྐོར་བ་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་

57-1-299b

བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཁྱིམ་བདག་དཔལ་སྦས་ཀྱི་ཁྱིམ་དུ་མ་གཤེགས་ཤིག །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས་ཁྱིམ་བདག་དཔལ་སྦས་ཀྱིས་ནི་བཅོམ་ལྡན་འདས་དང་
དགེ་སློང་གི་དགེ་འདུན་བཀྲོངས་པའི་སླད་དུ་ཕྱི་སྒོའི་སྒོ་གང་དུ་དོང་ཆེན་པོ་རྐོར་སྩལ་ཏེ། དོང་བརྐོས་ནས་ཞུགས་མི་འབར་ཞིང་དུ་བ་མ་མཆིས་པས་གཏམས་ཏེ། སྟེང་དུ་ཕྱག་དར་སྲབ་མོས་གཡོགས་ཤིང་མཆིས་ན་བཅོམ་ལྡན་འདས་དང་། 
དགེ་སློང་གི་དགེ་འདུན་ལ་ཆུང་ཟད་གནོད་པར་ལྟ་མི་འགྱུར་རམ་སྙམ་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་བསྙེན་ཁྱོད་འདི་སྙམ་དུ་མ་སེམས་ཤིག །དགེ་བསྙེན་ང་དུད་འགྲོའི་སྐྱེ་གནས་སུ་གྱུར་པ་ན་ཡང་ངའི་
ལུས་ལ་མེས་མ་ཚུགས་ན། ད་ལྟར་བྱང་ཆུབ་མངོན་པར་རྫོགས་པར་སངས་རྒྱས་པ་ལྟ་ཅི་སྨོས། ངས་ནི་འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེ་དང་། མེ་གསུམ་བསད་པས་ངའི་ལུས་ལ་མེས་ཚུགས་པར་འགྱུར་བ་
འདི་ནི་གནས་མེད་དོ། །བཅོམ་བཙུན་པ་བཅོམ་ལྡན་འདས་དུད་འགྲོའི་སྐྱེ་གནས་སུ་གྱུར་པ་ན་ཇི་ལྟར་སྐུ་ལ་ཞུགས་ཀྱིས་མ་ཚུགས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་བསྙེན་སྔོན་བྱུང་བ་འདས་པའི་དུས་ན་ཡུལ་ཀ་ལིང་
ཀའི་རྒྱལ་པོ་ཞིག་བྱུང་བ་དེའི་ཚེ། ཡུལ་ཀ་ལིང་ཀའི་རྒྱལ་པོས་གླིང་བེགས་བུར་ཆད་པའི་རི་དགས་རྣམས་གསོད་པའི་ཕྱིར་སྲེག་པའི་མེ་ཆེན་པོ་བཏང་ངོ་། །དེ་ནས་གླིང་བེགས་བུར་ཆད་པ་ནི་རི་དགས་དང་བྱ་གང་དག་གནས་པ། ནམ་མཁའ་ལ་རྒྱུ་བ་
འམ། ཐང་ལ་རྒྱུ་བ་འམ། ཆུ་ལ་རྒྱུ་བ་དེ་དག་སྲེག་པའི་མེ་དེས་འཁྲུགས་ནས་དེ་ན་གང་དག་ནམ་མཁའ་ལ་རྒྱུ་བ་དེ་དག་ན་མཁའ་ལ་བྱེར་རོ། །གང་དག་ཆུ་ལ་རྒྱུ་བ་དེ་དག་ནི་ཆུར་ཞུགས་སོ། །གང་དག་ཐང་ལ་རྒྱུ་བ་དེ་དག་ནི་ཕན་ཚུན་འབྱེར་ཞིང་རྒྱུག་སྟེ་
འབྲོས་སོ། །གླིང་བེགས་བུར་ཆད་པ་དེ་ན་སྲེག་པའི་ཕྲུ་གུ་འདབ་གཤོག་མ་སྐྱེས་པ་ཞིག་ཡོད་དེ། དེ་ནས་སྲེག་པ་མ་མོ་དེས་འདབ་མ་ཆུར་བཅུག་སྟེ། སྲེག་པའི་ཕྲུ་གུའི་ཁོར་ཡུག་ཏུ་གཏོར་ཏོ། །གཏོར་ནས་ཀྱང་རྒྱུག་ཅིང་ཡང་དང་ཡང་དེ་ལྟར་

57-1-300a

བརྩོན་པར་བྱས་སོ། །དེ་ནས་སྲེག་པའི་ཕྲུ་གུ་དེས་མ་འདི་ལྟར་རྩོལ་བ་བྱེད་པ་དེ་མཐོང་ངོ་། །མཐོང་ནས་ཀྱང་དེས་མ་ལ་འདི་སྐད་ཅེས་སྨྲས་སོ། །ཡུམ་ཅིའི་སླད་དུ་འདི་ལྟར་རྩོལ་བར་མཛད། དེས་སྨྲས་པ། བུ་ཤེས་པར་
གྱིས་ཤིག །རྒྱལ་པོ་ཡུལ་ཀ་ལིང་ཀའི་རྒྱལ་པོས་གླིང་བེགས་བུར་ཆད་པའི་རི་དགས་གསད་པའི་ཕྱིར་མེ་ཆེན་པོ་བཏང་ངོ་། །དེ་ནས་གླིང་བེགས་བུར་ཆད་པ་ན་རི་དགས་དང་། བྱ་གང་དག་གནས་པ་ནམ་མཁའ་ལ་རྒྱུ་བ་དང་། ཐང་ལ་རྒྱུ་བ་དང་། 
ཆུ་ལ་རྒྱུ་བ་དེ་དག་སྲེག་པའི་མེ་ཆེན་པོ་དེས་འཁྲུགས་ནས་དེ་ན་གང་དག་ནམ་མཁའ་ལ་རྒྱུ་བ་དེ་དག་ནི་ནམ་མཁའ་ལ་བྱེར། གང་དག་ཆུ་ལ་རྒྱུ་བ་དེ་དག་ནི་ཆུར་ཞུགས། གང་དག་ཐང་ལ་རྒྱུ་བ་དེ་དག་ནི་ཕན་ཚུན་འབྱེར་ཞིང་རྒྱུག་སྟེ་བྲོས་སོ། །ང་ནི་འདི་ལྟར་
ཁྱོད་ཚིག་ཏུ་འོང་ངོ་ཞེས་ཁྱོད་ཀྱི་ཕྱིར་འདི་ལྟར་རྩོལ་བར་བྱེད་དོ། །དེས་སྨྲས་པ། ཡུམ་ཐོང་ཤིག །ཐོང་ཤིག །ཡུམ་ཁྱོད་ནི་བྱིས་པ་སྟེ། ཁྱོད་ཀྱིས་རྩོལ་བ་འདི་ལྟ་བུས་བདག་སྲེག་པའི་མེ་འདི་ལས་ཐར་པར་མི་སྤྱོད་དོ། །ཡུམ་ཁྱོད་ཀྱིས་བདག་ཉིད་
ཀྱི་མཐུ་དང་སྟོབས་བསྐྱེད་དེ། ངན་བུ་ལེགས་པར་ཤིན་དུ་བླངས་ལ་གླིང་བེགས་བུར་ཆད་པ་འདིར་ཤིང་ནང་གི་མཐོན་པོའི་ཁར་ངན་བུ་གཞག་པར་སྤྱོད་དམ། དེ་བཞིན་བྱའོ་ཞེས་ཏེ་སྲེག་པ་མ་མོ་དེས་སྲེག་པའི་ཕྲུ་གུའི་ལྟར་མཉན་ནས་རང་གི་འཐུ་དང་
སྟོབས་བསྐྱེད་དེ། སྲེག་པའི་ཕྲུ་གུ་དེ་ཀུན་དུ་ལེགས་པར་བླངས་ནས་གླིང་བེགས་བུར་ཆད་པ་དེའི་ཤིང་ནང་གི་མཐོན་པོའི་ཁར་བཞག་གོ། །དེ་ནས་སྲེག་པའི་ཕྲུ་གུ་དེས་སྲེག་པའི་མེ་ཆེན་པོ་དེ་མཐོང་ནས་བྱམས་པས་ཁྱབ་པར་བྱེད་དོ། །
བྱམས་པས་ཁྱབ་པར་བྱས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྐང་མེད་སེམས་ཅན་རྣམས་ཀྱང་ཡོད། །འདབ་ཆགས་རྐང་བཅས་པ་འང་ཡོད། །ཕ་མ་དག་གིས་བསྲུངས་ཤིང་འཁོད། །མེ་གདུག་ཚུར་ནི་མ་འོང་ཤིག །དགེ་
བསྙེན་སྲེག་པའི་ཕྲུ་གུ་དེས་ཚིགས་སུ་བཅད་པ་དེ་སྨྲས་མ་ཐག་ཏུ་མེ་ཤི་བར་གྱུར་ཏེ། གང་ནས་བཏང་བ་དེ་ཉིད་དུ་ཤིའོ། །དེ་ལྟར་དེ་ཚུན་ཆད་དེང་སོང་གི་བར་དུ་གླིང་བེགས་བུར་ཆད་པ་དེར་མེ་མ་ཤོར་ཏོ། །དགེ་བསྙེན་དེའི་ཚེ་དེའི་དུས་ན་གླིང་

57-1-300b

བེགས་བུར་ཆད་པ་ན་སྲེག་པའི་ཕྲུ་གུ་འདབ་གཤོག་མ་སྐྱེས་པ་དེ་གཞན་ཞིག་ཡིན་སྙམ་དུ་ཁྱོད་དོགས་ཤིང་ཐེ་ཙོམ་ཟ་འམ། ཡིད་གཉིས་ཟ་ན་དེ་ལྟར་མི་བལྟ་སྟེ། དགེ་བསྙེན་ང་དེའི་ཚེ་དེའི་དུས་ན་སྲེག་པའི་ཕྲུ་གུར་གྱུར་ཏོ། །དགེ་བསྙེན་
ང་དུད་འགྲོའི་སྐྱེ་གནས་སུ་གྱུར་པ་དེའི་ཚེ་ཡང་ལུས་ལ་མེས་མ་ཚུགས་ན། ད་ལྟར་བྱང་ཆུབ་མངོན་པར་རྫོགས་པར་སངས་རྒྱས་པ་ལ་ལྟ་ཅི་སྨོས་ཏེ། ངའི་ལུས་ལ་མེས་ཚུགས་པར་འགྱུར་བ་འདི་ནི་གནས་མེད་དོ། །དེ་ནས་བཅོམ་ལྡན་འདས་
ཀྱིས་དགེ་བསྙེན་དེ་དང་། སྐྱེ་བོ་ཕལ་པོ་ཆེ་ལ་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་འཇུག །ཡང་དག་པར་གཟེང་སྟོད། ཡང་དག་པར་རབ་ཏུ་དགའ་བར་མཛད་དོ། །ཆོས་ཀྱི་གཏམ་ཡང་དག་པར་བསྟན། ཡང་
དག་པར་འཛིན་དུ་བཅུག །ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་མདུན་དུ་བཞུད་པ་དང་། དགེ་བསྙེན་ཞིག་གིས་བཅོམ་ལྡན་འདས་རྒྱང་རིང་པོ་ནས་བྱོན་པ་མཐོང་ངོ་། །མཐོང་ནས་དེ་འདི་སྙམ་
དུ་སེམས་ཏེ། ཁྱིམ་བདག་དཔལ་སྦས་འདི་ནི་བཅོམ་ལྡན་འདས་ལ་རྣམ་པ་འདི་ལྟ་བུ་འདི་བྱེད་པར་འདོད་ན། བཅོམ་ལྡན་འདས་བགྲོངས་པར་མི་འགྱུར་གྲང་། བདེ་བར་གཤེགས་པ་བགྲོངས་པར་མི་འགྱུར་གྲང་། འཇིག་རྟེན་གྱི་
མིག་ཤིན་དུ་མྱུར་དུ་མེད་པར་མི་འགྱུར་གྲང་། འཇིག་རྟེན་དུ་མུན་པ་ཤིན་དུ་མྱུར་དུ་མི་འབྱུང་གྲང་། བསྐལ་པ་གྲངས་མེད་པ་གསུམ་དུ་ཡང་དག་པར་བསྒྲུབས་པའི་སངས་རྒྱས་ཤིན་དུ་མྱུར་དུ་ནུབ་པར་མི་འགྱུར་གྲང་། བདག་
ཅག་ཆོས་ཀྱི་ལོངས་སྤྱོད་ལས་ཤིན་དུ་མྱུར་དུ་ཉམས་པར་མི་འགྱུར་གྲང་སྙམ་སྟེ། དེ་ནས་དགེ་བསྙེན་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། 
བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། པུས་མོ་གཉིས་ཀའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །

57-1-301a

བཙུན་པ་བཅོམ་ལྡན་འདས་ཁྱིམ་བདག་དཔལ་སྦས་ཀྱི་ཁྱིམ་དུ་མ་གཤེགས་ཤིག །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས་ཁྱིམ་བདག་དཔལ་སྦས་ཀྱིས་ནི་བཅོམ་ལྡན་འདས་དང་། 
དགེ་སློང་གི་དགེ་འདུན་བགྲོངས་པའི་སླད་དུ་ཕྱི་སྒོའི་སྒོ་གང་དུ་དོང་ཆེན་པོ་རྐོར་སྩལ་ཏོ། །དོང་བརྐོས་ནས་ཞུགས་མི་འབར་ཞིང་དུ་བ་མ་མཆིས་པས་གཏམས་ཏེ། སྟེང་དུ་ཕྱག་དར་སྲབ་མོས་གཡོགས་ཤིང་མཆིས་ན་བཅོམ་
ལྡན་འདས་དང་། དགེ་སློང་གི་དགེ་འདུན་ལ་ཆུང་ཟད་གནོད་པར་ལྟ་མི་འགྱུར་རམ་སྙམ་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་བསྙེན་ཁྱོད་འདི་སྙམ་དུ་མ་སེམས་ཤིག །དགེ་བསྙེན་ང་དུད་
འགྲོའི་སྐྱེ་གནས་སུ་གྱུར་པ་ན་ཡང་ངའི་ལུས་ལ་མེས་མ་ཚུགས་ན། ད་ལྟར་བྱང་ཆུབ་མངོན་པར་རྫོགས་པར་སངས་རྒྱས་པ་ལྟ་ལ་ཅི་སྨོས། ངས་ནི་འདོད་ཆགས་ཀྱི་མེ་དང་། ཞེ་སྡང་གི་མེ་དང་། གཏི་མུག་གི་མེ་དང་། མེ་གསུམ་བསད་
པས་ངའི་ལུས་ལ་མེས་ཚུགས་པར་འགྱུར་བ་འདི་ནི་གནས་མེད་དོ། །བཙུན་པ་བཅོམ་ལྡན་འདས་དུད་འགྲོའི་སྐྱེ་གནས་སུ་གྱུར་པ་ན་ཇི་ལྟར་སྐུ་ལ་ཞུགས་ཀྱིས་མ་ཚུགས་ལགས། བཅོམ་ལྡན་འདས་ཀྱིས་བཀའ་སྩལ་པ། 
དགེ་བསྙེན་སྔོན་བྱུང་བ་འདས་པའི་དུས་ན་འཛམ་བུའི་གླིང་འདི་ན་ནགས་སྟུག་པོ། ལོ་མ་ཕུན་སུམ་ཚོགས་པ། མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། སྐྱེད་མོས་ཚལ་ཕུན་སུམ་ཚོགས་པ་ཞིག་ཡོད་དེ། 
དེའི་ཚེ་ནགས་སྟུག་པོ་དེ་ན་རི་བོང་གི་གྲོགས་དྲང་སྲོང་གནས་ཏེ། རི་བོང་དེ་ནི་མི་སྐད་སྨྲ་བ་ཞིག་གོ། །དེའི་ཚེ་དུས་གཞན་ཞིག་ན་ནགས་སྟུག་པོ་དེར་ཐན་པ་ཆེན་པོ་བྱུང་སྟེ། དེ་ན་འདབ་མ་དང་ལྡན་པའི་ཤིང་གང་ཡིན་པ་དེ་དག་ནི་སྐམ། 
མེ་ཏོག་དང་ལྡན་པའི་ཤིང་གང་ཡིན་པ་དང་། འབྲས་བུའི་ཤིང་གང་ཡིན་པ་དེ་དག་ཀྱང་སྐམ་མོ། །སྐྱེད་མོས་ཚལ་གང་ཡིན་པ་དེ་དག་ཀྱང་ཡོངས་སུ་སྐམ་མོ། །དེ་ནས་དྲང་སྲོང་དེ་རི་བོང་དེ་ག་ལ་བ་དེར་སོང་སྟེ་ཕྱིན་ནས་རི་བོང་དེ་ལ་འདི་

57-1-301b

སྐད་ཅེས་སྨྲས་སོ། །རི་བོང་ཤེས་པར་གྱིས་ཤིག །ནགས་སྟུག་པོ་འདིར་ཐན་པ་ཆེན་པོ་བྱུང་སྟེ། འདབ་མ་དང་ལྡན་པའི་ཤིང་གང་ཡིན་པ་དེ་དག་ནི་སྐམ། མེ་ཏོག་དང་ལྡན་པའི་ཤིང་གང་ཡིན་པ་དང་། འབྲས་བུའི་ཤིང་གང་ཡིན་
པ་དེ་དག་ཀྱང་སྐམ་མོ། །སྐྱེད་མོས་ཚལ་གང་ཡིན་པ་དེ་དག་ཀྱང་ཡོངས་སུ་སྐམ་སྟེ། རི་བོང་བདག་ནི་ནགས་སྟུག་པོ་འདི་ནས་ནགས་སྟུག་པོ་གཞན་དུ་འགྲོ་བར་འདོད་དོ། །རི་བོང་གིས་སྨྲས་པ། དེའི་སླད་དུ་དྲང་སྲོང་དགུང་གཅིག་
ནགས་སྟུག་པོ་འདིར་བཞུགས་ཤིག །བདག་གིས་ཁྱོད་བཤོས་གསོལ་ལོ། །དེ་ནས་དྲང་སྲོང་དེ་གནས་སུ་སོང་སྟེ་མེ་བུས་ནས་སྔགས་ཀྱིས་སྦྱིན་བསྲེག་བྱེད་དོ། །དེ་ནས་རི་བོང་དེ་ནགས་དེར་གོམ་པས་འགྲོ་ཞིང་རྣམ་པར་རྒྱུ་ཡང་
གང་ནས་ཀྱང་འབྲས་བུ་འམ། རྩ་བ་མ་རྙེད་ནས། དེ་འདི་སྙམ་དུ་སེམས་ཏེ། བདག་གིས་དྲང་སྲོང་དེ་ཟས་ལ་མགྲོན་དུ་བོས་ལ། བདག་གིས་ནགས་སྟུག་པོ་འདི་ཐམས་ཅད་དུ་སོན་ཀྱང་། གང་ནས་ཀྱང་འབྲས་བུ་འམ་རྩ་བ་མ་རྙེད་
ཀྱིས། བདག་རང་གི་ཤས་དྲང་སྲོང་དེ་ཚིམ་པར་བྱའོ་སྙམ་སྟེ། དེ་ནས་རི་བོང་དེ་དྲང་སྲོང་དེ་ག་ལ་བ་དེར་སོང་སྟེ་ཕྱིན་ནས་དྲང་སྲོང་དེ་ལ་འདི་སྐད་ཅེས་སྨྲས་སོ། །དྲང་སྲོང་མཁྱེན་པར་མཛོད་ཅིག །བདག་གིས་ཁྱོད་ལ་བཤོས་གསོལ་
བར་སྤྱན་དྲངས་ལ། བདག་གིས་ནགས་སྟུག་པོ་འདི་ཐམས་ཅད་དུ་མཆིས་ཀྱང་གང་ནས་ཀྱང་འབྲས་བུ་དང་རྩ་བ་མ་རྙེད་ནས་བདག་ཞུགས་ཀྱི་དོང་འདིར་བདག་ཉིད་ཀྱིས་མཆོང་གིས། ཁྱོད་ཀྱིས་བདག་གི་ཤ་དེ་གསོལ་ལ་དགུང་
གཅིག་ནགས་སྟུག་པོ་འདི་ན་བཞུགས་ཤིག །དྲང་སྲོང་གིས་སྨྲས་པ། རི་བོང་མ་བྱེད་ཅིག །དེ་སྐད་མ་སྨྲ་ཤིག །ང་ནི་རི་བོང་ཁྱོད་ལ་གནོད་པར་ཡང་མི་འདོད་ན་ང་ཁྱོད་ཀྱི་ཤ་ཟ་བ་ལྟ་ཅི་སྨོས། རི་བོང་གིས་སྨྲས་པ། དྲང་སྲོང་དེ་
སྐད་མ་གསུང་ཤིག །ཁྱོད་ཀྱིས་བདག་གི་བསམ་པ་ངེས་པར་བསྐང་འཚལ་ལོ། །དེ་ནས་རི་བོང་དེ་འདི་ལྟ་བུའི་བདེན་པའི་ཚིག་འདི་སྨྲས་ཏེ། ནགས་སྟུག་པོ་འདིའི་ལྷ་རྒྱ་ཆེན་པོ་རྣམས་བདག་ལ་དགོངས་སུ་གསོལ། ཀླུ་དང་། 

57-1-302a

གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་གང་དག་གནས་པ་དེ་དག་ཐམས་ཅད་བདག་ལ་དགོངས་སུ་གསོལ། བདག་ནི་གཏོང་བ་བགྱིད་དེ་ཤིན་དུ་གཏོང་
བ་དང་། གཏོང་བའི་ཡང་གཏོང་བ་དང་། བདག་ཉིད་གཏོང་བ་བགྱིད་དོ། །བདག་གི་བདེན་པ་དང་བདེན་པའི་ཚིག་གང་གིས་བདག་ཡོངས་སུ་གཏོང་བ་ནི་རྒྱལ་པོའི་སླད་དུ་མ་ལགས། ལོངས་སྤྱོད་ཀྱི་སླད་དུ་མ་ལགས། མཐོ་རིས་ཀྱི་སླད་དུ་
མ་ལགས།  བརྒྱ་བྱིན་ཉིད་ཀྱི་སླད་དུ་མ་ལགས། བདུད་ཀྱི་སླད་དུ་མ་ལགས། ཚངས་པའི་སླད་དུ་མ་ལགས། འཁོར་ལོས་སྒྱུར་བའི་རྒྱལ་པོའི་ཡུལ་གྱི་སླད་དུ་མ་ལགས་ཏེ། གཞན་དུ་བདག་ཇི་ལྟར་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་མངོན་པར་རྫོགས་པར་འཚང་རྒྱ་བར་བགྱི་བ་དང་། སེམས་ཅན་མ་དུལ་བ་གདུལ་བར་བགྱི། མ་གྲོལ་བ་དགྲོལ་བར་བགྱི། དབུགས་མ་ཕྱིན་པ་དབུགས་དབྱུང་བར་བགྱི། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་
ལས་བཟླ་བར་བགྱི་བའི་སླད་དུ་སྟེ། བདེན་པ་དང་བདེན་པའི་ཚིག་དེས་བདག་ཡོངས་སུ་གཏོང་བ་འབྲས་བུ་མ་མཆིས་པར་མ་གྱུར་ཅིག་ཅེས་སྨྲས་ནས་བདག་ཉིད་མེ་དོང་ཆེན་པོ་དེར་མཆོངས་སོ། །དགེ་བསྙེན་རི་བོང་དེས་མེ་དོང་དེར་
མཆོངས་མ་ཐག་ཏུ་མེ་དོང་དེའི་མེ་ཤི་སྟེ་པད་མ་ཅན་གྱི་རྫིང་དུ་གྱུར་ནས། རི་བོང་དེ་བུང་བ་ཟི་ཟི་ཟེར་བར་གྱུར་པའི་པད་མ་འདབ་མ་སྟོང་ཡོད་པའི་སྟེང་ན་འདུག་ཅིང་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། 
ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་སྟོན་ཏོ། །དྲང་སྲོང་གིས་དེ་མཐོང་སྟེ། མཐོང་ནས་ཀྱང་དགའ་མགུ་ཡིད་རངས་ཏེ་རབ་
ཏུ་དགའ་ནས། དགའ་བ་དང་ཡིད་བདེ་བ་སྐྱེས་ཏེ། རི་བོང་དེ་ལ་ཐལ་མོ་སྦྱར་ཏེ་ཕྱག་འཚལ་ཏོ། །དགེ་བསྙེན་དེའི་ཚེ་དེའི་དུས་ན་ནགས་སྟུག་པོ་དེ་ན་གནས་པའི་དྲང་སྲོང་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཙོམ་ཟ་

57-1-302b

ན་དེ་ལྟར་མི་བལྟ་སྟེ། དགེ་སློང་འོད་སྲུང་དེའི་ཚེ་དེའི་དུས་ན་ནགས་སྟུག་པོའི་དྲང་སྲོང་དུ་གྱུར་ཏོ། །དགེ་བསྙེན་དེའི་ཚེ་དེའི་དུས་ན་ནགས་སྟུག་པོའི་རི་བོང་དུ་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཙོམ་ཟ་ན་
དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་རི་བོང་དུ་གྱུར་ཏོ། །དགེ་བསྙེན་ང་དུད་འགྲོའི་སྐྱེ་གནས་སུ་གྱུར་པ་དེའི་ཚེ་ཡང་ངའི་ལུས་ལ་མེས་མ་ཚུགས་ན། ད་ལྟར་བྱང་ཆུབ་མངོན་པར་རྫོགས་པར་སངས་རྒྱས་པ་ལྟ་ལ་ཅི་སྨོས་ཏེ། 
ངའི་ལུས་ལ་མེས་ཚུགས་པར་འགྱུར་བ་འདི་ནི་གནས་མེད་དོ། །དེ་ནས་བཅོམ་ལྡན་འདས་ཀྱིས་དགེ་བསྙེན་དེ་དང་། སྐྱེ་བོ་ཕལ་པོ་ཆེ་ལ་ཆོས་ཀྱི་གཏམ་ཡང་དག་པར་སྟོན། ཡང་དག་པར་འཛིན་དུ་འཇུག །ཡང་དག་པར་གཟེང་
བསྟོད། ཡང་དག་པར་རབ་ཏུ་དགའ་བར་མཛད་དོ། །ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཁྱིམ་བདག་དཔལ་སྦས་ཀྱི་ཁྱིམ་
ག་ལ་བ་དེར་གཤེགས་སོ། །དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་སྐྱེ་བོ་ཕལ་པོ་ཆེ་རྣམས་འདི་ཇི་ལྟར་འགྱུར་སྙམ་སྟེ། ཁྱིམ་བདག་དཔལ་སྦས་ཀྱི་ཕྱི་སྒོའི་སྒོ་གང་ག་ལ་བ་དེར་དོང་ངོ་། །དེ་ནས་བཅོམ་ལྡན་འདས་མེ་དོང་
ཆེན་པོ་ག་ལ་བ་དེར་གཤེགས་ཏེ་བྱོན་ནས་མེ་དོང་ཆེན་པོ་དེར་ཞབས་གཡས་པ་གསེར་གྱི་ཁ་དོག་ཅན་ཐོག་མར་བཞག་སྟེ། བཅོམ་ལྡན་འདས་ཀྱིས་མེ་དོང་དེར་ཞབས་གཡས་པ་གསེར་གྱི་ཁ་དོག་ཅན་དེ་བཞག་མ་ཐག་ཏུ་མེ་
དོང་དེའི་མེ་ཤི་བར་གྱུར་ཏེ་པད་མའི་རྫིང་བུར་གྱུར་ནས་བུང་བ་ཟི་ཟི་ཟེར་བར་གྱུར་ཏོ། །བཅོམ་ལྡན་འདས་ཀྱིས་ཞབས་གཡས་པ་གསེར་གྱི་ཁ་དོག་ཅན་མེ་དོང་དེར་བཞག་མ་ཐག་ཏུ་ལྷ་རྣམས་ལྷའི་ཙན་དན་གྱི་ཕྱེ་མ་དག་བཅོམ་
ལྡན་འདས་ཀྱི་སྐུ་ལ་འཐོར། མངོན་པར་འཐོར། མངོན་པར་རབ་ཏུ་འཐོར་རོ། །ལྷའི་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། ལྷའི་མེ་ཏོག་མན་དཱ་ར་བ་དག་བཅོམ་ལྡན་འདས་ཀྱི་སྐུ་ལ་འཐོར། 

57-1-303a

མངོན་པར་འཐོར། མངོན་པར་རབ་ཏུ་འཐོར་རོ། །ལྷའི་རོལ་མོའི་སྒྲ་ཡང་འབྱིན་ཏོ། །སིལ་སྙན་གྱི་སྒྲ་ཡང་འབྱིན་ཏོ། །དུང་དང་། རྔ་བོ་ཆེ་དང་། རྫ་རྔ་དང་། ཁར་རྔ་ལ་སོགས་པའི་སྒྲ་ཡང་ཕྱུང་ངོ་། །རྒྱལ་པོའི་ཁབ་ཀྱི་གྲོང་ཁྱེར་
ཆེན་པོའི་སྐྱེ་བོ་ཕལ་པོ་ཆེ་རྣམས་ངོ་མཚར་དུ་གྱུར་རྨད་དུ་བྱུང་བར་གྱུར་ཏེ་གསང་བསྟོད་ནས་སྒྲ་དྲག་པོ་དང་། སྒྲ་ཆེན་པོར་ཧ་ཧ་ཞེས་བྱ་བ་དང་། ཧི་ཧི་ཞེས་བྱ་བ་དང་། ཅ་ཅོ་དང་ག་ཞ་འཐོན་ཏོ། །བཅོམ་ལྡན་འདས་ལ་གོས་ཀྱང་འཐོར་རོ། །
དེའི་ཚེ་ཁྱིམ་བདག་དཔལ་སྦས་ནི་གཅེར་བུ་པ་ཉེ་དུའི་བུ་དང་ལྷན་ཅིག་ཏུ་ཁང་སྟེང་ན་འདུག་གོ། །ཁྱིམ་བདག་དཔལ་སྦས་ཀྱི་ཆུང་མ་ཁྱིམ་གྱི་ནང་ན་འདུག་པས་རྒྱལ་པོའི་ཁབ་ཏུ་སྒྲ་དྲག་པོ་དང་། སྒྲ་ཆེན་པོ་ཕྱུང་བ་ཐོས་སོ། །ཐོས་ནས་
དེ་འདི་སྙམ་དུ་སེམས་ཏེ། འདི་ལྟར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་འདིར་སྒྲ་མཐོན་པོ་དང་། སྒྲ་དྲག་པོ་དང་། སྒྲ་ཆེན་པོ་བྱུང་བ་ལས་བཅོམ་ལྡན་འདས་མེ་དོང་ཆེན་པོ་དེར་ལྷུང་སྟེ་གྲོངས་པར་མ་གྱུར་གྲང་། བདེ་བར་གཤེགས་པ་གྲོངས་
པར་མ་གྱུར་གྲང་སྙམ་ནས་བསྒྲིམས་ཏེ་སྟོབས་གཏུགས་ནས་སྒོ་ཕྱེ་སྟེ། བང་ཐག་པར་སྒོ་ཁང་ག་ལ་བ་དེར་སོང་བ་དང་། ཁྱིམ་བདག་དཔལ་སྦས་ཀྱི་ཆུང་མ་དེས་མེ་དོང་དེའི་མེ་ཤི་སྟེ་པད་མའི་རྫིང་དུ་གྱུར་ནས་བུང་བ་ཟི་ཟི་ཟེར་བའི་པད་མ་
ལ་བཅོམ་ལྡན་འདས་ཀྱི་ཞབས་བཞག་སྟེ་དཔལ་སྦས་ཀྱི་ཁྱིམ་དུ་གཤེགས་པ་མཐོང་ངོ་། །མཐོང་ནས་དགའ་མགུ་ཡིད་རངས་ཏེ་རབ་ཏུ་དགའ་ནས། དགའ་བ་དང་ཡིད་བདེ་བ་སྐྱེས་ཏེ་ཁྱིམ་བདག་དཔལ་སྦས་ག་ལ་བ་དེར་སོང་ནས་
ཕྱིན་པ་དང་། ཁྱིམ་བདག་དཔལ་སྦས་ལ་འདི་སྐད་ཅེས་སྨྲས་སོ། །ཇོ་བོ་ཞུགས་དོང་གི་ཞུགས་གུམ་ནས་པད་མའི་རྫིང་བུར་གྱུར་ཏེ་བུང་བ་ཟི་ཟི་མཆི་བའི་པད་མ་ལ་བཅོམ་ལྡན་འདས་ཀྱི་ཞབས་བཞག་ནས་ཁྱོད་ཀྱི་ཁྱིམ་དུ་བྱོན་པ་ལ་
གཟིགས་ཤིག །གཟིགས་ཤིག །དེ་ནས་ཁྱིམ་བདག་དཔལ་སྦས་འཇིགས། དངངས། སྐྲག་སྟེ་སྤུ་ཟིང་ཞེས་བྱེད་ནས་རིངས་ཤིང་མྱུར་བར་ལ་གོར་དུ་ཁང་སྟེང་ནས་བབས་ཏེ་སྒོ་གང་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་

57-1-303b

ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་བདག་གིས་ནོངས། བདེ་བར་གཤེགས་པ་བདག་གིས་ནོངས་ཏེ་སླར་འཆགས་སོ། །བྱིས་པ་ཇི་ལྟ་བ་དང་། རྨོངས་པ་ཇི་ལྟ་བ་དང་། མི་མཁས་
པ་ཇི་ལྟ་བ་བཞིན་དུ་བདག་མི་དགེ་བའི་བཤེས་གཉེན་དང་བསྟེན་པའི་དབང་གིས་བཅོམ་ལྡན་འདས་ལ་རྣམ་པ་འདི་ལྟ་བུ་བགྱི་བར་བསམས་ན། བཅོམ་ལྡན་འདས་བདག་ནོངས་པས་ནོངས་པ་ཅན་དུ་གཟུང་དུ་གསོལ། སླན་ཆད་ཀྱང་
སྡོམ་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། དེའི་ཕྱིར་ཁྱིམ་བདག་ཁྱོད་བྱིས་པ་ཇི་ལྟ་བ་དང་། རྨོངས་པ་ཇི་ལྟ་བ་དང་། མི་མཁས་པ་ཇི་ལྟ་བ་བཞིན་དུ་མི་དགེ་བའི་བཤེས་གཉེན་དང་བསྟེན་པའི་དབང་གིས་ཁྱོད་
ཀྱིས་རྣམ་པ་འདི་ལྟ་བུ་འདི་བྱས་པ་ཉེས་པས་ཉེས་པ་ཅན་དུ་རྟོགས་ཤིག །ཁྱིམ་བདག་ཁྱོད་གང་གི་ཚེ་ཉེས་པས་ཉེས་པ་ཅན་དུ་མཐོང་ལ། ཉེས་པས་ཉེས་པ་ཅན་དུ་མཐོང་ནས་འཆགས། མཐོལ། ཕྱིན་ཆད་ཀྱང་སྡོམ་ན་དེའི་ཕྱིར་
ངས་ཁྱོད་ལ་ཉེས་པས་ཉེས་པ་ཅན་དུ་བཟུང་ངོ་། །དེ་ཅིའི་ཕྱིར་ཞེ་ན། ཁྱིམ་བདག་ཆོས་འདུལ་བ་འདི་ལ་འདི་ནི་འཕེལ་བ་སྟེ། ཉེས་པས་ཉེས་པ་ཅན་དུ་མཐོང་ནས་འཆགས་ཤིང་འཐོལ་ཏེ་ཕྱིན་ཆད་ཀྱང་སྡོམ་པའོ། །ཁྱིམ་བདག་
ཁྱོད་ལོངས། འདི་ལྟར་འདིར་སེམས་དད་པས་མཆོད་པ་བྱས་སོ། །དེ་ནས་ཁྱིམ་བདག་དཔལ་སྦས་ཀྱིས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་མདུན་དུ་བདར་ཏོ། །དེ་ནས་བཅོམ་ལྡན་འདས་སྟེང་གི་ཁང་
བཟངས་ག་ལ་བ་དེར་གཤེགས་ཏེ་བྱོན་ནས་གདན་བཤམས་པ་ལ་དགེ་སློང་གི་དགེ་འདུན་དང་ཐབས་གཅིག་ཏུ་བཞུགས་སོ། །དེ་ནས་ཁྱིམ་བདག་དཔལ་སྦས་ཀྱིས་བཅོམ་ལྡན་འདས་དང་། དགེ་སློང་གི་དགེ་འདུན་
བཞུགས་པར་རིག་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། པུས་མོ་གཉིས་ཀའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དོ། །ཐལ་མོ་སྦྱར་བ་བཏུད་ནས་

57-1-304a

བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཆུང་ཟད་ཅིག་གཞེས་སུ་གསོལ། བདག་གིས་བཅོམ་ལྡན་འདས་ཀྱི་སླད་དུ་བཤོས་གཙང་གཞན་བགྱིད་དུ་སྩལ་ཏོ། །དེ་ཅིའི་
སླད་དུ་ཞེ་ན། བཙུན་པ་བཅོམ་ལྡན་འདས་མི་དགེ་བའི་བཤེས་གཉེན་དང་བསྟེན་པའི་དབང་གིས་བདག་གིས་བཤོས་གཙང་ཅི་སྦྱར་བ་དེ་ཐམས་ཅད་ཀྱི་ནང་དུ་དུག་དྲག་པོ་སྩལ་བས། དེས་བཅོམ་ལྡན་འདས་དང་དགེ་སློང་གི་དགེ་
འདུན་ལ་ཆུང་ཟད་གནོད་པར་འགྱུར་དུ་གློ་བ་ཆུད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དེ་སྙམ་དུ་མ་སེམས་ཤིག །ཁྱིམ་བདག་ང་དུད་འགྲོའི་སྐྱེ་གནས་སུ་གྱུར་པའི་ཚེ་ཡང་ལུས་ལ་དུག་གིས་མ་
ཚུགས་ན། ད་བྱང་ཆུབ་མངོན་པར་རྫོགས་པར་སངས་རྒྱས་པ་ལྟ་ལ་ཅི་སྨོས་ཏེ། ངའི་ལུས་ལ་དུག་གིས་ཚུགས་པར་འགྱུར་བ་འདི་ནི་གནས་མེད་དོ། །བཅོམ་ལྡན་འདས་དུད་འགྲོའི་སྐྱེ་གནས་སུ་གྱུར་པ་ན་ཇི་ལྟར་སྐུ་ལ་དུག་གིས་
མ་ཚུགས་ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་སྔོན་བྱུང་བ་འདས་པའི་དུས་ན་གྲོང་ཁྱེར་བཱ་རཱ་ཎ་སཱིའི་རྒྱལ་པོ་ཚངས་པས་བྱིན་ཞེས་བྱ་བ་ཕྱུག་པ། ནོར་ཆེ་བ། ལོངས་སྤྱོད་ཆེ་བ་ནས་བང་མཛོད་ཡོངས་
སུ་གང་བའི་བར་དང་ལྡན་པ་ཞིག་བྱུང་ངོ་། །ཁྱིམ་བདག་རྒྱལ་པོ་ཚངས་པས་བྱིན་ལ་བཙུན་མོ་དཔེ་མེད་ཅེས་བྱ་བ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་ཡོད་དོ། །
བཙུན་མོ་དཔེ་མེད་ནི་རྒྱལ་པོ་ཚངས་པས་བྱིན་ལ་སྡུག་པ། མདོས་པ། ཕངས་པ། ཡིད་དུ་འོང་བ། འདོད་པ། བལྟ་བ་དང་འཐུན་པའོ། །ཁྱིམ་བདག་དེའི་ཚེ་ན་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་རྨ་བྱའི་རྒྱལ་པོ་
གསེར་དུ་སྣང་བ་ཞེས་བྱ་བ་འཁོར་ལྔ་བརྒྱ་དང་ལྡན་པ། ཡན་ལག་བཀྲ་བ། ལུས་བཀྲ་བ། རིན་པོ་ཆེའི་མཆུ་ཅན་ཞིག་གནས་ཏེ། དེ་གང་དང་གང་དུ་འགྲོ་ཡང་རྨ་བྱ་དེ་དག་ཐམས་ཅད་ཀྱི་ཐོག་མ་ཉིད་ལ་འགྲོའོ། །དེའི་ཚེ་

57-1-304b

དུས་གཞན་ཞིག་ན་རྨ་བྱའི་རྒྱལ་པོ་གསེར་དུ་སྣང་བ་ནམ་ཕྱེད་ཀྱི་དུས་ནམ་གྱི་གུང་ཐུན་ལ་གྲོང་ཁྱེར་བཱ་ར་ཎ་སཱིའི་སྟེང་དུ་སྐད་ཕྱུང་སྟེ། སྐད་དེས་གྲོང་ཁྱེར་དེ་ཁྱབ་པར་གྲག་གོ། །དེའི་ཚེ་རྒྱལ་པོ་ཚངས་པས་བྱིན་བཙུན་མོ་དཔེ་
མེད་དང་ཁང་སྟེང་ན་འདུག་པར་གྱུར་ཏོ། །དེ་ནས་བཙུན་མོ་དཔེ་མེད་ཀྱིས་སྒྲ་དེ་ཐོས་ནས་རྒྱལ་པོ་ཚངས་པས་བྱིན་དེ་ལ་དྲིས་པ། ལྷ་འདི་ལྟར་ཆགས་པར་བགྱིད་པ། འདི་ལྟར་འདོད་པར་བགྱིད་པ། འདི་ལྟར་དྲེགས་པར་བགྱིད་པ། འདི་ལྟར་
ཞེན་པར་བགྱིད་པ། འདི་ལྟར་འཆིང་བར་བགྱིད་པ། འདི་ལྟར་དགའ་བར་བགྱིད་པ། འདི་ལྟར་རོ་མྱང་བར་འོས་པ། འདི་ལྟར་སྙན་ཅིང་ཡིད་དུ་མཆི་ལ་མཉན་པར་འོས་པའི་སྒྲ་གདའ་བ་འདི་སུའི་ལགས། རྒྱལ་པོས་སྨྲས་པ། ལྷ་མོ་ངས་ཀྱང་
མ་མཐོང་སྟེ་གཏམ་དུ་ཐོས་ན་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་རྨ་བྱའི་རྒྱལ་པོ་གསེར་དུ་སྣང་བ་ཡན་ལག་བཀྲ་བ། ལུས་བཀྲ་བ། རིན་པོ་ཆེའི་མཆུ་ཅན། འཁོར་ལྔ་བརྒྱ་དང་ལྡན་པ་ཞིག་གནས་ཏེ། དེ་གང་དང་གང་དུ་འགྲོ་
ཡང་རྨ་བྱ་དེ་དག་ཐམས་ཅད་ཀྱི་ཐོག་མ་ཉིད་ལ་འགྲོ་སྟེ་ལྷ་མོ་དེའི་སྒྲ་ནི་འདི་ལྟར་ཆགས་པར་བྱེད་པ། འདི་ལྟར་འདོད་པར་བྱེད་པ། འདི་ལྟར་དྲེགས་པར་བྱེད་པ། འདི་ལྟར་ཞེན་པར་བྱེད་པ། འདི་ལྟར་འཆིང་བར་བྱེད་པ། འདི་ལྟར་དགའ་བར་
བྱེད་པ། འདི་ལྟར་རོ་མྱང་བར་འོས་པ། འདི་ལྟར་སྙན་ཅིང་ཡིད་དུ་འོང་ལ་མཉན་པར་འོས་པར་གྲག་ཅེའོ། །བཙུན་མོ་དཔེ་མེད་ཀྱིས་སྨྲས་པ། ལྷ་རྨ་བྱའི་རྒྱལ་པོ་གསེར་དུ་སྣང་བ་མྱུར་དུ་འདིར་བླང་བར་གསོལ། རྒྱལ་པོ་ཚངས་པས་བྱིན་
གྱིས་སྨྲས་པ། ལྷ་མོ་ནམ་མཁའ་ལ་རྒྱུ་བ་འདི་ལྟ་བུ་ངས་ཀྱང་མཐོང་བར་ག་ལ་ནུས། བཙུན་མོ་དཔེ་མེད་ཀྱིས་སྨྲས་པ། ལྷ་གལ་ཏེ་རྨ་བྱའི་རྒྱལ་པོ་གསེར་དུ་སྣང་བ་མ་མཐོང་དུ་ལགས་ན་བདག་འགུམ་པར་འགྱུར་རོ། །རྒྱལ་པོ་ཚངས་
པས་བྱིན་བཙུན་མོ་དཔེ་མེད་ལ་ཀུན་དུ་ཆགས་པའི་སེམས་སུ་གྱུར་ཏེ། སེམས་ཞེན་པས་རྒྱལ་པོ་ཚངས་པས་བྱིན་གྱིས་སྨྲས་པ། ལྷ་མོ་ངས་རྔོན་པ་དང་བྱ་བ་དགྱེས་རེ་ཤིག་སྡོད་ཅིག །དེ་ནས་རྒྱལ་པོ་ཚངས་པས་བྱིན་གྱིས་

57-1-305a

རྔོན་པ་དང་བྱ་བའི་མི་རྣམས་བོས་ཏེ་འདི་སྐད་སྨྲས་སོ། །མཆོག་རྣམས་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བ་ཡན་ལག་བཀྲ་བ། ལུས་བཀྲ་བ། གསར་གྱི་
མཆུ་ཅན་ཞིག་གནས་ཤེས་གྲག་གིས། ཁྱེད་ཀྱིས་རྨ་བྱའི་རྒྱལ་པོ་གསེར་དུ་སྣང་བ་བྱ་རྒྱ་དང་སྙིས་ཟུང་ལ་འདིར་འོན་ཅིག །གལ་ཏེ་འདིར་བླང་ནུས་ན་དེ་ལྟ་ན་ནི་ལེགས་སོ། །ཇི་སྟེ་མི་ནུས་ན་ཁྱེད་ཐམས་ཅད་ཀྱི་སྲོག་ཡལ་ལོ། །དེ་
ནས་རྔོན་པ་དང་བྱ་པའི་མི་རྣམས་སྲོག་གིས་འཇིགས་སྐྲག །འཆི་བས་འཇིགས་སྐྲག་སྟེ། བྱ་རྒྱ་དང་སྙི་རྣམས་ཐོགས་ནས་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ག་ལ་བ་དེར་སོང་ནས་ཕྱིན་པ་དང་། རྨ་བྱའི་རྒྱལ་པོ་གསེར་དུ་སྣང་བ་
གང་ན་གནས་པའི་ཕྱོགས་དེར་རྒྱ་བྲེས་སྙི་བཙུགས་པ་དང་། རྨ་བྱའི་རྒྱལ་པོ་གསེར་དུ་སྣང་བ་དེ་གང་དང་གང་དུ་ལྟ་བ་དེ་དང་དེར་རྒྱ་རལ་སྙི་ཆད་དེ། ཕྱོགས་དེར་ཞག་བདུན་གྱི་བར་དུ་ཤ་ཐང་ཡང་རྨ་བྱའི་རྒྱལ་པོ་གསེར་དུ་སྣང་བ་དེ་བྱ་རྒྱ་དང་
སྙིས་གཟུང་བར་མ་ནུས་པ་དང་། རྨ་བྱའི་རྒྱལ་པོ་དེས་སྙིང་རྗེ་ཉེ་བར་བཞག་ནས་རྔོན་པ་དང་བྱ་པ་རྣམས་ལ་འདི་སྐད་ཅེས་སྨྲས་སོ། །ཞོ་ཤས་འཚོ་བ་ཁྱེད་རྣམས་ཅིའི་ཕྱིར་ཕྱོགས་འདི་ན་ཤ་ཐང་ཞིང་འཁོད། དེ་དག་གིས་སྨྲས་པ། རྨ་
བྱའི་རྒྱལ་པོ་ཤེས་པར་གྱིས་ཤིག །རྒྱལ་པོ་ཚངས་པས་བྱིན་དེས་བསྒོ་བ་མཆོག་རྣམས་ཤེས་པར་གྱིས་ཤིག །རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བ་ཡན་ལག་བཀྲ་བ་ལུས་བཀྲ་
བ། རིན་པོ་ཆེའི་མཆུ་ཅན། འཁོར་ལྔ་བརྒྱ་དང་ལྡན་པ་ཞིག་གནས་ཀྱིས། དེ་ཁྱེད་ཀྱིས་བྱ་རྒྱ་དང་སྙིས་ཟུང་ལ་འདིར་འོན་ཅིག །གལ་ཏེ་འདིར་བླང་བར་ནུས་ན་ནི་ཤིན་དུ་ལེགས་སོ། །ཇི་སྟེ་མ་ནུས་ན་ཁྱེད་ཐམས་ཅད་ཀྱི་སྲོག་ཡལ་ལོ། །
ཞེས་བསྒོ་སྟེ། བདག་ཅག་སྲོག་གིས་འཇིགས་སྐྲག་ནས་ཁྱོད་ཀྱི་ཕྱིར་འདི་ལྟ་བུར་འབད་པར་བྱེད་དོ། །རྨ་བྱའི་རྒྱལ་པོ་དེས་སྨྲས་པ། ཞོ་ཤས་འཚོ་བ་དག་ཁྱེད་ཀྱིས་སྙི་དང་བྱ་རྒྱས་ང་གཟུང་བ་ནི་མི་ནུས་སོ། །ཞོ་ཤས་འཚོ་བ་

57-1-305b

དག་གལ་ཏེ་རྒྱལ་པོ་ཚངས་པས་བྱིན་ང་བལྟ་བར་འདོད་ན་གྲོང་ཁྱེར་བཱ་རཱ་ཎ་སིའི་ནང་ཤིན་དུ་ཕྱག་དར་བྱས་ཏེ། སྤོས་ཆུས་ཆག་ཆག་ཐོབ་ལ་མེ་ཏོག་སིལ་མ་ཁྲོམ་སྟེ། གདུགས་དང་བ་དན་བྲེས་ཤིག །རྒྱལ་མཚན་སྒྲེང་ལ། པོག་ཕོར་
ནས་བདུག་པས་བདུགས་ལ་རིན་པོ་ཆེ་སྣ་བདུན་གྱི་ཤིང་རྟ་གྱིས་ཏེ། ཞག་བདུན་གྱི་ཉིན་པར་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་འདིར་ཤོག་ཤིག་དང་། ང་ཉིད་དེར་འགྲོ་བར་བྱའོ། །དེ་ལྟར་བྱའོ་ཞེས་ཏེ། རྔོན་པ་དང་བྱ་
པའི་མི་དག་རྨ་བྱའི་རྒྱལ་པོ་གསེར་དུ་སྣང་བའི་ལྟར་མཉན་ནས་མཐར་གྱིས་གྲོང་ཁྱེར་བཱ་རཱ་ཎ་སི་དེར་རྒྱལ་པོ་ཚངས་པས་བྱིན་ག་ལ་བ་དེར་སོང་སྟེ་ཕྱིན་ནས་རྒྱལ་པོ་ཚངས་པས་བྱིན་ལ་འདི་སྐད་སྨྲས་སོ། །ལྷ་མཁྱེན་པར་མཛད་དུ་
གསོལ། བདག་ཅག་འདི་ནས་བྱ་རྒྱ་དང་བསྙི་ཐོགས་ཏེ་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས། ག་ལ་བ་དེར་མཆིས་པ་དང་། ཕྱོགས་གང་ན་རྨ་བྱའི་རྒྱལ་པོ་གསེར་དུ་སྣང་བ་གནས་པའི་ཕྱོགས་དེར་སྙི་བཙུགས། རྒྱ་བྲེས་
ན། རྨ་བྱའི་རྒྱལ་པོ་གསེར་དུ་སྣང་བ་གང་དང་གང་དུ་ལྟ་བ་དེ་དང་དེར་རྒྱ་རལ་སྙི་ཆད་དེ། བདག་ཅག་ཕྱོགས་དེ་ན་དགུང་བདུན་གྱི་བར་དུ་ཤ་ཐང་ཡང་རྨ་བྱའི་རྒྱལ་པོ་དེ་རྒྱ་དང་སྙིས་བཟུང་བའི་རྔོ་མ་ཐོག་པ་དང་། རྨ་བྱའི་རྒྱལ་པོ་དེས་སྙིང་
རྗེ་ཉེ་བར་བཞག་སྟེ་བདག་ཅག་ལ་འདི་སྐད་ཅེས་མཆིའོ། །ཀྱེ་མི་དག་ཅིའི་ཕྱིར་ཕྱོགས་འདི་ན་ཤ་ཐང་ཞིང་འཁོད། བདག་ཅག་གིས་སྨྲས་པ། རྨ་བྱའི་རྒྱལ་པོ་ཤེས་པར་གྱིས་ཤིག །རྒྱལ་པོ་ཚངས་པས་བྱིན་གྱིས་བདག་ཅག་
ལ་བསྒོ་བ། རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བ་ཡན་ལག་བཀྲ་བ། ལུས་བཀྲ་བ། རིན་པོ་ཆེའི་མཆུ་ཅན། འཁོར་ལྔ་བརྒྱ་དང་ལྡན་པ་དེ་གང་དང་གང་དུ་འགྲོ་བར་རྨ་བྱ་དེ་དག་
ཐམས་ཅད་ཀྱི་དང་པོ་ལ་འགྲོ་བ་ཞིག་གནས་ཤེས་གྲག་གིས། ཁྱེད་ཀྱིས་བྱ་རྒྱ་དང་སྙིས་རྨ་བྱའི་རྒྱལ་པོ་གསེར་དུ་སྣང་བ་ཟུང་ལ་འོན་ཅིག །གལ་ཏེ་རྨ་བྱའི་རྒྱལ་པོ་དེ་འདིར་བླང་ནུས་ན་དེ་ལྟ་ན་ནི་ལེགས་སོ། །ཇི་སྟེ་མ་ནུས་ན་ཁྱེད་

57-1-306a

ཐམས་ཅད་ཀྱི་སྲོག་ཡལ་ལོ་ཞེས་བསྒོ་སྟེ། བདག་ཅག་སྲོག་གིས་འཇིགས་སྐྲག །འཆི་བས་འཇིགས་སྐྲག་ནས་ཁྱོད་ཀྱི་ཕྱིར་འདི་ལྟར་འབད་པར་བྱེད་དོ། །དེས་སྨྲས་པ། ཀྱེ་ཞོ་ཤས་འཚོ་བ་དག་ཁྱེད་གྱིས་
བྱ་རྒྱ་དང་སྙིས་བཟུང་བར་ནི་མི་ནུས་སོ། །ཞོ་ཤས་འཚོ་བ་དག་གལ་ཏེ་རྒྱལ་པོ་ཚངས་པས་བྱིན་ང་མཐོང་བར་འདོད་ན་གྲོང་ཁྱེར་བཱ་རཱ་ཎ་སཱིའི་ནང་ཤིན་དུ་ཕྱག་དར་བྱོས་ཏེ། སྤོས་ཆུས་ཆག་ཆག་ཐོབ་ལ་མེ་ཏོག་སིལ་མ་ཁྲོམ་སྟེ། 
གདུགས་དང་བ་དན་བྲེས་ཤིག །རྒྱལ་མཚན་སྒྲེང་ལ། པོག་པོར་ནས་བདུག་པས་བདུགས་ལ་རིན་པོ་ཆེ་སྣ་བདུན་གྱི་ཤིང་རྟ་གྱིས་ཏེ། ཞག་བདུན་གྱི་ཉིན་པར་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་འདིར་ཤོག་ཤིག་
དང་། ང་ཉིད་དེར་འགྲོ་བར་བྱའོ་ཞེས་མཆིའོ། །དེ་ལྟར་བྱའོ་ཞེས་ཏེ་རྒྱལ་པོ་ཚངས་པས་བྱིན་གྱིས་རྔོན་པ་དང་བྱ་པ་དེ་དག་གི་ལྟར་མཉན་ནས་གྲོང་ཁྱེར་བཱ་རཱ་ཎ་སཱིའི་ནང་ཤིན་དུ་ཕྱག་དར་བྱེད་དུ་བཅུག །སྤོས་ཆུས་ཆག་ཆག་འདེབས་སུ་
བཅུག །མེ་ཏོག་སིལ་མ་འགྲེམས་སུ་བཅུག །གདུགས་དང་བ་དན་འབྲེང་བཅུག །རྒྱལ་མཚན་སྒྲེང་དུ་བཅུག །པོག་ཕོར་ནས་བདུག་པས་བདུག་ཏུ་བཅུག །རིན་པོ་ཆེ་སྣ་བདུན་གྱི་ཤིང་རྟ་བྱེད་དུ་བཅུག་ནས་ཞག་བདུན་འདས་པ་དང་། 
དཔུང་གི་ཚོགས་ཡན་ལག་བཞི་པ་གོ་གྱོན་དུ་བཅུག་སྟེ། དཔུང་གི་ཚོགས་ཡན་ལག་བཞི་པ་གོ་བགོས་ནས་རིན་པོ་ཆེ་སྣ་བདུན་གྱི་ཤིང་རྟ་ལྔ་སྟེ། དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་རིའི་རྒྱལ་པོ་གངས་རིའི་ལྷོ་ཕྱོགས་
ཀྱི་ངོས་ག་ལ་བ་དེར་སོང་བ་དང་། རྨ་བྱའི་རྒྱལ་པོ་གསེར་དུ་སྣང་བ་དེ་བདག་ཉིད་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་སྐད་ཕྱུང་བ་དང་། དེའི་སྐད་ཀྱིས་དཔུང་གི་ཚོགས་ཡན་ལག་བཞི་པ་ཁྱབ་པར་གྲག་ནས་རྒྱལ་པོ་ཚངས་པས་
བྱིན་དགའ་མགུ་ཡི་རངས་ཏེ་རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ་རྨ་བྱའི་རྒྱལ་པོ་གསེར་དུ་སྣང་བ་དེ་ལ་བཀུར་སྟི་བྱེད་དུ་བཅུག །བླ་མར་བྱེད་དུ་བཅུག །རིམ་གྲོ་བྱེད་དུ་བཅུག །མཆོད་པ་བྱེད་དུ་བཅུག་ནས་རྨ་བྱའི་

57-1-306b

རྒྱལ་པོ་གསེར་དུ་སྣང་བ་དང་ལྷན་ཅིག་གྲོང་ཁྱེར་བཱ་རཱ་ཎ་སཱི་ག་ལ་བ་དེར་སོང་བ་དང་། གྲོང་ཁྱེར་བཱ་རཱ་ཎ་སཱིའི་སྒོར་འདུག་ནས་སྐད་ཕྱུང་སྟེ། དེའི་སྐད་དེས་གྲོང་ཁྱེར་དེ་ཐམས་ཅད་ཁྱབ་པར་གྲག་གོ། །དེ་ནས་གྲོང་ཁྱེར་བཱ་རཱ་ཎ་སཱིའི་
ན་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་གང་དག་གནས་པ་དེ་དག་གྲོང་ཁྱེར་གྱི་སྒོ་ག་ལ་བ་དེར་རབ་ཏུ་རྒྱུག་གོ། །དེ་ནས་རྒྱལ་པོ་ཚངས་པས་བྱིན་གྱིས་རྨ་བྱའི་རྒྱལ་པོ་གསེར་དུ་སྣང་བ་ལ་བཀུར་སྟི་བྱེད་དུ་བཅུག །བླ་མར་བྱེད་དུ་
བཅུག །རིམ་གྲོ་བྱེད་དུ་བཅུག །མཆོད་པ་བྱེད་དུ་བཅུག་ནས། རང་གི་ཁྱིམ་ག་ལ་བ་དང་། བཙུན་མོ་དཔེ་མེད་ག་ལ་བ་དེར་སོང་སྟེ་ཕྱིན་ནས། བཙུན་མོ་དཔེ་མེད་ལ་འདི་སྐད་ཅེས་སྨྲས་ཏེ། ལྷ་མོ་རྨ་བྱའི་རྒྱལ་པོ་གསེར་དུ་སྣང་བ་འདི་
ནི་ཁྱོད་ཀྱི་གན་དུ་རང་འོངས་སོ་ཞེས་སྨྲས་སོ། །རྒྱལ་པོ་ཚངས་པས་བྱིན་དེ་བདག་ཉིད་རྨ་བྱའི་རྒྱལ་པོ་གསེར་དུ་སྣང་བ་ལ་མེ་ཏོག་དང་འབྲས་བུ་རྣམས་ཀྱིས་རིམ་གྲོ་བྱེད་དོ། །དེའི་ཚེ་དུས་གཞན་ཞིག་ན་རྒྱལ་པོ་ཚངས་པས་
བྱིན་བྲེལ་བ་ཞིག་བྱུང་ནས་དེས་འདི་སྙམ་དུ་བསམས་ཏེ། སུས་རྨ་བྱའི་རྒྱལ་པོ་གསེར་དུ་སྣང་བ་ལ་རིམ་གྲོ་བྱེད་ནུས་སྙམ་ནས། དེས་ཡང་འདི་སྙམ་དུ་བསམས་ཏེ། བཙུན་མོ་དཔེ་མེད་ནི་མཁས་པ། ཤེས་རབ་ཆེན་པོ་དང་
ལྡན་པ་སྟེ་དེས་ནུས་སོ་སྙམ་མོ། །དེ་ནས་རྒྱལ་པོ་ཚངས་པས་བྱིན་གྱིས་བཙུན་མོ་དཔེ་མེད་ལ་བོས་ཏེ་འདི་སྐད་ཅེས་སྨྲས་སོ། །ལྷ་མོ་ཁྱོད་ཀྱིས་རྨ་བྱའི་རྒྱལ་པོ་གསེར་དུ་སྣང་བ་འདི་ངས་ཇི་ལྟར་རིམ་གྲོ་བྱས་པ་བཞིན་དུ་
བདག་ཉིད་ཀྱིས་རིམ་གྲོ་གྱིས་ཤིག །དེ་ནས་རྒྱལ་པོ་ཚངས་པས་བྱིན་གྱི་བཙུན་མོ་དཔེ་མེད་བདག་ཉིད་ཀྱིས་མེ་ཏོག་དང་འབྲས་བུ་རྣམས་ཀྱིས། རྨ་བྱའི་རྒྱལ་པོ་གསེར་དུ་སྣང་བ་དེ་ལ་བསྙེན་བཀུར་བྱེད་དོ། །དེའི་ཚེ་དུས་
གཞན་ཞིག་ན་བཙུན་མོ་དཔེ་མེད་སྐྱེས་པ་གཞན་ལ་ཆགས་པར་གྱུར་ཏེ། དེ་ནས་བཙུན་མོ་དཔེ་མེད་ཀྱིས་འདི་སྙམ་དུ་བསམས་སོ། །རྨ་བྱའི་རྒྱལ་པོ་གསེར་དུ་སྣང་བ་འདི་ནི་མིའི་སྐད་དུ་སྨྲ་བས་དེས་གཏམ་འདི་རྒྱལ་པོ་ཚངས་

57-1-307a

པས་བྱིན་ལ་མི་བསྙད་གྲང་། རྒྱལ་པོ་ཚངས་པས་བྱིན་དེས་ཀྱང་བདག་བཟུང་སྟེ་མི་བསད་གྲང་སྙམ་ནས། དེ་ནས་བུད་མེད་དེས་བྱའི་རྒྱལ་པོ་དེ་ལ་ཟས་དུག་ཅན་དང་། སྐོམ་དུག་ཅན་བྱིན་ནོ། །བུད་མེད་དེས་རྨ་
བྱའི་རྒྱལ་པོ་དེ་ལ་ཇི་ལྟ་ཇི་ལྟར་ཟས་དུག་ཅན་དང་། སྐོམ་དུག་ཅན་བྱིན་པ་དེ་ལྟ་དེ་ལྟར་རྨ་བྱའི་རྒྱལ་པོ་དེའི་ལུས་གཟུགས་ཆེས་བཟང་བ་དང་། ཆེས་མཛེས་པ་དང་། ཆེས་བལྟ་ན་སྡུག་པ་དང་། ཆེས་འོད་གསལ་བར་གྱུར་ཏོ། །དེ་ནས་
བཙུན་མོ་དཔེ་མེད་ཀྱིས་འདི་སྙམ་དུ་སེམས་ཏེ། རྨ་བྱའི་རྒྱལ་པོ་གསེར་དུ་སྣང་བ་ལ་བདག་གིས་ཇི་ལྟ་ཇི་ལྟར་ཟས་དུག་ཅན་དང་། སྐོམ་དུག་ཅན་བྱིན་པ་དེ་ལྟ་དེ་ལྟར་འདིའི་ལུས་གཟུགས་ཆེས་བཟང་བ་དང་། ཆེས་མཛེས་པ་དང་། ཆེས་
བལྟ་ན་སྡུག་པ་དང་། ཆེས་འོད་གསལ་བར་གྱུར་ཏོ་སྙམ་མོ། །དེ་ནས་བཙུན་མོ་དཔེ་མེད་ལ་རྨ་བྱའི་རྒྱལ་པོ་གསེར་དུ་སྣང་བས་འདི་སྐད་ཅེས་སྨྲས་སོ། །རྐུན་མ་རྐུན་མ་ཁྱོད་ཀྱི་ངས་ཤེས་ཏེ། ཁྱོད་འདི་སྙམ་དུ་བདག་ནི་སྐྱེས་པ་གཞན་
ལ་ཆགས་པར་གྱུར་ལ། བྱ་འདིས་ཤེས་ཏེ་འདི་ཡང་མི་སྐད་སྨྲ་བས་འདིས་གཏམ་འདི་རྒྱལ་པོ་ཚངས་པས་བྱིན་ལ་མི་བསྙད་གྲང་། རྒྱལ་པོས་བདག་བཟུང་སྟེ་མི་བསད་གྲང་སྙམ་དུ་བསམས་ནས་དེའི་ཕྱིར་ཁྱོད་ཀྱིས་ང་ལ་ཟས་དུག་
ཅན་དང་། སྐོམ་དུག་ཅན་བྱིན་ཏེ། ཁྱོད་ཀྱིས་ང་གསད་པར་མི་ནུས་སོ། །དེ་ནས་བཙུན་མོ་དཔེ་མེད་དེས་ཚིག་དེ་ཐོས་ནས་ཁ་བུབ་དུ་འགྱེལ་ཏེ། ཁྲག་དྲོན་པོ་སྐྱུགས་ནས་ནད་ཚབས་ཆེན་པོས་བཏབ་སྟེ། ནད་དེ་ཉིད་ཀྱིས་ཤི་བའི་དུས་
བྱས་སོ། །དེ་ཤི་ནས་སེམས་ཅན་དམྱལ་བ་ཆེན་པོ་ངུ་འབོད་དུ་སྐྱེས་པར་གྱུར་ཏོ། །ཁྱིམ་བདག་དེའི་ཚེ་དེའི་དུས་ན་གྲོང་ཁྱེར་ཆེན་པོ་བཱ་ར་ཎ་སིའི་རྒྱལ་པོ་ཚངས་པས་བྱིན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་
དོགས་ཤིང་ཐེ་ཙོམ་ཟ་ན་དེ་ལྟར་མི་བལྟ་སྟེ། དགེ་སློང་ཤཱ་རིའི་བུ་དེའི་ཚེ་དེའི་དུས་ན་རྒྱལ་པོ་ཚངས་པས་བྱིན་ཞེས་བྱ་བར་གྱུར་ཏོ། །ཁྱིམ་བདག་དེའི་ཚེ་དེའི་དུས་ན་བཙུན་མོ་དཔེ་མེད་ཅེས་བྱ་བར་གྱུར་པ་དེ་གཞན་ཞིག་

57-1-307b

ཡིན་པ་སྙམ་དུ་ཁྱོད་དོགས་ཤིང་ཐེ་ཙོམ་ཟ་ན་དེ་ལྟར་མི་བལྟ་སྟེ། བྲམ་ཟེའི་བུ་མོ་གཡོ་མ་དེ་དེའི་ཚེ་དེའི་དུས་ན་བཙུན་མོ་དཔེ་མེད་དུ་གྱུར་ཏོ། །ཁྱིམ་བདག་དེའི་ཚེ་དེའི་དུས་ན་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་གནས་
པ་རྨ་བྱའི་རྒྱལ་པོ་གསེར་དུ་སྣང་བ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་དོགས་ཤིང་ཐེ་ཙོམ་ཟ་ན་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་རིའི་རྒྱལ་པོ་གངས་རིའི་ལྷོ་ཕྱོགས་ཀྱི་ངོས་ལ་གནས་པ་རྨ་བྱའི་རྒྱལ་པོ་
གསེར་དུ་སྣང་བ་ཞེས་བྱ་བར་གྱུར་ཏོ། །ཁྱིམ་བདག་དེའི་ཚེ་དེའི་དུས་ན་རྨ་བྱ་ལྔ་བརྒྱར་གྱུར་པ་དེ་དག་གཞན་ཞིག་ཡིན་སྙམ་དུ་ཁྱོད་དོགས་ཤིང་ཐེ་ཙོམ་ཟ་ན་དེ་ལྟར་མི་བལྟ་སྟེ། དགེ་སློང་མཆོག་ལྔ་བརྒྱ་པོ་འདི་དག་དེའི་ཚེ་དེའི་
དུས་ན་རྨ་བྱ་ལྔ་བརྒྱར་གྱུར་ཏོ། །ཁྱིམ་བདག་ང་དུད་འགྲོའི་སྐྱེ་གནས་སུ་གྱུར་པ་དེའི་ཚེ་ཡང་ལུས་ལ་དུག་གིས་མ་ཚུགས་ན། ད་ལྟར་མངོན་པར་རྫོགས་པར་སངས་རྒྱས་པ་ལྟ་ལ་སྨོས་ཀྱང་ཅི་དགོས་ཏེ། ངའི་ལུས་ལ་དུག་
གིས་ཚུགས་པར་འགྱུར་བ་འདི་ནི་གནས་མེད་དོ། །དེ་བས་ན་ཁྱིམ་བདག་ཚིགས་སུ་བཅད་པ་བརྗོད་པ་བྱས། དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་བཤད་ཀྱིས་ལེགས་པར་རབ་ཏུ་ཟུང་ལ་ཟས་ལ་ལན་
གསུམ་བཟླས་པ་གྱིས་ཏེ། དགེ་སློང་གི་དགེ་འདུན་ལ་བྲིམས་ཤིག །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །བཅོམ་ལྡན་སངས་རྒྱས་དུག་མེད་པ། །སངས་རྒྱས་བདེན་པས་དུག་
བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །བཅོམ་ལྡན་ཆོས་ནི་དུག་མེད་པ། །ཆོས་ཀྱི་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་
འཇིག་རྟེན་དུག་གསུམ་སྟེ། །བཅོམ་ལྡན་དགེ་འདུན་དུག་མེད་པ། །དགེ་འདུན་བདེན་པས་དུག་བཅོམ་མོ། །བདེན་པ་གང་གིས་ང་སངས་རྒྱས། །འཇིག་རྟེན་ཀུན་ལ་བླ་ན་མེད། །བདེན་པའི་ཚིག་ནི་དེ་ཡིས་སུ། །

57-1-308a

ང་ལུས་དུག་གིས་མི་ཚུགས་ཤོག །བདེན་པ་གང་གིས་ང་ཡི་ཆོས། །འཇིག་རྟེན་ཀུན་ལ་བླ་ན་མེད། །བདེན་པའི་ཚིག་ནི་དེ་ཡིས་སུ། །ང་ལུས་དུག་གིས་མི་ཚུགས་ཤོག །བདེན་པ་གང་གིས་ང་དགེ་འདུན། །
འཇིག་རྟེན་ཀུན་ལ་བླ་ན་མེད། །བདེན་པའི་ཚིག་ནི་དེ་ཡིས་སུ། །ང་ལུས་དུག་གིས་མི་ཚུགས་ཤོག །ཤིང་གང་དུག་དང་བཅས་རྣམས་དང་། །སྲོག་ཆགས་གང་དག་དུག་བཅས་པ། །དེ་ཀུན་འདོད་ཆགས་དུག་ལས་བྱུང་། །
འདོད་ཆགས་འདི་ནི་དུག་གི་མཆོག །ཤིང་གང་དུག་དང་བཅས་རྣམས་དང་། །སྲོག་ཆགས་གང་དག་དུག་བཅས་པ། །དེ་ཀུན་ཞེ་སྡང་དུག་ལས་བྱུང་། །ཞེ་སྡང་འདི་ནི་དུག་གི་མཆོག །ཤིང་གང་དུག་དང་བཅས་རྣམས་དང་། །
སྲོག་ཆགས་གང་དག་དུག་བཅས་པ། །དེ་ཀུན་གཏི་མུག་དུག་ལས་བྱུང་། །གཏི་མུག་འདི་ནི་དུག་གི་མཆོག །དྲག་པོའི་དུག་གིས་དུག་བཅོམ་སྟེ། །བསྲུང་དང་ཡོངས་སུ་གཟུང་བ་བྱས། །སངས་རྒྱས་ཀུན་གྱིས་དུག་བཅོམ་
པས། །རྫོགས་སངས་རྒྱས་ལ་སྐྱབས་སུ་དོང་། །དེ་དེ་བཞིན་བགྱིའོ་ཞེས་ཏེ་ཁྱིམ་བདག་དཔལ་སྦས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་དེ་དག་ལེགས་པར་རབ་ཏུ་བླངས་ཏེ། བླངས་ནས་ཟས་དེ་དག་ལ་ལན་གསུམ་
བཟླས་ཏེ། རང་གི་ལག་གིས་ཞལ་ཟས་སོད་པ་མང་པོ་དགེ་སློང་གི་དགེ་འདུན་ལ་བསྟབས་ཏེ་ཚིམ་པར་བྱས་སོ། །དེ་ནས་ཁྱིམ་བདག་དཔལ་སྦས་ཀྱིས་བཅོམ་ལྡན་འདས་དང་། དགེ་སློང་གི་དགེ་འདུན་བཤོས་གསོལ་ཟིན་
ཏེ། ཕྱག་བཅབས་ལྷུང་བཟེད་གྱུ་བར་རིག་ནས་སྟན་ཞིག་བླངས་ཏེ་ཕྱོགས་གཅིག་ཏུ་འདུག་གོ། །ཁྱིམ་བདག་དཔལ་སྦས་ཕྱོགས་གཅིག་ཏུ་འདུག་པ་དང་། བཅོམ་ལྡན་འདས་ཀྱི་གཏམ་རིམ་གྱིས་མཛད་པ་འདི་ལྟ་སྟེ། གང་
འདི་སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་། མཐོ་རིས་ཀྱི་གཏམ་དང་། འདོད་པའི་ཉེས་དམིགས་དང་། དེའི་འོག་ཏུ་ཟག་པ་དང་། ཀུན་ནས་ཉོན་མོངས་པ་དང་། མངོན་པར་འབྱུང་བའི་ཕན་ཡོན་དང་། རྣམ་པར་བྱང་བའི་

57-1-308b

ཕྱོགས་སོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་དཔལ་སྦས་ལ་རྒྱ་ཆེར་རབ་ཏུ་བསྟན། རབ་ཏུ་འཇོག །རྣམ་པར་འགྲེལ། རྣམ་པར་འབྱེད། གསལ་བར་མཛད་དོ། །བཅོམ་ལྡན་འདས་ཀྱིས་གང་གི་ཚེ་ཁྱིམ་བདག་
དཔལ་སྦས་སེམས་དགའ་བ་དང་། སེམས་མཉེན་པ་དང་། སེམས་དགེ་བ་དང་། སྒྲིབ་པ་མེད་པའི་སེམས་སུ་གྱུར་པར་མཁྱེན་པ་དེའི་ཚེ་སངས་རྒྱས་བཅོམ་ལྡན་འདས་རྣམས་ཡང་དག་ཕུལ་གྱི་ཆོས་གང་སྟོན་པ་དེ་བཅོམ་ལྡན་
འདས་ཀྱིས་ཁྱིམ་བདག་དཔལ་སྦས་ལ་རྒྱ་ཆེར་རབ་ཏུ་བསྟན། རབ་ཏུ་བཞག །རྣམ་པར་བཀྲོལ། རྣམ་པར་ཕྱེ། གསལ་བར་མཛད། རབ་ཏུ་བཤད་དོ། །དེ་ནས་ཁྱིམ་བདག་དཔལ་སྦས་སྟན་དེ་ལ་འདུག་བཞིན་དུ་ཆོས་རྣམས་ལ་
ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་ཏེ། འདི་ལྟ་སྟེ། དཔེར་ན་རས་ནག་པོའི་བག་མེད་པ། ཁ་བསྒྱུར་བར་འོས་པ་ཚོན་གྱི་ནང་དུ་བཅུག་ན་ཚོན་ལེགས་པར་འཇོན་པོ་དེ་བཞིན་དུ་ཁྱིམ་བདག་དཔལ་སྦས་ཀྱང་སྟན་དེ་ལ་
འདུག་བཞིན་དུ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་ཁྱིམ་བདག་དཔལ་སྦས་ཀྱིས་ཆོས་མཐོང་། ཆོས་ཐོབ། ཆོས་ཡོངས་སུ་བསྐྱེད། མངོན་དུ་ཡང་དག་པར་རྟོགས། ནེམ་ནུར་མེད། ཐེ་
ཙོམ་དང་བྲལ། སོམ་ཉི་དང་བྲལ། གཞན་གྱི་དྲིང་མི་འཇོག །སྟོན་པའི་བསྟན་པ་ཀུན་དུ་ཤེས། མི་འཇིགས་པ་ཐོབ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་སངས་
རྒྱས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆིའོ། །བཙུན་པ་བཅོམ་ལྡན་འདས་བདག་ལ་དགེ་བསྙེན་དུ་གཟུང་དུ་གསོལ། །དེང་ནས་ཇི་སྲིད་འཚོའི་བར་དུ་བདག་གི་སྐྱབས་ཁྱོད་ལགས་ཏེ་སྐྱབས་སུ་
མཆིའོ། །དེ་ནས་དགེ་སློང་དེ་དག་ངོ་མཚར་དུ་གྱུར། རྨད་དུ་བྱུང་བར་གྱུར་ཏེ། འདི་ལྟར་ཁྱིམ་བདག་དཔལ་སྦས་བཅོམ་ལྡན་འདས་མེ་དོང་དུ་བསྲེག་པ་དང་། སེམས་ཅན་དམྱལ་བ་ཆེན་པོར་ལྟུང་བར་འདོད་པ་དེ་

57-1-309a

བཅོམ་ལྡན་འདས་ཀྱིས་སེམས་ཅན་དམྱལ་བ་ཆེན་པོ་ནས་བཟློག་སྟེ། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་པ་འདི་ནི་ངོ་མཚར་རྨད་དུ་བྱུང་བའོ་སྙམ་པ་དང་། བཅོམ་ལྡན་འདས་ཀྱིས་
བཀའ་སྩལ་པ། དགེ་སློང་དག་ཁྱིམ་བདག་དཔལ་སྦས་ད་ལྟར་འབའ་ཤིག་ང་མེ་དོང་དུ་བསྲེག་པ་དང་། སེམས་ཅན་དམྱལ་བ་ཆེན་པོར་ལྟུང་བར་འདོད་ལ། ངས་དེ་སེམས་ཅན་དམྱལ་བ་ཆེན་པོ་དེ་ལས་བཟློག་སྟེ། ཆོས་རྣམས་ལ་ཆོས་
ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་པར་ཡང་མ་ཟད་དེ། དགེ་སློང་དག་གཞན་གྱི་ཚེ་ཡང་ཁྱིམ་བདག་དཔལ་སྦས་ང་མེ་དོང་དུ་བསྲེག་པ་དང་། སེམས་ཅན་དམྱལ་བ་ཆེན་པོར་ལྟུང་བར་འདོད་དེ། ངས་དེ་སེམས་ཅན་དམྱལ་བ་ཆེན་
པོ་དེ་ལས་བཟློག་གོ། །དགེ་སློང་དེ་དག་གིས་གསོལ་པ། བཙུན་པ་བཅོམ་ལྡན་འདས་ཁྱིམ་བདག་དཔལ་སྦས་གཞན་གྱི་ཚེ་བཅོམ་ལྡན་འདས་ཞུགས་ཀྱི་དོང་དུ་བསྲེགས་ཏེ། སེམས་ཅན་དམྱལ་བ་ཆེན་པོ་མནར་མ་མཆིས་པར་ལྟུང་
བར་འཚལ་ལ། བཅོམ་ལྡན་འདས་ཀྱིས་དེ་སེམས་ཅན་དམྱལ་བ་ཆེན་པོ་དེ་ལས་ཐར་བར་མཛད་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྔོན་བྱུང་བ་འདས་པའི་དུས་ན་བྲམ་ཟེའི་ཁྱེའུ་ཆོས་འདོད་ཅེས་
བྱ་བ་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། འདོད་པ་ཆུང་བ། ཆོག་ཤེས་པ། རབ་ཏུ་དབེན་པ། དགེ་བའི་ཆོས་ཅན་ཞིག་བྱུང་སྟེ། བྲམ་ཟེའི་ཁྱེའུ་ཆོས་འདོད་ནི་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་
པོ་རྒྱས་པ་མཆོག་དང་ལྡན་པའོ། །བྲམ་ཟེའི་ཁྱེའུ་ཆོས་འདོད་དེ་བྲམ་ཟེ་དང་། རྒྱལ་རིགས་དང་། ཁྱིམ་བདག་རྣམས་ཀྱིས་བཀུར་སྟི་བྱས། བླ་མར་བྱས་ཏེ་མཆོད་ནས་གོས་དང་། ཟས་དང་། མལ་ཆ་དང་། ན་བའི་གསོས་སྨན་དང་། 
ཡོ་བྱད་བཟང་པོ་མང་པོ་རྙེད་པར་གྱུར་ཏོ། །བྲམ་ཟེའི་ཁྱེའུ་ཆོས་འདོད་ནི་སྟོང་ཕྲག་བརྒྱས་ཚིགས་སུ་བཅད་པ་གཅིག་ཚོལ་ལོ། །དེ་ནས་བྲམ་ཟེ་ཞིག་བྲམ་ཟེའི་ཁྱེའུ་ཆོས་འདོད་ཀྱི་རྙེད་པ་དང་། བཀུར་སྟི་དང་། ཚིགས་སུ་བཅད་པ་མ་

57-1-309b

བཟོད་ནས་བྲམ་ཟེའི་ཁྱེའུ་ཆོས་འདོད་ག་ལ་བ་དེར་སོང་སྟེ་ཕྱིན་པ་དང་། བྲམ་ཟེའི་ཁྱེའུ་ཆོས་འདོད་ལ་འདི་སྐད་ཅེས་སྨྲས་སོ། །ངས་བྲམ་ཟེའི་ཁྱེའུ་ཁྱོད་ལ་ལེགས་པར་བཤད་པ་བསྒྲགས་པར་བྱའོ། །བྲམ་ཟེའི་ཁྱེའུ་ཆོས་འདོད་
ཀྱིས་སྨྲས་པ། འཕགས་པ་ལེགས་པར་བཤད་པ་བདག་ལ་ལེགས་པར་བསྒྲག་ཏུ་གསོལ། བྲམ་ཟེས་སྨྲས་པ། ཆོས་འདོད་ངས་ཁྱོད་ལ་དེ་བཞིན་དུ་ལེགས་པར་བཤད་པ་བསྒྲག་ཏུ་མི་རུང་ངོ་། །ཆོས་འདོད་ཀྱིས་སྨྲས་པ། 
འཕགས་པ་འོ་ན་ཁྱོད་ཀྱིས་ལེགས་པར་བཤད་པ་བདག་ལ་ཇི་ལྟར་བསྒྲག་པར་བགྱི། བྲམ་ཟེས་སྨྲས་པ། གལ་ཏེ་ཆོས་འདོད་ཁྱོད་ཀྱིས་དོང་ཆེན་པོ་རྐོར་བཅུག་ལ། བརྐོས་ནས་མེས་འགེངས་སུ་བཅུག་སྟེ། མེ་མི་འབར་ཞིང་། དུ་བ་མི་
འཐུལ་བས་བཀང་ནས་མཆོད་སྡོང་མཐོན་པོ་འཛུགས་སུ་ཆུག་ལ། འཛུགས་སུ་བཅུག་ནས་མེ་དོང་དེར་བདག་ཉིད་མཆོངས་ན་དེ་ལྟ་ན་ངས་ཁྱོད་ལ་ལེགས་པར་བཤད་པ་བསྒྲག་པར་བྱའོ། །བྲམ་ཟེའི་ཁྱེའུ་ཆོས་འདོད་ཀྱིས་སྨྲས་པ་
འཕགས་པ་བདག་འདི་ན་ལེགས་པར་བཤད་པ་གང་ཅི་ཚོལ་བ་དེ་ཐམས་ཅད་ནི་སེམས་ཅན་རྣམས་ཀྱི་དོན་གྱི་སླད་དུ་ལགས་ན། སློབ་དཔོན་བདག་གིས་ལེགས་པར་བཤད་པ་སེམས་ཅན་རྣམས་ལ་མ་བསྒྲགས་པར་ཇི་ལྟར་མེ་དོང་
དུ་མཆོང་བར་བགྱི། དེ་ནས་བྲམ་ཟེས་བྲམ་ཟེའི་ཁྱེའུ་ཆོས་འདོད་ལ་ཚིགས་སུ་བཅད་དེ་སྨྲས་པ། སྔགས་ཚོལ་བདེ་བ་ག་ལ་ཡོད། །ག་ལ་བདེ་ཡོད་སྔགས་ཚོལ་བ། །སྔགས་བཙལ་ཕྱིར་ནི་བདེ་བ་འོར། །བདེ་བ་འོར་ཅིག་སྔགས་
བཙལ་ཕྱིར། །དེ་ནས་བྲམ་ཟེའི་ཁྱེའུ་ཆོས་འདོད་ཀྱིས་བྲམ་ཟེ་དེ་ལ་ཚིགས་སུ་བཅད་དེ་སླར་སྨྲས་པ། བྱང་ཆུབ་ཚོལ་བ་ག་ལ་བདེ། །ག་ལ་བདེ་ཡོད་བྱང་ཆུབ་ཚོལ། །བྱང་ཆུབ་བཙལ་ཕྱིར་བདེ་བ་འོར། །བདེ་འོར་བྱང་ཆུབ་བཙལ་
བའི་ཕྱིར། །དེ་ནས་བྲམ་ཟེའི་ཁྱེའུ་ཆོས་འདོད་ཀྱིས་བྲམ་ཟེ་ལ་འདི་སྐད་ཅེས་སྨྲས་སོ། །སློབ་དཔོན་བདག་ལ་ལེགས་པར་བཤད་པ་ལེགས་པར་བསྒྲགས་སུ་གསོལ། འོན་ཏང་ཁྱོད་གང་བཞེད་པ་དེ་བགྱིའོ། །བྲམ་ཟེའི་ཁྱེའུ་ཆོས་

57-1-310a

འདོད་ལེགས་པར་བཤད་པའི་དོན་གྱི་ཕྱིར་བདག་ཉིད་དོར་བར་འདོད་དོ་ཞེས་བྲམ་ཟེ་དང་། ཁྱིམ་བདག་རྣམས་ཀྱིས་ཐོས་ནས་དེ་དག་ཐམས་ཅད་ངུ་ཞིང་གདོང་ལ་མཆི་མ་ཟག་བཞིན་དུ་བྲམ་ཟེའི་ཁྱེའུ་ཆོས་འདོད་ག་ལ་
བ་དེར་དོང་སྟེ་ཕྱིན་ནས་བྲམ་ཟེའི་ཁྱེའུ་ཆོས་འདོད་ལ་འདི་སྐད་ཅེས་སྨྲས་སོ། །ཆོས་འདོད་ཁྱོད་བདག་ཉིད་མ་དོར་ཅིག །ཆོས་འདོད་ཁྱོད་ནི་ཁྱིམ་ན་འདུག་བཞིན་སྦྱིན་པ་སྦྱིན་པ་དང་། བསོད་ནམས་བྱ་བར་ནུས་སོ། །བྲམ་ཟེའི་ཁྱེའུ་ཆོས་
འདོད་ཀྱིས་བྲམ་ཟེ་དང་། ཁྱིམ་བདག་དེ་དག་ལ་འདི་སྐད་ཅེས་སྨྲས་སོ། །བཙུན་པ་དག་དེ་སྐད་མ་གསུང་ཤིག །བདག་གིས་སློབ་དཔོན་གྱི་དགོངས་པ་ངེས་པར་བསྐང་བར་བགྱིའོ། །དེ་ནས་བྲམ་ཟེའི་ཁྱེའུ་ཆོས་འདོད་ཀྱིས་མཆོད་སྡོང་ཆེན་
པོ་འཛུགས་སུ་བཅུག་སྟེ། མཆོད་སྡོང་ཆེན་པོ་བཙུགས་ནས་དེའི་དྲུང་དུ་དོང་ཆེན་པོ་རྐོར་བཅུག་སྟེ། བརྐོས་ནས་མེས་འགེངས་སུ་བཅུག་གོ། །མེ་མི་འབར་ཞིང་དུ་བ་མི་འཐུལ་བས་བཀང་ནས་བྲམ་ཟེ་དེ་ལ་འདི་སྐད་ཅེས་སྨྲས་སོ། །
སློབ་དཔོན་བདག་ལ་ལེགས་པར་བཤད་པ་ལེགས་པར་བསྒྲག་ཏུ་གསོལ། དེ་ནས་བྲམ་ཟེ་དེས་བྲམ་ཟེའི་ཁྱེའུ་ཆོས་འདོད་ལ་ཚིགས་སུ་བཅད་པ་འདི་ལྟ་བུ་བསྟན་ཏོ། །སྦྱིན་པ་ལ་ནི་རྟག་ཏུ་དགའ་བར་གྱིས། །རྟག་ཏུ་ཚུལ་
ཁྲིམས་ཡོངས་སུ་རྫོགས་པར་སྤྱོད། །བརྩོན་འགྲུས་མཆོག་གི་གནས་ནི་བརྩམ་པར་གྱིས། །ཤེས་རབ་ཀྱིས་ནི་ཆོས་མཆོག་དམ་པ་ཐོབ། །དེ་ནས་བྲམ་ཟེའི་ཁྱེའུ་ཆོས་འདོད་ཀྱིས་བྲམ་ཟེ་དེ་ལ་ཚིགས་སུ་བཅད་པ་འདི་
ལེགས་པར་རབ་ཏུ་བཟུང་སྟེ། སྐྱེ་བོ་ཕལ་པོ་ཆེ་བསོགས་སོ། །སྐྱེ་བོ་ཕལ་པོ་ཆེ་བསོགས་ནས་མཆོད་སྡོང་མཐོན་པོའི་ཁར་འཛེགས་ཏེ། སྐྱེ་བོ་ཕལ་པོ་ཆེ་ལ་ཚིགས་སུ་བཅད་པ་འདི་བསྒྲགས་སོ། །སྦྱིན་པ་ལ་ནི་རྟག་ཏུ་
དགའ་བར་གྱིས། །རྟག་ཏུ་ཚུལ་ཁྲིམས་ཡོངས་སུ་རྫོགས་པར་སྤྱོད། །བརྩོན་འགྲུས་མཆོག་གི་གནས་ནི་བརྩམ་པར་གྱིས། །ཤེས་རབ་ཀྱིས་ནི་ཆོས་མཆོག་དམ་པ་ཐོབ། །དེ་ནས་བྲམ་ཟེའི་ཁྱེའུ་ཆོས་འདོད་ཀྱིས་སྐྱེ་བོ་

57-1-310b

ཕལ་པོ་ཆེ་དེ་ལ་ཚིགས་སུ་བཅད་པ་འདི་བསྒྲགས་ནས་འདི་ལྟ་བུའི་བདེན་པའི་ཚིག་འདི་བྱེད་དེ། ས་ཕྱོགས་འདི་ན་ལྷ་རྒྱ་ཆེན་པོ་གང་དག་གནས་པ་རྣམས་བདག་ལ་དགོངས་སུ་གསོལ། ཀླུ་དང་། གནོད་སྦྱིན་དང་། དྲི་ཟ་དང་། 
ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་ཕྱེ་ཆེན་པོ་དེ་དག་ཐམས་ཅད་ཀྱང་བདག་ལ་དགོངས་སུ་གསོལ། བདག་ནི་གཏོང་བ་བགྱིད་དེ། ཤིན་དུ་གཏོང་བ་དང་། གཏོང་བའི་ཡང་གཏོང་བ་དང་། བདག་ཉིད་ཡོངས་སུ་
གཏོང་བ་བགྱིད་དོ། །བདེན་པ་དང་། བདེན་པའི་ཚིག་གང་གིས་བདག་ཡོངས་སུ་གཏོང་བ་བགྱིད་པ་ནི་རྒྱལ་པོའི་སླད་དུ་མ་ལགས། ལོངས་སྤྱོད་ཀྱི་སླད་དུ་མ་ལགས། མཐོ་རིས་ཀྱི་སླད་དུ་མ་ལགས། འཁོར་ལོས་སྒྱུར་བའི་རྒྱལ་
པོའི་སླད་དུ་མ་ལགས་ཀྱི། གཞན་དུ་ན་བདག་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་མ་དུལ་བ་རྣམས་གདུལ་བར་བགྱི། མ་རྒལ་བ་རྣམས་བསལ་
བསྒྲལ་བར་བགྱི། མ་གྲོལ་བ་རྣམས་དགྲོལ་བར་བགྱི། དབུགས་མ་ཕྱིན་པ་རྣམས་དབུགས་དབྱུང་བར་བགྱི། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་བགྱི་སྙམ་པའི་སླད་དུ་སྟེ། 
བདེན་པ་དང་། བདེན་པའི་ཚིག་དེས་བདག་གི་ཡོངས་སུ་གཏོང་བ་འབྲས་བུ་མེད་པར་མ་གྱུར་ཅིག་ཅེས་བྱས་ནས་མེ་དོང་དེར་བདག་ཉིད་མཆོངས་སོ། །དགེ་སློང་དག་བྲམ་ཟེའི་ཁྱེའུ་ཆོས་འདོད་མེ་དོང་དེར་མཆོངས་མ་ཐག་ཏུ་མེ་དོང་དེའི་
མེ་ཤི་སྟེ། པད་མའི་རྫིང་དུ་གྱུར་ནས་བུང་བ་སྒྲ་ཟི་ཟི་ཟེར་བའི་པད་མ་ལ་བྲམ་ཟེའི་ཁྱེའུ་ཆོས་འདོད་འདུག་ནས་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་
པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་སྟོན་ཏེ། བྲམ་ཟེ་དེ་ནི་ལུས་ཐམས་ཅད་ནས་མེ་བྱུང་སྟེ་ཚིག་ནས་ཚིག་གོ་ཞེས་སྨྲས་ཏེ་སེམས་ཅན་དམྱལ་བ་ཆེན་པོར་ལྟུང་ངོ་། །དེ་ལ་བྲམ་

57-1-311a

ཟེའི་ཁྱེའུ་ཆོས་འདོད་ཀྱིས་འདི་སྐད་ཅེས་སྨྲས་སོ། །སློབ་དཔོན་མ་བསྙེངས་ཤིག །བདག་གིས་ཁྱོད་བསྐྱབ་པར་བགྱིའོ། །དེ་ནས་བྲམ་ཟེའི་ཁྱེའུ་ཆོས་འདོད་ཀྱིས་དེའི་ཚེ་འདི་ལྟ་བུའི་བདེན་པའི་ཚིག་འདི་བྱས་ཏེ། 
བདེན་པ་དང་། བདེན་པའི་ཚིག་གང་གིས་བདག་སེམས་ཅན་རྣམས་ཀྱི་དོན་དུ་བྱང་ཆུབ་ལ་སྤྱོད་པའི་བདེན་པ་དང་། བདེན་པའི་ཚིག་དེས་བྲམ་ཟེ་འདིའི་ལུས་ཚིག་པ་རབ་ཏུ་ཞི་བར་གྱུར་ཅིག །སེམས་ཅན་དམྱལ་བ་ལས་ཀྱང་ལོག་པར་གྱུར་
ཅིག་ཅེས་བྱས་སོ། །བྲམ་ཟེའི་ཁྱེའུ་ཆོས་འདོད་ཀྱིས། བདེན་པ་དང་། བདེན་པའི་ཚིག་བྱས་མ་ཐག་ཏུ་བྲམ་ཟེ་དེ་སེམས་ཅན་དམྱལ་བ་དེ་ནས་ཐར་བར་གྱུར་ཏོ། །དགེ་སློང་དག་དེའི་ཚེ་དེའི་དུས་ན། བྲམ་ཟེའི་ཁྱེའུ་ཆོས་འདོད་ཅེས་
བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཙོམ་ཟ་ན། དེ་ལྟར་མི་བལྟ་སྟེ། དགེ་སློང་དག་ང་དེའི་ཚེ་དེའི་དུས་ན་བྲམ་ཟེའི་ཁྱེའུ་ཆོས་འདོད་ཅེས་བྱ་བར་གྱུར་ཏོ། །དགེ་སློང་དག་དེའི་ཚེ་དེའི་དུས་ན་བྲམ་ཟེར་གྱུར་པ་དེ་
གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཙོམ་ཟ་ན་དེ་ལྟར་མི་བལྟ་སྟེ། ཁྱིམ་བདག་དཔལ་སྦས་དེའི་ཚེ་དེའི་དུས་ན་བྲམ་ཟེར་གྱུར་ཏོ། །དགེ་སློང་དག་དེའི་ཚེ་ཡང་ཁྱིམ་བདག་དཔལ་སྦས་ང་མེ་དོང་དུ་བསྲེགས་ལ་སེམས་ཅན་
དམྱལ་བ་ཆེན་པོར་ལྟུང་བར་འདོད་པ་ལས། ངས་དེ་སེམས་ཅན་དམྱལ་བ་ཆེན་པོ་དེ་ནས་བཟློག་ཅིང་། འཕགས་པའི་ཆོས་འདུལ་བ་ལ་བཞག་སྟེ་འདི་དང་དེ་ཡང་དེ་བཞིན་དུ་ཟུང་ཤིག །དགེ་སློང་དག་ད་ལྟར་ཡང་དཔལ་སྦས་ང་མེ་
དོང་དུ་བསྲེགས་ལ་སེམས་ཅན་དམྱལ་བ་ཆེན་པོར་ལྟུང་བར་འདོད་པ་ལས། ངས་དེ་སེམས་ཅན་དམྱལ་བ་ཆེན་པོ་དེ་ལས་བཟློག་ཅིང་འཕགས་པའི་ཆོས་འདུལ་བ་ལ་བཞག་སྟེ། དེ་དང་འདི་ཡང་དེ་བཞིན་དུ་ཟུང་ཤིག །དགེ་དང་
མི་དགེ་སྔོན་བྱས་ཆུད་མི་ཟ། །མཁས་པ་རྣམས་ལ་བསྟེན་པ་ཆུད་མི་ཟ། །འཕགས་པའི་ཚོགས་ཀྱིས་ལེགས་བཤད་ཆུད་མི་ཟ། །བྱས་ལ་བྱས་གཟོ་ནམ་ཡང་ཆུད་མི་ཟ། །ལེགས་པར་བྱས་པ་དགེ་བའི་ལས། །ཉེས་པར་

57-1-311b

བྱས་པ་མི་དགེ་ཡིན། །དེ་ལའང་རྣམ་པར་སྨིན་ཡོད་དེ། །གདོན་མི་ཟ་བར་འབྲས་བུ་སྨིན། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དེ་དག་
དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་བཅས་པ་དང་། ཐམས་ཅད་དང་ལྡན་པའི་འཁོར་དེ་ཡི་རངས་ཏེ། བཅོམ་ལྡན་འདས་ཀྱིས་གསུངས་
པ་ལ་མངོན་པར་བསྟོད་དོ། །འཕགས་པ་དཔལ་སྦས་ཤེས་བྱ་བའི་མདོ་རྫོགས་སོ།། །། རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་
ཀྱིས་བཅོས་ནས་གཏན་ལ་ཕབ་པ། ། ༄༅། །རྒྱ་གར་སྐད་དུ། ཨཱརྱ་ཀརྨ་ཨཱ་བ་ར་ཎ་བི་ཤུད་དྷ་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ།  
འཕགས་པ་ལས་ཀྱི་སྒྲིབ་པ་རྣམ་པར་དག་པ་ཞེས་བྱ་བ་ཐེག་པ་ཆེན་པོའི་མདོ།  སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡངས་པ་ཅན་གྱི་ཨ་མྲས་བསྲུངས་པའི་ཚལ་ན། དགེ་
སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སུམ་ཁྲི་ཉིས་སྟོང་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ང་རྒྱལ་
རྣམ་པར་འཇོམས་དང་། འོད་ཀྱིས་རྣམ་པར་རྩེ་བ་མངོན་པར་ཤེས་པ་དང་། མེ་ཏོག་དམ་པ་ལྟ་བུ་དང་། འོད་ཟེར་རབ་ཏུ་འགྱེད་པའི་རྒྱལ་པོ་དང་། རྟག་ཏུ་བུ་དོན་ལྟར་བྲིས་པའི་ལུས་ཅན་དང་། སོམ་ཉི་ཐམས་ཅད་མགུ་བྱེད་
དང་། རིན་ཆེན་བཀོད་པའི་རྒྱ་མཚོ་བློ་གྲོས་དང་། མེ་ཏོག་སྣ་ཚོགས་གནས་དང་། སྒྲ་དབྱངས་རྣམ་པར་དག་པའི་རྒྱལ་པོ་དང་། འོད་ཟེར་རྒྱལ་པོའི་སྒྲོན་མ་དང་། དཔལ་གྱི་སྙིང་པོའི་གསེར་འོད་དང་། དབང་པོ་དང་། ཡུལ་

57-1-312a

ཐམས་ཅད་རབ་ཏུ་འདུལ་བ་དང་། སྒྲ་དབྱངས་མངོན་པར་སྒྲོགས་པའི་རྒྱལ་པོ་དང་། གཟི་བརྗིད་ཡིད་འོང་ཀུན་བསྡུས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང་། དེ་དག་
ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་སུམ་ཁྲི་ཉིས་སྟོང་དང་ཡང་ཐབས་གཅིག་གོ། །དེ་ནས་དེའི་ཚེ་དགེ་སློང་དྲི་མེད་འོད་ཅེས་བྱ་བ་ཡངས་པ་ཅན་གྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་རྒྱུ་སྟེ། མཐར་ཆགས་
སུ་བསོད་སྙོམས་ཀྱི་ཕྱིར་རྒྱུ་བ་ན་ཁྱིམ་གྱི་རྒྱུས་མི་ཤེས་པས་སྨད་འཚོང་མའི་ཁྱིམ་ཞིག་ཏུ་སོང་ངོ་། །དགེ་སློང་དེ་སྨད་འཚོང་མའི་ཁྱིམ་གྱི་ནང་དུ་སོང་མ་ཐག་ཏུ་སྨད་འཚོང་མ་དེས་བདག་དགེ་སློང་འདི་དང་མི་ཉལ་དུ་མི་གཏོང་ངོ་། །
གལ་ཏེ་མ་གྲུབ་ན་ནི་བདག་འཆི་བར་འགྱུར་རོ་སྙམ་དུ་དེ་ལ་འདོད་ཆགས་ཀྱི་སེམས་བསྐྱེད་དོ། །དེས་དགེ་སློང་དེ་ནང་དུ་འོངས་མ་ཐག་ཏུ་སྒོ་བཅད་ནས་དགེ་སློང་དེ་ལ་འདི་སྐད་ཅེས་སྨྲས་སོ། །བདག་དང་ལྷན་ཅིག་ཏུ་མི་ཉལ་དུ་མི་རུང་
ངོ་། །གལ་ཏེ་མ་ཉལ་ན་ནི་ཁོ་མོ་འཆི་བར་འགྱུར་རོ་ཞེས་སྨྲས་སོ། །དེ་ནས་དགེ་སློང་དྲི་མེད་འོད་ཀྱིས་སྨད་འཚོང་མ་དེ་ལ་འདི་སྐད་ཅེས་སྨྲས་སོ། །སྲུ་མོ་ཁོ་བོས་ནི་སངས་རྒྱས་ཀྱི་བསླབ་པ་ཆེན་པོ་བཅས་པ་ལ་བསླབ་དགོས་ཏེ། 
འཁྲིག་པའི་ཆོས་བྱེད་མི་ཕོད་ཀྱིས་ཐོང་ཤིག །ཁོ་བོ་ནི་ཤི་ཡང་སླ་ཡི་འཁྲིག་པའི་ཆོས་ནི་མི་བྱེད་དོ་ཞེས་སྨྲས་སོ། །དེ་ནས་སྨད་འཚོང་མ་དེ་འདི་སྙམ་དུ་སེམས་ཏེ། བདག་གིས་གསང་སྔགས་དང་། སྨན་གང་གིས་དགེ་སློང་འདི་
འདུག་ནས་གདོན་མི་ཟ་བར་བདག་དང་ལྷན་ཅིག་ཏུ་དགའ་བ་ཉམས་སུ་མྱོང་བར་འགྱུར་བའི་གསང་སྔགས་དང་། སྨན་དག་དགེ་སློང་འདི་ལ་སྦྱིན་གོར་མ་ཆག་གོ་སྙམ་མོ། །དེ་ནས་དེས་དགེ་སློང་དེ་ལ་སྨྲས་པ། བདག་ཀྱང་སངས་
རྒྱས་ཀྱིས་བཅས་པའི་བསླབ་པ་གཞིག་པ་འམ་ཉམས་པར་ནི་བགྱི་བར་མི་འཚལ་གྱིས། ཐུགས་བརྩེ་བའི་སླད་དུ་བསོད་སྙོམས་བཞེས་ཤིག་ཅེས་བྱས་ནས་དེ་ནང་དུ་སོང་སྟེ། རིག་སྔགས་དང་གསང་སྔགས་སྟོབས་

57-1-312b

བསྐྱེད་པ་དག་གིས་ཟས་དེ་ལ་སྔགས་ནས་དགེ་སློང་དེའི་ལྷུང་བཟེད་ཀྱི་ནང་དུ་བླུགས་སོ། །ཟས་བླུགས་མ་ཐག་ཏུ་དགེ་སློང་དེ་དེའི་མོད་ལ་ཚུལ་བཞིན་མ་ཡིན་པའི་རྣམ་པར་རྟོག་པ་སྐྱེས་ཏེ། དེ་ཀུན་དུ་རྟོག་ཅིང་ཤས་ཆེར་གདུང་
བ་སྐྱེད་དོ། །དེ་ནས་སྨད་འཚོང་མ་དེས་དགེ་སློང་དེའི་བཞིན་གྱི་མདོག་གྱུར་པར་མཐོང་ནས་ལག་པ་གཡས་པས་དགེ་སློང་དེ་བཟུང་སྟེ། མལ་དུ་ཁྲིད་ནས་དེ་དང་ལྷན་ཅིག་ཏུ་ཉལ་པོ་བྱེད་དོ། །དེ་ནས་དགེ་སློང་དེ་སྨད་འཚོང་
མ་དེ་དང་ལྷན་ཅིག་ཏུ་དགའ་བའི་རྩེད་མོ་དེ་ཉམས་སུ་མྱོང་ནས་བསོད་སྙོམས་དེ་བླངས་ཏེ། གཙུག་ལག་ཁང་དུ་སོང་ནས་ཁྱིམ་བདག་ནི་ཚུལ་ཁྲིམས་ཀྱི་ཕུང་པོ་ཆེན་པོ་ལས་ཉམས་པར་གྱུར་གྱིས། བདག་ཚུལ་ཁྲིམས་ཉམས་
པས་དད་པས་བྱིན་པ་ལོངས་སྤྱོད་པའི་འོས་མ་ཡིན་ཏེ། བདག་ནི་སེམས་ཅན་དམྱལ་བ་ཆེན་པོར་ལྟུང་བར་འགྱུར་རོ་སྙམ་ནས་དེ་དགེ་སློང་གྲོགས་པོ་རྣམས་ཀྱི་ཐད་དུ་འོངས་ནས་བདག་ནི་ཚུལ་ཁྲིམས་འཆལ་པར་གྱུར་ཏེ། དགེ་
སྦྱོང་མ་ཡིན་པར་གྱུར་པས་བདག་ནི་སེམས་ཅན་དམྱལ་བར་ལྟུང་བར་འགྱུར་རོ་ཞེས་སྨྲས་སོ། །དགེ་སློང་གྲོགས་པོ་དེ་དག་གིས་དེ་ལ་འདི་སྐད་ཅེས་སྨྲས་སོ། །ཁྱོད་ཅིའི་ཕྱིར་ཚུལ་ཁྲིམས་འཆལ་པར་གྱུར། དེས་ཀྱང་དེ་དག་
ལ་ཇི་ལྟར་གྱུར་པ་བཞིན་དུ་བསྙད་དོ། །དེ་ནས་དགེ་སློང་གྲོགས་པོ་དེ་དག་གིས་དགེ་སློང་དྲི་མེད་འོད་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དྲི་མེད་འོད་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་
གྱུར་པ་ཞེས་བྱ་བ་ཉེས་པ་ཐམས་ཅད་ལས་འབྱིན་པ་ལ་མཁས་པ། སྒྲིབ་པ་ཐམས་ཅད་ལས་སེལ་བ་ལ་མཁས་པ། མི་སྐྱེ་བའི་ཆོས་ལ་བཟོད་པ་ཐོབ་པ། བཅོམ་ལྡན་འདས་ཀྱིས་ཀྱང་བསྟོད་ཅིང་བསྔགས་ལ་སྙན་པར་
བརྗོད་པ་ཡོད་ཀྱིས་ཚེ་དང་ལྡན་པ་ཚུར་ཤོག །འོ་བུ་ཅག་འཇམ་དཔལ་གཞོན་ནུར་གྱུར་པ་ག་ལ་བ་དེར་འདོང་ངོ་། །དེས་ནི་ཁྱོད་ཀྱི་འགྱོད་པ་དེ་བསལ་ནུས་སོ། །དེ་ནས་དགེ་སློང་དྲི་མེད་འོད་དེ་ཟས་དེ་མ་ཟོས་པར་དགེ་སློང་

57-1-313a

གྲོགས་པོ་དེ་དག་དང་ལྷན་ཅིག་ཏུ་འཇམ་དཔལ་གཞོན་ནུར་གྱུར་པ་ག་ལ་བ་དེར་དོང་སྟེ་ལྷགས་ནས། འཇམ་དཔལ་གཞོན་ནུར་གྱུར་པ་དང་ལྷན་ཅིག་ཏུ་མངོན་དུ་ཡང་དག་པར་མགུ་བ་དང་། ཡང་དག་པར་དགའ་བར་
འགྱུར་བའི་གཏམ་རྣམ་པ་སྣ་ཚོགས་བྱས་ནས། འཇམ་དཔལ་གཞོན་ནུར་གྱུར་པ་ལ་ཇི་ལྟར་གྱུར་པ་དེ་བསྙད་དོ། །དེ་སྐད་སྨྲས་པ་དང་། འཇམ་དཔལ་གཞོན་ནུར་གྱུར་པས་དགེ་སློང་དྲི་མེད་འོད་དེ་ལ་འདི་སྐད་ཅེས་སྨྲས་སོ། །
དགེ་སློང་ཁྱོད་ཟས་འདི་ཇེ་ཟོ་ཤིག་དང་། ཟས་ཟོས་ཟིན་པའི་འོག་ཏུ་བཅོམ་ལྡན་འདས་ལ་ཞུས་ཏེ། བཅོམ་ལྡན་འདས་ཀྱིས་ཇི་སྐད་ལུང་བསྟན་པའི་དོན་བཞིན་དུ་གཟུང་བར་བྱའོ། །དེ་ནས་དགེ་སློང་དྲི་མེད་འོད་དང་། དགེ་
སློང་དེ་དག་ཟན་ཟོས་ཟིན་པའི་འོག་ཏུ་འཇམ་དཔལ་གཞོན་ནུར་གྱུར་པ་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་
ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །དེ་ནས་དགེ་སློང་དྲི་མེད་འོད་ངོ་ཚ་སྟེ་བཅོམ་ལྡན་འདས་ལ་གསོལ་མ་ནུས་སོ། །དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ། བླ་གོས་ཕྲག་པ་
གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་འདས་ལ་ཇི་ལྟར་གྱུར་པ་དེ་ཐམས་ཅད་གསོལ་ཏོ། །དེ་སྐད་ཅེས་གསོལ་ནས་
བཅོམ་ལྡན་འདས་ཀྱིས་དགེ་སློང་དྲི་མེད་འོད་དེ་ལ་འདི་སྐད་ཅེས་བཀའ་སྩལ་ཏོ། །དགེ་སློང་ཁྱོད་ཀྱིས་དེ་ལྟ་བུ་བྱས་པ་བདེན་ནམ། གསོལ་པ། བཅོམ་ལྡན་འདས་དེ་མད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། 
དགེ་སློང་ཁྱོད་ཀྱིས་ཅི་བདག་གིས་འདོད་ཆགས་སྤྱད་དོ་སྙམ་དུ་སྔ་ནས་བསམས་སམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འདོད་ཆགས་ཡིད་ལ་བྱེད་པ་མ་

57-1-313b

སྐྱེས་པར་ཁྱོད་ཀྱིས་འདོད་ཆགས་ཇི་ལྟར་སྤྱད། གསོལ་པ། བཅོམ་ལྡན་འདས་བདག་གི་འདོད་ཆགས་ཀྱི་སེམས་ནི་སླད་ཀྱིས་སྐྱེས་ལགས་སོ། །བཀའ་སྩལ་པ། དགེ་སློང་སེམས་དེས་ཁྱོད་ཀྱི་འདོད་ཆགས་སྤྱད་དམ། 
གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཅི་སེམས་ཀུན་ནས་ཉོན་མོངས་པས་སེམས་ཅན་རྣམས་ཀུན་ནས་ཉོན་མོངས་པ་ཅན་དུ་འགྱུར་ལ། སེམས་རྣམ་པར་དག་
པས་རྣམ་པར་དག་པར་འགྱུར་རོ་ཞེས་ངས་ཆོས་མ་བསྟན་ཏམ། གསོལ་པ། བཅོམ་ལྡན་འདས་དེ་ནི་དེ་ལྟ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཇི་སྙམ་དུ་སེམས། ཅི་ཁྱོད་ཀྱིས་གཉིད་ལོག་པའི་རྨི་
ལམ་ན་ཀུན་དུ་རྟོག་པའི་ཚེ་འདོད་ཆགས་སྤྱད་པ་མྱོང་ངམ། གསོལ་པ། བཅོམ་ལྡན་འདས་མྱོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་སེམས་ཀྱིས་འདོད་ཆགས་སྤྱད་པར་ཁྱོད་ཀྱིས་མི་ཤོད་དམ། 
གསོལ་པ། བཅོམ་ལྡན་འདས་དེ་ནི་དེ་ལྟ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཅི་ཁྱོད་ཀྱིས་རྨི་ལམ་གྱི་སེམས་དང་། གཉིད་མ་ལོག་པའི་སེམས་འདི་ལ་བྱེ་བྲག་དང་ཐ་དད་དུ་བྱ་བ་ཞིག་ཡོད་པར་
མཐོང་ངམ། གསོལ་པ། བཅོམ་ལྡན་འདས་བདག་གིས་ནི་རྨི་ལམ་གྱི་སེམས་སམ། གཉིད་མ་ལོག་པའི་སེམས་ལ་ཐ་དད་དུ་བགྱི་བ་ཅུང་ཟད་ཀྱང་མ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་
སློང་འདི་ཇི་སྙམ་དུ་སེམས། ཆོས་ཐམས་ཅད་ནི་རྨི་ལམ་ལྟ་བུའོ་ཞེས་ངས་མ་བསྟན་ཏམ། གསོལ་པ། བཅོམ་ལྡན་འདས་དེ་ནི་དེ་ལྟ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འདི་ཇི་སྙམ་དུ་
སེམས། ཅི་རྨི་ལམ་དེ་ཡང་དག་པ་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འདི་ཇི་སྙམ་དུ་སེམས། ཅི་རྨི་ལམ་གྱི་སེམས་གང་ཡིན་པ་དང་། 

57-1-314a

གཉིད་མ་ལོག་པའི་སེམས་གང་ཡིན་པ་འདི་གཉིས་མེད་པ་མ་ཡིན་ནམ། གསོལ་པ། བཅོམ་ལྡན་འདས་མ་མཆིས་ལགས་སོ། །བདེ་བར་གཤེགས་པ་མ་མཆིས་ལགས་སོ། །བཅོམ་ལྡན་འདས་ཀྱིས་
བཀའ་སྩལ་པ། དགེ་སློང་འདི་ཇི་སྙམ་དུ་སེམས། ཅི་མེད་པ་དེ་གང་ཞིག་ན་ཡོད་དམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འདི་ཇི་སྙམ་དུ་སེམས། ཅི་མེད་པ་གང་
ཡིན་པ་དེ་ལ་སྐྱེ་བ་ཡོད་དམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཇི་སྙམ་དུ་སེམས། ཅི་སྐྱེ་བ་མེད་པ་སྐྱེ་བ་འམ། འགགས་པ་འམ། ཀུན་ནས་ཉོན་མོངས་
པ་ཅན་ནམ། རྣམ་པར་བྱང་བར་འགྱུར་རམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འདི་ཇི་སྙམ་དུ་སེམས། ཅི་སྐྱེ་བ་མེད་པའི་ཆོས་རྣམས་སེམས་ཅན་དམྱལ་
བར་འགྲོ་བར་འགྱུར་རམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་དུ་འགྲོ་བར་འགྱུར་རམ། གསོལ་པ། བཅོམ་ལྡན་འདས་སྐྱེ་བ་མ་མཆིས་པ་ཉིད་ཀྱང་མ་མཆིས་པ་ལགས་ན། ངན་འགྲོར་མཆི་བར་འགྱུར་བ་ལྟ་ག་ལ་མཆིས། 
བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཆོས་ཐམས་ཅད་ནི་དེ་ལྟར་འོད་གསལ་བ་ཡིན་ན་བྱིས་པ་སོ་སོའི་སྐྱེ་བོ་རྣམས་ནི་ཡང་དག་པ་མ་ཡིན་པའི་ཆོས་རྣམས་ལ་བརྟགས། ཕྱིན་ཅི་ལོག་ལ་བརྟགས། གསོབ་དང་། གསོག་ལྟ་
བུའི་ཆོས་ཐམས་ཅད་ལ་བརྟགས་པས། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་འགྲོ་བར་འགྱུར་རོ། །དགེ་སློང་གཞན་ཡང་ཆོས་ཐམས་ཅད་ནི་ཡང་དག་པ་མ་ཡིན་པ་སྟེ། རྣམ་པར་བསྒྲུབས་
ནས་ཉེ་བར་གནས་པའི་མཚན་ཉིད་དོ། །དགེ་སློང་ཆོས་ཐམས་ཅད་ནི་སྦྱར་བ་སྟེ། འདོད་ཆགས་དང་། ཞེ་སྡང་དང་། གཏི་མུག་རྣམས་ཀྱང་བྱིས་པ་སོ་སོའི་སྐྱེ་བོ་དེ་དག་གིས་ཀུན་ནས་བསྐྱེད་པ་ཡིན་ནོ། །དགེ་སློང་ཆོས་ཐམས་ཅད་ནི་

57-1-314b

བརྟགས་པ་སྟེ། ཕྱིན་ཅི་ལོག་ལས་བྱུང་བ་ཡིན་ནོ། །དགེ་སློང་ཆོས་ཐམས་ཅད་ནི་མེད་པ་སྟེ། སྨིག་རྒྱུ་ལྟ་བུའི་ངོ་བོ་ཉིད་ཡིན་ནོ། །དགེ་སློང་ཆོས་ཐམས་ཅད་ནི་ཡ་མ་བརླ་སྟེ་ནམ་མཁའ་དང་འདྲའོ། །དགེ་སློང་ཆོས་ཐམས་ཅད་
ནི་དངོས་པོ་དང་བྲལ་བའི་ཕྱིར་དངོས་པོ་མེད་པའོ། །དགེ་སློང་ཆོས་ཐམས་ཅད་ནི་ནམ་མཁའ་ལྟར་ཟབ་པའི་ཕྱིར་ཟབ་པའོ། །དགེ་སློང་ཆོས་ཐམས་ཅད་ནི་དངོས་པོ་མི་དམིགས་པའི་ཕྱིར་ཡངས་པའོ། །དགེ་སློང་ཆོས་ཐམས་ཅད་
ནི་ཤིན་དུ་དབེན་པའི་ཕྱིར་མི་གནས་པའོ། །དགེ་སློང་ཆོས་ཐམས་ཅད་ནི་ཡུལ་ཐམས་ཅད་གསོག་ཡིན་པའི་ཕྱིར་མི་རྟེན་པའོ། །དགེ་སློང་ཆོས་ཐམས་ཅད་ནི་ཤིན་དུ་གསོག་ཡིན་པའི་ཕྱིར་རྩ་བ་མེད་པའོ། །དགེ་སློང་ཆོས་
ཐམས་ཅད་ནི་ཉོན་མོངས་པ་མི་དམིགས་པའི་ཕྱིར་ཀུན་ནས་དཀྲིས་པ་མེད་པའོ། །དགེ་སློང་ཆོས་ཐམས་ཅད་ནི་རང་བཞིན་གྱིས་མ་སྐྱེས་པའི་ཕྱིར་ཡོངས་སུ་གདུང་བ་མེད་པའོ། །དགེ་སློང་ཆོས་ཐམས་ཅད་ནི་ཆོས་དབེན་
པའི་ཕྱིར་སྒྲིབ་པ་མེད་པའོ། །དགེ་སློང་ཆོས་ཐམས་ཅད་ནི་རང་བཞིན་གྱིས་ལྡང་བ་མེད་པའི་ཕྱིར་ཞེ་སྡང་མེད་པའོ། །དགེ་སློང་ཆོས་ཐམས་ཅད་ནི་རང་བཞིན་གྱིས་འོད་གསལ་བའི་ཕྱིར་གཏི་མུག་མེད་པའོ། །དགེ་སློང་
ཆོས་ཐམས་ཅད་ནི་མིག་ཡོར་ལྟ་བུ་སྟེ་རྣམ་པར་སྨིན་པ་མེད་པའོ། །དགེ་སློང་ཆོས་ཐམས་ཅད་ནི་ལོག་པར་སྣང་བའི་ཕྱིར་སྒྱུ་མ་ལྟ་བུའོ། །དགེ་སློང་ཆོས་ཐམས་ཅད་ནི་ཡང་དག་པ་མ་ཡིན་པར་ཀུན་དུ་བརྟག་པའི་ཕྱིར་
གནས་པ་མེད་པའོ། །དགེ་སློང་ཆོས་ཐམས་ཅད་ནི་བྱིས་པ་སོ་སོའི་སྐྱེ་བོ་རྣམས་ཀྱིས་མེད་བཞིན་དུ་སྒྲོ་བཏགས་པའི་ཕྱིར་རྣམ་པར་རྨོངས་པར་བྱེད་པའོ། །དགེ་སློང་ཆོས་ཐམས་ཅད་ནི་རྐྱེན་ཕན་ཚུན་འགལ་བའི་ཕྱིར་
སྐྱེ་བ་མེད་པའོ། །དགེ་སློང་ཆོས་ཐམས་ཅད་ནི་ལམ་ཆད་པའི་ཕྱིར་ཆགས་པ་མེད་པའོ། །དགེ་སློང་ཆོས་ཐམས་ཅད་ནི་ཉོན་མོངས་པ་ཡང་དག་པ་མ་ཡིན་པའི་ཕྱིར་ཉོན་མོངས་པ་མེད་པའོ། །དགེ་སློང་ཆོས་ཐམས་ཅད་ནི་

57-1-315a

ནམ་མཁའ་ལྟར་ཡོངས་སུ་དག་པའི་ཕྱིར་དྲི་མ་མེད་པའོ། །དགེ་སློང་ཆོས་ཐམས་ཅད་ནི་ཅི་ལས་ཀྱང་དབེན་པའི་ཕྱིར་ཅི་ཡང་མ་ཡིན་པའོ། །དགེ་སློང་ཆོས་ཐམས་ཅད་ནི་ངོ་བོ་ཉིད་ཀྱིས་མ་སྐྱེས་པའི་ཕྱིར་དུལ་བའོ། །
དགེ་སློང་ཆོས་ཐམས་ཅད་ནི་སྔོན་གྱི་མཐའ་དང་། ཕྱི་མའི་མཐའ་དང་། དབུས་ཡོངས་སུ་བཅད་པའི་ཕྱིར་མི་བདེན་པའོ། །དགེ་སློང་ཆོས་ཐམས་ཅད་ནི་གཅིག་ལ་གཅིག་རྒྱུར་འགྱུར་བ་མེད་པའི་ཕྱིར་གྲོལ་བའོ། །དགེ་སློང་ཆོས་ཐམས་
ཅད་ནི་རྩྭ་དང་ཤིང་དང་། བརྩིགས་པ་དང་། བོང་བ་འདྲ་བའི་ཕྱིར་བེམས་པོ་ཡིན་ནོ། །དགེ་སློང་ཆོས་ཐམས་ཅད་ནི་ནམ་མཁའ་དང་ཚུལ་འདྲ་བའི་ཕྱིར་ངོ་བོ་མེད་པའོ། །དགེ་སློང་ཆོས་ཐམས་ཅད་ནི་ཆགས་པ་མེད་པའི་ཕྱིར་མཉམ་
པའོ། །དགེ་སློང་ཆོས་ཐམས་ཅད་ནི་ནམ་མཁའི་ལུས་དང་། ཆང་པ་སྟོང་པ་དང་འདྲ་བའི་ཕྱིར་གཟུང་དུ་མེད་པའོ། །དགེ་སློང་ཆོས་ཐམས་ཅད་ནི་ཡེ་ཤེས་དང་ལྡན་པ་རྣམས་ཀྱིས་ཡོངས་སུ་བཙལ་བའི་ཕྱིར་ཐོབ་པ་མེད་པའོ། །
དགེ་སློང་ཆོས་ཐམས་ཅད་ནི་དུས་གསུམ་ཡོངས་སུ་དག་པའི་ཕྱིར་དུས་མེད་པའོ། །དགེ་སློང་ཆོས་ཐམས་ཅད་ནི་མུན་པར་ཆགས་པ་མེད་པའི་ཕྱིར་སྦྱོར་བ་མེད་པའོ། །དགེ་སློང་ཆོས་ཐམས་ཅད་ནི་སྒྲིབ་པ་ལས་དབེན་པའི་ཕྱིར་
ཟུག་རྔུ་མེད་པའོ། །དགེ་སློང་ཆོས་ཐམས་ཅད་ནི་མྱ་ངན་ལས་འདས་པ་དང་མཚུངས་པའི་ཕྱིར་བདེ་བའོ། །དགེ་སློང་ཆོས་ཐམས་ཅད་ནི་འཇིགས་པ་དང་བྲལ་བའི་ཕྱིར་འཇིགས་པ་མེད་པའོ། །དགེ་སློང་ཆོས་ཐམས་ཅད་ནི་
ཚུ་རོལ་མི་དམིགས་པའི་ཕྱིར་ཕ་རོལ་མ་ཡིན་ནོ། །དགེ་སློང་ཆོས་ཐམས་ཅད་ནི་གྲངས་སུ་བགྲང་བ་མེད་པའི་ཕྱིར་དཔག་ཏུ་མེད་པའོ། །དགེ་སློང་ཆོས་ཐམས་ཅད་ནི་མཚན་མ་གསོབ་ཡིན་པའི་ཕྱིར་མཚན་མ་མེད་པའོ། །
དགེ་སློང་ཆོས་ཐམས་ཅད་ནི་སྨོན་པ་ཆད་པའི་ཕྱིར་སྨོན་པ་མེད་པའོ། །དགེ་སློང་ཆོས་ཐམས་ཅད་ནི་འདུ་བྱེད་བརྫུན་པའི་ཆོས་ཉིད་ཡིན་པའི་ཕྱིར་མངོན་པར་འདུ་བྱེད་པ་མེད་པའོ། །དགེ་སློང་ཆོས་ཐམས་ཅད་ནི་རྣམ་པར་རྟོག་པ་ཉེ་

57-1-315b

བར་ཞི་བའི་ཕྱིར་སྤྲོས་པ་མེད་པའོ། །དགེ་སློང་ཆོས་ཐམས་ཅད་ནི་གནས་དང་བྲལ་བའི་ཕྱིར་གནས་པ་མེད་པའོ། །དགེ་སློང་ཆོས་ཐམས་ཅད་ནི་རྟག་ཏུ་དང་བའི་ཕྱིར་རྙོག་པ་མེད་པའོ། །དགེ་སློང་ཆོས་ཐམས་ཅད་ནི་སྐྱེ་བ་མི་
དམིགས་པ་དང་། སྐྱེ་བ་གསོབ་ཡིན་པ་དང་། སྐྱེ་བ་གསོག་ཡིན་པ་དང་། སྐྱེ་བ་སྟོང་པ་ཡིན་པ་དང་། སྐྱེ་བ་ཞི་བ་ཡིན་པའི་ཕྱིར་ཡོངས་སུ་མྱ་ངན་ལས་འདས་པའོ། །དགེ་སློང་དེའི་ཕྱིར་ཆོས་འདི་དག་ནི་ཇི་སྐད་བསྟན་པ་དེ་ཁོ་ན་བཞིན་ཏེ། 
དགེ་སློང་ང་བྱང་ཆུབ་ཀྱི་སྙིང་པོ་ལ་འདུག་པས་ནི་ཆོས་གང་གིས་སྐྱེ་བ་འམ། འཇིག་པ་འམ། ཀུན་ནས་ཉོན་མོངས་པ་འམ། རྣམ་པར་བྱང་བ་འམ། སྒྲིབ་པ་འམ། ཀུན་ནས་དཀྲེས་པ་འམ། འགྱོད་པ་འམ། ཡིད་ལ་གཅགས་
པའི་ཆོས་རྡུལ་ཙམ་ཡང་མི་དམིགས་སོ། །དེ་ཅིའི་ཕྱིར་ཞེ་ན། དགེ་སློང་ཆོས་ཐམས་ཅད་ནི་རྟག་ཏུ་ཀུན་ནས་ཉོན་མོངས་པ་ཅན་མ་ཡིན་པས་རང་བཞིན་གྱིས་ཡོངས་སུ་དག་པའི་ཕྱིར་རོ། །དེ་ནས་དགེ་སློང་དྲི་མེད་འོད་ཀྱིས་ཆོས་ཀྱི་རང་
བཞིན་འདི་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ཏེ། སྒྲིབ་པ་མེད་པར་ཤིན་དུ་དགའ་བར་གྱུར་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་
ལྡན་འདས་ལ་ཚིགས་སུ་བཅད་དེ་གསོལ་པ། ཀྱེ་མ་ཀྱེ་མ་སངས་རྒྱས་མཐུ་ཆེ་བ། །ལྷར་བཅས་འཇིག་རྟེན་སྐྱབས་ནི་ཁྱོད་ལགས་ཏེ། །མ་བསླབས་བཞིན་དུ་ཡོན་ཏན་ཀུན་གྱིས་འཕགས། །སྡུག་བསྔལ་ཀུན་འགྲེལ་
ཁྱོད་ལ་ཕྱག་འཚལ་ལོ། །སྐྱབས་མ་མཆིས་པ་རྣམས་ཀྱི་སྐྱབས་ཁྱོད་མཛོད། །འདྲེན་པ་མ་མཆིས་རྣམས་ཀྱི་འདྲེན་ཁྱོད་མཛོད། །ཞིར་གྱུར་བདེ་བའི་ལམ་ལ་གནས་པ་པོ། །སངས་རྒྱས་མཐུ་ཆེན་ཁྱོད་ལ་ཕྱག་འཚལ་ལོ། །
ཁྱོད་ནི་འཇིག་རྟེན་ལོང་བའི་སྒྲོན་མ་ལགས། །མིག་མ་མཆིས་པ་རྣམས་ལ་མིག་སྩོལ་ཁྱོད། །སེམས་ཅན་མ་གྲོལ་རབ་ཏུ་གྲོལ་མཛད་ཁྱོད། །དཔའ་བོ་མཐུ་ཆེན་ཁྱོད་ལ་ཕྱག་འཚལ་ལོ། །ཆགས་དང་སྡང་ལ་ཁྱོད་ནི་ཆགས་

57-1-316a

མི་མངའ། །སྲེད་ལ་ཆགས་རྣམས་སྡུག་བསྔལ་འགྲེལ་པ་ཁྱོད། །འཁོར་བའི་འཁོར་ལོ་མི་བདེན་ཐུགས་སུ་ཆུད། །ཡེ་ཤེས་སྟོབས་འཕགས་ཁྱོད་ལ་ཕྱག་འཚལ་ལོ། །རྟོག་དང་རྣམ་རྟོག་རྣམས་ཀྱིས་
རྟག་མི་ཆགས། །ཡེ་ཤེས་བསམ་མི་ཁྱབ་པས་གྲོལ་བ་པོ། །འཇིག་རྟེན་གསུམ་མཆོག་དྲི་མེད་ཉོན་མོངས་གྲོལ། །དྲི་མེད་དག་པའི་སེམས་ཅན་ཁྱོད་ཕྱག་འཚལ། །བྱང་ཆུབ་ལ་ནི་བདག་ཀྱང་ཞུགས་བགྱིས་ལ། །
སེམས་ཅན་སྡུག་བསྔལ་སྐྱབས་མ་མཆིས་རྣམས་དགྲོལ། །འདི་འདྲའི་ཡེ་ཤེས་བདག་གིས་ཐོབ་གྱུར་ཅིང་། །ཐེག་པ་དམན་པས་ཟག་པ་བས་མ་གྱུར། །བསྐལ་པ་བྱེ་བ་ཁྲག་ཁྲིག་བསམ་ཡས་ཀྱིས། །སྡུག་
བསྔལ་བས་བགྱི་བྱང་ཆུབ་ཡོང་མི་སྤོང་། །སྐར་མའི་ཚོགས་ཀྱི་ནང་ན་དགུན་ཟླ་ལྟར། །འཇིག་རྟེན་མགོན་པོ་བདག་གིས་དེ་འདྲར་མཐོང་། །ཇི་ལྟར་བསམ་པ་དམན་པའི་མི་འགའ་ཞིག །རྒྱ་མཚོ་ཆེན་པོའི་ནང་དུ་ཕྱིན་གྱུར་
ཀྱང་། །རིན་ཆེན་མང་པོ་མི་ལེན་སྤོང་བགྱིད་ཅིང་། །མཆིང་བུའི་ནོར་བུ་བླངས་ནས་མཆི་བར་བགྱིད། །དེ་བཞིན་གང་དག་སངས་རྒྱས་རྣམ་འཕྲུལ་སྟོབས། །ཐོས་ཀྱང་འདིར་ནི་བྱང་ཆུབ་སེམས་མི་སྐྱེད། །བྱང་ཆུབ་
སྤངས་ནས་ཉན་ཐོས་འཚལ་བ་གང་། །དེ་དག་ཡེ་ཤེས་ཡངས་ལ་འཇུག་མི་འགྱུར། །འདིར་ནི་མི་ཞིག་བྱིས་པའི་རང་བཞིན་ཅན། །རྒྱལ་པོ་འབངས་ཀྱིས་བསྐོར་བ་མཐོང་གྱུར་ཀྱང་། །དེ་ནི་བློན་པོའི་ཐབས་ལ་
སེམས་བསྐྱེད་ན། །དེ་ཡི་ཤེས་པ་ཡངས་ལྟར་མི་འཇུག་ལྟར། །དེ་ལྟར་སངས་རྒྱས་ཡོན་ཏན་ཆེ་ཉིད་དང་། །ཡེ་ཤེས་རྣམ་པར་འཕྲུལ་པ་ཐོས་གྱུར་ཀྱང་། །ཤེས་པ་དམན་པ་ལ་ནི་འདུན་སྐྱེད་པ། །དེ་ནི་ལེ་ལོ་ཅན་
ཏེ་སེམས་ཀྱང་ཞུམ། །ཐེག་པ་དམན་པས་འཇིག་རྟེན་མ་ཆགས་པ། །མཚན་མོ་སྲིན་བུ་མེ་ཁྱེར་སྣང་བ་འདྲ། །ཉི་མའི་གཟི་བརྗིད་ཀྱིས་ནི་ལས་བགྱིད་པ། །སྣང་བ་ཐོབ་ནས་མུན་དང་བྲལ་བར་འགྱུར། །སངས་རྒྱས་

57-1-316b

སྒྲས་ནི་མཐོ་རིས་མཆི་བར་འགྱུར། །སངས་རྒྱས་སྒྲས་ནི་བཟང་འགྲོར་མཆི་བར་འགྱུར། །འཇིག་རྟེན་འདི་ན་སངས་རྒྱས་སྒྲོན་མའི་མཆོག །ལྷར་བཅས་འཇིག་རྟེན་འདི་ནི་སྣང་བར་མཛད། །ཝ་ཡི་ཁྲོད་ན་སེང་གེ་
མཐོང་གྱུར་ན། །ཝ་ཡི་སྐད་ལ་འདུན་པ་སྐྱེད་པ་དང་། །སེང་གེ་རྣམ་པར་འཕྲུལ་བ་སྤོང་བགྱིད་ཅིང་། །ཝ་ཡི་ཆོས་ཀྱི་དགའ་བ་སྐྱེད་པ་ལྟར། །དེ་བཞིན་གང་དག་ཉན་ཐོས་ཁྲོད་དག་ཏུ། །སྐྱེས་བུ་ཁྱུ་མཆོག་སེང་གེ་
རྣམ་འཕྲུལ་མཐོང་། །ཐེག་པ་དམན་ལ་དགའ་བ་སྐྱེད་པ་ནི། །དེ་དག་ཕྱོགས་གཅིག་པ་ཡི་རྫུ་འཕྲུལ་ལགས། །ཡེ་ཤེས་འཚལ་བའི་མིས་ནི་དུས་ཀུན་དུ། །འཇིག་རྟེན་ཀུན་དུ་སྡུག་བསྔལ་མང་འགྲེལ་བ། །ཉན་
ཐོས་མང་པོའི་ས་མིན་གང་ལགས་པ། །ཡེ་ཤེས་དམ་པ་མཆོག་ནི་བཙལ་བར་བགྱི། །དེ་ནས་དགེ་སློང་དྲི་མེད་འོད་ཀྱི་ཚིགས་སུ་བཅད་པ་སྤོབས་པ་སྨྲས་པ་འདི་ཐོས་ནས། ལྷའི་བུ་བཞི་ཁྲི་ཉིས་སྟོང་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། དེ་དག་གིས་བཅོམ་ལྡན་འདས་དང་། འཇམ་དཔལ་གཞོན་ནུར་གྱུར་པ་དང་། དགེ་སློང་དྲི་མེད་འོད་ལ་མེ་ཏོག་མན་དཱ་ར་བ་དག་གིས་གཏོར་ཏེ། ཚིག་འདི་སྐད་ཅེས་
སྨྲས་སོ། །དགེ་སློང་ལེགས་སོ་ལེགས་སོ། །འདི་ལྟར་སངས་རྒྱས་ཀྱི་བྱང་ཆུབ་རྗེས་སུ་འཛིན་པ་འདི་ནི་དེ་བཞིན་གཤེགས་པ་ལ་བྱས་པ་གཟོ་བ་ཉིད་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་འཛུམ་པ་
མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱིས་ཆོས་ཉིད་དེ། ནམ་འཛུམ་པ་མཛད་པ་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་འཕྲོ་བ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། 
བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་ཁ་དོག་དུ་མ་དང་། ཁ་དོག་སྣ་ཚོགས་བྱུང་སྟེ། དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་འོད་ཀྱིས་ཁྱབ་པར་བྱས་ནས། ཚངས་པའི་འཇིག་རྟེན་གྱི་

57-1-317a

བར་དུ་སོང་སྟེ། ཉི་མ་དང་ཟླ་བའི་འོད་ཀྱང་མོག་མོག་པོར་བྱས་ནས་ཕྱིར་ལོག་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་དབུའི་གཙུག་ཏུ་མི་སྣང་བར་གྱུར་ཏོ། །དེ་ནས་
ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་ཆོས་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་
ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མ་མཆིས་རྐྱེན་མ་མཆིས་པར་འཛུམ་པ་མི་མཛད་ན། འཛུམ་པ་མཛད་པའི་
རྒྱུ་གང་ལགས། རྐྱེན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དགེ་སློང་དྲི་མེད་འོད་འདིས་ལྷག་པའི་བསམ་པ་དེ་ལྟ་བུས་བྱང་ཆུབ་ཏུ་སེམས་བསྐྱེད་དེ། དེའི་ཕྱིར་ངས་དགེ་སློང་དྲི་མེད་འོད་
འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་བྱ་སྟེ། ཀུན་དགའ་བོ་དགེ་སློང་དྲི་མེད་འོད་འདི་ནི་མ་འོངས་པའི་དུས་བསྐལ་པ་བཅུ་འདས་པ་ན་སངས་རྒྱས་བྱེ་བ་ཕྲག་ཉི་ཤུ་རྩ་གཉིས་ལ་མཆོད་པ་
བྱེད་པར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་ལས་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ། །བསྐལ་པ་བཟང་པོའི་སངས་རྒྱས་བཅོམ་ལྡན་
འདས་ཐམས་ཅད་ལ་ཡང་མཆོད་པ་བྱེད་པར་འགྱུར་ཏེ། དེའི་འོག་ཏུ་མངོན་པར་བྱུང་ནས་དེ་བཞིན་གཤེགས་པ་ཡོན་ཏན་པད་མ་རྣམ་པར་གྲགས་སྤྱོད་སེང་གེའི་སྒྲ་སྒྲོགས་ཤེས་བྱ་བར་འགྱུར་རོ། །ཀུན་དགའ་བོ་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་པད་མ་རྣམ་པར་གྲགས་སྤྱོད་སེང་གེའི་སྒྲ་སྒྲོགས་དེའི་སངས་རྒྱས་ཀྱི་ཞིང་རིན་པོ་ཆེ་སྣ་བདུན་ལས་གྲུབ་པར་འགྱུར་ལ། ཉན་ཐོས་དང་

57-1-317b

རང་སངས་རྒྱས་མེད་དེ། བྱང་ཆུབ་སེམས་དཔའ་འབའ་ཤིག་ཏུ་འདུ་བར་འགྱུར་རོ། །སངས་རྒྱས་ཀྱི་ཞིང་དེར་ཡང་ཕྱིར་མི་ལྡོག་པའི་འཁོར་ལོ་ཞེས་བྱ་བའི་ཆོས་བསྟན་པར་འགྱུར་རོ། །དེ་དག་ཀྱང་མྱུར་བ་ཉིད་དུ་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། སངས་རྒྱས་ཀྱི་ཞིང་ཡང་ཡེ་ཤེས་ཀྱི་ཁྱད་པར་གྱིས་ཡོངས་སུ་སྦྱང་བར་འགྱུར་རོ། །འཇིག་རྟེན་གྱི་ཁམས་དེ་ཡང་རྣམ་གྲགས་
མཐའ་ཡས་ལྡན་ཞེས་བྱ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་འདི་ལྟ་སྟེ་དཔེར་ན་ཉི་མ་ཤར་བ་ན་མུན་པ་ཐམས་ཅད་མེད་པར་འགྱུར་རོ། །
ཀུན་དགའ་བོ་དེ་བཞིན་དུ་གང་དག་གིས་ཆོས་ཀྱི་རྣམ་གྲངས་འདི་ཐོས་པ་དེ་དག་གིས་ཀུན་ནས་སྣང་བ་ཐོབ་པར་འགྱུར་ཏེ། ཆོས་ཐམས་ཅད་ལ་ཡང་སྒྲིབ་པ་མེད་པ་ཐོབ་པར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་
ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ཙམ་གྱིས་ན་སྒྲིབ་པ་དང་། སྒྲིབ་པ་མ་མཆིས་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཐོང་ཤིག་གནས་འདི་
འདྲི་བས་ཁྱོད་ལ་ཅི་ཞིག་བྱ། ཀུན་དགའ་བོ་གལ་ཏེ་དེ་བཞིན་གཤེགས་པས་སྒྲིབ་པ་དང་སྒྲིབ་པ་མེད་པ་ཐམས་ཅད་བཤད་དུ་ཟིན་ན་ལྷར་བཅས་པའི་འཇིག་རྟེན་རྨོངས་པར་འགྱུར་རོ། །དེ་ནས་བཅོམ་ལྡན་འདས་ལ་འཇམ་
དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་སྒྲིབ་པ་དང་། སྒྲིབ་པ་མ་མཆིས་པ་གང་ཐོས་ན། བྱང་ཆུབ་སེམས་དཔའ་རྣམས་ལྔ་བརྒྱ་པ་ཐ་མ་ལ་བབ་པའི་ཚེ། འཇིག་རྟེན་པའི་ཆོས་
རྣམས་ལ་འདོད་པ་སྐྱེད་པ་མི་འགྱུར་བར་དེ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་སྒྲིབ་པ་ཞེས་བྱ་བ་ལ་འདོད་ཆགས་ནི་སྒྲིབ་པའོ། །ཞེ་སྡང་ནི་སྒྲིབ་པའོ། །གཏི་མུག་ནི་སྒྲིབ་པའོ། །

57-1-318a

སྦྱིན་པ་ནི་སྒྲིབ་པའོ། །ཚུལ་ཁྲིམས་ནི་སྒྲིབ་པའོ། །བཟོད་པ་ནི་སྒྲིབ་པའོ། །བརྩོན་འགྲུས་ནི་སྒྲིབ་པའོ། །བསམ་གཏན་ནི་སྒྲིབ་པའོ། །ཤེས་རབ་ནི་སྒྲིབ་པའོ། །སངས་རྒྱས་སུ་འདུ་ཤེས་པ་ནི་
སྒྲིབ་པའོ། །ཆོས་སུ་འདུ་ཤེས་པ་ནི་སྒྲིབ་པའོ། །དགེ་འདུན་དུ་འདུ་ཤེས་པ་ནི་སྒྲིབ་པའོ། །སྟོང་པ་ཉིད་དུ་འདུ་ཤེས་པ་ནི་སྒྲིབ་པའོ། །མཚན་མ་མེད་པར་འདུ་ཤེས་པ་ནི་སྒྲིབ་པའོ། །སྨོན་པ་མེད་པར་འདུ་ཤེས་པ་ནི་
སྒྲིབ་པའོ། །མངོན་པར་འདུ་བྱེད་པ་མེད་པར་འདུ་ཤེས་པ་ནི་སྒྲིབ་པའོ། །སྐྱེ་བ་མེད་པར་འདུ་ཤེས་པ་ནི་སྒྲིབ་པའོ། །བྱང་ཆུབ་ཏུ་འདུ་ཤེས་པ་ནི་སྒྲིབ་པའོ། །འཇམ་དཔལ་མདོར་ན་ཀུན་ནས་ཉོན་མོངས་པ་འམ། 
རྣམ་པར་བྱང་བར་དམིགས་པ་དེ་དག་ཐམས་ཅད་ནི་དེའི་སྒྲིབ་པ་ཡིན་པར་བལྟ་བར་བྱའོ། །འཇམ་དཔལ་གྱིས་གསོལ་པ། བཅོམ་ལྡན་འདས་སྦྱིན་པ་ཇི་ལྟར་སྒྲིབ་པ་ལགས། ཚུལ་ཁྲིམས་དང་། བཟོད་པ་དང་། 
བརྩོན་འགྲུས་དང་། བསམ་གཏན་དང་། ཤེས་རབ་ཇི་ལྟར་སྒྲིབ་པ་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཆོས་ཐམས་ཅད་ལ་ནི་སྒྲིབ་པ་མེད་མོད་ཀྱི། འོན་ཀྱང་བྱིས་པ་སོ་སོའི་སྐྱེ་
བོ་རྣམས་ཀྱི་རང་གི་རྟོག་པས་སྦྱིན་པ་ཡང་སྒྲིབ་པའི་བྱ་བ་བྱེད་དོ། །ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱང་སྒྲིབ་པའི་བྱ་བ་བྱེད་དོ། །དེ་ཅིའི་ཕྱིར་ཞེ་ན། འཇམ་
དཔལ་བྱིས་པ་སོ་སོའི་སྐྱེ་བོ་རྣམས་ནི་སྦྱིན་པ་སྦྱིན་པ་ན། སེམས་ཅན་སེར་སྣ་ཅན་རྣམས་ལ་མ་དད་པར་བྱེད་དེ། དེ་དག་མ་དད་པ་དེས་ཁོང་ཁྲོ་བ་དང་། ཐ་བའི་ཉེས་པ་སྐྱེད་པར་བྱེད་དོ། །ཁོང་ཁྲོ་བ་དང་། ཐ་བའི་
ཉེས་པས་སེམས་ཅན་དམྱལ་བར་ལྟུང་བར་འགྱུར་རོ། །དེ་དག་ཚུལ་ཁྲིམས་སྲུང་བ་ན་ཚུལ་ཁྲིམས་འཆལ་པ་ལ་སྨོད་ཅིང་བརྙས་པར་བྱེད་ལ་བསྔགས་པ་མ་ཡིན་པ་རྗོད་དོ། །དེ་དག་ལས་དེ་དག་གི་བསྔགས་

57-1-318b

པ་མ་ཡིན་པ་ཐོས་པས་སོ་སོའི་སྐྱེ་བོ་མང་པོ་དག་མ་དད་པར་བྱེད་དེ། དེ་དག་མ་དད་པ་དེས་ངན་འགྲོར་འགྲོ་བར་འགྱུར་རོ། །དེ་དག་བཟོད་པ་སྒོམ་པ་ན་བདག་ཅག་ནི་བཟོད་པར་སྨྲ་བ་ཡིན་གྱི་གཞན་འདི་དག་གནོད་སེམས་
ཀྱི་སེམས་དང་ལྡན་པ་ཡིན་ནོ་ཞེས་བཟོད་པའི་རྒྱགས་པས་མྱོས་པ་དེ་དག་བག་མེད་པའི་གཞི་ལས་བྱུང་བའི་སྡུག་བསྔལ་རྣམས་སྐྱེད་པར་འགྱུར་རོ། །དེ་དག་བརྩོན་ན་བདག་ཅག་ནི་བཟང་པར་སྨྲ་བ་ཡིན་གྱི་གཞན་འདི་
དག་གནོང་སེམས་ཀྱི་སེམས་དང་ལྡན་པ་ཡིན་ནོ་ཞེས་བཟོད་པའི་རྒྱགས་པས་མྱོས་པ་དེ་དག་བག་མེད་པའི་གཞི་ལས་བྱུང་བའི་སྡུག་བསྔལ་རྣམས་སྐྱེད་པར་འགྱུར་རོ། །དེ་དག་བརྩོན་འགྲུས་རྩོམ་པ་ན་བདག་སྒྲོགས་
ཤིང་དགེ་སློང་འདི་དག་ནི་ལེ་ལོ་ཅན་དུ་གནས་པ་ཡིན་ཏེ། བརྩོན་པ་མེད་པར་དད་པས་བྱིན་པ་ལོངས་སྤྱོད་པར་བྱེད་དོ། །དེ་དག་གིས་ནི་ཆུ་རའི་ཆུ་ཡང་ལོངས་སྤྱོད་པར་མི་འོས་སོ་སྙམ་སྟེ། དེ་དག་བརྩོན་འགྲུས་རྩོམ་པས་
བདག་ལ་ནི་བསྟོད་པར་བྱེད། གཞན་ལ་ནི་སྨོད་པར་བྱེད་དེ། དེ་དག་ནི་བྱིས་པ་ཡིན་ཞེས་ང་སྨྲའོ། །དེ་དག་བསམ་གཏན་ལ་སྙོམས་པར་འཇུག་པ་ན། བསམ་གཏན་གྱི་དགའ་བ་དེ་ལ་ཆགས་པ་སྐྱེད་པར་བྱེད་ཅིང་དེ་དག་འདི་སྙམ་དུ་
སེམས་ཏེ། བདག་ཅག་ནི་མཉམ་པར་བཞག་པས་གནས་པ་ཡིན་གྱི། དགེ་སློང་གཞན་འདི་དག་ནི་སེམས་གཡེངས་པས་གནས་པ་ཡིན་ཏེ། འདུ་འཛི་ལ་དགའ་བས་གནས་པ་ཡིན་ནོ། །འདུ་འཛི་ལ་དགའ་བས་འདི་
དག་སངས་རྒྱས་སུ་ག་ལ་འགྱུར་ཏེ། འདི་དག་ནི་སངས་རྒྱས་ཀྱི་བྱང་ཆུབ་ལས་རིང་ངོ་སྙམ་མོ། །དེ་དག་འདུ་ཤེས་ཡིད་ལ་བྱེད་པ་དེས་ཇི་ཙམ་དུ་བརྙས་པར་གྱུར་པའི་སེམས་སྐྱེད་པར་བྱེད་པ་དེ་སྙེད་ཀྱི་བསྐལ་པར་འཁོར་བ་
ཡོངས་སུ་འཛིན་པར་འགྱུར་རོ། །ཕྱིས་དེ་དག་གིས་གང་དུ་བྱང་ཆུབ་ལ་སྤྱོད་པ་ན་གལ་ཏེ་དེ་དག་མང་དུ་ཐོས་པ་ཡིན་དུ་ཟིན་ཀྱང་དེ་དག་གིས་ཆོས་ཐམས་ཅད་ཡི་གེ་མེད་པ་ལ་རྣམ་པར་ཤེས་པ་ཡོད་པར་བརྟགས་ཏེ། 

57-1-319a

ཤེས་རབ་ཏུ་དམིགས་ནས་ཕ་རོལ་ཁྱད་དུ་གསོད་པར་བྱེད་པ་དེ་དག་ནི་མི་ཤེས་པའོ་ཞེས་ང་སྨྲའོ། །མི་ཤེས་བཞིན་དུ་སྨྲའོ་ཞེས་ང་སྨྲའོ། །སྐྱེས་བུ་དམ་པ་མ་ཡིན་པའོ་ཞེས་ང་སྨྲའོ། །རྣམ་པར་རྟོག་
པས་ཉམས་དམའོ་ཞེས་ང་སྨྲའོ། །གལ་ཏེ་དེ་དག་ཐེག་པ་ཆེན་པོ་ལ་ཞུགས་པར་གྱུར་ན་ཡང་དེ་དག་འདི་སྙམ་དུ་སེམས་ཏེ། བདག་ཅག་ནི་འཇིག་རྟེན་ན་གཙོ་བོ་ཡིན་ནོ། །བདག་ཅག་ནི་འཇིག་རྟེན་ན་ཕུལ་ཡིན་ནོ། །
བདག་ཅག་ནི་འཇིག་རྟེན་ན་མཆོག་ཡིན་ནོ་སྙམ་མོ། །གལ་ཏེ་དེ་དག་གིས་ཉན་ཐོས་ཀྱི་ཐེག་པ་པ་དག་མཐོང་ན། དེ་དག་ལ་མ་དད་པ་སྐྱེད་ཅིང་སྨོད་པ་དང་། འཕྱ་བ་དང་། བསྔགས་པ་མ་ཡིན་པ་བརྗོད་པར་བྱེད་དེ། བསམ་
པ་ངན་པ་དང་། ཉེས་པར་རྗོད་པ་དེས་ན་ངན་འགྲོར་འགྲོ་བ་ཐོབ་པར་འགྱུར་རོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་
སངས་རྒྱས་ཀྱི་ཆོས་རྣམས་ཀྱིས་བསྔགས་པ་བརྗོད་པར་མི་བགྱི་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ཇི་སྙམ་དུ་སེམས། ཅི་བྱང་ཆུབ་སེམས་དཔའ་སེམས་ཅན་ཐམས་ཅད་
ལ་དགའ་བཞིན་དུ་བལྟ་བ་དང་། ཕན་པའི་དངོས་པོའི་རང་བཞིན་བསྐྱེད་པར་མི་བྱ་འམ། འཇམ་དཔལ་གྱིས་གསོལ་པ། བཅོམ་ལྡན་འདས་དེ་ནི་དེ་ལྟ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་
དཔལ་འདི་ཇི་སྙམ་དུ་སེམས། བྱང་ཆུབ་སེམས་དཔའ་སེམས་ཅན་ཉན་ཐོས་ཀྱི་ཐེག་པ་འམ། རང་སངས་རྒྱས་ཀྱི་ཐེག་པ་འམ། ཐེག་པ་ཆེན་པོ་པ་འགའ་ཙམ་ཡང་ཡོངས་སུ་སྤངས་སམ། འཇམ་དཔལ་གྱིས་
གསོལ་པ། བཅོམ་ལྡན་འདས་དེ་ནི་མ་ལགས་ཏེ། བྱང་ཆུབ་སེམས་དཔའ་སེམས་ཅན་ཐམས་ཅད་ལ་སེམས་སྙོམས་པ་ལགས་པས་བྱང་ཆུབ་སེམས་དཔའ་ནི་སེམས་ཅན་འགའ་ཡང་ཡོངས་སུ་མ་བཏང་

57-1-319b

བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ལྟ་སྟེ་དཔེར་ན་སྨན་པས་ནི་རྒྱལ་པོ་འམ། ཚོང་དཔོན་ནམ། ཁྱིམ་བདག་གམ། མི་དབུལ་པོ་འམ། སེམས་ཅན་འགའ་ཙམ་ཡང་ཡོངས་
སུ་སྤངས་པ་མེད་དོ། །སྨན་པ་དེ་ནི་འདི་ལྟར་སེམས་སྙོམས་པས་ཉེ་བར་གནས་པ་ཡིན་ཏེ། ཇི་ལྟར་བྱས་ན་སེམས་ཅན་འདི་དག་ནད་དང་བྲལ་བར་འགྱུར་ཞིག་གུ་སྙམ་མོ། །འཇམ་དཔལ་དེ་བཞིན་དུ་བྱང་ཆུབ་སེམས་
དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ལ་སྙིང་རྗེ་འཇུག་ཅིང་སེམས་སྙོམས་པས་ཉེ་བར་གནས་པ་ཡིན་ཏེ། འདི་སྙམ་དུ་སེམས་ཅན་འདི་དག་ཐམས་ཅད་ཇི་ལྟར་བྱས་ན་སངས་རྒྱས་ཀྱི་ཆོས་
རྣམས་ལ་ངེས་པར་འབྱུང་བར་འགྱུར་ཞིག་གུ་སྙམ་མོ། །འཇམ་དཔལ་འདི་ལྟ་སྟེ་དཔེར་ན་སྨན་པ་ནི་སྨན་དཔྱོད་ཀྱི་རྒྱུད་རྒྱུན་མ་ཆད་ན། དགའ་ཞིང་མགུ་ལ་ཡིད་རངས་པར་འགྱུར་རོ། །འཇམ་དཔལ་དེ་བཞིན་དུ་
བྱང་ཆུབ་སེམས་དཔའ་སེམས་དཔའ་ཆེན་པོ་ནི་སངས་རྒྱས་ཀྱི་གདུང་རྒྱུན་མི་ཆད་ན་དགའ་ཞིང་མགུ་ལ་ཡིད་རངས་པར་འགྱུར་རོ། །འཇམ་དཔལ་སེམས་ཅན་ཐམས་ཅད་ནི་སྨན་པ་དང་འདྲ་བ་མ་ཡིན་ནོ། །འཇམ་
དཔལ་གསོ་བར་བྱེད་པའི་སྨན་པ་ནི་དཀོན་ནོ། །འཇམ་དཔལ་དེ་བཞིན་དུ་སེམས་ཅན་ཐམས་ཅད་ནི་སངས་རྒྱས་དང་འདྲ་བ་མ་ཡིན་ཏེ། བྱང་ཆུབ་ཀྱི་སེམས་ནི་དཀོན་ནོ། །བྱང་ཆུབ་ཀྱི་ཕྱིར་གོ་ཆ་བགོ་བ་ནི་སེམས་
ཅན་ཐམས་ཅད་ཀྱིས་མི་བཟོད་དོ། །དཔེར་ན་ལེ་ལོ་ཅན་རྣམས་ནི་བདག་གིས་སྨན་པ་བྱའོ་སྙམ་དུ་སྨན་པའི་ཆོས་རྣམས་ལ་ལྷག་པར་དམིགས་པ་མེད་དོ། །དེ་བཞིན་དུ་སེམས་ཅན་ཐམས་ཅད་ནི་བྱང་ཆུབ་
ཏུ་སེམས་བསྐྱེད་མི་ནུས་ཏེ། ལེ་ལོས་བདག་ཉིད་ནད་པར་བྱེད་དོ། །འཇམ་དཔལ་རང་བྱུང་ནི་དཀོན་ནོ། །གཞན་ལ་རག་ལས་པ་མ་ཡིན་པའི་ཡེ་ཤེས་ནི་དཀོན་ནོ། །སེམས་རྒྱ་ཆེ་བ་ནི་དཀོན་ནོ། །སངས་རྒྱས་ཀྱི་

57-1-320a

ཆོས་རྣམས་ལ་ལྷག་པར་དམིགས་པ་ནི་དཀོན་ནོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་ཆོས་ཐམས་ཅད་
ལ་སྒྲིབ་པ་མ་མཆིས་པར་རྣམ་པར་དག་པར་འགྱུར་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་བྱང་ཆུབ་སེམས་དཔའ་ཆོས་ཐམས་
ཅད་འདོད་ཆགས་ཀྱི་ཆོས་སུ་མཐོང་བ་གང་ཡིན་པ་དེས་ནི་ལས་ཀྱི་སྒྲིབ་པ་རྣམ་པར་དག་པ་ཐོབ་པར་འགྱུར་རོ། །ཆོས་ཐམས་ཅད་ཞེ་སྡང་གི་ཆོས་སུ་མཐོང་བ་དེས་ནི་ལས་ཀྱི་སྒྲིབ་པ་རྣམ་པར་དག་པ་ཐོབ་པར་འགྱུར་རོ། །ཆོས་
ཐམས་ཅད་གཏི་མུག་གི་ཆོས་སུ་མཐོང་བ་དེས་ནི་ལས་ཀྱི་སྒྲིབ་པ་རྣམ་པར་དག་པ་ཐོབ་པར་འགྱུར་རོ། །འཇམ་དཔལ་གཞན་ཡང་བྱང་ཆུབ་སེམས་དཔའ་འདོད་པའི་ཡོན་ཏན་ལྔ་པོ་དག་ལ་མངོན་པར་དགའ་ཞིང་མི་གཏོང་མི་སྤོང་ལ། 
སངས་རྒྱས་ཀྱི་ཆོས་རྣམས་ཀྱང་འདོད་པའི་ངོ་བོ་ཉིད་དུ་མཐོང་བ་དེས་ནི་ལས་ཀྱི་སྒྲིབ་པ་རྣམ་པར་དག་པ་ཐོབ་པར་འགྱུར་རོ། །འཇམ་དཔལ་གཞན་ཡང་བྱང་ཆུབ་སེམས་དཔའ་ནི་སྒྲིབ་པ་ལྔ་པོ་དག་གིས་བྱང་ཆུབ་ཚོལ་བར་བྱེད་དེ། 
ཚོལ་བ་དང་བྱང་ཆུབ་ཀྱང་འཐོབ་པ་མེད་ཅིང་སྒྲིབ་པ་རྣམས་ཀྱང་མེད་པ་དེས་ནི་ལས་ཀྱི་སྒྲིབ་པ་ཐམས་ཅད་རྣམ་པར་དག་པ་ཐོབ་པར་འགྱུར་རོ། །འཇམ་དཔལ་གཞན་ཡང་བྱང་ཆུབ་སེམས་དཔའ་གང་ཀུན་ནས་མནར་སེམས་ཀྱི་
གཞི་དགུ་པོ་དག་ལ་བྱམས་པ་ཐོབ་པར་འགྱུར་ལ། གང་ལ་དེའི་ཀུན་ནས་མནར་སེམས་ཀྱི་གཞི་སྐྱེ་བར་འགྱུར་བ་དེ་དང་དེ་ལ་ཚུལ་བཞིན་དུ་སོ་སོར་རྟོག་པར་བྱེད་ཅིང་བདག་ཉིད་ཀྱང་མི་དམིགས། གཞན་ཡང་མི་དམིགས། བྱམས་པ་
ཡང་མི་དམིགས་ཏེ། འདི་ལྟར་ཆོས་ཐམས་ཅད་མི་དམིགས་པ་དེ་ནི་བྱམས་པའི་མཆོག་ཡིན་ནོ། །དེ་ལྟར་བྱང་ཆུབ་སེམས་དཔའ་བཟོད་པ་དང་ལྡན་པ་ནི་སྒྲིབ་པ་མེད་པ་ཉིད་ཐོབ་པར་འགྱུར་རོ། །འཇམ་དཔལ་གཞན་ཡང་

57-1-320b

བྱང་ཆུབ་སེམས་དཔའ་གང་ལྟུང་བ་ལ་ལྟུང་བ་མེད་པར་མཐོང་བ་དང་། འདུལ་བ་མ་ཡིན་པ་ལ་འདུལ་བར་མཐོང་བ་དང་། ཀུན་ནས་ཉོན་མོངས་པ་ལ་རྣམ་པར་བྱང་བར་མཐོང་བ་དང་། འཁོར་བའི་ཁམས་ལ་མྱ་ངན་ལས་འདས་པའི་
དབྱིངས་སུ་མཐོང་བ་དེས་ནི་ལས་ཀྱི་སྒྲིབ་པ་རྣམ་པར་དག་པ་ཐོབ་པར་འགྱུར་རོ། །འཇམ་དཔལ་གཞན་ཡང་བྱང་ཆུབ་སེམས་དཔའ་གང་འདོད་ཆགས་ཀྱི་ཁམས་ལ་མྱ་ངན་ལས་འདས་པའི་དབྱིངས་སུ་མཐོང་བ་དང་། ཞེ་སྡང་གི་
ཁམས་ལ་མྱ་ངན་ལས་འདས་པའི་དབྱིངས་སུ་མཐོང་བ་དང་། གཏི་མུག་གི་ཁམས་ལ་མྱ་ངན་ལས་འདས་པའི་དབྱིངས་སུ་མཐོང་བ་དེས་ནི་ལས་ཀྱི་སྒྲིབ་པ་རྣམས་པར་དག་པ་ཐོབ་པར་འགྱུར་རོ། །འཇམ་དཔལ་གཞན་ཡང་
བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཐམས་ཅད་ལ་སངས་རྒྱས་ཀྱི་ཆོས་སུ་ཡང་དག་པར་མཐོང་བ་དེས་ནི་ལས་ཀྱི་སྒྲིབ་པ་རྣམ་པར་དག་པ་ཐོབ་པར་འགྱུར་རོ། །འཇམ་དཔལ་གཞན་ཡང་བྱང་ཆུབ་སེམས་
དཔའ་གང་ཆོས་ཐམས་ཅད་ནམ་མཁའི་གཞི་ལས་བྱུང་བར་མཐོང་བ་དེས་ནི་ལས་ཀྱི་སྒྲིབ་པ་རྣམ་པར་དག་པ་ཐོབ་པར་འགྱུར་རོ། །འཇམ་དཔལ་གཞན་ཡང་བྱང་ཆུབ་སེམས་དཔའ་གང་སེར་སྣའི་ཆོས་རྣམས་དང་། 
སྦྱིན་པའི་ཆོས་རྣམས་ལ་གཉིས་སུ་མི་འབྱེད་པ་དང་། འཆལ་པའི་ཚུལ་ཁྲིམས་ཀྱི་ཆོས་རྣམས་དང་། ཚུལ་ཁྲིམས་ཀྱི་ཆོས་རྣམས་ལ་གཉིས་སུ་མི་འབྱེད་པ་དང་། གནོད་སེམས་ཀྱི་ཆོས་རྣམས་དང་། བཟོད་པའི་ཆོས་རྣམས་
ལ་གཉིས་སུ་མི་འབྱེད་པ་དང་། ལེ་ལོའི་ཆོས་རྣམས་དང་། བརྩོན་འགྲུས་ཀྱི་ཆོས་རྣམས་ལ་གཉིས་སུ་མི་འབྱེད་པ་དང་། རྣམ་པར་གཡེངས་པའི་ཆོས་རྣམས་དང་། བསམ་གཏན་གྱི་ཆོས་རྣམས་ལ་གཉིས་སུ་མི་འབྱེད་པ་
དང་། འཆལ་པའི་ཤེས་རབ་ཀྱི་ཆོས་རྣམས་དང་། ཤེས་རབ་ཀྱི་ཆོས་རྣམས་ལ་གཉིས་སུ་མི་འབྱེད་པ་དེས་ནི་ལས་ཀྱི་སྒྲིབ་པ་རྣམ་པར་དག་པ་ཐོབ་པར་འགྱུར་རོ། འཇམ་དཔལ་གཞན་ཡང་བྱང་ཆུབ་སེམས་དཔའ་གང་

57-1-321a

ཉོན་མོངས་པ་ཐམས་ཅད་ལ་སངས་རྒྱས་ཀྱི་ཆོས་རྣམས་སུ་མོས་པ་དེས་ནི་ལས་ཀྱི་སྒྲིབ་པ་རྣམ་པར་དག་པ་ཐོབ་པར་འགྱུར་རོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་
གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཇི་ལྟར་ཉོན་མོངས་པ་ཐམས་ཅད་ལ་སངས་རྒྱས་ཀྱི་ཆོས་རྣམས་འཇུག་པར་བགྱིད་པ་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ཇི་སྙམ་དུ་
སེམས། ཆོས་འགའ་ཙམ་ཡང་ཆོས་འགའ་ཙམ་ལ་ཀུན་ནས་ཉོན་མོངས་པའི་བྱ་བ་བྱེད་དམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ཇི་
སྙམ་དུ་སེམས། ཆོས་འགའ་ཙམ་ཡང་ཆོས་འགའ་ཙམ་ལ་རྣམ་པར་བྱང་བའི་བྱ་བ་བྱེད་དམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ཇི་
སྙམ་དུ་སེམས། ཁྱོད་ཀྱིས་མི་སྐྱེ་བའི་ཆོས་ལ་བཟོད་པ་ཇི་ལྟར་ཐོབ། འཇམ་དཔལ་གྱིས་གསོལ་པ། བཅོམ་ལྡན་འདས་བདག་གིས་ནི་ཉོན་མོངས་པ་ཐམས་ཅད་ལ་མི་སྐྱེ་བའི་ཆོས་ལ་བཟོད་པ་ཐོབ་ལགས་སོ། །
དེ་ཅིའི་སླད་དུ་ཞེ་ན། བཅོམ་ལྡན་འདས་ཉོན་མོངས་པ་ཐམས་ཅད་ནི་ནམ་མཁའི་གཞི་ལས་བྱུང་བའི་སླད་དུ་སྟེ། བཅོམ་ལྡན་འདས་བདག་གིས་ནི་ཆོས་འགའ་ཙམ་ཡང་ཡོངས་སུ་མ་འཚལ་ཅིང་མ་སྤངས་ལ། མ་བསྒོམས་
ཤིང་མངོན་སུམ་དུ་མ་བགྱིས་ལགས་སོ། །བཅོམ་ལྡན་འདས་བྱིས་པ་སོ་སོའི་སྐྱེ་བོ་ཐམས་ཅད་ནི་སངས་རྒྱས་ཀྱི་ཆོས་རྣམས་དང་བྲལ་བ་ཡང་མ་ལགས། རྟོགས་པ་ཡང་མ་ལགས་ཏེ། བཅོམ་ལྡན་འདས་ཉོན་མོངས་
པ་སྤང་བའི་སླད་དུ་སངས་རྒྱས་ཀྱི་ཆོས་རྣམས་ལ་དམིགས་པ་དེ་དག་ནི་ཕོངས་པར་འགྱུར་བ་ལགས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། 

57-1-321b

འཇམ་དཔལ་གཉིས་སུ་མེད་པའི་ཆོས་ལ་གནས་པ་བསྟན་པ་འདི་ནི་ལེགས་སོ། །ལེགས་སོ། །འཇམ་དཔལ་སྔོན་བྱུང་བ་འདས་པའི་དུས་བསྐལ་པ་གྲངས་མེད་པ། གཞལ་དུ་མེད་པ། ཚད་མེད་པ། བསམ་གྱིས་མི་ཁྱབ་
པ། དཔག་ཏུ་མེད་པའི་ཕ་རོལ་པས་ཀྱང་ཆེས་ཕ་རོལ་དུ་གྱུར་པ་དེའི་ཚེ་དེའི་དུས་ན། འཇིག་རྟེན་གྱི་ཁམས་ཤིན་དུ་དྲི་ལྡན་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་
པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཉི་མའི་སྙིང་པོ་འོད་ཟེར་དྲི་མ་མེད་
པ་ཞེས་བྱ་བ་འཇིག་རྟེན་དུ་བྱུང་ངོ་། །འཇམ་དཔལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མའི་སྙིང་པོ་འོད་ཟེར་དྲི་མ་མེད་པ་དེའི་སྐུ་ཚེའི་ཚད་ནི་བསྐལ་པ་དགུ་སྟོང་ཐུབ་པར་གྱུར་
ཏོ། །འཇིག་རྟེན་གྱི་ཁམས་དེའི་སེམས་ཅན་གང་ཡིན་པ་དེ་དག་ནི་དམན་པ་ལ་མོས་པར་གྱུར་ཏོ། །རྒྱ་ཆེན་པོ་ལ་མོས་པ་ནི་ཉུང་བར་གྱུར་ཏོ། །དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་པའི་དམ་པའི་ཆོས་ནི་
ལོ་སྟོང་གི་བར་དུ་གནས་པར་གྱུར་ཏོ། །དེའི་སྐུ་གདུང་རྣམས་ཀྱང་འདི་ལྟ་སྟེ་དཔེར་ན་ངའི་སྐུ་གདུང་ཇི་ལྟར་རྒྱས་པར་འགྱུར་བ་བཞིན་དུ་རྒྱས་པར་གྱུར་ཏོ། །འཇམ་དཔལ་དེའི་ཚེ་དགེ་སློང་དཔས་བྱིན་ཞེས་བྱ་བ་ཚུལ་
ཁྲིམས་ཀྱི་ཕུང་པོ་ལ་གནས་པ། ངོ་ཚ་ཤེས་ཤིང་བསླབ་པ་འདོད་པ། མང་དུ་ཐོས་པ་ཞིག་བྱུང་སྟེ། དགེ་སློང་དེ་མཛེས་ཤིང་བལྟ་ན་སྡུག་ལ། ཁ་དོག་བཟང་པོ་རྒྱས་པ་མཆོག་དང་ལྡན་ནོ། །དེ་ནང་པར་སྨད་གཡོགས་
བགོས་ནས་ལྷུང་བཟེད་དང་ཆོས་གོས་བླངས་ཏེ། གྲོང་ཁྱེར་ཆེན་པོ་རྣམ་པར་རྒྱལ་བར་བསོད་སྙོམས་ཀྱི་ཕྱིར་སོང་ངོ་། །དེ་གྲོང་ཁྱེར་དེ་ན་བསོད་སྙོམས་ཀྱི་ཕྱིར་རྒྱུ་ཞིང་ཚོང་དཔོན་གྱི་ཁྱིམ་ཞིག་ཏུ་སོང་བ་དང་། ཚོང་དཔོན་གྱི་

57-1-322a

ཁྱིམ་དེ་ན་ཡང་ཚོང་དཔོན་གྱི་བུ་མོ་གཟུགས་བཟང་ཞིང་མཛེས་ལ་བལྟ་ན་སྡུག་པ་མི་ལ་མ་བཏང་བ་ཞིག་ཡོད་དོ། །དེ་ནས་ཚོང་དཔོན་གྱི་བུ་མོ་དེས་དགེ་སློང་དཔས་བྱིན་མཐོང་ནས་འདོད་ཆགས་ཀྱི་སེམས་
སྐྱེས་ཏེ་དེ་འདི་སྙམ་དུ་སེམས་སོ། །གལ་ཏེ་བདག་གིས་དགེ་སློང་དཔས་བྱིན་འདི་བདག་གི་ཁྱིམ་ཐབ་ཏུ་མ་ཐོབ་ན་ནི་བདག་འཆི་བར་འགྱུར་རོ་སྙམ་ནས་སུ་ལ་ཡང་བསྙད་མ་ནུས་ཏེ། དེ་འདོད་ཆགས་ཀྱིས་ཡོངས་སུ་གདུངས་
པ་དེ་ཉིད་ཀྱིས་ནང་ཏུ་ཞུགས་པར་གྱུར་ཏོ། །དེ་ནས་དགེ་སློང་དཔས་བྱིན་བསོད་སྙོམས་ཀྱི་ཕྱིར་རྒྱུ་བ་བྱས་ནས་གཙུག་ལག་ཁང་དུ་སོང་ངོ་། །བུ་མོ་དེའི་ཕ་ཡང་འཆི་བའི་དུས་བྱས་སོ། །དེ་ནས་བུ་མོ་དེའི་མས་བུ་མོ་དེ་ལ་
ཁྱོད་ཅིའི་ཕྱིར་འདི་ལྟར་ན་བར་གྱུར་ཅེས་སྨྲས་ན། ཅང་མི་སྨྲ་ཞིང་གཟས་མི་ཟ་བར་འདུག་གོ། །དེ་ནས་བུ་མོ་དེའི་ནེའུ་ལྡངས་བདེ་བ་དང་སྡུག་བསྔལ་མཚུངས་པར་སྤྱོད་པ་རྣམས་ཀྱིས་བུ་མོ་དེ་ལ་ཁྱོད་ཅིའི་ཕྱིར་འདི་ལྟར་ན་བར་གྱུར་
ཅེས་དྲིས་སོ། །དེས་སྨྲས་པ། བདག་གིས་དགེ་སློང་ཆེ་གེ་མོ་ཞིག་མཐོང་ནས། དེ་ལ་འདུན་པའི་འདོད་ཆགས་སྐྱེས་ཏེ། བདག་དགེ་སློང་དེ་དང་ཕྲད་ན་ནི་ནད་འདི་ལས་སོས་པར་འགྱུར་རོ། །ཅི་སྟེ་ཕྲད་པར་མ་གྱུར་ན་ནི་འཆི་བར་འགྱུར་
རོ། །དེ་ནས་བུ་མོ་དེ་དག་གིས་བུ་མོ་དེ་ལས་ཐོས་ནས་དེའི་མ་ལ་བསྙད་དོ། །དེ་ནས་དེའི་མ་འདི་སྙམ་དུ་སེམས་ཏེ། གལ་ཏེ་དགེ་སློང་དཔས་བྱིན་དང་ཕྲད་པར་མ་གྱུར་ན་ནི་ཅི་བྱར་ཡང་མེད་ཀྱིས་བུ་མོ་འདི་ནི་འཆི་བར་འགྱུར་རོ་སྙམ་མོ། །
ཡང་འདི་སྙམ་དུ་བསམས་ཏེ། བདག་གིས་བུ་མོ་འདི་དགེ་སློང་དཔས་བྱིན་ལས་ལུང་ནོད་དུ་གཞུག་གོར་མ་ཆག་གོ། །འོན་ཏང་དགེ་སློང་དཔས་བྱིན་དེ་ཁྱིམ་འདིར་རྟག་ཏུ་འོང་བར་འགྱུར་རོ་སྙམ་མོ། །དེ་ནས་དགེ་སློང་དཔས་བྱིན་
ཡང་གྲོང་ཁྱེར་རྣམ་པར་རྒྱལ་བར་བསོད་སྙོམས་ཀྱི་ཕྱིར་རྒྱུ་ཞིང་ཚོང་དཔོན་གྱི་ཁྱིམ་དེར་ཡང་བསོད་སྙོམས་ཀྱི་ཕྱིར་སོང་སྟེ། དེ་ནང་དུ་ཞུགས་པ་དང་། ཚོང་དཔོན་གྱི་བུ་མོ་ཉམ་ཆུང་བར་གྱུར་པ་མཐོང་ནས། དེས་བུ་མོ་འདི་ཅིའི་ཕྱིར་

57-1-322b

ཉམ་ཆུང་ཞིང་ན་བར་གྱུར་ཅེས་སྨྲས་སོ། །བུ་མོ་དེའི་མས་སྨྲས་པ། བུ་མོ་འདི་ཆོས་ཉན་པར་འདོད་པ་ལས་བདག་གིས་བགེགས་བྱས་ནས་དེའི་ཕྱིར་འདི་ན་བར་གྱུར་ཏོ། །དེ་སྐད་ཅེས་སྨྲས་ནས། དགེ་སློང་དཔས་བྱིན་དེས་
བུ་མོ་དེའི་མ་ལ་འདི་སྐད་ཅེས་སྨྲས་སོ། །ཁྱོད་བུ་མོ་འདི་ཆོས་ཉན་པ་ལ་བགེགས་མ་བྱེད་ཅིག །དེས་སྨྲས་པ། གལ་ཏེ་སློབ་དཔོན་གྱིས་བུ་མོ་འདི་ལ་ལུང་འབོག་ན་ནི་བདག་བུ་མོ་འདི་ཆོས་ཉན་པ་ལ་བགེགས་མི་བགྱིད་དོ། །
དགེ་སློང་དཔས་བྱིན་གྱིས་སྨྲས་པ། བུ་མོ་འདི་ལ་བདག་གིས་ལུང་དཔོག་པར་བྱའོ། །བུ་མོའི་མས་སྨྲས་པ། སློབ་དཔོན་རྟག་ཏུ་ཁྱིམ་འདིར་གཤེགས་ཤིག །དཔས་བྱིན་གྱིས་སྨྲས་པ། འོང་བར་བྱའོ། །དེ་ནས་བུ་མོ་དེས་
དགེ་སློང་གི་ཚིག་ཐོས་ནས་ཚུལ་བཞིན་མ་ཡིན་པ་ཡིད་ལ་བྱེད་པ་དེ་ལས་རྩེ་ཞིལ་བར་གྱུར་ཏེ། བདག་གིས་ཀྱང་ཅི་ནས་བདག་འདོད་པ་བཞིན་བྱེད་པར་འགྱུར་བར་ཆགས་པར་འགྱུར་བར་བྱའོ་སྙམ་མོ། །དེ་ནས་བུ་མོ་དེས་དགེ་
སློང་དེ་ལ་འདི་སྐད་ཅེས་སྨྲས་སོ། །བདག་ལ་ཐུགས་བརྩེ་བའི་སླད་དུ་སློབ་དཔོན་ཁྱིམ་འདིར་གཤེགས་པར་གསོལ་ལོ། །དེ་ནས་དགེ་སློང་དཔས་བྱིན་དེས་ཅང་མི་སྨྲ་བས་ཁས་བླངས་ནས་བསོད་སྙོམས་ཁྱེར་ཏེ་གཙུག་
ལག་ཁང་དུ་སོང་ངོ་། །དེ་ནས་བུ་མོ་དེའི་མས་བུ་མོ་དེ་ལ་འདི་སྐད་ཅེས་སྨྲས་སོ། །བུ་མོ་ཁྱོད་ད་ཕྱིན་ཅད་རྒྱན་གྱིས་བརྒྱན་པར་གྱིས་ལ། ཙན་དན་གྱིས་ལུས་བྱུག་པ་དང་། གོས་ཁ་དོག་སྣ་ཚོགས་བགོ་བར་གྱིས་ལ་ཅི་ནས་
ཁྱོད་ཀྱི་དབང་དུ་འགྱུར་བ་དེ་བཞིན་དུ་ཁྱོད་ཀྱིས་ནན་ཏན་བྱོས་ཤིག །དེས་ཀྱང་དེ་བཞིན་དུ་ནན་ཏན་བྱས་སོ། །དེ་ནས་དགེ་སློང་དཔས་བྱིན་ཡང་དང་ཡང་དུ་ཁྱིམ་དེར་འོང་ཞིང་ཡིད་བརྟན་པར་གྱུར་ཏོ། །དེས་རྟག་ཏུ་མཐོང་བས་
བུ་མོ་དེ་ལ་འདོད་ཆགས་ཀྱི་སེམས་བསྐྱེད་དེ། དེ་འདོད་ཆགས་ཡིད་ལ་བྱེད་པ་དེ་དང་ལྷན་ཅིག་གནས་ནས་འདོད་ཆགས་ཀྱིས་ཀུན་ནས་དཀྲིས་པར་གྱུར་ཏོ། །དེ་བུ་མོ་དེ་དང་ལྷན་ཅིག་ཏུ་ཤིན་དུ་འདྲེས་པར་གནས་ཤིང་

57-1-323a

འདུག་པར་གྱུར་ཏེ། དེ་འདྲེས་ཤིང་དེར་མངོན་པར་དགའ་ནས་ཡང་དང་ཡང་དུ་གནས་པར་གྱུར་ཏོ། །དེ་ནས་དགེ་སློང་དཔས་བྱིན་དེ་བུ་མོ་དང་ལྷན་ཅིག་ཏུ་འདུ་ཞིང་འདུག་འདུག་པ་སྔོན་བུ་མོ་དེ་གང་གིས་བླངས་
པའི་ཁྱིམ་ཐབ་དེས་ཐོས་སོ། །དགེ་སློང་དཔས་བྱིན་དེ་བུ་མོ་དེ་དང་ལྷན་ཅིག་ཏུ་ཡང་དང་ཡང་དུ་འདུག་པ་དང་། དེ་འདི་སྙམ་དུ་སེམས་ཏེ། དགེ་སློང་དཔས་བྱིན་འདི་བདག་གིས་ཐབས་ཀྱིས་བཟུང་སྟེ་གསད་དོ་སྙམ་མོ། །དགེ་
སློང་དཔས་བྱིན་དེས་ཀྱང་བུ་མོ་དེའི་ཁྱིམ་ཐབ་ཀྱིས་བདག་གསད་པར་བྱས་ཤེས་ཐོས་ནས། དེ་འདི་སྙམ་དུ་སེམས་ཏེ། བདག་གིས་བུ་མོ་འདིའི་ལག་ཏུ་གང་གིས་ཚོང་དཔོན་གྱི་བུ་དེ་འཆི་བར་འགྱུར་བའི་དུག་བསྐུར་གོར་
མ་ཆག་སྙམ་མོ། །དེ་ནས་དགེ་སློང་དཔས་བྱིན་དེས་བུ་མོ་དེའི་ལག་ཏུ་དུག་བྱིན་ཏེ། དེ་ལ་འདི་སྐད་ཅེས་སྨྲས་སོ། །གལ་ཏེ་བདག་ཁྱོད་ཀྱི་སྙིང་དུ་སྡུག་ན་ནི་དུག་འདིས་ཁྱིམ་ཐབ་འདི་གསོད་ཅིག །དེ་ནས་བུ་མོ་དེས་དགེ་སློང་
དེ་ལས་དུག་དེ་བླངས་ནས་ཁ་ཟས་དང་སྦྱར་ཏེ་བྲན་མོའི་ལག་ཏུ་བསྐུར་ནས་ཁྱོད་སོང་ལ་ངའི་ཁྱིམ་ཐབ་དེ་ལ་འདི་བྱིན་ཅེས་བྱས་སོ། །དེ་ནས་བྲན་མོ་དེས་དུག་དང་སྦྱར་བའི་ཁ་ཟས་དེ་ཚོང་དཔོན་གྱི་བུ་དེ་ལ་བྱིན་ནོ། །དེ་ནས་
ཚོང་དཔོན་གྱི་བུ་དེས་ཁ་ཟས་དུག་དང་སྦྱར་བ་དེ་ཟོས་ནས་ཤིའོ། །དེ་ནས་དགེ་སློང་དཔས་བྱིན་དེས་ཚོང་དཔོན་གྱི་བུ་དེ་ཤིའོ་ཞེས་ཐོས་སོ། །ཐོས་ནས་ཀྱང་དེ་འགྱོད་པ་ཆེན་པོ་སྐྱེས་ཏེ། བདག་གིས་ནི་འཇིགས་སུ་རུང་བའི་
ལས་བྱས་སོ། །བདག་གིས་ནི་ལས་མི་ཟད་པ་བྱས་ཏེ། འདི་ལྟར་བདག་གིས་འདོད་པ་ཡང་ཡོངས་སུ་སྤྱད་ལ། མི་ཡང་གསོད་དུ་བཅུག་ན། བདག་གི་འགྲོ་བ་ནི་གང་ཡིན། བདག་གི་ཚེ་ཕྱི་མ་ནི་གང་ཡིན་ཞིག་གུ། བདག་
ནི་སེམས་ཅན་དམྱལ་བར་ལྟུང་བར་འགྱུར་རོ་སྙམ་ནས་དེའི་ལུས་ཡོངས་སུ་གདུང་བར་གྱུར་ཏེ། བདག་ནི་ཤི་ནས་གདོན་མི་ཟ་བར་སེམས་ཅན་དམྱལ་བར་འགྲོ་བར་འགྱུར་རོ་སྙམ་ནས། དེ་འདི་སྙམ་དུ་སེམས་ཏེ། བདག་སྡུག་

57-1-323b

བསྔལ་འདི་ལས་ཐར་པར་བྱེད་ནུས་པ་སུ་ཞིག་ཡོད་སྙམ་མོ། །དེ་གཙུག་ལག་ཁང་ནས་གཙུག་ལག་ཁང་དུ་འགྲོ་ཞིང་རྒྱུ་སྟེ། ཤིང་བཅད་པ་བཞིན་དུ་ས་ལ་སྒྱེལ་ནས། ཀྱི་ཧུད་ཀྱི་ཧུད་བདག་ནི་སེམས་ཅན་དམྱལ་བ་པར་གྱུར་
ཏོ་ཞེས་ཚིག་ཏུ་སྨྲའོ། །དེའི་ཚེ་གཙུག་ལག་ཁང་གངས་ཞེས་བྱ་བ་ཞིག་ཡོད་དེ། དེ་གཙུག་ལག་ཁང་དེ་ག་ལ་བར་སོང་སྟེ་ཕྱིན་ནས། གཙུག་ལག་ཁང་གི་སྒོར་སོང་སྟེ། ས་ལ་སྒྱེལ་ནས་ཀྱི་ཧུད་ཀྱི་ཧུད་བདག་ནི་སེམས་ཅན་
དམྱལ་བ་པར་གྱུར་ཏོ་ཞེས་ཚིག་ཏུ་སྨྲའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇིགས་སྒྲོལ་གཙུག་ལག་ཁང་དེའི་ནང་དུ་འགྲོ་བས་དགེ་སློང་དེ་ས་ལ་སྒྱེལ་བ་མཐོང་ནས་དེས་དེ་ལ་སྨྲས་པ། དགེ་སློང་
ཁྱོད་ཅིའི་ཕྱིར་ས་ལ་སྒྱེལ། དེས་དེ་ལ་སྨྲས་པ། བདག་ནི་སེམས་ཅན་དམྱལ་བ་པར་གྱུར་ཏོ། །བདག་གིས་ནི་འཇིགས་སུ་རུང་བའི་ལས་བྱས་ཏེ། བདག་གིས་འཁྲིག་པ་ཡང་བྱས་ལ། མི་ཡང་བསད་དོ། །དེ་ནས་
བྱང་ཆུབ་སེམས་དཔའ་འཇིགས་སྒྲོལ་གྱིས་དགེ་སློང་དཔས་བྱིན་དེ་ལ་སྨྲས་པ། དགེ་སློང་མ་འཇིགས་ཤིག་དང་། ངས་ཁྱོད་འཇིགས་པ་མེད་པར་བྱའོ། །དེ་ནས་དགེ་སློང་དཔས་བྱིན་དེས་འཇིགས་པ་མེད་པའི་སྒྲ་ཐོས་ནས། 
དགའ་ཞིང་མགུ་ལ་ཡི་རངས་པར་གྱུར་ཏོ། །དེ་ནས་བྱང་ཆུབ་སེམས་དཔའ་འཇིགས་སྒྲོལ་གྱིས་དགེ་སློང་དཔས་བྱིན་དེ་ས་ལས་བསླང་ནས་ལག་པ་གཡས་པ་ནས་བཟུང་ནས་ནགས་སྟུག་པོ་ཞིག་གི་ནང་དུ་སོང་ནས། དེ་
ནགས་སྟུག་པོ་དེར་འདུག་གོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇིགས་སྒྲོལ་ཏ་ལའི་སྲིད་ཙམ་གྱི་ནམ་མཁའ་ལ་འདུག་ནས་དགེ་སློང་དེ་ལ་འདི་སྐད་ཅེས་སྨྲས་སོ། །དགེ་སློང་ཁྱོད་ང་ལ་ཡིད་
ཆེས་སམ། དེ་ནས་དགེ་སློང་དེས་ཐལ་མོ་སྦྱར་ནས་ཚིག་ཏུ་སྨྲས་པ། བདག་ནི་བཅོམ་ལྡན་འདས་དང་མཇལ་ཏོ། །བདག་ནི་བདེ་བར་གཤེགས་པ་དང་མཇལ་ཏོ། །དེ་ནས་དེའི་ཚེ་བྱང་ཆུབ་སེམས་དཔའ་སེམས་

57-1-324a

དཔའ་ཆེན་པོ་འཇིགས་སྒྲོལ་སངས་རྒྱས་ཐམས་ཅད་ཀྱི་ཡུལ་ལ་འཇུག་པའི་སྒོ་དེ་བཞིན་གཤེགས་པའི་ཡེ་ཤེས་ཀྱི་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ་དེའི་ལུས་ལས་དེ་བཞིན་
གཤེགས་པའི་སྐུ་གསེར་གྱི་མདོག་ཅན་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་མངའ་བ་དེ་དག་ཕྱུང་ངོ་། །དེ་བཞིན་གཤེགས་པའི་སྐུ་དེ་དག་གིས་ཀྱང་ནགས་སྟུག་པོ་དེ་དག་ཐམས་ཅད་ཁྱབ་པར་གྱུར་ཏེ། དེ་བཞིན་གཤེགས་པ་
པའི་སྐུ་དེ་དག་གིས་གསུང་འཐུན་པར་ཚིགས་སུ་བཅད་པ་དག་གསུངས་སོ། །ཆོས་རྣམས་འདི་དག་གཟུགས་བརྙན་འདྲ་བ་སྟེ། །ཆུ་ནང་ཟླ་བ་སྣང་ལ་མེད་པ་བཞིན། །བྱིས་པའི་སེམས་ནི་རྨོངས་ཤིང་སྐྲག་གྱུར་ནས། །འདོད་
ཆགས་དུག་དང་དེ་བཞིན་ཞེ་སྡང་རྟོག །ཆོས་རྣམས་མཁའ་འདྲ་རྟག་ཏུ་དག་ཅིང་གསལ། །མྱ་ངན་འདས་ཤིང་གནས་མེད་ཞི་བ་ཡིན། །འདི་ན་ཚོར་བ་པོ་དང་བྱེད་པ་མེད། །ཆོས་རྣམས་འདི་དག་ཞི་གསོག་སྙིང་པོ་མེད། །ནང་དུ་བཙལ་
ཀྱང་འདོད་ཆགས་མ་རྙེད་དེ། །ཞེ་སྡང་སུས་ཀྱང་རྙེད་པར་མ་གྱུར་ན། །བྱིས་པའི་སྐྱེ་བོ་དག་ནི་ཆགས་སྙམ་སེམས། །སུ་ཡང་འདི་ན་ཆགས་པར་གྱུར་པ་མེད། །རྨི་ལམ་དུ་ནི་བདག་གི་གཟུགས་མཐོང་སྙམ། །དེ་ལ་ཆགས་ཤིང་
སྡང་ལ་རྨོངས་པར་གྱུར། །མཚོན་ཆ་ཐོགས་ཤིང་གསད་པར་གསོལ་པ་ན། །གསོད་པ་པོ་དང་མཚོན་ཆ་ཅི་ཡང་མེད། །དེ་བཞིན་འདི་ན་བྱིས་པ་འདོད་པ་སྤྱོད། །ཐབ་མོ་དག་ཀྱང་འགྱེད་ཅིང་གསོད་པར་བྱེད། །གཏི་མུག་དབང་གིས་
སྐྲག་ཅིང་རྨོངས་པར་གྱུར། །བདག་ནི་ཆགས་སོ་སྙམ་སྟེ་དགའ་བར་འཛིན། །འཇིག་རྟེན་འདི་དག་ཐམས་ཅད་རྨི་ལམ་བཞིན། །ཆོས་རྣམས་གསོག་སྟེ་སྟོང་ཞིང་སྙིང་པོ་མེད། །སྨིག་རྒྱུ་འདྲ་ཞིང་སྤྲིན་དང་མཚུངས་པ་སྟེ། 
འདོད་ཆགས་མཚན་ཉིད་མེད་ཅིང་གཏི་མུག་ཞི། །ཆོས་རྣམས་འདི་དག་སྒྲ་དང་བརྩིག་པ་བཞིན། །སེམས་ནི་ནང་ན་མེད་ཅིང་ཕྱི་རོལ་མེད། །འདོད་ཆགས་སྲོག་དང་སེམས་ཅན་གསོ་བ་མིན། །ཞེ་སྡང་གང་ཟག་མ་ཡིན་དངོས་པོ་མེད། །

57-1-324b

ཆོས་རྣམས་འདི་དག་རྐྱེན་དང་རྒྱུ་ལས་གྲུབ། །སྒྱུ་དེ་ལ་ནི་རྨོངས་ཤིང་བྱེད་པ་མེད། །ཆུ་ཟླ་འདྲ་བར་བྱས་པ་མ་ཡིན་ཏེ། །ལུས་ཀྱང་མེད་དེ་འདོད་ཆགས་གསོག་ཡིན་ནོ། །སྒྱུ་མས་བསྒྲུབས་པ་ཡིན་ཏེ་སྟོང་པ་ཉིད། །བྱིས་པ་
དངོས་པོར་འཛིན་པས་དཔྱད་ཅིང་བརྟགས། །སྒྱུ་མ་གསོག་སྟེ་མེད་ཅིང་སྟོང་པ་ཡིན། །འདི་ན་འདོད་ཆགས་ཞེ་སྡང་གཏི་མུག་མེད། །ཆོས་འདི་ཐམས་ཅད་མཚན་ཉིད་མེད་པ་སྟེ། །རྩ་བ་མི་དམིགས་གཟོད་ནས་རབ་ཏུ་ཞི། །
མཐའ་མ་གཟུང་མེད་དབེན་ཞིང་སྙིང་པོ་མེད། །འདོད་ཆགས་འོད་གསལ་གཏི་མུག་རབ་ཏུ་ཞི། །འདི་ན་བྱིས་པ་གཟུགས་བརྙན་མཐོང་བ་ན། །འདི་ནི་བདག་ཡིན་སྙམ་དུ་སེམས་པར་བྱེད། །གསོག་དང་གཟུང་དུ་མེད་ལ་ཡོད་མིན་
དང་། །སྙིང་པོ་མེད་པ་དེ་ལ་ལོག་པར་རྟོག །ཆོས་རྣམས་འདི་དག་མིག་ཡོར་འདྲ་བ་སྟེ། །འདོད་ཆགས་གཏི་མུག་ཞེ་སྡང་གཟུང་དུ་མེད། །སྒྱུ་མ་རྨི་ལམ་ཆུ་ཟླ་ལྟ་བུ་སྟེ། །འདི་ལ་སུ་ཡང་ཆགས་ཤིང་སྤོང་བ་མེད། །ཡུལ་
འདི་དག་ནི་དུག་མེད་སྟོང་པ་སྟེ། །དངོས་པོར་དམིགས་པ་ཐམས་ཅད་གཟུང་དུ་མེད། །འདི་དག་བརྟགས་པའི་ཆོས་ཅན་ཡོད་མ་ཡིན། །དངོས་པོ་མི་དམིགས་རྩ་ནས་རབ་ཏུ་ཞི། །སྒྱུ་མ་འདོད་ཆགས་ཞེ་སྡང་གཏི་མུག་མེད། །འདི་
ལ་ནམས་ཀྱང་ཡོད་པར་འགྱུར་མ་ཡིན། །ཆོས་རྣམས་སྒྱུ་མ་འདྲ་ཞིང་རྨི་ལམ་འདྲ། །ཐོག་མ་མི་དམིགས་ཐམས་ཅད་ཡོད་མ་ཡིན། །ཇི་ལྟར་ཆུ་ལ་ཟླ་བ་སྣང་བཞིན་དུ། །དེར་ནི་ནམས་ཀྱང་ཞུགས་པར་གྱུར་པ་མེད། །དེ་བཞིན་
བྱིས་པ་སྡང་ཞིང་ཆགས་གྱུར་ཀྱང་། །འདི་ན་འདོད་ཆགས་མེད་ཅིང་ཞེ་སྡང་མེད། །འདོད་ཆགས་གཟུང་དུ་མེད་ཅིང་ཞེ་སྡང་མེད། །གཏི་མུག་འོད་གསལ་རྐྱེན་རྣམས་སྟོང་པ་སྟེ། །སེམས་ཅན་དམིགས་སུ་མེད་ཅིང་སྲོག་ཀྱང་མེད། །
ཆོས་འདི་གསོག་སྟེ་ཞི་ལ་སྙིང་པོ་མེད། །མིག་ཀྱང་མེད་དེ་རྣ་བ་མེད་པ་ཡིན། །སྣ་ཡང་མི་སྣང་ལྕེ་ཡང་དེ་བཞིན་ཏེ། །འདི་དག་བེམས་པོའི་ཆོས་ཅན་སྙིང་པོ་མེད། །བྱིས་པའི་སྐྱེ་བོ་རྨོངས་བྱེད་མོས་པར་བྱེད། །

57-1-325a

ནམ་མཁའ་ལ་ནི་ཇི་ལྟར་མཐའ་མེད་ཅིང་། །ཟད་པར་མི་འགྱུར་སྐྱེ་བ་མེད་པ་བཞིན། །ཆོས་རྣམས་འདི་དག་ཐམས་ཅད་དེ་བཞིན་ཏེ། །ནམ་མཁའི་ཆུ་ལྟར་དག་ཅིང་རྣམ་པར་དག །ཆོས་རྣམས་རྣམ་པ་
སྣ་ཚོགས་བརྟགས་པ་སྟེ། །བརྟགས་ན་དེ་ཡང་ནམས་ཀྱང་ཡོད་མ་ཡིན། །བྱིས་པ་ཕུང་པོ་འདི་དག་འདྲ་བར་འཛིན། །དེ་ཡང་དེ་ལ་ནམས་ཀྱང་ཡོད་མ་ཡིན། །ཤེས་ལྡན་དངོས་དང་དངོས་མིན་རྣམ་འཇིག་ཅིང་། །ཆོས་ཉིད་
འདི་དག་ཐམས་ཅད་ཞི་བར་མཐོང་། །ཐམས་ཅད་མ་སྐྱེས་གཟུང་དུ་མེད་པར་མཐོང་། །དེ་ཡི་ལུས་ནི་ནམས་ཀྱང་ཡོད་པ་མིན། །ཆོས་རྣམས་འོད་གསལ་གྲོལ་ཞིང་རབ་ཏུ་གྲོལ། །ཞི་ཞིང་མི་གནས་མྱ་ངན་འདས་གྱུར་
ལ། །དེ་ལ་ནམས་ཀྱང་གཟུང་དུ་མེད་པ་སྟེ། །ཤེས་ལྡན་དེ་ལྟར་རྟོགས་ན་གྲོལ་བར་འགྱུར། །དེ་ནས་ནགས་ཁྲོད་དེར་བྱང་ཆུབ་སེམས་དཔའ་འཇིགས་སྒྲོལ་ལས་ཆོས་མཉན་པའི་ཕྱིར་ལྷའི་བུ་བཞི་ཁྲི་ཉིས་སྟོང་ལྷགས་
པར་གྱུར་པ་དེ་དག་གིས་ཚིགས་སུ་བཅད་པ་བསྟན་པ་དེ་དག་ཐོས་ནས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དགེ་སློང་དཔས་བྱིན་དེ་ཡང་ཀུན་ནས་དཀྲིས་པ་དང་བྲལ་བར་གྱུར་ཏེ། དེ་བཞིན་གཤེགས་པའི་
སྤྲུལ་པ་བཀོད་པ་དེ་དག་མཐོང་ནས་བྱང་ཆུབ་ཀྱི་ཚུལ་དང་ལྡན་པའི་སེམས་ཀྱིས་ཆོས་ཀྱི་རང་བཞིན་རབ་ཏུ་རྣམ་པར་འབྱེད་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །འཇམ་དཔལ་ཁྱོད་ཀྱིས་དེའི་ཚེ་དེའི་དུས་ན་
བྱང་ཆུབ་སེམས་དཔའ་འཇིགས་སྒྲོལ་ཞེས་བྱ་བ་དེ་གཞན་ཞིག་ཡིན་པ་སྙམ་ན་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་བྱམས་པ་དེའི་ཚེ་དེའི་དུས་ན་བྱང་ཆུབ་སེམས་དཔའ་འཇིགས་
སྒྲོལ་ཞེས་བྱ་བར་གྱུར་ཏོ། །འཇམ་དཔལ་ཁྱོད་ཀྱིས་དེའི་ཚེ་དེའི་དུས་ན་དགེ་སློང་དཔས་བྱིན་ཞེས་བྱ་བ་དེ་གཞན་ཞིག་ཡིན་པ་སྙམ་ན་དེ་ལྟར་མི་བལྟའོ། དེ་ཅིའི་ཕྱིར་ཞེ་ན། དེ་བཞིན་གཤེགས་པ་རིན་ཆེན་ཟླ་བ་

57-1-325b

བྱང་ཆུབ་ཀྱི་སྤྱད་པ་སྤྱོད་པ་དེ། དེའི་ཚེ་དེའི་དུས་ན་དགེ་སློང་དཔས་བྱིན་ཞེས་བྱ་བར་གྱུར་ཏོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་
དཔས་བྱིན་དེ་བྱང་ཆུབ་ཏུ་མངོན་པར་རྫོགས་པར་སངས་རྒྱས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་མངོན་པར་རྫོགས་པར་སངས་རྒྱས་ཟིན་ཏེ། དེ་ནི་ནུབ་ཕྱོགས་ལོགས་སུ་
སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་འདས་པ་ན། འཇིག་རྟེན་གྱི་ཁམས་འོད་ཟེར་རྟག་པ་ཞེས་བྱ་བ་དེར་དེ་བཞིན་གཤེགས་པ་རིན་ཆེན་ཟླ་བ་ཞེས་བྱ་བར་གྱུར་ཏོ། །འཇམ་དཔལ་
ཆོས་འདི་དག་གི་སྒྲུབ་པ་བྱེད་པ་དག་ཇི་ཙམ་འདོད་པ་དག་ཀྱང་ཡོངས་སུ་ལོངས་སྤྱད་ལ། སྲོག་གི་བར་ཆད་ཀྱང་བྱས་བཞིན་དུ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་པ་ལ་ལྟོས། །དེ་ཅིའི་ཕྱིར་ཞེ་ན། འདི་ལྟར་དེས་ཁམས་
གསུམ་པ་ཐམས་ཅད་ཡང་དག་པ་མ་ཡིན་པར་ཤེས་ཤིང་སེམས་ཅན་ཐམས་ཅད་མིག་ཡོར་དང་འདྲ་བར་ཤེས་པའི་ཕྱིར་རོ། །འཇམ་དཔལ་སྒྱུ་མ་ལྟ་བུའི་སེམས་ལ་གནས་པ་ལ་ནི་ཆོས་གང་ལ་ཡང་སྒྲིབ་པ་མེད་དོ། །
འཇམ་དཔལ་ཡང་བྱིས་པ་སོ་སོའི་སྐྱེ་བོ་རྣམས་ནི་རང་གི་རྟོག་པས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དུ་ལྟུང་བར་འགྱུར་ཏེ། མེད་པའི་ཆོས་རྣམས་ལ་ཡོངས་སུ་བརྟགས་
པས་སྡུག་བསྔལ་འབུམ་ཕྲག་མང་པོ་ཉམས་སུ་མྱོང་བར་འགྱུར་རོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་གང་ཆོས་
ཀྱི་རྣམ་གྲངས་འདི་འཛིན་པ་དང་། འཆང་བ་དང་། ཀུན་ཆུབ་པར་བགྱིད་པ་དང་། བསྟི་སྟང་བགྱིད་པ་དེས་ཚེ་འདི་ཉིད་ལ་ཡོན་ཏན་ཇི་སྙེད་ཅིག་ཐོབ་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་

57-1-326a

ཇི་སྙམ་དུ་སེམས། ཉི་མའི་དཀྱིལ་འཁོར་ཤར་བ་ན་འཛམ་བུའི་གླིང་པའི་མི་རྣམས་ལ་ཡོན་ཏན་གྱི་ཕན་ཡོན་ཇི་ཙམ་དུ་འགྱུར། འཇམ་དཔལ་གྱིས་གསོལ་པ། བཅོམ་ལྡན་འདས་ཡོན་ཏན་གྱི་ཕན་ཡོན་དཔག་
ཏུ་མ་མཆིས་ཤིང་སྣང་བ་ཚད་མ་མཆིས་པར་འགྱུར་ཏེ། དེས་ནི་མི་རྣམས་སུག་ལས་བགྱིད་པར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་དུ་ཆོས་ཀྱི་རྣམ་གྲངས་འདིས་ནི་བྱང་ཆུབ་
སེམས་དཔའ་དེའི་ཉོན་མོངས་པ་ཐམས་ཅད་བསལ་ནས། ཤེས་རབ་ཀྱི་སྣང་བ་ཚད་མེད་པ་སྐྱེད་པར་བྱེད་དོ། །ཆོས་ཐམས་ཅད་ལ་ཡང་སྒྲིབ་པ་མེད་པ་ཐོབ་པར་འགྱུར་རོ། །ཡོངས་སུ་གདུང་བ་དང་བྲལ་ཞིང་ཀུན་ནས་དཀྲིས་པ་
ཡང་མེད་པར་འགྱུར་རོ། །དེ་ལ་ཆགས་པ་མེད་པའི་སྤོབས་པ་ཡང་མྱུར་དུ་མངོན་སུམ་དུ་འགྱུར་རོ། །བདུད་དང་ཕྱིར་རྒོལ་བ་ཐམས་ཅད་ཀྱིས་ཀྱང་མི་རྫི་བར་འགྱུར་རོ། །ཆོས་ཀྱང་སྟོན་ཏེ། སྤོབས་པ་མཐར་ཐུག་པ་མེད་
པས་སྟོན་པར་འགྱུར་རོ། །འཇམ་དཔལ་འདི་ལྟ་སྟེ་དཔེར་ན་མེ་བྱུང་ན་རྩྭ་དང་ཤིང་ཐམས་ཅད་སྲེག་པར་བྱེད་དོ། །འཇམ་དཔལ་དེ་བཞིན་དུ་ཆོས་ཀྱི་རྣམ་གྲངས་འདིས་ཡང་ཉོན་མོངས་པ་ཐམས་ཅད་སྲེག་པར་བྱེད་དོ། །འཇམ་དཔལ་
འདི་ལྟ་སྟེ་དཔེར་ན། རིའི་རྒྱལ་པོ་གངས་ཀྱིས་རི་ནག་པོ་ཐམས་ཅད་ཟིལ་གྱིས་གནོན་ཏོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་ཆོས་ཀྱི་རྣམ་གྲངས་འདི་ལ་མཁས་པས་ནི་ཕ་རོལ་རྒོལ་བ་ཐམས་ཅད་ཆོས་དང་ལྡན་
པས་ཚར་བཅད་ནས་ཟིལ་གྱིས་གནོན་པར་བྱེད་དོ། །འཇམ་དཔལ་འདི་ལྟ་སྟེ་དཔེར་ན། འཁོར་ལོས་སྒྱུར་བའི་རྒྱལ་པོས་ནི་ཁམས་ཀྱི་རྒྱལ་པོ་རྣམས་ཟིལ་གྱིས་གནོན་ཏོ། །འཇམ་དཔལ་དེ་བཞིན་དུ་བྱང་ཆུབ་སེམས་
དཔའ་ཆོས་ཀྱི་རྣམ་གྲངས་འདི་ལ་གནས་པས་ནི་གང་ཟག་ཚིག་དང་ཡི་གེའི་འབྲུ་སྣ་ཚོགས་ཐམས་ཅད་ལ་མཁས་པ་རྣམས་ཟིལ་གྱིས་གནོན་ཏོ། །འཇམ་དཔལ་འདི་ལྟ་སྟེ་དཔེར་ན། དགེ་སློང་འདུལ་བ་འཛིན་པ་ནི་

57-1-326b

ལྟུང་བ་ཐམས་ཅད་འདུལ་བ་ལ་མཁས་པ་ཡིན་ནོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་ཆོས་ཀྱི་རྣམ་གྲངས་འདི་ལ་མཁས་པ་ནི་ཕྱོགས་བཅུའི་སེམས་ཅན་ཐམས་ཅད་ཀྱི་འགྱོད་པ་སེལ་བར་བྱེད་དོ། །
འཇམ་དཔལ་འདི་ལྟ་སྟེ་དཔེར་ན། ཉི་མའི་དཀྱིལ་འཁོར་ཤར་ན་མུན་པ་མུན་ནག་ཐམས་ཅད་མེད་པར་འགྱུར་རོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་ཆོས་ཀྱི་རྣམ་གྲངས་འདི་ལ་མཁས་པ་ནི་སེམས་ཅན་
ཐམས་ཅད་ཀྱི་ཉོན་མོངས་པ་སེལ་བར་བྱེད་དེ་ཡེ་ཤེས་ཀྱི་སྣང་བ་ཡང་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། འཇམ་དཔལ་ཆོས་ཀྱི་རྣམ་གྲངས་འདི་ལ་སློབ་པ་གང་ཡིན་པ་དེ་ནི་ལྷག་པའི་ཤེས་རབ་ལ་སློབ་པ་ཡིན་པའི་
ཕྱིར་རོ། །དེ་ནས་བདུད་སྡིག་ཅན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཁྱོད་ནི་ཐུགས་རྗེ་དང་ལྡན་པ་ལགས་ཏེ། སེམས་ཅན་ཐམས་
ཅད་ལ་སྨན་པ་དང་། ཐུགས་བརྩེ་བ་ཅན་ལགས་ན། བཅོམ་ལྡན་འདས་བདུད་ཀྱི་གནས་ཐམས་ཅད་རབ་ཏུ་གཡོས་ཏེ། བདག་ཀྱང་མྱ་ངན་གྱི་ཟུག་རྔུས་ཟུག་ལགས་ཀྱིས། བཅོམ་ལྡན་འདས་ཡང་ཆོས་ཀྱི་རྣམ་གྲངས་
འདི་མི་བཤད་པར་གསོལ། བཅོམ་ལྡན་འདས་བདག་གིས་ཀྱང་ཆོས་ཀྱི་རྣམ་གྲངས་འདི་ཅི་ནས་འཛམ་བུའི་གླིང་དུ་སྤྱོད་པར་མི་འགྱུར་བ་དེ་ལྟར་བགྱིའོ། །ཅི་ནས་ཆོས་ཀྱི་རྣམ་གྲངས་འདི་སུ་ཡང་འཛིན་པར་མི་འགྱུར། 
འཆང་བར་མི་འགྱུར། ཀུན་ཆུབ་པར་བགྱིད་པར་མི་འགྱུར་བ་དེ་ལྟ་བུར་ཡང་བགྱིའོ། །ཅི་ནས་ཆོས་ཀྱི་རྣམ་གྲངས་འདི་ལ་ལམ་ངན་པར་འདུ་ཤེས་པར་འགྱུར་བར་ཡང་བགྱིའོ། །དེ་དག་ཤིན་དུ་རྒྱས་པའི་མདོ་སྡེ་དག་ལ་
ལོག་པར་ལྟ་བའི་འདུ་ཤེས་སུ་འགྱུར་བར་ཡང་བགྱིའོ། །དགེ་སློང་དེ་དག་ཅི་ནས་ཆོས་ཀྱི་རྣམ་གྲངས་འདི་སྤོང་བར་འགྱུར་བའི་ཀུན་ནས་དཀྲིས་པ་འགའ་འབྱུང་བར་ཡང་བགྱིའོ། །དེ་ནས་སངས་རྒྱས་ཀྱི་མཐུས་ལྷའི་

57-1-327a

དབང་པོ་བརྒྱ་བྱིན་བཅོམ་ལྡན་འདས་ཀྱི་སྤྱན་སྔར་འདུག་ནས། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་མེ་ཏོག་མན་དཱ་ར་བ་དག་གིས་གཏོར་ནས། བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་བདུད་སྡིག་ཅན་ཆོས་ཀྱི་རྣམ་གྲངས་འདི་ནུབ་པར་བགྱིད་པའི་སླད་དུ་རྩོལ་བར་གྱུར་ན། བཅོམ་ལྡན་འདས་བདག་གིས་ཆོས་ཀྱི་རྣམ་གྲངས་འདི་གཟུང་བར་བགྱི། 
བཅང་བར་བགྱི། ཀུན་ཆུབ་པར་བགྱིའོ། །བཅོམ་ལྡན་འདས་དང་བཙུན་པ་ཀུན་དགའ་པོ་ཡོངས་སུ་མྱ་ངན་ལས་འདས་པའི་འོག་ཏུ་ཡང་བདག་གིས་ཆོས་ཀྱི་རྣམ་གྲངས་འདི་འཛམ་བུའི་གླིང་དུ་སྤྱོད་པར་འགྱུར་བར་བགྱིའོ། །ཆོས་སྨྲ་
བ་དེ་ལ་ཡང་རྒྱལ་པོ་ཆེན་པོ་བཞི་གནོད་སྦྱིན་གྱི་ཚོགས་ཀྱི་འཁོར་དང་བཅས་པ་རྣམས་བསྲུང་བ་དང་། བསྐྱབ་པ་དང་། སྦ་བར་བགྱིད་དུ་སྩལ་བར་འཚལ་ཏེ། ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། ཀློག་པ་དང་། 
ཀུན་ཆུབ་པར་བགྱིད་པ་གང་ལགས་པ་དེ་ལ་བདག་གིས་ཀྱང་བསྲུང་བ་དང་། བསྐྱབ་པ་དང་། སྦ་བར་འཚལ་ལོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཆོས་ཀྱི་
རྣམ་གྲངས་འདི་ཟུང་ཤིག །ཆོངས་ཤིག །ལྷོགས་ཤིག །ཀུན་ཆུབ་པར་གྱིས་ཤིག །གཞན་དག་ལ་ཡང་རྒྱ་ཆེར་སྟོན་ཅིག །དེ་ཅིའི་ཕྱིར་ཞེ་ན། ཀུན་དགའ་བོ་འདི་ནི་ཆོས་ཐམས་ཅད་ཀྱི་ཆོས་ཀྱི་མེ་ལོང་ཡིན་པའི་ཕྱིར་རོ། །
གསོལ་པ། བཅོམ་ལྡན་འདས་དེ་བཞིན་གཤེགས་པས་ཇི་སྐད་བཀའ་སྩལ་པ་དེ་བཞིན་དུ་ཆོས་ཀྱི་རྣམ་གྲངས་འདི་བདག་གིས་གཟུང་ལགས་ན། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་
གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་ལས་ཀྱི་སྒྲིབ་པ་རྣམ་པ་དག་པ་ཞེས་བྱ་བར་ཟུང་ཤིག །སྒྲིབ་པ་མེད་པའི་ཡེ་ཤེས་ལ་འཇུག་པ་ཞེས་བྱ་

57-1-327b

བར་ཟུང་ཤིག །ཆོས་ཀྱི་རྣམ་གྲངས་འདི་བཤད་པ་ན་དགེ་སློང་དྲུག་ཅུས་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའ་བརྒྱད་བཅུས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །
བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། འཇམ་དཔལ་གཞོན་ནུར་གྱུར་པ་དང་། ཚེ་དང་ལྡན་པ་ཀུན་དགའ་བོ་དང་། དགེ་སློང་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། 
བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ལས་ཀྱི་སྒྲིབ་པ་རྣམ་པར་དག་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། རྒྱ་གར་གྱི་མཁན་པོ་ཛི་ན་མི་ཏྲ་དང་། པྲ་ཛྙཱ་བར་མ་དང་། ཞུ་ཆེན་གྱི་ལོ་
ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ། ། ༄༅། །རྒྱ་གར་སྐད་དུ། ཨརྱ་ཀརྨ་ཨཱ་བ་ར་ན་པྲ་ཏི་པྲ་སྲ་བི་དི་ནཱ་མ་མ་ཧཱ་ཡཱ་ན་སཱུ་ཏྲ།  བོད་སྐད་དུ།  འཕགས་པ་ལས་ཀྱི་སྒྲིབ་པ་རྒྱུན་
གཅོད་པ་ཞེས་བྱ་བ་ཐེག་པ་ཆེན་པོའི་མདོ།  སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་
ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་བདུན་ཁྲི་དང་ཐབས་གཅིག་ཏུ་བཞུགས་ཏེ། དེ་ནས་སངས་རྒྱས་ཀྱི་མཐུས་ཚེ་དང་ལྡན་
པ་ཤཱ་རིའི་བུ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་
ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་འམ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་འམ། ཐེག་པ་ཆེན་པོ་ལ་ཡང་

57-1-328a

དག་པར་ཞུགས་པ་འམ། སེམས་ཅན་གཞན་དག་ཀྱང་རུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བས་ལས་ཀྱི་སྒྲིབ་པ་རྣམས་ཇི་ལྟར་
སོ་སོར་བཤགས་པར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་འདི་ལ་རིགས་ཀྱི་བུ་འམ། རིགས་ཀྱི་བུ་མོ་ཉན་ཐོས་ཀྱི་ཐེག་པ་ལ་ཡང་
དག་པར་ཞུགས་པ་འམ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་འམ། ཐེག་པ་ཆེན་པོ་ལ་ཡང་དག་པར་ཞུགས་པ་འམ། སེམས་ཅན་གཞན་དག་ཀྱང་རུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་
ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཉིན་ལན་གསུམ་མཚན་ལན་གསུམ་དུ་བླ་གོས་ཕྲག་པ་གཅིག་ཏུ་གཟར་ལ་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་བ་བཏུད་ནས་ཚིག་འདི་སྐད་དུ་སྐྱེ་
བོ་མང་པོ་ལ་སྨན་པ་དང་། སྐྱེ་བོ་མང་པོ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་། མི་རྣམས་ཀྱི་དོན་དང་། སྨན་པ་དང་། བདེ་བའི་སླད་དུ་སངས་རྒྱས་བཅོམ་ལྡན་འདས་གང་དག་ད་ལྟར་
ཕྱོགས་བཅུའི་འཇིག་རྟེན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རབ་ཏུ་སྐོར་བ། ཆོས་ཀྱི་འཁོར་ལོ་སྟོན་པ། ཆོས་ཀྱི་ཚུལ་རབ་ཏུ་འཛིན་པ། ཆོས་ཀྱི་
སྦྱིན་པ་མཛད་པ། ཆོས་ཀྱི་སྒྲོན་མ་འབར་བར་མཛད་པ། ཆོས་ཀྱི་ཆར་རབ་ཏུ་འབེབས་པ། ཆོས་ཀྱི་རྔ་རབ་ཏུ་རྡུང་བ། ཆོས་ཀྱི་རྔ་བོ་ཆེ་རབ་ཏུ་རྡུང་བ། ཆོས་ཀྱི་དུང་རབ་ཏུ་འབུད་པ། ཆོས་ཀྱི་སྲོག་ཤིང་སྒྲེང་བ། སེམས་ཅན་
ཐམས་ཅད་ལ་ཆོས་ཀྱི་སྦྱིན་པས་ཚིམ་པར་མཛད་པ། ཉམ་བག་ཏུ་སྤྱོད་དུ་འཛུད་པའི་སངས་རྒྱས་བཅོམ་ལྡན་འདས་དེ་དག་ལ་ཕྱག་འཚལ་ལོ། །སངས་རྒྱས་བཅོམ་ལྡན་འདས་མཆོད་པའི་གནས། ཕྱག་བགྱི་བའི་གནས། 

57-1-328b

རི་མོ་བགྱི་བའི་གནས། མཁྱེན་པར་གྱུར་པ། སྤྱན་དུ་གྱུར་པ། དཔང་དུ་གྱུར་པ། ཚད་མར་གྱུར་པ། མཁྱེན་པ་དང་ལྡན་པ། གཟིགས་པ་དང་ལྡན་པ། དེ་དག་ལ་བདག་ལུས་དང་། ངག་དང་། ཡིད་ཀྱིས་ཕྱག་འཚལ་ལོ། །ཐོག་མ་
དང་། ཐ་མ་མ་མཆིས་པའི་འཁོར་བ་ན་འཁོར་བའི་ཚེ། བདག་འདོད་ཆགས་ཀྱིས་གཟིར་བ་འམ། ཞེ་སྡང་གིས་གཟིར་བ་འམ། གཏི་མུག་གིས་གཟིར་བ་འམ། ལུས་དང་ངག་དང་། ཡིད་ཀྱི་ལས་ཀྱི་སྒྲིབ་པ་གང་མངོན་པར་
འདུས་བགྱིས་པ། སངས་རྒྱས་སུ་མ་འཚལ་བ་དང་། ཆོས་སུ་མ་འཚལ་བ་དང་། དགེ་འདུན་དུ་མ་འཚལ་བ་དང་། དགེ་བ་དང་། མི་དགེ་བར་མ་འཚལ་བ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། 
ཆོས་སྤངས་པ་དང་། དགེ་འདུན་གྱི་དབྱེན་བགྱིས་པ་དང་། དགེ་སློང་དགྲ་བཅོམ་པ་བཀུམ་པ་དང་། ཕ་མ་བཀུམ་པ་དང་། ལུས་ཀྱི་ལས་རྣམ་གསུམ། ངག་གི་རྣམ་བཞི། ཡིད་ཀྱི་རྣམ་གསུམ་སྟེ། མི་དགེ་བ་བཅུའི་ལས་
ཀྱི་ལམ་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བ་དང་། སེམས་ཅན་ཁ་ཅིག་ལ་ངག་རྩུབ་པོ་སྨྲས་པ་དང་། སྐུར་པ་བཏབ་པ་དང་། སྲང་ལ་གཡོ་བགྱིས་པ་དང་། གཞལ་བ་ལ་གཡོ་བགྱིས་
པ་དང་། འགྲོ་བ་དྲུག་ཏུ་འཁོར་བར་འཁོར་བ་ན་ཕ་མ་མི་དགའ་བར་བགྱིས་པ་དང་། གང་ཟག་གི་འམ། མཆོད་རྟེན་གྱི་འམ། དགེ་འདུན་གྱི་འམ། ཕྱོགས་བཞིའི་དགེ་སློང་གི་དགེ་འདུན་གྱི་ནོར་བརྐུས་པ་དང་། ཅི་ལྟར་
བསླབ་པའི་གཞི་བཅས་པ་རྣམས་ཀྱི་འདུལ་བ་དང་། འགལ་བར་བགྱིས་པ་དང་། མཁན་པོ་དང་། སློབ་དཔོན་གྱིས་བསྒོ་བ་མ་མཉན་པ་དང་། ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་འམ། རང་སངས་རྒྱས་
ཀྱི་ཐེག་པ་ལ་ཡང་དག་པར་ཞུགས་པ་འམ། ཐེག་པ་ཆེན་པོ་ལ་ཡང་དག་པར་ཞུགས་པ་འམ། དེ་ལས་གཞན་པའི་སེམས་ཅན་རྣམས་ལ་མི་སྙན་པར་བགྱིས་པ་དང་། སྤྱོས་པ་དང་། བརྡེགས་པ་དང་། དེ་དག་ལ་

57-1-329a

ཐ་བ་དང་། ཞེ་སྡང་བསྐྱེད་པ་དང་། ཕྲག་དོག་དང་། སེར་སྣ་ལས་བྱུང་བའི་སེམས་ཀྱིས་སངས་རྒྱས་བཅོམ་ལྡན་འདས་རྣམས་ལ་ཚིག་རྩུབ་པོ་སྨྲས་པ་དང་། ཆོས་ལ་ཆོས་མ་ལགས་ཤེས་བགྱིས་པ་
དང་། ཆོས་མ་ལགས་པ་ལ་ཆོས་ལགས་ཤེས་བགྱིས་པ་དེ་དག་སངས་རྒྱས་བཅོམ་ལྡན་འདས་མཁྱེན་པར་གྱུར་པ། སྤྱན་དུ་གྱུར་པ། དཔང་དུ་གྱུར་པ། ཚད་མར་གྱུར་པ། མཁྱེན་པ་དང་ལྡན་པ། གཟིགས་པ་དང་ལྡན་པ་དེ་དག་
གི་སྤྱན་སྔར་སོ་སོར་འཆགས་སོ། །མཐོལ་ལོ། །མི་འཆབ་པོ། །སླན་ཆད་ཀྱང་མི་བགྱིད་དོ། །བདག་ལས་ཀྱི་སྒྲིབ་པ་གང་གིས་བསྒྲིབས་ཏེ། སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་ཀྱི་ཡུལ་དང་། 
ལྷ་མ་ཡིན་གྱི་ཚོགས་ཀྱི་ནང་དུ་མཆི་བར་འགྱུར་བ་དང་། སངས་རྒྱས་དང་། ཆོས་དང་། དགེ་འདུན་མཉེས་པར་བགྱིད་པར་མི་འགྱུར་བ་དང་། མི་ཁོམ་པ་རྣམས་སུ་སྐྱེ་བར་འགྱུར་བའི་ལས་དེ་ལུས་འདི་ཉིད་ལ་རྣམ་པར་སྨིན་ཏེ་
གཞན་དུ་མི་མྱོང་བར་ཤོག་ཤིག །དེ་ཡང་སངས་རྒྱས་བཅོམ་ལྡན་འདས་མཁྱེན་པར་གྱུར་པ། སྤྱན་དུ་གྱུར་པ། དཔང་དུ་གྱུར་པ། ཚད་མར་གྱུར་པ། མཁྱེན་པ་དང་ལྡན་པ། གཟིགས་པ་དང་ལྡན་པ་དེ་དག་གི་སྤྱན་སྔར་སོ་སོར་འཆགས་
སོ། །མཐོལ་ལོ། །མི་འཆབ་བོ། །སླན་ཆད་ཀྱང་མི་བགྱིད་དོ། །ཇི་ལྟར་སྔོན་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་སྔོན་བྱང་ཆུབ་ཀྱི་ཕྱིར་སྤྱོད་པ་ན་ལས་ཀྱི་སྒྲིབ་པ་རྣམས་སོ་སོར་བཤགས་པ་དང་། མ་
བཅབས་པ་དེ་བཞིན་དུ་བདག་ཀྱང་ལས་ཀྱི་སྒྲིབ་པ་རྣམས་སོ་སོར་འཆགས་སོ། །མཐོལ་ལོ། །མི་འཆབ་བོ། །སླན་ཆད་ཀྱང་མི་བགྱིད་དོ། །ཇི་ལྟར་མ་འོངས་པའི་དུས་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་
དག་བྱང་ཆུབ་སེམས་དཔའི་སྤྱད་པ་སྤྱོད་པ་ན་ལས་ཀྱི་སྒྲིབ་པ་རྣམས་སོ་སོར་འཆགས་པར་འགྱུར་བ་དང་། མི་འཆབ་པར་འགྱུར་བ་དེ་བཞིན་དུ་བདག་ཀྱང་ལས་ཀྱི་སྒྲིབ་པ་རྣམས་སོ་སོར་འཆགས་སོ། །མཐོལ་ལོ། །མི་

57-1-329b

འཆབ་པོ། །སླན་ཆད་མི་བགྱིད་དོ། །ཇི་ལྟར་ད་ལྟར་ཕྱོགས་བཅུའི་འཇིག་རྟེན་ན་བྱང་ཆུབ་སེམས་དཔའ་སེམས་དཔའ་ཆེན་པོ་དག་བྱང་ཆུབ་ཀྱི་ཕྱིར་སྤྱོད་པ་ན་ལས་ཀྱི་སྒྲིབ་པ་རྣམས་སོ་སོར་འཆགས་པ་དང་། མི་འཆབ་པ་དེ་
བཞིན་དུ་བདག་ཀྱང་ལས་ཀྱི་སྒྲིབ་པ་རྣམས་སོ་སོར་འཆགས་སོ། །མཐོལ་ལོ། །མི་འཆབ་པོ། །སླན་ཆད་མི་བགྱིད་དོ། །ཇི་ལྟར་འདས་པ་དང་། མ་འོངས་པ་དང་། ད་ལྟར་བྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་
དག་བྱང་ཆུབ་སེམས་དཔའི་སྤྱད་པ་སྤྱོད་པ་ན་ལས་ཀྱི་སྒྲིབ་པ་རྣམས་སོ་སོར་བཤགས་པ་དང་། སོ་སོར་འཆགས་པ་དང་། སོ་སོར་འཆགས་པར་འགྱུར་བ་དེ་བཞིན་དུ་བདག་ཀྱང་ལས་ཀྱི་སྒྲིབ་པ་རྣམས་སོ་སོར་འཆགས་སོ། །
མཐོལ་ལོ། །མི་འཆབ་པོ། །སླན་ཆད་མི་བགྱིད་དོ་ཞེས་བརྗོད་པར་བྱའོ། །ཤཱ་རིའི་བུ་དེ་ལྟ་བས་ན་རིགས་ཀྱི་བུ་འམ། རིགས་ཀྱི་བུ་མོ་ཆོས་ཐམས་ཅད་ལ་སྒྲིབ་པ་མེད་པ་རྣམ་པར་དག་པ་ཐོབ་པར་འདོད་པས་འདི་བཞིན་དུ་ལས་
ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཅད་ཀྱང་མི་བྱའོ། །སུ་རྒྱལ་རིགས་ཀྱི་རིགས་ཤིང་སཱ་ལ་ཆེན་པོ་ལྟ་བུ་ཕྱུག་པ། ནོར་ཆེ་བ། ལོངས་སྤྱོད་ཆེ་བ། ས་ལེ་སྦྲམ་དང་། ནོར་དང་། ཡོ་བྱད་མང་བ། 
ཤིན་དུ་སྐྱིད་པ། བཞོན་པ་ཆེན་པོ་ལ་ཞོན་པ་རྣམས་ཀྱི་ནང་དུ་སྐྱེ་བར་འདོད་པ་དེས་ཀྱང་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཅད་ཀྱང་མི་བྱའོ། །སུ་བྲམ་ཟེའི་རིགས་ཤིང་
སཱ་ལ་ཆེན་པོ་ལྟ་བུ་རྣམས་དང་། ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུ་ཕྱུག་པ། ནོར་ཆེ་བ་ལོངས་སྤྱོད་ཆེ་བ། ས་ལེ་སྦྲམ་དང་། ནོར་དང་། ཡོ་བྱད་མང་བ། ཤིན་དུ་སྐྱིད་པ། བཞོན་པ་ཆེན་པོ་ལ་ཞོན་པ་རྣམས་ཀྱི་ནང་དུ་སྐྱེ་
བར་འདོད་པ་དེས་ཀྱང་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཅད་ཀྱང་མི་བྱའོ། །སུ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་བརྟུལ་ཞུགས་དང་མཚུངས་པར་སྐྱེ་བར་

57-1-330a

འདོད་པ་དེས་ཀྱང་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཅད་ཀྱང་མི་བྱའོ། །སུ་སུམ་བཅུ་རྩ་གསུམ་པའི་ལྷ་རྣམས་ཀྱི་བརྟུལ་ཞུགས་དང་མཚུངས་
པར་སྐྱེ་བར་འདོད་པ་དེས་ཀྱང་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཅད་ཀྱང་མི་བྱའོ། །དེ་བཞིན་དུ་སུ་འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་
བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་འཁོར་དང་། ཚངས་ཆེན་དང་། འོད་ཆུང་དང་། ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་
ནམས་སྐྱེས་དང་། འབྲས་བུ་ཆེ་དང་། སེམས་ཅན་འདུ་ཤེས་མེད་པ་དང་། གྱ་ནོམ་སྣང་བ་དང་། ཤིན་དུ་མཐོང་བ་དང་། མི་ཆེ་བ་དང་། མི་གདུང་བ་དང་། འོག་མིན་གྱི་ལྷ་རྣམས་ཀྱི་བརྟུལ་ཞུགས་དང་མཚུངས་པར་སྐྱེ་
བར་འདོད་པ་དེས་ཀྱང་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཅད་ཀྱང་མི་བྱའོ། །སུ་གཟུགས་མེད་པ་ནམ་མཁའ་མཐའ་ཡས་སྐྱེ་མཆེད་དུ་ཉེ་བར་འགྲོ་བ་རྣམས་དང་། 
རྣམ་ཤེས་མཐའ་ཡས་སྐྱེ་མཆེད་དུ་ཉེ་བར་འགྲོ་བ་རྣམས་དང་། ཅི་ཡང་མེད་པའི་སྐྱེ་མཆེད་དུ་ཉེ་བར་འགྲོ་བ་རྣམས་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་ཀྱི་བརྟུལ་ཞུགས་དང་མཚུངས་པར་
སྐྱེ་བར་འདོད་པ་དེས་ཀྱང་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཅད་ཀྱང་མི་བྱའོ། །སུ་རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་
མི་འོང་བའི་འབྲས་བུ་དང་། དགྲ་བཅོམ་པ་ཉིད་མངོན་སུམ་དུ་བྱེད་པར་འདོད་པ་དེས་ཀྱང་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཅད་ཀྱང་མི་བྱའོ། །སུ་རིག་པ་གསུམ་

57-1-330b

འམ། མངོན་པར་ཤེས་པ་དྲུག་གམ། སྟོབས་རྣམས་སམ། དབང་པོ་རྣམས་སམ། ཉན་ཐོས་ཀྱི་ཕ་རོལ་དུ་ཕྱིན་པ་འམ། ཉན་ཐོས་དབང་ཆེ་བར་གྲགས་པ་འམ། རང་བྱང་ཆུབ་མངོན་སུམ་དུ་བྱེད་པར་འདོད་པ་དེས་
ཀྱང་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་པར་བྱའོ། །ཕྱིན་ཅད་ཀྱང་མི་བྱའོ། །སུ་ཐམས་ཅད་མཁྱེན་པའི་ཡེ་ཤེས་དང་། རྣམ་པར་དག་པའི་ཡེ་ཤེས་དང་། བསམ་གྱིས་མི་ཁྱབ་པའི་
ཡེ་ཤེས་དང་། མཚུངས་པ་མེད་པའི་ཡེ་ཤེས་དང་། ཡང་དག་པར་རྫོགས་པའི་སངས་རྒྱས་ཀྱི་ཡེ་ཤེས་མངོན་པར་བསྒྲུབ་པར་འདོད་པ་དེས་ཀྱང་འདི་བཞིན་དུ་ལས་ཀྱི་སྒྲིབ་པ་རྣམས་སོ་སོར་བཤགས་པར་བྱའོ། །མི་བཅབ་
པར་བྱའོ། །ཕྱིན་ཅད་ཀྱང་མི་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ་དེ་བཞིན་གཤེགས་པས་ཆོས་ཐམས་ཅད་ནི་རྟེན་ཅིང་འབྲེལ་པར་འབྱུང་བའོ་ཞེས་གསུངས་པའི་ཕྱིར་ཏེ། རྒྱུ་དང་རྐྱེན་གཞན་དང་གཞན་གྱིས་གཞན་སྐྱེའོ། །
གཞན་འགག་གོ། །དེ་ལ་འདས་པའི་ཆོས་གང་ཡིན་པ་དེ་དག་ནི་འགགས་པ། ཟད་པ་བྲལ་བ་རྣམ་པར་གྱུར་པ་སྟེ། དེ་དག་ལ་ཡང་ལས་ཀྱི་སྒྲིབ་པ་ཆུང་ཟད་ཀྱང་མེད་དོ། །དེ་ལྟར་ན་འདུ་བྱེད་པ་གང་ཡིན་པ་རྣམས་ཀྱང་
མེད་པ་ལས་བྱུང་བ་སྟེ། དེ་དག་ལ་ཡང་ལས་ཀྱི་སྒྲིབ་པ་ཅུང་ཟད་ཀྱང་མེད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ་དེ་བཞིན་གཤེགས་པས་ཆོས་ཐམས་ཅད་ནི་སྟོང་པ། སེམས་ཅན་མེད་པ། སྲོག་མེད་པ། གང་ཟག་མེད་པ། མ་
སྐྱེས་པ། མ་འགགས་པ། འདུས་མ་བྱས་པ་ཞེས་གསུངས་པའི་ཕྱིར་རོ། །ཤཱ་རིའི་བུ་ཆོས་ཐམས་ཅད་བདག་ལས་བྱུང་ཡང་བདག་ཀྱང་ཡོད་པ་མ་ཡིན་ནོ། །ཤཱ་རིའི་བུ་རིགས་ཀྱི་བུ་འམ། རིགས་ཀྱི་བུ་མོ་གང་
ལ་ལ་ཞིག་འདི་ལྟ་སྟེ། སེམས་ཅན་མེད་པའི་མཐའི་ཆོས་ཀྱི་ཚུལ་འདི་ལ་འཇུག་པ་འདི་ནི་ལས་ཀྱི་སྒྲིབ་པ་རྒྱུན་གཅོད་པ་ཞེས་བྱ་སྟེ། ཤཱ་རིའི་བུ་འདི་ནི་སོ་སོར་བཤགས་པའོ། །དེ་ནས་བཅོམ་ལྡན་འདས་ལ་ཚེ་དང་

57-1-331a

ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་འམ། རང་སངས་རྒྱས་ཀྱི་ཐེག་པ་ལ་ཡང་དག་པར་
ཞུགས་པ་འམ། ཐེག་པ་ཆེན་པོ་ལ་ཡང་དག་པར་ཞུགས་པ་འམ། སེམས་ཅན་གཞན་དག་ཀྱང་རུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བས་ཇི་ལྟར་དགེ་བའི་
རྩ་བ་རྣམས་ལ་རྗེས་སུ་ཡི་རང་བར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་འདི་ལ་རིགས་ཀྱི་བུ་འམ། རིགས་ཀྱི་བུ་མོས་ཉིན་ལན་
གསུམ་མཚན་ལན་གསུམ་དུ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་ཚིག་འདི་སྐད་དུ་ཕྱོགས་བཅུའི་འཇིག་རྟེན་ན་སེམས་ཅན་གང་སུ་དག་སྦྱིན་པ་ལས་བྱུང་
བའི་བསོད་ནམས་བགྱི་བའི་དངོས་པོ་དང་། ཚུལ་ཁྲིམས་ལས་བྱུང་བ་དང་། བསྒོམ་པ་ལས་བྱུང་བའི་བསོད་ནམས་བགྱི་བའི་དངོས་པོ་མངོན་པར་འདུས་བགྱིས་པ་དེ་དག་ཐམས་ཅད་ལ་ཡང་རྗེས་སུ་ཡི་རང་བའི་མཆོག་གིས་
རྗེས་སུ་ཡི་རང་ངོ་། །རྗེས་སུ་ཡི་རང་བ་དམ་པ་དང་། གཙོ་བོ་དང་། ཁྱད་པར་ཅན་དང་། རབ་དང་། ཕུལ་དང་། གྱ་ནོམ་པ་དང་། བླ་མ་དང་། བླ་ན་མེད་པ་དང་། ལྟག་ན་མེད་པ་དང་། མཉམ་པ་མེད་པ་དང་། མི་མཉམ་པ་དང་མཉམ་པས་
རྗེས་སུ་ཡི་རང་ངོ་། །ཕྱོགས་བཅུའི་འཇིག་རྟེན་ན་སེམས་ཅན་གང་སུ་དག་སྦྱིན་པ་ལས་བྱུང་བའི་བསོད་ནམས་བགྱི་བའི་དངོས་པོ་དང་། ཚུལ་ཁྲིམས་ལས་བྱུང་བ་དང་། བསྒོམ་པ་ལས་བྱུང་བའི་བསོད་ནམས་བགྱི་བའི་
དངོས་པོ་མངོན་པར་འདུ་བགྱིད་པར་འགྱུར་བ་དེ་དག་ཐམས་ཅད་ལ་ཡང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་བ་ནས་རྗེས་སུ་ཡི་རང་བ་མི་མཉམ་པ་དང་མཉམ་པའི་བར་གྱིས་རྗེས་སུ་ཡི་རང་ངོ་། །ཕྱོགས་བཅུའི་

57-1-331b

འཇིག་རྟེན་ན་སེམས་ཅན་གང་སུ་དག་སྦྱིན་པ་ལས་བྱུང་བའི་བསོད་ནམས་བགྱི་བའི་དངོས་པོ་དང་། ཚུལ་ཁྲིམས་ལས་བྱུང་བ་དང་། བསྒོམ་པ་ལས་བྱུང་བའི་བསོད་ནམས་བགྱི་བའི་དངོས་པོ་མངོན་པར་འདུ་བགྱིད་པ་དེ་དག་
ཐམས་ཅད་ལ་ཡང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་བ་ནས་རྗེས་སུ་ཡི་རང་བ་མི་མཉམ་པ་དང་མཉམ་པའི་བར་གྱིས་རྗེས་སུ་ཡི་རང་ངོ་། །བྱང་ཆུབ་སེམས་དཔའ་གང་དག་ད་ལྟར་ན་སེམས་དང་པོ་བསྐྱེད་པ་
དེ་དག་གིས་དང་པོ་བྱང་ཆུབ་མཆོག་ཏུ་སེམས་བསྐྱེད་པ་དང་ལྡན་པའི་དགེ་བའི་རྩ་བ་གང་ལགས་པ་དང་། བྱང་ཆུབ་སེམས་དཔའ་བསྐལ་པ་བརྒྱས་བྱུང་བ་རྣམས་ཀྱི་བསོད་ནམས་ཀྱི་ཕུང་པོ་གང་ལགས་པ་དང་། བྱང་ཆུབ་
སེམས་དཔའ་མི་སྐྱེ་བའི་ཆོས་ལ་བཟོད་པ་ཐོབ་པ་རྣམས་ཀྱི་བསོད་ནམས་ཀྱི་ཕུང་པོ་གང་ལགས་པ་དང་། ཕྱིར་མི་ལྡོག་པ་རྣམས་ཀྱི་བསོད་ནམས་ཀྱི་ཕུང་པོ་གང་ལགས་པ་དང་། བྱང་ཆུབ་སེམས་དཔའ་སྐྱེ་བ་
གཅིག་གིས་ཐོགས་པ་རྣམས་ཀྱི་བསོད་ནམས་ཀྱི་ཕུང་པོ་གང་ལགས་པ་དེ་དག་ཐམས་ཅད་ལ་ཡང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་བ་ནས་རྗེས་སུ་ཡི་རང་བ་མི་མཉམ་པ་དང་མཉམ་པའི་བར་གྱིས་
རྗེས་སུ་ཡི་རང་ངོ་། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཕ་རོལ་དུ་ཕྱིན་པ་དྲུག་དང་ལྡན་པའི་དགེ་བའི་རྩ་བ་མངོན་པར་འདུས་བགྱིས་པ་གང་ལགས་
པ་དེ་དག་ཐམས་ཅད་ལ་ཡང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་ངོ་། །རྗེས་སུ་ཡི་རང་བའི་དམ་པ་དང་། གཙོ་བོ་དང་། ཁྱད་པར་ཅན་དང་། རབ་དང་། ཕུལ་དང་། གྱ་ནོམ་པ་དང་། བླ་མ་དང་། བླ་ན་མེད་པ་དང་། 
ལྟག་ན་མེད་པ་དང་། མཉམ་པ་མེད་པ་དང་། མི་མཉམ་པ་དང་མཉམ་པས་རྗེས་སུ་ཡི་རང་ངོ་། །མ་འོངས་པའི་དུས་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་བྱང་ཆུབ་ཀྱི་ཕྱིར་སྤྱོད་པ་ན་ཕ་རོལ་དུ་ཕྱིན་

57-1-332a

པ་དྲུག་དང་ལྡན་པའི་བསོད་ནམས་ཀྱི་ཕུང་པོ་མངོན་པར་འདུ་བགྱིས་པར་འགྱུར་བ་དེ་གང་ལགས་པ་དེ་དག་ཐམས་ཅད་ལ་ཡང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་ངོ་། །རྗེས་སུ་ཡི་རང་བ་དམ་
པ་དང་། གཙོ་བོ་དང་། ཁྱད་པར་ཅན་དང་། རབ་དང་། ཕུལ་དང་། གྱ་ནོམ་པ་དང་། བླ་མ་དང་། བླ་ན་མེད་པ་དང་། ལྟག་ན་མེད་པ་དང་། མཉམ་པ་མེད་པ་དང་། མི་མཉམ་པ་དང་མཉམ་པས་རྗེས་སུ་ཡི་རང་ངོ་། །བྱང་ཆུབ་སེམས་དཔའ་
སེམས་དཔའ་ཆེན་པོ་གང་དག་ད་ལྟར་ཕྱོགས་བཅུའི་འཇིག་རྟེན་ན་བྱང་ཆུབ་ཀྱི་ཕྱིར་སྤྱོད་པ་དེ་དག་ཕ་རོལ་དུ་ཕྱིན་པ་དྲུག་དང་ལྡན་པའི་བསོད་ནམས་ཀྱི་ཕུང་པོ་མངོན་པར་འདུ་བགྱིད་པ་གང་ལགས་པ་དེ་དག་ཐམས་ཅད་ལ་ཡང་རྗེས་སུ་ཡི་རང་བའི་
མཆོག་གིས་རྗེས་སུ་ཡི་རང་ངོ་། །རྗེས་སུ་ཡི་རང་བ་དམ་པ་དང་། གཙོ་བོ་དང་། ཁྱད་པར་ཅན་དང་། རབ་དང་། ཕུལ་དང་། གྱ་ནོམ་པ་དང་། བླ་མ་དང་། བླ་ན་མེད་པ་དང་། ལྟག་ན་མེད་པ་དང་། མཉམ་པ་མེད་པ་དང་། མི་མཉམ་པ་དང་མཉམ་པས་རྗེས་སུ་
ཡི་རང་ངོ་། །སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་། སྨན་པ་དང་བདེ་བའི་སླད་དུ་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རབ་ཏུ་བསྐོར་བ། ཆོས་ཀྱི་འཁོར་ལོ་རབ་ཏུ་བསྟན་པ། ཆོས་ཀྱི་ཚུལ་རབ་ཏུ་བཟུང་བ། ཆོས་ཀྱི་
ཆར་རབ་ཏུ་ཕབ་པ། ཆོས་ཀྱི་ཆར་རབ་ཏུ་བཏང་བ། ཆོས་ཀྱི་རྔ་རབ་ཏུ་བརྡུངས་པ། ཆོས་ཀྱི་རྔ་བོ་ཆེ་བརྡུངས་པ། ཆོས་ཀྱི་དུང་བུས་པ། ཆོས་ཀྱི་སྲོག་ཤིང་བསྒྲེང་བ། ཆོས་ཀྱི་སྒྲོན་མ་འབར་བར་མཛད་པ། སེམས་ཅན་ཐམས་ཅད་ལ་
ཆོས་ཀྱི་སྦྱིན་པས་ཚིམ་པར་མཛད་པ། ཉམ་བག་ཏུ་སྤྱོད་དུ་བཙུད་པ་གང་ལགས་པ་དང་། དེ་ལ་ཉན་ཐོས་ཀྱི་ཐེག་པ་པ་འམ། རང་སངས་རྒྱས་ཀྱི་ཐེག་པ་པ་འམ། བྱང་ཆུབ་སེམས་དཔའི་ཐེག་པ་པ་འམ། དེ་ལས་གཞན་པའི་

57-1-332b

སེམས་ཅན་རྣམས་ཀྱིས་དགེ་བའི་རྩ་བ་བསྐྱེད་པ་གང་ལགས་པ་དེ་དག་ཐམས་ཅད་ལ་ཡང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་བ་ནས་རྗེས་སུ་ཡི་རང་བ་མི་མཉམ་པ་དང་མཉམ་པའི་བར་གྱིས་རྗེས་སུ་ཡི་རང་ངོ་། །
སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་། སྨན་པ་དང་། བདེ་བའི་སླད་དུ་མ་འོངས་པའི་དུས་ཀྱི་སངས་རྒྱས་བཅོམ་ལྡན་འདས་
དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་སྐོར་བར་འགྱུར་བའི་བར་དག་གང་ལགས་པ་དང་། དེ་ལ་ཉན་ཐོས་ཀྱི་ཐེག་པ་པ་འམ། རང་སངས་རྒྱས་ཀྱི་ཐེག་པ་པ་འམ། 
བྱང་ཆུབ་སེམས་དཔའི་ཐེག་པ་པ་འམ། དེ་ལས་གཞན་པའི་སེམས་ཅན་དག་དགེ་བའི་རྩ་བ་སྐྱེད་པར་འགྱུར་བ་གང་ལགས་པ་དེ་དག་ཐམས་ཅད་ལ་ཡང་རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་བ་ནས་རྗེས་སུ་ཡི་རང་བ་
མི་མཉམ་པ་དང་མཉམ་པའི་བར་གྱིས་རྗེས་སུ་ཡི་རང་ངོ་། །སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་། སྨན་པ་དང་། བདེ་བའི་
སླད་དུ་ད་ལྟར་ན་ཕྱོགས་བཅུའི་འཇིག་རྟེན་ན་སངས་རྒྱས་བཅོམ་ལྡན་འདས་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཀྱི་འཁོར་ལོ་རབ་ཏུ་བསྐོར་བ། ཆོས་ཀྱི་འཁོར་ལོ་རབ་
ཏུ་སྟོན་པ། ཆོས་ཀྱི་ཚུལ་རབ་ཏུ་འཛིན་པ། ཆོས་ཀྱི་ཆར་རབ་ཏུ་འབེབས་པ། ཆོས་ཀྱི་ཆར་རབ་ཏུ་གཏོང་བ། ཆོས་ཀྱི་སྦྱིན་པ་མཛད་པ། ཆོས་ཀྱི་སྒྲོན་མ་འབར་བར་མཛད་པ། ཆོས་ཀྱི་རྔ་རྡུང་བ། ཆོས་ཀྱི་རྔ་བོ་ཆེ་རྡུང་བ། ཆོས་ཀྱི་
དུང་འབུད་པ། ཆོས་ཀྱི་སྲོག་ཤིང་སྒྲེང་བ། སེམས་ཅན་ཐམས་ཅད་ལ་ཆོས་ཀྱི་སྦྱིན་པས་ཚིམ་པར་མཛད་པ། ཉམ་བག་ཏུ་སྤྱོད་དུ་འཛུད་པ་གང་ལགས་པ་དང་། དེ་ལ་ཉན་ཐོས་ཀྱི་ཐེག་པ་པ་འམ། རང་སངས་རྒྱས་ཀྱི་ཐེག་

57-1-333a

པ་པ་འམ། བྱང་ཆུབ་སེམས་དཔའི་ཐེག་པ་པ་འམ། དེ་ལས་གཞན་པའི་སེམས་ཅན་དག་དགེ་བའི་རྩ་བ་བསྐྱེད་པ་གང་ལགས་པ་དེ་དག་ཐམས་ཅད་ལ་ཡང་རྗེས་སུ་ཡི་རང་བ་མཆོག་གིས་རྗེས་སུ་ཡི་རང་བ་
ནས་རྗེས་སུ་ཡི་རང་བ་མི་མཉམ་པ་དང་མཉམ་པའི་བར་གྱིས་རྗེས་སུ་ཡི་རང་ངོ་ཞེས་བརྗོད་པར་བྱའོ། །ཤཱ་རིའི་བུ་འདི་ནི་རྗེས་སུ་ཡི་རང་བའི་བསོད་ནམས་ཀྱི་ཕུང་པོའོ། །རིགས་ཀྱི་བུ་འམ། རིགས་ཀྱི་བུ་མོ་རྗེས་སུ་ཡི་རང་བའི་
བསོད་ནམས་ཀྱི་ཕུང་པོ་འདིས་རྗེས་སུ་ཡི་རང་ན་བསོད་ནམས་ཀྱི་ཕུང་པོ་མང་པོ་གྲངས་མེད། དཔག་ཏུ་མེད་པ་སྐྱེད་དོ། །ཤཱ་རིའི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ནས། འཇིག་རྟེན་གྱི་
ཁམས་གང་གཱའི་ཀླུང་གི་བྱེ་མ་སྙེད་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་དགྲ་བཅོམ་པ་ཟག་པ་ཟད་པར་གྱུར་ལ། རིགས་ཀྱི་བུ་འམ་རིགས་ཀྱི་བུ་མོ་ལ་ལ་ཞིག་གིས་དེ་དག་ལ་ཇི་སྲིད་འཚོའི་བར་དུ་གོས་དང་། ཟས་དང་། 
ན་བའི་གསོས་སྨན་དང་། ཡོ་བྱད་རྣམས་ཀྱིས་བསྙེན་བཀུར་བྱས་པ་བས་གང་ཞིག་རྗེས་སུ་ཡི་རང་བ་འདིས་རྗེས་སུ་ཡི་རང་ན་དེ་ནི་དེ་བས་བསོད་ནམས་ཆེས་མང་དུ་གྲངས་མེད་དཔག་ཏུ་མེད་པ་སྐྱེད་དོ། །ཤཱ་རིའི་བུ་དེ་བས་ན་
རིགས་ཀྱི་བུ་འམ། རིགས་ཀྱི་བུ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་རྗེས་སུ་ཡི་རང་བ་འདིས་རྗེས་སུ་ཡི་རང་བར་བྱའོ། །བུད་མེད་སྐྱེས་པའི་དབང་པོ་ཐོབ་པར་
འདོད་ཅིང་བུད་མེད་ཀྱི་དབང་པོ་རྗེས་པར་འདོད་པས་ཀྱང་རྗེས་སུ་ཡི་རང་བ་འདིས་རྗེས་སུ་ཡི་རང་བར་བྱའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་
ལྡན་འདས་མ་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་སྣང་བ་བགྱིས་པར་འགྱུར་བ་དང་། ད་ལྟར་བྱུང་བའི་བྱང་ཆུབ་སེམས་དཔའ་རྣམས་ཀྱི་མོས་པ་སྐྱེད་པར་འགྱུར་བའི་བསྐུལ་བའི་ཕུང་པོ་

57-1-333b

བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་འདི་ལ་རིགས་ཀྱི་བུ་འམ། རིགས་ཀྱི་བུ་མོ་ཉན་ཐོས་ཀྱི་ཐེག་པ་ལ་
ཡང་དག་པར་ཞུགས་པ་འམ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་འམ། ཐེག་པ་ཆེན་པོ་ལ་ཡང་དག་པར་ཞུགས་པ་འམ། སེམས་ཅན་གཞན་དག་ཀྱང་རུང་སྟེ། བླ་ན་མེད་པ་ཡང་དག་པར་རྫོགས་
པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཉིན་ལན་གསུམ་མཚན་ལན་གསུམ་དུ་བླ་གོས་ཕྲག་པ་གཅིག་ཏུ་གཟར་ལ་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་ཚིག་འདི་སྐད་
དུ་སངས་རྒྱས་བཅོམ་ལྡན་འདས་གང་དག་ད་ལྟར་ན། ཕྱོགས་བཅུའི་འཇིག་རྟེན་གྱི་ཁམས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེ་དག་ལ་ཕྱག་འཚལ་ལོ། །
སངས་རྒྱས་བཅོམ་ལྡན་འདས་དེ་དག་ལ་ཕྱག་འཚལ་ནས་ཆོས་ཀྱི་འཁོར་ལོ་རབ་ཏུ་བསྐོར་བར་བསྐུལ་གྱིས། སངས་རྒྱས་བཅོམ་ལྡན་འདས་དེ་དག་གིས་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་
ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་། སྨན་པ་དང་། བདེ་བའི་སླད་དུ་ཆོས་ཀྱི་འཁོར་ལོ་རབ་ཏུ་བསྐོར་དུ་གསོལ། །ཆོས་ཀྱི་འཁོར་ལོ་རབ་ཏུ་བསྟན་དུ་གསོལ། །ཆོས་ཀྱི་ཚུལ་རབ་ཏུ་
གཟུང་དུ་གསོལ། །ཆོས་ཀྱི་སྦྱིན་པ་མཛད་པ་གཟུང་དུ་གསོལ། །ཆོས་ཀྱི་སྒྲོན་མ་འབར་བར་མཛད་དུ་གསོལ། །ཆོས་ཀྱི་ཆར་དབབ་ཏུ་གསོལ། །ཆོས་ཀྱི་རྔ་བརྡུང་དུ་གསོལ། །ཆོས་ཀྱི་རྔ་བོ་ཆེ་བརྡུང་དུ་གསོལ། །ཆོས་ཀྱི་དུང་བུད་
དུ་གསོལ། །ཆོས་ཀྱི་སྲོག་ཤིང་བསྒྲེང་དུ་གསོལ་ཞེས་བརྗོད་པར་བྱའོ། །ཤཱ་རིའི་བུ་གཞན་ཡང་རིགས་ཀྱི་བུ་འམ། རིགས་ཀྱི་བུ་མོ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་འམ། རང་སངས་རྒྱས་ཀྱི་ཐེག་པ་ལ་

57-1-334a

ཡང་དག་པར་ཞུགས་པ་འམ། ཐེག་པ་ཆེན་པོ་ལ་ཡང་དག་པར་ཞུགས་པ་འམ། སེམས་ཅན་གཞན་དག་ཀྱང་རུང་སྟེ། ཉིན་ལན་གསུམ་མཚན་ལན་གསུམ་དུ་བླ་གོས་ཕྲག་པ་གཅིག་ཏུ་གཟར་ལ་པུས་མོ་
གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་ཚིག་འདི་སྐད་དུ་སངས་རྒྱས་བཅོམ་ལྡན་འདས་གང་དག་ད་ལྟར་ཕྱོགས་བཅུའི་འཇིག་རྟེན་ན་ཚེའི་འདུ་བྱེད་བཏོང་བའི་སངས་རྒྱས་བཅོམ་ལྡན་འདས་དེ་དག་ལ་ཕྱག་འཚལ་ལོ། །
སངས་རྒྱས་བཅོམ་ལྡན་འདས་དེ་དག་ལ་བདག་ཕྱག་འཚལ་ནས་གསོལ་བ་འདེབས་ཀྱིས། སངས་རྒྱས་བཅོམ་ལྡན་འདས་དེ་དག་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་
བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་། སྨན་པ་དང་། བདེ་བའི་སླད་དུ་ཆོས་ཀྱི་འཁོར་ལོ་ནི་རབ་ཏུ་བསྐོར། ཆོས་ཀྱི་སྒྲོན་མེ་ནི་འབར་བར་མཛད། ཆོས་ཀྱི་ཆར་ནི་རབ་ཏུ་འབེབས། ཆོས་ཀྱི་ཆར་ནི་རབ་
ཏུ་གཏོང་། ཆོས་ཀྱི་རྔ་ནི་རབ་ཏུ་རྡུང་། ཆོས་ཀྱི་རྔ་བོ་ཆེ་ནི་རབ་ཏུ་རྡུང་། ཆོས་ཀྱི་དུང་ནི་རབ་ཏུ་འབུད། ཆོས་ཀྱི་སྲོག་ཤིང་ནི་རབ་ཏུ་བསྒྲེང་། ཆོས་ཀྱི་སྒྲོན་མ་ནི་མཆེད་པར་མཛད། སེམས་ཅན་ཐམས་ཅད་ལ་ཆོས་ཀྱི་སྦྱིན་པས་ནི་
ཚིམ་པར་མཛད། ཉམ་བག་ཏུ་སྤྱོད་དུ་ནི་འཛུད་ཅིང་རེ་ཤིག་བཞུགས་སུ་གསོལ། གསོལ་བ་བཏབ་པའི་ཕུང་པོ་འདི་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་སྟེ། ཇི་ལྟར་ན་བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བ་དེ་བཞིན་དུ་འདི་ཡོངས་སུ་བསྔོའོ་ཞེས་བརྗོད་པར་བྱའོ། །ཤཱ་རིའི་བུ་འདི་ནི་གསོལ་བ་གདབ་པའི་ཕུང་པོ་སྟེ། རིགས་ཀྱི་བུ་འམ་རིགས་ཀྱི་བུ་མོ་གསོལ་བ་གཏབ་
པའི་ཕུང་པོ་འདིས་གསོལ་བ་འདེབས་ན། བསོད་ནམས་མང་པོ་གྲངས་མེད་དཔག་ཏུ་མེད་པ་སྐྱེད་དོ། །ཤཱ་རིའི་བུ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་

57-1-334b

གྱི་ཁམས་ཇི་སྙེད་པ་དེ་དག་རིན་པོ་ཆེ་སྣ་བདུན་གྱིས་བཀང་སྟེ། དེ་བཞིན་གཤེགས་པ་རྣམས་ལ་དབུལ་བ་ཕུལ་བ་སས། གང་གིས་དེ་བཞིན་གཤེགས་པ་དེ་དག་ལ་ཆོས་ཀྱི་འཁོར་ལོ་སྐོར་བར་བསྐུལ་ན་དེ་ནི་དེ་བས་
བསོད་ནམས་ཆེས་མང་དུ་གྲངས་མེད་དཔག་ཏུ་མེད་པ་སྐྱེད་དོ། །ཤཱ་རིའི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལྟ་ཞོག་སྟེ། ཤཱ་རིའི་བུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་དང་མཉམ་པ་ཇི་སྙེད་
པ་དེ་དག་རིགས་ཀྱི་བུ་འམ། རིགས་ཀྱི་བུ་མོ་ལ་ལ་ཞིག་གིས་རིན་པོ་ཆེ་སྣ་བདུན་གྱིས་བཀང་སྟེ། དེ་བཞིན་གཤེགས་པ་རྣམས་ལ་དབུལ་བ་ཕུལ་བ་བས། གང་གིས་དེ་བཞིན་གཤེགས་པ་དེ་དག་ལ་
གསོལ་བ་བཏབ་ན་དེ་ནི་དེ་བས་བསོད་ནམས་ཆེས་མང་དུ་གྲངས་མེད་དཔག་ཏུ་མེད་པ་སྐྱེད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ་ངས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དེ་བཞིན་གཤེགས་པ་རྣམས་ལ་ཆོས་ཀྱི་
འཁོར་ལོ་སྐོར་བར་གསོལ་བ་བཏབ་སྟེ། དགེ་བའི་རྩ་བ་དེས་ན་ང་ལ་ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པས་བཅོམ་ལྡན་འདས་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། 
འཇིག་རྟེན་ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་མི་རྣམས་ཀྱི་དོན་དང་། སྨན་པ་དང་། བདེ་བའི་སླད་དུ་ཆོས་ཀྱི་འཁོར་ལོ་རབ་ཏུ་བསྐོར་བར་གསོལ་ཞེས་ཆོས་ཀྱི་འཁོར་ལོ་རབ་ཏུ་བསྐོར་
བར་གསོལ་བ་བཏབ་བོ། །ཤཱ་རིའི་བུ་ངས་སྔོན་བྱང་ཆུབ་ཀྱི་ཕྱིར་སྤྱོད་པ་ན་དེ་བཞིན་གཤེགས་པ་རྣམས་ལ་རིང་དུ་བཞུགས་པར་གསོལ་ཏེ། དགེ་བའི་རྩ་བ་དེས་ན་ང་མི་འཇིགས་པ་བཞི་དང་། དེ་བཞིན་
གཤེགས་པའི་སྟོབས་བཅུ་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་། སོ་སོ་ཡང་དག་པར་རིག་པ་བཞི་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། ཡོངས་སུ་མྱ་ངན་ལས་འདས་

57-1-335a

པ་ཐོབ་སྟེ། ངའི་དམ་པའི་ཆོས་ཀྱང་ཡུན་རིང་དུ་གནས་པར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །
བཅོམ་ལྡན་འདས་རིགས་ཀྱི་བུ་འམ། རིགས་ཀྱི་བུ་མོ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་འམ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་འམ། ཐེག་པ་ཆེན་པོ་ལ་ཡང་དག་
པར་ཞུགས་པ་འམ། སེམས་ཅན་གཞན་དག་ཀྱང་རུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འཚལ་བས་ཐམས་ཅད་མཁྱེན་པ་ཉིད་དུ་འགྱུར་བར་བགྱི་
བའི་སླད་དུ་དགེ་བའི་རྩ་བ་རྣམས་ཇི་ལྟར་ཡོངས་སུ་བསྔོ་བར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་འདི་ལ་རིགས་
ཀྱི་བུ་འམ། རིགས་ཀྱི་བུ་མོ་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་པ་འམ། རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་འམ། ཐེག་པ་ཆེན་པོ་ལ་ཡང་དག་པར་ཞུགས་པ་འམ། 
སེམས་ཅན་གཞན་དག་ཀྱང་རུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཉིན་ལན་གསུམ་དུ་མཚན་ལན་གསུམ་དུ་ཚིག་འདི་སྐད་ཅེས་ཐོག་མ་
དང་ཐ་མ་མ་མཆིས་པའི་འཁོར་བ་ན་འཁོར་བའི་ཚེ་བདག་གིས་དགེ་བའི་རྩ་བ་མངོན་པར་འདུས་བགྱིས་པར་གྱུར་པ། སངས་རྒྱས་སམ། ཆོས་སམ། དགེ་འདུན་ནམ། གང་ཟག་གམ། ཐ་ན་
དུད་འགྲོའི་སྐྱེ་གནས་སུ་སོང་བ་རྣམས་སམ། སེམས་ཅན་གཞན་དག་ལ་ཡང་རུང་སྟེ། ཟན་ཆང་གཅིག་ཙམ་སྩལ་བར་གྱུར་བ་དང་། འཆགས་པ་གང་ལགས་པ་དང་། གསོལ་བ་གདབ་པ་གང་

57-1-335b

ལགས་པ་དང་། སྐྱབས་སུ་མཆི་བ་གང་ལགས་པ་དང་། བསླབ་པའི་གཞི་དང་ལྡན་པའི་དགེ་བའི་རྩ་བ་གང་ལགས་པ་དང་། སོ་སོར་འཆགས་པ་དང་ལྡན་པའི་དགེ་བའི་རྩ་བ་ལགས་པ་དང་། རྗེས་སུ་
ཡི་རང་བ་དང་ལྡན་པའི་བསོད་ནམས་བགྱི་བའི་དངོས་པོ་གང་ལགས་པ་དང་། གསོལ་བ་གདབ་པ་དང་ལྡན་པའི་དགེ་བའི་རྩ་བ་གང་ལགས་པ་དེ་དག་ཐམས་ཅད་གཅིག་ཏུ་བསྡུས་གཞལ་བཟླུམས་ཏེ། སེམས་དུལ་ཞིང་
རྣམ་པར་གྲོལ་བ་དང་། གཟུང་བ་མ་མཆིས་པས་སེམས་ཅན་ཐམས་ཅད་ལ་སྩལ་ཏོ། །ཇི་ལྟར་དགེ་བའི་རྩ་བ་རྣམས་སེམས་ཅན་ཐམས་ཅད་ལ་གཏང་བར་བགྱི་བ་སངས་རྒྱས་བཅོམ་ལྡན་འདས་རྣམས་ཀྱིས་
སངས་རྒྱས་ཀྱི་ཡེ་ཤེས་ཆགས་པ་མི་མངའ་བས་ཇི་ལྟར་མཁྱེན་པ་དེ་ལྟ་བུས་བདག་གིས་དགེ་བའི་རྩ་བ་གཏང་ངོ་། །སེམས་ཅན་ཐམས་ཅད་ལག་ན་རིན་པོ་ཆེ་དང་ལྡན་པར་གྱུར་ཅིག །ནམ་མཁའི་
མཛོད་དང་ལོངས་སྤྱོད་ཟད་མི་ཤེས་པ་དང་། བསོད་ནམས་ཟད་མི་ཤེས་པ་དང་། ཆོས་ཟད་མི་ཤེས་པ་དང་། ཡེ་ཤེས་ཟད་མི་ཤེས་པ་དང་། སྤོབ་པས་ཟད་མི་ཤེས་པ་དང་། བླ་ན་མེད་པ་ཡང་དག་
པར་རྫོགས་པའི་བྱང་ཆུབ་མངོན་པར་རྫོགས་པར་བྱང་ཆུབ་པ་དང་། ཐམས་ཅད་མཁྱེན་པའི་ཡེ་ཤེས་ཐོབ་པར་གྱུར་ཅིག །བདག་གི་དགེ་བའི་རྩ་བ་སེམས་ཅན་ཐམས་ཅད་ལ་སྩལ་བ་ལས་བྱུང་བའི་
བསོད་ནམས་གང་ཡིན་པ་དེ་དག་ཐམས་ཅད་གཅིག་ཏུ་བསྡུས་གཞལ་བཟླུམས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོའོ། །དགེ་བའི་རྩ་བ་འདིས་བདག་དང་
སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག །ཐམས་ཅད་མཁྱེན་པའི་ཡེ་ཤེས་ཀྱང་ཐོགས་པར་གྱུར་ཅིག །ཇི་ལྟར་སྔོན་གྱི་

57-1-336a

བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་བྱང་ཆུབ་ཀྱི་ཕྱིར་སྤྱོད་པ་ན་ཐམས་ཅད་མཁྱེན་པ་ཉིད་དུ་འགྱུར་བར་བགྱི་བའི་སླད་དུ་དགེ་བའི་རྩ་བ་རྣམས་ཡོངས་སུ་བསྔོས་པ་དེ་བཞིན་
དུ་བདག་གིས་ཀྱང་ཐམས་ཅད་མཁྱེན་པ་ཉིད་དུ་འགྱུར་བར་བགྱི་བའི་སླད་དུ་དགེ་བའི་རྩ་བ་རྣམས་ཡོངས་སུ་བསྔོའོ། །དགེ་བའི་རྩ་བ་འདིས་བདག་དང་། སེམས་ཅན་ཐམས་ཅད་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག །ཐམས་ཅད་མཁྱེན་པའི་ཡེ་ཤེས་ཀྱང་ཐོབ་པར་གྱུར་ཅིག །ཇི་ལྟར་མ་འོངས་པའི་དུས་ཀྱི་བྱང་ཆུབ་སེམས་དཔའ་སེམས་དཔའ་
ཆེན་པོ་དེ་དག་བྱང་ཆུབ་ཀྱི་ཕྱིར་སྤྱོད་པ་ན་ཐམས་ཅད་མཁྱེན་པ་ཉིད་དུ་འགྱུར་བར་བགྱི་བའི་སླད་དུ་དགེ་བའི་རྩ་བ་རྣམས་ཡོངས་སུ་སྔོ་བར་འགྱུར་བ་དེ་བཞིན་དུ་བདག་གིས་ཀྱང་ཐམས་ཅད་མཁྱེན་པ་ཉིད་དུ་འགྱུར་
བར་བགྱི་བའི་སླད་དུ་དགེ་བའི་རྩ་རྣམས་ཡོངས་སུ་བསྔོའོ། །དགེ་བའི་རྩ་བ་འདིས་བདག་དང་། སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་
འཚང་རྒྱ་བར་གྱུར་ཅིག །ཐམས་ཅད་མཁྱེན་པའི་ཡེ་ཤེས་ཀྱང་ཐོབ་པར་གྱུར་ཅིག །ཇི་ལྟར་ད་ལྟ་ན་ད་ལྟར་བྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་བྱང་ཆུབ་ཀྱི་ཕྱིར་སྤྱོད་པ་
ན་ཐམས་ཅད་མཁྱེན་པ་ཉིད་དུ་འགྱུར་བར་བགྱི་བའི་སླད་དུ་དགེ་བའི་རྩ་བ་རྣམས་ཡོངས་སུ་སྔོ་བ་དེ་བཞིན་དུ་བདག་གིས་ཀྱང་ཐམས་ཅད་མཁྱེན་པ་ཉིད་དུ་འགྱུར་བར་བགྱི་བའི་སླད་དུ་དགེ་བའི་རྩ་བ་རྣམས་ཡོངས་སུ་
བསྔོའོ། །དགེ་བའི་རྩ་བ་འདིས་བདག་དང་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག །

57-1-336b

ཐམས་ཅད་མཁྱེན་པའི་ཡེ་ཤེས་ཀྱང་ཐོབ་པར་གྱུར་ཅིག །ཇི་ལྟར་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེས་བྱང་ཆུབ་ཀྱི་སྙིང་པོ་ལ་བཞུགས་ཏེ། སངས་རྒྱས་ཀྱི་
ཏིང་ངེ་འཛིན་བསམ་གྱིས་མི་ཁྱབ་པ་དྲི་མ་མེད་པ་ཤིན་དུ་དཀར་བ་ལ་བཞུགས་ནས་བདུད་སྡིག་ཅན་བཅོམ་སྟེ། ཤེས་པར་བགྱི་བ་དང་། བལྟ་བར་བགྱི་བ་དང་། རྟོགས་པར་
པར་བགྱི་བ་དང་། མངོན་པར་རྫོགས་པར་བྱང་ཆུབ་པར་བགྱི་བ་གང་ཅི་ཡང་རུང་སྟེ། དེ་ཐམས་ཅད་ནམ་གྱི་ཐོ་རངས་སྐྱེ་རེང་འཆར་ཀར་སྐད་ཅིག་གཅིག་དང་ལྡན་པའི་ཤེས་རབ་ཀྱིས་
བདུད་རྩི་བརྙེས་ཏེ། འཆི་བ་མེད་པར་འགྲོ་བའི་ལམ་མངོན་པར་རྫོགས་པར་སངས་རྒྱས་པ་དེ་བཞིན་དུ་བདག་དང་སེམས་ཅན་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་འཚང་རྒྱ་བར་གྱུར་ཅིག །ཐམས་ཅད་མཁྱེན་པའི་ཡེ་ཤེས་ཀྱང་ཐོབ་པར་གྱུར་ཅིག །ཇི་ལྟར་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་དང་། འོད་
མཆོག་དང་། འོད་དགེ་དང་། བསོད་ནམས་འོད་དང་། མི་འཁྲུགས་པ་དང་། སེང་གེ་དང་། འོད་ཟེར་བརྒྱ་པ་དང་། འོད་ཟེར་མཐོ་དང་། འོད་དྲ་བ་ཅན་དང་། རིན་ཆེན་
འོད་འཕྲོ་དང་། འོད་འབར་དང་། སྣང་བའི་རྒྱལ་པོ་དང་། ཤིན་དུ་བརྒྱན་དང་། རིན་ཆེན་ཏོག་དང་། ཆོས་ཀྱི་རྒྱལ་མཚན་དང་། ཡན་ལག་མཆོག་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་དང་། སངས་རྒྱས་བཅོམ་ལྡན་འདས་གཞན་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་

57-1-337a

མངོན་པར་རྫོགས་པར་སངས་རྒྱས་ནས་ཇི་ཙམ་དུ་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་། མི་རྣམས་
ཀྱི་དོན་དང་། སྨན་པ་དང་། བདེ་བའི་སླད་དུ་ཆོས་ཀྱི་འཁོར་ལོ་རབ་ཏུ་བསྐོར་བ་དེ་བཞིན་དུ་བདག་དང་། སེམས་ཅན་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་
ནས་སྐྱེ་བོ་མང་པོ་ལ་སྨན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་ཐུགས་བརྩེ་བ་དང་། སྐྱེ་བོ་ཕལ་པོ་ཆེ་དང་། ལྷ་དང་། མི་རྣམས་ཀྱི་དོན་དང་། སྨན་པ་དང་། བདེ་བའི་སླད་དུ་ཆོས་ཀྱི་
འཁོར་ལོ་རབ་ཏུ་སྐོར་བར་ཤོག་ཤིག་ཅེས་བརྗོད་པར་བྱའོ། །ཤཱ་རིའི་བུ་འདི་ནི་ཡོངས་སུ་བསྔོ་བའི་ཕུང་པོ་སྟེ། བསོད་ནམས་ཀྱི་ཕུང་པོ་སྔ་མ་བས་ཡོངས་སུ་བསྔོ་བའི་ཕུང་པོ་འདིའི་བརྒྱའི་ཆར་ཡང་ཉེ་བར་མི་འགྲོ་
བ་ནས་དཔེའི་བར་དུ་ཡང་མི་བཟོད་དོ། །ཤཱ་རིའི་བུ་རིགས་ཀྱི་བུ་འམ། རིགས་ཀྱི་བུ་མོ་གང་ལ་ལ་ཞིག་མདོ་འདི་ལེན་ཏམ། ཀུན་ཆུབ་པར་བྱེད་དམ། འཛིན་ཏམ། ཀློག་གམ། གཞན་དག་ལ་ཡང་
རྒྱ་ཆེར་ཡང་དག་པར་རབ་ཏུ་སྟོན་ན་དེ་ནི་བསོད་ནམས་ཀྱི་ཕུང་པོ་ཆེས་མང་དུ་གྲངས་མེད་དཔག་ཏུ་མེད་པ་སྐྱེད་དོ། །ཤཱ་རིའི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་པ་དེ་དག་ཐམས་ཅད་
སྔ་ཕྱི་མེད་པར་མིའི་ལུས་ཐོབ་པར་གྱུར་ལ། སྔ་ཕྱི་མེད་པར་མིའི་ལུས་ཐོབ་ནས་ཀྱང་རང་བྱང་ཆུབ་ཐོབ་པར་གྱུར་ཏེ། དེ་དག་ལ་རིགས་ཀྱི་བུ་འམ། རིགས་ཀྱི་བུ་མོ་ལ་ལ་ཞིག་གིས་བསྟི་སྟང་དང་། ཕུ་དུད་དུ་བྱ་བའི་ཕྱིར་
གོས་དང་། ཟས་དང་། མལ་ཆ་དང་། ན་བའི་གསོས་སྨན་དང་། ཡོ་བྱད་རྣམས་ཀྱིས་ཇི་སྲིད་འཚོའི་བར་དུ་བསྙེན་བཀུར་བྱས་ཏེ། རིམ་གྲོ་བྱ་བ་ལན་ཅིག་ཅིང་ཡང་རིན་པོ་ཆེའི་ཕུང་པོ་རི་རབ་ཙམ་གྱི་རིན་པོ་ཆེ་རྣམས་

57-1-337b

ཡོངས་སུ་ཟད་པར་བྱས་ལ། ཡོངས་སུ་མྱ་ངན་ལས་འདས་ནས་ཀྱང་དེ་དག་གི་མཆོད་རྟེན་རིན་པོ་ཆེ་སྣ་བདུན་ཏེ། གསེར་དང་། དངུལ་དང་། མུ་ཏིག་དང་། བཻ་དཱུརྱ་དང་། ཤེལ་དང་། སྤུག་དང་། མུ་ཏིག་དམར་པོ་
ལས་འཕང་དུ་དཔག་ཚད་བཅུ་པ་བྱས་ཏེ། དེ་དག་ལ་གདུགས་དང་། རྒྱལ་མཚན་དང་། བ་དན་དང་། བ་དན་ཕྲ་མོ་རྣམས་ཀྱིས་མཆོད་པ་བྱས་ན་ཤཱ་རིའི་བུ་འདི་ཇི་སྙམ་དུ་སེམས། རིགས་ཀྱི་བུ་འམ། རིགས་
ཀྱི་བུ་མོ་གཞི་དེ་ལས་བསོད་ནམས་མང་དུ་སྐྱེད་དམ། གསོལ་པ། བཅོམ་ལྡན་འདས་མང་ལགས་སོ། །བདེ་བར་གཤེགས་པ་མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། 
ཤཱ་རིའི་བུ་རིགས་ཀྱི་བུ་འམ། རིགས་ཀྱི་བུ་མོ་གང་མདོ་འཛིན་ཏམ། ཀུན་ཆུབ་པར་བྱེད་དམ། འདོན་པར་བྱེད་དམ། ཀློག་གམ། སྐྱེ་བོ་མང་པོ་ལ་ཡང་དག་པར་རབ་ཏུ་སྟོན་ཏམ། བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་སྨོན་ལམ་འདེབས་ན་དེ་ནི་དེ་བས་བསོད་ནམས་ཆེས་མང་དུ་སྐྱེད་དེ། བསོད་ནམས་ཀྱི་ཕུང་པོ་སྔ་མས་བསོད་ནམས་ཀྱི་ཕུང་པོ་འདིའི་བརྒྱའི་ཆར་ཡང་ཉེ་བར་མི་འགྲོ་བ་ནས་དཔེའི་
བར་དུ་ཡང་མི་བཟོད་དོ། །དེ་ཅིའི་ཕྱིར་ཞེ་ན། ཤཱ་རིའི་བུ་འདི་ལྟར་རིགས་ཀྱི་བུ་འམ། རིགས་ཀྱི་བུ་མོ་སྒྲུབ་པ་འདི་ལ་གནས་ནས་ཕྱོགས་བཅུའི་འཇིག་རྟེན་གྱི་ཁམས་ཀྱི་སངས་རྒྱས་བཅོམ་ལྡན་འདས་
རྣམས་ལ་ཆོས་ཀྱི་འཁོར་ལོ་བསྐོར་བར་བསྐུལ་བའི་ཕྱིར་རོ། །ཤཱ་རིའི་བུ་སྦྱིན་པ་རྣམས་ཀྱི་ནང་ན་ནི་འདི་ལྟ་སྟེ། ཆོས་ཀྱི་སྦྱིན་པ་ནི་མཆོག་ཅེས་ངས་བཤད་དོ། །དེ་ནས་འཁོར་དེ་ལས་
སྲོག་ཆགས་ཁྲི་སྟན་ལས་ལངས་ཏེ། སོ་སོ་ནས་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་

57-1-338a

བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་མདོ་སྡེ་འདི་གཟུང་བར་བགྱིའོ། །གཞན་དག་ལ་ཡང་རྒྱ་ཆེར་ཡང་དག་པར་བསྟན་པར་བགྱིའོ། །བསྒྲུབ་པ་ལ་
གནས་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བདག་ཅག་ནི་དགེ་བའི་ཆོས་དེ་ལྟ་བུ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འཚལ་ཞིང་དོན་དུ་གཉེར་
བ་ལགས་སོ། །དེ་ནས་ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་དང་། ཆོས་ཀྱི་རྣམ་གྲངས་འདི་ལ་ལྷའི་མེ་ཏོག་མན་དཱ་ར་བས་མངོན་པར་གཏོར་ཏོ། །མངོན་པར་གཏོར་ནས་ཀྱང་ཚིག་འདི་སྐད་ཅེས་བཅོམ་
ལྡན་འདས་ཆོས་ཀྱི་རྣམ་གྲངས་འདི་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་བསྐྲུན་པ་དང་། ལས་ཀྱི་སྒྲིབ་པ་རྒྱུན་གཅོད་པའི་གཅེས་སྤྲས་བགྱིད་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། 
དེ་དེ་བཞིན་ནོ། །ཀཽ་ཤི་ཀ་དེ་དེ་བཞིན་ཏེ། དེ་ཅིའི་ཕྱིར་ཞེ་ན། ལྷའི་དབང་པོ་ངས་མངོན་པར་ཤེས་ཏེ། འདི་ནས་བསྐལ་པ་གྲངས་མེད་པའི་ཡང་ཆེས་གྲངས་མེད་པར་གྱུར་པ་ན་བཅོམ་ལྡན་འདས་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་གྱི་ཕུང་པོ་ཆེན་པོ་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁོ་ལོ་སྒྱུར་བ་བླ་ན་མེད་པ། ལྷ་
དང་། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ་། །ལྷའི་དབང་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་གྱི་ཕུང་པོ་ཆེན་པོ་དེའི་ཚེའི་ཚད་ནི་ལོ་བྱེ་བ་
ཕྲག་དྲུག་ཅུ་ཐུབ་པར་གྱུར་ཏོ། །དེའི་ཉན་ཐོས་ཐོག་མར་འདུས་པ་ནི་བྱེ་བ་ཕྲག་འབུམ་ཡོད་དེ། ཐམས་ཅད་ཀྱང་དགྲ་བཅོམ་པ་ཟག་པ་ཟད་པ་ཤ་སྟག་གོ། །དེའི་ཉན་ཐོས་འདུས་པ་གཉིས་པ་ནི་བྱེ་བ་བརྒྱ་སྟོང་

57-1-338b

ཕྲག་དགུ་བཅུ་རྩ་བརྒྱད་ཡོད་དེ། ཐམས་ཅད་ཀྱང་དགྲ་བཅོམ་པ་ཟག་པ་ཟད་པ་ཤ་སྟག་གོ། །དེའི་ཉན་ཐོས་འདུས་པ་པ་གསུམ་པ་ནི་བྱེ་བ་བརྒྱ་སྟོང་ཕྲག་དགུ་བཅུ་རྩ་དགུ་ཡོད་དེ། ཐམས་ཅད་ཀྱང་དགྲ་
བཅོམ་པ་ཟག་པ་ཟད་པ་ཤ་སྟག་གོ། །ལྷའི་དབང་པོ་དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་གྱི་ཕུང་པོ་ཆེན་པོ་དེ་ལྷ་དང་བཅས་པའི་འཇིག་རྟེན་དང་། ཚངས་པ་
དང་བཅས་པ་དང་། དགེ་སྦྱོང་དང་། བྲམ་ཟེར་བཅས་པའི་སྐྱེ་དགུའི་དོན་གྱི་ཕྱིར་རྒྱུའོ། །ལྷའི་དབང་པོ་དེའི་ཚེ་བུད་མེད་གང་གཱའི་ལྷ་མོ་ཞེས་བྱ་བ་ཞིག་འཁོར་འདུས་པ་དེ་ཉིད་ཀྱི་ནང་དུ་འདུས་པར་གྱུར་ཏེ། འདུག་པ་དེས་
ཆོས་ཀྱི་རྣམ་གྲངས་འདི་བཅོམ་ལྡན་འདས་དེ་བཞིན་གཤེགས་པ་འོད་ཟེར་གྱི་ཕུང་པོ་ཆེན་པོ་ལས་མངོན་སུམ་དུ་བཟུང་། ཀུན་ཆུབ་པར་བྱས། བླངས་ནས་སྐྱེ་བོ་མང་པོ་ལ་ཡང་དག་པར་བསྟན་ཏེ། བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་པར་གྱུར་ཏོ། །དེ་དེ་ནས་ཤི་འཕོས་ནས་བུད་མེད་ཀྱི་ལུས་སྤངས་ཏེ། སྐྱེས་པའི་དབང་པོ་ཐོབ་ནས་རྟག་པར་རྒྱུན་དུ་ལྷ་དང་། 
མི་རྣམས་ཀྱི་ནང་དུ་སྐྱེས་ཏེ། ལན་བརྒྱད་ཁྲི་བཞི་སྟོང་དུ་འཁོར་ལོས་རྒྱུར་བའི་རྒྱལ་པོ་བྱས་ནས་དེ་བཞིན་གཤེགས་པ་རིན་ཆེན་འོད་འཕྲོ་ཞེས་བྱ་བར་གྱུར་ཏོ། །ཀཽ་ཤི་ཀ་འདི་ནས་ཤར་ཕྱོགས་ན་
སངས་རྒྱས་ཀྱི་ཞིང་བྱེ་བ་སྟོང་ཕྲག་བརྒྱ་ན་ཆོས་སྟོན་སྟེ། ངས་ད་ལྟ་ན་ཡང་མཐོང་། །ཀཽ་ཤི་ཀ་སུ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་རིན་ཆེན་འོད་འཕྲོ་དེའི་མིང་ཐོས་པ་དེ་དག་ཐམས་ཅད་ཡོངས་སུ་མྱ་ངན་ལས་འདས་པར་ངེས་པར་འགྱུར་རོ། །བུད་མེད་གང་ལ་ལ་ཞིག་གིས་དེ་བཞིན་གཤེགས་པ་དགྲ་བཅོམ་པ་ཡང་

57-1-339a

དག་པར་རྫོགས་པའི་སངས་རྒྱས་རིན་ཆེན་འོད་འཕྲོ་དེའི་མིང་ཐོས་སམ། འཆི་ཀར་ཡང་མངོན་སུམ་དུ་བྱེད་ན་དེ་ཉིད་དེའི་བུད་མེད་ཀྱི་ལུས་ཀྱི་ཐ་མ་ཡིན་ནོ། །ལྷའི་དབང་པོ་དེ་ལྟར་
ཆོས་ཀྱི་རྣམ་གྲངས་འདི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགེ་བའི་རྩ་བ་སྒྲུབ་པ་དང་། ལས་ཀྱི་སྒྲིབ་པ་རྒྱུན་གཅོད་པའི་གཅེས་སྤྲས་བྱེད་པ་ཡིན་ནོ། །དེ་ནས་བཅོམ་ལྡན་
འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། དེ་སྐད་ཅེས་གསོལ་
པ་དང་། བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ་དེའི་ཕྱིར་ཆོས་ཀྱི་རྣམ་གྲངས་འདི་ལས་ཀྱི་སྒྲིབ་པ་རྒྱུན་གཅོད་པ་ཞེས་བྱ་བར་ཟུང་ཤིག །
འདི་ནི་བྱང་ཆུབ་སེམས་དཔའི་སྡེ་སྣོད་ཅེས་བྱ་བར་ཡང་ཟུང་ཤིག །འདི་སོམ་ཉི་གཅོད་པ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ལྷའི་
དབང་པོ་བརྒྱ་བྱིན་དང་། ཚེ་དང་ལྡན་པ་ཤཱ་རིའི་བུ་དང་། ལྷ་དང་མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་
གསུངས་པ་ལ་མངོན་པར་བསྟོད་དོ། །འཕགས་པ་ལས་ཀྱི་སྒྲིབ་པ་རྒྱུན་གཅོད་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། རྒྱ་གར་གྱི་མཁན་པོ་འཛི་ན་མི་ཏྲ་དང་། 
དཱ་ན་ཤཱི་ལ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་བཅོས་ཤིང་གཏན་ལ་ཕབ་པ། གེའོ། །བཀྲ་ཤིས། །