66-1-1a

༼ཤ༽ ༄༅། ༈ །མདོ་སྡེ་སྣ་ཚོགས་ཀྱི་སྐོར་བཞུགས་སོ། །
(黃)  經藏第二十七部

66-1-1b

གཞན་ཡང་ལས་དང་འབྲས་བུ་རྣམ་པར་སྨིན་པ་ཤེས་པའི་དགེ་སློང་དེ་མཚེ་
མ་རྣམས་ལ་ཕན་པའི་དོན་དུ་ལྷ་རྣམས་ཀྱི་ས་ལ་ལྟ་བར་བྱེད་པ་ན། དེས་ཐོས་པ་ལས་བྱུང་
བའི་རང་བཞིན་གྱི་ཤེས་རབ་ཀྱིས་ལྷ་རྣམས་ཀྱི་ས་བདེ་བ་རབ་ཏུ་འཕེལ་བ་དང་ལྡན་པ་ཞེས་བྱ་
བ་ཇི་ལྟར་ཡོད་པ་མཐོང་བར་གྱུར་ཏོ། །ས་དེར་ཡང་ལས་གང་གིས་སེམས་ཅན་སྐྱེ་བར་
འགྱུར་བ་ཡང་དེས་མཐོང་སྟེ། སྐྱེས་བུ་དམ་པ་གང་གིས་དགེ་ལེགས་སུ་གྱུར་པའི་སེམས་
ཀྱིས་ཚུལ་ཁྲིམས་དང་ལྡན་པར་གྱུར་པས་སྲོག་གཅོད་པ་དང་། མ་བྱིན་པར་ལེན་རྣམས་
སྤངས་པར་གྱུར་པ་ནི་སྔ་མ་བཞིན་ནོ། །འདོད་པ་ལ་ལོག་པར་གཡེམ་པ་རྣམས་ཀྱང་ཤིན་དུ་ཕྲ་
བ་ཡང་སྤོང་བར་བྱེད་དེ་དཔེར་ན་ཡུད་ཙམ་ཅིག་ཀྱང་བུད་མེད་སྐྱེས་པ་དང་བཅས་པར་མངོན་པར་

66-1-2a

བྲིས་པ་རྣམས་ལ་ཡང་ཚུལ་བཞིན་མ་ཡིན་པས་ཡིད་ལ་བྱེད་པས་སྐྱེད་པར་གྱུར་པས་དེ་ལ་འདི་རྟོག་པར་མི་བྱེད། བརྣབ་སེམས་སུ་མི་བྱེད་དོ། །རོ་མྱང་བར་མི་བྱེད་ཅིང་ཚུལ་བཞིན་མ་ཡིན་པ་ཡིད་
ལ་བྱེད་པའི་སེམས་རྙོག་པ་ཅན་དུ་བྱེད་པ་ཉོན་མོངས་པར་བྱེད་པ་འཇིགས་པ་དང་བཅས་པར་གྱུར་པ་ཚངས་པར་སྤྱོད་པ་ཀུན་དུ་སུན་འབྱིན་པར་བྱེད་པ་རྣམས་ཀྱི་ས་དང་། གང་ཡང་གཞན་དག་རབ་ཏུ་རྟོག་པར་བྱེད་པའམ། 
ལྟ་བར་བྱེད་པ་ཡང་རུང་སྟེ། ཚུལ་བཞིན་མ་ཡིན་པ་ཡིད་ལ་བྱེད་པས་སེམས་ཀུན་ནས་སུན་འདོན་པར་བྱེད་པ་དེ་དག་རྣམས་འདིས་རབ་ཏུ་འགོག་པར་བྱེད་དོ། །ཕྱིར་ལ་ཟློག་པར་བྱེད་དོ། །ལུས་ཀྱི་འབྲས་བུ་རྣམས་ཀྱང་
སྟོན་པར་བྱེད་པ་ཡིན་ཏེ། ཇི་ལྟར་མི་འདོད་པ་དང་མི་དགའ་བ་དང་ཡིད་དུ་མི་འོང་བར་འགྱུར་བ་ནི་འདོད་པ་ལ་ལོག་པར་གཡེམ་པ་སྟེན་པ་འདིའི་འབྲས་བུ་ཡིན་པས་དེས་ན་དེ་ལྟར་མི་བྱའོ། །འདི་དག་ནི་ཞི་བར་འགྱུར་བའི་ལམ་
མ་ཡིན་ནོ། །དགའ་བ་མ་ཡིན། ཡིད་དུ་འོང་བ་མ་ཡིན། དམ་པ་རྣམས་ཀྱིས་མངོན་པར་འདོད་པ་མ་ཡིན་ནོ། །ཤིན་དུ་ཕྲ་བའི་འབྲས་བུ་རྣམས་སྟོན་པར་བྱེད་པ། ཚུལ་ཁྲིམས་དང་ལྡན་པ་ཚངས་པར་སྤྱོད་པ་རྣམ་པར་
དག་པ་ཁ་ན་མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བ་དེ་དག་ནི་ལུས་ཞིག་ནས་ཤི་བའི་འོག་ཏུ་བདེ་འགྲོ་མཐོ་རིས་མཚེ་མའི་ལྷ་རྣམས་ཀྱི་བདེ་བ་རབ་ཏུ་འཕེལ་བ་དང་ལྡན་པའི་ས་འདི་ལ་སྐྱེ་བར་འགྱུར་རོ། །དེ་ལ་སྐྱེས་པ་
རྣམས་ནི་ལེགས་པར་བྱས་པའི་ལས་ཀྱི་མཐའ་རྣམས་ལ་སྤྱད་པས་དེ་དག་དགའ་བའི་ལས་ཀྱི་འབྲས་བུ་རྣམས་ལ་སྤྱོད་པར་བྱེད་དོ། །འདི་ལྟ་སྟེ་ནགས་རྣམས་དང་ཉེ་བའི་ནགས་རྣམས་དང་ཁྲུས་ཀྱི་རྫིང་བུ་རྣམས་དང་། 
གསེར་གྱི་རིའི་རྩེ་མོ་རྣམས་དང་འབབ་ཆུ་དང་རིན་པོ་ཆེའི་རང་བཞིན་གྱི་འབབ་ཆུ་རྣམས་ལ་བལྟ་བར་སྡུག་པའི་བྱ་རྣམས་ཀྱིས་ཀུན་ནས་སྒྲ་འདོན་པ་དང་། གཞལ་ཡས་ཁང་གི་རྩེ་མོ་རྣམས་ཀྱང་རིན་པོ་ཆེ་བདུན་གྱི་རང་བཞིན་

66-1-2b

ལ་ནོར་བུས་ཆ་ཤས་རྣམས་རྣམ་པར་བཀྲ་བར་བྱས་པ་དང་། པད་མའི་རྫིང་བུ་རྣམས་ཀྱི་བཻ་དཱུརྱ་དང་ཨིན་དྲ་ནཱི་ལ་དང་གསེར་གྱི་རང་བཞིན་རྣམས་ཀྱི་ཆ་ཤས་རྣམ་པ་སྣ་ཚོགས་པ་ལ་གཟུགས་དང་སྒྲ་དང་ཁ་དོག་དང་དབྱིབས་
རྣམ་པ་སྣ་ཚོགས་པ་ལ་ལྟ་བར་དགའ་བའི་བུང་བའི་ཚོགས་རྣམས་ཀྱི་སྒྲ་བདེ་བ་སྐྱེད་པ་ཀུན་ཏུ་སྒྲོགས་པ་དང་ལྡན་པ་རྣམས་ལ་མངོན་པར་བྱེད་དོ། །རིག་པ་དང་ལས་རྣམས་ཐམས་ཅད་ཀྱི་བདེ་བ་རབ་ཏུ་འཕེལ་བ་དང་ལྡན་
པའི་ནགས་ཚང་ཚིང་རྣམས་དང་གཞན་ཡང་རྡོ་རྗེ་དང་བཻ་དཱུརྱ་དང་ཨིན་དྲ་ནཱི་ལ་དང་ཤེལ་གྱི་རང་བཞིན་གྱི་བྲག་རྣམས་ཆ་ཤས་དང་ཆ་ཤས་སུ་ཕྱེ་བའི་འོད་ཟེར་རྣམས་ཀྱིས་རྣམ་པར་བཀྲ་བར་གྱུར་པ་རྣམས་ལ་དགའ་བར་བྱེད་དོ། །འབབ་
ཆུ་སྣ་ཚོགས་པའི་སྒྲ་བདེ་བ་སྐྱེ་བར་བྱེད་པའི་སྒྲ་སྙན་པ་དང་ལྡན་པ་རྣམས་ལ་དགའ་བར་བྱེད་དོ། །ཇི་ལྟར་འདོད་པ་བཞིན་དུ་བྱེད་པ་རང་དབང་ཅན་རྣམས་དཔེ་མེད་པར་གྱུར་པའི་ལྷ་རྫས་ཀྱི་འདོད་པ་རྣམས་ལ་སྟེན་པར་བྱེད་དོ། །
ལྷའི་བུ་མོའི་ཚོགས་བརྒྱ་སྟོང་ཕྲག་དུ་མ་རྣམས་ཀྱིས་ཡོངས་སུ་བསྐོར་ནས་ཆེས་འཕགས་པར་གྱུར་པའི་བདེ་བ་རྣམས་འཕེལ་བ་དང་ལྡན་པའི་འདོད་པ་རྣམས་ལ་ཉེ་བར་ལོངས་སྤྱོད་པ་ཡིན་ཏེ། དེ་ཡང་རྣམ་པར་རྟག་པ་དུ་མ་
རྣམས་སུ་དཔེ་མེད་པར་གྱུར་པའི་ལྷ་རྫས་ཀྱི་བདེ་བ་རྣམས་ལ་ལོངས་སྤྱོད་པར་བྱེད་དོ། །རི་དང་རྩེ་མོ་རྣམས་གསེར་གྱི་རང་བཞིན་དང་བཻ་དཱུརྱའི་རང་བཞིན་རྣམས་ལ་དེ་དག་ནམ་མཁའ་ལ་ལན་བརྒྱ་ཕྲག་དུ་མར་འགྲོ་བར་བྱེད་
པ། རྣམ་པ་སྣ་ཚོགས་པའི་གཟུགས་དང་ཆ་བྱད་དང་རྒྱན་རྣམས་ཕུན་སུམ་ཚོགས་པ། སྒྲིན་པོ་རྣམས་ཀྱི་རྒོད་པ་དང་གླུ་དང་གར་གྱིས་ཀུན་ནས་བརྒྱན་པར་གྱུར་པའི་ཞབས་འབྲིང་རྣམས་ཀྱིས་རྣམ་པར་བརྒྱན་ཅིང་རོལ་
པའི་གཟུགས་དཔེ་མེད་པ་དང་ལྡན་པའི་ལྷའི་བུ་མོའི་ཚོགས་རྣམས་ཀྱིས་ཡོངས་སུ་བསྐོར་ནས། ཉེ་བའི་ཁོར་ཀུན་ནས་རྩེ་དགའ་བར་གྱུར་པས་རྣམ་པར་རྒྱུ་བར་བྱེད། རང་གི་འོད་དང་ལྡན་པའི་ལྷའི་བུ་མོ་རྣམས་ཀྱིས་

66-1-3a

ཡོངས་སུ་བསྐོར་ནས། དེ་ལྷ་རྫས་ཀྱི་འདོད་པའི་ཡོན་ཏན་གྱི་ཡུལ་ལྔ་ལ་རྣམ་པར་ཆགས་པས། གཟུགས་གང་དང་གང་ཉིད་མཐོང་བར་གྱུར་པ་དེ་དང་དེ་ཉིད་ཀྱང་རྣམ་པར་རྟོག་པ་དུ་མ་དང་ལྡན་པའི་ལྷ་རྫས་སྙིང་
འགུལ་བར་བྱེད་པ་དཔེ་མེད་པའི་བདེ་བ་རྣམས་ལེགས་པར་སྟོན་པར་བྱེད་པ་མཐོང་ངོ་། །ཇི་ལྟར་འདོད་པ་བཞིན་དུ་སྤྱོད་པར་བྱེད་པ་དེ་ལྟར་མིག་གིས་གཟུགས་རྣམས་མཐོང་བར་འགྱུར་རོ། །དེ་བཞིན་དུ་རྣ་བས་སྒྲ་རྣམས་
ཐོས་པར་གྱུར་པ་ཡང་། ཐོས་ནས་བདེ་བར་འགྱུར་བ་དང་ཇི་ལྟར་འདོད་པ་བཞིན་དུ་རྣམ་པ་དུ་མར་རྣམ་པ་སྣ་ཚོགས་པར་གྱུར་པ་དང་ཀུན་དུ་རྟོག་པ་རྣམས་སྐྱེད་པར་བྱེད་པ་དང་མཆོག་ཏུ་གྱུར་པའི་ལྷའི་བུ་མོ་རྣམས་ཀྱིས་ལེགས་
པར་བསྐྱེད་པའི་རྒོད་པ་དང་འགྱིང་བག་དང་རྩེད་མོ་རྩེ་བར་བྱེད་པ་རྣམས་སོ། །དེ་བཞིན་དུ་སྣས་ཀྱང་ལྷ་རྫས་ཀྱི་དཔེ་མེད་པ་དང་ལྡན་པའི་དྲི་རྣམས་མནོཾ་པར་བྱེད་དེ། རྣམ་པར་རྟོག་པ་དུ་མར་དཔེ་མེད་པར་གྱུར་པ་རྣམས་ལ་འདི་ལྟ་སྟེ། 
པད་མའི་རྫིང་བུ་རྣམས་ཀྱི་དྲི་ཤིན་དུ་ཞིམ་པར་གྱུར་པའི་དྲི་རྣམས་མངོན་པར་འདོད་པའི་རླུང་གིས་ལེགས་པར་བཏབ་པ་རྣམས་ལ་དང་། དྲི་གཞན་ཡང་དེ་ཁོ་ན་བཞིན་དུ་དྲི་ཤིན་ཏུ་ཞིམ་པ་དཔེ་མེད་པར་གྱུར་པའི་ལྷ་རྫས་རྣམ་པ་
དུ་མ་རྣམས་མངོན་པར་འདོད་པའི་རླུང་གིས་རི་དང་སྨན་ལྗོངས་རྣམས་དང་བང་རིམ་རྣམས་དང་། རི་ཁྲོད་རྣམས་དང་ནགས་ཀྱི་ནང་རྣམས་ནས་བཏབ་པར་གྱུར་པའི་ཤིན་དུ་དྲི་ཞིམ་པ་དང་ལྡན་པའི་མེ་ཏོག་དུ་མ་དྲི་བླ་
ལྷག་པར་གྱུར་པ་རྣམས་སྣོམ་པར་བྱེད་དོ། །དེ་བཞིན་དུ་ལྕེས་ཀྱང་རོ་རྣམས་མྱོང་བར་བྱེད་དོ། །དེ་ནི་འདོད་པའི་བདེ་བ་རྣམས་ཐམས་ཅད་ཕུན་སུམ་ཚོགས་པ་ཡིན་ཏེ། ལྷ་རྫས་ཀྱི་རོ་རྣམ་པ་དུ་མར་གྱུར་པ་
སྐྱུར་བ་དང་། ལན་ཚྭ་དང་ཚ་བ་དང་ཁ་བ་དང་བསྐ་བ་དང་རྩུབ་པ་རྣམས་དང་རྣམ་པ་དུ་མ་རྣམས་དང་དཔེ་མེད་པར་གྱུར་པ་རྣམས་དང་། རྫས་དུ་མ་རྣམས་ལས་སྐྱེས་པ་དང་ཇི་ལྟ་བ་ཉིད་དུ་ཇི་ལྟར་འདོད་པའི་དུས་སུ་

66-1-3b

མཁོ་བ་རྣམས་དེ་དག་གིས་ཟ་བར་བྱེད་དོ། །དེ་ལྟར་ལྕེས་རོ་རྣམས་མྱོང་བར་བྱེད་དོ། །དེ་བཞིན་དུ་ལུས་ཀྱིས་ཀྱང་རེག་བྱ་རྣམ་པ་དུ་མ་རྣམས་ལ་རེག་པར་བྱེད་པ་ནི། བདེ་བའི་རེག་པར་བྱ་བ་བརྒྱད་དང་ལྡན་པར་གྱུར་པ་
རྣམས་ལ་བསིལ་བར་གྱུར་པ་དང་། དྲོ་བ་དང་དྲོ་བར་གྱུར་པ་དང་བསིལ་བའི་རེག་བྱ་རྣམས་དང་ལྡན་པ་དང་དེ་བཞིན་དུ་འཇམ་པ་དང་ཕྲ་བ་དང་། ཚགས་དམ་པ་དང་མ་བཏགས་པ་དང་རྣམས་ཏེ་ཁ་དོག་དུ་མ་དང་ལྡན་པའི་གོས་
རྣམས་སོ། །དེ་བཞིན་དུ་མཐོ་རིས་ཀྱི་རྗེས་སུ་མཐུན་པའི་རྒྱན་གྱིས་རྣམ་པ་རྣམས་ཀྱང་སྟེ། རིན་པོ་ཆེ་དུ་མའི་འོད་ཟེར་སྣང་བ་བྱེད་པ་དང་ལྡན་པ་རྣམས་ལ་དཔག་ཚད་བཅུ་དང་ཉི་ཤུ་དང་སུམ་བཅུ་དང་བཞི་བཅུ་དང་ལྔ་བཅུ་
དང་དྲུག་བཅུ་དང་དེ་བཞིན་དུ་དཔག་ཚད་བརྒྱའི་བར་དུ་འོད་དང་ལྡན་པའི་ནོར་བུ་རྣམས་ཀྱི་རེག་བྱ་རྣམས་ཀྱང་ཉེ་བར་ལོངས་སྤྱོད་པར་བྱེད་དོ། །དེ་བཞིན་དུ་རྒྱན་གྱི་རྣམ་པར་གྱུར་པའི་མེ་ཏོག་བདེ་བའི་རེག་བྱ་དང་དྲི་དང་ལེགས་
པར་འབྲེལ་པས་བསྒོས་པར་གྱུར་པ་རྣམ་པ་སྣ་ཚོགས་པ་རྣམས་ལྷ་རྫས་ཀྱི་ནགས་ཀྱི་གསེབ་ནས་རླུང་གིས་བདས་པའི་བདེ་བའི་རེག་བྱ་དང་ལྡན་པ་རྣམས་ཀྱི་རེག་བྱ་ལ་རྗེས་སུ་ལོངས་སྤྱོད་པར་བྱེད་པ་སྟེ། ལུས་ཀྱི་ལེགས་པར་
བྱས་པའི་ལས་ཀྱི་མཐའ་རྣམས་ལ་སྤྱད་པར་གྱུར་པ། རང་གིས་ལེགས་པར་བྱས་པའི་ལས་རྣམས་ཀྱིས་འདོད་པ་སྡུག་པ་ཡིད་དུ་འོང་བ་འཕགས་པ་དགྱེས་པ་ཡིན་གྱི། མ་བྱས་པ་རྣམས་ཀུན་དུ་འོང་བར་འགྱུར་བ་
ནི་མ་ཡིན་ནོ། །འདོད་རྒྱལ་བ་རྣམས་ནི་མ་ཡིན་ནོ། །བྱས་པ་ཆུད་ཟ་བར་འགྱུར་བ་ནི་མ་ཡིན་ནོ། །རྒྱུ་མེད་པ་ནི་མ་ཡིན་ནོ། །གཞན་བག་མེད་པ་རྣམས་ཀྱིས་བྱས་པ་ནི་མ་ཡིན་ནོ། །ལས་དང་འབྲས་བུ་རྣམས་དང་ཆ་
མི་འདྲ་བར་གྱུར་པའི་རྒྱུ་རྐྱེན་རྣམས་ཀུན་དུ་ཚོགས་པ་ནི་ཡིན་ནོ། །འདི་དག་ནི་འབྲས་བུ་དང་བཅས་པར་སྨིན་པར་ལེགས་པར་མཐོང་བ་རྣམས་དང་ཆ་འདྲ་བའི་ལས་རྣམས་ཀྱི་འབྲས་བུ་ལ་ཉེ་བར་ལོངས་སྤྱོད་པ་ཡིན་ནོ། །

66-1-4a

ཚུལ་ཁྲིམས་ལ་སྤྱོད་པར་གྱུར་པ་དེ་དེ་བཞིན་དུ་ཡིད་ཀྱིས་ཀྱང་གང་འདོད་པའི་འདོད་པ་རྣམས་ལ་སྟེ། འདོད་པའི་ཡིད་དུ་འོང་བའི་ལྷ་རྫས་ཀྱི་གཟུགས་མང་ཞིང་རྒྱ་ཆེན་པོར་གྱུར་པ་རྣམས་དང་། ཕྲ་བ་རྣམས་དང་
བར་མ་རྣམས་དང་ཀུན་ནས་འཕེལ་བར་འགྱུར་བའི་དུས་སུ་བྱུང་བ་རྣམས་དང་། དེ་བཞིན་དུ་མར་འབྲི་བའི་དུས་སུ་དང་བར་མའི་དུས་སུ་ཐོབ་པ་རྣམས་ལོངས་སྤྱོད་པར་བྱེད་པ་ན། དེ་ལྟར་ཡང་སེམས་བསྐྱེད་པ་ཉིད་ཀྱིས་མངོན་
པར་འདོད་པར་གྱུར་པའི་ཉེ་བར་ལོངས་སྤྱད་པར་བྱ་བ་རྣམ་པ་དུ་མའི་བདེ་བའི་ཆོས་རྣམས་ལ་མངོན་པར་འཚལ་བས་ཉེ་བར་ལོངས་སྤྱོད་པར་བྱེད་དོ། །ཚུལ་ཁྲིམས་ལ་སྤྱད་པའི་སྐྱེས་བུ་དེ་དག་རྣམས་དེ་ལྟར་ཁྱད་པར་དུ་ཡང་
ལྷ་རྣམས་ནི་ཡུལ་དྲུག་གི་མེ་ལ་རྣམ་པར་ཆགས་པར་གྱུར་ཅིང་། འདོད་པའི་ཆུ་བོ་རྣམས་ཀྱིས་ཁྱེར་བར་གྱུར་པས་དེ་དག་ནགས་ནས་ནགས་རྣམས་དང་རིའི་རྩེ་མོ་ནས་རིའི་རྩེ་མོ་རྣམས་ལྷ་རྫས་ཀྱི་རིན་པོ་ཆེའི་ཁམས་རྣམས་ཀྱི་
འབྱུང་ཁུངས་དང་ལྡན་པ་རྣམས་ནས་རིན་པོ་ཆེའི་ཁམས་རྣམས་ཀྱི་འབྱུང་ཁུངས་དང་ལྡན་པ་རྣམས་སུ་ཀུན་དུ་ཉེ་བར་འགྲོ་བར་བྱེད་ཅིང་། ནགས་དང་ཉེ་བའི་ནགས་ཀྱི་ཚལ་རྣམས་དང་། འབབ་ཆུའི་སྒྲ་རྣམས་ཀུན་ནས་
ལགས་པར་གྲག་པ་དང་ཁ་དོག་དང་དབྱིབས་དང་རིགས་དང་། སྡེ་ཚན་མི་འདྲ་བ་བརྒྱ་ཕྲག་གི་བྱ་རྣམས་ཀྱི་སྒྲ་སྙན་པར་འབྱིན་པས་ཡིད་དགའ་བར་གྱུར་པ་རྣ་གཏད་པས་དབྱངས་ཀྱིས་ཀུན་ནས་འཁྲིད་པ་དང་རྒྱན་དང་ལེགས་པར་
ལྡན་པའི་དགའ་བས་ཡིད་འཕྲོག་པར་གྱུར་པ་རྣམས་དེ་ལྟར་དེ་ལེགས་པར་བྱས་པའི་ལས་ཀྱི་མཐའ་ལ་སྤྱད་པ་རྣམས་དེ་ལེགས་པར་ཉེ་བར་འགྲོའོ། །མང་པོ་རྣམས་ཉིད་ཀྱང་གཟུགས་དང་ཆ་བྱད་དང་། རྒྱན་དང་ལེགས་པར་
གནས་པ་རྣམས་ཀྱི་ཡོན་ཏན་དུ་མ་རྣམས་དང་ལྡན་པའི་ཆ་བྱད་ཅན་རྣམས་བསྒྲིན་པ་དང་འགྱིང་བས་འདོད་པའི་མེ་རྣམས་ལེགས་པར་སྐྱེད་པའི་བྱེད་པ་རྣམས་ཀྱིས་ཡོངས་སུ་བསྐོར་ནས་གནས་རྣམ་པ་དུ་མ་རྣམས་ཉེ་བར་སྟོན་པར་

66-1-4b

བྱེད་དོ། །ལྷ་རྫས་ཀྱི་ཕྲེང་བ་མཆོག་རྣམས་ཀྱིས་བརྒྱན་པ་དང་། མེ་ཏོག་གི་ཕྲེང་བ་དང་ཕྱེ་མ་དང་བྱུག་པ་རྣམས་ཀྱིས་རྣམ་པར་བརྒྱན་པས་གསེར་གྱི་རང་བཞིན་དང་བཻ་དཱུརྱ་དང་གསེར་འབར་བའི་རང་བཞིན་གྱི་རྩེ་མོ་རྣམས་ལ་སྟེན་པར་བྱེད་དོ། 
སེམས་བསྐྱེད་པ་དང་ལྷན་ཅིག་ཉིད་དུ་འདོད་པ་དུ་མ་རྣམས་ཉེ་བར་བསྟེན་ནས། ལྷན་ཅིག་སྤྱོད་པ་རྣམས་དང་བཅས་པས། གལ་ཏེ་ཤེད་ན་ཉེ་བའི་ནགས་གཞན་རྣམས་ཉེ་བར་སྟེན་པར་བྱེད་དོ། །མཉམ་པ་དང་མི་མཉམ་པའི་སའི་ཆ་
ཤས་རྣམས་དགའ་བར་གྱུར་པའི་གསེར་དང་བཻ་དཱུརྱའི་རང་བཞིན་དང་གསེར་བཟང་པོའི་རང་བཞིན་དང་དངུལ་དང་ཨིན་དྲ་ནཱི་ལ་དང་མུ་ས་རའི་རང་བཞིན་རྣམས་ལ་དྲིལ་བུ་གཡེར་ག་སྒྲ་སྒྲོགས་པའི་དྲ་བའི་སྐད་ཕུན་སུམ་ཚོགས་པས་རྣམ་
པར་བརྒྱན་པའི་སྒྲ་རྣམས་དང་། བྱའི་ཚོགས་རྣམ་པ་སྣ་ཚོགས་པ་རྣམས་ཀྱིས་རྣམ་པར་བརྒྱན་པ་རྣམས་ལ། ལན་བརྒྱ་ཕྲག་རྣམས་སུ་རྣམ་པར་རྒྱུ་བར་བྱེད་པ་གང་གི་ཚེ། བག་མེད་པས་བག་མེད་པར་རྣམ་པར་སྤྱོད་པར་བྱེད་
པ་དེའི་ཚེ། དེ་དག་རྣམས་མངོན་པར་ཀུན་དུ་མཐོང་ནས་བག་ཡོད་པ་ཞེས་བྱ་བའི་བྱ་རྗེས་སུ་འདོམས་པར་བྱེད་པའི་ཚིགས་སུ་བཅད་པ་འཆད་པ་ཇི་ལྟར། གསར་པའི་ལས་ཀྱང་ཟད་འགྱུར་ལ། །རྙིངས་པ་ཡོངས་སུ་སྤྱོད་པ་ཡིན། །
དེ་ཟད་པས་ནི་རྟག་ཏུ་ལྷུང་། །མཐོ་རིས་ལྷ་ཡི་ཆོས་འདི་དག །རྟག་ཏུ་ལས་ཀྱིས་ལྷུང་བ་ཡིན། །དེ་བཞིན་འཚོ་བ་སྐད་ཅིག་སྟེ། །འཆི་བདག་མྱུར་བར་འོང་བ་ཡང་། །བྱས་པ་རྣམས་ཀྱིས་རིག་པ་འང་མིན། །ཁྱོད་ཀྱིས་འདི་མིན་འདི་
ཡང་ཁྱོད། །མིན་ཡང་ཆགས་པས་མ་ཤེས་སོ། །དུས་འགྲོ་རྟག་པར་ཤིན་དུ་མྱུར། ། ལྷུང་འགྱུར་དེ་ཡང་ཉེ་བར་འོང་། །ཐོབ་པ་དང་ནི་འཇིག་པའི་རྒྱུ། །ཡུལ་དུ་མ་ལ་ཆགས་པ་ཡིན། །གནོད་དང་བཅས་པ་དེ་ལ་ཁྱོད། །བློ་ངན་རྟག་ཏུ་
ཅི་སྟེ་འགྲོ། །གང་ཕྱིར་ལེགས་པར་བྱས་པའི་ལས། །དེ་ལྟར་ཁྱོད་ཀྱིས་བདེ་ལོངས་སྤྱད། །ཡང་ནི་ཅི་ཕྱིར་ལེགས་བྱས་པའི། །ལས་རྣམས་དག་ནི་ཅིས་མི་བྱེད། །ཡུལ་རྣམས་ལ་ནི་གང་ཆགས་པ། །དེ་ནི་སྲིད་པའི་རྒྱ་མཚོར་ནུབ། །

66-1-5a

གང་ཡང་དེས་ལས་རྣམ་གྲོལ་བ། །དེ་ནི་སྡུག་བསྔལ་མཚོ་ལས་གྲོལ། །ཡུལ་གྱི་རླབས་ཀྱི་ཤུགས་པོ་ཆེ། །སྲིད་པའི་ཆུ་ཀླུང་ལས་ཀུན་བྱུང་། །མྱང་འདས་གྲོང་ཁྱེར་འགྲོ་བ་ཡིན། །དཔའ་བོས་དེ་ནི་སྤང་བར་གྱིས། །
བརྟན་པ་དེ་ཉིད་ཚོལ་རྣམས་ཀྱིས། །ཡུལ་རྣམས་ངེས་པར་བཟློག་པར་གྱིས། །དེས་བསྐྱེད་ཡུལ་གྱི་སྲིད་པ་རྣམས། །སྲིད་པ་གསུམ་དུ་འཇུག་ཅིང་འགྲོ། །ཡུལ་རྣམས་ངེས་པར་ཟློག་པར་གྱིས། །བདག་ཅག་དེ་ཡིད་བྱས་ལ་རེ། །
ཀིམ་པ་ཀ་དང་འདྲ་བ་དང་། །ཕྱི་ནས་རྣམ་སྨིན་རྩུབ་པ་ཡིན། །མི་སེམས་བདེ་ལ་ཀུན་དུ་ཆགས། །ཡུལ་རྣམས་ལ་ནི་རྒྱུག་པར་བྱེད། །དེས་ནི་མི་དགེ་ལས་རྣམས་སོག །བློ་གྲོས་ངན་པས་གང་རྒྱུག་པའི། །ཡོ་བ་མི་བཟད་རྩུབ་
པ་ལས། །དེ་ཕྱིར་སེམས་ནི་རྟག་ཏུ་སྲུངས། །རྟག་ཏུ་ཡུལ་ལ་ཀུན་ཆགས་པ། །སྲིད་པའི་ཡུལ་གྱིས་གཡོགས་པ་ཡི། །ཡུལ་རྣམས་ལ་ནི་རྒྱུག་བྱེད་པ། །བྲེལ་ཕོངས་དེ་དག་མ་གོའོ། །ཕྱི་ནས་བྲེལ་ཕོངས་ཐོབ་པས་ཀྱང་། །ལས་
ཀྱི་འབྲས་བུ་རིག་པར་གྱུར། །ཤེས་ནས་ཀྱང་ནི་ལས་འདི་དང་། །རྟག་ཏུ་ཡུལ་རྣམས་སྐྱོན་དེ་དང་། །འགྲོ་བ་མ་ལུས་བཅིངས་གྱུར་པའི། །སྐྱོན་གཞན་ཡང་ནི་རྟག་ཏུ་སྤོངས། །དེ་ལྟར་བག་ཡོད་པའི་བྱ་དེས་བག་མེད་པས་བག་
མེད་པར་རྣམ་པར་རྒྱུ་བའི་ལྷ་དེ་དག་རྣམས་ལ་ལེགས་པར་སྒྲོགས་སོ། ། དེ་གཏན་ཚིགས་ཀྱིས་བརྗོད་ཀྱང་དེ་དག་རྣམས་ཀུན་ནས་རྟོགས་པ་ཡང་མ་ཡིན་ཏེ། ཡུལ་ལ་ཀུན་དུ་འཆུམས་པར་གྱུར་པས་དེས་དེ་དག་ལ་རྩིས་བགྲང་མེད་
པར་སླར་ཡང་དེ་ཁོ་ན་བཞིན་དུ་ཡུལ་རྣམས་ལ་རྣམ་པར་ཆགས་པར་གྱུར་པའི་བློས་འཁོར་བའི་དགོན་པ་ལྟ་བུར་གྱུར་པ་དང་། ཤིན་དུ་སྡུག་བསྔལ་སྐྱེད་པར་བྱེད་པའི་རྒྱུར་བྱེད་པ་དེ་ལྟར་སེམས་དང་འགྲོ་བ་དང་རབ་ཏུ་སྤྱོད་པར་
བྱེད་པ། རྟག་ཏུ་ཡང་ཡུལ་གྱི་གནས་སྐབས་རྣམས་ལ་འགྲོས་བྱེད་པར་མཚུངས་པའི་གནས་སྐབས་རྣམས་རྗེས་སུ་ཆགས་པར་བྱེད་པ་གནས་པ་མེད་པའི་འགྲོས་དང་། རབ་ཏུ་རྒྱུ་བས་ཀུན་དུ་གནས་པར་བྱེད་པ། རྟག་ཏུ་ཡང་

66-1-5b

སྐྱེས་པ་གཅིག་ཅིག་ཚོལ་བ་ལ་ཞུགས་པ་དག་དང་། མཚོན་ཆ་དང་མེ་དང་གཡང་ས་རྣམས་དང་། ཡིད་མཚུངས་པ་མི་རྣམས་ཐམས་ཅད་སྲེག་པར་བྱེད་པའི་ནགས་ཀྱི་མེར་གྱུར་པ་སྡུག་བསྔལ་རྣམས་ཐམས་ཅད་ཀྱི་རྒྱུ་
མཚན་དུ་གྱུར་པའི་ལྷའི་བུ་མོ་དེ་དག་རྣམས་ཉིད་དང་དེ་ལྷན་ཅིག་ཏུ་རྩེ་དགའ་བར་བྱེད་དོ། །གང་ཞིག་བདེ་བ་རྣམས་ཐམས་ཅད་འདོད་པ་དང་བློ་དང་ལྡན་པ་དང་བདེ་བ་རྣམས་རྗེས་སུ་ཚོལ་བར་བྱེད་པ་དང་འཁོར་བའི་འཇིགས་པ་
རྣམས་ཀྱིས་འཇིགས་པ་རྣམས་ནི་འདི་དག་རྣམས་ཀྱི་དྲུང་ན་གནས་པ་ནི་འཇིགས་པ་ཡིན་པར་བྱའོ། །ཐམས་ཅད་ཀྱིས་ཀྱང་བརྩོན་པར་བྲོས་པར་བྱའོ། །དེ་དག་ཉིད་ལ་ཀུན་དུ་རྨོངས་པའི་ཡིད་ཅན་རྣམས་འདོད་ཆགས་
ཀྱིས་དམུས་ལོང་དུ་བྱས་པའི་ཡིད་ཅན་རྣམས་ནི་དེ་དག་རྣམས་ཀྱི་མཐུ་སྟོབས་ལས་བྱུང་བའི་སྡུག་བསྔལ་རྣམས་ཤེས་ཀྱང་དེ་དག་རྣམས་ཉིད་དང་ལྷན་ཅིག་ཏུ་དགའ་བར་བྱེད་དོ། །བྱིས་པ་རྣམས་ཐམས་ཅད་ནི་འཁོར་བའི་
འདམ་རྫབ་དུ་གྱུར་པའི་མཚན་ཉིད་ཀྱིས་ལོང་བ་འདོད་ཆགས་ཞེ་སྡང་གཏི་མུག་རྣམས་ཀྱིས་ལོང་བར་གྱུར་པའི་འཆི་བདག་རྣམས་ཐམས་ཅད་དང་རྩེ་དགའོ། །དེ་ལྟར་དེ་དག་རྣམས་དང་དེ་ཡང་ལྷན་ཅིག་ཏུ་སྤྱོད་པར་བྱེད་པ་ལ་
ཡང་དེ་བཞིན་དུ་ཡང་མི་རྩེའོ། །གང་རྣམ་པ་དུ་མས་ཕན་པར་གྱུར་པ་དེ་ཁོ་ན་ཉིད་དང་། ངན་སོང་ལས་ཟློག་པར་བྱེད་པའི་ཚིག་ཡིན་ཡང་དེ་ཁོ་ན་བཞིན་དུ་དེའི་སེམས་ཡོངས་སུ་བསླུས་པས། དེ་ཁོ་ན་ཉིད་དེ་
མངོན་པར་མ་ཤེས་པས་ནགས་དང་ཉེ་བའི་ནགས་དེ་དག་རྣམས་སུ་དགའོ། །སྲེད་པའི་ཞགས་པ་ལེགས་པར་བསྐྱེད་པ་དེ་དག་རྣམས་ཉིད་དང་ལྷན་ཅིག་ཏུ་སྟེ། འཕགས་པ་མ་ཡིན་པ་རྣམས་དང་ལྷན་ཅིག་ཏུ་
དགའ་བར་བྱེད་དོ། །དེ་གསེར་དང་བཻ་དཱུརྱ་དང་ཨིན་དྲ་ནཱི་ལ་དང་ནཱི་ལ་ཆེན་པོ་དང་མུ་སཱ་ར་གལྦ་བ་ལ་སོགས་པའི་རིན་པོ་ཆེ་རྣམས་ཀྱིས་ཡོངས་སུ་གང་བ་རྣམས་ལེགས་པར་རྣམ་པར་ཕྱེ་བའི་ས་གཞིའི་ཆ་ཤས་རྣམ་པ་དུ་

66-1-6a

མ་རྣམས་ཀུན་ལ་རྣམ་པར་རྒྱུ་བར་གྱུར་པ་ན། བརྒྱ་ལ་ཞིག་ན་ཆེན་པོར་གྱུར་པའི་སྐད་ཀྱི་གདངས་ཐོས་ན་བདེ་ཞིང་ཡིད་དགའ་བར་བྱེད་པ། ལྷ་རྫས་ཀྱི་ཡོན་ཏན་རྣམས་དང་ལྡན་པ་ཐོས་པར་འགྱུར་རོ། །དེས་
ཐོས་ནས་འདི་སྙམ་དུ་སེམས་ཏེ། སྒྲ་འདི་དག་གང་གི་ཡིན་སྙམ་ནས། དེ་ངོ་མཚར་བར་གྱུར་པའི་ཡིད་ཀྱིས་ལྷན་ཅིག་རྗེས་སུ་སྤྱོད་པའི་འཁོར་དང་བཅས་ནས་གང་ན་སྒྲ་འདི་ཡོད་པ་དེར་ལེགས་པར་ཉེ་བར་འགྲོའོ། །དེ་ནས་
འགྲོ་བར་བྱེད་པ་ཉིད་ན་གང་ན་ཤིན་དུ་ངར་ཆེ་བར་གྱུར་པ་ཡི་གེ་རྣམས་གསལ་བར་གྱུར་པ་གླུའི་སྒྲ་དེ་དང་དེ་དག་རྣམས་ཉིད་ཤིན་དུ་སྙན་པའི་མཆོག་ཏུ་ཕྱིན་པ་ཡན་ལག་ལྔ་དང་ལྡན་པའི་རྔ་སྒྲ་རྣམས་ཀྱིས་ཕུན་སུམ་ཚོགས་
པ་དེ་དག་རྣམས་ནི་ཤིན་དུ་བར་ཡང་ཡོན་ཏན་རྣམས་ཕུན་སུམ་ཚོགས་པ་དཔེ་མེད་པར་གྱུར་པའི་སྔར་ཐོས་མ་མྱོང་བའི་སྒྲ་འདི་དག་དེ་དག་ཏུ་ཐོས་པར་གྱུར་ཏོ། །ལྷ་གསར་དུ་སྐྱེས་པ་དེ་ལྷན་ཅིག་སྤྱོད་པ་རྣམས་དང་བཅས་
ནས་ནགས་དེར་ཉེ་བར་རྒྱུག་སྟེ། རིན་པོ་ཆེའི་རང་བཞིན་གྱི་ཤིང་རྣམ་པ་དུ་མ་རྣམས་ཕུན་སུམ་ཚོགས་པ། དགའ་བ་ཆེན་པོའི་ནགས་ཚལ་ཞེས་བྱ་བ་རྒྱ་ཁྱོན་དུ་དཔག་ཚད་བརྒྱ་པ་ཞེང་དུ་དཔག་ཚད་ཉི་ཤུ་པ་ནགས་དེ་
ན་ནི་ནགས་ཆེན་པོར་གྱུར་པས། ཤིང་རྣམས་ཕུན་སུམ་ཚོགས་པ་ཡོན་ཏན་ཆེན་པོ་དང་ལྡན་པ་བརྒྱ་ཕྲག་དུ་མ་རྣམས་དང་སྟོང་ཕྲག་དུ་མ་རྣམས་ཀྱི་ལྷའི་ཚོགས་རྣམས་གནས་པ་ཡང་གླུ་ལེན་པར་བྱེད་པ་དང་། རྩེ་དགའ་བར་
བྱེད་པ་དང་གར་ཡང་བྱེད་དོ། །དེ་ནས་ལྷ་གསར་དུ་སྐྱེས་པ་དེས་ནགས་དེ་མཐོང་བར་གྱུར་ནས་ཞུགས་པར་གྱུར་པ་དང་། ནགས་རྣམས་ཐམས་ཅད་གསེར་གྱི་རང་བཞིན་གྱི་ཤིང་བཻ་དཱུརྱའི་རང་བཞིན་གྱི་ལོ་མ་ལྷའི་རྫས་ལས་
རབ་ཏུ་བྱུང་བ་དྲི་དང་མེ་ཏོག་རྣམས་སོ། །དེ་དག་དང་འདྲ་བའི་ཡོན་ཏན་གྱི་བདེ་བ་རྣམས་དང་། མདོག་དང་དབྱིབས་རྣམ་པ་དུ་མར་གྱུར་པ་དེ་དག་རྣམས་དེས་ཡང་དག་པར་མཐོང་ནས་གཞན་ཡང་གཞན་རྣམས་ལ་ལྟ་བར་བྱེད་དེ། 

66-1-6b

ཤིང་བཻ་དཱུརྱའི་རང་བཞིན་ལ་ཨིན་དྲ་ནཱི་ལའི་ཡལ་ག་རྣམས་དང་གསེར་གྱི་རང་བཞིན་གྱི་འདབ་མ་རྣམས་དང་དངུལ་གྱི་ཁ་དོག་གི་འབྲས་བུ་རབ་ཏུ་སྨིན་པར་གྱུར་པ་རྣམས་ལྷ་རྫས་ཀྱི་རོའི་ཡོན་ཏན་རྣམས་ཕུན་སུམ་ཚོགས་པའོ། །
ཨིན་དྲ་ནཱི་ལའི་མདོག་གི་ཡལ་ག་རྣམས་ཀྱིས་མངོན་པར་བསྐོར་བ་ལ་རྣམ་པ་སྣ་ཚོགས་པའི་ཁ་དོག་དང་ལྡན་པའི་མེ་ཏོག་རྣམས་ཀྱིས་མངོན་པར་བསྐོར་བ་རྣམས་དང་། ཤིང་གཞན་དག་རྣམས་ཀྱང་མཐོང་བ་ལ་འདི་ལྟ་སྟེ། 
ཨིན་དྲ་ནཱི་ལའི་རྩ་བ་གསེར་གྱི་མདོག་གི་ཡལ་ག་བཻ་དཱུརྱའི་རང་བཞིན་གྱི་འདབ་མ་དང་ལྡན་པ་རྣམས་ལ་མདོག་དང་དབྱིབས་རྣམ་པ་དུ་མ་རྣམས་དང་ལྡན་པའི་བུང་བའི་ཚོགས་རྣམས་ཀྱིས་ཉེ་བར་མཛེས་པར་གྱུར་པ། ཤིན་
དུ་སྙན་པའི་སྒྲ་རྣམས་ཀྱིས་མིག་འཕྲོག་པར་བྱེད་པ་རྣམས་སོ། །དེ་བཞིན་དུ་ལྷ་གསར་དུ་སྐྱེས་པ་དེས་གཞན་དག་རྣམས་ཀྱང་མཐོང་བ་ལ་ལྷ་རྫས་ཀྱི་མེ་ཏོག་ཁ་བྱེ་བ་དང་མིག་ཟུམ་པ་རྣམས་ཀྱང་མཐོང་ན་དགའ་
བར་འགྱུར་བའ་རིན་པོ་ཆེ་བདུན་གྱི་རང་བཞིན་རྣམ་པར་འདྲེས་པའི་ཆ་ཤས་རབ་ཏུ་རྣམ་པར་ཕྱེ་བ་མཆོག་ཏུ་ངོ་མཚར་བར་གྱུར་པ། སྒྲའི་རྣམ་པ་ཐོས་པར་དགའ་བ་རྣམས་ཀྱིས་ཡིད་མངོན་པར་དགའ་བར་བྱེད་པ་རྣམས་སོ། །
ད་བཞིན་དུ་གཞན་དག་འཁྲིས་ཤིང་གི་ཁང་པ་རྣམས་གསེར་གྱི་འཁྲིས་ཤིང་རྣམས་ཀྱི་ལོ་མ་འགུལ་བ་རྣམས་ལ་འདབ་མ་རྣམས་ལེགས་པར་ཁྱབ་པར་གྱུར་པ་བུང་བའི་ཚོགས་ཀྱི་ཁྱད་པར་བརྒྱ་སྟོང་རྣམས་ཀྱི་སྒྲའི་བྱེ་བྲག་
སྙན་པར་དགའ་བ་རྣམས་མཐོང་ངོ་། །དེ་བཞིན་དུ་འཁྲིས་ཤིང་གི་ཁང་པ་གཞན་དག་ཀྱང་བཻ་དཱུརྱའི་རང་བཞིན་གྱི་ཡལ་ག་རྣམས་ཀྱིས་རྣམ་པར་བརྒྱན་པ། ཨིན་དྲ་ནཱི་ལ་ཆེན་པོའི་འདབ་མ་རྣམས་ཀྱིས་ལེགས་པར་
གཡོགས་པ་རབ་ཀྱི་མཆོག་གི་ནོར་བུ་མདོག་རྣམ་པར་བཀྲ་བ་རྣམས་ཀྱིས་བརྒྱན་པ་ལ་བྱ་རྣམས་ཀྱིས་ཀུན་དུ་སྟེན་པར་བྱེད་པ་རྣམས་ནགས་དེ་འཇམ་པ་མནན་ན་ནེམ་ལ་བཏག་ན་འཕར་བའི་ས་གཞིའི་ཆ་ཤས་ལེགས་

66-1-7a

པར་ཕྱེ་བ་རྣམས་དང་། ལྷ་རྫས་ཀྱི་དྲི་རྣམས་ཀྱིས་བསྒོས་པ་ལྷའི་བུ་མོའི་ཚོགས་རྣམས་དང་བཅས་པ་མཐོང་བར་གྱུར་ཏོ། །དེ་བཞིན་དུ་གནས་གཞན་དག་རྣམས་ཀྱང་མཐོང་བར་གྱུར་པ་ལ་ལྷ་གསར་
དུ་སྐྱེས་པ་དེས། གང་འགའ་ཞིག་སྔར་མ་མཐོང་བ་སའི་རྣམ་པའི་ཆ་ཀུན་ཡང་ཡོངས་སུ་ཚོགས་པ་བཞིན་དུ་ལྷ་རྫས་ཀྱི་ཁ་དོག་གི་རིན་པོ་ཆེ་བདུན་གྱི་རང་བཞིན་རྣམས་ཀྱིས་ལེགས་པར་རྣམ་པར་གཡོགས་པ། ཤིན་དུ་
དགའ་བ་དང་ལེགས་པར་མཉམ་པའི་ས་ཕྱོགས་ཀྱི་མཆོག་དུ་དགའ་བ་རྣམས་ཕྱི་བཞིན་རྗེས་སུ་འབྲང་བའི་འཁོར་དང་བཅས་པ་རྣམས་མཆོག་ཏུ་ངོ་མཚར་བས་རྣམ་པར་གཡེངས་པའི་མིག་གིས་མཐོང་བར་འགྱུར་རོ། །ནགས་
དེར་ལྷ་དེས་གང་དག་ཁོ་ན་མཐོང་བར་གྱུར་པ་དེ་དག་ཁོ་ན་འདོད་པ་སྡུག་པ་ཡིད་དུ་འོང་བ་མཐོང་བར་འགྱུར་རོ། །གང་དག་ཁོ་ན་ཐོས་པ་དེ་དག་ཉིད་འདོད་པ་སྡུག་པ་ཡིད་དུ་འོང་བ་ཡིད་མངོན་པར་དགའ་བ་རྣམས་ཐོས་པར་འགྱུར་
རོ། །དེས་གང་དང་གང་ཉིད་སྣོཾ་པར་བྱེད་པ་ན་དེ་དང་དེ་ཉིད་འདོད་པ་དགའ་བ་ཡིད་དུ་འོང་བ་རྣམས་སྣོཾ་པར་བྱེད་དོ། །རྣམ་པ་དུ་མ་དེ་དག་རྣམས་ལས་དེས་གང་ཁོ་ན་སེམས་པར་བྱེད་པ་དེ་དག་ཉིད་འདོད་པ་དགའ་བ་ཡིད་དུ་འོང་བ་རྣམས་
མྱང་བར་བྱེད་པ་ཡིན་ནོ། །རབ་ཀྱི་ཕུལ་གྱི་ལྷ་རྫས་ཀྱི་རོའི་རོ་གཅིག་ཕུན་སུམ་ཚོགས་པ་ལས་ཀྱང་། དེ་གང་ཁོ་ན་ཉན་པར་བྱེད་པ་དེ་དང་དེ་ཉིད་རྣམ་པ་དུ་མར་དགའ་བ་ཡིད་དུ་འོང་བ་རྣམས་ཐོས་པར་འགྱུར་རོ། །དེ་གང་
དང་གང་ལ་རེག་པར་བྱེད་པ་འམ་གང་དང་གང་ཉིད་སེམས་པར་བྱེད་པ་དེ་དང་དེ་ཉིད་འདོད་པ་དགའ་བ་ཡིད་དུ་འོང་བ་རྣམས་འདིའི་སེམས་བསྐྱེད་པ་དང་དུས་གཅིག་ཁོ་ནར་འདི་ལ་ཕུན་སུམ་ཚོགས་པར་འགྱུར་རོ། །དེ་ལྟར་འདི་
འདོད་པ་རྣམས་ཐམས་ཅད་ཀྱི་འཆིང་བས་བཅིངས་ནས་རབ་ཏུ་རྒྱ་ཆེ་བའི་བདེ་བ་དང་ལྡན་པ་ནི། དེ་ལ་ཕྱི་བཞིན་རྗེས་སུ་འགྲོ་བའི་འཁོར་རྣམས་དང་བཅས་ནས་རྣམ་པ་དུ་མ་དང་རྣམ་པར་རྟོག་པ་དུ་མའི་སའི་ཆ་རྣམས་

66-1-7b

ལ་ལྷ་ཡུལ་གྱི་བྱའི་ཚོགས་ཀྱིས་ཁྱད་པར་གྱི་སྒྲ་འདོན་པའི་ནགས་ཚལ་ཆེན་པོ་དེ་ལ་ཞུགས་པར་གྱུར་ཏོ། །དེ་ཞུགས་པར་གྱུར་པ་ན་པད་མའི་རྫིང་བུ་རྣམ་པ་སྣ་ཚོགས་པར་མཛེས་པ་རྣམས་དང་། ས་གཞིའི་ཆ་ཤས་
ལེགས་པར་རྣམ་པར་ཕྱེ་བ་རྣམས་དང་དེ་ལས་ཤིན་དུ་ཆེས་ལྷག་པར་བསྟར་བའི་ས་ཕྱོགས་ཀྱི་ཆ་གཞན་རྣམས་ཉིད་ཀྱང་རབ་ཏུ་མཐོང་ངོ་། །པད་མའི་རྫིང་བུ་དེ་དག་རྣམས་ཀྱི་མཛེས་པར་གྱུར་པ་རྣམས་ནི། འདི་ལྟ་སྟེ་པད་མ་ལ་
ལ་ནི་བཻ་དཱུརྱའི་ཡུ་བ་གསེར་གྱི་འདབ་མ་རྡོ་རྗེའི་རང་བཞིན་གྱི་ཟེ་འབྲུ་དེ་བཞིན་དུ་ཨིན་དྲ་ནཱི་ལའི་རང་བཞིན་གྱི་ལྟེ་བ་རྣམས་ཡིན་ཏེ་ཤིན་དུ་འཇམ་པ་རྣམས་ཡིན་ནོ། །དེ་བཞིན་དུ་གཞན་དག་རྣམས་ཀྱང་བཻ་དཱུརྱའི་འདབ་མ་
དང་། གསེར་གྱི་རང་བཞིན་གྱི་ཡུ་བ་དང་དངུལ་གྱི་རང་བཞིན་གྱི་སྙིང་པོ་དང་། པད་མ་རཱ་གའི་ཟེ་བ་དང་ལྡན་པ་རྣམས་ལ་རྣམ་པ་སྣ་ཚོགས་པའི་བུང་བའི་ཚོགས་རྣམས་ཀྱི་རྣམ་པར་བརྗོད་པའི་སྒྲ་འབྱིན་པར་ཉན་པར་འོས་
པར་སྙན་པས་དགའ་བར་གྱུར་པ་རྣམས་དང་། འདབ་མ་རྣམ་པར་བཀྲ་བར་གྱུར་པའི་པད་མའི་འདབ་མ་རྣམས་ནི་རིན་པོ་ཆེ་བདུན་གྱིས་རྣམ་པར་སྤྲས་པ་དང་། གསེར་གྱི་འདབ་མ་རྣམས་ཀྱང་ལེགས་པར་རྣམ་པར་
ཕྱེ་བ་དང་། ལྟེ་བ་རྣམས་ཀྱང་དེ་ཁོ་ན་བཞིན་དུ་སྣ་ཚོགས་པར་ལེགས་པར་ཕྱེ་བ་རྣམས་ཀྱང་འདི་ལྟ་སྟེ། ཨིན་དྲ་ནཱི་ལ་དང་པད་མ་རཱ་ག་དང་། བཻ་དཱུརྱ་དང་གསེར་དང་མུ་སཱ་ར་གལྦ་དང་། ཤེལ་དང་མ་ཧཱ་ནཱི་ལ་རྣམས་
ཀྱི་ཁ་དོག་སྣ་ཚོགས་པའི་ཁ་དོག་དེ་དག་རྣམས་དང་ཆ་འདྲ་བའི་འོད་ཟེར་གྱིས་ཉེ་བར་གསལ་བར་བྱས་པའི་བདག་ཉིད་ཅན་རྣམས་ཡིན་ནོ། །དེ་ལ་སྙིང་པོ་རྣམས་ཀྱང་འདི་ལྟ་སྟེ་གཅིག་ཇི་ལྟ་བ་བཞིན་དུ་མ་རྣམས་ཀྱང་དེ་
བཞིན་དུ་རྣམ་པ་སྣ་ཚོགས་པའི་ཁ་དོག་དང་དབྱིབས་དང་ལྡན་པའི་ཁ་དོག་ཅན་རྣམས་ཡིན་ནོ། །དེས་པད་མའི་རྫིང་བུ་དེ་དག་རྣམས་མཐོང་བ་དང་། གཟུགས་དེ་དག་རྣམས་མཐོང་བ་དེ་ལྟ་བར་བྱེད་པ་ཉིད་ཀྱིས་ངོམས་

66-1-8a

པར་མི་འགྱུར་རོ། །དེས་ཇི་ལྟ་ཇི་ལྟར་ཡུལ་དེ་དག་རྣམས་མངོན་པར་མཐོང་བར་གྱུར་པ་དེ་ལྟ་དེ་ལྟར་འདིའི་སྲེད་པ་རྣམ་པར་འཕེལ་བར་འགྱུར་ཏེ། མ་ར་ཏ་བ་པར་གྱུར་པའི་མི་བཞིན་དུ་ངོམས་པ་སྐྱེ་
བར་འགྱུར་བ་མ་ཡིན་ནོ། །ཚིམ་པ་མེད་པ་རྣམས་ལ་ཡང་བདེ་བ་ག་ལ་ཡོད། བདེ་བ་དང་བྲལ་བ་རྣམས་ལ་ཡང་ཞི་བ་ག་ལ་ཡོད། སྲེད་པ་དང་བཅས་པ་རྣམས་ལ་ནི་གར་ཡང་ཞི་བ་སྐྱེ་བར་མི་འགྱུར་རོ། །དེ་ཇི་ལྟ་ཇི་ལྟར་
བདེ་བ་རྣམས་ཐོབ་པར་གྱུར་པ་དེ་ལྟ་དེ་ལྟར་འདིའི་སྲེད་པ་རྣམས་རྣམ་པར་འཕེལ་བར་འགྱུར་བ་ཡིན་ཞིང་། དེ་ལྟ་དེ་ལྟར་སྲེད་པ་རྣམས་གོང་དུ་ཁྱད་པར་དུ་འགྱུར་རོ། །ཇི་ལྟ་ཇི་ལྟར་ཡང་ཚིམ་པ་མེད་པར་གྱུར་པ་དེ་ལྟ་དེ་
ལྟར་རྣམ་པར་ངོམས་པ་མེད་པས་ཁྱད་པར་དུ་སྡུག་བསྔལ་བར་འགྱུར་རོ། །དེ་སྡུག་བསྔལ་བ་ལ་བདེ་བར་མངོན་པར་ང་རྒྱལ་བའི་འདོད་པའི་མེ་རྣམས་ཀྱིས་བསྲེགས་པར་གྱུར་པས། ཕྱིར་ཡང་ནགས་དེ་ཉིད་དུ་འཇུག་པར་
བྱེད་པ་ན་ནགས་ཚལ་གྱི་ནང་ན་ཚང་ཚིང་གི་ཁྱད་པར་རབ་ཏུ་མང་པོ་རྣམས་དེས་མཐོང་བར་གྱུར་པ་ལ་རྣམ་པར་འདྲེས་པའི་འོད་ཟེར་ཀུན་ནས་འབར་བར་གྱུར་པ་རྣམས་སོ། །ཁ་ཅིག་ནི་ལྷའི་ཁ་ཅིག་ནི་མེ་ཏོག་གི་འོད་ཀྱིས་
ཀུན་ཏུ་གསལ་བར་བྱེད་པ་སྟེ། ཁ་དོག་རྣམས་མངོན་པར་མཐོང་ནས་ཉེ་འཁོར་ཀུན་དུ་མིག་རྒྱང་བསྲིངས་པས་དེ་ཡུལ་ལྔའི་མེ་ཏོག་རྣམས་ཀྱི་ནང་དུ་འགྲོ་བར་བྱེད་དོ། །འདོད་པའི་བདེ་བ་རྣམས་ཀྱིས་ཚིམ་པ་མེད་པར་སླར་
ཡང་ནགས་དེ་ཉིད་དུ་འཇུག་པར་བྱེད་པ་ན། དེས་ནོར་བུའི་རང་བཞིན་གྱི་གཅལ་རྣམས་དང་གསེར་དང་ཤེལ་གྱི་རང་བཞིན་གྱི་མདོག་དང་འཇམ་པ་ཆུ་བ་དང་རྣམ་པར་བྲལ་བའི་མདོག་དང་འཇམ་པ་ཤིན་དུ་འཇམ་པར་གྱུར་པའི་མྱུ་གུ་
ལྔ་འབྱུང་བར་འགྱུར་བའི་ཆུ་ཀླུང་ན་རྣམ་པ་སྣ་ཚོགས་པ་ཟབ་པ་རྣམས་མཐོང་བར་གྱུར་ཏོ། །གཞན་ཡང་ཡུལ་ཕྱོགས་གཞན་དག་རྣམས་ལ་ཡང་མཐོང་སྟེ། མཚོ་རབ་ཏུ་དང་བར་གྱུར་པ་དངུལ་གྱི་རང་བཞིན་ཉིད་ཀྱི་ཆུས་

66-1-8b

ཡོངས་སུ་གང་བར་གྱུར་པ་རིན་པོ་ཆེའི་རང་བཞིན་གྱི་གཅལ་རྣམས་ལེགས་པར་བཀྲམ་པ་འོད་ཟེར་རྣམས་ཀྱང་རྟག་ཏུ་འབྱིན་པར་གྱུར་པས་ཉེ་བར་མཛེས་པར་བྱས་པ་དེ་ན་ངང་པ་དང་ཀཱ་རཎྜ་བ་དང་ཙཀྲ་བཱ་ཀ་རྣམས་ཀྱིས་ཉེ་བར་
མཛེས་པར་བྱས་པ་དང་། ཉེ་འཁོར་རྣམས་ན་ཡང་པད་མའི་རྫིང་བུ་རྣམས་ཀྱིས་ཉེ་བར་མཛེས་པ། འགྲམ་དུ་སྐྱེས་པའི་ལྗོན་ཤིང་རྣམས་ཀྱིས་ཀྱང་ཉེ་འཁོར་རྣམས་རབ་ཏུ་ཁྱབ་པར་གྱུར་པ་ཡང་ནགས་ཀྱི་གསེབ་རྣམས་རྣམ་
པར་རྒྱུ་བར་བྱེད་པའི་རྣམ་པ་སྣ་ཚོགས་པའི་རབ་ཀྱི་ཕུལ་དུ་ཕྱིན་པ་སྒྲ་རྣམས་དང་ལྡན་པའི་བྱ་རྣམས་ཀྱིས་ཉེ་བར་མཛེས་པར་བྱས་པས་ཀྱང་མཚོ་འདི་ནི་མཛེས་པར་གྱུར་པ་ཡིན་ནོ། །མཛེས་པར་གྱུར་པ་དེ་དག་རྣམས་མངོན་
སུམ་དུ་མཐོང་བར་གྱུར་ནས། གཞན་ཡང་རབ་ཏུ་ཞུགས་པར་གྱུར་པ་ན་ལྷ་གསར་དུ་སྐྱེས་པས་ནགས་དེ་ན་མཐོང་བ་རྣམས་ལ་ཨུད་པ་ལའི་ཚལ་རྣམས་ལྷའི་བུང་བས་ཉེ་བར་མཛེས་པར་གྱུར་པ་རྣམས་དང་། རིན་པོ་ཆེ་
བདུན་གྱི་རང་བཞིན་གྱི་སྒྲོ་རྣམ་པར་བཀྲ་བ་ཆུ་ལ་རྣམ་བར་སྣ་ཚོགས་པའི་བྱ་རྣམས་ཀྱིས་བསྟེན་པར་བྱས་པ་ལེགས་པར་རབ་ཏུ་བརྩོན་པ་རྣམས་ཀྱིས་འདམ་དང་ངེས་པར་བྲལ་བའི་ཆུ་ཡན་ལག་བདུན་གྱི་ཡོན་ཏན་ཕུན་སུམ་
ཚོགས་པ་དང་ཙཀྲ་བཱ་ཀའི་ཡོན་ཏན་ཕུན་སུམ་ཚོགས་པ་དང་ཙཀྲ་བཱ་ཀའི་ཚོགས་རྣམས་ཟུང་དུ་གྱུར་པ་རྣམས་ཀྱིས་ཡོངས་སུ་གང་བ་དང་། ཉེ་འཁོར་ན་ཡང་ཀླུང་དུ་སྐྱེས་པར་གྱུར་པ་མཆོག་ཏུ་དྲི་ཞིམ་པ་དབྱིབས་སྣ་ཚོགས་
རྣམས་སུ་སྐྱེས་པའི་འདབ་མའི་ཤིང་གིས་ཉེ་བར་མཛེས་པ་སྟེ། དེ་དག་རྣམས་ཀྱིས་ཨུད་པ་ལའི་ཚུལ་འདི་དག་རྣམས་མང་པོར་ལྷང་ངེར་གྱུར་པ་ཡིན་ནོ། །གཞན་ཡང་ལྷ་གསར་དུ་སྐྱེས་པ་དེ་ནགས་དེ་ཉིད་དུ་ཞུགས་
པར་གྱུར་པ་ན་ལྷ་རྫས་ཀྱི་བདུད་རྩིས་རབ་ཏུ་གང་བའི་ཆུ་བོ་ཉེ་འཁོར་ན་ལེགས་པར་འབབ་པ་མཐོང་བར་གྱུར་ཏེ། གཞན་ཡང་ཞུགས་པར་གྱུར་པ་ན་ལྷ་གསར་དུ་སྐྱེས་པས་དེ་དག་ཉིད་ལས་གཞན་པ་རྣམས་མཐོང་བ་ལ། 

66-1-9a

དེ་བཞིན་དུ་རྣམ་པ་སྣ་ཚོགས་པའི་ཁ་དོག་གི་བདུད་རྩི་དེ་དག་རྣམས་འདམ་གྱིས་ཤིན་དུ་གཙང་བ་སྒྲ་སི་ལི་ལི་སྒྲོགས་པའི་བཏུང་བའི་ཆུ་བོ་བརྒྱ་ཕྲག་རྣམས་དང་ཅི་སྟེ་ན་སྟོང་ཕྲག་རྣམས་ཀྱང་ཉེ་འཁོར་དག་ན་རབ་
ཏུ་འབབ་པ་དང་། བཏུང་བ་མྱོས་པར་འགྱུར་བ་རྣམས་ལ་ཀུན་ཏུ་ཆགས་པའི་བྱ་རྣམས་ཀྱིས་ཉེ་བར་མཛེས་པ་རྣམས་ཡིན་ནོ། །གཞན་ཡང་རབ་ཏུ་ཞུགས་པར་གྱུར་པ་ཉིད་ན་ལྷ་གསར་དུ་སྐྱེས་པ་དེ་མ་ཡིན་པ་
རྣམས་རབ་ཏུ་མཐོང་བ་ནི། ཐང་ལ་སྐྱེས་པར་གྱུར་པ་རྣམ་པ་སྣ་ཚོགས་པ་གཟུགས་དང་དབྱིབས་དང་འདབ་མ་དང་སྙིང་པོ་དང་དྲི་དང་ཁ་དོག་རྣམས་དང་ལྡན་པ་བུང་བ་རྣམས་ཀྱིས་ཉེ་བར་མཛེས་པར་བྱས་པའི་མེ་ཏོག་
གིས་ནགས་ཆེན་པོའི་ཁྱད་པར་དུ་བརྒྱན་པ་ལྟ་བུར་གྱུར་པ་ཡིན་ནོ། །ནགས་དེ་དག་ནི་རང་བཞིན་གྱིས་ཀྱང་ཤིན་དུ་དྲི་ཞིམ་པ་ཡིན་པ་དེ་དག་རྣམས་ཀྱི་དྲིས་ཕྱིར་ཞིང་ཤིན་དུ་ལྷག་པར་ཡང་དྲི་མཆོག་ཏུ་ཞིམ་པར་བྱེད་དོ། །
གཞན་ཡང་ལྷ་གསར་དུ་སྐྱེས་པ་དེ་ལྷན་ཅིག་སྤྱོད་པ་རྣམས་དང་བཅས་པ་རྣམས་ཀྱིས་རབ་ཏུ་མཐོང་བར་གྱུར་པ་དག་ལ། ནགས་ཀྱི་ནང་དག་ན་མཐོན་པོར་གྱུར་པ་རིའི་རྩེ་མོ་རྣམས་རིན་པོ་ཆེ་སྣ་ཚོགས་པ་རྣམས་ཀྱི་འབྱུང་
ཁུངས་རྣམས་ཀྱིས་རྣམ་པར་བཀྲ་བ་འབབ་ཆུ་བརྒྱ་སྟོང་ཕྲག་ལེགས་པར་འབྱུང་བ་རྣམས་ཀྱིས་སྣང་བར་བྱེད་པ་དང་ལྡན་པས་རིའི་རྩེ་མོ་རྣམས་རྟག་པར་ཡང་མཛེས་པར་གྱུར་པ་དང་ཤིང་གེལ་པ་རྣམས་ཀུན་ནས་དུད་
པས་རྣམ་པར་གསལ་ཞིང་འབར་བར་བྱེད་དོ། །ཁུ་བྱུག་གི་སྒྲ་དགའ་བར་འགྱུར་བ་རྣམས་དང་རྣམ་པ་སྣ་ཚོགས་པའི་རིན་པོ་ཆེ་མཆོག་ཏུ་འབར་བ་ཀུན་དུ་སྣང་བར་བྱེད་པའི་འོད་ཟེར་དང་ལྡན་པའི་བྱ་བརྒྱ་སྟོང་ཕྲག་དུ་
མ་རྣམས་བལྟ་བར་སྡུག་ཅིང་རྣམ་པར་བརྗོད་པའི་སྒྲ་མཉན་པར་འོས་པ་རྣམས་དང་། དེ་བཞིན་དུ་དྲི་དང་ལྡན་པའི་མེ་ཏོག་བརྒྱ་སྟོང་ཕྲག་དུ་མ་རྣམས་དང་ལྡན་པའི་རིའི་ཁྲོད་རྣམས་ཀྱིས་ཀྱང་ཇི་ལྟར་འཛམ་བུའི་གླིང་ན་རང་

66-1-9b

གི་འོད་ཟེར་ཀྱི་གཟི་བརྗིད་ཀྱིས་ནམ་མཁའི་དཀྱིལ་བརྟོལ་བ་བཞིན་དུ་ལངས་ནས་གནས་པའི་ཉི་མ་དང་ཟླ་བ་འདི་དག་གིས་རྣམ་པར་མཛེས་པར་བྱེད་པ་དེ་བཞིན་དུ་ཀུན་དུ་གསལ་བར་བྱེད་དེ། འོད་ཟེར་རྣམས་ཐམས་ཅད་ཀྱང་དུ་
མར་རྣམ་པར་བཀྲ་བའི་འོད་ཟེར་རྣམས་ཡིན་པས་འཐབ་བྲལ་བའི་ས་རྣམས་ལས་འོད་ཟེར་གོང་དུ་འཕེལ་བའི་ཁྱད་པར་གྱིས་ཕྱིར་ཞིང་ཉིད་དུ་ཤིན་དུ་ཆེས་ལྷག་པར་གསལ་བར་བྱེད་དོ། །རྣམ་པར་བཀྲ་བའི་འོད་ཟེར་དུ་མ་
རྣམས་ཆ་ཤས་སུ་རྣམ་པར་ཕྱེ་བ་དེ་དག་རྣམས་ཀྱང་ལྷ་གསར་དུ་སྐྱེས་པ་དེས་ལེགས་པར་མཐོང་ཞིང་། རིའི་རྩེ་མོ་དེ་དག་རྣམས་ཀྱང་ལེགས་པར་མཐོང་ནས་ཕྱིར་ཉིད་ཀྱང་ལྷན་ཅིག་སྤྱོད་པ་རྣམས་དང་བཅས་ཏེ་མང་དུ་
རྣམ་པར་བཀྲ་བའི་ནགས་དེར་འཇུག་པར་བྱེད་དོ། །དེ་ནགས་དེར་ཇི་ལྟ་ཇི་ལྟར་རབ་ཏུ་འཇུག་པར་བྱེད་པ་དེ་ལྟ་དེ་ལྟར་ཆེས་དགའ་བར་འགྱུར་བ་རྣམས་མཐོང་བར་འགྱུར་རོ། །དེ་ན་ཡང་དེ་ལས་གཞན་པའི་ཡོན་ཏན་གྱི་
ཚོགས་དུ་མ་རྣམས་ཕུན་སུམ་ཚོགས་པ་ལ། སྒྲ་འཕང་མཐོ་བར་རུང་བ་དང་སྙན་ཞིང་འཇམ་ལ་འཁྱིམ་པ་དང་མི་ཐོན་པ་ལྟར་བརྒྱལ་བ་ལ་སོགས་པའི་སྒྲ་དབྱངས་མང་པོ་ཕུན་སུམ་ཚོགས་པ་རྣམས་སོ། །ཇི་ལྟར་སྒྲ་འདི་
དག་རྣམས་དང་ཉེ་བར་གྱུར་ཅིང་དེས་སྒྲ་དེ་དག་རྣམས་ཐོས་པར་གྱུར་པས་ཤིན་དུ་ལྷག་པར་ཡིད་ཆེས་རབ་ཏུ་དགའ་བར་གྱུར་པས་རིངས་པ་ཉིད་དུ་ལེགས་པར་ཞུགས་པ་ན། ལྷའི་ཚོགས་སྔར་མ་མཐོང་བ་རྣམས་ཀྱི་ཅ་ཅོ་
འི་སྒྲས་མིག་རབ་ཏུ་རྣམ་པར་གདངས་ནས། དེ་གང་གི་ཚེ་ཉེ་འཁོར་རྣམས་སུ་ལེགས་པར་ཞུགས་པ་དེའི་ཚེ་ན་ཤིན་དུ་ལྷག་པར་གྱུར་པའི་ནགས་ཚལ་གྱི་ཕྲེང་བ་མཛེས་པ་རྣམས་མཐོང་བ་ནི་རབ་ཏུ་རྣམ་པར་གྱེས་པའི་
བཻ་དཱུརྱའི་ལྗོན་ཤིང་མཆོག་ཏུ་འབར་བ་རྣམས་ཀྱིས་ཉེ་བར་མཛེས་པ་དང་། དེ་བཞིན་དུ་ཨིན་དྲ་ནཱི་ལའི་ཤིང་གི་ཚོགས་རྣམས་ཀྱིས་ཉེ་བར་མཛེས་པར་བྱས་པ་རྣམས་ཀྱིས་ཀྱང་རིའི་ཚོགས་རྣམས་རྣམ་པར་མཛེས་པར་བྱེད་

66-1-10a

པ་ཡིན་ནོ། །གཞན་ཡང་ལྷ་དེ་ཉིད་ཀྱིས་ལེགས་པར་མཐོང་བ་རྣམས་རིན་པོ་ཆེ་བདུན་གྱིས་རྣམ་པར་བཀྲ་བར་བྱས་པ་པད་མའི་རྫིང་བུ་རྣམས་ཀྱིས་ཉེ་བར་མཛེས་པའི་ནགས་ཀྱི་རྒྱལ་པོ་རྣམ་པར་མཛེས་པ་
རྣམས་སོ། །དེ་དག་རྣམས་ཐམས་ཅད་ན་ཡང་རྟག་པར་རྒྱུན་མི་འཆད་པར་ཀུན་དུ་རྟོག་པ་རྣམ་པ་སྣ་ཚོགས་པའི་ཆེས་ལྷག་པ་རྣམས་ཀྱི་རྒྱན་དང་ཆ་བྱད་རྣམས་དང་ལྡན་པ་དཔེ་མེད་པར་གཟུགས་དང་ལང་ཚོ་ལ་བབ་
ཅིང་རྒྱན་དང་ཆ་བྱད་རྣམས་དང་ལྡན་པའི་ལྷ་དང་ལྷ་མོའི་ཚོགས་བརྒྱ་སྟོང་གིས་ཡོངས་སུ་གང་བས་རྣམ་པར་མཛེས་པའི་ཚོགས་པ་རྣམས་ལ་ལྷ་རྣམས་འགའ་ཞིག་ནི་ཀུན་ནས་གནས་ཏེ་མྱོས་བྱེད་ཀྱི་སྐྱོན་དང་རྣམ་པར་
བྲལ་བར་གྱུར་པའི་ལྷ་རྫས་ཀྱི་རོ་དང་དྲི་དང་རེག་བྱའི་བདེ་བ་རྣམས་སྐྱེད་པར་བྱེད་པའི་མྱོས་བྱེད་དེ་དག་རྣམས་མཐུང་བར་བྱེད་ཅིང་རྒྱགས་པ་ལ་དོན་ཅིག་པར་གྱུར་པའི་ལྷན་ཅིག་སྤྱོད་པའི་འཁོར་རྣམས་དང་བཅས་ནས་ཁ་དོག་རྣམ་
པ་སྣ་ཚོགས་པར་གྱུར་པའི་ནགས་ཀྱི་ཕྲེང་བ་མཛེས་པ་རྣམས་ལ་རྩེ་དགའ་བར་བྱེད་དོ། །ཚོགས་པ་གཞན་རྣམས་ཉིད་ནི་རྣམ་པར་འདྲེས་པའི་འོད་ཟེར་གྱིས་ལེགས་པར་གསལ་བར་བྱས་པའི་ནགས་མཛེས་པ་ཆ་ཤས་
རྣམ་པར་བཀྲ་བ་རྣམས་ལ་འཚེར་བག་དང་ལྡན་པའི་ལུས་ཅན་རྣམས་རྩེ་དགའ་བར་བྱེད་དོ། །ལྷ་གཞན་དག་རྣམས་ཀྱང་དེ་ཁོ་ན་བཞིན་དུ་ལྷན་ཅིག་སྤྱོད་པ་རྣམས་དང་བཅས་པས་རང་དང་གཞན་རྣམས་ལ་ཡང་མཆོག་ཏུ་
དགའ་བར་འགྱུར་བའི་ལྗོན་ཤིང་གིས་རབ་ཏུ་གང་བའི་ནགས་ཀྱི་ཕྲེང་བ་མཛེས་པ་རྣམས་ལ་རོལ་མོའི་ཆ་བྱད་རྣམས་དང་གར་དང་རྔ་སྒྲ་དང་བཅས་པའི་ལྷ་རྫས་ཀྱི་འདོད་པའི་ཡོན་ཏན་ལྔ་རྣམས་ཀྱི་ལྷ་རྫས་རྣམས་དང་ཉེ་བར་ལྡན་
ནོ། །དེ་བཞིན་དུ་རིན་པོ་ཆེ་བདུན་གྱི་རང་བཞིན་གྱི་ལྗོན་ཤིང་གཞན་དག་རྣམས་ཀྱི་ཚང་ཚིང་རྣམས་དང་བར་རྣམས་སུ་སོང་བར་གྱུར་ནས་དེ་ཁོ་ན་བཞིན་དུ་དགའ་བར་བྱེད་དེ། རྔ་སྐད་ཡན་ལག་ལྔ་དང་ལྡན་པ་རྣམས་ཀྱིས་དེ་དག་

66-1-10b

རྣམས་ལ་ཡིད་སོང་བ་དེ་དག་རྣམས་རྗེས་སུ་ཆགས་ཤིང་རྗེས་སུ་འགྲོ་བ་དཔེ་མེད་པའི་ལྷ་རྫས་ཀྱི་བདེ་བ་རྣམས་ལ་ཀུན་ནས་ཆགས་པར་གྱུར་པ་ལྷན་ཅིག་རྒྱུ་བར་བྱེད་པའི་འཁོར་རྣམས་དང་བཅས་པས་རྔ་སྐད་ཡན་ལག་ལྔ་དང་
ལྡན་པ་གླུ་དང་སྤྲུགས་པའི་རོལ་མོ་ལ་ཡིད་ཀུན་ནས་ཆགས་པར་གྱུར་པ། བདེ་བས་སྙིང་ཀུན་དུ་གང་བ་ཉིད་ཀྱིས་རྩེ་དགའ་བར་བྱེད་པས་ཀྱང་ཚིམ་པ་མེད་པའི་འབྲས་བུའི་སྲེད་པ་རྣམས་ལ་རྣམ་པར་ཆགས་པའི་ཡིད་ཅན་རྣམས་
མཐུན་པས་སྙིང་ཀུན་དུ་རྒྱས་པར་རྩེ་དགའ་བར་བྱེད་པའི་འདོད་པ་རྣམས་ཉིད་ཀྱིས་ཀྱང་ངོམས་པ་མེད་པ། སྲེད་པས་རྣམ་པར་འཆེལ་བའི་ཡིད་ཅན་རྣམས་སྒོ་ལྔ་ལ་རབ་ཏུ་རྟེན་པར་བྱེད་པ་གང་ཡིན་པའི་འདོད་པའི་ཆུ་བོ་རྣམས་སུ་
ནུབ་པ་ཡིན་ནོ། །དེ་བཞིན་དུ་པད་མའི་ནགས་གཞན་རྣམས་ལ་ལྷན་ཅིག་ཏུ་སྐྱེས་པར་གྱུར་པའི་པད་མའི་འདབ་མའི་ལྡེབས་རྣམས་སུ་ལེགས་པར་གནས་པར་བྱས་ནས་མྱོས་བྱེད་འཐུང་བར་བྱེད་དེ། འོན་ཀྱང་མྱོས་བྱེད་ཀྱི་ཉེས་
པ་རྣམས་ཀྱིས་ཀྱང་ཀུན་དུ་གོས་པར་ནི་མི་འགྱུར་རོ། །དྲི་ཞིམ་པོ་དང་རེག་བྱ་དང་ཁ་དོག་རྣམས་དཔེ་མེད་པར་གྱུར་པའི་བཏུང་བ་དེ་དག་རྣམས་ཀྱིས་ཡིད་ལེགས་པར་ཆགས་པས་བསྒོས་པ་ཡིན་ནོ། །ཡང་གཞན་དག་རྣམས་ནི་སྣ་
ཚོགས་པའི་འབབ་ཆུ་རྣམས་ཀྱི་ངོས་གཉིས་སུ་ལྷ་དེ་དག་རྣམས་ཕན་ཚུན་དུ་གྲོགས་སུ་གྱུར་པས་དཔེ་མེད་པའི་ལྷ་རྫས་ཀྱི་བདེ་བ་རྣམ་པ་དུ་མ་རྣམས་ལ་ཉེ་བར་ལོངས་སྤྱོད་པར་བྱེད་དོ། །གཞན་ཡང་ལྷ་གསར་དུ་སྐྱེས་པ་དེས་
མཐོང་བར་གྱུར་པ་རྣམས་ལ། གསེར་དང་བཻ་དཱུརྱའི་རང་བཞིན་རྣམས་ལ་ནོར་བུའི་སྟེགས་བུ་རྣམས་སུ་དང་། ཁང་བུའི་ཕྲེང་བ་རྣམས་ལ་ཡང་དགའ་བར་བྱེད་དོ། །དགའ་བར་བྱེད་པ་ཡང་ཕན་ཚུན་དུ་གྲོགས་སུ་གྱུར་པ་སྟེ། འདོད་
པ་རྣམས་ལ་དོན་གཅིག་པ་ལེགས་པར་བྱས་པའི་ལས་རྣམས་ཀྱིས་དམན་པ་དང་བར་མ་དང་ཁྱད་པར་དུ་འཕགས་པར་གྱུར་པའི་གཟུགས་དང་ལང་ཚོ་དང་བདེ་བ་རྣམས་ལ་ལས་རྣམས་དབང་པོར་གྱུར་པས་མཆོག་ཏུ་

66-1-11a

ལེགས་པར་ཞུགས་པ་རྣམས་ཁྱད་པར་མཚུངས་པ་མེད་པའི་ཡན་ལག་ལྔ་པའི་བདེ་བ་རྣམས་ཀྱིས་ཉེ་བར་འཚོ་བར་བྱེད་དོ། །དེ་ནས་ལྷ་དེས་སྔར་མཐོང་མ་མྱོང་བའི་རྣམ་པ་དུ་མར་དགའ་བར་གྱུར་པ་དེ་དག་རྣམས་ནི་
སྔར་བཞིན་ནོ། །ཡང་ལྷ་དེ་ཉེ་འཁོར་རྣམས་ན་རྩེ་བར་གྱུར་པ་ལས་མི་མཉན་པའི་བདེ་བ་ཕུན་སུམ་ཚོགས་པ་རྣམས་དང་ལྡན་པའི་ལྷ་རྣམས་གང་ཡིན་པ་དེའི་ཚོགས་དེར་རབ་ཏུ་དགའ་བར་གྱུར་པའི་ཡིད་ཀྱིས་ལྷན་ཅིག་སྤྱོད་པ་རྣམས་
དང་བཅས་པ་མྱུར་བར་འགྲོ་བར་བྱེད་དོ། །ལྷ་རྣམས་ཀྱིས་ཀྱང་ཕུལ་དུ་བྱུང་བའི་རྒྱན་དང་ཆ་ལུགས་དང་གཟུགས་ཕུན་སུམ་ཚོགས་པར་གྱུར་པའི་སྔ་ན་མ་མཐོང་བ་དེ་ལ་ངོ་མཚར་བར་གྱུར་པས་མིག་ཤིན་དུ་ཁྱད་པར་དུ་ཧར་
ཧར་པོར་བྱེད་དོ། །ལྷ་དེ་ཡང་ལྷ་དེ་དག་རྣམས་ལ་ཉེ་བར་བརྟེན་ནས་ཡིད་ཆེས་རབ་ཏུ་དགའ་བར་འགྱུར་རོ། །དེ་དག་རྣམས་ཀྱིས་ཀྱང་ཕན་ཚུན་དུ་ཉེ་བར་རྟེན་པར་བྱེད་དེ། ཕན་ཚུན་དུ་ངེས་པར་གནོན་པ་མེད་པར་ཉེ་བར་འགྲོ་བའི་
ཡིད་དང་། ལྷན་ཅིག་རྗེས་སུ་སྤྱོད་པ་དང་བཅས་པ་རྣམས་ཀྱང་རྗེས་སུ་ཆགས་པར་གྱུར་པའི་ཡིད་ཀྱིས། རྣམ་པར་མཛེས་པའི་ནགས་ཀྱི་རྒྱལ་པོ་རྣམས་ནས་རྣམ་པར་མཛེས་པའི་ནགས་ཀྱི་རྒྱལ་པོ་རྣམས་དང་། ནགས་ལས་
ནགས་རྣམས་སུ་དང་གསེར་གྱི་རང་བཞིན་གྱི་རི་དང་རི་བོའི་རྩེ་མོ་རྣམས་ལ་རི་དང་རི་བོའི་རྩེ་མོ་རྣམས་སུ་དང་པད་མའི་ཚལ་རྣམས་ནས་པད་མའི་ཚལ་རྣམས་སུ་དང་ཟས་ཀྱི་ཆུ་བོ་རྣམས་ནས་ཟས་ཀྱི་ཆུ་བོ་རྣམས་ལ་དང་དེ་བཞིན་དུ་འབབ་
ཆུ་རྣམས་ནས་འབབ་ཆུ་རྣམས་ལ་ཆུ་བོ་དག་ཏུ་ཡང་ཀུན་ནས་ཉེ་བར་འགྲོ་བར་བྱེད་དེ། གཞན་དང་འདྲ་བ་མ་ཡིན་པ་རྣམས་དཔེ་རྣམས་ཀྱིས་ཇི་ལྟ་བ་བཞིན་དུ་བརྗོད་པར་སླ་བ་ཡང་མ་ཡིན་ནོ། །དེ་ལྟར་ལྷའི་ཚོགས་དེ་དག་རྣམས་ཐམས་ཅད་
ཀྱང་དགའ་རངས་པར་བྱེད་དོ། །དེ་ལྟར་དེ་དག་ཏུ་དུས་ཤིན་དུ་རིང་བར་རྩེས་པར་གྱུར་ནས་གང་ན་ཐམས་ཅད་ཀྱི་སྙིང་པོ་ཞེས་བྱ་བའི་རི་ཡོད་པ་དེར་ཀུན་ཡང་ཉེ་བར་འགྲོ་བར་བྱེད་དོ། །རི་དེ་ཡང་རི་ཐམས་ཅད་ནས་གསེར་གྱི་ཁམས་དང་ལྡན་པ་འབབ་

66-1-11b

ཆུ་དང་པད་མའི་ཚལ་དང་ཁྲུས་ཀྱི་རྫིང་བུ་རྣམ་པ་དུ་མ་རྣམས་ཕུན་སུམ་ཚོགས་པ་ནགས་དང་ཉེ་བའི་ནགས་རྣམས་དང་ལྷ་དང་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་རྟག་ཏུ་ཡང་རོལ་མོ་དང་རྔ་སྒྲ་དང་གླུ་རྣམས་ཀུན་བརྗོད་པའི་
སྒྲ་སྒྲོགས་པ་དང་ཐམས་ཅད་ལས་ཀྱང་ཡིད་མངོན་པར་དགའ་བའི་རི་ལ་ཆུ་ཀླུང་བརྒྱ་སྟོང་ཕྲག་དུ་མ་རྣམས་ཀྱིས་ཡོངས་སུ་གང་བ། ཁང་པའི་ཕྲེང་བ་བརྒྱ་སྟོང་ཕྲག་དུ་མ་རྣམས་ཀྱིས་མངོན་པར་དགའ་བ་དང་། ཉེ་འཁོར་ཀུན་ནས་
ཡང་པད་མའི་ཚལ་རྣམས་དང་ལེགས་པར་ལྡན་པ་དང་འཇུག་ངོགས་བརྒྱ་སྟོང་གིས་བརྒྱན་པ། རབ་ཏུ་གསལ་བར་བྱེད་པའི་ལྗོན་ཤིང་རྣམས་བཞིན་དུ་ཉེ་འཁོར་རྣམས་ན་དཔག་བསམ་གྱི་ལྗོན་ཤིང་རྣམས་ཀྱིས་ཉེ་བར་མཛེས་པ་སྐྱེད་པ་
རྣམས་ཀྱང་དེ་ལྟ་བུའི་རྣམ་པ་འདི་དག་རྣམས་མཐོང་ན་དགའ་བར་འགྱུར་བ་དང་ཉེ་འཁོར་རྣམས་ན་ཡང་ལྷ་རྣམས་ཀྱི་མཐོང་ན་ཤིན་དུ་ངོ་མཚར་བ་སྐྱེ་བའི་ནགས་དང་ཉེ་བའི་ནགས་རྣམས་ཕུན་སུམ་ཚོགས་པ་ཡིན་ནོ། །དེའི་ངོས་གཅིག་
ནི་བཻ་དཱུརྱའི་རང་བཞིན་ནོ། །གཞན་ཅིག་ནི་གསེར་གྱི་རང་བཞིན་ནོ། །གཞན་ཅིག་ནི་ཨིན་དྲ་ནཱི་ལའི་རང་བཞིན་ནོ། །གཞན་ཅིག་ནི་ནཱི་ལ་ཆེན་པོའི་རང་བཞིན་ནོ། །རིན་པོ་ཆེའི་རང་བཞིན་གྱི་ལོགས་ཆ་ཤས་ལེགས་པར་
རྣམ་པར་ཕྱེ་བའི་རིའི་མཆོག་དེའི་ཉེ་འཁོར་རྣམས་ན་ཆེན་པོ་རྣམས་ལ་འོས་པར་གྱུར་པའི་བང་རིམ་རྣམས་དང་རིའི་ཕུག་དང་སྨན་ལྗོངས་དང་ནགས་ཀྱི་ཕྲེང་བ་ཕུན་སུམ་ཚོགས་པ་རྣམས་ལ་རེག་པར་བྱ་བའི་དོན་དུ་དང་རྩེད་མོ་ལ་རྣམ་
པར་རྒྱུ་བས་དང་། དེ་ཁོ་ནར་དགའ་བར་བྱ་བའི་ཆེད་དུ་ཀུན་ནས་འཛེག་པར་བྱེད་དེ། ལན་བརྒྱ་ཕྲག་དང་ཅི་སྟེ་ན་སྟོང་ཕྲག་སུ་ཡང་ཕྱི་བཞིན་རྗེས་སུ་སྤྱོད་པའི་འཁོར་དང་བཅས་པས་ལྷ་རྫས་ཀྱི་རྔ་སྐད་ཡན་ལག་ལྔ་དང་ལྡན་
པ་རབ་ཏུ་ཆགས་པ་མཚུངས་པ་དང་རྗེས་སུ་ཆགས་པར་བྱེད་པ་དང་སྙན་པ་དང་རྣམ་པ་དུ་མ་རྣམས་ཡང་དག་པར་ལྡན་པས་དགའ་བར་བྱེད་ཅིང་རྩེ་བར་ཡང་བྱེད་དེ། ཕལ་ཆེ་བའི་འདུས་པ་རྣམས་ནགས་དང་ཉེ་བའི་ནགས་རྣམས་

66-1-12a

དང་ཁྲུས་ཀྱི་རྫིང་བུ་དང་འབབ་ཆུ་རྣམས་སུའོ། །དེ་ནས་ལྷ་དེ་དག་རྣམས་ཇི་ལྟ་ཇི་ལྟར་མངོན་པར་འཛེག་པར་བྱེད་པ་དེ་ལྟ་དེ་ལྟར་ཆེས་དགའ་བ་རྣམས་མཐོང་བར་འགྱུར་ཏེ། ཐམས་ཅད་ལས་ཀྱང་འདོད་པ་ཐམས་
ཅད་ཀྱི་བདག་ཉིད་ཀྱི་ལྷ་རྫས་ཀྱི་ཤིང་བརྒྱ་སྟོང་གིས་ཉེ་བར་མཛེས་པར་གྱུར་པ། འོད་ཟེར་རྣམས་མཆོག་ཏུ་འབར་བའི་རིན་པོ་ཆེའི་རང་བཞིན་གྱིས་འོད་ཟེར་དང་ལྡན་པའི་པད་མའི་ཚལ་རྣམས་མཆོག་ཏུ་འབར་བ་དང་པད་མའི་ཚལ་
གྱི་ཕྲེང་བས་ཉེ་བར་མཛེས་པར་གྱུར་པ་རྣམས་ཡིན་ནོ། །སྔར་ཇི་སྐད་དུ་བཤད་པ་དེ་དག་རྣམས་བཞིན་དུ་ལྷ་དེ་དག་རྣམས་རྩེ་བར་དགའ་བ་དང་གར་དང་གླུ་ལེན་པར་བྱེད་དོ། །གླུ་ལེན་པར་བྱེད་པ་དང་གར་བྱེད་པར་གྱུར་པས་ཀྱང་དལ་གྱིས་
དལ་གྱིས་རི་དེ་ལ་ཀུན་ནས་བགྲོད་པར་བྱེད་དེ། ཕན་ཚུན་དུ་གྲོགས་སུ་གྱུར་པ་དང་རང་གིས་བྱས་པའི་ལས་རྣམས་གྲོགས་སུ་གྱུར་པ་དེའི་ལམ་ནས་འགྲོ་བར་བྱེད་པ་དང་། དེས་ལེགས་པར་བྱས་པའི་ལས་རྣམས་ཀྱིས་རང་ཉིད་འོད་
དང་ལྡན་པ་དང་། ཤ་དང་རུས་པ་དང་ཆུ་སེར་རྣམས་ངེས་པར་མེད་པ་དང་ཕན་ཚུན་དུ་གནོད་པ་མེད་པར་ཟས་ཀྱི་ཀླུང་རྣམས་ལ་དང་བཏུང་བའི་ཀླུང་རྣམས་ལ་དང་བདུད་རྩིའི་ཀླུང་ལ་ཡང་རང་གིས་བྱས་པ་རྣམས་དང་ཆ་འདྲ་བར་མདོག་དང་
རོ་དང་དྲི་དང་རེག་བྱ་ཕུན་སུམ་ཚོགས་པ་རྣམས་སྣོད་བཟང་པོ་ཕུན་སུམ་ཚོགས་པ་རྣམས་ཀྱིས་འོས་སུ་གྱུར་པ་རྣམས་ལ་ཉེ་བར་ལོངས་སྤྱོད་པར་བྱེད་ཅིང་ཡུལ་ལྔ་རྣམ་པར་ཆགས་པར་གྱུར་པའི་ཡིད་ཅན་རྣམས་ཡིན་ཏེ། ཕན་
ཚུན་རྣམས་ཀྱིས་ཀྱང་ཀུན་ནས་ཆགས་པ་སྐྱེད་པར་བྱེད་པ་དང་ཡིད་ཀྱང་དེ་ལ་སོང་བར་གྱུར་པ་དང་རྟག་པར་རྒྱུན་ཏུ་ཡང་བཞིན་རབ་ཏུ་དང་བར་གྱུར་པས་ཀྱང་རྩེ་དགའ་བར་བྱེད་དོ། །འདོད་པ་རྣམས་ཐམས་ཅད་རྟག་ཏུ་ཡང་ཕུན་སུམ་
ཚོགས་པར་གྱུར་པ། སྔ་ན་མེད་པ་རྣམས་དང་མཉམ་པ་མེད་པ་རྣམས་དང་རྣམ་པ་དུ་མ་རྣམས་ཀྱི་བདེ་བ་རྣམས་ཀྱིས་ཉེ་བར་འབད་པར་བྱེད་དོ། །རི་དེ་ལ་ཀུན་དུ་འཛེག་པར་གྱུར་པ་དེ་དག་རྣམས་ནི་ཤིན་དུ་ངོ་མཚར་བར་གྱུར་པའི་དགའ་བ་

66-1-12b

རྒྱ་ཆེན་པོ་རྣམས་ཀྱིས་དེ་དག་རྣམས་ཡོངས་སུ་རྒྱས་པར་གྱུར་པ་ན་ལུས་ཀྱི་ཁྱད་པར་རྣམས་མཐོང་བར་གྱུར་པའི་ལྷའི་ཚོགས་རབ་ཏུ་ཆགས་ཤིང་བདེ་བར་གྱུར་པ་རྣམས་ཀྱིས་ཉེ་འཁོར་རྣམས་ཀུན་ན་ཡང་མཚུངས་པ་མེད་པ་རྣམས་
མཐོང་བར་གྱུར་པའི་རི་བོའི་མཆོག་དེའི་རྒྱབ་དེ་དག་རྣམས་སུ་ཀུན་ནས་གནས་པར་གྱུར་ནས། རྩེད་མོའི་རི་བོ་ཞེས་བྱ་བའི་རི་དེ་ཡང་ཤིན་དུ་ཡང་དགའ་བར་གྱུར་པ་ཡིན་ཏེ། རིན་པོ་ཆེའི་རང་བཞིན་རྣམ་པ་དུ་མ་སྣ་ཚོགས་པའི་རྩེད་མོའི་རི་
ལ་མཐོང་བ་རྣམས་ནི་ལྗོན་ཤིང་དང་ཆུ་ཀླུང་དང་པད་མའི་ཚལ་དང་ཨུད་པ་ལའི་ཚལ་རྣམས་ཀྱིས་ཀུན་ཏུ་གང་བ་ཡིན་ནོ། །དེའི་རྒྱབ་ན་དཔལ་རྣམས་ཀུན་གྱིས་ཡོངས་སུ་གང་བར་གནས་པ་ཡིད་ལ་འདོད་པ་རྣམས་ཐམས་ཅད་
ཕུན་སུམ་ཚོགས་པ་ཡིན་ཏེ། དེར་གང་དང་གང་ཁོ་ན་སེམས་པར་བྱེད་པ་དེ་དང་དེ་དག་རྣམས་ཉིད་ཕུན་སུམ་ཚོགས་པར་འགྱུར་ཏེ་རྣམ་པ་དུ་མར་འདོད་པ་དགའ་བ་ཡིད་དུ་འོང་བ་དང་གཞན་རྣམས་དང་ཐུན་མོང་མ་ཡིན་པ་རྣམས་
འབྱུང་བ་ཡིན་ནོ། །ཡིད་ཀྱི་རྗེས་སུ་འཐུན་པ་རྣམས་ཀྱང་རྣམ་པ་དུ་མ་ཉེ་བར་གནས་སོ། །ཡོན་ཏན་ལྷག་མ་རྣམས་ཉིད་ནི་བརྗོད་ཟིན་ཏོ། །བདེ་བ་ལ་ལྷ་རྣམས་དུས་ཤིན་དུ་རིང་དུ་རྩེ་བར་བྱེད་དོ། །དེ་ལྟར་དེ་དག་རྣམས་རྩེ་བར་གྱུར་
ཅིང་དགའ་བར་ཡང་གྱུར་ལ་རི་དེ་དག་རྣམས་ཀྱང་སོ་སོ་དང་སོ་སོར་ཀུན་དུ་ལྟ་བར་བྱེད་པ་ན། གལ་ཏེ་ནམ་ཞིག་ན་འཁྲིས་ཤིང་ལེགས་པར་འཁྲིལ་བ་རྣམས་ཀྱིས་ཀུན་ནས་གཡེངས་པར་གྱུར་པ། རིན་པོ་ཆེ་རྣམས་ཀྱི་རང་བཞིན་
གྱི་འོད་ཟེར་གྱིས་ཀུན་ནས་གསལ་བར་བྱེད་པའི་རི་ལེགས་པར་ལངས་པ་རྣམས་ཀྱིས་ཉེ་འཁོར་རྣམས་ཀུན་ནས་ཡོངས་སུ་བསྐོར་བ། ས་གཞི་རྣམས་རིན་པོ་ཆེ་བདུན་གྱི་རང་བཞིན་གྱི་རབ་ཀྱི་ཕུལ་དུ་གྱུར་པ་ཞི་བར་གྱུར་པའི་བྱ་
རྣམས་ཀྱི་བརྗོད་པའི་ཁྱད་པར་ཆེས་དགའ་བར་འགྱུར་བའི་སྒྲ་རྣམས་དང་ལྡན་པ། རབ་ཏུ་ཞི་བའི་མཆོག་ཏུ་གྱུར་པའི་ཕུག་རྣམས་ཀྱིས་ཀྱང་ཉེ་བར་འཁོར་བ་རྣམས་ནས་ཡོངས་སུ་བསྐོར་བར་གྱུར་པའི་མཚོ་རབ་ཏུ་ཞི་བའི་སྤྱོད་

66-1-13a

པས་རྒྱུ་བ་རྣམས་ཀྱི་གནས་ཞེས་བྱ་བའི་རིའི་ཁྲོད་ན་གནས་པ་ཡིན་ནོ། །མཚོ་དེར་ཡང་གང་དག་གིས་རབ་ཏུ་ཞི་བ་སྐྱེ་བ་གཞན་དུ་སྤྱོད་པར་གྱུར་པ་དང་འོན་ཀྱང་ཚུལ་ཁྲིམས་རྣམས་ཡོ་ལ་ཡང་སྤྱད་པ་མ་ཡིན་
པ་དང་། སྙིང་ལ་ཆོས་ལེགས་པར་འཛིན་པར་བྱེད་པའི་བདག་ཉིད་ཅན་ནི་ཡིན་པ་དང་ཁྲོ་བར་གྱུར་པ་དང་། ཇི་སྐད་སྨྲས་པ་དེ་ལྟར་མི་བྱེད་པ་དང་གར་མཁན་དང་ཆོས་མཚུངས་པར་གྱུར་པའི་ཆོས་སྨྲ་བ་དེ་དག་རྣམས་དམྱལ་བ་དང་
ཡི་དགས་རྣམས་ནས་དཀའ་བས་ཤི་འཕོས་པ་རྣམས་ཡིན་ནོ། །གལ་ཏེ་ཞིག་དེ་དག་རྣམས་ལན་གྲངས་གཞན་ལ་མྱོང་བར་གྱུར་པའི་ལས་ཀྱི་རྒྱས་བཅུས་པའི་སྲེད་པས་མཚོ་དེར་སྐྱེ་བར་འགྱུར་ལ་རབ་ཏུ་ཞི་བ་སྐྱེ་བ་
གཞན་དང་གཞན་ལ་སྤྱད་པའི་དབང་གིས་མཚོ་དེའི་ཡང་ངང་པ་རྣམས་སུ་ཕལ་ཆེར་སྐྱེ་བར་འགྱུར་ཏེ། བྱ་དེ་དག་རྣམས་ནི་རིན་པོ་ཆེ་བདུན་གྱི་རང་བཞིན་གྱི་སྒྲོ་དག་དང་ལྡན་པར་འགྱུར་བ་དང་། སྐྱེ་བ་ཉིད་ཀྱི་མཐུ་སྟོབས་
ཀྱིས་སྒྲ་སྙན་པར་འགྱུར་བ་དང་ལྷ་རྫས་ཀྱི་པད་མའི་ཟས་དང་ལྡན་པར་ལྷན་ཅིག་སྤྱོད་པ་རྣམས་དང་བཅས་པ་རྩེ་དགའ་བར་ཡང་བྱེད་དོ། །ངང་པའི་རྒྱལ་པོ་བྱང་ཆུབ་སེམས་དཔའ་དུས་བཟང་ཞེས་བྱ་བ་ཡང་ཕལ་ཆེར་
མཚོ་དེ་ན་གནས་ཏེ། ཕུག་དེ་དག་ན་འཐབ་བྲལ་བ་རྣམས་ཀྱི་བདག་པོ་མུ་སུ་ལུན་དྷ་དང་ཆོས་དང་ལྡན་པའི་གཏམ་བྱེད་དོ། །བྱའི་ཚོགས་དེ་དག་རྣམས་ཆོས་ཀྱི་གཏམ་དེ་དག་ཉན་པར་བྱེད་དོ། །དེ་ནས་ལྷ་དེ་དག་རྣམས་རྩེ་དགའ་
ཞིང་དགའ་དགུར་སྤྱོད་པར་བྱེད་པ་ལས་གལ་ཏེ་ཤེད་ན་ཚོམས་གཉིས་སུ་འགྱུར་ཏེ། གང་དག་ལེགས་པར་བྱས་པའི་ལས་རྣམས་ཀྱིས་བསྐུལ་བར་གྱུར་ཅིང་སྐྱེ་བ་གཞན་ལ་ཡང་ལེགས་པར་བྱས་པ་རྣམས་སྤྱད་པ་དེ་
རྣམས་ནི་གང་ན་མཚོ་དེ་ཡོད་པར་གྱུར་པ་དེར་འགྲོ་བར་བྱེད་དོ། །གང་དག་གིས་མ་སྤྱད་པ་དེ་དག་རྣམས་ནི་གང་ན་བག་མེད་པ་རྣམས་སྤྱོད་པ་ཞེས་བྱ་བའི་ནགས་དེར་སོང་ནས་རྩེ་དགའ་བར་གནས་པར་འགྱུར་རོ། །ཇི་ལྟར་སྐྱེ་བ་

66-1-13b

གཞན་རྣམས་སུ་རབ་ཏུ་ཞི་བ་སྤྱད་པ་དེ་དག་རྣམས་ནི་མཚོའི་གནས་སུ་སོང་བར་གྱུར་ནས་དེ་དག་རྣམས་དང་ཀུན་ནས་འདྲེ་བར་གྱུར་པ་ཉིད་ན་ཀུན་བརྗོད་པ་དང་ལྡན་པ་ཞེས་བྱ་བའི་ངང་པ་དེ་དག་གིས་ཚིགས་སུ་བཅད་པ་རྣམས་
བརྗོད་པ་ཇི་ལྟར། གང་གིས་ཇི་སྐད་སྨྲས་པའི་མིས། །དེ་ཚེ་དེ་ལྟར་མི་བྱེད་པ། །དེ་ནི་རྨོངས་པ་སྟོང་པ་སྨྲ། །སྡུག་བསྔལ་རྣམས་ནི་མཐོར་བྱེད་མིན། །གང་ཞིག་གཞན་ལ་ཆོས་སྨྲ་ཞིང་། །ཆོས་ལ་ཡང་ནི་མི་འཇུག་པ། །
ཚིག་གི་སྙིང་པོའི་སྐྱེས་བུ་དེ། །རྟག་ཏུ་སེམས་ནི་སྟོང་པར་འདོད། །བག་མེད་ལས་ནི་འདོད་ཆགས་སྐྱེ། །འདོད་ཆགས་ཀྱིས་ནི་ཞེ་སྡང་སྒྲུབ། །དང་པོ་སྐྱོན་དེ་དང་ལྡན་པས། །དམྱལ་བའི་རྗེས་སུ་ཉེ་བར་རྒྱུག །འདས་པའི་
བདེ་བ་གང་ཡིན་དེར། །དེ་ལ་ཁྱོད་ནི་ཀུན་འཇུག་མིན། །མ་འོངས་པ་ཡི་བདེ་གང་ཡང་། །དེས་ནི་ད་ལྟར་བདེ་བ་མིན། །དུས་གཅིག་ལ་ནི་བག་མེད་གང་། །ཀུན་རྨོངས་ལོངས་སྤྱོད་ལ་འཆུམས་པ། །རང་གི་ལས་ཀྱིས་བསླུས་
པེ་ཡིས། །ལྷ་དེ་དམྱལ་བར་འགྲོ་བ་ཡིན། །སྲེད་པས་དུས་གསུམ་སླུ་བྱེད་ཅིང་། །རྟག་ཏུ་མཐུན་པར་མི་བྱེད་པས། །བློ་ལྡན་དེ་ལ་ཡིད་མ་རྟོན། །དེ་ནི་འཁོར་བའི་འཆིང་བ་ཡིན། །དགྲ་ནི་གཉེན་བཞིན་བྱིས་པས་མཐོང་། །
དགྲ་བཞིན་དུ་ཡང་གཅོད་པར་བྱེད། །ཤེས་ལྡན་དེ་ལ་ཡིད་མ་བརྟན། །དེ་ནི་འཇིག་རྟེན་འཆིང་བ་ཡིན། །ལྕགས་དང་ཤིང་གི་འཆིང་བ་ནི། །བཅད་པར་ནུས་པ་དེ་བཞིན་དུ། །རྟག་ཏུ་འདོད་པ་ལ་ཞེན་པའི། །སྲེད་པའི་འཆིང་བ་བཅད་མི་
ནུས། །བདེ་བ་ཟད་མེད་འདོད་པ་གང་། །གང་ཞིག་འཆིང་བ་གཞིག་འདོད་འདི། །དེ་ནི་སྲད་པའི་ཡུལ་ལས་གྲོལ། །ཤེས་རབ་ཡུལ་དུ་འགྲོ་བ་ཡིན། །ཡེ་ཤེས་སྣང་བ་བདེ་བའི་འོད། །སྡུག་བསྔལ་སྲེད་པའི་མུན་པར་བརྗོད། །དེ་ཕྱིར་སྣང་
བ་ལ་གནོས་ལ། །མཁས་པས་མུན་པ་རྗེས་སུ་སོལ། །ཤེས་རབ་མཚོན་ཆ་རྣོན་པོ་ཡིས། །སྲེད་པའི་ཤིང་གཅོད་དེ་བཞིན་དུ། །རྩད་ནས་ཤིང་གཅོད་སྐྱེས་བུས་ནི། །བདེ་བ་བླ་ན་མེད་པ་འཐོབ། །རྟག་ཏུ་འབབ་ཆུའི་ཀླུང་གང་བའི། །

66-1-14a

སྐྱོན་གྱི་ནགས་ནི་བཅད་པར་གྱིས། །སྐྱོན་གྱི་ནགས་དེ་བཅད་པ་ལས། །མཁས་པས་སྲིད་པ་ལས་གྲོལ་འགྱུར། །སྲེད་པའི་ཆུ་བོ་ལམ་གསུམ་འགྲོ། །བག་མེད་སྤྱོད་པས་རྒལ་བར་དཀའ། །ཤེས་རབ་གྲུ་ལ་བརྟེན་ནས་
ཀུན། །སྐྱོན་གྱི་ཕ་རོལ་འགྲོ་བར་འགྱུར། །ཤེས་རབ་རི་ཡི་རྩེར་སོང་ནས། །ཚུལ་ཁྲིམས་ཕུག་ནི་མཛེས་པ་ལས། །སྲིད་པའི་སྐྱོན་ནི་འདི་དག་ཀུན། །གཞལ་དུ་མེད་པའི་མིག་གིས་མཐོང་། །སྐྱེས་བུ་ཆོས་སྤངས་པ་དེ་ནི། །ཕྱི་དང་ནང་
ཡང་སྟོང་པ་ཡིན། །གང་དག་ཆོས་ནི་མི་འདོད་པ། །དབུ་བ་བཞིན་དུ་སྙིང་པོ་མེད། །ཕྱི་དང་ནང་ཡང་སྙིང་པོ་དེ། །སྐྱེས་བུ་རྡོ་རྗེ་ལྟར་བརྟན་པ། །གང་དག་ཞི་བའི་ཆོས་སྤྱོད་པ། །སེམས་ཅན་གཞན་ལ་ཕན་པ་ཡིན། །བག་མེད་
འདམ་དུ་བྱིང་བ་ཡི། །མི་གང་ཡུལ་ལ་སྤྱོད་པ་ནི། །རྨོངས་པ་དེ་ནི་སྲིན་བུས་ཟོས། །བདེ་བ་མཆོག་གི་སྐལ་ལྡན་མིན། །དེ་ཕྱིར་བདེ་དོན་གཉེར་སྐྱེས་བུས། །བག་མེད་རྗེས་སུ་བསྟེན་མི་བྱ། །བག་མེད་འཇིགས་པ་དང་བྲལ་བར། །
གནས་པའི་བདེ་བ་དཔག་ཏུ་མེད། །དཔྱོད་པ་པོས་ནི་བག་མེད་ལ། །རྗེས་སུ་ཡིད་བརྟན་མ་བྱེད་ཅིག །དེས་བལྟས་པ་ཡི་མི་རྣམས་ནི། །འགྲོ་བ་ལྔར་ནི་འཁོར་བ་ཡིན། །དེ་ལྟར་དེ་དག་གིས་ལྷ་དེ་དག་རྣམས་ལ་རྗེས་སུ་གདམས་པར་
བྱེད་པའི་ཚིགས་སུ་བཅད་པ་རྣམས་ཀྱིས་རྗེས་སུ་འདོམས་པར་བྱེད་དོ། །དེ་ལྟར་རྟོགས་པར་བྱེད་པར་གྱུར་ན་ཡང་ཀུན་དུ་རིག་པ་ཡང་མ་ཡིན་ཏེ། དེ་དག་འདོད་པའི་བདེ་བ་རྣམས་ཀྱིས་ཀུན་དུ་མི་རྟོགས་སོ། །དེ་དག་རྣམས་ཀྱིས་དེ་དག་
རྣམས་ལ་རྩིས་བགྲངས་མ་བྱས་པས་ཕྱིར་ཡང་དེ་ཁོ་ན་ལྟར་གར་བྱེད་པར་གྱུར་ཅིང་འདོད་པའི་དགའ་བ་རྣམས་ལ་རྣམ་པར་ཆགས་པར་གྱུར་ཏོ། །དེ་ནས་བློ་རྟག་ཏུ་མཉམ་པར་བཞག་པ་སེམས་ཅན་རྣམས་ཐམས་ཅད་ལ་གཅིག་ཏུ་ཕན་པ་
བྱེད་པ། ཕན་པ་བྱེད་པ་གཅིག་པུ་ལ་བློ་མཉམ་པར་བཞག་པའི་བྱང་ཆུབ་སེམས་དཔའ་དུས་བཟང་དེ་ངང་པ་དེ་དག་གི་ནང་དུ་སོང་བར་གྱུར་ཏོ། །དེ་གལ་ཏེ་ན་སྐལ་བ་མཐུན་པར་གྱུར་པ་ཉིད་ཀྱི་ཕྱིར་བྱ་དེ་དག་གི་དབུས་སུ་དགའ་བར་

66-1-14b

བྱེད་དོ། །གལ་ཏེ་ན་ཕུག་བཟང་པོ་དེར་རང་ཉིད་གཅིག་པུ་ཞིག་བླ་ལེགས་པར་མཉམ་པར་བཞག་པས་ཆོས་སེམས་པར་བྱེད་དོ། །དེ་ལྟར་བྱའི་རྒྱལ་པོ་དུས་བཟང་འདི་རྩེ་དགའ་བར་བྱེད་པ་ཉིད་དང་ལྷན་ཅིག་རྗེས་སུ་སྤྱོད་པའི་ངང་
པ་གཞན་རྣམས་ཆོས་ཀྱི་གཏམ་རྣམས་ཀྱང་བྱེད་དོ། །བྱའི་ཚོགས་དེ་དག་རྣམས་ཀྱི་ནང་དུ་འོངས་པར་གྱུར་པའི་ལྷ་དེ་དག་རྣམས་རབ་ཏུ་དགའ་བའི་ཡིད་ཀྱིས་ཕན་ཚུན་གྲོགས་སུ་གྱུར་པས་དགའ་བར་བྱ་འདོད་ནས་འོངས་པ་རྣམས་
ཀྱིས་མཚོ་དེ་མངོན་པར་མཐོང་བར་གྱུར་པ་ན་ཐམས་ཅད་ལས་ཀྱང་མངོན་པར་དགའ་བར་གྱུར་པ་མཆོག་ཏུ་ཡང་མིག་དང་ཡིད་འཕྲོག་པར་བྱེད་པ་ཀུན་ནས་འཕེལ་བར་བྱེད་པའི་ལྗོན་ཤིང་དང་འབྲས་བུ་རྣམས་ཀྱིས་ཉེ་བར་མཛེས་པར་གྱུར་པ་སྟེ། 
དེ་དག་རྣམས་མངོན་པར་མཐོང་ནས་ལྷ་དེ་དག་རབ་ཏུ་དགའ་བར་གྱུར་པའི་ཡིད་ཀྱིས་ཉེ་འཁོར་དེ་དག་རྣམས་ཀྱང་ལྷན་ཅིག་རྗེས་སུ་སྤྱོད་པའི་འཁོར་དང་བཅས་པས་ཡོངས་སུ་བཟུང་ཞིང་གར་དང་གླུ་དང་རྒོད་པ་དང་འགྱིང་བག་གི་བྱ་བ་རྣམས་བཅུ་འགྱུར་
ལས་ཀྱང་ལྷག་པར་བྱེད་པར་རྩོམ་མོ། །དེ་ལྟར་མཚོ་དེ་ལྷ་དེ་དག་རྣམས་དགའ་བར་བྱེད་ཅིང་རྩེ་བར་ཡང་བྱེད་དོ། །དེ་ནས་དེ་དག་རྣམས་ཀུན་དུ་མཐོང་ནས་བྱང་ཆུབ་སེམས་དཔའ་མཆོག་ཏུ་ཡོངས་སུ་སྨིན་པའི་བློ་དང་ལྡན་པ་དེས་ཚིགས་སུ་
བཅད་པ་འདི་དག་འཆད་པར་བྱེད་པ་ཇི་ལྟར། བག་མེད་པ་ནི་བག་ཡོད་པས། །གང་ཚེ་མཁས་པས་སྤང་བར་གྱིས། །ཤེས་རབ་ཁང་བཟངས་རྩེར་བྱུང་བ། །བདེ་ལེགས་ཐོབ་པ་བླ་ན་མེད། །གང་ཞིག་བག་མེད་རྣམས་སྤོང་བའི། །ལམ་
འདི་དག་ནི་ཞི་བ་མཆོག །ལམ་འདི་ཡིས་ནི་མྱ་ངན་འདས། །ཆེན་པོར་མཁས་པར་འགྲོ་བ་ཡིན། །ལམ་གྱི་གེགས་ནི་མི་བཟད་པ། །སེམས་རྒྱུད་སུན་འབྱིན་བྱེད་པ་པོ། །ཆོས་ཀྱི་ཟམ་རྣམས་གཅོད་པ་ནི། །བག་མེད་པར་ནི་ཡོངས་སུ་
བསྒྲགས། །དྲན་པ་སུན་འབྱིན་མ་བགྲུངས་པ། །ཐར་པའི་ལམ་ནི་འཇིག་པ་པོ། །ཕ་རོལ་ངན་སོང་རྣམས་སུ་ཁྲིད། །བག་མེད་པས་ནི་ཀུན་དུ་འཇུག །འདི་ཡིས་ཡིད་དཀྲུགས་པ་ཡིས་ནི། །བདག་གིས་ཕན་པ་མི་ཤེས་སོ། །ཤི་བ་

66-1-15a

ཡི་ནི་རོ་བཞིན་དུ། །ཚིག་མིན་དོན་ཡང་རིག་པ་མིན། །དེ་ཕྱིར་འདི་ནི་ཕྱུགས་མཚུངས་པའི། །ལྷ་ཡི་ལུས་ནི་འཛིན་པ་ཡིན། །བག་མེད་པས་ནི་ཉེར་བཅོམ་པའི། །རྨོངས་པ་གར་དང་རྒོད་པ་ཡང་། །སྐྱེ་དང་
འཆི་འཕོ་བ་གཞན་གྱིས། །འཇིག་འགྱུར་བ་དང་དངངས་པར་བྱེད། །གང་ཞིག་བག་མེད་རྗེས་སུ་རྒྱུག །སྲིད་གསུམ་འབྱུང་པོ་ཐམས་ཅད་རྣམས། །སྐྱོན་རྣམས་ཐམས་ཅད་སྐྱེད་བྱེད་པ། །འཆིང་དང་སྡིག་པའི་ལས་
རྣམས་དང་། །ཆོས་ཀུན་དྲན་པ་ཉམས་བྱེད་པར། །བག་མེད་དགྲ་ནི་རབ་ཏུ་འཇུག །ནང་གི་བདག་ཉིད་ལས་རྣམས་དང་། །ཕྱི་རོལ་ཇི་ལྟར་ཡང་མིན་ཏེ། །བག་མེད་ཉེར་བཅོམ་སྐྱེ་བོ་རྣམས། །ཆུད་ཟོས་ཡིད་ནི་སྐྱེད་པར་
བྱེད། །གང་ཡང་འདི་ནི་སུས་འདོན་ལས། །དེ་ནི་བག་མེད་པས་འགོགས་སོ། །ཁྲིམས་བྲལ་ངོ་ཚ་མེད་པ་ཡི། །མིག་ནི་བག་མེད་པས་ཉེར་བཅོམ། །རྩེད་མོ་ཡིས་ནི་ཡིད་བྲེལ་བས། །གར་རོལ་གླུ་བསྟན་པ་ཡིས་གཡེངས། །
ལྷ་རྫས་ཡུལ་གྱིས་ངོམས་པ་མེད། །མཐོ་རིས་གནས་ནས་ཉམས་པར་འགྱུར། །འཇིགས་པའི་གནས་ལ་དགའ་བ་དེ། །བག་མེད་པས་ནི་རྣམ་རྨོངས་སོ། །ལམ་ལ་ལམ་དུ་མི་རིག་པའི། །མི་ནི་དམུས་ལོང་དང་མཚུངས་སོ། །
དེ་ལྟར་གཞན་ལ་ཕན་པ་བྱེད་པའི་དུས་བཟང་དེས་ལྷ་དེ་དག་རྣམས་མངོན་པར་མཐོང་ནས། ཀུན་ནས་བརྗོད་པ་དང་ལྡན་པའི་བྱ་དེ་དག་རྣམས་ཀྱི་དབུས་སུ་སོང་ཞིང་མཆོག་ཏུ་མིག་དང་ཡིད་འཕྲོག་པར་བྱེད་པའི་ངང་པ་དེ་དག་
རྣམས་ཀྱི་ནང་དུ་ཕྱིན་པར་གྱུར་ནས་ཀྱང་རྗེས་སུ་འདོམས་པར་བྱེད་པའི་ཚིགས་སུ་བཅད་པ་འདི་རྣམས་ཇི་ལྟ་བར་བརྗོད་ཀྱང་འགགས་པའི་ཡིད་བཞིན་དུ་ལྷ་དེ་དག་རྣམས་ཀྱིས་ཐོས་པར་ཡང་མི་འགྱུར་རོ། །དེ་ལྟར་རྩིས་བགྲང་
ཡང་མི་བྱེད་པར་གར་དང་རྒོད་པ་དང་བཅས་ནས་རྔ་སྐད་ཡན་ལག་ལྔ་དང་ལྡན་པ་མཚུངས་པ་དང་སྙན་པ་དང་ཐམས་ཅད་ཀྱི་སེམས་དང་ཡིད་འཕྲོག་པར་བྱེད་པ་རྣམས་ཀྱིས་ཀུན་ནས་འཁྲིད་པར་འགྱུར་ཏེ། ཡུལ་གཞན་ལྔ་པོ་རྣམས་

66-1-15b

ལ་ཡང་ཡིད་ཤིན་དུ་རྣམ་པར་ཆགས་པའི་ཕྱིར་ན་ཐོས་པར་མི་འགྱུར་རོ། །དེ་ལྟར་ཡང་མཚོ་དེ་ཀུན་དུ་བསྐོར་ནས་གནས་པར་བྱེད་དོ། །དེ་ཁོ་ན་བཞིན་དུ་ཡུལ་རྣམས་ལ་རྣམ་པར་ཆགས་པའི་ཡིད་ཅན་རྣམས་
བག་མེད་པར་གནས་པའི་འཐབ་བྲལ་བའི་ལྷ་རྣམས་ལ་ཆོས་སྟོན་པར་བྱེད་པ་ནི་དགེ་བ་ཆེན་པོ་རྣམས་དང་ལྡན་པའི་སེམས་ཅན་གསུམ་པོ་འདི་དག་རྣམས་ཡིན་པས་ན། འདི་ལྟ་སྟེ་མུ་སུ་ལུན་དྷ་དེ་དང་ངང་པའི་
རྒྱལ་པོ་དུས་བཟང་དང་རྨ་བྱའི་རྒྱལ་པོ་རྣམ་པར་བཀྲ་བ་གསུམ་པོ་དེ་དག་རྣམས་ནི་གཞན་རྗེས་སུ་འཛིན་པ་ལ་རབ་ཏུ་ཞུགས་པས་ཆོས་སྟོན་པར་བྱེད་པ་ཡིན་ཏེ། ཁ་ཅིག་ནི་རང་སངས་རྒྱས་ཀྱི་བྱང་ཆུབ་ལ་ཁ་ཅིག་ནི་ཉན་
ཐོས་ཀྱི་བྱང་ཆུབ་ལ་རབ་ཏུ་འགོད་པར་བྱེད་པ་ཡིན་ནོ། །དེ་ལྟར་ངེས་པར་གནས་པ་རྣམས་ནི་དེ་དག་དགེ་ལེགས་དང་ལྡན་པ་རྣམས་ཡིན་ཏེ། བདུད་ཀྱི་ཡུལ་ལས་བྲོས་པར་འདོད་པ་རྣམས་ཡིན་ནོ། །དེ་ནས་བདུད་སྡིག་ཅན་
དེ་ཉིད་འདི་སྙམ་དུ་སེམས་ཏེ། ཇི་ལྟར་བདག་གནས་པའི་ཡུལ་སྟོངས་པར་བྱེད་པ་རྣམས་ནི་མིའི་འཇིག་རྟེན་ན་དགེ་སྦྱོང་གིས་སོ། །རྒྱལ་ཆེན་རིས་བཞི་ནི་རྒྱལ་པོ་བཞི་ཡིན་ནོ། །སུམ་བཅུ་རྩ་གསུམ་ན་ནི་ཀཽ་ཤི་ཀ་ཡིན་
ནོ། །མཚེ་མ་ན་ནི་མུ་སུ་ལུན་དྷ་དང་དུས་བཟང་དང་རྣམ་པར་བཀྲ་བ་རྣམས་ཡིན་ནོ། །དགའ་ལྡན་ན་ནི་རབ་ཏུ་ཞི་བ་ཡིན་ནོ། །ལྷན་ཅིག་སྤྱོད་པའི་འཁོར་དེ་དག་རྣམས་གང་ཡིན་པ་ཐམས་ཅད་ཀྱིས་ཀྱང་ཐོས་པར་མི་འགྱུར་
བ་ཡུལ་རྣམས་དང་བདག་གི་ལྷ་དང་མི་རྣམས་ཀྱང་གཏི་མུག་གིས་རྨོངས་པར་བྱའོ། །འཕྲུལ་དགའ་བ་ཞེས་བྱ་བ་གང་ཡིན་པ་རྣམས་ནི་མ་གཏོགས་པ་རྣམས་ཀྱིས་མི་ཐོས་པར་བྱའོ། །བདག་གི་ས་པའི་ཤིན་དུ་སྟོབས་དང་ལྡན་
པ་དེས་ཀྱང་བདག་གིས་ཕྱིར་བཟློག་པའི་བཀོད་པ་བྱ་བ་ནུས་ཀྱིས། ཐ་མར་གྱུར་ན་ཡང་ངས་གང་ན་འཐབ་བྲལ་བའི་ལྷ་རྣམས་ཡོད་པ་དེར་ཤེས་རབ་དང་ཕ་རོལ་གནོན་པས་མཚུངས་པར་གྱུར་པའི་འཁོར་བཙལ་གཏང་བར་བྱའོ། །

66-1-16a

དེ་ནས་དེ་ལྟར་བདུད་སྡིག་ཅན་དེས་རིག་ནས་བློན་པོ་དང་ལྷན་ཅིག་ཏུ་འགྲོས་ནས། མུ་སུ་ལུན་དྷ་དེ་དང་དུས་བཟང་དེ་དང་རྣམ་པར་བཀྲ་བ་དེ་དང་ཡང་བརྩད་པར་བྱ་བའི་དོན་དུ་ཕོ་ཉ་བཏང་བ་རྣམས་བློ་གྲོས་མཁས་པ་
དང་སྤྲུལ་པ་ལ་མཁས་པ་དང་གཟི་བརྗིད་ཆེ་བ་རྣམས་འདི་ལྟ་སྟེ། དགའ་བ་དང་བག་མེད་པ་དང་རྣམ་པར་རྨོངས་པར་བྱེད་པ་རྣམས་སོ། །ཀྱེ་ཁྱེད་རྣམས་མཚེ་མའི་ལྷ་རྣམས་ཀྱི་ནང་དུ་སོང་ལ་མུ་སུ་ལུན་དྷ་དང་དུས་བཟང་དང་
རྣམ་པར་བཀྲ་བ་རྣམས་ཆོས་སྟོན་པའི་བར་ཆད་གྱིས་ཤིག །དེ་ནས་དེའི་ཚིག་ཐོས་པར་གྱུར་ནས་གང་ན་འཐབ་བྲལ་བའི་ལྷའི་རིགས་ཡོད་པ་དེར་ངེས་པར་བབས་པར་འགྱུར་རོ། །ཞུགས་པར་གྱུར་ནས་ཀྱང་གང་ན་བྱའི་
རྒྱལ་པོ་དུས་བཟང་ཡོད་པ་དེར་ཀུན་ནས་ཉེ་བར་སོང་ངོ་། །ཀུན་ནས་ཉེ་བར་འོངས་པ་ཡང་མཐོང་བར་གྱུར་ནས། ལྷ་དེ་དག་རྣམས་ལ་བརྟན་པ་དང་རྣམ་པར་གསལ་བ་དང་རྒྱ་ཆེ་བར་གྱུར་པའི་རྗེས་སུ་བསྔགས་པར་བྱེད་
པའི་ཚིགས་སུ་བཅད་པ་རྣམས་བཤད་པ་འདི་ལྟ་སྟེ། བག་མེད་པ་ཡི་དུས་འདི་མིན། །དགའ་བའི་དུས་ནི་ནམ་ཡང་མིན། །རྣམ་རྨོངས་སྐྱེད་པ་འདི་དག་ཀྱང་། །འཆི་བདག་སྟོབས་པོ་ཆེ་ཡི་དུས། །དགའ་བ་དུ་བ་
བག་མེད་མེས། །ལྷ་རྣམས་ཀུན་ནི་སྲེག་པ་ཡིན། །ཡུལ་ལ་གཏི་མུག་གིས་རྨོངས་པ། །མིག་མེད་པས་ཀྱང་མ་རིག་གོ། །ལུས་ཅན་རྣམས་ཀྱི་འདུ་བྱེད་ནི། །རྣམ་པར་ཆད་པ་མེད་པར་མཐོང་། །དེ་ལྟར་ཡུལ་ལས་
ཀུན་རྨོངས་པས། །གང་ཕན་པ་ནི་རྟོགས་པ་མིན། ། དེ་ཡིས་དེའི་ཚིག་རྣམས་ཐོས་ནས་འཐབ་བྲལ་བའི་ལྷ་རྣམས་ཉིད་དང་འདྲ་བར་བྱས་ནས་བག་མེད་པས་སྨྲས་པ། ཀུན་དགའ་མཆོག་གི་མཐའ་ཡས་པ། །བག་མེད་
དགའ་བ་སྐྱེད་བྱེད་པ། །བདེ་ཀུན་རབ་ཏུ་འཕེལ་བྱེད་པ། །དེ་ཁྱོད་ཅི་ཡི་ཕྱིར་མི་འཆད། །དུས་བཟངས་ཀྱིས་རབ་ཏུ་བརྗོད་པ། ཀུན་དགའ་བག་མེད་པ་འདིས་ནི། །བདེ་བ་ཐམས་ཅད་འཇོམས་པར་བྱེད། །བག་མེད་སྡུག་བསྔལ་

66-1-16b

སྐྱེད་པ་པོ། །དེ་ཕྱིར་རྟག་ཏུ་དེ་ཁྱོད་འཆད། །བག་མེད་པས་སྨྲས་པ། བདེ་བ་ཡི་ནི་ཡུལ་རྣམས་དང་། །བག་མེད་ལྷ་ཡི་བུ་མོ་དང་། །དེ་བཞིན་དུ་ནི་གླུ་རྣམས་ཀྱང་། །བག་མེད་བདེ་བ་ཡིན་པར་བཤད། །དུས་བཟང་གིས་
བརྗོད་པ། མི་རྣམས་ཡུལ་ནི་གང་སྐྱེས་པ། །སྡུག་བསྔལ་བ་ནི་སྐྱེས་པ་ཡིན། །དེ་ཡི་རྩ་བ་གཅོད་བྱེད་པ། །གང་གིས་མི་ནི་འོག་ཏུ་འགྲོ། །བག་མེད་པས་སྨྲས་པ། ནགས་དང་ཉེ་བའི་ནགས་དང་བྲག །ཁྲུས་ཀྱི་རྫིང་བུ་པད་
མའི་ཚལ། །ཁང་བཟངས་རྩེ་དང་ཀུན་དགའ་ཚལ། །བདག་ནི་བག་མེད་པ་ཡིས་དུས། །དུས་བཟང་གིས་སྨྲས་པ། དགོན་པ་དང་ནི་ཞི་བའི་ཚལ། །རི་དང་ནགས་ཀྱི་ནང་དུ་ཡང་། །བག་ཡོད་དགའ་བ་ཞི་བ་ཡིས། །བཅིངས་ལས་
ཐར་པར་འགྲོ་བ་ཡིན། །སེམས་རྨོངས་པ་ཡི་མི་གང་དག །བག་མེད་པས་ནི་དམྱལ་བར་འགྲོ། །དེ་བཞིན་དུ་ནི་དུད་འགྲོར་ཡང་། །ཡི་དགས་སུ་ཡང་སྐྱེ་འགྱུར་ཏེ། །དེ་ལྟར་དུས་བཟང་གིས་བརྗོད་པ་ཡིན་ཏེ། བདུད་ཀྱི་ཕྱོགས་
ཀྱི་བག་མེད་པ་དང་དྲི་བ་དང་ཕྱིར་ལན་འདེབས་པ་རྣམས་བརྗོད་ནས། ཇི་སྲིད་དུ་རིན་པོ་ཆེའི་འོད་ཀྱིས་ཉེ་བར་གསལ་བའི་ཕུག་གང་ཡིན་པ་དེའི་ནང་དུ་ཞུགས་པའི་བར་དུ་སྟེ། དེ་ནི་ཡང་ཕལ་ཆེར་ནི་མུ་སུ་ལུན་དྷ་དེ་བག་མེད་པ་སྤང་
བར་བྱ་བ་སྒོམ་པར་བྱེད་དོ། །གང་ཡང་ལྷ་གཞན་དག་དེའི་ལྷན་ཅིག་སྤྱོད་པར་གྱུར་པ་དེ་དག་རྣམས་ནི་རྒྱུ་མཚན་དེ་དག་གིས་ལྷ་ཉིད་ཀྱང་བརྒྱ་སྟོང་ཕྲག་དུ་མ་རྣམས་ཀྱིས་ཡོངས་སུ་བསྐོར་ཅིང་གར་དང་གླུ་དང་རོལ་མོ་རྣམས་ཀྱི་སྒྲ་དང་ལྡན་
པས་ནམ་མཁའི་དཀྱིལ་མ་ལུས་པ་རྣམས་ཀུན་དུ་གང་བར་གྱུར་པས་མཚོ་ཆེན་པོ་དེར་འོངས་པར་གྱུར་ཏེ། །གང་ཡང་ལྷ་གཞན་དག་རྣམས་ནི་དེ་དག་གི་རྗེས་སུ་འགྲོ་བར་གྱུར་ནས་དེ་དག་རྣམས་དེ་ན་བག་མེད་པ་བྱེད་དོ། །གང་ཡང་སེམས་
མཉམ་པར་བཞག་པ་དེ་དག་རྣམས་ཀྱང་ཤིན་དུ་མྱུར་བར་འོང་བར་གྱུར་ཏེ། ཇི་སྲིད་དུ་བྱའི་རྒྱལ་པོ་དུས་བཟང་དང་བདུད་ཀྱི་ཕྱོགས་ཀྱི་བག་མེད་པ་དག་དྲི་བ་དང་ལན་བྱས་ཟིན་པར་མ་གྱུར་ཀྱི་བར་དུའོ། །དེ་ན་མུ་སུ་ལུན་དྷ་དེས་དེ་དག་

66-1-17a

རྣམས་ཐམས་ཅད་དུས་བཟང་ལས་ཐོས་པར་གྱུར་ཏེ་སྔ་མ་བཞིན་ནོ། །དེ་ནས་མུ་སུ་ལུན་དྷ་དེའི་ཡིད་ཀྱིས་རེག་པར་གྱུར་ནས་བག་མེད་པ་ལ་འདི་སྐད་བརྗོད་དོ། །ཁྱོད་ནི་གདོན་མི་ཟ་བར་བདུད་སྡིག་ཏོ་
ཅན་གྱི་ཕྱོགས་སུ་གྱུར་པའི་བག་མེད་པ་འདི་ཡིན་ཏེ་འོང་གིས་དེའི་ཡང་ཕྱོགས་བྱེད་པའི་འཁོར་གསུམ་ཡིན་པར་བདག་ཅག་གིས་ལྷ་གཞན་དག་གི་དྲུང་ནས་ཐོས་སོ། །འདི་ལྟ་སྟེ་བག་མེད་པ་དང་རྒོད་པ་དང་རྣམ་པར་རྨོངས་པའོ། །འཇིག་
རྟེན་རྨོངས་པ་རྣམས་ཕྱིར་ཞིང་ཉིད་དུ་ཆེས་ལྷག་པར་རྨོངས་པར་བྱེད་དོ། །གང་ཆུངས་ཀྱང་བདག་གིས་འདི་དག་དང་རྒོད་པ་དང་མ་བསྡམས་པ་ལ་སོགས་པ་རྣམས་ཀྱི་ལན་དྲི་བ་དང་ཕྱིར་ཞིང་དྲི་བ་དང་ལན་གྱི་ཆོས་ཀྱི་རྣམ་གྲངས་ཆེན་
པོ་བཅུ་གཅིག་པ་ཞེས་བྱ་བ་ཆོས་དང་ལྡན་པས་བརྩད་པར་བྱའོ། །དེ་ནས་འཐབ་བྲལ་བ་རྣམས་ཀྱི་མངའ་བདག་གིས་དེ་ལྟར་རིག་ནས་དུས་བཟང་དེ་དང་ཡང་ལྷན་ཅིག་ཏུ་འགྲོ་བར་བྱས་པར་གྱུར་ཏེ། ནམ་མཁའི་དཀྱིལ་དུ་
འཕགས་ནས་པད་མའི་སྙིང་པོ་ལ་ཉེ་བར་གནས་ཏེ་བག་མེད་པ་ལ་མངོན་པར་དགའི་ལྷ་བརྒྱ་ཕྲག་མང་པོ་རྣམས་ཀྱིས་ཡོངས་སུ་བསྐོར་ནས་འདི་སྐད་ཅེས་བརྗོད་དོ། །དྲི་བ་དང་ཕྱིར་ཞིང་དྲི་བ་དང་ལན་ཞེས་བྱ་བའི་ཆོས་ཀྱི་རྣམ་
གྲངས་བཅུ་གཅིག་པ་ཞེས་བྱ་བའི་ཆོས་བཤད་པར་བྱ་ཡིས་མཉན་པར་གྱིས་ཤིག །བག་མེད་པ་གང་བཅོམ་ལྡན་འདས་འོད་སྲུང་གིས་གསུངས་པ་རྣམས་བག་ཡོད་པ་ལ་མངོན་པར་དགའ་བ་བཀྲ་ཤིས་ཞེས་བྱ་བའི་སྔོན་གྱི་ལྷ་ལ་
བདག་གིས་ཐོས་པའི་ཆོས་ཀྱི་རྣམ་གྲངས་གང་ཡིན་པ་དེ་ལེགས་པར་རབ་ཏུ་ཡིད་ལ་བྱས་ཏེ་ཉོན་ཅིག །ལྷ་རྣམས་ཐམས་ཅད་དང་དུས་བཟང་ཐོག་མར་གྱུར་པའི་ཀུན་ནས་བརྗོད་པ་དང་ལྡན་པའི་བྱ་རྣམས་ཐམས་ཅད་དང་བག་མེད་པར་
ཉན་ནོ། །བདུད་ཀྱི་ཕྱོགས་རྣམས་ཀྱང་ཉན་ཏེ། ཕྱིན་ཅི་ལོག་ཏུ་སྨྲ་བ་འཇིག་རྟེན་པ་རྣམས་ལ་ཕན་པ་མ་ཡིན་པ་བྱེད་པ་བདུད་ཀྱི་ཕྱོགས་རྣམས་ཀུན་དུ་གནས་སོ། །དྲི་བ་དང་ཕྱིར་ཞིང་དྲི་བ་དང་ལམ་གྱི་ཆོས་ཀྱི་རྣམ་གྲངས་བཅུ་

66-1-17b

གཅིག་པ་དེ་དག་རྣམས་ཀྱང་གང་ཞེ་ན་འདི་ལྟ་སྟེ། ཆོས་བཅུ་གཅིག་པོ་འདི་དག་རྣམས་ནི་ཆོས་བཅུ་གཅིག་གིས་རབ་ཏུ་སྤང་བར་བྱ་སྟེ། ཡང་དག་པ་ཇི་ལྟ་བ་བཞིན་དུ་འདོད་པ་དང་མྱ་ངན་ལས་འདའ་བར་འགྲོ་བར་བྱེད་པ་དང་། 
བདུད་ཀྱི་ཡུལ་རྣམས་ལ་གནས་པར་མི་འདོད་པ་དང་། འཁོར་བའི་འཆིང་བ་རྣམས་ཀྱི་འཇིགས་པས་དང་། དགོན་པ་ཞི་བ་རྣམས་སུ་གནས་པས་དང་། གཅིག་ཏུ་དགའ་བ་རྣམས་ཀྱིས་དང་། ཡང་དག་པ་ཇི་ལྟ་བ་ལ་རེ་བར་
གྱུར་པ་དང་། གཏི་མུག་གཞོམ་པར་འདོད་པ་དེ་དག་རྣམས་ཀྱིས་ཡིན་ནོ། །བཅུ་གཅིག་པོ་རྣམས་ཀྱིས་རབ་ཏུ་སྤོང་བར་བྱེད་པ་དང་ཆོས་བཅུ་གཅིག་པོ་དེ་དག་རྣམས་གང་ཡིན་པ་ཡང་གང་དག་ཞེ་ན། འདི་ལྟ་སྟེ་རྒོད་པ་ནི་འདུལ་བས་སོ། །
མ་བསྡམས་པ་ནི་སེམས་རྩེ་གཅིག་པས་སོ། །ཚུལ་ཁྲིམས་འཆལ་པ་ནི་སྐྱེས་བུ་དམ་པ་ལ་རྟེན་པས་སོ། །ལེ་ལོ་ནི་བརྩོན་འགྲུས་བརྩམས་པས་སོ། །གྲོང་དང་གྲོང་ཁྱེར་རྣམས་སུ་རབ་ཏུ་འཇུག་པའི་སྤྱོད་པ་ལ་དགའ་བ་
ནི་གཅིག་པུ་དགོན་པར་གནས་པས་སོ། །འདོད་ཆེན་པོ་ནི་ཆོག་ཤེས་པས་སོ། །གཉེན་འདུན་ལྟ་བ་ལ་མངོན་པར་དགའ་བ་རྣམས་ནི་འགྲོན་པོར་ཡུན་རིང་དུ་གནས་པ་ལ་མངོན་པར་དགའ་བས་སོ། །དོན་མེད་པར་སྨྲ་བ་ནི་ངག་ཡང་
དག་པར་བསྡམས་པས་སོ། །ཙབ་ཧྲལ་ཉིད་ནི་བརྟན་པས་སོ། །དབུལ་པོ་རྣམས་ཀྱང་སྦྱིན་པས་སོ། །མི་ཤེས་པ་ནི་ཤེས་པས་སོ། །ཆོས་བཅུ་གཅིག་པོ་དེ་དག་རྣམས་ནི་ཀུན་ནས་ཉོན་མོངས་པ་རྣམས་ཀྱི་དྲི་མ་དང་
ཀུན་ནས་ཉོན་མོངས་པ་ཅན་གྱི་འཆིང་བར་གྱུར་པ་བག་མེད་པར་གྱུར་པའི་ལྗོན་ཤིང་རྣམས་ཀྱི་ཡལ་ག་རྒྱས་པར་གྱུར་པ་ཡིན་པས་བདུད་ཀྱི་ཡུལ་ལས་འདའ་བར་འདོད་པ་རྣམས་དང་འཁོར་བའི་འཇིགས་པས་སྐྲག་པ་རྣམས་
དང་བག་མེད་པ་ཕམ་པར་བྱ་འདོད་པ་རྣམས་ཀྱིས་སྤང་བར་བྱའོ། །འཁོར་བ་རྣམས་ཐམས་ཅད་ནི་བག་མེད་པའི་རྩ་བ་ལས་ཡིན་ནོ། །བག་ཡོད་པའི་རྩ་བ་ལས་ནི་ཐར་པ་ཡིན་ནོ། །འཁོར་བ་ལས་འབྲོས་པར་འདོད་པ་

66-1-18a

རྣམས་ཐམས་ཅད་ལ་འདི་ཉིད་བཅོམ་ལྡན་འདས་ཀྱིས་གསུངས་པ་ཡིན་ནོ། །དེ་ལ་འདུལ་བ་ལ་མངོན་པར་དགའ་བ་རྣམས་དང་འདུལ་བ་འདོད་པ་རྣམས་དང་སེམས་ཅན་རྣམས་ཐམས་ཅད་སྡུག་པ་དང་མཐུན་པ་དང་
ཡིད་དུ་འོང་བར་གྱུར་པ་དེ་དག་རྣམས་ཐམས་ཅད་ཀྱིས་ཀྱང་ཞེ་ལྡོག་པར་ལྟ་བའི་ཆོས་རྒོད་པ་ཞེས་བྱ་བ་གང་དག་ཞེ་ན། འདུལ་བ་ལ་མངོན་པར་དགའ་བ་དེ་དག་དང་དེ་དག་རྣམས་ཀྱིས་ཀྱང་སྡིག་པའི་ཆོས་འདི་དག་རབ་ཏུ་སྤང་བར་བྱའོ། །
དེ་ལ་རྒོད་པ་ཡང་རྣམ་པ་ལྔ་ཡིན་ནོ། །འདི་ལྟ་སྟེ་གྲོང་དང་གྲོང་ཁྱེར་དུ་འཇུག་པ་རྣམས་ལ་འགྱོགས་པར་ལམ་དུ་འགྲོ་བ་དང་། འགྲོ་བར་བྱེད་པ་ན་ཡང་ཀུན་ནས་མ་བསྡམས་པ་དང་། ཁ་ཅིག་ནི་ལམ་དུ་འགྲོ་བ་ན་གོས་ཚགས་ལྷོད་
པ་དང་། ཁ་ཅིག་ནི་ལམ་ན་གོས་རྣམ་པར་འཕྱར་བྱེད་པ་དང་། འཁྲུལ་པ་ཡང་དང་ཡང་དུ་འབྱུང་བ་འམ་སེམས་མཉམ་པར་མ་བཞག་པའོ། །རྣམ་པ་དེ་ལྟ་བུ་དེ་དག་རྣམས་གཞན་གྱིས་མཐོང་བར་གྱུར་ན། དེ་མ་ཐག་
ཏུ་རྣམ་པར་སྡང་བར་འགྱུར་རོ། །དེ་ལྟར་འགྲོ་བ་བྱེད་པ་རྣམས་ཀྱི་ཀུན་ནས་མ་བསྡམས་པའི་འགྲོས་འདི་ཡང་གང་ལས་ཡིན་ན། ཆུང་ངུ་ན་འདི་ནི་རྒྱགས་པ་འམ་ཡིད་ལ་བྱེད་པ་དང་བྲལ་བ་ཡིན་ཏེ། དེ་བཞིན་དུ་རྒོད་པ་
རྣམས་ནི་རྣམ་པ་དུ་མ་ལས་ཡིན་ནོ། །དེ་དག་རྣམས་ཀྱང་ཀུན་ནས་བསྡམས་པའི་སྤྱོད་ལམ་གྱི་འགྲོས་གྱིས་དང་། གཉའ་ཤིང་གང་ཙམ་དུ་ལྟ་ཞིང་འགྲོ་བ་དང་། གོས་རྣམས་ཀྱི་ཚགས་བསྡམས་པ་དང་། མི་འཕྱར་བས་
ཀྱང་སྟེ་པུས་མོ་ལས་སོར་བཞི་ཙམ་གྱིས་ལྷག་པར་བླ་གོས་རུང་བ་ཡིན་པ་དང་། དཔུང་པ་གཉིས་མི་བསྐྱོད་པས་ལྷའི་འཇིག་རྟེན་གྱི་བག་མེད་པ་རྣམས་ནི་བག་ཡོད་པས་འཇོམས་པར་འགྱུར་རོ། །དགེ་སློང་ངམ་དེ་ལྟ་
བུའི་རིགས་ཅན་རྣམས་ཀྱིས་རབ་ཏུ་གཞོམ་པར་བྱ་བའི་བག་མེད་པ་བཞིན་ལྷག་པར་གྱུར་པ་ཡང་གང་ཞེ་ན། གང་ཅུང་ཟད་ཅིག་སྨྲ་བར་གྱུར་པ་ན་ཡང་ལེགས་པར་མ་བརྟགས་པར་བྱེད་པ་ཡིན་ནོ། །གང་གི་ཚོད་ཀར་གྱུར་

66-1-18b

པ་དེའི་ཚོད་ཀ་རྣམས་ཀྱང་ཀུན་ནས་རིག་པར་མི་འགྱུར་རོ། །དེ་སྦྱིན་པ་པོ་དང་སྦྱིན་བདག་གི་ཁྱིམ་དུ་སྒྲས་ལེགས་པར་འཇུག་པར་བྱེད་པ་རྣམས་ནི་སྡོམ་པར་བྱེད་པ་ཡིན་ཏེ། སེ་གོལ་གྱི་སྒྲ་མ་བྱས་པར་འཇུག་པར་བྱེད་
པ་ཡིན་ནོ། །སྟན་ཡང་ངན་པར་འཛིན་པར་བྱེད་དོ། །བསྡམས་པ་མེད་པ་དུ་མ་རྣམས་སྨྲ་བ་ཡིན་གྱི། སྨྲ་བ་དང་མི་སྨྲ་བ་རྣམས་ཀྱི་ཚོད་རིག་པར་འགྱུར་བ་ནི་མ་ཡིན་ནོ། །འདུག་པ་ཉིད་ན་སྐད་འཕང་མཐོན་པོས་སྨྲ་བར་འགྱུར་
བ་ཡིན་ནོ། །བུད་མེད་རྣམས་ལ་རྟོག་དཔྱོད་འཇུག་པར་བྱེད་དོ། །བབ་ཆོལ་དུ་རྒོད་པར་བྱེད་དོ། །བབ་ཆོལ་དུ་ཁྲོ་བར་བྱེད་དོ། །འཁོར་རྣམས་ལ་ཡང་སྔ་ཕྱིར་ལྟ་བར་མི་བྱེད་དོ། །དེ་ལྟར་རྒོད་བག་ཏུ་སྤྱོད་པ་ཀུན་ནས་
མ་བསྡམས་པར་འཇུག་པར་བྱེད་པའི་དགེ་སློང་རྣམས་ནི་མི་སྡུག་པ་དང་ཡིད་དུ་མི་འོང་བར་འགྱུར་ཞིང་འདི་དག་རྣམས་ལས་གཞན་པ་རབ་ཏུ་ཞི་བའི་ཆ་བྱད་དང་སྤྱོད་ཚུལ་ཅན་ཡོད་དམ་ཞེས་བརྗོད་པར་ཡང་བྱེད་དོ། །ཇི་ལྟར་སྐྱེས་
པ་རྣམས་སམ་དེ་ལས་གཞན་དེའི་རིགས་ཅན་རྣམས་ཀྱང་རུང་སྟེ། ཀྱེ་མ་དགེ་སློང་འདི་དག་ནི་རྒོད་བག་ཅན་ཡིན་ནོ། །ཡང་གང་གི་ཚེ་ངག་ཀུན་ནས་ལེགས་པར་བསྡམས་པར་གྱུར་པ་ན་སྔ་ཕྱི་ཚིག་རྣམས་ཀུན་ལེགས་པར་
འབྲེལ་པར་རྗོད་པར་བྱེད་དོ། །སྐྱེས་སུ་གཞན་དག་རྣམས་མཐོང་བར་གྱུར་པ་འམ་དེ་ཉིད་མཐོང་བར་གྱུར་ཀྱང་རུང་། སྦྱིན་པ་པོ་དང་སྦྱིན་བདག་རྣམས་སྃ་དེའི་རིགས་ཅན་གཞན་དག་རྣམས་ཀྱང་རུང་སྟེ། ཡུལ་དང་དུས་སུ་རིགས་
པ་དང་འགལ་བ་མེད་པར་དལ་བུས་སྨྲ་བར་བྱེད་དོ། །ཞི་བ་དང་གོ་བར་གྱུར་པ་དང་ཆོས་ཉིད་དང་མི་འགལ་བའི་ངག་རྣམས་ཇི་ལྟར་རྗོད་པར་བྱེད་པ་དེ་བཞིན་དུ་སྒྲུབ་པར་ཡང་བྱེད་དོ། །བུད་མེད་རྣམས་ལ་རྟོག་དཔྱོད་མི་བྱེད་དོ། །
སེ་གོལ་གྱི་སྒྲ་བྱས་ལེགས་པར་འཇུག་པར་ཡང་བྱེད་དོ། །དུས་ཀྱང་རིག་པར་འགྱུར་རོ། །ཕྱིར་འབྱུང་བར་འགྱུར་བའི་ངོ་བོ་ཡང་ཤེས་པར་འགྱུར་བ་དང་ཟུར་གྱིས་གོ་བར་ཡང་འགྱུར་རོ། །ཆོས་གོས་རྣམས་ཀྱང་རྣམ་པར་འཕྱར་

66-1-19a

བར་མི་བྱེད་དོ། །དཔུང་པ་དག་བསྐྱོད་པར་ཡང་མི་བྱེད་དོ། །གློ་དྲག་པོར་ལུ་བར་ཡང་མི་བྱེད་དོ། །ངག་གིས་འཕྱ་བར་ཡང་མི་བྱེད་དོ། །དྲིས་པ་དང་གཞན་དག་གུས་པར་གྱུར་པས་ཕྱི་ནས་ཚིག་རྗོད་པར་བྱེད་དོ། །དལ་བ་དང་
སྙན་པ་དང་ཆོས་དང་ལྡན་པ་རྣམས་ཀྱིས་ཀྱང་རུང་། དེ་ལྟར་རྒོད་བག་ནི་འདུལ་བས་འཇོམས་པར་བྱེད་དོ། །གཞལ་ཡང་འདུལ་བས་རྒོད་པ་ཀུན་ནས་འཇོམས་པར་བྱེད་དོ། །འདི་ཡང་གང་དག་ཡིན་ཞེ་ན་འདི་ལྟ་སྟེ་ཁྱིམ་
རྣམས་སུ་དེ་འཇུག་པར་བྱེད་པ་ན་དེ་ན་གླུ་དང་གར་དང་རོལ་མོའི་སྒྲ་རྣམས་དང་གད་མོ་དང་འགྱིང་བག་དང་ཡོངས་སུ་སྤྱོད་པ་དང་གཞན་དག་གིས་རྗོད་པ་དང་ཕན་ཚུན་དུ་དགོད་པ་རྣམས་ལ་ཉན་པར་མི་བྱེད་དོ་རོ་མྱང་བར་ཡང་མི་བྱེད་དོ། 
དེ་དག་རྣམས་ལ་སེམས་རབ་ཏུ་སྨོན་པར་མི་བྱེད་དོ། །ཚོགས་པ་འདུས་པ་ལ་མངོན་པར་དགའ་བར་མི་འགྱུར་རོ། །ཁྱིམ་གཞན་དག་རྣམས་ཀྱི་སྤྱོད་ཚུལ་གཞན་དག་ཏུ་བརྗོད་པར་མི་བྱེད་དོ། །ཤིན་ཏུ་མྱུར་བར་འགྲོ་བ་དང་
འོང་བ་དང་རབ་ཏུ་འཇུག་པ་མང་བ་མ་ཡིན་ནོ། །ཧ་ཅང་སློང་བར་བྱེད་པའི་རང་བཞིན་ཅན་མ་ཡིན་ནོ། །དེ་ལྟ་བུར་ཡང་དགེ་སློང་དེ་གཞན་གྱི་ཁྱིམ་དུ་འཇུག་སྟེ། སྦྱིན་པ་པོ་དང་སྦྱིན་བདག་དང་གཞན་ཡང་དེ་ལྟ་བུའི་རིགས་ཅན་རྣམས་
ཀྱི་ཁྱིམ་དུ་འཇུག་པ་ནི་རྒོད་བག་རྣམས་ནི་འདུལ་བས་ཀུན་ནས་འཇོམས་སོ། །འཇིག་པར་བྱེད་དོ་རྣམས་པར་བྱེད་དོ། །གཞན་ཡང་གལ་ཏེ་ཁྱིམ་རྣམས་སུ་ཞུགས་པར་གྱུར་ནས་དགེ་སློང་གིས་སྦྱིན་པ་པོ་དང་སྦྱིན་བདག་རྣམས་
དང་གཏམ་ལ་ཞུགས་པར་གྱུར་པ་ན། ཆོས་དང་ལྡན་པའི་གཏམ་རྣམས་བཞག་ནས་འདོད་པ་རྣམས་ཀྱི་གཏམ་བྱེད་དོ། །ཡུལ་ལྗོངས་ཀྱི་གཏམ་རྣམས་བྱེད་དོ། །མཐོ་རིས་ཀྱི་གཏམ་བྱེད་དོ། །གར་མཁན་དང་གར་དང་རོལ་
མོ་བསྟན་པའི་གླུའི་གཏམ་རྣམས་བྱེད་དོ། །གྲོང་ཁྱེར་རྣམས་སམ་གཞན་གྱི་ཡང་རུང་སྟེ་ཀུན་ནས་ཉོན་མོངས་པ་ཅན་གྱི་གཏམ་རྣམས་བྱེད་དོ། །བུད་མེད་རྣམས་དང་ཀུན་ནས་འདྲེ་བར་གནས་པར་བྱེད་ཅིང་རྣམ་པར་བཀྲ་

66-1-19b

བར་བྱས་པའི་ཆ་བྱད་ཀྱིས་ཀྱང་ཁྱིམ་རྣམས་སུ་རྒྱུ་བར་བྱེད་དོ། །དགེ་སློང་རྣམས་སམ་གཞན་ཡང་དེའི་རིགས་ཅན་རྣམས་ལ་རྒོད་བག་དེ་ལྟ་བུ་དག་ཀྱང་འབྱུང་བ་ཡིན་ནོ། །རྒོད་བག་དེ་ལྟ་བུས་རབ་ཏུ་ཞུགས་པར་གྱུར་པ་
རྣམས་འདུལ་བ་ཇི་ལྟ་རྣམས་ཀྱིས་ཉེ་བར་སྤོང་བ་ཡིན་ན། འདི་ལྟ་སྟེ་དགེ་སློང་ངམ་གཞན་དག་དེའི་རིགས་ཅན་རྣམས་ཀྱང་རུང་སྟེ། ཁྱིམ་དུ་ལེགས་པས་ཉེ་བར་ཞུགས་པར་གྱུར་པ་ན་ལེགས་པ་ལ་རྟེན་པའི་གཏམ་
རྣམས་བྱེད་པར་འགྱུར་བ་ཡིན་ནོ། །དཔེར་བྱ་ན་སྦྱིན་པའི་གཏམ་དང་ཚུལ་ཁྲིམས་ཀྱི་གཏམ་དང་ཡེ་ཤེས་རབ་ཏུ་བསྔགས་པར་བྱ་བའི་གཏམ་རྣམས་དང་ལོག་པར་ལྟུང་བའི་གཏམ་དང་རྒས་པའི་གཏམ་དང་ནད་ཀྱི་གཏམ་
དང་རྣམ་པར་འབྲལ་བར་འགྱུར་བའི་གཏམ་དང་ལས་བདག་གིར་བྱ་བའི་གཏམ་དང་རྒུད་པར་འགྱུར་བའི་གཏམ་དང་འཆི་བའི་གཏམ་རྣམས་དང་ཡང་དག་པར་མགུ་བར་བྱ་བའི་གཏམ་དང་ལེགས་པ་ལ་བརྟེན་པར་བྱ་བའི་གཏམ་
དང་སྡུག་བསྔལ་གྱི་གཏམ་དང་ཀུན་འབྱུང་བའི་གཏམ་དང་འགོག་པའི་གཏམ་དང་ལམ་གྱི་གཏམ་རྣམས་དང་ས་རྣམས་ཀུན་དུ་བགྲོད་པར་བྱ་བའི་གཏམ་རྣམས་དང་། ཚུལ་ཁྲིམས་རབ་ཏུ་བསྔགས་པ་དང་དང་པོ་བྱུང་བའི་གཏམ་
རྣམས་དང་འདོད་ཆགས་དང་བྲལ་བའི་གཏམ་རྣམས་དང་སེར་སྣ་ཡོངས་སུ་གཞིག་པར་བྱ་བའི་གཏམ་རྣམས་དང་། གཟུགས་ཀྱི་རྒྱགས་པས་མྱོས་པ་རྣམས་ལ་གཟུགས་ཚད་མེད་པ་བརྗོད་པའི་གཏམ་རྣམས་དང་། བསླུ་བར་གྱུར་
པའི་གཏམ་རྣམས་དང་ལང་ཚོ་ལ་བབ་པ་ལ་སོགས་པ་རྣམས་ཀྱང་རྒ་བས་ངེས་པར་སླུ་བར་བྱེད་པའི་གཏམ་རྣམས་ཏེ་སྦྱིན་པ་པོ་དང་སྦྱིན་བདག་རྣམས་ཀྱི་བསམ་པ་ཀུན་དུ་རིག་པར་བྱས་ལ་དེ་ཁོ་ན་བཞིན་དུ་གཏམ་བྱའོ། །དེ་ལྟར་
ན་དགེ་སློང་གིས་རྒོད་བག་རྣམས་འདུལ་བས་ཉེ་བར་སྤོང་བ་ཡིན་ནོ། །གཞན་ཡང་རྒོད་པ་རྣམས་ནི་འདུལ་བས་ཉེ་བར་འཇོམས་པར་བྱེད་དེ། གང་ལ་ཟས་དང་སྐོམ་མང་བར་གྱུར་པ་དེ་དག་གིས་ཕེའུ་བཏབ་པར་གྱུར་ལ་

66-1-20a

དེར་ཡང་ལེགས་པར་ཉེ་བར་ཕྱིན་པ་ཡིན་ནོ། །གཞན་ཡང་གང་དག་འདོད་པ་ཆེ་བར་གྱུར་པ་རྣམས་ཀྱང་རོ་ལ་མངོན་པར་དགའ་བའི་ཕྱིར་ན་ཕལ་ཆེ་བ་རྣམས་སུ་རབ་ཏུ་འཇུག་པར་བྱེད་དེ། བསྟེན་གྲོགས་པ་དེ་དག་ཏུ་ཉེ་བར་འགྲོ་
བར་བྱེད་ལ། བསྟེན་གྲོགས་བྱ་བའི་དོན་དུ་ཡང་གང་དག་གིས་ཉེ་བར་སྒྲུབ་པར་བྱེད་དོ། །རྣམ་པ་གང་དག་གིས་ཉེ་བར་སྒྲུབ་པར་བྱེད་པ་དང་ཇི་སྲིད་དུ་ཉེ་བར་སྒྲུབ་པར་བྱེད་པ་དེ་སྲིད་དུ་ཆོས་གོས་དང་བསོད་སྙོམས་དང་གནས་མལ་
དང་ནད་ཀྱི་རྐྱེན་སྨན་དང་ཡོ་བྱད་རྣམས་ཀྱིས་ཀུན་ནས་དགའ་བར་བྱེད་དོ། །གང་གིས་འདིའི་བདེ་བ་རྣམས་ལ་ཀུན་དུ་དྲན་པར་མི་བྱེད་ཅིང་རོ་མྱང་བར་ཡང་མི་བྱེད་དོ། །རྣམ་པར་རྟོག་པར་ཡང་མི་བྱེད་དེ་ཡང་དེ་ལྟར་གཅིག་ཏུ་རྣམ་པར་རྒྱུ་བ་དང་
ལེགས་པ་ལ་བརྟེན་ནས་རྣམ་པར་རྒྱུ་བ་དང་ཀུན་ནས་བསྡམས་ནས་རྣམ་པར་རྒྱུ་བ་ནི་འདུལ་བ་དང་ལྡན་པ་ཡིན་ནོ། །དགེ་སློང་ངམ་དེའི་རིགས་ཅན་གཞན་དག་རྣམས་ཀྱང་རུང་སྟེ། དེ་ལྟར་རྒོད་པ་རྣམས་འདུལ་བས་ཉེ་བར་འཇོམས་པ་
ཡིན་ནོ། །རྒོད་པ་རྣམས་ཐམས་ཅད་ཀྱང་བག་མེད་པ་ལས་རབ་ཏུ་འཕེལ་བར་འགྱུར་བ་ཡིན་ནོ། །དོན་མ་ཡིན་པའི་ཚོགས་རྣམས་ཐམས་ཅད་ཀྱང་བག་མེད་པའི་རྩ་བ་ལས་ཡིན་ནོ། །དེའི་ཕྱིར་ན་མྱ་ངན་ལས་འདས་པ་ཚོལ་བར་བྱེད་
པ་རྣམས་ཐམས་ཅད་ཀྱིས་བག་མེད་པ་ཁོ་ན་གཞོམ་པར་བྱ་བ་ཡིན་ནོ། །དེ་ལྟར་མུ་སུ་ལུན་དྷ་འདིས་སྔོན་གྱི་ལྷའི་དྲུང་དུ་ཐོས་པ་གང་ཡིན་པའི་ཆོས་དེ་དག་དང་ངང་པའི་རྒྱལ་པོ་དུས་བཟང་དེ་དང་བདུད་ཀྱི་ཕྱོགས་སུ་གྱུར་པའི་བག་མེད་
པ་དེ་དག་གི་མདུན་དུ་སྟོན་པར་བྱེད་དོ། །བཅོམ་ལྡན་འདས་འོད་སྲུང་གིས་གསུངས་པ་དྲི་བ་བཅུ་གཅིག་པའི་མདོ་ལས་དྲི་བ་གཅིག་རྫོགས་སོ།།             །། ཇི་ལྟར་དྲི་བ་གཉིས་པ་ཡིན་ན། འདི་ལྟ་སྟེ་མ་བསྡམས་པ་རྣམས་ནི་སེམས་རྩེ་
གཅིག་པ་ཉིད་ཀྱིས་ཏེ་མ་བསྡམས་པ་རྣམས་ཀྱང་རྣམ་པ་གཉིས་ཡིན་ཏེ། འཇིག་རྟེན་པ་དང་འཇིག་རྟེན་ལས་འདས་པའོ། །བསྡམས་པ་ཡང་མདོར་བསྡུ་ན་སེམས་རྩེ་གཅིག་པས་འཛིན་པར་བྱེད་པའོ། །དེ་ལ་སྡོམ་པ་ཡང་རྣམ་པ་དུ་

66-1-20b

མ་ཡིན་ནོ། །མདོར་བསྡུ་ན་ནི་རྣམ་པ་གཉིས་ཡིན་ཏེ་རང་བཞིན་གྱི་ཁ་ན་མ་ཐོ་བ་དང་བཅས་པའི་ཁ་ན་མ་ཐོ་བའོ། །དེ་ལ་རང་བཞིན་གྱི་ཁ་ན་མ་ཐོ་བ་ཉམས་པ་རྣམས་ནི་དགེ་སློང་མ་ཡིན་ཞིང་འོད་སྲུང་བ་ཡང་མ་ཡིན་ཏེ། སྲོག་
གཅོད་པ་དང་མི་ཚངས་པར་སྤྱོད་པ་དང་མ་བྱིན་པར་ལེན་པ་ཡང་ཡོངས་སུ་རྫོགས་པ་ནི་ཀཱར་ཥ་པ་ཎ་གསུམ་གྱི་བློར་གྱུར་པས་ཆོས་དང་ལྡན་ན་ཡང་རུང་སྟེ་ཕྲོགས་ནས་ཡོངས་སུ་ལོངས་སྤྱོད་ན་ནི། ཡུལ་གྱིས་དང་གཉེན་
འབྲེལ་གྱི་མ་ཡིན་པ་དང་གནད་ལ་བསྒོ་བས་ཀྱང་རུང་སྟེ། དགེ་སློང་མ་ཡིན་ཞིང་འོད་སྲུངས་བའི་མ་ཡིན་ནོ། །རུལ་པར་གྱུར་པ་མ་རུངས་པ་རྫུན་པ་རྟགས་འབའ་ཞིག་འཛིན་པར་བྱེད་པ་ཡིན་ནོ། །དེ་ལྟར་རང་བཞིན་གྱི་ཁ་ན་མ་ཐོ་
བ་ཚུལ་ཁྲིམས་འཆལ་པར་གྱུར་པ་དེ་ཡང་བག་མེད་པས་བྱས་པ་ཡིན་ནོ། །དེའི་ཕྱིར་ན་འོད་སྲུང་རབ་ཏུ་བརྩོན་པ་རྣམས་ཀྱིས་ཀྱང་བག་མེད་པ་ཡོངས་སུ་སྤང་བར་གྱིས་ཤིག །དེ་ལྟར་འཐབ་བྲལ་བ་རྣམས་ཀྱི་མངའ་བདག་མུ་སུ་
ལུན་དྷ་འོད་སྲུང་ཀྱིས་གསུངས་པའི་མདོ། བྱང་ཆུབ་སེམས་དཔའ་དུས་བཟང་དང་སྨྲ་བ་པོར་གྱུར་པའི་ངང་པ་རྣམས་དང་བདུད་ཀྱི་ཕྱོགས་ཀྱི་བག་མེད་པ་རྣམས་ལ་ཆོས་སྟོན་པར་བྱེད་ཅིང་པད་མའི་སྙིང་པོ་ལ་ཡང་དག་པར་གནས་ནས་
བཤད་དོ། །གཞན་ཡང་བཅས་པའི་ཁ་ན་མ་ཐོ་བ་རྣམས་ནི་མདོར་བསྡུ་ན་རྣམ་པ་དགུ་ཡིན་ནོ། །མི་གཙང་བ་རྣམ་པ་དགུ་པོ་རྣམས་ཀྱང་གང་ཞེ་ན། གཅིག་སྤྱོད་པ་དང་བཤགས་པས་ལྡང་བ་སྤྱོད་པ་དང་བག་མེད་པས་
བག་མེད་པ་སྤྱོད་པ་དང་ཕྱེད་སྤྱོད་པ་དང་ཕལ་ཆེར་སྤྱོད་པ་དང་བཤགས་པ་དང་ལྡང་བ་ཡང་བར་སྤྱོད་པ་དང་ལམ་སྟོན་པར་བྱེད་པ་དང་བསྒྲགས་པས་སྤྱོད་པ་དང་རླག་པར་སྤྱོད་པ་དང་ཐམས་ཅད་སྤྱོད་པའོ། །དེ་ལྟར་དགེ་
སྦྱོང་རྣམས་སམ་གཞན་དག་དེའི་རིགས་ཅན་རྣམས་ཀྱང་རུང་སྟེ་བག་མེད་པའི་དབང་གིས་བྱིས་པའི་སྐྱེ་བོ་རྣམས་ཐམས་ཅད་བློ་ཉམས་པར་གྱུར་པ་དང་ཇི་སྲིད་དུ་ཆོས་འདུལ་བ་མ་བསླབས་པ་རྣམས་ཀྱི་མདོར་བསྡུ་ན་

66-1-21a

ཁ་ན་མ་ཐོ་བ་རྣམ་པ་དགུ་ཡིན་ནོ། །ཁ་ཅིག་སྤྱོད་པ་ཇི་ལྟ་བུ་ཡིན་ཞིང་ཇི་ལྟར་ན་བཅས་པའི་ཁ་ན་མ་ཐོ་བ་ཡིན་ན། འདི་ན་བསླབ་པ་གང་དག་ཡང་མོར་གྱུར་པ་རྣམས་དང་ལྡང་བ་ཡང་བར་གྱུར་པ་དེ་དག་
རྣམས་འདིས་ཁྱད་དུ་བསད་པར་གྱུར་ནས་བག་མེད་པའི་དབང་གིས་རྒལ་བར་བྱེད་དེ། ཇི་ལྟར་བདག་གིས་འདི་དག་ལས་རྒལ་བར་བྱས་ལ་ཕྱི་ནས་ནི་བདག་གིས་ཀུན་ནས་ལྡང་བར་བྱའོ་སྙམ་པའོ། །དཔེར་ན་ས་
རྐོ་བར་བྱེད་པ་དང་རྩྭ་གཅོད་པར་བྱེད་པའོ། །འདི་ནི་གཅིག་སྤྱོད་པ་ཞེས་བརྗོད་དེ། དགེ་སྦྱོང་ངམ་གཞན་ཡང་དེའི་རིགས་ཅན་རྣམས་ཀྱང་རུང་ངོ་། །ཡང་ཇི་ལྟར་ན་བག་མེད་པ་སྤྱོད་པ་རྣམས་བཤགས་པས་ལྡང་བ་
སྤྱོད་པ་ཡིན་ན། འདི་ན་དགེ་སྦྱོང་དག་བསླབ་པའི་གཞི་གཅིག་གམ་བསླབ་པའི་གཞི་གཉིས་སམ་གསུམ་ལ་སྤྱོད་པ་ལས་འདའ་བར་བྱེད་དོ། །ཇི་ལྟར་དེ་སྙེད་ཅིག་ལས་འདས་པར་བྱེད་ཅིང་། འདའ་བར་བྱས་ནས་ཀྱང་
ཁོ་བོས་ཕྱིས་ཡང་ལྡང་བར་བྱའོ་ཞེས་པ་སྟེ། དེ་རིམ་པ་དེ་ཉིད་ཀྱིས་དང་དེ་ཁྱད་དུ་གསོད་པར་བྱེད་པས་ཀྱང་རྟག་ཏུ་བཅས་པའི་ཁ་ན་མ་ཐོ་བ་རྣམས་བྱེད་དོ། །དེ་དག་ནི་ཆོས་ལ་གུས་པར་སྤྱོད་པ་ཉིད་ཀྱང་མ་ཡིན་ནོ། །
བག་དང་ལྡན་པ་ཡང་མ་ཡིན་ནོ། །རྟག་ཏུ་ཡང་རྣམ་པར་གཡེངས་པ་དང་བཅས་པའི་སེམས་སུ་འགྱུར་རོ། །འདི་ལ་ནི་བཤགས་པས་ལྡང་བར་སྤྱོད་པ་ཞེས་བྱའོ། །ཇི་ལྟར་ན་བག་མེད་པས་བག་མེད་པ་ཡོངས་སུ་འཕེལ་
བར་སྤྱོད་པ་ཡིན་ན། འདི་ན་སེམས་ཡང་བར་འགྱུར་ཞིང་སེམས་སྟོབས་ཀྱང་ཡང་བ་རྣམས་ཀྱིས་བསླབ་པའི་གཞི་རྣམས་ཀྱི་བཤགས་པར་བྱ་བ་རྣམས་ཀྱང་མངོན་པར་ཤེས་པར་འགྱུར་བ་མ་ཡིན་ནོ། །སྙིང་པོ་དང་སྙིང་པོ་
མེད་པ་རྣམས་བཤགས་པར་བྱ་བ་དང་། ལྡང་བ་ཡང་མངོན་པར་མི་ཤེས་པ་ཡིན་ནོ། །དེ་ལ་ནི་བསླབ་པའི་གཞི་བཅས་པའི་ཁ་ན་མ་ཐོ་བ་རྣམས་གང་ཡིན་པ་རྣམས་ཤིན་དུ་ཡང་མང་བར་འགྱུར་རོ། །དེ་དག་

66-1-21b

རྣམས་ཀྱང་འཛིན་པར་བྱེད་ཅིང་ཡང་གང་དག་དུས་ཤིན་དུ་རིང་བ་ན་དཀའ་སླས་ཆེན་པོས་ལྡང་བར་འགྱུར་ཏེ། དེ་དག་ཀྱང་འཛིན་པར་བྱེད་པ་ཡིན་ནོ། །ཡང་གང་དག་ཁ་ན་མ་ཐོ་བ་ཆུང་བར་གྱུར་པ་དེ་དག་ནི་ལེགས་པར་འཛིན་
པ་ཡང་མ་ཡིན་ནོ། །ཆོས་ལ་གུས་པར་གནས་པའི་རང་བཞིན་ཅན་མ་ཡིན་ནོ། །དགེ་སྦྱོང་རྣམས་སམ་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ། འདི་དག་ནི་བག་མེད་པས་བག་མེད་པ་རབ་ཏུ་འཕེལ་བར་སྤྱོད་པར་བརྗོད་
པ་ཡིན་ནོ། །ཡང་ཇི་ལྟར་ན་ཕྱེད་ལ་སྤྱོད་པ་ཡིན་ནོ། །འདི་ལ་བསླབ་པའི་གཞི་གང་དག་ཡང་བ་རྣམས་སམ་ལྕི་བར་གྱུར་པ་རྣམས་ཀྱང་རུང་སྟེ། དགེ་སློང་གིས་ཀུན་ནས་ལྡང་བ་འབའ་ཞིག་བྱེད་དུ་འགྲོ་བར་འམ་གལ་ཏེ་ན་འཛིན་
པར་བྱེད་པ་འམ། གལ་ཏེ་ན་ཤིན་དུ་བསྲབས་པར་གྱུར་ཏེ་ལྡང་བར་འགྱུར་བ་ཡིད་ལ་བྱས་ནས། རིགས་མཐུན་པའི་ཆ་རྣམས་མ་ལུས་པ་ཁོ་ན་ཕྱིར་ཟློག་པར་བྱེད་དེ། འདི་ནི་ཕྱེད་ལ་སྤྱོད་པ་ཞེས་བརྗོད་དོ། །གང་གི་ཕྱིར་ཕྱེད་ལ་ནི་
སྤྱོད་པར་བྱེད་ལ་ཕྱེད་ལ་ནི་སྤྱོད་པར་བྱེད་པ་ཉིད་ཀྱང་མ་ཡིན་ཏེ་རིམ་པ་འདི་དག་གིས་ན་ཕྱེད་ལ་སྤྱོད་པ་བྱ་བ་ཡིན་ནོ། །བག་མེད་པ་རྣམས་ཀྱིས་བག་མེད་པར་རྣམ་པར་རྒྱུ་བ་བག་མེད་པའི་དབང་གིས་འགྲོ་བ་བག་མེད་པའི་ཡུལ་
ལ་གནས་པ་འདི་ནི་དགེ་སྦྱོང་དང་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ། ཆེ་ཕལ་ཆེར་སྤྱོད་པར་བྱེད་པ་ཡིན་ནོ། །བསླབ་པའི་གཞི་རྣམས་ཡོངས་སུ་རྫོགས་པར་འཛིན་པར་བྱེད་པ་དགེ་སྦྱོང་མ་དང་དགེ་ཚུལ་དང་དགེ་བསྙེན་
རྣམས་ཀྱང་རུང་སྟེ། ཤིན་དུ་མྱུར་བར་མྱ་ངན་ལས་འདས་པར་འགྲོ་བར་འགྱུར་བ་འདི་དག་དང་རྣམ་པ་དེ་ལྟ་བུ་རྣམས་དང་ཚུལ་མི་མཐུན་པ་དེ་དང་དེ་དག་ལ་རྒྱབ་ཀྱིས་ཕྱོགས་པར་གྱུར་པའི་ཕལ་ཆེར་སྤྱོད་པ་རྣམས་ཇི་ལྟ་བུ་ཞེ་ན། འདི་
ནི་བཅས་པའི་ཁ་ན་མ་ཐོ་བའི་བསླབ་པའི་གཞི་རྣམས་ཤིན་དུ་ཕལ་ཆེར་འཛིན་པར་བྱེད་པ་རྣམས་མ་ཉམས་པ་དང་མ་རལ་བ་དང་མ་ཟགས་པ་དང་མི་བརྟན་པ་དང་སྙིང་པོ་མེད་པ་དང་གཅིག་ཏུ་ལྷག་མ་མེད་པ་མ་ཡིན་པར་གལ་ཏེ་

66-1-22a

ཤེད་ན་འཛིན་པར་བྱེད་དོ། །གལ་ཏེ་ཤེད་ན་མི་འཛིན་པར་བྱེད་དོ། །དགེ་སྦྱོང་དང་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ་འདི་ནི་ཕལ་ཆེར་སྤྱོད་པ་ཞེས་བརྗོད་དོ། །ཡང་ཇི་ལྟར་ན་བཤགས་པ་དང་ལྡང་
བ་ཡང་བར་སྤྱོད་པ་ཡིན་ན། འདི་ན་བག་མེད་པའི་དབང་གིས་སམ་སྡིག་པའི་གྲོགས་པོ་ལ་རྟེན་པའི་དབང་གིས་ཀྱང་གལ་ཏེ་ན་བསླབ་པའི་གཞི་རྣམས་ཉམས་པར་བྱེད་དོ། །དེ་མྱུར་བར་སོ་སོར་རིག་ནས་འགྱོད་པར་འགྱུར་
བ་དང་སེམས་རབ་ཏུ་དང་བར་གྱུར་པས་སམ་དམྱལ་བའི་འཇིགས་པས་འཇིགས་པར་གྱུར་པས་ཀྱང་རུང་སྟེ། བཤགས་པར་བྱེད་དགེ་འདུན་ལ་ཡང་མཐོལ་བར་བྱེད་དོ། །ཇི་ལྟར་ན་བདག་གི་བསླབ་པའི་གཞི་ཉམས་པར་
བྱས་པ་ནི་བདག་གིས་མཛེས་པ་མ་བྱས་ཀྱིས་དགེ་འདུན་རྣམས་ཀྱིས་དེ་ལས་ལྡང་བར་མཛད་དུ་གསོལ་ཞེས་བཤགས་པ་ལ་འཁོད་པར་བྱ་བ་དང་གཉེན་པོས་ཀྱང་མཐོལ་ཞིང་བཤགས་པར་བྱེད་པ་དང་ལྡང་བར་བྱེད་པ་ཞེས་བྱ་བས་
ཀྱང་འཇིགས་པ་ཡིན་ནོ། །དེའི་ཕྱིར་དགེ་སློང་འདི་ནི་བཤགས་པ་དང་ལྡང་བ་ཡང་བར་སྤྱོད་པ་ཞེས་བརྗོད་པ་ཡིན་ནོ། །ཇི་ལྟར་ན་དགེ་སློང་ལམ་སྟོན་པར་བྱེད་པ་དང་བསྒྲགས་པས་སྤྱོད་པ་ཡིན་ན། འདི་ན་དགེ་སློང་ངམ་རྣམ་པ་དེ་
ལྟ་བུ་གཞན་དག་རྣམས་ཀྱང་རུང་སྟེ། བརྒྱ་ལ་ཞིག་ན་བག་མེད་པའི་དབང་གིས་ཁ་ན་མ་ཐོ་བ་མང་པོར་གྱུར་པ་སྡུག་བསྔལ་གྱི་རྩ་བ་གཅོད་པར་བྱེད་པའི་བསླབ་པའི་གཞི་རྣམས་ལས་འདའ་བར་བྱེད་པ་འམ། ཉམས་དམས་པར་
བྱས་པར་གྱུར་ན་ཡང་དེ་དག་བླ་མ་རྣམས་ལ་རྗོད་པར་བྱེད་དོ། །དགེ་འདུན་རྣམས་ལ་ཡང་གསོ་སྦྱོང་གི་དུས་ཀྱི་ཚེ་ནའོ། །དེ་ལ་དགེ་འདུན་རྣམས་ཀྱིས་ལམ་འདོམས་པར་མཛད་ཅིང་དཀའ་སླས་རྣམས་ཀྱང་ཉེ་བར་སྟོན་པར་
མཛད་ལ་ལྡང་བའི་འཇིགས་པ་རྣམས་ཀྱང་འགྲོ་བར་བྱེད་དོ། །དེ་དག་རྣམས་ཀྱང་ཐོས་ཤིང་གོ་བར་བྱས་ཏེ་ལངས་པ་ཡིན་ནོ་ཞེ་ནས། ཕྱི་ནས་ཡང་ནི་བསླབ་པའི་གཞི་རྣམས་ལས་འདའ་བར་མི་བྱེད་དེ། དམྱལ་བ་དང་

66-1-22b

ཡི་དགས་དང་དུད་འགྲོ་རྣམས་ཀྱིས་འཇིགས་པའི་ཕྱིར་རོ། །དུས་བཟང་འདི་ནི་ལམ་སྟོན་པར་བྱེད་པ་དང་བསྒྲགས་པས་སྤྱོད་པ་ཞེས་བརྗོད་དོ། །ཡང་ཇི་ལྟར་ན་བརླག་པར་སྤྱོད་པ་ཡིན་ན། རྒ་བ་དང་འཆི་བའི་དབང་དུ་སོང་
ནས་འདི་ན་ཆོས་འདུལ་བ་རྣམས་བསྲབས་པར་གྱུར་པ་བསམ་གཏན་གྱིས་བསམ་གཏན་དུ་མི་བྱེད་པར་བྱ་བ་དང་བྱེད་པ་རྣམས་ལ་མངོན་པར་དགའ་བར་གྱུར་ནས། རྟག་ཏུ་ཡང་ཁྱིམ་ནས་ཁྱིམ་རྣམས་སུ་དང་གནས་ནས་གནས་
རྣམས་སུ་དང་སྦྱིན་བདག་གི་ཁྱིམ་རྣམས་ནས་སྦྱིན་བདག་གི་ཁྱིམ་རྣམས་སུ་ཟས་དང་གོས་ཀྱི་དོན་ཁོ་ནར་རྒྱུ་བར་བྱེད་དོ། །ལེགས་པར་འགྲོ་ལ་ཞབས་འབྲིང་ཡང་བྱེད་དོ། །ཁྱིམ་པ་རྣམས་ཉིད་ཉེ་བར་སྟེན་པར་བྱེད་དོ། །འདི་ནི་རླག་
པར་སྤྱོད་པ་ཞེས་བརྗོད་དོ། །རྐུན་མ་དེ་ནི་ཤི་བའི་འོག་ཏུ་དམྱལ་བའི་མཐར་ཐུག་པར་འགྱུར་རོ། །དུས་བཟང་ཡང་ཇི་ལྟར་ན་ཐམས་ཅད་སྤྱོད་པ་ཡིན་ན། ཆོས་འདུལ་བ་རྣམས་ཐམས་ཅད་ལ་དད་པར་བྱེད་དོ། །རྗོད་དོ། །བྱེད་
པར་འགྱུར་རོ། །གལ་ཏེ་ཤེད་ན་བསླབ་པའི་གཞི་གཅིག་གམ་གཉིས་ཀྱི་ཡང་རུང་སྟེ་ཁ་ན་མ་ཐོ་བ་ཅུང་ཟད་ཅིག་བྱུང་ན་ཡང་གོམས་པ་མེད་པ་དང་ཆོས་ལ་གུས་པའི་དབང་གིས་འཛིན་པར་བྱེད་མི་ནུས་པར་གྱུར་ནས། དེ་དག་ལས་
ལྡང་བར་བྱེད་པ་ཡིན་ནོ། །དུས་བཟང་འདི་ནི་ཐམས་ཅད་བཤགས་ཤིང་སྤྱོད་པ་ཞེས་བརྗོད་དོ། །དགེ་སློང་ངམ་རྣམ་པ་དེ་ལྟ་བུ་གཞན་དག་རྣམས་ཀྱང་རུང་ཁ་ན་མ་ཐོ་བ་ཉུང་བ་རྣམས་ཀྱང་ཕྱི་ནས་འདི་དག་བསླབ་པའི་གཞི་གང་དག་
ལས་འདའ་བར་བྱེད་པ་འདི་དག་ཀྱང་བག་མེད་པའི་ཉེས་པ་ཡིན་ནོ། །དེ་ལྟར་འཐབ་བྲལ་བ་རྣམས་ཀྱི་མངའ་བདག་དེ་པད་མའི་སྙིང་པོ་ལ་ལེགས་པར་གནས་ནས། སྨྲ་བ་པོའི་ངང་པ་དེ་དག་རྣམས་དང་བདུད་ཀྱི་རིགས་ཀྱི་བག་མེད་
པ་དེ་ལ་ཡང་ཆོས་བསྟོན་ཏོ། །དེ་ནས་དེའི་དུས་ན་མུ་སུ་ལུན་དྷ་དེ་ཚིགས་སུ་བཅད་པ་བརྗོད་པ་ཇི་ལྟར། སྐྱེས་བུ་བག་མེད་པས་ལོང་བ། །བག་མེད་དུག་ནི་སྟེན་པ་པོ། །བག་མེད་ཞགས་པས་བཟུང་ནས་ནི། །དམྱལ་བར་རྗེས་སུ་

66-1-23a

ཉེ་བར་འཁྲིད། །བག་མེད་སྐྱེས་བུ་འཇིག་རྟེན་པའི། །གཤེ་བ་ཐམས་ཅད་ཐོབ་པར་འགྱུར། །ངག་རྣམས་དོན་མེད་འགྱུར་བ་དང་། །དམྱལ་བར་ཡང་ནི་འདྲེ་བར་བྱེད། །རྨོངས་པ་ཉིན་མེད་མཚན་མེད་དང་། །མལ་དུ་འགྲོ་
དང་བརྗོད་པ་ན་འང་། །བག་མེད་སྐྱེས་བུ་སྐད་ཅིག་ཀྱང་། །བདེ་བའི་སྐལ་བ་ཡོད་མ་ཡིན། །འཁོར་ལོ་བཞིན་དུ་འགྲོ་བ་ལྔར། །གང་དག་འདོད་པའི་ཁམས་ན་འཁོར། །གང་ཡང་བསམ་གཏན་ལས་ལྟུང་བ་དེ་ཡང་བག་མེད་པས་བྱས་
སོ། །གཟུགས་མེད་པ་ཡི་གནས་བཞི་ཡང་། །འཇིག་རྟེན་པ་ནི་གང་ཐོབ་པ། །སྲིད་ན་འཕྱང་ཉུག་འཁོར་བ་ནི། །དེ་ཡང་བག་མེད་པས་བྱས་སོ། །ཁམས་གསུམ་འདི་དག་མ་ལུས་པ། །བག་མེད་འཆིང་བས་བཅིངས་པ་ཡི། །སྲེད་པའི་
ཞགས་པས་བསྡམ་བྱས་པ། །བློ་མེད་པས་ཀྱང་མི་རིག་གོ། །དེ་ལྟར་མུ་སུ་ལུན་དྷ་དེས་སྔོན་གྱི་ལྷ་རྣམས་ཀྱི་དྲུང་ནས་བཅོམ་ལྡན་འདས་འོད་སྲུངས་ཀྱིས་གསུངས་པའི་མདོ་བཤད་པར་བྱ་བའི་གནས་སྐབས་སུ་བབ་པས། ངང་པའི་
རྒྱལ་པོ་དུས་བཟང་དེ་དང་སྨྲ་བ་པོར་གྱུར་པའི་ངང་པ་དེ་དག་རྣམས་དང་བག་མེད་པ་དང་རྒོད་པ་དང་རྒྱགས་པ་དང་བཅས་པའི་བདུད་ཀྱི་རིགས་དེ་དག་རྣམས་ལ་ཆོས་བཅུ་གཅིག་པོ་རྣམས་ལས་གསུམ་པ་བསྟན་ཏོ། །དེ་རྣམས་གང་དག་ཞེ་ན། 
འདི་ལྟ་སྟེ་རྒོད་པ་ན་འདུལ་བས་རབ་ཏུ་འཇོམས་པར་བྱེད་དོ། །མ་བསྡམས་པ་ནི་སེམས་རྩེ་གཅིག་པས་ཡིན་ལ་ཚུལ་ཁྲིམས་འཆལ་པ་རྣམ་པ་སྣ་ཚོགས་པ་རྣམས་ལས་རང་བཞིན་གྱི་ཁ་ན་མ་ཐོ་བ་ནི་སྐྱེས་བུ་དམ་པ་ལ་བསྟེན་ནས་
ཕྱི་ནས་དགེ་བའི་རྩ་བ་རྣམས་ཀྱིས་ཏེ། ཚུལ་ཁྲིམས་འཆལ་པར་བརྗོད་པར་བྱ་བའི་རང་བཞིན་གྱི་ཁ་ན་མ་ཐོ་བ་རྣམས་ཀྱང་སྐྱེས་བུ་དམ་པ་ལ་ལེགས་པར་བསྟེན་གྲོགས་བྱས་པས་འཁོར་བ་ལས་གྲོལ་བར་འགྱུར་ན། བཅས་པའི་ཁ་ན་
མ་ཐོ་བ་རྣམས་ལྟ་སྨོས་ཀྱང་ཅི་དགོས། དེས་ན་རབ་ཏུ་བརྩོན་པས་ཀྱང་སྐྱེས་བུ་དམ་པ་ལ་བསྟེན་པར་བྱ་བ་ཡིན་ནོ། །སྤང་བར་བྱ་བ་གང་དག་ཞེ་ན་འདི་ལྟ་སྟེ་ལེ་ལོ་ནི་བརྩོན་འགྲུས་བསྐྱེད་པས་སོ། །ལེ་ལོ་རྣམས་ཐམས་ཅད་

66-1-23b

ཀྱང་བརྩོན་འགྲུས་བསྐྱེད་པས་སྤོང་བར་འགྱུར་ཏེ། ཡང་ཇི་ལྟར་བག་མེད་པ་ནི་དོན་མ་ཡིན་པ་རྣམས་ཐམས་ཅད་ཀྱི་དང་དགེ་བའི་བཤེས་གཉེན་སྟེན་པ་ནི་ཆོས་འདུལ་བ་རྣམས་ཀྱི་ཕུལ་དུ་ཕྱིན་པའི་རྩ་བ་ཡིན་ནོ། །གཞན་
ཡང་ཆོས་བཞི་པ་ཆོས་བཞི་པས་ངེས་པར་འཇོམས་ཤིང་སྤོང་ལ་སྤང་བར་བྱ་བ་རྣམས་གང་ཞེ་ན། དེ་ནི་འདི་ལྟ་སྟེ། ལེ་ལོ་ནི་བརྩོན་འགྲུས་བསྐྱེད་པས་ཏེ། ལེ་ལོ་རྣམས་ནི་ཐམས་ཅད་ཀྱང་བརྩོན་འགྲུས་བསྐྱེད་པས་
འཇོམས་པར་འགྱུར་རོ། །དཔེར་ན་སྣང་བས་མུན་པ་འཇོམས་པར་བྱེད་པ་དེ་བཞིན་དུ་ལེ་ལོ་རྣམས་ཐམས་ཅད་ཀྱང་བརྩོན་འགྲུས་བསྐྱེད་པས་སྤོང་བ་ཡིན་ནོ། །དེ་ལ་ལེ་ལོས་ཆོས་རྣམས་ཐམས་ཅད་ཀྱི་བར་ཆད་བྱེད་
པ་པོ་ཡིན་ཏེ། དཔེར་ན་ཇི་ལྟར་བྱས་པ་དེ་ལྟ་དེ་ལྟར་མངོན་པར་འཕེལ་བ་ཡིན་ཞིང་འཇིག་རྟེན་པ་དང་འཇིག་རྟེན་ལས་འདས་པའི་ཆོས་རྣམས་ཀྱི་བར་ཆད་བྱེད་པར་འགྱུར་རོ། །འཇིག་རྟེན་འདི་དང་འཇིག་རྟེན་ཕ་རོལ་
རྣམས་སུ་ཡང་བདེ་བར་འགྱུར་བ་མ་ཡིན་པ་མང་པོ་དེ་དག་རྣམས་ཀྱི་མིང་ཡང་གཟུང་བར་སླ་བ་མ་ཡིན་ནོ། །ལེ་ལོ་ཅན་ཞེས་བྱ་བ་ནི་བརྩོན་འགྲུས་ཞན་པ་སྟེ། གཞན་གྱིས་ཉེ་བར་འཇོམས་པར་བྱེད་དོ། །གཞན་རྣམས་
ཀྱི་ཞེ་ཟློགས་པར་འགྱུར་རོ། །གཞན་གྱིས་ཕམ་པར་བྱེད་ཅིང་ཚར་གཅོད་པར་འགྱུར་ཏེ། ལེ་ལོ་ཅན་རྣམས་ནི་ཤིན་དུ་ཉེ་བར་འཇོམས་པས་ཤིན་དུ་དབུལ་བར་འགྱུར་རོ། །ལས་ཀྱི་མཐའ་རྣམས་ལ་སྒྲུབ་པར་མི་བྱེད་དོ། །ཁེ་
སྤོགས་རྣམས་མི་བྱེད་དོ། །ཞིང་ལས་མི་བྱེད་དོ། །ཁྱིམ་གྱི་གཞིའི་བྱ་བ་གཞན་རྣམས་ཀྱང་མི་བྱེད་དོ། །སྐྱེས་བུ་ལ་སྟེན་པར་མི་བྱེད་ཀྱི་སྙོམ་ལས་ཀྱི་བསམ་གཏན་གྱིས་བཟུང་བ་ཡིན་ནོ། །སྐྱེ་བོ་རྣམས་ཐམས་ཅད་ཀྱིས་
མཚོན་པར་འགྱུར་རོ། །ཡེ་ཤེས་ལ་སྦྱོར་བར་མི་བྱེད་དོ། །དེ་ནི་མཁས་པ་མ་ཡིན་ནོ། །མཁས་པའི་རང་བཞིན་ཅན་རྣམས་ཀྱང་མ་ཡིན་ནོ། །ཡུལ་དང་དུས་ཤེས་པ་མ་ཡིན་ནོ། །བདག་དང་གཞན་རྣམས་ཀྱི་ཁྱད་

66-1-24a

པར་ཤེས་པ་མ་ཡིན་ནོ། །རང་གི་སྟོབས་རྣམས་དང་གཞན་གྱི་སྟོབས་རྣམས་ཀྱི་ཁྱད་པར་ཤེས་པ་མ་ཡིན་ནོ། །དུས་སུ་ལེགས་པར་དགོས་པ་རྣམས་སྒྲུབ་པ་མ་ཡིན་ཏེ། དེའི་བྱ་བ་རྣམས་ཐམས་ཅད་ལ་བར་ཆད་
འབྱུང་བར་འགྱུར་རོ། །གང་གི་ཚེ་འཇིག་རྟེན་འདི་དང་འཇིག་རྟེན་ཕྱི་མ་རྣམས་ཀྱི་ཡང་ལེ་ལོ་དེ་དག་རྣམས་ཉིད་བརྩོན་འགྲུས་བསྐྱེད་པས་བཅོམ་པར་གྱུར་པ་དེའི་ཚེ་འདི་ལ་འཇིག་རྟེན་པ་རྣམས་ཀྱིས་མངོན་པར་བགྲོད་པར་བྱ་བར་
འགྱུར་རོ། །སྔ་བར་ལངས་པར་བྱེད་པ་དང་ངལ་དུབ་ལས་བརྒྱལ་བ་དང་གཉིད་ལས་བརྒྱལ་ཞིང་ལེགས་པར་སད་པ་དང་། དུས་སུ་ལངས་པ་དང་དུས་སུ་སྐྱོ་བ་སྐྱེ་བ་དང་ལྟོས་པ་དང་བྲལ་བས་བྱ་བ་རྣམས་རྩོམ་པར་བྱེད་དོ། །དེ་ལུས་ཀྱི་
བརྩོན་འགྲུས་བརྟན་པ་དང་ལྡན་པས་ལེ་ལོའི་དྲི་མ་དེ་དག་རྣམས་དག་པར་བཀྲུས་པའི་བརྩོན་འགྲུས་ལེགས་པར་རྩོམ་པ་དེ་ནི་དོན་རྣམས་ཐམས་ཅད་དྲི་མ་དང་ཀུན་ནས་བྲལ་བར་སྒྲུབ་པར་བྱེད་དོ། །དོན་རྣམས་ལ་བགེགས་བྱུང་བར་
གྱུར་ན་ཡང་སྐྲག་པར་མི་འགྱུར་ལ་སྐྱོ་བ་སྐྱེ་བར་མི་འགྱུར་རོ། །གཞན་རྣམས་ཀྱིས་བར་ཆད་བྱེད་པ་ཡང་མ་ཡིན་ནོ། །རབ་ཏུ་བརྟན་པས་བྱ་བ་རྣམས་ཀྱང་རྩོམ་པར་བྱེད་དོ། །བརྩོན་འགྲུས་དང་ལྡན་པས་གང་དག་སྒྲུབ་པར་
བྱེད་པ་རྣམས་ནི་ཀུན་ནས་ཉམས་པར་ཡང་མི་འགྱུར་རོ། །གཞན་གྱི་དབང་གིས་བྱ་བ་རྣམས་ཀུན་དུ་རྩོམ་པ་ཡང་མ་ཡིན་ནོ། །མི་རྣམས་ཀྱི་ཁྱད་པར་ཡང་ཤེས་པར་འགྱུར་རོ། །བདག་གི་དཔུང་དང་གཞན་གྱི་དཔུང་རྣམས་ཀྱི་
ཁྱད་པར་ཤེས་པར་འགྱུར་རོ། །དེ་དེ་དག་རྣམས་ཀྱིས་ཀྱང་བསྔགས་པར་འགྱུར་རོ། །སྐྱེ་བོའི་ཚོགས་ཆེན་པོ་རྣམས་ཀྱིས་མཆོད་པར་ཡང་འགྱུར་རོ། །རྒྱལ་པོ་དང་རྒྱལ་པོའི་བློན་པོ་དག་གིས་ཀྱང་མཆོད་པར་བྱེད་དོ། །
རྟག་ཏུ་ནོར་དང་ལྡན་པར་ཡང་འགྱུར་རོ། །སེམས་སྟོབས་དང་སྟོབས་རྣམས་ཀྱང་ཉམས་པ་མེད་པར་འགྱུར་རོ། །གང་དག་དང་ལྷན་ཅིག་ཏུ་འགལ་བར་གྱུར་པ་དེ་དག་རྣམ་པར་ཕམ་པར་འགྱུར་རོ། ། གང་གི་ཕྱིར་བརྩོན་འགྲུས་

66-1-24b

དང་ལྡན་པ་རྣམས་དང་ནི་ལྷན་ཅིག་ཏུ་འགལ་བར་བྱ་བར་མི་ནུས་སོ། །མཛཱ་བོ་དག་ཀྱང་རྗེས་སུ་སྒྲུབ་པར་བྱེད་ལ། དེས་ཀྱང་འདིའི་མཛའ་བོ་རྣམས་མངོན་པར་འཕེལ་བར་འགྱུར་རོ། །དེ་གྲོགས་པོ་མང་བ་དང་མཆོག་ཏུ་བདེ་བ་
དང་མཆོག་ཏུ་སྟོབས་དང་ལྡན་པར་ཡང་འགྱུར་རོ། །གྲོང་ཁྱེར་གཞན་དག་ན་ཡང་མངོན་པར་དགའོ། །བྱེས་ན་ཡང་སྐྱེ་བོ་མང་པོ་རྣམས་ཀྱིས་མངོན་པར་ཤེས་པར་འགྱུར་རོ། །དེ་དེའི་ཕྱིར་གང་དག་དང་སྟེན་གྲོགས་བྱེད་པར་
གྱུར་པ་དེ་དག་རྣམས་ཀྱིས་མཆོད་པར་བྱེད་དོ། །འཇིག་རྟེན་དག་ན་ཡང་འདི་ཀུན་གྱིས་ཤེས་པར་འགྱུར་རོ། །ལེ་ལོ་རྩ་བ་ནས་རྣམ་པར་སྤངས་པའི་སྐྱེས་བུ་རྣམས་ཀྱིས་ནི་ཡོན་ཏན་དུ་མ་ཐོབ་པར་འགྱུར་རོ། །དེ་ནས་བདག་
ཉིད་ཆེན་པོ་དེ་ཉིད་ཀྱིས་ཀྱང་གོ་ཆ་བརྟན་པོ་དེ་ལྟ་བུ་རྣམས་དང་། རྙོག་པ་དང་རྣམ་པར་བྲལ་བས་བདུད་ཀྱི་དཔུང་རྣམས་ངེས་པར་འཇོམས་པར་བྱེད་དོ། །འཁོར་བ་ཕྱིར་ཟློག་པའི་གཡུལ་ཤོམ་པ་སྐྱེ་བོ་དམ་པ་རྣམས་
ཐམས་ཅད་དགའ་བ་དང་བརྩོན་འགྲུས་རྩོམ་པ་དང་བཅས་པ་གང་གིས། འཇིག་རྟེན་ལས་འདས་པ་ཟག་པ་མེད་པ་ཁ་ན་མ་ཐོ་བ་མེད་པ་མྱ་ངན་ལས་འདས་པའི་ནམ་མཁའ་ལེགས་པར་འཐོབ་པའི་དགོས་པ་ཀུན་ནས་
རྩོམ་པར་བྱེད་དོ། །དེ་དང་པོ་ཁོ་ནར་རེ་ཤིག་ཤིན་ཏུ་བརྟན་པས་མཆོག་ཏུ་དཀའ་བར་གྱུར་པ། ཁྱད་པར་དུ་རོའི་གནས་དམན་པ་རྣམས་དཀའ་བས་འགྲོལ་བ་འདི་ནི་འཁོར་བ་པ་རྣམས་ཐམས་ཅད་ཀྱི་འཆིང་བ་ཡིན་ཏེ། 
ཁྱིམ་ན་གནས་པ་བུ་དང་ཆུང་མ་དང་སྲིང་མོ་དང་བྲན་ཕོ་དང་བྲན་མོ་དང་ཞིང་དང་འབྲུ་དང་བང་མཛོད་རྣམས་ཀྱིས་གང་བའི་སྲེད་པའི་ཆུ་བོ། །བརྩོན་འགྲུས་བརྩམས་པའི་གྲོགས་དང་ལྡན་པ་གང་དག་གིས་འཁོར་བའི་
འཇིགས་པ་རབ་ཏུ་འཇོམས་པ་དེ་དག་གིས་ནི། རྣམ་པ་དེ་ལྟ་བུའི་ཁྱིམ་གྱི་གནས་རྣམས་བཏང་ནས་གོས་རྣམས་ངུར་སྨྲིག་ཏུ་བགོས་ཏེ། བརྩོན་འགྲུས་དང་ལྡན་པ་གང་ཡིན་པ་དེ་ཁྱིམ་གྱི་གནས་ནས་ངེས་པར་བྱུང་ངོ་། །

66-1-25a

ཁྱིམ་གྱི་གནས་ཀྱི་འཆིང་བ་རྣམས་ལས་གྲོལ་བས། ཐར་པ་མཐར་ཕྱིན་པའི་ལམ་ཐོབ་ནས་བསམ་གཏན་དང་ཁ་ཏོན་དག་ལ་བརྩོན་པ་དང་ལྡན་པ། བརྩོན་འགྲུས་ཕ་རོལ་གནོན་པ་རྣམས་མོས་པ་ཇི་ལྟ་བ་བཞིན་དུ་
ཐར་པ་ལ་འཇུག་པར་བྱེད་དོ། །དེ་ལ་ལེགས་པར་སྟོན་པ་བརྩོན་འགྲུས་དང་ལྡན་པ་དུས་རབ་ཏུ་ཤེས་པ་ལུས་དང་ངག་གི་དེ་ཁོ་ན་ཉིད་ཀྱི་མཚན་ཉིད་དང་སྐྱེ་བ་དང་འཇིག་པའི་དེ་ཁོ་ན་ཉིད་ཤེས་པ། རང་གི་མཚན་ཉིད་ཀྱི་དེ་ཁོ་ན་ཉིད་ཤེས་
པ། ཕུང་པོ་རྣམས་ཀྱི་སྐྱེ་བ་དང་འཇིག་པའི་དེ་ཁོ་ན་ཉིད་ཤེས་པ། ཉིན་དང་མཚན་དུ་ཡང་བརྩོན་པ་མི་འདོར་བ་དེས་རབ་ཏུ་བརྩོན་པས་ཀྱང་སློབ་དཔོན་ལ་ལེགས་པར་བརྟེན་པས་དང་ཡེ་ཤེས་མང་དུ་སྤེལ་བས་ཀྱང་ཀུན་ནས་རྩོམ་
པར་བྱེད་དོ། །བརྟུན་པར་བྱེད། རབ་ཏུ་འབད་པར་བྱེད། ལམ་གོམས་པར་བྱེད། སྐྱོན་སྤོང་བར་བྱེད་དེ་ཐོག་མ་མེད་པའི་དུས་ནས་ཞུགས་པར་གྱུར་པ་འཁོར་བའི་འཆིང་བར་གྱུར་པ་དོན་མེད་པ་རྣམས་ཐམས་ཅད་བྱེད་པ། མུན་པར་
བྱེད་པའི་འོས་སུ་གྱུར་པ་དོན་མ་ཡིན་པ་རྣམས་ཐམས་ཅད་ཀྱི་རྒྱུར་གྱུར་པ་སྲོག་ཆགས་རྣམས་ལ་ཤིན་དུ་འཐས་པར་གྱུར་པ། དེ་དག་རྣམས་ཀུན་ནས་བརྩམས་པའི་བརྩོན་འགྲུས་ཀྱིས་སྤོང་བར་བྱེད་དོ། །དེ་ཇི་ལྟ་ཇི་ལྟར་ལམ་
རྣམས་ཐོབ་པར་གྱུར་པ་དེ་ལྟ་དེ་ལྟར་ཕྱིར་ཞིང་ཉིད་ཀྱང་སྤྲོ་བ་སྐྱེ་བར་བྱེད་པ་ཡིན་ནོ། །བརྩོན་འགྲུས་ཤིན་དུ་བརྩམས་པས་བྲལ་བའི་འབྲས་བུ་རྣམས་ཅི་ནས་ཀྱང་འབྱུང་བར་བྱེད་དོ། །ཀུན་ནས་ཉོན་མོངས་པའི་ཆོས་འཆིང་བར་
གྱུར་པ། བྱིས་པའི་སྐྱེ་བོ་རྣམས་ཐམས་ཅད་ཀྱི་ཡིད་ཀུན་ནས་འཕྲོག་པར་བྱེད་པའི་ཡུལ་རྣམས་ལ་ཆགས་པར་མི་བྱེད་དོ། །འདི་ལྟ་སྟེ་འདོད་པའི་རྗེས་སུ་མཐུན་པར་གྱུར་པ་སྒྲ་དང་རེག་བྱ་དང་རོ་དང་གཟུགས་དང་དྲི་རྣམས་ཀྱིས་དགེ་
བའི་རྫས་གང་ཡིན་པ་རྣམས་རྐུ་བའི་དྲིད་པའི་ཆོས་ཅན་རྣམ་པར་སླུ་བའི་ཆོས་ཅན་དོན་མ་ཡིན་པ་རྣམས་ཐམས་ཅད་བྱེད་པ་མི་འདོད་པའི་རྣམ་པར་སྨིན་པར་འགྱུར་བ་མི་འདོད་པའི་འཆིང་བའི་ཆོས་སུ་གྱུར་པའི་བྱིས་པ་སོ་སོའི་སྐྱེ་

66-1-25b

བོ་ཡོངས་སུ་མ་སྤངས་པ་རྣམས་ཐམས་ཅད་ཀྱི་སེམས་རྣམ་པར་གཡེང་བར་བྱེད་པ་དང་རྣམ་པར་རྨོངས་པར་བྱེད་པའི་ཡུལ་གྱི་དགྲ་དེ་དག་རྣམས་ཐམས་ཅད་སྤོང་བར་བྱེད་དོ། །རོ་མྱང་བར་མི་བྱེད་པའི་ཐར་པའི་ལམ་སྒོམ་པར་བྱེད་དོ། 
སེམས་དྲི་མ་མེད་པར་བྱེད་དོ། །དེ་ཇི་ལྟ་ཇི་ལྟར་དྲི་མ་རྣམས་མེད་པའི་བྱེད་པ་དེ་ལྟ་དེ་ལྟར་བརྩོན་འགྲུས་དང་ལྡན་པ་དང་དྲན་པ་དང་ལྡན་པ་དང་ངོ་མཚར་བར་གྱུར་པ་ཤེས་བཞིན་ཅན་དགྲ་རབ་ཏུ་བཅོམ་པར་འགྱུར་རོ། །གཞན་ཡང་
བརྩོན་འགྲུས་དེ་ཉིད་ཀྱིས་སྤྲོ་བ་དང་བཅས་པ་གང་ཡིན་པས་འདོད་ཆགས་ཞེ་སྡང་གཏི་མུག་རྣམས་རབ་ཏུ་འཇོམས་པར་བྱེད་དོ། །རྣམ་པར་བྲལ་བར་བྱེད་དོ། །རྒྱལ་བར་བྱེད་དོ། །ཡང་སྲིད་པ་མི་འབྱུང་ངོ་། །དགྲ་རྣམས་ལས་རྒྱལ་བ་མི་
མཐུན་པ་རྣམས་ལས་རྒྱལ་བ་དེ་ནི་དྲི་མ་མེད་པའི་ནམ་མཁའ་བཞིན་དུ་དང་རབ་ཏུ་དང་བའི་ཆུ་བཞིན་དུ་དང་སྤྲིན་གྱི་ཚོགས་རྣམས་དང་བྲལ་བར་གྱུར་པས་དྲི་མ་མེད་པའི་ཟླ་བ་བཞིན་དུ་དང་ན་བུན་དང་བྲལ་བའི་འཛམ་བུའི་གླིང་གི་ཉི་མ་
བཞིན་དུ་སྟེ་དེ་ལྟ་དེ་ལྟར་རྣམ་པར་སྣང་ངོ་། །ཇི་ལྟ་ཇི་ལྟར་ནད་པ་ནད་རྣམས་ལས་གྲོལ་བ་བཞིན་དུ་དང་། དབུལ་པོ་རྣམས་ཀྱིས་བར་དུ་ནོར་རྙེད་པ་བཞིན་དུ་དང་། མིག་མེད་པ་རྣམས་ལམ་སྟོར་ནས་ནགས་ཁྲོད་དུ་ཞུགས་པ་ལས་ལམ་དུ་
བགྲོད་པར་བྱེད་པ་དེ་དག་རྣམས་བཞིན་དུ་འདིས་མཐར་ཐུག་པའི་ཚུལ་ཁྲིམས་ཤིས་པ་གང་ཡིན་པ་ཉེ་བར་ཐོབ་པའི་དབང་དུ་བྱས་ནས་བསྙེན་པར་རྫོགས་པར་བྱས་ཏེ་གནས་སོ། །ཇི་ལྟར་བདག་གི་སྐྱེ་བ་རྣམས་ནི་ཟད་དོ། །ཚངས་པར་སྤྱོད་པ་ནི་
སྤྱད་དོ། །བདག་གི་འདི་ལས་སྲིད་པ་གཞན་ནི་མི་ཤེས་སོ། །དེ་ལྟར་འདིའི་སྡིག་པ་རྣམས་རྣམ་པར་བྲལ་བ། འཆིང་བའི་ཞགས་པ་རྣམས་ཐམས་ཅད་ལས་གྲོལ་བ། ཆུ་ཀླུང་གི་ཕ་རོལ་ཏུ་ཕྱིན་པར་གྱུར་ནས་རྣམ་པར་རྒྱལ་ཞིང་
མཛེས་སོ། །བརྩོན་འགྲུས་བརྩམས་པ་དང་ལྡན་པ་གང་གིས་བརྟན་པ་རྣམས་ཀྱི་དེ་དག་རྣམས་ཐམས་ཅད་ཡིན་ནོ། །དེའི་ཕྱིར་ན་ཐམས་ཅད་ཀྱིས་ཀྱང་རབ་ཏུ་འབད་པས་བརྩོན་འགྲུས་བརྩམ་པར་བྱའོ། །འཁོར་བའི་འཆིང་བར་

66-1-26a

གྱུར་པའི་ལེ་ལོ་དང་བག་མེད་པ་རྣམས་ཀྱང་སྤང་བར་གྱིས་ཤིག །དེ་ནས་དེའི་ཚེ་ན་མུ་སུ་ལུན་དྷ་བཅོམ་ལྡན་འདས་འོད་སྲུངས་ཀྱིས་གསུངས་པའི་ཚིགས་སུ་བཅད་པ་བརྗོད་པ་ཇི་ལྟར། བརྩོན་འགྲུས་བརྩམས་
པ་དྲན་ལྡན་པ། །དེ་ཚེ་གཅིག་ཏུ་མངོན་པར་དགའ། །སྡིག་པའི་ཆོས་ལས་རྣམ་པར་གྲོལ། །མཁས་པས་ཐར་པ་ཐོབ་པར་འགྱུར། །བརྩོན་འགྲུས་རྩོམ་པ་དང་ལྡན་པ། །གང་གིས་ལེ་ལོའི་དྲི་མ་སྤོང་། །ངམ་གྲོག་འཇིགས་ལས་
རྣམ་པར་གྲོལ། །སྐྱེ་བོ་དེ་ནི་མཐོ་རིས་འགྲོ། །ལེ་ལོ་ཆོས་རྣམས་ཐམས་ཅད་ཀྱི། །བར་ཆད་བྱེད་པ་ཡིན་པར་འདོད། །སྐྱོན་དེས་ཉེ་བར་བཅོམ་པ་ཡི། །མི་ནི་སྡུག་བསྔལ་སྐལ་ལྡན་ཡིན། །འདི་དང་ཕ་རོལ་བདེ་དོན་གཉེར། །དེ་ཡིས་
དེ་ནི་སྤང་བར་གྱིས། །དེ་ཕྱིར་དེས་ཟིན་སྐྱེས་བུ་དེ། །བཀྲ་ཤིས་དང་ཡང་དེ་མཚུངས་འདོད། །དེ་ལྟར་འཐབ་བྲལ་བ་རྣམས་ཀྱི་མངའ་བདག་དེས་སྨྲ་བ་པོའི་ངང་པ་དེ་དག་རྣམས་དང་ངང་པའི་རྒྱལ་པོ་དུས་བཟང་དེ་དང་བདུད་ཀྱི་རིགས་ཀྱི་
བག་མེད་པ་དེ་དག་རྣམས་ལ་བཅོམ་ལྡན་འདས་འོད་སྲུངས་ཀྱིས་གསུངས་པའི་མདོ་གང་ཡིན་པ་སྔོན་གྱི་ལྷ་ལས་དེས་ཐོས་པ་རྣམས་སྟོན་པ་ཡིན་ནོ། །གཞན་ཡང་ཉོན་མོངས་པ་དྲི་མ་ཅན་གྱི་ཆོས་རྣམས་དཀར་པོའི་ཆོས་ཀྱིས་
རབ་ཏུ་གཞོམ་པར་བྱའོ། །འདི་ཡང་གང་ཞེ་ན། འདི་ལྟ་སྟེ་གྲོང་དང་གྲོང་ཁྱེར་དུ་འཇུག་པ་ལ་དགའ་བའི་སྤྱོད་པ་རྣམས་སྤོང་བ་ནི་ཐམས་ཅད་གཅིག་ཏུ་དགོན་པ་ན་གནས་པས་སོ། །གྲོང་དང་གྲོང་ཁྱེར་ན་སྤྱོད་པ་ལ་དགའ་
བར་བྱེད་པ་གཅིག་ཏུ་གོམས་པར་གྱུར་པ་ནི། དགེ་སློང་ལ་གཅིག་ཏུ་བར་ཆད་བྱེད་པར་འགྱུར་རོ། །ཇི་ལྟར་གྱུར་པས་ཞེ་ན། དགེ་སློང་གི་བྱ་བ་ཉིད་དུ་གྱུར་པ་བསམ་གཏན་དང་ཁ་དོག་ཡོངས་སུ་སྤངས་ནས་གྲོང་ངམ་གྲོང་
ཁྱེར་དུ་འཇུག་པར་བྱེད་ཅིང་གནས་པར་ཡང་བྱེད་དོ། །ཁྱིམ་དེ་དང་དེ་དག་རྣམས་ལ་བློ་ཤིན་དུ་ལྷག་པར་ཆགས་པར་གྱུར་ནས། བུད་མེད་རྣམས་དང་ངམ་སྐྱེས་པ་དང་བཅས་པ་དང་ཡང་རུང་སྟེ། རྒྱུན་མི་འཆད་པར་འདུ་

66-1-26b

འཚོག་ཡང་བྱེད་པར་འགྱུར་རོ། །དེ་གལ་ཏེ་བུད་མེད་དང་ལྷན་ཅིག་ཏུ་འཆིང་བར་འགྱུར་བ་རྣམས་ཐམས་ཅད་བྱེད་དོ། །དོན་ཐམས་ཅད་ལས་ཡོངས་སུ་ཉམས་པར་འགྱུར་ཞིང་། ཡིད་འདོད་ཆགས་ཀྱི་དབང་དུ་འགྱུར་
བར་ཀུན་ནས་སྐྱེད་པར་བྱེད་དོ། །རྒྱུ་གང་གིས་བུད་མེད་ནི་མེ་དང་འདྲ་བ་ཡིན་ཏེ། ཇི་ལྟར་གང་མེ་ལ་ཉེ་བ་ཉིད་དུ་གནས་པ་དེ་ནི་ཉེ་བར་སྲེག་པར་འགྱུར་རོ། །དེ་བཞིན་དུ་ཡང་གང་བུད་མེད་རྣམས་དང་ཉེ་བར་གནས་པར་
བྱེད་པ་དེའི་སེམས་རྣམ་པར་འཁྲུལ་བར་འགྱུར་རོ། །རྒྱུ་མཚན་དེའི་ཕྱིར་ན་དགེ་སློང་གིས་གྲོང་དང་གྲོང་ཁྱེར་རྣམས་སུ་འཇུག་པར་མི་བྱའོ། །གལ་ཏེ་སྐྱེས་པ་དག་དང་ལྷན་ཅིག་ཏུ་འདུ་འཚོག་པ་འམ་གཞན་རྣམས་
དང་ཡང་ཀུན་རྗོད་པར་བྱེད་པ་དེ་དག་ནི་བྱ་བ་རྣམས་ཐམས་ཅད་ལས་ཡོངས་སུ་ཉམས་པར་འགྱུར་རོ། །འདིའི་སེམས་ཟག་པ་མེད་པའི་ཆོས་རྣམས་ལ་ཡང་དག་པར་རབ་ཏུ་དང་བར་འགྱུར་བ་ཡང་མ་ཡིན་ནོ། །དགེ་སློང་
གྲོང་དང་གྲོང་ཁྱེར་རྣམས་སུ་འཇུག་པ་ལ་དགའ་བའི་སྤྱོད་པའི་དབང་གིས་བར་ཆད་ཆེན་པོར་གྱུར་པ་གཞན་རྣམས་ཉིད་ཀྱང་འབྱུང་བར་འགྱུར་ཏེ། དེ་ལས་འདི་དག་རྣམས་ཀྱང་གང་ཞེ་ན། འདི་ལྟ་སྟེ་ཁྱིམ་ནས་ཁྱིམ་རྣམས་
སུ་འཇུག་པའི་དགེ་སློང་ནི་སེམས་རྣམ་པར་གཡོས་པར་འགྱུར་རོ། །ཁྱིམ་རྣམས་ཀྱི་ཉེ་བར་སྤྱོད་པར་བྱ་བ་རྣམས་ཡོངས་སུ་རྟོགས་ཤིང་ཟས་དང་སྐོམ་གྱི་ལོངས་སྤྱོད་དག་མངོན་པར་མཐོང་ནས་སྤངས་ཀྱང་དེ་ནམ་ཞིག་ན་
སླར་ཡང་མི་མཉམ་པ་རྣམས་ལ་འཇུག་པར་རྩོམ་སྟེ། ནགས་ཀྱི་ནང་ནས་ཅི་ནས་ཀྱང་ཁྱིམ་པར་འགྱུར་རོ། །ནགས་ན་གནས་པ་ལས་ཡོངས་སུ་ཉམས་པར་གྱུར་ནས། དེ་ཕྱིར་ཡང་ཁྱིམ་གྱི་གནས་ཀྱི་འཆིང་བའི་
སྐྱོན་དེ་ཉིད་ཀྱིས་ཀུན་ནས་བཅིངས་པར་གྱུར་ནས་འདོད་ཆགས་དང་ཞེ་སྡང་དང་གཏི་མུག་རྣམས་ལ་སྤྱོད་དོ། །དེ་ཉེས་པ་དེ་དག་རྣམས་ཀྱི་སྐྱོན་གྱིས་ཕྱིར་ཡང་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བ་ཡིན་ནོ། །

66-1-27a

སྡུག་བསྔལ་དེ་དག་རྣམས་ཀྱི་རྩ་བ་ཡང་གྲོང་དང་གྲོང་ཁྱེར་དུ་འཇུག་པའི་སྤྱོད་པ་ལ་དགའ་བ་ཡིན་ནོ། །དེའི་ཕྱིར་ཡང་དག་པའི་དགེ་སློང་ཡིན་པར་འདོད་པས་དེ་དག་རྣམས་ཡོངས་སུ་སྤོངས་ཤིག །རྣམ་པ་དེ་
ལྟ་བུའི་སྐྱོན་དེ་དག་རྣམས་ཀྱང་གང་གིས་སྤོང་ན། ཅིག་ཏུ་དགོན་པ་ན་གནས་པས་སོ། །དགོན་པ་ན་གནས་པ་དེ་ཡང་མཐར་ཐུག་པའི་ཡོན་ཏན་རྣམས་ཐམས་ཅད་ཀྱི་རྟེན་དུ་གྱུར་པ་མཆོག་ཏུ་བཟང་བ་ཡིན་ནོ། །གཅིག་
པུ་དགོན་པ་ན་གནས་པར་དགའ་བའི་དགེ་སློང་ནི་དབང་པོ་རྣམས་ཞི་བ་དང་སེམས་ཤིན་དུ་རབ་ཏུ་དང་བ་དང་། བློ་ལེགས་པར་བཏུལ་བའི་གསེར་དང་མཚུངས་པ་དང་། མཆོག་ཏུ་ཞི་བ་དང་དབང་པོ་རྣམས་མཆོག་ཏུ་
བསྡམས་པ་དང་འཇིགས་པའི་དྲི་མ་རྣམས་དང་རྣམ་པར་བྲལ་བ་དང་། མཆོག་ཏུ་གཙང་བར་གྱུར་པའི་ཟག་པ་མེད་པའི་བདེ་བ་རྣམས་གང་ཡིན་པ་འཐོབ་པར་བྱེད་དོ། །བདེ་བ་དེའི་ཁྱད་པར་རྣམས་ཀྱིས་ན་འདོད་པ་
ན་སྤྱོད་པའི་ལྷའི་རིགས་དྲུག་པོ་འདི་དག་རྣམས་ཐམས་ཅད་ཀྱིས་ཀྱང་ཡང་དག་པའི་ལེགས་པ་དང་ལྡན་པར་གྱུར་ཅིང་ཀུན་གྱིས་ཀྱང་གང་སྔོན་ལས་རྣམས་ཅིག་ཏུ་བྱས་པར་གྱུར་ལ། དེ་ཡང་འདོད་པ་སྡུག་པ་ཡིད་དུ་འོང་བ་
མཆོག་ཏུ་མཚུངས་པ་མེད་པའི་ལྷ་གཅིག་གི་རྣམ་པར་སྨིན་པའི་འབྲས་བུར་གྱུར་ཅིག་འདོད་པ་ན་སྤྱོད་པ་འདི་དག་རྣམས་ཀྱི་བདེ་བ་རྣམས་དང་ཀུན་ནས་ལྡན་པར་གྱུར་པ་གང་ཡིན་པ་དེས་ཀྱང་། ཟག་པ་ཟད་པའི་བདེ་བ་ཅིག་གི་
ཆར་ཡང་མི་ཕོད་ཅིང་དཔེར་ཡང་མི་བཟོད་དོ། །དཔྱད་པར་གྱུར་པ་ན་ཐམས་ཅད་དུ་དཔེར་ཡང་མི་ཆོག་གོ། །དེའི་ཕྱིར་གང་འགའ་ཞིག་དོན་དམ་པའི་བདེ་བ་འདོད་པ་དེས་གྲོང་དང་གྲོང་ཁྱེར་དུ་འཇུག་པ་ལ་དགའ་བའི་བདེ་བ་དེ་དག་
རྣམས་ཐོང་ལ་བསམ་གཏན་དང་སྙོམས་པར་འཇུག་པའི་བདེ་བ་རྣམས་དོན་དུ་གཉེར་ཞིང་རྟག་ཏུ་གཅིག་པུ་ཉིད་མངོན་པར་དགའ་བས་རི་ཁྲོད་དང་རིའི་ཕུག་དང་དགོན་པ་རྣམས་སུ་རྩྭ་སོག་གི་སྟན་ལ་གཅིག་ཏུ་གནས་པར་འགྱུར་བར་

66-1-27b

གྱིས་ཤིག །ཟག་པ་མེད་པའི་བདེ་བ་ལ་མངོན་པར་དགའ་བས་གནས་པའི་དགེ་སློང་རྣམས་ནི་གྲོགས་པོ་དང་གཉེན་འབྲེལ་དང་རང་གི་སྐྱེ་བོ་རྣམས་ལྟ་བར་བྱེད་པས་རྣམ་པར་རྒྱུ་བ་སྟེན་པར་འགྱུར་བ་ནི་མ་ཡིན་ནོ། །དེ་རང་གི་
སྐྱེ་བོ་དང་གྲོགས་པོ་དང་གཉེན་འབྲེལ་རྣམས་ལ་ལྟ་བས་རྣམ་པར་རྒྱུ་བ་བསྟེན་པར་གྱུར་ན། དེ་རང་གི་སྐྱེ་བོ་དང་གྲོགས་པོ་དང་གཉེན་འབྲེལ་རྣམས་དང་འཕྲད་པ་ལས་བྱུང་བའི་བདེ་བ་རྣམས་ནི་འཇིག་པ་དང་མི་བརྟན་པ་དང་མི་རྟག་
པ་དང་མཐར་རྣམ་པར་འབྲལ་བ་དེ་དག་རྣམས་ནི་མཆོག་ཏུ་མཐར་ཕྱིན་པ་མ་ཡིན་ནོ། །ཉོན་མོངས་པ་རྣམས་དང་བཅས་པ་དང་དེ་ནི་དྲི་མ་དང་སྐྱོན་དང་གནོད་པ་དང་བཅས་པ་དང་གཅིག་ཏུ་ངེས་པ་མ་ཡིན་པ་འཇིགས་པ་དང་བཅས་པར་
གཅིག་ཏུ་ངེས་པ་དཔེ་མེད་པ་རྣམས་ལས་རྣམ་པར་མ་གྲོལ་བ་ཡིན་ནོ། །དེའི་ཕྱིར་ན་བློ་གྲོས་དམན་པར་གྱུར་པ་གང་འགའ་ཞིག་གིས་དོན་དམ་པའི་བདེ་བ་རྣམས་ཀུན་ནས་དོར་ནས་ཟག་པ་དང་བཅས་པའི་བདེ་བ་ཚུལ་དང་མཐུན་པ་མ་
ཡིན་པ་སྡུག་བསྔལ་རྣམས་ཚོལ་བར་བྱེད་དོ། །དེ་ནི་འོད་བོར་བར་གྱུར་ནས་མུན་པ་ཚོལ་བར་བྱེད་པ་ཡིན་ནོ། །དེ་ལས་ཀྱང་འཁྱམ་པར་གྱུར་ཏེ། བློ་དང་མི་ལྡན་ཞིང་ཡོན་ཏན་དང་ཡོན་ཏན་མ་ཡིན་པ་དང་སྐྱོན་གྱི་མཚན་ཉིད་
ལ་བློ་གྲོས་ལྡོངས་པའི་ཕྱིར་རོ། །དེའི་ཕྱིར་གྲོང་དང་གྲོང་ཁྱེར་དུ་འཇུག་པར་དགའ་བའི་སྤྱོད་པ་རྣམས་སྤོངས་ལ། རྟག་པར་གཅིག་པུ་དགོན་པ་ན་གནས་པ་ལ་མངོན་པར་དགའ་བར་འགྱུར་བར་གྱིས་ཤིག །དེ་ལྟར་ན་ཀུན་ནས་
ཉོན་མོངས་པ་རྣམས་སྤངས་པ་ཤིན་དུ་མཐར་ཕྱིན་པའི་བདེ་བ་རྣམས་འཐོབ་པ་ཡིན་ནོ། །ཆོས་ལྔ་པ་དྲི་མ་དང་བཅས་པ་འདི་ནི་དྲི་མ་མེད་པའི་ཆོས་ཀྱིས་རབ་ཏུ་གཞོམ་པར་བྱའོ། །བདེ་བ་འདོད་པ་རྣམས་དང་བདུད་ཀྱི་
ཡུལ་ལ་མངོན་པར་མི་དགའ་བ་རྣམས་དང་དེའི་ས་ལ་འདུག་པར་མི་འདོད་པ་ཉིད་ཀྱིས་དེ་ལྟར་དྲི་མ་དང་བཅས་པའི་ཆོས་དེ་དྲི་མ་མེད་པའི་ཆོས་ཀྱིས་རབ་ཏུ་གཞོམ་པར་བྱའོ། །དེ་ལྟར་མུ་སུ་ལུན་དྷ་འདིས་ཀུན་ནས་བརྗོད་པ་དང་

66-1-28a

ལྡ་ན་པའི་ངང་པ་དེ་དག་རྣམས་ཀྱི་བློ་ཡང་རྟོགས་པས་དང་དགེ་བའི་མཐའ་དང་ལྡན་པ་མཆོག་ཏུ། །རྒྱ་ཆེ་བའི་བློ་གྲོས་ཅན་གྱི་བྱང་ཆུབ་སེམས་དཔའ་དུས་བཟང་གཞན་ལ་ཕན་པ་ལ་རབ་ཏུ་ཞུགས་པ་དེ་
དང་། བདུད་ཀྱི་ཕྱོགས་སུ་གྱུར་པའི་བག་མེད་པ་དེ་འཁོར་རྒྱགས་པ་དང་སྨྱོ་བ་དང་བཅས་པ་དང་། དེ་དག་རྣམས་ཀྱི་བསམ་པ་རིག་ནས་བཅོམ་ལྡན་འདས་འོད་སྲུངས་ཀྱིས་གསུངས་པའི་མདོ་འདི་ཡུལ་དང་དུས་སུ་རིགས་
པར་བསྟན་ནོ། །དེ་ལ་ཆོས་བཅུ་གཅིག་པོ་རྣམས་ལས་ཆོས་ལྔ་པ་བསྟན་པ་ཡིན་ནོ། །ལྷག་མ་དྲུག་པ་དེ་ཡང་ཡུལ་དང་དུས་སུ་འོས་པར་ངས་བསྟན་པར་བྱ་ཡིས་ཁྱེད་རྣམས་ཡིད་རྩེ་གཅིག་པ་དང་ཡང་དག་པར་
ལྡན་པར་གྱིས་ཤིག །གང་གི་ཕྱིར་དལ་འབྱོར་ཕུན་སུམ་ཚོགས་པ་ཐོབ་པར་གྱུར་ནས། གང་དག་ཆོས་སྟོན་པར་མི་བྱེད་པ་དང་གང་ཡང་ཉན་པར་མི་བྱེད་པ་དེ་དག་ནི་ཤིན་དུ་མི་ཁོམ་པ་ཐོབ་པ་ཡིན་ནོ། །དེའི་ཕྱིར་ན་ཇི་
སྲིད་དུ་དལ་འབྱོར་ཕུན་སུམ་ཚོགས་པ་དང་དབང་པོ་ཀུན་ཚང་བར་གྱུར་པ་དེ་སྲིད་དུ་ཆོས་བསྟན་པར་བྱའོ། །གང་གི་ཕྱིར་ངན་སོང་གི་ས་གསུམ་པོ་དམྱལ་བ་དང་ཡི་དགས་དང་དུད་འགྲོ་རྣམས་ནི་ཤིན་དུ་སྡུག་བསྔལ་བའི་ཕྱིར་
རོ། །དམྱལ་བ་ནི་ཇི་ལྟར་ཆོས་ཉན་པར་འགྱུར། དེ་བཞིན་དུ་ཡི་དགས་དང་དུད་འགྲོ་རྣམས་ན་ཇི་ལྟར་ཆོས་འདུལ་བ་རྣམས་ཡོད། ཕན་ཚུན་དུ་གསོད་པར་བྱེད་པ་དང་སྐོམ་པ་དང་ལྟོགས་པའི་སྐྱོན་དང་ལྡན་པའི་ཕྱིར་
རོ། །ལྷ་དང་མི་རྣམས་ཁོ་ན་ཆོས་སྒྲོགས་པ་ཡོད་པ་ཡིན་ཏེ། གང་དག་བག་མེད་པ་མ་ཡིན་ཞིང་བག་མེད་པར་རྒྱུ་བ་མ་ཡིན་པ་རྣམས་ཀྱིས་སོ། །དེ་ལ་བདག་གིས་བག་མེད་པ་སྤངས་ལ། ཁྱེད་དད་པའི་མོས་པ་དང་ལྡན་པ་
དགེ་བའི་བསམ་པ་ཅན་རྣམས་ཉིད་ལ་ངས་ཆོས་བསྟན་པར་བྱ་ཡིས་དེ་ཁྱེད་རྣམས་ཀྱིས་རབ་ཏུ་གུས་པར་གྱིས་ལ་མཉན་པར་གྱིས་ཤིག །དེ་ལྟར་ཆོས་འདུལ་བ་ནི་ཤིན་དུ་དཀོན་པ་དང་དལ་འབྱོར་ཕུན་སུམ་ཚོགས་པ་ཡང་

66-1-28b

ཤིན་དུ་རྙེད་པར་དཀའ་བ་ཡིན་ནོ། །གཞན་ཡང་ཆོས་དྲི་མ་ཅན་མི་གཙང་བ་དང་བཅས་པ་གཞན་རྣམས་སླུ་བར་བྱེད་པ་ཡང་གང་ཞེ་ན། འདི་ལྟ་སྟེ་འདོད་པ་ཆེ་བའོ། །ཆོས་དེ་ཡང་མཆོག་དྲི་མ་ཅན་དུ་གྱུར་པ་འདོད་པ་ཆེ་
བས་བྱིན་གྱིས་བརླབས་པ་གང་གིས་གཞོམ་པར་བྱ་ན། འདི་ལྟ་སྟེ་ཆོག་ཤེས་པས་སོ། །འདོད་པ་ཆེ་བ་ཞེས་བྱ་བ་ནི་ཁྱིམ་པ་རྣམས་དང་རབ་ཏུ་བྱུང་བ་རྣམས་ཀྱང་བདེ་བར་རྒྱུ་བ་མ་ཡིན་ཏེ། གང་གི་ཕྱིར་འདོད་པ་ཆེ་བར་
གྱུར་པ་རྣམས་ནི་ཁྱིམ་པ་འམ་རབ་ཏུ་བྱུང་བ་ཡང་རུང་སྟེ། ཉིན་མོ་དང་མཚན་མོར་ཡང་དེ་དག་རྣམས་བདེ་བར་མི་འགྱུར་རོ། །རྫས་རྣམས་ཐོབ་པར་གྱུར་པས་ཀྱང་ཞི་བ་ཐོབ་པར་མི་འགྱུར་རོ། །ནོར་གང་རྙེད་པར་གྱུར་ཡང་
དེས་མཐར་ཐུག་པའི་ཚིམ་པ་འབྱུང་བར་མི་འགྱུར་རོ། །འདོད་པ་ཆེ་བར་གྱུར་པ་དེ་ཡང་ཁྱིམ་གྱི་གནས་ནས་ངེས་པར་འབྱུང་བའི་རབ་ཏུ་བྱུང་བ་རྣམས་ལ་ཇི་ལྟ་བར། དེ་ལྟར་ཁྱིམ་པ་རྣམས་ཀྱི་བར་ཆད་བྱེད་པར་ནི་མི་
འགྱུར་རོ། །གང་གི་ཕྱིར་རབ་ཏུ་བྱུང་བ་འདོད་པ་ཆེ་བར་གྱུར་པ་གང་ཡིན་པ་དེ་ནི་ཁྱིམ་པ་ཡིན་གྱི་རབ་ཏུ་བྱུང་བ་ནི་མ་ཡིན་ནོ། །རབ་ཏུ་བྱུང་བ་ཞེས་བྱ་བ་ནི་རྒྱགས་པ་དང་ང་རྒྱལ་དང་འགྱིང་བ་དང་རྨོངས་པ་དང་ཕྲག་དོག་རྣམས་
བཅོམ་པ་དང་འདོད་པ་ཆེ་བ་དང་ཡང་རྣམ་པར་བྲལ་བ་ཡིན་ནོ། །སྤྱིར་སྐྱོན་དེ་དག་རྣམས་ཉིད་ལས་ཀྱང་དགེ་སློང་འདོད་པ་ཆེ་བའི་མིང་ཅན་རྣམས་ལ་ནི་གཞན་ཐམས་ཅད་འཕྱ་བར་འགྱུར་རོ། །གང་ཡང་འདོད་པ་ཆེ་བའི་
བློ་ཅན་གྱི་དགེ་སློང་ནི། རྟག་ཏུ་བློ་ནོར་ལ་སོང་བར་གྱུར་པས་ཉིན་མཚན་མེད་པར་དེའི་སེམས་དགེ་བའི་ཆོས་རྣམས་ལ་ལེགས་པར་རབ་ཏུ་དང་བར་མི་འགྱུར་རོ། །དེའི་བློ་རབ་ཏུ་མ་དང་བ་དང་དབང་པོ་རབ་ཏུ་མ་དང་བ་དང་
བྱ་བ་རྣམས་རབ་ཏུ་མ་དང་བ་གང་ཡིན་པའི་གོམ་པ་འབོར་བར་གྱུར་པ་འམ་དགེ་འདུན་གྱི་ས་ལ་འཆག་པར་བྱེད་ཀྱང་དེར་དམྱལ་བར་ཉེ་བར་འགྱུར་ན། གནས་མལ་དེར་ནད་ཀྱི་རྐྱེན་སྨན་དང་ཡོ་བྱད་རྣམས་ཀྱིས་ནི་དང་པོ་

66-1-29a

ཁོ་ནར་བར་ཆད་བྱེད་པ་འབྱུང་བར་འགྱུར་བ་ཡིན་ནོ། །དེ་དམྱལ་བ་འབའ་ཤིག་ཏུ་འཚེད་པར་བྱེད་དེ། གང་ཚུལ་ཁྲིམས་འཆལ་བར་གྱུར་པ་འདོད་པ་ཆེ་བ་སྡིག་པའི་ཆོས་ཅན། དགེ་སྦྱོང་མ་ཡིན་པར་དགེ་སྦྱོང་
དུ་ཁས་འཆེས་པ། སེང་གེའི་ལྤགས་པ་ཀུན་ནས་གྱོན་པའི་ལྕེ་སྤྱང་སྒྱུ་མའི་ཟོང་དང་མཚུངས་པ། དུང་གི་སྒྲ་དང་མཚུངས་པར་སྤྱོད་པ་མཆོག་ཏུ་སྟོང་པ་ཤིན་དུ་སླུ་བ་ཤིན་དུ་ཆད་པར་གྱུར་པ་ཡིན་ནོ། །གང་འགའ་ཞིག་
འདོད་པ་ཆེ་བར་གྱུར་པ་ཇི་ལྟར་ང་ནི་དགེ་སློང་ཡིན་ཏེ་འོད་སྲུང་བ་ཡིན་ནོ། །འོད་སྲུངས་ཀྱི་ཆོས་འདུལ་བ་ལ་རབ་ཏུ་བྱུང་བ་ཡིན་ནོ་ཞེས་དེ་ལྟར་དམ་འཆའ་བརྗོད་པར་བྱེད་པ་ན། འདོད་པ་ཆེ་བར་གྱུར་པ་དེ་ལྟར་མེས་ནི་མི་སྲེག་གོ །། 
ཇི་ལྟར་འདོད་པ་ཆེ་བས་བློ་གྲོས་ཆུང་བ་རྣམས་ན་བར་བྱེད་པ་དེ་ལྟར་དུག་གིས་ལྷང་ཀྱོག་མི་བྱེད་དོ། །ཇི་ལྟར་འདོད་པ་ཆེ་བའི་རྒས་པས་རྒས་པར་བྱེད་པ་དེ་ལྟར་རྒ་བས་རྒས་པར་མི་བྱེད་དོ། །ཇི་ལྟར་དགེ་བའི་ལྗོན་ཤིང་རྣམས་
འདོད་པ་ཆེ་བའི་མཚོན་གྱིས་རྩ་བ་ནས་གཅོད་པར་བྱེད་པ་དེ་ལྟར་མཚོན་གྱིས་ནི་རྩ་བ་ནས་མི་གཅོད་དོ། །ཇི་ལྟར་འདོད་པ་ཆེ་བའི་ནད་རྣམས་ཀྱིས་ཉེ་བར་འཇོམས་པར་བྱེད་པ་དེ་ལྟར་ནད་རྣམས་ཀྱིས་ནི་ཉེ་བར་འཇོམས་
པར་མི་བྱེད་དོ། །ཇི་ལྟར་འདོད་པ་ཆེ་བའི་དགྲས་ནང་དུ་གསེབ་ཏུ་ཉེ་བར་སོང་ནས་སྙིང་ལ་ཀུན་དུ་གནས་ཏེ་སྲོག་འཇིག་པར་བྱེད་པ་དེ་ལྟར་དགྲ་བོ་གླགས་ཚོལ་བ་རྣམས་ནང་གི་གསེབ་དུ་ཞུགས་ཏེ། རྟག་ཏུ་ཉེ་བར་གླགས་
སྐབས་ཚོལ་བ་རྣམས་ཀྱང་སྲོག་གཅོད་པར་མི་བྱེད་དོ། །དེའི་ཕྱིར་སྐྱོན་དེ་དག་རྟོགས་པར་གྱིས་ལ་གཉིས་འཇིག་པར་བྱེད་པའི་སྐྱོན་ཅན་དགེ་སློང་འདོད་པ་ཆེ་བ་རྣམས་ཀྱིས་འཇིག་རྟེན་གཉིས་ག་འཇིག་པར་བྱེད་པ་དང་། 
དྲི་མ་རྣམས་དང་ལྡན་པ་དང་སྡིག་པའི་རྩེ་མོར་གྱུར་པ་ཡིན་པས་རྣམ་པར་སྤང་བར་གྱིས་ཤིག །དེ་སྤྱད་པར་གྱུར་པ་ན་ཡང་ཉིན་མོ་འམ་མཚན་མོ་ཡང་རུང་སྟེ་འགའ་ཞིག་ཀྱང་བདེ་བར་མི་འགྱུར་རོ། །དེ་ནས་དེའི་ཚེ་ན་འཐབ་བྲལ་བ་རྣམས་

66-1-29b

ཀྱི་མངའ་བདག་མུ་སུ་ལུན་དྷ་དེས་བཅོམ་ལྡན་འདས་འོད་སྲུངས་ཀྱིས་གསུངས་པའི་ཚིགས་སུ་བཅད་པར་བརྗོད་པ་ཇི་ལྟར། འདོད་པ་ཆེ་བའི་མཚོན་ཆེན་ནི། །གང་གིས་གཏུབ་པ་བྱིས་པ་རྣམས། །དེ་ཕྱིར་མཚོན་ཆ་བཞིན་དེ་
སྤོངས། །མིག་མེད་པ་ནི་དེས་བཅིངས་ནས། །འདོད་ཆེན་རྨ་ནི་མི་བཟད་པ། །གང་གི་སྙིང་ལ་སྐྱེ་བར་འགྱུར། །ཉིན་དང་མཚན་མོ་མེད་པར་ཡང་། །འདོད་ལྡན་དེ་ནི་བདེར་མི་འགྱུར། །ཀུན་རྟོག་བུད་ཤིང་ལས་བྱུང་བའི། །སྲེད་
པའི་རླུང་གིས་ཀུན་ཏུ་སྤར། །འདོད་ཆེན་རང་བཞིན་མེ་ཡིས་ནི། །མི་རྣམས་སྙིང་ནི་སྲེག་པར་བྱེད། །འདོད་པ་ཡིས་ནི་བསྐོར་བའི་ཡིད། །སེམས་ནི་ཡང་མོའི་སྐྱེས་བུ་ནི། །ནོར་ལ་སྲེད་པར་གྱུར་པ་ཡིས། །གསོན་པའི་སྙིང་པོ་
འཇོམས་པར་བྱེད། །གང་ཡང་སྡིག་པའི་ལས་རྣམས་ནི། །སྐྱེས་བུ་ཐ་ཤལ་གྱིས་བྱེད་དོ། །དེ་ཀུན་ནོར་སྲེད་ལས་ཡིན་པར། །མཁས་པས་རབ་ཏུ་བརྗོད་པ་ཡིན། །འབར་བ་གང་དུ་རྣམ་པར་འཇུག །གང་གིས་མི་
རིགས་པར་བྱེད་པ། །དེ་ཀུན་འདོད་པའི་སྐྱོན་གྱིས་ནི། །བདག་ལ་ཕན་མིན་བྱེད་པ་ཡིན། །འཁྲུག་པ་རྣམ་པ་སྣ་ཚོགས་དང་། །མཚོན་ཆའི་སྡུག་བསྔལ་ཤིན་དུ་ཡང་། །བསྟེན་པའི་སྐྱེས་བུ་རྨོངས་པ་གང་། །དེ་ཡི་
རྒྱུ་ཡང་འདི་ཡིན་ནོ། །འདོད་པའི་སྐྱོན་ལས་ཀུན་བྱུང་བའི། །ཉེར་འཚེ་འདི་དག་གོ་བར་གྱིས། །དེ་བསྟེན་ཕན་པ་བྱེད་མིན་པར། །ལམ་རིག་པས་ནི་ཡོངས་སུ་གསུངས། །དེ་ལྟར་མུ་སུ་ལུན་དྷ་དེས་སྨྲ་བ་པོའི་ངང་
པ་དེ་དག་དང་ངང་པའི་རྒྱལ་པོ་དུས་བཟང་དེ་དང་བག་མེད་པས་མགོ་དྲངས་པའི་བདུད་ཀྱི་རིགས་སུ་གྱུར་པ་གསུམ་པོ་རྒྱགས་པ་དང་སྨྱོ་བ་དང་དེ་དག་རྣམས་ལ་བཤེད་དོ། །རྣམ་པ་དེ་ལྟ་བུའི་སྐྱོན་ཆེན་པོ་རྣམས་དགེ་བའི་
ཆོས་གང་དག་གིས་རབ་ཏུ་གཞོམ་པར་བྱ་བ་ཡིན་ན། འདི་ལྟ་སྟེ་འདོད་པ་ཆུང་བ་ཞེས་བྱ་བས་སོ། །འདོད་པ་ཆུང་བ་ཞེས་བྱ་བ་ནི་འདི་ལྟ་སྟེ། བདེ་བ་རྣམས་ཐམས་ཅད་འབྱུང་བའོ། །དེ་གང་ལ་ཡོད་པའི་སྐྱེས་བུ་དེ་ནི་

66-1-30a

རྟག་ཏུ་བདེ་བའི་མཆོག་རྣམས་དང་ལྡན་པ་ཡིན་ལ། དེ་ལ་མེ་དང་རྒྱལ་པོ་དང་ཆོམ་རྐུན་དང་ཆུ་ལ་སོགས་པ་རྣམས་ཀྱི་འཇིགས་པ་མེད་དོ། །འདི་ནོར་གྱི་སྲེད་པ་རྣམས་ཀྱིས་རྣམ་པར་བསྲེགས་ནས་
ཁྱིམ་ནས་ཁྱིམ་དག་ཏུ་བསྟེན་པར་བྱ་བའི་དོན་དུ་སྨྲ་བར་མི་བྱེད་དོ། །སྟེན་གྲོགས་རྣམས་ནི་རྐུན་མའི་སྟེན་གྲོགས་ཡིན་ནོ། །དམན་པའི་གནས་རྣམས་ཁྱིམ་སྒོར་གནས་པ་ཡིན་ནོ། །བརྫུན་གྱིས་བསྟེན་གྲོགས་ཀྱི་
ཚིག་དག་ཀྱང་སྨྲ་བར་མི་བྱེད་དོ། །གར་དང་རྒོད་པ་དང་འགྱིང་བག་རྣམས་ཞབས་འབྲིང་གི་དོན་དུ་བྱེད་པ་ཡང་མ་ཡིན་ནོ། །ཚིག་རྣམས་སྨྲ་བར་མི་བྱེད་ཅིང་དོན་དག་ཀྱང་མི་བྱེད་དོ། །ནོར་གྱི་འདོད་པའི་མེ་རྣམས་ཀྱིས་
མི་སྲེག་གོ། །གཞན་དག་དང་མཉམ་དུ་འགྲོགས་པ་ལ་སྤྲོ་བར་གྱུར་པ་རྣམས་ཀྱི་དབུགས་འབྱིན་པ་མེད་པའི་སྡུག་བསྔལ་མང་པོར་མི་འགྱུར་རོ། །ནོར་གྱི་འདོད་པས་སྡིག་པའི་གྲོགས་པོ་རྣམས་བསྟེན་པར་མི་
བྱེད་དོ། །རྟག་ཏུ་དོགས་པ་དང་བཅས་པར་མི་འགྱུར་ཞིང་ལམ་དུ་འགྲོ་བར་གྱུར་པ་ན་ཆོམ་རྐུན་པའི་འཇིགས་པ་མེད་དོ། །གྲོགས་པོ་མ་ཡིན་པ་རྣམས་མང་བར་མི་འགྱུར་ཞིང་། སྐྱེ་བོ་རྣམས་ཐམས་ཅད་ཀྱིས་རྟོག་དཔྱོད་
བྱེད་པར་མི་འགྱུར་རོ། །ཆད་པའི་འཇིགས་པས་ཀྱང་རྣམ་པར་མི་འཇིགས་སོ། །དེ་ལྟར་ཁྱིམ་པར་གྱུར་ཀྱང་འཇིགས་པ་རྣམས་མེད་པར་འགྱུར་རོ། །སྐྱོན་གྱི་འཇིགས་པ་རྣམས་ཀུན་དུ་འགགས་པ་དང་ཐམས་ཅད་
དུ་སོ་གསོད་པར་གནས་པ་དང་གང་ཡང་ཁྱིམ་པ་རྣམས་ཀྱང་སྐྱོན་ལས་ཀུན་དུ་རྒལ་བ་ཡིན་ན་ནགས་ན་གནས་པ་རྣམས་ལ་ལྟ་ཅི་སྨོས། དེ་ཉིད་སླར་ཡང་འདོད་པ་ཆེ་བར་བྱེད་ན་ནི་དེ་སྐྱུགས་པ་ཟ་བ་དང་མཚུངས་པར་འགྱུར་
རོ། །དགེ་སྦྱོང་གི་མཆོད་པའི་མཆོག་རྣམས་ནི་འདི་ལྟ་སྟེ། འདོད་པ་ཆུང་བ་ཞེས་བྱ་བ་ཡིན་ནོ། །འདོད་པ་ཆུང་ཞིང་ཆོག་ཤེས་པའི་དགེ་སློང་རྣམས་ནི་གང་གི་ཕྱིར་ཤིན་དུ་ཡང་མཛེས་ཤིང་གསལ་ལ་རྣམ་པར་སྣང་ངོ་། །

66-1-30b

གདན་གཅིག་པ་འབའ་ཞིག་དང་། ཕྱག་དར་ཁྲོད་པ་འབའ་ཞིག་དང་གཅིག་པུ་ཁོ་ན་རྒྱུ་བ་དང་རིའི་ཁྲོད་དང་ཕུག་དག་དང་རྩྭའི་ཕུང་པོ་དང་དུར་ཁྲོད་འབའ་ཞིག་དུ་གནས་པ་དང་གསུས་པའི་སུམ་ཆ་འབའ་ཞིག་གིས་ཆོག་ཤེས་
པ་དང་། སུས་ཡང་མི་ཤེས་པ་འབའ་ཞིག་གིས་ཡུལ་ལྗོངས་རྒྱུ་བར་བྱེད་པ་དང་། གཉེན་བཤེས་དང་གྲོགས་པོ་དང་རང་གི་སྐྱེ་བོ་རྣམས་ལ་ཡང་བསོད་སྙོམས་འབའ་ཞིག་པ་དང་། ལྷུང་བཟེད་གོག་པོ་ཅིག་འབའ་ཞིག་
འཆང་བར་བྱེད་པ་དང་། ཤེས་རབ་ཀྱིས་ཕྱིན་ཅི་ལོག་འབའ་ཞིག་ཡོངས་སུ་སྤོང་བར་བྱེད་པ་དང་། ཡུལ་གང་ན་མཆོད་པར་བྱེད་པའི་ཡུལ་དེ་ཡོངས་སུ་སྤོང་བར་བྱེད་པ་དང་། ལམ་འབའ་ཞིག་ལ་ལེགས་པར་ལྟ་བ་དང་། གཉའ་
ཤིང་གང་ཙམ་དུ་ལྟ་བ་དང་། གཞན་དུ་མིག་མི་གཡེང་བ་དང་། རོ་ཞིམ་པོ་འབའ་ཞིག་ཟ་བ་ལ་སྟེན་པ་སྤོང་བ་དང་། ཆུ་ཞག་དུ་མ་བསྒྲངས་པ་འབའ་ཞིག་གི་བཏུང་བ་འཐུང་བ་དང་། ཡུལ་ལྗོངས་དང་གྲོང་དག་ཏུ་ཞག་གསུམ་
དང་ཞག་བདུན་འབའ་ཞིག་གནས་པར་བྱེད་པ་དང་། གསེར་དང་འཁར་བ་དང་དངུལ་གྱིས་མཛེས་པར་བྱས་པའི་ཉལ་ཁྲི་འཛིན་པར་མི་བྱེད་པ་ཁོ་ན་དང་། སྔོན་གྱི་ཁྱིམ་དང་གྲོགས་པོ་དང་གཉེན་བཤེས་ཀྱི་ལམ་ཀུན་དུ་ལྟ་བར་བྱེད་
པ་སྤོང་བ་འབའ་ཞིག་དང་། མཆོག་ཏུ་གྱུར་པའི་རྒྱལ་པོའི་བསོད་སྙོམས་དང་མལ་སྟན་དང་རྒྱལ་པོའི་སྒོར་བསྟེན་པར་བྱེད་པ་རྣམས་སྤོང་བ་ཁོ་ནར་སྤྱོད་པ་དང་རིགས་ཀྱི་མཆོག་ལས་རབ་ཏུ་བྱུང་བར་ཀུན་ནས་སྒྲོགས་པ་རྣམས་
སྤོང་བ་ཁོ་ནར་བྱེད་པ་དང་། དེ་དང་རང་བཞིན་མཚུངས་པ་འབའ་ཞིག་དང་བརྗོད་པ་དང་གསོད་གསལ་དང་ཀུན་རྗོད་པར་བྱེད་པ་ཡིན་ནོ། །རྣམ་པ་དེ་ལྟ་བུར་གྱུར་པའི་དགེ་སློང་གི་སྡོམ་པ་དང་དཀའ་ཐུབ་ནི་རྙོག་པ་རྣམ་པར་
སྤངས་པ་མཆོག་ཏུ་ཆོག་ཤེས་པ། མཆོག་ཏུ་འདོད་པ་ཆུང་བས་ནི་བདུད་ཀྱི་འཆིང་བ་རྣམས་གཅོད་པར་ནུས་སོ། །འདོད་པ་ཆེ་བ་རྣམས་ནི་སྡུག་བསྔལ་གྱི་ཚུལ་ཁྲིམས་དང་ལྡན་པ་དགེ་སློང་གི་ཆ་བྱད་འཛིན་པ་ནད་

66-1-31a

འདྲ་བ་རྐུན་མ་ཡིན་ཏེ། ལྷ་དང་བཅས་པའི་མིའི་ཚོགས་ཀྱི་སྐྱེ་དགུ་རྣམས་ཉེ་བར་མགུ་བར་མི་བྱེད་པའི་སྡིག་པ་ཅན་ཡིན་ནོ། །དགེ་སློང་རྣམས་ཀྱང་ཆོག་ཤེས་པ་དང་ལྡན་པ་དང་འདོད་པ་ཆུང་བའི་དགེ་སློང་ནི་དགེ་
སློང་ཡིན་ནོ། །སྒྲ་དང་རེག་བྱ་དང་རོ་དང་གཟུགས་དང་དྲི་དང་ཡུལ་རྣམས་ལ་དེའི་དབང་པོ་རྣམས་རྒྱུ་བར་མི་བྱེད་དོ། །ཕྱི་ཁྱམས་དག་ཏུ་ཉལ་བ་དང་སེམས་ཅན་ཐམས་ཅད་ལ་ཕན་པར་གནས་པའི་ལུས་དང་ཆོས་དང་ཚོར་བ་དང་
སེམས་རྣམས་ལ་དྲན་པ་ཉེ་བར་གཞག་པ་རྗེས་སུ་རྟོགས་པ་དང་། ཀུན་ནས་མཆོག་ཏུ་བློ་རྣམ་པར་བསྡུས་པ་དང་། འཁོར་བའི་ཚོགས་རྣམས་ལས་དབང་པོ་གཅིག་ཏུ་བསྡམས་པ་དང་། ཆོག་ཤེས་པ་ནི་དགེ་སློང་དུ་བརྗེད་
པ་ཡིན་ཏེ། ཇི་སྲིད་དུ་འདོད་པ་ཆུང་བར་གྱུར་པ་དེ་དག་རྣམས་ནི་ཁྱིམ་པ་འམ་རབ་ཏུ་བྱུང་བ་ཡིན་ཡང་རུང་སྟེ་བག་མེད་པར་མི་འགྱུར་རོ། །དེ་ནས་དེའི་ཚེ་ན་འཐབ་བྲལ་གྱི་བདག་པོ་དེས་ཚིགས་སུ་བཅད་པའི་དབྱངས་བརྗོད་པ་ཇི་
ལྟར། བག་ཡོད་འབྲས་བུ་ཐར་པ་ཡིན། །དམྱལ་བར་མི་རྣམས་བག་མེད་པས། །བག་ཡོད་བག་མེད་པ་དག་གི། །འདིས་ནི་ཁྱད་པར་བརྗོད་པ་ཡིན། །གང་ཡང་བཅིངས་དང་ཐར་པ་ཡི། །ཁྱད་པར་གང་ནི་ཟླ་དང་མུན། །བག་ཡོད་
བག་མེད་དེ་དག་གི། །ཁྱད་པར་འདི་ཉིད་ཁོ་ན་ཡིན། །བདེ་བ་འདོད་པ་ཆུང་ལ་མཐོང་། །སྡུག་བསྔལ་འདོད་ཆེན་མི་རྣམས་ཡིན། །བདེ་སྡུག་མཚན་ཉིད་འདི་ཡིན་པར། །ཡོངས་སུ་རྟོག་པར་བྱེད་པས་བཤད། །རྟག་ཏུ་
འདོད་ཆེན་མི་རྣམས་ཀྱི། །མེ་ནི་སྙིང་གནས་རང་བཞིན་ཡིན། །གང་དུ་འདོད་མེད་ཁྲུས་བྱེད་པའི། །འདོད་པ་ཆུང་བ་བསིལ་བའི་མཚོ། །ཇི་ལྟར་མེ་ནི་བུད་ཤིང་གིས། །རབ་ཏུ་ཞི་བར་འགྱུར་མ་ཡིན། །དེ་བཞིན་འདོད་ཆེན་
མི་རྣམས་ནི། །ནོར་གྱིས་གང་བར་འགྱུར་མ་ཡིན། །འདོད་པ་ཅན་ལ་ཉིན་དང་ནི། །མཚན་མོ་མེད་པར་བདེ་མི་འགྱུར། །སྐྱེས་བུ་འདོད་པ་ཆེ་བ་གང་། །སྲེད་པའི་ཟུག་རྔུས་རྣམ་པར་གནས། །རྒྱལ་པོ་ནོར་གྱིས་ངོམས་མེད་པར། །

66-1-31b

བྱེ་བ་ཕྲག་ཏུ་ཤི་ཞིང་སོང་། །གཞན་ཡང་མང་པོར་འགྲོ་བར་འགྱུར། །དེ་ཕྱིར་འདོད་པ་ཆུང་བ་བདེ། །དེ་ལྟར་འཐབ་བྲལ་གྱི་མངའ་བདག་དེ་པད་མའི་སྙིང་པོ་ལ་ལེགས་པར་གནས་ཏེ། དུས་བཟང་དེ་དང་སྨྲ་བ་པོའི་ངང་པ་དེ་དག་
རྣམས་ལ་འཆད་པར་བྱེད་དོ། །གཞན་ཡང་འཐབ་བྲལ་གྱི་བདག་པོ་དེ་ཉིད་ཀྱིས་བག་མེད་པ་དེའི་སྐྱོན་རྣམས་གཟུང་བར་བྱ་བའི་དོན་དུ་སྨྲ་བ་པོའི་བྱ་དེ་དག་རྣམས་ཀྱི་མདུན་དུ་དང་དུས་བཟང་དེའི་སྔོན་དུ་ཡང་། བཅོམ་ལྡན་འདས་འོད་
སྲུངས་ཀྱིས་གསུངས་པའི་མདོ་སྔོན་གྱི་ལྷའི་དྲུང་ནས་ཐོས་པ་རྣམས་འཆད་པ་ནི་ཇི་ལྟར་ཆོས་དྲི་མ་ཅན་རྣམས་བསྟན་པ་གང་ཡིན་པ་དེ་ནི་དཀར་པོའི་ཆོས་རྣམས་ཀྱིས་རབ་ཏུ་གཞོམ་པར་བྱའོ། །དེ་ལ་དྲི་མ་ཅན་གྱི་ཆོས་བདུན་པ་
བསྟན་པར་བྱ་བ་རྣམས་དང་། དཀར་པོའི་ཆོས་རྣམས་ཀྱིས་གཞོམ་པར་བྱ་བ་དང་། འདི་དག་ཀྱང་གང་དག་ཞེ་ན། འདི་ལྟ་སྟེ་གཉེན་བཤེས་བལྟ་བ་ལ་མངོན་པར་དགའ་བ་ནི་བྱེས་སུ་ཡུན་རིང་པོར་གནས་པས་སོ། །དེ་ལྟར་
ཡང་གཉེན་བཤེས་དང་གྲོགས་པོ་དང་རང་གི་སྐྱེ་བོ་རྣམས་དང་ཕྲད་པ་ལ་མངོན་པར་དགའ་བའི་དགེ་སློང་ནི། བློ་དེ་ལ་སོང་བར་གྱུར་པ་དང་དེ་རྗེས་སུ་སྒྲུབ་པར་བྱེད་པ་དང་དེ་ལས་རབ་ཏུ་འབྱམས་པར་གྱུར་པ་དང་དེས་བྲེལ་ཏོག་ཏུ་
གྱུར་ནས། ཉིན་མོ་དང་མཚན་མོ་མེད་པར་ཡང་བསམ་གཏན་བློ་ལ་བྱེད་པ་ཡང་མ་ཡིན་ནོ། །ཁ་ཏོན་ཡང་མི་བྱེད་ཅིང་བླ་མ་ལ་ལེགས་པར་བསྟེན་པའི་དབང་གིས་གནས་པ་ཡང་མ་ཡིན་ནོ། །དཀོན་མཆོག་གསུམ་ལ་མཆོད་པ་རྗེས་སུ་
སྒྲུབ་པར་མི་བྱེད་དོ། །འཇིག་རྟེན་ཕ་རོལ་གྱི་ལུས་གྱི་ལས་སུ་བྱ་བ་རྣམས་རྗེས་སུ་དྲན་པར་བྱེད་པ་དང་གཞན་ལ་སྟོན་པ་དང་། ངག་གི་ལས་དང་ཡིད་ཀྱི་ལས་དང་རྣམ་པ་གསུམ་བྱེད་པ་མ་ཡིན་གྱི། བློ་དེ་ལ་སོང་བ་འབའ་ཞིག་ཏུ་ཟད་དོ། 
ཇི་ལྟ་བ་བཞིན་དུ་ང་དང་ངའི་གཉེན་བཤེས་རྣམས་དང་གྲོགས་པོ་དང་རང་གི་སྐྱེ་བོ་རྣམས་མ་མཐོང་ན། དེ་དག་རྣམས་ཀྱི་ཁྱིམ་གྱི་བྱ་བ་ནི་ཅི་དང་ཅི་ལྟར་གྱུར་རམ་ཡང་དེ་དག་གི་གསོན་པ་རྣམས་ཀྱང་ཇི་ལྟར་གྱུར་རམ་ཞེས། དེ་དེ་ལྟར་

66-1-32a

ཡིད་ལ་བྱས་ནས་མྱ་ངན་གྱིས་གཟིར་བར་འགྱུར་ཏེ། གང་གི་དོན་དུ་དེ་ལྟ་བུ་རྣམས་ལས་ངེས་པར་གྲོལ་བར་བྱ་བའི་དོན་དུ་ནགས་སུ་གནས་པར་གྱུར་པ་ལས་དེ་ཉིད་ལ་རྗེས་སུ་འཇུག་པར་བྱེད་དོ། །བློ་གྲོས་ངན་པར་
གྱུར་པ་མི་གཡོ་བའི་མི་མྱ་ངན་ཅན་སྐྱེ་བ་དང་རྒ་བ་དང་ན་བ་དང་འཆི་བས་བྱས་པའི་རང་གི་མྱ་ངན་རྣམས་ཡོངས་སུ་བཏང་ནས། གཞན་གྱི་མྱ་ངན་གྱིས་མྱ་ངན་དུ་བྱེད་པ་དང་། དེ་མི་མཉམ་པ་དང་མཉམ་པའི་རང་གི་སྐྱེ་བོ་རྣམས་
དང་གཉེན་བཤེས་རྣམས་དང་ཕྲད་པའི་དྲ་བ་འདིར་ངེས་པར་འཇུག་པར་བྱེད་དོ། །དེ་ནས་ཡང་དེས་གཉེན་བཤེས་དེ་རྣམས་མངོན་པར་མཐོང་ནས་གདུང་བས་གདུངས་ཤིང་གཞན་གྱི་ཟས་བསོད་པ་རྣམས་ཟ་བས། ཁྱིམ་ནས་ཁྱིམ་
རྣམས་སུ་ཕེའུ་འདེབས་པའི་སྟོན་མོ་རྣམས་ལ་མངོན་པར་དགའ་བར་འགྱུར་རོ། །ཁྱིམ་དེ་དང་འབྲེལ་པར་གྱུར་པའི་དོན་དག་ནི་བྱེད་ལ་ཉན་པར་ཡང་བྱེད་དོ། །དེས་དེ་དག་རྣམས་ཡིད་ལ་བྱས་ནས་དེ་དག་རྣམས་ལས་གཞན་
ཡང་བྱེད་དོ། །དེ་ཁྱིམ་གྱི་འཚོ་ཆིས་རྣམས་བྱེད་པས་རང་གི་དོན་རྣམས་ལས་ཡོངས་སུ་ཉམས་པར་འགྱུར་རོ། །འཇིག་རྟེན་ཕ་རོལ་ཏུ་གྱུར་པ་རྣམས་ཀྱི་འཇིགས་པ་དག་སེམས་པར་མི་བྱེད་དོ། །དམྱལ་བ་དང་ཡི་དགས་དང་དུད་འགྲོའི་
འགྲོ་བ་པ་རྣམས་སུ་འཆི་འཕོ་བ་དང་སྐྱེ་བ་རྣམས་སེམས་པར་མི་བྱེད་དོ། །འདི་པའི་འཇིགས་པ་རྣམས་ཀྱང་སེམས་པེར་མི་བྱེད་དེ། རྒ་བ་དང་ན་བ་དང་འཆི་བ་དང་སྡུག་པ་རྣམས་དང་བྲལ་བ་དང་མི་སྡུག་པ་རྣམས་དང་ཕྲད་པ་དང་། སྡུག་
པ་དང་ཡིད་དུ་འོང་བ་རྣམས་ཐམས་ཅད་ཀྱང་ཐ་དད་དུ་འགྱུར་བ་མེད་པར་འགྱུར་བ་རྣམ་པར་འབྲལ་བ་སོ་སོར་གནས་པ་རྣམས་སེམས་པར་མི་བྱེད་དོ། །དེ་སྲིད་པ་དེ་སྲིད་དུ་གཉེན་དང་གྲོགས་པོ་རྣམས་ཀུན་ཏུ་སྟེན་པར་བྱེད་དོ། །གཉེན་
བཤེས་དང་གྲོགས་པོ་རྣམས་ལྟ་བར་བྱེད་པ་མངོན་པར་འདོད་པ་འཐུན་པར་བྱེད་པ་གཞན་གྱི་ཟས་ཟ་བ་གཞན་གྱི་ཁྱིམ་སྒོ་སྟོན་པར་བྱེད་པ་གང་ཡིན་པ་རྣམས་ནི་ལུས་ཞིག་ནས། ངན་སོང་དང་ངན་འགྲོ་ལོག་པར་ལྟུང་བ་དམྱལ་བ་རྣམས་

66-1-32b

སུ་སྐྱེ་བར་འགྱུར་རོ། །ཡི་དགས་ཀྱི་ཡུལ་རྣམས་དང་དུད་འགྲོའི་སྐྱེ་གནས་རྣམས་སུ་ཡང་ངལ་དུབ་དང་བཅས་པའི་འགྲོས་བླ་ལྷག་པར་གྱུར་པས་དེ་སྲིད་དུ་ཡོངས་སུ་འཁྱིམ་མོ། །དམྱལ་བ་རྣམས་སུ་སྐྱེས་པ་ན་ཡང་ཚོར་བ་དྲག་
པོ་རྣམས་ཀྱིས་ཟིལ་གྱིས་མནན་པ་རྣམས་ལ་གྲོགས་པོས་མ་ཡིན་ཞིང་གཉེན་བཤེས་རྣམས་ཀྱིས་ཀྱང་བསིལ་བར་གྱུར་པའི་དངོས་པོ་རྣམས་ནི་ཅུང་ཟད་ཀྱང་མི་བྱེད་དོ། །དེའི་ཕྱིར་ན་དགེ་སློང་རྣམས་ཐམས་ཅད་ཀྱིས་ཚུལ་
རྣམས་ཐམས་ཅད་ནས་དམྱལ་བ་དང་ཡི་དགས་དང་དུད་འགྲོའི་འགྲོ་བ་པའི་འཇིགས་པས་འཇིགས་པ་རྣམས་ཀྱིས་ཀྱང་གཉེན་བཤེས་དང་གྲོགས་པོ་རྣམས་དང་ཕྲད་པར་འདོད་པར་མི་བྱའོ། །དེ་དག་རྣམས་དང་འདུ་འཚོག་
བྱས་པས་ཀྱང་ནི་དོན་མ་ཡིན་པ་དྲག་པོ་རྣམས་བྱེད་པར་འགྱུར་རོ། །དེ་ལ་དམིགས་པར་ཕྱེད་པ་དང་། དོན་དེས་ཀྱང་གང་གི་ཕྱིར་སྲེད་པ་རྣམས་ཟད་པར་བྱ་བའི་དོན་དུ་རབ་ཏུ་བྱུང་བ་ལས་སྲེད་པ་དེ་ཉིད་ལ་སྲེད་པས་སྟེན་པར་བྱེད་
པ་ན། དེ་ནི་མཆོག་ཏུ་ཡང་བྱིས་པར་གྱུར་པ་རྣམས་ཀྱིས་བསྟེན་པ་ཡིན་ནོ། །གང་དག་ཁོ་ན་བཅོམ་ནས་རབ་ཏུ་བྱུང་བ་ཡང་དྲ་བ་དེ་ཉིད་དུ་བློ་འཇུག་པ་ནི་བློ་གྲོས་དམན་པ་ཡིན་ཏེ། ཡང་འགའ་ཞིག་ཇི་ལྟར་མེའི་འཇིགས་པ་
སྤངས་པ་ལས་མེ་དེ་ཉིད་དུ་ཉེ་བར་བསྟེན་པར་བྱེད་དོ། །དེ་བཞིན་དུ་ཁྱིམ་གྱི་གནས་རྣམས་འཇིགས་ནས་སྤངས་པ་ཡང་འཇིགས་པ་དེ་ཉིད་དུ་ཉེ་བར་འཇུག་པར་བྱེད་དོ། །དེ་བཞིན་དུ་གང་འགའ་ཞིག་གཉེན་བཤེས་རྣམས་ཀྱི་
ཀླུང་ཆེན་པོར་ཉེ་བར་འགྲོ་ཞིང་། སླར་ཡང་དེ་དག་རྣམས་ཉིད་ལ་ཉེ་བར་སྟེན་པར་བྱེད་པ་དེ་དག་རྣམས་ནི་མིག་མེད་པ་དང་བློ་གྲོས་བཀབ་པ་དང་དབང་པོ་རྣམས་ཀུན་ནས་མ་བསྡམས་པ་ཡིན་ནོ། །དེ་ལྟར་ཀུན་ནས་ཉོན་མོངས་པ་ཅན་གྱི་
ཆོས་འདི་དག་ཆོས་གང་གིས་རབ་ཏུ་གཞོམ་པར་བྱ་ན། འདི་ལྟ་སྟེ་གང་ཤེས་རབ་ཅན་རྣམས་ཀྱིས་ཀྱང་སྤང་བ་དང་གཟུང་བར་ཡང་ནུས་པ་མ་ཡིན་ཏེ། དེ་ཡུན་རིང་དུ་བྱེས་ན་གནས་པ་ལ་མངོན་པར་དགའ་བ་རྣམས་ཀྱིས་ནི་རབ་ཏུ་

66-1-33a

གཞོམ་པ་དང་གཟུང་བར་ཡང་ནུས་པ་ཡིན་ནོ། །རིང་དུ་འགྲོ་ན་ལམ་ལ་གནས་པ་ཡང་འདི་ལྟ་སྟེ་བློ་གྲོས་ཞན་པ་རྣམས་དང་གཉེན་པོ་གཞན་གྱིས་ཀྱང་གཉེན་བཤེས་དང་གྲོགས་པོ་དང་རང་གི་སྐྱེ་བོ་རྣམས་ལ་གདུང་སེམས་
སོ་སོར་བཟློག་པར་བྱ་བར་མི་ནུས་ཀྱིས། དེ་ཡང་ཡུན་རིང་དུ་འགྲོན་དུ་འགྲོ་བར་གྱུར་པས་ཐ་མར་ནི་གདུང་སེམས་དེ་དག་རྣམས་རབ་ཏུ་འཇོམས་ཏེ། བརྩེ་བའི་སེམས་ནི་གནས་སྐབས་རྣམས་ཐམས་ཅད་དང་དུ་མ་ཕྲད་པས་རབ་ཏུ་འཇོམས་
པ་ཇེ་དང་པར་ནི་གདུང་སེམས་དེ་ཉིད་ཀྱི་གཉེན་པོ་རྣམས་གནས་སྐབས་ཐམས་ཅད་དུ་རིག་པར་འགྱུར་བ་འདི་ནི་འདི་ལྟ་སྟེ། འདུས་པ་རྣམས་ཐམས་ཅད་ཀྱི་མཐའ་ནི་འབྲལ་བ་སྟེ། འཆི་བའི་ཡུལ་དང་དུས་རྣམས་སུ་འགའ་ཞིག་གིས་
ཀྱང་འགའ་ཞིག་དམིགས་པར་འགྱུར་བ་འམ་ཡོངས་སུ་སྐྱོབ་པར་འགྱུར་བ་ཡང་མ་ཡིན་ནོ། །འཆི་བའི་ཡུལ་དང་དུས་རྣམས་སུ་ནི་ལས་ཉིད་ཁོ་ན་གནས་སྐབས་རྣམས་ཐམས་ཅད་དུ་ཡོངས་སུ་སྐྱོབ་པར་བྱེད་པ་ཡིན་ནོ། །སྐྱེ་བ་གཞན་
དག་བརྒྱ་སྟོང་དུ་མ་རྣམས་སུ་ཡང་ལས་ཉིད་སྐྱབས་སུ་འགྱུར་ཏེ། རྣམ་པ་ཐམས་ཅད་ཀྱི་ཐམས་ཅད་དུ་གཉེན་བཤེས་རྣམས་བཞིན་དུ་འགྱུར་རོ། །གཉེན་བཤེས་རྣམས་ཀྱིས་མ་ཡིན་ཞིང་རྩད་འབྲེལ་རྣམས་སམ་གཞན་དག་རྣམས་
ཀྱིས་ཀྱང་མ་ཡིན་ནོ། །གཉེན་གཤེས་རྣམས་གང་འགའ་ཞིག་གིས་ཀྱང་སྐྱོབ་པར་བྱེད་པ་མ་ཡིན་པས་གཅིག་ཏུ་མངོན་པར་དགའ་ཞིང་། གཉེན་བཤེས་ཀྱི་དབང་དུ་བྱ་བ་འམ་རང་གི་སྐྱེ་བོ་རྣམས་ཀྱི་དབང་དུ་བྱས་ནས་དེ་ལྟར་དཔྱོད་པར་
བྱེད་དོ། །དེའི་ཕྱིར་ན་ཀུན་ནས་ཉོན་མོངས་པ་ཅན་གྱི་ཆོས་གཞན་འདི་ནི་གཅིག་པུ་མངོན་པར་དགའ་བའི་དགེ་སློང་གིས་རབ་ཏུ་གཞོམ་པར་བྱ་བ་ཡིན་ནོ། །འཆི་བའི་ཡུལ་དང་དུས་རྣམས་སམ་ན་བའི་དུས་དང་རྒས་པའི་དུས་ན་ཡང་འགའ་
ཞིག་ཀྱང་འགའ་ཞིག་ལ་ཅུང་ཟད་ཀྱང་མི་བྱེད་དོ། །ཡོངས་སུ་སྐྱོབ་པར་བྱེད་པ་ནི་སུ་དག་ཀྱང་མ་ཡིན་ནོ་ཞེས་དེ་ལྟར་སེམས་པར་བྱེད་དོ། །དགེ་སློང་འདིའི་རང་གི་སྐྱེ་བོ་རྣམས་ཀྱིས་བྱས་པའི་བརྩེ་གདུང་གང་ཡིན་པ་འདི་ལས་དེ་

66-1-33b

དག་རྣམས་ཐམས་ཅད་དུ་ཉམས་པར་འགྱུར་བ་འམ་མགོ་སྨད་པར་འགྱུར་རོ། །དེ་ལྟར་དགེ་སློང་གཉེན་བཤེས་ལ་ཕྲད་པའི་བརྩེ་གདུང་རྣམས་ནི་བྱེས་སུ་འགྲོ་བས་རབ་ཏུ་འབྲལ་བར་འགྱུར་རོ། །གཞན་ཡང་ཀུན་ནས་ཉོན་མོངས་
པ་ཅན་གྱི་ཆོས་ངེས་པར་འབྱུང་བས་རབ་ཏུ་གཞོམ་པར་བྱའོ། །འདི་ཡང་གང་ཞེ་ན། འདི་ལྟ་སྟེ་དོན་མེད་པར་སྨྲ་བ་སྟེ། ཁྱིམ་པ་ཡིན་ཡང་རུང་གང་དང་གང་སྐྱེ་བོ་ཐམས་ཅད་ཀྱང་རྩྭ་དང་འདྲ་བ་ཁོ་ནར་འགྱུར་རོ། །འདི་ལྟ་སྟེ་གང་གི་ཕྱིར་
ངག་གི་ཚིག་རྣམས་ནི་ནོར་ཡིན་གྱི་ནོར་གཞན་ནི་ཐ་མ་ཡིན་ནོ། །སྐྱེས་བུ་རྣམས་ནི་ངག་གིས་སྙིང་པོ་ཅན་དུ་འགྱུར་རོ། །དེ་དང་རྣམ་པར་བྲལ་བ་ནི་སྙིང་པོ་མེད་པ་དང་ནོར་དང་ཀུན་ནས་བྲལ་བར་འགྱུར་ཏེ། གསོག་གསོབ་སྙིང་པོ་མེད་
པ་ཕྱུགས་རྣམས་དང་མཚུངས་པར་འགྱུར་རོ། །ངག་གི་ནོར་རྣམས་དང་བྲལ་བ་ངག་དང་བྲལ་བའི་སྐྱེས་བུ་རྣམས་ནི་སྐྱེས་བུའི་མིང་ཅན་གྱི་ཕྱུགས་རྣམས་ཡིན་ནོ། །མཁས་པའི་སྐྱེ་བོ་རྣམས་ཐམས་ཅད་ཀྱིས་སྤངས་པ་དང་། གཙོག་པར་
གྱུར་པ་དང་ཤིན་དུ་ཡང་ཐ་ཤལ་ཡིན་ནོ། །རྣམ་པ་དེ་ལྟ་བུ་བྱེད་པའི་ཆོས་རྣམས་ཆོས་གང་དག་གིས་རབ་ཏུ་གཞོམ་པར་བྱ། དོན་མེད་པར་སྨྲ་བའི་ཆོས་དེ་ཡང་རབ་ཏུ་གཞོམ་པར་བྱའོ། །ཆོས་གང་དག་གིས་ཞེ་ན། འདི་ལྟ་སྟེ་ངག་
བསྡམས་པས་སོ། །ངག་བསྡམ་པ་ཡང་རྣམ་པ་གཉིས་ཡིན་ཏེ། འདི་ལྟ་སྟེ་གང་ཡང་ཅང་མི་སྨྲ་བ་འམ་སྡོམ་པ་རྣམ་པ་བཞི་དག་པའོ། །གང་དག་ཞེ་ན། འདི་ལྟ་སྟེ་རྫུན་གྱི་རང་བཞིན་དང་ཕྲ་མ་དང་ཚིག་རྩུབ་པོ་དང་འབྲེལ་པ་མེད་པར་
སྨྲ་བར་བྱེད་པ་རྣམས་རྣམ་པར་སྤངས་པས་ངག་ཀུན་ནས་བསྡམ་པར་བྱའོ། །དེ་ལྟར་ན་ཡང་ཡང་མོར་མི་འགྱུར་རོ། །དགེ་སློང་ངམ་གཞན་ཡང་དེའི་རིགས་ཅན་རྣམས་ཀྱང་རུང་སྟེ། རྒྱུ་དྲུག་གིས་སྐྱེས་བུ་རྣམས་སྐད་ཅིག་ལ་ཡང་
མོ་དང་རྣམ་པར་ཞེ་སྡང་བར་ཡང་འགྱུར་རོ། །གང་དག་ཞེ་ན་འདི་ལྟ་སྟེ། དོན་མེད་པར་སྨྲ་བར་བྱེད་པས་དང་ཇི་ལྟར་རབ་ཏུ་ཞུགས་པར་བྱེད་པ་དང་ཡང་དང་ཡང་དུ་ཟས་ལ་དགའ་བ་དང་རྒན་པོའི་སྟན་ཆེན་པོ་ལ་ཉེ་བར་གནས་པ་དང་གསོང་

66-1-34a

གསལ་རྗོད་པ་དང་ལབ་ལོབ་བྱེད་པ་དང་རྒྱུ་དེ་དག་གིས། དེ་ལྟར་མི་རྣམས་ཐམས་ཅད་ཀྱང་དར་ཅིག་ལ་ཡང་མོར་འགྱུར་ཞིང་རབ་ཏུ་དགའ་བར་ཡང་མྱུར་བར་འགྱུར་རོ། །དེའི་ཕྱིར་ན་དགེ་སློང་ངམ་ཁྱིམ་པ་རྣམས་ཀྱིས་
ཀྱང་ཆོས་དེ་རྣམ་པར་སྤང་བར་བྱའོ། །ཡང་ཆོས་གཞན་ཡང་ཤིན་དུ་དྲི་མ་ཅན་དུ་གྱུར་པ་ཀུན་ནས་ཉོན་མོངས་པ་ཅན་རྣམས་དཀར་པོའི་ཆོས་ཀྱིས་རབ་ཏུ་གཞོམ་པར་བྱའོ། །འདི་དག་ཀྱང་གང་ཞེ་ན། འདི་ལྟ་སྟེ་རྐོ་ཏྲོག་ནི་བསྟན་པས་སོ། 
གང་གི་ཕྱིར་རྐོ་ཏྲོག་གི་ཆོས་རྣམས་ནི་རབ་ཏུ་གཞོམ་པར་བྱ་སྟེ། རྐོ་ཏྲོག་གིས་ཀྱང་ཆོས་རྣམས་ཐམས་ཅད་ཀྱི་བར་དུ་གཅོད་པར་འགྱུར་བའི་ཕྱིར་རོ། །རང་བཞིན་གྱིས་ཀྱང་སེམས་ཙབ་ཧྲལ་ཅན་དུ་གྱུར་པ་དེ་སླར་ཡང་ཆེས་གཡོ་བར་
སོན་པའི་ཕྱིར་ན་ཆོས་འདི་དག་རྣམས་ཐམས་ཅད་ལ་ཡང་དེ་ཀུན་ནས་ཡིད་ཆེས་པ་མ་ཡིན་ནོ། །སོ་སོར་རྟོགས་པ་མེད་དོ། །བརྟན་པར་འཛིན་པ་མེད་དོ། །རབ་ཏུ་དགག་པར་བྱ་བ་ཡང་མེད་དོ། །སྤྱོད་པ་བསྡམ་པར་བྱ་བ་ཡང་མྱེད་
དོ། །མངོན་པར་བརྗོད་པར་བྱ་བ་མེད་དོ། །སྡོམ་པ་འཐོབ་པ་མ་ཡིན་ནོ། །མངོན་པར་རྟོགས་པ་དང་འཇིག་རྟེན་པ་རྣམས་ཀྱང་མེད་དོ། །འཇིག་རྟེན་པའི་ལམ་རྣམས་ཐམས་ཅད་བཀྲ་བར་བྱེད་པ་ལ་སོ་སོར་རྟོགས་པ་མེད་དོ། 
ལས་སུ་རུང་བ་མ་ཡིན་ནོ། །ཙབ་ཧྲལ་ཅན་ནི་བག་མེད་པ་ཡིན་པ་དེའི་ཕྱིར་ཙབ་ཧྲལ་དེ་སྐྱོན་དང་བཅས་པར་གོ་བར་བྱས་ལ། དོན་རྣམས་ཐམས་ཅད་ཆུད་གཟོན་པར་བྱེད་པ་པོ་འདི་དང་ཕྱི་མར་ཡང་ཕན་པ་མ་ཡིན་པར་
བྱེད་པའི་མཆོག་ཡིན་པས། དགེ་སློང་ངམ་གཞན་ཡང་དེའི་རིགས་ཅན་རྣམས་ཀྱིས་ཀྱང་རབ་ཏུ་གཞོམ་པར་བྱའོ། །གང་གིས་དེ་རབ་ཏུ་སྤོང་ཞེ་ན། འདི་ལྟར་དགེ་བའི་ཆོས་གང་ཡིན་པས་ཏེ་འདི་ལྟར་བརྟན་པར་གྱུར་
པས་སོ། །བརྟན་པར་གྱུར་པ་ནི་དགེ་སློང་ངམ་དེའི་རིགས་ཅན་གཞན་དག་རྣམས་ཀྱང་རུང་སྟེ། སྐྱེ་བོ་རྣམས་ཐམས་ཅད་ཀྱིས་མཆོག་ཏུ་ཡང་མཆོད་པར་འགྱུར་རོ། །བརྟན་པའི་ཚུལ་ཁྲིམས་དང་བརྟན་པའི་ཤེས་རབ་དང་

66-1-34b

བློ་གྲོས་བརྟན་པ་དང་བློ་བསྡམས་པ་དང་གཅིག་ཏུ་རྒྱུ་བ་རྣམས་ཀྱིས་ནི་བདུད་ཀྱི་ཡུལ་རྣམས་རབ་ཏུ་འཇོམས་པར་བྱེད་དོ། །མྱ་ངན་ལས་འདས་པའི་གྲོང་ཁྱེར་དུ་ཕྱིན་པར་བྱེད་པ་འདིའི་དགེ་བའི་ཆོས་རྣམས་ཕུན་སུམ་ཚོགས་
པར་འགྱུར་རོ། །འཇིག་རྟེན་པའི་དོན་རྣམས་ལ་ཡང་བརྟན་པར་གྱུར་པའི་སྐྱེས་བུ་ནི་མཁས་པ་རྣམས་ཀྱིས་རབ་ཏུ་བསྔགས་པར་བྱེད་དོ། །དེས་ཀྱང་འཇིག་རྟེན་པའི་དོན་དེ་དག་རྣམས་བསྒྲུབ་པར་ནུས་པ་ཡང་ཡིན་ནོ། །ཐམས་
ཅད་དུ་ཡང་སྐྱེ་བོ་རྣམས་ཐམས་ཅད་ཀྱིས་ཤིན་དུ་ཡང་མཆོད་པར་འགྱུར་རོ། །རབ་ཏུ་བསྟོད་པར་ཡང་འགྱུར་རོ། །མིང་རྣམ་པར་ཐོས་པས་ཀྱང་ཐམས་ཅད་དུ་ཡང་བདེ་བ་དང་ལྡན་པར་འགྱུར་རོ། །དོན་གང་དང་གང་རྩོམ་པར་
བྱེད་པ་དེ་དང་དེ་དག་འགྲུབ་པར་འགྱུར་རོ། །དེའི་ཕྱིར་བློ་ཅིག་ཏུ་ངེས་པ་དང་བློ་ཀུན་ནས་བསྡམས་པ་དང་བློ་གྲོས་བརྟན་པ་དང་ལྡན་པར་གྱུར་པའི་སྐྱེས་བུ་དེ་དག་ནི་འཇིག་རྟེན་པ་ལ་ཡང་རབ་ཏུ་བསྔགས་པ་ཡིན་ནོ། །དེ་ལྟ་
བས་ན་སྐྱེས་བུ་རྣམས་སམ་དགེ་སློང་གིས་ཀྱང་རུང་སྟེ་ཙབ་ཧྲལ་སྤངས་ལ་བློ་གྲོས་བརྟན་པ་དང་དཔའ་བ་དང་ཤེས་རབ་དང་ལྡན་པར་བྱའོ། །གཞན་ཡང་མུ་སུ་ལུན་དྷ་དེ་ཉིད་ཀྱིས་སྨྲ་བ་པོའི་ངང་པ་དེ་དག་རྣམས་དང་ངང་
པའི་རྒྱལ་པོ་དུས་བཟང་དེ་དང་། བདུད་ཀྱི་རིགས་ཀྱི་བག་མེད་པ་དང་སྨྱོ་བ་དེ་ལ་ཡང་། བཅོམ་ལྡན་འདས་འོད་སྲུངས་ཀྱི་མདོ་འདི་སྔོན་གྱི་ལྷའི་དྲུང་ནས་ཐོབ་པར་གྱུར་པ་ཕན་པའི་དོན་དུ་སྟོན་པར་བྱེད་པ་ལས། འདི་ལྟ་སྟེ་སྨྲེ་
བར་གྱུར་པའི་ཆོས་གཞན་དྲི་མ་ཅན་མཁས་པའི་སྐྱེ་བོ་ཐམས་ཅད་ཀྱིས་སྤངས་པ་དག་རབ་ཏུ་གཞོམ་པར་བྱའོ། །འདི་ཡང་གང་ཞེ་ན། འདི་ལྟ་སྟེ་དབུལ་པོའོ། ། དབུལ་པོར་གྱུར་པ་ཞེས་བྱ་བ་ཡང་རྣམ་པ་གཉིས་ཏེ། ཤེས་རབ་ཀྱིས་
དབུལ་བ་དང་ཚུལ་ཁྲིམས་ཀྱིས་དབུལ་བའོ། །གཞན་ཡང་རྣམ་པ་གཉིས་ཏེ། སྦྱིན་པས་དབུལ་བ་དང་བློ་གྲོས་ཀྱིས་དབུལ་བའོ། །གཞན་ཡང་རྣམ་པ་གཉིས་ཏེ། རིགས་ཀྱིས་དབུལ་བ་དང་ལྟ་བས་དབུལ་བའོ། །གཞན་ཡང་

66-1-35a

རྣམ་པ་གཉིས་ཏེ། སྡོམ་པ་ལ་བརྩོན་པས་དབུལ་བ་དང་བླ་མས་དབུལ་བའོ། །གཉེན་བཤེས་དང་རང་གི་སྐྱེ་བོ་རྣམས་ཀྱིས་དབུལ་བའོ། །དེ་ལ་དབུལ་པོ་དེ་དག་རྣམས་ཐམས་ཅད་ཀྱང་མཆོག་ཏུ་ཞེ་ཟློག་པ་ཡིན་ཏེ། 
རིགས་ཀྱི་བུ་འམ་རིགས་ཀྱི་བུ་མོ་འམ་རིགས་ཀྱི་བུའི་ཉེ་གནས་ཀྱིས་ཀྱང་མ་ལུས་པ་རྣམས་སྤང་བར་བྱའོ། །གང་གིས་འདི་དག་ཐམས་ཅད་རབ་ཏུ་འཇོམས་པར་བྱེད་ཅེ་ན། འདི་ལྟ་སྟེ་སྦྱིན་པས་སོ། །སྦྱིན་པ་ཉིད་གཅིག་པུ་ཞིག་གིས་
དབུལ་བ་རྣམས་ཐམས་ཅད་འཇོམས་པར་འགྱུར་རོ། །དཔེར་ན་མར་མེ་རྣམས་ཐམས་ཅད་ཀྱིས་ཀྱང་མུན་པ་རྣམས་ཐམས་ཅད་རབ་ཏུ་བསལ་བར་བྱེད་པར་འགྱུར་རོ། །ཤེས་རབ་རྣམས་ཐམས་ཅད་ཀྱིས་ཀྱང་མི་ཤེས་པ་རྣམས་ཀུན་དུ་
འཇོམས་པར་འགྱུར་རོ། །ལྟ་བ་རྣམས་ཐམས་ཅད་ནི་ཡང་དག་པའི་ལྟ་བས་ཉེ་བར་འཇོམས་པར་བྱེད་དོ། །དེ་ལ་མཆོག་ཏུ་མཛེས་པར་གྱུར་པའི་ཆོས་མཆོག་ཏུ་རྒྱ་ཆེ་བ་དང་ལྡན་པ་མཁས་པའི་སྐྱེ་བོ་རྣམས་ཐམས་ཅད་ཀྱིས་ཡོངས་སུ་
བཟུང་བ། ངན་འགྲོ་ཐམས་ཅད་སྤོང་བར་བྱེད་པ། བདག་ཅག་གི་འཇིག་རྟེན་ནས་འཇིག་རྟེན་ཕ་རོལ་ཏུ་ལེགས་པར་སྒྲོལ་བར་བྱེད་པའི་ཆོས་ཀྱི་མཆོག་འདིས་འཇོམས་པར་བྱེད་དོ། །གང་དག་གིས་འཇོམས་ཞེ་ན། འདི་ལྟ་སྟེ་སྦྱིན་པས་སོ། །
སྦྱིན་པ་ཡང་རྣམ་པ་མང་དུ་ཡོད་དོ། །འདི་ལྟ་སྟེ་ཤེས་པའི་སྦྱིན་པ་དང་ཚུལ་ཁྲིམས་ཀྱི་སྦྱིན་པ་དང་ཆོས་ཀྱི་སྦྱིན་པ་དང་བློ་བསྲོ་བའི་སྦྱིན་པ་དང་ལམ་ཉེ་བར་སྟོན་པའི་སྦྱིན་པ་དང་ལམ་གྱིས་ཉོན་མོངས་པ་རྣམས་ལ་ཁྲུས་ཀྱི་རྫིང་བུ་
འི་སྦྱིན་པ་དང་བྱ་བའི་སྦྱིན་པ་དང་སྲོག་གི་སྦྱིན་པ་དང་ཟང་ཟིང་གི་སྦྱིན་པ་དང་མི་འཇིགས་པའི་སྦྱིན་པ་དང་བདེན་པའི་སྦྱིན་པ་དང་ཐེ་ཚོམ་གཅོད་པའི་སྦྱིན་པ་དང་སྦྱིན་པ་ལྔ་ལ་ཉོན་མོངས་པ་མེད་པའི་སྦྱིན་པ་དང་རབ་ཏུ་དབྱུང་བའི་
སྦྱིན་པ་དང་དེ་བསྙེན་པར་རྫོགས་པའི་སྦྱིན་པ་དང་ནད་པ་ལ་སྨན་གྱི་སྦྱིན་པ་དང་མིག་གི་སྦྱིན་པ་སྟེ། རྣམ་པ་དེ་ལྟ་བུའི་སྦྱིན་པ་རྣམས་ནི་འཇིག་རྟེན་ཕ་རོལ་ལེགས་པར་སྒྲོལ་བར་བྱེད་པ་སྦྱིན་བདག་ཐམས་ཅད་ལ་རྟག་ཏུ་མ་དང་

66-1-35b

ཕ་དང་འདྲ་བ་ཡིན་ནོ། །དེ་ཡང་སེམས་རྣམས་ཀྱིས་དང་སེམས་ཀྱིས་ལེགས་པར་བསྒོམས་ནས་བྱིན་པར་གྱུར་པས་དབུལ་བ་རྣམས་ཐམས་ཅད་བཅོམ་ཞིང་ངན་འགྲོ་རྣམས་ཐམས་ཅད་ཀྱང་བཅད་ནས། ལྷ་དང་མི་གཉིས་ཀྱི་བདེ་
བ་ལ་ཉེ་བར་ལོངས་སྤྱད་པར་གྱུར་ནས། ཐ་མར་ཇི་སྲིད་དུ་མྱ་ངན་ལས་འདས་པ་ཐོབ་པར་འགྱུར་ཏེ། སྐྱེས་དུ་དེས་རྟག་ཏུ་དེ་ལྟ་བུའི་ལས་བྱའོ། །དེ་བས་ན་དབུལ་བ་ཞེས་བྱ་བའི་ཆོས་གཞན་འདི་མཆོག་ཏུ་དགེ་བ་རྣམས་དང་
མཁས་པའི་སྐྱེ་བོ་རྣམས་ལ་མཆོག་ཏུ་དགའ་བ་དག་གིས་རབ་ཏུ་གཞོམ་པར་བྱའོ། །འདི་ལྟ་སྟེ་སྦྱིན་པ་དང་སེམས་དང་དངོས་པོ་དང་ཞིང་རྣམས་ཕུན་སུམ་ཚོགས་པས་སོ། །གཞན་ཡང་ཆོས་ཐམས་ཅད་འཁོར་བ་ཐམས་ཅད་
ཀྱི་འཆིང་བའི་རབ་ཏུ་གྱུར་པ་ཆོས་རྣམས་ཐམས་ཅད་ཀྱི་མུན་པ་ལྟ་བུར་གྱུར་པའོ། །འདི་ཡང་གང་ཞེ་ན། འདི་ལྟ་སྟེ་མི་ཤེས་པའོ། །དེ་ལ་ཇི་སྲིད་དུ་མ་རིག་པའི་མུན་པ་ཡིན་པའི་བར་དུ་མི་ཤེས་པ་རྣམ་པ་དུ་མ་ཡིན་ཏེ། འཁོར་བ་
ཐམས་ཅད་ཀྱི་འཆིང་བས་མུན་པ་ཐམས་ཅད་ཀྱི་ཚོགས་སུ་གྱུར་པའི་མུན་ནག་གི་ཞེན་པའི་རྡུལ་དུ་གྱུར་པའི་འཆིང་བ་དང་། ཤིན་དུ་འཆིང་བར་བྱེད་པས་མཚོན་ཆ་དང་དུག་དང་མེ་དང་མཚུངས་པའི་མི་ཤེས་པ་རྣམས་ཐམས་ཅད་ནི་མ་
རིག་པ་དང་འདྲ་བ་ཐམས་ཅད་མ་རིག་པས་ཀུན་ནས་བསླང་བ། དམྱལ་བ་དང་ཡི་དགས་དང་དུད་འགྲོ་རྣམས་ཐམས་ཅད་དུ་ཡོངས་སུ་འཁྱམ་པ། འཆིང་བ་གང་ཁོ་ནས་ངེས་པར་བཅིངས་ནས་སེམས་ཅན་འདི་དག་རྣམས་འོབས་
ན་ཡོངས་སུ་འཁོར་རོ། །རྣམ་པ་དེ་ལྟ་བུའི་དགྲར་གྱུར་པའི་དྲི་མ་འདི་དག་རྣམས་རྣམ་པ་ཅི་ལྟ་བུ་དག་གིས་རབ་ཏུ་འཇོམས་པར་འགྱུར་ན། འདི་ལྟ་སྟེ་སྒྲོན་མར་རུང་བ་སྐྱབས་སུ་གྱུར་པ་སྐྱོབ་པར་གྱུར་པ་ཡོངས་སུ་འདྲེན་པར་གྱུར་
པ། སེམས་ཅན་རྣམས་ཐམས་ཅད་ཀྱི་ཡང་མ་དང་ཕ་ལྟ་བུར་གྱུར་པ་དང་སྨན་པ་དང་སྨན་ལྟ་བུར་གྱུར་པའི་ཟག་པ་མེད་པའི་ཡེ་ཤེས་སུ་གྱུར་པས་འཆིང་བ་རྣམས་ཐམས་ཅད་གཅོད་པར་བྱེད་པར་གྱུར་པའི་ཡེ་ཤེས་ཀྱིས་

66-1-36a

རབ་ཏུ་འཇོམས་པར་འགྱུར་རོ། །མ་རིག་པ་རབ་ཏུ་སྤངས་པ་རྣམས་ནི་སླར་ཉིད་ཀྱང་རབ་ཏུ་འབྱུང་བར་འགྱུར་བ་ནི་མ་ཡིན་ཏེ། དཔེར་ན་ལྗོན་ཤིང་རྩ་བ་ནས་བཏོན་པ་རྣམས་ནི་སླར་ཡང་རབ་ཏུ་སྐྱེ་བར་འགྱུར་བ་ནི་མ་ཡིན་ནོ། །
ཇི་ལྟར་མེས་ཚིག་པར་གྱུར་པའི་ཤིང་རྣམས་ནི་སླར་ཡང་ལེགས་པར་སྐྱེ་བར་མི་འགྱུར་རོ། །ཇི་ལྟར་ཆུ་གླུང་གི་ཆུ་སོང་བ་རྣམས་སླར་ཡང་ཕྱིར་ལོག་ནས་འོང་བ་ནི་མེད་དོ། །དེ་བཞིན་དུ་ཟག་པ་མེད་པའི་ཡེ་ཤེས་ཀྱིས་བསྲབས་པ་རྣམས་
ཡང་ཕྱིར་འབྱུང་བར་མི་འགྱུར་རོ། །དེའི་ཕྱིར་ན་རབ་ཏུ་བརྩོན་པ་ཁོ་ནས་ཐམས་ཅད་ཀྱིས་གནས་སྐབས་ཐམས་ཅད་དང་དུས་ཐམས་ཅད་དུ་མི་ཤེས་པ་ཐམས་ཅད་ཀྱང་ཡེ་ཤེས་ཐམས་ཅད་ཀྱིས་རབ་ཏུ་གཞོམ་པར་བྱའོ། །ཆོས་བཅུ་གཅིག་
པ་དེ་དག་རྣམས་ཐམས་ཅད་ཀྱང་། བག་མེད་པའི་རྩ་བ་ཅན་དང་བག་མེད་པའི་གནས་སྐབས་དང་བག་མེད་པའི་རིགས་ཅན་ཡིན་ནོ། །དེའི་ཕྱིར་ན་གནས་སྐབས་རྣམས་ཐམས་ཅད་དུ་དང་རྣམ་པ་རྣམས་ཐམས་ཅད་ཀྱིས་བག་མེད་པ་
ཉིད་རེ་ཤིག་ཡོངས་སུ་སྤང་བར་བྱ་བ་ཡིན་ནོ། །བག་མེད་པ་རྣམས་ཀྱི་རྩ་བ་ལས་ཀྱང་ཐམས་ཅད་གནས་སྐབས་ཐམས་ཅད་དུ་དོན་མ་ཡིན་པར་འགྱུར་ཏེ། དེ་ཡོད་པའི་ལས་འབྱུང་བ་ཡིན་ནོ། །དེ་མེད་པ་ལས་ནི་མི་འགྱུར་རོ། །དཔེར་ན་
ས་གཞིས་ནི་སྨན་རྣམས་ཐམས་ཅད་དང་རྩྭ་དང་ནགས་ཚལ་དང་ཆུ་དང་འབྲུ་དང་ཆུ་ཀླུང་དང་རི་དང་མཚོའི་མཆོག་དང་། གྲོང་ཁྱེར་གྱི་མཆོག་དང་གྲོང་དང་ནགས་དང་ཉེ་བའི་ནགས་དང་རི་རབ་ལྷུན་པོ་ཡང་ཀུན་ཏུ་འཛིན་པར་བྱེད་པ་ཡིན་ནོ། །
དེ་བཞིན་དུ་དམྱལ་བ་དང་ཡི་དགས་དང་དུད་འགྲོའི་འགྲོ་བའི་རིགས་རྣམས་ཀྱི་སྡུག་བསྔལ་ཐམས་ཅད་ཀྱི་རྩ་བ་གཅིག་པ་ནི་བག་མེད་པ་ཡིན་ནོ། །དེའི་ཕྱིར་ན་སྐྱེས་བུ་དམ་པ་རྣམས་ཀྱིས་དེ་ཉིད་རེ་ཤིག་སྤང་བར་བྱའོ། །དེ་ནས་དེའི་ཚེ་
འཐབ་བྲལ་བ་རྣམས་ཀྱི་བདག་པོ་མུ་སུ་ལུན་དྷ་དེས་ཚིགས་སུ་བཅད་པ་རྣམས་བརྗོད་པ་ཇི་ལྟར། རྒས་པས་མནན་ནས་གཉེར་མས་གང་། །རྗུད་པ་དབྱུག་པ་ལག་ན་ཐོགས། །གང་ཞིག་མཆོག་ཏུ་ཆོས་མི་སྤེལ། །དེ་ནི་

66-1-36b

བག་མེད་བྱེད་པས་ཡིན། །ལུས་རྣམས་ནད་ཀྱིས་ཞིག་པ་དང་། །མལ་སྟན་སྤྱོད་ལ་ཆེད་ཆེར་བྱེད། །ཤིན་དུ་སྐྱོ་བར་མི་འགྱུར་བ། །དེ་དག་གཏི་མུག་འདི་ཡི་འབྲས། །བཀྲེས་པའི་སྲེད་པས་འཇིགས་མཐོང་བར། །གང་དེའི་འོག་
གི་གནས་སུ་འགྲོ། །སླར་ཡང་སྐྱོ་བ་མི་སྐྱེ་བ། །བག་མེད་བྱེད་པས་དེ་བྱས་སོ། །མི་རྣམས་སྡུག་པ་དང་བྲལ་བའི། །སྙིང་ལ་སྡུག་བསྔལ་གང་སྐྱེ་བ། །དེ་ནི་བག་མེད་སྟེན་པ་ལས། །ཡིན་པར་དེ་བཞིན་གཤེགས་པས་གསུངས། །སྡུག་
བསྔལ་གང་དག་འགྲོ་བ་ལྔར། །དུ་མ་རྣམས་ནི་ལོངས་སྤྱོད་པ། །བག་མེད་པ་ཡི་སྲོག་ཆགས་ཀྱི། །རྟག་ཏུ་དེ་དག་རྨོངས་པས་བྱས། ། ཀྱེ་མ་ཀྱི་ཧུད་སྐྱོ་བ་སྐྱེ། །ལས་ཀྱི་འཁོར་ལོ་ཆེན་པོ་ཡིས། །འཁོར་བར་འགྱུར་བ་ཡང་དང་
ཡང་། །རྙོག་པ་མེད་པར་གང་བརྟགས་པའི། །བདེ་དེ་སྲིད་པ་གསུམ་ན་མེད། །དེ་ལྟ་ན་ཡང་ཀུན་རྨོངས་པས། །ངེས་པར་བྱིས་རྣམས་སྐྱོ་མི་འགྱུར། །ཡུལ་དགའ་བ་ལ་ཞེན་པ་ཡི། །རྨི་ལམ་བཞིན་དུ་འདི་དག་གཡོ། །
འགྲོ་འདི་ཐམས་ཅད་སྡུག་བསྔལ་བ། །མིག་མེད་པས་ཀྱང་མ་མཐོང་ངོ་། །གང་ལ་ཕྱིར་བཅོས་ཐབས་མེད་པའི། །འཆི་བདག་འཇིགས་པར་སྲེད་པས་འགྱུར། །དེ་ལྟ་ན་ཡང་ཀུན་རྨོངས་པས། །བག་མེད་པས་ནི་མི་
རྣམས་བཅོམ། །ཚུལ་བཞིན་མ་ཡིན་ཡིད་བྱེད་པས། །སེམས་ནི་རྣམ་པར་གཡེང་བྱས་པའི། །འཆི་བདག་རྒྱལ་པོས་འདྲེན་པ་ན། །འཇིག་རྟེན་པས་ཀྱང་གོ་བ་མིན། །ནོར་རྣམས་དང་ནི་བུ་དག་དང་། །ཤིན་དུ་སྡིག་པའི་
སྲོག་ཀྱང་ནི། །གསོན་པ་དེ་ནི་འཕྲོག་བྱེད་པས། །འཆི་བདག་རྒྱལ་པོ་འདི་ཡིས་འདྲེན། །བག་མེད་མྱུ་གུ་ལས་བྱུང་བའི། །གང་གིས་སྐྱེ་དགུ་འདི་འཇོམས་པའི། །འཇིག་རྟེན་དོན་མིན་ཡང་གསུམ་སྟེ། །ནད་དང་
རྒ་དང་འཆི་བའོ། །ཚོལ་ཁྲོས་མི་རྣམས་ཉེ་བར་བཅོམ། །ལྷ་རྣམས་བག་མེད་པས་ཉེར་བཅོམ། །ཡི་དགས་བཀྲེས་སྐོམ་དག་གིས་གཡེངས། །ཚོར་བ་དྲག་པོས་དམྱལ་བ་རྣམས། །ཕན་ཚུན་ཀུན་དུ་གསོད་བཙོག་པ། །དུད་

66-1-37a

འགྲོ་གཏི་མུག་དཔུང་གཉེན་ཡིན། །དེ་ལྟར་འཇིག་རྟེན་རྣམ་དུ་མར། །བྲེལ་ཏོག་དེ་དང་དེས་དཀྲུགས་སོ། །བག་མེད་པས་ནི་རྨོངས་པ་ཡིས། །འོན་ཀྱང་ཆོས་ལ་དགའ་བ་མིན། །སྨན་དང་རྩྭ་སོགས་ཐམས་ཅད་ཀྱང་། །ཇི་ལྟར་
ས་གཞི་ལས་རབ་སྐྱེད། །དེ་བཞིན་བག་མེད་ལས་ཉོན་མོངས། །རྣམ་པ་ཐ་དད་རབ་འཕེལ་བྱེད། །དེ་ནི་བདུད་ཀྱི་དམག་ཚོགས་ཀྱི། །རྗེ་དཔོན་དབང་ཕྱུག་མཆོག་འདི་ཡིན། །ཉི་མའི་འོད་ཀྱིས་མུན་པ་ལྟར། །ཡེ་ཤེས་རྡོ་རྗེས་གཞོམ་
པར་བྱ། །སྐྱོན་ཡོན་ཡོངས་ཤེས་དེ་དག་ནི། །རེ་ཤིག་དང་པོར་བསྟན་པ་ཡིན། །བག་མེད་པ་རྣམས་རྟག་སྡུག་བསྔལ། །བག་ཡོད་འབྲས་བུ་བདེ་བ་ཡིན། །དེ་ལྟར་འཐབ་བྲལ་བ་རྣམས་ཀྱི་བདག་པོ་མུ་སུ་ལུན་དྷ་དེས་རྣམ་པ་དུ་མ་རྣམས་
སུ་དང་རྣམ་པར་རྟོག་པ་དུ་མ་རྣམས་ཀྱིས་ཀྱང་བག་མེད་པ་དེའི་སྐྱོན་རྣམས་དང་། བག་ཡོད་པའི་ཡོན་ཏན་རྣམས་ཀྱང་མངོན་པར་བརྗོད་དོ། །འཆི་བདག་ནད་དང་རྒ་སྡུག་བསྔལ། །མི་མཐུན་པ་དང་ཕྲད་པ་དང་། །གཞན་ཡང་སྡུག་བསྔལ་
དྲག་པོ་དང་། །འཁོར་བ་འདི་ནི་ལྡན་པ་ཡིན། །མ་འོངས་སྡུག་བསྔལ་འཆོས་པ་ནི། །ཕན་པ་དང་ནི་བདེ་བ་ཡིན། །སྡུག་བསྔལ་སྡིག་པའི་རྒྱུ་ལས་སྐྱེ། །སྡིག་མེད་བྱེད་པ་བདེ་ཡིན་ནོ། །ཉོན་མོངས་ཟད་ལས་བདེ་བའི་མཆོག །ཡིན་
པར་མཁས་པས་གསུངས་པ་ཡིན། །འདི་ནི་མྱ་ངན་འདས་འགྲོའི་ལམ། །ཡིན་པར་དེ་ཉིད་གཟིགས་པས་གསུངས། །ཀུན་ནས་བསྡམས་དང་བག་ཡོད་དང་། །ཞི་བ་དང་ནི་ནགས་ན་རྒྱུ། །འདོད་ལ་བརྐམ་མིན་བརྟན་པ་ཡི། །
མྱ་ངན་འདས་པ་རིང་བ་མིན། །གྲོགས་དང་གྲོགས་མིན་དང་རབ་བྲལ། །སྲིད་པའི་འདོད་ཆགས་རྣམ་པར་སྤངས། །ཡུལ་རྣམས་ལ་ཡང་བག་ཡོད་པའི། །ཤིན་དུ་མྱ་ངན་འདས་རིང་མིན། །དགེ་དང་སྡིག་ལ་ཆགས་པ་མེད། །
བྱམས་དང་སྙིང་རྗེ་སྒོམ་པ་པོ། །འཁོར་བའི་འཇིགས་པས་འཇིག་པ་ནི། །ཤིན་དུ་མྱ་ངན་འདས་རིང་མིན། །ཉོན་མོངས་ཟད་པའི་ཐབས་ཤེས་དང་། །ཡེ་ཤེས་བཏུང་བས་ཚིམ་པ་དང་། །ལེ་ལོའི་དྲི་མ་དང་བྲལ་བའི། །ཤིན་དུ་མྱ་ངན་

66-1-37b

འདས་རིང་མིན། །ལྷག་པར་ཐེག་པ་ཆེ་ལ་མོས། །སེམས་ཅན་ཐམས་ཅད་ལ་ཕན་དང་། །སྟོང་ཉིད་དོན་ནི་རབ་རྟོགས་པའི། །ཤིན་དུ་མྱ་ངན་འདས་རིང་མིན། །དེ་ནི་སྐྱོན་གསུམ་འགོག་པ་ཡི། །འཕགས་པའི་བདེན་པ་བཞི་བསྟེན་
པ། །དབང་གྱུར་དབང་པོ་ཞི་བ་ཡི། །མྱ་ངན་འདས་པ་ཤིན་རིང་མིན། །དབུགས་དང་དབུགས་འབྱུང་རྣམ་པ་ཤེས། །མཚན་ཉིད་འགག་པ་བསྟེན་པ་དང་། །ཤེས་དང་ཤེས་བྱའི་རྣམ་པ་ཤེས། །ཤིན་དུ་མྱ་ངན་འདས་རིང་མིན། །རྟག་ཏུ་བློ་
དང་ལྡན་པ་དང་། །ཉོན་མོངས་རྣམས་ཀྱིས་སེམས་མི་འཚེ། །སྐྱོན་བཅས་འཇིགས་པ་ལས་གྲོལ་བའི། །ཐུབ་པ་ཕ་རོལ་ཕྱིན་པར་བརྗོད། །དེ་ལྟར་འཐབ་བྲལ་གྱི་མངའ་བདག་དེས་སྨྲ་བ་པོ་དེ་དག་རྣམས་དང་ངང་པའི་རྒྱལ་པོ་དུས་བཟང་དེ་ལ་ཆོས་
བསྟན་ཏེ། བཅོམ་ལྡན་འདས་འོད་སྲུངས་ཀྱིས་གསུངས་པའི་མདོ་བག་མེད་པ་ལ་རྣམ་པར་གཤེ་བར་བྱེད་པ་རྣམས་བསྟན་ཏོ། །དེ་ལྟར་རྣམ་པ་དུ་མར་བཅོམ་ལྡན་འདས་ཀྱིས་གསུངས་པའི་དམ་པའི་ཆོས་འདུལ་བ་དེ་དབྱངས་སྙན་པ་དང་དུལ་བའི་
བློ་རྒྱ་ཆེན་པོས་སྟོན་པར་བྱེད་དོ། །ཇི་ལྟར་གཅིག་ཏུ་དམ་པའི་ཆོས་ཀྱི་རོར་གྱུར་པའི་ཚིག་འདི་དག་རྣམས་ཐོས་ནས། བདུད་ཀྱི་རིགས་ཀྱི་བག་མེད་པ་དེ་འདི་སྙམ་དུ་སེམས་ཏེ། ཇི་ལྟར་རྣམ་གྲངས་འགའ་ཞིག་གི་སྒོ་ནས་ཀྱང་བདག་གིས་
འཐབ་བྲལ་བ་རྣམས་ཀྱི་བདག་པོ་འདི་དམ་པའི་ཆོས་འདུལ་བ་དེ་དག་ལས་གཡོ་བར་བྱ་བར་མི་ནུས་ཏེ། དེ་ལྟར་དམ་པའི་ཆོས་ལ་བློ་ཡོངས་སུ་མཐར་ཐུག་པ་ཡིན་ནོ། །དེ་ལྟར་རྟོགས་ནས་བག་མེད་པ་བསྐྱེད་པ་ལ་བགྲོ་བར་བྱེད་དེ། ཇི་ལྟར་
མུ་སུ་ལུན་དྷ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་པས་བདག་ཅག་གི་ཆོས་ཀྱི་ལམ་ལ་བདག་ཅག་རྣམས་ཀྱིས་གོམ་པ་བསྒུལ་བར་ཡང་མི་ནུས་སོ། །དེ་ནས་ཐམས་ཅད་ཀྱང་ཡིད་གཅིག་ཏུ་གྱུར་ཅིང་ཕ་རོལ་གནོན་པའི་
སྟོབས་ཆེན་པོ་དང་ཡིད་ལ་སྨོན་པ་དང་གཟི་བརྗིད་རྣམས་ཉེ་བར་བཅོམ་པར་གྱུར་ཏོ། །ཡིད་ཀྱི་རྒྱལ་སྲིད་ཕབ་པར་བྱས་པ་དང་། ནམ་མཁའི་དཀྱིལ་དུ་འཕགས་ནས་དེ་མྱུར་དུ་འགྲོ་བ་ཡིན་པས་དུས་མི་རིང་བ་དང་། གང་ན་གཞན་འཕྲུལ་

66-1-38a

དབང་བྱེད་ན་འདོད་པའི་ཁམས་པ་རྣམས་ཀྱི་དབང་ཕྱུག་བདུད་སྡིག་ཅན་ཡོད་པ་དེར་ཐམས་ཅད་ཀྱིས་ཕྱིན་ནོ། །དེ་ནས་བདུད་ཀྱིས་དེ་དག་ལ་འདི་སྐད་ཅེས་བརྗོད་དེ། བདུད་རྣམས་བྱ་བ་འགའ་ཞིག་བྱས་སམ། ཡིད་ལ་རེ་བ་དེ་
དག་ཉིད་ཐམས་ཅད་ཡོངས་སུ་རྫོགས་ནས་ངའི་དྲུང་དུ་ཁྱེད་ཀྱིས་སླེབ་པ་ཡིན་ནམ། དེ་ལྟར་ཐོས་ནས་དེས་བདུད་དེའི་དྲུང་དུ་འདི་སྐད་ཅེས་བརྗོད་དེ། ལྷ་ལགས་ཕར་ལ་གནོན་པའི་སྟོབས་རྣམས་ནི་ཇི་ལྟ་བ་བཞིན་དུ་ཉམས་ནས་བདག་
ཅག་ལྷའི་རིགས་འདིར་རྗེས་སུ་སླེབ་པར་གྱུར་ཏོ། །འཐབ་བྲལ་གྱི་བདག་པོ་དེ་གོམ་པ་གཅིག་ཀྱང་བསྐྱོད་པར་བདག་ཅག་གིས་བདག་ཅག་ལ་མ་ནུས་ཏེ། དེ་བཞིན་དུ་འདི་དམ་པའི་ཆོས་ལ་ངེས་པར་དགའ་བའི་བློ་དང་ལྡན་པའི་ལྷན་
ཅིག་སྤྱོད་པ་དེ་ལ་བདག་ཅག་གིས་ཅི་བྱར་ཡོད། བདུད་སྡིག་ཅན་གྱིས་དེ་ལྟར་ཐོས་པར་གྱུར་ནས་དེ་འདི་སྙམ་དུ་སེམས་ཏེ། གང་བག་མེད་པའི་ལྷ་ཆོས་ཐམས་ཅད་ལ་རབ་ཏུ་ཞུགས་པ་རྣམས་ངས་འདོད་པའི་སྤྱོད་པ་རྣམས་ལ་རབ་ཏུ་དགོད་
པར་བྱའོ། །དེ་ལ་ཡང་བག་ཡོད་པ་དེ་དག་རྣམས་ཀྱི་དབང་གིས་འདི་རྣམས་ཉིད་ཐམས་ཅད་ཀྱི་ཕ་རོལ་གནོན་པའི་སྟོབས་རྣམས་ཉེ་བར་བཅོམ་ནས་ངའི་དྲུང་དུ་ཉེ་བར་འོངས་པ་ཡིན་ནོ། །དེ་ནས་འདི་དག་རྣམས་གོ་ནས་འདི་སྐད་ཅེས་བརྗོད་དེ། 
དུས་འདས་ནས་བྱེད་པའི་ཚིག་རྣམས་ཇི་ལྟར་དུས་གཞན་དུ་བདག་ཅག་གིས་བག་མེད་པར་ནུས་ཀྱི་འཐབ་བྲལ་གྱི་བདག་པོ་མུ་སུ་ལུན་དྷ་དེ་ལ་སོ་སོའི་ཐབས་རྣམས་བདག་གིས་བྱའོ། །དེའི་ཕྱིར་ན་ཁྱེད་མ་རིངས་ཅིག་བདག་ཅག་
ཐམས་ཅད་ཀྱིས་དུས་གཞན་ན། ཕྱིར་བཟློག་པར་བྱའོ་ཞེས་དེ་ལྟར་སྡིག་ཅན་དེས་དུས་གཞན་འཕེན་པར་བྱེད་པའི་ཚིག་རྣམས་བརྗོད་ནས་རྣམ་པར་གནས་ཏེ། མཚུངས་པ་མེད་པའི་ལྷ་རྫས་ཀྱི་འདོད་པ་རྣམས་ལ་རབ་ཏུ་ཆགས་
པར་གྱུར་པས་བདེ་བར་གནས་སོ། །བག་མེད་པའི་ས་རྣམས་ལས་སླར་ཡང་རབ་ཏུ་སྤེལ་བར་མི་འགྱུར་བའི་ཕྱིར་ན་རྣམ་པ་དུ་མར་རྒྱུ་བའི་ལྷ་རྣམས་དང་། འཐབ་བྲལ་བ་རྣམས་ཀྱི་བདག་པོ་དང་དུས་བཟང་དེ་དང་སྨྲ་བ་པོའི་ངང་པ་

66-1-38b

པ་དེ་དག་རྣམས་དང་གཞན་ཉིད་ཀྱང་ཆོས་ཀྱི་གཏམ་རྣམ་པ་དུ་མ་རྣམས་བྱེད་དོ། །དེ་དག་རྣམས་ན་ཇི་ལྟར་བདུད་ཀྱི་རིགས་རྣམས་ཀུན་ནས་བྲལ་བ་དང་དོན་མེད་པ་རྣམས་ཐམས་ཅད་ཀྱི་རྩ་བར་གྱུར་པ་བག་མེད་པ་དེ་ཀུན་ནས་སོང་
ལྷ་རྣམས་དང་བྱ་དེ་དག་རྣམས་བྱ་བ་བྱས་པ་བཞིན་དུ་རྣམ་པར་གནས་སོ། །དེ་ནས་དེ་ལྟ་དེ་ལྟར་བརྗོད་ནས་དེ་དག་ལས་ལྷ་གང་དག་རྩེད་མོས་ཡིད་བྲེལ་བར་གྱུར་པ་དེ་དག་རྣམས་ནི་རབ་ཏུ་དགའ་བས་རྩེ་བར་བྱེད་
དེ། སྐྱེད་མོས་ཚལ་དང་ཁང་བཟངས་དང་ཀུན་དགའ་ར་བ་དང་ནགས་དང་ཉེ་བའི་ནགས་ཀྱི་ཡུལ་དེ་དག་རྣམས་སུ་ཉེ་བར་སོང་ནས་རྩེ་བར་འགྱུར་རོ། །གང་འཐབ་བྲལ་བ་རྣམས་ཀྱི་བདག་པོ་དེ་དུས་བཟང་དང་ལྷན་ཅིག་དུ་བརྗོད་
པ་དང་ལྡན་པའི་ངང་པ་རྣམས་དང་རྒྱུ་བར་བྱེད་དོ། །དེ་ནས་འཐབ་བྲལ་བ་རྣམས་ཀྱི་བདག་པོ་དེ་ལྷ་དེ་དག་རྣམས་མངོན་པར་མཐོང་ནས་དུས་བཟང་ལ་སྨྲས་པ། ཇི་ལྟར་ཉེ་བར་གནས་པའི་ལྷ་གང་ཡིན་པ་འདི་དག་རྣམས་ནི་རྩེད་མོའི་
གཞན་དབང་དུ་སོང་ནས་བག་མེད་པ་ཡིན་པས་བདག་ཅག་ཀྱང་གང་ན་ནགས་དང་ཉེ་བའི་ནགས་རབ་ཏུ་ཞི་བར་ཡོད་པར་འགྲོ་བར་བྱའོ། །དེ་ལྟར་རིག་ནས་ནམ་མཁའི་ཁམས་སུ་འཕགས་པར་གྱུར་ཏོ། །ལྷ་བག་མེད་པར་སྤྱོད་པ་
དེ་དག་ཀྱང་འདོད་པའི་ཡོན་ཏན་ལྔ་དང་ཡང་དག་པར་ལྡན་པའི་ནགས་དང་ཉེ་བའི་ནགས་དང་རྫིང་བུ་རྣམས་ལ་ཇི་སྲིད་དུ་འདོད་པ་སྡུག་པ་ཡིད་དུ་འོང་བའི་ལས་བྱས་ཤིང་བསགས་པའི་ལས་ཟད་པར་མ་གྱུར་པ་དེ་སྲིད་དུ་རྩེ་དགའ་
བར་བྱེད་དོ། །གང་གི་ཚེ་ཟད་པར་གྱུར་པ་དེའི་ཚེ་རང་གིས་བྱས་པའི་ཟས་བཟང་པོ་རྣམས་ཟོས་ནས་སླར་ཉིད་ཀྱང་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེའོ། །གང་ཡང་མི་རྣམས་དང་སྐལ་བ་མཐུན་པར་གྱུར་པ་མིན་
སྐྱེས་པར་གྱུར་ན། དེ་མཆོག་ཏུ་ཕུན་སུམ་ཚོགས་པ་དང་། མཆོག་ཏུ་རྒྱ་ཆི་བར་ཡང་འགྱུར་ཏེ། རྒྱལ་པོ་རྣམས་སམ་རྒྱལ་པོའི་བློན་པོ་རྣམས་སུ་གྱུར་ནས། སྐྱེ་བོ་ཐམས་ཅད་དགའ་བ་དང་མཆོག་ཏུ་སྐྱིད་པ་དང་ལས་

66-1-39a

དེའི་རྒྱུ་མཐུན་པས་ཡུལ་གྱི་མི་རྣམས་ཐམས་ཅད་བྱམས་པར་འགྱུར་རོ། །གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་འཐབ་བྲལ་བའི་ལྷ་རྣམས་ཀྱི་ས་རྣམས་ལ་ཀུན་དུ་ལྟ་བར་བྱེད་དོ། 
དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་ཇི་ལྟར་ཡོད་པའི་འཐབ་བྲལ་བ་རྣམས་ཀྱི་ལྷའི་ས་གཅིག་ཏུ་དགའ་བ་ཞེས་བྱ་བ་མཐོང་ངོ་། །དེར་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡང་། དེས་ཐོས་
པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་ན། ཇི་ལྟར་སྐྱེས་བུ་དམ་པ་གང་གིས་བྱ་བར་གྱུར་པའི་དོན་བྱས་པ་ཚུལ་ཁྲིམས་དང་ལྡན་པར་གྱུར་ནས། སྲོག་གཅོད་པ་དང་མ་བྱིན་པར་ལེན་པ་དག་སྤངས་པར་གྱུར་པ་ནི་སྔ་མ་
བཞིན་ནོ། །འདོད་པ་ལ་ལོག་པར་གཡེམ་པ་ཡང་མཆོག་ཏུ་སྤང་བར་དཀའ་བ་དང་ཁྱད་པར་དུ་དོར་བར་དཀའ་བ་རྣམས་ཀྱང་རབ་ཏུ་འགོག་པར་བྱེད་པ་ཡིན་ཏེ། ཇི་ལྟར་བྱ་དང་བྱ་དག་ལྷན་ཅིག་ཏུ་སྤྱོད་པར་གྱུར་པ་རྣམས་དང་། རི་མོ་ལ་ཕན་ཚུན་
དུ་གྱུར་པ་རྣམས་དང་། དེ་བཞིན་དུ་ཕན་ཚུན་དུ་གྱུར་པ་མཐོང་བ་དེ་དག་རྣམས་ཀྱང་ཡོངས་སུ་སྤོང་བར་བྱེད་དོ། །ཡིད་ཀྱིས་ཀྱང་ཀུན་ཏུ་རྟོག་པར་མི་བྱེད་དོ། །ཉེ་བར་བསྒོམ་པར་མི་བྱེད་དེ། འདོད་པ་ལ་ལོག་པར་གཡེམ་པའི་
རྣམ་པར་སྨིན་པའི་ཕྱིར་རྒོལ་བ་རྣམས་ཀྱི་འཇིགས་པས་ཐམས་ཅད་ཀྱང་གནས་སྐབས་རྣམས་ཐམས་ཅད་དུ་སྤོང་བར་བྱེད་དོ། །གཞན་དག་རྣམས་བྱེད་པར་གྱུར་པ་ན་ཡང་རབ་ཏུ་འགོག་པར་བྱེད་དོ། །ཆོས་འདུལ་བ་
ལ་རབ་ཏུ་འགོད་པར་བྱེད་ཅིང་འདོད་པ་ལ་ལོག་པར་གཡེམ་པའི་ལས་ཀྱི་འབྲས་བུ་རྣམ་པར་སྨིན་པ་རྣམས་སྟོན་པར་བྱེད་དོ། །རྣམ་པ་དུ་མར་ཡང་ལོག་པར་ལྟུང་བར་གྱུར་པའི་ཆོས་རྣམས་སྟོན་པར་བྱེད་དེ། ཇི་
ལྟར་འདོད་པ་ལ་ལོག་པར་གཡེམ་པས་ནི་ཐམས་ཅད་དུ་ཡང་མི་འདོད་པ་མི་སྡུག་པ་ཡིད་དུ་མི་འོང་བ་དམྱལ་བ་ཀུན་ནས་འཕེལ་བར་བྱེད་པའི་འབྲས་བུ་རྣམ་པར་སྨིན་པ་ཅན་དུ་འགྱུར་རོ། །དེ་བདག་ཉིད་ཀྱིས་ཀྱང་མི་

66-1-39b

བྱེད་དོ། །གཞན་དག་རྣམས་བྱེད་པ་ན་ཡང་རབ་ཏུ་འགོག་པར་བྱེད་དོ། །རང་དང་གཞན་ལ་ཕན་པའི་ཡོན་ལ་རབ་ཏུ་ཞུགས་པར་གྱུར་པ་དགེ་ལེགས་དང་ལྡན་པའི་སེམས་ཅན་དེ་ནི་ལུས་ཞིག་པར་གྱུར་ནས་ཤི་བའི་འོག་ཏུ་བདེ་
འགྲོའི་མཐོ་རིས་ཀྱི་འཇིག་རྟེན་ལས་འཐབ་བྲལ་བ་རྣམས་ཀྱི་ས་གཅིག་ཏུ་དགའ་བ་ལ་སྐྱེ་བར་འགྱུར་རོ། །དེར་སྐྱེས་པ་ན་ཡང་འདིས་ལེགས་པར་བྱས་པའི་ལས་ཀྱི་མཐའ་རྣམས་ལ་སྤྱད་པས། བདེ་བ་རྒྱ་ཆེན་པོ་ལ་སོགས་པ་
བདེ་བ་དུ་མ་རབ་ཏུ་འཕེལ་བར་གྱུར་པའི་ས་དེར་སྐྱེས་པ་རྣམས་ནི་ནགས་དང་ཉེ་བའི་ནགས་རྣམས་ན་ལྷག་པར་གནས་པ། འདོད་པ་རྣམས་ཐམས་ཅད་འདོད་པ་བཞིན་གྱི་ཡོན་ཏན་དང་ལྡན་པའི་བདེ་བ་རྣམས་ལ་ཉེ་བར་ལོངས་སྤྱོད་པས་
ནགས་དང་ཉེ་བའི་ནགས་དག་སྟེན་པར་བྱེད་དོ། །དེ་རྒྱུ་བའི་དུས་ན་ནགས་འདི་དག་རྣམས་ཡིན་ཏེ། འདི་ལྟ་སྟེ་འོད་ཟེར་མངོན་པར་དགའ་བ་ཞེས་བྱ་བ་དང་། འབབ་ཆུ་རྣམས་ཀྱིས་མངོན་པར་དགའ་བ་ཞེས་བྱ་བ་དང་། གཞལ་ཡས་
ཁང་གི་རི་བོ་ཞེས་བྱ་བ་དང་། རྣམ་པར་བཀྲ་བའི་ཆུའི་པད་མའི་རྫིང་བུ་རྣམས་ཞེས་བྱ་བ་དང་། དྲི་འཐུལ་བ་ཞེས་བྱ་བའོ། །ནགས་དང་ཉེ་བའི་ནགས་དང་རྫིང་བུ་རྣམས་དང་གཞན་དག་ཀྱང་རིར་གྱུར་པ་རྣམས་ཀྱི་ལྷ་རྫས་ཀྱི་ཡོན་
ཏན་གྱི་ཕུན་སུམ་ཚོགས་པ་རྣམས་ནི་གྲངས་ཀྱང་མི་དམིགས་སོ། །དེ་ལ་ནགས་གང་དག་དང་མཚོ་གང་དག་ནི་མཆོག་ཏུ་དགའ་བར་གྱུར་པ་ཡིན་ནོ། །གང་དག་ལ་འདི་དག་རྣམས་དགའ་བར་བྱེད་པ་འདི་དག་རྣམས་ནི་བྱིངས་ཆེ་བ་དང་
ལྡན་པ་ཡིན་ནོ། །འདི་ལྟ་སྟེ་ནོར་བུའི་སྟེགས་བུ་ཞེས་བྱ་བའི་མཚོ་ན་བྱ་ཕལ་པོ་ཆེ་རྣམས་ཀྱིས་མངོན་པར་དགའ་བ་དང་། རྟག་པར་ཡང་ཤིན་དུ་རངས་པའི་ལྷ་རྣམས་ཀྱིས་སྟེན་པར་གྱུར་པ་དོགས་པ་མེད་པར་གྱུར་པས་མཐོང་བར་
འགྱུར་བ་ཡིན་ནོ། །མཚོ་དེ་དག་གི་ཉེ་འཁོར་རྣམས་ན་ལྷ་རྫས་ཀྱི་སྒྲ་དང་མདོག་དང་ཚད་དང་མཆོག་ཏུ་ལྡན་པའི་བྱ་དག་གིས་ཡོངས་སུ་གང་བར་གྱུར་པ་དང་། ངོས་གཉིས་ག་ན་ཡང་དཔག་བསམ་གྱི་ཤིང་རྣམས་ཀྱིས་ཡོངས་སུ་གང་བར་གྱུར་



66-1-40a

པ་ཡིན་ནོ། ། ཡོན་ཏན་དུ་མ་དང་ལྡན་པ་དེ་དག་རྣམས་ལ་ལེགས་པར་བྱས་པའི་ལས་ཀྱི་མཐའ་ལ་སྤྱོད་པ་ནི་འདོད་པའི་ཡོན་ཏན་ལྔ་རྣམས་ལ་ལྷའི་བུ་མོ་དུ་མ་རྣམས་ཀྱིས་ཀྱང་ཡོངས་སུ་བསྐོར་ནས་དགའ་བར་བྱེད་དེ། ལྷ་རྫས་
ཀྱི་གཟུགས་དང་ལྡན་པ་རྣམས་དང་དེའི་འདུན་པའི་རྗེས་སུ་འཇུག་པར་བྱེད་པ་དང་། རྟག་ཏུ་རྒྱུན་མི་འཆད་པར་བདེ་བ་ལ་ཆེད་ཆེར་བྱེད་པ་དང་མཆོག་ཏུ་བདེ་བ་ལ་རབ་ཏུ་ཆགས་པ་དང་། ལྷ་རྫས་ཀྱི་བདེ་བ་གཞན་དང་གཞན་རྣམ་པ་དུ་
མ་རྣམས་ཀྱིས་དེ་དག་རྣམས་མཚོ་དེར་ལེགས་པར་བརྟེན་ནས་ཕྱིར་ཞིང་ཉིད་ཀྱང་འདོད་པའི་ཡོན་ཏན་ལྔའི་ཉེ་བར་ལོངས་སྤྱད་པ་རྣམས་ཀྱིས་ངོམས་པ་མེད་པས་སྲེད་པའི་ཟུག་རྔུ་རྣམས་ཀྱིས་རབ་ཏུ་འབྲེལ་བར་གྱུར་ནས། སླར་ཡང་རྗེས་སུ་
འབྲང་བ་དེ་དག་རྣམས་ཉིད་ཀྱིས་ཡོངས་སུ་བསྐོར་བ་རྣམས་ནོར་བུའི་ཆ་ཤས་རྣམས་ཀྱིས་རྣམ་པར་བཀྲ་བ་ཞེས་བྱ་བའི་མཚོ་དང་པད་མའི་རྫིང་བུ་དག་གིས་ཉེ་བར་མཛེས་པར་བྱས་པའི་རི་དེ་ལ་འཁོད་པར་བྱེད་དེ། སྐྱེད་མོས་ཚལ་གྱི་ལྟད་
མོའི་དབང་དུ་བྱས་ནས་ལྷ་རྫས་ཀྱི་བདུད་རྩིའི་པད་མའི་ཡུ་བ་དག་གིས་ཉེ་བར་མཛེས་པར་གྱུར་པ་དང་། ལྷ་རྫས་ཀྱི་གོས་རྣམས་གྱོན་པ་དང་ལྷ་རྫས་ཀྱི་ཡུལ་ལྔ་པོ་རྣམས་སྟེན་པར་བྱེད་པས་ཀྱང་། ནོར་བུའི་ཆ་ཤས་སྣ་ཚོགས་པས་བཀྲ་
བ་མཐོང་ན། མཆོག་ཏུ་ཡིད་འཕྲོག་པར་བྱེད་པའི་རི་དེ་ལ་རྩེ་དགའ་བར་འདོད་པས་མཉམ་པར་འཁོད་པར་བྱེད་དོ། །དེ་ནས་དེའི་རྩེ་མོ་གཞན་ལ་རིའི་ཁྲོད་དགའ་བ་ཞེས་བྱ་བ་དེ་ན་དགའ་ལྡན་གྱི་ལྷའི་རིགས་སུ་གྱུར་པའི་ལྷ་
གཞན་ལྷ་རྫས་ཀྱི་ཕྲེང་བ་དང་གོས་དང་ལྡན་པ་གསེར་གྱི་རང་བཞིན་རྣམ་པ་དུ་མར་དགའ་བའི་ནགས་སུ་བརྒྱ་ཕྲག་དང་དེ་ནས་སྟོང་ཕྲག་དང་ཐམས་ཅད་ཉིད་བབས་ནས་རྩེད་མོའི་མཆོག་རྣམས་བྱེད་དོ། །ལྷ་དེ་དག་རྣམས་མངོན་པར་མཐོང་
བར་གྱུར་ནས་ལྷ་གསར་དུ་སྐྱེས་པ་དེ་ལྷན་ཅིག་སྤྱོད་པ་རྣམས་ལ་བརྗོད་པ། ཇི་ལྟར་གང་དག་ལྷན་ཅིག་སྤྱོད་པ་རྣམས་ཀྱིས་ཡོངས་སུ་བསྐོར་ནས་རྩེ་ཞིང་འགྲོ་བར་འགྱུར་བའི་ལྷ་དེ་དག་རྣམས་དང་། མ་ཐ་ཡང་གང་བདག་ཀྱང་དེ་དག་དང་

66-1-40b

ཉེ་བར་གྱུར་མོད། དེ་ནས་དེ་དག་རྣམས་ཐམས་ཅད་ཀྱིས་ཀྱང་དེའི་དྲུང་ནས་ཚིག་དེ་ཉེ་བར་ཐོས་ནས་འདི་སྐད་ཅེས་བརྗོད་དོ། །ལྷ་དེ་ཇི་ལྟར་མངོན་པར་འདོད་པར་གྱུར་པ་དེ་ལྟར་བདག་ཅག་རྣམས་ཀྱིས་དེ་བཞིན་དུ་བྱའོ། །དེ་ནས་དེ་
ལྟར་རིག་ནས་ལྷ་གསར་དུ་སྐྱེས་པ་དེ་ལྷན་ཅིག་སྤྱོད་པར་བྱེད་པ་རྣམས་ཀྱིས་ཡོངས་སུ་བསྐོར་ནས། ལྷ་རྫས་ཀྱི་རྔ་སྐད་ཡན་ལག་ལྔ་དང་ལྡན་པ་རྣམས་ཉེ་བར་བསྒྲགས་པར་གྱུར་པས། གང་ན་ལྷ་དེ་དག་རྣམས་ཡོད་པ་དེ་དང་ཉེ་བར་
གྱུར་ཏོ། །དེ་ནས་ཕན་ཚུན་དུ་འདྲེས་པར་གྱུར་པའི་ལྷ་དེ་དག་རྣམས་ཕན་ཚུན་དུ་རྣམ་པར་འདྲེས་པས་རབ་ཏུ་ཆགས་པར་གྱུར་པའི་སྙིང་ངོམས་པ་མེད་པ་རྣམས་ལ། རིའི་གཙུག་ན་ནོར་བུ་ཞེས་བྱ་བའི་བྱས་ཚིགས་སུ་བཅད་པའི་དབྱངས་
བརྗོད་པ་ཇི་ལྟར། ལས་ཀྱི་སྙིང་པོའི་འཇིག་རྟེན་དང་། །ལྷ་ནི་ལས་ཀྱི་སྙིང་པོ་ཅན། །འདུས་བྱས་ལྷ་ཡི་འཇིག་རྟེན་པ། །ལས་ཟད་ནས་ནི་ལྟུང་བ་ཡིན། །འཐུན་པར་འགྲོགས་པའི་འཇིག་རྟེན་ནི། །འབྲལ་བས་རྟག་ཏུ་འཐུན་པ་
མིན། །འདུས་པའི་མཐའ་ནི་འབྲལ་བ་ཡིན། །དེ་བཞིན་གཤེགས་ཀྱིས་ཆོས་ཉིད་འདི། །བདེ་ལ་ཀུན་ཏུ་ཆགས་པའི་ཡིད། །ཡུལ་གྱིས་བདག་ཉིད་བསླུས་པ་ཡིན། །ཡིད་ཤུགས་དང་མཚུངས་རྣམས་ཀྱི་ནི། །ལྷ་རྣམས་ཚེ་ནི་ཟད་པར་
འགྱུར། །རྒ་དང་ན་དང་སྨད་པ་དང་། །འབྲལ་བས་ལུས་ཅན་ཐམས་ཅད་ལ། །འབྱུང་བ་ཡང་ནི་ཀུན་རྨོངས་པས། །ཡུལ་གྱིས་ཁྲིད་ནས་རིག་པ་མིན། །རྒ་བའི་ཆད་པ་སྔུན་བསར་ནས། །འཆི་བདག་གིས་ནི་ཀུན་ཏུ་སྲེ། །
ནད་ཀྱི་དཔུང་གིས་འདི་རྣམས་འབྲལ། །བློ་གྲོས་མེད་པས་མཐོང་བ་འང་མིན། །དྲུག་གིས་འཇིག་རྟེན་རྣམ་པར་འཇོམས། །ཕྱུགས་བཞིན་དུ་ཡང་འཇོམས་པར་བྱེད། ། གོམ་པའི་ལམ་དུ་ཞུགས་པ་ནི། །འཁྲིས་ཤིང་བཞིན་དུ་ཡོངས་
སུ་བསྐོར། །གང་འདིའི་བློ་ནི་རྟག་པར་ཡང་། །རྒྱུ་དང་འབྲས་ལོ་ལེགས་པར་གནས། །དེ་ནི་རྒྱུ་འབྲས་ལེགས་ལྟ་བས། །ཕྱི་ནས་གདུང་བས་མི་འཇོམས་སོ། །ཡུལ་རྣམས་ཀྱིས་ནི་འཇོམས་མིན་ཏེ། །དྲང་པོར་ལྟ་བ་བརྐམ་

66-1-41a

ཆགས་མེད། །དེས་ནི་ཤིན་དུ་མི་བཟད་པའི། །དགའ་བའི་ཡུལ་ཀུན་མྱུར་དུ་འདོར། །སྐྱོན་ལས་རྣམ་གྲོལ་ངམ་གྲོག་དང་། །དྲི་མའི་འཇིགས་པ་ལས་རྣམ་གྲོལ། །བག་མེད་མེ་གང་དེས་རྟོགས་ནས། །ཐམས་ཅད་དུ་
ནི་ཡོངས་སུ་སྤངས། །འཇིགས་པ་ལྔ་པོ་འདི་ཡིས་གང་། །དང་པོར་འཇིག་རྟེན་འདི་གསོད་པ། །རྒ་དང་ན་དང་འཆི་བ་དང་། །རྣམ་པར་འབྲལ་དང་རང་གི་ལས། །དེ་ལྟར་རིའི་གཙུག་ན་ནོར་བུ་ཞེས་བྱ་བའི་བྱ་ནི་རྣམ་པར་བཀྲ་བ། གཙང་
བ་དག་གི་རྨ་བྱའི་རྒྱལ་པོ་བྱང་ཆུབ་སེམས་དཔའི་ལྷན་ཅིག་ཏུ་སྤྱོད་པ་དང་གཉིས་ཀའི་ཡང་སྨོན་ལམ་གྱི་དབང་གིས་རྨ་བྱའི་སྐྱེ་གནས་སུ་སྐྱེས་པར་གྱུར་པ་ཡིན་ནོ། །དེ་དག་ཀྱང་རྨ་བྱ་རྣམས་དང་འཐབ་བྲལ་གྱི་ལྷ་རྣམས་ལ་བག་མེད་
པ་དང་བྲལ་བའི་དོན་དུ་ཆོས་སྟོན་པར་བྱེད་དོ། །དེ་ནས་ལྷ་དེས་སྔ་ན་མེད་པའི་ལྷ་དེ་དག་མངོན་པར་མཐོང་བར་གྱུར་པས། སླར་ཉིད་ཀྱང་ཆེས་མཆོག་ཏུ་དགའ་བར་གྱུར་པའི་ཡིད་ཀྱིས་ལེགས་པར་བཤད་པ་དེ་དག་རྣམས་ལ་རྩིས་བགྲང་མ་བྱས་པར་
བག་མེད་པའི་དབང་གིས། རབ་ཏུ་རྩེ་བར་བྱེད་པ་དང་གར་བྱེད་པ་དང་རྒོད་པར་ཡང་བྱེད་ཅིང་རྔ་སྐད་ཡན་ལག་ལྔ་དང་ལྡན་པ་རྣམས་ཀྱིས་རྣམ་པ་དུ་མར་དགའ་བར་བྱེད་དེ། དཔེ་མེད་པའི་ནགས་དང་ཉེ་བའི་ནགས་རྣམས་དང་རི་དང་རིའི་ལྗོངས་རིན་པོ་ཆེ་ཀུན་
ཏུ་འབར་བའི་འོད་ཟེར་གསལ་བར་སྣང་བ་རྣམས་དང་དཔག་བསམ་གྱི་ཤིང་གི་ནགས་རྣམས་དང་ལྡན་པ་རྣམས་དང་དགའ་བའི་བྱ་དང་ལྡན་པ་རྣམས་དང་རིའི་ཆུ་ཀླུང་བརྒྱ་ཕྲག་དང་ལྡན་པ་རྣམས་དང་པད་མའི་ནགས་དང་ལྡན་པ་རྣམས་ལ་ལྷན་ཅིག་
སྤྱོད་པ་རྣམས་དང་བཅས་ཅིང་འདོད་པ་རྣམས་ཐམས་ཅད་ཕུན་སུམ་ཚོགས་པ་ལྷ་རྫས་ཀྱི་བདེ་བ་རྣམས་དང་ལྡན་པས་རྣམ་པ་དུ་མར་ལྷ་རྣམས་རྩེ་དགའ་བར་བྱེད་དོ། །དེ་ལྟར་རྩེ་བར་གྱུར་པའི་ལྷ་དེ་རྣམས་རིམ་གྱིས་ནོར་བུའི་ཆ་ཤས་
རྣམ་པར་བཀྲ་བ་ཞེས་བྱ་བའི་རི་དེ་ལ་འཁོད་དོ། །རི་དེ་ལ་ཡང་དཔག་བསམ་གྱི་ཤིང་གི་ནགས་རིན་པོ་ཆེ་བདུན་གྱི་རང་བཞིན་གྱི་ཤིང་རྣམས་ཀྱིས་ཉེ་བར་མཛེས་པར་གྱུར་པ་སྟེ། དཔག་ཚད་ལྔ་བརྒྱ་ཡོད་པ་ཡིན་ནོ། །ནགས་ཆེན་པོ་

66-1-41b

དེ་ནི་ཤིན་ཏུ་བཀྲ་བས་རྣམ་པར་བཀྲ་བར་གྱུར་པའི་བྱའི་རྒྱལ་པོ་རབ་ཏུ་གནས་པས། བག་མེད་པ་དང་བྲལ་བར་བྱ་བའི་དོན་དུ་ལྷ་རྣམས་ལ་ཆོས་སྟོན་པར་བྱེད་དོ། །ལྷ་རྣམས་ཀྱང་ཆོས་ལ་རྗེས་སུ་འཇུག་པར་བྱ་བའི་དོན་དུ་ཡང་
སྟོན་པར་ཆེད་ཆེར་བྱེད་དོ། །ནགས་དང་ཉེ་བའི་ནགས་རྣམས་དང་པད་མའི་རྫིང་བུ་རྣམ་པ་སྣ་ཚོགས་པ་རྣམས་དང་ཆུ་ཀླུང་དང་འབབ་ཆུ་རྣམ་པ་སྣ་ཚོགས་པ་རྣམས་དང་རིན་པོ་ཆེའི་ཁམས་རྣམས་དང་ལྡན་པའི་རྩེ་མོ་རྣམ་པར་བཀྲ་བ་
རྣམས་དང་། བྱ་བརྒྱ་སྟོང་ཕྲག་ངོས་ན་སྒྲ་ཀུན་དུ་སྒྲོགས་པས་དགའ་བར་གྱུར་པ་རྣམས་དང་ལྷའི་ཚོགས་རྣམས་ཀྱིས་ཉེ་བར་མཛེས་པ་དང་ལྷ་མོའི་ཚོགས་རྣམས་ཀྱིས་རྣམ་པ་སྣ་ཚོགས་པར་ཆེས་དགའ་བར་གྱུར་པ་ལ་ལྷ་དེ་དག་
ཕན་ཚུན་གྲོགས་སུ་གྱུར་པས་དགའ་བར་བྱེད་དོ། །རྣམ་པ་སྣ་ཚོགས་པའི་འདོད་པའི་བདེ་བའི་རྒྱགས་པས་མྱོས་པ་དང་། རང་གིས་བྱས་པའི་ལས་ཀྱི་འབྲས་བུ་རྣམས་ལ་ལོངས་སྤྱོད་པས་ཐམས་ཅད་ཉིད་དགའ་བར་བྱེད་པ་དང་
རྣམ་པ་དུ་མ་དང་རྣམ་པར་རྟོག་པ་དུ་མས་ཀྱང་ལྷ་རྫས་ཀྱི་དཔེ་མེད་པ་རྣམས་ལ་རྩེད་མོ་དག་ཀྱང་རྩེ་བར་བྱེད་དོ། །དེ་ནས་ལྷ་དེ་དག་རྣམས་ཀྱིས་བག་མེད་པའི་བདེ་བ་དེ་དག་ཉེ་བར་རྙེད་ནས། ནོར་བུའི་ཆ་ཤས་རྣམ་པར་བཀྲ་བའི་
རི་དེ་ནས་དགའ་བས་རྩེ་བར་འགྱུར་བ་རྣམས་ལ། རྨ་བྱའི་རྒྱལ་པོ་དེས་ཚིགས་སུ་བཅད་པའི་དབྱངས་བསྙད་པ་ཇི་ལྟར། གཟུགས་ལ་སོགས་པའི་ཡུལ་རྣམས་ཀྱིས། །ཚིམ་པར་མ་གྱུར་འགྱུར་བ་མིན། །སོལ་མེའི་མེ་
ཡིས་བསྲེགས་པ་རྣམས། །སླར་ཡང་ཡུལ་ལ་འདོད་པ་རྣམས། །ཡང་དང་ཡང་དུ་ལྷའི་འཇིག་རྟེན། །འཆི་འཕོ་དང་ནི་སྐྱེ་བར་འགྱུར། །ལས་ཀྱི་ཉ་རྒྱས་བཟུང་ནས་ནི། །སླར་ཡང་དམྱལ་བར་འགྲོ་བ་ཡིན། །
དམྱལ་དང་ཡི་དགས་དུད་འགྲོ་ནི། །སྡུག་བསྔལ་མང་གནས་སྐལ་བ་ཅན། །རྒྱུ་དང་འབྲས་ཀྱི་སྐལ་ལྡན་པས། །སེམས་ཅན་འགྲོ་བ་ལྔ་ན་འཁྱམ། །ལུས་ཅན་རྣམས་ཀྱི་ལས་རྣམས་ནི། །སྣ་ཚོགས་མང་པོ་འདིར་བྱས་ནས། །

66-1-42a

འབྲས་བུ་སྣ་ཚོགས་དེ་དག་ཉིད། །དུ་མའི་སྒོ་ནས་ལྷ་རྣམས་སྤྱོད། །བྱུང་ཞིང་འཛད་པའི་ཆོས་ཅན་ནི། །ཟད་ནས་ཀྱང་ནི་རྟག་ཏུ་ལྟུང་། །དེ་ཉིད་བཞིན་དུ་མཁས་པ་ཡིས། །ལྷ་རྣམས་ཀྱི་ནི་འཆི་འཕོ་མཐོང་། །
འཆི་བདག་འདི་ནི་ཀུན་འབྱུང་བས། །མི་རྣམས་གསོན་པའི་བར་ཆད་བྱེད། །ཐམས་ཅད་ཡུལ་གྱིས་བག་མེད་པས། །རྨོངས་པ་ཡིས་ཀྱང་རིག་པ་མིན། །བདག་ཉིད་ཚོལ་བར་བྱེད་པའི་ངག །དུ་མ་རྗེས་སུ་བསྔགས་པར་འགྱུར། 
ལྷ་རྣམས་བདེ་བས་རྨོངས་པ་ཡིས། །འདོད་པ་རྣམས་ནི་རྣམ་མི་སྤོང་། །ཆོས་ལྡན་དགེ་བའི་ངག་གིས་ནི། །འདི་དང་ཕྱི་མར་བདེ་བ་འབྱུང་། །རྨོངས་དག་གང་ཞིག་མི་འཛིན་པ། །དེ་ནི་ཕྱི་ནས་གདུང་བར་འགྱུར། །མང་པོ་རྗེས་སུ་
གདམས་གྱུར་པའི། །དེ་ཉིད་དོན་ནི་གསལ་བྱེད་པ། །བག་མེད་པས་ཕྲོགས་ལྷ་ཡིས་ནི། །གང་ཕན་པ་ནི་མི་རྟོགས་སོ། །སྲོག་གི་བར་ཆད་བྱེད་པའི་དགྲ། །བསྲན་པར་མི་བཟོད་སྟོབས་པོ་ཆེ། །འགོར་བ་མེད་པར་ཤུགས་པོ་
ཆེ། །འདིར་ནི་འཆི་བདག་ཁྱེད་ལ་འབྱུང་། །ལྷ་ཀླུ་དྲི་ཟ་ཤ་ཟ་དང་། །ལྟོ་འཕྱེ་དང་ནི་སྲིན་པོས་ཀྱང་། །དེ་ཡི་སྟོབས་ནི་གཞིག་ནུས་པའི། །དེ་སྟོབས་རྣམ་པ་དེ་འདྲ་མེད། །སྟོབས་དང་སྟོབས་མེད་རྣམ་པར་ཤེས། །ལས་རྣམས་དེ་ཉིད་
མཐོང་བ་པོ། །སྡིག་པའི་ཆོས་ཀྱིས་མི་གོས་ཤིང་། །དེ་ནི་ངན་འགྲོར་འགྲོ་མི་འགྱུར། །དགེ་བ་གྱིས་དང་མི་དགེའི་དུག །དེ་ནི་སྤངས་པ་ཉིད་དུ་ཡང་། །བྱས་ན་འདི་ཡི་ཚེ་ལ་ནི། །སྡུག་བསྔལ་རྗེས་སུ་རྒྱུག་པ་མིན། །ཆོས་རྗེས་
འབྲང་དང་དད་པ་ནི། །བརྩོན་འགྲུས་ཀྱིས་ནི་ཡོངས་སུ་སྤེལ། །ཐེག་ཆེན་སྟོབས་ལ་བརྩོན་དང་ལྡན། །མ་བཞིན་དུ་ནི་ཕན་པར་བྱེད། །དེ་ནི་སྐྱེས་བུ་ཐམས་ཅད་ཀྱིས། །འགྲོ་བ་ལྔར་ནི་དབུགས་འབྱིན་འགྱུར། །དེ་ལ་ཕ་དང་མ་
མེད་པར། །འགྲོ་ཞིང་རྗེས་སུ་འགྲོ་བ་མིན། །ཆོས་རྗེས་འབྲང་དང་དད་པ་ཅན། །ཇི་ལྟར་བདེ་བ་འབྱུང་བར་འགྲོ། །ངན་སོང་ལས་ནི་ཀུན་འཛིན་པའི། །སྡུག་བསྔལ་སྟོབས་ནི་ཆེ་བ་ཡི། །མུན་པའི་དེ་ཡང་མར་མེ་རུང་། །ནད་པ་རྣམས་ཀྱི་

66-1-42b

འདི་ནི་སྨན། །དམུས་ལོང་རྣམས་ཀྱི་མིག་གྱུར་དང་། །དེ་ནི་དབུལ་པོའི་ནོར་ཆེན་ཡིན། །སྲིད་པའི་ཆུ་བོས་ཁྱེར་རྣམས་ཀྱི། །རྐྱལ་བར་གྱུར་པའི་བདེ་བ་འཁྱེར། །བག་མེད་རྒྱགས་པས་རྒྱགས་རྣམས་ཀྱི། །དེ་ནི་བག་མེད་འཇོམས་པ་
པོ། །འཆི་བདག་དུས་ནི་ཉེར་བྱུང་ལ། །སྲིད་པའི་ཆུ་བོ་འཇོམས་བྱེད་དེ། །གང་ཡང་གོ་འཕང་ཞི་གང་དེ། །སྔོན་གྱི་ཐུབ་པས་རྣམ་འཛིན་པ། །ཡང་དག་ལྟ་བས་སྔོན་འགྲོ་བ། །དེ་ནི་ངལ་བ་མེད་པར་འཐོབ། །བག་ཡོད་དེ་བཞིན་དད་པ་
དང་། །བརྩོན་འགྲུས་རྩོམ་པ་དེ་བཞིན་འཛིན། །ཡེ་ཤེས་གོམས་པ་དམ་པ་བསྟེན། །ཐར་པ་ཡི་ནི་སྐྱེ་མཆེད་དྲུག །སྦྱིན་དང་ཚུལ་ཁྲིམས་དུལ་དང་བཟོད། །བྱམས་པར་གྱུར་པས་འཚེ་བ་མེད། །སྙིང་རྗེ་དགའ་བ་བཏང་སྙོམས་ནི། །
ཞི་བ་ལེགས་འཐོབ་རྒྱུ་རྣམས་ཡིན། །ཙབ་ཧྲལ་ཅན་དང་སྡིག་ལ་འདྲེ། །ཁྲོན་མ་དེ་བཞིན་མིན་པའི་ཚིག །ལོག་ལྟ་དང་ནི་བག་མེད་ཀྱང་། །དམྱལ་བའི་རྒྱུ་ཡི་རྩེ་མོ་རྣམས། །སེར་སྣ་དང་ནི་ཕྲག་དོག་ངག་རྩུབ་བག་མེད་པ། །བསྟེན་
པ་ལ་ནི་མངོན་པར་དགའ་དང་མི་དགེ་དང་། །སེམས་ཅན་འཚེ་ལ་མངོན་པར་དགའ་བའི་ཡིད་དང་ནི། །འདི་དག་ཡི་དགས་ལམ་དུ་འཕགས་པ་དག་གིས་གསུངས། །བློ་གྲོས་བླུན་པོ་དང་ནི་རྨོངས་པ་སྟེན་པ་དང་། །དམ་པའི་ཆོས་ལ་རྒོད་དང་
འཁྲིག་པ་ལ་ཡང་དགའ། །ཟས་ལ་ཆགས་པ་དང་ནི་གཉིད་ལ་ཕན་ཆེ་བ། །དུད་འགྲོ་རྣམས་སུ་སྐྱེ་བའི་རྒྱུ་རྣམས་ཡིན་པར་སྨྲ། །ལུས་དང་ངག་དང་ཡིད་རྣམས་ཀྱིས། །མི་དགེ་རྣམ་པ་གསུམ་ཆེར་བྱས། །སྐྱེས་བུ་བློ་གྲོས་དམན་
པ་ནི། །དམྱལ་བར་སྐྱེ་བར་འགྱུར་བ་ཡིན། །རྒྱུ་རྣམས་ཅི་འདྲ་བ་ཡི་ནི། །འབྲས་བུ་དེ་དང་འདྲ་བ་མཐོང་། །འབྲུས་འབྲས་འབྲུ་དང་འདྲ་བ་དང་། །དེ་མེད་པར་ཡང་འབྱུང་མ་ཡིན། །འཁོར་བར་སྡུག་བསྔལ་རྒྱུ་མང་པོ། །མང་པོ་
ལེགས་པར་མཐོང་བ་ཡིན། །དེ་ལྟ་ན་ཡང་དེས་རྨོངས་པས། །ལྷ་རྣམས་ཀྱིས་ནི་མི་གོའོ། །དང་པོ་བག་མེད་བདེ་དང་ལྡན། །ཕྱི་ནས་སྡུག་བསྔལ་ལྡན་པར་འགྱུར། །ཕྱིས་གང་སྡུག་བསྔལ་རྒྱུར་གྱུར་པ། །དེ་ནི་མཁས་པས་

66-1-43a

སྤོང་བར་བྱེད། །ཇི་སྲིད་མྱ་ངན་འདས་མི་གཞོལ། །དེ་སྲིད་བདེ་བ་ཐོབ་མི་འགྱུར། །རྣམ་གྲོལ་སྐྱེས་བུ་ཐམས་ཅད་ནི། །རྟག་ཏུ་བདེ་དང་ལྡན་པར་འགྱུར། །བདེ་གང་བརྟན་པ་མིན་པ་དང་། །དེ་ནི་བདེ་བར་རབ་མ་བསྒྲགས། །
གང་ཡང་བརྟན་པ་དེ་ལ་ནི། །དེ་འདི་བདེ་བ་ཞེས་བརྗོད་དོ། །གོང་ནས་གོང་དུ་ལེགས་འབྲེལ་བའི། །ལས་རྣམས་ལེགས་པར་སྟོན་པར་བྱེད། །འབྲས་བུ་རྣམས་ཀྱང་ལེགས་འབྲེལ་བ། །དེ་ནི་གོང་ནས་གོང་ཉིད་དོ། །དེ་ཕྱིར་ལས་འབྲས་
འགོ་བ་དང་། །བག་མེད་པ་ཡང་རྣམ་པར་སྤོངས། །བདེ་ལེགས་ཀྱི་ནི་བློ་གྱིས་དང་། །དེ་དག་བདེ་བ་བླ་ན་མེད། །དེ་ལྟར་རྨ་བྱ་རྣམས་ཀྱི་མངའ་བདག་དེས་དེ་དག་རྣམས་ལ་བག་མེད་པ་དང་བྲལ་བར་བྱ་བའི་དོན་དུ་རྣམ་པ་དུ་མར་ཆོས་
སྟོན་པར་བྱེད་དེ། བརྟན་ཞིང་གསལ་ལ་སྙན་པ་རྒྱ་ཆེ་བའི་སྐད་རྣམ་པ་དེ་ལྟ་བུ་དག་གིས་གང་ལྷ་དེ་དག་རྣམས་ཀྱི་གླུ་དེ་དག་རྣམས་ཐམས་ཅད་ཉེ་བར་བཅོམ་ནས་དགེ་བའི་ཆོས་ཀྱིས་དཔག་ཚད་སྟོང་ཕྲག་ཉི་ཤུར་སྒྲ་དབྱངས་
བཟང་པོ་རྣམས་ཀྱིས་ཀུན་དུ་བསྒྲགས་སོ། །ཐོས་པའི་བདེ་བ་དང་ཆོས་ཡོངས་སུ་སྨིན་པའི་བདེ་བ་རྣམས་དང་ཡང་ལྡན་པ་ཡིན་ནོ། །དེ་ནས་ལྷ་གང་དག་དགའ་ལྡན་གྱི་ལྷའི་རིས་ནས་འབབ་པར་བྱེད་པ་དེ་དག་རྣམས་ནི་ནམ་
མཁའི་དཀྱིལ་ནས་རྒྱུ་བར་འགྱུར་ཏེ། ཇི་ལྟར་རྒྱལ་ཆེན་རིས་བཞིའི་ལྷ་རྣམས་རྒྱུ་བར་བྱེད་པ་དེ་ལྟར་དེ་དག་རྣམས་ཀྱང་རྒྱུ་བ་ཡིན་ནོ། །གལ་ཏེ་ཤེད་ན་དེ་དག་རྣམས་ཀྱིས་རྣམ་པར་རྟོག་པ་དུ་མར་གྱུར་པའི་དབྱངས་སྙན་པ་
དེ་ཐོས་པར་འགྱུར་རོ། །དེ་ནས་ཐོས་པར་གྱུར་པ་དང་ལྷ་ཉིད་སྟོང་ཕྲག་བཅུས་ཏེ། དམ་པའི་ཆོས་ལ་གུས་པ་དང་བག་མེད་པ་ཡང་ཤས་ཆུང་བར་གྱུར་པས་གང་ན་འཐབ་བྲལ་རྣམས་ཀྱི་ལྷའི་ས་ཡོད་པའི་གང་ལ་རྨ་བྱའི་རྒྱལ་པོ་
རྣམ་པར་བཀྲ་བ་འདིའི་ལེགས་པར་བཀྲ་བ་དང་བཅས་ནས་ཆོས་སྟོན་པར་བྱེད་པར་བབས་པར་གྱུར་ཏོ། །དེ་ནས་དགའ་ལྡན་གྱི་ལྷ་རྣམས་བབས་པར་རིག་ནས་རྨ་བྱའི་རྒྱལ་པོ་དེ་ཆེས་རབ་ཏུ་དགའ་བར་གྱུར་པའི་ཡིད་ཀྱིས་རྗོད་

66-1-43b

པར་བྱེད་པ་ཇི་ལྟ་བ་བཞིན་དུ་བདེ་བར་འོངས་སམ། ཀྱེ་ཡེ་ཡང་དག་པའི་ལྷ་རྣམས། འདིར་འོངས་པ་རྣམས་ནི་བག་མེད་པ་རྣམས་ཆུང་བས་རྣམ་པར་རྒྱུ་བ་དང་། འདི་དང་ཕ་རོལ་རྗེས་སུ་དཔྱོད་པར་བྱེད་པ་དང་ཆོས་རྣམ་པ་དུ་མ་
ཉན་པས་བབས་པར་གྱུར་པ་ཡིན་མོད་ཀྱི། ཁྱེད་རྣམས་ཇི་ལྟ་བར་བདག་ཅག་གི་ཆོས་ཉོན་དང་དེ་བཞིན་དུ་བདག་གིས་བསྟན་པར་བྱའོ། །ཤིས་པ་ཐབས་སུ་གྱུར་པ་མྱ་ངན་ལས་འདས་པའི་གྲོང་ཁྱེར་ལེགས་པར་འཐོབ་པར་བྱེད་པ་
ཐམས་ཅད་ཀྱིས་སྔར་མ་མཐོང་བ་གང་བདག་སྐྱེ་བ་གཞན་ཞིག་ཏུ་མིར་གྱུར་པ་ན། བཅོམ་ལྡན་འདས་འཁོར་བ་འཇིག་གི་སྤྱན་སྔ་ནས་ཐོས་པ་དེ་སྐྱེ་བ་གཞན་རྗེས་སུ་དྲན་པ་དང་སྨོན་ལམ་གྱི་དབང་གིས་ངས་ད་རུང་དྲན་ཞིང་། གཞན་དག་
རྣམས་ལ་ཡང་ཉེ་བར་སྟོན་པར་བྱེད་དོ། །དེ་ནས་དགའ་ལྡན་གྱི་ལྷ་དེ་དག་རྣམས་ཀྱིས་རྨ་བྱའི་རྒྱལ་པོ་དེའི་དྲུང་ནས་ཚིག་དག་ཉེ་བར་ཐོས་ནས་ནམ་མཁའི་དཀྱིལ་ནས་བབས་ཏེ། དམ་པའི་ཆོས་ལ་གུས་པས་ཚིམ་པར་གྱུར་པའི་ཡིད་ཀྱིས་ཐམས་
ཅད་ཀྱང་རི་དེའི་རྩེ་མོ་འབབ་ཆུ་དང་རྫིང་བུ་ཕལ་ཆེ་བ་དང་ནགས་དང་ཉེ་བའི་ནགས་རྣམས་ཕུན་སུམ་ཚོགས་པ་དང་པད་མའི་རྫིང་བུ་དང་རིན་པོ་ཆེའི་ཁམས་རྣམས་དང་ཡང་དག་པར་ལྡན་པ་དང་བྱ་བརྒྱ་སྟོང་དུ་མས་རྣམ་པར་རྗོད་པར་བྱེད་པས་
མངོན་པར་དགའ་བ་དང་། རིན་པོ་ཆེའི་ཁམས་ཀྱི་འབྱུང་ཁུང་རྣམས་དང་ལྡན་པའི་ནོར་བུའི་ཆ་ཤས་ཀྱིས་རྣམ་པར་བཀྲ་བའི་རིའི་རྩེ་མོ་དེ་ལ་ལྷ་དེ་དག་གིས་རྨ་བྱའི་རྒྱལ་པོ་དེ་ཡོངས་སུ་བསྐོར་ནས་ཀུན་ཏུ་གནས་སོ། །གཟུགས་དང་
བརྟན་པ་དང་རྒྱ་ཆེན་པོར་གྱུར་པ་ཕུན་སུམ་ཚོགས་པའི་ངོ་བོ་རྣམས་ཐམས་ཅད་ལས་འདི་ལྷག་པར་གྱུར་པས་འཐབ་བྲལ་གྱི་ལྷ་དེ་དག་གི་དྲུང་ན་ཆེས་ལྷག་པར་གྱུར་པ་ནི། ཇི་ལྟར་འཛམ་བུའི་གླིང་གི་མི་རྣམས་ཀྱི་ཁྱད་པར་གྱིས་
འཐབ་བྲལ་བ་རྣམས་ཐབས་ཐམས་ཅད་ཀྱིས་བླ་ལྷག་པ་ཡིན་ནོ། །དེ་བཞིན་དུ་དགའ་ལྡན་གྱི་ལྷ་དེ་དག་རྣམས་འཐབ་བྲལ་བའི་དྲུང་ན་བླ་ལྷག་པར་གྱུར་པ་ཡིན་ནོ། །དེ་ནས་འཐབ་བྲལ་བ་དེ་དག་གིས་དགའ་ལྡན་པ་དེ་དག་

66-1-44a

རྣམས་མངོན་པར་མཐོང་ནས་གཟུགས་ཀྱི་རྒྱགས་པ་དང་དབང་ཕྱུག་དང་རྒྱ་ཆེན་པོ་ཉེ་བར་བཅོམ་པར་གྱུར་པས། གང་ན་རྨ་བྱའི་མངའ་བདག་ཡོད་པར་གྱུར་པ་དེར་ཉེ་བར་འགྲོའོ། །འགའ་ཞིག་དང་འགའ་ཞིག་ནི་རྩེ་བ་
ལ་དགའ་བར་གྱུར་པས་ནགས་དང་ཉེ་བའི་ནགས་དག་ཏུ་ཞུགས་སོ། །ཇི་ལྟར་འཛམ་བུའི་གླིང་གི་མི་རྣམས་ཀྱི་ཁྱད་པར་གྱིས་འཐབ་བྲལ་བ་རྣམས་ཚུལ་ཐམས་ཅད་ཀྱིས་ཁྱད་པར་དུ་འཕགས་པ་ཡིན་ལ། དེ་ལྟར་དགའ་ལྡན་གྱི་
ལྷ་དེ་དག་རྣམས་འཐབ་བྲལ་བ་དེ་དག་གི་དྲུང་ན་ཡང་བླ་ལྷག་པ་ཡིན་ནོ། །ཁ་ཅིག་ནི་མ་མཐོང་བའི་ཕྱིར་དང་ངོ་མཚར་བར་གྱུར་པའི་ཕྱིར་ཡང་དགའ་ལྡན་གྱི་ལྷ་དེ་དག་རྣམས་ཉིད་ལ་ཀུན་ནས་མངོན་པར་ལྟ་ཞིང་གནས་པར་
གྱུར་ཏོ། །ཁ་ཅིག་ནི་སླར་ཉིད་ཀྱང་རིའི་རྩེ་མོ་དེ་དག་ཉིད་ལ་རྩེ་བའི་དོན་དུ་མངོན་པར་འཁོད་པར་བྱེད་དོ། །དེ་ནས་དགའ་ལྡན་པ་དེ་དག་དང་འཐབ་བྲལ་བ་དེ་དག་རྣམས་ཀྱིས་རྨ་བྱའི་རྒྱལ་པོ་དེ་ལ་ཡོངས་སུ་བསྐོར་ནས་དེ་ན་
གནས་སོ། །དེ་ནས་བྱང་ཆུབ་སེམས་དཔའ་དེས་དེ་དག་ལ་འདི་སྐད་ཅེས་སྨྲས་སོ། །ལྷ་དག་ཇི་ལྟར་ཆོས་ལ་གུས་པ་ལ་གོམས་པའི་དབང་གིས་ལྷ་དང་མི་རྣམས་ལ་ཕན་པའི་དོན་གང་ཡིན་པ་དང་མཆོག་ཏུ་བདེ་བ་དང་
སེམས་ཅན་རྣམས་ཐམས་ཅད་ལ་ཕན་པ་དང་སེམས་ཅན་ཐམས་ཅད་ལྷ་དང་མི་རྣམས་ལ་ཡང་དག་པར་འགོད་པ་ནི་འདི་ལྟ་སྟེ། ཆོས་ཉི་ཤུ་རྩ་གཉིས་པོ་འདི་དག་རྣམས་ཀྱིས་ནི་ལྷ་དང་མི་རྣམས་འཇིག་རྟེན་འདི་དང་ཕ་
རོལ་ཏུ་ཡང་ཕན་པ་དང་བདེ་བ་དང་སྡུག་པ་དང་ཡིད་དུ་འོང་བ་གང་ཡིན་པར་འགྱུར་རོ། །ཆོས་ཉི་ཤུ་རྩ་གཉིས་པོ་གང་གིས་བག་མེད་པ་རྣམས་ཀུན་ནས་འདོར་བ་དང་། ཆུད་གསོན་པར་བྱེད་པ་དང་མེད་པར་བྱེད་པ་དང་དེ་དང་
བྲལ་བས་ཀྱང་བདེ་བ་མཐའ་ཡས་པར་གྱུར་པ་ལྷ་དང་མི་རྣམས་མྱ་ངན་ལས་འདས་པའི་མཐར་ཐུག་པར་བྱེད་པ་དང་། ཇི་ལྟར་མས་མ་ཡིན་ཞིང་ཕས་ཀྱང་མ་ཡིན་པ་རྣམས་ཆོས་ཀྱིས་དེ་བཞིན་དུ་ཕན་པར་འགྱུར་བ་དེ་

66-1-44b

དག་གང་ཞེ་ན་འདི་ལྟ་སྟེ། འགྱོད་པ་དང་ངན་སོང་གི་འཇིགས་པ་དང་བཟོད་པ་དང་བརྩོན་འགྲུས་དང་། ཆོས་སྟོན་པ་དང་སྙིང་རྗེ་དང་སེམས་རབ་ཏུ་འདུལ་བ་དང་རབ་ཏུ་རྟེན་པ་དང་ལས་ལ་དད་པ་དང་ལྡན་པ་དང་། གྲགས་པ་མ་
ཡིན་པས་འཇིགས་པ་དང་མངོན་པར་ཞེན་པ་མེད་པ་དང་གཅིག་པུར་དགའ་བ་དང་སེམས་རྣམ་པར་མ་གཡེངས་པ་དང་འཆི་བ་རྗེས་སུ་དྲན་པ་དང་གཟུགས་དང་དབང་ཕྱུག་དང་རིགས་དང་ནད་མེད་པའི་རྒྱགས་པ་དང་བྲལ་བ་
དང་མི་གནས་པས་ཉེ་བར་བཅོམ་པ་དང་བརྟན་པོ་དང་ངག་འཇམ་པོ་དང་སེམས་ཅན་ཐམས་ཅད་ལ་མཉམ་པ་ཉིད་དང་ཆོག་ཤེས་པ་དང་ཡུལ་རྣམས་ལ་འཇིགས་པར་ལྟ་བ་དང་སེམས་ལ་ཡིད་ཆེས་པར་མི་བྱ་བའོ། །
དེ་ལ་ཆོས་ཉི་ཤུ་རྩ་གཉིས་པོ་དེ་དག་རྣམས་ཇི་ལྟ་བ་བཞིན་དུ་བསྟེན་པར་གྱུར་པ་ན་ལྷ་འམ་མི་རྣམས་ཀྱང་རུང་སྟེ་ངན་སོང་གི་ས་རྣམས་ལ་སྐྱེ་བར་མི་འགྱུར་རོ། །མྱ་ངན་ལས་འདས་པར་ཡང་མྱུར་བར་ཐོབ་པར་བྱེད་དོ། །དེ་ལ་
ཇི་ལྟར་འགྱོད་པར་བྱེད་པར་བྱ་བ་ཡིན་ཞིང་། ཇི་ལྟར་ན་ཐམས་ཅད་ཀྱང་བདེ་ལེགས་ལ་ལེགས་པར་སྤྱོད་པ་ཡིན་ན། ཡིད་ལ་གཅགས་པ་རྣམས་རྣམ་པ་ཐམས་ཅད་དུ་བྱས་པར་གྱུར་ན་ནི། དགེ་བའི་ཆོས་རྣམས་ཀུན་ནས་
འཇོམས་པར་བྱེད་དོ། །དེ་ལ་འདི་ཇི་ལྟར་བྱས་པར་གྱུར་ནས་ཡིན་ན། གལ་ཏེ་ཡང་འདི་ན་གཞན་འགའ་ཞིག་མི་དགེ་བ་རྣམས་ལུས་དང་ངག་དང་ཡིད་ཀྱིས་ཀྱང་བྱེད་པར་གྱུར་པ་ན་ནི། དེས་དགེ་སློང་འདི་སྐྱུག་བྲོ་བར་བལྟ་
བར་བྱ་བ་དང་། རྣམ་པར་སྨོད་པར་བྱེད་པ་དང་གང་ཡིད་ལ་གཅགས་པར་གྱུར་པ་བྱེད་ལ་དེ་དང་ལྷན་ཅིག་ཏུ་གནས་པར་ཡང་མི་བྱེད་དོ། །དེ་ནས་ཡང་གལ་ཏེ་བདག་ཉིད་ཀྱིས་ཇི་ཞིག་ལྟར་རྐྱེན་གྱི་དབང་གིས་བྱས་པར་གྱུར་ཏམ་
སེམས་ལ་ཡང་རྣམ་པར་རྟོག་པ་ཀུན་ཏུ་སྐྱེས་པར་གྱུར་ན། དེ་སྐྱེས་པར་གྱུར་པ་ཙམ་ཉིད་ན་ཡང་རབ་ཏུ་འཇོམས་སོ། །ཕྱིར་ཉིད་ཀྱང་རོ་མྱང་བར་མི་བྱེད་དོ། །གང་དག་གིས་ཕྲོགས་པར་གྱུར་ན་ཡང་གཞན་དག་གི་དྲུང་དུ་

66-1-45a

མཐོལ་བར་བྱེད་དོ། །འདི་འབྱུང་བར་མི་འགྱུར་བ་ལ་ཡང་ཀུན་ནས་འབད་པར་བྱེད་ཅིང་སེམས་ཀྱིས་འབད་པར་བྱེད་དོ། །དེ་ཁོ་ན་བཞིན་དུ་ཕྱིར་ཞིང་དང་དེ་དག་ཉིད་ལ་སླར་ཡང་དང་སེམས་རབ་ཏུ་གནས་པར་མི་བྱེད་
དོ། །དེས་མི་དགེ་བའི་ཆོས་རྣམ་པར་རྟོག་པ་དེ་ལྟར་སྨྲེ་བར་བྱེད་དེ། དཔེར་ན་རྟུག་པ་དང་། ཁྱིའི་རོ་མགུལ་པར་བཅིངས་པ་འམ་མི་གཙང་བ་རྣམས་འགའ་ཞིག་ཏུ་བཅུག་པར་གྱུར་ན། མི་གཙང་བ་དེ་དག་རྣམས་དང་ཁྱིའི་རོ་དེ་དག་ལ་
ཡང་གཙང་མ་འདོད་པའི་སྐྱེས་བུ་རྣམས་སྐྱུག་ལོག་པར་བྱེད་དོ། །དེ་ལྟར་དགེ་སློང་མི་དགེ་བའི་ཆོས་ཡིད་ལ་བྱེད་པ་ལ་སྐྱུག་བྲོ་བར་བྱེད་དོ། །རྣམ་པར་གཤེའོ་འགྱོད་པར་ཡང་བྱེད་པ་ཡིན་ནོ། །དཔེར་ན་ཡང་སྐྱེས་བུ་གཞན་འགའ་ཞིག་
གཙང་མ་འདོད་པ་གཙང་མ་ལ་བསྟེན་པ་གཙང་མ་རྣམས་ལ་སོ་སོར་སྐྱབས་སུ་སོང་བ་དག་བརྒྱ་ལ་ཞིག་ན་བཤང་བ་ཟ་བར་བྱེད་པ་ཡིན་ཏེ། གལ་ཏེ་ཤེད་ན་མི་ཤེས་པས་སམ་བྱིས་པར་གྱུར་པས་གཞན་གྲོགས་པོ་མ་ཡིན་པ་
དག་གིས་ཟར་བཅུག་པར་གྱུར་ཀྱང་རུང་སྟེ། དེས་མི་གཙང་བ་དེ་རྣམ་པར་སྨོད་པར་བྱེད་ཅིང་སྨྲེ་བར་བྱེད་ལ་ཕྱིས་ཀྱང་ཀུན་ནས་ཟ་བར་མི་བྱེད་པར་དེས་ཀྱང་འགྱོད་པར་བྱེད་དོ། །དེ་ཁོ་ན་བཞིན་དུ་དགེ་སློང་ངམ་དེའི་རིགས་ཅན་གཞན་
དག་རྣམས་ཀྱང་རུང་སྟེ་གང་འགའ་ཞིག་དགེ་བ་རྗེས་སུ་ཚོལ་བ་རྣམས་ལ་ཅི་ཞིག་ལྟར་མི་དགེ་བའི་ཡིད་ལ་བྱེད་པའི་རྣམ་པར་རྟོག་པ་དག་སྐྱེས་པར་གྱུར་ན་ཡང་རྣམ་པར་སྨོད་པར་བྱེད་དོ། །སྨྲེ་བར་བྱེད་དོ། །གང་དག་གིས་ཁྲིད་པར་
གྱུར་པ་ན་དེ་དག་ཡང་མི་སྐྱེ་བར་བྱ་བའི་དོན་དུ་སེམས་སྐྱེད་པར་བྱེད་ཅིང་དགེ་བ་ལ་ཡང་སྤྱོད་པར་བྱེད་དོ། །འདི་ནི་བག་མེད་པ་རྣམ་པར་འཇོམས་པ་དང་། བག་མེད་པ་རླག་པར་བྱེད་པ་དང་བག་མེད་པ་རྣམས་འཇིག་པར་བྱེད་པའི་
ལྷ་དང་མི་རྣམས་ཀྱི་ཆོས་དང་པོ་ཡིན་ནོ། །དེའི་ཕྱིར་སྐྱེས་བུ་དམ་པ་དེ་ཁོ་ན་ཉིད་ཚོལ་བ་རྣམས་དང་། འཁོར་བའི་འཇིགས་པས་འཇིགས་པ་གང་ཡིན་པ་རྣམས་ཀྱིས་འདི་ལྟར་བསླབ་པར་བྱ་སྟེ། མི་དགེ་བའི་རྣམ་པར་རྟོག་

66-1-45b

པ་ཕྲ་བའི་ཕྲ་བ་ཡིད་ལ་སྐྱེས་པར་གྱུར་ན་ཡང་འགྱོད་པར་བྱའོ། །འདིར་ནི་བག་ཡོད་པར་བྱ་བ་ཡིན་ཏེ། སྐད་ཅིག་ཀྱང་བག་མེད་པར་ནི་མི་བྱའོ། །དེ་ལྟ་བས་ན་མི་དགེ་བའི་ཆོས་རྣམས་ཀྱི་རྩ་བ་གཅིག་པུར་གྱུར་པ་ནི་འདི་ལྟ་སྟེ། 
རོ་མྱང་བར་བྱེད་པ་དང་ཡིད་ལ་གཅགས་པར་བྱེད་པ་སྟེ་ཆོས་དང་པོ་ཡིན་ནོ། །ཆོས་གཞན་ཡང་དགེ་བ་ཀུན་དུ་འཕེལ་བ་བྱེད་པ་དག་ཡོད་དེ། འདི་ལྟར་ངན་སོང་གིས་འཇིགས་པའོ། །ངན་སོང་གིས་འཇིགས་པ་ཞེས་བྱ་བ་ནི་ཐེག་པ་
ཆེན་པོའི་ཆོས་ཡིན་ཏེ། འདིར་ངན་སོང་གིས་འཇིགས་པའི་ལྷ་དང་མི་རྣམས་ཐམས་ཅད་ཀྱི་ཡང་བག་མེད་པ་རྣམས་རླག་པར་བྱེད་པ་དང་བག་མེད་པ་རྣམ་པར་འཇོམས་པར་བྱེད་པ་ཡིན་པས། དགེ་སློང་དག་གམ་དེ་དག་དང་མཚུངས་
པར་གྱུར་པ་གཞན་རྣམས་ཀྱང་རུང་སྟེ། ཐབས་མ་ཡིན་པ་ལ་འཇིགས་པ་རྣམས་ནི་མི་དགེ་བ་རྩོམ་པར་མི་བྱེད་དོ། །གཞན་དག་རྣམས་བྱེད་པ་ན་ཡང་རྗེས་སུ་ཡི་རང་བར་མི་བྱེད་དོ། །མི་དགེ་བའི་ལས་འདི་དག་རྣམས་ཀྱིས་ནི་ཇི་ལྟ་བ་བཞིན་
དུ་དམྱལ་བ་དང་ཡི་དགས་དང་དུད་འགྲོ་རྣམས་སུ་སེམས་ཅན་རྣམས་སྐྱེ་བ་ཡིན་ནོ་ཞེས་ཤེས་པ་ཡང་ཡིན་པས། བདག་གིས་མི་དགེ་བའི་ཆོས་དེ་བྱས་པ་མ་ཡིན་ཏེ། གང་གི་ཕྱིར་སྡིག་པའི་འབྲས་བུ་དེས་ཀྱང་ཐབས་མ་ཡིན་པ་རྣམས་སུ་ལྟུང་
བར་འགྱུར་རོ། །མི་དགེ་བ་ཆུང་ངུ་ཡང་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པའི་རྒྱུ་གང་གིས་སྲོག་ཆགས་རྣམས་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །དེའི་ཕྱིར་ན་དགེ་སྦྱོང་དང་བྲམ་ཟེ་དང་གཞན་
ཡང་དེའི་རིགས་ཅན་རྣམས་ཀྱིས་འདི་ལྟར་བསླབ་པར་བྱ་སྟེ། ངན་སོང་རྣམས་ཀྱིས་འཇིགས་པ་རྣམས་ཀྱིས་རྟག་ཏུ་ཡང་མི་དགེ་བའི་ཆོས་རྣམས་ལ་འཇིགས་པར་བྱའོ། །གང་གི་ཕྱིར་མི་དགེ་བའི་ལས་མཐའ་དག་གི་འབྲས་བུ་རྣམ་པར་
སྨིན་པ་རྣམས་ནི་དམྱལ་བ་དང་ཡི་དགས་དང་དུད་འགྲོ་རྣམས་སུ་ཉེ་བར་ལོངས་སྤྱོད་པར་བྱེད་པ་ཡིན་པས། བག་མེད་པ་རྣམས་བག་མེད་པར་རྒྱུ་བར་བྱེད་པའི་ལྷ་བློ་དམན་པ་རྣམས་ཀྱིས་དེ་ལྟར་ངན་སོང་ལ་འཇིགས་པར་བྱའོ། །ངན་

66-1-46a

སོང་རྣམས་ལ་འཇིགས་པའི་ཕྱིར་བག་མེད་པ་ཀུན་དུ་བསྟེན་པར་མི་བྱེད་དོ། །ལུས་དང་ངག་དང་ཡིད་ཀྱི་མི་དགེ་བའི་ལས་རྣམ་པ་གསུམ་པོ་རྣམས་མི་བྱེད་དོ། །དེ་ཉིན་གཅིག་བཞིན་དུ་རྟག་པར་ཡང་དག་པ་རྣམས་ནི་བྱེད་པ་
འང་ཡིན་ལ་མི་དགེ་བ་ཡང་སྤོང་བར་བྱེད་དོ། །དེ་དེ་ལྟར་ན་ངན་སོང་གིས་འཇིགས་པ་རྣམས་ཀྱིས་རྣམ་པར་འཇིགས་པ་ཡིན་ནོ། །ཇི་ལྟར་སྐྱེས་བུ་འགའ་ཞིག་རང་གི་སྟོབས་དང་གཞན་གྱི་སྟོབས་རྣམས་ཀྱི་དེ་ཁོ་ན་ཉིད་མཐོང་བ། དུག་དང་གཅན་ཟན་
དང་མེ་དང་མཚོན་ཆ་དང་གཡང་ས་དག་དང་སྲོག་གི་བར་ཆད་བྱེད་པར་འགྱུར་བ་རྣམས་ལས་རྣམ་པར་གཞིག་པར་བྱེད་པ་ཡིན་ནོ། །དེ་བཞིན་དུ་ཐབས་མ་ཡིན་པ་རྣམས་ཀྱིས་འཇིགས་པའི་ཕྱིར་ནི་འབྱུང་བར་འགྱུར་བའི་ཆོས་རྣམས་ལས་རྣམ་པར་
གཞིག་པར་བྱེད་དོ། །རྟག་ཏུ་ཡོངས་སུ་སྤོང་བར་བྱེད་པ་དང་། མི་དགེ་བ་རྣམས་ལས་ཕྲ་མོ་ཙམ་ཡང་མི་བྱེད་དོ། །བག་མེད་པ་དག་ལ་ཡང་མི་བསྟེན་ནོ། །དེ་ཡོངས་སུ་སྤངས་པར་གྱུར་པ་ལས་ཀྱང་ལྷ་དང་མི་རྣམས་སུ་ལོངས་སྤྱོད་རྣམས་
ལ་རྗེས་སུ་སྤྱད་ཅིང་མྱ་ངན་ལས་འདས་པའི་གྲོང་ཁྱེར་རྗེས་སུ་བཙལ་ནས་འདི་ཡང་མྱ་ངན་ལས་འདས་པར་ཅི་ནས་ཀྱང་འགྲོ་བར་འགྱུར་རོ། །དྲི་མ་མེད་པ་མི་གཡོ་བ་ཟག་པ་མེད་པའི་བདེ་བའི་མཆོག་རྣམས་ཐོབ་པར་བྱེད་དོ། །དེའི་ཕྱིར་ན་
རྟག་ཏུ་ཡང་ངན་སོང་གིས་འཇིགས་པར་བྱའོ། །དེ་ལྟར་བྱས་པར་གྱུར་ན་དགེ་སྦྱོང་ངམ་བྲམ་ཟེ་འམ་དེ་དང་འདྲ་བ་རྣམས་ཀྱང་རུང་སྟེ། གོ་འཕང་གི་མཆོག་ཐོབ་པར་འགྱུར་རོ། །འདི་ལ་ཡང་ཚིགས་སུ་བཅད་པའི་དབྱངས་ཀྱིས་
བསྙད་པ། སྐྱེས་བུ་ཐབས་མིན་པས་འཇིགས་པ། །བག་མེད་སྟོབས་ནི་སྤོང་བ་པོ། །དགེ་བ་སྤྱོད་ཅིང་ཡོན་ཏན་ཚོལ། །མྱ་ངན་འདས་པ་རྟོགས་པར་འགྱུར། །གང་ཞིག་ཐབས་མིན་པས་འཇིགས་པ། །དེ་ཡི་སེམས་ནི་རྣལ་ཏུ་
གནས། །མཉམ་པར་བཞག་པའི་སེམས་ཀྱིས་ནི། །བདེ་བ་ནས་ནི་བདེ་བ་འཐོབ། །གང་ལ་ངན་སོང་འཇིགས་པ་མེད། །དེ་ནི་སྡིག་པའི་མེས་བསྲེགས་ནས། །ཕྱི་ནས་དམྱལ་བ་ཐོབ་པར་འགྱུར། །མེ་སྟག་ཤིན་དུ་ཕྲ་བས་ཀྱང་། །

66-1-46b

ཇི་ལྟར་རུང་བར་སྲེག་པ་ཡིན། །དེ་བཞིན་སྡིག་པ་ཆུང་ངུས་ཀྱང་། །སྡིག་པའི་བློ་མེད་དམྱལ་བར་འགྲོ། །དེ་ཕྱིར་བདེ་བ་འདོད་པ་ཡིས། །ངན་སོང་གིས་ནི་འཇིགས་པར་བྱ། །དེས་ཀྱང་མི་རྣམས་ཀུན་དུ་སྐྱོབ། །སྡིག་ལས་
བདེ་བ་འབྱུང་བ་མིན། །དེ་ལྟར་ཆོས་གཞན་འདི་བྱ་སྟེ་ལྷ་དང་མི་རྣམས་སམ་དགེ་སྦྱོང་དང་བྲམ་ཟེ་འམ་དེ་དག་དང་འདྲ་བ་གཞན་རྣམས་ཀྱིས་ཀྱང་རུང་སྟེ་ཆོས་གཞན་པོ་འདི་དག་རྣམས་བྱའོ། །གང་དག་འཇིགས་པར་གྱུར་
པ་རྣམས་ནི་དེའི་ཡིད་ལས་སྐྱེས་པར་གྱུར་པའི་སྡིག་པ་ཆུང་ངུ་ནི་རྣམས་ཀྱང་དུས་དེ་ཉིད་དུ་བཤགས་པར་བྱེད་དོ། །རྗེས་སུ་ཡི་རང་བ་མི་བྱེད་ཅིང་ཕྱིས་ཡང་མྱི་བྱེད་དོ། །སེམས་པར་ཡང་མི་བྱེད་དོ། དེའི་འབྲས་བུ་དམྱལ་བ་
དང་ཡི་དགས་དང་དུད་འགྲོའི་སྡུག་བསྔལ་རྣམས་ཡིད་ལ་བྱས་ཤིང་རྟོགས་པ་ཡིན་ནོ། །དེ་ལྟར་ངན་སོང་གིས་འཇིགས་པ་རྣམ་པ་གསུམ་པོ་དེ་དག་རྣམས་བཅུར་ཕྱེ་བས་ནི་མི་དགེ་བ་བཅུའོ། །རྣམ་པར་སྤོང་བར་བྱེད་ཅིང་བྱེད་
པ་ཡང་མ་ཡིན་ནོ། །རྗེས་སུ་ཡི་རང་བར་མི་བྱེད་དོ། །དེ་བྱེད་པ་རྣམས་དང་ལྷན་ཅིག་ཏུ་འདྲེ་བར་མི་བྱེད་དོ། །དེ་ནི་སྡིག་པ་རྣམས་ཐམས་ཅད་རྣམ་པར་སྤངས་པའི་སྐྱེས་བུ་དམ་པ་དགེ་བར་སྤྱོད་པ་རྣམ་པར་དག་པར་སྤྱོད་པ་དྲི་མ་མེད་
པ་བག་མེད་པ་རྣམ་པར་སྤངས་པ། སྡིག་པ་རྣམས་ཀྱིས་བྱས་པའི་སྲིད་པའི་བརྗེ་བསོར་མི་དགེ་བའི་ལས་རྣམས་ཐམས་ཅད་ནས་སོ་སོར་སྤངས་པ་སྐྱོན་ཐམས་ཅད་ལས་ཡོངས་སུ་གྲོལ་བ་ཡིན་ནམ་སྐྱོན་ཐམས་ཅད་ལས་
ཡོངས་སུ་གྲོལ་བ་རྣམས་དང་ཉོན་མོངས་པ་རྣམས་ཐམས་ཅད་ལས་རྣམ་པར་གྲོལ་བ་རྣམས་དང་རྣལ་དུ་གནས་པའི་རྣོན་པོ་རྣམས་ནི་སྲིད་པའི་ཆུ་བོའི་ཕ་རོལ་ཏུ་འགྲོ་བར་འགྱུར་རོ། །དེའི་ཕྱིར་འདི་ལྟར་བསླབ་པར་བྱ་
སྟེ། རྟག་ཏུ་ངན་སོང་གིས་འཇིགས་པ་རྣམས་གོ་བར་བྱའོ། །ཆོས་གཞན་འདི་ནི་འདོད་པ་སྡུག་པ་ཡིད་དུ་འོང་བ་སེམས་ཅན་རྣམས་ཐམས་ཅད་ཀྱང་མྱ་ངན་ལས་འདས་པའི་མཐར་ཐུག་པར་བྱེད་པ་ཡིན་ནོ། །གཞན་ཡང་

66-1-47a

བཅོམ་ལྡན་འདས་དེ་ཉིད་ཀྱིས་ལྷ་དང་མི་རྣམས་ལ་ཕན་པ་དང་བདེ་བའི་དོན་དུ་བག་མེད་པ་རབ་ཏུ་གཞོམ་པར་བྱ་བ་དང་མྱ་ངན་ལས་འདས་པ་ཐོབ་པར་བྱ་བའི་དོན་དུ་ཡང་ཆོས་བསྟན་པ་བདག་མིར་གྱུར་པ་ན་ཐོས་པ་གང་
ཡིན་པ་དེ་དག་ངས་དྲན་པ་དང་རྗེས་སུ་འབྲེལ་པ་རྣམས་ལྷ་རྣམས་ལ་བསྟན་པར་བྱ་བའོ། །འདི་ཡང་གང་ཞེ་ན། འདི་ལྟ་སྟེ་བཟོད་པའོ། །བཟོད་པ་ཞེས་བྱ་བའི་ཆོས་རྣམས་མི་མཆོག་ཏུ་དགེ་བ་དང་། ཤིན་དུ་བདེ་ལེགས་སུ་གྱུར་པ་
དང་། མཆོག་ཏུ་སངས་རྒྱས་ཀྱིས་བསྔགས་པ་ཡིན་ནོ། །བཟོད་པ་དེ་ཡང་རྣམ་པ་གཉིས་ཡིན་ཏེ། གང་ཡང་ཆོས་མཉམ་པ་ཉིད་ཀྱི་ལམ་དུ་འགྲོ་བའི་བསམ་གཏན་པ་རྣམས་ཀྱི་དཀར་པོའི་ཆོས་རྣམས་ལ་ངེས་པར་བརྟན་པའི་ཕྱིར་ཆོས་
ཉིད་ལ་བརྟན་པར་གྱུར་པ་རྣམས་བསམ་གཏན་གྱི་ལམ་གྱི་དགེ་བའི་ཁྱད་པར་གྱིས་ཀྱང་བཟོད་པ་བྱེད་པའི་བཟོད་པ་ནི། དེ་ལྟར་འདིར་ཡང་བྲག་དང་ནགས་ཚང་ཚིང་དུ་མ་དང་བཅས་པའི་འཇིག་རྟེན་མ་ལུས་པ་འདི་དག་རྣམས་ས་གཞིའི་སྟེང་ན་
གནས་པར་གྱུར་ཡང་བཟོད་པར་བྱེད་དོ། །འབྱིང་བར་ཡང་མི་འགྱུར་རོ། །དེ་བཞིན་དུ་བཟོད་པས་ཀྱང་མྱ་ངན་ལས་འདས་པའི་ཆོས་རྣམས་ཐོབ་པར་བྱེད་པའི་ཆོས་རྣམས་ཐམས་ཅད་ལ་བརྟན་པ་དང་སྙིང་པོ་དང་ཆོས་ཉིད་དང་ཁྱད་པར་དུ་དང་། གཙོ་
བོ་དང་དཀར་པོའི་ཆོས་རྣམས་དང་མྱ་ངན་ལས་འདས་པའི་ལམ་ཐོབ་པར་འགྱུར་བ་རྣམས་ཀྱིས་ཀྱང་བཟོད་པར་བྱེད་དོ། །བཟོད་པ་འདི་དག་ཉིད་བརྟན་པ་དང་ལྡན་པའི་ལམ་མདུན་དུ་བསར་བའི་འཇིག་རྟེན་ལས་འདས་པ་ཡིན་པ་གང་གི་
ཕྱིར་མྱ་ངན་ལས་འདས་པ་ཐོབ་པར་བྱེད་པ་ཡིན་ནོ། །གཞན་ཡང་བཟོད་པ་གཉིས་པ་ཡོད་དོ། །འདི་ལྟ་སྟེ་གང་འགའ་ཞིག་དགེ་སྦྱོང་ངམ་བྲམ་ཟེ་འམ་རྣམ་པ་དེ་ལྟ་བུ་གཞན་དག་རྣམས་ཀྱང་ཁྲོ་བ་སྐྱེས་པར་གྱུར་པའི་དུག་འཇོམས་པར་
བྱེད་དོ། །ཁྲོ་བའི་འབྲས་བུ་རིག་པར་གྱུར་ནས་ཁྲོ་བ་དེའི་གོ་སྐབས་འབྱེད་པར་མི་བྱེད་དོ། །དེ་ལ་ཁྲོ་བ་ཉིད་སྐྱེས་པར་གྱུར་ན་དེ་སྲིད་དུ་སྐྱེས་བུ་རང་ཉིད་ཀྱི་རྟེན་སྲེག་པར་བྱེད་དོ། །བཞིན་འགྱུར་བར་བྱེད་དོ། །ཁྲག་རྣམས་ངོར་ལྡོག་

66-1-47b

པར་བྱེད་དོ། །གཞན་ལ་བག་མེད་པ་གོ་བར་བྱེད་དོ། །འཇིག་རྟེན་པ་འཇིགས་པ་སྐྱེད་པར་བྱེད་དོ། །ཡུལ་ལྗོངས་པ་རྣམས་ཐམས་ཅད་དང་ཡང་མི་མཐུན་པ་དང་ཡིད་དུ་མི་འོང་བ་དང་སྒེ་བར་ཡང་བྱེད་པར་འགྱུར་རོ། །ཕྱི་ནས་ལུས་ཞིག་
པར་གྱུར་ནས་ཀྱང་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བའོ། །གང་དག་ཁྲོ་བས་ཟིལ་གྱིས་མནན་པའི་སྐྱེས་བུ་རྣམས་ཀུན་དུ་སྤྱོད་པར་བྱེད་པ་ལས་བྱ་བ་མ་ཡིན་པ་གཞན་དེ་ནི་ཡོད་པ་མ་ཡིན་ཞིང་བྱེད་པ་ཡང་མ་ཡིན་ནོ། །དེའི་
ཕྱིར་ཁྲོ་བ་འདི་དག་མེ་བཞིན་དུ་བརྟན་པ་དག་གིས་ཡོངས་སུ་སྤང་བར་གྱིས་ཤིག །ཕན་པ་བྱེད་པའི་སྐྱེས་བུ་དེ་དག་རྣམས་ཀྱིས་ནི་རྣམ་པ་དེ་ལྟར་སྐྱོན་གྱི་འབྲས་བུ་རྣམས་རྟོགས་ནས་རང་ལ་ཕན་པ་དང་གཞན་རྣམས་ལ་ཕན་པ་ལ་རབ་
ཏུ་ཞུགས་པས་བཟོད་པ་བྱེད་ཅིང་འཇིལ་བར་བྱེད་དེ། ཇི་ལྟར་སྐྱེས་བུ་འགའ་ཞིག་གི་ཁྱིམ་ལ་མེ་ཤོར་བར་གྱུར་ན་མེ་ཞི་བར་བྱེད་པ་ལྟར། ཡེ་ཤེས་ཀྱི་ཆུ་དག་གིས་བློ་དང་ལྡན་པ་རྣམས་ཁྲོ་བ་ཀུན་ནས་ཞི་བར་བྱེད་པའི་བཟོད་པ་ཕུན་
སུམ་ཚོགས་པ་མཆོག་ཏུ་དགེ་བའི་ཡིད་ཅན་དང་། བཟོད་པ་དང་ལྡན་པ་ཁྲོ་བ་རྣམ་པར་སྤངས་པའི་སྐྱེས་བུ་ལ་སྐྱེ་བོ་རྣམས་ཐམས་ཅད་དང་མཐུན་པར་འགྱུར་རོ། །ཡིད་དུ་འོང་བ་དང་མཐོང་ན་དགའ་བར་ཡང་འགྱུར་རོ། །མཆོག་ཏུ་ཡིད་
ཆེས་པའི་ས་དང་བཞིན་གྱི་མདངས་རབ་ཏུ་དང་བ་དང་སེམས་རབ་ཏུ་དང་བར་ཡང་འགྱུར་རོ། །སེམས་ཤིན་དུ་ལེགས་པར་གནས་པ་དང་མཆོག་ཏུ་དགེ་བའི་བསམ་པ་དང་ལྡན་པར་འགྱུར་རོ། །ལུས་ཀྱི་ཉེས་པ་དང་བྲལ་བ་དང་ངག་གི་སྐྱོན་དང་
བྲལ་བ་དང་ཡིད་ཀྱི་གདུང་བ་དང་བྲལ་བ་དང་ངན་འགྲོའི་འཇིགས་པ་དང་བྲལ་བ་དང་ཞེ་འགྲས་པའི་སྐྱེ་བོ་རྣམས་དང་བྲལ་བ་དང་དགྲ་རྣམས་དང་བྲལ་བ་དང་མི་སྙན་པའི་དྲི་མ་རྣམས་དང་བྲལ་བ་དང་གནོད་སེམས་དང་བྲལ་བ་དང་སྙིང་
ལ་ཀུན་ཏུ་གཅགས་པ་དང་བྲལ་བ་དང་རྒྱལ་པོའི་ཆད་པའི་འཇིགས་པ་རྣམས་དང་བྲལ་བ་དང་མ་བསྲུངས་པའི་ཚིག་ངན་པ་རྣམས་བརྗོད་པའི་འཇིགས་པ་དང་བྲལ་བ་དང་ཀུན་ནས་འགྱེད་པའི་འཇིགས་པ་དང་བྲལ་བ་དང་། ཀུན་ནས་

66-1-48a

བརྗོད་པའི་འཇིགས་པ་དང་བྲལ་བ་དང་རྙེད་པའི་འཇིགས་པ་དང་བྲལ་བ་དང་སྡུག་བསྔལ་གྱི་འཇིགས་པ་དང་བྲལ་བ་དང་རྒྱགས་པའི་འཇིགས་པ་རྣམས་དང་བྲལ་བའི་སྐྱེས་བུ་ཡོན་ཏན་ཐམས་ཅད་དང་ལྡན་པར་འགྱུར་རོ། །
འགྲོ་བ་ཐམས་ཅད་དུ་འདི་སྙན་གྲགས་དང་ཡང་མི་འབྲལ་བར་འགྱུར་རོ། །འཇིག་རྟེན་འདི་དང་ཕ་རོལ་གཉིས་ཀར་སོང་བ་ན་ཡང་སྐྱིད་པར་ཡང་འགྱུར་རོ། །སྐྱེ་བོ་རྣམས་ཐམས་ཅད་ཀྱི་ཡང་མ་དང་ཕ་དག་ཏུ་རུང་བར་འགྱུར་རོ། །ཀུན་ཀྱིས་
འདྲུལ་འཇུག་བྱ་བར་ཡང་འགྱུར་རོ། །སྐྱེས་བུ་དམ་པ་བཟོད་པ་དང་ལྡན་པར་ཡང་འགྱུར་རོ། །དེའི་ཕྱིར་ཁྲོ་བ་གཞན་འདི་ནི་བཙན་དུག་དང་མཚོན་ཆ་དང་རླུང་ཚུབ་དང་མཚུངས་པའི་ཁྲོ་བ་གང་ཡིན་པ་རྣམས་བཟོད་པས་ཞི་བར་བྱེད་དོ། །
མཐོལ་བར་བྱེད་པ་དང་བཟོད་པར་བྱེད་པ་དང་སྡོམ་པར་ཡང་བྱེད་དོ། །བཟོད་པ་དེ་ཡང་སྐྱེས་བུ་དམ་པ་དགེ་བར་འདོད་པ་རྣམས་ཀྱིས་ཡིད་ལ་བྱ་སྟེ། རིན་པོ་ཆེ་བཞིན་དུ་ཡོངས་སུ་སྐྱོངས་ཤིག །དེ་ཡང་ཕ་རོལ་ཁྲོ་བས་རྣམ་པར་
བསྲེགས་པ་རྣམས་དང་ཁྲོ་བའི་མུན་པ་ན་ཀུན་ནས་གནས་པ་དེ་དག་རྣམས་ལ། དམ་པའི་ཆོས་ཀྱི་སྒྲོན་མ་རབ་ཏུ་སྤོར་བར་བྱེད་པ་དང་། དམུས་ལོང་རྣམས་ཀྱི་ནི་མིག་ཏུ་གྱུར་པའོ། །དམ་པའི་ཆོས་ཀྱིས་ཕོངས་པ་རྣམས་ལ་ནི་ཆོས་ཀྱི་རྫས་
སོ། །ལོག་པའི་ལྟ་བས་དབུལ་བ་རྣམས་ནི་འཇོམས་པར་བྱེད་པ་ཡིན་ནོ། །མ་དང་ཕས་སྤངས་པ་རྣམས་ལ་ནི་མ་དང་ཕར་གྱུར་པ་ཡིན་ནོ། །ཁྲོ་བའི་ཆུར་རབ་ཏུ་བྱིང་བར་གྱུར་པ་རྣམས་ཀྱི་རྐྱལ་བར་གྱུར་པས་རྟག་ཏུ་ཕན་འདོགས་པར་བྱེད་
པ་ཡིན་ནོ། །ངན་སོང་དུ་རབ་ཏུ་ལྟུང་བ་རྣམས་ལ་ནི་ལག་པ་བརྐྱང་བས་ཤིན་དུ་བརྟན་པོས་ལེགས་པར་འདྲེན་པར་བྱེད་པའོ། །སེམས་ཅན་ཁྲོ་བས་ཟིན་པས་དམྱལ་བའི་མེ་མདག་ཏུ་རབ་ཏུ་ལྷུང་བར་གྱུར་པ་རྣམས་ལ་ནི་ཆུའི་བྱ་བ་བྱེད་པ་
ཡིན་ནོ། །ཡི་དགས་ཀྱི་འཇིག་རྟེན་ཏུ་རབ་ཏུ་རྒྱུགས་པར་གྱུར་པའི་སྐྱེས་བུ་ཕྲག་དོག་དང་ལྡན་པ་རྣམས་བཀྲེས་པ་དང་སྐོམ་པའི་སྡུག་བསྔལ་གྱིས་རྣམ་པར་བཅོམ་པ་རྣམས་ལ་ནི་ཟས་དང་སྐོམ་བཞིན་དུ་བྱེད་པ་ཡིན་ནོ། །དུད་འགྲོའི་

66-1-48b

འགྲོ་བ་དང་རབ་ཏུ་འབྲེལ་བ་དང་ལྡན་པའི་སེམས་ཅན་རྣམས་ཕན་ཚུན་དུ་གསོད་པར་མངོན་པར་དགའ་བ་རྣམས་ལ་ནི་གསོན་པ་ལེགས་པར་སྦྱིན་པར་བྱེད་པ་རྣམས་བཟོད་པ་བསྟེན་ཅིང་བསྒོམས་ལ་ལན་དུ་མང་བྱས་པ་ལས་ཡིན་
པས། དེའི་ཕྱིར་ངན་སོང་གི་འཇིགས་པས་འཇིགས་པར་གྱུར་པའི་སྐྱེས་བུ་དགེ་བ་རྣམས་ཀྱིས་རབ་ཏུ་བརྩོན་པ་མཆོག་གིས་ཡིད་ལ་བྱའོ། །དེ་ནས་དུས་དེའི་ཚེ་ན་རྨ་བྱའི་བདག་པོ་དེ་གཙུག་ལག་གི་ཚིགས་སུ་བཅད་པ་བརྗོད་པ་ཇི་ལྟར། 
བཟོད་པས་བརྒྱན་པའི་སྐྱེས་བུ་ལ། །ནོར་གྱིས་བརྒྱན་པས་བསྒྲུན་དུ་མེད། །ནོར་རྣམས་འཕྲོག་པར་བྱེད་ན་ཡང་། །བཟོད་པ་ཉིད་ནི་ནམ་ཡང་མིན། །བཟོད་པ་དང་ལྡན་སྐྱེས་བུ་ལ། །ལུས་ཅན་ཐམས་ཅད་དགའ་བར་འགྱུར། །ཕྱི་ནས་བདེ་
ལེགས་ལ་སྦྱོར་རོ། །དེ་ཕྱིར་བཟོད་པ་དཀའ་ཐུབ་མཆོག །བཟོད་དང་ལྡན་པའི་སྐྱེས་བུ་ནི། །ཁྲོ་བའི་སྐྱོན་རྣམས་ཐམས་ཅད་སྤངས། །སྐྱེ་བ་འདི་དང་གཞན་དུ་ཡང་། །དགེ་ལེགས་ལ་ནི་རབ་ཏུ་སྦྱོར། །བཟོད་པའི་ནོར་དང་ཚུལ་ཁྲིམས་ནོར། །
ཤེས་རབ་ཀྱང་ནི་ནོར་ཉིད་ཡིན། །ནོར་དེ་རྣམས་ནི་བསྔགས་པ་ཡིན། །དབྱིག་ལ་སོགས་པ་ནམ་ཡང་མིན། །བཟོད་དང་ལྡན་པའི་སྐྱེས་བུ་ནི། །རྟག་ཏུ་དམ་པས་མཆོད་པར་བྱེད། །སྙན་གྲགས་ལ་ཡང་སྦྱོར་བར་འགྱུར། །དེ་ཕྱིར་ཀུན་ནས་
བཟོད་པ་མཆོག །ཁྲོ་བའི་དུག་གི་སྨན་མཆོག་ཏུ། །བཟོད་པ་འདི་ནི་འདོད་པ་ཡིན། །ཁྲོ་བ་བཟོད་པས་ངེས་བཅོམ་པ། །སླར་ཡང་སྐྱེ་བར་མི་འགྱུར་རོ། །མུན་པས་རབ་ཏུ་ཟིལ་མནན་པའི། །བྱིས་པ་རྣམས་ལ་ཁྱད་པར་དུ། །བཟོད་
པའི་ལམ་ནི་རབ་སྟོན་པའི། །སྒྲོན་མའི་བྱ་བ་བྱེད་པ་ཡིན། །དམ་ཆོས་ནོར་དང་བྲལ་བ་རྣམས། །འགྲོ་བ་ལྔར་ནི་འཁྱམ་པ་ཡིན། །གང་དག་བཟོད་པ་འདི་ཡི་རྫས། །དེ་དག་འཇིག་རྟེན་ནོར་ལྡན་དྲན། །ཁྲོ་བ་ཡི་ནི་མུན་པའི་ཚོགས། །
རྒལ་དཀའ་བ་ཡི་འབྲོག་དགོན་པར། །བཟོད་པའི་ལམ་ཟས་ཟ་མཐོང་བ། །ཡིད་ཅན་རྣམས་ནི་ངེས་པར་སྒྲོལ། །དམ་ཆོས་ལམ་ནི་སྟོན་རྣམས་ལ། །བསྟེན་པར་བྱེད་པ་བཟོད་པ་མཆོག །ངན་སོང་འཇིགས་པས་འཇིགས་

66-1-49a

རྣམས་ལ། །འཇིགས་པ་མེད་པ་བཟོད་པར་བརྗོད། །སྡུག་བསྔལ་རྣམ་པར་འཇོམས་པ་དང་། །མི་རྣམས་བདེ་བ་རྟག་ཏུ་འབྱུང་། །རྟག་ཏུ་བདེ་ལེགས་ཀུན་ཐོབ་པ། །བདེ་ལེགས་མིན་སྤངས་བདེ་ལེགས་ཡིན། །
དེ་ལ་དམ་པ་རྣམས་རྟག་དགའ། །ཡིད་ཆེས་ཡོན་ཏན་བྱེད་པ་ཡི། །དགེ་བ་བཟང་པོ་འབྱུང་བྱེད་དང་། །མི་དགེ་བ་རྣམས་རྣམ་པར་སྤོང་། །སྐྱེས་བུའི་ཐར་པ་ལེགས་སྟོན་དང་། །འཁོར་བའི་འཇིགས་པས་འཇིགས་པར་བྱེད། །མཐོ་རིས་
ཐེམ་སྐས་གྱུར་པ་དེས། །དམྱལ་བའི་མེ་ནི་རྣམ་པར་འཇོམས། །ཡི་དགས་འཇིག་རྟེན་ལ་སྐྱོབ་དང་། །དུད་འགྲོའི་སྐྱེ་གནས་དེས་དེ་བཞིན། །ཡོན་ཏན་ཚོགས་ཀྱིས་རྟག་གང་བའི། །ལུས་ཅན་དེ་རྣམས་ཤིས་པར་འགྱུར། །རབ་
བསྔགས་བདེ་བ་དེས་ཐོབ་པ། །བཟོད་པ་རབ་ཏུ་བརྩོན་པས་ཐོབ། །དེ་ལྟར་བཟོད་པ་ཞེས་བྱ་བའི། །ཆོས་གཞན་འདིར་ནི་བསྟེན་པར་གྱིས། །མཆོག་ཏུ་བདེ་བ་འབྱུང་བར་འགྱུར་བ་དང་ལུས་ཞིག་པར་གྱུར་ནས་ཀྱང་མཐོ་རིས་
བདེ་འགྲོའི་འཇིག་རྟེན་ལྷ་རྣམས་སུ་སྐྱེ་བར་འགྱུར་རོ། །མྱ་ངན་ལས་འདས་པ་ཡང་ཐོབ་པ་ཡིན་ནོ། །དེའི་ཕྱིར་བག་མེད་པ་དང་བྲལ་བར་བྱ་བའི་དོན་དུ་དང་ལྷ་དང་མིའི་འགྲོ་བ་རྣམས་སུ་སྐྱེ་བར་བྱེད་པ་རྣམས་ཀྱིས་བཟོད་པར་བྱའོ། །
གཞན་ཡང་དགེ་ལེགས་ཀྱི་ཆོས་བག་མེད་པའི་དུག་རྣམ་པར་འཇོམས་པར་བྱེད་པ་རྣམས་དགེ་སྦྱོང་ངམ་བྲམ་ཟེ་འམ་དེ་དག་དང་འདྲ་བར་གྱུར་པ་གཞན་དག་རྣམས་ཀྱིས་ཀྱང་བྱའོ། །འདི་ཡང་གང་ཞེ་ན། འདི་ལྟ་སྟེ་བརྩོན་འགྲུས་
སོ། །བརྩོན་འགྲུས་ནི་མཆོག་ཏུ་དགེ་ལེགས་ཀྱི་ཆོས་དགེ་བ་དང་ཡང་དག་པར་ལྡན་པ་ཡིན་ཏེ། ཐར་པའི་ལམ་དུ་འཁྲིད་པའི་བརྩོན་འགྲུས་ཡང་དག་པར་བྱས་ནས། ཡུལ་དང་དུས་སུ་རིགས་པར་བྱས་པར་གྱུར་པ་རྣམས་
ཀྱིས་ནི་ཤིས་པར་འགྱུར་རོ། །འཇིག་རྟེན་དང་འཇིག་རྟེན་ལས་འདས་པ་རྣམས་ལ་ཡང་རིགས་པ་དང་འགལ་བ་མེད་པ་དང་མཐར་ཐུག་པར་སྟོན་པར་གྱུར་པའི་དགེ་སྦྱོང་དང་བྲམ་ཟེ་རྣམས་འཇིག་རྟེན་དང་འཇིག་རྟེན་ལས་

66-1-49b

འདས་པའི་ཆོས་རྣམས་ལ་ཡང་དག་པར་བརྩོན་པ་དང་ལྡན་པས་ཤེས་པར་འགྱུར་རོ། །དུས་སུ་ལྡང་བ་དང་དུས་སུ་ངན་སོ་བར་བྱེད་པའི་གང་ཡུལ་དང་དུས་ཀྱི་ཐབས་ཤེས་པ་གང་ཡིན་པ་དེ་དག་ནི་དགེ་ལེགས་ཀྱི་སྐལ་བ་དང་
ལྡན་པར་འགྱུར་རོ། །བརྩོན་འགྲུས་ཀྱང་སྙོམ་ལས་རྣམས་ཐམས་ཅད་ཉེ་བར་བཅོམ་ནས་ངེས་པར་གནས་སོ། །ཉོན་མོངས་པ་གཞོམ་པ་ལ་བརྩོན་པ་དང་ལྡན་པའི་དགེ་སྦྱོང་དང་བྲམ་ཟེ་དེ་དག་རྣམས་ནི། མཉན་བྱ་དང་རེག་
བྱ་དང་རོ་དང་བསྣམ་པ་དང་ལྟ་བར་བྱ་བ་དེ་དག་རྣམས་བརྩོན་འགྲུས་དང་ལྡན་པར་གྱུར་ནས་ཡིད་ངེས་པར་ཟློག་པར་བྱེད་དོ། །དེ་རྐྱེན་རྣམས་ལས་སྐྱེས་པར་གྱུར་ན་ཡང་ཡིད་ཀྱི་རྣམ་པར་དཔྱོད་པར་བྱེད་ཅིང་སྡོམ་པར་བྱེད་དོ། །
གྲོགས་གཉིས་པ་བརྩོན་འགྲུས་དང་ལྡན་པར་གྱུར་པས། ཡུལ་རྣམས་ཐམས་ཅད་ལས་སེམས་ངེས་པར་ཟློག་པར་བྱེད་དོ། །ཆེས་ཤིན་དུ་མྱུར་བར་སེམས་ཀྱི་ཤུགས་འབྱུང་ཞིང་འབྱུང་བར་གྱུར་པ་རྣམས་དགེ་བའི་བརྩོན་
འགྲུས་ཀྱིས་སོ་སོར་རྣམ་པར་སྤོང་བར་བྱེད་དོ། །ཀུན་དུ་སྡུད་པར་བྱེད་ཅིང་རབ་ཏུ་འགོག་པར་བྱེད་དོ། །ངེས་པར་སྡོམ་པར་བྱེད་དོ། །གང་གི་ཕྱིར་བརྩོན་འགྲུས་ནི་ཆོས་རྣམས་ཐམས་ཅད་ཀྱི་རྩེ་མོར་གྱུར་པའི་ཆོས་ཡིན་ནོ། །དེ་
དང་འགྲོགས་པའི་དགེ་བའི་ཆོས་གང་ཡིན་པ་རྣམས་ནི་ཤིན་དུ་བརྟན་པ་དང་ཉམས་པ་མེད་པ་དང་། འབྲས་བུ་དང་བཅས་པར་འགྱུར་རོ། །བརྩོན་འགྲུས་མདུན་དུ་བདར་བའི་དགེ་བའི་སེམས་ཀྱི་ཡོན་ཏན་ནི་ཡང་དག་པར་
རྫོགས་པའི་བྱང་ཆུབ་ཀྱི་མཐར་ཐུག་པར་འགྱུར་རོ། །དེས་ན་ཡོན་ཏན་རྣམས་རྟོགས་པར་བྱས་ལ་ཐེག་པ་ཆེན་པོ་ལ་ཡང་དག་པར་གནས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་
བྱང་ཆུབ་པར་འདོད་པའི་དགེ་སྦྱོང་ངམ་བྲམ་ཟེ་དེ་དག་རྣམས་ཀྱིས་ཀྱང་དེ་རྗེས་སུ་འཐུན་པའི་བརྩོན་འགྲུས་ལ་གོམས་པར་བྱའོ། །འཇིག་རྟེན་དང་འཇིག་རྟེན་ལས་འདས་པའི་དོན་རྣམས་ལ་ཡང་བརྩོན་འགྲུས་ཉིད་ལྷག་པར་འགྱུར་རོ། །

66-1-50a

སྐྱེས་བུ་འཇིག་རྟེན་པའི་དོན་གང་དག་རྩོམ་པར་བྱེད་པ་ན་ཡང་དེ་དག་རྣམས་ཐམས་ཅད་ཀྱང་ཤིན་དུ་བརྟན་པའི་བརྩོན་འགྲུས་ཀྱིས་བརྩམས་པར་བྱས་ནས་ནི་འབྲས་བུ་མེད་པར་མི་འགྱུར་རོ། །དུས་རིང་དུ་གནས་པ་
དང་གཞན་རྣམས་ཀྱིས་ཉེ་བར་མི་ཆོམས་པ་དང་འཆི་བའི་མཐར་ཐུག་པར་བྱེད་པའི་འཇིག་རྟེན་པའི་འཇིགས་པ་ཆེན་པོ་དང་བཅས་པ་མ་ལུས་པ་རྣམས་བྱུང་དུ་ཟིན་ཀྱང་བརྩོན་འགྲུས་དང་ལྡན་པའི་སྐྱེས་བུ་རྣམས་ནི་སེམས་སྨས་
པར་མི་འགྱུར་རོ། །གཡོས་པར་མི་བྱེད་ཅིང་ན་ཚ་མེད་དོ། །རང་དང་གཞན་གྱི་དོན་རྣམ་པར་ཉམས་པ་ཆེན་པོ་རྣམས་བྱུང་བར་གྱུར་ན་ཡང་ཡི་མུག་པར་མི་འགྱུར་ཞིང་ཡང་དང་ཡང་དུ་དོན་དེ་ཉིད་རྩོམ་པར་བྱེད་དོ། །རྒྱགས་པར་བྱེད་དོ། །
དགྲ་བོ་རྣམས་ཀྱིས་ཀྱང་གདུལ་དཀའ་བར་འགྱུར་རོ། །འདི་དག་གི་དོན་འགའ་ཞིག་གྲུབ་པ་ལ་འཇོམས་པར་མི་འགྱུར་རོ། །དོན་གང་དང་གང་བརྩམས་པ་དེ་དག་རྣམས་རྒྱས་པར་འགྱུར་རོ། །དེ་ལྟར་རེ་ཤིག་འཇིག་རྟེན་པའི་
དོན་རྣམས་ལ་ཡང་དེ་ཤེས་པར་གྱུར་པའི་མཁས་པ་རྣམས་ཀྱིས་བསྔགས་པར་བྱེད་ན། འཇིག་རྟེན་ལས་འདས་པའི་དོན་ཡང་དག་པའི་ཤེས་པ་སྔོན་དུ་བྱེད་པ་རྣམས་ལ་བརྩོན་འགྲུས་གཙོ་བོར་གྱུར་པ་ལ་ལྟ་ཅི་སྨོས། དེའི་
ཕྱིར་ཐམས་ཅད་ལ་གནས་སྐབས་ཐམས་ཅད་དང་དུས་ཐམས་ཅད་དུ་ཡང་ཤེས་པ་སྔོན་དུ་བཏང་བས་ཡུལ་དང་དུས་སུ་འཚམ་པ་དང་རིགས་པ་དང་ལྡན་པས་བརྩོན་འགྲུས་བརྩམ་པར་བྱའོ། །དེ་ལས་མཐར་ཐུག་པའི་བདེ་བ་
རྣམས་འབྱུང་བར་འགྱུར་རོ། །བཟློག་པ་ལས་ནི་བདེ་བ་མ་ཡིན་པ་འབྱུང་བ་དང་དོན་མ་ཡིན་པ་དུ་མ་རྣམས་སུ་འགྱུར་རོ། །དེའི་ཕྱིར་ན་ལོག་པའི་ཤེས་པ་སྔོན་དུ་བཏང་བའི་བརྩོན་འགྲུས་རྣམས་ནི་བརྩོན་འགྲུས་མ་
ཡིན་པར་རིག་པར་བྱའོ། །དེ་ནས་དེའི་ཚེ་རྨ་བྱའི་མངའ་བདག་དེས་གཙུག་ལག་གི་ཚིགས་སུ་བཅད་པའི་དབྱངས་ཀྱིས་བསྙད་པ་ཇི་ལྟར། ཡུལ་དང་དུས་སུ་རིག་པ་ཡི། །བྱ་བ་འང་རབ་ཏུ་བརྩོན་ལྡན་པ། །བརྩོན་འགྲུས་

66-1-50b

རིགས་པས་བརྩམས་གྱུར་པའི། །འབྲས་བུ་འབྲས་དང་བཅས་པར་འགྱུར། །རིགས་པ་ཡུལ་དང་བྱ་བ་བྲལ། །ཆོས་ཀྱིས་ཡོངས་སུ་སྤངས་པ་ཡི། །བྱ་བ་བྱེད་པ་ཉམས་པར་འགྱུར། །བརྩོན་འགྲུས་ཀྱིས་ནི་ཡོངས་སྤངས་པས། 
རིགས་པས་བརྩོན་འགྲུས་རྩོམ་པ་ནི། །མཁས་པ་ཐར་པར་འགྲོ་བ་ཡིན། །ནམ་མཁའ་ལ་ནི་མདའ་འཕངས་བཞིན། །ལྷ་ཡི་འཇིག་རྟེན་དུ་ཡང་འགྲོ། །སྟོབས་དང་སྐྱེས་བུ་བརྩོན་འགྲུས་ཅན། །དགོས་པ་གང་དག་བརྩམ་གྱུར་པ། །དེ་
དག་དེ་ནི་རབ་འགྲུབ་ཅིང་། །རྣམ་བྱང་བར་ཡང་འགྱུར་བ་ཡིན། །འཇིག་རྟེན་འདས་པའི་དོན་འགའ་ཞིག །ལྷ་ཡི་འཇིག་རྟེན་ལས་འདོད་པ། །དེ་ནི་བརྩོན་འགྲུས་ཀྱིས་རབ་འགྲུབ། །བརྩོན་འགྲུས་བྲལ་བས་ནམ་ཡང་མིན། །སྙིང་ལས་
ཆུང་ཞིང་བརྩོན་འགྲུས་བྲལ། །ཆོས་ཀྱང་ཡོངས་སུ་སྤངས་པ་ཡི། །མི་ལ་དཔལ་ནི་རྒྱས་མིན་ཏེ། །ཞིམ་པོར་ཟ་ཞིང་ཟས་ཀྱི་བཞིན། །འཕགས་པའི་ལམ་ནི་ཡན་ལག་བརྒྱད། །ཤེས་པ་ལེགས་པར་ཡོངས་སུ་བསྐྱངས། །བརྩོན་
འགྲུས་ལྡན་པ་སྤྲོ་བ་ཆེ། །འགྲོ་བའི་མཆོག་ཏུ་འགྲོ་བར་འགྱུར། །བརྩོན་འགྲུས་ཀྱིས་ཀྱང་བྱང་ཆུབ་འཐོབ། །བརྩོན་པས་དེ་བཞིན་མཐོ་རིས་དང་། །སངས་རྒྱས་ཉིད་ཀྱང་བརྩོན་ལྡན་པས། །བརྩོན་འགྲུས་དང་མཚུངས་འགྲོ་བ་མེད། །དེ་
ཕྱིར་ཡོན་ཏན་དེ་རྟོགས་ལ། །བརྩོན་འགྲུས་ལྡན་པས་དབང་པོ་ཁྲིད། །བརྩོན་འགྲུས་བརྩམས་པའི་བློ་གྱིས་དང་། །བརྩོན་འགྲུས་མཚུངས་པའི་ནོར་ཡོད་མིན། །དེ་ལྟར་རྣམ་པར་བཀྲ་བ་ཞེས་བྱ་བའི་རྨ་བྱའི་རྒྱལ་པོ་དེས་དགའ་ལྡན་
པའི་ལྷ་དེ་དག་རྣམས་དང་འཐབ་བྲལ་གྱི་ལྷ་དེ་དག་རྣམས་ལ་སྐྱེ་བ་གཞན་རྗེས་སུ་དྲན་པར་གྱུར་པས་གཙུག་ལག་གི་ཆོས་རྣམས་སྟོན་པར་བྱེད་དོ། །ལྷ་དེ་དག་ཉིད་ཐམས་ཅད་ཀྱང་གཙུག་ལག་གི་ཆོས་དེ་དག་རྣམས་ཐོས་པར་གྱུར་
པ་དང་། བག་མེད་པ་རྣམས་དང་བྲལ་བ་དང་རྣ་བ་ཀུན་ནས་ལྷགས་ཤིང་ཡིད་ཀྱང་རྩེ་གཅིག་ཏུ་གྱུར་པས་རྣལ་དུ་ཕེབས་པའི་ལྷ་དེ་དག་རྣམས་ཀྱི་ཡིད་རྣམས་རྟོགས་ནས། རྨ་བྱའི་མངའ་བདག་དེ་གཞན་ཡང་ཤིན་དུ་ལེགས་པར་བརྩམས་

66-1-51a

པའི་བློ་དང་ལྡན་པས་ཤིན་དུ་རབ་ཏུ་རངས་པར་གྱུར་པས་ཆོས་གཞན་སྟོན་པར་བྱེད་པ་ནི། ཐབས་སུ་གྱུར་པ་དང་ལེགས་པ་དང་ཤིས་པ་དང་མྱ་ངན་ལས་འདས་པར་འགྲོ་བར་འགྱུར་བ་རྣམས་ལྷ་དེ་དག་རྣམས་ལ་ཕན་
པའི་དོན་དང་བདེ་བའི་དོན་དུ་སྟེ། གཞན་ལ་ཕན་པ་ལ་རབ་ཏུ་ཞུགས་པའི་བྱང་ཆུབ་སེམས་དཔའ་གཞན་ཡང་ཆོས་ཆེན་པོ་གཞན་ལྔ་པ་ལྷ་དང་མི་རྣམས་ཀྱི་དོན་དང་ཕན་པ་དང་བདེ་བར་འགྱུར་བའོ། །འདི་ཡང་གང་ཞེ་ན། འདི་ལྟ་སྟེ་
ཆོས་སྟོན་པའོ། །ཆོས་སྟོན་པ་ནི་གང་གི་ཕྱིར་སྦྱིན་པ་ཐམས་ཅད་ཀྱི་ནང་ནས་བླ་ལྷག་པ་ཡིན་ཏེ། རྒོད་པ་འདི་དག་ཐམས་ཅད་འཇོམས་པར་བྱེད་པ་ནི། འདི་ལྟ་སྟེ་ཆོས་སྟོན་པར་བྱེད་པའོ། །ཆོས་སྟོན་པ་དང་ཉན་པ་དང་
ཆོས་སྟོན་པ་ལ་གུས་པ་དང་ཆོས་སྟོན་པ་ལ་དང་བ་དང་། ཆོས་སྟོན་པ་ལ་གཅེས་པར་བྱེད་པ་དང་ཆོས་སྟོན་པ་ལ་སྒྲུབ་པ་དང་ཆོས་སྟོན་པ་རྒྱུན་མི་འཆད་པར་བྱེད་པ་དང་དེ་བཞིན་གཤེགས་པས་ཀྱང་ཆོས་བླ་མར་མཛད་པ་ཡིན་
ན་གཞན་ཉན་ཐོས་དང་རང་སངས་རྒྱས་རྣམས་ལ་ལྟ་སྨོས་ཀྱང་ཅི་དགོས། གང་གི་ཕྱིར་ཡོན་ཏན་བཅུ་གཅིག་དང་ལྡན་པར་གྱུར་པའི་ཆོས་སྟོན་པ་ནི་གཅེས་པར་འགྱུར་བ་ཡིན་ནོ། །ཡོན་ཏན་བཅུ་གཅིག་གང་ཞེ་ན། འདི་ལྟ་སྟེ་
ཡུལ་དང་དུས་སུ་རིགས་པ་དང་གོ་བར་འགྱུར་བ་དང་འགལ་བ་མེད་པ་དང་གསལ་བ་དང་རྙེད་པ་དང་བཀུར་བསྟིའི་རྩ་བས་མ་ཡིན་པ་དང་། གདུལ་བྱའི་སེམས་ཀྱི་རྗེས་སུ་འཐུན་པར་ཆོས་སྟོན་པ་དང་། སྦྱིན་པའི་འབྲས་བུ་སླུ་བ་
མེད་པར་སྟོན་པ་དང་ཐེག་པ་ཆེན་པོ་དང་ཡང་དག་པར་ལྡན་པ་དང་འཁོར་བའི་ཉེས་དམིགས་ཀྱི་ཆོས་སྟོན་པ་དང་མཐོ་རིས་སུ་འབབ་པར་འགྱུར་བའི་ཆོས་སྟོན་པ་དང་། ལས་དང་འབྲས་བུ་ཀུན་དུ་སྟོན་པར་བྱེད་པས་སྟོན་པ་སྟེ། དེ་
ལྟར་རྣམ་པ་བཅུ་གཅིག་གིས་ཆོས་སྟོན་པར་བྱེད་པ་ནི་ཉན་པ་པོ་རྣམས་དང་རབ་ཏུ་སྨྲ་བར་བྱེད་པ་རྣམས་ལ་ཡང་གཅེས་པར་འགྱུར་བའི་ཆོས་རྣམས་ཡིན་ནོ། །དོན་དུ་བྱེད་པ་དང་ཡོན་ཏན་དུ་བྱེད་པ་དང་བདེ་བར་བྱེད་པ་དང་མྱ་ངན་ལས་

66-1-51b

འདས་པའི་མཐར་ཐུག་པར་བྱེད་པ་རྣམས་ཇི་ལྟ་ཇི་ལྟར་ཡོངས་སུ་བསྔོ་བར་བྱེད་པ་དེ་ལྟ་དེ་ལྟར་འགྱུར་བ་ཡིན་ནོ། །ཆོས་སྨྲ་བ་ནི་གང་གི་ཕྱིར་རྣམ་པ་སྣ་ཚོགས་པའི་སྦྱིན་པ་འདི་དག་རྣམས་ཐམས་ཅད་ཀྱི་དྲུང་ན་ཡང་དམ་པའི་ཆོས་སྟོན་པའི་
སྦྱིན་པ་ནི་ཤིན་དུ་ལྷག་པ་ཡིན་ནོ། །ལུས་ཅན་རྣམས་ཐམས་ཅད་ལ་ཡང་མྱ་ངན་ལས་འདས་པའི་མཐར་ཐུག་པའི་བདེ་བ་རྣམས་དང་ལྡན་པར་འགྱུར་རོ། །དམ་པའི་ཆོས་སྟོན་པར་བྱེད་པ་དང་ཉན་པའི་ཡོན་ཏན་གཞན་ཡང་ཡོད་
དེ། གང་འགའ་ཞིག་ཆོས་སྒྲོགས་པ་ལ་དད་པ་དང་རབ་ཏུ་དད་པ་དང་ལྡན་པ་དབང་པོ་ཁ་ཕྱེ་བ་བློ་གཙང་བ་གཅིག་ཏུ་དཀོན་མཆོག་གསུམ་ལ་རབ་ཏུ་དང་བའི་བློས་ཁྱིམ་པ་འམ་རབ་ཏུ་བྱུང་བ་ཡང་རུང་སྟེ། དམ་པའི་ཆོས་ཉན་པར་འདོད་
པས་ཁྱིམ་ནས་བྱུང་ནས་ལྷ་ཁང་ངམ་ཀུན་དགའ་ར་བར་འགྲོ་བར་བྱེད་པ་ན། དེ་གོམ་པ་འབོར་བ་དང་གོམ་པ་འབོར་བ་ལ་ཚངས་པའི་བསོད་ནམས་འབྱུང་བར་འགྱུར་རོ། །ཡང་གང་དག་ཆོས་དང་ཆོས་སྨྲ་བ་ལ་ནོར་དག་གིས་མཆོད་པར་བྱེད་པ་
དེས་ནི་དངོས་སུ་སངས་རྒྱས་ལ་མཆོད་པར་འགྱུར་རོ། །དེ་ཇི་ལྟ་ཇི་ལྟར་མཆོད་པ་དེ་དག་ཡོངས་སུ་བསྔོ་བར་བྱེད་པ་ན། དེ་ལྟ་དེ་ལྟར་ཡོངས་སུ་སྨིན་པར་འགྱུར་རོ། །དེ་ཇི་སྲིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་
བར་དུ་འགྱུར་བ་ཡིན་ནོ། །ཆོས་སྟོན་པ་པོ་མཆོད་པར་བྱེད་པ་གང་ཡིན་པ་སྟེ། དེ་ཅིའི་ཕྱིར་ཞེ་ན། ཆོས་བསྒྲགས་པ་ལས་སེམས་ལས་སུ་རུང་བར་འགྱུར་བའི་ཕྱིར་རོ། །དེ་ལས་སུ་རུང་བར་བྱས་པ་ལས་ཀྱང་ཐོག་མ་མེད་པའི་དུས་ནས་
ཞུགས་པར་གྱུར་པའི་མུན་པ་རྣམས་འཇོམས་པར་བྱེད་པའི་ཕྱིར་རོ། །དེ་ལས་གཞན་འགའ་ཞིག་གིས་ཀྱང་སེམས་ལས་སུ་རུང་བར་བྱེད་པ་ནི་མ་ཡིན་ཏེ། ཆོས་སྨྲ་བ་རྣམས་ཇི་ལྟ་བ་བཞི་པོ་རྣམས་ཀྱི་ཡང་ཕན་པ་ལ་ལན་གྱིས་གླན་པར་
སླ་བ་མ་ཡིན་ནོ། །བཞི་པོ་གང་དག་ཞེ་ན་འདི་ལྟ་སྟེ། མ་དང་ཕ་དང་སངས་རྒྱས་དང་ཆོས་སྟོན་པ་པོའོ། །དེ་དག་རྣམས་ལ་བྱིན་པ་ནི་གཞལ་དུ་མྱེད་པར་འགྱུར་རོ། །རྒྱུ་དང་འབྲས་བུ་ལ་ཀུན་དུ་རྨོངས་པ་རྣམས་ནི་ཆོས་བསྟན་པ་ཐོས་

66-1-52a

ནས་རྒྱུ་དང་འབྲས་བུ་ལ་དད་པ་དང་ལྡན་པར་འགྱུར་རོ། །ལོག་པའི་ལྟ་བ་ལ་སེམས་ཀུན་དུ་ཞུགས་པ་རྣམས་ནི་ཡང་དག་པའི་ལྟ་བ་དང་ལྡན་པར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་དང་མི་ཚངས་པར་སྤྱོད་པ་ལ་
དགའ་བ་རྣམས་ནི་ཆོས་བསྟན་པ་དག་ཐོས་ནས་དེ་དག་རྣམས་སྤོང་བར་འགྱུར་རོ། །དེ་དག་རྣམས་ལ་ཆོས་བསྟན་པ་དེས་ཀྱང་ལས་སུ་རུང་བར་བྱས་ནས། མྱ་ངན་ལས་འདས་པའི་མཐར་ཐུག་པར་འགྱུར་རོ། །དེ་ལ་རྒྱུ་དེ་དག་གིས་ན་ཆོས་
སྟོན་པར་བྱེད་པ་པོས་ཕན་བཏགས་པ་ལ་ལན་གླན་འདི་སླ་བ་མ་ཡིན་ནོ། །ལུས་སྦྱིན་པར་བྱེད་པ་པོའི་མ་དང་ཕ་དག་ལ་ཡང་ལན་གླན་པར་བྱ་མི་ནུས་ཏེ། གསོ་བསྐྱེད་བྱེད་པ་པོ་དེ་དག་ཆོས་ལ་རབ་ཏུ་བཀོད་པར་གྱུར་པ་ནི་མ་གཏོགས་ཏེ་
གང་གི་ཚེ་བུས་མ་དང་ཕ་དག་ཆོས་ལ་རབ་ཏུ་འགོད་པར་བྱེད་པར་གྱུར་པ་དེ་ལྟར་ན་ཅུང་ཟད་ཅིག་ཕན་བཏགས་པར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཁམས་གསུམ་ན་ཆེས་ཁྱད་
པར་དུ་འཕགས་པ་འཁོར་བ་ལས་ངེས་པར་ཐར་པའི་འཕགས་པ་ལ་ཡང་ལན་གླན་པར་བྱ་བར་མི་ནུས་པ་སྟེ། དེ་རྟོགས་ཤིང་བསྒྲུབ་པ་ལ་ཀུན་དུ་དགའ་བའི་རྒྱུས་ལན་གློན་པ་རྣམས་ནི་མ་གཏོགས་སོ། །དེ་བཞིན་གཤེགས་པ་ལ་
ཡང་བྱ་བ་བྱས་པར་འགྱུར་ལ་བདག་ཉིད་ཀྱང་བདེ་ལེགས་ལ་སྦྱར་བར་འགྱུར་རོ། །དེ་ནས་དུས་དེའི་ཚེ་རྨ་བྱའི་མངའ་བདག་དེས་གཙུག་ལག་གི་ཚིགས་སུ་བཅད་པའི་དབྱངས་བརྗོད་པ་ཇི་ལྟར། བདེ་ལེགས་མྱ་ངན་འདས་འགྲོ་
བའི། །གང་ཡང་ཆོས་ནི་སྟོན་བྱེད་པ། །དེ་ནི་འབྲེལ་བ་ཀུན་གཅོད་པའི། །ལུས་ཅན་རྣམས་ཀྱི་བླ་མ་ཡིན། །གཏི་མུག་རག་བཞིན་ཞགས་བཅད་ནས། །ཤིས་པ་གཞན་ནི་སྟོན་པར་བྱེད། །ཆོས་རྣམས་རབ་ཏུ་སྟོན་པ་དང་། །
ལམ་སྟོན་པར་ནི་དེ་རབ་བརྗོད། །ཆོས་གང་གིས་ནི་མི་རྣམས་ཀྱང་། །སྲིད་པའི་རྒྱ་མཚོ་ལས་གྲོལ་བ། །དམ་ཆོས་མཆོག་རབ་ཡིན་པར་བརྗོད། །གང་ཡང་འཇིག་རྟེན་ཆོས་མ་ཡིན་གང་ཡང་ལུས་ཅན་རྣམས་ལ་ནི་ཞིང་ནི་བཞི་

66-1-52b

པོ་འདི་རྣམས་ཡིན། །ཐེག་པ་མཆོག་ཏུ་བླ་མེད་དང་། །དབང་པོ་ཚང་བ་དེ་རྙེད་པ། །དེ་ཡི་སྐྱེ་འདི་འབྲས་བཅས་པར། །ལམ་སྟོན་མཛད་པས་གསུངས་པ་ཡིན། །མི་གང་ཆོས་ལ་མི་དགའ་བ། །དེ་ནི་ཕྱི་ནས་འགྱོད་པར་འགྱུར། །རྟག་
ཏུ་རྣམ་པར་ཆགས་པའི་ཡིད། །རྟག་ཏུ་འདོད་པ་རྗེས་སུ་ཚལ། །བུ་དང་ཆུང་མ་ལ་རབ་ཆགས། །ལུས་ཅན་རྣམས་ལ་མཐར་བྱེད་འབྱུང་། །ཀུན་ནས་ཉོན་མོངས་རྟག་ཏུ་འཐུག །སྐྱོན་ནི་དེ་དང་དེ་ཡིས་གང་ངན་སོང་ལ་ནི་
སེམས་འབབ་ཅིང་། །ལུས་ཅན་རྣམས་ནི་སེམས་ཀྱིས་བཅིངས། །གདུལ་བར་དཀའ་དང་དབྱུག་པ་གསུམ། །རྟག་ཏུ་ཡང་ནི་གླགས་གཅོད་པ། །དེ་ཡང་མི་རྣམས་དགྲར་གྱུར་པའི། །སེམས་ཀྱི་དབང་དུ་མ་འགྲོ་དང་། །དགྲ་བོ་ཤིན་ཏུ་
མིག་རྣོ་དེས། །རྣམ་པ་དུ་མར་སྒོམ་པར་བྱེད། །རྨུ་རྒོད་རྟ་ནི་ཇི་ལྟར་བར། །སེམས་དེ་ཆོས་ཀྱིས་ཡང་དག་བྱོས། །དེ་ལྟར་མཆོག་ཏུ་ཟབ་པར་གྱུར་པའི་ཞིང་གི་ཡོན་ཏན་རྣམས་རབ་ཏུ་བསྔགས་ཏེ། ཤེས་པས་ལྷ་དེ་དག་རྣམས་ལ་ཕན་
པར་འདོད་པའི་བྱང་ཆུབ་སེམས་དཔའ་དེ་སྨོན་ལམ་གྱི་དབང་གིས་དེར་སྐྱེས་ནས་གཞན་ལ་ཕན་པ་ལ་རབ་ཏུ་ཞུགས་པས། རྣམ་པ་དུ་མར་ཆོས་བསྟན་པར་གྱུར་ཅིང་ཆོས་ཀྱི་ཡོན་ཏན་རྣམས་ཀྱང་རབ་ཏུ་བསྒྲགས་པར་གྱུར་ཏོ་ཆོས་འདུལ་
བ་དེ་དག་ཐོས་པར་གྱུར་ནས་ཀྱང་ལྷ་དེ་དག་ཡིད་ཆེས་པར་རབ་ཏུ་དང་བ་དང་ཐམས་ཅད་ཀྱང་ཡིད་རྩེ་གཅིག་ཏུ་གྱུར་པས་ཉན་པར་བྱེད་པ་དང་གཏམ་རྗོད་པར་ཡང་བྱེད་དོ། །ཇི་ལྟར་འགལ་བ་མེད་པར་ཆོས་འདི་དག་སྟོན་པར་བྱེད་དོ། །གང་བྱའི་
རྒྱལ་པོ་འདིས་བདག་ཅག་དགའ་ལྡན་པ་རྣམས་ལ་སྟོན་པ་དེ་ནི། དགའ་ལྡན་གྱི་མངའ་བདག་ཉེ་བར་ཞི་བའི་ཆོས་དེ་དང་འདི་ལ་ཡང་འགལ་བར་ཅུང་ཟད་ཀྱང་མེད་ཅིང་ཐ་དད་དུ་བྱ་བ་ཡང་ཅུང་ཟད་ཀྱང་མེད་དོ་སོ་སོ་དང་ཁྱད་པར་དུ་བྱ་བ་
ཡང་ཅུང་ཟད་ཀྱང་མེད་དོ། །ཆོས་འདུལ་བ་འདི་ཐམས་ཅད་ནས་ཡོངས་སུ་བརྟགས་པར་གྱུར་པ་ནི། ཐོག་མ་དང་བར་དང་ཐ་མར་དགེ་བ་དང་མཆོག་ཏུ་རབ་ཏུ་དང་བ་དང་མཆོག་ཏུ་དགེ་ལེགས་སུ་གྱུར་པ་དང་མཆོག་ཏུ་བདེ་ལེགས་ཀུན་དུ་

66-1-53a

འཐོབ་པ་དང་ལྷ་དང་མི་རྣམས་ཐམས་ཅད་ལ་ཕན་པར་བྱེད་པ་དང་ཤིས་པར་བྱེད་པ་ཡིན་ནོ། །དེ་ནས་ལྷ་དེ་དག་གིས་དེ་སྐད་ཅེས་བརྗོད་ནས་སླར་ཉིད་ཀྱང་ཇི་ལྟར་བདག་ཅག་རྣམས་ཐམས་ཅད་ལ་ཕན་པ་དང་བདེ་བ་དང་མྱ་
ངན་ལས་འདས་པའི་མཐར་ཐུག་པར་འགྱུར་བར་ཉི་ཤུ་རྩ་གཉིས་པར་གྱུར་པའི་ཆོས་ཀྱི་རྣམ་གྲངས་འདི་རྨ་བྱའི་མངའ་བདག་གིས་བཤད་དུ་གསོལ། ལྷ་དེ་དག་གི་དྲུང་ནས་ཐོས་པ་དང་། ཕྱིར་ཞིང་ཉིད་ཀྱང་ཆེས་རབ་ཏུ་རངས་པར་གྱུར་
པའི་ཡིད་ཀྱིས་ཏེ། སེམས་རབ་ཏུ་དང་བ་དང་སེམས་ཅན་རྣམས་ཐམས་ཅད་ལ་སྙིང་རྗེས་བརླན་པའི་བློ་དང་ལྡན་པ་དང་གཞན་ལ་ཕན་པ་ལ་རབ་ཏུ་ཞུགས་པར་གྱུར་པས་སླར་ཉིད་ཀྱང་ཉི་ཤུ་རྩ་གཉིས་པར་གྱུར་པའི་ཆོས་ཀྱི་རྣམ་
གྲངས་མཆོག་ཟབ་པའི་ཐེག་པ་ཆེན་པོ། མཆོག་ཏུ་རྒྱ་ཆེ་བའི་བདེ་ལེགས་ཀུན་ནས་ཐོབ་པར་བྱེད་པ་ལ་སྟོན་པར་བྱེད་པ་ལ་འདི་ལྟ་སྟེ། ཆོས་གཞན་འདི་ནི་མཆོག་ཏུ་ཐར་པར་བྱེད་པ་ཡིན་ཏེ་མཆོག་ཏུ་རྒྱ་ཆེ་བ་དང་། སྐྱེ་བོ་
རྣམས་ཐམས་ཅད་དགའ་བར་བྱེད་པ་ནི་འདི་ལྟ་སྟེ་སྙིང་རྗེ་བའོ། །སྙིང་རྗེས་ཞེས་བྱ་བའི་ཆོས་ནི་སྐྱེ་བོ་རྣམས་ཐམས་ཅད་ཀྱི་ཡིད་དུ་འོང་བ་དང་སྐྱེ་བོ་རྣམས་ཐམས་ཅད་ཀྱིས་ཡིད་ཆེས་པར་བྱེད་པ་དང་། འཁོར་བའི་འཇིགས་པས་
འཇིགས་པ་རྣམས་ཀྱི་ཡིད་ཆེས་པའི་ས་གཞི་དང་། ལེགས་པར་བསྡམས་པའི་ཡིད་ཅན་རྣམས་ཀྱི་མྱ་ངན་ལས་འདས་པ་དང་། སྐྱོབ་པ་མེད་པ་རྣམས་ཀྱི་སྐྱབས་ཀྱི་ས་ཡིན་ནོ། །གང་ལ་སྙིང་རྗེ་ཡོད་པ་དེ་ལ་མྱ་ངན་ལས་འདས་པ་
ཧ་ཅང་རིང་བ་མ་ཡིན་ནོ། །གཡོ་ཡང་ཡོད་པ་ཉིད་མ་ཡིན་ཏེ། ཁྲོ་བའི་སེམས་ལས་མངོན་པར་འདས་པ་དང་ཁྲོ་བ་དང་རྣ་རྣམ་པར་བྲལ་བའི་སྙིང་ལ་སྙིང་རྗེས་ཞུ་བའི་སེམས་དང་ལྡན་པའི་སྐྱེས་བུ་རྣམས་ནི་སྙིང་རྗེ་ཞེས་བྱ་བའི་རྒྱན་
ཆེན་པོ་རྣམས་ཀྱིས་བརྒྱན་པ་ཡིན་ནོ། །སྙིང་རྗེ་ཞེས་བྱ་བ་ཡང་གང་གི་ཕྱིར་གནོད་སེམས་ཀྱི་ཉེས་པ་རྣམ་པར་འཇོམས་པར་བྱེད་པའི་ཆོས་ཀྱི་སྙིང་རྗེ་འགྲོ་བར་ལྔར་སྐྱེས་པར་གྱུར་པའི་སེམས་ཅན་རྣམས་ལ་བྱ་བར་བྱའོ། །དེ་ལ་

66-1-53b

རེ་ཤིག་ཐེག་པ་ཆེན་པོ་ལ་རབ་ཏུ་གནས་པའི་བྱང་ཆུབ་སེམས་དཔས་དམྱལ་བ་པ་རྣམས་ཀྱི་དབང་དུ་བྱས་པའི་སྙིང་རྗེ་བསྒོམ་པར་བྱའོ། །ཇི་ལྟར་ཞེ་ན་སེམས་ཅན་དེ་དག་རྣམས་ནི་རང་གི་ལས་ཀྱིས་ཅོ་དྲིས་པ་དང་
སེམས་དགྲར་གྱུར་པས་ཡོངས་སུ་བསླུས་པ་དང་། དཔེ་མེད་པར་གྱུར་པ་རྣམ་པ་དུ་མའི་ཕུར་པ་དང་འགྱུར་བྱེད་དང་ཐོ་བ་དང་ཟངས་ཀྱི་ཁུ་བ་དམར་པོ་དང་གཏུན་ཤིང་དང་ཆུ་ཀླུང་རབ་མེད་དུ་བྱ་རྒོད་དང་བྱ་རོག་གིས་འདྲེད་པར་བྱེད་པ་དང་། 
ནགས་ཚལ་རལ་གྲི་ལོ་མར་འཇུག་པར་བྱེད་པ་དང་། འགྱུར་བྱེད་ཀྱི་ཆུ་ཀླུང་ལ་སོགས་པའི་ཚོར་བ་དྲག་པོ་རྩུབ་པ་དཔེ་མེད་པ་རྣམས་ཀྱིས། ཡང་སོས་དང་ཐིག་ནག་དང་བསྡུས་འཇོམས་དང་ངུ་འབོད་དང་ངུ་འབོད་ཆེན་པོ་དང་ཚད་དང་རབ་ཏུ་ཚ་
བ་དང་མནར་མེད་པའི་མཐར་ཐུག་པའི་ཉེ་འཁོར་གྱི་དམྱལ་བ་རྣམས་དང་། དམྱལ་བ་བརྒྱ་སུམ་བཅུ་རྩ་དྲུག་གི་བརྒྱ་ཕྲག་རྣམས་ལ་འཚེད་པར་བྱེད་གཤག་པར་བྱེད་འབྱེད་པར་བྱེད་འཆུར་བར་བྱེད་དེ། རང་གི་ལས་ཀྱིས་བསླུས་པ་ལས་
ཀྱི་ཞགས་པས་གཟུང་བར་གྱུར་པ་སྲེད་པའི་མེས་ཡོངས་སུ་གང་བའི་ཕྱིར། སྐྱོབ་པར་བྱེད་པ་རྗེས་སུ་ཚོལ་བ་དང་སྐྱབས་རྩད་གཅོད་པར་གྱུར་པས་ཐམས་ཅད་དུ་ཀུན་ནས་རྒྱུག་པར་བྱེད་པ་རྣམས་ལ་འདི་ལྟར་སེམས་བསྐྱེད་པར་བྱ་སྟེ། 
ཅིས་འདི་དག་རྣམས་བདེ་བར་འགྱུར། ཇི་ལྟར་ན་སྐྱབས་སུ་འགྱུར་བ་ཡིན་ན། གང་གི་ཚེ་འདི་དག་རྣམས་ཀྱི་མཆོག་ཏུ་རྩུབ་པའི་སྡུག་བསྔལ་གྱི་རྒྱ་མཚོ་ཆེན་པོ་ལས་བདག་གིས་སྒྲོལ་བར་བྱེད་པར་འགྱུར་ཏེ་སེམས་ཅན་དེ་དག་ལ་དེ་ལྟར་སྙིང་
རྗེ་བར་བྱེད་དོ། །སྙིང་རྗེ་དང་ལྡན་པ་དེ་ཡང་གང་གི་ཚེ་ཤི་བར་གྱུར་པ་དེའི་ཚེ་ལྷ་རྣམས་ཀྱི་མངའ་བདག་དུ་འགྱུར་རོ། །མི་རྣམས་ཀྱི་ཡང་སྟེ་འཁོར་ལོ་སྒྱུར་བའི་རྒྱལ་པོར་འགྱུར་རོ། །སེམས་ཅན་རྣམས་ཐམས་ཅད་ལ་ཡང་འདོད་པ་དང་སྡུག་པ་
ཡིད་དུ་འོང་བ་དང་དགེ་བའི་ཆོས་རྣམས་ལ་རྗེས་སུ་དགའ་བར་ཡང་འགྱུར་རོ། །དེ་ལྟར་དམྱལ་བར་གྱུར་པའི་སེམས་ཅན་རྣམས་ཀྱི་གཟེར་ཟུག་དེ་དང་དེ་དག་རྣམས་དམིགས་ཏེ་སྙིང་རྗེ་བསྐྱེད་པར་བྱའོ། །དེ་ལྟར་ན་མང་དུ་ཆེན་པོར་གྱུར་པ་དང་རྣམ་

66-1-54a

པ་དུ་མ་རྣམས་སུ་ཡང་ཚངས་པའི་བསོད་ནམས་མངོན་པར་འཕེལ་བར་འགྱུར་རོ། །གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་བྱང་ཆུབ་སེམས་དཔར་གྱུར་པ་དགེ་སྦྱོང་ངམ་བྲམ་ཟེ་འམ་བློ་དེ་དག་དང་མཚུངས་པར་གྱུར་པ་
གཞན་ཡང་རུང་སྟེ། བསྐུལ་བའི་བློས་སེམས་ཅན་རྣམས་ལ་ཕན་པ་ལ་གཅིག་ཏུ་མངོན་པར་དགའ་བས། ཡི་དགས་ཀྱི་དབང་དུ་བྱས་ལ་སྙིང་རྗེ་བསྐྱེད་པར་བྱའོ། །སེམས་ཀྱང་འདི་ལྟར་བསྐྱེད་པར་བྱ་སྟེ། ཇི་ལྟར་ཡི་དགས་འདི་དག་རྣམས་ནི། 
ཡི་དགས་ཀྱི་སྐྱེ་གནས་སུ་སྐྱེས་པར་གྱུར་པ། རྣམ་པ་སྣ་ཚོགས་པའི་བཀྲེས་པ་དང་སྐོམ་པས་བསྲེགས་པར་གྱུར་པའི་ལུས་ཅན། ནགས་ཚིག་པ་དང་འདྲ་བའི་ལུས་དང་ལྡན་པ་རྣམས། ཕན་ཚུན་དུ་ཁ་མངོན་དུ་ཕྱོགས་པར་གྱུར་ནས་མངོན་པར་
རྒྱུག་པར་བྱེད་དེ། འབར་བའི་ཕྲེང་བས་རབ་ཏུ་འབར་བར་གྱུར་པའི་ལུས་ཅན་རྣམས། ཐམས་ཅད་དུ་སྐྱབས་རྩད་གཅོད་པར་བྱེད་པས་ཕྱོགས་བཅུར་རྒྱུག་ཀྱང་དེ་དག་རྣམས་ཀྱི་སྐྱབས་ནི་འགའ་ཞིག་ཀྱང་མེད་དོ། །སྡུག་བསྔལ་དེ་དག་རྣམས་
ལས་དགྲོལ་བར་བྱ་ན། ཀྱེ་མ་འདི་དག་རྣམས་བཀྲེས་པ་དང་། སྐོམ་པའི་རང་བཞིན་གྱི་སྡུག་བསྔལ་རྣམ་པ་སྣ་ཚོགས་དེ་དག་རྣམས་ལས་ནམ་ཞིག་ཐར་བ་འབྱུང་བར་འགྱུར། དེ་ལྟར་ཡང་ཡི་དགས་ཀྱི་འཇིག་རྟེན་དུ་སྐྱེས་པའི་སེམས་ཅན་
རྣམས་ཀྱི་དབང་དུ་བྱས་ནས་སྙིང་རྗེ་སྐྱེད་པར་བྱེད་དོ། །གཞན་ཡང་ཐེག་པ་ཆེན་པོ་ལ་ལེགས་པར་རབ་ཏུ་གནས་པ་དེ་ཉིད་ཀྱིས་བྱང་ཆུབ་ཀྱི་སེམས་མངོན་དུ་བྱེད་པས། དུད་འགྲོ་རྣམས་མཐོང་ནས་ཀྱང་སྙིང་རྗེ་བསྐྱེད་པར་བྱེད་དོ། །ཡི་
དགས་རྣམས་ནི་སྡུག་བསྔལ་རྣམ་པ་དུ་མ་དང་ལྡན་པས་ཕན་ཚུན་ཆེས་ལྷག་པར་ལྷང་ཀྱོག་གིས་གསོད་པ་ལ་མངོན་པར་དགའ་བར་གྱུར་པ་ཡིན་ལ། དུད་འགྲོ་ཡང་གནས་གསུམ་དུ་སོང་བ་རྣམས་ལ་འདི་ལྟ་སྟེ། བར་སྣང་དང་
ཆུ་དང་ས་གཞི་ལ་རྒྱུ་བའོ། །ཕན་ཚུན་དུ་ཟ་བར་བྱེད་པའི་དབང་དུ་བྱས་ནས་དེ་དག་རྣམས་ཀྱི་སྲོག་གཏོང་བར་བྱེད་པའི་ཚུལ་ནི་རྣམ་པ་དུ་མ་ཡིན་ནོ། །ཀྱེ་མ་གང་གི་ཚེ་དེ་དག་རྣམས་སྡུག་བསྔལ་རྣམ་པ་དུ་མ་དེ་དག་ལས་གྲོལ་བར་

66-1-54b

འགྱུར་ཞེས། དེ་ལྟར་དུད་འགྲོར་སྐྱེས་པའི་སེམས་ཅན་རྣམས་ཀྱི་དབང་དུ་བྱས་ནས་སྙིང་རྗེ་བསྐྱེད་པར་བྱེད་དོ། །སེམས་བསྐྱེད་པ་དང་ལྷན་ཅིག་ཉིད་དུ་ཚངས་པའི་བསོད་ནམས་འཕེལ་བར་འགྱུར་རོ། །བྱང་ཆུབ་སེམས་དཔའ་
སེམས་དཔའ་ཆེན་པོ་མཆོག་ཏུ་དགེ་བར་གྱུར་པའི་སེམས་དང་ལྡན་པ། སེམས་ཅན་ཐམས་ཅད་ལ་སྙིང་རྗེ་དང་ལྡན་པས་དུད་འགྲོ་རྣམས་ལ་སྙིང་རྗེ་སྐྱེད་པར་གྱུར་ཅིང་། ཤིན་དུ་ཉེས་པར་སྤྱད་པའི་ལས་ཀྱི་འབྲས་བུའི་ས་པ་
རྣམས་མཆོག་ཏུ་སྡུག་བསྔལ་བ་མཆོག་ཏུ་རྩུབ་པར་གྱུར་པའི་འགྲོ་བ་གསུམ་པོ་རྣམས་ལ་སྙིང་རྗེ་བསྐྱེད་ནས་འདོད་པ་ན་སྤྱོད་པའི་ལྷ་དྲུག་པོ་རྣམས་ཀྱི་དབང་དུ་བྱས་ནས་སྙིང་རྗེ་བསྐྱེད་པར་བྱའོ། །ལྷ་རྣམས་ཀྱིས་ཀྱང་རི་དང་སྨན་
ལྗོངས་རྣམས་ལ་དང་ནགས་དང་ཉེ་བའི་ནགས་རྣམས་ལ་ཡང་དཔེ་མེད་པའི་མཐོ་རིས་བདེ་བ་རྣམ་པ་དུ་མ་རྣམས་ཉེ་བར་ལོངས་སྤྱོད་ཅིང་པད་མའི་རྫིང་བུ་དང་ནགས་རྣམས་ལ་བུད་མེད་དང་ལྷན་ཅིག་ཏུ་རྩེ་དགའ་བརྒྱ་སྟོང་ཉེ་བར་ལོངས་སྤྱད་
ནས་ཟས་ཟད་པར་གྱུར་པ་ན་འཆི་འཕོ་བའི་སྡུག་བསྔལ་འབྱུང་ངོ་། །དེའི་རྗེས་ཐོགས་ལ་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །དེའི་ཕྱིར་ན་འཁོར་བ་འདིར་ཤིན་དུ་མཐོ་བརྩམས་པར་གྱུར་པ་དག་
སྲོག་ཆགས་རྣམས་ཀྱིས་ཉེ་བར་ལོངས་སྤྱོད་པར་བྱེད་དེ། སྲེད་པའི་འཆིང་བ་རྣམས་ཀྱིས་ཤིན་དུ་དམ་པར་བཅིངས་ནས་སྔོན་གྱི་མཐའ་དང་ཕྱི་མའི་མཐའ་རྣམས་སུ་ཀུན་དུ་རྒྱུག་པར་བྱེད་ཀྱང་། འདི་དག་གིས་ལམ་དམ་པ་
ཚོལ་བར་བྱེད་པ་ཡང་མ་ཡིན་ནོ། །དེ་ལྟར་ལྷ་རྣམས་ལ་ཡང་འཆི་འཕོ་བའི་སྡུག་བསྔལ་རྣམས་ལ་ཉེ་བར་དམིགས་ནས་སྙིང་རྗེ་སྐྱེད་པར་བྱེད་དོ། །དེ་བཞིན་དུ་མི་རྣམས་ལ་ཡང་སྙིང་རྗེ་སྟེ། རྣམ་པ་སྣ་ཚོགས་པའི་ལམ་
གྱི་འབྲས་བུར་སྐྱེས་པ་རྣམས་དམན་པ་དང་བར་མ་དང་ཁྱད་པར་དུ་འཕགས་པའི་བདེ་བ་དང་སྡུག་བསྔལ་གྱི་འབྲས་བུ་དག་ཉེ་བར་ལོངས་སྤྱོད་པར་བྱེད་པ་རྣམས་དམན་པ་དང་བར་མ་དང་ཁྱད་པར་དུ་འཕགས་པའི་ལས་ལ་ཉེ་བར་

66-1-55a

ཞུགས་པ་རྣམས་སྤྱོད་པ་དང་རབ་ཏུ་རྒྱུ་བར་སྣ་ཚོགས་པ་དང་བསམ་པ་དང་མོས་པ་སྣ་ཚོགས་པ་དང་དབུལ་བས་གཟིར་བ་རྣམས། སྐྱབས་མེད་པ་རྣམས་གཞན་གྱིས་ཟིལ་གྱིས་མནན་པས་ཤིན་དུ་ཡང་གཟིར་བར་
གྱུར་པ་རྣམས་ཡོངས་སུ་ཚོལ་བའི་སྡུག་བསྔལ་གྱི་མཆོག་ཏུ་ཡོངས་སུ་ལོངས་སྤྱོད་པར་བྱེད་པའི་མིའི་འཇིག་རྟེན་དེ་མངོན་པར་མཐོང་ནས་སྙིང་རྗེ་བསྐྱེད་པར་བྱེད་དོ། །འདི་ཡང་མཆོག་ཏུ་དགའ་བར་གྱུར་པ་དང་མྱ་ངན་ལས་འདས་པའི་ཐར་
བར་འགྱུར་བའི་ཆོས་ཡིན་ནོ། །དེ་ལ་དེ་ལྟར་འགྲོ་བ་ལྔའི་སེམས་ཅན་རྣམས་ལ་སྡུག་བསྔལ་ལྔ་ཉེ་བར་དམིགས་པས་ན། ཐེག་པ་ཆེན་པོ་ལ་ཀུན་ནས་རབ་ཏུ་གནས་པ་གང་ཡིན་པའི་དགེ་སྦྱོང་ངམ་བྲམ་ཟེ་དག་གིས་ཀྱང་སྙིང་རྗེ་སྐྱེད་
པར་བྱེད་པ་རྣམས་ནི་ཐམས་ཅད་དུ་ཡང་བདེ་ལེགས་སུ་གྱུར་པའི་མྱ་ངན་ལས་འདས་པ་འཐོབ་པར་འགྱུར་རོ། །དེ་ནས་དེའི་དུས་འདིར་རྨ་བྱའི་རྒྱལ་པོ་དེས་འཁོར་བ་འཇིག་གི་ཚིགས་སུ་བཅད་པའི་དབྱངས་བརྗོད་པ་ཇི་ལྟར། ཀྭ་ཡེ་
ཐེག་ཆེན་ལ་རྟག་ཏུ། །གང་གི་སེམས་ནི་ལེགས་གནས་པ། །དེ་ཡི་སྙིང་རྗེ་རྗེས་འབྲེལ་བ། །མ་ལ་བུ་ནི་ཇི་བཞིན་ནོ། །གང་གིས་སེམས་ཀྱང་མྱོང་མིན་པའི། །སྙིང་རྗེ་ཡིས་ནི་རྣམ་བརྒྱན་པ། །དེ་ཡི་གྲོགས་པོར་འཇིག་རྟེན་འདིར། །
འགྱུར་རོ་སྙན་པས་ཀུན་ཏུ་ཁྱབ། །སྙིང་རྗེས་བརླན་དང་སྐྱོན་དང་བྲལ། །དབང་པོ་ལེགས་པར་གཏད་པ་དང་། །ཡང་དག་ལྟ་བ་རབ་ལྡན་པའི། །ཤིན་དུ་མྱ་ངན་འདས་མི་རིང་། །གང་ཞིག་སྙིང་རྗེས་རྣམ་བརྒྱན་དང་། ། མི་ཡི་འཇིག་རྟེན་ན་དེ་
ལྷ། །སྙིང་རྗེ་ཡིས་ནི་གང་དབུལ་བ། །དེ་ནི་ཤིན་དུ་དབུལ་པོར་འདོད། །གང་ཡང་བསམ་པ་འཇམ་པ་ནི། །མི་བཟང་གསེར་དང་འདྲ་བ་ཡིན། །སྙིང་རྗེ་རིན་པོ་ཆེ་འདི་ནི། །གང་དག་ཡིད་ལ་འཇུག་གྱུར་པ། །སེམས་ཅན་གང་ཡང་
རྟག་རྩོད་ལྡན། །རྟག་ཏུ་ཆོས་ལ་གཞོལ་གྱུར་པ། །དེ་དག་སྙིང་རྗེའི་སྒྲོན་མ་ཡིས། །སྙིང་ནི་ལེགས་པར་རབ་གསལ་བྱ། །གང་དག་དམ་ཆོས་ཆུ་བོ་ནི། །ཉིན་མཚན་མེད་པར་ལྡོག་པ་མེད། །དེ་དག་གནས་སྐབས་ཐམས་ཅད་དུ། །

66-1-55b

སྙིང་རྗེས་མངོན་པར་དགའ་བའི་ཡིད། །སྙིང་རྗེས་བསིལ་བར་གྱུར་པ་ཡིན། །སེམས་ཅན་ཀུན་ལ་ཕན་དགའ་བས། །བདེ་བ་དཔེ་མེད་ལོངས་སྤྱད་ནས། །ཕྱི་ནས་མྱ་ངན་འདས་པར་འགྲོ། །སྙིང་རྗེ་ཐུབ་པས་བསྔགས་པ་ཡིན། །
སྙིང་རྗེ་དྲི་མེད་སྙིང་པོ་ཡིན། །སྙིང་རྗེ་སྐྱོན་རྣམས་འཇོམས་པ་པོ། །སྙིང་རྗེ་ཟད་པ་མེད་པའི་གཏེར། །ཡོན་ཏན་རྒྱན་རྣམས་ཀྱི་ཡང་མཆོག །སྐྱོན་རྣམས་ཐམས་ཅད་རྣམ་འཇོམས་སོ། །སྙིང་རྗེས་བརླན་ཕྱིར་ཐུབ་རྣམས་ཀྱིས། 
གོ་འཕང་བླ་ན་མེད་པར་འགྲོ། །སྙིང་རྗེའི་བཞོན་མ་གང་ལ་ཡོད། །དེ་ནི་མཆོག་གི་འོ་མ་ལྡན། །ཁྲོ་བས་སྲེག་དང་མི་ལྡན་པར། །སྙིང་ལ་ལེགས་པར་རབ་ཏུ་འཇུག །ཐེག་ཆེན་རྐྱལ་པ་ལ་ཞོན་པའི། །བརྩེ་བའི་སྙིང་རྗེ་ལེགས་
གནས་ནས། །སྐྱོན་གསུམ་རླབས་ནི་ཤུགས་པོ་ཆེའི། །སྲིད་པའི་རྒྱ་མཚོ་ལ་སྒྲོལ་བྱེད། །ཡོན་ཏན་རྒྱ་ཆེན་རྣམས་ཀྱི་གཙོ། །ནོར་ནི་མ་ཡིན་པ་ཡི་རྒྱན། །བཟང་པོ་རྣམས་ཀྱིས་རྟག་བརྩེ་བ། །འདིར་ནི་སྙིང་རྗེར་བརྗོད་པ་ཡིན། །
དེ་ལྟར་དེས་ལྷ་དེ་དག་རྣམས་ལ་ཆོས་སྟོན་པར་བྱེད་དོ། །ཐོག་མ་དང་བར་དང་ཐ་མར་དགེ་བར་གྱུར་པ་དང་། ཐམས་ཅད་དུ་འགལ་བ་མེད་པ་དང་རབ་ཏུ་བསྔགས་པ་དང་ཤིས་པ་དང་ལྷ་རྣམས་ཐམས་ཅད་ཉེ་བར་འཕེལ་བར་བྱེད་པར་
འགྱུར་རོ། །གཞན་ཡང་བཅོམ་ལྡན་འདས་དེས་བསྟན་པར་གྱུར་པའི་ཆོས་གཞན་གང་དག་ཡིན་ཞིང་། ཐེག་པ་ཆེན་པོ་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་གང་དང་ཡང་དག་པར་
ལྡན་པས་སྐྱེས་བུ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་འགྱུར་བ་འདི་ཡང་གང་དག་ཞེ་ན། འདི་ལྟ་སྟེ་དུལ་བའོ། །དུལ་བའི་ཆོས་ཀྱང་གང་གི་ཕྱིར་ཡང་བར་གྱུར་པའི་
སྐྱོན་རྣམས་ཡོངས་སུ་སྤངས་པ་དང་ཡོན་ཏན་རྣམས་འཛིན་པར་བྱེད་པ་ཡིན་ནོ། །བསམ་པ་འཇམ་པོ་དང་ལྡན་པའི་སྐྱེས་བུ་ལ་ཡང་དྲི་མ་རྣམས་ཐམས་ཅད་ཡོངས་སུ་སྤངས་པའི་མྱ་ངན་ལས་འདས་པ་ལག་ཏུ་འོང་བར་

66-1-56a

འགྱུར་རོ། །བསམ་པ་འཇམ་པོའི་སྐྱེས་བུ་ཡང་གཅིག་ཏུ་དགེ་བ་བྱེད་པར་གྱུར་པ་དང་སྐྱེ་བོ་རྣམས་ཐམས་ཅད་ཡིད་ཆེས་པར་བྱེད་པར་འགྱུར་རོ། །སྙིང་རྩུབ་པར་གྱུར་པའི་སྐྱེས་བུ་ནི་རྡོ་རྗེ་དང་རྡོ་བ་དང་
མཚུངས་པ་མཁྲེགས་པའི་འཁོན་དམ་པོ་རྣམས་བློ་ལ་བསྡམས་པ་དང་ཀུན་ནས་མ་བསྡམས་པར་རྒྱུ་བ་སྐྱེ་བོ་རྣམས་ཐམས་ཅད་དང་མི་མཐུན་པར་འགྱུར་རོ། །མི་སྡུག་པ་དང་ཡིད་དུ་མི་འོང་བར་འགྱུར་ཏེ། གང་དང་གང་དག་བཟུང་
བར་གྱུར་པ་དེ་དག་འདིའི་སྙིང་ལས་ཡོངས་སུ་མི་འཕོའོ། །གཅིག་ཏུ་དགའ་བར་མི་འགྱུར་ཞིང་། བསམ་གཏན་གྱིས་ཀུན་དགའ་ར་བ་ན་རྒྱུ་བར་མི་འགྱུར་རོ། །དམ་པ་དང་ཀུན་དུ་འདྲེ་བར་འགྲོ་བ་མ་ཡིན་ནོ། །དེ་ལ་ཆོས་འདུལ་བ་རྣམས་
ལེགས་པར་འདོད་པར་མི་བྱེད་དེ། ཇི་ལྟར་གཞན་གྱི་ས་བོན་བཞིན་དང་། ཇི་ལྟར་བྱེ་མ་རྣམས་ལས་འབྲུ་མར་མི་འབྱུང་བ་བཞིན་དུ། དེ་ལྟར་སྐྱེས་བུ་ཁྲོན་མའི་རང་བཞིན་ཅན་སེམས་རྩུབ་པ་དེ་ལ་ཆོས་རྣམས་དེ་ལྟར་མི་འབྱུང་
ངོ་། །ཇི་ལྟར་བ་ལང་གི་རྭ་ལས་འོ་མ་དང་ཟླ་བ་དྲོ་བ་དང་མོ་ཤམ་ལ་བུ་དང་ནམ་མཁའ་ལ་མེ་ཏོག་ཡོད་པ་མ་ཡིན་ནོ། །དེ་བཞིན་དུ་ཁྲོན་མའི་རང་བཞིན་ཅན་དང་། ཁྲོ་བའི་ལས་ཅན་མཆོག་ཏུ་གཡོ་དང་ལྡན་པ་དང་གཡོ་ཅན་
གྱི་རིགས་སུ་གྱུར་པ། བློ་གྲོས་དམན་པ། བདག་ཉིད་ངལ་བར་བྱེད་པ། གཞན་དག་སླུ་བར་བྱེད་པ་སྲིད་པའི་འདམ་དུ་བྱིང་བ་མི་དགེ་བ་རྣམས་སྟེན་པར་བྱེད་པ། དཀོན་མཆོག་གསུམ་སྤངས་པར་གྱུར་པ། ཐེག་པ་
ཆེན་པོ་ལས་ཁ་ཕྱིར་ཕྱོགས་པ། དམུས་ལོང་དུ་གྱུར་པ་དམ་པའི་ཆོས་ཀྱི་ཉི་མ་མིག་གིས་མ་མཐོང་བ། མཆོག་ཏུ་མྱ་ངན་བྱེད་པར་གྱུར་པའི་སྐྱེ་བ་དང་རྒ་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང་སྡུག་
བསྔལ་བ་དང་ཡིད་མི་བདེ་བའི་དགོན་པར་འཁྱམས་པ། མཐའ་ཡས་པའི་སྡུག་བསྔལ་རྣམས་འཇོམས་པར་བྱེད་པའི་བདུད་རྩི་སྤངས་པའི་སྐྱེས་བུ་ངན་པ་སྡུག་བསྔལ་གྱི་ཆུ་བོར་བྱིང་བར་གྱུར་པ་ལ་ནི། མྱ་ངན་

66-1-56b

ལས་འདས་པ་ཉིད་ཡོད་པར་མི་འགྱུར་རོ། །དེ་ཅིའི་ཕྱིར་ཞེ་ན། གང་གི་ཕྱིར་འདིས་མྱ་ངན་ལས་འདས་པ་རྟོགས་པར་འགྱུར་བ་ལེགས་པར་འཐོབ་པར་བྱེད་པའི་ལམ་གྱི་རྒྱུ་ལ་ཡང་མི་འཇུག་པའི་ཕྱིར་རོ། །དེའི་ཕྱིར་འདི་
བདེ་བའི་སྐལ་བ་ཅན་དུ་མི་འགྱུར་རོ། །གང་ཡང་འདུལ་བ་དང་ལྡན་པར་གྱུར་པ་འཇམ་པོའི་ཡིད་ཅན་དེ་དག་རྣམས་ཐམས་ཅད་ནི་མྱ་ངན་ལས་འདས་པ་འཐོབ་པའི་སྐལ་བ་ཅན་དུ་གྱུར་པ་རྣམས་ནི་དེ་དག་ཡིན་ནོ། །དཔེར་ན་
ཏིལ་ལས་ནི་ཏིལ་མར་རོ། །ཉི་མ་ལས་ནི་འོད་ཟེར་རོ། །ཟླ་བ་ལས་ནི་བསིལ་བའོ། །མེ་ལས་ནི་དྲོ་བའོ། །ས་གཞི་ལ་ནི་བརྟན་པ་ཡིན་ནོ། །རྒྱ་མཚོ་ལས་ནི་ཧ་ཅང་མི་གཡོ་བའི་ཆུའོ། །བཏུང་ཆུ་ནི་བསིལ་བའོ། །
འབྱུང་བ་ཆེན་པོ་བཞི་པོ་རྣམས་ནི་བློ་ཀུན་དུ་གནས་པར་འགྱུར་བ་ཡིན་ནོ། །སེམས་འཇམ་པོ་རྣམས་ཀྱང་དེ་ཁོ་ན་བཞིན་དུ་ཡིན་ཏེ། སེམས་ལས་སུ་རུང་བ་དང་དད་པ་དང་ལྡན་པ་དང་རབ་ཏུ་བརྩོན་པ་དང་ལྡན་པ་དང་
ཕྱིན་ཅི་མ་ལོག་པར་སྟོན་པར་བྱེད་པ་དང་རྒྱུ་དང་འབྲས་བུ་ལ་དད་པ་དང་ལྡན་པ་ལ་ནི་མྱ་ངན་ལས་འདས་པ་མདུན་ཉིད་ན་གནས་སོ། །དེ་ནས་དུས་དེར་རྨ་བྱའི་རྒྱལ་པོ་དེས་གཙུག་ལག་གི་ཚིགས་སུ་བཅད་པའི་དབྱངས་
ཀྱིས་བསྙད་པ་ཇི་ལྟར། གང་གི་སྙིང་ནི་བཏུལ་བྱས་པ། །ཞུ་བར་གྱུར་པའི་གསེར་བཞིན་ནོ། །དེ་ནས་ངེས་པར་ཕན་དགེ་བའི། །སྡུག་བསྔལ་ལས་ནི་མྱུར་དུ་འགྲོ། །ཀུན་ནས་ཡོངས་སུ་བཏུལ་བ་ཡིས། །གང་གི་
སེམས་ནི་སྣོད་དུ་བྱས། །དེ་ལ་བདེ་ལེགས་སྐྱེ་འགྱུར་ཏེ། །ཞིང་རྣང་གྱི་ནི་སཱ་ལུ་བཞིན། །སེམས་ཀྱི་ཁྱིམ་གྱི་གཏེར་ལྡན་པ། །ལུས་ཅན་ཀུན་ལ་དེ་མི་བཟད། །མི་རྣམས་གཡོ་སྒྱུ་ཆེན་པོ་ཡིས། །དབུལ་བ་ཀུན་ནས་
འཇོམས་པར་བྱེད། །དབང་པོ་རྣོ་ཞིང་ཞི་བ་དང་། །རྟག་ཏུ་བསམ་གཏན་གྱིས་གནས་ཤིང་། །ཡུལ་རྣམས་ལ་ཡང་བག་དང་ལྡན། །སྡུག་བསྔལ་དག་གིས་གནོད་པ་འང་མེད། །དེ་ལྟར་རྨ་བྱའི་མངའ་བདག་དེས་ཚིགས་སུ་བཅད་པ་

66-1-57a

བརྗོད་པ་ལ་འཐབ་བྲལ་བའི་ལྷ་དང་དགའ་ལྡན་པའི་ལྷ་དེ་དག་རྣམས་ཀྱང་ངོམས་པ་མེད་པས། སླར་ཡང་ཆོས་འདུལ་བ་དེ་ཉིད་ཉན་པར་འདོད་པས་ཐལ་མོ་ཁ་སྦྱར་ཏེ། དམ་པའི་ཆོས་ལ་གུས་པར་འགྱུར་ཞིང་། སླར་ཡང་
ཆོས་ཉན་པར་འདོད་པས་རབ་ཏུ་སྨྲས་པ། འཕགས་པས་བཤད་དུ་གསོལ། རྨ་བྱའི་མངའ་བདག་གིས་བསྟན་དུ་གསོལ། སེམས་དཔའ་ཆེན་པོ་བདག་ཅག་རྣམས་སླར་ཉིད་ཀྱང་གཉིས་ཀྱིས་ལྷག་པའི་ཆོས་ཀྱི་རྣམ་གྲངས་ཉི་ཤུ་པ་
འདི་དག་གང་ཐོས་པར་གྱུར་ནས་བདག་ཅག་རྣམས་མཆོག་ཏུ་བདེ་ལེགས་རྣམས་ཐོབ་པར་འགྱུར་བ་ལགས་སོ། །དེ་ནས་རྨ་བྱའི་མངའ་བདག་རྣམ་པར་བཀྲ་བ་དེ་ཉིད་སླར་ཉིད་ཀྱང་ལྷ་དེ་དག་རྣམས་ཉིད་ལ་ཆོས་ཀྱི་རྣམ་གྲངས་གཉིས་ཀྱིས་
ལྷག་པའི་ཉི་ཤུ་པ་དེ་ཉིད་འཆད་པར་བྱེད་དོ། །འདི་ལྟ་སྟེ་ཆོས་གཞན་འདི་ཡང་ཐེག་པ་ཆེན་པོ་ལ་ལེགས་པར་རབ་ཏུ་གནས་པའི་དགེ་སྦྱོང་ངམ་བྲམ་ཟེ་འམ་དེ་དག་དང་འདྲ་བ་རྣམས་ཀྱིས་ཀྱང་ཡིད་ལ་བྱའོ། །འདི་ཡང་གང་ཞེ་ན། འདི་ལྟ་སྟེ་རབ་
ཏུ་རྟེན་པའོ། །རབ་ཏུ་རྟེན་པ་ཞེས་བྱ་བའི་ཆོས་ནི་ཐམས་ཅད་ནས་ཐམས་ཅད་ལ་མཛེས་སོ། །དེ་དང་ཡང་དག་པར་ལྡན་པའི་དགེ་སྦྱོང་ངམ་བྲམ་ཟེ་འམ་དེ་དག་དང་རང་བཞིན་མཚུངས་པར་གྱུར་པ་གཞན་རྣམས་ཐམས་ཅད་དང་། ཁྱིམ་པ་
འམ་རབ་ཏུ་བྱུང་བ་འམ་གཞན་དག་ཀྱང་བྱིས་པ་འམ་རྒན་པོ་ཡང་རུང་སྟེ། དེ་དག་དང་ཡང་དག་པར་ལྡན་པར་གྱུར་ཅིང་། དེས་རབ་ཏུ་གཡོགས་པ་རྣམས་ནི་མཛེས་པ་ཡིན་ནོ། །དེ་དང་མི་ལྡན་པའི་སྐྱེས་བུ་རྣམས་ནི་ལྕེ་སྤྱང་དང་ཁྭ་ཏ་དང་མཚུངས་
པ་རྣམ་པར་གྱུར་པ་འདྲ་བ་མ་ཡིན་པ་རྣམས་ཡིན་ནོ། །རེ་ཤིག་རབ་ཏུ་རྟེན་པ་འདི་ཡང་རབ་ཏུ་བྱུང་བའི་ཇི་ལྟར་བྱ་ཞེ་ན། རེ་ཤིག་དང་པོ་ཁོ་ནར་རབ་ཏུ་བྱུང་བ་རྣམས་ཀྱིས་རབ་ཏུ་བརྟེན་པར་བྱའོ། །དེ་ནི་རྣམ་པ་བདུན་ཏེ། རྣམ་པ་བདུན་
པོ་འདི་དག་ཀྱང་གང་ཞེ་ན། འདི་ལྟ་སྟེ་ཡུལ་གྱི་རྗེས་སུ་འཐུན་པར་གྱུར་པའི་ཕྱག་དར་ཁྲོད་ཡུལ་གང་དང་གང་ན་ཇི་ལྟ་བུའི་གོས་དང་ཁྱིམ་པ་རྣམས་གྱོན་པར་བྱེད་པ་དེ་ཆེད་དུ་བོར་བར་གྱུར་པ་དང་། དུར་ཁྲོད་ན་གནས་པ་དེ་དག་

66-1-57b

ཀྱང་རབ་ཏུ་བྱུང་བས་བླང་བར་བྱའོ། །དེའི་ཕྱིར་གང་ཡང་དྲི་མ་ཅན་དང་ཧྲུལ་པོ་དང་སྦོམ་པ་དེ་དག་བླང་བར་བྱའོ། །འདི་ནི་ཆོས་གོས་ཀྱི་རབ་ཀྱི་རྟེན་ཡིན་ནོ། །གཞན་ཡང་ལྟ་བ་ལ་རབ་ཏུ་རྟེན་པ་ནི་མིག་རབ་ཏུ་ལྟ་བར་བྱེད་པ་རྣམ་པ་ཇི་
ལྟ་བུ་ཡིན་ན། འདི་ན་གང་དགེ་སློང་དག་གཉའ་ཤིང་གང་ཙམ་དུ་ལམ་དུ་ལྟ་བར་བྱེད་པ་དང་། སྦྱིན་པ་པོ་དང་སྦྱིན་བདག་རྣམས་ཀྱི་ཁྱིམ་དུ་རྗེས་སུ་ཞུགས་པ་ན་ཡང་ས་ལ་ལྟ་བར་བྱེད་དོ། །དེ་ཡང་ན་སངས་རྒྱས་ཀྱི་སྐུ་གཟུགས་ལ་གཅིག་ཏུ་
དྲན་པ་ཉེ་བར་གནས་པར་བྱེད་དོ། །དབང་པོ་གཅིག་ཏུ་བསྡམས་པ་དང་། ལུས་ཐམས་ཅད་ཤིན་དུ་ལེགས་པར་བསྡམས་པ་དང་། དབུགས་དབྱུང་བ་དང་རྔུབ་པ་བགྲང་བར་གྱུར་པས་ལུས་ཀྱི་དབང་དུ་བྱས་ནས་ཀྱང་དྲན་པ་དང་
ལྡན་པས་རྒྱུ་བར་བྱེད་ཀྱི། སྦྱིན་བདག་གི་ཁྱིམ་དུ་རྣམ་པ་ཐམས་ཅད་དུ་ཡང་ཉེ་བར་མཁོ་བའི་སྣོད་སྤྱད་རྣམས་ཡོངས་སུ་སྤྱད་ནས་ལྟ་བར་མི་བྱེད་དོ། །མིག་རིག་རིག་པོར་མི་བྱེད་ཅིང་བུད་མེད་དག་ལ་རབ་ཏུ་རྟོག་པར་མི་བྱེད་དོ། 
བྱིས་པ་ལ་འཁྱུད་པར་མི་བྱེད་ཅིང་ཡང་དང་ཡང་དུ་རྐང་པ་དག་བསྐུཾ་པར་མི་བྱེད་དོ། །ལག་པ་དག་རྣམ་པར་བསྐྱོད་པར་མི་བྱེད་དོ། །སྟན་ལས་རབ་ཏུ་བསྐྱོད་པར་མི་བྱེད་པ་དང་། ལག་པ་ལ་རང་གི་མགོ་བོ་བྱི་བྱད་མི་བྱེད་ལ་ཡང་དང་ཡང་དུ་
ཆོས་གོས་དག་བསྐྱོད་པར་མི་བྱེད་དོ། །ལག་པས་ལག་པ་གནོན་པར་མི་བྱེད་ཅིང་སོར་མོ་བསྐྱོད་པར་མི་བྱེད་དོ། །འདི་ནི་རབ་ཏུ་རྟེན་པ་གཉིས་པ་ཡིན་ཏེ། རྣམ་པ་དེ་ལྟ་བུའི་དགེ་སློང་ནི་ལྟ་བར་བྱེད་པ་ལ་རྟེན་པ་རབ་ཡིན་ནོ། །གཞན་ཡང་
རབ་ཏུ་རྟེན་པ་གསུམ་པ་ཡོད་དེ། དགེ་སློང་སྦྱིན་པ་པོ་དང་ཁྱིམ་བདག་གི་ཁྱིམ་དུ་ཞུགས་པར་གྱུར་ནས། རྐང་པ་གཉིས་བཀྲུས་ལ་ལག་པ་གཙང་མར་བྱས་ཏེ་ལྷུང་བཟེད་བྱི་དོར་བྱའོ། །བྱི་དོར་བྱས་ནས་ཀྱང་དམན་ཞིང་དམན་པའི་
སེམས་ཀྱིས་སྟན་ལ་འདུག་པར་བྱའོ། །བསྡད་ནས་ཀྱང་ཡང་ཡང་རྐང་པ་གཉིས་ཀྱི་བར་ཙམ་གྱི་མདུན་དུ་ལྷུང་བཟེད་ལྕུག་ཀོར་ལ་ལྷུང་བཟེད་གཞག་པར་བྱའོ། །ལག་པ་གཡས་པས་ཀྱང་ལྷུང་བཟེད་བསྲིངས་ལ་ལེགས་པར་བྱ་སྟེ་

66-1-58a

བསོད་སྙོམས་བྱིན་ལེན་བྱའོ། །བླངས་ནས་ཀྱང་དེའི་རྗེས་ལ་སྨན་བཞིན་དུ་དང་ཁམ་ཡང་ཧ་ཅང་ཆེ་བར་མི་བྱའོ། །དེ་ཡང་ཁ་ཧ་ཅང་གདངས་ནས་ཁར་གཞུག་པར་མི་བྱའོ། །སྒྲ་ཆེ་བས་བཟའ་བར་མི་བྱ་ཞིང་མཆུ་ཧ་ཅང་
བསྐྱོད་པར་མི་བྱའོ། །གསུས་པའི་སུམ་ཆ་ཙམ་གྱིས་ཆོག་ཤེས་པར་གྱུར་པར་བྱའོ། །གཞན་དག་གི་ལྷུང་བཟེད་ལ་ཀུན་དུ་བལྟ་བར་མི་བྱའོ། །ཟས་གང་ལ་བརྐམ་ཆགས་བསྐྱེད་པར་གྱུར་པ་དེ་ཡང་བཟའ་བར་མི་བྱའོ། །དེ་ཟོས་པ་གང་
གིས་བག་མེད་པ་གཞན་རྣམས་བྱེད་པར་མི་འགྱུར་བ་རྣམས་སོ། །སྟོན་མོའི་ཡུལ་དང་དུས་ངེས་པར་རྫོགས་པ་དང་གང་གིས་དབང་པོ་རབ་ཏུ་དང་བར་གྱུར་པ་དང་ཤིན་ཏུ་མཉམ་པར་བཞག་པར་གྱུར་པའི་ཡིད་ཀྱིས་ཆོས་བསྟན་པར་བྱ་སྟེ། བློ་མཉམ་
པར་བཞག་པས་དང་ཤིན་དུ་མྱུར་བར་མ་ཡིན་པ་དང་བུལ་བ་མ་ཡིན་པ་དང་དྲང་བ་མ་ཡིན་པ་དང་སྐྱོག་པོ་མ་ཡིན་པ་དང་དོང་བ་མ་ཡིན་པ་དང་ཡུལ་དང་དུས་མངོན་པར་བལྟས་ཏེ། སྦྱིན་བདག་གི་སེམས་རྗེས་སུ་བསྲུངས་པར་འགྱུར་བར་བྱའོ། 
ཇི་ལྟར་འདི་བག་མེད་པ་རྣམས་ཀྱིས་འཇིགས་པར་མི་འགྱུར་བར་བྱའོ། །འདི་ནི་རབ་ཏུ་རྟེན་པ་གསུམ་པ་ཡིན་ནོ། །གལ་ཏེ་ཡང་ཟས་ཐོབ་པར་གྱུར་པ་འདིས་ཅུང་ཟད་ཅིག་མཐོང་བར་གྱུར་པ་གྲོང་ངམ་གྲོང་ཁྱེར་རམ་ཚོང་འདུས་རྣམས་ལ་
དེས་དེ་ཡིད་ལ་མི་བྱའོ། །འདོད་པར་ཡང་མི་བྱའོ། །དེ་ལ་སེམས་སྤྲོ་བ་བསྐྱེད་པར་ཡང་མི་བྱའོ། །ས་འཚམས་རིགས་པ་མ་ཡིན་པར་ཀུན་དུ་གོ་བར་བྱེད་པའི་གནས་མལ་རྣམས་ལ་བརྟགས་ཏེ་འདུག་པར་མི་བྱ་བ་འདི་ཉིད་ནི་རབ་ཏུ་བརྟེན་
པ་བཞི་པ་ཡིན་ནོ། །གཞན་ཡང་ངེས་པར་ཆགས་པ་མེད་པ་རབ་ཀྱི་རྟེན་ཡོད་དེ། དོན་རྣམས་ཐམས་ཅད་ལ་ལུས་དང་སྲོག་གཉིས་ལ་ཡང་ལྟོས་པ་མེད་པར་གྱུར་པའོ། །ཡོད་བྱད་དང་སྣོད་སྤྱད་མང་པོ་རྣམས་ཐོགས་ཤིང་ཁྱེར་བར་གྱུར་པ་ནི་
དགེ་སློང་མ་ཡིན་པ་དང་། ཀུན་ཏུ་རྩོམ་པས་ཡུལ་ལྗོངས་རྒྱུ་བ་ལ་མངོན་པར་དགའ་བ་མ་ཡིན་པའི་དགེ་སློང་དུ་གྱུར་པ་དང་། གཞན་གྱི་རྟགས་དང་ཆ་བྱད་འཛིན་པ་མ་ཡིན་པ་དང་། ཕེའུ་བཏབ་པ་ལ་ཆེད་ཆེར་བྱེད་པ་མ་ཡིན་པ་དང་། ཁྱིམ་

66-1-58b

གཅིག་ཏུ་རབ་ཏུ་འཇུག་པ་ལ་མངོན་པར་དགའ་བར་གྱུར་པ་མ་ཡིན་པ་དང་། འདི་ནི་རབ་ཏུ་རྟེན་པ་ལྔ་པ་ཡིན་ནོ། །གཞན་ཡང་ངེས་པར་ཆགས་པ་མེད་པའི་རབ་ཏུ་རྟེན་པ་ཡོད་པ་ནི་ཤིང་དང་རྩྭ་དང་ས་གཅོད་པར་གྱུར་པ་མ་ཡིན། 
ལྷམ་ཁྲ་བོ་དང་གོས་ཁྲ་བོ་གྱོན་པར་འགྱུར་བ་མ་ཡིན། ཤིན་དུ་ཚུལ་ཁྲིམས་འཆལ་པ་རྣམས་ལ་ཡང་གཤེ་བར་བྱེད་པ་མ་ཡིན། རྒྱལ་པོའི་བསོད་སྙོམས་ལ་ལྟོས་པ་མཆོག་ཏུ་བྱེད་པ་མ་ཡིན། ཀུན་དུ་རྩོད་པས་གཟིར་བ་དང་
ལྡན་པའི་དགེ་སློང་ལ་རྗེས་སུ་སྟེན་པར་བྱེད་པ་མ་ཡིན་པ་འདི་ནི་རབ་ཏུ་རྟེན་པ་དྲུག་པ་ཡིན་ནོ། །གཞན་ཡང་རབ་ཏུ་རྟེན་པ་དག་ཡོད་པ་ལ་ཇི་ལྟར་དགེ་སློང་གང་སེམས་མཉམ་པ་ལ་རྟེན་པ་དེ་ནི། རབ་ཀྱི་རྟེན་དེ་དང་དེས་རྗེས་སུ་བསྟེན་པས་
ཕན་པ་བཞིན་དུ་གྱུར་པ། བདུད་ཀྱི་ཡུལ་ལས་འབྲོས་པ་ལ་བརྩོན་པ་ལ་ཆེད་ཆེར་བྱེད་པ་དང་། ཞི་བ་དང་དབང་པོ་དུལ་བ་རྣམས་ཀྱིས་རྗེས་སུ་སྟེན་པར་བྱེད་པ་ནི། རི་ཁྲོད་དང་རིའི་ཕུག་དང་བླ་གབ་མེད་པ་དག་དུ་རྒྱུ་བ་དང་། རྟག་ཏུ་ཡང་
སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་ལ་གནས་པར་གྱུར་པ་འདི་ནི་རབ་ཏུ་རྟེན་པ་བདུན་པ་ཡིན་ནོ། །དེ་ལྟར་ན་དགེ་སློང་གིས་རྣམ་པར་འཇོམས་པ་དང་། འཆིང་བ་རྣམས་ཐམས་ཅད་ལས་རྣམ་པར་གྲོལ་བར་ཡང་འགྱུར་
རོ། །དེ་ནས་དེའི་དུས་འདིར་རྨ་བྱའི་མངའ་བདག་གིས་ཚིགས་སུ་བཅད་པ་གཞན་དག་བསྙད་པ་ཇི་ལྟར། ཇི་བཞིན་རབ་ཏུ་རྟེན་སྤྱོད་ལྡན། །ཡེ་ཤེས་སྤྱོད་ཡུལ་རྟེན་པ་པོ། །འཁོར་བའི་སྐྱོན་གྱིས་འཇིགས་པ་ཡི། །རབ་ཏུ་བྱུང་བ་
འབྲས་བཅས་འདོད། །བསླབ་པའི་གཞི་ནི་ཉམས་མེད་དང་། །སྔོན་བདེ་བ་ལ་ཡང་སྤྲོ་མེད། །ཕུང་པོའི་རྒྱུན་གྱིས་འཇིགས་པ་ཡི། །ནགས་སུ་བསྟེན་པ་འབྲས་དང་ལྡན། །ངག་འཇམ་པ་དང་ཞི་བ་དང་། །མྱ་ངན་འདས་ལ་འང་ཁ་
ཕྱོགས་པ། །ལུས་ནི་ཚུལ་ཁྲིམས་ཀྱིས་བརྒྱན་པའི། །རབ་ཏུ་བྱུང་བ་འབྲས་བཅས་འདོད། །བདག་གི་དངོས་དང་གཞན་དངོས་ལ། །གང་གི་བློ་ནི་རྨོངས་མེད་པ། །ལས་ཀྱི་རྣམ་པར་སྨིན་པས་མིན། །ལམ་དང་ལམ་མིན་དེ་བཞིན་

66-1-59a

ཉིད། །བདེ་དང་སྡུག་བསྔལ་འཇིགས་པ་དང་། །སྒྲིབ་པ་དང་ཡང་མི་ལྡན་ལ། །ཁྱིམ་གྱི་ཞགས་པ་རྣམ་གྲོལ་བས། །སྡུག་བསྔལ་ཉིད་ན་གནས་པ་མིན། །དེ་ལྟར་རབ་ཏུ་རྟེན་པའི་ཡོན་ཏན་རྣམ་པ་དུ་མ་རྣམས་སུ་རྨ་
བྱའི་མངའ་བདག་འདིས་ལྷ་དེ་དག་རྣམས་ལ་བརྗོད་དེ་ལྷ་དེ་དག་རྣམས་སླར་ཡང་དད་པ་སྐྱེད་པར་བྱེད་པའི་ཕྱིར་རོ། །དེའི་ཚེ་ལྷ་དེ་དག་རྣམས་ཐམས་ཅད་ཀྱང་ཆོས་འདུལ་བ་རྣམ་པ་དུ་མར་བརྗོད་པར་གྱུར་པ་ན་མཉམ་པར་བཞག་པའི་
རྣ་བའི་བུག་པས་ཉན་པར་བྱེད་དོ། །དེ་ནས་གཞན་ཡང་རྨ་བྱའི་མངའ་བདག་དེ་སྤྲོ་བ་ལྡོག་པ་མེད་པར་གྱུར་པས་སླར་ཡང་ཆོས་དེ་ཉིད་སྟོན་པར་བྱེད་དེ། འཐབ་བྲལ་གྱི་ལྷ་དེ་དག་རྣམས་དང་ཀུན་དུ་ལྷགས་པར་གྱུར་པའི་དགའ་
ལྡན་གྱི་ལྷ་དེ་དག་རྣམས་ལ་དམ་པའི་ཆོས་སྒྲོགས་པ་ལ་གུས་པས་ཕྱིར་ཡང་རྨ་བྱའི་བདག་པོ་དེ་ཉིད་ཀྱིས་ཆོས་སྟོན་པར་བྱེད་དོ། །ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་ངམ་བྲམ་ཟེ་ལ་ཡང་ཇི་ལྟར་གཅེས་པར་བྱ་བར་
གྱུར་པའི་ཆོས་གཞན་དེ་ཡང་གང་ཞེ་ན། འདི་ལྟ་སྟེ་ལས་ལ་དད་པ་དང་ལྡན་པའོ། །ལས་དང་འབྲས་བུ་ལ་དད་པ་དང་ལྡན་པ་ཞེས་བྱ་བའི་ཆོས་ནི་ཆེན་པོར་གྱུར་པ་ཡིན་ནོ། །གང་ཡང་དགེ་སྦྱོང་ངམ་བྲམ་ཟེ་འམ་དེ་དག་དང་
མཚུངས་པར་གྱུར་པ་རྣམས་ཀྱང་རུང་སྟེ། ལས་དང་འབྲས་བུ་ལ་དད་པ་དང་ལྡན་པར་གྱུར་པའི་ཡིད་ཅན་དེས་ནི་ལུས་ཀྱི་ཉེས་པ་སྤྱོད་པར་བྱེད་པ་ན་ཤེས་པར་བྱེད་དེ་ཇི་ལྟར། ལུས་ཀྱི་ཉེས་པར་སྤྱད་པ་འདི་བསྟེན་ཅིང་བསྒོམས་
ལ་ལན་མང་དུ་བྱས་པས་ནི། མི་འདོད་པ་མི་སྡུག་པ་ཡིད་དུ་མི་འོང་བའི་རྣམ་པར་སྨིན་པ་རྣམས་བདག་ལ་འབྱུང་བར་འགྱུར་བ་ཡིན་ཏེ། དམྱལ་བ་དང་ཡི་དགས་དང་དུད་འགྲོའི་འགྲོ་བའི་ཡུལ་རྣམས་ལ་འབྲས་བུ་མི་འདོད་
པ་མི་སྡུག་པ་ཡིད་དུ་མི་འོང་བའི་སྡུག་བསྔལ་རྣམས་སོ་སོར་མྱོང་བར་འགྱུར་ལ་རེ། དེ་བཞིན་དུ་རང་ཉིད་ངག་གི་ཉེས་པར་སྤྱོད་པ་རྣམས་སྤྱོད་པ་ན་ཡང་འདི་ལྟར་ཡིད་ལ་བྱེད་དོ། །ཇི་ལྟར་བདག་གི་ངག་གི་ཉེས་པར་སྤྱོད་པ་འདི་

66-1-59b

ཉིད་བསྟེན་ཅིང་བསྒོམས་ལ་ལན་མང་དུ་བྱས་པས་ནི། མི་འདོད་པ་མི་སྡུག་པ་ཡིད་དུ་མི་འོང་བའི་འབྲས་བུ་རྣམ་པར་སྨིན་པ་འབྱུང་བར་འགྱུར་ཏེ། དམྱལ་བ་དང་ཡི་དགས་དང་དུད་འགྲོའི་འགྲོ་བ་རྣམས་སུ་མི་དགེ་བའི་
ལས་ཀྱིས་སྐྱེ་བ་རབ་ཏུ་མྱོང་བར་འགྱུར་རོ། །དེ་བཞིན་དུ་ཡིད་ཀྱིས་ཉེས་པར་སྤྱོད་པ་ཡང་བྱེད་པ་དང་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པས་ནི་མི་སྡུག་ཅིང་ཡིད་དུ་མི་འོང་ལ་མི་འདོད་པ་མི་སྡུག་པ་ཡིད་དུ་མི་
འོང་པའི་འབྲས་བུ་དམྱལ་བ་དང་ཡི་དགས་དང་དུད་འགྲོའི་ཡུལ་རྣམས་སུ་འབྱུང་བར་འགྱུར་ཏེ། དགེ་སྦྱོང་ངམ་བྲམ་ཟེ་འམ་དེ་དག་དང་མཚུངས་པར་གྱུར་པ་གཞན་རྣམས་སམ། གང་ཡང་དེ་དག་དང་འདྲ་བར་གྱུར་པ་རྣམས་ཀྱིས་
གང་སྔོན་གྱི་དུས་ན་སྡིག་པའི་ལས་བྱས་པར་གྱུར་པ་རྣམས་དྲན་པར་བྱས་ནས་བཤགས་པར་བྱེད་དོ། །འགྱོད་པར་ཡང་བྱེད་དོ། །སངས་རྒྱས་ལ་རྗེས་སུ་སྟེན་པར་བྱེད་དོ། །ཇི་ལྟར་བདག་ཅག་གི་ལས་ཀྱི་འབྲས་བུ་
ཉེས་པར་བྱས་པ་རྣམས་ལས་གྲོལ་བར་འགྱུར་ཞེས། དེ་དག་རྣམས་ནི་ཡོངས་སུ་འདྲི་བའི་རང་བཞིན་ཅན་དུ་འགྱུར་རོ། །དེ་ནས་དེ་རྒན་པོ་ཤེས་ཉེན་དང་ལྡན་པ་དུལ་བ་ལ་སྤྲོ་བར་བྱས་ནས་ལྟུང་བ་འདི་དག་བཤགས་པར་
བྱེད་དོ། །འདི་ལས་ལངས་པས་དེ་སྲིད་ཀྱི་སྡིག་པའི་ལས་རྣམས་ཟད་པར་འགྱུར་རོ། །དེ་ལྟར་རེ་ཤིག་གང་སྔོན་གྱི་དུས་ན་ལས་བྱས་པར་འགྱུར་བ་དམ་པ་མ་ཡིན་པའི་ལས་ཉེ་བར་བྱས་པ་དེ་དག་ཕྱིས་ཡང་མི་བྱེད་དོ། །ལྡང་བར་ལ་
ཡང་སྤྱོད་པར་བྱེད་དོ། །དེས་མི་དགེ་བའི་ལས་འདི་དག་ཐམས་ཅད་ནས་ཐམས་ཅད་དུ་རབ་ཏུ་བྲལ་བར་འགྱུར་བ་འམ། དེ་དག་མགོ་སྨོད་པར་འགྱུར་རོ། །དེ་བཞིན་དུ་ད་ལྟར་བའི་དུས་སུ་ཉེས་པར་བྱས་པའི་ལས་བྱས་པར་
གྱུར་པ་ལུས་ཀྱི་དང་ངག་གི་དང་ཡིད་ཀྱིས་ཀྱང་སྟེ། རྣམ་པ་གསུམ་པོ་སེམས་ཡང་མོར་ཡོངས་སུ་འཇུག་པས་གལ་ཏེ་བྱས་པར་གྱུར་ན་ཡང་། དུས་འཇུག་པ་ཡུན་ཐུང་ངུས་དེ་མ་ཐག་དུ་གང་དག་སེམས་ཀྱིས་ཡོངས་སུ་བཏང་ནས་

66-1-60a

བཤགས་པར་བྱེད་དོ། ། འགྱོད་པ་སྐྱེད་པར་བྱེད་ཅིང་ཕྱིས་ཡང་མི་བྱེད་དོ། །དེ་དེ་བཞིན་དུ་རབ་ཏུ་འགྱོད་པར་བྱེད་པར་གྱུར་པ་ཡིན་ན། གང་ལ་ལས་དེའི་ཕྱི་བཞིན་ལྟ་བར་བྱེད་པར་མི་འགྱུར། སྡིག་པའི་ལས་རྣམས་
ཡོད་པ་མ་ཡིན་ལྡན་པ་མ་ཡིན་ནོ། །དེ་ཐམས་ཅད་ནས་ཐམས་ཅད་དུ་མེད་པར་འགྱུར་བ་འམ་ཟད་པར་བྱེད་པ་འམ་ཉམས་སྨོད་པར་ཡང་འགྱུར་རོ། །ཇི་ལྟར་ལས་ཀྱི་འབྲས་བུ་རྣམ་པར་སྨིན་པ་ཤེས་པའི་དགེ་སྦྱོང་ངམ་བྲམ་ཟེ་འམ་
གཞན་ཡང་དེ་དང་འདྲ་བ་རྣམས་དཔྱོད་པར་བྱེད་དེ། ཇི་ལྟར་གལ་ཏེ་བདག་གིས་ལུས་ཀྱིས་ཉེས་པར་སྤྱོད་པ་འམ་ངག་གིས་ཉེས་པར་སྤྱོད་པ་འདི་དག་རྣམས་བྱས་ཤིང་གོམས་པར་བྱས་པར་གྱུར་ན། དེས་བདག་དམྱལ་བ་དང་ཡི་དགས་
དང་དུད་འགྲོའི་འགྲོ་བའི་ཡུལ་རྣམས་སུ་འབྲས་བུ་རྩུབ་པོ་འབྱུང་བར་འགྱུར་བས་ན། དེ་མི་དགེ་བའི་ལས་ཀྱི་འབྲས་བུ་མ་སྐྱེས་པ་དེ་རྣམས་མི་སྐྱེ་བར་བྱ་བའི་དོན་དུ་འབད་ཅིང་རྩོལ་ལ་བརྩོན་འགྲུས་རྩོམ་པར་བྱེད་དོ། །དེ་ལྟ་དེ་ལྟར་འདས་པའི་
དུས་ཀྱི་ལས་ཀྱི་འབྲས་བུ་རྣམས་ལ་དད་པའི་སྟོབས་དང་ལྡན་པའི་དགེ་སྦྱོང་ངམ་བྲམ་ཟེ་རྣམས་ཀྱིས་ཀྱང་རུང་སྟེ། དེ་དག་རྣམས་ཀྱི་དམྱལ་བ་མྱོང་བར་འགྱུར་བའི་ལས་དུས་རིང་དུ་ཀུན་ཏུ་མྱོང་བར་གྱུར་པ་ཆེས་འཇིགས་པར་གྱུར་པའི་
ཚོར་བ་གང་ཡིན་པ་དེ་ཡང་དུས་ཐུང་བ་དང་ཤིན་དུ་ཞན་པའི་ཚོར་བར་གྱུར་པ་འམ། ཐམས་ཅད་ཀྱི་ཐམས་ཅད་དུ་ཡང་མེད་པར་འགྱུར་རོ། །དེ་དེ་ལྟར་གཞན་ཡང་སྤྱོད་པར་བྱེད་འབད་པར་བྱེད། བརྩོན་འགྲུས་རྩོམ་པར་བྱེད་པས་ནི་
གང་དེ་ཡི་དགས་སུ་སྐྱེ་བར་བྱེད་པའི་ལས་ངན་པ་རྣམས་དུས་རིང་དུ་མྱོང་བར་འགྱུར་བ་དང་། བཀྲེས་པ་དང་སྐོམ་པའི་རང་བཞིན་གྱིས་ཆེས་དྲག་པ་ཡོད་པ་དེ་དག་རྣམས་དམན་པར་འགྱུར་རོ། །དུས་ཐུང་བར་འགྱུར་བ་འམ་ཐམས་ཅད་
ཀྱི་ཐམས་ཅད་དུ་ཡང་མེད་པར་འགྱུར་རོ། །དེ་དེ་བཞིན་དུ་དགེ་སྦྱོང་ངམ་བྲམ་ཟེ་རྣམས་དང་གང་ཡང་དེ་དག་དང་འདྲ་བར་ལས་དང་འབྲས་བུ་ལ་དད་པ་དང་ལྡན་པ་རྣམས་གང་ཡིན་པ་རྣམས་དེ་དག་གིས་དུད་འགྲོར་སྐྱེ་བར་འགྱུར་བའི་ལས་

66-1-60b

ཆེས་འཇིགས་པ་རྣམས་བྱས་པས་དེ་དག་ཕན་ཚན་དུ་ཟ་བར་བྱེད་པ་དུས་རིང་བར་མྱོང་བར་འགྱུར་བ་དེ་དག་རྣམས་ཀྱང་ཤིན་དུ་ཆུང་བ་དང་། ཕན་ཚུན་དུ་ཟ་བ་མི་མྱོང་བར་འགྱུར་བ་དང་། དུས་ཐུང་བ་དང་ཐམས་ཅད་ནས་ཐམས་ཅད་དུ་ཡང་
མེད་པར་འགྱུར་རོ། །གང་བྱས་ཤིང་བསགས་ལ་ངེས་པ་ཁོ་ནར་སོ་སོར་མྱོང་བར་འགྱུར་བའི་ལས་ཀྱི་འབྲས་བུ་གང་དང་གང་ལ་འཕེན་པར་བྱེད་པའི་དམྱལ་བ་དང་ཡི་དགས་དང་དུད་འགྲོའི་འགྲོ་བའི་ལུས་རྣམས་ནི་མ་གཏོགས་སོ། །གཞན་
ཡང་ལས་ཀྱི་འབྲས་བུ་དེ་ཉིད་ལ་དད་པ་དང་ལྡན་པ་ཡིན་ཏེ། འདི་ལྟར་ལས་དེ་ནི་ཤིན་དུ་རྟོགས་པར་དཀའ་བ་དང་མཆོག་ཏུ་ཕྲ་བར་གྱུར་པའི་ལས་ཀྱི་འབྲས་བུ་རྣམས་ལ་དཔྱོད་པར་བྱེད་དོ། །དེ་ལ་མི་དགེ་བའི་ལས་རྣམ་པ་གསུམ་པོ་
དེ་དག་བྱས་པར་གྱུར་པ་རྣམས་དེ་སོ་སོར་བཤགས་པར་བྱེད་པ་དང་ཁ་ན་མ་ཐོ་བ་དེ་དག་རྣམས་རབ་ཏུ་སྤངས་པར་བྱེད་པ་དེ་ལ། གང་ཁོ་ན་ངེས་པར་མྱོང་བར་འགྱུར་བ་རྣམས་ལས་དུད་འགྲོའི་འགྲོ་བ་མྱོང་བར་འགྱུར་བ་དེ་དག་འདི་ལྟར་སེམས་
ཀྱིས་ལེགས་པར་བསྒོམས་ཤིང་ཡོངས་སུ་དག་པས་དེ་སྤོང་བར་བྱེད་དོ། །དེ་ལ་གང་དམྱལ་བ་མྱོང་བར་འགྱུར་བ་དང་དུད་འགྲོའི་འགྲོ་བ་མྱོང་བར་འགྱུར་བ་དང་ལན་གྲངས་གཞན་ལ་མྱོང་བར་འགྱུར་བ་རྣམས་སེམས་ཀྱིས་རྣམ་པར་འགྱོད་
པར་བྱེད་པ་དང་། གཉེན་པོ་དཀར་པོའི་ཆོས་རྣམས་ཀྱིས་ཉེ་བར་བཅོམ་པའི་དབང་གིས་ཀྱང་རྣམ་པ་ཐམས་ཅད་དུ་མི་འགྱུར་བ་འམ། ཉམས་སྨོད་པར་བྱེད་པ་འམ་ལས་དེ་ཉིད་ཀྱིས་གང་ཆེས་སྡུག་བསྔལ་བའི་དུད་འགྲོའི་སྐྱེ་
གནས་སོ་སོར་རབ་ཏུ་མྱོང་བར་འགྱུར་བ་ཡང་རུང་སྟེ། ཉེས་པར་བྱས་པ་དེ་བཤགས་པ་ལས་ལངས་པས་སམ་ཆོས་ཤིན་དུ་དཀར་བར་གྱུར་པའི་ལེགས་པར་བྱས་པའི་ལས་རྣམས་ཀྱིས་ཀྱང་། གང་དུད་འགྲོར་ཚེ་རིང་པོར་འཚེད་
པར་བྱེད་པ་རྣམས་ཉེ་བར་བཅོམ་པས་དེ་ཚེ་ཐུང་ངུ་དང་སྡུག་བསྔལ་ཆུང་བར་ཡོངས་སུ་འཚེད་པ་རྣམས་ཐམས་ཅད་དུ་མེད་པར་བྱེད་དོ། །དེ་ལ་རྒྱུ་བ་འདི་དང་མཚན་མ་འདི་དག་གིས་ལས་དང་འབྲས་བུ་ལ་དད་པ་དང་ལྡན་པ་ཉིད་དུ་བྱའོ། 

66-1-61a

དགེ་སྦྱོང་ངམ་བྲམ་ཟེ་འམ་དེ་དག་དང་འདྲ་བར་གྱུར་པ་གཞན་རྣམས་ཀྱང་རུང་སྟེ། གང་ཡང་ལས་དང་འབྲས་བུ་ལ་དད་པ་དང་ལྡན་པ་དེ་ནི། ཆུ་ཀླུང་གི་ངོས་དང་བཅས་ནས་ཚད་ཡོད་པར་འཁོར་བ་ན་འཁོར་བ་ཡིན་ནོ། །དེ་ཅིའི་ཕྱིར་ཞེ་ན། གང་
འགྲོ་བ་ལྔ་ན་དགེ་བ་དང་མི་དགེ་བའི་ལས་རྣམས་ཀྱིས་མ་བསྐྱེད་པའི་འབྲས་བུར་གྱུར་པ་གང་ཡིན་པའི་སྐྱེ་བ་ནི་ཅུང་ཟད་ཅིག་ཀྱང་ཡོད་པ་མ་ཡིན་ནོ། །དེའི་ཕྱིར་དེ་ཁོ་ན་བཞིན་དུ་སྐྱེས་བུའི་སྙིང་པོ་ནི་གང་ལས་དང་འབྲས་བུ་ལ་དད་པ་དང་ལྡན་པ་
ཞེས་བྱ་བ་ཡིན་ཏེ། སྲོག་ཆགས་རྣམས་ནི་ཐམས་ཅད་ཀྱང་ལས་རྣམས་ཐམས་ཅད་ཀྱི་འབྲས་བུའི་བགོ་སྐལ་ལ་སྤྱོད་པ་ཡིན་ནོ། །དེའི་ཕྱིར་ན་བུད་མེད་དམ་སྐྱེས་པ་རྣམས་ཀྱིས་ཀྱང་རུང་སྟེ། ཐམས་ཅད་ཀྱིས་ཀྱང་རབ་ཏུ་བརྩོན་པས་ཉིན་
མོ་དང་མཚན་མོར་ཡང་བདག་ཉིད་ཐམས་ཅད་ཀྱིས་ལས་དང་འབྲས་བུ་ལ་དད་པའི་སྟོབས་བསྐྱེད་པར་བྱའོ། །འདིར་རེ་ཤིག་འཁོར་བའི་སྲོག་ཆགས་རྣམས་ལ་དེ་དག་སྙིང་པོར་གྱུར་པའོ། །ཆོས་གཞན་ཡང་དགེ་སྦྱོང་ངམ་བྲམ་ཟེ་འམ་
གཞན་ཡང་དེ་དང་རང་བཞིན་མཚུངས་པ་རྣམས་ཀྱིས་ཡིད་ལ་བྱའོ། །འདི་ཡང་གང་ཞེ་ན། འདི་ལྟ་སྟེ་མི་གནས་པས་ཉེ་བར་བཅོམ་པ་ཉིད་དོ། །མི་གནས་པས་ཉེ་བར་བཅོམ་པ་ནི་གང་གི་ཕྱིར་དགེ་སྦྱོང་ངམ་བྲམ་ཟེ་རྣམས་གང་དག་
ཡིན་ཡང་རུང་སྟེ། དེ་དག་རྣམས་ནི་བློ་གྲོས་དམན་པ་རྣམས་ཡིན་ནོ། །མེ་གནས་པས་ཉེ་བར་བཅོམ་པར་གྱུར་པའི་སྐྱོན་དེས་སེམས་ཆགས་པར་བྱེད་དོ། །མི་གནས་པ་དེ་ཉིད་ཀྱིས་ཀུན་དུ་འཁོར་བར་བྱེད་དེ། དགེ་འདུན་གྱི་ཀུན་
དགའ་ར་བ་དང་གཙུག་ལག་ཁང་དང་གྲོང་དང་ཡུལ་དང་གྲོང་ཁྱེར་དང་གཞན་དག་ཏུ་ཡང་རུང་སྟེ། རྟག་ཏུ་ཡང་ལེ་ལོ་ཅན་དུ་འགྱུར་རོ། །དེ་དང་དེ་ཉིད་ལ་དགའ་བར་འགྱུར་རོ། །དེ་ཞི་བའི་དགོན་པ་རྣམས་དང་ཞི་བའི་གནས་གཞན་
དག་རྣམས་སུ་ཡང་མངོན་པར་དགའ་བར་མི་འགྱུར་རོ། །ལེགས་པར་འགྲོ་བའི་རང་བཞིན་ཅན་མ་ཡིན་ཏེ། འགྲོན་ལམ་དུ་འགྲོ་བའི་དབང་དུ་བྱས་པ་ན་ཡང་དེ་ནི་རབ་ཏུ་བྱུང་བ་ཡང་མ་ཡིན་ལ་ཁྱིམ་པ་ཡང་མ་ཡིན་ནོ། །དེ་ཐམས་

66-1-61b

ཅད་དུ་རིགས་མཚུངས་པར་འགྱུར་རོ། །ཡུལ་ཕྱོགས་གཅིག་པོ་དེ་ཉིད་ལ་གནས་པས་ཀྱང་དུས་འདའ་བར་བྱེད་དོ། །དེ་གང་གི་དོན་དུ་རབ་ཏུ་བྱུང་བར་གྱུར་པའི་བསམ་གཏན་གྱིས་བདེ་བར་གནས་པར་བྱ་བ་དེ་ཉིད་ནི་མི་བྱེད། ཀུན་
དུ་གནས་པའི་སྐྱོན་གྱིས་ཉེ་བར་བཅོམ་པའི་ཕྱིར་རོ། །གང་ཡང་མི་ཚུགས་པའི་སྐྱོན་དེ་རིག་པར་གྱུར་ནས་དགེ་སྦྱོང་ངམ་བྲམ་ཟེ་འམ་གཞན་ཡང་དེ་དང་རང་བཞིན་འདྲ་བ་དག་ལ་སྦྱིན་པ་པོ་དང་སྦྱིན་བདག་རྣམས་ཁ་དྲག་པར་འགྱུར་
རོ། །འདི་དང་ཕྲད་པའི་དོན་དུ་ཐམས་ཅད་དུ་ཉེ་བར་འོང་བར་ཡང་མི་འགྱུར་རོ། །འདི་ལ་གང་སྦྱིན་པ་པོ་དང་སྦྱིན་བདག་རྣམས་དབང་དུ་མི་འགྱུར་བར་དབང་ཆེན་པོར་འགྱུར་རོ། །འདི་དག་གི་ཚིག་ཉན་པར་མི་འགྱུར་ཞིང་། དེ་གཙོ་
བོར་བྱས་ནས་སྦྱིན་པ་རྣམས་གཏོང་བར་མི་བྱེད་དོ། །ཤིན་དུ་སེམས་སྟོབས་ཡང་བར་གྱུར་པ་འདུག་པའི་ས་མི་ཟིན་པས་ཉེ་བར་བཅོམ་པ་རྟག་ཏུ་འཕྲད་པར་བྱེད་པ་རྟག་ཏུ་ཞབས་འབྲིང་བྱེད་པ་ཡིན་ནོ། །དེ་ཀུན་དུ་གནས་
པས་ཉེ་བར་བཅོམ་པའི་སྐྱོན་ཀྱིས་ཉེ་བར་བཅོམ་པར་གྱུར་པ་ལ་བཞད་གད་དུ་བྱེད་དོ། །ཁྱིམ་པ་དག་ཕན་ཚུན་དུ་གླེང་བརྗོད་ཀྱང་བྱེད་དོ། ཇི་ལྟར་དགེ་སྦྱོང་ངམ་བྲམ་ཟེ་ཆེ་གེ་མོ་ཞེས་བྱ་བ་གར་ཡང་མི་ཆགས་ཉེ་བར་བཅོམ་
པས་དེ་དང་དེ་ཉིད་ལ་དགའོ། །དགོན་པ་ཞི་བ་རྣམས་སུ་ནི་མ་ཡིན་གྱི། རྟག་ཏུ་ཚོལ་སོག་བྱེད་པའི་རང་བཞིན་ཅན་རྟག་ཏུ་ཁྱིམ་པ་རྣམས་ལྟ་བར་འདོད་པ་དང་། ཞབས་འབྲིང་གི་དངོས་པོར་ཡང་འགྲོ་བ་དང་བྲན་བཞིན་དུ་ཁྱིམ་པ་
རྣམས་ཀྱི་གཡོག་བྱེད་དོ། །གཡོག་བྱེད་པར་གྱུར་པས་དེ་དག་གིས་ཁ་ཉེན་པར་བྱེད་དེ། །དེ་ཉིད་ཀྱིས་ཁྱིམ་པ་ཀུན་ཆུབ་པར་མི་འགྱུར་ལ། རབ་ཏུ་བྱུང་བར་ཡང་མི་འགྱུར་ཏེ་མི་གནས་པའི་སྐྱོན་གྱིས་ཉེ་བར་བཅོམ་པའི་ཕྱིར་རོ། །གང་
ལ་ཡང་སྐྱོན་འདི་དག་རྣམས་མེད་པ་དེ་ནི་སྐྱེ་བོ་རྣམས་ཐམས་ཅད་ཀྱིས་འབྱོར་བར་བྱེད་དོ། །གང་ཀུན་དུ་གནས་པས་ཉེ་བར་བཅོམ་པའི་སྐྱོན་གྱིས་སྦྱིན་པ་པོ་དང་སྦྱིན་བདག་རྣམས་ཁ་མི་དྲག་པར་མི་འགྱུར་བ་ནི་འགའ་ཡང་ཡོད་པ་མ་

66-1-62a

ཡིན་ནོ། །གནས་པ་མེད་པར་ཀུན་དུ་ལྟ་བར་བྱེད་པའི་སྐྱོན་གྱིས་ཡང་མོར་འགྱུར་ཞིང་དགེ་སྦྱོང་དང་བྲམ་ཟེ་གང་འགའ་ཞིག་ཀུན་དུ་གནས་པ་ཉེ་བར་བཅོམ་པར་གྱུར་པ་རྣམས་ལ་ནི་ཇི་སྲིད་དུ་རྣམ་པ་དེ་ལྟ་བུ་དང་སྐྱོན་གཞན་དག་
རྣམས་ཀྱང་འབྱུང་བར་འགྱུར་རོ། །དེའི་ཕྱིར་དགེ་སྦྱོང་དང་བྲམ་ཟེ་རྣམས་དང་དེ་དག་དང་མཚུངས་པ་གཞན་རྣམས་ཀྱིས་ཀྱང་གཅིག་བྱ་བར་བྱ་སྟེ། རྟག་ཏུ་ཆགས་པ་མེད་པའི་བློ་དང་། རྟག་ཏུ་གཅིག་པུ་མངོན་པར་དགའ་བ་དང་ཤིང་དྲུང་
པ་དང་དུར་ཁྲོད་པ་དང་ཕུག་གི་ནང་དུ་བསམ་གཏན་བྱེད་པ་དང་རི་ཁྲོད་སྟེན་པ་དང་གཅིག་ཏུ་རྣམ་པར་རྒྱུ་བས་གནས་སྐབས་ཐམས་ཅད་དུ་ཇི་སྲིད་འཚོ་བའི་བར་དུ་མི་གནས་པས་ཉེ་བར་བཅོམ་པ་ཉིད་ཡོངས་སུ་སྤང་བར་བྱའོ། །གཅིག་པུ་ཞིག་
འགའ་ཞིག་དང་ཡང་མངོན་པར་ཆགས་པར་མི་བྱའོ། །ཆགས་པ་རྣམས་ཐམས་ཅད་ཡོངས་སུ་སྤང་བར་བྱའོ། །ཆགས་པ་རྣམས་ཐམས་ཅད་ཡོངས་སུ་སྤངས་པ་ལས་ཐར་པ་ཐོབ་པར་འགྱུར་རོ། །དེ་ནི་མི་གནས་པས་ཉེ་བར་
བཅོམ་པ་ཡིན་ནོ། །དེ་ནས་དུས་དེའི་ཚེ་རྨ་བྱའི་མངའ་བདག་དེས་ཚིགས་སུ་བཅད་པའི་དབྱངས་ཀྱིས་བསྙད་པ་ཇི་ལྟར། ཀུན་ནས་ཉེར་བཅོམ་དགེ་སློང་ནི། །མི་རྣམས་ཀྱི་ནི་བྲན་བཞིན་མཐོང་། །རྩྭ་བཞིན་དུ་ནི་ཡང་མོར་འགྱུར། །རང་
དོན་ལས་ཀྱང་ཉམས་པར་འགྱུར། །གནས་ཀྱིས་ཉེར་བཅོམ་དགེ་སློང་ནི། །ཁྱིམ་པ་མ་ཡིན་ནགས་གནས་མིན། །བསམ་གཏན་བསྒོམ་པར་བྱ་བ་ལ། །ཡིད་ཆེས་ཉིད་ནི་རབ་མི་འཇུག །མི་གནས་ཉེར་བཅོམ་དགེ་སློང་ནི། །རྟག་ཏུ་
ཚོལ་སོག་ལ་བརྩོན་ནོ། །ཚོལ་སོག་ལ་ནི་བྲེལ་བའི་ཡིད། །ཚེ་ཡང་ཡོངས་སུ་ཉམས་པར་འགྱུར། །སྐད་ཅིག་ཤིན་དུ་མྱུར་འཇུག་པའི། །གསོན་པ་གོ་བ་ཉིད་མ་ཡིན། །བདེ་བ་གཞན་དུ་ལོངས་སྤྱད་པ། །གང་བྱས་པ་ནི་རིག་པ་འང་
མིན། །གནས་ཀྱིས་ཉེ་བར་བཅོམ་དགེ་སློང་། །སྐྱེ་བོ་ལ་ལྟ་ཆེད་ཆེར་བྱེད། །རྟག་ཏུ་སྡིག་པས་འགྲོ་བ་ཡིན། ། དེས་ཀྱང་ངན་སོང་གནས་སུ་འགྲོ། །ཡིད་ནི་མངོན་པར་ཞེན་པ་མེད། །ཆགས་པ་མེད་པའི་ལུས་ཅན་རྣམས། །ཆགས་པ་

66-1-62b

ཀུན་ལས་རྣམ་གྲོལ་བ། །དགེ་སྦྱོང་འབྲས་དང་བཅས་པར་འདོད། །རི་ཡི་ཁྲོད་དང་ཤིང་གི་དྲུང་། །རྟག་ཏུ་བསམ་གཏན་གྱིས་གནས་པ། །དགེ་བ་རབ་ཏུ་དད་པ་དང་། །ཡེ་ཤེས་སྐྱོན་དེ་ཡོངས་སུ་སྤངས། །ཆགས་པ་ཀུན་ལས་
ངེས་རྣམ་གྲོལ། །ཡུལ་རྣམས་ཀྱིས་ཀྱང་བསླུས་མིན་པའི། །སྐམ་པོའི་ཤིང་ལ་མེ་བཞིན་དུ། །དགེ་སློང་དེ་ཡིས་ཉོན་མོངས་སྲེག །གཅིག་པུ་དགའ་བས་དགར་གྱུར་པའི། །དགེ་སློང་དབང་པོ་ལྔ་བསྡམས་པ། །ལུས་ཀྱི་མཚན་
ཉིད་དེ་ཉིད་ཤེས། །མྱ་ངན་འདས་པ་རྟོགས་པར་འགྱུར། །བརྩོན་འགྲུས་ལྡན་ཞིང་དྲན་དང་ལྡན། །རྟག་པར་སྐྱོན་རྣམས་རྣམ་པར་སྤངས། །འགྱིང་བག་དོན་གྱི་སྐྱེད་ཚལ་བཞིན། །མྱ་ངན་འདས་པ་ལྷག་པར་འགྲོ། །མྱ་ངན་འདས་ལ་རྟག་
མངོན་དགའ། །སྲིད་གསུམ་ཆུ་བོས་ཀྱང་འཇིགས་པ། །ཀུན་གནས་ཀྱིས་ནི་མ་བསླུས་པའི། ། དག་པའི་བདག་ཉིད་དགེ་སློང་ཡིན། །དེ་ལྟར་མི་གནས་པས་ཉེ་བར་བཅོམ་པའི་སྐྱོན་རྣམས་དང་ལྡན་པས་དགེ་སློང་གང་དག་ཤིན་དུ་ཡང་སོ་སོར་
རྒྱུག་པར་བྱེད་དོ། །དེའི་ཕྱིར་གཅིག་པུ་ཉིད་སྙིང་པོར་བྱེད་པ་རྣམས་ཀྱིས་མི་གནས་པར་ཉེ་བར་བཅོམ་པ་དགེ་སློང་རྣམས་ཡོངས་སུ་སྤང་བར་བྱའོ། །ཁྱིམ་པ་རྣམས་ཀྱིས་ཤིན་དུ་ཆུང་བར་ཉེ་བར་བཅོམ་པ་རྣམས་དང་། དགེ་སློང་
གནས་ཀྱི་ཉེ་བར་བཅོམ་པ་ལས་རེ་ཤིག་ཁྱིམ་པ་ལ་ཡང་སྐྱོན་དེ་དག་རྣམས་སུ་འགྱུར་ན། ཁྱིམ་གྱི་གནས་ནས་ངེས་པར་བྱུང་བའི་དགེ་སློང་ལ་སྐྱོན་རྣམས་ཐམས་ཅད་ཀྱི་སྐལ་བ་ཅན་དུ་འགྱུར་བ་ལ་ལྟ་སྨོས་ཀྱང་ཅི་དགོས། འདི་ལྟ་སྟེ། 
བརྟན་པས་ནི་དགེ་བའི་ཆོས་རྣམས་ཐམས་ཅད་འཐོབ་པར་འགྱུར་རོ། །དེའི་ཕྱིར་ཀུན་དུ་མི་གནས་པས་ཉེ་བར་བཅོམ་པ་རབ་ཏུ་བརྩོན་པས་ཀྱང་སྤང་བར་བྱའོ། །གཞན་ཡང་དགའ་ལྡན་པ་དེ་དག་རྣམས་དང་འཐབ་བྲལ་བའི་ལྷ་དེ་
དག་རྣམས་ལ། རྨ་བྱའི་མངའ་བདག་དེས་བཅོམ་ལྡན་འདས་དེ་ཉིད་ཀྱི་མདོ་འཆད་པར་བྱེད་པ་ལ། ཇི་ལྟར་ཆོས་གཞན་ཡང་འདོད་པ་སྡུག་པ་ཡིད་དུ་འོང་བ་མྱ་ངན་ལས་འདས་པ་ཐོབ་པར་འགྱུར་བ་ཡོད་དོ། །དེ་ཡང་གང་ཞེ་ན། འདི་ལྟ་སྟེ། 

66-1-63a

བརྟན་པ་དང་ལྡན་པའི་དགེ་སློང་རྣམས་ནི་རིགས་ཀྱི་དགེ་བའི་ཆོས་ཀྱི་ཁུར་ཁྱེར་བར་འགྱུར་རོ། །འཇིག་རྟེན་པ་རྣམས་ཀྱིས་ཤིན་དུ་ཡང་རབ་ཏུ་བསྔགས་པར་འགྱུར་རོ། །བརྟན་པ་ནི་འཇིག་རྟེན་པ་དང་འཇིག་རྟེན་ལས་
འདས་པའི་ལམ་རྣམས་ལ་ཡང་རྒྱན་དུ་གྱུར་པ་ཡིན་ནོ། །སྐྱོན་རྣམས་ཐམས་ཅད་ལས་ཀྱང་རྣམ་པར་འགྲོལ་ལོ། །བརྟན་པ་སྐྱོན་ཐམས་ཅད་ལས་ངེས་པར་རྣམ་པར་འགྲོལ་བ་ཡང་གང་གི་ཕྱིར་འདི་ནི་ཐོག་མ་མེད་པའི་དུས་ནས་རབ་
ཏུ་འཇུག་པའི་སྐྱོན་གྱི་དྲ་བ་རྣམ་པ་དུ་མ་རྣམས་རབ་ཏུ་འཕྲོ་བ་དམ་ཞིང་ཤིན་དུ་བརྟན་པོར་སེམས་ཀྱི་རྗེས་སུ་འབྲེལ་བ་དེ་དག་རྣམས་དུས་ཅུང་ཟད་ཙམ་དང་། བརྩོན་འགྲུས་ཆུང་ངུ་དང་ཏིང་ངེ་འཛིན་དང་བརྟན་པ་ཡང་ཅུང་ཟད་ཙམ་གྱིས་
གཞོམ་པར་མི་ནུས་ཤིང་། སེམས་ཀྱི་ས་གཞི་ལ་རྣམ་པར་ཞེན་ནས་གནས་པའི་སྐྱོན་གྱི་དྲ་བ་དེ་དག་རྣམས་ནི་དགེ་སློང་གིས་འཁོར་བ་ལས་བགྲོལ་བར་བྱེད་པའི་བརྟན་པ་མ་གཏོགས་པ་གཞན་རྣམས་ཀྱིས་ནི་ཆོད་པ་མ་ཡིན་ནོ། །དེ་དང་
ཡང་དག་པར་ལྡན་པའི་རྣལ་འབྱོར་སྤྱོད་པ་རྣམས་ཀྱིས་ནི་རྐྱེན་རྣམས་ལས་ཉེ་བར་སྐྱེས་པའི་ཞེན་པ་མི་དགེ་བ་རྣམས་བློ་གྲོས་བརྟན་པོ་དག་གིས་ཡོངས་སུ་སྤོངས་བར་བྱེད་པའི་ཕྱིར་རོ། །དེ་ལ་ཀུན་ཏུ་ཆགས་པར་ཡང་མི་བྱེད་དེ། བདག་ཉིད་
ཐམས་ཅད་ཀྱིས་ཀྱང་བརྩོན་འགྲུས་བརྟན་པོར་བྱས་ནས། མི་དགེ་བའི་ཆོས་རྣམས་ཀྱི་འཇིགས་པས་འཇིགས་པའི་ཕྱིར་ཡོངས་སུ་སྤོང་བར་བྱེད་དོ། །འདོད་ཆགས་སྐྱེས་པར་གྱུར་ན་ཡང་དགེ་སློང་དག་བརྟན་པའི་བློས་མི་སྡུག་པ་སྒོམ་
པར་བྱེད་དོ། །དེ་དེ་ཡང་དག་པར་ལྡན་ཞིང་དཔུང་གཉེན་དུ་གྱུར་པས་ནི་མུན་པར་གྱུར་པའི་འདོད་ཆགས་གྱི་རྐྱེན་ཀྱིས་སྐྱེ་བར་གྱུར་པའི་མི་དགེ་བའི་སེམས་རྣམས་ཡོངས་སུ་སྤོང་བར་བྱེད་དོ། །དེས་ཀུན་དུ་འཁྲིད་པར་མི་འགྱུར་རོ། །
དེ་བཞིན་དུ་ཞེ་སྡང་དང་ལྷན་ཅིག་འགྲོགས་པར་གྱུར་པའི་སེམས་སྐྱེས་པར་གྱུར་ན་ཡང་དེས་འཕྲོགས་པར་མི་འགྱུར་ཏེ། བརྟན་པ་དང་ལྡན་པར་གནས་པའི་བྱམས་པའི་གཉེན་པོ་གྲོགས་སུ་གྱུར་པའི་ཕྱིར་རོ། །

66-1-63b

དེ་བཞིན་དུ་གཏི་མུག་དང་ལྡན་པའི་སེམས་ཀུན་དུ་སྐྱེས་པ་རྣམས་ལ་ཡང་རྟེན་ཅིང་འབྲེལ་བར་འགྱུར་བའི་གཉེན་པོས་སྒྲུབ་པར་བྱེད་དོ། །དེ་ནས་དུས་འདིར་རྨ་བྱའི་མངའ་བདག་དེས་ཚིགས་སུ་བཅད་པ་བརྗོད་པ་ཇི་ལྟར། 
ཀུན་གནས་པས་ཀྱང་གང་ཆགས་པ། །དེ་ནི་སྲེད་པས་རྟག་ཏུ་ཆགས། །སྲེད་པའི་འཆིང་ལས་གྲོལ་མིན་རྣམས། །འཇིག་རྟེན་འདིར་མིན་ཕ་རོལ་མིན། །དེ་ལྟར་རྨ་བྱའི་མངའ་བདག་དེས་དགའ་ལྡན་གྱི་ལྷ་དེ་དག་དང་འཐབ་བྲལ་
བ་རྟག་ཏུ་གཅིག་ཏུ་དགའ་བ་རྣམས་ལ་ཀུན་དུ་གནས་པའི་སྐྱོན་རྣམ་པ་དུ་མ་སྟོན་པར་བྱེད་དོ། །དེ་ནས་ལྷ་དེ་དག་འཇིག་རྟེན་གཉིས་ལ་ཕན་པའི་ཆོས་དེ་དག་རྣམས་རྣམ་པ་དུ་མར་ཉན་པར་གྱུར་ཀྱང་རྣམ་པ་ཐམས་ཅད་དུ་
ངོམས་པ་མེད་པས། སླར་ཡང་རྨ་བྱའི་མངའ་བདག་ལ་བརྗོད་པ། ཇི་ལྟར་ཁྱོད་ཀྱིས་བདག་ཅག་ལ་མཆོག་ཏུ་ངོ་མཚར་བར་གྱུར་པ་མཆོག་ཏུ་ཟབ་པའི་ཆོས་དེ་དག་རྣམས་བསྟན་པ་གང་ཡིན་པ་ནི་ཐོག་མ་དང་བར་དང་ཐ་མར་
དགེ་བ་མྱ་ངན་ལས་འདས་པའི་མཐར་ཐུག་པ་རྣམ་པར་རྟོག་པ་དུ་མར་འཁོར་བ་ལ་སྐྱོ་བར་བྱེད་པའི་ལམ་གྱི་མཆོག་དེ་སླར་ཉིད་ཀྱང་བདག་ཅག་རྣམས་ལ་རྗེས་སུ་བརྗོད་པའི་རིམ་པས་ཆོས་བསྟན་དུ་གསོལ། བདག་ཅག་ཐམས་
ཅད་ཀྱང་སེམས་རྩེ་གཅིག་པས་མཉན་པར་བགྱིའོ། །རང་དང་གཞན་ལ་ཕན་པ་ལ་རབ་ཏུ་ཞུགས་པའི་ཆོས་ཀྱི་ལམ་དེ་དག་རྣམས་ལྷ་དེ་དག་གི་དྲུང་ནས་ཐོས་པར་གྱུར་ནས། སླར་ཉིད་ཀྱང་རྨ་བྱའི་བདག་པོ་དེས་ལྷ་དེ་དག་རྣམས་ཐམས་
ཅད་ཉིད་ཀྱང་སེམས་རྩེ་གཅིག་ཏུ་གྱུར་པས་ཇི་ལྟ་བ་བཞིན་དུ་ཆོས་ཉན་པར་བྱེད་པའི་ལྷ་དེ་དག་རྣམས་ཀྱི་ཡིད་དེ་དག་ཀྱང་ཀུན་དུ་རྟོགས་པས། བདག་གིས་ཕྱིར་ཞིང་ཉིད་ཀྱང་ཆེས་རབ་ཏུ་རངས་པར་གྱུར་པའི་ཡིད་དུ་གྱུར་པས་སླར་ཉིད་ཀྱང་དེ་
དག་རྣམས་ལ་བསྟན་པར་བྱའོ། །དེ་ནས་ཕྱིར་ཡང་སེམས་རྟོགས་ནས་སླར་ཡང་ཆོས་དེ་ཉིད་རྣམ་པ་དུ་མ་རྣམས་སུ་སྒྲ་དབྱངས་བརྟན་ཞིང་རྒྱ་ཆེ་བ་དང་མཆོག་ཏུ་སྙན་པར་གྱུར་པ་དང་། གཞན་ལ་ཕན་པ་ལ་རབ་ཏུ་ཞུགས་པའི་

66-1-64a

སྙན་པས་སྟོན་པར་བྱེད་དེ། ཀྱེ་ཧེ་ལྷ་དག་གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་ངམ་བྲམ་ཟེ་འམ་དེ་དག་དང་འདྲ་བ་རྣམས་ཀྱིས་ཆོས་ཡིད་ལ་བྱ་བར་བྱ་ཞིང་། དེ་ལ་རབ་ཏུ་བརྩོན་པས་ཀྱང་འཇིགས་
པར་བྱའོ། །འདི་ཡང་གང་ཞེ་ན། འདི་ལྟ་སྟེ་གྲགས་པ་མ་ཡིན་པས་འཇིགས་པ་ཉིད་དོ། །གྲགས་པ་མ་ཡིན་པས་འཇིགས་པའི་དགེ་སློང་ནི་གཅིག་ཏུ་ངེས་པའི་བློར་འགྱུར་རོ། །དེ་སྐྱོན་འདི་དག་རྣམས་གྲགས་པ་མ་ཡིན་པ་ལ་འཇིགས་
པས་སྤོང་བར་བྱེད་དེ། ཇི་ལྟར་ཙབ་ཧྲལ་ཅན་གྱི་བུད་མེད་ཀྱི་སྐྱོན་གྱི་དྲི་མ་ཕལ་ཆེ་བར་གྱུར་པའི་ཁྱིམ་དུ་འཇུག་པར་མི་བྱེད་ཅིང་འདྲེ་བར་ཡང་མི་བྱེད་དོ། །ཆང་འཚོང་དང་ལྷན་ཅིག་ཀུན་བརྗོད་པར་མི་བྱེད་ཅིང་མི་སྐྲུན་པ་རྣམས་དང་མ་ཡིན་
ནོ། །རྐུན་མ་དང་ཡང་མ་ཡིན་ལ་སྡིག་པ་བྱེད་པ་རྣམས་དང་མ་ཡིན་ནོ། །རྒོད་བག་ཅན་དང་མ་ཡིན་ཞིང་ཀུན་དུ་འགྱོད་པ་རྣམས་དང་ཡང་མ་ཡིན་ནོ། །རྟགས་གཞན་པ་རྣམས་དང་རྟགས་གཞན་པ་ལ་སོ་སོར་འབྲང་བ་རྣམས་དང་མ་ཡིན་ནོ། །
ཆོ་ལོ་བ་རྣམས་དང་མ་ཡིན་ཞིང་རྟོག་མི་རྣམས་དང་ཡང་མ་ཡིན་ནོ། །བྱིས་པ་དང་མ་ཡིན་ཞིང་བུད་མེད་ཀྱིས་འཚོ་བ་དང་ཡང་མ་ཡིན་ནོ། །རྐོ་ཏྲོག་ཅན་རྣམས་དང་མ་ཞིང་ཁ་མི་འཚམ་པ་རྣམས་དང་མ་ཡིན་ནོ། །ཤིན་དུ་བརྐམ་ཆགས་
ཅན་རྣམས་དང་མ་ཡིན་ཞིང་འཇལ་བ་ལ་སྒྱུ་བྱེད་པས་སླུ་བ་རྣམས་དང་ཡང་མ་ཡིན་ནོ། །འཇིག་རྟེན་པ་རྣམས་དང་འགལ་བར་གྱུར་པའི་ཚོང་པ་དང་མ་ཡིན་ཞིང་ཆུ་ཀླུང་གི་ངོས་ལ་བཅོམ་ནས་སྒྲོ་བ་རྣམས་དང་མ་ཡིན་ནོ། །མ་ནིང་
རྣམས་དང་མ་ཡིན་ཞིང་ལམ་དུ་བུད་མེད་དང་གོམ་པ་གཅིག་ཀྱང་ལྷན་ཅིག་ཏུ་འགྲོ་བར་བྱེད་པ་མ་ཡིན་ནོ། །གླང་པོ་ཆེ་འདུལ་བ་རྣམས་དང་མ་ཡིན་ནོ། །མི་འདུལ་བ་རྣམས་དང་མ་ཡིན་ནོ། །སྟག་འདུལ་བ་རྣམས་དང་མ་ཡིན་
ནོ། །མེད་པར་སྨྲ་བ་རྣམས་དང་མ་ཡིན་ནོ། །དཀོན་མཆོག་གསུམ་ལ་ཁ་ཕྱིར་ཕྱོགས་པ་རྣམས་དང་མ་ཡིན་ནོ། །ཐེག་པ་ཆེན་པོ་ལ་ཞེ་སྡང་བར་གྱུར་པ་རྣམས་དང་མ་ཡིན་ནོ། །སྡོམ་པ་མ་ཡིན་པ་ལ་གནས་པ་རྣམས་དང་མ་

66-1-64b

ཡིན་ནོ། །རིགས་ངན་པ་རྣམས་དང་མ་ཡིན་ཏེ། རྣམ་པ་དེ་ལྟ་བུའི་སྡིག་པའི་ལས་ཅན་རྣམས་དང་ལྷན་ཅིག་ཏུ་དགེ་སློང་གནས་པར་མི་བྱེད་དོ། །དེ་ཅིའི་ཕྱིར་ཞེ་ན། ལྷན་ཅིག་ཏུ་གནས་པའི་བྱེད་པ་གང་གི་ཕྱིར་དགེ་སློང་ཆུད་ཟ་བར་
འགྱུར་ལ་དེ་བཞིན་དུ་འཇིག་རྟེན་པས་ཀྱང་གོ་བར་འགྱུར་རོ། །ཇི་ལྟར་འདིའི་དྲི་མ་ཅན་གྱི་ལས་ཡིན་པ་དེ་ཁོ་ན་ལྟར་དགེ་སློང་ལ་ཡང་རྟོག་པར་བྱེད་དོ། །གང་ཡང་ཡིད་ཅན་རྣམས་ཐམས་ཅད་རྣམ་པ་ཅི་ལྟ་བུ་དང་ལྷན་ཅིག་ཏུ་འདྲེ་བར་
བྱེད་པ་ན། དེ་དག་རྣམ་པ་དེ་ཁོ་ན་བཞིན་དུ་སྐྱེ་བོ་རྣམས་ཀྱིས་ཡང་རྟོགས་པར་འགྱུར་རོ། །དེའི་ཕྱིར་གྲགས་པ་མ་ཡིན་པས་འཇིགས་པ་རྣམས་ཀྱིས་དྲི་མ་ཅན་གྱི་ལས་ཅན་རྣམས་དང་ལྷན་ཅིག་ཏུ་གོམ་པ་གཅིག་ཀྱང་འགྲོགས་པར་
མི་བྱའོ། །དེ་ནས་དེའི་དུས་འདིར་རྨ་བྱའི་མངའ་བདག་དེས་བཅོམ་ལྡན་འདས་ཀྱིས་གསུངས་པའི་ཚིགས་སུ་བཅད་པ་བརྗོད་པར་བྱེད་པ་ཇི་ལྟར། མ་རྣགས་རྣག་དང་འདྲེ་བྱེད་པ། །རྣག་ཉིད་ཉེ་བར་སྐྱེ་བར་འགྱུར། །དེ་ཕྱིར་རྣག་དང་འདྲེ་
མ་བྱེད། །རྣག་མེད་བྱ་བར་འོས་པ་ཡིན། །སྐྱེས་བུ་ཅི་འདྲ་བ་དག་ལ། །མཚུངས་པར་རྟེན་གྲོགས་རྟག་བྱས་ནས། །དགེ་དང་གལ་ཏེ་མི་དགེ་ཡང་། །དེ་དང་འདྲེ་ལས་དེ་འདྲར་མཐོང་། །སྐྱེས་བུ་བདེ་དོན་གཉེར་ཀུན་གྱིས། །དགེ་བ་ཁོ་ན་
རྗེས་སུ་བསྟེན། །དེས་འདིར་བདེ་བ་འཐོབ་འགྱུར་གྱི། །དགེ་བས་སྡུག་བསྔལ་བྱེད་པ་མིན། །ཀུན་འདྲེས་ཡོན་ཏན་སྐྱེ་བར་མཐོང་། །འདྲེ་ལས་སྐྱོན་སྐྱེ་དེ་བཞིན་ཏེ། །ཡོན་ཏན་སྐྱོན་གྱི་མདོར་བསྡུས་པའི། །མཚན་ཉིད་འདིར་ནི་
བརྗོད་པ་ཡིན། །རྟག་ཏུ་བཟང་པོ་དང་འགྲོགས་པའི། །དགེ་སློང་སྙན་གྲགས་དང་ལེགས་ལྡན། །ངན་པ་དང་ནི་འགྲོགས་པ་ནི། །སྐྱེས་བུ་ངན་པར་མྱུར་ཏུ་འགྲོ། །གང་དག་ངན་པ་རྣམ་སྤོང་བའི། །དེ་དག་སྙིང་པོ་རྟག་ཏུ་གྱིས། །ལེགས་
རྟགས་ལྷན་ཅིག་གནས་པ་དང་། །མ་རུངས་པ་ཡང་སྤང་བར་གྱིས། །དེ་ལྟར་རྨ་བྱའི་བདག་པོ་འདིས་ལྷ་དེ་དག་རྣམས་ལ་ཆོས་སྟོན་པར་བྱེད་དོ། །གྲགས་པ་མ་ཡིན་པས་འཇིགས་པར་གྱུར་པའི་དགེ་སློང་རྣམས་ཀྱང་

66-1-65a

ཡོན་ཏན་བདུན་དང་ཡང་དག་པར་ལྡན་པར་འགྱུར་བ་ལ། འདི་ལྟ་སྟེ་སྡིག་པ་ཅན་གྱི་སྐྱེ་བོ་རྣམས་ལ་མི་སྟེན་ནོ། །རྙེད་པ་དང་བཀུར་སྟི་རྣམས་ལ་མངོན་པར་དགའ་བར་མི་འགྱུར་རོ། །ཆོག་ཤེས་པ་དང་ལྡན་པ་
རྣམས་ལ་སྦྱིན་པ་པོ་དང་སྦྱིན་བདག་རྣམས་རབ་ཏུ་དང་བར་འགྱུར་རོ། །རིའི་ཁྲོད་རྣམས་སུ་སྟེན་པར་འགྱུར་རོ། །དེ་དག་ནི་དགེ་ལེགས་ཀྱི་སྐལ་བ་ཅན་དུ་འགྱུར་རོ། །མང་དུ་ཀུན་བརྗོད་པར་མི་འགྱུར་རོ། །གྲོང་དུ་རྒྱུ་བར་
མི་འགྱུར་ཞིང་། འཐུང་བ་དག་གི་ཁང་པར་ཡང་མི་འཇུག་གོ། །ཉོ་བ་དང་འཚོང་བར་ཡང་མི་བྱེད་དོ། །དེ་དེ་ལྟ་བུའི་ཡོན་ཏན་རྣམས་དང་ཡང་དག་པར་ལྡན་པ་ལེགས་པར་རྒྱུ་བའི་དགེ་སློང་ནི་ཆུད་འཛའ་བར་མི་
འགྱུར་རོ། །སྐྱེ་བོའི་ཚོགས་མང་པོ་རྣམས་ཀྱང་གུས་པ་དང་བཅས་པར་འགྱུར་རོ། །དེའི་ཕྱིར་བག་མེད་པའི་རྒྱུའི་རྩེ་མོ་ནི་འདི་ཡིན་ཏེ། འདི་ལྟར་དགེ་སློང་གྲགས་པ་མ་ཡིན་པ་རྣམས་ཀྱིས་འཇིགས་པ་མེད་པའོ། །
གང་ཡང་དགེ་སློང་གྲགས་པ་མ་ཡིན་ནས་འཇིགས་པ་མེད་པ་དེ་ཁྱིམ་པ་རྣམས་ཀྱི་དྲུང་ན་ཡང་ཤིན་དུ་ལྷག་པ་ཡིན་ཏེ། སྐྱོན་རྣམས་ལས་དེ་ཅི་དགའ་བར་སྤྱོད་པར་བྱེད་པ་དང་། ཅི་རུང་བར་སྨྲ་བ་དང་ངོ་ཚ་མེད་པ་དང་ཁྲེལ་
མེད་པ་དང་། ཚུལ་ཁྲིམས་འཆལ་པ་མང་དུ་བྱེད་པར་འགྱུར་རོ། །དེ་ལུས་ཞིག་པར་གྱུར་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །གྲགས་པ་མ་ཡིན་པས་འཇིགས་པ་ནི་གཅིག་པུ་རྒྱུ་བར་འགྱུར་
བ་དང་ཁྱིམ་རྣམས་སུ་སྟེན་པར་མི་བྱེད་དོ། །དེ་དག་ནི་རྟག་ཏུ་ཡང་རི་དང་དགོན་པར་གནས་པར་འགྱུར་ཞིང་ཆོག་ཤེས་པར་ཡང་འགྱུར་རོ། །འདོད་པ་དང་བརྣབ་སེམས་ལ་སྟེན་པར་མི་བྱེད་དོ། །ཡུལ་ལྗོངས་ཀྱི་
སྐྱོན་རྣམས་ཐམས་ཅད་སྤོང་བར་བྱེད་དོ། །ཁ་ན་མ་ཐོ་བ་ཅུང་ཟད་ཙམ་ལ་ཡང་འཇིགས་པར་ལྟ་བར་འགྱུར་རོ། །དེ་ལྟར་འཇིག་རྟེན་ན་གྲགས་པ་མ་ཡིན་པ་རྣམས་ཀྱིས་འཇིགས་པར་གྱུར་པ་གང་ཡིན་པ་དེ་ནི་དགེ་

66-1-65b

སློང་ཡིན་ནོ། །དེ་ནི་དགེ་བའི་སྐལ་བ་ཅན་ཡིན་ནོ། །གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སློང་རྣམས་ལ་གཅེས་པར་གྱུར་པའི་ཆོས་ཡོད་དོ། །འདི་ཡང་གང་ཞེ་ན། འདི་ལྟ་སྟེ་མངོན་པར་ཞེན་པ་མེད་པའོ། །མངོན་
པར་ཞེན་པ་མེད་པ་ཞེས་བྱ་བའི་ཆོས་ནི་མཆོག་ཏུ་དགའ་བར་གྱུར་པ་ཡིན་ནོ། །འདི་ནི་དགེ་སློང་དག་མངོན་པར་ཞེན་པ་མེད་པ་ནི་དག་པ་དང་འབའ་ཞིག་པ་དང་ཀུན་དུ་ཆགས་པ་མེད་པའི་བློ་དང་ལྡན་པ་དང་། གཅིག་ཏུ་ངེས་པར་
རྒྱུ་བ་དང་བློ་ལེགས་པར་གནས་པར་གྱུར་པ་དང་། འཚོ་བ་དག་པ་རྣམས་མཆོག་ཏུ་མྱ་ངན་དང་བྲལ་བར་འགྱུར་བ་ཡིན་ནོ། །མཆོག་ཏུ་རྣལ་དུ་ཕེབས་པའི་ཡིད་འཛིན་པ་ཡིན་ནོ། །དེ་སྡུག་བསྔལ་བས་ཞུམ་པར་མི་
འགྱུར་རོ། །ཁྲོ་བ་དང་འཁྲུག་པ་འབྱུང་བར་མི་འགྱུར་རོ། །དགའ་བ་ཡ་ཡ་བོའི་གནས་རྣམས་ལ་དགའ་བར་ཡང་མི་འགྱུར་རོ། །འཇིགས་པའི་གནས་རྣམས་ལ་ཡང་རྣམ་པར་མི་འཇིགས་སོ། །གཉེན་བཤེས་རྣམས་ལ་
སྙིང་ཉེ་བར་ཆགས་པར་གྱུར་ནས་རང་གི་དོན་རྣམས་ལས་ཡོངས་སུ་ཉམས་པ་མ་ཡིན་ནོ། །གྲོང་ཁྱེར་པ་རྣམས་ཀྱིས་བརྒད་པ་དང་འགྱིང་བག་བྱས་པ་དང་རྩེས་པ་དང་ཡོངས་སུ་སྤྱད་པ་རྣམས་ལ་ཡང་མངོན་པར་ཞེན་པར་མི་བྱེད་
དོ། །ཉེ་བར་འགྲོ་བའི་རང་བཞིན་ཅན་མ་ཡིན་ནོ། །གྲོང་ནས་གྲོང་དང་གྲོང་ཁྱེར་ནས་གྲོང་ཁྱེར་དང་། ཚོང་འདུས་ནས་ཚོང་འདུས་རྣམས་དང་ཁྱིམ་ནས་ཁྱིམ་ཀུན་དུ་ཆགས་པ་མེད་པའི་བློས་གཅིག་ཏུ་བདེ་བར་ཉལ་བ་དང་རབ་ཏུ་སད་
པར་ཡང་འགྱུར་རོ། །དེའི་བློས་མངོན་པར་ཆགས་པ་མེད་པ་དང་རྣམ་པར་དག་པ་ཡིན་ནོ། །ཀུན་དུ་སྤྱོད་པ་རྣམ་པར་དག་པ་དེ་ནི་བདུད་དམ་སྒྲ་དང་རེག་བྱ་དང་། རོ་དང་གཟུགས་དང་དྲི་དང་དེ་དག་གིས་ཀྱང་ཕྲོགས་པར་མི་འགྱུར་རོ། །
རྙེད་པ་དང་བཀུར་སྟི་རྣམས་ལ་མངོན་པར་དགའ་བར་མི་འགྱུར་རོ། །དེས་ཐོབ་པ་རྣམས་སམ་གཞན་ཡང་ཇི་ལྟར་སྐྱེས་པའི་ཡིད་ཀྱི་རྣམ་པར་རྟོག་པ་རྣམས་འཇོམས་པར་བྱེད་དོ། །ཡོངས་སུ་སྤོང་བར་བྱེད་དོ། །མི་དགེ་བའི་

66-1-66a

རྣམ་པར་རྟོག་པ་དེ་དག་མི་སྐྱེ་བར་བྱ་བའི་དོན་དུ་རབ་ཏུ་འབད་པར་བྱེད་ཅིང་བརྩོན་འགྲུས་རྩོམ་པར་བྱེད་དོ། །ཇི་ལྟར་ལམ་འདི་དག་བསྐྱེད་པས་ནི་མི་དགེ་བ་ཡིད་ལ་བྱེད་པའི་རྣམ་པར་རྟོག་པ་དེ་རྣམས་ཇི་ལྟར་ཕྱི་ནས་
ཡང་བདག་གི་སེམས་རྣམ་པར་དཀྲུག་པའི་ངོ་བོར་མི་བྱེད་པ་དེ་ལྟར་བདག་གིས་གཞོམ་པར་བྱའོ་ཞེས་དེ་རེ་ཤིག་རྣམ་པར་རྟོག་པའི་རྐྱེན་གྱིས་སྐྱེས་པའི་མི་དགེ་བ་གཅིག་པོ་དེ་ཉིད་མི་སྐྱེད་པར་བྱ་བའི་དོན་དུ་འབད་རྩོལ་བརྩོན་
འགྲུས་རྩོམ་པར་བྱེད་པ་ཡིན་ན། མངོན་པར་ཞེན་པའི་ཆོས་རགས་པར་གྱུར་པ་འཇིག་རྟེན་པ་རྣམས་མི་བྱེད་པ་ལ་ལྟ་ཅི་སྨོས། གང་དག་རྣལ་འབྱོར་སྤྱོད་པར་གྱུར་པ་རྣམས་ཀྱིས་ཆོས་གསུམ་པོ་འདི་དག་ནི་བྱ་བ་ཡིན་ནོ། །
གསུམ་གང་ཞེ་ན་འདི་ལྟ་སྟེ། སེམས་ཀྱི་རྒྱུན་རབ་ཏུ་སུན་འབྱིན་པར་བྱེད་པ་སྐྱེས་པར་གྱུར་པའི་མི་དགེ་བའི་ཆོས་རྣམས་རྣམ་པ་ཐམས་ཅད་དུ་མི་སྐྱེ་བར་བྱ་བའི་དོན་དུ་དང་། མ་སྐྱེས་པ་རྣམས་མི་བསྐྱེད་པར་བྱ་བའི་དོན་དུ་དང་། 
དེ་བཞིན་དུ་འདས་པའི་ཆོས་མི་དགེ་བ་རྣམས་དྲན་པར་བྱས་ལ་རབ་ཏུ་བརྩོན་པར་བྱ་སྟེ། དགེ་སློང་ཡིད་ཤིན་དུ་མཉམ་པར་བཞག་པ་དང་སྤྱོད་པ་རྣམ་པར་དག་པ་རྣམས་དང་རྣམ་པ་ཐམས་ཅད་དུ་བློ་མངོན་པར་ཞེན་པ་མེད་པ་རྣམས་
དང་། རྣམ་པར་དག་པར་སྤྱོད་པར་བྱེད་པ་རྣམས་དང་གཅིག་ཏུ་སྲེད་པ་ཟད་པར་འདོད་པ་རྣམས་དང་འདོད་ཆགས་དང་བྲལ་བར་འདོད་པ་རྣམས་དང་། བདེ་བ་འདོད་པ་རྣམས་ཀྱིས་ཀྱང་མངོན་པར་ཞེན་པ་མེད་པའི་བློ་བསྐྱེད་པར་བྱའོ། །
ཡང་དགེ་སློང་གང་དག་བློ་མངོན་པར་ཆགས་པ་མེད་པར་གྱུར་པ་རྣམས་ནི། མཆོག་ཏུ་བདེ་བ་དང་ལྡན་པ་ཆེས་བདེ་བའི་གོ་འཕང་འཐོབ་པ་ཡིན་ནོ། །དེ་ནས་དུས་འདིར་རྨ་བྱའི་མངའ་བདག་དེས་འཁོར་བ་འཇིག་གིས་
གསུངས་པའི་ཚིགས་སུ་བཅད་པ་བརྗོད་པ་ཇི་ལྟར། རྟག་པར་ཀུན་དུ་ཆགས་མེད་བློ། །བསམ་གཏན་གྱིས་ནི་རྟག་ཏུ་གནས། །ཡིད་ནི་རྟག་ཏུ་རྣམ་པར་དག །རྩེ་གཅིག་ཡིད་ལ་མངོན་པར་དགའ། །སེམས་གང་ཤིན་ཏུ་

66-1-66b

རྩེ་གཅིག་པ། །དེ་ནི་སྐྱོན་གྱིས་འཆིང་བ་མེད། །སྐྱོན་བཅས་འཇིགས་ལས་ངེས་གྲོལ་བ། །འདི་ལ་རང་བཞིན་གནས་ཞེས་བརྗོད། །རྩེ་གཅིག་ལ་ནི་མངོན་དགའི་སེམས། །རྣམ་རྟོག་ཉིད་ཀྱིས་བསྒྲུབ་པ་མིན། །རྣམ་པར་རྟོག་
ལས་རྣམ་གྲོལ་དེ། །མཛེས་པར་རང་བཞིན་གནས་པར་འགྱུར། །གང་གི་སེམས་ནི་རྟག་ཏུ་ཞི། །རྒྱུན་དུ་མྱ་ངན་འདས་མངོན་དགའ། །དེ་ནི་མི་དགེ་བའི་རྒྱུ་རྣམས་ཀྱི། །དབང་སྐྱེས་སྐྱོན་ནི་འགྱུར་མ་ཡིན། །གང་ཡང་བསམ་
གཏན་གྱིས་བྱས་བདེ། །གང་ཡང་ཏིང་འཛིན་ལས་སྐྱེས་བདེ། །དེ་ཀུན་རྩེ་གཅིག་བློ་ཡི་ནི། །རྟག་ཏུ་ལུས་ཅན་རྣམས་ལ་འགྱུར། །རྩེ་གཅིག་དགའ་བའི་སྡོམ་བརྩོན་གྱི། །བདེ་གང་སྙིང་ལ་སྐྱེ་བ་ནི། །དེ་འདིར་བདེ་བར་རྣམ་ཤེས་གྱིས། 
འཇིག་རྟེན་པ་ཡི་བདེན་མིན་འདོད། །རྩེ་གཅིག་སེམས་ལ་མངོན་པར་དགའ། །རྣམ་པར་དག་པ་བྱས་ཉིད་དེ། །སྐྱོན་དྲི་ལས་ནི་རྣམ་གྲོལ་བའི། །དེས་ནི་ཞི་བ་རྟོགས་པར་འགྱུར། །རྟག་ཏུ་ཡིད་ནི་གཅིག་ཏུ་ངེས། །དབང་པོ་ལྔ་
རྣམས་ཀུན་དུ་བསྡུས། །སྲེད་པའི་མེས་སྲེག་མི་བཟད་པ། །བློ་ཡི་ཡེ་ཤེས་ཆུ་ཡིས་འཇོམས། །སྲེད་པ་དང་ནི་ལྡན་མིན་ཏེ། །རྣམ་པར་དག་པའི་བདེ་འདོད་པ། །ཟད་མེད་འགྲིབ་པ་མེད་ཉིད་ཀྱི། །གོ་འཕང་མདུན་ན་གནས་དང་
འདྲ། །རྣམ་པར་རྟོག་པ་གྱ་གྱུའི་སེམས། །གང་དང་གང་ལ་སྐྱེ་འགྱུར་བ། །གཅིག་ལ་དམིགས་པ་དང་ལྡན་པའི། །ཏིང་འཛིན་དེ་ཡིས་འཛིན་པར་བྱེད། །དེ་ཕྱིར་ཆོས་དེ་དག་གི་མཆོག །མྱ་ངན་འདས་གྲོང་འགྲོ་བ་ཡི། །གང་ནི་
རྩེ་གཅིག་ཡིད་བྱས་ལ། །བདུད་ཀྱི་སྒྲུབ་བྱེད་གཞོམ་པར་གྱིས། །རབ་བརྟན་ཡེ་ཤེས་འོད་ཟེར་གྱིས། །ཡིད་ཀྱི་རྟ་ནི་བརྟུལ་བཟུང་ནས། །མྱ་ངན་ཉོན་མོངས་བཅོམ་པ་ཡི། །མཆོག་གི་གནས་སུ་འགྲོར་འགྱུར་ཏེ། །སྙིང་པོ་
དེ་ནི་བརྟན་རྣམས་ཀྱིས། །རྣལ་འབྱོར་མཆོག་ཏུ་འགྲོ་རྣམས་ཀྱིས། །རྩེ་གཅིག་ཡིད་ནི་གང་བྱས་པས། །གོ་འཕང་འཕོ་བ་མེད་པར་འགྲོ། །དེ་ལྟར་རྨ་བྱའི་བདག་པོ་དེས་རྣམ་པ་དུ་མར་ཆོས་སྟོན་པར་བྱེད་པ་ནི་ལྷ་དེ་དག་

66-1-67a

རྣམས་ལ་བདེ་བའི་དོན་དུ་དང་ཕན་པར་བྱ་བའི་དོན་དུ་ཡིན་ནོ། །དེ་ནས་རྨ་བྱ་རྣམས་ཀྱི་མངའ་བདག་དེས་འཐབ་བྲལ་བ་དེ་དང་དགའ་ལྡན་པ་དེ་དག་རྣམས་ལ་སླར་ཡང་ཆོས་དེ་ཉིད་སྟོན་པར་བྱེད་དེ། མ་སྐྱེས་པ་ན་དགའ་བར་བྱེད་
པ་དགེ་བ་དང་མྱ་ངན་ལས་འདས་པར་འགྲོ་བའོ། །ཡང་ཆོས་གཞན་ཡང་སྟོན་པར་བྱེད་དེ། ཀྱེའི་ལྷ་དག་ཇི་ལྟར་ཆོས་གཞན་དག་ཉོན་དང་ཇི་ལྟར་དགེ་བའི་ཆོས་རྣམས་ཐམས་ཅད་ཀྱི་ཉིང་ཁུ་ནི་འདི་ཡིན་ཏེ། འདི་ལྟར་གཅིག་པུ་དགའ་
བའོ། །དགེ་སློང་གཅིག་པུ་ལ་དགའ་བ་ཡང་ཤིན་དུ་ཀུན་ནས་བསྡམས་པར་རྒྱུ་བ་དང་ཤིན་དུ་ཀུན་ནས་བསྡམས་པར་སྤྱོད་པ་དང་ལེགས་པར་བསྡམས་པར་རྣམ་པར་གནས་པ་དང་མཆོག་ཏུ་ཞི་བ་དང་མཆོག་ཏུ་གཙང་བར་འགྱུར་རོ། །འདི་
ལྟ་སྟེ་གཅིག་པུ་དགའ་བས་མངོན་པར་དགའ་བའི་དགེ་སློང་རྣམས་ནི། གཅིག་ཏུ་ཀུན་ནས་བསྡམས་པར་ལེགས་པར་སྤྱོད་པ་དང་། ཞི་བ་དུལ་བ་ཤིན་དུ་བརྟན་པས་གཅིག་པུ་དགའ་བས་དགའ་བ་རྣམས་ནི་ཐམས་ཅད་དུ་དགའ་
བར་འགྱུར་ཏེ། ཞི་བའི་གནས་སུ་གྱུར་པའི་རི་ཁྲོད་དག་དང་རིའི་ཕུག་དང་དུར་ཁྲོད་དང་སོག་མའི་ཕུང་པོ་རྣམས་དང་ཐམས་ཅད་ལ་ཡང་མཚུངས་པར་བློ་ཀུན་བསྡམས་པར་འགྱུར་རོ། །གཅིག་པུ་རྣམ་པར་རྒྱུ་བ་གཅིག་པུ་དགའ་
བའི་དགེ་སློང་ལ་ཡང་ཆོས་བདུན་གཅེས་པར་བྱེད་པར་འགྱུར་བ་ཡིན་ཏེ། གང་ཞེ་ན། འདི་ལྟ་སྟེ་རྟག་ཏུ་ཡིད་རབ་ཏུ་བདེ་བར་འགྱུར་རོ། །རྟག་ཏུ་ཡང་སེམས་རབ་ཏུ་དང་བར་འགྱུར་རོ། །འཇིག་རྟེན་པ་རྣམས་ཀྱིས་ཀྱང་འདི་
མཉན་པར་བྱེད་ཅིང་། ལྷ་དག་གིས་ཀྱང་འདི་མངོན་པར་སྲུང་བར་བྱེད་དོ། །དྲི་མ་རྣམས་དང་ཡོང་ཡོངས་སུ་བྲལ་བར་འགྱུར་རོ། །དགེ་བའི་ཆོས་རྣམས་ཀྱང་མངོན་པར་འཕེལ་ལོ། །དེའི་སེམས་ཤིན་དུ་མཉམ་པར་བཞག་
པའི་མཆོག་ཏུ་འགྱུར་ཞིང་། རབ་ཏུ་དང་བའི་ལུས་དང་ངག་དང་ཡིད་ཀྱི་ལས་ཀྱི་མཐའ་རྣམས་ཀྱིས་ཐར་པའི་ལམ་མངོན་སུམ་དུ་བྱེད་པར་འགྱུར་རོ། །དྲི་མ་རྣམས་ཀྱང་འདིས་རིང་དུ་བྱེད་པར་འགྱུར་རོ། །ཐ་མར་

66-1-67b

ཡང་འདིའི་དཀར་པོའི་ཆོས་རྣམས་ཀྱི་ཐ་སྙད་ཀྱིས་འཇིག་རྟེན་པ་རྣམས་དང་ལྷན་ཅིག་ཏུ་མངོན་པར་དགའ་བར་འགྱུར་རོ། །རྣམ་པ་དུ་མ་རྣམས་སུ་ཐོག་མ་མེད་པའི་དུས་ནས་མང་དུ་འཇུག་པའི་ཉོན་མོངས་པའི་དགྲ་རྣམས་
ཀུན་ནས་འཇོམས་པར་བྱེད་དོ། །དེའི་ཕྱིར་གཅིག་པུ་མངོན་པར་དགའ་བའི་དགེ་སློང་ནི་ཤིན་དུ་ལེགས་པར་བསྡམས་པས་རྒྱུ་བ་དང་། ཉོན་མོངས་པ་རྣམས་ཀྱིས་འཇིགས་པས་ཁ་ན་མ་ཐོ་བ་ཕྲ་རབ་ཙམ་རྣམས་ལ་ཡང་
འཇིགས་པར་ལྟ་བ་དང་རྟག་ཏུ་བརྩོན་པ་དང་ལྡན་པ་དང་ངེས་པར་གྲོལ་བ་དང་ཀུན་དུ་སྤྱོད་པ་རྣམས་ཤིན་དུ་དྲི་མ་མེད་པ་དང་རབ་ཏུ་ཞི་བ་ལ་དགའ་བར་འགྱུར་རོ། །དེ་ནས་དུས་དེའི་ཚེ་རྨ་བྱའི་མངའ་བདག་དེས་ལྷ་རྣམས་ལ་ཕན་
པར་བྱ་བའི་དོན་དུ་ཚིགས་སུ་བཅད་པ་བརྗོད་པ་ཇི་ལྟར། མི་བཟད་པ་དང་གཡོ་དང་དྲག །བཟོད་པར་དཀའ་དང་སྟོབས་པོ་ཆེ། །བརྟན་གང་སེམས་ལས་ངེས་རྒྱལ་བ། །འཇིག་རྟེན་པ་དེ་བདེ་ལྡན་འདོད། །གང་གིས་འཇིག་
རྟེན་འདི་སྲེག་པའི། །སྐྱོན་ནི་རྣམ་པ་གསུམ་པོ་སྤངས། །མེ་དེ་རྣམས་ནི་ཡེ་ཤེས་ཆུས། །ཞི་བར་བྱས་པས་བདེ་བར་འགྱུར། །གང་དག་ཆོས་ནི་མི་འདོད་པའི། །མི་དེ་རྣམས་ནི་མི་མ་ཡིན། །གྲོང་ཁྱེར་མྱ་ངན་འདས་འགྲོ་བ་ཡི། །དེ་ཉིད་
ལམ་ལ་གནས་པ་མིན། །ཆེན་པོར་གྱུར་པའི་བདེ་ལེགས་གནས། །མི་ཡིས་གང་ཕྱིར་ཐོབ་པར་འགྱུར། །ཐེག་ཆེན་རྐྱལ་པ་ལ་ཞོན་པས། །སྲིད་པའི་མཚོ་ལས་སྒྲོལ་བར་འགྱུར། །གློག་དང་ཟོ་ཆུན་རྒྱུན་མོ་འདྲ། །
དྲི་ཟའི་གྲོང་ཁྱེར་དང་མཚུངས་པར། །ཤིན་དུ་སྡུག་པ་རྟག་མྱུར་བ། །ལུས་ཅན་ཀུན་གྱི་གསོན་པ་ཡིན། །ལུས་ཞེས་བྱ་བའི་མྱུ་གུ་ནི། །རྟག་ཏུ་སྐད་ཅིག་འཇིག་པ་ཡིན། །ཤིན་དུ་གཡོ་ཞིང་སྙིང་པོ་མེད། །རྒ་ཤི་
འཇིགས་པའི་ཆེན་པོ་ཡིས། །ནད་ཀྱིས་གྲོང་ཁྱེར་འདི་དག་རྣམས། །མྱ་ངན་ཁོར་ཡུག་ཆེན་པོ་སྟེ། །དགེ་མི་དགེ་ཡི་ཞིང་ལ་ཡང་། །ལུས་སུ་མངོན་པར་བརྗོད་པ་ཡིན། །སྦྱིན་དང་ཚུལ་ཁྲིམས་ཡིད་ཀྱིས་གང་། །རྟག་ཏུ་

66-1-68a

ལུས་ནི་རྣམ་རྒྱན་པ། །སེམས་ཅན་དེ་ནི་སྙིང་པོ་གཅིག །ལུས་ནི་འབྲས་བུ་དང་བཅས་འདོད། །གང་ལ་སྙིང་པོ་བདུན་ཡོད་པ། །སངས་རྒྱས་ཡིན་པར་དེ་ཡོངས་བསྒྲགས། །བརྩོན་འགྲུས་སྦྱིན་པ་དེ་བཞིན་
ཁྲིམས། །ཡེ་ཤེས་བྱམས་པ་བཟོད་དང་དུལ། །གང་ཡང་གྲངས་མེད་འགྱུར་བ་ཡི། །ཐེག་ཆེན་དང་ཡང་ཡང་དག་ལྡན། །ཕ་རོལ་ཕྱིན་དྲུག་ལས་རྒལ་བའི། །དེ་ནི་སངས་རྒྱས་ཡིན་པར་བསྒྲགས། །འདོད་པ་ཡོངས་སུ་
སྤོང་བ་གང་། །དེ་དག་ས་གསུམ་སྙིང་པོ་ཡིན། །འདོད་པ་ཐམས་ཅད་ཡོངས་བཏང་བ། །རྟག་ཏུ་བདེ་ཞེས་འདིར་བརྗོད་དོ། །འདོད་པ་རྣམས་ལ་ཆགས་ཡོད་གང་། །དེ་ཡི་སྡུག་བསྔལ་འདི་མདུན་གནས། །དེ་དག་ཉེས་
དམིགས་ཤེས་བྱས་ལ། །དེ་ཕྱིར་དེ་དག་ཡོངས་སུ་སྤོངས། །དེ་ལྟར་རྨ་བྱ་རྣམས་ཀྱི་མངའ་བདག་དེས་དགའ་ལྡན་པ་དེ་དག་རྣམས་དང་འཐབ་བྲལ་གྱི་ལྷ་དེ་དག་རྣམས་ལ་ཆོས་སྟོན་པར་བྱེད་དོ། །གཞན་ཡང་རྨ་བྱའི་
མངའ་བདག་དེས་ལྷ་དེ་དག་རྣམས་ལ་ཆོས་སྟོན་པར་བྱེད་དེ། ཇི་ལྟར་ཆོས་གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་དང་བྲམ་ཟེ་རྣམས་ལ་གཅེས་པར་གྱུར་པ་ཡོད་དོ། །འདི་དག་ཀྱང་གང་ཞེ་ན། འདི་
ལྟ་སྟེ། སེམས་རྣམ་པར་གཡེང་བ་མེད་པའོ། །སེམས་རྣམ་པར་མི་གཡེང་བའི་དགེ་སློང་ཡང་བློ་ཤིན་དུ་མཉམ་པར་བཞག་པ་དང་། གཅིག་ཏུ་ངེས་པར་རྒྱུ་བར་བྱེད་པ་དང་རྟག་ཏུ་ཚངས་པར་སྤྱོད་པ་ལ་མངོན་པར་
དགའ་བ་དང་རྟག་ཏུ་བརྩོན་པ་དང་ལྡན་པར་ཡང་འགྱུར་རོ། །བདེ་ལེགས་རྣམས་ཐོབ་པར་འགྱུར་རོ། །ངན་སོང་གི་འཇིགས་པ་རྣམས་ཐམས་ཅད་ལས་ཀྱང་གྲོལ་བར་འགྱུར་རོ། །གཅིག་པུ་དགའ་བའི་དགེ་སློང་
ནི་དབང་པོ་དྲུག་ལེགས་པར་བསྡམས་པ་དང་ཡུལ་རྣམས་ཐམས་ཅད་ཡོངས་སུ་སྤངས་པ་དང་། འཁོར་བའི་འཇིགས་པ་རྣམས་ཀྱིས་སྐྲག་པར་གྱུར་པས་དགེ་སློང་ཆོས་རྣམས་ཐམས་ཅད་ཡོངས་སུ་སྤོང་བར་

66-1-68b

མི་བྱེད་པ་དང་། མི་དགེ་བ་རྣམས་ཐམས་ཅད་ཡོངས་སུ་སྤོང་བར་བྱེད་པ་དང་། རྟག་པ་ཉིད་དུ་ཡང་བདེ་བར་རྒྱུ་བར་འགྱུར་རོ། །གང་དག་གི་བློ་རྣམ་པར་གཡེང་བར་མ་གྱུར་པ་རྣམས་ནི་སྒྲ་དང་རེག་བྱ་དང་རོ་དང་
གཟུགས་དང་དྲི་རྣམས་ལ་རྟག་པ་ཁོ་ནར་ཡང་དེའི་སེམས་མཉམ་པར་བཞག་པར་འགྱུར་རོ། །དེའི་སེམས་མཉམ་པར་བཞག་པའི་ཕྱིར་ན་དགེ་བའི་ཆོས་རྣམས་མངོན་པར་འཕེལ་བར་འགྱུར་རོ། །དེ་དག་རྣམས་
ཉིད་ལ་དགའ་བར་འགྱུར་རོ། །འཁོར་བ་ལ་ནི་དགའ་བར་འགྱུར་བ་མ་ཡིན་ནོ། །རྟག་ཏུ་བརྩོན་པ་དང་ལྡན་པར་གྱུར་པས། ཏིང་ངེ་འཛིན་ལ་མཉམ་པར་བཞག་པའི་ཡིད་དེ་ལ་ལམ་རབ་ཏུ་སྐྱེ་བར་འགྱུར་རོ། །རྟག་ཏུ་ལམ་
ལ་བསྟེན་པར་བྱེད་ཅིང་སྒོམ་པར་ཡང་བྱེད་དོ། །ལན་མང་དུ་བྱེད་དོ། །དེ་ནི་ལམ་དེ་དག་བསྟེན་ཅིང་བསྒྲོམས་ལ་ལན་མང་དུ་བྱས་པར་གྱུར་པ་ལས་ལམ་མངོན་དུ་འགྱུར་རོ། །རྟག་པར་རྒྱུན་དུ་ཡང་ལམ་དེ་ཉིད་སྒོམ་པར་བྱེད་པ་
ཡིན་ནོ། །དེ་ལམ་གྱི་རྗེས་སུ་རྟོགས་པའི་བློ་བསྟེན་པར་བྱེད་ཅིང་། དེ་སྟེན་པར་གྱུར་པ་ལས་ཀྱང་ཀུན་དུ་སྦྱོར་བ་རྣམས་དང་བྲལ་བར་འགྱུར་རོ། །བག་ལ་ཉལ་རྣམས་ནི་འདྲུལ་བར་འགྱུར་རོ། །འདིའི་ཀུན་དུ་སྦྱོར་བ་གང་དག་དང་
ཡོངས་སུ་བྲལ་བར་གྱུར་ན། འདི་ལྟ་སྟེ་རྗེས་སུ་ཆགས་པའི་ཀུན་དུ་སྦྱོར་བ་དང་ཁོང་ཁྲོ་བའི་ཀུན་དུ་སྦྱོར་བ་དང་མ་རིག་པའི་ཀུན་དུ་སྦྱོར་བ་དང་ང་རྒྱལ་གྱི་ཀུན་དུ་སྦྱོར་བ་དང་ཕྲག་དོག་གིས་ཀུན་དུ་སྦྱོར་བ་དང་སེར་སྣའི་ཀུན་དུ་སྦྱོར་བ་
སྟེ་དེའི་ཀུན་དུ་སྦྱོར་བ་དེ་དག་རྣམས་དང་རབ་ཏུ་བྲལ་བ་ཡིན་ནོ། །འདི་ནི་བག་ལ་ཉལ་རྣམས་གང་དག་རུལ་བར་གྱུར་པ་ཡིན་ན་འདི་ལྟ་སྟེ། འདོད་པའི་འདོད་ཆགས་ཀྱི་བག་ལ་ཉལ་བ་དང་ཁོང་ཁྲོ་བའི་བག་ལ་ཉལ་དང་སྲིད་པའི་འདོད་
ཆགས་ཀྱི་བག་ལ་ཉལ་དང་མ་རིག་པའི་བག་ལ་ཉལ་དང་ང་རྒྱལ་གྱི་བག་ལ་ཉལ་དང་ལྟ་བའི་བག་ལ་ཉལ་དང་ཐེ་ཚོམ་གྱི་བག་ལ་ཉལ་དང་རྣམས་རུལ་ཅིང་མྱགས་པར་འགྱུར་རོ། །དེ་ལ་འགྲོ་བ་རྣམས་ཐམས་ཅད་དུ་བརྗེ་བསོར་བྱེད་

66-1-69a

པ་པོར་གྱུར་པ་ཁམས་གསུམ་གྱིས་བསྡུས་པའི་སྟོབས་པོ་ཆེ་དེ་དག་རྣམས་ནི། རྣམ་པར་གཡེང་བ་མེད་པའི་སེམས་ཀྱིས་ནི་མི་ནུས་པ་ཡིན་ཏེ། མཐོང་བ་དང་སྒོམ་པའི་ལམ་དག་གིས་སོ། །དེ་ལྟར་ན་
སེམས་རྩེ་གཅིག་ཏུ་བྱེད་པར་གྱུར་པ་ནི་དགེ་སྦྱོང་དང་བྲམ་ཟེ་རྣམས་ལ་གཅེས་པ་ཡིན་ཏེ། གང་གི་ཕྱིར་གལ་ཏེ་ན་དགེ་བར་གྱུར་པ་རྣམས་སམ་གལ་ཏེ་ན་མི་དགེ་བར་གྱུར་པ་རྣམས་ཀྱང་རུང་སྟེ། ཆོས་ཐམས་ཅད་ནི་སེམས་
ཀྱི་རྩ་བ་ལས་ཡིན་པའི་ཕྱིར་རོ། །དེའི་ཕྱིར་སྲིད་པའི་འཇིགས་པའི་སྐྱོན་འདི་དག་རྣམས་ཀྱིས་འཇིགས་པས་དེ་ལྟར་རབ་ཏུ་བརྩོན་པས་ལམ་སྟེན་པར་བྱེད་པ་རྣམས་ཐམས་ཅད་ཀྱིས་ཀྱང་རབ་ཏུ་འབད་པས་སེམས་
རྩེ་གཅིག་ཏུ་བྱའོ། །དེ་ལྟར་ན་ཉོན་མོངས་པ་རྣམས་ཟད་པར་བྱ་བར་ནུས་པ་ཡིན་གྱི། གཞན་དུ་ན་ཐོག་མ་མེད་པའི་དུས་ནས་འཇུག་པའི་ཉོན་མོངས་པའི་ཚོགས་གང་ཡིན་པ་རྣམས་གཞོམ་པར་ནུས་པ་ཡང་མ་ཡིན་ནོ། །
དེ་ནས་དུས་དེར་རྨ་བྱའི་མངའ་བདག་གིས་ཚིགས་སུ་བཅད་པ་ཐམས་ཅད་མཁྱེན་པས་གསུངས་པ་འཆད་པ་ཇི་ལྟར། ཡིད་ནི་རྩེ་གཅིག་གྱུར་པ་ཡི། །སྐྱོན་གྱིས་འཇིགས་པའི་རྣལ་འབྱོར་པ། །ཡིད་ཉིད་ཀྱི་ནི་པད་མ་བཞིན། །
ཡིད་ལ་ཟག་མེད་ཆོས་རྣམས་སྐྱེ། །རྩེ་གཅིག་གྱུར་པའི་ཡིད་ཀྱིས་ནི། །དགེ་བའི་ལམ་ནི་སྒོམ་པར་བྱེད། །ཉི་མ་ཤར་བས་མུན་བསལ་ལྟར། །མི་དགེའི་ཆོས་རྣམས་འཇོམས་པར་བྱེད། །གང་གི་ཡིད་ནི་རྩེ་གཅིག་པ། །
རྟག་ཏུ་ཞི་ཞིང་མཉམ་བཞག་པས། །དུག་ལ་བྱ་ཁྱུང་ཇི་ལྟ་བར། །སྐྱོན་རྣམས་ལ་ནི་དེ་འཇིགས་མིན། །གཡོ་བར་གྱུར་པའི་སེམས་འདི་ནི། །རླུང་ཆེན་ཤུགས་དང་འདྲ་བ་ཡིན། །འདུལ་མཁན་ཇི་བཞིན་འཛིན་པ་ཡིས། །
ཇི་ལྟར་བར་ནི་བརྟན་པས་འདུལ། །ཡེ་ཤེས་ཚུལ་ཁྲིམས་ཏིང་འཛིན་གྱིས། །སྐྱོན་གྱི་ནགས་ནི་གཏན་ནས་སྲེག །རུང་དང་བཅས་པ་གང་གིས་ནི། ། ནགས་སྐམས་པ་ལ་མེ་བཞིན་ནོ། །དེ་ཕྱིར་ཤེས་པ་རྟག་ཏུ་སྟེན། །

66-1-69b

མི་ཤེས་པ་ཡང་ཡོངས་སུ་སྤོངས། །སྐྱེ་དང་འཆི་བ་སྤངས་པ་ཡི། །བླ་ན་མེད་པའི་གནས་སུ་འགྲོ། །སེམས་གང་རྩེ་གཅིག་འགྱུར་བ་ཡི། །དེ་ནི་རབ་ཏུ་བརྩོན་པར་གྱིས། །དེ་ནི་དུལ་བའི་དབང་གྱུར་པས། །སྐྱོན་སྐྱེད་བྱེད་པ་
མིན་པར་འདོད། །རྟག་ཏུ་གཡོ་བའི་ཡུལ་རྣམས་ནི། །བརྟན་པར་ཡོངས་སུ་བསྡུས་གྱུར་ན། །ལག་ན་རྟེན་པའི་དུག་འདྲ་བའི། །ཆགས་སོགས་ཀྱིས་ནི་གནོད་མི་འགྱུར། །དེ་ཕྱིར་བརྩོན་དང་གཏན་སོགས་པའི། །ཡོན་ཏན་གྱིས་ནི་
ཡིད་མྱུར་ཁྲིད། །སྲེད་ཆུ་ལམ་གསུམ་འགྲོ་བ་ལས། །འགོར་བ་མེད་པར་རྒལ་བར་གྱིས། །དེ་ལྟར་རྨ་བྱ་རྣམས་ཀྱི་མངའ་བདག་དེས་གཅིག་ཏུ་སྤྱོད་པའི་དགའ་ལྡན་གྱི་ལྷ་དེ་དག་རྣམས་དང་འཐབ་བྲལ་བ་དེ་དག་རྣམས་ལ་རྣམ་པ་དུ་མ་
རྣམས་སུ་ཕན་པར་གྱུར་པའི་དོན་དུ་ཡང་ཆོས་དེ་སྟོན་པར་བྱེད་དོ། །ལྷ་དེ་དག་རྣམས་ཀྱང་ཡིད་ཤིན་དུ་ལེགས་པར་བསྡམས་པ་དང་། ཡིད་ཤིན་དུ་མཉམ་པར་བཞག་པས་བདེ་བའི་ཡུལ་དེ་དག་རྣམས་ཐམས་ཅད་ཡོངས་སུ་སྤངས་ནས་ཆོས་དེ་
ཉིད་ཁོ་ན་ཉན་པར་བྱེད་དེ། འཁོར་བས་འཇིགས་པར་གྱུར་པ་དེ་དག་རྣམས་ཀྱི་ཡིད་དེ་དག་རྟོགས་ནས། སླར་ཉིད་ཀྱང་ཆོས་དེ་དག་ཉིད་སྟོན་པར་བྱེད་པ་ནི་ཇི་ལྟར་འདོད་པ་སྡུག་པ་ཡིད་དུ་འོང་བ། བག་མེད་པ་རྣམས་ཐམས་
ཅད་ཀྱི་ལྕགས་ཀྱུ་ལྟ་བུར་གྱུར་པའི་ཆོས་གཞན་ཡང་ཐེག་པ་ཆེན་པོ་ལ་ལེགས་པར་གནས་པ་རྣམས་ཀྱིས་ཡིད་ལ་བྱའོ། །འདི་དག་ཀྱང་གང་ཞེ་ན། འདི་ལྟ་སྟེ་འཆི་བ་རྗེས་སུ་དྲན་པའོ། །གང་གི་ཡིད་ལ་འཆི་བ་རྗེས་སུ་
དྲན་པ་ཡོད་པར་གྱུར་ཞིང་། རྟག་ཏུ་ཡང་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་ན། ཇི་ལྟར་སྡུག་བསྔལ་འདི་དག་ནི་ལུས་ཅན་རྣམས་ཐམས་ཅད་ལ་སོ་སོར་མཚུངས་པ་ཡིན་ཏེ། ཕྱིར་བཟློག་དུ་མྱེད་པ་
སྐྱེས་པ་རྣམས་ཐམས་ཅད་ལ་ནི་ཅི་ནས་ཀྱང་འབྱུང་བར་འགྱུར་བ། བདེན་ངེས་པར་འབྱུང་བ་རྣམས་ནི་འདུན་ཞིང་ཡིད་དུ་འོང་བ་ཐམས་ཅད་ཀྱང་ཐ་དད་དུ་འགྱུར་བ་མེད་པར་འགྱུར་བ་རྣམ་པར་འགྱེས་པ་རྣམ་པར་བྲལ་བ་

66-1-70a

རྣམ་པར་བྱེ་བར་འགྱུར་བ་ཡིན་ནོ། །བདག་ཅག་ནི་འཇིག་རྟེན་འདི་ནས་ཤི་འཕོས་པར་གྱུར་ནས་གཞན་རྣམས་སུ་སྐྱེ་བར་འགྱུར་བ་ཡིན་ལ། གལ་ཏེ་ཤེད་ན་བདེ་བ་དང་སྡུག་བསྔལ་རྣམས་ཀུན་དུ་འཐོབ་
པར་འགྱུར་ཏེ། ལས་ལ་ཞོན་པར་གྱུར་པའི་སེམས་ཅན་དེ་དག་རྣམས་རང་གི་ལས་ཀྱི་འབྲས་བུ་རྣམས་ཀྱི་ལམ་གྱི་ཟས་ཟ་བར་བྱེད་པས་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །འདི་ནི་སྐྱེ་བ་དང་འཆི་
བའི་དུས་བྱུང་བར་གྱུར་པ་ན་འགའ་ཞིག་ལ་ཡང་འགའ་ཞིག་གི་ཡང་གྲོགས་མེད་དོ། །དེ་ལ་དགེ་བ་དང་མི་དགེ་བའི་ལས་དེ་དག་རྣམས་གང་གི་ཕྱིར་དུས་དེ་ནི་གྲོགས་སུ་གྱུར་པ་ཡིན་ནོ། །གང་གི་ཕྱིར་ལེགས་པར་བྱས་
པ་རྣམས་ཀྱིས་ནི་མ་དང་ཕ་ལྟ་བུར་གྱུར་པ་ཡིན་ནོ། །ཉེས་པར་བྱས་པ་རྣམས་ཀྱིས་ནི་དགྲ་བོ་ལྟ་བུར་གྱུར་པས་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་བྱེད་པར་འགྱུར་རོ། །དེའི་ཕྱིར་ལེགས་པར་
སྤྱད་པ་རྣམས་ནི་རྟག་ཏུ་གྱིས་དང་། ཉེས་པར་སྤྱད་པ་རྣམས་ནི་སྤང་བར་བྱ་བ་ཡིན་ནོ། །དེས་འཆི་བ་རྗེས་སུ་དྲན་པ་གང་ཡིན་པ་དེ་དེ་ལྟར་བཤད་པ་ན། དེའི་ཚེ་ན་འདིའི་ཡིད་སྐྱོ་བར་གྱུར་པས་ཡུལ་རྣམས་ལ་
ཐོག་རྡུངས་སུ་འཇུག་པ་མ་ཡིན་ནོ། །འདོད་ཆགས་དང་ཞེ་སྡང་དང་གཏི་མུག་རྣམས་ཀྱིས་ཀྱང་འཕྲོགས་པར་མི་འགྱུར་རོ། །བུ་དང་ཆུང་མ་དང་རང་གི་སྐྱེ་བོ་རྣམས་ཀྱི་དོན་དུ་མི་དགེ་བའི་ལས་རྣམས་མི་བྱེད་དོ། །འཆི་
བའི་འཇིགས་པས་སྐྲག་པར་གྱུར་པའི་ཁྱིམ་པ་རྣམས་ཐམས་ཅད་ཀྱང་ཡིད་རབ་ཏུ་ཞི་བར་འགྱུར་ན། རབ་ཏུ་བྱུང་བ་རྣམས་ལྟ་སྨོས་ཀྱང་ཅི་དགོས། རབ་ཏུ་བྱུང་བ་ཡང་འཆི་བ་རྗེས་སུ་དྲན་པར་བྱེད་པ་ལས་བརྒྱ་ལ་
ཞིག་ལ་ཡང་ཚུལ་ཁྲིམས་འཆལ་བར་མི་འགྱུར་རོ། །ཡུལ་རྣམས་ལ་དགའ་བར་མི་འགྱུར་རོ། །ཡུལ་ལྗོངས་རྣམས་སུ་རྒྱུ་བར་མི་བྱེད་དོ། །ལྗོངས་རྣམས་རྒྱུ་བར་བྱེད་པས་ཀྱང་སེམས་རྣམ་པར་གཡེང་བར་བྱེད་པ་ཡིན་པ་

66-1-70b

དང་། འདུ་འཛི་དེ་དག་རྣམས་ཐམས་ཅད་ཀྱི་རྩ་བར་གྱུར་པ་ཡང་བུད་མེད་ཀྱི་འགྲོ་བ་རྣམས་ཡིན་པ་དང་། ཐམས་ཅད་ཀྱི་ཡང་སྐྱེ་མཆོད་དུ་གྱུར་པ་དེ་ནི་དགེ་སློང་འདིས་སྤོང་བར་བྱེད་དོ། །འཆི་བ་རྗེས་སུ་དྲན་པ་དེ་ལྟར་སེམས་པར་
བྱེད་དོ། །ཇི་ལྟར་ལྗོངས་རྒྱུ་བ་ལ་མངོན་པར་དགའ་བ་རྣམས་ཡང་དགེ་བའི་ཆོས་རྣམས་ལས་འགའ་ཞིག་ཀྱང་སེམས་ལ་མེད་ལ། འཆི་བའི་ཡུལ་དང་དུས་སུ་ཡང་དེ་དག་རྣམས་ཐམས་ཅད་བདག་ལ་ཕན་པ་མ་ཡིན་པ་དང་བདེ་
བ་མ་ཡིན་པར་འགྱུར་རོ། །གང་གི་ཚེ་བདག་ལ་གྲོག་མ་དང་ཁབ་ལ་སོགས་པའི་ཀླུང་རྣམས་ཀྱིས་འཆི་བའི་ཡུལ་དང་དུས་སུ་རབ་ཏུ་འདེབས་པར་བྱེད་པ་དེའི་ཚེ་ན་བདག་ལ་སྐྱབས་སམ་སྐྱོབ་པ་གང་ཞིག་འབྱུང་བར་འགྱུར་། 
རང་རང་གི་ལས་ཀྱི་ཞགས་པས་ཀུན་དུ་བཅིངས་ནས་འདི་ནས་འཇིག་རྟེན་ཕ་རོལ་ཏུ་འཁྲིད་པར་བྱེད་པ་ན། འདི་ནི་མ་འམ་ཕ་འམ་སྤུན་ཟླ་འམ་རང་གི་སྐྱེ་བོ་འམ་གྲོགས་པོ་དང་གཉེན་བཤེས་ཀྱི་ཚན་པར་གྱུར་པའི་སྐྱབས་མཆི་
བའི་ཡུལ་དང་དུས་བྱུང་བར་གྱུར་པ་ནི་མེད་དོ། །དེས་འཆི་བ་རྗེས་སུ་དྲན་པ་ཡང་དེ་ལྟར་སྒོམ་པར་བྱེད་དོ། །དེའི་ཚེ་སྦྱིན་པ་དང་ཚུལ་ཁྲིམས་དང་ཤེས་རབ་རྣམས་ལ་མངོན་པར་དགའ་བར་འགྱུར་རོ། །དེ་ལྟར་ལེགས་པར་བྱེད་
པར་གྱུར་པ་དེ་རྣམས་ཀྱི་དགེ་བའི་ལས་མངོན་པར་འཕེལ་བར་འགྱུར་རོ། །མི་དགེ་བའི་ལས་རྣམས་དང་ཡོངས་སུ་འབྲལ་བར་འགྱུར་རོ། །དེ་ལས་དེ་དག་རྣམས་ཀྱིས་ལྷ་དང་མི་རྣམས་སུ་བདེ་བ་ལ་ལོངས་སྤྱད་ནས་ཕྱི་ནས་
མྱ་ངན་ལས་འདས་པ་ཐོབ་པར་འགྱུར་རོ། །དེའི་ཕྱིར་ན་ཡོན་ཏན་དེ་དག་རྣམས་གོ་བར་བྱས་ལ་བུད་མེད་དམ་སྐྱེས་པ་འམ། ཁྱིམ་པ་འམ་རབ་ཏུ་བྱུང་བ་འམ་དགེ་སྦྱོང་ངམ་བྲམ་ཟེ་རྣམས་ཀྱིས་ཀྱང་རྟག་པར་འཆི་བ་རྗེས་སུ་
དྲན་པ་བསྒོམ་པར་གྱིས་ཤིག །རྗེས་སུ་དྲན་པར་གྱུར་ན་ནི་འཆི་བདག་གི་འཇིགས་པས་འཇིགས་པའི་སྐྱེས་བུ་ནི་མི་དགེ་བའི་ལས་རྣམས་ཐམས་ཅད་མི་བྱེད་དོ། །ཡིད་ཀྱིས་ཀྱང་སྒོམ་པར་བྱེད་པ་ལ་དེ་བཞིན་དུ། 

66-1-71a

སེམས་ཅན་ཐམས་ཅད་འཆི་བར་འགྱུར་ཏེ། ལྷ་དང་མི་དང་དམྱལ་བ་དང་ཡི་དགས་ཀྱི་ཡུལ་དང་དུད་འགྲོ་རྣམས་ན་ཡང་གང་དག་འཆི་བདག་གི་དབང་དུ་མི་འགྲོ་བའི་གནས་དེ་ནི་ཡོད་པ་མ་ཡིན་ནོ། །དེ་དེ་ལྟར་སྒོམ་
པར་བྱེད་པ་ན་འཇིག་རྟེན་ཕ་རོལ་གྱི་འཇིགས་པས་འཇིགས་པའི་སེམས་སྒྲ་དང་རེག་བྱ་དང་རོ་དང་གཟུགས་དང་དྲི་ལ་རབ་ཏུ་རྒྱུག་པར་མི་འགྱུར་རོ། །རྟག་པ་དང་བརྟན་པ་དང་ཐེར་ཟུག་གི་བློར་ཡང་མི་འགྱུར་རོ། །དེ་མི་རྟག་པ་དང་
སྡུག་བསྔལ་བ་དང་སྟོང་པ་ཉིད་དང་བདག་མེད་པ་རྣམས་ཀྱི་ཡང་བློར་འགྱུར་རོ། །དེ་གང་གི་ཚེ་འཆི་བ་རྗེས་སུ་དྲན་པར་གྱུར་པ་དེ་ལ་ནི་སྐྱོན་རྣམས་ཐམས་ཅད་ཀྱིས་གནོད་པར་མི་འགྱུར་ཞིང་། རྟག་པར་རྒྱུན་མི་འཆད་པར་ཡང་དགེ་
བ་ལ་སེམས་པར་འགྱུར་རོ། །ཡིད་ལ་བྱེད་པ་རྣམས་ཀྱང་མངོན་པར་འཕེལ་བར་འགྱུར་རོ། །འཆི་བ་རྗེས་སུ་དྲན་པ་རྟག་པར་རྒྱུན་དུ་བསྟེན་ཅིང་བསྒོམས་ལ་ལན་མང་དུ་བྱེད་པར་གྱུར་པ་དེ་ལ་ནི་ཡིད་ལ་བྱེད་པའི་དམིགས་པ་རྟག་ཏུ་སྐྱེ་
བར་འགྱུར་རོ། །ཇི་ལྟར་འོག་དང་ཐད་ཀ་རྣམས་ན་ཡང་གང་དག་མ་ཞིག་པ་དང་མ་ལྷུང་བ་དང་། བྱེ་བར་མ་གྱུར་པ་དང་རྣམ་པར་འགྱུར་བའི་ཆོས་སུ་མ་གྱུར་པ་ནི་འདི་ནི་གནས་ཡོད་པ་མ་ཡིན་ཏེ། རིའི་ཁྲོད་དགའ་བར་གྱུར་པ་བརྒྱ་
སྟོང་རྣམས་ལས། ཇེ་ཐོག་མར་རི་ཐམས་ཅད་ཀྱི་རྒྱལ་པོ་རི་རབ་ལྷུན་པོ་ཡང་བསྐལ་པའི་མེས་ཉེ་བར་བཅོམ་ནས་མེད་པར་འགྱུར་ན། ཨེ་མའོ་བདག་གི་ལུས་གནས་པར་འགྱུར་རམ་ཅི། མཐའ་ཡས་པའི་རྒྱ་མཚོ་ཆུ་ཀླུང་
རྣམས་ཐམས་ཅད་ཀྱི་བདག་པོར་གྱུར་པ་ཀླུ་རྣམས་ཐམས་ཅད་ཀྱི་གནས་དང་ལྷ་མ་ཡིན་རྣམས་ཡང་སྟེ། ཉི་མ་བདུན་གྱིས་ངེས་པ་ཁོ་ནར་ཉེ་བར་སྐམས་པར་འགྱུར་བ་ཡིན་ན། བདག་གི་ལུས་ལ་ལྟ་སྨོས་ཀྱང་ཅི་དགོས་
མདོར་བསྡུ་ན་འདོད་པའི་ཁམས་དང་གཟུགས་ཀྱི་ཁམས་དང་གཟུགས་མེད་པའི་ཁམས་དང་ཁམས་གསུམ་པོ་དེ་དག་རྣམས་ཐམས་ཅད་ཀྱང་མི་རྟག་པ་དང་མི་བརྟན་པ་དང་ཐེར་ཟུག་མ་ཡིན་པ་དང་ཡོངས་སུ་རྣམ་པར་འགྱུར་བའི་

66-1-71b

ཆོས་ཅན་ཡིན་ན། བདག་གི་ལུས་དང་སྲོག་ནི་མི་རྟག་པ་དང་མི་བརྟན་པ་དང་ཐེར་ཟུག་མ་ཡིན་པ་དང་རྣམ་པར་འགྱུར་བའི་ཆོས་ཅན་དུ་འབྱུང་བར་འགྱུར་བ་ལྟ་སྨོས་ཀྱང་ཅི་དགོས། དེ་གང་གི་ཚེ་དེ་ལྟར་རྟག་པར་རྒྱུན་དུ་
ཤིན་དུ་མཉམ་པར་བཞག་པའི་ཡིད་ཀྱིས་གཅིག་ཏུ་ངེས་པར་དགེ་བ་ཡིད་ལ་བྱེད་པར་གྱུར་པའི་བློས་དེ་དག་སྒོམ་པར་བྱེད་པ་དེའི་ཚེ་འདི་འགའ་ཞིག་ལ་ཡང་མངོན་པར་ཞེན་པར་མི་འགྱུར་རོ། །ཀུན་དུ་ཆགས་པ་མེད་པར་གྱུར་
པའི་བློས་ནི་འདོད་ཆགས་རྣམས་འགའ་ཞིག་གམ་ཞེ་སྡང་གིས་ཀྱང་འཆིང་བར་མི་འགྱུར་རོ། །དེའི་འདོད་ཆགས་དང་ཞེ་སྡང་དག་རྟག་པར་རབ་ཏུ་བཅོམ་པས་གཏི་མུག་ཀྱང་མེད་པར་འགྱུར་རོ། །དེ་རྣམས་སྐྱོན་མ་ལུས་
པ་ལས་གྲོལ་བར་གྱུར་པས་མཆོག་ཏུ་འཆི་བ་མེད་པ་དང་རྒ་བ་མེད་པ་དང་ཟད་པ་མེད་པའི་གོ་འཕང་ཐོབ་པར་འགྱུར་རོ། །དེའི་ཕྱིར་ན་འཆི་བ་རྗེས་སུ་དྲན་པ་དེ་དག་ལ་དམིགས་པར་བྱའོ། །དེའི་ཕྱིར་དྲན་པ་རྣམས་ཐམས་
ཅད་ཀྱི་མཆོག་ཏུ་གྱུར་པ་འདི་ནི་འདི་ལྟ་སྟེ་འཆི་བ་རྗེས་སུ་དྲན་པའོ། །འཆི་བ་རྗེས་སུ་དྲན་པ་སྒོམ་པར་བྱེད་པ་རྣམས་ལ་ཡོན་ཏན་གཞན་ཡང་ཡོད་དོ། །དགེ་སྦྱོང་ངམ་བྲམ་ཟེ་ཡང་རུང་སྟེ། གང་གི་ཚེ་དེ་ཉིད་སྒོམ་པར་བྱེད་
པ་དེའི་ཚེ། ལུས་པོ་སྡུག་བསྔལ་གྱི་སྒྲོམ་བུ་ལྟ་བུར་གྱུར་པ་ལ་སོ་སོར་རྟོག་པར་བྱེད་དོ། །ཇི་ལྟར་སྡུག་བསྔལ་རྣམས་རིག་པར་གྱུར་པ་ཡིན་ན། ཇི་ལྟར་བདག་གི་ལུས་འདི་དག་ལ་ལུས་ནི་ནད་རྣམས་ཀྱིས་དང་འཆི་
བདག་ཉེ་བར་འོངས་པས་ཀྱང་ཡིད་ཉེ་བར་འཇོམས་པར་འགྱུར་རོ། །འཆི་བདག་གི་ཞགས་པ་དེས་བདག་ཉིད་ཀུན་དུ་བཅིངས་པར་གྱུར་པས་ངས་ཅི་ཞིག་བྱར་ཡོད། སྦྱིན་པ་དང་ཚུལ་ཁྲིམས་དང་ཤེས་རབ་ཀྱང་
བདག་གིས་བསྒོམ་པར་ནི་མི་ནུས་སོ། །དེའི་ཕྱིར་ན་ཇི་སྲིད་དུ་འཆི་བདག་དེ་ཡིད་ལ་འོངས་པར་མ་གྱུར་པ་དེ་སྲིད་དུ་སྦྱིན་པ་དང་ཚུལ་ཁྲིམས་དང་ཤེས་རབ་རྣམས་བསྒོམ་པར་བྱའོ། །སེམས་ཅན་རྣམས་ཐམས་ཅད་

66-1-72a

ཀྱི་སྲོག་འཇོམས་པར་བྱེད་པ་པོའི་འཆི་བདག་རིང་པོ་མི་ཐོགས་པར་འོང་བར་འགྱུར་རོ། །དགེ་སྦྱོང་དང་བྲམ་ཟེ་དེ་དག་གང་ཁོ་ན་འཆི་བ་རྗེས་སུ་དྲན་པ་གཅིག་ཏུ་སེམས་ལ་བྱེད་པ་རྣམས་ལ་ནི། དེ་ལས་འདིའི་
ཡིད་ལ་བྱེད་པ་རྣམས་འབྲས་བུ་ཡོད་པ་དང་མྱ་ངན་ལས་འདའ་བའི་མཐར་ཐུག་པར་ཡང་འགྱུར་རོ། །གཞན་ཡང་རྣམ་པ་གཞན་གྱི་སྒོ་ནས་ཀྱང་འཆི་བ་དེ་ཉིད་རྗེས་སུ་དྲན་པར་བྱེད་དེ། གང་ཞེ་ན་འདི་ལྟ་སྟེ། གཟུགས་ཀྱི་ཕུང་
པོ་འདི་ནི་སྟོང་པ་ཉིད་དོ། །ལུས་འདི་ནི་སྟོང་པ་མི་རྟག་པའོ། །འདུས་བྱས་ཀྱི་ཆོས་འདི་དག་རྣམས་ཐམས་ཅད་ཀྱང་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་ཡིན་ཏེ། སྐད་ཅིག་མྱུར་བར་འཇུག་པས་
ཤིན་དུ་གཡོ་བ་རབ་ཏུ་ཉམས་པར་འགྱུར་བའི་ཆོས་ཅན་མེད་པ་ཆད་པ་སྟོང་པ་སྙིང་པོ་མེད་པ་ཟོ་ཆུན་འཁོར་བ་དང་དྲི་ཟའི་གྲོང་ཁྱེར་དང་འདྲ་བར་གྱུར་པའོ། །ཀྱེ་མ་ཇི་ལྟར་འདུས་བྱས་ཀྱི་ཆོས་འདི་དག་རྣམས་
ཐམས་ཅད་པ་དེ་དག་དང་ལུས་འདི་དག་སྲོག་ཀྱང་དབུ་བ་དང་ཆུའི་ཆུ་བུར་དང་འདྲ་བར་སྙིང་པོ་མེད་པ་དྲི་ཟའི་གྲོང་ཁྱེར་དང་འདྲ་བ་ཡིན་ནོ། །གནས་སྐབས་རྣམས་ཐམས་ཅད་ཀྱི་ཐམས་ཅད་དུ་ཡང་བདག་འཆི་བར་འགྱུར་
བའི་འཇིགས་པའི་གནས་ཆེན་པོར་དེ་དག་རྣམས་འབྱུང་ངོ་། །དེའི་ཕྱིར་ན་སྙིང་པོ་བླང་བར་གྱིས་དང་དགེ་བ་ནི་རྣམ་པ་གསུམ་མོ། །མི་དགེ་བ་ཡང་རྣམ་པ་གསུམ་ཉིད་ནི་ཡོངས་སུ་སྤང་བར་བྱའོ། །དེ་བཞིན་དུ་ཡང་
འཆི་བ་རྗེས་སུ་དྲན་པར་བྱའོ། །དེ་ནི་དགེ་སྦྱོང་ངམ་བྲམ་ཟེ་རྣམས་ལ་གཅེས་པར་གྱུར་པ་ཡིན་ནོ། །རང་གི་སེམས་ལ་བསྒོམས་པས་ཡིད་ལ་བྱའོ། །དེ་ནས་དེའི་དུས་འདིར་རྨ་བྱའི་མངའ་བདག་དེས་ཚིགས་སུ་
བཅད་པ་བརྗོད་པ་ཇི་ལྟར། གང་གིས་འཇིག་རྟེན་འདིར་འཇོམས་པའི། །འཇིགས་པ་ཆེན་པོའི་དགྲ་བོ་དྲུག །རྒ་དང་ན་དང་འཆི་བདག་དང་། །འདོད་ཆགས་ལ་སོགས་དྲི་མ་གསུམ། །དགེ་བའི་རྫས་ནི་འཕྲོག་

66-1-72b

པ་ཡི། །རྐུན་མ་ཡང་ནི་ཡུལ་ལྔ་ཡིན། །དགྲ་རྣམས་གྲོགས་པོའི་གཟུགས་ཀྱིས་ནི། །སྲིད་པའི་ངམ་གྲོག་དག་ན་རྒྱུ། །བག་མེད་པས་ནི་གང་བའི་སེམས། །ཡུལ་རྣམས་ཀྱིས་ནི་འཕེལ་བར་བྱེད། །སྐྱེས་བུ་མྱུར་དུ་
གཞོམ་པ་ནི། །དམྱལ་དང་ཡི་དགས་རིགས་རྣམས་ལ། །སྡུག་བསྔལ་ལ་སོགས་བདེན་པ་ཡང་། །གང་ཚེ་ཤེས་པས་རྟོགས་པ་ཡི། །དེ་ཚེ་སྐྱེས་བུ་བླ་མེད་གྱིས། །བདེ་ལེགས་ཤིས་པའི་གནས་ཐོབ་འགྱུར། །
སྐྱོན་རྣམས་རྩད་ནས་གདོན་པ་དང་། །ཡོན་ཏན་སྤེལ་ལ་ཀུན་དུ་སྤྱོད། །སྡིག་པའི་གྲོགས་པོ་མི་བྱ་ཞིང་། །ལེ་ལོ་ཅན་ཁ་ཕྱིར་ཕྱོགས་གྱིས། །བརྩོན་འགྲུས་བརྩམས་ཤིང་དྲན་དང་ལྡན། །དགེ་སྦྱོང་ཤེས་རབ་དཔུང་གཉེན་
ཅན། །རྒ་དང་འཆི་བ་སྤངས་པ་ཡི། །བླ་ན་མེད་པའི་གནས་སུ་འགྲོ། །དབང་པོ་དང་ནི་དབང་དོན་ཡང་། །གང་ཚེ་དེ་ཉིད་ཁོ་ན་རིག །དེ་ཚེ་ཤེས་རབ་ལ་བརྟེན་ནས། །སྲིད་པའི་རྒྱ་མཚོ་ལས་རྒལ་ལོ། །ང་རྒྱལ་ཅན་དང་ལེ་ལོ་ཅན། །
ཐམས་ཅད་ལ་ནི་རྟོགས་དགོས་ཅན། །ཁེངས་དང་སྡིག་བློ་ཅན་རྣམས་ནི། །མཁས་པས་གྲོགས་པོ་བྱ་བ་མིན། །ཤིན་དུ་བརྩོན་ལྡན་རང་བཞིན་འཇམ། །ཆོས་ལ་གནས་དང་སྐྱོན་སྤངས་པ། །ཡང་དག་ལྟ་དང་ཙབ་ཧྲལ་
མེད། །གྲོགས་པོར་བསྟེན་གྱིས་མཛེས་པ་ཡིན། །སྡིག་ཅན་གྲོགས་པོའི་སྣོད་མ་ཡིན། །སྣོད་ནི་བླ་མེད་སྐྱེས་བུ་ཡིན། །བླ་མེད་སྣོད་དུ་བྱས་པ་ན། །སྐྱོན་རྣམས་ཀྱིས་ནི་འཇིགས་པ་མེད། །སྐད་ཅིག་ཐང་ཅིག་ཡུད་ཙམ་
དང་། །ཉིན་དང་མཚན་མོ་དེ་བཞིན་དུས། །འཆི་བ་སེམས་དང་བརྟན་པ་ཡིས། །དེ་ལས་བཟློག་ཐབས་མེད་པ་ཡིན། །གང་འདི་འཆི་བ་འབྱུང་བ་ནི། །དྲན་པའི་མཆོག་ཏུ་རབ་ཏུ་བསྔགས། །དེ་བསྟེན་པ་ནི་ཞི་བའི་
མཆོག །རྙོག་དང་བྲལ་བར་འགྲོ་བ་ཡིན། །འཆི་བདག་འཇིགས་པ་དྲན་ནས་ནི། །སྐྱོན་ལ་ཇི་ལྟར་ཡིད་རྒྱུག་འགྱུར། །སྐྱོན་མེད་པས་ཀྱང་དྲི་མ་རྣམས། །ཐམས་ཅད་རྟག་ཏུ་ཞི་བར་འགྱུར། །བག་ཡོད་གོ་འཕང་འདི་མཆོག་ཏུ། །

66-1-73a

དེ་བཞིན་གཤེགས་པ་རྣམས་ཀྱིས་གསུངས། །གང་ཡང་འཆི་བདག་རྟག་དྲན་དང་། །མི་དགེ་རྣམས་ཀྱང་སྤང་བར་གྱིས། །ཞེས་བྱའོ། །དེ་ལྟར་རྨ་བྱ་རྣམས་ཀྱི་མངའ་བདག་དེས་དགའ་ལྡན་གྱི་ལྷ་དེ་དག་རྣམས་
དང་འཐབ་བྲལ་བ་དེ་དག་རྣམས་དང་ཆོས་སྟོན་པར་བྱེད་དོ། །ཆོས་གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་དང་བྲམ་ཟེ་རྣམས་ལ་གཅེས་པར་གྱུར་པ་ཡོད་དོ། །འདི་ཡང་གང་ཞེ་ན། འདི་ལྟ་སྟེ་གཟུགས་དང་
རིགས་དང་དབང་ཕྱུག་གི་རྒྱགས་པ་དང་ཀུན་དུ་བྲལ་བར་བྱེད་པའོ། །གཟུགས་དང་རིགས་དང་བཙན་ཕྱུག་གི་རྒྱགས་པ་ལ་ཆགས་པས་ཀྱང་བྱིས་པ་རྣམས་ལུས་ཀྱིས་ཉེས་པར་སྤྱད་པ་རྣམས་སྤྱོད་དོ། །ལུས་ཇི་ལྟ་བ་དེ་བཞིན་
དུ་ངག་དང་ཡིད་ཀྱིས་ཀྱང་སྤྱོད་པར་བྱེད་དོ། །རྒྱུ་དེ་དང་རྐྱེན་དེས་ཀྱང་ལུས་ཞིག་པར་གྱུར་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །དུད་འགྲོའི་སྐྱེ་གནས་དང་དེ་བཞིན་དུ་ཡི་དགས་ཀྱི་ཡུལ་རྣམས་
ལ་ཡང་སྟེ། དེ་དང་དེ་དག་རྣམས་ལ་དེའི་སྐྱེ་བ་བརྗེ་བསོར་བྱེད་པར་གྱུར་པ་ན། རྣམ་པར་རྟོག་པ་དུ་མར་སྡུག་བསྔལ་རྣམ་པ་མང་པོ་རྣམས་སྐྱེ་བར་འགྱུར་བ་དེ་དག་རྣམས་གང་ཡིན་པའི་མིང་ཙམ་ཡང་ཤེས་པར་སླ་བ་མ་ཡིན་
ནོ། །དེའི་ཕྱིར་སྐྱོན་གྱི་འཇིགས་པ་འདི་དག་རྣམས་ཤེས་པར་གྱིས་ལ་གཟུགས་དང་རིགས་དང་དབང་ཕྱུག་གི་རྒྱགས་པ་དང་བྲལ་བར་འགྱུར་ཞིང་གྱུར་པ་གང་ཡིན་པ་དེ་ནི་ལུས་དང་ངག་དང་ཡིད་ཀྱི་ཉེས་པར་སྤྱོད་པར་མི་བྱེད་དོ། །
ཡང་དག་པ་ཇི་ལྟ་བ་བཞིན་དུ་གྱུར་པས། ལྟ་བར་བྱེད་པ་ནི་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པའི་རྣམ་པ་རྣམས་སུ་དང་། གསོག་གསོབ་སྙིང་པོ་མེད་པ་དང་མི་གཙང་བ་རྣམས་ཀྱི་སྣོད་དུ་
གྱུར་པ་སྐྲ་དང་སྤུ་དང་སེན་མོ་དང་སོ་དང་ཁྲག་དང་ལྤགས་པའི་ཚོགས་ལ་སོགས་པར་གྱུར་པ་རུས་པའི་འཁྲུལ་འཁོར་དུ་མ་དང་། རྒྱུས་པ་དང་ཞག་དང་གཅིན་དང་རྟུག་པ་རྣམས་ཀྱིས་ཀུན་དུ་གང་བར་གྱུར་པའི་

66-1-73b

བདག་གི་གཟུགས་འདི་དང་པོར་གཙང་བ་མ་ཡིན། བར་དུ་མ་ཡིན། ཐ་མར་མ་ཡིན་ཏེ། ལས་དང་ཉོན་མོངས་པ་དུ་མ་རྣམས་ཀྱིས་ཀུན་དུ་སྐྱེས་པ་འདི་ནི་སྙིང་པོར་གྱུར་པ་ནི་ཅུང་ཟད་ཀྱང་ཡོད་པ་མ་ཡིན་ནོ། །རྟག་པ་
ཡང་མ་ཡིན་ཞིང་བདག་དང་བཅས་པ་ཡང་མ་ཡིན་ནོ། །བདག་འཆི་བར་གྱུར་པའི་ཡུལ་དང་དུས་ཀུན་ཏུ་བྱུང་བ་ན་ལུས་འདི་གོམ་པ་གང་ཡང་འགྲོ་བ་དང་རྗེས་སུ་འགྲོ་བར་འགྱུར་བ་ཡང་མ་ཡིན་ནོ། །དུར་ཁྲོད་དུ་ཡང་མེས་སྲེག་
པར་བྱེད་པ་འབྱུང་བར་འགྱུར་ཞིང་། ཀུན་དུ་དྲངས་ནས་བྱ་རྒོད་དང་འུག་པ་དང་ལྕེ་སྤྱང་དང་ཁྭ་ཏ་ལ་སོགས་པ་རྣམས་ཀྱིས་ཀྱང་ཟ་བར་བྱེད་པར་འགྱུར་གྱིས་ཞེས་དེ་ལྟར་སྒོམ་པར་བྱེད་པའི་སྐྱེས་བུ་དམ་པ་དེའི་གཟུགས་དང་བཙན་ཕྱུག་
གི་རྒྱགས་པ་གང་ཡིན་པ་འདི་དག་དེས་ཐམས་ཅད་ནས་ཐམས་ཅད་དུ་བྲལ་བར་འགྱུར་བ་འམ་མགོ་གནོན་པར་འགྱུར་རོ། །གཞན་ཡང་གང་གི་ཚེ་ཇི་ལྟ་ང་ནི་བཟང་པོའི་རིགས་སུ་སྐྱེས་པ་ཡིན་ནོ་ཞེས་དགེ་སྦྱོང་དང་བྲམ་ཟེ་
འདི་དག་རྣམས་ལ་རིགས་ཀྱི་རྒྱགས་པ་སྐྱེས་པར་གྱུར་ན། དེའི་ཚེ་གལ་ཏེ་ན་གང་ཁོ་ན་རིགས་ཡིན་པ་ཡང་དག་པ་ཇི་ལྟ་བ་ཁོ་ན་བཞིན་དུ་སོ་སོར་རྟོག་པར་བྱེད་དེ། དོན་དམ་པར་ན་རིགས་ནི་ཡོད་པ་མ་ཡིན་གྱི། ཀུན་དུ་བརྟགས་
པ་འབའ་ཞིག་ཙམ་ཁོ་ན་ལ་བྱིས་པ་རྣམས་ཀྱིས་འདི་དག་ཏུ་གོ་བར་ཟད་དོ། །ཇི་ལྟར་རིགས་འདི་དག་རྣམས་ནི་རིགས་མེད་པ་ཡིན་ཏེ་རྒྱུ་མེད་པའི་ཕྱིར་རོ། །དེ་བཞིན་དུ་རུས་ཀྱང་མེད་པ་ཡིན་ནོ། །དགེ་བའི་རྒྱུ་རྣམས་ཀྱིས་
གཞན་ཉིད་ཁོ་ན་རིགས་ཡིན་ནོ། །གང་དག་ཞེ་ན། འདི་ལྟ་སྟེ། གང་ལ་བདེན་པ་དང་ཚུལ་ཁྲིམས་དང་སྦྱིན་པ་དང་ཤེས་རབ་དང་རབ་ཏུ་ཞི་བ་དང་དུལ་བའི་ཡོན་ཏན་རྣམས་ཡིན་ནོ། །གང་དག་རིགས་ངན་པར་གྱུར་ན་ཡང་ཆེན་
པོའི་རིགས་སུ་ལེགས་པར་སྐྱེས་པ་ཡིན་ནོ། །རྒྱུ་གང་གི་ཕྱིར་ཡོན་ཏན་རིགས་ཡིན་པའི་ཕྱིར་དང་སྐྱེ་བ་ནི་རྒྱུ་མཚན་མ་ཡིན་པའི་ཕྱིར་རོ། །དེ་ལྟ་བས་ན་དགེ་སྦྱོང་ངམ་བྲམ་ཟེ་འམ་དེའི་རིགས་ཅན་གཞན་དག་རྣམས་

66-1-74a

ཀྱིས་ཀྱང་དེ་ལྟར་སྐྱེ་བ་དང་རིགས་དང་བཙན་ཕྱུག་གིས་རྒྱགས་པར་མི་བྱའོ། །གཞན་ཡང་དེའི་ཚེ་ན་དགེ་སྦྱོང་ངམ་བྲམ་ཟེ་འམ་དེ་དག་གི་རིགས་ཅན་གཞན་རྣམས་ཀྱིས་ཀྱང་གཟུགས་གང་ཡིན་པ་དེ་ཁོ་ན་ཡང་དག་པ་
ཇི་ལྟ་བར་རྣམ་པ་གཞན་གྱི་སྒོ་ནས་སོ་སོར་རྟོག་པར་བྱེད་དོ། །ཇི་ལྟར་བདག་གི་གཟུགས་འདི་ནི་ཇི་ལྟ་བུའི་རྣམ་པར་བདག་བྱིས་པ་ཕྱིས་རྒན་ན་ཉལ་བར་གྱུར་པའི་རྣམ་པ་དེ་ལྟ་བུ་ནི་གོག་འགྲོས་བྱེད་པར་གྱུར་པ་ན་མ་ཡིན་ལ། གོག་
འགྲོས་བྱེད་པའི་རྣམ་པ་དེ་ལྟ་བུ་ནི་ཇི་སྲིད་གཙུག་པུད་བཞག་པ་ན་མ་ཡིན་ཏེ། གཙུག་པུད་ཀྱི་དེ་ལྟར་ནི་ཇི་སྲིད་དུ་ལང་ཚོ་ལ་བབ་པའི་བདག་གི་གཟུགས་འབྱུང་བར་མི་འགྱུར་རོ། །བར་མའི་ན་ཚོད་ཀྱི་རྣམ་པ་ཇི་ལྟ་བུའི་རྣམ་པ་དེ་
ལྟ་བུར་ནི་བདག་གློ་བུར་དུ་འཆི་བའི་དུས་མ་ཡིན་ནོ། །རྣམ་པ་དེ་ལྟ་བུའི་ནི་ཡུན་རིང་བ་ནི་འཆི་བ་ན་ཡང་མ་ཡིན་ནོ། །བདག་གི་གཟུགས་འདི་རོར་གྱུར་ནས་སྦྲང་མ་ལ་སོགས་པ་དག་གིས་ཟ་བར་བྱེད་པ་འབྱུང་བར་འགྱུར་རོ། །དེ་
ལས་ཀུན་ཏུ་བྱུང་བའི་འབུ་གཞན་དག་གིས་ཀྱང་ཟ་བར་བྱེད་ལ་དེ་ལྟ་བུ་རྣམས་འབྱུང་བར་འགྱུར་རོ། །རླུང་དང་ཉི་མ་དང་ཆར་པས་ཀྱང་ཐམས་ཅད་ནས་ཐམས་ཅད་དུ་ཉམས་པར་འགྱུར་བར་འབྱུང་བ་ཡིན་ནོ། །དེ་ཡང་ཕྱོགས་བཅུ་
རྣམས་སུ་ཆ་ཤས་ཐ་དད་པར་འབྱུང་བར་འགྱུར་རོ། །གཞན་དག་རྣམས་ཀྱིས་བདག་དུར་ཁྲོད་དུ་ཀུན་ནས་དྲངས་ཤིང་ལུས་འདི་རྣམ་པ་དུ་མར་ཆ་ཤས་ཐ་དད་པར་བྱེད་པར་འགྱུར་རོ། །གཞན་དག་གིས་རུས་པ་རྣམས་
དྲངས་ནས་ཁྱེར་བར་བྱེད་དོ། །གཞན་དག་གིས་ནི་མགོའི་ཐོད་པའོ། །གཞན་དག་གིས་ནི་འཇིང་པའི་རུས་པའོ། །གཞན་དག་གིས་ནི་སྣའི་སྟེ། གཞན་དག་གིས་ནི་ལག་པའི་གྲུ་མོ། གཞན་དག་གིས་ལུས་ཀྱི་དཔུང་པ། 
གཞན་དག་རྣམས་ཀྱིས་ནི་སོར་མོའི་ཐུར་མ། གཞན་དག་རྣམས་ཀྱིས་ནི་སེན་མོའོ། །གཞན་དག་རྣམས་ཀྱིས་ནི་རྩིབ་ལོགས། གཞན་དག་རྣམས་ཀྱིས་ནི་རྒྱབ་ཀྱི་རུས་པ། གཞན་དག་གིས་ནི་ཨོན་ཏོང་བའི་རུས་

66-1-74b

པའོ། །གཞན་དག་གིས་ནི་བརླ། གཞན་དག་གིས་ནི་རྐང་པའི་རུས་པ། གཞན་དག་གིས་ནི་རྐང་པའི་སོར་མོ་རྣམས་ཀྱི་ཚོགས་སོ། །དེ་ལྟར་བདག་ཉིད་ཀྱི་གཟུགས་དེ་ཡང་དག་པ་ཇི་ལྟ་བར་སོ་སོར་རྟོག་པར་བྱེད་པ་
རྣམས་ནི་གཟུགས་ཀྱིས་རྒྱགས་པར་མི་འགྱུར་རོ། །ཇི་ལྟར་ན་དབང་ཕྱུག་གི་རྒྱགས་པ་རྣམས་ལ་ཡང་དག་པ་ཇི་ལྟ་བ་ཉིད་དུ་ལྟ་བར་བྱེད་པ་དང་། ཤེས་པར་བྱེད་ན་མེད་པར་འགྱུར་བ་ཡིན་ཞེ་ན། གང་གི་ཚེ་སྐྱེ་དགུ་དེ་
དག་རྣམས་ཐམས་ཅད་ཀྱང་ཡང་དག་པ་ཇི་ལྟ་བ་བཞིན་དུ་རྟོགས་ཏེ། ཇི་ལྟར་འདི་དག་རྣམས་ཐམས་ཅད་ནི་གཞན་གྱི་དབང་དུ་གྱུར་པ་དང་རང་དབང་མེད་པ་ཡིན་ནོ། །སྐྱེ་དགུ་རྣམས་ནི་རྣམ་པ་དུ་མར་ཡང་གཞན་གྱི་དབང་དུ་གྱུར་
པ་ཡིན་ན། དེ་ལ་ཇི་ལྟར་ན་འདི་རང་དབང་ཅན་དུ་འགྱུར་བ་ཡིན། གཞན་གྱི་དབང་དུ་གྱུར་པའི་འདུས་བྱས་ཀྱི་ཆོས་འདི་དག་རྣམས་ནི་གཞན་གྱི་སྐྱེ་མཆེད་ཀྱིས་རབ་ཏུ་འཇུག་པ་ཡིན་ཏེ། རྒྱུ་དང་རྐྱེན་རྣམས་ལས་ཀུན་དུ་བྱུང་བ་
ཡིན་ནོ། །ཇི་ལྟར་ཁང་པ་ལ་ཡང་རྣམ་པ་དུ་མ་རྣམས་སུ་བསྐོར་བ་ལ་སོགས་པའི་ཚོགས་པ་རྣམས་ཕན་ཚུན་གྱི་དབང་གིས་དང་ཕན་ཚུན་ལ་ཀུན་དུ་བརྟེན་ནས་ཁང་པ་ཞེས་བྱ་བའི་ཐ་སྙད་དུ་འགྱུར་ལ། དེ་བཞིན་དུ་ལུས་ཀྱི་ཐ་
སྙད་ཅན་གྱི་གཟུགས་ཕུང་འདི་ཡང་ལྤགས་པ་དང་ཤ་དང་རུས་པ་དང་ཚིལ་དག་གི་ཚོགས་སུ་གྱུར་པ་དབང་ཕྱུག་མེད་པ་བྱེད་པ་པོ་རྣམས་དང་རྣམ་པར་བྲལ་བའི་གཟུགས་ཕུང་ལ་གཟུགས་ཀྱི་ཐ་སྙད་ཡིན་ནོ། །དེ་ལ་འདི་ལྟར་
ཇི་ལྟར་དགེ་སྦྱོང་ངམ་བྲམ་ཟེ་འམ་གཞན་ཡང་དེའི་རིགས་ཅན་དག་གིས་དེ་ལྟར་རྗེས་སུ་འཇལ་བ་ལ་བརྟེན་ནས་གང་དག་གཟུགས་ཡང་དག་པ་ཇི་ལྟ་བར་རྣམ་པར་ཕྱེ་བ་འདི་དག་རྣམས་ནི་གཟུགས་དང་རིགས་དང་དབང་ཕྱུག་
གི་རྒྱགས་པ་དེ་ཐམས་ཅད་དང་རབ་ཏུ་བྲལ་བར་འགྱུར་བ་འམ་མགོ་སྨད་པར་འགྱུར་རོ། །གཞན་ཡང་ཇི་ལྟར་བདག་ནི་མངོན་པར་མཐོ་བའི་རིགས་སུ་སྐྱེས་སོ་ཞེས་དེ་ལྟར་གང་གི་ཚེ་འདིའི་རིགས་ཀྱིས་རྒྱགས་པར་

66-1-75a

གྱུར་པ་ནི་ཡང་དག་པ་ཇི་ལྟ་བ་བཞིན་དུ་མཐོང་བ་མ་ཡིན་ལ། ཕྱི་ནས་ནི་ཡང་དག་པ་ཁོ་ནར་མཐོང་བ་ཡིན་ཏེ། ཇི་ལྟར་རིགས་ཞེས་བྱ་བ་ནི་ཀུན་དུ་བརྟགས་པ་འབའ་ཞིག་ཙམ་ཁོ་ན་ལ་མིག་མེད་པ་
རྣམས་ཀྱིས་འདི་དག་ཡོངས་སུ་རྟོགས་པར་བྱེད་པ་ཡིན་ནོ། །ཤེས་རབ་དང་ཚུལ་ཁྲིམས་དང་སྦྱིན་པ་རྣམས་ནི་མཐོང་བ་ཡིན་ཏེ། དེ་ལྟ་བུ་རྣམས་ནི་རྣམ་པར་དག་པའི་རིགས་དང་ལེགས་པར་ལྡན་པ་ཡིན་ནོ། །མེད་པ་ལ་
བྱིས་པ་རྣམས་ཀྱིས་ང་རྒྱལ་དུ་བྱས་པ་འབའ་ཞིག་ལ་འདི་དག་དུ་རྟོགས་པ་ཁོ་ན་ཡིན་ནོ། །དཔེར་ན་དགེ་སྦྱོང་ངམ་བྲམ་ཟེ་འམ་དེའི་རིགས་ཅན་གཞན་དག་རྣམས་ཀྱང་རུང་སྟེ། ཡང་དག་པ་ཇི་ལྟ་བ་བཞིན་དུ་དེ་ལྟར་
རིགས་རྣམས་རྟོགས་པ་ནི། དེའི་ཚེ་འདིའི་རིགས་ཀྱི་རྒྱགས་པ་གང་ཡིན་པ་དེ་དག་རྣམས་ཐམས་ཅད་ཀྱི་ཐམས་ཅད་དུ་རབ་ཏུ་འབྲལ་བར་འགྱུར་རོ། །མགོ་སྨད་པར་འགྱུར། དེ་ནས་དེའི་ཚེ་རྨ་བྱའི་རྒྱལ་པོ་དེས་
ཚིགས་སུ་བཅད་པའི་དབྱངས་ཀྱིས་བསྙད་པ་ཇི་ལྟར། གཟུགས་དང་བཙན་ཕྱུག་རིགས་རྒྱགས་པ། །ལུས་ཅན་གང་ལ་དམིགས་པ་ནི། །དེ་མྱོས་གླང་ཆེན་སྨྱོན་པ་འདྲ། །རབ་ཏུ་ལྟུང་ཞིང་མཐོང་བ་མིན། །
རྒོད་པའི་སྐྱེས་བུ་ཐམས་ཅད་ནི། །བག་མེད་པས་ནི་དབང་པོ་དཀྲུགས། །ཡང་མོར་འཇིག་རྟེན་འདིར་སོང་ནས། །ཕྱི་མར་ངན་སོང་དག་ཏུ་འཚེད། །གཟུགས་དང་དབང་ཕྱུག་རྒྱགས་པ་ཡིས། །ལོང་བའི་མིག་གང་
སྡིག་བྱེད་པ། །དེ་དག་བདེ་བ་ལེགས་རྙེད་མིན། །ཕྱི་མར་ངན་སོང་རྣམས་སུ་མཐོང་། །གཟུགས་དང་དབང་ཕྱུག་རིགས་ཀྱིས་དྲིས། །གང་དེ་དེ་ཉིད་སྐལ་ལྡན་མིན། །དེ་ཉིད་རྟོགས་མིན་བྱིས་པ་རྣམས། །སྲིད་པའི་
མཚོ་ལས་རྒལ་མི་འགྱུར། །གང་ཡང་རིགས་དང་ཕུན་ཚོགས་དང་། །གཞན་ཡང་བདེ་བར་འདོད་པ་གང་། །དེ་དག་ཐམས་ཅད་མི་རྟག་པས། །དེ་ཕྱིར་འདི་ལ་བློ་མ་བཏད། །ཤེས་རབ་ཚུལ་ཁྲིམས་ངེས་བྲལ་བའི། །

66-1-75b

རིགས་ནི་མཁས་པས་བསྔགས་པ་མིན། །གང་དག་ཤེས་རབ་དང་ཚུལ་ཁྲིམས། །དེ་ནི་ཆེན་པོའི་རིགས་ལ་གནས། །ཤེས་རབ་དང་བྲལ་དབང་ཕྱུག་མིན། །རིགས་མིན་ལེགས་པའི་སྲོལ་ཡང་མིན། །དེ་ཕྱིར་ཤེས་
རབ་འདི་རིགས་ཡིན། །ཤེས་རབ་དང་བྲལ་རིགས་མེད་ཡིན། །སྤྱོད་པ་དྲི་མེད་གང་དག་གི། །ཚུལ་ཁྲིམས་བསིལ་བའི་མཚེའུ་བཞིན་ནོ། །དེ་ནི་ཆེན་པོའི་རིགས་སུ་སྐྱེ། །དྲི་མ་ཅན་གཞན་རིགས་མིན་ནོ། །ཚུལ་ཁྲིམས་དཀའ་
ཐུབ་བསམ་གཏན་སྦྱིན། །བདེན་དང་བརྟན་དང་ཕ་རོལ་གནོན། །རིགས་གང་ཡང་དག་ལྡན་པ་དེའི། །ཆོས་གང་རྣམ་པར་སྤངས་པ་ཡི། །སྐྲ་བྲེགས་དགེ་སྦྱོང་མིན་པར་མཐོང་། །སྐྱེ་རིགས་ཉིད་ལས་བྲམ་ཟེ་མིན། །ཤེས་རབ་
ཚུལ་ཁྲིམས་རང་བཞིན་གང་། །དགེ་སྦྱོང་བྲམ་ཟེ་ཡང་དེ་ཡིན། །རྒ་བས་གཟུགས་ནི་འཇོམས་པར་བྱེད། །འཆི་བདག་མི་རྣམས་སྲོག་མཐར་བྱེད། །རྒུད་པས་ནོར་ནི་འཇོམས་བྱེད་པས། །རྟག་པ་ཉིད་དུ་རྣམ་པར་གནས། །ནད་
ཀྱང་ནད་མེད་འཇོམས་པར་ནི། །ལུས་ཅན་རྣམས་ལ་རབ་ཏུ་འཇུག །མཁས་པའི་སྐྱེས་བུས་ཐམས་ཅད་དུ། །བཙན་ཕྱུག་རྒྱགས་པས་འདིར་མ་ལྟུང་། །འཁོར་བའི་ཉེར་འཚེ་གོ་གྱིས་ལ། །སྐྱེས་བུ་རྒྱགས་ལྡན་མ་བྱེད་
ཅིག །དེ་ཕྱིར་འདིར་ནི་སྒྲིན་པོ་ཡིས། །གཟུགས་རྒྱགས་དབང་ཕྱུག་ལ་མ་ལྟ། །ལེགས་པར་སྤྱད་པས་ཆོས་ལ་སྤྱོད། །དེ་ལྟར་སྡུག་བསྔལ་གྱིས་མི་འཇོམས། །དེ་ལྟར་རྨ་བྱ་རྣམས་ཀྱི་མངའ་བདག་འདིས་ལྷ་དེ་དག་
རྣམས་ལ་ཆོས་སྟོན་པར་བྱེད་དོ། །ཆོས་གཞན་ཡང་དགེ་སྦྱོང་དང་བྲམ་ཟེ་ཐེག་པ་ཆེན་པོ་ལ་ཡང་དག་པར་རབ་ཏུ་གནས་པ་རྣམས་ཀྱིས་བྱ་བར་བྱའོ། །འདི་ཡང་གང་ཞེ་ན། འདི་ལྟ་སྟེ་སེམས་ཅན་ཐམས་ཅད་ལ་མཉམ་པ་ཉིད་དོ། །
སེམས་ཅན་ཐམས་ཅད་ལ་མཉམ་པ་ཉིད་ཅེས་བྱ་བའི་ཆོས་ནི་སེམས་ཅན་དུ་གྱུར་པ་རྣམས་ཐམས་ཅད་ལ་སྟེ། དགེ་སྦྱོང་དང་བྲམ་ཟེ་དང་དེའི་རིགས་ཅན་གཞན་དག་རྣམས་ཀྱང་མཆོག་ཏུ་བདེ་བ་དང་ལྡན་པར་འགྱུར་རོ། །

66-1-76a

སེམས་ཅན་རྣམས་ཐམས་ཅད་ཀྱི་མཐུན་པར་བྱེད་པར་ཡང་འགྱུར་རོ། །ལུས་ཞིག་པར་གྱུར་ནས་ཀྱང་ཤི་བའི་འོག་ཏུ་ཡང་མཐོ་རིས་ཀྱི་འཇིག་རྟེན་དུ་སྐྱེའོ། །དགེ་སྦྱོང་དང་བྲམ་ཟེ་དག་གིས་ཇི་ལྟར་ན་སེམས་ཅན་
རྣམས་ཐམས་ཅད་ལ་མཉམ་པ་ཉིད་དུ་བསྒོམ་པར་བྱ་ན། གང་ཡང་དགེ་སྦྱོང་དང་བྲམ་ཟེ་དག་ཀུན་ཏུ་རྩོད་པར་བྱེད་པ་རྣམས་ཡོངས་སུ་སྤོང་བར་བྱེད་དོ། །གང་འགའ་ཞིག་དང་ཡང་ཀུན་དུ་རྩོད་པར་མི་བྱེད་དོ། །ཀུན་དུ་རྩོད་པ་རྣམ་
པར་སྤངས་པ་དེ་ནི་སེམས་ཅན་རྣམས་ཐམས་ཅད་ལ་ཡང་ཡིད་མཉམ་པ་ཉིད་དུ་འགྱུར་རོ། །དེའི་ཕྱིར་རེ་ཤིག་དང་པོ་ཁོ་ནར་ཐམས་ཅད་ཀྱིས་གནས་སྐབས་ཐམས་ཅད་དུ་ཐམས་ཅད་ཀྱིས་ཀྱང་དགེ་སྦྱོང་དང་བྲམ་ཟེ་རྣམས་ཀྱིས་
ཀུན་དུ་རྩོད་པར་བྱེད་པ་རྣམས་ཡོངས་སུ་སྤང་བར་བྱའོ། །དེ་ལྟར་ན་སེམས་ཅན་རྣམས་ཐམས་ཅད་ལ་ཡང་མཉམ་པ་ཉིད་དུ་འགྱུར་རོ། །ཡང་གཉེན་པོ་གཞན་དག་གིས་ཀྱང་དགེ་སྦྱོང་དང་བྲམ་ཟེ་རྣམས་སེམས་ཅན་ཐམས་
ཅད་ལ་མཉམ་པ་ཉིད་ཀྱི་བློར་འགྱུར་རོ། །ཇི་ལྟ་བ་བཞིན་དུ་སེམས་ཅན་རྣམས་ཐམས་ཅད་ཀྱི་སྡུག་བསྔལ་ལ་རྟོག་པར་བྱེད་པ་ནི། གྲོགས་པོ་རྣམས་ལ་ཡང་ཇི་ལྟ་བ་དེ་ཁོ་ན་བཞིན་དུ་གྲོགས་པོ་མ་ཡིན་པ་རྣམས་ལ་
ཡང་སྟེ། འཁོར་བར་ཀུན་དུ་ཆུད་པར་གྱུར་པའི་སྲོག་ཆགས་འདི་རྣམས་ཐམས་ཅད་ཀྱང་སྐྱེ་བའི་རིགས་ཀྱི་ཆོས་རྣམས་ནི་རིགས་ཀྱི་ཆོས་ཉིད་ཀྱིས་བྲལ་བ་ཡིན་ལ། དེ་དག་གི་སྐྱེ་བ་རྣམས་བདེན་པས་ནི་རྒ་བ་དང་ནད་དང་
འཆི་བ་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་དང་ངལ་དུབ་དུ་འགྱུར་བ་ཡིན་ནོ། །གྲང་བ་དང་ཚ་བ་དང་བཀྲེས་པ་དང་སྐོམ་པ་དང་གསོད་པ་དང་འཆིང་བ་དག་གིས་སྐྱེ་བ་ཡིན་ནོ། །མི་སྡུག་པ་
རྣམས་དང་ཕྲད་པ་དང་སྡུག་པ་དང་བྲལ་བའི་སྡུག་བསྔལ་གྱི་ཁྱད་པར་རྣམས་འབྱུང་བར་འགྱུར་རོ། །དེ་དེ་ལྟ་བུ་ཉིད་དུ་གྲོགས་པོའི་སྡུག་བསྔལ་རྣམས་ཀྱང་ལ་འུར་ལྟ་བར་བྱེད་དོ། །དེ་ཁོ་ན་བཞིན་དུ་གྲོགས་པོ་མ་ཡིན་པ་ཡང་ངོ་། །

66-1-76b

དེ་དེ་ལྟར་སྒོམ་པར་བྱེད་པ་ན་དགེ་སྦྱོང་ངམ་བྲམ་ཟེ་རྣམས་ཀྱང་སེམས་ཅན་ཐམས་ཅད་ལ་མཉམ་པ་ཉིད་ཀྱི་བློར་འགྱུར་རོ། །གཞན་ཡང་དགེ་སྦྱོང་ངམ་བྲམ་ཟེ་དག་གིས་འདི་ལྟར་སེམས་པར་བྱེད་དེ། ཀྱེ་མ་སེམས་ཅན་འདི་དག་
རྣམས་ནི་སྡུག་བསྔལ་ཤིན་དུ་བནེམས་པའི་སྡུག་བསྔལ་མྱོང་བར་འགྱུར་རོ། །དེ་གང་དག་ཞེ་ན། འདི་ལྟ་སྟེ་ནད་ཅེས་བྱ་བའོ། །སེམས་ཅན་རྣམས་ཐམས་ཅད་ནི་ནད་ཀྱིས་འཇོམས་པར་འགྱུར་རོ། །དེ་དག་གི་ལུས་དང་ཡིད་ཀྱང་ནད་ཀྱིས་
གཟིར་བར་གྱུར་པ་རྣམས་ཤིན་དུ་སྡུག་བསྔལ་བར་འགྱུར་རོ། །དེ་ཇི་ལྟ་བ་བཞིན་དུ་གྲོགས་པོ་ལ་སེམས་པར་བྱེད་པ་ཁོ་ན་བཞིན་དུ་དགྲ་བོ་རྣམས་ལ་ཡང་སེམས་པར་བྱེད་དོ། །དེ་དེ་ལྟར་མཉམ་པ་ཉིད་དུ་གྱུར་པའི་བློས་སེམས་
རབ་ཏུ་དང་བར་འགྱུར་རོ། །དེའི་སེམས་རབ་ཏུ་དང་བར་གྱུར་པ་ལས་བརྗོད་པ་རྣམས་ཀྱང་རབ་ཏུ་དང་བར་འགྱུར་རོ། །ཁྲག་ཀྱང་རབ་ཏུ་དང་བས་བཞིན་གྱི་མདོག་ཀྱང་རབ་ཏུ་དང་ངོ་། །དེའི་དབང་པོ་རྣམས་ཐམས་ཅད་ཀྱང་རྟག་པར་རྒྱུན་
དུ་ཀུན་ནས་རབ་ཏུ་དང་བར་འགྱུར་རོ། །འདི་ནི་དེའི་མཐོང་བའི་ཆོས་ཀྱི་འབྲས་བུ་ཡིན་ཞིང་། སྐྱེ་བོ་རྣམས་ཐམས་ཅད་ཀྱི་ཡང་འདོད་པ་སྡུག་པ་ཡིད་དུ་འོང་བར་འགྱུར་རོ། །དེ་ལྟར་ཡང་སེམས་ཅན་རྣམས་ཐམས་ཅད་ལ་
བྱམས་པར་གྱུར་པ་དེ་ནི་ལུས་ཞིག་པར་གྱུར་ནས་ཤི་བའི་འོག་ཏུ་མཐོང་རིས་བདེ་འགྲོའི་འཇིག་རྟེན་པ་ལྷ་རྣམས་སུ་སྐྱེ་བར་འགྱུར་རོ། །ཡང་རྣམ་པ་གཞན་གྱིས་ཀྱང་དགེ་སྦྱོང་ངམ་བྲམ་ཟེ་རྣམས་སེམས་ཅན་ཐམས་ཅད་ལ་བློ་
མཉམ་པ་ཉིད་དུ་འགྱུར་བ་ནི། འདི་ལྟ་སྟེ་གྲོགས་པོ་རྣམས་ཀྱི་ལ་སེམས་པར་བྱེད་ཅིང་དེ་ཁོ་ན་བཞིན་དུ་དགྲ་བོ་རྣམས་ཀྱི་ལ་ཡང་སྟེ། ཇི་ལྟར་སྲོག་ཆགས་འདི་དག་རྣམས་ཐམས་ཅད་ནི་འཆི་བའི་ཆོས་ཅན་འཆི་བའི་ཆོས་ཉིད་
ལས་རྣམ་པར་མ་གྲོལ་བ་ཡིན་ནོ། །སྐྱེ་བ་དང་བཅས་པར་གྱུར་པ་འདི་དག་རྣམས་ཐམས་ཅད་ཀྱང་འཆིང་བར་གྱུར་བ་ཡིན་ནོ། །རང་རང་གི་ལས་རྣམས་ཀྱིས་སེམས་ཅན་འདི་དག་རྣམས་དམྱལ་བ་དང་ཡི་དགས་དང་དུད་འགྲོར་

66-1-77a

སྐྱེ་བས་སེམས་ཅན་འདི་དག་ནི། ཀྱེ་མ་རིང་བར་འགྱུར་རོ། །དེ་དེ་ལྟར་སྒོམ་པར་བྱེད་པ་དང་སེམས་ཅན་རྣམས་ཐམས་ཅད་ལ་ཡང་ཕན་པར་འདོད་པ་དེ་ནི་མཆོག་ཏུ་ཁྲག་རབ་ཏུ་དང་བར་འགྱུར་རོ། །ཁྲག་རབ་ཏུ་དང་
བར་གྱུར་པས་བཞིན་གྱི་མདོག་དང་ངོ་། །དེའི་བཞིན་གྱི་མདོག་རབ་ཏུ་དང་བས་བལྟ་ན་མཛེས་པར་འགྱུར་རོ། །དེས་སེམས་ཅན་རྣམས་ཐམས་ཅད་དགའ་བར་འགྱུར་ཏེ་མཐོང་བའི་ཆོས་ལ་ཡིན་ནོ། །རྣམ་པར་སྨིན་པས་
ནི་ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་གྱི་ལྷ་རྣམས་སུ་སྐྱེ་བར་འགྱུར་རོ། །དེ་ལྟར་ཡང་དགེ་སློང་རྣམས་སེམས་ཅན་ཐམས་ཅད་ལ་མཉམ་པ་ཉིད་ཀྱི་དབང་དུ་བྱས་ནས་དགེ་བའི་ལས་ཆེན་པོ་རྣམས་
བྱེད་པར་འགྱུར་རོ། །ཡང་རིམ་པ་གཞན་གྱིས་ཀྱང་དགེ་སྦྱོང་ངམ་བྲམ་ཟེ་འམ་གཞན་ཡང་དེའི་རིགས་ཅན་རྣམས་ཀྱིས་སེམས་ཅན་ཐམས་ཅད་ལ་མཉམ་པ་ཉིད་སྒོམ་པར་བྱེད་དེ། ཇི་ལྟར་སེམས་ཅན་འདི་དག་རྣམས་
ཐམས་ཅད་ནི་ལས་བསྒོ་སྐལ་ལ་སྤྱོད་པ། ལས་ཀྱི་སྐྱེ་གནས་པ་ལས་བདག་གིར་བྱེད་པར་གྱུར་པས་ཇི་ལྟར་ལས་བྱས་པར་གྱུར་པ་དགེ་བ་འམ་སྡིག་པ་ཅན་ཡང་རུང་སྟེ་ལས་དེ་དང་དེའི་སྐལ་བ་ཅན་དུ་འགྱུར་བ་ཡིན་ནོ། 
ལེགས་པར་བྱས་པ་རྣམས་ཀྱིས་ནི་ལྷ་དང་མི་རྣམས་ཀྱི་ནང་དུའོ། །ཉེས་པར་བྱས་པ་རྣམས་ཀྱིས་ནི་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །དགེ་སྦྱོང་དང་བྲམ་ཟེ་འམ་གཞན་ཡང་དེའི་རིགས་ཅན་
དེ་དག་རྣམས་ཀྱིས་དེ་ལྟར་སྒོམ་པར་བྱེད་པ་ན། དེའི་ཚེ་འདིའི་སེམས་ཅན་གྱི་དབང་དུ་བྱས་པའི་སེམས་རབ་ཏུ་དང་བར་གྱུར་པས་བཞིན་གྱི་ཁ་དོག་རབ་ཏུ་དང་བར་འགྱུར་རོ། །བཞིན་གྱི་མདོག་རབ་ཏུ་དང་བར་གྱུར་པས་ཀྱང་
སེམས་ཅན་རྣམས་ཐམས་ཅད་ཀྱི་འདོད་པ་སྡུག་པ་ཡིད་དུ་འོང་བར་འགྱུར་རོ། །ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་པ་ལྷ་རྣམས་སུ་སྐྱེ་བར་འགྱུར་ལ། ཐ་མར་ཡང་ཡོངས་སུ་མྱ་ངན་ལས་འདའ་བ་ཡིན་ནོ། །དེའི་

66-1-77b

སེམས་རབ་ཏུ་དང་བར་གྱུར་པ་དང་སེམས་ཅན་རྣམས་ཐམས་ཅད་ལ་མཉམ་པ་ཉིད་དུ་གྱུར་པའི་དགེ་སྦྱོང་དང་བྲམ་ཟེ་དག་རྣམས་ཀྱི་ཡང་འབྲས་བུ་དེ་ལྟ་བུར་འགྱུར་བ་ཡིན་ནོ། །ཡང་རིམ་པ་གཞན་གྱིས་དགེ་སྦྱོང་ངམ་བྲམ་ཟེ་རྣམས་
ཀྱང་སེམས་ཅན་རྣམས་ཐམས་ཅད་ལ་མཉམ་པ་ཉིད་སྒོམ་པར་བྱེད་དོ། །གང་ཞེ་ན་འདི་ལྟ་སྟེ་སེམས་ཅན་རྣམས་ཐམས་ཅད་ལ་ཡང་སེམས་ཅན་རྣམས་ཐམས་ཅད་ནི་སྡུག་པ་དང་ཡིད་དུ་འོང་བ་རྣམས་དང་ཐ་དད་དུ་འབྲལ་
བར་འགྱུར་རོ། །མེད་པར་འགྱུར་རོ། །རྣམ་པར་འཐོར་བར་འགྱུར་རོ། །རྣམ་པར་འབྲལ་བར་འགྱུར་རོ། །སོ་སོར་འབྱུང་བར་འགྱུར་རོ། །འཁོར་བར་གཏོགས་པའི་སེམས་ཅན་རྣམས་ཐམས་ཅད་ལ་ཡང་སྡུག་པ་
ཡིད་དུ་འོང་བ་འདོད་པ་རྣམས་ཐམས་ཅད་དང་ཡང་ལྷན་ཅིག་ཏུ་བྲལ་བར་མ་གྱུར་ཅིང་འབྲལ་བར་མི་འགྱུར་བ་རྣམས་ནི་འདི་ན་འགའ་ཞིག་ཀྱང་ཡོད་པ་མ་ཡིན་ནོ། །སྡུག་པ་རྣམས་དང་རབ་ཏུ་རྣམ་པར་བྲལ་བ་ནི་ཤིན་དུ་
ཡང་སྡུག་བསྔལ་བ་ཡིན་ནོ། །དེ་དེ་ལྟར་སྒོམ་པར་བྱེད་པས་སེམས་རབ་ཏུ་དང་བར་འགྱུར་ཞིང་སེམས་ཀུན་ནས་རབ་ཏུ་དང་བས་གདོང་གི་མདངས་གསལ་བར་འགྱུར་རོ། །དེའི་བཞིན་གྱི་མདངས་གསལ་བར་གྱུར་པས་ཀྱང་
མངོན་པར་དགའ་བའི་གཟུགས་སུ་འགྱུར་རོ། །དེའི་གཟུགས་བཟང་བས་སྐྱེ་བོ་རྣམས་ཐམས་ཅད་རབ་ཏུ་དང་བར་འགྱུར་རོ། །འདོད་པ་དང་སྡུག་པ་དང་ཡིད་དུ་འོང་བར་ཡང་འགྱུར་རོ། །དེ་སེམས་ཅན་རྣམས་ཐམས་ཅད་
ལ་མཉམ་པ་ཉིད་ཀྱི་མཐུ་སྟོབས་ཀྱི་མཐོང་བའི་ཆོས་ཀྱི་འབྲས་བུ་ནི་འདི་དག་ཡིན་ནོ། །ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་དུ་ལྷ་རྣམས་སུ་སྐྱེ་བར་འགྱུར་རོ། །ལས་ཀྱི་ལྷག་མ་རྣམས་
ཀྱིས་ཀྱང་ཡོངས་སུ་མྱ་ངན་ལས་འདའ་བར་འགྱུར་རོ། །ཡང་རྣམ་གྲངས་གཞན་གྱིས་ཀྱང་དགེ་སྦྱོང་ངམ་བྲམ་ཟེ་རྣམས་ཀྱིས་སེམས་ཅན་ཐམས་ཅད་ལ་མཉམ་པ་ཉིད་ཀྱི་སེམས་བསྒོམ་པར་བྱ་བ་ཡིན་ནོ། །གང་དག་ཞེ་ན་

66-1-78a

འདི་ལྟ་སྟེ། གང་གི་ཕྱིར་ཡང་མོར་མྱུར་དུ་འཇུག་པའི་ཕྱིར་ན་སེམས་ནི་ཀུན་དུ་གནས་པ་མེད་པ་ཡིན་པས་དགེ་སྦྱོང་དང་བྲམ་ཟེ་དེ་དག་རྣམས་ཡང་གལ་ཏེ་འདོད་ཆགས་དང་བཅས་པར་གྱུར་པའི་སེམས་སྐྱེས་
པར་གྱུར་ན་དེས་མི་སྡུག་པ་སྒོམ་པར་བྱེད་དོ། །གལ་ཏེ་ཞེ་སྡང་དང་བཅས་པར་གྱུར་ན་དེས་བྱམས་པ་སྒོམ་པར་བྱེད་དོ། །གལ་ཏེ་གཏི་མུག་དང་བཅས་པའི་སེམས་སྐྱེས་པར་གྱུར་ན། དེས་རྟེན་ཅིང་འབྲེལ་པར་
འབྱུང་བ་རྣམས་སྒོམ་པར་བྱེད་དོ། །དེ་དེ་ལྟར་སེམས་ཀྱི་གཉེན་པོར་གྱུར་པའི་གཉེན་པོ་གསུམ་པོ་རྣམས་སེམས་པར་བྱེད་པས་སེམས་ཅན་ཐམས་ཅད་ལ་མཉམ་པ་ཉིད་དུ་འགྱུར་རོ། །དེ་ནི་གྲོགས་པོ་དང་དགྲ་བོ་
རྣམས་དང་རབ་ཏུ་བྲལ་བ་དང་མཉམ་པ་དང་ཡང་བ་དང་རབ་ཏུ་དང་བའི་བློ་གྲོས་ཅན་ཐམས་ཅད་དུ་དོགས་པ་མེད་པར་འགྲོ་ཞིང་རྣམ་པར་རྒྱུ་བ་དང་། མཆོག་ཏུ་རྣམ་པར་དག་པ་བདེ་བར་གནས་པ་ཡིན་ནོ། །བདེ་བར་མཚན་
མོ་ཉལ་བར་འགྱུར་བ་དང་། བདེ་བར་ཡང་ཉིན་མོ་རབ་ཏུ་སད་པར་འགྱུར་ལ། ལྷ་རྣམས་ཀྱིས་ཀྱང་འདི་དག་ལ་མངོན་པར་སྲུང་བར་བྱེད་དོ། །དེ་ནི་དབང་ཆེ་བར་ཡང་འགྱུར་རོ། །མཐུ་སྟོབས་ཆེ་བར་ཡང་འགྱུར་རོ། །དེ་དེ་
ལྟར་རབ་ཏུ་ཡིད་རབ་ཏུ་དང་བས་ཁྲག་རབ་ཏུ་དང་བར་འགྱུར་རོ། །ཁྲག་རབ་ཏུ་དང་བས་བཞིན་གྱི་མདོག་རབ་ཏུ་དང་ངོ་། །དེའི་མདོག་རབ་ཏུ་དང་བས་བལྟ་ན་མཛེས་པའི་གཟུགས་སུ་འགྱུར་རོ། །རབ་ཏུ་མཛེས་པ་དང་
སྐྱེ་བོ་རྣམས་ཐམས་ཅད་ལ་འདོད་པ་དང་སྡུག་པ་དང་འཐུན་པ་དང་ཡིད་དུ་འོང་བར་ཡང་འགྱུར་རོ། །དེ་སེམས་ཅན་ཐམས་ཅད་ལ་མཉམ་པ་ཉིད་དུ་གྱུར་པའི་ལས་ཀྱི་འབྲས་བུ་རྣམ་པར་སྨིན་པས་ལུས་ཞིག་པར་གྱུར་ནས་
ཤི་བའི་འོག་ཏུ་ཡང་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་སུ་སྐྱེ་བར་འགྱུར་རོ། །ཀུན་དུ་ལྷག་པར་གྱུར་པའི་ལས་ཀྱིས་ཀྱང་ཇི་ལྟར་མོས་པ་བཞིན་དུ་ཡོངས་སུ་མྱ་ངན་ལས་འདའ་བར་འགྱུར་རོ། །དེ་ནས་དེའི་ཚེ་རྨ་

66-1-78b

བྱའི་རྒྱལ་པོ་དེས་ཚིགས་སུ་བཅད་པའི་དབྱངས་ཀྱིས་བསྙད་པ་ཇི་ལྟར། གྲོགས་དང་གྲོགས་མིན་ཐམས་ཅད་ལ། །གང་བློ་ཀུན་ཏུ་ཆགས་མེད་པར། །ཕྱོགས་འཛིན་མེད་པར་ཆོས་ཤེས་པའི། །ཤེས་ལྡན་ཐུབ་པར་བརྗོད་པ་
ཡིན། །སྐྱོན་གྱི་འདམ་གྱིས་ཡིད་གང་ལ། །ནམ་ཡང་གོས་པ་མེད་པ་དང་། །གཅིག་པུར་རྒྱུ་བར་དགའ་བ་དང་། །གང་དག་ཆགས་བྲལ་ཐུབ་པར་བརྗོད། །ང་ཡིར་མེད་དང་སྤྱོད་དྲི་མེད། །རྙོག་པའི་དྲི་མ་ཀུན་དང་བྲལ། །ཡུལ་
རྣམས་ཉོན་མོངས་ཐམས་ཅད་ཀྱིས། །ཀུན་དུ་ཕྲོགས་མེད་ཐུབ་པར་བརྗོད། །མི་རྟག་ལ་སོགས་བདེན་པ་ནི། །ཇི་ལྟ་བཞིན་དུ་རྗེས་སུ་མཐོང་། །འཇིག་རྟེན་འཇིག་རྟེན་མུན་ཉིད་ཀྱང་། །བརྟན་པ་དེ་ནི་ཐུབ་པར་བརྗོད། །འཇིག་རྟེན་
ཆོས་ཀྱིས་ནམ་ཡང་ནི། །རྗེས་སུ་སྐྱོ་བར་འགྱུར་མ་ཡིན། །བདེ་སྡུག་མཚུངས་པའི་ཤེས་རབ་ནི། །དྲི་མེད་ཐུབ་པར་བརྗོད་པ་ཡིན། །རྟག་ཏུ་ཀུན་དགའ་མཆོག་གིས་ནི། །རྟག་ཏུ་འདོད་པ་རྣམ་པར་སྤངས། །སྲེད་པ་མེད་
དང་ཉུང་ངུས་འཚོ། །གཙང་བ་འདི་ནི་ཐུབ་པར་བརྗོད། །གང་དག་དེ་དང་འགྲོགས་པ་ཡིས། །གང་ལ་དེ་ལ་རྗེས་འགྲོ་མིན། །གཅིག་པུ་རྒྱུ་ཞིང་བློ་གྲོས་བརྟན། ། བསྲུང་འཚམས་དང་ལྡན་ཐུབ་པར་བརྗོད། །འཇིགས་དང་
རྒ་བ་ལས་རྣམ་གྲོལ། །སྲེད་པའི་ཤུགས་ཀྱིས་འཇོམས་མིན་གང་། །རབ་ཏུ་ཞི་བའི་དབང་དག་སེམས། །རོ་ལ་ཞེན་མེད་ཐུབ་པར་བརྗོད། །སེམས་ཅན་རྣམས་ལ་མཉམ་ཉིད་གང་། །མི་མཉམ་པ་ལ་རྟག་ཏུ་མཉམ། །ཐམས་
ཅད་ལ་ནི་མཉམ་པ་ཉིད། །ཤེས་རབ་ལྡན་པ་ཐུབ་པར་བརྗོད། །དགེ་མི་དགེ་རྣམས་ཐམས་ཅད་ཀྱི། །ལས་དང་འབྲས་བུའི་དེ་ཉིད་རིག །དགེ་དང་མི་དགེ་ཡོངས་སྤངས་པའི། །འཇིག་རྟེན་འདི་ནི་ཐུབ་པར་བརྗོད། །ཤིན་དུ་
སྐྱོན་རྣམས་འཇོམས་ལ་བརྩོན། །རྟག་ཏུ་ལུས་གཏོགས་པ་ཡི་དྲན། །ཚོར་བ་ལ་སོགས་དེ་ཉིད་ཤེས། །ཤེས་རབ་ལྡན་པ་ཐུབ་པར་བརྗོད། །ཡུལ་དུས་བྱ་བར་རྩོམ་པ་དང་། །རིགས་པ་སྨྲ་ཞིང་དབང་པོ་དུལ། །འཁོར་བའི་

66-1-79a

འཇིགས་པས་འཇིགས་པ་ཡི། །རབ་ཞི་གང་ཡིན་ཐུབ་པར་བརྗོད། །དེ་ལྟར་རྨ་བྱའི་མངའ་བདག་དེས་དགའ་ལྡན་པ་དེ་དག་རྣམས་དང་འཐབ་བྲལ་བ་དེ་དག་རྣམས་ལ་རྣམ་པ་དུ་མར་ཆོས་སྟོན་པར་བྱེད་དོ། །
དེ་ལ་དེ་དག་རྣམས་ཐམས་ཅད་ཀྱང་ཡིད་ཤིན་དུ་མཉམ་པར་བཞག་པ་ཡིན་ཏེ། ཐམས་ཅད་དུ་ཡུལ་གྱི་བདེ་བ་དེ་དག་རྣམས་ཐོབ་ཀྱང་གཅིག་ཏུ་དགེ་བའི་ཆོས་ཀྱི་བཏུང་བས་ཡིད་ངོམས་པར་གྱུར་པ་ཡིན་ནོ། །དེ་ནས་ལྷ་དེ་
དག་རྣམས་ཀྱི་ཡིད་ཞུ་བར་གྱུར་པ་ཉེ་བར་རྙེད་པ་དང་། གཞན་ཡང་རྨ་བྱའི་རྒྱལ་པོ་དེ་གཙུག་ལག་གི་ཆོས་ཉིད་སྟོན་པར་བྱེད་པ་ལ་ཇི་ལྟར་ཆོས་གཞན་ཡང་ཐེག་པ་ཆེན་པོ་ལ་རབ་ཏུ་གནས་པར་གྱུར་པའི་དགེ་སྦྱོང་ངམ་
བྲམ་ཟེ་འམ་དེ་ལྟ་བུའི་རིགས་ཅན་གཞན་རྣམས་ཀྱིས་ཀྱང་ཡིད་ལ་བྱའོ། །བྱས་ནས་ཀྱང་ཀུན་ཏུ་སྤྱད་པར་བྱའོ། །འདི་དག་ཀྱང་གང་ཞེ་ན། འདི་ལྟ་སྟེ་ཆོག་ཤེས་པའོ། །ཆོག་ཤེས་པ་ཞེས་བྱ་བའི་ཆོས་ནི་མཆོག་ཏུ་
གཅེས་པར་བྱ་བ་ཡིན་ཏེ་བདེ་བར་བྱེད་པ་ཡང་ཡིན་ནོ། །ལུས་དང་སེམས་ཐམས་ཅད་ཚིམ་པར་ཡང་འགྱུར་རོ། །ཆོག་ཤེས་པའི་གྲོགས་པོ་དང་ལྡན་པ་དང་ཆོག་ཤེས་པའི་དཔུང་གཉེན་དང་ལྡན་པའི་དགེ་སྦྱོང་དང་བྲམ་ཟེ་རྣམས་
ནི་མཆོག་ཏུ་གྱུར་པའི་བདེ་བ་རྣམས་ལ་ལོངས་སྤྱོད་དོ། །ཐམས་ཅད་དུ་ཡང་ཐམས་ཅད་ཀྱིས་ཆོག་ཤེས་པ་དེ་དག་རྣམས་ཐམས་ཅད་ནི་བདེ་བའི་མཆོག་རྣམས་ལ་ཉེ་བར་ལོངས་སྤྱོད་པར་བྱེད་པ་ཡིན་ནོ། །འདོད་པ་སྡུག་པ་ཡིད་དུ་
འོང་བའི་གཟུགས་དུ་མ་རྣམས་ལ་མིག་གིས་མངོན་པར་ཞེན་པར་མི་བྱེད་དོ། །དོན་དུ་གཉེར་བར་ཡང་མི་བྱེད་ཅིང་ཀུན་དུ་རྟོག་པར་ཡང་མི་བྱེད་དོ། །མིག་གི་ཡུལ་དུ་གྱུར་པའི་གཟུགས་དེ་དག་རྣམས་ལ་ཀུན་དུ་རྟོག་པར་མི་བྱེད་
དོ། །སེམས་ཀྱིས་བསམ་ཏེ་སྨོན་པར་མི་བྱེད་དོ། །ཕྱིར་ཞིང་དོན་དུ་གཉེར་བར་མི་བྱེད་དོ། །འདོད་པ་སྡུག་པ་དང་ཡིད་དུ་འོང་བར་གྱུར་པའི་འདས་པའི་གཟུགས་དེ་དག་རྣམས་ལ་ཀུན་དུ་རྟོག་པར་མི་བྱེད་དོ། །དེས་བྱས་པའི་

66-1-79b

འདུན་པའི་འདོད་ཆགས་སྐྱེད་པར་མི་བྱེད་དོ། །དེ་ཉིད་ལ་དྲན་པར་བྱས་ནས་སྨོན་པར་མི་བྱེད་དོ། །རྣམ་པར་འཕེལ་བར་འཆེལ་བར་མི་བྱེད་དོ། །བདག་ཉིད་རང་གིས་བདག་ཉིད་མཆོག་ཏུ་དགའ་བར་བྱེད་པའི་དགེ་སྦྱོང་ངམ་བྲམ་
ཟེ་རྣམས་ནི་རྟག་པ་ཉིད་དུ་ཡང་སྐྱིད་པར་འགྱུར་རོ། །དེ་བཞིན་དུ་རྣ་བས་འདོད་པ་སྡུག་པ་ཡིད་དུ་འོང་བའི་སྒྲ་རྣམས་ཐོས་པར་གྱུར་པ་ན་ཀུན་དུ་རྟོག་པར་མི་བྱེད་དོ། །ཡིད་ཀྱིས་རབ་ཏུ་སྨོན་པར་མི་བྱེད་དོ། །འདས་པའི་ཡུལ་དེ་
དག་རྣམས་ལ་འདུན་པའི་འདོད་ཆགས་སྐྱེད་པར་མི་འགྱུར་རོ། །ཀུན་དུ་རྟོག་པར་མི་བྱེད་དོ། །ཡང་དག་པ་ཇི་ལྟ་བ་བཞིན་དུ་གྱུར་པས་སྒྲ་རྣམས་ལ་སོ་སོར་རྟོག་པར་ཡང་བྱེད་དོ། །སྒྲ་འདི་དག་ནི་རྟག་པ་མ་ཡིན། བདེ་བ་མ་ཡིན། 
བདག་དང་བཅས་པ་མ་ཡིན་གྱི། ཀུན་དུ་རྟོག་པ་འབའ་ཞིག་གིས་བཅོམ་པར་གྱུར་པའི་བྱིས་པའི་སྲོག་ཆགས་རྣམས་ཀྱིས་ཇི་ལྟར་བདེ་བར་ཀུན་ནས་སྒྱུར་བར་བྱེད་པ་པོར་དེ་ལྟར་ཡོངས་སུ་བརྟགས་ཤིང་ཞེན་པ་རྣམས་ལ་སྒྲ་
རྣམས་རྣ་བའི་ཡུལ་དུ་འགྱུར་བས་སེམས་ཀུན་ནས་དཀྲུག་པར་བྱེད་པ་ཡིན་ནོ། །དེ་ལ་ཇི་ལྟ་བ་བཞིན་དུ་རྣམ་པ་དུ་མར་ཚུལ་བཞིན་ཡིད་ལ་བྱེད་པས་ཡང་དག་པ་ཇི་ལྟ་བ་བཞིན་དུ་མཐོང་བས་འདིས་ཇི་ལྟ་བ་བཞིན་དུ་ཀུན་དགའ་
བར་བྱེད་པ་ན། སྒྲ་དེ་དག་ཉིད་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་དོ། ཇི་ལྟར་སྒྲ་འདི་ནི་ཆང་བ་སྟོང་པ་དང་རྒྱུན་འཆད་པ་དང་སྙིང་པོ་མེད་པ་ཡིན་ཏེ། འདི་ནི་སྙིང་པོ་ཅུང་ཟད་ཅིག་ཀྱང་ཡོད་པ་ནི་མ་ཡིན་གྱི། འཁོར་
བར་རྟོག་པ་འབའ་ཞིག་གིས་ཀུན་དུ་ཕྲོགས་པའི་བྱིས་པ་སོ་སོའི་སྐྱེ་བོ་རྣམས་ཡིན་ནོ། །དེ་གང་གི་ཚེ་སྒྲ་དེ་ཉིད་ལ་ཀུན་དུ་ལྟ་བར་བྱེད་པ་ན། དེའི་ཚེ་ཐམས་ཅད་ཀྱང་སྙན་པ་འདོད་པ་སྡུག་པ་ཡིད་དུ་འོང་བར་གྱུར་པའི་ཁྱད་པར་
ཐམས་ཅད་དང་ལྡན་པའི་སྒྲ་རྣམས་ཐམས་ཅད་ཀྱིས་ཀྱང་ཕྲོགས་པར་མི་འགྱུར་རོ། །ཆོག་ཤེས་པ་དེས་ནི་བདེ་བའི་མཆོག་རྣམས་ཐོབ་པར་འགྱུར་རོ། །གཞན་ཡང་དགེ་སྦྱོང་ངམ་བྲམ་ཟེ་རྣམས་དང་དེའི་རིགས་ཅན་གཞན་རྣམས་

66-1-80a

ཀྱིས་ཀྱང་སྣས་དྲི་ནི་བསྣོཾ་པར་མི་བྱེད་ཅིང་ཀུན་དུ་རྟོག་པར་ཡང་མི་བྱེད་དོ། །ཡིད་ཀྱིས་ཀྱང་ཚུལ་བཞིན་མ་ཡིན་པ་ཡིད་ལ་བྱེད་པས་སེམས་པར་མི་བྱེད་དོ། །ཡང་དག་པ་ཇི་ལྟ་བ་བཞིན་དུ་སྣས་དྲི་འདི་དག་རྣམས་བསྣོཾ་
པར་བྱེད་པ་རྣམས་ཀྱིས་ནི་ཡང་དག་པ་ཇི་ལྟ་བར་མཐོང་བར་བྱེད་པ་ཡིན་ཏེ། ཇི་ལྟར་དྲི་འདི་དག་རྣམས་ནི་རྟག་པ་འམ་བརྟན་པ་འམ། ཐེར་ཟུག་གམ་རྣམ་པར་མི་འགྱུར་བའི་ཆོས་ཅན་ནི་མ་ཡིན་གྱི་དྲི་གང་ལ་ཀུན་ཏུ་ཆགས་
པར་བྱེད་པ་དང་དེས་རྨོངས་པར་བྱེད་པ་དང་ཚུལ་བཞིན་མ་ཡིན་པའི་ཡིད་ལ་བྱེད་པས་སེམས་ཀྱི་རྒྱུན་དཀྲུགས་པ་དྲི་ལ་ཆགས་པ་གང་ཡིན་པ་རྣམས་ནི། མི་རྟག་པ་དང་འདི་དག་ནི་སྙིང་པོ་མེད་པ་དང་གསོག་དང་གསོབ་ཡིན་ནོ། །
དེ་ལྟར་ཆོག་ཤེས་པར་གྱུར་པའི་དགེ་སྦྱོང་ངམ་བྲམ་ཟེ་འམ་གཞན་ཡང་དེའི་རིགས་ཅན་རྣམས་ནི་ཤིན་དུ་ཆོག་ཤེས་པར་གྱུར་པ་ཡིན་ནོ། །དེ་ནི་སྣའི་སྲེད་པ་དེ་དག་གིས་ཀུན་དུ་མི་ཕྲོགས་སོ། །དེ་ཇི་ལྟ་ཇི་ལྟར་རྗེས་སུ་ལྟ་བར་བྱེད་
པ་དེ་ལྟ་དེ་ལྟར་ཆེས་བདེ་བར་འགྱུར་ཏེ། ཆོག་ཤེས་པ་དེ་མཆོག་ཏུ་རྣམ་པར་དག་པར་གྱུར་པ་བསྟེན་ཅིང་བསྒོམས་ལ། ལན་མང་དུ་བྱས་པའི་ཕྱིར་མཆོག་ཏུ་བདེ་བར་འགྱུར་རོ། །གཞན་ཡང་དགེ་སྦྱོང་དེ་ཉིད་དམ་བྲམ་
ཟེ་འམ་གཞན་ཡང་དེའི་རིགས་ཅན་རྣམས་ཀྱིས་ལྕེས་རོ་མྱངས་པར་གྱུར་ནས་ཀུན་ཏུ་ཆགས་པར་མི་འགྱུར་རོ། །ཀུན་དུ་རྟོག་པར་ཡང་མི་བྱེད་དོ། །སྔོན་གྱི་དུས་སུ་མྱངས་པར་གྱུར་པའི་རོ་སྔ་མ་དག་རྗེས་སུ་དྲན་པར་མི་བྱེད་དོ། །ཚུལ་
བཞིན་མ་ཡིན་པ་ཡིད་ལ་བྱེད་པས་ཀྱང་སེམས་པར་མི་བྱེད་དོ། །ཕྱིར་ཞིང་ཡང་དང་ཡང་དུ་རོ་དེ་ཉིད་མྱང་བ་ལ་དོན་དུ་གཉེར་བར་མི་བྱེད་དོ། །ཆོག་ཤེས་པ་ཉིད་ཀྱིས་ཀུན་དུ་བདེ་བར་འགྱུར་རོ། །ཆོག་མི་ཤེས་པ་ཉིད་ཀྱིས་ཀུན་དུ་
འཁྲིད་པར་མི་འགྱུར་རོ། །དེ་ལ་ནང་དུ་མངོན་པར་ཞེན་པར་མི་བྱེད་དོ། །ཡང་དག་པ་ཇི་ལྟ་བར་ཡང་རོ་དེ་ཡིད་ཀྱིས་རྟོག་པར་བྱེད་དེ། ཇི་ལྟར་རོ་འདི་དག་རང་བཞིན་གྱིས་སྙིང་པོ་འམ་བརྟན་པ་འམ་ཐེར་ཟུག་གམ་རྣམ་པར་མི་འགྱུར་

66-1-80b

བའི་ཆོས་ཅན་ནི་མ་ཡིན་གྱི། འདི་ནི་ཀུན་དུ་རྟོག་པའི་འདོད་ཆགས་ཀྱིས་ཕྲོགས་པ་འབའ་ཞིག་གི་སེམས་ཅན་རྣམས་ཀྱིས། ཇི་ལྟར་རོ་ནི་མཛེས་པ་ཁོ་ནའོ་ཞེས་རྟོགས་པར་ཟད་དེ། གང་གི་ཚེ་ཡང་དག་པ་ཇི་ལྟ་བ་བཞིན་ཏུ་རོ་དེ་དག་ལ་
སོ་སོར་རྟོག་པར་བྱེད་པ་ན། དེའི་ཚེ་རོ་དེ་རྣམས་ལ་ཆགས་པར་མི་འགྱུར་རོ། །རྙོག་པ་ཅན་དུ་མི་འགྱུར་ཞིང་འདིའི་ཡིད་ཀྱིས་རོའི་སྲེད་པ་ལས་བྱུང་བས་རོ་རྣམས་ལ་མྱང་བར་མི་བྱེད་དོ། །ཆོག་ཤེས་པ་ཉིད་ཀྱིས་དགའ་བར་འགྱུར་རོ། །
དེ་ནི་རོས་ཀུན་དུ་འཁྲིད་པར་འགྱུར་བ་ཉིད་ཀྱང་མ་ཡིན་ནོ། །གཞན་ཡང་དགེ་སྦྱོང་ངམ་བྲམ་ཟེ་རྣམས་ཀྱིས་ཀྱང་རེག་བྱ་ལ་རེག་པར་གྱུར་པ་ན་ཀུན་དགའ་བས་ཆོག་ཤེས་པ་དྲན་པ་དང་ལྡན་པ་རྣམས་རེག་བྱ་ལ་རེག་པར་གྱུར་ནས་ཡང་དག་པ་
ཇི་ལྟ་བ་བཞིན་དུ་ཀུན་དུ་ལྟ་བར་བྱེད་པ་ན། ཇི་ལྟར་རེག་བྱ་འདི་དག་རྣམས་རང་བཞིན་ཉིད་ཀྱིས་རྟག་པ་འམ་བརྟན་པ་འམ་ཐེར་ཟུག་གམ་ཡོངས་སུ་མི་འགྱུར་བའི་ཆོས་ཅན་ནི་མ་ཡིན་གྱི། འདི་དག་རྣམས་ནི་གསོག་གསོབ་སྙིང་པོ་
མེད་པ་ཡིན་ཏེ། རེག་བྱ་འདི་དག་ནི་བྱུང་ནས་མེད་པར་འགྱུར་བ་དང་། བྱུང་ནས་ཀྱང་ཕྱིར་ལྡོག་པར་འགྱུར་བ་ཡིན་ནོ། །དེས་ཡང་དག་པ་ཇི་ལྟ་བ་བཞིན་དུ་རེག་བྱ་འདི་དག་རྣམས་ལ་ལྟ་བར་བྱེད་དོ། །རྣམ་པར་རྟོག་པར་མི་བྱེད་དོ། །
འདས་པའི་རེག་བྱ་རྣམས་ལ་དྲན་པས་རྗེས་སུ་འབྲེལ་བར་མི་བྱེད་དོ། །སྲེད་པ་རྣམས་སྐྱེད་པར་མི་བྱེད་ཅིང་རེག་བྱ་དེ་དག་རྣམས་ལ་ཆགས་པར་ཡང་མི་བྱེད་དོ། །ཕྱིར་ཞིང་ཡང་དང་ཡང་དུ་རེག་བྱ་གཞན་རྣམས་དོན་དུ་
གཉེར་བར་མི་བྱེད་དོ། །ཅི་ཡང་རུང་བའི་རེག་བྱ་དེ་དག་གིས་ཀྱང་ཆོག་ཤེས་པར་ཡང་འགྱུར་རོ། །ཇི་ལྟ་བ་བཞིན་དུ་འདུན་པའི་འདོད་ཆགས་དང་རྣམ་པར་བྲལ་བའི་རེག་བྱ་དག་གིས་ཆོག་ཤེས་པར་བྱེད་དོ། །འདི་ནི་
རེག་བྱས་ཆོག་ཤེས་པ་ཞེས་བྱ་བར་ཡང་བརྗོད་དོ། །གཞན་ཡང་དགེ་སྦྱོང་ངམ་བྲམ་ཟེ་འམ་དེ་དག་གི་རིགས་ཅན་གཞན་རྣམས་ཀྱིས་ཀྱང་ཡིད་ཀྱིས་ཆོས་འདོད་པ་རྣམས་དང་མི་འདོད་པ་རྣམས་དཔྱད་པར་གྱུར་ནས་ཡང་

66-1-81a

དག་པ་ཇི་ལྟ་བ་བཞིན་དུ་རྗེས་སུ་ལྟའོ། །ཆོས་འདི་དག་ནི་རྟག་པ་འམ་བརྟན་པ་འམ་ཐེར་ཟུག་གམ་ཡོངས་སུ་མི་འགྱུར་བའི་ཆོས་ཅན་ནི་མ་ཡིན་གྱི། འདི་དག་རྣམས་ནི་སྟོང་པ་དང་མེད་པ་དང་སྙིང་པོ་མེད་པ་ཡིན་ནོ། །འདི་
དག་ནི་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་ཡིན་ཏེ། མེད་པར་གྱུར་ནས་ཀྱང་འབྱུང་བར་འགྱུར་ལ། བྱུང་ནས་ཀྱང་ཕྱིར་ལྡོག་པར་འགྱུར་བ་ཡིན་ནོ། །དེ་དག་རྣམས་ཐམས་ཅད་ཀྱང་རྣམ་པར་ཉམས་པར་
འགྱུར་བའི་ཆོས་ཅན་གྱི་འདོད་པ་དང་མི་འདོད་པའི་ཆོས་དེ་དག་རྣམས་བསམས་ནས་ཀུན་དུ་དགའ་བའི་མཆོག་ཏུ་གྱུར་པས་མི་འདོད་པ་རྣམས་ཀྱིས་རྣམ་པར་ཉམས་པར་མི་འགྱུར་ཞིང་། འདོད་པ་རྣམས་ལ་ཆགས་
པར་ཡང་མི་འགྱུར་རོ། །འདས་པ་རྣམས་ལ་ཡང་དྲན་པར་གྱུར་ནས་རྗེས་སུ་འབྲེལ་བར་མི་བྱེད་དོ། །འདས་པ་རྣམས་ཀྱི་རོ་མྱང་བར་ཡང་མི་བྱེད་དོ། །དེ་ལྟར་ཡིད་ཀྱིས་ཆོས་རྣམས་ལ་ཚུལ་བཞིན་དུ་ཡིད་ལ་བྱེད་
པས་མངོན་པར་ཞེན་པར་མི་བྱེད་དོ། །ཆོས་རྣམས་ཐམས་ཅད་ཀྱང་ཡིད་ཀྱིས་རོ་མྱང་བར་མི་བྱེད་དོ། །སྲེད་པ་རྣམས་ཀྱིས་ཀྱང་ཕྲོགས་པར་མི་འགྱུར་རོ། །དེ་ལྟར་སྲེད་པ་དྲུག་གི་ཚོགས་རྣམས་ལས་ཀུན་ནས་
རྣམ་པར་གྲོལ་བའི་དགེ་སྦྱོང་ངམ་བྲམ་ཟེ་འམ་དེ་དག་དང་རིགས་འདྲ་བར་གྱུར་པ་རྣམས་ཀྱང་ཆོག་ཤེས་པ་ཡིན་ནོ། །དེ་ནས་དུས་དེའི་ཚེ་རྨ་བྱའི་མངའ་བདག་དེས་ཚིགས་སུ་བཅད་པའི་དབྱངས་ཀྱིས་བསྙད་པ་ཇི་ལྟར། 
སྲིད་པ་དྲུག་གི་ཡུལ་གྲོལ་བའི། །ཆོག་ཤེས་པ་ཡང་སྐྱོབ་པ་ཡིན། །སྤྲོ་མེད་རོ་ལ་ཞེན་མེད་པའི། །མཐར་ཐུག་པ་ཡི་བདེ་བར་འདོད། །དེ་ལྟར་གྱུར་པའི་གཟུགས་ལ་ནི། །གང་གིས་མཉམ་པར་བཞག་ལྟ་བ། 
གཟུགས་ཀྱི་རང་བཞིན་སྲེད་པ་རྣམས། །དེ་ཡི་སེམས་ལ་རབ་འཇུག་མིན། །རྣ་བས་སྒྲ་རྣམས་ལ་རེག་ནས། །ཡིད་ནི་རབ་ཏུ་སྦྱོར་མི་བྱེད། །དེ་ཡི་རྣ་བའི་རང་བཞིན་གྱིས། །འདོད་ཆགས་སྙིང་ཉིད་ལ་རྒྱུག་མིན། 

66-1-81b

སྣ་ནི་ཡུལ་དང་ཡང་དག་ལྡན། །གང་ཕྱིར་དེ་ཁོ་ནར་རིག་པ། །གང་ཕྱིར་དེ་ཡི་ཡིད་ཀྱང་ནི། །སྣ་ཡང་སྐྱོན་གྱིས་འཆིང་བ་མིན། །བརྟན་པར་རོ་རྣམས་མྱངས་ནས་ཀྱང་། །ཡང་དག་པར་དེ་རྗེས་སུ་རྟོགས། །དེ་ཡི་ཡིད་ཀྱི་ཁང་
པར་ནི། །རོ་སྐྱེས་སྐྱོན་གྱིས་ཉམས་མི་བྱེད། །རྣམ་པ་སྣ་ཚོགས་རེག་བྱ་རྣམས། །ལུས་ཀྱིས་རེག་ནས་རྨོངས་མི་འགྱུར། །རེག་བྱའི་ཐབས་བླག་ཤེས་པ་དེའི། །བདེ་བ་མཐའ་ནི་ཡས་པར་འགྱུར། །འཐུན་དང་མི་འཐུན་
ཡིད་གང་ལ། །འགའ་ཞིག་ཆོས་རྣམས་ལ་བཟོད་པ། །རབ་ཏུ་བརྟན་པ་བྲག་འདྲ་བར། །དེ་ཡི་ཡིད་ནི་ཡོངས་སུ་བསྒྲགས། །ཤེས་བྱ་བའོ། །དེ་ལྟར་དགེ་སྦྱོང་དང་བྲམ་ཟེ་ཡང་སྲེད་པ་དང་ཀུན་ནས་རྣམ་པར་
གྲོལ་བ་དེ་དག་རྣམས་ནི་ཆོག་ཤེས་པར་ཡོངས་སུ་བསྒྲགས་པ་ཡིན་ནོ། །དེ་ལྟ་དེ་ལྟར་རྨ་བྱའི་མངའ་བདག་དེ་ཉིད་ཀྱིས་འཐབ་བྲལ་བ་དེ་དག་དང་དགའ་ལྡན་པ་དེ་རྣམས་ལ་གཙུག་ལག་གི་ཆོས་རྣམས་སྟོན་པར་བྱེད་དོ། །ཆོས་
གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་ངམ་བྲམ་ཟེ་རྣམས་ཀྱིས་ཀྱང་ཡིད་ལ་བྱའོ། །འདི་དག་ཀྱང་གང་ཞེ་ན། འདི་ལྟ་སྟེ་ཡུལ་རྣམས་ལ་འཇིགས་པར་ལྟ་བ་ཞེས་བྱ་བའོ། །བདེ་བའི་མཆོག་རྣམས་འབྱུང་
བར་བྱེད་པའོ། །དགེ་སྦྱོང་ངམ་བྲམ་ཟེ་རྣམས་ཡུལ་གང་ཡིན་པ་ལས་ཀྱང་བཞིན་གཞན་དུ་ལྟ་བར་བྱེད་དོ། །གང་གི་ཚེ་མིག་གིས་གཟུགས་རྣམས་རྗེས་སུ་མཐོང་བར་གྱུར་ན། དེའི་ཚེ་མིག་གི་རྣམ་པར་ཤེས་པ་སྐྱེས་པ་ལ་
ཡིད་ཀྱི་རྣམ་པར་ཤེས་པས་ཉམས་སུ་མྱོང་བར་གྱུར་པ་ན་རྣམ་པར་འབྱེད་པར་བྱེད་དོ། ཇི་ལྟར་འདིར་འོངས་པའི་ཡུལ་འདི་ལ་ནི་འདུན་པའི་འདོད་ཆགས་ཀྱང་སྤང་བར་བྱའོ། །བདག་རབ་ཏུ་འཆིང་བར་བྱེད་པ་པོའི་
ཡུལ་འདི་ལ་འདུན་པའི་འདོད་ཆགས་ལས་ཀུན་དུ་སྐྱེས་པའི་འཇིགས་པ་རྣམས་འབྱུང་བར་འགྱུར་བས། འདུན་པའི་འདོད་ཆགས་རབ་ཏུ་གཞོམ་པར་བྱའོ། །སྲེད་པ་རྣམས་ནི་བསྐམ་པར་བྱའོ། །ཚུལ་བཞིན་

66-1-82a

མ་ཡིན་པའི་ཡིད་ལ་ཡང་སྤང་བར་བྱའོ། །ཡུལ་མཐོང་བ་དང་ལྷན་ཅིག་ཉིད་དུ་ཇི་ལྟར་ཀུན་དུ་རྟོག་པ་སྐྱེས་པར་གྱུར་པས་དེ་ལྟར་ཡང་རྣམ་པར་ཤེས་པ་སྐྱེ་བ་ཡིན་ནོ། །དེ་ཡང་འདོད་ཆགས་དང་ལྷན་ཅིག་འགྲོགས་
པར་གྱུར་པ་འམ། དེ་ཡང་ཞེ་སྡང་དང་ལྷན་ཅིག་ཏུ་འགྲོགས་པ་དེ་དག་འདིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཉོན་མོངས་པ་ཅན་གྱི་མཐར་ཐུག་པའི་ཡིད་ལ་བྱེད་པ་འདི་དག་བདག་ལ་སྐྱེས་ལ། དེ་དག་གིས་ཀྱང་
བདག་ལ་ཕན་པ་མ་ཡིན་པ་རྣམས་འབྱུང་བར་འགྱུར་རོ། །འཇིག་རྟེན་འདི་དང་ཕ་རོལ་དུ་ཡང་བདེ་བར་མི་འགྱུར་ལ། ཉོན་མོངས་པས་ནི་བདག་གི་དོན་དུ་མི་འགྱུར་ཞིང་བདེ་བར་ཡང་མི་འགྱུར་རོ། །འདི་དག་རྣམས་ནི་སེམས་
ཅན་ཐམས་ཅད་ཀྱི་འཆིང་བར་གྱུར་པ་ཡིན་ཏེ། དེ་ཡང་གང་གི་ཚེ་དགེ་སྦྱོང་ངམ་བྲམ་ཟེ་རྣམས་ཀྱིས་ཡུལ་རྣམས་དེ་ལྟར་ཡོངས་སུ་རྟོག་པར་བྱེད་པ་དེའི་ཚེ་འདིའི་སྙིང་ལ་འདུན་པའི་འདོད་ཆགས་ཀུན་དུ་སྐྱེས་པར་གྱུར་པ་གང་
ཡིན་པ་དེ་དག་རྣམས་ཐམས་ཅད་ཀྱི་ཐམས་ཅད་དུ་རབ་ཏུ་བྲལ་བར་འགྱུར་བ་འམ་བསྐྱུངས་པར་འགྱུར་རོ། །དེ་ཇི་ལྟ་བ་ཁོ་ནར་མིག་གིས་གཟུགས་རྣམས་ཡང་དག་པ་ཇི་ལྟ་བར་སོ་སོར་རྟོག་པར་བྱེད་པ་དེ་ཁོ་ན་བཞིན་དུ་རྣ་བའི་
སྒྲ་རྣམས་སྐྱེས་པ་ཡང་སོ་སོར་རྟོག་པར་བྱེད་དོ། རྣ་བའི་རྣམ་པར་ཤེས་པ་འདི་སྐྱེས་པ་ནི་རྣ་བའི་རྐྱེན་དང་དེ་སྐྱེད་པ་ཡིད་ལ་བྱེད་པའི་རྐྱེན་གྱིས་བདེ་བར་ཀུན་དུ་ཚོར་བ་འམ་སྡུག་བསྔལ་གྱི་ཚོར་བ་འམ། དེ་ལས་
སྐྱེས་པའི་རྣམ་པར་ཤེས་པའི་དབང་དུ་བྱས་པ་རྣམ་པ་དེ་ལྟ་བུའི་ཡིད་ལ་བྱེད་པ་རྣམས་བདག་ལས་སྐྱེས་སོ། །འདོད་ཆགས་ལྷག་པར་གྱུར་པ་འམ། ཞེ་སྡང་ལྷག་པར་གྱུར་པ་འམ། གཏི་མུག་ལྷག་པར་གྱུར་པ་ཡང་
རུང་སྟེ། རྣམ་པར་ཤེས་པ་དེ་མར་མེའི་འོད་བཞིན་དུ་འདྲ་བར་གྱུར་པ་རྒྱུད་དང་ཀུན་དུ་འབྲེལ་བའི་རྣམ་པར་ཤེས་པ་གཞན་གྱིས་དེ་རྣམ་པར་ཤེས་པར་བྱེད་པ་ནི། ཇི་ལྟར་བདག་ལ་མི་དགེ་བའི་ཡིད་ལ་བྱེད་པ་འདི་

66-1-82b

སྐྱེས་སོ་ཞེས་དེས་ཡིད་ལ་བྱེད་པ་མི་དགེ་བ་དེ་དེ་ཉིད་དུ་མངོན་པར་ཤེས་སོ། །དེ་ཇི་ལྟ་བ་བཞིན་དུ་སོ་སོར་ཤེས་ཤིང་རྐྱེན་ཀྱིས་བྱུང་བའི་མི་དགེ་བ་རྣམས་སྤོང་བར་བྱེད་དོ། །དེ་གང་གི་ཚེ་མི་དགེ་བའི་ཆོས་རྣམས་ཡོངས་
སུ་སྤོང་བར་བྱེད་པ་དེའི་ཚེ་ན་དགེ་བའི་ཆོས་གཞན་རྣམས་ཀྱིས་ཀྱང་ཡོངས་སུ་གང་བར་ཡང་འགྱུར་རོ། །འདིར་ཡང་དག་པ་ཇི་ལྟ་བ་བཞིན་དུ་ཡུལ་རྣམས་ལྟ་བར་བྱེད་པ་ན་ཡང་ཚུལ་བཞིན་ཡིད་ལ་བྱེད་པ་རྣམས་ནི་རབ་
ཏུ་སྟོབས་དང་ལྡན་པར་འགྱུར་ལ། ཚུལ་བཞིན་མ་ཡིན་པ་ཡིད་ལ་བྱེད་པ་རྣམས་ནི་མི་འབྱུང་བར་འགྱུར་རོ། །དགའ་བའི་འདོད་ཆགས་དང་ལྷན་ཅིག་འགྲོགས་པར་གྱུར་པ་འདིའི་སྲད་པའི་ཡང་འབྱུང་བ་ཅན་གྱི་སྲེད་པ་དང་ལྡན་
པར་མི་འགྱུར་རོ། །དེ་དེ་ཟད་པར་གྱུར་པས་རྣམ་པར་དག་པར་འགྱུར་རོ། །ཉོན་མོངས་པའི་རྙོག་པ་རྣམས་དང་བྲལ་བ་དང་། དེ་མི་དགེ་བའི་དྲི་མ་རྣམས་དང་བྲལ་བར་འགྱུར་ཞིང་ཐམས་ཅད་དུ་ཡང་བདེ་བར་འགྱུར་རོ། །
དེ་དག་གི་ཕྱིར་ན་ཡང་དགེ་སྦྱོང་ངམ་བྲམ་ཟེ་འམ་གཞན་དག་རྣམས་ཀྱིས་ཀྱང་དང་པོ་ཁོ་ནར་ཡུལ་རྣམས་ལ་འདུན་པའི་འདོད་ཆགས་སྐྱེས་པར་གྱུར་པའི་མི་དགེ་བ་རྣམས་རབ་ཏུ་གཞོམ་པར་བྱའོ། །དགེ་བ་རྣམས་
ཀྱང་རྟག་པར་མང་དུ་སོ་སོར་དཔྱད་པར་བྱའོ། །སྡིག་པ་མི་དགེ་བར་གྱུར་པའི་ཆོས་རྣམས་ཐམས་ཅད་ཀྱང་རབ་ཏུ་གཞོམ་པར་བྱའོ། །དེ་བཞིན་དུ་རྣ་བས་ཀྱང་སྒྲ་རྣམས་ཐོས་ནས་ཡང་དག་པ་ཇི་ལྟ་བ་ཁོ་ནར་དགེ་བའི་
རྣམ་པར་ཤེས་པ་རྣམས་སོ་སོར་བསྐྱེད་པར་བྱའོ། །གཞན་ཡང་དགེ་སྦྱོང་ངམ་བྲམ་ཟེ་དང་དེ་དག་ཉིད་དང་དེའི་རིགས་ཅན་རྣམས་ཀྱིས་ཀྱང་སྣས་དྲི་རྣམས་བསྣམས་ནས་ཇི་ལྟར་ཤེས་པར་བྱེད་པ་ཡིན་ན། འདི་ནི་སྣའི་
རྐྱེན་དང་དྲིའི་རྐྱེན་ལས་ཀྱང་སྣའི་རྣམ་པར་ཤེས་པ་སྐྱེ་བར་འགྱུར་ལ། དེ་སྐྱེས་པའི་ཡིད་ལ་བྱེད་པའི་རྐྱེན་ཀྱིས་ཀྱང་གང་གི་ཚེ་མི་དགེ་བའི་ཡིད་ལ་བྱེད་པ་སྐྱེས་པར་གྱུར་པ་དེའི་ཚེ། དགེ་སྦྱོང་ངམ་བྲམ་ཟེ་འདི་དག་

66-1-83a

གིས་རྣམ་པར་ཤེས་པ་ཡིན་ཏེ། ཇི་ལྟར་མི་དགེ་བའི་ཆོས་སྡིག་པ་ཅན་འདི་དག་སྐྱེས་པར་གྱུར་ཏོ། །དེས་ཀྱང་བདག་ལ་དོན་མ་ཡིན་པ་རྣམས་འབྱུང་བར་འགྱུར་རོ། །བདེ་བ་མ་ཡིན་པ་འདི་དག་བདག་གིས་ཡོངས་
སུ་སྤང་བར་བྱའོ། །དེ་གང་གི་ཚེ་མི་དགེ་བའི་ཡིད་ལ་བྱེད་པ་དེ་དག་རྣམས་ཡོངས་སུ་སྤོང་བར་བྱེད་པ་དེའི་ཚེ། འདི་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་དོ། །དེའི་ཚེ་འདི་ལ་ཚུལ་བཞིན་ཡིད་ལ་བྱེད་པ་རྣམས་
ལེགས་པར་སྐྱེ་བར་འགྱུར་རོ། །དེ་ཚུལ་དང་མཐུན་པའི་ཡིད་ལ་བྱེད་པ་དེ་དང་ཡང་དག་པར་ལྡན་པས་དགའ་བའི་འདོད་ཆགས་དང་ལྡན་པའི་སྲེད་པ་རྣམས་རབ་ཏུ་འཇོམས་པར་བྱེད་དོ། །དེ་སླར་ཡང་དྲི་དེ་ཉིད་ལ་སོ་སོར་རྟོག་
པར་བྱེད་དེ། དེ་ལྟར་སོ་སོར་རྟོགས་པར་གྱུར་པ་ན་དེ་ཐམས་ཅད་དུ་དྲི་རྣམས་ཐམས་ཅད་ལ་མངོན་པར་ཆགས་པར་མི་འགྱུར་རོ། །དེ་རབ་ཏུ་བཅོམ་པ་ལས་ཀྱང་སྐྱིད་པར་འགྱུར་རོ། །དེ་ཇི་ལྟ་ཇི་ལྟར་ཡང་དག་པར་ཇི་
ལྟ་བར་ཡུལ་རྣམས་མངོན་པར་ཤེས་པར་གྱུར་པ་དེ་ལྟ་དེ་ལྟར་ཤིན་དུ་མཐར་ཐུག་པ་མཆོག་གི་བདེ་ལེགས་རྣམས་འཐོབ་པར་འགྱུར་རོ། །དེ་ལྟར་སྣས་ཀྱང་དྲི་རྣམས་བསྣམས་ནས་ཡང་དག་པ་ཇི་ལྟ་བ་བཞིན་
དུ་ལྟ་བས་དྲི་དེ་དག་རྣམས་ལ་ཀུན་དུ་ཆགས་པར་མི་འགྱུར་རོ། །གཞན་ཡང་དགེ་སྦྱོང་དང་བྲམ་ཟེ་དེ་དག་རྣམས་ཉིད་ཀྱི་ལྕེས་རོ་རྣམས་མྱངས་པར་བྱས་པ་ན་ཡང་། གང་དེ་ལ་མི་དགེ་བའི་འདུན་པའི་འདོད་
ཆགས་སྐྱེས་པར་གྱུར་པ་དེ་དག་རྣམས་ཀྱང་འདིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཇི་ལྟར་ལྕེའི་རྐྱེན་གྱིས་དང་རོའི་རྐྱེན་གྱིས་ཀྱང་ལྕེའི་རྣམ་པར་ཤེས་པ་སྐྱེ་བར་འགྱུར་ཞིང་། དེ་སྐྱེད་པའི་ཡིད་ལ་
བྱེད་པའི་རྐྱེན་ལས་ཀྱང་ལྕེའི་རྣམ་པར་ཤེས་པ་སྐྱེ་བ་ཡིན་ནོ། །རྣམ་པ་དེ་ལྟ་བུ་རྣམས་ཀྱི་མཚན་ཉིད་ལས་སྐྱེས་པའི་ལྕེའི་རྣམ་པར་ཤེས་པ་ལ་དེ་མངོན་པར་ཞེན་པར་མི་བྱེད་དོ། །དེ་ལ་ཀུན་དུ་ཆགས་པར་ཡང་མི་

66-1-83b

བྱེད་དོ། །ཡང་དག་པ་ཇི་ལྟ་བ་བཞིན་དུ་ཡང་ལྕེའི་རྣམ་པར་ཤེས་པ་དེ་ཤེས་སོ། །དེ་གང་གི་ཚེ་ཡང་དག་པར་ཤེས་པ་དེའི་ཚེ་རོ་ལ་དམིགས་པའི་རྣམ་པར་ཤེས་པ་དགའ་བའི་འདོད་ཆགས་དང་ཀུན་དུ་ལྡན་པའི་སྲེད་པས་མི་འཆིང་
ངོ་། །དེ་དེ་ལས་གྲོལ་བས་མཆོག་ཏུ་བདེ་བ་དང་ལྡན་པར་འགྱུར་རོ། །ཇི་ལྟ་ཇི་ལྟར་ཡུལ་རྣམས་ཡང་དག་པ་ཇི་ལྟ་བ་བཞིན་དུ་མངོན་པར་ཤེས་པར་གྱུར་པ་ན་ཡང་། དེ་ལྟ་དེ་ལྟར་དྲི་མའི་རྙོག་མ་རྣམས་དང་རྣམ་པར་བྲལ་བའི་
མཐར་ཕྱིན་པའི་བདེ་བ་རྣམས་འཐོབ་པའོ། །དེ་ལྟར་དགའ་བའི་འདོད་ཆགས་དང་ཀུན་དུ་ལྡན་པའི་སྲེད་པ་རྣམས་ཀྱིས་མི་འཆིང་ངོ་། །ཡང་དག་པ་ཇི་ལྟ་བ་བཞིན་དུ་དེས་ལྕེའི་རོ་རྣམས་ཐམས་ཅད་དང་། གནས་སྐབས་
ཐམས་ཅད་དུ་ཇི་ལྟ་བ་བཞིན་དུ་རྟོགས་ནས། ལུས་ཀྱི་རེག་བྱའི་ཡུལ་རྣམས་ལ་ཀུན་དུ་ལྟ་བར་བྱེད་དེ། དེ་ལ་ལུས་ཀྱི་རྐྱེན་དང་རེག་བྱའི་རྐྱེན་དང་དེ་སྐྱེད་པའི་ཡིད་ལ་བྱེད་པའི་རྐྱེན་ལས་ཀྱང་རེག་བྱའི་རྣམ་པར་ཤེས་པ་
སྐྱེ་བར་འགྱུར་རོ། །གསུམ་པོ་རྣམས་འདུས་པ་ལས་ནི་རེག་བྱའོ། །རེག་བྱ་དང་ལྷན་ཅིག་འགྲོགས་ནས་ཚོར་བ་དང་འདུ་ཤེས་དང་སེམས་པའོ། །དེ་ཡང་དགེ་སྦྱོང་དང་བྲམ་ཟེ་འདི་དག་གིས་ཡང་དག་པ་ཇི་ལྟ་བར་རེག་
བྱ་དེ་ཉིད་ལ་ཀུན་དུ་ལྟ་བར་བྱེད་དེ། རེག་བྱ་འདི་དག་ནི་རྟག་པ་དང་བརྟན་པ་དང་ཐེར་ཟུག་པ་མ་ཡིན་ནོ། །གང་འདི་ལ་བདག་གིས་ཚུལ་བཞིན་མ་ཡིན་པ་ཡིད་ལ་བསྐྱེད་པར་གྱུར་ན། ཚུལ་བཞིན་མ་ཡིན་པར་
ཡིད་ལ་བྱེད་པ་དེས་བདག་ལ་དོན་མ་ཡིན་པ་རྣམས་འབྱུང་བར་འགྱུར་རོ། །བདེ་བར་མི་འགྱུར་ཞིང་ཕན་པར་ཡང་མི་འགྱུར་རོ། །དེ་གང་གི་ཚེ་རེག་བྱ་དེ་ཡང་ཇི་ལྟ་བ་བཞིན་དུ་ཀུན་ནས་རྟོགས་པར་འགྱུར་ཞིང་ཚུལ་བཞིན་དུ་
ཡིད་ལ་བྱེད་པས་སོ་སོར་རྟོག་པར་བྱེད་པ་ན། དེའི་ཚེ་འདི་དགའ་བའི་འདོད་ཆགས་དང་ལྡན་པར་གྱུར་པའི་སྲེད་པས་གནོད་པར་མི་འགྱུར་རོ། །ཡུལ་གྱི་སྟོབས་ཀྱིས་ཀྱང་ཀུན་དུ་སྦྱོར་བར་མི་བྱེད་དོ། །ཐབས་རྣམས་ཐམས་

66-1-84a

ཅད་ཀྱིས་ལུས་ཀྱི་རེག་བྱ་རྣམས་ཇི་ལྟ་བ་བཞིན་དུ་ཀུན་དུ་བརྟགས་པར་གྱུར་ནས་ཡིད་ཀྱིས་ཀྱང་ཆོས་ལ་ཀུན་དུ་ལྟ་བར་བྱེད་དོ། ཇི་ལྟར་ཡིད་ཀྱི་ཆོས་རྣམས་ཡིན་ན། འདི་ན་ཡིད་ཀྱི་རྐྱེན་དང་ཆོས་ཀྱི་རྐྱེན་ལས་ཀྱང་
ཡིད་ཀྱི་རྣམ་པར་ཤེས་པ་དགེ་བ་འམ་མི་དགེ་བ་འམ་ལུང་དུ་མ་བསྟན་པ་ཡང་སྐྱེ་བར་འགྱུར་རོ། །དེ་ལ་གང་གི་ཚེ་མི་དགེ་བ་ལ་དམིགས་པར་གྱུར་པའི་ཡིད་ཀྱི་རྣམ་པར་ཤེས་པ་ཚུལ་བཞིན་མ་ཡིན་པ་འབྱུང་བར་འགྱུར་བ་དེའི་ཚེ། རིག་
པར་འགྱུར་ཏེ་ཇི་ལྟར་བདག་ལས་སྐྱེས་པ་འདི་ནི་མི་དགེ་བའི་ཆོས་ཀྱི་དབང་དུ་བྱས་པའི་ཡིད་ཀྱི་རྣམ་པར་ཤེས་པ་སྐྱེས་པ་ཡིན་ལ། དགའ་བའི་འདོད་ཆགས་དང་ཀུན་དུ་ལྡན་པའི་སྲེད་པ་ཡིད་ལ་བྱུང་བས་ནི་བདག་དོན་མེད་པར་
འགྱུར་རོ། །ཕན་པར་མི་འགྱུར་ཞིང་བདེ་བར་ཡང་མི་འགྱུར་རོ། །གང་དེ་ཁོ་ན་ལྟར་ཆོས་རྣམས་ཀྱི་འབྱུང་བ་དཔྱོད་པར་བྱེད་ཅིང་། དེ་ལྟར་ཆོས་རྣམས་ལ་ཆོས་ཀྱིས་རྗེས་སུ་ལྟ་བས་གནས་པར་གྱུར་པ་ནི། ཆོས་རྣམས་ཐམས་
ཐམས་ཅད་ཀྱི་ཡང་རང་གི་མཚན་ཉིད་དང་སྤྱིའི་མཚན་ཉིད་ལ་ཇི་ལྟ་བ་བཞིན་དུ་རྗེས་སུ་ལྟ་བས་དགའ་བའི་འདོད་ཆགས་དང་ལྷན་ཅིག་མཚུངས་པར་ལྡན་པའི་སྲིད་པ་ཡང་འབྱུང་བ་ཅན་གྱི་སྲེད་པ་རྣམས་ཀྱིས་འཆིང་བར་མི་འགྱུར་
རོ། །དེ་དགའ་བའི་འདོད་ཆགས་ཀྱིས་བྱས་པའི་སྲེད་པ་དེ་དག་རྣམས་ལས་གྲོལ་བས་མཆོག་ཏུ་བདེ་བ་དང་ལྡན་པར་འགྱུར་རོ། །ཆོས་རྣམས་ཀྱི་ཡང་འཕེལ་བ་དང་འགྲིབ་པ་ཤེས་པར་འགྱུར་རོ། །དེ་ལྟར་གང་གི་ཚེ་ཇི་ལྟ་བ་བཞིན་དུ་
ཡུལ་རྣམས་ཐམས་ཅད་ལ་ཡང་སོ་སོར་རྟོག་པར་བྱེད་པ་དེའི་ཚེ་འདི་ལ་ཡང་དག་པའི་ཤེས་པ་སྐྱེ་བར་འགྱུར་རོ། །དེའི་ཡང་དག་པའི་ཤེས་པ་དེས་ཉོན་མོངས་པ་རྣམས་ཟད་པར་བྱེད་དོ། །དེ་ཉོན་མོངས་པ་ཟད་པས་ཀྱང་ཟག་པ་མེད་
པའི་ཡེ་ཤེས་སྐྱེ་བར་འགྱུར་རོ། །དེ་དེ་དང་ཡང་དག་པར་ལྡན་པས་གོ་འཕང་གི་མཆོག་འཐོབ་པར་འགྱུར་རོ། །དེ་ལྟར་དགེ་སྦྱོང་ངམ་བྲམ་ཟེ་འམ་གཞན་ཡང་དེའི་རིགས་ཅན་རྣམས་ཀྱིས་རྟག་པ་ཉིད་དུ་ཡུལ་རྣམས་ལ་ཡིད་

66-1-84b

ཆེས་པར་མི་བྱའོ། །དགྲ་ལྟ་བུར་གྱུར་པ་ཡིན་པ་གང་གི་ཕྱིར་ཡུལ་རྣམས་ནི་བཏང་སྙོམས་སུ་གཞག་པར་བྱ་སྟེ། སྲོག་ཆགས་རྣམས་ཐམས་ཅད་ཐུལ་འོག་དུ་འཇུག་པར་བྱེད་པ་ཡིན་ནོ། །དེའི་ཕྱིར་ཇི་སྲིད་དུ་ཟག་པ་མེད་པའི་ཡེ་ཤེས་སྐྱེས་པར་མ་གྱུར་པ་དེ་
སྲིད་དུ་ཡུལ་རྣམས་ལ་ནམ་ཡང་འགའ་ཞིག་ལ་ཡང་ཡིད་ཆེས་པར་མི་བྱའོ། །རྐོ་ཏྲོག་ཅན་དེ་དག་ནི་གྲོགས་པོའི་གཟུགས་སུ་འཆོས་པའི་དགྲ་རྣམས་ཡིན་ཞིང་། འཁོར་བའི་འཆིང་བ་རྣམས་ཐམས་ཅད་ཀྱང་དེ་དག་རྣམས་ཡིན་ནོ། །དེ་ནས་དེའི་དུས་
དེར་རྨ་བྱའི་མངའ་བདག་དེས་ཚིགས་སུ་བཅད་པ་བརྗོད་པ་ཇི་ལྟར། ཡུལ་གྱི་དེ་ཉིད་མཐོང་བ་ཡིས། །ཡེ་ཤེས་ལྕགས་ཀྱུས་འཛིན་པར་བྱེད། །དེས་མ་བཟུང་བས་མི་བཟད་གཡོ། །དོན་མིན་ཐམས་ཅད་བྱེད་པར་འདོད། །ཡུལ་གྱི་བསམ་པ་
རྨོངས་པ་རྣམས། །ཀུན་དུ་རྟོག་པ་སྙིང་ལ་སེམས། །འཚོ་བའི་བསམ་པ་ཀུན་སྡོམ་པའི། །འཆི་བདག་ཞགས་པ་འདིར་འོང་འགྱུར། །ཡང་མོའི་སེམས་ཀྱི་སྲོག་ཆགས་རྣམས། །ཡུལ་རྣམས་ཀྱིས་ནི་ཡོངས་སུ་དྲངས། །གཏི་མུག་
གིས་ནི་ཡོངས་བསླུས་པས། །ཀུན་རྨོངས་ཀྱིས་ཀྱང་ཤེས་པ་མིན། །གཡོ་བས་ཡུལ་རྣམས་ཐམས་ཅད་ནི། །དྲི་ཟའི་གྲོང་ཁྱེར་འདྲ་བ་ཡིན། །སྡུག་བསྔལ་ཀུན་དུ་སྤེལ་བྱེད་དེ། །དམྱལ་བ་ཡི་ཡང་རྒྱུ་རྣམས་ཡིན། །འདོད་པས་
རྣམ་རྨོངས་བྱིས་པ་རྣམས། །ཡུལ་རྣམས་མེ་ཡིས་སྲེག་པར་བྱེད། །སྲེག་བཞིན་དུ་ཡང་མི་གོ་བར། །དེ་ཉིད་ལ་ནི་ཡོངས་སུ་འཇུག །ཀུན་རྟོག་ལས་ནི་འདོད་ཆགས་སྐྱེ། །ཆགས་ལས་ཁོང་ཁྲོ་རབ་ཏུ་འཇུག །ཁྲོ་བས་
གཟིར་བའི་སྐྱེས་བུ་ནི། །དམྱལ་བའི་རྗེས་སུ་རྒྱུག་པར་འགྱུར། །དེ་ཕྱིར་འདོད་པ་ཡོངས་སུ་སྤོངས། །མཁས་པས་ཁྲོ་བ་ཞི་བར་གྱིས། །གཏི་མུག་མྱུར་དུ་ཡོངས་སྤངས་ནས། །མྱ་ངན་འདས་པ་མངོན་དུ་འགྱུར། །དགྲ་བོ་བཞིན་
དུ་ཡུལ་ཤེས་བྱ། །གྲོགས་པོ་དང་འདྲ་མྱ་ངན་འདས། །མྱང་འདས་ཡུལ་ཅན་བརྟན་པ་ནི། །མྱ་ངན་འདས་པ་རྟོགས་པར་འགྱུར། །དེ་ལྟར་རྨ་བྱ་རྣམས་ཀྱི་བདག་པོ་དེས་ལྷ་དེ་དག་རྣམས་ལ་གཙུག་ལག་གི་མདོ་དེ་དག་སྟོན་པར་

66-1-85a

བྱེད་དོ། །ཆོས་གཞན་ཡང་ལེགས་པར་བསྲུང་བར་བྱ་བ་གཅེས་པ་ཡོད་དོ། །འདི་ཡང་གང་ཞེ་ན། འདི་ལྟ་སྟེ། སེམས་ལ་ཡིད་ཆེས་པར་མི་བྱའོ། །འདི་ན་དགེ་སྦྱོང་ངམ་བྲམ་ཟེ་འམ་གཞན་ཡང་དེའི་རིགས་ཅན་རྣམས་ཀྱིས་
ཀྱང་ཇི་སྲིད་འཚོའི་བར་དུ་དེ་ལྟར་སེམས་ལ་ཡིད་ཆེས་པས་བགྲོད་པར་མི་བྱའོ། །དེ་དག་ཀྱང་གང་གི་ཕྱིར་ཀུན་དུ་གཡོ་བར་གྱུར་པ་བཟློག་ཏུ་མེད་པའི་རང་བཞིན་གྱ་གྱུས་རྣམ་པར་གནས་པ་མེད་པ་ཡུལ་རྣམས་ལ་བརྐམ་པར་གྱུར་པ་
ཡོངས་སུ་སྐྱེས་པར་བྱེད་པ་འདིས་ཀྱང་བྱིས་པ་སོ་སོའི་སྐྱེ་བོ་རྣམས་ཐམས་ཅད་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་འགྲོ་བ་ལ་རྣམ་པ་དུ་མར་ཡོངས་སུ་འཁྱམ་པར་བྱེད་དོ། །ནམ་ཞིག་ཀྱང་འདི་དག་དང་ཡོངས་སུ་འདྲིས་
པར་འབྱུང་བར་མི་འགྱུར་ཏེ། ཡུལ་འགྱུར་ཟློག་ཅན་འདི་དག་རྣམས་ཀྱིས་ཀུན་དུ་རྨོངས་པར་གྱུར་པས། བྱིས་པ་སོ་སོའི་སྐྱེ་བོ་རྣམས་ཐམས་ཅད་ཀྱང་དམྱལ་བ་དང་ཡི་དགས་དང་དུད་འགྲོ་རྣམས་སུ་ལན་ཅིག་དང་ཕོགས་
ཅིག་མ་ཡིན་པར་ཡོངས་སུ་འཁོར་བར་བྱེད་དོ། །དེ་ལྟ་ན་ཡང་སྐྱོ་བ་སྐྱེ་བར་ཡང་མི་འགྱུར་རོ། །དེ་ལྟར་དེ་དག་ནི་ཐམས་ཅད་འཇིག་པར་བྱེད་པའི་དྲག་ཅིང་རྩུབ་པར་གྱུར་པའི་སྡུག་བསྔལ་ཅན་ནི་འཁོར་བ་ཡིན་ནོ། །དེའི་ཕྱིར་
ཤིན་དུ་མི་བཟད་ཅིང་མཆོག་ཏུ་དྲག་པར་གྱུར་པའི་སེམས་འདི་ལ་ཇི་སྲིད་དང་ཇི་སྲིད་དུ་འཕགས་པའི་རྒྱས་མ་བཏབ་པ་དེ་སྲིད་དུ་ཡིད་ཆེས་པར་མི་བྱའོ། །ཇི་སྲིད་དུ་རྒྱུན་དུ་ཞུགས་པའི་འབྲས་བུ་ཐོབ་པར་མ་གྱུར་གྱི་བར་དུ་སྟེ། 
ཕྱི་ནས་ནི་ངན་སོང་གི་སྒོ་བཅད་པར་འགྱུར་རོ། །གཞན་དུ་ན་ནི་འགྲོ་བ་རྣམས་ཐམས་ཅད་དུ་རྒྱུ་བ་དང་སྡུག་བསྔལ་རྣམས་ཐམས་ཅད་དང་བཅས་པར་འགྱུར་རོ། །འཆིང་བ་རྣམས་ཐམས་ཅད་ཀྱིས་བཅིངས་པར་གྱུར་པ་
རྗེས་སུ་འབྲེལ་པ་རྣམས་ཐམས་ཅད་དང་ཀུན་ནས་ལྡན་པ་མཆོག་ཏུ་བསྒྲུབ་པར་དཀའ་བ་མཆོག་ཏུ་གདུལ་བར་དཀའ་བར་གྱུར་པ་ཡིན་ནོ། །དེའི་ཕྱིར་ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་ངམ་བྲམ་ཟེ་འམ་

66-1-85b

གཞན་ཡང་དེའི་རིགས་ཅན་རྣམས་ཀྱིས་ཀྱང་རུང་སྟེ། བརྒྱ་ལ་ནམ་ཞིག་ཀྱང་ཡིད་ཆེས་པར་མི་བྱའོ། །དེ་ནས་དེའི་ཚེ་རྨ་བྱ་རྣམས་ཀྱི་མངའ་བདག་དེས་ཚིགས་སུ་བཅད་པའི་དབྱངས་ཀྱིས་བསྙད་པ་ཇི་ལྟར། རྒལ་
དཀའ་མྱུར་དུ་དྲི་བྲལ་དང་། །སེམས་ཅན་ཀུན་ལ་འགྱུར་བ་ཆེ། །སེམས་ནི་སྐྱེ་དགུ་ཐམས་ཅད་ལ། །རྒྱལ་པོ་བཞིན་དུ་རབ་ཏུ་འཇུག །མཐོང་བ་མེད་དང་འཇིགས་བཅས་པའི། །ལས་ཀྱིས་དམྱལ་
བ་གཡོ་བ་འདི། །གང་གི་སེམས་འཛིན་དེ་ཤེས་རབ། །དེ་ནི་འགྲོ་བའི་མཆོག་ཏུ་འགྲོ། །དེ་བཞིན་བདེ་བའི་གནས་སུ་གཞོལ། །དེས་ནི་ངན་འགྲོ་དག་ཏུ་འབབ། །དེ་ཉིད་བཏུལ་བས་དྲི་མེད་པའི། །མྱ་
ངན་འདས་པ་རྟོགས་པར་འགྱུར། །བདེ་དང་སྡུག་བསྔལ་བྱེད་པ་སེམས། །དེ་བཏུལ་བ་ལས་བདེ་བ་འབབ། །ལས་རྣམས་རྣམ་པ་སྣ་ཚོགས་པ། །སེམས་ཀྱི་འཕེན་པའི་རྗེས་སུ་འཇུག །དེ་ཕྱིར་
སེམས་ནི་རྟག་ཏུ་སྲུངས། །དེ་བརྟུལ་བས་ཀྱང་བདེ་བ་འབྱུང་། །གང་གི་ཡིད་ནི་རབ་ཞི་བ། །དབང་པོ་སྤྱོད་ཡུལ་ལས་རབ་ཞི། །སྐྱེ་དང་མྱ་ངན་བྲལ་བའི་དེ། །གོ་འཕང་ནད་མེད་དག་ཏུ་སོང་། །དེ་ལྟར་
རྨ་བྱ་རྣམས་ཀྱི་མངའ་བདག་དེས་འཐབ་བྲལ་གྱི་ལྷ་དེ་དག་རྣམས་དང་། དགའ་ལྡན་པ་རྣམས་ལ་བཅོམ་ལྡན་འདས་འཁོར་བ་འཇིག་གིས་གསུངས་པའི་གཙུག་ལག་གི་མདོ་དེ་བཤད་དོ། །དེ་ནས་ལྷ་དེ་དག་ཉིད་ཐམས་ཅད་ཀྱིས་
ཀྱང་དེ་ཡོངས་སུ་བསྐོར་ནས་ཀུན་དུ་གནས་ནས་ཆེས་རབ་ཏུ་རངས་པར་གྱུར་པའི་ཡིད་ཀྱིས་དེ་ལ་འདི་སྐད་ཅེས་བརྗོད་དོ། །ལེགས་སོ་ལེགས་སོ་སྐལ་བ་ཆེན་པོ་ཆོས་འདི་ནི་མཛེས་པ་ལགས་སོ། །ཐོག་མ་དང་བར་དང་ཐ་མར་
མཛེས་པར་གྱུར་པ་མྱ་ངན་ལས་འདས་པའི་མཐར་ཐུག་པར་གྱུར་པ་ཁྱོད་ཉིད་ཀྱིས་བདག་ཅག་ལ་བཤད་དོ། །དེ་ནས་ལྷ་དེ་དག་རྣམས་ལ་སླར་ཡང་རྨ་བྱའི་རྒྱལ་པོ་དེས་བརྗོད་པ་ཇི་ལྟར། གང་བདག་ཉིད་ཀྱིས་ལྷག་པའི་

66-1-86a

ཆོས་ཉི་ཤུའི་ཆོས་ཀྱི་རྣམ་གྲངས་བཅོམ་ལྡན་འདས་ཀྱི་སྤྱན་སྔ་ནས་ཐོས་པ་དེ་དག་བདག་གིས་ཁྱེད་ལ་བསྟན་པ་ཡིན་ཏེ། དོན་དང་ལྡན་པ་དང་ཕན་པའི་དོན་དུ་དང་བདེ་བའི་དོན་དུ་དང་མྱ་ངན་ལས་འདས་པའི་མཐར་
ཐུག་པར་འགྱུར་བར་བདག་གིས་མཆོག་ཏུ་ཕན་པར་འགྱུར་བའི་ཆོས་འདུལ་བ་འདི་ཁྱེད་རྣམས་ལ་བསྟན་པ་ཡིན་ནོ། །དེ་ནས་ལྷ་དེ་དག་རྣམས་ཐམས་ཅད་ཀྱིས་ཀྱང་བཤད་པ་དེ་ལ་མངོན་པར་བསྟོད་ནས། རྨ་བྱའི་རྒྱལ་པོ་དེ་མཆོད་
ཅིང་མངོན་པར་ཕྱག་འཚལ་བར་གྱུར་ནས་ཡང་། གང་དག་འཐབ་བྲལ་བ་དེ་དག་རྣམས་ནི་ནགས་དང་ཉེ་བའི་ནགས་དང་རྫིང་བུ་དང་པད་མའི་རྫིང་བུ་རྣམས་སུ་རྩེད་མོའི་དོན་དུ་རབ་ཏུ་ཞུགས་པར་གྱུར་ཏོ། །དགའ་ལྡན་གྱི་ལྷ་གང་ཡིན་
པ་དེ་དག་རྣམས་ཀྱང་ནམ་མཁའི་དབྱིངས་ནས་གང་ན་དགའ་ལྡན་གྱི་ལྷ་རྣམས་ཡོད་པ་དེར་དེ་དག་རྣམས་ཕྱིར་སོང་ངོ་། །ཆོས་ཀྱི་རྣམ་གྲངས་ཉི་ཤུ་རྩ་གཉིས་པར་གྱུར་པ་རྫོགས་སོ།། །།
དེ་ནས་འཐབ་བྲལ་གྱི་ལྷ་དེ་དག་རྣམས་ནགས་དང་ཉེ་བའི་ནགས་དེ་དག་ལ་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་ངེས་པར་མྱོང་བར་འགྱུར་བའི་ལས་རྣམས་ཟད་པར་མ་གྱུར་གྱི་བར་དེ་སྲིད་དུ་དགའ་བར་བྱེད་རྩེ་བར་བྱེད་དོ། །དེ་ནས་རང་
གིས་བྱས་པའི་ལས་ལ་ལོངས་སྤྱོད་པས་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །ཡང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་སུ་སྐྱེས་པར་གྱུར་ན། དེ་རྟག་ཏུ་ཆོས་ལ་
གནས་པར་འགྱུར་ཞིང་ཆེན་པོའི་རིགས་དང་མདངས་དང་དབང་ཕྱུག་གི་ཡོན་ཏན་རྣམས་ཕུན་སུམ་ཚོགས་པར་གྱུར་པའི་ཡུལ་བཟང་པོ་རྣམས་སུ་རྒྱལ་པོ་འམ་རྒྱལ་པོའི་བློན་པོར་ཡང་ལེགས་པར་བྱས་པའི་ལས་དེའི་རྒྱུ་མཐུན་པས་འགྱུར་
རོ། །གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་འཐབ་བྲལ་བའི་ལྷ་རྣམས་ཀྱི་ས་ལ་ཀུན་དུ་ལྟ་བར་བྱེད་དོ། །དེས་ཐོས་པ་ལས་བྱུང་བའི་ཤེས་པས་སམ་ལྷའི་མིག་གིས་ཇི་ལྟར་ཡོད་པའི་འཐབ་

66-1-86b

བྲལ་བ་རྣམས་ཀྱི་ས་མཐོང་བར་གྱུར་པ་ནི་ར་ཛ་ནི་ན་རྒྱུ་བ་ཞེས་བྱ་བའོ། །ས་དེ་ལ་ལས་གང་དག་གིས་སེམས་ཅན་རྣམས་སྐྱེ་བར་འགྱུར་བ་ཡང་དེས་མཐོང་བ་ནི། སེམས་ཅན་ཆེན་པོ་སྐྱེས་བུ་དམ་པ་དགེ་ལེགས་སུ་སྤྱོད་པ་དྲང་
པོ་དྲང་པོའི་རིགས་ཅན་གང་དག་གིས་རྟག་ཏུ་ཡང་ཚུལ་ཁྲིམས་དང་ལྡན་པར་གྱུར་པས་སྲོག་གཅོད་པ་དང་མ་བྱིན་པར་ལེན་པ་ཡོངས་སུ་སྤངས་པར་གྱུར་པ་ནི་སྔ་མ་བཞིན་ཏེ། འདོད་པ་ལ་ལོག་པར་གཡེམ་པ་ཡང་ཡོངས་སུ་སྤངས་
པར་གྱུར་པ་ནི་བུད་མེད་ཀྱི་ཡུལ་རྣམས་ལ་བརྩིག་པ་ལས་གྱུར་པ་ཡང་རུང་སྟེ། རྣམ་པ་ཐམས་ཅད་དུ་བག་ཙམ་ཅིག་ཀྱང་ཚུལ་བཞིན་མ་ཡིན་པའི་ཡིད་ལ་བྱེད་པར་གྱུར་པ་འདོད་ཆགས་དང་ལྷན་ཅིག་འགྲོགས་པས་ཀུན་ཏུ་ལྟ་བར་མི་
བྱེད་དོ། །གཞན་དག་བྱེད་པར་གྱུར་པ་རྣམས་ཀྱང་རབ་ཏུ་འགོག་པར་བྱེད་དོ། །ཚུལ་ཁྲིམས་ལ་རབ་ཏུ་འགོད་པར་བྱེད་དོ། །ཆོས་རྣམས་ཀྱང་ལན་གཅིག་དང་ལན་གཅིག་མ་ཡིན་པར་སྟོན་པར་བྱེད་དོ། །དེ་དག་ལ་ཡང་རབ་ཏུ་
འགོད་པར་བྱེད་དོ། །སེམས་ཅན་རྣམས་ཐམས་ཅད་ལ་ཡང་འདོད་པ་ལ་ལོག་པར་གཡེམ་པའི་སྐྱོན་རྗོད་པར་བྱེད་དོ། །ལས་ཀྱི་འབྲས་བུ་རྣམ་པར་སྨིན་པ་སྟོན་པར་བྱེད་དོ། །ཇི་ལྟར་གང་འགའ་ཞིག་འདོད་པ་ལ་ལོག་པར་
གཡེམ་པར་གྱུར་པའི་སེམས་ཅན་དམན་པ་དེ་དག་ནི་ལུས་ཞིག་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །དེའི་ཕྱིར་ན་དམྱལ་བའི་ལས་ཀྱི་རྣམ་པར་སྨིན་པ་མཆོག་ཏུ་རྩུབ་པ་ཤིན་དུ་སྡུག་བསྔལ་བ་རྣམས་
ཡིད་ལ་གྱིས་ལ། འདོད་པ་ལོག་པར་གཡེམ་པར་མ་བྱེད་ཅིག་ཕྱི་ནས་འགྱོད་པར་མ་བྱེད་ཅིག །སྡུག་བསྔལ་རྣམས་ཀྱང་ནི་དྲག་པ་དང་རྩུབ་པ་དང་ཚ་བར་གྱུར་པ་ཡིན་ནོ་ཞེས་དེ་ལྟར་འདོད་པ་ལ་ལོག་པར་གཡེམ་པའི་རྣམ་པར་
སྨིན་པ་རྣམས་གཞན་དག་ལ་ཡང་སྟོན་པར་བྱེད་དོ། །དེ་དག་ལ་ཡང་སོ་སོར་ཀུན་དུ་འཇུག་པར་བྱེད་དེ། ངན་འགྲོ་རྣམས་སུ་འགྲོ་བར་འགྱུར་བའི་འཇིགས་པ་རྣམས་ཀྱིས་སྐྲག་པར་བྱེད་དོ། །དགེ་ལེགས་སུ་གྱུར་པའི་

66-1-87a

སེམས་ཅན་དེ་རང་དང་གཞན་ལ་ཕན་པ་ལ་རབ་ཏུ་ཞུགས་པ། ཚུལ་ཁྲིམས་དང་ལྡན་པ་ཚུལ་ཁྲིམས་ལ་རབ་ཏུ་གནས་པ་ཚུལ་ཁྲིམས་དེ་ཉིད་ལ་ཀུན་དུ་བརྟེན་ནས་ཇི་སྲིད་འཚོའི་བར་དུ་མ་ཉམས་པ་དང་རྒྱུན་མ་ཆད་
པ་དང་མ་རྡོལ་བར་འཛིན་པར་བྱེད་པ་དེ་ནི་ལུས་ཞིག་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་ནང་གི་བར་རཱ་ཛ་ནི་ན་རྒྱུ་བའི་སར་སྐྱེ་བར་འགྱུར་རོ། །དེར་ཉེ་བར་སྐྱེས་པ་ན་ཡང་འདིའི་བདེ་
བ་མཉམ་པ་མེད་པ་རྣམས་ཕུན་སུམ་ཚོགས་ཤིང་མཚུངས་པ་མེད་པའི་ལོངས་སྤྱོད་རྣམས་དང་ཡང་དག་པར་ལྡན་པ་ལ་བདེ་བ་འདི་དག་རྣམས་ཡིན་ཏེ། ར་ཛ་ནི་ན་ཞེས་བྱ་བའི་རྫིང་བུ་དཔག་ཚད་ལྔ་བརྒྱ་པར་གྱུར་པ། བསིལ་བའི་
ཆུ་རབ་ཏུ་དང་བ་ལྟེམ་པར་གྱུར་པའི་ཆུའི་འོད་ཀྱིས་ཡུལ་འགའ་ཞིག་དུ་ཡང་གསལ་བར་བྱས་པ། ཉེ་འཁོར་དག་ན་ཡང་གསེར་དང་བཻ་དཱུརྱའི་རང་བཞིན་ལ་གསེར་བཙོ་མའི་འདབ་མ་དང་ཨིན་དྲ་ནཱི་ལའི་རང་བཞིན་གྱི་ཡལ་གས་
ཡོངས་སུ་གང་བའི་ཤིང་ལྗོན་པ་རྣམས་ཀྱིས་ཉེ་འཁོར་ཡོངས་སུ་གང་བ། དཔག་ཚད་ལྔ་བརྒྱར་གྱུར་པའི་རྫིང་བུ་པད་མ་རྣམས་ཀྱིས་ཡང་ཉེ་འཁོར་ཀུན་ཏུ་གང་བ་རྣམས་ལ་བཻ་དཱུརྱའི་ཡུ་བ་ཅན་རྣམས་ལ་ནི་གསེར་གྱི་འདབ་མ་
རྣམས་སོ། །གསེར་གྱི་ཡུ་བ་ཅན་རྣམས་ལ་ནི་བཻ་དཱུརྱའི་ཟེ་བ་རྣམས་སོ། །པད་མ་གཞན་འགའ་ཞིག་ནི་རིན་པོ་ཆེ་བདུན་གྱི་རང་བཞིན་ཡིན་ཏེ། རྣམ་པ་སྣ་ཚོགས་ཤིང་རྣམ་པར་བཀྲ་བའི་པད་མ་རྣམས་ཀྱིས་ཀྱང་ཐམས་
ཅད་ནས་ཡོངས་སུ་ཁྱབ་པར་གྱུར་པའོ། །རྫིང་བུ་དེའི་ཉེ་འཁོར་རྣམས་ནས་ཡང་བྱ་ཁ་དོག་རྣམ་པ་སྣ་ཚོགས་པ་དང་ལྡན་པར་གྱུར་པ། རིན་པོ་ཆེ་བདུན་དང་ཆ་འདྲ་བའི་ཁ་དོག་གི་ལུས་ཅན་གྱི་བྱ་རྣམས་ཀྱིས་ཀུན་ནས་ཉེ་བར་
མཛེས་པ་མཆོག་ཏུ་སྙན་པར་འགྱུར་བའི་དབྱངས་ཀྱིས་ཀུན་དུ་གང་བ་ཡིན་ཏེ། ར་ཛ་ནི་ནའི་རྫིང་བུ་དེ་ཡང་ལྷ་བརྒྱ་སྟོང་གིས་ཡོངས་སུ་བསྐོར་བར་གྱུར་པ་ཡིན་ཏེ། འདི་གང་ཡིན་པ་ལ་ལྷ་ཉིད་བརྒྱ་ཕྲག་དུ་མ་རྣམས་ཀྱིས་

66-1-87b

ཀྱང་ཡོངས་སུ་མ་བསྐོར་བའི་ལྷ་རྣམས་ནི་མེད་དོ། །ལྷ་མོ་དེ་དག་རྣམས་དང་ལྷ་དེ་དག་རྣམས་ཀྱང་ལྷན་ཅིག་ཏུ་རྔ་སྐད་ཡན་ལག་ལྔ་དང་ལེགས་པར་ལྡན་པས་རྫིང་བུ་དེ་ན་དགའ་མགུར་སྤྱོད་ཅིང་རྩེ་བར་བྱེད་པས་རང་གི་ལས་ཀྱི་
འབྲས་དུ་རྣམས་ཟ་བར་བྱེད་དོ། །གཞན་ཡང་རྫིང་བུ་དེ་ཉིད་ཀྱི་འགྲམ་ན་ཡོངས་སུ་བསྐོར་བའི་ཉེ་འཁོར་རྣམས་ན་མཆོག་ཏུ་དགའ་བར་གྱུར་པའི་རིན་པོ་ཆེ་བདུན་གྱི་རང་བཞིན་གྱི་ལྗོན་ཤིང་རྣམས་ཀྱིས་ཡོངས་སུ་བསྐོར་ནས་ཡིད་
དགའ་བ་ཞེས་བྱ་བའི་ནགས་ཀུན་དུ་གནས་སོ། །དེ་ན་ཡང་དགའ་བར་གྱུར་པའི་བྱའི་ཚོགས་རྣམས་ཀྱིས་མངོན་པར་དགའ་བར་གྱུར་པའི་འབབ་ཆུ་བརྒྱ་སྟོང་ཕྲག་དུ་མས་ཀུན་དུ་བརྒྱན་པ། རིན་པོ་ཆེའི་ཁམས་རྣམས་
ཀྱིས་རྣམ་པར་བརྒྱན་པར་གཞན་དག་ལྷན་ཅིག་སྤྱོད་པ་རྣམས་ཀྱིས་ཡོངས་སུ་བསྐོར་ནས་དཔེ་མེད་པའི་ལྷ་རྫས་ཀྱི་དབང་པོ་ལྔ་མངོན་པར་དགའ་བའི་ཡུལ་རྣམས་དང་ཡང་དག་པར་ལྡན་པས་ཡིད་དགའ་བའི་ནགས་དེ་ན་ལྷ་རྣམས་
དགའ་བར་བྱེད་དོ། །ལྷ་དེ་དག་རྣམས་ཀྱང་རཱ་ཛ་ནི་ནའི་རྫིང་བུར་ཡང་རྩེད་མོ་སྣ་ཚོགས་པ་རྣམས་ཀྱིས་ལྷན་ཅིག་ཏུ་རྩེ་བར་བྱེད་དོ། །དེ་ནས་ལྷ་གང་དག་ལེགས་པར་བྱས་པའི་ལས་ཀྱིས་དེར་སྐྱེས་པ་དེ་དག་རྣམས་འདི་
ལྟར་འགྱུར་ཏེ། སྔ་ན་མེད་པའི་གླུའི་སྒྲ་དེ་དག་ཐོས་པའི་དཔེ་མེད་པ་དེ་དག་གིས་དྲངས་པར་གྱུར་པས་ཀླུང་དུ་སྐྱེས་པའི་ཤིང་རིན་པོ་ཆེ་བདུན་གྱི་རང་བཞིན་གྱི་ལྗོན་ཤིང་རྣམས་ཀྱི་ནགས་དེ་དག་གི་ནང་གང་ན་ཡོད་པ་དེར་ལེགས་
པར་ཉེ་བར་འགྲོ་བར་བྱེད་དོ། །དེ་ནས་ལྷ་གཞན་གང་དག་ལྷའི་རིགས་དེ་ནས་འཆི་འཕོས་པར་གྱུར་ནས་ར་ཛ་ནི་ནའི་རྒྱུ་བའི་ས་དེར་སྐྱེས་པར་གྱུར་པའི་ལྷ་གསར་དུ་སྐྱེས་པ་དེ་དག་ལྷ་རྫས་ཀྱི་ཕྲེང་བས་ཀུན་དུ་བརྒྱན་པའི་ལྷའི་
བུ་མོ་གང་ཡིན་པ་དེ་དག་རྣམས་ཀྱིས་མངོན་པར་མཐོང་ཞིང་། རྗེ་དཔོན་དེ་མངོན་པར་མཐོང་བར་གྱུར་ནས་ཀྱང་མངོན་པར་རྒྱུག་གོ། །ལྷའི་རིགས་དེར་ལས་ཀྱི་འབྲས་བུ་རྣམ་པར་སྨིན་པ་འདི་དག་ནི་ཇི་ལྟར་སྲོག་གཅོད་པ་

66-1-88a

དང་མ་བྱིན་པར་ལེན་པ་དང་འདོད་པ་ལོག་པར་གཡེམ་པ་རྣམ་པར་སྤངས་པས་དེ་ལ་སྐྱེ་བར་འགྱུར་བ་ཡིན་ནོ། །འདོད་པ་ལ་ལོག་པར་གཡེམ་པ་རྣམ་པར་སྤངས་པས་དེ་དག་རྣམས་ཀྱི་ལྷ་མོ་ནི་གཞན་ལ་མེ་
འཕོའོ། །མ་སྤངས་པ་དེ་དག་རྣམས་ཀྱི་ནི་ལྷ་མོ་རྣམས་ནི་གཞན་ལ་ཀུན་དུ་ཉེ་བར་འཕོ་བར་འགྱུར་རོ། །རྒྱལ་ཆེན་བཞིའི་རིས་ཀྱི་ལྷ་དང་སུམ་བཅུ་རྩ་གསུམ་པ་རྣམས་ནི་ལྷ་གང་དག་གིས་འདོད་པ་ལ་ལོག་པར་གཡེམ་པ་
ཡོངས་སུ་མ་སྤངས་པར་གྱུར་པ་རྣམས་ནི། དེ་ལས་འཆི་འཕོ་བར་གྱུར་པ་ན་ལྷ་གཞན་དེ་དག་ལྷ་མོ་རྣམས་ཀྱི་ནང་དུ་སྐྱེའོ། །དེ་དག་རྣམས་ཀྱིས་ཀྱང་འོད་ཉམས་པར་གྱུར་པའི་མར་མེ་དང་འདྲ་བའི་ཚེ་འགག་པར་འགྱུར་
བ་སྤངས་ནས་གསར་དུ་སྐྱེས་པའི་ལྷ་དེ་དག་ལ་སྟེན་པར་བྱེད་དོ། །དེ་དང་ལྷན་ཅིག་ཏུ་རྩེ་བར་བྱེད་དགའ་བར་བྱེད་ཡོངས་སུ་སྤྱོད་པར་བྱེད་དོ། །དེ་ནས་འཆི་འཕོ་བར་གྱུར་པའི་ལྷ་གང་ཡིན་པ་འདི་ལ་འཆི་འཕོ་བར་འགྱུར་བས་
བྱས་པའི་ཕྲག་དོག་གིས་དེ་ལ་སྡུག་བསྔལ་སྐྱེ་བར་འགྱུར་རོ། །འདི་ནི་དམྱལ་བའི་ཡང་སྡུག་བསྔལ་ཆེན་པོ་ཡིན་ཏེ། སེམས་ཀྱི་སྐྱོན་ཕུལ་དུ་ཕྱིན་པ་དེས་དམྱལ་བར་སྐྱེ་བར་འགྱུར་རོ། །ལྷ་དེ་འཆི་འཕོ་བ་དེའི་འབྲས་
བུ་རྣམ་པར་སྨིན་པ་འདི་ནི་འཐབ་བྲལ་བའི་ལྷ་རྣམས་ལ་མེད་པ་ཡིན་ཏེ། དེ་དག་ནི་ཕལ་ཆེར་འདོད་པ་ལ་ལོག་པར་གཡེམ་པ་རྣམས་མ་སྤངས་པ་རྣམས་དེ་དག་ཏུ་སྐྱེ་བར་འགྱུར་རོ། །རྒྱུ་མཚན་དེས་ན་ལྷ་གསར་དུ་སྐྱེས་པ་དེ་སྔུན་གྱི་
ལྷ་མེད་པར་ལྷ་མོ་དེ་དག་རྣམས་ཀྱིས་ལྷ་གསར་དུ་སྐྱེས་པ་དེ་ལ་ཉེ་བར་སྙེན་པར་བྱེད་དོ། །ཉེ་བར་འདྲེས་ནས་ཀྱང་ཀུན་ནས་དེ་ཡོངས་སུ་བསྐོར་ཅིང་གང་ན་ནགས་ཆེན་པོ་ཡོད་པ་དེར་ཉེ་བར་འགྲོ་བར་བྱེད་དོ། །རྒྱགས་པ་ལ་
དོན་གཅིག་པས་བདེ་བར་རྒྱུ་བས་དེ་དག་རྣམས་ཐམས་ཅད་ཀྱང་གང་ན་ལྷའི་ཚོགས་དེ་དག་ཡོད་པ་དེར་ལེགས་པར་ཉེ་བར་འགྲོའོ། །དེ་ནས་ལྷའི་ཚོགས་དེ་དག་རྣམས་ཀྱིས་ལྷ་གསར་དུ་སྐྱེས་པ་དེ་མངོན་པར་མཐོང་ནས་ཆེས་

66-1-88b

རབ་ཏུ་དགའ་བར་གྱུར་པའི་ཡིད་ཀྱིས་ལྷན་ཅིག་སྤྱོད་པའི་འཁོར་རྣམས་དང་བཅས་ནས་རྫིང་བུ་དེ་ཉིད་དུ་ཕྱིན་པར་འགྱུར་ཏོ། །བརྒྱ་ཕྲག་དང་དེ་ནས་སྟོང་ཕྲག་རྣམས་སུ་ཡང་སྟེ་ནགས་དང་ཉེ་བའི་ནགས་རྣམས་དང་ལྡན་པ་
དང་དཔག་བསམ་གྱི་ཤིང་རྣམས་དང་ལྡན་པ་ལ་བྱའི་ཚོགས་རྣམ་པ་དུ་མས་ཡོངས་སུ་གང་བ་རྣམས་དང་པད་མའི་རྫིང་བུ་བརྒྱ་སྟོང་གིས་རབ་ཏུ་བརྒྱན་པ་རྣམས་དང་རྒྱགས་པའི་ཀར་ཎ་ཌ་བ་དང་ངང་ངུར་དག་གིས་ཉེ་བར་མཛེས་
པ་རྣམས་དང་ཡོན་ཏན་དུ་མ་བརྒྱ་སྟོང་འདི་དག་རྣམས་ཀྱིས་བརྒྱན་པས་དགའ་བར་འགྱུར་བའི་རྫིང་ཆེན་པོ་དེར་དེ་དག་རྣམས་དུས་རིང་དུ་སྟེ། རྔ་སྐད་ཡན་ལག་ལྔ་པ་དང་ལྷ་རྫས་ཀྱི་འདོད་པའི་ཡོན་ཏན་ལྔས་དུས་ཤིན་དུ་རིང་
བར་ཡུལ་རྣམས་ལ་རྗེས་སུ་ལོངས་སྤྱད་ནས་སླར་ཡང་ཡུལ་དེ་དག་ཉིད་ཀྱིས་ངོམས་པར་མ་གྱུར་པས་ནགས་དེ་ཉིད་དུ་རྣམ་པར་རྒྱུ་བར་བྱེད་པ་ལས། གང་ན་ཉེ་འཁོར་ཀུན་དུ་སྣང་བར་བྱེད་པ་ཞེས་བྱ་བའི་རི་བོ་ཡོད་པ་དེར་
ལེགས་པར་ཉེ་བར་འགྲོའོ། །བདེ་བར་རྒྱུ་བའི་དོན་གྱིས་གར་བྱེད་པར་གྱུར་པ་དང་རྒོད་པར་གྱུར་པས་པད་མའི་རྫིང་བུ་ནས་པད་མའི་རྫིང་བུ་རྣམས་དང་ནགས་ནས་ནགས་རྣམས་སུ་དང་ཉེ་བའི་ནགས་ནས་ཉེ་བའི་ནགས་
རྣམས་སུ་དང་། འབབ་ཆུ་ནས་འབབ་ཆུ་རྣམས་སུ་དང་། རིའི་མཐོ་ས་ནས་རིའི་མཐོ་ས་རྣམས་སུ་དང་། རིའི་བང་རིམ་ནས་རིའི་བང་རིམ་རྣམས་ལ་དང་། རིའི་གསེབ་ནས་རིའི་གསེབ་རྣམས་སུ་དང་། འཁྲི་ཤིང་
གི་ཚང་ཚིང་ནས་འཁྲི་ཤིང་གི་ཚང་ཚིང་རྣམས་ལ་དང་། མེ་ཏོག་གི་ནགས་ནས་མེ་ཏོག་གི་ནགས་རྣམས་སུ་དང་། འབབ་ཆུ་ནས་འབབ་ཆུ་རྣམས་སུ་དང་། ཆུ་ཀླུང་དང་ཚང་ཚིང་ནས་ཆུ་ཀླུང་དང་ཚང་ཚིང་རྣམས་
སུ་དང་། དཔག་བསམ་གྱི་ཤིང་གི་ནགས་ནས་དཔག་བསམ་གྱི་ཤིང་གི་ནགས་རྣམས་སུ་དང་། འཁྲི་ཤིང་གི་ཁང་པ་ནས་འཁྲི་ཤིང་གི་ཁང་པ་རྣམས་དང་། རིན་པོ་ཆེའི་ཁམས་སྣ་ཚོགས་པ་རྣམས་དང་ལྡན་

66-1-89a

པའི་རིའི་གསེབ་ནས་རིའི་གསེབ་རྣམས་སུ་རྩེད་མོ་རྩེ་བར་གྱུར་པས་ཐམས་ཅད་ཀྱང་རྔ་སྐད་ཡན་ལག་ལྔ་དང་ལྡན་ཞིང་དཔེ་མེད་པར་གྱུར་པའི་འདོད་པའི་ཡོན་ཏན་ལྔ་པོ་རྣམས་ཀྱང་རང་གི་ལས་
ཀྱི་འབྲས་བུ་རྣམས་དང་འདྲ་བར་ཡང་དག་པར་ལྡན་པས་ཐམས་ཅད་ཀྱང་ཉེ་འཁོར་ཀུན་ནས་སྣང་བ་ཞེས་བྱ་བའི་རི་བོ་འདི་གང་ན་ཡོད་པ་དེར་ཉེ་བར་འགྲོ་བར་བྱེད་དོ། །གླུའི་སྒྲ་དེ་དག་ཐོས་ནས་ངོ་མཚར་བ་ཀུན་
དུ་སྐྱེས་པའི་ཡིད་ཀྱིས་ལྷ་དེ་དག་རྣམས་མྱུར་བར་རི་བོ་དེ་གང་ན་ཡོད་པར་འཁོད་དེ། དེ་ཀུན་དུ་ལྟ་བ་ལ་ཆེད་ཆེར་གྱུར་པའི་ཕྱིར་རོ། །དེ་ནས་རིའི་མཆོག་དེ་ལ་འཁོད་པར་གྱུར་པའི་ལྷ་དེ་དག་རྣམས་
གང་ཡིན་པ་རྣམས་ཀྱིས་ཉེ་འཁོར་རྣམས་ལས་ཀུན་དུ་སྣང་བར་བྱེད་པའི་རིའི་མཆོག་དེ་ལ་ལེགས་པར་གནས་ནས་ལྷ་དེ་དག་གིས་མངོན་པར་མཐོང་བར་གྱུར་ཏོ། །མཆོག་ཏུ་དགའ་བར་གྱུར་པས་སླར་ཡང་
བྱ་བཞིན་དུ་ནམ་མཁའི་དཀྱིལ་དུ་འཕགས་ཏེ་རྒྱན་དང་ཆ་བྱད་དུ་མ་རྣམས་དང་རང་གི་འོད་ཀྱིས་འབར་བར་གྱུར་པས་ཕན་ཚུན་དུ་ལྟ་བ་ལ་ཆེད་ཆེར་བྱེད་པར་འགྱུར་ཞིང་འདྲེས་པར་གྱུར་པས་དེ་དག་ཐམས་ཅད་ཀྱང་
རི་བོའི་མཆོག་དེ་ན་དགའ་བར་གྱུར་པའི་ཆུ་ཀླུང་དང་འབབ་ཆུ་དང་རྫིང་བུ་དང་པད་མའི་ཚལ་དང་འཁྲིལ་ཤིང་གི་ཁང་པ་དང་དཔག་བསམ་གྱི་ཤིང་རྣམས་རིན་པོ་ཆེ་བདུན་རབ་ཏུ་འབར་བའི་འོད་དང་ལྡན་པ་དེ་དང་དེ་ན་ལྷ་རྣམས་
ཐམས་ཅད་རཱ་ཛ་ནི་ན་རྒྱུ་བ་ན་དགའ་བར་བྱེད་པ་དང་རྩེ་བར་བྱེད་དེ། ཁ་ཅིག་ནི་པད་མའི་ཚུལ་དུའོ། །ཁ་ཅིག་ནི་ཆུ་ཀླུང་དང་ཚང་ཚིང་དུའོ། །ཁ་ཅིག་ནི་ཨུད་པ་ལའི་ཚུལ་དུའོ། །ཁ་ཅིག་ནི་དཔག་བསམ་གྱི་ཤིང་གི་ནགས་
སུའོ། །ཁ་ཅིག་ནི་རིའི་ཁོང་པ་ནའོ། །ཁ་ཅིག་ནི་ནམ་མཁའི་དཀྱིལ་དུ་ཀུན་ནས་འཕགས་ནས་གང་ན་ལྷ་གཞན་རྣམས་ཡོད་པ་དེར་འགྲོ་བར་བྱེད་དོ། །ཁ་ཅིག་ནི་གླུ་མཁན་དང་བཅས་པས་རྒྱགས་པ་ལ་དོན་གཅིག་པའི་བུད་མེད་

66-1-89b

རྣམས་ཀྱིས་ཡོངས་སུ་བསྐོར་ནས་མྱོས་བྱེད་ཀྱི་བཏུང་བ་ཀུན་དུ་སྟེན་པར་བྱེད་དེ། མྱོས་པའི་སྐྱོན་རྣམས་དང་བྲལ་བར་གྱུར་པ་རབ་ཏུ་དགའ་བའི་ལྷ་རྣམས་ཕྱིར་ཞིང་ཕྱིར་ཞིང་དེ་ཉིད་ཀྱིས་རབ་ཏུ་དགའ་བ་ཀུན་ཏུ་སྐྱེད་པར་བྱེད་པ་
འབའ་ཞིག་ཡིན་ནོ། །ཡོན་ཏན་དེ་ལྟ་བུ་རྣམས་དང་ལྡན་པའི་ཡུལ་གྱིས་རབ་ཏུ་དགའ་བའི་དུ་བ་དང་མེས་སླར་ཡང་ཉིས་འགྱུར་དུ་སྲེག་པར་བྱེད་དོ། །དེ་ནས་དེ་ལྟར་ཀུན་དུ་གནས་པའི་ལྷ་དེ་དག་རྣམས་ལ། དེ་ཁོ་ན་ཉིད་རིག་པ་ཞེས་བྱ་
བའི་བྱས་ཚིགས་སུ་བཅད་པ་འདོན་པར་བྱེད་པ་ལ་ཇི་ལྟར། འབར་བ་ལྔ་ལ་རབ་ཆགས་པའི། །སྲེད་པའི་རླུང་གིས་བདས་པ་ཡི། །བག་མེད་མེ་ཡིས་ལྷ་རྣམས་ནི། །འདོད་པས་རྨོངས་ནས་སྲེག་པར་བྱེད། །སྔ་མའི་ལས་ནི་ཟད་
པར་འགྱུར། །གསར་པ་ཉིད་ཀྱང་ཉེར་མི་སྤེལ། །དེ་ཟད་ནས་ནི་ལྟུང་བར་ཡང་། །ལྷ་རྣམས་ཐམས་ཅད་མཐོང་བ་ཡིན། །འཆི་བའི་དུས་ནི་ཉེར་བྱུང་ན། །སྡུག་བསྔལ་གྱིས་ནི་སེམས་ཉེར་བཅོམ། །གང་ཡང་དགེ་བ་མ་གཏོགས་
པ། །སྐྱབས་གཞན་རྣམས་ནི་ངས་མ་མཐོང་། །བུད་མེད་ཆེད་ཆེར་ལྟ་བ་དང་། །རྙེད་དང་ལོངས་སྤྱོད་ལ་རབ་ཆགས། །རང་གི་སེམས་ཀྱིས་བསླུས་པ་ཡི། །ཐ་མའི་གནས་སུ་མྱུར་འགྲོ་འགྱུར། །གསོན་པ་འཆི་བའི་མཐའ་ཡིན་པ། །
དེ་དག་རྣམས་ཀྱིས་གོ་འམ་ཅི། །འདོད་པ་རྣམས་ནི་རབ་འཇིག་ཅིང་། །རྟག་པ་ལ་ཡང་འཐད་པ་མེད། །ཡུལ་གྱིས་རྣམ་པར་བཤིག་པ་དང་། །རང་ལས་ཀྱིས་ཀྱང་བསླུས་པ་ཡིན། །སྲེད་པས་ཉེ་བར་བཅོམ་པའི་སེམས། །
ལྷ་རྣམས་ཚེ་ནི་འགྲོ་བ་ཡིན། །བརྩིག་པ་ཞིག་པ་ཇི་བཞིན་དུ། །རི་མོའི་ལས་ཀུན་རབ་ཏུ་འཇིག །ལས་རྣམས་ཟད་པས་དེ་བཞིན་དུ། །ལྷ་རྣམས་འཇིག་པར་འགྱུར་བ་ཡིན། །དབང་པོ་རྣམས་ཀྱང་ཡུལ་རྣམས་ཀྱིས། །ངོམས་
པ་ནམ་ཡང་ཡོད་མ་ཡིན། །མར་སར་བླུགས་པར་གྱུར་པ་ཡི། །འབར་བའི་རིམ་པ་ཇི་བཞིན་ནོ། །དེ་ལྟར་བྱ་དེས་ལྷ་དེ་དག་རྣམས་ཀྱི་བག་མེད་པའི་ཡིད་འཇོམས་པ་ཆོས་དང་ལྡན་པས་ཀུན་དུ་རྟོགས་པར་བྱེད་པའི་ཚིགས་སུ་བཅད་པ་

66-1-90a

རྣམས་བྱས་པ་ཡིན་ནོ། །དེ་ནས་ལྷ་དེ་དག་རྣམས་ཀྱིས་དེ་དག་ཐམས་ཅད་རྩིས་བཏབ་མ་བྱས་པར་བག་མེད་པས་རྣམ་པར་རྨོངས་པའི་ཕྱིར། ལྷ་མོ་དེ་དག་ཉིད་ཀྱིས་ཡོངས་སུ་བསྐོར་ནས་རབ་ཏུ་དགའ་བའི་ཡིད་ཀྱིས་སྡེ་
ཚན་དུ་གྱུར་པའི་ཚོགས་རྣམས་ཀྱིས་ནི་ཁ་ཅིག་གོ། །ཁ་ཅིག་ནི་རང་གི་འཁོར་རྣམས་དང་ངོ་། །ཁ་ཅིག་ནི་ནམ་མཁའི་དཀྱིལ་དུ་འཕགས་པར་གྱུར་ནས་རི་དེ་ལ་འཁོད་པར་བྱེད་དོ། །དེ་དག་རྣམས་འཁོད་པར་གྱུར་པ་ནི་ཉི་མ་བརྒྱ་སྟོང་
བས་ཆེས་ལྷག་པར་གྱུར་པའི་གཟི་བརྗིད་ཀྱི་འོད་དང་ལྡན་པའི་རི་དེའི་ཉེ་འཁོར་རྣམས་ན་རིན་པོ་ཆེའི་འོད་ཟེར་གྱིས་ཀུན་ནས་སྣང་བར་བྱས་པའི་རྩེ་མོ་རྣམས་ནི་ཆེས་མཆོག་ཏུ་ཡང་འོད་ཀྱིས་ཀུན་ནས་རབ་ཏུ་གསལ་བར་བྱེད་དོ། །རི་དེ་ལ་
ནགས་དུ་མ་རྣམས་ཡོད་པ་ཡང་རིན་པོ་ཆེ་སྣ་ཚོགས་པའི་རང་བཞིན་གྱི་ཤིང་ལྗོན་པས་ཉེ་བར་མཛེས་པར་གྱུར་པ་དེ་དག་རྣམས་ཀྱིས་ཀྱང་ཤིན་དུ་ཆེས་བླ་ལྷག་པར་ལྷ་དེ་དག་གི་འོད་ཟེར་རྣམས་བཅུ་འགྱུར་དུ་སྐྱེད་པར་བྱེད་དོ། །ཡང་ལྷ་
གཞན་གང་དག་ནགས་རྣམས་དང་པད་མའི་ཚལ་རྣམས་དང་འཁྲིས་ཤིང་གི་ཁང་པ་རྣམས་དང་རིན་པོ་ཆེ་སྣ་ཚོགས་པའི་འོད་ཟེར་གྱིས་གསལ་བར་གྱུར་པ། དེ་དག་རྣམས་ལ་རྩེ་བར་བྱེད་ཅིང་དགའ་མགུར་ཀུན་དུ་སྤྱོད་པར་བྱེད་པ་ན། 
དེས་ཀྱང་འོད་དེ་དག་མཐོང་ནས་མཆོག་ཏུ་ངོ་མཚར་བ་དང་ལྡན་པར་གྱུར་ཏེ། དེ་ན་རི་བོའི་མཆོག་འདི་ཇི་ལྟ་བ་བཞིན་དུ་མཛེས་པར་གྱུར་པའི་ཕྱིར་རོ། །དེ་ནས་ནགས་དང་ཉེ་བའི་ནགས་དེ་དག་རྣམས་ན་རྩེ་བར་བྱེད་པ་གང་ཡིན་པ་དེ་
དག་རྣམས་ཀྱང་འདི་དག་རྣམས་ནས་འོངས་ནས་རཱ་ཛ་ནིའི་རྫིང་ཆེན་པོ་དེའི་རིའི་མཆོག་གི་རི་བོ་དེ་ལ་རྩེ་བར་འདོད་པ་ཡིན་ཏེ། །དེ་དག་ཐམས་ཅད་མཉམ་དུ་འགྲོགས་ནས་ཕན་ཚུན་དུ་གྲོགས་སུ་གྱུར་ཅིང་ཕན་ཚུན་དུ་རྫི་བ་མེད་པར་
སྙིང་ལ་བདེ་བ་རྣམས་ལེགས་པར་སྐྱེས་པས་ཕན་ཚུན་དུ་བདེ་བ་བསྐྱེད་པ་ཉེ་བར་འབྱིན་པས་མཐུན་པར་གྱུར་པས་རིན་པོ་ཆེ་བདུན་གྱི་འོད་ཕྲེང་བས་ཀུན་ཏུ་སྣང་བར་བྱས་པའི་རི་དེ་ལ་དལ་བུ་དལ་བུས་ཀུན་དུ་འཁོད་པར་བྱེད་དེ། 

66-1-90b

རོལ་མོ་སྣ་ཚོགས་པ་རྣམས་དང་གླུ་དང་གར་དང་རྒོད་པ་དང་འགྱིང་བ་དང་རྩེ་བ་དང་བཅས་པར་འགྱུར་ཞིང་། ནད་ཀྱི་འཇིགས་པ་དང་མྱ་ངན་གྱི་འཇིགས་པ་དང་ལྐོག་ཏུ་གྱུར་པའི་སྐྱོན་རྣམས་དང་བྲལ་བ་དང་རང་ཇི་ལྟར་འདོད་པ་བཞིན་
དུ་འགྲོ་བ་དང་རྒྱུ་བར་བྱེད་པ་མཆོག་ཏུ་བདེ་བ་དང་ལྡན་པར་གྱུར་པ་རྣམས་རྔ་སྐད་ཡན་ལག་ལྔ་དང་ལྡན་པས་གར་བྱེད་པར་གྱུར་པས་རི་ཆེན་པོ་དེ་ལ་ཇི་ལྟར་འདོད་པའི་ཁ་ཟས་རྩི་དག་འཐུང་བར་བྱེད་དོ། །བདུད་རྩི་ཡང་མིད་པར་གྱུར་པས་
ནི་མཆོག་ཏུ་དགའ་བ་དང་ལྡན་པ་སྐྱེས་པར་གྱུར་ནས་དགེ་བར་བྱེད་དེ་རང་གི་ལས་དང་འདྲ་བའི་བདེ་བ་རྣམས་དང་ཡང་དག་པར་ལྡན་པར་གྱུར་པས་དེ་དེ་ལྟར་དགའ་བར་གྱུར་ནས་དེ་ཁོ་ན་བཞིན་དུ་བདེ་བ་ལ་ལོངས་སྤྱོད་པར་གྱུར་པ་ལས་དུས་
ནམ་ཞིག་ན་གང་ན་མཐོང་ན་ཀུན་དགའ་བ་ཞེས་བྱ་བའི་པད་མའི་རྫིང་བུ་དེར་ཉེ་བར་འགྲོ་བར་བྱེད་དོ། །པད་མའི་རྫིང་བུ་དེ་ཡང་དཔག་ཚད་བཅུར་ཡངས་པ་དཔག་ཚད་ལྔར་རྒྱ་ཆེ་བར་གྱུར་པ་མཆོག་ཏུ་ཉེ་འཁོར་ཀུན་ནས་དགའ་བ་
རྣམས་ལ་པད་མའི་རྫིང་བུ་འདིའི་དགའ་བ་དེ་ཉིད་ནི་ངང་པ་དང་ཀ་རཎ་ཌ་བ་དང་ངང་ངུར་རྣམས་ཀྱིས་ཉེ་བར་མཛེས་པ་འདིའི་ཉེ་འཁོར་རྣམས་ན་ཡང་གསེར་བཙོ་མའི་མདོག་གི་པད་མས་ཉེ་བར་མཛེས་པར་གྱུར་པ། འདིའི་ཉེ་འཁོར་
རྣམས་ཀུན་ནས་ཡང་དགའ་བར་གྱུར་པའི་གསེར་རྣམས་དང་བཻ་དཱུརྱ་དང་སྔོན་པོ་དང་སྔོན་པོ་ཆེན་པོ་དང་པད་མ་རཱ་གའི་རང་བཞིན་དུ་གྱུར་པའི་སྡུག་པ་དག་གིས་ཉེ་བར་མཛེས་པར་སྤྲས་པས་ཤིན་དུ་ཡང་མཛེས་པར་གྱུར་པ་ཀླུང་དུ་སྐྱེས་པའི་
ཤིང་ལྗོན་པ་རྣམས་ཀྱིས་ཀྱང་ཉེ་འཁོར་ཀུན་ནས་མཛེས་པ་རྫིང་བུ་དེ་ཡོངས་སུ་བསྐོར་ནས་ཀུན་དུ་གནས་པ་ལ་འདི་ལྟ་སྟེ། གསེར་གྱི་རང་བཞིན་ལ་དངུལ་གྱི་འདབ་མ་དང་དངུལ་གྱི་རང་བཞིན་གྱི་ཡལ་ག་རྣམས་ལ་ནི་གསེར་གྱི་འདབ་མ་
འོ། །ཨིན་དྲ་ནཱི་ལའི་ཡལ་ག་རྣམས་ལ་ནི་པད་མ་རཱ་གའི་འདབ་མའོ། །ཤེལ་གྱི་རང་བཞིན་གྱི་ཡལ་ག་རྣམས་ལ་ནི་བཻ་དཱུརྱ་དང་གསེར་དང་ཨིན་དྲ་ནཱི་ལའི་རང་བཞིན་གྱི་འདབ་མ་རྣམས་སོ། །བཻ་དཱུརྱའི་སྡོང་བུ་ཅན་རྣམས་

66-1-91a

ལ་ནི་གསེར་དང་དངུལ་དང་ཨིན་དྲ་ནཱི་ལའི་རང་བཞིན་གྱི་འདབ་མའོ། །སྔོན་པོ་ཆེན་པོའི་རང་བཞིན་གྱི་སྡོང་བུ་རྣམས་ལ་ནི་ཤེལ་དང་ཨིན་དྲ་ནཱི་ལའི་ཡལ་ག་རྣམས་ལ་གསེར་བཙོ་མའི་རང་བཞིན་གྱི་ལོ་མའོ། །
གསེར་གྱི་སྡོང་བུ་དང་སྡོང་བུ་ཕྱེད་བཻ་དཱུརྱ་རྣམས་ལ་ནི། སྔོན་པོ་ཆེན་པོའི་ཡལ་ག་རྣམས་ལའོ། །གསེར་བཙོ་མ་དང་མུ་ས་རིའི་འདབ་མའོ། །ཁ་ཅིག་ནི་ཐམས་ཅད་དུ་གསེར་གྱི་སྡོང་བུ་དང་གསེར་གྱི་འདབ་མ་དང་གསེར་གྱི་
ཡལ་ག་དང་ལྡན་པ་ཉི་མ་བས་ལྷག་པར་གཟི་བརྗིད་ཀུན་དུ་སྣང་བར་བྱེད་དོ། །ཤིང་ལྗོན་པ་གཞན་ཁ་ཅིག་ལ་ནི་བཻ་དཱུརྱའི་ཡལ་ག་དང་བཻ་དཱུརྱའི་འདབ་མ་དང་ལྡན་པ་ཡིན་ཏེ། སྤྲིན་གྱི་ཕུང་པོ་དང་འདྲ་བར་ཐོ་འཁོར་ཀུན་ནས་
རྣམ་པར་མཛེས་པར་བྱེད་དོ། །ཁ་ཅིག་ནི་གསེར་བཙོ་མའི་རང་བཞིན་གྱི་སྡོང་བུ་དང་གསེར་བཙོ་མའི་རང་བཞིན་གྱི་ཡལ་ག་དང་གསེར་བཙོ་མའི་རང་བཞིན་གྱི་འདབ་མ་སྤེལ་བའི་མེའི་ཕུང་པོའི་མདོག་དང་མཚུངས་པར་
ཀུན་ནས་སྣང་བར་བྱེད་དོ། །ཁ་ཅིག་ནི་དངུལ་གྱི་འདབ་མ་དང་དངུལ་གྱི་ཡལ་ག་དང་དངུལ་གྱི་སྡོང་བུ་རྣམས་ཀྱིས་ཟླ་བ་དང་འདྲ་བར་ཀུན་དུ་སྣང་བར་བྱེད་དོ། །ཁ་ཅིག་ནི་ཨིན་དྲ་ནཱི་ལའི་རང་བཞིན་གྱི་སྡོང་བུ་དང་ཨིན་དྲ་ནཱི་
ལའི་རང་བཞིན་གྱི་འདབ་མ་ལ་ཨ་ག་རུ་ནག་པོའི་དུ་བའི་མདོག་ཏུ་ཀུན་ནས་སྣང་བར་བྱེད་དོ། །ལྗོན་ཤིང་གཞན་ཁ་ཅིག་ནི་འཁྲིས་ཤིང་སྣ་ཚོགས་པ་རྣམས་ཀྱིས་ཡོངས་སུ་བསྐོར་བ་ཡིན་ཏེ། གང་དག་གསེར་བཙོ་མའི་
རང་བཞིན་ཡིན་པ་དེ་དག་ནི་སྔོན་པོ་མཆོག་ཏུ་གསལ་བའི་ཁ་དོག་དང་ལྡན་པའི་ཨིན་དྲ་ནཱི་ལའི་རང་བཞིན་གྱི་འཁྲིས་ཤིང་གིས་ཉེ་བར་བཏུད་ནས་ལམ་མེ་སྣང་བར་བྱེད་དོ། །ལྗོན་ཤིང་གཞན་ཁ་ཅིག་ནི་གསེར་དང་དངུལ་གྱི་
རང་བཞིན་དུ་གྱུར་པ་རྣམས་སོ། །ལྗོན་ཤིང་གཞན་ཁ་ཅིག་ནི་མེ་ཏོག་ཕུན་སུམ་ཚོགས་པ་རྣམས་ཀྱི་ཁ་དོག་སྣ་ཚོགས་པའི་མེ་ཏོག་རྣམས་ཀྱིས་ཉེ་བར་མཛེས་པར་གྱུར་པའོ། །ལྗོན་ཤིང་གཞན་ཁ་ཅིག་ནི་མན་

66-1-91b

དཱ་ར་བའི་རང་བཞིན་ནོ། །གཞན་དག་རྣམས་ཁ་ཅིག་ལ་ནི་པད་མ་ཀུ་ཤེ་ཤ་ཡའི་འདབ་མ་ཀུན་དུ་སྣང་བར་གྱུར་ཏོ། །ལྗོན་ཤིང་གཞན་དག་རྣམས་ཁ་ཅིག་ལ་ནི་དྲིལ་བུ་གཡེར་གའི་དྲ་བས་ཀུན་ནས་སྤེལ་བ་རྣམས་
གྱི་སྒྲ་འཁྲོལ་བར་གྱུར་པ་གསེར་དང་དངུལ་གྱི་རང་བཞིན་གྱི་འཁྲེལ་ཤིང་གིས་ཉེ་བར་ཕུབ་པར་གྱུར་པའོ། །ལྗོན་ཤིང་གཞན་དག་རྣམས་ཁ་ཅིག་ལ་ནི་ཤེལ་གྱི་རང་བཞིན་དང་གསེར་དམར་པོའི་རང་བཞིན་གྱི་འཁྲིས་ཤིང་གིས་
ཕུབ་པར་གྱུར་པའོ། །ལྗོན་ཤིང་གཞན་དག་རྣམས་ཁ་ཅིག་ལ་ནི་པད་མ་རཱ་གའི་རང་བཞིན་དང་དངུལ་གྱི་རང་བཞིན་གྱི་འཁྲིས་ཤིང་དག་གིས་ཡོངས་སུ་བསྐོར་ནས་གནས་པའོ། །ལྗོན་ཤིང་གཞན་དག་རྣམས་ཁ་ཅིག་ལ་ཡང་
དྲིལ་བུ་གཡེར་ཁའི་དྲ་བ་བརྒྱངས་པའི་སྒྲ་འཁྲོལ་བའོ། །ལྗོན་ཤིང་གཞན་དག་རྣམས་ཁ་ཅིག་ལ་ནི་ཤིང་ཐོག་རྣམས་སྨིན་པར་འགྱུར་བ་ལ་འདི་ལྟ་སྟེ་ཁུ་བའི་འབྲས་བུ་རྣམས་ལས་ནི་འབྲས་བུ་དེ་དག་རྣམས་ལས་རྣམ་པ་དེ་ལྟ་
བུའི་ཁུ་བ་དག་རབ་ཏུ་འབབ་པར་འགྱུར་བ་གང་ཡིན་པའི་ཁྱད་པར་གྱིས་ལྷ་རྫས་ཀྱི་མྱོས་བྱེད་དེ་དག་རྣམས་ཀྱི་རོ་ཡང་ཅུང་ཟད་ཀྱང་མ་ཡིན་ནོ། །ལྗོན་ཤིང་གཞན་དག་འགའ་ཞིག་ནི་མེ་ཏོག་གི་ཤིང་ཡིན་ཏེ། གང་དག་གི་
དྲི་རྣམས་ཇི་སྲིད་དུ་དཔག་ཚད་བརྒྱར་ཡང་རླུང་གིས་རབ་ཏུ་འདེབས་པར་བྱེད་དོ། །ལྗོན་ཤིང་གཞན་དག་རྣམས་ཁ་ཅིག་ནི་སྒྲའི་ཤིང་ཡིན་ཏེ། གང་དག་རླུང་འཇམ་པོས་རབ་ཏུ་བསྐྱོད་པར་གྱུར་པ་རྣམས་རྣམ་པ་
དེ་ལྟ་བུའི་འདབ་མ་ཀུན་དུ་བསྐྱོད་པ་ལས་སྐྱེས་པའི་མཆོག་ཏུ་སྙན་པར་གྱུར་པ་གླུ་མཁན་གྱི་ལས་ཆེས་ལྷག་པར་གྱུར་པའི་སྒྲར་འགྱུར་རོ། །ལྗོན་ཤིང་གཞན་འགའ་ཞིག་ནི་གཅིག་ཏུ་ལྟ་བ་མངོན་པར་དགའ་བ་ཡིན་
ནོ། །གང་དག་རྣམ་པ་དེ་ལྟ་བུའི་གཟུགས་དག་ཡིན་ཏེ། གང་དག་གི་ཁྱད་པར་གྱིས་ཁ་དོག་སྣ་ཚོགས་པ་རྣམས་ཀྱིས་རྣམ་པར་བཀྲ་བའི་ནགས་ཀྱི་རྒྱལ་པོ་དག་གིས་ཀྱང་བཅུ་དྲུག་ཁོ་ནའི་ཆ་འབའ་ཞིག་ཏུ་ཆོག་པ་ཡང་

66-1-92a

མ་ཡིན་ནོ། །བདུག་པའི་ཤིང་ལྗོན་པ་གཞན་ཁ་ཅིག་ནི་རྣམ་པ་སྣ་ཚོགས་པའི་བདུག་པའི་དྲི་རྣམས་གང་དག་གིས་འཐུལ་བར་བྱེད་པ་སྟེ། མཆོག་ཏུ་དྲི་ཞིམ་པར་གྱུར་པའི་དྲི་གང་གིས་བསྣམས་པ་ན་
ལྷ་རྣམས་ཀྱང་དགའ་བར་བྱེད་པ་ཡིན་ནོ། །རྣམ་པ་དེ་ལྟ་བུའི་ཤིང་ལྗོན་པ་ཡོན་ཏན་མཚུངས་པ་མེད་པ་གཞན་དག་རྣམས་ཀྱིས་ཀྱང་པད་མའི་རྫིང་བུ་མཐོང་ན་ཀུན་དགའ་བ་ཞེས་བྱ་བ་ཡོངས་སུ་ཁྱབ་པར་གྱུར་པ་ཡིན་ནོ། །དེ་
ནས་ལྷ་དེ་དག་རྣམས་ཀྱིས་རྣམ་པ་དེ་སྲིད་མངོན་པར་མཐོང་བར་གྱུར་ཏེ། ངོ་མཚར་བ་རྣམས་མཐོང་ཞིང་མཚུངས་པ་མེད་པར་ཉེ་བར་ལོངས་སྤྱོད་པར་བྱ་བ་རྣམས་མངོན་དུ་ལེགས་པར་མཐོང་ནས། རཱ་ཛ་ནི་ན་རྒྱུ་བའི་
ལྷ་དེ་དག་རྣམས་ཁ་ཅིག་ནི་འབྲས་བུ་རྣམས་ཟ་བ་ཡིན་ནོ། །ཁ་ཅིག་ནི་འབྲས་བུའི་ཁུ་བ་རྣམས་འཐུང་ངོ་། །ཁ་ཅིག་ནི་ལྷན་ཅིག་སྤྱོད་པ་རྣམས་དང་བཅས་ནས་མེ་ཏོག་གི་རྩེད་མོ་བྱེད་དོ། །ཁ་ཅིག་ནི་ནགས་ཀྱི་ནང་
གི་ས་དག་ལ་ཉེ་བར་གནས་ནས་རྣམ་པ་སྣ་ཚོགས་པའི་མྱོས་བྱེད་རྣམས་འཐུང་ཞིང་གླུ་ཡང་ལེན་པར་བྱེད་དོ། །ཁ་ཅིག་ནི་ལྷན་ཅིག་སྤྱོད་པ་རྣམས་དང་བཅས་ནས་གླུ་དབྱངས་དག་ལེན་པར་བྱེད་དོ། །ཁ་ཅིག་ནི་གར་བྱེད་དོ། །
ཁ་ཅིག་ནི་པད་མའི་རྫིང་བུ་ལ་འབོག་པར་བྱེད་དོ། །ཁ་ཅིག་ནི་བདུད་རྩི་མིད་པར་བྱེད་དོ། །ཁ་ཅིག་ནི་ལྷན་ཅིག་སྤྱོད་པ་རྣམས་ཀྱིས་ཡོངས་སུ་བསྐོར་ནས་ནམ་མཁའི་དཀྱིལ་དུ་འཕགས་སོ། །གཞན་དག་ཁ་ཅིག་ནི་
རིན་པོ་ཆེ་བདུན་གྱི་རང་བཞིན་གྱི་ཁང་བུར་ཞུགས་ནས་ལྷའི་བུ་མོའི་ཚོགས་རྣམས་ཀྱིས་ཀུན་ནས་ཡོངས་སུ་བསྐོར་ནས་རྣམ་པ་སྣ་ཚོགས་པའི་འདོད་པའི་ལོངས་སྤྱོད་ལ་རྗེས་སུ་སྤྱོད་པར་བྱེད་དོ། །དེ་ལྟར་ལྷ་དེ་དག་རྣམས་པད་མའི་རྫིང་
བུ་དེ་ན་དགའ་བར་བྱེད་དོ། །འདོད་པའི་ཡོན་ཏན་ལྔ་དང་ཡང་དག་པར་ལྡན་པས་དགའ་བར་བྱེད་པ་དང་རྩེ་བར་བྱེད་ཀྱང་ཡུལ་རྣམས་ཀྱིས་ཉེ་བར་ལོངས་སྤྱོད་པས་ངོམས་པར་ཡང་མི་འགྱུར་རོ། །སྲེད་པ་དང་ལྡན་པ་

66-1-92b

རྣམས་ནི་ངོམས་པར་འགྱུར་བ་ནམ་ཡང་ཡོད་པ་མ་ཡིན་ཏེ། དཔེར་ན་མར་གྱིས་ལེགས་པར་བཏབ་པར་གྱུར་པའི་ཤིང་རྣམས་ཀྱིས་མེ་ལ་ངོམས་པའི་མཐར་ཐུག་པ་མེད་དོ། །དེ་བཞིན་དུ་སྲེད་པ་དང་ལྡན་པའི་མེ་རྣམས་
ཀྱང་ཡུལ་རྣམས་ཀྱིས་ཡིན་ནོ། །དེ་ནས་རྫིང་བུ་དེའི་པད་མའི་ངོས་ཀྱི་དབུས་ཀྱི་པད་མའི་ནགས་མཆོག་ཏུ་དགའ་བ་དང་མཆོག་ཏུ་བདེ་བ་དང་མཆོག་ཏུ་རྒྱ་ཆེ་བར་གྱུར་པ་སྣ་ཚོགས་པའི་བྱའི་ཚོགས་རྣམས་ཀྱིས་ཀུན་དུ་གང་
བར་གྱུར་པ་ན། རང་གི་སྨོན་ལམ་གྱིས་སྐྱེས་པའི་བྱང་ཆུབ་སེམས་དཔའ་དུས་བཟང་ཞེས་བྱ་བའི་ངང་པའི་རྒྱལ་པོ་ངང་པ་བརྒྱ་སྟོང་གིས་ཡོངས་སུ་བསྐོར་བར་གྱུར་པ་ནི། ཇི་ལྟར་འཛམ་བུའི་གླིང་གི་གཟའ་དང་སྐར་མ་
རྣམས་ཀྱིས་ཟླ་བ་ལ་བཞིན་ནོ། །དེ་བཞིན་དུ་ཡང་ཉེ་འཁོར་རྣམས་ཀུན་དུ་སྨང་བར་བྱེད་དོ། །པད་མའི་ཚལ་རྣམས་ཀྱང་བུང་བའི་ཚོགས་རྣམས་ཀྱིས་ཀུན་ནས་ཉེ་བར་མཛེས་པར་གྱུར་པའོ། །ཉེ་འཁོར་ཀུན་ནས་ཡོངས་སུ་
བསྐོར་བའི་ལྷ་དེ་དག་རྣམས་ལེགས་པར་མངོན་པར་མཐོང་ནས་གཞན་ལ་ཕན་པ་ལ་རབ་ཏུ་ཞུགས་པས་ཚིགས་སུ་བཅད་པ་བརྗོད་པ་ཇི་ལྟར། འགྲོ་བ་དང་ནི་གནས་ཉིད་དང་། །རྩེ་བ་དང་ནི་རྒོད་པ་ཡང་། །བཟོད་
པར་མི་ནུས་ཤུགས་པོ་ཆེ། །མི་བཟད་པ་ཡི་འཆི་བདག་འབྱུང་། །གང་ལ་འདི་ཡིས་མི་སྒྲུབ་པའི། །འདི་དང་ཕྱི་མར་གནས་དེ་མེད། །དེ་ལྟ་ན་ཡང་ཀུན་རྨོངས་པས། །འགྲོ་བ་འདི་དག་གིས་མི་རྟོགས། །
དབུལ་པོ་དང་ནི་དབུལ་མིན་དང་། །གཞོན་པ་དང་ནི་གནས་བརྟན་དང་། །ཁྱིམ་པ་དང་ནི་ཁྱིམ་པ་མིན། །གང་ཡང་འདི་ཡིས་མི་འཇོམས་མེད། །སྐྱིད་དེན་པ་དང་སྡུག་ཕོངས་དང་། །ཡོན་ཏན་ཅན་དང་དེ་ལས་གཞན། །
སྤོངས་ལ་གནས་དང་སྤོང་གནས་མིན། །གང་ཡང་འདི་ཡིས་མི་འཁྲིད་མེད། །ཚུལ་ཁྲིམས་འཆལ་དང་ཚུལ་ཁྲིམས་ལྡན། །ཤེས་རབ་ཅན་དང་རྨོངས་པ་དང་། །རྒྱལ་པོ་དང་ནི་དེ་ལས་གཞན། །གང་དག་འདིས་ནི་མི་

66-1-93a

འཁྲིད་མེད། །ལྷ་རྣམས་དང་ནི་དམྱལ་བ་འམ། །ཡི་དགས་དུད་འགྲོ་སྐྱེས་དེ་བཞིན། །བག་མེད་པ་དང་བག་ཡོད་དང་། །གང་དག་འདི་ཡིས་མི་འཁྲིད་མེད། །འདོད་པའི་ཁམས་སུ་སྐྱེས་པ་འམ། །གཟུགས་ཀྱི་
ཁམས་ཀྱང་དེ་བཞིན་དེ། །གཟུགས་མེད་པར་ཡང་སྐྱེས་པ་འམ། །གང་དག་འདི་ཡིས་མི་འཁྱེར་མེད། །ལས་ཀྱི་ཞགས་པས་རྒ་བའི་ཆད། །ནད་ཀྱི་ལུས་སོ་སྟོབས་པོ་ཆེ། །སྲིན་པོ་ལྟ་བུའི་འཆི་བདག་འདིས། །སེམས་
ཅན་བླངས་ནས་འགྲོ་བ་ཡིན། །དེ་ལྟར་འཇིགས་སུ་རུང་བ་ཡི། །འཆི་བདག་མཆོག་ཏུ་མི་བཟད་པ། །འདོད་པས་རྣམ་པར་རྨོངས་པའི་ལྷ། །ངུ་བར་འོས་ལ་དགའ་བར་བྱེད། །ཇི་ལྟ་ཇི་ལྟར་བསྟེན་བྱས་པ། །འདོད་
པ་སྡུག་བསྔལ་རྒྱུ་རྣམས་ནི། །དེ་ལྟ་དེ་ལྟར་རྣམ་འཕེལ་བ། །མར་བླུགས་པ་ཡི་མེ་ཇི་བཞིན། །མི་དགེ་དེ་དག་སླུ་བྱེད་ཡིན། །བྱས་པ་ཆུད་གཟོན་སྡུག་བསྔལ་རྒྱུ། །དང་པོར་མངར་བར་འདོད་པ་ནི། །ཡོངས་སུ་
སྨིན་ནས་མི་བཟད་པ། །འདོད་པས་དང་པོར་བདེ་ལེགས་དང་། །བར་དང་ཐ་མར་བྱེད་པ་འང་མིན། །ཞི་ཡིད་རྗེས་སུ་ཐོབ་པར་མིན། །ཉམས་དང་ཞི་བའི་རྒྱུ་རྣམས་ནི། །དབང་པོ་དང་ནི་དབང་དོན་ལ། །རྨོངས་ནས་
རྣམ་པ་ཐ་དད་པར། །བྱིས་པའི་ཡིད་འཕྲོག་འདོད་པ་འདིས། །དམྱལ་བར་འགྲོ་བར་བྱེད་པ་ཡིན། །གང་དང་ལྷན་ཅིག་བྱིས་པ་དགའ། །དེ་ཉིད་འདི་ནི་མི་བཟད་མཆོག །དགྲ་བོ་གྲོགས་པོའི་གཟུགས་ཀྱིས་ནི། །
ཁྱད་པར་གྱིས་ནི་རབ་ཏུ་རྒྱུ། །དེ་ལྟར་དུས་བཟང་དེས་བག་མེད་པ་བག་མེད་པར་སྤྱོད་པ་རྣམས་མངོན་པར་མཐོང་ནས་ཚིགས་སུ་བཅད་པ་བརྗོད་དོ། །དེ་ནས་ལྷ་དེ་དག་འདོད་པ་དེ་དག་གིས་རྣམ་པར་རྨོངས་པའི་ཕྱིར་ཕན་
པར་འགྱུར་བ་གང་ཡིན་པ་དེ་བརྗོད་པ་ན་ཀུན་དུ་མི་རྟོགས་སོ། །དེ་ནས་སླར་ཉིད་ཀྱང་པད་མའི་རྫིང་བུ་དེ་ཉིད་ཀྱི་འགྲམ་དུ། རཱ་ཛ་ནི་ན་རྒྱུ་བའི་ལྷ་དེ་དག་རྣམས་ནགས་དང་ཉེ་བའི་ནགས་རྣམས་དང་པད་མའི་རྫིང་བུ་

66-1-93b

དག་དང་འཁྲིས་ཤིང་འཕྱར་བར་ལེགས་པར་ཀུན་དུ་གཡོགས་པའི་མཆོག་ཏུ་དྲི་ཞིམ་པའི་འཁྲིས་ཤིང་གི་ཁང་པ་རྣམས་ལ་བུང་བ་བརྒྱ་སྟོང་དུ་མ་སྐད་སྙན་པ་རྣམས་འདོན་པས་རྣ་བར་སྙན་པ་རྣམས་ལ། ལྷ་དེ་དག་
རྣམས་ལྷའི་བུ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་དགའ་བར་བྱེད་ཅིང་རྩེ་བར་བྱེད་དེ། རྔ་སྐད་ཡན་ལག་ལྔ་དང་ལྡན་པས་ཤིན་དུ་སྙན་པ་དང་བརྒྱུད་མར་དམའ་ཞིང་སྙན་པ་དང་མཐོན་པོར་འཇམ་ཞིང་སྙན་པའི་སྒྲ་
དང་ཡང་དག་པར་ལྡན་པར་དཔེ་མེད་པ་རྣམས་ཀྱིས་དགའ་བར་བྱེད་དོ། །གཞན་དག་ནི་ཁང་བུའི་སྟེང་ན་ཀུན་དུ་གནས་ཏེ་མཆོག་ཏུ་དགའ་བའི་པད་མའི་རྫིང་བུ་དེ་ཉིད་ལ་ཀུན་དུ་ལྟ་བར་བྱེད་དོ། ། རཱ་ཛ་ནི་ན་རྒྱུ་བའི་ལྷ་དེ་དག་རང་
གི་ལས་ལ་སྤྱོད་པས་རྗེས་སུ་འབྲང་བ་རྣམས་དང་བཅས་པས་ཉེ་འཁོར་ཀུན་དུ་ལྟ་བར་བྱེད་དོ། །དེ་ནས་ཀུན་དུ་ལྟ་བར་བྱེད་པ་དེ་དག་རྣམས་ལ་གཞན་ཡང་དུས་བཟང་དེ་འདི་སྙམ་དུ་སེམས་ཏེ། ལྷ་དེ་དག་རྣམས་ཀྱི་ཡིད་ལ་
ཅི་ཞིག་ཡོད་པར་གྱུར་ན། ངེས་པར་ཉམས་སུ་མྱོང་བར་འགྱུར་བའི་སྡུག་བསྔལ་འབྱུང་བར་འགྱུར་བ་རྣམས་གང་ཡིན་པ་གང་དག་གིས་གོ་བར་མི་འགྱུར་བ། ལྷ་རྣམས་འཆི་བའི་དུས་ན་འཇིགས་པ་ནི་ལྔ་ཡོད་དེ། 
ལྔ་པོ་རྣམས་གང་ཞེ་ན། འདོད་པ་སྡུག་པ་མཐུན་པ་ཡིད་དུ་འོང་བའི་བུད་མེད་རྣམས་ཐམས་ཅད་དང་ལྷའི་རིགས་ཀྱི་སྐལ་བ་མཐུན་པ་དེ་ཉིད་དུ་སླར་ཡང་ཀུན་དུ་མི་ཕྲད་པ་སྟེ། དེ་ལ་འདི་ནི་རྣམ་པར་འབྲལ་བས་བྱས་
པའི་སྡུག་བསྔལ་ཆེན་པོ་དང་པོ་ཡིན་ནོ། །གཞན་ཡང་ལྷ་རྣམས་འཆི་འཕོ་བར་གྱུར་པའི་དུས་ན་སྡུག་བསྔལ་གཉིས་པ་འདི་ལྟ་སྟེ། འདོད་པ་སྡུག་པ་ཡིད་དུ་འོང་བའི་ལྷ་རྫས་ཀྱི་ཡུལ་རྣམས་དང་ཕྱི་ནས་ཡང་མི་
ཕྲད་པ་ཞེས་བྱ་བ་འདི་ནི་ལྷ་རྣམས་འཆི་འཕོ་བའི་དུས་ན་སྡུག་བསྔལ་ཆེན་པོ་གཉིས་པ་ཡིན་ནོ། །གཞན་ཡང་ལྷ་རྣམས་ལ་སྡུག་བསྔལ་གསུམ་པ་ཡོད་དེ། ལྷ་གཞན་གང་དག་དང་རྩེ་བར་བྱེད་པ་ན་དེ་དག་གིས་འདིའི་

66-1-94a

མངོན་སུམ་དུ་གྱུར་པ་གང་གི་ཚེ། སྣུམ་ཟད་པའི་མར་མེ་འཆི་བ་བཞིན་དུ་མཐོང་བར་འགྱུར་རོ། །དེའི་ཚེ་དེ་ལ་སྡུག་བསྔལ་གང་དག་སྐྱེ་བར་འགྱུར་བ་དེ་དག་འདི་ལྟར་འབྱུང་བ་ཡིན་ཏེ། ངེས་པའི་
ལས་ཀྱི་རླུང་གིས་བདག་ངེས་པར་བརླག་པར་འགྱུར་བ་ཡིན་ནོ་ཞེས་དེ་ལ་རྣམ་པར་འབྲལ་བར་བྱས་པའི་སྡུག་བསྔལ་སྐྱེ་བ་གང་ཡིན་པ་དེ་དམྱལ་བའི་སྡུག་བསྔལ་གྱིས་ཀྱང་ཆར་མི་བཟོད་དོ། །གཞན་ཡང་ལྷ་རྣམས་ཀྱི་
སྡུག་བསྔལ་བཞིར་ཡོད་དེ། གང་གི་ཚེ་འཆི་འཕོ་བར་གྱུར་པ་དང་ཉེ་བར་གྱུར་པ་ན། འགྲོ་བ་གང་ནས་སྐྱེ་བར་འགྱུར་བ་དང་གང་ལ་འདི་སྐྱེ་བ་འབྱུང་བར་འགྱུར་བ་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་
འགྲོ་བ་དེ་དེས་ཇི་ལྟ་བ་བཞིན་དུ་མཐོང་བར་གྱུར་པ་ན། དེའི་ཚེ་འདི་འགྱོད་པར་གྱུར་པས་བྱས་པའི་མེར་འོས་པ་རྣམ་པ་དུ་མའི་སྡུག་བསྔལ་འབྱུང་བར་འགྱུར་རོ། །གཞན་ཡང་ལྷ་རྣམས་ལ་སྡུག་བསྔལ་ཆེན་པོ་
ལྔ་པ་ཡོད་དེ། གང་དག་དགེ་བའི་བཤེས་གཉེན་དུ་གྱུར་པ་རྣམས་ཀྱིས་ཆོས་བསྟན་པར་གྱུར་པ་ན་དེ་ཡང་ཉན་པར་མི་བྱེད་པ་དང་། དམ་པའི་ཆོས་རྗེས་སུ་སྒྲུབ་པར་མི་བྱེད་པར་བག་མེད་པས་བག་མེད་པར་རྒྱུ་བ་
ཡུལ་གྱིས་ཀུན་ནས་ཕྲོགས་པར་གྱུར་པའི་སེམས་ཀྱིས་ཏེ། འཆི་འཕོ་བར་འགྱུར་བའི་དུས་དེའི་ཚེ་དེ་ཡང་རྗེས་སུ་དྲན་ནས། ཧཱ་མི་བཟད་པའི་སྡུག་བསྔལ་ངས་ཅི་ཞིག་བྱས་ན། ཆོས་གང་ཡིན་པ་ནི་མ་མཉན་ནོ། །
ཚུལ་ཁྲིམས་ལ་ཡང་རྗེས་སུ་མ་བསྒྲུབས་པས་ཤེས་རབ་ཀྱང་གོམས་པར་མ་བྱས་པ་དེའི་སེམས་དང་པོ་ཁོ་ནར་རྣམ་པར་འགྱོད་པར་འགྱུར་བའི་མེས་སྲེག་པར་བྱེད་དོ། །རང་ལས་ཀྱི་ཞགས་པ་དེས་དབང་མེད་པར་ངེས་
པར་བཅིངས་ནས་བག་མེད་པའི་དགྲས་བསླུས་པ་ཡིན་ཏེ། ལྷ་རྣམས་ལ་སྡུག་བསྔལ་ཆེན་པོ་ལྔ་པོ་འདི་རྣམས་ཡོད་དོ། །སྡུག་བསྔལ་དེ་དག་རྣམས་ཀྱིས་མི་ཤེས་ཏེ། བག་མེད་པའི་དགྲ་རྣམས་ཀྱིས་ཅོ་དྲིས་

66-1-94b

པའི་ཕྱིར་དང་བསླུས་པའི་ཕྱིར་དང་རྣམ་པར་ཉམས་པར་བྱས་པའི་ཕྱིར་རོ། །དེ་ནས་དེ་ལྟར་རིག་ནས་ངང་པ་རྣམས་ཀྱི་མངའ་བདག་དེ་གཅིག་ཏུ་ངེས་པའི་བློ་དང་ལྷན་ཅིག་ཏུ་ངེས་པར་བློ་བཞག་པར་གྱུར་ནས་ཐབས་
རྣམས་གང་ཡིན་པ་དཔྱོད་པར་བྱེད་དེ། གང་གིས་འདི་དག་ལེགས་པར་བྱེད་པར་འགྱུར་བའི་ཐབས་གང་དག་གིས་ལྷ་འདི་དག་རྣམས་ལ་བདག་གིས་ཆོས་བསྟན་པར་བྱ། དེ་ནས་དེ་ལྟར་དུས་རིང་བ་ནི་རྟོགས་ནས་ངང་པ་
རྣམས་ཀྱི་བདག་པོ་དེ་གཞན་ལ་ཕན་པ་ལ་རབ་ཏུ་ཞུགས་པས། སེམས་ཅན་དེ་དག་རྣམས་ལ་ཕན་པར་བྱ་བའི་དོན་དུ་ཚིགས་སུ་བཅད་པ་བརྗོད་པ་ཇི་ལྟར། རྟག་ཏུ་སྦྱིན་དང་ཚུལ་ཁྲིམས་ལྡན། །སེམས་ཅན་
ཐམས་ཅད་ལ་རྗེས་བརྩེ། །ཀུན་དུ་བསམས་པ་ཐམས་ཅད་འགྲུབ། །དེ་ཕྱིར་ཚུལ་ཁྲིམས་མཆོག་ཡིན་ནོ། །བྱམས་དང་སྙིང་རྗེ་དང་ལྡན་ཞིང་། །འདོད་པ་ཟད་པའི་ལུས་ཅན་རྣམས། །གཞན་དག་རྗེས་སུ་
འཛིན་ལྡན་པའི། །ལུས་འགྲུབ་པ་ནི་རྟག་ཏུ་གནས། །ཆོག་ཤེས་པ་དང་བག་ཡོད་པའི། །སེམས་ཅན་ཀུན་ལ་ཕན་པར་འདོད། །འདོད་ཆགས་ཞེ་སྡང་ལས་རྣམས་གྲོལ། །ལུས་འགྲུབ་པ་ནི་རྟག་ཏུ་གནས། །
གྲོགས་དང་དགྲ་དང་བྲལ་བ་དང་། །ལུས་ཅན་རྣམས་ལ་སྙོམས་པའི་སེམས། །ངན་སོང་འགྲོ་བས་འཇིགས་པ་ཡི། །ལུས་འགྲུབ་པ་ནི་རྟག་ཏུ་གནས། །བསླུ་བ་མེད་དང་བརྟན་པ་དང་། །ཆོས་སྦྱིན་པ་ལ་དགའ་བ་དང་། །
སེར་སྣ་ཕྲག་དོག་རྣམ་གྲོལ་བའི། །ལུས་འགྲུབ་པ་ནི་རྟག་ཏུ་གནས། །སྡོམ་ལ་གནས་དང་ཞི་བ་དང་། །བླ་མ་མཆོད་ལ་དགའ་བ་དང་། །དོན་དང་དོན་མིན་ཐབས་བླག་ཤེས། །དོན་གྲུབ་པ་ནི་རྟག་ཏུ་གནས། །
གཡོ་མེད་ཤིན་དུ་མཁས་པ་དང་། །རྟག་པར་ཡང་ནི་སྙན་པའི་ངག །མགོན་མེད་རྣམས་ལ་སྡོམ་བརྩོན་ལྡན། །དོན་གྲུབ་པ་ནི་རྟག་ཏུ་གནས། །ཡུལ་དུས་རྣམ་པར་ཤེས་པ་ཡི། །བསྒྲུབ་དང་སྒྲུབ་མིན་

66-1-95a

རྣམ་པར་ཤེས། །སྡིག་པའི་སྦྱང་ཐབས་ཤེས་ནུས་པའི། །ལུས་འགྲུབ་པ་ནི་རྟག་ཏུ་གནས། །དེ་ལྟར་ངང་པ་རྣམས་ཀྱི་མངའ་བདག་དེས་རིག་པར་གྱུར་ནས། ཇི་ལྟར་འདི་དག་རྣམས་ཆོས་བྱེད་དུ་
འགྱུར་བ་དང་ཆོས་སྟོན་པར་འགྱུར་བར་ཡང་བྱེད་དེ། གཞན་དག་རྗེས་སུ་འཛིན་པར་བྱེད་པ་ལ་སྦྱོར་བ་གང་ཡིན་པ་དེ་དག་རྣམས་ནི། ཀུན་དུ་བསམས་པ་རྣམས་ཐམས་ཅད་འགྲུབ་པར་དེས་རིག་པའི་ཕྱིར་རོ། །
དེ་ནས་ལྷ་དེ་དག་རྣམས་བག་མེད་པ་བག་མེད་པར་རྒྱུ་བས་རྣམ་པར་རྒྱུ་བར་བྱེད་པ་ཡིན་ན། དེ་ལ་གང་གིས་འདི་དག་རྣམས་ཀྱི་བག་མེད་པ་དང་འབྲལ་བར་འགྱུར་བར་ཇི་ལྟར་བདག་གིས་དེ་དག་རྣམས་ལ་ཆོས་བསྟན་
པར་བྱ། དེ་ནས་ཡེ་ཤེས་སྟོབས་པོ་ཆེས་ལེགས་པར་སྤྱད་པ་རྣམས་རིག་ཅིང་སྐྱེ་བ་གཞན་དྲན་པ་དང་དྲན་པར་གྱུར་ན། ཇི་ལྟར་སྔོན་བདག་མིར་གྱུར་ནས་འཛམ་བུའི་གླིང་དུ་སྐྱེས་པ་ན། བཅོམ་ལྡན་འདས་གསེར་
ཐུབ་ཀྱི་སྤྱན་སྔར་ཆོས་ཐོས་པར་གྱུར་པ་དེའི་དུས་ནི་ཆུང་ངུ་ན་ཡང་ངེས་པར་འདི་ཡིན་ལ། བཅོམ་ལྡན་འདས་དེས་ནི་དུས་འདི་དག་མཁྱེན་ནས་བདག་ལ་ཆོས་བསྟན་པ་ཡིན་ཏེ། ཇི་ལྟར་ཚོང་དཔོན་གཙོ་བོའི་བུ་ཨུད་པ་
ལ་སྦྱིན་ཞེས་བྱ་བ་འདི་ཤི་བར་གྱུར་ནས་འཐབ་བྲལ་བའི་ལྷ་རྣམས་ཀྱི་ས་རཱ་ཛ་ནི་ན་རྒྱུ་བར་ངང་པར་སྐྱེ་བ་གཞན་ལ་སྐྱེ་བར་འགྱུར་རོ། །དེས་བདག་གི་ཆོས་འདི་དག་རྣམས་བག་མེད་པས་བག་མེད་པར་རྣམ་པར་རྒྱུ་བར་བྱེད་
པའི་ལྷ་དེ་དག་རྣམས་ལ་སྟོན་པར་བྱེད་དོ་ཞེས་བྱ་བ། ཆོས་དེའི་དུས་དེ་ནི་དེ་རིང་འདིར་བྱུང་བ་ཡིན་པས། ཅི་ནས་ཀྱང་བདག་གིས་ཆོས་དེ་དག་བསྟན་པར་བྱ་བ་ཡིན་ནོ། །ངང་པ་རྣམས་ཀྱི་མངའ་བདག་དེས་
དེ་ལྟར་རིག་ནས། གཞན་ལ་ཕན་པ་ལ་རབ་ཏུ་ཞུགས་པ་སྙིང་རྗེ་དང་ལྡན་པར་གྱུར་ཅིང་། བྱམས་པ་དང་སྙིང་རྗེ་མང་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡིད་ལ་བྱས་ནས། གང་ན་

66-1-95b

རྔ་སྐད་ཡན་ལག་ལྔ་དང་ལྡན་པས་ལྷ་དེ་དག་རྣམས་རྩེ་བར་བྱེད་པ་དེར་ཉེ་བར་འགྲོའོ། །ངང་པའི་ཚོགས་ཆེན་པོ་རྣམས་ཀྱིས་ཡོངས་སུ་བསྐོར་ནས་ཉེ་བར་ཕྱིན་པར་གྱུར་ནས་མཐོང་བ་ནི། ལྷ་དེ་དག་རྣམས་ཁ་ཅིག་
ནི་ནགས་ཚལ་གྱི་གསེབ་ལ་རྩེ་བར་བྱེད་དོ། །ཁ་ཅིག་ནི་པད་མའི་རྫིང་བུ་རྣམས་ལའོ། །ཁ་ཅིག་ནི་འཁྲིས་ཤིང་གི་ཁཾ་པ་རྣམས་སུའོ། །ཁ་ཅིག་ནི་ནམ་མཁའི་དཀྱིལ་ན་ཁང་བུ་ལ་ལེགས་པར་ཀུན་དུ་གནས་
ནས་རྩེ་བར་བྱེད་དོ། །ཁ་ཅིག་ནི་ལྷན་ཅིག་སྤྱོད་པ་རྣམས་དང་བཅས་ནས་བདུད་རྩི་ཟ་བར་བྱེད་དོ། །དེ་ནས་དུས་བཟང་འདི་སྙམ་དུ་སེམས་ཏེ། ཇི་ལྟར་བག་མེད་པས་བག་མེད་པར་རྒྱུ་བ་འདི་དག་རྣམས་ཉིད་
ལ་ཆོས་བསྟན་པའི་དབང་དུ་བྱས་པའི་དུས་ནི་འདི་ཡིན་ཏེ། གང་ཐ་མར་གྱུར་ཡང་བདག་གིས་རྣམ་པ་ཇི་ལྟ་བུའི་དབྱངས་སྙན་པའི་དབྱངས་རྣམས་ཀྱིས་ཆོས་ཀྱི་ཚིགས་སུ་བཅད་པའི་དབྱངས་ཀྱིས་འདི་
དག་ལ་བསྙད་པར་བྱ་སྟེ། བདག་གིས་དབྱངས་ཀྱི་གདངས་ཤིན་དུ་སྙན་པ་གང་ཡིན་པས་ལྷ་དེ་དག་རྣམས་ཀྱི་དང་ལྷ་མོ་དེ་དག་རྣམས་ཀྱི་སྙན་པ་དང་ལྡན་པའི་གླུ་དབྱངས་དེ་དག་ཐམས་ཅད་ཉེ་བར་བཅོམ་ནས། 
ངའི་དབྱངས་དེ་ལ་ཀུན་དུ་གནས་པ་ཁོ་ནས་ལྷ་དེ་དག་རྣམས་དབྱངས་ཀྱིས་ཀུན་དུ་ཕྲོགས་པས་རྣ་བའི་རྣམ་པར་ཤེས་པ་གཏད་ནས་ཉན་པར་འགྱུར་རོ། །གཞན་དུ་ན་འདོད་པའི་ལོངས་སྤྱོད་རྣམས་ཀྱིས་བག་
མེད་པས་ཉན་པར་མི་འགྱུར་རོ། །དེ་ནས་དེ་དག་ལ་བློ་ཀུན་ནས་གནས་པར་བྱས་ནས། ངང་པའི་རྒྱལ་པོ་དེས་ཚངས་པའི་དབྱངས་དེ་ཡིད་ལ་བྱས་ཤིང་། སངས་རྒྱས་ཀྱི་ཡོན་ཏན་དེ་དག་རྣམས་ཀྱང་
རྗེས་སུ་དྲན་པར་བྱས་ཏེ། བྱམས་པ་དང་སྙིང་རྗེའི་བློ་མང་དུ་བསྐྱེད་པར་གྱུར་ནས། རིན་པོ་ཆེ་བདུན་གྱིས་རྣམ་པར་བརྒྱན་པའི་རིའི་རྩེ་མོ་ལ་མངོན་པར་གནས་ཏེ་ངང་པ་དེ་དག་རྣམས་ཉིད་དང་ལྷན་ཅིག་ཏུ་

66-1-96a

དཔག་ཚད་བརྒྱ་སྟོང་ཕྲག་བཅུར་ཁྱབ་པར་གྱུར་པ་དང་། མཚུངས་པ་མེད་པའི་དབྱངས་སྙན་པ་རྣམས་ཀྱིས་ཚིགས་སུ་བཅད་པ་བཤད་པ་ཇི་ལྟར། གསོན་པ་རེ་བ་རྣམ་འཇིག་
པའི། །འཆི་བ་ཇི་སྲིད་མ་བྱུང་བ། །ཕྱི་ནས་འགྱོད་པར་མི་འགྱུར་བར། །དེ་སྲིད་དུ་ནི་བསོད་ནམས་ཀྱིས། །རྟག་ཏུ་བག་མེད་སྟེན་པ་གང་། །འདི་ནི་འཆི་བདག་གོ་འཕང་ཡིན། །བག་ཡོད་པ་ནི་ངེས་
བསྟེན་པས། །འཆི་བ་མེད་པའི་གོ་འཕང་མཆོག །གང་དག་བག་མེད་པས་རྨོངས་པའི། །ལམ་འདི་ཤིས་པར་རབ་བརྗོད་མིན། །བག་ཡོད་པ་ལ་མཉམ་རྟེན་ནས། །མཁས་པ་མྱ་ངན་འདས་པར་
འགྲོ། །གནས་དེ་དག་ནི་ཆུད་གཟོན་པའི། །བག་མེད་པ་ལ་དགའ་མ་བྱེད། །ཞི་མིན་གོ་འཕང་བླངས་ནས་ནི། །དམྱལ་བར་རྗེས་སུ་རྒྱུག་ལ་རེ། །རབ་ཞིག་རབ་ཏུ་ཆུད་ཟོས་གང་། །ལུས་ཅན་རབ་
ཏུ་ཆུད་འཛར་འགྱུར། །དེ་དག་བག་མེད་སྐྱོན་ཡིན་པར། །དེ་བཞིན་གཤེགས་པ་གསུང་བར་མཛད། །དེ་ཕྱིར་ཐམས་ཅད་ཀྱིས་ཐམས་ཅད། །བརྩོན་པ་ཀུན་གྱིས་ཐམས་ཅད་ཀྱི། །བག་མེད་
ཡོངས་སུ་སྤོང་བ་ཡི། །ལྷ་རྣམས་འདིར་ནི་ཞི་བར་བརྗོད། །དེ་ལྟར་ངང་པ་རྣམས་ཀྱི་མངའ་བདག་དེ་རིའི་རྩེ་མོ་དེ་ལ་ལྷག་པར་གནས་ནས་རྣམ་པ་དེ་ལྟ་བུའི་དབྱངས་ཀྱིས་རྗོད་པར་བྱེད་དོ། །དེ་ལྟ་
བུར་སྙན་པ་དང་དེ་ལྟ་བུར་གསལ་བ་དང་དེ་ལྟ་བུར་ཡིད་འཕྲོག་པའི་དབྱངས་གང་གི་ཁྱད་པར་གྱིས་ནི་ལྷ་དེ་རྣམས་ཀྱི་གླུའི་དབྱངས་དེ་དག་གིས་ཐམས་ཅད་དུ་སྐྱོ་བ་སྐྱེ་བར་འགྱུར་རོ། །དེ་ནས་ལྷ་དེ་དག་
རྣམས་ཐམས་ཅད་ཀྱང་སྒྲ་དེས་དྲངས་པར་གྱུར་ནས་གང་ན་ནི་རིའི་རྩེ་མོ་ཡོད་པ་དེར་ཉེ་བར་འགྲོ་བར་བྱེད་དེ། མཆོག་ཏུ་སྙན་པ་ཤིན་དུ་རྒྱ་ཆེ་བར་གྱུར་པའི་རྣམ་པ་ཇི་ལྟ་བུའི་དབྱངས་དེ་ལྷ་རྣམས་ཀྱིས་ནམ་ཡང་

66-1-96b

སྔར་མ་ཐོས་པའི་བློ་ལྷ་དེ་དག་རྣམས་ལ་སྐྱེ་སྟེ། ཇི་ལྟར་གླུའི་སྒྲ་འདི་དག་རྣམས་འདོད་པར་གྱུར་པས་དེ་དག་ཀུན་དུ་དྲངས་པ་ཡིན་གྱི་ཆོས་ལ་གུས་པ་ནི་མ་ཡིན་ནོ། །དེ་ནས་རིའི་རྩེ་མོ་དེ་ལ་འཁོད་ནས་མཐོང་བར་གྱུར་པ་
ངང་པའི་རྒྱལ་པོ་དུས་བཟང་དེས་ཚིགས་སུ་བཅད་པ་རྗོད་པར་བྱེད་པ་ནི་ཇི་ལྟར་སྔར་བཞིན་ནོ། །དེ་ནས་ལྷ་དེ་དག་དང་ལྷ་མོ་དེ་དག་རྣམས་ཐམས་ཅད་ཀྱང་སྙན་པ་དང་རྒྱ་ཆེ་བར་གྱུར་པ་མཆོག་གི་དབྱངས་དེས་བཀུག་པའི་ཕྱིར་
ཐམས་ཅད་ཀྱིས་ཀྱང་དུས་བཟང་དེ་ཡོངས་སུ་བསྐོར་ནས་གནས་ཏེ། རབ་ཏུ་དང་བ་རྩེ་གཅིག་པའི་ཡིད་ཀྱིས་དབྱངས་དེ་འབའ་ཞིག་ཉན་པར་བྱེད་དོ། །ཚིགས་སུ་བཅད་པ་འདི་དག་རྣམས་ལས་སྙན་པར་གྱུར་པའི་ཚིག་
རྣམས་ཉེ་བར་འཛིན་པར་བྱེད་དོ། །དེ་ནས་ལྷ་དེ་དག་རྣམས་ཀྱི་ཡིད་རྩེ་གཅིག་ཏུ་གྱུར་པ་ངང་པའི་རྒྱལ་པོ་དེས་རིག་ནས། དེ་མིར་གྱུར་པ་ནི་ཇི་ལྟར་གཙོ་བོར་གྱུར་པའི་བུའི་མིང་ཡང་ཨུད་པ་ལ་སྦྱིན་དུ་གྱུར་ཅིང་། གྱུར་པ་
ན་བཅོམ་ལྡན་འདས་གསེར་ཐུབ་ཀྱི་སྤྱན་སྔར་ཐོས་པའི་ཆོས་དེ་གང་ཡིན་པ་འདི་ལས་བརྩམས་ནས་སྙན་ཞིང་མཆོག་ཏུ་རྒྱ་ཆེ་བར་གྱུར་པའི་དབྱངས་དེ་ཉིད་ཀྱིས་ཡིད་རྩེ་གཅིག་ཏུ་གྱུར་པ་རྣམས་ཉིད་ལ་རང་དང་འདྲ་བར་སྟོན་
པར་བྱེད་པ་ཡིན་ཏེ། དེ་ལྟར་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་བའི་ལྷ་དེ་དག་རྣམས་ལ། ཇི་ལྟར་བག་མེད་པས་བག་མེད་པར་རྣམ་པར་མི་རྒྱུ་བར་ལྷ་དག་གིས་གནས་པར་བྱ་བ་དང་། ཆོས་ཀྱང་བག་ཡོད་
པས་ཉན་པར་བྱ་བ་དང་། སྐྱེས་བུ་དམ་པ་ཕན་པར་བྱེད་པ་རྣམས་ཀྱི་དྲུང་དུ་དམ་པའི་ཆོས་ཉན་པར་གྱུར་པ་ན། དམ་པའི་ཆོས་སྒྲོགས་པ་ལ་གུས་པ་དང་ལྡན་པའི་སྐྱེས་བུ་དམ་པ་རྣམས་ནི་མྱ་ངན་ལས་འདས་པའི་
མཐར་ཐུག་པར་འགྱུར་རོ། །དགའ་བ་དང་ཡིད་བདེ་བ་མང་བར་འགྱུར་རོ། །ཟག་པ་རྣམས་ཟད་པར་འགྱུར་རོ། །འཇིག་རྟེན་གཉིས་པོ་འདི་དག་ཏུ་སྐྱེས་བུ་དམ་པས་ཚངས་པའི་བསོད་ནམས་སྐྱེད་པར་འགྱུར་རོ། 

66-1-97a

ཚུལ་བཞིན་དུ་གྱུར་པས་ཀྱང་འཛིན་པར་བྱེད་དོ། །ཟག་པ་དག་ཟད་པར་བྱེད་དོ། །དེ་ལ་གང་ཡང་དམ་པར་བྱས་ཏེ་ཆོས་སྟོན་པར་བྱེད་པ་དང་གང་ཡང་དམ་པའི་ཆོས་ཏེ་ཉན་པར་བྱེད་པ་གང་གིས་དེ་ལ་དེ་དག་མ་དང་
ཕ་གཉིས་དང་མཚུངས་པར་འགྱུར་བ་ཡིན་ན། གང་དག་འཁོར་བ་ངེས་པར་འབྱུང་བར་འགྱུར་བར་ཆོས་སྟོན་པར་བྱེད་པས་ཏེ། མཐར་ཐུག་པ་དང་དགེ་བའི་ཆོས་རྣམས་འཕེལ་བར་འགྱུར་བའི་ཆོས་སྟོན་པ་པོ་དེ་ནི་
ཆོས་ཉེ་བར་འཕེལ་བ་དེ་ཡིས་མ་དང་ཕ་དང་མཚུངས་པར་འགྱུར་རོ། །དེ་ལ་དམ་པའི་ཆོས་སྟོན་པར་བྱེད་པ་ནི་ཆོས་སྟོན་པ་པོ་སྦྱིན་པ་པོ། ཆོས་ཀྱི་སྦྱིན་བདག་དུ་གྱུར་པ། ཉན་པ་པོ་རྣམས་ལ་ཆོས་སྒྲོགས་པས་
ཉན་པར་བྱེད་དུ་འཇུག་པ་སྟེ་ཆོས་སྒྲོགས་པར་བྱེད་པ་པོ་ཡིན་ནོ། །དེ་ལ་ཆོས་བསྒྲགས་པ་ཉན་པ་རྣམས་ཀྱིས་ནི་རབ་ཏུ་བརྩོན་པ་དང་ལྡན་པ་དང་སེམས་དྲང་པོའི་རང་བཞིན་དུ་གྱུར་པ་དང་དམ་པའི་ཆོས་ལ་གུས་པ་དང་
ལྡན་པས་ཆོས་སྒྲོགས་པ་རྣམས་ལས་ཆོས་ཉན་པར་འདོད་པ་ནི་ཡོན་ཏན་སུམ་བཅུ་ཐམ་པ་དང་ཡང་དག་པར་ལྡན་ནོ། །སུམ་བཅུ་ཐམ་པ་པོ་གང་དག་རྣམས་དང་ལྡན་ཞེ་ན། ཆོས་སྒྲོགས་པ་པོ་ཆོས་སྨྲ་བ་པོ་གཅིག་ཏུ་
ཆོས་ཀྱི་སྦྱིན་བདག་ཏུ་གྱུར་པ་མ་དང་ཕ་དང་མཚུངས་པ་འཁོར་བའི་རྒྱུ་མ་ཡིན་པའི་དྲུང་ནས་ནི། འདི་ལྟ་སྟེ་མ་ཐོས་པའི་ཆོས་རྣམས་ཐོས་པར་འགྱུར་བ་དང་། ཐོས་པ་རྣམས་སོ་སོར་རིག་པར་བྱེད་པ་དང་། 
སོ་སོར་རིག་པར་བྱས་པས་ཀྱང་རྣམ་པར་དཔྱོད་པར་བྱེད་པ་དང་། རྣམ་པར་དཔྱད་ནས་ཀྱང་རབ་ཏུ་སྒྲུབ་པར་བྱེད་པ་དང་། རབ་ཏུ་ཞུགས་པར་གྱུར་ནས་བདག་ཉིད་རབ་ཏུ་གནས་པར་བྱེད་དོ། །རབ་ཏུ་གནས་
པར་གྱུར་ནས་གཞན་དག་རྣམས་ཀྱང་རབ་ཏུ་འགོད་པར་བྱེད་དོ། །དེ་དང་ལྷན་ཅིག་ཏུ་ཆོས་ཉན་པར་གྱུར་པ་ལས་རྣམ་པར་དཔྱོད་པར་བྱེད་དོ། །རྒུད་པར་གྱུར་པས་ཀྱང་ཀུན་ནས་རབ་ཏུ་གཡོ་བར་མི་འགྱུར་རོ། 

66-1-97b

དགེ་བའི་རྩ་བ་མ་བསྐྱེད་པ་རྣམས་ལ་སྐྱེད་པར་བྱེད་པ་དང་གོང་དུ་རྣམ་པར་སྨིན་པར་བྱེད་དོ། །ཡོངས་སུ་སྨིན་པ་རྣམས་ནི་ཐར་བར་བྱེད་དོ། །ལོག་པར་ལྟ་བ་ཅན་རྣམས་ཡང་དག་པའི་ལྟ་བ་ཅན་དུ་བྱེད་དོ། ། སྐྱེས་པར་
གྱུར་པའི་མི་དགེ་བའི་རྣམ་པར་རྟོག་པ་རྣམས་སོ་སོར་འཇོམས་པར་བྱེད་དོ། །དགེ་བའི་སེམས་ཀུན་དུ་སྐྱེས་པ་རྣམས་ལེགས་པར་འཕེལ་བར་བྱེད་དོ། །རྐྱེན་ཀྱིས་བྱུང་བའི་མི་དགེ་བ་རྣམས་ཡོངས་སུ་སྤོང་བར་བྱེད་དོ། །བག་
དང་ལྡན་པར་འགྱུར་རོ། །སྐྱེས་བུ་དམ་པ་རྣམས་ལ་རྗེས་སུ་སྟེན་པར་བྱེད་དོ། །གཡོ་དང་སེར་སྣ་རྣམས་དང་བྲལ་བར་བྱེད་དོ། །མ་དང་ཕ་ལ་གུས་པ་དང་ལྡན་པར་འགྱུར་རོ། །ལས་དང་འབྲས་བུ་རྣམས་ཀུན་དུ་ཤེས་
སོ། །འདིས་ནི་ཚེ་རིང་བ་འཕེལ་བར་བྱེད་པའི་ལས་རྣམས་ཡང་མངོན་པར་འཕེལ་བར་བྱེད་དོ། །འཇིག་རྟེན་པ་རྣམས་ཀྱིས་ཀྱང་བསྔགས་པར་འགྱུར་རོ། །ལྷ་རྣམས་ཀྱིས་ཀྱང་འདི་དག་མངོན་པར་སྲུང་བར་བྱེད་དོ། 
འདིས་ཀུན་དུ་བསམས་པ་རྣམས་ཀྱང་ཕུན་སུམ་ཚོགས་པར་འགྱུར་རོ། །ཆོས་དང་ལྡན་པའི་ལོངས་སྤྱོད་དག་ཐོབ་པར་འགྱུར་རོ། །ལེ་ལོ་མེད་པར་ཡང་འགྱུར་རོ། །བརྩོན་འགྲུས་བརྩམས་པ་དང་བྱས་པ་ཤེས་
པར་ཡང་འགྱུར་རོ། །རྟག་པར་རྒྱུན་དུ་ཡང་འཆི་བ་རྗེས་སུ་དྲན་པ་སྒོམ་པར་བྱེད་དོ། །འཆི་བའི་དུས་ན་འགྱོད་པ་མེད་པར་ཡང་འགྱུར་རོ། །མཐར་ཡང་ཡོངས་སུ་མྱ་ངན་ལས་འདས་པར་འགྱུར་རོ། །དེ་ལྟ་བུའི་
ཡོན་ཏན་སུམ་བཅུ་ཐམ་པ་ཡིན་ཏེ། ཆོས་དང་ལྡན་པའི་འཆད་པ་པོ་མ་དང་ཕ་དང་མཚུངས་པར་གྱུར་པའི་ཆོས་ཀྱི་སྦྱིན་བདག་ཆོས་སྒྲོགས་པ་པོའི་དྲུང་ནས་ཆོས་ཐོས་པ་ལས་ཡིན་ནོ། །དེ་ནི་མཐར་ཐུག་པ་
དང་མཐའ་ཡས་པའི་ཕན་པ་བྱེད་པའི་ཕྱིར་ཕ་ཡིན་ཏེ། གང་གིས་རྙོག་པ་མེད་པ་དང་ཡིད་རབ་ཏུ་རྣམ་པར་དང་བར་གྱུར་པ་དང་ཕན་བྱེད་པ་དང་ངེས་པར་རྟོགས་པར་བྱེད་པས་ཀྱང་ཆོས་སྟོན་པར་བྱེད་

66-1-98a

པ་དེ་ནི། དོན་དེ་ལས་སངས་རྒྱས་དང་ཆོས་དང་དགེ་འདུན་གྱི་བྱ་བ་བྱེད་པ་ཡིན་ནོ། །འཁོར་བ་ལས་སྒྲོལ་བར་བྱེད་དོ། །འདི་ན་ཆོས་སྒྲོགས་པ་པོ་ཆོས་བརྗོད་པའི་དྲུང་ནས་གང་གི་ཚེ་ཆོས་ཉན་པར་
བྱེད་པ་ན། དང་པོ་ཉིད་དུ་དེ་འཁོར་བ་ཐོག་མ་མེད་པའི་དུས་ནས་འཇུག་པ་ལས། གལ་ཏེ་ཤེད་ན་འགའ་ཞིག་ལས་ཆོས་ཐོས་པར་འགྱུར་ཏེ། དེ་ཆོས་སྒྲོགས་པ་དེའི་དྲུང་ནས་མ་ཐོས་པའི་ཆོས་རྣམས་ཐོས་
པར་གྱུར་ནས་ངོ་མཚར་བ་སྐྱེ་བར་འགྱུར་རོ། །ཇི་ལྟར་སྐྱེས་པ་ནས་ལོང་བར་གྱུར་པའི་མིག་གི་ཉེས་པ་རྣམས་སྨན་པ་ཆེན་པོས་གང་གི་ཚེ་ཀུན་ནས་བསལ་བར་གྱུར་པ་ན། དེས་དུ་མ་སྣ་ཚོགས་པར་གྱུར་པའི་ས་
གཞི་འདི་མཐོང་ནས་མཆོག་ཏུ་དགའ་ཞིང་རངས་པར་འགྱུར་རོ། ། སྔ་ན་མེད་པ་དང་སྔར་མ་ཐོས་པ་རྣམ་པ་སྣ་ཚོགས་པའི་དགའ་བར་གྱུར་པ་གཟུགས་མངོན་པར་མཐོང་བར་འགྱུར་རོ། །དེ་བཞིན་དུ་འདིའི་ཐོག་མ་མེད་
པའི་དུས་ནས་རབ་ཏུ་ཞུགས་པ་རྣམས་ཀྱང་དམ་པའི་ཆོས་སྒྲོགས་པ་རྣམས་འཛིན་པའི་དོན་གྱིས་གང་གི་ཚེ་བྱང་ཆུབ་ཀྱི་ཡན་ལག་གི་ས་གཞི་སྣ་ཚོགས་པའི་དགེ་བའི་སྙིང་པོ་དགའ་བར་གྱུར་པ་སྔ་ན་མེད་པའི་མདོའི་དོན་
རྣམས་རྗོད་པར་བྱེད་པས་གསལ་བར་གྱུར་པ་མཐོང་བར་འགྱུར་རོ། །དེའི་ཚེ་ཤིན་ཏུ་བར་ཡང་རབ་ཏུ་ཡངས་པར་འགྱུར་ཏེ། དམུས་ལོང་བཞིན་དུ་གཟུགས་རྣམས་མངོན་པར་མཐོང་ནས་རབ་ཏུ་དགའ་བར་འགྱུར་རོ། 
འདི་ནི་ཡོན་ཏན་དང་པོ་ཡིན་ནོ། །དམ་པའི་ཆོས་སྒྲོགས་པར་བྱེད་པ་རྣམས་ལས་དེས་ཐོས་ནས་ཆོས་དེ་དག་རྣམས་རབ་ཏུ་རིག་པར་འགྱུར་རོ། །དམ་པའི་ཆོས་ཉན་པར་བྱེད་པས་ཆོས་དེ་དག་ཐོས་པར་གྱུར་ནས་ཡིད་
ཀྱིས་རབ་ཏུ་རྟོགས་པར་བྱེད་དོ། །བཤད་པ་དེའི་དོན་ཅི་ཞིག་ཡིན་པ་ཡང་གང་གི་ཚེ་བདག་ཉིད་ཀྱིས་ཀུན་ནས་མ་རིག་པ་ན་དེ་གཞན་དག་རྣམས་ལ་ཡོངས་སུ་འདྲི་བར་བྱེད་དོ། །བཤད་པ་དེ་དག་གི་དོན་ཅི་ཡིན་ཞེས་

66-1-98b

བྱ་བར་དེ་དག་དང་གཞན་དག་རྣམས་ཀྱི་དྲུང་ནས་ཀྱང་དེ་ཐོས་ནས་ཡིད་ཀྱིས་རབ་ཏུ་རིག་པར་བྱེད་དོ། །སེམས་པར་བྱེད་དོ། །སྒོམ་པར་བྱེད་དོ། །ལན་མང་དུ་བྱེད་དོ། །སྔ་མ་དང་ཕྱི་མའི་དོན་དག་དང་བཤད་པ་
དེ་དག་སྦྱོར་བར་བྱེད་དོ། །ཡིད་ལ་བྱེད་དོ། །ཡིད་ལ་བྱས་ནས་ཀྱང་ཡང་དང་ཡང་དུ་དོན་རྣམས་ལ་ཀུན་དུ་ལྟ་བར་ཡང་བྱེད་དོ། །ཀུན་དུ་བལྟས་པས་ཀྱང་དགའ་བ་ཐོབ་པར་འགྱུར་རོ། །ཇི་ལྟ་ཇི་ལྟར་ཀུན་དུ་ལྟ་བར་བྱེད་
པ་ན་ཡང་། དེ་ལྟ་དེ་ལྟར་དོན་ཟབ་མོ་རྣམས་ཀྱང་ཡིད་ཀྱིས་སོ་སོར་རྣམ་པར་ཕྱེད་པར་འགྱུར་རོ། །འདི་ནི་ཆོས་སྒྲོགས་པ་ལ་ཉན་པ་རྣམས་ཀྱིས་མ་ཐོས་པ་དག་ལེགས་པར་བཤད་པ་ཡིད་ལ་བྱས་པའི་ཡོན་ཏན་གཉིས་
པ་ཡིན་ནོ། །གཞན་ཡང་ཡོན་ཏན་གསུམ་པ་ཡོད་པ་ནི། ཆོས་སྒྲོགས་པ་རྣམས་ཀྱང་སོ་སོར་རིག་པར་བྱས་ནས་རྣམ་པར་དཔྱོད་པར་བྱེད་དོ། །འདིའི་དོན་ནི་འདི་ཡིན་ནོ། །འདིའི་དོན་ནི་འདི་ཡིན་ཏེ། དགོངས་པ་
འདི་དག་གིས་བཤད་པ་ཡིན་ནོ། །དེ་དག་གིས་སྤྱིའི་དོན་ནི་འདི་དག་ཏུ་རིགས་པ་ཡིན་ཏེ། གདུལ་བྱ་རྣམས་ཀྱི་དབང་གིས་དོན་འདི་བཅོམ་ལྡན་འདས་ཀྱིས་གསུངས་པ་ཡིན་ནོ། །དོན་དེ་དག་རྣམས་ཐོས་ནས་
དཔྱོད་པར་བྱེད་དོ། །འདི་དག་དང་ལྷན་ཅིག་ཏུ་བཅས་ནས་གང་དག་གིས་སེམས་པར་བྱེད་པ་ཡིན་ནོ། །སྔ་ཕྱི་དེས་རྣམ་པར་སྤྱོད་པར་བྱེད་པ་ནི་གཅེས་པར་གྱུར་པ་ཡིན་ནོ། །མྱ་ངན་ལས་འདས་པའི་མཐར་ཐུག་
པར་ཡང་བྱེད་དོ། །འདི་ནི་དམ་པའི་ཆོས་སྒྲོགས་པར་བྱེད་པ་ལ་ཉན་པའི་ཡོན་ཏན་གསུམ་པ་ཡིན་ནོ། །གཞན་ཡང་ཡོན་ཏན་བཞི་པ་ཡོད་པ་ནི། དམ་པའི་ཆོས་བསྒྲགས་པ་རྣམས་རྣམ་པར་དཔྱོད་པར་གྱུར་པ་
ན་བཤད་པ་དེའི་སྔ་མ་དང་ཕྱི་མའི་དོན་དེ་དག་རྣམས་ཕྱི་ནས་རིག་པར་གྱུར་ནས་སྒྲུབ་པར་བྱེད་དོ། །བསྒྲུབ་པ་ཞེས་བྱ་བ་ཡང་ཇི་ལྟར་བཤད་པ་དེའི་དོན་ཡིན་པ་ལས། ཇི་ལྟར་ལུས་དང་ངག་དང་ཡིད་ཀྱི་ལས་

66-1-99a

གྱིས་རབ་ཏུ་སྒྲུབ་པར་བྱེད་པ་ཡིན་ཏེ། དགེ་བ་རྣམ་པ་གསུམ་བྱེད་པ་ཡིན་ནོ། །སྒོམ་པར་བྱེད་དོ། །ལན་མང་དུ་བྱེད་དོ། །བཤད་པ་དེ་ལ་རབ་ཏུ་སྒྲུབ་པར་བྱེད་དོ། །བློ་རབ་ཏུ་དང་
བར་གྱུར་པས་ཚིག་ནས་ཚིག་རྣམས་དང་དབང་སྐལ་ནས་དབང་སྐལ་རྣམས་དང་། འབྲེལ་བ་ནས་འབྲེལ་བ་རྣམས་སུ་རྣམ་པར་དཔྱོད་པར་བྱེད་དོ། །དེས་ཇི་ལྟ་ཇི་ལྟར་རྣམ་པར་དཔྱད་པར་འགྱུར་བ་དེ་ལྟ་དེ་
ལྟར་དོན་ལས་མི་ཉུང་བར་འགྱུར་རོ། །དེས་སྔ་ན་མེད་པའི་དོན་རྣམས་རྙེད་པར་འགྱུར་བའི་ཕྱིར་ཉོན་མོངས་པ་རྣམས་ལ་འབད་པར་བྱེད་དོ། །དེ་ཀུན་དུ་སྦྱོར་བ་རྣམས་དང་རྗེས་སུ་འབྲེལ་བ་རྣམས་ལ་ཡང་འབད་
པར་བྱེད་པ་དང་། ཡོན་ཏན་དུ་མ་རྣམས་དང་ཚུལ་ཁྲིམས་དང་ཤེས་རབ་དང་སྦྱིན་པ་ལ་དེ་ལྟ་དེ་ལྟར་རྗེས་སུ་སྒྲུབ་པར་ཡང་བྱེད་དོ། །གལ་ཏེ་ན་བསམ་པའི་ཁྱད་པར་གྱིས་དང་། སྦྱིན་པ་དང་ཚུལ་ཁྲིམས་དང་
ཤེས་རབ་རྣམས་ལ་སྟེ། འདི་ནི་དམ་པའི་ཆོས་སྒྲོགས་པ་བསྟེན་ཅིང་བསྒོམས་ལ་ལན་མང་དུ་བྱས་པའི་ཡོན་ཏན་བཞི་པ་ཡིན་ནོ། །གཞན་ཡང་དམ་པའི་ཆོས་སྒྲོགས་པ་ལ་ལེགས་པར་ཉན་ཅིང་ལེགས་
པར་རབ་ཏུ་ཞུགས་པར་གྱུར་པའི་ཡོན་ཏན་ལྔ་པ་ཡོད་དེ། ལས་རྣམ་པ་གསུམ་པོ་རྣམས་ཀྱིས་ཕྱི་ནས་བདག་ཉིད་ཤིན་དུ་བརྟན་པར་བྱེད་པ་ཡིན་ནོ། །ཆོས་འདུལ་བ་དེ་ལ་རབ་ཏུ་འགོད་པར་བྱེད་དོ། 
ཇི་ལྟར་ཡང་དགེ་སྦྱོང་ངམ་བྲམ་ཟེ་འམ་ཁྱིམ་པ་རྣམས་ཀྱིས་ཀྱང་འདི་ལྟར་རྗོད་པར་བྱེད་དེ་ཇི་ལྟར་རིགས་ཀྱི་བུ་ཆེ་གེ་མོ་ཞིག་ཆོས་འདུལ་བ་ལ་ལེགས་པར་གནས་པར་གྱུར་ཏེ། དེ་ནི་ཇི་སྐད་བརྗོད་པ་དེ་
ལྟར་བྱེད་པ་ཡིན་ནོ་བྱ་བའོ། །དེ་ལྟར་བདག་ཉིད་དང་གཞན་དག་ཀྱང་ཆོས་འདུལ་བ་དེ་ལ་རབ་ཏུ་གནས་པར་བྱེད་དོ། །དེས་ཇི་ལྟ་ཇི་ལྟར་རབ་ཏུ་འགོད་པར་བྱེད་པ་དེ་ལྟ་དེ་ལྟར་འཁོར་བའི་སྐྱེ་བ་བརྒྱ་སྟོང་

66-1-99b

ཕྲག་བྱེ་བ་ཁྲག་ཁྲིག་དང་། བསྐལ་པ་བརྒྱ་སྟོང་ཕྲག་བྱེ་བ་ནས་བྱེ་བ་རྣམས་འཇོམས་པར་བྱེད་དོ། །འཇིག་པར་བྱེད་དོ། །སྐྱེ་བ་གཞན་གང་དག་བརྒྱ་སྟོང་རྣམས་སུ་དམྱལ་བ་དང་ཡི་དགས་རྣམས་སུ་
སྐྱེ་བར་འགྱུར་བ་རྣམས་འགོག་པར་བྱེད་དོ། །འདི་ཡང་དམ་པའི་ཆོས་བསྒྲགས་པ་ཉན་ཅིང་བསྟེན་པ་ལ་བསྒོམས་ཤིང་རྣམ་པར་དཔྱད་པ་རྣམས་ཀྱི་ཡོན་ཏན་ཆེན་པོ་གཞན་ཡིན་ནོ། །ཆོས་ཉན་པར་
བྱེད་པ་རྣམས་ལ་དམ་པའི་ཆོས་སྒྲོགས་པ་རྣམས་ནི་ཤིན་དུ་གཅེས་པར་གྱུར་པ་ཡིན་ནོ། །མྱ་ངན་ལས་འདས་པ་ཉེ་བར་སྟོན་པར་བྱེད་པའི་ཕྱིར་ན་དོན་གྱིས་ན་སངས་རྒྱས་ཡིན་ནོ། །གང་གིས་ཆོས་
ཀྱི་དབང་དུ་བྱས་ནས་རབ་ཏུ་འགོད་པར་བྱེད་པའི་དམ་པའི་ཆོས་སྨྲ་བ་པོ་དེ་ལ་བླ་ལྷག་ཏུ་མཐུན་པར་འཛིན་པ་དང་གུས་པ་ཆེན་པོ་དང་རབ་ཏུ་དང་བར་གྱུར་པ་རྣམས་གཡོ་མེད་པས་སྟོན་པ་བཞིན་དུ་བྱའོ། 
འདི་ནི་དམ་པའི་ཆོས་ཉན་པའི་ཡོན་ཏན་ལྔ་པ་ཡིན་ནོ། །གཞན་ཡང་དམ་པའི་ཆོས་སྒྲོགས་པའི་ཡོན་ཏན་དྲུག་པ་འདི་དག་ཀྱང་གང་ཞེ་ན། འདི་ལྟ་སྟེ་རང་རབ་ཏུ་གནས་པར་གྱུར་ནས་གཞན་ཡང་རབ་
ཏུ་གནས་པར་བྱེད་ཅིང་། གཞན་དག་རྣམས་ཀྱང་རབ་ཏུ་དད་པར་བྱེད་དོ། །གང་དག་གི་སྐྱེ་བ་གཞན་བརྒྱ་སྟོང་དུ་དམྱལ་བ་དང་ཡི་དགས་སུ་སྐྱེས་པར་གྱུར་པའི་སྡུག་བསྔལ་དུ་མ་རྣམས་བཅོམ་
ནས་སྣོད་དུ་བྱེད་དོ། །འཁོར་བ་ལས་སྐྱོ་བ་སྐྱེད་པར་བྱེད་དོ། །བདེ་ལེགས་ཡང་དག་པར་སྟོན་པར་བྱེད་དོ། །སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་གྱི་གཏམ་བྱེད་དོ། །དེ་གཉིས་ཀའི་
རྒྱུད་ལས་བསོད་ནམས་རབ་ཏུ་འབྱུང་བར་བྱེད་དོ། །དེ་རང་གི་རྒྱུད་ལ་ཡང་སྟེ། དེ་ནི་བདག་གཞན་ལ་ཕན་པར་བྱེད་པ་ཡིན་པས་བསོད་ནམས་ཆེན་པོ་རབ་ཏུ་འབྱུང་བར་འགྱུར་རོ། །ཇི་ལྟ་ཇི་ལྟར་

66-1-100a

དམ་པའི་ཆོས་སྒྲོགས་པ་ཉན་པར་བྱེད་པ་དེ་ལྟ་དེ་ལྟར་ཤེས་རབ་མངོན་པར་འཕེལ་བར་འགྱུར་རོ། ། དེ་ལྟ་དེ་ལྟར་ཉོན་མོངས་པ་རྣམས་ཟད་པར་བྱེད་དོ། །དེ་ཉོན་མོངས་པ་རྣམས་
ཟད་པས་ཡོངས་སུ་མྱ་ངན་ལས་འདའ་བར་འགྱུར་རོ། །དམ་པའི་ཆོས་སྒྲོགས་པའི་ཡོན་ཏན་ནི་དེ་དག་རྣམས་ཡིན་ནོ། །གཞན་ཡང་དམ་པའི་ཆོས་སྒྲོགས་པ་བསྟེན་ཅིང་བསྒོམས་ལ་ལན་མང་དུ་
བྱས་པའི་ཡོན་ཏན་བདུན་པ་ཡོད་དོ། །འདི་ཡང་གང་ཞེ་ན། འདི་ལྟ་སྟེ་རྒུད་པས་སེམས་ཞུམ་པར་མི་འགྱུར་རོ། །ལས་ཀྱི་འབྲས་བུ་རྣམ་པར་སྨིན་པ་རྣམས་ཐོས་ནས་རྒུད་པས་ཞུམ་པར་མི་འགྱུར་
རོ། །བྱ་བ་མ་ཡིན་པ་རྣམས་མི་བྱེད་དོ། །བརྗོད་པར་བྱ་བ་མ་ཡིན་པ་རྣམས་རྗོད་པར་ཡང་མི་བྱེད་དོ། །བསམ་པར་བྱ་བ་མ་ཡིན་པའི་བསམ་ཁྲལ་རྣམས་སེམས་པར་མི་བྱེད་དོ། །འདིའི་སེམས་
ཀྱི་དཔའ་རབ་ཏུ་ཉམས་པར་ཡང་མི་འགྱུར་རོ། །འདི་ནི་དམ་པའི་ཆོས་བསྒྲགས་པའི་ཡོན་ཏན་བདུན་པ་ཡིན་ནོ། །གཞན་ཡང་དམ་པའི་ཆོས་བསྒྲགས་པའི་ཡོན་ཏན་བརྒྱད་པ་ནི། ཡང་གཞན་དག་ལ་
ཤེས་པ་འམ་ཐོས་པ་འམ་ཚུལ་ཁྲིམས་སམ་ཤེས་རབ་བམ་ལུང་གིས་ལྷག་པ་མཐོང་བར་གྱུར་ནས་ང་རྒྱལ་དང་ལྡན་པར་མི་བྱེད་པར་དེ་དག་དང་ལྷན་ཅིག་ཏུ་ཆོས་ཀྱིས་མཚན་ཉིད་ལ་རྣམ་པར་དཔྱོད་པར་
བྱེད་དོ། །བཤད་པ་དེ་དང་དེ་དག་གི་དོན་རྣམ་པར་འདྲེས་པར་འགྱུར་བ་རྣམས་ཀྱང་གསལ་བར་བྱེད་དོ། །འདི་ནི་དམ་པའི་ཆོས་བསྒྲགས་པའི་ཡོན་ཏན་བརྒྱད་པ་ཡིན་ནོ། །དགེ་བའི་རྩ་བ་མ་སྐྱེས་པ་
རྣམས་སྐྱེད་པར་བྱེད་དེ། གང་གི་ཕྱིར་དམ་པའི་ཆོས་བསྒྲགས་པ་ཐོས་པར་གྱུར་ནས་དགེ་བའི་རྩ་བ་མ་བསྐྲུན་པ་རྣམས་བསྐྲུན་པར་བྱེད་དོ། །དམ་པའི་ཆོས་སྒྲོགས་པ་རྣམས་འདོད་པས་དགེ་བའི་རྩ་བ་རྣམས་

66-1-100b

སྐྱེད་པར་བྱེད་པ་ནི་འདི་ལྟ་སྟེ་ཞིང་གི་རྣང་ལ་ས་བོན་ཀུན་ནས་སོ་སོར་བཏབ་པར་གྱུར་པས་མྱུ་གུ་རྣམས་རབ་ཏུ་སྐྱེ་བར་ནུས་པར་འགྱུར་རོ། །དེ་ཁོ་ན་བཞིན་དུ་བརྩོན་འགྲུས་དྲག་པ་རྣམས་ཀྱི་དགེ་བའི་རྩ་
བ་ཡང་ཆོས་ཉན་པ་པོ་རྣམས་ཀྱིས་ཆོས་སྒྲོགས་པར་ཕྱིན་ཅིང་ཆོས་སྨྲ་བའི་དྲུང་ནས་དགེ་བའི་རྩ་བའི་ས་བོན་རྣམས་རྣ་བའི་བུ་ག་ནས་ཞུགས་ནས་ཡིད་ཀྱི་ཞིང་རྣང་ལ་ལེགས་པར་སྐྱེའོ། །ཆོས་ཀྱི་ས་བོན་
རྣ་བའི་ཞིང་རྣང་ལ་རྗེས་སུ་ཞུགས་པ་དེ་དུས་གཞན་དུ་འབྲས་བུ་རྣམ་པར་རྒྱས་པར་གྱུར་པས་དམྱལ་བ་དང་ཡི་དགས་དང་དུད་འགྲོའི་འགྲོ་བའི་སྡུག་བསྔལ་གྱི་མུ་གེའི་འཇིགས་པ་རྣམས་ལས་ཡོངས་
སུ་སྐྱོབ་པར་བྱེད་དོ། །དེའི་ཕྱིར་དེ་དག་རྣམས་ལས་ཡོངས་སུ་བསྐྱབ་པར་བྱས་ཤིང་སྡུག་བསྔལ་དེ་དག་རྣམས་ཐམས་ཅད་ཀྱང་རབ་ཏུ་གཞོམ་པར་བྱས་ལ། ངམ་གྲོག་རྣམས་ཐམས་ཅད་ཀྱང་བཅད་ཅིང་
འཇིགས་པ་རྣམས་ཐམས་ཅད་ལས་གྲོལ་བར་བྱས་ནས། ཞི་བའི་གོ་འཕང་བླ་ན་མེད་པར་གྱུར་པའི་བར་དུ་འཇུག་པར་བྱེད་དོ། །དེ་ནས་ནི་མྱ་ངན་ལས་འདས་པར་ཞུགས་པར་འགྱུར་བ་ཡིན་ནོ། །དམ་
པའི་ཆོས་སྒྲོགས་པར་བྱེད་པ་དེ་ནི་དོན་དེ་དག་གི་ཕྱིར་ན་སངས་རྒྱས་ཀྱི་མཛད་པ་བྱས་པ་ཡིན་ནོ། །དེའི་ཕྱིར་དམ་པའི་ཆོས་སྒྲོགས་པར་བྱེད་པ་དེའི་ཡོན་ཏན་གཞན་འདི་དག་ཡིན་ཏེ། གང་དམ་པའི་ཆོས་
རྟག་ཏུ་སྒྲོགས་པ་ལ་འགྲོ་བ་དང་བསྙེན་བཀུར་བྱེད་པ་དང་སྒྲུབ་པར་བྱེད་པ་དེ་དག་རྣམས་ནི་སྐྱབས་ཡིན་ཞིང་འཁོར་བ་ལས་ངེས་པར་འབྱུང་བར་བྱེད་པའི་སྒོ་ཡིན་ནོ། །དམ་པའི་ཆོས་སྒྲོགས་པར་བྱེད་པ་རྣམས་
ལ་ནི་ཡོན་ཏན་གཞན་དག་ཀྱང་ཡོད་དོ། །འདི་དག་ཀྱང་གང་ཞེ་ན། འདི་ལྟ་སྟེ་གོང་དུ་སྐྱོང་བར་བྱེད་པའོ། །དགེ་བའི་རྩ་བ་རྣམས་རྒྱ་ཆེན་པོར་གོང་དུ་ཡོངས་སུ་སྨིན་པར་བྱེད་དོ། །གང་འགའ་ཞིག་ཆོས་སྒྲོགས་པ་

66-1-101a

ལ་རྟག་ཏུ་ཉན་དུ་འགྲོ་བར་བྱེད་པའི་བརྩོན་འགྲུས་དྲག་པོ་དང་ལྡན་པ་དེའི་དགེ་བའི་རྩ་བ་རྣམས་ནི་ཕྱི་ནས་ཡོངས་སུ་སྨིན་པར་འགྱུར་རོ། །དཔེར་ན་ཞིང་གི་རྣང་ལ་ས་བོན་རབ་ཏུ་བཏབ་
པར་གྱུར་པ་ལས་དུས་ཕྱིས་ཉི་མའི་འོད་ཟེར་གྱིས་དང་དུས་ཀྱི་འགྱུར་བ་ལས་ཡོངས་སུ་སྨིན་པར་འགྲོའོ། །དེ་བཞིན་དུ་ཕྱི་ནས་དགེ་བའི་རྩ་བ་རྣམས་ཤེས་རབ་ཀྱི་ཉི་མས་ཡོངས་སུ་སྨིན་པར་བྱེད་དོ། །དེའི་
ཕྱིར་རྟག་པར་རྒྱུན་མི་འཆད་པར་དམ་པའི་ཆོས་བསྒྲགས་པར་འགྱུར་རོ། །མཉན་པར་ཡང་བྱའོ། །དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་དག་ཞེ་ན། འདི་ལྟ་སྟེ་ཡོངས་
སུ་སྨིན་ངེས་པར་གྲོལ་བར་བྱེད་དོ། །གང་གི་ཚེ་སེམས་ལ་དགེ་བའི་རྩ་བ་རྣམས་ཡོངས་སུ་སྨིན་པར་གྱུར་པ་དེའི་ཚེ། འདི་ཁོ་ན་ལ་རྟག་ཏུ་འགྲོ་བ་དང་འཛིན་པ་དང་རྣམ་པར་དཔྱོད་པ་དང་སྒྲུབ་པར་བྱེད་པའི་
རྒྱུས་སེམས་ཀྱི་རྒྱུད་དེ་ཡོངས་སུ་སྦྱང་བ་བྱས་པའི་ཕྱིར་ཉོན་མོངས་པ་རྣམས་འཇོམས་པར་བྱེད་དོ། །ཉོན་མོངས་པ་རྣམས་ཟད་པས་ཡོངས་སུ་འགྲོལ་བར་འགྱུར་རོ། །ངེས་པར་རྣམ་པར་གྲོལ་བ་
རྣམས་ནི་ཆགས་པ་མེད་པར་འགྱུར་བས། དེ་འདི་སྙམ་དུ་སེམས་ཏེ་བདག་གི་སྐྱེ་བ་རྣམས་ནི་ཟད་དོ། །ཚངས་པར་སྤྱོད་པ་ནི་སྤྱད་དོ། །བྱ་བ་རྣམས་ནི་བྱས་སོ། །བདག་གི་སྲིད་པ་གཞན་རྣམས་ནི་རབ་ཏུ་
མི་ཤེས་སོ། །དེ་ལ་ཡོན་ཏན་དེ་དག་རྣམས་ཐམས་ཅད་ཀྱང་དམ་པའི་ཆོས་བསྒྲགས་པ་ལས་ཡིན་ནོ། །དེའི་ཕྱིར་ན་རྒྱུན་མི་འཆད་པར་ཆོས་མཉན་པར་བྱའོ། །ཡང་ཐབས་གཞན་གྱིས་ངེས་པར་གྲོལ་བར་
བྱེད་པའི་རྒྱུའི་ཡོན་ཏན་གཞན་ཡོད་དོ། །འདི་དག་ཀྱང་གང་ཞེ་ན། འདི་ལྟ་སྟེ་ལོག་པའི་ལྟ་བ་ཅན་རྣམས་ཡང་དག་པའི་ལྟ་བ་ཅན་དུ་བྱེད་དོ། །གང་ཡང་ཐོག་མ་མེད་པའི་དུས་ནས་འཁོར་བའི་བྱ་བ་ངན་པ་

66-1-101b

རྣམས་ཀྱིས་ཕྱིན་ཅི་ལོག་ལ་རབ་ཏུ་ཞུགས་པའི་འགྲོ་བ་རྣམས་ཐོས་པ་ངན་པ་རྣམས་ལ་ཀུན་དུ་འཇུག་པར་འགྱུར་བ་ཡིན་ནོ། །ཐོས་པ་ངན་པས་ཀྱང་དམྱལ་བ་དང་ཡི་དགས་དང་དུད་འགྲོའི་འགྲོ་བ་རྣམས་སུ་སྐྱེ་བར་
འགྱུར་བ་ཡིན་ནོ། །གང་གི་ཚེ་དམ་པའི་ཆོས་ཉན་པར་བྱེད་པ་དང་དམ་པའི་ཆོས་སྒྲོགས་པ་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པ་ན། དེའི་ཚེ་ལོག་པར་ལྟ་བ་དེ་དག་སྟེན་ཅིང་སྒོམ་ལ་ལན་གྲངས་མང་
དུ་བྱེད་པར་ཡང་མི་འགྱུར་རོ། །དེའི་ཚེ་འདི་ལ་བདེ་བ་རྣམས་ཀྱི་མཆོག་ཏུ་གྱུར་པ་དང་། སླུ་བ་མེད་པའི་ཡང་དག་པའི་ཡེ་ཤེས་འཆར་བར་འགྱུར་རོ། །དེའི་ཕྱིར་ན་དམ་པའི་ཆོས་བསྟེན་ཅིང་བསྒོམས་ལ་ལན་མང་དུ་བྱས་པར་
གྱུར་པའི་ཡོན་ཏན་གཞན་ཡང་འདི་དག་ཡོད་དོ། །འདི་ཡང་གཞན་གང་དག་ཞེ་ན། འདི་ལྟ་སྟེ་སྐྱེས་པར་གྱུར་པའི་མི་དགེ་བའི་རྩ་བའི་རྣམ་པར་རྟོག་པ་རྣམས་སོ་སོར་འཇོམས་པར་བྱེད་དོ། །ཡང་དམ་པའི་ཆོས་བསྒྲགས་པ་
བསྟེན་ཅིང་བསྒོམས་ལ་ལན་མང་དུ་བྱས་པའི་ཡོན་ཏན་འདི་དག་ནི་གཞན་ཡིན་ནོ། །འདི་ཡང་གང་ཞེ་ན། འདི་ལྟ་སྟེ། མི་དགེ་བའི་རྣམ་པར་རྟོག་པ་ཉུང་ངུ་ཙམ་ཞིག་ཡིད་ལ་སྐྱེས་པར་གྱུར་ཀྱང་། དེའི་ཚེ་མི་དགེ་བ་
གཉེན་པོས་ངེས་པར་འཇོམས་པར་བྱེད་པ་ལ་འདི་ལྟ་སྟེ། གང་གི་ཚེ་འདོད་ཆགས་ཀྱི་རྣམ་པར་རྟོག་པ་སྐྱེས་པར་གྱུར་ན་ནི། དེའི་ཚེ་མི་སྡུག་པའི་གཉེན་པོས་ངེས་པར་འཇོམས་པར་བྱེད་དོ། །གང་གི་ཚེ་ཞེ་སྡང་གི་རྣམ་
པར་རྟོག་པ་སྐྱེས་པར་གྱུར་ན། དེའི་ཚེ་བྱམས་པའི་རྣམ་པར་རྟོག་པས་འཇོམས་པར་བྱེད་དོ། །གལ་ཏེ་གཏི་མུག་གི་རྣམ་པར་རྟོག་པ་སྐྱེས་པར་གྱུར་ན་ནི། དེའི་ཚེ་རྟེན་ཅིང་འབྲེལ་བར་འབྱུང་བའི་གཉེན་པོས་འཇོམས་
པར་བྱེད་དོ། །དེ་ལ་གཉེན་པོ་དེ་དག་རྣམས་ནི་དམ་པའི་ཆོས་སྒྲོགས་པ་ལ་ཉན་པ་ལས་ཡིན་ནོ། །དེ་ལ་མ་ཐོས་པ་རྣམས་ཀྱིས་ནི་རེ་ཤིག་མི་དགེ་བའི་རྩ་བ་གསུམ་པོ་རྣམས་ཀྱི་རྣམ་པར་རྟོག་པ་ཡང་རྣམ་པར་འཇོམས་པར་

66-1-102a

བྱེད་པ་མ་ཡིན་ནོ། །གང་དག་ཕྲ་བར་གྱུར་པ་ཉེ་བའི་ཉོན་མོངས་པ་གཞན་དེ་དག་རྣམས་ཀྱི་སོ་སོར་འཇོམས་པར་འབྱུང་བར་མི་འགྱུར་བ་ལ་ལྟ་སྨོས་སུ་ཅི་ཞིག་ཡོད་ནས། དེའི་ཕྱིར་དམ་པའི་ཆོས་སྒྲོགས་
པའི་ཡོན་ཏན་འདི་ཡང་གཞན་ཡིན་ནོ། །དམ་པའི་ཆོས་ཀྱིས་ཀྱང་མི་དགེ་བའི་རྣམ་པར་རྟོག་པ་རྣམས་སོ་སོར་འཇོམས་པར་བྱེད་དོ། །གང་གི་ཚེ་ཉི་མས་མུན་པ་རྣམས་འཇོམས་པར་བྱེད་པ་ཡིན་ལ། དེ་བཞིན་དུ་ཤེས་རབ་
ཀྱིས་ཀྱང་ཉོན་མོངས་པའི་མུན་པ་རྣམས་ཐམས་ཅད་འཇོམས་པར་བྱེད་པ་ཡིན་ཏེ། དམ་པའི་ཆོས་ཀྱི་ཕྱོགས་ནི་སྟོབས་དང་ལྡན་པ་ཡིན་ལ། ཉོན་མོངས་པའི་ཕྱོགས་ནི་སྟོབས་ཞན་པ་ཡིན་པའི་ཕྱིར་རོ། །དེ་ཡང་དམ་པའི་
ཆོས་སྒྲོགས་པ་མ་གཏོགས་པའི་གཞན་རྣམས་ཀྱིས་ནི་གཞོམ་པར་མི་ནུས་སོ། །འདི་ནི་དམ་པའི་ཆོས་སྒྲོགས་པའི་ཡོན་ཏན་གཞན་ཡིན་ནོ། །དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན་
འདི་ལྟ་སྟེ། དགེ་བའི་སེམས་སྐྱེས་པ་རྣམས་འཕེལ་བར་བྱེད་པའོ། །འདི་ནི་དམ་པའི་ཆོས་སྒྲོགས་པའི་ཡོན་ཏན་གཞན་ཡིན་ཏེ། མི་དགེ་བ་རྣམས་རབ་ཏུ་འཇོམས་པར་བྱེད་པ་འབའ་ཞིག་ནི་མ་ཡིན་གྱི། དགེ་བའི་རྣམ་
པར་རྟོག་པ་སྐྱེས་པ་རྣམས་འཕེལ་བར་བྱེད་དོ། །གང་གི་ཚེ་འདི་ལ་དགེ་བའི་རྣམ་པར་རྟོག་པ་རྣམས་སྐྱེས་པར་གྱུར་པ་དེའི་ཚེ་འཕེལ་བར་བྱེད་པ་ནི་འདི་ལྟར་ཤེས་རབ་ཀྱིས་ཡིན་ནོ། །དཔེར་ན་མེ་ཆུངུ་ཙམ་ཞིག་སྐྱེས་པར་
གྱུར་པ་ལ། གང་གི་ཚེ་རྩྭ་དང་ཤིང་ལ་སོགས་པ་རྣམས་དང་རླུང་དང་བཅས་པར་གྱུར་ཅིང་ལྷན་ཅིག་དུ་འདུས་ཤིང་ཚོགས་པར་གྱུར་པ་དེའི་ཚེ་འཕེལ་བར་འགྱུར་རོ། །དེ་བཞིན་དུ་དགེ་བའི་རྩ་བ་ཆུང་ངུ་སྐྱེས་པར་གྱུར་པ་
ཡང་ཤེས་རབ་ཀྱིས་ཀུན་དུ་འཕེལ་བར་བྱེད་དེ། དམ་པའི་ཆོས་བསྒྲགས་པ་ལས་གང་དག་ཐོས་པའི་དོན་དང་ལྡན་པར་གྱུར་པའི་དགེ་བའི་སེམས་བསྐྱེད་པ་གཅིག་ཀྱང་བསྐལ་པ་བརྒྱ་སྟོང་དུ་མ་རྣམས་སུ་ཡང་ཆུད་ཟ་

66-1-102b

བར་མི་འགྱུར་རོ། །མི་སྐྱེ་བར་བྱ་བའི་དོན་ཡང་བྱེད་དོ། །དེའི་ཕྱིར་ཡོན་ཏན་དེ་དག་གོ་བར་གྱིས་ལ་རབ་ཏུ་བརྩོན་པས་ཀྱང་ཆོས་ཉན་པར་བྱའོ། །ཆོས་ལས་སྐྱོབ་པར་བྱེད་པ་གཞན་ནི་མེད་དོ། །ཆོས་ཐོས་པ་ལས་སྦྱིན་
པ་བཏང་བར་གྱུར་པས་སྦྱིན་བདག་ཏུ་འགྱུར་བ་ཡིན་ནོ། །ཆོས་རྣམས་ཐོས་ནས་ཆོས་བསྲུངས་པ་ལས་མཁས་པར་འགྱུར་བ་ཡིན་ནོ། །ཆོས་ཐོས་ནས་ཤེས་རབ་དང་ལྡན་པར་འགྱུར་རོ། །དེའི་ཕྱིར་ཡོན་ཏན་དེ་དག་
རྣམས་ཐོས་ཤིང་ལེགས་པར་མཐོང་བར་གྱུར་ནས་འཁོར་བ་ཐམས་ཅད་ལས་ངེས་པར་འབྱུང་བའི་རྒྱུར་གྱུར་པའི་ཆོས་ལ་རབ་ཏུ་བརྩོན་པས་ཀྱང་ཇི་སྲིད་འཚོའི་བར་དུ་རབ་ཏུ་བརྩོན་པས་མཉན་པར་བྱའོ། །དེ་དག་ནི་སྐྱོབ་
པ་རྣམས་ཀྱི་མཆོག་ཡིན་ཞིང་། དམ་པའི་ཆོས་སྒྲོགས་པ་གང་ཡིན་པས་ནི་སྲིད་པའི་སྡུག་བསྔལ་རྣམས་ལས་ངེས་པར་འབྱུང་བར་བྱེད་པའི་ཕྱིར་དེ་དག་ནི་མཆོག་ཏུ་གྱུར་པ་ཡིན་ནོ། །ཡང་དམ་པའི་ཆོས་སྒྲོགས་པ་ལ་ནི་
ཡོན་ཏན་གཞན་ཡོད་དོ་འདི་ཡང་གང་ཞེ་ན་འདི་ལྟ་སྟེ། མི་དགེ་བ་རྣམས་ཡོངས་སུ་སྤོང་བའོ། །རྐྱེན་ཀྱི་མི་དགེ་བ་རྣམས་འོངས་པར་གྱུར་ན་ཡོངས་སུ་སྤོང་བར་བྱེད་དོ། །གང་གི་ཚེ་མི་དགེ་བའི་རྐྱེན་ཀྱིས་སྐྱེས་པར་གྱུར་པ་ན། དེའི་
ཚེ་ངན་སོང་གི་འཇིགས་པ་རྣམས་ཀུན་ནས་མཐོང་བར་གྱུར་ནས་ཡོངས་སུ་འདོར་བར་བྱེད་དོ། །ཡོངས་སུ་སྤྱོད་པར་བྱེད་པ་པོ་འཁོར་བའི་འཇིགས་པ་རྣམས་ཀྱིས་འཇིགས་པར་གྱུར་པ་དེ་ཁོ་ན་ཉིད་ཡོངས་སུ་རྟོག་པ་པོས་
རྐྱེན་ཀྱིས་མི་དགེ་བ་སྐྱེས་པ་རྣམས་ཀྱང་ཡོངས་སུ་སྤོང་བར་བྱེད་དོ། །དེ་ལ་འཇུག་པར་མི་བྱེད་དོ། །དེ་མི་སྐྱེད་པར་བྱ་བའི་དོན་དུ་དེ་དག་ལ་ཚུལ་ཁྲིམས་དང་ལྡན་པ་དང་ཤེས་རབ་དང་ལྡན་པར་འགྱུར་རོ། །གང་གི་ཚེ་རྙེད་པ་དང་བཀུར་སྟི་
ལ་དད་པ་ཆེ་བར་གྱུར་པ་ན། དེ་སྦྱིན་པས་རབ་ཏུ་འཇོམས་པར་བྱེད་དོ། །སེར་སྣའི་དྲི་མ་རྣམས་ནི་འདོད་པ་མེད་པས་རབ་ཏུ་འཇོམས་སོ། །ཀུན་དུ་མི་ཤེས་པ་ནི་ཤེས་རབ་ཀྱིས་སོ། །རྣམ་པར་རྟོག་པ་རྣམས་ནི་ཡང་དག་པ་ཇི་ལྟ་བའི་

66-1-103a

དོན་མཐོང་བས་སོ། །མུ་སྟེགས་པའི་ངག་རྣམས་ནི་རིགས་པ་དང་ལྡན་པའི་ངག་གིས་སོ། །ཡང་དག་པ་མ་ཡིན་པའི་རྣམ་པར་རྟོག་པ་རྣམས་ནི་ཡང་དག་པའི་རྣམ་པར་རྟོག་པས་སོ། །བདེ་བའི་རྣམ་པར་རྟོག་པ་
རྣམས་ནི་སྡུག་བསྔལ་གྱི་རྣམ་པར་རྟོག་པས་སོ། །སྟོང་པ་མ་ཡིན་པའི་རྣམ་པར་རྟོག་པ་རྣམས་ནི་སྟོང་པའི་རྣམ་པར་རྟོག་པས་སོ། །བདག་གི་རྣམ་པར་རྟོག་པ་རྣམས་ནི་བདག་མེད་པའི་རྣམ་པར་རྟོག་པས་སོ། །དེ་ལྟར་ཡང་དག་པར་
གྱུར་པའི་གཉེན་པོར་གྱུར་པ་རྣམས་ཀྱི་གཉེན་པོའི་རྣམ་པར་རྟོག་པར་འགྱུར་བ་དེ་རྣམས་ཀྱིས་ཡོངས་སུ་སྤོང་བར་བྱེད་དོ། །རྐྱེན་ལས་བྱུང་བའི་ཡང་ཤིན་དུ་ཕྲ་བ་འམ་རགས་པ་འམ་བར་མ་ཡང་ཡོངས་སུ་སྤོང་བར་བྱེད་དོ། །དེ་
ཐམས་ཅད་ལ་གནས་སྐབས་ཐམས་ཅད་དུ་མི་དགེ་བའི་རྐྱེན་རྣམས་དམ་པའི་ཆོས་ཐོས་ནས་སྤོང་བར་བྱེད་ཀྱི་མ་ཐོས་པར་ནི་མ་ཡིན་ནོ། །དམ་པའི་ཆོས་བསྒྲགས་པ་ནི་བདེ་ལེགས་རྣམས་ཐམས་ཅད་ཀྱི་གཞིར་གྱུར་པ་
ལྟ་བུ་ཡིན་ནོ། །ཡང་དམ་པའི་ཆོས་བསྒྲགས་པ་ལ་ཡོན་ཏན་གཞན་ཡོད་དོ། །འདི་ཡང་གང་ཞེ་ན། འདི་ལྟ་སྟེ། བག་ཡོད་པར་གྱུར་པའོ། །གང་གི་ཚེ་རྣམ་པར་རྟོག་པ་རྣམས་ཡོངས་སུ་སྤོང་བར་བྱེད་པ་དེའི་ཚེ་བག་ཡོད་པར་འགྱུར་རོ། །
དེས་ནི་བདེ་ལེགས་རྣམས་ཐམས་ཅད་འཐོབ་པར་འགྱུར་རོ་བག་མེད་པ་དེ་ཡང་གང་གིས་མེད་པར་འགྱུར་བ་ཡིན་ན། དམ་པའི་ཆོས་བསྒྲགས་པ་འབའ་ཞིག་གིས་ཡིན་ཏེ། གང་གི་ཕྱིར་བག་མེད་པའི་སྐྱོན་རྣམས་ཐོས་
ནས་ཡོངས་སུ་སྤོང་བར་བྱེད་དོ། །དམ་པའི་ཆོས་བསྒྲགས་པ་ལས་གྱུར་པས་བག་ཡོད་པ་དེའི་དབང་པོ་ལྔ་པོ་རྣམས་དབང་དུ་འགྱུར་རོ། །དབང་པོ་ལྔ་ཀུན་དུ་བསྡུས་པ་དེའི་བློ་ནི་ཚུལ་བཞིན་མ་ཡིན་པ་ཡིད་ལ་བྱེད་པས་གནོད་
པར་མི་འགྱུར་རོ། །རྟག་པར་རྒྱུན་ཏུ་ཡང་ཚུལ་བཞིན་ཡིད་ལ་བྱེད་པ་སྟེན་པར་བྱེད་དོ། །དེས་ཚུལ་བཞིན་ཡིད་ལ་བྱེད་པ་དེ་མགུ་བར་བྱས་པར་གྱུར་ན་མཆོག་ཏུ་བདེ་བར་གྱུར་པ་རྣམས་འཐོབ་པར་འགྱུར་རོ། །གང་གི་

66-1-103b

ཕྱིར་བག་མེད་པའི་རྩ་བ་ལས་ཉོན་མོངས་པའི་ཚོགས་རྣམས་ཐམས་ཅད་ཡིན་ནོ། །དེ་བཞིན་དུ་བག་ཡོད་པའི་གཞི་ལས་ཀྱང་རྣམ་པར་བྱང་བའི་ཕྱོགས་རྣམས་ཡོད་དོ། །དེའི་ཕྱིར་བག་མེད་པ་རྣམས་ཀྱི་གཉེན་
པོར་གྱུར་པ་ཡིན་པས་དམ་པའི་ཆོས་ཅི་ནས་ཀྱང་བསྒྲགས་པར་བྱ་བ་ཁོ་ན་ཡིན་ནོ། །ཡང་དང་ཡང་དུ་བསྒོམ་པར་བྱའོ། །ལན་མང་དུ་བྱའོ། །གཞན་ཡང་དམ་པའི་ཆོས་སྒྲོགས་པ་ལ་ཡོན་ཏན་ཡོད་དོ། །འདི་ཡང་
གང་དག་ཞེ་ན། འདི་ལྟ་སྟེ། སྐྱེས་བུ་དམ་པ་ལ་ཉེ་བར་སྟེན་པར་བྱེད་པའོ། །དམ་པའི་ཆོས་ཐོས་ནས་ཀྱང་སྐྱེས་བུ་དམ་པ་ཉིད་ལ་སྟེན་པར་བྱེད་དོ། །དགའ་བར་ཡང་སྐྱེས་བུ་དམ་པ་དང་བྱེད་དོ། །སྐྱེས་བུ་དམ་པ་
རྣམས་དང་ལྷན་ཅིག་དུའོ། །དགའ་བར་གྱུར་པ་རྣམས་ཀྱི་ནི་མཆོག་འདི་ལྟ་སྟེ། སེམས་མཉམ་པ་ཉིད་དོ། །ཡོན་ཏན་གྱི་མཆོག་རྣམས་སྐྱེས་བུ་དམ་པ་དང་བསྟེན་པ་ལས་འབྱུང་བར་འགྱུར་རོ། །སྐྱེས་བུ་དམ་པ་དང་
སྟེན་པ་ནི་ཡོན་ཏན་རྣམས་ཀྱི་མཆོག་ཡིན་ནོ། །དེ་བཞིན་དུ་སྐྱོན་རྣམས་ཀྱི་ཡང་རྩེ་མོ་ནི་སྐྱེས་བུ་དམ་པ་མ་ཡིན་པ་དང་འགྲོགས་པ་ཡིན་ནོ། །སྐྱེས་བུ་དམ་པ་ལ་སྟེན་པར་བྱེད་པ་དེ་ཡང་དམ་པའི་ཆོས་ལ་སྟེན་པ་མ་གཏོགས་
པ་གཞན་དུ་ནི་མ་ཡིན་ནོ། །དེའི་ཕྱིར་འདི་ནི་ཚངས་པར་སྤྱོད་པའི་མཆོག་ཡིན་ཏེ། འདི་ལྟར་སྐྱེས་བུ་དམ་པ་ལ་སྟེན་པར་བྱེད་པའོ། །གཞན་ཡང་དམ་པའི་ཆོས་སྒྲོགས་པ་ལ་ཡོན་ཏན་ཡོད་དོ། །འདི་ཡང་གང་ཞེ་ན་འདི་ལྟ་
སྟེ། གཡོ་དང་སེར་སྣ་རབ་ཏུ་འཇོམས་པར་བྱེད་པའོ། །སྐྱེས་བུ་དམ་པ་བསྟེན་པར་བྱེད་པ་རྣམས་ཀྱི་ཡོན་ཏན་གང་དག་འཐོབ་པར་འགྱུར་བ་ཡིན་ན། གལ་ཏེ་ཡང་སྐྱེས་བུ་དམ་པ་ལ་བསྟེན་པས་ཡོན་ཏན་དུ་མ་རྣམས་
ཡོད་པ་ཡིན་གྱིས་ཀྱང་། ཡོན་ཏན་འདི་ནི་རབ་ཏུ་ཁྱད་པར་དུ་འཕགས་པ་ཡིན་ཏེ། འདི་ལྟ་སྟེ་ཆོས་རྣམས་ཀྱི་འབྲས་བུ་རྣམ་པར་སྨིན་པ་ཐོས་པར་གྱུར་ནས་གཡོ་དང་སེར་སྣ་རབ་ཏུ་འཇོམས་པར་བྱེད་པའོ། །འདིའི་གཡོ་དང་སེར་

66-1-104a

སྣ་དག་གིས་ཇི་ལྟར་འགྱུར་བ་ཡིན་ན། དེའི་ལུས་ཞིག་པར་གྱུར་ནས་ཤི་བའི་འོག་ཏུ་ངན་སོང་ལོག་པར་ལྷུང་ནས་ཡི་དགས་སམ་དམྱལ་བ་རྣམས་སུ་སྐྱེ་བར་འགྱུར་རོ། །དེས་གལ་ཏེ་དམ་པའི་ཆོས་བསྒྲགས་
པ་ལས་ལས་རྣམས་ཀྱི་འབྲས་བུ་ཐོས་པར་གྱུར་ནས་གཡོ་དང་སེར་སྣ་མང་བར་གྱུར་པ་ཡིན་ན་དེས་རབ་ཏུ་འཇོམས་པར་བྱེད་དོ། །སྨྲེ་བར་བྱེད་དོ། །གལ་ཏེ་ཐ་མལ་པ་ཡིན་པར་གྱུར་ན་སྨོད་པར་བྱེད་ཅིང་སྨྲེ་བར་བལྟའོ། །བཤགས་
པར་བྱེད་དོ། །གཞན་དག་གཡོ་དང་སེར་སྣ་དང་ལྡན་པར་གྱུར་ན་ཡང་རབ་ཏུ་འགོགས་པར་བྱེད་དོ། །སྨོད་པར་བྱེད་དོ། །བཤགས་སུ་འཇུག་གོ། །དགེ་ཞིང་ལེགས་པའི་ལམ་དམ་པར་འགོད་པར་བྱེད་དོ། །དེ་ལ་ཡོན་ཏན་དེ་དག་
རྣམས་ནི་དམ་པའི་ཆོས་བསྒྲགས་པ་དང་ཉན་པ་ལས་ཡིན་ནོ། །དེའི་ཕྱིར་ན་མི་རྣམས་ཀྱི་སྙིང་པོ་ནི་གང་དམ་པའི་ཆོས་སྒྲོགས་པར་བྱེད་པ་དེ་དག་ཡིན་ནོ། །གཞན་ཡང་དམ་པའི་ཆོས་སྒྲོགས་པ་ལ་ཡོན་ཏན་ཡོད་དོ། །འདི་
ཡང་གང་དག་ཞེ་ན། འདི་ལྟ་སྟེ། མ་དང་ཕ་ལ་གུས་པ་དང་ལྡན་པར་གྱུར་པའོ། །དམ་པའི་ཆོས་ཐོས་པར་གྱུར་པ་གང་གི་ཕྱིར་ལས་རྣམས་ཀྱི་རྣམ་པར་སྨིན་པ་དང་ཞིང་གི་ཡོན་ཏན་རྣམས་ཀུན་དུ་རིག་པར་འགྱུར་ཏེ། ཇི་ལྟར་
མཆོག་ཏུ་གྱུར་པའི་ཞིང་དེ་དག་ནི། འདི་ལྟ་སྟེ་མ་དང་ཕ་དག་ཡིན་ནོ། །དེ་གང་གི་ཚེ་ལས་ཀྱི་འབྲས་བུ་ལ་ཡིད་ཆེས་པ་མངོན་པར་སྐྱེས་པར་གྱུར་ན་དེའི་ཚེ་སེམས་ལ་བསྒོམས་ནས་མ་དང་ཕ་དག་ལ་མཆོད་པར་བྱེད་དོ། །རབ་
ཏུ་ཕལ་ཆེ་བར་གྱུར་པའི་ནད་ཀྱི་རྐྱེན་སྨན་དང་ཡོ་བྱད་རྣམས་ཀྱིས་ལེགས་པར་སྦྱོར་བར་བྱེད་དོ། །དེ་ཇི་ལྟ་ཇི་ལྟར་མ་དང་ཕ་དག་ལ་མཆོད་པར་བྱེད་པར་གྱུར་པ་དེ་ལྟ་དེ་ལྟར་ཚངས་པའི་བསོད་ནམས་འབྱུང་བར་འགྱུར་རོ། །
དེ་དག་གིས་མྱ་ངན་ལས་འདས་པ་ཐོབ་པར་འགྱུར་རོ། །དམ་པའི་ཆོས་བསྒྲགས་པ་ལས་མ་དང་ཕ་ལ་མཆོད་པ་བྱེད་པར་གྱུར་ན་ཡོན་ཏན་གཞན་འདི་ཡང་ཡོད་དེ། སྐྱེ་བོ་རྣམས་ཐམས་ཅད་ཀྱིས་བསྔགས་པར་འགྱུར་

66-1-104b

བའོ། །མཐོང་བའི་ཆོས་ཉིད་ལ་མ་དང་ཕ་ལས་བསྔགས་པར་གྱུར་ལ། ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོ་ལྷའི་འཇིག་རྟེན་དུ་སྐྱེ་བར་འགྱུར་རོ། །རྒྱུ་དེ་ཉིད་དང་རྐྱེན་དེ་དག་གིས་ཀྱང་མཐར་
ཡོངས་སུ་མྱ་ངན་ལས་འདའ་བར་འགྱུར་རོ། །དེའི་ཕྱིར་ཡོན་ཏན་དེ་དག་མངོན་པར་མཐོང་བར་གྱུར་པའི་སྐྱེས་བུ་མཁས་པ་རྣམས་ནི་ཇི་སྲིད་འཚོའི་བར་དུ་མ་དང་ཕ་དག་ལ་གུས་པར་འགྱུར་རོ། །བློ་གཞན་མ་ཡིན་པ་དང་
སྤྱོད་པ་གཞན་མ་ཡིན་པ་དང་བློ་གྲོས་མཉམ་པར་བཞག་པར་གྱུར་པས་སྤྱོད་པ་རྣམས་ཀྱང་བསྡམས་པར་འགྱུར་རོ། །གཞན་ཡང་དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན། འདི་
ལྟ་སྟེ་ལས་ཀྱི་འབྲས་བུ་ཀུན་ཏུ་རེག་པའོ། །ལས་དང་འབྲས་བུའི་དེ་ཁོ་ན་ཉིད་གང་ཟག་གིས་མཐོང་བར་འགྱུར་བ་ནི་དམ་པའི་ཆོས་སྒྲོགས་པ་མ་གཏོགས་པ་གཞན་གྱིས་མ་ཡིན་ནོ། །དེ་ལ་གང་གི་ཚེ་མི་དགེ་བའི་
སེམས་དང་ལྡན་པའི་མི་དགེ་བ་ལ་དམིགས་པར་གྱུར་ན་དེའི་ཚེ་མི་དགེ་བའོ། །ཞེས་སོ་སོར་མངོན་པར་ཤེས་སོ། །གང་གི་ཚེ་དགེ་བའི་སེམས་ཀུན་དུ་སྐྱེས་པར་གྱུར་པ་ན། དེའི་ཚེ་དགེ་བའོ་ཞེས་སོ་སོར་རབ་ཏུ་
ཤེས་པར་འགྱུར་རོ། །དེས་ཇི་ལྟ་བ་བཞིན་དུ་ལས་ཀྱི་འབྲས་བུ་རྣམས་ཀུན་དུ་ཤེས་སོ། །ཇི་ལྟ་བ་ཉིད་དུ་མི་དགེ་བའི་སེམས་བདག་ལ་སྐྱེས་པར་གྱུར་པའི་མི་དགེ་བའི་སེམས་དེ་དག་གིས་ནི་ཕྱི་ནས་མི་འདོད་
པ་མི་སྡུག་པའི་འབྲས་བུ་རྣམ་པར་སྨིན་པ་དམྱལ་བ་དང་ཡི་དགས་དང་དུད་འགྲོ་རྣམས་སུ་བདག་ལ་འབྱུང་བར་འགྱུར་རོ། །གང་གི་ཚེ་ངག་གི་ཉེས་པར་སྤྱོད་པ་རྣམས་བྱས་པར་གྱུར་པ་དེའི་ཚེ་འདི་སྙམ་དུ་སེམས་པར་འགྱུར་ཏེ། 
ཇི་ལྟར་མི་དགེ་བའི་ལས་སྐྱེས་པ་འདི་དག་རྣམས་ཀྱིས་བདག་ལ་མི་འདོད་པ་དང་། མི་སྡུག་པ་དང་ཡིད་དུ་མི་འོང་བ་དང་དམྱལ་བ་དང་ཡི་དགས་དང་དུད་འགྲོ་རྣམས་འབྱུང་བར་འགྱུར་རོ། །གང་གི་ཚེ་ལུས་ཀྱི་ཉེས་པར་སྤྱོད་པར་བྱེད་

66-1-105a

པ་རྣམས་བྱེད་པར་གྱུར་པ་དེའི་ཚེ་འདི་སྙམ་དུ་སེམས་ཏེ། ཇི་ལྟར་མི་དགེ་བའི་ལས་སྐྱེས་པ་དང་བྱས་པ་འདི་དག་གིས་ནི་དམྱལ་བ་དང་ཡི་དགས་དང་དུད་འགྲོ་རྣམས་སུ་བདག་ལ་རྣམ་པར་སྨིན་པ་མི་འདོད་
པ་རྣམས་འབྱུང་བར་འགྱུར་རོ། །དེ་ལ་ལས་ཀྱི་རྣམ་པར་སྨིན་པ་རྣམ་པ་གསུམ་པོ་འདི་དག་རྣམས་ཀྱང་དམ་པའི་ཆོས་སྒྲོགས་པ་མ་གཏོགས་པ་གཞན་གྱིས་ནི་ཤེས་པར་འགྱུར་བ་མ་ཡིན་ནོ། །དེའི་ཕྱིར་ན་སྐྱེས་བུ་དམ་
པ་རྣམས་ཀྱིས་ཇི་སྲིད་འཚོའི་བར་དུ་དམ་པའི་ཆོས་སྒྲོགས་པ་དང་མཉན་པར་ཡང་བྱའོ། །གང་གི་ཚེ་དམ་པའི་ཆོས་སྒྲོགས་པ་རྣམས་རྗེས་སུ་ཉན་པར་བྱེད་པ་དེ་ནི་ལེགས་པར་སྤྱོད་པར་བྱེད་པ་ཡིན་ནོ། །ཉེས་པར་
སྤྱོད་པ་རྣམས་ནི་ཡོངས་སུ་སྤོང་བར་བྱེད་དོ། །གཞན་ཡང་དམ་པའི་ཆོས་སྒྲོགས་པར་བྱེད་པ་ལ་ཡོན་ཏན་ཡོད་དོ། །འདི་ཡང་གང་ཞེ་ན། འདི་ལྟ་སྟེ་ཚེ་རིང་པོ་ཀུན་དུ་འཕེལ་བར་བྱེད་པའི་ལས་རྣམས་ཀྱང་འདི་ལ་མངོན་
པར་འཕེལ་བར་འགྱུར་ཏེ། དེ་གང་གི་ཚེ་དམ་པའི་ཆོས་སྒྲོགས་པར་བྱེད་པ་ལ་ཆེད་ཆེར་གྱུར་པ་ན། དེའི་ཚེ་ལས་ཀྱི་འབྲས་བུའི་དེ་ཁོ་ན་ཉིད་མཐོང་བར་གྱུར་ནས་སྲོག་གཅོད་པ་ལ་སོགས་པའི་མི་དགེ་བའི་ལས་རྣམས་མི་བྱེད་
དོ། །རྒྱུན་དུ་ཡང་དགེ་བའི་ལས་རྣམས་བསྟེན་ཅིང་བསྒོམས་ལ་ལན་མང་དུ་བྱེད་པར་ཡང་འགྱུར་རོ། །དེ་དགེ་བའི་ལས་དེ་དག་གི་རྣམ་པར་སྨིན་པས་ལྷ་དང་མི་རྣམས་སུ་ཚེ་རིང་བར་འགྱུར་ཏེ། དེས་དེ་ལྟར་དམ་པའི་ཆོས་བསྟེན་
ཅིང་བསྒོམས་ལ་ལན་མང་དུ་བྱས་པའི་ཕྱིར་རོ། །དེའི་ཕྱིར་དམ་པའི་ཆོས་བསྒྲགས་པའི་ཡོན་ཏན་འདི་ནི་གཞན་ཡིན་ཏེ། འདི་ལྟ་སྟེ་ཚེ་རིང་པོར་འགྱུར་བའི་ལས་འདིས་ཀུན་དུ་སྤེལ་བར་བྱེད་པའོ། །དམ་པའི་ཆོས་བསྒྲགས་
པའི་ཡོན་ཏན་གྱི་རྒྱུ་འདིས། དེ་དག་ཐོས་ནས་ཀྱང་ལྷ་དང་མི་རྣམས་སུ་སྐྱེ་བར་འགྱུར་རོ། །མིའི་འཇིག་རྟེན་དུ་སྐྱེས་པར་གྱུར་ནས་ཀྱང་དེ་གལ་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་ན་ཚེ་རིང་བའི་ལྷ་རྣམས་ཀྱི་ནང་དུ་སྐྱེ་བར་

66-1-105b

འགྱུར་རོ། །ཁྱད་པར་དུ་ཡང་མདོག་དང་གཟུགས་དང་འོད་དང་རྩེད་མོས་རྣམ་པར་རྒྱུ་བ་དང་ལྡན་པར་འགྱུར་རོ། །དམ་པའི་ཆོས་བསྒྲགས་པ་དེས་གལ་ཏེ་མི་རྣམས་སུ་སྐྱེས་པར་གྱུར་ན་ཡང་། དེའི་རིགས་དང་གཟུགས་དང་ཕུན་སུམ་
ཚོགས་པ་དང་ཡོན་ཏན་དང་ཚེ་ཡང་རིང་བར་འགྱུར་རོ། །ཡུལ་ལྗོངས་བཟང་པོར་ཡང་འདི་སྐྱེ་བར་འགྱུར་རོ། །དེ་ཡང་དག་པའི་ལྟ་བ་ཅན་དུ་ཡང་འགྱུར་རོ། །དམ་པའི་ཆོས་དེ་བསྟེན་ཅིང་བསྒོམས་ལ་ལན་མང་དུ་བྱས་པ་འདི་ནི་
སྡུག་བསྔལ་ལས་ངེས་པར་འབྱུང་བ་གཞན་ཡིན་ཏེ། འདི་ལྟ་སྟེ་རབ་ཏུ་དང་བའི་ཡིད་ཀྱིས་དམ་པའི་ཆོས་བསྒྲགས་པ་ལ་གོམ་པ་འདོར་བས་ཚངས་པའི་བསོད་ནམས་རབ་ཏུ་འབྱུང་ངོ་། །དམ་པའི་ཆོས་སྒྲོགས་པ་ལས་གང་
དག་གིས་དམ་པར་བྱས་ཏེ་འགྲོ་བར་བྱེད་པ་ན། དེ་དག་ནི་ལུས་ཀྱི་ལེགས་པར་སྤྱོད་པ་རྣམས་ལ་ཡང་དག་པར་སྦྱོར་བ་ཡིན་ནོ། །གང་དག་གིས་ཐོས་པའི་བློ་དེས་དེ་ངག་གིས་ལེགས་པར་སྤྱོད་པ་དང་ཡང་དག་པར་ལྡན་
པར་འགྱུར་རོ། །གང་ཐོས་པར་གྱུར་ནས་ཡིད་རབ་ཏུ་དད་པ་སྐྱེས་པར་གྱུར་པས་ནི། དེས་ཡིད་ཀྱིས་ལེགས་པར་སྤྱོད་པ་རྣམས་དང་ཡང་དག་པར་ལྡན་པར་འགྱུར་རོ། །དེ་ལྟར་ཆོས་བསྒྲགས་པ་རྣམས་ལེགས་པར་སྤྱོད་པ་གསུམ་
དང་ཡང་དག་པར་ལྡན་པར་གང་གི་ཚེ་གྱུར་པ་ན། དེའི་ཚེ་ལྷ་དང་མི་རྣམས་ཀྱི་ནང་དུ་སྐྱེས་པར་གྱུར་ནས་མཆོག་ཏུ་སྐྱིད་པར་འགྱུར་རོ། །ཚེ་རིང་བ་དང་ལྡན་པར་ཡང་འགྱུར་རོ། །དེ་ཡོངས་སུ་མྱ་ངན་ལས་འདའ་བར་ཡང་
འགྱུར་རོ། །ཡོན་ཏན་རྣམས་ཐམས་ཅད་ནི་ཆོས་བསྒྲགས་པས་འཐོབ་པར་འགྱུར་གྱི་གཞན་རྣམས་ཀྱིས་ནི་མ་ཡིན་ནོ། །དེའི་ཕྱིར་བདེ་ལེགས་རྣམས་ཀྱི་རྩེ་མོ་རྣམས་སུ་འགྱུར་བ་ནི་གང་དམ་པའི་ཆོས་བསྒྲུགས་པ་
ལས་ཡིན་ནོ། །གཞན་ཡང་དམ་པའི་ཆོས་བསྒྲགས་པའི་ཡོན་ཏན་ཡོད་དོ། །འདི་ཡང་གང་ཞེ་ན་འདི་ལྟ་སྟེ། འཇིག་རྟེན་པ་རྣམས་ཀྱིས་རབ་ཏུ་བསྔགས་པར་འགྱུར་བ་ཡིན་ནོ། །ཐམས་ཅད་ཀྱང་ཆོས་བསྒྲགས་པ་

66-1-106a

ལས་ཡིན་ཏེ། ཚུལ་ཁྲིམས་དང་ལྡན་པ་དང་ཡོན་ཏན་དང་ལྡན་པ་དང་མང་དུ་ཐོས་པ་དང་རྣམ་པར་དུལ་བ་དང་བློ་གྲོས་རྒྱ་ཆེན་པོར་གྱུར་པ་དང་སྐྱེ་བོ་རྣམས་ཐམས་ཅད་ཀྱིས་ཀྱང་མངོན་པར་བརྗོད་པར་བྱ་བ་
དང་། ཕྱག་འཚལ་བ་དང་སྙན་པར་སྨྲ་བའི་རང་བཞིན་དུ་འགྱུར་བ་དང་དྲང་པོ་དང་དྲང་པོའི་རང་བཞིན་ཅན་དུ་འགྱུར་བ་དང་ཐམས་ཅད་ཀྱང་ཆོས་སྒྲོགས་པ་ལས་ཡིན་ནོ། །དེ་ཡོན་ཏན་དེ་ལྟ་བུ་རྣམས་དང་ལྡན་པ་ནི་ཁ་ན་
མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བའི་ཕྱིར་སྐྱེ་བོ་རྣམས་ཐམས་ཅད་ཀྱང་གྲོགས་པོར་འགྱུར་རོ། །ཐམས་ཅད་ཀྱིས་ཀྱང་འདི་རབ་ཏུ་བསྔགས་པར་བྱེད་དོ། །འདི་ལ་འཇིགས་པ་འམ་སྡུག་བསྔལ་བྱུང་
བ་རྣམས་ཐམས་ཅད་ཀྱིས་ཀྱང་གྲོགས་བྱེད་པར་འགྱུར་རོ། །དེ་ལྟར་དམ་པའི་ཆོས་སྒྲོགས་པར་བྱེད་པ་རྣམས་འཇིག་རྟེན་པས་རབ་ཏུ་བསྔགས་པར་འགྱུར་རོ། །དེ་ལྟར་དམ་པའི་ཆོས་སྒྲོགས་པར་བྱེད་པ་དེ་དག་
རྣམས་ལ་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན། འདི་ལྟ་སྟེ་ལྷ་རྣམས་ཀྱིས་འདི་དག་ལ་མངོན་པར་སྲུང་བར་བྱེད་པ་ཡིན་ནོ། །དེ་ལ་ཡོན་ཏན་དེ་ལྟ་བུ་དང་ལྡན་པར་གྱུར་པའི་ཆོས་སྒྲོགས་པ་པོ་ནི་ལུས་
ཀྱིས་ལེགས་པར་སྤྱོད་པ་རྣམས་དང་ཡང་དག་པར་ལྡན་པའི་ཕྱིར་ན་ལྷ་རྣམས་ཀྱིས་མངོན་པར་སྲུང་བར་བྱེད་དོ། །ཇི་ལྟར་འདི་ཡོན་ཏན་དང་ལྡན་པར་གྱུར་པ་དང་འདི་དག་རྣམས་ཀྱིས་མངོན་པར་བསྲུངས་པས་སྐྱེ་བོའི་ཚོགས་
ཆེན་པོ་རྣམས་ཀྱིས་ཀྱང་ཡོན་ཏན་བྱེད་པར་འགྱུར་རོ། །སྐྱེ་བོའི་ཚོགས་ཆེན་པོ་རྣམས་ཀྱིས་འདིའི་བར་དུ་གཅོད་པ་ཡང་ནུབ་པར་འགྱུར་ལ། དེ་བདུད་ཀྱི་ཕྱོགས་རྣམས་ཀྱིས་མི་འཛིན་ལ་གཟུང་དུ་མེད་པར་ཡང་འགྱུར་རོ། 
དམ་པའི་ཆོས་ཀྱི་ཕྱོགས་རྣམས་ནི་ཤིན་དུ་མཐོང་བར་འགྱུར་བ་ཡིན་ནོ། །རྒྱུ་འདི་དང་ཡང་དག་པར་ལྡན་པ་མངོན་པར་མཐོང་ནས་ཀྱང་འདི་དག་ལྷ་རྣམས་ཀྱིས་བསྲུང་བར་འགྱུར་ཏེ། ཉིན་མོ་དང་མཚན་མོ་དང་སྒྲོགས་པ་ན་

66-1-106b

ཡང་ཕྱི་བཞིན་ཀུན་དུ་རྗེས་སུ་འབྲང་བར་འགྱུར་རོ། །དགོས་པ་གང་འགའ་ཞིག་རྗེས་སུ་རྩོམ་པར་བྱེད་པ་ན་ནི་འདིའི་དེ་དང་དེ་དག་ཀྱང་ཕུན་སུམ་ཚོགས་པར་འགྱུར་ཏེ། ལྷ་དེ་དག་རྣམས་རབ་ཏུ་དད་པར་གྱུར་པས་དང་
ལེགས་པར་བྱས་པའི་ལས་རྣམས་ཀྱིས་ཀྱང་ངོ་། །ཕན་ཚུན་རྒྱུར་གྱུར་པའི་ཕྱིར་ན་གང་གི་ཚེ་དེའི་དོན་རྣམས་གྲུབ་པར་གྱུར་པ་ན་དེའི་ཚེ་ཤིན་དུ་ཕྱིར་ཞིང་ཆེས་དགེ་བར་བྱེད་དོ། །དེ་ལྟ་དེ་ལྟར་ཡང་འདིའི་ལེགས་པར་
བྱས་པའི་ལས་རྣམས་ཀྱིས་ཐམས་ཅད་དུ་འགྲུབ་པར་འགྱུར་རོ། །ཇི་ལྟ་ཇི་ལྟར་མངོན་པར་འགྲུབ་པར་གྱུར་པ་དེ་ལྟ་དེ་ལྟར་རབ་ཏུ་ཕལ་ཆེ་བར་གྱུར་པའི་ལེགས་པར་སྤྱོད་པ་རྣམས་བྱེད་དོ། །དེ་ལྟར་འདི་བདེ་བ་
བརྒྱུད་པས་འཇིག་རྟེན་གཉིས་སུ་ཕན་པ་རྣམས་སུ་བྱེད་པར་འགྱུར་རོ། །ས་གཞི་ལྟ་བུར་གྱུར་པའི་དམ་པའི་ཆོས་བསྒྲགས་པ་འདིའི་ཡོན་ཏན་རྣམས་ནི་དེ་ལྟ་བུ་ཡིན་ནོ། །དེའི་ཕྱིར་བདེ་ལེགས་ཀྱི་མཆོག་ཏུ་གྱུར་
པའི་གཏེར་དེ་དག་ནི་འདི་ལྟ་སྟེ་དམ་པའི་ཆོས་སྒྲོགས་པ་ཡིན་ནོ། །དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ་འདི་དག་ཀྱང་གང་ཞེ་ན་འདི་ལྟ་སྟེ། འདིའི་ཀུན་དུ་བསམས་པ་ཡང་ཕུན་སུམ་
ཚོགས་པར་འགྱུར་རོ། །དེ་ལྟ་དེ་ལྟ་བུར་གྱུར་པའི་ཆོས་དང་ལྡན་ཞིང་ཆོས་ལ་རབ་ཏུ་རྗེས་སུ་ཞུགས་པ་ཤེས་པ་དང་ལྡན་པ་དང་ཚུལ་ཁྲིམས་དང་ལྡན་པ་དང་སྦྱིན་པ་དང་ལྡན་པར་གྱུར་པ་ནི་མཐོང་བའི་ཆོས་ཀྱི་ཀུན་ཏུ་
བསམས་པ་རྣམས་ཐམས་ཅད་ཕུན་སུམ་ཚོགས་པར་འགྱུར་རོ། །འདིའི་རྩོམ་པ་རྣམས་ཐམས་ཅད་ཕུན་སུམ་ཚོགས་པར་མི་འགྱུར་བ་གང་དག་འདིའི་བརླག་པར་འགྱུར་བའི་དོན་དེ་དག་རྣམས་ཐམས་ཅད་ཀྱང་
དེའི་རབ་ཏུ་བརྩོན་པ་ཉིད་ཀྱིས་རབ་ཏུ་འགྲུབ་པར་འགྱུར་རོ། །ཉོན་མོངས་པར་མ་ཡིན་ཞིང་ཆོས་དང་ལྡན་པར་ཡང་འགྱུར་ལ། དོན་ལ་རྗེས་སུ་ཆགས་པའི་འཇིགས་པ་ལྔ་ཡོངས་སུ་སྤངས་པ་དང་ཡང་དག་པར་ཉེ་

66-1-107a

བར་འཚོ་བ་དང་ཐུན་མོང་མ་ཡིན་པར་འགྱུར་བ་དང་། ལུས་ཞིག་པར་གྱུར་ནས་ཤི་བའི་འོག་ཏུ་ཡང་བདེ་འགྲོ་ལྷར་སྐྱེ་བར་འགྱུར་རོ། །དམ་པའི་ཆོས་བསྒྲགས་པ་འདིའི་ཡོན་ཏན་གཞན་ཡིན་ཏེ། འདི་
ཡང་གང་དག་ཞེ་ན་འདི་ལྟ་སྟེ། འདི་ཡང་ཆོས་དང་ལྡན་པའི་ལོངས་སྤྱོད་ཅན་དུ་འགྱུར་བའོ། །དེ་ལྟ་དེ་ལྟ་བུའི་ཡོན་ཏན་དང་ལྡན་པའི་ཆོས་སྒྲོགས་པ་སྐྱེ་བོ་གང་ཚུལ་ཁྲིམས་དང་བཅས་པ་དེ་ལ་ཉེ་བར་སྟེན་པར་
བྱེད་དོ། །དེ་ཚུལ་ཁྲིམས་ཀྱིས་ཕན་ཚུན་དུ་ཆ་སྐལ་སྦྱིན་པར་བྱེད་དོ། །དེ་དག་ཀྱང་གཞན་རྗེས་སུ་བཅོམ་པ་མ་ཡིན་ཞིང་གཞན་རྣམས་ངོ་མཚར་བར་བྱས་པ་མ་ཡིན་པར་ཆོས་པ་རྣམས་ཀྱི་དྲུང་ནས་རྙེད་པའི་སྐལ་བ་དེ་
ཆོས་པ་དག་ལ་རབ་ཏུ་སྦྱིན་པར་བྱེད་པས་དེ་དག་རྣམས་གོང་ནས་གོང་དུ་ཁྱད་པར་དུ་འཕེལ་བར་འགྱུར་རོ། །འཇིག་རྟེན་གཉིས་ལ་ཕན་པ་དང་འཇིག་རྟེན་གཉིས་སུ་བདེ་བར་ཡང་འགྱུར་རོ། །འདི་ནི་དམ་པའི་ཆོས་བསྒྲགས་
པའི་ཡོན་ཏན་གཞན་ཡིན་ལ། དམ་པའི་ཆོས་བསྒྲགས་པའི་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན་འདི་ལྟ་སྟེ། ལེ་ལོ་མེད་པར་གྱུར་པའོ། །མཁས་པའི་རང་བཞིན་གྱི་སྐྱེས་བུ་དག་གང་གི་ཚེ་ཆོས་བསྒྲགས་
པ་ཉན་པར་བྱེད་པ་དེའི་ཚེ་ལེ་ལོའི་སྐྱོན་ཀྱིས་ཉན་པར་བྱེད་ན། གང་གི་ཚེ་གང་འཇིག་རྟེན་པ་དང་འཇིག་རྟེན་ལས་འདས་པའི་དོན་མི་འགྲུབ་པའོ། །དེ་དག་ཐམས་ཅད་ཀྱང་ལེ་ལོའི་སྐྱོན་གྱིས་ཡིན་ལ། ལེ་ལོའི་
སྐྱོན་ཐོས་པར་གྱུར་ནས་ཡོངས་སུ་སྤོང་བར་བྱེད་དོ། །བརྩོན་འགྲུས་བརྩམས་པ་དང་དྲན་པ་དང་ལྡན་པར་འགྱུར་བ་དང་ཤེས་བཞིན་དང་ལྡན་པ་དང་དོན་རྣམས་ཐམས་ཅད་ལ་ཡང་ལེ་ལོ་དང་རྣམ་པར་བྲལ་བས་
མྱུར་བར་བྱེད་པ་དང་དུས་སུ་བྱེད་པར་འགྱུར་བ་དང་སྡིག་པ་མེད་པར་བྱེད་པ་དང་འདོར་བ་མེད་པར་བྱེད་པ་ནི་དོན་རྣམས་ཐམས་ཅད་ཕུན་སུམ་ཚོགས་པར་འགྱུར་རོ། །འཇིག་རྟེན་གཉིས་ལ་ཕན་པར་བྱེད་པ་པོ་ལེ་ལོ་

66-1-107b

དང་བྲལ་བ་པོ་རྟག་ཏུ་གྲིམས་པར་གྱུར་པ། བརྩོན་འགྲུས་བརྩམས་པ་རྣམས་ནི་དོན་རྣམས་ཐམས་ཅད་ཀྱི་ཕ་རོལ་ཏུ་ཕྱིན་པར་འགྱུར་རོ། །རྩོམ་པ་ཐམས་ཅད་ཀྱང་ཡང་དག་པར་འཛིན་པར་བྱེད་དོ། །གལ་ཏེ་
ཡང་འདི་ལ་བརྒྱ་ཞིག་ལ་ལེ་ལོས་སྙིང་ལ་ཞུགས་པར་གྱུར་ན་དམ་པའི་ཆོས་བསྒྲགས་པ་གང་ཡིན་པ་དེ་དེས་ཐོས་ནས། ལེ་ལོའི་སྐྱོན་དེ་དག་རྣམས་དེས་དྲན་པས་རྟག་ཏུ་ཡོན་ཏན་འཛིན་པར་འགྱུར་ཞིང་སྐྱོན་
རྣམས་ལ་རྣམ་པར་སྡང་བས་ལེ་ལོ་མེ་བཞིན་དུ་སྤོང་བར་བྱེད་དོ། །མཚོན་ཆ་བཞིན་དུ་ཡང་ཡོངས་སུ་སྤོང་བར་བྱེད་དོ། །ཡང་ཇི་ལྟར་འགའ་ཞིག་གི་དོན་རྣམས་ཉམས་པ་ཉེ་བར་འབྱུང་ན་ཡང་ཐམས་ཅད་
ལེ་ལོའི་སྐྱོན་གྱིས་ཡིན་ནོ། །ལེ་ལོ་མེད་པ་དེའི་ཐོས་པའི་དོན་དང་ཐོས་པའི་དོན་རྣམས་འགྲུབ་པའོ། །འདི་ནི་དམ་པའི་ཆོས་བསྒྲགས་པའི་ཡོན་ཏན་གཞན་ཡིན་ནོ། །དམ་པའི་ཆོས་བསྒྲགས་པའི་ཡོན་
ཏན་གཞན་ཡང་ཡོད་དོ། །འདི་ཡང་གང་ཞེ་ན་འདི་ལྟ་སྟེ། བྱས་པ་ཤེས་པར་གྱུར་པའོ། །ཆོས་གཞན་ཡང་གཞན་རྣམས་ཐོས་པར་གྱུར་ནས་བྱས་པ་རིག་པ་དང་དེ་ཁོ་ན་ཉིད་ཤེས་པ་དང་བྱས་པ་ཤེས་པའི་ཡང་
ཡོན་ཏན་རྣམས་ཐོས་ནས་ཆོས་སྒྲོགས་པ་ལས་རྟག་པ་ཉིད་དུ་བྱས་པ་ཤེས་པར་འགྱུར་རོ། །བྱས་པ་ཤེས་པ་བྱས་པ་རིག་པར་གྱུར་པ་དེའི་གྲོགས་པོ་ཐམས་ཅད་ཤིན་ཏུ་བརྟན་པར་འགྱུར་རོ། །སྐྱེས་བུ་གང་
དག་གིས་འདི་ལ་ཡང་གྲོགས་པོར་ཁམས་མ་བླངས་པར་གྱུར་པ་དེ་དག་རྣམས་ཐམས་ཅད་ཀྱང་གྲོགས་པོ་ཉིད་དུ་འགྱུར་རོ། །ཡོན་ཏན་དང་ལྡན་པ་འདི་ཞེས་བྱས་ནས་གང་དག་ལ་འདི་ལ་ཕན་པ་ཆུང་ངུས་བྱས་པར་གྱུར་པ་
དེ་ཡང་དྲན་པར་བྱེད་དོ། །དེ་བྱས་པ་ཤེས་པ་དེ་དང་ལྡན་པར་གྱུར་པས་ཡོན་ཏན་ཆེན་པོ་རྣམས་ཐོབ་པར་འགྱུར་ཏེ་ཐམས་ཅད་མཁྱེན་པ་ཉིད་དོ། །དམ་པའི་ཆོས་བསྒྲགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་དག་

66-1-108a

ཞེ་ན་འདི་ལྟ་སྟེ། རྟག་ཏུ་འཆི་བ་རྗེས་སུ་དྲན་པར་བྱེད་པའོ། །རྗེས་སུ་དྲན་པ་དེ་དག་རྣམས་ཀྱི་མཆོག་ཏུ་གྱུར་པ་ནི་འདི་ལྟ་སྟེ། འཆི་བ་རྗེས་སུ་དྲན་པའོ། །འཆི་བ་དཔྱད་པས་ཟིལ་ཀྱིས་མནན་པས་ནི་སེམས་
ཅན་རྣམས་ཐམས་ཅད་འཇིགས་པ་དང་བཅས་པར་འགྱུར་རོ། །འཇིགས་པ་དང་བཅས་པར་གྱུར་ནས་ནི་དོན་མ་ཡིན་པ་རྣམས་ནི་མི་བྱེད་དོ། །མིག་གིས་གཟུགས་རྣམས་མཐོང་ནས་ཀུན་དུ་ཆགས་པར་མི་བྱེད་དོ། །ཀུན་ཏུ་
རྟོག་པར་ཡང་མི་བྱེད་དོ། །རྣ་བས་སྒྲ་རྣམས་ཐོས་པར་གྱུར་ནས་ཀུན་དུ་ཆགས་པར་མི་བྱེད་དོ། །ཀུན་དུ་རྟོག་པར་ཡང་མི་བྱེད་དོ། །ལྕེས་རོ་རྣམས་མྱངས་པར་གྱུར་ནས་ཀུན་དུ་ཆགས་པར་མི་འགྱུར་ཞིང་ཀུན་དུ་རྟོག་
པར་ཡང་མི་བྱེད་དོ། །ལུས་ཀྱིས་རེག་བྱ་རྣམས་ལ་རེག་པར་གྱུར་ནས་ཀུན་དུ་ཆགས་པར་མི་འགྱུར་ཞིང་ཀུན་དུ་རྟོག་པར་ཡང་མི་བྱེད་དོ། །ཡིད་ཀྱིས་ཆོས་རྣམས་རིག་པར་གྱུར་ནས་ཀུན་དུ་ཆགས་པར་མི་བྱེད་ལ་ཀུན་དུ་རྟོག་པར་ཡང་མི་
བྱེད་དོ། །དེ་ལྟར་སྲིད་པའི་དྲ་བ་འདི་དག་རྣམས་ཐམས་ཅད་ཀྱང་ཀུན་དུ་གཅོད་པར་བྱེད་དོ། །སྐྱེས་བུ་འཆི་བའི་འཇིགས་པས་འཇིགས་པར་འགྱུར་བ་དེས་འཇིགས་ན་འདི་དག་རྣམས་ཐམས་ཅད་ལ་ཡང་སྙིང་པོ་ཐམས་ཅད་མེད་པར་མཐོང་
ངོ་། །ཐམས་ཅད་ཀྱང་སྡུག་བསྔལ་དུ་མཐོང་ངོ་། །ཐམས་ཅད་བདག་མེད་པར་མཐོང་ངོ་། །ཐམས་ཅད་སྟོང་པར་མཐོང་ངོ་། །ཡང་དག་པ་ཇི་ལྟ་བ་བཞིན་དུ་མཐོང་བ་དེས་འགའ་ཞིག་ལ་ཡང་ཆགས་པ་མེད་པས་ལྷའི་འཇིག་རྟེན་རྣམས་
ལ་ཆགས་པ་དང་མི་ལྡན་ནོ། །མིའི་འཇིག་རྟེན་རྣམས་ལ་ཡང་ཆགས་པར་མི་འགྱུར་རོ། །ཅིའི་ཕྱིར་དམྱལ་བ་དང་ཡི་དགས་དང་དུད་འགྲོ་རྣམས་ལ་འབྱུང་། དེ་ནི་འགྲོ་བ་ལྔ་ལས་ཆགས་པ་རྣམས་ལས་རྣམ་པར་གྲོལ་བ་ཡིན་ནོ། །
ཐམས་ཅད་ལས་ངེས་པར་བྱུང་བ་ཐམས་ཅད་ལ་འཇིགས་པ་འཆི་འཕོ་དང་སྐྱེ་བས་བྱས་པའི་སྡུག་བསྔལ་རྣམས་ཀྱིས་ཡིད་འབྱུང་བར་འགྱུར་རོ། །འདོད་ཆགས་དང་རྣམ་པར་བྲལ་བ་དེ་རྣམ་པར་གྲོལ་བར་འགྱུར་རོ། །རྣམ་

66-1-108b

པར་གྲོལ་བ་ལས་ཀྱང་རྣམ་པར་གྲོལ་བའི་ཡེ་ཤེས་ཉིད་འབྱུང་བ་ཡིན་ཏེ། ཇི་ལྟར་ངའི་ཚངས་པར་སྤྱོད་པ་ནི་སྤྱད་དོ་བྱ་བ་ནི་བྱས་སོ། །བདག་གི་སྲིད་པ་གཞན་ནི་རབ་ཏུ་མི་ཤེས་སོ། །དེ་ལྟར་བསྟན་པའི་ཡོན་ཏན་དེ་དག་
རྣམས་ཇི་ལྟར་ངའི་ཚངས་པར་སྤྱོད་པ་ནི་སྤྱད། བྱ་བ་རྣམས་ནི་དམ་པའི་ཆོས་ཉན་པ་དང་དགེ་བའི་བཤེས་གཉེན་བསྟེན་པར་བྱེད་པ་མ་གཏོགས་པར་གཞན་གྱིས་ནི་མ་ཡིན་ནོ། །དེའི་ཕྱིར་ཐམས་ཅད་ཀྱིས་རབ་ཏུ་བརྩོན་
པ་ཐམས་ཅད་ཀྱིས་གནས་སྐབས་ཐམས་ཅད་དུ་དམ་པའི་ཆོས་སྒྲོགས་པ་མཉན་པར་བྱའོ། །འཁོར་བ་ན་འཇིག་རྟེན་གཉིས་སུ་ཕན་པ་དེ་དག་རྣམས་ཐམས་ཅད་ནི་འདི་ལྟ་སྟེ་དམ་པའི་ཆོས་སྒྲོགས་པ་རྣམས་
དང་དགེ་བའི་བཤེས་གཉེན་བསྟེན་པ་ཡིན་ལ། འདི་དག་གཉིས་སྲིད་པ་གཉིས་སུ་བདེ་ལེགས་རྣམས་འཐོབ་པར་འགྱུར་རོ། །དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་དག་
ཞེ་ན་འདི་ལྟ་སྟེ། འཆི་བའི་དུས་ན་ཡང་འགྱོད་པ་མེད་པར་འགྱུར་བའོ། །དམ་པའི་ཆོས་སྒྲོགས་པ་ཐོས་པའི་དོན་གྱིས་སྐྱེས་བུ་དམ་པ་རྣམས་ཐམས་ཅད་ཀྱང་འཆི་བ་རྗེས་སུ་དྲན་པ་སྒོམ་པར་བྱེད་དོ། །སྐྱོན་
གང་དག་གིས་སེམས་ཅན་རྣམས་སྐྱེ་བར་འགྱུར་བའི་སྐྱོན་དེ་ཡོངས་སུ་སྤོང་བར་བྱ་བ་འདོད་ཆགས་དང་ཞེ་སྡང་དང་གཏི་མུག་དང་དྲི་མ་གསུམ་པོ་དེ་དག་ཀྱང་འཁོར་བའི་རྒྱུ་རྣམས་ཡིན་ནོ། །དེ་དག་རྣམས་ཡོངས་སུ་
བཅད་པར་གྱུར་ན་ནི་སླར་ཡང་མི་སྐྱེའོ། །འཆི་བར་བྱེད་དོ། །འཆི་འཕོ་བར་མི་འགྱུར་རོ། ། ངེས་པར་སྐྱེ་བར་མི་འགྱུར་རོ། ། དེ་ལ་ཡོན་ཏན་དེ་དག་རྣམས་ནི་དམ་པའི་ཆོས་ཉན་པ་ལས་མ་གཏོགས་པར་གཞན་དག་ལས་ནི་
མ་ཡིན་ནོ། །དེའི་ཕྱིར་ཡང་མཆོག་ཏུ་བདེ་ལེགས་ཀྱི་རྩ་བ་ཁོ་ནར་གྱུར་པ་དུས་བཟངས་འདིས་བཅོམ་ལྡན་འདས་གསེར་ཐུབ་ཀྱིས་གསུངས་པའི་མདོ་ལྷ་དེ་དག་རྣམས་ལ་བཤད་དོ། །དམ་པའི་ཆོས་སྒྲོགས་པ་དང་ལྡན་པ་ལ་དམ་

66-1-109a

པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན་འདི་ལྟ་སྟེ། འཆི་བའི་དུས་སུ་མི་འགྱོད་པའོ། །གང་ཡང་དམ་པའི་ཆོས་བསྒྲགས་པ་ཐོག་མའི་དོན་དང་ལྡན་པ་དང་དེ་བྱེད་པ་
དང་དེ་དག་ཀྱང་འཆི་བའི་དུས་ན་འགྱོད་པར་མི་འགྱུར་རོ། །གང་འགའ་ཞིག་གིས་ལེགས་པར་བྱ་བ་བྱས་པར་གྱུར་པ་དེ་དག་ནི་འཆི་བའི་དུས་ན་རབ་ཏུ་རྣམ་པར་འགྱོད་པར་མི་འགྱུར་རོ། །གང་དང་གང་གིས་དམ་པའི་ཆོས་
བསྒྲགས་པ་འདིའི་དོན་འདི་ཐོས་པར་གྱུར་པ་དེ་ཡང་གང་གི་ཚེ་འདི་ལ་མངོན་དུ་འགྱུར་རོ། །དེའི་ཚེ་མངོན་སུམ་དུ་མཐོང་བར་གྱུར་པ་དེ་དག་མངོན་པར་མཐོང་ནས། སངས་རྒྱས་དང་ཆོས་དང་དགེ་འདུན་རྣམས་ལ་ཕྱིར་
ཞིང་ཉིད་ཀྱང་ཤིན་དུ་ལྷག་པར་ཀུན་ནས་རབ་ཏུ་དང་བར་འགྱུར་རོ། །དེ་ལ་འདིའི་སེམས་རབ་ཏུ་དང་བར་གྱུར་པས་མཆོག་ཏུ་ཁྲག་ཀུན་ནས་རབ་ཏུ་དང་བར་འགྱུར་རོ། །དེ་རབ་ཏུ་དང་བར་གྱུར་པས་བཞིན་གྱི་མདོག་
རབ་ཏུ་དང་བར་འགྱུར་རོ། །དེའི་སེམས་རབ་ཏུ་དང་བར་གྱུར་པས་ལུས་ཀྱང་རབ་ཏུ་དང་བར་མཐོང་ངོ་། །གང་དག་སྣང་བ་ཁོ་ནར་མཐོང་བ་དེ་དག་ནི་དཀར་པོ་ནས་དཀར་པོ་སྣང་བ་དགའ་བར་འགྱུར་བའི་ལྷའི་འཇིག་
རྟེན་དུ་སྐྱེ་བར་འགྱུར་རོ། །དེས་དེ་དག་རྣམས་མངོན་པར་མཐོང་ནས་ཕྱིར་ཉིད་ཀྱང་ཤིན་དུ་ལྷག་པར་ཇི་ལྟ་བར་རབ་ཏུ་དང་བར་འགྱུར་ཏེ། ཇི་ལྟ་ཇི་ལྟར་སངས་རྒྱས་དང་ཆོས་དང་དགེ་འདུན་རྣམས་ལ་རབ་ཏུ་
དང་བར་གྱུར་པ་དེ་ལྟ་དེ་ལྟར་ཆེས་ལྷག་པའི་ལྷའི་རིགས་རྣམས་སུ་སྐྱེ་བར་འགྱུར་རོ། །གང་ཏེ་རྒྱལ་ཆེན་བཞིར་སྐྱེ་བ་ཀུན་དུ་འཕེན་པར་འགྱུར་བའི་ལས་བྱས་པར་གྱུར་ན། དེའི་སེམས་རབ་ཏུ་དང་བར་གྱུར་པ་ཉིད་
ལས་སུམ་བཅུ་རྩ་གསུམ་པ་རྣམས་སུ་སྐྱེ་བར་འགྱུར་རོ། །སུམ་ཅུ་རྩ་གསུམ་པ་རྣམས་སུ་སྐྱེ་བར་འགྱུར་བའི་ལས་བྱས་པར་གྱུར་ན། དེ་འཐབ་བྲལ་བ་རྣམས་སུ་སྐྱེ་བར་འགྱུར་རོ། །དེ་བཞིན་དུ་གལ་ཏེ་དགའ་ལྡན་དུ་

66-1-109b

སྐྱེ་བར་འགྱུར་བའི་ལས་བྱས་པར་གྱུར་ན་དེ་འཕྲུལ་དགའ་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་བཞིན་དུ་ཇི་སྲིད་དུ་གཞན་འཕྲུལ་དབང་བྱེད་པ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ལྟར་སེམས་ཀྱི་འཕེན་
པ་དང་རབ་ཏུ་དང་བར་གྱུར་པའི་དབང་གིས་ཇི་སྲིད་དུ་དེས་ཤིས་པའི་གནས་འདི་དག་རྣམས་འཐོབ་པར་འགྱུར་རོ། །དེ་དག་རྣམས་ཐམས་ཅད་ཀྱང་ཐོས་པ་ལས་ཡིན་གྱི་མ་ཐོས་པས་ནི་མ་ཡིན་ནོ། །ཐོས་པ་དེ་ཡང་དམ་
པའི་ཆོས་བསྒྲགས་པ་ལས་ཡིན་གྱི། གཞན་རྣམས་ལས་ནི་མ་ཡིན་ནོ། །འདི་ནི་ཡོན་ཏན་གཞན་ཡིན་ཏེ། དམ་པའི་ཆོས་སྒྲོགས་པ་ནི་འཆི་བའི་དུས་ན་སྐྱོབ་པར་གྱུར་པ་དང་སྐྱབས་སུ་གྱུར་པ་དང་ངེས་པར་འབྱུང་
བར་འགྱུར་བ་རྣམས་ནི་དམ་པའི་ཆོས་སྒྲོགས་པ་ལས་ཡིན་ནོ། །དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན་འདི་ལྟ་སྟེ། མཐར་ཡང་ཡོངས་སུ་མྱ་ངན་ལས་འདའ་བར་བྱེད་པའོ། །
ཡོན་ཏན་གཞན་རྣམས་ཐམས་ཅད་ཀྱི་སྟེང་དུ་འཕགས་པ་ཡིན་ནོ། །འདི་ཡང་གང་ཞེ་ན་འདི་ལྟ་སྟེ། ཡོངས་སུ་མྱ་ངན་ལས་འདའ་བའོ། །ཆོས་ཐོས་པ་དེ་ཉིད་བསྟེན་ཅིང་བསྒོམས་ལ་ལན་མང་དུ་བྱས་པས་
ཇི་སྐད་བརྗོད་པ་དེ་བཞིན་དུ་བྱེད་པར་འགྱུར་བས་ལེགས་པར་རང་བཞིན་དུ་གནས་པར་གྱུར་པའི་སྐྱེས་བུ་དམ་པ་རྣམས་ཀྱིས་ངེས་པ་ཁོ་ནར་ཉོན་མོངས་པ་རྣམས་ཟད་པར་བྱས་ནས་མྱ་ངན་ལས་འདས་པ་ཀུན་དུ་ཐོབ་
པར་འགྱུར་རོ། །དེ་ལྟར་ངང་པ་རྣམས་ཀྱི་མངའ་བདག་དུས་བཟངས་འདིས་བག་མེད་པ་རྣམས་ཀྱིས་བག་མེད་པར་རྒྱུ་བའི་ལྷ་དེ་དག་རྣམས་ཀྱང་ངོ་མཚར་བར་བྱེད་པའི་དབྱངས་མཚུངས་པ་མེད་པར་གྱུར་པས་གཙུག་ལག་
གི་ཆོས་སྟོན་པར་བྱེད་དོ། །དེ་ནས་ལྷ་དེ་དག་རྣམས་ཀྱིས་གཙུག་ལག་གི་ཆོས་དེ་ཐོས་པར་གྱུར་ནས། རབ་ཏུ་རྣམ་པར་དང་བར་གྱུར་པའི་ཡིད་ཐམས་ཅད་ལ་སྐྱེས་ནས་དེ་ལ་དེ་དག་རྣམས་ཀྱིས་འདི་སྐད་ཅེས་བརྗོད་དེ། ཡང་

66-1-110a

ཇི་ལྟར་ཁྱོད་ཁོ་ན་འདི་ན་ལྷ་ཡིན་ཏེ། གང་ལ་ཡང་རྣམ་པ་འདི་འདྲ་བའི་བློ་དང་སྒྲུབ་པ་མེད་པའི་ཕྱིར་རོ། །བདག་ཅག་རྣམས་ནི་དུད་འགྲོ་ཡིན་ཏེ་བག་མེད་པས་རྣམ་པར་བཅོམ་པ་དང་ཡུལ་རྣམས་ལ་དཔུང་
གཉེན་དུ་བྱེད་པས་རྟག་ཏུ་ཡང་སྲེད་པས་ཉེ་བར་བཅོམ་པའི་སེམས་གང་ལ་ཡང་རྣམ་པ་དེ་ལྟ་བུ་ཉིད་ནི་མེད་དེ། བདག་ཅག་རྣམས་ཐམས་ཅད་ཀྱིས་གུས་པ་ཐམས་ཅད་ཀྱིས་གླུ་བླངས་པར་གྱུར་ཀྱང་རྣམ་པ་ཇི་སྲིད་
པར་གྱུར་པའི་དབྱངས་དེ་དག་རྣམས་ནི་མི་འབྱུང་ངོ་། །དེ་ནས་དེའི་དུས་འདིར་ངང་པ་རྣམས་ཀྱི་མངའ་བདག་དེས་ཚིགས་སུ་བཅད་པའི་དབྱངས་ཀྱིས་བསྙད་པ་ཇི་ལྟར། དམ་ཆོས་བྱིན་བརླབས་དང་ལྡན་པ། །ཆོས་
བསྒྲགས་གནས་པའི་དབང་ཇི་བཞིན། །དམ་ཆོས་བསྒྲགས་པ་ཐོས་ནས་ནི། །སྡིག་པ་རྣམ་སྤོང་སྐྱེས་བུ་དེ། །དགའ་བས་ལེགས་པར་རབ་ཏུ་བསྒྲུབ། །རྟག་པར་ཡང་ནི་སྐྱེད་པར་བྱེད། །དམ་ཆོས་བསྒྲགས་པ་
ཐོས་ནས་ནི། །ཡིད་ནི་ཚིམ་པར་འགྱུར་བ་ཡིན། །དགེ་བ་འང་ཤིན་དུ་ཆེན་པོ་ནི། །རྒྱུད་ལ་ཀུན་ནས་རབ་ཏུ་འཇོག །ཐོས་ནས་ཆོས་ནི་འཛིན་པར་འགྱུར། །ཐོས་ནས་སྡིག་པ་མི་བྱེད་དོ། །ཐོས་ནས་ལས་
དང་འབྲས་བུ་ཤེས། །དེ་ནི་མྱ་ངན་འདས་པར་འགྲོ། །ཐོས་ནས་ཆོས་ལ་རྟོགས་པ་དང་། །ཐོས་ནས་སངས་རྒྱས་ལ་རབ་དང་། །ཐོས་ནས་སྡུག་བསྔལ་རྣམ་གྲོལ་བའི། །མི་གང་དེ་ནི་མཁས་པ་ཡིན། །ཆོས་
བསྒྲགས་དེ་ཉིད་ཤེས་པ་ནི། །ཐོས་པས་ཡིད་ཅན་རྣམས་ལ་འགྱུར། །དེ་ཕྱིར་རབ་འབད་ཐོས་པའི་བློ། །རབ་ཏུ་བརྩོན་པས་བྱ་བར་གྱིས། །ཐོས་ནས་འཁོར་བ་ལས་ཁ་ཕྱིར། །གཏམ་ནི་བདེ་བར་
གཤེགས་པས་གསུངས། །སྲིད་པ་རྣམ་པ་གསུམ་བཅོམ་ནས། །གོ་འཕང་ཉམས་པ་མེད་པར་འགྲོ། །རབ་ཏུ་བརྩོན་པ་རྣམ་བཞི་ཡིས། །སྐྱེ་འགག་མེད་པའི་ཆོས་རྣམས་ནི། །ཐོས་ནས་ས་བོན་

66-1-110b

ཐམས་ཅད་པ། །དེ་ཐོས་སྐྱེས་བུས་རྣམ་པར་བསྒོམ། །ཕུང་པོ་སྐྱེ་མཆེད་ཁམས་རྣམས་ཀྱི། །གང་ཕྱིར་མཚན་ཉིད་དེ་གཉིས་དག །ཐོས་ནས་ཀྱང་ནི་ཐམས་ཅད་ཤེས། །དེ་ཕྱིར་ཤེས་རབ་མཆོག་ཡིན་ནོ། །གང་ཡང་
འཁོར་བར་ཀུན་འཆིང་བའི། །རབ་ཀྱི་སྟོབས་ལྡན་སྐྱོན་དེ་དག །དམ་ཆོས་ཐོས་པ་རྣམས་ཀྱིས་ནི། །དེ་ནི་ལྷག་མ་མེད་པར་འཇོམས། །སྐད་ཅིག་མ་ལུས་པར་རབ་འཇུག །ལྷག་མ་མ་ལུས་པར་ཡང་ལྡོག །ཐོས་
དང་ལྡན་པས་རབ་ཏུ་ཤེས། །དེ་ཕྱིར་ཐོས་པ་བླ་ན་མེད། །འཆི་བའི་དུས་སུ་ཕྱིན་པ་ཡི། །ཚོར་བས་གཟིར་བའི་ལུས་ཅན་རྣམས། །ཇི་ལྟར་ཐོས་པ་ལ་དམིགས་ཏེ། །ཅུང་ཟད་སྙིང་ལ་སྐྱེས་པ་ཡིན། །ཐོས་པའི་
མེ་ཡིས་མ་ལུས་ཀུན། །ཉོན་མོངས་ཤིང་ནི་གང་བསྲེགས་པའི། །དེ་དག་སླར་ཡང་འབྱུང་བ་ནི། །ནམ་ཡང་དམིགས་པ་མ་ཡིན་ནོ། །བག་ཡོད་པ་ཡིས་བསྲེགས་པའི་ཡང་། །བདེ་ལས་བདེ་བ་ཐམས་ཅད་འབྱུང་། །
ཐོས་པའི་གཞི་ལས་བདེ་ལེགས་ཡིན། །དེ་ཕྱིར་ཐོས་པ་མཆོག་ཡིན་ནོ། །དམ་ཆོས་བསྒྲགས་པ་མཉན་ནས་ནི། །སྤེལ་ལ་ཉེར་བསྟེན་མཁས་པ་ཡང་། །རྒ་དང་འཆི་བ་སྤངས་པ་ཡི། །བླ་ན་མེད་པའི་གནས་སུ་
འགྲོ། །ཐོས་པས་སྡིག་པ་མི་བྱེད་ཅིང་། །ཐོས་པས་ཆོས་ལ་འཇུག་པར་བྱེད། །ཐོས་ནས་སྡུག་བསྔལ་ལས་རྣམ་གྲོལ། །དེ་ཕྱིར་ཐོས་པ་གཙོ་བོ་ཡིན། །ལུས་ངག་ཡིད་གསུམ་དག་པ་ནི། །ལུས་ཅན་རྣམས་ཀྱིས་
ཐོས་པས་ཡིན། །དེ་ཕྱིར་ལེགས་པར་དག་འདོད་གང་། །དེས་ནི་གུས་པར་མཉན་པར་བྱ། །ཐོས་པའི་གྲུ་ལ་ལེགས་བརྟེན་ནས། །བརྩོན་འགྲུས་བརྟན་པོས་ཕ་རོལ་གནོན། །རྣམ་པ་སྣ་ཚོགས་ཆེ་རྒྱས་པར། །སྐྱེས་བུ་
མྱུར་དུ་སྒྲོལ་བར་འགྱུར། །ཐོས་པས་ཕྱུག་པའི་སྐྱེས་བུ་ནི། །ནོར་རྣམས་ཀུན་དུ་ལྡན་པར་བརྗོད། །ཐོས་མེད་དོན་གྱི་ནོར་ལྡན་པ། །དེ་དབུལ་རབ་ཏུ་སངས་རྒྱས་གསུང་། །དམ་ཆོས་ནོར་ནི་ཉམས་པ་དང་། །བླ་མ་

66-1-111a

ཡང་ན་སྤངས་པ་ཡི། །གསོན་པའི་འབྲས་བུ་མེད་པ་དང་། །སྡིག་པས་ཀྱང་ནི་བཅོམ་པར་འདོད། །བག་མེད་པ་དང་ལེ་ལོ་ཅན། །སྡིག་པའི་གྲོགས་ཀྱི་ལུས་ཅན་རྣམས། །གསོན་པ་འབྲས་མེད་མིག་གི་
ནི། །འབྲས་བུ་གཞན་གྱིས་བཏོན་པ་བཞིན། །ཐོས་པའི་མིག་དང་རྣམ་བྲལ་བ། །དམུས་ལོང་ཞེས་ནི་མངོན་པར་བརྗོད། །གང་ཡང་ཆོས་ནི་ཡོང་བོར་ནས། །ཆོས་མིན་པ་ལ་རྗེས་གནས་པ། །དེ་ནི་སྨན་རྣམས་ཡོངས་
བོར་ནས། །ནད་ཉིད་ཉེ་བར་སྟེན་པ་ཡིན། །བསྟེན་པ་ཉིད་དང་སྐྱེས་བུ་དེས། །ཆོས་ནི་རྣམ་པ་དུ་མར་སྤེལ། །ཆར་རྣམས་དང་ནི་ཚོགས་པ་ལས། །ཆུ་ཀླུང་རབ་ཏུ་འཇུག་པ་ལྟར། །ཆོས་ལ་སྤྱོད་པར་བཞིའི་བདག །དུས་
སུ་ལྡང་དང་མཉམ་པར་བཞག །ངེས་པར་བདེ་བའི་སྐལ་ལྡན་འགྱུར། །བག་མེད་པས་ཀྱང་བསླུས་པ་མིན། །དེ་ཕྱིར་ཤེས་རབ་ཡོན་ཏན་དུ། །ཤེས་ཀྱིས་མཁས་པས་ཤེས་རབ་སྟེན། །ཤེས་མིན་ཡང་དག་ལེགས་
ལྡན་པའི། །བདེ་བའི་སྐལ་ལྡན་སྐྱེ་འགག་མེད། །དེ་ལྟར་དུས་བཟང་དེས་ལྷ་དེ་དག་རྣམས་ཀྱི་དགེ་བའི་རྩ་བ་དེ་སྙིང་ལ་ལེགས་པར་འཇུག་པར་བྱེད་དོ། །རབ་ཏུ་འགོད་པར་བྱེད་དོ། །ལན་ཅིག་དང་ཕྱོགས་ཅིག་མ་
ཡིན་པར་ཡང་ཕན་པར་གྱུར་པ་རྣམས་ཉེ་བར་སྡུག་པར་བྱེད་ལ། མི་ཕན་པ་རྣམས་དང་བྲལ་བར་བྱེད་དོ། །རྫོགས་པའི་སངས་རྒྱས་ཀྱིས་གསུངས་པའི་གཙུག་ལག་གི་ཆོས་རྣམས་སྟོན་པར་བྱེད་དོ། །དེ་ནས་ལྷ་དེ་
དག་གིས་དེའི་དྲུང་ནས་ཆོས་དེ་དག་ཐོས་པར་གྱུར་ནས་གུས་པ་ལེགས་པར་སྐྱེས་པས་ཚིམ་པར་གྱུར་པའི་ཡིད་ཀྱིས་སླར་ཉིད་ཀྱང་བག་མེད་པ་ཞན་པར་གྱུར་པའི་ལུས་ལྷན་ཅིག་པའི་སྐྱོན་གྱིས་རྩེད་མོ་རྩེ་འདོད་པ་
པས་གཞན་དུ་འགྲོ་བར་བྱེད་དོ། །དུས་བཟང་ཀྱང་བཅོམ་ལྡན་འདས་གསེར་ཐུབ་ཀྱིས་གསུངས་པའི་དམ་པའི་ཆོས་སྒྲོགས་པའི་སྙིང་པོ་ཞེས་བྱ་བའི་མདོ་ཡོན་ཏན་དུ་མ་དང་ལྡན་པ་དེ་བཤད་ནས་ཡུལ་གཞན་ལ་

66-1-111b

ཆོས་ཁོ་ན་སེམས་པར་བྱེད་པས་ཀུན་ཏུ་གནས་སོ། །བཅོམ་ལྡན་འདས་གསེར་ཐུབ་ཀྱིས་གསུངས་པའི་མདོ་ཡོན་ཏན་སུམ་བཅུ་དང་ཡང་དག་པར་ལྡན་པའི་དམ་པའི་ཆོས་སྒྲོགས་པའི་སྙིང་པོ་ཞེས་བྱ་
བ་རྫོགས་སོ།།           །། འཐབ་བྲལ་བ་རྣམས་ཀྱིས་ས་རཱ་ཛ་ནི་དེ་ན་རྒྱུ་བར་བྱེད་པའི་ལྷ་དེ་དག་རྣམས་ཀྱང་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པར་གྱུར་པའི་ལས་དེ་ཟད་པར་མ་
གྱུར་གྱི་བར་དེ་སྲིད་དུ་རྔ་སྐད་ཡན་ལག་ལྔ་དང་ལྡན་པ་དང་ལྷ་རྫས་ཀྱི་འདོད་པའི་ཡོན་ཏན་ལྔས་དགའ་བར་བྱེད་དོ། །གང་གི་ཚེ་དེ་དག་ཟད་པར་གྱུར་པ་དེའི་ཚེ་ཉེས་པར་བྱས་པའི་ལས་རྣམས་ཀྱིས་སླར་ཉིད་
ཀྱང་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །གང་ཡང་མི་རྣམས་དང་སྐལ་བ་མཐུན་པར་གྱུར་པ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མིར་སྐྱེས་པར་གྱུར་ན། 
དེ་ཕུན་སུམ་ཚོགས་པར་གྱུར་ལ་མཆོག་ཏུ་སྐྱིད་པའི་སྐལ་བ་ཅན་དང་། མཆོག་ཏུ་བདེ་བར་གྱུར་པ་དང་རྒྱུན་དུ་དམ་པའི་ཆོས་རྣམས་མཉན་པར་འདོད་པ་དང་། ཆོས་པའི་མཆོག་ཏུ་གྱུར་པ་དང་ཡིད་གཞུངས་
པ་དང་ཡང་དག་པའི་ལྟ་བ་ཅན་དང་། རྒྱལ་པོ་འམ་རྒྱལ་པོའི་བློན་པོར་ཡང་ལས་དེའི་རྒྱུ་མཐུན་པས་འགྱུར་རོ། །ར་ཛ་ནི་ན་རྒྱུ་བ་ཞེས་བྱ་བའི་ས་རྫོགས་སོ།། །།གཞན་ཡང་དགེ་སློང་ལས་ཀྱི་འབྲས་
བུ་རྣམ་པར་སྨིན་པ་ཤེས་པ་དེ་འཐབ་བྲལ་བའི་ལྷ་རྣམས་ཀྱི་ས་ལ་ཀུན་དུ་ལྟ་བར་བྱེད་དེ། དེས་ཐོས་པ་ལས་བྱུང་བའི་རང་བཞིན་གྱི་ཤེས་རབ་ཀྱིས་འཐབ་བྲལ་བའི་ལྷ་རྣམས་ཀྱི་ས་རྣམ་པ་སྣ་ཚོགས་པར་རྣམ་
པར་བཀྲ་བ་ཞེས་བྱ་བ་ཇི་ལྟར་ཡོད་པ་དེ་མཐོང་ངོ་། །ས་དེར་ཡང་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡང་། དེས་ཇི་ལྟ་བ་བཞིན་དུ་མཐོང་བ་སྐྱེས་བུ་དམ་པ་གང་གིས་དགེ་ལེགས་བྱེད་པར་གྱུར་

66-1-112a

པས་ལུས་དང་ངག་དང་ཡིད་ཀྱི་ལས་རྣམས་དགེ་བ་ལ་རབ་ཏུ་ཞུགས་པ་ཚུལ་ཁྲིམས་དང་ལྡན་པར་གྱུར་པ་དང་གཞན་གྱིས་དཀྲི་བར་མི་འགྱུར་བ་དང་ཡང་དག་པའི་ལྟ་བ་དང་ཡང་དག་པའི་འཚོ་བ་དང་ལྡན་པས་
ཉེ་འཁོར་ཀུན་ནས་མཆོག་ཏུ་དྲི་མ་མེད་པར་སྤྱོད་པར་གྱུར་ཅིང་དྲང་པོ་དང་དྲང་པོའི་རང་བཞིན་ཅན་དུ་གྱུར་པས་སེམས་ཅན་རྣམས་ལ་མངོན་པར་ཞེན་པར་གྱུར་པའི་བློར་གྱུར་པས། སྲོག་གཅོད་པ་དང་མ་བྱིན་པར་ལེན་པ་
རྣམས་ནི་སྤངས་པར་གྱུར་ཅིང་། འདོད་པ་ལ་ལོག་པར་གཡེམ་པ་ཡང་སྤངས་པར་གྱུར་པ་ལ་འདི་ལྟ་སྟེ། རྨི་ལམ་ན་ཡང་བུད་མེད་མཐོང་བར་གྱུར་ནས་མངོན་པར་ཞེན་པར་མི་བྱེད་དོ། །དེ་དང་ལྷན་ཅིག་ཏུ་བགྲོད་པར་
ཡང་མི་བྱེད་དོ། །ཉིན་མོ་ཡང་གཞན་རྣམས་དང་ཡིད་ཀུན་ཏུ་རྙོག་པ་དང་བཅས་པས་ཡོངས་སུ་རྣམ་པར་རྟོག་པར་མི་བྱེད་དོ། །ཇི་ལྟ་བར་བདག་གིས་འདོད་པ་རྣམས་ལ་ལོག་པར་གཡེམ་པ་དག་དེ་ལྟར་
ཡོངས་སུ་སྤང་བར་བྱས་པར་གྱུར་ན། ཇི་ལྟར་མཆོག་ཏུ་རྣམ་པར་དག་པའི་འབྲས་བུ་རྣམས་བདག་ལ་འབྱུང་བར་འགྱུར་ཏེ། ང་ཉིད་ཀྱིས་འདོད་པ་ལོག་པར་གཡེམ་པ་འདི་རྣམ་པར་སྤངས་པའི་རྒྱུས་
བདག་ལྷར་ཡང་འགྱུར་ལ་ལྷ་གཞན་དག་རྣམས་སུ་ཡང་རུང་སྟེ། དེས་ལྷའི་བུ་མོའི་ཚོགས་རྣམས་ཀྱིས་ཡོངས་སུ་བསྐོར་བར་བདག་འབྱུང་བར་འགྱུར་ཞིང་། ལྷའི་ཡང་བུད་མེད་ཀྱི་མཆོག་རྣམས་ལ་བདག་ཉེ་བར་
ལོངས་སྤྱོད་པར་འགྱུར་གྱི་མིའི་ནི་མ་ཡིན་ནོ། །དེ་ལྷའི་བུ་མོ་རྣམས་གང་ཡིན་པ་ཁོ་ནའི་བསམ་པས་དེ་ནི་རྙོག་པ་དང་བཅས་པའི་ཚངས་པར་སྤྱོད་པ་སྤྱོད་པར་འགྱུར་རོ། །ཇི་ལྟར་བདག་ལ་ལྷ་དེ་ཉིད་ཀྱིས་ཀྱང་བྱ་བ་མེད་
ཀྱི། གལ་ཏེ་འདིར་བདག་གིས་འདོད་པ་ལ་ལོག་པར་གཡེམ་པ་རྣམ་པར་སྤངས་པར་མ་གྱུར་པ་ནི། ཇི་ལྟར་གང་དག་གིས་བུད་མེད་རྣམས་དང་སྔོན་ཡང་ལྷན་ཅིག་དུ་བརྒད་ཅིང་བསྒྱིངས་ལ་རྩེས་པ་དང་ཡོངས་སུ་སྤྱོད་པ་དེ་

66-1-112b

དག་རྣམས་ནི་ཡང་དག་པའི་འགྲོ་བར་སྐྱེ་བར་འགྱུར་བའི་ལེགས་པ་མ་ཡིན་ནོ། །དེ་གང་གི་ཚེ་སྔོན་བུད་མེད་རྣམས་དང་ཉེ་བར་ལོངས་སྤྱད་པར་གྱུར་པའི་ལྷན་ཅིག་ཏུ་བརྒད་པ་དང་བསྒྱིངས་པ་དང་རྩེས་པ་དེ་ཡང་ཡིད་
ཀྱིས་རོ་མྱང་བར་མི་བྱེད་དོ། །ཀུན་དུ་རྟོག་པར་ཡང་མི་བྱེད་དོ། །འདུན་པའི་འདོད་ཆགས་ཡིད་ལ་སྐྱེས་པར་གྱུར་ན་ཡང་འགོག་པ་ལ་བརྩོན་པར་བྱེད་དོ། །དེའི་ཚེ་འབད་པར་བྱེད་དེ། བརྒད་པ་དང་བསྒྱིངས་པ་
དང་ཡོངས་སུ་སྤྱོད་པར་གྱུར་པའི་རྣམ་པར་རྟོག་པ་རྙིང་པ་གང་ཡིན་པ་བདག་ལ་སྐྱེས་པ་རྣམས་དང་། སོ་སོར་ཉེ་བར་ལོངས་སྤྱད་པའི་བུད་མེད་རྙིང་པ་རྣམས་ལ་ཡང་རྣམ་པར་རྟོག་པས་རྟོག་
པར་མི་བྱེད་དེ། སྐྱེས་པ་རྣམས་ལ་ཡང་ངེས་པར་བརྩོན་པར་བྱེད་དོ། །སྐྱེས་བུ་དམ་པ་དེ་ལས་དེ་དག་གིས་ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་
འཐབ་བྲལ་གྱི་ལྷ་རྣམས་ཀྱི་རྣམ་པ་སྣ་ཚོགས་པ་རྣམ་པར་བཀྲ་བའི་ས་ལ་སྐྱེ་བར་འགྱུར་རོ། །དེར་སྐྱེས་པ་འདི་ཡང་ལེགས་པར་བྱས་པའི་ལས་ཀྱི་མཐའ་ལ་སྤྱོད་པར་གྱུར་པའི་ལེགས་པར་
སྨིན་པའི་དགེ་བའི་ལས་རྣམས་ཀྱི་འབྲས་བུ་ལ་ཉེ་བར་ལོངས་སྤྱོད་པས། འདོད་པའི་ཡོན་ཏན་ལྔ་དང་ཡང་དག་པར་ལྡན་པ་ཇི་ལྟར་གང་ཁོ་ནར་ལྷ་དེ་སྐྱེས་པར་གྱུར་པ་རྣམས་ལས། རེ་ཤིག་དང་པོ་ཁོ་ནར་ཐམས་ཅད་
ནས་རིན་པོ་ཆེའི་འོད་ཟེར་གྱིས་ཐམས་ཅད་རྣམ་པར་བཀྲ་བར་གྱུར་པ་དེའི་མཐོ་རིས་ཀྱི་ཡུལ་དེ་དག་ཡིན་ནོ། །དེ་ལ་ལྷ་དེའི་ལེགས་པར་བྱས་པའི་ལས་ཀྱིས་གསར་དུ་རིན་པོ་ཆེ་འདི་དག་རྣམས་རབ་ཏུ་འབྱུང་བ་ཡིན་ནོ། །འདི་ལྟ་
སྟེ་ཉེ་འཁོར་རྣམས་ན་རྡོ་རྗེ་རྣམ་པ་དུ་མ་དང་། རིའི་རྩེ་མོ་ལ་རྣམ་པ་སྣ་ཚོགས་པའི་འོད་ཟེར་གྱི་ཕྲེང་བ་དང་ལྡན་པ་རྣམས་ལ། ཇི་ལྟར་བཻ་དཱུརྱ་དང་སྔོན་པོ་དང་སྔོན་པོ་ཆེན་པོ་དང་ཤེལ་དང་མུ་སཱ་ར་གལྦ་

66-1-113a

པ་དང་པད་མ་རཱ་ག་ཏ་མཆུ་ལྟུང་བ་རྣམས་དང་། དེ་བཞིན་དུ་གཞན་དག་ཀྱང་ལྷ་རྫས་ཀྱི་ལས་ཀྱི་ཁྱད་པར་རྣམས་ཀྱིས་ཁྱད་པར་དུ་སྐྱེས་པར་གྱུར་པའི་རིན་པོ་ཆེའི་རྣམས་པ་བརྒྱ་སྟོང་ཕྲག་རྣམས་ཀྱི་འོད་ཀྱིས་གནས་དེར་ཤིན་
དུ་ཡང་ཁྱབ་པར་གྱུར་ཏོ། །དེ་རེ་ཤིག་དང་པོ་ཉིད་ཁོ་ནར་ཁ་དོག་སྣ་ཚོགས་པའི་འོད་རྣམ་པར་རྒྱས་པ་རྣམས་ཡང་དག་པར་མངོན་པར་མཐོང་ནས་མིག་གི་རྣམ་པར་ཤེས་པ་ཀུན་དུ་འཇུག་པར་བྱེད་དོ། །གང་དག་དེས་སྔོན་ནམ་
ཡང་མ་མཐོང་བ་དེ་ལ་དེའི་མིག་གི་རྣམ་པར་ཤེས་པ་ཤིན་དུ་འཕེན་པར་བྱེད་དོ། །དེའི་རྗེས་ཐོགས་ལ་རྣམ་པ་སྣ་ཚོགས་པར་གྱུར་པ་མཚུངས་པ་མེད་པའི་ལྷ་རྫས་རྣམས་ཀྱི་གླུ་དང་རྔ་དང་རོལ་མོའི་སྒྲ་རྣམས་ཀྱི་སྒྲ་སྙན་
པར་བྱེད་དོ། །དེའི་རྗེས་ཐོགས་ལ་འདི་ལྷ་རྫས་ཀྱི་དྲི་མ་རྣམ་པ་སྣ་ཚོགས་པ་དཔེ་མེད་པའི་རྣམ་པ་རྣམས་ལ་སྣ་ཀུན་དུ་འཇུག་པར་ཡང་བྱེད་དོ། །དང་པོར་སྐྱེས་པ་དེ་གསུམ་གྱིས་ཐོག་མ་ཁོ་ནར་ཀུན་དུ་གཡེང་བར་
ཤེས་པར་བྱ་སྟེ། སྔ་ན་མ་མཐོང་བ་དང་མཚུངས་པ་མེད་པ་རྣམས་ཀྱིས་བག་མེད་པའི་ས་ལ་ཀུན་ནས་འཇུག་པར་བྱེད་དོ། །དེ་དག་རྣམས་མངོན་པར་མཐོང་ནས་གང་དག་ལྷ་ཉིད་དུ་གྱུར་པ་དེ་དག་ནི་སྐལ་བ་དང་ལྡན་པ་ཡིན་
པས་ལེགས་པར་བྱས་པའི་ལས་ཀྱིས་རྩེ་མོར་གྱུར་པ་དེ་དག་ནི་ནགས་ཀྱི་ནང་གི་གསེབ་དག་ནས་ཀུན་དུ་འོང་བར་བྱེད་དོ། །ནགས་དེ་ཡང་འོད་སྣང་བ་ཞེས་བྱ་བ་སྟེ་ཉེ་འཁོར་ཀུན་ན་འོད་ཟེར་རྣམ་པ་སྣ་ཚོགས་པ་མཚུངས་
པ་མེད་པ་རྣམས་རབ་ཏུ་སྣང་བར་བྱེད་དོ། །ནགས་དེ་ལ་ལྷ་དེ་དག་གིས་ཀུན་ནས་བགྲོད་ནས་གང་ན་ལྷ་གསར་དུ་སྐྱེས་པ་ཡོད་པ་དེར་ཉེ་བར་རྒྱུགས་པར་བྱེད་པ་རྣམས་ནི། ཆ་བྱད་སྣ་ཚོགས་པ་འཆང་བ་གཟུགས་སྣ་ཚོགས་པ་དང་
ལྡན་པ་རྣམ་པ་སྣ་ཚོགས་པའི་གླུ་དང་རྔ་སྒྲ་དང་རོལ་མོའི་སྒྲ་སྙན་པ་རྣམས་དང་གླུ་ཀུན་དུ་སྒྲོགས་པར་བྱེད་པ་དང་གླུ་དབྱངས་སྙན་པ་དཔེ་མེད་པ་དགའ་བར་གྱུར་པ་རྣམས་ཉེ་བར་བྱུང་ནས་སྐད་རྣམས་ཀུན་དུ་འདོན་ནོ། །དེ་ནས་ལྷ་དེ་

66-1-113b

ཡང་དེ་དག་རྣམས་མངོན་པར་མཐོང་བ་དང་ཐོག་མ་མེད་པའི་དུས་ནས་གོམས་པར་གྱུར་པའི་འདོད་ཆགས་ཀྱི་བློས་ཀུན་ནས་འཕངས་པས། གང་ན་ལྷ་དེ་དག་ཡོད་པ་དེར་རབ་ཏུ་དགའ་བའི་ཡིད་ཀྱིས་འདྲེ་བར་བྱེད་དོ། །དེ་དག་རྣམས་
ཀྱང་གང་ན་ལྷ་འདི་ཡོད་པ་དེར་ཉེ་བར་རྒྱུ་སྟེ། ཁ་ཅིག་ནི་ནམ་མཁའི་དཀྱིལ་དུ་ཤིན་ཏུ་འཕགས་པར་གྱུར་ནས་པི་བང་ལག་ན་ཐོགས་པས་གླུ་ལེན་པར་གྱུར་པས་སོ། །གཞན་དག་ཁ་ཅིག་ནི་ཁང་བུའི་སྟིང་ན་ཆེས་རབ་ཏུ་རྒོད་པར་བྱེད་
པའི་མིག་གིས་མེ་ཏོག་ཀུན་ཏུ་སྦྲེལ་བས་མཚུངས་པ་མེད་པ་རྣམས་ཀྱི་དྲི་སྣོམ་པར་བྱེད་དོ། །ལྷ་གཞན་དག་རྣམས་ཁ་ཅིག་ནི་ས་གཞི་ཉིད་ལ་ཚོགས་པ་འདུས་པ་རྣམས་ཀྱིས་སྣ་ཚོགས་པའི་རོལ་མོ་དང་ལག་ན་མེ་ཏོག་ཐོགས་
པར་གྱུར་པས་གང་ན་ལྷ་འདི་ཡོད་པ་དེར་རྒྱུག་པར་བྱེད་དོ། །ལྷ་གཞན་དག་ཁ་ཅིག་ནི་ལག་ན་མེ་ཏོག་རྣམས་ཐོགས་པས་གང་ན་ལྷའི་བུ་འདི་ཡོད་པ་དེར་ཉེ་བར་རྒྱུག་པར་བྱེད་དོ། །ལྷ་གཞན་དག་ཁ་ཅིག་གིས་ནི་སྣ་ཚོགས་
པའི་ཁ་དོག་དང་རོ་དང་དྲི་ཕུན་སུམ་ཚོགས་པར་གྱུར་པའི་མྱོས་བྱེད་མྱོས་པའི་སྐྱོན་དང་བྲལ་བ་དག་ཐོགས་ནས་གང་ན་ལྷ་འདི་ཡོད་པ་དེར་ཉེ་བར་རྒྱུག་པར་བྱེད་དོ། །དེ་ནས་ལྷ་གང་དག་གིས་མྱོས་བྱེད་དེ་བཟུང་ནས་རྒྱུག་པར་བྱེད་དེ་བཟུང་
ནས་རྒྱུག་པར་བྱེད་པ་དེ་དག་གི་ལག་པ་དག་ལ་དེས་ཀུན་དུ་འཇུས་ནས་ལྷ་འདི་མྱོས་བྱེད་དེ་དག་བླངས་ནས་ལྷའི་ཁ་དོག་དང་རོ་ཕུན་སུམ་ཚོགས་པར་གྱུར་པ་རྣམས་འཐུང་བར་བྱེད་དོ། །དེ་ནས་འཐུངས་པར་གྱུར་ནས་དེ་བཅུ་
འགྱུར་གྱི་བླ་ལྷག་པར་རབ་ཏུ་དགའ་བ་འཐོབ་པར་འགྱུར་རོ། །དེ་ཡུལ་བཞི་པས་ཀྱང་རྣམ་པར་གཡེངས་པ་ཡིན་ཏེ། སྔར་ནི་གཟུགས་དང་སྒྲ་དང་དྲི་རྣམས་ཀྱིས་ཡིན་ལ་ཕྱི་ནས་ནི་རོས་ཀྱང་ཀུན་ནས་གཡེངས་པར་
གྱུར་ཏོ། །ལུས་ཀྱིས་ཀྱང་རྣམ་པ་སྣ་ཚོགས་པར་གྱུར་པའི་མཆོག་ཏུ་བདེ་བ་དང་ལྡན་པའི་ཡིད་ཀྱི་རྗེས་སུ་མཐུན་པར་བྱེད་པའི་རེག་བྱ་རྣམས་ལ་རེག་པར་བྱེད། ཡིད་ཀྱིས་ཀྱང་གང་ཁོ་ན་ཀུན་དུ་རྟོག་པར་བྱེད་པ་དེ་ཁོ་ན་

66-1-114a

འབད་པ་མེད་ཅིང་ངལ་བ་མེད་པའི་ཕུན་སུམ་ཚོགས་པར་ལྷན་ཅིག་ཉིད་དུ་འབྱུང་བར་འགྱུར་རོ། །དེ་ལྟར་ལྷ་གསར་དུ་སྐྱེས་པ་དེ་སྲེད་པའི་ཚོགས་དྲུག་གིས་རྣམ་པར་འབྱེད་པར་བྱེད་དོ། །དེ་ནས་ལྷ་གསར་དུ་
སྐྱེས་པ་ལྷ་དེ་དག་རྣམས་དང་ལྷན་ཅིག་ཏུ། གང་ན་ལྷ་གཞན་དག་འདོད་པའི་ཡོན་ཏན་ལྔ་དང་བཅས་ཤིང་ཡང་དག་པར་ལྡན་པར་གྱུར་པས་དགའ་བར་བྱེད་པ་འདོད་པ་རྣམས་ཐམས་ཅད་རྗེས་སུ་མཐུན་པའི་ནགས་ཞེས་བྱ་བའི་
ནགས་དེར་ལྷ་འདི་ཉེ་བར་འདྲེ་བར་བྱེད་དོ། །དེ་ནས་ལྷ་གསར་དུ་སྐྱེས་པར་གྱུར་པ་དེ་ལྷ་དེ་དག་གིས་ཡོངས་སུ་བསྐོར་བ་ཉིད་ཀྱིས་རྣམ་པ་སྣ་ཚོགས་པའི་རྩེད་མོ་རྣམས་ཀྱིས་རྩེ་བར་གྱུར་པའི་ལྷ་དེ་དག་རྣམས་ཉིད་མཐོང་བ་ལ། 
ཁ་ཅིག་ནི་པད་མའི་རྫིང་བུ་རྣམས་ན་རྩེ་བར་བྱེད་དོ། །ཁ་ཅིག་ནི་འཁྲིས་ཤིང་གི་གསེབ་དུ་སོང་ནས་རྩེ་བར་བྱེད་དོ། །ཁ་ཅིག་ནི་རིའི་རྩེ་མོ་རྣམས་ཀྱི་གསེབ་དུ་སོང་ནས་རྔ་སྐད་ཡན་ལག་ལྔ་དང་ལྡན་པ་རྣམས་ཀྱིས་རྩེ་བར་
བྱེད་དོ། །ལྷ་གཞན་ཁ་ཅིག་ནི་སྲེད་པ་དྲུག་གི་ཚོགས་རྣམས་ཀྱིས་རྣམ་པར་འབྱེད་དོ། །དེ་ནས་ལྷ་གསར་དུ་སྐྱེས་པར་གྱུར་པ་དེ་ལྷ་དེ་དག་རྣམས་དང་ལྷན་ཅིག་ཏུ་གྱུར་པས། གང་ན་ལྷ་གཞན་དག་ལྷ་མོའི་ཚོགས་
རྣམས་ཀྱིས་ཡོངས་སུ་བསྐོར་ཅིང་ནམ་མཁའི་དཀྱིལ་ན་ཁང་བུའི་རྒྱབ་ཏུ་སོང་ནས་སྣ་ཚོགས་པའི་རིན་པོ་ཆེ་རྣམས་ཀྱིས་རྣམ་པར་བརྒྱན་པའི་ལུས་ཅན་རྣམས་རྩེ་བར་བྱེད་པ་དང་། ལྷ་གཞན་དག་ཁ་ཅིག་
ནི་ལྗོན་ཤིང་གི་ཡལ་ག་ལ་ཀུན་དུ་བབས་ནས་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ཏེ་གར་དག་བྱེད་པ་དང་རྒོད་པར་ཡང་བྱེད་པ་དང་རྔ་སྐད་ཡན་ལག་ལྔ་འགྱིང་བར་ཡང་བྱེད་དོ། །དེ་ནས་ལྷ་གསར་
དུ་སྐྱེས་པ་དེས་ལྷ་དེ་དག་རྣམས་མངོན་པར་མཐོང་བར་གྱུར་ནས་རབ་ཏུ་ཆེས་དགའ་བར་གྱུར་པའི་ཡིད་ཀྱིས། ལྷ་དེ་དག་རྣམས་ཉིད་ཁོ་ནས་ཡོངས་སུ་བསྐོར་ནས་རྣམ་པར་འདྲེ་བར་འགྱུར་རོ། །ལྷ་དེ་རྣམས་དང་ལྷ་དེ་དག་ཀྱང་

66-1-114b

ཕན་ཚུན་དུ་ལྷན་ཅིག་ཏུ་གྱུར་ཅིང་ལྷ་དེ་དག་རྣམས་དང་ལྷན་ཅིག་ཏུ་གྱུར་པ་གང་ཡིན་པའི་ལྷ་དེ་དག་རྣམས་དང་ལྷ་གསར་དུ་སྐྱེས་པ་དེ་དང་བཅས་པ་རྣམས་ནགས་དེར་རྗེས་སུ་ཞུགས་པར་གྱུར་ཏོ། །དེ་དེ་ལ་བདེ་བར་རྣམ་
པར་རྒྱུ་བར་གྱུར་པས་རྔ་སྐད་ཡན་ལག་ལྔ་དང་ལྡན་པ་དང་འདོད་པའི་ཡོན་ཏན་ལྔ་པོ་རང་གི་ལས་དང་འདྲ་བ་རྣམས་ལ་དུས་རིང་དུ་རྩེ་བར་བྱེད་ཅིང་དགའ་བར་ཡང་བྱེད་དོ། །དེ་ནས་དུས་ཤིན་དུ་རིང་དུ་ནགས་དེ་ལ་
བགྲོད་པར་གྱུར་ནས་འབབ་ཆུ་རྣམ་པ་སྣ་ཚོགས་པ་དང་ལྡན་པ་ཞེས་བྱ་བའི་རི་རིན་པོ་ཆེ་བདུན་གྱིས་རྣམ་པར་བཀྲ་བར་བྱས་པ་ལ་རྩེ་བར་གྱུར་པས་ལྷག་པར་འཁོད་པར་བྱེད་དོ། །དེ་ལྟར་ཕན་ཚུན་དུ་མྱོས་པ་ལ་གྲོགས་སུ་གྱུར་པ་
རྣམས་རང་གི་ལས་ཀྱི་འབྲས་བུ་རྣམས་ལ་ལོངས་སྤྱོད་པ་རྣམས་དེ་དང་དེ་ལ་ཡང་རྩེ་བར་བྱེད་པ་ཡིན་ཏེ། ལྗོན་ཤིང་རྣམས་ཀྱི་བར་དག་ཏུ་གྱུར་པའི་འབབ་ཆུ་རྣམས་ལ་དང་། རྣམ་པ་སྣ་ཚོགས་པའི་རྡོ་རིན་པོ་ཆེ་རྣམས་ཀྱིས་རྣམ་པར་
བརྒྱན་པ་རྣམས་དང་། རབ་ཏུ་དང་ཞིང་བསིལ་བར་གྱུར་པ་རྣམས་ལ་དང་། མཆོག་ཏུ་བསིལ་བའི་དྲི་མ་མེད་པར་གྱུར་པའི་རིའི་འབབ་ཆུ་སྣ་ཚོགས་པ་དང་ལྡན་པ་དེ་དག་རྣམས་ལ་ཡང་དགའ་བར་བྱེད་དོ། །དེ་ནས་ལྷ་བག་མེད་
པ་དེ་དག་རྣམས་ནི་མངོན་པར་མཐོང་བར་གྱུར་ནས། འབབ་ཆུ་ལ་རྒྱུ་བ་ཞེས་བྱ་བ་ལྷ་རྣམས་རྩེ་བར་བྱེད་པའི་བྱ་དག་གིས་ཚིགས་སུ་བཅད་པ་བརྗོད་པ་ཇི་ལྟར། ལས་རྣམས་གང་ཕྱིར་རྣམ་དག་གི། འབྲས་བུ་བདེ་བར་
ཀུན་ནས་གནས། །དེ་ཟད་ནས་ནི་སླར་ལྟུང་བར། །ལྷ་ཡི་འཇིག་རྟེན་ལ་འབྱུང་འགྱུར། །བདེ་བ་ད་ལྟ་བས་རྨོངས་ནས། །མདུན་གྱི་འཇིགས་པ་མཐོང་བ་མིན། །ལས་ཟད་སྡུག་བསྔལ་ཀུན་ཐོབ་པ། །ཕྱི་ནས་ཤེས་པར་
འགྱུར་བ་ཡིན། །བདེ་མིན་བདེ་བའི་གཟུགས་ཀྱིས་ནི། །བག་མེད་ཀུན་ནས་རབ་ཏུ་འཇུག །ལས་ཟད་ནས་ནི་རྣམ་ལྟུང་བ། །དེ་ནི་ཕྱི་ནས་ཡོངས་གདུང་འགྱུར། །ལས་གང་ཆུད་ཟ་བར་འཇུག་པའི། །བག་མེད་དུག་

66-1-115a

བཞིན་དུ་ནི་སྤོངས། །བག་མེད་པས་ནི་ཉེར་བཅོམ་ལྷ། །ཕྱི་ནས་དམྱལ་བའི་སྐལ་ལྡན་ཡིན། །འདུ་བ་ལ་ནི་བློ་དགའ་ཞིང་། །བྲལ་བ་ལ་ཡང་རྗེས་སུ་གདུང་། །འདུས་པའི་མཐའ་ནི་འབྲལ་འགྱུར་བར། །ཆོས་
ཉིད་འདི་ནི་རྣམ་པར་གནས། །ཤེས་གང་འཇིག་པར་མི་འགྱུར་བའི། །གནས་དེ་དམིགས་པ་མ་ཡིན་ནོ། །རྣམ་པར་འཇིག་དང་འབྱུང་བ་ཉིད། །ཆོས་རྣམས་བྱུང་ཞིང་འཇིག་པ་ཡིན། །ཇི་ལྟ་ཇི་ལྟར་ལྷ་རྣམས་ཀྱང་། །
བདེ་བ་རྒྱུ་བར་མཐོང་བ་ཡང་། །དེ་ལྟ་དེ་ལྟར་བག་མེད་པའི། །དུག་གིས་རྨོངས་ནས་རབ་ཆུད་འཛའ། །བག་མེད་ལྷ་རྣམས་ཐམས་ཅད་ཀྱིས། །སྔར་ནི་དགའ་བ་བཞིན་དུ་མཐོང་། །ཕྱི་ནས་སྡུག་བསྔལ་མཐོང་ནས་ནི། །
མི་རྣམས་ལ་ནི་དགྲ་བཞིན་སྐྱེ། །བུད་མེད་དང་འདྲེ་བློ་ལྡན་གྱིས། །བག་མེད་རྣམས་ལས་ལྷག་པར་བརྗོད། །དེ་དང་འདྲེ་ལས་ལྷ་རྣམས་འཇིག །ལྷ་མིན་ལྟོ་འཕྱེ་ཆེན་པོ་ཡང་། །བུད་མེད་དང་འབྲེལ་ཆང་འཐུང་དང་། །
རྩེད་མོ་ཡུལ་དང་ལྷན་ཅིག་ཏུ། །ཙབ་ཧྲལ་དེ་ནས་ལེ་ལོ་དང་། །དེ་དག་བག་མེད་མྱུ་གུ་ཡིན། །དེ་དག་བྱ་དེས་ལྷ་དེ་དག་རྣམས་མངོན་པར་མཐོང་ནས་རྗེས་སུ་འདོམས་པར་བྱེད་པའི་ཚིགས་སུ་བཅད་པ་རྣམས་བརྗོད་དོ། །
དེ་ནས་ལྷ་དེ་དག་ལ་དེ་ལྟར་ཕན་པ་རྣམས་བརྗོད་པར་གྱུར་པ་ན་ཡང་རྟོགས་པར་མི་འགྱུར་བར། ཡུལ་རྣམས་ཀྱིས་ཉེ་བར་བཅོམ་ནས་དེ་ཁོ་ན་བཞིན་དུ་གར་བྱེད་པར་གྱུར་ཅིང་རྒོད་པར་གྱུར་པ་དང་རྩེ་བར་ཡང་གྱུར་པས། སླར་ཡང་
འཁྲིས་ཤིང་ལྗོན་ཤིང་གིས་ཀུན་ནས་ཁྱབ་པའི་ནགས་འོད་སྣང་བ་དེ་ཉིད་དུ་རབ་ཏུ་འཇུག་པར་བྱེད་དོ། །ནགས་དེ་ན་ནི་མཆོག་ཏུ་དགའ་བར་གྱུར་པ་རྣམ་པ་སྣ་ཚོགས་པའི་ཤིང་དང་འཁྲིས་ཤིང་དང་ལྗོན་ཤིང་དང་པད་མའི་རྫིང་བུ་དང་
ཁྲུས་ཀྱི་རྫིང་བུ་དང་འབབ་ཆུ་རྣམས་ལ་དགའ་བ་རྣམ་པ་སྣ་ཚོགས་པའི་བྱའི་ཚོགས་བརྒྱ་ཕྲག་གི་སྒྲ་འབྱིན་པ་རྣམས་དང་། མེ་ཏོག་བརྒྱ་ཕྲག་ཁ་བྱེ་བས་དགའ་བར་གྱུར་པ་མན་དཱ་ར་བ་ཀུན་ནས་འདུད་པའི་ལྗོན་ཤིང་དང་མྱུ་གུ་ལ་ལྷ་བརྒྱ་

66-1-115b

ཕྲག་གིས་གང་བས་དགའ་བ། ལྷ་རྫས་ཀྱི་རྔ་སྐད་ཡན་ལག་ལྔ་པའི་སྒྲ་སྒྲོགས་པར་གྱུར་པའི་སྒྲས་ལྷ་དེ་དག་ལྷ་གསར་དུ་སྐྱེས་པ་དེ་དང་ཡང་དག་པར་ལྡན་པས་རྩེ་བར་བྱེད་ཅིང་དགའ་བར་ཡང་བྱེད་དོ། །དེ་ལ་ལྷ་གང་དག་སྐྱེས་
ནས་རིང་དུ་ལོན་པ་དེ་དག་རྣམས་ལན་གཅིག་དང་ལན་གཅིག་མ་ཡིན་པར་རྣམ་པ་དུ་མར་ནགས་དེ་དག་དང་ནགས་ཀྱི་བཀོད་པ་དག་རྣམས་ལ་དང་འཇུག་ངོས་དེ་དག་དང་པད་མའི་རྫིང་བུ་དེ་དག་དང་ས་གཞིའི་ཆ་དེ་དག་དང་འཁྲིས་ཤིང་གི་ཁང་པ་
དེ་དག་དང་། ནགས་ཀྱི་གསེབ་དེ་དག་དང་དཔག་བསམ་གྱི་ཤིང་དེ་དག་དང་ནགས་ཁྲོད་ཀྱི་གསེབ་རིན་པོ་ཆེ་བདུན་གྱི་འོད་ཀུན་ནས་འབར་བའི་འོད་ཟེར་དང་ལྡན་པ་དང་ཁང་བུ་སྔ་ན་མ་མཐོང་བ་དེ་དག་རྣམས་ཀྱིས་དེ་ལྟར་ཀུན་དུ་འཁྲིད་
པར་བྱེད་དོ། །དེ་བཞིན་དུ་ལྷ་གསར་དུ་སྐྱེས་པ་འདི་ཡང་ཐམས་ཅད་དུ་རྣམ་པར་ལྟ་བར་གྱུར་པས་ཀུན་དུ་འགྲོ་བར་བྱེད་དོ། །ངོ་མཚར་བས་ཡིད་ཀུན་དུ་གཡོས་པར་གྱུར་པའི་བློས་ལྷ་དེ་དག་ཉིད་ཀྱིས་ཡོངས་སུ་བསྐོར་ནས། 
དེ་ཡུལ་གསར་པ་རྣམས་ཀྱི་སྲེད་པས་གདུངས་པའི་འདོད་པའི་མེ་དང་བག་མེད་པའི་དུད་པས་བསྲེགས་པར་གྱུར་པས་གྱུར་ཅིང་ཡང་དང་ཡང་དུ་བསྲེགས་པར་གྱུར་པས་ལྷ་དེ་དག་རྣམས་ཉིད་ཀྱིས་ཡོངས་སུ་བསྐོར་ནས་ནགས་ཀྱི་
ནང་གི་གསེབ་ཏུ་ཡུལ་རྣམས་ཀྱི་སྲེད་པའི་ཤུགས་དུ་མས་བསྲེགས་པར་གྱུར་པས་རྟག་པར་རྒྱུན་དུ་འགྲོ་བར་བྱེད་དོ། །དུས་རིང་དུ་རྒྱུ་བར་གྱུར་པ་ལས་དེ་གལ་ཏེ་ཤེད་ན་ལྷ་དེ་དག་གིས་ཡོངས་སུ་བསྐོར་ནས་གང་ན་རྣམ་
པ་སྣ་ཚོགས་པར་བཀྲ་བ་ཞེས་བྱ་བའི་པད་མའི་རྫིང་བུ་ཡོད་པ་དེར་ཀུན་དུ་འགྲོ་བར་བྱེད་དོ། །རྣམ་པ་སྣ་ཚོགས་པར་བཀྲ་བའི་པད་མའི་རྫིང་བུ་དེའི་ཡང་མཚུངས་པ་མེད་པར་གྱུར་པའི་མཛེས་པ་འདི་དག་ཡིན་ཏེ། 
དཔེར་ན་པད་མ་དེ་ལྟ་བུའི་གཟུགས་རྣམ་པར་བཀྲ་བར་གྱུར་པ་རྣམས་ལ་འདི་ལྟ་སྟེ། བཻ་དཱུརྱའི་འདབ་མ་དང་གསེར་གྱི་ཡུ་བ་དང་པད་མ་རཱ་ག་དང་གསེར་བཟང་པོའི་སྙིང་པོ་དང་། དངུལ་གྱི་མདོག་དང་མཚུངས་

66-1-116a

པའི་ཟེ་འབྲུ་དང་ལྡན་པ་རྣམས་ལ་ཨིན་དྲ་ནཱི་ལའི་རང་བཞིན་གྱི་བུང་བ་རྣམས་ཀྱིས་ཉེ་བར་མཛེས་པར་གྱུར་པ་དང་། པད་མ་གཞན་ཁ་ཅིག་ནི་དངུལ་གྱི་རང་བཞིན་གྱི་ཡུ་བ་དང་ཨིན་དྲ་ནཱི་ལའི་འདབ་མ་དང་། 
གསེར་གྱི་ཟེ་འབྲུ་ལ་མུ་སཱ་ར་གལྦ་དང་ཤེལ་དང་གསེར་གྱི་མདོག་གི་བུང་བ་རྣམས་ཀྱིས་ཉེ་བར་མཛེས་པར་བྱས་པའོ། །པད་མ་གཞན་ཁ་ཅིག་ནི་གསེར་གྱི་ཡུ་བ་ལ་ཨིན་དྲ་ནཱི་ལའི་འདབ་མ་དང་པད་མའི་ཟེ་འབྲུ་དངུལ་གྱི་སྙིང་པོ་ལ་པད་མ་
རཱ་ག་དང་མདོག་མཚུངས་པའི་བུང་བ་རྣམས་ཀྱིས་ཉེ་བར་མཛེས་པའོ། །པད་མ་གཞན་ཁ་ཅིག་ནི་ཡུ་བ་དང་འདབ་མ་དང་ཟེ་འབྲུ་དང་སྙིང་པོ་རྣམས་ཐམས་ཅད་དམར་པོ་ཡིན་ཏེ། དེ་བཞིན་དུ་བུང་བ་ཡང་དམར་པོ་རྣམས་ཀྱི་ཉེ་
བར་མཛེས་པར་བྱས་པའོ། །གཞན་ཡང་པད་མ་གཞན་དག་ནི་ཡུ་བ་དང་འདབ་མ་དང་ཟེ་འབྲུ་དང་སྙིང་པོ་རྣམས་ཐམས་ཅད་ཀྱང་དངུལ་དང་མཚུངས་པར་གྱུར་པ་ལ་བུང་བ་རྣམས་ཀྱང་ཁ་དོག་གཅིག་པའོ། །པད་མ་གཞན་ཁ་
ཅིག་ནི་ཨུད་པ་ལ་དང་ཆ་འདྲ་བ་དང་ཡུ་བ་དང་འདབ་མ་དང་ཟེ་འབྲུ་དང་སྙིང་པོ་རྣམས་ཐམས་ཅད་ནས་སྔོན་པོར་གྱུར་པ་ལ་བུང་བའི་ཚོགས་རྣམ་པར་སྒྲོགས་པ་རྣམས་ཀྱིས་ཉེ་བར་མཛེས་པའོ། །གཞན་ཡང་པད་མ་གཞན་རྣམས་
རྣམ་པར་མཛེས་པར་གྱུར་པ་པད་མའི་རྫིང་བུ་དེ་ཉིད་ན་ཁ་དོག་རྣམ་པར་བཀྲ་བའི་པད་མ་རྣམས་ལ་འདི་ལྟ་སྟེ། པད་མ་ཅིག་ཀྱང་རིན་པོ་ཆེ་བདུན་གྱི་རང་བཞིན་གྱིས་རྣམ་པར་བཀྲ་བ་དང་དབྱིབས་རྣམ་པ་སྣ་ཚོགས་པ་དང་རྣམ་པ་སྣ་
ཚོགས་པར་རབ་ཏུ་སྐྱེས་པར་གྱུར་པའི་པད་མ་རྣམས་ཡིན་ཞིང་། རྣམ་པ་སྣ་ཚོགས་པའི་དྲི་དང་ལྡན་པ་དང་འདབ་མ་ཁ་དོག་སྣ་ཚོགས་པས་ཉེ་བར་མཛེས་པར་གྱུར་པ་རྣམས་ལ་འདི་ལྟ་སྟེ། སྔོན་པོ་དང་སེར་པོ་དང་དཀར་པོ་དང་
དམར་པོ་དང་ནག་པོ་དང་རྣམ་པར་འདྲེས་པའི་འདབ་མས་ཉེ་བར་མཛེས་པར་བྱས་པའི་པད་མའི་རྫིང་བུ་ལས་སྐྱེས་པ་ལས་བུང་བའི་ཚོགས་རྣམས་ཀྱིས་མཛེས་པར་གྱུར་པའོ། །རྣམ་པ་དེ་སྲིད་པ་རྣམས་ཉིད་ཀྱིས་ཉེ་བར་

66-1-116b

མཛེས་པར་གྱུར་པས་པད་མའི་གསེབ་རྣམས་རབ་ཏུ་གསལ་ལོ། །རྣམ་པ་དེ་ལྟ་བུར་རྣམ་པར་བཀྲ་བར་གྱུར་པའི་པད་མའི་རྫིང་བུ་དེ་ན་མཆོག་ཏུ་དགའ་བར་གྱུར་པ་རབ་ཏུ་དང་བའི་ཆུ་བསིལ་ཞིང་མངར་བའི་ཆུ་ལ་མཆོག་ཏུ་དགའ་བའི་
ལྷ་རྫས་ཀྱི་མདོག་དང་དྲི་དང་དབྱིབས་དང་ལྡན་པའི་པད་མས་ཉེ་བར་མཛེས་པར་གྱུར་པ་འདི་ནི། ལྷ་གསར་དུ་སྐྱེས་པ་དེ་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ཅིང་ལྷན་ཅིག་ཏུ་ལྷ་རྫས་ཀྱི་འདོད་པའི་ཡོན་ཏན་ལྔ་དང་ལྡན་པར་
གྱུར་ནས་རྔ་སྐད་ཡན་ལག་ལྔ་པས་རྩེ་བར་བྱེད་ཅིང་རྒོད་པར་བྱེད་དོ། །རྣམ་པ་སྣ་ཚོགས་པར་རྣམ་པར་བཀྲ་བའི་པད་མའི་རྫིང་བུ་དེའི་མཐའ་མ་ན་ཡང་། ལྷ་རྫས་ཀྱི་འགྲམ་ནས་སྐྱེས་པར་གྱུར་པའི་ལྗོན་ཤིང་གི་རིགས་ཡོད་
པ་རྣམས་ནི་གང་དག་གིས་པད་མའི་རྫིང་བུ་དེ་བརྒྱ་འགྱུར་དུ་ཡང་རྣམ་པར་མཛེས་པར་བྱེད་པ་སྟེ། ནམ་ཟླ་ཐམས་ཅད་དུ་རབ་ཏུ་ཁ་བྱེ་བར་གྱུར་པའི་མེ་ཏོག་གི་ཚན་ཀ་ཀུན་ནས་དུད་པ་རྣམས་ཀྱིས་ཡོངས་སུ་བསྐོར་བ་རྣམས་ལ་
འདི་ལྟ་སྟེ། ཤིང་གི་ཚོགས་སུ་གྱུར་པ་རྣམས་ལ་ཤིང་གང་དག་གི་མཛེས་པ་འདི་དག་ཡིན་ཏེ། འདི་ལྟར་རྩ་བ་ནས་བཟུང་ནས་སྔོན་པོ་དང་སེར་པོ་དང་དཀར་པོ་དང་ནག་པོ་དང་དམར་པོའི་མདོག་གི་མེ་ཏོག་རྣམས་ཀྱིས་ཉེ་
བར་མཛེས་པ་དང་ལྡན་པའི་ལྗོན་ཤིང་རྣམས་ཡིན་ནོ། །པད་མའི་རྫིང་བུ་དེ་ན་གང་དག་ཡོན་ཏན་བརྒྱ་འགྱུར་དུ་གྱུར་པའི་འོད་དང་ལྡན་པའི་བྱའི་ཚོགས་རྣམས་ཀྱིས་དཔག་ཚད་བཅུར་ཉེ་བར་མཛེས་ཤིང་སྐད་སྙན་པ་རྣམས་ཀྱིས་
ཉེ་འཁོར་ཀུན་ནས་རྣམ་པར་མཛེས་པར་བྱེད་དོ། །གཞན་ཡང་པད་མའི་རྫིང་བུ་དེ་ཉིད་ན་ཤིང་ལྗོན་པ་འགྲམ་ནས་སྐྱེས་པ་གཞན་དག་ཁང་བུའི་ཤིང་ལྗོན་པ་རྣམས་ཡོད་པ་འདི་དག་ནི་ལྷ་རྣམས་ཀྱི་ལེགས་པར་བྱས་པའི་ལས་ཀྱི་
གཟི་བརྗིད་ཡིན་ནོ། །གང་གི་ཚེ་ལྷ་དེ་དག་པད་མའི་རྫིང་བུ་དེ་ན་རྩེ་བར་བྱེད་པ་དེའི་ཚེ་གལ་ཏེ་ན་ཤིང་ལ་རྣམ་པར་འཛེག་པར་གྱུར་ནས་འདི་ལྟར་སེམས་པར་བྱེད་དོ། །ཇི་ལྟར་ཁང་བུ་རྣམས་ཀྱང་བདག་ཅག་ལ་འདིར་བྱུང་བར་

66-1-117a

གྱུར་ན་རུང་སྙམ་པ་དེའི་ཚེ་ཁང་བུའི་ཤིང་དེ་དག་རྣམས་ལ་བུང་བ་རྣམས་ཚིམ་པར་བྱེད་པའི་མེ་ཏོག་རྣམས་དང་བརྗོད་པ་དང་དེ་དག་རྣམས་ཐམས་ཅད་ཀྱང་ལྷ་དེ་དག་གི་ལེགས་པར་བྱས་པའི་ལས་ཀྱིས་ཏེ། རིན་པོ་
ཆེ་བདུན་གྱི་འོད་རྣམས་དང་ལྡན་པ་དང་རབ་ཏུ་ཕལ་ཆེ་བར་གྱུར་པའི་ཆུ་ཀླུང་དང་རྫིང་བུ་དང་ནགས་དང་ཉེ་བའི་ནགས་དང་རིའི་རྩེ་མོ་རྣམས་དང་རིན་པོ་ཆེ་བདུན་གྱིས་ཉེ་བར་སྤྲས་པ་དང་བཅས་པ་རྣམས་གང་ཡིན་པ་དེ་དག་ཁང་བུའི་ནང་དུ་ཕུན་
སུམ་ཚོགས་པར་འབྱུང་ངོ་། །དེ་དག་ཁང་བུར་ཞུགས་པར་གྱུར་ཅིང་རྣམ་པ་སྣ་ཚོགས་པའི་རྒྱན་དང་ཆ་བྱད་ཅན་གྱི་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་རྩེ་བར་གྱུར་ཅིང་རྒོད་པར་གྱུར་ལ་གླུ་ཡང་ལེན་པར་གྱུར་པས། 
ནམ་མཁའི་དཀྱིལ་དུ་འཕགས་ནས་འཐབ་བྲལ་བ་རྣམས་ཀྱིས་གཞན་ལ་ཇི་ལྟར་འདོད་པར་ཀུན་དུ་ལྟ་བར་བྱེད་དོ། །ཡོན་ཏན་དེ་ལྟ་བུ་རྣམས་དང་ལྡན་པའི་འགྲམ་སྐྱེས་ཀྱི་ཤིང་ཞེས་བྱ་བ་གང་དག་ཁང་བུའི་ལྗོན་ཤིང་འདི་དག་
རྣམས་ཀྱི་མཐུ་ཡིན་ནོ། །གཞན་ཡང་པད་མའི་རྫིང་བུ་དེ་ཉིད་ཀྱི་འགྲམ་ན་ཡོད་པའི་ཤིང་ལྗོན་པ་རྣམས་ལ། རྣམ་པ་སྣ་ཚོགས་པར་རྣམ་པར་བཀྲ་བའི་མེ་ཏོག་དང་འབྲས་བུ་རྣམ་པ་སྣ་ཚོགས་པར་རྣམ་པར་བཀྲ་
བའི་བྱ་རྣམས་ཀྱིས་ཉེ་བར་མཛེས་པར་གྱུར་པས་རྣམ་པར་གསལ་བར་གྱུར་པ་ཡིན་ནོ། །ནོར་བུའི་སྒྲ་ཞེས་བྱ་བ་གང་དག་གི་མཐུ་སྟོབས་ནི་འདི་ཡིན་ཏེ། གང་གི་ཚེ་ལྷ་དེ་དག་རྣམས་པད་མའི་རྫིང་བུ་དེ་ཉིད་ན་རྩེ་བར་
བྱེད་པ་ན་དེའི་ཚེ་ཤིང་དེ་དག་རླུང་འཇམ་པོ་རྣམས་ཀྱིས་རབ་ཏུ་བསྐྱོད་པར་གྱུར་པས་ཕན་ཚུན་དུ་འདྲུད་པར་བྱེད་དོ། །ཀུན་དུ་འདྲུད་པར་གྱུར་པ་དེ་དག་རྣམས་ཀྱི་ཕན་ཚུན་དུ་སྙན་པར་གྱུར་པ་དང་ཕན་ཚུན་དུ་ཡིད་དུ་འོང་བ་དང་
སྒྲ་རྒྱ་ཆེན་པོ་རྣམ་པ་སྣ་ཚོགས་པ་རྣམས་རབ་ཏུ་འབྱུང་བར་འགྱུར་རོ། །ལྷ་རྫས་ཀྱི་ནོར་བུའི་ཕུང་པོ་ཡང་མཆོག་ཏུ་ཡང་བར་གྱུར་པ་དག་མེ་ཏོག་བཞིན་དུ་རབ་ཏུ་འབབ་པའོ། །གང་དག་ནོར་བུ་རྣམས་ཀྱིས་

66-1-117b

དེའི་ཚེ་ན་ནམ་མཁའ་མ་ལུས་པར་ཀུན་དུ་སྣང་བར་བྱེད་པ་རྣམས་ལ། དཔེར་ན་ཉི་མ་དང་ཟླ་བ་འདི་དག་གིས་འཛམ་བུའི་གླིང་རབ་ཏུ་སྣང་བར་བྱེད་པ་དེ་བཞིན་དུ་ནོར་བུ་དེ་དག་རྣམས་ཀྱིས་རབ་ཏུ་གསལ་བར་བྱེད་དོ། །
དེའི་ཚེ་ནམ་མཁའི་རང་བཞིན་རབ་ཏུ་གསལ་བར་བྱེད་པ་ཡང་ཡིན་ནོ། །ལྗོན་ཤིང་གཞན་ཡང་པད་མའི་རྫིང་བུ་དེ་ཉིད་ཀྱི་ངོས་ན་ཡོད་པ་རྣམས་ལ། འདི་ལྟ་སྟེ་སྐྱ་བོ་མི་གཡོ་བ་ཞེས་བྱ་བའི་ཤིང་ལྗོན་པའོ། །པད་
མའི་རྫིང་བུ་དེ་དག་ཉིད་ན་ལྷ་དེ་དག་རྣམས་རྩེ་བར་བྱེད་པ་ན། དེའི་ཚེ་ལྗོན་ཤིང་དེ་དག་ལས་ལྷ་དེ་དག་རྣམས་ཉིད་ཀྱིས་ལེགས་པར་བྱས་པའི་ལས་རྣམས་ཀྱི་འབྲས་བུ་ཁ་དོག་དཀར་བར་གྱུར་པའི་ཁུ་བའི་རྩི་ལྷ་རྫས་ཀྱི་
དྲི་དང་རོ་དང་ཁ་དོག་དང་རེག་བྱ་ཅན་དེ་དག་རབ་ཏུ་འབྱུང་ངོ་། །དེའི་ཚེ་ལྷ་དེ་དག་རྣམས་འཐུང་བར་བྱེད་དོ། །དེས་བཅུ་འགྱུར་གྱིས་ཀྱང་ལྷག་པར་ཡིད་ཆེས་རབ་ཏུ་རངས་པར་འགྱུར་རོ། །མྱོས་པའི་སྐྱོན་རྣམས་དང་
ནི་བྲལ་བ་ཡིན་ནོ། །ལྷན་ཅིག་སྤྱོད་པར་བྱེད་པ་དེ་དག་རྣམས་ཀྱིས་ཡོངས་སུ་བསྐོར་ནས་གར་དང་རྒོད་པར་ཡང་བྱེད་དོ། །བཟའ་བ་ཡང་བདུད་རྩིའི་རང་བཞིན་རྣམས་རབ་ཏུ་ཟ་བར་བྱེད་དོ། །དེ་ལྟར་ཤིང་དེ་དག་
རྣམས་ཉིད་ལས་ལྷ་དེ་དག་རྣམས་ཀྱི་ལས་ཇི་ལྟ་བུ་རྣམས་དང་འདྲ་བར་འགྱུར་རོ། །གཞན་ཡང་པད་མའི་རྫིང་བུ་དེ་ཉིད་ན་རྣམ་པ་སྣ་ཚོགས་པར་རྣམ་པར་བཀྲ་བའི་དྲི་དང་ཁ་དོག་ཞེས་བྱ་བ་འགྲམ་ན་སྐྱེས་པའི་ཤིང་
ལྗོན་པ་གཞན་དག་ཡོད་དོ། །གང་གི་ཚེ་ན་ལྷ་དེ་དག་རྣམས་པད་མའི་རྫིང་བུ་དེ་ན་རྩེད་མོ་རྩེ་བར་བྱེད་པ་ན། དེའི་ཚེ་ལྷ་དེ་དག་རྣམས་ཉིད་ཀྱི་ལེགས་པར་བྱས་པའི་ལས་ཀྱིས་བདེ་བའི་རེག་པའི་རླུང་འཇམ་པོ་རབ་
ཏུ་འཕྱུར་རོ། །རླུང་དེ་དག་གིས་ཀྱང་ལྗོན་ཤིང་དེ་དག་རྣམས་ཀྱི་འདབ་མ་དེ་དག་འདྲུད་པར་བྱེད་དོ། །ཕན་ཚུན་ཀུན་དུ་འདྲུད་པར་གྱུར་པ་དེ་དག་རྣམས་ལས་མཆོག་ཏུ་ཡིད་དུ་འོང་བར་གྱུར་པའི་སྒྲ་རབ་ཏུ་འབྱུང་བ་རྣམས་ལ། འདི་ལྟ་སྟེ་ལྷ་དེ་དག་

66-1-118a

རྣམས་ཉིད་ཀྱི་རོལ་མོར་གྱུར་པ་མཉམ་པ་དང་ཆགས་པར་འགྱུར་བ་དང་སྙན་པར་གྱུར་པའི་རྣམ་པ་དེ་ལྟ་བུ་རྣམས་ལས་རབ་ཏུ་འབྱུང་བར་འགྱུར་རོ། །དེ་བཞིན་དུ་པད་མའི་རྫིང་བུ་རྣམ་པ་སྣ་ཚོགས་པར་
རྣམ་པར་བཀྲ་བ་དེ་ཉིད་ནི་འགྲམ་ན་སྐྱེས་པའི་ཤིང་ལྗོན་པ་གཞན་དག་ཡོད་པ་ནི་བྱས་དགའ་བ་ཞེས་བྱ་བའོ། །དེ་དག་གི་མཐུ་ནི་འདི་ལྟ་བུ་ཡིན་ཏེ། འདི་ལྟར་བྱ་གང་དག་ཡིན་པ་དེ་དག་ལྗོན་ཤིང་དེ་དག་རྣམས་ལ་སོ་སོར་
གནས་སོ། །ཇི་ལྟར་ལྷ་དེ་དག་རྣམས་སོང་བར་གྱུར་ནས་པད་མའི་རྫིང་བུ་དེ་ཉིད་དུ་ཡུན་རིང་དུ་རྩེད་མོ་རྣམས་བྱས་ཤིང་རྔ་སྐད་ཡན་ལག་ལྔ་པས་དགའ་བར་བྱས་ནས། ལྗོན་ཤིང་དེ་དག་རྣམས་ལ་ལྷག་པར་འཁོད་
པར་བྱེད་པ་དང་། དགའ་བར་གྱུར་པ་རྣམས་ལ་ལྟ་བར་འདོད་པའི་ཕྱིར་བྱ་དེ་དག་རྣམས་ཀྱི་ཡང་རྒྱབ་ཏུ་ཞོན་པར་བྱེད་དེ། གང་གིས་རྣམ་པ་ཇི་ལྟ་བུ་དག་གིས་ནམ་མཁའི་དཀྱིལ་དུ་འཕགས་ནས་ས་རྣམས་ཇི་ལྟ་བ་བཞིན་དུ་ཀུན་དུ་
བལྟ་བར་བྱ་འདོད་པའི་རྣམ་པ་དེ་ལྟ་བུར་བྱ་དེ་དག་ལྷ་རྣམས་ཀྱི་སེམས་བསྐྱེད་པ་ཙམ་གྱིས་འགྱུར་རོ། །ཡང་ན་དེར་ཁང་བུ་དག་འགྱུར་ཞིང་ཕལ་ཆེ་བར་གྱུར་པའི་འབབ་ཆུ་དང་རྫིང་བུ་དང་ནགས་དང་ཉེ་བའི་ནགས་དང་འཁྲིས་ཤིང་གི་
ཁང་བུ་ཕུན་སུམ་ཚོགས་པ་རྣམ་པ་སྣ་ཚོགས་པར་བལྟ་ན་མཛེས་པར་གྱུར་པའི་བཞོན་པ་རྣམས་ལ་ཞོན་ནས་ལྷ་རྣམས་ཀྱི་ས་ལ་དེ་དག་ཀུན་དུ་ལྟ་བར་བྱེད་དོ། །གཞན་ཡང་བྱ་གཞན་དག་གིས་ཚིགས་སུ་བཅད་པའི་
དབྱངས་བརྗོད་པ་ཇི་ལྟར། ཚུལ་ཁྲིམས་བསྲུངས་པའི་མི་རྣམས་འཆི་བ་མཆོག་ཡིན་གྱི། །ཁྲིམས་འཆལ་རྣམས་ནི་ཡུན་རིངས་གསོན་པ་འང་འདིར་མཆོག་མིན། །མི་ཡིས་ཡོངས་སུ་ཟིལ་གྱིས་མནན་ནས་གནས་
ཕྱིར་མིན། །འཆི་འཕོས་ན་ཡང་མ་ཡིན་དམྱལ་བ་རྣམས་སུ་གནས། །སྔ་ཕྱི་རིམ་པར་བློ་ལྡན་རྣམས། །སྐད་ཅིག་རེ་རེ་ཉུང་ངུན་ཉུང་། །མགར་བ་དང་ནི་ཁྲུས་མཁན་ཡང་། །བྱི་དོར་འབྲས་བུའི་བདག་ཉིད་ཡིན། །དེ་ནས་

66-1-118b

ཡང་བཅོམ་ལྡན་འདས་རྒྱལ་པོའི་ཁབ་ཀྱི་ནཱ་ལ་ཏིའི་བྲམ་ཟེའི་གྲོང་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ལུས་དྲན་པ་ཉེ་བར་གཞག་པ་ཞེས་བྱ་བ་ངས་
བཤད་པར་བྱ་སྟེ། དང་པོར་དགེ་བ་བར་དུ་དགེ་བ་ཐ་མར་དགེ་བ་དོན་བཟང་པོ་ཚིག་འབྲུ་བཟང་པོ་འབའ་ཞིག་པ་ཡོངས་སུ་རྫོགས་པ་ཡོངས་སུ་དག་པ་ཡོངས་སུ་བྱང་བ་ཚངས་པར་སྤྱོད་པ་ངས་བཤད་པར་བྱའོ། །འདི་ལྟ་སྟེ་ལུས་
དྲན་པ་ཉེ་བར་གཞག་པ་ཞེས་བྱ་བའི་ཆོས་ཀྱི་རྣམ་གྲངས་སོ། །དེ་ལེགས་པར་རབ་ཏུ་ཡིད་ལ་བྱས་ཏེ་ཉོན་ཅིག་བཤད་པར་བྱའོ། །དེ་སྐད་ཅེས་བཀའ་སྩལ་པ་དང་། དགེ་སློང་དེ་དག་བཅོམ་ལྡན་འདས་ཀྱི་ལྟར་ཉན་ཏོ། །དེ་དག་
ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །དགེ་སློང་དག་ལུས་དྲན་པ་ཉེ་བར་གཞག་པ་ཞེས་བྱ་བའི་ཆོས་ཀྱི་རྣམ་གྲངས་འདི་ཡང་གང་དག་ཡིན་ཞེ་ན། འདི་ལྟ་སྟེ་ལུས་ལ་ལུས་ཀྱི་རྗེས་སུ་ལྟ་ཞིང་གནས་
པའི་དགེ་སློང་ནི་བདུད་ཀྱི་ཡུལ་ལ་མི་གནས་སོ། །ཉོན་མོངས་པ་རྣམས་ཀྱང་སྤོང་བར་བྱེད་དོ། །ཡང་དག་པ་ཇི་ལྟ་བ་བཞིན་དུ་ལུས་མཐོང་ངོ་། །ཡེ་ཤེས་མངོན་སུམ་དུ་བྱས་པར་གྱུར་ནས་མྱ་ངན་ལས་འདས་པ་ཡང་མཐར་བྱེད་
པར་ང་གསུང་ངོ་། །འདི་ན་དགེ་སློང་ལུས་ལ་ཡང་དག་པར་ལྟ་བར་བྱེད་པ་རྣམས་ནི་ཚུལ་བཞིན་མ་ཡིན་པ་ཡིད་ལ་བྱེད་པས་མི་འཕྲོགས་པ་དང་། ཀུན་ནས་ཉོན་མོངས་པ་རྣམས་དང་ཡང་བྲལ་བར་འགྱུར་རོ། །ནང་གི་
བདག་ཉིད་ཀྱི་མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་དང་། ཕྱི་རོལ་གྱི་གཟུགས་དང་རོ་དང་དྲི་དང་རེག་བྱ་དང་སྒྲ་དང་ཆོས་རྣམས་ཀྱང་ལུས་ཡིན་ནོ། །ནང་གི་བདག་ཉིད་ཀྱིས་ལུས་ལ་ལུས་ཀྱི་རྗེས་སུ་ལྟ་ཞིང་གནས་
པར་གྱུར་ན་མཐར་མྱ་ངན་ལས་འདས་པར་འགྱུར་རོ། །འདི་ན་དགེ་སློང་དག་མིག་གིས་གཟུགས་རྣམས་མཐོང་ན་ཀུན་དུ་རྟོག་པར་མི་བྱེད་ཅིང་། དགའ་བའི་འདོད་ཆགས་དང་མཚུངས་པར་ལྡན་པའི་སེམས་ཀྱིས་

66-1-119a

ཡང་དག་པ་ཉིད་དུ་ལྟ་བར་མི་བྱེད་ཀྱིས། ལུས་འདི་ལ་ཡོད་པ་རྣམས་ནི་སྐྲ་དང་སྤུ་དང་སེན་མོ་དང་སོ་དང་རུས་པ་དང་ལྤགས་པ་དང་ཁྲག་དང་ཟས་དང་སྨིན་པ་དང་བད་ཀན་དང་མཁྲིས་པ་དང་རླུང་དང་རྒྱུ་མ་དང་གཉེ་མ་དང་
བཤང་བ་དང་གཅི་བ་དང་གློ་བ་དང་མཁལ་མ་དང་གཞང་དང་ཚིལ་དང་ཁུ་ཆུ་དང་ཆུ་སེར་དང་སྣབས་དང་གླད་རྒྱས་དང་གླད་པ་རྣམས་སོ། །དེ་གང་གི་ཚེ་དེ་ལྟར་ལུས་ལ་ལུས་ཀྱི་རྗེས་སུ་འབྲེལ་བར་དྲན་པར་གྱུར་ན། དེའི་ཚེ་གཟུགས་དང་། 
རོ་དང་དྲི་དང་རེག་བྱ་དང་སྒྲ་དང་ཆོས་དང་ཕྱི་རོལ་གྱི་ཆོས་རྣམས་ཀྱིས་ཀྱང་འཕྲོགས་པར་མི་འགྱུར་རོ། །མིག་གིས་ཀྱང་གཟུགས་རྣམས་དང་པོ་ཉིད་ནས་ཡང་དག་པ་ཇི་ལྟ་བ་བཞིན་དུ་མཐོང་ངོ་། །རྣལ་འབྱོར་སྤྱོད་པ་
རྣམས་ཀྱིས་ཡང་དག་པ་ཇི་ལྟ་བ་བཞིན་དུ་ནང་གི་བདག་ཉིད་ཀྱི་མིག་ཤའི་གོང་བུ་འབྱུང་བ་ཆེན་པོ་བཞི་ལས་གྱུར་པ་ཇི་ལྟར་མཐོང་བ་ཡིན་ན། ནང་གི་བདག་ཉིད་ཀྱི་ཤའི་གོང་བུའི་མིག་འདི་དག་ལ་གང་ཅུང་ཟད་ཅིག་སྲ་ཞིང་མཁྲང་བ་
མཁྲང་བར་གྱུར་པ་ཟིན་པར་གྱུར་པ་དེ་དག་ཉེ་བར་ལེན་པ་འདི་ནི། ནང་གི་བདག་ཉིད་ཀྱི་ཤའི་གོང་བུའི་མིག་གི་སའི་ཁམས་ཞེས་བརྗོད་དོ། །དེ་ལ་ནང་གི་བདག་ཉིད་ཀྱི་ཤའི་གོང་བུའི་མིག་འདི་དག་ཉིད་སོ་སོའི་བདག་ཉིད་ལ་ཆུ་
དང་ཆུ་རྣམས་ནི་དེ་དག་རླན་ཞིང་རླན་པར་འབབ་པ་དེ་ལ་བརྟེན་ནས་གཤེར་བར་གྱུར་པ་ཟིན་པར་གྱུར་པ་ཉེ་བར་ལེན་པ་འདི་ནི། ནང་གི་བདག་ཉིད་ཀྱི་ཤའི་གོང་བུའི་མིག་གི་ཆུའི་ཁམས་ཞེས་བརྗོད་དོ། །དེ་ལ་ནང་
གི་བདག་ཉིད་ཀྱི་ཤའི་གོང་བུའི་མིག་འདི་ཉིད་སོ་སོའི་བདག་ཉིད་ལ་མེར་གྱུར་པ་ནི་དྲོ་བ་དང་དྲོ་བར་གྱུར་པ་ཟིན་པར་གྱུར་པ་ཉེ་བར་ལེན་པ་འདི་ནི། ནང་གི་བདག་ཉིད་ཀྱི་ཤའི་གོང་བུའི་མིག་གི་མེའི་ཁམས་ཞེས་བརྗོད་དོ། །
དེ་ལ་ནང་གི་བདག་ཉིད་ཀྱི་ཤའི་གོང་བུའི་མིག་འདི་ཉིད་སོ་སོའི་བདག་ཉིད་ལ་རླུང་དང་རླུང་དུ་གྱུར་པ་རྣམས་ནི་ཡང་འདི་ཀུན་དུ་གཡོ་བ་ཉིད་དུ་གྱུར་པ་འདི་ནི། ནང་གི་བདག་ཉིད་ཀྱི་ཤའི་གོང་བུའི་མིག་གི་རླུང་གི་

66-1-119b

ཁམས་ཞེས་བརྗོད་དོ། །ཇི་ལྟར་མིག་ལ་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་པ་དེ་ལྟར་ན་རྣ་བ་དང་སྣ་དང་ལྕེ་དང་ལུས་རྣམས་ལ་ཡང་སོ་སོར་རྟོག་པར་བྱེད་ཅིང་། ལུས་ལ་ལུས་ཀྱི་རྗེས་སུ་ལྟ་བའི་དགེ་
སློང་ནི། དགའ་བའི་འདོད་ཆགས་དང་ལྷན་ཅིག་གནས་པའི་སྲེད་པས་འཆིང་བར་མི་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ངའི་ལུས་འདི་ནི་སྐད་ཅིག་དང་སྐད་
ཅིག་ལ་སྐྱེ་བ་དང་རྒས་པ་དང་འཆི་བ་དང་ཤི་འཕོ་བ་དང་སྐྱེ་བར་ཡང་འགྱུར་བས། འདི་ནི་སྒྱུ་མ་ལྟ་བུ་དང་གསོག་གསོབ་སྙིང་པོ་མེད་པ་དབུ་བ་དང་ཆུ་བུར་རྡོས་པ་ལྟ་བུར་གྱུར་པ་སྡུག་བསྔལ་དང་། སྡུག་བསྔལ་
རྣམས་སྐྱབས་གནས་སུ་གྱུར་པ་དང་། སྡུག་བསྔལ་གྱི་སྐྱེ་གནས་ཀྱི་ལུས་ཡིན་ནོ། །སྡུག་བསྔལ་མ་ཡིན་པར་འགྱུར་བ་འམ། མི་རྟག་པ་མ་ཡིན་པ་དང་ཡོངས་སུ་འགྱུར་བའི་ཆོས་ཉིད་མ་ཡིན་པ་དང་། 
འཇིག་པའི་ཆོས་ཉིད་མ་ཡིན་པ་དང་། མི་འཇིག་པའི་ཆོས་ཉིད་མ་ཡིན་པ་གང་ཡིན་པའི་གནས་སྐབས་ནི་ལུས་འདི་ལས་ཅུང་ཟད་ཅིག་ཀྱང་ཡོད་པ་མ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་
ལུས་ཀྱི་རྗེས་སུ་ལྟ་ཞིང་གནས་ཏེ། སྐྱབས་ནི་གང་ཡིན་སྐྱོབ་པ་ནི་གང་ཡིན་འདི་ན་ནི་ཇི་ལྟར་ཞེས་དེས་ཡང་དག་པ་ཇི་ལྟ་བ་བཞིན་དུ་ལུས་ལ་སོ་སོར་རྟོག་པར་བྱེད་དོ། །དེ་དག་ནི་འདི་ལྟར་ཡིན་ཏེ། ལུས་འདི་
ནི་ལས་ཀྱི་རྩ་བ་ལས་ཡིན་ཞིང་ལས་ཀྱི་སྐྱབས་གནས་པ་ལས་ཀྱི་སྐྱོབ་པ་ཡིན་པས། དགེ་བའི་ལས་རྣམས་དང་ལྡན་ན་ལྷ་དང་མི་རྣམས་སུའོ། །མི་དགེ་བའི་ལས་རྣམས་དང་ལྡན་ན་དམྱལ་བ་ཡི་དགས་དུད་འགྲོ་
རྣམས་སུའོ། །ལུས་འདི་ལ་ནི་རྫས་སམ་གཙང་བ་འམ་སྙིང་པོ་འམ་རྟག་པ་འམ་བརྟན་པར་གྱུར་པ་ནི་མེད་དོ་ཞེས་དེས་འདི་ཡང་དག་པར་སོ་སོར་རྟོག་པར་བྱེད་པ་གང་ཡིན་པ་ལས་དགའ་བའི་འདོད་ཆགས་

66-1-120a

དང་ལྷན་ཅིག་གནས་པའི་སྲིད་པ་ཡང་འབྱུང་བ་ཅན་གྱི་སྲེད་པ་རྣམས་ཡོངས་སུ་སྤོང་བར་འགྱུར་རོ། །གཞན་ཡང་རྣལ་འབྱོར་སྤྱོད་པ་མིག་དེ་ཉིད་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་དེ། 
ཇི་ལྟར་འཛམ་བུའི་གླིང་པ་རྣམས་ཀྱི་མིའི་མིག་གིས་གཟུགས་རྣམས་སྣང་བ་དང་ནམ་མཁའ་དག་ལས་རྗེས་སུ་འཐུན་པ་མཐོང་བར་འགྱུར་བ་དེ་ཁོ་ན་བཞིན་དུ་གནས་གཞན་ན་གནས་པའི་མིའི་མིག་གིས་གཟུགས་རྣམས་
མཐོང་བ་ཡིན་ནམ་ཞེས་བྱ་བར་ཏེ། དེ་ནས་ལེགས་པར་བསམས་ཤིང་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་ཀྱང་ཀུན་དུ་ལྟ་བར་བྱེད་པ་ལ་ཇི་ལྟར་འཛམ་བུའི་གླིང་པ་རྣམས་ཀྱི་མིག་དང་གཟུགས་དང་སྣང་བ་དང་
ནམ་མཁའ་དང་ཡིད་ལ་བྱེད་པའི་རྐྱེན་དེ་དག་རྣམས་ལས་གཟུགས་རྣམས་ལེགས་པར་མཐོང་བ་ཡིན་ནོ། །དེ་བཞིན་དུ་བྱང་ཕྱོགས་སྒྲ་མི་སྙན་པ་རྣམས་ཀྱི་སྐྱེས་བུ་སོང་ཞིང་ནམ་མཁའ་ལ་གནས་ནས་གཟུགས་རྣམས་མཐོང་
བ་ཡིན་ཏེ། དཔེར་ན་ཆུ་ན་ཆུ་ལ་སྤྱོད་པའི་ཉ་ལ་སོགས་པ་རྣམས་ཀྱི་གཟུགས་མཐོང་བ་དེ་བཞིན་དུ་བྱང་ཕྱོགས་སྒྲ་མི་སྙན་པའི་སྐྱེས་བུ་རིས་བསྒྲིབས་པར་གྱུར་པའི་གཟུགས་རྣམས་ཀྱང་མཐོང་ངོ་། །གཞན་ཡང་རྣལ་
འབྱོར་སྤྱོད་པ་བདག་ཉིད་འཛམ་བུའི་གླིང་པའི་ལུས་ཀྱིས་བྱང་གི་སྒྲ་མི་སྙན་པའི་ལུས་ལ་སོ་སོར་རྟོག་པར་བྱེད་དེ། ཇི་ལྟ་བུ་ཁོ་ནར་བདག་གི་རྣ་བས་མི་འདོད་པའི་སྒྲ་དང་རབ་ཏུ་གསལ་བ་རྣམས་ཐོས་ལ་བར་ཆོད་པ་
རྣམས་ནི་མ་ཡིན་ཞིང་དེ་བཞིན་དུ་སྒྲ་ཆེན་པོ་རྣམས་ནི་བདག་ཅག་གིས་ཐོས་པ་ཡིན་ན། དེ་ཁོ་ན་བཞིན་དུ་བྱང་ཕྱོགས་སྒྲ་མི་སྙན་པ་རྣམས་ཡིན་ནམ་ཅི་སྟེ་མ་ཡིན་ཞེས། དེ་ཡང་དག་པ་ཇི་ལྟ་བ་བཞིན་དུ་རྣ་བས་
སོ་སོར་རྟོག་པར་བྱེད་དེ། ཐག་ཉེ་བ་རྣམས་དང་རྒྱང་རིང་བ་རྣམས་དང་དམན་པ་རྣམས་དང་སྙན་པ་རྣམས་དང་མི་སྙན་པའི་སྒྲ་རྣམས་ཀྱང་ཆོས་ཉིད་ཀྱི་ཁྱད་པར་གྱིས་བྱང་ཕྱོགས་སྒྲ་མི་སྙན་པའི་སྐྱེས་བུས་ཐོས་པ་ཡིན་ཏེ། 

66-1-120b

ཇི་ལྟར་ཉི་མས་ཐག་ཉེ་བ་དང་རྒྱང་རིང་བ་དང་ཕལ་ཆེ་བ་དང་གཟུགས་དམན་པ་དང་མི་གཙང་བ་རྣམས་ཀྱང་གསལ་བར་བྱེད་དོ། །དེ་བཞིན་དུ་བྱང་ཕྱོགས་སྒྲ་མི་སྙན་པའི་མི་རྣམས་ཀྱིས་ཀྱང་སྒྲ་ཐོས་སོ། །གཞན་ཡང་རྣལ་འབྱོར་སྤྱོད་
པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པའི་མི་རྣམས་ཀྱི་སྣའི་དབང་པོ་དེ་ཁོ་ན་བཞིན་དུ་བྱང་གི་སྒྲ་མི་སྙན་པ་རྣམས་ཀྱི་ཡང་ཡིན་ནམ་ཅི་སྟེ་མ་ཡིན་ཞེས། དེས་ཐོས་པ་ལས་བྱུང་བའི་ཤེས་
རབ་བམ་ལྷའི་མིག་གིས་སོ་སོར་རྟོག་པར་བྱེད་དེ། སྣས་དྲི་ཞིམ་པོ་རྣམས་ནི་བསྣོཾ་པར་བྱེད་ལ་དྲི་ཞིམ་པོ་མ་ཡིན་པ་རྣམས་མནོཾ་པར་མི་བྱེད་དེ་ཆོས་ཉིད་ཀྱི་ཁྱད་པར་གྱིས་ཇི་ལྟར་འོ་མ་དང་ཆུ་དག་འདྲེས་པར་གྱུར་པ་ལ་ངང་པས་
ཆུ་མི་འཐུང་བར་འོ་མ་འཐུང་བར་བྱེད་པ་ཡིན་ནོ། །དེ་ཁོ་ན་བཞིན་དུ་བྱང་ཕྱོགས་སྒྲ་མི་སྙན་པའི་མི་རྣམས་ཀྱིས་དྲི་ཞིམ་པོ་བསྣོམ་པར་བྱེད་ཅིང་དྲི་མི་ཞིམ་པ་རྣམས་ནི་མི་མནོམ་མོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་
ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པའི་མི་རྣམས་རོ་མྱང་བར་བྱེད་པ་དེ་ཁོ་ན་བཞིན་དུ་བྱང་ཕྱོགས་སྒྲ་མི་སྙན་པ་རྣམས་ཀྱི་ཡིན་ནམ་ཅི་སྟེ་ན་མ་ཡིན་ཞེས། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་རྣམ་
པར་དག་པས་མཐོང་བར་གྱུར་པ། འཛམ་བུའི་གླིང་པ་རྣམས་ཀྱི་ལུས་ནི་རྣམ་པ་དུ་མ་རྣམས་སུ་དམན་པ་དང་བར་མ་དང་ཁྱད་པར་དུ་འཕགས་པའི་ཟས་ཡིན་ལ། དེ་ཁོ་ན་བཞིན་དུ་བྱང་ཕྱོགས་སྒྲ་མི་སྙན་པའི་མི་རྣམས་
ནི་མ་ཡིན་ཏེ། དེ་དག་རྣམས་ནི་ངའི་བ་མེད་པ་དང་རྟག་པ་ཁོ་ནར་དགེ་བའི་ལས་རྣམས་སྤྱད་པས་ཀྱང་དེ་དག་རྣམས་ནི་ངའི་བ་མེད་པ་དང་རོ་རྣམས་ཀྱང་གཅིག་པ་ཡིན་གྱི། ཇི་ལྟར་འཛམ་བུའི་གླིང་པའི་མི་རྣམས་
ཀྱི་ལྟར་ནི་མ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པའི་མི་རྣམས་ཀྱི་ལུས་ཀྱི་གཟུགས་རྣམ་པ་དུ་མ་ཡིན་པ་དེ་ཁོ་ན་བཞིན་དུ་

66-1-121a

བྱང་ཕྱོགས་སྒྲ་མི་སྙན་པ་རྣམས་ཀྱི་ཡང་ཡིན་ནམ་ཅི་སྟེ་མ་ཡིན་ཞེས། དེ་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། ཇི་ལྟར་འཛམ་བུའི་གླིང་པ་རྣམས་ཀྱི་ལུས་ནི་རྣམ་པ་དུ་མ་ཡིན་གྱི། 
དེ་ལྟར་བྱང་ཕྱོགས་སྒྲ་མི་སྙན་པ་རྣམས་ནི་མ་ཡིན་ཏེ། དེ་དག་ནི་གང་གི་ཕྱིར་ལས་མཚུངས་པ་རྣམས་ཀྱིས་ལྷན་ཅིག་ཏུ་འོངས་པ་རྣམས་ཡིན་པའི་ཕྱིར་ལུས་མཉམ་པ་ཁ་དོག་མཉམ་པ་འཛམ་བུ་ཆུ་བོའི་གསེར་འདྲ་བ་དེ་དག་
རྣམས་ནི་རྒྱ་ཆེ་ཞིང་གྱོང་བ་ནི་མ་ཡིན་ལ། འཇམ་ཞིང་མཛེས་པའི་ལུས་ཅན་རྣམས་ཡིན་ནོ། །དེ་ལྟར་འཛམ་བུའི་གླིང་པའི་མི་རྣམས་ནི་མ་ཡིན་ཏེ། འདི་དག་རྣམས་ནི་ལས་གཅིག་གིས་ཉེ་བར་འགྲོ་བ་མ་
ཡིན་ཞིང་ལུས་གཅིག་ཀྱང་མ་ཡིན་ལ་གཟུགས་གཅིག་གིས་འགྲོ་བ་པ་མ་ཡིན་ནོ། །དེ་མིའི་གནས་གཉིས་ཀྱི་ལུས་ལ་ལུས་ཀྱི་རྗེས་སུ་བལྟ་བར་གྱུར་ནས། མིའི་གནས་གསུམ་པར་གྱུར་པ་ཤར་གྱི་ལུས་འཕགས་པོ་
ཞེས་བྱ་བ་ལ་རྣམ་པར་ལྟ་བར་བྱེད་དོ། །དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། ཇི་ལྟར་འཛམ་བུའི་གླིང་གི་མི་རྣམས་དང་བྱང་གི་སྒྲ་མི་སྙན་པའི་མི་རྣམས་ཀྱི་སྐྱེ་མཆེད་ཡིན་པ་དེ་བཞིན་དུ་
ཤར་གྱི་ལུས་འཕགས་པོ་རྣམས་ཀྱང་སྟེ། དེ་དག་རྣམས་ཀྱི་མིག་གིས་གཟུགས་མཐོང་བ་ནི་ཇི་ལྟར་འཛམ་བུའི་གླིང་པའི་སྣང་བ་ལ་རྒྱུ་བའི་ཁྱི་དང་སྟག་དང་སྲིན་བྱ་དང་བྱི་ལ་ལ་སོགས་པ་རྣམས་འཇིགས་པས་སྣང་བ་མེད་པར་
མཐོང་བ་ཡིན་ལ། དེ་ལྟར་ཤར་གྱི་ལུས་འཕགས་པོའི་སྐྱེས་བུ་རྣམས་ཀྱིས་ཀྱང་མུན་པ་ལ་གཟུགས་མཐོང་བ་ཡིན་ཏེ། ཕྲ་བ་དང་རགས་པ་རྣམས་དང་ཇི་ལྟར་མིག་གི་ཡུལ་དུ་འགྲོ་བ་རྣམས་སོ། །གཞན་ཡང་
རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པའི་མི་རྣམས་ཀྱིས་སྒྲ་ཉན་པར་བྱེད་པ་ནི་སྔར་བཞིན་ཏེ། དེ་བཞིན་དུ་ཤར་གྱི་ལུས་འཕགས་པོ་རྣམས་ཀྱི་ཡང་ཡིན་ནམ་ཅི་སྟེ་

66-1-121b

མ་ཡིན་ཞེས། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་ནས་རྣམ་པར་ལྟ་བར་བྱེད་དེ། ཇི་ལྟར་འཛམ་བུའི་གླིང་པ་དང་བྱང་གི་སྒྲ་མི་སྙན་པའི་མི་རྣམས་སྒྲ་ཉན་པར་བྱེད་པ་དེ་ལྟར་ཤར་གྱི་ལུས་འཕགས་
པོ་དེ་དག་རྣམས་ནི་མ་ཡིན་ཏེ། ཤར་གྱི་ལུས་འཕགས་པོ་དེ་དག་ནི་མདའ་ལྟུང་བའི་ཚད་ཙམ་ཅིག་ཏུ་རྣ་བའི་རྣམ་པར་ཤེས་པས་སྒྲ་ལ་འཇུག་གི་ཆོས་ཉིད་ཀྱི་ཁྱད་པར་གྱིས་ལྷག་པར་སྒྲ་འཛིན་པ་ནི་མ་ཡིན་ནོ། །གཞན་
ཡང་རྣལ་འབྱོར་སྤྱོད་པ་མིའི་གནས་གསུམ་གྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པ་རྣམས་དང་བྱང་གི་སྒྲ་མི་སྙན་པའི་མི་རྣམས་ཀྱིས་སྣའི་རྣམ་པར་ཤེས་པ་དྲི་ལ་འཇུག་པར་འགྱུར་བ་དེ་བཞིན་
དུ་ཤར་གྱི་ལུས་འཕགས་པོ་རྣམས་ཀྱི་ཡང་ཡིན་ནམ་ཅི་སྟེ་མ་ཡིན་ཞེས། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཤར་གྱི་ལུས་འཕགས་པོའི་མི་རྣམས་ནི་ཆོས་ཉིད་ཀྱི་
ཁྱད་པར་གྱིས་ཉིན་མོ་སྣའི་རྣམ་པར་ཤེས་པས་དྲི་རྣམས་བསྣོམ་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པ་རྣམས་དང་བྱང་གི་སྒྲ་མི་སྙན་
པའི་མི་རྣམས་ཀྱི་ལྕེའི་རྣམ་པར་ཤེས་པ་ཀུན་དུ་འཇུག་པར་འགྱུར་བ་དེ་ལྟར་ཤར་གྱི་ལུས་འཕགས་པོའི་མི་རྣམས་ཀྱི་ལྕེའི་རྣམ་པར་ཤེས་པ་ཀུན་ནས་འཇུག་པ་ཡིན་ནམ་ཅི། དེས་ཐོས་པ་ལས་བྱུང་བའི་ཤེས་རབ་
ཀྱིས་སམ་ལྷའི་མིག་གིས་མཐོང་བར་གྱུར་པ། ཤར་གྱི་ལུས་འཕགས་པོའི་མི་རྣམས་ནི། སཱ་ལུ་ཀའི་ཟས་གཅིག་ཟོས་པས་འདི་དག་རྣམས་ཞག་གསུམ་དུ་ལུས་འཚོ་བར་འགྱུར་རོ། །ཆོས་ཉིད་ཀྱི་ཁྱད་པར་གྱིས་
དེ་དག་རྣམས་ལ་མི་འཆི་བའི་བར་དུ་ནད་ཀྱང་མེད་པ་ཡིན་ལ། དུས་གང་གི་ཚེ་ཉི་མ་ལྔ་ན་འཆི་བ་འབྱུང་བར་འགྱུར་བའི་དུས་དེའི་ཚེ་ན་ནད་འོང་བ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་

66-1-122a

ལྟ་ཞིང་གནས་ཏེ། ཇི་ལྟར་འཛམ་བུ་གླིང་པ་རྣམས་དང་བྱང་གི་སྒྲ་མི་སྙན་པའི་མི་རྣམས་ཀྱི་ལུས་ཡིན་པ་དེ་ཁོ་ན་བཞིན་དུ་ཤར་གྱི་ལུས་འཕགས་པོའི་མི་རྣམས་ཀྱི་ཡང་ཡིན་ནམ་ཅི། དེས་ཐོས་པ་ལས་བྱུང་
བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཤར་གྱི་ལུས་འཕགས་པོའི་མི་རྣམས་ཀྱི་ལུས་ནི་ནྱ་གྲོ་དྷཱ་དང་ཆ་འདྲ་བའི་ཉེ་འཁོར་ཀུན་ནས་ཡོངས་སུ་འགྲིབས་པ་ཡིན་ནོ། །གཞན་ཡང་རྣལ་འབྱོར་སྤྱོད་
པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། མིའི་གནས་གསུམ་པོ་རྣམས་ཡང་དག་པར་སོ་སོར་བརྟགས་ནས། སྐྱེས་བུའི་གནས་བཞི་པར་གྱུར་པ་བ་ལང་སྤྱོད་ཅེས་བྱ་བ་ལ་སོ་སོར་ཀུན་ནས་རྟོག་པར་བྱེད་དོ། །
ཇི་ལྟར་བ་ལང་སྤྱོད་པ་རྣམས་ཀྱི་མིག་འཇུག་པར་འགྱུར་བ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བ་ལང་སྤྱོད་པའི་མི་རྣམས་ནི་ནམ་མཁའ་མེད་པར་ཡང་
མིག་གིས་རྣམ་པར་ཤེས་པ་འཇུག་པ་ཡིན་ཏེ། རིས་ཀྱང་སྒྲིབ་པར་མི་འགྱུར་ཏེ། ཇི་ལྟར་འཛམ་བུའི་གླིང་པའི་མི་རྣམས་ཀྱིས་ཤེལ་གྱིས་བསྒྲིབས་པའི་གཟུགས་རྣམས་མཐོང་བར་འགྱུར་བ་དེ་བཞིན་དུ་ཆོས་ཉིད་
ཀྱི་ཁྱད་པར་གྱིས་བ་ལང་སྤྱོད་པ་རྣམས་ཀྱིས་རིས་བསྒྲིབས་པའི་གཟུགས་རྣམས་ཀྱང་མཐོང་བར་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་
གླིང་པ་རྣམས་དང་བྱང་གི་སྒྲ་མི་སྙན་པ་རྣམས་དང་ཤར་གྱི་ལུས་འཕགས་པོ་རྣམས་ཀྱི་སོ་སོར་རྣ་བའི་རྣམ་པར་ཤེས་པ་རབ་ཏུ་འཇུག་པ་དེ་ཁོ་ན་བཞིན་དུ་བ་ལང་སྤྱོད་པའི་མི་རྣམས་ཀྱི་ཡང་ཡིན་ནམ་ཅི། དེས་ཐོས་པ་ལས་བྱུང་
བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་དེ་ནི་མིག་ཉིད་ཀྱིས་ཐོས་པ་ཡིན་ཏེ། ཇི་ལྟར་འཛམ་བུའི་གླིང་པ་རྣམས་ཀྱི་མིག་གིས་ཐོས་པ་སྦྲུལ་ཡིན་པ་དེ་བཞིན་དུ་བ་ལང་སྤྱོད་པའི་མི་རྣམས་ཀྱི་མིག་ཉིད་ཀྱིས་ཐོས་པ་ཡིན་

66-1-122b

ཞིང་། ཇི་ལྟར་རིས་བསྒྲིབས་པའི་གཟུགས་རྣམས་ཉིད་མཐོང་བ་དེ་བཞིན་དུ་སྒྲ་རིས་བསྒྲིབས་པར་གྱུར་པ་ཡང་ཐོས་པ་ཡིན་ཏེ། ཆོས་ཉིད་ཀྱི་ཁྱད་པར་གྱིས་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་
ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པ་རྣམས་དང་བྱང་གི་སྒྲ་མི་སྙན་པ་རྣམས་དང་ཤར་གྱི་ལུས་འཕགས་པོའི་མི་རྣམས་ཀྱི་སྣའི་རྣམ་པར་ཤེས་པ་འཇུག་པར་འགྱུར་བས་མི་རྣམས་ཀྱི་གནས་གསུམ་
ན་མིག་ལ་སོགས་པ་རྣམས་སོ་སོར་ཐ་དད་པར་འཇུག་པ་ཡིན་པ་དེ་ཁོ་ན་བཞིན་དུ་བ་ལང་སྤྱོད་པ་རྣམས་ཀྱི་སྣའི་རྣམ་པར་ཤེས་པ་ཡང་འཇུག་པ་ཡིན་ནམ་ཅི། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་
མིག་གིས་མཐོང་བར་གྱུར་པ། དེས་ན་གང་དག་མེ་ཏོག་རྣམས་སམ་གཞན་ཡང་རུང་ཏེ། དངོས་པོ་མིག་གིས་མཐོང་བ་རྣམས་དེས་དྲི་ཡང་འཛིན་པར་བྱེད་དོ། །འདི་ལྟ་སྟེ་ཆོས་ཉིད་ཀྱི་ཁྱད་པར་གྱིས་མཐོང་བའི་དངོས་པོ་
རྣམས་ཀྱི་དྲི་འཛིན་པར་བྱེད་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་བ་ལོང་སྤྱོད་པ་རྣམས་ཀྱི་ལྕེའི་རྣམ་པར་ཤེས་པ་འཇུག་པ་ཡིན་ན། དེས་ཐོས་པ་ལས་བྱུང་བའི་
ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་དེ་དག་ནི་སཱ་མ་ཀུའི་ཟས་ཟ་བ་དང་བ་ལང་གི་འོ་མ་དང་ཞོ་དང་དར་བ་རྣམས་ཀྱིས་རྟག་ཏུ་ཡང་སྐོམ་གྱི་བྱ་བ་བྱེད་དེ། ཇི་ལྟར་འཛམ་བུའི་གླིང་པ་རྣམས་བུ་རམ་ཆང་དང་རྒུན་ཆང་
དང་མངར་ཆང་དང་ཟན་ཆང་རྣམས་ཡིན་པ་དེ་ལྟར་བ་ལང་སྤྱོད་པ་རྣམས་ཀྱི་བ་ལང་གི་འོ་མ་དང་ཞོ་དང་དར་བ་རྣམས་ཡིན་ནོ། །ཇི་ལྟར་འབྲས་ཤ་ལི་ཡིས་ཚིམ་པར་གྱུར་པ་དེ་ལྟར་བ་ལང་སྤྱོད་པ་རྣམས་ས་མ་ཀཱ་ཡིས་ཚིམ་པ་ཡིན་ནོ། །
གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་བ་ལང་སྤྱོད་པ་རྣམས་ཀྱི་ལུས་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་དེ་ནི་ཏ་ལ་ཙམ་དུ་མཐོ་བར་

66-1-123a

གྱུར་པ་ཡིན་ཏེ། རང་གི་ལས་ཀྱིས་ཡིན་པས་ཇི་ལྟར་ལས་རྣམས་དང་འདྲ་བའི་གཟུགས་ཡིན་ནོ། །གཞན་ཡང་རྣལ་འབྱོར་སྤྱོད་པས་སྐྱེས་བུའི་གནས་བཞིན་མཚུངས་ཤིང་འདྲ་བར་གྱུར་པའི་ཡིད་དང་མཚུངས་
ཤིང་འདྲ་བར་གྱུར་པའི་སྐྱེ་བ་དང་མཚུངས་ཤིང་འདྲ་བར་གྱུར་པའི་རྟེན་རྣམས་ཀྱང་ཕན་ཚུན་དུ་བལྟས་པར་གྱུར་པ་ན། དས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་ཤེས་པས་ཀྱང་སྐྱེས་བུ་གཅིག་ཀྱང་
ཡོད་པར་མཐོང་ངོ་། །སྐྱེས་བུའི་གནས་བཞི་པའི་རྣམས་ན་གང་དག་ཕན་ཚུན་དུ་མཚུངས་ཤིང་འདྲ་བར་གྱུར་པའི་ཡིད་དང་མཚུངས་ཤིང་འདྲ་བར་གྱུར་པའི་སྐྱེ་བ་དང་མཚུངས་ཤིང་འདྲ་བར་གྱུར་པའི་རྟེན་རྣམས་ཐམས་ཅད་
འདྲ་བར་གྱུར་པ་མ་ཡིན་པ་དེ་ལྟར་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཅི་སྐྱེས་བུའི་གནས་བཞི་པོ་འདི་དག་རྣམས་ན་སྐྱེས་
བུ་གང་དག་ལས་ཀྱི་བགོ་སྐལ་ལ་སྤྱོད་པ་དང་ལས་ཀྱི་སྐྱེ་གནས་པ་དང་ལས་ཀྱི་སྐྱབས་གནས་པའི་ཆོས་སུ་གྱུར་པ་མ་ཡིན་པ་ཕན་ཚུན་གྱི་གནས་དང་གྲོང་རྡལ་རྣམས་ན་འགའ་ཞིག་ཡོད་དམ། ལས་ཀྱི་སྐྱེ་གནས་
པ་དང་ལས་ཀྱི་བགོ་སྐལ་ལ་སྤྱོད་པ་དང་། ལས་བརྟན་པར་བྱས་པར་གྱུར་པ་མ་ཡིན་པ་གང་ཡིན་པའི་སྐྱེས་བུ་དེ་ནི་གཅིག་ཀྱང་མ་མཐོང་ངོ་། །དགེ་བ་འམ་སྡིག་པར་གྱུར་པ་ཡང་རུང་སྟེ་ལས་གང་དག་བྱེད་པར་
འགྱུར་བ་དེ་དང་དེ་དག་ཉིད་ཀྱི་ལས་རྣམས་ཀྱི་བགོ་སྐལ་ལ་སྤྱོད་པར་འགྱུར་རོ། །གང་ཡང་མཛའ་བོ་དང་མཛའ་བོ་མ་ཡིན་པ་དང་བར་མའི་ཕུང་པོ་རྣམས་སུ་མ་གྱུར་པ་ནི་མེད་དོ། །དེ་ལྟར་ལུས་ལ་ལུས་ཀྱི་རྗེས་སུ་ལྟ་ཞིང་
རྣལ་འབྱོར་སྤྱོད་པ་གནས་པ་ཡིན་ནོ། །ལེགས་པར་བྱས་པའི་ལས་ཀྱི་མཐའ་རྣམས་ལ་སྤྱད་པའི་ལྷ་རྣམས་ཀྱི་ལུས་ནི་ཇི་ལྟ་བུ་ཡིན་ཞིང་། ཇི་ལྟར་ན་ལྷ་རྫས་ཀྱི་འདོད་པའི་ཡོན་ཏན་ལྔ་ལ་སྤྱོད་པར་གྱུར་ཅིང་ཡང་དག་པར་ལྡན་

66-1-123b

པས་ལྷ་རྣམས་གནས་པ་ཡིན་ནོ། །དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྒྱལ་པོ་ཆེན་པོ་བཞིའི་རིས་ཀྱི་ལྷར་སྐྱེས་པའི་སེམས་ཅན་རྣམས་ལྷ་རྫས་ཀྱི་ལྷའི་འདོད་པའི་
ཡོན་ཏན་ལྔ་དང་བཅས་ཤིང་ཡང་དག་པར་ལྡན་པ་རྣམས་ལ་འདི་ལྟ་སྟེ། ལྷ་རྣམས་ཀྱི་མིག་ལྷ་རྫས་ཀྱི་གཟུགས་རྣམས་ཀྱིས་ཚིམ་པར་མི་འགྱུར་བའི་ལྷ་རྫས་ཀྱི་གཟུགས་ཕྲ་བ་དང་རགས་པ་རྣམས་ཐམས་ཅད་ཀྱང་
ལྷན་ཅིག་སྐྱེས་པའི་ལྷའི་མིག་གིས་དཔག་ཚད་སྟོང་ཕྲག་བཅུར་མཐོང་ངོ་། །གལ་ཏེ་རྫུ་འཕྲུལ་བྱས་ནས་མིག་སྤྲུལ་བར་གྱུར་ན་ནི་དེས་དཔག་ཚད་སྟོང་ཕྲག་རབ་ཏུ་མཐོང་བར་འགྱུར་རོ། །དེ་ལྟར་དགེ་སློང་གིས་
ལེགས་པར་བྱས་པའི་ལས་ཀྱི་མཐའ་རྣམས་ལ་སྤྱད་པའི་མཐུ་སྟོབས་དང་ལྡན་པའི་ལྷ་རྣམས་ཀྱི་ནང་ནས། རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་གང་ཡིན་པ་མཐོང་སྟེ། དེ་དག་ཀྱང་འདོད་པ་དང་དགའ་བ་དང་
ཡིད་དུ་འོང་བར་མཐོང་ངོ་། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་རྒྱལ་ཆེན་རིས་བཞིའི་ལྷ་རྣམས་ཀྱི་རྣ་བས་སྒྲ་ཐོས་པ་ཡིན་ན། དེས་ཐོས་པ་ལས་བྱུང་བའི་
ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ། ལྷ་རྣམས་ཀྱིས་སྒྲ་གང་དང་གང་དག་ཁོ་ན་ཐོས་པ་དེ་དང་དེ་དག་རྣམས་ནི་འདོད་པ་སྡུག་པ་ཡིད་དུ་འོང་བ་རྣམས་ཐོས་པ་ཡིན་ཏེ། ལྷན་ཅིག་སྐྱེས་པར་གྱུར་པའི་
རྣ་བས་ནི་དཔག་ཚད་སུམ་སྟོང་གི་སྒྲ་རྣམས་ཐོས་སོ། །གལ་ཏེ་རྫུ་འཕྲུལ་བྱས་ནས་རྣ་བ་སྤྲུལ་པར་གྱུར་ན་ནི་དེས་དཔག་ཚད་སྟོང་ཕྲག་ཉི་ཤུར་ཐོས་པར་འགྱུར་ཏེ། གང་དག་ཐོས་པར་འགྱུར་བ་དེ་དག་རྣམས་ཀྱང་འདོད་
པ་སྡུག་པ་ཡིད་དུ་འོང་བ་རྣམས་ཐོས་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་རྒྱལ་ཆེན་རིས་བཞིའི་ལྷ་རྣམས་ཀྱི་སྣས་དྲི་སྣོམ་པར་བྱེད་པ་ཡིན་ན། དེས་ཐོས་པ་ལས་

66-1-124a

བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྒྱལ་ཆེན་རིས་བཞིའི་ལྷ་རྣམས་ཀྱི་སྣས་ནི་དྲི་དཔག་ཚད་ཉིས་བརྒྱར་དྲི་རྣམས་སྣོམ་པར་བྱེད་དོ། །གལ་ཏེ་རྫུ་འཕྲུལ་བྱས་ཏེ་སྣ་སྤྲུལ་
པར་གྱུར་ན་ནི་དཔག་ཚད་སྟོང་ཕྲག་བརྒྱའི་བར་དུ་དེས་དྲི་འཛིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་ལྷ་རྣམས་ཀྱིས་ལྕེའི་དབང་པོ་རོ་ཚིམ་པར་བྱེད་པ་ཡིན་ན། དེས་ཐོས་
པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྒྱལ་ཆེན་རིས་བཞིའི་ལྷ་རྣམས་ཀྱི་ལྕེའི་དབང་པོས་ནི་མི་དམན་པ་དང་ཡིད་དུ་འོང་ཞིང་ཡིད་དུ་འོང་བའི་རོ་རྣམས་ཀྱི་བདེ་བ་དང་ལྡན་པ་ཡིན་ཏེ། 
རོ་རྣམས་ནི་ཇི་ལྟར་ལེགས་པར་བྱས་པའི་ལས་བྱས་པ་རྣམས་ཀྱིས་ལྷ་རྣམས་རོས་ཚིམ་པ་མེད་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཕྲ་བ་དང་རགས་པ་དང་མྱུར་བ་ཉིད་དུ་
ཡང་འགྱུར་བའི་ལྷ་རྣམས་ཀྱི་བདག་ཉིད་ཀྱི་དངོས་པོའི་ལྷ་རྣམས་ཀྱི་ལུས་ཇི་ལྟ་བུ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་དེ། པད་མ་གཅིག་ཉིད་ལ་ལྷ་ལྔ་བརྒྱ་གནས་
པར་གྱུར་ན་ཡང་ཕན་ཚུན་ལུས་ཀུན་དུ་ཐུག་པར་འགྱུར་བ་དང་། ཟེར་ཟུག་ཀྱང་འབྱུང་བར་མི་འགྱུར་བ་དེ་སྲིད་དུ་ལུས་རྣམས་ཤིན་དུ་ཕྲ་བར་གྱུར་པ་ཡིན་ཏེ། གང་གི་ཕྱིར་ལྷ་རྣམས་ཀྱི་ལྷ་རྫས་ཀྱི་གཟི་བརྗིད་ཡིན་པའི་ཕྱིར་རོ། །
དཔེར་ན་ཁང་པ་གཅིག་གི་ནང་དུ་མར་མེ་ལྔ་བརྒྱ་ལེགས་པར་སྦར་བར་གྱུར་ཀྱང་། འོན་ཀྱང་མར་མེའི་འོད་རྣམས་ཕན་ཚུན་དུ་ཟུག་ཟེར་དུ་གྱུར་པ་ནི་མེད་པ་ཡིན་ལ། ཀུན་དུ་རེག་པར་འགྱུར་བ་ཡང་མ་ཡིན་ནོ། །དེ་ལྟར་ལྷ་
རྣམས་ཀྱི་གཞལ་ཡས་ཁང་གི་མཆོག་ན་གནས་པ་རྣམས་ལ་ཕན་ཚུན་དུ་གནོད་ཟུག་མེད་པ་ཡིན་ཞིང་ཐུག་པ་ཡང་མེད་པ་ཡིན་ནོ། །གལ་ཏེ་ཡང་ལྷ་རྣམས་རགས་པའི་ལུས་སྤྲུལ་པར་བྱེད་ན། དེས་དཔག་ཚད་བརྒྱ་ཕྲག་མང་པོ་རྣམས་སུ་

66-1-124b

གྱུར་པའི་གཟུགས་བྱེད་པ་དང་། བལྟ་ན་སྡུག་པ་འམ་བལྟ་ན་མི་སྡུག་པ་འམ་འཇིགས་པར་བྱེད་པ་འམ་འཇིགས་པར་མི་བྱེད་པ་རྣམས་ཀྱང་བྱེད་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་གྱི་རྗེས་སུ་
ལྟ་ཞིང་གནས་ཏེ། ལྷ་རྣམས་ཇི་ལྟར་ན་མགྱོགས་པར་འགྲོ་བ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ་ལྷ་རྣམས་ཀྱང་རེ་ཤིག་མགྱོགས་པར་འགྲོ་བ་ཡིན་ནོ། །རྫུ་འཕྲུལ་
བྱས་པར་གྱུར་ན་གང་དག་མིག་བཙུམས་པ་ཙམ་ལ་ཡང་དཔག་ཚད་བརྒྱ་སྟོང་ཕྲག་མང་པོ་རྣམས་སུ་འགྲོ་བར་བྱེད་ཅིང་སླར་ཡང་འོང་བར་འགྱུར་བ་ཡིན་ནོ། །གང་དང་གང་ལ་ལྷ་རྣམས་འགྲོ་བར་འདོད་པར་གྱུར་པ་དེ་དང་དེ་དག་
རྣམས་ཉིད་ལ་ཀུན་དུ་ཐོགས་པ་མེད་པར་འགྲོ་བར་འགྱུར་རོ། །ལྷ་རྣམས་འདོད་པ་གང་དང་གང་དག་དོན་དུ་གཉེར་བར་གྱུར་པ་དེ་དག་རྣམས་ཉིད་དེ་བཞིན་དུ་འདིར་ཕུན་སུམ་ཚོགས་པར་འགྱུར་ཏེ། ཐོབ་པ་རྣམས་ནི་གཞན་
གྱིས་ཕྲོགས་པར་མི་ནུས་པ་དང་། དབང་དུ་གྱུར་པ་ཡང་ཡིན་ནོ། །ཐོབ་པར་གྱུར་པའི་རང་གི་དོན་རྣམས་ལ་ཕྱིས་ཡང་འདི་དག་རྣམས་གཞན་དག་འགའ་ཞིག་ལ་འཇིགས་པར་འགྱུར་བ་ཡང་མ་ཡིན་ནོ། །མཐོ་འཚམ་
པ་མང་མེད་དོ། །རང་གི་ཡུལ་གྱི་ལྷ་རྫས་རྣམས་ཀྱིས་ཉིན་དང་མཚན་དུ་འཕེལ་བར་བྱེད་དོ། །ལེགས་པར་བྱས་པའི་ལས་བྱས་པ་རྣམས་ནི་འདོད་པའི་ཡོན་ཏན་ལྔ་འབྱོར་ཞིང་རྫོགས་པ་རབ་ཏུ་ལྡན་པར་གྱུར་པ་
ཡིན་ཏེ། དེ་དག་རྣམས་ནི་ཐམས་ཅད་དུ་འགྱུར་བ་ཡིན་ནོ། །དེ་ལྟར་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་
གནས་ཏེ། ཇི་ལྟར་སུམ་བཅུ་རྩ་གསུམ་པའི་ལྷ་རྣམས་ཀྱི་ལུས་ཡིན་ཞིང་ཡུལ་རྣམས་ལ་ཡང་ཇི་ལྟར་འཇུག་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། 

66-1-125a

ཇི་ལྟར་རྒྱལ་ཆེན་བཞིའི་ལྷ་རྣམས་ཀྱི་ཡུལ་གྱི་བདེ་བ་དེ་དག་རྣམས་ལས་སུམ་བཅུ་རྩ་གསུམ་པའི་ལྷ་རྣམས་ཀྱི་འདོད་པར་གྱུར་པའི་སྒྲ་དང་རེག་བྱ་དང་རོ་དང་གཟུགས་དང་དྲི་རྣམས་ནི་སྟོང་འགྱུར་དུ་གྱུར་པ་ཡིན་ནོ། །
དེ་ཅིའི་ཕྱིར་ཞེ། རྒྱལ་ཆེན་རིས་བཞིའི་ལྷ་རྣམས་ཀྱི་དྲུང་ན་སུམ་བཅུ་རྩ་གསུམ་པ་རྣམས་ཀྱིས་ནི་ཤིན་དུ་འདོད་པར་གྱུར་པ་དང་ཤིན་དུ་ཕལ་ཆེ་བ་དང་རབ་ཏུ་དགའ་བར་གྱུར་པ་དང་མཆོག་ཏུ་ཡིད་དུ་འོང་བ་དང་ཁྱད་པར་དུ་
འཕགས་པའི་ལས་རྣམས་སུམ་བཅུ་རྩ་གསུམ་པའི་ལྷས་བྱས་པའི་ཕྱིར་རོ། །དེ་ཅིའི་ཕྱིར་ཞེ་ན། སུམ་བཅུ་རྩ་གསུམ་པའི་ལྷ་རྣམས་ནི་ལེགས་པར་བྱས་པའི་ཕུལ་དུ་བྱུང་བ་ཡིན་པའི་ཕྱིར་རྒྱལ་ཆེན་རིས་བཞི་
པ་རྣམས་ཀྱིས་ནི་སུམ་བཅུ་རྩ་གསུམ་གྱི་ལྷ་རྣམས་ཀྱི་བདེ་བའི་དབང་དུ་བྱས་ནས་མཉམ་པར་ནུས་པ་ཡང་མ་ཡིན་ནོ། །དེ་ལྟར་རྣལ་འབྱོར་སྤྱོད་པ་པ་ཞིབ་མོར་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ཡིན་ནོ། །
གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་དམྱལ་བ་པའི་སྐྱེ་བོ་རྣམས་ཀྱི་ལུས་ཡིན་ན། ཡང་སོས་དང་ཐིག་ནག་དང་བསྡུས་འཇོམས་དང་ངུ་འབོད་དང་ངུ་འབོད་ཆེན་པོ་དང་ཚ་བ་དང་རབ་ཏུ་
ཚ་བ་དང་མནར་མེད་པ་དང་དམྱལ་བ་ཆེན་པོ་རྣམས་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མི་འདོད་པ་དང་མི་སྡུག་པ་དང་ཡིད་དུ་མི་འོང་བར་གྱུར་པའི་ལས་རྣམ་པ་གསུམ་པོ་ལུས་
ཀྱིས་དང་ངག་གིས་དང་ཡིད་ཀྱིས་བྱས་ཤིང་བསགས་པས་དམྱལ་བ་རྣམས་སུ་སྐྱེ་བར་འགྱུར་རོ། །གང་གི་ཕྱིར་བྱས་ཤིང་བསགས་པའི་ཉེས་པར་བྱས་པའི་ལས་རྣམས་མ་མྱོང་གི་བུར་དུ་འགྲོལ་བར་འགྱུར་བ་ནི་
མེད་དོ། །དེ་ལྟར་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། ལས་གང་དག་གིས་དམྱལ་བ་འདི་དག་རྣམས་གང་དུ་སྐྱེ་བར་འགྱུར་བ་ཡང་དེས་ཐོས་པ་ལས་བྱུང་བའི་ཤེས་རབ་བམ་

66-1-125b

ལྷའི་མིག་གིས་མཐོང་བར་གྱུར་པ་སྲོག་གཅོད་པ་ཤིན་ཏུ་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པས་ནི་དམྱལ་བ་ཡང་སོས་སུ་སྐྱེ་བར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་ཡང་ཤིན་དུ་
བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པའི་ཉིས་འགྱུར་གྱི་ལས་ཀྱིས་ཐིག་ནག་དུ་སྐྱེ་བར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་དང་འདོད་པས་ལོག་པར་གཡེམ་པ་རྣམས་ཤིན་དུ་བསྟེན་ཅིང་
བསྒོམས་ལ་ལན་མང་དུ་བྱས་པར་གྱུར་པས་ན། དམྱལ་བ་ཆེན་པོ་བསྡུས་འཇོམས་སུ་སྐྱེ་བར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་དང་འདོད་པ་ལ་ལོག་པར་སྤྱོད་པ་དང་བརྫུན་དུ་སྨྲ་བ་རྣམས་ཤིན་དུ་
བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པས་ནི་ངུ་འབོད་དུ་སྐྱེ་བར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་དང་འདོད་པ་ལོག་པར་སྤྱོད་པ་དང་བརྫུན་དུ་སྨྲ་བ་དང་འབྲུ་དང་བཅོས་པའི་ཆང་སྡོམ་པ་
འཛིན་པ་ལ་སྐོམ་དུ་བྱིན་པར་གྱུར་ན་ངུ་འབོད་ཆེན་པོར་སྐྱེ་བར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་དང་འདོད་པ་ལོག་པར་གཡེམ་པ་དང་། རྫུན་དུ་སྨྲ་བ་དང་འབྲུ་དང་བཅོས་པའི་ཆང་སྡོམ་པ་
བཟུང་བ་ལ་སྐོམ་དུ་བྱིན་པར་གྱུར་པ་དང་ལོག་པར་ལྟ་བ་ཅན་དུ་གྱུར་ན་ཚ་བའི་དམྱལ་བ་ཆེན་པོར་སྐྱེ་བར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་དང་འདོད་པ་ལོག་པར་སྤྱོད་པ་དང་བརྫུན་དུ་སྨྲ་བ་དང་འབྲུ་
དང་བཅོས་པའི་ཆང་སྡོམ་པ་འཛིན་པ་ལ་འཐུང་དུ་བཅུག་པ་རྣམས་དང་ལོག་པར་ལྟ་བ་དང་སྡོམ་པ་འཛིན་པའི་དགེ་སློང་དང་དགེ་སློང་མ་ཡང་རུང་སྟེ་སུན་ཕྱུང་བར་གྱུར་པས་ནི་རབ་ཏུ་ཚ་བའི་དམྱལ་བ་ཆེན་པོར་སྐྱེ་བར་
འགྱུར་རོ། །དམྱལ་བ་ཆེན་པོ་ཀུན་ནས་འགྲུབ་པར་གྱུར་པའི་ལས་ལྔས་མནར་མེད་པར་སྐྱེ་བར་འགྱུར་བ་ནི་འདི་ལྟ་སྟེ། ཕ་དང་མ་དང་དགྲ་བཅོམ་པ་རྣམས་སྲོག་གཅོད་པར་བྱེད་པ་དང་དགེ་འདུན་འབྱེད་པར་

66-1-126a

བྱེད་པ་དང་སངས་རྒྱས་བཅོམ་ལྡན་འདས་ལ་ངན་སེམས་ཀྱི་ཁྲག་འབྱིན་པར་བྱེད་པ་དང་ལས་དེ་རྣམས་ཀྱིས་མནར་མེད་པའི་དམྱལ་བ་ཆེན་པོར་སྐྱེ་བར་འགྱུར་རོ། །དེས་དམྱལ་བ་པ་རྣམས་ཀྱི་ལས་
ཀྱི་རྣམ་པར་སྨིན་པ་རྣམས་ལ་བསམས་ནས་སེམས་ཅན་རྣམས་ལ་རྗེས་སུ་སྙིང་བརྩེ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། དེས་ཡི་དགས་ཀྱི་འགྲོ་བར་
གཏོགས་པའི་སེམས་ཅན་རྣམས་ཇི་ལྟར་མཐོང་བ་ཡིན་ཞེ་ན། གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་
མཐོང་བར་གྱུར་པ། སེར་སྣ་རྣམ་པ་དུ་མས་སྐྱེས་པའི་ཡི་དགས་རྣམས་སམ་དཔག་ཚད་ལྔ་བརྒྱའི་ས་འོག་ཉིད་དུ་སྐྱེས་པར་གྱུར་པ་རྣམས་ལ་རྣམ་པ་དུ་མར་ཡང་ཟས་མེད་པ་ཤིན་དུ་སྨྲེ་བར་གྱུར་པ་ཕན་ཚུན་དུ་ཟས་
སུ་གྱུར་པ་ལྟོགས་པ་དང་སྐོམ་པས་ཉམས་ཐག་པས་ཤིན་དུ་སྡུག་བསྔལ་བར་གྱུར་པ་རྣམས་མེའི་ཆར་འབབ་པས་སྲེག་པར་བྱེད་པ་རྣམས་ནི། ལས་ཇི་ལྟ་བ་བཞིན་དུ་ཉེ་བར་འགྲོ་བ་དང་ལས་ཀྱི་བགོ་སྐལ་ལ་སྤྱོད་པ་
དང་ལས་ཀྱི་སྐྱབས་གནས་པ་རྣམས་ཡིན་ཏེ། ཤིན་དུ་ཡང་སྡུག་བསྔལ་བར་གྱུར་པའི་ཡི་དགས་དེ་དག་རྣམས་མཐོང་ནས། གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་དུད་
འགྲོའི་འགྲོ་བར་གཏོགས་པ་རྣམས་ལ་ཀུན་དུ་ལྟ་བར་བྱེད་དོ། །དས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ལ། རྣམ་པ་དུ་མར་གྱུར་པ་རྣམས་མཐོང་བ་ཡིན་ནོ། །
མདོར་བསྡུ་ན་གནས་གསུམ་ན་རྒྱུ་བ་རྣམས་ལ་འདི་ལྟ་སྟེ། ཆུ་ལ་རྒྱུ་བར་བྱེད་པ་རྣམས་ནི་ཉ་ལ་སོགས་པའོ། །ཐང་ལ་རྒྱུ་བར་བྱེད་པ་རྣམས་ནི་གླང་པོ་ཆེ་དང་རྟ་དང་བ་ལང་དང་མ་ཧི་ཥ་དང་རི་དགས་དང་ཕག་པ་ལ་

66-1-126b

སོགས་པ་རྣམས་སོ། །ནམ་མཁའ་ལ་རྒྱུ་བ་རྣམས་ཀྱང་རྣམ་པ་དུ་མའོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན། མཐོང་བ་དང་ཐོས་པ་ལས་བྱུང་བའི་ཤེས་
རབ་ཀྱིས་སམ་ལྷའི་མིག་གིས་ཇི་ལྟར་སྐྱེ་གནས་ལས་སྐྱེ་བའི་དུད་འགྲོ་རྣམས་མཐོང་བ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་སྐྱེ་གནས་བཞི་ལས་སྐྱེ་བར་འགྱུར་བའི་དུད་འགྲོ་
རྣམས་མཐོང་སྟེ། མངལ་ལས་སྐྱེ་བ་ནི་ཕག་པ་དང་བ་ལང་དང་མ་ཧི་ཥ་དང་གླང་པོ་ཆེ་དང་རྟ་ལ་སོགས་པ་རྣམས་སོ། །སྒོང་ང་ལས་སྐྱེ་བ་ནི་སྦྲུལ་དང་ངང་པ་དང་བྱ་བ་ལཱ་ཀཱ་དང་ཁྱིམ་བྱ་དང་བྱ་རོག་ལ་སོགས་པ་རྣམས་སོ། 
དྲོད་གཤེར་ལས་སྐྱེ་བ་ནི་ཤིག་དང་འདྲེ་ཤིག་པ་ལ་སོགས་པ་རྣམས་སོ། །བརྫུས་ཏེ་སྐྱེ་བ་ནི་ཕལ་ཆེར་གདོང་རིངས་ཀྱི་ཀླུ་ལ་སོགས་པ་རྣམས་སོ། །དེས་དུད་འགྲོ་རྣམས་གང་ཡིན་པ་ཡང་དག་པ་ཇི་ལྟ་བ་བཞིན་དུ་
མཐོང་ངོ་། །དེ་ལས་གནས་སྐབས་གསུམ་པོ་ཐམས་ཅད་ན་ཡང་འདོད་པ་དང་ཡིད་དུ་འོང་བ་རྣམས་ཐ་དད་དུ་འགྱུར་བ་དང་མེད་པར་འགྱུར་བ་དང་འབྲལ་བར་འགྱུར་བ་དང་འགྱེས་པར་འགྱུར་བ་རྣམས་སུ་གང་དག་མི་འགྱུར་བ་
འམ། གང་ལ་སྲོག་ཆགས་རྣམས་ཐམས་ཅད་ཀྱིས་ཀྱང་ལྷན་ཅིག་ཏུ་མཛའ་བོ་དང་མི་མཛའ་བོ་དང་བར་མའི་ཕུང་པོ་རྣམས་ཐམས་ཅད་རྣམ་པར་གཞག་པ་བྱས་པར་མ་གྱུར་པ་འམ། གང་ལ་ཡང་འཆི་འཕོ་བ་དང་སྐྱེ་བར་
འགྱུར་བ་རྣམས་བྱས་ཤིང་བྱས་པར་མ་གྱུར་པ་ནི། དམྱལ་བའི་གནས་རྣམས་དང་ཡི་དགས་ཀྱི་གནས་རྣམས་དང་དུད་འགྲོའི་གནས་རྣམས་དང་། གནས་ཀྱིས་བསྡུས་པ་རྣམས་ན་ཅུང་ཟད་ཀྱང་མེད་དོ། །
དགེ་སློང་དག་འཁོར་བ་འདི་ནི་འདོད་པར་བྱ་བ་མ་ཡིན་ནོ། །ཇི་སྲིད་དུ་དགའ་བ་མ་ཡིན་པ་དེ་ལྟར་ཡིད་དུ་འོང་བ་མ་ཡིན་ཏེ། དེ་ལྟར་མི་མཐུན་པ་དང་དེ་ལྟ་དེ་ལྟར་སླུ་བ་དང་དེ་ལྟར་རབ་ཏུ་འཇིག་པའི་ཆོས་ཅན་དང་

66-1-127a

དེ་ལྟར་སེམས་ཅན་རྣམས་ཐམས་ཅད་ནི་ཐུན་མོང་མ་ཡིན་པར་སྡུག་བསྔལ་བར་གྱུར་པ་ཡིན་ནོ། །དེའི་ཕྱིར་དགེ་སློང་དག་འཁོར་བའི་གནས་ལ་འདོད་ཆགས་དང་བྲལ་བར་གྱིས་ཤིག །དོན་མེད་པ་སླུ་བ་
རྣམ་པར་འཇིག་པའི་ཆོས་ཅན་མི་རྟག་པ་སྡུག་བསྔལ་བ་མུན་ནག་དུ་བྱེད་པ་མནོག་ཆུང་བ་འདི་དག་ལས་ཤིན་དུ་མྱུར་བར་རྣམ་པར་གྲོལ་བར་གྱིས་ཤིག །དེ་ལྟར་ནཱ་ལ་ཏིའི་གྲོང་གི་བྲམ་ཟེ་དང་ཁྱིམ་བདག་རྣམས་དང་དགེ་
སློང་རྣམས་ཀྱང་ནང་གི་བདག་ཉིད་ཀྱི་ལུས་ཀྱིས་ཕྱི་རོལ་གྱི་ལུས་ཀྱང་ཡང་བདག་པོ་ཉིད་དུ་རྣལ་འབྱོར་སྤྱོད་པས་མཐོང་ནས། ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །ཡང་ཇི་ལྟར་ན་ནཱ་ལ་ཏིའི་གྲོང་གི་བྲམ་ཟེ་དང་། 
ཁྱིམ་བདག་དང་དགེ་སློང་རྣམས་ཀྱང་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ཡིན་ན། འདི་ན་ཡང་དག་པ་ཇི་ལྟ་བ་བཞིན་དུ་གྱུར་པའི་ནང་གི་བདག་ཉིད་ཀྱི་ལུས་ལས་ཡང་གང་དག་ལུས་ཀྱི་ནང་དུ་ཞ་བར་
གྱུར་པའི་མི་གཙང་བའི་ཡན་ལག་རྣམས་ལ་ཡང་དག་པ་ཇི་ལྟ་བ་བཞིན་དུ་མཐོང་ཞིང་རྣམ་པར་དཔྱོད་ལ་སོ་སོར་རྟོག་པར་བྱེད་པས་ལན་ཅིག་མ་ཡིན་པར་མགོ་བོ་ནས་ཇི་སྲིད་དུ་རྐང་པའི་བར་དུ་ལུས་ལ་ལུས་ཀྱི་རྗེས་སུ་ལྟ་ཞིང་
གནས་པར་བྱེད་དོ། །རྣལ་འབྱོར་སྤྱོད་པ་དེ་དང་པོ་ཁོ་ནར་སོ་སོར་རྟོག་པར་བྱེད་པ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། ཐོད་པའི་སྲུབས་བཞིར་གྱུར་པའི་རུས་པའི་
མགོ་བོའི་ཀླད་ཕོར་གྱི་དུམ་བུ་བཞི་ཡིན་ཞིང་དེ་ལ་སྲིན་བུ་ཀུན་དུ་རྒྱུ་བ་ཡིན་ཏེ། དེའི་རིགས་ཅན་དུ་གྱུར་པ་རྣམས་ཟས་ཀླད་ཕོར་ལ་རྒྱུ་བ་ཡིན་ལ། གཉིས་པ་ཀླད་ཕོར་ལ་རྒྱུ་བ་ཞེས་བྱ་བའི་སྲིན་ནི་ཀླད་པ་ཟ་བར་རྒྱུ་བར་
བྱེད་པ་སྟེ། དེ་ལ་ཡང་སོ་སོར་གནས་པ་དང་དེའི་རིགས་ཅན་དང་ཀླད་པ་ཟ་བར་བྱེད་པ་ཡིན་ནོ། །གླང་ཀླད་ཕོར་གྱི་རུས་པའི་གསེབ་ན་འགྲོ་བའི་སྲིན་རྣམས་ནི་མགོའི་ཀླད་ཕོར་གྱི་གསེབ་ན་སོ་སོར་གནས་སོ། 

66-1-127b

དེའི་རིགས་ཅན་དང་དེའི་ཟས་སུ་གྱུར་པ་ཡང་ཡིན་ནོ། །སྐྲ་ཟ་བ་ཞེས་བྱ་བའི་སྲིན་ནི་ཀླད་ཕོར་གྱི་ཕྱི་རོལ་ན་ཡོད་དེ། དེ་སྐྲ་ལོའི་རྩ་བའི་ཟས་ཅན་དེ་ཟས་ཕལ་ཆེ་བར་གྱུར་ན་ནི་མགོ་བོ་སྐྲ་རྗེན་དུ་འགྱུར་རོ། །རྣ་བ་
ལ་སྤྱོད་པ་ཞེས་བྱ་བའི་སྲིན་ནི་རྣ་བ་གཉིས་ཀྱི་ནང་ན་སོ་སོར་གནས་ཏེ། དེ་ལས་སྐྱེས་ཤིང་ཟས་ཀྱང་ཡིན་ལ་དེ་ཁྲོས་པར་གྱུར་ན་ནི་རྣ་བ་གཟེར་བ་དང་ནད་དུ་འགྱུར་རོ། །སྣབས་ལ་འཇུག་པ་ཞེས་བྱ་བའི་སྲིན་ནི་
སྣ་བུག་ན་གནས་ཏེ། དེ་ལས་སྐྱེས་པ་དང་ཟས་ཀྱང་ཡིན་ལ་དེ་ཁྲོས་ན་ནི་གང་དག་ཟོས་པ་དང་འཐུངས་པ་དང་འཆོས་པ་དང་མྱངས་པ་རྣམས་ཟ་བར་བྱེད་དོ། །དེ་ངའི་སྣ་འདི་ལས་གླད་རྒྱས་ལ་འཕོས་ནས་ཟ་
བར་བྱེད་དེ། དེའི་སྐྱོན་གྱིས་བདག་གི་དང་ཀ་མི་བདེ་བར་འགྱུར་རོ། །ཚིལ་གྱི་ནང་ན་སྤྱོད་པ་ཞེས་བྱ་བའི་སྲིན་ནི་ངའི་མགོ་ལ་གནས་ཏེ། དེ་ལས་སྐྱེས་ཤིང་དེ་ཟ་བར་བྱེད་པ་དེ་ཁྲོས་པར་གྱུར་ན་ནི་མགོ་ལ་ལྷང་
ཀྱོག་འོང་ངོ་། །ཚིགས་ཀྱི་གསེབ་ན་རྒྱུ་བ་ཞེས་བྱ་བའི་སྲིན་ནི་ངའི་ལུས་ལ་སོ་སོར་གནས་ཏེ། འགྲམ་པའི་བར་ན་བ་དང་དེ་ལས་སྐྱེས་པ་དང་དེ་ཟ་བར་ཡང་བྱེད་ལ། དེ་རྣ་བའི་ཕྱི་རོལ་གྱི་བར་རྣམས་ལ་ཀུན་
དུ་འགྲོ་བར་བྱེད་དེ། དེ་ཁྲོས་ནས་ཟ་བར་གྱུར་ན་ནི་ཁབ་ཀྱིས་བཞིན་དུ་འབིགས་པར་བྱེད་དོ། །ལུད་པ་ཟ་བ་ཞེས་བྱ་བའི་སྲིན་ནི་ཟས་ཀྱི་རོ་རྣམས་འབབ་པའི་སྦུབས་དང་ལྕེའི་རྩ་བ་ན་གནས་ཏེ། 
དེ་ལས་སྐྱེས་པ་དང་དེ་ཟ་བར་བྱེད་པ་དང་དེ་ཁྲོས་པར་གྱུར་ན་ནི་བདག་གི་ཁ་སྐམ་པར་འགྱུར་རོ། །སོ་རྣམས་ཀྱི་རྩ་བ་ན་སྲིན་སོ་སོར་གནས་ཏེ། སོའི་རྩ་བ་ཟ་བར་བྱེད་པ་ཞེས་བྱ་བ་གང་ཡིན་པ་ཁྲོས་པར་གྱུར་
ན་ནི་སོ་གཟེར་བར་འགྱུར་རོ། །དེ་ལྟར་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་རྣལ་འབྱོར་སྤྱོད་པ་གནས་པ་ཡིན་ནོ། །བདག་གི་མགོ་བོ་ལ་སྲིན་བུའི་རིགས་བཅུ་གནས་སོ། །གཞན་ཡང་རྣལ་འབྱོར་

66-1-128a

སྤྱོད་པ་མགོའི་རུས་པ་དང་ཤ་དང་ནང་གི་བདག་ཉིད་སོ་སོ་རྣམས་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། མགོ་བོའི་རུས་པ་དང་ཤ་རྣམས་ཀྱང་ཇི་ཙམ་ཅིག་ཡོད་པ་ཡང་དེས་ཐོས་པ་ལས་བྱུང་བའི་ཤེས་རབ་བམ་
ལྷའི་མིག་གིས་མཐོང་བར་གྱུར་པ། མགོའི་གླད་ཕོར་ནི་དུམ་བུ་བཞིའོ། །འཁུར་ཚོས་ཀྱི་ལྡང་རུས་པ་ནི་གསུམ་མོ། །ཨོག་སྐོའི་རུས་པ་ནི་གཅིག་གོ། །སོའི་རྩ་བའི་རུས་པ་རྣམས་ནི་སུམ་བཅུ་རྩ་གཉིས་སོ། །
དེ་ལྟར་ངའི་རྐན་གྱི་རུས་པ་ནི་གཉིས་སོ། །འཇིང་པའི་རུས་པ་རྣམས་ནི་བཅྭ་ལྔའོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་མགོ་བོ་ལ་ཤ་ཡོད་པ་དང་མགོའི་
ཤ་ཟས་རྣམས་ཀྱིས་འཕེལ་བ་ནི་ཅི་ཙམ་ཅིག་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བདག་གི་གླད་ཕོར་ལ་ནི་ཤའི་དུམ་བུ་བཞིའོ། །འགྲམ་པ་ལ་ནི་གཉིས་སོ། །
ཐོད་པ་དག་གི་བར་ན་ནི་གཅིག་གོ། །མགྲིན་པ་དང་སྣ་དང་ལྕེ་རྣམས་ལ་དུམ་བུ་རེ་རེའོ། །མཆུ་གཉིས་ལ་ནི་དུམ་བུ་གཉིས་སོ། །རྣ་བའི་ལྤགས་པའི་ལེབ་མའི་དུམ་བུ་གཉིས་ཏེ། ཤའི་གོང་བུ་དེ་དག་རྣམས་དང་ཉེ་བར་ལྡན་
ཞིང་བདག་གི་ཟས་ཀྱི་དབང་གིས་ཉེ་བར་འཕེལ་བ་དང་ཕྱིར་ཞིང་རྒྱས་པ་དང་ཤིན་དུ་རྒྱས་པར་ཡང་འགྱུར་རོ། །གཞན་ཡང་སྲིན་གྱི་རིགས་བཅུས་མགྲིན་པ་རླུགས་པར་བྱེད་པ་རྣམས་ནི། འདི་ལྟ་སྟེ་ཟས་སུ་ཁའི་ལྗན་ལྗིན་རྣམས་
ཟ་བར་བྱེད་པ་དང་། འཆིལ་མ་འབྱུང་བར་བྱེད་པ་དང་སྐྱུག་པར་བྱེད་པ་ནི་ཁུ་བ་འགྲིམ་པའི་རྩ་བཅུའི་ནང་རྣམས་ལ་རྒྱུ་བར་བྱེད་པ་ཡིན་ནོ། །མངར་མྱོས་ཀྱིས་མྱོས་པ་དང་རབ་ཏུ་མྱོས་པ་དང་རོ་དྲུག་ལ་སྲེད་པ་དང་གྷུར་གྷུར་ར་
བ་དང་རོ་ལ་རབ་ཏུ་སྡང་བ་དང་ཉལ་བ་ལ་ཤིན་དུ་དགའ་བ་དང་སྦོམ་པོ་རྣམས་སོ། །དེ་ལ་དགེ་སློང་དག་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་བར་བྱེད་དེ། ངའི་སྲིན་བུ་དག་གིས་ལུས་འདིའི་ཡུལ་ཕྱོགས་གང་དག་དུ་

66-1-128b

ནད་དུ་གྱུར་པ་འམ་ནད་མེད་པར་གྱུར་པའི་ཡང་ལས་ཅི་དག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་དག་གིས་སམ་ལྷའི་མིག་གིས་མཐོང་བར་གྱུར་པ། ཁ་ཆུ་ཟ་བར་བྱེད་པའི་སྲིན་བུ་ནི་མགྲིན་པའི་ཡུལ་ཕྱོགས་
དང་པོ་ན་རབ་ཏུ་གནས་ཏེ། དེ་བདག་གིས་སོའི་རང་ཐག་གིས་ཕྱེ་མར་བརྣལ་ནས་འོག་ཏུ་གསུས་པར་རབ་ཏུ་ལྟུང་བར་གྱུར་ན་སྐད་ཅིག་ལ་སྐྱུག་པར་བྱེད་པ་དང་འདྲ་བའི་ལྗན་ལྗིན་རྣམས་ཀྱིས་གཡོགས་པ་ཡིན་པས་དེ་གླད་རྒྱས་
ལས་རབ་ཏུ་འབབས་པར་འགྱུར་རོ། །སྣབས་དེ་དང་དེ་དག་རྣམས་ཀུན་དུ་གཡོགས་པར་གྱུར་པའི་ལྗན་ལྗིན་དང་འདྲེས་པ་མེད་པར་བྱེད་དོ། །དེས་ཀྱང་རྒྱས་པར་གྱུར་ནས་གལ་ཏེ་ན་ཤིན་དུ་སྦོམ་པར་སོང་བར་གྱུར་ན་ནི། 
དེས་བདག་བད་ཀན་གྱིས་ལུ་བར་བྱེད་དོ། །སྣུམ་པ་དང་མངར་བ་དང་ཤིན་དུ་མངར་བར་གྱུར་པ་དང་ཤིན་དུ་སྐྱུར་བ་མ་ཡིན་པ་དང་ཤིན་དུ་བསིལ་བའི་ཟས་རྣམས་ཀྱིས་མགྲིན་པའི་ཡུལ་ཕྱོགས་སུ་སྐྱེ་བར་འགྱུར་རོ། །
གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། མཆིལ་མ་འབྱུང་བར་བྱེད་པའི་སྲིན་གྱིས་བདག་གི་ལུས་སོ་གསོད་པར་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་
སམ་ལྷའི་མིག་གིས་མཐོང་བར་གྱུར་པ། མཆིལ་མ་འབྱུང་བར་བྱེད་པའི་སྲིན་ནི་ངའི་མགྲིན་པའི་གསེབ་ན་སོ་སོར་གནས་ཏེ། དེ་གལ་ཏེ་རང་བཞིན་དུ་གནས་པར་གྱུར་ན་དེའི་ཚེ་སྔར་བཤད་པའི་ངའི་ཟས་རྣམས་
སྐྱུག་རླུག་ཏུ་མི་འགྱུར་རོ། །ཡང་དག་པར་བདེ་བར་གྱུར་པས་ཀྱང་ཁུ་བ་རྒྱུ་བའི་རྒྱུན་བཅུར་མངོན་པར་འབབས་སོ། །དཔེར་ན་འདི་ནི་བད་ཀན་ཆེ་བར་གྱུར་ན་ནད་མེད་པར་མི་འགྱུར་རོ། །སྲིན་གྱིས་བག་ཀན་
ཆུ་སྐྱགས་སམ་སྙིང་ལ་ལྡག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་

66-1-129a

གྱུར་པ། སྐྱུག་བྱེད་ཅེས་བྱ་བའི་སྲིན་བུས་བདག་ལ་རང་བཞིན་དུ་གནས་པ་འམ་རང་བཞིན་དུ་མི་གནས་པར་ཅི་ཞིག་བྱེད་པ་ཡིན་ཞིང་། ཟས་ཀྱང་ཅི་དག་གིས་ངའི་ལུས་ལ་སོ་སོར་གནས་པ་ཡིན་ན། 
རབ་ཏུ་སྐྱུག་བྱེད་ནི་ཁུ་བ་རྒྱུ་བ་བཅུའི་རྒྱུན་ནང་དུ་ཞུགས་པར་གྱུར་ནས་མགྲིན་པའི་སྦུབས་ཀྱི་ཡུལ་ཕྱོགས་སུ་རྒྱུན་ལས་སྐད་ཅིག་ཉིད་ལ་སྟེང་དུ་འཕོས་ནས་འབྱུང་བར་བྱེད་དོ། །ཟོས་པ་ན་ཡང་རུང་སྟེ་དེས་བདག་
ལ་སྐྱུག་པར་བྱེད་པ་རྣམ་པ་ལྔ་སྐྱེད་པར་བྱེད་དེ། རླུང་དང་མཁྲིས་པ་དང་བད་ཀན་དང་འདུས་པ་དང་སྦྲང་བུས་བྱས་པ་རྣམས་སོ། །ཅི་སྟེ་རང་གི་གནས་ན་གནས་པར་གྱུར་ན་སྔར་བཤད་པའི་གསུས་པའི་ཞབས་སུ་
བབས་ནས་བདག་གི་ཟས་རྣམས་ལེགས་པར་འགྱུར་བ་དང་། དེ་ནི་མཆིལ་མའི་ཟས་ཅན་ཡང་ཡིན་ནོ། །རབ་ཏུ་སྐྱུག་པར་བྱེད་པའི་སྲིན་གྱིས་ཇི་ལྟར་རླུང་གིས་སྐྱུག་པར་བྱེད་པ་ཡིན་ན། དེས་ཐོས་པ་ལས་བྱུང་
བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གལ་ཏེ་ཡང་བ་དང་བསིལ་བ་དང་རྩུབ་པ་དང་རྒྱུན་ཅུང་ཟད་བསྡམས་པ་དང་། གཉིད་མ་ལོག་པ་ལས་བདག་ལ་འབྱུང་བར་འགྱུར་རོ། །དེ་ངའི་མགུལ་
པའི་སྦུ་གུ་ལ་རབ་ཏུ་ཞུགས་པས་རླུང་འབྱུང་བ་ཡིན་ཏེ། ངའི་སྲིན་རབ་ཏུ་སྐྱུག་བྱེད་དེ་གནས་ལས་འཕོ་བར་འགྱུར་བའི་སྐྱོན་གང་ཡིན་པས་བདག་ལ་རླུང་གིས་སྐྱུགས་པ་འབྱུང་བར་འགྱུར་རོ། །གཞན་ཡང་
རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་ངའི་སྲིན་རབ་ཏུ་སྐྱུག་བྱེད་ཀྱིས་མཁྲིས་པ་ལས་སྐྱུག་པར་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་
མཐོང་བར་གྱུར་པ། ཚ་བ་དང་དྲོ་བ་དང་ལན་ཚྭ་དང་འགྱུར་བྱེད་ཀྱི་ཚྭ་དང་ལྡན་པའི་ཟས་གང་གི་ཚེ་མང་དུ་ཟོས་པར་གྱུར་ན། བདག་གི་དྲོ་བ་ལ་སོགས་པ་དེ་དག་གི་སྐྱོན་དེ་དག་གིས་སྐྱུག་བྱེད་ཀྱི་སྲིན་མཐོ་བཙམས་པར་གྱུར་

66-1-129b

ནས་གནས་ལས་སྟེང་དུ་གྱུར་པས། དེས་བདག་མཁྲིས་པའི་སྐྱུག་པ་སྐྱེད་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་བད་ཀན་གྱིས་རབ་ཏུ་སྐྱུག་པར་བྱེད་པ་
ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། མངར་བར་གྱུར་པ་དང་བསིལ་བ་དང་ལྕི་བ་དང་སྣུམ་པ་དང་འཇམ་པ་དང་ཉིན་མཚན་དུ་ཉལ་བ་རྗེས་སུ་བསྟེན་པ་ལས། བད་ཀན་
རབ་ཏུ་འཁྲུགས་པར་གྱུར་ལ་དེས་ངའི་སྐྱུག་བྱེད་ཀྱི་སྲིན་ཤིན་དུ་ཚོ་བར་གྱུར་ནས། དེས་ངའི་མགྲིན་པར་ནད་བྱེད་པར་འགྱུར་བ་དང་སྐྱུག་པར་ཡང་བྱེད་དོ། །དེ་ལས་བདག་ལ་བད་ཀན་གྱིས་སྐྱུག་པ་སྐྱེད་པར་འགྱུར་
རོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་བདག་གི་སྲིན་རབ་ཏུ་སྐྱུག་བྱེད་ཀྱིས་འདུས་པའི་སྐྱུག་པར་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་
མིག་གིས་མཐོང་བར་གྱུར་པ་ཡང་བ་དང་བསིལ་བ་དང་རྩུབ་པ་དང་ཚ་བ་དང་སྐྱུར་བ་དང་ལན་ཚྭ་དང་འཇམ་པ་དང་གྲང་བ་དང་མངར་མོ་དང་སྣུམ་པ་རྣམས་ཤིན་དུ་བསྟེན་པར་གྱུར་པས་བདག་གི་སྲིན་རབ་ཏུ་སྐྱུག་བྱེད་ཀྱིས་
མགུལ་པའི་ཡུལ་དུ་རྣམ་པར་འཇོམས་པར་བྱེད་དོ། །དེས་སྐྱོན་གསུམ་གྱིས་བདག་སྐྱུག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་བདག་ལ་སྦྲང་བུས་
བྱས་པའི་སྐྱུག་པར་གྱུར་པ་སྐྱུག་བྱེད་ཀྱི་སྲིན་གྱིས་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། སྦྲང་བུའི་རྟུག་པའི་སྐྱོན་གྱིས་རབ་ཏུ་སྐྱུག་བྱེད་ཀྱི་སྲིན་མགུལ་པའི་
ཡུལ་དུ་གཡོ་བར་འགྱུར་རོ། །དེའི་སྐྱོན་གྱིས་བདག་ལ་སྐྱུག་པ་སྐྱེ་བར་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཐོས་པ་ལས་བྱུང་བའི་ཤེས་རབ་དག་གིས་སམ་ལྷའི་མིག་

66-1-130a

གིས་དེས་མཐོང་བར་གྱུར་པ། ངའི་སྲིན་མངར་མྱོས་ནི་ལྕེའི་རྩེ་མོ་ནས་བཟུང་ནས་ཀུན་ལ་རྒྱུ་བར་བྱེད་ཅིང་ཇི་སྲིད་དུ་སྲོག་རྒྱུ་བའི་རྩའི་ནང་ན་ཀུན་དུ་རྒྱུ་ཞིང་གནས་སོ། །ཤིན་དུ་ཕྲ་བ་དང་རྐང་པ་མེད་པ་དང་སྲེ་བར་
གྱུར་པ་ཡིན་ནོ། །གལ་ཏེ་བདག་འདོད་པར་གྱུར་པའི་ཟས་རྣམས་ཟ་བར་གྱུར་ན་བདག་འདོད་པར་གྱུར་པའི་ཟས་དེས་སྲིན་མངར་མྱོས་དགའ་བར་འགྱུར་ལ་མི་འདོད་པ་རྣམས་ཀྱིས་ནི་རྒུད་པར་འགྱུར་རོ། །དེའི་ཟས་
རྣམས་ནི་ཇི་ལྟར་མེ་ཏོག་གི་ནང་ན་རྒྱུ་བར་གྱུར་པའི་བུང་བ་རྣམས་ཤིན་དུ་ཕྲ་བར་གྱུར་པའི་རྩི་རྣམས་འཐུང་བར་བྱེད་པ་ཡིན་ནོ། །དེ་བཞིན་དུ་མངར་མྱོས་ཀྱི་སྲིན་ཡང་ཟས་རྣམས་ལས་ཤིན་དུ་ཕྲ་བར་གྱུར་པའི་ཟས་རྣམས་ཀྱིས་
རངས་པ་ཡིན་ལ་དེ་དག་གིས་ཀྱང་འདི་ཚིམ་པར་འགྱུར་རོ། །ཡང་ཟས་གང་དག་ལ་མངར་མྱོས་ཀྱི་སྲིན་ཀུན་དུ་མྱང་བར་བྱེད་པ་དེ་ཉིད་ཁོ་ན་ལ་ང་ཡང་མྱང་བར་བྱེད་པ་ཡིན་ནོ། །ཡང་ཟས་གང་དག་ལ་སྲིན་དད་པར་གྱུར་པའི་
ཟས་དེ་དང་དེ་དག་རྣམས་ལ་བདག་ཀྱང་དད་པར་འགྱུར་བ་ཡིན་ནོ། །གལ་ཏེ་ཡང་བདག་ཟས་ཟ་བར་མི་བྱེད་ན་ངའི་སྲིན་མངར་མྱོས་དེ་ནད་པར་འགྱུར་རོ། །མི་དགའ་བར་གྱུར་པའི་རིགས་ཅན་ཀྱི་སྲིན་མངར་མྱོས་དེ་ལ་སོ་སོར་
རྟོག་པར་བྱེད་དོ། །བདག་གི་སྲིན་རབ་མྱོས་ཀྱིས་ཀྱང་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཇི་ཙམ་ཅིག་བྱེད་པ་ཡིན་ན་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་
གྱུར་པ། རབ་མྱོས་ཀྱི་སྲིན་ནི་མིག་ཕོར་གཉིས་ཀྱི་རྩེ་མོ་ལ་རབ་ཏུ་གནས་སོ། །གལ་ཏེ་ཡང་ལྟག་ཚིགས་པ་ལ་འགྲོ་བར་བྱེད་ན་ནི་དེས་བདག་ཁྲོ་བ་སྐྱེ་བར་འགྱུར་བ་འམ་མི་དགའ་བར་ཡང་བྱེད་དོ། །མགུལ་པ་ལ་ཤ་སྐྱེ་
བར་དང་མགུལ་པ་ལ་ཡང་གྲོག་མ་བཞིན་དུ་ཞུགས་ནས་དབང་ཕྱུག་དུ་ཡང་བྱེད་དོ། །གལ་ཏེ་ཡང་རང་གི་གནས་ན་གནས་པར་གྱུར་ན་ནི་དས་ནད་དེ་དག་རྣམས་འབྱུང་བར་མི་འགྱུར་རོ། །དེས་རབ་མྱོས་ཀྱི་སྲིན་ལ་སོ་སོར་བརྟགས་པར་གྱུར་

66-1-130b

ནས་རོ་དྲུག་ལ་ཤིན་དུ་སྲེད་པར་གྱུར་པའི་སྲིན་ལ་སོ་སོར་རྟོག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ་སྐྱེས་བུ་ཞེན་པར་བྱེད་པའི་སྲིན་གྱིས་རང་བཞིན་དུ་གནས་པ་འམ་རང་
བཞིན་དུ་མི་གནས་པའི་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། རོ་དྲུག་ལ་ཞེན་ཅིང་སྲེད་པ་ཞེས་བྱ་བའི་སྲིན་རྣམས་གང་དག་ཁོ་ན་ལ་མངོན་པར་
སྲེད་པར་གྱུར་པའི་རོ་དེ་དང་དེ་དག་རྣམས་ཁོ་ན་ལ་བདག་ཀྱང་དད་པར་འགྱུར་བ་ཡིན་ནོ། །རོ་གང་དང་གང་གིས་རང་བཞིན་ལ་རོ་དྲུག་ལ་མངོན་པར་སྲེད་པའི་སྲིན་རྣམས་འདོད་པར་མི་འགྱུར་བའི་རོ་དེ་དང་དེ་དག་རྣམས་ལ་བདག་ཀྱང་
མངོན་པར་སྲེད་པར་མི་འགྱུར་རོ། །ཡང་གང་གི་ཚེ་བདག་ཚད་རིམས་ཀྱིས་བཏབ་པར་གྱུར་ན་ནི་དེའི་ཚེ་བདག་གི་སྲིན་ཆེས་སྔ་བར་ཚད་རིམས་གྱིས་ཟིལ་གྱིས་མནན་པར་འགྱུར་རོ། །སྐྱོན་དེ་དག་གིས་བདག་ཟས་
སྙིང་དུ་མི་སྡུག་པ་ཉིད་དུ་འགྱུར་རོ་གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ་གྷུར་གྷུར་ཀོ་ཞེས་པའི་སྲིན་ངའི་མིག་ཕོར་གཉིས་ཀྱི་འོག་ཏུ་གྱུར་པ་ན་རབ་ཏུ་
གནས་པ་ཡིན་ཞིང་། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ་གལ་ཏེ་གྷུར་གྷུར་ཀ་རབ་ཏུ་ཁྲོས་པར་གྱུར་ན། དེས་བདག་གི་མགོ་བོ་གང་དུ་གནས་པར་བྱ་བ་བྱེད་དོ། 
མིག་ཕོར་དང་མགུལ་པར་ལྷང་ཀྱོག་འབྱུང་བ་དང་མགྲིན་པར་འཐོག་པ་དང་རླུང་གིས་ཀྱང་བདག་གི་མགྲིན་པའི་ཡུལ་དུ་ལྷིགས་པར་འགྱུར་རོ། །དེས་བདག་ལ་འཆི་བ་ཙམ་དུ་སྡུག་བསྔལ་སྐྱེད་པར་བྱེད་དོ། ། གྷུར་གྷུར་ཀའི་
སྲིན་དང་མགུལ་པ་ནི་གནས་པའི་སྲིན་རྣམས་ཐམས་ཅད་ལྷན་ཅིག་ཏུ་འགལ་བར་གྱུར་པ་དེའི་ཚེ་ན་ནད་དེ་དག་རྣམས་འབྱུང་བར་འགྱུར་རོ། །གྷུར་གྷུར་ཀའི་སྲིན་ནི་རྟག་ཏུ་མཆིལ་མས་གཡོགས་པར་འགྱུར་བ་དང་སྲིན་འདི་དག་གི་ཁ་དང་རྐང་པ་
66-1-131a

ཐུང་བར་གྱུར་པ་ཡིན་ནོ། ། གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་དེས་མཐོང་བར་གྱུར་པ་
ལ། རོ་ལ་རབ་ཏུ་སྡང་བ་ཞེས་བྱ་བའི་སྲིན་མགོ་བོའི་མགུལ་པའི་གཞི་དང་མིག་ཕོར་གཉིས་ལ་རབ་ཏུ་གནས་སོ། །དེས་བདག་ལ་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་ཞིག་བྱེད་པ་ཡིན་ན། རོ་ལ་རབ་ཏུ་སྡང་བ་ཞེས་བྱས་པའི་སྲིན་
ནི་རོ་གཅིག་འདོད་པ་ཡིན་གྱི་རོ་ལྷག་མ་རྣམས་ལ་ནི་རབ་ཏུ་སྡང་བ་ཡིན་ནོ། །དེ་ཡང་ན་མངར་བ་འདོད་པར་གྱུར་ན་ནི་རོ་ལྷག་མ་རྣམས་ལ་རབ་ཏུ་སྡང་བར་འགྱུར་རོ། །དེ་ཡང་ན་སྐྱུར་བ་འདོད་ན་ནི་རོ་ལྷག་མ་རྣམས་ལ་སྡང་བར་འགྱུར་
བ་ཡིན་ནོ། །དེ་ཡང་ན་ཚ་བ་འདོད་པར་གྱུར་ན་ནི་རོ་ལྷག་མ་རྣམས་ལ་རབ་ཏུ་སྡང་བར་འགྱུར་རོ། །དེ་ཡང་ན་ལན་ཚྭ་འདོད་པར་གྱུར་ན་ནི་རོ་ལྷག་མ་རྣམས་ལ་རབ་ཏུ་སྡང་བར་འགྱུར་རོ། །དེ་ཡང་ན་ཁ་བ་འདོད་པར་གྱུར་ན་
ནི་རོ་ལྷག་མ་རྣམས་ལ་རབ་ཏུ་སྡང་བར་འགྱུར་རོ། །རབ་ཏུ་སྡང་བར་གྱུར་པའི་སྲིན་དེ་རོ་རྣམས་གང་དང་གང་དག་མངོན་པར་མི་འདོད་པ་དེ་དག་རྣམས་ཉིད་ང་ཡང་མི་འདོད་པ་ཡིན་ནོ། །རོ་རྒྱུ་བ་ཞེས་བྱ་བའི་བདག་གི་ལྕེའི་
རྩེ་མོའི་སྦུབས་ལ་རོ་སྣང་བའི་རྗེས་སུ་མཐུན་པས་དེ་འབྱུང་སྟེ། བདག་གི་ལྕེའི་རྩེ་མོ་སྐམ་པར་འགྱུར་རོ། །བདག་གི་ལྕེ་ཡང་དེ་ཁྲོས་པར་གྱུར་ན་འབྲབ་གཟེར་དུ་བྱེད་པ་དང་ལྕི་བར་འགྱུར་རོ། །མགུལ་པ་ཟིལ་
གྱིས་གནོན་པར་གྱུར་ན་ནི་མ་ཁྲོས་པ་ཡིན་ནོ། །ཁྲོས་པར་མ་གྱུར་ན་ནི་ཇི་སྐད་དུ་བཤད་པའི་ནད་མི་འབྱུང་ངོ་། །གཞང་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་
ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ་ནི། ཉལ་བ་ལ་དགའ་བ་ཞེས་བྱ་བའི་ངའི་སྲིན་ནི་ཕྲ་བར་གྱུར་པ་ཉི་ཟེར་གྱི་རྡུལ་གྱི་ཚད་ཙམ་ཡིན་ནོ། །ཐམས་ཅད་ཀྱིས་མ་ཞུགས་པ་གང་ཡིན་པའི་

66-1-131b

རྒྱུན་རྣམས་སུ་དེ་མངོན་པར་རྒྱུག་པར་བྱེད་པ་ཡིན་ཏེ། གནད་དང་ལྷ་བའི་གསེབ་རྣམས་དང་ཤའི་གོང་བུའི་གསེབ་རྣམས་དང་མགོ་བོའི་ཀླད་ཕོར་གྱི་གསེབ་རྣམས་དང་འགྲམ་པའི་རུས་པའི་གསེབ་རྣམས་དང་སོའི་རྩ་བའི་
གསེབ་རྣམས་དང་མགུལ་པའི་གསེབ་རྣམས་དང་མགྲིན་པའི་སྦུ་གུའི་གསེབ་རྣམས་དང་རྣ་བའི་གསེབ་རྣམས་དང་མིག་གི་གསེབ་རྣམས་དང་སྣའི་གསེབ་རྣམས་དང་སྐྲ་དང་ཁ་སྤུའི་གསེབ་རྣམས་སུ་རླུང་བཞིན་དུ་རྒྱུ་བར་བྱེད་དོ། 
ཉལ་བ་ལ་དགའ་བའི་སྲིན་དེ་གང་གི་ཚེ་ཉིན་མོ་ནད་པར་འགྱུར་བ་དང་ངལ་བར་ཡང་འགྱུར་རོ། །དེ་མཚན་མོ་སྙིང་གི་རྩ་བ་ལ་ཀུན་དུ་འབྱོར་བར་འགྱུར་རོ། །སྙིང་གི་པད་མའི་དབྱིབས་དེ་ནི་ཉིན་མོ་འབྱུང་བ་ཡིན་ནོ། །མཚན་
མོ་ནི་འཁུམ་པར་འགྱུར་ཏེ་ཉི་མའི་འོད་ཟེར་མེད་པའི་ཕྱིར་རོ། །དེའི་ཚེ་ན་སྙིང་ལ་ཀུན་དུ་ཞུམ་པར་འགྱུར་རོ། །དེ་ལ་སྙིང་གི་པད་མའི་དབྱིབས་འཁུམ་པར་འགྱུར་རོ། །དེས་ཀྱང་བདག་སྲེད་པ་མེད་པར་འགྱུར་རོ། །
དུས་གང་གི་ཚེ་ཉལ་བ་ལ་དགའ་བའི་སྲིན་མི་བརྩོན་པར་གྱུར་པ་ན་དུས་དེའི་ཚེ། རང་གི་ཡུལ་རྣམས་ལ་དབང་པོ་རྣམས་དུབ་པར་གྱུར་ནས་ངལ་སོ་བར་བྱེད་དོ། །དེས་སྲོག་ཆགས་དེ་དག་རྣམས་ཐམས་ཅད་གཉིད་
དུ་འགྱུར་རོ། །གལ་ཏེ་ཡང་ཉིན་མོ་ཡང་ཆད་པར་འགྱུར་ནའོ། །ཉལ་བ་ལ་དགའ་བར་འགྱུར་བའི་སྲིན་འདི་ཡང་དག་པ་ཇི་ལྟ་བ་བཞིན་སོ་སོར་རྟོག་ཅིང་གནས་སོ། །གཞན་ཡང་རྣལ་འབྱོར་སྤྱོད་པ་ནང་གི་བདག་
ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་དག་གིས་སམ་ལྷའི་མིག་གིས་མཐོང་བར་གྱུར་པ་ལ་སྲིན་སྦོམ་པོ་ཞེས་བྱ་བ་ངའི་ལུས་ལ་རབ་ཏུ་གནས་པ་ཡིན་ཏེ། མགོ་བོ་དང་
མགྲིན་པའི་ཡང་ཁྲག་གི་ནང་དུ་རྒྱུ་བར་བྱེད་པ་དང་ཚིལ་རྣམས་ཀྱི་གསེབ་དུ་རྒྱུ་བར་བྱེད་པ་ཡིན་པས། དེ་གང་དང་གང་ལ་ཕྲ་བར་གྱུར་ནས་ངའི་ཁྲག་རྣམས་འཐུང་བར་བྱེད་པ་ན་དེ་དང་དེ་དག་ཉིད་རྣམས་སུ་ལུས་སྐྲང་བར་

66-1-132a

འགྱུར་བ་དང་རྐོ་རློག་དུ་ཡང་བྱེད་དེ། ངའི་ཁའི་ཐོ་ཡུལ་ལམ་སྐྲའི་ཐོ་ཡུལ་ལམ་ལྟག་ཚིགས་ཀྱི་ཡུལ་ལམ་ཡུལ་གཞན་རྣམས་ལ་ཡང་རུང་ངོ་། །གལ་ཏེ་ཡང་རྒྱུ་བར་མི་བྱེད་ན་ནི་རྒྱུས་པའི་གསེབ་དུ་གནས་པར་
གྱུར་ཅིང་། དེས་ཇི་སྐད་དུ་བཤད་པའི་ནད་དེ་དང་དེ་དག་རྣམས་འབྱུང་བར་མི་འགྱུར་རོ། །གང་ཡང་ནཱ་ལ་ཏིའི་གྲོང་གི་བྲམ་ཟེ་དང་ཁྱིམ་བདག་འདི་རྣམས་ཉིད་དང་རྣལ་འབྱོར་སྤྱོད་པའི་དགེ་སློང་རྣམས་ཀྱང་རུང་སྟེ་ཇི་སྲིད་དུ་ལུས་ལ་
ཉེ་བར་འཇུག་པའི་སྲིན་བུའི་རིགས་སུ་གྱུར་པ་རྣམས་མགྲིན་པ་ལ་འཇུག་པ་རྣམས་དང་ལྕེ་ལ་ཞུགས་པ་རྣམས་དང་ལྟག་ཚིགས་ལ་ཞུགས་པ་རྣམས་དང་བ་སྤུའི་ཁུང་བུ་དང་བད་ཀན་ལ་ཞུགས་པ་རྣམས་དང་རུས་པ་ལ་ཞུགས་
པ་རྣམས་དང་ཁྲག་གི་གསེབ་དུ་ཞུགས་པ་རྣམས་དང་རྒྱུས་པའི་གསེབ་དུ་ཞུགས་པ་རྣམས་ཀྱང་ཡང་དག་པ་ཇི་ལྟ་བ་བཞིན་དུ་མཐོང་ངོ་། །རྣམ་པར་ཤེས་པར་འགྱུར་རོ། །ལྕེར་གཏོགས་པ་རྣམས་རོར་གྱུར་པ་རྣམས་ལ་
འདི་འདོད་ཆགས་དང་བྲལ་བར་འགྱུར་རོ། །འདིའི་རོ་ལ་སྲེད་པ་ཡང་འབྱུང་བ་ཅན་གྱི་སྲེད་པ་རྣམས་རབ་ཏུ་འཇོམས་པར་འགྱུར་རོ། །ཀུན་དགའ་བོ་འདི་ནི་སྲེད་པའི་ཀུན་དུ་སྦྱོར་བ་བཅིངས་པར་གྱུར་པའི་སེམས་ཅན་
རྣམས་ཀྱི་རོའི་རྒྱ་མཚོ་ཡིན་པས་དེ་དག་རྣམས་ལས་འདི་འདོད་ཆགས་དང་བྲལ་བར་འགྱུར་རོ། །དེ་འདོད་ཆགས་དང་བྲལ་བར་གྱུར་པས། དེ་ཟས་སུ་གྱུར་པའི་སྲེད་པ་དག་གིས་མི་འཆིང་ངོ་། །སྦྱིན་པ་པོ་དང་སྦྱིན་
བདག་རྣམས་ཀྱི་ཁྱིམ་དག་རྣམས་ཀྱི་ཁྱིམ་དག་ཏུ་རྒྱུ་བར་མི་བྱེད་ཅིང་ཞབས་འབྲིང་བར་མི་འགྱུར་རོ། །ནོར་དང་ཉེ་བར་མཁོ་བ་རྣམས་རབ་ཏུ་ཕལ་ཆེ་བ་མ་ཡིན་ནོ། །ནས་སྲན་གྱི་ཐུག་པ་ཙམ་གྱི་ཟས་ཀྱིས་ཀྱང་
ཆོག་ཤེས་པར་འགྱུར་རོ། །རྙེད་པ་དང་བཀུར་སྟིའི་རྒྱུས་གཞན་དག་རྣམས་ལ་རབ་ཏུ་ཞེ་སྡང་བར་མི་བྱེད་དོ། །ཚོགས་འདུས་པ་འདུ་བར་བྱེད་པ་ལ་མངོན་པར་དགའ་བ་མ་ཡིན་ནོ། །རྒྱགས་པའི་གཙུག་

66-1-132b

ལག་ཁང་དང་ཀུན་དགའ་ར་བ་རྣམས་མ་ཡིན་ནོ། །ལུས་རྒྱགས་པས་རྒྱགས་པར་མི་འགྱུར་རོ། །གཟུགས་ཀྱི་རྒྱགས་པས་རྒྱགས་པ་ཡིན་ནོ། །གོས་ཀྱིས་རྒྱགས་པ་མ་ཡིན་ནོ། །ལྷུང་བཟེད་ཀྱིས་རྒྱགས་པ་
མ་ཡིན་ནོ། །ཆོས་གོས་ཀྱིས་རྒྱགས་པ་མ་ཡིན་ནོ། །ཕྱི་བཞིན་འབྲང་བའི་དགེ་སློང་ཡོངས་སུ་འཛིན་པས་རྒྱགས་པ་མ་ཡིན་ནོ། །གྲོང་དུ་འཇུག་པའི་རྒྱགས་པས་མ་ཡིན་ནོ། །ཉེ་འབྲེལ་ལ་ལྟ་བས་རྒྱགས་པ་མ་ཡིན་ནོ། 
གཅིག་པུར་གྱུར་པ་དང་འདོད་པ་ལ་མི་བརྐམ་པ་དང་རྙོག་པ་མེད་པ་དང་སྡིག་པ་རྣམས་བཅོམ་པར་གྱུར་པ་ནི་དགེ་སྦྱོང་གི་ཡུལ་ལ་རབ་ཏུ་གནས་པ་ཡིན་ནོ། །མྱ་ངན་ལས་འདས་པའི་མཐའ་ལ་རབ་ཏུ་གནས་སོ། །དེའི་ཕྱིར་ན་
རོའི་རྒྱ་མཚོས་གང་དག་ཁྲིད་པར་གྱུར་པ་དེ་དག་རྣམས་དང་གང་དག་རོའི་རྒྱ་མཚོ་ལ་མངོན་པར་སྲེད་པར་གྱུར་པ་རྣམས་ནི་བདུད་ཀྱི་དྲུང་ན་རབ་ཏུ་གནས་སོ། །མྱ་ངན་ལས་འདས་པ་ལས་རིང་བར་གྱུར་ནས་གནས་པ་ཡིན་ནོ། །
དེའི་ཕྱིར་ན་ལུས་ལ་གནས་པའི་སྲིན་རྣམས་བསྒོམས་པར་གྱུར་ནས་རོ་རྣམས་ལས་རྣལ་འབྱོར་སྤྱོད་པ་འདོད་ཆགས་དང་འབྲལ་ལོ། །འདོད་ཆགས་དང་བྲལ་བ་དེས་ཟས་ཀྱིས་ཀུན་དུ་འཁྲིད་པ་མ་ཡིན་ནོ། །གཞན་ཡང་
རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ནས། རྒྱབ་ལ་སོ་སོར་རྟོག་པར་བྱེད་པ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་ཡང་དག་པའི་ལྟ་བ་བཞིན་དུ་མཐོང་
བར་གྱུར་པ། རྒྱབ་དུ་གྱུར་པའི་རུས་པ་རྣམས་ནི་ལྔ་བཅུ་རྩ་བཞིའོ། །བྲང་གི་ནི་བཅུ་བཞིའོ། །འདུས་པའི་བཅུ་གཉིས་སོ། །ལོགས་གཅིག་ལ་ནི་བཅུ་གཉིས་སོ། །ལོགས་གཅིག་ལ་ཇི་ཙམ་པ་གཉིས་པ་
ཡང་དེ་ཙམ་ཁོ་ནའོ། ། ཐང་བ་ཡང་ཇི་ཙམ་པ་དེ་ཙམ་སྟེ། རུས་པའི་གོང་བུ་རྣམས་སླར་ཡང་རུས་པའི་ཕུང་པོའི་ལུས་སུ་བྱས་ནས་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །མགྲིན་པ་ནས་བཟུང་

66-1-133a

ནས་ཇི་སྲིད་འཕོངས་ཀྱི་བར་དུ་སོ་སོར་རྟོག་པར་བྱེད་དེ། ཤའི་དུམ་བུ་ཇི་ཙམ་ཅིག་ཡོད་པ་ཡིན་ན། ངོས་ཅིག་ལ་ཇི་ཙམ་པ་གཉིས་པ་ལ་ཡང་དེ་ཙམ་ཡིན་ནོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་
ལུས་ཀྱི་རྗེས་སུ་ལྟ་ཞིང་གནས་ཏེ། དེ་དག་རྣམས་རྒྱུས་པ་ཇི་སྙེད་ཅིག་སྦྲེལ་བ་ཡིན་ན་མགྲིན་པ་ནས་བཟུང་ནས་ཇི་སྲིད་འཇུག་མའི་བར་དུ་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། བདག་གི་རྒྱུས་པས་
སྦྲེལ་བ་རྣམས་ནི་མགྲིན་པ་ནས་བཟུང་ནས་འཇུག་མའི་བར་དུ་ངོས་གཅིག་ལ་བརྒྱ། ངོས་གཞན་ལ་ཡང་བརྒྱ་ཉིད་ཡིན་ཏེ་རྒྱུས་པ་ཕྲ་མོ་རྣམས་ནི་མ་གཏོགས་སོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་
རྗེས་སུ་ལྟ་ཞིང་གནས་ཏེ། བདག་གི་ཚིལ་གྱི་ཚད་ཇི་ཙམ་ཞིག་ཡིན་ཞེས་མགྲིན་པ་ལ་སོགས་མཇུག་མའི་བར་དུ། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བ་ནི། ཟས་བསོད་པའི་དབང་
གིས་ཚིལ་རྣམས་འཕེལ་བར་འགྱུར་རོ། །འགྲིབ་པ་ཡང་སྟེ་བདག་གི་རྣམ་པ་ཐམས་ཅད་བྱས་པ་ལ་ཡང་མ་ག་དྷཱའི་སྲང་ལྔ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན་
ངའི་ལུས་ཀྱི་ཆུའི་ཚད་ནི་ཅི་ཙམ་ཡིན་ཞེས་དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། རང་གི་སྙིམ་པའི་ཚད་ཀྱི་ངའི་ཆུ་ནི་སྙིམ་པ་དག་བཅུ་ཡིན་ནོ། །དེ་འཇིམ་པར་གྱུར་པའི་སྒྲོ་ནི་བ་སྤུའི་
ཁུང་བུ་རྣམས་སོ། །རྔུལ་དུ་གྲགས་པ་རྣམས་ནི་ལུས་ཀྱི་བ་སྤུའི་སྒོ་ནས་འབྱུང་ངོ་། །ཆུ་སེར་དུ་གྲགས་པ་རྣམས་ནི་རྨའི་སྒོ་ནས་སོ། །མྱ་ངན་སྐྱེས་པའི་དུས་ན་ནི་མིག་དག་ནས་མཆི་མ་འབྱུང་བར་འགྱུར་རོ། །
ས་གཞི་ལ་རྒྱུ་བའི་སྲོག་ཆགས་རྣམས་ཉམས་པར་འགྱུར་རོ། །དེ་ནི་ངའི་རླན་གྱིས་ཟས་རྣམས་ཡོངས་སུ་སྨིན་པར་གྱུར་པའི་ཁུ་བ་རྣམས་འཕེལ་བའི་རྡུལ་ཕྲ་རབ་གང་དག་འབྱུང་བ་ཡིན་ནོ། །གཞན་ཡང་རྣལ་

66-1-133b

འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ངའི་བཤང་བའི་ཚད་ནི་ཅི་ཙམ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། བདག་
ཉིད་ཀྱི་སྙིམ་པ་བདུན་ནི་བཤང་བ་ཡིན་ལ། དྲུག་ནི་བད་ཀན་ཡིན་ནོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ངའི་འཁྲིས་པ་དང་གཅིན་གྱི་ཚད་ཀྱང་ཇི་
ཙམ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། མཁྲིས་པ་ནི་སྙིམ་པ་ལྔ་ཡིན་ལ་བཞི་ནི་གཅིན་ཡིན་ཏེ་འཕེལ་བ་དང་འགྲིབ་པར་འགྱུར་བ་ནི་མ་གཏོགས་སོ། །ནད་
མེད་པ་དང་ནད་ཀྱིས་བྱས་པ་ཡང་མ་གཏོགས་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། དྲོད་དང་ཁུ་ཆུ་དང་སྟོབས་ཀྱི་ཚད་ཇི་ཙམ་ཡིན་ན། དེས་ཐོས་
པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། དྲོད་ནི་སྙིམ་པ་གཉིས་སོ། །ཁུ་ཆུ་ནི་གཅིག་གོ། །སྟོབས་ནི་སྙིམ་པ་གཅིག་གོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་
ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ་བདག་གི་རླུང་གི་ཚད་ནི་ཇི་ཙམ་ཅིག་ཡིན་ན་དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། ཆུང་བའི་ཚད་ནི་སྙིན་པ་གསུམ་ཡིན་ནོ། །གཞན་
ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཟོས་པ་དང་འཐུངས་པ་དང་འཆོས་པ་དང་མྱངས་པ་རྣམས་ཡང་དག་པར་བདེ་བར་སྨིན་པར་གྱུར་ནས་འཚོ་བར་བྱེད་པའི་རྩ་རྒྱུན་བདག་
གི་ལུས་ལ་ཇི་ཙམ་ཅིག་ཡོད་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། རྩའི་རྒྱུན་བཅུ་གསུམ་མོ། །ཡུར་བའི་ཆུ་གང་གིས་ཞིང་རྒྱས་པར་བྱེད་པ་ཇི་ལྟ་བ་དེ་བཞིན་དུ་ལུས་འདི་ཉིད་དེ་དག་རྣམས་

66-1-134a

ཉིད་ཀྱིས་རྒྱས་པར་བྱེད་དོ། །འདི་ལྟ་སྟེ་སྲོག་རྒྱུ་བའི་རྒྱུན་དང་མཐར་རྒྱུ་བའི་རྒྱུན་དང་། ཆུ་རྒྱུ་བའི་རྒྱུན་དང་རྔུལ་རྒྱུ་བའི་རྒྱུན་དང་གཅིན་རྒྱུ་བའི་རྒྱུན་དང་རྟུག་པ་རྒྱུ་བའི་རྒྱུན་དང་དངས་མ་རྒྱུ་བའི་རྒྱུན་དང་ཁྲག་རྒྱུ་བའི་
རྒྱུན་དང་ཤ་རྒྱུ་བའི་རྒྱུན་དང་། ཚིལ་རྒྱུ་བའི་རྒྱུན་དང་རུས་པ་རྒྱུ་བའི་རྒྱུན་དང་ལྷ་བ་རྒྱུ་བའི་རྒྱུན་དང་ཁུ་ཆུ་རྒྱུ་བའི་རྒྱུན་ནོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། རྩའི་
རྒྱུན་དེ་དག་རྣམས་ཀྱིས་གཞི་ཅི་ལས་ལུས་ཀྱི་ཁམས་གང་དག་རྒྱས་པར་བྱེད་ཅིང་། སྲིན་རྣམས་ཀྱང་བདག་གི་ལུས་ཀྱི་ཡུལ་ཕྱོགས་དང་ཡུལ་ཕྱོགས་རྣམས་ལ་ཀུན་དུ་རྒྱུ་བ་རྣམས་ཀྱིས་ཀྱང་འགལ་བ་འམ་འཚོ་
བར་བྱེད་པ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་འགྱུར་བ། སྲོག་རྒྱུ་བའི་རྒྱུན་རྣམས་ཀྱིས་ནི་སྙིང་གི་གཞི་ལས་སོ། །མཐར་རྒྱུ་བའི་རྒྱུན་རྣམས་ཀྱིས་ནི་རྩིབ་
ལོགས་ཀྱི་གཞི་ལས་སོ། །ཆུ་རྒྱུ་བའི་རྒྱུན་རྣམས་ཀྱིས་ནི་ལོང་ཀ་དང་གློ་བ་དང་བད་ཀན་རྣམས་ཀྱི་གཞི་ལས་སོ། །རྔུལ་རྒྱུ་བའི་རྒྱུན་རྣམས་ཀྱིས་ནི་སྤུའི་ཁུང་བུ་རྣམས་དང་ཚིལ་གྱི་གཞི་ལས་སོ། །གཅིན་
རྒྱུ་བའི་རྒྱུན་རྣམས་ཀྱིས་ནི་ལྒང་པག་དང་ཕོ་མཚན་གྱི་གཞི་ལས་སོ། །རྟུག་པ་རྒྱུ་བའི་རྒྱུན་རྣམས་ཀྱིས་ནི་ཕོ་བ་དང་ཚིལ་ཁྲ་དང་གཞང་རྣམས་ཀྱི་གཞི་ལས་སོ། །བདག་གི་དངས་མ་རྒྱུ་བའི་རྒྱུན་རྣམས་
ཀྱིས་ནི་འཇིང་པའི་རྩ་བཅུ་དང་མཆིན་པ་དང་སྙིང་རྣམས་ཀྱི་གཞི་ལས་སོ། །ཁྲག་རྒྱུ་བའི་རྒྱུན་རྣམས་ཀྱིས་ནི་བདག་གི་མཆེར་པ་དང་མཆིན་པའི་གཞི་ལས་སོ། །ཤ་རྒྱུ་བའི་རྒྱུན་རྣམས་ཀྱིས་ནི་ལྤགས་པ་དང་ཆུ་
རྒྱུས་ཀྱི་གཞི་ལས་སོ། །ཚིལ་རྒྱུ་བའི་རྒྱུན་རྣམས་ཀྱིས་ནི་མཁལ་མ་དང་ཞག་རྣམས་ཀྱི་གཞི་ལས་ཏེ། གཞུག་རུས་ཀྱི་གཞི་ལས་དང་བདག་གི་རུས་པ་རྒྱུ་བའི་རྒྱུན་རྣམས་ཀྱི་གཞི་ལས་ནི་ལོགས་དང་

66-1-134b

ཟས་ཀྱི་གནས་དང་པོ་དང་གློ་བ་རྣམས་ལས་ཡིན་ལ། ལྷ་བ་དང་ཁུ་ཆུ་རྒྱུ་བའི་རྒྱུན་དག་གིས་ནི་མཚམས་ཐམས་ཅད་དང་རུས་པ་རྣམས་ཀྱི་གཞི་ལས་སོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་
ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་སྲིན་གང་དག་གིས་གཞུག་མའི་ཡུལ་ཕྱོགས་ནས་བཟུང་བའི་ཐམས་ཅད་དུ་ཡང་རྩའི་རྒྱུན་གང་དག་ལ་རང་བཞིན་དུ་གནས་པ་འམ་རང་བཞིན་དུ་མི་གནས་
པའི་ཅི་དག་བྱེད་པར་འགྱུར་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མངལ་ནས་སྐྱེས་པར་གྱུར་པའི་སྲིན་བཅུ་དག་གིས་བདག་གི་མཆེར་པ་དང་མཆིན་པ་དག་གི་
གནས་སུ་སོང་བར་གྱུར་ནས་ནད་རྣམས་སྐྱེད་པར་བྱེད་དོ། །འདི་ལྟ་སྟེ་སྲིན་སྤུ་ཟ་བ་དང་འབིགས་བྱེད་དང་ཛན་ཏུ་མཱ་དྷ་རཿདང་ཨོའུ་དུམ་བ་རཿདང་ཀུན་དུ་འཛིམ་པ་དང་སྤུའི་གླིང་དང་ཁྲག་ལ་རབ་ཏུ་ཁྲོ་བ་དང་ཁྲག་ཟ་བ་དང་རབ་རབ་བྱེད་པ་
ཨམ་བྱ་ཀས་རྣམས་སོ། །སྲིན་བུ་འདི་དག་རྣམས་ནི་རྐང་པ་མེད་པ་དང་རང་དགར་འཇུག་པ་དང་རྡུལ་ཕྲ་རབ་ཙམ་གྱི་དབྱིབས་དང་ཤིན་དུ་ཕྲ་བར་གྱུར་པ་དང་མིག་མེད་པ་དང་ཟ་འཕྲུག་གི་མཚན་ཉིད་དང་ནད་ཀྱི་མཚན་ཉིད་ཅན་ཡིན་ནོ། །
གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པས། ངའི་སྲིན་རེ་རེས་ཀྱང་ལས་རེ་རེ་བྱེད་པར་འགྱུར་བ་རྣམས། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་
བར་འགྱུར་བ། སྤུ་ཟ་བ་ཞེས་བྱ་བའི་སྲིན་རབ་ཏུ་ཁྲོས་པར་གྱུར་ན་སྨིན་མ་དང་མིག་གཉིས་ཀྱི་འམ་ཁ་སྤུ་དང་བ་སྤུ་ལ་སོགས་པ་རྣམས་ཟ་བར་བྱེད་དོ། །དེའི་སྐྱོན་གྱིས་མཛེར་འགྱུར་རོ། །དེ་ལ་འདིར་འབིགས་བྱེད་ཅེས་
བྱ་བའི་སྲིན་རབ་ཏུ་ཁྲོས་པར་གྱུར་ན། དེ་ཁྲག་རྒྱུ་བའི་རྒྱུན་དུ་སོང་ནས་ལུས་ཐམས་ཅད་འཁྲུག་པར་བྱེད་དོ། །འཛན་དུ་མཱ་ཏ་རོ་ཞེས་བྱ་བའི་སྲིན་དེས་ནི་ཁྲག་རྒྱུ་བའི་རྒྱུན་རྣམས་དྲི་ངན་པར་སྐྱེད་པར་བྱེད། ཁ་དང་སྣ་བུག་

66-1-135a

གཉིས་སུ་ཨོའུ་དུམ་འབར་ཞེས་བྱ་བའི་སྲིན་གྱིས་ཏེ། དེ་ནི་ཁྲག་གི་སྲིན་ཡིན་པས་དེ་ཁྲག་ལ་རབ་ཏུ་འཁྲོ་ཞིང་རྣམ་པར་སྡང་བས་འབྲུམ་བུ་ཕྲ་མོ་དང་སྐེལ་ཕོལ་ཏུ་བྱེད་དོ། །ཀུན་དུ་འཇིམ་བྱེད་ཅེས་བྱ་བའི་སྲིན་དེ་
ནི་ཁྲག་གི་རྒྱུན་དུ་རབ་ཏུ་ཁྲོས་པར་གྱུར་ན་མཆིན་པ་དང་ཁྲག་དང་མཁྲིས་པ་སྐྱེད་དོ། །སྤུའི་གླིང་ཞེས་བྱ་བའི་སྲིན་དེ་ཁྲག་གི་རྒྱུན་དུ་སོང་བར་གྱུར་ནས་ཤིན་དུ་ཁྲོས་པས་ནད་འདི་དག་རྣམས་ཕུལ་དུ་བྱེད་དོ། །འདི་ལྟ་སྟེ་
གཡན་པ་དང་མིག་སེར་དང་འབྲུམ་བུ་དང་མོ་དྱཱ་ལང་རྣམས་སོ། །ཁྲག་ལ་རབ་ཏུ་ཁྲོ་བ་ཞེས་བྱ་བའི་སྲིན་དེ་ཁྲག་གི་རྒྱུན་དུ་སོང་བར་གྱུར་ནས་ནད་འདི་དག་རྣམས་བྱེད་དོ། །འདི་ལྟ་སྟེ་མཛེར་གྱུར་པ་དང་འདོད་ཆགས་ཀྱི་ནད་
གཞན་ཡང་བུད་མེད་ལ་ཡང་ཁྲག་གིས་གཡའ་བར་གྲགས་པ་དང་ཁེ་མ་རྣམས་སོ། །ཁྲག་ཟ་བ་ཞེས་བྱ་བའི་སྲིན་དེ་ཁྲག་གི་ནད་འདི་དག་རྣམས་བྱེད་དོ། །འདི་ལྟ་སྟེ། མགོ་འཁོར་བ་དང་སྐེ་འཁྲུལ་བ་དང་གཞང་
སྨིན་པར་བྱེད་པའོ། །རབ་རབ་བྱེད་པ་ཞེས་བྱ་བའི་སྲིན་དེ་ཁྲག་གི་རྒྱུན་གྱི་གསེབ་དུ་སོང་བར་གྱུར་ནས་ནད་འདི་རྣམས་བྱེད་དོ། །འདི་ལྟ་སྟེ། ངལ་བ་དང་རེངས་པ་དང་རྒྱུན་དྲག་ཏུ་འབྱུང་བ་དང་ཀ་མི་བདེ་བ་རྣམས་སོ། །གང་
ཡང་དེ་དག་རྣམས་ནི་ཁྲག་ལ་རབ་ཏུ་གནས་པའི་སྲིན་འཁོར་དང་བཅས་པ་རྣམས་ཐམས་ཅད་ཀྱིས་ཡིན་ནོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། སྲིན་གྱི་རིགས་
བཅུ་ནི་ཤ་ལ་གནས་པ་ཡིན་ནོ། །འདི་ལྟ་སྟེ་རྨས་ཀུན་ནས་སློང་བ་དང་ཙུན་ཙུ་ར་ཀཿ དང་རྒྱུས་པ་སྒུལ་བ་དང་རྩ་སྒུལ་བ་དང་ལྤགས་པ་ཟ་བར་བྱེད་པ་དང་དྲོད་སྒུལ་བ་དང་འཕེལ་བྱེད་དང་དྲི་ངན་པ་དང་རྔུལ་ལ་རྒྱུ་བ་དང་རྣམ་པར་
སྲེག་བྱེད་རྣམས་སོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ངའི་ཤ་ལ་གནས་པའི་སྲིན་གང་དག་གིས་རང་བཞིན་དུ་གནས་པ་འམ་རང་བཞིན་དུ་མི་གནས་

66-1-135b

པ་ཅི་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་འགྱུར་བ། ངའི་སྲིན་རྨས་ཀུན་ནས་བསླང་བ་ཞེས་བྱ་བ་ནི་ཡུལ་ཕྱོགས་གང་དུ་རྨ་ཀུན་ཏུ་འབྱུང་བར་འགྱུར་བ་དེའི་ཡུལ་
ཕྱོགས་སུ་རྨས་ཀུན་ནས་བསླང་བར་གྱུར་པའི་སྲིན་འཁོར་མང་པོར་གྱུར་ནས་རྨ་རྣམས་ཟ་བར་བྱེད་པ་དང་ཟ་འཕྲུག་དང་རྨ་དག་ཀྱང་བདག་ལ་སྐྱེད་དོ། །ཙུན་ཙུ་ར་ཀས་ཞེས་བྱ་བའི་ངའི་སྲིན་གྱིས་ཀྱང་རང་བཞིན་དུ་གནས་
པ་འམ་རང་བཞིན་དུ་མི་གནས་པ་ཅི་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་དག་གིས་སམ། ལྷའི་མིག་གིས་མཐོང་བར་གྱུར་པ། ཙུན་ཙུ་ཀོའི་བདག་གི་སྲིན་གལ་ཏེ་ལྟོགས་པར་གྱུར་ན། དེས་གནད་
རྣམས་དང་བཤང་བ་དག་ཀྱང་རབ་ཏུ་འབྱེད་པར་བྱེད་དོ། །དེས་མཉམ་པར་ཤིན་དུ་འཁྲུ་བར་འགྱུར་རོ། །ངའི་མེ་དྲོད་ཉམས་པར་བྱེད་དོ། །དེས་བདག་གི་ཁ་སྐམས་པར་འགྱུར་རོ། །བདག་གི་ལུས་རྙིངས་པར་
འགྱུར་བ་དང་གཟེར་ཟུག་དག་འབྱུང་བར་བྱེད་དོ། །བདག་གི་བཤང་བ་དང་ཆུ་འདྲེས་པར་བྱེད་དེ། ཉིན་མོ་དང་མཚན་མོར་ཡང་གཉིད་འབྱུང་བར་མི་འགྱུར་རོ། །སྲིན་ཙུན་ཙུ་ར་ཀས་ནི་རྟག་ཏུ་ཡང་བདག་གི་སྨིན་མའི་
གནས་སུ་བཤང་བ་ཚལ་བར་བྱེད་དོ། །དེ་བདག་གི་རྟུག་པའི་གཏེར་ལ་བརྟེན་ནས་རླུང་དང་རྔུལ་དང་གཅིན་དང་བད་ཀན་རྣམས་དང་ལྷན་ཅིག་འགྲོགས་པར་གྱུར་པའི་ཤིན་དུ་འཁྲུ་བར་བྱེད་དོ། །དེས་བདག་གི་དང་ཀ་
མི་བདེ་བ་སྐྱེད་པར་འགྱུར་ཞིང་ལྐུག་པར་ཡང་བྱེད་དོ། །གལ་ཏེ་མྱ་ངན་བྱེད་པར་གྱུར་ན་དེས་ངའི་སྲིན་ཙུན་ཙུ་ར་ཀཿཤིན་དུ་དགའ་བར་འགྱུར་རོ། །དེ་ཤིན་དུ་ཡང་བདག་ལ་སྟོབས་དང་ལྡན་པར་འགྱུར་ཞིང་། 
མཉམ་ཞིང་ཤིན་དུ་རྒྱ་ཆེ་བར་ཁྲག་ཏུ་གྱུར་པའི་རྩ་རྣམས་སུན་འབྱིན་པར་བྱེད་དོ། །དེས་ང་ཤིན་དུ་ཡང་འཁྲུ་བར་འགྱུར་རོ། །བད་ཀན་བེའུ་སྣབས་ཤིན་དུ་འཁྲུས་པས་རླུང་ལྷག་པར་འགྱུར་རོ། །ཙུན་ཙུ་ར་ཀའི་སྲིན་ལ་

66-1-136a

སོ་སོར་བརྟགས་པས་ཡང་དག་པ་ཇི་ལྟ་བ་བཞིན་དུ་ལུས་རབ་ཏུ་ཤེས་སོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་
བའི་ཤེས་རབ་དག་གིས་སམ་ལྷའི་མིག་གིས་མཐོང་བར་གྱུར་པ། ངའི་སྲིན་རྒྱུས་པ་སྒུལ་བ་ཞེས་བྱ་བ་རྟག་ཏུ་རྒྱུས་པ་སྦོམ་པ་འམ་ཕྲ་བ་རྣམས་ཀྱི་ཡང་གསེབ་དུ་རྒྱུ་བར་བྱེད་དོ། །དེ་བདག་ལ་ཁྲོས་པར་གྱུར་ན་དེས་ངའི་རྒྱུས་པ་
རྣམས་ན་བར་འགྱུར་རོ། །གལ་ཏེ་ལྟོགས་པར་མ་གྱུར་ན་ནི་དེས་ངའི་རྒྱུས་པར་གྱུར་པ་རྣམས་ན་བར་མི་འགྱུར་རོ། །བདག་གི་རྒྱུས་པས་སྦྲེལ་བར་གྱུར་པའི་རུས་པའི་སྒལ་ཚིགས་རྣམས་ཐམས་ཅད་མ་ལུས་པ་ནས་ཐུག་
དུ་མཐོང་བར་གྱུར་པས་དེས་བདག་གི་ལུས་ལ་རྒྱུས་པ་ལས་གྱུར་པའི་ཚོར་བ་རྣམས་སྐྱེད་པར་བྱེད་དོ། །ངས་ཟས་དང་བྲལ་བར་གྱུར་པས་གལ་ཏེ་ན་ང་ལྟོགས་པར་གྱུར་ན། དེ་བདག་གི་རྒྱུས་པ་ལ་གནས་པའི་ཁྲག་
རྣམས་འཐུང་བར་བྱེད་དོ། །དེས་ངའི་རྩོལ་བ་རབ་ཏུ་ཉམས་པར་འགྱུར་རོ། །གལ་ཏེ་ཤ་ཟ་བར་བྱེད་ན་དེས་བད་ཀན་སྨུག་པོ་ང་ལ་སྐྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་
སུ་ལྟ་ཞིང་གནས་པ། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། རྩ་སྒུལ་བ་ཞེས་བྱ་བའི་སྲིན་དེ་ངའི་རྩ་ཀུན་ཐམས་ཅད་ཀྱི་མཐར་རྒྱུ་ཞིང་གསེབ་དུ་རྒྱུ་བར་བྱེད་པ་ཕྲ་བར་གྱུར་པས་ཤིན་
དུ་ཐོགས་པ་མེད་པར་འགྲོ་བ་ཡིན་ནོ། །དེ་གལ་ཏེ་ངའི་ཟས་རྣམས་ཀྱི་སྟོབས་ཀྱིས་རྩ་རྣམས་འཇོམས་པར་བྱེད་དོ། །དེས་བདག་གི་ལུས་པོ་ཀུན་དུ་སྐམ་པར་འགྱུར་བ་འམ་ཡི་ཀ་མི་བདེ་བ་འབྱུང་བར་འགྱུར་རོ། །
གལ་ཏེ་ཡང་ཆུ་རྒྱུ་བའི་རྩ་རྣམས་ལ་གནོད་པ་བྱེད་པར་གྱུར་ན། དེས་ངའི་རྐན་སྐམས་པར་འགྱུར་རོ། །གལ་ཏེ་ཡང་རྔུལ་རྒྱུ་བའི་རྩ་རྣམས་ལ་གནོད་པ་བྱེད་པར་གྱུར་ན་དེས་ཀྱང་ངའི་བ་སྤུའི་ཁུང་བུ་རྣམས་ནས་

66-1-136b

རྔུལ་ཀུན་དུ་འབྱུང་བར་འགྱུར་རོ། །ཡང་གལ་ཏེ་ཆུ་ངན་རྒྱུ་བའི་རྩ་རྣམས་ཀྱི་གསེབ་དུ་སོང་བར་གྱུར་ནས་སུན་འབྱིན་པར་བྱེད་ན་གཅིན་སྡོམ་པར་འགྱུར་རོ། །ཁུ་ཆུ་སུན་འདོན་པར་བྱེད་ན་ཡང་ཤིན་དུ་སྡུག་
བསྔལ་མི་ཟད་པར་འགྱུར་རོ། །གལ་ཏེ་ཡང་རྟུག་པ་རྒྱུ་བའི་རྩ་རྣམས་ཀྱི་ནང་དག་ཏུ་རྒྱུ་བར་བྱེད་ཅིང་ཁྲོས་པར་གྱུར་ན་ནི་དེས་བདག་གི་རྟུག་པའི་གནས་རྣམས་སྡོམ་པས་འཆི་བ་ཙམ་གྱི་སྡུག་བསྔལ་བྱེད་དོ། །
རྩ་སྒུལ་བར་བྱེད་པའི་སྲིན་དེ་ལ་སོ་སོར་བརྟགས་པར་གྱུར་ན་ཡང་དག་པ་ཇི་ལྟ་བ་བཞིན་དུ་སོ་སོར་ཤེས་སོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། 
དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། པགས་པ་བསྐྱོད་པར་བྱེད་པ་ཞེས་བྱ་བའི་སྲིན་པགས་པ་དྲུག་གི་གསེབ་ན་གནས་པ་རྣམས་གལ་ཏེ་ངའི་ཟས་ཀྱི་སྐྱོན་གྱིས་ཁྲོས་པར་
གྱུར་ན་ནི། དེས་བདག་གི་པགས་པ་རྣམས་ཁ་དོག་ངན་པར་འགྱུར་རོ། །རྩུབ་པར་འགྱུར་བ་འམ་གཡན་པ་འམ་པགས་པ་རྣམས་དམར་བ་ཉིད་དམ་སྐྱ་བ་ཉིད་དམ་སྔོ་བ་ཉིད་དམ་རྡོལ་བར་འགྱུར་བ་འམ་སེན་མོ་དང་སྐྲ་དང་
ཁ་སྤུ་དང་བ་སྤུ་རྣམས་དང་སྐྱི་རྣམས་ཉིལ་བར་འགྱུར་རོ། །འབྲུམ་བུ་ཐུག་ཐུག་པོ་འམ་མཛེར་འགྱུར་བ་འམ་པགས་པ་དང་ཤ་དང་དྲོད་བྱེ་བྲལ་དུ་འགྱུར་རོ། །དེས་པགས་པ་སྐྱོད་པར་བྱེད་པའི་སྲིན་རྣམས་ལ་སོ་སོར་
བརྟགས་པར་གྱུར་པས་ཀྱང་ལུས་ལ་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་གྱུར་པ་ན། དེས་ཐོས་
པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བ་ནི། ཚིལ་རྒྱུ་བར་གྱུར་པའི་རྒྱུན་རྣམས་ཀྱི་གསེབ་ན་གནས་པའི་ཚིལ་སྒུལ་ཞེས་བྱ་བའི་སྲིན་བདག་གི་ལུས་ལ་གནས་པར་གྱུར་པ་དེས་མཐོང་བར་གྱུར་ཏོ། །

66-1-137a

ཡང་ད་གལ་ཏེ་ན་ཉལ་བའི་སྐྱོན་གྱིས་སམ་ཟས་ཀྱི་སྐྱོན་གྱིས་ཀྱང་རུང་སྟེ་རབ་ཏུ་འཁྲུགས་པར་གྱུར་པ་སྐྱེས་ན། དེས་ང་ལ་འཁྲུ་སྐྱུག་གམ་འབྲུམ་བུ་འམ་སྐྱ་བོར་སྣང་བ་འམ་ཐིག་ལེའི་རིགས་སུ་གྱུར་པ་རྣམས་སྐྱེད་
པར་བྱེད་དོ། །སྐེ་ལ་ལྦ་བར་གྱུར་པ་འམ་རྒྱུས་པ་ཡང་རུལ་བ་དང་སྟོབས་ཟད་པ་དང་ལུས་རྗུད་པ་དང་བདག་ཟས་ཟ་བར་བྱེད་པར་གྱུར་ན་རྟག་ཏུ་རྔུལ་བ་ཉིད་དུ་ཡང་བྱེད་དོ། །ཚིལ་སྒུལ་བར་བྱེད་པའི་སྲིན་དེ་ལ་སོ་སོར་
བརྟགས་པར་གྱུར་པས་ཀྱང་ལུས་ཡང་དག་པ་ཇི་ལྟ་བ་བཞིན་དུ་རབ་ཏུ་རིག་གོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་
བམ་ལྷའི་མིག་གིས་མཐོང་བར་གྱུར་པ། འཕེལ་བྱེད་ཅེས་བྱ་བའི་སྲིན་ལུས་ལ་རབ་ཏུ་གནས་པ་ཡིན་ལ། དེས་བདག་ལ་རང་བཞིན་དུ་གནས་པ་འམ་རང་བཞིན་དུ་མི་གནས་པར་གྱུར་པ་ཅི་དག་བྱེད་པ་ཡང་། དེས་ཐོས་པ་
ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བ་ནི། ངའི་སྲིན་འཕེལ་བྱེད་རྣམ་པ་གཉིས་ཀྱིས་ལུས་ལ་ཉེ་བར་ལོངས་སྤྱོད་པར་བྱེད་དེ་ཟིན་པ་དང་མ་ཟིན་པའོ། །དེ་ལ་ཟིན་པ་ཡང་ལུས་ཕྱེད་དྲོད་དང་ཁྲག་དང་ཤ་དང་
རུས་པ་དང་ལྷ་བ་དང་མཁྲིས་པ་དང་ཁུ་ཆུའོ། །མ་ཟིན་པ་ཡང་ཇི་ལྟར་ལུས་ལ་སྐྲ་དང་བ་སྤུ་དང་སེ་མོ་དང་ཁ་སྤུ་དང་སོ་རྣམས་སོ། །ཉེ་བར་འཕེལ་བྱེད་ཀྱི་སྲིན་དེས་ཀྱང་བདག་གི་ལུས་ལ་རྣམ་པ་གཉིས་སུ་འཕེལ་བར་བྱེད་པ་
ཡིན་ཏེ། གལ་ཏེ་ཡང་ངའི་ཟས་ཀྱི་སྐྱོན་གྱིས་འཕེལ་བྱེད་ཀྱི་སྲིན་རྣམས་རབ་ཏུ་རྒྱས་པར་མ་གྱུར་ན་ནི་དེས་ང་སྤྲོ་བ་དང་རྣམ་པར་བྲལ་བར་འགྱུར་རོ། །འགྲོ་བ་དང་འོང་བ་ལ་ཡང་བདག་བདེ་བར་གནས་པར་འགྱུར་རོ། །
མྱུར་ཞིང་བརྟད་པར་གཉིད་ཀྱི་རྒྱུན་འབྱུང་བར་འགྱུར་རོ། །དེ་ལས་ཀྱང་བདག་གི་སྟོབས་རབ་ཏུ་འཕེལ་བར་འགྱུར་ཏེ། བདག་གི་ལྤགས་པ་དང་ཁྲག་དང་ཚིལ་དང་ལྷ་བ་དང་རུས་པ་དང་ཁུ་ཆུ་དང་སྟོབས་རྣམས་སྐྱེ་བར་འགྱུར་རོ། །

66-1-137b

དེས་འཕེལ་བྱེད་ཀྱི་སྲིན་ལ་སོ་སོར་བརྟགས་པས་ཀྱང་ལུས་ཡང་དག་པ་ཇི་ལྟ་བ་བཞིན་དུ་རིག་གོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་
བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། ངའི་སྲིན་དྲི་ངན་པ་ཞེས་བྱ་བ་ཤ་དང་བཤང་བ་དང་གཅིན་གྱི་གསེབ་ན་གནས་པ་ཡིན་ལ། གལ་ཏེ་ཟས་ཀྱི་སྐྱོན་གྱིས་ཁྲོས་པར་གྱུར་ན་ངའི་ཟས་དེ་དག་གི་སྐྱོན་
གྱིས་དེས་ཕྱི་ས་དང་གཅིན་དང་མཆིལ་མ་དང་སྣབས་རྣམས་དྲི་མི་ཞིམ་པར་འགྱུར་རོ། །སྣའི་རྣག་དང་མིག་གི་རྣག་དག་ཀྱང་འབྱུང་ངོ་། །སྲིན་རྣམས་དང་ལྷན་ཅིག་ཀུན་དུ་ཚོགས་པར་འགྱུར་བ་དེ་དང་དེ་དག་རྣམས་
ཀྱང་སྲིན་གྱིས་དྲི་ངན་པ་རྣམས་སུ་སྐྱེད་པར་བྱེད་དོ། །གང་ཡང་གོས་སམ་མལ་ཆ་དང་ནམ་ཟས་ཀྱི་རིགས་སུ་གྱུར་པ་རྣམས་ཀྱང་རུང་སྟེ་སོའི་གསེབ་དུ་སོང་བར་གྱུར་ན། དེ་དག་རྣམས་སྲིན་དེ་ཡིས་དྲི་ངན་པ་དང་ཆེས་དྲི་ངན་
པར་འགྱུར་བར་བྱེད་དོ། །མཚན་མོ་ཉལ་བར་གྱུར་པའི་སྐྱོན་གྱིས་ཀྱང་ལྕེའི་དྲི་མ་དེ་ཤིན་དུ་དྲི་མི་ཞིམ་པར་འགྱུར་རོ། །ལྕེའི་དྲི་མ་རྣམས་ཤིན་དུ་སྐྱ་བར་འགྱུར་བ་དང་ལུས་དྲི་ངན་པ་དང་དྲི་མ་ཅན་དུ་ཡང་འགྱུར་རོ། །དེས་ཡང་དག་
པ་ཇི་ལྟ་བ་བཞིན་དུ་དྲི་ངན་པའི་སྲིན་དེ་ལ་སོ་སོར་བརྟགས་པར་གྱུར་པས་ཀྱང་ལུས་ཡང་དག་པ་ཇི་ལྟ་བ་བཞིན་དུ་སོ་སོར་རབ་ཏུ་རིག་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་
ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྔུལ་ལ་རྒྱུ་བ་ཞེས་བྱ་བའི་སྲིན་གཤུལ་ཤའི་གསེབ་ན་རྒྱུ་བ་ཡིན་ཏེ། དེ་གལ་ཏེ་ངའི་ཟས་ཞུ་བར་གྱུར་ན། དེས་བདག་
གི་རུས་ཤིང་གི་ཡུལ་ཕྱོགས་ཀྱི་རུས་པ་གསུམ་གྱི་བུ་གུ་གང་ཡིན་པར་ངའི་བཤང་བ་དྲངས་ནས་འཕོངས་ཀྱི་མདོར་འཇུག་གོ། །རུས་པ་གཞན་གསུམ་གྱི་བུ་གུ་རླན་པར་བྱས་ཤིང་བདག་གི་ཆུ་ངན་གྱིས་རླན་པར་བྱས་ནས་རྟུག་

66-1-138a

པའི་དབྱིབས་ཆེན་པོ་རྣམས་ཨན་ཏོང་རུས་པའི་ཡུལ་ཕྱོགས་སུ་བྱས་ནས་ངའི་གཅིན་འབྱུང་བར་འགྱུར་རོ། །དེས་རྔུལ་ལ་རྒྱུ་བའི་སྲིན་ལ་རབ་ཏུ་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་རབ་
ཏུ་རིད་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། སྲིན་གྱི་
རིགས་བཅུ་དག་གི་མཁྲིས་པ་ལ་གནས་པ་དེ་ལས་སྐྱེས་པར་གྱུར་པ། ལུས་ཐམས་ཅད་ཀྱི་རྗེས་སུ་འཇུག་པར་བྱེད་པ་རྣམས་ནི་འདི་ལྟ་སྟེ། ཙུ་རུ་བཿ དང་སྒུལ་བྱེད་དང་རྫས་ཀྱིས་རྒྱས་པ་དང་ཆེན་པོའི་རིགས་
དང་ནག་པ་པ་དང་། ཟས་ཆེན་པོ་དང་དྲོ་བ་ལ་རྒྱུ་བ་དང་རྣམ་པར་སྲེག་བྱེད་དང་མེ་དྲོད་ཉམས་པར་བྱེད་པ་དང་མེ་ཆེན་པོ་དང་སྟེ། སྲིན་གྱི་རིགས་བཅུ་པོ་དེ་དག་རྣམས་ནི་མཁྲིས་པ་ལ་རྒྱུ་བ་དང་དེ་ལས་སྐྱེས་པར་གྱུར་པ་ལུས་
ཐམས་ཅད་ཀྱི་རྗེས་སུ་འཇུག་པ་རྣམས་ཡིན་ནོ། །བདག་གི་སྲིན་གང་དག་གིས་ངའི་ལུས་ལ་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་བྱེད་པར་འགྱུར་ན། དེས་ཐོས་པ་ལས་བྱུང་བའི་ཤེས་རབ་བམ་
ལྷའི་མིག་གིས་མཐོང་བ་ལ། ཙུ་ར་བ་ཞེས་བྱ་བའི་སྲིན་ལུས་ལ་རབ་ཏུ་གནས་སོ། །དེ་གལ་ཏེ་བདག་གི་ཟས་ཀྱི་སྐྱོན་གྱིས་ཁྲོ་བ་ཀུན་ནས་སྐྱེས་པར་གྱུར་ན། དེས་ངའི་མིག་གཉིས་ཀྱི་རྫི་མ་དག་ཟ་བར་འགྱུར་རོ། །
དེས་ང་ལ་འབྲུམ་བུ་དང་གཡན་པ་དག་སྐྱེ་བར་འགྱུར་རོ། །གལ་ཏེ་རྫི་མ་གཞན་རྣམས་ལ་ཟ་བར་འགྲོ་ན་མིག་ལས་གྱུར་པའི་མཆི་མ་རབ་ཏུ་ཕལ་ཆེ་བ་ཡང་རབ་ཏུ་འབྱུང་ངོ་། །གལ་ཏེ་མིག་ལ་རྒྱུ་བར་གྱུར་ན་དེས་
བདག་གི་མིག་ལ་ནད་དྲག་པོ་རྣམས་སྐྱེད་པར་བྱེད་དེ། མཐོང་བ་རྣམས་པར་ཉམས་པ་འམ་མིག་ཉེ་བར་སྡོམ་པར་ཡང་འགྱུར་རོ། །དེ་བདག་གི་མིག་གི་ནང་ན་རྒྱུ་ཞིང་ཤའི་གོང་བུར་གྱུར་པའི་མིག་གི་ཐ་

66-1-138b

སྙེད་དུ་བྱས་པ་ལ་འགལ་བར་བྱས་ནས། མིག་ལ་གནས་པའི་ནུར་ནུར་པོ་ལ་གནས་པར་བྱེད་དོ། །དེས་ངའི་མིག་འབྲས་སུ་གཏོགས་པའི་གཡོགས་མ་དང་དམར་པོར་སྣང་བ་ཡང་སྐྱེད་པར་བྱེད་དོ། །སྲིན་འདིས་
ནི་རྟག་པར་རྒྱུན་དུ་ནད་ཆེན་པོ་རྣམས་བྱེད་དོ། །དེས་ཙུ་ར་བཱི་སྲིན་ཡང་དག་པ་ཇི་ལྟ་བ་བཞིན་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་
པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་དག་གིས་སམ་ལྷའི་མིག་གིས་མཐོང་བར་གྱུར་པ། སྒུལ་བྱེད་ཞེས་བྱ་བའི་སྲིན་ལུས་ལ་གནས་ཏེ། 
མཁྲིས་པའི་ནང་ན་རྒྱུ་བ་དང་ལུས་ཐམས་ཅད་ལ་ཡང་ཐོགས་པ་མེད་པར་འགྲོ་བར་བྱེད་པ་དང་། མཁྲིས་པ་ཉིད་ཀྱིས་ལུས་གཡོགས་པ་ཡིན་ནོ། །དེས་གང་གིས་ཁོ་བོའི་རུས་པ་བསྲེགས་པར་གྱུར་པ་ཤར་གཏོགས་
པ་ཡང་ཤིན་དུ་ཚ་བར་འགྱུར་བ་འམ། བདག་གི་ཡན་ལག་རྣམས་ཀྱང་དྲོན་མོར་འགྱུར་རོ། །བདག་གི་ལག་པ་དང་རྐང་པ་གཉིས་ཀྱང་ཤིན་དུ་རྣམ་པར་བསྲེགས་པར་གྱུར་པ་ནི་ཉིན་མོ་དང་མཚན་མོ་ཡང་རབ་ཏུ་ཞི་བར་མི་
འགྱུར་རོ། །གལ་ཏེ་པགས་པ་ལ་འགྲོ་བར་གྱུར་ན་བདག་ལ་རྔུལ་འབྱུང་བར་འགྱུར་རོ། །དེས་སྒུལ་བྱེད་ཀྱི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་རབ་ཏུ་ཤེས་སོ། །གཞན་
ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་དག་གིས་སམ། ལྷའི་མིག་གིས་མཐོང་བར་གྱུར་པ། བདག་གི་སྲིན་རྫས་ཀྱིས་རྒྱས་
པ་ཞེས་བྱ་བ་མཁྲིས་པའི་ནང་ན་རྒྱུ་བར་གྱུར་པ་མཆུ་ཤིན་དུ་རྣོ་བ་རྐང་པ་ཐུང་བ་མེའི་ལྟོ་དང་ནད་ཆེན་པོར་གྱུར་པའོ། །དེ་གལ་ཏེ་ཤེད་ན་ལུས་ཀྱི་ཡུལ་ཕྱོགས་གཞན་ན་གནས་པར་གྱུར་ན། ངའི་ཟས་ཀྱི་སྐྱོན་གྱིས་ལྟོགས་

66-1-139a

པར་གྱུར་ནས། ཡུལ་ཕྱོགས་དེ་དང་དེ་དག་ཏུ་ལུས་སྲེག་པར་འགྱུར་རོ། །ཁྲག་འགྲིམ་པར་འགྱུར་རོ། །ཁྲག་སྐྱུག་པར་འགྱུར་བ་དང་བདག་གི་ལུས་ཐམས་ཅད་ཀྱང་རང་བཞིན་དུ་མི་གནས་པར་མེ་
བཞིན་དུ་སྲེག་པར་བྱེད་དོ། །བདག་གི་ལུས་ཀྱི་པགས་པ་རྣམས་ཐམས་ཅད་མེའི་ཡུལ་དུ་འགྱུར་ཞིང་རྐང་པ་དག་ལ་ཡང་འབྲུམ་བུའི་ཐིག་ལེ་དང་ལུས་རྣམས་མེ་དང་མཚུངས་པར་སྐྱེད་དོ། །རྫས་ཀྱིས་རྒྱས་པའི་
སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བུར་ལུས་སོ་སོར་རིག་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེའི་ཐོས་པ་
ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རིགས་ཆེན་པོ་ཞེས་བྱ་བའི་སྲིན་ལུས་ཀྱི་ནང་ན་རྒྱུ་བར་གྱུར་པ་མཁྲིས་པའི་གསེབ་ན་རྒྱུ་བ་ཡིན་ནོ། །དེ་གལ་ཏེ་ངའི་ཟས་ཀྱི་སྐྱོན་ཀྱིས་ཁྲོ་བ་
སྐྱེས་པར་གྱུར་ན། དེས་ང་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རིགས་ཆེན་པོའི་སྲིན་ནི་
ངའི་ལུས་ཀྱི་ནང་ན་རྒྱུ་བར་གྱུར་པས་མགོ་ནས་བཟུང་ནས་ཇི་སྲིད་དུ་རྐང་པའི་བར་དུ་ཐོགས་པ་མེད་པར་འགྲོ་བ་ཡིན་ཏེ། དེ་བདག་ལ་ཁྲོས་ནས་ལུས་ཐམས་ཅད་ལ་ཁྲག་མཁྲིས་ཀྱི་འབྲུམ་ཐུག་བྱེད་པ་དང་། འདིས་
མཁྲིས་པ་དང་ཁྲག་དག་གིས་རྣ་བ་དང་སྣ་བུག་གི་ནང་དག་ནས་ཁྲག་མཁྲིས་འཇག་པར་བྱེད་པས་འཆི་བའི་གནས་སྐབས་དང་འདྲ་བར་བྱེད་དོ། །སྔོན་པོར་བྱེད་ཅིང་མིག་སེར་དུ་ཡང་བྱེད་དོ། །དེས་ཁ་ཁ་བར་ཡང་བྱེད་དོ། 
དེས་རིགས་ཆེན་པོའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་

66-1-139b

པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ནག་པ་པ་ཞེས་བྱ་བའི་སྲིན་མཁྲིས་པ་སྐྱོན་ཅན་རྣམས་དྲངས་ནས་ལུས་ལ་ཀུན་ཏུ་རྒྱུ་བར་བྱེད་དོ། །དེ་གལ་ཏེ་བདག་གི་
ཟས་ཀྱི་སྐྱོན་གྱིས་ཁྲོ་བ་སྐྱེས་པར་གྱུར་ནས་ལུས་ཀུན་ལ་སྙོམས་པར་ཏིལ་འདྲ་བའི་ཐིག་ལེ་ནག་པོ་རྣམས་བྱེད་པ་དང་། ཤ་འབྲུམ་པར་བྱེད་པ་འམ་ལུས་ལ་ཡང་ནག་པོ་དང་སེར་པོར་འགྱུར་བ་འམ། 
དམར་པོའི་དྲི་རླུང་དང་རླུང་དག་དང་མཚུངས་པར་འཇུག་པར་བྱེད་པ་འམ་བདག་གི་མཁྲིས་པ་འམ་གཞང་འཇོམས་པར་འགྱུར་རོ། །དེས་ནག་པོའི་སྲིན་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་ལུས་རབ་ཏུ་
ཤེས་སོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཟས་ཆེན་པོ་ཞེས་
བྱ་བའི་སྲིན་ལུས་ལ་གནས་ཏེ་དེས་ལུས་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བ་ནི་ཟས་ཆེན་པོ་ཞེས་
བྱ་བའི་སྲིན་ཟས་ཀྱི་སྐྱོན་གྱིས་གལ་ཏེ་ཁྲོས་པར་གྱུར་ན་དེ་ངའི་མཁྲིས་པའི་ནང་ན་གནས་པས་ཟས་ཟོས་པ་དང་དེ་ལྟར་ཚ་བ་སྐྱེད་པར་བྱེད་དོ། །དེ་ཆེན་པོར་གྱུར་པས་བདག་གི་ལུས་རླན་པར་འགྱུར་ཞིང་ཞིམ་པར་
གྱུར་ནས་ཡན་ལག་དང་ཉིང་ལག་རྣམས་ཐམས་ཅད་དང་མིག་དང་རྣ་བ་དང་སྣ་དང་བདག་གི་ལྕེའི་དབང་པོ་རྣམས་ཀྱང་ཉམས་པར་འགྱུར་རོ། །རང་དང་རང་གི་ཡུལ་རྣམས་ལ་ཡང་ལྟ་བར་མི་ནུས་པར་འགྱུར་བ་དང་། 
ཟས་ཀྱི་སྐྱོན་གྱིས་བདག་གི་དབང་པོ་ལྔ་པོ་རྣམས་ལམ་ངན་པ་ལ་རབ་ཏུ་གནས་པར་ཡང་འགྱུར་རོ། །དེས་ཟས་ཆེན་པོའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་

66-1-140a

རིག་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་དག་གིས་སམ་ལྷའི་མིག་གིས་མཐོང་བར་གྱུར་པ། དྲོ་བ་
ལས་རྒྱུ་བ་ཞེས་བྱ་བའི་སྲིན་ནི་རྟག་ཏུ་ཟས་དྲོ་བ་ལ་དགའ་བར་གྱུར་པ། ཟས་གྲང་བ་རྣམས་ལ་རབ་ཏུ་སྡང་བ་ཡིན་ནོ། །དེས་བདག་ལ་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་བྱེད་པ་ཡིན་ན། 
དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གལ་ཏེ་བདག་ཟས་སུ་གྱུར་པ་དག་གམ་བཟའ་བ་དང་བཏུང་བ་དང་བཅའ་བ་དང་མྱང་བ་ཡང་རུང་སྟེ་གྲང་མོ་དག་ཟ་བར་གྱུར་ན་
དེ་ང་ལ་ཁྲོས་པར་གྱུར་ནས་ངའི་ཁ་ལ་ལྡག་པར་བྱེད་པ་འམ། ལུས་རླན་པ་འམ་ལྕི་བ་འམ་ཉམ་ཆུང་བ་འམ་འགག་པ་འམ་སྙིང་ལ་ཡང་ལྡག་པ་འམ་ལུས་ཐམས་ཅད་ཀྱི་སྐྱོན་དུ་གྱུར་པ་སྟེ། དེས་ལུད་པ་དམར་པོར་
བྱེད་པ་འམ་མགྲིན་པ་ལ་ལྡག་པར་ཡང་བྱེད་དོ། །དེས་དྲོ་བ་ལས་རྒྱུ་བའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་ལ་སོ་སོར་བརྟགས་པ་ཡིན་ནོ། །གཞན་ཡང་རྣལ་འབྱོར་
སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྣམ་པར་སྲེག་བྱེད་ཅེས་བྱ་བའི་སྲིན་ལུས་ཀྱི་
མཁྲིས་པའི་གནས་ལ་རབ་ཏུ་གནས་པ་ཡིན་ལ། དེས་ང་ལ་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་
གྱུར་པ་སྲེག་བྱེད་ཀྱི་སྲིན་བདག་གི་ལུས་ལ་གནས་པ་ལས། གལ་ཏེ་ངས་ཟས་ལྕི་མོ་གང་དག་ཟོས་པར་གྱུར་ན་ངའི་ཟས་དེ་དག་གི་སྐྱོན་གྱིས་རྣམས་བསྲེག་བྱེད་ཀྱི་སྲིན་གྱིས་མེས་སྲེག་པར་བྱེད་དོ། །སྟོབས་ལྷག་པ་ཉིད་དང་རྩེ་

66-1-140b

འུ་ཆུང་ལ་གནོད་པར་འགྱུར་བ་དང་ཟས་ཀྱི་ཁམ་ཤིན་དུ་ཆེ་བས་མགྲིན་པར་མཐོག་པར་ཡང་འགྱུར་རོ། །བདག་གི་བཤང་བ་ཡང་སྐྱ་བོར་འགྱུར་ཞིང་ཆུ་ངན་ཡང་ཇི་ལྟ་བར་ཏེ། བདག་གྲང་བ་ལ་དགའ་བ་ཉིད་དུ་
ཡང་མི་འགྱུར་རོ། །ཟས་མངར་མོ་རྣམས་ལ་འདོར་བར་ཡང་མི་འགྱུར་རོ། །དེས་རྣམ་པར་སྲེག་བྱེད་ཀྱི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་རབ་ཏུ་ཤེས་སོ། །
གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ནི། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མེ་དྲོད་ཉམས་པར་བྱེད་
པ་ཞེས་བྱའི་སྲིན་ངའི་ལུས་ལ་མཁྲིས་པ་དང་ལྷན་ཅིག་སྐྱེས་ནས་གནས་ཏེ། དེ་ལ་དགའ་བ་དང་དེ་གྲང་བའི་དུས་ན་ནི་དགའ་བར་འགྱུར་རོ། །དྲོ་བའི་དུས་ན་ནི་རྒུད་པར་འགྱུར་རོ། །གྲང་བའི་དུས་ན་ཡང་རབ་ཏུ་
དགའ་བར་གྱུར་ནས་བདག་ཟས་འདོད་པར་བྱེད་དོ། །དྲོ་བའི་དུས་ན་ནི་མེ་དྲོད་ཉམས་པར་བྱེད་དོ། །གྲང་བའི་དུས་ན་ཡང་ངའི་མཁྲིས་པ་ལེགས་པར་སྒྲུབ་པར་བྱེད་ཅིང་དྲོ་བའི་དུས་ན་ནི། སུན་འདོན་པ་ཡིན་
ནོ། །དེའི་སྐྱོན་གྱིས་ནི་མེ་དྲོད་ཉམས་པར་བྱེད་དོ། །དེས་མེ་དྲོད་ཉམས་པར་བྱེད་པའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་
ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་མེ་ཆེན་པོ་ཞེས་བྱ་
བའི་སྲིན་ལུས་ལ་གནས་ཏེ། དེས་ང་ལ་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི། 

66-1-141a

ངའི་སྲིན་མེ་ཆེན་པོ་ཞེས་བྱ་བ་ནི་ཟས་འགལ་བ་ཟོས་པ་རྣམས་ཐམས་ཅད་འདོད་པར་འགྱུར་རོ། །གལ་ཏེ་ཡང་རང་ལྟོགས་པར་གྱུར་ན་ནི། དེས་ངའི་ལུས་ཀྱི་གསེབ་དུ་གྱུར་པའི་སྲིན་རྣམས་ཟ་བར་
བྱེད་དོ། །སྲིན་དེའི་སྐྱོན་གྱིས་བདག་ལ་འདིར་ལྷང་ཀྱོག་འབྱུང་བར་འགྱུར་རོ། །རྒྱབ་དུ་གཟེར་བར་འགྱུར་བ་འམ་ལག་པ་ལ་ཟུག་ཟེར་ཡང་རུང་སྟེ། ཡུལ་ཕྱོགས་གང་དུ་སྲིན་རྣམས་ཟ་བར་བྱེད་པའི་ཡུལ་ཕྱོགས་དེ་
དང་དེ་དག་རྣམས་སུ་གཟེར་ཟུག་སྐྱེ་བར་འགྱུར་རོ། །དེས་མཁྲིས་པ་ལ་གནས་པའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་རབ་ཏུ་རིད་པར་འགྱུར་རོ། །གཞན་ཡང་རྣལ་
འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རུས་པ་ལས་གྱུར་པའི་དང་ཚིལ་ལ་གནས་
པའི་སྲིན་གྱི་རིགས་འདི་ལྟ་སྟེ། རུས་པ་ལ་ལྡག་པ་དང་ཤིན་དུ་འབྲུད་བྱེད་དང་ཚིགས་པ་གཅོད་ཅིང་རྒྱུ་བ་དང་དྲི་མི་ཞིམ་པ་དང་རུས་པའི་རྣག་གི་རིགས་དང་ཁ་དམར་བ་དང་མྱང་བར་བྱེད་པ་དང་ལྤགས་པ་ཟ་བ་དང་གྲོག་མ་
དང་སྤུ་གྲིའི་ཁ་དང་རྣམས་སོ། །དེ་ལ་ངའི་རུས་པ་ལས་གྱུར་པའི་སྲིན་རྣམས་ཀྱིས་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་
གིས་མཐོང་བར་གྱུར་པ། རུས་པ་ལ་ལྡག་པར་བྱེད་པ་ཞེས་བྱ་བའི་སྲིན་ནི་ཕྱི་རོལ་གྱི་རུས་པའི་རྐང་རྣམས་ལ་རབ་ཏུ་གནས་སོ། །འདི་ལྟ་སྟེ་དཔུང་པའི་རྐང་ལ་གནས་པ་དང་། བརླའི་རྐང་ལ་གནས་པ་དང་རྒྱབ་ཀྱི་
སྒལ་བ་ལ་གནས་པ་རྣམས་ཡིན་ཏེ། རུས་པ་རྣམས་ཐམས་ཅད་ཀྱི་ཡང་གནད་རྣམས་ཀྱི་གསེབ་ན་རྒྱུ་བ་ཡིན་ནོ། །གལ་ཏེ་ཡང་དེ་ཟས་ཀྱི་སྐྱོན་རྣམས་ཀྱིས་ཁྲོ་བ་སྐྱེས་པར་གྱུར་ན་དེས་ངའི་རུས་པར་གྱུར་

66-1-141b

པའི་ལྷང་ཀྱོག་རྣམས་དང་ལུས་ཀྱི་མདོག་དང་རེག་པ་ཡང་ངན་པར་བྱེད་དོ། །རུས་པ་རྣམས་སམ་ཤ་རྣམས་ཀྱང་རུང་སྟེ་རུས་པས་བསྡུས་པ་རྣམས་ཟ་བར་བྱེད་དོ། །དེས་ངའི་རུས་པ་ལས་གྱུར་པའི་ཚོར་བ་ཆེན་པོ་མཆོག་ཏུ་མི་བཟད་
པ་རྣམས་བསྐྱེད་དོ། །གལ་ཏེ་ཡང་དེ་ལྟོགས་པར་མ་གྱུར་ན་ནི་དེ་ཇི་སྐད་དུ་བཤད་པའི་ངའི་ཚོར་བ་རྣམས་དང་འབྲལ་བར་འགྱུར་རོ། ། རུས་པ་ལ་ལྡག་པར་བྱེད་པ་ཞེས་བྱ་བའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་
དག་པ་ཇི་ལྟ་བ་བཞིན་དུ་ལུས་རབ་ཏུ་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་
གྱུར་པ། ཤིན་དུ་འདྲུད་བྱེད་ཅེས་བྱ་བའི་སྲིན་རུས་པ་རྣམས་ཐམས་ཅད་ལ་གནས་པ་ཡིན་ནོ། །དེས་གལ་ཏེ་ཤིན་དུ་རུས་པ་དྲུད་པར་བྱེད་ན་ནི། དེས་བདག་གི་ཁམས་རྣམས་ཐམས་ཅད་སྐམ་པོ་ཏྲོག་ཏྲོག་དུ་འགྱུར་རོ། །ཚད་
པ་དང་སྐད་འགག་པ་དང་བཤང་བ་འཁྲུ་བར་བྱེད་དོ། །དེ་རྣམས་བདག་ལ་མེད་ན་ཙིབ་ལོགས་ཀྱི་ནད་དང་སྐྱུག་པ་དང་ཡི་ག་མི་བདེ་བར་འགྱུར་རོ། །གལ་ཏེ་རུས་པའི་ཚིགས་སུ་གྱུར་པ་རྣམས་ཐམས་ཅད་ཀྱི་ཡང་རུས་པ་
རྣམས་མི་འདྲུད་ན་ནི། ཇི་སྐད་དུ་བཤད་པར་གྱུར་པའི་ནད་རྣམས་ང་ལ་འབྱུང་བར་འགྱུར་བ་མ་ཡིན་ནོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་
བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཚིགས་པ་གཅོད་ཅིང་རྒྱུ་བ་ཞེས་བྱ་བའི་སྲིན་ལུས་ལ་གནས་པ་ཡིན་ནོ། །དེས་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་བྱེད་པ་
ཡིན་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི། ཚིགས་གཅོད་ཅིང་རྒྱུ་བ་ཞེས་བྱ་བའི་སྲིན་ནི་གལ་ཏེ་ཡང་ཟས་ཀྱི་སྐྱོན་གྱིས་ལྟོགས་པར་གྱུར་ན་བདག་གི་

66-1-142a

ལག་པ་འཁུམ་པར་བྱེད་དོ། །ལུས་ཀྱི་ཡན་ལག་རྣམས་འབྲུལ་བར་འགྱུར་བ་འམ་སྙིང་གི་ནད་དུ་གྱུར་པ་འམ་གྲོང་ཁྱེར་གནས་པ་རྣམས་ཀྱང་སྟོངས་པར་མཐོང་བར་འགྱུར་རོ། །སྣབས་ཀྱང་འཁྲུག་པར་འགྱུར་རོ། །
རྟག་ཏུ་ཡང་ཡི་མུག་པ་དང་རེག་བྱ་དང་གཟུགས་རྣམས་ལ་བློ་ཀུན་དུ་དགའ་བར་མི་འགྱུར་རོ། །དེ་ཅིའི་ཕྱིར་ཞེ་ན། ཚོར་བ་རབ་ཏུ་སྟོབས་དང་ལྡན་པའི་ཕྱིར་རོ། །དེ་ཚིགས་པ་གཅོད་བྱེད་ཀྱི་སྲིན་ལ་སོ་སོར་བརྟགས་པར་གྱུར་པས་
ཀྱང་ཡང་དག་པ་ཇི་ལྟ་བ་བཞིན་དུ་ལུས་རབ་ཏུ་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་
མིག་གིས་མཐོང་བར་གྱུར་པ། དྲི་ངན་པ་ཞེས་བྱ་བའི་སྲིན་ལུས་ལ་གནས་པ་ཡིན་ཏེ། དེས་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་
ལྷའི་མིག་གིས་མཐོང་བ་ལས། དྲི་ངན་པ་ཞེས་བྱ་བའི་སྲིན་གལ་ཏེ་ཡང་ཟས་ཀྱི་སྐྱོན་གྱིས་ཁྲོ་བ་སྐྱེས་པར་གྱུར་ན། དེས་བདག་ལ་རྣམ་པར་སྲེག་པ་དང་ལྕི་བ་དང་ལུས་རྨར་གྱུར་པ་མྱུར་དུ་སོས་པ་རྣམས་ཀྱང་རིང་ཞིག་འགོར་བ་
དང་ཤ་བཀྲ་ཡང་བདག་གི་ལུས་ཀྱི་དཀྱིལ་འཁོར་ལ་འབྱུང་བར་འགྱུར་རོ། །སྐྱ་བོར་གྱུར་པ་ཡང་ལུས་ལ་རྒྱ་ཆེན་པོར་འགྱུར་རོ། །ཐམས་ཅད་དུ་མ་བྱུང་བར་འགྱུར་ན་ཉལ་བ་ཇི་ལྟ་བ་བཞིན་དུ་ལུས་འགྱུར་རོ། །མཛེ་ཡང་བདག་ལ་
འབྱུང་ངོ་། །རྣག་གི་དངོས་པོར་གྱུར་པ་བདག་གིས་ལུས་རྣམས་ཐམས་ཅད་ལ་རྒྱས་པར་འགྱུར་རོ། །དེའི་ནད་དེ་དག་རྣམས་རབ་ཏུ་ཞི་བར་མི་འགྱུར་རོ། །དེས་དྲི་ངན་པའི་སྲིན་ལ་སོ་སོར་བརྟགས་པར་གྱུར་པས་ཀྱང་ལུས་ཡང་
དག་པ་ཇི་ལྟ་བ་བཞིན་དུ་རབ་ཏུ་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། 

66-1-142b

རུས་པའི་རྣག་གི་རིགས་ཀྱི་སྲིན་རྣམས་བདག་གི་ལུས་ལ་གནས་པ་ཡིན་ཏེ། དེས་བདག་ལ་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་དག་གིས་སམ་
ལྷའི་མིག་གིས་མཐོང་བ་ནི། བདག་གི་སྲིན་རུས་པའི་རྣག་གི་རིགས་རྣམས་གལ་ཏེ་ཟས་ཀྱི་སྐྱོན་གྱིས་ཁྲོས་པ་སྐྱེས་པར་གྱུར་ན། དེ་གལ་ཏེ་ལོ་འམ་ལོ་གཉིས་སམ་ལོ་མང་པོ་ན་ཡང་རུང་བདག་བྱིས་པར་གྱུར་པ་
ཙམ་ན་ཡང་རུང་སྟེ་ལུས་ལ་གལ་ཏེ་བརྒྱབ་ཅིང་བསྣུན་པ་རབ་ཏུ་ཞི་ཞིང་སྔོན་སོས་པར་གྱུར་པ་ལས་དེ་དག་བདག་གིས་སྲིན་དེ་ཁྲོས་ནས་སླར་ཡང་སྙིང་ལ་རྒྱུ་བར་བྱེད་དེ། ཇི་སྲིད་དུ་རྒས་པར་གྱུར་གྱི་བར་དུ་ཡང་ཁྲོས་པ་
སྐྱེ་བར་འགྱུར་རོ། །རུས་པའི་རྣག་གི་རིགས་ཀྱི་སྲིན་འདི་ནི་ཤིང་པ་ལ་ཀྵོ་དང་དུབ་པ་རའི་འབྲས་བུ་དང་འདྲ་བའི་ཐིག་ལེ་དྲི་མི་ཞིམ་པ་སྐྱེད་པར་བྱེད་དོ། །དེ་ཡང་གཡན་པ་མང་བར་འགྱུར་ཞིང་མང་དུ་འཛག་པ་རྣམས་ཀྱང་
སྐྱེ་བར་འགྱུར་རོ། །སྨིན་མ་འདྲ་བ་ཡང་སྐྱེ་བར་འགྱུར་ཞིང་ཚད་སྦྲང་དང་ཤ་སྦྲང་རྣམས་ཀྱང་འབབས་པར་འགྱུར་རོ། །དེས་རུས་པའི་རྣག་གི་རིགས་ཀྱི་སྲིན་ལ་སོ་སོར་བརྟགས་པར་གྱུར་པས་ཀྱང་ལུས་ཡང་དག་པ་ཇི་
ལྟ་བ་བཞིན་དུ་ལུས་རབ་ཏུ་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེ་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་
གྱུར་པ། ཁ་དམར་བ་ཞེས་བྱ་བའི་སྲིན་རུས་པ་ལ་གནས་པ་ཡིན་ཏེ། དེས་བདག་ལ་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་བྱེད་པ་ཡིན་ན། དེ་ཐོས་པ་ལས་བྱུང་བའི་ཤེས་རབ་དག་གིས་སམ་ལྷའི་མིག་གིས་མཐོང་བ་ནི། བདག་
གི་ཁ་དམར་བ་ཞེས་བྱ་བའི་སྲིན་གང་གི་ཚེ་ཟས་དག་གི་སྐྱོན་གྱིས་ལྟོགས་པར་གྱུར་པ་ན། དེས་བདག་ལ་མེ་སྦལ་འདྲ་བའི་ནད་ཆེན་པོ་མེ་དང་མཉམ་པར་འགྱུར་བ་ཁྲག་གི་མཐར་ཐུག་པར་འབྱུང་བ་ཆུ་སེར་དང་རྣག་མང་པོར་གྱུར་

66-1-143a

ནས་ཉིན་མོ་དང་མཚན་མོ་མེད་པར་ཡང་རབ་ཏུ་ཉེ་བར་མི་འགྱུར་རོ། །ཁོང་རྨ་ཞེས་བྱ་བའི་ནད་རབ་ཏུ་བྱེད་པར་འགྱུར་རོ། །ཁ་དམར་བའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་
དུ་ལུས་ལ་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་ན། དེས་ཐོས་པ་ལས་བྱུང་བའི་ཤེས་རབ་དག་གིས་སམ་ལྷའི་མིག་གིས་མཐོང་བར་གྱུར་
པ། མྱང་བར་བྱེད་པ་ཞེས་བྱ་བའི་སྲིན་བདག་གི་རུས་པ་ལ་སྤྱོད་པ་ཡིན་ཏེ། དེས་ང་ལ་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་
མཐོང་བ་ནི། མྱང་བར་བྱེད་པ་ཞེས་བྱ་བའི་སྲིན་ཟས་དག་གི་སྐྱོན་གྱིས་གལ་ཏེ་ལྟོགས་པར་གྱུར་ན། དེས་ང་ལ་འབྲུམ་བུ་རྣམས་སུ་བྱེད་དོ། །ལུས་ཐམས་ཅད་ཀྱི་ཡན་ལག་དང་ཉིང་ལག་རྣམས་ལ་ཀུན་དུ་རྒྱུ་བར་བྱེད་པ་ཡིན་
ཏེ། དེ་ལུས་གང་དག་ཉིད་ཁོ་ན་ལ་ཀུན་ཏུ་རྒྱུ་བར་བྱེད་པ་དེ་དག་ཉིད་ཁོ་ནར་བདག་རེངས་པར་འགྱུར་རོ། །སྙིང་སྟོབ་པ་དང་ལུས་ལ་ཚོར་བ་མེད་པར་ཡང་འགྱུར་རོ། །སྡང་བ་དང་བཤང་བ་འགག་པར་ཡང་འགྱུར་རོ། །གཉིད་མེད་
པར་ཡང་འགྱུར་རོ། །གྲོག་མ་དང་འདྲ་བར་ཡན་ལག་དང་ཉིང་ལག་རྣམས་ལ་རྒྱུག་པར་ཡང་བྱེད་དོ། །བདག་ཤིན་དུ་སྐོམ་པར་ཡང་འགྱུར་རོ། །བདག་ལ་མུན་པ་ཀུན་དུ་འབྱུང་བར་འགྱུར་བ་དང་གྲངས་བའི་ཚད་པ་དང་སྐྲང་
བར་ཡང་འགྱུར་རོ། །གལ་ཏེ་ཡང་མྱང་བར་བྱེད་པའི་སྲིན་ལྟོགས་པར་མ་གྱུར་ན་ནི། ཇི་སྐད་དུ་བཤད་པའི་ནད་དེ་དག་རྣམས་རབ་ཏུ་ཞི་བར་འགྱུར་རོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་
རྗེས་སུ་ལྟ་ཞིང་གནས་པར་བྱེད་པ་ན། དེས་ཐོས་པ་ལས་བྱུང་བའི་ཤེས་རབ་དག་གིས་སམ་ལྷའི་མིག་གིས་མཐོང་བར་གྱུར་པ། ལྤགས་པ་ཟ་བ་ཞེས་བྱ་བའི་སྲིན་ལུས་ལ་གནས་པ་ཡིན་ཏེ། དེས་རང་བཞིན་

66-1-143b

དུ་གནས་པ་འམ་རང་བཞིན་དུ་མི་གནས་པ་ཅི་ཞིག་བྱེད་པ་ཡིན་པ་ཡང་དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བ་ནི་ལྤགས་པ་ཟ་བ་ཞེས་བྱ་བ་རུས་པ་ལ་གནས་པ་ཡིན་ཏེ། དེ་གལ་ཏེ་ལྟོགས་པར་གྱུར་
ན་ནི་དེས་ངའི་མཆུ་སྐྲང་བར་བྱེད་པ་འམ་ཁ་སྐྲང་བར་བྱེད་པ་འམ་མིག་སྐྲང་བར་བྱེད་པ་འམ་རྣག་གི་ཐོར་པ་འམ་རྒྱུས་པ་འཁུམ་པར་གྱུར་པའི་ཚོར་བ་དང་སྐོམ་དད་ཆེ་བ་དང་མགྲིན་པ་སྐམས་པ་དང་རྣ་བ་སྐྲང་བ་དང་། འཇིང་པ་
རེངས་པ་འམ་ཐོད་པ་རྐོ་རློག་ཏུ་གྱུར་པ་འམ་དུས་མ་ཡིན་པར་སྐྲ་དཀར་པོ་རྣམས་འབྱུང་བར་འགྱུར་བ་འམ་གྲེ་བ་འཇོམས་པ་འམ་དུས་མ་ཡིན་པར་གཉིད་དང་མི་མཐུན་པའི་ཟས་རྣམས་ལ་དགའ་བ་འམ་གནས་གཅིག་ལ་མི་དགའ་
བར་འགྱུར་བ་དང་། གནས་དང་ཀུན་དགའ་ར་བ་སྟོང་པ་རྣམས་ལ་དགའ་བ་འམ་སེམས་རྣམ་པར་གཡེངས་པར་གྱུར་པ་འམ། གང་ཅུང་ཟད་ཀྱིས་མང་དུ་སྨྲ་བར་བྱེད་པ་འམ་རྟག་པར་རྒྱུན་དུ་ཡན་ལག་དང་ཉིང་ལག་རྣམས་
ལ་སེན་མོས་འཕྲུག་པས་ཀྱང་བདག་གི་ལུས་ཐལ་ཚུབ་དང་འདྲ་བར་འགྱུར་ཏེ། ལྤགས་པ་ཟ་བར་བྱེད་པའི་སྲིན་རྣམས་ཀྱི་སྐྱོན་གྱིས་ཡིན་ནོ། །དེ་གལ་ཏེ་ལྟོགས་པར་མ་གྱུར་ན་ནི་དེའི་ཚེ་ཇི་སྐད་དུ་བཤད་པའི་ནད་རྣམས་
འཁྲུག་པར་མི་འགྱུར་རོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན་དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ་ནི། 
གྲོག་མ་པ་ཞེས་བྱ་བའི་སྲིན་བདག་གི་རུས་པའི་གསེབ་ན་རྒྱུ་བ་ཡིན་ཏེ། ཡང་གལ་ཏེ་བདག་ཉིད་ལྟོགས་པར་གྱུར་ན་ཡང་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་ཞིག་བྱེད་པ་ཡིན་ན། དེས་ཐོས་པ་ལས་
བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི། གྲོག་མ་པ་ཞེས་བྱ་བའི་བདག་གི་སྲིན་ཡང་གལ་ཏེ་ཟས་ཀྱི་སྐྱོན་གྱིས་ཁྲོས་པར་གྱུར་ན། དེའི་ངའི་གནད་རྣམས་ལ་སྦྲུལ་བཞིན་དུ་ཀུན་དུ་སྐྲག་

66-1-144a

པར་བྱེད་པའི་ཡིད་ཀྱིས་ཚོར་བ་འབྱུང་བར་བྱེད་དོ། །འདི་ལྟ་སྟེ་སྤྱི་བོ་དང་འགྲམ་པ་དག་དང་སྙིང་དང་རྒྱུ་ཞབས་དང་གཞང་དང་ལག་པ་དང་རྐང་པའི་མཐིལ་དང་སེན་མོའི་གསེབ་རྣམས་སུ་སོང་ནས་ཁབ་བཞིན་དུ་
གཏུར་བར་བྱེད་དོ། །རྒྱུན་རྣམས་ཀྱང་སྒུལ་བར་བྱེད་དོ། །སྣ་ལ་སྣབས་རྣམས་ཆུད་ཟ་བར་བྱེད་དོ། །མིག་དང་ཁ་དང་ལུས་རྣམས་ཀྱང་སྒུལ་བར་ཡང་བྱེད་དོ། །བདག་ཟས་རྣམས་ལ་ཞེ་སྡང་བར་གནས་པར་འགྱུར་རོ། །
དེ་ཡང་ལྟོགས་པར་གྱུར་ན་སྲིན་དུ་གྱུར་པའི་སྲིན་གཞན་གསེབ་ན་རྒྱུ་བ་རྣམས་ལ་རྩིས་མེད་པར་ལུས་ལ་མཐོ་འཚམ་པར་བྱེད་པས་ཉིན་མཚན་ཀུན་དུ་གནས་སོ། །དེའི་ཚོར་བས་བདག་ཟིལ་གྱིས་མནན་པས་གཉིད་འབྱུང་
བར་མི་འགྱུར་རོ། །གལ་ཏེ་དེ་ལྟོགས་པར་མ་གྱུར་ན་ནི། ཇི་སྐད་དུ་བཤད་པའི་ནད་དེ་དག་རྣམས་འབྱུང་བར་མི་འགྱུར་རོ། །གྲོག་མ་པའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་
དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་
གྱུར་པ། སྤུ་གྲིའི་ཁ་ཞེས་བྱ་བའི་སྲིན་ལུས་ལ་རབ་ཏུ་གནས་པ་ཡིན་ཏེ། དེས་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་
མཐོང་བ་ནི། ངའི་སྲིན་སྤུ་གྲིའི་ཁ་ན་སྐྱེ་གནས་ཀྱི་སྒོ་ནས་འབྱུང་བར་འགྱུར་བའི་དང་པོ་ཉིད་དུ་འབྱུང་བར་འགྱུར་ཏེ། ཆོས་ཉིད་ཀྱི་ཁྱད་པར་གྱིས་དེ་དང་ལྷན་ཅིག་ཏུ་སྐྱེ་བས་སྐྱེས་པ་ཡིན་ནོ། །མངལ་གྱི་ནང་དུ་འབྱུང་བར་འགྱུར་
བའི་སྲིན་རྣམས་ནི་ཐམས་ཅད་ཉིད་ཚེའི་འདུ་བྱེད་འགོག་པ་ཡིན་ལ་མའི་ནུ་མ་དང་ཟས་ཀྱི་ཁྱད་པར་ལས་བདག་སྐྱེས་པར་གྱུར་ནས་ཇི་སྐད་དུ་བཤད་པའི་སྲིན་རྣམས་འབྱུང་ངོ་། །དེས་སྤུ་གྲིའི་ཁའི་སྲིན་སོ་སོར་བརྟགས་

66-1-144b

པར་གྱུར་པས་ཀྱང་ལུས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །རུས་པའི་གསེབ་ན་རྒྱུ་བའི་སྲིན་གྱི་རིགས་རྣམས་ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་ནས་དེས་རུས་པར་གྱུར་པའི་ལུས་ལ་དྲན་པས་ཡང་དག་
པ་ཇི་ལྟ་བ་བཞིན་དུ་ལུས་མཐོང་སྟེ། རབ་རིབ་མེད་པའི་མིག་སོ་སོ་སྐྱེ་བོ་ལས་ཤིན་དུ་འདས་པར་གྱུར་པ་ཉོན་མོངས་པ་མེད་པ་ངའི་བ་མེད་པ་སོམ་ཉི་མེད་པ་མྱ་ངན་མེད་པ་རྣམ་པར་དག་པར་གྱུར་པ། གཞན་མུ་སྟེགས་
ཅན་རྣམས་ཀྱི་ལྟ་བའི་ལམ་ནས་མ་ཡིན་པས་ལུས་ཡང་དག་པ་ཇི་ལྟ་བ་བཞིན་དུ་ཁྱད་པར་དུ་ཤེས་པར་གྱུར་པ་རྣམས་ནི་མྱ་ངན་ལས་འདས་པའི་མཐར་འགྱུར་རོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་
ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་སྲིན་གྱི་རིགས་བཅུ་བདག་གི་རྟུག་པ་ལ་རྒྱུ་བར་བྱེད་པ་རྣམས་ནི་འདི་
ལྟ་སྟེ། བེ་འུ་སྣབས་པ་དང་ཁབ་ཀྱི་ཁ་དང་ཝི་སྤི་སྐྱེས་པ་དང་རྐང་པ་མེད་པ་དང་བཤང་བ་རྣམ་པར་འཐོར་བྱེད་དང་སྐོམ་པས་གདུང་བ་དང་རྒྱུ་མ་འབྱེད་བྱེད་དང་རྣམ་པར་རིངས་བྱེད་དང་མདོག་བཟངས་དང་གཞང་སྨིན་བྱེད་དང་། 
སྲིན་གྱི་རིགས་བཅུ་བདག་གི་རྟུག་པ་ལ་རྒྱུ་བ་རྣམས་ལ་སོ་སོར་རྟོག་པར་བྱེད་དེ། བདག་གི་སྲིན་གང་དག་གིས་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་
ཤེས་རབ་བམ་ལྷའི་མིག་གིས་མཐོང་བར་གྱུར་པ་ནི། བེའུ་སྣབས་པ་ཞེས་བྱ་བའི་སྲིན་བཤང་བ་ལ་རྒྱུ་བར་བྱེད་པ་ཡིན་ཏེ། གལ་ཏེ་ལུས་འདིའི་མེ་དྲོད་ཉམས་པར་གྱུར་ན་ནི་དེས་བདག་གི་ལུས་ཀྱི་མེ་དྲོད་ཤིན་དུ་ཡང་ཉམས་
པར་བྱེད་དོ། །དེས་ཤ་སྐྱེས་པར་བྱེད་དེ་བཤང་བ་རྣམས་འཇིག་པས་མདོག་སྐྱ་བོར་འགྱུར་རོ། །བདག་འདིར་འཕེལ་བར་འགྱུར་བ་ཡང་མ་ཡིན་ནོ། །ངའི་ཁ་གདོང་སྐྱ་བོར་ཡང་འགྱུར་རོ། །དེས་བེའུ་སྣབས་པའི་སྲིན་ལ་

66-1-145a

སོ་སོར་བརྟགས་པར་གྱུར་པས་ཀྱང་ལུས་ཡང་དག་པ་ཇི་ལྟ་བ་བཞིན་དུ་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན་
དེས་ཐོས་པ་ལས་བྱུང་བའི་ཤེས་རབ་དག་གིས་སམ་ལྷའི་མིག་གིས་མཐོང་བར་གྱུར་པ། ཁབ་ཀྱི་ཁ་ཞེས་བྱ་བའི་བདག་གི་སྲིན་ཡིན་ཏེ། དེ་ནི་ངའི་བཤང་བའི་ནང་ན་སྤྱོད་པ་དང་སྦོམ་པ་དང་རིང་བ་དང་ཕོ་བ་དང་ལོང་ཀ་དག་
ན་རྒྱུ་བ་ཡིན་ཏེ། སྲིན་རྣམས་ཐམས་ཅད་ཀྱིས་གཟུང་བར་མི་ནུས་པ་ཡིན་ནོ། །དེའི་ངའི་ཕོ་བ་དང་ལོང་ཀ་དག་ཀྱང་གྱེན་ལ་བཟློག་ནས་བད་ཀན་དང་ལྷན་ཅིག་ཏུ་ཁར་འབྱིན་པར་བྱེད་དོ། །བདག་གི་སྙིང་ལ་ཡང་ལྡག་པར་
བྱེད་དོ། །ལྐུགས་པ་འམ་མེ་དྲོད་ཉམས་པར་ཡང་བྱེད་དོ། །ཡང་གང་དག་ལུས་ཀྱི་ཕྱི་རོལ་དུ་འགྲོ་བར་འགྱུར་བ་རྣམས་ནི་མེ་ཏོག་དང་ལྷན་ཅིག་ཏུ་ཡུད་ཙམ་ཅིག་འཚོ་བར་འགྱུར་རོ། །དེས་ཁབ་ཀྱི་ཁའི་སྲིན་ལ་སོ་སོར་བརྟགས་
པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་ལ་སོ་སོར་རྟོག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན། དས་ཐོས་པ་ལས་བྱུང་
བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཕི་སྤི་སྐྱེས་ཞེས་བྱ་བའི་སྲིན་ཡིན་ཏེ། བཤང་བའི་ནང་ན་རྒྱུ་བར་བྱེད་པ་དང་སྐྱ་བོ་དང་ལུས་ཐུང་བ་དང་འཁོར་མང་བར་གྱུར་པ་དང་རྟག་པར་ཡང་ལྗན་ལྗིན་གྱི་ཁུ་
བ་ལ་རྒྱུ་བ་དང་དྲི་ངན་པ་དང་རྟག་ཏུ་ཡང་བྲོ་བར་གྱུར་པས་བཤང་བ་དང་ལྷན་ཅིག་ཏུ་འབྱུང་བར་འགྱུར་རོ། །བདག་གི་ལུས་ལས་སྦྲང་བུ་དགའ་བའི་བཤང་བ་དང་མཉམ་དུ་འབྱུང་བར་འགྱུར་རོ། །བདག་གི་བཤང་བ་ཤིན་དུ་མང་
བ་རྣམས་འབྱིན་པར་བྱེད་དོ། །བདག་ཟས་ཡིད་དུ་མི་འོང་བར་འགྱུར་རོ། །དེས་ཕི་སྤི་སྐྱེས་ཀྱི་སྲིན་ལ་སོ་སོར་བརྟགས་པར་གྱུར་ནས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་

66-1-145b

འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྐང་པ་མེད་པ་ཞེས་བྱ་བའི་སྲིན་ངའི་ལུས་
ལ་གནས་པ་ཡིན་ཏེ། དེ་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་དག་གིས་སམ་ལྷའི་མིག་གིས་མཐོང་བ་ནི་རྐང་པ་མེད་ཅེས་བྱ་བའི་ངའི་སྲིན་དེ་
དག་གལ་ཏེ་ཟས་ཀྱི་སྐྱོན་གྱིས་ལྟོགས་པར་གྱུར་ན། དེ་རླུང་གིས་བཏབ་པར་གྱུར་པས་ངའི་རྒྱུན་རླུག་པར་བྱེད་དོ། །འདི་ལྟ་སྟེ་གཅིན་གྱི་རྒྱུན་རླུག་པ་འམ་བཤང་བའི་རྒྱུན་རླུག་པ་འམ། གང་གི་ཚེ་ཡང་ལོང་ཀར་སོང་བར་
གྱུར་ན་དེས་སྒྲའི་རྒྱུན་རླུག་པར་བྱེད་དོ། །གློ་ལུ་བའི་རྒྱུན་རླུག་པ་དང་ལྟོགས་པའི་རྒྱུན་འབྱུང་བར་བྱེད་པ་དང་ངལ་བའི་དབུགས་ཀྱི་རླུང་གི་རྒྱུན་འབྱུང་བ་དང་སྐོམ་པའི་རྒྱུན་འབྱུང་བར་ཡང་བྱེད་པ་སྟེ། རྒྱུན་འབྱུང་བ་དེ་དག་
རྣམས་ཀྱིས་བདག་ལ་རྣམ་པ་སྣ་ཚོགས་པར་གྱུར་པའི་ནད་རྣམས་འཁྲུག་པར་བྱེད་པ་རབ་ཏུ་སྐྱེད་དོ། །དེས་རྐང་མེད་ཀྱི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་
འགྱུར་རོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱིས་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བཤང་བ་རྣམ་པར་
འཐོར་བྱེད་ཅེས་བྱ་བའི་སྲིན་ལུས་ལ་གནས་པ་ཡིན་ཏེ། དེ་དག་གི་ཟས་རྣམས་ལས་གང་དག་ཉིད་ཁོ་ན་ཞུ་བར་གྱུར་པའི་བཤང་བ་རྒྱུ་བའི་སྦུབས་རྣམས་ཐམས་ཅད་དུ་དེས་ཡན་ལག་དང་ཉིང་ལག་རྣམས་བཅུག་པར་
གྱུར་ནས་བཤང་བ་དང་ལྷན་ཅིག་ཏུ་བདག་གི་ལུས་ཐམས་ཅད་ལ་ཡང་རྒྱུ་བར་བྱེད་པ་ཡིན་ནོ། །ཇི་སྲིད་དུ་རྐང་པ་ལ་སོགས་པའི་ལུས་ཀྱི་ཡུལ་ཐམས་ཅད་ལ་ཡང་ཡིན་ཏེ། གང་དག་དེ་དག་རྣམས་ཀྱིས་ནི་བདག་གི་

66-1-146a

ལུས་གསེར་གྱི་མདོག་ཏུ་མཚོན་པར་བྱེད་དོ། །དེ་དག་རྣམས་ནི་བཤང་བས་བྱས་པ་ཡིན་ནོ། །དེས་བཤང་བ་བྱེད་པ་པོའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་
པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སྐོམ་པས་
གདུངས་པ་ཞེས་བྱ་བའི་སྲིན་བདག་གི་ལུས་ལ་གནས་པ་ཡིན་ཏེ། དེ་གང་གིས་ཚེ་བདག་ཚ་བ་སྐྱེས་པར་གྱུར་པ་དེས་དྲི་མ་སུན་འབྱིན་ནོ། །བདག་གི་ཕོ་བ་ཡང་སུན་འདོན་པར་བྱེད་དོ། །མེ་ཤིན་དུ་མྱུར་བར་སུན་འདོན་ནོ། 
དྲི་རྣམས་ཀྱང་ཀུན་དུ་སུན་འདོན་ནོ། །ཚད་པ་དང་ཀུན་དུ་ཚ་བར་གྱུར་པ་དེས་བདག་གི་ལུས་དང་ཡན་ལག་རྣམས་ལ་སྲིན་རྣམས་ཀུན་དུ་རྒྱུག་པར་བྱེད་དོ། །རྔུལ་ཚད་དང་ཚན་མོ་དེ་ཡིས་ཀུན་དུ་གདུངས་པར་གྱུར་པས་ཁུ་བ་
རྣམས་རྒྱུ་བའི་སྦུབས་སྐམ་པར་འགྱུར་རོ། །དེ་བདག་ལ་ཁྲོས་པར་གྱུར་པས་ཀྱང་སྐོམ་པ་དང་མགོ་བོའི་ནད་ཀྱང་བྱེད་དོ། །དེས་སྐོམ་པས་གདུངས་པའི་སྲིན་ལ་སོ་སོར་བརྟགས་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་
རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྒྱུ་མ་འབྱེད་
པར་བྱེད་པ་ཞེས་བྱ་བའི་སྲིན་ལུས་ལ་གནས་པ་ཡིན་ཏེ། དེས་རང་བཞིན་དུ་གནས་པ་འམ་རང་བཞིན་དུ་མི་གནས་པ་ཅི་ཞིག་བདག་ལ་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་
མཐོང་བར་གྱུར་པ་གང་དང་གང་དག་ངས་བཟའ་བར་བྱ་བ་དང་བཏུང་བར་བྱ་བ་དང་བཅའ་བ་དང་མྱང་བ་རྣམས་མིད་པར་གྱུར་པ་ན་དེ་ནང་གི་གསེབ་དུ་སོང་བར་གྱུར་ནས་ཀུན་དུ་མནེར་བར་བྱེད་དོ། ། དེ་ཡིས་རྒྱུ་མ་རྣམས་འབྱེད་

66-1-146b

པར་བྱེད་དོ། །བདག་གི་གསུས་པ་འཆང་བར་བྱེད་པ་འམ་རླུང་གི་གསུས་པར་འགྱུར་བ་འམ་མཁྲིས་པའི་གསུས་པར་འགྱུར་བ་འམ་བད་ཀན་གྱི་གསུས་པར་འགྱུར་བར་སྐྱེད་པར་བྱེད་དོ། །གཞི་དེ་ལས་དེ་རང་ངམ་གཟེར་
ཟུག་གཞན་རྣམས་ཀྱང་བདག་ལ་འབྱུང་ངོ་། །རྒྱུ་མ་འབྱུང་བར་བྱེད་པའི་སྲིན་དེས་ནི་བཤང་བ་རྣམས་སུན་འདོན་པར་བྱེད་དོ། །དེས་རྒྱུ་མ་འབྱེད་པར་བྱེད་པའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་
བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་
གྱུར་པ། ངའི་སྲིན་རྣམ་པར་རེངས་བྱེད་ཞེས་བྱ་བ་ལུས་ལ་རབ་ཏུ་གནས་པ་ཡིན་ཏེ། དེས་རང་བཞིན་དུ་གནས་པ་འམ་རང་བཞིན་དུ་མི་གནས་པ་བདག་ལ་ཅི་ཞིག་བྱེད་པ་ཡིན་པ་ཡང་། དེས་ཐོས་པ་ལས་བྱུང་བའི་
ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི། བདག་གི་རྣམ་པར་རེངས་བྱེད་ཅེས་བྱ་བའི་སྲིན་བཤང་བའི་ནང་ན་རྒྱུ་བར་བྱེད་པ་ཡིན་ཏེ། གང་དག་བདག་མིད་པར་བྱེད་པའི་རོ་དེ་དང་དེ་དག་རྣམས་མཉམ་
དུ་མིད་པར་གྱུར་ནས་རྣམ་པར་རེངས་པར་བྱེད་དེ་ཆོས་ཉིད་ཀྱི་ཁྱད་པར་གྱིས་ཡིན་ནོ། །དེས་ངའི་སྲོག་རྒྱུ་བའི་སྦུབས་འབྱིན་པར་ཡང་བྱེད་དོ། །ཟས་དང་ལྷན་ཅིག་པའི་མེ་དེའི་སྐྱོན་གྱིས་བདག་རྣམ་པར་རེངས་པ་ཀུན་
དུ་སྐྱེད་པ་དང་། རྒྱུ་མ་རྣམས་ཀུན་དུ་འཁུམ་པ་འམ་ན་ཚ་བར་འགྱུར་བ་འམ་སྙིང་གི་གཟེར་ཟུག་གམ་ཕོ་ཚེའི་གཟེར་ཟུག་ཡང་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་
གནས་པར་བྱེད་པ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། མདོག་བཟངས་ཞེས་བྱ་བའི་སྲིན་བདག་གི་ལུས་ལ་གནས་པ་ཡིན་ཏེ། དེས་རང་བཞིན་དུ་གནས་པར་གྱུར་པ་

66-1-147a

འམ་རང་བཞིན་དུ་མི་གནས་པར་བདག་ལ་ཅི་ཞིག་བྱེད་པ་ཡིན་ན་དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ་ལ། མདོག་བཟངས་ཀྱི་སྲིན་ནི་ནས་ཐུག་གམ་མི་བསོད་པ་
རྣམས་སམ་ལྕི་བའི་ཟས་བདག་ལ་ཕན་པ་མ་ཡིན་པ་རྣམས་ཀྱང་རུང་སྟེ་གང་དག་བདག་གིས་ཟ་བར་བྱེད་པ་དེ་དག་རྣམས་བདག་གི་སྲིན་མདོག་བཟངས་ཀྱིས་ཡན་ལག་དང་ཉིང་ལག་རྣམས་ཀྱི་ཁམས་ལ་ཡང་ཕན་པའི་
ཟས་སུ་བྱས་ནས་ཁྱབ་པར་བྱེད་ཅིང་བདེ་བར་བྱས་ནས་ཀྱང་འཕེན་པར་བྱེད་དོ། །ནད་རབ་ཏུ་ཞི་བར་གྱུར་པ་ཡང་འཕེན་པར་བྱེད་དོ། །སྟོབས་རྣམས་ཀྱང་འབྱུང་བར་བྱེད་དོ། །སྐྱོན་རྣམས་དང་ཡང་འབྲལ་བར་བྱེད་དོ། །
སྲིན་འདི་ནི་ལུས་ཀྱི་ནང་ན་རབ་ཏུ་གནས་པ་ཡིན་ནོ། །དེ་གལ་ཏེ་རབ་ཏུ་སྟོབས་ཆེ་བར་གྱུར་ན་ཆོས་ཉིད་ཀྱི་ཁྱད་པར་གྱིས་དེས་བདག་མདོག་བཟང་བ་དང་སྟོབས་དང་ལྡན་པར་འགྱུར་རོ། །གལ་ཏེ་སྟོབས་རབ་ཏུ་ཆེ་བར་མ་གྱུར་
ན་ནི། དེས་བདག་གི་ལུས་རིད་པ་ཉིད་དུ་འགྱུར་རོ། །དེས་མདོག་བཟངས་ཀྱི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་
ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གཞང་སྨིན་པར་བྱེད་པའི་སྲིན་ངའི་ལུས་ལ་རབ་ཏུ་གནས་པ་
ཡིན་ཏོ། དེས་རང་བཞིན་དུ་གནས་པར་གྱུར་པ་འམ་རང་བཞིན་དུ་མི་གནས་པ་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བ་ན། གཞང་སྨིན་པར་བྱེད་པ་ཞེས་
བྱ་བའི་སྲིན་དེ་གལ་ཏེ་ལྟོགས་པར་གྱུར་ན། དེས་བདག་ལ་རྣམ་པ་སྣ་ཚོགས་པར་གཞང་སྨིན་པར་བྱེད་པའི་ནད་རྣམས་སྐྱེད་པར་བྱེད་དོ། །འདི་ལྟ་སྟེ་རློན་པ་དང་སྐམ་པ་དང་ལྷན་ཅིག་སྐྱེས་པ་དང་སྔོན་གྱི་དུས་ན་སྐྱེས་པ་

66-1-147b

དང་རླུང་ལས་གྱུར་པ་དང་མཁྲིས་པ་ལས་གྱུར་པ་དང་བད་ཀན་ལས་གྱུར་པ་དང་གསུམ་གྱི་སྐྱོན་ལས་སྐྱེས་པའི་འདུས་པ་ལས་གྱུར་པའོ། །དེ་གལ་ཏེ་ལྟོགས་པར་གྱུར་ན་ངའི་བཤང་བ་རྒྱུ་བར་གྱུར་པའི་སྦུབས་སུན་འདོན་པར་བྱེད་དོ། །
ཁྲག་རྒྱུ་བར་གྱུར་པ་འམ་ཁུ་བ་རྒྱུ་བར་གྱུར་པ་ཡང་རུང་སྟེ། བདག་གི་མེ་དྲོད་ཀྱང་ཉམས་པར་བྱེད་དོ། །བདག་གི་མེ་དྲོད་ཉམས་པ་དེས་གཞང་སྨིན་པར་བྱེད་པའི་སྲིན་ཁྲོ་བ་རབ་ཏུ་སྐྱེ་བར་འགྱུར་ཏེ། དེས་ངའི་གཞང་རྣམ་པ་སྣ་
ཚོགས་པ་རྣམས་སུ་སྨིན་པར་བྱེད་དོ། །དེས་གཞང་སྨིན་པར་བྱེད་པའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་ལ་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་
ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སྲིན་གྱི་རིགས་བཅུ་ལྷ་བ་ལ་རྒྱུ་བ་རྣམས་འདི་ལྟ་སྟེ། སྤུ་ལ་ཡོད་པ་དང་ཁ་
ནག་པ་དང་སྤྲོ་བ་མེད་པ་དང་ལུ་བའི་གཟེར་ཟུག་ཆེན་པོ་དང་རྨོངས་པར་བྱེད་པ་དང་མེ་མདོག་ཅན་དང་འོག་དུ་འགྲོ་བ་དང་ཨོོཊྚིང་གཱཿ དང་ཀུན་དུ་རྟོག་པ་དང་དགའ་བ་པ་དང་རྣམས་སོ། །གཞན་ཡང་རྣལ་འབྱོར་སྤྱོད་པ་ནང་གི་
བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སྤུ་ལ་ཡོད་པ་ཞེས་བྱ་བའི་ལུས་ཐམས་ཅད་ཀྱི་སྤུ་ལ་གནས་
པ་ཡིན་ཏེ། དེ་གལ་ཏེ་ལྷ་བ་ངན་པར་གྱུར་ན་སྙོམས་པར་ལྷ་བ་རྣམས་སུན་འདོན་ནོ། །ལམ་དུ་འགྲོ་བར་ཡང་གྱུར་ནས་ཡན་ལག་དང་ཉིང་ལག་རྣམས་ཐམས་ཅད་ཀྱི་བདག་གི་ལྷ་བ་རྣམས་སུན་ཕྱུང་ནས་ཟ་བར་
བྱེད་དོ། །དེའི་སྐྱོན་གྱིས་བདག་མདོག་ངན་པ་དང་མཛེ་དང་རུས་པའི་གཟེར་བ་དང་སྟོབས་ཟད་པར་ཡང་འགྱུར་རོ། །དེས་སྤུ་ལ་ཡོད་པའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་

66-1-148a

སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེསུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། 
ཁ་ནག་པ་ཞེས་བྱ་བའི་སྲིན་བདག་གི་ལྷ་བའི་གསེབ་ན་རྒྱུ་བར་བྱེད་པ་དང་ཡན་ལག་དང་ཉིང་ལག་རྣམས་ཐམས་ཅད་ལ་ཡང་ཐོགས་པ་མེད་པར་འགྲོ་བ་ཡིན་ནོ། །དེ་གལ་ཏེ་ལྟོགས་པར་གྱུར་ན་དེས་ངའི་ལྷ་བ་བཞུ་བར་བྱེད་དོ། །དེས་
བདག་གི་རུས་པ་འབྱེད་པ་དང་མདོག་ངན་པ་དང་སྒལ་བ་འབྱུང་བ་དང་སྤུངས་ཆུང་བ་དང་ཉེ་སར་བགྲོད་པ་དང་སྒུར་ནས་འགྲོ་བ་དང་རྣམ་པར་ཉམས་པར་འགྱུར་རོ། །ཁ་ནག་གི་སྲིན་ལ་སོ་སོར་བརྟགས་པར་གྱུར་པས་ཀྱང་ལུས་སོ་སོར་
རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སྤྲོ་བ་མེད་པ་ཞེས་
བྱ་བའི་སྲིན་ངའི་ལུས་ལ་རབ་ཏུ་གནས་པ་ཡིན་ཏེ། དེས་ནི་ལྷ་བ་ཟ་བར་བྱེད་པ་ཡིན་པས་གལ་ཏེ་ལྷ་བས་ཚིམ་པར་གྱུར་ན། དེས་བདག་སྤྲོ་བ་མེད་པ་ཉིད་དུ་སྐྱེད་པར་བྱེད་པ་དང་རང་ཡང་རུང་སྟེ། དེ་གལ་ཏེ་ལྷ་བ་ལ་རྒྱུ་བར་གྱུར་
པའི་སྲིན་གཞན་རྣམས་ཀྱིས་མཐོ་བརྩམས་པར་གྱུར་ན་ནི། དེས་ང་ལ་མཆོག་ཏུ་མི་བཟད་པར་གྱུར་པའི་ལྷང་ཀྱོག་སྐྱེད་པར་བྱེད་དོ། །དེས་སྤྲོ་བ་མེད་པའི་སྲིན་ལ་རྣམ་པར་བལྟས་པར་གྱུར་པས་ཀྱང་ཡང་དག་པ་ཇི་ལྟ་བ་
བཞིན་དུ་ལུས་མཐོང་བར་གྱུར་ཏོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་དག་གིས་སམ་ལྷའི་མིག་གིས་མཐོང་བར་གྱུར་པ། 
ཟུག་ཟེར་ཆེན་པོ་བྱེད་པ་ཞེས་བྱ་བའི་སྲིན་ནི་ལྷ་བའི་ནང་ན་རྒྱུ་བར་གྱུར་པ་རྟག་ཏུ་ཡང་རྒྱུ་བར་གྱུར་པ། ཁམས་གསུམ་པོ་རྣམས་ཐམས་ཅད་ཟད་པར་བྱེད་པ་ནད་རྣམས་ཐམས་ཅད་ཀྱི་རྒྱུར་གྱུར་པ། མཐར་ཐུག་པར་གྱུར་ན་ཡང་

66-1-148b

ངའི་ཆུ་སེར་དང་གཉིད་ཡར་བར་ཡང་བྱེད་དོ། །དེས་ཟུག་ཟེར་ཆེན་པོའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་
ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྨོངས་པར་བྱེད་པ་ཞེས་བྱ་བའི་སྲིན་ངའི་ལུས་ལ་རབ་ཏུ་གནས་པ་ཡིན་ཏེ། དེ་ནི་བདག་གི་ཡིད་རྒྱུ་བར་གྱུར་པའི་
སྦུབས་ལ་རྣམ་པར་རྒྱུ་བར་བྱེད་པ་དང་ཤིན་དུ་ཕྲ་བར་ཡང་གྱུར་ནས་ངའི་ཡིད་རངས་པའི་རྒྱུན་གང་ཡིན་པ་དེ་ཡང་དཀྲུགས་པར་བྱེད་དོ། །དེ་དག་རྣམས་བསྐྱོད་པར་གྱུར་པས་ཀྱང་བདག་ལ་སྙིང་གི་ནད་ཀུན་དུ་སྐྱེད་པར་བྱེད་དོ། །དེས་ཀྱང་
བདག་བརྒྱལ་བར་འགྱུར་རོ། །མདོག་ངན་པ་དང་སྙིང་སྟོངས་པར་ཡང་འགྱུར་རོ། །དང་ཀ་མི་བདེ་བ་དང་ཚད་པ་སྐྱེ་བ་དང་སྙིང་གཟེར་བ་དང་འཆད་པར་འགྱུར་བ་དང་སྙིང་འཆིར་བ་དང་ཕྱི་རོལ་ཏུ་སྲིན་མཐོང་བར་གྱུར་ནས་ཀྱང་བདག་ཡིད་
འབྱུང་བར་འགྱུར་རོ། །དེས་རྨོངས་བྱེད་ཀྱི་སྲིན་མཐོང་བར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་རབ་ཏུ་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། 
དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འོག་ཏུ་འགྲོ་བ་ཞེས་བྱ་བའི་སྲིན་ཁུ་ཆུ་ལ་རྒྱུ་བའི་རྩ་རྣམས་ཀྱི་ནང་ན་རྒྱུ་བ་ཡིན་ཏེ། གལ་ཏེ་ཕན་པར་གྱུར་པའི་བཟའ་བ་དང་བཏུང་བ་དང་བཅའ་
བས་བདག་གི་ཁུ་ཆུ་ལྷག་པར་འགྱུར་རོ། །དེ་བདག་གི་གཅིན་གྱི་སྦུབས་སུ་ལྷུང་བར་གྱུར་ནས་གཅིན་དང་ལྷན་ཅིག་ཏུ་འབྱུང་བར་འགྱུར་རོ། །འོག་ཏུ་འགྲོ་བའི་སྲིན་དེ་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་
ཇི་ལྟ་བར་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་བ་ན་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། 

66-1-149a

ཨུ་ཊྚིང་གཱ་ཞེས་བྱ་བའི་སྲིན་ལྒང་པག་ལ་རབ་ཏུ་གནས་སོ། །གང་གི་ཚེ་གཅིན་གྱིས་བདག་གི་ལྒང་པག་གང་བར་གྱུར་ན་དེའི་ཚེ་དགའ་བར་འགྱུར་རོ། །དགའ་བར་གྱུར་པས་ཀྱང་གཅིན་གྱི་སྟོབས་ཀྱིས་ཁུ་ཆུ་རྒྱུ་
བའི་གནས་གཞིའི་སྐྱེ་མཆེད་རྣམས་རྩུབ་མོར་བྱེད་དེ། གང་ལ་བྱིས་པ་སོ་སོའི་སྐྱེ་བོ་རྣམས་ཚུལ་བཞིན་མ་ཡིན་པའི་ཡིད་ལ་བྱེད་པའི་སྒོ་ནས་སོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་
པ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ་ཀུན་དུ་རྟོག་པར་དགའ་བ་ཞེས་བྱ་བའི་སྲིན་བདག་གི་ལུས་ལ་གནས་པ་ཡིན་ཏེ་དེས་རང་བཞིན་དུ་གནས་པ་འམ་རང་བཞིན་དུ་མི་
གནས་པ་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བ་ནི། ཀུན་དུ་རྟོགས་པ་ལ་དགའ་བ་ཞེས་བྱ་བའི་བདག་གི་སྲིན་དེ་གལ་ཏེ་ལྟོགས་པར་གྱུར་ན། དེས་ང་ཉལ་བར་
གྱུར་པ་ན་དགེ་བ་འམ་མི་དགེ་བ་རབ་ཏུ་ཕལ་ཆེ་བ་རྣམས་བདག་གིས་མཐོང་བར་གྱུར་ཏེ། དེ་ནི་བདག་གི་སྲིན་གྱི་སྐྱོན་གྱིས་ཡིན་ཏེ་བདག་གི་ཡིད་རྒྱུ་བའི་སྦུབས་ནས་རྒྱུ་བར་གྱུར་པའི་སྲིན་གྱི་སྟོབས་ཀྱིས་བདག་ཉལ་བ་ན་ཡང་འགྱུར་
རོ། །དེ་ལྟར་ནཱ་ལ་ཏའི་གྲོང་གི་བྲམ་ཟེ་དང་ཁྱིམ་བདག་རྣམས་དང་རྣལ་འབྱོར་སྤྱོད་པའི་དགེ་སྦྱོང་རྣམས་ཀྱིས་ཀྱང་ལུས་ལས་གྱུར་པའི་དྲན་པ་ཉེ་བར་གཞག་པས། ལུས་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་
པར་བྱེད་དེ། ཅི་ལུས་འདི་ལ་རྟག་པ་འམ་ཐེར་ཟུག་གམ་ཡོངས་སུ་མི་འགྱུར་བའི་ཆོས་ཀྱི་བདེ་བ་འམ་གཙང་བ་འམ་བདག་དང་བཅས་པ་འམ་བྱེད་པ་པོས་བྱིན་གྱིས་བརླབས་པར་གྱུར་པ་ཡིན་ནམ། དེས་ཐོས་
པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ལུས་འདི་ལ་ཡང་ཕྲ་བ་དང་རགས་པར་གྱུར་པའི་ཡང་ལུས་ཀྱི་རིགས་སུ་གཏོགས་པ་དམིགས་པར་འགྱུར་བ་འམ་གང་ཡང་

66-1-149b

རྟག་པ་དང་བརྟན་པ་དང་ཐེར་ཟུག་དང་ཡོངས་སུ་མི་འགྱུར་བའི་ཆོས་ཀྱི་བདེ་བར་འགྱུར་བ་འམ་བདག་དང་བཅས་པར་སྐྱེ་བ་འམ་བྱེད་པ་པོ་རྣམས་ཀྱིས་བྱིན་གྱིས་རློབ་པར་བྱེད་པ་ནི་མེད་དོ། །དཔེར་ན་ཉི་མ་
མུན་པ་ལ་རག་ལས་པ་དམིགས་སོ། །ཕྲ་བ་ཡང་མ་དམིགས་སོ། །དེ་བཞིན་དུ་ལུས་ལ་ཡང་རྟག་པ་དང་བདེ་བ་དང་གཙང་བ་དང་བྱེད་པ་པོ་དང་ཤེས་པ་པོ་ཡང་མ་དམིགས་སོ། །དེ་ལྟར་རྣལ་འབྱོར་སྤྱོད་པ་དེས་ནང་གི་
བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ནི་བདུད་ཀྱི་དྲུང་ན་གནས་པར་མི་འགྱུར་རོ། །མྱ་ངན་ལས་འདས་པའི་མཐར་འགྱུར་རོ། །དགའ་བའི་འདོད་ཆགས་དང་ལྷན་ཅིག་ཏུ་གྱུར་པའི་སྲེད་པ་རྣམས་ཀྱིས་
ཀྱང་མི་འཆིང་ངོ་། །སྲིད་པ་ཡང་འབྱུང་བ་ཅན་གྱི་ཉོན་མོངས་པས་གནོད་པར་མི་འགྱུར་རོ། །དེས་དེ་ལྟར་ལུས་ལ་ལུས་ཀྱི་རྗེས་སུ་ལྟ་ཞིང་གནས་ནས། གཞན་ཡང་ནང་གི་བདག་ཉིད་ཀྱི་ལུས་དེ་ཉིད་ལ་རྣམ་པ་
གཞན་གྱིས་སོ་སོར་རྟོག་པར་བྱེད་དེ། ལུས་སུ་གཏོགས་པ་རྣམས་ཀྱི་རླུང་དུ་གྱུར་པ་རྣམས་ཀྱི་བྱ་བ་རྣམས་ལ་ཡང་སོ་སོར་རྟོག་པ་བྱེད་དེ། ཇི་ལྟར་བདག་གི་ལུས་རླུང་གིས་འཛིན་པར་བྱེད་པ་དང་བྱ་བ་བྱེད་པ་དང་འགྲོ་བར་བྱེད་
པ་དང་གནས་པར་བྱེད་པ་དང་བསྐུམ་པར་བྱེད་པ་དང་རྐྱོང་བར་བྱེད་པ་རྣམས་ཀྱི་བྱ་བ་ཐམས་ཅད་ནུས་པར་འགྱུར་བ་ཡིན་ཞིང་། བྲལ་བར་ཡང་རླུང་གི་དབང་གིས་འགྱུར་བ་ཡིན་ཞེ་ན། དེས་དེ་ལྟར་ལུས་ལ་ལུས་ཀྱི་རྗེས་སུ་ལྟ་ཞིང་
གནས་པར་བྱེད་པ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། བདག་གི་ཁ་ལ་རྟེན་པར་གྱུར་པའི་རླུང་ཡིན་ལ་དེས་བདག་ལ་ལས་ཅི་ཞིག་བྱེད་པར་གྱུར་པ་ཡིན་པ་ཡང་དེས་ཐོས་
པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བ་ནི་བདག་གི་ཁ་ལས་རྟེན་པའི་རླུང་གི་མཐུ་སྟོབས་ཀྱིས་ནི་རབ་ཏུ་འཕེལ་བར་བྱེད་དེ། ལག་པ་དང་རྐང་པ་དག་དང་སེན་མོ་རྣམས་ཀྱང་འཕེལ་བར་བྱེད་པར་

66-1-150a

འགྱུར་རོ། །རླུང་དེའི་མཐུ་སྟོབས་ཀྱིས་རྣལ་འབྱོར་སྤྱོད་པ་པ་རྣམས་ཀྱི་སེམས་དང་པོ་དམིགས་པ་ནི་སེན་མོའི་རྩེ་མོ་རྣམས་ལ་ཡིན་ནོ། །རླུང་འདིས་ནི་ལུས་ཀྱི་རྣམ་པར་ཐར་པའི་བསམ་གཏན་གྱིས་གནས་པ་
རྣམས་ཤིན་དུ་བདེ་བར་ཡང་བྱེད་པ་ཡིན་ནོ། །དེ་ལ་ལྷག་པར་གྱུར་པས་ཀྱང་ལྤགས་པ་དང་སེན་མོ་དང་ལག་པ་དང་རྐང་པ་དག་ལྷག་པར་འགྱུར་རོ། །ཤིན་དུ་མྱུར་བར་སྐྱེན་པར་ཡང་འགྱུར་རོ། །ཁ་ལ་རྟེན་པའི་རླུང་ཡང་དག་
པ་ཇི་ལྟ་བ་བཞིན་དུ་སོ་སོར་བརྟགས་པར་གྱུར་པས་ཀྱང་ལུས་ཡང་དག་པ་ཇི་ལྟ་བ་བཞིན་རབ་ཏུ་ཤེས་སོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་
ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་ལྟ་བར་བྱེད་དེ། བདག་གི་རྐང་པའི་ལོགས་ལ་རྟེན་ནས་གནས་པའི་རླུང་དེས་ལས་ཅི་ཞིག་བྱེད་པ་ཡིན་ཞིང་། བདག་གི་རྐང་པའི་ལོགས་ལ་ཡང་ཇི་ལྟར་གནས་པ་
ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བདག་གི་རྐང་པའི་ལོགས་ལ་རྟེན་པའི་རླུང་དེས་ཅི་བྱེད་ཅིང་ཇི་ལྟར་ཡང་བདག་གི་རྐང་པ་ལ་གནས་ན་གཡན་པ་སྐྱེད་པར་
བྱེད་དོ། །གཡན་པས་བྱས་པར་གྱུར་པའི་འབྲུམ་པ་ཅན་དུ་བདག་གི་རྐང་པ་གཉིས་འགྱུར་རོ། །བདག་ལམ་དུ་འགྲོ་བར་གྱུར་ན་ཡང་རླུང་རྡོལ་པའི་སྒྲ་འབྱུང་བར་འགྱུར་རོ། །བདག་གི་རྐང་པ་བརྟན་པར་གྱུར་པ་ཡང་
འགྲོ་བ་ན་རུས་པ་འཁྲོལ་བར་འགྱུར་རོ། །བདག་གི་རྐང་པའི་ལོགས་ལ་རྟེན་པའི་རླུང་གིས་མིག་ལ་མིག་གི་རྒྱུས་པས་ཀུན་ནས་སྦྲེལ་བའི་ལམ་ནས་གྲང་བ་དང་དྲོ་བ་རྣམས་དང་ལྷན་ཅིག་དུ་འགྱུར་གྱི། འདི་དག་བསྐུས་
པར་གྱུར་པས་ཀྱང་བདག་གི་མིག་དག་ཚིམ་པར་ཡང་བྱས་པར་ཡང་ནི་མི་འགྱུར་རོ། །དེས་རྐང་པའི་ལོགས་ལ་གནས་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་རབ་

66-1-150b

ཏུ་རིག་པར་བྱེད་དོ། ། གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སེམས་
མེད་པར་བྱེད་པ་ཞེས་བྱ་བའི་བདག་གི་རླུང་ངའི་པུས་མོར་གཏོགས་པའི་ལྤགས་པར་གྱུར་པ་ལ་རབ་རབ་བྱེད་པར་འགྱུར་རོ། །དེ་དང་འགལ་བར་གྱུར་པས་ནི་ངའི་པུས་མོ་གཉིས་ལ་གྲོག་མ་བཞིན་དུ་མཆེད་པར་བྱེད་དོ། །གང་གི་
ཚེ་ཟུག་གཟེར་དུ་མ་གྱུར་པ་དེའི་ཚེ་རྩའི་གསེབ་དུ་རྒྱུ་བར་བྱེད་པས་རང་བཞིན་དུ་གནས་པ་ཡིན་ནོ། །བདག་ལ་གྲོག་མ་དང་འདྲ་བར་འཕེལ་བར་བྱེད་དོ། །དེས་སེམས་མེད་པར་གྱུར་པའི་རླུང་ལ་སོ་སོར་བརྟགས་པར་གྱུར་
པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་ཡང་དག་པར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། བདག་གི་རླུང་གང་གིས་ལས་
ཅི་དག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རུས་པ་གཅོག་པར་བྱེད་པ་ཞེས་བྱ་བའི་རླུང་ཡིན་ཏེ། དེས་ལས་ཅི་ཞིག་བྱེད་པ་ཡིན་ན། དེས་ཐོས་པ་
ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བ་ནི། རུས་པ་གཅོག་པར་བྱེད་པ་ཞེས་བྱ་བའི་རླུང་དེས་བདག་ཉིན་མོ་སྤྱོད་པའི་སར་འགྲོ་བ་ན་འམ་ཀུན་དགའ་ར་བར་འགྲོ་བ་ན་འམ་ལམ་དུ་ཞུགས་པར་གྱུར་པ་
ན་འམ་ངལ་དུབ་དུ་གྱུར་པ་ན་འམ་གནས་པར་གྱུར་པ་ན་ཡང་རུས་པ་འབིགས་པར་བྱེད་དོ། །ལྷང་ཀྱོག་སྐྱེད་པར་བྱེད་དོ། །གཉིད་ཡར་བར་བྱེད་དོ། །བདག་གིས་བསྐུམ་པ་དང་བརྐྱང་བར་ཡང་བྱེད་མི་ནུས་པར་འགྱུར་རོ། 
ཇི་སྲིད་དུ་རང་བཞིན་དུ་གནས་པར་མ་གྱུར་པ་དེ་སྲིད་ཀྱི་བར་དུའོ། །དེས་རུས་པ་གཅོག་པ་ཞེས་བྱ་བའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་འགྱུར་རོ། །གཞན་

66-1-151a

ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་དེ། བདག་གི་རླུང་གང་དག་གིས་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་
ལྷའི་མིག་གིས་མཐོང་བར་གྱུར་པ། འགྲོ་བ་འཇོམས་པར་བྱེད་པ་ཞེས་བྱ་བའི་རླུང་ལས་ཅི་ཞིག་བྱེད་པ་ཡིན་ན། དེས་བདག་གི་ལུས་སུ་གཏོགས་པའི་ནད་དུ་གྱུར་པའི་ནད་པའི་ལུས་རྣམས་རྣམ་པར་དཀྲུག་པར་བྱེད་དོ། 
བདག་གིས་འགྲོ་བ་དང་འོང་བར་བྱེད་ནུས་པར་ཡང་མི་འགྱུར་རོ། །འོན་ཀྱང་བདག་གི་འགྲོ་བ་རྣམ་པར་འཇོམས་པར་ཡང་མི་འགྱུར་རོ། །དེས་འགྲོ་བ་འཇོམས་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་
ཡང་དག་པ་ཇི་ལྟ་བ་བཞིན་དུ་ལུས་རབ་ཏུ་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། བདག་གི་ལུས་ལ་རླུང་གཞན་གང་གིས་ལས་ཅི་ཞིག་
བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བདག་གི་ལོང་བུའི་ཚིགས་པ་འབྱེད་པ་ཞེས་བྱ་བའི་རླུང་ཡོད་དེ། དེས་བདག་ལ་ལས་ཅི་ཞིག་བྱེད་པ་ཡིན་པ་
ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་འགྱུར་ཏེ། ལོང་བུའི་ཚིགས་པ་འབྱེད་པ་ཞེས་བྱ་བའི་རླུང་གལ་ཏེ་བད་ཀན་དང་བཅས་པར་གྱུར་ན། དེས་བདག་གི་རྒྱུས་པ་དང་རུས་
པ་དང་ཤའི་གསེབ་ན་ཡང་སོང་ནས་རལ་གྲིའི་ལྷང་ཀྱོག་ཇི་ལྟ་བ་བཞིན་དུ་འབྱུང་ངོ་། །རང་གི་གནས་སུ་སོང་བར་གྱུར་ནས་བརླ་ཡང་ཡང་དུ་ན་བར་བྱེད་དོ། །བརླ་མ་གཏོགས་པ་ལུས་ཐམས་ཅད་ལས་ཀྱང་ནི་མ་ཡིན་
ནོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། བདག་གི་རླུང་གཞན་རྣམས་ཀྱིས་ལུས་གྱི་རྗེས་སུ་གསེབ་དུ་སོང་ནས་ལས་ཅི་ཞིག་བྱེད་པ་ཡིན་ན། 

66-1-151b

དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ལྗང་ངར་འབྱེད་པར་བྱེད་པ་ཞེས་པ་བའི་བདག་གི་རླུང་ཡོད་དེ། དེས་ལས་ཅི་ཞིག་བྱེད་པ་ཡིན་ན། དེ་བདག་གི་ལྗང་ངར་ལ་བརྟེན་པར་
གྱུར་ནས་བཤང་བ་རྒྱུ་བར་གྱུར་པའི་རྩ་དེ་དག་རྣམས་ཐམས་ཅད་སྦོམ་པོར་བྱེད་དོ། །འཁུམ་པར་བྱེད་དོ། །ཕན་ཚུན་རྣམས་འབྱར་བར་ཡང་བྱེད་དོ། །ལྕི་བར་ཡང་བྱེད་དོ། །ལྗང་ངར་ལ་རྟན་པར་གྱུར་པའི་ཤ་ལ་
ཡང་གཟེར་ཟུག་ཆེན་པོར་བྱེད་དོ། །ལྗང་ངར་གཉིས་པོ་དག་ཕན་ཚུན་དུ་མི་འདྲ་བར་བྱེད་དོ། །རྒྱུས་པའི་དྲ་བས་གཡོགས་པར་ཡང་ལྗང་ངར་གཅིག་གི་ཡུལ་ཕྱོགས་སུ་བྱེད་དོ། །དེས་ལྗང་ངར་འབྱེད་པར་
བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་ལ་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་
པ་ན། བདག་གི་རླུང་གཞན་དག་གིས་བདག་གི་ལུས་ལ་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཚིགས་པ་འབྱེད་པར་བྱེད་པའི་
རླུང་ཡིན་ཏེ། དེས་ངའི་ལུས་ལ་ལས་ཅི་དག་བྱེད་པ་ཡིན་ན་ཡང་དེས་མཐོང་བའི་སྲིན་རྣམས་ནི་ཚིག་པ་རྣམས་ཀྱི་གསེབ་དུ་སོང་བར་གྱུར་ནས་ཚིགས་པ་ལ་ཟུག་ཟེར་བྱེད་དོ། །འདི་ལྟ་སྟེ་མགོ་བོའི་བཞི་དང་འགྲམ་
པའི་གཉིས་ཀྱི་ཚིགས་པ་གསུམ་པ་དང་དཔྲལ་བའི་ཚིགས་པ་གཉིས་ན་བར་བྱེད་དོ། །བདག་གི་མགྲིན་པའི་ཚིགས་པ་གཅིག་དང་ཨོག་སྐོའི་ཚིགས་པ་གཅིག་དང་སུམ་བཅུ་ནི་སོ་གཏུན་ཁུང་གི་ཚིགས་པ་དང་
རྐན་གྱི་ཚིགས་པ་གཅིག་དང་མ་རྐན་གྱི་ཚིགས་པ་གཉིས་སོ། །སྐེ་བའི་ཚིགས་པ་བཅྭ་ལྔའོ། །ཚིགས་པ་གཅིག་ལ་ཡང་ཚིགས་པ་གཉིས་སུ་གྱུར་པ་ནི་བྲང་ངོ་། །ཚིགས་ཚིགས་མ་ཡིན་པ་ལ་འབྲེལ་

66-1-152a

བར་གྱུར་པ་ཚིགས་མ་ཡིན་པའི་ཚིགས་ལ་འབྲེལ་བར་གྱུར་པ་ནི་དཔུང་པའི་ཚིགས་གཉིས་དང་གྲུ་མོའི་ཚིགས་པ་དང་བཅས་པའི་ཚིགས་པ་གཞན་གཉིས་སོ། །མིག་རུས་ཀྱི་ཚིགས་པ་
ནི་བཞི་བཞིའོ། །ལག་མགུལ་གྱི་ཚིགས་པ་གཉིས་དང་། ལག་མཐིལ་གྱི་ཚིགས་པ་གཉིས་དང་ལྔ་བཅུ་རྩ་ལྔ་ནི་རྒྱབ་དུ་གྱུར་པའི་ཚིགས་པ་རྣམས་སོ། །གཞོགས་ངོས་གཅིག་ལ་ནི་ཚིགས་པ་བཅུ་
གཉིས་སོ། །དེ་བཞིན་དུ་གཉིས་པ་ལ་ཡང་ངོ་། །ཐང་བའི་ཚིགས་པ་བཅུ་གཉིས་སོ། །ཤའི་དུམ་བུའི་ཚིགས་པ་བཅུ་གཉིས་སོ། །ཆུ་སོའི་ཚིགས་པ་གཅིག་གོ། །འཕོངས་ཚོས་ཀྱི་རུས་འབྲས་
ཚིགས་པ་གཉིས་སོ། །མོ་མཚན་གྱི་ཚིགས་པ་གཅིག་གོ། །བརླའི་ཚིགས་པ་གཉིས་སོ། །ལྗང་ངར་གྱི་མཐིལ་གྱི་ཚིགས་པ་གཉིས་སོ། །ལོང་བུ་ནི་ཚིགས་པ་གཉིས་སོ། །རྐང་མཐིལ་གྱི་ཚིགས་པ་དྲུག་
བཅུའོ། །རྐང་པ་དང་ལག་པའི་སོར་མོའི་ཚིགས་པ་དང་སེན་མོའི་ཚིགས་པ་རྣམས་ནི་ཉི་ཤུའོ། །འདི་དག་རྣམས་ཡིན་ཏེ་ཚིགས་པ་འབྱེད་པར་བྱེད་པའི་རླུང་དེ་དག་རྣམས་ལ་རྟེན་པ་ཡིན་ན། །དེ་དག་ལ་གནས་པར་གྱུར་
ནས་གང་གི་ཚེ་བདག་ལ་འཁྲུག་པ་སྐྱེད་པར་གྱུར་ན་དེས་འཆི་བར་ཡང་འགྱུར་བ་འམ། འཆི་བ་ཙམ་གྱི་སྡུག་བསྔལ་ཡང་འབྱུང་བར་འགྱུར་རོ། །དེས་ཚིགས་པ་འབྱེད་པར་བྱེད་པའི་རླུང་ལ་སོ་སོར་བརྟགས་པར་གྱུར་
པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་ལུས་ལ་
ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ། བྱིན་པ་ལ་ཉལ་བར་བྱེད་པའི་བདག་གི་རླུང་ཡོད་དེ། བདག་གི་ལུས་ལ་ལས་ཅི་དག་

66-1-152b

བྱེད་པ་ཡིན་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི། བྱིན་པ་ལ་ཉལ་བ་པོའི་བདག་གི་རླུང་འཁྲུགས་པར་གྱུར་ན། དེའི་ཚེ་བདག་གི་བྱིན་པ་འཁུམས་པར་གྱུར་
ནས་བདག་གིས་རྐྱོང་བར་མི་ནུས་སོ། ། བརྐྱང་བར་གྱུར་ནས་ཀྱང་བདག་གིས་བསྐུམ་པར་མི་ནུས་སོ། །ཤིང་ལྟ་བུར་བདག་གིས་རིག་པར་གྱུར་ནས་ཀྱང་ཕན་ཚུན་ཀུན་ཏུ་བདག་གི་འབྲེལ་བར་ཡང་མི་འགྱུར་རོ། །
བདག་གིས་འགྲོ་བ་དང་འོང་བ་ཡང་ནུས་པར་མི་འགྱུར་ཏེ། རླུང་དེའི་སྐྱོན་གྱིས་ཡིན་ནོ། །དེས་ལྗང་ངར་ལ་ཀུན་དུ་ཉལ་བར་བྱེད་པཱི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་
རིག་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། བདག་གི་ལུས་ལ་གནས་པའི་རླུང་གཞན་གང་དག་གིས་ལས་ཅི་ཞིག་བྱེད་པ་
ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སྤྲོ་བར་བྱེད་པ་ཞེས་བྱ་བའི་རླུང་བདག་གི་ལུས་ལ་གནས་པ་ཡིན་ཏེ། དེ་བདག་ལ་གང་གི་ཚེ་བདག་ལ་འཁྲུགས་
པར་གྱུར་པ་ན་དེའི་ཚེ་ལས་ཅི་ཞིག་བྱེད་པ་ཡིན་ཞིང་། ཡང་གང་གི་ཚེ་འཁྲུགས་པར་མ་གྱུར་པ་དེའི་ཚེ་ནད་ཅི་དག་བྱེད་པ་ཡིན་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་
བ་ཡིན་ཏེ། གང་དག་བདག་གི་ལུས་ཀྱི་བྱ་བའི་ཁམས་ལ་གནས་པར་གྱུར་པ་རྣམས་ཀྱིས་ནི་འདི་དག་བྱེད་པ་ཡིན་ཏེ། ལུས་ཐམས་ཅད་ལ་ཡང་འགྲོ་བ་དང་བྲལ་བར་བྱེད་པ་དང་དབུགས་གྱེན་དུ་འབྱུང་བ་དང་། 
ཟོས་པ་དང་འཐུངས་པ་དང་འཆོས་པ་དང་མྱངས་པ་རྣམས་ཀྱིས་བསྐྱེད་པའི་ལུས་མདོག་བཟང་པོར་བྱེད་དོ། །བདག་གི་མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་རྣམས་ཀྱི་རང་རང་གི་ཡུལ་རྣམས་ལ་རབ་ཀྱི་སྟོབས་

66-1-153a

དང་ལྡན་པར་འགྱུར་རོ། །ཟོས་པ་རྣམས་ཀྱང་རེགས་པར་སྨིན་པར་བྱེད་དོ། །གང་གི་ཚེ་འཁྲུག་པར་འགྱུར་བ་དེའི་ཚེ་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་
ལྷའི་མིག་གིས་མཐོང་བར་གྱུར་པ། ལུས་ལ་གནས་པར་གྱུར་པའི་ཟོས་པ་དང་འཐུངས་པ་དང་འཆོས་པ་དང་མྱངས་པ་རྣམས་ཐམས་ཅད་ཀྱང་བདག་གིས་བདེ་བར་འཇུ་བར་མི་འགྱུར་རོ། །ལུས་ཀྱི་མདོག་ཀྱང་བཟང་བར་
མི་འགྱུར་རོ། །ལྟོ་རྣམ་པར་འགྱུར་བར་བྱེད་དོ། །སྤྲོ་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་
བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྒྱུས་པ་བསྐྱོད་པར་བྱེད་པ་ཞེས་བྱ་བའི་བདག་གི་
རླུང་དེ་འཁྲུགས་པར་གྱུར་པ་དང་མ་འཁྲུགས་པ་ན་ཡང་ལས་ཅི་ཞིག་བྱེད་པ་ཡིན་ན། ཉལ་བ་དང་སད་པ་དང་དབང་པོ་ཡིད་གཞན་གང་དག་གི་ལུས་ལ་གནས་པར་གྱུར་པའི་བྱ་བ་དེ་དག་རྣམས་ཐམས་ཅད་ཀྱང་འདིས་
བྱེད་དོ། །རྒྱུས་པ་དང་ལྡན་པའི་རླུང་གིས་བྱིན་གྱིས་རློབ་པར་མི་བྱེད་ན་ནི་བདག་གི་ལུས་འཁྲུག་པར་མི་འགྱུར་རོ། །བདག་གི་ལུས་ལ་ཚོར་བས་གཟིར་བར་ཡང་མི་འགྱུར་རོ། །ཞ་བོར་ཡང་མི་འགྱུར་ཏེ། དེའི་
རླུང་འཁྲུགས་པར་མ་གྱུར་ནའོ། །གལ་ཏེ་ཡང་རྒྱུས་པ་བསྐྱོད་བྱེད་ཀྱི་རླུང་འཁྲུགས་པར་གྱུར་ན་ནི། ཉལ་བ་དང་སད་པ་དང་ཡིད་གཞན་དུ་གྱུར་ཅིང་དབང་པོ་གཞན་ལ་ཡེངས་པར་གྱུར་པའི་བདག་གི་ལུས་ཀྱི་
བྱ་བ་དེ་དག་རྣམས་ཐམས་ཅད་ནི་བདག་གིས་བརྗོད་པར་མི་ནུས་ཏེ་རླུང་དེའི་མཐུ་ལས་གྱུར་པ་ཡིན་ནོ། །དེས་རྒྱུས་པ་བསྐྱོད་བྱེད་ཀྱི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བར་ལུས་སོ་

66-1-153b

སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་ལུས་ལ་གནས་པར་གྱུར་པའི་རླུང་གཞན་གང་དག་གིས་ལས་ཅི་ཞིག་
བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འགྲོ་བ་རྣམ་པར་ཟློག་པར་བྱེད་པ་ཞེས་བྱ་བའི་རླུང་བདག་གི་ལུས་ལ་གནས་པ་ཡིན་ན། འཁྲུགས་པར་
གྱུར་པ་ན་འམ་འཁྲུག་པར་མ་གྱུར་ན་བདག་ལ་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ་ན། ལུས་སུ་གྱུར་པ་ཐམས་ཅད་ཀྱི་ལུས་ཀྱི་ལམ་གང་ཡིན་པ་
དེ་དག་རྣམས་ལ་འདིས་གེགས་བྱེད་དོ། །དེ་རབ་ཏུ་འཁྲུགས་པར་གྱུར་ན་བདག་གི་གཅིན་སྡོམ་པར་འགྱུར་རོ། །བདག་ལ་ལྒང་པག་གི་ནད་འབྱུང་བར་འགྱུར་རོ། །བདག་ལ་རླིག་པའི་ནད་ཀྱང་འབྱུང་ངོ་། །
ཟས་མི་འདོད་པར་ཡང་འགྱུར་རོ། །མི་གཙང་བས་གསུས་པ་ཀུན་ཏུ་རྒྱས་པར་བྱས་པས་བདག་སྡུག་བསྔལ་བར་བྱས་ནས་ཆུ་ངན་གྱི་ལམ་ནས་འབྱིན་ཏོ། །བདག་གི་ཡན་ལག་དང་ཉིང་ལག་རྣམས་ཐམས་
ཅད་ལ་སྲིན་བུ་རྣམས་ཀྱང་འབྱུང་བར་འགྱུར་རོ། ། ཁོང་པའི་ནད་ཀྱང་འབྱུང་བར་འགྱུར་རོ། །བདག་གི་ཡན་ལག་དང་ཉིང་ལག་རྣམས་ཐམས་ཅད་རྒྱས་པར་ཡང་འགྱུར་རོ། །བདག་གི་རྩ་སྡོམ་པར་ཡང་འགྱུར་རོ། །
གལ་ཏེ་འཁྲུགས་པར་མ་གྱུར་ན་ནི་དེས་ཇི་སྐད་དུ་བཤད་པའི་བདག་གི་ནད་རྣམས་རབ་ཏུ་ཞི་བར་བྱེད་པར་འགྱུར་རོ། །དེས་འགྲོ་བ་རྣམ་པར་ཟློག་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ལུས་ཡང་དག་པ་ཇི་
ལྟ་བ་བཞིན་དུ་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གང་ཞིག་འཁྲུགས་པར་གྱུར་ན་ཡང་ལས་ཅི་དག་བྱེད་པ་ཡིན་ན་

66-1-154a

དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འགྲོ་བའི་འབྲེལ་རྣམ་པར་གཡེང་བ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་ཏེ། དེ་གལ་ཏེ་འཁྲུགས་པར་གྱུར་པ་
འམ། འཁྲུགས་པར་མ་གྱུར་པས་བདག་ལ་ནད་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་གལ་ཏེ་འབྲེལ་བར་འགྲོ་བ་དཀྲུག་པའི་རླུང་འཁྲུགས་པར་གྱུར་ན། དེས་
བདག་གི་གསུས་པ་ལ་གནས་པའི་རླུང་གི་སྐྲན་བྱེད་དོ། །རྟུག་པ་འབྱུང་བར་འགྱུར་བའི་གེགས་བྱས་པས་བདག་མཐོ་བརྩམས་པར་གྱུར་ནས་ལག་པ་དག་གིས་དྲུད་པས་རབ་ཏུ་འཁྲུག་པ་སྐྱེད་དོ། །ཁམས་འཁྲུགས་པར་གྱུར་
པ་ཡང་བདག་ལ་འབྱུང་ངོ་། །བདག་ལ་མི་བཟད་པའི་གེགས་བྱས་པར་གྱུར་པས་མགོའི་ནད་དུ་འགྱུར་རོ། །བདག་གིས་ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་ཡང་དག་པར་བདེ་བར་སྨིན་པར་ཡང་
མི་འགྱུར་རོ། །བདག་གི་ལུས་ལ་འབྲུམ་བུ་ཉེ་བར་སྐྱེ་བར་ཡང་འགྱུར་རོ། །བདག་ལ་ཚད་པ་ཡང་འབྱུང་ངོ་། །གལ་ཏེ་བདག་གི་འགྲོ་བའི་འབྲེལ་རྣམ་པར་དཀྲུག་པར་བྱེད་པའི་རླུང་འཁྲུགས་པར་མ་གྱུར་ན་ནི་དེ་ཇི་སྐད་དུ་བཤད་
པའི་བདག་གི་ནད་རྣམས་བདག་ལ་རབ་ཏུ་འབྱུང་བར་མི་འགྱུར་རོ། །དེས་འགྲོ་བའི་འབྲེལ་རྣམ་པར་དཀྲུག་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་འགྱུར་རོ། །
གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་ལུས་ལ་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་
སམ་ལྷའི་མིག་གིས་མཐོང་བར་གྱུར་པ། སྤུ་དང་། སེན་མོ་དང་། རྟུག་པ་རྣམས་འབྱེད་པར་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་གལ་ཏེ་བདག་ལ་འཁྲུགས་པར་གྱུར་པ་དང་། 

66-1-154b

འཁྲུགས་པར་མ་གྱུར་པ་ཡང་ལས་ཅི་ཞིག་བྱེད་པ་ཡིན་ན། གལ་ཏེ་བདག་གི་སྤུ་དང་། སེན་མོ་དང་། རྟུག་པ་རྣམས་འབྱེད་པར་བྱེད་པའི་རླུང་བདག་གི་ལུས་ལ་འཁྲུགས་པར་གྱུར་ན། དེས་བདག་
གི་དབང་པོ་རྣམས་མནེར་བར་གྱུར་ནས་རིད་པ་ཉིད་དུ་བྱེད་པ་ཡིན་ནོ། །བདག་གི་ཁ་དང་། སྣ་བུག་དང་། རྣ་བ་རྣམས་ཀྱི་ཕྱེད་ཟུག་ཟེར་གྱིས་གཟེར་བར་བྱེད་དོ། །མིག་ལ་ཡང་རབ་རིབ་ཏུ་འགྱུར་རོ། །བདག་གི་སྣས་
ཀྱང་དྲི་འཛིན་པར་མི་འགྱུར་རོ། །བདག་གི་ཁ་ཡང་སྐྱ་བོར་འགྱུར་རོ། །བདག་རང་བཞིན་དུ་གནས་པར་བསྡད་ཀྱང་སྐྱུག་པར་འགྱུར་རོ། །བདག་གི་བསམ་གཏན་གྱི་བདེ་བ་ལ་ཡང་གནོད་པར་འགྱུར་རོ། །བདག་གི་
སེམས་ཀྱི་རྒྱུན་གཅིག་ཏུ་གནས་པར་ཡང་མི་འགྱུར་རོ། །ལུས་རང་བཞིན་དུ་གྱུར་པ་རྣམས་ནི་སེམས་རང་བཞིན་དུ་གནས་པར་འགྱུར་བ་ཡིན་ནོ། །ལུས་ལ་ནི་ཕུང་པོ་ལྔར་བརྟེན་པ་ཡིན་ཏེ། གཟུགས་དང་། ཚོར་བ་
དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་དང་རྣམས་སོ། །ལུས་ཀྱི་རྗེས་སུ་འགྲོ་བའི་འདུ་བྱེད་རྣམས་ཐམས་ཅད་རིག་པར་གྱུར་ནས། རྣལ་འབྱོར་སྤྱོད་པ་དེས་འཕེལ་བ་དང་འགྲིབ་པའི་ཆོས་རྣམས་ཤེས་པར་
འགྱུར་རོ། །དེས་སྤུ་དང་། སེན་མོ་དང་། རྟུག་པ་རྣམས་འབྱེད་པར་བྱེད་པའི་རླུང་རིག་པར་གྱུར་ནས་ཡང་དག་པ་ཇི་ལྟ་བ་བཞིན་དུ་ལུས་རིག་པར་གྱུར་ནས། གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་
རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་ལུས་ལས་གྱུར་པའི་ལས་ཅི་དག་བྱེད་པ་ཡིན་ན་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཁུ་ཆུ་རྣམ་པར་རླུག་བྱེད་
ཅེས་བྱ་བའི་རླུང་ལུས་ལ་རབ་ཏུ་གནས་པ་ཡིན་ཏེ། དེས་བདག་ལ་ལས་ཅི་ཞིག་བྱེད་པ་ཡིན་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ལ། ཆུའི་ཆུ་བུར་འདྲ་བར་ཁུ་ཆུ་

66-1-155a

རྣམ་པར་རླུག་བྱེད་ཅེས་བྱ་བའི་བདག་གི་རླུང་ཡོད་དོ། །དེས་བདག་གི་གཅིན་གྱི་ལམ་ནས་རྣམ་པར་རྟོག་པ་མ་བྱས་པར་གྱུར་དུ་ཟིན་ཀྱང་གཅིན་དང་ལྷན་ཅིག་ཏུ་ཁུ་བ་རབ་ཏུ་འབྱུང་བར་འགྱུར་རོ། །འདི་ལྟ་སྟེ། 
ཡུངས་ཀར་གྱི་ཚད་ཙམ་དང་། ནས་ཙམ་དུ་འཐས་པར་བྱས་ནས་བདག་གི་ལུས་ལ་འབབ་པའོ། །བཤང་བའི་གནས་ཀྱང་དེས་ཟུག་གཟེར་དུ་བྱེད་པར་འགྱུར་རོ། །དེ་ནི་ནད་དང་མཐོ་འཚམ་པའི་རིགས་ཅན་ཡིན་ཏེ། བདག་
གི་སེམས་ཀྱི་རྒྱུན་གཅིག་ཏུ་གནས་པར་མི་འགྱུར་རོ། །དེས་ཁུ་བ་རྣམ་པར་རླུག་བྱེད་ཀྱི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་རབ་ཏུ་རིག་པར་བྱེད་དོ། །གཞན་ཡང་རྣལ་
འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་ལུས་ལ་གནས་པར་གྱུར་པའི་རླུང་གཞན་གང་དག་གིས་འཁྲུགས་པར་གྱུར་པ་དང་མི་འཁྲུག་པ་ན་ལས་ཅི་དག་བྱེད་པ་ཡིན་ན། 
དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པའི་རྒན་གོག་ཏུ་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་གང་དང་གང་དུ་བདག་ལ་རྒྱས་པར་འགྱུར་
བ་དེ་དང་དེ་དག་གིས་བདག་གི་འདུ་བྱེད་རྣམས་རྙིངས་པར་འགྱུར་ཞིང་རྒན་གོག་ཏུ་འགྱུར་རོ། །འགྲོ་བ་དང་འོང་བའི་གནས་རྣམས་ལ་ཡང་སྟོབས་དང་ལྡན་པར་མི་འགྱུར་རོ། །བདག་ཡུད་ཙམ་ཅིག་ཉེ་བར་བསྡད་
པས་ཀྱང་ནད་པར་འགྱུར་རོ། །བདག་མལ་སྟན་གྱི་གནས་སུ་ཕྱིན་ན་ཡང་ནད་པར་འགྱུར་རོ། །ཡན་ལག་དང་ཉིང་ལག་རྣམས་ལ་ཡང་བདག་དབང་སྒྱུར་ནུས་པ་ཡང་མི་འགྱུར་རོ། །བདག་ཉིད་མང་བར་ཡང་
འགྱུར་རོ། །གལ་ཏེ་ཡང་བདག་གི་རྒན་གོག་ཏུ་བྱེད་པའི་རླུང་འཁྲུགས་པར་མ་གྱུར་ན་ནི་ཇི་སྐད་དུ་བཤད་པར་གྱུར་པའི་ནད་དེ་དག་རྣམས་རབ་ཏུ་འབྱུང་བར་མི་འགྱུར་རོ། །དེས་རྒས་འཁོགས་པར་བྱེད་པའི་རླུང་ལ་སོ་སོར་

66-1-155b

བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་ལུས་ལ་གནས་པའི་རླུང་གང་དག་
གིས་འཁྲུགས་པ་དང་མ་འཁྲུགས་པའི་ལས་ཅི་དག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ལྒང་པག་རེངས་པར་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་
གནས་པ་ཡིན་ཏེ། དེ་འཁྲུགས་པ་དང་མ་འཁྲུགས་པ་ན་བདག་ལ་ལས་ཅི་ཞིག་བྱེད་པར་གྱུར་པ་ཡིན་པ་ཡང་། དེས་མཐོང་བ་ནི་ལྒང་པག་རེངས་པ་ཞེས་བྱ་བའི་རླུང་དེ་གལ་ཏེ་འཁྲུགས་པར་གྱུར་ན། བདག་གི་ཡན་ལག་དང་
ཉིང་ལག་རྣམས་ཐམས་ཅད་ལ་ཡང་འཕྲོ་བར་བྱེད་དོ། །དབུགས་རྔུབ་པར་བྱེད་པ་དང་། སྙིང་གི་ནད་དང་། ལྒང་པག་ཏུ་གྱུར་པ་ཡང་གཡེང་བར་བྱེད་པ་དང་། བདག་གི་རྟུག་པ་དང་གཅིན་རྣམས་ཐམས་ཅད་ཀྱང་རེངས་པར་
བྱེད་པ་འམ། རེངས་པར་མི་བྱེད་པ་ཡང་རུང་སྟེ། བདག་གི་རྟུག་པ་བདེ་བར་མི་ཐོན་ནོ། །ཅོ་འདྲི་བར་བྱེད་པ་དང་ཟུག་གཟེར་དུ་བྱེད་དོ། །སེམས་ཀྱི་རྒྱུན་རྣམ་པར་གཡེང་བར་བྱེད་པར་འགྱུར་རོ། །བདག་གི་རྣམ་པར་ཤེས་པ་
སྟོབས་དང་ལྡན་པར་ཡང་མི་འགྱུར་རོ། །ཆོས་ཀྱི་དབང་དུ་བྱས་ནས་སེམས་རབ་ཏུ་དང་བར་འགྱུར་བ་དང་། ལས་ལ་མངོན་པར་འདོད་པ་ཡང་མ་ཡིན་ཏེ། ལུས་སྡུག་བསྔལ་བར་གྱུར་ན་ཆོས་ལ་མངོན་པར་འདོད་པར་མི་འགྱུར་
རོ། །གལ་ཏེ་ལྒང་པག་རེངས་པར་བྱེད་པའི་རླུང་མི་འཁྲུགས་ན་ནི་ཇི་སྐད་དུ་བཤད་པར་གྱུར་པའི་ནད་དེ་དག་རྣམས་རབ་ཏུ་འབྱུང་བར་མི་འགྱུར་རོ། །དེས་ལྒང་པག་རེངས་པར་བྱེད་པའི་རླུང་ལ་སོ་སོར་བརྟགས་པར་གྱུར་
པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་

66-1-156a

གྱུར་པ་དང་། འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བཤང་བ་སྐམ་པོར་བྱེད་པ་ཞེས་བྱ་བའི་རླུང་བདག་གི་
ལུས་ལ་རབ་ཏུ་གནས་ཏེ། དེ་བདག་ལ་འཁྲུགས་པ་དང་། མ་འཁྲུགས་པ་ན་ལས་ཅི་ཞིག་བྱེད་པ་ཡིན་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ལ། བདག་གི་
བཤང་བ་ཀུན་དུ་སྐམས་པར་བྱེད་པ་ཞེས་བྱ་བའི་རླུང་གལ་ཏེ་འཁྲུགས་པར་གྱུར་ན། དེས་བདག་གལ་ཏེ་རབ་ཏུ་ཕལ་ཆེ་བའི་བཟའ་བར་བྱ་བ་དང་བཅའ་བར་བྱ་བ་རྣམས་བསོད་པར་གྱུར་པའི་འདུ་ཤེས་སུ་བྱས་ནས་མང་དུ་
ཟས་སྐོམ་རྣམས་མིད་པར་གྱུར་པ་ན། དེ་ལུས་ཀྱི་གསེབ་དུ་སོང་བར་གྱུར་ནས་དང་། འགྲམ་སོའི་གསེབ་དུ་སོང་བར་གྱུར་ནས་དང་། ལུས་ཀྱི་གསེབ་ན་གནས་པ་དང་། མནན་པའི་བར་དུ་གནས་པ་དང་། ལུས་
ཐམས་ཅད་ཀྱི་གསེབ་དུ་སོང་བར་གྱུར་ནས་ཀྱང་བདག་ལ་ལྷང་ཀྱོག་དུ་བྱེད་དོ། །ངའི་བཤང་བ་ཡང་སྐམ་པར་བྱེད་དོ། །ཞག་གཉིས་སམ། ཞག་གསུམ་འམ། ཞག་བཞིར་ཡང་བདག་གི་རྟུག་པ་བཏང་བར་མི་ནུས་སོ། 
གལ་ཏེ་བདག་གིས་ནུས་པར་གྱུར་ན་ཡང་ཚོར་བ་ཆུང་ངུ་བདག་ལ་འབྱུང་བར་འགྱུར་རོ། །གལ་ཏེ་ཡང་བདག་གི་བཤང་བ་སྐམས་པར་བྱེད་པའི་རླུང་དེ་འཁྲུགས་པར་མ་གྱུར་ན་ནི་ཇི་སྐད་དུ་བཤད་པའི་ནད་དེ་དག་རྣམས་རབ་ཏུ་འབྱུང་
བར་མི་འགྱུར་རོ། །བཤང་བ་ཀུན་དུ་སྐམ་བྱེད་ཀྱི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་
ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྩིབས་ལོགས་ན་བར་བྱེད་

66-1-156b

པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེས་བདག་ལ་འཁྲུགས་པར་གྱུར་པ་དང་། འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་པ་ཡང་། དེས་མཐོང་བ་ནི་རྩིབ་ལོགས་ན་བར་བྱེད་པ་
ཞེས་བྱ་བའི་བདག་གི་རླུང་དེ་གལ་ཏེ་འཁྲུགས་པར་གྱུར་ན། དེས་བདག་གི་ལོགས་ཀྱི་རུས་པ་ལ་གནས་ནས་ལོགས་ཀྱི་གསེབ་དུ་རྒྱུ་བར་བྱེད་པ་ལོགས་ཀྱི་ཁྲག་རྣམས་རབ་ཏུ་སྐམས་པར་བྱེད་པས་བདག་ལ་འཇིགས་
སུ་རུང་བ་དང་། རྩུབ་པ་དང་། མི་བཟད་ཅིང་དྲག་པོར་གྱུར་པའི་ཚོར་བ་རྣམས་སྐྱེད་པར་བྱེད་དོ། །གལ་ཏེ་རླུང་དེ་བདག་ལ་འཁྲུགས་པར་མ་གྱུར་ན་ནི་ཇི་སྐད་དུ་བཤད་པའི་ནད་དེ་དག་རྣམས་རབ་ཏུ་འབྱུང་བར་མི་འགྱུར་རོ། །
དེས་ལོགས་ན་བར་བྱེད་པའི་རླུང་རིག་པར་གྱུར་ནས་ཡང་དག་པ་ཇི་ལྟ་བ་བཞིན་དུ་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། བདག་
གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བུ་ག་དགུའི་ནད་
ཅེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེས་བདག་ལ་འཁྲུགས་པ་དང་མ་འཁྲུགས་པ་ན་ལས་ཅི་ཞིག་བྱེད་པར་གྱུར་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་
མཐོང་བ་ལས་བུ་ག་དགུ་ན་བར་བྱེད་པ་ཞེས་བྱ་བའི་བདག་གི་རླུང་གལ་ཏེ་འཁྲུགས་པར་གྱུར་ན། དེས་བདག་གི་བུ་ག་དགུ་པོ་རྣམས་མ་ལུས་པར་འཆུམ་པར་བྱེད་དོ། །བུ་ག་བདུན་མགོ་བོ་ལ་གནས་པ་དང་། གཉིས་
བཤང་བ་དང་གཅི་བའི་ཡིན་ཏེ་སྤྱིར་ཡོ་འམ་གལ་ཏེ་རེ་རེ་ཡང་རླུང་བཀག་པར་གྱུར་ན་ཡང་དེས་ལུས་མཉམ་པར་ན་བར་བྱེད་དོ། །དབུགས་རྔུབ་པ་དང་འབྱུང་བ་ཡང་འདིས་ཤིན་ཏུ་སྡོམ་པར་བྱེད་དོ། །སྣ་བུག་ན་ཡོད་པའི་

66-1-157a

རླུང་གིས་ནི་ལུས་རྣམས་ཐམས་ཅད་ལེགས་པར་འཛིན་པར་བྱེད་པ་དང་། བདག་གི་ལུས་ཀྱི་གོང་བུ་འདི་ནི་རླུང་གི་དབང་དུ་གྱུར་པ་ཡིན་ཞིང་རླུང་ཡང་འཁྲུལ་འཁོར་བཞིན་ཏེ། རླུང་ནི་རླུང་ཉིད་ཀྱིས་བསྐྱོད་པར་བྱེད་ཀྱི་གཞན་
དག་འགའ་ཞིག་ཀྱང་ནི་མ་ཡིན་ནོ། །དེས་བུ་ག་དགུ་ན་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་
ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཡན་ལག་དང་
ཉིང་ལག་ཐུང་བར་བྱེད་པ་ཞེས་བྱ་བའི་བདག་གི་རླུང་ཡིན་ན། དེ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་བདག་ལ་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་
གྱུར་པ་ནི་གལ་ཏེ་བདག་གི་ཡན་ལག་དང་ཉིང་ལག་རྣམས་ཐུང་བར་བྱེད་པའི་རླུང་འཁྲུགས་པར་གྱུར་ན་དེས་སོར་མོ་རྣམས་འཁུམ་པར་བྱེད་དོ། །གནད་རྣམས་འབིགས་པར་བྱེད་དོ། །དམན་ཞིང་ཐུང་བར་བྱེད་དོ། །རྐང་པ་དང་
ལག་པ་ཡང་ཀུན་ཏུ་འཁུམ་པར་བྱེད་དོ། །སྟེང་གིས་རུས་པ་རྣམས་གཟེར་ཟུག་བྱེད་དོ། །བརླའི་རྒྱུས་པ་རྣམས་འཁུམ་པར་བྱེད་དོ། །འོན་ཀྱང་རྒྱུ་མ་ལ་གནས་པ་རྣམས་སྦོམ་པོར་ཡང་མི་བྱེད་དོ། །རྐང་པ་དང་ལུས་རྣམས་
ངལ་དུབ་སྐྱེད་པར་བྱེད་དོ། །ནད་འདི་དག་རྣམས་ནི་ཡན་ལག་དང་ཉིང་ལག་ཐུང་བར་བྱེད་པའི་བདག་གི་རླུང་གིས་བྱེད་དོ། །གལ་ཏེ་འཁྲུགས་པར་མ་གྱུར་ན་ནི་ཇི་སྐད་དུ་བཤད་པའི་ནད་དེ་དག་རྣམས་འབྱུང་བར་མི་
འགྱུར་རོ། །ཡན་ལག་དང་ཉིང་ལག་ཐུང་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་ལ་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་

66-1-157b

ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གང་དག་གིས་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མེ་དྲོད་ཀུན་དུ་སུན་འབྱིན་
པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེས་བདག་ལ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡང་དེས་མཐོང་བར་གྱུར་པ། གལ་ཏེ་མེ་དྲོད་སུན་འབྱིན་པར་བྱེད་པའི་
རླུང་ལུས་ལ་འཁྲུགས་པར་གྱུར་ན། དེས་བདག་གི་ལུས་ལ་གནས་པར་གྱུར་པའི་མེ་དྲོད་རྣམས་རང་གི་གནས་ནས་འཕོ་བར་བྱས་ནས་ཉམས་པར་བྱེད་དོ། །དེས་བདག་མེ་དྲོད་ཉམས་པར་གྱུར་ནས་ཟས་རྣམས་སྨིན་
པར་མི་འགྱུར་རོ། །སྐོམ་ཡང་བདག་གིས་འཇུ་བར་མི་འགྱུར་རོ། །དེས་ལྤགས་པར་གྱུར་པ་རྣམས་ཀྱང་མདོག་ངན་པར་འགྱུར་རོ། །ཁྲག་རྣམས་ཀྱང་སྐམ་ཞིང་ཤ་དག་ཀྱང་ཡོངས་སུ་ཉམས་པར་བྱེད་དོ། །རྒྱུས་པ་
རྣམས་འཁུམ་པར་འགྱུར་བ་སྐྱེད་པར་བྱེད་དོ། །ཚིལ་རྣམས་མེད་པར་འགྱུར་རོ། །བདག་གི་རུས་པ་རྣམས་ཀྱང་སྐམ་པར་འགྱུར་རོ། །ལྷ་བ་ཀུན་ཀྱང་སྲབ་མོར་འགྱུར་རོ། །བདག་གི་ལུས་ཐམས་ཅད་ལས་གྱུར་པའི་
ཁུ་ཆུ་དག་དང་སྟོབས་རྣམས་ཀྱང་ཉམས་པར་བྱེད་དོ། །སྙིང་ལ་བརྟེན་པའི་རླུང་གིས་ནི་རྟོགས་པར་མི་བྱེད་དོ། །གལ་ཏེ་ཡང་མེ་དྲོད་ཀུན་ཏུ་སུན་འབྱིན་པར་བྱེད་པའི་རླུང་འཁྲུགས་པར་མ་གྱུར་ན་ཇི་སྐད་དུ་བཤད་པའི་ནད་དེ་
དག་རྣམས་འབྱུང་བར་མི་འགྱུར་རོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གང་དག་གིས་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་
རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བདག་གི་ལུས་ཀྱི་ཡན་ལག་དང་ཉིང་ལག་རྣམས་ཐམས་ཅད་གྲང་བར་བྱེད་པ་ཞེས་བྱ་བའི་རླུང་ཡིན་ཏེ། དེས་འཁྲུགས་པར་གྱུར་པ་འམ་འཁྲུགས་པར་མ་གྱུར་པ་ན་ལས་ཅི་ཞིག་

66-1-158a

བྱེད་པ་ཡིན་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བ་ནི་བདག་གི་ལུས་ཐམས་ཅད་གྲོང་མོར་བྱེད་པའི་རླུང་གལ་ཏེ་འཁྲུགས་པར་གྱུར་ན། ལུས་ལ་ཁ་ཆུ་སྐྱེད་པ་དང་རླན་པར་ཡང་འགྱུར་
རོ། །འདི་ལྟ་སྟེ། ཉལ་བར་གྱུར་པ་ན་རྩུབ་པ་དང་གྱོང་བའི་ཁ་དོག་དང་འཁུམ་པར་ཡང་བྱེད་དོ། །སྙོམས་པར་ལུས་ཀྱི་ཡན་ལག་དང་ཉིང་ལག་རྣམས་ཧྲུད་ཧྲུད་པོར་འགྱུར་རོ། །བདག་གི་ལུས་ཀྱི་བ་སྤུ་རྣམས་ལངས་པར་ཡང་ལུས་
འགྱུར་རོ། །ལབ་ལེབ་མང་ཞིང་མི་མཉམ་པར་གྱུར་པར་ལུས་ཀྱི་ཡུལ་འགའ་ཞིག་ཏུ་སྐྱེད་པར་འགྱུར་རོ། །འཛད་པར་འགྱུར་བ་སྐྱེད་པ་དང་གཡན་པའི་ངོ་བོར་གྱུར་པའི་ཆུ་སེར་ཁྲག་གི་རྒྱལ་པོ་ཡང་སྐྱེད་དོ། །སྤུ་རྣམས་ཀྱང་སེར་
པོར་འགྱུར་རོ། །ཚད་པས་གདུངས་པར་ཡང་འགྱུར་རོ། །སྦོམ་པ་ཉིད་དུ་གྱུར་ཅིང་ལུས་ཀྱི་ཡུལ་རྣམས་མི་མཉམ་པར་ཡང་འགྱུར་རོ། །སྐྱ་བོ་ཉིད་དུ་ཡུལ་དེ་དག་རྣམས་འགྱུར་རོ། །བདག་གི་ལུས་པོ་ལ་ཡང་ལྤགས་པ་འཐུག་པོ་
ཀབ་ཀོབ་མང་དུ་འགྱུར་རོ། །གླང་པོའི་ལྤགས་པ་དང་འདྲ་བར་ཡང་འགྱུར་རོ། །བདག་གི་དཀའ་བླས་ཀྱིས་བདག་གིས་ལངས་ནུས་པར་འགྱུར་རོ། །རྣག་གི་དྲི་རྣམས་ཀྱང་བདག་གི་ལུས་ལས་འབྱུང་བར་འགྱུར་རོ། །
ཇི་སྲིད་དུ་ཟས་ཀྱང་རྩུབ་པའི་རྡག་རྡོག་ཅན་དུ་འགྱུར་རོ། །བདག་གི་ལུས་ཀྱི་ཕྱོགས་གཅིག་ནས་གླང་པོ་ཆེའི་ལྤགས་པ་དང་འདྲ་བར་འགྱུར་རོ། །འབྲུམ་འཇུར་དང་སྙེ་བ་ཡང་བདག་གི་ངོས་གཅིག་ཏུ་འགྱུར་རོ། །སྐྱེས་བུ་ལག་པ་
དང་རྐང་པ་དག་ལ་རྨ་ཡང་ཀུན་ཏུ་སྐྱེ་བར་བྱེད་དོ། །བདག་འགྲོ་བ་དང་འོང་བར་གྱུར་པ་ན་ཡང་ངལ་ཞིང་དུབ་པར་འགྱུར་རོ། །གཡན་པ་ཡང་བདག་གི་ལུས་ཀྱི་ཕྱོགས་གཅིག་ཏུ་ཀུན་ནས་སྐྱེ་བར་བྱེད་དོ། །རྣམ་པར་སྲེག་པར་བྱེད་པ་ཡང་
རྟག་དུ་སྐྱེད་དོ། །བདག་གི་ལུས་རེག་བྱ་ངན་པར་ཡང་ཀུན་ཏུ་སྐྱེ་བར་བྱེད་དོ། །རྣག་གི་ཐུམ་པོ་སྐྱེས་པ་རྣམས་རྣམ་པར་འཕེལ་བར་བྱེད་དོ། །རྣམ་པར་རྨས་པར་བྱེད་དོ། །སོ་ལ་ཡང་བདག་ཆགས་པ་དང་བྲལ་བར་འགྱུར་རོ། །བདག་གི་སྣ་

66-1-158b

ཡང་ཟུག་གཟེར་ཆེན་པོར་འགྱུར་རོ། །བདག་གི་མིག་གཉིས་ཀྱི་རྫི་མ་ཕྲ་མོ་རྣམས་འབྲུལ་བར་འགྱུར་རོ། །སོར་མོ་དང་རྐང་པའི་སོར་མོ་རྣམས་ཀྱང་རྣམ་པར་འབྲུལ་བར་འགྱུར་རོ། །སྐད་རྣམས་ཀྱང་གྲག་ཡར་མེད་པར་འགྱུར་རོ། །སྲིན་བུ་
ཡང་ཕྱི་རོལ་ཏུ་རྒྱུ་བར་གྱུར་པར་རབ་ཏུ་འབྱུང་བར་འགྱུར་རོ། །བདག་གི་ཡན་ལག་དང་ཉིང་ལག་རྣམས་ཐམས་ཅད་ཀྱི་སྤུ་རྣམས་ཉིལ་བར་འགྱུར་རོ། །སྐྱེ་བོ་རྣམས་ཐམས་ཅད་ཀྱང་བདག་ལ་སྐྱུག་ལྡོག་པར་འགྱུར་རོ། །སྦྱིན་པ་པོ་དང་སྦྱིན་བདག་གི་
ཁྱིམ་དུ་ཡང་བདག་སྨོད་པར་བྱ་བའི་གནས་སུ་འགྱུར་རོ། །སྦྲང་བུ་རྣམས་ཀྱང་བདག་གི་ལུས་ལ་རྟག་ཏུ་རྒྱུག་པར་འགྱུར་རོ། །ཆོས་གོས་ཀྱང་བདག་གི་ལུས་ལ་མི་བཟོད་དོ། །བདག་གི་སེན་མོ་རྣམས་ཀྱང་རྣམ་པར་ཉིལ་བར་འགྱུར་རོ། །
བདག་ཉལ་བར་གྱུར་པ་ན་ཡང་ངར་ངར་པོའི་དབུགས་རྣམས་ཀུན་དུ་འབྱུང་ངོ་། །བདག་སྡུག་བསྔལ་བར་གྱུར་པས་ཀྱང་ཟས་ལ་སྲེད་པར་འགྱུར་རོ། །འོན་ཀྱང་འཇུ་བ་མ་ཡིན་ནོ། །བདག་གིས་བཏུང་བ་རྣམས་འཐུངས་པས་ཀྱང་ཁྱད་པར་དུ་ཚད་
པ་སྐྱེད་པར་བྱེད་དོ། །བདག་གི་ལྕེ་ཡང་རྣམ་པར་འགྱུར་བ་བསྐྱེད་དོ། །དེ་ལྟར་ཡན་ལག་དང་ཉིང་ལག་རྣམས་ཐམས་ཅད་ལ་གྲང་བར་བྱེད་པའི་རླུང་དག་གིས་དམན་པར་གྱུར་པས་ལུས་རྣམས་འཛག་པར་འགྱུར་རོ། །གལ་ཏེ་ཡང་བདག་
གི་ཡན་ལག་དང་ཉིང་ལག་རྣམས་ཐམས་ཅད་ལ་གྲང་བར་བྱེད་པའི་རླུང་རབ་ཏུ་རྒྱས་པར་མ་གྱུར་ན་ནི་གྲང་བ་མ་ཡིན་པའི་རླུང་དེས་ལུས་མདོག་བཟང་བ་དང་། མཁྲེགས་པ་དང་། འཇམ་ཞིང་སྣུམ་བག་ཅན་དང་། དཀར་བ་དང་། མཉེན་པ་དང་། 
སྐྱེ་བོ་རྣམས་ཐམས་ཅད་དགའ་བར་འགྱུར་རོ། །རྔུལ་བ་རྣམས་ཐམས་ཅད་ནི་དྲོ་བར་འགྱུར་བ་ལ་རིགས་པས་ཡན་ལག་དང་ཉིང་ལག་རྣམས་ཐམས་ཅད་དང་། བ་སྤུའི་ཁུང་བུ་རྣམས་ནས་འབྱུང་བར་འགྱུར་རོ། །ཇི་སྐད་དུ་བཤད་པར་གྱུར་པའི་
ནད་རྣམས་ཀྱང་རབ་ཏུ་འབྱུང་བར་མི་འགྱུར་རོ། །དེས་ཡན་ལག་དང་ཉིང་ལག་རྣམས་ཐམས་ཅད་ལ་གྲང་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ལུས་ཡང་དག་པ་ཇི་ལྟ་བ་བཞིན་དུ་སོ་སོར་རིག་པར་བྱེད་དོ། །

66-1-159a

གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་ལུས་ལ་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་
སམ་ལྷའི་མིག་གིས་མཐོང་བར་གྱུར་པ། བརྟན་པ་འཇིག་པར་བྱེད་པ་ཞེས་བྱ་བའི་རླུང་ལུས་ལ་འཁྲུགས་པར་གྱུར་ན། དེས་བདག་འཇིགས་པ་ཆུང་ངུ་ལ་ཡང་བདག་གི་སྙིང་དངངས་པར་འགྱུར་རོ། །ཡན་ལག་དང་ཉིང་ལག་
རྣམས་ཐམས་ཅད་ལ་ཡང་ལྷང་ཀྱོག་འབྱུང་ངོ་། །རེངས་པར་འགྱུར་བ་དང་། དངང་བར་ཡང་འགྱུར་རོ། །རྨོངས་པར་ཡང་འགྱུར་རོ། །བདག་གི་དབུགས་ཀྱང་སྟོབས་ཤིན་དུ་ཕུལ་དུ་ཕྱིན་པར་འགྱུར་རོ། །འོན་ཀྱང་
དབུགས་ཀྱང་ཕྱིར་རྔུབ་པར་ཡང་མི་ནུས་པར་འགྱུར་རོ། །བདག་གིས་ཆོས་གོས་ཀྱང་མི་བཟོད་དོ། །བདག་ལ་མགོ་བོའི་ནད་རྣམས་འབྱུང་བར་འགྱུར་རོ། །བསམ་གཏན་ལ་གནས་པར་གྱུར་པ་ན་ཡང་སེམས་ཀྱི་དམིགས་
པ་གཅིག་ཏུ་མི་འགྱུར་རོ། །བདག་གིས་རྨི་ལམ་དུ་ཡང་རྣམ་པར་འགྱུར་བ་རྣམས་མཐོང་བར་འགྱུར་རོ། །བདག་ལ་སྐྱུག་པ་ཡང་འབྱུང་བར་འགྱུར་རོ། །བདག་གིས་ཞི་བར་འགྱུར་བའི་གཟུགས་རྣམས་ཀྱང་དྲག་པོར་གྱུར་པར་
མཐོང་ངོ་། །ཐག་ཉེ་བར་གྱུར་པའི་གཟུགས་རྣམས་ཀྱང་བདག་གིས་རྒྱང་རིང་བར་མཐོང་བར་འགྱུར་རོ། །བདག་གི་སྲེད་པ་ཡང་རབ་ཏུ་ཆེ་བར་འགྱུར་རོ། །གལ་ཏེ་ཡང་བརྟན་པ་འཇིག་པར་བྱེད་པའི་རླུང་འཁྲུགས་པར་མ་གྱུར་ན་ནི་ཇི་སྐད་
དུ་བཤད་པའི་ནད་དེ་དག་རྣམས་འབྱུང་བར་མི་འགྱུར་རོ། །དེས་བརྟན་པ་འཇིག་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་
སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་

66-1-159b

ལུས་ཐམས་ཅད་ལ་འཕར་བ་ཞེས་བྱ་བའི་རླུང་ལུས་ལ་གནས་པ་ཡིན་ཏེ། དེས་བདག་ལ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་
མཐོང་བར་གྱུར་པ་ནི་གལ་ཏེ་བདག་གི་ལུས་ཐམས་ཅད་ལ་འཕར་བ་ཞེས་བྱ་བའི་རླུང་ལུས་ལ་འཁྲུགས་པར་གྱུར་ན་དེས་བདག་འཕར་བར་བྱེད་དོ། །རྣ་བ་འུར་འུར་བྱེད་ཅིང་རྣམ་པར་འཕར་བར་བྱེད་དོ། །རླུང་གིས་འཕར་བར་ཡང་བྱེད་
དོ། །ཡན་ལག་དང་ཉིང་ལག་རྣམས་ཐམས་ཅད་ལ་ཡང་འཕར་བར་བྱེད་དོ། །ནང་དུ་རྒྱུ་བར་ཡང་འགྱུར་རོ། །ཡུལ་དང་ཡུལ་རྣམས་སུ་སྡོམ་པར་ཡང་བྱེད་དོ། །འོན་ཀྱང་ནད་ནི་མི་སྐྱེད་དོ། །གལ་ཏེ་ལུས་ཐམས་ཅད་ལ་རྒྱུ་བའི་རླུང་དེ་
འཁྲུགས་པར་མ་གྱུར་ན་ཇི་སྐད་དུ་བཤད་པའི་ནད་དེ་དག་རྣམས་འབྱུང་བར་མི་འགྱུར་རོ། །དེས་ཡན་ལག་ཐམས་ཅད་འཕར་བའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རྟོགས་པར་བྱེད་དོ། །
གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་ལུས་ལ་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་
གིས་མཐོང་བར་གྱུར་པ། སྲེག་པར་བྱེད་པའི་རླུང་བདག་གི་ལུས་ལ་གནས་པ་ཡིན་ཏེ། དེས་བདག་ལ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡང་། དེས་མཐོང་བར་གྱུར་པ་སྲེག་བྱེད་ཀྱི་རླུང་
འཁྲུགས་པར་གྱུར་ན་ནི་དེས་བདག་གིས་མིད་པར་གྱུར་པའི་ཟས་རྣམས་མགུལ་པའི་སྦུ་གུ་ལ་རབ་ཏུ་བརྟེན་པར་བྱས་ནས་མྱུར་དུ་སྲེག་པར་བྱེད་དོ། །ཟས་ལ་གནས་པར་གྱུར་པས་བདག་གི་འབྱུང་བ་ཆེན་པོ་རྣམས་རྒྱས་པར་མི་འགྱུར་རོ། །
བཟའ་བར་བྱ་བ་དང་བཅའ་བར་བྱ་བ་ཟོས་པར་གྱུར་པ་རྣམས་ཀྱང་རྣམ་པ་གཉིས་སུ་འགྱུར་བ་ཡིན་ཏེ། རབ་ཏུ་དང་བར་གྱུར་པ་དང་། རྙོག་པར་གྱུར་པའོ། །དེ་ལ་རབ་ཏུ་དང་བར་གྱུར་པ་རྣམས་ཀྱིས་ནི་འབྱུང་བ་ཆེན་པོ་རྣམས་རྒྱས་པར་

66-1-160a

བྱེད་དོ། །རྙོག་པར་གྱུར་པས་ནི་ནད་རྣམས་རབ་ཏུ་འབྱུང་བར་འགྱུར་རོ། །བདག་གི་སྲེག་བྱེད་ཀྱི་རླུང་དེ་འཁྲུགས་པར་གྱུར་ན་ཕལ་ཆེར་ཟས་ཀྱི་རིགས་རྣམས་རྙོག་པ་ཅན་དུ་བྱེད་དོ། །ཉུང་ངུ་ཉུང་ངུ་ཙམ་ཞིག་རབ་ཏུ་དང་བར་འགྱུར་
རོ། །དེས་བདག་གི་ནད་རྣམས་རབ་ཏུ་འཁྲུགས་པར་བྱེད་དོ། །གལ་ཏེ་ཡང་སྲེག་བྱེད་ཀྱི་རླུང་འཁྲུགས་པར་མ་གྱུར་ན་ནི་དེས་བདག་གི་ཟས་རྣམས་རྣམ་པ་གཉིས་སུ་བྱེད་དོ། །རབ་ཏུ་དང་བར་གྱུར་པ་དང་རྙོག་པ་སྟེ། དེས་ཀྱང་ངའི་འབྱུང་
བ་ཆེན་པོ་རྣམས་སྙོམས་པར་འགྱུར་རོ། །ནད་རྣམས་དཀྲུག་པར་ཡང་མི་འགྱུར་རོ། །དེས་སྲེག་བྱེད་ཀྱི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བར་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་
བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། རླུང་གཞན་གང་དག་བདག་གི་ལུས་ལ་རབ་ཏུ་གནས་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སྲིན་ལ་ཀུན་ཏུ་འཇུག་པར་བྱེད་
པའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེས་བདག་གི་ཡན་ལག་དང་ཉིང་ལག་རྣམས་ཐམས་ཅད་ལ་གནས་པའི་སྲིན་རྣམས་སོ་སོར་འདྲེ་བར་བྱེད་དོ། །རྣམ་པར་འདྲེ་བར་བྱེད་དོ། །ཀུན་ཏུ་འགལ་བར་བྱེད་དོ། །རྣམ་པར་འགལ་བར་
བྱེད་དོ། །ཀུན་ཏུ་སྒུལ་བར་བྱེད་དོ། །སྟེང་འོག་ཏུ་བྱེད་པར་འགྱུར་རོ། །མགོ་བོ་ནས་ཇི་སྲིད་དུ་རྐང་པའི་བར་དུ་དང་། ཀླད་པ་ལ་རྒྱུ་བར་བྱེད་པ་དེ་ཀླད་པ་ལ་རྒྱུས་ནས་དེ་ཀླད་རྒྱས་ལ་རྒྱུ་བར་གྱུར་ནས་ཐོད་པ་ལ་རྒྱུ་བར་བྱེད་ཅིང་གསེབ་ཏུ་
སོང་ནས་སྐྲ་ཟ་བར་བྱེད་པ་དང་། རྣ་བ་ལ་རྒྱུ་བ་དང་སྣབས་ཤིན་ཏུ་འཕེལ་བར་བྱེད་པ་དང་། ཚིལ་ལ་རྒྱུ་བར་བྱེད་པ་དང་། ཚིགས་པ་རྣམས་དང་། འགྲམ་པར་གྱུར་པ་དང་། དཔྲལ་བ་ཟ་བ་དང་། སོའི་རྩ་བ་རྣམས་ཟ་བ་དང་། སྐྱུགས་
བྱེད་ཀྱི་སྲིན་གྱི་རིགས་གཞན་བཅུ་མགྲིན་པ་དང་མགུལ་པ་ལ་གནས་པ་རྣམས་ལ་འདི་ལྟ་སྟེ། ཟས་སུ་ངར་སྣབས་ཟ་བ་དང་། མཆིལ་མ་རྣམས་ཤིན་ཏུ་འགྲིམ་པར་བྱེད་པ་དང་། རབ་ཏུ་སྐྱུག་བྱེད་དང་རྣམས་སོ། །ཁུ་བ་རྒྱུ་བ་

66-1-160b

བཅུའི་རྩ་རྣམས་ཀྱི་ནང་ན་རྒྱུ་བ་མངར་མྱོས་དང་། རབ་མྱོས་དང་། རོ་དྲུག་ལ་སྲེད་པ་དང་། གྷུར་གྷུར་ར་བ་དང་། རོ་ལ་རབ་ཏུ་སྡང་བ་དང་། ཉལ་བ་ལ་ཤིན་ཏུ་མངོན་པར་དགའ་བ་དང་། སྦོམ་པོ་དང་རྣམས་སོ། །ཁྲག་ལས་སྐྱེས་པར་གྱུར་པའི་
སྲིན་གྱི་རིགས་བཅུ་ཤ་དང་ལྷན་ཅིག་གནས་པ་རྣམས་འདི་ལྟ་སྟེ། སྤུ་ཟ་བ་དང་། སོ་སུ་ར་དང་། ཛ་ན་ཏུ་ར་དང་། ཨོའུ་དུམ་བ་ར་མ་དང་། ཀུན་ཏུ་འཛིམ་པ་དང་། སྤུའི་གླིང་དང་། ཁྲག་ལ་རབ་ཏུ་ཁྲོ་བ་དང་། ཁྲག་ཟ་བ་དང་། རབ་རབ་བྱེད་པ་དང་། 
སྐྱུར་པོ་དང་རྣམས་ཏེ། རྐང་པ་མེད་པ་དང་། ཐུང་ངུ་དང་། འཕེལ་བའི་དབྱིབས་ཅན་དང་། ཁྲག་ལས་སྐྱེས་པའི་སྲིན་དུ་གྱུར་པ་མིག་མེད་པ་དང་། གཡན་པའི་མཚན་ཉིད་དང་། འབིགས་བྱེད་ཀྱི་མཚན་ཉིད་དང་ལྡན་པ་རྣམས་ཡིན་
ནོ། །ཤ་ལ་གནས་པའི་སྲིན་གྱི་རིགས་བཅུ་པོ་རྣམས་ནི་འདི་ལྟ་སྟེ། རྨ་ཀུན་ནས་སློང་བ་དང་། ཙུན་ཙུ་ཀ་བ་དང་། རྒྱུས་པ་སྒུལ་བ་དང་། རྩ་འབིགས་པ་དང་། པགས་པ་ཟ་བ་དང་། ཚིལ་སྒུལ་བ་དང་། འཕེལ་བྱེད་དང་། དྲི་ངན་དང་། 
རྔུལ་ལ་རྒྱུ་བ་དང་། སྲེག་བྱེད་དང་རྣམས་སོ། །མཁྲིས་པ་ལ་གནས་པར་གྱུར་པའི་སྲིན་གྱི་རིགས་བཅུ་པོ་རྣམས་ནི་འདི་ལྟ་སྟེ། ཙུ་ར་ཐ་དང་། སྒུལ་བྱེད་དང་། རྫས་ཀྱིས་རྒྱས་པ་དང་། ཆེན་པོའི་རིགས་དང་། ནག་པ་པ་དང་། ཟས་ཆེན་
པོ་དང་། དྲོ་བ་ལ་རྒྱུ་བ་དང་། རྣམ་པར་སྲེག་བྱེད་དང་། མེ་དྲོད་ཉམས་བྱེད་དང་། མེ་ཆེན་པོ་དང་རྣམས་ཡིན་ནོ། །ཡན་ལག་དང་ཉིང་ལག་རྣམས་ཐམས་ཅད་ལ་གནས་པའི་སྲིན་རྣམས་ནི་འདི་ལྟ་སྟེ། རུས་པ་ལ་ལྡག་པ་དང་། ཤིན་ཏུ་
འདྲུད་བྱེད་དང་། ཚིགས་པ་གཅོད་ཅིང་རྒྱུ་བ་དྲི་མི་ཞིམ་པ་དང་། རུས་པའི་རྣག་གི་རིགས་དང་། ཁ་དམར་བ་དང་། མྱང་བར་བྱེད་པ་དང་། པགས་པ་ཟ་བ་དང་། གྲོག་མ་དང་། སྤུ་གྲིའི་ཁ་དང་རྣམས་སོ། །བཤང་བ་ལ་རྒྱུ་བའི་སྲིན་གྱི་རིགས་
བཅུ་པོ་རྣམས་ནི་འདི་ལྟ་སྟེ། དངས་མ་པ་དང་། ཁབ་ཀྱི་ཁ་དང་། ཕི་སྦི་སྐྱེས་པ་དང་། རྐང་པ་མེད་པ་དང་། བཤང་བ་རྣམ་པར་འཐོར་བྱེད་དང་། སྐོམ་པས་གདུངས་པ་དང་། བཤང་བ་འབྱེད་པ་དང་། རྣམ་པར་རེངས་བྱེད་དང་། མདོག་

66-1-161a

བཟངས་དང་། གཞང་སྨིན་བྱེད་དང་རྣམས་སོ། །ལྷ་བ་ལ་རྒྱུ་བར་བྱེད་པའི་སྲིན་གྱི་རིགས་བཅུ་པོ་རྣམས་ནི་འདི་ལྟ་སྟེ། སྤུ་ལ་གནས་པ་དང་། སྤྲོ་བ་མེད་པ་དང་། ཁ་ནག་དང་། གཟེར་ཟུག་ཆེན་པོར་བྱེད་པ་དང་། 
རྨོངས་པར་བྱེད་པ་དང་། མེ་མདོག་ཅན་དང་། འོག་ཏུ་འགྲོ་བ་དང་། ཨོའུ་ཊྚིང་ག་དང་། ཀུན་དུ་རྟོག་པ་དང་། དགའ་བ་པ་དང་རྣམས་སོ། །འདི་དག་རྣམས་ནི་ཇི་ལྟར་འདོད་པ་བཞིན་དུ་ལུས་ལ་རྒྱུ་བར་བྱེད་པ་ཡིན་ནོ། །ཁམས་ཐམས་ཅད་
ལ་འཇུག་པ་དང་། སྐྱོན་རྣམས་ཐམས་ཅད་ལ་འཇུག་པར་བྱེད་པའི་ཡན་ལག་དང་ཉིང་ལག་རྣམས་ཐམས་ཅད་ལ་གནས་པའི་སྲིན་དེ་དག་རྣམས་ལ། སྲིན་རྣམས་ལ་ཀུན་ཏུ་འཇུག་པར་བྱེད་པའི་རླུང་གིས་སྲིན་རྣམས་ཐམས་ཅད་
ལུས་ཀྱི་ནང་དུ་རྒྱུ་བས་ཇི་ལྟར་འདོད་པ་བཞིན་དུ་རླུང་གིས་འབེབས་པར་བྱེད་པ་ཡིན་ཏེ། བདག་གི་ལུས་དང་པོ་དང་སྲོག་སྲིན་རྣམས་ཐམས་ཅད་ཀྱང་ངོ་། །དེས་སྲིན་བུ་རྣམས་ལ་ཀུན་ཏུ་འཇུག་པར་བྱེད་པའི་རླུང་ལ་སོ་སོར་
བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིགས་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། དེས་ཐོས་པ་ལས་བྱུང་བའི་
ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སྟེང་འོག་དུ་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་པ་ཡང་། དེས་ཐོས་པ་
པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བ་ནི་སྟེང་དང་འོག་གི་རླུང་གལ་ཏེ་བདག་ལ་འཁྲུགས་པར་གྱུར་ན། དེ་རྣམ་པ་ལྔར་ལམ་ལྔ་ལ་རྗེས་སུ་རྟེན་པར་འགྱུར་རོ། །གནས་ལྔ་ལ་གནས་པ་ཡིན་ནོ། །
གནས་ལྔ་ལ་གནས་པར་གྱུར་ནས་ཀྱང་ལས་གང་དག་བྱེད་པ་ཡིན་ན། དབུགས་འབྱུང་བ་དང་རྔུབ་པ་རྣམས་ཀུན་དུ་རྒྱུ་བར་བྱེད་དོ། །དེ་ལ་འཇིག་རྟེན་འདི་ན་སྲོག་ཅེས་བརྗོད་དོ། །དེ་མགོ་བོ་དང་བྲང་ལ་ཀུན་དུ་བརྟེན་ནས་

66-1-161b

དེ་དག་གི་ནང་ན་རྒྱུ་བར་བྱེད་པ་ལུས་ཐམས་ཅད་ལ་སྟོབས་དང་ལྡན་པར་འཕྲོ་བར་བྱེད་པ་ཡིན་ནོ། །དེ་ཡང་གང་གི་ཚེ་མི་བཟད་པར་གྱུར་པ་ན་དེས་ལུས་ཀྱི་འཁྲུལ་འཁོར་རྣམ་པར་འཇིག་པར་བྱེད་དོ། །དེའི་ལས་ནི་ལུད་པ་དང་གློ་ལུ་བ་འོག་
ཏུ་སོང་བར་གྱུར་ནས་ཟས་ཁའི་ལམ་ནས་སྟེང་དུ་བྱེད་དོ། །དེའི་ལས་ཀྱིས་དབུགས་འབྱུང་བ་དང་རྔུབ་པ་འདི་དག་གི་ཆ་གཉིས་པ་བྲང་སྙིང་ལ་ལེགས་པར་བརྟེན་ནས་ཤིན་ཏུ་དགའ་བར་བྱེད་དོ། །གང་གི་ཚེ་ཡང་སྟེང་དུ་རྒྱུ་བར་གྱུར་
ན་དགའ་བ་དང་བྲལ་བར་ཡང་འགྱུར་ཏེ། དེ་མགྲིན་པའི་སྦུ་གུའི་གསེབ་ནས་སྟེང་དུ་འབྱུང་བར་འགྱུར་ཞིང་མགོ་བོ་རབ་ཏུ་བརྟོལ་བར་གྱུར་ནས་ལྕེའི་རྩ་བར་འགྲོའོ། །དེ་ལྕེ་ལ་བརྟེན་པར་གྱུར་ན་ནི་དེ་མ་ཐག་པའི་ཡིད་ཀྱི་ལྷན་
ཅིག་བྱེད་པའི་རྐྱེན་དང་ཕྲད་པས་ཡི་གེའི་བརྗོད་པ་རྣམ་པ་སྣ་ཚོགས་པ་རྟོགས་པ་དང་སྤྱོད་པ་དང་ལྡན་པ་རྣམས་རྗོད་པར་བྱེད་དོ། །ཆ་གསུམ་པས་ཀྱང་རྟག་པར་རྒྱུན་ཏུ་ལུས་ཀྱི་མེ་དྲོད་འཕེལ་བར་བྱེད་དོ། །སྐྱོན་ཡང་དེས་
འདུག་པར་བྱེད་དོ། །བཞི་པས་ནི་རང་གི་ལུས་ལ་ཁྱབ་པར་གྱུར་ནས་ངེས་པར་གནས་སོ། །རྟག་ཏུ་མིག་འཛུམས་པ་དང་འབྱེད་པར་བྱེད་པ་པོ་དེ་ལ་བརྟེན་ནས་རྐེད་པ་དང་། རྒྱུ་ཞབས་དང་། བརླ་དང་། རླིག་པ་དང་། 
རྣམས་ལ་རྟེན་ཅིང་བཤང་བའི་ལམ་ལ་རྟེན་པར་བྱེད་དོ། །དེས་ཀྱང་ལྟོ་རྒྱས་པར་བྱེད་དེ་བུད་མེད་རྣམས་ནི་འགྲིབ་པར་བྱེད་དོ། །ཨན་ཏོང་རུས་པ་ལ་བརྟེན་ནས་གང་གི་ཚེ་བུད་མེད་དག་ཁུ་ཆུ་དང་ཁྲག་རྣམས་ཀུན་ཏུ་
སྦྱོར་བར་གྱུར་པ་ན། བུད་མེད་ཀྱི་རྒྱུ་ཞབས་ཀྱི་གནས་སུ་ཤུགས་དང་ལྡན་པར་ཀུན་དུ་རྒྱུག་པར་གྱུར་ནས་དེས་ཁུ་ཆུ་དང་ཁྲག་ཀུན་དུ་འདྲེ་བར་བྱེད་དོ། །སླ་མོ་རྣམས་ནི་ཡང་བར་བྱེད་དོ། །གང་གི་ཚེ་ཟས་རྣམ་
པར་འཇུ་བར་བྱེད་པ་ན་ཆ་གསུམ་པ་འདོད་པའི་མེའི་བྱ་བས་གསལ་བར་བྱས་ནས་རྣམ་པར་འབྱེད་པར་བྱེད་དོ། །རྣམ་པར་རྟོག་པས་ལུས་རིང་བ་དང་། ཐུང་བ་དང་། ཟླུམ་པོ་དང་། གྲུ་བཞི་ཡང་བྱེད་དོ། །

66-1-162a

རླུང་དེས་ཇི་ལྟ་ཇི་ལྟར་ལུས་མངོན་པར་གསལ་བ་དང་། ཚད་དང་། དབྱིབས་རྣམས་མངོན་པར་འབྲེལ་བར་བྱེད་པ་དེ་བཞིན་དུ་རྣམ་པར་ཤེས་པ་ཡང་རྣམ་པ་སྣ་ཚོགས་པའི་མཚན་ཉིད་དུ་འབྲེལ་བར་འགྱུར་རོ། །དཔེར་ན་
ཞོ་སྐ་མོ་དང་ཆུ་བུད་མེད་ཀྱིས་བུམ་པར་སྡུད་པར་བྱེད་དོ། །བསྲུབས་པས་སྐ་མོ་དབུ་བ་རྡོས་པར་འགྱུར་རོ། །དབུ་བ་རྡོས་ནས་འཐས་པར་འགྱུར་རོ། །འཐས་པ་ལས་མར་སར་དུ་འགྱུར་རོ། །དེ་ཁོ་ན་བཞིན་དུ་རླུང་ཡང་ལུས་ལ་ཉོན་མོངས་
པ་རྣམས་ཐམས་ཅད་དང་བཅས་ནས་ཀུན་དུ་མངོན་པར་འཇུག་གོ། །ཆ་ལྔ་པས་ནི་ཟོས་པ་དང་། འཐུངས་པ་དང་། འཆོས་པ་དང་། མྱངས་པར་གྱུར་པ་རྣམས་གང་གི་ཚེ་ལྕེའི་རྩེ་མོ་དང་སྦུ་གུ་ལ་རབ་ཏུ་བརྟེན་པར་གྱུར་པའི་ཟས་རྣམས་
དས་སྐྲ་རྣམས་ཀྱི་མཐའ་ནས་བཟུང་ནས་ཇི་སྲིད་དུ་སེན་མོ་རྣམས་ལ་བརྩོན་འགྲུས་ཀྱིས་རྣམ་པར་འབྱེད་པར་བྱེད་དོ། །རོ་དང་། ཁ་དོག་དང་། དྲི་རྣམས་ཀྱང་ལུས་ཐམས་ཅད་ལ་བྱེད་དོ། །གང་གི་ཚེ་ཡང་ཟས་སྟེང་དུ་བྱེད་པར་གྱུར་
པའི་རླུང་འཁྲུགས་པར་གྱུར་ན་ནི་དེས་རྣམ་པ་ལྔར་ཆགས་པ་དང་བྲལ་བར་འགྱུར་བའི་ལས་ལྔ་བྱེད་པ་ཡིན་ཏེ། སྟེང་དུ་དབུགས་འབྱུང་བར་འགྱུར་བའི་དབུགས་མི་འབྱུང་བར་བྱེད་དོ། །དེས་ལུས་ཀྱི་ཁམས་རྣམས་ཐམས་ཅད་
ལ་ལྷང་ཀྱོག་ཆེན་པོ་འབྱུང་བར་འགྱུར་རོ། །ལྷང་ཀྱོག་གིས་ཀྱང་ལུས་ཡོངས་སུ་བཏང་ནས་འཁྲུགས་པར་གྱུར་པའི་ལས་གསུམ་པ་བྱེད་དོ། །དབང་པོ་རྣམས་ཐམས་ཅད་དང་ཤེས་པ་རྣམས་ཐམས་ཅད་ཀྱང་རྣམ་པར་
དཀྲུག་པར་བྱས་ནས་ལུས་ཀྱང་འདོར་བར་བྱེད་དོ། །ལུས་ཡོངས་སུ་དོར་བས་ཀྱང་གསུམ་འཇོམས་པར་འགྱུར་ཏེ། སྲོག་དང་དྲོད་དང་དེ་ནས་ནི་རྣམ་པར་ཤེས་པའོ། །འདི་ལ་ཚིགས་སུ་བཅད་པ། སྲོག་དྲོད་དེ་ནས་རྣམ་པར་
ཤེས། །གང་ཚེ་ལུས་འདི་བཏང་བ་ན། །ཇི་ལྟར་ཤིང་བཞིན་ས་ལ་ནི། །འགྱེལ་ནས་དེ་ཚེ་ཉལ་བ་ཡིན། །འཁྲུགས་པར་གྱུར་པའི་ལས་གཉིས་པ་ཡང་བྱེད་དོ། །དབུགས་ཐུང་ངུ་འབྱུང་བར་བྱེད་ཀྱི་དབུགས་རིང་པོ་འབྱུང་

66-1-162b

བར་ནི་མི་བྱེད་དེ། དེ་ལས་ཀྱང་ལུས་རྣམས་ཐམས་ཅད་ལ་རྒྱུག་པའི་ཟུག་གཟེར་ཆེན་པོ་འབྱུང་བར་འགྱུར་རོ། །ཟུག་གཟེར་གྱིས་ཀྱང་ལུས་ཡོངས་སུ་བཏང་བར་འགྱུར་རོ། །འཁྲུགས་པར་འགྱུར་བའི་ལས་གསུམ་པ་
རྣམས་བྱེད་དེ། དབང་པོ་རྣམས་ཐམས་ཅད་དང་ཤེས་པ་རྣམས་ཐམས་ཅད་ཀྱང་རྣམ་པར་གཡེང་བར་བྱས་པས་འདུ་ཤེས་མེད་པར་ཡང་བྱས་ནས་ལུས་འདོར་བར་ཡང་བྱེད་དོ། །འཁྲུགས་པར་འགྱུར་བའི་ལས་བཞི་པ་བྱེད་
པ་ཡིན་ཏེ། བརྒྱ་ལམ་ན་དབུགས་འབྱུང་བ་སྟོབས་དང་ལྡན་པར་གྱུར་པས་སམ། གལ་ཏེ་ཤེད་ན་དམན་པར་གྱུར་པས་ཀྱང་ལུས་འདོར་བར་བྱེད་པ་འམ། མ་ཡིན་པ་འམ་ཉལ་བའི་འདུ་ཤེས་ཀྱི་དབུགས་དང་ལྡན་པར་
གྱུར་པས་འཚོ་བ་འཛིན་པར་བྱེད་དོ། །དེས་སྟེང་འོག་གི་རླུང་རྣམས་རིག་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་
སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཀུན་རྫོགས་པར་བྱེད་པ་
ཞེས་བྱ་བའི་རླུང་ལུས་ལ་རབ་ཏུ་གནས་ཏེ་ཆ་བར་གྱུར་པ་དང་རྗུད་པར་ཡང་བྱེད་དོ། །སེམས་ཀྱི་རྒྱུད་བརྟན་པར་ཡང་བྱེད་དོ། །གལ་ཏེ་འཁྲུགས་པར་གྱུར་ན་ནི་དེས་ཀྱང་སེམས་ཀྱི་རྒྱུན་ཙབ་ཧྲལ་ཅན་དུ་བྱེད་དོ། །རྣམ་པར་
ཤེས་པ་གོམས་པར་བྱས་པ་ཡང་ཉམས་པར་བྱེད་དོ། །ཐོས་པ་རྣམས་ཀྱང་གཞན་དུ་བྱེད་དོ། །དེས་མཐོང་བར་གྱུར་པ་རྣམས་ཀྱང་མི་མཐོང་བར་བྱེད་དོ། །དེ་བཞིན་དུ་རྣ་བས་ཀྱང་སྒྲ་རྣམས་མི་ཐོས་པར་བྱེད་དོ། །
དེ་བཞིན་དུ་དྲི་བསྣོམ་པར་མི་བྱེད་ཅིང་དེ་བཞིན་དུ་རོ་མྱང་བར་མི་བྱེད་ལ་དེ་བཞིན་དུ་ལུས་ཀྱི་རེག་བྱ་རྣམས་འཛིན་པར་མི་བྱེད་དོ། །དེ་བཞིན་དུ་ཡིད་ཀྱིས་ཆོས་རྣམས་མི་ཤེས་སོ། །བདག་ཉིད་རང་དང་གཞན་རྣམས་ཤེས་པར་མི་འགྱུར་

66-1-163a

རོ། །དེས་ཀུན་རྫོགས་པར་བྱེད་པའི་རླུང་རིག་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ་
བདག་གི་རླུང་གང་དག་གིས་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སེམས་ཀྱི་རྒྱུད་ཀུན་དུ་སུན་འབྱིན་པའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེས་
འཁྲུགས་པར་གྱུར་པ་འམ་འཁྲུགས་པར་མ་གྱུར་ན། བདག་ལ་ལས་ཅི་ཞིག་བྱེད་པ་ཡང་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བ་ན། གལ་ཏེ་བདག་ལ་སེམས་ཀྱི་རྒྱུད་ཀུན་ནས་སུན་འབྱིན་པའི་
རླུང་འཁྲུགས་པར་གྱུར་ན། དེ་བདག་གི་སེམས་རྒྱུ་བར་བྱེད་པའི་ལམ་ཀུན་དུ་སུན་འབྱིན་པར་བྱེད་དོ། །བསྐྱོད་པར་བྱེད་དོ། །རེངས་པར་བྱེད་དོ། །ཤིན་དུ་སྐམས་པར་བྱེད་དོ། །རྣམ་པར་གཡེང་བར་ཡང་བྱེད་དོ། །ཀུན་དུ་རྨོངས་པར་ཡང་
བྱེད་དོ། །བདག་གིས་ཟོས་པར་གྱུར་པ་རྣམས་ཀྱང་ལམ་ནས་ཡང་དག་པར་ཡོངས་སུ་བཞུ་བར་མི་འགྱུར་རོ། །དེས་རང་གི་སེམས་རྣམ་པར་གཡེང་བར་འགྱུར་རོ། །དེ་ཡིས་བདག་གི་སེམས་དགེ་བའི་ཆོས་རྣམས་ལ་མངོན་པར་དགའ་
བར་མི་བྱེད་དོ། །རྟག་ཏུ་ཡང་བདག་གི་ལུས་ལས་རྔུལ་ཀུན་དུ་འབྱུང་ངོ་། །བདག་གི་ཁ་ནས་ལྦུ་བ་ཡང་འབྱུང་བར་འགྱུར་རོ། །གྲང་མོར་གྱུར་པའི་རེག་བྱ་རྣམས་ཀྱང་བདག་གིས་མི་བཟོད་དོ། །གང་ཡང་བདག་གིས་གཟུགས་རྣམས་
མཐོང་བར་གྱུར་པ་དེ་དག་རྣམས་ནི་མི་གསལ་བར་ཡོངས་སུ་འཛིན་ཏོ། །བདག་གི་ལུས་པོ་དག་ལྕི་བར་ཡང་འགྱུར་རོ། །འོན་ཀྱང་བདག་ལ་དེ་དག་ལ་མཐུ་སྟོབས་ཡང་མེད་དོ། །བདག་གི་ལུས་ཤིན་དུ་རྒུད་པར་འགྱུར་རོ། །དེས་
སེམས་སུན་འབྱིན་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། 

66-1-163b

བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འཁྲུགས་པར་བྱེད་པ་ཞེས་
བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་གལ་ཏེ་འཁྲུགས་པར་གྱུར་ན། བདག་གིས་རྨི་ལམ་ན་རྨི་ལམ་གྱི་བྱ་བ་རྣམས་བྱེད་པར་མཐོང་ངོ་། །བདག་ཉལ་བར་གྱུར་པ་ཡང་རྣམ་པར་འཁྲུལ་བར་བྱེད་དོ། །བདག་གི་དྲོད་
རྣམས་ཐམས་ཅད་ཤིན་དུ་གྲང་བའི་སྟོབས་དང་ལྡན་པར་འགྱུར་རོ། །གྲོང་ཁྱེར་དང་ཁང་པ་རྣམས་ཀྱང་བདག་གིས་ཤིན་དུ་སྟོང་པར་མཐོང་ངོ་། །བདག་གི་མདོག་སྐྱ་བོར་འགྱུར་རོ། །བདག་གི་ལུས་ངག་གི་བྱེད་པ་རྣམས་ཉུང་བར་འགྱུར་རོ། །
མལ་སྟེན་ལ་བདག་གི་བདེ་བ་རྙེད་པར་མི་འགྱུར་རོ། །གང་ཡང་བདག་གིས་ཆོས་རྣམས་མངོན་སུམ་དུ་བྱས་པ་དེ་དག་རྣམས་ཀྱང་བདག་ཤིན་དུ་མངོན་པར་འདོད་པར་མི་འགྱུར་རོ། །བདག་གི་འབྱུང་བ་ཆེན་པོ་རྣམས་ཐམས་
ཅད་ཀྱང་ཀུན་དུ་འཁྲུགས་པར་བྱེད་དོ། །ཟོས་པར་གྱུར་པའི་བདག་གི་འབྱུང་བ་ཆེན་པོ་རྣམས་ཐམས་ཅད་དང་། བཟོད་པ་རྣམས་ཀྱང་བདག་གི་སྙིང་གི་ཕྱོགས་ན་ཀུན་ཏུ་གནས་པར་འགྱུར་བ་དང་། བདག་གློ་བུར་དུ་ཚོར་བ་མེད་པར་
ཡང་འགྱུར་རོ། །བདག་གིས་ཐལ་བའི་ཕུང་པོ་ཡང་གློ་བུར་དུ་མཐོང་བར་འགྱུར་རོ། །གལ་ཏེ་ཡང་འཁྲུགས་པར་མ་གྱུར་ན་ནི་ཇི་སྐད་དུ་བཤད་པའི་ནད་དེ་དག་རྣམས་འབྱུང་བར་མི་འགྱུར་རོ། །དེས་ཀུན་དུ་འཁྲུགས་པར་བྱེད་པའི་
རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་
དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མིག་འབྱེད་པ་དང་འཛུམས་པར་བྱེད་པ་ཞེས་བྱ་བའི་བདག་གི་

66-1-164a

རླུང་ལུས་ལ་རབ་ཏུ་གནས་པ་ཡིན་ཏེ། དེ་གལ་ཏེ་འཁྲུགས་པར་གྱུར་ན་དེས་བདག་གི་མིག་འབྱེད་པ་དང་འཛུམས་པར་ཡང་མི་བྱེད་དོ། །དེ་ལྟར་ཡན་ལག་དང་ཉིང་ལག་རྣམས་ཐམས་ཅད་ལ་རྒྱུ་བ་དང་། རྩ་རྣམས་
ཐམས་ཅད་ལ་རྒྱུ་བ་དང་། དབང་པོ་རྣམས་ཐམས་ཅད་རྨོངས་ཤིང་ཞེན་པར་བྱེད་པའི་རླུང་མྱུར་བ་ནི་བདག་གིས་གཅིག་ཀྱང་མ་མཐོང་ངོ་། །འབྱེད་པ་དང་འཛུམས་པར་བྱེད་པའི་རླུང་གལ་ཏེ་འཁྲུགས་པར་གྱུར་ན་ནི། ཇི་སྐད་དུ་བཤད་པའི་ནད་དེ་དག་
རྣམས་རབ་ཏུ་འབྱུང་བར་མི་འགྱུར་རོ། །འབྱེད་པ་དང་འཛུམས་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རྟོགས་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་
གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ་བདག་གི་རླུང་གཞན་གང་དག་གིས་འཁྲུགས་པར་གྱུར་པ་འམ་འཁྲུགས་པར་མ་གྱུར་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་
སམ་ལྷའི་མིག་གིས་མཐོང་བར་གྱུར་པ། ཕན་ཚུན་ཀུན་དུ་དཀྲུག་པར་བྱེད་པའི་རླུང་ལྔ་བདག་ལ་འཆི་བའི་དུས་ན་འབྱུང་བར་འགྱུར་ཏེ། དེ་འཁྲུགས་པར་གྱུར་པ་འམ་འཁྲུགས་པར་མ་གྱུར་པ་ན། བདག་འཆི་བར་གྱུར་པའི་
དུས་ན་ལས་ཅི་ཞིག་བྱེད་པར་འགྱུར་བ་ཡིན་ན། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་རྣམས་ཀུན་དུ་འགག་པར་བྱེད་དོ། །རང་རང་གི་ཡུལ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་རྣམས་ཀྱང་སྟེ་
གལ་ཏེ་འཁྲུགས་པར་མ་གྱུར་ན་ནི་དེས་བདག་མྱུར་བར་འཆི་བར་བྱེད་པར་མི་འགྱུར་རོ། །དེས་ཕན་ཚུན་འཁྲུགས་པར་བྱེད་པར་ལྔའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་
བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་

66-1-164b

པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མངལ་ཀུན་དུ་ཆགས་པར་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེས་བདག་དང་པོ་མངལ་དུ་སྐྱེ་བར་གྱུར་པ་ན། གལ་ཏེ་
ཐ་མལ་པའི་ལས་ཀྱི་རྐྱེན་ཀྱིས་བདག་ནུར་ནུར་པོའི་ནང་དུ་དེས་སྲོག་དང་འབྲེལ་བར་བྱེད་དོ། །ནུར་ནུར་པོ་ལ་གནས་པར་གྱུར་པ་ན། གལ་ཏེ་ཡང་སྲོག་དང་བྲལ་བར་མ་གྱུར་ན་མེར་མེར་པོ་ལ་གནས་པ་ན་འབྲལ་བར་མི་བྱེད་དོ། །
ནར་ནར་པོ་ལ་གནས་པར་གྱུར་ན་ཡང་འབྲལ་བར་མི་བྱེད་དོ། །དེས་ལུས་ཀྱི་ཆ་ཤས་རྣམས་ཐམས་ཅད་དོད་པ་ན་འབྲལ་བར་བྱེད་དོ། །ཡན་ལག་དང་ཉིང་ལག་རྣམས་ཐམས་ཅད་འགྱུས་པ་ལ་ནི་སྲོགས་འཕྲོག་པར་མི་བྱེད་དོ། །དེས་
བདག་གི་དབང་པོ་རྣམས་དོད་པར་བྱས་ནས་འཕྲོག་པར་བྱེད་དོ། །སྐྱེ་བ་གཞན་གང་ཡང་རུང་བ་རྣམས་ལ་ཇི་ལྟ་ཇི་ལྟར་སྲོག་གཅོད་པ་ཤིན་དུ་ལྕི་བ་རྣམས་བྱས་པར་གྱུར་ན། དེ་ལྟ་དེ་ལྟར་འདིའི་མངལ་ནས་བཟུང་ནས་ཤིན་དུ་མྱུར་བར་
སྲོག་དང་བྲལ་བར་བྱེད་དོ། །གལ་ཏེ་ཡང་འདིས་སྐྱེ་བ་གཞན་གང་ཡང་རུང་བ་རྣམས་སུ་སྲོག་གཅོད་པ་མ་བྱས་པར་གྱུར་ན་ནི་འཆི་བར་འགྱུར་བ་ཇི་སྐད་དུ་བཤད་པ་དེ་དག་རྣམས་ཤིན་དུ་མྱུར་བར་འབྱུང་བར་མི་འགྱུར་རོ། །དེས་
མངལ་འཕེལ་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་
ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མངལ་
འཇིག་པར་བྱེད་པ་ཞེས་བྱ་བའི་རླུང་ལུས་ལ་གནས་པ་ཡིན་ཏེ་དེ་འཁྲུགས་པ་འམ་མ་འཁྲུགས་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གལ་ཏེ་བདག་གི་མངལ་

66-1-165a

འཇིག་པར་བྱེད་པའི་རླུང་འཁྲུགས་པར་གྱུར་ན། འདོད་པས་ལོག་པར་གཡེམ་པའི་རྐྱེན་དང་ལྡན་པས་རང་བཞིན་སུན་འབྱིན་པར་བྱེད་པ་ཡིན་ཏེ། བདག་སྐྱེས་པར་གྱུར་ནས་མངལ་ན་གནས་པ་ལས་དེས་བུད་མེད་དམ་མ་ནིང་དུ་
ཡང་བྱེད་དོ། །ཐམས་ཅད་དུ་ཡང་མངལ་འཕོ་བར་བྱེད་པ་ཡིན་ཏེ། ཉེས་པར་བྱས་པའི་ལས་ཅན་རྣམས་ལའོ། །གལ་ཏེ་ཡང་མངལ་འཇིག་པར་བྱེད་པའི་རླུང་སྔོན་ཉེས་པར་བྱས་པའི་ལས་རྣམས་ཀྱི་རྐྱེན་དང་ལྡན་པར་གྱུར་པས་
འཁྲུགས་པར་མ་གྱུར་ན་ནི་ཇི་སྐད་དུ་བཤད་པའི་མངལ་གྱི་རྣམ་པར་འགྱུར་བའི་ནད་དེ་དག་རྣམས་འབྱུང་བར་མི་འགྱུར་རོ། །དེས་མངལ་འཇིག་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་
དུ་ལུས་རབ་ཏུ་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་
ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གལ་ཏེ་བདག་འགྲོ་བ་དང་། འོང་བ་དང་། རྒྱུག་པ་དང་། མཆོང་བར་བྱེད་པའི་རླུང་འཁྲུགས་པ་དང་མ་འཁྲུགས་
པར་གྱུར་པ་ན་སྟེ། དེས་བདག་སྐྱོག་པོར་འགྱུར་རོ། །ལག་པ་དག་ཀྱང་འཁུམ་པར་འགྱུར་རོ། །རྒུར་པོར་ཡང་འགྱུར་རོ། །གནས་དང་གནས་སུ་ཡང་འགྲོ་བར་མི་ནུས་སོ། །བདག་གི་ཟས་དང་གནས་དང་ཀུན་དགའ་ར་
བ་རྣམས་སུ་ཡང་འགྲོ་བར་མི་ནུས་སོ། །བདག་གི་ལུས་ཀྱི་དབང་པོའི་བློ་རྣམས་དང་ཡིད་ཀྱང་རབ་ཏུ་དང་བར་མི་འགྱུར་རོ། །གལ་ཏེ་འཁྲུགས་པར་མ་གྱུར་ན་ནི་དེས་བདག་གི་ལུས་འགྲོ་བ་དང་འོང་བ་རྣམས་ནུས་པར་འགྱུར་རོ། །
བདག་གིས་རྒྱུག་པ་དང་། མཆོང་བ་དང་། འཛེག་པ་རྣམས་ཀྱང་ནུས་པར་འགྱུར་རོ། །དེས་འགྲོ་བ་དང་། འོང་བ་དང་། རྒྱུག་པ་དང་། མཆོང་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་

66-1-165b

སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་འམ་འཁྲུགས་པར་མ་གྱུར་པ་ན་ལས་ཅི་ཞིག་
བྱད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བདག་གི་མིག་དང་། རྣ་བ་དང་། སྣ་དང་། ལྕེ་དང་། ལུས་རྣམས་ཀྱི་སོ་སོར་ལས་བྱེད་པའི་རླུང་ལྔ་པོ་རྣམས་སོ་སོར་རྒྱུ་བར་
བྱེད་དོ། །དེ་ལ་རླུང་གཅིག་ནི་མིག་དང་ལྷན་ཅིག་ཏུ་གྱུར་པའི་འབྱུང་བ་བཞི་ལས་ཤིན་དུ་གཡོ་བར་བྱེད་པས་ན་རླུང་ཡིན་ཏེ། དེས་ན་འདི་ལ་ནི་རླུང་ཞེས་བརྗོད་དོ། །དེས་གལ་ཏེ་བདག་གི་མིག་རབ་ཏུ་དང་བར་བྱེད་པར་གྱུར་ན་ནི་
གང་གིས་བདག་གི་འབྱུང་བ་ཆེན་པོ་རྣམས་རབ་ཏུ་དང་བར་བྱས་པས་གཟུགས་རྣམས་ལྟ་བར་བྱེད་པ་ལ་ནུས་པ་དང་ལྡན་པར་འགྱུར་རོ། །རྣ་བ་ལ་ཡང་བདག་གི་རླུང་གཞན་རབ་ཏུ་གནས་པ་ཡིན་ཏེ། དེས་སྒྲ་རྣམས་
འཛིན་པར་བྱེད་པ་ལ་བདག་ནུས་པ་དང་ལྡན་པར་འགྱུར་རོ། །དེ་བཞིན་དུ་སྣས་དྲི་རྣམས་འཛིན་པར་བྱེད་པ་ཡིན་ཏེ། དེ་ལྟར་སྣས་ནུས་པར་འགྱུར་བ་ཡིན་ནོ། །དེ་ལྟར་བདག་གི་ལྕེས་ཀྱང་རོ་རྣམས་མྱང་བར་བྱེད་པ་
ཡིན་ནོ། །དེ་ལྟར་བདག་གི་ལུས་ཀྱིས་ཀྱང་རེག་བྱ་རྣམས་འཛིན་པར་བྱེད་པ་ཡིན་ནོ། །དེ་ལྟར་ཡང་རླུང་ལྔ་པོ་རྣམས་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གལ་ཏེ་ཡང་རླུང་དེ་དག་རྣམས་ཀྱང་
འཁྲུགས་པར་གྱུར་ན་ནི་ཇི་སྐད་དུ་བཤད་པར་གྱུར་པའི་ཡུལ་དེ་དག་རྣམས་ལ་དབང་པོ་རྣམས་ནུས་པ་མེད་པར་འགྱུར་རོ། །དེས་མིག་དང་། རྣ་བ་དང་། སྣ་དང་། ལྕེ་དང་། ལུས་རྣམས་ལ་གནས་པར་གྱུར་པའི་རླུང་ལྔ་པོ་
རྣམས་ཤེས་པར་གྱུར་པ་དག་གིས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་

66-1-166a

གང་དག་ལུས་ལ་རབ་ཏུ་གནས་པ་ཡིན་ལ། དེ་བདག་ལ་འཁྲུགས་པར་གྱུར་པ་འམ་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་
མཐོང་བར་གྱུར་པ། གྲོག་མ་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་ཏེ། དེས་འཁྲུགས་པ་དང་མ་འཁྲུགས་པ་ན་བདག་ལ་ལས་ཅི་ཞིག་བྱེད་པ་ཡིན་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་
སམ་ལྷའི་མིག་གིས་མཐོང་བར་གྱུར་པ་ནི་གལ་ཏེ་གྲོག་མ་པའི་རླུང་བདག་འཆི་བའི་དུས་སུ་གྱུར་པ་ན་ཤིན་དུ་འཁྲུགས་པ་སྐྱེས་པར་གྱུར་ན་ནི་དེས་བདག་གི་ལྤགས་པ་དང་། ཁྲག་དང་། ཤ་དང་། ཚིལ་དང་། རུས་པའི་འདུ་ཤེས་
དང་། ཁུ་ཆུ་ཡང་སྟེ། ཁམས་དེ་དག་རྣམས་ཐམས་ཅད་ཀྱང་སྐམས་པར་བྱེད་དོ། །ཀུན་དུ་སྒུལ་བར་འགྱུར་རོ། །འཇུག་པར་འགྱུར་རོ། །ཀུན་དུ་སྐམས་པར་གྱུར་ནས་ཀྱང་བདག་འཆི་བའི་དུས་ཀྱི་ཚེ་ན་དེ་ལྟར་ཚོར་བ་རྣམས་
བྱེད་པར་འགྱུར་རོ། །རབ་ཏུ་འབར་བར་གྱུར་པའི་ལྕགས་ཀྱི་རང་བཞིན་གྱི་གྲོག་མ་སྟོང་ཕྲག་རྣམས་གལ་ཏེ་ལུས་ལ་བཅུག་པར་གྱུར་ན་ཡང་དེའི་བཅུ་དྲུག་གི་ཆར་ཡང་མི་ཕོད་དོ། །གལ་ཏེ་ཡང་བདག་འཆི་བར་གྱུར་པའི་དུས་ན་
ཤིན་དུ་སྟོབས་ཆེ་བར་འཁྲུགས་པར་མ་གྱུར་ན་ལེགས་པར་བྱས་པའི་ལས་རྣམས་ཀྱི་རང་བཞིན་གྱིས་དེས་བདག་ལ་ཤིན་དུ་མི་བཟད་པའི་ཚོར་བ་རྣམས་འབྱུང་བར་མི་འགྱུར་རོ། །དེས་གྲོག་མ་པར་གྱུར་པའི་རླུང་ལ་སོ་སོར་
བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་
གིས་འཁྲུགས་པར་གྱུར་པ་འམ་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཁབ་པ་ཞེས་བྱ་བའི་རླུང་བདག་གི་ལུས་ལ་

66-1-166b

རབ་ཏུ་གནས་པ་ཡིན་ཏེ། དེས་འཁྲུགས་པ་དང་མ་འཁྲུགས་པ་ན་བདག་ལ་ལས་ཅི་ཞིག་བྱེད་པ་ཡིན་པ་ཡང་། དེས་ཐོས་པ་ལས་བྱུང་བའི་ཤེས་རབ་དག་གིས་སམ་ལྷའི་མིག་གིས་མཐོང་བར་གྱུར་པ་ནི། གལ་ཏེ་བདག་
འཆི་བར་གྱུར་པའི་དུས་སུ་ཁབ་ལྟ་བུའི་རླུང་དེ་འཁྲུགས་པར་གྱུར་ན། དེས་བདག་གི་ལུས་སུ་གྱུར་པ་རྣམས་ཐམས་ཅད་དང་། ཚིགས་སུ་གྱུར་པ་རྣམས་ཐམས་ཅད་དང་། གནད་དུ་གྱུར་པ་རྣམས་ཐམས་ཅད་དང་། རྒྱུས་
པར་གྱུར་པ་རྣམས་ཐམས་ཅད་དང་། རྒྱུས་པའི་གསེབ་ཏུ་གྱུར་པ་རྣམས་ཐམས་ཅད་དང་། ཁོག་པར་གྱུར་པ་རྣམས་ཐམས་ཅད་དང་། སྤུའི་ཁུང་བུར་གྱུར་པ་རྣམས་ཐམས་ཅད་དང་ཤའི་དུམ་བུར་གྱུར་པ་རྣམས་ཐམས་ཅད་
དང་། ལྷ་བར་གྱུར་པ་རྣམས་ཐམས་ཅད་དང་། རུས་པར་གྱུར་པ་རྣམས་ཐམས་ཅད་ལ་ཡང་རབ་ཏུ་འབར་བར་འགྱུར་ཞིང་ཁབ་དང་འདྲ་བར་གྱུར་པ་རྣམས་ཀྱིས་ལུས་ཐམས་ཅད་ལ་ཁྱབ་པར་བྱེད་དེ་དེས་དེ་བཞིན་དུ་བདག་
ལ་ཚོར་བ་རྣམས་བྱེད་པར་འགྱུར་རོ། །དཔེར་ན་ཁབ་བརྒྱ་སྟོང་ཕྲག་མང་པོ་རབ་ཏུ་འབར་བར་གྱུར་པ་རྣམས་ལུས་ཐམས་ཅད་ལ་རབ་ཏུ་བཙུགས་པར་གྱུར་པས་ཀྱང་བཅུ་དྲུག་གི་ཆར་ཡང་ཆོག་པར་ཡང་མི་འགྱུར་རོ། །
གལ་ཏེ་ཡང་སྔོན་ལེགས་པར་བྱས་པའི་ལས་རྣམས་ཀྱི་གཟི་བརྗིད་ཀྱིས་བདག་འཆི་བའི་དུས་ཀྱི་ཚེ་ན་ཁབ་ལྟ་བུའི་རླུང་ཤིན་དུ་སྟོབས་ཆེ་བར་མི་འགྱུར་ལ། དེས་ཇི་སྐད་དུ་བཤད་པར་གྱུར་པའི་ཚོར་བ་རྣམས་མི་བཟད་པར་མི་འགྱུར་རོ། །
དེས་ཁབ་ལྟ་བུའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། 
བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལུས་ལ་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མཁྲིས་

66-1-167a

པ་ཀུན་ནས་སུན་འབྱིན་པ་ཞེས་བྱ་བའི་རླུང་ལུས་ལ་རབ་ཏུ་གནས་ཏེ། དེས་འཁྲུགས་པར་གྱུར་ན་ཡང་བདག་ལ་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་
མཐོང་བར་གྱུར་པ་ནི། གལ་ཏེ་མཁྲིས་པ་ཀུན་ནས་སུན་འབྱིན་པ་ཞེས་བྱ་བའི་རླུང་འཁྲུགས་པར་གྱུར་ན། དེས་བདག་གི་གསུས་པ་ན་གནས་པར་གྱུར་པའི་མཁྲིས་པ་སུན་ཕྱུང་ནས་ཁ་སྐམས་པར་བྱེད་པ་ཡིན་ནོ། 
ལུས་ཐམས་ཅད་ནི་སེར་སྐྱར་བྱེད་པ་དང་། སེན་མོ་དང་། མིག་དང་། ཁ་དང་རྣམས་ཀྱང་སེར་པོར་བྱས་ནས་གསུས་པ་ཐང་བར་བྱེད་དོ། །སྔོན་པོ་དང་སེར་པོའི་རྩ་རྣམས་བདག་གི་གསུས་པའི་སྟོད་དུ་སྐྱེ་བར་བྱེད་དོ། །བདག་
སྤྲོ་བ་མེད་པར་ཡང་འགྱུར་རོ། །ཟོས་པ་རྣམས་ཀྱང་ཤིན་དུ་འཇུ་བར་མི་འགྱུར་བ་དང་། བདག་གི་ཁ་ཁ་བར་ཡང་འགྱུར་རོ། །བདག་གི་ཆུ་ངན་ཡང་སེར་པོར་འགྱུར་རོ། །ལུས་ཐམས་ཅད་སྐམ་པོར་སྐྱེད་པར་བྱེད་དོ། །བདག་
གིས་གཟུགས་རྣམས་ཐམས་ཅད་ཀྱང་སྔོན་པོ་དང་སེར་པོ་དང་སྔོ་བསངས་སུ་མཐོང་བར་འགྱུར་རོ། །འོན་ཀྱང་བདག་གིས་ལངས་ནུས་པར་ཡང་མི་འགྱུར་རོ། །རྟག་ཏུ་ཡང་བདག་གི་གསུས་པ་སྒྲ་དང་བཅས་པར་ཡང་འགྱུར་
རོ། །གལ་ཏེ་ཡང་བདག་གི་མཁྲིས་པ་ཀུན་དུ་སུན་འབྱིན་པར་བྱེད་པའི་རླུང་འཁྲུགས་པར་མ་གྱུར་ན་ནི་ཇི་སྐད་དུ་བཤད་པའི་ནད་དེ་དག་རྣམས་རྒྱས་པར་མི་འགྱུར་རོ། །དེས་མཁྲིས་པ་ཀུན་དུ་སུན་འདོན་པར་བྱེད་པའི་རླུང་
ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རྟོགས་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་
གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་གང་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྒྱུ་མ་འབྱེད་པ་ཞེས་བྱ་བའི་

66-1-167b

རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་བདག་ལ་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་
གལ་ཏེ་རྒྱུ་མ་འབྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ལས། དེ་གལ་ཏེ་འཁྲུགས་པར་གྱུར་ན། དེས་ཀྱང་བདག་གིས་ཟོས་པར་གྱུར་ནས་ལྕེའི་མཐར་སོང་བ་ན་ཡང་རུང་སྟེ། ཤིན་དུ་བར་ཡང་འདས་ཤིང་རུས་
པའི་ཀྲེང་ཏོར་རམ་ལུས་ཀྱི་གྲེ་བ་འབིགས་པར་བྱེད་དོ། ། དེ་ཡིས་ཟས་ཀྱི་རོ་རྣམས་ལུས་ཀྱི་གསེབ་ཏུ་ངེས་པར་འགྲོའོ། །ངེས་པར་ཟས་ཀྱི་རོ་རྒྱུ་མའི་གསེབ་ཏུ་སོང་བར་གྱུར་པས་ཀྱང་བདག་གི་གསུས་པ་འཕེལ་བར་
ཡང་འགྱུར་རོ། །དེས་བདག་ཆེ་སྦོམ་པར་བྱེད་དོ། །བཟའ་བ་དང་། འཐུངས་པ་དང་། འཆོས་པ་དང་། མྱངས་པ་རབ་ཏུ་ཕལ་ཆེ་བར་གྱུར་པ་རྣམས་བདག་གིས་ཉེ་བར་སྤྱད་པར་ཡང་མི་ནུས་སོ། །བདག་ཟས་དང་བྲལ་བར་གྱུར་པ་
དེ་ཡིས་སྤྲོ་བ་ཡོངས་སུ་ཉམས་པར་འགྱུར་རོ། །བདག་གི་ལག་པ་དང་རྐང་པ་དག་ཀྱང་སྐྲང་བར་གྱུར་པ་ཀུན་དུ་སྐྱེད་པར་བྱེད་དོ། །བདག་གི་གསང་བའི་གནས་ཀྱང་སྲེག་པར་བྱེད་དོ། །རྣམ་པར་སྲེག་པ་ཡང་རྒྱུན་གྱིས་འཇུག་པར་
འགྱུར་རོ། །ལུས་ཐམས་ཅད་དང་ཁ་ཡང་སྐམ་པར་འགྱུར་རོ། །བདག་གིས་དགའ་བར་གྱུར་པའི་རྨི་ལམ་རྣམས་ཀྱང་མི་མཐོང་ངོ་། །རླུང་གིས་རྒྱུ་མ་རྣམས་ཡུད་ཙམ་ཡང་གནས་པར་མི་འགྱུར་རོ། །གལ་ཏེ་ཡང་རྒྱུ་མ་འབྱེད་པར་
བྱེད་པའི་རླུང་འཁྲུགས་པར་མ་གྱུར་ན་ཇི་སྐད་བཤད་པའི་ནད་རྣམས་དེ་དག་རྣམས་ཀྱིས་རྒྱས་པར་མི་འགྱུར་རོ། །དེས་རྒྱུ་མ་འབྱེད་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་
བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་

66-1-168a

བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བད་ཀན་ཀུན་ནས་སུན་འབྱིན་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པ་དང་མ་འཁྲུགས་པ་ན་བདག་ལ་ལས་ཅི་ཞིག་བྱེད་པ་ཡིན་པ་ཡང་། 
དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་གལ་ཏེ་བདག་གི་བད་ཀན་སུན་འབྱིན་པ་ཞེས་བྱ་བའི་རླུང་འཁྲུགས་པར་གྱུར་ན་ནི་དེས་བདག་གི་ཁ་མངར་པོར་བྱེད་དོ། །སྙིང་འཕར་བ་དང་། ད་དང་ཀ་མི་བདེ་བ་
དང་། བསམ་གཏན་ལ་འགྲོ་བར་གྱུར་པ་ན་ཡང་གཉིད་དང་རྨུགས་པ་སྐྱེད་པར་བྱེད་དོ། །ལྕེ་ཡང་ལྕི་མོར་བྱེད་པ་དང་བདག་གི་མགུལ་པ་ལ་ཡང་ན་ཚ་སྐྱེད་པར་བྱེད་དོ། །ཁར་བླུག་པར་གྱུར་པ་རྣམས་ཀྱང་སྐད་ཅིག་ལ་མགྲིན་པའི་སྤུའི་ཡུལ་
ཕྱོགས་ཀྱི་སྟེང་དུ་འོངས་པར་གྱུར་ན་དྲི་མི་ཞིམ་ཞིང་ཚོར་བ་དང་བཅས་པས་ཁ་ནས་ཀུན་དུ་འབྱུང་བར་འགྱུར་རོ། །ལྟོགས་པ་དང་སྐོམ་པ་དག་ཀྱང་སྟོབས་དང་ལྡན་པར་འགྱུར་རོ། །བདག་གི་མགྲིན་པར་ཡང་འཁྱིག་པར་བྱེད་དོ། །གལ་
ཏེ་ཡང་བདག་གི་བད་ཀན་ཀུན་དུ་སུན་འབྱིན་པར་བྱེད་པའི་རླུང་འཁྲུགས་པར་མ་གྱུར་ན་ནི་ཇི་སྐད་དུ་བཤད་པར་གྱུར་པའི་ནད་དེ་དག་རྣམས་རབ་ཏུ་རྒྱས་པར་མི་འགྱུར་རོ། །བད་ཀན་ཀུན་དུ་སུན་འདོན་པར་བྱེད་པའི་རླུང་ལ་སོ་སོར་བརྟགས་པར་
གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། གཞན་བདག་གི་རླུང་གང་དག་འཁྲུགས་པར་གྱུར་པ་དང་། 
འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ལྷ་བ་ཀུན་དུ་སུན་འབྱིན་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། 
དེ་གལ་ཏེ་འཁྲུགས་པར་གྱུར་ན་དེས་བདག་འདར་བར་འགྱུར་བ་དང་། ལས་ཅུང་ཟད་ཙམ་གྱིས་ཀྱང་ངལ་བར་འགྱུར་རོ། །རྟག་ཏུ་བདག་ནད་པར་འགྱུར་རོ། །བདག་གི་ངོ་བཞིན་མཛེས་པར་ཡང་མི་འགྱུར་ཞིང་བདག་གི་ལུས་ལ་

66-1-168b

རྐོ་རློག་བྱེད་པ་དང་། བདག་གིས་མང་དུ་སྨྲ་བར་ཡང་མི་ནུས་སོ། །བདག་གི་ཡིད་ཀྱང་བརྟན་པ་མ་ཡིན་པར་འགྱུར་རོ། །ཉིན་མཚན་མེད་པར་ཡང་རུས་པའི་གསེབ་རྣམས་ལས་གྱུར་པའི་བདག་གི་ཚོར་བ་རྣམས་འཇི་བར་
ཡང་འགྱུར་རོ། །བདག་གི་ལུས་པོ་རྣམས་ལ་རྟག་ཏུ་བ་སྤུ་ལངས་པར་ཡང་འགྱུར་རོ། །དབང་པོ་རྣམས་ཐམས་ཅད་ཀྱང་ནད་དང་བཅས་པར་འགྱུར་རོ། །བདག་གི་མགོ་བོ་ལ་ཡང་ཚོར་བ་རྣམས་རྒྱུན་གྱིས་འཇུག་པར་ཡང་
འགྱུར་རོ། །བདག་གི་མགོ་བོ་ལ་ཀུན་དུ་སྤྱོད་པར་བྱེད་པའི་སྲིན་རྣམས་ཀྱང་རྟག་ཏུ་རླུང་གིས་མགོ་བོའི་ནང་དུ་སོང་བར་གྱུར་ནས་རྣམ་པར་བསྐྱོད་པར་བྱེད་དོ། །དེ་རྣམ་པར་བསྐྱོད་པར་གྱུར་པས་ཀྱང་ཁབ་བཞིན་དུ་བདག་གི་མགོ་བོ་
འབིགས་པར་བྱེད་དོ། །གལ་ཏེ་ཡང་འཁྲུགས་པར་མ་གྱུར་ན་ནི་ཇི་སྐད་དུ་བཤད་པའི་ནད་དེ་དག་རྣམས་རབ་ཏུ་འབྱུང་བར་མི་འགྱུར་རོ། །དེས་ལྟ་བ་ཀུན་དུ་སུན་འབྱིན་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་
ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། གཞན་བདག་གི་རླུང་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་
བདག་ལ་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ལྤགས་པ་ཀུན་དུ་སུན་འབྱིན་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། 
དེ་འཁྲུགས་པ་དང་མ་འཁྲུགས་པ་ན་བདག་ལ་ལས་ཅི་ཞིག་བྱེད་པ་ཡིན་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་གལ་ཏེ་ལྤགས་པ་ཀུན་ནས་སུན་འབྱིན་པའི་རླུང་ལུས་ལ་
རབ་ཏུ་གནས་པ་འཁྲུགས་པར་གྱུར་ན་ཡང་དེ་ཡིས་བདག་གི་ལྤགས་པའི་མདོག་རྣམས་དང་བྲལ་བར་འགྱུར་རོ། །ལུས་ཐམས་ཅད་ཀྱང་རྩུབ་མོ་ཧྲུད་པོར་འགྱུར་ཞིང་གླང་པོའི་ལྤགས་པའི་ཀབ་ཀོབ་པོ་རྣམས་དང་འདྲ་བར་

66-1-169a

ལྤགས་པའི་ཡུལ་ཀུན་ལ་ཐིག་ལེ་དུ་མ་ཉེ་བར་སྐྱེས་པར་འགྱུར་རོ། །ཡན་ལག་རྣམས་ལས་ཐོགས་པ་མེད་ཅིང་མྱུར་བར་རྔུལ་ཡང་འབྱུང་བར་འགྱུར་རོ། །ཉལ་བར་གྱུར་པ་ན་བདག་གི་ལུས་རྣམས་རྩུབ་པར་འགྱུར་རོ། །
བདག་གི་ལུས་རྐྱོང་བར་ཡང་མི་ནུས་ལ་བསྐུམས་པར་གྱུར་པ་ན་ཡང་བདག་གིས་རྐྱོང་བར་བྱེད་མི་ནུས་སོ། །དོང་རྣམས་དང་གཡང་སར་གྱུར་པ་དང་རྩུབ་པའི་མདོག་རྣམས་རྨི་ལམ་དུ་ཡང་བདག་གིས་མཐོང་བར་འགྱུར་རོ། །བཟའ་བར་
བྱ་བ་རྣམས་དང་བཅའ་བར་བྱ་བ་རྣམས་དྲོན་མོར་གྱུར་པ་མིད་པ་ཡང་ཐམས་ཅད་གྲང་མོར་ཡང་བདག་གིས་རྟོགས་སོ། །བདག་གི་ལྕེ་ཡང་རྡོལ་བར་འགྱུར་ཞིང་། བདག་གི་ཟས་རྣམས་མིད་པར་ཡང་མི་ནུས་སོ། །གལ་ཏེ་ཡང་ལྤགས་
པ་ཀུན་ནས་སུན་འབྱིན་པར་བྱེད་པའི་རླུང་འཁྲུགས་པར་མ་གྱུར་ན་ནི་ཇི་སྐད་དུ་བཤད་པར་གྱུར་པའི་ནད་དེ་དག་རྣམས་འབྱུང་བར་མི་འགྱུར་རོ། །དེས་ལྤགས་པ་ཀུན་དུ་འཇོམས་བྱེད་ཀྱི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་
པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་གྱུར་པ་ན། གཞན་དག་གི་རླུང་གང་དག་འཁྲུགས་པར་གྱུར་པ་དང་འཁྲུགས་པར་མ་
གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཁྲག་ཀུན་ནས་སུན་འདོན་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་གལ་ཏེ་
འཁྲུགས་པར་གྱུར་ན་དེས་བདག་གི་མཆིན་པའི་གནས་ཀྱི་ནང་གི་གསེབ་ན་རྒྱུ་བར་གྱུར་པའི་ཁྲག་རྣམས་གཉིས་སུ་རྣམ་པར་འབྱེད་པར་བྱེད་དེ། མ་འགྲུངས་པ་སྟེང་དུ་འགྲོ་བ་དང་འོག་ཏུ་འགྲོའོ། །དེ་ལ་སྟེང་དུ་འགྲོ་བ་རྣམས་ནི་སྣ་བུག་
དང་། མིག་དང་། རྣ་བ་རྣམས་སུ་རྒྱུ་བར་བྱེད་ཅིང་ཁྲག་རྒྱུ་བའི་རྒྱུན་རྣམས་ཀུན་དུ་སུན་འདོན་ནོ། །དེ་སུན་བཏོན་པར་གྱུར་པས་ཀྱང་ནང་གི་ཁམས་རྣམས་ཐམས་ཅད་འཁྲུགས་པར་བྱེད་དོ། །དེ་ཡིས་བདག་གི་ཡན་ལག་དང་

66-1-169b

ཉིང་ལག་རྣམས་ཐམས་ཅད་ཀྱང་རྩོལ་བ་མེད་པར་འགྱུར་རོ། །རྣ་བ་ལས་སུན་མི་རུང་བ་དང་འགྲོ་བ་དང་འོང་བ་ཡང་བདག་གིས་མི་ནུས་པར་འགྱུར་རོ། །རྟག་ཏུ་ཡང་བདག་གི་སྣ་བུག་གཉིས་དྲི་མི་ཞིམ་པར་འགྱུར་རོ། །ཚངས་པར་
སྤྱོད་པར་འགྱུར་བ་བདག་ཉིན་མོ་སྤྱོད་པའི་སར་འགྲོ་བ་ན་མངོན་པར་སྤྲོ་བར་མི་འགྱུར་བ་དང་ཀུན་དུ་འདྲེ་བར་ཡང་མི་བྱེད་དོ། །གལ་ཏེ་ཡང་འོག་ཏུ་འགྲོ་བར་འགྱུར་བའི་ཁྲག་རྣམ་པར་འབྱེད་པར་བྱེད་ན། དེ་གཞང་དང་ཕོ་མཚན་དག་རྣམ་
པར་འཇིག་པར་བྱེད་དེ། དེས་ཀྱང་བདག་གི་ཁྲག་རྣམས་མཚན་མ་ནས་ཤིན་དུ་རབ་དུ་རྒྱུ་བར་བྱེད་དོ། །བདག་གི་གཞང་ཡང་ཁྲོ་གཉེར་གསུམ་དུ་སུན་འབྱིན་པར་བྱེད་ལ། བཤང་བ་རྒྱུ་བར་གྱུར་པའི་སྦུབས་ཀུན་དུ་སུན་ཕྱུང་བར་
ཡང་གྱུར་ཅིང་ཁུ་བས་ཀྱང་བདག་ལ་གཞང་འབྲུམ་བསྐྱེད་པར་གྱུར་ནས་དེས་བདག་ཤིན་དུ་ཡང་ན་ཚ་བར་བྱེད་དོ། །དེས་ཡང་ན་ཁྲག་གིས་ཤིན་དུ་ཡང་འཁྲུ་བར་བྱེད་དོ། །དེས་ཁྲག་ཀུན་དུ་སུན་འདོན་པར་བྱེད་པའི་རླུང་ལ་སོ་སོར་
བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་
འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཤ་ཀུན་ནས་སུན་འདོན་པ་ཞེས་བྱ་བའི་རླུང་བདག་གི་ལུས་
ལ་རབ་ཏུ་གནས་པ་ཡིན་ཏེ། དེ་བདག་ལ་འཁྲུགས་པ་དང་མ་འཁྲུགས་པ་ན་ལས་ཅི་ཞིག་བྱེད་ཅེ་ན། གལ་ཏེ་ཤ་ཀུན་ནས་སུན་འདོན་པར་བྱེད་པའི་རླུང་བདག་ལ་རབ་ཏུ་འཁྲུགས་པར་གྱུར་ན་དེ་ཡིས་བདག་རྩུབ་པ་དང་། སྣུམ་བག་ཅན་
མ་ཡིན་པ་དང་། མདོག་ངན་པ་དང་། ཧྲུད་ཧྲུད་པོ་དང་། ནད་ཆེན་པོར་གྱུར་པ་དང་། དྲི་མི་ཞིམ་པ་དང་། ལུས་སུ་གྱུར་པ་རྣམས་ཐམས་ཅད་ལ་ཡང་ཀབ་ཀོབ་ཏུ་གྱུར་པའི་ཐིག་ལེ་རྣམས་སྐྱེད་དོ། །ཀུན་དུ་སྐྱེས་པར་གྱུར་པ་རྣམས་ཀྱང་

66-1-170a

དྲི་མི་ཞིམ་པར་འགྱུར་རོ། ། བདག་ཤིན་དུ་ཡང་ཆུ་ངན་མང་བར་འགྱུར་བ་དང་། གྲང་བ་རྣམས་བཟོད་པ་དང་། དྲོ་བ་རྣམས་དང་ཆུ་དྲོན་གྱི་གཏམ་ཙམ་ཡང་བཟོད་པར་མི་འགྱུར་བ་དང་། རོ་ཚ་བར་གྱུར་པ་རྣམས་མི་བཟོད་པ་དང་། 
བསིལ་བ་དང་། མངར་བ་དང་། ཡང་བ་རྣམས་བཟོད་པར་འགྱུར་རོ། །བདག་གི་ལུས་ཐམས་ཅད་ཀྱི་ཤ་ཡང་འདྲུལ་བ་དང་། དྲི་མི་ཞིམ་པ་དང་། རྣག་འཛག་པར་ཡང་འགྱུར་རོ། །དེས་ཤ་སུན་འདོན་པར་བྱེད་པའི་རླུང་ལ་སོ་སོར་
རྟགས་པས་ཀྱང་ཡང་དག་པ་ཇི་ལྟ་བར་ལུས་རྣམས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་གྱུར་པ་ན། རླུང་གཞན་གང་དག་བདག་གི་
ལུས་ལ་རབ་ཏུ་གནས་པ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཚིལ་ཀུན་ནས་སུན་འདོན་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་ཏེ། དེ་བདག་ལ་འཁྲུགས་པར་
གྱུར་ན་ནད་གང་དག་སྐྱེད་པར་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་གལ་ཏེ་བདག་གི་ཚིལ་ཀུན་དུ་མ་རུངས་པར་བྱེད་པའི་རླུང་དེས་བདག་གི་ཚིལ་རྣམས་ཤིན་དུ་ཕུལ་དུ་བྱུང་བ་
སྐྱེད་པར་གྱུར་ནས་བདག་གི་ལུས་ཀྱི་གནས་རྣམས་ལས་ཁ་ཅིག་ནི་ཚིལ་ཀྱིས་གནོན་པར་བྱེད་དོ། །ལ་ལ་ནི་སྐྲང་བར་བྱེད་པར་འགྱུར་རོ། །འགའ་ཞིག་ནི་མ་རུངས་པའི་གནས་སུ་བྱེད་དོ། །འགའ་ཞིག་ནི་དམའ་བར་བྱེད་དོ། །བརྒྱ་ལ་
ནི་ཤིན་དུ་སྲ་བར་ཡང་བྱེད་དོ། །འགའ་ཞིག་སྐྱ་བོར་ཡང་འགྱུར་རོ། །འགའ་ཞིག་ནི་རྣམ་པ་ཐམས་ཅད་དུ་སེམས་མེད་པར་འགྱུར་རོ། །གལ་ཏེ་འཁྲུགས་པར་མ་གྱུར་ན་ནི་ཇི་སྐད་དུ་བཤད་པར་གྱུར་པའི་ནད་དེ་དག་རྣམས་འབྱུང་
བར་མི་འགྱུར་རོ། །དེས་ཚིལ་ཀུན་དུ་སུན་འདོན་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་གོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་

66-1-170b

ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་
གྱུར་པ། རུས་པ་ཀུན་དུ་སུན་འདོན་པ་ཞེས་བྱ་བའི་རླུང་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པ་དང་མ་འཁྲུགས་པ་ན་བདག་ལ་ལས་ཅི་ཞིག་བྱེད་པ་ཡིན་ཞེ་ན། དེས་རུས་པའི་ལྷང་ཀྱོག་རྣམས་ཀུན་ནས་སྐྱེད་པར་བྱེད་
དོ། །མུར་འགྲམ་འབྱེད་པར་ཡང་འགྱུར་བ་དང་། གཉིད་མེད་པར་ཡང་བྱེད་དེ། ཉིན་མཚན་མེད་པར་གཉིད་མེད་པར་ཡང་འགྱུར་རོ། །བདག་གི་རྐང་མར་ཡང་ཤིན་དུ་སྡུག་བསྔལ་བར་བྱེད་ཅིང་བདག་གི་ལུས་ཐམས་ཅད་ཀྱང་སློ་
སློ་བོར་ཀུན་དུ་སྐྱེད་པར་བྱེད་དོ། །རྒྱུས་པ་ཡང་རབ་ཏུ་རྒྱས་པར་མི་འགྱུར་བ་དང་སྲ་བ་ཡང་མ་ཡིན་ནོ། །སྔོ་བར་གྱུར་པ་དང་། རྟག་པར་ཉེ་བར་དགའ་བ་མ་ཡིན་པའི་ཚོར་བ་རྣམས་ཀྱིས་ཁྱབ་པར་བྱེད་པས་ངལ་བར་གྱུར་པ་རྣམས་
བཞིན་དུ་བདག་གི་ལུས་ཀྱང་རྟག་ཏུ་འགྱུར་རོ། །སྐད་ཅིག་ཙམ་ཡང་མིག་བཙུམ་ཙམ་དུ་ཡང་བདག་གིས་བདེ་བ་རྙེད་པར་མི་འགྱུར་རོ། །དེས་རུས་པ་སུན་འདོན་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་
ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་འཁྲུགས་པ་དང་འཁྲུགས་པར་མ་གྱུར་པ་ན་ལས་ཅི་ཞིག་
བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཁུ་ཆུ་ཀུན་དུ་སྐམས་པར་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པ་དང་མ་འཁྲུགས་པ་ན་
བདག་ལ་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་གལ་ཏེ་ཁུ་ཆུ་སྐམ་བྱེད་ཀྱི་རླུང་བདག་ལ་འཁྲུགས་པར་གྱུར་ན། དེས་བདག་འཁྲུལ་བར་བྱེད་དོ། །མཚན་

66-1-171a

མོ་ཡང་མལ་ན་བུ་མོ་དག་གི་རྨི་ལམ་གྱི་རྣམ་པར་འགྱུར་བ་ཀུན་དུ་སྟོན་པར་བྱེད་དོ། །རྣམ་པར་འགྱུར་བ་ནི་ཀུན་དུ་རྣམ་པར་རྟོག་པ་ལས་གྱུར་པའི་སོ་སོ་སྐྱེ་བོ་རྣམས་འདོད་པར་གྱུར་པས་བརྫུན་པོས་འདོད་པ་ལ་སྤྱོད་
པར་བྱེད་པ་སྟེ། རླུང་དེས་དམིགས་པར་གྱུར་པ་ནི་སྲིན་པོ་རྒྱུ་བའི་བུ་མོ་བརྫུན་པ་བདེན་པ་དང་རྣམ་པར་བྲལ་བ་ཞེས་བྱ་བ་དེས་བདག་ལ་ཅོ་འདྲི་བར་བྱེད་འདོད་པ་ཡིན་ནོ། །བདག་གི་ཟས་ཀྱང་སྨིན་པར་མི་འགྱུར་རོ། །དེས་ཁུ་ཆུ་ཀུན་
ནས་སུན་འདོན་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བར་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་
གི་རླུང་གཞན་གང་དག་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མཐུག་ཀོབ་ཏུ་བྱེད་པ་ཞེས་བྱ་བའི་རླུང་
བདག་གི་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པ་དང་མ་འཁྲུགས་པ་ན་བདག་ལ་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་གལ་ཏེ་མཐུག་ཀོབ་ཏུ་བྱེད་
པ་ཞེས་བྱ་བའི་རླུང་འཁྲུགས་པར་གྱུར་ན་དེས་བདག་གི་རྐང་པའི་གསེབ་དུ་གྱུར་པ་དང་། རྐང་པའི་མཐིལ་གྱི་གསེབ་དུ་གྱུར་པ་དང་། པུས་མོའི་ལྷ་ངའི་གསེབ་ཏུ་གྱུར་པ་དང་། མཇུག་མའི་གསེབ་ཏུ་གྱུར་པ་དང་། རྒྱབ་ཀྱི་གསེབ་ཏུ་
གྱུར་པ་དང་། གློ་བའི་གསེབ་ཏུ་གྱུར་པ་དང་། ནུ་མའི་གསེབ་ཏུ་གྱུར་པ་དང་། སྐེའི་གསེབ་ཏུ་གྱུར་པ་དང་། དཔུང་བའི་གསེབ་ཏུ་གྱུར་པ་དང་། མགོ་བོའི་གསེབ་ཏུ་གྱུར་པ་དང་། རྣ་བའི་གསེབ་ཏུ་གྱུར་པ་དང་། སྨིན་མའི་
གསེབ་ཏུ་གྱུར་པ་དང་། ཡན་ལག་དང་ཉིང་ལག་རྣམས་ཐམས་ཅད་ཀྱི་གསེབ་ཏུ་གྱུར་པའི་བདག་གི་ལུས་རྣམས་ལ་མཐུག་པོ་ཀབ་ཀོབ་ཏུ་སྐྱེད་དོ། །ཀུན་དུ་དཀྲིག་པར་བྱེད་ཅིང་རབ་ཏུ་འཕེལ་བར་བྱེད་དོ། །ཀུན་དུ་

66-1-171b

འཁུམ་པར་བྱེད་པ་དང་འཁྲུལ་བར་བྱེད་དོ། །རྐང་པ་དག་རྡོལ་བར་ཡང་བྱེད་དོ། །གལ་ཏེ་ཡང་བདག་གིས་མར་སར་དང་མར་ནག་དག་གིས་བྱུག་པ་བྱས་པར་གྱུར་ན་དེས་བདག་གིས་བསྐུས་པ་རྣམས་སྐམ་པར་བྱེད་དོ། །
རྙིངས་པར་བྱེད་དོ། །དེས་མཐུག་ཀོབ་ཏུ་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བར་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་
ཞིང་གནས་ཏེ། བདག་གི་རླུང་གཞན་གང་དག་གིས་ལས་ཅི་ཞིག་བྱེད་པར་གྱུར་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་སྐྲ་དཀར་པོར་བྱེད་པ་ཞེས་བྱ་བའི་རླུང་བདག་གི་ལུས་ལ་
རབ་ཏུ་གནས་པ་ཡིན་ལ། དེ་བདག་ལ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། གལ་ཏེ་སྐྲ་དཀར་པོར་བྱེད་པའི་རླུང་བདག་གི་ལུས་འཁྲུགས་པ་སྐྱེས་པར་གྱུར་ན། དེས་བདག་གཞོན་པ་
ལང་ཚོ་ལ་བབ་པ་ཡིན་ཡང་སྐྲ་དཀར་ཀུན་དུ་སྐྱེད་པར་བྱེད་དོ། །གཞོན་པ་ལང་ཚོ་ལ་བབ་པར་གྱུར་པ་ཡང་རྗུད་པ་ཉིད་དུ་སྐྱེད་པར་བྱེད་དེ་དེ་ནི་ཇི་ལྟར་རྒན་པོ་བཞིན་ནོ། །གལ་ཏེ་ཡང་བྱིས་པ་སོ་སོའི་སྐྱེ་བོ་གཞན་དག་རྣམས་ལ་
ཡང་ཟས་ཀྱིས་སྐྱེད་པར་བྱེད་དོ། །དེ་དག་ཀྱང་བུའི་རིམ་པ་ཇི་ལྟ་བས་རྒན་པོ་རྣམས་སུ་འགྱུར་རོ། །གཞོན་པ་ལང་ཚོ་ལ་བབ་པར་གྱུར་པ་དེ་དག་རྣམས་ཀྱང་ངེས་པར་ཡང་ཀུན་དུ་འབྲེལ་པར་བྱེད་དོ། །དེ་དག་རྣམས་ཀྱང་གཞན་
གང་དག་བྱིས་པ་རྣམས་ལ་ཡིན་པ་ལས་དེ་དག་ཀྱང་རྒྱུན་གྱི་རིམ་པས་རྒས་པ་དང་ཤིན་དུ་འབྲེལ་པར་བྱེད་དོ། །གསར་པ་ལང་ཚོ་ལ་བབ་པ་རྣམས་ཀྱང་སྐྲ་དཀར་པོར་བྱེད་པའི་རླུང་གི་མཐུ་སྟོབས་ཀྱིས་གསར་པ་ལང་ཚོ་ལ་བབ་
པ་རྣམས་ཀྱང་རྒས་པ་རབ་ཀྱི་སྟོབས་དང་ལྡན་པར་འགྱུར་རོ། །སྐྲ་དཀར་དུ་བྱེད་པའི་རླུང་དེ་ཡང་བཟང་ལྡན་དུས་ན་མི་འབྱུང་ངོ་། །རྩོད་ལྡན་གྱི་དུས་ན་ཡང་ཇི་ལྟར་ཆོས་མ་ཡིན་པ་ལ་ཕལ་ཆེར་སྐྱེ་དགུ་རྣམས་གནས་པར་གྱུར་

66-1-172a

པ་དེ་ལྟ་དེ་ལྟར་སྐྲ་དཀར་དུ་བྱེད་པའི་རླུང་རབ་ཏུ་འཕེལ་བར་འགྱུར་རོ། །དེ་ལྟར་ཡང་ཆོས་མ་ཡིན་པ་ལ་གནས་པའི་སེམས་ཅན་རྣམས་ཕལ་ཆེ་བར་འགྱུར་རོ། །དེས་སྐྲ་དཀར་དུ་བྱེད་པའི་རླུང་ལ་སོ་སོར་བརྟགས་
པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་ལས་ཅི་
ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འཐུན་པ་སུན་འདོན་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་གལ་ཏ་བདག་ལ་
འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་དེས་བདག་ལ་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བདག་ལ་འཁྲུགས་པར་གྱུར་པས་
ནི་དང་ཀ་མི་བདེ་བར་བྱེད་དོ། །སྡུག་པ་དང་འཐུན་པ་རྣམས་ལ་ཞེ་སྡང་བར་འགྱུར་རོ། །དེ་ཉིན་མོ་ཉལ་བ་ན་འཁྲུག་པར་འགྱུར་ཏེ། ཟས་མངར་མོ་རྣམས་ཀྱང་བདག་གིས་མིད་པར་མི་ནུས་སོ། །བདག་ཚ་བ་དང་སྐྱུར་བའི་
ཟས་རྣམས་འདོད་པར་འགྱུར་རོ། །རྩུབ་མོ་དེ་དག་རྣམས་ཀྱིས་ཀྱང་བདག་གི་ཡིད་རབ་ཏུ་ཁྲོ་བ་སྐྱེད་པར་བྱེད་དོ། །ཉིན་མོ་སྤྱོད་པའི་སར་མ་ཕྱིན་ན་ཡང་ལུས་ངལ་བར་འགྱུར་རོ། །དེས་འཐུན་པ་སུན་འདོན་པར་བྱེད་པའི་རླུང་
ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། རླུང་གཞན་གང་
དག་བདག་གི་ལུས་ལ་རབ་ཏུ་གནས་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གཅིན་ལྷག་མ་སུན་འདོན་པར་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་

66-1-172b

གནས་པ་ཡིན་ཏེ། དེ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་བདག་ལ་ལས་ཅི་ཞིག་བྱེད་པ་ཡིན་ན། དེས་ཐོས་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི། གལ་ཏེ་བདག་གི་
གཅིན་ཀུན་ནས་སུན་འདོན་པར་བྱེད་པའི་རླུང་རབ་ཏུ་འཁྲུགས་པར་གྱུར་ན། དེ་ཡིས་ཉིན་མོ་དང་མཚན་མོ་མེད་པར་ཡང་བདག་གི་ཕོ་མཚན་ལ་གནས་པའི་ཚོར་བ་རྣམས་རབ་ཏུ་ཞི་བར་མི་འགྱུར་རོ། །རྟག་ཏུ་ཡང་བདག་ཆུ་
ངན་གཏོང་འདོད་པར་འགྱུར་རོ། །བདག་གི་ཆུ་ངན་གཏང་བར་ཡང་མི་ནུས་སོ། །བདག་གི་ལུས་ཀྱང་རྟག་པར་ཀུན་དུ་སྤྲོ་བ་མེད་པར་འགྱུར་རོ། །བདག་གི་དབུགས་འབྱིན་པ་ན་རྫོགས་པར་ཡང་མི་འགྱུར་རོ། །དེ་རབ་ཏུ་
སྟོབས་ཆེ་བར་གྱུར་ན་བདག་ཤིན་དུ་ཡང་སྐྱ་བོར་སྐྱེད་པ་དང་། རྫུད་པར་ཡང་བྱེད་དོ། །དེས་གཅིན་ལྷག་མ་ཀུན་ནས་སུན་འདོན་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་
སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། རླུང་གཞན་གང་དག་བདག་གི་ལུས་ལ་རབ་ཏུ་གནས་པར་གྱུར་ན། དེས་ཐོས་པ་ལས་བྱུང་བའི་
ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཟས་དང་ལྡན་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་བདག་ལ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་
བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་གལ་ཏེ་ཟས་དང་ལྡན་པའི་རླུང་རབ་ཏུ་འཁྲུགས་པར་གྱུར་ན་རང་བཞིན་དུ་གནས་པར་གྱུར་པའི་ཟས་ལས་དེ་ཡང་གང་གི་ཚེ་
ཟས་བཞི་འགྱུར་རམ་ལྔ་འགྱུར་དུ་ཡང་ཟ་བར་བྱེད་དོ། །དེ་བདག་ལ་རབ་ཏུ་འཁྲུགས་པར་གྱུར་ན་ཟས་དང་བཅས་པར་གྱུར་ཏུ་ཟིན་ཀྱང་སྤྲོ་བ་འཇིག་པར་བྱེད་དོ། །བདག་གིས་མིག་འབྱེད་པ་དང་འཛུམས་པར་བྱེད་ཀྱང་མི་

66-1-173a

ནུས་སོ། །རླུང་དེ་སྟོབས་དང་ལྡན་པར་གྱུར་པས་བདག་གི་ཡིད་ལ་ཆོས་རྣམས་སྲིད་པར་ཡང་མི་འགྱུར་རོ། །དེས་ཟས་དང་ལྡན་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་
བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱིས་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་
ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སྟེང་དུ་འགྲོ་བར་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེས་བདག་ལ་ལས་ཅི་ཞིག་བྱེད་པ་ཡིན་པ་ཡང་། དེས་ཐོས་པ་ལས་
བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་གལ་ཏེ་སོ་འབྱེད་པར་བྱེད་པའི་རླུང་འཁྲུགས་པར་གྱུར་ན་ནི་དེས་བདག་གི་སོ་ལ་ལྷང་ཀྱོག་དང་། སོ་འཇིག་པ་དང་། སོ་རྣམས་རྩ་བ་ནས་འབྲུལ་བ་དང་། སོ་རྣམས་རྙིལ་སྐྲང་བ་དང་
ཁ་སྐྲང་བ་དང་། མཆུ་སྐྲང་བ་དང་། རྐན་ཡང་སྔོན་པོར་བྱེད་དོ། །དེས་སོ་འབྱེད་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་
བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་ལུས་ལ་རླུང་གཞན་གང་དག་རབ་ཏུ་གནས་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྩེའུ་ཆུང་དག་ལ་
རབ་ཏུ་སྲེག་པར་བྱེད་པ་ཞེས་བྱ་བའི་རླུང་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་བདག་ལ་ལས་ཅི་ཞིག་བྱེད་པ་ཡང་། དེས་མཐོང་བར་གྱུར་པ་ནི་རྩེའུ་ཆུང་ལ་རབ་ཏུ་སྲེག་པར་བྱེད་པ་ཞེས་
བྱ་བའི་རླུང་བདག་ལ་རབ་ཏུ་འཁྲུགས་པར་གྱུར་ན། དེས་བདག་གི་མགྲིན་པ་ལ་ཟུག་གཟེར་དང་། མགྲིན་པ་ལ་ཤ་འབྲས་དང་། མགྲིན་པ་སྦོམ་པོར་ཡང་བྱེད་དོ། །འུར་འུར་ཞེས་ཀྱང་བྱེད་དོ། །དེས་རྩེའུ་ཆུང་ལ་སྲེག་པར་བྱེད་པའི་རླུང་ལ་

66-1-173b

སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བར་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་
དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འོག་ཏུ་འགྲོ་བ་ཞེས་བྱ་བའི་རླུང་ལུས་ལ་རབ་ཏུ་གནས་པ་ཡིན་ཏེ། དེ་བདག་ལ་འཁྲུགས་
པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། འོག་ཏུ་འགྲོ་བར་བྱེད་པའི་རླུང་དེ་འཁྲུགས་པར་གྱུར་ན་ཡང་དེས་བདག་གི་ཟས་རྣམས་ལས་མང་དུ་ནི་སུན་བཏོན་པར་གྱུར་ནས་ཤིན་དུ་ཉུང་བ་ཞིག་དངས་པར་འགྱུར་
རོ། །དེ་ལ་ཟས་རྣམས་དངས་པར་གྱུར་པས་ནི་ལྤགས་པ་དང་། ཁྲག་དང་། ཤ་དང་། ཚིལ་དང་། རུས་པ་དང་། ཁུ་ཆུ་དང་། ལྷ་རྐང་རྣམས་ཀྱང་འཕེལ་བར་བྱེད་དོ། །རྙོག་པར་གྱུར་པས་ནི་རླུང་དང་། མཁྲིས་པ་དང་། བད་ཀན་རྣམས་རབ་ཏུ་འཁྲུགས་
པར་འགྱུར་རོ། །བདག་གི་སྟེང་དང་འོག་ཏུ་བྱེད་པའི་རླུང་དེ་གལ་ཏེ་འཁྲུགས་པར་གྱུར་ན་ནི་དེས་ཆེས་མང་དུ་ཟས་དང་བརྩོན་འགྲུས་རྣམས་སུན་འབྱིན་པར་བྱེད་དོ། །ཤིན་དུ་ཉུང་བ་ཞིག་དང་བར་བྱེད་དོ། །དེས་འོག་ཏུ་འགྲོ་བའི་རླུང་ལ་སོ་སོར་
བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་འཁྲུགས་པར་གྱུར་པ་
དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སྟེང་དུ་འགྲོ་བར་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེས་
འཁྲུགས་པར་གྱུར་པ་དང་། འཁྲུགས་པར་མ་གྱུར་པ་ན་བདག་ལ་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི། སྟེང་དུ་འགྲོ་བར་བྱེད་པའི་རླུང་ནི་བདག་གི་སྤྱི་བོ་ལ་བརྟེན་

66-1-174a

ནས་སྤྱི་བོའི་ཐོད་པ་ཕུག་པར་གྱུར་ནས་དུ་བ་ལྟ་བུ་སྤྱི་བོ་ནས་བྱུང་སྟེ་འགྲོ་བར་བྱེད་དོ། །བདག་ཚ་བར་གྱུར་པའི་ནང་ན་འགྲོ་བར་གྱུར་ན་སྤྱི་བོ་བརྟོལ་ནས་དུ་བ་ཉིད་དུ་རྒྱུ་བར་བྱེད་དོ། །དེ་ནི་གཙུག་ཕུད་ནས་མཐོང་བར་འགྱུར་
རོ། །ཉིན་མོ་དང་མཚན་མོ་མེད་པར་ཡང་རྒྱུན་མི་འཆད་པར་འགྲོ་བའོ། །སོ་སོའི་སྐྱེ་བོ་རྣམས་ཐམས་ཅད་ཀྱིས་མངོན་སུམ་དུ་ཡང་མཐོང་ངོ་། །གལ་ཏེ་ཡང་རབ་ཏུ་འཁྲུགས་པར་གྱུར་ན་དེ་ནི་སྤྱི་བོ་བརྟོལ་ནས་ཀུན་དུ་འགྲོ་བར་
བྱེད་དེ། དེ་རྒྱུན་མ་ཆད་པས་ཞག་གསུམ་ན་ངེས་པར་འཆི་བར་འགྱུར་རོ། །དེས་སྟེང་དུ་འགྲོ་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་
འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། བདག་གི་རླུང་གཞན་གང་དག་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་
བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གལ་ཏེ་བདག་གི་གློ་ན་རྒྱུ་བར་བྱེད་པའི་རླུང་འཁྲུགས་པར་གྱུར་ན། དེས་བདག་གི་དབུགས་དབྱུང་བ་དང་རྔུབ་པ་རྣམས་ཀྱང་བསྐྱོད་པར་བྱེད་པ་དང་། བདག་གི་རྩ་དང་
རྒྱུས་པ་རྣམས་ཐམས་ཅད་ཀྱང་གཡོ་བར་བྱེད་དོ། །རྣམ་པར་འདྲེ་བར་བྱེད་ཅིང་འཕྱང་བར་ཡང་བྱེད་དོ། །ཀུན་ནས་ཐུང་བར་བྱེད་ཅིང་རིང་བར་ཡང་བྱེད་ལ། སྣ་སྦུབས་དག་གཞོམ་པར་བྱེད་དོ། །ཤུ་ཤུའུ་བ་དག་ཀྱང་སྐྱེད་པར་བྱེད་དོ། །
དེས་ཀྱང་བདག་འཆི་བ་ལ་ཐུག་པའི་སྡུག་བསྔལ་འབྱུང་བར་འགྱུར་རོ། །དེས་རྩིབ་ལོགས་ལ་རྒྱུ་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བར་ལུས་སོ་སོར་རིག་པར་བྱེད་དོ། །གཞན་ཡང་
རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གང་དག་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་

66-1-174b

ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཟ་མ་ཏོག་ལ་གནས་པ་ཞེས་བྱ་བའི་རླུང་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པ་དང་མ་འཁྲུགས་པ་ན་བདག་ལ་ལས་ཅི་ཞིག་བྱེད་པ་ཡིན་པ་
ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་ཟ་མ་ཏོག་ལ་གནས་པའི་རླུང་གལ་ཏེ་འཁྲུགས་པར་གྱུར་པ་ན། དེས་བདག་གི་རྒྱུས་པ་མང་པོ་ལག་པའི་གནད་ལ་
གནས་པ་རྣམས་དང་། རྐང་པ་ལ་གནས་པའི་རྒྱུས་པ་མང་པོ་རྣམས་དང་། རྒྱབ་ལ་གནས་པའི་རྒྱུས་པ་མང་པོ་རྣམས་དང་། གསང་བ་ལ་གནས་པའི་རྒྱུས་པ་མང་པོ་རྣམས་དང་། ལུས་ཐམས་ཅད་ལ་གནས་པའི་
རྒྱུས་པ་མང་པོ་རྣམས་ཀུན་དུ་འཁུམ་པར་བྱེད་དོ། །ཀུན་ནས་འབྲེལ་པར་བྱེད་དོ། །ཀུན་དུ་སྒོ་བར་བྱེད་དོ། །སེམས་དང་བྲལ་བར་ཡང་བྱེད་དོ། །རྒྱུས་པའི་ཚོགས་ཆེན་པོ་དེ་ལ་ཡང་ལུས་པོ་ཞེས་ཀྱང་རྗོད་པར་བྱེད་དོ། །དེས་ཟ་མ་
ཏོག་ལ་གནས་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། 
རླུང་གཞན་གང་དག་བདག་གི་ལུས་ལ་རབ་ཏུ་གནས་པ་ཡིན་ན། དེས་སྤུ་འབྱེད་པར་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པར་འགྱུར་བ་མཐོང་བར་གྱུར་ཏོ། །དེ་འཁྲུགས་པར་གྱུར་པ་དང་འཁྲུགས་པར་
མ་གྱུར་པ་ན་བདག་ལ་ལས་ཅི་ཞིག་བྱེད་པ་ཡིན་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི། གལ་ཏེ་སྤུ་འབྱེད་པ་ཞེས་བྱ་བའི་རླུང་བདག་གི་ལུས་ལ་འཁྲུགས་པར་གྱུར་
ན་ནི་དེས་བདག་གི་ཡན་ལག་དང་ཉིང་ལག་རྣམས་ཐམས་ཅད་ལ་གནས་པའི་སྤུ་རྣམས་འཇོམས་པར་བྱེད་དོ། །སེར་སྐྱར་ཡང་བྱེད་པ་དང་། ཡན་ལག་དེའི་ཡུལ་ཕྱོགས་རྣམས་མདོག་ངན་པར་ཡང་བྱེད་དོ། །བདག་གི་སྤུ་རྣམས་

66-1-175a

ཉམས་པར་འགྱུར་རོ་ཞེས་ཤེས་པར་ཡང་འགྱུར་བ་དང་། ཆུད་འཛའ་བར་གྱུར་པ་རྣམས་ནི་ཕྱིར་ཞིང་ལྷག་པར་ཁྱད་པར་དུ་འཕེལ་བར་ཡང་འགྱུར་རོ། །དེས་སྤུ་འབྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་
ཡང་དག་པ་ཇི་ལྟ་བ་བཞིན་དུ་ལུས་སོ་སོར་རྟོགས་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་འཁྲུགས་པར་གྱུར་པ་དང་
འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རླུང་རྗེས་སུ་འཐུན་པ་ཞེས་བྱ་བ་སྟེ། རླུང་འཁྲུགས་པ་འམ་མ་འཁྲུགས་
པ་ན་ཡང་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བ་ནི་རྗེས་སུ་འཐུན་པར་གཡོ་བའི་རླུང་ནི་སྐབས་དང་སྐབས་རྣམས་སུ་ཇི་ལྟ་བར་རླུང་གིས་རྗེས་སུ་འཐུན་པར་
སྤྲོ་བར་བྱེད་པ་སྟེ། ཐ་མལ་པའི་ཚད་དུ་འགྲོ་བ་དང་། འོང་བ་དང་། བསྐུམ་པ་དང་། རྐྱོང་བ་དང་། རྣམས་རྗེས་སུ་འཐུན་པར་རྣམ་པར་འབྱེད་པར་བྱེད་པའོ། །གལ་ཏེ་ཡང་ལུས་ཐམས་ཅད་དུ་འགྲོ་བར་བྱེད་པས་བསྐྱོད་ནས་ནི་དེས་
ཡིད་རྒྱུ་བར་བྱེད་པའི་རྒྱུན་ཡང་བསྐྱོད་པར་བྱེད་དོ། །དེའི་རྐྱེན་ཀྱིས་བདག་རླུང་གིས་སྨྱོན་པར་འགྱུར་རོ། །བདག་གི་སེམས་མཉམ་པར་བཞག་པར་ཡང་མི་འགྱུར་རོ། །དེས་རླུང་རྗེས་སུ་འཐུན་པའི་རླུང་ལ་སོ་སོར་བརྟགས་
པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། རླུང་གཞན་གང་དག་བདག་གི་ལུས་ལ་
རབ་ཏུ་གནས་པ་ཡིན་ལ། དེ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་བདག་ལ་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ལས། ཉལ་བ་ལས་རྣམ་

66-1-175b

པར་གཡེང་བ་སྟོན་པ་ཞེས་བྱ་བའི་རླུང་ལུས་ལ་རབ་ཏུ་གནས་པ་ཡིན་ཏེ། དེ་གལ་ཏེ་བདག་ལ་འཁྲུགས་པར་གྱུར་ན། དེས་བདག་སངས་རྒྱས་ཀྱི་གསུང་ཉན་པར་གྱུར་པ་ན་ནི་གཉིད་སྐྱེད་པར་བྱེད་དོ། །ཀུན་ནས་ཉོན་མོངས་པ་ཅན་མི་དགེ་བར་
གྱུར་པ་རྣམས་ཉན་ན་ནི་གཉིད་མི་སྐྱེད་དོ། །དེ་སེམས་ཅན་གྱི་རྒྱུན་རྣམ་པར་གཡེང་བ་ཉིད་དུ་ཡང་བྱེད་དོ། །མཚན་མོ་ཡང་ཡིད་ལ་བྱེད་པ་ཡང་དག་པར་མི་འགྱུར་རོ། །བདག་མང་དུ་མངོན་པར་བརྗོད་པར་འགྱུར་རོ། །ཕྱོགས་སུ་གྱུར་པ་
རྣམས་ན་ཡང་བདག་གིས་སྐྲ་ཤད་འཛིངས་པར་མཐོང་བར་འགྱུར་རོ། །དེས་ཉལ་བས་རྣམ་པར་གཡེངས་པ་རྣམས་སྟོན་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །
གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། རླུང་གཞན་གང་དག་བདག་གི་ལུས་ལ་རབ་ཏུ་གནས་པ་ཡིན། དེས་ལས་ནི་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་
སམ་ལྷའི་མིག་གིས་མཐོང་བར་གྱུར་པ། མི་བཟོད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་བདག་ལ་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་
བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ལས་གལ་ཏེ་བདག་གི་མི་བཟོད་པའི་རླུང་འཁྲུགས་པར་གྱུར་ན། དེས་བདག་གླེང་གཞི་ཆུང་ངུ་ཙམ་གྱིས་ཀྱང་རབ་ཏུ་ཁྲོ་བར་བྱེད་དོ། །དེས་ཁྲོ་བའི་དབང་དུ་གྱུར་པར་ཡང་
ལེགས་པར་སྟོན་པར་བྱེད་དོ། །སོ་སོའི་སྐྱེ་བོ་རྣམས་ལ་ཁྲོ་བ་སྐྱེད་པར་འགྱུར་བ་ཡང་ཡིན་ནོ། །སྤུ་རྣམས་ཀྱང་ལངས་པར་བྱེད་དོ། །སྙིང་ལ་གནས་པའི་རླན་རྣམས་སྐྱེད་པར་ཡང་བྱེད་དོ། །བདག་གིས་ཉེ་བ་ན་གནས་པའི་
གཟུགས་རྣམས་ཀྱང་རིང་བ་ན་གནས་པ་བཞིན་དུ་མཐོང་ངོ་། །བདག་གིས་ཉི་མ་དང་ཟླ་བ་དག་གི་དཀྱིལ་འཁོར་ཡང་ཕྱིན་ཅི་ལོག་ཏུ་མཐོང་བར་འགྱུར་རོ། །ཟླ་བ་ཡང་ཉི་མ་ལྟར་བདག་གིས་མཐོང་བར་འགྱུར་ཏེ། རླུང་དེ་རབ་ཏུ་

66-1-176a

འཁྲུགས་པར་གྱུར་པའི་སྐྱོན་གྱིས་ཡིན་ནོ། །དེས་མི་བཟོད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་
བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་
སམ་ལྷའི་མིག་གིས་མཐོང་བར་གྱུར་པ། ལྕེ་ལ་གསལ་བྱེད་དང་ཡི་གེ་རྣམས་བྱེད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པ་དང་མ་འཁྲུགས་པ་ན་ལས་ཅི་ཞིག་བྱེད་པ་ཡང་། དེས་ཐོས་
པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་བདག་གི་གསལ་བྱེད་དང་ཡི་གེ་གང་ཡིན་པ་འདི་དག་རྣམས་ནི་བརྗོད་པར་བྱ་བར་ཡང་མི་ནུས་ཀྱི། དེ་དག་ནི་སེམས་དང་སེམས་ལས་བྱུང་བ་དག་
གིས་དམིགས་པས་ལྕེ་ལས་བརྗོད་པ་དང་ཡི་གེ་རྣམས་དང་བཅས་པར་རླུང་གི་མངོན་པར་བརྗོད་པ་ཡིན་ཏེ། སེམས་ཀྱིས་བྱེད་པའི་རྗེས་སུ་འབྲང་བར་བྱེད་པའི་རླུང་གིས་བསྐྱོད་པར་གྱུར་པས་བརྗོད་པ་དང་ཡི་གེ་རྣམས་
གཅིག་མ་ཡིན་པར་བྱེད་པ་ཡིན་ཞིང་། དེ་ལྟར་ལྕེ་ཡིས་བརྗོད་པ་དང་ཡི་གེ་བྱེད་པའི་རླུང་ལ་བརྟེན་པར་གྱུར་ནས་གསལ་བྱེད་དང་ཡི་གེའི་ཀུན་བརྗོད་པ་དུ་མ་རྣམས་བྱེད་པ་ཡིན་ནོ། །གལ་ཏེ་ཡང་འཁྲུགས་པར་གྱུར་ན་ནི་
ལྕེ་ཞན་པར་འགྱུར་བ་འམ། ལྕེ་མགྱོགས་པར་ཡང་བྱེད་ཅིང་ལྐུགས་པར་ཡང་བྱེད་དོ། །ལྕེ་ལ་གསལ་བྱེད་དང་ཡི་གེ་བྱེད་པ་ཞེས་བྱ་བའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་
རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་། འཁྲུགས་པར་མ་གྱུར་པ་ན་ལས་

66-1-176b

ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རོ་སྲེ་བར་བྱེད་པ་ཞེས་བྱ་བའི་རླུང་ལུས་ལ་རབ་ཏུ་གནས་པ་ཡིན་ཏེ། དེ་བདག་ལ་འཁྲུགས་པ་འམ་མ་འཁྲུགས་
པ་ན་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་གལ་ཏེ་བདག་གི་རོ་སྲེ་བར་བྱེད་པའི་རླུང་འཁྲུགས་པར་གྱུར་ན། དེས་བདག་གི་ལྕེའི་རྩེ་མོ་ལ་སྲིན་མངར་
མོས་འདོད་པར་བྱེད་དོ། ། དེ་ཡིས་བདག་ཐམས་ཅད་དུ་འདོད་པར་གྱུར་པ་དང་། ཐམས་ཅད་དུ་དགའ་བར་གྱུར་པ་དང་། ཐམས་ཅད་དུ་ཡིད་དུ་འོང་བར་གྱུར་པའི་ཟས་རྣམས་ལ་བདག་དགའ་བར་འགྱུར་རོ། །བདག་གིས་མྱིད་པར་ཡང་
བྱེད་མི་ནུས་སོ། །བདག་ཟས་དེ་དང་བྲལ་བར་གྱུར་ན་ལུས་བསམ་གཏན་ལ་མཉམ་པར་འཇོག་པར་བྱེད་མི་ནུས་པར་འགྱུར་རོ། །དགེ་བའི་ཆོས་རྣམས་ལ་ཡང་ཤིན་དུ་སྤྲོ་བར་ཡང་མི་འགྱུར་རོ། །བདག་གི་ལུས་ཀྱི་སྐྱོན་གྱིས་
ཡིན་ཏེ། གཟུགས་ནི་ཕན་ཚུན་གྱི་དབང་གིས་ཀུན་དུ་གནས་པའི་ཕྱིར་ན། ཇི་ལྟར་དབྱུག་གུ་གཉིས་ཕན་ཚུན་དུ་ལྟོས་པའི་དབང་གིས་འཛིན་པར་བྱེད་པ་ནི་ཕན་ཚུན་གྱི་སྟོབས་ཀྱིས་ཡིན་ནོ། །དེ་བཞིན་དུ་མིང་དང་གཟུགས་གཉིས་
ཕན་ཚུན་གྱི་སྟོབས་ཀྱིས་དང་། ཟས་ཀྱི་དབང་གིས་ཀྱང་འཁོར་བའི་ཕུང་པོ་འདི་ཡིན་ནོ། །ཇི་ལྟར་ཕྱེ་དང་ཆུ་གཉིས་འདྲེས་པར་གྱུར་པ་དག་གི་ཕན་ཚུན་གྱི་སྟོབས་ཀྱིས་གོང་བུར་འགྱུར་རོ། །དེ་བཞིན་དུ་ཕན་ཚུན་གྱི་སྟོབས་ཀྱིས་
མིང་དང་གཟུགས་དག་གནས་པ་ཡིན་ནོ། །དེས་རོ་སྲེ་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་
ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་

66-1-177a

གལ་ཏེ་བདག་གི་མཆིན་པ་ཀུན་དུ་སུན་འབྱིན་པར་བྱེད་པའི་རླུང་འཁྲུགས་པར་གྱུར་ན་དེས་བདག་གི་ཟས་རྣམས་མཚན་མོ་འཇུ་བར་བྱེད་པ་ན་ལྷང་ཀྱོག་སྐྱེད་པར་བྱེད་པ་དང་། ཟས་རྣམས་ཀྱང་སྐྱུར་པོར་བྱེད་དོ། །དེ་སྲིད་དུ་ལྷང་
ཀྱོག་ཡོད་པར་གྱུར་པ་ཇི་སྲིད་པ་དེ་སྲིད་དུ་ཟས་རྣམས་ཀྱང་སྙོམས་པར་མི་འགྱུར་རོ། །བདག་གི་ཡན་ལག་དང་ཉིང་ལག་རྣམས་ཐམས་ཅད་ཀྱང་སྤྲོ་བ་མེད་པར་འགྱུར་རོ། །འབྲེལ་པ་རྣམས་ཐམས་ཅད་ཀྱང་རྒྱུས་པའི་དྲ་བ་
ཐམས་ཅད་དུ་འབྲེལ་པར་བྱས་པར་འགྱུར་རོ། །མཆིན་པ་ཀུན་དུ་སུན་འདོན་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་ཤེས་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་
བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་འམ་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་
སམ་ལྷའི་མིག་གིས་མཐོང་བར་གྱུར་པ། བཤང་བ་སྟེང་དུ་བྱེད་པའི་བདག་གི་རླུང་དེ་འཁྲུགས་པ་འམ་མ་འཁྲུགས་པར་གྱུར་ན་སྟེ། དེས་བདག་གི་ཁ་དང་སྣ་བུག་དག་ནས་དྲི་ངན་པ་རྣམས་སྐྱེད་པར་བྱེད་དོ། །བདག་གི་ནང་ནས་བྱུང་
ནས་སྤུའི་ཁུང་བུ་རྣམས་ཐམས་ཅད་ལས་ཀྱང་ཕྱིར་འབྱིན་པར་བྱེད་དོ། །ཟས་ཀྱི་གནས་དང་པོའི་སྟེང་དུ་གྱུར་པར་བཤང་བ་དང་ཟས་ཀྱི་གནས་ཐ་མ་དག་འདྲེན་པར་བྱེད་དོ། །དེས་ཀྱང་བདག་ཤིན་དུ་དྲག་པ་དང་ཚ་བ་དང་རྩུབ་པར་གྱུར་
པའི་ཚོར་བ་ལུས་སུ་གྱུར་པ་ཐམས་ཅད་ལ་འབྱུང་བར་འགྱུར་རོ། །ཟས་ཀྱང་ཡང་དག་པ་དང་བདེ་བར་འཇུ་བར་ཡང་མི་འགྱུར་རོ། །བདག་བསམ་གཏན་གྱི་བདེ་བས་གནས་པར་ཡང་མི་འགྱུར་རོ། །བདག་གིས་ཉིན་མོ་སྤྱོད་པའི་
སར་དགེ་བའི་ཕྱོགས་ལ་སྦྱོར་བར་ཡང་མི་ནུས་སོ། །བཤང་བ་གྱེན་དུ་ཟློག་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་

66-1-177b

པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། གཞང་ལ་ཀུན་དུ་རྒྱུ་བ་ཞེས་བྱ་བའི་རླུང་ལུས་ལ་གནས་ཏེ། བདག་གི་རླུང་གཞན་གང་དག་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་
པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གཞང་ལ་ཀུན་དུ་རྒྱུ་བ་ཞེས་བྱ་བའི་རླུང་ལུས་ལ་གནས་པ་ཡིན་ཏེ། དེ་འཁྲུགས་པ་དང་མ་འཁྲུགས་པ་ན་བདག་ལ་ལས་ཅི་ཞིག་བྱེད་པ་
ཡང་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བ་ནི་གལ་ཏེ་བདག་གི་གཞང་ལ་ཀུན་དུ་རྒྱུ་བའི་རླུང་འཁྲུགས་པར་གྱུར་ན། དེས་བདག་གི་གཞང་ལ་འབྲུམ་བུའི་རིགས་ལྔ་དང་མཐུག་ཀོབ་ཏུ་གྱུར་པ་གསུམ་ཀུན་
ནས་སྐྱེད་པར་བྱེད་དོ། །གཞང་ལ་ཀུན་དུ་བརྟེན་ནས་ཀྱང་རླུང་གིས་རྣག་རྣམས་འབྱིན་པར་བྱེད་དོ། །རྣམ་པར་སྲེག་པར་བྱེད་པ་དང་གཉིད་དུ་ཡང་འགྱུར་རོ། །རྒྱུས་པ་དང་གླད་ཕོར་དག་འཁྲུགས་ཅིང་འཁྲུགས་པར་ཡང་འགྱུར་རོ། །
མེ་དོད་ཉམས་པར་ཡང་འགྱུར་བ་དང་། བདག་གི་ལྕེ་ཡང་རོ་ལ་སྲེད་པ་དང་བྲལ་བར་འགྱུར་རོ། །དེས་བཤང་བ་ལ་རྒྱུ་བའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་
ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་ལུས་ལ་རླུང་གཞན་གང་དག་རབ་ཏུ་གནས་པ་ཡིན་ལ། དེ་བདག་ལ་འཁྲུགས་པར་གྱུར་པ་འམ་འཁྲུགས་པར་མ་གྱུར་པ་ན་ལས་ཅི་ཞིག་
བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། དྲན་པ་ཀུན་ནས་འཇོམས་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པ་དང་མ་འཁྲུགས་པ་ན་བདག་
ལ་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ལ། གལ་ཏེ་བདག་གི་དྲན་པ་ཀུན་ནས་སུན་འདོན་པའི་རླུང་འཁྲུགས་པར་གྱུར་ན། དེས་བདག་གི་དྲན་པ་རྣམས་འཇོམས་

66-1-178a

པར་བྱེད་དོ། །བདག་གིས་སྔོན་བླགས་པ་རྣམས་ནི་མི་དྲན་ནོ། །བདག་གིས་དམིགས་པ་མེད་པ་བཞིན་དུ་ཕྱོགས་རྣམས་མཐོང་ངོ་། །གློ་ལུ་བར་བྱེད་པ་དག་ཀྱང་ཡང་དང་ཡང་དུ་འགྱུར་རོ། །སྤུ་རྣམས་ཐམས་ཅད་ཀྱང་
རྩུབ་མོར་འགྱུར་རོ། །བདག་གི་སེན་མོ་རྣམས་ཀྱང་མདངས་ཁྲག་མེད་པར་འགྱུར་རོ། །བདག་ལ་ཚ་གྲང་དག་ཀྱང་ལྷན་ཅིག་ཏུ་འགྱུར་རོ། །བདག་གིས་ཟོས་པ་རྣམས་ཀྱང་ཧ་ཅང་དྲན་པ་ཡང་མ་ཡིན་ནོ། །དེས་དྲན་པ་སུན་འབྱིན་པའི་
རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་
གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གལ་ཏེ་སྤྲོ་བར་བྱེད་པའི་རླུང་བདག་གི་ལུས་
ལ་རབ་ཏུ་གནས་པ་ཡིན་ཏེ། དེ་འཁྲུགས་པ་འམ་མ་འཁྲུགས་པ་ན་བདག་ལ་ལས་ཅི་ཞིག་བྱེད་པ་ཡང་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ལ། གལ་ཏེ་བདག་གི་སྤྲོ་བར་བྱེད་
པའི་རླུང་འཁྲུགས་པར་གྱུར་ན། དེས་རབ་ཏུ་ཕལ་ཆེ་བར་གྱུར་པའི་བཟའ་བར་བྱ་བ་དང་། བཅའ་བར་བྱ་བ་ཤིན་དུ་བསོད་པ་རྣམས་ལ་བདག་གིས་རབ་ཏུ་བརྩོན་པ་བསྐྱེད་ནས་མིད་པར་གྱུར་ཀྱང་ལུས་ལ་སྤྲོ་བ་སྐྱེ་བར་འགྱུར་བ་ཉིད་
ཀྱང་མ་ཡིན་ནོ། །བདག་གི་ལུས་པོ་དུག་གིས་བདུགས་པ་བཞིན་དུ་འགྱུར་ཏེ་རླུང་དེ་རབ་ཏུ་འཁྲུགས་པའི་རྐྱེན་ཀྱིས་སོ། །དེས་སྤྲོ་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་
སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་

66-1-178b

ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ལུས་དང་སེམས་ཀྱི་སྟོབས་བྱེད་པ་ཞེས་བྱ་བའི་རླུང་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པ་
དང་མ་འཁྲུགས་པ་ན་བདག་ལ་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ལ། ཇི་ལྟ་ཇི་ལྟར་བདག་མངལ་ལ་སོགས་པ་རྣམས་ནས་དེ་ལྟ་དེ་ལྟར་བདག་
གི་སེམས་ཀྱང་འཕེལ་བར་བྱེད་དོ། །རླུང་དེའི་མཐུས་བྱ་བ་དང་བྱ་བ་མ་ཡིན་པ་དག་ལ་ཡང་བདག་གི་སེམས་གསལ་པོར་ཡང་རླུང་དེས་བྱེད་དོ། །བདག་གིས་ཤེས་པར་འགྱུར་ཞིང་དང་པོ་དུས་རིང་པོ་ནས་བྱས་པའི་བྱ་བ་
རྣམས་ལ་ཡང་བདག་གིས་ཡང་དག་པར་དྲན་ནོ། །བདག་གི་འགྲོ་བ་དང་འོང་བ་དག་ཡང་འཇོམས་པར་མི་འགྱུར་རོ། །བདག་གྲང་བ་དང་། དྲོ་བ་དང་ལྟོགས་པ་དང་། སྐོམ་པ་དང་བཅས་པར་འགྱུར་རོ། །བདག་གི་ལུས་
མཁྲང་པོར་ཡང་འགྱུར་ཞིང་སྐྲ་དཀར་རྣམས་ཀྱང་དུས་མ་ཡིན་པར་མི་སྐྱེའོ། །དེས་ལུས་དང་སེམས་ཀྱི་སྟོབས་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་
དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་
ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་མགྲིན་པ་དང་ངག་རྣམ་པར་འཇོམས་པར་བྱེད་པ་ཞེས་བྱ་བའི་རླུང་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པ་དང་
མ་འཁྲུགས་པ་ན་བདག་ལ་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི། གལ་ཏེ་བདག་གི་མགྲིན་པ་དང་ངག་རྣམ་པར་འཇོམས་པར་བྱེད་

66-1-179a

པ་ཞེས་བྱ་བའི་རླུང་འཁྲུགས་པར་གྱུར་ན། དེས་བདག་གི་ལུས་རང་བཞིན་དུ་གནས་པར་ནི་རྒྱུ་གཞན་གྱིས་འགྱུར་རོ། །རླུང་དེ་གཞི་དེས་འཁྲུགས་པར་གྱུར་པས་དེའི་ཕྱིར་ལྐུགས་པར་བྱེད་དོ། །དེས་
ཡང་ན་འོན་པར་བྱེད་པ་འམ། དེས་ཡང་ན་ལག་པ་འཁུམ་པར་བྱེད་པ་འམ། དེས་ཡང་ན་རྒུར་པོ་ཉིད་དུ་བྱེད་པ་འམ། དེས་ཡང་ན་དམུས་ལོང་དུ་བྱེད་པར་འགྱུར་ཏེ་རྣམ་པ་དེ་ལྟ་བུ་རྣམས་ཀྱི་ནད་རྣམས་ཀུན་དུ་སྐྱེད་
དོ། །གལ་ཏེ་འཁྲུགས་པར་མ་གྱུར་ན་ནི་ཇི་སྐད་དུ་བཤད་པར་གྱུར་པའི་ནད་དེ་དག་རྣམས་འབྱུང་བར་མི་འགྱུར་རོ། །དེས་མགྲིན་པ་དང་ངག་རྣམ་པར་འཇོམས་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་
དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། རླུང་གཞན་གང་དག་བདག་གི་ལུས་ལ་རབ་ཏུ་གནས་པ་ཡིན་ན། དེས་ཐོས་པ་ལས་
བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཉལ་བ་ན་ལུ་བར་བྱེད་པ་ཞེས་བྱ་བའི་རླུང་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡང་
དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི། གལ་ཏེ་བདག་ཉལ་བ་ན་གློ་ལུ་བར་བྱེད་པའི་རླུང་འཁྲུགས་པར་གྱུར་ན་ནི་དེས་བདག་གིས་རྣམ་པར་འགྱུར་བ་དང་བཅས་པའི་རྨི་ལམ་
རྣམས་མཐོང་བར་འགྱུར་རོ། །རྣ་བ་ངན་པར་གནས་པར་གྱུར་པའི་འཁྲུལ་པའི་བྱ་བ་རྣམས་བྱིས་པ་རྣམས་ཐམས་ཅད་ལ་ཡང་འབྱུང་བ་ཡིན་ཏེ། བདག་གི་རུས་པའི་ཚིགས་རྣམས་ཀུན་དུ་འབིགས་པར་བྱེད་པའི་ཚོར་བ་དག་
ཀུན་དུ་སྐྱེད་དོ། །ཉལ་བ་ན་ཕྱིས་ལུས་ལ་འགྱུར་རོ། །དེས་ཉལ་བ་ན་ལུ་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ལུས་ཡང་དག་པ་ཇི་ལྟ་བ་བཞིན་དུ་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་

66-1-179b

གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། རླུང་གཞན་གང་དག་བདག་གི་ལུས་ལ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་
རབ་ཀྱིས་སམ་ལྷའི་མིག་གིས་མཐོང་བར་གྱུར་པ། དྲོད་འཛིན་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། སྲོག་ཆགས་རྣམས་ཐམས་ཅད་འགའ་ཞིག་གི་ལུས་ལ་ཡང་ཉུང་བར་མི་བྱེད་དོ། །དེ་ནི་
སྲོག་ཆགས་འདི་དག་རྣམས་ཐམས་ཅད་ཀྱི་སྲོག་ཅེས་བྱ་བ་སྟེ། ལྷན་ཅིག་ཏུ་ལུས་འཛིན་པར་བྱེད་པ་རྣམ་པར་ཤེས་པའི་རྟེན་དུ་གྱུར་པ་ཡིན་ནོ། །དེ་གལ་ཏེ་འཁྲུགས་པར་གྱུར་ན་སྲོག་ཆགས་རྣམས་ཐམས་ཅད་གསོད་
པར་བྱེད་དོ། །དེས་དྲོད་ཀུན་དུ་འཛིན་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་
ཞིང་གནས་ཏེ། རླུང་གཞན་གང་དག་བདག་གི་ལུས་ལ་རབ་ཏུ་གནས་པ་དང་། དེ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ཡང་བདག་ལ་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་
ཀྱིས་སམ་ལྷའི་མིག་གིས་མཐོང་བར་གྱུར་པ། བདག་གི་རླུང་ལུས་ཐམས་ཅད་འཁྱིག་པ་ཞེས་བྱ་བ་གལ་ཏེ་མངལ་ན་གནས་པ་རྣམས་ཀྱི་ཡང་གང་ལ་ལུས་རབ་ཏུ་རྒྱས་པར་གྱུར་པ་ཡོད་པ་རྣམས་ཀྱང་དེས་དེའི་ལུས་ཆེས་
མི་འཕེལ་བ་དང་། ཤིན་དུ་ཉམས་པ་དང་། ལྷག་པར་ཡང་འགྱུར་རོ། །ཐུང་བ་འམ་གོག་པོ་འམ་འཁུམས་པར་ཡང་འགྱུར་རོ། །དེས་ལུས་ཐམས་ཅད་སྡོམ་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་
པ་ཇི་ལྟ་བར་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། རླུང་གཞན་གང་དག་བདག་གི་ལུས་ལ་རབ་ཏུ་གནས་པ་ཡིན་ན། དེས་ཐོས་པ་ལས་བྱུང་བའི་

66-1-180a

ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ལྤགས་པ་འཛིན་པ་ཞེས་བྱ་བའི་རླུང་ལུས་ལ་རབ་ཏུ་གནས་པ་ཡིན་ཏེ། དེ་ཕྱི་རོལ་གྱི་རླུང་དང་མཚུངས་པར་འགྲོགས་པས་ཀུན་དུ་རེག་པར་བྱེད་དེ། རླུང་དེ་ནི་གྲང་བ་
དང་། དྲོ་བ་དང་དམན་པ་དང་། གསོད་པ་དང་། རབ་ཏུ་སྟོབས་ཆེ་བ་དང་། དུས་སུ་ཇི་ལྟ་བར་རིགས་པ་དང་། ཇི་ལྟར་དུས་སུ་རིགས་པ་རྣམས་ཡིན་ནོ། །དེས་ལྤགས་པ་འཛིན་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་
པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། རླུང་གཞན་གང་དག་བདག་གི་ལུས་ལ་རབ་ཏུ་གནས་པ་ཡིན་ཞེ་ན། དེས་ཐོས་པ་
ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་ཀྱང་རུང་སྟེ། ཉོན་མོངས་པ་མེད་པ་གཞན་གྱི་སྐྱོན་གྱིས་མི་བཀྲི་བ་ངམ་གྲོག་རྣམས་ལས་རྒལ་བ་ཇི་ལྟ་བ་བཞིན་དུ་དེ་ཁོ་ན་ཉིད་མཐོང་བར་གྱུར་པའི་ལྷའི་མིག་གིས་མཐོང་བ་འདི་ནི་རླུང་
གཞན་ནི་ཡོད་པ་མ་ཡིན་ལ། ལུས་ལ་ཡང་དེ་ཙམ་ཅིག་དང་ལྡན་པ་ཡིན་ནོ། །རླུང་གི་ཚོགས་རྣམས་ནི་འདི་དག་ཡིན་ཞིང་རླུང་གི་ཕུང་པོ་དང་། སྲིན་གང་དག་གིས་ཁམས་ལ་དམིགས་པར་བྱེད་པའི་དབང་པོ་ལས་དང་ཉོན་མོངས་པ་དང་
བཅས་པའི་ལུས་འཛིན་པར་བྱེད་པ་དང་། མཐོ་འཚམ་པར་བྱེད་པ་རྣམས་ནི་དེ་དག་ལས་མེད་དོ། །རྣལ་འབྱོར་སྤྱོད་པ་དེས་ཐ་མའི་རླུང་ལ་སོ་སོར་བརྟགས་ཤིང་ལུས་ཀྱི་གོང་བུ་འདི་མཐོང་བར་གྱུར་ནས་འདོད་པ་རྣམས་ལས་འདོད་ཆགས་
དང་བྲལ་བར་འགྱུར་རོ། །དགའ་བའི་འདོད་ཆགས་དང་ལྷན་ཅིག་ཏུ་གྱུར་པའི་སྲེད་པ་རྣམས་ཀྱིས་མི་འཆིང་ངོ་། །བདུད་ཀྱི་ཡུལ་ལ་མི་གནས་སོ། །མྱ་ངན་ལས་འདས་པའི་མཐའ་ལ་གནས་པ་ཡིན་ནོ། །ཐོག་མ་མེད་པའི་
དུས་ནས་རབ་ཏུ་ཞུགས་པར་གྱུར་པའི་འདོད་ཆགས་དང་། ཞེ་སྡང་དང་། གཏི་མུག་གི་མུན་པ་རྣམས་འཇོམས་པར་བྱེད་དོ། །ཡེ་ཤེས་ཀྱི་ཉི་མའི་མཐར་ཡང་འབྱུང་བར་འགྱུར་རོ། །སོམ་ཉི་མེད་པ་དང་ངམ་གྲོག་རྣམས་དང་རྣམ་

66-1-180b

པར་བྲལ་བར་ཡང་འགྱུར་རོ། །ཀུན་ནས་ཉོན་མོངས་པ་ཅན་དུ་གྱུར་པའི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་ཀྱིས་འཁྲིད་པ་ཡང་མ་ཡིན་ནོ། །ཡུལ་གྱི་དེ་ཁོ་ན་ཉིད་མ་མཐོང་བ་ཡིན་པར་མི་འགྱུར་རོ། །ཁམས་
གསུམ་མ་ལུས་པ་རྣམས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡང་ཇི་ལྟ་བ་བཞིན་དུ་མཐོང་ངོ་། །ནཱ་ལ་ཏིའི་གྲོང་གི་བྲམ་ཟེ་དང་། ཁྱིམ་བདག་རྣམས་དང་། དགེ་སྦྱོང་རྣལ་འབྱོར་སྤྱོད་པ་རྣམས་ཀྱིས་
ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་གྱུར་ཏོ། །ལུས་དྲན་པ་ཉེ་བར་གཞག་པ་ལ་མངོན་པར་དགའ་བར་འགྱུར་རོ། །སྐྱེ་བ་དང་འཇིག་པར་འགྱུར་བའི་ཆོས་རྣམས་ཤེས་པ་དང་། གཞན་རྣམས་ཀྱིས་འཁྲིད་
པར་མི་འགྱུར་བ་དང་། ལུས་ཐམས་ཅད་ལ་སོ་སོར་རྟོག་པར་གྱུར་པ་ན་བཅིང་བ་དང་ཐར་པ་རྣམས་ཐམས་ཅད་ཤེས་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་དེ་ཉིད་ལ་རྣམ་པར་འཇིག་པའི་མཐར་དང་། ཟད་པ་དང་
འགྲིབ་པ་དང་། རྣམ་པར་འཇིག་པའི་རྣམ་པ་གཞན་དག་རྣམས་ཀྱི་རྣམ་པ་གཞན་རྣམས་ཀྱིས་སོ་སོར་རྟོག་པར་བྱེད་དེ། ཇི་ལྟར་ན་ལུས་འདི་རྣམ་པར་འཇིག་པ་ཡིན། འཆི་བའི་དུས་ན་མེད་པར་འགྱུར་བ་ཡིན། ཇི་ལྟར་ན་
སྲིན་རྣམས་རླུང་རྣམས་ཀྱིས་ཀུན་དུ་བཅོམ་ནས་རླག་པར་བྱེད་པ་ཡིན། ཇི་ལྟར་ན་ཁམས་རྣམས་ཐམས་ཅད་འཁྲུགས་པར་འགྱུར་བ་ཡིན། ཇི་ལྟར་ན་ཐ་མའི་དུས་ཀྱི་བྱ་བར་འགྱུར་བ་ཡིན། སྲིན་རྣམས་རླུང་གིས་འཇོམས་
པར་གྱུར་པ་ན་ཇི་ལྟར་ན་སྟེང་འོག་ཏུ་འགྱུར་བ་ཡིན། དེ་ལྟར་ན་ནང་གི་བདག་ཉིད་དུ་གྱུར་པའི་ལུས་ཀྱི་ལུས་ལ་རྟག་པར་རྒྱུན་དུ་རྣམ་པར་ལྟ་བར་བྱེད་དོ། །འཆི་བའི་དུས་ན་ཁམས་རྣམས་ཐམས་ཅད་ཀྱི་སྲིན་ཀུན་དུ་འཁྲུགས་པར་
པར་གྱུར་པ། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་སྔུན་དུ་ན་སྲིན་རྣམས་རླུང་གིས་འཇོམས་པར་གྱུར་ལ། ཕྱི་ནས་ནི་བདག་འཆི་བར་འགྱུར་བ་ཡིན་ནོ། །བདག་གི་འདུ་

66-1-181a

བྱེད་རྣམས་ཐམས་ཅད་ཀྱང་རྣམ་པར་འཇིག་པར་འབྱུང་བར་འགྱུར་ཞིང་བདག་འཆི་བར་འགྱུར་བའི་མཐར་ནི་མི་བཟད་ཅིང་རྩུབ་པའི་ཚོར་བ་རྣམས་འབྱུང་བར་འགྱུར་རོ། །དེས་རྣམ་པར་ལྟ་བར་བྱེད་དེ། ཀླད་པ་ལ་གནས་ནས་
རྒྱུ་བའི་སྲིན་རྣམས་ནི་སེན་མོ་ལ་བརྟེན་པའི་རླུང་གིས་མགོ་ལས་ཀུན་དུ་བགྲོད་ནས་འཇོམས་པར་བྱེད་དོ། །འཆི་བར་བྱེད་དོ། །མགོ་བོ་དང་མགུལ་པ་ལ་རྒྱུ་བའི་སྲིན་རྣམས་ནི་རྐང་པའི་ལོགས་ལ་བརྟེན་པའི་རླུང་གིས་འཇོམས་པར་བྱེད་དོ། །ཐོད་པ་
ལ་རྒྱུ་བའི་སྲིན་རྣམས་ནི་སེམས་མེད་པར་བྱེད་པའི་རླུང་གིས་འཇོམས་པར་བྱེད་དོ། །སྐྲ་ཟ་བའི་སྲིན་རྣམས་ནི་རུས་པ་གཅོག་པར་བྱེད་པའི་རླུང་གིས་འཇོམས་པར་བྱེད་དོ། །རྣ་བ་ལ་རྒྱུ་བའི་སྲིན་རྣམས་ནི་འགྲོ་བ་འཇོམས་པར་བྱེད་པའི་རླུང་གིས་
འཇོམས་པར་བྱེད་དོ། །སྣབས་ཀྱིས་གཡོགས་པའི་སྲིན་རྣམས་ནི་ལོང་བུའི་ཚིགས་པ་འབྱེད་པའི་རླུང་གིས་འཇོམས་པར་བྱེད་དོ། །ཚིལ་གྱི་མཐའ་ན་རྒྱུ་བའི་སྲིན་རྣམས་ནི་ལྗང་ངར་འབྱེད་པར་བྱེད་པའི་རླུང་གིས་འཇོམས་པར་བྱེད་དོ། །ཚིགས་
པ་རྣམས་དང་། འགྲམ་པར་གྱུར་པ་དང་། ལུད་པ་ཟ་བའི་སྲིན་རྣམས་ནི་ཚིགས་པ་འབྱེད་པར་བྱེད་པའི་རླུང་གིས་འཇོམས་པར་བྱེད་དོ། །སོའི་རྩ་བ་ནས་ཟ་བའི་སྲིན་རྣམས་ནི་བྱིན་པ་རབ་ཏུ་འབྱེད་ཅིང་ཉལ་བའི་རླུང་གིས་འཇོམས་པར་བྱེད་དོ། །
བདག་གི་སྲིན་གྱི་རིགས་གཞན་བཅུ་མགྲིན་པ་དང་། བྲང་གི་གསེབ་ན་རྒྱུ་བ་རྣམས་རླུང་གི་སྔ་ཕྱི་རིམ་པས་འཇོམས་པར་བྱེད་པ་རྣམས་ནི་འདི་ལྟ་སྟེ། ཟས་སུ་ངར་སྣབས་ཟ་བའི་སྲིན་རྣམས་ནི་སྤྲོ་བ་འཕེལ་བའི་རླུང་གིས་འཇོམས་པར་བྱེད་
དོ། །རབ་ཏུ་སྐྱུག་པར་བྱེད་པའི་སྲིན་རྣམས་ནི་ཁུ་བ་རྒྱུ་བ་བཅུའི་རྩ་རྣམས་ཀྱི་ནང་ན་རྒྱུ་བར་གྱུར་པ་དེ་འདྲ་བའི་འགྲོ་བ་རྣམ་པར་ཟློག་པར་བྱེད་པའི་རླུང་གིས་འཇོམས་པར་བྱེད་དོ། །མངར་མྱོས་ཀྱི་སྲིན་རྣམས་ནི་ཚིགས་རྣམ་པར་
དཀྲུག་པའི་རླུང་གིས་འཇོམས་པར་བྱེད་དོ། །རོ་དྲུག་ལ་དགའ་བའི་སྲིན་རྣམས་ནི་སྤུ་དང་སེན་མོ་དང་། བཤང་བ་རྣམས་འབྱེད་པར་བྱེད་པའི་རླུང་གིས་འཇོམས་པར་བྱེད་དོ། །གྷུར་གྷུར་བའི་སྲིན་རྣམས་ནི་ཁུ་ཆུ་

66-1-181b

རྣམ་པར་རླུག་བྱེད་ཀྱི་རླུང་གིས་འཇོམས་པར་བྱེད་དོ། །རོ་ལ་རབ་ཏུ་སྡང་བའི་སྲིན་རྣམས་ནི་རྒན་གོག་ཏུ་བྱེད་པའི་རླུང་གིས་འཇོམས་པར་བྱེད་དོ། །ཉལ་བ་ལ་ཤིན་ཏུ་མངོན་པར་དགའ་བའི་སྲིན་རྣམས་ནི་ལྒང་པག་རིངས་པར་བྱེད་
པའི་རླུང་གིས་འཇོམས་པར་བྱེད་དོ། །ཁྲག་ལས་སྐྱེས་པར་གྱུར་པའི་སྲིན་གྱི་རིགས་བཅུ་འདི་ལྟ་སྟེ། ལུས་ལ་སྤུ་ཟ་བའི་སྲིན་རྣམས་ནི་བཤང་བ་ཀུན་དུ་སྐམ་བྱེད་ཀྱི་རླུང་གིས་འཇོམས་པར་བྱེད་དོ། །སླུབས་
ཅན་གྱི་སྲིན་རྣམས་ནི་ལོགས་ན་བར་བྱེད་པའི་རླུང་གིས་འཇོམས་པར་བྱེད་དོ། །འཛན་ཏུ་མཱ་ཏ་རའི་སྲིན་རྣམས་ནི་བུ་ག་དགུ་ལ་གནས་པའི་ནད་ཅེས་བྱ་བའི་རླུང་གིས་འཇོམས་པར་བྱེད་དོ། །ཨོའུ་དུམ་འབར་རའི་
སྲིན་རྣམས་ནི། ཡན་ལག་དང་། ཉིང་ལག་དང་། ཉིང་ལག་ཐུང་བར་བྱེད་པའི་རླུང་གིས་འཇོམས་པར་བྱེད་དོ། །འཛན་ཏུ་མཱ་ཏ་ར་དང་། ཀུན་དུ་འཛག་པའི་སྲིན་རྣམས་ནི་མེ་དྲོད་ཀུན་དུ་སྐུམ་འདོན་པའི་རླུང་
གིས་འཇོམས་པར་བྱེད་དོ། །སྤུའི་གླིང་གི་སྲིན་རྣམས་ནི་ཡན་ལག་དང་། ཉིང་ལག་རྣམས་ཐམས་ཅད་གྲང་བར་བྱེད་པའི་རླུང་གིས་འཇོམས་པར་བྱེད་དོ། །ཁྲག་ཟ་བའི་སྲིན་རྣམས་ནི་བརྟན་པ་འཇིག་པར་བྱེད་
པའི་རླུང་གིས་འཇོམས་པར་བྱེད་དོ། །སྐྱུར་པོ་པའི་སྲིན་རྣམས་ནི་སྲེག་པར་བྱེད་པའི་རླུང་གིས་འཇོམས་པར་བྱེད་དོ། །རྐང་པ་མེད་པ་དང་། དབྱིབས་ཐུང་བར་གྱུར་པ་དང་། ཁྲག་ལས་
སྐྱེས་པའི་སྲིན་ཤིན་དུ་ཕྲ་བ་དང་། མིག་མེད་པ་དང་། གཡན་པ་དང་། འབིགས་བྱེད་ཀྱི་མཚན་ཉིད་དོ། །དེ་ལ་དེ་དག་རྣམས་ནི། གང་གི་ཚེ་འཆི་བའི་ཡུལ་དང་། 
དུས་སུ་གྱུར་པ་ན། དེའི་ཚེ་རླུང་རྣམས་ཀྱིས་སྲིན་དེ་དག་རྣམས་བཅོམ་པར་གྱུར་ནས། ཁྲག་ཀྱང་སྐམ་པར་བྱེད་དོ། །དེ་ལ་དེ་དག་རྣམས་ནི་འཆི་བར་འགྱུར་བ་ན་

66-1-182a

ཡིན་ཏེ། རྩུབ་པར་གྱུར་པ་དང་མི་བཟད་པར་གྱུར་པའི་ཚོར་བ་རྣམས་ཀྱིས་ཀྱང་ཤིན་ཏུ་སྐེམས་པར་བྱེད་དོ། །འཆི་བར་གྱུར་པའི་མཐའ་ན་སོ་སོའི་སྐྱེ་བོ་རྣམས་རང་གི་སྐྱེ་བོ་དང་། གྲོགས་པོ་དང་གཉེན་
འབྲེལ་དང་། བུ་དང་། ཆུང་མ་དང་། ཕུན་སུམ་ཚོགས་པ་དང་། ཡོངས་སུ་སྤྱད་པར་བྱ་བ་རྣམས་ཡོངས་སུ་གཏོང་བར་འགྱུར་བའི་སྲེད་པ་དག་གིས་བྱས་པའི་འཆི་བའི་འཇིགས་པ་དྲག་པོ་རྣམས་བློ་དམན་པ་རྨོངས་པའི་
ཀུན་དུ་སྦྱོར་བས་བཅིངས་པ་རྣམས་ལས་འབྱུང་སྟེ། སྐྱབས་མེད་པར་གྱུར་པ་ཆོས་དང་ཆོས་མ་ཡིན་པ་དང་ཧན་ཅིག་ཏུ་གཅིག་པུ་ཉིད་དུ་གྱུར་པ་ལུས་དང་སེམས་ཀྱི་སྡུག་བསྔལ་གྱིས་ཡན་ལག་དང་ཉིང་ལག་རྣམས་
ཐམས་ཅད་ནས་ཁྲག་ཀུན་དུ་ཚིམ་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་སྲིན་གྱི་རིགས་གཞན་དག་རྣམས་ནི་གང་ཡིན་ཞིང་རླུང་གི་
ཚོགས་རྣམས་ཀྱང་གང་དག་གིས་སྲིན་གང་བཅོམ་པས་བདག་ལ་སྡུག་བསྔལ་དུ་བྱེད་པར་འགྱུར་བ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་སྲིན་གྱི་རིགས་
བཅུ་བདག་གི་ཤ་ལ་གནས་པ་རྣམས་ནི་འདི་ལྟ་སྟེ། རྨ་ལ་ཀུན་དུ་འབྱུང་བ་རྣམས་ཏེ་དེ་ལ་རྨ་ལ་ཀུན་དུ་འབྱུང་བའི་སྲིན་རྣམས་ནི་སྦུད་པའི་རླུང་གིས་འཇོམས་པར་བྱེད་དོ། །ཙུན་ཙུ་ཀའི་སྲིན་རྣམས་ནི་སྟེང་འོག་གི་
རླུང་གིས་འཇོམས་པར་བྱེད་དོ། །རྒྱུས་པ་སྒུལ་བ་ཞེས་བྱ་བའི་སྲིན་རྣམས་ནི་སྲོག་གི་རླུང་གིས་འཇོམས་པར་བྱེད་དོ། །གང་གི་ཕྱིར་སོང་བར་གྱུར་པའི་སྐྱེས་བུ་འཆི་བར་འགྱུར་རོ། །རྩ་འབིགས་པར་བྱེད་པའི་
སྲིན་རྣམས་ནི་འཛུམས་པར་བྱེད་པའི་རླུང་གིས་འཇོམས་པར་བྱེད་དོ། །ལྤགས་པ་གཏུབ་པའི་སྲིན་རྣམས་ནི་སེམས་སུན་འབྱིན་པར་བྱེད་པའི་རླུང་གིས་འཇོམས་པར་བྱེད་དོ། །ཚིལ་སྒུལ་བར་བྱེད་པ་ཞེས་བྱ་

66-1-182b

བའི་སྲིན་རྣམས་ནི་འཁྲུག་པར་བྱེད་པའི་རླུང་གིས་འཇོམས་པར་བྱེད་དོ། །འཕེལ་བྱེད་ཀྱི་སྲིན་རྣམས་ནི་མིག་འབྱེད་པ་དང་འཛུམས་པར་བྱེད་པའི་རླུང་གིས་འཇོམས་པར་བྱེད་དོ། །དྲི་ངན་པའི་སྲིན་རྣམས་ནི་ཕན་ཚུན་དུ་དཀྲུག་པར་བྱེད་
པས་འཆི་བའི་མཐར་ཐུག་པར་བྱེད་པའི་རླུང་ལྔས་འཇོམས་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་བདག་འཆི་བར་གྱུར་པའི་དུས་ན་རྔུལ་ལ་རྒྱུ་བའི་སྲིན་
རྣམས་རླུང་གང་དག་གིས་འཇོམས་པར་བྱེད་པ་ཡིན་ན་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པས། དེ་བཞིན་དུ་མཁྲིས་པ་ལས་རྒྱུ་བའི་སྲིན་རྣམས་ལ་རྣལ་འབྱོར་སྤྱོད་པས་སོ་སོར་
རྟོག་པར་བྱེད་པ་ནི་འདི་ལྟ་སྟེ། ཙུ་ར་བ་ཀཿའི་སྲིན་རྣམས་ནི་མངལ་ཀུན་དུ་འཕེལ་བྱེད་ཀྱི་རླུང་གིས་འཇོམས་པར་བྱེད་དེ། སྐྱེས་བུའི་ལས་རྣམས་དང་ཁྱད་པར་དུ་འཕེལ་བར་བྱེད་དོ། །སྒུལ་བྱེད་ཀྱི་སྲིན་རྣམས་ནི་མངལ་འཇིག་པར་བྱེད་
པའི་རླུང་གིས་འཇོམས་པར་བྱེད་དོ། །སྐྱེས་བུའི་སྟོབས་སྐམ་པར་བྱེད་དོ། །གུར་གུམ་གྱི་མདོག་འདྲ་བའི་སྐྱུར་པོ་གཅིག་ཁའི་སྒོ་ནས་ཀུན་དུ་འབྱུང་བར་ཡང་བྱེད་དོ། །གལ་ཏེ་ན་ཡང་བུད་མེད་དུ་འགྱུར་བར་ཡང་བྱེད་
དོ། །ཀུ་ཤི་མེ་ཏོག་གི་སྲིན་རྣམས་ནི་འགྲོ་བ་དང་། འོང་བ་དང་། རྒྱུག་པ་དང་། མཆོང་བར་བྱེད་པའི་རླུང་གིས་འཇོམས་པར་བྱེད་དོ། །ཆེན་པོའི་རིགས་ཀྱི་སྲིན་དང་། ནག་པ་པ་དང་ཟས་ཆེན་པོ་དང་དྲོ་བ་ལ་རྒྱུ་བ་
རྣམས་ནི་མིག་རྣ་བ་སྣ་ལྕེ་ལུས་རྣམས་རྣམ་པར་འཇོམས་པར་བྱེད་པའི་རླུང་ལྔས་འཇོམས་པར་བྱེད་དོ། །རིམ་པ་ཇི་ལྟ་བ་བཞིན་དུ་རྣམ་པར་སྲེག་བྱེད་ཀྱི་སྲིན་རྣམས་ནི་གྲོག་མ་པའི་རླུང་གིས་འཇོམས་པར་བྱེད་དོ། །མེ་དྲོད་
ཉམས་བྱེད་ཀྱི་སྲིན་རྣམས་ནི་ཁབ་པའི་རླུང་གིས་འཇོམས་པར་བྱེད་དོ། །མེ་ཆེན་པོའི་སྲིན་རྣམས་ནི་རྒྱུ་མ་འབྱེད་པའི་རླུང་གིས་འཇོམས་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་

66-1-183a

ལྟ་ཞིང་གནས་ཏེ། ཇི་ལྟར་བདག་འཆི་བར་གྱུར་པའི་དུས་ན་རུས་པ་ལ་གནས་པའི་སྲིན་རྣམས་རླུང་གང་དག་གིས་འཇོམས་པར་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་
གིས་མཐོང་བར་གྱུར་པ། ཡན་ལག་དང་ཉིང་ལག་རྣམས་ཐམས་ཅད་ལ་གནས་པའི་སྲིན་རྣམས་ནི་འདི་ལྟ་སྟེ། རུས་པ་ལ་ལྡག་པའི་སྲིན་རྣམས་ནི་མཁྲིས་པ་ཀུན་དུ་སུན་འདོན་པར་བྱེད་པའི་རླུང་གིས་འཇོམས་པར་
བྱེད་དོ། །དྲོ་བ་ལ་རྒྱུ་བའི་སྲིན་རྣམས་ནི་བད་ཀན་སུན་འདོན་པའི་རླུང་གིས་འཇོམས་པར་བྱེད་དོ། །ཚིགས་པ་གཅོད་ཅིང་རྒྱུ་བ་དང་དྲི་མི་ཞིམ་པའི་སྲིན་རྣམས་ནི་ལྤགས་པ་ཀུན་ནས་སུན་འདོན་པའི་རླུང་གིས་འཇོམས་
པར་བྱེད་དོ། །རུས་པའི་རྣག་གི་རིགས་ཀྱི་སྲིན་རྣམས་ནི་ཁྲག་ཀུན་དུ་སུན་འདོན་པར་བྱེད་པའི་རླུང་གིས་འཇོམས་པར་བྱེད་དོ། །ཁ་དམར་བའི་སྲིན་རྣམས་ནི་ཤ་སུན་འདོན་པར་བྱེད་པའི་རླུང་གིས་འཇོམས་པར་བྱེད་དོ། 
ལྤགས་པ་ལ་སྤྱོད་ཅིང་ཟ་བའི་སྲིན་རྣམས་ནི་ཁྲག་ཀུན་དུ་སུན་འདོན་པའི་རླུང་གིས་འཇོམས་པར་བྱེད་དོ། །གྲོག་མ་པའི་སྲིན་རྣམས་ནི་ཁུ་ཆུ་ཀུན་ནས་སུན་འདོན་པའི་རླུང་གིས་འཇོམས་པར་བྱེད་དོ། །སྤུ་གྲིའི་ཁའི་
སྲིན་ནི་འཁྲུལ་པར་བྱེད་པའི་རླུང་གིས་འཇོམས་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ་བདག་འཆི་བར་གྱུར་པའི་དུས་ན་བཤང་བ་ལ་རྒྱུ་བའི་
སྲིན་གང་དག་རླུང་གང་དག་གིས་འཇོམས་པར་བྱེད་པ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་དངས་མ་པའི་སྲིན་རྣམས་ནི་སྟོབས་བྱེད་པའི་རླུང་གིས་
འཇོམས་པར་བྱེད་དོ། །ཁབ་ཀྱི་ཁའི་སྲིན་རྣམས་ནི་རྔུལ་ཀུན་ནས་སུན་འདོན་པའི་རླུང་གིས་འཇོམས་པར་བྱེད་དོ། །ཕི་སྤི་སྐྱེས་ཀྱི་སྲིན་རྣམས་ནི་གཅིན་ལྷག་པར་སུན་འདོན་པར་བྱེད་པའི་རླུང་གིས་འཇོམས་པར་བྱེད་དོ་རྐང་

66-1-183b

མེད་ཀྱི་སྲིན་རྣམས་ནི་ཚིལ་ཀུན་དུ་སུན་འདོན་པའི་རླུང་གིས་འཇོམས་པར་བྱེད་དོ། །མི་སྤྱོད་པའི་སྲིན་རྣམས་ནི་ཟས་དང་ལྡན་པའི་རླུང་གིས་འཇོམས་པར་བྱེད་དོ། །བཤང་བ་རྣམ་པར་འཐོར་བྱེད་ཀྱི་སྲིན་རྣམས་ནི་སོ་རྣམ་
པར་བྱེད་པའི་རླུང་གིས་འཇོམས་པར་བྱེད་དོ། །བཤང་བ་འབྱེད་པའི་སྲིན་རྣམས་ནི་རྩེའུ་ཆུང་སྡུད་པར་བྱེད་པའི་རླུང་གིས་འཇོམས་པར་བྱེད་དོ། །རྒྱུ་མ་འབྱེད་པའི་སྲིན་རྣམས་ནི་འོག་དུ་འགྲོ་བའི་རླུང་གིས་འཇོམས་
པར་བྱེད་དོ། །ཟས་སྨིན་པ་རྣམས་སོ་སོར་རེངས་པར་བྱེད་པའི་སྲིན་རྣམས་ནི་སྟེང་དུ་འགྲོ་བའི་རླུང་གིས་སོ་སོར་འཇོམས་པར་བྱེད་དོ། །མདོག་བཟངས་ཀྱི་སྲིན་རྣམས་ནི་ལོགས་ལ་རྒྱུ་བའི་རླུང་གིས་འཇོམས་
པར་བྱེད་དོ། །གཞང་སྨིན་པར་བྱེད་པའི་སྲིན་རྣམས་ནི་ཟ་མ་ཏོག་ལ་གནས་པའི་རླུང་གིས་འཇོམས་པར་བྱེད་དོ། །སྲིན་རྣམས་དང་རླུང་དེ་དག་རྣམས་ཀྱིས་ཀྱང་བཤང་བ་རྣམས་ཐམས་ཅད་ཀྱང་ངེས་པར་སྐམས་པར་
འགྱུར་ཞིང་ཁམས་རྣམས་ཐམས་ཅད་ཀྱང་ཁྱད་པར་དུ་སྐམས་ནས་ཕན་ཚུན་གྱིས་གཡོམས་ཤིང་ཀུན་དུ་དྲུད་པར་གྱུར་པས་སྟེང་འོག་ཏུ་གྱུར་པར་བྱས་ནས་ཁམས་རྣམས་ཐམས་ཅད་ཀྱང་དཀྲུག་པར་གྱུར་པས་གོག་པོར་
གྱུར་པ་དང་། མྱགས་པར་གྱུར་པ་དང་རྣམ་པར་གཡོགས་པར་གྱུར་པས་ཀྱང་བྱེ་བྲག་ཏུ་བྱས་ཤིང་དམན་པར་བྱས་པས་ནི་སྐྱེས་བུ་རྣམས་སམ་བདག་ཀྱང་རླུང་སྟེ། འཆི་བའི་མཐར་གྱུར་པ་ན་རྩུབ་པ་གཞན་རྣམས་དང་མི་འདྲ་བའི་ཚོར་
བ་རྣམས་ངེས་པར་མྱོང་བར་འགྱུར་བར་སྐྱེ་བོ་རྣམས་ཐམས་ཅད་ལ་ངེས་པར་མྱོང་བར་འགྱུར་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་སྲིན་གང་དག་འཆི་བའི་
མཐར་ཐུག་པར་གྱུར་པ་ན་རླུང་གང་དག་གིས་འཇོམས་པར་བྱེད་པ་ཡིན་ཞེ་ན་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བདག་གི་རྐང་མར་ལ་རྒྱུ་བར་གྱུར་པའི་སྲིན་གྱི་རིགས་བཅུ་ལ་འདི་ལྟ་སྟེ་སྤུ་ལ་

66-1-184a

གནས་པའི་སྲིན་རྣམས་ནི་སྤུ་ཀུན་ནས་སུན་འདོན་པའི་རླུང་གིས་འཇོམས་པར་བྱེད་དོ། །ཁ་ནག་པའི་སྲིན་རྣམས་ནི་རྗེས་སུ་འཐུན་པར་བྱེད་པའི་རླུང་གིས་འཇོམས་པར་བྱེད་དོ། །སྤྲོ་བ་མེད་པའི་སྲིན་རྣམས་ནི་ཉལ་བ་ན་རྣམ་པར་
གཡེང་བར་སྟོན་པའི་རླུང་གིས་འཇོམས་པར་བྱེད་དོ། །གཟེར་ཟུག་ཆེན་པོར་བྱེད་པའི་སྲིན་རྣམས་ནི་མི་བཟོད་པའི་རླུང་གིས་འཇོམས་པར་བྱེད་དོ། །རྨོངས་པར་བྱེད་པའི་སྲིན་རྣམས་ནི་ལྕེ་ལ་གསལ་བྱེད་དང་ཡི་གེ་བྱེད་པའི་རླུང་གིས་
འཇོམས་པར་བྱེད་དོ། །མེའི་མདོག་གི་སྲིན་རྣམས་ནི་རོ་རྣམས་འདྲེ་བར་བྱེད་པའི་རླུང་གིས་འཇོམས་པར་བྱེད་དོ། །འགྲེང་བའི་སྲིན་རྣམས་ནི་མཆིན་པ་ཀུན་ནས་སུན་འདོན་པའི་རླུང་གིས་འཇོམས་པར་བྱེད་དོ། །འོག་ཏུ་རྒྱུ་བའི་སྲིན་རྣམས་ནི་
བཤང་བ་གྱེན་དུ་བྱེད་པའི་རླུང་གིས་འཇོམས་པར་བྱེད་དོ། ། ཨུནྚིང་གའི་སྲིན་རྣམས་ནི་གཞང་ལ་རྒྱུ་བའི་རླུང་གིས་འཇོམས་པར་བྱེད་དོ། །ཀུན་དུ་རྟོགས་པས་དགའ་བའི་སྲིན་རྣམས་ནི་དྲན་པ་ཀུན་ནས་སུན་འདོན་པའི་རླུང་གིས་འཇོམས་
པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ་རྟག་པར་ཀུན་དུ་མཐོང་བ་མ་ཡིན། གཙང་མར་མཐོང་བ་མ་ཡིན། བདག་ཏུ་མཐོང་བ་མ་ཡིན་ནོ། །སྔོན་གྱི་སྲིན་ཅིག་ནི་མཁལ་མ་སུན་
འདོན་པར་བྱེད་པའི་རླུང་གིས་འཇོམས་པར་བྱེད་དོ། །སྲིན་འདི་དག་རྣམས་ནི་འཆི་བའི་དུས་སུ་རླུང་རྣམས་ཀྱིས་འཇོམས་པར་བྱེད་དོ། །དེ་དེ་ལྟར་ན་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ཡིན་ཏེ། དགེ་སློང་གིས་ཐོག་མ་མེད་
པའི་དུས་ནས་རབ་ཏུ་བཞུགས་པར་གྱུར་པའི་མུན་པ་རྣམས་ལྷག་མ་ལུས་པ་མེད་པར་འཇོམས་པར་འགྱུར་རོ། །ཟག་པ་མེད་པ་ཤིན་དུ་མཐར་ཐུག་པར་གྱུར་པ་གཞན་རྣམས་དང་མི་འདྲ་བར་གྱུར་པ་འཇིག་རྟེན་ལས་འདས་པའི་སྣང་
བ་རྣམས་ཀྱང་འདི་ལ་རབ་ཏུ་འབྱུང་བར་འགྱུར་རོ། །རྗེས་སུ་དྲན་པ་རྣམས་ཀྱང་རྣམ་པ་བདུན་དུ་གྱུར་པ་ལས་འཆི་བ་རྗེས་སུ་དྲན་པ་ནི་མཆོག་ཏུ་བསྟན་པ་ཡིན་ནོ། །འདི་ལྟ་སྟེ། སངས་རྒྱས་རྗེས་སུ་དྲན་པ་དང་། ཆོས་རྗེས་སུ་དྲན་པ་དང་། 

66-1-184b

དགེ་འདུན་རྗེས་སུ་དྲན་པ་དང་། ལྷ་རྗེས་སུ་དྲན་པ་དང་། མི་རྟགས་པ་རྗེས་སུ་དྲན་པའོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཆོས་རྣམས་ཐམས་ཅད་ལ་རྒུད་པ་འབྱུང་བར་
བྱེད་པའི་འཆི་བ་རྣམ་པ་དུ་ཞིག་ཡོད་ཅེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འཆི་བ་ནི་རྣམ་པ་བཞི་ཡིན་ནོ། །འདི་ལྟ་སྟེ། སའི་ཁམས་མ་སྙོམས་པས་བསྐྱེད་པ་དང་། ཆུའི་
ཁམས་མ་སྙོམས་པས་བསྐྱེད་པ་དང་། མེའི་ཁམས་མ་སྙམས་པས་བསྐྱེད་པ་དང་། རླུང་གི་ཁམས་མ་སྙོམས་པས་བསྐྱེད་པའོ། །དེ་ལ་ཇི་ལྟར་ན་སའི་ཁམས་མ་སྙོམས་པས་བསྐྱེད་པའི་འཆི་བས་འཆི་བར་འགྱུར་བ་
ཡིན་ཞེ་ན། གང་གི་ཚེ་སའི་ཁམས་རྣམས་འཁྲུགས་པར་གྱུར་པ་ན་ཕྱིར་ཞིང་རླུང་གིས་ཀྱང་སའི་ཁམས་རྣམས་ཀྱང་སྲ་ཞིང་མཁྲང་བར་གྱུར་ནས་ཡན་ལག་དང་ཉིང་ལག་རྣམས་ཐམས་ཅད་ཀུན་དུ་གཡོས་ཤིང་ཀུན་དུ་མནན་
པས་མྱགས་པར་བྱེད་དོ། །ཕན་ཚུན་དུ་འཇོམས་པར་བྱེད་ཅིང་ཀུན་དུ་འཚིར་བར་བྱེད་དོ། །དཔེར་ན་རྡོ་རྗེའི་རང་བཞིན་གྱི་རི་གཉིས་སུ་གྱུར་པ་དེ་དག་གི་བར་དུ་མར་སར་པའི་གོང་བུ་གཅིག་བཅུག་པར་གྱུར་ལ་དེ་དག་ཀྱང་ཕན་ཚུན་དུ་
དུས་ཀྱིས་རླུང་གི་ཚད་དུ་གྱུར་པའི་རླུང་གི་ཤུགས་ཀྱིས་ལེགས་པར་དྲུད་པར་གྱུར་ན། དེ་ལ་ཇི་ལྟར་ན་མར་སར་གྱི་གོང་བུའི་སྙིང་པོ་ཉིད་དུ་ཐ་སྙད་གདགས་པར་བྱ། དེ་ཁོ་ན་བཞིན་དུ་སའི་ཁམས་འཁྲུགས་པར་གྱུར་པས་བདག་
གི་ཡན་ལག་དང་ཉིང་ལག་རྣམས་ཐམས་ཅད་དང་། ཁམས་རྣམས་ཐམས་ཅད་དང་། རྒྱུས་པའི་ཟ་མ་ཏོག་གི་ལྤགས་པ་དང་། ཁྲག་དང་། ཤ་དང་། ཚིལ་དང་། རུས་པ་དང་། རྐང་མར་དང་། ཁུ་ཆུ་དང་རྣམས་ནི་ཐམས་ཅད་ཀྱང་མར་སར་
དང་འདྲ་བར་འགྱུར་བ་ཡིན་ནོ། །རྟག་ཏུ་རྒྱུན་མི་འཆད་པར་ཀུན་ནས་མནན་པར་གྱུར་པའི་ཉེ་འཁོར་རྣམས་ནི་ཤིན་དུ་ཉམས་པར་མི་འགྱུར་རོ། །དེས་བདག་གི་ཁམས་རྣམས་དེ་ལྟར་མནན་པར་གྱུར་པས་སྡུག་བསྔལ་རྣམས་

66-1-185a

འབྱུང་བར་འགྱུར་རོ། །སངས་རྒྱས་རྗེས་སུ་དྲན་པ་འམ། ཆོས་རྗེས་སུ་དྲན་པ་འམ། དགེ་འདུན་རྗེས་སུ་དྲན་པར་གྱུར་པ་ཡང་རུང་སྟེ། སྲིད་པ་ཐ་མ་པ་རྣམས་ཀྱིས་ཡང་དག་པའི་བློས་དམིགས་པ་རྒྱུན་མ་ཆད་པར་
གྱུར་ན་སོ་སོའི་སྐྱེ་བོ་འདི་དག་རྣམས་ཐམས་ཅད་ལ་ཡང་རྒྱུད་ལ་དམིགས་པ་དང་ཆ་འདྲ་བའི་སྐྱེ་བ་འབྱུང་བར་འགྱུར་རོ། །རྒྱའི་ཆ་རྣམས་ཅི་འདྲ་བར་གྱུར་པ་ཡིན་པའི་རྒྱས་བཏབ་པ་རྣམས་ཀྱང་དེ་དང་འདྲ་བར་འགྱུར་རོ། །དེ་
བཞིན་དུ་འཆི་བའི་དུས་ཀྱི་སྲིད་པ་ཐ་མ་པ་རྣམས་ཀྱི་སེམས་ཀྱི་རྒྱུན་རྣམ་པ་ཇི་སྲིད་དང་འདྲ་བར་གྱུར་པའི་སྐྱེ་བ་དེ་དང་དེ་འདྲ་བའི་རྣམས་འབྱུང་བ་ཡིན་ནོ། །སེམས་སྤྲེའུ་གྱི་དབང་གིས་སྐྱེ་བ་དང་འཆི་བ་རྣམས་འབྱུང་
བ་ཡིན་ནོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་ན་བདག་ཅག་གི་ཆུའི་ཁམས་རྣམས་མ་སྙོམས་པར་གྱུར་པས་བྱིས་པ་སོ་སོའི་སྐྱེ་བོ་འདི་དག་རྣམས་
ཐམས་ཅད་འཆི་བ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གལ་ཏེ་བདག་གི་ཆུའི་ཁམས་རྣམས་འཁྲུགས་པར་གྱུར་ན་དེས་བདག་གི་ཡན་ལག་དང་ཉིང་ལག་
རྣམས་ཐམས་ཅད་ཀྱང་རྒྱུས་པའི་སྦུབས་རྣམས་ཐམས་ཅད་དང་། ཁམས་རྣམས་ཐམས་ཅད་དང་། ལྤགས་པ་དང་། ཁྲག་དང་། ཤ་དང་། ཚིལ་དང་། རུས་པ་དང་། རྐང་མར་དང་། ཁུ་ཆུ་དང་རྣམས་ཀུན་དུ་རྐུ་བར་བྱེད་ཅིང་ཀུན་
ནས་བཞུ་བར་འགྱུར་བ་ནི་འཆི་བའི་དུས་ན་བདག་དང་སོ་སོའི་སྐྱེ་བོ་འདི་དག་རྣམས་ཐམས་ཅད་ལ་ཡང་ངེས་པར་འབྲེལ་པར་འགྱུར་རོ། །ཕན་ཚུན་དུ་ཀུན་ནས་དབུ་བར་བྱེད་ཅིང་བསྐྱོད་པར་བྱེད་དོ། །འདི་ལྟ་སྟེ། རི་གཉིས་ནི་
སྔོན་བཞིན་ནོ། །དེ་ལ་མར་སར་གྱི་གོང་བུ་རྒྱ་མཚོར་བཅུག་པར་གྱུར་ཅིང་དུས་ཀྱི་རླུང་གིས་རྣམ་པར་བཅོམ་པར་གྱུར་པ་ལ་ནི་གནས་པ་མེད་དོ། །སྐྱོབ་པ་མེད་དོ། །སྙིང་པོར་གྱུར་པ་གང་ཡང་མེད་ཅིང་དེ་ལ་ནཾ་བརྟན་པ་ཡང་

66-1-185b

ཡོད་པ་མ་ཡིན་ནོ། །བདག་ཆུའི་ཁམས་ཀྱིས་མནར་བར་གྱུར་པའི་སྡུག་བསྔལ་རྣམས་ནི་དེ་ལྟ་བུ་ཡིན་ནོ། །སངས་རྒྱས་རྗེས་སུ་དྲན་པ་འམ། ཆོས་རྗེས་སུ་དྲན་པ་འམ། དགེ་འདུན་རྗེས་སུ་དྲན་པ་ཡང་རུང་སྟེ། སྲིད་པ་ཐ་མ་པ་
རྣམས་ཀྱི་ཡང་དག་པའི་བློས་དམིགས་པ་རྒྱུན་མ་ཆད་པར་གྱུར་ན་སོ་སོའི་སྐྱེ་བོ་འདི་དག་རྣམས་ཐམས་ཅད་ལ་ཡང་རྒྱུད་ལ་དམིགས་པའི་རྒྱའི་རྗེས་དང་ཆ་འདྲ་བའི་སྐྱེ་བ་འབྱུང་བར་འགྱུར་རོ། །རྒྱའི་ཆ་རྣམས་ཅི་འདྲ་བར་གྱུར་
པ་ཡིན་པའི་རྣམ་པ་དེ་སྲིད་ཀྱི་རྒྱས་བཏབ་པའི་སྐྱེ་བ་འབྱུང་ངོ་། །དཔེ་དེ་བཞིན་དུ་འཆི་བའི་དུས་ཀྱི་ཚེ་ན་སྲིད་པ་ཐ་མ་པ་རྣམས་ཀྱི་སེམས་ཀྱི་རྒྱན་རྣམས་ཇི་སྲིད་དུ་གྱུར་པ་དེ་བཞིན་དུ་སྐྱེ་བ་རྣམས་འབྱུང་བར་འགྱུར་རོ། །
གང་གི་ཕྱིར་སེམས་སྤྲེའུ་གྱི་དབང་གིས་རྒ་ཤིའི་དུས་ན་སྐྱེ་བའི་གནས་ཡིན་ནོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་བདག་འཆི་བར་གྱུར་པའི་དུས་ན་མེའི་
ཁམས་འཁྲུགས་པས་འཆི་བར་འགྱུར་བ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི། གལ་ཏེ་བདག་འཆི་བར་གྱུར་པའི་དུས་ན་མེའི་ཁམས་རྣམས་འཁྲུགས་པར་གྱུར་
ན་དེས་བདག་གི་ཡན་ལག་དང་ཉིང་ལག་རྣམས་ཐམས་ཅད་རྩ་དང་རྒྱུས་པའི་ཟ་མ་ཏོག་རྣམས་ཐམས་ཅད་དང་། ཁམས་རྣམས་ཐམས་ཅད་དང་། ལྤགས་པ་དང་། ཁྲག་དང་། ཤ་དང་། ཚིལ་དང་། རུས་པ་དང་། རྐང་མར་དང་། ཁུ་ཆུ་
རྣམས་སྲེག་གོ། །འཚེད་དོ། །ཀུན་དུ་ཚ་བར་བྱེད་དོ། །ཀུན་ནས་རབ་ཏུ་འབར་བར་བྱེད་དེ། དཔེར་ན་སེང་ལྡེང་གི་མེ་མདག་གི་ཕུང་པོ་ཆེན་པོ་རི་དང་མཚུངས་པར་གྱུར་པ་དག་ཏུ་མར་སར་གྱི་གོང་བུ་བཅུག་པར་གྱུར་ལ་དེ་སྲེག་པར་བྱེད། 
འཚེད་པར་བྱེད། ཀུན་ནས་རབ་ཏུ་འབར་བེད་དོ། །ཀུན་དུ་སྐོལ་བར་ཡང་བྱེད་པ་དེ་བཞིན་དུ་བདག་གི་ལུས་པོ་རྣམས་ཐམས་ཅད་ཀྱང་མར་སར་གྱི་གོང་བུ་དང་འདྲ་བར་གྱུར་པ་ཡིན་ན། ད་ཡིས་བདག་འཆི་བར་གྱུར་པའི་ཐ་མའི་

66-1-186a

ལུས་ཀུན་དུ་ཚ་བར་སྡུག་བསྔལ་བར་བྱེད་དོ། །སངས་རྒྱས་རྗེས་སུ་དྲན་པ་འམ། ཆོས་རྗེས་སུ་དྲན་པ་འམ། དགེ་འདུན་རྗེས་སུ་དྲན་པར་གྱུར་པ་ཡང་རུང་སྟེ། ཡང་དག་པའི་བློས་ཐ་མའི་སེམས་ཀྱི་དམིགས་པ་
རྒྱུན་མ་ཆད་པར་གྱུར་ན་སོ་སོའི་སྐྱེ་བོ་འདི་དག་རྣམས་ཐམས་ཅད་ལ་ཡང་རྒྱུད་ལ་དམིགས་པར་གྱུར་པའི་སྒྲུབ་པའི་རྒྱ་དང་ཆ་འདྲ་བའི་སྐྱེ་བ་རྣམས་འབྱུང་བར་འགྱུར་རོ། །ཇི་ལྟར་རྒྱ་གང་དག་དང་འདྲ་བར་གྱུར་པའི་རྣམ་པ་དེ་
སྲིད་ཀྱི་རྒྱའི་རྗེས་ཀྱི་སྐྱེ་བ་འབྱུང་བ་ཡིན་ནོ། །དེ་ལྟར་རྣམ་པ་ཇི་སྲིད་པར་གྱུར་པའི་འཆི་བའི་དུས་ན་སྲིད་པ་ཐ་མའི་སེམས་འབྱུང་བར་གྱུར་པ་དེ་ལྟར་སྐྱེ་བ་ཡང་འབྱུང་བར་འགྱུར་རོ། །གང་གི་ཚེ་སེམས་སྤྲེའུ་གྱི་དབང་གིས་
རྒ་ཤིའི་དུས་སུ་སྐྱེ་བ་ཉེ་བར་གནས་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་འཆི་བར་འགྱུར་བའི་དུས་ན་ཇི་ལྟར་ན་རླུང་འཁྲུགས་པས་འཆི་བར་
འགྱུར་བ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གལ་ཏེ་བདག་འཆི་བར་གྱུར་པའི་དུས་སུ་རླུང་གི་ཁམས་རྣམས་རབ་ཏུ་འཁྲུགས་པར་གྱུར་ན། དེས་བདག་གི་
ཡན་ལག་དང་ཉིང་ལག་རྣམས་ཐམས་ཅད་དང་། རྒྱུས་པའི་ཟ་མ་ཏོག་རྣམས་ཐམས་ཅད་དང་། ཁམས་རྣམས་ཐམས་ཅད་ཀྱི་ཡང་འདི་ལྟ་སྟེ། ལྤགས་པ་དང་། ཁྲག་དང་། ཤ་དང་། ཚིལ་དང་། རུས་པ་དང་། རྐང་མར་དང་། 
ཁུ་ཆུ་རྣམ་པར་ཉམས་པར་བྱེད་དོ། །ཀུན་དུ་སྐེམས་པར་བྱེད་དོ། །ཀུན་དུ་གྱོང་བ་ཉིད་དུ་བྱེད་དོ། །ཕན་ཚུན་དུ་གཤག་པར་བྱེད་དོ། །རྐང་པའི་སེན་མོ་རྣམས་ནས་བཟུང་ནས་ཇི་སྲིད་དུ་མགོ་བོའི་བར་དུ་བྱེ་མ་དང་འདྲ་བར་
ཕྱེ་མར་བྱེད་དོ། །དཔེར་ན་མར་སར་གྱི་གོང་བུ་དུས་ཀྱི་རླུང་གིས་ཕན་ཚུན་དུ་བཏབ་པར་གྱུར་ན་མར་གྱི་གོང་བུ་རྣམ་པར་ཉམས་པར་བྱེད་དོ། །ཀུན་དུ་སྐམས་པར་བྱེད་དོ། །ཀུན་ནས་གྱོང་པོ་ཉིད་དུ་བྱེད་དོ། །ནམ་མཁར་ཕན་ཚུན་

66-1-186b

གྱིས་ཡན་ལག་རྣམས་བྱེ་མ་བཞིན་དུ་ཕྱེ་མར་བྱེད་དོ། །དེ་ཁོ་ན་བཞིན་དུ་བདག་འཆི་བར་གྱུར་པའི་དུས་ན་རླུང་གི་ཁམས་རྣམས་རབ་ཏུ་འཁྲུགས་པར་གྱུར་པས། དེ་ལས་བདག་འཆི་བར་གྱུར་པའི་ཐ་མའི་ལུས་ཀུན་ནས་
མངོན་པར་སྲེད་པའི་ཚོར་བའི་སྡུག་བསྔལ་རྣམས་འབྱུང་ངོ་། །སངས་རྒྱས་རྗེས་སུ་དྲན་པར་གྱུར་པ་འམ། ཆོས་རྗེས་སུ་དྲན་པར་གྱུར་པ་འམ། དགེ་འདུན་རྗེས་སུ་དྲན་པར་གྱུར་པ་ཡང་རུང་སྟེ། ཡང་དག་པའི་
བློས་ཐ་མའི་སེམས་ཀྱི་དམིགས་པ་རྒྱུན་མ་ཆད་པར་གྱུར་ན། སོ་སོའི་སྐྱེ་བོ་འདི་དག་རྣམས་ཐམས་ཅད་ལ་ཡང་རྒྱུད་ལ་ཡང་དམིགས་པ་སོ་སོ་དང་སོ་སོའི་རྒྱ་རྣམས་དང་ཆ་འདྲ་བའི་སྐྱེ་བ་རྣམས་འབྱུང་བ་ཡིན་ནོ། །
ཇི་ལྟར་རྒྱ་རྣམས་ཇི་སྲིད་ཀྱི་རྣམ་པ་ཡིན་པར་གྱུར་པ་དེ་བཞིན་དུ་རྣམ་པ་ཇི་སྲིད་དུ་འཆི་བའི་དུས་ཀྱི་སྲིད་པ་ཐ་མ་པའི་སེམས་སུ་གྱུར་པ་དེ་ཇི་ལྟ་བ་བཞིན་དུ་སྐྱེ་བར་འགྱུར་ཏེ། གང་གི་ཕྱིར་ལུས་སེམས་སྤྲེའུ་གྱི་དབང་
ཡིན་པའི་ཕྱིར་འཆི་བའི་ཚེ་ན་སྐྱེ་བའི་གནས་ཡིན་ནོ། །དེ་ལྟར་ན་འབྱུང་བ་ཆེན་པོ་བཞི་པོ་རྣམས་རབ་ཏུ་འཁྲུགས་པའི་འཆི་བ་རྣམ་པ་བཞི་ཡིན་ནོ། །རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་
རྗེས་སུ་ལྟ་བ་རྣམས་ཀྱིས་ནི་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་སེམས་ཅན་རྣམས་མཚུངས་པར་མཐོང་བ་ཡིན་ནོ། །དེ་མཐོང་བར་གྱུར་པས་ཀྱང་བདུད་ཀྱི་དྲུང་ན་མི་གནས་སོ། །མྱ་ངན་ལས་
འདས་པའི་མཐའ་ལ་གནས་པ་ཡིན་ནོ། །དེ་ཀུན་ནས་ཉོན་མོངས་པ་ཅན་དུ་འགྱུར་བའི་འདོད་པའི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་ཀྱིས་འཁྲིད་པར་བྱེད་པ་ཉིད་ཀྱང་མ་ཡིན་ནོ། །དགའ་བའི་འདོད་ཆགས་དང་
ལྷན་ཅིག་འགྲོགས་པར་གྱུར་པའི་སྲེད་པ་རྣམས་ཀྱིས་འཆིང་བར་མི་བྱེད་དོ། །ཉོན་མོངས་པའི་རྡུལ་རྣམས་དང་རྣམས་བྲལ་བར་འགྱུར་རོ། །ངམ་གྲོག་རྣམས་དང་རྣམ་པར་བྲལ་བ་དང་། གཟུགས་དང་དྲིས་ཀྱང་ཕྲོགས་པ་མ་ཡིན་ནོ། 

66-1-187a

གཟུགས་ཀྱིས་རྒྱགས་པས་རྒྱགས་པར་ཡང་མི་འགྱུར་རོ། །ལང་ཚོའི་རྒྱགས་པས་རྒྱགས་པར་ཡང་མི་འགྱུར་རོ། །གསོན་པའི་རྒྱགས་པར་ཡང་མི་འགྱུར་རོ། །ཚོགས་པ་འདུས་པ་ལ་དགའ་བར་ཡང་མི་འགྱུར་རོ། །རྟག་ཏུ་
གྲོང་ཁྱེར་རྣམས་སུ་འཇུག་པར་ཡང་མི་འགྱུར་རོ། །གང་དེ་ལ་མངོན་པར་དགའ་བར་ཡང་མི་བྱེད་དོ། །འཆི་བར་འགྱུར་བའི་འཇིགས་པས་ཀྱང་འཇིགས་པར་འགྱུར་རོ། །ཁ་ན་མ་ཐོ་བ་ཕྲ་རབ་ཙམ་རྣམས་ལ་ཡང་འཇིགས་པར་ལྟ་བར་འགྱུར་རོ། །ཡང་དག་
པ་ཇི་ལྟ་བ་བཞིན་དུ་ལུས་སོ་སོར་རིག་པར་འགྱུར་རོ། །སྐྱེ་བ་དང་འཇིག་པའི་ཆོས་རྣམས་ཀྱང་ཤེས་པར་འགྱུར་རོ། །དེ་ནི་ཀུན་ནས་ཉོན་མོངས་པ་ཅན་དུ་གྱུར་པའི་འདོད་པ་རྣམས་ཐམས་ཅད་ལས་འདོད་ཆགས་དང་བྲལ་བར་འགྱུར་
རོ། །སྙོམ་ལས་ཅན་དུ་མི་འགྱུར་རོ། །དམ་པའི་ཆོས་ལ་ཡང་རྒྱུན་དུ་དགའ་བར་འགྱུར་རོ། །དེ་ལྟར་ནཱ་ལ་ཏིའི་གྲོང་གི་བྲམ་ཟེ་དང་། ཁྱིམ་བདག་རྣམས་དང་། དགེ་སྦྱོང་རྣམས་ཀྱང་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་
གནས་སོ། །རྣལ་འབྱོར་སྤྱོད་པ་རྣམས་ཇི་ལྟར་གནས་པ་ཡིན་ཞེ་ན། དགེ་སློང་དག་འདི་ན་ཕྱི་རོལ་གྱི་ཆོས་ཀྱིས་རྣལ་འབྱོར་སྤྱོད་པ་རྣམས་ནང་གི་བདག་ཉིད་ཀྱི་ལུས་ལ་སོ་སོར་རྟོག་པར་བྱེད་དོ། །འདི་ལྟ་སྟེ། ཕྱི་རོལ་གྱི་ཆོས་རྣམས་
མཐོང་ནས་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ལས་དང་པོ་ས་བོན་གྱི་ཚོགས་རྣམས་ལ་སོ་སོར་རྟོག་པར་བྱེད་དེ། ས་བོན་ལས་ནི་མྱུ་གུ་འབྱུང་ངོ་། །མྱུ་གུ་ལས་ནི་སྡོང་བུ་འབྱུང་ངོ་། །སྡོང་བུ་ལས་ནི་འདབ་
མ་འབྱུང་ངོ་། །འདབ་མ་རྣམས་ལས་ནི་མེ་ཏོག་འབྱུང་ངོ་། །མེ་ཏོག་ལས་ནི་འབྲས་བུ་འབྱུང་བར་འགྱུར་རོ། །དེ་ཁོ་ན་བཞིན་དུ་རྣལ་འབྱོར་སྤྱོད་པ་པ་རྣམས་ཀྱིས་ནང་གི་བདག་ཉིད་རྣམས་ལ་ཡང་མཐོང་བ་ཡིན་ཏེ། དང་པོ་ས་བོན་དུ་
གྱུར་པའི་རྣམ་པར་ཤེས་པ་ལས་དང་ཉོན་མོངས་པ་རྣམས་དང་བཅས་པ་ཁུ་ཆུར་ལྟུང་བ་ཡིན་ནོ། །ཁུ་ཆུ་ལས་ནི་མེར་མེར་པོར་འགྱུར་རོ། །མེར་མེར་པོ་ལས་ནུར་ནུར་པོར་འགྱུར་རོ། །ནུར་ནུར་པོ་ལས་ནི་གོར་གོར་པོར་འགྱུར་རོ། །

66-1-187b

གོར་གོར་པོ་ལས་ནི་ནར་ནར་པོར་འགྱུར་རོ། །ནར་ནར་པོ་ལས་ནི་འབུར་འབུར་ལྔ་འབྱུང་བར་འགྱུར་ཏེ། རྐང་པའི་འབུར་འབུར་གཉིས་དང་། ལག་པའི་འབུར་འབུར་གཉིས་དང་། མགོའི་འབུར་འབུར་གཅིག་གོ། །དེ་ལྟར་འབུར་འབུར་
ལྔ་པོ་རྣམས་ལས་ནི་དབང་པོ་རྣམས་གསལ་བར་སྐྱེ་བར་འགྱུར་རོ། །དེ་ལྟར་སྔ་ཕྱིའི་རིམ་པས་རྒ་ཤིའི་མཐར་ཐུག་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་
ས་བོན་གྱི་ཚོགས་རྣམས་ནི་དང་པོ་སྔོན་པོ་ཉིད་དུ་འགྱུར་རོ། །ཕྱི་ནས་ནི་སྐྱ་བོར་འགྱུར་ཞིང་རིངས་པར་འགྱུར་རོ། །ཐམས་ཅད་ཉིད་དུ་མེད་པར་ཡང་འགྱུར་རོ། །དེ་ཁོ་ན་བཞིན་དུ་ལུས་འདི་ཡང་དང་པོ་ནི་བྱིས་པར་འགྱུར་རོ། །བྱིས་པ་ལས་
ནི་དར་ལ་བབ་པར་འགྱུར་རོ། །དར་ལ་བབ་པ་ལས་ནི་རྒས་པར་འགྱུར་རོ། །རྒས་པར་གྱུར་ནས་ནི་རྣམ་པ་ཐམས་ཅད་དུ་མེད་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་ན་ཕྱི་
རོལ་གྱི་ས་བོན་གྱི་ཚོགས་རྣམས་འབྱུང་བར་འགྱུར་བ་ཡིན་ཞིང་ཅི་ལྟར་ཡང་ས་གཞི་ལས་སྨན་དང་ནགས་ཚལ་རྣམས་མངོན་པར་འཕེལ་བར་འགྱུར་བ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་
གྱུར་པ། ཆོས་འདི་དག་རྣམས་ཐམས་ཅད་ནི་ཕན་ཚུན་གྱི་རྒྱུ་ཅན་དང་ཕན་ཚུན་གྱི་རྐྱེན་ཅན་ཡིན་ཞིང་། ཕྱི་རོལ་དུ་གྱུར་པ་དང་ནང་གི་བདག་ཉིད་དུ་གྱུར་པའི་འདུས་བྱས་ཐམས་ཅད་ནི་ཕན་ཚུན་གྱི་སྟོབས་ཀྱིས་སྐྱེ་བར་འགྱུར་བ་ཡིན་ལ་
ཆོས་གསུམ་ནི་མ་གཏོགས་སོ། །འདི་ལྟ་སྟེ། སོ་སོར་བརྟགས་པའི་འགོག་པ་དང་། སོ་སོར་མ་བརྟགས་པའི་འགོག་པ་དང་། ནམ་མཁའ་དང་རྣམས་སོ། །ཇི་ལྟར་ན་ཕན་ཚུན་གྱི་སྟོབས་ཀྱིས་ཆོས་རྣམས་རབ་ཏུ་འཇུག་
པར་འགྱུར་བ་ཡིན་ཞེ་ན། འདི་ལྟ་སྟེ། མ་རིག་པའི་རྐྱེན་ཀྱིས་ནི་འདུ་བྱེད་རྣམས་སོ། །འདུ་བྱེད་ཀྱི་རྐྱེན་ཀྱིས་ནི་རྣམ་པར་ཤེས་པའོ། །རྣམ་པར་ཤེས་པའི་རྐྱེན་ཀྱིས་ནི་མིང་དང་གཟུགས་དག་གོ། །མིང་དང་གཟུགས་ཀྱི་རྐྱེན་གྱིས་

66-1-188a

ནི་སྐྱེ་མཆེད་དྲུག་གོ། །སྐྱེ་མཆེད་དྲུག་གི་རྐྱེན་ཀྱིས་ནི་རེག་པའོ། །རེག་པའི་རྐྱེན་ཀྱིས་ནི་ཚོར་བའོ། །ཚོར་བའི་རྐྱེན་ཀྱིས་ནི་སྲེད་པའོ། །སྲེད་པའི་རྐྱེན་ཀྱིས་ནི་ལེན་པའོ། །ལེན་པའི་རྐྱེན་ཀྱིས་ནི་སྲིད་པའོ། །
སྲིད་པའི་རྐྱེན་ཀྱིས་ནི་སྐྱེ་བའོ། །སྐྱེ་བའི་རྐྱེན་ཀྱིས་ནི་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། ཡོངས་སུ་ངལ་བ་རྣམས་འབྱུང་བར་འགྱུར་རོ། །དེ་ལྟར་སྡུག་བསྔལ་གྱི་ཕུང་
པོ་ཆེན་པོ་འདི་འབའ་ཞིག་ཀུན་ཏུ་འབྱུང་བར་འགྱུར་བ་ཡིན་ནོ། །ཡང་དགེ་སློང་དག་མ་རིག་པ་འགགས་པར་གྱུར་པས་ཀྱང་འདུ་བྱེད་རྣམས་འགག་གོ། །འདུ་བྱེད་རྣམས་འགགས་པར་གྱུར་ན་རྣམ་པར་ཤེས་པ་འགག་གོ། །
རྣམ་པར་ཤེས་པ་འགགས་པར་གྱུར་ན་མིང་དང་གཟུགས་འགག་གོ། །མིང་དང་གཟུགས་འགགས་པར་གྱུར་ན་སྐྱེ་མཆེད་དྲུག་འགག་གོ། །སྐྱེ་མཆེད་དྲུག་འགགས་པར་གྱུར་ན་རེག་པ་འགག་གོ། །རེག་པ་འགགས་པར་
གྱུར་ན་ཚོར་བ་འགག་གོ། །ཚོར་བ་འགགས་པར་གྱུར་ན་སྲེད་པ་འགག་གོ། །སྲེད་པ་འགགས་པར་གྱུར་ན་ལེན་པ་འགག་གོ། །ལེན་པ་འགགས་པར་གྱུར་ན་སྲིད་པ་འགག་གོ། །སྲིད་པ་འགགས་པར་གྱུར་ན་སྐྱེ་བ་འགག་གོ། །
སྐྱེ་བ་འགགས་པར་གྱུར་ན་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། ཉམ་ཐག་པ་རྣམས་ཀུན་དུ་འགག་པར་འགྱུར་རོ། །དེ་ལྟར་སྡུག་བསྔལ་འབའ་ཞིག་གི་ཕུང་པོ་ཆེན་
པོ་འདི་འགག་པར་འགྱུར་བ་ཡིན་ནོ། །དེ་ལྟར་ཆོས་དེ་དག་ནི་གཅིག་ལ་གཅིག་གི་རྐྱེན་ཀྱི་དབང་གིས་ཡིན་ཏེ། ཕྱི་རོལ་གྱི་ཆོས་རྣམས་སམ་ནང་གི་བདག་ཉིད་ཀྱི་ཆོས་རྣམས་ཀྱང་རུང་སྟེ། ཕན་ཚུན་གྱི་དབང་གིས་ཡིན་ནོ། །
དེ་ལྟར་རྣལ་འབྱོར་སྤྱོད་པ་དེས་ཇི་ལྟར་ནང་གི་བདག་ཉིད་ཡིན་པ་དེ་ལྟར་ཕྱི་རོལ་རྣམས་ཡིན་ཞིང་ཇི་ལྟར་ཕྱི་རོལ་ཡིན་པ་དེ་ལྟར་ནང་གི་བདག་ཉིད་ཀྱི་ཆོས་རྣམས་ཡིན་ནོ་ཞེས་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་

66-1-188b

བར་བྱེད་པ་དང་། ཕྱི་རོལ་ཀྱིས་ལུས་རྣམས་ལ་ཡང་དག་པ་ཇི་ལྟ་བ་བཞིན་དུ་ལུས་ཀྱི་རྗེས་སུ་ལྟ་ཞིང་གནས་སོ། །དེ་ལྟར་རྣལ་འབྱོར་སྤྱོད་པ་རྣམས་ཀྱི་ཕྱི་རོལ་དང་ནང་གི་བདག་ཉིད་ཀྱི་ཆོས་རྣམས་རབ་ཏུ་ཤེས་པར་བྱེད་དེ། 
དང་པོ་རེ་ཤིག་འཛམ་བུའི་གླིང་པ་རྣམས་ཀྱི་ཆོས་རྣམས་འཕེལ་བར་འགྱུར་རོ། །དེ་ནས་ནི་ནང་གི་བདག་ཉིད་རྣམས་ཆེས་གསལ་བར་བྱེད་པའི་ཆོས་གཅིག་སོ་སོར་ཤེས་པར་བྱེད་པ་དང་། སོ་སོ་བ་རྣམས་ལེགས་པར་རབ་
ཏུ་ཤེས་པར་བྱེད་པ་དང་། ཀུན་དུ་མཛེས་པ་རྣམས་དང་། ཚོར་བ་རྣམས་དང་། སོ་སོ་བར་གྱུར་པའི་ཆོས་རྣམས་ཀྱང་རབ་ཏུ་ཤེས་པར་བྱེད་དོ། །ཕྱི་དང་ནང་གི་དབང་གིས་འབྱུང་པོའི་གྲོང་རྣམས་ཐམས་ཅད་དང་ཕྱི་རོལ་གྱི་དབང་
གིས་ཀྱང་ནང་གི་བདག་ཉིད་ཀྱི་སེམས་དང་སེམས་ལས་བྱུང་བའི་ཚོགས་རྣམས་སོ། །གལ་ཏེ་ཡང་ཕྱི་རོལ་ཏུ་གྱུར་པའི་ཆོས་རྣམས་ཀྱིས་ནང་གི་བདག་ཉིད་ཀྱི་ཆོས་རྣམས་འཕེལ་བར་འགྱུར་ཞིང་དེ་ལས་ཀྱང་ནང་གི་
བདག་ཉིད་ཀྱི་ཆོས་རྣམས་ཆེས་གསལ་བར་འགྱུར་བ་དང་། གལ་ཏེ་ཡང་ནང་གི་བདག་ཉིད་ཀྱི་ཆོས་རྣམས་ཀྱིས་ཕྱི་རོལ་ཀྱི་ཆོས་རྣམས་འཕེལ་བར་འགྱུར་བ་ཡིན་ཞིང་། དེས་ཀྱང་ཆེས་གསལ་བར་འགྱུར་བ་ཡིན་ཞེ་ན། 
དེ་ལ་ཡང་ཕྱི་རོལ་ཀྱི་ཆོས་རྣམས་ཀྱིས་ཇི་ལྟར་ནང་གི་བདག་ཉིད་ཀྱི་ཆོས་རྣམས་འཕེལ་བར་འགྱུར་བ་ནི་གལ་ཏེ་གནས་མལ་དང་། ནད་ཀྱི་རྐྱེན་སྨན་རྣམས་རབ་ཏུ་ཕལ་ཆེ་བ་དང་ལྡན་པར་གྱུར་ན། དེས་དགེ་སློང་རྣམས་དགེ་
བའི་ཆོས་རྣམས་ལ་མངོན་པར་དགའ་བར་འགྱུར་རོ། །གལ་ཏེ་གནས་མལ་དང་། ནད་ཀྱི་རྐྱེན་སྨན་དང་། ཡོ་བྱད་རྣམས་རབ་ཏུ་ཕལ་ཆེ་བ་དང་ལྡན་པར་མ་གྱུར་ན་ནི་དེ་ཐམས་ཅད་དུ་ཡང་དགེ་བའི་ཆོས་རྣམས་ལ་མངོན་
པར་དགའ་བར་མི་འགྱུར་རོ། །དེ་ལྟར་ཆོས་རྣམས་ནི་གཅིག་གིས་གཅིག་སྐྱེད་པར་བྱེད་པ་དང་། ཕན་ཚུན་དུ་ལྟོས་པ་དང་། ཕན་ཚུན་དུ་སྐྱེད་པར་བྱེད་པ་དང་། ཕན་ཚུན་གྱི་རྒྱུ་ཅན་གྱི་དོན་གཞན་དུ་གྱུར་པའི་བྱེད་

66-1-189a

པ་པོ་དང་། རྟག་པ་དང་། བརྟན་པ་དང་། ཐེར་ཟུག་དང་། ཡོངས་སུ་མི་འགྱུར་བའི་ཆོས་ཅན་རྣམས་གང་ཡིན་པ་འམ། རྒྱུ་རྣམས་ཀྱི་ནང་དུ་འདུ་བར་འགྱུར་བའི་རྒྱུ་མེད་པ་རྣམས་ཀྱིས་ཀྱང་ཀུན་ཀྱང་སྐྱེད་པར་འགྱུར་བ་
ལ་ཤིན་དུ་འབད་པར་བྱེད་པ་ནི་འདི་ན་མཐོང་བ་མ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་ཁམས་གསུམ་དུ་སྐྱེས་པར་གྱུར་པའི་སེམས་ཅན་རྣམས་ཐམས་ཅད་ཀྱང་ཕྱི་རོལ་
ཀྱིས་དོན་གཅིག་པར་གྱུར་པའི་ཕྱི་རོལ་གྱི་ལས་གང་གིས་ནང་གི་བདག་ཉིད་ཀྱི་ཆོས་རྣམས་འཕེལ་བར་འགྱུར་བ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འདུ་བྱེད་པར་སྐྱེས་
པའི་སེམས་ཅན་རྣམས་ཐམས་ཅད་ཀྱི་ཆོས་གཅིག་ཏུ་གྱུར་པ་ནི་ཟས་གང་དག་ཡིན་པ་རྣམ་པ་བཞི་པོ་ཁམ་གྱི་ཟས་དང་། ཡིད་ལ་སེམས་པ་དང་། རེག་པ་དང་། དགའ་བ་དང་འདི་དག་རྣམས་ཡིན་ནོ། །དེ་ལ་འདོད་པའི་ཁམས་རྣམས་
ན་ནི་ཟས་འདི་དག་རྣམས་གང་ཡིན་པས་ས་བོན་གྱི་ཚོགས་བྱས་ནས་ཕྱི་རོལ་ཀྱི་ཟས་དེ་དག་གིས་ཀྱང་ནང་གི་བདག་ཉིད་ཀྱི་བསམ་གཏན་ལ་བདེ་བར་གནས་པ་རྣམས་འཕེལ་བར་བྱེད་དོ། །དེ་ལ་དང་པོ་ཉིད་དུ་རེ་ཤིག་ཕྱི་རོལ་ཀྱི་
ཆོས་རྣམས་ཀྱིས་སོ་སོར་རྟོག་པར་བྱེད་དེ། ཅི་ལྟར་ནང་གི་བདག་ཉིད་ཀྱི་ཆོས་དེ་དག་རྣམས་ཕྱི་རོལ་ཀྱི་ཆོས་རྣམས་ཀྱིས་འཛིན་པར་བྱེད་པ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་
བར་གྱུར་པ་རྒྱུ་གང་དང་རྐྱེན་གང་དག་དང་། གཞི་ཅི་ལས་གང་གི་ཚེ་བཟང་ལྡན་གྱི་དུས་ཀྱི་སྲོག་ཆགས་རྣམས་ཐམས་ཅད་ཀྱི་ཟས་ཡིན་ན་ཡན་ལག་བརྒྱད་དང་ལྡན་པ་རྣམས་ཡིན་ནོ། །དེ་ལ་ཡན་ལག་བརྒྱད་པོ་དེ་དག་རྣམས་ཀྱང་
གང་དག་ཡིན་ན། འདི་ལྟ་སྟེ། འདོད་པའི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་དང་། འདོད་པ་སྡུག་པའི་ཁུ་བ་འཐས་པའི་མདོག་དང་དབྱིབས་སོ། །དེ་ལ་གལ་ཏེ་མལ་སྟན་དང་ནད་ཀྱི་རྐྱེན་སྨན་དང་ཡོ་བྱད་རབ་ཏུ་ཕལ་

66-1-189b

ཆེ་བར་གྱུར་པའི་ཕྱི་རོལ་ཀྱི་ཆོས་རྣམས་ཀྱིས་ལུས་འཕེལ་བར་འགྱུར་ན་དེའི་ཚེ་ན་ནང་གི་བདག་ཉིད་ཀྱི་དགེ་བའི་ཆོས་རྣམས་ལ་ཡང་མངོན་པར་དགའ་བར་འགྱུར་རོ། །དེ་ལྟར་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་
སོ། །ཕྱི་རོལ་ཀྱི་སྦྲང་བུ་མཆུ་རྣོན་དང་། ཤ་སྦྲང་དང་། གྲོག་མ་ཕྲ་མོ་ལ་སོགས་པ་རྣམས་ཀྱིས་གལ་ཏེ་ལུས་ལ་མཐོ་འཚམ་པར་མི་བྱེད་ན་དེ་ལས་ནང་གི་བདག་ཉིད་ཀྱི་ཆོས་རྣམས་ལ་ཡང་མངོན་པར་འདོད་པར་འགྱུར་རོ། །
གལ་ཏེ་ཡང་གྲང་བ་དང་དྲོ་བ་དང་ཆར་པ་ལ་སོགས་པ་རྣམས་ཀྱིས་ལུས་ལ་མཐོ་འཚམ་པར་མི་བྱེད་ན་དེའི་ཚེ་ནང་གི་བདག་ཉིད་ཀྱི་ཆོས་རྣམས་ལ་མངོན་པར་སྤྲོ་བར་འགྱུར་རོ། །གལ་ཏེ་ཡང་འདོད་པ་སྡུག་པ་ཡིད་དུ་འོང་བ་རྣར་སྙན་པར་
གྱུར་པའི་སྒྲ་རྣམས་ཐོས་པར་གྱུར་པ་ན་དེའི་ཚེ་ནང་གི་བདག་ཉིད་ཀྱི་ཆོས་རྣམས་ལ་མངོན་པར་དགའ་བར་འགྱུར་རོ། །གལ་ཏེ་འདོད་པ་སྡུག་པ་ཡིད་དུ་འོང་བའི་དྲི་རྣམས་ཀྱི་དབང་དུ་གྱུར་པ་ན་དེའི་ཚེ་ནང་གི་བདག་ཉིད་ཀྱི་ཆོས་
རྣམས་ལ་མངོན་པར་དགའ་བར་འགྱུར་རོ། །གལ་ཏེ་གྲང་བ་དང་། ཚ་བ་དང་། ཆར་པ་ལ་སོགས་པ་ལུས་ལ་གཙོ་མ་དྲིས་ན་དེའི་ཚེ་ནང་གི་བདག་ཉིད་ཀྱི་ཆོས་རྣམས་ལ་མངོན་པར་དགའ་བར་འགྱུར་རོ། །དབང་པོ་ལྔ་པོ་རྣམས་གལ་ཏེ་
རྒྱས་པར་བྱེད་པའི་ཕྱི་རོལ་ཀྱི་སྐྱེ་མཆེད་ལྔ་པོ་རྣམས་ཀྱིས་ནང་གི་བདག་ཉིད་ཀྱི་སྐྱེ་མཆེད་ལྔ་འཕེལ་བར་གྱུར་པའོ། །དེ་ལྟར་ཕྱི་རོལ་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཐེག་པ་ཆེན་པོ་ལ་ཡང་དག་པར་གནས་པའི་རིགས་
ཀྱི་བུ་འམ། འཕགས་པ་ཉན་ཐོས་རྣམས་ཀྱིས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། ཇི་ལྟར་བདག་གི་རྣམ་པར་ཤེས་
པའི་ཚོགས་དྲུག་ཆོས་རྣམས་ལ་དགའ་བར་འགྱུར་བ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གལ་ཏེ་ཕྱི་རོལ་ཀྱི་ཆོས་རྣམས་ཀྱིས་མཐོ་བརྩམ་པར་མ་གྱུར་ན་དེའི་

66-1-190a

ཚེ་ནང་གི་བདག་ཉིད་ཀྱི་ཆོས་རྣམས་རང་བཞིན་དུ་གནས་པས་ཆོས་རྣམས་ལ་མངོན་པར་དགའ་བར་འགྱུར་རོ། །རྣམ་པར་ཤེས་པའི་ཚོགས་དྲུག་པོ་དེ་དག་རྣམས་ཀྱང་གང་ཞེ་ན། མིག་གི་རྣམ་པར་ཤེས་པ་དང་། 
རྣ་བའི་རྣམ་པར་ཤེས་པ་དང་། སྣའི་རྣམ་པར་ཤེས་པ་དང་། ལྕེའི་རྣམ་པར་ཤེས་པ་དང་། ལུས་ཀྱི་རྣམ་པར་ཤེས་པ་དང་། ཡིད་ཀྱི་རྣམ་པར་ཤེས་པ་རྣམས་སོ། །དེ་ལྟར་ནང་གི་བདག་ཉིད་ཀྱི་ཆོས་རྣམས་ཀྱི་ཕྱི་རོལ་གྱི་དངོས་
པོ་རྣམས་དང་ལྷན་ཅིག་ཕན་ཚུན་གྱི་དབང་དུ་གྱུར་པ་དང་། ཕན་ཚུན་འགྲོགས་པ་ཡིན་ཏེ། དཔེར་ན་འདི་ལྟ་སྟེ། བྱ་ནམ་མཁའི་དཀྱིལ་དུ་སོང་བར་གྱུར་ནས་རབ་ཏུ་རྒྱུ་བར་བྱེད་པ་དེ་གང་དང་གང་དུ་ཇི་ལྟར་ནམ་མཁའ་ལ་འགྲོ་བར་འགྱུར་
བ་དེ་དང་དེ་དག་རྣམས་སུ་འདིའི་གྲིབ་མ་དེ་ཁོ་ན་བཞིན་དུ་དབང་དུ་གྱུར་ནས་འགྲོའོ། །དེ་ཁོ་ན་བཞིན་དུ་ཕྱི་རོལ་ཀྱི་དངོས་པོ་རྣམས་ཀྱི་དབང་གིས་ནང་གི་བདག་ཉིད་ཀྱི་དངོས་པོ་རྣམས་ཐམས་ཅད་ཡིན་ནོ། །གལ་ཏེ་ལུས་ཐམས་ཅད་
རྒྱས་པར་གྱུར་ན་ནི་དེ་ལས་ཀྱང་སེམས་རྣམ་པར་ཉམས་པར་མི་འགྱུར་རོ། །དེས་ན་ཐམས་ཅད་ཀྱང་ཕན་ཚུན་དུ་ལྟོས་ནས་རྐྱེན་གྱི་དབང་གིས་ཐམས་ཅད་འབྱུང་བ་ཡིན་ནོ། །དེ་ནི་དེ་ལྟར་རྣལ་འབྱོར་སྤྱོད་པ་རྣམས་ཀྱིས་
འདིར་མཐོང་བ་ཡིན་ལ་མི་རྟག་པ་དང་། མི་བརྟན་པ་དང་། ཐེར་ཟུག་མ་ཡིན་པ་དང་། ཡོངས་སུ་འགྱུར་བའི་ཆོས་ཅན་མ་ཡིན་པ་ཞེས་བྱ་བའི་ཆོས་རྣམས་ནི་གཅིག་ཀྱང་སྐྱེ་བ་ན་ཡོད་པ་མ་ཡིན་ནོ། །གཞན་ཡང་རྣལ་
འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པའི་མི་རྣམས་ཀྱི་ཚེ་ཐུང་བ་དང་འཕེལ་བར་འགྱུར་བ་ཡིན་ན་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་
མཐོང་བར་གྱུར་པ། གང་གི་ཚེ་བཟང་ལྡན་གྱི་དུས་ཀྱི་མི་རྣམས་ཐམས་ཅད་ནི་འོད་བསལ་གྱི་ལྷའི་རེས་ལས་བབས་པར་གྱུར་པ་རྣམས་ཡིན་པས་ས་ཞག་ཟས་ཡིན་ཏེ། དཔེར་ན་སུམ་བཅུ་རྩ་གསུམ་གྱི་ལྷ་རྣམས་ཀྱི་

66-1-190b

ཟས་ནི་བདུད་རྩི་ཡིན་པ་དེ་བཞིན་དུ་དགེ་བའི་སེམས་དང་ལྡན་པའི་བཟང་ལྡན་གྱི་དུས་ཀྱི་མི་རྣམས་ཀྱིས་ནི་སའི་བཅུད་མདོག་དང་། དྲི་དང་། གཟུགས་དང་། རེག་བྱ་བཟང་བ། སྐྱོན་རྣམས་ཐམས་ཅད་དང་བྲལ་བར་གྱུར་པའི་མི་རྣམས་ཟས་
རྣམས་ཀྱི་དབང་གིས་འཚོ་བ་ཡིན་ནོ། །དེའི་སྟོབས་ཀྱིས་ཚེའི་ཚད་ནི་ལོ་སྟོང་ཕྲག་བརྒྱད་བཅུ་རྩ་བཞིར་འགྱུར་རོ། །ནད་ཀྱང་གསུམ་འབྱུང་བར་འགྱུར་རོ། །འདི་ལྟ་སྟེ། ལྟོགས་པ་དང་། སྐོམ་པ་དང་། འདོད་པ་ལ་བལྟོས་ནས་དེ་དག་
རྣམས་ཐམས་ཅད་ཀྱང་འཚོ་བ་དང་ནད་མེད་པར་འགྱུར་རོ། །དེ་ནས་གཉིས་ལྡན་གྱི་དུས་ན་ནི་སའི་བཅུད་དེ་དག་ཉེས་པ་དང་བཅས་པར་འགྱུར་ཞིང་མི་རྣམས་ཀྱང་དེ་བཞིན་དུ་སེམས་དགེ་བའི་སེམས་དང་ལྡན་པར་མི་འགྱུར་རོ། །
ནད་རྣམས་ཐམས་ཅད་ཀྱང་མི་རྣམས་ལ་འབྱུང་བར་འགྱུར་རོ། །འདི་ལྟ་སྟེ། ལྟོགས་པ་དང་། སྐོམ་པ་དང་། དུས་མ་ཡིན་པར་འཆི་བ་དང་། ཚ་བ་སྐྱེ་བའོ། །དེ་ལྟར་ཕྱི་རོལ་གྱི་ཟས་རྣམས་ཀྱི་དབང་གིས་འཛམ་བུའི་གླིང་གི་མི་དེ་དག་
རྣམས་ཐམས་ཅད་ཀྱང་འཚོ་བ་དང་ནད་མེད་པར་ཡང་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་ན་འཛམ་བུའི་གླིང་པའི་མི་རྣམས་ཐམས་ཅད་གསུམ་ལྡན་
གྱི་དུས་ན་ཟས་ཀྱི་དབང་གིས་ཁ་དོག་དང་ཚེ་ཇི་ལྟ་བུ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གསུམ་ལྡན་གྱི་དུས་ན་ནི་སའི་བཅུད་དེ་དག་དེ་བཞིན་དུ་ནུབ་པར་འགྱུར་རོ། །
ནད་དུ་མ་རྣམས་ཀྱང་འབྱུང་བར་འགྱུར་ཏེ། ཟས་ཀྱི་སྐྱོན་ཀྱིས་མི་རྣམས་ལ་རླུང་དང་མཁྲིས་པ་དང་བད་ཀན་རྣམས་རབ་ཏུ་འཁྲུགས་པར་འགྱུར་རོ། །རྣལ་འབྱོར་སྤྱོད་པ་དེ་ཕྱི་རོལ་ཀྱི་ཟས་རྣམས་ཀྱི་ནང་གི་བདག་ཉིད་ཀྱི་སྐྱེ་
མཆེད་རྣམས་འཕེལ་བར་འགྱུར་བའི་འདུ་བྱེད་ཀྱི་ཚོགས་རྣམས་ཐམས་ཅད་མཐོང་བར་གྱུར་ནས་ཡང་དག་པ་ཇི་ལྟ་བ་བཞིན་དུ་ལུས་ལ་ཕྱི་རོལ་ཀྱི་ཆོས་རྣམས་ཀྱིས་ཀུན་དུ་ལྟ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་

66-1-191a

ཕྱི་རོལ་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་ན་བཞི་ལྡན་རྩོད་པའི་དུས་ཀྱི་འཛམ་བུའི་གླིང་པའི་མ་རྣམས་ཀྱི་ཟས་གང་ཡིན་ན། དེས་ཐོས་པ་ལས་བྱུང་བའི་ཤེས་པས་མཐོང་བར་གྱུར་པ། རྩོད་
པའི་དུས་ཀྱི་འཛམ་བུའི་གླིང་གི་མི་རྣམས་ནི་ཁྲེ་རྒོད་ཀྱི་ཟས་དང་། ནས་ཐུག་གི་ཟས་དང་། ཉའི་ཟས་དང་། རྡོག་གུ་རྩ་བའི་ཟས་རྣམས་ཡིན་གྱི་རོ་རྣམས་ཐམས་ཅད་ནི་ནུབ་པར་འགྱུར་རོ། །མི་དེ་དག་རྣམས་ལ་ནི་རྟག་ཏུ་ནད་
རྣམས་འབྱུང་བར་འགྱུར་རོ། །དུས་མ་ཡིན་པར་རྒས་པ་ཡང་འབྱུང་བར་འགྱུར་རོ། །རྩོད་ལྡན་གྱི་དུས་ཀྱི་མི་རྣམས་ནི་སྤྲོ་བ་མེད་པར་ཡང་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་
གནས་ཏེ། ཇི་ལྟར་བཞི་ལྡན་གྱི་མི་རྣམས་ཀྱི་ཚེ་དང་ཚད་རྣམས་འཕེལ་བ་དང་འགྲིབ་པ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། བཟང་ལྡན་གྱི་དུས་སུ་འཛམ་བུའི་གླིང་པའི་མི་
རྣམས་ཀྱི་ཚེ་རབ་ཏུ་རིང་བ་ནི་ལོ་སྟོང་ཕྲག་བརྒྱད་བཅུ་རྩ་བཞི་ཡིན་ནོ། །བདག་ཉིད་ཀྱི་དངོས་པོ་ནི་གཞུ་འདོམ་བརྒྱ་ཕྲག་བཅུར་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། 
གཉིས་ལྡན་གྱི་དུས་ན་འཛམ་བུའི་གླིང་པའི་མི་རྣམས་ཀྱི་ཚེ་རབ་ཏུ་རིང་བ་ཇི་ལྟ་བུ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གཉིས་ལྡན་གྱི་དུས་ཀྱི་འཛམ་བུའི་གླིང་པའི་
མི་རྣམས་ཀྱི་ཚེ་རིང་བ་ནི་ལོ་སྟོང་ཕྲག་བཞི་བཅུར་འགྱུར་རོ། །བདག་གི་དངོས་པོར་གྱུར་པའི་ཚད་ནི་གཞུ་འདོམ་ཉིས་བརྒྱ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། 
གསུམ་ལྡན་གྱི་དུས་ན་འཛམ་བུའི་གླིང་པའི་མི་རྣམས་ཀྱི་ཚེ་རིང་བར་གྱུར་པ་ཇི་ལྟ་བུ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གསུམ་ལྡན་གྱི་དུས་ཀྱི་འཛམ་བུའི་

66-1-191b

གླིང་པའི་མི་རྣམས་ཀྱི་ཚེ་རིང་བར་གྱུར་པ་ནི་ལོ་སྟོང་ཕྲག་ཉི་ཤུ་ཡིན་ནོ། །བདག་ཉིད་ཀྱི་དངོས་པོ་ནི་གཞུ་འདོམ་བརྒྱ་ཕྲག་གཅིག་ཏུ་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། 
རྩོད་ལྡན་གྱི་དུས་ཀྱི་འཛམ་བུའི་གླིང་པའི་མི་རྣམས་ཀྱི་ཚེ་རབ་ཏུ་རིང་བར་གྱུར་པ་དང་བདག་ཉིད་ཀྱི་དངོས་པོའི་ཚད་ཀྱང་ཇི་ལྟ་བུ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྩོད་ལྡན་གྱི་
དུས་ན་འཛམ་བུའི་གླིང་པའི་མི་རྣམས་ཀྱི་ཚེ་ཤིན་དུ་རིང་བར་འགྱུར་བ་ནི་ལོ་བརྒྱའོ། །བདག་ཉིད་ཀྱི་དངོས་པོ་ཡང་གཞུ་འདོམ་གཅིག་ནི་ཡང་མཐའ་ཡིན་ནོ། །རྩོད་ལྡན་དང་རྗེས་སུ་འབྲེལ་པ་འཇིག་པའི་དུས་དམན་པ་དང་ལྡན་
པ་མི་རྣམས་དགེ་བ་བཅུ་དང་བྲལ་བར་གྱུར་པའི་སྐྱེ་བོའི་ཚོགས་ཐམས་ཅད་བདག་ཉིད་བཟང་པོ་ཡིན་པར་ཤེས་པར་བྱེད་པ་རྣམས་ཀྱི་ཚེ་ཤིན་ཏུ་རིང་བར་གྱུར་པ་ནི་གང་དག་ཅེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་
ལྷའི་མིག་གིས་མཐོང་བར་གྱུར་པ། འཇིག་པར་གྱུར་པའི་དུས་དམན་པ་དང་ལྡན་པས་རོའི་གཙོ་བོ་རྣམས་ཐམས་ཅད་ནི་ནུབ་པར་འགྱུར་རོ། །འདི་ལྟ་སྟེ། ཚྭ་དང་། མར་དང་། ཞོ་དང་། ཤ་དང་། སྦྲང་རྩི་དང་། རོ་མངར་པོ་དང་། བུ་རམ་
ཤིང་དང་རྣམས་ཏེ། འབྲས་སཱ་ལུ་རྣམས་ཐམས་ཅད་ཀྱང་རྣམ་པར་འགྱུར་བ་དང་བཅས་པར་གྱུར་ན་དྲུག་བཅུ་པ་ལ་སོགས་པ་རྣམས་ཡིན་གྱི་ཇི་ལྟར་གཙོ་བོར་གྱུར་པ་རྣམས་ནི་ནུབ་པར་འགྱུར་རོ། །ཤཱ་ལི་གཞན་རྣམས་
ཀྱང་དཔེར་ན་འདི་ལྟ་སྟེ། འབྲས་ཤཱ་ལི་དམར་པོ་དང་། རོས་འཕྲོག་པ་དང་། པ་ཏང་ག་དང་། སྐྱ་བོ་དང་། ལྕགས་ཀྱི་སྟོབས་དང་། རབ་ཏུ་དགའ་བར་བྱེད་པ་དང་། ཤཱ་རི་ཀཿདང་། དུང་གི་མུ་ཏིག་དང་། སཱུ་རྣ་ཀ་དང་། ལོ་ཧ་བཱ་ལཱ་ཞེས་
བ་དང་། ཀུན་དུ་བི་ན་ཏཿདང་། དམར་པོ་ཛུ་ལ་ཀཿདང་། ཕྱེ་མ་བ་དང་། ཨརྫུ་ནཿདང་། བན་ཛ་ཀ་དང་། སྐམ་པོ་རུ་ཧཿདང་། རྒྱ་མཚོ་ཀུན་དུ་རུ་ཧཿདང་། གཉིས་སུ་འཕེལ་བ་དང་། སམ་ཧ་སཿདང་། རབ་ཏུ་ཚ་བ་པ་དང་། གྲ་མ་མེད་

66-1-192a

པ་དང་། རྩུབ་པ་རབ་ཏུ་ཚ་བ་དང་། ཡཱ་བ་ཀཿདང་། ཐམས་ཅད་དུ་སྐྱེ་བ་དང་། སིང་ཧ་ཎཿདང་། སྡིག་པ་མེད་པ་དང་། ཁ་དོག་ཆེན་པོ་དང་། ཐམས་ཅད་དུ་ལེགས་པར་སྐྱེ་བ་དང་། ཨརྫུ་ནཿདང་། རབ་ཏུ་ཚ་བར་བྱེད་པ་དང་། དྲི་རུ་ཧཿ
དང་། སྤྲུལ་གྱི་གཅོད་པ་དང་། ཀ་ས་མ་ར་ཡ་རུ་ཧཿདང་། རི་ལས་སྐྱེ་བ་དང་། རྟག་ཏུ་སྐྱེ་བ་དང་། ཚིགས་པ་མེད་པ་དང་། ཐམས་ཅད་ལ་སྐྱེ་བ་དང་། ཀཱ་ལིང་ཀཿདང་། ཀཱ་ལིང་ཀ་ཆེན་པོ་དང་། ཧེ་མ་སྟོན་པོ་དང་། དུང་ཆེན་པོ་དང་། རྙེད་སླ་བ་
དང་། བཱ་ཧི་ནི་རོ་དང་། ཤེ་ཁྲི་ཎཱི་དང་། ཨང་གུ་སྐྱེས་དང་། སེན་བྷ་བ་ཀཿདང་། ཀཱ་ལ་བཱ་ཧཿདང་། པྲ་སི་བུ་དང་། བི་གྷ་ས་དང་། རབ་ཏུ་སྦྱིན་བྱེད་དང་། ཨིང་ག་ལི་ཀཿདང་། ཚད་མ་པ་དང་། བྱཱ་བིད་དྷ་དང་། མི་འདོད་པ་དང་། ལྷན་ཅིག་ཏུ་རྣམ་པར་
འདྲེས་པ་དང་། བུད་དྷི་ལ་དང་། ཉི་མའི་དབང་དང་། དྲི་མ་མེད་པ་དང་། མཱ་ག་དྷའི་དང་། རྒྱ་མཚོ་ལྦུ་བ་དང་། བེ་ལ་རུ་ཧ་དང་། སྙོམས་པར་བན་ཙ་ཀཿདང་། སྦུན་པ་མེད་པ་དང་། རབ་ཀྱི་མཆོག་ཏུ་གྱུར་པ་དང་། དྲོན་པོ་དང་། རྒྱ་ནག་གི་དང་། 
གུར་གུམ་གྱི་མདོག་དང་། དྲི་མ་དང་བཅས་པ་དང་། རབ་ཏུ་འབྲེལ་པ་དང་། འཛིང་ཀའི་སེམས་དང་། སྟོབས་ཅན་དང་། ཁད་ཀ་ཁ་ཎ་ཌི་ཀཿདང་། རྣམ་པར་འདྲེས་པ་དང་། བདུད་རྩི་འགྲམ་པ་ན་རྒྱུ་བ་དང་། གྲོའི་མདོག་རྣམས་སོ། །
ནས་རྣམས་ནི་རྣམ་པ་དྲུག་སྟེ། སྦུན་པ་དང་བཅས་པ་དང་། སྦུན་པ་མེད་པ་དང་། རྣམ་པར་འདྲེས་པ་དང་། མངར་པོ་དང་། མདོག་ནག་པ་དང་། མདོག་སྐྱ་བའོ། །ནས་ཆུང་བ་ནི་རྣམ་པ་གཉིས་ཏེ། འདོད་རྒྱལ་བ་དང་། ས་བོན་ལས་
སྐྱེས་པའོ། །ཤིན་དུ་དྲི་བཟང་བར་གྱུར་པའི་མེ་ཏོག་ཐམས་ཅད་ཀྱང་ཤིན་དུ་སྡུག་བསྔལ་བར་གྱུར་པའི་འཇིག་པའི་དུས་ན་ནུབ་པར་འགྱུར་རོ། །ཏིལ་དང་། མོན་སྲན་སྡེའུ་དང་། རྒྱ་སྲན་ལེབ་བུ་དང་། སྐྱེས་པ་དང་། བཏག་
པ་དང་། བྱས་པ་དང་། མ་བྱས་པ་རྣམས་ཀྱང་ཉེ་འཁོར་དུ་ཐམས་ཅད་ནུབ་པར་འགྱུར་རོ། །བ་ལང་དང་། མ་ཧེ་ཥཱི་ཁུ་བའི་བཅུད་དང་། དགུན་འབྲུམ་དང་། ཁུར་བ་པ་དང་། འདོད་པར་གྱུར་པའི་རོ་རབ་ཏུ་ཕལ་ཆེ་བ་རྣམས་དང་། 

66-1-192b

མངོན་པར་འདོད་པའི་རོ་རྣམས་ཀྱང་ནུབ་པར་འགྱུར་རོ། །དེ་དག་རྣམས་རབ་ཏུ་ཞིག་པར་གྱུར་པས་ཀྱང་འཛམ་བུའི་གླིང་པའི་མི་རྣམས་ལྤགས་པ་དང་། དྲོད་དང་། རུས་པ་དང་། རྐང་མར་རྣམས་ཀྱི་གྲངས་ཙམ་དུ་ཐམས་ཅད་ཀྱང་འགྱུར་རོ། 
རོའི་ཟས་རྣམས་དང་རྣམ་པར་བྲལ་བས་འདིར་ནི་ཐམས་ཅད་ཀྱང་རུས་པས་སྦྲེལ་བ་ཙམ་དུ་འགྱུར་རོ། །གང་གི་ཕྱིར་ཕྱི་རོལ་དང་ནང་གི་བདག་ཉིད་རྣམས་ཐམས་ཅད་ཀྱང་ཕན་ཚུན་ཀྱི་ལྟོས་པའི་དབང་གིས་ཡིན་པའི་ཕྱིར་འདུ་
བྱེད་རྣམས་ཐམས་ཅད་ཀྱང་འཇིག་པར་འགྱུར་བར་རྣལ་འབྱོར་པས་སོ་སོ་རིག་པར་བྱེད་དོ། །ཡང་དག་པ་ཇི་ལྟ་བ་བཞིན་དུ་ཕྱི་རོལ་རྣམས་རབ་ཏུ་རིག་པར་བྱེད་དོ། །རྟག་པ་མ་ཡིན། བདེ་བ་མ་ཡིན། གཙང་བ་མ་ཡིན། 
བདག་དང་བཅས་པ་མ་ཡིན་ལ་བྱེད་པ་པོས་བྱིན་གྱིས་བརླབས་པ་ཡང་མ་ཡིན་ནོ། །རྒྱུ་མེད་པ་མ་ཡིན་ཞིང་འདོད་རྒྱལ་བ་ཡང་མ་ཡིན་ཏེ། བྱེད་པ་པོ་གཅིག་གིས་བྱས་པ་མ་ཡིན། གཉིས་ཀྱིས་མ་ཡིན། གསུམ་གྱིས་མ་ཡིན། 
བཞིས་མ་ཡིན། ལྔས་མ་ཡིན། ལམ་ལོག་པ་སྟོན་པར་བྱེད་པའི་གཞན་མུ་སྟེགས་ཅན་རྣམས་ཀྱི་རྒྱུ་དྲུག་པས་ཀྱང་མ་ཡིན་ནོ། །དེ་ལྟར་ཕྱི་རོལ་ཀྱི་དབང་དུ་བྱས་ནས་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་
གནས་སོ། །གཞན་ཡང་རྣལ་འབྱོར་སྤྱོད་པ་དེས་དེ་ལྟར་བཟང་ལྡན་གྱི་དུས་ནས་འཇིག་པའི་དུས་ཀྱི་བར་དུ་ཐམས་ཅད་ལ་རྒྱས་པར་སྔར་བཞིན་དུ་རིག་པར་གྱུར་ནས་ཡང་དག་པ་ཇི་ལྟ་བ་བཞིན་དུ་ཕྱི་རོལ་ཀྱིས་ལུས་ཀྱིས་ལུས་
ལ་རྗེས་སུ་ལྟ་ཞིང་གནས་སོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ཇི་ལྟར་མིའི་གནས་བཞི་པོ་རྣམས་ཐམས་ཅད་ན་རི་དང་། ཆུ་བོ་དང་། ཐང་དང་། རྒྱ་མཚོ་རྣམས་དང་། 
རིའི་རྒྱལ་པོ་རི་རབ་ལྷུན་པོའི་བར་དུ་ཡང་རེ་རེ་ཞིང་ཆེར་འཕེལ་བར་འགྱུར་བ་དང་། ཆུང་དུ་འགྲིབ་པ་རྣམས་ཀྱང་གང་དག་ཞེ་ན། སྐྱེས་བུའི་གནས་བཞི་པོ་རྣམས་འདི་ལྟ་སྟེ། འཛམ་བུའི་གླིང་དང་། ནུབ་ཀྱི་བ་ལང་སྤྱོད་

66-1-193a

དང་བྱང་གི་སྒྲ་མི་སྙན་དང་། ཤར་གྱི་ལུས་འཕགས་པོ་དང་བཅས་པ་རྣམས་སོ། །དམྱལ་བ་ཡང་ཆེན་པོ་བརྒྱད་དོ། །ཡི་དགས་རྣམས་དང་། དུད་འགྲོ་རྣམས་དང་། འདོད་པ་ན་སྤྱོད་པའི་ལྷའི་རིས་དྲུག་གོ། །
དེ་ལྟར་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་སོ། །གཞན་ཡང་རྣལ་འབྱོར་སྤྱོད་པ་པ་འཛམ་བུའི་གླིང་གི་ཤར་ཕྱོགས་ཀྱི་ཆ་དེའི་རི་དང་། ཆུ་བོ་དང་། ཡུལ་དང་། མཚམས་ལ་ཀུན་དུ་ལྟ་བར་བྱེད་དོ། །དེས་ཐོས་པ་
ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འཛམ་བུའི་གླིང་གི་ཤར་ཕྱོགས་ན་ཡང་མིང་ཨ་ནཱུ་ན་ཞེས་བྱ་བའི་རི་ཡོད་དོ། །རི་ཨ་ནཱུ་ན་དེ་ནི་དཔག་ཚད་བཅུ་པ་ཡིན་ནོ། །གཞན་ཕ་རོལ་པོ་ཨ་ནཱུ་
ནའི་རི་ནི་དཔག་ཚད་སུམ་བཅུ་པ་ཡིན་ནོ། །རི་དེ་དག་གཉིས་ཀྱི་བར་གྱི་ས་ལ་ཆུ་བོ་མཐོ་རིས་དགའ་བ་འབབ་པའོ། །ཆུ་ཀླུང་ཀཽ་ཤི་ཀ །ཆུ་ཀླུང་གཞན་ཀོ་ཤ་ལཱ་དང་། ཡུལ་ཡང་གྲ་མ་ཅན་ཞེས་བྱ་བ་དང་། ཡུལ་གཉིས་
པའི་མིང་ཡང་རྣམ་པར་སྲེག་བྱེད་ཅེས་བྱ་བའོ། །ཀཽ་ཤི་ཀ་དང་། ཀོ་ཤ་ལཱ་དང་ལྷན་ཅིག་ཏུ་ཡོངས་སུ་གང་བར་ཡུལ་ལྗོངས་རྣམས་དང་འབྲེལ་པ་ཡིན་ནོ། །དེ་བཞིན་དུ་ཨང་ག་ཞེས་བྱ་བ་ཡུལ་ལྗོངས་གཉིས་པའོ། །
དེ་ལ་རྣམ་པར་སྲེག་བྱེད་ནི་རྒྱར་དཔག་ཚད་བརྒྱ་ཡིན་ནོ། །གྲ་མ་ཅན་ཞེས་བྱ་བའི་རི་དེ་ཡང་དཔག་ཚད་བརྒྱ་ཕྲག་ཉི་ཤུ་ཡིན་ནོ། །ཀཽ་ཤི་ཀའི་ཡུལ་ལྗོངས་ནི་གྲོང་སྟོང་ཕྲག་བཅུ་ཡིན་ནོ། །ལྗོངས་གཉིས་པའི་ཕྱེད་ཀོའུ་ར་བ་
ཞེས་བྱ་བའི་ལྗོངས་ནི་ཀུན་ནས་གང་བར་གྱུར་པ་ཤིང་ཕུན་སུམ་ཚོགས་པ་སྟེ། ནཱ་ག་དང་། ནཱ་ཌི་དང་། གོའུ་ར་བ་པ་དང་། ཛ་ལ་ཧི་ན་ཏ་དང་། ཏཱ་ལ་དང་། ཏ་ལོ་རྣམས་ཀྱིས་ཉེ་བར་བརྒྱན་པ་དང་། ཁ་རྫུའུ་ར་དང་། པ་ན་ས་དང་། ནཱ་ཌི་
ཀེ་ཀེ་རེའི་འབྲས་བུས་གང་བར་གྱུར་པའི་ལྗོངས་ཀོ་ས་ལཱ་དེ་རྣལ་འབྱོར་སྤྱོད་པས་མཐོང་བར་གྱུར་ཏོ། །རྣ་བ་གོན་པ་རྣམས་དང་། ཤ་བ་ན་བ་འཆད་པ་དང་། ཀཎྞི་ཀ་དང་། དགའ་བའི་བཞིན་དང་། རྔ་མོའི་བཞིན་དང་རྣམས་

66-1-193b

ཀྱི་ཡུལ་ལྗོངས་དེ་དག་རྣམས་ནི་དཔག་ཚད་བརྒྱ་སུམ་བཅུ་ཡིན་ན། །ཡུལ་ལྗོངས་དེ་དག་རྣམས་ལ་བལྟས་པར་གྱུར་ནས་ཀྱང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །ཡུལ་ལྗོངས་དེ་དག་
རྣམས་ཀྱི་མཐར་ཐུག་པ་ཡིན་ནམ་ནི་འོན་ཏེ་འཛམ་བུའི་གླིང་ན་ཆུ་ཀླུང་དུ་བྱ་བ་དང་། གཞན་དག་ཀྱང་ཡོད་དོ། །དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཆུ་བོ་ཆེན་པོ་ཥོ་ཎོ་ཞེས་བྱ་བ་
རྒྱར་དཔག་ཚད་ཕྱེད་པ་མེ་ག་ལ་ཏིའི་རི་ལས་འབབ་པ་ཡིན་ཏེ་རིང་དུ་ནི་དཔག་ཚད་ལྔ་བརྒྱར་གྱུར་པས་ཇི་སྲིད་དུ་རྒྱ་མཚོའི་ཤར་དུ་འབབ་པར་འགྱུར་རོ། །འདིའི་གཞི་ཡང་བྲག་གི་གཅལ་གྱིས་རྣམ་པར་བརྒྱན་པ་ཡིན་ནོ། །
གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། འཛམ་བུའི་གླིང་འདི་ན་རིའི་རིགས་སུ་གྱུར་པ་འམ་ཆུ་ཀླུང་གི་ཐ་སྙད་དུ་བྱ་བ་གཞན་དག་ཀྱང་ཡོད་དམ་ཞེ་ན། དེས་ཐོས་པ་ལས་བྱུང་བའི་
ཤེས་རབ་བམ་ལྷའི་མིག་གིས་མཐོང་བར་གྱུར་པ། རིའི་རིགས་གཞན་དག་ཀྱང་ཡོད་པ་ཡིན་ཏེ། གཅིག་པུ་པ་ཞེས་བྱ་བའི་རིའི་རིང་དུ་ནི་དཔག་ཚད་བརྒྱར་གྱུར་པ་འཕང་དུ་ནི་དཔག་ཚད་ལྔ་བརྒྱ་པ་ཡིན་ནོ། །རི་དེ་ལས་དམར་པོ་
ཞེས་བྱ་བའི་ཆུ་བོ་འབབ་པ་ཡིན་ཏེ། གཟི་བརྗིད་ཆེ་བ་དང་ལྡན་པར་གྱུར་པ། རྒྱར་ནི་དཔག་ཚད་ཕྱེད་ཡིན་ཞིང་རིང་དུ་ནི་དཔག་ཚད་ལྔ་བརྒྱ་ཡིན་ཏེ། ཇི་སྲིད་དུ་རྒྱ་མཚོར་འཇུག་གོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་
ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རྣམ་པ་ལྟ་བུའི་ཆུ་ཀླུང་གི་རིགས་གཞན་འཛམ་བུའི་གླིང་ན་ཡོད་པ་ཡིན་ནམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། 
འཛམ་བུའི་གླིང་ན་རབ་ཏུ་འབབ་པར་གྱུར་པའི་ཆུ་བོ་ཆེན་པོ་ཀཱ་བེ་རཱི་ཞེས་བྱ་བ་མེ་ཏོག་ཆེན་པོ་རྣམས་ཀྱིས་ཉེ་བར་མཛེས་པར་བྱས་པ་རྣམས་ལ་འདི་ལྟ་སྟེ། ཀེ་ཏཱ་ཀ་དང་། ཙམ་པ་ཀ་དང་། ཨརྫུ་ནཱ་དང་། ཀ་ད་མཱ་དང་། མཱ་

66-1-194a

ལི་ཀ་གསར་པ་དང་། ཨ་ཏི་མུཀྟ་ཀ་དང་རྣམས་ཀྱིས་ཉེ་བར་མཛེས་པར་བྱས་པའོ། །གཉིས་པ་ཡང་བ་ལང་ཅན་ཞེས་བྱ་བ་བ་ལང་གི་གཞི་རྣམས་ཀུན་དུ་གང་བ་ཡིན་ནོ། །ཆུ་བོ་དེ་དག་གཉིས་ག་ཡང་ཞིང་དུ་ནི་
དཔག་ཚད་ཕྱེད་ཡིན་ལ་རིང་དུ་ནི་དཔག་ཚད་སུམ་བརྒྱ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་ན་རིའི་རིགས་སུ་གྱུར་པ་འམ་ཆུ་ཀླུང་གི་རིགས་སུ་
གྱུར་པ་གཞན་དག་ཀྱང་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འཛམ་བུའི་གླིང་ན་རིའི་རིགས་དང་ཆུ་བོའི་རིགས་གཞན་དག་ཀྱང་ཡོད་དོ། །དེ་དག་ཀྱང་འདི་ལྟ་
སྟེ། ཊ་ཀ་ཤོ་བྷོ་ཆེན་པོ་ཞེས་བྱ་བའི་རི་ཡོད་པ་ནི་མི་ཐམས་ཅད་ཀྱིས་བགྲོད་དུ་རུང་བ་རྒྱ་མཚོས་བསྐོར་བ་ཡིན་ནོ། །རི་དེའི་ཚད་ནི་དཔག་ཚད་སུམ་བཅུ་ཡིན་ནོ། །འདི་ལ་མི་རྣམས་གནས་པ་ཡང་ཅུང་ཟད་ཀིན་ཀི་ཀི་རཱ་ཏཱ་
ཞེས་བྱ་བའི་མི་བརྩེ་བ་མེད་པ་དང་། ཀླ་ཀློ་དང་། རྣ་བ་གོན་པ་དང་རྣམས་སོ། །གཞན་རྣམས་ཀྱང་རབ་ཏུ་གནས་པར་གྱུར་པ་ནི་ལོ་མ་གྱོན་པ་རྣམས་ཏེ། དེ་དག་ཀྱང་རྒྱ་མཚོའི་ཆུའི་ནང་གི་གླང་པོ་ཆེའི་ཤ་རྣམས་ཟ་བར་
བྱེད་དོ། །གོམས་པར་གྱུར་པའི་དབང་གིས་ཟས་རྣམས་ཟ་བ་ཡིན་པས་མིའི་ཤ་རྣམས་ཀྱང་ཟ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་
ལས་ཤིན་དུ་འདས་པར་གྱུར་པའི་རྒྱ་མཚོ་ནི་རིའི་རིགས་སམ་གླིང་གི་རིགས་གཞན་ཡང་གང་དག་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རིན་པོ་ཆེ་དང་ལྡན་པ་ཞེས་
བྱ་བའི་རྒྱ་མཚོའི་ནང་ན་དཔག་ཚད་སྟོང་དུ་གྱུར་པ་རིན་པོ་ཆེ་རྣམ་པ་སྣ་ཚོགས་པ་རྣམས་ཀྱིས་ཉེ་བར་མཛེས་པར་གྱུར་པ་རྣམས་ལ་འདི་ལྟ་སྟེ། ཨིནྡྲ་ནཱི་ལ་དང་། ནཱི་ལ་ཆེན་པོ་དང་། རྡོ་རྗེ་དང་། བཻ་ཌཱུརྱ་དང་། མུ་སཱ་ར་གལྦ་

66-1-194b

དང་། ཨརྐ་དང་། པདྨ་རཱ་ག་དང་། སུ་ཀུ་མ་རི་ཀཱ་ལ་སོགས་པ་རྣམས་ཀྱིས་རི་དེ་ཉེ་བར་མཛེས་པར་བྱས་པ་ཡིན་ནོ། །དེ་ལ་བཟང་ལྡན་གྱི་དུས་ན་ནི་ལས་ཀྱིས་རྗེས་སུ་འཇུག་པར་འགྱུར་བའི་ཚོང་པ་རྣམས་རྒྱ་མཚོའི་
རླུང་གིས་བདས་ནས་རབ་ཏུ་འཇུག་པར་བྱེད་དོ། །རི་དེ་ལས་ཤིན་དུ་འདས་པའི་རྒྱ་མཚོར་སྟོང་ཕྲག་བཅུར་ཉ་ཆེན་པོ་དང་། ཆུ་སྲིན་བྱིས་པ་གསོད་དང་། གྲིབ་མའི་རྩེ་བྱའི་སྲིན་མོ་རྣམས་ཀྱིས་ཀུན་དུ་གང་བ་ཡིན་ནོ། །
རྒྱ་མཚོ་དེ་ལས་ཀྱང་ཤིན་དུ་རྒལ་བར་གྱུར་ནས་གསེར་གྱི་བརྩིག་པ་ཞེས་བྱ་བའི་གླིང་ཡོད་པ་ཡིན་ཏེ། གསེར་གྱི་ས་གཞིས་ཡོངས་སུ་ཁེབས་པར་གྱུར་པ་དེ་ན་མཐོང་ན་ཤིན་དུ་འཇིགས་པར་འགྱུར་བ་བརྟུལ་ཞུགས་
ཆེ་བའི་སྲིན་པོ་རྣམས་རབ་ཏུ་གནས་པ་ཡིན་ནོ། །ཡུལ་དེ་ལས་ཤིན་དུ་འདས་ནས་རྒྱ་མཚོ་དཔག་ཚད་ཉིས་སྟོང་གི་ཕ་རོལ་ན་དྷི་རེ་ཀོ་ཞེས་བྱ་བའི་རི་ཡོད་པ་ཡང་རྩེ་མོ་གསུམ་པ་སྟེ་འཕངས་སུ་དཔག་ཚད་བདུན། 
རྒྱར་ནི་དཔག་ཚད་སུམ་བརྒྱ་པ་ལ་རིན་པོ་ཆེ་བདུན་གྱིས་མཛེས་པར་བྱས་པ་རྣམས་ནི་འདི་ལྟ་སྟེ། ཨིན་དྲ་ནཱི་ལ་དང་། རྡོ་རྗེ་དང་། བཻ་ཌཱུརྱ་དང་། པདྨ་རཱ་ག་དང་། སུ་ཀུ་མ་རི་དང་། ནཱི་ལ་ཆེན་པོ་དང་། མུ་སཱ་ར་དང་རྣམས་ཀྱིས་
ཉེ་བར་མཛེས་པར་བྱས་པའོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ་རི་དེ་ལས་འདས་པར་གྱུར་ནས་རིའི་རིགས་སམ་རྒྱ་མཚོའི་རིགས་གཞན་དག་ཡོད་དམ་
ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཆུ་ནག་པོ་ཞེས་བྱ་བའི་རྒྱ་མཚོ་ཆེན་པོ་དཔག་ཚད་སྟོང་ཕྲག་བཅུར་གྱུར་པ། གང་ལ་ལྷ་མ་ཡིན་རྣམས་ཀླུའི་བུ་མོ་དང་
ལྷན་ཅིག་ཏུ་རྩེ་བར་བྱེད་པ་ཡིན་ནོ། །རྒྱ་མཚོ་འདིའི་ཀླུ་རྣམས་ཀྱང་མཐོང་ན་འཇིགས་སུ་རུང་བ་ཡིན་ནོ། །དེ་ལ་ཡང་གྲིབ་མིའི་རྩེ་ལ་འབྱུང་བ་ཞེས་བྱ་བའི་སྲིན་མོས་ལྷ་མ་ཡིན་སྟོབས་དམན་པར་རྒྱུ་བར་བྱེད་པ་

66-1-195a

གང་དག་བཟུང་ནས་རྒྱ་མཚོར་འཕེན་པར་བྱེད་དོ། །ཆུ་ནག་པོ་ཆེན་པོ་དེའི་ཆུའི་ནང་རྣམས་ནི་རི་ཡིས་གང་བར་གྱུར་པ་སྤྲིན་ནག་པོ་ཆེན་པོ་དང་མཚུངས་པར་གྱུར་པ། ལྟོ་འཕྱེ་ཆེན་པོ་རྣམས་ཀྱིས་ཆེས་
གང་བར་གྱུར་པ་རྣམས་ཀུན་དུ་མཐོང་བར་གྱུར་ནས་རྣལ་འབྱོར་སྤྱོད་པས་ཡང་དག་པ་ཇི་ལྟ་བ་བཞིན་ཕྱི་རོལ་རྣམས་ལ་རྣམ་པར་ལྟ་བར་བྱེད་དོ། །རྣལ་འབྱོར་སྤྱོད་པ་པས་ཆུ་ནག་པོ་དེ་ལས་ཡང་དག་པར་འདས་ནས་འདི་དག་ལས་ཕ་
རོལ་ན་རིའི་རིགས་སུ་གྱུར་པ་འམ། རྒྱ་མཚོའི་རིགས་སུ་གྱུར་པ་ཡོད་དམ་ཞེས་ལྟ་བར་བྱེད་དོ། །དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རིན་པོ་ཆེ་རྣམས་ཀྱིས་ཀུན་དུ་གང་བ་
ཞེས་བྱ་བ་དང་གཞན་ནི་དམར་པོ་ཞེས་བྱ་བ་སྟེ། རྒྱ་མཚོ་དེ་དག་ན་ནི་འཛམ་བུ་ཞེས་བྱ་བ་འདིའི་ཤིང་རྣམས་ལས་ལྷག་པ་དཔག་ཚད་དགུ་བཅུའི་ཚད་དུ་གྱུར་པའོ། །དེ་ལ་ནི་རྡོ་རྗེའི་མཆུ་དང་ལྡན་པའི་བྱའི་རྒྱལ་པོ་ནམ་མཁའ་ལྡིང་འདི་
གནས་པ་ཡིན་ནོ། །ལྗོན་ཤིང་དེ་ལས་ཉུང་བར་གྱུར་ན་ནི་དཔག་ཚད་བརྒྱ་ན་ཆུ་སྔོན་པོ་ཞེས་བྱ་བའི་རྒྱ་མཚོ་ཡོད་དོ། །དེ་ལ་རྒྱང་གྲགས་ཀྱི་ཚད་ཙམ་གྱི་སྲིན་མོ་མན་དེ་ཧ་ཞེས་བྱ་བ་ཡོད་དོ། །དེ་ནི་ཆུའི་ནང་གི་རིའི་མཆོག་རྣམས་ལ་
རྒྱུ་བར་བྱེད་པ་ཡིན་ཏེ། རྒྱ་མཚོའི་ཆུའི་ནང་གང་དག་ན་རི་བོ་རྣམས་ཡོད་པར་གྱུར་པ་དེ་དག་རྣམས་ལ་རྣམ་པར་རྒྱུ་བར་བྱེད་དོ། །དེ་དག་ལས་འདས་པར་གྱུར་ནས་རིའི་རིགས་སུ་གྱུར་པ་འམ་ཆུ་ཀླུང་གི་རིགས་སུ་གྱུར་པ་
གཞན་དག་རྒྱ་མཚོ་ན་ཡོད་དམ་ཞེས་རྣལ་འབྱོར་སྤྱོད་པ་པ་ཡུལ་རྣམས་ལ་ལྟ་བར་བྱེད་དོ། །དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཆུ་རབ་ཏུ་དང་བ་ཞེས་བྱ་བའི་རྒྱ་མཚོ་དཔག་
ཚད་ལྔ་བརྒྱ་པ་ཡོད་དོ། །རྒྱ་མཚོ་དེའི་ནང་ན་འོད་ཟེར་གྱི་ཕྲེང་བ་ཞེས་བྱ་བའི་རི་འཕངས་སུ་དཔག་ཚད་བརྒྱ་པ། རྒྱར་ནི་དཔག་ཚད་སུམ་བརྒྱར་གྱུར་པ་ཡིན་ནོ། །རི་འདི་ནི་དངུལ་གྱི་རང་བཞིན་དུ་གྱུར་པ་ལ་རིན་པོ་ཆེ་རྣམས་

66-1-195b

ཐམས་ཅད་ཀྱིས་ཀྱང་མཛེས་པར་བྱས་པ་དང་། གསེར་གྱི་པད་མ་རྣམས་ཀྱིས་ཉེ་བར་མཛེས་པར་བྱས་པ་རྣམས་ནི་འདི་ལྟ་སྟེ། སྟོང་དུ་མཐོང་བ་ཞེས་བྱ་བའི་པད་མའི་རྫིང་བུ་ཟབས་སུ་ནི་དཔག་ཚད་བརྒྱ་ཡོད་པ་རིང་དུ་དཔག་ཚད་སུམ་བཅུར་
གྱུར་པའོ། །དེ་ལ་སོང་ནས་ཕྲེང་བ་ཐོགས་པའི་ལྷ་དང་། ཡོལ་གོ་ཐོགས་པ་རྣམས་ཀྱང་དགའ་བར་བྱེད་དོ། །ལྷའི་ངང་པ་དང་། ཀ་རཎ་ཌ་བ་དག་གིས་ཀྱང་མཛེས་པར་བྱས་པར་གྱུར་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་
ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རབ་ཏུ་དང་བར་གྱུར་པའི་རྒྱ་མཚོ་ལས་ཀྱང་གཞན་དུ་གྱུར་པའི་རི་དང་རྒྱ་མཚོའི་རྒྱལ་པོའི་རིགས་སུ་གཏོགས་པ་རྣམས་སམ་གླིང་དུ་གྱུར་པ་དག་ཡོད་དམ་ཞེ་ན། དེས་ཐོས་པ་
ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རླབས་ཆེན་པོ་ཞེས་བྱ་བའི་རྒྱ་མཚོ་ཡོད་དེ་དཔག་ཚད་ནི་ལྔ་བརྒྱར་གྱུར་པ་ཡིན་ནོ། །དེ་ལ་སའི་འོག་གི་ཆུའི་ནང་དུ་སོང་བར་གྱུར་པའི་རླུང་རྣམས་སྟེང་དུ་
གྱུར་པ་གང་ཡིན་པས་རྒྱ་མཚོ་དང་གླིང་དེ་དག་རྣམས་ཐམས་ཅད་ཀྱང་འཁྲུག་པར་བྱེད་དེ། སེམས་ཅན་རྣམས་ཀྱི་ལས་ཀྱི་དབང་གི་ཕྱོགས་ཀྱིས་ཡིན་ནོ། །རླབས་རྣམས་ནི་དཔག་ཚད་ཉིས་བརྒྱར་འབྱུང་ངོ་། །ལྷག་མ་རྣམས་ནི་འཛམ་
བུའི་གླིང་གི་རྒྱ་མཚོའི་རླབས་ཞེས་གང་དག་རྗོད་པར་བྱེད་དོ། །དེ་ལ་ནི་ཉ་ཐམས་ཅད་རྟའི་གདོང་ཅན་དུ་གྱུར་པ་རྣམས་རབ་ཏུ་གནས་སོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རླབས་
ཆེན་པོའི་རྒྱ་མཚོའི་རི་ལས་རིའི་རིགས་སམ་རྒྱ་མཚོའི་རིགས་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རླབས་ཆེན་པོའི་རིའི་ཕ་རོལ་བྱང་ཕྱོགས་ངོས་ན་རི་ངོས་གཅིག་པ་ཞེས་བྱ་
བ་དཔག་ཚད་བརྒྱ་ཕྲག་བཅུ་བཞིར་གྱུར་པའི་རི་གསེར་འབར་བ་དག་གིས་རྣམ་པར་བརྒྱན་པ་ཉི་མ་གཉིས་པ་དང་འདྲ་བར་གྱུར་པ་ཡིན་ནོ། །དེ་ལ་ལྷའི་མེ་ཏོག་དུ་གྱུར་པ་མཱན་དཱ་ར་བ་དང་། པད་མ་ཀུ་ཤེ་ཤ་ཡཱ་དང་། བཻ་དཱུརྱའི་རང་བཞིན་གྱི་

66-1-196a

པད་མ་རྣམས་སྐྱེ་བ་ཡིན་ནོ། །ལྷའི་ནགས་དང་ཉེ་བའི་ནགས་རྣམས་ཀྱང་རི་འདི་ལ་ཡོད་པ་ཡིན་ནོ། །ངོས་གཅིག་པའི་རི་དེ་ལས་འདས་པར་གྱུར་ནས་གཞན་རིའི་རིགས་སུ་གྱུར་པ་དག་ཡོད་དམ་ཞེས་རྣལ་འབྱོར་སྤྱོད་པ་ཀུན་
དུ་ལྟ་བར་བྱེད་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཤར་གྱི་ཕྱོགས་སུ་རྒྱ་མཚོ་དཔག་ཚད་སུམ་སྟོང་དུ་ངེས་པར་བྱུང་ནས་སོང་བར་གྱུར་པ་ན་གསེར་འབར་བ་ཞེས་བྱ་བ་རི་རབ་
ལས་ཧ་ཅང་མི་རིང་བ་ན་ཡོད་དོ། །དེ་ནས་ལྷུན་པོའི་ལོགས་ལ་འཆར་བ་ཞེས་བྱ་བའི་རི་ཡོད་དེ། གང་གིས་འཛམ་བུའི་གླིང་འདི་ནི་དེས་བཻ་དཱུརྱའི་རང་བཞིན་གྱི་ལོགས་སུ་བྱེད་པ་དང་། གང་གིས་ཤར་གྱི་ལུས་འཕགས་པོ་ནི་དེས་གསེར་
གྱི་མདོག་ཏུ་བྱེད་པ་ཡིན་ནོ། །རི་དེའི་ངོས་སྔོན་པོར་སྣང་བ་ཡིན་པས་རི་ཡིས་འཛམ་བུའི་གླིང་གི་ནམ་མཁའ་ཡང་སྔོན་པོར་མཐོང་ངོ་། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་གྱིས་ལུས་ལ་རྗེས་སུ་ལྟ་ཞིང་གནས་ཏེ་
རི་ཤར་བ་དེ་དང་ཐག་ཉེ་བར་གྱུར་པ་ན་གཞན་དག་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རི་ཤར་བ་དེ་ལས་རིང་དུ་འདས་པར་གྱུར་ནས་ཤར་གྱི་ལུས་འཕགས་
སུ་རི་རབ་ལྷུན་པོ་དེའི་རྭ་གཉིས་པར་གྱུར་པ་ཡིད་བདེ་བ་ཞེས་བྱ་བ་ལྷའི་འཛམ་བུའི་ཆུ་བོའི་གསེར་གྱི་རང་བཞིན་དུ་གྱུར་པ་ཡངས་པ་གསེར་གྱི་པད་མས་ལེགས་པར་ཀུན་ཏུ་བརྒྱན་པ་སྟེ། རྒྱར་ནི་དཔག་ཚད་བཅུ་པའོ། །འཕང་དུ་
ནི་དཔག་ཚད་ལྔ་བརྒྱ་ཡིན་ནོ། །དེ་ལ་ནི་གསེར་གྱི་རང་བཞིན་གྱི་ལྗོན་ཤིང་དང་། རི་དགས་དང་། བྱ་རྣམས་དང་། གསེར་ས་ལེ་སྦྲམ་གྱི་རང་བཞིན་གྱི་ལྗོན་ཤིང་ལོ་མ་རྣམས་དང་། ལྷའི་གླུ་མཁན་རྣམས་ཀྱིས་ཀྱང་བསྟེན་པ་ཡིན་ནོ། །
དེ་ལ་ཡང་ཕྲེང་བ་ཐོགས་པར་གྱུར་པའི་ལྷ་རྣམས་དང་། པི་བང་གསུམ་པ་ཅན་རྣམས་ཀྱང་རྩེ་དགའ་བར་བྱེད་དོ། །ཇི་ལྟར་ལས་རྣམས་ཀྱིས་བསྐྱེད་པར་གྱུར་པ་རྣམས་དམན་པ་དང་། བར་མ་དང་། ཁྱད་པར་དུ་འཕགས་པའི་

66-1-196b

ལས་རྣམས་ཀྱིས་མངོན་པར་སྤྲུལ་པ་སྟེ། རང་གི་ལས་ཀྱི་བགོ་སྐལ་ལ་སྤྱོད་པར་བྱེད་པའི་ལྷ་དེ་དག་རྣམས་ཡིད་བདེ་བའི་རི་དེ་དང་ཇི་སྲིད་དུ་རི་ཉི་མ་དང་མཚུངས་པར་གྱུར་པའི་ཤར་བ་ལ་ཡང་སྟེན་པར་བྱེད་དོ། །འཛམ་བུའི་གླིང་
གི་རྩེ་མོར་གྱུར་པ་ཤིན་དུ་མཐོ་བ་ཡིན་ཏེ། དེ་ཙམ་ཞིག་འཛམ་བུའི་གླིང་གི་ཤར་ཕྱོགས་ན་ཡོད་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་དེ། ཇི་ལྟར་འཛམ་བུའི་གླིང་གི་
ཕྱོགས་ན་ཆུ་བོའི་རིགས་སུ་གྱུར་པ་འམ། རིའི་རིགས་སུ་གྱུར་པ་འམ། རྒྱ་མཚོ་ཡོངས་སུ་འཁྲུགས་པར་གྱུར་པ་འམ། ཅི་ཙམ་གཅིག་གིས་མཐར་ཐུག་པར་འགྱུར་བ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་
ཀྱིས་སམ་ལྷའི་མིག་གིས་མཐོང་བར་གྱུར་པ། དེ་ལ་འབིགས་བྱེད་ཅེས་བྱ་བའི་རིའི་ཉེ་འཁོར་དུ་དཔག་ཚད་བརྒྱད་ཡོད་པ་ལས། ཆུ་ཀླུང་ནར་མ་དཱ་ཞེས་བྱ་བ་ཞེང་དུ་དཔག་ཚད་ཕྱེད་དུ་གྱུར་པ་རིང་དུ་དཔག་ཚད་བརྒྱ་ཕྲག་གཉིས་
ཡོད་པ་སྟེ། དེ་ལ་ཡང་དུག་ཆེན་པོ་དང་ལྡན་པའི་ཀླུ་རྣམས་རབ་ཏུ་གནས་ཤིང་ཆུ་སྲིན་བྱིས་པ་གསོད་དང་ཆུ་སྲིན་འཛིན་ཁྲིས་ཀྱང་གང་བར་གྱུར་པ་ཡིན་ནོ། །ཆུ་ཀླུང་དེ་ལས་གཉིས་པར་གྱུར་པ་ཆུ་ཀླུང་རླབས་ལྡན་ཞེས་བྱ་
བ་ཡང་འབིགས་བྱེད་ལས་ཀུན་དུ་འབབ་པའོ། །ཆུ་ཀླུང་གསུམ་པ་ཤུགས་དང་ལྡན་པ་ཞེས་བྱ་བ་སྟེ། དགའ་བར་གྱུར་པ་ཤིང་རྣམས་ཀྱིས་ཡོངས་སུ་བསྐོར་བར་གྱུར་པ་ཡིན་ནོ། །ཆུ་ཀླུང་གཞན་ཡང་ནག་པོ་འཁྱིལ་པ་ཞེས་
བྱ་བ་ཟབས་སུ་ནི་དཔག་ཚད་གསུམ་དུ་གྱུར་པ། རིང་དུ་གྱུར་པའི་དངོས་པོར་ནི་དཔག་ཚད་སུམ་བརྒྱ་པ་ཡིན་ཏེ། ཇི་སྲིད་དུ་རྒྱ་མཚོར་འབབ་པ་ཡིན་ནོ། །ཆུ་ཀླུང་ཡང་རོ་དྷ་ཆེན་པོ་ཞེས་བྱ་བ་ལ་དུག་
ཆེན་པོ་དང་ལྡན་པའི་ཀླུས་གང་བར་གྱུར་པ་ཡིན་ནོ། །རི་མ་ལ་ཡ་ཞེས་བྱ་བ་ནི་ཙན་དན་གྱི་རང་བཞིན་དུ་གྱུར་པ་མཆོག་ཏུ་དགའ་བ་རིང་བར་གྱུར་པའི་ངོ་བོར་ནི་དཔག་ཚད་ལྔ་བརྒྱ་ཡིན་ལ་འཕངས་སུ་གྱུར་པ་ནི་དཔག་ཚད་སུམ་བརྒྱ་

66-1-197a

ཡིན་ནོ། །རླབས་ཆེན་ཞེས་བྱ་བའི་ཆུ་ཀླུང་རབ་ཏུ་འབབ་པ་ཡིན་ཏེ། ཞེང་དུ་དཔག་ཚད་གཅིག་ཡིན་ལ་རིང་བའི་ངོ་བོར་ནི་དཔག་ཚད་བརྒྱར་གྱུར་པ་ཇི་སྲིད་དུ་རྒྱ་མཚོར་འབབ་པ་ཡིན་ནོ། །བེ་ཏྲ་ཅན་ཞེས་བྱ་བའི་ཆུ་ཀླུང་ནི་
ལྗོན་ཤིང་སྣ་ཚོགས་པ་རྣམས་ཀྱིས་གང་བར་གྱུར་པ་ལ་བྱ་རྣམས་ཀྱིས་ཁྱབ་པར་གྱུར་པ་སྟེ། རྒྱར་ནི་དཔག་ཚད་གཅིག་ཡིན་ལ་རིང་དུ་ནི་དཔག་ཚད་ལྔ་བརྒྱར་གྱུར་པས་ཇི་སྲིད་དུ་རྒྱ་མཚོར་འབབ་པ་ཡིན་ནོ། །གཞན་
ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་ན་གཞན་དག་ཅི་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཡུལ་
རྣམས་ལ་འདི་ལྟ་སྟེ། མེ་ལ་ཀོའི་ལྗོངས་ཀྱི་ཡུལ་ཕྱོགས་ནི་རྣམ་པ་དུ་མ་རྣམས་ཡིན་ཏེ། ཡུལ་དེ་དག་ནི་དཔག་ཚད་བཞི་བཅུ་ཡིན་ནོ། །ཙོ་ཀ་ལ་ཞེས་བྱ་བའི་ཡུལ་ལྗོངས་གཉིས་པ་ནི་དཔག་ཚད་ལྔ་བཅུ་པ་ཡིན་ཏེ། ལྗོན་
ཤིང་དང་། ཀེ་ཏ་ཀཱ་དང་། ན་ཌི་ཀེ་ར་དང་། པ་ན་ས་དང་། ཆུ་ཤིང་དང་། བི་ལ་དང་། ཀ་པཏྠི་དང་། ཀ་རུ་ཤ་ཀ་དང་། བ་ད་ར་དང་། ཨརྫུ་ན་དང་། ཙམྤ་ཀ་དང་རྣམས་ཀྱིས་ཉེ་བར་མཛེས་པར་གྱུར་པའོ། །ལྗོན་ཤིང་གཞན་ནི་ཚ་བི་ཀ་ལིང་ཀ་ཞེས་
བྱ་བ་དཔག་ཚད་བརྒྱ་པ་སྟེ། ཤིང་གསར་པ་རྣམས་ཐམས་ཅད་དང་ཤཱ་ལི་དག་གིས་ཉེ་བར་མཛེས་པར་བྱས་པའོ། །དེ་ནས་ཆུ་ལྡན་ཞེས་བྱ་བའི་ཡུལ་གཞན་ནི་ཞེང་དུ་དཔག་ཚད་བརྒྱ་ཡིན་ཏེ། ལྗོན་ཤིང་དང་ཤཱ་ལི་དག་གིས་
ཉེ་བར་མཛེས་པར་བྱས་པ་ཡིན་ནོ། །ནགས་ན་རི་དགས་དང་སྟག་དང་། མི་བགྲུངས་པར་གྱུར་པ་དཎྜ་ཀཱ་ར་ཎྱ་བ་ཞེས་བྱ་བ་ནི་དཔག་ཚད་ཉི་ཤུ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་
ཞིང་གནས་ཏེ། འཛམ་བུའི་གླིང་གི་ལྷོ་ཕྱོགས་ན་ཆུ་ཀླུང་གི་རིགས་སམ། རིའི་རིགས་གཞན་དག་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ཆུ་ཀླུང་གོ་དཱ་བ་རཱི་ཞེས་པ་

66-1-197b

རབ་ཏུ་དང་བར་གྱུར་པའི་ཆུ་ཡོད་དེ། ཞེང་དུ་ནི་རྒྱང་གྲགས་ཡིན་ལ་རིང་དུ་གྱུར་པའི་ངོ་བོར་ནི་དཔག་ཚད་ཉིས་བརྒྱ་པའོ། །ལྗོངས་ཀྱང་ཙོན་ཏྭ་ཞེས་བྱ་བ་སྟེ་དཔག་ཚད་ཉི་ཤུ་ཡིན་ནོ། །མ་དྲཱ་ཞེས་བྱ་བའི་ལྗོངས་ནི་དཔག་ཚད་བརྒྱ་
ཕྲག་བཞི་བཅུ་ཡིན་ནོ། །ཀེ་ཏ་ཀོ་ཞེས་བྱ་བའི་ཡུལ་ནི་དཔག་ཚད་ལྔ་བཅུ་པ་ཡིན་ཏེ། བ་ལང་དང་མ་ཧེ་ཥ་རྣམས་ཀྱིས་ཀུན་ནས་གང་བར་གྱུར་པ། ལྗོན་ཤིང་དང་ཤཱ་ལི་ཐམས་ཅད་ཕུན་སུམ་ཚོགས་པ་ཡིན་ནོ། །གཞན་ཡང་
རྒྱ་མཚོའི་ནང་ན་ཀར་ཀོ་ལའི་རང་བཞིན་གྱི་ཤིང་ཐམས་ཅད་ཕུན་སུམ་ཚོགས་པར་གྱུར་པ་སྟེ། རིང་དུ་གྱུར་པའི་དངོས་པོར་ནི་དཔག་ཚད་སུམ་བརྒྱའོ། །ཞེང་དུ་ནི་དཔག་ཚད་སུམ་བརྒྱ་ཡིན་ནོ། །ཀཱ་བེ་རི་ཞེས་བྱ་བའི་
ཆུ་ཀླུང་ནི་ཤིང་རྣམས་ཐམས་ཅད་ཀྱིས་ཉེ་བར་མཛེས་པར་གྱུར་པ་སྟེ། རབ་ཏུ་དང་བའི་ཆུ་ཞེང་དུ་ནི་དཔག་ཚད་དོ། །རིང་དུ་གྱུར་པའི་ངོ་བོར་ནི་དཔག་ཚད་ལྔ་བརྒྱ་པ་ཡིན་ནོ། །དེ་ལ་ནི་དགའ་བར་གྱུར་པ་ཀར་ཀོ་ལ་ཀཱ་དང་། 
ན་ར་ཀ་དང་། ཀེ་ཏ་ཀ་དང་རྣམས་ཀྱིས་ཤིན་དུ་དགའ་བར་གྱུར་པའི་ནགས་ཡོད་དོ། །ཆུ་ཀླུང་ཡང་བཱ་སའི་ཆུ་ཞེས་བྱ་བ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། 
འཛམ་བུའི་གླིང་ལས་རྒལ་བར་གྱུར་ནས་རྒྱ་མཚོ་དང་རིའི་རིགས་དང་གླིང་གི་རིགས་སུ་གྱུར་པ་གཞན་དག་ཀྱང་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྒྱ་མཚོ་པུ་
ཌིས་གཡོགས་པ་ཞེས་བྱ་བ་དཔག་ཚད་སྟོང་ཕྲག་བཅུ་པ་སྟེ། དེ་ན་རླུང་གིས་རླབས་རྣམས་ནི་མི་བྱེད་དོ། །པད་མའི་འདབ་མའི་ཚོགས་རྣམས་ལྡན་པ་ཡིན་ནོ། །རྒྱ་མཚོ་ཆེན་པོ་འདི་ལས་འདས་པར་གྱུར་ནས་རྒྱ་མཚོའི་གླིང་
དཔག་ཚད་ལྔ་བརྒྱ་པ་ཡོད་དོ། །དེ་ལ་ནི་སྲིན་མོ་རྣམས་རབ་ཏུ་གནས་པ་ཡིན་ཏེ། ཟས་སུ་ཉ་ཟ་བར་བྱེད་པ་འཇིགས་པའི་གཟུགས་ཅན་རྣམས་ཡིན་ནོ། །དེ་ལས་རྒལ་བར་གྱུར་ནས་དབང་ཆེན་གྱི་རི་ཡིན་ཏེ། རྒྱར་ནི་

66-1-198a

དཔག་ཚད་བཞི་བཅུ་པར་གྱུར་པ་འཕང་དུ་དཔག་ཚད་བཅུ་པ་ལ་ཏཱ་ལ་དང་། ཤཱ་ལིའི་ཕྲེང་བ་དང་ལྡན་པར་གྱུར་པའོ། །དེ་ལ་ལྷ་མ་ཡིན་རྣམས་ཀླུའི་བུ་མོ་དང་རྩེ་བར་བྱེད་དེ་ཀླུ་དང་ལྷན་ཅིག་ཏུ་འཇུག་ངོགས་དང་ཉེ་བའི་ནགས་སུ་
ཡང་ངོ་། །རི་དེ་ལ་གནས་པར་གྱུར་ནས་རྒྱལ་པོ་ཆེན་པོ་བཞིས་འཛམ་བུའི་གླིང་རྣམས་ཐམས་ཅད་བརྒྱད་དང་བཅུ་བཞི་ལ་སོ་སོར་རྟོག་པར་བྱེད་དོ། །སྐྱེས་བུ་སུ་དག་ནི་མ་ལ་གུས་པ་ཡིན། ཆོས་ལ་སྤྱོད་པར་བྱེད་པ་སུ་དག་ཡིན། ཆོས་ཀྱིས་
རྗེས་སུ་ཕྱོགས་པར་འཇུག་པ་ནི་སུ་དག་ཡིན། བསྙེན་གནས་ལ་ཉེ་བར་གནས་པ་ནི་གང་དག་ཡིན། སངས་རྒྱས་ལ་དད་པ་ནི་གང་དག་ཡིན། ཆོས་ལ་དད་པར་གྱུར་པ་ནི་གང་དག་ཡིན། དགེ་འདུན་ལ་དད་པར་གྱུར་པ་ནི་གང་དག་
ཡིན། བདུད་དང་ལྷན་ཅིག་གཡུལ་འགྱེད་པར་བྱེད་པ་ནི་སུ་དག་ཡིན། སུ་ནི་དྲང་པོའི་རང་བཞིན་ཅན་ཡིན། སུ་ནི་སྦྱིན་བདག་དུ་གྱུར་པ་ཡིན། སུ་ནི་སེར་སྣ་མེད་པ་ཡིན། སུ་ནི་གཞན་དག་ལ་གནོད་པ་མི་བྱེད་པ་ཡིན། སུ་ནི་
བྱས་པ་ཁྱད་དུ་མི་གསོད་པ་ཡིན། སུ་ནི་མེད་པར་སྨྲ་བ་མ་ཡིན། དགེ་བ་བཅུའི་ལས་ཀྱི་ལམ་རྣམས་ལ་སྤྱོད་པར་བྱེད་པ་ནི་གང་དག་ཡིན། གང་དག་ནི་ཐེག་པ་ཆེན་པོ་པ་རྣམས་ཡིན། སུ་ནི་ཉན་ཐོས་ཀྱི་ཐེག་པ་པ་ཡིན། 
སུ་ནི་རང་སངས་རྒྱས་ཀྱི་ཐེག་པ་པ་ཡིན། སུ་ནི་གྲོགས་པོའི་དགྲར་མ་གྱུར་པ་ཡིན། གཞན་མུ་སྟེགས་ཅན་རྣམས་ཀྱི་ལོག་པར་ལྟ་བ་མ་ཡིན་པ་སུ་ཡིན་ཞེས་དེ་ལྟར་རྒྱལ་པོ་ཆེན་པོ་བཞི་པོ་དེ་དག་གིས་དབང་ཆེན་གྱི་རི་ལ་འཛམ་
བུའི་གླིང་རྣམས་ཐམས་ཅད་ལ་སོ་སོར་རྟོག་པར་བྱེད་དོ། །གལ་ཏེ་འཛམ་བུའི་གླིང་གི་མི་རྣམས་ཆོས་དང་ལྡན་པར་གྱུར་ན་ནི་རྒྱལ་པོ་ཆེན་པོ་བཞི་མགུ་བར་གྱུར་ནས་བརྒྱ་བྱིན་ལ་ཀུན་དུ་རིག་པར་བྱེད་ཅིང་དབང་པོ་དང་བཅས་པའི་
ལྷ་རྣམས་དགའ་བར་འགྱུར་རོ། །བདུད་ཀྱི་ཕྱོགས་རྣམས་ནི་ཉམས་པར་གྱུར་ཏོ། །ལྷའི་ཕྱོགས་རྣམས་ནི་འཕེལ་བར་གྱུར་ཏོ། །འཛམ་བུའི་གླིང་གི་མི་རྣམས་ནི་ཐམས་ཅད་ཀྱང་དགེ་བའི་ཆོས་ལ་སྤྱོད་པར་བྱེད་པ་དང་། 

66-1-198b

ཆོས་ཀྱི་རྗེས་སུ་ཕྱོགས་པར་གྱུར་པ་དེ་ཐོས་ནས་དབང་པོ་དང་བཅས་པའི་ལྷ་རྣམས་དགའ་བར་འགྱུར་རོ། །གལ་ཏེ་ཆོས་དང་མི་ལྡན་ཞིང་ཆོས་ཀྱི་རྗེས་སུ་མི་ཕྱོགས་པར་འཛམ་བུའི་གླིང་གི་མི་རྣམས་གྱུར་ན་དེས་
རྒྱལ་པོ་ཆེན་པོ་བཞི་སྡུག་བསྔལ་བར་གྱུར་ནས་སུམ་བཅུ་རྩ་གསུམ་གྱི་ལྷ་རྣམས་ལ་རྗོད་པར་བྱེད་དེ། འཛམ་བུའི་གླིང་གི་མི་རྣམས་ཐམས་ཅད་ཀྱང་ཆོས་དང་ལྡན་པ་མ་ཡིན་ཞིང་ཆོས་ཀྱི་རྗེས་སུ་འཇུག་པར་བྱེད་པ་ཡང་མ་ཡིན་
ནོ། །བདུད་ཀྱི་ཕྱོགས་རྣམས་ནི་ཉམས་པར་གྱུར་ཏོ་ཞེས་དེས་ཐོས་ནས་དབང་པོ་དང་བཅས་པའི་ལྷ་རྣམས་སྡུག་བསྔལ་བར་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། དབང་
ཆེན་གྱི་རིའི་ཕ་རོལ་ན་རིའི་རིགས་སུ་གྱུར་པ་འམ་གླིང་གི་རིགས་སུ་གྱུར་པ་དག་ཡོད་པ་ཡིན་ནམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། དབང་ཆེན་གྱི་རི་དེ་ལས་རིང་དུ་འདས་
པར་གྱུར་པ་ན་ཡང་རྒྱར་དཔག་ཚད་བརྒྱ་པར་གྱུར་པའི་གླིང་ཡོད་དོ། །དེ་ལ་རྐང་པ་གཅིག་པའི་མི་རྣམས་རབ་ཏུ་གནས་པ་ཡིན་ཏེ། རྩ་བ་དང་འབྲས་བུ་དག་གི་ཟས་དང་། ཚེ་ལོ་ལྔ་བཅུ་པར་གྱུར་པ་དང་། ཤིང་ལོ་གོས་སུ་གྱོན་པ་དང་། 
ཤིང་དྲུང་ན་ཀུན་དུ་གནས་པ་རྣམས་ཡིན་ཏེ། ཡུལ་འདི་ཐམས་ཅད་ན་ཡང་མི་ཤ་ཟ་བར་བྱེད་པའི་གཅན་ཟན་དང་སེང་གེས་ཀུན་དུ་གང་བར་གྱུར་པ། གཤོག་པ་ཅན་རྣམས་ཀྱང་ཤིན་དུ་རྩུབ་པ་རྣམས་ཡུལ་དེ་ན་སོ་སོར་གནས་པ་ཡིན་ནོ། །
དྲོ་བ་དང་བསིལ་བ་དང་བཅས་པས་ཡུལ་འདི་ཡང་དགའ་བ་ཡིན་ཞིང་དེ་ལ་ཡང་བུད་མེད་རྣམས་ཁྱིའི་གདོང་ཅན་ཡིན་ཞིང་སྐད་སྙན་པ་ཡིན་ནོ། །དེ་ལས་རྒལ་བར་གྱུར་ནས་རྒྱ་མཚོ་དཔག་ཚད་སྟོང་ཕྲག་ཉི་ཤུ་པ་ཡོད་དོ། །རྒྱ་མཚོ་དེ་
བརྡོལ་བར་གྱུར་ནས་ཏཱ་ལའི་ཕྲེང་བ་ཞེས་བྱ་བའི་རི་ཤེལ་དང་། བཻ་དཱུརྱ་དང་། དངུལ་གྱི་རང་བཞིན་དུ་གྱུར་པ་ལ་གསེར་གྱི་བྱ་རྣམས་ཀྱིས་སྟེན་པར་བྱེད་པ་མེ་ཏོག་མན་དཱ་ར་བ་དང་། པད་མ་ཀུ་ཤེ་ཤ་ཡ་རྣམས་ཕུན་སུམ་ཚོགས་པར་

66-1-199a

གྱུར་པས་དུས་དྲུག་དུ་རྣམ་པར་བརྒྱན་པ་ཡིན་ནོ། །དེ་ལ་ལྷ་མ་ཡིན་རྫུ་འཕྲུལ་དང་ལྡན་པ་རྣམས་འདོད་པར་གྱུར་པའི་སྒྲ་དང་། རེག་བྱ་དང་། རོ་དང་། དྲི་རྣམས་ཀྱིས་དགའ་ཞིང་རྩེ་བར་བྱེད་ལ་ཡོངས་སུ་སྤྱོད་པར་ཡང་བྱེད་དོ། །
རི་དེའི་རིང་བར་གྱུར་པའི་ངོ་བོར་ནི་དཔག་ཚད་སྟོང་ཕྲག་ལྔར་གྱུར་པ་ཡིན་ལ། འཕང་དུ་ནི་དཔག་ཚད་བརྒྱ་པ་ཡིན་ཏེ། རི་འདི་ལ་དངུལ་གྱི་རང་བཞིན་གྱི་རཱ་ཡང་བཅྭ་ལྔ་ཡོད་དོ། །དེ་ལ་ནི་ལྷའི་བུ་མོ་རྣམས་རྩེ་དགའ་བར་བྱེད་དོ། །ལྷའི་
བུ་མོ་དེ་དག་རྣམས་ཐམས་ཅད་ལྷ་མ་ཡིན་གྱིས་ཀུན་དུ་མཐོ་འཚམ་པར་བྱེད་དོ། །གཞི་དེ་ལས་དང་པོ་ལྷ་དང་ལྷ་མ་ཡིན་གྱི་འཁྲུག་པར་འགྱུར་རོ། །ལྷ་དང་མི་རྣམས་སོ་སོའི་སྐྱེ་བོ་རྣམས་ཐམས་ཅད་ཀྱང་བུད་མེད་ཀྱི་དབང་དུ་འགྱུར་
བ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ཏཱ་ལའི་ཕྲེང་བའི་རི་དེ་ལས་འདས་པར་གྱུར་ནས་རི་དང་རྒྱ་མཚོའི་རིགས་སམ། གླིང་གི་རིགས་རྣམས་གཞན་གང་དག་ཅེ་
ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། དེ་ལས་རིང་དུ་འདས་ནས་དཔག་ཚད་ལྔ་སྟོང་དུ་རྒྱ་མཚོ་ཡིན་ནོ། །དེ་ལ་དཔག་ཚད་སྟོང་དུ་ཉ་རྣམས་ཡོད་དེ་དཔག་ཚད་ལྔའི་ཚད་དུ་གྱུར་པ་ཡིན་ཞིང་གླང་
པོ་ཆེ་དང་། མ་ཧེ་ཥ་དང་། ཕག་པ་དང་། རྔ་མོ་དང་། སེང་གེ་དང་། སྟག་དང་། སྤྱང་གི་དང་། གུང་དང་། སྤྲེའུ་དང་། མིའི་གདོང་ཅན་རྣམས་དང་། སེམས་ཅན་རྣམས་ཐམས་ཅད་ཀྱི་བཞིན་གྱི་རྗེས་འདྲ་བར་གྱུར་པ་རྣམ་པ་དུ་མ་ཅན་རྣམས་ཡིན་ནོ། །
རྒྱ་མཚོ་དེ་ལས་འདས་པར་གྱུར་ནས་ཉི་མ་ལྡན་ཞེས་བྱ་བའི་རི་ཡོད་དོ། །དེ་ལ་ནི་འདོད་པ་རྣམས་ཐམས་ཅད་དང་། ལྷ་རྫས་ཀྱི་པད་མ་དང་། ཞག་བདུན་དུ་རྒྱགས་པ་སྐྱེད་པར་བྱེད་པའི་འབྲས་བུ་རྣམས་ཀྱང་ཕུན་སུམ་ཚོགས་པ་ཡིན་ནོ། །
དེ་ལ་ཡང་མི་འམ་ཅི་དག་རབ་ཏུ་གནས་པ་ཡིན་ཏེ། གླུ་དང་གར་གྱིས་རྟག་ཏུ་གནས་པར་བྱེད་པ། རྟག་ཏུ་ཡིད་དགའ་བར་གྱུར་པ་རྣམས་རང་གི་ལས་ཀྱི་འབྲས་བུའི་བགོ་སྐལ་ལ་སྤྱོད་པར་བྱེད་པས་དམན་པ་དང་། བར་མ་དང་། མཆོག་

66-1-199b

ཏུ་གྱུར་པ་རྣམས་ཕན་ཚུན་དུ་གྲོགས་སུ་གྱུར་པས་རྩེ་དགའ་བར་བྱེད་དོ། །ཉི་མ་ལྡན་གྱི་རི་དེ་ལས་ཤིན་དུ་འདས་པར་གྱུར་ནས་དཔག་ཚད་ཉིས་སྟོང་གི་རྒྱ་མཚོ་ཡིན་ནོ། །དེ་ལས་ཤིན་དུ་འདས་པ་ན་ནི་ཀུཉྫ་རོ་ཞེས་བྱ་བའི་རི་ཐམས་ཅད་
དུ་ཡང་དངུལ་གྱི་རང་བཞིན་དང་། ལྷ་རྫས་ཀྱི་བཻ་དཱུརྱའི་རྡོ་བ་དང་། དངུལ་གྱི་གླེགས་བུ་དང་། རྡོ་བ་ཡིད་དུ་འོང་བ་རྣམས་ཀྱིས་ཡིད་ཉེ་བར་མཛེས་པར་བྱས་པའོ། །དེ་ལ་བུ་མོའི་ཤིང་ལྗོན་པ་ཞེས་བྱ་བའི་ལྗོན་ཤིང་རི་དེའི་ཉེ་འཁོར་ན་ཡོད་
དོ། །ཤིང་དེ་ལས་སྐྱ་རེངས་ཤར་བར་གྱུར་པ་ན་བྱིས་པའི་སྐྱེས་བུ་ལེགས་པར་སྐྱེའོ། །ཉི་མ་ཤར་བ་ན་རྒུར་འགྲོས་བྱེད་པར་འགྱུར་རོ། །སྔ་དྲོའི་དུས་སུ་ནི་གཙུག་ཕུད་དང་ལྡན་པའི་གཞོན་ནུར་འགྱུར་རོ། །ཉི་མ་ཕྱེད་དུ་ཕྱིན་པ་ན་
ལང་ཚོ་ལ་བབ་པར་འགྱུར་རོ། །ཉི་མའི་ཆ་གསུམ་པ་ལ་ན་ཚོད་བར་མར་འགྱུར་རོ། །ཉི་མ་འབབས་པའི་དུས་ན་ནི་རྒས་པས་ནོན་པར་འགྱུར་ཏེ། ལུས་དབྱུག་པ་ལ་བརྟེན་པར་འགྱུར་བ་དང་། མགོ་ཁ་བའི་ཕུང་པོ་ལྟར་འགྱུར་རོ། །
ཉི་མ་ནུབ་པར་གྱུར་པའི་དུས་ན་ནི་ཐམས་ཅད་དུས་བྱེད་པར་འགྱུར་རོ། །ལས་དང་བཅས་པར་གྱུར་པ་དང་། ལས་ཀྱི་སེམས་ཅན་དང་། ལས་ཀྱི་བགོ་སྐལ་ལ་སྤྱོད་པར་བྱེད་པ་དང་། ལས་བརྟན་པར་བྱེད་པ་རྣམས་ཡིན་ཏེ། 
ཇི་ལྟ་ཇི་ལྟར་ལས་རྣམས་བྱས་པར་གྱུར་པ་དེ་ནི་ལས་དེ་དག་རྣམས་ཉིད་ཀྱི་ཤིན་དུ་ཡང་སྐལ་བ་ཅན་དུ་འབྱུང་བར་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ཀུཉྫ་རའི་རི་ལས་
འདས་པར་གྱུར་ནས་རིའི་རིགས་སུ་གྱུར་པ་འམ། རྒྱ་མཚོའི་རིགས་སུ་གྱུར་པ་འམ། གླིང་གི་རིགས་སུ་གྱུར་པ་གཞན་དག་གང་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས། མཐོང་བར་གྱུར་པ། དཔག་
ཚད་ལྔ་བརྒྱར་གྱུར་པའི་རྒྱ་མཚོའི་ཆུའི་ནང་ན་རིན་པོ་ཆེ་སྣ་ཚོགས་པའི་རང་བཞིན་རྣམས་ཀྱིས་གང་བར་གྱུར་པ་བཻ་དཱུརྱ་དང་། ཨིན་དྲ་ནཱི་ལ་དང་། ཤེལ་དང་། ནོར་བུའི་སྟེགས་བུ་རྣམས་དང་། རིན་པོ་ཆེ་བདུན་གྱིས་ཉེ་བར་མཛེས་པར་

66-1-200a

བྱས་པ། རང་བཞིན་གྱིས་འོད་དང་ལྡན་པར་གྱུར་པའི་ནོར་བུ་རྣམས་ཀྱིས་ཀུན་དུ་གང་བར་གྱུར་པ། གསེར་དང་ནོར་བུའི་སྟེགས་བུ་རྣམས་དང་། ཁང་བཟངས་དང་། གཞལ་མེད་ཁང་དང་། ཁང་པ་བརྩེགས་པ་དང་། ཁང་
བུའི་ཕྲེང་བ་རྣམ་པ་སྣ་ཚོགས་པ་རྣམས་དང་། ཉི་མ་གཉིས་པ་དང་འདྲ་བར་ཀུན་དུ་གསལ་བར་བྱེད་པའི་གནས་ཡིན་ནོ། །དེ་ལ་ནི་ཏ་ཀྵ་ཀོ་ཞེས་བྱ་བའི་ཀླུའི་རྒྱལ་པོ་ལེགས་པར་གནས་པ་ཡིན་ཏེ། རང་གི་ལས་རྣམས་ཀྱི་བགོ་སྐལ་
ལ་སྤྱོད་པར་གྱུར་པ་དང་། སངས་རྒྱས་རྗེས་སུ་དྲན་པ། ཆོས་རྗེས་སུ་དྲན་པ། དགེ་འདུན་རྗེས་སུ་དྲན་པར་བྱེད་པ་ཡིན་ནོ། ། ཏ་ཀྵ་ཀོའི་སྲེད་པ་དེ་ལས་རིང་དུ་འདས་ནས་རྒྱ་མཚོ་དཔག་ཚད་ལྔ་བརྒྱར་མཐོང་ན་འཇིགས་པར་འགྱུར་བ་
སེམས་ཅན་ཐམས་ཅད་འཇིགས་པར་བྱེད་པ། མཆོག་ཏུ་ཁྲོ་བར་གྱུར་པའི་ཀླུ་རྣམས་ཀྱིས་ཀུན་དུ་གང་བར་གྱུར་པ་ཡིན་ནོ། །རྒྱ་མཚོ་དེ་ལས་ཀྱང་འདས་པར་གྱུར་ནས་སེམས་ཅན་རྣམས་ཐམས་ཅད་ཀྱིས་མཚུངས་
པར་གང་བ་འབྲིའ་བྷོ་ཞེས་བྱ་བའི་རི་ཡོད་དོ། །དེ་ལས་ནི་གོ་ཤཱཪྵི་ཞེས་བྱ་བའི་ཙན་དན་དེ་དང་། ཧ་རིཤྱཱ་མང་ཞེས་བྱ་བའི་ཙན་དན་གཉིས་པ་ཡང་སྐྱེ་བ་ཡིན་ཏེ། དེ་དག་ཀྱང་ཉི་མ་དང་མཚུངས་པའི་གཟི་བརྗིད་ཅན་ཡིན་པས་དེ་དག་ནི་
ཐ་མལ་པ་རྣམས་ཀྱིས་ལྟ་བར་མི་ནུས་པ་ཡིན་ནོ། །གང་དག་ཆོས་པར་གྱུར་ཅིང་ཆོས་ཀྱི་རྗེས་སུ་འཇུག་པར་བྱེད་པའི་འཁོར་ལོས་སྒྱུར་བའི་རྒྱལ་པོར་གྱུར་པ་རྣམས་དང་། རྣམ་པ་དེ་ལྟ་བུའི་རྒྱལ་པོ་གཞན་དག་རྣམས་ཀྱི་ཡང་
ཙན་དན་དེ་དག་ཡིན་ནོ། །དེ་ལ་ཡང་དྲི་ཟའི་རྗེས་དཔོན་རྣམས་ཙན་དན་དེའི་དྲི་དེ་དག་གིས་མྱོས་པར་གྱུར་ནས་རྟག་ཏུ་གར་དང་། གླུ་དང་། རོལ་མོའི་སྒྲ་རྣམས་ཀྱིས་ཀྱང་ཡིད་བདེ་བར་འགྱུར་རོ། །ཡུལ་དེ་ལས་ཀྱང་ཤིན་དུ་འདས་
ནས་རྒྱ་མཚོའི་དཔག་ཚད་ལྔ་བརྒྱ་རྣམས་སུ་དབུ་བ་ཕྲེང་བར་གྱུར་པ་རྣམས་རླུང་གི་འུར་སྒྲ་དང་འདེབས་པ་ཡིན་ནོ། །རྒྱ་མཚོ་དེ་ལས་རིང་དུ་འདས་པ་ན་རཱ་གསུམ་པ་ཞེས་བྱ་བའི་རི་ཡོད་དོ། །དེའི་རཱ་གཅིག་ནི་གསེར་གྱི་རང་

66-1-200b

བཞིན་ཡིན་ནོ། །གཉིས་པ་ནི་དངུལ་གྱི་རང་བཞིན་ཡིན་ནོ། །གསུམ་པ་ནི་ཤེལ་གྱི་རང་བཞིན་ཡིན་ནོ། །དེ་དག་ན་ཡང་དབུ་བའི་ཕྲེང་བ་ཞེས་བྱ་བ་རབ་ཏུ་དང་བའི་ཆུ་ལ་གསེར་གྱི་ཕྱེ་མ་དང་། གྲམ་པ་དང་། ལྷ་རྫས་ཀྱི་པད་མས་
ཉེ་བར་མཛེས་པར་བྱས་པ། ངང་པ་དང་། ཀཱ་རཎྜ་པཱ་རྣམས་ཀྱིས་གང་བར་གྱུར་པས་ཉེ་འཁོར་རྣམས་ན་ཤིན་དུ་སྒྲ་འདོན་པར་བྱེད་དོ། །རཱ་གསུམ་པའི་རི་དེ་ལ་རླུང་གིས་བརྡབས་པར་གྱུར་པས་རྒྱ་མཚོའི་རླབས་རྣམས་ངེས་པར་
རྡེབས་པར་བྱེད་དོ། །ད་དག་ལ་རབ་ཏུ་བརྡབས་པར་གྱུར་པས་ནི་ཉ་ཉམ་ཆུང་བ་རྣམས་དུས་ཀྱི་ཆོས་དང་ཀུན་དུ་ལྡན་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། 
རྒྱ་མཚོ་ན་རིའི་རིགས་སུ་གྱུར་པ་འམ། ཆུ་ཀླུང་གི་རིགས་སུ་གྱུར་པ་འམ། གླིང་གི་རིགས་སུ་གྱུར་པ་གཞན་དག་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། 
ཡུལ་དེ་ལས་རིང་དུ་འདས་པར་གྱུར་ནས་ལེགས་པར་བྱས་པ་དགེ་བ་རྣམས་དང་མི་དགེ་བར་གྱུར་པ་མྱོང་བར་ངེས་པ་རྣམས་ཏེ། སེམས་ཅན་རྣམས་ཐམས་ཅད་ཀྱི་ལས་ཀྱི་འབྲས་བུའི་དབང་པོར་གྱུར་པ་གཤིན་
རྗེའི་འཇིག་རྟེན་ཡོད་དོ། །དེ་ལ་གཤིན་རྗེ་ཞེས་བྱ་བ་ནི་ཆོས་ཀྱི་རྒྱལ་པོ་སྟེ། ཆོས་ཀྱིས་སེམས་ཅན་རྣམས་རྗེས་སུ་སྟོན་པར་བྱེད་པ་ཡིན་ནོ། །གཤིན་རྗེའི་འཇིག་རྟེན་འདི་ནི་རང་གི་སེམས་རྣམ་པར་འཁྲུལ་བ་དང་མུན་པས་
ཀྱང་འགྲིབས་པ་ཡིན་ནོ། །གཤིན་རྗེའི་འཇིག་རྟེན་དེ་ལས་འདས་པར་གྱུར་ནས་དཔག་ཚད་བརྒྱར་ནམ་མཁའ་སྒྲིབ་པ་མེད་པ་ཡིན་ནོ། །དེ་ལས་འདས་པར་གྱུར་ནས་ནི་དགའ་བར་གྱུར་པའི་གཤིན་རྗེའི་སྲེད་པ་
ཡིན་ཏེ། ལྷ་རྫས་ཀྱི་འཛམ་བུའི་ཆུ་བོའི་གསེར་དྲི་མ་མེད་པ་ཁང་པ་དང་རྟ་བབས་ཐམས་ཅད་ཀྱང་རིན་པོ་ཆེ་རྣམས་ཀྱིས་མཛེས་པར་བྱས་པ་དང་། ཆུ་བོ་དང་། འབབ་ཆུ་དང་། རྫིང་བུ་པད་མའི་རྫིང་བུ་རྣམས་ཡོངས་སུ་ཁྱབ་

66-1-201a

ཅིང་ཉེ་བར་མཛེས་པར་གྱུར་པ་སྟེ། རྒྱར་ནི་དཔག་ཚད་བརྒྱ་ཡོད་པ་ཉི་མ་གཉིས་པ་དང་མཚུངས་པ་ཡིན་ནོ། །གཤིན་རྗེའི་སྲིད་པ་དེ་ལས་འདས་པར་གྱུར་ནས་ནི་ཉི་མ་དང་ཟླ་བའི་འོད་ཟེར་ཡང་ཉམས་པར་
གྱུར་ནས་ཐམས་ཅད་ཀྱང་མུན་པས་ཀུན་དུ་བསྒྲིབས་པ་ཡིན་ཏེ། རྒྱ་མཚོ་ལ་ཡང་ཉི་མ་དང་ཟླ་བ་འདི་དག་གི་འོད་མེད་པ་ཡིན་ནོ། །སྲིད་པ་རྒྱ་ཆེན་པོར་གྱུར་པའི་དམྱལ་བ་པའི་སྐྱེ་བོ་རྣམས་ཀྱི་ཉེས་པར་བྱས་པའི་ལས་
རྣམས་ཀྱི་རང་བཞིན་གྱིས་རྒྱ་མཚོར་ཡང་མུན་པས་ཀུན་དུ་འགྲིབས་པར་གྱུར་ཏེ། རྒྱ་མཚོར་གྱུར་པ་འམ་ཡུལ་ཕྱོགས་ཀྱང་ཐམས་ཅད་དུ་གསལ་པོར་མི་དམིགས་སོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་
ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ཤིས་པའི་ཡུལ་འདི་ན་ནི་གྲོང་ཁྱེར་དུ་གྱུར་པ་འམ། ལྗོན་ཤིང་དུ་གྱུར་པ་འམ། ཆུ་བོར་གྱུར་པ་འམ། རིར་གྱུར་པ་རྣམས་ཀྱང་རུང་། རྒྱ་མཚོར་གྱུར་པ་འམ། ལྷའི་འཇིག་
རྟེན་དུ་གྱུར་པ་འམ། དུད་འགྲོའི་འཇིག་རྟེན་དུ་གྱུར་པ་འམ། ཡི་དགས་ཀྱི་འཇིག་རྟེན་དུ་གྱུར་པ་རྣམས་སམ། སྟེང་དུ་གྱུར་པ་འམ། འོག་གམ། ཕྱོགས་རྣམས་སམ། ཕྱོགས་མཚམས་རྣམས་ན་གང་ལ་ཡང་
སེམས་ཅན་རྣམས་མ་སྐྱེས་པ་འམ། མ་ཤི་བ་འམ། འཆི་མ་འཕོས་པ་འམ། སྐྱེས་པར་མ་གྱུར་པ་འམ། འཐུན་པ་དང་ཡིད་དུ་འོང་བ་རྣམས་ཐམས་ཅད་ཀྱང་མེད་པར་མ་གྱུར་པ་འམ། འབྲལ་བར་མ་གྱུར་པ་
འམ། བསླུས་པར་མ་གྱུར་པ་འམ། བརྟན་པ་མ་ཡིན་པ་དང་། ཐེར་ཟུག་མ་ཡིན་པ་དང་། ཡོངས་སུ་འགྱུར་བའི་ཆོས་ཅན་དང་། རྣམ་པར་འབྲལ་བ་དང་། ཕན་ཚུན་དུ་རྣམ་པར་འབྲལ་བ་དང་མི་ལྡན་པར་གྱུར་པ་
དེ་ནི་གཅིག་ཀྱང་གོ་སྐབས་མ་མཐོང་ངོ་། །གང་ལ་འཐུན་པ་དང་ཡིད་དུ་འོང་བ་རྣམས་དང་མེད་ཅིང་བྲལ་བར་བྱས་པར་མ་གྱུར་པ་འམ། ཐ་དད་དུ་གྱུར་པ་འམ། རྣམ་པར་གྱེས་པ་དང་། རྣམ་པར་བྲལ་བ་དང་། 

66-1-201b

ཀུན་ནས་འབྲལ་བར་མ་བྱས་པར་གྱུར་པ་ནི་འགྲོ་བ་ལྔ་ན་སེན་མོའི་ཆ་ཙམ་མ་དམིགས་ཏེ། ས་ཕྱོགས་ཀྱི་ཆ་གང་ལ་ཡང་སེམས་ཅན་རྣམས་མ་སྐྱེས་པ་འམ། ཤི་བ་དང་། འཆི་འཕོས་པ་དང་། སྐྱེས་པར་མ་གྱུར་པ་
ནི་མ་མཐོང་ངོ་། །དེའི་ཕྱིར་ན་ཤིན་དུ་མྱུར་བར་འདུ་བྱེད་རྣམས་ལ་འདོད་ཆགས་དང་བྲལ་བར་གྱིས་ཤིག །སླུ་བར་འགྱུར་བ་ཡིན་པ་དང་། གནས་འདི་དག་ནི་གཡོ་བ་དང་། ཉེ་བར་འཚེ་བ་དང་བཅས་པ་དང་། མྱ་ངན་དང་ཡིད་མི་བདེ་
བ་མང་བར་གྱུར་པ་དང་། མྱུར་བ་དང་བཅས་པ་དང་། ཀུན་དུ་འབྱེད་པར་འགྱུར་བ་དང་། ཡོངས་སུ་ཐོབ་པ་ལ་ཀུན་དུ་ཉམས་པར་འགྱུར་བ་དང་། སྒྱུ་མ་དང་འདྲ་བ་དང་། རྨི་ལམ་དང་མཚུངས་པ་དང་། རྙེད་པ་རྣམས་ཆུད་འཛའ་བ་དང་། སྲེད་པའི་
གནས་དེ་དག་རྣམས་ཀྱིས་ནི་བྱིས་པ་སོ་སོའི་སྐྱེ་བོ་རྣམས་སླུ་བར་བྱེད་པ་ཡིན་ཏེ། ཐོག་མ་མེད་པའི་དུས་ནས་རབ་ཏུ་འཇུག་པའི་འདོད་ཆགས་ཞེ་སྡང་གཏི་མུག་རྣམས་རྟེན་དུ་གྱུར་པ་ཡིན་ནོ། །འཛའ་བ་མ་ཡིན་པའི་དགའ་བའི་འདོད་
ཆགས་ཀྱི་གཞི་ལྟ་བུར་གྱུར་པ་ཡིན་པས། དེའི་ཕྱིར་ན་ཤིན་དུ་མྱུར་བར་འདུ་བྱེད་རྣམས་ལས་འདོད་ཆགས་དང་བྲལ་བར་གྱིས། སྐྱོ་བ་མེད་པར་གྱུར་ཏ་རེ། རྣམ་པར་གཡེང་བར་གྱུར་ཏ་རེ། ཀུན་ནས་འབྲལ་བར་འགྱུར་བའི་ཡུལ་
རྣམས་ཀྱིས་ཁྲིད་པར་གྱུར་ཏ་རེ། བྱིས་པ་རྣམས་དང་ལྷན་ཅིག་ཏུ་རྩེ་བར་མ་བྱེད་ཅིག །དེ་ལྟར་རྣལ་འབྱོར་སྤྱོད་པ་དེས་ལུས་གཞན་དུ་འཇིག་པར་འགྱུར་བའི་ཕྱི་རོལ་ཀྱི་ལུས་ཀྱིས་ལུས་ལ་ཡང་དག་པ་ཇི་ལྟ་བ་བཞིན་དུ་རྗེས་སུ་ལྟ་
ཞིང་གནས་སོ། །གནས་བཞི་བཅུ་ཐམ་པའི་ནང་རྣམས་ལ་གང་ལས་ཀྱི་སྐྱབས་གནས་པ་དང་། ལས་ཀྱིས་རབ་ཏུ་སྦྲེལ་བར་གྱུར་པ་དང་། ལས་ཀྱི་བགོ་སྐལ་ལ་སྤྱོད་པར་གྱུར་པ་མ་ཡིན་པའི་སེམས་ཅན་དུ་གྱུར་པ་གཅིག་
ཙམ་ཡོད་དམ། དགེ་བར་གྱུར་པ་འམ་སྡིག་པ་ཡང་རུང་སྟེ། ཇི་ལྟར་ལས་བྱས་པར་གྱུར་པ་དེ་ནི་དེ་ཉིད་ཀྱི་སྐལ་བ་ཅན་དུ་འགྱུར་ཞེ་ན། གང་ལས་ཀྱི་བགོ་སྐལ་ལ་སྤྱོད་པ་མ་ཡིན་པ་དང་། ལས་ཀྱི་སྐྱེ་གནས་པ་མ་ཡིན་པ་

66-1-202a

དང་། ལས་བརྟེན་པར་བྱ་བ་མ་ཡིན་པའི་སྐྱེས་བུ་དེ་ནི་གཅིག་ཀྱང་མ་མཐོང་གི་དགེ་བར་གྱུར་པའམ་སྡིག་པ་ཡང་རུང་སྟེ། ཇི་ལྟར་ལས་རྣམས་བྱས་པ་དེ་ནི་དེ་ཉིད་ཀྱི་སྐལ་བ་ཅན་དུ་འགྱུར་བ་ཡིན་ནོ། །རང་ཉིད་ཀྱིས་ལས་
བདག་གིར་བྱ་བ་ལ་ཀུན་དུ་བལྟས་ནས་ཡང་དག་པ་ཇི་ལྟ་བ་བཞིན་དུ་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །འཛམ་བུའི་གླིང་གི་ནུབ་ཀྱི་ཕྱོགས་ན་རིའི་རིགས་སམ། ཆུ་བོའི་རིགས་སམ། གླིང་གི་རིགས་སམ། ཡུལ་གྱི་
རིགས་སུ་གྱུར་པ་རྣམས་ཀྱང་ཇི་ལྟ་བུ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། པུནྣཱ་ག་དག་གིས་ཀུན་དུ་གང་བ་དང་། པ་ཊའི་ཤིང་མང་བ་དང་། ཁརྫུ་རྭ་རྣམས་ཀྱིས་ཁྱབ་པ་
དང་། ཀེ་ཏ་ཀའི་མེ་ཏོག་གིས་ཉེ་བར་མཛེས་པ་དང་། ཎཱ་ཌི་ཀེ་ར་མང་བར་གྱུར་པ་དང་། ཏ་མ་ལའི་ལྗོན་ཤིང་གིས་གང་བར་གྱུར་པ་དང་། རབ་ཏུ་བསིལ་བར་གྱུར་པའི་ཆུ་ཀླུང་རབ་ཏུ་ཕལ་ཆེ་བ་དང་། རིའི་ཕུག་རྣམས་དང་ལྡན་པ་སྟེ། 
ཡུལ་དེ་ཡང་ཀེ་ཀཱ་པི་ནོ་ཞེས་བྱ་བའི་ཡུལ་ཡིན་ལ། སིནྡྷུ་ཞེས་བྱ་བའི་ཆུ་བོ་སུ་བཱི་རོ་ཞེས་བྱ་བའི་ཡུལ་ཤིན་དུ་དགའ་བར་གྱུར་པ། ཤཱ་ལུ་དམར་པོའི་ཟས་དང་ལྡན་པའི་མི་རྣམས་ནི་བལྟ་བར་མཛེས་པ་ས་ཕྱོགས་རྣམས་རི་དང་འབབ་
ཆུས་གང་བར་གྱུར་པ་ཡིན་ནོ། ། བཱ་ར་ཏཱ་ཞེས་བྱ་བའི་ཡུལ་དཔག་ཚད་ཉི་ཤུ་པ་སྟེ་བལ་པོ་སེའུ་ཡི་ཆང་མང་བ་ཡིན་ནོ། །གྲོགས་པོའི་ལོངས་སྤྱོད་ཅེས་བྱ་བའི་གནས་ཏེ། དེ་ཉིད་ཀྱི་ནུབ་ཕྱོགས་ཀྱི་ཡུལ་ན་ཆུ་ཀླུང་ལྔ་ཡོད་དོ། །
དེ་ལས་འདས་པར་གྱུར་ནས་ནི་ཆུ་སྲིན་འཛིན་ཀྲི་རྣམ་པ་སྣ་ཚོགས་པས་གང་བར་གྱུར་པ། འཇིགས་པ་ཆེན་པོ་བྱེད་པའི་རྒྱ་མཚོ་ཡོད་པ་རྣལ་འབྱོར་སྤྱོད་པས་མཐོང་ངོ་། །རྒྱ་མཚོ་དེའི་ནུབ་ཕྱོགས་ན་དཔག་ཚད་བརྒྱ་པར་གྱུར་
པའི་གླིང་ཀཱ་ལ་ཀོ་ཞེས་བྱ་བ་ཡོད་དེ། དེ་ལ་རྣམ་པ་སྣ་ཚོགས་པའི་བྱ་རྣམས་དང་། ནགས་དང་ཉེ་བའི་ནགས་རྣམས་ཀྱང་ཡོད་དེ་ཤིན་དུ་དགའ་བ་ཡིན་ནོ། །གླིང་དེ་ན་ཡང་རིག་པ་འཛིན་པ་རྣམས་ཀུན་དུ་དགའ་བར་བྱེད་དེ། 

66-1-202b

བ་རི་ཏ་བཊྚ་ན་ད་ཞེས་བྱ་བའི་རིག་པ་འཛིན་པ་གནས་པ་ཡིན་ནོ། །རལ་པ་ཅན་གྱི་དབྱིབས་ཞེས་བྱ་བའི་གནས་གཉིས་པ་ཤིན་དུ་དགའ་བ་དང་དགའ་བར་གྱུར་པའི་ཡུལ་ཕྱོགས་ཡིན་ཏེ། ཀཱ་ལ་ཀེའི་གླིང་དེ་ན་ནི་ཁང་བཟངས་དང་
ཁྱིམ་དང་། འབབ་ཆུ་རབ་ཏུ་ཕལ་ཆེ་བ་ཡིན་ནོ། །གླིང་དེའི་ཕ་རོལ་ན་ནི་སིནྡྷུ་དང་རྒྱ་མཚོ་གཉིས་འདྲེ་བ་ཞེས་བྱ་བའི་ཡུལ་ཕྱོགས་ཡོད་དེ། སིནྡྷུ་དང་རྒྱ་མཚོ་གཉིས་ཀྱི་བར་ན་སུ་ཁ་ན་ཞེས་བྱ་བའི་རི་ཆུའི་ནང་ན་གནས་པ་ཡིན་ནོ། །
དེ་ལ་པྲ་བཱ་ཌ་སྐྱེ་བ་ཡིན་ཏེ། བྱི་རུའི་ལྗོན་པ་བསྡོམས་པས་ཚོང་པ་དག་རྒྱགས་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། དེ་ནུབ་ཕྱོགས་ཀྱི་རྒྱ་མཚོ་ལ་རབ་ཏུ་ཞུགས་པར་གྱུར་པ་
ན། རི་དང་། གླིང་དང་། སྲིན་མོ་ཡང་མིང་ཇི་སྐད་བྱ་བ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྒྱ་མཚོ་དང་རི་ཡང་དཔག་ཚད་ལྔ་སྟོང་དུ་དུང་དང་ཆུ་སྲིན་དང་། ཉ་དང་། ཉ་ཆེན་པོས་
ཀུན་དུ་གང་བར་གྱུར་པ་སྟེ། ཐམས་ཅད་དུ་ཡང་རླུང་གིས་རྣམ་པར་གཡེངས་པར་བྱེད་དོ། །རླུང་དེའི་མཐུས་ཀྱང་ཉ་རྣམས་སྟེང་དང་འོག་ཏུ་བྱེད་པར་འགྱུར་རོ། །རྒྱ་མཚོ་དེ་ལས་འདས་པར་གྱུར་ནས་ཀྱང་རྣལ་འབྱོར་སྤྱོད་པས་
མཐོང་བར་གྱུར་པ་ནི་གླིང་ཉེ་འཁོར་ཀུན་དུ་དགའ་བར་གྱུར་པ། སེང་གེས་ཀུན་ནས་གང་བ་ཞེས་བྱ་བ་སྟེ། དེ་ལ་ནི་གཅན་ཟན་ནམ་མཁའ་ལ་རྒྱུ་བ་རྣམས་ཡོད་དོ། །ལུས་ནི་ཉེ་འཁོར་དུ་རྒྱང་གྲགས་ཀྱི་ཚད་ཙམ་ཡིན་ཏེ། དེ་དག་
རྣམས་ནི་ཆུ་དང་ས་ལ་ཐོགས་རྡུགས་མེད་པའི་འགྲོས་དང་ལྡན་པ་ཡིན་ནོ། །དེ་དག་རྣམས་ཀྱི་ཚེའི་ཚད་ནི་ལོ་སྟོང་ཡིན་ནོ། །ཕན་ཚུན་དུ་རྟག་ཏུ་མི་མཐུན་པར་གྱུར་པ་དང་། རྟག་ཏུ་མངོན་པར་རྩོད་པར་བྱེད་པ་དེ་དག་ལས་
འདས་པར་གྱུར་ནས་རྣལ་འབྱོར་སྤྱོད་པས་མཐོང་བར་གྱུར་པ་ནི་ར་མ་ཡོ་ཞེས་བྱ་བའི་རྒྱ་མཚོ་དཔག་ཚད་ལྔ་བརྒྱ་པར་གྱུར་པའོ། །རྒྱ་མཚོ་དེ་ན་པད་མ་རྣམས་རྟག་ཏུ་ཁ་བྱེ་བར་གྱུར་པའི་སྙིང་པོ་རྒྱ་ཆེན་པོ་རྣམས་ལ་བུང་བ་

66-1-203a

དག་གིས་ཉེ་བར་མཛེས་པར་བྱས་པ་ཡིན་ནོ། །པད་མ་དེ་དག་གི་ནང་ན་ཀུ་ལ་ཀཱ་ཞེས་བྱ་བའི་སྲིན་མོ་རབ་ཏུ་གནས་པ་ཡིན་ཏེ། པད་མའི་སྙིང་པོ་གང་ཡིན་པའི་ཟས་དེ་དག་གིས་བདག་ཉིད་ཀྱི་དངོས་པོ་ཀུན་དུ་ཚིམ་
པར་བྱེད་དོ། །དགའ་བར་གྱུར་པའི་རྒྱ་མཚོ་ལས་རིང་དུ་འདས་ནས་རྣལ་འབྱོར་སྤྱོད་པས་མཐོང་བར་གྱུར་པ་ནི་ཨར་དྷ་མ་རུ་ཞེས་བྱ་བའི་རི་ཉེ་འཁོར་དུ་དཔག་ཚད་བརྒྱ་པ་ཡོད་དོ། །རི་དེ་ལ་ནི་གླང་པོ་ཆེ་རྣམས་དང་། ཀ་ལ་པིང་
ཀ་རྣམས་ལེགས་པར་གནས་སོ། །བྱ་དེ་རྣམས་ནི་ཤིན་དུ་སྐད་སྙན་པ་ཡིན་ཏེ། གང་དག་གི་རྣམ་པ་དེ་སྲིད་དུ་སྙན་པར་གྱུར་པ་རྣམས་ནི་དེ་བཞིན་གཤེགས་པ་དང་། དབང་བསྐུར་བ་རྣམས་ཐོབ་པའི་བྱང་ཆུབ་སེམས་དཔའ་
རྣམས་མ་གཏོགས་པ་ཇི་ལྟར་ལྷ་རྣམས་ལ་ཡང་མེད་པ་དང་། མི་རྣམས་ལ་ཡང་མེད་ཅིང་མི་འམ་ཅི་རྣམས་ལ་ཡང་མེད་ལ་ལྷ་མ་ཡིན་རྣམས་ལ་ཡང་མེད་དོ། །ཨར་དྷ་མ་རུ་ཞེས་བྱ་བའི་རི་དེ་ལས་འདས་པར་གྱུར་ནས་རིའི་རིགས་
སུ་གྱུར་པ་འམ། ཆུ་བོའི་རིགས་སུ་གྱུར་པ་འམ། རྒྱ་མཚོའི་རིགས་སུ་གྱུར་པ་འམ། གཞན་ཅི་དག་ཡོད་པ་ཡིན་ནམ་ཞེས་རྣལ་འབྱོར་སྤྱོད་པ་ལྟ་བར་བྱེད་དོ། །དེས་མཐོང་སྟེ། ཐོས་པ་ལས་བྱུང་བའི་ཤེས་རབ་ཀྱིས་སམ་
ལྷའི་མིག་གིས་མཐོང་བར་གྱུར་པ། ཨར་དྷ་མ་རུ་ཞེས་བྱ་བའི་རི་དཔག་ཚད་ལྔ་བཅུར་རྒྱ་མཚོ་ལས་ལངས་པ་ཡིན་ཏེ། དེ་ཉིད་ལ་ནི་བཻ་དཱུརྱ་རབ་ཏུ་ཕལ་ཆེ་བ་ཡོད་པ་ཡིན་ནོ། །གཤོག་པ་དང་བཅས་པའི་སེང་གེའི་རྣམས་རབ་ཏུ་
གནས་པ་ཡིན་ནོ། །བཻ་དཱུརྱའི་རང་བཞིན་གྱི་ནགས་དེ་ལ་མཱ་ན་དེ་ཧཱ་ཞེས་བྱ་བ་དང་རཱ་མ་ཞེས་བྱ་བའི་སྲིན་མོས་སྲུང་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་
བུའི་གླིང་ལས་རིང་དུ་གནས་པ་ན་རིའི་རིགས་སུ་གྱུར་པ་འམ། རྒྱ་མཚོའི་རིགས་སུ་གྱུར་པ་གཞན་དག་ཀྱང་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་ལྟ་བར་གྱུར་པ་ན། དེ་ནས་ནུབ་

66-1-203b

ཕྱོགས་སུ་གྱུར་པ་ན་དཔག་ཚད་སྟོང་ཕྲག་བཅུ་གཉིས་པའི་རྒྱ་མཚོ་མཐོང་བར་གྱུར་ཏེ། དེ་ན་རི་ཡང་མེད་ལ་འདུ་འཚོག་གི་སར་གྱུར་པ་ཡང་ཡོད་པ་མ་ཡིན་གྱི་གླང་པོ་ཆེ་དང་ཕག་གི་གདོང་ཅན་གྱི་ཉ་རྣམས་ནི་མ་གཏོགས་སོ། །རྒྱ་མཚོ་དེ་ལས་
འདས་པར་གྱུར་ནས་རྣལ་འབྱོར་སྤྱོད་པ་པས་རི་གསེར་གྱི་རང་བཞིན་དུ་གྱུར་པའི་རི་སཱ་ར་ཞེས་བྱ་བར་མཐོང་བར་གྱུར་ཏེ། རི་དེའི་འོད་ཟེར་རྣམས་ཀྱིས་རྒྱ་མཚོ་དང་བཅས་པ་གསེར་གྱི་ཆུར་མཛེས་པར་བྱེད་དོ། ། སཱ་རའི་རི་དེ་ཡང་ནི་རྒྱར་
དཔག་ཚད་ལྔ་བཅུ་པ་ལ་མཐོ་བར་ནི་དཔག་ཚད་སུམ་བརྒྱ་ཡོད་དོ། །དེ་ལ་དྲི་ཟ་རྣམས་རབ་ཏུ་གནས་པ་ཡིན་ཏེ། རབ་ཏུ་དགའ་བའི་འཛམ་བུའི་ཕྲེང་བ་ཞེས་བྱ་བའོ། །དེ་དག་ནི་ལོ་སྟོང་ཕྲག་གཉིས་སུ་འཚོ་བ་ཡིན་ཏེ། བར་དུ་འཆི་
བའི་དུས་བྱེད་པ་ཡང་ཡོད་དོ། །དེ་དག་གི་དྲི་ཟ་རྣམས་ནི་བརྒྱ་སྟོང་ཕྲག་དུ་མ་རྣམས་དེ་ན་རབ་ཏུ་གནས་པ་ཡིན་ནོ། །ལུས་གསེར་ལེགས་པར་སྦྱངས་པ་དང་འདྲ་བ་དང་། དྲི་ཟ་རྣམས་ཐམས་ཅད་ལྷ་རྣམས་དང་འདྲ་བ་ཡིན་ནོ། །དེ་ལ་ཡོད་པའི་དྲི་ཟ་རྣམས་ཀྱི་ནགས་ཀྱི་རྩ་བ་དང་
འབྲས་བུ་རྣམས་ཐམས་ཅད་ཀྱང་དབྲོག་པར་དཀའ་བ་ཡིན་ཏེ། ས་འོག་ན་གནས་པར་གྱུར་པའི་ལྷ་མ་ཡིན་རྣམས་ཐམས་ཅད་ཀྱིས་ཀྱང་དེ་དག་རྣམས་ཀྱི་འབྲས་བུ་ཉུང་བར་བྱ་བ་དང་། འགའ་ཞིག་གིས་དབྲོག་པར་བྱ་བ་དང་། 
ལོངས་སྤྱད་པར་ཡང་མི་ནུས་སོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། གཞན་རྒྱ་མཚོ་ན་རིའི་རིགས་དག་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་
སམ་ལྷའི་མིག་གིས་མཐོང་བར་གྱུར་པ། རྒྱ་མཚོའི་བཞི་ཆ་ལས་འདས་པར་གྱུར་པ་ན་ཙཀྲ་བཱ་ཌོ་ཞེས་བྱ་བའི་རི་ཡོད་དེ། རྒྱར་ནི་དཔག་ཚད་ལྔ་བརྒྱ་ཡིན་ལ་འཕང་དུ་ནི་དཔག་ཚད་སྟོང་དུ་གྱུར་པའི་རི་འདི་ནི་རྡོ་རྗེའི་
ལྟེ་བ་དང་གསེར་གྱི་རི་ཡིན་ནོ། །གསེར་དེ་དག་ལ་ནི་རེས་འགའ་ལྷ་མ་ཡིན་རྣམས་རབ་ཏུ་གནས་པར་བྱེད་དོ། །རེས་འགའ་ནི་མི་འམ་ཅི་རྣམས་སོ། །རི་དེ་ནི་མི་འམ་ཅི་རྣམས་ཀྱི་གླུས་དགའ་བར་གྱུར་པ་དང་། 

66-1-204a

འབྲས་བུ་རྣམ་པ་སྣ་ཚོགས་པ་རྣམས་ཀྱིས་གང་བར་གྱུར་པ་སྟེ། ཡུལ་འདི་ན་ནི་སྤྲེའུ་མང་བ་ཡིན་ནོ། །གསེར་གྱི་མདོག་གི་ཆུ་ཞེས་བྱ་བའི་ཆུ་ཀླུང་ཡང་འབབ་པ་ཡིན་ཏེ། གསེར་གྱི་མདོག་གི་ཉ་རྣམས་ཀྱིས་
གང་བར་གྱུར་པ་རྒྱར་ནི་དཔག་ཚད་ཕྱེད་པའོ། །འཁོར་ལོ་དང་ལྡན་པའི་རི་དེ་ལས་འདས་པར་གྱུར་ནས་རྣལ་འབྱོར་སྤྱོད་པས་རྒྱ་མཚོ་དཔག་ཚད་སྟོང་ཕྲག་བཅུ་ཡོད་པར་མཐོང་བར་གྱུར་ཏོ། །རྒྱ་མཚོ་དེའི་དབུས་ན་ནི་རིན་
པོ་ཆེའི་གླིང་ཞེས་བྱ་བའི་གླིང་དེ་ན་རིན་པོ་ཆེ་རྣམ་པ་སྣ་ཚོགས་པ་རྣམས་མཐོང་བར་འགྱུར་གྱི། དེ་ན་ས་ལས་བྱས་པར་གྱུར་པ་འམ། རྡོ་ལས་བྱས་པར་གྱུར་པའི་ཐ་མལ་པ་རྣམས་ནི་ཆུང་ཟད་ཀྱང་མ་མཐོང་ངོ་། །གླིང་འདི་དག་
ཐམས་ཅད་ནི་རིན་པོ་ཆེའི་རང་བཞིན་ཡིན་ནོ། །ཡང་རི་དེ་དང་མཚོ་དེ་ལས་ཀྱང་འདས་པར་གྱུར་ནས་རྣལ་འབྱོར་སྤྱོད་པས་གཞན་རྒྱ་མཚོའི་རིགས་སུ་གྱུར་པ་འམ། རིའི་རིགས་སུ་གྱུར་པ་འམ། ཆུ་བོའི་རིགས་སུ་གྱུར་པ་གཞན་ཡོད་
དམ་ཞེས་ལྟ་བར་བྱེད་དོ། །དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བྲག་སྐྱ་བོ་རྣམས་ལ་ལྗོན་ཤིང་སྐྱ་བོ་རྣམས་ཀྱིས་ཁྱབ་པར་གྱུར་པ་དབུ་བ་ཀུན་ནས་གང་བར་གྱུར་པའི་རྒྱ་མཚོས་ཡོངས་
སུ་བསྐོར་བ་སྟེ། རི་དེའི་ཚད་ནི་རྒྱར་དཔག་ཚད་ལྔ་བརྒྱ་ཡིན་ལ་འཕང་དུ་ནི་དཔག་ཚད་སྟོང་ཡིན་ནོ། །དེ་ལས་འདས་པར་གྱུར་ནས་རྣལ་འབྱོར་སྤྱོད་པ་པ་ཡུལ་རྣམས་ལ་ལྟ་བར་བྱེད་དེ། སུ་མེ་གྷོ་ཞེས་བྱ་བའི་རི་ནི་རྒྱར་དཔག་ཚད་
དྲུག་ཅུ་རྩ་བཞི་པ་ལ་འཕངས་སུ་ནི་དཔག་ཚད་བརྒྱ་པ་ཡིན་ཏེ། ལྷ་མ་ཡིན་གྱི་འཇིགས་པས་སྟོང་པར་གྱུར་པ་གསང་བ་པའི་ལྷ་རྣམས་དེ་ལ་རབ་ཏུ་གནས་པ་ཡིན་གྱི། མི་འམ་ཅི་ཡང་མེད་ལ་གནོད་སྦྱིན་ཡང་མེད་དོ། །རི་དེ་ལས་
འདས་པར་གྱུར་ནས་རི་ཆེན་པོ་སུ་ཤཱི་མ་ཞེས་བྱ་བ་རྒྱར་ནི་དཔག་ཚད་སྟོང་ཡོད་པ་ལ་རིང་དུ་དཔག་ཚད་སུམ་སྟོང་ཡོད་པར་གྱུར་པ་སྟེ། ཤེལ་གྱི་རང་བཞིན་དུ་གྱུར་པའི་ལྷ་རྫས་མཛེས་པ་ཡིན་ཞིང་ཆུ་བོ་དང་། ལྗོན་ཤིང་དང་། འབྲས་

66-1-204b

བུ་རྣམས་ཀྱིས་ཀྱང་དགའ་བར་གྱུར་པ་ཡིན་ནོ། །དེ་ལས་འདས་པར་གྱུར་ནས་དཔག་ཚད་བརྒྱར་ཆུ་སྔོན་པོའི་རྒྱ་མཚོ་ཡིན་ཏེ་དུང་མང་དུ་གནས་པ་དང་། དུང་མོ་རྣམས་ཀྱིས་བགྲོད་དཀའ་བར་གྱུར་པ་ཡིན་ནོ། །དེ་ལས་
འདས་པར་གྱུར་ནས་པྲཱ་ག་ཛྱོ་ཏི་ཥ་ཞེས་བྱ་བའི་རི་ཡོད་དེ། དེ་ལ་ནི་ལྷ་མ་ཡིན་རྣམས་ཕལ་ཆེར་གནས་སོ། །དོགས་པ་དང་བཅས་པས་ལྷ་རྣམས་ཀྱང་ལྷ་མ་ཡིན་གྱི་བུ་མོ་ལྷ་རྫས་ཀྱི་རྒྱན་གྱིས་བརྒྱན་པ་རྣམས་ཀྱིས་ཡོངས་
སུ་བསྐོར་བ་དང་། བཏུང་བའི་ཆུ་ཀླུང་རྣམས་ཀྱང་འབབ་པ་ཡིན་ནོ། །པྲཱ་ག་ཛྱོ་ཏི་ཥེའི་རི་དེ་ལ་ཀིམ་བཱ་ཀ་ཞེས་བྱ་བའི་འབྲས་བུ་རྣམས་ཀྱང་སྐྱེ་བ་ཡིན་ཏེ། མྱང་བར་བྱ་བ་ཞིམ་པ་ཡིན་ལ་ཞུ་བར་གྱུར་ནས་ནི་གསོད་པར་བྱེད་དོ། །
གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རྒྱ་མཚོ་ན་རིའི་རིགས་སུ་གྱུར་པ་འམ། གླིང་གི་རིགས་སུ་གྱུར་པ་འམ། ཆུ་བོའི་རིགས་སུ་གྱུར་པ་ཡང་རུང་སྟེ། གཞན་ཡོད་དམ་ཞེ་ན། 
དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གསེར་གྱི་རི་བོ་སྟོང་ཕྲག་དྲུག་བཅུ་པ་རྣམས་ལ་གསེར་ས་ལེ་སྦྲམ་གྱི་རང་བཞིན་གྱི་ལྗོན་ཤིང་གིས་ཉེ་འཁོར་རྣམས་ཡོངས་སུ་ཁྱབ་པར་
གྱུར་པ་དང་། རི་དགས་དང་བྱ་རྣམས་ཀྱིས་ཀྱང་ཀུན་དུ་གང་བར་གྱུར་པའི་ལྷའི་མེ་ཏོག་རྣམས་ཀྱིས་ཀྱང་ཀུན་ཏུ་རྒྱས་པར་གྱུར་པ། གསེར་གྱི་པད་མ་རྣམས་དང་པད་མའི་རྫིང་བུ་རྣམས་ཀྱིས་ཀྱང་རྟག་པར་ཡོངས་སུ་རྫོགས་
པར་གང་བའི་ཆུ་སྟེ། རང་ཉིད་ཀྱི་འོད་ཀྱི་གཟི་བརྗིད་ཀྱིས་དེ་དག་རྣམས་ཀྱི་དབུས་ན་གནས་པར་གྱུར་པའི་རི་དེ་ནི་རི་རབ་ལྷུན་པོ་ཞེས་བྱ་བ་ཕྲེང་བ་ཐོགས་པ་རྣམས་དང་། ལག་ན་གཞོང་པ་ཐོགས་པ་རྣམས་དང་། པི་ཝང་གསུམ་
པ་རྣམས་དང་། རྒྱལ་ཆེན་རིས་བཞི་པ་རྣམས་དང་བཅས་པའི་ལྷ་རྣམས་ཀུན་གྱི་གནས་ཡིན་ནོ། །དེ་ལ་དཔག་བསམ་གྱི་ཤིང་ཡོད་པ་རྣམས་ལས་ནི་ལྷའི་འཇིག་རྟེན་པ་རྣམས་ཀྱི་གང་ཁོ་ན་ཡིད་ཀྱིས་བརྟགས་པར་

66-1-205a

གྱུར་པ་དེ་དག་རྣམས་ཤིང་དེ་ལས་འཐོབ་པར་འགྱུར་རོ། །བྱ་དང་རི་དགས་རྣམས་ཐམས་ཅད་དང་། གསེར་གྱི་མེ་ཏོག་རྣམས་དང་། མན་དཱ་རཱ་བ་དང་། པད་མ་ཀུ་ཤེ་ཤཱ་དང་རྣམས་ཀྱང་རུང་སྟེ། ངོས་བཞི་ལ་ཚལ་བཞི་
པོ་རྣམས་འདི་ལྟ་སྟེ་དགའ་བའི་ཚལ་དང་། ཤིང་རྟ་སྣ་ཚོགས་ཀྱི་ཚལ་དང་། རྩུབ་འགྱུར་དང་། ཡོངས་སུ་འདྲེས་པ་དང་རྣམས་སོ། །ནགས་དེ་ན་ནི་ཡོངས་འདུ་ཞེས་བྱ་བ་ཤིང་གི་རྒྱལ་པོ་ཡོད་པ་གང་གི་རྩ་བར་ལྷ་རྣམས་
དབྱར་ཟླ་བ་བཞིར་ལྷའི་འདོད་པའི་ཡོན་ཏན་ལྔས་ཀུན་ཏུ་ཚིམ་ཞིང་ཡང་དག་པར་ལྡན་པར་གྱུར་པས་རྩེ་དགའ་བར་བྱེད་དོ། །དེ་ན་རྒྱལ་ཆེན་རིས་བཞིའི་ལྷ་དེ་དག་རྣམས་ཀྱིས་དགའ་བ་རྣམ་པ་སྣ་ཚོགས་པའི་རང་བཞིན་གྱི་
ཕུན་སུམ་ཚོགས་པ་རྣམས་ཐོབ་ནས་ལྷ་རྣམས་བསྐྱེད་མོས་ཚལ་གྱི་ལྟད་མོ་ཉམས་སུ་མྱོང་བར་བྱེད་དོ། །རྩུབ་འགྱུར་གྱི་ཚལ་དུ་ནི་རྣམ་པ་སྣ་ཚོགས་ཀྱི་ལས་བྱས་པའི་རང་བཞིན་གྱི་ཕུན་སུམ་ཚོགས་པ་རྣམས་ཐོབ་ནས་
ཤིང་རྟ་རྣམ་པ་སྣ་ཚོགས་པ་རྣམས་ཀྱིས་བསྐྱེད་མོས་ཚལ་གྱི་ལྟད་མོ་བྱེད་དོ། །ཤིང་རྟ་སྣ་ཚོགས་སུ་ནི་ཡོངས་སུ་དགའ་མགུ་བར་གྱུར་ནས་སྡུག་པའི་སྒྲ་དང་། རོ་དང་། གཟུགས་དང་དྲི་རྣམས་ཀུན་དུ་ཚིམ་པར་གྱུར་པས་དགའ་
བར་བྱེད་དོ། །དེ་ལ་དགའ་བའི་ཚལ་གྱི་ལོགས་དེ་ན་ནི་ལྷ་རྣམས་རྩེ་དགའ་བར་བྱེད་དེ། འཛམ་བུའི་གླིང་ཡོད་པའི་རི་རབ་ལྷུན་པོའི་ལོགས་དེ་ནི་བཻ་དཱུརྱའི་རང་བཞིན་ནོ། །དེས་ཀུན་དུ་སྣང་བར་བྱས་པས་འཛམ་བུའི་གླིང་གི་
ནམ་མཁའ་ཡང་སྔོན་པོ་བཞིན་དུ་སྣང་ངོ་། །ལོགས་གཉིས་པ་ལ་ནི་རྩུབ་འགྱུར་ཞེས་བྱ་བའི་ཚལ་ལོ། །དེ་ན་ནི་ལྷ་དང་ལྷ་མ་ཡིན་གྱི་ཐབ་མོའི་གྲོས་རྣམས་བགྲོ་བར་བྱེད་དོ། །བ་ལང་སྤྱོད་ཡོད་པའི་གླིང་གི་ལོགས་དེ་ནི་གསེར་
གྱི་རང་བཞིན་ཡིན་ཏེ། དེས་ཀུན་དུ་སྣང་བར་བྱས་པས་བ་ལང་སྤྱོད་པ་རྣམས་ཀྱི་ནམ་མཁའི་མདོག་སེར་པོར་སྣང་བ་ཡིན་ནོ། །ངོས་གསུམ་པ་ལ་ནི་ཤིང་རྟ་སྣ་ཚོགས་ཞེས་བྱ་བའི་ཚལ་ལོ། །ཚལ་དེ་ན་ནི་ལྷ་རྣམས་མཚོན་ཆར་བྱ་

66-1-205b

བ་རྣམས་ཡོད་པ་ཡིན་ནོ། །ཤར་གྱི་ལུས་འཕགས་པོ་ཞེས་བྱ་བ་ཡོད་པའི་ལོགས་དེ་ན་ནི་དངུལ་གྱི་རང་བཞིན་ཡིན་ཏེ། དངུལ་གྱིས་ཀུན་དུ་སྣང་བར་བྱས་པ་དེས་ཤར་གྱི་ལུས་འཕགས་པོའི་མི་རྣམས་ཀྱི་ནམ་མཁའ་ཡང་སྐྱ་བོར་ཀུན་ནས་
སྣང་བ་ཡིན་ནོ། །ལོགས་བཞི་པ་ལ་ནི་ཡོངས་སུ་འདྲེས་པ་ཞེས་བྱ་བའི་ཚལ་ལོ། །ལོགས་དེ་ནས་ནི་བྱང་ཕྱོགས་སྒྲ་མི་སྙན་གྱི་གླིང་ཡོད་དེ། ལོགས་དེ་ནི་ཤེལ་གྱི་རང་བཞིན་ཡིན་ནོ། །དེས་ཀུན་དུ་སྣང་བར་བྱས་པས་བྱང་གི་སྒྲ་མི་སྙན་
པའི་མི་རྣམས་ཀྱི་ནམ་མཁའ་སྐྱ་བོ་གཙང་མར་གྱུར་པར་ཀུན་ནས་སྣང་བ་ཡིན་ནོ། །མི་རྣམས་ཀྱི་གྲངས་སུ་བྱས་པའི་ལོ་ལྔ་བཅུ་ལ་ཉིན་ཞག་ཕྲུགས་གཅིག་ཏུ་རྩིས་པའི་རྒྱལ་ཆེན་རིས་བཞི་རྣམས་ནི་ལོ་ལྔ་བརྒྱར་འཚོ་བ་ཡིན་ཏེ། 
བར་དུ་འཆི་བར་གྱུར་པ་ཡང་ཡོད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རི་རྣམས་ཀྱི་རྒྱལ་པོ་རི་རབ་ལྷུན་པོ་ལ་ལྷའི་འཇིག་རྟེན་དང་བཅས་པར་གྱུར་པ་འམ་ལྷ་རྫས་རྣམས་
དང་བཅས་པར་གྱུར་པ་གཞན་དག་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སུམ་བཅུ་རྩ་གསུམ་པ་ཞེས་བྱ་བའི་ལྷ་རྣམས་རི་རབ་ལྷུན་པོའི་སྟེང་ན་ལེགས་པར་
གནས་སོ། །དེ་དག་ནི་དཔེ་མེད་པའི་ལྷ་རྫས་དང་ལྡན་པ་ཡིན་ཏེ་ལྷ་རྫས་ཀྱི་བདེ་བ་རྣམས་ཀྱིས་རྣམ་པར་གནས་པ་ཡིན་ནོ། །དེ་ན་གྲོང་ཁྱེར་བལྟ་ན་སྡུག་ཅེས་བྱ་བ་ཡོད་དེ། གྲོང་ཁྱེར་དེ་ལ་ནི་དཔག་ཚད་སྟོང་ཕྲག་བཅུ་ཡོད་པ་
ཡིན་ཞིང་རིན་པོ་ཆེ་བདུན་གྱིས་ཀྱང་རྣམ་པར་བརྒྱན་པ་ནི་རྡོ་རྗེ་དང་། ཨིན་དྲ་ནཱི་ལ་དང་། བཻ་དཱུརྱ་དང་། མུ་ས་ར་གལྦ་དང་། པད་མཱ་རཱ་ག་དང་། སུ་གུ་མ་རི་ཀཱི་དང་རྣམས་ཀྱིས་རྣམ་པར་བརྒྱན་པ་ཡིན་ནོ། །ཆོས་བཟངས་ཞེས་བྱ་བའི་
ལྷའི་མདུན་ས་ན་ཡང་དཔག་ཚད་ལྔ་བརྒྱ་པར་གྱུར་པ་ལ་བཻ་དཱུརྱ་དང་ནོར་བུའི་སྟེགས་བུ་རྣམས་དང་། གསེར་གྱི་ར་བ་དང་། རིན་པོ་ཆེ་རྣམས་ཐམས་ཅད་ཀྱིས་ཉེ་བར་མཛེས་པར་བྱས་པ་ཡིན་ནོ། །ལྷ་རྣམས་ཀྱི་མདུན་ས་

66-1-206a

ཆོས་བཟང་དེ་ན་ཡང་ལྷའི་དབང་པོ་བརྒྱ་བྱིན་རང་གི་ལས་དང་འདྲ་བར་གྱུར་པའི་ལྷ་རྫས་ཀྱི་བདེ་བ་རྣམས་ཀྱིས་རབ་ཏུ་གནས་པ་ཡིན་ནོ། །མི་རྣམས་ཀྱི་ལོ་བརྒྱ་ལ་དེ་དག་གི་ཉིན་ཞག་གཅིག་གོ། །དེས་
བསྒྲེས་པས་ལྷའི་ལོ་སྟོང་འཚོ་བར་འགྱུར་ཏེ་བར་དུ་དུས་བྱེད་པ་ཡང་ཡོད་དོ། །དེ་ལ་རིའི་རྒྱལ་པོ་རི་རབ་ལྷུན་པོ་དེའི་རྩེ་མོ་ཞེས་བྱ་བའི་ནུབ་ཕྱོགས་ཀྱི་ཆ་དེར་ནུབ་པ་གང་གི་ཚེ་ཉི་མ་འགྲོ་བར་གྱུར་པ་ན་དེའི་ཚེ་འཛམ་བུའི་
གླིང་དུ་ནུབ་བོ་ཞེས་འཛམ་བུའི་གླིང་གི་མི་རྣམས་ལ་ཐ་སྙད་འབྱུང་ངོ་། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རི་རབ་ལྷུན་པོའི་ཚད་ཇི་ཙམ་ཡིན་ཞེ་ན། དེས་ཐོས་པ་ལས་
བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སྟེང་དུ་ནི་དཔག་ཚད་སྟོང་ཕྲག་བརྒྱད་ཅུ་རྩ་བཞི་ཡིན་ལ་འོག་ཏུ་ཡང་དཔག་ཚད་སྟོང་ཕྲག་བརྒྱད་བཅུ་རྩ་བཞི་ཡིན་ནོ། །དེ་ལ་ཆུའི་ནང་ལ་གནས་
པ་ལ་ནི་ལྷ་མ་ཡིན་རྣམས་གནས་སོ། །སྟེང་ན་ནི་ལྷ་རྣམས་སོ། །རི་རྣམས་ཀྱི་རྒྱལ་པོ་རི་རབ་ལྷུན་པོ་དེ་ལ་ནི་རབ་ཏུ་ཚ་བར་གྱུར་པའི་ཉི་མ་དང་ལྡན་ཞིང་སེམས་ཅན་རྣམས་ཀྱི་དབང་གིས་དང་ལས་ཀྱི་བྱིན་གྱིས་བརླབས་
པའི་ཕྱིར་ན། གང་ཞིག་ཉི་མའི་ཤིང་རྟ་མཆོག་དང་ལྡན་པར་གྱུར་པ་རྟའི་རྒྱལ་པོ་ཆེར་སྒྲོགས་པ་ཉན་པ་ཞེས་བྱ་བ་སྟོབས་ཆེ་བ་ཕ་རོལ་དག་གནོན་པར་བྱེད་པས་ཡོངས་སུ་སྐོར་བར་བྱེད་དོ། །གང་ཤིང་རྟ་མཆོག་
དང་ལྡན་པ་དེ་ནི་གང་ཤིང་རྟ་མཆོག་དང་ལྡན་པ་དེས་འདྲེན་པར་བྱེད་པ་ཡིན་ནོ། །རྟའི་མཆོག་གཅིག་པོ་དེ་ཉིད་ཀྱིས་ཀྱང་བདག་ཉིད་རྟ་བདུན་དུ་སྟོན་པར་བྱེད་དོ། །ཤིང་རྟའི་མཆོག་དེ་ཡང་འཁོར་ལོ་གཅིག་པ་ཡིན་ཏེ། 
དེ་ཡང་ཆེར་སྒྲོགས་པ་ཉན་པའི་རྟའི་རྒྱལ་པོས་མིག་བཙུམ་པ་ཙམ་ལ་ཡང་དཔག་ཚད་སྟོང་ཕྲག་བཅུར་འདྲེན་པར་བྱེད་དོ། །གང་གིས་སེམས་ཅན་རྣམས་ཀྱི་ཚེ་འཕེལ་བ་ཤེས་པར་འགྱུར་བའི་ཉིན་མོ་བྱེད་པའི་

66-1-206b

ཉི་མའི་དཀྱིལ་འཁོར་ཡང་དཔག་བརྒྱ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། མིའི་གནས་བཞི་པོ་རྣམས་ཀྱི་གླིང་བཞིའི་ཚད་ཇི་ཙམ་ཡིན་ཞེ་ན། དེས་ཐོས་པ་
ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འཛམ་བུའི་གླིང་ནི་དཔག་ཚད་སྟོང་ཕྲག་བདུན་ཡིན་ནོ། །བ་ལང་སྤྱོད་ནི་དཔག་ཚད་སྟོང་ཕྲག་བརྒྱད་ཡིན་ནོ། །ཤར་གྱི་ལུས་འཕགས་པོ་ནི་དཔག་ཚད་སྟོང་
ཕྲག་དགུ་ཡིན་ནོ། །བྱང་གི་སྒྲ་མི་སྙན་ནི་དཔག་ཚད་སྟོང་ཕྲག་བཅུ་ཡིན་ནོ། །གླིང་རྣམས་གང་དང་གང་གིས་དབྱིབས་རྣམས་ཇི་ལྟ་ཇི་ལྟར་གྱུར་པ་དེ་དང་དེ་ལ་གནས་པའི་མི་རྣམས་ཀྱི་ཁ་གདོང་གི་དབྱིབས་ཀྱང་དེ་ལྟ་དེ་
ལྟར་ཡིན་ནོ། །དེ་ལ་ཤིང་རྟ་ཤ་ཀ་ཊཱ་དང་མཚུངས་པ་ནི་འཛམ་བུའི་གླིང་སྟེ། དེ་དང་འདྲ་བར་འཛམ་བུའི་གླིང་པའི་མི་རྣམས་ཀྱི་བཞིན་ནི་གྲུ་གསུམ་གྱི་རྣམ་པ་ཡིན་ནོ། །ཤར་གྱི་ལུས་འཕགས་པོའི་གླིང་ནི་ཟླ་གམ་
ཡིན་ཏེ་མི་རྣམས་ཀྱི་བཞིན་ཡང་དེ་དང་ཆ་འདྲ་བ་ཡིན་ནོ། །བ་ལང་སྤྱོད་ཀྱི་གླིང་ནི་ཡོངས་སུ་ཟླུམ་པ་ཡིན་ཏེ་མི་རྣམས་ཀྱི་བཞིན་ཡང་དེ་དང་འདྲ་བ་ཡིན་ནོ། །བྱང་ཕྱོགས་སྒྲ་མི་སྙན་གྱི་གླིང་ནི་གྲུ་བཞི་པ་ཡིན་ཏེ། 
བྱང་ཕྱོགས་སྒྲ་མི་སྙན་པའི་མི་རྣམས་ཀྱི་བཞིན་ཡང་དེ་དང་འདྲ་བ་ཡིན་ནོ། །དེ་ལྟར་རྣལ་འབྱོར་སྤྱོད་པ་དེས་མིའི་གནས་བཞི་རྣམས་ཀྱི་དབྱིབས་རྣམས་མཐོང་བར་གྱུར་ནས་ཀྱང་ཡང་དག་པ་ཇི་ལྟ་བ་བཞིན་
དུ་ཕྱི་རོལ་ལ་ཀུན་ཏུ་ལྟ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་ལས་རིང་དུ་འདས་ནས་བྱང་ཕྱོགས་ཀྱི་ཆར་གྱུར་པ་ལ་རིའི་རིགས་
སམ། ཆུ་བོའི་རིགས་སམ། ཡུལ་གྱི་རིགས་སམ། གླིང་གི་རིགས་རྣམས་ཇི་ལྟ་བུ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བྱང་གི་ཕྱོགས་ནི་ཉ་ཞེས་བྱ་བའི་ཡུལ་

66-1-207a

དཔག་ཚད་བཅུ་པ་ཡིན་ནོ། །ཡུལ་གཉིས་པ་པུ་ལིན་དོ་ཞེས་བྱ་བ་དཔག་ཚད་ཉི་ཤུ་པ་ཡིན་ནོ། །ཡུལ་གསུམ་པ་དཔའ་བོའི་སྡེ་ཞེས་བྱ་བའི་དཔག་ཚད་བརྒྱ་པ་ཡིན་ནོ། །ཡུལ་བཞི་པ་སུས་ཐ་ལའི་ཞེས་བྱ་བ་དཔག་ཚད་བརྒྱ་པ་
ཡིན་ནོ། །ཡུལ་ལྔ་པ་དར་དོ་ཞེས་བྱ་བ་བཟང་པོར་སྤྱོད་པ་དཔག་ཚད་བརྒྱ་པ་ཡིན་ནོ། །ཡུལ་དྲུག་པ་སྒྲ་མི་སྙན་ཞེས་བྱ་བ་དཔག་ཚད་བརྒྱ་པ་རྣམས་ཡིན་ནོ། །ཡུལ་བདུན་པ་བཟང་པོ་པ་ཞེས་བྱ་བ་དཔག་ཚད་ལྔ་བཅུ་པ་ཡིན་ནོ། །གན་དྷ་
ར་ཞེས་བྱ་བའི་ཡུལ་མཐའ་སྐོར་དང་བཅས་པ་རྣམས་ལ་དཔག་ཚད་བརྒྱ་ཡིན་ནོ། །ཤ་ཀཱ་ཞེས་བྱ་བའི་ཡུལ་དཔག་ཚད་བརྒྱ་ཡིན་ནོ། །བཟང་པོ་བ་ནི་དཔག་ཚད་ཉིས་བརྒྱ་ཡིན་ནོ། །དར་དོ་ཞེས་བྱ་བའི་ཡུལ་ནི་རི་མང་བར་གྱུར་པ་སྟེ་དཔག་
ཚད་བརྒྱ་ཡིན་ནོ། །བཱ་ཧི་ལི་ཀོ་ནི་དཔག་ཚད་སྟོང་ཡིན་ནོ། །པྲི་ཥི་ཀཱ་ཞེས་བྱ་བ་དཔག་ཚད་ཉིས་བརྒྱ་ཡིན་ནོ། །མ་ཧི་ཥི་ཀཱ་དཔག་ཚད་ཉིས་བརྒྱ་ཡིན་ནོ། །རྒྱ་ནག་ཅེས་བྱ་བ་འཁོར་དང་བཅས་པ་རྣམས་ལ་དཔག་ཚད་སྟོང་ཡིན་ནོ། །
རྒྱ་ནག་གཞན་ཞེས་བྱ་བ་ལ་ནི་དཔག་ཚད་ཉིས་བརྒྱ་ཡིན་ནོ། །ཁཱ་རཱ་རྣམས་ནི་དཔག་ཚད་ལྔ་བརྒྱ་ཡིན་ནོ། །བར་བ་རཱ་ཞེས་བྱ་བ་རྣམས་ནི་དཔག་ཚད་ཉིས་བརྒྱ་ཡིན་ནོ། ། ཀུན་ཏའི་འབྲས་བུ་པ་རྣམས་ནི་དཔག་ཚད་ལྔ་བརྒྱ་ཡིན་ནོ། །
ཀུ་ཊུ་ཞེས་བྱ་བའི་ཡུལ་དཔག་ཚད་ལྔ་བཅུ་པ་ཡིན་ནོ། །ཀམ་པོ་ཛཱི་ཞེས་བྱ་བའི་ཡུལ་ནི་དཔག་ཚད་བརྒྱ་པ་ཡིན་ཏེ། ཡུལ་ཕྲན་ཚེགས་རྣམས་ནི་མ་གཏོགས་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་
ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་ཀྱི་ཆ་ན་རིའི་རིགས་གང་དག་ཡོད་ཅེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གངས་ཅན་ཞེས་བྱ་བའི་རྩེ་མོ་རྣམ་པ་སྣ་ཚོགས་པ་དང་
ལྡན་པ་དང་དཔག་ཚད་སྟོང་ཡིན་ཏེ། ཤིང་ལོ་བྲན་དང་ལྡན་པ་དང་། ཤིང་ཤུགས་པས་གང་བར་གྱུར་པ་དང་། པད་མས་ཀུན་དུ་གང་བ་དང་། སྤ་མས་གང་བ་དང་། སཱ་ལ་དང་། ཏཱ་ལ་དང་། ཏ་མ་ལཱ་དང་རྣམས་ཀྱིས་གང་བར་གྱུར་པ་དང་

66-1-207b

མི་འམ་ཅི་དང་གནོད་སྦྱིན་རྣམས་རྒྱུ་བར་གྱུར་པ་དང་། ཤ་ཟ་དང་གནོད་སྦྱིན་དང་ལྡན་པ་ཡིན་ཞིང་རི་དེ་ནི་ཤིན་དུ་ཉམས་དགའ་བར་གྱུར་པ་ཡིན་ཏེ། དཀའ་ཐུབ་ཅན་རྣམས་རྒྱུ་བ་དང་གྲུབ་པ་ཐོབ་པ་རྣམས་ཀྱིས་ཀྱང་གང་བ་ཡིན་
ནོ། །འབབ་ཆུ་དང་ཆུ་ཀླུང་མངར་བ་དང་མཆོག་ཏུ་མངར་བ་རྣམས་ལ་ཀླུ་སྟོབས་ཆེན་པོ་རྣམས་ཀྱིས་གང་བ་དང་རིགས་དམན་པའི་མི་མང་བ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་
ཞིང་གནས་ཏེ། འཛམ་བུའི་གླིང་གི་བྱང་ཕྱོགས་ན་རི་འམ། ཆུ་ཀླུང་གི་རིགས་སམ། རྒྱ་མཚོའི་རིགས་སམ་ཅི་དག་ཡོད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། 
གངས་ཅན་གྱི་རི་ནས་དཔག་ཚད་ལྔ་བརྒྱ་ན་ཤིང་རྣམ་པ་སྣ་ཚོགས་ཀྱིས་གང་བར་གྱུར་པ་དགའ་བར་གྱུར་པའི་རི་དགས་དང་། བྱའི་ཚོགས་ཀྱིས་ལེགས་པར་གང་བ་ཤུག་པ་དང་། ལྷ་ཤིང་དང་། ཏ་མ་རུ་དང་། ཀུ་ལུ་མ་ཀ་དང་། 
རིར་ཥ་ཀ་རྣམས་ཀྱིས་དགའ་བར་གྱུར་པའི་རི་གཞན་ཟངས་ཀྱི་མདོག་ཅེས་བྱ་བ་དཔག་ཚད་ཉི་ཤུ་པ་སྟེ། ཕུག་སྟོང་དང་ཡང་དག་པར་ལྡན་པ་ཡིན་ནོ། །དེ་ལས་རིང་དུ་འདས་པར་གྱུར་པ་ནས་བར་སྣང་དཔག་ཚད་བརྒྱ་
ཐམ་པར་ཡང་ཆུ་ཀླུང་གིས་ཡོངས་སུ་བསྐོར་བ་ཡིན་གྱིས། དེ་ན་རྩྭ་དང་། གེལ་པ་དང་། ཁྲི་ཤིང་ཡང་མེད་ལ། སྨན་དང་ནགས་ཚལ་རྣམས་ནི་གཅིག་ཀྱང་མི་འཕེལ་ལོ། །དེ་ལས་རིང་དུ་འདས་པའི་བར་ན་ཏི་རྩེ་ཞེས་བྱ་བའི་
རི་དཔག་ཚད་ལྔ་བརྒྱ་པར་གྱུར་པ་མདོག་དཀར་བ་དངུལ་གྱི་རང་བཞིན་ལ་གསེར་གྱི་རྭས་ཡོངས་སུ་གང་བ་ཡིན་ཏེ། དེ་ལ་འཕགས་སྐྱེས་པོ་ཞེས་བྱ་བའི་རྒྱལ་པོ་ཆེན་པོ་རབ་ཏུ་གནས་སོ། །དེ་ལ་པད་མའི་མཚེའུ་ཡོད་དེ་
མཚེའུ་རྣམས་ལས་ནི་ཆུ་ཤིན་དུ་བསིལ་བ་འབབ་བོ། །ཨུད་པ་ལ་སྔོན་པོ་ཡང་རབ་ཏུ་ཕལ་ཆེ་བ་ཡིན་ཏེ། པད་མའི་རྫིང་བུ་རྣམས་ན་ཡང་ངང་པ་དང་། ཀ་རཎྜ་བ་དང་། ཙཀྲ་པཱ་ཀ་དང་རྣམས་ཀྱིས་གང་བ་ཡིན་ནོ། །དེ་ལས་འདས་

66-1-208a

པར་གྱུར་ནས་ཏི་རྩེའི་རྭ་ཞེས་བྱ་བའི་རི་དཔག་ཚད་ལྔ་བརྒྱ་པ་ཡོད་དོ། །དེའི་ཤིང་ལྗོན་པ་རྣམས་ལ་མི་འམ་ཅི་རྩེ་དགའ་བར་བྱེད་དེ། མཆོག་ཏུ་གླུ་ལ་མངོན་པར་དགའ་བས་རབ་ཏུ་དགའ་བ་ཡིན་ནོ། །དེའི་རྭ་
ལྔ་ཡོད་པ་ལས་གསེར་དང་། ཤེལ་དང་། གསུམ་ནི་དངུལ་གྱི་རང་བཞིན་ཡིན་ནོ། །ཕྱོགས་བཅུར་ལྷའི་མེ་ཏོག་རྣམས་ཀྱིས་ཉེ་བར་མཛེས་པར་གྱུར་པ་སྟེ། རི་དེའི་ཉེ་འཁོར་རྣམས་སུ་པད་མས་ཁྱབ་པས་དེ་ནི་མཆོག་
དུ་དྲི་ཞིམ་ཞིང་དགའ་བ་ཡིན་ནོ། །རི་དེའི་ཁྲོད་ལས་ནི་འབབ་ཆུ་རབ་ཏུ་འབབ་པ་ཡིན་ཏེ། རབ་ཏུ་དང་བར་གྱུར་པའི་ཆུ་ལ་ངང་པ་དང་། ཀ་རཎྜ་བ་དང་། ངང་ངུར་གྱི་ཚོགས་ཀྱིས་གང་བར་གྱུར་པ་མཆོག་ཏུ་དགའ་བ་ཡིན་ནོ། །
ཆུ་ཀླུང་དེ་ལས་འདས་པར་གྱུར་ནས་མེ་ན་ཀོ་ཞེས་བྱ་བའི་རི་ཡོད་དོ། །དཔག་ཚད་ལྔ་བརྒྱ་པ་ཡིན་ནོ། །དེ་ལ་ལྷ་མ་ཡིན་དང་པོ་ཉིད་ནས་རབ་ཏུ་གནས་པ་ཡིན་ཞིང་རྟའི་གདོང་པ་དང་འདྲ་བར་གྱུར་པའི་བུད་མེད་རྣམས་ཀྱང་
གནས་པ་ཡིན་ཏེ་རྟག་ཏུ་གླུ་དབྱངས་ཀྱིས་མངོན་པར་དགའ་བ་ཉིད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་ལས་རིང་དུ་འདས་ནས་རིའི་རིགས་སུ་གྱུར་
པ་གཞན་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། དཔག་ཚད་སྟོང་ཕྲག་བཅུའི་རྒྱ་མཚོ་རྣམས་ཀླུ་དང་། ཉ་ཆེན་པོ་དང་། ན་ཀྲ་དང་། ཆུ་སྲིན་དང་། དུང་རྣམས་
ཀྱིས་ཆུའི་ནང་ཀུན་དུ་གང་བ་ཡིན་ནོ། །དེ་ལས་རིང་དུ་འདས་ནས་མཆོག་ཏུ་བཟང་པོའི་བློ་གྲོས་བཟང་པོ་ཞེས་བྱ་བའི་རི་ཡོད་དོ། །རི་དེ་ལ་ནི་མར་སར་གྱི་གོང་བུ་ཞེས་བྱ་བའི་མཚོ་ཤིན་དུ་ཉམས་དགའ་བར་གྱུར་པ་དང་། ཀཱ་རཎ་
ཌ་བ་དང་། བྱ་ཀཱ་ལིང་ཀ་རྣམས་ཀྱིས་ཡོངས་སུ་གང་བ་ཡིན་ནོ། །དེ་ལ་རིའི་བློ་གྲོས་བཟངས་པོ་ནི་དཔག་ཚད་ལྔ་བཅུ་ཡིན་ནོ། །མཚོ་དེ་ནི་དཔག་ཚད་གཅིག་ཡིན་ནོ། །ཆུ་ཀླུང་ཡང་ཀཽ་ཤི་ཀ་མ་ཞེས་བྱ་བ་འབབ་པའོ། །རི་དེ་

66-1-208b

ནི་ཤིན་དུ་དགའ་བར་གྱུར་པའི་ཆུ་ལ་རྒྱུ་བ་རྣམས་ཐམས་ཅད་ཀྱིས་ཀྱང་ཡོངས་སུ་གང་བ་ཡིན་ནོ། །རི་དེ་ལས་རིང་དུ་འདས་པར་གྱུར་ནས་དཔག་ཚད་སྟོང་ཕྲག་ཉི་ཤུའི་རྒྱ་མཚོ་རྣམས་མཆོག་ཏུ་འཇིགས་པར་
གྱུར་པའི་ཏུག་ཅོམ་བྱེད་པའི་ཀླུའི་སྒྲ་རྣམས་ཀྱིས་སྤྲིན་རྣམས་འདུ་བར་བྱེད་དོ། །དེ་ཉིད་དུ་ཞེ་སྡང་གིས་གཟིར་བར་གྱུར་པའི་ཀླུ་རྣམས་ཕན་ཚུན་ཐབ་མོ་བྱས་ནས་ཆར་འབབ་པར་བྱེད་དོ། །འབབ་པར་བྱེད་
ཅིང་གློག་འཁྱུགས་པས་ལྷ་མ་ཡིན་ལ་ཅོ་འདྲི་བར་བྱེད་དོ། །དུག་ཀུན་ནས་སྤྲོ་བར་བྱེད་དེ། ཁྲོ་བས་འཁྲུགས་པར་གྱུར་པས་ཕན་ཚུན་དུ་སྲོག་གཅོད་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་
ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་ལས་རིང་དུ་འདས་པ་གཞན་ན་རིའི་རིགས་སམ་ཆུ་ཀླུང་གི་རིགས་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་
ལྷའི་མིག་གིས་མཐོང་བར་གྱུར་པ། ཀླུ་རྣམས་ཀྱིས་ཀུན་ནས་གང་བར་གྱུར་པའི་རྒྱ་མཚོའི་ཉེ་འཁོར་དེ་ལས་རིང་དུ་འདས་ནས་ཟངས་ཅན་ཞེས་བྱ་བའི་གླིང་དཔག་ཚད་བརྒྱ་པ་ཡོད་དོ། །དེ་ལ་ཟངས་མ་ཅན་ཞེས་
བྱ་བའི་སྲིན་མོ་རབ་ཏུ་གནས་པ་ཡིན་ཏེ། ཉའི་ཟས་དང་ལྡན་པའི་ཤིན་དུ་འཇིགས་པར་གྱུར་པ་ཡིན་ནོ། །དེ་ལས་རིང་དུ་འདས་ནས་ཉི་ཚེ་བའི་དམྱལ་བ་དམར་པོ་ཞེས་བྱ་བ་ཡོད་དེ། གང་ལ་ཉི་ཚེ་བའི་སེམས་ཅན་
དམྱལ་བ་པ་རྣམས་འཚེད་པར་བྱེད་པའོ། །དེ་ལ་གཞན་ཀཽ་ཤི་ཀ་ཞེས་བྱ་བའི་ཆུ་བོ་དང་། དམར་པོ་རྣམ་པར་ཞུ་ཞེས་བྱ་བའི་ཆུ་དང་། རྡོ་བའི་ཉི་ཚེ་བའི་སེམས་ཅན་དམྱལ་བ་རྣམས་ཀྱང་གང་ལ་དཔག་ཚད་ལྔ་བརྒྱར་དྲག་
པ་དང་། ཚ་བ་དང་། རྩུབ་པའི་ཚོར་བ་རྣམས་ཉམས་སུ་མྱོང་བར་བྱེད་པ་ཡིན་ནོ། །ཉི་ཚེ་བའི་སེམས་ཅན་དམྱལ་བར་སྐྱེས་པ་དེ་ལས་འདས་པར་གྱུར་ནས་དཔག་ཚད་སྟོང་ཕྲག་བཅུར་ནམ་མཁའ་མཐིང་ག་དང་འདྲ་

66-1-209a

བའི་སྨག་ཏུ་གྱུར་པ་ཡིན་ཏེ། དེ་ལ་ནི་ཀླུ་ཡང་མེད་ལ། གནོད་སྦྱིན་ཡང་མེད། དྲི་ཟ་ཡང་མེད་པ་ཡིན་ནོ། །དེ་ལས་འདས་པར་གྱུར་ནས་རིན་པོ་ཆེ་རྣམས་ཀྱིས་གང་བར་གྱུར་པའི་རྒྱ་མཚོ་དགའ་བའི་རི་རྣམས་ཀྱིས་
རབ་ཏུ་དགའ་བར་གྱུར་པ་ཆུ་ཀླུང་དང་། ལྗོན་ཤིང་དང་། ལྷ་ཤིང་དང་། ཙན་དན་དང་། ཤུག་པ་རྣམས་ཀྱིས་ཀུན་དུ་ཁྱབ་པར་གྱུར་ཅིང་འདོད་པ་རྣམས་ཐམས་ཅད་ཀྱང་ལྗོན་ཤིང་གི་དྲུང་ནས་ཕུན་སུམ་ཚོགས་པ་ཡིན་ནོ། །རྒྱ་
མཚོ་དེ་ལས་འདས་པར་གྱུར་ནས་ཨུད་ཏ་ར་ཞེས་བྱ་བ་མན་དཱ་རཿབའི་རི་དཔག་ཚད་ལྔ་སྟོང་པ་ཀེ་ཏ་ཀ་དང་། ནི་ཙུ་ལ་དང་། ན་ལི་ཀེ་རའི་ནགས་ཀྱིས་ཉེ་བར་མཛེས་པར་གྱུར་པ་འབྲས་བུ་དང་ལྗོན་ཤིང་དང་། འདོད་པ་རྣམ་པ་ཐམས་
ཅད་ཕུན་སུམ་ཚོགས་པ། ཆུ་ཀླུང་རབ་ཏུ་མང་པོ་རྣམས་ཀྱང་ཕུན་སུམ་ཚོགས་པ་ལ་ངང་པ་དང་། ཙཀྲ་པཱ་ཀ་དང་། བྱ་ཁྱུང་དང་། ཀ་དམ་པ་རྣམས་ཀྱིས་ཉེ་བར་མཛེས་པ། གྲུབ་པ་ཐོབ་པ་རྣམས་རྒྱུ་བར་བྱེད་པའི་ཚོགས་ཀྱིས་
གང་བར་གྱུར་པ་སྟེ། རི་འདི་ནི་མགོ་བོ་སྟོང་ལ་རིན་པོ་ཆེ་རྣམས་སྣ་ཚོགས་ཀྱིས་མཛེས་པར་གྱུར་པ་རྣམ་པ་སྣ་ཚོགས་པ་སྤ་བའི་ནགས་གསེར་གྱིས་ཉེ་བར་མཛེས་པར་གྱུར་པ་ཡིན་ནོ། །དྲི་སྣ་ཚོགས་དང་ལྡན་པའི་
ཨུད་ཏ་ར་མན་དཱ་རའི་རི་དེ་ལས་རྒལ་བར་གྱུར་ནས་རྡོ་སྦྱིན་པར་བྱེད་པ་ཞེས་བྱ་བའི་ཆུ་བོ་ཡོད་དེ། ཆུ་དེར་ནི་རྩྭའི་རིགས་སུ་གྱུར་པ་འམ། ཤིང་གི་རིགས་སུ་གྱུར་པ་འམ། སེམས་ཅན་གྱི་རིགས་སུ་གྱུར་པ་འམ། རི་དགས་
དང་བྱའི་རིགས་སུ་གྱུར་པ་རྣམས་ཀྱང་རུང་སྟེ། གང་ཅུང་ཟད་ལྷུང་བར་གྱུར་པ་དེ་དག་རྣམས་ཐམས་ཅད་ཀྱང་རྡོ་རྗེའི་རང་བཞིན་དུ་འགྱུར་རོ། །ཆུ་བོ་དེའི་ངོས་གཉིས་དག་ན་ཀཱི་ཙ་ཀཱ་ཞེས་བྱ་བའི་འོད་མ་དེ་དག་རྣམས་རླུང་
གིས་བཏབ་པར་གྱུར་ནས་ཕན་ཚུན་དྲུད་པ་ལས་མེ་སྐྱད་པར་བྱེད་དོ། །མེ་དེས་སེམས་ཅན་བརྒྱ་སྟོང་ཕྲག་དུ་མ་ཆུ་བོ་དེར་མཆོང་བར་འགྱུར་རོ། །གཞན་ཡང་རྣལ་འབྱོར་སྤྱོད་པའི་དགེ་སློང་ཕྱི་རོལ་གྱི་ལུས་ཀྱིས་ལུས་

66-1-209b

ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་ལས་རིང་དུ་འདས་པར་གྱུར་ནས་རིའི་རིགས་སམ་ཆུ་ཀླུང་གི་རིགས་གཞན་དག་ཅི་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་
པ་སཱི་ཏཱ་ཞེས་བྱ་བའི་ཆུ་བོ་ཡོད་པ་ནི་རྒྱར་ནི་དཔག་ཚད་བཅུ་ཡིན་ལ་རིང་བར་གྱུར་པའི་དངོས་པོར་ནི་དཔག་ཚད་སུམ་བརྒྱ་པ་ཡིན་ནོ། །དེ་ལ་སེམས་ཅན་གྱི་རིགས་གང་དག་ལྷུང་བར་གྱུར་པ་རྣམས་ནི་རྩུབ་པར་གྱུར་པའི་ཆུ་
ཡིན་པས་དེ་དག་རྣམས་ཐམས་ཅད་ཀྱང་གྲང་བའི་དངོས་པོས་རྣམ་པར་ཉིགས་པར་འགྱུར་རོ། །དེ་ལ་ནི་འགའ་ཞིག་ཀྱང་བྱ་བར་མི་ནུས་སོ། །ཆུ་ཀླུང་དེ་ལས་འདས་པར་གྱུར་ནས་འཛམ་བུའི་གླིང་གི་ཕྲེང་བ་ཞེས་བྱ་
བའི་གླིང་ཡོད་དེ། དེ་ལ་རྟག་ཏུ་རྒྱགས་པ་ཞེས་བྱ་བའི་དྲི་ཟ་རབ་ཏུ་གནས་པ་ཡིན་ཏེ། སྦྱིན་པ་དང་ཚུལ་ཁྲིམས་ཀྱིས་བསྒྲུབས་པར་གྱུར་པ་ཚུལ་ཁྲིམས་དང་ཡང་དག་པར་ལྡན་པས་རྟག་ཏུ་དགའ་བ་མྱུར་དུ་སོང་བ་འདོད་
པའི་འབྲས་བུ་རྣམས་ཐམས་ཅད་ཕུན་སུམ་ཚོགས་པ་ཡིན་ནོ། །གླིང་ཐམས་ཅད་ཀྱང་ལྗོན་ཤིང་ཐམས་ཅད་ཀྱིས་ཉེ་བར་མཛེས་པར་བྱས་པ་སྟེ། གསེར་གྱི་རང་བཞིན་གྱི་ལྗོན་ཤིང་རྣམས་སོ། །པད་མ་རྣམས་ཀྱང་
བཻ་དཱུརྱའི་སྡོང་བུ་ཅན་གྱི་པད་མའི་རྫིང་བུ་རྣམས་ཀྱིས་ཉེ་བར་མཛེས་པར་བྱས་པའོ། །གླིང་འདི་ནས་ནི་རི་རབ་ལྷུན་པོ་ཡང་ཧ་ཅང་རིང་བ་མ་ཡིན་ནོ། །དེའི་དབང་གིས་རི་དང་བྱ་དང་ཆུའི་ཚོགས་པ་རྣམས་ཐམས་ཅད་
ཉིད་ཀྱང་གསེར་དུ་མཐོང་བར་འགྱུར་རོ། །ཨུད་པ་ལ་དང་ཀུ་མུ་ད་རྣམས་ཀྱང་ཕུན་སུམ་ཚོགས་པ་ཡིན་ནོ། །གླིང་འདི་ན་ནི་བཏུང་བའི་ཆུ་ཀླུང་རྣམས་ཀྱང་ཐམས་ཅད་ལས་རབ་ཏུ་འབབ་པའོ། །འབྲས་ཤཱ་ལི་རྣམས་
ཀྱང་མ་བྱས་པར་རྙེད་པར་འགྱུར་རོ། །གླིང་དེ་ཡང་དཔག་ཚད་ཉིས་སྟོང་པ་ཡིན་ནོ། །དེ་ལས་འདས་པར་གྱུར་ནས་རི་དང་། ཆུ་ཀླུང་དང་། ཤིང་རྣམས་ནི་ནམ་མཁའ་བཞིན་ཏེ། རྒྱ་མཚོ་དཔག་ཚད་སུམ་བརྒྱར་

66-1-210a

དབུ་བས་ཀུན་དུ་གང་བ་ཡིན་ནོ། །རྒྱ་མཚོ་དེ་ན་གློག་གི་ཕྲེང་བ་ཞེས་བྱ་བ་དང་། རབ་ཏུ་འབར་བར་གྱུར་པའི་ཀླུ་མང་པོ་རྣམས་སོ་སོར་གནས་སོ། །དེ་ལས་རིང་དུ་འདས་ནས་མིག་བཙུམས་ཞེས་བྱ་
བའི་རི་ཡོད་དོ། །རི་དེ་ལ་མཆོག་ཏུ་མཛེས་པར་གྱུར་པའི་མིག་བཙུམས་པའི་ཕུག་ཅེས་བྱ་བ་ཡོད་དོ། །ཕུག་དེ་ལ་ཡང་ཉི་མའི་ཆ་ལ་ནི་དེ་ནས་རྫུས་ཏེ་སྐྱེ་བའི་བུད་མེད་རྣམས་ལེགས་པར་སྐྱེ་སྟེ། མཆོག་
ཏུ་ལང་ཚོ་ཕུན་སུམ་ཚོགས་པར་གྱུར་པ་རྒྱན་རྣམས་ཐམས་ཅད་ཀྱིས་མཛེས་པར་བྱས་པའོ། །དེ་ནི་ཉིན་ཞག་གཅིག་འཚོ་བ་ཡིན་ཏེ། གང་གི་ཚེ་ཉི་མ་འཆར་བར་གྱུར་པ་དེའི་ཚེ་དེ་རྣམས་རྒས་འཁོགས་པར་གྱུར་ནས་འཆི་བར་
འགྱུར་ཏེ། སྲོག་གཅོད་པའི་རྒྱུ་འཐུན་པ་ལས་ཡིན་ནོ། །མིག་བཙུམས་པའི་ཕུག་གི་རི་དེ་ལས་རིང་དུ་འདས་པ་ན་ཡང་ཟླ་བའི་རི་བོ་ཞེས་བྱ་བའི་རི་གསེར་གྱི་མདོག་ཏུ་གྱུར་པ་དཔག་ཚད་ལྔ་བརྒྱ་པ་ཡིན་ནོ། །རི་བོ་རི་རབ་ལྷུན་
པོ་ལ་འགྲན་པ་ཞེས་བྱ་བའི་རི་དཔག་ཚད་ལྔ་བརྒྱ་པ་ཡོད་པ་ཡིན་ཏེ། དེའི་བྱང་ཕྱོགས་ཀྱི་ལོགས་ལ་ཀེ་ཏ་ཀའི་ནགས་ཡོད་པ། དེ་ལ་ནི་རྨི་ལམ་མཐོང་བའི་བགེགས་ཞེས་བྱ་བའི་སྲིན་མོ་རབ་ཏུ་གནས་པ་ཡིན་ཏེ། བང་ཤིན་
དུ་མགྱོགས་པར་གྱུར་པས་མིག་ཚུམ་ཙམ་ལ་ཡང་དཔག་ཚད་བརྒྱ་སྟོང་ཕྲག་མང་པོ་རྣམས་སུ་འགྲོ་བར་བྱེད་དེ། དེས་ནི་སྐྱེས་བུ་དག་ལ་དོན་མེད་པ་དང་། མི་བདེ་བ་དང་། མི་ཕན་པ་རྣམས་བྱེད་དོ། །གཞན་ཡང་རྣལ་འབྱོར་སྤྱོད་པ་པ་ཕྱི་རོལ་
ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། གཞན་ཅི་བྱང་ཕྱོགས་སྒྲ་མི་སྙན་པ་དང་། འཛམ་བུའི་གླིང་པའི་བར་ན་རིའི་རིགས་སུ་གྱུར་པ་འམ། ཆུ་ཀླུང་གི་རིགས་སུ་གྱུར་པ་འམ། རྒྱ་མཚོའི་རིགས་སུ་གྱུར་པ་ནི་
གཞན་གང་དག་ཡོད་ཅིང་། གང་ལ་ཡང་བདག་ཅག་སྐྱེས་པར་མ་གྱུར་པ་འམ། ཤི་བར་མ་གྱུར་པ་འམ། འཆི་འཕོས་པར་མ་གྱུར་པ་འམ། སྐྱེས་པར་མ་གྱུར་པ་འམ། ལས་ཀྱིས་ཉེ་བར་འགྲོ་བ་མ་ཡིན་པར་གྱུར་པ་རྣམས་

66-1-210b

སམ། སྡུག་པ་དང་ཡིད་དུ་འོང་བ་རྣམས་ཐམས་ཅད་དང་ཡང་ཐ་དད་དུ་གྱུར་པ་དང་། བྱེ་བ་དང་། བྲལ་བ་དང་། རྣམ་པར་བྲལ་བ་དང་ལྡན་པར་མ་གྱུར་པ་ཡོད་དམ་ཞེ་ན། དེ་ནི་སེན་མོའི་ཚད་ཙམ་གྱི་ཡུལ་གཅིག་ཀྱང་མ་མཐོང་ངོ་། །
གང་ལ་འཐུན་པ་དང་ཡིད་དུ་འོང་བར་གྱུར་པ་རྣམས་ཐམས་ཅད་དང་ཐ་དད་དུ་གྱུར་པ་དང་། རྣམ་པར་ཞིག་པ་དང་། རྣམ་པར་གྱེས་པ་དང་། རྣམ་པར་བྲལ་བ་དང་ལྡན་པར་མ་གྱུར་པ་ནི་མེད་དོ། །དེའི་ཕྱིར་ན་རིངས་པ་རིངས་པར་
འདུ་བྱེད་ཐམས་ཅད་ལས་འདོད་ཆགས་དང་བྲལ་བར་གྱིས། རྣམ་པར་གྲོལ་བར་གྱིས། སྐྱོ་བ་མེད་པར་གྱུར་ཏ་རེ། འཁོར་བ་ལ་ཀུན་ཏུ་ཆགས་པར་གྱུར་པ་སྐྱེས་པར་གྱུར་ཏ་རེ། སྲེད་པའི་ཞགས་པའི་དབང་དུ་ཀུན་ནས་འགྲོ་
བར་མ་བྱེད་ཅིག །འཁོར་བ་ལ་མངོན་པར་དགའ་བར་མ་བྱེད་ཅིག །འཁོར་བ་འདི་ནི་རབ་ཏུ་འབར་བ་དང་། སྡུག་བསྔལ་དང་། ཡིད་མི་བདེ་བ་དང་། ཡོངས་སུ་ངལ་བ་ཡིན་ནོ། །མི་མཐུན་པར་གྱུར་པ་རྣམས་དང་ཕྲད་པ་དང་། 
འཐུན་པ་རྣམས་དང་བྲལ་བར་འགྱུར་བའི་མེ་དག་གིས་དམྱལ་བ་དང་། ཡི་དགས་དང་། དུད་འགྲོ་རྣམས་སུའོ། །མི་དང་ལྷའི་གནས་རྣམས་སུ་བདེ་བ་ཉམས་སུ་མྱོང་བར་གྱུར་པ་རྣམས་ནི་གཡོ་བ་ཡིན་ལ་བདེ་བ་མ་ཡིན་ཡང་གཏི་
མུག་གིས་ཀུན་ནས་གཡོགས་པ་ཡིན་ནོ། །དེའི་ཕྱིར་ན་ཐམས་ཅད་ལ་ཡང་སྐྱོ་བ་སྐྱེ་བར་གྱིས་ཤིག །དེ་འཁོར་བར་མ་འཁོར་བར་མ་བྱེད་དང་། བདུད་ཀྱི་ཡུལ་དེ་ལ་གནས་པར་གྱུར་ཏ་རེ། ཉོན་མོངས་པ་རྣམས་དང་ལྷན་
ཅིག་ཏུ་རྩེ་བར་མ་བྱེད་དང་། ཕྱིས་འགྱོད་པ་སྐྱེ་བར་འགྱུར་བར་མ་བྱེད་ཅིག་ཅེས་དེ་ལྟར་རྣལ་འབྱོར་སྤྱོད་པ་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་པ་རྣམས་ནི་བདུད་ཀྱི་དབང་དུ་འགྲོ་བར་མི་འགྱུར་རོ། །དེ་ཁོ་ན་ཉིད་
ཇི་ལྟ་བ་བཞིན་དུ་མཐོང་བར་འགྱུར་བ་དང་། འདུ་བྱེད་རྣམས་ཐམས་ཅད་ལ་ཡང་ཆགས་པ་དང་བྲལ་བ་དང་། ཉོན་མོངས་པ་རྣམས་རྣམ་པར་སྤོང་བ་དང་། ལས་ཀྱི་མཐའ་རྣམས་བྲལ་བ་དང་། ཐེ་ཚོམ་དང་ཡང་རྣམ་པར་བྲལ་

66-1-211a

བར་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། སྒྲ་མི་སྙན་པ་དང་འཛམ་བུའི་གླིང་པའི་བྱང་གི་ཕྱོགས་ན་རིའི་རིགས་སུ་གྱུར་པ་འམ་ཆུ་བོའི་རིགས་སུ་གྱུར་པ་
གཞན་དག་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཁུ་བྱུག་གིས་གང་བའི་སྒྲ་དབྱངས་དང་ལྡན་པ་ཞེས་བྱ་བའི་རི་འཕངས་སུ་ནི་དཔག་ཚད་སུམ་བཅུ་པ་སྟེ། 
རྒྱར་ན་དཔག་ཚད་བཅུ་པ་ཡིན་ནོ། །རི་དེ་ལ་ནི་ཁུ་བྱུག་བརྒྱ་ཕྲག་མང་པོས་ཀུན་དུ་གང་བར་གྱུར་པ། ཤིང་མྱ་ངན་མེད་སྔོན་པོ་དང་། མྱ་ངན་མེད་དམར་པོ་དང་། འདབ་མ་བདུན་པ་དང་། ཀོ་དཱ་ལ་དང་། ཀ་དཾ་པ་དང་། ཨ་ཤོ་ཀ་ལེ་བ་
རྒན་དང་། མེ་ཏོག་ཕྲེང་བ་གསར་པ་དང་། སཽ་བརྞ་ཡུ་ཐཱི་ཀ་དང་། སུ་མ་ནཱ་དང་། ཤཱལྨ་ལི་དང་། ཤཱལྨ་པྲི་ཡཾ་དང་། གུཾ་ཀུ་ཊ་སྐྱེས་དང་། ཙམྤ་ཀ་དང་། ཀུནྡ་དང་། བནྡྷ་ཛཱི་པ་ཀ་དང་། དབྱར་གྱི་དུས་པ་དང་རྣམས་ཏེ། ཇི་ལྟར་ནམ་ཟླ་དང་དུས་ཚོད་
ཀྱི་རྗེས་སུ་འཇུག་པར་བྱེད་པའི་མེ་ཏོག་རྣམས་ཀྱིས་རི་ལ་ཀུན་དུ་གང་བ་ཡིན་ནོ། །ཕྲེང་བ་ཐོགས་པ་ཞེས་བྱ་བའི་ལྷ་རེས་འགའ་རང་གི་གནས་རི་རབ་ལྷུན་པོ་གཏང་ནས་དེ་ལ་རྩེ་དགའ་བར་བྱེད་དོ། །རི་དེ་ནི་དགའ་བ་ཡིན་པའི་ཕྱིར་
ཡང་གླུ་དང་། གར་དང་། རོལ་མོའི་སྒྲ་རྣམས་ཀྱིས་ཀྱང་རི་དེ་ལ་ཡིད་དགའ་བར་བྱེད་དེ། འོན་ཀྱང་ལྷ་དེ་དག་རྣམས་ཀྱི་སེམས་ཀུན་ནས་གཡེངས་པས་རྣམ་པར་གཡེངས་པར་ཡང་མི་འགྱུར་རོ། །ཁུ་བྱུག་གིས་གང་བར་གྱུར་པའི་
རི་དེ་ལས་འདས་པར་གྱུར་ནས་ངང་པའི་ནགས་ཞེས་བྱ་བ་རྒྱ་མཚོའི་ཡུལ་ཕྱོགས་ན་ཡོད་དེ། ངང་པ་བརྒྱ་སྟོང་ཕྲག་རྣམས་ཁྱུས་རྒྱུ་བར་བྱེད་དོ། །དེ་ཉེ་འཁོར་རྣམས་ཉིད་ན་པད་མ་རྣམས་ཀྱིས་ཀྱང་གང་བ་ཡིན་ཞིང་རྒྱ་མཚོ་འདིའི་
ས་ཕྱོགས་རྣམས་ལ་ཀཱ་རཎྜ་བ་དང་། ཙཀྲ་པཱ་ཀ་དང་། ཀ་དམྤ་དང་རྣམས་ནོར་བུའི་མཆུ་དང་ཡུ་བ་འཇམ་པོའི་མགུ་བ་ཅན་ལ་སོགས་པ་རྣམས་ཀྱིས་གང་བར་གྱུར་པ་དང་། གསེར་འབར་བའི་མདོག་ལྟ་བུའི་པད་མ་རྣམས་ཀྱིས་

66-1-211b

ཀྱང་གང་བར་གྱུར་པས་དཔག་ཚད་སྟོང་ཕྲག་བཅུའི་ས་ཕྱོགས་ཁྱབ་པར་གྱུར་ཏོ། །ཉེ་འཁོར་གཞན་དེ་ལས་འདས་པར་གྱུར་ནས་རི་རབ་ལྷུན་པོའི་བྱང་གི་ཆའི་རྒྱ་མཚོའི་ཁོར་ཡུག་དཔག་ཚད་བརྒྱ་ཕྲག་བཅུར་ཉ་དང་། ཉ་ཆེན་
པོ་དང་། ཆུ་སྲིན་ན་ཀྲ་དང་། ཆུ་སྲིན་མ་ཀ་ར་དང་། ཆུ་སྲིན་བྱིས་པ་གསོད་དང་། རུས་སྦལ་རྣམས་ཀྱིས་ཡོངས་སུ་གང་བར་གྱུར་པ་ཡིན་ནོ། །ཉེ་འཁོར་ཀུན་ཡང་ཁ་དོག་ནམ་མཁའ་དང་མཚུངས་པར་གྱུར་པའི་ཆུ་སྔོན་པོ་ཡིན་
ཏེ། ཟབས་སུ་ནི་དཔག་ཚད་སྟོང་ཕྲག་བཅུ་ཡིན་ནོ། །དེ་ན་ཡང་མོ་དུང་རྣམས་གནས་ཏེ། བདག་ཉིད་ཀྱི་དངོས་པོའི་ཚད་ན་རྒྱང་གྲགས་ཙམ་ཡིན་ནོ། །སྟོབས་ཆེན་པོ་དང་ལྡན་པ་རྣམས་ཡིན་ཏེ་ཆུའི་ནང་ནས་གང་དག་གནས་
པའི་རིའི་རྩེ་མོ་དེ་དག་རྣམས་ཤུགས་ཀྱིས་བསྒུལ་ནས་ལྷུང་བར་བྱེད་དོ། །གླང་པོ་ཆེ་སྟོང་གི་སྟོབས་རེ་རེས་འཛིན་པ་ཡིན་ནོ། །དེ་ལས་རིང་དུ་འདས་ནས་འོ་མའི་ཆུ་ཞེས་བྱ་བའི་རྒྱ་མཚོ་ཉེ་འཁོར་དུ་དཔག་ཚད་སྟོང་ཕྲག་ལྔ་
ཡོད་པ་སྟེ། རྟག་ཏུ་རླབས་རྣམས་ཀྱིས་དཀྲུག་པར་བྱེད་པ། རྟག་ཏུ་སྤྲིན་དང་སྒྲ་སྒྲོགས་པར་བྱེད་པའི་ཤིུན་ཏུ་ཁྲོ་བར་གྱུར་པའི་ཀླུ་དུག་ཅན་རྣམས་ཀྱིས་གང་བར་གྱུར་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་
ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། འཛམ་བུའི་གླིང་གི་བྱང་ཕྱོགས་ངོས་ན་རིའི་རིགས་སམ། ཆུ་བོའི་རིགས་སམ། རྒྱ་མཚོའི་རིགས་གཞན་གང་དག་ཡིན་ན། དེས་ཐོས་པ་ལས་བྱུང་བའི་ཤེས་རབ་
ཀྱིས་སམ་ལྷའི་མིག་གིས་མཐོང་བར་གྱུར་པ། གསེར་དང་། གསེར་དམར་པོ་དང་། ཤེལ་གྱི་རང་བཞིན་གྱི་རི་བརྒྱ་ཕྲག་ལྔ་ཡོད་པས་བྱང་ཕྱོགས་སྒྲ་མི་སྙན་གྱི་གླིང་དེ་ནང་པར་གྱི་ཉི་མའི་མདོག་དང་འདྲ་བ་དང་། པད་མ་
དང་། པད་མའི་རྫིང་བུ་དག་གིས་ཀྱང་གང་བར་གྱུར་པ་སྟེ། ཡུལ་དེ་ནི་དཔག་ཚད་སུམ་སྟོང་པ་ཡིན་ནོ། །ཡུལ་དེ་ལས་འདས་པར་གྱུར་ནས་སྒྲ་མི་སྙན་དང་འཛམ་བུའི་གླིང་དག་གི་བྱང་ཕྱོགས་ངོས་ལ་འོ་མ་དང་

66-1-212a

མཚུངས་པར་འཇུག་པ་ཞེས་བྱ་བའི་ཡུལ་རྣམ་པར་བཀྲ་བར་གྱུར་པ་རི་དང་། ནགས་དང་། ཉེ་བའི་ནགས་དང་། རི་དགས་དང་། བྱ་ཡང་རྣམ་པ་སྣ་ཚོགས་པ་རྣམས་ཀྱིས་ཀུན་དུ་གང་བར་གྱུར་པ་དང་། རྟག་ཏུ་
དགའ་བར་གྱུར་པའི་ལྷ་གསང་བ་པ་རྣམས་ཀྱིས་གང་བར་གྱུར་པ། རྣམ་པ་སྣ་ཚོགས་པའི་ལྗོན་ཤིང་དང་མེ་ཏོག་གི་ཚོགས་ཀྱིས་ཀུན་ནས་དུད་པར་གྱུར་པ་རྣམས་ཀྱིས་གང་བར་གྱུར་པས་ཉེ་འཁོར་ཉམས་དགའ་བ་
ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་གི་སྒྲ་མི་སྙན་དང་འཛམ་བུའི་གླིང་གི་བྱང་ངོས་ན་རཱི་རིགས་སུ་གྱུར་པ་འམ། ཆུ་བོའི་རིགས་སུ་གྱུར་པ་གཞན་
ཅི་དག་ཡོད་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གླིང་གཉིས་པོ་འདི་དག་གཉིས་ཀྱི་བར་ན་ཡུལ་ཕྱོགས་འགའ་ཞིག་ཀྱང་ཡོད་པ་མ་ཡིན་ནོ། །བྱང་ཕྱོགས་སྒྲ་མི་
སྙན་གྱི་གླིང་ཆེན་པོ་ནི་མ་གཏོགས་ཏེ། རྒྱ་ཁྱོན་དུ་ནི་དཔག་ཚད་སྟོང་ཕྲག་བཅུ་ཡིན་ནོ། །གྲོང་བྱེ་བ་ཕྲག་སུམ་བཅུ་རྩ་དྲུག་གི་རྣམ་པ་རྣམས་ཀྱིས་ཉེ་འཁོར་རྣམས་ཀུན་དུ་གང་བར་གྱུར་པ་སྟེ། མཆོག་ཏུ་དགའ་བ་དང་
སྐལ་བ་གཞན་རྣམས་ལ་ཡང་དགའ་བ་ཡིན་ནོ། །ཤ་དང་། རུས་པ་དང་། ཆུ་སེར་རྣམས་དང་བྲལ་བར་གྱུར་པ་མ་གཏོགས་པ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་དྲུང་ན་ནི་འཇིགས་པ་མེད་པ་ཡང་ཡིན་ནོ། །ལྷ་རྣམས་
ནི་མིག་མི་འཛུམས་པ་ཡིན་ལ། བྱང་ཕྱོགས་སྒྲ་མི་སྙན་པ་རྣམས་ནི་ལྤགས་པ་དང་། ཤ་དང་། རུས་པ་དང་། ཆུ་སེར་དང་། མིག་འཛུམས་པར་བྱེད་པ་དང་བཅས་པ་ཡིན་ཞིང་བདག་གི་བ་མེད་པ་དང་། ང་རྒྱལ་ཅན་
མེད་པ་ཡིན་ཏེ། ཤི་ནས་ཀྱང་ངེས་པར་ལྷ་རྣམས་སུ་སྐྱེ་བར་འགྱུར་བ་ཡིན་ནོ། །སྒྱུ་དང་། གཡོ་དང་། ཕྲག་དོག་དང་། ཁེངས་པ་རྣམས་དང་བྲལ་བར་གྱུར་པ་དང་། རྟག་པར་རབ་ཏུ་དགའ་བར་གྱུར་པ་ཡིན་ནོ། །

66-1-212b

སྲིན་མོ་དང་། ཤ་ཟ་དང་། གྲུལ་བུམ་དང་། སེང་གེ་དང་། སྟག་དང་། གུང་དང་། སྤྱང་གི་དང་། ཀླུ་དང་། ལྟོ་འཕྱེ་དང་། སྦྲུལ་གདེངས་ཀ་ཅན་དང་། མུ་གེ་དང་། ཚད་པ་དང་། གྲང་བ་དང་། ལྟོགས་པ་དང་། སྐོམ་པ་དང་། ནད་དང་། ལྷས་ཆར་
མི་འབེབས་པར་གྱུར་པ་རྣམས་དང་བྲལ་བ་དང་། ཕན་ཚུན་དུ་ཀུན་དགའ་བར་བྱེད་པ་རྣམས་ཡིན་ནོ། །དེ་དག་རྣམས་ལ་འཇིགས་པར་གྱུར་པ་རྒྱལ་པོ་དང་། ཆོམ་རྐུན་དང་། ཆུ་དང་། མེ་དང་། མཚོན་ཆ་འབེབས་པས་
འཇིགས་པར་བྱེད་པ་རྣམས་ཀྱང་མེད་པ་ཡིན་ནོ། །ཉིན་མོ་དང་མཚན་མོའི་ཁྱད་པར་ཡང་རྙེད་པ་མ་ཡིན་ཏེ། གསེར་གྱི་རང་བཞིན་གྱི་ལྗོན་ཤིང་རྣམས་ཀྱི་འོད་ཟེར་ཀུན་དུ་འཕྲོ་བའི་ཕྱིར་རོ། །དེ་ལ་ལྗོན་ཤིང་རྣམས་ནི་ཧ་རི་
ཎཱའི་རང་བཞིན་དང་། གསེར་དམར་པོ་དང་། བྱི་རུ་དང་། དངུལ་གྱི་རང་བཞིན་རྣམས་ཡིན་ནོ། །བྱ་རྣམས་ཀྱང་ལུས་རྣམ་པར་འགྱུར་བ་རྣམ་པ་སྣ་ཚོགས་པ་རྣམས་བྱད་པ་དང་། རྟག་པར་ཀུན་ནས་རངས་པར་གྱུར་
པ་ནི་རབ་ཏུ་དགའ་བའི་སྐྱེས་བུ་རྣམས་བཞིན་ནོ། །ཤིང་དེ་དག་རྣམས་ཀྱང་སེམས་དང་ལྡན་པ་བཞིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་
སྒྲ་མི་སྙན་གྱི་གླིང་ན་དགའ་བ་ཡོད་པ་དང་། དགའ་བ་ལས་ཀྱང་ཤིན་དུ་དགའ་བ་ཡོད་པ་གཞན་གང་ཡིན་ན། དས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བྱང་ཕྱོགས་སྒྲ་མི་སྙན་
གྱི་གླིང་ན་ནི་རི་ཆེན་པོ་བཅུ་ཡོད་དེ། འདི་ལྟ་སྟ་སང་ཀཱ་ཤེ་ཀཱ་ཞེས་བྱ་བའི་རི་དང་། རྭ་མཉམ་པ་ཞེས་བྱ་བའི་རི་དང་། རི་དགས་ཀྱི་དགྲ་དུལ་བ་ཞེས་བྱ་བའི་རི་དང་། སྤྲིན་དཀར་པོ་འཛིན་པ་ཞེས་བྱ་བའི་རི་དང་། མཐོ་བར་
བརྩེགས་པ་ཞེས་བྱ་བའི་རི་དང་། ཕྲེང་བའི་ཉེ་འཁོར་ཞེས་བྱ་བའི་རི་དང་། དུས་ན་དགའ་བ་ཞེས་བྱ་བའི་རི་དང་། ཀུན་དགའ་བ་འཛིན་པ་ཞེས་བྱ་བའི་རི་དང་། ཡིད་ཀྱི་རྗེས་སུ་འཐུན་པ་ཞེས་བྱ་བའི་རི་དང་། 

66-1-213a

པད་མ་ཀུ་ཤེ་ཤ་ཡ་དང་ལྡན་པ་ཞེས་བྱ་བའི་རི་དང་སྟེ། རི་ཆེན་པོ་བཅུ་པོ་དེ་དག་གིས་བྱང་ཕྱོགས་སྒྲ་མི་སྙན་གྱི་གླིང་རྒྱ་མཚོའི་མཐར་ཐུག་པས་ཡོངས་སུ་བསྐོར་བ་ཡིན་ནོ། །དཔེར་ན་འཛམ་བུའི་གླིང་རི་བཞིས་
ཡོངས་སུ་བསྐོར་བ་ཡིན་ཏེ། གངས་ཅན་དང་། འབིགས་བྱེད་དང་། མ་ལ་ཡ་དང་། ཏེ་ཙེའོ། །དེ་ཁོ་ན་བཞིན་དུ་རི་བཅུས་བྱང་ཕྱོགས་སྒྲ་མི་སྙན་གྱི་གླིང་ཡོངས་སུ་བསྐོར་བ་ཡིན་ནོ། །གཞན་ཡང་རྣལ་འབྱོར་སྤྱོད་པ་
ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རི་དེ་དག་རྣམས་ལ་མེ་ཏོག་དང་འཁྲི་ཤིང་གི་ཚོགས་འཁྲིལ་བ་དང་། མཚོ་དང་། ཆུ་ཀླུང་དང་། བྱ་དང་། འབྲས་བུ་དང་། རི་དགས་ཀྱི་རིགས་ཅི་ཡོད་པ་
རྣམས་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སང་ཀཱ་ཤེའི་རི་ལ་སང་ཀཱ་ཤཱ་ཞེས་བྱ་བའི་ལྗོན་ཤིང་དུས་དྲུག་ཏུ་མེ་ཏོག་འབྱུང་བར་འགྱུར་རོ། །ལྗོན་ཤིང་དེ་དག་རྣམས་
ལ་ཉིན་མཚན་དུ་འོད་འབྱུང་བར་འགྱུར་ཏེ། འཛམ་བུའི་གླིང་གི་མཚན་མོའི་མར་མེ་རྣམས་བཞིན་ནོ། །དྲི་ཡང་དཔག་ཚད་དུ་རབ་ཏུ་འཕྱུར་བ་ཡིན་ཏེ། ཇི་ལྟར་ཅུང་ཟད་ཅིག་ཀྱང་འཛམ་བུའི་གླིང་ནི་ཆ་འདྲ་བ་ནི་མེད་དོ། །སཾ་ཀཱ་
ཤེའི་རི་དེ་ལ་ནགས་ལྔ་ཡོད་པ་རྣམས་ནི་འདི་ལྟ་སྟེ། གྲིབ་མ་སྔོན་པོ་ཞེས་བྱ་བའི་ནགས་དང་། བྱ་ངེས་པར་གནས་པ་ཞེས་བྱ་བའི་ནགས་དང་། ཟབ་མོ་ཞེས་བྱ་བའི་ནགས་དང་། སྤྲིན་དཀར་པོ་ཞེས་བྱ་བའི་ནགས་དང་། རྣམ་
པར་འབབ་པ་ཞེས་བྱ་བའི་ནགས་རྣམས་སོ། །དེ་ལ་སཾ་ཀཱ་ཤེའི་རི་དེ་ལས་སྤྲིན་དང་འདྲ་བར་གྱུར་པའི་མེ་ཏོག་རྣམས་རྒྱས་པའི་ཕྱིར་ན་འདི་ནི་ནམ་མཁའ་དང་མཚུངས་པ་ཡིན་ནོ། །དེས་ན་འདི་ནི་སཾ་ཀཱ་ཤེའི་རི་ཞེས་བྱའོ། །དེ་ལ་
ཕྱོགས་གཅིག་ན་གྲིབ་མ་སྔོན་པོ་ཞེས་བྱ་བའི་ནགས་ཡོད་དོ། །དེ་ལ་གང་ཅུང་ཟད་དཀར་པོར་གྱུར་པའི་གཟུགས་སོང་ཞིང་འགྲོ་ལ་སོ་སོར་འགྲོ་བར་འགྱུར་བ་རྣམས་ཀྱང་ནགས་དེའི་འོད་ཀྱིས་ཀུན་དུ་སྣང་བར་བྱས་པའི་

66-1-213b

སྟོབས་ཀྱིས་བཻ་དཱུརྱ་སྔོན་པོའི་མདོག་དུ་འགྱུར་རོ། །བྱ་རྣམས་ཀྱང་སྔོན་པོ་དེ་དག་ཉིད་ན་གནས་པ་ཡིན་ནོ། །འདི་ལྟ་སྟེ། ཡིད་ཀྱི་རྗེས་སུ་འཐུན་པ་ཞེས་བྱ་བའི་བྱ་ནི་བྱང་ཕྱོགས་སྒྲ་མི་སྙན་པའི་མི་རྣམས་གྲིབ་མ་སྔོན་
པོའི་ནགས་སུ་ཞུགས་པར་གྱུར་ནས་ཡིད་ཀྱི་རྗེས་སུ་འཐུན་པ་གང་དག་སྤྱོད་པར་བྱེད་ན་དེ་དག་བྱ་དེ་དག་རྣམས་ཀྱིས་རྩེ་བར་བྱེད་དོ། །རྟག་པར་རབ་ཏུ་དགའ་བ་ཞེས་བྱ་བའི་བྱ་ལེགས་པར་གནས་པས་ནི་དེ་མཐོང་བར་
གྱུར་པས་ཀྱང་བྱང་ཕྱོགས་སྒྲ་མི་སྙན་གྱི་སྐྱེས་བུ་རྣམས་ཕྱིར་ཞིང་ཆེས་རབ་ཏུ་དགའ་བར་འགྱུར་རོ། །གྲང་བ་དང་དྲོ་བ་ཞེས་བྱ་བའི་བྱ་དེ་དག་མཐོང་བར་གྱུར་པས་ཀྱང་སྐྱེས་བུ་གྲང་བས་ཉེན་པ་རྣམ་གྲང་བར་མི་འགྱུར་རོ། །
དྲོ་བས་ཉེན་པར་གྱུར་པ་རྣམས་ཀྱང་ཤིན་ཏུ་ཚ་བར་མི་འགྱུར་ཏེ། བྱ་དེ་དག་རྣམས་ཀྱི་མཐུས་ཡིན་ནོ། །རླུང་གི་བང་ཡོད་པ་ཞེས་བྱ་བའི་བྱ་རྣམས་ཀྱིས་ནི་ཡུད་ཙམ་ཅིག་ལ་ཡང་དཔག་ཚད་སྟོང་དུ་འགྲོ་བ་ཡིན་ཏེ། དེ་མཐོང་
བར་གྱུར་པས་ཀྱང་སྐྱེས་བུ་རྣམས་གནས་གང་དང་གང་དུ་འགྲོ་འདོད་པ་དེ་དང་དེར་བྱ་དེ་དག་རྣམས་ཀྱི་སྟོབས་ཀྱིས་ཡུད་ཙམ་ལ་དཔག་ཚད་སྟོང་དུ་ཕྱིན་པར་འགྱུར་རོ། །ཤང་ཤང་ཏེའུ་ཞེས་བྱ་བའི་བྱ་རྣམས་ཀྱིས་ནི་
གླིང་ཐམས་ཅད་ཀྱི་སྐྱེས་བུ་རྣམས་ཀྱིས་རྗོད་པར་བྱེད་པའི་བརྗོད་པ་རྣམས་དང་ཆ་འདྲ་བའི་སྐད་འབྱིན་ནོ། །མིའི་བདེ་བའི་འཁྲིག་པས་རྟག་ཏུ་དགའ་བར་བྱེད་པ་རྣམས་ཡིན་ནོ། །ཁ་དོག་རྣམ་པ་སྣ་ཚོགས་པའི་
སྒྲ་རྣམས་ཀྱིས་ཉེ་བར་མཛེས་པར་གྱུར་ཅིང་རིན་པོ་ཆེ་བདུན་གྱི་རང་བཞིན་རྣམས་ལ་འདི་ལྟ་སྟེ། ཨིནྡྲ་ནཱི་ལ་དང་། མར་ཀ་ཏ་དང་། རྡོ་རྗེ་དང་། མུ་སཱ་ར་གལྦ་དང་། ཤེལ་དང་། པདྨ་རཱ་ག་དང་འདྲ་བར་གྱུར་པའི་བྱི་རུ་དང་
རྣམས་སོ། །བྱ་དེ་དང་དེ་དག་རྣམས་མཐོང་བར་གྱུར་ནས་རབ་ཏུ་དགའ་བར་མི་འགྱུར་བ་ནི་འགའ་ཡང་མེད་དོ། །དེས་སཾ་ཀཱ་ཤེའི་རིའི་གྲིབ་མ་སྔོན་པོའི་ནགས་ལ་སོ་སོར་བརྟགས་ནས་ཡང་དག་པ་ཇི་ལྟ་བ་བཞིན་དུ་

66-1-214a

ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་པའི་སཾ་ཀཱ་ཤེའི་རི་དེ་ལ་གྲིབ་མ་སྔོན་པོའི་ནགས་རྒལ་བར་
གྱུར་ནས་གཞན་ནགས་དག་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སཾ་ཀཱ་ཤེའི་རི་ལ་བྱ་ངེས་པར་གནས་པ་ཞེས་བྱ་བའི་ནགས་གཉིས་པ་ཡོད་དོ། །དེ་ན་གནས་
པར་གྱུར་པའི་བྱ་དག་ནི་རྟག་ཏུ་རབ་ཏུ་མགུ་རངས་པ་དང་པདྨའི་རྫིང་བུ་རྣམས་ཀྱང་རྟག་ཏུ་གངས་བསིལ་མོའི་འཁྱག་པས་ལེགས་པར་བསྡམས་པ་ཡིན་ནོ། །འཛམ་བུའི་གླིང་ན་གནས་པ་གང་ཡིན་པ་ཆོས་ཀྱི་དུས་ན་འཆི་
འཕོས་པར་གྱུར་པ་དེ་ལ་ངང་པའི་རྒྱལ་པོར་འགྱུར་ཏེ། དེ་དེ་ལ་རབ་ཏུ་གནས་པར་བྱེད་པ་ཡིན་ནོ། །དེ་བཞིན་དུ་མཚོ་མ་དྲོས་པའི་ངང་པའི་རྒྱལ་པོ་དང་། རྣམ་པ་སྣ་ཚོགས་པའི་བྱ་གཞན་རྣམས་ཐམས་ཅད་རབ་ཏུ་གནས་པ་
ཡིན་ནོ། །འདི་ལྟ་སྟེ། ཀཱ་རཎྜ་བཱཿདང་། ཧཱ་རཱི་ཧཱཿདང་། གཡུ་གུ་མཱ་ན་བཱ་དང་། བཱ་རཱ་བ་ཏཱ་དང་། ལ་ཆུ་ཥ་ཀཱ་དང་། ཨི་ལྦ་ལི་ཀཱ་དང་། རྔ་སྒྲ་བ་དང་། སཾ་ཧྲ་དཱཿ་དང་།  དྲིས་དགའ་བ་དང་། སཾ་མྲཱ་ཛྱཿདང་། ལུས་པོ་པ་དང་། སྒྲས་ཀུན་དུ་དགའ་བ་
དང་། དུས་དྲུག་ཏུ་རྒྱུ་བ་དང་། ཟླ་བ་ཤར་བས་དགའ་བ་ཟླ་བ་ཤར་བས་དགའ་ལ་མ་ཤར་བ་ན་ཉི་མ་དང་མཚུངས་པའི་མདོག་གོ། །རྟག་ཏུ་ཕྱི་རོལ་ཏུ་སྒྲས་ཀུན་ནས་རངས་པ་དང་། ཙཀྲ་པཱ་ཀཱཿདང་། གསེར་དང་མཚུངས་པར་གྱུར་པའི་
མདོག་དང་། ཀུ་ར་ཎ་གནས་པ་དང་། ཉི་མས་མི་རེག་པ་དང་། ནི་ཙུན་ལུནྡཱཿདང་། གཅིག་པུ་ཉོན་མོངས་པས་དགའ་བ་དང་། བུང་བ་འདུ་བ་རྣམས་ནི་གང་དག་གི་སྒྲ་རྣམས་དཔག་ཚད་དུ་སྙན་པར་ཐོས་པ་རྣམས་ཡིན་ཏེ། ཇི་ལྟར་
འཛམ་བུའི་གླིང་གི་བུང་བ་རྣམས་ཀྱིས་བ་ལང་ལ་གེགས་མེད་པར་ལྗོན་ཤིང་གི་རྩ་བ་ན་གནས་པ་བཞིན་ནོ། ། ཀཾ་ཀཱ་དང་། རི་ལ་འཇུག་པར་བྱེད་པ་དང་། ཁོར་ཡུག་རྒྱུ་བ་དང་། སཱ་རཱ་དང་། ཁྱིམ་བྱ་དང་། བ་རསྟུ་རཱ་དང་། བ་རདྡད་དང་། 

66-1-214b

ཟེའུ་འབྲུ་ལུས་ལ་གྱོན་ནས་པད་མའི་ནང་ན་གནས་པ་དང་། ཨུཏྤ་ལ་སྔོན་པོ་གྲོལ་བར་གྱུར་པའི་མགྲིན་པ་དང་། ཀོ་ཡཥྚི་ཀཱ་དང་། བྱེའུ་ནག་མོ་དང་། བྷྲྀངྒའི་སྐེ་དང་། པཉྫུ་ལ་ཀཱཿདང་། ཆུ་ལ་དགའ་དང་། རྟག་ཏུ་དགའ་བའི་སྒྲ་སྒྲོགས་
པ་དང་པི་ཝང་དང་འདྲ་བའི་སྒྲ་དང་། སྤྲིན་ལ་དགའ་བ་དང་། དཔུང་འགྱེད་པ་ལ་དགའ་བ་དང་། ཟིལ་པའི་ཐིགས་པ་དང་། འདབ་མའི་མཐའ་ན་གནས་པ་རྣམས་ཏེ། དེ་དག་དང་གཞན་དག་རྣམས་ཀྱང་རྣམ་པ་སྣ་ཚོགས་པ་རྣམས་ཏེ་
མཐོང་ན་ཡིད་ཀྱི་རྗེས་སུ་འཐུན་པའི་སྒྲ་འདོན་པར་བྱེད་པ། དགའ་བར་གྱུར་པའི་བྱ་ཁྲོ་བ་དང་རྣམ་པར་བྲལ་བ་རྣམས་བྱ་ངེས་པར་གནས་པའི་ནགས་ལ་བྱང་ཕྱོགས་སྒྲ་མི་སྙན་པའི་སྐྱེས་བུ་རྣམས་དང་རྟག་པར་ལྷན་ཅིག་ཏུ་
རབ་ཏུ་དགའ་བར་གྱུར་པས་རྩེ་དགའ་བར་བྱེད་དོ། །བྱ་ངེས་པར་གནས་པའི་ནགས་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ཕྱི་རོལ་གྱིས་ལུས་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་
ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། སང་ཀཱ་ཤེའི་རི་བོ་ལ་ནགས་གཞན་གསུམ་པ་གང་ཡོད་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གསུམ་པ་ནི་ཟབ་མོ་
ཞེས་བྱ་བའི་ནགས་ཡོད་དེ། ལྗོན་ཤིང་ཕན་ཚུན་གྱི་ཉེ་འཁོར་རྣམས་ན་ལྗོན་ཤིང་མཐུག་པོའི་གྲིབ་མ་རྣམས་ཀྱིས་མངོན་པར་ཁྱབ་པར་གྱུར་པ་ཡིན་ནོ། །དེ་ལ་ཡང་དྲོ་བ་དང་བསིལ་བའི་གྲིབ་མ་རྣམས་ཡིན་པས་བྱང་ཕྱོགས་སྒྲ་
མི་སྙན་པའི་སྐྱེས་བུ་བསྐྱེད་མོས་ཚལ་དུ་དགའ་བ་རྣམས་ཉིད་ཤིང་གི་གསེབ་ན་རྩེ་དགའ་བར་བྱེད་དོ། །དེ་ལ་ཤིང་གི་ཚོགས་འདི་དག་རྣམས་ཡོད་པ་ཡིན་ཏེ། འདི་ལྟ་སྟེ། ཏི་ལ་ཀཱ་དང་། ཀླུའི་མེ་ཏོག་དང་། ཨེ་དྷཱ་ཤཱལྨ་ལཱ་དང་། 
ཀོ་བི་དཱ་རཱ་དང་། སཱལྦཱ་ལ་དང་། འདོད་པར་དགའ་བ་རྣམས་དང་། བྱ་ངལ་སོ་བ་དང་། སཱ་ལཱཿདང་། ཏཱ་ལཱ་དང་། ཤཱ་མཱ་དང་། ནིཥྐའི་རྣམ་པ་དང་། ཨ་མྲ་དང་། ཀ་ར་བཱི་ར་ཀཱཿདང་། ཤི་ལིནྡྷཿདང་། བ་ཀུ་ལཱཿདང་། དྲིས་རངས་པ་དང་། མ་དྷོ་དྡྷཱ་མཱ་

66-1-215a

དང་། ཧིནྟཱ་ལཱ་དང་། ཏ་མཱ་ལཱཿདང་། ཀོ་ལ་ཀཱཿདང་། སིནྡྷུ་ཙཱ་རཱ་དང་། ན་ཀུ་མཱ་ལཱ་དང་། མཚུངས་པ་དང་། ཟླ་བ་འཁོར་བ་དང་། གཟའ་རྒྱུ་བ་དང་། རྟག་ཏུ་མེ་ཏོག་རྒྱས་པ་དང་། ནི་ཙུ་ལུནྡྷཿདང་། མུ་ཀུ་ལུནྡྷཿདང་། ཨ་ཤྭཏྠཱཿདང་། ཀེ་ཤུ་
ཀཱཿདང་། སྔོ་བསངས་ཀྱི་སེམས་དང་། ཀ་པིཏྠཱཿདང་། པི་ལྭ་དང་། ནཱ་ཊ་ཀེ་རཱཿདང་། པ་ན་སཱཿདང་། མོ་ཙཱ་དང་། སྲིད་སྒྲུབ་དང་། ཀ་དཾ་པཱཿདང་། སྔོན་པོ་དང་། ལྷ་ཤིང་རུ་ཛཱ་ཡཱ་ནའི་འདབ་མ་དང་། ཆུ་སྐྱེས་དང་། མནྡཱ་རཱཿདང་། པདྨ་ཀུ་ཤེ་ཤ་ཡ་
དང་། ནི་ལཱ་ལཱ་དང་། གངས་ཀྱི་མདོག་དང་། དངུལ་གྱི་མདོག་དང་། བཻ་དཱུརྱའི་འདབ་མ་དང་། རྩེ་མོ་ངལ་བསོ་དང་། ཡུལ་དུ་འཕོ་བ་དང་། སྙོམས་པར་གནས་པ་ཀླུང་དུ་སྐྱེས་པ་དང་། ཀཱ་ཤཱ་བ་ཀཱ་ཤི་དང་། ཕན་ཚུན་དུ་མཐུག་པ་དང་། 
སྣུམ་པ་དང་། ཕྲག་པར་སྐྱེས་པ་དང་། ཨིཏྤྲ་ཎའི་མེ་ཏོག་དང་། ཨུཉྫུ་ལི་ན་དང་། སཾ་ཤཱ་ཊ་ཀཱཿདང་། བྱི་རུའི་ཤིང་དང་གུར་ཀུམ་གྱི་སྙིང་པོ་དང་། ཉེ་བར་བསླད་པ་དང་། རྗེས་སུ་བཙུགས་པའི་སྐྱེས་པ་དང་། དུ་བའི་མདོག་དང་། 
མར་མེའི་འོད་དང་། རླུང་གིས་ཤིན་དུ་བསྒུལ་བ་དང་། ཆུ་ཤིང་དང་། ཀཽ་ཀི་ལཱཿམྱོས་པ་དང་། མེ་ཏོག་གི་རྡུལ་མ་གྱོན་པ་དང་། མིག་དང་བཅས་པ་བཙུམས་པ་དང་། ཆ་ཤས་སུ་ཕྱེ་བའི་ཆ་དང་། འབྲས་ཆན་དང་འདྲ་བ་དང་། 
ཨུ་དྲུ་མ་འཁྲུལ་བ་དང་། བུང་བ་འཁོར་བ་དང་། རྩེ་མོ་འགུལ་བ་དང་། རླུང་གིས་ངལ་བ་དང་། མྱ་ངན་མེད་པ་དང་། མིག་དགའ་བ་དང་དེ་དག་རྣམས་ཡིན་ནོ། །དེ་དག་ནི་ཇི་ལྟར་ཤིང་གི་རིགས་ཀྱི་གཙོ་བོར་གྱུར་པ་དྲུག་བཅུ་ཡིན་ཏེ། 
གང་མ་བགྲངས་པའི་ཤིང་གི་རིགས་སུ་གྱུར་པ་བར་མ་དང་ཐ་མ་རྣམས་ནི་མ་གཏོགས་པ་ཡིན་ནོ། །དེ་ཁོ་ན་བཞིན་དུ་ཟབ་མོ་ན་རབ་ཏུ་ཕལ་ཆེ་བར་གྱུར་པའི་འབབ་ཆུ་དང་། མེ་ཏོག་དང་། འབྲས་བུ་དང་བཅས་པས་དགའ་བ་
ཡིན་ཏེ། བྱང་ཕྱོགས་སྒྲ་མི་སྙན་པའི་མི་རྣམས་འཇིགས་པ་དང་ནད་དང་གཞན་གྱི་དབང་དུ་གྱུར་པ་རྣམས་རྣམ་པར་བྲལ་བ་དང་། རིམས་ནད་མེད་པ་དང་། ཕན་ཚུན་དུ་ཕྲག་དོག་དང་འཐབ་རྩོད་ཀྱི་འཇིགས་པ་རྣམས་མེད་པར་

66-1-215b

གྱུར་ནས་རྩེ་དགའ་བར་བྱེད་དོ། །དེ་ལྟར་སཾ་ཀཱ་ཤེའི་རི་ཟབ་མོའི་ནགས་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་
ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་གྱི་གླིང་གི་རི་དང་པོ་སཾ་ཀཱ་ཤེའི་ནགས་བཞི་པ་ལ་གཞན་བསིལ་བའི་ཆུ་ཅི་ཡོད། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་
མིག་གིས་མཐོང་བར་གྱུར་པ། བསིལ་བའི་ཆུའི་ཆུ་ཀླུང་ཆུ་རྣམས་ནི་རབ་ཏུ་ཕལ་ཆེ་བ་ཡོད་ལ། ཇི་སྐད་དུ་བརྗོད་པའི་ལྗོན་ཤིང་དང་། མེ་ཏོག་དང་འབྲས་བུ་རྣམས་ཀྱང་ཕུན་སུམ་ཚོགས་པ་ཡིན་ནོ། །ཆུ་ཀླུང་ཡོད་པ་
རྣམས་ནི་འདི་ལྟ་སྟེ། བསིལ་བའི་ཆུ་ནི་རྒྱར་དཔག་ཚད་དུ་གྱུར་པའོ། །ཆུ་ཀླུང་ཟབ་མོའི་ཆུ་དང་། རབ་ཏུ་དང་བའི་ཆུ་དང་། གཙང་བའི་ཆུ་དང་། འོ་མའི་ཆུ་དང་། དགུན་འགྲུའི་ཆུ་དང་། ཟླ་བ་རྒྱུ་བ་དང་། འོ་ཐུག་གི་འདམ་དང་། 
གྲམ་སག་གི་ཆུ་དང་། ངང་ངུར་གྱིས་གང་བ་དང་། ངང་པ་ཀུན་དུ་སྒྲ་འབྱིན་པ་དང་། དབྱངས་སྙན་པ་དང་། མེ་ཏོག་རྒྱུ་བ་དང་། སེམས་འགྲོ་བ་དང་། འུ་རུ་རུའི་སྒྲས་འབབ་པ་དང་། རླབས་འབྱུང་བ་དང་། བདེ་བའི་ཆུ་དང་། 
ཀ་དམྤ་འཁོད་པ་ཉིད་དང་། ནོར་བུའི་མཆུ་ཅན་རྣམས་ཀྱིས་འཛིན་པ་དང་། ཆུ་སྲིན་ཀཱུརྨ་མང་བ་ཉིད་དང་། ཉ་རོ་ཧི་འཁོར་བ་དང་། རུསྦལ་གྱིས་གང་བ་དང་། ཆུ་སྲིན་ན་ཀྲས་བསྐོར་བ་དང་། ཡིད་བདེ་བར་འབབ་པ་དང་། 
དབུ་བའི་ཕྲེང་བ་དང་། རབ་ཏུ་དགའ་བར་གྱུར་པའི་ཆུ་དང་རླུང་མཚུངས་པ་དང་། ཆར་དང་ཆར་གྱི་རྗེས་སུ་འབྱུང་བའི་ཆུ་ཀླུང་དང་། དབྱངས་ཅན་གྱི་མདོག་ཏུ་འབབ་པ་དང་། དུས་སུ་འབབ་པ་དང་། རིང་པ་དང་། རྩེ་མོའི་དང་། 
གསེར་གྱི་ཆུ་དང་། དངུལ་གྱི་མདོག་དང་། མུ་ཏིག་གི་བྱེ་མ་དང་ལྡན་པ་དང་། རི་བོ་ལ་རྒྱུ་བ་དང་། སྤྲིན་འཁོར་བ་དང་། མུ་སཱ་ར་གལྦ་རྒྱན་དུ་བྱས་པ་དང་། བི་དྲུ་མའི་ཤིང་དང་ལྡན་པ་དང་། དཔྱིད་དགའ་བ་དང་། དབྱར་སྤྲིན་རབ་ཏུ་

66-1-216a

དང་བའི་ཆུ་འབབ་པ་དང་། རྩེ་མོ་ལ་འཇུག་པར་དགའ་བ་དང་། གངས་ཡོད་པ་དང་། ཉི་མ་ཤར་བར་གྱུར་པས་མི་རེག་པ་དང་། མྱུར་བའི་ཆུ་དང་། རླབས་རབ་ཏུ་འཇུག་པ་དང་། ཨ་ཌུ་པཱ་དང་། ཙུ་ལུནྡ་འབབ་པ་དང་། 
དྲི་ཆུ་དང་ཀེ་ཏ་ཀའི་དྲིས་བསྒོས་པ་དང་། དབྱར་དགའ་བ་དང་། དྷུ་ན་དྷུ་མཱ་རཱ་དང་། ཉེ་འཁོར་ན་ཁྱབ་པ་དང་། དཔག་ཏུ་མེད་པ་འབབ་པ་དང་། རྒྱབ་ནས་ཀླུང་ཀུན་དུ་གང་བར་རབ་ཏུ་འབབ་པ་དང་། དམའ་བའི་ཆུ་དང་། དགའ་
བས་འཇུག་པ་དང་། སྔོན་གྱི་དུ་བའི་སྟོབས་དང་། སྤྲིན་གྱི་འགྲོས་དང་། དྲི་ཟའི་དབྱངས་ཅན་དང་། རྔའི་སྒྲའི་དབྱངས་ཅན་དང་། སྐད་ཀྱི་དབྱངས་ཅན་དང་། ཀླུའི་བུ་མོ་མངོན་པར་དགའ་བ་དང་། རིག་པ་འཛིན་པ་རྩེ་དགའ་
བས་གནས་པ་དང་རྣམས་ཡིན་ནོ། །དེ་དག་ནི་རི་སཾ་ཀཱ་ཤེའི་ནགས་བཞི་པ་སྤྲིན་དཀར་པོ་ལ་ཇི་ལྟར་འབབ་ཆུའི་གཙོ་བོར་གྱུར་པ་བདུན་བཅུ་ཡིན་པར་རབ་ཏུ་བརྗོད་པ་ཡིན་ནོ། །བར་མ་ཐ་མའི་ཆུ་ཀླུང་རྣམས་ནི་མ་གཏོགས་
པ་ཡིན་ནོ། །གཞལ་དུ་མེད་པ་དགའ་བར་གྱུར་པའི་ཤིང་དང་། མེ་ཏོག་དང་། བྱ་རྣམས་ཀྱིས་ཡོན་ཏན་གྱིས་བླ་ན་མེད་པར་གྱུར་པའི་བསིལ་བའི་ཆུའི་ནགས་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་
བ་བཞིན་དུ་ཕྱི་རོལ་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། 
སཾ་ཀཱ་ཤེའི་ལ་བི་ཤྲཱ་མཾ་ཞེས་བྱ་བའི་ནགས་ལྔ་པ་ཡོད་པ་ཡིན་ཏེ། གང་ལ་ཀླུ་མི་བཟད་པ་འདི་དག་རྩེ་དགའ་བར་བྱེད་པའོ། །འདི་ལྟ་སྟེ། ཁྲོ་བ་བྲལ་བ་དང་། བཱ་སུ་ཀི་དང་། སྟཥྐ་ཀོ་དང་། མཆེ་བའི་དུག་དང་། གློག་གི་ཕྲེང་བ་དང་། 
སྤྲིན་གྱི་ཉེ་འཁོར་ཆོས་ལ་དབང་བ་དང་། རྣམ་པ་དེ་ལྟ་བུའི་ཀླུ་སྟོང་ཕྲག་བདུན་རྩེ་དགའ་བར་བྱེད་དོ། །བྱང་ཕྱོགས་སྒྲ་མི་སྙན་གྱི་ཉེ་འཁོར་རྣམས་སུ་ཆོས་ཀྱི་ཆར་པ་འབེབས་པར་བྱེད་དོ། །ཇི་ལྟར་ས་གཞི་དང་ནམ་མཁའི་ཉེ་

66-1-216b

འཁོར་རྣམས་ཀྱང་ཤིན་དུ་བྱང་ཕྱོགས་སྒྲ་མི་སྙན་པའི་འཇིག་རྟེན་པ་རྣམས་དང་འདྲ་བ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ཅི་སང་ཀཱ་ཤེའི་རིའི་ནགས་རྣམས་ནི་ཇི་
སྐད་དུ་སྔར་བསྟན་པ་བཞིན་དུ་གྱུར་པ་ཡིན་ལ་ལྗོན་ཤིང་རེ་རེ་ལོ་མར་གྱུར་པ་རྣམས་དང་། མེ་ཏོག་ཏུ་གྱུར་པ་རྣམས་དང་། འབྲས་བུར་གྱུར་པ་རྣམས་དང་། ཆུ་ཀླུང་དུ་གྱུར་པ་རྣམས་དང་། རྡོའི་གསེབ་ཏུ་གྱུར་པ་རྣམས་དང་ཕྱོགས་ཀྱི་ཆར་
གྱུར་པ་རྣམས་དང་། རྩྭའི་གསེབ་ཏུ་གྱུར་པ་རྣམས་དང་། རིའི་ཁྲད་ཁྲོད་དང་ཁོང་གསེང་དུ་གྱུར་པ་རྣམས་དང་། འབབ་ཆུར་གྱུར་པ་ལ་ཡང་རུང་སྟེ། ཁབ་ཀྱིས་ཕུག་པའི་བར་ཙམ་གང་དག་ལ་ཡང་སེམས་ཅན་ཐམས་ཅད་ལན་བརྒྱ་
དང་། གལ་ཏེ་ན་ལན་བརྒྱ་སྟོང་དུ་ཡང་མ་སྐྱེས་པ་དང་། མ་ཤི་བ་དང་། འཆི་མ་འཕོས་པ་དང་། མ་སྐྱེས་པར་མ་གྱུར་པ་འམ། ཡིད་དུ་འོང་བ་རྣམས་ཐམས་ཅད་དང་ཐ་དད་དུ་མ་གྱུར་པ་དང་། རྣམ་པར་གྱེས་པར་མ་གྱུར་པ་དང་། 
རྣམ་པར་བྲལ་བར་མ་གྱུར་པ་དང་། གཞན་དུ་མ་གྱུར་པ་འམ། དགྲར་གྱུར་པའི་ལུས་འདི་ལན་བརྒྱ་དང་། དེ་ནས་ལན་སྟོང་དུ་དང་། ལན་བརྒྱ་སྟོང་དུ་ཡང་སྐྱེས་པར་མ་གྱུར་པ་ནི་མེད་དོ། །གང་ལ་སེམས་ཅན་རྣམས་ཐམས་ཅད་
ཀྱང་ཤི་བ་དང་སྐྱེས་པར་མ་གྱུར་པ་དེ་ནི་ཁབ་ཀྱི་བུག་པ་ཙམ་ཡང་གོ་སྐབས་མ་མཐོང་ངོ་། །དེས་སཾ་ཀཱ་ཤེའི་རི་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་
འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་ན་དགའ་བར་གྱུར་པའི་རིའི་རིགས་གཞན་ཡོད་དམ་ཞེ་ན། གཞན་ཡང་རྣལ་འབྱོར་སྤྱོད་པ་པས་ཐོས་པ་ལས་བྱུང་བའི་ཤེས་རབ་ཀྱིས་
སམ་ལྷའི་མིག་གིས་མཐོང་བར་གྱུར་པ་མཆོག་ཏུ་དགའ་བར་གྱུར་པའི་ལྷ་རྣམས་ཀྱི་དགའ་བའི་ཚལ་དང་འདྲ་བར་རྭ་མཉམ་པ་ཞེས་བྱ་བའི་རི་གཞན་ཡོད་དོ། །དེའི་ལྗོན་ཤིང་དང་། འབྲས་བུ་དང་། ཆུ་ཀླུང་དང་། རིའི་ཕུག་

66-1-217a

རྣམས་ཀྱི་དགའ་བ་ནི་རྒྱས་པར་སྔར་སཾ་ཀཱ་ཤེ་ལ་ཇི་སྐད་བཤད་པ་བཞིན་ནོ། །དགའ་བར་གྱུར་པའི་དུས་ཀྱི་ཁྱད་པར་རྣམས་སོ་སོར་བྱེ་བྲག་ཏུ་བྱ་སྟེ། རྭ་མཉམ་པར་གྱུར་པའི་རི་གང་ལ་རྭ་བརྒྱ་ཕྲག་གསུམ་ནི་
གསེར་གྱི་ཡིན་ཏེ། མཚུངས་པ་མེད་པ་ཡིན་ནོ། །འོད་ཟེར་རྣམས་ཉི་མ་གཉིས་པ་བཞིན་དུ་གསལ་ལོ། །རྭ་བརྒྱ་ཕྲག་ལྔ་ནི་དངུལ་གྱི་རང་བཞིན་ཡིན་ཏེ། གང་ལ་དངུལ་གྱི་རང་བཞིན་དུ་གྱུར་པ་ནི་གང་སྔར་བཤད་པ་རྣམས་
བཞིན་ནོ། །ཡོན་ཏན་རྣམས་ཐམས་ཅད་ལ་ཡང་ཁྱབ་པར་ཡོད་དེ། རྭ་མཉམ་པའི་རི་དེའི་ཉེ་འཁོར་རྣམས་ན་ཡང་བྱང་ཕྱོགས་སྒྲ་མི་སྙན་པའི་སྐྱེས་བུ་རྣམས་ཟླ་བ་རྒྱས་པའི་འོད་དང་འདྲ་བ་ཡིན་ནོ། །དེ་དག་རྣམས་ནི་
འཇིགས་པ་དང་བྲལ་བ་ཞེས་བྱ་བའི་མིང་དང་ལྡན་པ་ཡིན་ནོ། །འཇིགས་པ་དང་བྲལ་བའི་སྐྱེས་བུ་རྣམས་རྭ་མཉམ་པའི་རི་ལ་ནི་ཇི་ལྟར་རྒྱལ་ཆེན་རིས་བཞིའི་ལྷ་རྣམས་དགའ་བའི་ཚལ་ན་དབྱར་ཟླ་བ་བཞིར་ལྷ་རྫས་ཀྱི་འདོད་པའི་ཡོན་
ཏན་ལྔས་ཡོངས་སུ་ཚིམ་པ་ཡང་དག་པར་ལྡན་པར་གྱུར་པ་ལ་རྩེ་དགའ་བར་བྱེད་པ་དེ་བཞིན་དུ་མངོན་པར་དགའ་བར་བྱེད་དོ། །དེ་ལྟ་ན་ཡང་འཇིགས་པ་དང་བྲལ་བའི་སྐྱེས་བུ་རྣམས་དང་རྒྱལ་ཆེན་བཞིའི་རིས་ཀྱི་ལྷ་རྣམས་
ཀྱི་སོ་སོའི་ཁྱད་པར་གང་དག་ཡིན་ཞེ་ན། ལྷ་རྣམས་ནི་ཤ་དང་། རུས་པ་དང་། ཆུ་སེར་དང་བྲལ་བ་ཡིན་ལ། འཇིགས་པ་དང་མ་བྲལ་བའི་སྐྱེས་བུ་རྣམས་ནི་ཤ་དང་རུས་པ་དང་ཆུ་སེར་དང་མ་བྲལ་བར་ཡོད་པ་ཡིན་ནོ། །ལྷ་རྣམས་
དང་འཇིགས་པ་བྲལ་བའི་སྐྱེས་བུ་རྣམས་ཀྱི་ཁྱད་པར་ནི་དེ་ལྟར་ཡིན་ནོ། །སྐྱེས་བུ་འཇིགས་པ་དང་བྲལ་བ་རྣམས་ནི་བདག་འཛིན་མེད་པ་དང་། ང་རྒྱལ་མེད་པ་དང་། ངེས་པར་གོང་དུ་འགྲོ་བར་འགྱུར་བ་ཡིན་ནོ། །ལྷ་རྣམས་ནི་
དེ་ལྟར་ཡང་མ་ཡིན་ནོ། །ཡང་འཇིགས་པ་དང་བྲལ་བའི་སྐྱེས་བུ་རྣམས་དང་རྒྱལ་ཆེན་རིས་བཞིའི་ལྷ་རྣམས་ཀྱི་སོ་སོའི་ཁྱད་པར་གང་དག་ཡིན་ན། རྭ་མཉམ་པའི་རིའི་ཉེ་འཁོར་རྣམས་ན་དཔག་བསམ་གྱི་ཤིང་ཉི་མ་གཉིས་པ་

66-1-217b

ལྟར་རབ་ཏུ་གསལ་བར་བྱེད་དོ། །གང་དང་གང་དག་འཇགས་པ་དང་བྲལ་བའི་སྐྱེས་བུ་རྣམས་ཀྱིས་སེམས་བསམས་པར་གྱུར་པ་དེ་དག་རྣམས་ལྗོན་ཤིང་དེ་རྣམས་ལས་འབྱུང་བར་འགྱུར་རོ། །ཐག་པས་བཏགས་པ་འམ། 
ནོར་བུའི་རིགས་རྣམས་སམ། རྒྱན་གྱི་རིགས་རྣམས་དང་། ཟས་དང་སྐོམ་གྱི་ཆུ་བོ་ཡང་བརྒྱ་ཕྲག་དང་སྟོང་ཕྲག་ཀྱང་འབབ་བོ། །ཇི་སྐད་དུ་བཤད་པར་གྱུར་པའི་བྱ་རྒྱགས་པ་རྣམས་ཀྱང་རྩེ་དགའ་བར་བྱེད་དོ། །གསེར་གྱི་ལོ་མ་
རྣམས་ཀྱིས་བརྒྱན་པར་གྱུར་པ་དང་། བཻ་ཌཱུརྱ་སྔོན་པོ་རྣམས་ཀྱི་པད་མའི་རྫིང་བུ་མང་པོ་བརྒྱ་ཕྲག་དང་། ཅི་སྟེ་ན་སྟོང་ཕྲག་རྣམས་ལ་ངང་པ་དང་ཀཱ་རཎྜ་བ་རྣམས་ཀྱིས་གང་བ། ཙཀྲ་བཱ་ཀ་རྗེས་སུ་རྒྱུ་བ་དང་། རི་དགས་ཀྱི་ཚོགས་རྣམས་
རྗེས་སུ་བརྟེན་པར་གྱུར་པ་ནི་གསེར་གྱི་རི་དགས་རྣམས་བྱི་རུའི་རང་བཞིན་གྱི་རྭ་དང་། མུ་སཱ་རའི་མིག་དང་། རཱ་ཛ་པཊྚའི་རྨིག་པ་སྟེ། རི་དགས་ཀྱི་རིགས་གཞན་རྣམས་ཀྱིས་ཀྱང་རྗེས་སུ་རྒྱུ་བར་བྱེད་པ་ཡིན་ནོ། །རི་དེའི་ཉེ་འཁོར་རྣམས་
ན་མུ་ཏིག་གི་དྲ་བས་སྦྲེལ་བར་གྱུར་པཱི་འཁྲི་ཤིང་གི་ཚོགས་ཕན་ཚུན་དུ་འཁྲིལ་བས་གཡོགས་པ་དང་། ར་མཉམ་པའི་རི་དེ་ལ་ཀོ་ཀི་ལ་དང་། རྨ་བྱ་དང་། ངང་པ་དང་རྣམས་སྒྲ་འབྱིན་པར་བྱེད་པ་དང་། རི་འདི་ལ་འབབ་ཆུ་སྟོང་ཕྲག་
བརྒྱས་ཀྱང་ཀུན་ཏུ་གང་བ་དང་། འདི་ལ་ཆུ་ཀླུང་དུ་མ་རྣམས་དང་ཤིང་ཀླུང་དུ་སྐྱེས་པ་རྣམས་ཀྱིས་གང་བར་གྱུར་པ་ཡིན་ཏེ། ཉེ་འཁོར་རྣམས་ན་ཡོན་ཏན་མཐའ་ཡས་པ་དང་ལྡན་པ་ཡིན་ནོ། །དེས་བྱང་ཕྱོགས་སྒྲ་མི་སྙན་པའི་
རི་བོ་གཉིས་པ་རྭ་མཉམ་པ་ལ་ཀུན་ཏུ་བལྟས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རྟོགས་སོ། །ཆུ་ཀླུང་གང་དང་གང་དག་འབབ་པར་གྱུར་པ་དེ་དག་རྣམས་ནི་མཚུངས་པར་ཡོན་ཏན་
བརྒྱད་དང་ལྡན་པའི་ཆུ་ཡིན་ནོ། །འདི་ལྟ་སྟེ། རོ་ཕུན་སུམ་ཚོགས་པ་དང་། རབ་ཏུ་དང་བ་དང་། དྲི་ཞིམ་པ་དང་། སྐོམ་པ་སེལ་བར་བྱེད་པ་དང་། བསིལ་བར་གྱུར་པ་དང་། འཐུངས་པར་གྱུར་པ་ན་ལུས་ན་བར་མི་བྱེད་པ་དང་། 

66-1-218a

ཆུ་བལ་གྱིས་མི་གཙང་བར་མ་བྱས་པ་དང་། ཆུ་སྲིན་མ་ཀ་རས་མ་རེག་པ་དང་། འཐུངས་པས་ལུས་ཚིམ་པར་བྱེད་པ་དང་རྣམས་སོ། །ནད་ཀྱང་སྐྱེད་པར་མི་བྱེད་དོ། །མཚོ་རྣམས་ཀྱང་རྣམ་པ་དུ་མ་ཡོད་དོ། །
འདི་ལྟ་སྟེ། རྒྱ་མཚོ་ཆེན་པོའི་སཱ་ནུ་དང་། བྱེ་མས་མ་བཅོམ་པ་དང་། ཤིང་ལྔ་པ་དང་། ཀཱ་རཎ་ཌ་བའི་ཀླུང་དང་། ངང་པའི་ཆུ་དང་། ཀཱ་དམ་པའི་བྱ་རྣམས་ཀྱིས་བཅོམ་པ་དང་། བྱ་བརྒྱ་ཕྲག་གིས་ཀུན་དུ་གང་བ་དང་། ཆེན་པོ་
རབ་ཏུ་འབབ་པ་དང་། པད་མས་བཀབ་པར་གྱུར་པ་དང་། འོད་མ་སྐྱེས་པ་དང་། ཤིང་གིས་གཡོགས་པ་དང་། ཟབ་མོ་དང་ཟླ་བ་དགའ་བ་དང་། རྟག་ཏུ་ཟླ་བ་དང་འདྲེས་པའི་ཆུ་དང་། རླབས་འཁོར་བར་གྱུར་པ་དང་། འོད་
མས་ཁྱབ་པར་གྱུར་པ་དང་། རིག་པ་འཛིན་པ་དགའ་བ་དང་། ཤེལ་འཁོར་བར་བྱེད་པ་དང་། རླབས་གཡོ་བ་དང་། ཆུ་བསྟན་པ་དང་། ཉ་འཁོར་བ་དང་། ཉ་དང་ཀུན་དུ་འབྲེལ་བ་དང་། རྩེ་མོའི་གསེབ་དང་། ཁྲུས་ཀྱི་རྫིང་བུའི་
ཕྲེང་བ་དང་། རླབས་རབ་ཏུ་འཇུག་པ་དང་། གཙང་བའི་ཆུ་དང་། ཟླ་བའི་ལུས་དང་། དཀྱིལ་འཁོར་དང་། དྲི་མ་མེད་པ་དང་། འོད་མའི་ཆུ་དང་། རྫིང་བུའི་ཕྲེང་བ་དང་། རྔུལ་བ་ངལ་སོ་བ་དང་། ཟླ་བ་དགའ་བ་དང་། ཤི་ལ་འཇུག་པ་དང་། 
རླབས་གཡོ་བ་དང་། ཆུ་བརྟན་པ་དང་། རྟག་པའི་ཆུ་དང་། ལྷ་དགའ་བ་དང་། དགའ་བའི་ཆུ་དང་། རོ་བཟངས་པོ་དང་། ཇི་ལྟར་འདོད་པའི་རོ་དང་། ལོངས་སྤྱོད་དུ་གྱུར་པ་དང་། ཀཻ་ཊུ་བྷཿདང་། བདུད་རྩི་འབབ་པ་དང་། མཚོའི་མཆོག་
དང་། ཀླུའི་བེ་རུཿདང་། མཛེས་པ་དང་། ཨརྫུ་ནཿདང་ཞེས་བྱ་སྟེ། དེ་དག་རྣམས་ནི་མཚོ་བཞི་བཅུ་རྩ་བདུན་ནོ། །རིའི་མཆོག་ཏུ་གྱུར་པ་རྭ་མཉམ་པ་འདི་དག་ཐམས་ཅད་ཀྱང་ཡོན་ཏན་བརྒྱད་པའི་ཆུ་སྔར་ཇི་སྐད་བཤད་པ་བཞིན་
ནོ། །རྭ་མཉམ་པའི་རི་ཡང་མཐོ་བར་གྱུར་པ་ནི་ནམ་མཁའ་འབིགས་པ་བཞིན་དུ་གནས་པ་ཡིན་ནོ། །ནགས་རྣམས་ཀྱང་ཡོན་ཏན་དེ་དག་རྣམས་ཐམས་ཅད་དང་ལྡན་པར་གྱུར་པ་ཡིན་ཏེ། འདི་ལྟར་དངུལ་བས་རེག་པའི་

66-1-218b

ནགས་དང་ཟླ་བའི་མདོག་དང་དངུལ་གྱི་ལྗོན་ཤིང་ནི་དངུལ་གྱི་རང་བཞིན་གྱི་ལྗོན་ཤིང་རྣམས་ཀྱིས་བསྐོར་བ་དཔག་ཚད་བརྒྱ་ཡིན་ནོ། །ནོར་བུའི་འོད་ཀྱི་མདོག་དང་ནགས་དེའི་ཉེ་འཁོར་ན་མཐོ་བར་གྱུར་པ་རྣམས་ནི་ནགས་
དེ་ལ་ཡང་པད་མའི་རྫིང་བུ་འདི་དག་རྣམས་ཡིན་ནོ། །འདི་ལྟ་སྟེ། ཆུ་བལ་དང་རྣམ་པར་བྲལ་བ་དང་། བུང་བས་ཁྱབ་པ་དང་། དུང་གི་མདོག་དང་། རྟག་པའི་ཆུ་དང་། རྣམ་པར་མཐོང་བས་དགའ་བ་དང་། ཀཱ་དམ་པའི་ཆུ་
དང་། ངང་པའི་གཤོག་པས་བཅོམ་པ་དང་། རབ་ཏུ་རྩེ་བར་བྱེད་པ་དང་། སྐྱེ་བོ་རྣམས་མངོན་པར་དགའ་བ་དང་། མགོ་བོ་མཐོང་བ་དང་། བག་མེད་པ་རྣམས་རྩེ་བ་དང་། རྟག་ཏུ་མངོན་པར་དགའ་བ་དང་། རྟག་ཏུ་
པད་མ་རབ་ཏུ་དགའ་བ་དང་། ཆུ་ལ་སྤྱོད་པའི་ས་གཞི་དང་དེ་དག་རྣམས་ནི་ཇི་ལྟར་པད་མའི་རྫིང་བུའི་གཙོ་བོར་གྱུར་པ་བཅུ་དྲུག་ཡིན་ཏེ། གང་དག་གི་མིང་རྣམས་ཀྱང་ཤེས་པར་མི་འགྱུར་བའི་བར་མ་དང་ཐ་མར་གྱུར་
པ་བརྒྱ་ཕྲག་རྣམས་དང་དེ་ནས་སྟོང་ཕྲག་རྣམས་ནི་མ་གཏོགས་སོ། །ཐམས་ཅད་ཀྱང་འདམ་བག་མེད་པ་དང་། ཆུ་བལ་གྱིས་ཉེ་བར་མ་བཅོམ་པ་དང་། ངང་པ་དང་། ཀཱ་རཎ་ཌ་བ་དང་། ངང་ངུར་རྣམས་སྒྲ་འདོན་པར་བྱེད་པ་
ཡིན་ནོ། །རྟག་ཏུ་དགའ་སྟོན་གྱི་ཉི་མར་གྱུར་པ་བྱང་ཕྱོགས་སྒྲ་མི་སྙན་པའི་སྐྱེས་བུ་རྣམས་བྱ་རྟག་ཏུ་མྱོས་པ་དང་། ཤང་ཤང་ཏེའུ་དང་། བྱ་བྷྲིང་ག་རཱ་ཛ་དང་། རྨ་བྱ་རྣམས་ནགས་དང་ཉེ་བའི་ནགས་རྣམས་ན་སྒྲ་འདོན་པར་
བྱེད་པ་ནི་རྭ་མཉམ་པའི་རི་ཡིན་ནོ། །རྭ་མཉམ་པའི་རི་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ཕྱི་རོལ་གྱི་ལུས་སོ་སོར་རིག་པར་བྱེད་དོ། །གཞན་ཡང་འཕགས་པའི་བདེན་པ་བཞི་ལ་ལྷག་
པར་མོས་པར་གྱུར་པའི་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རྭ་མཉམ་པའི་རི་ལ་རྟག་པ་འམ། བརྟན་པ་འམ། བདེ་བ་འམ། བདག་དང་བཅས་པ་འམ། སྟོང་པ་མ་ཡིན་པའི་

66-1-219a

གནས་དག་ཡོད་དམ་ཞེ་ན་སྔར་བཞིན་ནོ། །གང་ལ་ཡང་འཁོར་བར་རྟོགས་པར་གྱུར་པའི་སེམས་ཅན་རྣམས་ཐམས་ཅད་ཀྱང་མ་སྐྱེས་པ་དང་མ་ཤི་བ་དང་རྒས་པར་མ་གྱུར་པ་འམ་འཐུན་པ་དང་ཡིད་དུ་འོང་
བ་རྣམས་ཐམས་ཅད་ཀྱང་ཐ་དད་དུ་གྱུར་པ་དང་། རྣམ་པར་གྱེས་པ་དང་། རྣམ་པར་བྲལ་བ་དང་། སླུ་བ་དང་། ཀུན་དུ་ལྡན་པར་མ་གྱུར་པ་རྣམས་ནི་རྣལ་འབྱོར་སྤྱོད་པ་དེས་རྭ་མཉམ་པའི་རི་དེ་ལ་གནས་གཅིག་ཀྱང་མ་མཐོང་
ངོ་། །གང་དག་རྟག་པ་འམ། བརྟན་པ་འམ། བདེ་བ་འམ། བདག་དང་བཅས་པར་གྱུར་པ་འམ། སྟོང་པ་མ་ཡིན་པ་དང་། གང་ལ་སེམས་ཅན་རྣམས་ཐམས་ཅད་ཀྱང་མ་སྐྱེས་པ་དང་། མ་རྒས་པ་དང་། མ་ཤི་བ་ཡང་མེད་དེ། 
འཐུན་པར་ཡིད་དུ་འོང་བར་གྱུར་པ་རྣམས་ནི་ཐམས་ཅད་ཀྱང་མེད་པར་འགྱུར་བ་དང་། ཐ་དད་དུ་འགྱུར་བ་དང་། འབྲལ་བར་འགྱུར་བ་དང་། སླུ་བར་འགྱུར་བ་དང་ཀུན་དུ་ལྡན་པར་འགྱུར་བ་ཡིན་ནོ། །རབ་ཏུ་ལྡན་པར་གྱུར་པ་ཡིན་པ་
ཉིད་ཀྱི་ཕྱིར་འཁོར་བ་འདི་ཐམས་ཅད་ནི་མི་རྟག་པ་ཡིན་ནོ། །དེ་ལྟར་མི་རྟག་པར་གྱུར་པའི་གནས་རྣམས་ཐམས་ཅད་གང་ལ་ཡང་སེམས་ཅན་རྣམས་ཐམས་ཅད་ཀྱང་མ་སྐྱེས་པ་དང་། མ་ཤི་བ་དང་། སྐྱེས་པར་མ་གྱུར་
པ་ནི་ཁབ་ཀྱིས་ཕུག་པ་ཙམ་གྱི་ཡུལ་ཕྱོགས་ཀྱང་མེད་དོ། །འཕགས་པའི་བདེན་པ་བཞིར་གྱུར་པའི་དྲན་པ་དང་ལྡན་པས་བྱང་ཕྱོགས་སྒྲ་མི་སྙན་པ་རྣམས་ཀྱི་རི་བོ་གཉིས་པར་གྱུར་པ་རྭ་མཉམ་པར་གྱུར་པ་ཐམས་ཅད་ལ་ཀུན་
དུ་བལྟས་པར་གྱུར་པས་ཀྱང་ཕྱི་རོལ་གྱིས་ལུས་ལྟ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་ན་ནགས་དགའ་བར་གྱུར་པ་གཞན་དག་དམིགས་
སམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་རི་གསུམ་པ་ཡང་ཡོད་པ་ཡིན་ཏེ།  རི་དགས་ཀྱི་དགྲ་དུལ་བ་ཞེས་བྱ་བའི་རིའོ། །དེ་ལ་དགའ་བར་གྱུར་པ་ཁྱད་པར་མེད་པ་གང་དག་

66-1-219b

ཡིན་པ་དེ་དག་རྣམས་ནི་སང་ཀཱ་ཤེའི་རི་དང་རྭ་མཉམ་པར་གྱུར་པའི་རི་ལ་ཡོངས་སུ་བསྒྲགས་པར་ཟད་དོ། །རི་དགས་ཀྱི་དགྲ་དུལ་བའི་རི་བོ་དེ་ལ་ནི་འབབ་ཆུ་དང་ཆུ་བོ་རྣམས་ཕུན་སུམ་ཚོགས་པ་དང་། ཆང་གི་ཆུ་ཀླུང་ཕུན་
སུམ་ཚོགས་པ་དང་། གོས་ཀྱི་ལྗོན་ཤིང་ཕུན་སུམ་ཚོགས་པར་གྱུར་པ་རྣམས་དང་། འདི་དག་ཀྱང་ཁྱད་པར་ཡིན་ཏེ། འདི་ལྟར་གསེར་དང་དངུལ་གྱི་ལྗོན་ཤིང་རྣམས་ལ་རྟག་པར་དུས་དྲུག་ཏུ་མེ་ཏོག་གི་ཕྲེང་བ་རྣམས་ཀྱིས་ཕྱུག་པར་
གྱུར་ནས་ཀུན་དགའ་བ་དང་ལྡན་པ་བཞིན་དུ་རྒྱས་པ་ཡིན་ནོ། །ཤིང་རྣམས་ནི་རང་གི་འོད་དང་ལྡན་པར་ཉི་མ་བཞིན་དུ་རབ་ཏུ་གསལ་བར་ཡང་བྱེད་དོ། །ཕན་ཚུན་དུ་འོད་འཕྲོ་བར་གྱུར་པས་ཀྱང་རི་དགས་ཀྱི་དགྲ་དུལ་བའི་རི་བོ་འདི་
རབ་ཏུ་གསལ་བར་བྱེད་དོ། །དེ་ལ་ནགས་འདི་དག་རྣམས་ཡོད་དོ། །འདི་ལྟ་སྟེ། གསེར་དང་ལྡན་པ་དང་། དངུལ་མཐོན་པོར་བརྩེགས་པ་དང་། མྱོས་པ་སྒོ་ང་ལས་སྐྱེས་པའི་ངོས་དང་། མནན་ན་ནེམ་ལ་བཏེག་ན་འཕར་བ་དང་
རྣམས་སོ། །དེ་ལ་གསེར་དང་ལྡན་པ་ཞེས་བྱ་བའི་ནགས་ནི་དཔག་ཚད་བརྒྱ་པ་སྟེ། གསེར་གྱི་ལྗོན་ཤིང་རྣམས་ལ་བུང་བས་ལེགས་པར་ཁྱབ་པར་གྱུར་པ་ཡིན་ནོ། །དངུལ་མཐོན་པོར་བརྩེགས་པའི་ནགས་དཔག་ཚད་
སུམ་བརྒྱ་པ་སྟེ། དངུལ་གྱི་རང་བཞིན་གྱི་ལྗོན་ཤིང་རྣམས་ཀྱིས་ཀུན་དུ་གང་བར་གྱུར་ནས་ཟླ་བ་བརྒྱ་སྟོང་བཞིན་དུ་རྣམ་པར་གསལ་བར་བྱེད་དོ། །སེང་གེ་རྣམས་ཀྱིས་ཀྱང་ཀུན་དུ་གང་བ་ཡིན་ནོ། །ནགས་དེ་ཡང་ཐམས་
ཅད་ནས་དཀར་པོར་ཀུན་དུ་སྣང་བ་ཡིན་ཏེ། རྟག་པར་རབ་ཏུ་དགའ་བར་གྱུར་པའི་བྱ་རྣམས་ཀྱིས་ཀྱང་ཀུན་དུ་གང་བ་རྣམས་ནི་ཇི་ལྟར་སྔར་བཤད་པ་བཞིན་ནོ། །རི་དགས་ཀྱི་དགྲ་དུལ་བའི་རི་བོའི་ནགས་གསུམ་པ་ནི་
མྱོས་པའི་སྒོ་ང་ལས་སྐྱེས་པའི་ངོས་ཞེས་བྱ་བ་སྟེ། དེ་ལ་ནགས་དེ་ན་ནི་བག་མེད་པས་རབ་ཏུ་དགའ་བའི་བྱ་རྣམས་ཡོད་དོ། །ནགས་དེའི་ཉེ་འཁོར་རྣམས་ན་ཡང་སྐྱེས་བུ་གང་དང་གང་དག་རབ་ཏུ་གནས་པར་གྱུར་པ་དེ་དག་

66-1-220a

རྣམས་ཀྱང་རྟག་ཏུ་དུལ་བ་ཞེས་བྱ་བའི་མིང་དུ་འགྱུར་རོ། །སྐྱེས་བུ་དག་རྟག་ཏུ་མྱོས་པ་སྒོ་ང་ལས་སྐྱེས་པའི་ནགས་ན་རབ་ཏུ་དགའ་བར་གྱུར་པ་ཡིན་ཏེ། རང་འདོད་པ་བཞིན་དུ་གྱུར་པའི་གཟི་བརྗིད་ཀྱིས་ལྷའི་
ཚོགས་རྣམས་དང་འདྲ་བ་ཡིན་ནོ། །རི་དགས་ཀྱི་དགྲ་དུལ་བའི་རི་ལ་ནགས་བཞི་པ་ནི་མནན་ན་ནེམ་ལ་བཏེག་ན་འཕར་བ་ཞེས་བྱ་བ་སྟེ། ནེམ་པ་དང་འབར་བའི་ནགས་དེ་ན་ལྗོན་ཤིང་གང་དག་གསེར་དང་གསེར་རབ་ཏུ་འབར་
བ་དང་། བི་དྲུ་མའི་རང་བཞིན་ཡིན་པ་རྣམས་ལ་ནི་མ་བཅིངས་པའི་བྱ་རྣམས་ཀྱིས་རྟག་ཏུ་གང་བ་ཡིན་ནོ། །ནེམ་ལ་འཕར་བའི་ནགས་ནི་དཔག་ཚད་ལྔ་ཡིན་ནོ། །ནགས་དེའི་ཉེ་འཁོར་རྣམས་ན་སྐྱེས་བུ་གང་དག་རབ་ཏུ་
གནས་པར་གྱུར་པ་དེ་དག་རྣམས་ཀྱི་ཐ་སྙད་ནི་རབ་ཏུ་ཕལ་ཆེ་བར་མྱོས་པ་ཞེས་བྱ་བའི་ཡིན་ནོ། །རབ་ཏུ་ཕལ་ཆེ་བར་མྱོས་པའི་སྐྱེས་བུ་རྣམས་གལ་ཏེ་ནེམ་ཞིང་འཕར་བར་གྱུར་པའི་ནགས་སུ་རྩེ་དགའ་བར་བྱེད་ན། ས་དེ་དག་ནི་ཀཱ་ཤཱི་ལྟར་
དཀར་ཞིང་འཇམ་པ་དང་ཤིང་བལ་འདྲ་བར་གཞི་མནན་ན་ནེམ་ལ་བཏེག་ན་འཕར་བ་ཡིན་ནོ། །ཇི་སྐད་དུ་བརྗོད་པའི་མེ་ཏོག་དང་། འབྲས་བུ་དང་། ལྗོན་ཤིང་དང་། པད་མ་དང་། པད་མའི་རྫིང་བུ་དང་། སྒྲ་སྒྲོགས་པའི་བུང་བའི་ཚོགས་ཀྱིས་
གང་བར་གྱུར་པ་རྣམས་ནི་ནེམ་ཞིང་འཕར་བའི་ནགས་དེ་ལ་ཡང་སྔར་གྱི་བཞིན་ནོ། །དེས་བྱང་ཕྱོགས་སྒྲ་མི་སྙན་གྱི་རི་གསུམ་པ་ན་རི་དགས་ཀྱི་སྒྲ་དུལ་བ་ལེགས་པར་མཐོང་བར་གྱུར་པས་ཀྱང་ཡང་དག་པ་ཇི་ལྟ་བར་ལུས་སོ་སོར་རིག་པར་
བྱེད་དེ་སྔར་བཞིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། གཞན་ཡང་བྱང་ཕྱོགས་སྒྲ་མི་སྙན་ན་དགའ་བར་གྱུར་པ་གཞན་ཅི་དམིགས་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་
ལྷའི་མིག་གིས་མཐོང་བར་གྱུར་པ། སྤྲིན་དཀར་པོ་རྒྱུ་བ་ཞེས་བྱ་བའི་རི་བོ་ཉེ་འཁོར་དུ་དཔག་ཚད་སྟོང་ཡིན་ནོ། །ཤིན་དུ་དཀར་བར་གྱུར་པའི་དངུལ་གྱི་རང་བཞིན་ཡིན་ཏེ། རི་གང་གི་འོད་ཟེར་གྱིས་ཟླ་བའི་འོད་ཀྱང་གསལ་བར་མི་འགྱུར་རོ། །

66-1-220b

དཔེར་ན་འཛམ་བུའི་གླིང་དུ་ཟླ་བ་ཤར་བར་གྱུར་པ་ན་གཟའ་དང་། རྒྱུ་སྐར་དང་། སྐར་ཕྲན་གྱི་འོད་ཀྱང་མེད་པར་འགྱུར་བ་དེ་བཞིན་དུ་སྤྲིན་དཀར་པོ་རྒྱུ་བའི་རིས་ཀྱང་ཟླ་བའི་འོད་མི་གསལ་བར་བྱེད་དོ། །སྤྲིན་དཀར་པོ་རྒྱུ་བའི་རི་བོའི་དྲུང་
དུ་ཡང་སྐྱེས་བུ་གང་དག་རབ་ཏུ་གནས་པར་བྱེད་པ་དེ་དག་རྣམས་ནི་མེ་ཏོག་གི་ཕྲེང་བ་གྱོན་པ་ཞེས་བྱ་བའི་མིང་དུ་འགྱུར་རོ། །སྐྱེས་ནས་སྤྲིན་དཀར་པོ་རྒྱུ་བའི་རི་བོ་ལ་རྟག་ཏུ་རྩེ་བ་ལ་ཆེད་ཆེར་བྱེད་པ་རྣམས་མེ་ཏོག་གི་ཟེ་འབྲུ་གྱོན་པར་
གྱུར་ནས་རྟག་ཏུ་གླུས་དགའ་བར་གྱུར་པ་དང་། རྒྱུན་དུ་ཡང་པད་མའི་ཚལ་རྣམས་ན་མངོན་པར་དགའ་བར་བྱེད་དོ། །སྡུག་གུ་དང་བཅས་པར་གྱུར་པ་དང་། རབ་ཏུ་གཡོ་བར་བྱེད་པ་དང་། རྣམ་པར་འཁྲུལ་པ་དང་། རྣམ་པར་འཁོར་བ་
དང་། རྟག་ཏུ་ཀུན་ནས་འཆིང་བ་མེད་པ་རྒྱགས་པ་དང་། རྟག་ཏུ་མྱ་ངན་དང་རྣམ་པར་བྲལ་བ་རྣམས་ཡིན་ནོ། །གཞན་ཡང་སྤྲིན་དཀར་པོ་རྒྱུ་བའི་རི་དེ་ལ་ནགས་འདི་དག་རྣམས་ཡོད་དོ། །འདི་ལྟ་སྟེ། རྔ་སྒྲ་འབྱིན་པའི་སྒྲ་དང་། 
ངང་ངུར་རྣམས་ཀྱིས་རྗེས་སུ་བསྒྲགས་པར་བྱེད་པ་དང་། ཡིད་ཀྱི་རྗེས་སུ་འཐུན་པ་དང་། ཆུ་སྒྲ་ཀུན་ནས་སྒྲོགས་པ་དང་རྣམས་སོ། །རྔ་སྒྲ་ཀུན་ནས་སྒྲོགས་པའི་ནང་དུ་ཕྲེང་བ་ཐོགས་པའི་ལྷ་རྣམས་ཀྱིས་རྔ་སྒྲ་དག་
སྒྲོགས་པར་བྱེད་དོ། །སྒྲ་སྙན་པར་གྱུར་པ་ནི་དཔེར་ན་འཛམ་བུའི་གླིང་གི་པི་ཝང་དང་། གླིང་བུ་དང་། རྔ་པ་ཎ་བ་དང་། དུང་གི་སྒྲ་ལ་ཆགས་པར་འགྱུར་བ་ཡིན་ལ། དེ་བཞིན་དུ་རྔ་སྒྲ་ཀུན་ནས་སྒྲོགས་པའི་ནགས་ན་ལྷ་
རྣམས་རྔ་སྒྲ་སྒྲོགས་པར་བྱེད་པ་ཡིན་ནོ། །དེ་དག་རྣམས་ལ་ནི་འཛམ་བུའི་གླིང་གི་གླུ་མཁན་རྣམས་ཀྱིས་བཅུ་དྲུག་གི་ཆར་ཡང་མི་ཆོག་གོ། །ཇི་སྐད་དུ་བཤད་པར་གྱུར་པའི་རི་དགས་དང་། བྱ་དང་། པད་མ་དང་། ལྗོན་
ཤིང་དང་། ནགས་དང་ཉེ་བའི་ནགས་དང་། ཁྲུས་ཀྱི་རྫིང་བུ་དང་། མཚེའུ་དང་། གསེར་དང་དངུལ་གྱི་ས་གཞིའི་ཆ་རྣམས་དང་། འབབ་ཆུ་དང་རྣམས་ཀྱི་ཡོན་ཏན་རྣམས་ནི་དེ་ལྟ་དེ་ལྟར་གྱིས་རྔ་སྒྲ་སྒྲོགས་པའི་ནགས་ན་ཡོན་

66-1-221a

ཏན་རྣམས་ཐམས་ཅད་ཀྱང་ཡོད་པ་ནི་སྔར་བཞིན་ནོ། །ཕྲེང་བ་གྱོན་པར་གྱུར་པའི་སྐྱེས་བུ་རྣམས་ནི་རྔ་སྒྲ་ཀུན་ནས་སྒྲོགས་པར་བྱེད་པའི་གདངས་ཀྱིས་རྟག་ཏུ་འདོད་པ་རྣམས་ལ་རྣམ་པར་ཆགས་པ་ཡིན་
ཏེ། དཔེར་ན་གཞོང་པ་ཐོགས་པའི་ལྷ་རྣམས་ཀྱི་དགའ་བའི་ཚལ་གྱི་ཉེ་བའི་ནགས་བཞིན་དུ་རྟག་ཏུ་འདོད་པའི་སྒྲ་དང་རོ་དང་གཟུགས་དང་དྲི་རྣམས་སྤྱོད་པར་བྱེད་དོ། །ནགས་གཉིས་པ་ངང་ངུར་རྣམས་ཀྱིས་ཡོངས་
སུ་སྒྲོགས་པར་བྱེད་པ་ཞེས་བྱ་བ་སྟེ། ནགས་དེ་ལ་ནི་ངང་ངུར་རྣམས་ཀྱིས་ཡོངས་སུ་སྒྲོགས་པར་བྱེད་པ་དང་པད་མའི་རྫིང་བུ་རྣམས་ཀྱང་བརྒྱ་ཕྲག་རྣམས་དེ་ནས་སྟོང་ཕྲག་རྣམས་ཡོད་དོ། །དེ་དག་རྣམས་ཀྱི་ནི་མིང་ཡང་བརྗོད་
ཅིང་གཟུང་བར་མི་ནུས་སོ། །ངང་ངུར་རྣམས་ཀྱིས་རྗེས་སུ་སྒྲོགས་པའི་ནགས་ལ་རི་དགས་ཀྱི་རིགས་འདི་དག་རྣམས་ཡོད་པ་ནི་འདི་ལྟ་སྟེ། རྣམ་པར་བཀྲ་བའི་བཻ་ནཱཿདང་། རིན་པོ་ཆེ་སྣ་བདུན་གྱིས་བརྒྱན་པའི་ལུས་འདུལ་
བ་ཞེས་བྱ་བའི་རི་དགས་དང་། ཀུ་རང་གཱ་དང་། མ་ར་ཀཱ་དང་། མར་ཀཱ་འདོད་པ་དང་། ཤིན་དུ་དགའ་བ་དང་། སམ་བཱ་བི་ནཿདང་། རྩེ་མོ་གཡོ་བ་རྣམས་འཛིན་པར་བྱེད་པ་དང་། ཁོར་ཡུག་གི་མིག་དང་། ཀར་ཀེ་ཏའི་ལྟེ་བ་དང་། 
གསེར་གྱི་རྭ་དང་། ལོགས་དངུལ་གྱི་ལོགས་དང་། རླུང་གི་ཤུགས་དང་། ཤིང་གི་རྩ་བ་ན་རྒྱུ་བ་དང་། ཆུའི་སྒྲ་འབབ་པར་འགྲོ་བར་བྱེད་པ་དང་། ནགས་ཀྱི་ཕྲེང་བར་བགྲང་བ་དང་། བི་དྲུ་མའི་ལུས་དང་། ལགྣའི་ལོགས་དང་ལྟོ་ལྟིར་
བ་དང་། བར་པཱོ་ཏཱཿདང་། ཤང་ཤཱ་རཱ་ཎཱཿདང་། ལྤགས་པ་ནགས་པོ་དང་། རྩ་བའི་འོད་དང་། ལང་ཚོ་ལ་བབ་པ་དང་། ཤིན་དུ་འཇམ་པ་དང་། དཀར་པོའི་ཚོགས་དང་རྣམས་ཡིན་ཏེ། དེ་དག་རྣམས་ནི་རི་དགས་ཀྱི་རིགས་ཉི་ཤུ་རྩ་
ལྔ་ཡིན་ནོ། །ཕྲེང་བ་གྱོན་པའི་སྐྱེས་བུ་རྣམས་དང་ལྷན་ཅིག་ཏུ་རྩེ་དགའ་བར་བྱེད་དེ། རང་གི་ལས་དང་འདྲ་བར་གྱུར་པ་རྣམ་པ་སྣ་ཚོགས་པ་རྣམས་ཉམས་སུ་མྱོང་བར་བྱེད་དོ། །སྤྲིན་དཀར་པོ་རྒྱུ་བའི་རི་ལ་ཡིད་ཀྱི་རྗེས་

66-1-221b

སུ་འཐུན་པ་ཞེས་བྱ་བའི་ནགས་ཡོད་དོ། །ནགས་དེ་ནས་ནི་ཕྲེང་བ་གྱོན་པའི་མི་རྣམས་ཀྱི་ཡིད་ཀྱི་རྗེས་སུ་འཐུན་པར་གྱུར་པ་གང་དག་ཡིན་པ་དེ་དག་རྣམས་ཉིད་ལྗོན་ཤིང་རྣམས་ལས་འཐོབ་པར་འགྱུར་རོ། །ནགས་
དང་ཉེ་བའི་ནགས་རྣམས་གང་དག་ཡིན་པ་ཐམས་ཅད་ཀྱང་དགའ་བ་རྣམས་ཡིན་ཏེ་སྔར་བཞིན་ནོ། །སྤྲིན་དཀར་པོ་རྒྱུ་བའི་རི་བོ་ལ་ནགས་བཞི་པ་ཆུའི་སྒྲ་ཀུན་ནས་སྒྲོགས་པ་ཞེས་བྱ་བ་ཡོད་དོ། །དེ་ལ་ནི་
རྣམ་པ་སྣ་ཚོགས་པའི་གཟུགས་འཛིན་པར་གྱུར་པའི་རིག་པ་འཛིན་པ་རྣམས་རྩེ་བར་བྱེད་དོ། །ཡང་གང་གི་ཚེ་རྡུལ་གྱིས་གནོད་པར་གྱུར་པ་ན་དེའི་ཚེ་རང་འདོད་པའི་ཆ་བྱད་ཀྱིས་ཆུར་འཇུག་སྟེ། ཆུ་ལ་ཀུན་དུའཕྱོ་
བར་བྱེད་དོ། །དེ་ལ་རིག་པ་འཛིན་པའི་རིགས་འདི་དག་རྣམས་ཡོད་དེ་འདི་ལྟ་སྟེ། བདེ་བ་ལ་ཆགས་པའི་ཤུགས་དང་། འགོར་བ་མེད་པར་འགྲོ་བ་དང་། ནམ་མཁའི་སྟོབས་དང་། སྤྲིན་རབ་ཏུ་འབྱེད་པར་
བྱེད་པ་དང་། ཉི་མའི་ལམ་དུ་ལེགས་པར་རྒྱུ་བ་དང་། རི་དགས་ཀྱི་འགྲོས་དང་། བཽ་རྭཿདང་། ཤིན་དུ་དུད་པ་དང་། ཀུ་ཤི་ཀཱཿདང་། རི་རྣམས་ལ་ཀུན་དུ་ཆགས་པ་དང་། རྟག་ཏུ་མྱོས་པའི་དྲི་དང་། ནམ་མཁའ་ལ་
རྒྱུ་བར་བྱེད་པ་དང་། མཱ་ཥཱ་ཌའི་ནང་ན་གནས་པ་དང་། ཙི་མི་ཤའི་ཕུག་ན་རྒྱུ་བ་དང་། རྟག་པའི་ཤུགས་དང་། ངང་པའི་ཤིང་རྟ་དང་། གླང་པོའི་ཤིང་རྟ་དང་། གློག་འཁྱུག་པར་བྱེད་པ་དང་། མ་ལ་ཡ་ན་གནས་པ་དང་། ཀེ་
ཏ་ཀའི་ཕྲེང་བ་མཆོག་དང་ལྡན་པ་དང་། བུད་མེད་ལ་སྲེད་པ་དང་། ཆང་པ་རྣམས་ཀྱིས་བཏུང་བ་དང་། རི་རབ་ལྷུན་པོ་ལ་གནས་པ་དང་། ཀུན་དུ་ཁྱབ་པའི་ཞེན་པ་དང་། རྟག་ཏུ་དགའ་བ་དང་། མེ་ཏོག་གི་ཕྲེང་བ་
འཕྱང་བ་དང་། ས་གཞི་ལ་རྒྱུ་བ་དང་། སྔགས་གསང་བ་པ་དང་རྣམས་ཏེ། དེ་དག་ནི་རིག་པ་འཛིན་པའི་རིགས་སུམ་བཅུ་རྩ་གཉིས་ཡིན་ལ། སྤྲིན་དཀར་པོ་རྒྱུ་བའི་རིའི་ཆུ་སྒྲ་ནས་སྒྲོགས་པའི་ནགས་དེ་ཉིད་ལ་གནས་

66-1-222a

ནས་དགའ་བར་བྱེད་དོ། །རྣམ་པ་སྣ་ཚོགས་པའི་རྒྱན་རྣམས་ཀྱིས་རབ་ཏུ་བརྒྱན་ཅིང་རྣམ་པ་སྣ་ཚོགས་པའི་རྒོད་པ་དང་འགྱིང་བ་དང་རྩེ་བ་དང་ཀུན་དུ་སྤྱོད་པར་ཡང་བྱེད་དེ། དེའི་ལས་ཀྱི་མཐུས་ཡིན་ནོ། །དེ་འདྲ་བར་
གྱུར་པའི་བུད་མེད་དང་ལྷན་ཅིག་ཏུ་ཞེན་པར་བྱེད་དོ། །དེ་ལྟར་སྤྲིན་དཀར་པོ་འཛིན་པའི་ནགས་དང་ཉེ་བའི་ནགས་དང་བཅས་པ་རྣམས་ཐམས་ཅད་ཀྱང་ཡང་དག་པ་ཇི་ལྟ་བ་བཞིན་དུ་སོ་སོར་རིག་པར་བྱེད་དེ། སྤྲིན་དཀར་པོ་འཛིན་
པའི་རི་བོ་འདི་ལ་གཅིག་ཏུ་ངེས་པར་གྱུར་པ་དང་། རྟག་པ་དང་། བརྟན་པ་དང་། ཐེར་ཟུག་དང་། མྱ་ངན་ལས་འདས་པར་འགྲོ་བ་ཐོབ་པའི་བདེ་བ་ཡོད་དམ་ཞེ་ན། དེས་རྟག་པ་དང་། བརྟན་པ་དང་། ཐེར་ཟུག་དང་། ཡོངས་སུ་མི་འགྱུར་
བའི་ཆོས་ཅན་དུ་གྱུར་པའི་བདེ་བ་ནི་གཅིག་ཀྱང་མ་མཐོང་སྟེ་ཇི་ལྟར་ཉི་མ་ལ་མུན་པ་བཞིན་ནོ། །དེ་ལྟར་འཇིག་རྟེན་པའི་བདེ་བ་རྣམས་ཀྱང་མྱང་བར་མངར་བ་དང་། རྣམ་པར་སྨིན་པ་རྩུབ་པ་དང་། ཀུན་ནས་ཉོན་མོངས་པ་ཅན་
དུ་གྱུར་པ་དང་། སྲེད་པ་ལས་ངེས་པར་འབྱུང་བ་མ་ཡིན་པ་དང་། འབྲས་བུ་རྩུབ་པ་ཡིན་ཏེ། ཀིམ་པ་ཀའི་འབྲས་བུ་འདྲ་བ་དུག་དང་མཚོན་དང་མེ་དང་མཚུངས་པར་གྱུར་པ་དང་། དུས་དེ་ཙམ་དུ་དགའ་བར་གྱུར་པ་ཡིན་ནོ། །
གར་མཁན་གྱི་ཚོན་རྩི་བཞིན་དུ་ཡུད་ཙམ་ཅིག་དགའ་བ་ཡིན་ནོ། །གློག་དང་མཚུངས་པར་ཤིན་དུ་གཡོ་བ་ཡིན་ནོ། །རིའི་འབབ་ཆུའི་ཤུགས་དང་འདྲ་བ་དང་། ཉེ་བར་འཚེ་བ་དང་བཅས་པ་དང་། དྲི་ཟའི་གྲོང་
ཁྱེར་དང་མཚུངས་པར་སླུ་བར་བྱེད་པ་དང་། སྐྱེ་བོ་རྣམས་ཐམས་ཅད་ཀྱང་རྣམ་པར་འཇོམས་པར་བྱེད་པ་དང་། ཤིང་ཏོག་རྣམས་ཐམས་ཅད་བཞིན་དུ་ཅི་ནས་ཀྱང་ལྟུང་བར་འགྱུར་བར་མཚུངས་པ་དང་། དུག་
གི་ཟས་དང་འདྲ་བར་ཡོངས་སུ་སྨིན་པར་འགྱུར་བ་དང་། སྤུ་གྲིའི་སོའི་མྱང་བ་བཞིན་དུ་ཤིན་དུ་རྣོ་བ་དང་། ལན་བརྒྱ་སྟོང་དུ་མ་རྣམས་སུ་ཡང་སླུ་བར་བྱེད་པ་ཡིན་པ་དང་། ཆུ་ཀླུང་གི་འགྲམ་གྱི་ཤིང་བཞིན་དུ་ངེས་པ་

66-1-222b

ཁོ་ནར་ལྟུང་བར་འགྱུར་བར་མཚུངས་པ་ཡིན་ནོ། །རྣམ་པ་དེ་ལྟ་བུའི་འདོད་པ་རྣམས་ལ་ཀུན་དུ་བལྟས་པར་གྱུར་ནས་རྣལ་འབྱོར་སྤྱོད་པ་པ་ངེས་པར་སྐྱོ་བ་སྐྱེ་བར་འགྱུར་རོ། །ཡང་ཇི་ལྟ་བ་བཞིན་དུ་མཐོང་བར་གྱུར་པ་དང་། 
ཚུལ་བཞིན་ཡིད་ལ་བྱེད་པ་མཐོང་བ་དང་ལྡན་ཞིང་རྣམ་པར་བྱང་བར་གྱུར་པའི་མཐོང་བ་དང་ཡང་དག་པར་ལྡན་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། 
བྱང་ཕྱོགས་སྒྲ་མི་སྙན་ན་དགའ་བར་གྱུར་པའི་རི་དགས་ཀྱི་རིགས་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མཐོ་བར་བརྩེགས་པ་ཞེས་བྱ་བའི་རི་
དཔག་ཚད་སྟོང་ཡོད་པ་ཡིན་ཏེ། ཉེ་འཁོར་རྣམས་དགའ་བར་གྱུར་པ་དང་འོད་ཀྱི་ཕྲེང་བ་དང་ལྡན་པ་ཡིན་ནོ། །དེ་ལ་ཤིང་གི་རིགས་ནི་འདི་དག་རྣམས་ཡོད་དེ་འདི་ལྟ་སྟེ། བཻ་དཱུརྱའི་འདབ་མ་དང་། གསེར་
འབར་བའི་སྡོང་བུ་དང་། བྱི་རུའི་འདབ་མ་ཅན་རྣམས་དང་། དངུལ་གྱི་སྡོང་བུ་དང་། གསེར་གྱི་འདབ་མ་དང་ལྡན་པ་མར་མེའི་གོང་བུ་རྩ་བརྒྱད་འདྲ་བ་རྣམས་ཡིན་ནོ། །དེ་རྣམ་པ་དུ་མ་དང་ཤིང་གི་རིགས་
གཞན་དག་རྣམས་དང་། པད་མའི་རིགས་རྣམས་དང་། བསྐྱེད་མོས་ཚལ་གྱི་རིགས་རྣམས་དང་། རིའི་རྩེ་མོའི་རིགས་རྣམ་པ་དུ་མ་རྣམས་ཀྱང་སྔར་བཞིན་ནོ། །མཐོ་བར་བརྩེགས་པའི་ཡན་ལག་གི་
བརྩེགས་པའི་རྒྱར་ནི་དཔག་ཚད་ཉིས་བརྒྱའོ། །དེའི་བརྩེགས་པ་གཅིག་ལ་རི་རབ་ལྷུན་པོ་ལ་གནས་པའི་ཕྲེང་བ་ཐོགས་པ་ཞེས་བྱ་བའི་ལྷ་དང་པི་ཝང་གསུམ་པ་ཞེས་བྱ་བའི་ལྷ་རྣམས་རྩེ་དགའ་བར་བྱེད་དོ། །པི་ཝང་
གསུམ་པའི་ལྷུ་ནི་ལྷན་པོའི་བང་རིམ་བཏང་བར་གྱུར་ནས་མཐོ་བར་བརྩེགས་པའི་རི་ལ་རྩེ་དགའ་བར་བྱེད་དེ། རི་བོ་དེ་དགའ་བར་གྱུར་པའི་ཕྱིར་རོ། །མཐོན་པོ་དེའི་ཡན་ལག་གི་བརྩེགས་པའི་ཉེ་འཁོར་རྣམས་ནི་རིན་པོ་ཆེའི་རང་བཞིན་ཡིན་ཏེ། འཕང་

66-1-223a

དུ་ནི་དཔག་ཚད་ལྔ་བཅུ་ཡིན་ནོ། །བརྩེག་མ་ལྔ་ཡོད་པའི་ཡན་ལག་གི་བརྩེགས་པའི་རྒྱར་ནི་དཔག་ཚད་ཉིས་བརྒྱ་ཡིན་ནོ། །དེ་ལ་བརྩེག་མ་གཅིག་ནི་གསེར་ལ་ནོར་བུའི་ཁྲོད་ཡིན་ཏེ། རིན་པོ་ཆེ་རྣམས་
ཐམས་ཅད་ཀྱང་ཁྲོད་དེ་ལས་སྐྱེ་བར་འགྱུར་རོ། །འདི་ལྟ་སྟེ། བི་དྲུ་མ་དང་། བྱི་རུ་དང་། བཻ་ཌཱུརྱ་དང་། མུ་སཱ་ར་གལྦ་དང་། ཤེལ་དང་། པདྨ་རཱ་ག་དང་། སུ་ཀུ་མཱ་རི་ཀཱ་དང་། ཨིནྡྷ་ནཱི་ལ་དང་། ནཱི་ལ་ཆེན་པོ་དང་། མ་བཏགས་པའི་
གོས་ཀྱང་འབྱུང་ངོ་། །གཉིས་པ་ནི་དངུལ་གྱི་རང་བཞིན་ཡིན་ཏེ། དངུལ་གྱི་ལྗོན་ཤིང་རྣམས་ཕུན་སུམ་ཚོགས་པ་གོ་ཤཱིཪྵ་ཞེས་བྱ་བའི་ཙན་དན་སྐྱེ་བ་ཡིན་ནོ། །ལྷ་དང་ལྷ་མ་ཡིན་གྱི་འཁྲུག་པ་གང་ཡིན་པ་ལྷ་རྣམས་དང་ལྷ་མ་
ཡིན་རྣམས་ལྷན་ཅིག་ཏུ་གཡུལ་བཀྱེ་བར་གྱུར་པས་མཚོན་གྱིས་རྨས་པ་རྣམས་དང་ལྷན་ཅིག་ཏུ་འགྱེལ་བར་གྱུར་པ་རྣམས་ཉིད་ཀྱི་ལྷ་རྣམས་ཀྱི་ལུས་ནད་མེད་པར་བྱེད་པ་ཡིན་ནོ། ། གོ་ཤཱིཪྵ་པ་ཞེས་བྱ་བ་ནི་རི་དེའི་ལྷན་ཅིག་
སྐྱེས་པའི་མིང་ཡིན་ནོ། །དེའི་ཙན་དན་ཡང་གོ་ཤཱིཪྵ་པའི་མིང་ཡིན་ནོ། །རིའི་རྩེ་མོ་གསུམ་པ་ནི་ལྷའི་བུ་མོ་དགའ་བ་ཞེས་བྱ་བ་ཡིན་ཏེ། གང་ལ་ལྷའི་བུ་མོ་རྣམས་རྩེ་དགའ་བར་བྱེད་པ། ནགས་དང་ཉེ་བའི་ནགས་རྣམས་
དང་། གསེར་དང་དངུལ་དང་བཻ་ཌཱུརྱ་རྣམས་ཀྱིས་ཟེ་འབྲུ་དང་གཞི་འཇམ་པོ་རྣམས་ལ་རྟག་ཏུ་རྟེན་པར་བྱེད་པ་དང་། རབ་ཏུ་དགའ་བར་གྱུར་པས་དགའ་བ་དང་རོལ་པ་དང་། རྩེ་བར་བྱེད་པས་རྣམ་པར་གྱུར་པའི་དགའ་
བ་རྣམས་ལ་སྲེད་པས་རྣམ་པར་བསླད་པར་གྱུར་པའི་བྱིས་པ་སོ་སོའི་སྐྱེ་བོ་རྣམས་དམ་པའི་ཆོས་ཉན་པ་ལ་ཁ་ཕྱིར་ཕྱོགས་པར་འགྱུར་ཞིང་རྟག་ཏུ་འདོད་པ་ལ་རྣམ་པར་ཆགས་པར་གྱུར་པས་རྭ་དེའི་རྩེ་ལ་རྟག་ཏུ་
འཁོད་པར་བྱེད་དོ། །རྭ་བཞི་པ་ནི་གང་ལ་རྒྱལ་པོ་ཆེན་པོ་བཞི་རྒུན་འབྲུའི་ནགས་དང་ཉེ་བའི་ནགས་ལ་རྩེ་དགའ་བར་བྱེད་པ་ཡིན་ནོ། །དེ་ལ་ཡང་རྟག་ཏུ་མྱོས་པའི་རི་དགས་དང་བྱ་དང་གསང་བ་པའི་ལྷ་དང་རིག་པ་འཛིན་པ་

66-1-223b

དང་མི་རྣམས་དང་ཉེ་འཁོར་རྣམས་ན་ཡང་རྒུན་འབྲུའི་ཆུ་ཀླུང་རྣམས་རབ་ཏུ་འབབ་པ་ཡིན་ནོ། །ཁ་ཅིག་ནི་སྦྲང་རྩིའི་རོ་ཡིན་ནོ། །ཁ་ཅིག་ནི་བདུག་པ་མ་ཡིན་པ་དང་ལྡན་པའི་རོ་ཡིན་ནོ། །ཁ་ཅིག་ནི་འདྲེས་པར་གྱུར་པའི་
རོ་སྟེ། རྭ་དེ་ལ་ནི་ཆུ་ཀླུང་གི་འགྲམ་རྣམས་ལས་གསེར་ས་ལེ་སྦྲམ་སྐྱེའོ། །བ་ལང་དང་མ་ཧེ་ཥ་དང་། ཕག་པ་དང་། གླང་པོ་ཆེ་དང་། ལྕེ་སྤྱང་དང་། རྔ་མོ་དང་། ཕྱུགས་དང་། སྤྱང་གུ་དང་། ཀླུ་དང་། གུང་དང་། སེང་གེ་དང་། དྲེད་དང་། ཝ་དང་
བྱ་དང་། དེ་དང་དེ་དག་རྣམས་དང་འདྲ་བར་གྱུར་པའི་གཟུགས་རྣམས་དང་། ཁ་དོག་དུ་མར་གྱུར་པའི་རིན་པོ་ཆེའི་རང་བཞིན་ཕལ་ཆེ་བ་རྣམས་མཐོང་ངོ་། །གང་གི་ཕྱིར་གང་ལ་གསེར་ས་ལེ་སྦྲམ་རྣམས་སྐྱེ་བར་འགྱུར་བ་ནི་རིའི་རྩེ་མོ་དེའི་
ཀླས་གསེར་ས་ལེ་སྦྲམ་འདི་དག་རྣམས་ཡིན་ནོ། །བརྩེག་མ་ལྔ་པ་གང་ལ་གསེར་གྱི་འདབ་མ་དང་། བཻ་ཌཱུརྱའི་ཡུ་བ་ཅན་ཤིན་དུ་འཇམ་པར་གྱུར་པའི་པདྨ་རྣམས་སྐྱེའོ། །ཉེ་འཁོར་ཀུན་ནས་ཡང་བཻ་ཌཱུརྱའི་ལྗོན་ཤིང་རྣམས་
ཀྱིས་གང་བ་ཡིན་ནོ། །དེ་ལ་པདྨའི་རྫིང་བུ་འདི་དག་རྣམས་ཡོད་དོ། །འདི་ལྟ་སྟེ། ཀུན་དགའ་ར་བའི་རྒྱས་པ་དང་། པད་མས་ཁྱབ་པར་གྱུར་པ་དང་། པད་མ་དུས་སུ་རྒྱུ་བ་དང་། པདྨ་དམར་པོས་ཀུན་ཏུ་ཁྱབ་པ་དང་། ཉི་མ་སྟེན་པ་དང་། 
གཞི་འཇམ་པ་དང་། མི་གཡོ་བ་དང་། ལྗོན་ཤིང་དང་། ཟབ་པ་དང་། མེ་ཏོག་དྲི་ཞིམ་པ་འབྱུང་བ་དང་། བརྟན་པའི་ཆུ་དང་སྟེ། དེ་དག་རྣམས་ནི་པདྨའི་རྫིང་བུ་བཅུ་གཅིག་ཡིན་ནོ། །རྭ་དེའི་མིང་ཡང་པད་མས་ཀུན་དུ་ཁྱབ་པ་ཞེས་
བྱ་བ་ཡིན་ནོ། །ཆུ་ཀླུང་རྣམས་ཀྱང་རྣམ་པ་སྣ་ཚོགས་པའི་དྲི་དང་རོས་ལེགས་པར་གང་བར་གྱུར་པ་རྣམས་ཉེ་འཁོར་རྣམས་ན་འབབ་སྟེ་རོ་དྲུག་དང་ལྡན་པ་ཡིན་ནོ། །འདོད་པའི་ལྗོན་ཤིང་རྣམས་ཐམས་ཅད་དང་། 
ཉེ་བར་སྐྱེས་པ་དང་། ལྗོན་ཤིང་དང་། མེ་ཏོག་དང་། ཆུ་བོ་དང་། ཁྲུས་ཀྱི་རྫིང་བུ་དང་ལྡན་པ་རྣམས་ནི་སྔ་མ་བཞིན་ནོ། །དེས་རྭ་ལྔ་པ་ལ་ཀུན་དུ་བལྟས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ཕྱི་རོལ་

66-1-224a

གྱི་ལུས་ལ་ཀུན་ནས་ལྟ་བར་བྱེད་དོ། །དེས་བྱང་ཕྱོགས་སྒྲ་མི་སྙན་པ་རྣམས་ཀྱི་རི་ལྔ་པ་མཐོ་བར་བརྩེགས་པ་ཞེས་བྱ་བ་ལ་མངོན་པར་བལྟས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ཕྱི་རོལ་གྱི་
ལུས་སོ་སོར་རེག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ལས་དང་ཆོས་དག་གི་རྣམ་པར་སྨིན་པའི་དབང་དུ་བྱས་ནས་མཐོན་པོར་བརྩེགས་པའི་རི་ལ་ཀུན་དུ་ལྟ་སྟེ། སེམས་ཅན་འདི་དག་རྣམས་ནི་ལས་ཀྱི་
ཆོས་ཀྱི་རྣམ་པར་སྨིན་པ་ཅན་ཡིན་ཏེ། རང་གི་ལས་ཀྱི་བགོ་སྐལ་ལ་སྤྱོད་པར་བྱེད་པ་དང་། རང་གི་ལས་རྣམས་བརྟན་པར་བྱས་པ་དང་། རང་གིས་ལེགས་པར་བྱས་པ་རྣམས་ཀྱིས་ནི་འདིར་སྐྱེས་པ་ཡིན་ལ། རང་གི་
ལས་དེ་དག་ཟད་པར་གྱུར་ནས་ངེས་པར་ལྟུང་བར་འགྱུར་ཏེ། མི་དགེ་བའི་ལས་རྣམས་ཀྱིས་ནི་དམྱལ་བ་དང་། ཡི་དགས་དང་། དུད་འགྲོ་རྣམས་སུ་འགྱུར་རོ། །ལེགས་པར་བྱས་པ་རྣམས་ཀྱིས་ནི་ལྷ་དང་མི་རྣམས་ཀྱི་
ནང་དུའོ། །མཐོ་བར་བརྩེགས་པའི་རིའི་ཉེ་འཁོར་ན་གང་དག་གནས་པ་དེ་དག་རྣམས་ནི་བདེ་བ་ལ་དགའ་བ་ཞེས་བྱ་བ་ཡིན་ནོ། །བདེ་བ་ལ་དགའ་བའི་སྐྱེས་བུ་རྣམས་ནི་རྟག་ཏུ་འདོད་པ་ལ་མངོན་པར་དགའ་བ་རྣམས་ཡིན་
ཏེ། རྟག་ཏུ་འདོད་པ་རྣམས་ཀྱིས་ངོམས་པ་མེད་པ་རྣམས་ཡིན་ནོ། །འདི་ལྟར་ཚིགས་སུ་བཅད་པ། མེ་ལ་བུད་ཤིང་རྣམས་དང་ནི། །རྒྱ་མཚོ་ལ་ནི་ཆུ་བོ་ལྟར། །སྲེད་ལྡན་འདོད་པས་ངོམས་པ་མེད། །དེ་ཕྱིར་འདོད་པ་ཞི་བ་
མིན་ཞེས་བྱ་བ་ཡིན་ཏེ། འདི་ན་སེམས་ཅན་འདི་དག་རྣམས་ནི་ངེས་པ་ཁོ་ནར་ངུ་བར་བྱ་བ་ལ་དགའ་བར་བྱེད་པ་ཡིན་པར་རྣལ་འབྱོར་པ་དེས་དྲི་མ་དང་རྣམ་པར་བྲལ་བའི་མིག་གིས་མཐོང་ངོ་། །དེ་དག་རྣམས་ཀྱིས་ནི་
ཤེས་པ་ཡང་མ་ཡིན་ཏེ། འདུས་བྱས་འདི་དག་རྣམས་ཐམས་ཅད་ནི་སྡུག་བསྔལ་གྱི་བདག་ཉིད་ཡིན་ནོ། །ཐམས་ཅད་ཀྱང་འཛད་ཅིང་འགོག་པའི་ཆོས་ཅན་ཡིན་ནོ། །སྙིང་པོ་མེད་པ་དང་སྒྲོན་མ་མེད་པ་ཡིན་ནོ། །འདི་དག་

66-1-224b

རྣམས་ལ་ནི་མཐར་ཐུག་པའི་བདེ་བ་ཡོད་པ་མ་ཡིན་ནོ། །ཤིས་པ་མ་ཡིན་ཞིང་ཞི་བ་ཡང་མ་ཡིན་ནོ། །སེམས་ཅན་འདི་དག་རྣམས་ཐམས་ཅད་ཀྱི་སྲོག་དང་། ལང་ཚོ་དང་། ནད་མེད་པ་དང་། ཕུན་སུམ་ཚོགས་པ་དང་། 
འདི་དག་རྣམས་ཐམས་ཅད་ཀྱང་བདེ་བ་མ་ཡིན་ཞིང་གཙང་བ་མ་ཡིན་ལ་མི་རྟག་པ་བདག་མེད་པ་སྙིང་པོ་མེད་པ་དབུ་བ་རྡོས་པ་དང་ཆུའི་ཆུ་བུར་ལྟ་བུ་ཡིན་ཏེ། གསོན་པ་རྣམས་ནི་ཐམས་ཅད་ཀྱང་འཆི་བའི་མཐར་ཐུག་པར་
འགྱུར་བ་ཡིན་ལ་ཕུན་སུམ་ཚོགས་པ་རྣམས་ཐམས་ཅད་ཀྱང་རྒུད་པའི་མཐར་ཐུག་པར་འགྱུར་བ་ཡིན་ནོ། །གནས་དེ་དག་རྣམས་ནི་དམྱལ་བ་དང་། ཡི་དགས་དང་། དུད་འགྲོ་དང་མི་རྣམས་མི་སླུ་བའི་ཡིན་ཏེ། དཔེར་ན་
ཇི་ལྟར་ཉི་མ་ཤར་བར་གྱུར་པ་དེ་ནི་ངེས་པར་ནུབ་པར་འགྱུར་རོ། །དེ་ཁོ་ན་བཞིན་དུ་སྐྱེས་པ་རྣམས་ནི་ངེས་པར་འཆི་བར་བྱ་བ་ཡིན་ནོ། །ཡང་ཇི་ལྟ་ཇི་ལྟར་ས་གཞི་གཞོན་ཞིང་ལང་ཚོ་ལ་བབ་པར་གྱུར་ན། ལྗོན་ཤིང་
དང་། ནགས་དང་། ཉེ་བའི་ནགས་དང་། ནེའུ་གསིང་དང་བཅས་པར་འགྱུར་རོ། །ས་གཞི་དེ་རྙིངས་པར་གྱུར་ན་ལྗོན་ཤིང་དང་ནགས་དང་ཉེ་བའི་ནགས་དང་། མཚེའུ་དང་། པད་མ་དང་བཅས་པ་རྣམས་ཀྱང་དེ་ལྟར་འགྱུར་རོ།། 
དེ་ཁོ་ན་བཞིན་དུ་སོས་ཀའི་དུས་སུ་ལང་ཚོ་ལ་བབ་པ་རྣམས་སྟོན་གའི་དུས་སུ་རྙིངས་པར་འགྱུར་བ་དང་། གཞོན་པ་རྣམས་ཐམས་ཅད་ཀྱང་རྒས་པའི་མཐར་ཐུག་པར་འགྱུར་བ་འདི་བྱང་ཕྱོགས་སྒྲ་མི་སྙན་པའི་མི་
རྣམས་ཀྱིས་གོ་བ་ཡང་མ་ཡིན་ནོ། །ཡང་ཇི་ལྟ་ཇི་ལྟར་མཚན་མོ་ཆར་བབ་པར་གྱུར་ན་ཆུ་ཀླུང་རྣམས་ཕུན་སུམ་ཚོགས་པར་འགྱུར་ཏེ་ཆར་བབ་པའི་དབང་གིས་ངོས་གཉིས་ཀར་ཡང་མང་དུ་འབབ་པར་འགྱུར་རོ། །
ཕུན་སུམ་ཚོགས་པར་གྱུར་པ་རྣམས་ཀྱང་སྟོན་ག་ཟད་པ་དང་འགྲིབ་པའི་སྒོ་ནས་ཆུ་ཆུང་བར་འགྱུར་རོ། །དེ་ཁོ་ན་བཞིན་དུ་དབྱར་གྱི་མཚན་མོ་ཆར་འབབ་པར་གྱུར་པ་དང་མཚུངས་པ་ནི་ཕུན་སུམ་ཚོགས་པ་རྣམས་ཡིན་ནོ། 

66-1-225a

དབྱར་གྱི་ཆར་འགགས་པར་གྱུར་ནས་སྟོན་གྱི་དུས་ན་ཆུ་ཀླུང་རྣམས་ཟད་ཅིང་འགྲིབ་པའི་སྒོ་དང་མཚུངས་པ་ནི་རྒུད་པ་རྣམས་ཡིན་ནོ། །འདི་ལྟ་སྟེ། ཕྱི་རོལ་གྱི་དངོས་པོ་པད་མ་རྣམས་ཀྱང་སོས་ཀའི་དུས་སུ་རྒྱས་པར་
འགྱུར་ཞིང་ནད་མེད་པ་དང་བུང་བ་རྣམས་ཀྱིས་ཀྱང་སྟེན་པར་བྱེད་དོ། །དགུན་གྱི་དུས་ན་ནི་ཁ་བ་དང་པད་དག་གིས་བུང་བ་རྣམས་ཀྱང་ན་བས་མི་སྟེན་ནོ། །སོས་ཀའི་དུས་ཀྱི་པད་མ་དེ་ཁོ་ན་བཞིན་དུ་ནད་མེད་པ་ཡིན་ནོ། །དགུན་
གྱི་དུས་དང་མཚུངས་པར་གྱུར་པ་ནི་ནད་མེད་པ་མ་ཡིན་པའོ། །དགུན་གྱི་དུས་ན་ནད་མེད་པ་མ་ཡིན་པས་བུང་བ་རྣམས་དང་མཚུངས་པ་ནི་ཕུན་སུམ་ཚོགས་པ་རྣམས་ཡིན་ནོ། །དེ་བཞིན་དུ་སེམས་ཅན་འདི་དག་རྣམས་
ཀྱང་སྲེད་པས་ཤིན་དུ་རྣམ་པར་ཉམས་པར་གྱུར་ནས་བདག་ཉིད་ཀྱི་རྒུད་པ་རྣམས་ནི་གཏན་རིག་པར་མི་འགྱུར་རོ། །དེས་མཐོ་བར་བརྩེགས་པའི་རིའི་ནགས་དང་། ཉེ་བའི་ནགས་དང་། ལྗོན་ཤིང་དང་། འབབ་ཆུ་
དང་། ཁྲུས་ཀྱི་རྫིང་བུ་དང་། ནེའུ་བསིང་དང་། རིག་པ་འཛིན་པ་དང་། རི་དགས་དང་། བྱ་དང་། རི་ཁྲོད་དང་། ཆུ་གཤལ་དང་བཅས་པ་རྣམས་ལ་ལེགས་པར་བལྟས་པར་གྱུར་པས་ཀྱང་ཡང་དག་པར་ཇི་ལྟ་བ་བཞིན་དུ་ཕྱི་རོལ་
ལ་ཡང་དག་པར་ལྟ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་བྱང་ཕྱོགས་སྒྲ་མི་སྙན་ན་དགའ་
བ་དང་། དགའ་བའི་རིགས་སུ་གྱུར་པ་དང་། དགའ་བར་གྱུར་པ་རིའི་ཕྲེང་བ་འཛིན་པ་ཞེས་བྱ་བ་གཞན་ཡོད་པ་མཐོང་ངོ་། །རི་བོ་དེ་ནི་རྣམ་པར་བཀྲ་བའི་ཕྲེང་བ་རྣམས་འཛིན་པ་ཡིན་པས་དམར་པོ་དང་། སྔོན་པོ་དང་། དཀར་
པོ་དང་། མཐིང་ག་དང་། སེར་པོ་དང་། རྣམ་པ་སྣ་ཚོགས་རྣམས་འདྲེས་པའི་མདོག་གི་ཁ་དོག་དང་ཡང་ལྡན་པའི་ལྗོན་ཤིང་གི་རིགས་རྣམས་ཡོད་དོ། །འདི་ལྟ་སྟེ། སྟ་བ་ཀའི་ཤིང་དང་། མྱ་ངན་མེད་དང་། གསེར་གྱི་ལོ་མ་

66-1-225b

དང་ལྡན་པ་དང་། འཁྲིས་ཤིང་དང་། ཤིང་གེལ་པས་གཡོགས་པར་གྱུར་པ་རྣམས་སོ། །འདི་ལྟ་སྟེ། ཤིན་དུ་གྲོལ་བར་གྱུར་པའི་འཁྲིས་ཤིང་རྣམས་དང་དགའ་བའི་ལོ་མ་དང་རླུང་གི་ཤུགས་ཀྱིས་རབ་ཏུ་གཡོ་བའི་ལོ་མ་རྣམས་
སོ། །འདི་ལྟ་སྟེ། ཤིང་ནི་ཙུ་ལ་དང་། བཻ་ཌཱུརྱའི་འདབ་མ་དང་། ཆུ་ལ་སྐྱེས་པ་དང་རྣམས་སོ། །འདི་ལྟ་སྟེ། བརྒྱ་ལ་ཅུང་ཟད་དང་བི་དྲུ་མའི་འདབ་མ་དང་ཉི་མ་མཐོང་བས་དགའ་བར་འགྱུར་བ་རྣམས་སོ། །འདི་ལྟ་སྟེ། ཏི་ལ་ཀཱ་
ས་དང་ཟླ་བའི་འོད་ཀྱིས་དགའ་བ་དང་རྣམས་སོ། །འདི་ལྟ་སྟེ། ཀུ་མུ་དའི་ཚོགས་དང་ཉི་མ་འཕོ་བ་དང་རྣམས་སོ། །འདི་ལྟ་སྟེ། དུས་སུ་འདོད་པ་དང་ཟླ་བ་ཕྱེད་པ་དང་བཅས་པ་ན་དགའ་བ་རྣམས་སོ། །འདི་ལྟ་སྟེ། ཨུདྡཱ་
ལཱ་མཚན་མོ་དགའ་བའོ། །འདི་ལྟ་སྟེ། བནྡྷ་ཛཱི་བི་ཀཱ་དང་དེའི་རྗེས་ཐོགས་ལ་འབྲས་བུ་འབྱུང་བ་དག་གོ། །འདི་ལྟ་སྟེ། ཨ་མྲ་དང་དུ་བའི་དྲིས་ལྷག་པས་བསྒོས་པ་དག་གོ། །འདི་ལྟ་སྟེ། མྱ་ངན་མེད་སྔོན་པོ་དང་རེག་པར་
བཟོད་པ་དག་གོ། །འདི་ལྟ་སྟེ། ཀུནྡཱ་དང་ཤིན་དུ་འཇམ་པ་དང་རྣམས་སོ། །འདི་ལྟ་སྟེ། ཤི་རཱི་ཥཱཿདང་གོམ་པ་བོར་བར་བཟོད་པ་དག་གོ། །འདི་ལྟ་སྟེ། སེམས་པ་དང་དྲོ་བས་དགའ་བར་འགྱུར་བའི་དྲིའོ། །འདི་ལྟ་སྟེ། 
ཀུནྡཱཿམ་དང་། ཀུ་སུ་མཱ་དང་། ཡུལ་གཞན་དུ་རྣམ་པར་རྒྱུ་བ་རྣམས་སོ། །འདི་ལྟ་སྟེ། ཀོ་བི་དཱ་རཱ་དང་བཟང་པོ་མཐོང་བ་དག་གོ། །འདི་ལྟ་སྟེ། ཡིད་བདེ་བ་དང་ལྷའི་སྐྱེ་བོ་རྣམས་དགའ་བའོ། །འདི་ལྟ་སྟེ། ནཱི་ལ་ཨུཏྤ་
ལ་དང་། པདྨ་དང་། པདྨ་མཚོ་སྐྱེས་དང་། དུས་ཐམས་ཅད་ཀྱི་མེ་ཏོག་ཅན་རྣམས་སོ། །འདི་ལྟ་སྟེ། སེངྒེ་སྭ་བྲཱཿདང་ཀཱ་དམྤ་དགའ་བ་དག་གོ། །འདི་ལྟ་སྟེ། ཆུས་དགའ་བར་འགྱུར་བ་དང་རྐང་པའི་མཐིལ་གྱིས་
བརྒྱབ་པས་མེ་ཏོག་འབྱུང་བའོ། །འདི་ལྟ་སྟེ། མྱ་ངན་མེད་དང་རང་བཞིན་གྱིས་དྲི་དང་ཁ་དོག་རྣམས་དགའ་བར་གྱུར་པའོ། །འདི་ལྟ་སྟེ། ཨ་ཌ་ཀ་དང་སྟེ། དེ་ལྟར་དེ་དག་རྣམས་ནི་ཇི་ལྟར་གཙོ་བོར་གྱུར་པའི་

66-1-226a

ལྗོན་ཤིང་མེ་ཏོག་གིས་ཕྱུག་པ་རྣམས་ཡོངས་སུ་བསྒྲགས་པ་ཡིན་ཏེ། མེ་ཏོག་གི་ལྗོན་ཤིང་གི་རིགས་ཉི་ཤུ་རྩ་གཉིས་ཡིན་ནོ། །ཕྲེང་བ་འཛིན་པའི་རི་བོའི་ཉེ་འཁོར་རྣམས་ན་ཕན་ཚུན་དུ་བསྐྱེད་པས་ལོ་འདབ་
རྣམས་འཁྲིལ་བར་འགྱུར་བའི་ལྗོན་ཤིང་རྣམས་ཡིན་ནོ། །བུང་བའི་རིགས་ཀྱི་ཚོགས་རྣམས་ཀྱིས་ཉེ་བར་གང་བ་ཡིན་ཏེ། བུང་བ་དེ་དག་རྣམས་ཀྱང་ལ་ལ་བཻ་ཌཱུརྱའི་མདོག་ཡིན་ནོ། །ལ་ལ་ནི་གསེར་གྱི་མདོག་ཡིན་
ནོ། །ཁ་ཅིག་ནི་དངུལ་གྱི་མདོག་ཏུ་རྣམ་པར་སྣང་ངོ་། །ཁ་ཅིག་ནི་གུར་ཀུམ་གྱི་མདོག་གོ། །ཁ་ཅིག་ནི་སྔོན་པོའོ། །ཁ་ཅིག་ནི་རྣམ་པར་འདྲེས་པར་གྱུར་པའོ། །ཁ་ཅིག་ནི་མཚོ་ལ་རྒྱུ་བའོ། །ཁ་ཅིག་ནི་ལྗོན་ཤིང་ལ་
རྒྱུ་བའོ། །ཁ་ཅིག་ནི་ཤིང་གེལ་བ་ལ་རྒྱུ་བའོ། །ཁ་ཅིག་ནི་ཐམས་ཅད་ལ་རྒྱུ་བའོ། །བྱ་རྣམས་ཀྱང་ཁ་ཅིག་ནི་གསེར་འབར་བའི་ལུས་ལ་དངུལ་གྱི་མདོག་གི་སྒྲོའོ། །ཁ་ཅིག་ནི་དངུལ་གྱི་ལུས་ལ་གསེར་གྱི་སྒྲོའོ། །
ཁ་ཅིག་ནི་བི་དྲུ་མའི་ལུས་ལ་བཻ་ཌཱུརྱའི་སྒྲོའོ། །ཁ་ཅིག་ནི་བཻ་ཌཱུརྱ་དང་འདྲ་བར་གྱུར་པའི་ལུས་ལ་ཨིནྡྲ་ནཱི་ལའི་སྒྲོ་རྣམས་སོ། །ཁ་ཅིག་ནི་ཤེལ་གྱི་མདོག་གི་ལུ་ལ་སྒྲོ་རྣམས་གསེར་གྱི་སྒྲོའི་རང་བཞིན་ནོ། །ཁ་ཅིག་ནི་རིན་
པོ་ཆེ་གསུམ་གྱི་ལུས་སུ་གྱུར་པ་འདི་ལྟ་སྟེ། ལུས་ནི་གསེར་གྱི་མདོག་གོ། །སྒྲོ་རྣམས་ནི་དངུལ་གྱི་མདོག་གོ། །རྒྱབ་ནི་བཻ་ཌཱུརྱའི་མདོག་གོ། །ཁ་ཅིག་ནི་རིན་པོ་ཆེ་བདུན་གྱི་མདོག་གི་བྱ་རྣམས་ལ་འདི་ལྟ་སྟེ། ཨིནྡྲ་ནཱི་
ལ་དང་། མ་ར་ཀ་ཏ་དང་། ཤེལ་དང་། མུ་སཱ་ར་གལྦ་དང་། བི་དྲུ་མ་དང་། སུ་ཀུ་མཱ་རི་ཀཱ་དང་། པདྨ་མ་རཱ་གའི་མདོག་རྣམས་སོ། །དེ་ལྟར་རང་གི་ལས་གྱིས་རྣམ་པར་བཀྲ་བའི་ལུས་ཅན་རྣམས་ཡིན་ཏེ། གཟུགས་རྣམ་
པ་དུ་མར་གྱུར་པའི་བུང་བ་རྣམས་དང་བྱ་རྣམས་ཀྱང་རྣམ་པ་སྣ་ཚོགས་པའི་སྒྲོ་དང་ལྡན་པ་དང་། རྗེས་སུ་འཐུན་པ་རྣམ་པ་སྣ་ཚོགས་པའི་སྐད་རྗོད་པར་བྱེད་པ་ཡིན་ནོ། །ལས་སྣ་ཚོགས་པ་རྣམས་ཀྱི་ལུས་རྣམ་པར་

66-1-226b

བཀྲ་བར་གྱུར་པ་ཡིན་ནོ། །ཁ་དོག་དང་དྲི་དང་ཕྲེང་བ་དང་ལྡན་པའི་མེ་ཏོག་དུ་མ་རྣམས་འབྱུང་བ་ཡང་འདི་ལྟ་སྟེ། གཟུགས་དུ་མ་རྣམས་ཡིན་ནོ། །སྐྱེས་བུ་རྣམས་ཀྱིས་རང་གིས་ལས་བྱས་པར་གྱུར་པའི་རང་བཞིན་ཇི་ལྟ་
བ་བཞིན་ནོ། །ལྗོན་ཤིང་རྣམས་ཀྱང་གཟུགས་དང་དྲི་སྣ་ཚོགས་པ་ཡིན་ཞིང་། བྱང་ཕྱོགས་སྒྲ་མི་སྙན་པ་རྣམས་ཀྱི་དབང་གིས་ཤིང་རྒྱན་རྒྱུ་དང་རྡོ་བ་དང་ཆུ་ཀླུང་དང་ཁྲུས་ཀྱི་རྫིང་བུ་རྣམས་ཀྱང་རྣམ་པ་དུ་མར་དགའ་
བར་གྱུར་པ་དང་། ཡིད་ལ་སྨོན་པ་བཞིན་དུ་རྣམ་པར་བཀྲ་བ་ཡིན་ཏེ། སྔོན་ལེགས་པར་བྱས་པའི་ལས་རྣམས་ཀྱི་རྒྱུ་མཚན་གྱིས་རིན་པོ་ཆེ་རྣམས་དང་ཡང་ལྡན་པ་དང་། ཟས་སྐོམ་གྱི་ཆུ་བོ་རྣམས་ཀྱིས་རྣམ་པར་
བརྒྱན་པ་དང་། ལྗོན་ཤིང་དགའ་བར་གྱུར་པ་དང་། སའི་ཉེ་འཁོར་གྱི་ཆ་དང་དེ་དག་རྣམས་ལ་བྱང་ཕྱོགས་སྒྲ་མི་སྙན་པའི་སྐྱེས་བུ་རྣམས་རྩེ་དགའ་བར་བྱེད་དོ། །ཕྲེང་བ་འཛིན་པའི་རིའི་ཉེ་འཁོར་རྣམས་ན་རབ་ཏུ་
གནས་པའི་སྐྱེས་བུ་གང་ཡིན་པ་དེ་དག་རྣམས་ལ་རྟག་ཏུ་འགྱིང་བག་ཅན་ཞེས་བྱ་བའི་མིང་འབྱུང་བར་འགྱུར་རོ། །ཕྲེང་བ་འཛིན་པའི་ཉེ་འཁོར་རྣམས་ལ་སྐྱེས་བུ་གང་དག་འགྱིང་བག་ཅན་ཡིན་ཏེ། ཇི་ལྟར་ཡོངས་
འདུས་བརྟོལ་གྱི་རྩ་བ་ན་ལྷ་རྣམས་ཀྱི་དབྱར་ཟླ་བ་བཞི་པོ་རྣམས་མ་གཏོགས་པ་དང་། ལྷ་རྣམས་ལ་མིག་འཛུམས་པ་མེད་པ་དང་། ཤ་དང་རུས་པ་དང་ཆུ་སེར་དང་ལྤགས་པ་མེད་པ་རྣམས་དང་འདི་དག་རྣམས་
མ་གཏོགས་པ་ལྷ་རྣམས་དང་བྱང་ཕྱོགས་སྒྲ་མི་སྙན་གྱི་སྐྱེས་བུ་རྟག་ཏུ་འགྱིང་བག་ཅན་རྣམས་ནི་ཐམས་ཅད་ཀྱང་མཚུངས་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་པ་ལས་དང་ཆོས་ལ་ཡང་དག་པར་ཀུན་དུ་ལྟ་
བར་བྱེད་དེ། སེམས་ཅན་དེ་དག་རྣམས་ནི་རྒྱགས་པ་རྣམ་པ་གསུམ་གྱིས་རྒྱགས་པར་གྱུར་ནས་ལེགས་པར་སྤྱོད་པ་རྣམས་སྤྱོད་པར་མི་བྱེད་དོ། །འདི་ལྟ་སྟེ། གཟུགས་ཀྱིས་རྒྱགས་པ་དང་ལང་ཚོའི་རྒྱགས་པ་དང་། 

66-1-227a

གསོན་པའི་རྒྱགས་པ་རྣམས་ཀྱིས་རྒྱགས་པར་གྱུར་པའི་ཕྱིར་ན། ལུས་ཀྱིས་ལེགས་པར་སྤྱད་པ་རྣམས་མི་སྤྱོད་དོ། །ངག་གིས་ལེགས་པར་སྤྱད་པ་རྣམས་མི་སྤྱོད་དོ། །ཡིད་ཀྱིས་ལེགས་པར་སྤྱད་པ་རྣམས་མི་སྤྱོད་
དོ། །ལེགས་པར་བྱས་པའི་ལས་ཀྱི་ལྷག་མ་རྣམས་ཀྱིས་ལྷ་རྣམས་སུ་སྐྱེའོ། །ལྷའི་འཇིག་རྟེན་དེ་ལས་ཤི་འཕོས་པར་གྱུར་ནས་དམྱལ་བ་དང་། ཡི་དགས་དང་། དུད་འགྲོ་དང་། མི་རྣམས་སུ་སྐྱེ་བར་འགྱུར་ཏེ། གང་གི་
ཕྱིར་སྲེད་པ་ནི་དུག་གི་མཆོག་ཟས་དང་འདྲེས་པ་ཡིན་པའི་ཕྱིར་སེམས་ཅན་རྣམས་ལ་མཆོག་ཏུ་རྩུབ་པ་དང་། མཆོག་ཏུ་འཆིང་བ་དང་། མཆོག་ཏུ་ཉམ་ང་བ་ཡིན་ནོ། །དེས་བཅིངས་པའི་ཕྱིར་ན་སེམས་ཅན་འདི་དག་རྣམས་
ཀྱིས་ནི་ངེས་པ་ཁོ་ནར་སྔོན་གྱི་མཐའ་དང་། ཕྱི་མའི་མཐའ་དག་ཀུན་དུ་མི་ཤེས་པ་ཡིན་ནོ། །མངར་བའི་མཆོག་ཏུ་གྱུར་པ་ལ་འབྲས་བུ་རྩུབ་པའི་འདོད་པ་རྣམས་ཐམས་ཅད་ནི་ཀིམ་པ་ཀ་སྨིན་པ་དང་འདྲ་བ་དང་། ས་འོག་
གི་ཞགས་པ་དང་འདྲ་བ་ཡིན་པ་དེ་དག་སེམས་ཅན་གྱིས་མ་རིག་གོ། །གཡང་ས་དང་འདྲ་བ་དང་། ཐམས་ཅད་ཀྱང་རྣམ་པར་བྲལ་བ་དང་། འཆི་བའི་སྡུག་བསྔལ་དང་། སྡུག་བསྔལ་རྣམས་ལ་ཡང་དཔེ་མེད་པ་ཡིན་ནོ། །
རི་ཆེན་པོའི་འབབ་ཆུའི་ཤུགས་ལྟར་གཡོ་བ་ཡིན་པས་ལང་ཚོ་ཡང་འདི་ན་རྟག་པ་མ་ཡིན་ཏེ། བརྟན་པ་དང་ཡོངས་སུ་མི་འགྱུར་བའི་ཆོས་ཅན་གྱིས་གནས་སྐབས་གཅིག་ཀྱང་འགྲོ་བ་ལྔ་ན་ཡོད་པ་མ་ཡིན་ནོ། །འདི་ལྟར་ཉེས་
པ་བྱས་པ་ལས་ཀྱི་འཁོར་ལོའི་རླུང་གིས་ཡང་དང་ཡང་འཁོར་བར་གྱུར་ཏུ་ཟིན་ཀྱང་སྲོག་ཆགས་འདི་དག་རྣམས་ནི་སྐྱོ་བ་ཡང་སྐྱེ་བར་མི་འགྱུར་རོ། །ཕྲེང་བ་འཛིན་པའི་རི་དང་ཉེ་འཁོར་གྱི་སྐྱེས་བུ་རྟག་ཏུ་འགྱིང་བག་ཅན་རྣམས་
ལ་ཡང་ཡང་དག་པར་བལྟས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ཕྱི་རོལ་གྱི་ལུས་ལ་ལྟ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་

66-1-227b

སྒྲ་མི་སྙན་ན་རིའི་རིགས་སུ་གྱུར་པ་འམ། ཆུ་ཀླུང་གི་རིགས་སུ་གྱུར་པ་འམ། ཁྲུས་ཀྱི་རྫིང་བུའི་རིགས་སུ་གྱུར་པ་གང་ཡིན་པ་དེ་དག་དགའ་བ་དང་། ཤིན་དུ་དགའ་བ་དང་། མཆོག་ཏུ་དགའ་བར་གྱུར་པ་གཞན་གང་
དག་ཅེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བྱང་ཕྱོགས་སྒྲ་མི་སྙན་ན་ཤིན་དུ་དགའ་བར་གྱུར་པའི་རིའི་རིགས་གཞན་དག་ཀྱང་ཡོད་དོ། །འདི་ལྟ་སྟེ། དུས་ན་དགའ་
བ་ཞེས་བྱ་བའི་རི་བོ་རྒྱར་དཔག་ཚད་སྟོང་ཡོད་པ་མཐོར་དཔག་ཚད་སུམ་བཅུ་པར་གྱུར་པའོ། །དེ་ལེ་ཡང་དུས་དྲུག་པོ་འདི་དག་རྣམས་ཉིད་རྟག་ཏུ་ཉེ་བར་གནས་པ་ཡིན་ཏེ། འདི་ལྟ་སྟེ། དགུན་སྟོད་དང་། དགུན་སྨད་དང་། 
སོས་ཀ་དང་། དཔྱིད་ཀ་དང་། སྟོན་ལ་སོགས་པའོ། །རི་དེ་ལ་ཡུལ་ཕྱོགས་འདི་དག་དང་། དགུན་སྟོད་ནི་གང་དག་ཡིན་ཞིང་། དེ་ལ་ཡང་དགུན་སྟོད་སྐྱེ་བའི་ལྗོན་ཤིང་གི་མེ་ཏོག་རབ་ཏུ་རྒྱས་པ་རྣམས་ཡིན་ན། དེ་ལ་དགུན་
སྟོད་སྐྱེ་བའི་ལྗོན་ཤིང་གི་རིགས་རྣམས་ནི་འདི་ལྟ་སྟེ། སྭ་རི་ཤཱངྒ་ན་དང་། ཁྲོ་བ་དང་། བད་ཀྱིས་རྒས་པ་དང་། བུང་བ་བགྲོད་པར་བྱེད་པ་དང་། དེ་ངེས་པར་དྲི་ཞིམ་པ་དང་། མྱུ་གུ་མེད་པ་དང་། ཙཀྲ་བཱ་ཀཱས་རྗེས་སུ་སྒྲ་
སྒྲོགས་པ་དང་། མཆོག་ཏུ་དགའ་བར་འགྱུར་བའི་མེ་ཏོག་དང་། གླུ་ཕུན་སུམ་ཚོགས་པ་དང་། ཟབ་མོར་སྐྱེས་པ་དང་། ནི་ཏཱནྟཾ་དང་། མཆོག་ཏུ་ཁྲོ་བ་དང་། ཉི་མ་དང་བཅས་པ་དང་། མེ་ཏོག་བཅྭ་ལྔ་པོ་དེ་དག་རྣམས་
ནི་དགུན་སྟོད་ཀྱི་དུས་སུ་སྟེ། དགུན་སྟོད་སྐྱེ་བ་རྣམས་ཡིན་ནོ། །དུས་ན་དགའ་བའི་རི་བོའི་ཡུལ་ཕྱོགས་གཉིས་པ་ལ་ནི་དགུན་སྨད་གྱི་དུས་སུ་འབྱུང་བ་རྣམས་ཡིན་ནོ། །དེ་ལ་མེ་ཏོག་གི་རིགས་འདི་དག་རྣམས་དུས་སུ་དགའ་
བའི་རི་ལ་དགུན་སྨད་ཁ་འབྱེ་བ་ཡིན་ཏེ། བྱང་ཕྱོགས་སྒྲ་མི་སྙན་པའི་རི་ལ་བྱང་ཕྱོགས་སྒྲ་མི་སྙན་པ་རྣམས་ཀྱི་དབང་གི་འབྲས་བུ་ཡིན་ནོ། །དུས་ན་དགའ་བའི་རི་བོའི་ཡུལ་ཕྱོགས་གཞན་ལ་ནི་སོས་ཀའི་དུས་སུ་འབྱུང་བར་

66-1-228a

འགྱུར་ཏེ། དེ་ལ་མེ་ཏོག་གི་རིགས་ནི་འདི་དག་རྣམས་ཡིན་ནོ། །འདི་ལྟ་སྟེ། ཤིན་དུ་ཁ་བྱེ་བ་དང་། པད་མ་དང་། ཀུ་ར་བ་ཀཾ་དང་། དྲི་མང་བ་དང་། བུང་བ་འཁོར་བ་དང་། ས་མ་མ་ཏ་དང་། མྱ་ངན་མེད་དང་
ཀིཾ་ཤུ་ཀ་དང་། མྱ་ངན་མེད་སྔོན་པོ་དང་། འགྲིབ་པ་མེད་པའི་དྲི་དང་། ཀུ་མུ་ཌ་དང་། ཨ་མྲེ་ཌ་ཀང་དང་། ཀླུང་དུ་སྐྱེ་བ་དང་ལྡན་པ་དང་། ནི་ཙི་ཏ་དང་། ལ་མྲ་དང་། བཱནྟི་ཀི་དང་། མེ་ཏོག་ལ་བྱ་དགའ་བ་དང་། རྟག་ཏུ་མེ་ཏོག་ཁ་
འབྱེ་བ་དང་། འདབ་མ་སྟོང་པ་དང་རྣམས་ཡིན་ནོ། །ཉི་ཤུ་པོ་འདི་དག་རྣམས་ནི་སོས་ཀའི་དུས་སུ་ཡིན་ཏེ། ཡུ་ཏི་ཀ་དང་དུས་སུ་རྒྱུ་བའི་མེ་ཏོག་གི་རིགས་རྣམས་ཀྱང་ཡིན་ནོ། །དུས་སུ་དགའ་བའི་རིའི་ཡུལ་ཕྱོགས་
གཞན་ལ་ནི་དཔྱིད་ཀྱི་མེ་ཏོག་གི་རིགས་འདི་དག་རྣམས་འབྱུང་ངོ་། །འདི་ལྟ་སྟེ། ཙམྤ་ཀ་དང་། སུ་མ་ན་སཿདང་། གསེར་གྱི་ཡུ་ཏི་ཀ་དང་། དུས་ན་རྒྱུ་བ་དང་། དུ་བས་གྲོལ་བའི་དྲི་དང་། པད་མ་དང་། བུང་བ་གནས་པ་
དང་། པ་ས་སཾ་དང་། ཤི་ཏ་ཏི་དང་། ཨ་མྲ་དང་། དྲི་མཉམ་པ་དང་། དྲི་རྟག་པ་དང་། ཟངས་ཀྱི་རོ་དང་། རླུང་གིས་འདེབས་པ་དང་། འདབ་མ་བརྒྱ་པ་དང་། ཏ་མའི་རོ་དང་། ཉི་མ་ཕྱེད་པ་དང་། ཙུ་ལྭ་ལན་དང་། ཏི་ལའི་
དངོས་པོའི་མདོག་དང་། བྱིས་པའི་མེ་ཏོག་དང་། ཛ་ཏི་ལྭ་དང་རྣམས་ཏེ། མེ་ཏོག་གི་རིགས་ཉི་ཤུ་པོ་དེ་དག་རྣམས་ནི་དཔྱིད་ཀྱི་དུས་ན་འབྱུང་སྟེ། བྱང་ཕྱོགས་སྒྲ་མི་སྙན་པ་རྣམས་ཀྱི་ལེགས་པར་བྱས་པའི་ལས་ཀྱི་དབང་གི་
དུས་ན་དགའ་བའི་རི་བོ་ལ་དཔྱིད་ཀྱི་དུས་ན་ཡིན་ནོ། །དུས་ན་དགའ་བའི་རིའི་ས་ཕྱོགས་གཞན་དག་རྣམས་ལ་ནི་དབྱར་གྱི་མེ་ཏོག་འདི་དག་རྣམས་འབྱུང་སྟེ། འདི་ལྟར་ཡང་ཀེ་ཏ་ཀ་དང་། ཀུ་ཊ་ཛང་དང་། བརྒྱ་འགྲོ་བ་དང་
ས་ལ་འགྱིང་ཞིང་དགའ་བར་གྱུར་པ་དང་། ད་རིའི་ཕྲེང་བ་དང་། རྡོ་ལས་སྐྱེས་པ་དང་། ཀཱ་དམྤ་ལ་དགའ་བ་དང་། ངང་པ་འཁོར་བ་དང་། མེ་ཏོག་དྲི་ཞིམ་པོས་དགའ་བ་དང་། ཟངས་ཀྱི་རོ་དང་། ས་ལི་ལ་དང་། ཙནྡྲཱ་དི་ཀཱ་དང་། 

66-1-228b

ཀླུ་དུ་སྐྱེས་པ་དང་། རྩེ་མོ་མཐོང་བ་དང་རྣམས་ཏེ། སྟོན་ཀྱང་མེ་ཏོག་གི་རིགས་ཉི་ཤུ་པོ་དེ་དག་རྣམས་འབྱུང་བ་ཡིན་ནོ། །དེ་ལ་དུས་ན་དགའ་བའི་རི་བོ་ལ་དེ་ལྟར་དེ་དག་རྣམས་དུས་དྲུག་ཏུ་ཡིན་ཞིང་ཉེ་འཁོར་རྣམས་ན་ཡང་དུས་
ཀྱི་འཁོར་ལོ་སྟེ། དེ་དུས་དེ་དག་རྣམས་ཀྱིས་དེ་སྲིད་དུ་བྱང་ཕྱོགས་སྒྲ་མི་སྙན་རྟག་པ་ཁོ་ནར་དགའ་བར་གྱུར་པའི་མེ་ཏོག་དང་། འབྲས་བུ་དང་། དྲུ་མའི་འབྲས་བུ་དང་། ལྗོན་ཤིང་དང་། ཁྲུས་ཀྱི་རྫིང་བུ་དང་། ཆུ་ཀླུང་གི་ངོས་རྣམས་
ཀྱིས་ཀྱང་དུས་སུ་དགའ་བའི་རི་བོ་དེ་ལྟར་དགའ་བར་གྱུར་པ་ཡིན་ནོ། །དེ་བཞིན་དུ་གཞན་དག་རྣམས་ཀྱང་དུས་རྣམས་ལ་དེ་ལྟར་ཡིན་པ་ནི་སྔར་བཞིན་ནོ། །དུས་ན་དགའ་བའི་རིའི་ཉེ་འཁོར་ན་གནས་པར་འགྱུར་བའི་སྐྱེས་བུ་དེ་
དག་རྣམས་ནི་དེ་རི་རིང་བ་ཞེས་བྱ་བའི་མིང་དུ་འགྱུར་རོ། །གཞན་ཡང་རྣལ་འབྱོར་སྤྱོད་པ་ལས་ཀྱི་ཆོས་ལ་ཀུན་དུ་ལྟ་བར་བྱེད་དེ། ཇི་ལྟར་སེམས་ཅན་འདི་དག་རྣམས་སྔོན་ལེགས་པར་བྱས་པ་རྣམས་ཟད་པར་བྱེད་པ་ཡིན་
པ་དང་། གསར་པ་རྣམས་ཀྱང་མི་བྱེད་པ་ཡིན་ལ། དེ་དག་རྣམས་ནི་སོ་སོར་མངོན་པར་ཤེས་པ་ཡང་མ་ཡིན་ནོ། །ཇི་ལྟར་དུས་ཚོད་ཀྱི་འཁོར་ལོ་རྣམས་འཁོར་བར་གྱུར་པའི་དུས་ན་སྐྱེས་བུ་འདི་དག་རྣམས་ཀྱི་ཚེ་ཀུན་ནས་
གཅོད་པར་བྱེད་པ་ཡིན་ནོ། །དུས་ཀྱི་མེས་ཚེའི་ཤིང་རྣམས་སྲེག་པར་བྱེད་དོ། །དུས་ཀྱི་རྡོ་རྗེས་ཚེའི་ལོ་ཏོག་རྣམས་འཇོམས་པར་བྱེད་དོ། །དུས་ཀྱི་སེང་གེས་སྐྱེས་བུ་རི་དགས་རྣམས་རབ་ཏུ་བཅོམ་ནས་ཟ་བར་བྱེད་དོ། 
འཆི་བདག་གི་དུས་ནི་ཆུ་བོ་དང་མཚུངས་པས་སྐྱེས་བུའི་ལྗོན་ཤིང་རྣམས་མངོན་པར་བསྡུས་ཤིང་བསྐྱེད་ནས་འཇོམས་པར་བྱེད་དོ། །དུས་ནི་སྤྱང་གུ་དང་མཚུངས་པ་དང་སྦྲུལ་དང་མཚུངས་པའི་ཕྱིར་ན། སྐྱེས་བུ་རྣམས་
གསོད་པར་བྱེད་དོ། །འཆི་བདག་ནི་གླང་པོ་ཆེ་དང་འདྲ་བས་རྩྭ་ཀ་ཏ་པ་ཏ་དང་མཚུངས་པའི་ཁམ་གྱིས་མིད་པར་བྱེད་དོ། །འཆི་བདག་ནི་རླུང་དང་མཚུངས་པས་སྐྱེས་བུའི་ལྗོན་ཤིང་རྣམས་རྩ་བ་ནས་སྒྱེལ་བར་བྱེད་དོ། །

66-1-229a

སྐྱེ་བོ་རྣམས་ཐམས་ཅད་ཀྱིས་ཀྱང་སྤང་བར་མི་ནུས་པའི་འཆི་བདག་གི་འཇིགས་པ་དེ་དག་རྣམས་སྐྱེས་བུ་རྣམས་ཅིའི་ཕྱིར་ཀུན་དུ་མ་རྟོགས་པ་ཡིན་ནོ། །གང་གིས་ལང་ཚོ་ལ་བབ་པ་རྣམས་ཐམས་ཅད་ལ་
ཡང་གཅོ་འདྲི་བར་བྱེད་པ་དང་། སྟོབས་རྣམས་ཐམས་ཅད་འཇིག་པར་བྱེད་པ་དང་། སྐྱེ་བོ་རྣམས་ཐམས་ཅད་ཀྱིས་བཞད་གད་དུ་བྱེད་པའི་རྒས་པ་ཡང་མཐོང་བ་མ་ཡིན་ན། རྟེན་ཉམས་ཆུང་བར་བྱེད་པ་དང་མིག་དང་རྣ་
བ་དང་། སྣ་དང་། ལྕེ་དང་། ལུས་དང་། ཡིད་རྣམས་དང་ཉེ་བར་འགལ་བར་བྱེད་པ་དང་། ཁ་ཆུ་རྣམ་པར་འཛག་པར་བྱེད་པ་དང་། སྒུར་པོར་བྱེད་པ་དང་། འགྲམ་པ་དང་། སོ་དང་ཐོད་པ་དང་ཚིགས་པ་དང་། གནད་དང་རྒྱུས་པ་
རྣམས་ཉམས་པར་བྱེད་པ་དང་། འགྲོ་བ་དང་འོང་བའི་གནས་རྣམས་ལ་གེགས་བྱེད་པ་པོར་གྱུར་པ། ལང་ཚོ་ལ་བབ་པ་རྣམས་ཐམས་ཅད་ལ་འགྲན་ཟླར་གྱུར་པ། ལང་ཚོ་ལ་བབ་པ་རྣམས་ཐམས་ཅད་ཀྱང་ཁ་ཉེན་པའི་སར་གྱུར་པ། 
འཆི་བདག་རྒྱལ་པོའི་གྲོང་ཁྱེར་དུ་འཇུག་པར་བྱེད་པ་པོ་དགའ་བ་དང་། སྟོབས་དང་སྤྲོ་བ་རྣམས་འཇིག་པར་བྱེད་པ་པོ། སྒྱུ་སྙོམ་པ་ལ་དགའ་བར་གྱུར་པའི་ས་པ། སྣབས་དང་གཅིན་དང་རྟུག་པ་རྣམས་མང་བར་གྱུར་པ་
རྟག་ཏུ་ཡང་མལ་སྟན་ལ་ལྷག་པར་སྙོམ་ལས་སུ་བྱེད་པ་པོར་གྱུར་པ། སེམས་ཅན་བག་མེད་པ་འདི་དག་རྣམས་ཀྱིས་ཅིའི་ཕྱིར་མ་མཐོང་། གང་གི་ཚེ་འཇིགས་པར་འགྱུར་བའི་ནད་ཀྱི་འཇིགས་པ་ཡང་ངེས་པར་
འཇིགས་པར་གྱུར་པས་ཤིན་དུ་ཉེ་བར་གནས་པ་ཡིན་ཏེ། དེས་ནི་ཁམས་རྣམས་འཁྲུག་པར་བྱེད་པ་དང་། དབང་པོ་རྣམས་ཐམས་ཅད་ཀྱང་ལོངས་སྤྱོད་པར་བྱེད་པ་དང་། རྒྱུས་པ་དང་རྐང་མར་དང་བཅུད་དང་ལྤགས་པ་དང་
ཁྲག་དང་ཤ་དང་ཚིལ་དང་རུས་པ་དང་ཁུ་ཆུ་དང་རྣམས་ཐམས་ཅད་ཀྱང་ཀུན་དུ་སྐམས་པར་བྱེད་པ་དང་། ཁུ་བ་རྣམས་ཐམས་ཅད་ཀྱི་འགྲན་ང་བའི་དགྲར་གྱུར་པ་དང་། ལངས་པར་བྱ་བ་དང་ལེགས་པར་འདུག་པར་ཡང་མི་

66-1-229b

བཟོད་པ་སྨན་དང་སྨན་པ་ལ་ལྟོས་ནས་བཟློག་པར་བྱ་བ་བཟའ་བ་དང་། བཏུང་བ་དང་། བལྡག་པ་དང་། མྱང་བར་བྱ་བ་ལ་སོགས་པ་རྣམས་ཐམས་ཅད་ཀྱང་མི་གཙང་བ་ལྟ་བུར་གྱུར་པ། རིད་པ་དང་ཉམས་
ཆུང་བ་དང་གཉིད་ཕལ་ཆེ་བར་འགྱུར་ཏེ། ལྤགས་པ་དང་། རུས་པ་ཙམ་དང་། སྐྱེ་བོ་ཐམས་ཅད་རང་གི་སྐྱེ་བོ་དང་། གྲོགས་པོ་དང་། ཉེ་འབྲེལ་དང་། བུ་དང་ཆུང་མ་དང་བཅས་པའིཆི་བདག་དང་འདྲ་བའི་སྡུག་བསྔལ་
གང་ཡིན་པའི་ནད་ཀྱི་འཇིགས་པས་བདག་ཉིད་བྱིང་བར་འགྱུར་བར་རྟོགས་པ་ཡིན་ནོ། །རྣལ་འབྱོར་སྤྱོད་པ་དེ་སྐྱེས་བུ་བག་མེད་པར་གྱུར་པ་དེ་དག་རྣམས་ལ་རྗེས་སུ་བརྩེ་བར་འགྱུར་རོ། །བརྩེ་བར་གྱུར་པས་ཀྱང་
འདིའི་ཚངས་པའི་གནས་ཀྱི་སྤྱོད་ཡུལ་དུ་གྱུར་པ་རྣམས་ལ་འདི་ལྟ་སྟེ། བྱམས་པ་དང་། སྙིང་རྗེ་དང་། དགའ་བའོ། །དེ་ལྟར་རྣལ་འབྱོར་སྤྱོད་པ་དེས་བྱང་ཕྱོགས་སྒྲ་མི་སྙན་པའི་སྐྱེས་བུ་བག་མེད་པས་གནས་པར་གྱུར་
པའི་སེམས་ཅན་རྣམས་ལ་རྗེས་སུ་བརྩེ་བར་བྱེད་དོ། །འཁོར་བའི་བདག་ཉིད་ནི་ཤིན་དུ་དམན་པ་ཡིན་པར་མཐོང་ངོ་། །དབུ་བ་དང་ཆུའི་ཆུ་བུར་ལྟ་བུར་གྱུར་པའི་ལུས་ལ་ཀུན་དུ་ལྟ་བར་བྱེད་དོ། །སྒྱུ་མ་ལྟ་བུར་གྱུར་པའི་
རྣམ་པར་ཤེས་པ་ལ་ཡེ་ཤེས་ཀྱིས་ཀུན་དུ་ལྟ་བར་བྱེད་དོ། །རྨི་ལམ་གྱི་ནང་དང་འདྲ་བར་གྱུར་པའི་ཕུན་སུམ་ཚོགས་པ་རྣམས་ལ་ཀུན་དུ་ལྟ་བར་བྱེད་དོ། །ངེས་པ་ཁོ་ནར་ཡང་ཡིད་འབྱུང་བར་འགྱུར་རོ། །གཞན་ཡང་རྣལ་
འབྱོར་སྤྱོད་པ་ཕྱི་རོལ་ཀྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་ན་རིའི་རིགས་སམ། ཆུ་ཀླུང་གི་རིགས་སམ། ལྗོན་ཤིང་གི་རིགས་སུ་གྱུར་པ་དགའ་བ་དང་། ཤིན་དུ་དགའ་བ་དང་། མཆོག་ཏུ་
དགའ་བར་གྱུར་པ་གཞན་ཅི་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བྱང་གི་སྒྲ་མི་སྙན་ན་རི་གཞན་ཀུན་དགའ་བ་འཛིན་པ་ཞེས་བྱ་བ་དཔག་ཚད་སྟོང་པ་ཡོད་དོ། །

66-1-230a

རི་ཀུན་དགའ་བ་འཛིན་པའི་ཉེ་འཁོར་ན་ནི་རྒྱུ་འཐུན་པ་ཞེས་བྱ་བའི་ནགས་དཔག་ཚད་ལྔ་བརྒྱ་པ་ཡོད་དོ། །ནགས་དེ་ན་ནི་འབྱུང་ཁུངས་རྣམས་ཐམས་ཅད་དང་ལྡན་ནོ། །དེ་ལ་འབྱུང་ཁུངས་འདི་དག་རྣམས་
ཡོད་དེ་འདི་ལྟ་སྟེ། གསེར་གྱི་འབྱུང་ཁུངས་དང་། དངུལ་གྱི་འབྱུང་ཁུངས་དང་། ཟངས་མའི་འབྱུང་ཁུངས་དང་། ཆང་གི་འབྱུང་ཁུངས་དང་། སྦྲང་རྩིའི་འབྱུང་ཁུངས་དང་། རོ་དྲུག་གི་འབྱུང་ཁུངས་རྣམས་ཏེ། འབྱུང་ཁུངས་
དེ་དག་དང་གཞན་དག་རྣམས་ཀྱང་དེ་དག་ལ་ཡོད་པ་ཡིན་ནོ། །རྒྱུ་འཐུན་པའི་ཉེ་འཁོར་རྣམས་ནི་དགའ་བར་གྱུར་པ་ཡིན་ཏེ། གང་ལ་བཻ་དཱུརྱ་དང་མཚུངས་པར་གྱུར་པའི་ལྗོན་ཤིང་རྣམས་ལ་ནི་མེ་ཏོག་གི་འཁྲི་
ཤིང་རྣམས་ཀྱིས་ཡོངས་སུ་བསྐོར་བ་དང་། གསེར་གྱི་འདབ་མའི་པད་མའི་རྫིང་བུ་རྣམས་ཀྱི་ནི་དངུལ་གྱི་ཡུ་བ་ཅན་ཡིན་ནོ། །དངུལ་གྱི་འདབ་མ་ལ་ནི་གསེར་གྱི་ཡུ་བ་ཅན་ཡིན་ནོ། །གསེར་དང་དངུལ་གྱི་འདབ་
མ་རྣམས་ལ་ནི་བཻ་ཌཱུརྱའི་ཡུ་བ་ཅན་རྣམས་ཏེ། ཉི་མ་ཤར་མ་ཐག་ཐོག་ལྟར་དམར་བའི་པད་མ་རྣམས་ཀྱིས་ཁྱབ་པར་གྱུར་པའི་པད་མའི་རྫིང་བུ་དེ་དག་རྣམས་ལ་བྱ་སྣ་ཚོགས་པ་རྣམས་ཀྱིས་ཉེ་བར་མཛེས་པའོ། །
འདི་ལྟ་སྟེ། ངང་པ་དང་། ཁྲུང་ཁྲུང་དང་། བེ་ཀཻཿདང་། མཚོའི་ཁྲུང་ཁྲུང་དང་། ཀཱ་དམྤ་དང་། རི་དགས་ཀྱི་མགྲིན་པ་པ་དང་། ཆུ་བྱ་དང་། མདྦྷ་བ་དང་། བླ་བཿདང་། ཙམ་བཱ་ཀ་དང་། བཱ་ལུ་ཀཱ་དང་། ཨཱདྱཿདང་། སཱ་ར་སཱི་དང་། བི་ལཱ་ལཱཿདང་། 
དུས་སུ་རྗོད་པར་བྱེད་པ་དང་། ཨུཥྞ་བཱི་ར་བཿདང་། མཚན་མོ་རྒྱུ་བ་དང་། པདྨའི་རྡུལ་ལ་དགའ་བ་དང་། སིནྡུའི་རླབས་དང་། རླབས་ལས་སྐྱེས་པ་སྟེ་བྱའི་རིགས་ཉི་ཤུ་པོ་དེ་དག་རྣམས་པད་མའི་རྫིང་བུ་དེ་ན་ཡོད་དོ། །རྒྱུ་འཐུན་པ་ཞེས་
བྱ་བའི་ནགས་ཀྱི་ཉེ་འཁོར་དེ་ལས་ཤིན་དུ་འདས་ནས་ཀུན་དགའ་བ་འཛིན་པའི་རིའི་ཕྱེད་ཏུ་གྱུར་པ་ན་དཔག་ཚད་བརྒྱ་ཡིན་ཏེ། དེ་ལ་འོད་མའི་ཀླུང་ན་ངེས་པར་གནས་པ་ཞེས་བྱ་བའི་སྐྱེས་བུ་རྣམས་ཡོད་དོ། །གང་དག་

66-1-230b

གསེར་ཀྱི་རང་བཞིན་དུ་གྱུར་པའི་ལྗོན་ཤིང་གི་ཚོགས་ན་དེ་དག་གླུ་ལེན་པར་བྱེད་པ་ན་ཡང་ནམ་མཁའ་ལ་གནས་ནས་ལྷའི་བུ་མོ་རྣམས་ཀྱང་ཉན་པར་བྱེད་དོ། །ཆུ་ཀླུང་དང་མཚེའུ་དང་ཉེ་བའི་ནགས་དང་བྱ་རྣམས་ཀྱང་ཕུན་
སུམ་ཚོགས་པར་གྱུར་པ་ནི་ཡུལ་འདི་ལ་ཡང་སྔར་བཞིན་ནོ། །གཞན་ཡང་རྣལ་འབྱོར་སྤྱོད་པ་པས་སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པ་རྣམས་ཡང་དག་པར་རྗེས་སུ་མཐོང་སྟེ། སེམས་ཅན་འདི་དག་
རྣམས་ནི་ངུ་བར་བྱར་ཡོད་པ་ལ་གླུ་ལེན་པར་བྱེད་དོ། །ཅིའི་ཕྱིར་འདི་དག་རྣམས་མ་མཐོང་བ་ཡིན། བག་མེད་པས་བག་མེད་པར་རྣམ་པར་རྒྱུ་བའི་ཕྱིར་ན་དམྱལ་བ་པ་རྣམས་སུ་ནི་ངུ་བར་འགྱུར་བ་ཡིན་ན། ཀུན་དུ་གོ་བར་
ཡང་མ་ཡིན་ནོ། །སྲེད་པའི་ཞགས་པའི་འཆིང་བས་བཅིངས་པར་གྱུར་པའི་སེམས་ཅན་རྣམས་ཀྱིས་ལུས་དང་ངག་དང་ཡིད་ཀྱིས་ཉེས་པར་སྤྱོད་པ་གང་ཡིན་པ་དེ་རྣམས་བྱེད་དོ། །དེའི་རྣམ་པར་སྨིན་པ་རྣམས་ནི་རྩུབ་
པ་ཡིན་པས་དམྱལ་བ་དང་། ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །ལས་རྣམས་ཇི་ལྟ་བ་བཞིན་དུ་ཉེ་བར་འགྲོ་བ་ཡིན་པས་ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་
ཆེན་པོ་དང་། ཚ་བ་དང་། རབ་ཏུ་ཚ་བའི་དམྱལ་བ་རྣམས་སུ་ངུ་བ་དང་ལྷང་ཀྱོག་རྣམ་པ་སྣ་ཚོགས་པ་རྣམས་ཀྱིས་མངོན་པར་འཇོམས་པར་བྱེད་དོ། །འདོད་པའི་སྒྲ་དང་། རེག་བྱ་དང་། རོ་དང་། གཟུགས་དང་། དྲིའི་སྲེད་པ་རྣམ་
པ་ལྔས་ཀུན་ནས་ཉེ་བར་བཅིངས་ནས་སྔོན་གྱི་མཐའ་དང་ཕྱི་མའི་མཐའ་ལ་སེམས་ཅན་གྱི་རྒྱ་མཚོ་འཁོར་བ་ཡིན་ནོ། །དེ་ལྟར་རྣལ་འབྱོར་སྤྱོད་པ་པས་འོད་མའི་ཀླུང་ལ་ངེས་པར་གནས་པའི་སྐྱེས་བུ་རྣམས་ལ་ཀུན་དུ་
བལྟས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ཕྱི་རོལ་གྱི་ལུས་ལ་ལྟ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་ན་དགའ་

66-1-231a

བའམ་ཆེས་དགའ་བར་གྱུར་པ་གཞན་ཅི་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ། བྱང་ཕྱོགས་སྒྲ་མི་སྙན་ན་རི་གཞན་ཡང་ཡོད་དེ། ཡིད་ཀྱི་རྗེས་སུ་
འཐུན་པ་ཞེས་བྱ་བའི་དཔག་ཚད་ནི་སྟོང་དུ་གྱུར་པ་ཡིན་ནོ། །རི་དེའི་དགའ་བར་གྱུར་པ་རྣམས་ནི་མི་འམ་ཅི་མོ་རྣམས་ཀྱིས་རྟག་པ་ཁོ་ནར་གླུ་ལེན་པར་བྱེད་པ་ཡིན་ཏེ། རིའི་རྩེ་མོ་རྣམས་དང་། ནགས་རྣམས་དང་། ཉེ་
བའི་ནགས་རྣམས་དང་། རི་ངོས་རྣམས་དང་། རིའི་ཕུག་རྣམས་དང་། རྫིང་བུ་རྣམས་དང་། ཤིང་ཀེ་ཏ་ཀའི་ནང་རྣམས་དང་། ཀླུའི་ནགས་ཀྱི་ནང་རྣམས་དང་། ནཱ་རི་ཀེ་ལའི་ནང་རྣམས་དང་། ཤིང་པ་ན་སའི་ནང་རྣམས་དང་། 
ཨ་རུ་རའི་ནགས་རྣམས་དང་། ཨཱ་མྲའི་ནགས་རྣམས་དང་། ཆུ་ཤིང་གི་ནགས་རྣམས་དང་། གསེར་གྱི་དཔལ་འབྲས་ཀྱི་ཤིང་གི་ནགས་རྣམས་དང་། ཀ་པིཏྠེའི་ནགས་རྣམས་དང་། རྨ་བྱའི་ནགས་རྣམས་དང་། ཁུ་བྱུག་གི་
ནགས་རྣམས་དང་། ནེ་ཙོའི་ནགས་ཀྱི་ནང་རྣམས་དང་། ཆུ་ཀླུང་དང་། ཁྲུས་ཀྱི་རྫིང་བུ་དང་། ཉེ་བའི་ནགས་རྣམས་དང་། པད་མའི་ཚལ་རྣམས་དང་། ཨུཏྤ་ལའི་ཚལ་རྣམས་དང་། སིནྡུ་བཱ་རའི་ནགས་རྣམས་དང་། གྲུབ་པའི་
ནགས་རྣམས་དང་། ཙཱུ་ཏའི་ནགས་རྣམས་དང་། ཀུ་ར་རའི་ནགས་རྣམས་དང་། གསོན་པ་གསོན་པའི་ནགས་རྣམས་དང་། ཏཎྜའི་ནགས་རྣམས་དང་། རྫིང་བུ་དགའ་བར་གྱུར་པ་རྣམས་ལ་ཐམས་ཅད་ཀྱང་རིན་པོ་ཆེའི་སྒྲ་
སྙན་པ་ཡང་དག་པར་ལྡན་པ་སྐྱེ་བོ་རྣམས་ཐམས་ཅད་ཀྱི་རྣ་བར་ཡང་སྙན་པར་གྱུར་པ། སྲེད་པའི་ཟིལ་གྱིས་མནན་པར་གྱུར་པའི་བྱིས་པའི་བློ་ཅན་རྣམས་ལ་སླར་ཡང་བརྒྱ་འགྱུར་དུ་སྲེད་པའི་མེ་ཀུན་དུ་འབར་བར་
འགྱུར་བར་མི་འམ་ཅི་མོ་རྣམས་ཀྱིས་གླུ་ལེན་པར་བྱེད་དོ། །དེ་དག་གི་སྒྲ་དབྱངས་ཀྱིས་རི་དགས་རྣམས་ཀྱང་སྒྲ་འབྱིན་པར་བྱེད་དོ། །ལྷན་ཅིག་སྤྱོད་པར་བྱེད་དོ། །ལྷན་ཅིག་སྤྱོད་པར་གྱུར་པའི་བྱའི་ཚོགས་རྣམས་

66-1-231b

ཀྱང་ལྷན་ཅིག་ཏུ་རྩེ་དགའ་བར་བྱེད་དོ། །བདུད་རྩིར་རྟག་ཏུ་རུང་བའི་འབྲས་བུ་རྣམས་ཀྱང་ལེགས་པར་མིད་པར་བྱེད་དོ། །བུང་བ་རྣམས་ཀྱང་རྩི་དག་ལ་འཐུང་བར་བྱེད་དོ། །རིག་པ་འཛིན་པ་རྣམས་དང་ལྷའི་བུ་མོ་རྣམས་
ཀྱང་ནམ་མཁའ་ལ་འདུས་ནས་ཉན་པར་བྱེད་དོ། །དེ་ལྟར་ཡིད་ཀྱི་རྗེས་སུ་འཐུན་པའི་རི་ལ་མི་འམ་ཅི་མོ་དེ་དག་རྣམས་ཀྱི་གླུ་དགའ་ཞིང་སྙན་པ་ཡིན་ནོ། །རི་དེའི་ཉེ་འཁོར་རྣམས་ན་ཡང་བཻ་ཌཱུརྱའི་རང་བཞིན་དང་། གསེར་གྱི་
བྲག་དང་། དངུལ་གྱི་རྡོ་བ་དང་། བི་དྲུ་མའི་ལྗོན་ཤིང་དང་། མུ་ཏིག་གི་ཕྱེ་མ་དང་། བྱི་རུའི་རྐང་བུ་རྣམས་དང་། ཤེལ་གྱི་རྡོ་བ་དང་། དུང་གི་རྐང་བུ་འཇམ་པོ་རྣམས་དང་། གསེར་གྱི་པད་མའི་རྫིང་བུ་རྣམས་ལ་ངང་པ་རྣམས་
ཀྱིས་ཉེ་བར་མཛེས་པར་བྱས་པ་དང་། ལུས་རིན་པོ་ཆེ་རྣམ་པ་སྣ་ཚོགས་པ་ལས་གྲུབ་པའི་རི་དགས་རྣམས་དང་། ཀོ་ཀ་ལིའི་སྒྲ་དང་བཅས་པའི་ནགས་དང་། རྨ་བྱ་དང་ཤང་ཤང་ཏེའུ་གྱི་སྒྲ་སྙན་པ་རྣམས་དང་། ཁྲུས་ཀྱི་
རྫིང་བུ་ན་བུང་བའི་སྒྲ་སྙན་པར་གྱུར་པ་རྣམས་ཏེ། དེ་ལྟར་ཡིད་ཀྱི་རྗེས་སུ་འཐུན་པའི་རིའི་དགའ་བ་ཡིན་ནོ། །སྐྱེ་བོ་རྣམས་ཐམས་ཅད་ཀྱི་མིག་དང་རྣ་བར་སྡུག་ཅིང་སྙན་པ་ཡིན་ནོ། །ཐམས་ཅད་ཏུ་ཡང་རབ་ཏུ་དགའ་
བ་དང་། རྒོད་པ་དང་། རོལ་པ་དང་། རྩེ་བར་བྱེད་པ་དང་། ཡོངས་སུ་སྤྱོད་པ་དང་། མི་ཕོ་མོ་དང་། བྱའི་ཚོགས་རྣམས་ཀྱིས་ཀྱང་ཡིད་བདེ་བར་བྱེད་པ་ཡིན་ནོ། །རི་རབ་ལྷུན་པོ་གཉིས་པ་ལྟ་བུར་གྱུར་པ་དཔག་ཚད་ཉིས་
སྟོང་འཕང་དུའོ། །མཐོ་བའི་ཡིད་ཀྱིས་རྗེས་སུ་འཐུན་པའི་རི་དེའི་འོད་ཀྱིས་དཔག་ཚད་ཉིས་སྟོང་དུ་མདོག་སྐྱ་བོར་བྱེད་དོ། ། བཻ་ཌཱུརྱའི་འོད་ཀྱི་གཟི་བརྗིད་ཀྱིས་གསེར་གྱི་མདོག་དང་ལྗོན་ཤིང་སྔོན་པོ་རྣམས་ཀྱང་
ཉེ་བར་བཅོམ་ནས་རི་སྐྱ་བོར་བྱེད་དོ། །དཔེར་ན་རི་རབ་ལྷུན་པོའི་གསེར་མདོག་བཟང་པོའི་གཟི་བརྗིད་ཀྱིས་རྩྭ་རྣམས་ཐམས་ཅད་ཀྱང་གསེར་བཞིན་དུ་འགྱུར་རོ། །འདི་ལྟ་སྟེ། ཡིད་ཀྱི་རྗེས་སུ་འཐུན་པའི་རིའི་

66-1-232a

གཟི་བརྗིད་ཀྱིས་ཀྱང་ཐམས་ཅད་སྐྱ་བོར་འགྱུར་རོ། །རི་དགས་དང་། བྱ་དང་། ཆུ་དང་། མཚེའུ་དང་། ཆུ་ཀླུང་དང་། ལྗོན་ཤིང་དང་། པད་མ་རྣམས་ཀྱང་ཕུན་སུམ་ཚོགས་པ་ནི་རི་འདི་ལ་ཡང་སྔར་གྱི་བཞིན་
ནོ། །རི་བོ་ཡིད་ཀྱི་རྗེས་སུ་འཐུན་པའི་ཉེ་འཁོར་ན་སྐྱེས་བུ་གང་དག་རབ་ཏུ་གནས་པ་དེ་དག་རྣམས་ནི་སྐྱ་བོར་སྣང་བ་ཞེས་བྱ་བའི་མིང་དུ་འགྱུར་རོ། །སྐྱ་བོར་སྣང་བའི་སྐྱེ་བོ་རྣམས་ནི་གཟི་བརྗིད་ཆེ་བ་དང་། 
གཟུགས་ཆེན་པོ་དང་ལྡན་པ་དང་། མཆོག་ཏུ་དགའ་བ་དང་། མཆོག་ཏུ་མཛེས་པ་དང་། མེ་ཏོག་གི་འཕྲེང་བ་དང་། ཕྱེ་མ་དང་། དྲི་དང་། བྱུག་པ་དང་། རྒོད་པ་དང་། འགྱིང་བག་དང་། གར་དང་། གླུ་དང་། རོལ་མོའི་སྒྲ་
རྣམས་ལ་དགའ་བར་གྱུར་པ་དང་། ཕན་ཚུན་ཕྲག་དོག་དང་སེར་སྣའི་དྲི་མ་རྣམས་ཉེ་བར་བཅོམ་པ་དང་། བདག་གི་བ་མེད་ཅིང་ང་རྒྱལ་མེད་པ་དང་། སྐྱ་བོར་སྣང་བའི་སྐྱེས་བུ་རྣམས་ཐམས་ཅད་ཉིད་ཀྱང་ཕྲེང་བ་
དང་། ཕྱེ་མ་དང་། དྲི་དང་བྱུག་པ་རྣམས་ཀྱིས་ལུས་བརྒྱན་པ་ཡིན་ནོ། །རྣམ་པ་སྣ་ཚོགས་པའི་རོལ་མོའི་སྒྲ་དང་གླུ་དང་དྲི་ཟའི་སྒྲ་རྣམས་ཀུན་ནས་རྗོད་པར་བྱེད་པའི་ཆོས་དགའ་བར་འགྱུར་བ་རྣམས་ཀྱིས་ཐམས་ཅད་
ཉིད་དགའ་བར་བྱེད་དོ། །ཡིད་ལ་སྨོན་པའི་ཀུན་དུ་བསམས་པ་རྣམས་ཀྱང་གང་དང་གང་དག་ཡིད་ལ་སེམས་པར་བྱེད་པ་དེ་རྣམས་དེ་དག་ལས་འབྱུང་བར་འགྱུར་ཏེ། འདི་ལྟ་སྟེ། མ་བཏགས་པའི་གོས་དང་རྣམ་
པ་སྣ་ཚོགས་པ་རྣམས་དང་། རྣམ་པ་སྣ་ཚོགས་པའི་དོ་ཤལ་རྣམས་དང་། དེ་ལ་འོས་པར་གྱུར་པའི་རྣམ་པ་སྣ་ཚོགས་པའི་རྒྱན་རྣམས་དང་། ཉལ་བ་འམ་རབ་ཏུ་སད་པར་གྱུར་པ་ན་ཡང་ཐོས་ན་དགའ་བར་
འགྱུར་བ་ཡིད་དུ་འོང་བ་ལས་ཀྱང་ཡིད་དུ་འོང་བར་གྱུར་པའི་སྒྲ་མ་འདྲེས་པ་རྣམས་རྣམ་པ་སྣ་ཚོགས་པའི་བྱ་བརྒྱ་སྟོང་དུ་མ་རྣམས་ཀྱིས་སྒྲོགས་པར་བྱེད་དོ། །རིགས་བརྒྱ་ཕྲག་དུ་མའི་པད་མའི་རྫིང་བུ་རྣམས་

66-1-232b

ཀྱི་དྲི་ཞིམ་པོ་རྣམས་ཀྱང་རྟག་ཏུ་སྣོམ་པར་བྱེད་དོ། །སྐྱ་བོར་སྣང་བའི་སྐྱེས་བུ་རྣམས་ཀྱིས་དེ་ལྟར་བཟང་པོའི་ལས་ཀྱི་འབྲས་བུ་སྤྲུལ་པའི་བདེ་བ་རྣམས་ཉམས་སུ་མྱོང་བར་བྱེད་དོ། །དེ་བཞིན་དུ་དམན་པ་
དང་། བར་མ་དང་། མཆོག་ཏུ་ལེགས་པར་བྱས་པ་རྣམས་ཀྱང་ཡིན་ནོ། །གཞན་ཡང་རྣལ་འབྱོར་སྤྱོད་པ་པ་ལས་ཀྱི་ཆོས་ཀྱི་རྣམ་པར་སྨིན་པ་ལ་རྗེས་སུ་ལྟ་བར་བྱེད་དེ། ཀྱེ་མ་ཇི་ལྟར་ན་སེམས་ཅན་འདི་དག་རྣམས་
ཀྱིས་ལེགས་པར་བྱས་པའི་ལས་ཟད་པ་རྗེས་སུ་མ་མཐོང་བ་ཡིན། འདི་དག་རྣམས་ཀྱི་མངོན་སུམ་དུ་མ་གྱུར་པ་ཡིན་ནམ་ཅེ་ན་ཇི་ལྟར་སྐྱེ་བའི་སྡུག་བསྔལ་ནི་དང་པོ་ཉིད་དུ་ཕ་མ་གཉིས་ཀྱི་ཁུ་ཆུ་དང་ཁྲག་དེ་དག་གཉིས་
ཀྱིས་མི་སྟོང་པར་གྱུར་པའི་གཅིན་གྱི་ནང་དུ་གསུས་པའི་སྨད་ཀྱི་རུས་པའི་རང་བཞིན་གྱི་རྣམ་པ་ཞིང་གི་གདུབ་ཀོར་ལྟ་བུའི་མངལ་དུ་རྣམ་པར་ཤེས་པའི་ས་བོན་སྐྱེའོ། །དེ་ཡང་ལས་ཀྱི་རླུང་གིས་བུ་
སྣོད་བསྐོར་བར་གྱུར་པས་ཉི་མ་བདུན་པ་ལ་མེར་མེར་པོར་འགྱུར་རོ། །སྲོག་གཅོད་པ་སྤངས་པས་མེར་མེར་པོར་གྱུར་པ་དེ་ལ་གནས་པ་ན་ཡང་རྣམ་པར་ཤེས་པ་མི་འཕོའོ། །ཉི་མ་བདུན་པ་གཞན་ལ་ནི་གོར་གོར་
པོར་འགྱུར་རོ། །རྣམ་པར་ཤེས་པ་ཡང་ལས་དང་ཉོན་མོངས་པ་དང་བཅས་པའི་དབང་གིས་དེ་ཉིད་ལ་རྨོངས་ནས་གནས་སོ། །དེ་ལ་གནས་པ་ཉིད་ཀྱང་ཉི་མ་བདུན་པ་ཡིན་ཏེ། ཉི་མ་བདུན་ན་ཤའི་གོང་བུར་འགྱུར་རོ། །
གཅིན་དང་རྟུག་པའི་ཚོགས་རྣམས་ཀྱང་མའི་གསུས་པའི་སྨད་དུ་ཡིན་ཞིང་། གང་དང་གང་དག་མའི་བྱ་བར་གྱུར་པའི་ལུས་རྣམ་པར་བསྐྱོད་པ་དང་ཟས་ཀྱིས་བྱས་པ་རྣམས་ཀྱང་རུང་སྟེ། དེ་དང་དེ་དག་རྣམས་ཉིད་ཀྱིས་
འདིའི་གཟིར་བར་འགྱུར། ཇི་ལྟར་གཏུན་ཤིང་གིས་བུ་རམ་ཤིང་འཚིར་བར་བྱེད་པ་དེ་ལྟར་མངལ་ན་གནས་པ་འཚིར་བར་བྱེད་དོ། །གཞན་ཡང་ལས་ཀྱི་རླུང་གིས་ཤའི་གོང་བུ་དྲངས་པར་གྱུར་པས་སྦོམ་པོར་འགྱུར་རོ། །

66-1-233a

དེ་ལས་ནི་རྡོག་རྡོག་ལྔ་འབྱུང་བར་འགྱུར་ཏེ། རྐང་པ་གཉིས་ཀྱི་དང་། ལག་པ་གཉིས་ཀྱི་དང་། མགོའིའོ། །གཞན་ཡང་ལས་ཀྱི་རླུང་གིས་བསྐོར་བར་གྱུར་པས་མངལ་ན་སྐྱེ་བ་ནི་མའི་གསུས་པར་འབྱུང་བར་
འགྱུར་ལ། དེ་ལས་ཀྱང་ལྟེ་བའི་སྦུ་གུ་འབྱུང་བར་འགྱུར་རོ། །སྦུ་གུ་དེ་ནི་མའི་མཁལ་མའི་ནང་ནས་འབྱུང་བར་འགྱུར་རོ། །གང་ཡང་གྲང་བ་དང་། དྲོ་བ་དང་། རོ་བཟང་བ་དང་། རོ་ངན་པ་རྣམས་ཀྱང་རུང་སྟེ། མས་ཟས་ཟོས་
པའི་རོ་དེ་ཡང་དེ་ལ་སྦུ་གུ་དེ་ནས་འཇུག་གོ། །ལྟེ་བ་ནས་ཀྱི་རོ་ཟས་ཀྱི་གང་ཡིན་པ་དེས་མངལ་ན་གནས་པ་འདི་ཀུན་དུ་འཚོ་བར་བྱེད་དོ། །དེ་ལྟར་མངལ་གྱིས་བྱས་པའི་ཤིན་དུ་སྡུག་བསྔལ་བ་དང་། ཁྱད་པར་དུ་བཙོག་པ་རྣམས་
ཉམས་སུ་མྱོང་བར་འགྱུར་རོ། །དེ་གལ་ཏེ་མངལ་ན་གནས་པ་ན་དུས་བྱེད་པར་མ་གྱུར་ན་ནི་དེ་གཅིན་དང་ཁྲག་གི་གནས་སྐབས་ན་གནས་པའི་དེ་ལ་ཐམས་ཅད་རྫོགས་པར་གྱུར་ནས་ཟླ་བ་བཅུ་ན་ཟོར་མ་མིག་གི་ནང་ནས་
འདྲེན་པས་བུར་ཤིང་ལྟར་ཡན་ལག་དང་ཉིང་ལག་ཐམས་ཅད་འཚིར་བར་གྱུར་པས་མའི་སྐྱེ་གནས་ནས་འབྱུང་བ་ཡིན་ནོ། །སྐྱེས་ནས་ཀྱང་རླུང་ཚ་བས་རེག་པར་གྱུར་པས་སྡུག་བསྔལ་གྱི་མཆོག་རྣམས་ཉམས་སུ་མྱང་བར་
འགྱུར་རོ། །སྐྱེས་པར་གྱུར་ནས་ཀྱང་མས་འདི་བོར་ནས་གར་འདོད་པ་ཀུན་དུ་རྒྱུ་བར་འགྱུར་རོ། །དེ་ཡང་བདག་ཉིད་ཀྱི་མཐེབ་མོ་ནུ་བར་བྱེད་དོ། །དེ་ལས་འོ་མ་འབྱུང་བར་འགྱུར་རོ། །དེས་ཀྱང་བདག་ཉིད་འཚོ་བར་འགྱུར་རོ། །
དེ་ལྟར་དུས་དེ་ཉིད་ཀྱི་ཚེ་ན་བྱིས་པ་ཡིན་ཏེ། ལྷག་པས་ནི་ལང་ཚོ་ལ་རེག་པར་འགྱུར་རོ། །དེ་དག་རྣམས་ནི་དུས་ཀྱི་རླུང་གིས་ངེས་པར་བཏབ་པ་ཡིན་ན། དེས་ན་སེམས་ཅན་དེ་དག་རྣམས་ལས་ཀྱི་བགོ་སྐལ་ལ་སྤྱོད་པར་
བྱེད་པ་དང་། ལས་ཀྱི་སྐྱེ་གནས་པར་གྱུར་པ་དང་། ལས་བརྟན་པར་བྱས་པ་རྣམས་ཡིན་ཏེ། དགེ་བ་འམ་མི་དགེ་བར་གྱུར་པ་རྣམས་ཀྱང་རུང་སྟེ། ཇི་ལྟར་ལས་བྱས་པར་གྱུར་པའི་ལས་དེ་དང་དེ་དག་རྣམས་ཀྱི་སྐལ་

66-1-233b

བ་ཅན་དུ་འགྱུར་བ་ཡིན་ནོ། །འོན་ཀྱང་སྐྱེས་བུ་དེ་དག་རྣམས་ཀྱིས་ནི་ལས་དང་རྣམ་པར་སྨིན་པ་རྣམས་མངོན་སུམ་དུ་མཐོང་བ་ཡང་མ་ཡིན་ནོ། །ཀྱེ་མ་ཀྱི་ཧུད་བག་མེད་པར་རྣམ་པར་རྒྱུ་བའི་སེམས་ཅན་འདི་དག་ནི་
ཤིན་དུ་སྡུག་བསྔལ་བ་ཡིན་ཏེ། གང་གི་ཕྱིར་སྡུག་བསྔལ་གྱི་མཆོག་ཏུ་གྱུར་པའི་ལྗོན་ཤིང་རྣམས་ཀྱི་རྩ་བ་ཡང་སྐྱེ་བ་ཡིན་ནོ། །སྐྱེ་བ་ཡོད་པར་གྱུར་ནས་ཚ་བ་དང་། གྲང་བ་དང་། ལྟོགས་པ་དང་། སྐོམ་པ་དང་། ངལ་
བ་དང་། ཉམ་ཆུང་བ་དང་། མི་མཐུན་པ་དང་། ཕྲད་པ་དང་། འཐུན་པ་དང་བྲལ་བ་དང་། རྒ་བ་དང་། འཆི་བ་རྣམས་ཀྱང་འབྱུང་བར་འགྱུར་རོ། །འཁོར་བ་ན་སྡུག་བསྔལ་ཕུལ་དུ་བྱུང་བར་འགྱུར་བ་ནི་སྐྱེ་བ་ཡིན་ནོ། །འཁོར་
བ་འདི་ནི་ཕུན་སུམ་ཚོགས་པ་དང་རྒུད་པའི་ཕྱང་མོ་ཉུག་པ་ལ་ཞོན་པ་ཡིན་ནོ། །འཁོར་བ་འདི་ནི་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ཡིན་ནོ། །ཇི་ལྟར་རི་རྣམས་དང་། ནགས་དང་། ཤང་ཤོང་
དང་བཅས་པ་རྣམས་དང་། ནགས་དང་། ཉེ་བའི་ནགས་དང་། ཆུ་ཀླུང་དང་། ལྗོན་ཤིང་དང་། བྱ་དང་། མེ་ཏོག་དང་། འབྲས་བུ་དང་། རིའི་ཁྲོད་དང་། གཡང་ཁ་དང་། རིན་པོ་ཆེ་དང་འདི་དག་རྣམས་ཀྱང་མེད་པར་འགྱུར་བ་ཡིན་ན། 
བྱང་ཕྱོགས་སྒྲ་མི་སྙན་པའི་སྐྱེས་བུ་འདི་དག་རྣམས་ཀྱིས་ཅིའི་ཕྱིར་ན་མ་གོ། །མྱ་ངན་དང་བྲལ་བར་འགྱུར་བ་དང་། དུས་ཀྱི་མཐའ་ལ་ནི་ཐམས་ཅད་ཀྱང་ཐལ་བར་འགྱུར་རོ། །བྱང་ཕྱོགས་སྒྲ་མི་སྙན་གྱི་གླིང་འདི་ཡང་
སྟོངས་པར་འགྱུར་རོ། །སྐྱེས་བུ་འདི་དག་རྣམས་ཐམས་ཅད་ཀྱང་དུས་བྱས་པར་གྱུར་ནས་ལྷའི་འཇིག་རྟེན་དུ་མངོན་པར་འབྱུང་བར་འགྱུར་ལ། དེ་ནས་ནི་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་
བར་འགྱུར་ཏེ། རང་གི་ལས་ཀྱི་བགོ་སྐལ་ལ་སྤྱོད་པ་ཡིན་པའི་ཕྱིར་རོ། །དེ་ལྟར་རྣལ་འབྱོར་སྤྱོད་པ་པ་དེས་ལས་ཀྱི་འབྲས་བུ་རྣམ་པར་སྨིན་པ་རྣམས་རྗེས་སུ་མཐོང་བར་གྱུར་པ་ན་སྐྱ་བོར་སྣང་བའི་སྐྱེས་བུ་རྣམས་

66-1-234a

ལ་རྗེས་སུ་བརྩེ་བ་སྐྱེ་བར་འགྱུར་རོ། །འཁོར་བའི་བདག་ཉིད་ནི་ངན་པ་ཡིན་པར་མཐོང་ངོ་། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། གཞན་བྱང་
ཕྱོགས་སྒྲ་མི་སྙན་ན་དགའ་བ་འམ་ཆེས་དགའ་བར་གྱུར་པ་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་པད་མ་ཀུ་ཤེ་ཤ་ཡ་དང་ལྡན་པ་ཞེས་བྱ་བའི་རིའི་
པད་མ་ཀུ་ཤེ་ཤ་ཡ་དང་ལྡན་པ་ཞེས་བྱ་བའི་རི་དཔག་ཚད་སྟོང་དུ་གྱུར་པ་ལ། ཆུ་བསིལ་བ་དང་ལྡན་པ་ཞེས་བྱ་བའི་པད་མའི་རྫིང་བུ་དཔག་ཚད་ལྔ་བརྒྱ་པ་ཡོད་དེ། གསེར་གྱི་ཁ་དོག་དང་ལྡན་པའི་པད་མས་ཁྱབ་པར་
གྱུར་པ་འདམ་མེད་པ་བུང་བ་དང་། ངང་པ་དང་། ཀཱ་རཎྡ་བ་དང་། ཙཀྲ་པཱ་རྣམས་ཀྱིས་ཉེ་བར་མཛེས་པར་བྱས་པ་ཡིན་ནོ། །པད་མའི་རྫིང་བུ་དེ་ན་ཡང་ལྷའི་མེ་ཏོག་པད་མ་ཀུ་ཤེ་ཤ་ཡ་དང་། ལྷའི་མཱན་དཱ་ར་བ་དང་། ཀུ་སུ་
མ་དང་། ལྗོན་ཤིང་དང་། མེ་ཏོག་དང་། འབྲས་བུ་དང་། ཆུ་ཀླུང་དང་། རི་ཁྲོད་དང་། བྱ་དང་། ནགས་དང་། ཉེ་བའི་ནགས་དང་། རྫིང་བུ་དགའ་བར་གྱུར་པ་རྣམས་དང་། བསིལ་བའི་ཆུ་རྣམས་ནི་སྔར་གྱི་བཞིན་ནོ། །པད་མ་
ཀུ་ཤེ་ཤ་ཡ་དང་ལྡན་པའི་རིའི་ཕྱེད་དུ་གྱུར་པ་དཔག་ཚད་ལྔ་བརྒྱ་ལ་མཆོག་ཏུ་དགའ་བར་གྱུར་པའི་གཞལ་ཡས་ཁང་སྟོང་ཕྲག་བརྒྱད་བཅུ་རྩ་བཞི་ཡོད་དོ། །འདི་ལྟ་སྟེ། གསེར་དང་དངུལ་གྱི་རང་བཞིན་རྣམས་ལ་ནི་
གསེར་གྱི་སྟེགས་བུ་དང་ལྡན་ནོ། །ཤེལ་གྱི་རང་བཞིན་རྣམས་ལ་ནི་བཻ་དཱུརྱའི་སྟེགས་བུ་དང་ལྡན་ནོ། །བཻ་དཱུརྱའི་རང་བཞིན་རྣམས་ལ་ནི་ཤེལ་གྱི་སྟེགས་བུ་དང་ལྡན་ནོ། ། ཨིན་དྲ་ནཱི་ལའི་རང་བཞིན་རྣམས་ལ་ནི་མུ་སཱ་
ར་གལྦའི་སྟེགས་བུ་དང་ལྡན་ནོ། །དེ་བཞིན་དུ་ཕན་ཚུན་དུ་རྣམ་པ་སྣ་ཚོགས་པའི་སྐྱེས་བུ་རྣམས་ཀྱིས་ལེགས་པར་བརྒྱན་པ་དང་། དྲིལ་བུ་གཡེར་ཀའི་དྲ་བས་ཀུན་དུ་གཡོགས་པ་དང་། ཀླུ་དང་། གར་དང་། རྒོད་པ་དང་། 

66-1-234b

རྔ་སྒྲ་རབ་ཏུ་སྒྲོགས་པར་བྱེད་པ་དང་། རྟག་ཏུ་རབ་ཏུ་དགའ་བར་གྱུར་པ་དང་། རྒུན་འབྲུའི་ཆུ་ཀླུང་རྣམས་ཀྱིས་ཡོངས་སུ་བསྐོར་བ་དང་། ནགས་དང་ཉེ་བའི་ནགས་རྣམས་ཀྱིས་ལེགས་པར་ཁྱབ་པར་གྱུར་པ་ཡིན་ཏེ། དཔེར་བྱ་
ན་ལྷ་རྣམས་ཀྱི་གྲོང་ཁྱེར་བལྟ་ན་སྡུག་དང་། ལྷ་རྣམས་ཀྱི་མདུན་ས་ཆོས་བཟངས་ཀྱི་གཞལ་ཡས་ཁང་རྣམས་ཡིན་ཏེ། དེ་ཁོ་ན་བཞིན་དུ་པད་མ་ཀུ་ཤེ་ཤ་ཡ་དང་ལྡན་པའི་རིའི་གཞལ་ཡས་ཁང་སྟོང་ཕྲག་བརྒྱད་བཅུ་
རྩ་བཞི་ཡིན་ནོ། །ནགས་དང་། ཉེ་བའི་ནགས་དང་། རྫིང་བུ་དང་། ལྗོན་ཤིང་དང་། འབྲས་བུ་ཕུན་སུམ་ཚོགས་པ་རྣམས་ནི་སྔར་གྱི་བཞིན་ནོ། །པད་མ་ཀུ་ཤེ་ཤ་ཡ་དང་ལྡན་པའི་རིའི་ཉེ་འཁོར་ན་སྐྱེས་བུ་གང་དག་གནས་
པ་དེ་དག་རྣམས་ནི་རྣམ་པར་བཀྲ་བ་ཞེས་བྱ་བའི་མིང་དུ་འགྱུར་རོ། །དེ་དག་རྣམས་ནི་རྟག་ཏུ་རྒོད་པ་དང་། འགྱིང་བ་དང་། རྩེ་བ་དང་། གར་དང་། རོལ་མོའི་སྒྲ་དང་། ཟས་དང་། སྐོམ་དང་། འཁྲིག་པ་ལ་དགའ་བ་རྣམས་
ཡིན་ནོ། །གཞན་ཡང་རྣལ་འབྱོར་སྤྱོད་པ་པ་ལས་ཀྱི་ཆོས་ཀྱི་རྣམ་པར་སྨིན་པ་རྣམས་ལ་རྗེས་སུ་ལྟ་བར་བྱེད་དེ། ཕན་ཚུན་རྣམ་པར་འབྲལ་བ་ལས་བྱུང་བའི་སྡུག་བསྔལ་སེམས་ཅན་འདི་དག་རྣམས་ཀྱིས་ཅིའི་ཕྱིར་
མཐོང་ན། སེམས་ཅན་འདི་དག་རྣམས་ཐམས་ཅད་ཀྱི་སྡུག་པ་དང་། ཡིད་དུ་འོང་བ་རྣམས་ཐམས་ཅད་ཀྱང་ཐ་དད་དུ་འགྱུར་བ་དང་། མེད་པར་འགྱུར་བ་དང་། རྣམ་པར་འགྱེས་པ་དང་། རྣམ་པར་འབྲལ་བ་དང་། 
གཞན་དུ་འགྱུར་བ་ཡིན་ནོ། །སེམས་ཅན་འདི་དག་རྣམས་ཐམས་ཅད་ནི་འཐུན་པ་དང་ཡིད་དུ་འོང་བ་རྣམས་ཐམས་ཅད་དང་ཡང་ཐ་དད་དང་། མེད་པ་དང་། རྣམ་པར་འཐོར་བ་དང་། གཞན་དུ་འགྱུར་བ་རྣམས་འབྱུང་
བར་འགྱུར་རོ། །ལས་ཀྱིས་ཇི་ལྟ་བ་བཞིན་དུ་ཉེ་བར་འགྲོ་བ་ཡིན་ཏེ། དགེ་བའི་ལས་རྣམས་ཀྱིས་ནི་ལྷ་དང་མིའི་ནང་དུའོ། །མི་དགེ་བའི་ལས་རྣམས་ཀྱིས་དམྱལ་བ་དང་། ཡི་དགས་དང་། དུད་འགྲོ་རྣམས་སུའོ། །

66-1-235a

དེ་ལ་རྣམ་པར་བཀྲ་བའི་གཟུགས་དང་ལྡན་པའི་དེ་དག་རྣམས་ནི་བག་མེད་པར་གནས་པ་ཡིན་པས་འདོད་པའི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་ཀྱིས་ཀྱང་ངོམས་པ་མེད་པ་དང་། 
སྲེད་པས་རྣམ་པར་ཆགས་པ་དང་། སྲེད་པའི་དབང་དུ་གྱུར་པ་དང་། སྲེད་པའི་ཆུ་བོས་ཁྱེར་བར་གྱུར་པ་དང་། འདོད་ཆགས་ཀྱི་མེས་སྲེག་པར་བྱེད་པ། གཏི་མུག་གི་མུན་པར་ནུབ་པར་བྱིང་བའི་ཕྱིར་ན་ཟད་པ་དང་། 
འགྲིབ་པའི་བདག་ཉིད་རྣམས་མི་ཤེས་སོ། །ལང་ཚོ་ལ་བབ་པ་རྣམས་གོག་པོར་བྱེད་པའི་ཕྱིར་ན་རྒ་བ་ནི་ཤིན་དུ་འཇིགས་པ་ཡིན་ནོ། །རང་གི་སྐྱེ་བོ་དང་གྲོགས་པོ་དང་གཉེན་འབྲེལ་རྣམས་ཐམས་ཅད་དང་འབྲལ་བར་
བྱེད་པའི་ཕྱིར་རྒོལ་བའི་འཇིགས་པར་གྱུར་པ་གསོན་པའི་ལྗོན་ཤིང་སྲེག་པར་འགྱུར་ཞིང་སེམས་ཅན་རྣམས་ཐམས་ཅད་ཀྱི་ནགས་ལྷག་མ་མ་ལུས་པར་སྲེག་པར་འགྱུར་བས་འཆི་བའི་མེ་ངེས་པར་འོང་བར་འགྱུར་
རོ། །དེ་དག་ནི་མཐོང་བ་ཡང་མ་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རི་བཅུས་ཡོངས་སུ་བསྐོར་བར་གྱུར་པའི་བྱང་ཕྱོགས་སྒྲ་མི་སྙན་འདི་ལྟ་སྟེ། 
སང་ཀཱ་ཤེ་དང་། རྭ་མཉམ་པ་དང་། རི་དགས་ཀྱི་སྒྲ་དུལ་བ་དང་། སྤྲིན་དཀར་པོ་འཛིན་པ་དང་། མཐོ་བར་བརྩེགས་པ་དང་། ཉེ་འཁོར་ཕྲེང་བ་དང་ལྡན་པ་དང་། དུས་ན་དགའ་བ་དང་། ཀུན་དགའ་བ་འཛིན་པ་དང་། ཡིད་
ཀྱི་རྗེས་སུ་འཐུན་པ་དང་། པད་མ་ཀུ་ཤེ་ཤ་ཡ་དང་ལྡན་པ་འདི་དག་རྣམས་ལ་ངེས་པར་སེམས་ཅན་འདི་དག་རྣམས་ལས་གང་གིས་སྐྱེས་པ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་
བར་གྱུར་པ། སྔར་བཞིན་དུ་སེམས་ཅན་དེ་དག་རྣམས་ནི་དགེ་བའི་ལས་རྣམས་ལས་ཀུན་དུ་འབྱུང་བ་ཡིན་ནོ། །དགེ་བའི་ལས་རྣམས་ཀྱི་མཐའ་ལ་སྤྱད་པར་གྱུར་པ་ཡང་། སྲོག་གཅོད་པ་དང་། མ་བྱིན་པར་ལེན་པ་དང་། 

66-1-235b

འདོད་པས་ལོག་པར་གཡེམ་པ་རྣམས་རབ་ཏུ་སྤངས་པར་གྱུར་ཅིང་། ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་རྣམས་ཀྱང་རབ་ཏུ་སྤངས་པ་དང་། འདིར་དགེ་བ་རྣམ་པ་བཅུའི་ལས་ཀྱི་མཐའ་
ལ་སྤྱད་པ་ཡིན་ནོ། །དེ་དག་རྣམས་ནི་དགེ་བ་དེའི་ལས་རྣམས་ཀྱི་རྐྱེན་ཀྱིས་སྐྱེས་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་པ་ལས་དང་ཆོས་དང་རྣམ་པར་སྨིན་པ་རྣམས་ལ་རྗེས་སུ་ལྟ་བར་བྱེད་དེ། ལས་གང་དག་
གིས་སྐྱེས་བུ་དེ་དག་རྣམས་ཀྱི་དྲུང་དང་སྐྱེས་བུ་གཞན་དག་རྣམས་ཀྱི་དྲུང་ན་ཡང་གཟུགས་ཀྱི་ཚད་དང་སྟོབས་དང་བརྩོན་འགྲུས་དང་དབྱིབས་རྣམས་ཆེས་ཁྱད་པར་དུ་འཕགས་པའི་སྐྱེས་བུ་གཞན་ཡོད་དམ་ཞེ་ན། དེས་
ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སེམས་ཅན་དེ་དག་རྣམས་ནི་ཡང་དག་པའི་ལྟ་བ་མངོན་དུ་བྱས་པ། གཡོ་བ་མེད་པ་དང་། གཞན་ལ་གནོད་པར་མི་བྱེད་པ་དང་། དྲང་
པོ་དྲང་པོའི་རང་བཞིན་ཅན་དང་། དེས་པར་གྱུར་པ་དང་། དེས་པའི་རང་བཞིན་ཅན་དང་། ཆོས་པ་དང་ཆོས་ཀྱི་རྗེས་སུ་འཇུག་པ་དང་། ཆོས་དང་ལྡན་པའི་སྐྱེས་བུ་རྣམས་ལྷན་ཅིག་འགྲོགས་པར་བྱེད་པ་རྣམས་ནི་རྒྱུ་དེ་
དང་རྐྱེན་དེ་ལས་ལུས་ཞིག་པར་གྱུར་ནས་བདེ་འགྲོ་མཐོ་རིས་ཀྱི་འཇིག་རྟེན་པ་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། རྒྱལ་ཆེན་རིས་བཞི་དང་། སུམ་བཅུ་རྩ་གསུམ་པ་རྣམས་སུའོ། །དེ་ལས་ཤི་འཕོས་པར་གྱུར་ནས་
ཀྱང་འདིར་སྐྱེ་བར་འགྱུར་རོ། །འདི་ལས་ཤི་འཕོས་པར་གྱུར་ནས་ཀྱང་དེར་སྐྱེ་བར་འགྱུར་རོ། །གཞན་ཡང་རྣལ་འབྱོར་སྤྱོད་པ་པ་ལས་ཀྱི་ཆོས་ཀྱི་རྣམ་པར་སྨིན་པ་རྣམས་ལ་ལྟ་བར་བྱེད་དེ། ལས་གང་དག་གིས་སེམས་
ཅན་དེ་དག་རྣམས་ཆེས་ཁྱད་པར་དུ་འཕགས་པ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་དེ་རྣམས་ནི་ཐམས་ཅད་ཀྱིས་ཀྱང་སྔོན་མི་འཇིགས་པའི་སྦྱིན་པ་རབ་ཏུ་

66-1-236a

བྱིན་པར་གྱུར་པ་ཡིན་ཏེ། གྲོང་ཁྱེར་གྱི་ལྷོ་ཕྱོགས་ཀྱི་སྒོར་ཁྲིད་པར་གྱུར་པའི་སེམས་ཅན་ཤིན་དུ་སྐྲག་པ་རྣམས་ལ་སྲོག་གི་སྦྱིན་པ་བྱིན་པ་ཡིན་ལ། རྒྱབ་དུ་ལག་པ་དམ་པོར་བཅིངས་ཤིང་དུར་ཁྲོད་དུ་ཁ་ཕྱོགས་
པར་གྱུར་ནས་གསོད་པའི་རྔ་པ་ཊ་ཧ་བརྡུངས་པར་གྱུར་ཅིང་གཤེད་མའི་མི་གཏུམ་པོ་ཕྱི་བཞིན་རྗེས་སུ་འབྲང་བར་གྱུར་པ་རྣམས་ལ་སྲོག་གི་སྦྱིན་པ་བྱིན་པ་ཡིན་ནོ། །རྒྱུ་དེ་དང་རྐྱེན་དེ་ལས་ཀྱང་ལུས་ཞིག་པར་གྱུར་པ་ན་བདེ་འགྲོ་
མཐོ་རིས་ཀྱི་འཇིག་རྟེན་པ་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། རྒྱལ་ཆེན་རིས་བཞི་དང་། སུམ་བཅུ་རྩ་གསུམ་དང་། འཐབ་བྲལ་བ་རྣམས་སུའོ། །གཞན་ཡང་རྣལ་འབྱོར་སྤྱོད་པ་པ་ཕྱི་རོལ་གྱི་ལུས་ཀྱིས་ལུས་
ལ་རྗེས་སུ་ལྟ་ཞིང་གནས་ཏེ། སེམས་ཅན་དེ་དག་རྣམས་ཀྱིས་ལེགས་པར་བྱས་པའི་ལས་གང་གིས་སེམས་ཅན་དེ་དག་རྣམས་ཆེས་ཁྱད་པར་དུ་འཕགས་པ་དང་། མཆོག་ཏུ་ཁྱད་པར་དུ་གྱུར་པའི་དགའ་བ་
དང་གཟུགས་བཟང་བ་དང་། རྫུ་འཕྲུལ་ཆེ་བའི་མཆོག་ཏུ་གྱུར་པ་དང་། སྐྱེ་བོ་རྣམས་ཐམས་ཅད་ཀྱིས་མཆོད་པར་བྱེད་པ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། 
སེམས་ཅན་དེ་དག་རྣམས་ནི་སྔོན་ཐེག་པ་ཆེན་པོ་ལ་དད་པའི་ནོར་དང་ལྡན་པའི་ངང་ཚུལ་ཅན་དང་། ཐེག་པ་ཆེན་པོ་སྒྲོགས་པ་ལ་དགའ་བར་གྱུར་པས་ཡིན་ནོ། །གཞན་ཡང་སངས་རྒྱས་ཀྱིས་གསུངས་པའི་ཉན་ཐོས་
ཀྱི་ཆོས་འདུལ་བ་དག་ཉན་པར་བྱེད་ཅིང་། སངས་རྒྱས་ཀྱིས་གསུངས་པའི་གཏམ་རྒྱུད་རྣམས་ཀྱང་འཛིན་པར་བྱེད་དོ། །བརྗོད་པར་བྱེད་དོ། །དེ་སངས་རྒྱས་ཀྱིས་གསུངས་པའི་ཆོས་ཀྱི་ཚིག་གཅིག་ཐོས་པར་གྱུར་པའི་
རྒྱུ་དེ་དང་རྐྱེན་དེ་ལས་ཀྱང་རྒྱལ་པོར་འགྱུར་བ་ཡིན་ཏེ། གླིང་བཞི་ལ་ལོངས་སྤྱོད་པར་བྱེད་པའི་འཁོར་ལོས་སྒྱུར་བར་འགྱུར་རོ། །དེ་ལས་ཤི་བར་གྱུར་ནས་ཀྱང་ལྷ་རྣམས་སུ་སྐྱེ་བར་འགྱུར་ཏེ། གཅིག་གཉིས་གསུམ་

66-1-236b

བཞི་ལྔ་དྲུག་བདུན་ལྡབས་ཤིང་གླིང་བཞི་ལ་ལོངས་སྤྱོད་པར་ཡང་འགྱུར་རོ། །དེ་ལས་ཤི་འཕོས་ནས་ཀྱང་ལྷ་རྣམས་སུ་སྐྱེ་བར་འགྱུར་ཏེ། འདོད་པ་ན་སྤྱོད་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །འདི་ལྟ་སྟེ། རྒྱལ་ཆེན་
རིས་བཞི་དང་། སུམ་བཅུ་རྩ་གསུམ་པ་དང་། མཚེ་མ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དོ། །ལྷའི་རིས་དེ་དག་རྣམས་ལས་ཤི་འཕོས་པར་གྱུར་ནས་འདིར་སྐྱེ་བ་ཡིན་ཏེ། འདི་ན་ཡང་
བྱེད་པ་དང་ལྡན་པ་ཡིད་ཀྱི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་ཉམས་སུ་མྱོང་བར་བྱས་ནས་སླར་ཡང་དེ་དག་ཏུ་སྐྱེ་བར་འགྱུར་རོ། །ཕྱིས་ཡང་དེ་ནས་ཤི་འཕོས་པར་གྱུར་པ་ན་ཐེག་པ་ཆེན་པོ་ཉན་པའི་
ས་བོན་དེ་ཉིད་ཀྱིས་བསམ་གཏན་དང་པོ་ཐོབ་པར་འགྱུར་ཏེ། དེ་ཚངས་རིས་དང་། ཚངས་པའི་མདུན་ན་འདོན་དང་། ཚངས་པ་ཆེན་པོ་རྣམས་སུ་སྐྱེ་བར་འགྱུར་རོ། །གཞན་ཡང་ཐེག་པ་ཆེན་པོ་ཐོས་པར་གྱུར་པ་དེ་ཉིད་
དང་ཐོས་ནས་ཀྱང་རྗེས་སུ་སྤྱད་པར་གྱུར་པ་དེས་བསམ་གཏན་གཉིས་པ་འཐོབ་པར་འགྱུར་ཏེ། འོད་ཆུང་དང་། ཚད་མེད་འོད་དང་། འོད་གསལ་རྣམས་སུ་སྐྱེ་བར་འགྱུར་རོ། །གཞན་ཡང་ཐེག་པ་ཆེན་པོ་ཐོས་པར་
གྱུར་པའི་ས་བོན་དེ་ཉིད་དང་། ཐོས་པར་གྱུར་ནས་ཀྱང་རྗེས་སུ་སྤྱོད་ཅིང་སྤྱོད་པ་ལ་ཞུགས་པས་ནི་བསམ་གཏན་གསུམ་པ་འཐོབ་པར་འགྱུར་ཏེ། དགེ་ཆུང་དང་། དགེ་རྒྱས་དང་། ཚད་མེད་དགེ་དང་རྣམས་སུ་སྐྱེ་བར་
འགྱུར་རོ། །གཞན་ཡང་ཐེག་པ་ཆེན་པོ་ཐོས་པར་གྱུར་པའི་ས་བོན་དེ་ཉིད་དང་བྱས་ཤིང་རྗེས་སུ་སྤྱད་ལ་རྣམ་གྲངས་ཀུན་ཆུབ་པར་བྱས་ཤིང་ཡོངས་སུ་དྲི་བ་བྱས་པས་ཀྱང་བསམ་གཏན་བཞི་པ་འཐོབ་པར་འགྱུར་
ཏེ། སྤྲིན་མེད་པ་དང་། བསོད་ནམས་སྐྱེས་དང་། འབྲས་བུ་ཆེ་བ་རྣམས་དང་། ཆགས་པ་མེད་པའི་ཡེ་ཤེས་ཀྱི་མེས་ཀུན་ནས་ཉོན་མོངས་པའི་ལྗོན་ཤིང་གི་ནགས་རྣམས་སྲེག་པར་བྱེད་པའི་མི་ཆེ་བ་དང་། མི་

66-1-237a

གདུང་བ་དང་། གྱ་ནོམ་སྣང་དང་། ཤིན་དུ་མཐོང་དང་། འོག་མིན་རྣམས་སུའོ། །གཞན་ཡང་ཐེག་པ་ཆེན་པོ་ཐོས་པར་གྱུར་པའི་ས་བོན་དེ་ཉིད་དང་ཐོས་པར་གྱུར་ནས་ཀྱང་རྗེས་སུ་སྤྱད་ཅིང་སྤྱོད་པ་ལ་
ཞུགས་པ་དང་། ཡོངས་སུ་དྲི་བ་བྱས་ཏེ། སེམས་ཅན་ལྟ་བ་ལོག་པ་རྣམས་ཡང་དག་པའི་ལྟ་བ་ལ་བཀོད་ལ་ཐེག་པ་ཆེན་པོ་ཐོས་པའི་ས་བོན་དེ་ཉིད་ཀྱིས་ཀྱང་སྲིད་པའི་བཙོན་ར་རྣམས་ཐམས་ཅད་ཟད་པའི་
རང་སངས་རྒྱས་སུ་འགྱུར་བ་འམ། གཞན་ཡང་གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སེམས་སུ་ཡོངས་སུ་སྨིན་པར་འགྱུར་རོ། །ཡང་ན་གལ་ཏེ་སེམས་ཅན་རྣམས་ཐམས་ཅད་ཀྱི་བདེ་བ་
འབྱུང་བར་འགྱུར་བའི་བླ་ན་མེད་པའི་ཐུགས་རྗེ་ཆེན་པོའི་སེམས་ཡོངས་སུ་གོམས་པའི་བྱང་ཆུབ་སེམས་དཔར་འགྱུར་རོ། །ཐེག་པ་ཆེན་པོ་ཐོས་པའི་ས་བོན་དེ་ཉིད་ཀྱིས་དེའི་ཚེ་བྱང་ཆུབ་སེམས་དཔའ་
སེམས་དཔའ་ཆེན་པོ་སངས་རྒྱས་སུ་འགྱུར་ཏེ། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། 
སངས་རྒྱས་བཅོམ་ལྡན་འདས་སུ་འགྱུར་རོ། །གང་གི་ཕྱིར་ཐེག་པ་ཆེན་པོ་ཐོས་པའི་ས་བོན་གྱི་རྩ་བ་ཡང་སྦྱིན་པ་དང་། ཚུལ་ཁྲིམས་དང་། ཐོས་པ་རྣམས་ཡིན་ནོ། །དེ་ཅིའི་ཕྱིར་ཞེ་ན། ཐོས་པས་ཀྱང་ཐེག་པ་
ཆེན་པོ་ལ་རབ་ཏུ་གནས་པར་འགྱུར་ཏེ། རང་བྱང་ཆུབ་ཏུ་ཡོངས་སུ་བསྔོ་བར་བྱེད་དམ། ཉན་ཐོས་ཀྱི་བྱང་ཆུབ་ཏུ་ཡོངས་སུ་བསྔོ་བར་བྱེད་ན་ཡང་ཉན་ཐོས་ཀྱི་བྱང་ཆུབ་ཏུ་ཡང་འགྱུར་རོ། །དགེ་སློང་ངམ་ཁྱིམ་པ་རྣམས་
སྦྱིན་པའི་འབྲས་བུ་ཐོས་པར་གྱུར་ནས་སྦྱིན་པ་གཏོང་བར་བྱེད་དོ། །ཚུལ་ཁྲིམས་ཀྱི་འབྲས་བུ་ཐོས་པར་གྱུར་ནས་ཚུལ་ཁྲིམས་སྤྱོད་པར་བྱེད་དོ། །ཡེ་ཤེས་ཀྱི་འབྲས་བུ་ཐོས་པར་གྱུར་ནས་ཡེ་ཤེས་གོམས་པར་བྱེད་

66-1-237b

དོ། །དེའི་ཕྱིར་ན་མཐོ་རིས་དང་ཐར་པ་གཉིས་གའི་ས་བོན་ཡང་ཐེག་པ་ཆེན་པོ་ཐོས་པ་ཡིན་ནོ། །དེའི་ཕྱིར་འདི་ནི་སྦྱིན་པ་རྣམས་ཐམས་ཅད་ཀྱི་ཡང་མཆོག་ཡིན་ཏེ། མི་འཇིགས་པ་དང་། ཟང་ཟིང་དང་། ཚུལ་
ཁྲིམས་ཀྱི་སྦྱིན་པ་རྣམས་ལ་ནི་འདི་ལྟ་སྟེ། ཐེག་པ་ཆེན་པོ་སྒྲོགས་པའི་སྦྱིན་པའོ། ཚུལ་ཁྲིམས་རྣམས་ཀྱི་ཡང་འདི་ལྟ་སྟེ། ཐེག་པ་ཆེན་པོ་ཉན་པའི་ཚུལ་ཁྲིམས་སོ། །ཐེག་པ་ཆེན་པོ་ནི་ཉན་ཐོས་དང་རང་སངས་
རྒྱས་རྣམས་ཐམས་ཅད་དང་། དེ་བཞིན་གཤེགས་པ་རྣམས་ཀྱི་ཡང་སྐྱེད་པར་བྱེད་པ་པོ་ཡིན་ནོ། །དེའི་ཕྱིར་ན་ཐེག་པ་ཆེན་པོ་རྟག་ཏུ་མཉན་པར་བྱའོ། །གཞན་ཡང་རྣལ་འབྱོར་སྤྱོད་པ་པ་ཕྱི་རོལ་གྱི་ལུས་ལ་རྗེས་སུ་ལྟ་
ཞིང་གནས་ཏེ། བྱང་ཕྱོགས་སྒྲ་མི་སྙན་གྱི་གླིང་ན་མིང་ཅིར་བཏགས་པའི་ཡུལ་ལྗོངས་གཞན་ཡང་གནས་པ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། དཔག་
ཚད་ཉིས་སྟོང་པ་ཉེ་འཁོར་གྱི་མིག་འཇིག་རྟེན་ལས་འདས་པ་ཞེས་བྱ་བ་སྟེ། དེ་ལ་ཡུལ་ལྗོངས་འདི་དག་རྣམས་ཡོད་དོ། །འདི་ལྟ་སྟེ། ནམ་མཁའ་རིང་བ་ཞེས་བྱ་བ་དཔག་ཚད་སུམ་བརྒྱ་པ་ཡོད་དོ། །དེའི་ཉེ་འཁོར་
རྣམས་ན་སྐྱེས་བུ་གང་དག་རབ་ཏུ་གནས་པར་གྱུར་པ་དེ་དག་རྣམས་ནི་གོས་ཀྱིས་གནས་པ་ཞེས་བྱ་བ་ཡིན་ནོ། །ལྗོན་ཤིང་དང་། ཁྲུས་ཀྱི་རྫིང་བུ་དང་། མེ་ཏོག་དང་། འབྲས་བུ་དང་། ཉེ་བའི་ནགས་དང་། ཤིང་གེལ་བ་
དང་། འཁྲིས་ཤིང་དང་། ཆུ་ཀླུང་རྣམས་ཀྱང་ཕུན་སུམ་ཚོགས་པ་ནི་འདི་ལ་ཡང་སྔ་མ་བཞིན་ནོ། །ནམ་མཁའ་རིང་བ་ལས་འདས་པར་གྱུར་ནས་གཞལ་དུ་མེད་པ་ཞེས་བྱ་བའི་ཆུ་བོ་དཔག་ཚད་བདུན་བརྒྱ་པར་
གྱུར་པ་ཡོད་དེ། ཆུ་ཀླུང་དང་། ལྗོན་ཤིང་དང་། ནགས་དང་། ཉེ་བའི་ནགས་དང་། རྫིང་བུ་ཕུན་སུམ་ཚོགས་པ་རྣམས་ནི་སྔར་གྱི་བཞིན་ནོ། །གཞལ་དུ་མེད་པའི་ཆུ་བོའི་ཉེ་འཁོར་ན་ཡུལ་ལྗོངས་ལྔ་གནས་སོ། །

66-1-238a

འདི་ལྟ་སྟེ། དབུ་རྒྱན་འཛིན་པ་དང་། པ་ལཱ་ཤ་ཡིས་ཀུན་དུ་ཁྱབ་པ་དང་། ཕྲེང་བ་གནས་པ་དང་། རྨ་བྱའི་སྒྲ་དང་། ཀ་ར་ནའི་མཐའ་ན་གནས་པའོ། །དབུ་རྒྱན་འཛིན་ནི་དཔག་ཚད་ཕྱེད་དང་ཉིས་བརྒྱ་ཡིན་ནོ། །
པ་ལ་ཤས་ཀུན་དུ་ཁྱབ་པ་དང་གཉིས་ནི་དཔག་ཚད་ཕྱེད་དང་ཉིས་བརྒྱ་ཡིན་ནོ། །རྨ་བྱའི་སྒྲ་ནི་དཔག་ཚད་བརྒྱ་ཡིན་ནོ། །ཀ་ར་ནའི་མཐའ་ན་གནས་པ་ནི་དཔག་ཚད་བརྒྱ་ཡིན་ནོ། །གཉིས་པ་ཡང་དེ་ལ་དཔག་ཚད་བརྒྱ་
ཕྲག་བཅུ་གནས་ཏེ། དཔག་ཚད་བརྒྱ་པ་དང་། དཔག་ཚད་བརྒྱ་ཕྲག་བཅུར་གནས་པ་ཡིན་ནོ། །འདི་ལྟ་སྟེ། ཀུཌྜཾ་ག་ཏི་ན་གནས་པ་དང་། དྲི་རྒྱུ་བ་དང་། ནགས་པོ་གསུས་པ་དང་། མིག་ལ་ཀུན་
དུ་རྒྱུ་བ་དང་། རིའི་ཀླུང་ན་ཀུན་དུ་སྤྱོད་པ་དང་། གྲུ་གསུམ་པ་དང་། ཀུན་ནས་ཟླུམ་པར་སྐྱེས་པ་དང་། གསུས་པ་ཉིད་དང་། གཡོས་པ་དང་། ཚོགས་པའོ། །གཞན་ཡང་ཡུལ་ལྗོངས་དེ་དག་རྣམས་ཉིད་ལྟ་བར་བྱེད་དེ། 
ཆུ་ཀླུང་དང་། ལྗོན་ཤིང་དང་། རྫིང་བུ་དང་། ཉེ་བའི་ནགས་རྣམས་ཀྱང་ཕུན་སུམ་ཚོགས་པ་ནི་སྔ་མ་བཞིན་ནོ། །གླིང་འདི་ནི་གྲུ་བཞི་པ་ཡིན་ཏེ། སྐྱེས་བུ་རྣམས་ཀྱི་བཞིན་ཡང་དེ་དང་འདྲ་བ་ཡིན་ནོ། །དཔེར་ན་གྲུ་གསུམ་
དུ་གྱུར་པའི་རྣམ་པ་ནི་འཛམ་བུའི་གླིང་ངོ་། །འཛམ་བུའི་གླིང་གི་སྐྱེས་བུ་རྣམས་ཀྱི་བཞིན་ཡང་དེ་དང་འདྲ་བ་ཡིན་ནོ། །དེ་བཞིན་དུ་བྱང་ཕྱོགས་སྒྲ་མི་སྙན་པ་རྣམས་ཡིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་
ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། དེས་བྲག་དང་། ནགས་དང་། རྫིང་བུ་དང་། མེ་ཏོག་གི་ཉེ་བར་ལེན་པ་རྣོ་བའི་མེ་ཏོག་རྣམས་དང་། འབྲས་བུ་ཕུན་སུམ་ཚོགས་པ་རྣམས་ལ་བལྟས་པར་གྱུར་པས་ཀྱང་ཡང་
དག་པ་ཇི་ལྟ་བ་བཞིན་དུ་ཕྱི་རོལ་ལ་ཀུན་དུ་ལྟ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། བྱང་ཕྱོགས་སྒྲ་མི་སྙན་དང་བ་ལང་སྤྱོད་གཉིས་ཀྱི་བར་ན་གཞན་རྒྱ་

66-1-238b

མཚོའི་རིགས་སུ་གྱུར་པ་འམ། རིའི་རིགས་སུ་གྱུར་པ་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བྱང་ཕྱོགས་སྒྲ་མི་སྙན་དང་བ་ལང་སྤྱོད་དག་གི་བྱང་ཕྱོགས་
ན་ཉེ་འཁོར་གྱི་མིག་ཅེས་བྱ་བ་རྒྱ་མཚོ་དཔག་ཚད་སྟོང་ཕྲག་བཅུ་པ་ཡོད་དོ། །ཉེ་འཁོར་དུ་དཔག་ཚད་གཅིག་དང་། གཞན་ཡང་དཔག་ཚད་གཉིས་པའོ། །གཞན་ཡང་ས་འོག་གི་ཀླུ་མངའ་བྱེད་པའི་དབང་གིས་ཆུ་མིག་ཡོད་དོ། །
ཉེ་འཁོར་གྱི་མིག་གི་རྒྱ་མཚོ་དེ་ལས་འདས་པར་གྱུར་ནས་རྩེད་མོའི་ཕྲེང་བ་ཞེས་བྱ་བའི་རི་གཞན་དཔག་ཚད་སྟོང་ཕྲག་བཅུ་པ་ཡོད་དེ། ཀླུ་རྣམས་ཀྱི་དབུགས་ཀྱིས་བསྲེགས་པས་རྩེ་མོ་མིག་རྩེ་ལྟར་ནག་པ་ཡིན་ནོ། །རྩེད་མོའི་
ཕྲེང་བའི་རི་དེ་ལས་འདས་པར་གྱུར་ནས་དུང་གི་སྒྲ་སི་མི་སི་མི་ཞེས་བྱ་བའི་རྒྱ་མཚོ་དཔག་ཚད་སྟོང་ཕྲག་བཅུ་ཐམས་ཅད་ཀྱང་གང་བར་ཉ་དང་། ཉ་ཆེན་པོ་དང་། རུསྦལ་དང་། ཆུ་སྲིན་ན་བཀྲ་དང་། ཆུ་སྲིན་མ་ཀ་ར་དང་། ཉ་
ཕྱིས་དང་རྣམས་ཀྱིས་ཀུན་དུ་གང་བར་གྱུར་པས་མཆོག་ཏུ་བགྲོད་དཀའ་བ་བལྟ་བར་འཇིགས་པ་གང་ལ་ལོངས་སྤྱོད་དང་ལྡན་པའི་ཀླུ་ངེས་པར་གནས་པ་ཡིན་ཏེ། ཁྲོ་བས་གཟིར་བ་ཁོ་བ་འབྱིན་པར་བྱེད་དོ། །དུང་གི་སྒྲ་སི་
མི་སི་མིའི་རྒྱ་མཚོ་དེ་ལས་རིང་དུ་འདས་ནས་ཆུས་ཁྱབ་པ་ཞེས་བྱ་བའི་རྒྱ་མཚོ་དཔག་ཚད་སྟོང་ཕྲག་བཅུ་པ་ཡོད་དེ། གང་གི་ས་རྣམས་རླུང་གིས་དཔག་ཚད་བཅུ་འམ། དཔག་ཚད་ཉི་ཤུ་འམ། དཔག་ཚད་སུམ་བཅུ་ཡང་ལྷག་
པར་བྱེད་དོ། །ཆུས་ཁྱབ་པར་བྱེད་པའི་རྒྱ་མཚོ་དེ་ལས་རིང་དུ་འདས་ནས་མུ་ཏིག་གི་ཤུ་ཀ་ཏི་ཞེས་བྱ་བའི་གླིང་མུ་ཏིག་གིས་ཀུན་དུ་གང་བར་གྱུར་པ་ཡོད་དེ། ཀླུ་དང་ཉ་རྣམས་ཤི་བར་གྱུར་པ་དེ་ལ་རླུང་གིས་ཆུས་གྱེན་དུ་བཏབ་
པས་མུ་ཏིག་འདྲེན་ནོ། །དེ་ནི་དཔག་ཚད་སྟོང་པ་ཡིན་ནོ། །མུ་ཏིག་གི་ཤུ་ཀ་ཏིའི་གླིང་དེ་ལས་འདས་པར་གྱུར་ནས་རིན་པོ་ཆེའི་གྲོགས་པོ་ཞེས་བྱ་བའི་རི་དཔག་ཚད་སྟོང་ཕྲག་ལྔ་པ་ཡིན་ཏེ། རིན་པོ་ཆེ་སྣ་བདུན་གྱི་རྩེ་

66-1-239a

མོ་དང་ལྡན་ཞིང་། བཻ་དཱུརྱ་དང་། ནོར་བུ་མང་བར་གྱུར་པ་རི་རབ་ལྷུན་པོ་གཉིས་པ་ཇི་ལྟ་བ་ཡིན་ནོ། །རིན་པོ་ཆེའི་གྲོགས་པོའི་རི་དེ་ལས་འདས་པར་གྱུར་ནས་དཔག་ཚད་ཉིས་སྟོང་དུ་དེ་ལ་མེ་ཏོག་གི་ནགས་དང་རྣམ་པ་སྣ་
ཚོགས་པར་དགའ་བར་གྱུར་པ་རྣམས་ཡོད་དོ། །དེ་ལས་འདས་པར་གྱུར་ནས་ལེགས་པར་ཟོས་པ་ཞེས་བྱ་བའི་རི་དཔག་ཚད་ལྔ་སྟོང་ངོ་། །དེ་ལ་གསེར་གྱི་པད་མའི་རྫིང་བུ་ན་ཙཀྲ་བ་སྒྲ་སྙན་པ་འབྱིན་པར་བྱེད་དོ། །ཀིང་ཤུ་
ཀའི་ནགས་དེ་ལས་འདས་པར་གྱུར་ནས་རི་དང་། ཆུ་ཀླུང་དང་། ལྗོན་ཤིང་དང་། རྒྱ་མཚོ་དཔག་ཚད་སྟོང་ཕྲག་བཅུར་གསེར་དང་འདྲ་བའི་ཆུས་གང་བར་གྱུར་པ་ཡིན་ཏེ། རི་རབ་ལྷུན་པོའི་འོད་ཀྱིས་གསེར་གྱི་མདོག་གི་ཆུ་ཞེས་
བྱ་བ་ཡིན་ནོ། །འཕངས་སུ་དཔག་ཚད་ལྔ་བརྒྱའོ། །བ་ལང་སྤྱོད་ཅེས་བྱ་བའི་གླིང་དཔག་ཚད་དགུ་སྟོང་པ་ཡིན་ཏེ། གྲོང་འབུམ་ཕྲག་བཅུ་དང་གྲོང་ཁྱེར་སྟོང་གིས་གང་བར་གྱུར་པའོ། །གྲོང་གི་མགོ་བོར་གྱུར་པ་ནི་བཅུ་གཉིས་
པ་ཡིན་ནོ། །གྲོང་ཁྱེར་གྱི་གཙོ་བོར་གྱུར་པ་ཡང་ལྔ་བརྒྱ་ཡིན་ནོ། །དེ་ལ་ཇི་ལྟར་འཛམ་བུའི་གླིང་ན་པཱ་ཊཱ་ལི་པུ་ཏྲས་མགོ་དྲངས་པར་གྱུར་པའི་གྲོང་ཁྱེར་གསུམ་གྱིས་ལྷག་པའི་བརྒྱ་ཡིན་ནོ། །དེ་བཞིན་དུ་བ་ལང་སྤྱོད་ན་ཡང་ཨ་བྷྲ་
ཀཱུ་ཊཱ་ཆེན་པོས་མགོ་དྲངས་པར་གྱུར་པའི་གྲོང་ཁྱེར་ལྔ་བརྒྱ་ཡིན་ནོ། །ཨ་བྷྲ་ཀཱུ་ཊཱའི་གྲོང་ཁྱེར་ཡང་དཔག་ཚད་བཅུ་གཉིས་པ་སྟེ། ལམ་སྲང་དང་ཁང་བཟངས་ཀྱི་བད་ཀྱི་རིམ་པ་དང་། སྒོ་མདོའི་ཁམས་དང་། རྟ་བབས་ཀྱིས་
ལེགས་པར་གང་བ་ཡིན་ནོ། །བ་ལང་སྤྱོད་ཀྱི་གླིང་གི་དབུས་ཀྱི་གྲོང་ཁྱེར་གྱི་གཙོ་བོ་རྣམས་ཀྱང་འདི་ལྟ་སྟེ། རྟ་བབས་བརྒྱ་པ་དང་། ས་གཞི་བལྟ་བར་དགའ་བ་དང་། དྲི་མ་མེད་པར་གསལ་བ་དང་། གང་ཀ་ར་དང་། དེ་ལྟ་བུ་
ལ་སོགས་པའི་གྲོང་རྣམས་ཡིན་ནོ། །དབུས་ཀྱི་གྲོང་ཁྱེར་གྱི་གཙོ་བོ་རྣམས་ཀྱང་འདི་ལྟ་སྟེ། བྱ་བ་མེད་པ་དང་། སེམས་སོང་བ་དང་། ཀུན་དུ་ཉམས་པའི་སྟོབས་ཀྱི་མཐའ་དང་ཨ་ཎི་རའོ། །ཡུལ་ལྗོངས་ཀྱི་གཙོ་བོ་རྣམས་ལ་

66-1-239b

འདི་ལྟ་སྟེ། འཛམ་བུའི་གླིང་ན་ཀཱ་ཤི་དང་། ཀོ་ཤ་ལ་དང་། མ་ག་དྷཱའོ། །དེ་བཞིན་དུ་ཇི་ལྟར་ནུབ་ཀྱི་བ་ལང་སྤྱོད་ཀྱི་གླིང་གི་གཙོ་བོར་གྱུར་པའི་ཡུལ་ལྗོངས་རྣམས་འདི་ལྟ་སྟེ། མི་ཐི་ལོ་ཞེས་བྱ་བའི་ཡུལ་ལྗོངས་དང་། 
ཏ་ཎ་ཌི་ཞེས་བྱ་བའི་ཡུལ་ལྗོངས་དང་། ཙུ་ཏུ་རོ་ཞེས་བྱ་བའི་ཡུལ་ལྗོངས་དང་། ཀོ་རཎྜོ་ཞེས་བྱ་བའི་ཡུལ་ལྗོངས་དང་། སེམས་ཀྱི་དྲི་མ་ཞེས་བྱ་བའི་ཡུལ་ལྗོངས་དང་། རི་རབ་ཏུ་རྒྱུ་བ་ཞེས་བྱ་བའི་ཡུལ་ལྗོངས་དང་། 
དེ་དག་རྣམས་ནི་ཇི་ལྟར་ཡུལ་ལྗོངས་ཀྱི་གཙོ་བོར་གྱུར་པ་རྣམས་ཡིན་ནོ། །བ་ལང་སྤྱོད་ཀྱི་ཡུལ་ལྗོངས་རྣམས་ཐམས་ཅད་བསྡུས་པར་གྱུར་ན་ནི་ཡུལ་ཉི་ཤུ་རྩ་ལྔ་ཡིན་ནོ། །ཇི་ལྟར་འཛམ་བུའི་གླིང་གི་ཡུལ་ལྗོངས་
བཅྭ་བརྒྱད་བཞིན་ནོ། །བ་ལང་སྤྱོད་ཀྱི་གླིང་ན་ཆུ་བོ་ཆེན་པོ་ལྔ་ཡིན་ནོ། །འདི་ལྟ་སྟེ། ཡངས་པ་ཅན་དང་། ཙུ་ན་ཙུམྤ་ཏཱི་དང་། ཟླ་བའི་ཤུགས་དང་། ཆུ་བཟང་པོ་དང་། ཀུན་དུ་འདྲེས་པའོ། །དཔེར་ན་འཛམ་བུའི་གླིང་
གི་ཆུ་བོ་ཆེན་པོ་བཞི་བཞིན་ཏེ། འདི་ལྟ་སྟེ། གང་གཱ་དང་། ཡ་མུ་ནཱ་དང་། པ་ཀྵུ་དང་། སཱི་ཏཱའོ། །ནུབ་ཀྱི་བ་ལང་སྤྱོད་ཀྱི་གླིང་གི་རི་ཆེན་པོ་ལྔ་ལ་འདི་ལྟ་སྟེ། ནཱ་ཌོ་ཌཱི་ན་དང་། རྭ་གསུམ་པ་དང་། ནོར་བུའི་རྟ་བབས་དང་། པརྦ་
བརྒྱ་པ་དང་། རྩུབ་པ་དང་རྣམས་སོ། །ཇི་ལྟར་འཛམ་བུའི་གླིང་ན་རི་ཆེན་པོ་རྣམས་ལ་འདི་ལྟ་སྟེ། གངས་ཅན་དང་། འབིགས་བྱེད་དང་། མ་ལ་ཡ་དང་། ཀཻ་ལ་ས་དང་རྣམས་བཞིན་ནོ། །བ་ལང་སྤྱོད་ཀྱི་གླིང་གི་མཚོ་
ཆེན་པོ་ནི་གསུམ་ཡིན་ནོ། །འདི་ལྟ་སྟེ། གམ་བྷི་ར་ཛ་ལང་དང་། བར་མེད་པ་དང་། གམ་བྷི་རོ་དཀར་རྣམས་ཏེ། ཇི་ལྟར་འཛམ་བུའི་གླིང་གི་མ་དྲོས་པ་དང་། པཾ་པཱ་དང་མཚོ་ཆེན་པོ་གཉིས་བཞིན་ནོ། །གཞན་
ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ནུབ་ཀྱི་བ་ལང་སྤྱོད་པའི་མི་རྣམས་ཅི་ལ་ཉོ་ཚོང་དུ་བྱེད་ན་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་

66-1-240a

མཐོང་བར་གྱུར་པ་དེ་དག་རྣམས་བ་ལང་ལ་ཉོ་ཚོང་དུ་བྱེད་པ་དང་། གླིང་འདིའི་ཉེ་འཁོར་རྣམས་ནི་བ་ལང་གིས་ཡོངས་སུ་གང་བ་ཡིན་ཏེ། མི་རྣམས་ཐམས་ཅད་ཀྱང་ནུ་མ་གསུམ་པ་ཡིན་ནོ། །ཇི་ལྟར་འཛམ་
བུའི་གླིང་གི་བུད་མེད་རྣམས་ཟླ་བ་བཅུ་ན་བུ་སྐྱེ་བ་དེ་བཞིན་དུ་བ་ལང་སྤྱོད་ཀྱི་གླིང་ན་ཡང་འོ་མ་རབ་ཏུ་འབབ་པ་ཡིན་ལ། ཆུ་ཀླུང་དང་། ནགས་དང་། ཉེ་བའི་ནགས་དང་། ཁྲུས་ཀྱི་རྫིང་བུ་དང་། མེ་ཏོག་གིས་ཀུན་དུ་ཁྱབ་པ་དང་། 
འབྲས་བུ་རྣམས་ནི་འཛམ་བུའི་གླིང་ན་ཇི་ཙམ་པ་དེ་ཙམ་ཁོ་ན་ཡིན་ནོ། །འོན་ཀྱང་འདི་དག་གི་འབྲས་བུ་རྣམས་ནི་འཛམ་བུའི་གླིང་གི་རོའི་ཕྱེད་ཡིན་ནོ། །མེ་ཏོག་གི་དྲི་རྣམས་ཀྱང་འཛམ་བུའི་གླིང་གི་ཕྱེད་དོ། །གཞན་ཡང་
རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ལས་ཀྱི་རྣམ་པར་སྨིན་པ་གང་གིས་བ་ལང་སྤྱོད་ཀྱི་གླིང་གི་མི་དེ་དག་རྣམས་སྐྱེས་པ་ཡིན་ཞིང་། དམན་པ་དང་། བར་མ་དང་འཆིས་དམན་པའི་ཆ་
ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་སྐྱེ་བ་གཞན་དག་ཏུ་ཚུལ་ཁྲིམས་ཞན་པར་གྱུར་ཅིང་། སྦྱིན་པ་ཞན་པ་ཞན་པ་དང་། ལས་དང་ཆོས་ཞན་པ་རྣམས་ཀུན་
དུ་སྤྱད་པར་གྱུར་པ་རྣམས་ཡིན་ནོ། །ཇི་ལྟར་ཚུལ་ཁྲིམས་ཞན་པ་ཡིན་ཞེ་ན། འདིར་སྐྱེས་བུ་དེ་དག་རྣམས་ནི་སྐྱེ་བ་གཞན་དུ་དབུལ་པོར་གྱུར་པས་དེ་དག་རིན་ཐང་བྱས་པས་བསྙེན་གནས་ལ་ཉེ་བར་གནས་པ་དང་
སངས་རྒྱས་དང་། ཆོས་དང་། དགེ་འདུན་ལ་ཡང་རྒྱལ་པོའི་ཆད་པས་སྤྱི་བོས་ཕྱག་འཚལ་བར་བྱེད་ཀྱི་རབ་ཏུ་དང་བར་གྱུར་པས་ནི་མ་ཡིན་ནོ། །སྦྱིན་པ་ཡང་མ་གཏང་ངོ་། །རྒྱལ་པོའི་ཞབས་འབྲིང་བྱེད་པའི་ཕྱིར་
སེམས་བསྒོམས་པ་ཡང་མ་ཡིན་ནོ། །སངས་རྒྱས་ཀྱི་བཀའ་ཡ་མ་བཏོན་ཏོ། །རྒྱལ་པོའི་ཞབས་ཏོག་བྱེད་པའི་དོན་གྱིས་སམ། འདོད་པ་ཆེ་བ་འམ། ལོག་པར་ལྟ་བ་ཅན་དང་ཞིང་ངན་པ་ཅན་ལ་བྱིན་པ་འམ། 

66-1-240b

དགེ་བ་བཅུའི་ལས་ཀྱི་ལམ་རྣམས་རྙོག་པ་མེད་པ་དང་། དུས་རིང་དུ་མ་སྤྱད་པ་དེ་དག་རྣམས་འཛམ་བུའི་གླིང་ནས་ཤི་འཕོས་པར་གྱུར་ནས་ལས་ཀྱི་རྐྱེན་ཀྱིས་འདིར་སྐྱེས་པ་ཡིན་ཏེ། རོ་ཕྱེད་དུ་གྱུར་པའི་ཟས་དང་ལྡན་ཞིང་
དགེ་བ་དང་མི་དགེ་བའི་ལས་ཀྱི་འབྲས་བུ་རྣམས་མངོན་པར་མི་ཤེས་པ་དང་། བློ་དམན་པར་གྱུར་པ་དང་། རྣམ་པར་ཤེས་པ་ཉམ་ཆུང་བ་དང་བུད་མེད་ལ་བརྐམ་ཞིང་ཆགས་པ་ཡིན་ཏེ། སྔོན་གྱི་ལས་དེ་དག་རྣམས་
ཀྱི་ས་བོན་གྱི་རྐྱེན་གྱིས་ཡིན་ནོ། །སེམས་ཅན་འདི་དག་རྣམས་ནི་རང་གི་ལས་ཉིད་ཀྱིས་འགྲོ་བ་ཡིན་ཞིང་ལས་ཀྱི་བགོ་སྐལ་ལ་སྤྱོད་པ་དང་། ལས་བརྟན་པར་བྱས་པ་དང་། ལས་ཀྱི་སྐྱེ་གནས་པ་རྣམས་ཡིན་
ནོ། །ཇི་ལྟར་ལས་བྱེད་པར་འགྱུར་བ་དགེ་བ་འམ་སྡིག་པ་ཡང་རུང་སྟེ། དེ་དང་དེ་དག་ཉིད་ཀྱི་ལས་རྣམས་ཀྱི་སྐལ་བ་ཅན་དུ་འབྱུང་བར་འགྱུར་ཏེ། མི་དགེ་བའི་ལས་ཀྱི་མཐའ་རྣམས་ལ་སྤྱད་པར་གྱུར་ན་ནི་
དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་བར་འགྱུར་རོ། །ས་བོན་དང་འདྲ་བའི་ལས་རྣམས་དང་འདྲ་བའི་འབྲས་བུ་རྣམས་ཡིན་ཏེ། དཔེར་ན་ཀོ་ཏྲ་བའི་ས་བོན་ལས་ནི་ཀོ་ཏྲ་བའི་འབྲས་བུ་སྐྱེའི་
ཁྲེ་རྒོད་གྱི་འབྲས་བུ་ནི་མ་ཡིན་ནོ། །ནས་ཀྱི་ས་བོན་རྣམས་ལ་ནི་ནས་ཀྱི་འབྲས་བུའོ། །དེ་བཞིན་དུ་ཡོན་ཏན་དམན་པ་དང་། ཞིང་དམན་པ་རྣམས་ལས་ཀྱང་འབྲས་བུ་དམན་པ་རྣམས་སྐྱེའོ། །དེ་བཞིན་དུ་
ས་བོན་བཟང་པོ་རྣམས་ལས་ནི་འབྲས་བུ་བཟང་པོ་རྣམས་སྐྱེའོ། །དཔེར་ན་འབྲས་ཤཱ་ལི་དམར་པོ་རྣམས་ལས་ནི་འབྲས་ཤཱ་ལི་དམར་པོ་རྣམས་སོ། །མོན་སྲན་སྡེའུ་རྣམས་ལས་ནི་མོན་སྲན་སྡེའུ་རྣམས་སོ། །
བུར་ཤིང་རྣམས་ལས་ནི་བུར་ཤིང་རྣམས་སོ། །ཞིང་དང་ཡོན་ཏན་གྱི་ཁྱད་པར་རྣམས་ལས་ཀྱང་འབྲས་བུ་རྣམས་ཁྱད་པར་དུ་འབྱུང་ངོ་། །འདི་ལྟ་སྟེ། ཡོན་ཏན་ཡོད་པ་དང་། སྡུག་བསྔལ་ཡོད་པ་དང་། གཉིས་

66-1-241a

ཀ་ཡོད་པ་རྣམས་སོ། །དེ་ལ་ཡོན་ཏན་ཡོད་པ་ཉིད་ནི་བར་མ་ཡིན་ནོ། །ཡོན་ཏན་དང་སྡུག་བསྔལ་ཡོད་པ་ནི་ཁྱད་པར་ཅན་ནོ། །སྡུག་བསྔལ་འབའ་ཤིག་ཡོད་པ་ནི་ཆུང་ངུ་ཡིན་ཏེ། སེམས་ཀྱི་ཡོན་ཏན་
རྣམས་མ་གཏོགས་པ་ཡིན་ནོ། །འདི་ལྟར་ཕྱི་རོལ་གྱི་རྣམས་ལ་ཞིང་རྣམ་པ་གསུམ་ཡིན། ཆུ་བལ་གྱིས་མ་བཅོམ་པ་ནི་བར་མ་ཡིན་ནོ། །རྩྭ་དང་ཆུ་བལ་རབ་ཏུ་ཕལ་ཆེ་བར་གྱུར་པ་དང་། ཆུ་དང་། ཆོམ་ཀུན་པའི་
འཇིགས་པ་དང་རྣམ་པར་བྲལ་བའི་ནི་ཁྱད་པར་དུ་འཕགས་པ་ཡིན་ནོ། །རྩྭ་ལྡུམ་དང་ཆུ་བལ་གྱིས་ཉམས་པར་བྱས་པ་དང་། ཆུའི་སྐྱོན་དང་། འཇིགས་པ་དང་། ཆོམ་རྐུན་གྱི་འཇིགས་པ་དང་ལྡན་པར་བརྗོད་པ་
རྣམས་ནི་ཆུང་ངུ་ཡིན་ཏེ། ཞིང་ལས་པ་རྣམས་ཀྱིས་ཡོངས་སུ་སྦྱང་བ་བྱས་པའི་ལས་རྣམས་ནི་མ་གཏོགས་སོ། །དེ་ལ་ནང་གི་བདག་ཉིད་དང་ཕྱི་རོལ་གྱི་དངོས་པོ་དེ་དག་རྣམས་ཀྱང་ལས་ཀྱི་བགོ་སྐལ་ལ་སྤྱོད་པ་དང་། 
ལས་བརྟན་པར་བྱས་པ་དང་། ལས་ཀྱི་སྐྱེ་གནས་པ་ཡིན་ཏེ། གཞན་གྱི་སྟོབས་དང་བཅས་པ་ཡིན་ཞིང་ཕན་ཚུན་གྱི་རྐྱེན་ཅན་དུ་གྱུར་པ་དང་། ཕན་ཚུན་དུ་སྐྱེད་པར་བྱེད་པ་ཡིན་ནོ། །དེ་ལ་ནུབ་ཀྱི་བ་ལང་སྤྱོད་པའི་
སྐྱེས་བུ་དེ་དག་རྣམས་ནི་རྙོག་པ་དང་བཅས་པའི་ལས་ཀྱི་འབྲས་བུ་རྣམས་ལ་སྤྱོད་པ་ཡིན་ཏེ། རྙོག་པ་དང་བཅས་པའི་ལས་རྣམས་ཀྱིས་འདིར་སྐྱེས་པ་ཡིན་ནོ། །གཞན་ཡང་ཤི་འཕོས་པར་གྱུར་ནས་རང་གི་ལས་ཀྱི་
རླུང་གིས་འཁོར་བར་ཡོངས་སུ་འཁོར་བར་འགྱུར་རོ། །རྣལ་འབྱོར་སྤྱོད་པ་པ་དེས་ཕྱི་རོལ་གྱི་ལས་དང་ཆོས་རྣམས་ཡང་དག་པ་ཇི་ལྟ་བ་བཞིན་དུ་མངོན་པར་རྟོགས་ནས། གཞན་ཡང་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་
གནས་ཏེ། ནུབ་ཀྱི་བ་ལང་སྤྱོད་ཀྱི་གླིང་ལས་འདས་པར་གྱུར་ནས་རིའི་རིགས་སམ། ཆུ་བོའི་རིགས་སམ། །རྒྱ་མཚོའི་རིགས་སུ་གྱུར་པ་གཞན་ཅི་ཡོད་པ། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་

66-1-241b

བར་གྱུར་པ་ནུབ་ཀྱི་བ་ལང་སྤྱོད་དང་། ཤར་གྱི་ལུས་འཕགས་པོ་གཉིས་ཀྱི་གླིང་དག་གི་བར་ན་ཡོད་དེ། ནུབ་ཀྱི་བ་ལང་སྤྱོད་ཀྱི་གླིང་ལས་ནི་འདས་པར་གྱུར་ནས་སྐྱོ་མ་བ་ཞེས་བྱ་བའི་རྒྱ་མཚོ་དཔག་ཚད་སྟོང་ཕྲག་བཅུ་གཉིས་
པའོ། །སྐྱོ་མ་དང་འདྲ་བའི་ཆུ་གང་ཡིན་པས་གང་བར་གྱུར་པ་སྟེ། དུང་དང་། ཉ་དང་། ཉ་ཆེན་པོ་དང་། ཆུ་སྲིན་ན་ཀྲ་དང་། ཆུ་སྲིན་མ་ཀ་ར་དང་། རུསྦལ་དང་། ཆུ་སྲིན་བྱིས་པ་གསོད་ཀྱི་ཡང་ཕུང་པོར་གྱུར་པ་ཡིན་ནོ། །སྐྱོ་མའི་ཆུའི་
རྒྱ་མཚོ་དེ་ལས་འདས་པར་གྱུར་ནས་བི་དྲུ་མ་འདྲ་བ་ཞེས་བྱ་བའི་རིའི་ཉེ་འཁོར་དུ་དཔག་ཚད་ལྔ་བརྒྱ་པ་ཡོད་དོ། །དེ་ལ་དུག་ཆེན་པོའི་སྦྲུལ་རྣམས་རབ་ཏུ་གནས་སོ། །དེ་ལས་འདས་པར་གྱུར་ནས་ཆུ་དྲོན་མོ་ཞེས་བྱ་བའི་
རྒྱ་མཚོ་ཡོད་དེ། སྦྲུལ་དེ་དག་རྣམས་ཀྱི་ཁ་རླངས་དྲོན་མོའི་དུག་གིས་དྲོན་མོར་འགྱུར་རོ། །དེ་ལ་ནི་སེམས་ཅན་གྱི་རིགས་ཅུང་ཟད་ཀྱང་ཡོད་པ་མ་ཡིན་ཏེ། སྦྲུལ་དུག་ཅན་དེ་དག་གིས་དབུགས་འབྱུང་བས་དུས་བྱེད་པར་
འགྱུར་རོ། །དུག་གི་རང་བཞིན་ཡིན་པས་ཆུ་ཡང་དྲོན་མོར་འགྱུར་རོ། །དེ་ལས་འདས་པར་གྱུར་ནས་ཆུ་དམར་པོ་ཞེས་བྱ་བའི་རྒྱ་མཚོ་དཔག་ཚད་ལྔ་སྟོང་ཡོད་དོ། །དེ་ལ་ཀླུ་དང་ས་འོག་ན་གནས་པར་གྱུར་པའི་ལྷ་
མ་ཡིན་རྣམས་ཕན་ཚུན་དུ་ཞེ་སྡང་བར་གྱུར་པས་ཟིལ་གྱིས་མནན་ནས་ཟས་ཟོས་པར་གྱུར་པ་དང་འཁྲུག་པར་བྱེད་དོ། །ཀླུང་ན་གནས་པའི་ཀླུ་སྟོབས་ཅན་དེ་དག་གིས་ཀྱང་ལྷ་མ་ཡིན་དེ་དག་རྣམས་ཀྱི་སྟོབས་མི་
འཕྲོགས་སོ། །དེ་ལས་འདས་པར་གྱུར་ནས་སྲིན་མོའི་གླིང་དཔག་ཚད་ཉིས་སྟོང་པ་ཡོད་དེ། རལ་པ་ཅན་ཞེས་བྱ་བའི་སྲིན་མོ་དེ་དེ་ལ་རབ་ཏུ་གནས་པ་ཡིན་ནོ། །དྲི་དང་མེ་ཏོག་གི་ཕྲེང་བ་ཁར་འཇུག་ཅིང་ཟ་བའི་ཟས་དང་
ལྡན་པ། མིག་བཙུམ་ཙམ་གྱི་བར་ལ་དཔག་ཚད་སྟོང་དུ་ཕྱིན་པར་མགྱོགས་པ། མི་རྣམས་ལ་གླགས་ལྟ་བར་བྱེད་པ་དང་། ཡིད་ཀྱང་རྟག་ཏུ་དེ་ལ་སོང་བར་གྱུར་པ་ཡིན་ཏེ། ཤ་དང་ཁྲག་དང་རུས་པ་རྣམས་ཀྱིས་ནི་

66-1-242a

གླིང་འདི་ནི་དྲི་མི་ཞིམ་པ་ཡིན་ནོ། །རལ་པ་ཅན་གྱི་གླིང་དེ་ལས་འདས་པར་གྱུར་ནས་ཤ་ཟའི་གླིང་དཔག་ཚད་ལྔ་སྟོང་པ་ཡོད་དོ། །དེ་ལ་སྐྲས་ཁྱབ་པ་ཞེས་བྱ་བའི་ཤ་ཟ་རབ་ཏུ་གནས་པ་ཡིན་ནོ། །དེ་ལས་འདས་
པར་གྱུར་ནས་གླིང་གིས་ལེགས་པར་གང་བ་ཞེས་བྱ་བའི་རི་དཔག་ཚད་ལྔ་སྟོང་པ་ཡོད་དོ། །ལེགས་པར་གང་བའི་རི་ལ་ལྗོན་ཤིང་རྣམས་ཀྱིས་ལེགས་པར་གང་བ་ལ་འདི་ལྟ་སྟེ། ཤིང་ན་ལི་ཀེ་ར་དང་། པ་ན་ས་དང་། 
མོ་ཙ་དང་། ཧིན་ཏཱ་ལ་དང་། ཏ་མཱ་དང་། ར་ཀ་མཱ་ལ་དང་། སེར་པོ་དང་། སེང་ལྡེང་དང་། ཏི་ལ་ཀཱ་དང་། ཨརྫུ་ན་དང་། ཀ་དམ་བ་དང་། ནཱི་བ་དང་། ནི་ཙུ་ལ་དང་། ཙམྤ་ཀ་དང་། ཁརྫུ་ར་དང་། ཨམྲ་དང་། པི་ཙུ་མརྡ་དང་། བ་ད་རི་དང་། 
བ་ཊཱ་ད་དང་། ཀིང་ཤུ་དང་། ཀླུའི་མེ་ཏོག་དང་། ཀ་དམྤ་དང་། མྱ་ངན་མེད་དང་། སི་ལིན་དྷ་དང་། ཀེ་ཏ་ཀ་དང་། ཀརྣི་ཀ་ར་ཤིན་དུ་ལྷུག་པ་དང་། མཱ་ལི་ཀཱ་གསར་པ་དང་། བཱ་ཊཱ་ལཱ་དང་། ཀ་བིད་ཐ་དང་། དཔལ་ཤིང་དང་། ལྷ་ཤིང་དང་ཤུག་
པ་དང་། ཀ་ར་པཱི་ར་དང་། མྱ་ངན་མེད་སྔོན་པོ་དང་། ཀུ་ར་བ་ཀ་དང་། ཀུན་ད་དང་རྣམས་ཏེ། ཕུང་པོར་སྐྱེས་པའི་ལྗོན་ཤིང་རྣམས་ཀྱིས་ལེགས་པར་གང་བ་དང་། འབབ་ཆུ་བརྒྱ་ཕྲག་གིས་དགའ་བར་གྱུར་པ་ཡིན་ནོ། །ནགས་
ཀྱི་ཁམས་རྣམས་དང་ལྡན་པའི་ནང་དེ་ལ་ནི་དྲི་ཟ་རྣམས་རྩེ་དགའ་བར་བྱེད་དོ། །ལེགས་པར་གང་བའི་རི་དེ་ལས་འདས་པར་གྱུར་ནས་རྒྱ་མཚོ་དཔག་ཚད་ལྔ་སྟོང་དུ་འོ་མའི་ཆུ་ཞེས་བྱ་བ་ཡིན་ནོ། །དེ་ལ་ནི་ཆུ་འོ་མ་དང་
འདྲ་བར་ཡོད་དེ། རོ་འོ་མ་དང་མཉམ་པ་ཡིན་ནོ། །བདག་ཉིད་ཀྱི་དངོས་པོ་དཔག་ཚད་ལྔ་པར་གྱུར་པའི་ཉ་འགའ་ཞིག་རྒྱུ་བར་བྱེད་པ་ཡིན་ནོ། །འོ་མའི་ཆུའི་རྒྱ་མཚོ་དེ་ལས་འདས་པར་གྱུར་ནས་བྱེ་མའི་གནས་
སྐབས་ཤེས་བྱ་བ་དཔག་ཚད་སྟོང་དུ་ལྗོན་ཤིང་གི་ངམ་གྲོག་ཏུ་གྱུར་པ་ཡིན་ནོ། །དེ་ལས་འདས་པར་གྱུར་ནས་ཀླུའི་དུག་བཅོམ་ཞེས་བྱ་བའི་རྒྱ་མཚོ་དཔག་ཚད་དྲུག་སྟོང་པར་གྱུར་པ་གང་ལ་སྟོབས་ཤེས་བྱ་

66-1-242b

བའི་ཀླུ་རབ་ཏུ་གནས་པ་ཡིན་ནོ། །ཕན་ཚུན་མི་མཐུན་པར་གྱུར་པ་རྟག་ཏུ་མ་ཞི་བ་ལ་དགའ་བ་ཡིན་ནོ། །ཕན་ཚུན་གྱི་ཀླུའི་དུག་བཅོམ་ཞེས་བྱ་བའི་རྒྱ་མཚོ་དེ་ལས་རིང་དུ་འདས་ནས་ཆུ་མཉམ་པར་གྱུར་པ་ཞེས་
བྱ་བའི་རྒྱ་མཚོ་ཡོད་དེ། དཔག་ཚད་ཉིས་སྟོང་དུ་ཆུ་བརྟན་ཞིང་གནས་པ་དང་ཆུ་རབ་ཏུ་དང་བ་དང་ཟབ་མོ་ཡིན་ཏེ། ཉ་དང་ཆུ་སྲིན་མ་ཀ་ར་དང་། དུང་དང་། ཆུ་སྲིན་ན་ཀྲ་དང་། ཆུ་སྲིན་བྱིས་པ་གསོད་རྣམས་ཀྱིས་ཀུན་དུ་
གང་བར་གྱུར་པ་ཡིན་ནོ། །གཞན་ཡང་ལས་ཀྱི་ཆོས་ཀྱི་རྣམ་པར་སྨིན་པ་རྣམས་ཤེས་པའི་རྣལ་འབྱོར་སྤྱོད་པ་པ་དེས་ལྟ་བར་བྱེད་དེ། ཇི་སྐད་དུ་བཤད་པའི་རྒྱ་མཚོ་དང་། ཆུ་བོ་དང་། གླིང་དང་། ནགས་དང་། 
རི་དང་། ལྗོན་ཤིང་རྣམས་དང་། གནས་དེ་དག་རྣམས་གང་ལ་ཡང་བདག་ཅག་མ་སྐྱེས་པ་དང་། མ་ཤི་བ་དང་འཆི་འཕོས་པར་མ་གྱུར་པ་དང་། སྐྱེས་པར་མ་གྱུར་པ་དང་། འཐུན་པ་དང་ཡིད་དུ་འོང་བ་རྣམས་ཐམས་
ཅད་དང་ཡང་ཐ་དད་དུ་གྱུར་པ་དང་། མེད་པར་གྱུར་པ་དང་། བྱེ་བར་གྱུར་པ་དང་། བྲལ་བར་གྱུར་པ་དང་། གཞན་དུ་གྱུར་པ་དང་ལྡན་པར་མ་གྱུར་པ་དང་། གང་ཡང་ལས་ཀྱི་བགོ་སྐལ་ལ་སྤྱོད་པ་ལས་ཀྱི་སྐྱེ་གནས་
པ། ལས་བརྟན་པར་བྱས་པ་རང་གི་ལས་ཀྱི་འབྲས་བུ་མྱོང་བར་གྱུར་པས་འཆི་འཕོ་བ་དང་སྐྱེ་བར་མ་གྱུར་པ་དེ་ནི་རྒྱ་མཚོའི་ཡུལ་ཕྱོགས་སམ། རིའི་ཡུལ་ཕྱོགས་སམ། ལྗོན་ཤིང་གི་ཕྱོགས་རྣམས་ལ་ཡང་
གཅིག་ཀྱང་མ་མཐོང་ངོ་། །ལན་བརྒྱ་ཕྲག་དང་། དེ་ནས་སྟོང་ཕྲག་དང་། ལན་སྟོང་ཕྲག་བརྒྱ་དང་། ལན་བྱེ་བ་ཕྲག་འབུམ་དུ་ཡང་གང་ལ་བདག་ཅག་རྣམས་སྐྱེས་པ་དང་ཤི་བ་དང་། སྐྱེས་པར་གྱུར་པ་མ་ཡིན་པ་ནི་
ཁབ་ཀྱིས་ཕུག་པ་ཙམ་ཡང་མེད་དོ། །འཐུན་པ་དང་ཡིད་དུ་འོང་བར་གྱུར་པ་རྣམས་ཐམས་ཅད་ཀྱང་ཐ་དད་དུ་གྱུར་པ་དང་། མེད་པར་གྱུར་པ་དང་། གྱེས་པར་གྱུར་པ་དང་། རྣམ་པར་བྲལ་བར་གྱུར་པ་དང་། 

66-1-243a

གཞན་དུ་གྱུར་པར་ནི་ལན་བརྒྱ་ཕྲག་དང་། ལན་སྟོང་ཕྲག་དང་། ལན་བརྒྱ་སྟོང་ཕྲག་བྱེ་བར་གྱུར་པ་བརྒྱ་སྟོང་ཕྲག་ཏུ་གྱུར་ཅིང་། འཁོར་བ་ཐོག་མ་མེད་པ་ནས་འདོད་ཆགས་དང་། ཞེ་སྡང་དང་། གཏི་
མུག་གི་ཞགས་པས་ཀུན་ནས་བཅིངས་ནས་འཁོར་བ་ན་ཡང་དམྱལ་བ་དང་། ཡི་དགས་དང་། དུད་འགྲོའི་གནས་རྣམས་སུ་སྐྱེ་བ་དང་། འཆི་བ་དང་། སྐྱེ་བར་འགྱུར་བ་ཡིན་ནོ། །དེའི་ཕྱིར་ན་མྱུར་བ་མྱུར་བར་
འཁོར་བ་ལས་ཡིད་འབྱུང་བར་གྱིས་ཤིག །འཁོར་བ་ལ་བརྐམ་ཞིང་ཆགས་པར་འགྱུར་བར་མ་བྱེད་དང་། འཁོར་བ་འདི་ནི་སྡུག་བསྔལ་བ་ཡིན་ནོ། །ཚ་བར་གྱུར་པའི་ཚོར་བ་དང་ལྡན་པ་ཡིན་ཞིང་། རྩུབ་
པར་གྱུར་པའི་ཚོར་བ་དང་ལྡན་པ་ཡིན་ཏེ། སྡུག་བསྔལ་དང་ལྷན་ཅིག་ཏུ་གྱུར་པའི་ཚོར་བ་ཡིན་ནོ། །རྒ་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་མང་བ་ཡིན་
ནོ། །ལྟུང་བའི་མཐའ་དང་ཟད་པར་གྱུར་པའི་སྒོ་ཡིན་ནོ། །འདི་ན་ནི་ཤིན་ཏུ་ཕྲ་བར་གྱུར་པའི་རྟག་པ་དང་བདེ་བ་ཡང་ཡོད་པ་མ་ཡིན་ནོ། །དཔེར་ན་ཉི་མ་ལ་མུན་པ་ཤིན་ཏུ་ཕྲ་བ་ཡང་མེད་དོ། །དེ་ལྟར་རྣལ་འབྱོར་
སྤྱོད་པ་དེ་ཕྱི་རོལ་གྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །གཞན་ཡང་རྣལ་འབྱོར་སྤྱོད་པ་ཡང་དག་པ་ཇི་ལྟ་བ་གཞན་དུ་ཕྱི་རོལ་གྱི་ལུས་རྣམས་རིག་པར་བྱེད་དེ། ཆུ་མཉམ་པའི་རྒྱ་མཚོ་དེ་ལས་རིང་དུ་
འདས་ནས། ཆུ་ཀླུང་གི་རིགས་སུ་གྱུར་པ་འམ། རྒྱ་མཚོའི་རིགས་སུ་གྱུར་པ་གཞན་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཤར་གྱི་ལུས་
འཕགས་པོ་ཞེས་བྱ་བའི་གླིང་ཡོད་དེ། དཔག་ཚད་སྟོང་ཕྲག་བརྒྱད་པ་ཉེ་འཁོར་ཡོངས་སུ་ཟླུམ་པར་གྱུར་པ་གྲོང་དང་། གྲོང་ཁྱེར་དང་། ཚོང་འདུས་རྣམས་ཕུན་སུམ་ཚོགས་པ་དང་། ཆུ་ཀླུང་དང་། ལྗོན་ཤིང་དང་། 

66-1-243b

ནགས་དང་། ཉེ་བའི་ནགས་དང་། ཁྲུས་ཀྱི་རྫིང་བུ་དང་། གླིང་དང་། རི་དང་། འབབ་ཆུ་དང་། ཤིང་ཚང་ཚིང་རྣམས་དཀྲིགས་པ་དང་ལྡན་པའི་ནགས་དང་བཅས་པ་དང་། མེ་ཏོག་དང་འབྲས་བུ་དང་། རི་དགས་དང་། 
བྱ་རྣམས་ཀྱང་ཕུན་སུམ་ཚོགས་པ་ཡིན་ནོ། །དེ་ལ་རི་དྲུག་པོ་འདི་དག་རྣམས་ནི་ཐམས་ཅད་ལ་ཆེ་བར་གྱུར་པ་ཡིན་ཏེ། འདི་ལྟ་སྟེ། ལོགས་ཆེན་པོ་དང་། ནགས་ཀྱི་ཕྲེང་བ་དང་། རྨ་བྱའི་ཚོགས་དང་ཡི་དགས་ཀྱི་ཁྲོད་
དང་། རྒྱ་མཚོ་གྱེན་དུ་འགྲོ་བ་དང་། མིག་གི་ཕྲེང་བ་དང་རྣམས་སོ། །རི་དེ་དག་རྣམས་ཀྱིས་ཤར་ཕྱོགས་ལུས་འཕགས་པོའི་གླིང་ཡོངས་སུ་བསྐོར་བ་ཡིན་ཏེ། འཛམ་བུའི་གླིང་རི་བཞིས་ཇི་ལྟ་བར་དེ་སྔར་བཞིན་ནོ། 
དེ་ལ་ལོགས་ཆེན་པོའི་རི་རྒྱར་ནི་དཔག་ཚད་སུམ་སྟོང་ཡིན་ཏེ། རི་དེ་ལ་དཔག་ཚད་སྟོང་སྟོང་གི་ནགས་གསུམ་ཡོད་དོ། །འདི་ལྟ་སྟེ། སུ་བེ་ལང་གི་ནགས་དང་། འབབ་ཆུའི་སྒྲ་དང་ལྡན་པའི་ནགས་དང་། མཱ་ལི་ཀ་གངྒ་
རའི་ནགས་སོ། །ནགས་ན་ལྗོན་ཤིང་རྣམས་ཕུན་སུམ་ཚོགས་པར་གྱུར་པ་ལ་འདི་ལྟ་སྟེ། ལཱི་ལི་ཀའི་ལྗོན་ཤིང་དང་། རིའི་ཁྲོད་ནས་སྐྱེས་པའི་ལྗོན་ཤིང་དང་། ཡལ་ག་མཉམ་པའི་ལྗོན་ཤིང་དང་། བགྲོད་དཀའ་
བར་གྱུར་ནས་སྐྱེས་པར་གྱུར་པའི་ལྗོན་ཤིང་དང་། ཀླུང་ན་སྐྱེས་པའི་ལྗོན་ཤིང་དང་། ཨུཏྤལ་སྐྱེས་པའི་ལྗོན་ཤིང་དང་། རི་བྲགས་ན་སྐྱེས་པའི་ལྗོན་ཤིང་དང་། འཛམ་བུའི་གླིང་གི་ལྗོན་ཤིང་རྣམས་ནི་སྔར་བཞིན་
ནོ། །རི་ཆེན་པོའི་ཉེ་འཁོར་ན་སྐྱེས་བུ་གང་དག་གནས་པ་དེ་དག་རྣམས་ནི་མེའི་གཙུག་ཅན་ཞེས་བྱ་བའི་མིང་དུ་འགྱུར་རོ། །ཆུ་ཀླུང་ཡང་འདི་དག་རྣམས་ཡོད་དོ། །འདི་ལྟ་སྟེ། བྱེ་མ་འདྲིམ་པ་དང་། སཱ་མཱེ་
ཌཱ་དང་། ཆུ་གཡོ་བ་དང་། ཀླུའི་ཆུ་དང་། ནགས་ནས་འབྱུང་བ་དང་། ཙ་ར་ཙ་དང་རྣམས་སོ། །ནགས་ཀྱི་ཕྲེང་བའི་རི་དེའི་ཚད་ནི་དཔག་ཚད་སྟོང་ཡིན་ནོ། །དེ་ལ་ནགས་འདི་དག་རྣམས་ཡོད་དོ། །འདི་ལྟ་སྟེ། ཀུཀྐུ་ཌཱ་

66-1-244a

ཙཱི་རཾ་དང་། ལྷ་ཤིང་གི་ནགས་དང་། ཙི་ལི་ཀའི་ནགས་དང་། དུ་བ་པ་དང་། ཤིན་དུ་མ་སྐྱེས་པ་དང་རྣམས་ཡིན་ནོ། །ཆུ་ཀླུང་ཡང་འདི་དག་རྣམས་ཡོད་དོ། །འདི་ལྟ་སྟེ། འཁྲི་ཤིང་གིས་གཡོགས་པ་དང་། རྩེ་མོ་ལ་
འཁོར་བ་དང་། ཆུ་ནག་པོ་དང་། ལོ་མ་ཤིན་དུ་འཕྱང་བ་དང་། དུ་བ་དགའ་བ་དང་རྣམས་སོ། །རིའི་ནགས་ཀྱི་ཕྲེང་བའི་ཉེ་འཁོར་ན་སྐྱེས་བུ་གང་དག་གནས་པ་དེ་དག་རྣམས་ནི་གྱ་གྱུ་ཅན་ཞེས་བྱ་བའི་མིང་དུ་འགྱུར་རོ། །
རི་གསུམ་པ་རྨ་བྱའི་ཚོགས་ལ་རྣལ་འབྱོར་སྤྱོད་པ་པ་དེས་མཐོང་བར་གྱུར་པ་དཔག་ཚད་སྟོང་ཡིན་ནོ། །དེ་ལ་ནགས་འདི་དག་རྣམས་ཡོད་དོ། །འདི་ལྟ་སྟེ། སྤྲིན་གྱི་ནགས་དང་། རྟག་ཏུ་གློག་འཁྱུག་པ་དང་། སྒྲ་འཕང་
མཐོན་པོ་དང་། ལྷག་པ་ཐུང་བ་དང་། མཎྜ་ལཾ་དང་རྣམས་སོ། །ཆུ་ཀླུང་ཡང་འདི་དག་རྣམས་ཡོད་དོ། །འདི་ལྟ་སྟེ། ནི་ཙུ་ལུནྡ་འབབ་པ་དང་། དྲང་སྲོང་དགའ་བ་སྔོན་འབབ་པ་དང་། བཟང་པོ་དང་རྣམས་ཡིན་ནོ། །རྨ་བྱའི་
ཚོགས་ཀྱི་ནགས་ཀྱི་ཉེ་འཁོར་ན་སྐྱེས་བུ་གང་དག་གནས་པ་དེ་དག་རྣམས་ལ་མགུལ་པ་སྔོན་པོ་ཞེས་བྱ་བའི་མིང་དུ་འགྱུར་རོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་
ཏེ། ཤར་ཕྱོགས་ཀྱི་ལུས་འཕགས་པོའི་གླིང་ན་རིའི་རིགས་སམ་ཆུ་ཀླུང་གི་རིགས་གཞན་དག་ཡོད་དམ་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རི་གཞན་བཞི་པ་
རི་དགས་ཀྱི་ཁྲོད་ཅེས་བྱ་བ་ཡོད་དོ། །དེ་ལ་ནགས་འདི་དག་རྣམས་ཡོད་དོ། །འདི་ལྟ་སྟེ། རལ་པ་ཅན་གྱི་ནགས་དང་། ཀུན་དགའ་བའི་ནགས་དང་། རྟའི་སྤྲིན་གྱི་ནགས་དང་རྣམས་སོ། །ལྗོན་ཤིང་དང་། མེ་ཏོག་དང་། འབྲས་བུ་ཕུན་
སུམ་ཚོགས་པ་རྣམས་ནི་སྔར་གྱི་བཞིན་ནོ། །དེ་ལ་ཆུ་ཀླུང་འདི་དག་རྣམས་ཡོད་དོ། །འདི་ལྟ་སྟེ། ཤིན་དུ་གྲོལ་བར་གྱུར་པའི་ཆུ་དང་། ཉེ་འཁོར་ན་དགའ་བ་དང་། ཚོགས་པ་རྣམས་ཡིན་ནོ། །རི་དགས་ཀྱི་རིགས་ཀྱང་

66-1-244b

འདི་དག་རྣམས་ཡིན་ནོ། །འདི་ལྟ་སྟེ། བཻ་ནེ་ཡཱ་དང་། ཉེ་འཁོར་གྱི་གྲིབ་མ་ལ་དགའ་བ་དང་། བལྟས་པས་འབྲོས་པ་དང་། ཀུ་རང་གཱ་དང་། ལམ་བཟང་པོ་དང་། ཕྲག་དོག་ཀླུ་སྐྱེས་དང་། བ་ལང་གི་རྣ་བ་དང་། གླང་པོ་འཐུང་
བ་དང་། བྱིས་པ་མཆོག་དང་། གྲིབ་མ་ལ་དགའ་བ་དང་། རི་བོང་ལུག་དང་། རྔ་མོའི་ལུས་དང་། མཇུག་མ་ནག་པོ་དང་། མགོ་དཀར་པོ་དང་། རྨ་དང་བཅས་པ་དང་། སྦྲུལ་གྱི་ལྕེ་དང་། རང་གི་སོ་བརྒྱ་པ་དང་། སྡོམ་པ་
དང་སྦུབས་ཀྱི་མཁྲེན་པ་སྟེ། རི་དགས་ཀྱི་ཚོགས་དེ་དག་རྣམས་ཁ་ཅིག་ནི་འཛམ་བུའི་གླིང་ན་ཡང་ཡོད་པ་མ་ཡིན་ནོ། །རི་ཁྲོད་ཀྱི་རི་ལ་ནགས་དང་། ཉེ་བའི་ནགས་དང་། རྫིང་བུ་དང་། ལྗོན་ཤིང་དང་། བྱ་དང་། 
མེ་ཏོག་དང་། ཕུན་སུམ་ཚོགས་པ་རྣམས་ནི་སྔོན་གྱི་བཞིན་ཏེ། རི་དགས་ཀྱི་ཁྲོད་ཀྱི་རི་ལ་འཛམ་བུའི་གླིང་གི་མེ་ཏོག་རྣམས་ནི་ཐམས་ཅད་ཀྱང་ཡོད་དོ། །རི་དགས་ཀྱི་ཁྲོད་ཀྱི་རིའི་ཉེ་འཁོར་ན་གང་དག་གནས་པའི་སྐྱེས་
བུ་དེ་དག་རྣམས་ལ་ནི་ཤུགས་སྡོམ་པ་ཞེས་བྱ་བའི་མིང་དུ་འགྱུར་རོ། །ཤར་གྱི་ལུས་འཕགས་གླིང་གི་རི་ལྔ་པ་དེའི་ནགས་ཉེ་བའི་ནགས་དང་རྫིང་བུ་རྣམས་ལ་ལྟ་བར་བྱེད་དོ། །རྒྱ་མཚོ་གྱེན་དུ་འགྲོ་བ་ཞེས་བྱ་བའི་
རི་དཔག་ཚད་སྟོང་དང་ལྡན་པའི་ནགས་དང་ཉེ་བའི་ནགས་དང་རྫིང་བུ་རྣམས་ཀྱིས་ཀུན་ནས་གང་བ་ནི་སྔོན་གྱི་བཞིན་ནོ། །དེ་ལ་ཡང་ནགས་འདི་དག་རྣམས་ཡོད་དོ། །འདི་ལྟ་སྟེ། ཐིག་ལེ་གསུམ་པ་ཞེས་
བྱ་བའི་ནགས་དང་། མགྲིན་པ་འགག་པ་དང་། དགའ་བའི་རིའི་ནགས་དང་རྣམས་སོ། །ཆུ་ཀླུང་ཡང་འདི་དག་ཡོད་དོ། །འདི་ལྟ་སྟེ། རྭ་གསུམ་པ་དང་། ཅ་ཅོ་བ་དང་། རྡོ་བ་འདྲིམ་པ་དང་རྣམས་སོ། །རྒྱ་མཚོ་
གྱེན་དུ་འགྲོ་བའི་རིའི་ཉེ་འཁོར་ན་སྐྱེས་བུ་གང་དག་གནས་པ་དེ་དག་རྣམས་ལ་ནི་སྒྲིན་པོ་ཞེས་བྱ་བའི་མིང་དུ་འགྱུར་རོ། །རྒྱ་མཚོ་གྱེན་དུ་འགྲོ་བའི་རི་ལ་བལྟས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་

66-1-245a

དུ་ཕྱི་རོལ་ལ་ལྟ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ཤར་གྱི་ལུས་འཕགས་པོའི་གླིང་ན་རིའི་རིགས་སུ་གྱུར་པ་གཞན་དག་ཡོད་དམ་
ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མིག་གི་ཕྲེང་བ་ཞེས་བྱ་བའི་རི་དཔག་ཚད་སྟོང་དང་ལྡན་པ་ཡོད་དེ། ཉེ་འཁོར་ན་ནགས་དང་། ཉེ་བའི་ནགས་དང་། རྫིང་
བུ་དང་། འབབ་ཆུ་ཕུན་སུམ་ཚོགས་པར་གྱུར་པ། རྣམ་པ་སྣ་ཚོགས་པའི་རི་དགས་དང་། བྱ་དང་། མེ་ཏོག་དག་འབྲས་བུ་ཕུན་སུམ་ཚོགས་པ་ནི་སྔར་གྱི་བཞིན་ནོ། །མིག་གི་ཕྲེང་བ་ཞེས་བྱ་བའི་རི་དེ་ལས་མི་
མཐོང་བའི་ཀླུང་ཞེས་བྱ་བའི་ཆུ་ཀླུང་འབབ་པ་ཡིན་ཏེ། དཔག་ཚད་དུ་ཟབ་པ་ཡིན་ནོ། །མིག་གི་ཕྲེང་བའི་ཉེ་འཁོར་ན་སྐྱེས་བུ་གང་དག་གནས་པ་དེ་དག་རྣམས་ལ་ནི་ཉེ་འཁོར་གྱི་མིག་ཅེས་བྱ་བའི་མིང་དུ་འགྱུར་རོ། 
དེ་ལྟར་ཤར་ཕྱོགས་ལུས་འཕགས་པོའི་གླིང་ནི་རི་དྲུག་གིས་ཡོངས་སུ་བསྐོར་བ་ཡིན་ནོ། །དེའི་ནང་ན་གྲོང་ཁྱེར་ཆེན་པོ་གསུམ་ལ་འདི་ལྟ་སྟེ། དགའ་བ་བཟང་པོ་ཞེས་བྱ་བ་དང་། ནགས་མངོན་པར་དགའ་བ་ཞེས་
བྱ་བ་དང་། ཉེ་འཁོར་ན་རྩེ་དགའ་བ་ཞེས་བྱ་བའོ། །གྲོང་ཁྱེར་གྱི་རྒྱར་ནི་དཔག་ཚད་གསུམ་ཡིན་ནོ། །ལྷག་མར་གྱུར་པ་བར་མ་དང་ཐ་ཆུངས་ཀྱི་གྲོང་ཁྱེར་རྣམས་ནི་དྲུག་བཅུ་རྩ་གསུམ་ཡིན་ནོ། །བར་མའི་གྲོང་
ཁྱེར་ལ་ཕུང་པོའི་གྲོང་ཁྱེར་ཞེས་བྱ་བ་དང་། ཉེ་འཁོར་གྱི་སྒྲ་ཞེས་བྱ་བ་དང་ངོ་། །གྲོང་ཁྱེར་ཆུང་ངུ་ལ་ཐམས་ཅད་འགྲོ་བ་ཞེས་བྱ་བའི་གྲོང་ཁྱེར་དང་། འབྲོག་ཏུ་རྣམ་པར་ཆད་པ་ཞེས་བྱ་བའི་གྲོང་ཁྱེར་ཆེན་
པོ་དང་སྟེ། དེ་དག་ནི་བར་མ་དང་ཐ་ཆུངས་ཀྱི་གྲོང་ཁྱེར་རྣམས་ཇི་ལྟར་གཙོ་བོར་གྱུར་པ་རྣམས་ཡིན་ནོ། །གྲོང་བྱེ་བ་ཕྲག་གསུམ་དང་། གྲོང་སྟོང་ཕྲག་བརྒྱ་ལྔ་པ་དང་། གྲོང་སྟོང་ཕྲག་གསུམ་དང་། གྲོང་ལྔ་བརྒྱ་དང་

66-1-245b

དྲུག་གིས་ལྷག་པའི་ལྔ་བཅུ་དང་རྣམས་ཤར་གྱི་ལུས་འཕགས་གླིང་ན་ཡོད་དོ། །དེ་ལ་འདི་དག་རྣམས་ནི་གྲོང་གི་གཙོ་བོ་ཡིན་ཏེ། འདི་ལྟར་ནམ་མཁའི་དྲི་མ་དང་། དབུ་བའི་ཚོགས་དང་། བྲི་ཀྵཱི་རང་དང་། སྐྱེ་བོ་ཐམས་ཅད་པ་དང་། 
ལོ་འདབ་མང་བ་དང་། བྷཱི་དཱུ་རཾ་དང་། སྨིན་པའི་སྣོད་དང་། མདོར་བསྡུས་པ་དང་། བིཥྐ་ཊཱ་དང་། གནོད་པའི་ནགས་དང་། ཕན་པར་འཇུག་པའི་མིག་དང་། བཱ་དཱུ་ཏཾ་དང་། ཟེའུ་འབྲུའི་ལུས་ཀྱི་ཤིང་དང་། དུས་ཀྱི་ཆུ་དང་རྣམས་ཏེ། 
དེ་ལྟ་བུ་ལ་སོགས་པའི་གྲོང་རྣམས་ཡིན་ནོ། །གླིང་གི་ཉེ་འཁོར་ཡོངས་སུ་ཟླུམ་པ་ཇི་ལྟ་བ་ཁོ་ནར་མི་རྣམས་ཀྱི་བཞིན་གྱི་ཉེ་འཁོར་ཡང་ཡོངས་སུ་ཟླུམ་པ་ཡིན་ནོ། །དེ་ལ་འཛམ་བུའི་གླིང་པ་རྣམས་ནི་རྣ་བ་དང་། 
སྐྲ་ལ་རྒྱན་འདོགས་སོ། །བྱང་ཕྱོགས་སྒྲ་མི་སྙན་པ་རྣམས་ནི་མིག་དང་དཔུང་པ་ལ་རྒྱན་འདོགས་སོ། །བ་ལང་སྤྱོད་པ་རྣམས་ནི་གསུས་པ་དང་མགྲིན་པ་ལ་རྒྱན་འདོགས་སོ། །ཤར་ཕྱོགས་ལུས་འཕགས་པོ་རྣམས་
ནི་བརླ་དང་ཕྲག་པ་ལ་རྒྱན་འདོགས་སོ། །དེ་ལ་དེ་དག་རྣམས་ཀྱང་སྐྱེས་བུའི་གནས་བཞི་པོ་རྣམས་ཀྱི་རང་རང་གི་ལུས་ལ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལས་ཀྱི་ཆོས་ཀྱི་རྣམ་པར་སྨིན་པ་རྣམས་ལ་རྗེས་སུ་ལྟ་སྟེ། 
ལས་གང་གིས་ངེས་པར་སེམས་ཅན་དེ་དག་རྣམས་འདིར་སྐྱེས་པ་ཡིན་ཞིང་ཁྱད་པར་དུ་འཕགས་པ་དང་། བར་མ་དང་། ཐ་མ་རྣམས་ཀྱང་ཁྱད་པར་དུ་འཕགས་པ་དང་། བར་མ་དང་། ཐ་མའི་ལས་རྣམས་ཀྱིས་བྱས་
པ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སྔོན་སེམས་ཅན་འདི་དག་རྣམས་ལས་དང་ཆོས་དང་རྣམ་པར་སྨིན་པ་རྣམས་མངོན་པར་མི་ཤེས་པར་གྱུར་ཏོ། །
དེ་མི་ཤེས་པར་གྱུར་པའི་ཕྱིར་ན་ཞིང་ངན་པ་ལ་སྦྱིན་པ་ངན་པ་བྱིན་པ་ཡིན་ཏེ། དཔེར་ན་ཕན་འདོགས་པའི་ངོར་རམ། སེམས་གཞན་དུ་གྱུར་པས་སམ། ཞབས་འབྲིང་གི་ཕྱིར་ཡང་སྡེ་སྔར་བཞིན་ནོ། །ལས་
66-1-246a

དེས་སེམས་ཅན་ཐ་མ་རྣམས་འདིར་སྐྱེས་པར་གྱུར་ཏོ། །བར་མ་རྣམས་ཀྱང་ཚུལ་ཁྲིམས་དམན་པ་རྣམས་ཡིན་ནོ། །འདི་ལྟ་སྟེ། རྒྱལ་པོའི་ཞབས་འབྲིང་དུ་སྲོག་གཅོད་པ་སྤོང་བར་བྱེད་པ་སྤངས་
པར་གྱུར་ཀྱང་རབ་ཏུ་དང་བའི་སེམས་ཀྱིས་ནི་མ་ཡིན་ནོ། །གང་དེ་དག་རྣམས་ནི་རྒྱུ་དེ་དང་རྐྱེན་དེས་ལུས་ཞིག་པར་གྱུར་ནས་བདེ་འགྲོ་མཐོ་རིས་ཀྱི་ལྷ་རྣམས་སུ་སྐྱེ་བར་འགྱུར་བ་ནི་བར་མ་ཡིན་ནོ། །ཁྱད་པར་
དུ་འཕགས་པའི་རྣམས་ནི་ཁྱད་དུ་འཕགས་པའི་ལས་རྣམས་ཀུན་དུ་བགྲོད་པར་འགྱུར་བ་ཡིན་ཏེ། ཐེག་པ་ཆེན་པོ་ཉན་པར་བྱེད་པ་དང་། ཡོངས་སུ་རྫོགས་པར་བྱེད་པ་དང་། རྗེས་སུ་ཡི་རང་བར་བྱེད་པ་
དག་གིས་ཡིན་ནོ། །ཐེག་པ་ཆེན་པོ་ཉན་པར་བྱེད་པ་དང་། སྟོན་པར་བྱེད་པ་དང་། རྗེས་སུ་ཡི་རང་བར་བྱེད་པ་དང་། ཡོངས་སུ་རྫོགས་པར་བྱེད་པ་མེ་གཏོགས་པའི་འཁོར་བའི་དགོན་པ་ནས་ངེས་པར་འབྱུང་བར་
བྱེད་པ་གཅིག་ཀྱང་ངས་མ་མཐོང་ངོ་། །སྦྱིན་པ་རྣམས་ཀྱི་མཆོག་ནི་འདི་ཡིན་ནོ། །འདི་ལྟ་སྟེ། ཐེག་པ་ཆེན་པོ་སྒྲོགས་པར་བྱེད་པའི་སྦྱིན་པའོ། །ཤེས་རབ་རྣམས་ཀྱི་མཆོག་ཀྱང་འདི་ཡིན་ཏེ། འདི་ལྟར་ཐེག་པ་
ཆེན་པོ་ཉན་པར་བྱེད་པའི་ཤེས་རབ་བོ། །ཐེག་པ་ཆེན་པོ་སྒྲོགས་པའི་ཡོན་ཏན་བརྗོད་པ་རྣམས་ནི་སྔར་གྱི་བཞིན་ནོ། །དེས་ཤར་གྱི་ལུས་འཕགས་པོའི་གླིང་གི་སེམས་ཅན་རྣམས་ཀྱི་ལས་དང་ཆོས་དང་རྣམ་པར་སྨེན་
པ་རྣམས་མཐོང་བར་གྱུར་ནས་ཡང་དག་པ་ཇི་ལྟ་བ་བཞིན་དུ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་སྟེ། ཤར་གྱི་ལུས་འཕགས་པོའི་གླིང་གི་བར་རྣམས་ནི་རིའི་རིགས་སམ། ཆུ་ཀླུང་གི་རིགས་གཞན་ཅི་ཡོད་
ཅེ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ་ཤར་ཕྱོགས་ལུས་འཕགས་པོའི་གླིང་དཔག་ཚད་སྟོང་ཕྲག་བརྒྱད་པའི་བར་ལས་རིང་དུ་འདས་ནས། ལྕགས་ཀྱི་

66-1-246b

ཕུང་པོ་ཞེས་བྱ་བའི་རི་དཔག་ཚད་སུམ་སྟོང་པ་ཡོད་པ་གང་ལས་ཤིན་དུ་ཕྲ་བར་གྱུར་པའི་ལྕགས་ཀྱི་ཕྱེ་མ་རྣམས་ནི་དཔག་ཚད་སྟོང་ཕྲག་བཅུར་འཐུལ་བ་ཡིན་ནོ། །ལྕགས་ཀྱི་ཕུང་པོའི་རི་དེ་ལས་འདས་པར་གྱུར་
ནས་ཁོར་ཡུག་གི་རྣམ་པ་ཞེས་བྱ་བའི་རྒྱ་མཚོ་དཔག་ཚད་བདུན་སྟོང་པ་ཡོད་དེ། ཁོར་ཡུག་གི་རྣམ་པར་བྱས་པ་ཉིད་ཀྱི་རི་ལྔས་ཡོངས་སུ་བསྐོར་བ་ཡིན་ནོ། །འདི་ལྟ་སྟེ། ཁབ་ཀྱི་ཁ་དང་། ལྟོ་ཆེན་པོ་དང་། བྷཱཎྜ་ནཱ་
དང་། སྦྲུལ་དང་། བླ་ལྷག་པ་དང་རྣམས་སོ། །ཁོར་ཡུག་གི་རྣམ་པའི་རྒྱ་མཚོ་དེ་ལས་འདས་པར་གྱུར་ནས་ཁམས་རྣམས་དང་ལྡན་པ་ཞེས་བྱ་བའི་གླིང་དཔག་ཚད་སུམ་སྟོང་པ་ཡོད་དོ། །དེ་ལ་རིག་པ་འཛིན་པ་དང་། 
གསང་བ་པ་དང་། མི་འམ་ཅི་རྣམས་རབ་ཏུ་གནས་སོ། །གླིང་འདི་ནི་ཤིན་དུ་དགའ་བར་གྱུར་པ་ཡིན་ནོ། །ཆུ་ཀླུང་དང་རྫིང་བུ་དང་ལྗོན་ཤིང་རྣམས་ཀྱང་ཕུན་སུམ་ཚོགས་པ་ཡིན་ནོ། །འཛམ་བུའི་གླིང་དང་ཤར་གྱི་ལུས་
འཕགས་པོའི་རི་དགས་དང་བྱ་དང་ལྗོན་ཤིང་རྣམས་ཀྱང་སྟེ། གླིང་དེ་ལས་རིང་དུ་འདས་པར་གྱུར་ནས་རྒྱུ་སྐར་མང་པོ་ཞེས་བྱ་བའི་རིའི་རྩེ་མོ་རི་རབ་ལྷུན་པོ་ལས་བྱུང་ནས་ཧ་ཅང་མི་རིང་བ་ན་ཡོད་དོ། །དེ་ལ་གནས་
ནས་ཀྱང་མཉམ་པ་དང་མི་མཉམ་པའི་ལས་རྣམས་ཀྱི་དབང་གིས་ཡིན་ཏེ། འཛམ་བུའི་གླིང་གི་མི་རྣམས་ཀྱི་དགེ་བ་དང་མི་དགེ་བའི་ལས་ཀྱི་རླུང་གིས་དེ་ལ་འཆར་བར་བྱེད་པས་འཆར་བ་ཡིན་ནོ། །དེ་དག་རྣམས་
འཛམ་བུའི་གླིང་དུ་མཐོང་བར་གྱུར་ནས་ལས་དང་འབྲས་བུའི་དེ་ཁོ་ན་ཉིད་མི་ཤེས་པའི་བྲམ་ཟེ་རྟོག་གེ་པ་རྣམས་ཀྱིས་གཟས་བྱས་སོ། །སྐར་མས་བྱས་སོ་ཞེས་རྒྱལ་པོ་དང་རྒྱལ་པོའི་བློན་པོ་ལ་ཡང་ཀུན་དུ་རིག་པར་
བྱེད་དོ། །དེ་ལ་དེ་དག་རྣམས་ནི་ལྟ་བ་ཕྱིན་ཅི་ལོག་ཏུ་གྱུར་པའི་བྲམ་ཟེ་རྟོག་གེ་པ་རྣམས་ཀྱིས་མཐོང་བ་ཡིན་ནོ། །དགེ་བ་དང་མི་དགེ་བའི་ལས་རྣམས་ཇི་ལྟ་བར་གལ་ཏེ་གཟས་དགེ་བ་བྱས་པ་ཡིན་ན་ཉི་མ་དང་ཟླ་བ་

66-1-247a

འདི་དག་ཀྱང་གཟའ་ཁྱད་པར་ཅན་ཡིན་ན། དེས་བྱས་པས་ཀྱང་དགེ་བ་དང་མི་དགེ་བའི་དུས་དག་རབ་ཏུ་འཇུག་པ་ཡིན་ལ། དེའི་ཚེ་དུས་ཐམས་ཅད་མེ་ཏོག་དང་འབྲས་བུ་རྣམས་ཡོད་པར་འགྱུར་རོ། །གང་གི་
ཚེ་ཉི་མ་དང་ཟླ་བ་དེ་དག་གཉིས་གཟའ་གཞན་གྱིས་བཟུང་བར་གྱུར་པ་འདི་ལྟ་སྟེ། ར་ཧུས་ཉི་མ་དང་ཟླ་བ་འདི་དག་དང་རྒྱུ་སྐར་རྣམས་ཐམས་ཅད་ཀྱང་ཕན་ཚུན་དུ་ཡང་གཟས་གནོད་པར་བྱེད་པ་ཡིན་ནོ། །དེའི་ཕྱིར་
ན་དགེ་བ་དང་མི་དགེ་བ་དག་གཟའ་དང་རྒྱུ་སྐར་གྱིས་མ་བྱས་སོ། །གཞན་ཡང་རྣལ་འབྱོར་སྤྱོད་པ་པ་གཟའ་དང་རྒྱུ་སྐར་གྱིས་བྱས་པ་དང་། ལྟ་བས་བྱས་པ་དང་། ལས་ཀྱི་འབྲས་བུ་རྣམས་ཀྱི་ཕྱི་རོལ་གྱི་ལུས་ཀྱིས་
ལུས་ལ་རྗེས་སུ་ལྟ་ཞིང་གནས་སོ། །དེ་ལ་གཟས་བྱས་པ་དང་། རྒྱུ་སྐར་མང་པོའི་རྒྱ་མཚོའི་འཆར་བ་དང་། རི་རབ་ལྷུན་པོ་དང་། འཆར་བའི་རྩེ་མོ་རྣམས་ལ་ཀུན་དུ་བལྟས་པར་གྱུར་པས་ཀྱང་ཡང་དག་པ་ཇི་ལྟ་བ་
བཞིན་དུ་ཕྱི་རོལ་ལ་ལྟ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། རྒྱུ་སྐར་མང་པོའི་རྒྱ་མཚོ་དཔག་ཚད་བདུན་སྟོང་པ་དེ་ལས་འདས་པར་གྱུར་ནས་བྷ་ར་ཏ་ལྷག་
པར་གནས་པ་ཞེས་བྱ་བའི་གླིང་ཡོད་དེ། བྲག་དང་ཆུ་ཀླུང་དང་ལྗོན་ཤིང་རྣམས་ཕུན་སུམ་ཚོགས་པ་ཡིན་ནོ། །འཛམ་བུའི་གླིང་གི་ལྗོན་ཤིང་དང་མེ་ཏོག་དང་འབྲས་བུ་ཐམས་ཅད་ཀྱང་སྟེ། དཔག་ཚད་ནི་སུམ་སྟོང་ཡིན་ནོ། །
རིག་པ་འཛིན་པ་དང་གསང་བ་པ་ལྷག་པར་གནས་པ་ཡིན་ཏེ། དེ་ནི་འདོད་པའི་རང་བཞིན་གྱི་ལྗོན་ཤིང་དང་མེ་ཏོག་དང་འབྲས་བུ་རྣམས་ཕུན་སུམ་ཚོགས་པ་ཡིན་ནོ། །དེ་ལས་རིང་དུ་འདས་ནས་མཚམས་ཀྱི་མཐའི་རི་
ཞེས་བྱ་བ་སྟེ། ཤར་གྱི་ལུས་འཕགས་པོ་དང་འཛམ་བུའི་གླིང་པ་རྣམས་ཐམས་ཅད་ཀྱི་ཡང་མཚམས་སུ་གྱུར་པ་ཡིན་ནོ། །རྒྱ་མཚོ་འདི་ཡང་ཆུ་བསིལ་བ་ཡིན་ནོ། །ཤར་གྱི་ལུས་འཕགས་པོ་དང་། འཛམ་

66-1-247b

བུའི་གླིང་དག་གི་བར་དཔག་ཚད་སུམ་སྟོང་དུ་དུང་དང་། ཉ་ཆེན་པོ་དང་། ཆུ་སྲིན་ན་ཀྲ་དང་། ཆུ་སྲིན་མ་ཀ་ར་དང་། རུསྦལ་དང་། ཆུ་སྲིན་བྱིས་པ་གསོད་དང་། ཆུ་སྲིན་ཀུརྨྨ་དང་། ཉ་རྣམས་རབ་ཏུ་གནས་སོ། །མཚམས་
ཀྱི་རི་དེ་ལས་འདས་པར་གྱུར་ནས་དམར་པོ་ཞེས་བྱ་བའི་རྒྱ་མཚོ་ཡོད་དེ། འཛམ་བུའི་གླིང་གི་ངོས་གཞན་ཞིག་ན་དཔག་ཚད་ལྔ་སྟོང་དུ་དམར་པོའི་མདོག་གིས་ཀུན་དུ་གང་བར་སྣང་བ་འཛམ་བུའི་གླིང་ལས་ཧ་ཅང་
མི་རིང་བ་ན་ཡོད་དོ། །དེ་ལ་ཡང་ཉ་ཤིན་དུ་མང་བ་ཡིན་ནོ། །ཁྲག་རབ་ཏུ་ཕལ་ཆེ་བ་ཡིན་ནོ། །ཕན་ཚུན་དུ་ཡང་འཚོ་བར་གྱུར་པའི་སྲོག་གཅོད་པར་བྱེད་དོ། །བདག་ཉིད་ཀྱང་ཟ་བར་བྱེད་དོ། །ཁྲག་རབ་ཏུ་ཕལ་ཆེ་
བ་དེའི་ཕྱིར་ན་ཆུ་དེ་ཡང་དམར་པོ་ཡིན་ནོ། །དམར་པོར་ཀུན་དུ་སྣང་བའི་ཕྱིར་ཡང་རྒྱ་མཚོ་འདི་ལ་དམར་པོའི་ཐ་སྙད་དུ་འབྱུང་བ་ཡིན་ནོ། །དེ་ལས་རིང་དུ་འདས་ནས་སྔོན་པོ་ཞེས་བྱ་བའི་རྒྱ་མཚོ་དཔག་ཚད་བདུན་སྟོང་
དང་ལྡན་པ་སྟེ། ཆུ་ཀླུང་དེ་ཐམས་ཅད་ཀྱང་ཉས་གང་བ་དང་མཆོག་ཏུ་ཟབ་པ་ཡིན་ནོ། །དེ་ལས་འདས་པར་གྱུར་ནས་རིན་པོ་ཆེའི་གླིང་ཞེས་བྱ་བའི་རྒྱ་མཚོ་དཔག་ཚད་སུམ་སྟོང་པ་ཡོད་ཏེ། རི་དང་རིན་པོ་ཆེ་དང་
ལྡན་པ་གསེར་གྱི་བྱེ་མ་དང་། རྡོ་དང་། ཥ་ཤྱཱ་ཀ་དང་། མུ་སཱ་ར་གལྦའི་རྡོ་དང་། མུ་ཏིག་གི་ཕྱེ་མ་དང་། བི་དྲུ་མའི་ལྗོན་ཤིང་དང་། སུ་ཀུ་མཱ་རི་ཀཱ་མང་བ་དང་། རིན་པོ་ཆེ་དུ་མ་ལྡན་པ་ཡིན་ནོ། །དེ་ལ་མངར་བའི་དུག་
སེམས་འཕེན་པར་བྱེད་པ་ཞེས་བྱ་བ་ལྗོན་ཤིང་ལས་སྐྱེས་པའི་འབྲས་བུ་དེ་དག་བྱ་འམ་མི་ཡང་རུང་སྟེ། འཛམ་བུའི་གླིང་པར་གཏོགས་པ་རྣམས་ཀྱིས་གང་གི་ཚེ་ཟོས་པར་གྱུར་པའི་ཉི་མ་བདུན་པ་ལ་འཆི་བར་བྱེད་དོ། །བྱ་
གང་དག་གིས་ཟ་བར་བྱེད་པ་དེ་དག་རྣམས་ཀྱང་དུས་བྱེད་དོ། །རིན་པོ་ཆེའི་གླིང་དེ་ལས་འདས་པར་གྱུར་ནས། ལན་ཚྭ་ཞེས་བྱ་བའི་རྒྱ་མཚོ་དཔག་ཚད་སྟོང་ཕྲག་བདུན་དུ་ཉ་ཆེན་པོ་དང་། ཤུ་ག་ཏི་དང་། རུསྦལ་དང་། ན་ཀྲ་དང་། 

66-1-248a

ཆུ་སྲིན་དང་། ཀླུ་དང་། བྱ་རྣམས་ཀྱིས་གང་བར་གྱུར་པའི་སྲིན་པོ་དང་ཤ་ཟ་རྣམས་ཀྱིས་བྲེལ་ཏོག་ཏུ་གྱུར་པ། ཆུའི་ནང་ན་སྐྱེས་པའི་བི་དྲུ་མ་དཀར་པོ་དང་། ཆུའི་ནང་ན་ནུབ་པར་གྱུར་པའི་རི་ཡིན་ནོ། །འཛམ་
བུའི་གླིང་གི་འཁོར་དུ་གྱུར་པའི་གླིང་ལྔ་བརྒྱས་ཡོངས་སུ་བསྐོར་བ་ཡིན་ནོ། །འཛམ་བུའི་གླིང་ན་ཡོད་པའི་གཙོ་བོར་གྱུར་པ་རྣམས་དཔེར་བྱ་ན་འདི་ལྟ་སྟེ། གསེར་གྱི་ས་གཞི་དང་ལྡན་པ་དང་། རིན་པོ་ཆེའི་རྡོ་བ་དང་
ལྡན་པ་དང་། ཀེ་ཏ་ཀ་དང་། མཱ་ལི་ཀཱ་གླིང་དང་། དུང་དང་། མུ་ཏིག་དང་། མེ་ཀ་ལ་འབྱུང་བ་དང་། གཤོལ་མདའ་བ་དང་། དཀའ་ཐུབ་དང་འབྲེལ་བ་དང་། ཀུན་དུ་བཟང་པོའི་ནགས་རྣམས་དང་། རྨ་བྱའི་ནགས་དང་། དྲིའི་ཕྲེང་བ་དང་། 
རྭ་གསུམ་པ་དང་། སྡེ་དཔུང་བཟང་པོ་དང་། སྤཱ་ནཱ་ཤེ་ཏུ་དང་། ལང་ཀའི་གྲོང་ཁྱེར་ན་ངེས་པར་གནས་པའི་སྲིན་པོ་དང་། རི་བཅུ་གཉིས་ལ་ངེས་པར་གནས་པའི་དང་། ལྷུན་པོའི་བི་ལཱ་ཀཿདང་། རི་ལ་ངེས་པར་གནས་པ་དང་། དུང་
དང་། མུ་ཏིག་དམར་པོ་དང་། ཁ་བ་འཁོར་བ་དང་། དངུལ་དང་བཅས་པའི་བྱེ་མས་ཡོངས་སུ་བསྐོར་བ་དང་། ལམ་མེད་པ་དང་། གསེར་ལ་སོགས་པའི་ལྕགས་རི་ལྔས་བསྐོར་བ་དང་། ཤུཀྟིའི་གནས་དང་། བུ་མོའི་
ཤིང་གིས་བསྐོར་བ་དང་། དེ་དག་རྣམས་ནི་སྐྱེས་བུ་རྐང་པ་དང་ལྡན་པ་རྣམས་ཀྱི་སྟེ། ཇི་ལྟར་ཁྱད་པར་དུ་གྱུར་པའི་གླིང་དེ་དག་རྣམས་ཀྱིས་འཛམ་བུའི་གླིང་ཡོངས་སུ་བསྐོར་བ་ཡིན་ཞིང་། དཔག་ཚད་བདུན་སྟོང་དུ་དགའ་
བར་གྱུར་པ་དང་། རི་རྣམས་ནི་སྔར་གྱི་བཞིན་ནོ། །གཞན་ཡང་རྣལ་འབྱོར་སྤྱོད་པ་ཕྱི་རོལ་གྱི་ལུས་ཀྱིས་ལུས་ལ་རྗེས་སུ་ལྟ་ཞིང་གནས་ཏེ། ཉི་མ་དང་ཟླ་བ་འདི་དག་གི་འོད་ཀྱི་ཚད་ཇི་ཙམ་ཅིག་ཡིན་ཞེ་ན། དེས་
ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རི་རབ་ལྷུན་པོ་དང་སྐྱེས་བུའི་གནས་བཞིའི་ལོགས་བཞི་དང་། སྐྱེས་བུའི་གནས་བཞི་པོ་དང་། དེ་དག་རྣམས་ཉི་མ་དང་ཟླ་བ་འདི་

66-1-248b

དག་གིས་རབ་ཏུ་གསལ་བར་བྱེད་དོ། །རྒྱ་མཚོ་ཡང་རི་དེའི་ལོགས་དེ་ནས་དཔག་ཚད་སྟོང་ཕྲག་བརྒྱད་བཅུ་རྩ་བཞི་ཡིན་པ་ལས་དེའི་ཕྱེད་ནི་རབ་ཏུ་གསལ་བར་བྱེད་དོ། །ཕྱེད་ནི་མཆོག་ཏུ་འཇིགས་པར་གྱུར་པའི་མུན་པས་
ཀུན་དུ་ཁྱབ་པར་གྱུར་ཏོ། །ཕ་རོལ་ན་ནི་ཁོར་ཡུག་ཏུ་བྱེ་བ་ཕྲག་སུམ་བཅུ་རྩ་དྲུག་དུ་གྱུར་པའི་ཤིན་དུ་བཟོད་པར་དཀའ་བའི་ལས་ཀྱི་མེའི་རྡོ་རྗེའི་རང་བཞིན་རབ་ཏུ་འབར་བར་གྱུར་པ་འཁོར་ལོ་ཁྱུད་མོ་ཞེས་བྱ་བའི་རི་
ཡོད་པ་གང་ལ་རྒྱ་མཚོའི་ཆུ་རིང་བར་གྱུར་ན་ནི་འོ་མར་འགྱུར་རོ། །དེ་ཇི་སྲིད་དུ་ཉེ་བར་གྱུར་པས་ནི་དེ་དག་ཞོར་འགྱུར་རོ། །ཞོ་ཡང་མར་སར་ཉིད་དུ་འགྱུར་རོ། །ཇི་སྲིད་དུ་ཀུན་ནས་རིག་པར་གྱུར་པས་ནི་མར་འདི་ཡང་
ཞུ་བའི་མར་དུ་འགྱུར་རོ། །མར་ཞུ་བ་དེ་དག་དམྱལ་བའི་མེ་དེ་དག་རྣམས་ཀྱིས་འཚིག་པར་བྱེད་དོ། །དེ་བཞིན་དུ་ཆུས་ཀྱང་ས་གཞི་འདི་ནུབ་པར་བྱེད་དོ། །དེ་ཁོ་ན་བཞིན་དུ་འདོད་པའི་ཁམས་འདི་ཡང་ཡིན་ཏེ། རྣལ་
འབྱོར་སྤྱོད་པ་པ་འདིས་ཡང་དག་པ་ཇི་ལྟ་བ་བཞིན་དུ་རིག་པར་འགྱུར་རོ། །རྣལ་འབྱོར་སྤྱོད་པ་པ་དེས་ཡང་དག་པ་ཇི་ལྟ་བ་བཞིན་དུ་ཤེས་ཤིང་མཐོང་ལ། ཡོངས་སུ་ཆུབ་པར་བྱེད་པའི་བློས་ཀྱང་གང་ཞིག་རྟག་པ་འམ། 
བརྟན་པ་འམ། ཐེར་ཟུག་དུ་གྱུར་པ་འམ། ཡོངས་སུ་མི་འགྱུར་བའི་ཆོས་ཅན་དུ་གྱུར་པ་འམ། གང་ལ་ཡང་བདག་ཅག་རྣམས་ཐོག་མ་དང་ཐ་མ་མེད་པའི་འཁོར་བ་རྣམས་སུ་ལས་ཀྱི་འབྲས་བུའི་བགོ་
སྐལ་ལ་སྤྱོད་པ་དང་། རང་གི་ལས་ཀྱི་འབྲས་བུས་མནར་བ་དང་། ལན་བརྒྱ་ཕྲག་དང་དེ་ནས་སྟོང་ཕྲག་རྣམས་སུ་ཡང་ཤི་འཕོས་པ་དང་། སྐྱེས་པར་མ་གྱུར་པའི་གནས་གཅིག་དང་ཡང་ལྡན་པའི་ནི་དེས་གཅིག་
ཀྱང་མ་མཐོང་ངོ་། །ཡང་དག་པ་ཇི་ལྟ་བ་བཞིན་དུ་རྟག་པར་རྒྱུན་དུ་ནང་དང་གཞན་དང་། ནང་དང་ཕྱིའི་ལུས་རྣམས་ལ་ཡང་ལྟ་བར་བྱེད་པས་ནི་ལུས་ལ་ཀུན་དུ་ཆགས་པར་མི་འགྱུར་རོ། །སྡུག་པར་གྱུར་

66-1-249a

པའི་སྒྲ་དང་། རོ་དང་གཟུགས་དང་། དྲི་དང་། རེག་བྱ་རྣམས་ཀྱིས་ཀྱང་ཕྲོགས་པར་མི་འགྱུར་རོ། །དེ་ལྟར་ནཱ་ལ་ཏིའི་གྲོང་གི་བྲམ་ཟེ་དང་ཁྱིམ་བདག་རྣམས་དང་། ལུས་དྲན་པ་ཉེ་བར་གཞག་པ་ལ་མངོན་
པར་བརྩོན་པའི་དགེ་སློང་རྣམས་ཀྱང་བདུད་ཀྱི་དྲུང་ན་རབ་ཏུ་མི་གནས་སོ། །དེ་ལྟར་ལུས་དྲན་པ་ཉེ་བར་གཞག་པ་ཐོས་པར་གྱུར་པས་ཀྱང་རབ་ཏུ་མང་པོ་རྣམས་ཀྱིས་འཇིག་ཚོགས་ལ་ལྟ་བའི་མིག་སྤྲིན་ཕུག་ནས་
བླ་ན་མེད་པའི་ཆོས་རྣམས་ལ་ཆོས་ཀྱི་མིག་སྐྱེས་པར་གྱུར་ཏོ། །དགེ་སློང་དག་ངས་ཇི་སྐད་དུ་ལུས་དྲན་པ་ཉེ་བར་གཞག་པ་བསྟན་པར་བྱའོ་ཞེས་བརྗོད་པ་ལ་བཤད་པ་ནི་དེ་དག་རྣམས་ཡིན་ནོ། །དགེ་སློང་དག་དེ་
དག་རྣམས་རི་དང་། རིའི་ཁྲོད་དང་། རིའི་ཕུག་དང་། དུར་ཁྲོད་དང་། བླ་གབ་མེད་པ་དང་རྣམས་སུ་རྩྭ་སོགས་གི་ཕུང་པོ་ལ་བསམ་གཏན་དུ་གྱིས་ཤིག །བག་མེད་པས་གནས་པར་མ་བྱེད་ཅིག །ཕྱི་ནས་འཆི་
བའི་དུས་ན་འགྱོད་པར་འགྱུར་བ་མ་བྱེད་དང་། འདི་ནི་ཁྱེད་རྣམས་ལ་རྗེས་སུ་གདམས་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ལ། དགེ་སློང་དེ་དག་རྣམས་ཀྱང་ཡི་རངས་ཏེ། བཅོམ་
ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ལུས་དྲན་པ་ཉེ་བར་གཞག་པའོ། །སྟོང་ཕྲག་སུམ་བཅུ་རྩ་དྲུག་པ་འཕགས་པ་དམ་པའི་ཆོས་དྲན་པ་ཉེ་བར་གཞག་པ་ཞེས་བྱ་བ་ཐེག་པ་
ཆེན་པོའི་མདོ་རྫོགས་སོ།། །།ཆོས་རྣམས་ཐམས་ཅད་རྒྱུ་ལས་བྱུང་། །རྒྱུ་དེ་དེ་བཞིན་གཤེགས་པས་གསུངས། །དེ་ཡི་འགོག་པ་གང་ཡིན་པ། །དགེ་སྦྱོང་ཆེན་པོས་དེ་སྐད་གསུངས། །ཉེ་བར་
མཁོ་བ་ཐམས་ཅད་ལེགས་པར་སྐྲུན་པ་ལ་སོགས་པ་ཕུན་སུམ་ཚོགས་པའི་དངོས་པོ་མཐའ་དག་དང་ལྡན་པ་ས་གཞིའི་ཡོན་ཏན་དང་རིག་པའི་གནས་མཐའ་དག་གི་འབྱུང་གནས་སུ་གྱུར་པ་སྦྱང་ཞིང་སྒྲིན་ལ་

66-1-249b

སྐྱེ་བོ་ཐམས་ཅད་བློ་དང་ལྡན་པས་འཛམ་བུའི་གླིང་གི་ཡུལ་རྣམས་ཀྱི་མིག་ཏུ་དགོངས་ནས་སྟོན་པ་ཡང་དག་པར་རྫོགས་པའི་སངས་རྒྱས་མངོན་པར་རྫོགས་པར་སངས་རྒྱས་པ་ནི་ཀླུང་ཆེན་པོ་འབབ་པ་ཆུ་བོ་གང་
གཱའི་འགྲམ་གྱིས་བསྡུས་པ་ཆེས་ཡངས་པར་གྱུར་པ་རྒྱ་གར་གྱི་ཡུལ་ལོ། །དེའི་ཡང་དབུས་སུ་གཏོགས་པ་ལས་ཤར་གྱི་ཆ་ཡུལ་ཆེན་པོ་ཤར་ཕྱོགས་བ་ལེནྡྲ་ཞེས་བྱ་བའི་གཙུག་ལག་ཁང་ཆེན་པོ་སྟོན་པའི་
བསྟན་པའི་མིག་དང་། རྩ་བ་དང་། གཞིར་གྱུར་པ། དཔལ་དང་ལྡན་པའི་རྒྱལ་པོའི་སྲས་ཕུན་སུམ་ཚོགས་པའི་དཔལ་གྱིས་གཞན་ལས་མཐོ་བས་མངའ་ཆེར་སྒྱུར་བཱི་སའི་བདག་པོ་ནེ་བཻ་པཱ་ལ་ཞེས་བྱ་བས་
མཐོ་རིས་དང་ཐར་པའི་ཐེམ་སྐས་མཁས་ཤིང་བཙུན་ལ་དུལ་བའི་སྐྱེས་བུ་དམ་པ་རྣམས་ཀྱི་བཞུགས་གནས་སུ་མཛད་པའི་གཙུག་ལག་ཁང་ཛ་གདྡཱ་ལ་ན་མཁས་པའི་སྐྱེ་དགུ་པཎྜི་ཏ་རྣམས་མང་དུ་བྱུང་ཞིང་
མང་གིས་ཀྱང་ཆེན་པོ་ལས་ཆེན་པོར་གྱུར་པ། ལྔ་བརྒྱ་པའི་ཐམས་ཅད་མཁྱེན་པར་འཇིག་རྟེན་ལས་སྒྲོགས་པ། སྔོན་གྱི་སློབ་དཔོན་ཆེན་པོ་རྣམས་དང་མཚུངས་པ་ཡིན་ཞེས་བྱ་བའི་བསྔགས་པས་པཎྜི་ཏ་རྣམས་
ཀྱིས་བསྔགས་པར་མཛད་པ། འཇིག་རྟེན་གྱི་ཕུན་སུམ་ཚོགས་པས་ང་རྒྱལ་བའི་རྒྱལ་པོ་དང་བློན་པོ་རྣམས་ཀྱིས་ལུས་ཀྱི་མགོ་ལྟར་གཉའ་བར་ཁུར་བ་མཁས་པའི་ང་རྒྱལ་ཅན་པཎྜི་ཏ་དང་། འཇིག་རྟེན་པ་རྣམས་
ཀྱིས་གཙུག་གི་ནོར་བུ་ལྟར་འཛིན་པ། ཚེ་འདི་རིང་དུ་སྤངས་པའི་སྐྱེ་བོ་ཐར་པ་སྒྲུབ་པ་ལ་བརྩོན་པ་རྣམས་ཀྱིས་སྐྱོན་ལེགས་པར་མཐོང་བས་ལམ་འདྲེན་པའི་མིག་དང་འདྲ་བར་འདྲེན་པར་ལྟ་བ། ཡུལ་གྱི་མི་ཐམས་
ཅད་ཀྱིས་བུ་གཅིག་པ་ལྟར་སྙིང་དུ་སྡུག་ཅིང་འཐུན་པར་གྱུར་པས་དམུ་རྒོད་ལྟ་བུར་ལོག་པར་སྒྲུབ་པ་རྣམས་ལ་ཆེས་འཐུན་པར་འཛིན་པས་ཡིད་འཕྲོག་པར་མཛད་པ། འགྲོ་བ་ཉམ་ཐག་པ་རྣམས་གཟིགས་

66-1-250a

ནས་བརྩེ་བའི་ཟུག་རྔུས་སེམས་གདུངས་ཀྱང་ཐུགས་རྗེའི་ཕྱག་བརྐྱང་བས་སྐལ་བ་དང་འཐུན་པར་རྗེས་སུ་འཛིན་པར་མཛད་པ། སྤྱིར་ལུང་བསྟན་པའི་མདོ་སྡེ་སྟག་རྣའི་རྒྱུ་སྐར་ལས་ཡོན་ཏན་དུ་མ་དང་
ལྡན་པ་དང་རྩོམ་པ་པོ་ཆེན་པོ་ཉིད་དང་། ལུས་བརྗེས་ནས་མཐོ་རིས་སུ་སྐྱེ་བ་བཞེས་པར་ལུང་བསྟན་པ། འཕགས་པ་བྱམས་པ་དང་མཇལ་བར་བཞེད་པའི་སྲེད་པ་དང་། ཆོས་ཀྱི་སྲེད་པ་དང་། ཆོས་ཀྱི་སྲེད་པ་བླ་ལྷག་པ་
མངའ་བ། ཆགས་སྡང་ལ་སོགས་པ་ཐམས་ཅད་ནི་ཤས་ཆུང་བར་གྱུར་པའི་སྐྱེས་བུ་དེའི་བསྔགས་པ་སྤྲོ་བར་ནི་སུས་ནུས། མདོར་བསྡུ་ན་འཇིག་རྟེན་མི་ཆོས་ཀྱི་མཁྱེན་པ་ཆེ་ཞིང་བཟང་བ་གསེར་གྱི་ས་གཞི་དང་འདྲ་བ་ལ། 
དམ་པའི་ཆོས་ཕུན་སུམ་ཚོགས་པ་མཁས་པ་དང་། བཙུན་པ་དང་། ཞི་བ་དང་། དུལ་བ་དང་། མཉེན་པ་དང་། དེས་པ་དང་། བདེན་པར་སྨྲ་བ། གཡོ་མེད་པ། དྲང་པོའི་རང་བཞིན་ཅན། སྒྲུབ་པ་ལ་སྙིང་པོར་མཛད་པའི་དཔག་
བསམ་གྱི་ལྗོན་ཤིང་ལོ་འདབ་རྒྱས་པ་གཡུའི་མཎྜལ་དང་མཚུངས་པར་འཁྲུངས་པ་ལས་ཚེ་འདི་དང་། གཞན་དང་། གནས་སྐབས་དང་། མཐར་ཐུག་པའི་དགེ་བའི་ལོ་ཏོག་ཕུན་སུམ་ཚོགས་པའི་མེ་ཏོག་དང་འབྲས་བུ་ཡོངས་
སུ་རྒྱས་ཤིང་རྣམ་པར་སྨིན་པས་བདག་དང་གཞན་ལ་ཕན་པའི་ཕ་རོལ་ཏུ་བྱོན་པས་ཅུང་ཟད་ཀྱང་དོན་མེད་པ་མ་ཡིན་པ། རིག་པའི་གནས་ལྔ་ལ་ཐོགས་པ་མེད་པའི་མཁྱེན་པ་དང་ལྡན་པའི་དཔལ་གྱིས་མཛེས་པའི་པ་ཎྜི་ཏ་
ཆེན་པོ་ཤཱནྟ་ཨཱ་ཀ་རའ་གུཔྟ་ཏའི་ཞལ་སྔ་ནས་དང་། མཁས་པ་ཆེན་པོ་སྐྱེས་བུ་དམ་པ་འདུལ་བ་འཛིན་པའི་ཡང་མཆོག་ཏུ་གྱུར་པ་པ་ཎྜི་ཏ་ཆེན་པོ་ཨ་བྷ་ཡཱ་ཀ་རའ་གུཔྟ་ཏ་དང་། ཐོས་པ་འཛིན་པས་འཇམ་དཔལ་དང་
འདྲ་བར་གྲགས་པ་སྤོབས་པའི་ཤེས་རབ་ཅན་རྣམས་ཀྱི་མཆོག་པཎྜི་ཏ་ཆེན་པོ་ཤཱཀྱ་རཀྵི་ཏ་དང་། པཎྜི་ཏ་ཆེན་པོ་བཱིདྱ་ཨཱ་ཀ་ར་ཤཱནྟི་ལ་སོགས་པ་རྣམས་ལ་རྒྱ་དཔེ་ལྔ་དང་། གཞན་ཡང་ཡུལ་དབུས་མ་ག་དྷ་ཞེས་

66-1-250b

བྱ་བ་དེ་བཞིན་གཤེགས་པའི་རྟེན་མང་དུ་བཞུགས་ཤིང་སངས་རྒྱས་པའི་སྐྱེ་བོ་དཀོན་མཆོག་གསུམ་ལ་དད་པས་ཡུལ་གང་བའི་མ་ག་དྷཱའི་ཡུལ་སྨད་ན། རྒྱལ་པོ་བྱང་ཆུབ་སེམས་དཔའ་དེ་བ་པཱ་ལས་མཛད་པའི་གཙུག་
ལག་ཁང་ཆེན་པོ་བསྟན་པའི་མིག་ཏུ་གྱུར་པ་བི་ཀྲ་མ་ཤཱི་ལ་ན་ཡང་མཁས་པའི་སྐྱེ་བོ་མང་དུ་ཟིན་ཀྱང་ཤཱཀྱ་རཀྵི་ཏ་དེ་ཉིད་དང་། སྒྲ་དང་། སྙན་དངགས་དང་། ལེགས་པར་དཔྱད་པའི་སྐད་ཀྱི་ལུགས་ལ་མཁས་པའི་པ་ཎྜི་ཏ་
ཆེན་པོ་སུ་བྷུ་ཏི་ཙནྡྲ་དང་། མངོན་པ་ལ་མཁས་པ་ཨ་ཌི་ཏ་ཙནྡྲ་ལ་སོགས་པ་རྣམས་ལ་རྒྱ་དཔེ་གཉིས་ལ་ལེགས་པར་མཉན་ཅིང་གུས་པས་ཐད་དུ་བསྟེན་ནས་དོན་དང་ཚིག་མ་ལུས་པར་རྟོགས་པའི་བཤད་པ་ཞུས་ནས་
ཤིན་དུ་དཀའ་བའི་གནས་རྣམས་ལ་ནི་ཕྱིར་ཞིང་ལེགས་པར་དཔྱད་པས་དོན་དགྲོལ་བའི་ཐབས་ཞུས་ཏེ། འགྱུར་གྱི་ཡན་ལག་རྒྱ་གར་གྱི་སཾ་སྐྲྀ་ཏ་དང་། འཕྲལ་སྐད་གཉིས། བོད་ཀྱི་ཆོས་སྐད་དང་། འཕྲལ་སྐད་
གཉིས་ཏེ་བཞི་ལ་དབང་འབྱོར་པའི་ཤེས་རབ་ཀྱི་སྣང་བ་ཐོབ་མོད་ཀྱིས་ཀྱང་། སྤྱིར་མདོ་སྡེ་ལ་དོན་གྱི་གནས་མང་བས་ཚིག་དོན་ཕལ་ཆེར་བརླིང་ཞིང་ལྷག་པར་ཡང་མདོ་འདི་དོན་དུ་མ་ཚིག་ཟུར་རྣམས་ཀྱིས་ངག་གཅིག་ཏུ་
འབྲེལ་བར་སྟོན་པ་ནི་ཚིག་མཛེས་པའི་རྒྱན་གྱིས་དོན་གསལ་བར་མཛད་པ་སྙན་དངགས་ཀྱི་དབང་ཕྱུག་འགྲན་གྱི་དོ་ཟླ་མེད་པ་རྣམས་ཀྱིས་མཛད་པའི་རིམ་པ་ཡིན་པའི་ཕྱིར་ན་སྦྱངས་པ་ཞན་པ་རྣམས་ལ་སླ་བ་མ་ཡིན་ལ། 
ཁྱད་པར་དུ་ཡང་གཞུང་ཉུང་བས་དོན་དུ་མ་སྟོན་པའི་མདོ་དུམ་བུ་རྣམས་ནི་སྤྱི་སོར་བསྒྱུར་བར་མངོན་ཡང་། བློའི་ནོར་ཅན་རྣམས་ཀྱིས་ནི་དེ་ཉིད་ལ་དོན་དུ་མ་ངེས་ནུས་ལ། བྱེ་བྲག་ཏུ་གསལ་བཏབ་ན་ནི་དོན་གཅིག་
སྟོན་པར་འཁྲུལ་པའི་ཕྱིར་དང་། ཚིག་ཇི་ཙམ་པས་བརྗོད་པ་དེ་ཙམ་དུ་བསྒྱུར་བར་རིགས་པའི་ཡང་ཕྱིར་ཏེ། མདོར་ན་རྒྱ་བོད་ཀྱི་དོན་ཐུན་མོང་བ་བརྡ་ཐ་དད་པའི་བྱེད་པ་མ་ཉམས་པར་བྱས་ནས་སྔོན་གྱི་བསྒྱུར་བ་

66-1-251a

ལ་མཁས་པ་རྣམས་ཀྱིས་བཀས་བཅད་ལ་སོགས་པའི་ལུགས་དང་ཡང་མི་འགལ་བར་བྱང་ཕྱོགས་པ་ཚབ་ཀྱི་རྒྱུད་དུ་སྐྱེས་པའི་དགེ་སློང་ཚུལ་ཁྲིམས་རྒྱལ་མཚན་གྱིས་དམ་པའི་ཆོས་ལ་གུས་པས་རྒྱ་
གར་གྱི་རྒྱལ་པོ་ཕུན་སུམ་ཚོགས་པའི་དཔལ་གྱི་རྒྱལ་མཚན་གྱི་དབང་ཕྱུག་གཞན་པས་ཆེས་མཐོ་བ་དང་ལྡན་པ་ར་མ་པཱ་ལའི་རིང་ལ་ཐེག་པ་ཆེན་པོའི་མདོ་སྡེ་དམ་པའི་ཆོས་དྲན་པ་ཉེ་བར་གཞག་པ་ཞེས་བྱ་བའི་ཤས་ཤིག་
འགྱུར་བའི་འཕྲོ་ཡོངས་སུ་རྫོགས་པར་བྱས་ནས་བསྒྱུར་བའོ།། སླད་ཀྱིས་ཞུས་ཐུག་ལ་ནི་དགེ་བའི་བཤེས་གཉེན་ཞང་བུ་གཅིག་པ་ཞེས་རབ་ཏུ་གྲགས་ཤིང་སྐྱེ་དགུ་རྣམས་སྒྲོགས་པ་ཡང་འཇིག་རྟེན་པ་ནི་རང་
ལ་ཕན་པའི་རྒྱུ་མཚན་གྱིས་རྗོད་པ་དེ་དག་རྣམས་ཀྱི་གཤིས་ཡིན་པའི་ཕྱིར་ཏེ། སྐྱེས་བུ་དེས་ནི་སེམས་ཅན་ལ་བུ་གཅིག་པ་བཞིན་དུ་དགོངས་པས་སྲས་གཅིག་པའོ། །དེས་ནི་ཐུགས་རྗེ་ཆེན་པོ་དང་ལྡན་པ་མཚོན་ནོ། །
ཆོས་ལ་གནས་པ་རྣམས་ལ་ཤེས་རབ་འོད་ཅེས་གྲགས་པ་ཡང་ཐེག་པའི་རིམ་པ་དང་འཐུན་པར་མཁྱེན་ཅིང་བདེན་པ་གཉིས་ལ་སོགས་པའི་སྒོར་བསྡུ་བས་མོས་པ་དང་། ངེས་པ་དང་། མངོན་དུ་རྟོགས་ཤིང་ཤེས་ནས་རང་
དང་གཞན་གྱི་ཉོན་མོངས་པ་དང་ཤེས་བྱའི་སྒྲིབ་པའི་མུན་པ་འཇོམས་པའི་འོད་མཛད་པའི་ཕྱིར་ཏེ། དེས་ནི་ཤེས་རབ་ཆེན་པོ་དང་ལྡན་པ་དང་། བདག་དང་གཞན་གྱི་དོན་ཕུན་སུམ་ཚོགས་པ་བསྟན་ཏོ། །དམ་པའི་
སྐྱེ་བོ་དེས་གྲོགས་མཛད་ནས་དགེ་སློང་ཚུལ་ཁྲིམས་རྒྱལ་མཚན་ཉིད་ཀྱིས་དག་པར་བྱས་སོ། །དེ་ལྟར་ན་དང་པོའི་གཞི་འགྱུར་དང་། ཞུ་ཆེན་དང་། ཚིག་དོན་གྱི་འབྲེལ་དཔྱད་པ་དང་། ཞུ་ཆུང་དང་། ཡང་འབྲེལ་དཔྱད་པ་
དང་ལྔར་ཞུས་ཤིང་གཏུགས་ཏེ་གཏན་ལ་ཕབ་པའོ། །དམ་ཆོས་མདོ་སྡེ་རིན་ཆེན་ཐེག་པ་ཀུན་གྱི་གཞི་དང་རྩ་བ་བཅུད་དུ་གྱུར་པའི་ཐེག་ཆེན་དྲན་གཞག་འདི་ལེགས་བསྒྱུར་དངོས་དང་དེ་ཡི་གྲོགས་བྱེད་ཐམས་ཅད་དང་ནི་

66-1-251b

ནམ་མཁའི་མཐས་གཏུགས་འགྲོ་ཀུན་དགེ་བ་དྲི་མེད་ཀྱིས། །སྲིད་ན་བདེ་སྦྱིན་སྐྱབས་གནས་རྫོགས་པའི་བྱང་ཆུབ་འབྲས་ལྡན་ས་ཡི་གནས་སྐབས་ལྗོན་ཤིང་ལོ་འདབ་ཕུན་ཚོགས་ཤོག ། །།
༄༅།   །རྒྱ་གར་སྐད་དུ། མཱ་ཡཱ་ཛཱ་ལཾ་ནཱ་མ་མ་ཧཱ་སཱུ་ཏྲཾ།  བོད་སྐད་དུ། མདོ་ཆེན་པོ་སྒྱུ་མའི་དྲ་བ་ཞེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་
དུ་ཡོད་པ་ན་རྒྱལ་བུ་རྒྱལ་བྱེད་ཀྱི་ཚལ། མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ལྷག་པའི་ཚུལ་ཁྲིམས་ཀྱི་བསླབ་
པ་ཡོད་ལ། ལྷག་པའི་སེམས་མེད་ཅིང་། ལྷག་པའི་ཤེས་རབ་མེད་པ་དང་། ལྷག་པའི་ཚུལ་ཁྲིམས་དང་། ལྷག་པའི་སེམས་ཀྱི་བསླབ་པ་ཡོད་ལ། ལྷག་པའི་ཤེས་རབ་མེད་པ་ཡང་ཡོད་དེ། འཕགས་པ་ཉན་ཐོས་
ལྷག་པའི་ཤེས་རབ་ལ་བརྩོན་པའི་རྗེས་སུ་སྦྱོར་བ་ལ་གནས་ན་ལྷག་པའི་ཚུལ་ཁྲིམས་དང་། ལྷག་པའི་སེམས་ཀྱི་བསླབ་པའི་བསྒོམ་པ་ཡོངས་སུ་རྫོགས་པར་འགྱུར་ཏེ། དགེ་སློང་དག་དེ་ལྟར་ན། འདི་ལ་འཕགས་པ་
ཉན་ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་པ་ནི་ཤེས་རབ་ཀྱིས་འཚོ་བ་རྣམས་ཀྱི་ནང་ན་བླ་ན་མེད་པས་འཚོ་བ་ཡིན་ནོ། །དགེ་སློང་དག་ཇི་ལྟར་ན་འཕགས་པ་ཉན་ཐོས་ལྷག་པའི་ཤེས་རབ་ལ་
སྦྱོར་བར་རྗེས་སུ་ཞུགས་པ་ལ་གནས་པ། ཤེས་རབ་ཀྱིས་འཚོ་བ་རྣམས་ཀྱི་ནང་ན་བླ་ན་མེད་པས་འཚོ་བ་ཡིན་ཞེ་ན། དགེ་སློང་དག་འདི་ལ་འཕགས་པ་ཉན་ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་ཞུགས་
པ་ལ་གནས་པ་ནི་བདག་སྔོན་མིག་གིས་རྣམ་པར་ཤེས་པར་བྱ་བའི་གཟུགས་ཡིད་བདེ་བའི་གནས་ལྟ་བུ་དག་ལ་ནི་རྗེས་སུ་ཆགས་ཤིང་གནས་པར་གྱུར་ལ། མིག་གིས་རྣམ་པར་ཤེས་པར་བྱ་བའི་གཟུགས་ཡིད་

66-1-252a

མི་བདེ་བའི་གནས་ལྟ་བུ་དག་ལ་ནི་ཁོང་ཁྲོ་བ་དང་ལྡན་ཞིང་གནས་པར་གྱུར། མིག་གིས་རྣམ་པར་ཤེས་པར་བྱ་བའི་གཟུགས་བཏང་སྙོམས་ཀྱི་གནས་ལྟ་བུ་དག་ལ་ནི་སོ་སོར་བརྟགས་པ་མ་ཡིན། སོ་སོར་
བརྟགས་པ་མ་ཡིན་པའི་བཏང་སྙོམས་སུ་གནས་པར་འགྱུར་ཏེ། དེ་ལྟར་བདག་ཡུན་རིང་པོ་ནས་འདི་ལ་རྗེས་སུ་སློབ་ཅིང་རྗེས་སུ་བྱེད་པ་ན་རྒ་བ་དང་། འཆི་བ་ཉམས་སུ་མྱོང་ཞིང་། སྔོན་གྱི་མཐའ་མི་མངོན་པར་གྱུར་པས་
བདག་གིས་ད་ནི་མིག་གིས་རྣམ་པར་ཤེས་པར་བྱ་བའི་གཟུགས་དག་ལ་སྔོན་ཇི་ལྟ་བ་དེ་ལྟར་བསླབ་པར་མི་བྱ་ཞིང་། བདག་གིས་མིག་གིས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་
གཟུགས་དག་ལ་ལོག་པར་མོས་པ་འམ། འདུ་ཤེས་ཕྱིན་ཅི་ལོག་གམ། སེམས་ཕྱིན་ཅི་ལོག་གམ། ལྟ་བ་ཕྱིན་ཅི་ལོག་ཏུ་གྱུར་པ་འདི་ལྟ་སྟེ། བརྣབ་སེམས་ཀྱི་ཚོགས་ཀྱི་མདུད་པ་དང་། གནོད་སེམས་ཀྱི་ཚོགས་
ཀྱི་མདུད་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ཚོགས་ཀྱི་མདུད་པ་དང་། འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པ་གང་དག་ཡིན་པ་དེ་དག་སྤང་
བའི་ཕྱིར་བསླབ་པར་བྱ་ཞིང་དེ་དག་སྤངས་པར་གྱུར་ཅིག་ཅེས་དེ་ལྟར་སོ་སོར་རྟོག་པར་བྱེད་པའི་ཕྱིར་རོ། །དགེ་སློང་དག་འོན་ཀྱང་འདི་ན་ཁ་ཅིག་ལ་ནི་མིག་གིས་རྣམ་པར་ཤེས་པར་བྱ་བའི་གཟུགས་དེ་དག་ཉིད་ཡིད་དུ་
འོང་བར་འགྱུར་ལ། གཞན་དག་ལ་ནི་དེ་དག་ཉིད་ཡིད་དུ་མི་འོང་བར་འགྱུར་བ་ཡང་ཡོད་ལ། དེ་དག་ལ་ཡང་དུས་ལ་ལར་ནི་ཡིད་བདེ་བའི་གནས་ལྟ་བུ་དག་ཏུ་འགྱུར་ཞིང་། དུས་ལ་ལར་ནི་ཡིད་མི་བདེ་བའི་གནས་ལྟ་བུ་
དག་ཏུ་འགྱུར། དུས་ལ་ལར་ནི་བཏང་སྙོམས་ཀྱི་གནས་ལྟ་བུ་དག་ཏུ་འགྱུར་ཏེ། དགེ་སློང་དག་དེ་དེ་ལྟར་ན་འདི་ལ་སེམས་ཅན་རྣམས་ཡུན་རིང་པོ་ནས་སེམས་ཀྱིས་བསྒྲིབས་ཤིང་། སེམས་ཀྱིས་བྲིད། སེམས་ཀྱིས་

66-1-252b

བསླུས་ནས་ཉེས་དམིགས་སུ་མི་མཐོང་ཞིང་། ངེས་པར་འབྱུང་བ་རབ་ཏུ་མི་ཤེས་ཏེ། བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་གོ། །དགེ་སློང་དག་དགེ་སྦྱོང་ངམ། བྲམ་ཟེ་གང་དག་ཁ་ཅིག་མིག་གིས་རྣམ་
པར་ཤེས་པར་བྱ་བའི་གཟུགས་འདི་དག་ཉིད་བདེན་པ་དང་གནས་པའི་སྒོ་ནས་མ་མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཞེན་པར་བྱས་ནས་འདི་ཉིད་བདེན་གྱི་གཞན་ནི་
བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་མིག་གིས་རྣམ་པར་ཤེས་པར་བྱ་བའི་གཟུགས་ཡིད་བདེ་བའི་གནས་ལྟ་བུ་དག་ལ་རྗེས་སུ་ཆགས་ཤིང་གནས་ཏེ། དགེ་སྦྱོང་དང་བྲམ་ཟེ་བརྣབ་སེམས་ཀྱི་
ཚོགས་ཀྱི་མདུད་པས་ཀུན་ནས་སུན་ཕྱུང་བ། རྗེས་སུ་ཆགས་པའི་ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་པ་ཡིན་ནོ། །དགེ་སློང་དག་དགེ་སྦྱོང་ངམ་བྲམ་ཟེ་གང་དག་ཁ་
ཅིག་གིས་རྣམ་པར་ཤེས་པར་བྱ་བའི་གཟུགས་འདི་དག་ཉིད་བདེན་པ་དང་གནས་པའི་སྒོ་ནས་མ་མཐོང་ཞིང་ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཞེན་པར་བྱས་ནས་འདི་ཉིད་བདེན་
གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་མིག་གིས་རྣམ་པར་ཤེས་པར་བྱ་བའི་གཟུགས་ཡིད་མི་བདེ་བའི་གནས་ལྟ་བུ་དག་ལ་ཁོང་ཁྲོ་བ་དང་ལྡན་པར་གནས་ཏེ། དགེ་སྦྱོང་དང་
བྲམ་ཟེ་གནོད་སེམས་ཀྱི་ཚོགས་ཀྱི་མདུད་པས་ཀུན་ནས་སུན་ཕྱུང་བ། ཁོང་ཁྲོ་བའི་ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་དུ་བྱེད་དུ་འཇུག་པ་ཡིན་ནོ། །དགེ་སློང་དག་དགེ་
སྦྱོང་ངམ་བྲམ་ཟེ་གང་དག་ཁ་ཅིག་མིག་གིས་རྣམ་པར་ཤེས་པར་བྱ་བའི་གཟུགས་འདི་དག་ཉིད་བདེན་པ་དང་གནས་པའི་སྒོ་ནས་མ་མཐོང་ཞིང་ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་

66-1-253a

ཞེན་པར་བྱས་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་མིག་གིས་རྣམ་པར་ཤེས་པར་བྱ་བའི་གཟུགས་བཏང་སྙོམས་ཀྱི་གནས་ལྟ་བུ་དག་ལ་
སོ་སོར་བརྟགས་པ་མ་ཡིན་པའི་བཏང་སྙོམས་སུ་གནས་ཏེ། དགེ་སྦྱོང་ངམ་བྲམ་ཟེ་འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པས་ཀུན་ནས་སུན་ཕྱུང་བ། ང་རྒྱལ་གྱི་ཀུན་
ཏུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་པ་ཡིན་ནོ། །དགེ་སློང་དག་འདི་ལྟ་སྟེ། དཔེར་ན་མི་སྨྱོན་པ་སེམས་གཡེངས་པ་ནི་གཅེར་བུར་དེ་དང་དེ་དག་ཏུ་འཁྱམ་པར་བྱེད་
ཅིང་། དེ་དེས་མངོན་པར་དགའ་བར་བྱེད་ལ། དེ་ལ་ཉེས་དམིགས་སུ་མ་མཐོང་བ་ལས་གང་གི་ཚེ་དེས་རང་གི་སེམས་ཕྱིར་ཐོབ་པ་དེའི་ཚེ་དེ་སྔོན་གྱི་སྨྱོན་པའི་སྤྱོད་པ་དང་། སེམས་གཡེངས་པའི་སྤྱོད་པ་དང་། 
གཅེར་བུའི་སྤྱོད་པ་པ་དེས་གདུང་བར་བྱེད། ངོ་ཚ་བར་བྱེད། གནོང་བར་བྱེད་ཅིང་། རྣམ་པར་སྨོད་པར་བྱེད་དོ། །དགེ་སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་ཡང་། འཕགས་པའི་འཇིག་
རྟེན་ལས་འདས་པའི་ཤེས་རབ་འདི་ཉིད་ཐོབ་ནས་སྔོན་གྱི་བྱིས་པའི་སྤྱོད་པ་དང་། རྨོངས་པའི་སྤྱོད་པ་དང་། ཤེས་རབ་འཆལ་པའི་སྤྱོད་པ་དེས་གདུང་བར་བྱེད། ངོ་ཚ་བར་བྱེད། གནོང་བར་བྱེད་ཅིང་། རྣམ་པར་
སྨོད་པར་བྱེད་ལ། དེ་འདི་སྙམ་དུ་སེམས་ཏེ། བདག་གིས་ནི་སྔོན་མི་རྟག་པ་ཁོ་ན་ལ་རྟག་པར་བསམས་ཤིང་། བདག་གིས་སྡུག་བསྔལ་བ་ཁོ་ན་ལ་ནི་བདེ་བར་བསམས། བདག་གིས་མི་གཙང་བ་ཁོ་ན་ལ་ནི་གཙང་
བར་བསམས། བདག་གིས་བདག་མེད་པ་ཁོ་ན་ལ་ནི་བདག་ཏུ་བསམས་ཏེ། དེ་ལྟར་ན་བདག་ནི་སྔོན་མི་རྟག་པ་ལ་རྟག་པར་འདུ་ཤེས་པ་དང་། སྡུག་བསྔལ་བ་ལ་བདེ་བར་འདུ་ཤེས་པ་དང་། མི་གཙང་བ་ལ་གཙང་བར་འདུ་

66-1-253b

ཤེས་པ་དང་། བདག་མེད་པ་ལ་བདག་ཏུ་འདུ་ཤེས་པར་གྱུར་ཏོ་སྙམ་དུ་སེམས་སོ། །དགེ་སློང་དག་འདི་ལྟ་སྟེ། དཔེར་ན་སྒྱུ་མ་མཁན་ནམ་སྒྱུ་མ་མཁན་གྱི་སློབ་མ་མཁས་པ་ཞིག་ལམ་པོ་ཆེའི་བཞི་མདོར་འདུག་སྟེ། 
སྒྱུ་མ་རྣམ་པ་བཞི་པོ་འདི་ལྟ་སྟེ། གླང་པོ་ཆེའི་ཚོགས་དང་། རྟའི་ཚོགས་དང་། ཤིང་རྟའི་ཚོགས་དང་། དཔུང་བུ་ཆུང་གི་ཚོགས་དག་བྱས་ཏེ། རྣམ་པར་བསྟན་པར་གྱུར་ན། དེ་ལ་སེམས་ཅན་བྱིས་པའི་རང་བཞིན་ཅན་
དང་། རྨོངས་པའི་རང་བཞིན་ཅན་དང་། ཤེས་རབ་འཆལ་པའི་རང་བཞིན་ཅན་གང་དག་ཡིན་པ། །དེ་དག་ནི་འདི་སྙམ་དུ་སེམས་ཏེ། གླང་པོ་ཆེའི་ཚོགས་དང་། རྟའི་ཚོགས་དང་། ཤིང་རྟའི་ཚོགས་དང་། 
དཔུང་བུ་ཆུང་གི་ཚོགས་གང་སྣང་བ་འདི་ནི་བདེན་པ་དང་གནས་པའི་སྒོ་ནས་ཡོད་དོ་སྙམ་དུ་སེམས་སོ། །སེམས་ཅན་བྱིས་པའི་རང་བཞིན་ཅན་མ་ཡིན་པ་དང་། རྨོངས་པའི་རང་བཞིན་ཅན་མ་ཡིན་པ་དང་། ཤེས་རབ་
དང་ལྡན་པའི་རང་བཞིན་ཅན་གང་དག་ཡིན་པ་དེ་དག་ནི་འདི་སྙམ་དུ་སེམས་ཏེ། གླང་པོ་ཆེའི་ཚོགས་དང་། རྟའི་ཚོགས་དང་། ཤིང་རྟའི་ཚོགས་དང་། དཔུང་བུ་ཆུང་གི་ཚོགས་དག་སྣང་བ་འདི་ནི་བདེན་པ་དང་གནས་པའི་སྒོ་
ནས་ཡོད་པ་མ་ཡིན་ཏེ། སྒྱུ་མར་བྱས་པ་འདི་འབའ་ཤིག་ཡོད་དོ། །མིག་སླུ་བའི་བྱེད་པ་འདི་འབའ་ཤིག་ཡོད་དོ་སྙམ་དུ་སེམས་སོ། །དགེ་སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་ཡང་བདག་
གི་མིག་གིས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་གཟུགས་གང་དག་ཡིན་པ་འདི་དག་ལ་རྟག་པ་ཉིད་དམ། བརྟན་པ་ཉིད་དམ། ཐེར་ཟུག་ཉིད་དམ། དེ་བཞིན་ཉིད་དམ། མ་ནོར་བ་
དེ་བཞིན་ཉིད་དམ། གཞན་མ་ཡིན་པ་དེ་བཞིན་ཉིད་དམ། ཡང་དག་པ་ཉིད་དམ། བདེན་པ་ཉིད་དམ། དེ་ཁོ་ན་ཉིད་དམ། ཇི་ལྟ་བ་བཞིན་ཉིད་དམ། མ་ནོར་བ་ཉིད་དམ། ཕྱིན་ཅི་མ་ལོག་པ་ཉིད་མེད་དེ། གསོག་ཀྱང་དེ་ཉིད་ཡིན། 

66-1-254a

གསོབ་ཀྱང་དེ་ཉིད་ཡིན། སྙིང་པོ་མེད་པ་ཡང་དེ་ཉིད་ཡིན། བརྫུན་པ་ཡང་དེ་ཉིད་ཡིན། སླུ་བའི་ཆོས་ཀྱང་དེ་ཉིད་ཡིན། བདུད་ཀྱང་དེ་ཉིད། བདུད་ཀྱི་ཡོ་བྱད་ཀྱང་དེ་ཉིད་ཡིན། རོ་ཡང་དེ་ཉིད་ཡིན། རོའི་གཟུགས་
ཀྱང་དེ་ཉིད་ཡིན་པས་དེ་ལ་ནི་མངོན་པར་དགའ་བར་བྱ་བ་འམ། མངོན་པར་བརྗོད་པར་བྱ་བ་འམ། ལྷག་པར་ཆགས་པར་བྱ་བ་འམ། ལྷག་པར་ཆགས་ཤིང་གནས་པར་བྱ་བར་མི་རིགས་ཀྱི། བཅོམ་ལྡན་འདས་ཀྱིས་
གསུངས་པ་འཕགས་པ་འཇིག་རྟེན་ལས་འདས་པ་ནི་བདེན་ནོ་ཞེས་དེ་ལྟར་སོ་སོར་རྟོག་པར་བྱེད་དོ། །དེས་དེ་ལྟར་ཤེས་ནས་མིག་གིས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་
གཟུགས་ནད་དུ་ཡང་དག་པར་རྗེས་སུ་མཐོང་ཞིང་། འབྲས་དང་། ཟུག་རྔུ་དང་། སྡིག་པ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡང་དག་པར་རྗེས་སུ་མཐོང་ངོ་། །དེས་མིག་གིས་རྣམ་
པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་གཟུགས་རྣམས་ནད་དུ་ཡང་དག་པར་རྗེས་སུ་མཐོང་ཞིང་། འབྲས་དང་། ཟུག་རྔུ་དང་། སྡིག་པ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། 
བདག་མེད་པར་ཡང་དག་པར་རྗེས་སུ་མཐོང་བ་ན་དེ་མིག་གིས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་གཟུགས་དག་ལ་ལོག་པར་མོས་པ་འམ། འདུ་ཤེས་ཕྱིན་ཅི་ལོག་གམ། སེམས་
ཕྱིན་ཅི་ལོག་གམ། ལྟ་བ་ཕྱིན་ཅི་ལོག་ཏུ་གྱུར་པ་འདི་ལྟ་སྟེ། བརྣབ་སེམས་ཀྱི་ཚོགས་ཀྱི་མདུད་པ་དང་། གནོད་སེམས་ཀྱི་ཚོགས་ཀྱི་མདུད་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ཚོགས་ཀྱི་མདུད་པ་དང་
འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པ་གང་དག་ཡིན་པ་དེ་དག་སྤོང་བར་བྱེད་དོ། །དེ་དག་སྤངས་པའི་ཕྱིར་བདུད་ལྡོངས་པ་དང་། ཡི་ཆད་པ་དང་། ཕྱོགས་མེད་པར་བྱས་ཏེ་གནས་ཤིང་བདུད་

66-1-254b

སྡིག་ཅན་གྱིས་མི་མཐོང་བར་སོང་ནས་བདུད་དང་བདུད་ཀྱི་འཁོར་བཅོམ་ཞིང་གཡུལ་ཆེན་པོའི་གཡུལ་སྤྲད་དེ། གཡུལ་ལས་རྣམ་པར་རྒྱལ་བ་དང་། གཡུལ་ངོ་དེ་ཉིད་མངོན་པར་བྱས་ཤིང་གནས་ཏེ། དེ་ལྟར་ན་འདི་ལ་འཕགས་
པ་ཉན་ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་པ་ནི་ཤེས་རབ་ཀྱིས་འཚོ་བ་རྣམས་ཀྱི་ནང་ན་བླ་ན་མེད་པས་འཚོ་བ་ཡིན་ནོ། །དགེ་སློང་དག་ཡང་ཇི་ལྟར་ན་འཕགས་པ་ཉན་ཐོས་ལྷག་པའི་
ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་པ། ཤེས་རབ་ཀྱིས་འཚོ་བ་རྣམས་ཀྱི་ནང་ན་བླ་ན་མེད་པས་འཚོ་བ་ཡིན་ཞེ་ན། དགེ་སློང་དག་འདི་ལ་འཕགས་པ་ཉན་ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་
ཞུགས་པ་ལ་གནས་པ་ནི། བདག་སྔོན་རྣ་བས་རྣམ་པར་ཤེས་པར་བྱ་བའི་སྒྲ་ཡིད་བདེ་བའི་གནས་ལྟ་བུ་དག་ལ་ནི་རྗེས་སུ་ཆགས་ཤིང་གནས་པར་འགྱུར་ལ། རྣ་བས་རྣམ་པར་ཤེས་པར་བྱ་བའི་སྒྲ་ཡིད་མི་བདེ་བའི་གནས་
ལྟ་བུ་དག་ལ་ནི་ཁོང་ཁྲོ་བ་དང་ལྡན་ཞིང་གནས་པར་གྱུར། རྣ་བས་རྣམ་པར་ཤེས་པར་བྱ་བའི་སྒྲ་བཏང་སྙོམས་ཀྱི་གནས་ལྟ་བུ་དག་ལ་ནི་སོ་སོར་བརྟགས་པ་མ་ཡིན། སོ་སོར་བརྟགས་པ་མ་ཡིན་པའི་བཏང་སྙོམས་སུ་གནས་
པར་གྱུར་ཏེ། དེ་ལྟར་བདག་ཡུན་རིང་པོ་ནས་འདི་ལ་རྗེས་སུ་སློབ་ཅིང་རྗེས་སུ་བྱེད་པ་ན་རྒ་བ་དང་། འཆི་བ་ཉམས་སུ་མྱོང་ཞིང་། སྔོན་གྱི་མཐའ་མི་མངོན་པར་གྱུར་པས། བདག་གིས་ད་ནི་རྣ་བས་རྣམ་པར་ཤེས་པར་
བྱ་བའི་སྒྲ་དག་ལ་སྔོན་ཇི་ལྟ་བ་དེ་ལྟར་བསླབ་པར་མི་བྱ་ཞིང་བདག་གིས་རྣ་བས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་སྒྲ་དག་ལ་ལོག་པར་མོས་པ་འམ། འདུ་ཤེས་ཕྱིན་ཅི་ལོག་གམ་
སེམས་ཕྱིན་ཅི་ལོག་གམ། ལྟ་བ་ཕྱིན་ཅི་ལོག་ཏུ་གྱུར་པ་འདི་ལྟ་སྟེ། བརྣབ་སེམས་ཀྱི་ཚོགས་ཀྱི་མདུད་པ་དང་། གནོད་སེམས་ཀྱི་ཚོགས་ཀྱི་མདུད་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་

66-1-255a

ཚོགས་ཀྱི་མདུད་པ་དང་། འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པ་གང་དག་ཡིན་པ་དེ་དག་སྤང་བའི་ཕྱིར་བསླབ་པར་བྱ་ཞིང་། དེ་དག་སྤངས་པར་གྱུར་ཅིག་ཅེས་དེ་ལྟར་
སོ་སོར་རྟོག་པར་བྱེད་པའི་ཕྱིར་རོ། །དགེ་སློང་དག་འོན་ཀྱང་འདི་ན་ཁ་ཅིག་ལ་ནི་རྣ་བས་རྣམ་པར་ཤེས་པར་བྱ་བའི་སྒྲ་དེ་དག་ཉིད་ཡིད་དུ་འོང་བར་འགྱུར་ལ། གཞན་དག་ལ་ནི་དེ་དག་ཉིད་ཡིད་དུ་མི་འོང་བར་འགྱུར་བ་
ཡང་ཡོད་ལ། དེ་དག་ལ་ཡང་དུས་ལ་ལར་ནི་ཡིད་བདེ་བའི་གནས་ལྟ་བུ་དག་ཏུ་འགྱུར་ཞིང་། དུས་ལ་ལར་ནི་ཡིད་མི་བདེ་བའི་གནས་ལྟ་བུ་དག་ཏུ་འགྱུར། དུས་ལ་ལར་ནི་བཏང་སྙོམས་ཀྱི་གནས་ལྟ་བུ་དག་ཏུ་འགྱུར་ཏེ། 
དགེ་སློང་དག་དེ་ལྟར་ན་འདི་ལ་སེམས་ཅན་རྣམས་ཡུན་རིང་པོ་ནས་སེམས་ཀྱིས་བསྒྲིབས་ཤིང་། སེམས་ཀྱིས་བྲིད། སེམས་ཀྱིས་བསླུས་ནས་ཉེས་དམིགས་སུ་མི་མཐོང་ཞིང་ངེས་པར་འབྱུང་བ་རབ་ཏུ་མི་ཤེས་ཏེ། 
བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་གོ། །དགེ་སློང་དག་དགེ་སྦྱོང་ངམ། བྲམ་ཟེ་གང་དག་ཁ་ཅིག་རྣ་བས་རྣམ་པར་ཤེས་པར་བྱ་བའི་སྒྲ་འདི་དག་ཉིད་བདེན་པ་དང་གནས་པའི་སྒོ་ནས་མ་མཐོང་ཞིང་། 
ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཞེན་པར་བྱས་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་རྣ་བས་རྣམ་པར་ཤེས་པར་
བྱ་བའི་སྒྲ་ཡིད་བདེ་བའི་གནས་ལྟ་བུ་དག་ལ་རྗེས་སུ་ཆགས་ཤིང་གནས་ཏེ། དགེ་སྦྱོང་དང་བྲམ་ཟེ་བརྣབ་སེམས་ཀྱི་ཚོགས་ཀྱི་མདུད་པས་ཀུན་ནས་སུན་ཕྱུང་བ། རྗེས་སུ་ཆགས་པའི་ཀུན་ཏུ་སྦྱོར་བ་དང་ལྡན་པ་དེ་
དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་པ་ཡིན་ནོ། །དགེ་སློང་དག་དགེ་སྦྱོང་ངམ་བྲམ་ཟེ་གང་དག་ཁ་ཅིག་རྣ་བས་རྣམ་པར་ཤེས་པར་བྱ་བའི་སྒྲ་འདི་དག་ཉིད་བདེན་པ་དང་། གནས་པའི་སྒོ་ནས་མ་

66-1-255b

མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཞེན་པར་བྱས་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་རྣ་བས་རྣམ་
པར་ཤེས་པར་བྱ་བའི་སྒྲ་ཡིད་མི་བདེ་བའི་གནས་ལྟ་བུ་དག་ལ་ཁོང་ཁྲོ་བ་དང་ལྡན་པར་གནས་ཏེ། དགེ་སྦྱོང་དང་བྲམ་ཟེ་གནོད་སེམས་ཀྱི་མདུད་པས་ཀུན་ནས་སུན་ཕྱུང་བ་ཁོང་ཁྲོ་བའི་ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་
ཅན་ཇི་ལྟར་འདོད་པ་བཞིན་བྱེད་དུ་འཇུག་པ་ཡིན་ནོ། །དགེ་སློང་དག་དགེ་སྦྱོང་ངམ་བྲམ་ཟེ་གང་དག་ཁ་ཅིག་རྣ་བས་རྣམ་པར་ཤེས་པར་བྱ་བའི་སྒྲ་འདི་དག་ཉིད་བདེན་པ་དང་། གནས་པའི་སྒོ་ནས་མ་མཐོང་ཞིང་། ཇི་ལྟར་རང་རང་
ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཞེན་པར་བྱས་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་རྣ་བས་རྣམ་པར་ཤེས་པར་བྱ་བའི་སྒྲ་བཏང་སྙོམས་ཀྱི་
གནས་ལྟ་བུ་དག་ལས་སོ་སོར་བརྟགས་པ་མ་ཡིན། སོ་སོར་བརྟགས་པ་མ་ཡིན་པའི་བཏང་སྙོམས་སུ་གནས་ཏེ། དགེ་སྦྱོང་དང་། བྲམ་ཟེ་འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པས་
ཀུན་ནས་སུན་ཕྱུང་བ། ང་རྒྱལ་གྱི་ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་པ་ཡིན་ནོ། །དགེ་སློང་དག་འདི་ལྟ་སྟེ། དཔེར་ན་མི་སྨྱོན་པ་འམ། ཆང་གིས་ར་རོ་བར་གྱུར་པ་ནི་མ་དང་
ལྷན་ཅིག་ཉལ་པོ་བྱེད་ཅིང་། དེ་དེས་མངོན་པར་དགའ་བར་བྱེད་ལ། དེ་ལ་ཉེས་དམིགས་སུ་མ་མཐོང་བ་ལས་གང་གི་ཚེ་དེ་སྨྱོས་པ་འམ། ར་རོ་བ་སངས་པར་གྱུར་པ་དེའི་ཚེ་མ་དང་ལྷན་ཅིག་ཉལ་པོ་བྱས་པ་དེས་གདུང་བར་བྱེད། ངོ་
ཚ་བར་བྱེད། གནོང་བར་བྱེད་ཅིང་། རྣམ་པར་སྨོད་པར་བྱེད་དོ། །དགེ་སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་ཡང་འཕགས་པ་འཇིག་རྟེན་ལས་འདས་པའི་ཤེས་རབ་འདི་ཉིད་ཐོབ་ནས་སྔོན་གྱི་བྱིས་པའི་སྤྱོད་

66-1-256a

པ་དང་། རྨོངས་པའི་སྤྱོད་པ་དང་། ཤེས་རབ་འཆལ་པའི་སྤྱོད་པ་དེས་གདུང་བར་བྱེད། ངོ་ཚ་བར་བྱེད། གནོང་བར་བྱེད་ཅིང་། རྣམ་པར་སྨོད་པར་བྱེད་ལ། དེ་འདི་སྙམ་དུ་སེམས་ཏེ། བདག་གིས་ནི་སྔོན་མི་རྟག་པ་ཁོ་ན་ལ་
རྟག་པར་བསམས་ཤིང་། བདག་གིས་སྡུག་བསྔལ་བ་ཁོ་ན་ལ་ནི་བདེ་བར་བསམས། བདག་གིས་མི་གཙང་བ་ཁོ་ལ་ནི་གཙང་བར་བསམས། བདག་གིས་བདག་མེད་པ་ཁོ་ན་ལ་ནི་བདག་ཏུ་བསམས་ཏེ། དེ་ལྟར་ན་བདག་ནི་སྔོན་
མི་རྟག་པ་ལ་རྟག་པར་འདུ་ཤེས་པ་དང་། སྡུག་བསྔལ་བ་ལ་བདེ་བར་འདུ་ཤེས་པ་དང་། མི་གཙང་བ་ལ་གཙང་བར་འདུ་ཤེས་པ་དང་། བདག་མེད་པ་ལ་བདག་ཏུ་འདུ་ཤེས་པར་གྱུར་ཏོ་སྙམ་དུ་སེམས་སོ། །དགེ་སློང་དག་འདི་ལྟ་སྟེ། དཔེར་ན་ཆུ་
ཀླུང་གི་འགྲམ་འམ་ཡུར་པོ་ཆེའི་འགྲམ་ན་སྒྲ་བརྙན་གྱི་སྒྲ་གྲག་པར་གྱུར་ན། དེ་ལ་སེམས་ཅན་བྱིས་པའི་རང་བཞིན་ཅན་དང་། རྨོངས་པའི་རང་བཞིན་ཅན་དང་། ཤེས་རབ་འཆལ་པའི་རང་བཞིན་ཅན་གང་དག་ཡིན་པ་དེ་དག་ནི་འདི་སྙམ་དུ་སེམས་
ཏེ། གང་ལས་སྒྲ་འདི་གྲག་པའི་སེམས་ཅན་དེ་ནི་བདེན་པ་དང་། གནས་པའི་སྒོ་ནས་ཡོད་དོ་སྙམ་དུ་སེམས་སོ། །སེམས་ཅན་བྱིས་པའི་རང་བཞིན་མ་ཡིན་པ་དང་། རྨོངས་པའི་རང་བཞིན་ཅན་མ་ཡིན་པ་དང་། ཤེས་རབ་དང་ལྡན་པའི་རང་བཞིན་
ཅན་གང་དག་ཡིན་པ་དེ་དག་ནི་འདི་སྙམ་དུ་སེམས་ཏེ། གང་ལས་སྒྲ་འདི་གྲག་པའི་སེམས་ཅན་དེ་ནི་བདེན་པ་དང་། གནས་པའི་སྒོ་ནས་ཡོད་པ་མ་ཡིན་ཏེ། སྒྲ་བརྙན་འདི་འབའ་ཤིག་ཡོད་དེ། རྣ་བ་སླུ་བར་བྱེད་པ་འདི་འབའ་ཤིག་ཡོད་དོ་སྙམ་དུ་
སེམས་སོ། །དགེ་སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་ཡང་བདག་གིས་རྣ་བས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་སྒྲ་གང་དག་ཡིན་པ་འདི་དག་ལ་རྟག་པ་ཉིད་དམ། 
བརྟན་པ་ཉིད་དམ། ཐེར་ཟུག་ཉིད་དམ། དེ་བཞིན་ཉིད་དམ། མ་ནོར་བ་དེ་བཞིན་ཉིད་དམ། གཞན་མ་ཡིན་པ་དེ་བཞིན་ཉིད་དམ། ཡང་དག་པ་ཉིད་དམ། བདེན་པ་ཉིད་དམ། དེ་ཁོ་ན་ཉིད་དམ། ཇི་ལྟ་བ་དེ་བཞིན་ཉིད་དམ། མ་ནོར་བ་ཉིད་དམ། 

66-1-256b

ཕྱིན་ཅི་མ་ལོག་པ་ཉིད་མེད་དེ། གསོག་ཀྱང་དེ་ཉིད་ཡིན། གསོབ་ཀྱང་དེ་ཉིད་ཡིན། སྙིང་པོ་མེད་པ་ཡང་དེ་ཉིད་ཡིན། བརྫུན་པ་ཡང་དེ་ཉིད་ཡིན། སླུ་བའི་ཆོས་ཀྱང་དེ་ཉིད་ཡིན། བདུད་ཀྱང་དེ་ཉིད་ཡིན། བདུད་ཀྱི་ཡོ་བྱད་ཀྱང་དེ་ཉིད་ཡིན། རོ་ཡང་
དེ་ཉིད་ཡིན། རོའི་གཟུགས་ཀྱང་དེ་ཉིད་ཡིན་པས་དེ་ལ་ནི་མངོན་པར་དགའ་བར་བྱ་བ་འམ། མངོན་པར་བརྗོད་པར་བྱ་བ་འམ། ལྷག་པར་ཆགས་པར་བྱ་བ་འམ། ལྷག་པར་ཆགས་ཤིང་གནས་པར་བྱ་བར་མི་རིགས་ཀྱི། བཅོམ་ལྡན་འདས་
ཀྱིས་གསུངས་པ་འཕགས་པ་འཇིག་རྟེན་ལས་འདས་པ་ནི་བདེན་ནོ་ཞེས་དེ་ལྟར་སོ་སོར་རྟོག་པར་བྱེད་དོ། །དེས་དེ་ལྟར་ཤེས་ནས་རྣ་བས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་སྒྲ་རྣམས་ནད་དུ་ཡང་
དག་པར་རྗེས་སུ་མཐོང་ཞིང་། འབྲས་དང་། ཟུག་རྔུ་དང་། སྡིག་པ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡང་དག་པར་རྗེས་སུ་མཐོང་ངོ་། །དེས་རྣ་བས་རྣམ་པར་ཤེས་པར་བྱ་བ་འདས་པ་དང་། མ་འོངས་
པ་དང་། ད་ལྟར་བྱུང་བའི་སྒྲ་རྣམས་ནད་ཏུ་ཡང་དག་པར་རྗེས་སུ་མཐོང་ཞིང་འབྲས་དང་། ཟུག་རྔུ་དང་། སྡིག་པ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡང་དག་པར་རྗེས་སུ་མཐོང་བ་ན། དེའི་རྣ་བས་རྣམ་པར་
ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་སྒྲ་དག་ལ་ལོག་པར་མོས་པའམ། འདུ་ཤེས་ཕྱིན་ཅི་ལོག་གམ། སེམས་ཕྱིན་ཅི་ལོག་གམ། ལྟ་བ་ཕྱིན་ཅི་ལོག་ཏུ་གྱུར་པ་འདི་ལྟ་སྟེ། བརྣབ་སེམས་ཀྱི་ཚོགས་ཀྱི་མདུད་
པ་དང་། གནོད་སེམས་ཀྱི་ཚོགས་ཀྱི་མདུད་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ཚོགས་ཀྱི་མདུད་པ་དང་། འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པ་གང་ཡིན་པ་དེ་དག་སྤོང་བར་
བྱེད་དོ། །དེ་དག་སྤངས་པའི་ཕྱིར་བདུད་ལྡོངས་པ་དང་། ཡི་ཆད་པ་དང་། ཕྱོགས་མེད་པར་བྱས་ཏེ། གནས་ཤིང་བདུད་སྡིག་ཅན་གྱིས་མི་མཐོང་བར་སོང་ནས་བདུད་དང་བདུད་ཀྱི་འཁོར་བཅོམ་ཞིང་གཡུལ་ཆེན་པོའི་གཡུལ་སྤྲད་དེ། གཡུལ་

66-1-257a

ལས་རྣམ་པར་རྒྱལ་བ་དང་། གཡུལ་ངོ་དེ་ཉིད་ཕམ་པར་བྱས་ཤིང་གནས་ཏེ། དེ་ལྟར་ན་འདི་ལ་འཕགས་པ་ཉན་ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་པ་ནི་ཤེས་རབ་ཀྱིས་འཚོ་བ་རྣམས་ཀྱི་
ནང་ན་བླ་ན་མེད་པས་འཚོ་བ་ཡིན་ནོ། །དགེ་སློང་དག་ཡང་ཇི་ལྟར་ན་འཕགས་པ་ཉན་ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་པ། ཤེས་རབ་ཀྱིས་འཚོ་བ་རྣམས་ཀྱི་ནང་ན་བླ་ན་མེད་པས་འཚོ་བ་ཡིན་ཞེ་ན། 
དགེ་སློང་དག་འདི་ལ་འཕགས་པ་ཉན་ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་པ་ནི་བདག་སྔོན་སྣས་རྣམ་པར་ཤེས་པར་བྱ་བའི་དྲི་ཡིད་བདེ་བའི་གནས་ལྟ་བུ་དག་ལ་ནི་རྗེས་སུ་ཆགས་ཤིང་གནས་པར་གྱུར་ལ། 
སྣས་རྣམ་པར་ཤེས་པར་བྱ་བའི་དྲི་ཡིད་མི་བདེ་བའི་གནས་ལྟ་བུ་དག་ལ་ནི་ཁོང་ཁྲོ་བ་དང་ལྡན་ཞིང་གནས་པར་གྱུར། སྣས་རྣམ་པར་ཤེས་པར་བྱ་བའི་དྲི་བཏང་སྙོམས་ཀྱི་གནས་ལྟ་བུ་དག་ལ་ནི་སོ་སོར་བརྟགས་པ་མ་ཡིན་སོ་སོར་
བརྟགས་པ་མ་ཡིན་པའི་བཏང་སྙོམས་སུ་གནས་པར་གྱུར་ཏེ། དེ་ལྟར་བདག་ཡུན་རིང་པོ་ནས་འདི་ལ་རྗེས་སུ་སློབ་ཅིང་། རྗེས་སུ་བྱེད་པ་ན། རྒ་བ་དང་། འཆི་བ་ཉམས་སུ་མྱོང་ཞིང་། སྔོན་གྱི་མཐའ་མི་མངོན་པར་གྱུར་པས་བདག་
གིས་ད་ནི་སྣས་རྣམ་པར་ཤེས་པར་བྱ་བའི་དྲི་དག་ལ་སྔོན་ཇི་ལྟ་བ་དེ་ལྟར་བསླབ་པར་མི་བྱ་ཞིང་། བདག་གི་སྣས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་དྲི་དག་ལ་ལོག་པར་མོས་པ་འམ། 
འདུ་ཤེས་ཕྱིན་ཅི་ལོག་གམ། སེམས་ཕྱིན་ཅི་ལོག་གམ། ལྟ་བ་ཕྱིན་ཅི་ལོག་ཏུ་གྱུར་པ་འདི་ལྟ་སྟེ། བརྣབ་སེམས་ཀྱི་ཚོགས་ཀྱི་མདུད་པ་དང་། གནོད་སེམས་ཀྱི་ཚོགས་ཀྱི་མདུད་པ་དང་། ཚུལ་ཁྲིམས་དང་བརྟུལ་ཞུགས་
མཆོག་ཏུ་འཛིན་པའི་ཚོགས་ཀྱི་མདུད་པ་དང་། འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པ་གང་དག་ཡིན་པ་དེ་དག་སྤང་བའི་ཕྱིར་བསླབ་པར་བྱ་ཞིང་། དེ་དག་སྤངས་པར་གྱུར་ཅིག་ཅེས་དེ་

66-1-257b

ལྟར་སོ་སོར་རྟོག་པར་བྱེད་པའི་ཕྱིར་རོ། །དགེ་སློང་དག་འོན་ཀྱང་འདི་ན་ཁ་ཅིག་ལ་ནི་སྣས་རྣམ་པར་ཤེས་པར་བྱ་བའི་དྲི་དེ་དག་ཉིད་ཡིད་དུ་འོང་བར་འགྱུར་ལ། གཞན་དག་ལ་ནི་དེ་དག་ཉིད་ཡིད་དུ་མི་འོང་བར་འགྱུར་བ་ཡང་ཡོད་
ལ་དེ་དག་ལ་ཡང་དུས་ལ་ལར་ནི་ཡིད་བདེ་བའི་གནས་ལྟ་བུ་དག་ཏུ་འགྱུར་ཞིང་། དུས་ལ་ལར་ནི་ཡིད་མི་བདེ་བའི་གནས་ལྟ་བུ་དག་ཏུ་འགྱུར། དུས་ལ་ལར་ནི་བཏང་སྙོམས་ཀྱི་གནས་ལྟ་བུ་དག་ཏུ་འགྱུར་ཏེ། དགེ་སློང་དག་དེ་
ལྟར་ན་འདི་ལ་སེམས་ཅན་རྣམས་ཡུན་རིང་པོ་ནས་སེམས་ཀྱིས་བསྒྲིབས་ཤིང་། སེམས་ཀྱིས་བསླུས་ནས་ཉེས་དམིགས་སུ་མི་མཐོང་ཞིང་། ངེས་པར་འབྱུང་བར་རབ་ཏུ་མི་ཤེས་ཏེ། བདུད་སྡིག་ཅན་ཇི་ལྟར་འདོད་པ་
བཞིན་བྱེད་དུ་འཇུག་གོ། །དགེ་སློང་དག་དགེ་སྦྱོང་ངམ་བྲམ་ཟེ་གང་དག་ཁ་ཅིག་སྣས་རྣམ་པར་ཤེས་པར་བྱ་བའི་དྲི་འདི་དག་ཉིད་བདེན་པ་དང་། གནས་པའི་སྒོ་ནས་མ་མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་
ནན་གྱིས་བཟུང་སྟེ། མངོན་པར་ཞེན་པར་བྱས་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་སྣས་རྣམ་པར་ཤེས་པར་བྱ་བའི་དྲི་ཡིད་བདེ་བའི་གནས་ལྟ་བུ་དག་ལ་རྗེས་སུ་
ཆགས་ཤིང་གནས་ཏེ། དགེ་སྦྱོང་དང་། བྲམ་ཟེ་བརྣབ་སེམས་ཀྱི་ཚོགས་ཀྱི་མདུད་པས་ཀུན་ནས་སུན་ཕྱུང་བ། རྗེས་སུ་ཆགས་པའི་ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་ཏུ་འཇུག་པ་ཡིན་ནོ། །
དགེ་སློང་དག་དགེ་སྦྱོང་ངམ། བྲམ་ཟེ་གང་དག་ཁ་ཅིག་སྣས་རྣམ་པར་ཤེས་པར་བྱ་བའི་དྲི་འདི་དག་ཉིད་བདེན་པ་དང་། གནས་པའི་སྒོ་ནས་མ་མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་
ཞེན་པར་བྱས་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་སྣས་རྣམ་པར་ཤེས་པར་བྱ་བའི་དྲི་ཡིད་མི་བདེ་བའི་གནས་ལྟ་བུ་དག་ལ་ཁོང་ཁྲོ་བ་དང་ལྡན་པར་གནས་སྟེ། དགེ་

66-1-258a

སྦྱོང་དང་། བྲམ་ཟེ་གནོད་སེམས་ཀྱི་ཚོགས་ཀྱི་མདུད་པས་ཀུན་ནས་སུན་ཕྱུང་བ། ཁོང་ཁྲོ་བའི་ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་ཏུ་འཇུག་པ་ཡིན་ནོ། །དགེ་སློང་དག་
དགེ་སྦྱོང་ངམ། བྲམ་ཟེ་གང་དག་ཁ་ཅིག་སྣས་རྣམ་པར་ཤེས་པར་བྱ་བའི་དྲི་འདི་དག་ཉིད་བདེན་པ་དང་། གནས་པའི་སྒོ་ནས་མ་མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་
ཞེན་པར་བྱས་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་སྣས་རྣམ་པར་ཤེས་པར་བྱ་བའི་དྲིའི་བཏང་སྙོམས་ཀྱི་གནས་ལྟ་བུ་དག་ལ་སོ་སོར་བརྟགས་པ་མ་ཡིན་པའི་
བཏང་སྙོམས་སུ་གནས་ཏེ། དགེ་སྦྱོང་དང་། བྲམ་ཟེ་འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པས་ཀུན་ནས་སུན་ཕྱུང་བ། ང་རྒྱལ་གྱི་ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་
ལྟར་འདོད་པ་བཞིན་བྱེད་ཏུ་འཇུག་པ་ཡིན་ནོ། །དགེ་སློང་དག་འདི་ལྟ་སྟེ། དཔེར་ན་མི་ཞིག་གི་ཕྱི་ཐོག་ཐག་ཏུ་གཤེད་མ་ཕྱིར་རྒོལ་བ་དགྲ་བོ་ཞིག་རྗེས་སུ་འབྲང་བར་གྱུར་ཅིང་། དེ་དེ་ལ་མངོན་པར་དགའ་བར་བྱེད་ལ། དེ་ལ་ཉེས་དམིགས་
སུ་མ་མཐོང་བ་ལས་གང་གི་ཚེ་དེ་སོ་སོར་རྟོག་པར་བྱེད་པ་ན། འདི་ནི་བདག་གི་གཤེད་མ་ཕྱིར་རྒོལ་བ་དགྲ་བོ་ཡིན་ནོ་ཞེས་ཤེས་པར་གྱུར་པ་དེའི་ཚེ། དེས་དེ་གདུང་བར་བྱེད། ངོ་ཚ་བར་བྱེད། གནོང་བར་བྱེད་ཅིང་། རྣམ་པར་སྨོད་པར་
བྱེད་དོ། །དགེ་སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་ཡང་འཕགས་པ་འཇིག་རྟེན་ལས་འདས་པའི་ཤེས་རབ་འདི་ཉིད་ཐོབ་ནས་སྔོན་བྱིས་པའི་སྤྱོད་པ་དང་། རྨོངས་པའི་སྤྱོད་པ་དང་། ཤེས་རབ་
འཆལ་པའི་སྤྱོད་པ་དེས་གདུང་བར་བྱེད། ངོ་ཚ་བར་བྱེད། གནོང་བར་བྱེད་ཅིང་། རྣམ་པར་སྨོད་པར་བྱེད་ལ། དེ་འདི་སྙམ་དུ་སེམས་ཏེ། བདག་གིས་ནི་སྔོན་མི་རྟག་པ་ཁོ་ན་ལ་རྟག་པར་བསམས་ཤིང་། བདག་གིས་སྡུག་

66-1-258b

བསྔལ་བ་ཁོ་ན་ལ་ནི་བདེ་བར་བསམས། བདག་གིས་མི་གཙང་བ་ཁོ་ན་ལ་ནི་གཙང་བར་བསམས། བདག་གིས་བདག་མེད་པ་ཁོ་ན་ལ་ནི་བདག་ཏུ་བསམས་ཏེ། དེ་ལྟར་བདག་ནི་སྔོན་མི་རྟག་པ་ལ་རྟག་པར་འདུ་
ཤེས་པ་དང་། སྡུག་བསྔལ་བ་ལ་བདེ་བར་འདུ་ཤེས་པ་དང་། མི་གཙང་བ་ལ་གཙང་བར་འདུ་ཤེས་པ་དང་། བདག་མེད་པ་ལ་བདག་ཏུ་འདུ་ཤེས་པར་གྱུར་ཏོ་སྙམ་དུ་སེམས་སོ། །དགེ་སློང་དག་འདི་ལྟ་སྟེ། དཔེར་ན་
སྐྱེས་བུ་མིག་དང་ལྡན་པ་ཞིག་གིས་མེ་ལོང་གི་དཀྱིལ་འཁོར་ཤིན་དུ་ཡོངས་སུ་དག་པ་བླངས་ཏེ། རང་གི་བཞིན་གྱི་མཚན་མ་སོ་སོར་རྟོག་པར་བྱེད་པ་ན། དེ་ལ་སེམས་ཅན་བྱིས་པའི་རང་བཞིན་ཅན་དང་། རྨོངས་
པའི་རང་བཞིན་ཅན་དང་། ཤེས་རབ་འཆལ་པའི་རང་བཞིན་ཅན་གང་དག་ཡིན་པ་དེ་དག་ནི་འདི་སྙམ་དུ་སེམས་ཏེ། གང་འདི་ལྟར་སྣང་བའི་སེམས་ཅན་འདི་ནི་བདེན་པ་དང་། གནས་པའི་སྒོ་ནས་ཡོད་དོ་སྙམ་དུ་
སེམས་སོ། །སེམས་ཅན་བྱིས་པའི་རང་བཞིན་ཅན་མ་ཡིན་པ་དང་། རྨོངས་པའི་རང་བཞིན་ཅན་མ་ཡིན་པ་དང་། ཤེས་རབ་དང་ལྡན་པའི་རང་བཞིན་ཅན་གང་དག་ཡིན་པ་དེ་དག་ནི་འདི་སྙམ་དུ་སེམས་ཏེ། གང་འདི་
ལྟར་སྣང་བའི་སེམས་ཅན་འདི་ནི་བདེན་པ་དང་གནས་པའི་སྒོ་ནས་ཡོད་པ་མ་ཡིན་ཏེ། གཟུགས་བརྙན་འདི་འབའ་ཤིག་ཡོད་དོ། །མིག་སླུ་བར་བྱེད་པ་ནི་འབའ་ཤིག་ཡོད་དོ་སྙམ་དུ་སེམས་སོ། །དགེ་སློང་དག་
དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་ཡང་བདག་གི་སྣས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་དྲི་གང་དག་ཡིན་པ་འདི་དག་ལ། རྟག་པ་ཉིད་དམ། བརྟན་པ་
ཉིད་དམ། ཐེར་ཟུག་ཉིད་དམ། དེ་བཞིན་ཉིད་དམ། མ་ནོར་བ་དེ་བཞིན་ཉིད་དམ། གཞན་མ་ཡིན་པ་དེ་བཞིན་ཉིད་དམ། ཡང་དག་པ་ཉིད་དམ། བདེན་པ་ཉིད་དམ། དེ་ཁོ་ན་ཉིད་དམ། ཇི་ལྟ་བ་བཞིན་ཉིད་དམ། མ་

66-1-259a

ནོར་བ་ཉིད་དམ། ཕྱིན་ཅི་མ་ལོག་པ་ཉིད་མེད་དེ། གསོག་ཀྱང་དེ་ཉིད་ཡིན། གསོབ་ཀྱང་དེ་ཉིད་ཡིན། སྙིང་པོ་མེད་པ་ཡང་དེ་ཉིད་ཡིན། བརྫུན་པ་ཡང་དེ་ཉིད་ཡིན། སླུ་བའི་ཆོས་ཀྱང་དེ་ཉིད་ཡིན། བདུད་ཀྱང་དེ་
ཉིད་ཡིན། བདུད་ཀྱི་ཡོ་བྱད་ཀྱང་དེ་ཉིད་ཡིན། རོ་ཡང་དེ་ཉིད་ཡིན། རོའི་གཟུགས་ཀྱང་དེ་ཉིད་ཡིན་པས་དེ་ལ་ནི་མངོན་པར་དགའ་བར་བྱ་བ་འམ། མངོན་པར་བརྗོད་པར་བྱ་བ་འམ། ལྷག་པར་ཆགས་པར་བྱ་བ་འམ། ལྷག་པར་
ཆགས་ཤིང་གནས་པར་བྱ་བར་མི་རིགས་ཀྱི། བཅོམ་ལྡན་འདས་ཀྱིས་གསུངས་པ་འཕགས་པ་འཇིག་རྟེན་ལས་འདས་པ་ནི་བདེན་ནོ་ཞེས་དེ་ལྟར་སོ་སོར་རྟོག་པར་བྱེད་དོ། །དེས་དེ་ལྟར་ཤེས་ནས་སྣས་རྣམ་པར་ཤེས་
པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་དྲི་རྣམས་ནད་དུ་ཡང་དག་པར་རྗེས་སུ་མཐོང་ཞིང་། འབྲས་དང་། ཟུག་རྔུ་དང་། སྡིག་པ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་
ཡང་དག་པར་རྗེས་སུ་མཐོང་ངོ་། །དེས་སྣས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་དྲི་རྣམས་ནད་ཏུ་ཡང་དག་པར་རྗེས་སུ་མཐོང་ཞིང་། འབྲས་དང་། ཟུག་རྔུ་དང་། སྡིག་པ་དང་། མི་རྟག་པ་དང་
སྡུག་བསྔལ་བ་དང་། སྟོང་པ་དང་། བདག་མེད་པར་ཡང་དག་པར་རྗེས་སུ་མཐོང་བ་ན། དེའི་སྣས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་དྲི་དག་ལ་ལོག་པར་མོས་པ་འམ། འདུ་ཤེས་ཕྱིན་ཅི་ལོག་
གམ། སེམས་ཕྱིན་ཅི་ལོག་གམ། ལྟ་བ་ཕྱིན་ཅི་ལོག་ཏུ་གྱུར་པ་འདི་ལྟ་སྟེ། བརྣབ་སེམས་ཀྱི་ཚོགས་ཀྱི་མདུད་པ་དང་། གནོད་སེམས་ཀྱི་ཚོགས་ཀྱི་མདུད་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་
པའི་ཚོགས་ཀྱི་མདུད་པ་དང་། འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པ་གང་དག་ཡིན་པ་དེ་དག་སྤོང་བར་བྱེད་དོ། །དེ་དག་སྤངས་པའི་ཕྱིར་བདུད་ལྡོངས་པ་དང་། ཡི་ཆད་པ་དང་། 

66-1-259b

ཕྱོགས་མེད་པར་བྱས་ཏེ་གནས་ཤིང་། བདུད་སྡིག་ཅན་གྱིས་མི་མཐོང་བར་སོང་ནས། བདུད་དང་བདུད་ཀྱི་འཁོར་བཅོམ་ཞིང་གཡུལ་ཆེན་པོའི་གཡུལ་སྤྲད་དེ་གཡུལ་ལས་རྣམ་པར་རྒྱལ་བ་དང་། གཡུལ་ངོ་དེ་ཉིད་མངོན་
པར་ཕམ་པར་བྱས་ཤིང་གནས་ཏེ། དེ་ལྟར་ན་འདི་ལ་འཕགས་པ་ཉན་ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་པ་ནི་ཤེས་རབ་ཀྱིས་འཚོ་བ་རྣམས་ཀྱི་ནང་ན་བླ་ན་མེད་པས་འཚོ་བ་ཡིན་ནོ། །དགེ་
སློང་དག་ཡང་ཇི་ལྟར་ན་འཕགས་པ་ཉན་ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་པ། ཤེས་རབ་ཀྱིས་འཚོ་བ་རྣམས་ཀྱི་ནང་ན་བླ་ན་མེད་པས་འཚོ་བ་ཡིན་ཞེ་ན། དགེ་སློང་དག་འདི་ལ་འཕགས་པ་ཉན་
ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་པ་ནི་བདག་སྔོན་ལྕེས་རྣམ་པར་ཤེས་པར་བྱ་བའི་རོ་ཡིད་བདེ་བའི་གནས་ལྟ་བུ་དག་ལ་ནི་རྗེས་སུ་ཆགས་ཤིང་གནས་པར་གྱུར་ལ། ལྕེས་རྣམ་པར་ཤེས་པར་བྱ་
བའི་རོ་ཡིད་མི་བདེ་བའི་གནས་ལྟ་བུ་དག་ལ་ནི་ཁོང་ཁྲོ་བ་དང་ལྡན་ཞིང་གནས་པར་གྱུར། ལྕེས་རྣམ་པར་ཤེས་པར་བྱ་བའི་རོ་ཡིད་མི་བདེ་བའི་གནས་ལྟ་བུ་དག་ལ་ནི་ཁོང་ཁྲོ་བ་དང་ལྡན་ཞིང་གནས་པར་གྱུར། ལྕེས་རྣམ་པར་ཤེས་
པར་བྱ་བའི་རོ་བཏང་སྙོམས་ཀྱི་གནས་ལྟ་བུ་དག་ལ་ནི་སོ་སོར་བརྟགས་པ་མ་ཡིན་པའི་བཏང་སྙོམས་སུ་གནས་པར་གྱུར་ཏེ། དེ་ལྟར་བདག་ཡུན་རིང་པོ་ནས་འདི་ལ་རྗེས་སུ་སློབ་ཅིང་རྗེས་སུ་བྱེད་པ་ན་རྒ་བ་དང་། 
འཆི་བ་ཉམས་སུ་མྱོང་ཞིང་སྔོན་གྱི་མཐའ་མི་མངོན་པར་གྱུར་པས། བདག་གིས་ད་ནི་ལྕེས་རྣམ་པར་ཤེས་པར་བྱ་བའི་རོ་དག་ལ་སྔོན་ཇི་ལྟ་བ་དེ་ལྟར་བསླབ་པར་མི་བྱ་ཞིང་། བདག་གིས་ལྕེས་རྣམ་པར་ཤེས་པར་བྱ་བ་
འདས་པ་དང་། མ་འོངས་པ་དང་། ད་ལྟར་བྱུང་བའི་རོ་དག་ལ་ལོག་པར་མོས་པ་འམ་འདུ་ཤེས་ཕྱིན་ཅི་ལོག་གམ། སེམས་ཕྱིན་ཅི་ལོག་གམ། ལྟ་བ་ཕྱིན་ཅི་ལོག་ཏུ་གྱུར་པ་འདི་ལྟ་སྟེ། བརྣབ་སེམས་ཀྱི་ཚོགས་ཀྱི་མདུད་

66-1-260a

པ་དང་། གནོད་སེམས་ཀྱི་ཚོགས་ཀྱི་མདུད་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ཚོགས་ཀྱི་མདུད་པ་དང་། འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པ་
གང་དག་ཡིན་པ་དེ་དག་སྤང་བའི་ཕྱིར་བསླབ་པར་བྱ་ཞིང་། དེ་དག་སྤངས་པར་གྱུར་ཅིག་ཅེས་དེ་ལྟར་སོ་སོར་རྟོག་པར་བྱེད་པའི་ཕྱིར་རོ། །དགེ་སློང་དག་འོན་ཀྱང་འདི་ན་ཁ་ཅིག་ལ་ནི་ལྕེས་རྣམ་པར་ཤེས་པར་བྱ་བའི་རོ་དེ་དག་ཉིད་
ཡིད་དུ་འོང་བར་འགྱུར་ལ། གཞན་དག་ལ་ནི་དེ་དག་ཉིད་ཡིད་དུ་མི་འོང་བར་འགྱུར་བ་ཡང་ཡོད་ལ། དེ་དག་ལ་ཡང་དུས་ལ་ལར་ནི་ཡིད་བདེ་བའི་གནས་ལྟ་བུ་དག་ཏུ་འགྱུར་ཞིང་། དུས་ལ་ལར་ནི་ཡིད་མི་བདེ་བའི་གནས་ལྟ་བུ་དག་ཏུ་
འགྱུར། དུས་ལ་ལར་ནི་བཏང་སྙོམས་ཀྱི་གནས་ལྟ་བུ་དག་ཏུ་འགྱུར་ཏེ། དགེ་སློང་དག་དེ་ལྟར་ན་འདི་ལ་སེམས་ཅན་རྣམས་ཡུན་རིང་པོ་ནས་སེམས་ཀྱིས་བསྒྲིབས་ཤིང་། སེམས་ཀྱིས་བྲིད། སེམས་ཀྱིས་བསླུས་ནས་ཉེས་
དམིགས་སུ་མི་མཐོང་ཞིང་། ངེས་པར་འབྱུང་བ་རབ་ཏུ་མི་ཤེས་ཏེ། བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་གོ། །དགེ་སློང་དག་དགེ་སྦྱོང་ངམ། བྲམ་ཟེ་གང་དག་ཁ་ཅིག་ལྕེས་རྣམ་པར་ཤེས་པར་བྱ་བའི་རོ་འདི་དག་
ཉིད་བདེན་པ་དང་གནས་པའི་སྒོ་ནས་མ་མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཞེན་པར་བྱས་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་
བྱེད་པ་དེ་དག་ནི་ལྕེས་རྣམ་པར་ཤེས་པར་བྱ་བའི་རོ་ཡིད་བདེ་བའི་གནས་ལྟ་བུ་དག་ལ་རྗེས་སུ་ཆགས་ཤིང་གནས་ཏེ། དགེ་སྦྱོང་དང་། བྲམ་ཟེ་བརྣབ་སེམས་ཀྱི་ཚོགས་ཀྱི་མདུད་པས་ཀུན་ནས་སུན་ཕྱུང་བ། རྗེས་སུ་ཆགས་པའི་
ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་པ་ཡིན་ནོ། །དགེ་སློང་དག་དགེ་སྦྱོང་ངམ། བྲམ་ཟེ་གང་དག་ཁ་ཅིག་ལྕེས་རྣམ་པར་ཤེས་པར་བྱ་བའི་རོ་འདི་དག་ཉིད་བདེན་པ་དང་གནས་

66-1-260b

པའི་སྒོ་ནས་མ་མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཞེན་པར་བྱས་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་ལྕེས་རྣམ་
པར་ཤེས་པར་བྱ་བའི་རོ་ཡིད་མི་བདེ་བའི་གནས་ལྟ་བུ་དག་ལ་ཁོང་ཁྲོ་བ་དང་ལྡན་པར་གནས་ཏེ། དགེ་སྦྱོང་དང་། བྲམ་ཟེ་གནོད་སེམས་ཀྱི་ཚོགས་ཀྱི་མདུད་པས་ཀུན་ནས་སུན་ཕྱུང་བ། ཁོང་ཁྲོ་བའི་ཀུན་ཏུ་སྦྱོར་བ་དང་
ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་པ་ཡིན་ནོ། །དགེ་སློང་དག་དགེ་སྦྱོང་ངམ། བྲམ་ཟེ་གང་དག་ཁ་ཅིག་ལྕེས་རྣམ་པར་ཤེས་པར་བྱ་བའི་རོ་འདི་དག་ཉིད་བདེན་པ་དང་གནས་པའི་སྒོ་ནས་མ་
མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཤེས་པར་བྱས་ནས་འདི་ཉིད་བདེན་གྱི་གཞན་ནི་དོན་མེད་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་ལྕེས་རྣམ་པར་ཤེས་
པར་བྱ་བའི་རོ་བཏང་སྙོམས་ཀྱི་གནས་ལྟ་བུ་དག་ལ་སོ་སོར་བརྟགས་པ་མ་ཡིན། སོ་སོར་བརྟགས་པ་མ་ཡིན་པའི་བཏང་སྙོམས་སུ་གནས་ཏེ། དགེ་སྦྱོང་དང་། བྲམ་ཟེ་འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་
ཚོགས་ཀྱི་མདུད་པས་ཀུན་ནས་སུན་ཕྱུང་བ། ང་རྒྱལ་གྱི་ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་པ་ཡིན་ནོ། །དགེ་སློང་དག་འདི་ལྟ་སྟེ། དཔེར་ན་སློབ་མ་ཞིག་གིས་སློབ་དཔོན་
ཟས་སྦྱིན་པར་བྱའོ་ཞེས་བ་ལང་གི་ལྕི་བ་ཟར་བཅུག་ཅིང་། སྐོམ་བླུད་པར་བྱའོ་ཞེས་གཅིན་འཐུང་དུ་བཅུག་ལ་དེ་དེས་མངོན་པར་དགའ་བར་བྱེད་ཅིང་དེ་ལ་ཉེས་དམིགས་སུ་མ་མཐོང་བ་ལས། གང་གི་ཚེ་དེ་སོ་སོར་རྟོག་པར་བྱེད་
པ་ན་བདག་གིས་སློབ་དཔོན་ཟས་སྦྱིན་པར་བྱའོ་ཞེས་བ་ལང་གི་ལྕི་བ་ཟར་བཅུག་ཅིང་། སྐོམ་བླུད་པར་བྱའོ་ཞེས་གཅིན་འཐུང་དུ་བཅུག་པར་ཤེས་པར་གྱུར་པ་དེའི་ཚེ། དེ་དེས་གདུང་བར་བྱེད། ངོ་ཚ་བར་བྱེད་ལ། གནོང་བར་བྱེད་

66-1-261a

ཅིང་རྣམ་པར་སྨོད་པར་བྱེད་དོ། །དགེ་སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་ཡང་འཕགས་པ་འཇིག་རྟེན་ལས་འདས་པའི་ཤེས་རབ་འདི་ཉིད་ཐོབ་ནས་སྔོན་གྱི་བྱིས་པའི་སྤྱོད་པ་དང་། རྨོངས་
པའི་སྤྱོད་པ་དང་། ཤེས་རབ་འཆལ་པའི་སྤྱོད་པ་དེས་གདུང་བར་བྱེད། ངོ་ཚ་བར་བྱེད། གནོང་བར་བྱེད་ཅིང་རྣམ་པར་སྨོད་པར་བྱེད་ལ་དེ་འདི་སྙམ་དུ་སེམས་ཏེ། བདག་གིས་ནི་སྔོན་མི་རྟག་པ་ཁོ་ན་ལ་རྟག་པར་བསམས་ཤིང་། 
བདག་གིས་སྡུག་བསྔལ་བ་ཁོ་ན་ལ་ནི་བདེ་བར་བསམས། བདག་གིས་མི་གཙང་བ་ཁོ་ན་ལ་ནི་གཙང་བར་བསམས། བདག་གིས་བདག་མེད་པ་ཁོ་ན་ལ་ནི་བདག་ཏུ་བསམས་ཏེ། དེ་ལྟར་ན་བདག་ནི་སྔོན་མི་རྟག་པ་ལ་རྟག་
པར་འདུ་ཤེས་པ་དང་། སྡུག་བསྔལ་བ་ལ་བདེ་བར་འདུ་ཤེས་པ་དང་། མི་གཙང་བ་ལ་གཙང་བར་འདུ་ཤེས་པ་དང་། བདག་མེད་པ་ལ་བདག་ཏུ་འདུ་ཤེས་པར་གྱུར་ཏོ་སྙམ་དུ་སེམས་སོ། །དགེ་སློང་དག་འདི་ལྟ་སྟེ། དཔེར་ན་སོ་ཀའི་
ཟླ་བ་ཐ་མ་ལ་སྤྲིན་མེད་ཅིང་སྤྲིན་དང་བྲལ་བའི་ཉི་མའི་གུང་ཚིགས་ལ་བབ་པའི་ཚེ། ཚ་བས་སྨིག་རྒྱུ་དག་གཡོ་བར་གྱུར་པ་ན། དེ་ལ་སེམས་ཅན་བྱིས་པའི་རང་བཞིན་ཅན་དང་། རྨོངས་པའི་རང་བཞིན་ཅན་དང་། ཤེས་
རབ་འཆལ་པའི་རང་བཞིན་ཅན་གང་དག་ཡིན་པ་དེ་དག་ནི་འདི་སྙམ་དུ་སེམས་ཏེ། གང་འདི་ལྟར་སྣང་བའི་ཆུ་འདི་ནི་བདེན་པ་དང་གནས་པའི་སྒོ་ནས་ཡོད་དོ་སྙམ་དུ་སེམས་སོ། །སེམས་ཅན་བྱིས་པའི་རང་བཞིན་ཅན་
མ་ཡིན་པ་དང་། རྨོངས་པའི་རང་བཞིན་ཅན་མ་ཡིན་པ་དང་། ཤེས་རབ་དང་ལྡན་པའི་རང་བཞིན་ཅན་གང་དག་ཡིན་པ་དེ་དག་ནི་འདི་སྙམ་དུ་སེམས་ཏེ། གང་འདི་ལྟར་སྣང་བའི་ཆུ་འདི་ནི་བདེན་པ་དང་། གནས་པའི་སྒོ་ནས་
ཡོད་པ་མ་ཡིན་ཏེ། སྨིག་རྒྱུ་འདི་འབའ་ཤིག་ཡོད་དོ། །མིག་སླུ་བར་བྱེད་པ་འདི་འབའ་ཤིག་ཡོད་དོ་སྙམ་དུ་སེམས་སོ། །དགེ་སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་ཡང་བདག་གི་ལྕེས་རྣམ་པར་ཤེས་པར་

66-1-261b

བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་རོ་གང་དག་ཡིན་པ་འདི་དག་ལ་རྟག་པ་ཉིད་དམ། བརྟན་པ་ཉིད་དམ། ཐེར་ཟུག་ཉིད་དམ། དེ་བཞིན་ཉིད་དམ། མ་ནོར་བ་དེ་བཞིན་ཉིད་དམ། གཞན་མ་ཡིན་པ་དེ་བཞིན་ཉིད་
དམ། ཡང་དག་པ་ཉིད་དམ། བདེན་པ་ཉིད་དམ། དེ་ཁོ་ན་ཉིད་དམ། ཇི་ལྟ་བ་བཞིན་ཉིད་དམ། མ་ནོར་བ་ཉིད་དམ། ཕྱིན་ཅི་མ་ལོག་པ་ཉིད་མེད་དེ། གསོག་ཀྱང་དེ་ཉིད་ཡིན། གསོབ་ཀྱང་དེ་ཉིད་ཡིན། སྙིང་པོ་མེད་པ་ཡང་དེ་ཉིད་ཡིན་
བརྫུན་པ་ཡང་དེ་ཉིད་ཡིན། སླུ་བའི་ཆོས་ཀྱང་དེ་ཉིད་ཡིན། བདུད་ཀྱང་དེ་ཉིད་ཡིན། བདུད་ཀྱི་ཡོ་བྱད་ཀྱང་དེ་ཉིད་ཡིན། རོ་ཡང་དེ་ཉིད་ཡིན། རོའི་གཟུགས་ཀྱང་དེ་ཉིད་ཡིན་པས་དེ་ལ་ནི་མངོན་པར་དགའ་བར་བྱ་བ་འམ། མངོན་
པར་བརྗོད་པར་བྱ་བ་འམ། ལྷག་པར་ཆགས་པར་བྱ་བ་འམ། ལྷག་པར་ཆགས་ཤིང་གནས་པར་བྱ་བའི་མི་རིགས་ཀྱི་བཅོམ་ལྡན་འདས་ཀྱིས་གསུངས་པ་འཕགས་པ་འཇིག་རྟེན་ལས་འདས་པ་ནི་བདེན་ནོ་ཞེས་དེ་
ལྟར་སོ་སོར་རྟོག་པར་བྱེད་དོ། །དེས་དེ་ལྟར་ཤེས་ནས་ལྕེས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་རོ་རྣམས་ནད་ཏུ་ཡང་དག་པར་རྗེས་སུ་མཐོང་ཞིང་། འབྲས་དང་། ཟུག་རྔུ་དང་། སྡིག་པ་
དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡང་དག་པར་རྗེས་སུ་མཐོང་ངོ་། །དེས་ལྕེས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་རོ་རྣམས་ནད་དུ་ཡང་དག་པར་
རྗེས་སུ་མཐོང་ཞིང་། འབྲས་དང་། ཟུག་རྔུ་དང་། སྡིག་པ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡང་དག་པར་རྗེས་སུ་མཐོང་བ་ན། དེའི་ལྕེས་རྣམ་པར་ཤེས་པར་བྱ་བ་འདས་པ་དང་། མ་
འོངས་པ་དང་། ད་ལྟར་བྱུང་བའི་རོ་དག་ལ་ལོག་པར་མོས་པ་འམ། འདུ་ཤེས་ཕྱིན་ཅི་ལོག་གམ། སེམས་ཕྱིན་ཅི་ལོག་གམ། ལྟ་བ་ཕྱིན་ཅི་ལོག་ཏུ་གྱུར་པ་འདི་ལྟ་སྟེ། བརྣབ་སེམས་ཀྱི་ཚོགས་ཀྱི་མདུད་པ་དང་། གནོད་

66-1-262a

སེམས་ཀྱི་ཚོགས་ཀྱི་མདུད་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ཚོགས་ཀྱི་མདུད་པ་དང་། འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པ་གང་དག་ཡིན་
པ་དེ་དག་སྤོང་བར་བྱེད་དོ། །དེ་དག་སྤངས་པའི་ཕྱིར་བདུད་ལྡོངས་པ་དང་། ཡི་ཆད་པ་དང་ཕྱོགས་མེད་པར་བྱས་ཏེ་གནས་ཤིང་བདུད་སྡིག་ཅན་གྱིས་མི་མཐོང་བར་སོང་ནས་བདུད་དང་བདུད་ཀྱི་འཁོར་བཅོམ་ཞིང་གཡུལ་ཆེན་པོའི་
གཡུལ་སྤྲད་དེ། གཡུལ་ལས་རྣམ་པར་རྒྱལ་བ་དང་གཡུལ་ངོ་དེ་ཉིད་མངོན་པར་ཕམ་པར་བྱས་ཤིང་གནས་ཏེ་དེ་ལྟར་ན་འདི་ལ་འཕགས་པ་ཉན་ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་
པ་ནི་ཤེས་རབ་ཀྱིས་འཚོ་བ་རྣམས་ཀྱི་ནང་ན་བླ་ན་མེད་པས་འཚོ་བ་ཡིན་ནོ། །དགེ་སློང་དག་ཡང་ཇི་ལྟར་ན་འཕགས་པ་ཉན་ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་པ། ཤེས་རབ་ཀྱིས་
འཚོ་བ་རྣམས་ཀྱི་ནང་ན་བླ་ན་མེད་པས་འཚོ་བ་ཡིན་ཞེ་ན། དགེ་སློང་དག་འདི་ལ་འཕགས་པ་ཉན་ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་པ་ནི་བདག་སྔོན་ལུས་ཀྱིས་རྣམ་པར་ཤེས་པར་
བྱ་བའི་རེག་བྱ་ཡིད་བདེ་བའི་གནས་ལྟ་བུ་དག་ལ་ནི་རྗེས་སུ་ཆགས་ཤིང་གནས་པར་གྱུར་ལ། ལུས་ཀྱིས་རྣམ་པར་ཤེས་པར་བྱ་བའི་རེག་བྱ་ཡིད་མི་བདེ་བའི་གནས་ལྟ་བུ་དག་ལ་ནི་ཁོང་ཁོ་བ་དང་ལྡན་ཞིང་གནས་པར་
གྱུར། ལུས་ཀྱིས་རྣམ་པར་ཤེས་པར་བྱ་བའི་རེག་བྱ་བཏང་སྙོམས་ཀྱི་གནས་ལྟ་བུ་དག་ལ་ནི་སོ་སོར་བརྟགས་པ་མ་ཡིན། སོ་སོར་བརྟགས་པ་མ་ཡིན་པའི་བཏང་སྙོམས་སུ་གནས་པར་གྱུར་ཏེ། དེ་ལྟར་བདག་ཡུན་རིང་པོ་ནས་
འདི་ལ་རྗེས་སུ་སློབ་ཅིང་རྗེས་སུ་བྱེད་པ་ན་རྒ་བ་དང་འཆི་བ་ཉམས་སུ་མྱོང་ཞིང་སྔོན་གྱི་མཐའ་མི་མངོན་པར་གྱུར་པས་བདག་གིས་ད་ནི་ལུས་ཀྱིས་རྣམ་པར་ཤེས་པར་བྱ་བའི་རེག་བྱ་དག་ལ་སྔོན་ཇི་ལྟ་བ་དེ་ལྟར་བསླབ་པར་མི་བྱ་ཞིང་། བདག་

66-1-262b

གིས་ལུས་ཀྱིས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་ད་ལྟར་བྱུང་བའི་རེག་བྱ་དག་ལ་ལོག་པར་མོས་པ་དང་། འདུ་ཤེས་ཕྱིན་ཅི་ལོག་གམ། སེམས་ཕྱིན་ཅི་ལོག་གམ། ལྟ་བ་ཕྱིན་ཅི་ལོག་ཏུ་གྱུར་པ་འདི་ལྟ་སྟེ། བརྣབ་སེམས་
ཀྱི་ཚོགས་ཀྱི་མདུད་པ་དང་། གནོད་སེམས་ཀྱི་ཚོགས་ཀྱི་མདུད་པ་དང་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ཚོགས་ཀྱི་མདུད་པ་དང་། འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པ་
གང་དག་ཡིན་པ་དེ་དག་སྤང་བའི་ཕྱིར་བསླབ་པར་བྱ་ཞིང་། དེ་དག་སྤངས་པར་གྱུར་ཅིག་ཅེས་དེ་ལྟར་སོ་སོར་རྟོག་པར་བྱེད་པའི་ཕྱིར་རོ། །དགེ་སློང་དག་འོན་ཀྱང་འདི་ན་ཁ་ཅིག་ལ་ནི་ལུས་ཀྱིས་རྣམ་པར་ཤེས་པར་བྱ་བའི་རེག་བྱ་དེ་དག་
ཉིད་ཡིད་དུ་འོང་བར་འགྱུར་ལ། གཞན་དག་ལ་ནི་དེ་དག་ཉིད་ཡིད་དུ་མི་འོང་བར་འགྱུར་བ་ཡང་ཡོད་ལ། དེ་དག་ལ་ཡང་དུས་ལ་ལར་ནི་ཡིད་བདེ་བའི་གནས་ལྟ་བུ་དག་ཏུ་འགྱུར་ཞིང་། དུས་ལ་ལར་ནི་ཡིད་མི་བདེ་བའི་གནས་ལྟ་བུ་དག་
ཏུ་འགྱུར། དུས་ལ་ལར་ནི་བཏང་སྙོམས་ཀྱི་གནས་ལྟ་བུ་དག་ཏུ་འགྱུར་ཏེ། དགེ་སློང་དག་དེ་ལྟར་ན་འདི་ལ་སེམས་ཅན་རྣམས་སུ་ཡུན་རིང་པོ་ནས་སེམས་ཀྱིས་བསྒྲིབས་ཤིང་། སེམས་ཀྱིས་བསླུས་ནས་ཉེས་དམིགས་སུ་མི་
མཐོང་ཞིང་ངེས་པར་འབྱུང་བ་རབ་ཏུ་མི་ཤེས་ཏེ། བདུད་སྡིག་ཅན་ཇི་ལྟར་འདོད་པ་བཞིན་བྱེད་ཏུ་འཇུག་གོ། །དགེ་སློང་དག་དགེ་སྦྱོང་ངམ། བྲམ་ཟེ་གང་དག་ཁ་ཅིག་ལུས་ཀྱིས་རྣམ་པར་ཤེས་པར་བྱ་བའི་རེག་བྱ་འདི་དག་ཉིད་
བདེན་པ་དང་གནས་པའི་སྒོ་ནས་མ་མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཞེན་པར་བྱས་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་
པ་དེ་དག་ནི་ལུས་ཀྱིས་རྣམ་པར་ཤེས་པར་བྱ་བའི་རེག་བྱ་ཡིད་བདེ་བའི་གནས་ལྟ་བུ་དག་ལ་རྗེས་སུ་ཆགས་ཤིང་གནས་ཏེ། དགེ་སྦྱོང་དང་། བྲམ་ཟེ་བརྣབ་སེམས་ཀྱི་ཚོགས་ཀྱི་མདུད་པས་ཀུན་ནས་སུན་ཕྱུང་བ། རྗེས་སུ་

66-1-263a

ཆགས་པའི་ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་པ་ཡིན་ནོ། །དགེ་སློང་དག་དགེ་སྦྱོང་དང་། བྲམ་ཟེ་གང་དག་ལུས་ཀྱིས་རྣམ་པར་ཤེས་པར་བྱ་བའི་རེག་བྱ་འདི་དག་
ཉིད་བདེན་པ་དང་གནས་པའི་སྒོ་ནས་མ་མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཞེན་པར་བྱས་ནས་འདི་ཉིད་བདེན་གྱི་གཞན་ནི་དོན་མེད་པའོ་ཞེས་རྗེས་སུ་ཐ་སྙད་འདོགས་པར་བྱེད་
པ་དེ་དག་ནི་ལུས་ཀྱིས་རྣམ་པར་ཤེས་པར་བྱ་བའི་རེག་བྱ་ཡིད་མི་བདེ་བའི་གནས་ལྟ་བུ་དག་ལ་ཁོང་ཁྲོ་བ་དང་ལྡན་པར་གནས་ཏེ། དགེ་སྦྱོང་དང་བྲམ་ཟེ་གནོད་སེམས་ཀྱི་ཚོགས་ཀྱི་མདུད་པས་ཀུན་ནས་སུན་ཕྱུང་བ། ཁོང་ཁྲོ་
བའི་ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་ཏུ་འཇུག་པ་ཡིན་ནོ། །དགེ་སློང་དག་དགེ་སྦྱོང་ངམ། བྲམ་ཟེ་གང་དག་ཁ་ཅིག་ལུས་ཀྱིས་རྣམ་པར་ཤེས་པར་བྱ་བའི་རེག་བྱ་འདི་དག་ཉིད་བདེན་པ་
དང་གནས་པའི་སྒོ་ནས་མ་མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཞེན་པར་བྱས་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་
ལུས་ཀྱིས་རྣམ་པར་ཤེས་པར་བྱ་བའི་རེག་བྱ་བཏང་སྙོམས་ཀྱི་གནས་ལྟ་བུ་དག་ལ་སོ་སོར་བརྟགས་པ་མ་ཡིན། སོ་སོར་བརྟགས་པ་མ་ཡིན་པའི་བཏང་སྙོམས་སུ་གནས་ཏེ། དགེ་སྦྱོང་དང་། བྲམ་ཟེ་འདི་བདེན་ནོ་སྙམ་དུ་མངོན་
པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པས་ཀུན་ནས་སུན་ཕྱུང་བ། ང་རྒྱལ་གྱི་ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་པ་ཡིན་ནོ། །དགེ་སློང་དག་འདི་ལྟ་སྟེ། 
དཔེར་ན་མི་ཞིག་རྐུན་པོ་དག་གིས་གཙེས་པ་ན་རང་གི་བུ་ཡིན་ནོ་སྙམ་དུ་སེམས་ཤིང་གཞན་གྱི་བུ་བླངས་ཏེ་གྲོང་ནས་འབྲོས་པར་བྱེད་ཅིང་། དེ་དེས་མངོན་པར་དགའ་བར་བྱེད་ལ། དེ་ལ་ཉེས་དམིགས་སུ་མ་མཐོང་བ་ལས། 

66-1-263b

གང་གི་ཚེ་དེ་སོ་སོར་རྟོག་པར་བྱེད་པ་ན་འདི་ནི་བདག་གི་བུ་མ་ཡིན་གྱི། འདི་ནི་གཞན་གྱི་བུ་ཡིན་ནོ་ཞེས་ཤེས་པར་གྱུར་པ་དེའི་ཚེ། དེ་དེས་གདུང་བར་བྱེད། ངོ་ཚ་བར་བྱེད། གནོང་བར་བྱེད་ཅིང་རྣམ་པར་སྨོད་པར་བྱེད་དོ། །དགེ་
སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་ཡང་འཕགས་པ་འཇིག་རྟེན་ལས་འདས་པའི་ཤེས་རབ་འདི་ཉིད་ཐོབ་ནས་སྔོན་གྱི་བྱིས་པའི་སྤྱོད་པ་དང་། རྨོངས་པའི་སྤྱོད་པ་དང་། ཤེས་རབ་འཆལ་པའི་སྤྱོད་
པ་དེས་གདུང་བར་བྱེད། ངོ་ཚ་བར་བྱེད། གནོང་བར་བྱེད་ཅིང་། རྣམ་པར་སྨོད་པར་བྱེད་ལ། དེ་འདི་སྙམ་དུ་སེམས་ཏེ། བདག་གིས་ནི་སྔོན་མི་རྟག་པ་ཁོ་ན་ལ་རྟག་པར་བསམས་ཤིང་བདག་གིས་སྡུག་བསྔལ་བ་ཁོ་ན་ལ་ནི་བདེ་
བར་བསམས། བདག་གིས་མི་གཙང་བ་ཁོ་ན་ལ་ནི་གཙང་བར་བསམས། བདག་གིས་བདག་མེད་པ་ཁོ་ན་ལ་ནི་བདག་ཏུ་བསམས་ཏེ། དེ་ལྟར་བདག་ནི་སྔོན་མི་རྟག་པ་ལ་རྟག་པར་འདུ་ཤེས་པ་དང་། སྡུག་བསྔལ་བ་ལ་བདེ་བར་
འདུ་ཤེས་པ་དང་། མི་གཙང་བ་ལ་གཙང་བར་འདུ་ཤེས་པ་དང་། བདག་མེད་པ་ལ་བདག་ཏུ་འདུ་ཤེས་པར་གྱུར་ཏོ་སྙམ་དུ་སེམས་སོ། །དགེ་སློང་དག་འདི་ལྟ་སྟེ། དཔེར་ན་སྐྱེས་བུ་གཉིད་ཀྱིས་ལོག་པའི་རྨི་ལམ་ལ་འདོད་པའི་ཡོན་ཏན་
ལྔས་རྩེ་ཞིང་དགའ་ལ་དགའ་མགུར་སྤྱོད་པར་བྱེད་པ་ལས་ཕྱིས་སད་པ་ན་ཆུང་ཟད་མི་སྣང་བར་གྱུར་པའི་ཚེ། དེ་ལ་སེམས་ཅན་བྱིས་པའི་རང་བཞིན་ཅན་དང་། རྨོངས་པའི་རང་བཞིན་ཅན་དང་། ཤེས་རབ་འཆལ་པའི་རང་
བཞིན་ཅན་གང་དག་ཡིན་པ་དེ་དག་ནི་འདི་སྙམ་དུ་སེམས་ཏེ། གང་དག་བདག་ཅག་གིས་རྨི་ལམ་ན་དགའ་མགུར་སྤྱད་པའི་འདོད་པའི་ཡོན་ཏན་ལྔ་པོ་དེ་དག་ནི་བདེན་པ་དང་གནས་པའི་སྒོ་ནས་ཡོད་དོ་སྙམ་དུ་སེམས་སོ། །སེམས་
ཅན་བྱིས་པའི་རང་བཞིན་ཅན་མ་ཡིན་པ་དང་། རྨོངས་པའི་རང་བཞིན་ཅན་མ་ཡིན་པ་དང་། ཤེས་རབ་དང་ལྡན་པའི་རང་བཞིན་ཅན་གང་དག་ཡིན་པ་དེ་དག་ནི་འདི་སྙམ་དུ་སེམས་ཏེ། གང་དག་བདག་ཅག་གིས་རྨི་ལམ་ན་དགའ་

66-1-264a

མགུར་སྤྱོད་པའི་འདོད་པའི་ཡོན་ཏན་ལྔ་པོ་དེ་དག་ནི་བདེན་པ་དང་གནས་པའི་སྒོ་ནས་ཡོད་པ་མ་ཡིན་ཏེ། རྨི་ལམ་དེ་འབའ་ཤིག་ཡོད་དོ། །སེམས་སླུ་བར་བྱེད་པ་དེ་འབའ་ཤིག་ཡོད་དོ་སྙམ་དུ་སེམས་སོ། །དགེ་
སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་ཡང་བདག་གི་ལུས་ཀྱིས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་རེག་བྱ་གང་དག་ཡིན་པ་འདི་དག་ལ་རྟག་པ་ཉིད་དམ། བརྟན་
པ་ཉིད་དམ། ཐེར་ཟུག་པ་ཉིད་དམ། དེ་བཞིན་ཉིད་དམ། མ་ནོར་བ་དེ་བཞིན་ཉིད་དམ། གཞན་མ་ཡིན་པ་དེ་བཞིན་ཉིད་དམ། ཡང་དག་པ་ཉིད་དམ། བདེན་པ་ཉིད་དམ། དེ་ཁོ་ན་ཉིད་དམ། ཇི་ལྟ་བ་བཞིན་ཉིད་དམ། མ་ནོར་བ་
ཉིད་དམ། ཕྱིན་ཅི་མ་ལོག་པ་ཉིད་མེད་དེ། གསོག་ཀྱང་དེ་ཉིད་ཡིན་ལ། གསོབ་ཀྱང་དེ་ཉིད་ཡིན། སྙིང་པོ་མེད་པ་ཡང་དེ་ཉིད་ཡིན། བརྫུན་པ་ཡང་དེ་ཉིད་ཡིན། སླུ་བའི་ཆོས་ཀྱང་དེ་ཉིད་ཡིན། བདུད་ཀྱང་དེ་ཉིད་ཡིན། བདུད་ཀྱི་ཡོ་བྱད་
ཀྱང་དེ་ཉིད་ཡིན། རོའི་གཟུགས་ཀྱང་དེ་ཉིད་ཡིན་པས། དེ་ལ་ནི་མངོན་པར་དགའ་བར་བྱ་བ་འམ། མངོན་པར་བརྗོད་པར་བྱ་བ་འམ། ལྷག་པར་ཆགས་པར་བྱ་བ་འམ། ལྷག་པར་ཆགས་ཤིང་གནས་པར་བྱ་བར་མི་རིགས་ཀྱི། 
བཅོམ་ལྡན་འདས་ཀྱིས་གསུངས་པ། འཕགས་པ་འཇིག་རྟེན་ལས་འདས་པ་ནི་བདེན་ནོ་ཞེས་དེ་ལྟར་སོ་སོར་རྟོག་པར་བྱེད་དོ། །དེས་དེ་ལྟར་ཤེས་ནས་ལུས་ཀྱིས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། 
ད་ལྟར་བྱུང་བའི་རེག་བྱ་རྣམས་ནད་དུ་ཡང་དག་པར་རྗེས་སུ་མཐོང་ཞིང་། འབྲས་དང་། ཟུག་རྔུ་དང་། སྡིག་པ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡང་དག་པར་རྗེས་སུ་མཐོང་བ་ན། །དེ་
ལུས་ཀྱིས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་རེག་བྱ་རྣམས་ནད་དུ་ཡང་དག་པར་རྗེས་སུ་མཐོང་ཞིང་། འབྲས་དང་། ཟུག་རྔུ་དང་། སྡིག་པ་དང་། མི་རྟག་པ་དང་། སྡུག་བསྔལ་བ་དང་། 

66-1-264b

སྟོང་པ་དང་། བདག་མེད་པར་ཡང་དག་པར་རྗེས་སུ་མཐོང་བ་ན་དེའི་ལུས་ཀྱིས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་རེག་བྱ་དག་ལ་ལོག་པར་མོས་པ་འམ། འདུ་ཤེས་ཕྱིན་ཅི་ལོག་
གམ། སེམས་ཕྱིན་ཅི་ལོག་གམ། ལྟ་བ་ཕྱིན་ཅི་ལོག་ཏུ་གྱུར་པ་འདི་ལྟ་སྟེ། བརྣབ་སེམས་ཀྱི་ཚོགས་ཀྱི་མདུད་པ་དང་། གནོད་སེམས་ཀྱི་ཚོགས་ཀྱི་མདུད་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་
ཚོགས་ཀྱི་མདུད་པ་དང་། འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པ་གང་དག་ཡིན་པ་དེ་དག་སྤོང་བར་བྱེད་དོ། །དེ་དག་སྤངས་པའི་ཕྱིར་བདུད་ལྡོངས་པ་དང་ཡི་ཆད་པ་དང་། ཕྱོགས་
མེད་པར་བྱས་ཏེ་གནས་ཤིང་བདུད་སྡིག་ཅན་གྱིས་མི་མཐོང་བར་སོང་ནས་བདུད་དང་བདུད་ཀྱི་འཁོར་བཅོམ་ཞིང་གཡུལ་ཆེན་པོའི་གཡུལ་སྤྲད་དེ། གཡུལ་ལས་རྣམ་པར་རྒྱལ་བ་དང་། གཡུལ་ངོ་དེ་ཉིད་ཕམ་པར་
བྱས་ཤིང་གནས་ཏེ། དེ་ལྟར་ན་འདི་ལ་འཕགས་པ་ཉན་ཐོས་ལྷག་པའི་ཤེས་རབ་ལ་བརྩོན་པའི་རྗེས་སུ་སྦྱོར་བ་ལ་གནས་པ་ནི་ཤེས་རབ་ཀྱིས་འཚོ་བ་རྣམས་ཀྱི་ནང་ན་བླ་ན་མེད་པས་འཚོ་བ་ཡིན་ནོ། །དགེ་སློང་དག་ཡང་
ཇི་ལྟར་ན་འཕགས་པ་ཉན་ཐོས་ལྷག་པའི་ཤེས་རབ་ལ་སྦྱོར་བས་རྗེས་སུ་ཞུགས་པ་ལ་གནས་པ་ཤེས་རབ་ཀྱིས་འཚོ་བ་རྣམས་ཀྱི་ནང་ན་བླ་ན་མེད་པས་འཚོ་བ་ཡིན་ཞེ་ན། དགེ་སློང་དག་འདི་ལ་འཕགས་པ་ཉན་ཐོས་ལྷག་
པའི་ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་པ་ནི་བདག་སྔོན་ཡིད་ཀྱིས་རྣམ་པར་ཤེས་པར་བྱ་བའི་ཆོས་ཡིད་བདེ་བའི་གནས་ལྟ་བུ་དག་ལ་ནི་རྗེས་སུ་ཆགས་ཤིང་གནས་པར་གྱུར་ལ། ཡིད་ཀྱིས་རྣམ་པར་ཤེས་
པར་བྱ་བའི་ཆོས་ཡིད་མི་བདེ་བའི་གནས་ལྟ་བུ་དག་ལ་ནི་ཁོང་ཁྲོ་བ་དང་ལྡན་ཞིང་གནས་པར་གྱུར་ཡིད་ཀྱིས་རྣམ་པར་ཤེས་པར་བྱ་བའི་ཆོས་བཏང་སྙོམས་ཀྱི་གནས་ལྟ་བུ་དག་ལ་ནི་སོ་སོར་བརྟགས་པ་

66-1-265a

མ་ཡིན། སོ་སོར་བརྟགས་པ་མ་ཡིན་པའི་བཏང་སྙོམས་སུ་གནས་པར་གྱུར་ཏོ། དེ་ལྟར་བདག་ཡུན་རིང་པོ་ནས་འདི་ལ་རྗེས་སུ་སློབ་ཅིང་རྗེས་སུ་བྱེད་པ་ན། རྒ་བ་དང་། འཆི་བ་ཉམས་སུ་མྱོང་ཞིང་། 
སྔོན་གྱི་མཐའ་མི་མངོན་པར་གྱུར་པས་བདག་གིས་ད་ནི་ཡིད་ཀྱིས་རྣམ་པར་ཤེས་པར་བྱ་བའི་ཆོས་དག་ལ་སྔོན་ཇི་ལྟ་བ་དེ་ལྟར་བསླབ་པར་མི་བྱ་ཞིང་། བདག་གིས་ཡིད་ཀྱིས་རྣམ་པར་ཤེས་པར་བྱ་བ་འདས་པ་དང་། 
མ་འོངས་པ་དང་། ད་ལྟར་བྱུང་བའི་ཆོས་དག་ལ་ལོག་པར་མོས་པ་འམ་འདུ་ཤེས་ཕྱིན་ཅི་ལོག་གམ། སེམས་ཕྱིན་ཅི་ལོག་གམ། ལྟ་བ་ཕྱིན་ཅི་ལོག་ཏུ་གྱུར་པ་འདི་ལྟ་སྟེ། བརྣབ་སེམས་ཀྱི་ཚོགས་ཀྱི་མདུད་པ་དང་
གནོད་སེམས་ཀྱི་ཚོགས་ཀྱི་མདུད་པ་དང་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ཚོགས་ཀྱི་མདུད་པ་དང་། འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པ་གང་དག་ཡིན་པ་
དེ་དག་སྤང་བའི་ཕྱིར་བསླབ་པར་བྱ་ཞིང་། དེ་དག་སྤངས་པར་གྱུར་ཅིག་ཅེས་དེ་ལྟར་སོ་སོར་རྟོག་པར་བྱེད་པའི་ཕྱིར་རོ། །དགེ་སློང་དག་འོན་ཀྱང་འདི་ན་ཁ་ཅིག་ལ་ནི་ཡིད་གྱིས་རྣམ་པར་ཤེས་པར་བྱ་བའི་ཆོས་དེ་དག་ཉིད་ཡིད་དུ་
འོང་བར་འགྱུར་ལ། གཞན་དག་ལ་ནི་དེ་དག་ཉིད་ཡིད་དུ་མི་འོང་བར་འགྱུར་བ་ཡང་ཡོད་ལ། དེ་དག་ལ་ཡང་དུས་ལ་ལར་ནི་ཡིད་བདེ་བའི་གནས་ལྟ་བུ་དག་ཏུ་འགྱུར་ཞིང་། དུས་ལ་ལར་ནི་ཡིད་མི་བདེ་བའི་གནས་ལྟ་བུ་དག་ཏུ་འགྱུར། དུས་ལ་ལར་ནི་བཏང་སྙོམས་ཀྱི་
གནས་ལྟ་བུ་དག་ཏུ་འགྱུར་ཏེ་དགེ་སློང་དག་དེ་ལྟར་ན་འདི་ལ་སེམས་ཅན་རྣམས་ཡུན་རིང་པོ་ནས་སེམས་ཀྱིས་བསྒྲིབས་ཤིང་། སེམས་ཀྱིས་བྲིད། སེམས་ཀྱིས་བསླུས་ནས་ཉེས་དམིགས་སུ་མི་མཐོང་ཞིང་། ངེས་པར་འབྱུང་
བ་རབ་ཏུ་མི་ཤེས་ཏེ། བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་གོ། །དགེ་སློང་དག་དགེ་སྦྱོང་ངམ། བྲམ་ཟེ་གང་དག་ཁ་ཅིག་ཡིད་ཀྱིས་རྣམ་པར་ཤེས་པར་བྱ་བའི་ཆོས་འདི་དག་ཉིད་བདེན་པ་དང་གནས་པའི་སྒོ་

66-1-265b

ནས་མ་མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཞེན་པར་བྱས་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་ཡིད་ཀྱིས་
རྣམ་པར་ཤེས་པར་བྱ་བའི་ཆོས་ཡིད་བདེ་བའི་གནས་ལྟ་བུ་དག་ལ་རྗེས་སུ་ཆགས་ཤིང་གནས་ཏེ། དགེ་སྦྱོང་དང་། བྲམ་ཟེ་བརྣབ་སེམས་ཀྱི་ཚོགས་ཀྱི་མདུད་པས་ཀུན་ནས་སུན་ཕྱུང་བ། རྗེས་སུ་ཆགས་པའི་ཀུན་
དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་པ་ཡིན་ནོ། །དགེ་སློང་དག་དགེ་སྦྱོང་ངམ། བྲམ་ཟེ་གང་དག་ཁ་ཅིག་ཡིད་ཀྱིས་རྣམ་པར་ཤེས་པར་བྱ་བའི་ཆོས་འདི་དག་ཉིད་
བདེན་པ་དང་གནས་པའི་སྒོ་ནས་མ་མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཞེན་པར་བྱས་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་ལ་
འདོགས་པར་བྱེད་པ་དེ་དག་ནི་ཡིད་ཀྱིས་རྣམ་པར་ཤེས་པར་བྱ་བའི་ཆོས་ཡིད་མི་བདེ་བའི་གནས་ལྟ་བུ་དག་ལ་ཁོང་ཁྲོ་བ་དང་ལྡན་པར་གནས་ཏེ། དགེ་སྦྱོང་དང་། བྲམ་ཟེ་གནོད་སེམས་ཀྱི་ཚོགས་ཀྱི་མདུད་
པས་ཀུན་ནས་སུན་ཕྱུང་བ། ཁོང་ཁྲོ་བའི་ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་པ་ཡིན་ནོ། །དགེ་སློང་དག་དགེ་སྦྱོང་ངམ། བྲམ་ཟེ་གང་དག་ཁ་
ཅིག་ཡིད་ཀྱིས་རྣམ་པར་ཤེས་པར་བྱ་བའི་ཆོས་འདི་དག་ཉིད་བདེན་པ་དང་གནས་པའི་སྒོ་ནས་མ་མཐོང་ཞིང་། ཇི་ལྟར་རང་རང་ལོག་པར་མོས་པ་དག་ལ་ནན་གྱིས་བཟུང་སྟེ། མངོན་པར་ཞེན་པར་བྱས་
ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པ་དེ་དག་ནི་ཡིད་ཀྱིས་རྣམ་པར་ཤེས་པར་བྱ་བའི་ཆོས་བཏང་སྙོམས་ཀྱི་གནས་ལྟ་བུ་དག་ལ་སོ་སོར་བརྟགས་པ་མ་ཡིན། 

66-1-266a

སོ་སོར་བརྟགས་པ་མ་ཡིན་པའི་བཏང་སྙོམས་སུ་གནས་ཏེ། དགེ་སྦྱོང་དང་། བྲམ་ཟེ་འདི་བདེན་ནོ་སྙམ་དུ་མངོན་པར་ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པས་ཀུན་ནས་སུན་ཕྱུང་བ། 
ང་རྒྱལ་གྱི་ཀུན་དུ་སྦྱོར་བ་དང་ལྡན་པ་དེ་དག་ཀྱང་བདུད་སྡིག་ཅན་ཇི་ལྟར་འདོད་པ་བཞིན་བྱེད་དུ་འཇུག་པ་ཡིན་ནོ། །དགེ་སློང་དག་འདི་ལྟ་སྟེ། དཔེར་ན་སྐྱེས་བུ་ཞིག་གིས་རིན་པོ་ཆེའི་ཟ་མ་ཏོག་ཡིན་པར་སེམས་
ཤིང་སྦྲུལ་གྱི་ཟ་མ་ཏོག་བླངས་ཏེ་གྲོང་ཁྱེར་ཀུན་དུ་འབར་བ་ནས་འབྲོས་པར་བྱེད་ཅིང་། དེ་དེས་མངོན་པར་དགའ་བར་བྱེད་ལ་དེ་ལ་ཉེས་དམིགས་སུ་མ་མཐོང་བ་ལས་གང་གི་ཚེ་དེ་སོ་སོར་རྟོག་པར་བྱེད་པ་ན་
འདི་ནི་སྦྲུལ་གྱི་ཟ་མ་ཏོག་ཡིན་གྱི། འདི་ནི་རིན་པོ་ཆེའི་ཟ་མ་ཏོག་མ་ཡིན་ནོ་ཞེས་ཤེས་པར་གྱུར་པ་དེའི་ཚེ། དེ་དེས་གདུང་བར་བྱེད། ངོ་ཚ་བར་བྱེད། གནོང་བར་བྱེད་ཅིང་རྣམ་པར་སྨོད་པར་བྱེད་དོ། །དགེ་
སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་དང་ལྡན་པ་ཡང་འཕགས་པའི་འཇིག་རྟེན་ལས་འདས་པའི་ཤེས་རབ་འདི་ཉིད་ཐོབ་ནས་སྔོན་གྱི་བྱིས་པའི་སྤྱོད་པ་དང་། རྨོངས་པའི་སྤྱོད་པ་དང་། ཤེས་
རབ་འཆལ་པའི་སྤྱོད་པ་དེས་གདུང་བར་བྱེད། ངོ་ཚ་བར་བྱེད། གནོང་བར་བྱེད་ཅིང་རྣམ་པར་སྨོད་པར་བྱེད་ལ། དེ་འདི་སྙམ་དུ་སེམས་ཏེ། བདག་གིས་ནི་མངོན་མི་རྟག་པ་ཁོ་ན་ལ་རྟག་པར་བསམས་ཤིང་། 
བདག་གིས་སྡུག་བསྔལ་བ་ཁོ་ན་ལ་ནི་བདེ་བར་བསམས། བདག་གིས་མི་གཙང་བ་ཁོ་ན་ལ་ནི་གཙང་བར་བསམས། བདག་གིས་བདག་མེད་པ་ཁོ་ན་ལ་ནི་བདག་ཏུ་བསམས་ཏེ། དེ་ལྟར་ན་བདག་ནི་སྔོན་མི་རྟག་
པ་ལ་རྟག་པར་འདུ་ཤེས་པ་དང་། སྡུག་བསྔལ་བ་ལ་བདེ་བར་འདུ་ཤེས་པ་དང་། མི་གཙང་བ་ལ་གཙང་བར་འདུ་ཤེས་པ་དང་། བདག་མེད་པ་ལ་བདག་ཏུ་འདུ་ཤེས་པར་གྱུར་ཏོ་སྙམ་དུ་སེམས་སོ། །དགེ་སློང་དག་

66-1-266b

འདི་ལྟ་སྟེ། དཔེར་ན་སྒྱུ་མ་མཁན་ནམ་སྒྱུ་མ་མཁན་གྱི་སློབ་མ་མཁས་པ་ཞིག་ལམ་པོ་ཆེའི་བཞི་མདོར་འདུག་སྟེ། སྒྱུ་མ་སྣ་ཚོགས་འདི་ལྟ་སྟེ། ནོར་བུ་དག་གམ། རྣ་ཆ་གདུབ་ཀོར་དག་གམ། མགུལ་རྒྱན་དག་གམ། གདུབ་
བུ་རྒྱན་ཅན་དག་གམ། དཔུང་རྒྱན་དག་གམ། ལག་རྒྱན་དག་གམ། རྐང་རྒྱན་དག་གམ། སོར་གདུབ་རྒྱན་དག་གམ། གསེར་དང་དངུལ་གྱི་ཕྲེང་བ་དག་བྱས་ཏེ་རྣམ་པར་བསྟན་པར་གྱུར་ན། དེ་ལ་སེམས་ཅན་བྱིས་པའི་རང་བཞིན་ཅན་
དང་། རྨོངས་པའི་རང་བཞིན་ཅན་དང་། ཤེས་རབ་འཆལ་པའི་རང་བཞིན་ཅན་གང་དག་ཡིན་པ་དེ་དག་ནི་འདི་སྙམ་དུ་སེམས་ཏེ། གང་འདི་ལྟར་སྣང་བའི་ནོར་བུ་དག་གམ། རྣ་ཆ་གདུབ་ཀོར་དག་གམ། མགུལ་རྒྱན་དག་གམ། 
གདུ་བུ་རྒྱན་ཅན་དག་གམ། དཔུང་རྒྱན་དག་གམ། ལག་རྒྱན་དག་གམ། རྐང་རྒྱན་དག་གམ། སོར་གདུབ་རྒྱན་དག་གམ། གསེར་དང་། དངུལ་གྱི་ཕྲེང་བ་འདི་དག་ནི་བདེན་པ་དང་། གནས་པའི་སྒོ་ནས་ཡོད་དོ་སྙམ་དུ་སེམས་སོ། །
སེམས་ཅན་བྱིས་པའི་རང་བཞིན་ཅན་མ་ཡིན་པ་དང་། རྨོངས་པའི་རང་བཞིན་ཅན་མ་ཡིན་པ་དང་། ཤེས་རབ་དང་ལྡན་པའི་རང་བཞིན་ཅན་གང་དག་ཡིན་པ་དེ་དག་ནི་འདི་སྙམ་དུ་སེམས་ཏེ། གང་འདི་ལྟར་སྣང་བའི་ནོར་བུ་དག་
གམ། རྣ་ཆ་གདུབ་ཀོར་དག་གམ། མགུལ་རྒྱན་དག་གམ། གདུ་བུ་རྒྱན་ཅན་དག་གམ། དཔུང་རྒྱན་དག་གམ། ལག་རྒྱན་དག་གམ། རྐང་རྒྱན་དག་གམ། སོར་གདུབ་རྒྱན་དག་གམ། གསེར་དང་དངུལ་གྱི་ཕྲེང་བ་འདི་དག་ནི་བདེན་པ་
དང་གནས་པའི་སྒོ་ནས་ཡོད་པ་མ་ཡིན་ཏེ། གྱི་ན་སྒྱུ་མར་བྱས་པ་འདི་འབའ་ཤིག་ཡོད་དོ། །མིག་སླུ་བར་བྱེད་པ་འདི་འབའ་ཤིག་ཡོད་དོ་སྙམ་དུ་སེམས་སོ། །དགེ་སློང་དག་དེ་བཞིན་དུ་འཕགས་པ་ཉན་ཐོས་ཐོས་པ་
དང་ལྡན་པ་ཡང་བདག་གིས་ཡིད་ཀྱིས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་ཆོས་གང་དག་ཡིན་པ་འདི་དག་ལ། རྟག་པ་ཉིད་དམ། བརྟན་པ་ཉིད་དམ། ཐེར་ཟུག་ཉིད་དམ། དེ་

66-1-267a

བཞིན་ཉིད་དམ། མ་ནོར་བ་དེ་བཞིན་ཉིད་དམ། གཞན་མ་ཡིན་པ་དེ་བཞིན་ཉིད་དམ། ཡང་དག་པ་ཉིད་དམ། བདེན་པ་ཉིད་དམ། དེ་ཁོ་ན་ཉིད་དམ། ཇི་ལྟ་བ་བཞིན་ཉིད་དམ། མ་ནོར་བ་ཉིད་དམ། ཕྱིན་ཅི་མ་ལོག་
པ་ཉིད་མེད་དེ། གསོག་ཀྱང་དེ་ཉིད་ཡིན་ལ། གསོབ་ཀྱང་དེ་ཉིད་ཡིན། སྙིང་པོ་མེད་པ་ཡང་དེ་ཉིད་ཡིན། བརྫུན་པ་ཡང་དེ་ཉིད་ཡིན། སླུ་བའི་ཆོས་ཀྱང་དེ་ཉིད་ཡིན། བདུད་ཀྱང་དེ་ཉིད་ཡིན། བདུད་ཀྱི་ཡོ་བྱད་ཀྱང་དེ་ཉིད་
ཡིན། རོ་ཡང་དེ་ཉིད་ཡིན། རོའི་གཟུགས་ཀྱང་དེ་ཉིད་ཡིན་པས་དེ་ལ་ནི་མངོན་པར་དགའ་བར་བྱ་བ་འམ། མངོན་པར་བརྗོད་པར་བྱ་བ་འམ། ལྷག་པར་ཆགས་པར་བྱ་བ་འམ། ལྷག་པར་ཆགས་ཤིང་གནས་པར་བྱ་
བར་མི་རིགས་ཀྱི། བཅོམ་ལྡན་འདས་ཀྱིས་གསུངས་པ་འཕགས་པ་འཇིག་རྟེན་ལས་འདས་པ་ནི་བདེན་ནོ་ཞེས་དེ་ལྟར་སོ་སོར་རྟོག་པར་བྱེད་དོ། །དེས་དེ་ལྟར་ཤེས་ནས་ཡིད་ཀྱིས་རྣམ་པར་ཤེས་པར་བྱ་བ་འདས་པ་
དང་། མ་འོངས་པ་དང་། ད་ལྟར་བྱུང་བའི་ཆོས་རྣམས་ནད་དུ་ཡང་དག་པར་རྗེས་སུ་མཐོང་། འབྲས་དང་། ཟུག་རྔུ་དང་། སྡིག་པ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡང་དག་
པར་རྗེས་སུ་མཐོང་ངོ་། །དེས་ཡིད་ཀྱིས་རྣམ་པར་ཤེས་པར་བྱ་བ་འདས་པ་དང་། མ་འོངས་པ་དང་། ད་ལྟར་བྱུང་བའི་ཆོས་རྣམས་ནད་དུ་ཡང་དག་པར་རྗེས་སུ་མཐོང་ཞིང་། འབྲས་དང་། ཟུག་རྔུ་དང་། 
སྡིག་པ་དང་། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ཡང་དག་པར་རྗེས་སུ་མཐོང་བ་ན། དེའི་ཡིད་ཀྱིས་རྣམ་པར་ཤེས་པར་བྱ་བ་འདས་པ་དང་། མ་འོངས་
པ་དང་། ད་ལྟར་བྱུང་བའི་ཆོས་དག་ལ་ལོག་པར་མོས་པ་འམ། འདུ་ཤེས་ཕྱིན་ཅི་ལོག་གམ། སེམས་ཕྱིན་ཅི་ལོག་གམ། ལྟ་བ་ཕྱིན་ཅི་ལོག་ཏུ་གྱུར་པ། འདི་ལྟ་སྟེ། བརྣབ་སེམས་

66-1-267b

ཀྱི་ཚོགས་ཀྱི་མདུད་པ་དང་། གནོད་སེམས་ཀྱི་ཚོགས་ཀྱི་མདུད་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ཚོགས་ཀྱི་མདུད་པ་དང་། འདི་བདེན་ནོ་སྙམ་དུ་མངོན་པར་
ཞེན་ཅིང་མཆོག་ཏུ་འཛིན་པའི་ཚོགས་ཀྱི་མདུད་པ་གང་དག་ཡིན་པ་དེ་དག་སྤོང་བར་བྱེད་དོ། །དེ་དག་སྤངས་པའི་ཕྱིར་བདུད་ལྡོངས་པ་དང་། ཡི་ཆད་པ་དང་། ཕྱོགས་མེད་པར་བྱས་ཏེ་གནས་
ཤིང་། བདུད་སྡིག་ཅན་གྱིས་མི་མཐོང་བར་སོང་ནས་བདུད་ཀྱི་སྲང་དང་། བདུད་ཀྱི་འཁོར་བཅོམ་ཞིང་། གཡུལ་ཆེན་པོའི་གཡུལ་སྤྲད་དེ། གཡུལ་ལས་རྣམ་པར་རྒྱལ་བ་དང་། 
གཡུལ་ངོ་དེ་ཉིད་མངོན་པར་ཕམ་པར་བྱས་ཤིང་གནས་ཏེ། །དེ་ལྟར་ན་འདི་ལ་འཕགས་པ་ཉན་ཐོས་ལྷག་པའི་ཤེས་རབ་ལ་སྦྱོར་བར་རྗེས་སུ་ཞུགས་པ་ལ་གནས་པ་ནི་ཤེས་རབ་ཀྱིས་
འཚོ་བ་རྣམས་ཀྱི་ནང་ན་བླ་ན་མེད་པས་འཚོ་བ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡིད་རངས་ཏེ། བཅོམ་ལྡན་འདས་ཀྱིས་གསུངས་པ་
ལ་མངོན་པར་བསྟོད་དོ། །བར་སྡོམ་ནི། སྨྱོན་པ་དང་ནི་སྒྱུ་མ་དང་། །ར་རོ་བ་དང་སྒྲ་བརྙན་དང་། །གཤེད་མ་དང་ནི་མེ་ལོང་དང་། །ཟས་སྦྱིན་པ་དང་སྨིག་རྒྱུ་དང་། །རྐུན་པོས་གཙེས་
པ་གྲོང་ནས་དང་། །རྨི་ལམ་དགའ་སྤྱོད་ཟ་མ་ཏོག །ནོར་བུ་དཔུང་རྒྱན་རྣམ་དག་ནི། །སྒྱུ་མའི་དྲ་བ་ཀུན་བསྡུས་པའོ། །མདོ་ཆེན་པོ་སྒྱུ་མའི་དྲ་བ་ཞེས་བྱ་བ་རྫོགས་སོ།། །། རྒྱ་གར་གྱི་
མཁན་པོ་ཛི་ན་མི་ཏྲ་དང་། པྲ་ཛྙཱ་ཝརྨ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།།               །། །།

66-1-268a

This is a blank page without image

66-1-268b

༄༅༅། །རྒྱ་གར་སྐད་དུ། བི་མྦི་སཱ་ར་པྲ་ཏྱུངྒ་མ་ན་ནཱ་མ་མ་ཧཱ་སཱུ་ཏྲཾ།  བོད་སྐད་དུ། མདོ་ཆེན་པོ་གཟུགས་
ཅན་སྙིང་པོས་བསུ་བ་ཞེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་
དུས་གཅིག་ན། བཅོམ་ལྡན་འདས་དགེ་སློང་སྟོང་གི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་སྔོན་རལ་པ་ཅན། 
ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་
རྗེས་སུ་ཐོབ་པ། སྲིད་པར་ཀུན་དུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་དུ་རྣམ་
པར་གྲོལ་བ་ཤ་སྟག་དང་ཐབས་གཅིག་ཏུ་ཡུལ་མ་ག་དྷཱར་ཡུལ་རྒྱུ་ཞིང་གཤེགས་པ་ན། མ་ག་དྷཱ་པ་རྣམས་ཀྱི་
མཆོད་རྟེན་རབ་བརྟན་གྱི་སྨྱིག་མའི་ནགས་ཁྲོད་ག་ལ་བ་དེར་གཤེགས་ཏེ། དེ་ན་བཅོམ་ལྡན་འདས་རབ་བརྟན་དུ་
བྱོན་ནས་མ་ག་དྷཱ་པ་རྣམས་ཀྱི་མཆོད་རྟེན་རབ་བརྟན་གྱི་སྨྱིག་མའི་ནགས་ཁྲོད་ན་བཞུགས་སོ། །ཡུལ་མ་ག་

66-1-269a

དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་དགེ་སློང་སྟོང་གི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་སྔོན་རལ་པ་ཅན། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། བྱ་བ་བྱས་པ་
བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་དུ་རྣམ་པར་གྲོལ་བ་ཤ་སྟག་དང་ཐབས་གཅིག་ཏུ་ཡུལ་མ་ག་དྷཱར་ཡུལ་རྒྱུ་
ཞིང་གཤེགས་པ་ན། མ་ག་དྷཱ་པ་རྣམས་ཀྱི་མཆོད་རྟེན་རབ་བརྟན་གྱི་སྨྱིག་མའི་ནགས་ཁྲོད་ག་ལ་བ་དེར་གཤེགས་ཏེ། དེ་ན་བཅོམ་ལྡན་འདས་རབ་བརྟན་དུ་བྱོན་ནས་མ་ག་དྷཱ་པ་རྣམས་ཀྱི་མཆོད་རྟེན་རབ་བརྟན་གྱི་སྨྱིག་མའི་
ནགས་ཁྲོད་ན་བཞུགས་སོ་ཞེས་ཐོས་སོ། །ཐོས་ནས་ཀྱང་རྒྱལ་པོའི་འབྱོར་པ་ཆེན་པོ་དང་། རྒྱལ་པོའི་མཐུ་ཆེན་པོས་ཤིང་རྟ་ཁྲི་ཉིས་སྟོང་དང་། རྟའི་ཁྱུ་ཚན་ཁྲི་བརྒྱད་སྟོང་དང་། ཡུལ་མ་ག་དྷཱའི་བྲམ་ཟེ་དང་ཁྱིམ་བདག་འབུམ་
ཕྲག་དུ་མ་དང་ལྷན་ཅིག་ཏུ་བཅོམ་ལྡན་འདས་ལ་བལྟ་བ་དང་། བསྙེན་བཀུར་ལ་འགྲོ་བའི་ཕྱིར་རྒྱལ་པོའི་ཁབ་ནས་བྱུང་སྟེ། དེ་བཞོན་པས་བགྲོད་པའི་ས་ཇི་སྲིད་པ་དེ་སྲིད་དུ་བཞོན་པས་སོང་ནས། བཞོན་པ་ལས་བབས་ཏེ། 
རྐང་པ་ཁོ་ནས་ཀུན་དགའ་ར་བར་ཞུགས་ནས། ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བར་སྐབས་གང་ནས་བཅོམ་ལྡན་འདས་མཐོང་བའི་བར་སྐབས་དེར། རྒྱལ་པོའི་ཆོས་ཀྱི་མཚན་མ་ལྔ་པོ་
ཅོད་པན་དང་། གདུགས་དང་། རལ་གྲི་དང་། རྔ་ཡབ་ནོར་བུ་ཅན་དང་། ལྷམ་ཁྲ་བོ་དག་ཕུད་དེ་བཞག་གོ། །དེ་ནས་ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་རྒྱལ་པོའི་ཆོས་ཀྱི་མཚན་མ་ལྔ་པོ་དག་ཕུད་དེ་
བཞག་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། 

66-1-269b

བཙུན་པ་བདག་ནི་ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལགས་སོ། །བཙུན་པ་བདག་ནི་ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལགས་སོ། །རྒྱལ་པོ་ལགས་སོ་ཞེས་ལན་
གསུམ་གྱི་བར་དུ་རང་གི་མིང་རྗེས་སུ་སྒྲོགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་དེ་བཞིན་ནོ། །དེ་དེ་བཞིན་ཏེ། རྒྱལ་པོ་ཆེན་པོ་ཁྱོད་ནི་ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་
སྙིང་པོ་ཡིན་ནོ། །རྒྱལ་པོ་ཆེན་པོ་ཁྱོད་ནི་ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡིན་ནོ། །རྒྱལ་པོ་ཡིན་ནོ། །རྒྱལ་པོ་ཆེན་པོ་ཁྱོད་རང་གི་སྟན་གང་ཡིན་པ་ལ་འདུག་ཤིག །དེ་ནས་ཡུལ་མ་ག་
དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ། །ཡུལ་མ་ག་དྷཱའི་བྲམ་ཟེ་དང་། ཁྱིམ་བདག་ཁ་ཅིག་གིས་ནི་བཅོམ་ལྡན་འདས་
ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །ཁ་ཅིག་གིས་ནི་བཅོམ་ལྡན་འདས་ལ་མངོན་སུམ་དུ་ཕན་ཚུན་ཀུན་དགའ་བར་འགྱུར་བ་དང་། ཡང་དག་པར་དགའ་བར་འགྱུར་བའི་གཏམ་སྣ་ཚོགས་
དག་གསོལ་ཏེ་ཕྱོགས་གཅིག་ཏུ་འཁོད་དོ། །ཁ་ཅིག་གིས་ནི་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཕྱོགས་གཅིག་ཏུ་འཁོད་དོ། །ཁ་ཅིག་གིས་ནི་རྒྱང་རིང་པོ་ཁོ་ན་ནས་བཅོམ་ལྡན་འདས་མཐོང་
ནས་ཅང་མི་སྨྲ་བར་ཕྱོགས་གཅིག་ཏུ་འཁོད་དོ། །དེའི་ཚེ་ན་རལ་པ་ཅན་ཚེ་དང་ལྡན་པ་ལྟེང་རྒྱས་འོད་སྲུང་འཁོར་དེ་ཉིད་དུ་འདུས་ཏེ་འདུག་པར་གྱུར་ཏོ། །དེ་ནས་ཡུལ་མ་ག་དྷཱའི་བྲམ་ཟེ་དང་། ཁྱིམ་བདག་རྣམས་འདི་སྙམ་དུ་སེམས་
ཏེ་ཅི་དགེ་སྦྱོང་ཆེན་པོ་རལ་པ་ཅན་ལྟེང་རྒྱས་འོད་སྲུང་གི་དྲུང་ན་ཚངས་པར་སྤྱད་པ་སྤྱོད་དམ། འོན་ཏེ་རལ་པ་ཅན་ལྟེང་རྒྱས་འོད་སྲུང་ཉིད་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱད་པ་སྤྱོད་དོ་སྙམ་མོ། །དེ་ནས་བཅོམ་ལྡན་

66-1-270a

འདས་ཀྱིས་ཡུལ་མ་ག་དྷཱའི་བྲམ་ཟེ་དང་། ཁྱིམ་བདག་རྣམས་ཀྱི་སེམས་ཐུགས་ཀྱིས་མཁྱེན་ནས་ཚེ་དང་ལྡན་པ་ལྟེང་རྒྱས་འོད་སྲུང་ལ་ཚིགས་སུ་བཅད་པའི་དབྱངས་ཀྱིས་དྲི་བ་དྲིས་པ། ལྟེང་རྒྱས་གནས་པས་འདི་
ལ་ཅི་མཐོང་ན། །ཁྱོད་ཀྱིས་མེ་སྤངས་བརྟུལ་ཞུགས་ཁོ་ན་སྤྱོད། །ཁྱོད་ཀྱིས་ཇི་ལྟར་མེའི་སྦྱིན་སྲེག་སྤངས། །འོད་སྲུང་དེ་ཡི་དོན་ནི་ང་ལ་སྨྲོས། །ཚེ་དང་ལྡན་པ་ལྟེང་རྒྱས་འོད་སྲུང་གིས་གསོལ་པ། འདི་ན་ཁ་ཅིག་ཟས་དང་
སྐོམ་དག་དང་། །རོ་དང་འདོད་པ་བུད་མེད་རྗོད་བགྱིད་པ། །རྫས་བྱུང་དེ་དག་དྲི་མར་རབ་མཐོང་བས། །དེ་སླད་མཆོད་སྦྱིན་སྲེག་ལ་བདག་མི་དགའ། །བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ཁྱོད་ནི་འདོད་དང་ཟས་སྐོམ་
དང་། །དེ་བཞིན་རོ་རྣམས་དག་ལ་ཡིད་དགར་མི་བདེ་ན། །ཇི་ལྟར་ལྷ་མིའི་འཇིག་རྟེན་དག་ལ་ཁྱོད་ཀྱི་ཡིད། །དགའ་བར་བྱེད་པ་དྲིས་པ་འོད་སྲུང་སྨྲོས། །ཚེ་དང་ལྡན་པ་ལྟེང་རྒྱས་འོད་སྲུང་གིས་གསོལ་པ། གོ་འཕང་ཞི་མཆོག་ཕུང་
པོ་མ་མཆིས་ཤིང་། །ཅི་ཡང་མ་མཆིས་འདོད་སྲིད་མ་ཆགས་ལ། །མི་འགྱུར་གཞན་གྱིས་མི་དཀྲི་མཐོང་ལགས་པས། །དེ་སླད་མཆོད་སྦྱིན་སྲེག་ལ་བདག་མི་དགའ། །མི་ཉམས་གོ་འཕང་དམ་པ་མ་མཐོང་ཚེ། །མཆོད་
སྦྱིན་བརྟུལ་ཞུགས་རྣམས་ཀྱང་ཞུགས་ཀྱིས་ཀྱང་། །གྲོལ་བར་འགྱུར་ཞེས་བདག་ཡིད་རྨོངས་གྱུར་ཅིང་། །ལྡོངས་ཤིང་སྐྱེ་ཤིའི་རྗེས་སུ་ཞུགས་པར་གྱུར། །གཽ་ཏམ་སྐྱེ་མང་དོན་དུ་རྣམ་འདྲེན་པ། །ཐུབ་པ་བདེན་པའི་རྩལ་
མངའ་ཁྱོད་བྱུང་ཞིང་། །གཙོ་མཆོག་སྐྱོབ་པས་ལེགས་བཤད་ད་ལྟར་ནི། །གོ་འཕང་འདུས་མ་བགྱིས་དེ་བདག་གིས་མཐོང་། །བཅོམ་ལྡན་འདས་ཀྱིས་བཀའ་སྩལ་པ། རབ་ཏུ་རྣམ་པར་ཕྱེ་བའི་ཆོས་རྣམས་ལས། །དམ་
པ་གང་ཡིན་དེ་ནི་རྟོགས་གྱུར་པ། །དེ་ནི་ཁྱོད་ཀྱིས་ཉེས་བསམས་མ་ཡིན་ཏེ། །ཁྱོད་ཀྱིས་ངེས་པ་ལེགས་པར་རྟོགས་པ་ཡིན། །འོད་སྲུང་འཁོར་རྣམས་སྐྱོ་བ་མ་སྐྱེད་ཅིག །དེ་ནས་ཚེ་དང་ལྡན་པ་ལྟེང་རྒྱས་འོད་སྲུང་བཅོམ་

66-1-270b

ལྡན་འདས་ཀྱིས་སྐབས་ཕྱེ་བས། ཇི་ལྟར་སེམས་མཉམ་པར་བཞག་པ་བཞིན་དུ་བདག་གི་སྟན་གྱི་སྟེང་ན་མི་སྣང་བར་གྱུར་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ནས་ཤར་ཕྱོགས་ཀྱི་སྟེང་གི་ནམ་མཁའ་ལ་
མངོན་པར་འཕགས་ཏེ། སྤྱོད་ལམ་རྣམ་པ་བཞི་པོ་འདི་ལྟ་སྟེ། འཆག་པ་དང་། འགྲེང་བ་དང་། འདུག་པ་དང་། ཉལ་བ་དག་བྱེད་དོ། །མེའི་ཁམས་ལ་ཡང་སྙོམས་པར་ཞུགས་ཏེ། ཚེ་དང་ལྡན་པ་ལྟེང་རྒྱས་འོད་སྲུང་མེའི་
ཁམས་ལ་སྙོམས་པར་ཞུགས་པའི་ལུས་ལས་འོད་ཟེར་རྣམ་པ་སྣ་ཚོགས་འདི་ལྟ་སྟེ། སྔོན་པོ་དག་དང་། སེར་པོ་དང་། དམར་པོ་དག་དང་། དཀར་པོ་དག་དང་། བཙོད་ཀ་དག་དང་། ཤེལ་གྱི་ཁ་དོག་ལྟ་བུ་དག་བྱུང་ངོ་། །ཆོ་
འཕྲུལ་ཟུང་དག་ཀྱང་རྣམ་པར་བསྟན་ཏེ། ལུས་ཀྱི་སྨད་ནས་མེ་འབར་ལ་ལུས་ཀྱི་སྟོད་ནས་ཆུ་གྲང་མོའི་རྒྱུན་འབབ་པ་དང་། ལུས་ཀྱི་སྟོད་ནས་མེ་འབར་ལ་ལུས་ཀྱི་སྨད་ནས་ཆུ་གྲང་མོའི་རྒྱུན་འབབ་པ་དག་ཀྱང་རྣམ་
པར་བསྟན་ཏོ། །ཤར་ཕྱོགས་སུ་ཇི་ལྟ་བ་བཞིན་དུ་ལྷོ་དང་། ནུབ་དང་། བྱང་ཕྱོགས་ཀྱི་སྟེང་གི་ནམ་མཁའ་ལ་ཡང་མངོན་པར་འཕགས་ཏེ། སྤྱོད་ལམ་རྣམ་པ་བཞི་པོ་འདི་ལྟ་སྟེ། འཆག་པ་དང་། འགྲེང་བ་དང་། འདུག་
པ་དང་། ཉལ་བ་དག་བྱེད་དོ། །མེའི་ཁམས་ལ་ཡང་སྙོམས་པར་ཞུགས་ཏེ། ཚེ་དང་ལྡན་པ་ལྟེང་རྒྱས་འོད་སྲུང་མེའི་ཁམས་ལ་སྙོམས་པར་ཞུགས་པའི་ལུས་ལས་འོད་ཟེར་རྣམ་པ་སྣ་ཚོགས་འདི་ལྟ་སྟེ། སྔོན་པོ་དག་དང་། 
སེར་པོ་དག་དང་། དམར་པོ་དག་དང་། དཀར་པོ་དག་དང་། བཙོད་ཀ་དག་དང་། ཤེལ་གྱི་ཁ་དོག་ལྟ་བུ་དག་བྱུང་ངོ་། །ཆོ་འཕྲུལ་ཟུང་དག་ཀྱང་རྣམ་པར་བསྟན་ཏེ། ལུས་ཀྱི་སྨད་ནས་མེ་འབར་ལ་ལུས་ཀྱི་སྟོད་ནས་ཆུ་གྲང་མོའི་རྒྱུན་
འབབ་པ་དང་། ལུས་ཀྱི་སྟོད་ནས་མེ་འབར་ལ་ལུས་ཀྱི་སྨད་ནས་ཆུ་གྲང་མོའི་རྒྱུན་འབབ་པ་དག་ཀྱང་རྣམ་པར་སྟོན་ཏོ། །དེ་ལྟར་ཕྱོགས་བཞིར་རྫུ་འཕྲུལ་རྣམ་པ་བཞི་བསྟན་ནས་རྫུ་འཕྲུལ་མངོན་པར་འདུ་བྱ་བ་དེ་དག་ཕྱིར་

66-1-271a

བསྡུས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་གཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་ནི་བདག་གི་སྟོན་པ་ལགས་སོ། །བདག་ནི་བཅོམ་ལྡན་འདས་ཀྱི་ཉན་ཐོས་ལགས་སོ། །བཅོམ་ལྡན་འདས་ནི་བདག་གི་སྟོན་པ་ལགས་སོ། །སྟོན་པ་ལགས་སོ། །བདག་ནི་བཅོམ་ལྡན་
འདས་ཀྱི་ཉན་ཐོས་ལགས་སོ། །ཉན་ཐོས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེ་དེ་བཞིན་ནོ། །དེ་དེ་བཞིན་ཏེ། འོད་སྲུང་ང་ནི་ཁྱོད་ཀྱི་སྟོན་པ་ཡིན་ནོ། །ཁྱོད་ནི་ངའི་ཉན་ཐོས་ཡིན་ནོ། །འོད་
སྲུང་ང་ནི་ཁྱོད་ཀྱི་སྟོན་པ་ཡིན་ནོ། །སྟོན་པ་ཡིན་ནོ། །ཁྱོད་ནི་ངའི་ཉན་ཐོས་ཡིན་ནོ། །ཉན་ཐོས་ཡིན་ནོ། །འོད་སྲུང་ཁྱོད་རང་གི་སྟན་གང་ཡིན་པ་ལ་འདུག་ཤིག །དེ་ནས་ཚེ་དང་ལྡན་པ་ལྟེང་རྒྱས་འོད་སྲུང་གིས་བཅོམ་ལྡན་
འདས་ཀྱི་ཞབས་ལ་མགོ་བོས་ཕྱག་འཚལ་ཏེ། རང་གི་སྟན་གང་ཡིན་པ་དེ་ལ་འདུག་གོ། །དེ་ནས་ཡུལ་མ་ག་དྷཱའི་བྲམ་ཟེ་དང་། ཁྱིམ་བདག་རྣམས་འདི་སྙམ་དུ་སེམས་ཏེ། དགེ་སྦྱོང་ཆེན་པོ་ནི་རལ་པ་ཅན་ལྟེང་རྒྱས་འོད་
སྲུང་གི་དྲུང་ན་ཚངས་པར་སྤྱད་པ་སྤྱོད་པ་མ་ཡིན་གྱི། རལ་པ་ཅན་ལྟེང་རྒྱས་འོད་སྲུང་ཉིད་དགེ་སློང་ཆེན་པོའི་སྤྱན་སྔར་ཚངས་པར་སྤྱད་པ་སྤྱོད་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡུལ་མ་ག་དྷཱའི་རྒྱལ་པོ་བཟོ་
སྦྱངས་གཟུགས་ཅན་སྙིང་པོ་ལ་བཀའ་སྩལ་པ། རྒྱལ་པོ་ཆེན་པོ་གཟུགས་ནི་སྐྱེ་བ་ཡང་མ་ཡིན། འཇིག་པ་ཡང་མ་ཡིན་ཏེ། དེའི་སྐྱེ་བ་དང་འཇིག་པ་ཡང་རྟོགས་པར་བྱའོ། །རྒྱལ་པོ་ཆེན་པོ་ཚོར་བ་དང་། འདུ་ཤེས་དང་། 
འདུ་བྱེད་རྣམས་དང་། རྣམ་པར་ཤེས་པ་ནི་སྐྱེ་བ་ཡང་མ་ཡིན། འཇིག་པ་ཡང་མ་ཡིན་ཏེ། དེའི་སྐྱེ་བ་དང་། འཇིག་པ་ཡང་རྟོགས་པར་བྱའོ། །རྒྱལ་པོ་ཆེན་པོ་གཟུགས་ཀྱི་སྐྱེ་བ་དང་། འཇིག་པའི་ཆོས་ཉིད་རྟོགས་པའི་

66-1-271b

རིགས་ཀྱི་བུས་ནི་གཟུགས་དེ་ཡོངས་སུ་ཤེས་པ་ཡིན་ནོ། །རྒྱལ་པོ་ཆེན་པོ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའི་སྐྱེ་བ་དང་། འཇིག་པའི་ཆོས་ཉིད་རྟོགས་པའི་རིགས་ཀྱི་བུས་ནི་རྣམ་པར་
ཤེས་པ་དེ་ཡོངས་སུ་ཤེས་པ་ཡིན་ནོ། །རྒྱལ་པོ་ཆེན་པོ་གཟུགས་ཡོངས་སུ་ཤེས་པའི་རིགས་ཀྱི་བུ་ནི་བདག་དང་བདག་གི་ཞེས་ཁས་ལེན་པར་མི་བྱེད། ཉེ་བར་ལེན་པར་མི་བྱེད། ལྷག་པའི་ཆགས་པར་མི་བྱེད། མངོན་
པར་ཞེན་པར་མི་བྱེད་དོ། །རྒྱལ་པོ་ཆེན་པོ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡོངས་སུ་ཤེས་པའི་རིགས་ཀྱི་བུ་ནི་བདག་དང་བདག་གི་ཞེས་ཁས་ལེན་པར་མི་བྱེད། ཉེ་བར་ལེན་པར་མི་
བྱེད། ལྷག་པར་གནས་པར་མི་བྱེད། མངོན་པར་ཞེན་པར་མི་བྱེད་དོ། །རྒྱལ་པོ་ཆེན་པོ་གཟུགས་བདག་གིར་མི་བྱེད། ཁས་ལེན་པར་མི་བྱེད། ཉེ་བར་ལེན་པར་མི་བྱེད། ལྷག་པར་གནས་པར་མི་བྱེད། མངོན་པར་ཞེན་
པར་མི་བྱེད་པའི་རིགས་ཀྱི་བུ་ནི་ཚད་མེད་པ་དང་། གྲངས་མེད་པ་ཡིན་ཏེ། མྱ་ངན་ལས་འདས་པ་ཡིན་པར་ང་སྨྲའོ། །རྒྱལ་པོ་ཆེན་པོ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་བདག་གིར་མི་
བྱེད། ཁས་ལེན་པར་མི་བྱེད། ཉེ་བར་ལེན་པར་མི་བྱེད། ལྷག་པར་གནས་པར་མི་བྱེད། མངོན་པར་ཞེན་པར་མི་བྱེད་པའི་རིགས་ཀྱི་བུ་ནི་ཚད་མེད་པ་དང་། གྲངས་མེད་པ་ཡིན་ཏེ། མྱ་ངན་ལས་འདས་པ་ཡིན་པར་ང་
སྨྲའོ། །དེ་ནས་ཡུལ་མ་ག་དྷཱའི་བྲམ་ཟེ་དང་། ཁྱིམ་བདག་རྣམས་འདི་སྙམ་དུ་སེམས་ཏེ། གལ་ཏེ་གཟུགས་བདག་མ་ཡིན་ཞིང་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ཡང་བདག་མ་
ཡིན་ན། འོ་ན་ཅི་གང་ནམ་ཡང་བྱུང་བར་མ་གྱུར་པ་དང་། འབྱུང་བར་མི་འགྱུར་བ་དང་། ད་ལྟར་ཡང་མེད་པ་ཡང་མ་ཡིན་ཞིང་། གང་དེ་དང་དེ་དག་ཏུ་དགེ་བ་དང་། སྡིག་པའི་ལས་བྱས་ཤིང་། བྱས་པ་དག་གི་རྣམ་པར་སྨིན་པ་

66-1-272a

སོ་སོར་མྱོང་བར་བྱེད་པ་དང་། གང་ཕུང་པོ་འདི་འདོར་ཞིང་ཕུང་པོ་གཞན་དང་ཉིང་མཚམས་སྦྱོར་བར་འགྱུར་བའི་བདག་གམ། སེམས་ཅན་ནམ་སྲོག་གམ། སྐྱེ་བ་འམ། གསོ་བ་འམ། གང་ཟག་གམ། ཤེད་ལས་སྐྱེས་
སམ། ཤེད་བུ་འམ། བྱེད་པ་པོ་འམ། བྱེད་དུ་འཇུག་པ་པོ་འམ། སྐྱེད་པ་པོ་འམ། ཀུན་ནས་སྐྱེད་པ་པོ་འམ། སློང་བ་པོ་འམ། ཀུན་ནས་སློང་བ་པོ་འམ། སྨྲ་བ་པོ་འམ། མྱོང་བ་པོ་འམ། སོ་སོར་མྱོང་བ་པོ་དེ་གང་ཞིག་ཡིན་སྙམ་མོ། །
དེ་ནས་བཅོམ་ལྡན་འདས་ཀྱིས་ཡུལ་མ་ག་དྷཱའི་བྲམ་ཟེ་དང་། ཁྱིམ་བདག་རྣམས་ཀྱི་སེམས་ཐུགས་ཀྱིས་མཁྱེན་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ནི་བདག་
བདག་ཅེས་ཐ་སྙད་འདོགས་པའི་རྗེས་སུ་ལྷུང་སྟེ། དེ་ལ་ནི་བདག་གམ་བདག་གིར་བྱ་བ་མེད་དོ། །དགེ་སློང་དག་སྡུག་བསྔལ་འདི་སྐྱེ་བ་ནི་སྐྱེ་ལ། སྡུག་བསྔལ་འགགས་པ་ནི་འགག་གོ། །འདུ་བྱེད་རྣམས་སྐྱེ་བ་ནི་སྐྱེ་ལ། འདུ་བྱེད་རྣམས་
འགག་པ་ནི་འགག་སྟེ། རྒྱུ་དེ་དག་དང་། རྐྱེན་དེ་དག་ལ་བརྟེན་ནས་སེམས་ཅན་རྣམས་ཀྱི་འདུ་བྱེད་ཀྱི་རྒྱུན་འབྱུང་བར་འགྱུར་ཏེ། དགེ་སློང་དག་དེ་བཞིན་གཤེགས་པ་ནི་འདུ་བྱེད་ཀྱི་རྒྱུན་ཉིང་མཚམས་སྦྱོར་བར་ཐུགས་སུ་ཆུད་ནས་སེམས་
ཅན་རྣམས་ཀྱི་འཆི་འཕོ་དང་། སྐྱེ་བ་འདོགས་པར་མཛད་དོ། །དགེ་སློང་དག་ངས་ལྷའི་སྤྱན་རྣམ་པར་དག་པ་མིའི་ལས་ཤིན་དུ་འདས་པས་སེམས་ཅན་འཆི་འཕོ་བ་དག་དང་། སྐྱེ་བ་དག་དང་། མདོག་བཟང་བ་དག་དང་། མདོག་ངན་པ་དག་
དང་། ངན་པ་དག་དང་། བཟང་པོ་དག་དང་། བདེ་འགྲོར་འགྲོ་བ་དག་དང་། ངན་འགྲོར་འགྲོ་བ་དག་ཀྱང་གཟིགས་ལ། སེམས་ཅན་ཤེས་པ་དང་ལྡན་པ་འདི་དག་ནི་ལུས་ཀྱིས་ཉེས་པར་སྤྱོད་པ་དང་ལྡན་པ། ངག་དང་ཡིད་ཀྱིས་ཉེས་པར་སྤྱོད་
པ་དང་ལྡན་པ། འཕགས་པ་རྣམས་ལ་སྐུར་པ་འདེབས་པ། ལོག་པར་ལྟ་བ་དག་སྟེ། ལོག་པར་ལྟ་བའི་ལས་དང་། ཆོས་ཡང་དག་པར་བླངས་པའི་རྒྱུས་ལུས་ཞིག་སྟེ་ཤི་བའི་འོག་ཏུ་རྒྱུ་དེ་དང་རྐྱེན་དེས་ངན་སོང་ངན་འགྲོ་ལོག་པར་

66-1-272b

ལྟུང་བ་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་བ་དང་། སེམས་ཅན་ཤེས་པ་དང་ལྡན་པ་འདི་དག་ནི་ལུས་ཀྱིས་ལེགས་པར་སྤྱོད་པ་དང་ལྡན་པ། ངག་དང་ཡིད་ཀྱིས་ལེགས་པར་སྤྱོད་པ་དང་ལྡན་པ། འཕགས་པ་
རྣམས་ལ་སྐུར་པ་མི་འདེབས་པ། ཡང་དག་པར་ལྟ་བ་དག་སྟེ། ཡང་དག་པར་ལྟ་བའི་ལས་དང་། ཆོས་ཡང་དག་པར་བླངས་པའི་རྒྱུས་ལུས་ཞིག་སྟེ་ཤི་བའི་འོག་ཏུ་རྒྱུ་དེ་དང་། རྐྱེན་དེས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷ་
རྣམས་ཀྱི་ནང་དུ་སྐྱེ་བར་འགྱུར་རོ་ཞེས་སེམས་ཅན་རྣམས་ལས་ཇི་ལྟ་བ་བཞིན་དུ་ཉེ་བར་འགྲོ་བ་དག་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དགེ་སློང་དག་ངས་དེ་ལྟར་མཁྱེན་ཅིང་དེ་ལྟར་གཟིགས་པས་ན། ང་ནི་
གང་ནམ་ཡང་བྱུང་བར་མ་གྱུར་པ་དང་། འབྱུང་བར་མི་འགྱུར་བ་དང་། ད་ལྟར་ཡང་མེད་པའང་མ་ཡིན་ཞིང་། གང་དེ་དང་དེ་དག་ཏུ་དགེ་བ་དང་། སྡིག་པའི་ལས་བྱས་ཤིང་བྱས་པ་དག་གི་རྣམ་པར་སྨིན་པ་སོ་སོར་མྱོང་བར་བྱེད་
པ་དང་། གང་ཕུང་པོ་འདི་འདོར་ཞིང་ཕུང་པོ་གཞན་དང་ཉིང་མཚམས་སྦྱོར་བ་དེ་ཆོས་གྱི་བརྡ་མ་གཏོགས་པར་བདག་གམ། སེམས་ཅན་ནམ། སྲོག་གམ། སྐྱེ་བ་འམ། གསོ་བ་འམ། གང་ཟག་གམ། ཤེད་ལས་
སྐྱེས་སམ། ཤེད་བུ་འམ། བྱེད་པ་པོ་འམ། བྱེད་དུ་འཇུག་པ་པོ་འམ། སྐྱེད་པ་པོ་འམ། ཀུན་ནས་སྐྱེད་པ་པོ་འམ། སློང་བ་པོ་འམ། ཀུན་ནས་སློང་བ་པོ་འམ། སྨྲ་བ་པོ་འམ། མྱོང་བ་པོ་འམ། སོ་སོར་མྱོང་བ་
པོ་ཡིན་ནོ་ཞེས་མི་སྨྲའོ། །དེ་ལ་ཆོས་ཀྱི་བརྡ་ནི་འདི་ཡིན་ཏེ། འདི་ལྟ་སྟེ། འདི་ཡོད་པའི་ཕྱིར་འདི་འབྱུང་ལ། འདི་སྐྱེས་པའི་ཕྱིར་འདི་སྐྱེ་བ་སྟེ། འདི་ལྟ་སྟེ། མ་རིག་པའི་རྐྱེན་ཀྱིས་འདུ་བྱེད་རྣམས་འདུ་བྱེད་རྣམས་ཀྱི་
རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་

66-1-273a

པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་
རྣམས་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཤིག་པོ་འདི་འབྱུང་བར་འགྱུར་རོ། །འདི་ལྟ་སྟེ། འདི་མེད་པས་འདི་མི་འབྱུང་ལ། འདི་འགགས་པས་འདི་འགག་པ་སྟེ། འདི་ལྟ་སྟེ། མ་རིག་པ་
འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་
འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་
སྐྱེ་བ་འགག །སྐྱེ་བ་འགགས་པས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འགག་པར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་
ཤིག་པོ་འདི་འགག་པར་འགྱུར་རོ། །དགེ་སློང་དག་དེ་ལྟར་ན་འདུ་བྱེད་རྣམས་ནི་སྡུག་བསྔལ་བ་ཡིན་ལ། མྱ་ངན་ལས་འདས་པ་ནི་ཞི་བ་ཡིན་ཏེ། རྒྱུ་ཀུན་འབྱུང་བ་ལས་སྡུག་བསྔལ་ཀུན་འབྱུང་བར་འགྱུར་ལ། རྒྱུ་
འགགས་པ་ལས་སྡུག་བསྔལ་འགག་པ་དང་། ལམ་གྱི་རྒྱུན་འཆད་པ་དང་། མི་འབྱུང་བ་དང་། ཉིང་མཚམས་སྦྱོར་བ་མེད་ཅིང་འགག་པར་འགྱུར་ཏེ། སྡུག་བསྔལ་གྱི་མཐའ་ནི་དེ་ལྟ་བུ་ཁོ་ན་ཡིན་ནོ། །དགེ་སློང་དག་དེ་ལ་སྡུག་བསྔལ་
གང་ཡིན་པ་དེ་འགག་པ་དང་། དེ་ཉེ་བར་ཞི་བ་དང་། དེ་བསིལ་བར་གྱུར་པ་དང་། དེ་ནུབ་པར་གྱུར་པ་མ་གཏོགས་པར་སུ་ཞིག་ཡོངས་སུ་མྱ་ངན་ལས་འདས་ཏེ། དགེ་སློང་དག་འདི་ལྟ་སྟེ། ཕུང་པོ་ཀུན་སྤངས་པ། སྲེད་

66-1-273b

པ་ཟད་པ། འདོད་ཆགས་དང་བྲལ་བ། འགོག་པ་མྱ་ངན་ལས་འདས་པའི་གོ་འཕང་འདི་ནི་ཞི་བ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡང་ལན་གཉིས་སུ་ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་
ལ་བཀའ་སྩལ་པ། རྒྱལ་པོ་ཆེན་པོ་ཇི་སྙམ་དུ་སེམས། གཟུགས་རྟག་པ་ཞིག་གམ། མི་རྟག་པ་ཞིག་ཡིན་སྙམ། རྒྱལ་པོས་གསོལ་པ། བཙུན་པ་དེ་ནི་མི་རྟག་པ་ལགས་སོ། །བཅོམ་ལྡན་འདས་ཀྱིས་བཀའ་
སྩལ་པ། རྒྱལ་པོ་ཆེན་པོ་གང་མི་རྟག་པ་དེ་སྡུག་བསྔལ་བ་ཞིག་གམ། སྡུག་བསྔལ་བ་མ་ཡིན། རྒྱལ་པོས་གསོལ་པ། བཙུན་པ་དེ་ནི་སྡུག་བསྔལ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་འོ་ན་
གང་མི་རྟག་པ་དང་། སྡུག་བསྔལ་བ་དང་། རྣམ་པར་འགྱུར་བའི་ཆོས་ཅན་དེ་ལ། འཕགས་པ་ཉན་ཐོས་ཐོས་པ་དང་ལྡན་པ་དག་འདི་ནི་བདག་གིའོ། །འདི་ནི་བདག་གོ། འདི་ནི་བདག་གི་བདག་གོ་ཞེས་བདག་ཏུ་ཁས་ལེན་པར་
བྱེད་དམ། རྒྱལ་པོས་གསོལ་པ། བཙུན་པ་མི་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་
རྟག་པ་ཞིག་གམ། མི་རྟག་པ་ཞིག་ཡིན་སྙམ་འམ། རྒྱལ་པོས་གསོལ་པ། བཙུན་པ་དེ་ནི་མི་རྟག་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་གང་མི་རྟག་པ་དེ་སྡུག་བསྔལ་བ་ཞིག་གམ། 
སྡུག་བསྔལ་བ་མ་ཡིན། རྒྱལ་པོས་གསོལ་པ། བཙུན་པ་དེ་ནི་སྡུག་བསྔལ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་འོ་ན་གང་མི་རྟག་པ་དང་། སྡུག་བསྔལ་བ་དང་། རྣམ་པར་འགྱུར་བའི་ཆོས་
ཅན་དེ་ལ་འཕགས་པ་ཉན་ཐོས་ཐོས་པ་དང་ལྡན་པ་དག །འདི་ནི་བདག་གིའོ། །འདི་ནི་བདག་གོ། །འདི་ནི་བདག་གི་བདག་གོ་ཞེས་བདག་ཏུ་ཁས་ལེན་པར་བྱེད་དམ། རྒྱལ་པོས་གསོལ་པ། བཙུན་པ་མི་བགྱིད་ལགས་སོ། །

66-1-274a

བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་ལྟ་བས་ན་གཟུགས་གང་ཅི་ཡང་རུང་བ་འདས་པ་དང་། མ་འོངས་པ་འམ། ད་ལྟར་བྱུང་བ་འམ། ནང་གི་འམ། ཕྱི་རོལ་གྱི་འམ། རགས་པ་འམ། ཕྲ་བ་འམ། 
བཟང་པོ་འམ། ངན་པ་འམ། གང་རྒྱང་རིང་བ་འམ། གང་ཐག་ཉེ་བ་དེ་དག་ཐམས་ཅད་ལ་ཡང་དག་པའི་ཤེས་རབ་ཀྱིས་འདི་ནི་བདག་གི་མ་ཡིན་ནོ། །འདི་ནི་བདག་མ་ཡིན་ནོ། །འདི་ནི་བདག་གི་བདག་མ་ཡིན་ནོ་ཞེས་དེ་ལྟར་དེ་དག་
ལ་ཡང་དག་པ་ཇི་ལྟ་བ་བཞིན་དུ་བལྟ་བར་བྱའོ། །ཚོར་བ་དང་། འདུ་ཤེས་དང་། འདུ་བྱེད་གང་ཅི་ཡང་རུང་བ་དག་དང་། རྣམ་པར་ཤེས་པ་གང་ཅི་ཡང་རུང་བ་འདས་པ་འམ། མ་འོངས་པ་འམ། ད་ལྟར་བྱུང་བ་འམ། ནང་གི་འམ། 
ཕྱི་རོལ་གྱི་འམ། རགས་པ་འམ། ཕྲ་བ་འམ། བཟང་པོ་འམ། ངན་པ་འམ། གང་རྒྱང་རིང་བ་འམ། གང་ཐག་ཉེ་བ་དེ་དག་ཐམས་ཅད་ལ་ཡང་དག་པའི་ཤེས་རབ་ཀྱིས་འདི་ནི་བདག་གི་མ་ཡིན་ནོ། །འདི་ནི་བདག་མ་ཡིན་ནོ། །འདི་
ནི་བདག་གི་བདག་མ་ཡིན་ནོ་ཞེས་དེ་ལྟར་དེ་དག་ལ་ཡང་དག་པ་ཇི་ལྟ་བ་བཞིན་དུ་བལྟ་བར་བྱའོ། །རྒྱལ་པོ་ཆེན་པོ་དེ་ལྟར་ལྟ་བའི་འཕགས་པ་ཉན་ཐོས་ཐོས་པ་དང་ལྡན་པ་ནི་གཟུགས་ལ་ཡང་སྐྱོ་བར་འགྱུར། ཚོར་བ་དང་། འདུ་
ཤེས་དང་། འདུ་བྱེད་རྣམས་དང་། རྣམ་པར་ཤེས་པ་ལ་ཡང་སྐྱོ་བར་འགྱུར་རོ། །སྐྱོ་ན་འདོད་ཆགས་དང་བྲལ་བར་འགྱུར་རོ། །འདོད་ཆགས་དང་བྲལ་ན་རྣམ་པར་གྲོལ་བར་འགྱུར་རོ། །རྣམ་པར་གྲོལ་བས་བདག་ནི་སྐྱེ་བ་ཟད་
དེ། ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་རྣམ་པར་གྲོལ་བ་ཤེས་ཤིང་མཐོང་བར་འགྱུར་རོ། །ཆོས་ཀྱི་རྣམ་གྲངས་འདི་བཤད་པ་ན་ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་
ཅན་སྙིང་པོ་དང་། ལྷ་བརྒྱད་ཁྲིད་དང་། ཡུལ་མ་ག་དྷཱའི་བྲམ་ཟེ་དང་། ཁྱིམ་བདག་འབུམ་ཕྲག་དུ་མ་དག་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ཆོས་

66-1-274b

མཐོང་ཞིང་ཆོས་ཐོབ་ལ། ཆོས་རྟོགས་ཤིང་ཆོས་ཀྱི་གཏིང་སླེབས་ཏེ། ནེམ་ནུར་ལས་རྒལ་ཏེ། ཐེ་ཙོམ་ལས་རྒལ་ཅིང་གཞན་གྱི་དྲིང་མི་འཇོག་པ་དང་། གཞན་གྱིས་བཀྲིར་མི་ཟུག་པ་དང་། སྟོན་པའི་བསྟན་པའི་ཆོས་རྣམས་ལ་མི་
འཇིགས་པ་ཐོབ་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་
ཅེས་གསོལ་ཏོ། །བཙུན་པ་བདག་ནི་མངོན་པར་ཞུགས་པ་ལགས་སོ། །བདག་ནི་མངོན་པར་ཞུགས་པ་ལགས་སོ། །བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས། བདག་
དེང་སླན་ཆད་ཇི་སྲིད་འཚོའི་བར་དུ་སྲོག་གཅོད་པ་ལ་སོགས་པ་སྤངས་པ། སྐྱབས་སུ་མཆིས་པ། མངོན་པར་དད་པར་གྱུར་པའི་དགེ་བསྙེན་ལགས་པར་གཟུང་དུ་གསོལ། བདག་གིས་ཇི་སྲིད་འཚོའི་བར་དུ་བཅོམ་ལྡན་
འདས་དགེ་སློང་གི་དགེ་འདུན་དང་བཅས་པ་ལ་ན་བཟའ་དང་། བསོད་སྙོམས་དང་། གཟིམས་ཆ་དང་། གདན་དང་། སྙུན་གྱི་གསོས་སྨན་ཡོ་བྱད་དག་གིས་བསྙེན་བཀུར་བགྱི་བར་འཚལ་ན། བཅོམ་ལྡན་འདས་རྒྱལ་པོའི་ཁབ་ཏུ་
གཤེགས་པར་ཅི་གནང་། བཅོམ་ལྡན་འདས་ཀྱིས་ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ཅང་མི་གསུང་བས་གནང་བར་མཛད་དོ། །དེ་ནས་ཡུལ་མ་ག་དྷཱའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་
བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་ཅིང་རྗེས་སུ་ཡིད་རང་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་
ལྡན་འདས་ཀྱི་སྤྱན་སྔ་ནས་ཕྱིར་སོང་ངོ་། །མདོ་ཆེན་པོ་གཟུགས་ཅན་སྙིང་པོས་བསུ་བ་ཞེས་བྱ་བ་རྫོགས་སོ།། །། རྒྱ་གར་གྱི་མཁན་པོ་འཛི་ན་མི་ཏྲ་དང་། པྲ་ཛྙཱ་ཝརྨ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་

66-1-275a

ཕབ་པ།།   །།༄༅། ། རྒྱ་གར་སྐད་དུ། ཤཱུ་ནྱ་ཏཱ་ནཱ་མ་མ་ཧཱ་སཱུ་ཏྲམ།  བོད་སྐད་དུ། མདོ་ཆེན་པོ་སྟོང་པ་ཉིད་ཅེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་
འདས་མཉན་ཡོད་ཀྱི་ཤར་གྱི་ཀུན་དགའ་ར་བ་ན་རི་དགས་འཛིན་གྱི་མའི་ཁང་བཟང་ན་བཞུགས་སོ། །དེ་ནས་ཚེ་དང་ལྡན་པ་ཀུན་དགའ་བོ་ཕྱི་དྲོ་ནང་དུ་ཡང་དག་འཇོག་ལས་ལངས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། 
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་དུས་གཅིག་
ན་བཅོམ་ལྡན་འདས་ཤཱཀྱ་རྣམས་ཀྱི་ནང་ན་ཤཱཀྱ་རྣམས་ཀྱི་གྲོང་རྡལ་གྲོང་ཁྱེར་ཞེས་བགྱི་བ་ན་བཞུགས་པ་དེའི་ཚེ། དེ་ནས་བཅོམ་ལྡན་འདས་ཀྱིས་འདི་སྐད་ཅེས་ཀུན་དགའ་བོ་ང་ནི་སྟོང་པ་ཉིད་ཀྱིས་ལན་མང་དུ་གནས་
སོ་ཞེས་བཀའ་སྩལ་པའི་དོན་བདག་གིས་འཚལ་ལགས་ན། བཙུན་པ་ཅི་བཅོམ་ལྡན་འདས་ཀྱིས་བཀའ་སྩལ་པ། བདག་གིས་ལེགས་པར་མཉན་ཅིང་ལེགས་པར་བཟུང་། ལེགས་པར་ཡིད་ལ་བགྱིས་པར་
བསྙེན། ལེགས་པར་རྟོགས་པ་དེ་བཞིན་དུ་མ་ལགས་ཤིང་དེ་ཁོ་ན་བཞིན་ལགས་སམ། བཀའ་སྩལ་པ། ཀུན་དགའ་བོ་དེ་དེ་བཞིན་ཏེ། ངས་བཤད་པ་ཁྱོད་ཀྱིས་ལེགས་པར་མཉན་ཅིང་ལེགས་པར་བཟུང་། ལེགས་
པར་བསྟེན། ལེགས་པར་རྟོགས་པ་དེ་ནི་གཞན་དུ་མ་ཡིན་ཏེ་དེ་ཁོ་ན་བཞིན་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་ང་ནི་དེའི་ཚེ་དང་ད་ལྟར་ཡང་སྟོང་པ་ཉིད་ཀྱིས་ལན་མང་དུ་གནས་པའི་ཕྱིར་རོ། །ཀུན་དགའ་བོ་འདི་ལྟ་
སྟེ། དཔེར་ན་རི་དགས་འཛིན་གྱི་མའི་ཁང་བཟང་འདི་གླང་པོ་ཆེ་དང་། རྟ་དང་། བ་ལང་དང་། ལུག་དང་། བྱ་གག་དང་། ཕག་གིས་སྟོང་ཞིང་ནོར་དང་། འབྲུ་དང་། འགྲོན་བུ་དང་། གསེར་གྱིས་སྟོང་ལ། བྲན་དང་། བྲན་མོ་དང་། 

66-1-275b

ལས་བྱེད་པ་དང་། ཞོ་ཤས་འཚོ་བ་དག་དང་། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དག་གིས་སྟོང་ཡང་འདི་ན་འདི་ལྟ་སྟེ། དགེ་སློང་གི་དགེ་འདུན་ཁོ་ན་འམ། དེ་ལས་ཁ་ཅིག་ལ་བརྟེན་ནས་མི་སྟོང་པ་ཡང་ཡོད་དོ། །
ཀུན་དགའ་བོ་དེ་བཞིན་དུ་གང་ལ་གང་མེད་པ་དེ་དེས་སྟོང་ངོ་ཞེས་བྱ་བར་ཡང་དག་པར་རྗེས་སུ་མཐོང་ཡང་། དེ་ལ་ལྷག་མ་གང་ཡོད་པ་དེ་དེ་ལ་ཡོད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཀུན་དགའ་བོ་
སྟོང་པ་ཉིད་ལ་འཇུག་པ་འདི་ནི་ཡང་དག་པ་ཇི་ལྟ་བ་བཞིན་ཏེ་ཕྱིན་ཅི་མ་ལོག་པ་ཡིན་ནོ། །ཀུན་དགའ་བོ་དེ་ལྟ་བས་ན་དགེ་སློང་ཡང་ཀྱཻ་མ་བདག་སྟོང་པ་ཉིད་ཀྱིས་ལན་མང་དུ་གནས་པར་བྱའོ་ཞེས་འདོད་པར་གྱུར་ན། ཀུན་དགའ་
བོ་དགེ་སློང་དེས་གྲོང་དུ་འདུ་ཤེས་པ་དང་། མིར་འདུ་ཤེས་པ་ཡིད་ལ་མི་བྱ་བར་དགོན་པར་འདུ་ཤེས་པ་འམ། དེ་ལས་ཁ་ཅིག་ཡིད་ལ་བྱའོ། །དེ་འདི་སྙམ་དུ་སེམས་ཏེ་འདུ་ཤེས་ཀྱི་རྣམ་པ་འདི་ལྟ་སྟེ། གྲོང་དུ་འདུ་ཤེས་པ་དང་། 
མིར་འདུ་ཤེས་པས་སྟོང་ཡང་འདི་ལ་འདི་ལྟ་སྟེ། དགོན་པར་འདུ་ཤེས་པ་ཁོ་ན་འམ། དེ་ལས་ཁ་ཅིག་ལ་བརྟེན་ནས་མི་སྟོང་པ་ཡང་ཡོད་དོ་སྙམ་མོ། །དེ་ལ་གྲོང་དུ་འདུ་ཤེས་པ་དང་། མིར་འདུ་ཤེས་པ་ལ་བརྟེན་པ་ཉོན་མོངས་
པའི་གནས་གང་དག་ཡིན་པ་དེ་དག་མེད་ཀྱང་དེ་ལ་འདི་ལྟ་སྟེ། དགོན་པར་འདུ་ཤེས་པ་ཁོ་ན་འམ་དེ་ལས་ཁ་ཅིག་ལ་བརྟེན་པ་ཙམ་གྱི་ཉོན་མོངས་པའི་གནས་ནི་ཡོད་དོ། །ཀུན་དགའ་བོ་དེ་ལྟ་བས་ན་གང་ལ་གང་མེད་པ་དེ་དེས་
སྟོང་ངོ་། །ཞེས་བྱ་བར་ཡང་དག་པར་རྗེས་སུ་མཐོང་ཡང་། དེ་ལ་ལྷག་མ་གང་ཡོད་པ་དེ་ལ་ཡོད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཀུན་དགའ་བོ་སྟོང་པ་ཉིད་ལ་འཇུག་པ་འདི་ནི་ཡང་དག་པ་ཇི་ལྟ་
བ་བཞིན་ཏེ། ཕྱིན་ཅི་མ་ལོག་པ་ཡིན་ནོ། །ཀུན་དགའ་བོ་གཞན་ཡང་དགེ་སློང་ཞིག་ཀྱེ་མ་བདག་སྟོང་པ་ཉིད་ཀྱིས་ལན་མང་དུ་གནས་པར་བྱའོ་ཞེས་འདོད་པར་གྱུར་ན། ཀུན་དགའ་བོ་དགེ་སློང་དེས་མིར་འདུ་ཤེས་པ་དང་། དགོན་

66-1-276a

ཡང་དག་པར་རྗེས་སུ་མཐོང་ཡང་དེ་ལ་ལྷག་མ་གང་ཡོད་པ་དེ་དེ་ལ་ཡོད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཀུན་དགའ་བོ་སྟོང་པ་ཉིད་ལ་འཇུག་པ་འདི་ནི་ཡང་དག་པ་ཇི་ལྟ་བ་བཞིན་ཏེ་ཕྱིན་ཅི་མ་ལོག་པ་ཡིན་ནོ། །
ཀུན་དགའ་བོ་གཞན་ཡང་དགེ་སློང་ཞིག་ཀྱེ་མ་བདག་སྟོང་པ་ཉིད་ཀྱིས་ལན་མང་དུ་གནས་པར་བྱའོ་ཞེས་འདོད་པར་གྱུར་ན། ཀུན་དགའ་བོ་དགེ་སློང་དེས་ནམ་མཁའ་མཐའ་ཡས་སྐྱེ་མཆེད་དུ་འདུ་ཤེས་པ་དང་། རྣམ་ཤེས་མཐའ་ཡས་སྐྱེ་མཆེད་དུ་འདུ་ཤེས་པ་ཡིད་
ལ་མི་བྱ་བར་ཅི་ཡང་མེད་པའི་སྐྱེ་མཆེད་དུ་འདུ་ཤེས་པ་འམ། དེ་ལས་ཁ་ཅིག་ཡིད་ལ་བྱའོ། །དེ་འདི་སྙམ་དུ་སེམས་ཏེ། འདུ་ཤེས་ཀྱི་རྣམ་པ་འདི་འདི་ལྟ་སྟེ། ནམ་མཁའ་མཐའ་ཡས་སྐྱེ་མཆེད་དུ་འདུ་ཤེས་པ་དང་། རྣམ་ཤེས་མཐའ་ཡས་སྐྱེ་མཆེད་དུ་འདུ་ཤེས་པས་སྟོང་
ཡང་དེ་ལ་འདི་ལྟ་སྟེ། ཅི་ཡང་མེད་པའི་སྐྱེ་མཆེད་དུ་འདུ་ཤེས་པ་ཁོ་ན་འམ། དེ་ལས་ཁ་ཅིག་ལ་རྟེན་པ་ཙམ་གྱི་ཉོན་མོངས་པའི་གནས་ནི་ཡོད་དོ། །ཀུན་དགའ་བོ་དེ་ལྟ་བས་ན་གང་ལ་གང་མེད་པ་དེས་སྟོང་ངོ་ཞེས་བྱ་བར་ཡང་དག་པར་རྗེས་སུ་མཐོང་ཡང་དེ་ལྷག་མ་
གང་ཡོད་པ་དེ་དེ་ལ་ཡོད་དོ་ཞེས་བྱ་བ་དེ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཀུན་དགའ་བོ་སྟོང་པ་ཉིད་ལ་འཇུག་པ་འདི་ནི་ཡང་དག་པར་ཇི་ལྟ་བ་བཞིན་ཏེ་ཕྱིན་ཅི་མ་ལོག་པ་ཡིན་ནོ། །ཀུན་དགའ་བོ་གཞན་ཡང་དགེ་སློང་ཞིག་ཀྱེ་མ་བདག་སྟོང་པ་ཉིད་
ཀྱིས་ལན་མང་དུ་གནས་པར་བྱའོ། །ཞེས་འདོད་པར་གྱུར་ན་དེ་ཀུན་དགའ་བོ་དགེ་སློང་དེས་རྣམ་ཤེས་མཐའ་ཡས་སྐྱེ་མཆེད་དུ་འདུ་ཤེས་པ་དང་། ཅི་ཡང་མེད་པའི་སྐྱེ་མཆེད་དུ་འདུ་ཤེས་པ་ཡིད་ལ་མི་བྱ་བར་མཚན་མ་མེད་པའི་དབྱིངས་སམ་དེ་ལས་
ཁ་ཅིག་ཡིད་ལ་བྱའོ། །དེ་འདི་སྙམ་དུ་སེམས་ཏེ། འདུ་ཤེས་ཀྱིས་རྣམ་པ་འདི་འདི་ལྟ་སྟེ། རྣམ་ཤེས་མཐའ་ཡས་སྐྱེ་མཆེད་དུ་འདུ་ཤེས་པ་དང་། ཅི་ཡང་མེད་པའི་སྐྱེ་མཆེད་དུ་འདུ་ཤེས་པས་སྟོང་ཡང་འདི་ལྟ་སྟེ། མཚན་མ་མེད་པའི་དབྱིངས་ཁོ་ན་འམ། དེ་
ལས་ཁ་ཅིག་ལ་རྟེན་ནས་མི་སྟོང་པ་ཡོད་དོ་སྙམ་མོ། །དེ་ལ་རྣམ་ཤེས་མཐའ་ཡས་སྐྱེ་མཆེད་དུ་འདུ་ཤེས་པ་དང་། ཅི་ཡང་མེད་པའི་འདུ་ཤེས་པ་ལ་བརྟེན་པ་ཉོན་མོངས་པའི་གནས་གང་དག་ཡིན་པ་དེ་དག་མོད་ཀྱང་དེ་ལ་འདི་ལྟ་སྟེ། མཚན་མ་མེད་

66-1-276b

པའི་དབྱིངས་ཁོ་ན་འམ། དེ་ལས་ཁ་ཅིག་ལ་བརྟེན་པ་ཙམ་གྱི་ཉོན་མོངས་པའི་གནས་ནི་ཡོད་དོ། །ཀུན་དགའ་བོ་དེ་ལྟ་བས་ན་གང་ལ་གང་མེད་པ་དེ་དེས་སྟོང་ངོ་། །ཞེས་བྱ་བར་ཡང་དག་པར་རྗེས་སུ་མཐོང་ཡང་དེ་ལ་ལྷག་མ་གང་ཡོད་པ་དེ་དེ་ལ་
ཡོད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཀུན་དགའ་བོ་སྟོང་པ་ཉིད་ལ་འཇུག་པ་འདི་ནི་ཡང་དག་པ་ཇི་ལྟ་བ་བཞིན་ཏེ། ཕྱིན་ཅི་མ་ལོག་པ་ཡིན་ནོ། །དེ་འདི་སྙམ་དུ་སེམས་ཏེ། མཚན་མ་མེད་པའི་དབྱིངས་
ཀྱང་མངོན་པར་འདུས་བྱས་ཤིང་སེམས་པས་མངོན་པར་བསམས་པ་དེ་ལ་ནི་མངོན་པར་དགའ་བར་བྱ་བ་འམ། མངོན་པར་བརྗོད་པར་བྱ་བ་འམ། ལྷག་པར་ཆགས་པར་བྱ་བ་འམ། ལྷག་པར་ཆགས་ཤིང་གནས་པར་བྱ་བར་མི་
རིགས་སོ། །སྙམ་མོ། །དེ་ལྟར་ཤེས་ཤིང་དེ་ལྟར་མཐོང་བས་འདོད་པའི་ཟག་པ་ལས་སེམས་རྣམ་པར་གྲོལ་ཞིང་སྲིད་པའི་ཟག་པ་དང་། མ་རིག་པའི་ཟག་པ་ལས་ཀྱང་སེམས་རྣམ་པར་གྲོལ་ལོ། །རྣམ་པར་གྲོལ་
བས་བདག་ནི་སྐྱེ་བ་ཟད་དོ། །ཚངས་པར་སྤྱད་པ་བསྟན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ། །ཞེས་རྣམ་པར་གྲོལ་བ་ཡེ་ཤེས་མཐོང་བ་ཁོ་ནར་འགྱུར་རོ། །དེ་འདི་སྙམ་དུ་སེམས་ཏེ། འདུ་
ཤེས་ཀྱི་རྣམ་པ་འདི་འདི་ལྟ་སྟེ། འདོད་པའི་ཟག་པ་དང་། སྲིད་པའི་ཟག་པ་དང་། མ་རིག་པའི་ཟག་པས་སྟོང་ཡང་དེ་ལ་འདི་ལྟ་སྟེ། སྲོག་རྐྱེན་དུ་བྱས་པའི་སྐྱེ་མཆེད་དྲུག་གི་ལུས་འདི་ཁོ་ན་ལ་བརྟེན་ནས་མི་སྟོང་པ་ཡང་ཡོད་དོ་སྙམ་འམ། 
དེ་ལ་འདོད་པའི་ཟག་པ་དང་། སྲིད་པའི་ཟག་པ་དང་། མ་རིག་པའི་ཟག་པ་ལ་བརྟེན་པ་ཉོན་མོངས་པའི་གནས་གང་དག་ཡིན་པ་དེ་དག་མེད་ཀྱང་དེ་ལ་འདི་ལྟ་སྟེ། སྲོག་རྐྱེན་དུ་བྱས་པའི་སྐྱེ་མཆེད་དྲུག་གི་ལུས་དེ་ཁོ་ན་ལ་བརྟེན་
པ་ཙམ་གྱི་ཉོན་མོངས་པའི་གནས་ནི་ཡོད་དོ། །ཀུན་དགའ་བོ་དེ་ལྟ་བས་ན་གང་ལ་གང་མེད་པ་དེ་དེས་སྟོང་ངོ་། །ཞེས་བྱ་བར་ཡང་དག་པར་རྗེས་སུ་མཐོང་ཡང་། གང་དུ་ཟག་པ་མེད་ཅིང་མངོན་པར་འདུས་མ་བྱས་

66-1-277a

པ་ཁོ་ན་འམ། དེ་ལས་ཁ་ཅིག་ལ་བརྟེན་ནས་མི་སྟོང་པ་ཡང་ཡོད་དོ་སྙམ་མོ། །དེ་ལ་སར་འདུ་ཤེས་པ་དང་། ནམ་མཁའ་མཐའ་ཡས་སྐྱེ་མཆེད་དུ་འདུ་ཤེས་པ་ལ་རྟེན་པ་ཉོན་མོངས་པའི་གནས་གང་དག་ཡིན་
པ་དེ་དག་མེད་ཀྱང་དེ་ལ་འདི་ལྟ་སྟེ། རྣམ་ཤེས་མཐའ་ཡས་སྐྱེ་མཆེད་དུ་འདུ་ཤེས་པ་ཁོ་ན་འམ། དེ་ལས་ཁ་ཅིག་ལ་བརྟེན་པ་ཙམ་གྱི་ཉོན་མོངས་པའི་གནས་ནི་ཡོད་དོ། །ཀུན་དགའ་བོ་དེ་ལྟ་བས་ན་གང་ལ་གང་མེད་པ་དེ་
དེས་སྟོང་ངོ་ཞེས་བྱ་བར་ཡང་དག་པར་རྗེས་སུ་མཐོང་ཡང་དེ་ལ་ལྷག་མ་གང་ཡོད་པ་དེ་དེ་ལ་ཡོད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཀུན་དགའ་བོ་སྟོང་པ་ཉིད་ལ་འཇུག་པ་འདི་ནི་ཡང་དག་པ་ཇི་ལྟ་བ་བཞིན་
ཏེ་ཕྱིན་ཅི་མ་ལོག་པ་ཡིན་ནོ། །ཀུན་དགའ་བོ་གཞན་ཡང་དགེ་སློང་ཞིག་ཀྱེ་མ་བདག་སྟོང་པ་ཉིད་ཀྱིས་ལན་མང་དུ་གནས་པར་བྱའོ་ཞེས་འདོད་པར་གྱུར་ན། ཀུན་དགའ་བོ་དགེ་སློང་དེས་ནམ་མཁའ་མཐའ་ཡས་སྐྱེ་མཆེད་དུ་
འདུ་ཤེས་པ་དང་། རྣམ་ཤེས་མཐའ་ཡས་སྐྱེ་མཆེད་དུ་འདུ་ཤེས་པ་ཡིད་ལ་མི་བྱ་བར་ཅི་ཡང་མེད་པའི་སྐྱེ་མཆེད་དུ་འདུ་ཤེས་པ་འམ། དེ་ལས་ཁ་ཅིག་ཡིད་ལ་བྱའོ། །དེ་འདི་སྙམ་དུ་སེམས་ཏེ། འདུ་ཤེས་ཀྱི་རྣམ་པ་འདི་
འདི་ལྟ་སྟེ། ནམ་མཁའ་མཐའ་ཡས་སྐྱེ་མཆེད་དུ་འདུ་ཤེས་པ་དང་། རྣམ་ཤེས་མཐའ་ཡས་སྐྱེ་མཆེད་དུ་འདུ་ཤེས་པས་སྟོང་ཡང་། དེ་ལ་འདི་ལྟ་སྟེ། ཅི་ཡང་མེད་པའི་སྐྱེ་མཆེད་དུ་འདུ་ཤེས་པ་ཁོ་ན་འམ། དེ་ལས་ཁ་ཅིག་
ལ་བརྟེན་ནས་མི་སྟོང་པ་ཡང་ཡོད་དོ་སྙམ་མོ། །དེ་ལ་ནམ་མཁའ་མཐའ་ཡས་སྐྱེ་མཆེད་དུ་འདུ་ཤེས་པ་དང་། རྣམ་ཤེས་མཐའ་ཡས་སྐྱེ་མཆེད་དུ་འདུ་ཤེས་པ་ལ་བརྟན་པ་ཉོན་མོངས་པའི་གནས་གང་དག་ཡིན་པ་དེ་དག་མེད་ཀྱང་
དེ་ལ་འདི་ལྟ་སྟེ། ཅི་ཡང་མེད་པའི་སྐྱེ་མཆེད་དུ་འདུ་ཤེས་པ་ཁོ་ན་འམ། དེ་ལས་ཁ་ཅིག་ལ་རྟིན་པ་ཙམ་གྱི་ཉོན་མོངས་པའི་གནས་ནི་ཡོད་དོ། །ཀུན་དགའ་བོ་དེ་ལྟ་བས་ན་གང་ལ་གང་མེད་པ་དེ་དེས་སྟོང་ངོ་ཞེས་བྱ་བར་ཡང་

66-1-277b

དག་པར་རྗེས་སུ་མཐོང་ཡང་དེ་ལ་ལྷག་མ་གང་ཡོད་པ་དེ་དེ་ལ་ཡོད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཀུན་དགའ་བོ་སྟོང་པ་ཉིད་ལ་འཇུག་པ་འདི་ནི་ཡང་དག་པ་ཇི་ལྟ་བ་བཞིན་ཏེ། ཕྱིན་ཅི་མ་ལོག་པ་
ཡིན་ནོ། །ཀུན་དགའ་བོ་གཞན་ཡང་དགེ་སློང་ཞིག་ཀྱེ་མ་བདག་སྟོང་པ་ཉིད་ཀྱིས་ལན་མང་དུ་གནས་པར་བྱའོ་ཞེས་འདོད་པར་གྱུར་ན། ཀུན་དགའ་བོ་དགེ་སློང་དེས་རྣམ་ཤེས་མཐའ་ཡས་སྐྱེ་མཆེད་དུ་འདུ་ཤེས་པ་དང་། ཅི་ཡང་
མེད་པའི་སྐྱེ་མཆེད་དུ་འདུ་ཤེས་པ་ཡིད་ལ་མི་བྱ་བར་མཚན་མ་མེད་པའི་དབྱིངས་སམ། དེ་ལས་ཁ་ཅིག་ཡིད་ལ་བྱའོ། །དེ་འདི་སྙམ་དུ་སེམས་ཏེ། འདུ་ཤེས་ཀྱི་རྣམ་པ་འདི་འདི་ལྟ་སྟེ། རྣམ་ཤེས་མཐའ་ཡས་སྐྱེ་མཆེད་དུ་འདུ་
ཤེས་པ་དང་། ཅི་ཡང་མེད་པའི་སྐྱེ་མཆེད་དུ་འདུ་ཤེས་པས་སྟོང་ཡང་འདི་ལྟ་སྟེ། མཚན་མ་མེད་པའི་དབྱིངས་ཁོ་ན་འམ། དེ་ལས་ཁ་ཅིག་ལ་བརྟེན་ནས་མི་སྟོང་པ་ཡང་ཡོད་དོ་སྙམ་མོ། །དེ་ལ་རྣམ་ཤེས་མཐའ་ཡས་སྐྱེ་མཆེད་
དུ་འདུ་ཤེས་པ་དང་། ཅི་ཡང་མེད་པའི་སྐྱེ་མཆེད་དུ་འདུ་ཤེས་པ་ལ་བརྟེན་པ་ཉོན་མོངས་པའི་གནས་གང་དག་ཡིན་པ་དེ་དག་མེད་ཀྱང་། དེ་ལ་འདི་ལྟ་སྟེ། མཚན་མ་མེད་པའི་དབྱིངས་ཁོ་ན་འམ། དེ་ལས་ཁ་ཅིག་ལ་བརྟེན་པ་ཙམ་གྱི་ཉོན་
མོངས་པའི་གནས་ནི་ཡོད་དོ། །ཀུན་དགའ་བོ་དེ་ལྟ་བས་ན་གང་ལ་གང་མེད་པ་དེ་དེས་སྟོང་ངོ་ཞེས་བྱ་བར་ཡང་དག་པར་རྗེས་སུ་མཐོང་ཡང་། དེ་ལ་ལྷག་མ་གང་ཡོད་པ་དེ་དེ་ལ་ཡོད་དོ་ཞེས་བྱ་བར་ཡང་དག་པ་ཇི་ལྟ་བ་བཞིན་དུ་
རབ་ཏུ་ཤེས་ཏེ། ཀུན་དགའ་བོ་སྟོང་པ་ཉིད་ལ་འཇུག་པ་འདི་ནི་ཡང་དག་པ་ཇི་ལྟ་བ་བཞིན་ཏེ་ཕྱིན་ཅི་མ་ལོག་པ་ཡིན་ནོ། །དེ་འདི་སྙམ་དུ་སེམས་ཏེ། མཚན་མ་མེད་པའི་དབྱིངས་ཀྱང་མངོན་པར་འདུས་བྱས་ཤིང་སེམས་པས་
མངོན་པར་བསམས་པ་ཡིན་ཏེ། གང་མངོན་པར་འདུས་བྱས་ཤིང་སེམས་པས་མངོན་པར་བསམས་པ་དེ་ལ་ནི་མངོན་པར་དགའ་བར་བྱ་བ་འམ། མངོན་པར་བརྗོད་པར་བྱ་བ་འམ། ལྷག་པར་ཆགས་པར་བྱ་བའམ། ལྷག་

66-1-278a

པར་ཆགས་ཤིང་གནས་པར་བྱ་བར་མི་རིགས་སོ་སྙམ་མོ། །དེས་དེ་ལྟར་ཤེས་ཤིང་དེ་ལྟར་མཐོང་བས་འདོད་པའི་ཟག་པ་ལས་སེམས་རྣམ་པར་གྲོལ་ཞིང་སྲིད་པའི་ཟག་པ་དང་། མ་རིག་པའི་ཟག་པ་ལས་ཀྱང་
སེམས་རྣམ་པར་གྲོལ་ལོ། །རྣམ་པར་གྲོལ་བས་བདག་ནི་སྐྱེ་བ་ཟད་དོ། །ཚངས་པར་སྤྱད་པ་བསྟན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་རྣམ་པར་གྲོལ་བ་ཡེ་ཤེས་མཐོང་བ་ཁོ་ནར་འགྱུར་རོ། །དེ་འདི་
སྙམ་དུ་སེམས་ཏེ། འདུ་ཤེས་ཀྱི་རྣམ་པ་འདི་འདི་ལྟ་སྟེ། འདོད་པའི་ཟག་པ་དང་། སྲིད་པའི་ཟག་པ་དང་། མ་རིག་པའི་ཟག་པས་སྟོང་ཡང་འདི་ལ་འདི་ལྟ་སྟེ། སྲོག་རྐྱེན་དུ་བྱས་པའི་སྐྱེ་མཆེད་དྲུག་གི་ལུས་འདི་ཁོ་ན་ལ་བརྟེན་ནས་མི་སྟོང་
པ་ཡང་ཡོད་དོ་སྙམ་མོ། །དེ་ལ་འདོད་པའི་ཟག་པ་དང་། སྲིད་པའི་ཟག་པ་དང་། མ་རིག་པའི་ཟག་པ་ལ་བརྟེན་པ་ཉོན་མོངས་པའི་གནས་གང་དག་ཡིན་པ་དེ་དག་མེད་ཀྱང་དེ་ལ་འདི་ལྟ་སྟེ། སྲོག་རྐྱེན་དུ་བྱས་པའི་སྐྱེ་མཆེད་དྲུག་གི་ལུས་དེ་
ཁོ་ན་ལ་བརྟེན་པ་ཙམ་གྱི་ཉོན་མོངས་པའི་གནས་ནི་ཡོད་དོ། །ཀུན་དགའ་བོ་དེ་ལྟ་བས་ན་གང་ལ་གང་མེད་པ་དེ་དེས་སྟོང་ངོ་ཞེས་བྱ་བར་ཡང་དག་པར་རྗེས་སུ་མཐོང་ཡང་། དེ་ལ་ལྷག་མ་གང་ཡོད་པ་དེ་དེ་ལ་ཡོད་དོ་ཞེས་བྱ་བར་
ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཀུན་དགའ་བོ་འདི་ལྟ་སྟེ། ཟག་པ་རྣམས་ཟད་པས་ཟག་པ་མེད་ཅིང་མངོན་པར་འདུས་མ་བྱས་པ་རྣམ་པར་གྲོལ་བ་གང་ཡིན་པ་འདི་ནི་སྟོང་པ་ཉིད་ལ་འཇུག་པ་བླ་ན་མེད་པ་
ཡིན་ནོ། །ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་འདས་པའི་དུས་ན་བྱུང་བར་གྱུར་པའི་སངས་རྒྱས་བཅོམ་ལྡན་འདས་དེ་དག་གིས་ཀྱང་འདི་ལྟ་སྟེ། ཟག་པ་རྣམས་ཟད་
པས་ཟག་པ་མེད་ཅིང་མངོན་པར་འདུས་མ་བྱས་པ་རྣམ་པར་གྲོལ་བའི་སྟོང་པ་ཉིད་ལ་འཇུག་པ་བླ་ན་མེད་པ་འདི་ཉིད་སྐུས་མངོན་སུམ་དུ་མཛད་ནས་བསྒྲུབས་ཏེ་བཞུགས་པར་གྱུར་ཏོ། །ཀུན་དགའ་བོ་དེ་བཞིན་གཤེགས་པ་

66-1-278b

དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་དག་མ་འོངས་པའི་དུས་ན་འབྱུང་བར་འགྱུར་བའི་སངས་རྒྱས་བཅོམ་ལྡན་འདས་དེ་དག་ཀྱང་འདི་ལྟ་སྟེ། ཟག་པ་རྣམས་ཟད་པས་ཟག་པ་མེད་ཅིང་མངོན་པར་འདུས་མ་བྱས་
པ་རྣམ་པར་གྲོལ་བའི་སྟོང་པ་ཉིད་ལ་འཇུག་པ་བླ་ན་མེད་པ་འདི་ཉིད་སྐུས་མངོན་སུམ་དུ་མཛད་ནས་བསྒྲུབས་ཏེ་བཞུགས་པར་འགྱུར་རོ། །ཀུན་དགའ་བོ་ད་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་ང་ད་ལྟར་བྱུང་བའི་དུས་ན་འདི་ལྟ་སྟེ། ཟག་པ་རྣམས་ཟད་པས་ཟག་པ་མེད་ཅིང་འདུས་མ་བྱས་པ། རྣམ་པར་གྲོལ་བའི་སྟོང་པ་ཉིད་ལ་འཇུག་པ་བླ་ན་མེད་པ་འདི་ཉིད་སྐུས་མངོན་སུམ་དུ་མཛད་ནས་བསྒྲུབས་ཏེ་བཞུགས་སོ། །
ཀུན་དགའ་བོ་དེ་ལྟ་བས་ན་འདི་ལྟ་སྟེ། ཟག་པ་རྣམས་ཟད་པས་ཟག་པ་མེད་ཅིང་མངོན་པར་འདུས་མ་བྱས་པ། རྣམ་པར་གྲོལ་བའི་སྟོང་པ་ཉིད་ལ་འཇུག་པ་བླ་ན་མེད་པ་གང་ཡིན་པ་འདི་ཉིད་ལུས་ཀྱིས་མངོན་སུམ་དུ་བྱས་ནས་
བསྒྲུབས་ཏེ་གནས་པར་བྱའོ་ཞེས་དེ་ལྟར་བསླབ་པར་བྱ་སྟེ། ཀུན་དགའ་བོ་ཁྱོད་ཀྱིས་ཀྱང་དེ་བཞིན་དུ་བསླབ་པར་བྱའོ། །དེ་ནས་ཚེ་དང་ལྡན་པ་ཀུན་དགའ་བོས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་
ཅིང་རྗེས་སུ་ཡིད་རང་བར་བྱས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་ཕྱིར་སོང་ངོ་། །མདོ་ཆེན་པོ་སྟོང་པ་ཉིད་ཅེས་བྱ་བ་རྫོགས་སོ།། །།
རྒྱ་གར་གྱི་མཁན་པོ་ཛི་ན་མི་ཏྲ་དང་། པྲ་ཛྙཱ་ཝརྨ་དང་། ཞུ་ཆེན་གྱི་ལོ་ཙྪ་བ་བན་དྷེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ། ། 
༄༅།   །རྒྱ་གར་སྐད་དུ། མ་ཧཱ་ཤཱུ་ནྱ་ཏཱ་ནཱ་མ་མ་ཧཱ་སཱུ་ཏྲམ།  བོད་སྐད་དུ། མདོ་ཆེན་པོ་སྟོང་པ་ཉིད་ཆེན་པོ་ཞེས་བྱ་བ།  དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལན་

66-1-279a

འདས་སེར་སྐྱའི་གནས་ན་ཤིང་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་དང་ཆོས་གོས་གསོལ་ཏེ། ལྷུང་བཟེད་བསྣམས་ནས་བསོད་སྙོམས་ཀྱི་ཕྱིར་སེར་སྐྱའི་
གནས་སུ་ཞུགས་སོ། །སེར་སྐྱའི་གནས་ནས་བསོད་སྙོམས་བཞེས་ཏེ། ཞལ་ཟས་ཀྱི་བྱ་བ་མཛད་ཅིང་། ཟས་ཕྱིས་ལེན་པའི་ཞལ་ཟས་སྤངས་ནས། ལྷུང་བཟེད་དང་ཆོས་གོས་བཞག་སྟེ། ཞབས་བསིལ་ནས་ཤཱཀྱ་
དུས་བདེའི་གཙུག་ལག་ཁང་ག་ལ་བ་དེར་གཤེགས་སོ། །དེའི་ཚེ་ན་དགེ་སློང་རབ་ཏུ་མང་པོ་དག་གིས་ཤཱཀྱ་དུས་བདེའི་གཙུག་ལག་ཁང་དུ་བླ་གབ་མེད་པར་སྟན་རབ་ཏུ་མང་པོ་དག་བཏིང་སྟེ་དོང་ངོ་། །དེ་ནས་བཅོམ་ལྡན་འདས་གཙུག་ལག་ཁང་
གི་ཕྱི་རོལ་དུ་ཞབས་བསིལ་ནས་ནང་དུ་ཡང་དག་འཇོག་གི་སླད་དུ་གཙུག་ལག་ཁང་དུ་བཞུགས་སོ། །དེ་ནས་བཅོམ་ལྡན་འདས་ཕྱེམ་རེད་ནང་དུ་ཡང་དག་འཇོག་ལས་བཞེངས་ནས་ཤཱཀྱ་ལྟག་པ་རིའི་གཙུག་ལག་ཁང་ག་ལ་བ་དེར་
གཤེགས་སོ། །དེའི་ཚེ་ན་ཚེ་དང་ལྡན་པ་ཀུན་དགའ་བོ་དགེ་སློང་རབ་ཏུ་མང་པོ་དག་དང་ལྷན་ཅིག་ཏུ་ཤཱཀྱ་ལྟག་པའི་རིའི་གཙུག་ལག་ཁང་དུ་འདི་ལྟ་སྟེ། ཆོས་གོས་ཀྱི་ལས་ལ་འདུས་ཏེ་འདུག་པར་གྱུར་ཏོ། །ཚེ་དང་ལྡན་པ་ཀུན་དགའ་
བས་རྒྱང་རིང་པོ་ནས་བཅོམ་ལྡན་འདས་མཐོང་ངོ་། །མཐོང་ནས་ཀྱང་སྟན་ལས་ལངས་ཏེ་བཅོམ་ལྡན་འདས་ཀྱི་གདན་བཤམས་ནས་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས་ཚུར་གཤེགས་སུ་གསོལ། བཅོམ་ལྡན་འདས་
ལེགས་པར་གཤེགས་ལགས་སོ། །བཅོམ་ལྡན་འདས་གདན་བཤམས་པ་འདི་ལ་བཞུགས་སུ་གསོལ། །བཅོམ་ལྡན་འདས་གདན་ལ་བཞུགས་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་རབ་
ཏུ་མང་པོ་དག་གིས་ཤཱཀྱ་དུས་བདེའི་གཙུག་ལག་ཁང་དུ་བླ་གབ་མེད་པར་སྟན་རབ་ཏུ་མང་པོ་དག་བཏིང་སྟེ་དོང་ངོ་། །གསོལ་པ། བཅོམ་ལྡན་འདས་ཆོས་གོས་སྩལ་བའི་དུས་ལགས་སོ། །བདེ་བར་གཤེགས་པ་ཆོས་གོས་སྩལ་

66-1-279b

བའི་དུས་ལགས་སོ། །བཀའ་སྩལ་པ། ཀུན་དགའ་བོ་དགེ་སློང་བྲེ་མོ་གཏམ་ལ་དགའ་བ་དང་། བྲེ་མོ་གཏམ་ལ་ཀུན་དུ་དགའ་བ་དང་། བྲེ་མོ་གཏམ་ལ་ཀུན་དུ་དགའ་བ་ཉད་ལ་བརྩོན་པའི་རྗེས་སུ་སྦྱོར་བ་དང་། ཚོགས་ལ་
དགའ་བ་དང་། ཚོགས་ལ་ཀུན་དུ་དགའ་བ་དང་། ཚོགས་ལ་ཀུན་དུ་དགའ་བ་ཉིད་ལ་བརྩོན་པའི་རྗེས་སུ་སྦྱོར་བ་ལ་གནས་པ་ནི་མི་མཛེས་ཏེ། ཀུན་དགའ་བོ་དགེ་སློང་བྲེ་མོ་གཏམ་ལ་དགའ་བ་དང་། བྲེ་མོ་གཏམ་ལ་ཀུན་དུ་
དགའ་བ་དང་། བྲེ་མོ་གཏམ་ལ་ཀུན་དུ་དགའ་བ་ཉིད་ལ་བརྩོན་པའི་རྗེས་སུ་སྦྱོར་བ་དང་། ཚོགས་ལ་དགའ་བ་དང་། ཚོགས་ལ་ཀུན་དུ་དགའ་བ་དང་། ཚོགས་ལ་ཀུན་དུ་དགའ་བ་ཉིད་ལ་བརྩོན་པའི་རྗེས་སུ་སྦྱོར་བ་ལ་གནས་
ཤིང་། ཚོགས་ལས་གཅིག་པུ་ལོགས་ཤིག་ན་མི་གནས་པ་དེས་ནི་རེ་ཤིག་འཕགས་པའི་བདེ་བ་དང་། ངེས་པར་འབྱུང་བའི་བདེ་བ་དང་། རབ་ཏུ་དབེན་པའི་བདེ་བ་དང་། ཉེ་བར་ཞི་བའི་བདེ་བ་དང་། རྫོགས་པར་བྱང་ཆུབ་
པའི་བདེ་བ་དང་། དེ་ལྟ་བུའི་བདེ་བ་གང་ཡིན་པ་དེ་དག་ཅི་འདོད་པ་བཞིན་འཐོབ་པ་དང་། །དཀའ་བ་མེད་པར་འཐོབ་པར་འགྱུར་བ་དེ་ནི་གནས་མེད་དོ། །ཀུན་དགའ་བོ་དགེ་སློང་བྲེ་མོ་གཏམ་ལ་མི་དགའ་བ་དང་། བྲེ་མོ་གཏམ་ལ་
ཀུན་དུ་མི་དགའ་བ་དང་། བྲེ་མོ་གཏམ་ལ་ཀུན་དུ་དགའ་བ་ཉིད་ལ་བརྩོན་པའི་རྗེས་སུ་མི་སྦྱོར་བ་དང་། ཚོགས་ལ་མི་དགའ་བ་དང་། ཚོགས་ལ་ཀུན་དུ་མི་དགའ་བ་དང་། ཚོགས་ལ་ཀུན་དུ་དགའ་བ་ཉིད་ལ་བརྩོན་པའི་རྗེས་སུ་
མི་སྦྱོར་བ་ལ་གནས་ཤིང་། ཚོགས་ལས་གཅིག་པུ་ལོགས་ཤིག་ན་གནས་པ་དེས་ནི་རེ་ཤིག་འཕགས་པའི་བདེ་བ་དང་། ངེས་པར་འབྱུང་བའི་བདེ་བ་དང་། རབ་ཏུ་དབེན་པའི་བདེ་བ་དང་། ཉེ་བར་ཞི་བའི་བདེ་བ་དང་། རྫོགས་པར་
བྱང་ཆུབ་པའི་བདེ་བ་དང་། དེ་ལྟ་བུའི་བདེ་བ་གང་ཡིན་པ་དེ་དག་ཅི་འདོད་པ་བཞིན་འཐོབ་པ་དང་། དཀའ་བ་མེད་པར་འཐོབ་པར་འགྱུར་བ་དེ་ནི་གནས་ཡོད་དོ། །ཀུན་དགའ་བོ་དགེ་སློང་བྲེ་མོ་གཏམ་ལ་དགའ་བ་དང་། བྲེ་མོ་

66-1-280a

གཏམ་ལ་ཀུན་དུ་དགའ་བ་དང་། བྲེ་མོ་གཏམ་ལ་ཀུན་དུ་དགའ་བ་ཉིད་ལ་བརྩོན་པའི་རྗེས་སུ་སྦྱོར་བ་དང་། ཚོགས་ལ་དགའ་བ་དང་། ཚོགས་ལ་ཀུན་དུ་དགའ་བ་དང་། ཚོགས་ལ་ཀུན་དུ་དགའ་བ་ཉིད་ལ་བརྩོན་པའི་རྗེས་སུ་
སྦྱོར་བ་ལ་གནས་ཤིང་། ཚོགས་ལས་གཅིག་པུ་ལོགས་ཤིག་ན་མི་གནས་པ་དེས་ནི་རེ་ཤིག་དུས་དང་སྦྱོར་ཞིང་སྲུང་བའི་སེམས་རྣམ་པར་གྲོལ་བ་འམ། དུས་དང་མི་སྦྱོར་ཞིང་མི་ཉམས་པ་ལུས་ཀྱིས་མངོན་སུམ་དུ་
བྱས་ནས་བསྒྲུབས་ཏེ་གནས་པར་འགྱུར་བ་དེ་ནི་གནས་མེད་དོ། །ཀུན་དགའ་བོ་དགེ་སློང་བྲེ་མོ་གཏམ་ལ་མི་དགའ་བ་དང་། བྲེ་མོ་གཏམ་ལ་ཀུན་དུ་མི་དགའ་བ་དང་། བྲེ་མོ་གཏམ་ལ་ཀུན་དུ་དགའ་བ་ཉིད་ལ་བརྩོན་པའི་
རྗེས་སུ་མི་སྦྱོར་བ་དང་། ཚོགས་ལ་མི་དགའ་བ་དང་། ཚོགས་ལ་ཀུན་དུ་མི་དགའ་བ་དང་། ཚོགས་ལ་ཀུན་དུ་དགའ་བ་ཉིད་ལ་བརྩོན་པའི་རྗེས་སུ་མི་སྦྱོར་བ་ལ་གནས་ཤིང་། ཚོགས་ལས་གཅིག་པུ་ལོགས་ཤིག་ན་གནས་
པ་དེས་ནི་རེ་ཤིག་དུས་དང་སྦྱོར་ཞིང་སེམས་རྣམ་པར་གྲོལ་བ་འམ། དུས་དང་མི་སྦྱོར་ཞིང་མི་ཉམས་པ་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་པར་འགྱུར་བ་དེ་ནི་གནས་ཡོད་དོ། །ཀུན་དགའ་བོ་ངས་
གང་ལ་ཀུན་དུ་དགའ་བ་དང་། མངོན་པར་དགའ་བའི་གཟུགས་དེའི་རྣམ་པར་འགྱུར་བ་དང་གཞན་དུ་འགྱུར་བ་ལས་མྱ་ངན་དང་། སྨྲི་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དག་
འབྱུང་བར་མི་འགྱུར་བའི་གཟུགས་ནི་གཅིག་ཀྱང་ཡང་དག་པར་རྗེས་སུ་མ་མཐོང་ངོ་། །ཀུན་དགའ་བོ་དེ་ལྟ་བས་ན་ངའི་གནས་པ་ནི་འདི་ལྟ་སྟེ། རྣམ་པ་ཐམས་ཅད་དུ་གཟུགས་ཀྱི་འདུ་ཤེས་ལས་ཡང་དག་པར་
འདས་ནས་ཕྱི་སྟོང་པ་ཉིད་སྐུས་མངོན་སུམ་དུ་མཛད་ནས་བསྒྲུབས་ཏེ་བཞུགས་པ་འདི་ཡང་རྗེས་སུ་རྟོགས་ཤིང་རབ་ཏུ་རྟོགས་སོ། །ང་གནས་པ་འདིས་གནས་པ་ན་མཆོག་ཏུ་དགའ་བ་སྐྱེས་ཏེ། ང་མཆོག་ཏུ་དགའ་བ་དེས་

66-1-280b

ལུས་ཀྱི་ཐམས་ཅད་ཡང་དག་པར་མྱོང་ཞིང་དྲན་པ་དང་ཤེས་བཞིན་གྱིས་ལན་མང་དུ་གནས་སོ། །ང་གནས་པ་འདིས་གནས་པ་ན་དགའ་བ་དང་། ཤིན་དུ་སྦྱངས་པ་དང་། བདེ་བ་དང་། ཏིང་ངེ་འཛིན་སྐྱེས་ཏེ། ང་ཏིང་ངེ་འཛིན་དེས་
ལུས་ཀྱི་ཐམས་ཅད་ཡང་དག་པར་མྱོང་ཞིང་དྲན་པ་དང་ཤེས་བཞིན་གྱིས་ལན་མང་དུ་གནས་སོ། །ང་གནས་པ་འདིས་གནས་པ་ན་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དག་ཉེ་བར་ལྷགས་པར་གྱུར་
ནས། ང་དེ་ལ་གཞོལ་བ་དང་། དེ་ལ་འབབ་པ་དང་། དེ་ལ་བབ་པའི་སེམས་ཀྱིས་དེ་དག་ལ་འདི་ལྟ་སྟེ། བརྩོན་འགྲུས་སུ་རུང་བར་བྱ་བའི་ཕྱིར་ཕན་ཚུན་ཀུན་དགའ་བར་གཏམ་འདྲེ་བར་སྨྲ། ཕེབས་པར་སྨྲ་ཞིང་ཆོས་ཀྱི་གཏམ་ཡང་ཟེར་རོ། །
ཀུན་དགའ་བོ་དེ་ལྟ་བས་ན་དགེ་སློང་ཡང་ཀྱེ་མ་བདག་ཕྱི་སྟོང་པ་ཉིད་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་པར་བྱའོ་ཞེས་འདོད་པར་གྱུར་ན། ཀུན་དགའ་བོ་དགེ་སློང་དེས་སེམས་ནང་ཁོ་ནར་བཞག་པར་བྱ། ཡང་
དག་པར་བཞག་པར་བྱ། བསྡུས་ཏེ་བཞག་པར་བྱ། ཉེ་བར་བཞག་པར་བྱ། དུལ་བར་བྱ། ཞི་བར་བྱ། ཉེ་བར་ཞི་བར་བྱ། རྒྱུད་གཅིག་ཏུ་བྱ་ཞིང་ཏིང་ངེ་འཛིན་དུ་བྱའོ། །ཀུན་དགའ་བོ་དགེ་སློང་གང་འདི་སྐད་ཅེས། བདག་གིས་
སེམས་ནང་ཁོ་ནར་མ་བཞག །ཡང་དག་པར་མ་བཞག །བསྡུས་ཏེ་མ་བཞག །ཉེ་བར་མ་བཞག །དུལ་བར་མ་བྱས། ཞི་བར་མ་བྱས། ཉེ་བར་མ་བྱས། ཉེ་བར་ཞི་བར་མ་བྱས། རྒྱུད་གཅིག་ཏུ་མ་བྱས་ཤིང་། ཏིང་ངེ་འཛིན་
དུ་མ་བྱས་པར་ཕྱི་སྟོང་པ་ཉིད་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་པར་བྱའོ་ཞེ་ཟེར་ན། ཀུན་དགའ་བོ་དེ་ནི་རྣམ་པར་འཁྲུལ་པ་ཡིན་པར་རིག་པར་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ་དེ་ནི་གནས་
མ་ཡིན་ཞིང་སྐབས་མ་ཡིན་ཏེ། གང་སེམས་ནང་ཁོ་ནར་མ་བཞག །ཡང་དག་པར་མ་བཞག །བསྡུས་ཏེ་མ་བཞག །ཉེ་བར་མ་བཞག །དུལ་བར་མ་བྱས། ཞི་བར་མ་བྱས། ཉེ་བར་ཞི་བར་མ་བྱས། རྒྱུད་གཅིག་ཏུ་

66-1-281a

མ་བྱས་ཤིང་། ཏིང་ངེ་འཛིན་དུ་མ་བྱས་པར་ཕྱི་སྟོང་པ་ཉིད་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་པར་འགྱུར་བ་དེ་ནི་གནས་མེད་པའི་ཕྱིར་རོ། །ཀུན་དགའ་བོ་དགེ་སློང་གང་འདི་སྐད་ཅེས། བདག་
གིས་སེམས་ནང་ཁོ་ནར་བཞག །ཡང་དག་པར་བཞག །བསྡུས་ཏེ་བཞག །ཉེ་བར་བཞག །དུལ་བར་བྱས། ཞི་བར་བྱས། ཉེ་བར་ཞི་བར་བྱས། རྒྱུད་གཅིག་ཏུ་བྱས་ཤིང་ཏིང་ངེ་འཛིན་དུ་བྱས་ཏེ། ཕྱི་སྟོང་པ་ཉིད་ལུས་ཀྱིས་
མངོན་སུམ་དུ་བྱས་ནས་བསྒྲུབས་ཏེ་གནས་པར་བྱའོ་ཞེས་ཟེར་ན། ཀུན་དགའ་བོ་དེའི་ཚིག་ནི་ལེགས་པ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་དེ་ནི་གནས་ཡིན་ཞིང་སྐབས་ཡིན་ཏེ། གང་སེམས་ནང་ཁོ་ནར་བཞག །
ཡང་དག་པར་བཞག །བསྡུས་ཏེ་བཞག །ཉེ་བར་བཞག །དུལ་བར་བྱས། ཞི་བར་བྱས། ཉེ་བར་ཞི་བར་བྱས། རྒྱུད་གཅིག་ཏུ་བྱས་ཤིང་། ཏིང་ངེ་འཛིན་དུ་བྱས་ཏེ། ཕྱི་སྟོང་པ་ཉིད་ལུས་ཀྱིས་མངོན་སུམ་དུ་བྱས་ནས་
བསྒྲུབས་ཏེ་གནས་པར་འགྱུར་བ་དེ་ནི་གནས་ཡོད་པའི་ཕྱིར་རོ། །ཀུན་དགའ་བོ་ཇི་ལྟར་ན་དགེ་སློང་སེམས་ནང་ཁོ་ནར་འཇོག་པར་བྱེད། ཡང་དག་པར་འཇོག་པར་བྱེད། བསྡུས་ཏེ་འཇོག་པར་བྱེད། ཉེ་བར་འཇོག་པར་བྱེད། 
དུལ་བར་བྱེད། ཞི་བར་བྱེད། ཉེ་བར་ཞི་བར་བྱེད། རྒྱུད་གཅིག་ཏུ་བྱེད་ཅིང་། ཏིང་ངེ་འཛིན་དུ་བྱེད་ཅེ་ན། འདི་ལ་དགེ་སློང་དབེན་པ་ལས་སྐྱེས་པའི་དགའ་བ་དང་བདེ་བས་ལུས་དེ་ཉིད་མངོན་པར་རླན་པར་བྱེད། ཡོངས་སུ་རླན་
པར་བྱེད། ཡོངས་སུ་ཚིམ་པར་བྱེད་ཅིང་། ཡོངས་སུ་ཁྱབ་པར་བྱེད་དེ། དེའི་ལུས་ཐམས་ཅད་ལ་འདི་ལྟ་སྟེ། དབེན་པ་ལས་སྐྱེས་པའི་དགའ་བ་དང་བདེ་བས་ཁྱབ་པར་མ་གྱུར་པ་དང་། ཁྱབ་པར་མ་བྱས་པ་ཆུང་ཟད་ཀྱང་མེད་དོ། 
འདི་ལྟ་སྟེ། དཔེར་ན་ཁྲུས་མཁན་ནམ། ཁྲུས་མཁན་གྱི་སློབ་མ་མཁས་པ་ཞིག་གིས། ཁྲུས་ཆལ་ཞིབ་མོ་དག་ཁར་ཕོར་རམ། གཞོང་བུ་འམ། ཉ་ཕྱིས་སུ་བླུགས་ཏེ། ཆུས་བཏབ་ཅིང་མཉེས་ན། དེ་ཁྲུས་ཆལ་གྱི་རིལ་

66-1-281b

ལུ་རླན་པ་རླན་དང་ལྡན་པ། རླན་གྱིས་ཀུན་དུ་གང་བ། ཕྱི་ནང་བཅས་པར་རླན་གྱིས་ཁྱབ་པར་འགྱུར་ཞིང་། ཕྱིར་ཡང་མི་འཇིག་ལ་ཟག་པར་ཡང་མི་འགྱུར་རོ། །དེ་བཞིན་དུ་དགེ་སློང་ཡང་དབེན་པ་ལས་སྐྱེས་པའི་དགའ་
བ་དང་བདེ་བས་ལུས་དེ་ཉིད་མངོན་པར་རླན་པར་བྱེད། ཡོངས་སུ་རླན་པར་བྱེད། ཡོངས་སུ་ཚིམ་པར་བྱེད་ཅིང་། ཡོངས་སུ་ཁྱབ་པར་བྱེད་དེ། དེའི་ལུས་ཐམས་ཅད་ལ་འདི་ལྟ་སྟེ། དབེན་པ་ལས་སྐྱེས་པའི་དགའ་བ་དང་བདེ་བས་
ཁྱབ་པར་མ་གྱུར་པ་དང་། ཁྱབ་པར་བྱ་བ་ཆུང་ཟད་ཀྱང་མེད་དོ། །ཀུན་དགའ་བོ་དེ་ལྟར་ན་དགེ་སློང་སེམས་ནང་ཁོ་ནར་འཇོག་པར་བྱེད། ཡང་དག་པར་འཇོག་པར་བྱེད། བསྡུས་ཏེ་འཇོག་པར་བྱེད། ཉེ་བར་འཇོག་པར་བྱེད། 
དུལ་བར་བྱེད། ཞི་བར་བྱེད། ཉེ་བར་ཞི་བར་བྱེད། རྒྱུད་གཅིག་ཏུ་བྱེད་ཅིང་། ཏིང་ངེ་འཛིན་དུ་བྱེད་པ་ཡིན་ཏེ། ཀུན་དགའ་བོ་དགེ་སློང་དེས་ནི་སེམས་ནང་ཁོ་ནར་བཞག །ཡང་དག་པར་བཞག །བསྡུས་ཏེ་བཞག །ཉེ་བར་བཞག །
དུལ་བར་བྱས། ཞི་བར་བྱས། ཉེ་བར་ཞི་བར་བྱས། རྒྱུད་གཅིག་ཏུ་བྱས་ཤིང་། ཏིང་ངེ་འཛིན་དུ་བྱས་ཏེ། ཕྱི་སྟོང་པ་ཉིད་ཡིད་ལ་བྱའོ། །ཀུན་དགའ་བོ་དགེ་སློང་དེ་ཕྱི་སྟོང་པ་ཉིད་ཡིད་ལ་བྱེད་པས་སེམས་རྣམ་པར་གཡོ་
བར་འགྱུར་ཞིང་། འདི་ལྟ་སྟེ། ཕྱི་སྟོང་པ་ཉིད་ལ་དེའི་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར། མོས་པར་མི་འགྱུར། ཀུན་དགའ་བོ་གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་
ཕྱི་སྟོང་པ་ཉིད་ཡིད་ལ་བྱེད་པ་ན་སེམས་རྣམ་པར་གཡོ་བར་འགྱུར་ཞིང་། འདི་ལྟ་སྟེ། ཕྱི་སྟོང་པ་ཉིད་ལ་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར། མོས་པར་མི་འགྱུར་བར་ཤེས་པར་
གྱུར་ན། ཀུན་དགའ་བོ་དགེ་སློང་དེས་ནང་སྟོང་པ་ཉིད་ཡིད་ལ་བྱའོ། །ཀུན་དགའ་བོ་དགེ་སློང་དེ་ནང་སྟོང་པ་ཉིད་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་འགྱུར་ཞིང་འདི་ལྟ་སྟེ། ནང་སྟོང་པ་ཉིད་ལ་སེམས་འཇུག་པར་

66-1-282a

མི་འགྱུར་དང་བར་མི་འགྱུར། གནས་པར་མི་འགྱུར་མོས་པར་མི་འགྱུར་ལ། ཀུན་དགའ་བོ་གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་ནང་སྟོང་པ་ཉིད་ཡིད་ལ་བྱེད་པ་ན་ཡང་སེམས་རྣམ་པར་གཡོ་
བར་འགྱུར་ཞིང་། འདི་ལྟ་སྟེ། ནང་སྟོང་པ་ཉིད་ལ་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར། མོས་པར་མི་འགྱུར་བར་ཤེས་པར་གྱུར་ན། ཀུན་དགའ་བོ་དགེ་སློང་དེས་ཕྱི་ནང་སྟོང་པ་ཉིད་
ཡིད་ལ་བྱའོ། །ཀུན་དགའ་བོ་དགེ་སློང་དེ་ཕྱི་ནང་སྟོང་པ་ཉིད་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་འགྱུར་ཞིང་། འདི་ལྟ་སྟེ། ཕྱི་ནང་སྟོང་པ་ཉིད་ལ་སེམས་འཇུག་པར་མི་འགྱུར། དང་བར་མི་འགྱུར། གནས་
པར་མི་འགྱུར། མོས་པར་མི་འགྱུར་ལ། ཀུན་དགའ་བོ་གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་ཕྱི་ནང་སྟོང་པ་ཉིད་ལ་བྱེད་ན་ཡང་སེམས་རྣམ་པར་གཡོ་བར་འགྱུར་ཞིང་། འདི་ལྟ་སྟེ། ཕྱི་ནང་སྟོང་ཉིད་
ལ་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར། མོས་པར་མི་འགྱུར་བར་ཤེས་པར་གྱུར་ན། ཀུན་དགའ་བོ་དགེ་སློང་དེས་མི་གཡོ་བ་ཡིད་ལ་བྱའོ། །ཀུན་དགའ་བོ་དགེ་སློང་དེ་མི་གཡོ་བ་
ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་འགྱུར་ཞིང་། འདི་ལྟ་སྟེ། མི་གཡོ་བ་ལ་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར། མོས་པར་མི་འགྱུར་ལ། ཀུན་དགའ་བོ་གལ་ཏེ་དགེ་སློང་
དེ་དེ་ལྟར་སོ་སོར་རྟོག་པའི་ཚེ་བདག་མི་གཡོ་བ་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་འགྱུར་ཞིང་། འདི་ལྟ་སྟེ། མི་གཡོ་བ་ལ་སེམས་འཇུག་པར་མི་འགྱུར། དང་བར་མི་འགྱུར། གནས་པར་མི་འགྱུར་
མོས་པར་མི་འགྱུར་བར་ཤེས་པར་གྱུར་ན། ཀུན་དགའ་བོ་དགེ་སློང་དེས་སེམས་དེ་ཏིང་ངེ་འཛིན་དེ་དང་དེ་དག་ལ་གཞོལ་བར་བྱ། དུལ་བར་བྱ། ཞི་བར་བྱ། ལས་སུ་བྱ། བསྲོ་བར་བྱ། ཡང་དག་པར་བསྲོ་བར་བྱ། ཡོངས་སུ་

66-1-282b

བསྲོ་བར་བྱ། དྲང་པོར་བྱ་ཞིང་ལས་སུ་རུང་བ་དང་། གནས་པ་དང་། བཅོས་སུ་རུང་བ་དང་། བཏུབ་པར་བྱའོ། །ཀུན་དགའ་བོ་དགེ་སློང་དེས་སེམས་དེ་ཏིང་ངེ་འཛིན་དེ་དང་དེ་དག་ལ་གཞོལ་བར་བྱས། དུལ་བར་བྱས། ཞི་བར་བྱས། 
ལས་སུ་བྱས། བསྲོ་བར་བྱས། ཡང་དག་པར་བསྲོ་བར་བྱས། ཡོངས་སུ་བསྲོ་བར་བྱས། དྲང་པོར་བྱས་ཤིང་། ལས་སུ་རུང་བ་དང་། གནས་པ་དང་། བཅོས་སུ་རུང་བ་དང་། བཏུབ་པར་བྱས་ཏེ། ཕྱི་སྟོང་པ་ཉིད་ཡིད་ལ་བྱའོ། །
ཀུན་དགའ་བོ་དགེ་སློང་དེ་ཕྱི་སྟོང་པ་ཉིད་ཡིད་ལ་བྱེད་པ་ན་སེམས་རྣམ་པར་གཡོ་བར་མི་འགྱུར་ཞིང་འདི་ལྟ་སྟེ། ཕྱི་སྟོང་པ་ཉིད་ལ་སེམས་འཇུག་པ་དང་། དྲང་བ་དང་། གནས་པ་དང་། མོས་པར་གྱུར་ལ། ཀུན་དགའ་བོ་གལ་ཏེ་དགེ་སློང་དེ་
དེ་ལྟར་སོ་སོར་རྟོག་པའི་ཚེ་བདག་ཕྱི་སྟོང་པ་ཉིད་ཡིད་ལ་བྱེད་པ་ན་སེམས་རྣམ་པར་གཡོ་བར་མི་འགྱུར་ཞིང་། འདི་ལྟ་སྟེ། ཕྱི་སྟོང་པ་ཉིད་ལ་སེམས་འཇུག་པ་དང་། དང་བ་དང་། གནས་པ་དང་། མོས་པར་གྱུར་པར་ཤེས་ན། ཀུན་
དགའ་བོ་དགེ་སློང་དེས་ནང་སྟོང་པ་ཉིད་ཡིད་ལ་བྱའོ། །ཀུན་དགའ་བོ་དགེ་སློང་དེ་ནང་སྟོང་པ་ཉིད་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་མི་འགྱུར་ཞིང་། འདི་ལྟ་སྟེ། ནང་སྟོང་པ་ཉིད་ལ་སེམས་འཇུག་པ་དང་། དང་བ་དང་། 
གནས་པ་དང་། མོས་པར་གྱུར་ལ། ཀུན་དགའ་བོ་གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་ནང་སྟོང་པ་ཉིད་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་མི་འགྱུར་ན། འདི་ལྟ་སྟེ། ནང་སྟོང་པ་ཉིད་ལ་སེམས་
འཇུག་པ་དང་། དང་བ་དང་། གནས་པ་དང་། མོས་པར་གྱུར་པར་ཤེས་ན། ཀུན་དགའ་བོ་དགེ་སློང་དེས་ཕྱི་ནང་སྟོང་པ་ཉིད་ཡིད་ལ་བྱའོ། །ཀུན་དགའ་བོ་དགེ་སློང་དེ་ཕྱི་ནང་སྟོང་པ་ཉིད་ཡིད་ལ་བྱེད་པ་ན་ཡང་སེམས་རྣམ་པར་
གཡོ་བར་མི་འགྱུར་ཞིང་། འདི་ལྟ་སྟེ། ཕྱི་ནང་སྟོང་པ་ཉིད་ལ་སེམས་འཇུག་པ་དང་། དང་བ་དང་། གནས་པ་དང་། མོས་པར་གྱུར་ལ། ཀུན་དགའ་བོ་གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་ཕྱི་ནང་སྟོང་པ་ཉིད་ཡིད་ལ་བྱེད་པ་ན་

66-1-283a

ཡང་སེམས་རྣམ་པར་གཡོ་བར་མི་འགྱུར་ཞིང་། འདི་ལྟ་སྟེ། ཕྱི་ནང་སྟོང་པ་ཉིད་ལ་སེམས་འཇུག་པ་དང་། དང་བ་དང་། གནས་པ་དང་། མོས་པར་གྱུར་པར་ཤེས་ན། ཀུན་དགའ་བོ་དགེ་སློང་དེས་མི་གཡོ་བ་ཡིད་ལ་བྱའོ། །
ཀུན་དགའ་བོ་དགེ་སློང་དེ་མི་གཡོ་བ་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་མི་འགྱུར་ཞིང་། འདི་ལྟ་སྟེ། མི་གཡོ་བ་ལ་སེམས་འཇུག་པ་དང་། དང་བ་དང་། གནས་པ་དང་། མོས་པར་གྱུར་ལ། ཀུན་དགའ་བོ་གལ་ཏེ་
དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་མི་གཡོ་བ་ཡིད་ལ་བྱེད་པ་ན་ཡང་སེམས་རྣམ་པར་གཡོ་བར་མི་འགྱུར་ཞིང་། འདི་ལྟ་སྟེ། མི་གཡོ་བ་ལ་སེམས་འཇུག་པ་དང་། དང་བ་དང་། གནས་པ་དང་། མོས་པར་གྱུར་པར་
ཤེས་ན། དེ་དེ་ལ་དྲན་པ་དང་ཤེས་བཞིན་ཅན་དུ་འགྱུར་རོ། །ཀུན་དགའ་བོ་དགེ་སློང་དེ་གནས་པ་འདིས་གནས་པ་ན། གལ་ཏེ་འཆག་པ་ལ་སེམས་འཇུག་པར་གྱུར་ན། ཀུན་དགའ་བོ་དགེ་སློང་དེས་གཙུག་ལག་ཁང་གི་ཕྱི་རོལ་
བླ་གབ་མེད་པའི་འཆག་སར་དབང་པོ་རྣམས་ནང་དུ་བསྡུས་ཤིང་ཡིད་ཕྱི་རོལ་དུ་མ་སོང་བར་སྔ་ཕྱིའི་འདུ་ཤེས་ཀྱིས་བཅག་པར་བྱའོ། །དེ་དེ་ལྟར་འཆག་པ་ན་འཇིག་རྟེན་ལ་བརྣབ་སེམས་དང་། ཡིད་མི་བདེ་བ་དང་། སྡིག་པ་
མི་དགེ་བའི་ཆོས་རྣམས་སེམས་ཀྱི་རྗེས་སུ་མི་འབྲང་ཞིང་། དེ་དེ་ལ་དྲན་པ་དང་ཤེས་བཞིན་ཅན་དུ་འགྱུར་རོ། །ཀུན་དགའ་བོ་དགེ་སློང་དེ་གནས་པ་འདིས་གནས་པ་ན། གལ་ཏེ་འདུག་པ་ལ་སེམས་འཇུག་པར་གྱུར་ན། 
ཀུན་དགའ་བོ་དགེ་སློང་དེས་གཙུག་ལག་ཁང་གི་ཕྱི་རོལ་དུ་རྐང་པ་བཀྲུས་ཏེ་གཙུག་ལག་ཁང་གི་ནང་དུ་ཞུགས་ལ་སྐྱིལ་མོ་དཀྲུང་བཅས་ཏེ་ལུས་དྲང་པོར་བསྲང་ལ་དྲན་པ་མངོན་དུ་བཞག་སྟེ་འདུག་པར་བྱའོ། །དེ་དེ་ལྟར་
འདུག་པ་ན་འཇིག་རྟེན་ལ་བརྣབ་སེམས་དང་། ཡིད་མི་བདེ་བ་དང་། སྡིག་པ་མི་དགེ་བའི་ཆོས་རྣམས་སེམས་ཀྱི་རྗེས་སུ་མི་འབྲང་ཞིང་། དེ་དེ་ལ་དྲན་པ་དང་ཤེས་བཞིན་ཅན་དུ་འགྱུར་རོ། །ཀུན་དགའ་བོ་དགེ་སློང་དེ་གནས་

66-1-283b

པ་འདིས་གནས་པ་ན། གལ་ཏེ་རྣམ་པར་རྟོག་པ་དག་ལ་སེམས་འཇུག་པར་གྱུར་ན། ཀུན་དགའ་བོ་དགེ་སློང་དེས་མི་དགེ་བ། སྡུག་བསྔལ་བ། འཕགས་པ་མ་ཡིན་པ། གནོད་པ་དང་ལྡན་པའི་རྣམ་པར་རྟོག་པ་འདི་ལྟ་སྟེ། 
འདོད་པའི་རྣམ་པར་རྟོག་པ་དང་། གནོད་སེམས་ཀྱི་རྣམ་པར་རྟོག་པ་དང་། རྣམ་པར་འཚེ་བའི་རྣམ་པར་རྟོག་པ་དང་། དེ་ལྟ་བུའི་རྣམ་པར་རྟོག་པ་གང་དག་ཡིན་པ་དེ་དག་མངོན་པར་སྤངས་ལ། དགེ་བ་བདེ་བ་འཕགས་པ་
གནོད་པ་མེད་པ་དང་ལྡན་པའི་རྣམ་པར་རྟོག་པ་འདི་ལྟ་སྟེ། ངེས་པར་འབྱུང་བའི་རྣམ་པར་རྟོག་པ་དང་། གནོད་སེམས་མེད་པའི་རྣམ་པར་རྟོག་པ་དང་། རྣམ་པར་མི་འཚེ་བའི་རྣམ་པར་རྟོག་པ་དང་། དེ་ལྟ་བུའི་རྣམ་པར་རྟོག་
པ་གང་དག་ཡིན་པ་དེ་དག་ལ་རྣམ་པར་བརྟག་པར་བྱའོ། །དེ་དེ་ལྟར་རྣམ་པར་རྟོག་པ་ན་འཇིག་རྟེན་ལ་བརྣབ་སེམས་དང་། ཡིད་མི་བདེ་བ་དང་། སྡིག་པ་མི་དགེ་བའི་ཆོས་རྣམས་སེམས་ཀྱི་རྗེས་སུ་མི་འབྲང་ཞིང་། དེ་དེ་ལ་
དྲན་པ་དང་ཤེས་བཞིན་ཅན་དུ་འགྱུར་རོ། །ཀུན་དགའ་བོ་དགེ་སློང་དེ་གནས་པ་འདིས་གནས་པ་ན། གལ་ཏེ་གཏམ་ལ་སེམས་འཇུག་པར་གྱུར་ན། ཀུན་དགའ་བོ་དགེ་སློང་དེས་མི་དགེ་བ་འཕགས་པ་མ་ཡིན་པ་གནོད་པ་
དང་ལྡན་པའི་གཏམ་འདི་ལྟ་སྟེ། རྒྱལ་པོའི་གཏམ་དང་། རྐུན་པོའི་གཏམ་དང་། འཐབ་མོའི་གཏམ་དང་། ཟས་ཀྱི་གཏམ་དང་། སྐོམ་གྱི་གཏམ་དང་། གོས་ཀྱི་གཏམ་དང་། ལམ་སྲང་གི་གཏམ་དང་། སྨད་འཚོང་མའི་
གཏམ་དང་། འཇིག་རྟེན་གྱི་གཏམ་རྒྱུད་ཀྱི་གཏམ་དང་། ལམ་ངན་པའི་གཏམ་རྒྱུད་ཀྱི་གཏམ་དང་། རྒྱ་མཚོའི་གཏམ་རྒྱུད་ཀྱི་གཏམ་དང་། ཡུལ་གྱི་མི་དང་། སྣ་ཆེན་པོ་ལ་གཏོགས་པའི་གཏམ་རྒྱུད་གྱི་གཏམ་དང་། 
དེ་ལྟ་བུའི་གཏམ་གང་དག་ཡིན་པ་དེ་དག་མངོན་པར་སྤངས་ལ། འཕགས་པའི་ཡོ་བྱད་བསྙུངས་པ་སེམས་ཀྱི་སྒྲིབ་པ་མེད་པ་དང་འཐུན་པར་འགྱུར་བའི་གཏམ་འདི་ལྟ་སྟེ། ཚུལ་ཁྲིམས་ཀྱི་གཏམ་དང་། ཏིང་ངེ་འཛིན་གྱི་

66-1-284a

གཏམ་དང་། ཤེས་རབ་ཀྱི་གཏམ་དང་། རྣམ་པར་གྲོལ་བའི་གཏམ་དང་། རྣམ་པར་གྲོལ་བའི་ཡེ་ཤེས་མཐོང་བའི་གཏམ་དང་། འདོད་པ་ཆུང་བའི་གཏམ་དང་། ཆོག་ཤེས་པའི་གཏམ་དང་། མི་སོགས་པའི་
གཏམ་དང་། ཡོ་བྱད་བསྙུངས་པའི་གཏམ་དང་། འདུ་འཛི་མེད་པའི་གཏམ་དང་། སྤོང་བའི་གཏམ་དང་། འདོད་ཆགས་དང་བྲལ་བའི་གཏམ་དང་། འགོག་པའི་གཏམ་དང་། སྟོང་པ་ཉིད་ཀྱི་གཏམ་དང་། རྐྱེན་འདི་ཉིད་ཀྱི་
རྟེན་ཅིང་འབྲེལ་པར་འབྱུང་བའི་གཏམ་དང་། དེ་ལྟ་བུའི་གཏམ་གང་དག་ཡིན་པ་དེ་དག་གི་གཏམ་བྱའོ། །དེ་དེ་ལྟར་གཏམ་ཟེར་བ་ན་འཇིག་རྟེན་ལ་བརྣབ་སེམས་དང་། ཡིད་མི་བདེ་བ་དང་། སྡིག་པ་མི་དགེ་བའི་ཆོས་རྣམས་
སེམས་ཀྱི་རྗེས་སུ་མི་འབྲང་ཞིང་དེ་དེ་ལྟར་དྲན་པ་དང་ཤེས་བཞིན་ཅན་དུ་འགྱུར་རོ། །ཀུན་དགའ་བོ་འཕགས་པ་ཉན་ཐོས་ཀྱིས་མ་ལ་བདག་གིས་སེམས་འདོད་པའི་ཡོན་ཏན་ལྔ་པོ་འདི་དག་ལས་འདོད་པའི་ཡོན་ཏན་གང་
ཡང་རུང་བ་ལ་བརྟེན་ནས་ཀུན་དུ་འབྱུང་བ་ཡོད་དམ། འོན་ཏེ་བདག་གི་སེམས་འདོད་པའི་ཡོན་ཏན་ལྔ་པོ་འདི་དག་ལས་འདོད་པའི་ཡོན་ཏན་གང་ཡང་རུང་བ་ལ་བརྟེན་ནས་ཀུན་དུ་འབྱུང་བ་མེད་ཅེས་ཡང་དང་ཡང་དུ་འདོད་པའི་ཡོན་ཏན་
ལྔ་པོ་འདི་དག་ལ་རང་གི་སེམས་སོ་སོར་བརྟག་པར་བྱ་སྟེ། ཀུན་དགའ་བོ་ང་ནི་འདོད་པའི་ཡོན་ཏན་ལྔ་པོ་དག་ལས་གཞན་པ་ལ་སེམས་ཀུན་དུ་འབྱུང་བར་མི་སྨྲའོ། །ཀུན་དགའ་བོ་གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་
བདག་གི་སེམས་འདོད་པའི་ཡོན་ཏན་ལྔ་པོ་འདི་དག་ལས་འདོད་པའི་ཡོན་ཏན་གང་ཡང་རུང་བ་ལ་བརྟེན་ནས་ཀུན་དུ་འབྱུང་བ་ཡོད་པར་ཤེས་པར་གྱུར་ན། ཀུན་དགའ་བོ་དགེ་སློང་དེས་འདོད་པའི་ཡོན་ཏན་དེ་དང་དེ་དག་ལ་མི་རྟག་
པར་རྗེས་སུ་བལྟ་ཞིང་གནས་པར་བྱ། ཟད་པར་རྗེས་སུ་བལྟ་བ་དང་། འདོད་ཆགས་དང་བྲལ་བར་རྗེས་སུ་བལྟ་བ་དང་། འགོག་པར་རྗེས་སུ་བལྟ་བ་དང་། ངེས་པར་འབྱུང་བར་རྗེས་སུ་བལྟ་ཞིང་གནས་པར་བྱའོ། །

66-1-284b

ཀུན་དགའ་བོ་དགེ་སློང་དེ་འདོད་པའི་ཡོན་ཏན་དེ་དང་དེ་དག་ལ་མི་གནས་པར་རྗེས་སུ་ལྟ་ཞིང་གནས་པ་དང་། ཟད་པར་རྗེས་སུ་ལྟ་བ་དང་། འདོད་ཆགས་དང་བྲལ་བར་རྗེས་སུ་ལྟ་བ་དང་། འགོག་པར་རྗེས་སུ་ལྟ་བ་དང་། ངེས་
པར་འབྱུང་བར་རྗེས་སུ་ལྟ་ཞིང་གནས་པ་ན། དེའི་སེམས་འདོད་པའི་ཡོན་ཏན་ལྔ་པོ་འདི་དག་ལས་ཡོན་ཏན་གང་ཡང་རུང་བ་ལ་བརྟེན་ནས་ཀུན་དུ་འབྱུང་བར་འགྱུར་བ་གང་ཡིན་པ་དེ་ཀུན་དུ་འབྱུང་བར་མི་འགྱུར་རོ། །
ཀུན་དགའ་བོ་གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་གི་སེམས་འདོད་པའི་ཡོན་ཏན་ལྔ་པོ་འདི་དག་ལས་འདོད་པའི་ཡོན་ཏན་གང་ཡང་རུང་བ་ལ་བརྟེན་ནས་ཀུན་དུ་འབྱུང་བར་གྱུར་པ་གང་ཡིན་པ་དེ་སྤང་བར་
ཤེས་པར་གྱུར་ན། དེ་དེ་ལ་དྲན་པ་དང་ཤེས་བཞིན་ཅན་དུ་འགྱུར་རོ། །ཀུན་དགའ་བོ་འཕགས་པ་ཉན་ཐོས་ཀྱིས་མ་ལ་བདག་གིས་ཉེ་བར་ལེན་པའི་ཕུང་པོ་འདི་དག་ལ་ངའོ་སྙམ་པའི་ང་རྒྱལ་དང་། ངའོ་སྙམ་པའི་འདུན་པ་དང་། 
ངའོ་སྙམ་པའི་བག་ལ་ཉལ་མ་སྤངས་ཤིང་ཡོངས་སུ་མ་ཤེས་ལ་མ་བཀག་མ་བསལ་བ་ཡོད་དམ། འོན་ཏེ་བདག་གིས་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ངའོ་སྙམ་པའི་ང་རྒྱལ་དང་ངའོ་སྙམ་པའི་འདུན་པ་དང་། 
ངའོ་སྙམ་པའི་བག་ལ་ཉལ་མ་སྤངས་ཤིང་ཡོངས་སུ་མ་ཤེས་ལ་མ་བཀག་མ་བསལ་བ་མེད་ཅེས། དེ་དང་ཡང་དུ་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་རང་གི་སེམས་སོ་སོར་བརྟག་པར་བྱའོ། །ཀུན་དགའ་བོ་གལ་
ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་གིས་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ངའོ་སྙམ་པའི་ང་རྒྱལ་དང་། ངའོ་སྙམ་པའི་འདུན་པ་དང་། ངའོ་སྙམ་པའི་བག་ལ་ཉལ་མ་སྤངས་ཤིང་ཡོངས་སུ་མ་ཤེས་ལ་མ་
བཀག་མ་བསལ་བ་ཡོད་པར་ཤེས་པར་གྱུར་ན། ཀུན་དགའ་བོ་དགེ་སློང་དེས་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ཡང་དང་ཡང་དུ་འདི་ལྟ་སྟེ། འདི་ནི་གཟུགས་སོ། །འདི་ནི་གཟུགས་ཀྱི་ཀུན་འབྱུང་བའོ། །འདི་ནི་

66-1-285a

གཟུགས་ཀྱི་ཟད་པའོ། །འདི་ལྟ་སྟེ། འདི་ནི་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པའོ། །འདི་ནི་རྣམ་པར་ཤེས་པའི་ཀུན་འབྱུང་བའོ། །འདི་ནི་རྣམ་པར་ཤེས་པའི་ཟད་པའོ་
ཞེས་ཀུན་འབྱུང་བ་དང་ཟད་པར་རྗེས་སུ་བལྟ་ཞིང་གནས་པར་བྱའོ། །དེ་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ཡང་དང་ཡང་དུ་ཀུན་འབྱུང་བ་དང་ཟད་པར་རྗེས་སུ་ལྟ་ཞིང་གནས་པ་ན། དེ་ལ་ཉེ་བར་ལེན་པའི་ཕུང་པོ་ལྔ་
པོ་འདི་དག་ལ་ངའོ་སྙམ་པའི་ང་རྒྱལ་དང་། ངའོ་སྙམ་པའི་འདུན་པ་དང་། ངའོ་སྙམ་པའི་བག་ལ་ཉལ་མ་སྤངས་ཤིང་ཡོངས་སུ་མ་ཤེས་ལ་མ་བཀག་མ་བསལ་བར་གྱུར་པ་གང་ཡིན་པ་དེ་མེད་པར་འགྱུར་རོ། །ཀུན་དགའ་
བོ་གལ་ཏེ་དགེ་སློང་དེ་དེ་ལྟར་སོ་སོར་རྟོག་པའི་ཚེ་བདག་གིས་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ངའོ་སྙམ་པའི་ང་རྒྱལ་དང་། ངའོ་སྙམ་པའི་འདུན་པ་དང་། ངའོ་སྙམ་པའི་བག་ལ་ཉལ་འབྱུང་བར་གྱུར་པ་གང་ཡིན་
པ་དེ་སྤངས་པར་ཤེས་པར་གྱུར་ན། དེ་དེ་ལ་དྲན་པ་དང་ཤེས་བཞིན་ཅན་དུ་འགྱུར་ཏེ། ཀུན་དགའ་བོ་ཆོས་དེ་དག་ནི་གཅིག་ཏུ་དགར་བ། གཅིག་ཏུ་དགེ་བ། གཅིག་ཏུ་ཁ་ན་མ་ཐོ་བ་མེད་པ་སྟེ། བདུད་སྡིག་ཅན་གྱིས་འདའ་
བར་བྱ་བ་མ་ཡིན་ཞིང་། སྡིག་པ་མི་དགེ་བའི་ཆོས་ཀུན་ནས་ཉོན་མོངས་པར་འགྱུར་བ་དང་། ཡང་སྲིད་པར་འགྱུར་བ་གདུང་བ་དང་བཅས་པ། རྣམ་པར་སྨིན་པ་སྡུག་བསྔལ་བ། ཕྱི་མ་ལ་སྐྱེ་བ་དང་། རྒ་བ་དང་། འཆི་བར་
འགྱུར་བ་རྣམས་ཀྱིས་མི་འཕྲོགས་པ་ཡིན་ནོ། །ཀུན་དགའ་བོ་ཇི་སྙམ་དུ་སེམས་ཉན་ཐོས་དད་པ་ཅན་དག་ཇི་སྲིད་འཚོའི་བར་དུ་ཕྱིར་བཀག་ཀྱང་སྟོན་པའི་ཕྱི་བཞིན་རྗེས་སུ་འབྲང་བར་འོས་པ་ཅིའི་ཕྱིར་སྙམ། གསོལ་
པ། བཙུན་པ་བཅོམ་ལྡན་འདས་ནི་ཆོས་རྣམས་ཀྱི་གཞི་བོ་ལགས་ཏེ། བཅོམ་ལྡན་འདས་ཀྱིས་མཚོན་པ་དང་། བཅོམ་ལྡན་འདས་ལ་རྟེན་པ་ལགས་པས་བཅོམ་ལྡན་འདས་ཀྱིས་དོན་དེ་དགེ་སློང་རྣམས་ལ་ལེགས་

66-1-285b

པར་བཀའ་སྩལ་དུ་གསོལ། བཅོམ་ལྡན་འདས་ལས་ཐོས་ནས་དགེ་སློང་རྣམས་ཀྱང་འཛིན་པར་འགྱུར་ལགས་སོ། །བཀའ་སྩལ་པ། ཀུན་དགའ་བོ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་པར་
བྱའོ། །ཀུན་དགའ་བོ་ཉན་ཐོས་དད་པ་ཅན་གང་དག་འདི་ལྟ་སྟེ། མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞིའི་སྡེ་དང་། 
རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པ་རབས་ཀྱི་སྡེ་དང་། ཤིན་དུ་རྒྱས་པའི་སྡེ་དང་རྨད་དུ་བྱུང་བའི་ཆོས་ཀྱི་སྡེ་དང་། གཏན་ལ་བབ་པར་བསྟན་པའི་སྡེའི་ཆོས་དེ་དག་དང་། དེ་ལྟ་བུའི་ཆོས་རྣམས་
མཉན་པའི་ཕྱིར་ཇི་སྲིད་འཚོའི་བར་དུ་ཕྱིར་བཀག་ཀྱང་སྟོན་པའི་ཕྱི་བཞིན་རྗེས་སུ་འབྲང་བ་ནི་འོས་པ་མ་ཡིན་ནོ། །དེ་ཅིའི་ཕྱིར་ཞེ་ན། །ཀུན་དགའ་བོ་ཆོས་དེ་དག་ནི་ཡུན་རིང་པོ་ནས་ཐོས་ཤིང་བཟུང་ལ་བརྟན་པར་བྱས་ཤིང་
ཁ་ཏོན་བྱང་བ་དང་། ཡིད་ཀྱིས་བརྟགས་པ་དང་། མཐོང་བས་ཤིན་དུ་རྟོགས་པར་བྱས་ཟིན་པའི་ཕྱིར་རོ། །ཀུན་དགའ་བོ་ཉན་ཐོས་དད་པ་ཅན་གང་དག་འཕགས་པ་ཡོ་བྱད་བསྙུངས་པ་སེམས་ཀྱིས་སྒྲིབ་པ་མེད་པ་དང་
འཐུན་པར་འགྱུར་བའི་གཏམ་འདི་ལྟ་སྟེ། ཚུལ་ཁྲིམས་ཀྱི་གཏམ་དང་། ཏིང་ངེ་འཛིན་གྱི་གཏམ་དང་། ཤེས་རབ་ཀྱི་གཏམ་དང་། རྣམ་པར་གྲོལ་བའི་གཏམ་དང་། རྣམ་པར་གྲོལ་བའི་ཡེ་ཤེས་མཐོང་བའི་གཏམ་དང་། 
འདོད་པ་ཆུང་བའི་གཏམ་དང་། ཆོག་ཤེས་པའི་གཏམ་དང་། མི་སོགས་པའི་གཏམ་དང་། ཡོ་བྱད་བསྙུངས་པའི་གཏམ་དང་། འདུ་འཛི་མེད་པའི་གཏམ་དང་། སྤོང་བའི་གཏམ་དང་། འདོད་ཆགས་དང་བྲལ་བའི་གཏམ་དང་། 
འགོག་པའི་གཏམ་དང་། སྟོང་པ་ཉིད་ཀྱི་གཏམ་དང་། རྐྱེན་འདི་པ་ཉིད་ཀྱི་རྟེན་ཅིང་འབྲེལ་པར་འབྱུང་བའི་གཏམ་དང་། དེ་ལྟ་བུའི་གཏམ་གང་ཡིན་པ་དག་མཉན་པའི་ཕྱིར་ཇི་སྲིད་འཚོའི་བར་དུ་ཕྱིར་བཀག་ཀྱང་སྟོན་པའི་

66-1-286a

ཕྱི་བཞིན་རྗེས་སུ་འབྲང་བ་ནི་རིགས་པ་ཡིན་ནོ། །ཀུན་དགའ་བོ་གསུམ་པོ་འདི་དག་ནི་གནོད་པ་ཡིན་ཏེ། གསུམ་གང་ཞེ་ན། སློབ་དཔོན་གྱི་གནོད་པ་དང་། སློབ་མའི་གནོད་པ་དང་། ཚངས་པར་སྤྱོད་པའི་གནོད་
པའོ། །ཀུན་དགའ་བོ་སློབ་དཔོན་གྱི་གནོད་པ་གང་ཞེ་ན། ཀུན་དགའ་བོ་འདི་ལ་སྟོན་པ་རྟོག་གེ་པ་དཔྱོད་པ་ཅན་རྟོག་གེར་གཏོགས་པའི་ས་རང་གི་སྤོབས་པ་ལས་བྱུང་བ། སོ་སོའི་སྐྱེ་བོ་པ་དཔྱོད་པའི་རྗེས་སུ་སྤྱོད་པ་ལ་
གནས་པ་དེ་འཇིག་རྟེན་དུ་བྱུང་ན། དེ་གནས་མལ་དགོན་པ་འམ། ནགས་འདབ་བམ། བས་མཐའ་དག་ཏུ་གནས་པར་བྱེད་དོ། །དེ་གནས་མལ་དགོན་པ་འམ། ནགས་འདབ་བམ། བས་མཐའ་དག་ན་གནས་པའི་ཚེ་
ཉན་པ་པོ་ཁྱིམ་པ་དང་། རབ་ཏུ་བྱུང་བ་དག་རྗེས་སུ་འབྲང་བར་འགྱུར་རོ། །དེ་ཉན་པ་པོ་ཁྱིམ་པ་དང་། རབ་ཏུ་བྱུང་བ་རྗེས་སུ་ལྷགས་པ་དག་ལ་ཆུམས་པར་བྱེད་ཅིང་བརྒྱལ་བ་སྐྱེད་པར་བྱེད་ལ། མང་པོ་བསྡུ་བའི་ཕྱིར་རྗེས་སུ་
འཇུག་པར་བྱེད་དོ། །ཀུན་དགའ་བོ་དེ་ནི་སློབ་དཔོན་གྱི་གནོད་པ་ཞེས་བྱའོ། །ཀུན་དགའ་བོ་སློབ་དཔོན་གྱི་གནོད་པས་གནོད་པར་གྱུར་པའི་སློབ་དཔོན་དེ་ནི་སྡིག་པ་མི་དགེ་བའི་ཆོས་ཀུན་ནས་ཉོན་མོངས་པར་འགྱུར་བ། 
ཡང་སྲིད་པར་འགྱུར་བ། གདུང་བ་དང་བཅས་པ། རྣམ་པར་སྨིན་པ་སྡུག་བསྔལ་བ། ཕྱི་མ་ལ་སྐྱེ་བ་དང་། རྒ་བ་དང་། འཆི་བར་འགྱུར་བ་རྣམས་ཀྱིས་གནོད་པར་འགྱུར་རོ། །ཀུན་དགའ་བོ་སློབ་མའི་གནོད་པ་གང་
ཞེ་ན། ཀུན་དགའ་བོ་འདི་ལ་ཉན་པ་པོ་དད་པ་དང་ལྡན་པ་སྟོན་པ་དེ་ཉིད་ཀྱི་ཚིག་ལ་མངོན་པར་དད་པར་གྱུར་པ་དེ་སྟོན་པ་དེ་ཉིད་ཀྱི་དབེན་པའི་རྗེས་སུ་སློབ་པའི་ཚེ་གནས་མལ་དགོན་པ་འམ། ནགས་འདབ་བམ། བས་མཐའ་
དག་ཏུ་གནས་པར་བྱེད་དོ། །དེ་གནས་མལ་དགོན་པ་འམ། ནགས་འདབ་བམ། བས་མཐའ་དག་ན་གནས་པའི་ཚེ་ཉན་པ་པོ་ཁྱིམ་པ་དང་། རབ་ཏུ་བྱུང་བ་དག་རྗེས་སུ་འབྲང་བར་འགྱུར་རོ། །དེ་ཉན་པ་པོ་ཁྱིམ་པ་

66-1-286b

དང་རབ་ཏུ་བྱུང་བ་རྗེས་སུ་ལྷགས་པ་དག་ལ་ཆུམས་པར་བྱེད་ཅིང་བརྒྱལ་བ་སྐྱེད་པར་བྱེད་ལ། མང་པོ་བསྡུ་བའི་ཕྱིར་རྗེས་སུ་འཇུག་པར་བྱེད་དེ། ཀུན་དགའ་བོ་དེ་ནི་སློབ་མའི་གནོད་པ་ཞེས་བྱའོ། །ཀུན་དགའ་བོ་
སློབ་མའི་གནོད་པས་གནོད་པར་གྱུར་པའི་སློབ་མ་དེ་ནི་སྡིག་པ་མི་དགེ་བའི་ཆོས་ཀུན་ནས་ཉོན་མོངས་པར་འགྱུར་བ། ཡང་སྲིད་པར་འགྱུར་བ། གདུང་བ་དང་བཅས་པ། རྣམ་པར་སྨིན་པ་སྡུག་བསྔལ་བ། ཕྱི་མ་ལ་སྐྱེ་
བ་དང་། རྒ་བ་དང་། འཆི་བར་འགྱུར་བ་རྣམས་ཀྱིས་གནོད་པར་འགྱུར་རོ། །ཀུན་དགའ་བོ་ཚངས་པར་སྤྱོད་པའི་གནོད་པ་གང་ཞེ་ན། ཀུན་དགའ་བོ་འདི་ལ་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་
རྟེན་དུ་བྱུང་ན། དེ་གནས་མལ་དགོན་པ་འམ། ནགས་འདབ་བམ། བས་མཐའ་དག་ཏུ་གནས་པར་མཛད་དོ། །དེ་གནས་མལ་དགོན་པ་འམ། ནགས་འདབ་བམ། བས་མཐའ་དག་ན་བཞུགས་པའི་ཚེ་ཉན་པ་པོ་ཁྱིམ་
པ་དང་། རབ་ཏུ་བྱུང་བ་དག་རྗེས་སུ་འབྲང་བར་འགྱུར་རོ། །དེ་ཉན་པ་པོ་ཁྱིམ་པ་དང་། རབ་ཏུ་བྱུང་བ་རྗེས་སུ་ལྷགས་པ་དག་ལ་ཆུམས་པར་མི་མཛད་ཅིང་བརྒྱལ་བ་སྐྱེད་པར་མི་མཛད་ལ། མང་པོ་བསྡུ་བའི་ཕྱིར་རྗེས་སུ་
འཇུག་པར་མི་མཛད་ཀྱང་། དེ་ཉན་པ་པོས་ཀུན་དུ་གང་ཞིང་གནས་ན་ལྷག་པའི་སེམས་ལས་བྱུང་བ་བཞི་པོ་དེ་དག་གིས་ཚེ་འདི་ལ་བདེ་བར་གནས་པ་ཐོབ་པ་གང་དག་ཡིན་པ་དེ་དག་ལས་གང་ཡང་རུང་བ་ལས་ཡོངས་སུ་
ཉམས་པར་ང་སྨྲ་ལ། གཅིག་པུ་མ་འདྲེས་པ་དང་། བག་ཡོད་པ་དང་། རྟུན་པ་དང་། སེམས་བསྡུས་པའི་བདག་ཉིད་དེ། དེ་དག་གིས་ཉམས་པ་མེད་པའི་སེམས་རྣམ་པར་གྲོལ་བ་སྐུས་མངོན་སུམ་དུ་མཛད་ཅིང་གནང་

66-1-287a

བ་གང་ཡིན་པ་དེ་ལ་ནི་རྣམ་གྲངས་གང་གིས་ཀྱང་ཡོངས་སུ་ཉམས་པ་མེད་པར་ང་སྨྲ་མོད་ཀྱི། འོན་ཀྱང་ཉན་པ་པོ་དང་ལྡན་པ་སྟོན་པ་དེ་ཉིད་ཀྱི་བཀའ་ལ་མངོན་པར་དད་པར་གྱུར་པ་དེ་སྟོན་པ་དེ་ཉིད་ཀྱི་དབེན་
པའི་རྗེས་སུ་སློབ་པའི་ཚེ་གནས་མལ་དགོན་པ་འམ། ནགས་འདབ་བམ། བས་མཐའ་དག་ན་གནས་པའི་ཚེ། ཉན་པ་པོ་ཁྱིམ་པ་དང་། རབ་ཏུ་བྱུང་བ་དག་རྗེས་སུ་འབྲང་བར་འགྱུར་རོ། །དེ་ཉན་པ་པོ་ཁྱིམ་པ་དང་། 
རབ་ཏུ་བྱུང་བ་རྗེས་སུ་ལྷགས་པ་དེ་དག་ལ་ཆུམས་པར་བྱེད་ཅིང་བརྒྱལ་བ་སྐྱེད་པར་བྱེད་ལ། མང་པོ་བསྡུ་བའི་ཕྱིར་རྗེས་སུ་འཇུག་པར་བྱེད་དེ། ཀུན་དགའ་བོ་དེ་ནི་ཚངས་པར་སྤྱོད་པའི་གནོད་པ་ཞེས་བྱའོ། །ཀུན་དགའ་བོ་
གནོད་པ་རྣམས་ལས་འདི་ལྟ་སྟེ། སློབ་དཔོན་གྱི་གནོད་པ་དང་། སློབ་མའི་གནོད་པ་དེ་དག་ནི་ཅུང་ཟད་ཙམ་དུ་ཟད་ཀྱི། གནོད་པ་རྣམས་ལས་འདི་ལྟ་སྟེ། ཚངས་པར་སྤྱོད་པའི་གནོད་པ་དེ་ནི་ཐ་ཆད་ཡིན་ནོ། །ཀུན་དགའ་བོ་
ཚངས་པར་སྤྱོད་པའི་གནོད་པས་གནོད་པར་གྱུར་པའི་ཚངས་པར་སྤྱོད་པ་དེ་ནི་སྡིག་པ་མི་དགེ་བའི་ཆོས་ཀུན་ནས་ཉོན་མོངས་པར་འགྱུར་བ། ཡང་སྲིད་པར་འགྱུར་བ། གདུང་བ་དང་བཅས་པ། རྣམ་པར་སྨིན་པ་སྡུག་
བསྔལ་བ། ཕྱི་མ་ལ་སྐྱེ་བ་དང་། རྒ་བ་དང་། འཆི་བར་འགྱུར་བ་རྣམས་ཀྱིས་གནོད་པར་འགྱུར་རོ། །ཀུན་དགའ་བོ་ང་ནི་མཛའ་བཤེས་དང་ལྡན་པས་ཀུན་དུ་སྤྱོད་པར་བྱེད་ཀྱི། འགྲན་ཟླ་དང་ལྡན་པས་ནི་མ་ཡིན་ནོ། །ཀུན་
དགའ་བོ་ཇི་ལྟར་ན་ཉན་ཐོས་རྣམས་སྟོན་པ་ལ་འགྲན་ཟླ་དང་ལྡན་པས་ཀུན་དུ་སྤྱོད་ཅིང་མཛའ་བཤེས་དང་ལྡན་པས་མ་ཡིན་ཞེ་ན། ཀུན་དགའ་བོ་འདི་ལ་སྟོན་པ་རྗེས་སུ་ཐུགས་བརྩེ་བ་དང་ལྡན་པ། ཐུགས་རྗེ་དང་ལྡན་
པ། དོན་དུ་བཞེད་པ་ཕན་པར་བཞེད་པ། ཐུགས་རྗེ་བར་གྱུར་པ། ཉན་ཐོས་རྣམས་ལ་དགེ་སློང་དག་ཁྱེད་ལ་ཕན་པ་འདི་དང་། བདེ་བ་འདི་དང་། ཕན་པ་དང་བདེ་བ་འདིའི་ཕྱིར་རོ་ཞེས་ཆོས་སྟོན་པར་མཛད་པ་ན། དེའི་

66-1-287b

ཉན་ཐོས་དེ་དག་གུས་པར་ཉན་པར་མི་བྱེད་ཅིང་། རྣ་ཀློག་པར་མི་བྱེད། ཀུན་ཤེས་པར་བྱ་བའི་སེམས་ཉེ་བར་འཇོག་པར་མི་བྱེད། ཆོས་ཀྱི་རྗེས་སུ་འཐུན་པའི་ཆོས་སྒྲུབ་པར་མི་བྱེད་ལ། སྟོན་པའི་བསྟན་པ་ལས་
རྣམ་པར་འདས་ཤིང་གནས་པར་བྱེད་ན། ཀུན་དགའ་བོ་དེ་ན་ཉན་ཐོས་རྣམས་སྟོན་པ་ལ་འགྲན་ཟླ་དང་ལྡན་པས་ཀུན་དུ་སྤྱོད་ཅིང་མཛའ་བཤེས་དང་ལྡན་པས་མ་ཡིན་པ་ཡིན་ནོ། །ཀུན་དགའ་བོ་ཇི་ལྟར་ན་ཉན་ཐོས་རྣམས་
སྟོན་པ་ལ་མཛའ་བཤེས་དང་ལྡན་པས་ཀུན་དུ་སྤྱོད་ཅིང་འགྲན་ཟླ་དང་ལྡན་པས་མ་ཡིན་ཞེ་ན། ཀུན་དགའ་བོ་འདི་ལ་སྟོན་པ་རྗེས་སུ་ཐུགས་བརྩེ་བ་དང་ལྡན་པ། ཐུགས་རྗེ་དང་ལྡན་པ། དོན་དུ་བཞེད་པ། ཕན་པར་བཞེད་པ། 
ཐུགས་རྗེ་བར་གྱུར་པ། ཉན་ཐོས་རྣམས་ལ་དགེ་སློང་དག་ཁྱེད་ལ་ཕན་པ་འདི་དང་། བདེ་བ་འདི་དང་། ཕན་པ་དང་བདེ་བ་འདིའི་ཕྱིར་རོ་ཞེས་ཆོས་སྟོན་པར་མཛད་པ་ན། དེའི་ཉན་ཐོས་དེ་དག་གུས་པར་ཉན་པར་བྱེད་ཅིང་། 
རྣ་ཀློག་པར་བྱེད། ཀུན་ཤེས་པར་བྱ་བའི་སེམས་ཉེ་བར་འཇོག་པར་བྱེད། ཆོས་ཀྱི་རྗེས་སུ་འཐུན་པའི་ཆོས་སྒྲུབ་པར་བྱེད་ལ། སྟོན་པའི་བསྟན་པ་ཡང་དག་པར་བླངས་ཏེ་གནས་པར་བྱེད་ན། ཀུན་དགའ་བོ་དེ་ནི་
ཉན་ཐོས་རྣམས་སྟོན་པ་ལ་མཛའ་བཤེས་དང་ལྡན་པས་ཀུན་དུ་སྤྱོད་ཅིང་འགྲན་ཟླ་དང་ལྡན་པས་མ་ཡིན་པ་ཡིན་ནོ། །ཀུན་དགའ་བོ་ང་ནི་ཁྱེད་ཅག་ལ་ཚར་བཅད་ཅིང་བཅད་ཅིང་ཟིལ་གྱིས་མནན་ཅིང་མནན་ཅིང་སྨྲ་
སྟེ། རྫ་མཁན་རྫ་མ་མ་ཚོས་པ་དག་ལས་སྲ་བ་གང་ཡིན་པ་དེ་འཇོག་པར་བྱེད་པ་བཞིན་དུ་ཁྱེད་ལ་དབྱིག་ཏུ་མི་འཛིན་གྱིས། ངའི་ཚིག་གི་ལམ་རྣམས་ལ་ཡང་བཟོད་པར་གྱིས་ཤིག །བཅོམ་ལྡན་འདས་ཀྱིས་དེ་སྐད་
ཅེས་བཀའ་སྩལ་ནས། དགེ་སློང་དེ་དག་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །བར་སྡོམ་ནི། འཕགས་པའི་བདེ་དང་དུས་སྦྱོར་དང་། །གཟུགས་དང་མཆོག་དགའ་དགེ་སློང་དང་། །ཁྲུས་རིལ་

66-1-288a

ཕྱི་སྟོང་ཉིད་སོགས་དང་། །ཏིང་ངེ་འཛིན་ལ་སེམས་གཞོལ་དང་། །འཆག་པ་དང་ནི་འདུག་པ་དང་། །རྣམ་རྟོག་གཏམ་དང་འདོད་ཡོན་ཏན། །ཕུང་པོ་གཅིག་དཀར་ཉན་ཐོས་དང་། །གནོད་དང་མཛའ་བཤེས་ཚར་གཅོད་
པའོ། །མདོ་ཆེན་པོ་སྟོང་པ་ཉིད་ཆེན་པོ་ཞེས་བྱ་བ་རྫོགས་སྷོ།།         །། རྒྱ་གར་གྱི་མཁན་པོ་འཛི་ན་མི་ཏྲ་དང་། པྲ་ཛྙཱ་ཝརྨ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ། །
༄༅།   །རྒྱ་གར་སྐད་དུ། དྷྭ་ཛཱ་གྲན་ན་མ་མ་ཧཱ་སཱུ་ཏྲམ།  བོད་སྐད་དུ། མདོ་ཆེན་པོ་རྒྱལ་མཚན་མཆོག་ཅེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་
འདས་ཡུལ་སྤོང་བྱེད་དུ་ཡུལ་རྒྱུ་ཞིང་གཤེགས་པ་ན་ཡངས་པ་ཅན་དུ་བྱོན་ནས། ཡངས་པ་ཅན་གྱི་སྤྲེའུ་རྫིང་གི་འགྲམ་གྱི་ཁང་པ་བརྩེགས་པའི་གནས་ན་བཞུགས་སོ། །དེའི་ཚེ་ན་ཡངས་པ་ཅན་གྱི་ཚོང་པ་རབ་ཏུ་མང་པོ་
ཡུལ་རྡོ་འཇོག་ཏུ་ཚོང་པར་བྱ་བའི་ཕྱིར་ཡུལ་རྡོ་འཇོག་ཏུ་འགྲོ་བར་ཆས་པའི་ཡངས་པ་ཅན་གྱི་ཚོང་པ་རབ་ཏུ་མང་པོ་དག་གིས། བཅོམ་ལྡན་འདས་ཡུལ་སྤོང་བྱེད་དུ་ཡུལ་རྒྱུ་ཞིང་གཤེགས་པ་ན་ཡངས་པ་ཅན་དུ་བྱོན་
ནས། ཡངས་པ་ཅན་གྱི་སྤྲེའུའི་རྫིང་གི་འགྲམ་གྱི་ཁང་པ་བརྩེགས་པའི་གནས་ན་བཞུགས་སོ་ཞེས་ཐོས་སོ། །ཐོས་ནས་ཀྱང་ཚོགས་ནས་ཚོགས་དང་། མང་པོ་ནས་མང་པོར་ལྷགས་ཤིང་འདུས་ཏེ་ཡངས་པ་
ཅན་ནས་བྱུང་ནས། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་པ་དང་། བཅོམ་ལྡན་འདས་ཀྱིས་ཡངས་པ་ཅན་གྱི་
ཚོང་པ་རབ་ཏུ་མང་པོ་ཕྱོགས་གཅིག་ཏུ་འཁོད་པ་དག་ལ་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་

66-1-288b

དུ་མར་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་བར་བཞུགས་སོ། །དེ་ནས་ཡངས་པ་ཅན་
གྱི་ཚོང་པ་རབ་ཏུ་མང་པོ་དག་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
བཙུན་པ་བདག་ཅག་ནི་ཡངས་པ་ཅན་གྱི་ཚོང་པ་རབ་ཏུ་མང་པོ་ཡུལ་རྡོ་འཇོག་ཏུ་འཇལ་ཚོང་བགྱི་བའི་སླད་དུ། ཡུལ་རྡོ་འཇོག་ཏུ་མཆི་བར་ཆས་པ་ལགས་ན། བཅོམ་ལྡན་འདས་དགེ་སློང་གི་དགེ་
འདུན་དང་ཐབས་གཅིག་ཏུ་སང་བདག་ཅག་གི་སྡུམ་པར་གདུགས་ཚོད་གསོལ་བར་ཅི་གནང་། བཅོམ་ལྡན་འདས་ཀྱིས་ཡངས་པ་ཅན་གྱི་ཚོང་པ་རབ་ཏུ་མང་པོ་དག་ལ་ཅང་མི་གསུང་བས་གནང་བར་མཛད་དོ། །དེ་
ནས་ཡངས་པ་ཅན་གྱི་ཚོང་པ་རབ་ཏུ་མང་པོ་དག་གིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་ཅིང་རྗེས་སུ་ཡི་རང་ནས། བཅོམ་
ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་ཕྱིར་དོང་ངོ་། །དེ་ནས་ཡངས་པ་ཅན་གྱི་ཚོང་པ་རབ་ཏུ་མང་པོ་དག་གིས་དེ་ཉིད་ཀྱི་མཚན་མོ་བཟའ་བ་དང་བཅའ་བ་གཙང་ཞིང་
བསོད་པ་དག་ལེགས་པར་སྦྱར་ནས་ནང་པར་སྔར་ལངས་ཏེ། གདན་དག་བཤམས་ཤིང་། ཆུ་ར་དག་ཀྱང་བཞག་ནས། བཅོམ་ལྡན་འདས་ལ་བཙུན་པ་གདུགས་ཚོད་སྦྱར་ཏེ། དུས་ལ་བབ་ལགས་ན། བཅོམ་ལྡན་
འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་འདྲེན་གྱིས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་དང་ཆོས་གོས་གསོལ་ཏེ། ལྷུང་བཟེད་བསྣམས་ནས་དགེ་སློང་གི་ཚོགས་

66-1-289a

ཀྱིས་ཡོངས་སུ་བསྐོར་ཅིང་། དགེ་སློང་གི་དགེ་འདུན་གྱིས་མདུན་དུ་བདར་ནས་ཡངས་པ་ཅན་གྱི་ཚོང་པ་རབ་ཏུ་མང་པོ་དག་གི་བཀད་ས་ག་ལ་བ་དེར་གཤེགས་ཏེ་བྱོན་ནས། དགེ་སློང་གི་དགེ་འདུན་གྱི་གུང་ལ་གདན་
བཤམས་པ་དེ་ཉིད་ལ་བཞུགས་སོ། །དེ་ནས་ཡངས་པ་ཅན་གྱི་ཚོང་པ་རབ་ཏུ་མང་པོ་དག་གིས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་པ་དང་། བཅོམ་ལྡན་འདས་ཀྱིས་ཡངས་པ་
ཅན་གྱི་ཚོང་པ་རབ་ཏུ་མང་པོ་ཕྱོགས་གཅིག་ཏུ་འཁོད་པ་དག་ལ་འདི་སྐད་ཅེས་བཀའ་སྩལ་ཏོ། །ཚོང་པ་དག་གལ་ཏེ་ཁྱེད་ཅག་དགོན་པར་སོན་པ་ན་འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་སྐྱེ་བར་གྱུར་
ན། དེའི་ཚེ་ཁྱེད་ཀྱིས་འདི་ལྟར་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། 
སྐྱེས་བུ་གདུལ་བྱའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཡིན་ནོ་ཞེས་ང་རྣམ་པ་ལས་ཡང་དག་པར་རྗེས་སུ་དྲན་པར་གྱིས་ཤིག །ཚོང་པ་དག་དེའི་ཚེ་ཁྱེད་ཀྱིས་ང་རྣམ་
པ་ལས་ཡང་དག་པར་རྗེས་སུ་དྲན་པར་བྱས་ན་འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་འབྱུང་བར་འགྱུར་བ་གང་ཡིན་པ་དེ་མེད་པར་འགྱུར་རོ། །གལ་ཏེ་ང་མི་དྲན་ན་ཡང་བཅོམ་ལྡན་འདས་ཀྱི་ཆོས་
ནི་ལེགས་པར་གསུངས་པ་ཡང་དག་པར་མཐོང་བ། ནད་མེད་པ། དུས་ཆད་པ་མེད་པ། ཉེ་བར་གཏོང་བ་འདི་མཐོང་བ་ལ་དོན་ཡོད་པ། མཁས་པ་རྣམས་ཀྱིས་རང་གིས་རིག་པར་བྱ་བ་ཡིན་ནོ་ཞེས་ཆོས་རྣམ་པ་
ལས་ཡང་དག་པར་རྗེས་སུ་དྲན་པར་གྱིས་ཤིག །ཚོང་པ་དག་དེའི་ཚེ་ཁྱེད་ཀྱིས་ཆོས་རྣམ་པ་ལྔས་ཡང་དག་པར་རྗེས་སུ་དྲན་པར་བྱས་ན་འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་འབྱུང་བར་འགྱུར་བ་

66-1-289b

གང་ཡིན་པ་དེ་མེད་པར་འགྱུར་རོ། །གལ་ཏེ་ཆོས་མི་དྲན་ན་ཡང་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་ལེགས་པར་ཞུགས་པ། རིགས་པར་ཞུགས་པ། དྲང་པོར་ཞུགས་པ། འཐུན་པར་ཞུགས་པ། 
ཆོས་ཀྱི་རྗེས་སུ་འཐུན་པའི་ཆོས་ལ་ཞུགས་པ། ཆོས་ཀྱི་རྗེས་སུ་འཐུན་པར་སྤྱོད་པ་སྟེ། དགེ་འདུན་ལ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད། དགེ་འདུན་ལ་རྒྱུན་དུ་
ཞུགས་པ་དག་ཀྱང་ཡོད། དགེ་འདུན་ལ་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད། དགེ་འདུན་ལ་ལན་ཅིག་ཕྱིར་འོང་བ་དག་ཀྱང་ཡོད། དགེ་འདུན་ལ་ཕྱིར་མི་འོང་བའི་
འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད། དགེ་འདུན་ལ་ཕྱིར་མི་འོང་བ་དག་ཀྱང་ཡོད། དགེ་འདུན་ལ་དགྲ་བཅོམ་པ་ཉིད་ཀྱི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད། 
དགེ་འདུན་ལ་དགྲ་བཅོམ་པ་དག་ཀྱང་ཡོད་དེ། དེ་དག་ནི་སྐྱེས་བུ་ཟུང་བཞི་དང་། སྐྱེས་བུ་གང་ཟག་བརྒྱད་ཡིན་ཏེ། བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་དེ་ནི་ཚུལ་ཁྲིམས་ཕུན་སུམ་ཚོགས་པ། ཏིང་ངེ་འཛིན་
ཕུན་སུམ་ཚོགས་པ། ཤེས་རབ་ཕུན་སུམ་ཚོགས་པ། རྣམ་པར་གྲོལ་བ་ཕུན་སུམ་ཚོགས་པ། རྣམ་པར་གྲོལ་བའི་ཡེ་ཤེས་མཐོང་བ་ཕུན་སུམ་ཚོགས་པ་ཀུན་དུ་སྦྱིན་པའི་འོས་སུ་གྱུར་པ། རབ་ཏུ་སྦྱིན་པའི་འོས་
སུ་གྱུར་པ། ཐལ་མོ་སྦྱར་བའི་འོས་སུ་གྱུར་པ། ཕྱག་བྱ་བའི་འོས་སུ་གྱུར་པ། བསོད་ནམས་ཀྱི་ཞིང་བླ་ན་མེད་པ། འཇིག་རྟེན་གྱི་ཡོན་གནས་ཡིན་ནོ་ཞེས་དགེ་འདུན་རྣམ་པ་ལས་ཡང་དག་པར་རྗེས་སུ་དྲན་པར་
གྱིས་ཤིག །ཚོང་པ་དག་དེའི་ཚེ་ཁྱེད་ཀྱིས་དགེ་འདུན་རྣམ་པ་ལས་ཡང་དག་པར་རྗེས་སུ་དྲན་པར་བྱས་ནས་འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་འབྱུང་བར་འགྱུར་བ་གང་ཡིན་པ་དེ་མེད་པར་འགྱུར་རོ། །

66-1-290a

ཚོང་པ་དག་སྔོན་ལྷ་དང་ལྷ་མ་ཡིན་གྱི་གཡུལ་ཉེ་བར་གནས་པར་གྱུར་པ་ན་ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་པའི་ལྷ་རྣམས་ལ་སྨྲས་པ། གྲོགས་པོ་དག་གལ་ཏེ་ཁྱེད་ཅག་ལྷ་དང་། ལྷ་མ་ཡིན་གྱི་གཡུལ་
དུ་ཞུགས་པ་ན། འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་སྐྱེ་བར་གྱུར་ན། དེའི་ཚེ་ཁྱེད་ཀྱིས་ངའི་རྒྱལ་མཚན་མཆོག་རྣམ་པར་རྒྱལ་བྱེད་ཡང་དག་པར་རྗེས་སུ་དྲན་པར་གྱིས་ཤིག །དེའི་ཚེ་ཁྱེད་ཀྱིས་ངའི་
རྒྱལ་མཚན་མཆོག་རྣམ་པར་རྒྱལ་བྱེད་ཡང་དག་པར་རྗེས་སུ་དྲན་པར་བྱས་ན་འཇིགས་པ་འམ། བག་ཚ་བ་འམ་སྤུ་ཟིང་ཞེས་བྱེད་པ་དེ་འབྱུང་བར་འགྱུར་བ་གང་ཡིན་པ་དེ་མེད་པར་འགྱུར་རོ། །གལ་ཏེ་ངའི་མི་དྲན་ན་ཡང་
ལྷའི་བུ་དབང་ལྡན་གྱི་རྒྱལ་མཚན་མཆོག་ཡང་དག་པར་རྗེས་སུ་དྲན་པར་གྱིས་ཤིག །དེའི་ཚེ་ཁྱེད་ཀྱིས་ལྷའི་བུ་དབང་ལྡན་གྱི་རྒྱལ་མཚན་མཆོག་ཡང་དག་པར་རྗེས་སུ་དྲན་པར་བྱས་ན་འཇིགས་པ་འམ། བག་ཚ་བ་
འམ། སྤུ་ཟིང་ཞེས་བྱེད་པ་འབྱུང་བར་འགྱུར་བ་གང་ཡིན་པ་དེ་མེད་པར་འགྱུར་རོ། །གལ་ཏེ་ལྷའི་བུ་དབང་ལྡན་གྱི་མི་དྲན་ན་ཡང་ལྷའི་བུ་ཆུ་ལྷའི་རྒྱལ་མཚན་མཆོག་ཡང་དག་པར་རྗེས་སུ་དྲན་པར་གྱིས་ཤིག །དེའི་
ཚེ་ཁྱེད་ཀྱིས་ལྷའི་བུ་ཆུ་ལྷའི་རྒྱལ་མཚན་མཆོག་ཡང་དག་པར་རྗེས་སུ་དྲན་པར་བྱས་ན་འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་འབྱུང་བར་འགྱུར་བ་གང་ཡིན་པ་དེ་མེད་པར་འགྱུར་རོ། །ཚོང་པ་
དག་དེ་བཞིན་དུ་གལ་ཏེ་ཁྱེད་ཅག་ཀྱང་དགོན་པར་སོན་པ་ན་འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་སྐྱེ་བར་གྱུར་ན་དེའི་ཚེ་ཁྱེད་ཀྱིས་འདི་ལྟར་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བྱའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཡིན་

66-1-290b

ནོ་ཞེས་ང་རྣམ་པ་ལས་ཡང་དག་པར་རྗེས་སུ་དྲན་པར་གྱིས་ཤིག །ཚོང་པ་དག་དེའི་ཚེ་ཁྱེད་ཀྱིས་ང་རྣམ་པ་ལས་ཡང་དག་པར་རྗེས་སུ་དྲན་པར་བྱས་ན་འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་འབྱུང་བར་འགྱུར་
བ་གང་ཡིན་པ་དེ་མེད་པར་འགྱུར་རོ། །གལ་ཏེ་ང་མི་དྲན་ན་ཡང་བཅོམ་ལྡན་འདས་ཀྱི་ཆོས་ནི་ལེགས་པར་གསུངས་པ། ཡང་དག་པར་མཐོང་བ། ནད་མེད་པ། དུས་ཆད་པ་མེད་པ། ཉེ་བར་གཏོང་བ། འདི་མཐོང་བ་ལ་དོན་
ཡོད་པ། མཁས་པ་རྣམས་ཀྱིས་རང་གིས་རིག་པར་བྱ་བ་ཡིན་ནོ་ཞེས་ཆོས་རྣམ་པ་ལས་ཡང་དག་པར་རྗེས་སུ་དྲན་པར་གྱིས་ཤིག །ཚོང་པ་དག་དེའི་ཚེ་ཁྱེད་ཀྱིས་ཆོས་རྣམ་པ་ལས་ཡང་དག་པར་རྗེས་སུ་དྲན་པར་བྱས་ན་
འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་འབྱུང་བར་འགྱུར་བ་གང་ཡིན་པ་དེ་མེད་པར་འགྱུར་རོ། །གལ་ཏེ་ཆོས་མི་དྲན་ན་ཡང་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་ལེགས་པར་ཞུགས་པ། རིགས་
པར་ཞུགས་པ། དྲང་པོར་ཞུགས་པ། འཐུན་པར་ཞུགས་པ། ཆོས་ཀྱི་རྗེས་སུ་ཞུགས་པའི་ཆོས་ལ་ཞུགས་པ། ཆོས་ཀྱི་རྗེས་སུ་འཐུན་པར་སྤྱོད་པ་སྟེ། དགེ་འདུན་ལ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་
ཕྱིར་ཞུགས་པ་དག་ཀྱང་ཡོད། དགེ་འདུན་ལ་རྒྱུན་དུ་ཞུགས་པ་དག་ཀྱང་ཡོད། དགེ་འདུན་ལ་ལན་ཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད། དགེ་འདུན་ལ་ལན་ཅིག་ཕྱིར་འོང་བ་དག་
ཀྱང་ཡོད། དགེ་འདུན་ལ་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་དག་ཀྱང་ཡོད། དགེ་འདུན་ལ་ཕྱིར་མི་འོང་བ་དག་ཀྱང་ཡོད། དགེ་འདུན་ལ་དགྲ་བཅོམ་པ་ཉིད་ཀྱི་འབྲས་བུ་མངོན་སུམ་དུ་བྱ་
བའི་ཕྱིར་ཞུགས་པ་དག་ཀྱང་ཡོད། དགེ་འདུན་ལ་དགྲ་བཅོམ་པ་དག་ཀྱང་ཡོད་དེ། དེ་དག་ནི་སྐྱེས་བུ་ཟུང་བཞི་དང་། སྐྱེས་བུ་གང་ཟག་བརྒྱད་ཡིན་ཏེ། བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་དེ་ནི་ཚུལ་ཁྲིམས་ཕུན་

66-1-291a

སུམ་ཚོགས་པ། ཏིང་ངེ་འཛིན་ཕུན་སུམ་ཚོགས་པ། ཤེས་རབ་ཕུན་སུམ་ཚོགས་པ། རྣམ་པར་གྲོལ་བ་ཕུན་སུམ་ཚོགས་པ། རྣམ་པར་གྲོལ་བའི་ཡེ་ཤེས་མཐོང་བ་ཕུན་སུམ་ཚོགས་པ། ཀུན་དུ་སྦྱིན་པའི་
འོས་སུ་གྱུར་པ། རབ་ཏུ་སྦྱིན་པའི་འོས་སུ་གྱུར་པ། ཐལ་མོ་སྦྱར་བའི་འོས་སུ་གྱུར་པ། ཕྱག་བྱ་བའི་འོས་སུ་གྱུར་པ། བསོད་ནམས་ཀྱི་ཞིང་བླ་ན་མེད་པ། འཇིག་རྟེན་གྱི་ཡོན་གནས་ཡིན་ནོ་ཞེས་དགེ་འདུན་རྣམ་
པ་ལས་ཡང་དག་པར་རྗེས་སུ་དྲན་པར་གྱིས་ཤིག །ཚོང་པ་དག་དེའི་ཚེ་ཁྱེད་ཀྱིས་དགེ་འདུན་རྣམ་པ་ལས་ཡང་དག་པར་རྗེས་སུ་དྲན་པར་བྱས་ན་འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་འབྱུང་བར་འགྱུར་བ་
གང་ཡིན་པ་དེ་མེད་པར་འགྱུར་རོ། །དེ་ནས་ཡངས་པ་ཅན་གྱི་ཚོང་པ་རབ་ཏུ་མང་པོ་དག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་རང་རང་གི་ལག་ནས་བཟའ་བ་དང་། བཅའ་བ་
གཙང་ཞིང་བསོད་པ་དག་ལེགས་པར་བསྟབས་ཤིང་ཡང་དག་པར་ཚིམ་པར་བྱས་སོ། །རྣམ་གྲངས་དུ་མར་རང་རང་གི་ལག་ནས་བཟའ་བ་དང་། བཅའ་བ་གཙང་ཞིང་བསོད་པ་དག་ལེགས་པར་བསྟབས་ཤིང་ཡང་དག་པར་
ཚིམ་པར་བྱས་ནས་བཅོམ་ལྡན་འདས་གདུགས་ཚོད་གསོལ་ཅིང་། ལྷུང་བཟེད་བཞག་སྟེ། ཕྱག་བཅབས་པར་རིག་ནས་སྟན་ཤིན་དུ་དམའ་བ་དག་བླངས་ཏེ་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འཁོད་དོ། །
དེ་ནས་བཅོམ་ལྡན་འདས་ཀྱིས་ཡངས་པ་ཅན་གྱི་ཚོང་པ་རབ་ཏུ་མང་པོ་དག་གི་སྦྱིན་པ་དེ་ལ་རྗེས་སུ་ཡི་རང་བ་འདིས་རྗེས་སུ་ཡི་རང་པར་མཛད་དོ། །ཚོང་པ་ཟས་དང་སྐོམ་དག་གིས། །དགེ་སློང་དགེ་འདུན་བཤོས་གསོལ་བ། །
རབ་ཏུ་ཤེས་ནས་གཏོང་བ་ཡི། །བློ་ལྡན་འཕགས་པ་གང་བྱེད་བཞིན། །སྦྱིན་པ་བདེ་ལེགས་རྗོད་པ་འདི། །ཚོང་པ་ཁྱེད་ཀྱིས་བྱིན་པས་ན། །ཁྱེད་ཅག་དོན་གང་ལེགས་འདོད་པའི། །ཁྱེད་ཀྱི་དོན་དེ་རྟག་གྲུབ་ཤོག །ཁྱེད་ཀྱི་

66-1-291b

རྐང་གཉིས་བདེ་ལེགས་ཤིང་། །ཁྱེད་ཀྱི་རྐང་བཞི་བདེ་ལེགས་ཤོག །ཁྱེད་ཅག་ལམ་ཞུགས་བདེ་ལེགས་ཤིང་། །ཕྱིར་ལྡོག་པ་ནའང་བདེ་ལེགས་ཤོག །མཚན་མོ་བདེ་ལེགས་ཉིན་བདེ་ལེགས། །ཉི་མའི་གུང་ལ་
བདེ་ལེགས་ཤིང་། །ཁྱེད་ཅག་ཀུན་དུ་བདེ་ལེགས་ལ། །ཁྱེད་ལ་སྡིག་པ་མ་འབྱུང་ཤིག །ཇི་ལྟར་ཞིང་ནི་ཕུན་སུམ་ལ། །ས་བོན་ཕུན་སུམ་ཚོགས་བཏབ་ཅིང་། །ཆར་པ་ཕུན་སུམ་ཚོགས་གྱུར་ན། །ལོ་ཏོག་ཕུན་སུམ་
ཚོགས་པར་འགྱུར། །གནས་མེད་ཕུན་སུམ་ཚོགས་གྱུར་ཅིང་། །སྐྱེ་བ་ཕུན་སུམ་ཚོགས་གྱུར་ལ། །རྒྱས་པ་ཕུན་སུམ་ཚོགས་གྱུར་ན། །ལོ་ཏོག་ཕུན་སུམ་ཚོགས་འགྱུར་ལྟར། །དེ་བཞིན་ཚུལ་ཁྲིམས་ཕུན་ཚོགས་
ལ། །ཁ་ཟས་ཕུན་སུམ་ཚོགས་བྱིན་ཞིང་། །ཕུན་སུམ་ཚོགས་ཕྱིར་དེ་བྱས་ན། །ཕུན་སུམ་ཚོགས་པ་འགྲུབ་པར་འགྱུར། །དེ་ཕྱིར་ཕུན་སུམ་ཚོགས་འདོད་ཅིང་། །ཕུན་ཚོགས་དོན་གཉེར་གང་ཟག་གིས། །ཤེས་
རབ་ཕུན་ཚོགས་བསྟེན་གྱུར་ན། །དེས་ནི་ཕུན་སུམ་ཚོགས་པ་འགྲུབ། །དེ་ཕྱིར་བླ་མེད་སངས་རྒྱས་དང་། །ཆོས་དང་དགེ་འདུན་དག་ལ་ནི། །བརྟན་པ་དད་པ་སྐྱེད་བྱེད་པ། །དེ་སེམས་ཕུན་སུམ་ཚོགས་པར་འགྱུར། །རིག་
དང་ཞབས་སུ་ལྡན་པ་ལ། །ཕུན་སུམ་ཚོགས་པའི་སེམས་ཐོབ་ནས། །དགེ་བའི་ལས་རྣམས་བྱེད་གྱུར་པ། །དེ་ནི་ཕུན་སུམ་ཚོགས་པའི་ལས། །འཇིག་རྟེན་ཡང་དག་བཞིན་ཤེས་ན། །ལྟ་བ་ཕུན་སུམ་ཚོགས་
པ་འཐོབ། །འཕགས་ཤིང་མཐོང་བ་ཕུན་ཚོགས་ན། །ཡིད་ནི་ཕུན་སུམ་ཚོགས་པར་འགྱུར། །དྲི་མ་ཐམས་ཅད་བཅོམ་བྱས་ཤིང་། །མྱ་ངན་འདས་པ་ཕུན་སུམ་ཐོབ། །སྡུག་བསྔལ་ཟད་པར་བྱེད་པ་དེ། །དེ་ཡི་
དོན་ནི་ཕུན་སུམ་ཡིན། །དེ་ནས་བཅོམ་ལྡན་འདས་ཀྱིས་ཡངས་པ་ཅན་གྱི་ཚོང་པ་རབ་ཏུ་མང་པོ་དག་ལ་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེང་བསྟོད། ཡང་དག་

66-1-292a

པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་ཀྱི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེང་བསྟོད། ཡང་དག་པར་རབ་ཏུ་དགའ་བར་མཛད་ནས་གདན་ལས་བཞེངས་ཏེ་གཤེགས་
སོ། །མདོ་ཆེན་པོ་རྒྱལ་མཚན་མཆོག་ཅེས་བྱ་བ་རྫོགས་སོ།།            །། རྒྱ་གར་གྱི་མཁན་པོ་འཛི་ན་མི་ཏྲ་དང་། པྲ་ཛྙཱ་ཝརྨ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ། །
༄༅།   །རྒྱ་གར་སྐད་དུ། དྷྭ་ཛཱ་གྲན་ནཱ་མ་མ་ཧཱ་སཱུ་ཏྲམ།  བོད་སྐད་དུ། མདོ་ཆེན་པོ་རྒྱལ་མཚན་དམ་པ་ཞེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་
ན། བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་
དག་གལ་ཏེ་ཁྱེད་ཅག་དགོན་པ་ན་འདུག་ཀྱང་རུང་། ཤིང་དྲུང་ན་འདུག་ཀྱང་རུང་། ཁྱིམ་སྟོང་པ་ན་འདུག་ཀྱང་རུང་སྟེ། འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་སྐྱེ་བར་གྱུར་ན། དེའི་ཚེ་ཁྱེད་ཀྱིས་
འདི་ལྟར་བཅོམ་ལྡན་འདས་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བྱའི་ཁ་
ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཡིན་ནོ། ཞེས་ང་རྣམ་པ་ལས་ཡང་དག་པར་རྗེས་སུ་དྲན་པར་གྱིས་ཤིག །དེའི་ཚེ་ཁྱེད་ཀྱིས་ང་རྣམ་པ་ལས་ཡང་དག་པར་
རྗེས་སུ་དྲན་པར་བྱས་ན་འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་འབྱུང་བར་འགྱུར་བ་གང་ཡིན་པ་དེ་མེད་པར་འགྱུར་རོ། །དགེ་སློང་དག་སྔོན་ལྷ་དང་། ལྷ་མ་ཡིན་གྱི་གཡུལ་ཉེ་བར་གནས་པར་

66-1-292b

གྱུར་ན། ལྷའི་དབང་པོ་བརྒྱ་བྱིན་གྱིས་སུམ་བཅུ་རྩ་གསུམ་པའི་ལྷ་རྣམས་ལ་སྨྲས་པ། གྲོགས་པོ་དག་གལ་ཏེ་ཁྱེད་ཅག་ལྷ་དང་ལྷ་མ་ཡིན་གྱི་གཡུལ་དུ་ཞུགས་པ་ན། འཇིགས་པ་འམ། བག་ཚ་བ་འམ། སྤུ་
ཟིང་ཞེས་བྱེད་པ་སྐྱེ་བར་གྱུར་ན། དེའི་ཚེ་ཁྱེད་ཀྱིས་ངའི་རྒྱལ་མཚན་མཆོག་རྣམ་པར་རྒྱལ་བྱེད་ཡང་དག་པར་རྗེས་སུ་དྲན་པར་གྱིས་ཤིག །དེའི་ཚེ་ཁྱེད་ཀྱིས་ངའི་རྒྱལ་མཚན་མཆོག་རྣམ་པར་རྒྱལ་བྱེད་ཡང་དག་
པར་རྗེས་སུ་དྲན་པར་བྱས་ན་འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་འབྱུང་བར་འགྱུར་བ་གང་ཡིན་པ་དེ་མེད་པར་འགྱུར་རོ། །དགེ་སློང་དག་དེ་བཞིན་དུ་གལ་ཏེ་ཁྱེད་ཅག་ཀྱང་དགོན་པ་ན་འདུག་ཀྱང་
རུང་། ཤིང་དྲུང་ན་འདུག་ཀྱང་རུང་། ཁྱིམ་སྟོང་པ་ན་འདུག་ཀྱང་རུང་སྟེ། འཇིགས་པ་འམ། བག་ཚ་བ་འམ། སྤུ་ཟིང་ཞེས་བྱེད་པ་སྐྱེ་བར་གྱུར་ན། དེའི་ཚེ་ཁྱེད་ཀྱིས་འདི་ལྟར་བཅོམ་ལྡན་འདས་དེ་ནི་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བྱའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་
སྟོན་པ། སངས་རྒྱས་བཅོམ་ལྡན་འདས་ཡིན་ནོ་ཞེས་ང་རྣམ་པ་ལས་ཡང་དག་པར་རྗེས་སུ་དྲན་པར་གྱིས་ཤིག །དགེ་སློང་དག་དེའི་ཚེ་ཁྱེད་ཀྱིས་ང་རྣམ་པ་ལས་ཡང་དག་པར་རྗེས་སུ་དྲན་པར་བྱས་ན། འཇིགས་
པ་འམ། བག་ཚ་བ་འམ། སྤུ་ཟིང་ཞེས་བྱེད་པ་འབྱུང་བར་འགྱུར་བ་གང་ཡིན་པ་དེ་མེད་པར་འགྱུར་རོ། །དགེ་སློང་དག་ལྷའི་དབང་པོ་བརྒྱ་བྱིན་དེ་ནི་ད་དུང་འདོད་ཆགས་དང་བཅས། ཞེ་སྡང་དང་བཅས། གཏི་
མུག་དང་བཅས་ཤིང་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དག་ལས་ཡོངས་སུ་མ་ཐར་ལ། འཇིགས་པ་

66-1-293a

ཡོད། བག་ཚ་བ་ཡོད། དངང་པ་ཡོད། འབྲོས་པ་ཡོད་ཅིང་། དེ་ནི་ལན་འགའ་འཇིགས་པར་ཡང་འགྱུར། བག་ཚ་བར་ཡང་འགྱུར། དངང་པར་ཡང་འགྱུར། འབྲོས་པར་ཡང་འགྱུར་ཏེ། དགེ་
སློང་དག་ད་དུང་འདོད་ཆགས་དང་བཅས། ཞེ་སྡང་དང་བཅས། གཏི་མུག་དང་བཅས་ཤིང་། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་
བདེ་བ་དང་། འཁྲུག་པ་དག་ལས་ཡོངས་སུ་མ་ཐར་ལ། འཇིགས་པ་ཡོད། བག་ཚ་བ་ཡོད། དངང་པ་ཡོད། འབྲོས་པ་ཡོད་པའི་ལྷའི་དབང་པོ་བརྒྱ་བྱིན་དེའི་ཚིག་ཀྱང་སུམ་བཅུ་རྩ་གསུམ་པའི་ལྷ་རྣམས་དད་
པས་མཉན་པར་བྱ་བར་སེམས་ཤིང་ཚིག་བཞིན་དུ་བྱ་བར་སེམས་ན། དགེ་སློང་དག་ང་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདོད་ཆགས་དང་བྲལ་བ། ཞེ་སྡང་དང་བྲལ་
བ། གཏི་མུག་དང་བྲལ་བ། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དག་ལས་ཡོངས་སུ་ཐར་བ། འཇིགས་
པ་མེད། བག་ཚ་བ་མེད། དངང་པ་མེད། འབྲོས་པ་མེད་པ་ཡིན་པས་དགེ་སློང་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདོད་ཆགས་དང་བྲལ་བ། ཞེ་སྡང་དང་བྲལ་བ། 
གཏི་མུག་དང་བྲལ་བ། སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དག་ལས་ཡོངས་སུ་ཐར་བ། འཇིགས་པ་མེད་
པ། བག་ཚ་བ་མེད་པ། དངང་པ་མེད་པ། འབྲོས་པ་མེད་པ། ངའི་ཚིག་མཉན་པར་བྱ་བ་དང་། གཏམས་པ་བཞིན་བྱ་བ་དང་། རྗེས་སུ་བསྟན་པ་བཞིན་བྱ་བ་དེ་ནི་གནས་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་

66-1-293b

བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་བཀའ་སྩལ་ཏོ། །དགོན་པ་དང་ནི་ཤིང་དྲུང་དང་། །ཁྱིམ་སྟོང་དག་ཏུ་འཇིག་རྟེན་གཙོ། །རྣམ་པར་འདྲེན་པ་རྫོགས་
སངས་རྒྱས། །རྗེས་སུ་དྲན་གྱིས་དགེ་སློང་དག །གལ་ཏེ་རྣམ་འདྲེན་འཇིག་རྟེན་གཙོ། །རྫོགས་སངས་རྒྱས་པ་མི་དྲན་ན། །འདོད་ཆགས་བྲལ་བ་རྣམས་ཀྱི་མཆོག །ཆོས་དེ་རྗེས་སུ་དྲན་པར་གྱིས། །གལ་
ཏེ་འདོད་ཆགས་བྲལ་བའི་མཆོག །ཆོས་དེ་རྗེས་སུ་མི་དྲན་ན། །དགེ་འདུན་བླ་མེད་བསོད་ནམས་ཞིང་། །དེ་ནི་རྗེས་སུ་དྲན་པར་གྱིས། །སངས་རྒྱས་ཆོས་དང་དགེ་འདུན་རྣམས། །དེ་ལྟར་རྗེས་སུ་དྲན་བྱས་ན། །
འཇིགས་དང་བག་ཚ་སྤུ་ལྡང་བ། །མེད་པར་འགྱུར་རོ་དགེ་སློང་དག །འཇིགས་པས་སྐྲག་པའི་མི་མང་པོ། །རི་དང་ནགས་ཚལ་རྣམས་དག་དང་། །ཀུན་དགའ་མཆོད་པའི་ལྗོན་ཤིང་ལ། །སྐྱབས་སུ་འགྲོ་བར་
གང་བྱེད་པ། །དེ་ནི་སྐྱབས་གཙོ་མ་ཡིན་ཞིང་། །དེ་ནི་སྐྱབས་མཆོག་མ་ཡིན་ཏེ། །སྐྱབས་དེ་དག་ལ་རྟེན་བྱེད་པ། །སྡུག་བསྔལ་ཀུན་ལས་གྲོལ་མི་འགྱུར། །གང་དག་སངས་རྒྱས་ཆོས་དང་ནི། །དགེ་འདུན་དག་ལ་
སྐྱབས་སོང་བ། །སྡུག་བསྔལ་སྡུག་བསྔལ་ཀུན་འབྱུང་དང་། །སྡུག་བསྔལ་ཡང་དག་འགགས་པ་དང་། །བདེ་ཞིང་མྱ་ངན་འདས་འགྲོ་བའི། །འཕགས་ལམ་ཡན་ལག་བརྒྱད་པ་ཡི། །འཕགས་པའི་བདེན་པ་
བཞི་པོ་དག །ཤེས་རབ་ཀྱིས་ནི་ལེགས་མཐོང་འགྱུར། །དེ་ནི་སྐྱབས་ཀྱི་གཙོ་བོ་དང་། །དེ་ནི་སྐྱབས་ཀྱི་མཆོག་ཡིན་ཏེ། །སྐྱབས་དེ་དག་ལ་བརྟེན་བྱས་ན། །སྡུག་བསྔལ་ཀུན་ལས་གྲོལ་བར་འགྱུར། །བཅོམ་ལྡན་འདས་
ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །མདོ་ཆེན་པོ་རྒྱལ་མཚན་དམ་པ་ཞེས་བྱ་བ་རྫོགས་སོ།། །།

66-1-294a

༄༅། །རྒྱ་གར་སྐད་དུ། པཉྩ་ཏྲི་ཡན་ནཱ་མ་མ་ཧཱ་སཱུ་ཏྲམ།  བོད་སྐད་དུ། མདོ་ཆེན་པོ་ལྔ་གསུམ་པ་ཞེས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་
མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་སྦྱོང་དང་བྲམ་ཟེ་གང་དག་མོས་པའི་
གཞི་རྣམ་པ་དུ་མ་དག་མངོན་པར་རྗོད་པར་བྱེད་པ་དེ་དག་ཐམས་ཅད་ནི་གནས་ལྔ་མངོན་པར་རྗོད་པར་བྱེད་དེ། ལྔ་གང་ཞེ་ན། ཁ་ཅིག་ནི་དེ་ཕན་ཆད་བདག་འདུ་ཤེས་ཅན་དུ་འགྱུར་རོ་ཞེས་བྱ་བ་དང་། ཡང་ཁ་ཅིག་ནི་འདུ་
ཤེས་མེད་པ་དང་། འདུ་ཤེས་ཡོད་པ་ཡང་མ་ཡིན། འདུ་ཤེས་མེད་པ་ཡང་མ་ཡིན་པ་དང་། ཆད་པའོ་ཞེས་བྱ་བ་དང་། ཡང་ཁ་ཅིག་ནི་ཚེ་འདི་ཉིད་ལ་མྱ་ངན་ལས་འདའོ་ཞེས་མངོན་པར་རྗོད་པ་མངོན་པར་རྗོད་པར་བྱེད་དོ། 
དགེ་སྦྱོང་དང་བྲམ་ཟེ་ཤེས་པ་དང་ལྡན་པ་འདུ་ཤེས་ཅན་དུ་སྨྲ་བ་དེ་དག་ཁ་ཅིག་ནི་བདག་ཡོད་པར་སྲིད་དེ། དེ་ཕན་ཆད་འདུ་ཤེས་ཅན་དུ་འགྱུར་རོ་ཞེས་བྱ་བ་དང་། ཡང་ཁ་ཅིག་ནི་ཆད་པའོ་ཞེས་བྱ་བ་དང་། ཡང་ཁ་ཅིག་ནི་ཚེ་
འདི་ཉིད་ལ་མྱ་ངན་ལས་འདའོ་ཞེས་མངོན་པར་རྗོད་པ་མངོན་པར་རྗོད་པར་བྱེད་དེ། ལྔ་པོ་དེ་དག་ཡོད་ན་གསུམ་དུ་འགྱུར་ལ། གསུམ་ཡོད་ན་ལྔར་འགྱུར་ཏེ། དེ་ནི་ལྔ་གསུམ་པའི་ཆོས་ཀྱི་རྣམ་གྲངས་མདོར་བསྟན་པ་ཡིན་
ནོ། །དགེ་སློང་དག་དེ་ལ་དགེ་སྦྱོང་དང་བྲམ་ཟེ་གང་དག་འདུ་ཤེས་ཅན་དུ་སྨྲ་བ་དེ་དག་ཁ་ཅིག་ནི་དེ་ཕན་ཆད་བདག་ཏུ་འདུ་ཤེས་ཅན་དུ་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པའི་དགེ་སྦྱོང་དང་བྲམ་ཟེ་ཤེས་པ་
དང་ལྡན་པ་འདུ་ཤེས་ཅན་དུ་སྨྲ་བ་དེ་དག་ཁ་ཅིག་ནི་བདག་ཡོད་པར་སྲིད་དེ། དེ་ཕན་ཆད་གཟུགས་ཅན་འདུ་ཤེས་ཅན་དུ་འགྱུར་རོ་ཞེས་བྱ་བ་དང་། གཟུགས་ཅན་མ་ཡིན་པ་དང་། འདུ་ཤེས་གཅིག་པ་དང་། འདུ་ཤེས་ཐ་དད་པ་

66-1-294b

དང་། འདུ་ཤེས་ཆུང་བ་དང་། འདུ་ཤེས་ཆེན་པོར་གྱུར་པ་དང་། འདུ་ཤེས་ཚད་མེད་པའོ་ཞེས་མངོན་པར་རྗོད་པ་མངོན་པར་རྗོད་པར་བྱེད་དོ། །ཡང་ཁ་ཅིག་ནི་དེ་ལས་ལྡོག་པ་ན་རྣམ་ཤེས་མཐའ་ཡས་སྐྱེ་མཆེད་ཡིན་ནོ་
ཞེས་མངོན་པར་རྗོད་པ་མངོན་པར་རྗོད་པར་བྱེད་དོ། །དེ་བཞིན་གཤེགས་པས་དགེ་སྦྱོང་དང་བྲམ་ཟེ་གང་དག་འདུ་ཤེས་ཅན་དུ་སྨྲ་བ་དེ་དག་ཁ་ཅིག་དེ་ཕན་ཆད་བདག་འདུ་ཤེས་ཅན་དུ་འགྱུར་རོ་ཞེས་མངོན་པར་རྗོད་པ་མངོན་
པར་རྗོད་པར་བྱེད་པའི་དགེ་སྦྱོང་དང་བྲམ་ཟེ་ཤེས་པ་དང་ལྡན་པ། འདུ་ཤེས་ཅན་དུ་སྨྲ་བ་དེ་དག་ཁ་ཅིག་བདག་ཡོད་པར་སྲིད་དེ། དེ་ཕན་ཆད་གཟུགས་ཅན་འདུ་ཤེས་ཅན་དུ་འགྱུར་རོ་ཞེས་བྱ་བ་དང་། གཟུགས་ཅན་
མ་ཡིན་པ་དང་། འདུ་ཤེས་གཅིག་པ་དང་། འདུ་ཤེས་ཐ་དད་པ་དང་། འདུ་ཤེས་ཆུང་བ་དང་། འདུ་ཤེས་ཆེན་པོར་གྱུར་པ་དང་། འདུ་ཤེས་ཚད་མེད་པའོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དང་། ཡང་ཁ་
ཅིག་དེ་ལས་ལྡོག་པ་ན། རྣམ་ཤེས་མཐའ་ཡས་སྐྱེ་མཆེད་ཡིན་ནོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དགེ་སློང་དག་འདུ་ཤེས་ཐ་དད་པ་དང་། མཆོག་ཏུ་
འདོགས་པ་ཐ་དད་པ་དེ་དག་གིས་འདི་ལྟ་སྟེ། རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ནས་ཅི་ཡང་མེད་དོ། །ཞེས་ཅི་ཡང་མེད་པའི་སྐྱེ་མཆེད་བསྒྲུབས་ཏེ་གནས་པ་གཉིས་སུ་
མེད་པ་མི་གཡོ་བ་དེ་ནི་མཆོག་ཡིན་ཞིང་དེ་ནི་བླ་ན་མེད་པ་ཡིན་ནོ། །དགེ་སློང་དག་དེ་ནི་རགས་པ། འདུས་བྱས་པ། བསམས་པ། རྟེན་ཅིང་འབྲེལ་པར་འབྱུང་བ་ཡིན་ཏེ། འདི་ལྟར་འདུ་བྱེད་རྣམས་ཡོད་ན་འདུ་བྱེད་རྣམས་ཀྱི་
འགོག་པ་ཡང་ཡོད་པས་ན། དེ་བཞིན་གཤེགས་པས་དེ་ཡོད་པར་ཐུགས་སུ་ཆུད་ནས་དེ་ལས་ཕྱིར་ལྡོག་ཅིང་། དེ་ལ་ཞི་བར་གཟིགས། ངེས་པར་འབྱུང་བར་གཟིགས་ཤིང་བཞུགས་སོ། །དགེ་སློང་དག་དེ་ལ་དགེ་སྦྱོང་དང་

66-1-295a

བྲམ་ཟེ་གང་དག་འདུ་ཤེས་མེད་པར་སྨྲ་བ་དེ་དག་ཁ་ཅིག་དེ་ཕན་ཆད་བདག་འདུ་ཤེས་མེད་པར་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་ནི་དགེ་སྦྱོང་དང་བྲམ་ཟེ་གང་དག་འདུ་ཤེས་ཅན་དུ་སྨྲ་བ་དེ་
དག་ཁ་ཅིག་དེ་ཕན་ཆད་བདག་འདུ་ཤེས་ཅན་དུ་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་གིས་སྨྲས་པ་ལ་ཕྱིར་རྒོལ་བར་བྱེད། སྨོད་པར་བྱེད་ཅིང་དེ་དག་འདི་སྙམ་དུ་སེམས་ཏེ། འདུ་ཤེས་ནི་ནད་
དོ། །འདུ་ཤེས་ནི་འབྲས་སོ། །འདུ་ཤེས་ནི་ཟུག་རྔུའོ། །འདི་ལྟ་སྟེ། འདུ་ཤེས་མེད་པ་འདི་ནི་ཞི་བའོ། །འདི་ནི་གྱ་ནོམ་པའོ་སྙམ་དུ་སེམས་ཏེ། དེ་བཞིན་གཤེགས་པས་དགེ་སྦྱོང་དང་བྲམ་ཟེ་གང་དག་འདུ་ཤེས་མེད་
པར་སྨྲ་བ་དེ་དག་ཁ་ཅིག་དེ་ཕན་ཆད་བདག་འདུ་ཤེས་མེད་པར་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་དགེ་སྦྱོང་དང་བྲམ་ཟེ་གང་དག་འདུ་ཤེས་ཅན་དུ་སྨྲ་བ་དེ་དག་ཁ་ཅིག་དེ་ཕན་ཆད་བདག་འདུ་ཤེས་
ཅན་དུ་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་གིས་སྨྲས་པ་ལ་ཕྱིར་རྒོལ་བར་བྱེད། སྨོད་པར་བྱེད་ཅིང་དེ་དག་འདི་སྙམ་དུ་སེམས་ཏེ། འདུ་ཤེས་ནི་ནད་དོ། །འདུ་ཤེས་ནི་འབྲས་སོ། །འདུ་ཤེས་
ནི་ཟུག་རྔུའོ། །འདི་ལྟ་སྟེ། འདུ་ཤེས་མེད་པ་འདི་ནི་ཞི་བའོ། །འདི་ནི་གྱ་ནོམ་པའོ་སྙམ་དུ་སེམས་པ་དེ་དག་ཀྱང་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དགེ་སློང་དག་ང་ནི་རྣམ་པར་ཤེས་པའི་འོང་བ་འམ། 
འགྲོ་བ་འམ། གནས་པ་འམ། འཆི་འཕོ་བ་འམ། སྐྱེ་བ་འམ། རྒྱས་ཤིང་འཕེལ་ལ་ཡངས་པར་འགྱུར་བ། གཟུགས་ལས་གཞན་པ་དང་། ཚོར་བ་ལས་གཞན་པ་དང་། འདུ་ཤེས་ལས་གཞན་པ་དང་། འདུ་བྱེད་
རྣམས་ལས་གཞན་དུ་འདོགས་པར་མི་བྱེད་དོ། །དགེ་སློང་དག་གང་དག་འདི་སྐད་ཅེས་བདག་ནི་རྣམ་པར་ཤེས་པའི་འོང་བ་འམ། འགྲོ་བ་འམ། གནས་པ་འམ། འཆི་འཕོ་བ་འམ། སྐྱེ་བ་འམ། རྒྱས་ཤིང་འཕེལ་ལ་

66-1-295b

ཡངས་པར་འགྱུར་བ། གཟུགས་ལས་གཞན་པ་དང་། ཚོར་བ་ལས་གཞན་པ་དང་། འདུ་ཤེས་ལས་གཞན་པ་དང་། འདུ་བྱེད་རྣམས་ལས་གཞན་དུ་འདོགས་པར་བྱེད་དོ་ཞེས་ཟེར་ན། དེ་ནི་ཚིག་གི་དངོས་པོ་ཁོ་ནར་ཟད་དེ་འདི་ལྟ་སྟེ། 
ཡུལ་མ་ཡིན་པའི་ཕྱིར་དྲིས་ན་ཡང་དག་པར་རབ་ཏུ་མི་ཤེས་ཤིང་ལན་ལ་ཡང་རྨོངས་པར་འགྱུར་རོ། །དགེ་སློང་དག་དེ་ཡང་རགས་པ། འདུས་བྱས་པ། བསམས་པ། རྟེན་ཅིང་འབྲེལ་པར་འབྱུང་བ་ཡིན་ཏེ། འདི་ལྟར་འདུ་བྱེད་
རྣམས་ཡོད་ན་འདུ་བྱེད་རྣམས་ཀྱི་འགོག་པ་ཡང་ཡོད་པས་ན་དེ་བཞིན་གཤེགས་པས་དེ་ཡོད་པར་ཐུགས་སུ་ཆུད་ནས་དེ་ལས་ཕྱིར་ལོག་ཅིང་དེ་ལ་ཞི་བར་གཟིགས་ངེས་པར་འབྱུང་བར་གཟིགས་ཤིང་བཞུགས་སོ། །དགེ་
སློང་དག་དེ་ལ་དགེ་སྦྱོང་དང་། བྲམ་ཟེ་གང་དག་འདུ་ཤེས་ཡོད་པ་མ་ཡིན། འདུ་ཤེས་མེད་པ་ཡང་མ་ཡིན་པར་སྨྲ་བ་དེ་དག་ཁ་ཅིག་དེ་ཕན་ཆད་བདག་འདུ་ཤེས་ཡོད་པ་ཡང་མ་ཡིན་འདུ་ཤེས་མེད་པ་ཡང་མ་ཡིན་པར་འགྱུར་རོ།། 
ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་ནི་དགེ་སྦྱོང་དང་བྲམ་ཟེ་གང་དག་འདུ་ཤེས་ཅན་དུ་སྨྲ་བ་དེ་དག་ཁ་ཅིག་དེ་ཕན་ཆད་བདག་འདུ་ཤེས་ཅན་དུ་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་
གིས་སྨྲས་པ་ལ་ཕྱིར་རྒོལ་བར་བྱེད། དམོད་པར་བྱེད་ལ། དགེ་སྦྱོང་དང་བྲམ་ཟེ་གང་དག་འདུ་ཤེས་མེད་པར་སྨྲ་བ་དེ་དག་ཁ་ཅིག་དེ་ཕན་ཆད་བདག་འདུ་ཤེས་མེད་པར་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་
དག་གིས་སྨྲས་པ་ལས་ཕྱིར་རྒོལ་བར་བྱེད། སྨོད་པར་བྱེད་ཅིང་དེ་དག་འདི་སྙམ་དུ་སེམས་ཏེ། འདུ་ཤེས་ནི་ནད་དོ། །འདུ་ཤེས་ནི་འབྲས་སོ། །འདུ་ཤེས་ནི་ཟུག་རྔུའོ། །འདུ་ཤེས་མེད་པ་ཡང་ཀུན་དུ་རྨོངས་པའོ། །འདི་ལྟ་སྟེ། འདུ་
ཤེས་མེད་འདུ་ཤེས་མེད་མིན་སྐྱེ་མཆེད་འདི་ནི་ཞི་བའོ། །འདི་ནི་གྱ་ནོམ་པའོ་སྙམ་དུ་སེམས་ཏེ། དེ་བཞིན་གཤེགས་པས་དགེ་སྦྱོང་དང་བྲམ་ཟེ་གང་དག་འདུ་ཤེས་ཡོད་པ་ཡང་མ་ཡིན། འདུ་ཤེས་མེད་པ་ཡང་མ་ཡིན་པར་

66-1-296a

སྨྲ་བ་དེ་དག་ཁ་ཅིག་དེ་ཕན་ཆད་བདག་འདུ་ཤེས་ཡོད་པ་ཡང་མ་ཡིན། འདུ་ཤེས་མེད་པ་ཡང་མ་ཡིན་པར་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག །དགེ་སྦྱོང་དང་བྲམ་ཟེ་གང་དག་འདུ་
ཤེས་ཅན་དུ་འགྱུར་རོ། །དེ་ཕན་ཆད་བདག་འདུ་ཤེས་ཅན་དུ་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་གིས་སྨྲས་པ་ལ་ཕྱིར་རྒོལ་བར་བྱེད། སྨོད་པར་བྱེད་ལ་དགེ་སྦྱོང་དང་བྲམ་ཟེ་གང་དག་འདུ་ཤེས་
མེད་པར་སྨྲ་བ་དེ་དག་ཁ་ཅིག་དེ་ཕན་ཆད་བདག་འདུ་ཤེས་མེད་པར་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་གིས་སྨྲས་པ་ལ་ཡང་ཕྱིར་རྒོལ་བར་བྱེད། སྨོད་པར་བྱེད་ཅིང་དེ་དག་འདི་སྙམ་དུ་སེམས་ཏེ། 
འདུ་ཤེས་ནི་ནད་དོ། །འདུ་ཤེས་ནི་འབྲས་སོ། །འདུ་ཤེས་ནི་ཟུག་རྔུའོ། །འདུ་ཤེས་མེད་པ་ཡང་ཀུན་དུ་རྨོངས་པའོ། །འདི་ལྟ་སྟེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་འདི་ནི་ཞི་བའོ། །འདི་ནི་གྱ་ནོམ་པའོ་སྙམ་དུ་
སེམས་པ་དེ་དག་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དགེ་སློང་དག་ང་ནི་མཐོང་བ་དང་། ཐོས་པ་དང་། བྱེ་བྲག་ཕྱེད་པ་དང་། རྣམ་པར་ཤེས་པ་དང་། ཚུལ་ཁྲིམས་དང་། བརྟུལ་ཞུགས་དང་། འཚོ་བ་དང་། 
ཚངས་པར་སྤྱོད་པ་དང་། དཀའ་ཐུབ་དང་། བསྙེན་བཀུར་ལྷུར་ལེན་པ་ཙམ་གྱིས་འདུ་བྱེད་ཀྱི་སྐྱེ་མཆེད་ལྷག་མ་དེ་རྗེས་སུ་འཐོབ་པར་འགྱུར་བར་མི་སྨྲའི། དགེ་སློང་དག་ང་ནི་སྲིད་པའི་རྩེ་མོའི་སྙོམས་པར་འཇུག་པས་སྐྱེ་
མཆེད་དེ་རྗེས་སུ་འཐོབ་པར་འགྱུར་བར་སྨྲའོ། །དགེ་སློང་དག་འདི་ལྟ་སྟེ། དེ་སྒྲུབ་པར་སྣང་བ་དེ་ཡང་སྐྱེ་མཆེད་དེའི་ཉོན་མོངས་པ་ཡིན་ཏེ། དེ་བཞིན་གཤེགས་པས་འདི་ལྟ་སྟེ། སྡུག་བསྔལ་བ་དང་། བསྒྲུབ་པ་དེ་དག་
ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དགེ་སློང་དག་དེ་ཡང་རགས་པ། འདུས་བྱས་པ། བསམས་པ། རྟེན་ཅིང་འབྲེལ་པར་འབྱུང་བ་ཡིན་ཏེ། འདི་ལྟར་འདུ་བྱེད་རྣམས་ཡོད་ན་འདུ་བྱེད་རྣམས་ཀྱི་འགོག་པ་

66-1-296b

ཡང་ཡོད་པས་ན། དེ་བཞིན་གཤེགས་པས་དེ་ཡོད་པར་ཐུགས་སུ་ཆུད་ནས་དེ་ལས་ཕྱིར་ལོག་ཅིང་དེ་ལ་ཞི་བར་གཟིགས། ངེས་པར་འབྱུང་བར་གཟིགས་ཤིང་བཞུགས་སོ། །དགེ་སློང་དག་དེ་ལ་དགེ་སྦྱོང་དང་
བྲམ་ཟེ་གང་དག་ཆད་པར་སྨྲ་བ་དེ་དག་ཁ་ཅིག་དེ་ཕན་ཆད་བདག་ཆད་པར་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་ནི་དགེ་སྦྱོང་དང་བྲམ་ཟེ་གང་དག་འདུ་ཤེས་ཅན་དུ་སྨྲ་བ་དེ་དག་ཁ་ཅིག་དེ་ཕན་
ཆད་བདག་འདུ་ཤེས་ཅན་དུ་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་གིས་སྨྲས་པ་ལ་ཕྱིར་རྒོལ་བར་བྱེད། སྨོད་པར་བྱེད་ཅིང་། དགེ་སྦྱོང་དང་བྲམ་ཟེ་གང་དག་འདུ་ཤེས་མེད་པར་སྨྲ་བ་དེ་དག་ཁ་
ཅིག་དེ་ཕན་ཆད་བདག་འདུ་ཤེས་མེད་པར་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་གིས་སྨྲས་པ་ལ་ཡང་ཕྱིར་རྒོལ་བར་བྱེད། སྨོད་པར་བྱེད་ལ། དགེ་སྦྱོང་དང་བྲམ་ཟེ་གང་དག་འདུ་ཤེས་ཡོད་པ་ཡང་མ་
ཡིན། འདུ་ཤེས་མེད་པ་ཡང་མ་ཡིན་པར་སྨྲ་བ་དེ་དག་ཁ་ཅིག་དེ་ཕན་ཆད་བདག་འདུ་ཤེས་ཡོད་པ་ཡང་མ་ཡིན། འདུ་ཤེས་མེད་པ་ཡང་མ་ཡིན་པར་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་གིས་སྨྲས་
པ་ལ་ཡང་ཕྱིར་རྒོལ་བར་བྱེད། དམོད་པར་བྱེད་ཅིང་། དེ་དག་འདི་སྙམ་དུ་སེམས་ཏེ། དགེ་སྦྱོང་དང་བྲམ་ཟེ་ཤེས་པ་དང་ལྡན་པ། ཕྱིས་འཁོར་ཞིང་ལེགས་སུ་སྨོན་པར་སྨྲ་བ་འདི་དག་ཐམས་ཅད་ནི་འདི་ལྟར་བདག་ཅག་ཕྱི་
མ་ལ་འདི་ལྟ་བུ་དང་འདི་ལྟ་བུར་འགྱུར་བར་བྱའོ། །འདི་ལྟར་བདག་ཅག་ཕྱི་མ་ལ་འདི་ལྟ་བུ་དང་། འདི་ལྟ་བུར་འགྱུར་བར་བྱའོ་ཞེས་ལེགས་སུ་སྨོན་པ་ཁོ་ན་མངོན་པར་རྗོད་པར་བྱེད་དེ་འདི་ལྟ་སྟེ། དཔེར་ན་སྐྱེས་བུ་ཚོང་པ་ཞིག་
ཚོང་ཟོང་གིས་ཚོང་བྱེད་པ་ན་འདི་སྙམ་དུ་སེམས་ཏེ། བདག་གིས་ཚོང་ཟོང་འདི་ལས་འདི་ལྟ་བུ་དང་འདི་ལྟ་བུ་དག་བླངས་ཤིང་གཞན་དུ་འགྲོ་བར་བྱ་སྟེ། དེར་སོན་ན་བདག་ལ་ཁེ་སྤོགས་འདི་ལྟ་བུ་དང་འདི་ལྟ་བུ་དག་

66-1-297a

གྲུབ་པར་འགྱུར་རོ་སྙམ་དུ་སེམས་སོ། །དེ་བཞིན་དུ་དགེ་སྦྱོང་དང་བྲམ་ཟེ་ཤེས་པ་དང་ལྡན་པ། ཕྱིས་འཁོར་ཞིང་ལེགས་སུ་སྨོན་པ་སྨྲ་བ་འདི་དང་ཐམས་ཅད་ཀྱང་འདི་ལྟར་བདག་ཅག་ཕྱི་མ་ལ་འདི་
ལྟ་བུ་དང་འདི་ལྟ་བུར་འགྱུར་བར་བྱའོ། །འདི་ལྟར་བདག་ཅག་ཕྱི་མ་ལ་འདི་ལྟ་བུ་དང་འདི་ལྟ་བུར་འགྱུར་བར་བྱའོ་ཞེས་ལེགས་སུ་སྨོན་པ་ཁོ་ན་མངོན་པར་རྗོད་པ་མངོན་པར་རྗོད་པར་བྱེད་དེ། དེ་དག་གིས་སྨྲས་པ་དེ་ནི་ཚོང་
པ་ལྟ་བུར་འགྱུར་རོ་སྙམ་དུ་སེམས་སོ། །དེ་དག་འདི་སྙམ་དུ་ཡང་སེམས་ཏེ། ཇི་སྲིད་དུ་བདག་འདི་གཟུགས་ཅན་རགས་པ། འབྱུང་བ་ཆེན་པོ་བཞིའི་རྒྱུ་ལས་བྱུང་ཞིང་། གསོན་ལ་འདུག་སྟེ། འཚོ་ཞིང་སྡོད་པར་འགྱུར་
བ་དེ་སྲིད་དུ་ནད་དང་བཅས། འབྲས་དང་བཅས། ཟུག་རྔུ་དང་བཅས། རིམས་དང་བཅས། ཡོངས་སུ་གདུང་བ་དང་བཅས་པ་ཡིན་གྱི། ཇི་ཙམ་དུ་བདག་འདི་ཤི་ཕན་ཅད་བདག་ཆད་ཅིང་ཞིག་ལ་མི་འབྱུང་བ་དེ་ཙམ་དུ་བདག་
འདི་ཡང་དག་པར་ཤིན་ཏུ་ལེགས་པར་ཆད་པ་ཡིན་ནོ། །ཇི་སྲིད་དུ་འདོད་པ་ན་སྤྱོད་པའི་ལྷ་དང་། གཟུགས་ན་སྤྱོད་པའི་ལྷ་དང་། གཟུགས་མེད་པ་ནམ་མཁའ་མཐའ་ཡས་སྐྱེ་མཆེད་དུ་ཉེ་བར་འགྲོའོ། །གཟུགས་མེད་པ་
རྣམ་ཤེས་མཐའ་ཡས་སྐྱེས་མཆེད་དུ་ཉེ་བར་འགྲོ། གཟུགས་མེད་པ་ཅི་ཡང་མེད་པའི་སྐྱེ་མཆེད་དུ་ཉེ་བར་འགྲོ། གཟུགས་མེད་པ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་ཞིང་གསོན་ལ་འདུག་སྟེ། 
འཚོ་ཞིང་སྡོད་པར་འགྱུར་བ་དེ་སྲིད་དུ་ནད་དང་བཅས། འབྲས་དང་བཅས། ཟུག་རྔུ་དང་བཅས། རིམས་དང་བཅས། ཡོངས་སུ་གདུང་བ་དང་བཅས་པ་ཡིན་གྱི། ཇི་ཙམ་དུ་བདག་འདི་ཤི་ཕན་ཅད་བདག་ཆད་ཅིང་ཞིག་ལ་མི་
འབྱུང་བ་དེ་ཙམ་དུ་བདག་འདི་ཡང་དག་པར་ཤིན་ཏུ་ལེགས་པར་ཆད་པ་ཡིན་ནོ་སྙམ་དུ་སེམས་ཏེ། དེ་བཞིན་གཤེགས་པས་དགེ་སྦྱོང་དང་བྲམ་ཟེ་གང་དག་ཆད་པར་སྨྲ་བ་དེ་དག་ཁ་ཅིག་དེ་ཕན་ཆད་བདག་ཆད་པར་

66-1-297b

འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་དགེ་སྦྱོང་དང་བྲམ་ཟེ་གང་དག་འདུ་ཤེས་ཅན་དུ་སྨྲ་བ་དེ་དག་ཁ་ཅིག་དེ་ཕན་ཆད་བདག་འདུ་ཤེས་ཅན་དུ་འགྱུར་རོ་ཞེས་མངོན་པར་རྗོད་པ་མངོན་པར་རྗོད་
པར་བྱེད་པ་དེ་དག་གིས་སྨྲས་པ་ལ་ཕྱིར་རྒོལ་བར་བྱེད། སྨོད་པར་བྱེད་ཅིང་དགེ་སྦྱོང་དང་བྲམ་ཟེ་གང་དག་འདུ་ཤེས་མེད་པར་སྨྲ་བ་དེ་དག་ཁ་ཅིག་དེ་ཕན་ཆད་བདག་འདུ་ཤེས་མེད་པར་འགྱུར་རོ་ཞེས་མངོན་པར་རྗོད་པ་མངོན་
པར་རྗོད་པར་བྱེད་པ་དེ་དག་གིས་སྨྲས་པ་ལ་ཡང་ཕྱིར་རྒོལ་བར་བྱེད། སྨོད་པར་བྱེད་ལ་དགེ་སྦྱོང་དང་བྲམ་ཟེ་གང་དག་འདུ་ཤེས་ཡོད་པ་ཡང་མ་ཡིན། འདུ་ཤེས་མེད་པ་ཡང་མ་ཡིན་པར་སྨྲ་བ་དེ་དག་ཁ་ཅིག་དེ་ཕན་ཆད་
བདག་འདུ་ཤེས་ཡོད་པ་ཡང་མ་ཡིན། འདུ་ཤེས་མེད་པ་ཡང་མ་ཡིན་པར་འགྱུར་རོ་ཞེས་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་གིས་སྨྲས་པ་ལ་ཡང་ཕྱིར་རྒོལ་བར་བྱེད། སྨོད་པར་བྱེད་ཅིང་། དེ་
དག་འདི་སྙམ་དུ་སེམས་ཏེ། དགེ་སྦྱོང་དང་བྲམ་ཟེ་ཤེས་པ་དང་ལྡན་པ། ཕྱིས་འཁོར་ཞིང་ལེགས་སུ་སྨོན་པ་སྨྲ་བ་འདི་དག་ཐམས་ཅད་ནི་འདི་ལྟར་བདག་ཅག་ཕྱི་མ་ལ་འདི་ལྟ་བུ་དང་འདི་ལྟ་བུར་འགྱུར་བར་བྱའོ། །
འདི་ལྟར་བདག་ཅག་ཕྱི་མ་ལ་འདི་ལྟ་བུ་དང་འདི་ལྟ་བུར་འགྱུར་བར་བྱའོ་ཞེས་ལེགས་སུ་སྨོན་པ་ཁོ་ན་མངོན་པར་རྗོད་པ་མངོན་པར་རྗོད་པར་བྱེད་དེ། འདི་ལྟ་སྟེ། དཔེར་ན་སྐྱེས་བུ་ཚོང་པ་ཞིག་ཚོང་ཟོང་གིས་ཚོང་བྱེད་
པ་ན་འདི་སྙམ་དུ་སེམས་ཏེ། བདག་གིས་ཚོང་ཟོང་འདི་ལས་འདི་ལྟ་བུ་དང་འདི་ལྟ་བུ་དག་བླངས་ཤིང་གཞན་དུ་འགྲོ་བར་བྱ་སྟེ། དེར་སོན་ན་བདག་ལ་ཁེ་སྤོགས་འདི་ལྟ་བུ་དང་འདི་ལྟ་བུ་དག་འགྲུབ་པར་འགྱུར་རོ་སྙམ་དུ་
སེམས་སོ། །དེ་བཞིན་དུ་དགེ་སྦྱོང་དང་བྲམ་ཟེ་ཤེས་པ་དང་ལྡན་པ། ཕྱིས་འཁོར་ཞིང་ལེགས་སུ་སྨོན་པ་སྨྲ་བ་འདི་དག་ཐམས་ཅད་ཀྱང་འདི་ལྟར་བདག་ཅག་ཕྱི་མ་ལ་འདི་ལྟ་བུ་དང་འདི་ལྟ་བུར་འགྱུར་བར་བྱའོ། །

66-1-298a

འདི་ལྟར་བདག་ཅག་ཕྱི་མ་ལ་འདི་ལྟ་བུ་དང་འདི་ལྟ་བུར་འགྱུར་བར་བྱའོ་ཞེས་ལེགས་སུ་སྨོན་པ་ཁོ་ན་མངོན་པར་རྗོད་པ་མངོན་པར་རྗོད་པར་བྱེད་དེ། དེ་དག་གིས་སྨྲས་པ། དེ་ནི་ཚོང་པ་ལྟ་བུར་འགྱུར་རོ་སྙམ་དུ་སེམས་
པ་དང་། དེ་དག་འདི་སྙམ་དུ་ཡང་སེམས་ཏེ། ཇི་སྲིད་དུ་བདག་འདི་གཟུགས་ཅན་རགས་པ། འབྱུང་བ་ཆེན་པོ་བཞིའི་རྒྱུ་ལས་བྱུང་ཞིང་གསོན་ལ་འདུག་སྟེ། འཚོ་ཞིང་སྡོད་པར་འགྱུར་བ་དེ་སྲིད་དུ་ནད་དང་བཅས། འབྲས་དང་བཅས། 
ཟུག་རྔུ་དང་བཅས། རིམས་དང་བཅས། ཡོངས་སུ་གདུང་བ་དང་བཅས་པ་ཡིན་གྱི། ཇི་ཙམ་དུ་བདག་འདི་ཤི་ཕན་ཅད་བདག་ཆད་ཅིང་ཞིག་ལ་མི་འབྱུང་བ་དེ་ཙམ་དུ་བདག་འདི་ཡང་དག་པར་ཤིན་དུ་ལེགས་པར་ཆད་པ་ཡིན་
ནོ། །ཇི་སྲིད་དུ་འདོད་པ་ན་སྤྱོད་པའི་ལྷ་དང་། གཟུགས་ན་སྤྱོད་པའི་ལྷ་དང་། གཟུགས་མེད་པ་ནམ་མཁའ་མཐའ་ཡས་སྐྱེ་མཆེད་དུ་ཉེ་བར་འགྲོ། གཟུགས་མེད་པ་རྣམ་ཤེས་མཐའ་ཡས་སྐྱེ་མཆེད་དུ་ཉེ་བར་འགྲོ། གཟུགས་
མེད་པ་ཅི་ཡང་མེད་པའི་སྐྱེ་མཆེད་དུ་ཉེ་བར་འགྲོ། གཟུགས་མེད་པ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་ཞིང་གསོན་ལ་འདུག་སྟེ། འཚོ་ཞིང་སྡོད་པར་འགྱུར་བ་དེ་སྲིད་དུ་ནད་དང་བཅས། འབྲས་
དང་བཅས། ཟུག་རྔུ་དང་བཅས། རིམས་དང་བཅས། ཡོངས་སུ་གདུང་བ་དང་བཅས་པ་ཡིན་གྱི། ཇི་ཙམ་དུ་བདག་འདི་ཤི་ཕན་ཅད་བདག་ཆད་ཅིང་ཞིག་ལ་མི་འབྱུང་བ་དེ་ཙམ་དུ་བདག་འདི་ཡང་དག་པར་ཤིན་དུ་ལེགས་པར་
ཆད་པ་ཡིན་ནོ་སྙམ་དུ་སེམས་པ་དེ་དག་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དགེ་སློང་དག་དགེ་སྦྱོང་དང་བྲམ་ཟེ་ཤེས་པ་དང་ལྡན་པ། ཆད་པར་སྨྲ་བ། སེམས་ཅན་ཡོད་པ་ལ་ཆད་པ་དང་། འཇིག་པ་དང་། 
མེད་པར་འདོགས་པར་བྱེད་པ་དེ་དག་ལ་ནི་མི་ཤེས་པའི་ཕུང་པོའི་ལྷག་མ་ཡོད་དོ། །ཇི་ཙམ་དུ་མི་ཤེས་པའི་ཕུང་པོའི་ལྷག་མ་ཡོད་པ་དེ་ཙམ་དུ་འཇིག་ཚོགས་ཀྱིས་འཇིག་པ་ཡོད་པས་འཇིག་ཚོགས་ཀྱིས་འཇིགས་ཤིང་སྐྲག་སྟེ། 

66-1-298b

འཇིག་ཚོགས་ཁོ་ན་ལ་ཡོངས་སུ་སྨོད་པར་བྱེད་ཅིང་ཡོངས་སུ་སྨོད་པར་བྱེད་པ་དེའི་ཚེ་དེ་དག་འཇིག་ཚོགས་ཁོ་ན་ལ་རྗེས་སུ་ཆགས་པ་ཡིན་ནོ། །དགེ་སློང་དག་དེ་ཡང་རགས་པ། འདུས་བྱས་པ། བསམས་པ། རྟེན་ཅིང་འབྲེལ་
པར་འབྱུང་བ་ཡིན་ཏེ། འདི་ལྟར་འདུ་བྱེད་རྣམས་ཡོད་ན་འདུ་བྱེད་རྣམས་ཀྱི་འགོག་པ་ཡང་ཡོད་པས་ན་དེ་བཞིན་གཤེགས་པས་དེ་ཡོད་པར་ཐུགས་སུ་ཆུད་ནས་དེ་ལས་ཕྱིར་ལྡོག་ཅིང་། དེ་ལ་ཞི་བར་གཟིགས། ངེས་པར་
འབྱུང་བར་གཟིགས་ཤིང་བཞུགས་སོ། །དགེ་སློང་དག་ཕྱི་མའི་མཐར་རྟོག་པ་དག་ཕྱི་མའི་མཐའ་དང་ལྡན་པའི་ལྟ་བའི་རྣམ་པ་དག་མངོན་པར་རྗོད་པ་མངོན་པར་རྗོད་པར་བྱེད་པ་ནི་དེ་སྙེད་ཡོད་དེ། དེ་དག་ཕྱི་མའི་མཐའ་
དང་ལྡན་པའི་ལྟ་བའི་རྣམ་པ་རྣམས་ཤེས་པར་བྱའོ། །དགེ་སློང་དག་སྔོན་གྱི་མཐར་རྟོག་པ་དག་སྔོན་གྱི་མཐའ་དང་ལྡན་པའི་ལྟ་བའི་རྣམ་པ་དག་མངོན་པར་རྗོད་པ་མངོན་པར་རྗོད་པར་བྱེད་པ་ཇི་སྙེད་ཡོད་ཅེ་ན། དགེ་
སློང་དག་དགེ་སྦྱོང་དང་བྲམ་ཟེ་གང་དག་སྔོན་གྱི་མཐར་རྟོག་པ་དེ་དག་ཁ་ཅིག་བདག་དང་འཇིག་རྟེན་རྟག་པ་དང་། བདག་དང་འཇིག་རྟེན་མི་རྟག་པ་དང་། རྟག་ཀྱང་རྟག་ལ་མི་རྟག་ཀྱང་མི་རྟག་པ་དང་། རྟག་པ་ཡང་མ་ཡིན་
མི་རྟག་པ་ཡང་མ་ཡིན་པ་དང་། བདག་དང་སྡུག་བསྔལ་རྟག་པ་དང་། བདག་དང་སྡུག་བསྔལ་མི་རྟག་པ་དང་། རྟག་ཀྱང་རྟག་ལ་མི་རྟག་ཀྱང་མི་རྟག་པ་དང་། རྟག་པ་ཡང་མ་ཡིན་མི་རྟག་པ་ཡང་མ་ཡིན་པ་དང་། བདག་དང་
འཇིག་རྟེན་རང་གིས་བྱས་པ་དང་། བདག་དང་འཇིག་རྟེན་གཞན་གྱིས་བྱས་པ་དང་། རང་གིས་ཀྱང་བྱས་ལ་གཞན་གྱིས་ཀྱང་བྱས་པ་དང་། རང་གིས་ཀྱང་མ་བྱས་ལ་གཞན་གྱིས་ཀྱང་མ་བྱས་པར་རྒྱུ་མེད་པ་ལས་བྱུང་བ་དང་། 
བདག་དང་སྡུག་བསྔལ་རང་གིས་བྱས་པ་དང་། བདག་དང་སྡུག་བསྔལ་གཞན་གྱིས་བྱས་པ་དང་། རང་གིས་ཀྱང་བྱས་ལ་གཞན་གྱིས་ཀྱང་བྱས་པ་དང་། རང་གིས་ཀྱང་མ་བྱས་ལ་གཞན་གྱིས་ཀྱང་མ་བྱས་པར་རྒྱུ་མེད་པ་ལས་

66-1-299a

བྱུང་ངོ་ཞེས་དེ་ལྟར་ལྟ་ཞིང་དེ་སྐད་སྨྲ་བ་དག་ཀྱང་ཡོད་དེ། དེ་བཞིན་གཤེགས་པས་དགེ་སྦྱོང་དང་བྲམ་ཟེ་གང་དག་སྔོན་གྱི་མཐར་རྟོག་པ་དེ་དག་ཁ་ཅིག་བདག་དང་འཇིག་རྟེན་རྟག་གོ་ཞེས་དེ་ལྟར་ལྟ་ཞིང་དེ་སྐད་སྨྲ་ལ་མངོན་
པར་རྗོད་པ་མངོན་པར་རྗོད་པར་བྱེད་པ་དེ་དག་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། དགེ་སྦྱོང་དང་བྲམ་ཟེ་དེ་དག་དད་པ་མེད་པ་དང་། འདོད་པ་མེད་པ་དང་། ཐོས་པ་བརྒྱུད་པ་མེད་པ་དང་། རྣམ་པ་ལ་ཡོངས་སུ་རྟོག་པ་
མེད་པ་དང་། མཐོང་བས་ངེས་པར་རྟོགས་པའི་བཟོད་པ་མེད་པར་ཡང་རྟོགས་ནས། ཤེས་པ་དེ་ཡོད་པར་སེམས་པ་དེ་ནི་གནས་མེད་དོ། །དགེ་སྦྱོང་དང་བྲམ་ཟེ་ཤེས་པ་དང་ལྡན་པ་དེ་དང་དེ་དག་རྟོགས་ནས་ཤེས་པ་མེད་ཀྱང་
བདག་ཉིད་ཤེས་པ་སྨྲ་བ། ཡོངས་སུ་བྱང་བ་ཉིད་ཡིན་པར་མགོ་གཅིག་ཏུ་འཇོག་པར་བྱེད་པ་དེ་ནི་དེ་དག་གི་མི་ཤེས་པ་ཁོ་ན་ཡིན་པར་སྣང་སྟེ། དགེ་སློང་དག་དེ་ཡང་རགས་པ། འདུས་བྱས་པ། བསམས་པ། རྟེན་ཅིང་འབྲེལ་
པར་འབྱུང་བ་ཡིན་ཏེ། འདི་ལྟར་འདུ་བྱེད་རྣམས་ཡོད་ན་འདུ་བྱེད་རྣམས་ཀྱི་འགོག་པ་ཡང་ཡོད་པས་ན་དེ་བཞིན་གཤེགས་པས་དེ་ཡོད་པར་ཐུགས་སུ་ཆུད་ནས་དེ་ལས་ཕྱིར་ལྡོག་ཅིང་དེ་ལ་ཞི་བར་གཟིགས། ངེས་པར་འབྱུང་
བར་གཟིགས་ཤིང་བཞུགས་སོ། །དེ་བཞིན་གཤེགས་པས་དགེ་སྦྱོང་དང་བྲམ་ཟེ་གང་དག་སྔོན་གྱི་མཐར་རྟོག་པ་དེ་དག་ཁ་ཅིག་བདག་དང་འཇིག་རྟེན་རྟག་པ་དང་། བདག་དང་འཇིག་རྟེན་མི་རྟག་པ་དང་། རྟག་ཀྱང་རྟག་ལ་
མི་རྟག་ཀྱང་མི་རྟག་པ་དང་། རྟག་པ་ཡང་མ་ཡིན་མི་རྟག་པ་ཡང་མ་ཡིན་པ་དང་། བདག་དང་སྡུག་བསྔལ་རྟག་པ་དང་། བདག་དང་སྡུག་བསྔལ་མི་རྟག་པ་དང་། རྟག་ཀྱང་རྟག་ལ་མི་རྟག་ཀྱང་མི་རྟག་པ་དང་། རྟག་པ་ཡང་
མ་ཡིན་མི་རྟག་པ་ཡང་མ་ཡིན་པ་དང་། བདག་དང་འཇིག་རྟེན་རང་གིས་བྱས་པ་དང་། བདག་དང་འཇིག་རྟེན་གཞན་གྱིས་བྱས་པ་དང་། རང་གིས་ཀྱང་བྱས་ལ་གཞན་གྱིས་ཀྱང་བྱས་པ་དང་། རང་གིས་ཀྱང་མ་བྱས་གཞན་

66-1-299b

གྱིས་ཀྱང་མ་བྱས་པར་རྒྱུ་མེད་པ་ལས་བྱུང་བ་དང་། བདག་དང་སྡུག་བསྔལ་རང་གིས་བྱས་པ་དང་། བདག་དང་སྡུག་བསྔལ་གཞན་གྱིས་བྱས་པ་དང་། རང་གིས་ཀྱང་བྱས་ལ་གཞན་གྱིས་ཀྱང་བྱས་པ་དང་། རང་གིས་ཀྱང་མ་
བྱས་གཞན་གྱིས་ཀྱང་མ་བྱས་པར་རྒྱུ་མེད་པ་ལས་བྱུང་ངོ་ཞེས་དེ་ལྟར་ལྟ་ཞིང་དེ་སྐད་སྨྲ་ལ་མངོན་པར་རྗོད་པ་མངོན་པར་རྗོད་པར་བྱེད་པ་དེ་དག་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། དགེ་སྦྱོང་དང་བྲམ་ཟེ་དེ་དག་
དད་པ་མེད་པ་དང་། འདོད་པ་མེད་པ་དང་། ཐོས་པ་བརྒྱུད་པ་མེད་པ་དང་། རྣམ་པ་ལ་ཡོངས་སུ་རྟོག་པ་མེད་པ་དང་། མཐོང་བས་ངེས་པར་རྟོགས་པའི་བཟོད་པ་མེད་པར་ཡང་རྟོགས་ནས་ཤེས་པ་དེ་ཡོད་པར་སེམས་པ་དེ་ནི་
གནས་མེད་དོ། །དགེ་སྦྱོང་དང་བྲམ་ཟེ་ཤེས་པ་དང་ལྡན་པ་དེ་དང་དེ་དག་རྟོགས་ནས་ཤེས་པ་མེད་ཀྱང་བདག་ཉིད་ཤེས་པ་སྨྲ་བ་ཡོངས་སུ་བྱང་བ་ཉིད་ཡིན་པར་མགོ་གཅིག་ཏུ་འཇོག་པར་བྱེད་པ་དེ་ནི་དེ་དག་གི་མི་ཤེས་པ་ཁོ་ན་
ཡིན་པར་སྣང་སྟེ། དགེ་སློང་དག་དེ་ཡང་རགས་པ། འདུས་བྱས་པ། བསམས་པ། རྟེན་ཅིང་འབྲེལ་པར་འབྱུང་བ་ཡིན་ཏེ། འདི་ལྟར་འདུ་བྱེད་རྣམས་ཡོད་ན་འདུ་བྱེད་རྣམས་ཀྱི་འགོག་པ་ཡང་ཡོད་པས་ན་དེ་བཞིན་གཤེགས་
པས་དེ་ཡོད་པར་ཐུགས་སུ་ཆུད་ནས་དེ་ལས་ཕྱིར་ལོག་ཅིང་དེ་ལ་ཞི་བར་གཟིགས། ངེས་པར་འབྱུང་བར་གཟིགས་ཤིང་བཞུགས་སོ། །དགེ་སློང་དག་སྔོན་གྱི་མཐར་རྟོག་པ་དག་སྔོན་གྱི་མཐའ་དང་ལྡན་པའི་ལྟ་བའི་རྣམ་པ་དག་
མངོན་པར་རྗོད་པ་མངོན་པར་རྗོད་པར་བྱེད་པ་ནི་དེ་སྙེད་ཡོད་དེ། དེ་དག་ནི་སྔོན་གྱི་མཐའ་དང་ལྡན་པའི་ལྟ་བའི་རྣམ་པ་རྣམས་ཤེས་བྱའོ། །དགེ་སློང་དག་ཚེ་འདི་ཉིད་ལ་མྱ་ངན་ལས་འདའ་བར་སྨྲ་བ་དག་ཚེ་འདི་ཉིད་ལ་མྱ་ངན་ལས་འདའོ་
ཞེས་མངོན་པར་རྗོད་པ་མངོན་པར་རྗོད་པར་བྱེད་པ་ཇི་སྙེད་ཡོད་ཅེ་ན། དགེ་སློང་དག་འདི་ན་དགེ་སྦྱོང་ངམ་བྲམ་ཟེ་ལ་ལ་སྔོན་གྱི་མཐའ་དང་ལྡན་པའི་ལྟ་བའི་རྣམ་པ་དག་རབ་ཏུ་སྤངས་ཤིང་ཕྱི་མའི་མཐའ་དང་ལྡན་པའི་ལྟ་བའི་རྣམ་པ་

66-1-300a

དག་རབ་ཏུ་སྤངས་ནས་ཚེ་འདི་ཉིད་ལ་འདོད་པའི་ཀུན་དུ་སྦྱོར་བ་དག་རབ་ཏུ་སྤངས་ཏེ། རབ་ཏུ་དབེན་པའི་དགའ་བ་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་ཤིང་དེ་འདི་སྙམ་དུ་སེམས་ཏེ། འདི་ལྟར་
བདག་སྔོན་གྱི་མཐའ་དང་ལྡན་པའི་ལྟ་བའི་རྣམ་པ་དག་རབ་ཏུ་སྤངས་ཤིང་། ཕྱི་མའི་མཐའ་དང་ལྡན་པའི་ལྟ་བའི་རྣམ་པ་དག་རབ་ཏུ་སྤངས་ནས། ཚེ་འདི་ཉིད་ལ་འདོད་པའི་ཀུན་དུ་སྦྱོར་བ་རབ་ཏུ་སྤངས་ཏེ། རབ་ཏུ་དབེན་པའི་
དགའ་བ་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་པ་འདི་ལྟ་སྟེ། རབ་ཏུ་དབེན་པའི་དགའ་བ་འདི་ནི་ཞི་བའོ། །འདི་ནི་གྱ་ནོམ་པའོ་སྙམ་དུ་སེམས་ཏེ། དེ་བཞིན་གཤེགས་པས་དགེ་སྦྱོང་ངམ་བྲམ་ཟེ་གང་སྔོན་
གྱི་མཐའ་དང་ལྡན་པའི་ལྟ་བའི་རྣམ་པ་དག་རབ་ཏུ་སྤངས་ཤིང་ཕྱི་མའི་མཐའ་དང་ལྡན་པའི་ལྟ་བའི་རྣམ་པ་དག་ཀྱང་རབ་ཏུ་སྤངས་ནས། ཚེ་འདི་ཉིད་ལ་འདོད་པའི་ཀུན་དུ་སྦྱོར་བ་རབ་ཏུ་སྤངས་ཏེ། རབ་ཏུ་དབེན་པའི་དགའ་བ་ལུས་
ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་ཤིང་དེ་འདི་སྙམ་དུ་སེམས་ཏེ། འདི་ལྟར་བདག་སྔོན་གྱི་མཐའ་དང་ལྡན་པའི་ལྟ་བའི་རྣམ་པ་དག་རབ་ཏུ་སྤངས་ཤིང་། ཕྱི་མའི་མཐའ་དང་ལྡན་པའི་ལྟ་བའི་རྣམ་པ་དག་ཀྱང་རབ་ཏུ་
སྤངས་ནས། ཚེ་འདི་ཉིད་ལ་འདོད་པའི་ཀུན་དུ་སྦྱོར་བ་རབ་ཏུ་སྤངས་ཏེ། རབ་ཏུ་དབེན་པའི་དགའ་བ་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་པ་འདི་ལྟ་སྟེ། རབ་ཏུ་དབེན་པའི་དགའ་བ་འདི་ནི་ཞི་བའོ། །འདི་ནི་གྱ་
ནོམ་པའོ་སྙམ་དུ་སེམས་པ་དེ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དགེ་སློང་དག་རབ་ཏུ་དབེན་པའི་དགའ་བ་དང་། མི་རྟག་པ་དང་། འགོག་པའི་ཆོས་ཅན་ཡིན་ཏེ། རབ་ཏུ་དབེན་པའི་བདེ་བ་འགགས་པ་ལས་ཡིད་
མི་བདེ་བ་འབྱུང་བར་འགྱུར་ལ་ཡིད་མི་བདེ་བ་འགགས་པ་ལས་ཀྱང་རབ་ཏུ་དབེན་པའི་དགའ་བ་འབྱུང་བར་འགྱུར་ཏེ། དགེ་སློང་དག་འདི་ལྟ་སྟེ། དཔེར་ན་གང་གི་ཚེ་གྲིབ་མ་འབྲི་བ་དེའི་ཚེ་ཉི་མས་ཁྱབ་པར་བྱེད་ལ། གང་གི་ཚེ་ཉི་

66-1-300b

མ་འབྲི་བ་དེའི་ཚེ་གྲིབ་མས་ཁྱབ་པར་བྱེད་དོ། །དེ་བཞིན་དུ་རབ་ཏུ་དབེན་པའི་དགའ་བ་འགགས་པ་ལས་ཀྱང་ཡིད་མི་བདེ་བ་འབྱུང་བར་འགྱུར་ལ། ཡིད་མི་བདེ་བ་འགགས་པ་ལས་ཀྱང་རབ་ཏུ་དབེན་པའི་དགའ་བ་འབྱུང་བར་
འགྱུར་ཏེ། དགེ་སློང་དག་དེ་ཡང་རགས་པ། འདུས་བྱས་པ། བསམས་པ། རྟེན་ཅིང་འབྲེལ་པར་འབྱུང་བ་ཡིན་ཏེ། འདི་ལྟར་འདུ་བྱེད་རྣམས་ཡོད་ན་འདུ་བྱེད་རྣམས་ཀྱི་འགོག་པ་ཡང་ཡོད་པས་ན། དེ་བཞིན་གཤེགས་པས་
དེ་ཡོད་པར་ཐུགས་སུ་ཆུད་ནས་དེ་ལས་ཕྱིར་ལྡོག་ཅིང་དེ་ལ་ཞི་བར་གཟིགས། ངེས་པར་འབྱུང་བར་གཟིགས་ཤིང་བཞུགས་སོ། །དགེ་སློང་དག་གཞན་ཡང་འདི་ན་དགེ་སྦྱོང་ངམ་བྲམ་ཟེ་ལ་ལ་སྔོན་གྱི་མཐའ་དང་ལྡན་པའི་
ལྟ་བའི་རྣམ་པ་དག་རབ་ཏུ་སྤངས་ཤིང་། ཕྱི་མའི་མཐའ་དང་ལྡན་པའི་ལྟ་བའི་རྣམ་པ་དག་ཀྱང་རབ་ཏུ་སྤངས་ནས་ཚེ་འདི་ཉིད་ལ་འདོད་པའི་ཀུན་ཏུ་སྦྱོར་བ་དག་རབ་ཏུ་སྤངས་ཏེ། རབ་ཏུ་དབེན་པའི་དགའ་བ་ལས་ཡང་དག་པར་
འདས་ཤིང་། ཟང་ཟིང་མེད་པའི་བདེ་བ་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་ལ། དེ་འདི་སྙམ་དུ་སེམས་ཏེ། འདི་ལྟར་བདག་སྔོན་གྱི་མཐའ་དང་ལྡན་པའི་ལྟ་བའི་རྣམ་པ་དག་རབ་ཏུ་སྤངས་ཤིང་། ཕྱི་མའི་
མཐའ་དང་ལྡན་པའི་ལྟ་བའི་རྣམ་པ་དག་ཀྱང་རབ་ཏུ་སྤངས་ནས་ཚེ་འདི་ཉིད་ལ་འདོད་པའི་ཀུན་དུ་སྦྱོར་བ་རབ་ཏུ་སྤངས་ཏེ། རབ་ཏུ་དབེན་པའི་དགའ་བ་ལས་ཡང་དག་པར་འདས་ཤིང་ཟང་ཟིང་མེད་པའི་བདེ་བ་ལུས་ཀྱིས་མངོན་
སུམ་དུ་བྱས་ནས་བསྒྲུབས་ཏེ་གནས་པ་འདི་ལྟ་སྟེ། ཟང་ཟིང་མེད་པའི་བདེ་བ་འདི་ནི་ཞི་བའོ། །འདི་ནི་གྱ་ནོམ་པའོ་སྙམ་དུ་སེམས་སོ། །དེ་བཞིན་གཤེགས་པས་དགེ་སྦྱོང་ངམ་བྲམ་ཟེ་གང་སྔོན་གྱི་མཐའ་དང་ལྡན་པའི་ལྟ་བའི་
རྣམ་པ་དག་རབ་ཏུ་སྤངས་ཤིང་ཕྱི་མའི་མཐའ་དང་ལྡན་པའི་ལྟ་བའི་རྣམ་པ་དག་ཀྱང་རབ་ཏུ་སྤངས་ནས་ཚེ་འདི་ཉིད་ལ་འདོད་པའི་ཀུན་དུ་སྦྱོར་བ་རབ་ཏུ་སྤངས་ཏེ། རབ་ཏུ་དབེན་པའི་དགའ་བ་ལས་ཡང་དག་པར་འདས་ཤིང་། ཟང་ཟིང་

66-1-301a

མེད་པའི་བདེ་བ་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་ལ། དེ་འདི་སྙམ་དུ་སེམས་ཏེ། འདི་ལྟར་བདག་སྔོན་གྱི་མཐའ་དང་ལྡན་པའི་ལྟ་བའི་རྣམ་པ་དག་རབ་ཏུ་སྤངས་ཤིང་། ཕྱི་མའི་མཐའ་དང་ལྡན་
པའི་ལྟ་བའི་རྣམ་པ་དག་ཀྱང་རབ་ཏུ་སྤངས་ནས་ཚེ་འདི་ཉིད་ལ་འདོད་པའི་ཀུན་དུ་སྦྱོར་བ་རབ་ཏུ་སྤངས་ཏེ། རབ་ཏུ་དབེན་པའི་དགའ་བ་ལས་ཡང་དག་པར་འདས་ཤིང་ཟང་ཟིང་མེད་པའི་བདེ་བ་ལུས་ཀྱིས་མངོན་སུམ་དུ་བྱས་ནས་
བསྒྲུབས་ཏེ་གནས་པ་འདི་ལྟ་སྟེ། ཟང་ཟིང་མེད་པའི་བདེ་བ་འདི་ནི་ཞི་བའོ། །འདི་ནི་གྱ་ནོམ་པའོ་སྙམ་དུ་སེམས་པ་དེ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དགེ་སློང་དག་ཟང་ཟིང་མེད་པའི་བདེ་བ་དེ་ཡང་མི་རྟག་
པ་དང་། འགོག་པའི་ཆོས་ཅན་ཡིན་ཏེ། ཟང་ཟིང་མེད་པའི་བདེ་བ་འགགས་པ་ལས་སྡུག་བསྔལ་འབྱུང་བར་འགྱུར་ལ། སྡུག་བསྔལ་འགགས་པ་ལས་ཀྱང་ཟང་ཟིང་མེད་པའི་བདེ་བ་འབྱུང་བར་འགྱུར་ཏེ། དགེ་སློང་དག་འདི་ལྟ་སྟེ། 
དཔེར་ན་འོད་པའི་ཆུ་ནི་ལན་འགའ་འབྲི་ཞིང་ལན་འགའ་སྐྱེ་བར་འགྱུར་རོ། །དེ་བཞིན་དུ་ཟང་ཟིང་མེད་པའི་བདེ་བ་འགགས་པ་ལས་ཀྱང་སྡུག་བསྔལ་འབྱུང་བར་འགྱུར་ལ། སྡུག་བསྔལ་འགགས་པ་ལས་ཀྱང་ཟང་ཟིང་མེད་
པའི་བདེ་བ་འབྱུང་བར་འགྱུར་ཏེ། དགེ་སློང་དག་དེ་ཡང་རགས་པ། འདུས་བྱས་པ། བསམས་པ། རྟེན་ཅིང་འབྲེལ་པར་འབྱུང་བ་ཡིན་ཏེ། འདི་ལྟར་འདུ་བྱེད་རྣམས་ཡོད་ན་འདུ་བྱེད་རྣམས་ཀྱི་འགོག་པ་ཡོད་པས་ན། དེ་
བཞིན་གཤེགས་པས་དེ་ཡོད་པར་ཐུགས་སུ་ཆུད་ནས་དེ་ལས་ཕྱིར་ལྡོག་ཅིང་དེ་ལ་ཞི་བར་གཟིགས་ངེས་པར་འབྱུང་བར་གཟིགས་ཤིང་བཞུགས་སོ། །དགེ་སློང་དག་གཞན་ཡང་འདི་ན་དགེ་སྦྱོང་ངམ་བྲམ་ཟེ་ལ་ལ་སྔོན་གྱི་
མཐའ་དང་ལྡན་པའི་ལྟ་བའི་རྣམ་པ་དག་རབ་ཏུ་སྤངས་ཤིང་ཕྱི་མའི་མཐའ་དང་ལྡན་པའི་ལྟ་བའི་རྣམ་པ་དག་ཀྱང་རབ་ཏུ་སྤངས་ནས་ཚེ་འདི་ཉིད་ལ་འདོད་པའི་ཀུན་ཏུ་སྦྱོར་བ་རབ་ཏུ་སྤངས་ཏེ། རབ་ཏུ་དབེན་པའི་དགའ་བ་ལས་

66-1-301b

ཡང་དག་པར་འདས་ཤིང་ཟང་ཟིང་མེད་པའི་བདེ་བ་ལས་ཀྱང་ཡང་དག་པར་འདས་ཏེ། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་ལ། དེ་འདི་སྙམ་
དུ་སེམས་ཏེ། འདི་ལྟར་བདག་སྔོན་གྱི་མཐའ་དང་ལྡན་པའི་ལྟ་བའི་རྣམ་པ་དག་རབ་ཏུ་སྤངས་ཤིང་ཕྱི་མའི་མཐའ་དང་ལྡན་པའི་ལྟ་བའི་རྣམ་པ་དག་ཀྱང་རབ་ཏུ་སྤངས་ནས་ཚེ་འདི་ཉིད་ལ་འདོད་པའི་ཀུན་ཏུ་སྦྱོར་བ་རབ་ཏུ་སྤངས་ཏེ། 
རབ་ཏུ་དབེན་པའི་དགའ་བ་ལས་ཡང་དག་པར་འདས་ཤིང་ཟང་ཟིང་མེད་པའི་བདེ་བ་ལས་ཀྱང་ཡང་དག་པར་འདས་ཏེ། སྡུག་བསྔལ་བ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་ལུས་ཀྱིས་མངོན་སུམ་དུ་བྱས་ནས་
བསྒྲུབས་ཏེ་གནས་པ་འདི་ལྟ་སྟེ། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་འདི་ནི་ཞི་བའོ། འདི་ནི་གྱ་ནོམ་པའོ་སྙམ་དུ་སེམས་ཏེ། དེ་བཞིན་གཤེགས་པས་དགེ་སྦྱོང་ངམ་བྲམ་ཟེ་གང་སྔོན་གྱི་
མཐའ་དང་ལྡན་པའི་ལྟ་བའི་རྣམ་པ་དག་རབ་ཏུ་སྤངས་ཤིང་ཕྱི་མའི་མཐའ་དང་ལྡན་པའི་ལྟ་བའི་རྣམ་པ་དག་ཀྱང་རབ་ཏུ་སྤངས་ནས་ཚེ་འདི་ཉིད་ལ་འདོད་པའི་ཀུན་དུ་སྦྱོར་བ་རབ་ཏུ་སྤངས་ཏེ། རབ་ཏུ་དབེན་པའི་དགའ་བ་ལས་
ཡང་དག་པར་འདས་ཤིང་ཟང་ཟིང་མེད་པའི་བདེ་བ་ལས་ཀྱང་ཡང་དག་པར་འདས་ཏེ། སྡུག་བསྔལ་བ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་ལུས་ཀྱིས་མངོན་སུམ་དུ་བྱས་ནས་བསྒྲུབས་ཏེ་གནས་ལ། དེ་འདི་
སྙམ་དུ་སེམས་ཏེ། འདི་ལྟར་བདག་སྔོན་གྱི་མཐའ་དང་ལྡན་པའི་ལྟ་བའི་རྣམ་པ་དག་རབ་ཏུ་སྤངས་ཤིང་ཕྱི་མའི་མཐའ་དང་ལྡན་པའི་ལྟ་བའི་རྣམ་པ་དག་ཀྱང་རབ་ཏུ་སྤངས་ནས་ཚེ་འདི་ཉིད་ལ་འདོད་པའི་ཀུན་དུ་སྦྱོར་བ་
རབ་ཏུ་སྤངས་ཏེ། རབ་ཏུ་དབེན་པའི་དགའ་བ་ལས་ཡང་དག་པར་འདས་ཤིང་། ཟང་ཟིང་མེད་པའི་བདེ་བ་ལས་ཀྱང་ཡང་དག་པར་འདས་ཏེ། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་ལུས་ཀྱིས་མངོན་

66-1-302a

སུམ་དུ་བྱས་ནས་བསྒྲུབས་ཏེ་གནས་པ་འདི་ལྟ་སྟེ། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་འདི་ནི་ཞི་བའོ། །འདི་ནི་གྱ་ནོམ་པའོ་སྙམ་དུ་སེམས་པ་དེ་ཡང་ཡང་དག་པ་ཇི་ལྟ་བ་བཞིན་དུ་
རབ་ཏུ་མཁྱེན་ཏོ། །དགེ་སློང་དག་སྡུག་བསྔལ་བ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་ཡང་མི་རྟག་པ་དང་། འགོག་པའི་ཆོས་ཅན་ཡིན་ཏེ། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་འགགས་པ་
ལས་བདེ་བ་དང་། སྡུག་བསྔལ་འབྱུང་བར་འགྱུར་ལ། བདེ་བ་དང་སྡུག་བསྔལ་འགགས་པ་ལས་ཀྱང་། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་འབྱུང་བར་འགྱུར་ཏེ། དགེ་སློང་དག་འདི་ལྟ་སྟེ། 
དཔེར་ན་འཁར་བ་ནམ་མཁའ་ལ་འཕངས་ན། ཡང་ན་ནི་ཡུ་བས་ཕྱིར་ལྷུང་ངོ་། །ཡང་ན་ནི་རྩེ་མོས་སོ། །དགེ་སློང་དག་དེ་བཞིན་དུ་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་འགགས་པ་ལས་ཀྱང་
བདེ་བ་དང་སྡུག་བསྔལ་འབྱུང་བར་འགྱུར་ལ། བདེ་བ་དང་སྡུག་བསྔལ་འགགས་པ་ལས་ཀྱང་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་འབྱུང་བར་འགྱུར་ཏེ། དགེ་སློང་དག་དེ་ཡང་རགས་པ། འདུས་
བྱས་པ། བསམས་པ། རྟེན་ཅིང་འབྲེལ་པར་འབྱུང་བ་ཡིན་ཏེ། འདི་ལྟར་འདུ་བྱེད་རྣམས་ཡོད་ན་འདུ་བྱེད་རྣམས་ཀྱི་འགོག་པ་ཡང་ཡོད་པས་ན། དེ་བཞིན་གཤེགས་པས་དེ་ཡོད་པར་ཐུགས་སུ་ཆུད་ནས་དེ་ལས་
ཕྱིར་ལྡོག་ཅིང་དེ་ལ་ཞི་བར་གཟིགས། ངེས་པར་འབྱུང་བར་གཟིགས་ཤིང་བཞུགས་སོ། །དགེ་སློང་དག་གཞན་ཡང་འདི་ན་དགེ་སྦྱོང་ངམ་བྲམ་ཟེ་ལ་ལས་སྔོན་གྱི་མཐའ་དང་ལྡན་པའི་ལྟ་བའི་རྣམ་པ་དག་རབ་ཏུ་སྤངས་
ཤིང་ཕྱི་མའི་མཐའ་དང་ལྡན་པའི་ལྟ་བའི་རྣམ་པ་དག་ཀྱང་རབ་ཏུ་སྤངས་ནས་ཚེ་འདི་ཉིད་ལ་འདོད་པའི་ཀུན་དུ་སྦྱོར་བ་རབ་ཏུ་སྤངས་ཏེ། རབ་ཏུ་དབེན་པའི་དགའ་བ་ལས་ཡང་དག་པར་འདས་ཤིང་ཟང་ཟིང་མེད་པའི་

66-1-302b

བདེ་བ་ལས་ཀྱང་ཡང་དག་པར་འདས། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་ལས་ཀྱང་ཡང་དག་པར་འདས་ནས། འདི་སྐད་ཅེས་ང་ནི་ཞི་བའོ། །ང་ནི་མྱ་ངན་ལས་འདས་པའོ། །ང་ནི་སྲེད་པ་མེད་
པའོ། །ང་ནི་ཉེ་བར་ལེན་པ་མེད་པ་སྟེ། ང་ལ་སྔོན་བདག་ཡོད་པར་གྱུར་པ་དེ་ནི་ད་ལྟར་ང་ལ་མེད་དོ་ཞེས་ཟེར་ཏེ། དེ་བཞིན་གཤེགས་པས་དགེ་སྦྱོང་ངམ་བྲམ་ཟེ་གང་སྔོན་གྱི་མཐའ་དང་ལྡན་པའི་ལྟ་བའི་རྣམ་པ་དག་
རབ་ཏུ་སྤངས་ཤིང་ཕྱི་མའི་མཐའ་དང་ལྡན་པའི་ལྟ་བའི་རྣམ་པ་དག་ཀྱང་རབ་ཏུ་སྤངས་ནས་ཚེ་འདི་ཉིད་ལ་འདོད་པའི་ཀུན་དུ་སྦྱོར་བ་རབ་ཏུ་སྤངས་ཏེ། རབ་ཏུ་དབེན་པའི་དགའ་བ་ལས་ཡང་དག་པར་འདས་ཤིང་ཟང་ཟིང་
མེད་པའི་བདེ་བ་ལས་ཀྱང་ཡང་དག་པར་འདས། སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་ལས་ཀྱང་ཡང་དག་པར་འདས་ནས་འདི་སྐད་ཅེས། ང་ནི་ཞི་བའོ། །ང་ནི་མྱ་ངན་ལས་འདས་པའོ། །ང་ནི་སྲེད་
པ་མེད་པའོ། །ང་ནི་ཉེ་བར་ལེན་པ་མེད་པ་སྟེ། ང་ལ་སྔོན་བདག་ཡོད་པར་གྱུར་པ་དེ་ནི་ད་ལྟར་ང་ལ་མེད་དོ་ཞེས་ཟེར་བ་དེ་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་ནི་འདི་ལྟར་རིག་པར་བྱ་སྟེ། ཚེ་དང་ལྡན་
པ་དེ་ནི་ཉེ་བར་ལེན་པ་དང་འཐུན་པར་འགྲོ་བའི་ལམ་གང་ཡིན་པ་ལས་ཡང་དག་པར་མ་འདས་པར་རིག་པར་བྱའོ། །དེས་ནི་འདི་ལྟར་འདོད་པར་བྱ་སྟེ། ཡང་སྔོན་གྱི་མཐའ་དང་ལྡན་པའི་ལྟ་བའི་རྣམ་པ་གང་ཡིན་པ་དག་
ཉེ་བར་ལེན་པར་འགྱུར་བ་དང་། ཕྱི་མའི་མཐའ་དང་ལྡན་པའི་ལྟ་བའི་རྣམ་པ་དག་ཀྱང་ཉེ་བར་ལེན་པར་འགྱུར་བ་དང་། ཚེ་འདི་ཉིད་ལ་འདོད་པའི་ཀུན་དུ་སྦྱོར་བ་ཡང་ཉེ་བར་ལེན་པར་འགྱུར་བ་དང་། རབ་ཏུ་དབེན་པའི་དགའ་
བ་ཡང་ཉེ་བར་ལེན་པར་འགྱུར་བ་དང་། ཟང་ཟིང་མེད་པའི་བདེ་བ་ཡང་ཉེ་བར་ལེན་པར་འགྱུར་བ་དང་། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་ཡང་ཉེ་བར་ལེན་པར་འགྱུར་བར་འདོད་པར་བྱའོ། །ཡང་དེ་འདི་སྐད་ཅེས་

66-1-303a

ང་ནི་ཞི་བའོ། །ང་ནི་མྱ་ངན་ལས་འདས་པའོ། །ང་ནི་སྲེད་པ་མེད་པའོ། །ང་ནི་ཉེ་བར་ལེན་པ་མེད་པ་སྟེ། ང་ལ་སྔོན་བདག་ཡོད་པར་གྱུར་པ་དེ་ནི་ད་ལྟར་ང་ལ་མེད་དོ་ཞེས་ཟེར་བ་དེ་ལ་ཉེ་བར་ལེན་པ་ཡོད་པ་ཁོ་ནར་སྣང་སྟེ་
དགེ་སློང་དག་དེ་ཡང་རགས་པ། འདུས་བྱས་པ། བསམས་པ། རྟེན་ཅིང་འབྲེལ་པར་འབྱུང་བ་ཡིན་ཏེ། འདི་ལྟར་འདུ་བྱེད་རྣམས་ཡོད་ན་འདུ་བྱེད་རྣམས་ཀྱི་འགོག་པ་ཡང་ཡོད་པས་ན། དེ་བཞིན་གཤེགས་པས་དེ་ཡོད་པར་ཐུགས་
སུ་ཆུད་ནས་དེ་ལས་ཕྱིར་ལོག་ཅིང་དེ་ལ་ཞི་བར་གཟིགས། ངེས་པར་འབྱུང་བར་གཟིགས་ཤིང་བཞུགས་ཏེ། དགེ་སློང་དག་ཚེ་འདི་ཉིད་ལ་མྱ་ངན་ལས་འདའ་བར་སྨྲ་བ་དག་ཚེ་འདི་ཉིད་ལ་མྱ་ངན་ལས་འདའ་བར་མངོན་པར་རྗོད་པ་
མངོན་པར་རྗོད་པར་བྱེད་པ་དེ་སྙེད་ཡོད་དོ། །དགེ་སློང་དག་གཞན་ཡང་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་ངས་རང་གི་མངོན་པར་ཤེས་པས་མངོན་པར་རྫོགས་པར་སངས་རྒྱས་ཏེ་བཤད་པ་གོ་འཕང་དམ་པ་གཞན་
ཡང་ཡོད་དོ། །དགེ་སློང་དག་སྐྱེས་བུ་འདུལ་བའི་ཁ་ལོ་སྒྱུར་བའི་བླ་ན་མེད་པ་ངས་རང་གི་མངོན་པར་ཤེས་པས་མངོན་པར་རྫོགས་པར་སངས་རྒྱས་ཏེ་བཤད་པ་གོ་འཕང་དམ་པ་གཞན་དེ་གང་ཞེ་ན། དགེ་སློང་དག་འདི་ལྟ་སྟེ། 
ཟག་པ་རྣམས་ཟད་པས་ཟག་པ་མེད་ཅིང་མངོན་པར་འདུས་མ་བྱས་པའི་རྣམ་པར་གྲོལ་བ་སྟེ། དགེ་སློང་དག་དེ་ནི་སྐྱེས་བུ་གདུལ་བྱའི་ཁ་ལོ་སྒྱུར་བ་བླ་ན་མེད་པ་ངས་རང་གི་མངོན་པར་ཤེས་པས་མངོན་པར་ཤེས་པ་མངོན་པར་
རྫོགས་པར་སངས་རྒྱས་ཏེ་བཤད་པ་གོ་འཕང་དམ་པ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །བར་སྡོམ་ནི། 
འདུ་ཤེས་ཐ་དད་གཟུགས་ཅན་དང་། །ཆད་དང་རྟག་པར་ལྟ་བ་དང་། །གྲིབ་དང་ཆུ་དང་མཁར་བ་དང་། །སྐྱེས་བུ་གདུལ་བྱ་ཐ་མ་ཡིན། །མདོ་ཆེན་པོ་ལྔ་གསུམ་པ་ཞེས་བྱ་བ་རྫོགས་སོ།། །།

66-1-303b

རྒྱ་གར་གྱི་མཁན་པོ་འཛི་ན་མི་ཏྲ་དང་། པྲ་ཛྙཱ་ཝརྨ་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།        ༄༅༅། །རྒྱ་གར་སྐད་དུ། ཨཱརྱ་ཤི་ལ་ཀྵི་བ་ཏ་སཱུ་ཏྲམ།  
བོད་སྐད་དུ། འཕགས་པ་རྡོ་འཕངས་པའི་མདོ།  བམ་པོ་དང་པོ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གྱད་རྣམས་ཀྱི་ལྗོངས་རྒྱུ་བ་
སྤྱད་ནས་སྡིག་པར་གཤེགས་ཏེ། སྡིག་པའི་སྲིན་བུ་པད་མའི་ནགས་ཁྲོད་དུ་བཞུགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཀུ་ཤའི་གྲོང་ཁྱེར་ག་ལ་བར་ཚུར་ཤོག །
བཙུན་པ་དེ་བཞིན་ནོ་ཞེས་གསོལ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་ལྟར་ཉན་ཏོ། །ཡང་དེའི་ཚེ་ཀུ་ཤའི་གྲོང་ཁྱེར་གྱི་གྱད་རྣམས་ནི་གྱད་ལྔ་བརྒྱ་ཙམ་སྟེ། དེ་ལ་གྱད་རེ་རེ་ཡང་གྱད་ཀྱི་འཁོར་བརྒྱ་བརྒྱ་དང་ལྡན་
ནོ། །འདུན་ས་གཅིག་ཤོས་སུ་འདུས་ཏེ་འཁོད་པ་དེ་དག་བར་གྱི་གཏམ་ཡང་དག་པར་བརྗོད་པ་འདི་ལྟ་བུ་བྱུང་སྟེ། ཤེས་ལྡན་དག་བཅོམ་ལྡན་འདས་གྱད་རྣམས་ཀྱི་ལྗོངས་སུ་རྒྱུ་བ་སྤྱད་ནས་སྡིག་པར་གཤེགས་ཏེ། སྡིག་པའི་
སྲིན་བུ་པད་པའི་ནགས་ཁྲོད་ན་བཞུགས་སོ། །དེ་ལ་སྡིག་པར་སྐྱེས་པའི་གྱད་རྣམས་ཀྱིས་རི་མོར་བྱ་བ་མཆོག་གིས་རི་མོར་བྱས། མཆོད་པར་བྱ་བ་མཆོག་གིས་མཆོད། བླ་མ་ལ་གུས་པ་མཆོག་གིས་ཀྱང་བསྙེན་བཀུར་
བྱས་སོ། །བཅོམ་ལྡན་འདས་ཀྱིས་ཀྱང་དེ་དག་ལ་ཆོས་ཀྱི་སྦྱིན་པ་དམ་པ་གྱ་ནོམ་པ་བླ་ན་མེད་པས་ཕན་གདགས་པར་མཛད་དོ། །དེ་ལ་ད་བཅོམ་ལྡན་འདས་གནས་པ་ཇི་ལྟ་བུར་གནས་པས་རིང་པོ་མི་ཐོགས་པར་དགེ་སློང་གི་ཚོགས་ཀྱིས་ཡོངས་སུ་
བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ། བདག་ཅག་གི་གྲོང་གི་ཞིང་དུ་ཀུ་ཤའི་གྲོང་ཁྱེར་དུ་གཤེགས་སོ་སྙམ་མོ། །དེ་ལ་གང་འོ་ན་བདག་ཅག་གིས་ཀྱང་བཅོམ་ལྡན་འདས་དེ་ལ་རི་མོར་བྱ་བ་དང་། མཆོད་པར་

66-1-304a

བྱ་བས་བདག་ལ་ཕན་པར་བྱ་བའི་ཕྱིར་ཀུ་ཤའི་གྲོང་ཁྱེར་ཀུན་ཆོ་ག་བཞིན་དུ་ཕྱག་དར་དག་བྱ། ཆག་ཆག་ལེགས་པར་བཏབ་པ་དང་། བྱི་དོར་ལེགས་པར་བྱ་བ་དག་བྱས་ནས་རྒྱན་དང་ལྷབ་ལྷུབ་ཐམས་ཅད་དང་། བདུག་
པ་དང་། ཕྲེང་བ་དང་། མེ་ཏོག་དང་། སྤོས་དང་། རོལ་མོའི་སྒྲ་གྱ་ནོམ་པ་དག་གིས་བརྒྱན་པར་བྱ། གདུགས་དང་། རྒྱལ་མཚན་དང་། བ་དན་དག་གཟུགས་པར་བྱ། དུས་སྟོན་དག་ཏུ་གནས་པར་བྱ། བཅོམ་ལྡན་འདས་ལམ་
གང་ནས་གཤེགས་པར་བརྩོན་པའི་གཤེགས་ཤུལ་དེ་ཡང་ཆོ་ག་བཞིན་དུ་ཕྱག་དར་དག་བྱའོ། །དེ་ཕྱིན་ཆད་བདག་ཅག་ཐམས་ཅད་ཀྱིས་བསུ་བ་བྱ་བ་འབའ་ཤིག་ན་ལེགས་སོ་སྙམ་ནས། དེ་ནས་དེ་དག་ཐམས་ཅད་ཚོགས་
ཤིང་ཡང་དག་པར་དགའ་བ་སྟེ། རྩོད་པ་མེད་ཅིང་རྩེ་གཅིག་ལ་བློ་གཅིག་པ་དག་ཏུ་བྱས་ནས་ཀུ་ཤའི་གྲོང་ཁྱེར་ཐམས་ཅད་ཆོ་ག་བཞིན་དུ་ཕྱག་དར་དག་བྱེད་དོ། །ཆག་ཆག་ལེགས་པར་བཏབ་པ་དང་། བྱི་དོར་ལེགས་པར་
བྱས་པ་དག་བྱས་ནས། རྒྱན་དང་ལྷབ་ལྷུབ་ཐམས་ཅད་དང་། བདུག་པ་དང་། ཕྲེང་བ་དང་། མེ་ཏོག་དང་། སྤོས་དང་། རོལ་མོའི་སྒྲ་གྱ་ནོམ་པ་དག་གིས་བརྒྱན་པར་བྱེད། གདུགས་དང་། རྒྱལ་མཚན་དང་། བ་དན་དག་འཛུགས་པར་
བྱེད། དུས་སྟོན་ཡང་རབ་ཏུ་གནས་པར་བྱེད་དེ། གཤེགས་ཤུལ་གང་ནས་བཅོམ་ལྡན་འདས་གཤེགས་པའི་གཤེགས་ལམ་དེ་ཡང་ཆོ་ག་བཞིན་དུ་ཕྱག་དར་དག་བྱེད་དོ། །ཡང་དེའི་ཚེ་ཀུ་ཤའི་གྲོང་ཁྱེར་གྱི་བར་དང་། ཆུ་ཀླུང་
དབྱིག་ལྡན་གྱི་བར་དེ་གཉིས་ཀྱི་བར་ན་རྡོ་ཆེན་པོ་ཡངས་པ་ཞིག་གནས་མ་ཡིན་པ་ན་འདུག་སྟེ། ལམ་པོ་ཆེ་ན་གནས་པ་ན་འདི་ལྟ་སྟེ། གྱེན་དུ་ནི་འདོམ་བཅྭ་ལྔ་སྲིད་མངོན་དུ་འཕགས་སོ། །རྒྱར་ནི་འདོམ་ཕྱེད་དང་བརྒྱད་དོ། །དེ་ནས་
དེ་དག་འདི་སྙམ་དུ་སེམས་ཏེ། གང་འོ་ན་བདག་ཅག་གིས་རྡོ་ཆེན་པོ་ཡངས་པ་འདི་ཕྱོགས་འདི་ནས་བཏེག་སྟེ། ཕྱོགས་གཅིག་ཏུ་གཞག་པར་བྱའོ། །དེའི་ཕྱིར་བདག་ཅག་གིས་ལམ་ཡང་ཤིན་དུ་ཕྱག་དར་བྱས་པས་འགྱུར་ལ་

66-1-304b

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་མཆོད་པར་འགྱུར་ཞིང་། ཕྱོགས་དང་ཕྱོགས་མཚམས་དག་ཏུ་ཡང་བདག་ཅག་གི་དགེ་བ་རྒྱ་ཆེན་པོ་གྲགས་པ་དང་། སྒྲ་དང་། ཚིགས་སུ་བཅད་
པས་མངོན་པར་འཕགས་པར་འགྱུར་ཏེ། གང་དག་གིས་རྡོ་ཆེན་པོ་ཡངས་པ་འདི་ཕྱོགས་འདི་ནས་བཏེག་ནས་ཕྱོགས་གང་ཡང་རུང་བ་ཞིག་ཏུ་བཞག་པས། ཀྱེ་མ་ཀུ་ཤའི་གྲོང་ཁྱེར་གྱི་གྱད་དག་ནི་དཔའ་བ་དག་བྱུང་ངོ་། །
ཀྱེ་མ་ཀུ་ཤའི་གྲོང་ཁྱེར་གྱི་གྱད་དག་ནི་རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཆེས་སྟོབས་དང་ལྡན་པ་དག་བྱུང་བར་གྱུར་ཏོ་ཞེས་ཟེར་རོ་སྙམ་ནས། དེ་ལྟར་རྗེས་སུ་རྣམ་པར་བསམས་ཏེ་དམ་བཅའ་བ་དག་
བྱས་སོ། །ཤེས་ལྡན་དག་ཀུ་ཤའི་གྲོང་ཁྱེར་གྱི་གྱད་དག་གམ། གྱད་ཀྱི་བུ་གཞོན་ནུ་དག་ཉོན་ཅིག །བདག་གིས་ལམ་འདི་བཙལ་བར་བརྩོན་ནོ། །རྡོ་ཆེན་པོ་ཡངས་པ་འདི་གནས་མ་ཡིན་པ་ན་འདུག་སྟེ། རྒྱལ་པོའི་ལམ་
ན་གནས་པས་གང་འོ་ན་བདག་གིས་རྡོ་ཆེན་པོ་ཡངས་པ་འདི་ཕྱོགས་འདི་ནས་བཏེག་ནས་ཕྱོགས་གཅིག་ཤོས་སུ་གཞག་པར་བྱའོ། །དེའི་ཕྱིར་བདག་ཅག་གིས་ལམ་ཤིན་དུ་སྦྱངས་པར་འགྱུར་ཞིང་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་མཆོད་པར་འགྱུར་ལ། ཕྱོགས་དང་ཕྱོགས་མཚམས་སུ་ཡང་བདག་ཅག་གི་དགེ་བ་རྒྱ་ཆེན་པོ་གྲགས་པ་དང་། སྒྲ་དང་། ཚིགས་སུ་བཅད་པས་
མངོན་པར་འཕགས་པར་འགྱུར་ཏེ། གང་དག་གིས་རྡོ་ཆེན་པོ་ཡངས་པ་འདི་ཕྱོགས་འདི་ནས་བཏེག་ནས་ཕྱོགས་གཅིག་ཤོས་སུ་བཞག་པས། ཀྱེ་མ་ཀུ་ཤའི་གྲོང་ཁྱེར་གྱི་གྱད་དག་ནི་དཔའ་བ་དག་བྱུང་ངོ་། །ཀྱེ་མ་ཀུ་
ཤའི་གྲོང་ཁྱེར་གྱི་གྱད་དག་ནི་རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཆེས་སྟོབས་དང་ལྡན་པ་དག་བྱུང་ངོ་ཞེས་ཟེར་གྱིས། དེའི་ཕྱིར་ཤེས་ལྡན་དག་རྡོ་ཆེན་པོ་ཡངས་པ་འདི་ག་ལ་བར་ཀུན་

66-1-305a

ཀྱང་དེང་ཤིག་དེ་བཞིན་ནོ་ཞེས་སྨྲས་ནས་ཀུ་ཤའི་གྲོང་ཁྱེར་གྱི་གྱད་དག་ཕན་ཚུན་གྱི་ལྟར་ཉན་ཏེ། དེ་དག་སོ་སོ་ནས་བཞོན་པ་བཟང་པོ་དག་ལ་ཞོན་ནས་བདག་ཅག་ནི་ས་སྟེང་འདི་ན། ཆེས་སྟོབས་དང་ལྡན་
པའོ་སྙམ་དུ་རློམ་སེམས་སུ་བྱེད་ཅིང་འོངས་པ་དང་། རིགས་དང་། སྟོབས་དང་། ལུས་བྱད་དང་། དབང་ཕྱུག་གི་རྒྱགས་པས་དྲེགས་ཏེ། སྒྲ་མཐོན་པོ་དང་། སྒྲ་ཆེན་པོས་ག་ཞ་བྱེད་ཅིང་ཅ་ཅོ་བྱེད་ལ། དགའ་མགུ་རངས་ཤིང་དགའ་
བ་དང་། བདེ་བ་དང་། ཡིད་བདེ་བ་སྐྱེས་ཏེ། འབྱོར་བ་ཆེན་པོ་མཆོག་གིས་ཀུ་ཤའི་གྲོང་ཁྱེར་ནས་བྱུང་ནས་རྟ་དང་། རྔ་མོ་དང་། བ་ལང་སྔོན་པོའི་གཙོ་བོ་དང་། ཁྱུ་མཆོག་དང་། གླང་པོ་ཆེ་དང་། སྤོས་ཀྱི་གླང་པོ་ཆེ་བརྒྱ་ཕྲག་དུ་མ་ཁྲིད་
ནས་རྡོ་ཆེན་པོ་ཡངས་པ་འདི་ག་ལ་བ་དེར་སོང་སྟེ་ཕྱིན་ནས་རྡོ་ཆེན་པོ་ཡངས་པ་དེ་རྩིད་པའི་ཐག་པ་སྲ་བས་ལན་མང་དུ་དཀྲིས་ནས། ཁ་ཅིག་གིས་ནི་སྐས་བཅས་ཏེ། རྩྭ་མུན་ཛ་དང་། བལ་བ་ཛའི་ཐག་པ་དང་། རྟས་འདྲེན་པའི་
ཐག་པ་དག་གིས་ཚུར་འདྲེན་པར་བྱེད་ཕར་འདྲེན་པར་བྱེད་དོ། །ཁ་ཅིག་ནི་ཐོང་ལྕགས་བརྒྱས་གཞི་ནས་འབྱིན་པར་འདོད་དོ། །ཁ་ཅིག་ནི་དགྲ་སྟ་དག་གིས་གཅོད་པར་འདོད་དོ། །ཁ་ཅིག་ནི་རྡོ་རྗེས་གདབ་པ་དག་གིས་ཕྱི་
མར་བྱ་བར་འདོད་དོ། །ཁ་ཅིག་ནི་ལུས་ཀྱི་སྟོབས་ཀྱིས་མཆུ་དག་བསྡམས་ཏེ་ཡོངས་སུ་བསྐྱོད་པར་འདོད་དོ། །ཁ་ཅིག་ནི་ཁྱུ་མཆོག་དག་དང་། བ་ལང་གི་གཙོ་བོ་དག་གིས་བསྒྱལ་བར་འདོད་དོ། །ཁ་ཅིག་ནི་བ་ལང་ཁྱུའི་སྟོབས་
ཀྱིས་རབ་ཏུ་གཞོམ་པར་འདོད་དོ། །ཁ་ཅིག་ནི་སྨན་གྱི་མཐུས་གཞིག་པར་འདོད་དོ། །ཁ་ཅིག་ནི་སྔགས་ཀྱི་མཐུས་མི་སྣང་བར་བྱ་བར་འདོད་དེ། དེའི་ཕྱིར་བརྩོན་པ་དང་། དྲང་བ་དང་། འབད་པ་དེ་ལྟ་བུས་དེ་དག་གིས་ཅི་ཕྱོགས་འདི་ནས་
བཏེག་སྟེ། ཕྱོགས་གཅིག་ཅིག་ཏུ་གཞག་གོ་སྙམ་པ་དང་། དེ་དག་ལུས་ངལ་ཞིང་ལུས་དུབ་ལ་ལུས་རྒུ་བས་རབ་ཏུ་འབད་པས་སྒྱིད་ལུག་སྟེ་རྡོ་ཆེན་པོ་ཡངས་པ་དེ་བསྒུལ་བར་ཡང་མ་ནུས་ན། བསྒྲེང་པ་འམ་འཕང་བར་ལྟ་ག་ལ་ནུས། 

66-1-305b

དེ་ནས་བཅོམ་ལྡན་འདས་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ། གང་ན་རྡོ་ཆེན་པོ་ཡངས་པ་དེ་གནས་པའི་ཕྱོགས་དེར་གཤེགས་སོ། །ཀུ་ཤའི་གྲོང་ཁྱེར་དུ་སྐྱེས་པའི་གྱད་
རྣམས་ཀྱིས་བཅོམ་ལྡན་འདས་རྒྱང་རིང་པོ་ཁོ་ན་ནས་ཚུར་གཤེགས་པ་མཐོང་སྟེ། མཐོང་ནས་ཀྱང་དགའ་མགུ་ཞིང་རངས་ཏེ་དགའ་བ་དང་། བདེ་བ་དང་། ཡིད་བདེ་བ་སྐྱེས་ཤིང་། བླ་མ་ལ་གུས་པ་ཆེན་པོ་སྐྱེས་ནས་ཐམས་ཅད་ཀྱིས་
ཀྱང་བཅོམ་ལྡན་འདས་ལ་བསུ་བ་བྱེད་དོ། །བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་བར་བྱེད་དོ། །བཅོམ་ལྡན་འདས་ལ་ལན་གསུམ་བསྐོར་བར་བྱེད་དེ། བཅོམ་ལྡན་འདས་ལ་ལན་གསུམ་བསྐོར་
བ་བྱས་ནས་ཅང་མི་སྨྲ་བར་ཕྱོགས་གཅིག་ཏུ་འཁོད་དོ། །བཅོམ་ལྡན་འདས་ཀྱིས་ཀུ་ཤའི་གྲོང་ཁྱེར་གྱི་གྱད་ཕྱོགས་གཅིག་ཏུ་འཁོད་པ་དག་ལ་འདི་སྐད་ཅེས་བཀའ་སྩལ་ཏོ། །གཞོན་ནུ་དག་ཅི་འདི་ངལ་བ་ཆེན་པོ་མཆོག་
གིས་ཀྱང་བརྩམས་སམ། ངལ་བར་བྱེད་དམ། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཀུ་ཤའི་གྲོང་ཁྱེར་གྱི་གྱད་རྣམས་ཀྱིས་འདི་སྐད་ཅེས་གསོལ་ཏོ། །བཙུན་པ་འདི་ལ་ཀུ་ཤའི་གྲོང་ཁྱེར་གྱི་གྱད་བདག་
ཅག་གིས་ནི། བཅོམ་ལྡན་འདས་གྱད་རྣམས་ཀྱི་ལྗོངས་རྒྱུ་བ་སྤྱད་ནས་སྡིག་པར་གཤེགས་ཏེ། སྡིག་པའི་སྲིན་བུ་པད་པའི་ནགས་ཁྲོད་ན་ཞུགས་སོ། །དེ་ལ་སྡིག་པར་སྐྱེས་པའི་གྱད་རྣམས་ཀྱིས་རི་མོར་བགྱི་བ་མཆོག་གིས་རི་
མོར་བགྱིས། མཆོད་པའི་མཆོག་གིས་མཆོད། བླ་མ་ལ་གུས་པའི་མཆོག་གིས་ཀྱང་རིམ་གྲོར་བགྱིས་སོ། །བཅོམ་ལྡན་འདས་ཀྱིས་ཀྱང་དེ་དག་ལ་ཆོས་ཀྱི་སྦྱིན་པ་དམ་པ་གྱ་ནོམ་པ་བླ་ན་མེད་པས་ཕན་གདགས་པར་མཛད་དོ། 
དེ་ལ་ད་བཅོམ་ལྡན་འདས་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་། དགེ་སློང་གི་དགེ་འདུན་གྱིས་མདུན་དུ་བདར་ཏེ། བདག་གི་གྲོང་གི་ཞིང་དུ་ཀུ་ཤའི་གྲོང་ཁྱེར་དུ་གཤེགས་སོ་ཞེས་ཐོས་ལགས་ཏེ། དེ་སྐད་ཐོས་ནས་ཀྱང་

66-1-306a

བདག་ཅག་འདི་སྙམ་དུ་སེམས་སོ། །གང་འོ་ན་བདག་ཅག་གིས་ཀྱང་བཅོམ་ལྡན་འདས་དེ་ལ་རི་མོར་བགྱི་བ་དང་། མཆོད་པར་བགྱི་བས་བདག་ལ་ཕན་པར་བགྱི་བའི་སླད་དུ་ཀུ་ཤའི་གྲོང་ཁྱེར་ཐམས་ཅད་ཆོ་ག་བཞིན་དུ་ཕྱག་
དར་དག་བགྱི། ཆག་ཆག་ལེགས་པར་བཏབ་པ་དང་། བྱི་དོར་ལེགས་པར་བགྱི་བ་དག་བགྱིས་ནས་རྒྱན་དང་ལྷབ་ལྷུབ་ཐམས་ཅད་ཀྱིས་བརྒྱན་པར་བགྱི། དེ་ནས་དྲི་དང་། ཕྲེང་བ་དང་། མེ་ཏོག་དང་། བདུག་པ་དང་། རོལ་མོའི་སྒྲ་གྱ་
ནོམ་པ་དག་གིས་བརྒྱན་པར་བགྱི། གདུགས་དང་། རྒྱལ་མཚན་དང་། བ་དན་དག་ཀྱང་གཟུགས་པར་བགྱི། དུས་སྟོན་ཡང་རབ་ཏུ་གཞག་པར་བགྱི། ཤུལ་གང་ནས་བཅོམ་ལྡན་འདས་གཤེགས་པར་བརྩོན་པར་མཛད་པའི་
གཤེགས་ཤུལ་དེ་ཡང་ཆོ་ག་བཞིན་དུ་ཕྱག་དར་དག་བགྱི། དེ་སླན་ཆད་བདག་ཅག་ཐམས་ཅད་ཀྱིས་བསུ་བ་བགྱིས་འབའ་ཤིག་ན་ལེགས་སོ་སྙམ་ནས་དེ་ནས་བདག་ཅག་ཐམས་ཅད་ཚོགས་ཤིང་ཡང་དག་པར་དགའ་བར་བགྱིད་
ལ། རྩོད་པ་མ་མཆིས་ཤིང་རྩེ་གཅིག་སྟེ་བློ་གཅིག་པར་གྱུར་ནས་ཀུ་ཤའི་གྲོང་ཁྱེར་ཐམས་ཅད་ནི་ཆོ་ག་བཞིན་དུ་ཕྱག་དར་དག་བགྱིད། ཆག་ཆག་ལེགས་པར་བཏབ་པ་དང་། བྱི་དོར་ལེགས་པར་བགྱི་བ་དག་བགྱིས་ནས་རྒྱན་དང་
ལྷབ་ལྷུབ་ཐམས་ཅད་དང་། བདུག་པ་དང་། ཕྲེང་བ་དང་། མེ་ཏོག་དང་། སྤོས་དང་། རོལ་མོའི་སྒྲ་གྱ་ནོམ་པ་དག་གིས་བརྒྱན་པར་བགྱིད། གདུགས་དང་། རྒྱལ་མཚན་དང་། བ་དན་དག་ཀྱང་འཛུགས་པར་བགྱིད། དུས་སྟོན་ཡང་རབ་
ཏུ་འཇོག་པར་བགྱིད། བཅོམ་ལྡན་འདས་ཤུལ་གང་ནས་གཤེགས་པའི་ཤུལ་དེ་ཡང་ཆོ་ག་བཞིན་དུ་ཕྱག་དར་དག་བགྱིས་པས་གོར་མ་ཆེན་པོ་ཡངས་པ་དེ་གནས་མ་ལགས་པ་ན་མཆིས་ཤིང་། ཤུལ་པོ་ཆེ་ན་གནས་པ་མཐོང་
ལགས་སོ། །དེ་ནས་བདག་ཅག་འདི་སྙམ་དུ་སེམས་སོ། །གང་འོ་ན་བདག་ཅག་གིས་རྡོ་ཆེན་པོ་ཡངས་པ་འདི་ཕྱོགས་འདི་ནས་བཏེག་སྟེ་ཕྱོགས་གང་ཡང་རུང་བར་གཞག་གོ། །དེའི་ཕྱིར་བདག་ཅག་གིས་ལམ་ཡང་

66-1-306b

ཤིན་ཏུ་ཕྱག་དར་བགྱིས་པར་འགྱུར་ལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་མཆོད་པར་འགྱུར་ཞིང་། ཕྱོགས་དང་ཕྱོགས་མཚམས་དག་ཏུ་ཡང་བདག་ཅག་གི་དགེ་བ་རྒྱ་
ཆེན་པོར་གྲགས་པ་དང་། སྒྲ་དང་། ཚིགས་སུ་བཅད་པ་མངོན་དུ་འཕགས་པར་འགྱུར་ཏེ། གང་དག་གིས་རྡོ་ཆེན་པོ་ཡངས་པ་དེ་ཕྱོགས་འདི་ནས་བཏེག་སྟེ། ཕྱོགས་གཅིག་ཤོས་སུ་འཕངས་པས་ཀྱེ་མ་ཀུ་ཤའི་གྲོང་
ཁྱེར་གྱི་གྱད་དཔའ་བོ་དག་བྱུང་ངོ་། །ཀྱེ་མ་ཀུ་ཤའི་གྲོང་ཁྱེར་གྱི་གྱད་རྟུལ་ཕོད་པ་ཡན་ལག་མཆོག་གི་གཟུགས་དང་ལྡན་པ། ཆེས་སྟོབས་དང་ལྡན་པ་དག་བྱུང་བར་གྱུར་ཏོ་ཞེས་ཟེར་རོ་སྙམ་ནས་དེ་ལྟར་རྗེས་སུ་རྣམ་པར་
བསམས་ཏེ། དམ་བཅའ་བ་ཁས་བླང་བ་དག་ནི་ཤེས་ལྡན་དག་ཀུ་ཤའི་གྲོང་ཁྱེར་གྱི་གྱད་དག་དང་། གྱད་ཀྱི་བུ་གཞོན་ནུ་དག་ཉོན་ཅིག །བདག་ཅག་གིས་ལམ་འདི་ཕྱག་དར་བྱ་བར་བརྩོན་ནོ། །རྡོ་ཆེན་པོ་ཡངས་པ་འདི་ནི་
གནས་མ་ཡིན་པ་ན་འདུག་ཅིང་རྒྱལ་པོའི་ལམ་ན་གནས་ཏེ། གང་འོ་ན་བདག་ཅག་གིས་རྡོ་ཆེན་པོ་ཡངས་པ་འདི་ཕྱོགས་འདི་ནས་བཏེག་སྟེ་ཕྱོགས་གཅིག་ཤོས་སུ་བཞག་པར་བྱའོ། །དེའི་ཕྱིར་བདག་ཅག་གིས་ལམ་
ཡང་ཤིན་དུ་ཕྱག་དར་བྱས་པར་འགྱུར་ལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་མཆོད་པར་འགྱུར་ཏེ། ཕྱོགས་དང་ཕྱོགས་མཚམས་དག་ཏུ་ཡང་བདག་ཅག་གིས་
དགེ་བ་རྒྱ་ཆེན་པོ་གྲགས་པ་དང་། སྒྲ་དང་། ཚིགས་སུ་བཅད་པས་མངོན་པར་འཕགས་པར་འགྱུར་བ་ནི་གང་དག་གིས་རྡོ་ཆེན་པོ་ཡངས་པ་འདི་ཕྱོགས་འདི་ནས་བཏེག་སྟེ་ཕྱོགས་གཅིག་ཤོས་སུ་འཕངས་པས། 
ཀྱེ་མ་ཀུ་ཤའི་གྲོང་ཁྱེར་གྱི་གྱད་དཔའ་བོ་དག་ཅིག་བྱུང་ངོ་། །ཀྱེ་མ་ཀུ་ཤའི་གྲོང་ཁྱེར་གྱི་གྱད་རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཆེས་སྟོབས་དང་ལྡན་པ་དག་གཅིག་བྱུང་ངོ་ཞེས་ཟེར་གྱིས། 

66-1-307a

ཤེས་ལྡན་དག་དེའི་ཕྱིར་རྡོ་ཆེན་པོ་ཡངས་པ་འདི་ག་ལ་བར་ཀུན་ཀྱང་ཕྱིར་བྱུང་སྟེ་དེང་ཤིག །དེ་བཞིན་ནོ་ཞེས་སྨྲས་ནས་དེ་དག་དང་དེ་ཉིད་གཅིག་ལ་གཅིག་གི་ལྟར་ཉན་ཏེ། སོ་སོ་ནས་བཞོན་པ་བཟང་པོ་
དག་ལ་ཞོན་ཏེ། བདག་ཅག་ནི་ས་སྟེང་འདི་ན་ཆེས་སྟོབས་དང་ལྡན་པའོ་སྙམ་དུ་རློམ་སེམས་བྱེད་ཅིང་འོངས་པ་དང་། རིགས་དང་། སྟོབས་དང་། ལུས་བྱད་དང་། དབང་ཕྱུག་གི་རྒྱགས་པས་དྲེགས་ཏེ། སྐད་མཐོང་
པོ་དང་། སྐད་ཆེན་པོས་ག་ཞ་བྱེད་ཅིང་ཅ་ཅོ་བྱེད་ལ་དགའ་མགུ་རངས་ཤིང་དགའ་བ་དང་། བདེ་བ་དང་། ཡིད་བདེ་བ་སྐྱེས་ཏེ། འབྱོར་པ་ཆེན་པོ་མཆོག་གིས་ཀུ་ཤའི་གྲོང་ཁྱེར་ནས་ཕྱིར་བྱུང་སྟེ། རྟ་དང་། རྔ་མོ་དང་། 
བ་ལང་སྔོན་པོའི་མཆོག་ཏུ་བྱིན་པ་དང་། ཁྱུ་མཆོག་དང་། གླང་པོ་ཆེ་དང་། སྤོས་ཀྱི་གླང་པོ་ཆེ་བརྒྱ་ཕྲག་དུ་མ་དེད་ནས་རྡོ་ཆེན་པོ་ཡངས་པ་དེ་ག་ལ་བ་དེར་དོང་སྟེ་ཕྱིན་ནས། རྡོ་ཆེན་པོ་ཡངས་པ་དེ་རྩིད་པའི་ཐག་པ་སྲ་
བས་རྣམ་པ་ཐམས་ཅད་དུ་དཀྲིས་ནས་དེ་དག་དང་དེ་ཉིད་ཁ་ཅིག་གིས་ནི་སྐས་བཙུགས་ཏེ། རྩྭ་མུན་ཛ་དང་། བལ་བ་ཛའི་ཐག་པ་དང་། རྟས་འདྲེན་པའི་ཐག་པ་དག་གིས་ཚུར་དྲང་བར་བྱ་ཕར་དྲང་བར་བྱའོ། །ཁ་ཅིག་
ནི་རྨོ་ལྕགས་བརྒྱས་རྩ་ནས་འབྱིན་པར་འདོད་དོ། །ཁ་ཅིག་ནི་དགྲ་སྟ་དག་གིས་གཅོད་པར་འདོད། ཁ་ཅིག་ནི་རྡོ་རྗེས་གདབ་པ་དག་གིས་ཕྱེ་མར་བྱ་བར་འདོད། ཁ་ཅིག་ནི་ལུས་ཀྱི་སྟོབས་ཀྱིས་མཆུ་དག་བསྡམས་ཏེ་
ཡོངས་སུ་བསྒུལ་བར་འདོད། ཁ་ཅིག་ནི་ཁྱུ་མཆོག་དག་དང་། བ་ལང་མཆོག་ཏུ་ཕྱིན་པ་དག་གིས་བསྒྱེལ་བར་འདོད། ཁ་ཅིག་ནི་གླང་པོ་ཆེའི་ཚོགས་ཀྱིས་རབ་ཏུ་འཇོམས་པར་འདོད། ཁ་ཅིག་ནི་སྨན་གྱི་སྟོབས་
ཀྱིས་གཞིག་པར་འདོད། ཁ་ཅིག་ནི་གསང་སྔགས་ཀྱི་སྟོབས་ཀྱིས་མི་སྣང་བར་བྱེད་པར་འདོད་པར་བྱའོ། །དེའི་ཕྱིར་བདག་ཅག་གིས་བརྩོན་པ་དང་། དྲང་བ་དང་། འབད་པ་དེ་ལྟ་བུ་དག་གིས་ཅི་ཕྱོགས་འདི་ནས་བཏེག་སྟེ། 

66-1-307b

ཕྱོགས་གཅིག་ཤོས་སུ་གཞག་གོ་སྙམ་པ་དང་། དེ་དག་དང་དེ་ཉིད་ལུས་ངལ་ཞིང་། ལུས་དུབ་ལ། ལུས་དབྱིབས་རྒུ་བས་ཡིད་སྒྱིད་ལུག་སྟེ། གང་འདི་ཞག་ཉི་ཤུ་རྩ་དགུར་རྩོམ་པ་བྱས་པ་དེས་ཀྱང་རྡོ་ཆེན་པོ་ཡངས་
པ་དེ་ཕྱོགས་དེ་ནས་ཡོངས་སུ་བསྒུལ་བར་ཡང་མ་ནུས་ན་བསྒྲེང་བ་འམ། འཕང་བར་ལྟ་ག་ལ་ནུས། གཞོན་ནུ་དག་གང་དེ་བཞིན་གཤེགས་པས་རྡོ་ཆེན་པོ་ཡངས་པ་དེ་ཕྱོགས་དེ་ནས་བཏེག་ནས་ཕྱོགས་གཅིག་ཤོས་
སུ་འཕང་བར་བྱེད་འདོད་དམ། བཙུན་པ་བཅོམ་ལྡན་འདས་མཆོག་ཏུ་འཚལ་ལགས་སོ། །བདེ་བར་གཤེགས་པ་མཆོག་ཏུ་འཚལ་ལགས་སོ། །དེ་ནས་བཅོམ་ལྡན་འདས་བླ་གོས་ཕྲག་པ་གཅིག་ཏུ་གཟར་ཏེ། རྡོ་ཆེན་
པོ་ཡངས་པ་དེ་ག་ལ་བ་དེར་གཤེགས་ཏེ་ཕྱིན་ནས་རྡོ་ཆེན་པོ་ཡངས་པ་དེ་ཞབས་ཀྱི་མཐེ་འོང་གཡས་པས་ཡང་དག་པར་རབ་ཏུ་བསྒུལ་ཏེ། ཡང་དག་པར་རབ་ཏུ་བསྒུལ་ནས་ཀྱང་གཞི་ནས་མ་ལུས་པར་ཕྱུང་སྟེ། 
ཕྱག་གཡོན་པས་བླངས་ནས་ཕྱག་གཡས་ཀྱི་མཐིལ་དུ་བཞག་སྟེ་ཡུད་ཙམ་ཞིག་དགོངས་ནས་གྱེན་དུ་ཚངས་པའི་འཇིག་རྟེན་གྱི་བར་དུ་འཕངས་ཏེ་མིག་ལམ་དུ་མི་སྣང་བར་གནས་པར་གྱུར་པ་དང་། དེའི་སྒྲས་
གྱད་དག་དངངས་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། གནས་འཇོག་གི་རྒྱུད་དག་མ་འཇིགས་ཤིག །གྱེན་དུ་འཕངས་པ་ཙམ་གྱིས་ཀྱང་འདུ་བྱེད་ཐམས་ཅད་ནི་མི་རྟག་པའོ། །ཆོས་ཐམས་ཅད་ནི་
བདག་མེད་པའོ། །མྱ་ངན་ལས་འདས་པ་ནི་ཞི་བའོ་ཞེས་སྒྲ་དེ་ལྟ་བུ་མཛད་དོ། །སླར་འཁོར་ནས་ཀྱང་དེ་བཞིན་གཤེགས་པའི་ཕྱག་མཐིལ་དེ་ཉིད་དུ་གནས་པར་གྱུར་ཏོ། །བཅོམ་ལྡན་འདས་ཀྱིས་དེ་ཞལ་གྱི་དབུགས་
གྱིས་རྡུལ་ཕྲ་རབ་ཙམ་དུ་མཛད་དོ། །ཕྱེ་མར་མཛད་ནས་ཀྱང་ཕྱོགས་དང་ཕྱོགས་མཚམས་དག་ཏུ་རྡུལ་ཕྲ་རབ་ཏུ་ཕྱེ་མའི་ཆར་མངོན་དུ་འབབ་པར་རྩོམ་པར་མཛད་དོ། །དེ་ནས་གྱད་ཀྱི་ཚོགས་དེ་ནི་རྡོ་ཆེན་པོ་ཡངས་པ་

66-1-308a

དེ་མེད་པར་གྱུར་པས། མཆོག་ཏུ་ཡིད་མི་བདེ་བར་གྱུར་ཏོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་གྱད་ཀྱི་ཚོགས་དེའི་སེམས་ཀུན་མཁྱེན་ཏེ། རྡོ་ཆེན་པོ་ཡངས་པ་མེད་པས་མཆོག་ཏུ་ཡིད་མི་བདེ་
བར་ཐུགས་སུ་ཆུད་ནས། ཕྱི་ནས་ཀྱང་རྡོའི་ཕྱེ་མ་རྡུལ་ཕྲ་རབ་ཙམ་དེ་མ་ཚང་བ་མེད་ཅིང་ཚང་བར་གཅིག་ཏུ་བསྡུས་ཏེ་བསྡོམས་ནས་རྡོ་ཆེན་པོ་ཡངས་པ་དེ་འདྲ་བ་ཁོ་ནར་མཛད་དེ། རྣམ་པར་དབེན་པར་ཕྱོགས་གཅིག་ཤོས་སུ་
གནས་པར་མཛད་དོ། །དེ་ནས་གྱད་ལྔ་བརྒྱ་ཙམ་པོ་དེ་དག་བཅོམ་ལྡན་འདས་དེས་ངོ་མཚར་རྨད་དུ་འབྱུང་བའི་ཆོས་ཆེན་པོས་འདུན་པར་མཛད་དེ་དགའ་མགུ་རངས་ཤིང་དགའ་བ་དང་། ཡིད་བདེ་བ་སྐྱེས་ནས། བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ཅི་ལགས། དེ་དེ་བཞིན་གཤེགས་པའི་ཡབ་དང་ཡུམ་ལས་བྱུང་བའི་སྟོབས་ལགས་སམ། འོན་ཏེ་རྫུ་འཕྲུལ་གྱི་སྟོབས་ལགས་སམ། འོན་ཏེ་བསྒོམ་
པའི་སྟོབས་ལགས། གནས་འཇོག་གི་རྒྱུད་དག་གང་དེ་བཞིན་གཤེགས་པས་རྡོ་ཆེན་པོ་ཡངས་པ་ཞབས་ཀྱི་མཐེ་འོང་གཡས་པས་ཡང་དག་པར་རབ་ཏུ་བསྒུལ་ཏེ། གཞི་ནས་མ་ལུས་པར་ཕྱུང་ནས་ཕྱག་གཡོན་
པས་བཟུང་སྟེ་ཕྱག་མཐིལ་གཡས་པར་བཞག་ནས་ཡུད་ཙམ་དགོངས་ཏེ། གྱེན་དུ་ཚངས་པའི་འཇིག་རྟེན་གྱི་བར་དུ་འཕངས་པ་འདི་ནི་དེ་བཞིན་གཤེགས་པའི་ཡབ་ཡུམ་ལས་བྱུང་བའི་སྟོབས་སོ། །གནས་
འཇོག་གི་རྒྱུད་དག་གང་འདུ་བྱེད་ཐམས་ཅད་ནི་མི་རྟག་པའོ། །ཆོས་ཐམས་ཅད་ནི་བདག་མེད་པའོ། །མྱ་ངན་ལས་འདས་པ་ནི་ཞི་བའོ་ཞེས་རྡོ་ཆེན་པོ་ཡངས་པའི་སྒྲ་མཛད་པ་འདི་ནི་དེ་བཞིན་གཤེགས་པའི་རྫུ་འཕྲུལ་
གྱི་སྟོབས་སོ། །གནས་འཇོག་གི་རྒྱུད་དག་གང་དེ་བཞིན་གཤེགས་པས་རྡོ་ཆེན་པོ་ཡངས་པ་དེ་ཞལ་གྱི་དབུགས་ཀྱིས་ཕྱེ་མར་མཛད་ནས་ཕྱེ་མ་རྡུལ་ཕྲ་རབ་ཙམ་དེ་གོད་པ་མེད་ཅིང་མ་ཚང་བ་མེད་པར་གཅིག་ཏུ་བསྡུས་ཏེ་

66-1-308b

བསྡོམས་ནས་རྡོ་ཆེན་པོ་ཡངས་པ་དེ་འདྲ་བ་ཁོ་ནར་མཛད་དེ། དབེན་པར་ཕྱོགས་གཅིག་ཏུ་གནས་པར་མཛད་པ་འདི་ནི་དེ་བཞིན་གཤེགས་པའི་སྒོམ་པའི་སྟོབས་སོ། །བཙུན་པ་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་དག་ཡབ་ཡུམ་ལས་བྱུང་བའི་སྟོབས་ཇི་ལྟ་བུ་དང་ལྡན་པ་ལགས། གནས་འཇོག་གི་རྒྱུད་དག་ཁྱེད་དེ་བཞིན་གཤེགས་པ་ལས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡབ་ཡུམ་ལས་བྱུང་བའི་སྟོབས་ཉན་པར་འདོད་དམ། བཙུན་པ་བཅོམ་ལྡན་འདས་མཆོག་ཏུ་འཚལ་ལགས་སོ། །བདེ་བར་གཤེགས་པ་མཆོག་ཏུ་འཚལ་
ལགས་སོ། །གནས་འཇོག་གི་རྒྱུད་དག་དེའི་ཕྱིར་ཁྱེད་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །གནས་འཇོག་གི་རྒྱུད་དག་མི་བཅུའི་སྟོབས་གང་ཡིན་པ་དེ་བ་ལང་ཕལ་གཅིག་གི་
སྟོབས་སོ། །བ་ལང་ཕལ་བཅུའི་སྟོབས་གང་ཡིན་པ་དེ་བ་ལང་སྔོན་པོ་གཅིག་གི་སྟོབས་སོ། །བ་ལང་སྔོན་པོ་བཅུའི་སྟོབས་གང་ཡིན་པ་དེ་ཁྱུ་མཆོག་གཅིག་གི་སྟོབས་སོ། །ཁྱུ་མཆོག་བཅུའི་སྟོབས་གང་ཡིན་པ་
དེ་གཡག་གཅིག་གི་སྟོབས་སོ། །གཡག་བཅུའི་སྟོབས་གང་ཡིན་པ་དེ་བསེ་གཅིག་གི་སྟོབས་སོ། །བསེ་བཅུའི་སྟོབས་གང་ཡིན་པ་དེ་གླང་པོ་ཆེ་ཕལ་གཅིག་གི་སྟོབས་སོ། །གླང་པོ་ཆེ་ཕལ་བཅུའི་སྟོབས་གང་
ཡིན་པ་དེ་སྒྲ་གསལ་བར་མི་བྱེད་པའི་གླང་པོ་ཆེ་གཅིག་གི་སྟོབས་སོ། །སྒྲ་གསལ་བར་མི་བྱེད་པའི་གླང་པོ་ཆེ་བཅུའི་སྟོབས་གང་ཡིན་པ་དེ་སྒྲ་ཆེན་པོར་བྱེད་པའི་གླང་པོ་ཆེ་གཅིག་གི་སྟོབས་སོ། །སྒྲ་ཆེན་པོར་བྱེད་པའི་
གླང་པོ་ཆེ་བཅུའི་སྟོབས་གང་ཡིན་པ་དེ་མཆེ་བ་གཅིག་པའི་གླང་པོ་ཆེ་གཅིག་གི་སྟོབས་སོ། །མཆེ་བ་གཅིག་པའི་གླང་པོ་ཆེ་བཅུའི་སྟོབས་གང་ཡིན་པ་དེ་རི་སྔོན་པོའི་གླང་པོ་ཆེ་གཅིག་གི་སྟོབས་སོ། །རི་སེར་པོ་དང་། 

66-1-309a

རི་དམར་པོ་དང་། རི་དཀར་པོ་དང་། དྲི་མཆོག་དང་ལྡན་པ་དང་། དྲི་ངད་འཇམ་པ་དང་ལྡན་པ་དང་། དྲི་ཨུད་པ་ལ་དང་ལྡན་པ་དང་། དྲི་ཀུ་མུ་ད་དང་ལྡན་པའི་སྟོབས་ཀྱང་དེ་བཞིན་ནོ། །ཀུ་མུ་དའི་སྤོས་ཀྱི་གླང་པོ་
ཆེའི་སྟོབས་གང་ཡིན་པ་དེ་པད་མའི་གླང་པོ་ཆེ་གཅིག་གི་སྟོབས་སོ། །པད་མའི་གླང་པོ་ཆེ་བཅུའི་སྟོབས་གང་ཡིན་པ་དེ་པད་མ་ཆེན་པོའ་གླང་པོ་ཆེ་གཅིག་གི་སྟོབས་སོ། །པད་མ་ཆེན་པོའི་གླང་པོ་ཆེ་བཅུའི་སྟོབས་གང་
ཡིན་པ་དེ་གངས་ཁྲོད་དུ་སྐྱེས་པའི་གླང་པོ་ཆེ་གཅིག་གི་སྟོབས་སོ། །གངས་ཁྲོད་དུ་སྐྱེས་པའི་གླང་པོ་ཆེ་བཅུའི་སྟོབས་གང་ཡིན་པ་དེ་ཚན་པོ་ཆེ་དང་ལྡན་པ་བལ་གླང་སྤོས་ཀྱི་གླང་པོ་ཆེ་གཅིག་གི་སྟོབས་སོ། །ཚན་པོ་
ཆེ་དང་ལྡན་པ་བལ་གླང་སྤོས་ཀྱི་གླང་པོ་ཆེ་བཅུའི་སྟོབས་གང་ཡིན་པ་དེ་ཚན་པོ་ཆེ་དང་ལྡན་པ་ཕྱེད་པོ་གཅིག་གི་སྟོབས་སོ། །ཚན་པོ་ཆེ་དང་ལྡན་པ་ཕྱེད་པོ་གཉིས་ཀྱི་སྟོབས་གང་ཡིན་པ་དེ་ཚན་པོ་ཆེ་དང་ལྡན་
པ་གཅིག་གི་སྟོབས་སོ། །ཚན་པོ་ཆེ་དང་ལྡན་པ་བཅུའི་སྟོབས་གང་ཡིན་པ་དེ་རབ་གནོན་ཕྱེད་པོ་གཅིག་གི་སྟོབས་སོ། །རབ་གནོན་ཕྱེད་པོ་གཉིས་ཀྱི་སྟོབས་གང་ཡིན་པ་དེ་རབ་གནོན་གཅིག་གི་སྟོབས་སོ། །རབ་
གནོན་བཅུའི་སྟོབས་གང་ཡིན་པ་དེ་སྟོབས་མཆོག་གི་སྟོབས་གཅིག་གོ། །སྟོབས་མཆོག་གི་སྟོབས་བཅུ་གང་ཡིན་པ་དེ་ཡན་ལག་མཆོག་གི་སྟོབས་གཅིག་གོ། །ཡན་ལག་མཆོག་གི་སྟོབས་བཅུ་གང་ཡིན་པ་དེ་
སྲེད་མེད་ཀྱི་བུ་ཕྱེད་ཀྱི་སྟོབས་གཅིག་གོ། །སྲེད་མེད་ཀྱི་བུ་ཕྱེད་པོ་གཉིས་ཀྱི་སྟོབས་གང་ཡིན་པ་དེ་སྲེད་མེད་ཀྱི་བུའི་སྟོབས་གཅིག་གོ། །སྲེད་མེད་ཀྱི་བུའི་སྟོབས་སུམ་བརྒྱ་ཉི་ཤུ་གང་ཡིན་པ་དེ་དེ་བཞིན་གཤེགས་
པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཅིག་གི་ཡབ་དང་ཡུམ་ལས་བྱུང་བའི་སྟོབས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་

66-1-309b

སྐུའི་གནད་ཀྱི་གནས་རེ་རེ་ལ་ཡང་སྲེད་མེད་ཀྱི་བུའི་སྟོབས་འཆང་བར་མཛད་པའི་ཕྱིར་རོ། །གང་དག་འདས་པ་དང་གང་དག་མ་བྱོན་པ་དང་། གང་དག་ད་ལྟར་བྱུང་བའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པའི་སངས་རྒྱས་པའི་སངས་རྒྱས་ཐམས་ཅད་མཉམ་པ་དང་མཉམ་སྟེ། མཚན་མཉམ་པ། ཡོན་ཏན་མཚུངས་པ་མཉམ་པ། བསོད་ནམས་ཀྱི་འབྲས་བུ་རྣམ་པར་སྨིན་པ་མཉམ་པ་དག་ཡིན་གྱི། 
རྒྱུ་གསུམ་པོ་རིགས་དང་། སྐུ་ཚེ་དང་། སྐུ་ལུས་ཀྱིས་མཉམ་པ་དག་ནི་མ་ཡིན་ནོ། །གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ནི་ཡབ་ཡུམ་དག་ལས་
བྱུང་བའི་སྟོབས་དེ་ལྟ་བུ་དང་ལྡན་པ་དག་ཡིན་ཞིང་། གང་དག་འདས་པ་དག་དང་། གང་དག་མ་བྱོན་པ་དག་དང་། གང་ཡང་ད་ལྟར་བྱུང་བའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་ཐམས་ཅད་མཉམ་པ་དང་མཉམ་པ་སྟེ། མཚན་མཉམ་པ། ཡོན་ཏན་མཚུངས་པ་མཉམ་པ། བསོད་ནམས་ཀྱི་འབྲས་བུ་རྣམ་པར་སྨིན་པ་མཉམ་པ་དག་ཡིན་གྱི། རྒྱུ་གསུམ་པོ་རིགས་དང་། སྐུ་ཚེ་དང་། སྐུ་ལུས་
མཉམ་པ་དག་ནི་མ་ཡིན་ནོ། །བཙུན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡབ་ཡུམ་ལས་བྱུང་བའི་སྟོབས་ནི་བདག་ཅག་གིས་ཐོས་ལགས་ན་
བཙུན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་བསོད་ནམས་ཀྱི་སྟོབས་ཇི་ལྟ་བུ་དང་ལྡན་པ་དག་ལགས། གནས་འཇོག་གི་རྒྱུད་དག་ཁྱེད་དེ་བཞིན་གཤེགས་པ་ལས་དེ་
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བསོད་ནམས་ཀྱི་སྟོབས་ཉན་པར་འདོད་དམ། གཙུན་པ་བཅོམ་ལྡན་འདས་མཆོག་ཏུ་འཚལ་ལགས་སོ། །བདེ་བར་གཤེགས་

66-1-310a

པ་མཆོག་ཏུ་འཚལ་ལགས་སོ། །གནས་འཇོག་གི་རྒྱུད་དག་དེའི་ཕྱིར་ཁྱེད་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །གནས་འཇོག་གི་རྒྱུད་དག་འཛམ་བུ་གླིང་པའི་སེམས་
ཅན་རྣམས་ཀྱི་བསོད་ནམས་གང་ཡིན་པ་དེ་གླིང་གཅིག་གི་བདག་པོ་འཁོར་ལོས་སྒྱུར་བའི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་
སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །གནས་འཇོག་གི་རྒྱུད་དག་གླིང་གཉིས་ཀྱི་སེམས་ཅན་རྣམས་ཀྱི་བསོད་ནམས་གང་ཡིན་པ་དེ་གླིང་གཉིས་ཀྱི་
བདག་པོ་འཁོར་ལོས་སྒྱུར་བའི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་
ཉེ་བར་མི་འགྲོའོ། །གནས་འཇོག་གི་རྒྱུད་དག་གླིང་གསུམ་གྱི་སེམས་ཅན་རྣམས་ཀྱི་བསོད་ནམས་གང་ཡིན་པ་དེ་གླིང་གསུམ་གྱི་བདག་པོ་འཁོར་ལོས་སྒྱུར་བའི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་
ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །གནས་འཇོག་གི་རྒྱུད་དག་གླིང་བཞིའི་སེམས་ཅན་རྣམས་ཀྱི་བསོད་ནམས་གང་ཡིན་
པ་དེ་གླིང་བཞིའི་བདག་པོ་འཁོར་ལོས་སྒྱུར་བའི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་
ཡང་ཉེ་བར་མི་འགྲོའོ། །གནས་འཇོག་གི་རྒྱུད་དག་ཡང་འཁོར་ལོས་སྒྱུར་བ་བཞི་བྱུང་སྟེ། གླིང་གཅིག་པ་དང་། གླིང་གཉིས་པ་དང་། གླིང་གསུམ་པ་དང་། གླིང་བཞི་པའི་འཁོར་ལོས་སྒྱུར་བའོ། །དེ་ལ་གླིང་གཅིག་པའི་

66-1-310b

འཁོར་ལོས་སྒྱུར་བའི་འཁོར་ལོ་ནི་ལྕགས་ལས་བྱས་པ་ཁོར་ཡུག་དུ་རྒྱང་གྲགས་གཅིག་ཡོད་པ་འབྱུང་ངོ་། །གླིང་གཉིས་པའི་འཁོར་ལོས་སྒྱུར་བའི་འཁོར་ལོ་ནི་ཟངས་ལས་བྱས་པ་ཁོར་ཡུག་ཏུ་རྒྱང་གྲགས་གཉིས་
ཡོད་པ་འབྱུང་ངོ་། །གླིང་གསུམ་པའི་འཁོར་ལོས་སྒྱུར་བའི་འཁོར་ལོ་ནི་དངུལ་ལས་བྱས་པ་ཁོར་ཡུག་དུ་རྒྱང་གྲགས་གསུམ་ཡོད་པ་འབྱུང་ངོ་། །གླིང་བཞི་པའི་འཁོར་ལོས་སྒྱུར་བའི་འཁོར་ལོ་ནི་གསེར་ལས་བྱས་པ་
རྩིབས་སྟོང་པ་ལྟེ་བ་དང་བཅས་པ། མུ་ཁྱུད་དང་བཅས་པ་ཐམས་ཅད་གསེར་ལས་བྱས་པ། ལྷ་རྫས་ཀྱི་འོད་འཕྲོ་བ། འོད་རབ་ཏུ་གསལ་བ། ཁོར་ཡུག་དུ་རྒྱང་གྲགས་བཞི་ཡོད་པ་འབྱུང་ངོ་། །གནས་འཇོག་གི་རྒྱུད་
དག་གླིང་བཞི་པའི་འཁོར་ལོས་སྒྱུར་བ་དག །བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་
འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །རྒྱལ་ཆེན་བཞིའི་རིས་ཀྱི་ལྷ་དག་བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་རྒྱལ་པོ་ཆེན་པོ་
བཞིའི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་ཆ་དང་བགྲང་བ་དང་དཔེ་དང་རྒྱུར་ཡང་ཉེ་བར་མི་འགྲོའོ། །རྒྱལ་པོ་ཆེན་
པོ་བཞི་བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་སུམ་བཅུ་རྩ་གསུམ་པའི་ལྷ་རྣམས་ཀྱི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་
སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །སུམ་བཅུ་རྩ་གསུམ་པའི་ལྷ་དག་བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་ལྷའི་དབང་པོ་བརྒྱ་བྱིན་གྱི་བསོད་ནམས་དག་ཏུ་

66-1-311a

ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །ལྷའི་དབང་པོ་བརྒྱ་བྱིན་དག་
བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་འཐབ་བྲལ་གྱི་ལྷ་རྣམས་ཀྱི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། 
ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །འཐབ་བྲལ་གྱི་ལྷ་དག་བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་ལྷའི་བུ་རབ་འཐབ་བྲལ་གྱི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་
བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །ལྷའི་བུ་རབ་འཐབ་བྲལ་དག་བྱེ་བ་ཕྲག་འབུམ་གྱི་བསོད་ནམས་གང་ཡིན་
པ་དེ་དགའ་ལྡན་གྱི་ལྷ་རྣམས་ཀྱི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་། བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་
ཉེ་བར་མི་འགྲོའོ། །དགའ་ལྡན་གྱི་ལྷ་དག་བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་ལྷའི་བུ་ཡོངས་སུ་དགའ་ལྡན་གཅིག་གི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་
འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །ལྷའི་བུ་ཡོངས་སུ་དགའ་ལྡན་བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་འཕྲུལ་དགའི་
ལྷ་རྣམས་ཀྱི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །

66-1-311b

འཕྲུལ་དགའི་ལྷ་དག་བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་ལྷའི་བུ་རབ་འཕྲུལ་དགའ་གཅིག་གི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། 
བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །ལྷའི་བུ་རབ་འཕྲུལ་དགའ་བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་བསོད་
ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །གཞན་འཕྲུལ་དབང་
བྱེད་ཀྱི་ལྷ་དག་བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་ལྷའི་བུ་དབང་སྒྱུར་གྱི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་
དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །ལྷའི་བུ་དབང་སྒྱུར་དག་བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་ཚངས་རིས་ཀྱི་ལྷ་རྣམས་ཀྱི་བསོད་ནམས་དག་ཏུ་ངེས་པར་བརྟག་པར་བྱས་
ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །ཚངས་རིས་ཀྱི་ལྷ་དག་བྱེ་བ་ཕྲག་འབུམ་གྱི་བསོད་ནམས་གང་ཡིན་
པ་དེ་འཁོར་གྱི་བདག་པོ་ཚངས་པའི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་
ཉེ་བར་མི་འགྲོའོ། །ཚངས་རིས་དག་ཇི་ལྟ་བར་ཚངས་པའི་མདུན་ན་འདོན་དག་དང་། ཚངས་པ་ཆེན་པོ་དག་དང་། འོད་ཆུང་དག་དང་། ཚད་མེད་འོད་དག་དང་། འོད་གསལ་དག་དང་། དགེ་ཆུང་དག་དང་། ཚད་མེད་དགེ་དག་དང་། 

66-1-312a

དགེ་རྒྱས་དག་དང་། སྤྲིན་མེད་དག་དང་། བསོད་ནམས་སྐྱེས་དག་དང་། འབྲས་བུ་ཆེ་དག་དང་། མི་ཆེ་དག་དང་། མི་གདུང་དག་དང་། གྱ་ནོམ་སྣང་དག་དང་། ཤིན་དུ་མཐོང་དག་དང་། འོག་མིན་དག་ཀྱང་དེ་བཞིན་ནོ། །
འོག་མིན་གྱི་ལྷ་དག་བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་རང་སངས་རྒྱས་བསེ་རུ་ལྟ་བུ་གཅིག་གི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། 
བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །རང་སངས་རྒྱས་བསེ་རུ་ལྟ་བུ་དག་བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་བྱང་ཆུབ་སེམས་དཔའ་བྱམས་པ་
གཅིག་གི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་། བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །བྱང་
ཆུབ་སེམས་དཔའ་བྱམས་པ་དག་བྱེ་བ་ཕྲག་འབུམ་གྱི་བསོད་ནམས་གང་ཡིན་པ་དེ་བྱང་ཆུབ་སེམས་དཔའ་སྲིད་པ་ཐ་མ་པ་གཅིག་གི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་
འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །བྱང་ཆུབ་སེམས་དཔའ་སྲིད་པ་ཐ་མ་པ་དག་གང་གཱའི་ཀླུང་གི་བྱེ་མ་དང་མཉམ་པ་སྙེད་ཀྱི་བསོད་
ནམས་གང་ཡིན་པ་དེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཅིག་གི་བསོད་ནམས་དག་ཏུ་ངེས་པར་བརྟག་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། 
བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ནི་བསོད་

66-1-312b

ནམས་ཀྱི་སྟོབས་དེ་ལྟ་བུ་དང་ལྡན་པ་དག་ཡིན་ཞིང་། གང་དག་འདས་པ་དང་། གང་དག་མ་བྱོན་པ་དང་། གང་ཡང་ང་ད་ལྟར་བྱུང་བའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པར་སངས་
རྒྱས་པའི་སངས་རྒྱས་ཐམས་ཅད་མཉམ་པ་དང་མཉམ་སྟེ། མཚན་མཉམ་པ། ཡོན་ཏན་མཚུངས་པ་མཉམ་པ། བསོད་ནམས་ཀྱི་འབྲས་བུ་རྣམ་པར་སྨིན་པ་མཉམ་པ་དག་ཡིན་ཏེ། རྒྱུ་གསུམ་པོ་རིགས་དང་། 
སྐུ་ཚེ་དང་། སྐུ་ལུས་ཀྱིས་མཉམ་པ་དག་ནི་མ་ཡིན་ནོ། །བཙུན་པ་བདག་ཅག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡབ་ཡུམ་ལས་བྱུང་བའི་སྟོབས་ཀྱང་
ཐོས་ལགས། བསོད་ནམས་ཀྱི་སྟོབས་ཀྱང་ཐོས་ལགས་ན་བཙུན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ཤེས་རབ་ཀྱི་སྟོབས་ཇི་ལྟ་བུ་དང་ལྡན་པ་དག་ལགས། 
གནས་འཇོག་གི་རྒྱུད་དག་ཁྱེད་དེ་བཞིན་གཤེགས་པ་ལས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཤེས་རབ་ཀྱི་སྟོབས་ཉན་པར་འདོད་དམ། བཙུན་པ་བཅོམ་ལྡན་འདས་མཆོག་ཏུ་འཚལ་
ལགས་སོ། །བདེ་བར་གཤེགས་པ་མཆོག་ཏུ་འཚལ་ལགས་སོ། །གནས་འཇོག་གི་རྒྱུད་དག་དེའི་ཕྱིར་ཁྱེད་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །གནས་འཇོག་གི་རྒྱུད་དག་རྒྱ་མཚོ་
ཆེན་པོ་ནི་ཟབས་སུ་དཔག་ཚད་བརྒྱད་ཁྲི་ཡོད་པ། རྒྱར་དཔག་ཏུ་མེད་པ་དེ་སྣག་ཚའི་སྙིང་ཁུས་ཡོངས་སུ་གང་བར་གྱུར་ཅིང་། རིའི་རྒྱལ་པོ་རི་རབ་དཔག་ཚད་བརྒྱད་ཁྲི་ཆུའི་ནང་ནས་མངོན་དུ་འཕགས་ཏེ། རིན་པོ་
ཆེ་སྣ་བཞི་ལས་བྱས་ཤིང་། ངོས་བཞི་ཡོད་པ། དེའི་ངོས་གཅིག་ནི་གསེར་ལས་བྱས་པ་ཡིན། ངོས་གཉིས་པ་ནི་དངུལ་ལས་བྱས་པའོ། །གསུམ་པ་ནི་བཻ་དཱུརྱ་ལས་བྱས་པའོ། །བཞི་པ་ནི་ཤེལ་ལས་བྱས་པ་སྟེ། 

66-1-313a

དེ་ལ་གསེར་གྱི་ངོས་སུ་ནི་བྱང་གི་སྒྲ་མི་སྙན་གྱི་གླིང་སྣང་ངོ་། །དངུལ་ལས་བྱས་པའི་ངོས་སུ་ནི་ཤར་གྱི་ལུས་འཕགས་ཀྱི་གླིང་སྣང་ངོ་། །བཻ་དཱུརྱ་ལས་བྱས་པའི་ངོས་ན་ནི་འཛམ་བུའི་གླིང་སྣང་ངོ་། །ཤེལ་
ལས་བྱས་པའི་ངོས་ན་ནི་བ་ལང་སྤྱོད་ཀྱི་གླིང་སྣང་ངོ་། །རིའི་རྒྱལ་པོ་རི་རབ་དཔག་ཚད་བརྒྱད་ཁྲི་འོག་ཏུ་ཆུའི་ནང་དུ་ནུབ་སྟེ། གསེར་ལས་བྱས་པའི་ས་སྟེང་གི་བར་ན་གནས་པ་དེ་གྲོ་གའི་ཤོག་ཤོག་ཙམ་དུ་གྱུར་ལ། 
གླིང་བཞི་ན་སེམས་ཅན་གྱི་ཁམས་གང་སུ་དག་ཡོད་པ་ཡི་གེ་པ་རྣམས་ནི་དེ་ཙམ་དུ་གྱུར་ཏེ། ས་ཆེན་པོའི་སྟེང་ན་རྩྭ་དང་། ཤིང་དང་། ཤིང་གི་ཡལ་ག་དང་། ཤིང་གི་དུམ་བུ་གང་ཅི་ཡང་རུང་སྨྱུག་གུ་དག་ནི་དེ་ཙམ་དུ་
གྱུར་ནས། གནས་འཇོག་གི་རྒྱུད་དག་སྣག་ཚའི་སྙིང་ཁུ་རྒྱ་མཚོ་ཆེན་པོ་ཙམ་དང་། གྲོ་གའི་ཤོག་ཤོག་རི་རབ་ཙམ་དང་། ཡི་གེ་པ་དག་གླིང་བཞི་པའི་སེམས་ཅན་གྱི་ཁམས་ཙམ་དང་། སྨྱུག་གུ་དག་ས་ཆེན་
པོའི་སྟེང་ན་རྩྭ་དང་། ཤིང་དང་། ཡལ་ག་དང་། ཤིང་གི་དུམ་བུ་ཙམ་ནི་ཆེས་མྱུར་དུ་ཡོངས་སུ་ཟད་པ་དང་། ཡོངས་སུ་གཏུགས་པར་འགྱུར་གྱི། དགེ་སློང་ཤཱ་རིའི་བུའི་ཤེས་རབ་ཟད་པར་འགྱུར་བར་ནི་ང་
མི་སྨྲའོ། །གནས་འཇོག་གི་རྒྱུད་དག་དགེ་སློང་ཤཱ་རིའི་བུ་ནི་ཤེས་རབ་ཀྱི་སྟོབས་དེ་ལྟ་བུ་དང་ལྡན་ནོ། །གནས་འཇོག་གི་རྒྱུད་དག་འདི་ལྟ་སྟེ། རྣམ་པར་སྣང་བྱེད་ཀྱི་ཉི་མ་དག་ནི་ཀུན་དུ་འགྲོ་བ་དང་། ཕྱོགས་
སྣང་བར་བྱེད་དོ། །དེ་སྲིད་དུ་སྟོང་གི་འཇིག་རྟེན་ན་ཟླ་བ་སྟོང་དང་ཉི་མ་སྟོང་དང་། རིའི་རྒྱལ་པོ་རི་རབ་སྟོང་དང་། ཤར་གྱི་ལུས་འཕགས་སྟོང་དང་། བ་ལང་སྤྱོད་སྟོང་དང་། བྱང་གི་སྒྲ་མི་སྙན་སྟོང་དང་། 
འཛམ་བུ་གླིང་སྟོང་དང་། རྒྱལ་ཆེན་བཞིའི་རིས་ཀྱི་ལྷ་སྟོང་དང་། སུམ་བཅུ་རྩ་གསུམ་པ་དག་དང་། འཐབ་བྲལ་དག་དང་། དགའ་ལྡན་དག་དང་། འཕྲུལ་དགའ་དག་དང་། གཞན་འཕྲུལ་དབང་བྱེད་ཀྱི་ལྷ་སྟོང་

66-1-313b

དང་། ཚངས་པའི་འཇིག་རྟེན་སྟོང་པོ་འདི་ནི་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཤེས་བྱའོ། །སྟོང་ཆུང་ངུའི་འཇིག་རྟེན་གྱི་ཁམས་སྟོང་གི་སྟོང་གང་ཡིན་པ་འདི་ནི་སྟོང་གཉིས་པ་བར་མའི་འཇིག་རྟེན་གྱི་
ཁམས་ཤེས་བྱའོ། །སྟོང་གཉིས་པ་བར་མའི་འཇིག་རྟེན་གྱི་ཁམས་ཕྲག་སྟོང་གང་ཡིན་པ་འདི་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཤེས་བྱའོ། །གནས་འཇོག་གི་རྒྱུད་དག་སྟོང་གསུམ་གྱི་
སྟོང་ཆེན་པོའི་འཇིག་རྟེན་གྱི་ཁམས་དེ་ཡང་ཤེས་རབ་དགེ་སློང་ཤ་རིའི་བུ་དང་འདྲ་བ་དག་གིས་གང་བར་གྱུར་ལ། དེ་བཞིན་གཤེགས་པའི་ཤེས་རབ་ཏུ་ངེས་པར་བརྟག་པར་བྱས་ཀྱང་། བརྒྱའི་ཆར་ཡང་ཉེ་བར་
མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་དག་ནི་ཤེས་རབ་ཀྱི་སྟོབས་དེ་ལྟ་བུ་དང་ལྡན་པ་དག་ཡིན་ཞིང་། གང་དག་འདས་པ་དག་དང་། གང་དག་མ་བྱོན་པ་དག་དང་། གང་ཡང་ང་ད་ལྟར་བྱུང་བའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པར་སངས་རྒྱས་པའི་སངས་རྒྱས་ཐམས་ཅད་མཉམ་པ་དང་མཉམ་པ་སྟེ། མཚན་མཉམ་པ་ཡོན་ཏན་མཚུངས་པ་མཉམ་པ། བསོད་ནམས་ཀྱི་འབྲས་བུ་རྣམ་པར་སྨིན་པ་མཉམ་པ་དག་ཡིན་གྱི། 
རྒྱུ་གསུམ་པོ་རིགས་དང་། སྐུ་ཚེ་དང་། སྐུ་ལུས་ཀྱིས་མཉམ་པ་དག་ནི་མ་ཡིན་ནོ། །བཙུན་པ་བདག་ཅག་གིས་དེ་བཞིན་གཤེགས་པ་ལས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
རྣམས་ཀྱི་ཡབ་ཡུམ་ལས་བྱུང་བའི་སྟོབས་ཀྱང་ཐོས་ལགས། བསོད་ནམས་ཀྱི་སྟོབས་ཀྱང་ཐོས་ལགས། ཤེས་རབ་ཀྱི་སྟོབས་ཀྱང་ཐོས་ལགས་ན་བཙུན་པ་དེ་བཞིན་གཤེགས་པ་དགྲ་བཅོམ་པ་ཡང་དག་

66-1-314a

པར་རྫོགས་པའི་སངས་རྒྱས་དག་རྫུ་འཕྲུལ་གྱི་སྟོབས་ཇི་ལྟ་བུ་དང་ལྡན་པ་ལགས། གནས་འཇོག་གི་རྒྱུད་དག་ཁྱེད་དེ་བཞིན་གཤེགས་པ་ལས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རྣམས་ཀྱི་རྫུ་འཕྲུལ་གྱི་སྟོབས་ཉན་པར་འདོད་དམ། བཙུན་པ་བཅོམ་ལྡན་འདས་མཆོག་ཏུ་འཚལ་ལགས་སོ། །བདེ་བར་གཤེགས་པ་མཆོག་ཏུ་འཚལ་ལགས་སོ། །གནས་འཇོག་གི་རྒྱུད་
དག་དེའི་ཕྱིར་ཁྱེད་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །གནས་འཇོག་གི་རྒྱུད་དག་དུས་འདི་ནི་དུས་གཅིག་སྟེ། རྩྭ་བི་ར་ན་དང་ལྡན་པར་གནོད་སྦྱིན་འདམ་བུ་དང་འདྲ་བར་རྩུབ་པའི་
དོང་ཀའི་དྲུང་ན་བཞུགས་སོ། །ཡང་དེའི་ཚེ་རྩྭ་བི་ར་ན་དང་ལྡན་པ་ན་དཀའ་བ་འབྲོག་དགོན་པ་སློངས་མོ་པས་བསོད་སྙོམས་རྙེད་པར་དཀའ་བའི་མུ་གེ་བྱུང་སྟེ། དགེ་སློང་དག་ཀྱང་ཟས་ངན་པས་ཡོངས་སུ་དུབ་
པ་ཡིན་ནོ། །དེ་ནས་དགེ་སློང་མཽ་དགལ་གྱི་བུ་ང་ག་ལ་བ་དེར་སོང་སྟེ་ཕྱིན་ནས་ང་ལ་འདི་སྐད་ཅེས་གསོལ་ཏོ། །བཙུན་པ་ད་ལྟར་ན་རྩྭ་བི་ར་ན་དང་ལྡན་པར་དཀའ་བ་འབྲོག་དགོན་པ་སློངས་མོ་པས་བསོད་སྙོམས་
རྙེད་པར་དཀའ་བའི་མུ་གེ་བྱུང་ལགས་ཏེ། དགེ་སློང་དག་ཀྱང་དབྱར་ཟས་ངན་པས་ཡོངས་སུ་དུབ་ལགས་སོ། །བཙུན་པ་བཅོམ་ལྡན་འདས་ལས་བདག་གིས་མངོན་དུ་ཐོས་ཤིང་མངོན་དུ་བཟུང་ལགས་ཏེ། 
དོག་ས་ཆེན་པོ་འདི་ལ་དོག་ས་ལས་བྱུང་བའི་རོའི་ཁམས་གྱ་ནོམ་པ་གང་ལགས་པ་དེ་ནི་འོག་ན་གནས་ལགས་ཤིང་། བདག་ཀྱང་བདག་ཉིད་ཀྱི་ཡང་དག་པར་ཤེས་པ་མཐོང་བ་འཇུག་ལགས་སོ། །དོག་ས་
ཆེན་པོ་འདི་ལ་དོག་ས་ལས་བྱུང་བའི་རོའི་ཁམས་གྱ་ནོམ་པ་གང་ལགས་པ་འདི་ནི་འོག་ན་གནས་པ་ལགས་ཏེ། བཙུན་པ་དེའི་སླད་དུ་དོག་ས་ཆེན་པོ་བསྒྱུར་བར་བདག་འཚལ་ལགས་སོ། །དོག་ས་ཆེན་པོ་

66-1-314b

འདིའི་འོག་ན་རོའི་ཁམས་གྱ་ནོམ་པ་གང་ལགས་པ་དེ་སྟེང་ན་མཆིས་པར་བགྱི་ལགས་སོ། །སྟེང་ན་མཆིས་པ་གང་ལགས་པ་དེ་འོག་ན་མཆིས་པར་བགྱི་ལགས་སོ། །དེ་ལ་འདི་སྐད་ཅེས་ཀྱང་ངས་བཀའ་
སྩལ་ཏོ། །མཽད་གལ་གྱི་བུ་ས་ཆེན་པོ་བསྒྱུར་བར་འདོད་དམ། དེས་འདི་སྐད་ཅེས་གསོལ་ཏོ། །བཙུན་པ་དོག་ས་ཆེན་པོ་བསྒྱུར་བར་འཚལ་ལགས་སོ། །དེ་ལ་འདི་སྐད་ཅེས་བཀའ་སྩལ་ཏོ། །གནས་འདིར་
གནས་ཏེ་ས་ཆེན་པོ་བསྒྱུར་བར་འདོད་དམ། དེས་འདི་སྐད་ཅེས་གསོལ་ཏོ། །བཙུན་པ་ཁོར་ཡུག་དང་ཁོར་ཡུག་ཆེན་པོ་དག་གི་གནས་སུ་གནས་ཏེ་དོག་ས་ཆེན་པོ་བསྒྱུར་བར་འཚལ་ལགས་སོ། །དེ་ལ་
ཡང་འདི་སྐད་ཅེས་བཀའ་སྩལ་ཏོ། །མཽད་གལ་གྱི་བུ་ས་ཆེན་པོ་བསྒྱུར་བར་འདོད་ན་གང་དག་ས་ལ་རྟེན་པའི་སེམས་ཅན་དང་། སྲོག་ཆགས་དེ་དག་ཇི་ལྟར་བྱེད། དེས་འདི་སྐད་ཅེས་གསོལ་ཏོ། །བཙུན་པ་དོག་
ས་ཆེན་པོ་བསྒྱུར་བར་འཚལ་ལགས་ཏེ། གང་དག་དོག་ས་ལ་རྟེན་པའི་སེམས་ཅན་དང་། སྲོག་ཆགས་དེ་དག་ལག་པ་གཡོན་པས་བླངས་ཏེ་བཟུང་བར་བགྱི་ལགས་སོ། །ལག་པ་གཡས་པས་ནི་ས་ཆེན་པོ་
བསྒྱུར་བར་བགྱི་ལགས་སོ། །དེ་ལ་ཡང་འདི་སྐད་ཅེས་བཀའ་སྩལ་ཏོ། །མཽད་གལ་གྱི་བུ་ཆེན་པོ་ས་ཆེན་པོ་སྒྱུར་བར་བྱེད་པ་ན་ཇི་ལྟ་བུའི་འདུ་ཤེས་དང་ལྡན་པར་བྱེད། དེས་འདི་སྐད་ཅེས་གསོལ་ཏོ། །བཙུན་
པ་ས་ཆེན་པོ་བསྒྱུར་བར་བགྱིད་པ་ན་འདུ་ཤེས་མཆོག་ཏུ་ཡང་བ་དང་ལྡན་པར་བགྱིད་ལགས་ཏེ། འདི་ལྟ་སྟེ། སྐྱེས་བུ་སྟོབས་དང་ལྡན་པ་ཞིག་ཆུ་ཤིང་གི་འདབ་མ་བསྒྱུར་བར་བགྱིད་པ་ན་འདུ་ཤེས་མཆོག་ཏུ་
ཡང་བ་དང་ལྡན་པར་བགྱིད་ལགས་སོ། །བཙུན་པ་དེ་བཞིན་དུ་བདག་ས་ཆེན་པོ་བསྒྱུར་བར་བགྱིད་པ་ན། འདུ་ཤེས་མཆོག་ཏུ་ཡང་བ་དང་ལྡན་པར་བགྱིད་ལགས་སོ། །དེ་ལ་ཡང་འདི་སྐད་ཅེས་བཀའ་སྩལ་ཏོ། 

66-1-315a

མཽད་གལ་གྱི་བུ་ལེགས་སོ་ལེགས་སོ། །མཽད་གལ་གྱི་ཁྱོད་ཀྱིས་རྫུ་འཕྲུལ་དེ་དང་ཐབས་དེས་ས་ཆེན་པོ་ནི་བསྒྱུར་བར་ནི་ནུས་པར་གྱུར་ན་ས་ཆེན་པོ་བསྒྱུར་བར་དེ་བཞིན་གཤེགས་པ་ཁྱོད་ལ་གནང་བ་མི་
མཛད་དོ། །མཽད་གལ་གྱི་བུ་དེ་ཅིའི་ཕྱིར་ཞེ་ན། སེམས་ཅན་གང་ཕལ་ཆེར་ཁ་ཟས་ཀྱི་རོ་ལ་ཆགས་ཤིང་། ཁ་ཟས་ཀྱི་རོ་ལ་རྨོངས་ཏེ། ཀུན་དུ་གཏི་མུག་པར་འགྱུར་རོ། །མཽད་གལ་གྱི་བུ་དེ་ཅིའི་ཕྱིར་ཞེ་ན། ས་ཆེན་
པོའི་སྟེང་ན་ས་ལས་བྱུང་བའི་རོའི་ཁམས་གྱ་ནོམ་པ་དེ་ཡང་ཡུན་རིང་དུ་མི་གནས་ཏེ། རིང་པོ་མི་ཐོགས་པར་དེ་ས་ཆེན་པོའི་སྟེང་ན་ཐམས་ཅད་ཀྱི་ཐམས་ཅད་དུ་ནུབ་པར་འགྱུར་རོ། །དེའི་ཕྱིར་སེམས་ཅན་དང་
འབྱུང་པོ་དང་། སྲོག་ཆགས་དེ་དག་ཀྱང་ཁ་ཟས་ཀྱི་རོ་ལ་ཆགས་ཤིང་། ཁ་ཟས་ཀྱི་རོ་ལ་རྨོངས་ཏེ། མཆོག་ཏུ་མྱོས་པར་འགྱུར་བ་འམ། སྲོག་ཆད་ནས་ཤི་བའི་དུས་བྱེད་པར་འགྱུར་ཏེ། མཽད་གལ་གྱི་
བུ་དེའི་ཕྱིར་ས་ཆེན་པོ་བསྒྱུར་བར་དེ་བཞིན་གཤེགས་པ་ཁྱོད་ལ་གནང་བར་མི་མཛད་དོ། །གནས་འཇོག་གི་རྒྱུད་དག་དགེ་སློང་མཽད་གལ་གྱི་བུ་ནི་རྫུ་འཕྲུལ་གྱི་སྟོབས་དེ་ལྟ་བུ་དང་ལྡན་ནོ། །གནས་འཇོག་
གི་རྒྱུད་དག་འདི་ལྟ་སྟེ། རྣམ་པར་སྣང་བྱེད་ཀྱི་ཉི་མ་དག་ནི་གུན་དུ་འགྲོ་བ་ན་ཕྱོགས་སྣང་བར་བྱེད་དོ། །དེ་སྲིད་དུ་སྟོང་གི་འཇིག་རྟེན་ན་ཟླ་བ་སྟོང་དང་། ཉི་མ་སྟོང་དང་། རིའི་རྒྱལ་པོ་རི་རབ་སྟོང་དང་། ཤར་གྱི་
ལུས་འཕགས་སྟོང་དང་། བ་ལང་སྤྱོད་སྟོང་དང་། བྱང་གི་སྒྲ་མི་སྙན་སྟོང་དང་། འཛམ་བུའི་གླིང་སྟོང་དང་། རྒྱལ་ཆེན་བཞིའི་རིས་ཀྱི་ལྷ་སྟོང་དང་། སུམ་བཅུ་རྩ་གསུམ་པ་དག་དང་། འཐབ་བྲལ་དག་དང་། 
དགའ་ལྡན་དག་དང་། འཕྲུལ་དགའ་དག་དང་། གཞན་འཕྲུལ་དབང་བྱེད་ཀྱི་ལྷ་སྟོང་དང་། ཚངས་པའི་འཇིག་རྟེན་སྟོང་པོ་འདི་ནི་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཤེས་བྱའོ། །སྟོང་སྤྱི་ཕུད་ཀྱི་འཇིག་རྟེན་


66-1-315b

གྱི་ཁམས་སྟོང་གང་ཡིན་པ་དེ་ནི་སྟོང་གཉིས་པ་བར་མའི་འཇིག་རྟེན་གྱི་ཁམས་ཤེས་བྱའོ། །སྟོང་གཉིས་པ་བར་མའི་འཇིག་རྟེན་གྱི་ཁམས་ཕྲག་སྟོང་གང་ཡིན་པ་འདི་ནི་སྟོང་གསུམ་གྱི་སྟོང་ཆེན་པོའི་
འཇིག་རྟེན་གྱི་ཁམས་ཤེས་བྱའོ། །འཕགས་པ་རྡོ་འཕངས་པའི་མདོ། བམ་པོ་གཉིས་པ་སྟེ་ཐ་མ། གནས་འཇོག་གི་རྒྱུད་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཡང་རྫུ་
འཕྲུལ་དང་ལྡན་པ་དགེ་སློང་མཽད་གལ་གྱི་བུ་དང་འདྲ་བ་དག་གིས་གང་བར་གྱུར་ལ། དེ་བཞིན་གཤེགས་པའི་རྫུ་འཕྲུལ་ངེས་པར་བྱས་ཀྱང་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་
གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། ཉན་ཐོས་དང་། རང་སངས་རྒྱས་རྣམས་ཀྱི་རྫུ་འཕྲུལ་ནི་ལུས་ཀྱིས་འགྲོ་བ་ཡིན་ཞིང་། དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་རྫུ་འཕྲུལ་ནི་ཡིད་ལྟར་མགྱོགས་པ་ཡིན་པའི་ཕྱིར་ཏེ། གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་དག་ནི་རྫུ་འཕྲུལ་གྱི་སྟོབས་དེ་ལྟ་བུ་དང་ལྡན་པ་དག་ཡིན་ཞིང་། གང་དག་འདས་པ་དག་དང་། གང་དག་མ་བྱོན་པ་དག་དང་། གང་ཡང་ང་ད་ལྟར་བྱུང་བའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་
དག་པར་རྫོགས་པར་སངས་རྒྱས་པའི་སངས་རྒྱས་ཐམས་ཅད་མཉམ་པ་དང་མཉམ་སྟེ། མཚན་མཉམ་པ། ཡོན་ཏན་མཚུངས་པ་མཉམ་པ། བསོད་ནམས་ཀྱི་འབྲས་བུ་རྣམ་པར་སྨིན་པ་མཉམ་པ་དག་ཡིན་
གྱི། རྒྱུ་གསུམ་པོ་རིགས་དང་། སྐུ་ཚེ་དང་། སྐུ་ལུས་ཀྱིས་མཉམ་པ་དག་ནི་མ་ཡིན་ནོ། །བཙུན་པ་བདག་ཅག་གིས་དེ་བཞིན་གཤེགས་པ་ལས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་

66-1-316a

སངས་རྒྱས་རྣམས་ཀྱི་ཡབ་ཡུམ་ལས་བྱུང་བའི་སྟོབས་ཀྱང་ཐོས་ལགས། བསོད་ནམས་ཀྱི་སྟོབས་ཀྱང་ཐོས་ལགས། ཤེས་རབ་ཀྱི་སྟོབས་ཀྱང་ཐོས་ལགས། རྫུ་འཕྲུལ་གྱི་སྟོབས་ཀྱང་ཐོས་
ལགས་ན། བཙུན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་བསྒོམ་པའི་སྟོབས་ཇི་ལྟ་བུ་དང་ལྡན་པ་ལགས། གནས་འཇོག་གི་རྒྱུད་དག་ཁྱེད་དེ་བཞིན་གཤེགས་པ་
ལས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བསྒོམ་པའི་སྟོབས་ཉན་པར་འདོད་དམ། བཙུན་པ་བཅོམ་ལྡན་འདས་མཆོག་ཏུ་འཚལ་ལགས་སོ། །བདེ་བར་
གཤེགས་པ་མཆོག་ཏུ་འཚལ་ལགས་སོ། །གནས་འཇོག་གི་རྒྱུད་དག་དེའི་ཕྱིར་ཁྱེད་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །གནས་འཇོག་གི་རྒྱུད་དག་འཛམ་བུའི་གླིང་ཆུ་དང་རྒྱར་
ནི་དཔག་ཚད་བདུན་སྟོང་ཡོད་དེ་བྱང་ཕྱོགས་སུ་ནི་ཡངས་ལ། ལྷོ་ཕྱོགས་སུ་ཤིང་རྟའི་དབྱིབས་སོ། །གནས་འཇོག་གི་རྒྱུད་དག་ཤར་གྱི་ལུས་འཕགས་གླིང་ནི་ཆུར་ནི་དཔག་ཚད་བརྒྱད་སྟོང་ཡོད་དེ་ཟླ་གམ་
དུ་གནས་སོ། །གནས་འཇོག་གི་རྒྱུད་དག་བ་ལང་སྤྱོད་ཀྱི་གླིང་ནི་ཆུར་དཔག་ཚད་དགུ་སྟོང་ཡོད་ལ་ཀུན་དུ་ཟླུམ་པོའོ། །གནས་འཇོག་གི་རྒྱུད་དག་བྱང་གི་སྒྲ་མི་སྙན་གྱི་གླིང་ནི་ཆུར་དཔག་ཚད་ཁྲི་ཡོད་དེ་ཀུན་
ནས་གྲུ་བཞིའོ། །གནས་འཇོག་གི་རྒྱུད་དག་གང་གླིང་བཞིར་དུས་མེད་པའི་སྤྲིན་ཆེན་པོ་ཡང་དག་པར་འོང་བའི་དུས་དེ་ཡོད་དེ། དེའི་ཚེ་གླིང་ཆེན་པོ་བཞི་ནས་ཆུ་ཆེན་པོའི་རྒྱུན་དང་། ཆུ་ཆེན་པོའི་ཕུང་པོ་རྒྱ་མཚོ་
ཆེན་པོར་འབབ་སྟེ། དེ་བཞིན་གཤེགས་པའི་ཆུའི་ཐིགས་པ་རེ་རེ་ལ་ཆུའི་ཐིགས་པ་འདི་ནི་འཛམ་བུའི་གླིང་ནས་ཆར་འབབ་བོ། །གྲོང་ཆེ་གེ་མོ་དང་། གྲོང་རྡལ་ཆེ་གེ་མོ་དང་། ལྗོངས་ཆེ་གེ་མོ་དང་། 

66-1-316b

ལྗོངས་ཀྱི་ཕྱོགས་ཆེ་གེ་མོ་དང་། ཤིང་ལྗོན་པ་ཆེ་གེ་མོ་དང་། སྡོང་པོ་ཆེ་གེ་མོ་དང་། ཡལ་ག་དང་། མདབ་མ་དང་། མེ་ཏོག་དང་། འབྲས་བུ་དང་། རྩྭ་དང་། ཤིང་དང་། ཡལ་ག་དང་། ཤིང་གི་དུམ་བུ་ཆེ་གེ་མོ་ལས་ཆར་
བབ་པའོ། །འདི་ནི་བ་ལང་སྤྱོད་པ་དང་། ཤར་གྱི་ལུས་འཕགས་དང་། བྱང་གི་སྒྲ་མི་སྙན་གྱི་གླིང་ནས་ཆར་བབ་པའོ། །གྲོང་ཆེ་གེ་མོ་དང་། གྲོང་རྡལ་ཆེ་གེ་མོ་དང་། ལྗོངས་ཆེ་གེ་མོ་དང་། ལྗོངས་ཀྱི་ཕྱོགས་ཆེ་གེ་
མོ་དང་། ཤིང་ལྗོན་པ་ཆེ་གེ་མོ་དང་། སྡོང་པོ་ཆེ་གེ་མོ་དང་། ཡལ་ག་དང་། འདབ་མ་དང་། མེ་ཏོག་དང་། འབྲས་བུ་དང་། རྩྭ་དང་། ཤིང་དང་། ཡལ་ག་དང་། ཤིང་གི་དུམ་བུ་ཆེ་གེ་མོ་ལས་ཆར་བབ་པའོ་ཞེས་
ཡོངས་སུ་དཔྱོད་པར་མཛད་དེ། ཆུའི་ཐིགས་པ་དེ་ཡང་རྡུལ་ཕྲ་རབ་ཙམ་དུ་ཡོངས་སུ་དཔྱོད་པར་མཛད་དོ། །གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
དག་ནི་བསྒོམ་པའི་སྟོབས་དེ་ལྟ་བུ་དང་ལྡན་པ་དག་ཡིན་ཞིང་། གང་དག་འདས་པ་དག་དང་། གང་དག་མ་བྱོན་པ་དག་དང་། གང་ཡང་ང་ད་ལྟར་བྱུང་བའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པར་སངས་རྒྱས་པའི་སངས་རྒྱས་ཐམས་ཅད་མཉམ་པ་དང་མཉམ་པ་སྟེ། མཚན་མཉམ་པ། ཡོན་ཏན་མཚུངས་པ་མཉམ་པ། བསོད་ནམས་ཀྱི་འབྲས་བུ་རྣམ་པར་སྨིན་པ་མཉམ་པ་དག་ཡིན་གྱི། 
རྒྱུ་གསུམ་པོ་རིགས་དང་། སྐུ་ཚེ་དང་། སྐུ་ལུས་ཀྱིས་མཉམ་པ་དག་ནི་མ་ཡིན་ནོ། །གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ནི་སྟོབས་
བཅུ་གཞན་དག་དང་ལྡན་པ་དག་ཡིན་ཞིང་། ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་སྟེ། ཚངས་པའི་འཁོར་ལོ་རབ་ཏུ་སྐོར་ཞིང་འཁོར་གྱི་ནང་དུ་ཡང་དག་པར་སེང་གེའི་སྒྲ་སྒྲོགས་པར་མཛད་ཅིང་

66-1-317a

གང་དག་འདས་པ་དག་དང་། གང་དག་མ་བྱོན་པ་དག་དང་། གང་ཡང་ང་ད་ལྟར་བྱུང་བའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པར་སངས་རྒྱས་པའི་སངས་རྒྱས་ཐམས་ཅད་མཉམ་པ་དང་མཉམ་པ་སྟེ། མཚན་
མཉམ་པ། ཡོན་ཏན་མཚུངས་པ་མཉམ་པ། བསོད་ནམས་ཀྱི་འབྲས་བུ་རྣམ་པར་སྨིན་པ་མཉམ་པ་དག་ཡིན་གྱི། རྒྱུ་གསུམ་པོ་རིགས་དང་། སྐུ་ཚེ་དང་། སྐུ་ལུས་ཀྱིས་མཉམ་པ་དག་ནི་མ་ཡིན་ནོ། །གནས་འཇོག་གི་རྒྱུད་དག་སྟོབས་བཅུ་གང་
དག་དང་ལྡན་ཞེ་ན། འདི་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་གནས་ལ་ཡང་གནས་དང་གནས་པ་མ་ཡིན་པ་ཡང་གནས་མ་ཡིན་པར་ཡང་དག་པ་ཇི་ལྟ་བ་བཞིན་དུ་ཡང་རབ་ཏུ་མཁྱེན་ཏེ། 
གནས་འཇོག་གི་རྒྱུད་དག་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་གནས་ལ་ཡང་གནས་དང་གནས་མ་ཡིན་པ་ལ་ཡང་གནས་མ་ཡིན་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །
གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ནི་སྟོབས་དང་པོ་དེ་དང་ལྡན་པ་དག་ཡིན་ཞིང་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་སྟེ། ཚངས་པའི་འཁོར་ལོ་རབ་ཏུ་སྐོར་
ཞིང་འཁོར་གྱི་ནང་དུ་ཡང་དག་པར་སེང་གེའི་སྒྲ་སྒྲོགས་པར་མཛད་དོ། །གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་འདས་པ་དང་། མ་འོངས་པ་དང་། ད་ལྟར་བྱུང་
བའི་ལས་དང་། ཆོས་ཡང་དག་པར་ལེན་པ་དག་ལ་གནས་དང་། རྒྱུ་དང་། དངོས་པོ་དང་། རྣམ་པར་སྨིན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། གནས་འཇོག་གི་རྒྱུད་དག་འདི་ལྟར་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་འདས་པ་དང་། མ་འོངས་པ་དང་། ད་ལྟར་བྱུང་བའི་ལས་དང་། ཆོས་ཡང་དག་པར་ལེན་པ་དག་ལ་གནས་དང་། རྒྱུ་དང་། དངོས་པོ་དང་། རྣམ་པར་སྨིན་

66-1-317b

པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ནི་སྟོབས་གཉིས་པ་དེ་དང་ལྡན་པ་ཡིན་
ཞིང་། ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་སྟེ། ཚངས་པའི་འཁོར་ལོ་རབ་ཏུ་སྐོར་ཞིང་འཁོར་གྱི་ནང་དུ་ཡང་དག་པར་སེང་གེའི་སྒྲ་སྒྲོགས་པར་མཛད་དོ། །གནས་འཇོག་གི་རྒྱུད་དག་
གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དག་གིས་
ཀུན་ནས་ཉོན་མོངས་པ་དག་གིས་ཀུན་ནས་ཉོན་མོངས་པ་དང་། རྣམ་པར་བྱང་བ་དང་། རྣམ་པར་གནས་པ་དང་། རྣམ་པར་དག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། གནས་འཇོག་གི་
རྒྱུད་དག་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དག་གི་
ཀུན་ནས་ཉོན་མོངས་པ་དང་། རྣམ་པར་བྱང་བ་དང་། རྣམ་པར་གནས་པ་དང་། རྣམ་པར་དག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །གནས་འཇོག་གི་རྒྱུད་དག་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ནི་སྟོབས་གསུམ་པ་དེ་དང་ལྡན་པ་དག་ཡིན་ཞིང་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་སྟེ། ཚངས་པའི་འཁོར་ལོ་རབ་ཏུ་སྐོར་
ཞིང་། འཁོར་གྱི་ནང་དུ་ཡང་དག་པར་སེང་གེའི་སྒྲ་སྒྲོགས་པར་མཛད་དོ། །གནས་འཇོག་གི་རྒྱུད་དག་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་

66-1-318a

ནི་སེམས་ཅན་གཞན་དག་དང་། གང་ཟག་གཞན་དག་གི་དབང་པོ་མཆོག་དང་མཆོག་མ་ཡིན་པ་ཉིད་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། གནས་འཇོག་གི་རྒྱུད་དག་འདི་ལྟར་དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་སེམས་ཅན་གཞན་དག་དང་། གང་ཟག་གཞན་དག་གི་དབང་པོ་མཆོག་དང་མཆོག་མ་ཡིན་པ་ཉིད་ཡང་དག་པ་ཇི་ལྟ་བ་བཞིན་དུ་
རབ་ཏུ་མཁྱེན་ཏོ། །གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ནི་སྟོབས་བཞི་པ་དེ་དང་ལྡན་པ་དག་ཡིན་ཞིང་། ཁྱུ་མཆོག་གི་གནས་རླབས་པོ་ཆེ་
ཞལ་གྱིས་འཆེ་སྟེ། ཚངས་པའི་འཁོར་ལོ་རབ་ཏུ་སྐོར་ཞིང་འཁོར་གྱི་ནང་དུ་ཡང་དག་པར་སེང་གེའི་སྒྲ་སྒྲོགས་པར་མཛད་དོ། །གནས་འཇོག་གི་རྒྱུད་དག་གཞན་ཡང་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རྣམས་ནི་སེམས་ཅན་གཞན་དག་དང་། གང་ཟག་གཞན་དག་གི་མོས་པ་སྣ་ཚོགས་ཉིད་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། གནས་འཇོག་གི་རྒྱུད་དག་
འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་སེམས་ཅན་གཞན་དག་དང་། གང་ཟག་གཞན་དག་གི་མོས་པ་སྣ་ཚོགས་ཉིད་ཡང་དག་པ་ཇི་ལྟ་བ་བཞིན་དུ་
མཁྱེན་ཏོ། །གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ནི་སྟོབས་ལྔ་པ་དེ་དང་ལྡན་པ་དག་ཡིན་ཞིང་། ཁྱུ་མཆོག་གི་གནས་རླབས་པོ་ཆེ་
ཞལ་གྱིས་འཆེ་སྟེ། ཚངས་པའི་འཁོར་ལོ་རབ་ཏུ་སྐོར་ཞིང་། འཁོར་གྱི་ནང་དུ་ཡང་དག་པར་སེང་གེའི་སྒྲ་སྒྲོགས་པར་མཛད་དོ། །གནས་འཇོག་གི་རྒྱུད་དག་གཞན་ཡང་དེ་བཞིན་གཤེགས་པ་དགྲ་

66-1-318b

བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཁམས་སྣ་ཚོགས་པ་ཁམས་དུ་མ་དང་ལྡན་པའི་འཇིག་རྟེན་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། གནས་འཇོག་གི་རྒྱུད་དག་འདི་ལྟར་
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཁམས་སྣ་ཚོགས་པ་ཁམས་དུ་མ་དང་ལྡན་པའི་འཇིག་རྟེན་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །གནས་
འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ནི་སྟོབས་དྲུག་པ་དེ་དང་ལྡན་པ་དག་ཡིན་ཞིང་། ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་སྟེ། 
ཚངས་པའི་འཁོར་ལོ་རབ་ཏུ་སྐོར་ཞིང་། འཁོར་གྱི་ནང་དུ་ཡང་དག་པར་སེང་གེའི་སྒྲ་སྒྲོགས་པར་མཛད་དོ། །གནས་འཇོག་གི་རྒྱུད་དག་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རྣམས་ནི་ཐམས་ཅད་དུ་འགྲོ་བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། །གནས་འཇོག་གི་རྒྱུད་དག་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རྣམས་ནི་ཐམས་ཅད་དུ་འགྲོ་བའི་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་དག་ནི་སྟོབས་བདུན་པ་དེ་དང་ལྡན་པ་དག་ཡིན་ཞིང་། ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་སྟེ། ཚངས་པའི་འཁོར་ལོ་རབ་ཏུ་སྐོར་ཞིང་འཁོར་གྱི་ནང་དུ་ཡང་དག་པར་སེང་གེའི་སྒྲ་སྒྲོགས་པར་
མཛད་དོ། །གནས་འཇོག་གི་རྒྱུད་དག་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་སྔོན་གྱི་གནས་རྣམ་པ་དུ་མ་ཡང་དག་པར་རྗེས་སུ་དྲན་པར་མཛད་དེ། 

66-1-319a

འདི་ལྟ་སྟེ། ཚེ་རབས་གཅིག་དང་། གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བདུན་དང་། བརྒྱད་དང་། དགུ་དང་། བཅུ་དང་། ཉི་ཤུ་དང་། སུམ་བཅུ་དང་། བཞི་བཅུ་དང་། ལྔ་བཅུ་དང་། ཚེ་རབས་
བརྒྱ་དང་། ཚེ་རབས་སྟོང་དང་། ཚེ་རབས་བརྒྱ་སྟོང་དང་། ཚེ་རབས་བརྒྱ་ཕྲག་དུ་མ་དང་། ཚེ་རབས་སྟོང་ཕྲག་དུ་མ་དང་། ཚེ་རབས་བརྒྱ་སྟོང་ཕྲག་དུ་མ་དང་། འཇིག་པའི་བསྐལ་པ་དང་། འཆགས་པའི་བསྐལ་པ་དང་། འཇིག་
པ་དང་། འཆགས་པའི་བསྐལ་པ་དང་། འཇིག་པའི་བསྐལ་པ་དུ་མ་དང་། འཆགས་པའི་བསྐལ་པ་དུ་མ་དང་། འཇིག་པ་དང་། འཆགས་པའི་བསྐལ་པ་དུ་མ་ཡང་དག་པར་རྗེས་སུ་དྲན་པར་མཛད་ཅིང་སེམས་
ཅན་འབྱུང་བ་དེ་དག་ནི་མིང་འདི་དག་ཅེས་བྱ་བར་གྱུར་ཏོ། །དེ་དག་ཏུ་བདག་ཅག་མིང་འདི་དག་ཅེས་བྱ་བར་གྱུར་ཏོ། །རིགས་དག་ནི་འདི་དག་ཅེས་བྱ། རུས་དག་ནི་འདི་དག་ཅེས་བྱ། ཟས་དག་ནི་འདི་ལྟ་བུ་དག་ཅིག་ཟ་
ཟ། བདེ་བ་དང་སྡུག་བསྔལ་བ་ནི་འདི་ལྟ་བུ་དག་ཅིག་མྱོང་། ཚེ་ནི་འདི་ཙམ་ཞིག་ཏུ་རིང་བར་གྱུར། ཡུན་ནི་འདི་སྲིད་དག་ཅིག་ཏུ་གནས་གནས། ཚེ་དག་ནི་འདི་ཙམ་དག་ཅིག་ཐུབ། དེ་དག་དང་བདག་ཅག་གནས་དེ་
ནས་ཤི་འཕོས་ཏེ་ཆེ་གེ་མོ་ཞིག་ཏུ་སྐྱེས་པ་དག་ཏུ་གྱུར། དེ་ནས་ཀྱང་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་པ་དག་ཏུ་གྱུར། དེ་ནས་ཀྱང་ཤི་འཕོས་ནས་ཡང་འདིར་སྐྱེས་པ་དག་ཏུ་གྱུར་ཏོ་ཞེས་རྣམ་པ་དང་བཅས་
ཤིང་། ཡུལ་ཕྱོགས་དང་བཅས་ལ། གཞི་ཅི་ལས་གྱུར་པ་དང་བཅས་པར་སྔོན་གྱི་གནས་རྣམ་པ་དུ་མ་ཡང་དག་པར་རྗེས་སུ་དྲན་པར་མཛད་ལ། གནས་འཇོག་གི་རྒྱུད་དག་འདི་ལྟར་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་ནི་སྔོན་གྱི་གནས་རྣམ་པ་དུ་མ་ཡང་དག་པར་རྗེས་སུ་དྲན་པར་མཛད་དེ། འདི་ལྟ་སྟེ། ཚེ་རབས་གཅིག་དང་། གཉིས་དང་། གསུམ་དང་། བཞི་དང་། ལྔ་དང་། དྲུག་དང་། བདུན་དང་། 

66-1-319b

བརྒྱད་དང་། དགུ་དང་། བཅུ་དང་། ཉི་ཤུ་དང་། སུམ་བཅུ་དང་། བཞི་བཅུ་དང་། ལྔ་བཅུ་དང་། ཚེ་རབས་བརྒྱ་དང་། ཚེ་རབས་སྟོང་དང་། ཚེ་རབས་བརྒྱ་སྟོང་དང་། ཚེ་རབས་བརྒྱ་ཕྲག་དུ་མ་དང་། ཚེ་རབས་སྟོང་ཕྲག་དུ་མ་དང་། 
ཚེ་རབས་བརྒྱ་སྟོང་ཕྲག་དུ་མ་དང་། འཇིག་པའི་བསྐལ་པ་དང་། འཆགས་པའི་བསྐལ་པ་དང་། འཇིག་པ་དང་། འཆགས་པའི་བསྐལ་པ་དང་། འཇིག་པའི་བསྐལ་པ་དུ་མ་དང་། འཆགས་པའི་བསྐལ་པ་དུ་མ་དང་། 
འཇིག་པ་དང་། འཆགས་པའི་བསྐལ་པ་དུ་མ་ཡང་དག་པར་རྗེས་སུ་དྲན་པར་མཛད་ཅིང་སེམས་ཅན་འབྱུང་བ་དེ་དག་ནི་མིང་འདི་དག་ཅེས་བྱ་བར་གྱུར་ཏོ། །དེ་དག་ཏུ་བདག་ཅག་མིང་འདི་དག་ཅེས་བྱ་བར་གྱུར་ཏོ། །
རིགས་དག་ནི་འདི་དག་ཅེས་བྱ། རུས་དག་ནི་འདི་དག་ཅེས་བྱ། ཟས་དག་ནི་འདི་ལྟ་བུ་དག་ཅིག་ཟ་ཟ། བདེ་བ་དང་སྡུག་བསྔལ་བ་ནི་འདི་ལྟ་བུ་དག་ཅིག་མྱོང་། ཚེ་འདི་ཙམ་ཞིག་ཏུ་རིང་བར་གྱུར། ཡུན་ནི་འདི་སྲིད་
དག་ཅིག་གནས་གནས། ཚེ་དག་ནི་འདི་ཙམ་དག་ཅིག་ཐུབ། དེ་དག་དང་བདག་ཅག་གནས་དེ་ནས་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་པ་དག་ཏུ་གྱུར། དེ་ནས་ཀྱང་ཤི་འཕོས་ནས་ཆེ་གེ་མོ་ཞིག་ཏུ་སྐྱེས་པ་དག་
ཏུ་གྱུར། དེ་ནས་ཀྱང་ཤི་འཕོས་ནས་ཡང་འདིར་སྐྱེས་པ་དག་ཏུ་གྱུར་ཏོ་ཞེས་རྣམ་པ་དང་བཅས་ཤིང་། ཡུལ་ཕྱོགས་དང་བཅས་ལ། གཞི་ཅི་ལས་གྱུར་པ་དང་བཅས་པར་སྔོན་གྱི་གནས་རྣམ་པ་དུ་མ་ཡང་དག་
པར་རྗེས་སུ་དྲན་པར་མཛད་དོ། །གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ནི་སྟོབས་བརྒྱད་པ་དེ་དང་ལྡན་པ་དག་ཡིན་ཞིང་། ཁྱུ་མཆོག་གི་གནས་
རླབས་པོ་ཆེ་ཞལ་གྱིས་འཆེ་སྟེ། ཚངས་པའི་འཁོར་ལོ་རབ་ཏུ་སྐོར་ཞིང་འཁོར་གྱི་ནང་དུ་ཡང་དག་པར་སེང་གེའི་སྒྲ་སྒྲོགས་པར་མཛད་དོ། །གནས་འཇོག་གི་རྒྱུད་དག་གཞན་ཡང་དེ་བཞིན་གཤེགས་པ་དགྲ་

66-1-320a

བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ལྷའི་སྤྱན་རྣམ་པར་དག་པ་མི་ལས་འདས་པས་སེམས་ཅན་ཤི་འཕོ་བ་དག་དང་། སྐྱེ་བ་དག་དང་། མདོག་བཟང་པོ་དག་དང་། མདོག་ངན་པ་དག་
དང་། དམན་པ་དག་དང་། གྱ་ནོམ་པ་དག་དང་། བདེ་འགྲོར་འགྲོ་བ་དག་ལ་གཟིགས་པར་མཛད་ཅིང་། སེམས་ཅན་ལ་ཇི་ལྟ་བ་བཞིན་དུ་ཉེ་བར་དོང་བ་དག་ལ་སེམས་ཅན་འབྱུང་བ་དེ་དག་ནི་ལུས་ཀྱིས་ཉེས་པར་སྤྱོད་
པ་དང་ལྡན་པ་དག་དང་། ངག་དང་ཡིད་ཀྱིས་ཉེས་པར་སྤྱོད་པ་དང་ལྡན་པ་དག་དང་། འཕགས་པ་རྣམས་ལ་སྐུར་པ་འདེབས་པ་དག་དང་། ལོག་པར་ལྟ་བ་དག་ཡིན་ཏེ། ལོག་པར་ལྟ་བའི་ལས་དང་། ཆོས་ཡང་དག་
པར་ལེན་པའི་རྒྱུས། དེའི་རྒྱུ་དང་། དེའི་རྐྱེན་གྱིས་ལུས་ཞིག་ནས་ཤི་ཕན་ཅད་ངན་སོང་ངན་འགྲོ་ལོག་པར་ལྟུང་བའི་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །ཡང་ན་སེམས་ཅན་འབྱུང་བ་དག་ནི་ལུས་ཀྱིས་
ལེགས་པར་སྤྱོད་པ་དང་ལྡན་པ་དག་དང་ངག་དང་ཡིད་ཀྱིས་ལེགས་པར་སྤྱོད་པ་དང་ལྡན་པ་དག་དང་། འཕགས་པ་རྣམས་ལ་སྐུར་པ་མི་འདེབས་པ་དག་དང་། ཡང་དག་པར་ལྟ་བ་དག་ཡིན་ཏེ། ཡང་དག་པའི་ལྟ་བའི་ལས་
དང་། ཆོས་ཡང་དག་པར་ལེན་པའི་རྒྱུས་དེའི་རྒྱུ་དང་དེའི་རྐྱེན་གྱིས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། གནས་
འཇོག་གི་རྒྱུད་དག་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ལྷའི་སྤྱན་རྣམ་པར་དག་པ་མི་ལས་འདས་པས་སེམས་ཅན་འཆི་འཕོ་བ་དག་དང་། སྐྱེ་བ་དག་དང་། 
མདོག་བཟང་པོ་དག་དང་། མདོག་ངན་པ་དག་དང་། དམན་པ་དང་། གྱ་ནོམ་པ་དག་དང་། བདེ་འགྲོ་དང་། ངན་འགྲོར་འགྲོ་བ་དག་ལ་གཟིགས་པར་མཛད་ཅིང་། སེམས་ཅན་ལས་ཇི་ལྟ་བ་བཞིན་དུ་ཉེ་བར་དོང་བ་དག་ལ་

66-1-320b

སེམས་ཅན་འབྱུང་བ་དེ་དག་ནི་ལུས་ཀྱིས་ཉེས་པར་སྤྱོད་པ་དང་ལྡན་པ་དག་དང་། ངག་དང་ཡིད་ཀྱིས་ཉེས་པར་སྤྱོད་པ་དང་ལྡན་པ་དག་དང་། འཕགས་པ་རྣམས་ལ་སྐུར་པ་འདེབས་པ་དག་དང་ལོག་པར་ལྟ་བ་
དག་ཡིན་ཏེ། ལོག་པར་ལྟ་བའི་ལས་དང་། ཆོས་ཡང་དག་པར་ལེན་པའི་རྒྱུས་དེའི་རྒྱུ་དང་། དེའི་རྐྱེན་གྱིས་ལུས་ཞིག་ནས་ཤི་ཕན་ཅད་ངན་སོང་ངན་འགྲོ་ལོག་པར་ལྟུང་བའི་སེམས་ཅན་དམྱལ་བ་དག་ཏུ་སྐྱེ་བར་
འགྱུར་རོ། །ཡང་ན་སེམས་ཅན་འབྱུང་བ་དེ་དག་ནི་ལུས་ཀྱིས་ལེགས་པར་སྤྱོད་པ་དང་ལྡན་པ་དག་དང་། ངག་དང་ཡིད་ཀྱིས་ལེགས་པར་སྤྱོད་པ་དང་ལྡན་པ་དག་དང་། འཕགས་པ་རྣམས་ལ་སྐུར་པ་མི་འདེབས་
པ་དག་དང་། ཡང་དག་པར་ལྟ་བ་དག་ཡིན་ཏེ། ཡང་དག་པའི་ལྟ་བའི་ལས་དང་། ཆོས་ཡང་དག་པར་ལེན་པའི་རྒྱུས་དེའི་རྒྱུ་དང་དེའི་རྐྱེན་གྱིས་ལུས་ཞིག་ནས་བདེ་འགྲོ་དང་། མཐོ་རིས་ཀྱི་འཇིག་རྟེན་དུ་ལྷ་
རྣམས་ཀྱི་ནང་དུ་སྐྱེ་བར་འགྱུར་རོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ནི་སྟོབས་
དགུ་པ་དེ་དང་ལྡན་པ་དག་ཡིན་ཞིང་། ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་སྟེ། ཚངས་པའི་འཁོར་ལོ་རབ་ཏུ་སྐོར་ཞིང་། འཁོར་གྱི་ནང་དུ་ཡང་དག་པར་སེང་གེའི་སྒྲ་སྒྲོགས་པར་མཛད་དོ། །གནས་འཇོག་
གི་རྒྱུད་དག་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཟག་པ་ཟད་པས་ཟག་པ་མེད་པའི་སེམས་རྣམ་པར་གྲོལ་བ། ཤེས་རབ་རྣམ་པར་གྲོལ་བ། 
མཐོང་བའི་ཆོས་ཉིད་བདག་ཉིད་ཀྱིས་མངོན་པར་མཁྱེན་པས་མངོན་དུ་མཛད་དེ། རྫོགས་པར་མཛད་ནས་རབ་ཏུ་མཁྱེན་ཅིང་ངེད་ཅག་གི་སྐྱེ་བ་འདི་ནི་ཟད་དོ། །ཚངས་པར་སྤྱོད་པ་ནི་བསྙེན་ཏོ། །མཛད་པ་མཛད་དོ། 

66-1-321a

འདི་ལས་སྲིད་པ་གཞན་རབ་ཏུ་མི་མཁྱེན་ཏེ། གནས་འཇོག་གི་རྒྱུད་དག་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཟག་པ་དག་ཟད་ནས་ཟག་པ་
མེད་པའི་སེམས་རྣམ་པར་གྲོལ་བ། ཤེས་རབ་རྣམ་པར་གྲོལ་བ། མཐོང་བའི་ཆོས་ཉིད་ལ་བདག་ཉིད་ཀྱིས་མངོན་པར་མཁྱེན་པས་མངོན་དུ་མཛད་དེ། རྫོགས་པར་མཛད་ནས་རབ་ཏུ་མཁྱེན་ཅིང་ངེད་ཀྱི་སྐྱེ་བ་
ནི་ཟད་དོ། །ཚངས་པར་སྤྱོད་པ་ནི་བསྙེན་ཏོ། །མཛད་པ་མཛད་དོ། །འདི་ལས་སྲིད་པ་གཞན་རབ་ཏུ་མི་མཁྱེན་ཏོ། །གནས་འཇོག་གི་རྒྱུད་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་དག་ནི་སྟོབས་བཅུ་པོ་དེ་དང་ལྡན་པ་དག་ཡིན་ཞིང་ཁྱུ་མཆོག་གི་གནས་རླབས་པོ་ཆེ་ཞལ་གྱིས་འཆེ་སྟེ། ཚངས་པའི་འཁོར་ལོ་རབ་ཏུ་སྐོར་ཞིང་འཁོར་གྱི་ནང་དུ་ཡང་དག་པའི་སེང་གེའི་སྒྲ་སྒྲོགས་པར་
མཛད་དོ། །གང་དག་འདས་པ་དག་དང་། གང་དག་མ་བྱོན་པ་དག་དང་། གང་ཡང་ང་ད་ལྟར་བྱུང་བའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པར་སངས་རྒྱས་པའི་སངས་རྒྱས་ཐམས་ཅད་
མཉམ་པ་དང་མཉམ་སྟེ། མཚན་མཉམ་པ། ཡོན་ཏན་མཚུངས་པ་མཉམ་པ། བསོད་ནམས་ཀྱི་འབྲས་བུ་རྣམ་པར་སྨིན་པ་མཉམ་པ་དག་ཡིན་གྱི། རྒྱུ་གསུམ་པོ་རིགས་དང་། སྐུ་ཚེ་དང་། སྐུ་ལུས་གྱིས་མཉམ་
པ་དག་མ་ཡིན་ནོ། །དེ་ནས་བཅོམ་ལྡན་འདས་ལ་ཀུ་ཤའི་གྲོང་ཁྱེར་ནས་སྐྱེས་པ་གྱད་རྣམས་ཀྱིས་འདི་སྐད་ཅེས་གསོལ་ཏོ། །བཙུན་པ་འོ་ན་ཅི་གང་སྟོབས་དེ་དག་ལས་ཆེས་སྟོབས་དང་ལྡན་ཞིང་། གང་སྟོབས་དེ་
དག་ཟིལ་གྱིས་གནོན་པར་བགྱིད་པའི་སྟོབས་གཞིན་མཆིས་ལགས་སམ། གནས་འཇོག་གི་རྒྱུད་དག་གང་སྟོབས་དེ་དག་ལས་ཆེས་སྟོབས་དང་ལྡན་ཞིང་། གང་སྟོབས་དེ་དག་ཟིལ་གྱིས་གནོན་པར་བྱེད་པའི་སྟོབས་གཞན་

66-1-321b

ཡོད་དེ། འདི་ལྟ་སྟེ། གང་དེ་ཉིད་ཀྱི་མཚན་མོའི་གུང་ཐུན་ལ་མཚན་གྱིས་རྣམ་པར་བརྒྱན་པ། དཔེ་བྱད་བཟང་པོས་རྣམ་པར་མཛེས་པར་བྱས་པའི་སྐུ་འདི་དང་སྟོབས་དེ་དག་གི་སྣོད་དུ་གྱུར་པའི་སྐུ་སྲོག་འདི་རབ་ཏུ་
འཇོམས་པར་འགྱུར་བའི་མི་རྟག་པ་ཉིད་ཀྱི་སྟོབས་ཤེས་བྱའོ། །གནས་འཇོག་གི་རྒྱུད་དག་འདི་ནི་གང་སྟོབས་དེ་དག་ལས་ཆེས་སྟོབས་དང་ལྡན་ཞིང་། གང་སྟོབས་དེ་དག་ཟིལ་གྱིས་གནོན་པར་བྱེད་པའི་སྟོབས་
གཞན་དེ་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ། ཚིགས་སུ་བཅད་པ་དག་བཀའ་སྩལ་པ། ལུས་ལས་བྱུང་བའི་སྟོབས་དང་བསོད་ནམས་སྟོབས། །ཡེ་ཤེས་སྟོབས་དང་རྫུ་འཕྲུལ་སྟོབས་པས་ཀྱང་། །
ང་ཡི་གཟི་བརྗིད་འཇོམས་པ་མི་རྟག་ཉིད། །མཆོག་ཏུ་སྟོབས་དང་ལྡན་པར་བཞེད་པ་ཡིན། །གང་དུ་དེ་དང་འདྲ་བའི་སྐུ་ལུས་ནི། །གསེར་གྱི་རི་ཡི་དབང་པོའི་རྩེ་མོ་འདྲ། །མི་རྟག་ཉིད་ཀྱི་གཟི་བརྗིད་ཀྱིས་བཅོམ་པ། །
ང་ཡི་འཇིག་པ་འོང་བར་འགྱུར་བ་ཡིན། །མི་རྟག་ཉིད་ཀྱི་སྟོབས་ནི་སྟོབས་མཆོག་བར། །མཁས་པ་ཡིས་ནི་རྣམ་པར་ཤེས་བྱ་སྟེ། །གང་དུ་མི་རྟག་ཉིད་ནི་མི་འོང་བའི། །མི་འཆི་བ་ཡི་གནས་དེ་ཐོབ་པར་བྱ། །
བཅོམ་ལྡན་འདས་ལས་ཀུ་ཤའི་གྲོང་ཁྱེར་ནས་སྐྱེས་པའི་གྱད་རྣམས་ཀྱིས་དེ་སྐད་ཐོས་ནས་རྨོངས་པར་གྱུར་ཏེ། ཇི་ལྟར་ཡང་འདུ་ཤེས་ཐོབ་པ་དག་ཏུ་གྱུར་ནས་ས་ལ་འགྲེ་ལྡོག་སྟེ། འདི་ལྟ་སྟེ་ཤིང་གི་སྡོང་དུམ་
བཞིན་ནོ། །ཁ་ཅིག་ནི་དཔུང་པ་དག་བསྣོལ་ཏེ་རབ་ཏུ་ངུ་བར་བྱེད་དོ། །ཁ་ཅིག་ནི་སེམས་ཀྱི་སྡུག་བསྔལ་དང་ཀུན་དུ་ལྡན་ཞིང་འཁོད་དོ། །ཁ་ཅིག་ནི་ཆོས་ཉིད་ཁོ་ན་ལ་རྟོན་པར་བྱེད་དེ། བཅོམ་ལྡན་འདས་ཀྱིས་བདག་
ཅག་ལ་ཡང་དང་པོ་ཉིད་དུ་འདོད་པ་དང་། སྡུག་པ་དང་། དགའ་བ་དང་། ཡིད་དུ་འོང་བ་ཐམས་ཅད་ལས་དངོས་པོ་ཐ་དད་པ་དང་། མེད་པར་འབྱུང་བ་དང་། འབྲལ་བ་དང་མི་ལྡན་པ་འབྱུང་བར་འགྱུར་རོ་ཞེས་གསུངས་སོ་སྙམ་མོ། །

66-1-322a

དེ་ནས་ཀུ་ཤའི་གྲོང་ཁྱེར་ནས་སྐྱེས་པའི་གྱད་རྣམས་ཐི་བའི་སྐད་ལྟར་སྙན་ཅིང་འཇེབས་པ་རིང་ཞིང་འཇམ་པའི་དབུགས་བྱུང་ནས་མཆི་མ་དག་ཕྱུང་སྟེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་
ཕྱག་འཚལ་ནས་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་གཅིག་ཏུ་རྡོ་ཆེན་པོ་ཡངས་པ་དེའི་ཕྱོགས་གཅིག་ཏུ་བཞུགས་སོ། །ཀུ་ཤའི་གྲོང་ཁྱེར་ནས་སྐྱེས་པའི་གྱད་
རྣམས་ཀྱང་རྡོ་ཆེན་པོ་ཡངས་པ་དེ་ཉིད་ཀྱི་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀུ་ཤའི་གྲོང་ཁྱེར་ནས་སྐྱེས་པའི་གྱད་རྣམས་ལ་ཤད་ཀྱིས་སྦྱོང་བ་ལྟར་མཛད་ཅིང་ཀུ་ཤའི་གྲོང་ཁྱེར་ནས་སྐྱེས་
པའི་གྱད་རྣམས་ལ་འདི་སྐད་ཅེས་བཀའ་སྩལ་ཏོ། །གནས་འཇོག་གི་རྒྱུད་དག་རྡོ་ཆེན་པོ་ཡངས་པ་འདི་ནི་བསྐལ་པ་དང་པོའི་མི་རྣམས་ཀྱི་རྩོལ་བའི་རྡོར་གྱུར་ཏེ། འདི་ལྟར་དེང་སང་ཡང་དེ་ལ་སོར་མོའི་རྗེས་དག་
སྣང་བའི་ཕྱིར་རོ། །གནས་འཇོག་གི་རྒྱུད་དག་དེ་ལྟར་འདུ་བྱེད་ཐམས་ཅད་ནི་མི་རྟག་པ། མི་བརྟན་པ། ཡིད་བརྟན་དུ་མི་རུང་བ། རྣམ་པར་འགྱུར་བའི་ཆོས་ཅན་དག་ཡིན་ཏེ། འདུ་བྱེད་ཐམས་ཅད་ཀྱི་བར་གྱིས་ཆོག་
པ་ཉིད་དོ། །སྐྱོ་བར་བྱ་བའི་རིགས་སོ། །འདོད་ཆགས་དང་བྲལ་བར་བྱ་བའི་རིགས་སོ། །རྣམ་པར་གྲོལ་བར་བྱ་བའི་རིགས་སོ། །གནས་འཇོག་གི་རྒྱུད་དག་རྒྱ་མཚོ་ཆེན་པོ་ནི་རྒྱུ་བཞིས་བསྐམ་པར་མི་
ནུས་སོ། །བཞི་གང་དག་གིས་ཞེ་ན། འོག་ཏུ་ནི་གསེར་གྱི་འཁོར་ལོས་ཀུན་དུ་བཟུང་བ་དང་། ངོས་སུ་ནི་ཁོར་ཡུག་གིས་ཡོངས་སུ་བཟུང་བ་དང་། སྟེང་ནས་ནི་ཀླུ་ཆེན་པོ་དག་གིས་ཤིང་རྟའི་སྲོག་ཤིང་ཙམ་དུ་ཆུའི་རྒྱུན་
གྱི་ཆར་འབེབས་པར་བྱེད་པ་དང་། ཆུ་བོ་ཆེན་པོ་ཐམས་ཅད་ཆུ་ཀླུང་སྟོང་ཕྲག་དུ་མའི་འཁོར་དང་ལྡན་པ་རྒྱ་མཚོ་ཆེན་པོར་འབབ་པར་བྱེད་པའོ། །དེ་ལྟར་སངས་རྒྱས་ཀྱི་བསྟན་པ་རྒྱ་མཚོ་འདི་ཡང་རྒྱུ་བཞིས་ནུབ་པར་

66-1-322b

མི་འགྱུར་རོ། །བཞི་གང་དག་གིས་ཞེ་ན། འོག་ཏུ་ནི་འདུལ་བའི་གསེར་གྱི་འཁོར་ལོས་ཀུན་དུ་བཟུང་བ་དང་། ངོས་སུ་ན་མདོ་སྡེའི་ཁོར་ཡུག་གིས་ཡོངས་སུ་བཟུང་བ་དང་། ཆོས་མངོན་པའི་ཀླུ་ཆེན་པོའི་ཆར་གྱིས་
ཀུན་དུ་ཡོངས་སུ་གང་བར་བྱས་པ་དང་། བསྒོམ་པ་ལས་བྱུང་བའི་དགེ་བའི་རྩ་བའི་ཆུ་ཀླུང་དག་གིས་ཡོངས་སུ་རྒྱས་པར་བྱས་པའོ། །གནས་འཇོག་གི་རྒྱུད་དག་འོན་ཀྱང་སངས་རྒྱས་ལ་དགེ་བའི་རྩ་བ་བསྐྱེད་པ་
ནི་འཁོར་བར་ཟད་པར་མི་འགྱུར། ཡོངས་སུ་གཏུགས་པར་མི་འགྱུར་ཞིང་། མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །ཆོས་ལ་དགེ་བའི་རྩ་བ་བསྐྱེད་པ་དང་། དགེ་འདུན་ལ་དགེ་བའི་རྩ་བ་བསྐྱེད་པ་
ནི་འཁོར་བར་ཟད་པར་མི་འགྱུར། ཡོངས་སུ་གཏུགས་པར་མི་འགྱུར་ཞིང་། མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །གནས་འཇོག་གི་རྒྱུད་དག་འཛམ་བུའི་གླིང་འདི་ནི་ཆུ་དང་ཞེང་དུ་དཔག་ཚད་བདུན་
སྟོང་ཡོད་ཅིང་། བྱང་ཕྱོགས་སུ་ནི་ཡངས་ལ། ལྷོ་ཕྱོགས་སུ་ཤིང་རྟའི་དབྱིབས་ཡིན་ནོ། །དེ་ནི་གོམ་པ་འདི་སྙེད་ཅིག་ཡོད་དོ་ཞེ་འམ། གོམ་པ་བརྒྱ་འམ། གོམ་པ་སྟོང་ངམ། གོམ་པ་བརྒྱ་སྟོང་ཞིག་ཡོད་ཅེས་
བགྲང་བ་དང་། ཚད་བཟུང་བར་ནུས་ཀྱི། གནས་འཇོག་གི་རྒྱུད་དག་སངས་རྒྱས་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། ཚད་གཟུང་བར་མི་ནུས་ཏེ། འཁོར་བར་ཟད་པར་མི་འགྱུར། ཡོངས་སུ་གཏུགས་པར་མི་འགྱུར་
འགྱུར་ཞིང་། མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །ཆོས་ལ་དགེ་བའི་རྩ་བ་བསྐྱེད་པ་དང་། དགེ་འདུན་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། ཚད་བཟུང་བར་མི་ནུས་ཏེ། འཁོར་བར་ཟད་པར་མི་
འགྱུར། ཡོངས་སུ་གཏུགས་པར་མི་འགྱུར་ཞིང་། མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །གནས་འཇོག་གི་རྒྱུད་དག་འཛམ་བུའི་གླིང་ལྟ་ཞོག་གི། གནས་འཇོག་གི་རྒྱུད་དག་ཤར་གྱི་ལུས་འཕགས་

66-1-323a

གླིང་ཞེས་བྱ་བ་ཆུ་དང་རྒྱར་དཔག་ཚད་བརྒྱད་སྟོང་ཡོད་ཅིང་། ཟླ་གམ་དུ་གནས་པ་ཡོད་དེ། དེ་ལ་ཡང་གོམ་པ་འདི་སྙེད་ཅིག་ཡོད་དོ་ཞེ་འམ། གོམ་པ་བརྒྱ་འམ། གོམ་པ་སྟོང་ངམ། གོམ་པ་བརྒྱ་སྟོང་ཞིག་ཡོད་དོ་ཞེས་བགྲང་བ་
དང་། ཚད་གཟུང་བར་ནུས་ཀྱི། གནས་འཇོག་གི་རྒྱུད་དག་སངས་རྒྱས་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། ཚད་གཟུང་བར་མི་ནུས་ཏེ། འཁོར་བར་ཟད་པར་མི་འགྱུར། ཡོངས་སུ་གཏུགས་པར་མི་འགྱུར་ཞིང་། མྱ་ངན་ལས་
འདས་པ་མི་ཟད་པ་ཡང་ཐོབ་པར་བྱེད་དོ། །ཆོས་ལ་དགེ་བའི་རྩ་བ་བསྐྱེད་པ་དང་། དགེ་འདུན་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། ཚད་གཟུང་བར་མི་ནུས་ཏེ། འཁོར་བར་ཟད་པར་མི་འགྱུར། ཡོངས་སུ་གཏུགས་པར་
མི་འགྱུར་ཞིང་། མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །གནས་འཇོག་གི་རྒྱུད་དག་འཛམ་བུའི་གླིང་ཡང་ཞོག །ཤར་གྱི་ལུས་འཕགས་གླིང་ཡང་ཞོག་གི། གནས་འཇོག་གི་རྒྱུད་དག་བ་ལང་སྤྱོད་ཀྱི་
གླིང་ཞེས་བྱ་བ་ཆུ་དང་རྒྱར་དཔག་ཚད་དགུ་སྟོང་ཡོད་ཅིང་། ཀུན་དུ་ཟླུམ་པོ་ཡོད་དེ། དེ་ལ་གོམ་པ་འདི་སྙེད་ཅིག་ཡོད་དོ་ཞེ་འམ། གོམ་པ་བརྒྱ་འམ། གོམ་པ་སྟོང་ངམ། གོམ་པ་བརྒྱ་སྟོང་ཞིག་ཡོད་དོ་ཞེས་བགྲང་བ་
དང་། ཚད་གཟུང་བར་ནུས་ཀྱི། གནས་འཇོག་གི་རྒྱུད་དག་སངས་རྒྱས་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། ཚད་བཟུང་བར་མི་ནུས་ཏེ། འཁོར་བར་ཟད་པར་མི་འགྱུར། ཡོངས་སུ་གཏུགས་པར་མི་འགྱུར་
ཞིང་། མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །ཆོས་ལ་དགེ་བའི་རྩ་བ་བསྐྱེད་པ་དང་། དགེ་འདུན་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། ཚད་གཟུང་བར་མི་ནུས་ཏེ། འཁོར་བར་ཟད་པར་མི་འགྱུར་
ཡོངས་སུ་གཏུགས་པར་མི་འགྱུར་ཞིང་། མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །གནས་འཇོག་གི་རྒྱུད་དག་འཛམ་བུའི་གླིང་ཡང་ཞོག །ནུབ་ཀྱི་བ་ལང་སྤྱོད་ཀྱི་གླིང་ཡང་ཞོག །ཤར་གྱི་ལུས་འཕགས་

66-1-323b

གླིང་ཡང་ཞོག་གི། གནས་འཇོག་གི་རྒྱུད་དག་བྱང་གི་སྒྲ་མི་སྙན་གྱི་གླིང་ཞེས་བྱ་བ་ཆུ་དང་རྒྱར་དཔག་ཚད་ཁྲི་ཡོད་པ་ཀུན་དུ་གྲུ་བཞི་པ་ཡོད་དེ། དེ་ལ་ཡང་གོམ་པ་འདི་སྙེད་ཅིག་ཡོད་དོ་ཞེ་འམ། གོམ་པ་བརྒྱ་འམ། གོམ་པ་སྟོང་ངམ། 
གོམ་པ་བརྒྱ་སྟོང་ཞིག་ཡོད་དོ་ཞེས་བགྲང་བ་དང་། ཚད་བཟུང་བར་ནུས་ཀྱི། གནས་འཇོག་གི་རྒྱུད་དག་སངས་རྒྱས་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། ཚད་གཟུང་བར་མི་ནུས་ཏེ། འཁོར་བར་ཟད་པར་མི་འགྱུར། 
ཡོངས་སུ་གཏུགས་པར་མི་འགྱུར་ཞིང་། མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །ཆོས་ལ་དགེ་བའི་རྩ་བ་སྐྱེད་པ་དང་། དགེ་འདུན་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། ཚད་གཟུང་བར་མི་ནུས་ཏེ། 
འཁོར་བར་ཟད་པར་མི་འགྱུར། ཡོངས་སུ་གཏུགས་པར་མི་འགྱུར་ཞིང་། མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །གནས་འཇོག་གི་རྒྱུད་དག་གླིང་བཞི་པའི་འཇིག་རྟེན་གྱི་ཁམས་ལྟ་ཞོག་གི། 
གནས་འཇོག་གི་རྒྱུད་དག་རིའི་རྒྱལ་པོ་ཁོར་ཡུག་དང་། ཁོར་ཡུག་ཆེན་པོ་དག་ཡོད་དེ། དེ་གཉིས་ལ་ཡང་སྲིད་འདི་སྙེད་ཅིག་ཡོད་དོ་ཞེ་འམ། སྲང་བརྒྱ་འམ། སྲང་སྟོང་ངམ། སྲང་བརྒྱ་སྟོང་ཞིག་ཡོད་དོ་ཞེས་བགྲང་བ་
དང་། ཚད་བཟུང་བར་ནུས་ཀྱི། གནས་འཇོག་གི་རྒྱུད་དག་སངས་རྒྱས་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། ཚད་བཟུང་བར་མི་ནུས་ཏེ། འཁོར་བར་ཟད་པར་མི་འགྱུར་ཡོངས་སུ་གཏུགས་པར་མི་འགྱུར་ཞིང་། 
མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །ཆོས་ལ་དགེ་བའི་རྩ་བ་བསྐྱེད་པ་དང་། དགེ་འདུན་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། ཚད་བཟུང་བར་མི་ནུས་ཏེ། འཁོར་བར་ཟད་པར་མི་འགྱུར། 
ཡོངས་སུ་གཏུགས་པར་མི་འགྱུར་ཞིང་། མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །གནས་འཇོག་གི་རྒྱུད་དག་གླིང་བཞི་པའི་འཇིག་རྟེན་གྱི་ཁམས་ཀྱང་ཞོག །རིའི་རྒྱལ་པོ་ཁོར་ཡུག་ཆེན་པོ་དག་

66-1-324a

ཀྱང་ཞོག་གི། གནས་འཇོག་གི་རྒྱུད་དག་རྒྱ་མཚོ་ཆེན་པོ་ནི་ཟབས་སུ་དཔག་ཚད་བརྒྱད་ཁྲི་ཡོད་ཅིང་། རྒྱར་ནི་དཔག་ཏུ་མེད་པའོ། །དེ་ལ་ཡང་བུམ་པ་འདི་སྙེད་ཅིག་ཡོད་དོ་ཞེ་འམ། བུམ་པ་བརྒྱ་འམ། བུམ་
པ་སྟོང་ངམ། བུམ་པ་བརྒྱ་སྟོང་ཞིག་ཡོད་དོ་ཞེས་བགྲང་བ་དང་། ཚད་བཟུང་བར་ནུས་ཀྱི། གནས་འཇོག་གི་རྒྱུད་དག་སངས་རྒྱས་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། ཚད་གཟུང་བར་མི་ནུས་ཏེ། འཁོར་བར་
ཟད་པར་མི་འགྱུར། ཡོངས་སུ་གཏུགས་པར་མི་འགྱུར་ཞིང་། མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །ཆོས་ལ་དགེ་བའི་རྩ་བ་བསྐྱེད་པ་དང་། དགེ་འདུན་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། 
ཚད་གཟུང་བར་མི་ནུས་ཏེ། འཁོར་བར་ཟད་པར་མི་འགྱུར། ཡོངས་སུ་གཏུགས་པར་མི་འགྱུར་ཞིང་། མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །གནས་འཇོག་གི་རྒྱུད་དག་གླིང་བཞི་པའི་འཇིག་
རྟེན་གྱི་ཁམས་ཀྱང་ཞོག །རིའི་རྒྱལ་པོ་ཁོར་ཡུག་དང་། ཁོར་ཡུག་ཆེན་པོ་དག་ཀྱང་ཞོག །རྒྱ་མཚོ་ཆེན་པོ་ཡང་ཞོག་གི། གནས་འཇོག་གི་རྒྱུད་དག་རིའི་རྒྱལ་པོ་རི་རབ་ནི་དཔག་ཚད་བརྒྱད་ཁྲི་ཆུའི་ནང་དུ་ནུབ་
ཅིང་། དཔག་ཚད་བརྒྱད་ཁྲི་ཆུ་ལས་གྱེན་དུ་མངོན་དུ་འཕགས་སོ། །དེ་ལ་ཡང་སྲང་འདི་སྙེད་ཅིག་ཡོད་དོ་ཞེ་འམ། སྲང་བརྒྱ་འམ། སྲང་སྟོང་ངམ། སྲང་བརྒྱ་སྟོང་ཞིག་ཡོད་དོ་ཞེས་བགྲང་བ་དང་། ཚད་གཟུང་བར་
ནུས་ཀྱི། གནས་འཇོག་གི་རྒྱུད་དག་སངས་རྒྱས་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། ཚད་གཟུང་བར་མི་ནུས་ཏེ། འཁོར་བར་ཟད་པར་མི་འགྱུར། ཡོངས་སུ་གཏུགས་པར་མི་འགྱུར་ཞིང་། མྱ་ངན་ལས་
འདས་པ་མི་ཟད་པ་ཡང་ཐོབ་པར་བྱེད་དོ། །ཆོས་ལ་དགེ་བའི་རྩ་བ་བསྐྱེད་པ་དང་། དགེ་འདུན་ལ་དགེ་བའི་རྩ་བ་བསྐྱེད་པ་ནི་བགྲང་བ་དང་། ཚད་གཟུང་བར་མི་ནུས་ཏེ། འཁོར་བར་ཟད་པར་མི་འགྱུར། ཡོངས་སུ་

66-1-324b

གཏུགས་པར་མི་འགྱུར་ཞིང་། མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །གནས་འཇོག་གི་རྒྱུད་དག་དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
དག་ནི་སྦྱིན་པས་དཔག་ཏུ་མེད་པ་དག་གི་ཕྱིར་རོ། །ཚུལ་ཁྲིམས་ཀྱིས་དཔག་ཏུ་མེད་པ་དག་དང་། བཟོད་པས་དཔག་ཏུ་མེད་པ་དག་དང་། བརྩོན་འགྲུས་ཀྱིས་དཔག་ཏུ་མེད་པ་དག་དང་། བསམ་གཏན་གྱིས་
དཔག་ཏུ་མེད་པ་དག་དང་། ཤེས་རབ་ཀྱིས་དཔག་ཏུ་མེད་པ་དག་དང་། རྫུ་འཕྲུལ་གྱིས་དཔག་ཏུ་མེད་པ་དག་དང་། རྫུ་འཕྲུལ་གྱི་ཆོ་འཕྲུལ་གྱིས་དཔག་ཏུ་མེད་པ་དག་དང་། ཀུན་བརྗོད་པས་དཔག་ཏུ་མེད་པ་དག་དང་། ཀུན་
བརྗོད་པའི་ཆོ་འཕྲུལ་གྱིས་དཔག་ཏུ་མེད་པ་དག་དང་། རྗེས་སུ་བསྟན་པས་དཔག་ཏུ་མེད་པ་དག་དང་། རྗེས་སུ་བསྟན་པའི་ཆོ་འཕྲུལ་གྱིས་དཔག་ཏུ་མེད་པ་དག་དང་། སྟོབས་བཅུ་དང་། མི་འཇིགས་པ་བཞི་དང་། མ་འདྲེས་
པའི་དྲན་པ་ཉེ་བར་གཞག་པ་གསུམ་དང་། ཐུགས་རྗེ་ཆེན་པོ་དཔག་ཏུ་མེད་པའི་ཕྱིར་ཏེ། གནས་འཇོག་གི་རྒྱུད་དག་དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་ཡོན་ཏན་
དཔག་ཏུ་མེད་པ་དང་ལྡན་པ་དག་གི་ཕྱིར་རོ། །སེང་གེའི་སྒྲ་ཆེན་པོ་དང་ལྡན་པའི་ཆོས་ཀྱི་རྣམ་གྲངས་འདི་བཤད་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལན་གསུམ་དུ་འགུལ། ཀུན་ཏུ་འགུལ། ཀུན་ཏུ་
རབ་ཏུ་འགུལ། གཡོས། ཀུན་ཏུ་གཡོས། ཀུན་ཏུ་རབ་ཏུ་གཡོས། ལྡེག །ཀུན་ཏུ་ལྡེག །ཀུན་ཏུ་རབ་ཏུ་ལྡེག །འཁྲུགས། ཀུན་ཏུ་འཁྲུགས། ཀུན་ཏུ་རབ་ཏུ་འཁྲུགས་པར་གྱུར་ཏོ། །དེ་ནས་འཁོར་གྱི་བདག་པོ་ཚངས་པ་དང་། ལྷ་རྣམས་
ཀྱི་དབང་པོ་བརྒྱ་བྱིན་རང་གི་རིས་ན་གནས་པ་གཉིས་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་འདི་ནི་ཀུ་ཤའི་གྲོང་ཁྱེར་དང་ཉེ་བ་ན་བཞུགས་ཏེ། ཀུ་ཤའི་གྲོང་ཁྱེར་ནས་སྐྱེས་པའི་གྱད་རྣམས་རྫུ་འཕྲུལ་ཆེན་པོས་

66-1-325a

འདུན་པར་མཛད་ནས་རིང་པོ་མི་ཐོགས་པར་ད་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་གྱིས། གང་འོ་ན་བདག་ཅག་དོང་ནས། བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཐ་མར་བལྟ་བའི་ཕྱིར་འདོང་ངོ་སྙམ་མོ། །དེ་ནས་འཁོར་གྱི་བདག་པོ་ཚངས་པ་དང་། ལྷ་རྣམས་ཀྱི་དབང་པོ་བརྒྱ་བྱིན་རང་གི་
རིས་ནས་མི་སྣང་བར་གྱུར་ཏེ། འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷ་རྣམས་དང་ལྷན་ཅིག་བཅོམ་ལྡན་འདས་ཀྱི་སྤྱན་སྔར་འཁོད་དོ། །འཁོར་གྱི་བདག་པོ་ཚངས་པ་ཕྱོགས་གཅིག་ཏུ་འདུག་པས་དེའི་ཚེ་ཚིགས་
སུ་བཅད་པ་དག་གསོལ་པ། རྫོགས་པའི་སངས་རྒྱས་གྲགས་ལྡན་པ། །དེ་དག་མཐོང་བ་རྙེད་པར་དཀའ། །ཨུ་དུམ་བ་རའི་མེ་ཏོག་བཞིན། །བསྐལ་པ་བྱེ་བར་རྙེད་པར་དཀའ། །ཤཱཀྱ་སེང་གེ་མི་ཡི་མཆོག །སྟོན་ཁྱོད་དེ་
བཞིན་རྙེད་པར་དཀའ། །གཟུགས་ན་སྤྱོད་པའི་ལྷར་བཅས་ཏེ། །ཐལ་མོ་རབ་སྦྱར་ཁྱོད་ལ་འདུད། །ལྷ་རྣམས་ཀྱི་དབང་པོ་བརྒྱ་བྱིན་ཕྱོགས་གཅིག་ཏུ་འདུག་པས་དེའི་ཚེ་ཚིགས་སུ་བཅད་པ་དག་གསོལ་པ། བདག་གི་
ཆོས་མིག་རྣམ་པར་དག །སྙིང་ལ་ཆོས་ཀྱི་སྒྲོན་མ་འབར། །ངན་སོང་སྒོ་རྣམས་བཅད་ལགས་ཏེ། །བདག་ལ་ངན་འགྲོའི་འཇིགས་མ་མཆིས། །ཨེ་མའོ་སྟོན་པ་ཐུགས་རྗེ་ཅན། །ཕན་པར་བཞེད་དང་ཐུགས་
བརྩེ་བ། །འདོད་པར་སྤྱོད་པའི་ལྷར་བཅས་ཏེ། །ཐལ་མོ་རབ་སྦྱར་ཁྱེད་ལ་འདུད། །མི་ཐོགས་ཡོངས་སུ་མྱ་ངན་འདའ། །ཁྱོད་ལ་ཐ་མར་ལྟ་བ་ལགས། །འཁོར་གྱི་བདག་པོ་ཚངས་པ་དང་། ལྷ་རྣམས་ཀྱི་དབང་པོ་བརྒྱ་
བྱིན་གྱིས་དེ་སྐད་ཅེས་གསོལ་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་ཐད་ནས་ཞལ་དུ་ཕྱོགས་ཤིང་ལྟ་བས་

66-1-325b

དོང་སྟེ། མགོ་བོས་ཕྱག་འཚལ་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་འཁོར་ཇི་ལྟར་ལྷགས་པ་བཞིན་དུ་ཐུགས་སུ་ཆུད་ནས་བསམ་པ་དང་། ཕྲ་རྒྱས་དང་། ཁམས་དང་། རང་བཞིན་རྣམ་པར་
མཁྱེན་ཏེ། འཕགས་པའི་བདེན་པ་བཞི་ཡང་དག་པར་རབ་ཏུ་རྟོགས་པར་བྱེད་པའི་ཆོས་བསྟན་པ་དེ་ལྟ་བུ་མཛད་པར་གྱུར་ཏེ། དེ་ཐོས་པ་ཁོ་ན་ལས་ཀུ་ཤའི་གྲོང་ཁྱེར་ནས་སྐྱེས་པའི་གྱད་རྣམས་ཀྱིས་ཁ་ཅིག་གིས་ནི་དྲོ་བར་
གྱུར་པའི་དགེ་བའི་རྩ་བ་དག་བསྐྱེད་དོ། །ཁ་ཅིག་གིས་ནི་རྩེ་མོ་དག་བསྐྱེད་དོ། །ཁ་ཅིག་གིས་ནི་བཟོད་པ་ཆུང་ངུ་དང་འབྲིང་དག་བསྐྱེད་དོ། །ཁ་ཅིག་གིས་ནི་བདེན་པ་དང་རྗེས་སུ་འཐུན་པའི་ཆོས་ཀྱི་མཆོག་རྣམས་བསྐྱེད་དོ། །ཁ་
ཅིག་གིས་ནི་རྒྱུན་ཏུ་ཞུགས་པའི་འབྲས་བུ་མངོན་དུ་བྱས་སོ། །ཁ་ཅིག་གིས་ནི་ལན་ཅིག་ཕྱིར་འོང་བའི་འབྲས་བུ་མངོན་དུ་བྱས་སོ། །ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་དུ་བྱས་སོ། །ཁ་ཅིག་གིས་ནི་རབ་ཏུ་བྱུང་
ནས་ཉོན་མོངས་པ་ཐམས་ཅད་སྤངས་ཏེ། དགྲ་བཅོམ་པ་ཉིད་མངོན་དུ་བྱས་སོ། །ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད་པ་དག་ཏུ་གྱུར་ཏོ། །ཁ་ཅིག་གིས་ནི་རང་བྱང་ཆུབ་ཏུ་སེམས་བསྐྱེད་པ་དག་ཏུ་གྱུར་
ཏོ། །ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དག་ཏུ་གྱུར་ཏོ། །སངས་རྒྱས་བཅོམ་ལྡན་འདས་རྣམས་ནི་འབྲས་བུ་ཡོད་པའི་ཆོས་ཀྱི་འབྲས་བུ་སྟོན་པ་དག་ཡིན་ཏེ། འཁོར་དེ་ལས་
གང་ཕལ་ཆེར་ནི་སངས་རྒྱས་ལ་གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་དགའ་བར་རྣམ་པར་གནས་སོ། །འདི་ནི་བཅོམ་ལྡན་འདས་ཀྱི་འདུལ་བ་རྣམས་འདུས་པ་ཆེན་པོ་ཐ་མར་བྱུང་བ་ཡིན་ནོ། །དེ་ནས་ཀུ་ཤའི་
གྲོང་ཁྱེར་ནས་སྐྱེས་པའི་གྱད་རྣམས་ཡིད་བྱུང་བར་གྱུར་ཅིང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་ཐད་ནས་དོང་ངོ་། །

66-1-326a

འཕགས་པ་རྡོ་འཕངས་པའི་མདོ། རྫོགས་སོ།། །། རྒྱ་གར་སྐད་དུ། ཀུ་མཱ་ར་དྲྀ་ཥྜཱནྟ་སཱུ་ཏྲ།  བོད་སྐད་དུ། གཞོན་ནུ་དཔེའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། 
འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཀོ་ས་ལའི་ལྗོངས་རྒྱུ་ཞིང་གཤེགས་པ་དང་། མཉན་ཡོད་དུ་བྱོན་ནས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་
བཞུགས་སོ། །ཀོ་ས་ལའི་རྒྱལ་པོ་གསལ་རྒྱལ་གྱིས་དགེ་སྦྱོང་གཽ་ཏ་མ་ཀོ་ས་ལའི་ལྗོངས་རྒྱུ་ཞིང་གཤེགས་པ་དང་། མཉན་ཡོད་དུ་བྱོན་ནས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་
ར་བ་ན་བཞུགས་ཏེ། ཤེས་ལྡན་གཽ་ཏ་མ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སངས་རྒྱས་པར་བདག་ཉིད་ཞལ་གྱིས་འཆེའོ་ཞེས་ཐོས་སོ། །ཐོས་ནས་ཀྱང་བཅོམ་ལྡན་འདས་གང་ན་བ་དེར་སོང་སྟེ་
ཕྱིན་ནས། བཅོམ་ལྡན་འདས་དང་ལྷན་ཅིག་མངོན་དུ་ཡང་དག་པར་དགའ་བ་དང་། ཡང་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ཀོ་ས་ལའི་རྒྱལ་པོ་
གསལ་རྒྱལ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་བདག་གིས་ཤེས་ལྡན་གཽ་ཏ་མ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སངས་རྒྱས་པར་བདག་ཉིད་ཞལ་གྱིས་འཆེའོ་ཞེས་
ཐོས་ལགས་ན། གཽ་ཏ་མ་གང་དག་དེ་སྐད་ཅེས་ལུང་བསྟན་པ་དེ་དག་ཇི་ག་དགེ་སྦྱོང་གཽ་ཏ་མ་ལ་སྐུར་པ་འདེབས་པ་མ་ལགས་སམ། ཐལ་བར་སྨྲ་བ་མ་ལགས་སམ། ཤེས་ལྡན་གཽ་ཏ་མས་གསུངས་པ་བཞིན་སྨྲ་བ་ལགས་སམ། 
ཆོས་སྨྲ་བ་ལགས་སམ། ཆོས་དང་འཐུན་པའི་ཆོས་ལུང་སྟོན་པ་ལགས་སམ། ཇི་ག་དེ་དག་གི་དྲུང་དུ་ཕ་རོལ་པོ་ཆོས་དང་འཐུན་པར་རྩོད་པའི་རྗེས་སུ་རྩོད་པ་མཆིས་ན། སྨོད་པའི་ཆོས་ཀྱི་གནས་སུ་མི་འགྱུར་ལགས་སམ། 

66-1-326b

རྒྱལ་པོ་ཆེན་པོ་གང་དག་དེ་སྐད་དུ་སྨྲ་བ་དེ་དག་ནི་དེ་སྐད་དུ་ལུང་སྟོན་པ་བདེན་ཏེ། ང་ལ་སྐུར་པ་འདི་འདེབས་པ་མ་ཡིན། ཐལ་བར་སྨྲ་བ་མ་ཡིན། དེ་ནི་གསུངས་པ་བཞིན་སྨྲ་བ་ཡིན། ཆོས་དང་འཐུན་པའི་ཆོས་ལུང་སྟོན་པ་ཡིན་ཏེ། 
དེ་དག་གི་དྲུང་དུ་ཕ་རོལ་པོ་ཆོས་དང་འཐུན་པའི་རྩོད་པའི་རྗེས་སུ་རྩོད་པ་འོངས་ནས་སྨོད་པའི་ཆོས་ཀྱི་གནས་སུ་མི་འགྱུར་རོ། །རྒྱལ་པོ་ཆེན་པོ་དེ་ཅིའི་ཕྱིར་ཞེ་ན། ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་
སངས་རྒྱས་སོ། །ཤེས་ལྡན་གཽ་ཏ་མ་དེ་སྐད་མོད་ཀྱི། ཤེས་ལྡན་གཽ་ཏ་མ་བདག་ཡིད་མི་ཆེས་ལགས་སོ། །དེ་ཅིའི་སླད་དུ་ཞེ་ན། ཀྱེ་གཽ་ཏ་མ་རེ་ཤིག་རྒན་ཞིང་རྒན་པའི་དགེ་སྦྱོང་དང་། བྲམ་ཟེ་ནི་འདི་དག་ལགས་ཏེ། འདི་ལྟ་སྟེ། 
འོད་སྲུང་རྫོགས་བྱེད་དང་། ཀུན་དུ་རྒྱུ་གནག་ལྷས་ཀྱི་བུ་དང་། སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་དང་། མི་ཕམ་སྐྲའི་ལ་བ་ཅན་དང་། ཀ་ཏྱཱའི་བུ་ནོག་ཅན་དང་། གཅེར་བུ་པ་གཉེན་གྱི་བུ་གང་ལགས་པ་དེ་དག་ཀྱང་ད་དུང་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་བདག་ཉིད་གཡར་གྱིས་མི་མཆི་ལགས་ན། ཤེས་ལྡན་གཽ་ཏ་མ་འཁྲུངས་ནས་རིང་པོ་མ་ལགས་པ་གསར་དུ་རབ་ཏུ་འབྱུང་བས་ལྟ་སྨོས་ཀྱང་ཅི་འཚལ། 
རྒྱལ་པོ་ཆེན་པོ་གཞོན་ནུ་བཞི་པོ་འདི་དག་ལ་ཁྱད་དུ་གསད་པར་མི་བྱ། ཟིལ་གྱིས་མནན་པར་མི་བྱ་སྟེ། བཞི་གང་ཞེ་ན། རྒྱལ་པོ་ཆེན་པོ་རྒྱལ་རིགས་གཞོན་ནུ་ཁྱད་དུ་གསད་པར་མི་བྱ། གཞོན་ནུ་ལ་ཟིལ་གྱིས་མནན་པར་མི་བྱའོ། །
རྒྱལ་པོ་ཆེན་པོ་སྦྲུལ་གཞོན་ནུ་ལ་ཁྱད་དུ་གསད་པར་མི་བྱ། གཞོན་ནུ་ལ་ཟིལ་གྱིས་མནན་པར་མི་བྱའོ། །རྒྱལ་པོ་ཆེན་པོ་མེ་ཆུང་ངུ་ལ་ཁྱད་དུ་གསད་པར་མི་བྱ། ཟིལ་གྱིས་མནན་པར་མི་བྱའོ། །རྒྱལ་པོ་ཆེན་པོ་དགེ་སློང་གཞོན་ནུ་
ལ་ཁྱད་དུ་གསད་པར་མི་བྱ། གཞོན་ནུ་ལ་ཟིལ་གྱིས་མནན་པར་མི་བྱའོ། །དེ་ཅིའི་ཕྱིར་ཞེ་ན། དགེ་སློང་གཞོན་ནུར་གྱུར་ཀྱང་དེ་རྫུ་འཕྲུལ་ཆེ་ཞིང་མཐུ་ཆེ་བའི་དགྲ་བཅོམ་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས། །བཀའ་

66-1-327a

སྩལ་ནས་ནི་བདེ་གཤེགས་ཀྱིས། །དེ་སྐད་ཅེས་ནི་བཀའ་སྩལ་ནས། །སྟོན་པས་གཞན་ཡང་འདི་སྐད་གསུངས། །རྒྱལ་རིགས་དཔེ་མེད་ལྡན་པ་དང་། །རིགས་བཙུན་གྲགས་པར་ལྡན་པ་ལ། །བློ་དང་ལྡན་པས་དེ་གཞོན་ཞེས། 
ཁྱད་དུ་མི་གསད་ཟིལ་མི་མནན། །རྒྱལ་པོ་རྒྱལ་རིགས་མཁས་པ་ཡིས། །རྒྱལ་སྲིད་དག་ནི་ཐོབ་གྱུར་ནས། །ཆད་པས་གསོད་པའི་གནས་དེ་ཡོད། །དེ་བས་དེ་ལ་ཤིན་དུ་གདུང་། །དེ་ལྟར་རང་གི་སྲོག་བསྲུང་ཞིང་། །རང་གི་དོན་
ལ་ལྟ་བས་ནི། །དེ་ནི་ཁྱད་དུ་མི་གསད་ཅིང་། །དེ་ལ་ལེགས་པར་བག་ཀྱང་བྱ། །གལ་ཏེ་གྲོང་ངམ་དགོན་པའང་རུང་། །གང་དུ་སྦྲུལ་ནི་མཐོང་གྱུར་ན། །བློ་དང་ལྡན་པས་དེ་གཞོན་ཞེས། །ཁྱད་དུ་མི་གསད་ཟིལ་མི་མནན། །འདི་ལྟར་
སྦྲུལ་ནི་རྒྱུ་བ་ན། །རིགས་ནི་རྣམ་པ་སྣ་ཚོགས་ལ། །གླགས་རྙེད་ནས་ནི་གཞོན་ནུས་ཀྱང་། །སྐྱེས་པ་བུད་མེད་དུ་མ་ཟིན། །དེ་ལྟས་རང་གི་སྲོག་སྲུང་ཞིང་། །རང་གི་དོན་ལ་ལྟ་བས་ནི། །དེ་ནི་ཁྱད་དུ་མི་གསད་ཅིང་། །དེ་ལ་ལེགས་
པར་བག་ཀྱང་བྱ། །འབར་བ་མང་བ་ཟ་བྱེད་པ། །བྱིན་ཟ་ལམ་སྔོན་ལྡན་པ་དེ། །ཆུང་ཡང་ཁྱད་དུ་མི་གསད་ཅིང་། །མཁས་པས་ཟིལ་གྱིས་མནན་མི་བྱ། །ཉེ་བར་ལེན་པས་བྱིན་ཟ་ནི། །ཆུང་ངུར་གྱུར་ལས་ཆེན་པོར་འགྱུར། །
མེ་ལྕེ་འབར་བས་མྱུར་བར་ནི། །གྲོང་དང་གྲོང་ཁྱེར་སྲེག་པར་བྱེད། །དེ་ཕྱིར་བདག་སྲོག་སྲུང་བྱེད་པས། །དེ་ནི་ཁྱད་དུ་མི་གསད་ཅིང་། །བདག་ཉིད་དོན་ལ་ལེགས་ལྟ་བས། །དེ་ལ་ལེགས་པར་བག་ཀྱང་བྱ། །བྱིན་ཟ་ལམ་སྔོན་
ལྡན་གྱུར་པའི། །མེ་ཡིས་ཚང་ཚིང་གང་བསྲེགས་པ། །དེ་ལ་ཉིན་མཚན་འདས་གྱུར་པས། །ལ་ལར་ལོ་མ་སྐྱེ་བར་འགྱུར། །གང་གིས་ཚུལ་ཁྲིམས་ལྡན་པ་ཡི། །དགེ་སློང་རྙེད་ནས་སྲེག་བྱེད་པ། །དེ་ལ་བུ་དང་ཚ་བོ་དང་། །བགོ་
སྐལ་ཡོད་པར་མི་འགྱུར་ཏེ། །ཏ་ལའི་མགོ་བཞིན་མི་རིང་བར། །རིགས་རྒྱུད་དང་ཡང་བྲལ་བར་འགྱུར། །དེ་ཕྱིར་བདག་སྲོག་སྲུང་བྱེད་པས། །དེ་ནི་ཁྱད་དུ་གསད་མི་བྱ། །བདག་ཉིད་དོན་ལ་ལེགས་ལྟ་བས། །དེ་ལ་ལེགས་

66-1-327b

པར་བག་ཀྱང་བྱ། །རྒྱལ་རིགས་དཔེ་བྱད་ལྡན་པ་དང་། །བྲང་འགྲོ་མེ་དང་དེ་བཞིན་དུ། །དགེ་སློང་ཚུལ་ཁྲིམས་ལྡན་པ་ད། །མཁས་པས་ཟིལ་གྱིས་མནན་མི་བྱ། །དེ་ཕྱིར་བདག་སྲོག་སྲུང་བྱེད་པས། །དེ་ནི་ཁྱད་དུ་གསད་མི་བྱ། །
བདག་ཉིད་དོན་ལ་ལེགས་ལྟ་བས། །དེ་ནི་ལེགས་པར་སྤང་བར་བྱ། །དེ་ནས་ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་ཅིང་རྗེས་སུ་ཡི་རང་པ་བྱས་ནས། བཅོམ་ལྡན་
འདས་ཀྱི་ཞབས་ལ་མགོ་བོས་ཕྱག་འཚོལ་ཏེ། བཅོམ་ལྡན་འདས་ཀྱི་སྤྱན་སྔ་ནས་ཕྱིར་སོང་ངོ་། །གཞོན་ནུ་དཔེའི་མདོ་རྫོགས་སོ།། །། ༄༅། །རྒྱ་གར་སྐད་དུ། དྷཱ་ཏུ་བ་ཧུ་ཏ་ཀ་སཱུ་ཏྲ།  བོད་སྐད་དུ། ཁམས་མང་པོ་པའི་མདོ། 
འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། 
དེ་ནས་ཚེ་དང་ལྡན་པ་ཀུན་དགའ་བོ་གཅིག་པུ་དབེན་པར་སོང་སྟེ། ནང་དུ་ཡང་དག་བཞག་ནས་སེམས་ལ་སེམས་ཀྱི་རྣམ་པར་རྟོག་པ་འདི་ལྟ་བུ་དག་སྐྱེས་ཏེ། འཇིགས་པ་གང་དག་འབྱུང་ཞིང་སྐྱེ་བ་དེ་དག་ཐམས་ཅད་
ནི་བྱིས་པ་ལས་སྐྱེའི་མཁས་པ་ལས་ནི་མ་ཡིན་ནོ། །ཡམས་ཀྱི་ནད་གང་དག་དང་། གནོད་པ་དང་། ནད་འགོ་བ་དང་། འཁྲུག་པ་གང་དག་འབྱུང་ཞིང་སྐྱེ་བ་དེ་དག་ཐམས་ཅད་ནི་བྱིས་པ་ལས་སྐྱེའི་མཁས་པ་ལས་ནི་མ་ཡིན་ནོ། །
དེ་ནས་ཚེ་དང་ལྡན་པ་ཀུན་དགའ་བོ་ཕྱེམ་རེད་ནང་དུ་ཡང་དག་འཇོག་ལས་ལངས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །
ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་འདིར་བདག་གཅིག་པུ་དབེན་པར་མཆིས་ཏེ། ནང་དུ་ཡང་དག་བཞག་ན་སེམས་ལ་སེམས་ཀྱི་རྣམ་པར་རྟོག་པ་

66-1-328a

འདི་ལྟ་བུ་དག་སྐྱེས་ཏེ། འཇིགས་པ་གང་དག་འབྱུང་ཞིང་སྐྱེ་བ་དེ་དག་ཐམས་ཅད་ནི་བྱིས་པ་ལས་སྐྱེའི་མཁས་པ་ལས་ནི་མ་ལགས་སོ། །ཡམས་ཀྱི་ནད་གང་དག་དང་། གནོད་པ་དང་། ནད་འགོ་བ་དང་། འཁྲུག་པ་གང་
དག་འབྱུང་ཞིང་སྐྱེ་བ་དེ་དག་ཐམས་ཅད་ནི་བྱིས་པ་ལས་སྐྱེའི་མཁས་པ་ལས་ནི་མ་ལགས་སོ་སྙམ་མོ། །ཀུན་དགའ་བོ་དེ་དེ་བཞིན་ནོ། །དེ་དེ་བཞིན་ཏེ། འཇིགས་པ་གང་དག་འབྱུང་ཞིང་སྐྱེ་བ་དེ་དག་ཐམས་ཅད་ནི་བྱིས་པ་ལས་
སྐྱེའི་མཁས་པ་ལས་ནི་མ་ཡིན་ནོ། །ཡམས་ཀྱི་ནད་གང་དག་དང་། གནོད་པ་དང་། ནད་འགོ་བ་དང་། འཁྲུག་པ་གང་དག་འབྱུང་ཞིང་སྐྱེ་བ་དེ་དག་ཐམས་ཅད་ནི་བྱིས་པ་ལས་སྐྱེའི་མཁས་པ་ལས་ནི་མ་ཡིན་ནོ། །ཀུན་དགའ་བོ་དཔེར་
ན་འདམ་བུ་སྐམ་པོའི་ཁང་པ་འམ། རྩྭ་སྐམ་པོའི་ཁང་པ་འམ། སོག་མ་སྐམ་པོའི་ཕུང་པོ་དག་ལ་མེ་བཏང་ན་དེ་རྣམས་ཀྱང་ཚིག་པར་བྱེད་དོ། །དེ་བཞིན་དུ་འཇིགས་པ་གང་དག་འབྱུང་ཞིང་སྐྱེ་བ་དེ་དག་ཐམས་ཅད་ནི་བྱིས་པ་ལས་
སྐྱེའི་མཁས་པ་ལས་ནི་མ་ཡིན་ནོ། །ཡམས་ཀྱི་ནད་གང་དག་དང་། གནོད་པ་དང་། ནད་འགོ་བ་དང་། འཁྲུག་པ་གང་དག་འབྱུང་ཞིང་སྐྱེ་བ་དེ་དག་ཐམས་ཅད་ནི་བྱིས་པ་ལས་སྐྱེའི་མཁས་པ་ལས་ནི་མ་ཡིན་ནོ། །ཀུན་དགའ་བོ་འདས་པའི་
དུས་སུ་འཇིགས་པ་གང་དག་བྱུང་ཞིང་སྐྱེས་པ་དེ་དག་ཐམས་ཅད་ནི་བྱིས་པ་ལས་སྐྱེའི་མཁས་པ་ལས་ནི་མ་ཡིན་ནོ། །ཡམས་ཀྱི་ནད་གང་དག་དང་། གནོད་པ་དང་། ནད་འགོ་བ་དང་། འཁྲུག་པ་གང་དག་འབྱུང་ཞིང་སྐྱེས་པ་དེ་དག་ཐམས་ཅད་
ནི་བྱིས་པ་ལས་སྐྱེའི་མཁས་པ་ལས་ནི་མ་ཡིན་ནོ། །ཀུན་དགའ་བོ་མ་འོངས་པའི་དུས་འཇིགས་པ་གང་དག་འབྱུང་ཞིང་སྐྱེ་བར་འགྱུར་བ་དེ་དག་ཐམས་ཅད་ནི་བྱིས་པ་ལས་སྐྱེ་བར་འགྱུར་གྱི་མཁས་པ་ལས་ནི་མ་ཡིན་ནོ། །ཡམས་
ཀྱི་ནད་གང་དག་དང་། གནོད་པ་དང་། ནད་འགོ་བ་དང་། འཁྲུག་པ་གང་དག་འབྱུང་ཞིང་སྐྱེ་བར་འགྱུར་བ་དེ་དག་ཐམས་ཅད་ནི་བྱིས་པ་ལས་སྐྱེ་བར་འགྱུར་གྱི་མཁས་པ་ལས་ནི་མ་ཡིན་ནོ། །ཀུན་དགའ་བོ་དེ་ལྟར་ན་འདས་པ་དང་། མ་

66-1-328b

འོངས་པ་དང་། ད་ལྟར་བྱུང་བའི་དུས་དག་ཏུ་འཇིགས་པ་དང་བཅས་པ་ནི་བྱིས་པའོ། །འཇིགས་པ་མེད་པ་ནི་མཁས་པའོ། །ཡམས་ཀྱི་ནད་དང་བཅས་པ་ནི་བྱིས་པའོ། །ཡམས་ཀྱི་ནད་མེད་པ་ནི་མཁས་པའོ། །གནོད་པ་དང་བཅས་པ་ནི་
བྱིས་པའོ། །གནོད་པ་མེད་པ་ནི་མཁས་པའོ། །ནད་འགོ་བ་དང་བཅས་པ་ནི་བྱིས་པའོ། །ནད་འགོ་བ་མེད་པ་ནི་མཁས་པའོ། །འཁྲུག་པ་དང་བཅས་པ་ནི་བྱིས་པའོ། །འཁྲུག་པ་མེད་པ་ནི་མཁས་པའོ། །ཀུན་དགའ་བོ་
འཇིགས་པ་དང་། ཡམས་ཀྱི་ནད་དང་། གནོད་པ་དང་། ནད་འགོ་བ་དང་། འཁྲུག་པ་དག་ནི་བྱིས་པ་ལས་ཡིན་གྱི་མཁས་པ་ལས་ནི་མ་ཡིན་པར་ཤེས་པར་བྱའོ། །ཀུན་དགའ་བོ་དེ་ལྟ་བས་ན་བྱིས་པའི་ཆོས་དང་། མཁས་པའི་
ཆོས་ཁོང་དུ་ཆུད་པར་བྱའོ། །བྱིས་པའི་ཆོས་དང་། མཁས་པའི་ཆོས་དག་ཁོང་དུ་ཆུད་ནས་ཀྱང་བྱིས་པའི་ཆོས་ནི་སྤང་བར་བྱའི་མཁས་པའི་ཆོས་ནི་ཡང་དག་པར་བླང་བར་བྱ་སྟེ། ཀུན་དགའ་བོ་དེ་ལྟར་དེ་བཞིན་དུ་བསླབ་པར་
བྱའོ། །བཙུན་པ་ཇི་ཙམ་གྱིས་ན་བྱིས་པ་བྱིས་པ་ཞེས་བགྱི་བའི་གྲངས་སུ་མཆི་བ་ལགས། ཀུན་དགའ་བོ་བྱིས་པ་ནི་ཁམས་ལ་མཁས་པ་མ་ཡིན་པ་དང་། སྐྱེ་མཆེད་ལ་མཁས་པ་མ་ཡིན་པ་དང་། རྟེན་ཅིང་འབྲེལ་པར་
འབྱུང་བ་ལ་མཁས་པ་མ་ཡིན་པ་དང་། གནས་དང་གནས་མ་ཡིན་པ་ལ་མཁས་པ་མ་ཡིན་པ་སྟེ། ཀུན་དགའ་བོ་དེ་ཙམ་གྱིས་ན་བྱིས་པ་བྱིས་པ་ཞེས་བྱ་བའི་གྲངས་སུ་འགྲོ་བ་ཡིན་ནོ། །བཙུན་པ་ཇི་ཙམ་གྱིས་ན་
མཁས་པ་མཁས་པ་ཞེས་བགྱི་བའི་གྲངས་སུ་མཆི་བ་ལགས། ཀུན་དགའ་བོ་མཁས་པ་ནི་ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་པར་འབྱུང་བ་ལ་མཁས་པ་དང་། གནས་དང་གནས་
མ་ཡིན་པ་ལ་མཁས་པ་ཡིན་ཏེ། ཀུན་དགའ་བོ་དེ་ཙམ་གྱིས་ན་མཁས་པ་མཁས་པ་ཞེས་བྱ་བའི་གྲངས་སུ་འགྲོ་བ་ཡིན་ནོ། །བཙུན་པ་ཇི་ཙམ་གྱིས་ན་མཁས་པ་ཁམས་ལ་མཁས་པ་ལགས། ཀུན་དགའ་

66-1-329a

བོ་མཁས་པ་ནི་ཁམས་བཅྭ་བརྒྱད་པོ་མིག་གི་ཁམས་དང་། གཟུགས་ཀྱི་ཁམས་དང་། མིག་གི་རྣམ་པར་ཤེས་པའི་ཁམས་དང་། རྣ་བའི་ཁམས་དང་། སྒྲའི་ཁམས་དང་། རྣ་བའི་རྣམ་པར་ཤེས་པའི་ཁམས་
དང་། སྣའི་ཁམས་དང་། དྲིའི་ཁམས་དང་། སྣའི་རྣམ་པར་ཤེས་པའི་ཁམས་དང་། ལྕེའི་ཁམས་དང་། རོའི་ཁམས་དང་། ལྕེའི་རྣམ་པར་ཤེས་པའི་ཁམས་དང་། ལུས་ཀྱི་ཁམས་དང་། རེག་བྱའི་ཁམས་དང་། 
ལུས་ཀྱི་རྣམ་པར་ཤེས་པའི་ཁམས་དང་། ཡིད་ཀྱི་ཁམས་དང་། ཆོས་ཀྱི་ཁམས་དང་། ཡིད་ཀྱི་རྣམ་པར་ཤེས་པའི་ཁམས་དག་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་སྟེ། ཀུན་དགའ་བོ་དེ་ལྟར་ན་
ཁམས་བཅྭ་བརྒྱད་པོ་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ནོ། །གཞན་ཡང་ཁམས་དྲུག་པོ་སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་
དང་། རྣམ་པར་ཤེས་པའི་ཁམས་དག་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་སྟེ། དེ་ལྟར་ན་ཁམས་དྲུག་པོ་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ནོ། །གཞན་ཡང་ཁམས་དྲུག་པོ་འདོད་པའི་
ཁམས་དང་། གནོད་སེམས་ཀྱི་ཁམས་དང་། རྣམ་པར་འཚེ་བའི་ཁམས་དང་། ངེས་པར་འབྱུང་བའི་ཁམས་དང་། གནོད་སེམས་མེད་པའི་ཁམས་དང་། རྣམ་པར་འཚེ་བ་མེད་པའི་ཁམས་དག་ཡང་དག་པ་ཇི་ལྟ་བ་
བཞིན་ཤེས་ཤིང་མཐོང་བ་སྟེ། དེ་ལྟར་ན་ཁམས་དྲུག་པོ་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ནོ། །གཞན་ཡང་ཁམས་དྲུག་པོ་བདེ་བའི་ཁམས་དང་། སྡུག་བསྔལ་གྱི་ཁམས་དང་། ཡིད་བདེ་བའི་
ཁམས་དང་། ཡིད་མི་བདེ་བའི་ཁམས་དང་། བཏང་སྙོམས་ཀྱི་ཁམས་དང་། མ་རིག་པའི་ཁམས་དག་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་སྟེ། དེ་ལྟར་ན་ཁམས་དྲུག་པོ་ཡང་དག་པ་ཇི་ལྟ་བ་བཞིན་ཤེས་

66-1-329b

ཤིང་མཐོང་བ་ཡིན་ནོ། །གཞན་ཡང་ཁམས་བཞི་པོ་ཚོར་བའི་ཁམས་དང་། འདུ་ཤེས་ཀྱི་ཁམས་དང་། འདུ་བྱེད་ཀྱི་ཁམས་དང་། རྣམ་པར་ཤེས་པའི་ཁམས་དག་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་
ནོ། །གཞན་ཡང་ཁམས་གསུམ་པོ་འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་དག་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ནོ། །གཞན་ཡང་ཁམས་གསུམ་པོ་གཟུགས་
ཀྱི་ཁམས་དང་། གཟུགས་མེད་པའི་ཁམས་དང་། འགོག་པའི་ཁམས་དག་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ནོ། །གཞན་ཡང་ཁམས་གསུམ་པོ་འདས་པའི་ཁམས་དང་། མ་འོངས་པའི་
ཁམས་དང་། ད་ལྟར་བྱུང་བའི་ཁམས་དག་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ནོ། །གཞན་ཡང་ཁམས་གསུམ་པོ་དམན་པའི་ཁམས་དང་། བར་མའི་ཁམས་དང་། གྱ་ནོམ་པའི་ཁམས་དག་ཡང་དག་
པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ནོ། །གཞན་ཡང་ཁམས་གསུམ་པོ་དགེ་བའི་ཁམས་དང་། མི་དགེ་བའི་ཁམས་དང་། ལུང་དུ་མ་བསྟན་པའི་ཁམས་དག་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་
ཡིན་ནོ། །གཞན་ཡང་ཁམས་གསུམ་པོ་སློབ་པའི་ཁམས་དང་། མི་སློབ་པའི་ཁམས་དང་། སློབ་པ་ཡང་མ་ཡིན་མི་སློབ་པ་ཡང་མ་ཡིན་པའི་ཁམས་དག་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ནོ། །
གཞན་ཡང་ཁམས་གཉིས་པོ་ཟག་པ་དང་བཅས་པའི་ཁམས་དང་། ཟག་པ་མེད་པའི་ཁམས་དག་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ནོ། །གཞན་ཡང་ཁམས་གཉིས་པོ་འདུས་བྱས་ཀྱི་ཁམས་
དང་། འདུས་མ་བྱས་ཀྱི་ཁམས་དག་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། ཀུན་དགའ་བོ་དེ་ཙམ་གྱིས་ན་མཁས་པ་ཁམས་ལ་མཁས་པ་ཡིན་ནོ། །བཙུན་པ་ཇི་ཙམ་གྱིས་ན་མཁས་པ་སྐྱེ་མཆེད་

66-1-330a

ལ་མཁས་པ་ལགས། ཀུན་དགའ་བོ་མཁས་པ་ནི་སྐྱེ་མཆེད་བཅུ་གཉིས་པོ་མིག་གི་སྐྱེ་མཆེད་དང་། གཟུགས་ཀྱི་སྐྱེ་མཆེད་དང་། རྣ་བའི་སྐྱེ་མཆེད་དང་། སྒྲའི་སྐྱེ་མཆེད་དང་། སྣའི་སྐྱེ་མཆེད་དང་། དྲིའི་སྐྱེ་མཆེད་དང་། 
ལྕེའི་སྐྱེ་མཆེད་དང་། རོའི་སྐྱེ་མཆེད་དང་། ལུས་ཀྱི་སྐྱེ་མཆེད་དང་། རེག་བྱའི་སྐྱེ་མཆེད་དང་། ཡིད་ཀྱི་སྐྱེ་མཆེད་དང་། ཆོས་ཀྱི་སྐྱེ་མཆེད་དག་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་སྟེ། ཀུན་དགའ་བོ་དེ་ཙམ་གྱིས་ན་
མཁས་པ་སྐྱེ་མཆེད་ལ་མཁས་པ་ཡིན་ནོ། །བཙུན་པ་ཇི་ཙམ་གྱིས་ན་མཁས་པ་རྟེན་ཅིང་འབྲེལ་པར་འབྱུང་བ་ལ་མཁས་པ་ལགས། ཀུན་དགའ་བོ་མཁས་པ་ནི་རྟེན་ཅིང་འབྲེལ་པར་འབྱུང་བ་འདི་ཉིད་ལུགས་བཞིན་འབྱུང་
བ་དང་། ལུགས་ལས་བཟློག་པ་འདི་ལྟ་སྟེ། འདི་ཡོད་པས་འདི་འབྱུང་། འདི་སྐྱེས་པས་འདི་སྐྱེ་སྟེ། འདི་ལྟར་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་
གཟུགས། །མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ་ལེན་པའི་རྐྱེན་གྱིས་སྲིད་པ། སྲིད་
པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དག་འབྱུང་ཞིང་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཤིག་འབྱུང་བར་འགྱུར་རོ། །
འདི་ལྟ་སྟེ། འདི་མེད་པས་འདི་མི་འབྱུང་། འདི་འགགས་པས་འདི་འགག་སྟེ། འདི་ལྟར་མ་རིག་པ་འགགས་པས་འདུ་བྱེད་འགག ། འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་
དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་

66-1-330b

པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དག་
འགག་ཅིང་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཤིག་འགག་པར་འགྱུར་བ་དག་ཡང་དག་པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ཏེ། ཀུན་དགའ་བོ་དེ་ཙམ་གྱིས་ན་མཁས་པ་རྟེན་ཅིང་འབྲེལ་པར་འབྱུང་བ་ལ་
མཁས་པ་ཡིན་ནོ། །བཙུན་པ་ཇི་ཙམ་གྱིས་ན་མཁས་པ་གནས་དང་གནས་མ་ཡིན་པ་ལ་མཁས་པ་ལགས། ཀུན་དགའ་བོ་མཁས་པ་ནི་གནས་ལ་གནས་དང་། གནས་མ་ཡིན་པ་ལ་གནས་མ་ཡིན་པ་དག་ཡང་དག་
པ་ཇི་ལྟ་བ་བཞིན་ཤེས་ཤིང་མཐོང་བ་ཡིན་ནོ། །ཀུན་དགའ་བོ་འདི་ནི་གནས་མ་ཡིན་ཞིང་གོ་སྐབས་མེད་པ་སྟེ། གང་ལུས་ཀྱིས་ཉེས་པར་སྤྱད་པ་དང་། ངག་དང་། ཡིད་ཀྱིས་ཉེས་པར་སྤྱད་པའི་རྣམ་པར་སྨིན་པ་འདོད་པ་
དང་། སྡུག་པ་དང་། དགའ་བ་དང་། ཡིད་དུ་འོང་བ་དག་མངོན་པར་འགྲུབ་པར་འགྱུར་བ་འདི་ནི་གནས་མ་ཡིན་ནོ། །འདི་ནི་གནས་ཡིན་ཏེ། གང་ལུས་ཀྱིས་ཉེས་པར་སྤྱད་པ་དང་། ངག་དང་། ཡིད་ཀྱིས་ཉེས་པར་སྤྱད་པའི་རྣམ་པར་
སྨིན་པ་འདོད་པ་མ་ཡིན་པ་དང་། སྡུག་པ་མ་ཡིན་པ་དང་། དགའ་བ་མ་ཡིན་པ་དང་། ཡིད་དུ་འོང་བ་མ་ཡིན་པ་དག་མངོན་པར་འགྲུབ་པར་འགྱུར་བ་འདི་ནི་གནས་ཡིན་ནོ། །ཀུན་དགའ་བོ་འདི་ནི་གནས་མ་ཡིན་ཞིང་གོ་
སྐབས་མེད་པ་སྟེ་གང་ལུས་ཀྱིས་ལེགས་པར་སྤྱད་པ་དང་། ངག་དང་། ཡིད་ཀྱིས་ལེགས་པར་སྤྱད་པའི་རྣམ་པར་སྨིན་པ་འདོད་པ་མ་ཡིན་པ་དང་། སྡུག་པ་མ་ཡིན་པ་དང་། དགའ་བ་མ་ཡིན་པ་དང་། ཡིད་དུ་འོང་བ་
མ་ཡིན་པ་དག་མངོན་པར་འགྲུབ་པར་འགྱུར་བ་འདི་ནི་གནས་མ་ཡིན་ནོ། །འདི་ནི་གནས་ཡིན་ཏེ་གང་ལུས་ཀྱིས་ལེགས་པར་སྤྱད་པ་དང་། ངག་དང་། ཡིད་ཀྱིས་ལེགས་པར་སྤྱད་པའི་རྣམ་པར་སྨིན་པ་འདོད་པ་དང་། སྡུག་

66-1-331a

པ་དང་། དགའ་བ་དང་། ཡིད་དུ་འོང་བ་དག་མངོན་པར་འགྲིབ་པར་འགྱུར་བ་འདི་ནི་གནས་ཡིན་ནོ། །གནས་མ་ཡིན་ཞིང་གོ་སྐབས་མེད་པ་ནི་གང་ལུས་ཀྱིས་ཉེས་པར་སྤྱད་པ་སྤྱད། ངག་དང་། ཡིད་ཀྱིས་ཉེས་པར་སྤྱད་པ་སྤྱད་
ནས་རྒྱུ་དེ་དག་དང་རྐྱེན་དེས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་བ་འདི་ནི་གནས་མ་ཡིན་ནོ། །འདི་ནི་གནས་ཡིན་ཏེ། གང་ལུས་ཀྱིས་ཉེས་པར་སྤྱད་པ་སྤྱད། ངག་དང་། ཡིད་ཀྱིས་ཉེས་པར་སྤྱད་པ་
སྤྱད་ནས་རྒྱུ་དེ་དང་རྐྱེན་དེས་ལུས་ཞིག་ནས་ཤི་ཕན་ཅད་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་གི་ནང་དུ་སྐྱེ་བར་འགྱུར་བ་འདི་ནི་གནས་ཡིན་ནོ། །གནས་མ་ཡིན་ཞིང་གོ་སྐབས་མེད་པ་ནི་གང་ལུས་ཀྱིས་ལེགས་
པར་སྤྱད་པ་སྤྱད། ངག་དང་། ཡིད་ཀྱིས་ལེགས་པར་སྤྱད་པ་སྤྱད་ནས་རྒྱུ་དེ་དང་རྐྱེན་དེས་ལུས་ཞིག་ནས་ཤི་ཕན་ཅད་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་གི་ནང་དུ་སྐྱེ་བར་འགྱུར་བ་འདི་ནི་གནས་མ་ཡིན་ནོ། །
འདི་ནི་གནས་ཡིན་ཏེ་གང་ལུས་ཀྱིས་ལེགས་པར་སྤྱད་པ་སྤྱད། ངག་དང་། ཡིད་ཀྱིས་ལེགས་པར་སྤྱད་པ་སྤྱད་ནས་རྒྱུ་དེ་དང་རྐྱེན་དེས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་བ་འདི་ནི་
གནས་ཡིན་ནོ། །གནས་མ་ཡིན་ཞིང་གོ་སྐབས་མེད་པ་ནི་ཡང་དག་པར་རྫོགས་པའི་སངས་རྒྱས་གཉིས་འཇིག་རྟེན་དུ་གང་སྔ་ཕྱི་མེད་པར་འབྱུང་བ་འདི་ནི་གནས་མ་ཡིན་ཏེ། གང་གཅིག་འབྱུང་བ་འདི་ནི་གནས་ཡིན་ནོ། །གནས་
མ་ཡིན་ཞིང་གོ་སྐབས་མེད་པ་ནི་འཁོར་ལོས་སྒྱུར་བ་གཉིས་འཇིག་རྟེན་དུ་གང་སྔ་ཕྱི་མེད་པར་འབྱུང་བ་འདི་ནི་གནས་མ་ཡིན་ཏེ། གང་གཅིག་འབྱུང་བ་འདི་ནི་གནས་ཡིན་ནོ། །གནས་མ་ཡིན་ཞིང་གོ་སྐབས་མེད་པ་ནི་གང་བུད་མེད་
འཁོར་ལོས་སྒྱུར་བའི་རྒྱལ་སྲིད་དང་། བརྒྱ་བྱིན་ཉིད་དང་། ཚངས་པ་ཉིད་དང་། བདུད་ཉིད་བྱེད་པར་འགྱུར་བ་དང་། རང་བྱང་ཆུབ་མངོན་དུ་བྱེད་པར་འགྱུར་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་

66-1-331b

འཚང་རྒྱ་བར་འགྱུར་བ་འདི་ནི་གནས་མ་ཡིན་ནོ། །འདི་ནི་གནས་ཡིན་ཏེ་སྐྱེས་པ་གང་ཡིན་པའོ། །གནས་མ་ཡིན་ཞིང་གོ་སྐབས་མེད་པ་ནི་གང་ལྟ་བ་ཕུན་སུམ་ཚོགས་པའི་གང་ཟག་བསམས་བཞིན་དུ་ཕ་དང་། མ་དང་། དགྲ་
བཅོམ་པ་གསོད་པར་འགྱུར་བ་དང་། དགེ་འདུན་གྱི་དབྱེན་བྱེད་པར་འགྱུར་བ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པར་འགྱུར་བ་ནི་གནས་མ་ཡིན་ནོ། །འདི་ནི་གནས་ཡིན་ཏེ་སོ་སོའི་སྐྱེ་བོ་གང་ཡིན་པའོ། །གནས་མ་
ཡིན་ཞིང་གོ་སྐབས་མེད་པ་ནི་གང་ལྟ་བ་ཕུན་སུམ་ཚོགས་པའི་གང་ཟག་བསམས་བཞིན་དུ་སྲོག་ཆགས་ཀྱི་སྲོག་གཅོད་པར་འགྱུར་བ་དང་། བསླབ་པ་གཏང་ནས་ཉམས་པ་ལ་འཇུག་པར་འགྱུར་བ་དང་། འདི་ལས་ཕྱི་རོལ་པ་གཞན་དག་
ལ་ཡོན་གནས་སུ་ཚོལ་བར་འགྱུར་བ་དང་། འདི་ལས་ཕྱི་རོལ་པ་གཞན་དག་ལ་སྟོན་པར་ལྟ་བར་འགྱུར་བ་དང་། དགེ་མཚན་དང་། བཀྲ་ཤིས་དག་གིས་དག་པར་ཡིད་ཆེས་པར་འགྱུར་བ་དང་། དགེ་སྦྱོང་དང་བྲམ་ཟེ་ཤེས་པ་དང་ལྡན་པ་དེ་དག་ཤེས་
པར་བྱ་བ་ཤེས་ཤིང་བལྟ་བར་བྱ་བ་མཐོང་ངོ་སྙམ་ནས་དགེ་སྦྱོང་དང་བྲམ་ཟེ་གཞན་དག་གི་ངོར་རྟོག་ཅིང་ངོར་ལྟ་བར་འགྱུར་བ་དང་། སྲིད་པ་བརྒྱད་པ་མངོན་པར་འགྲུབ་པར་འགྱུར་བ་འདི་ནི་གནས་མ་ཡིན་ནོ། །འདི་ནི་གནས་ཡིན་ཏེ་སོ་སོའི་སྐྱེ་བོ་
གང་ཡིན་པའོ། །གནས་མ་ཡིན་ཞིང་གོ་སྐབས་མེད་པ་ནི་སེམས་ཀུན་ནས་ཉོན་མོངས་པར་བྱེད་པ་དང་། ཤེས་རབ་ཉམ་ཆུང་བར་བྱེད་པ་དང་། རྒུད་པའི་ཕྱོགས་སུ་གྱུར་པ་དང་། མྱ་ངན་ལས་འདའ་བར་མི་འགྱུར་བ་གང་སྒྲིབ་པ་ལྔ་པོ་མ་སྤངས་པ་ནི་དྲན་
པ་ཉེ་བར་གཞག་པ་བཞི་དག་ལ་སེམས་ཤིན་དུ་ཉེ་བར་གཞག་ནས་གནས་པར་འགྱུར་བ་འདི་ནི་གནས་མ་ཡིན་ནོ། །འདི་ནི་གནས་ཡིན་ཏེ། སེམས་ཀུན་ནས་ཉོན་མོངས་པར་བྱེད་པ་དང་། ཤེས་རབ་ཉམ་ཆུང་བར་བྱེད་པ་དང་། རྒུད་པའི་
ཕྱོགས་སུ་གྱུར་པ་དང་། མྱ་ངན་ལས་འདའ་བར་མི་འགྱུར་བ་གང་སྒྲིབ་པ་ལྔ་པོ་སྤངས་པས་ནི་དྲན་པ་ཉེ་བར་གཞག་པ་བཞི་དག་ལ་སེམས་ཤིན་དུ་ཉེ་བར་གཞག་ནས་གནས་པར་འགྱུར་བ་འདི་ནི་གནས་ཡིན་ནོ། །གནས་མ་ཡིན་ཞིང་གོ་

66-1-332a

སྐབས་མེད་པ་ནི་སེམས་ཀུན་ནས་ཉོན་མོངས་པར་བྱེད་པ་དང་། ཤེས་རབ་ཉམ་ཆུང་བར་བྱེད་པ་དང་། རྒུད་པའི་ཕྱོགས་སུ་གྱུར་པ་དང་། མྱ་ངན་ལས་འདའ་བར་མི་འགྱུར་བ་གང་སྒྲིབ་པ་ལྔ་པོ་མ་སྤངས་པས་ནི་དྲན་
པ་ཉེ་བར་གཞག་པ་བཞི་དག་ལ་སེམས་ཤིན་དུ་ཉེ་བར་གཞག་པ་ན་བྱང་ཆུབ་ཀྱི་ཡན་ལག་བདུན་སྒོམ་པ་འདི་ནི་གནས་མ་ཡིན་ནོ། །འདི་ནི་གནས་ཡིན་ཏེ་སེམས་ཀུན་ནས་ཉོན་མོངས་པར་བྱེད་པ་དང་། ཤེས་རབ་ཉམ་ཆུང་བར་
བྱེད་པ་དང་། རྒུད་པའི་ཕྱོགས་སུ་གྱུར་པ་དང་། མྱ་ངན་ལས་འདས་པར་མི་འགྱུར་བ་གང་སྒྲིབ་པ་ལྔ་པོ་སྤངས་པས་ནི་དྲན་པ་ཉེ་བར་གཞག་པ་བཞི་དག་ལ་སེམས་ཤིན་དུ་ཉེ་བར་གཞག་ནས་གནས་པ་ན་བྱང་ཆུབ་ཀྱི་ཡན་
ལག་བདུན་སྒོམ་པར་འགྱུར་བ་འདི་ནི་གནས་ཡིན་ནོ། །གནས་མ་ཡིན་ཞིང་གོ་སྐབས་མེད་པ་ནི་སེམས་ཀུན་ནས་ཉོན་མོངས་པར་བྱེད་པ་དང་། ཤེས་རབ་ཉམ་ཆུང་བར་བྱེད་པ་དང་། རྒུད་པའི་ཕྱོགས་སུ་གྱུར་པ་དང་། མྱ་ངན་
ལས་འདའ་བར་མི་འགྱུར་བ་གང་སྒྲིབ་པ་ལྔ་པོ་མ་སྤངས་པས་ནི་དྲན་པ་ཉེ་བར་གཞག་པ་བཞི་དག་ལ་སེམས་ཤིན་དུ་ཉེ་བར་གཞག་ནས་གནས་པ་ན་བྱང་ཆུབ་ཀྱི་ཡན་ལག་བདུན་བསྒོམས་ཏེ་རང་བྱང་ཆུབ་མངོན་དུ་བྱེད་
པར་འགྱུར་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་འདི་ནི་གནས་མ་ཡིན་ནོ། །འདི་ནི་གནས་ཡིན་ཏེ། སེམས་ཀུན་ནས་ཉོན་མོངས་པར་བྱེད་པ་དང་། ཤེས་རབ་
ཉམ་ཆུང་བར་བྱེད་པ་དང་། རྒུད་པའི་ཕྱོགས་སུ་གྱུར་པ་དང་། མྱ་ངན་ལས་འདའ་བར་མི་འགྱུར་བ་གང་སྒྲིབ་པ་ལྔ་པོ་སྤངས་ནས་ནི་དྲན་པ་ཉེ་བར་གཞག་པ་བཞི་དག་ལ་སེམས་ཤིན་དུ་ཉེ་བར་གཞག་ནས་གནས་པ་ན་བྱང་ཆུབ་ཀྱི་
ཡན་ལག་བདུན་བསྒོམས་ཏེ་རང་བྱང་ཆུབ་མངོན་དུ་བྱེད་པར་འགྱུར་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་འདི་ནི་གནས་ཡིན་ཏེ། ཀུན་དགའ་བོ་དེ་ཙམ་གྱིས་ན་

66-1-332b

མཁས་པ་གནས་དང་གནས་མ་ཡིན་པ་ལ་མཁས་པ་ཡིན་ནོ། །བཙུན་པ་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་ནི་ལེའུ་བཞི་པ་ཞེས་བྱ་
བར་ཡང་ཟུང་ཤིག །ཆོས་ཀྱི་མེ་ལོང་ཞེས་བྱ་བར་ཡང་ཟུང་ཤིག །བདུད་རྩིའི་རྔ་བོ་ཆེ་ཞེས་བྱ་བར་ཡང་ཟུང་ཤིག །ཁམས་མང་པོ་པ་ཞེས་བྱ་བར་ཡང་ཟུང་ཤིག་དེ་བས་ན་ཁམས་མང་པོ་ཞེས་བྱ་བ་ནི་ཆོས་ཀྱི་རྣམ་གྲངས་
འདིའི་ཚིག་བླ་དགས་ཡིན་ནོ། །ཁམས་མང་པོ་པ་ཞེས་བྱ་བའི་མདོ་རྫོགས་སོ།།    །། ༄༅། །རྒྱ་གར་སྐད་དུ། གཎ་ཌཱི་སཱུ་ཏྲ།  བོད་སྐད་དུ། གཎ་ཌཱིའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་
ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་དགེ་སློང་སྟོང་དུ་ཚང་བའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་
སེམས་དཔའི་ཚོགས་ཆེན་པོ་དང་ཐབས་གཅིག་ཏུ་བཞུགས་ཏེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་སྦྱོར་བ་ཡོངས་སུ་ཟད་པ། 
ཡང་དག་པའི་ཤེས་པས་སེམས་ཤིན་དུ་རྣམ་པར་གྲོལ་བ་རྣམས་དང་། བཅོམ་ལྡན་འདས་ཐབས་གཅིག་གོ། །དེའི་ཚེ་རྒྱལ་པོ་གསལ་རྒྱལ་ཞེས་བྱ་བ་སྟན་ལས་ལངས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། 
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མ་འོངས་པའི་དུས་སུ་རྩོད་པའི་དུས་ཀྱི་ཚེ་སེམས་ཅན་ཐམས་ཅད་སྡིག་པའི་སེམས་དང་། 
འཐབ་པའི་སེམས་དང་། འདོད་ཆགས་དང་། ཞེ་སྡང་དང་། གཏི་མུག་དང་ཀུན་དུ་ལྡན་པ། ཕ་རོལ་གྱི་ཡུལ་རྣམས་ལ་མཆོག་ཏུ་ཞེན་པ། གཅིག་ལ་གཅིག་ཟ་བ་ལ་བརྩོན་པ། བཅོམ་ལྡན་འདས་ཀྱིས་སྔོན་གསུངས་པའི་དུས་འཇིག་

66-1-333a

པར་བྱེད་པ། དམ་པའི་ཆོས་སྤོང་བར་བྱེད་པ། སངས་རྒྱས་དང་། ཆོས་དང་། འདོད་ཆགས་དང་བྲལ་བ་རྣམས་སུན་འབྱིན་པ་དེ་རྣམས་གཞིག་པའི་ཐབས་གང་གིས་བྱང་ཆུབ་ལ་མཆོག་ཏུ་གཞོལ་བར་འགྱུར་བའི་ཐབས་
བསྟན་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཁྱོད་སེམས་ཅན་ཐམས་ཅད་ཀྱི་དོན་དང་། ཕན་པ་དང་། བདེ་བའི་ཕྱིར་དང་། སངས་རྒྱས་དང་། དགེ་འདུན་ཡང་དག་པར་བསྲུང་བའི་ཕྱིར་
འདྲི་བར་བྱེད་པ་ལེགས་སོ་ལེགས་སོ། །དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་ངས་བཤད་པར་བྱའོ། །དེ་ནས་བཅོམ་ལྡན་འདས་དེའི་ཚེ་ཀུན་དུ་སྒྲ་སྒྲོགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །
བཅོམ་ལྡན་འདས་ཏིང་ངེ་འཛིན་གང་ལ་སྙོམས་པར་ཞུགས་པ་དེའི་ཚེ་དམྱལ་བ་ཐམས་ཅད་རྒྱུན་ཆད་པ་དང་། སྡང་བའི་སེམས་དང་ལྡན་པ་ཐམས་ཅད་ཀྱང་སྡང་བའི་སེམས་དང་བྲལ་ཞིང་བྱང་ཆུབ་ཀྱི་སེམས་ལ་རབ་ཏུ་གཞོལ་བར་གྱུར་
པ་དང་། བཅོམ་ལྡན་འདས་ཀྱིས་བཀའ་སྩལ་པ། གསལ་རྒྱལ་ཁྱོད་ཀྱིས་མཐོང་ངམ། ཀུན་དུ་ཐོས་སམ། ཤེས་སམ། རྟོགས་སམ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །ཁུམས་
ཤིང་ཀུན་དུ་ཁུམས་ལ་འཚལ་ཞིང་རྟོགས་སོ། །བཅོམ་ལྡན་འདས་ཀྱིས་བཀའ་སྩལ་པ། གསལ་རྒྱལ་འདི་ནི་སེམས་ཅན་ཐམས་ཅད་ཀྱི་མ་སངས་རྒྱས་དང་། བྱང་ཆུབ་སེམས་དཔའ་སྐྱེད་པ། ཉན་ཐོས་དང་། རང་སངས་རྒྱས་
དང་། ཡང་དག་པར་རྫོགས་པའི་སངས་རྒྱས་ཐམས་ཅད་ཀྱིས་ཕྱག་བྱས་པ། མཆོད་པ། བསམས་པ། བསྒོམས་པ། ཤེས་རབ་ཀྱི་ཕ་རོལ་དུ་ཕྱིན་པ་སྒྲའི་གཟུགས་ཀྱིས་སེམས་ཅན་ཐམས་ཅད་ཡོངས་སུ་སྐྱོང་བར་
བྱེད་པ། མུ་སྟེགས་པ་ཐམས་ཅད་རྣམ་པར་འཇིག་པར་བྱེད་པ། སྡང་བའི་སེམས་འདུལ་བར་བྱེད་པ། སྡིག་པའི་སེམས་འཇོམས་པར་བྱེད་པ། ཞེ་སྡང་བའི་སེམས་རྣམ་པར་སེལ་བར་བྱེད་པ། གཏི་མུག་གི་

66-1-333b

སེམས་རབ་ཏུ་འཇིག་པར་བྱེད་པ། འདོད་ཆགས་ཀྱི་སེམས་རྣམ་པར་སྤོང་བར་བྱེད་པ། བྱང་ཆུབ་ཀྱི་སེམས་ཡོངས་སུ་སྐྱོང་བར་བྱེད་པ། སངས་རྒྱས་ཀྱི་སེམས་འཕེལ་བར་བྱེད་པ། སངས་རྒྱས་འབྱུང་བ་བསྟེན་པར་བྱེད་པ། 
འཐབ་པ་དང་། འགྱེད་པ་དང་། འཁྲུག་པ་དང་། རྩོད་པ་དང་། སྡུག་བསྔལ་བ་དང་། རྨི་ལམ་ངན་པ་དང་། ཀུན་འདུལ་བ་ཐམས་ཅད་འཇིག་པ། གློ་བུར་གྱི་ནད་དང་། འཆི་བ་ཞི་བར་བྱེད་པ་དང་། དུས་མ་ཡིན་པར་འཆི་བ་དང་། རིམས་
ལ་སོགས་པ་ཞི་བར་བྱེད་པ། ཕ་རོལ་གྱི་དཔུང་འདུལ་བར་བྱེད་པ། བདུད་རྣམ་པར་འཇིག་པར་བྱེད་པ། གདུང་བ་སེལ་བར་བྱེད་པ། སྐལ་བ་བཟང་པོ་ཡང་དག་པར་འཕེལ་བར་བྱེད་པ། ཚེ་དང་ནད་མེད་པ་སྟེར་བར་བྱེད་
པ། འཆི་བའི་འཇིགས་པ་ཞི་བར་བྱེད་པ། ཐར་པ་དང་དཔལ་འཕེལ་བར་བྱེད་པ། གང་གིས་ཐོས་ནས་རྗེས་སུ་ཡི་རང་བ་དེ་ལ་ཡིད་བཞིན་གྱི་ནོར་བུ་ལྟར་འབྲས་བུ་རབ་ཏུ་སྟེར་བ། ཡུམ་ཤེས་རབ་ཀྱི་ཕ་རོལ་དུ་ཕྱིན་པ་
གཎ་ཌཱིའི་གཟུགས་ཀྱིས་བཞུགས་སོ་ཞེས་ཐོས་པ་དང་། གསལ་རྒྱལ་སེམས་དང་བ་སྐྱེས་ནས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདིའི་ཚད་ནི་ཇི་ཙམ་ལགས། མདོག་ནི་ཅི་
འདྲ་བ་ལགས། བྱེ་བྲག་ནི་དུ་ཞིག་ལགས། བརྡུང་བ་ནི་ཅི་ལྟ་བ་ལགས། གང་གིས་བརྡུང་བར་བགྱི། གང་གི་ཚེ་གང་གི་དུས་ན་ཇི་སྲིད་དུ་བརྡུང་བར་བགྱི། ཇི་ལྟར་གཞག་པར་བགྱི། དེ་སྐད་ཅེས་གསོལ་པ་དང་། བཅོམ་
ལྡན་འདས་ཀྱིས་བཀའ་སྩལ་པ། འབྱོར་པར་འདོད་པས་ཤིང་རྣམས་ནི། །རབ་ཏུ་འབད་དེ་བརྟག་པར་བྱ། །ཙན་དན་བིལ་བ་པ་ལ་ཤ །ཨ་ཤྭད་ཐ་དང་ཙན་དན་དམར། །རྒྱ་སྟར་ཏ་ལ་ཀིང་ཤུ་ཀ །ཤིང་ཤ་པ་དང་ཏ་མ་ལ། །ཨ་མྲ་
སྟར་བུ་སྐྱུ་རུ་ར། །ཏིང་ཏི་ས་ར་ཨ་ཤོ་ཀ །འདི་དག་ཐམས་ཅད་མེད་ན་ཡིད། །འོ་སེ་ལས་ནི་འབད་དེ་བྱ། །རྒྱལ་པོ་འབད་པས་ཐམས་ཅད་དུ། །འདི་དག་མེད་ན་མི་བྱའོ། །ཚད་མེད་ཤིང་ངན་ལས་བྱས་དང་། །བརྡུངས་དང་སྒྲ་ནི་

66-1-334a

མི་འབྱུང་བའི། །སངས་རྒྱས་ཡུམ་འདི་བརྡུངས་ན་ནི། །ཡུལ་འཁོར་འཚེ་བ་ངེས་པར་འབྱུང་། །གཙུག་ལག་ཁང་དུ་དགེ་སློང་རྣམས། །དེ་བཞིན་བློ་ནི་མི་མཐུན་དང་། །ཉེ་བར་གདུང་བ་འབྱུང་འགྱུར་ཞིང་། །རྣམ་པ་
དུ་མར་རྩོད་པར་འགྱུར། །མུ་སྟེགས་ཅན་གྱི་དབང་འགྱུར་ཞིང་། །བདུད་ཀྱང་འབྱུང་བར་འགྱུར་བ་ཡིན། །གདུག་པའི་ཀླུ་ནི་དུ་མ་ཡིས། །འབྲུ་རྣམས་ཀྱང་ནི་ཉམས་པར་བྱེད། །རྒྱལ་ཁམས་འདིར་མང་སེམས་ཅན་རྣམས། །
རྣམ་པར་འཇིག་པ་ཉིད་དུ་འགྱུར། །གཙུག་ལག་ཁང་ཡང་འཇིག་འགྱུར་ཞིང་། །ཆོས་ཀྱང་ནུབ་པར་འགྱུར་བ་ཡིན། །བདུད་ཀྱི་ལྷ་རྣམས་དགེ་སློང་གི། །དགེ་འདུན་ཤིན་དུ་མ་བསྡམས་བྱེད། །དེ་ལྟར་ཡང་དག་ཤེས་ནས་ཀྱང་། །
ལེགས་པར་ཡོངས་སུ་བརྟགས་ཏེ་བྱ། །ཚད་ནི་ཆུང་ངུ་སོར་བརྒྱད་ཀྱི། །བརྒྱད་ཅུ་རྩ་བཞི་ཉིད་བྱ་ཞིང་། །ཞེང་དུ་སོར་ནི་དྲུག་བྱ་སྟེ། །འཕངས་སུ་ཡང་ནི་གཉིས་བྱའོ། །སོར་མོའི་ཚིགས་ཀྱི་ཚད་དག་གིས། །ཟུར་བཞིར་ཚད་
ནི་གཉིས་པ་ཡིན། །ལེགས་མཉམ་ཉིད་ནི་ཤིན་དུ་གསལ། །རྩེ་གཉིས་སྦལ་པའི་མགོ་བཞིན་ནོ། །དེ་ནས་རྡུང་བར་བྱེད་པ་ཡང་། །ཤིང་དེ་ཉིད་ལས་བཅད་དེ་བྱ། །སོར་བཅུ་གཉིས་ཀྱི་ཚད་དག་ལ། །ཟླུམ་ཞིང་རྩེ་
གཉིས་ནེའུ་ལེའི་མགོ། །ཆང་ཟུངས་ཚད་ཀྱང་དེ་བཞིན་ཏེ། །ཤིན་དུ་འཇམ་དང་རྩིབས་མཉམ་པར། །གང་ཕྱིར་དེ་བརྡུངས་གཞན་དགོངས་པ། །འོག་ཏུའང་དེ་ཡི་ཁྲི་བྱ་བ། །གཙུག་ལག་ཁང་གི་སྒོ་སྟེངས་སམ། །ཡང་
ན་དབུས་མའི་སྟེང་དུ་བྱ། ། དེ་ཡི་རབ་གནས་བྱ་བ་ནི། །ཤིན་དུ་བརྟན་པའི་ཆོས་ཀྱི་སྐུ། །སྐྱེད་པ་མ་ཡིན་འཇིག་བྱེད་མིན། །གདོད་ནས་མ་སྐྱེས་པ་དགེ་བ། །དེ་ལྟར་རབ་གནས་བྱས་ནས་ནི། །དེ་ནི་སྤྱན་དབྱེར་གྱུར་པ་ཡིན། །
གཎ་ཌཱི་སྤྱན་དབྱེ་བྱས་ནས་ཀྱང་། །དེ་འོག་གཙུག་ལག་ཁང་ཀུན་དུ། །ཀླུ་བདུན་གྱིས་ནི་བརྒྱན་པ་ལྟར། །བསྐྱེད་པའི་རིམ་གྱིས་བརྡུང་བར་བྱ། །དེ་འོག་དཀོན་མཆོག་གསུམ་ལ་ནི། །ཕྱག་བྱས་ནས་ནི་བརྡུང་བྱ་ཞིང་། ། ཤང་རྩ་

66-1-334b

ལན་གསུམ་བརྗོད་པས་ནི། །ཆོས་ཀྱི་རྔ་རྣམས་བརྡུང་བར་བྱ། །མེ་ཏོག་གིས་ནི་དེ་བཞིན་ཁྲུས། །ཟན་ཟ་ཉི་མ་འཆར་ནུབ་ཚེ། །དུས་གསུམ་ལ་ནི་ལན་གསུམ་སྟེ། །སྐུ་ཁྲུས་ཚེ་ན་ལན་གཉིས་བསྔགས། །གློ་བུར་
གནོད་པ་ཆར་མི་འབབ། །དེ་བཞིན་འཐབ་དང་རྩོད་པ་དང་། །གློག་དང་གནོད་པ་ཆེན་པོ་དང་། །གནས་བརྟན་རྣམས་ནི་སྤྱན་འདྲེན་དང་། །ནད་དང་མུ་གེ་ཞི་བའི་ཕྱིར། །མ་འཚོལ་རིམ་གྱིས་བརྡུང་བར་བྱ། །དགེ་སློང་རྣམས་
དང་དགེ་ཚུལ་གྱིས། །དུས་རྣམས་རྟག་ཏུ་བརྡུང་བ་སྟེ། །གསོ་སྦྱོང་ལ་ནི་གནས་ཚེ་ཡི། །དགེ་བསྙེན་གྱིས་ཀྱང་བརྡུང་བར་བྱ། །མཚན་ཉིད་ཐམས་ཅད་རྫོགས་པ་དང་། །ཀླུ་བདུན་གྱིས་ནི་བརྒྱན་པར་བྱ། །རྒྱལ་པོ་གང་ཚེ་
ཡུལ་འཁོར་དུ། །གཎ་ཌཱི་དེ་ནི་གྲག་གྱུར་པ། །དེར་ནི་དཔལ་དང་གྲགས་པ་དང་། །འདོད་པ་དང་ནི་ལོ་ལེགས་འགྱུར། །ཕ་རོལ་དཔུང་གིས་འཇིགས་མེད་ཅིང་། །འབྲུ་རྣམས་ཀྱང་ནི་ཉམས་མི་འགྱུར། །སངས་རྒྱས་
བྱིན་བརླབས་འབྱོར་པ་ཡིས། །དེར་ནི་བདུད་རྣམས་འདུལ་བར་འགྱུར། །ཆོས་ཀྱི་རྔ་ནི་སྲིད་རྩེར་བཅས། །ཀུན་ནས་རབ་ཏུ་གཡོ་བར་འགྱུར། །དམྱལ་དང་ཡི་དགས་འཇིག་རྟེན་རྣམས། །འཇིག་པར་འགྱུར་བར་ཐེ་ཚོམ་
མེད། །ཐམས་ཅད་སངས་རྒྱས་རྟག་དད་ཅིང་། །ཐམས་ཅད་ཆོས་ལ་གཞོལ་བར་འགྱུར། །དེས་ནི་དགེ་འདུན་འདུལ་བར་ལྡན། །མཁས་པ་རྣམས་ཀྱང་འཕེལ་བར་འགྱུར། །འདོད་ཆགས་ཞེ་སྡང་གཏི་མུག་རྣམས། །
དེར་ནི་ནུབ་པར་འགྱུར་བ་ཡིན། །རྒྱལ་པོ་ཚེ་རིང་ཆོས་ལྡན་ཞིང་། །བདེ་བ་དག་དང་ལྡན་པར་འགྱུར། །རྒྱལ་པོ་གཙུག་ལག་ཁང་ཀུན་དུ། །ཆོས་ཀྱི་རྔ་ནི་བརྡུངས་པ་ཡིས། །སྒྲ་ནི་གང་གི་རྣ་བ་ཡི། །ལམ་དག་ཏུ་
ནི་གྲག་གྱུར་ཅིང་། །དུས་བཞི་དག་ཏུ་ཐོས་མ་ནི། །དེ་རྣམས་བྱང་ཆུབ་ཐོབ་པར་འགྱུར། །གང་ཞིག་སྙིང་ནས་ཡིད་རང་པ། །དེ་ནི་གྲོལ་འགྱུར་ཐེ་ཚོམ་མེད། །གཎ་ཌཱིའི་མདོ་ནི་ལན་ཅིག་ཐོས། །མི་དེ་སྐྱེ་བ་དྲན་

66-1-335a

པར་འགྱུར། །གང་ན་མདོ་སྡེའི་མཆོག་འདི་གནས། །ཡུལ་འཁོར་དེར་ཡང་འབྱོར་པར་འགྱུར། །དུས་ཀུན་དུ་ནི་གནས་པ་དང་། །ཀློག་གམ་ཡང་ན་མཆོད་པར་བྱེད། །འདི་ནི་ཡིད་ལ་འཛིན་བྱེད་པ། །
སྡིག་པ་ལས་ནི་གྲོལ་བར་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། རྒྱལ་པོ་གསལ་རྒྱལ་བཅོམ་ལྡན་འདས་ལ་ཡང་དང་ཡང་དུ་ཕྱག་བྱས་ནས་སོང་ངོ་། །བཅོམ་ལྡན་འདས་ཀྱིས་དེ་
སྐད་ཅེས་བཀའ་སྩལ་ནས། ཐམས་ཅད་དང་ལྡན་པའི་འཁོར་དེ་དང་། ལྷ་དང་མི་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་
མངོན་པར་བསྟོད་དོ། །གཎ་ཌཱིའི་མདོ་རྫོགས་སོ།། །། རྒྱ་གར་གྱི་མཁན་པོ་དྷམྨ་ཤྲཱི་བྷ་དྲ་དང་། ལོ་ཙྪ་བ་དགེ་སློང་ཚུལ་ཁྲིམས་ཡོན་ཏན་གྱིས་བསྒྱུར། ཞུ་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་བཅོས་ཏེ་གཏན་ལ་ཕབ་པ། 
༄༅༅།   །རྒྱ་གར་སྐད་དུ། གཎ་ཌཱི་ས་མ་ཡ་སཱུ་ཏྲ།  བོད་སྐད་དུ། གཎ་ཌཱིའི་དུས་ཀྱི་མདོ། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་
གཅིག་ན། བཅོམ་ལྡན་འདས་རྒྱལ་པོའི་ཁབ་ཀྱི་འོད་མའི་ཚལ་བྱ་ཀ་ལན་ད་ཀའི་གནས་ན་བཞུགས་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བོས་ཏེ་བཀའ་སྩལ་པ། དགེ་སློང་དག་ལ་ལོ་རྣམས་ཀྱི་
དུས་བཤད་པར་བྱ་ཡིས། དེ་ལེགས་པར་ཉོན་ཅིག་དགེ་སློང་རྣམས་ཀྱི་ཟླ་བ་ཕྱེད་དང་པོ་ལ་ནི་རྐང་པ་བདུན་གཎ་ཌཱིའི་དུས་ཡིན་ལ། སོར་གྱི་དམན་པའི་རྐང་པ་ཕྱེད་དང་ལྔ་ནི་དུས་མ་ཡིན་ནོ། །ཟླ་བ་ཕྱེད་དང་གཉིས་པ་ལ་ནི་
རྐང་པ་བརྒྱད་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་དྲུག་ནི་དུས་མ་ཡིན་ནོ། །དགུན་ཟླ་འབྲིང་པོའི་ཟླ་བ་ཕྱེད་དང་པོ་ལ་ནི་རྐང་པ་དགུ་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་བདུན་ནི་དུས་མ་ཡིན་ནོ། །

66-1-335b

ཟླ་བ་གཉིས་པ་ལ་ནི་རྐང་པ་བཅུ་གཎ་ཌཱིའི་དུས་ཡིན་ལ། སོར་གྱི་དམན་པའི་རྐང་པ་བརྒྱད་ནི་དུས་མ་ཡིན་ནོ། །དགུན་ཟླ་ཐ་ཆུངས་ཀྱི་ཟླ་བ་ཕྱེད་དང་པོ་ལ་ནི་རྐང་པ་བཅུ་གཅིག་གཎ་ཌཱིའི་དུས་ཡིན་ལ། སོར་གྱིས་དམན་པའི་
རྐང་པ་དགུ་ནི་དུས་མ་ཡིན་ནོ། །ཟླ་བ་ཕྱེད་གཉིས་པ་ལ་ནི་རྐང་པ་བཅུ་གཉིས་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་བཅུ་ནི་དུས་མ་ཡིན་ནོ། །དཔྱིད་ཟླ་ར་བ་ཕྱེད་དང་པོ་ལ་ནི་རྐང་པ་བཅུ་གཅིག་གཎ་ཌཱིའི་དུས་
ཡིན་ལ། སོར་གྱིས་དམན་པའི་རྐང་པ་དགུ་ལ་ནི་དུས་མ་ཡིན་ནོ། །ཟླ་བ་ཕྱེད་གཉིས་པ་ལ་ནི་རྐང་པ་བཅུ་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་བརྒྱད་ནི་དུས་མ་ཡིན་ནོ། །དཔྱིད་ཟླ་འབྲིང་པོའི་ཟླ་བ་ཕྱེད་
དང་པོ་ལ་ནི་རྐང་པ་དགུ་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་བདུན་ནི་དུས་མ་ཡིན་ནོ། །ཟླ་བ་ཕྱེད་གཉིས་པ་ལ་ནི་རྐང་པ་བརྒྱད་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་དྲུག་ནི་དུས་མ་ཡིན་ནོ། །
དཔྱིད་ཟླ་ཐ་ཆུངས་ཀྱི་ཟླ་བ་ཕྱེད་དང་པོ་ལ་ནི་རྐང་པ་བདུན་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་ལྔ་ནི་དུས་མ་ཡིན་ནོ། །ཟླ་བ་ཕྱེད་གཉིས་པ་ལ་ནི་རྐང་པ་དྲུག་གཎ་ཌཱིའི་དུས་ཡིན་ལ། སོར་གྱིས་དམན་པའི་
རྐང་པ་བཞི་ནི་དུས་མ་ཡིན་ནོ། །དབྱར་ཟླ་ར་བ་ཕྱེད་དང་པོ་ལ་ནི་རྐང་པ་དྲུག་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་བཞི་ནི་དུས་མ་ཡིན་ནོ། །ཟླ་བ་ཕྱེད་གཉིས་པ་ལ་ནི་རྐང་པ་ལྔ་གཎ་ཌཱིའི་དུས་ཡིན་ལ། 
སོར་གྱིས་དམན་པའི་རྐང་པ་གསུམ་པ་ནི་དུས་མ་ཡིན་ནོ། །དབྱར་ཟླ་འབྲིང་པོའི་ཟླ་བ་ཕྱེད་དང་པོ་ལ་ནི་རྐང་པ་བཞི་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་གསུམ་ནི་དུས་མ་ཡིན་ནོ། །ཟླ་བ་ཕྱེད་གཉིས་
པ་ལ་ནི་རྐང་པ་བཞི་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་གཉིས་པ་ནི་དུས་མ་ཡིན་ནོ། །དབྱར་ཟླ་ཐ་ཆུངས་ཀྱི་ཟླ་བ་ཕྱེད་དང་པོ་ལ་ནི་རྐང་པ་གསུམ་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་

66-1-336a

པ་གསུམ་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་གཉིས་ནི་དུས་མ་ཡིན་ནོ། །སྟོན་ཟླ་ར་བའི་ཟླ་བ་ཕྱེད་དང་པོ་ལ་ནི་རྐང་པ་གསུམ་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་
ཕྱེད་དང་གསུམ་ནི་དུས་མ་ཡིན་ནོ། །ཟླ་བ་ཕྱེད་གཉིས་པ་ལ་ནི་རྐང་པ་གཉིས་གཎ་ཌཱའི་དུས་ཡིན་ལ། སོར་གྱིས་དམན་པའི་རྐང་པ་ཕྱེད་ནི་དུས་མ་ཡིན་ནོ། །སྟོན་ཟླ་འབྲིང་པོའི་ཟླ་བ་ཕྱེད་དང་པོ་ལ་ནི་རྐང་པ་བཞི་གཎ་
ཌཱིའི་དུས་ཡིན་ལ། སོར་གྱིས་དམན་པའི་རྐང་པ་གཉིས་ནི་དུས་མ་ཡིན་ནོ། །ཟླ་བ་ཕྱེད་གཉིས་པ་ལ་ནི་རྐང་པ་བཞི་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་གཉིས་ནི་དུས་མ་ཡིན་ནོ། །སྟོན་ཟླ་ཐ་
ཆུངས་ཀྱི་ཟླ་བ་ཕྱེད་དང་པོ་ལ་ནི་རྐང་པ་ལྔ་གཎ་ཌཱིའི་དུས་ཡིན་ལ། སོར་གྱིས་དམན་པའི་རྐང་པ་གསུམ་ནི་དུས་མ་ཡིན་ནོ། །ཟླ་བ་ཕྱེད་གཉིས་པ་ལ་ནི་རྐང་པ་དྲུག་གཎ་ཌཱིའི་དུས་ཡིན་ལ། སོར་གྱིས་དམན་
པའི་རྐང་པ་བཞི་ནི་དུས་མ་ཡིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་
གཎ་ཌཱིའི་དུས་ཀྱི་མདོ་རྫོགས་སོ།།         །། རྒྱ་གར་གྱི་མཁན་པོ་དཱི་པང་ཀ་ར་ཤྲཱི་ཛྙཱ་ན་དང་། ལོ་ཙྪ་བ་དགེ་སློང་དགེ་བའི་བློ་གྲོས་གྱིས་བསྒྱུར་བ། །  
༄༅།   །རྒྱ་གར་སྐད་དུ། ཨཱརྱ་ཀ་ལྱ་ཎ་མི་ཏྲ་སེ་བ་ནི་སཱུ་ཏྲ།  བོད་སྐད་དུ། འཕགས་པ་དགེ་བའི་བཤེས་གཉེན་བསྟེན་པའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་
བདག་གིས་ཐོས་པ་དུས་གཅིག་ན། བཅོམ་ལྡན་འདས་གྲོང་ཁྱེར་ཀུ་ཤ་ན་གྱད་ཀྱི་ཉེ་འཁོར་ཤིང་ས་ལ་ཟུང་གི་ཚལ་ན། ཉན་ཐོས་ཀྱི་དགེ་འདུན་དང་བཅས་པར་བཞུགས་ཏེ། དེ་ནས་བཅོམ་ལྡན་འདས་ཡོངས་སུ་མྱ་ངན་

66-1-336b

ལས་འདའ་བ་ཁོ་ནའི་དུས་ཀྱི་ཚེ་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཀྱིས་འདི་ལྟར་བསླབ་པར་བྱ་སྟེ། དགེ་བའི་བཤེས་གཉེན་དང་། དགེ་བའི་གྲོགས་པོ་དང་། དགེ་བའི་སྟེན་དང་གནས་པར་བྱའི། 
སྡིག་པའི་བཤེས་གཉེན་དང་། སྡིག་པའི་གྲོགས་པོ་དང་། སྡིག་པའི་སྟེན་དང་གནས་པར་མི་བྱའོ་ཞེས་དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་
བོས་འདི་སྐད་ཅེས་གསོལ་ཏོ། །བཙུན་པ་འདིར་བདག་གཅིག་པུ་དབེན་པར་མཆིས་ནས་ནང་དུ་ཡང་དག་འཇོག་ལ་ཞུགས་པ་ན་སེམས་ལ་འདི་ལྟ་བུའི་སེམས་ཀྱི་ཡོངས་སུ་རྟོག་པ་བྱུང་སྟེ། འདི་ལྟ་སྟེ། དགེ་བའི་
བཤེས་གཉེན་དང་། དགེ་བའི་གྲོགས་པོ་དང་། དགེ་བའི་སྟེན་འདི་ནི་ཚངས་པར་སྤྱོད་པའི་ཕྱེད་ལགས་ཀྱི། སྡིག་པའི་བཤེས་གཉེན་དང་། སྡིག་པའི་གྲོགས་པོ་དང་། སྡིག་པའི་སྟེན་ནི་དེ་ལྟ་མ་ལགས་སོ་
སྙམ་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་འདི་ལྟ་སྟེ། དགེ་བའི་བཤེས་གཉེན་དང་། དགེ་བའི་གྲོགས་པོ་དང་། དགེ་བའི་སྟེན་འདི་ནི་ཚངས་པར་སྤྱོད་པའི་ཕྱེད་ཡིན་
གྱི། སྡིག་པའི་བཤེས་གཉེན་དང་། སྡིག་པའི་གྲོགས་པོ་དང་། སྡིག་པའི་སྟེན་ནི་དེ་ལྟ་མ་ཡིན་ནོ་ཞེས་མ་ཟེར་ཅིག །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟ་སྟེ། དགེ་བའི་བཤེས་གཉེན་དང་། དགེ་
བའི་གྲོགས་པོ་དང་། དགེ་བའི་སྟེན་འདི་ནི་ཚངས་པར་སྤྱོད་པའི་རིལ་པོ་དང་། མ་འདྲེས་པ་དང་། ཡོངས་སུ་རྫོགས་པ་དང་། ཡོངས་སུ་དག་པ་དང་། ཡོངས་སུ་བྱང་བ་ཡིན་གྱི། སྡིག་པའི་བཤེས་གཉེན་
དང་། སྡིག་པའི་གྲོགས་པོ་དང་། སྡིག་པའི་སྟེན་འདི་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། ཀུན་དགའ་བོ་བཤེས་གཉེན་དང་། ང་ལ་རྟེན་ནས་སེམས་ཅན་སྐྱེ་བའི་ཆོས་ཅན་རྣམས་

66-1-337a

སྐྱེ་བའི་ཆོས་ཅན་ལས་ཡོངས་སུ་གྲོལ་བར་འགྱུར་བ་དང་། སེམས་ཅན་རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་
མི་བདེ་བ་དང་། འཁྲུག་པའི་ཆོས་ཅན་རྣམས་རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པའི་ཆོས་ཅན་ལས་
ཡོངས་སུ་གྲོལ་བར་འགྱུར་བའི་ཕྱིར་རོ། །ཀུན་དགའ་བོ་ད་བས་ན་རྣམ་གྲངས་ཁོ་ནས་ཁྱོད་ཀྱིས་འདི་ལྟར་རིག་པར་བྱ་སྟེ། འདི་ལྟ་སྟེ། དགེ་བའི་བཤེས་གཉེན་དང་། དགེ་བའི་གྲོགས་པོ་དང་། 
དགེ་བའི་སྟེན་འདི་ནི་ཚངས་པར་སྤྱོད་པའི་རིལ་པོ་དང་། མ་འདྲེས་པ་དང་། ཡོངས་སུ་རྫོགས་པ་དང་། ཡོངས་སུ་དག་པ་དང་། ཡོངས་སུ་བྱང་བ་ཡིན་གྱི། སྡིག་པའི་བཤེས་གཉེན་དང་། 
སྡིག་པའི་གྲོགས་པོ་དང་། སྡིག་པའི་སྟེན་འདི་ནི་དེ་ལྟ་མ་ཡིན་ནོ། །ཞེས་ཀུན་དགའ་བོ་ཁྱོད་ཀྱིས་དེ་ལྟར་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་
སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དགེ་བའི་བཤེས་གཉེན་
བསྟེན་པའི་མདོ་རྫོགས་སོ།། །།