71-1-1a

༼ཨཿ༽ ༄༅། ༈ །མདོ་སྡེ་སྣ་ཚོགས་ཀྱི་སྐོར་བཞུགས་སོ། །
(黃)  經藏第三十二部

71-1-1b

༄༅༅། །རྒྱ་གར་སྐད་དུ། པུཎྱ་བ་ལ་ཨ་བ་དཱ་ན། བོད་སྐད་དུ། བསོད་ནམས་ཀྱི་སྟོབས་ཀྱི་རྟོགས་
པ་བརྗོད་པ། བམ་པོ་དང་པོ། སངས་རྒྱས་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། 
བཅོམ་ལྡན་འདས་མཉན་དུ་ཡོད་པ་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་
བཞུགས་ཏེ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ན་མི་བླུན་པོ་
ལ་ལ་དམ་པའི་ཆོས་མ་ཡིན་པ་གསུམ་དང་ལྡན་ན་སྦྱིན་པ་དག་མི་སྦྱིན་ཞིང་བསོད་ནམས་དག་མི་བྱེད་ལ། ཚུལ་ཁྲྀམས་
ཡང་དག་པར་བླངས་ནས་གནས་པར་མི་བྱེད་དེ། གསུམ་པོ་གང་ཞེ་ན། འདི་ལྟར་ཆགས་པ་དང་སེར་སྣ་དང་བག་མེད་
པ་རྣམས་ཏེ། དགེ་སློང་དག་འདི་ན་མི་བླུན་པོ་ལ་ལ་དམ་པའི་ཆོས་མ་ཡིན་པ་གསུམ་པོ་འདི་དང་ལྡན་པས་སྦྱིན་པ་
དག་མི་བྱིན་ཞིང་བསོད་ནམས་དག་མ་བྱས་ལ། ཚུལ་ཁྲིམས་ཡང་དག་པར་བླངས་ཏེ་གནས་པར་མ་བྱས་པས་ལུས་

71-1-2a

ཞིག་སྟེ་ཤི་བའི་འོག་ཏུ་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །དགེ་སློང་དག་སྐྱེས་བུ་དམ་པ་ཆོས་གསུམ་དང་ལྡན་པ་ནི་སྦྱིན་པ་དག་སྦྱིན་ཞིང་བསོད་ནམས་དག་བྱེད་ལ་ཚུལ་
ཁྲིམས་ཡང་དག་པར་བླངས་ཏེ་གནས་སོ། །གསུམ་གང་ཞེ་ན། འདི་ལྟར་མ་ཆགས་པ་དང་། སེར་སྣའི་དྲི་མ་དང་བྲལ་བ་དང་། བག་ཡོད་པ་རྣམས་སོ། །དགེ་སློང་དག་ཆོས་གསུམ་པོ་འདི་དག་དང་ལྡན་ན་སྐྱེས་བུ་དམ་པ་སྦྱིན་པ་
དག་སྦྱིན་ཞིང་བསོད་ནམས་དག་བྱས་ལ། ཚུལ་ཁྲིམས་ཡང་དག་པར་བླངས་ཏེ་གནས་པས་ལུས་ཞིག་སྟེ་ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །བཅོམ་ལྡན་འདས་ཀྱིས་དེ་
སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་ཅེས་གསུངས་ནས། དེའི་འོག་ཏུ་གཞན་ཡང་སྟོན་པས་འདི་སྐད་ཅེས་གསུངས་སོ། །གང་ཕྱིར་སེར་སྣ་བག་མེད་པས། །སྦྱིན་པ་སྦྱིན་པར་མི་བྱེད་དེ། །དེ་ཕྱིར་བསོད་
ནམས་འདོད་པ་ཡི། །ཤེས་པས་སྦྱིན་པ་སྦྱིན་པར་བྱ། །སེར་སྣ་ཅན་གྱི་འཇིགས་པ་ནི། །བཀྲེས་དང་སྐོམ་པ་འདི་ཡིན་ན། །གང་གིས་འཇིགས་པས་འདིར་མ་བྱིན། །དེ་ཉིད་མ་ཡིན་འཇིགས་པ་སྟེ། །འཇིག་རྟེན་འདི་
དང་ཕ་རོལ་ཏུ། །དེ་ཡི་བྱིས་པ་གོས་པར་འགྱུར། །གང་དག་སེར་སྣ་སྤངས་ནས་ཀྱང་། །དུས་སུ་སྦྱིན་པ་སྦྱིན་བྱེད་ན། །ཤི་ཡང་དེ་ནི་ཤི་མ་ཡིན། །རྒྱགས་བཟང་བའི་འདྲོན་པོ་བཞིན། །གང་དག་ཤིན་དུ་གཏང་དཀའ་བ། །
ཉུང་ངུ་འམ་མང་པོ་གཏོང་བྱེད་ན། །གཏང་དཀའ་གཏོང་བ་དེ་དག་ནི། །དཀའ་བའི་ལས་དག་བྱེད་པ་ཡིན། །དམ་པ་མིན་པས་མི་རྟོགས་ཏེ། །དམ་པའི་ཆོས་ལས་འདའ་མི་བྱེད། །དེ་ཕྱིར་དམ་པ་དམ་པ་བྱིན། །འདི་ནས་ཤི་བར་གྱུར་པ་ན། །
དམ་པ་མ་ཡིན་དམྱལ་བར་འགྲོ། །དམ་པ་དག་ནི་མཐོ་རྀས་འགྲོ། །རྒ་བས་གཙེས་པ་ལ་ནི་སྐྱབས་མེད་དེ། །ཚེ་ཐུང་བས་ན་སྲོག་ཁྱེར་དུས་ཀྱང་ཉེ། །འཆི་བས་འཇིགས་པ་འདི་མཐོང་རྣམས་ཀྱིས་ནི། །བསོད་ནམས་བདེ་སྦྱོར་བདག་

71-1-2b

ནི་བྱ་བའི་རིགས། །བུད་མེད་སྤངས་འདིར་བོར་བས་འཚོ་བ་གང་། །དགའ་བས་སྦྱིན་པ་ཉུང་ངུ་བྱིན་ན་ཡང་། །སྟོང་གི་མཆོད་སྦྱིན་བརྒྱ་སྟོང་བྱེད་པས་ནི། །དེ་ཡི་བཅུ་དྲུག་ཆར་ཡང་མི་ཕོད་དོ། །ཅི་ཕྱིར་མཆོད་སྦྱིན་ཡངས་ཤིང་རྒྱ་ཆེ་བ། །མཆོད་
སྦྱིན་འཐུན་པ་དེ་ཡི་ལམ་མི་འགྲོ། །ཇི་ལྟར་སྟོང་གི་མཆོད་སྦྱིན་སྟོང་རྣམས་ཀྱང་། །དེ་ཡི་བཅུ་དྲུག་ཆར་མི་འགྱུར་ཞེ་ན། །བྱིས་པ་ལ་ལ་གསོད་ཅིང་འཆིང་བྱེད་འདིར། །གཞན་ནོར་སྦྱིན་བྱེད་ཡ་ངར་བརླག་པར་འགྱུར། །
མཆི་མའི་གདོང་བཅས་ཆད་པར་བཅས་པ་ཡི། །ཡོན་དེ་མཆོད་སྦྱིན་འཐུན་པའི་ལམ་མི་འགྲོ། །དེ་ལྟར་མཆོད་སྦྱིན་ཡངས་ཤིང་རྒྱ་ཆེ་བ། །མཆོད་སྦྱིན་འཐུན་པའི་ལམ་དུ་མི་འགྲོ་ལ། །དེ་ལྟར་སྟོང་གི་མཆོད་སྦྱིན་སྟོང་རྣམས་ཀྱང་། །
དེ་ཡི་བཅུ་དྲུག་ཆར་ཡང་མི་ཕོད་དོ། །ལ་ལ་གང་དག་གཟུ་ལུམས་མ་ཡིན་པ། །ཆོས་བཞིན་ནོར་རྣམས་ཐོབ་པ་གཏོང་བྱེད་ཅིང་། །དེ་དག་གཏང་དཀའ་དེ་རྣམས་བཏང་བས་ན། །རང་གི་བསོད་ནམས་ཀྱིས་ནི་ལྷ་གནས་འགྲོ། །
བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བཅོམ་ལྡན་འདས་གདན་ལས་བཞེངས་ཏེ། ནགས་སྟུག་པོ་ག་ལ་བ་དེ་ལོགས་སུ་གཤེགས་སོ། །གཤེགས་ནས་ནགས་སྟུག་པོའི་ནང་དུ་ཞུགས་ཏེ། ཉིན་པར་
གནས་པའི་ཕྱིར་ཤིང་ཞིག་གི་དྲུང་ན་གནས་ཤིང་བཞུགས་སོ། །དེའི་ཚེ་དགེ་སློང་མང་པོ་དག་འདུན་ཁང་དུ་འདུས་ཤིང་འཁོད་པའི་སྐབས་སུ་ཚུལ་འདི་ལྟ་བུར་ཚེ་དང་ལྡན་པ་དག་མི་རྣམས་ཀྱི་ཉམས་སུ་དབེན་པ་གང་ཡིན་ཞེས་གཏམ་
དུ་གླེངས་སོ། །དེའི་ཚེ་བཅོམ་ལྡན་འདས་ཀྱི་གཅུང་སྲུའི་བུ་ཚེ་དང་ལྡན་པ་དགའ་བོ་དང་། ཚེ་དང་ལྡན་པ་གྲོ་ཞིན་སྐྱེས་བྱེ་བ་ཉི་ཤུ་པ་དང་། ཚེ་དང་ལྡན་པ་མ་འགགས་པ་དང་། ཚེ་དང་ལྡན་པ་ཤཱ་རིའི་བུ་རྣམས་ཀྱང་འཁོར་དེ་ཉིད་དུ་
འདུས་པར་གྱུར་ཏེ་འཁོད་དོ། །དེ་ནས་ཚེ་དང་ལྡན་པ་དགའ་བོས་སྨྲས་པ། ཚེ་དང་ལྡན་པ་དག་བྱད་གཟུགས་ནི་མི་རྣམས་ཀྱི་ཉམས་སུ་དཔེན་པ་ཡིན་ནོ། །ཚེ་དང་ལྡན་པ་གྲོ་ཞིན་སྐྱེས་བྱེ་བ་ཉི་ཤུ་པས་སྨྲས་པ། ཚེ་དང་ལྡན་པ་དག་

71-1-3a

བརྩོན་འགྲུས་ནི་མི་རྣམས་ཀྱི་ཉམས་སུ་དཔེན་པ་ཡིན་ནོ། །ཚེ་དང་ལྡན་པ་མ་འགགས་པས་སྨྲས་པ། ཚེ་དང་ལྡན་པ་དག་བཟོ་ནྀ་མི་རྣམས་ཀྱི་ཉམས་སུ་དཔེན་པ་ཡིན་ནོ། །ཚེ་དང་ལྡན་པ་ཤཱ་རིའི་བུས་སྨྲས་པ། ཚེ་དང་ལྡན་པ་དག་
ཤེས་རབ་འབའ་ཤིག་མི་རྣམས་ཀྱི་ཉམས་སུ་དཔེན་པ་ཡིན་ནོ། །ཞེས་གླེངས་ནས་དེ་དག་འདི་སྐད་དུ། ཚེ་དང་ལྡན་པ་དག་བདག་ཅག་ཀུན་མི་མཐུན་པར་གྱུར་ཏེ། འདི་ལྟར་ཐ་དད་པར་བརྟགས་ཀྱིས། བདག་ཅག་བཅོམ་ལྡན་འདས་ཀྱི་ཐད་དུ་
སོང་སྟེ་དོན་འདི་ཉིད་ཞུས་ལ། བཅོམ་ལྡན་འདས་བདག་ཅག་ལ་ཅི་སྐད་དུ་ལུང་སྟོན་པ་དེ་བཞིན་དུ་གཟུང་བར་བྱའོ་ཞེས་ཟེར་ནས་ཚེ་དང་ལྡན་པ་དག་བཅོམ་ལྡན་འདས་ནི། སྟོན་པ་ཐུགས་རྗེ་ཆེན་པོ་སྟེ། །ཐམས་ཅད་མཁྱེན་པ་ཐེ་ཙོམ་བསལ། །
དེ་ནི་སོམ་ཉི་གཅོད་པ་སྟེ། །ཉི་མས་མུན་པ་བསལ་བ་བཞིན། །སྡུག་བསྔལ་དྲ་བས་ཀླགས་པ་དང་། །ལོག་པའི་ལམ་ལ་གནས་པ་ཡི། །སྲོག་ཆགས་རྣམས་ཀྱི་སྐྱབས་གཅིག་སྟེ། །བུ་རྣམས་ཀྱི་ནི་ཕ་མཆོག་བཞིན། །དེ་ཕྱིར་ཆོས་ཀུན་
དབང་ཕྱུག་པོ། །སེམས་ཅན་ཀུན་གྱི་དོན་བརྩོན་པ། །ཐུབ་པ་ཐེ་ཙོམ་གཅོད་དེ་ལ། །བདག་ཅག་ཀུན་གྱིས་ཞུ་བར་བྱ། །སོམ་ཉི་མདུད་པ་ཆེན་པོ་ནི། །གང་ཕྱིར་རྒྱལ་བ་གཅོད་པར་འགྱུར། །དེ་ཕྱིར་ཐམས་ཅད་དོང་ནས་ནི། །དེ་བཞིན་
གཤེགས་ལ་ཞུ་བར་བྱ། །ཞེས་བྱས་ནས་དགེ་སློང་མང་པོ་དེ་དག་བཅོམ་ལྡན་འདས་བལྟ་བའི་ཕྱིར་འགྲོ་བར་ཆས་པ་ལས། བཅོམ་ལྡན་འདས་ཉིན་པར་གནས་པའི་ཕྱིར་ནགས་སྟུག་པོའྀ་ནང་ན་བཞུགས་པའི་བར་སྐབས་སུ་དགེ་སློང་མང་པོ་དགེ་འདུན་
ཁང་དུ་འདུས་ཤིང་འཁོད་དེ། སྐབས་སུ་ཚུལ་དེ་ལྟ་བུའི་གཏམ་གླེངས་པ། ལྷའི་སྙན་རྣམ་པར་དག་པ་མི་ལས་འདས་པས་གསན་ཏོ། །གསན་ནས་ཏིང་ངེ་འཛིན་དེ་ལས་བཞེངས་ཏེ་འདུན་ཁང་ག་ལ་འདུག་པར་གཤེགས་སོ། །གཤེགས་ནས་དགེ་སློང་
གི་དགེ་འདུན་གྱི་གུང་ལ་གདན་བཤམས་པ་དེ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ་དང་། དགེ་སློང་དག་དགེ་སློང་མང་པོ་འདུན་ཁང་དུ་འདུས་ཤིང་འཁོད་པ་རྣམས་ཀྱིས་སྐབས་ཀྱི་

71-1-3b

གཏམ་ཅི་ཞིག་གླེངས་ད་ལྟར་ཁྱེད་གཏམ་ཇི་ལྟ་བུ་ཞིག་གི་ཕྱིར་འདུས་ཤིང་འཁོད། གསོལ་པ། བཙུན་པ་བདག་ཅག་དགེ་སློང་མང་པོ་འདུན་ཁང་འདིར་འདུས་ཤིང་མཆིས་པ་རྣམས་ཀྱིས་སྐབས་སུ་ཚུལ་འདི་ལྟ་བུར་ཚེ་དང་ལྡན་པ་དག་མི་
རྣམས་ཀྱི་ཉམས་སུ་དཔེན་པ་གང་ལགས་ཤེས་བཀའ་མཆིད་བགྱིས་སོ། །དེ་ལ་ཚེ་དང་ལྡན་པ་དགའ་བོའི་མཆིད་ནས་ནི་ཚེ་དང་ལྡན་པ་དག་བྱད་གཟུགས་མི་རྣམས་ཀྱི་ཉམས་སུ་དཔེན་པ་ལགས་སོ་ཞེས་མཆི། ཚེ་དང་ལྡན་པ་གྲོ་
ཞིན་སྐྱེས་བྱེ་བ་ཉི་ཤུ་པའི་མཆིད་ནས་ནི་ཚེ་དང་ལྡན་པ་དག་བརྩོན་འགྲུས་མི་རྣམས་ཀྱི་ཉམས་སུ་དཔེན་པ་ལགས་སོ་ཞེས་མཆི། ཚེ་དང་ལྡན་པ་མ་འགགས་པའི་མཆིད་ནས་ནི་ཚེ་དང་ལྡན་པ་དག་བཟོ་མི་རྣམས་ཀྱི་ཉམས་སུ་དཔེན་པ་
ལགས་སོ་ཞེས་མཆི། ཚེ་དང་ལྡན་པ་ཤཱ་རིའི་བུའི་མཆིད་ནས་ནི་ཚེ་དང་ལྡན་པ་དག་ཤེས་རབ་འབའ་ཤིག་མི་རྣམས་ཀྱི་ཉམས་སུ་དཔེན་པ་ལགས་སོ་ཞེས་མཆི་སྟེ། བཙུན་པ་བདག་ཅག་རྣམས་འདི་སྙམ་བགྱིད་དོ། །ཚེ་དང་ལྡན་པ་
དག་བདག་ཅག་ཀུན་མི་མཐུན་པར་འགྱུར་ཏེ། འདི་ལྟར་ཐ་དད་པར་བརྟགས་ཀྱིས་བདག་ཅག་བཅོམ་ལྡན་འདས་ཀྱི་ཐད་དུ་མཆིས་ཏེ་དོན་འདི་ཉིད་ཞུས་ལ། བཅོམ་ལྡན་འདས་བདག་ཅག་ལ་ཇི་སྐད་དུ་ལུང་སྟོན་པ་དེ་བཞིན་གཟུང་
བར་བགྱིའོ་སྙམ་བགྱིད་དོ། །བཙུན་པ་བདག་ཅག་དགེ་སློང་མང་པོ་འདུན་ཁང་དུ་འདུས་ཤིང་མཆིས་པ་རྣམས་ཀྱིས་སྐབས་ཀྱི་བཀའ་མཆིད་འདི་གླེངས་ཏེ། ད་ལྟར་བདག་ཅག་བཀའ་མཆིད་འདིའི་སླད་དུ་འདུས་ཤིང་མཆིས་ལགས་སོ། །
དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་གསུངས་པ། སེམས་ཅན་རྣམས་ཀྱི་གཟུགས་དང་བཟོ། །བརྩོན་འགྲུས་དང་ནི་ཤེས་རབ་གཞན། །བསོད་ནམས་དག་ལས་འབྱུང་བས་ན། །དེ་ཕྱིར་བསོད་ནམས་
དམ་པ་ཡིན། །ཞེས་གསུངས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཅི་ཡང་རུང་སྟེ། ལན་འགའ་ཙམ་དུ་ཟད་ཀྱི་དུས་ཐམས་ཅད་དུ་ཀུན་ཉམས་སུ་དཔེན་པ་མ་ཡིན་ནོ། །བསོད་ནམས་ནི་དུས་ཐམས་ཅད་དུ་

71-1-4a

སྲོག་ཆགས་ཐམས་ཅད་ཀྱི་ཉམས་སུ་དཔེན་པ་ཡིན་ཏེ། དགེ་སློང་དག་འདི་ལྟར་བསོད་ནམས་བཞིན་དུ་སེམས་ཅན་རྣམས་ཀྱི་ཉམས་སུ་དབེན་པའི་ཆོས་གཅིག་ཀྱང་ངས་ཡང་དག་པར་རྗེས་སུ་མ་མཐོང་ངོ་། །དགེ་སློང་དག་དེ་ཅིའི་
ཕྱིར་ཞེ་ན། སྔོན་བྱུང་བ་འདས་པའི་དུས་ན། རྒྱལ་པོའི་ཕོ་བྲང་འཁོར་ཞིག་ན། རྒྱལ་པོ་གསལ་སྟོབས་ཞེས་བྱ་བ་ཞིག་རྒྱལ་པོ་བྱེད་དེ་དེའི་རིང་ལ་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་མང་པོ་དང་མི་མང་པོས་
གང་ངོ་། །རྒྱལ་པོ་དེའི་བཙུན་མོ་རྣམ་པར་སྤ་བ་ཞེས་བྱ་བ་གཟུགས་བཟང་ཞིང་བལྟ་ན་སྡུག་ལ་མཛེས་པ་ཞིག་ཡོད་དེ། ཕྱི་ཞིག་ན་བཙུན་མོ་རྣམ་པར་སྤ་བ་དང་ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྤྱོད་དོ། །དེ་རྩེ་ཞིང་དགའ་ལ་དགའ་མགུར་
སྤྱོད་པ་དེ་ལས་བུ་གཟུགས་བཟང་ཞིང་བལྟ་ན་སྡུག་ལ་མཛེས་པ། མིའི་ཁ་དོག་ལས་ནི་འདས། ལྷའི་ཁ་དོག་ནི་མ་ཐོབ་པ་ཞིག་བཙས་ཏེ། དེ་བཙས་པ་ན་བཙས་སྟོན་བྱས་སོ། །བཙས་སྟོན་བྱས་ནས་གཟུགས་སྟོབས་ཤེས་བྱ་བར་མིང་
བཏགས་སོ། །དེ་བཞིན་དུ་རིམ་གྱིས་དེའི་འོག་ཏུ་དེའི་བུ་གསུམ་བཙས་ཏེ། དེ་དག་གི་ནང་ན་གཅིག་ནི་བརྩོན་འགྲུས་དང་ལྡན་པ་ཞེས་བྱ། གཉིས་པ་ནི་བཟོ་ལྡན་ཞེས་བྱ། གསུམ་པ་ནི་ཤེས་རབ་ལྡན་ཞེས་བྱའོ། །ཕྱིས་རེ་ཤིག་
ན་ཡང་བཙུན་མོ་རྣམ་པར་སྤ་བ་ལ་བུ་ཆགས་ཏེ། གང་གི་ཉིན་པར་དེའི་བུ་ཆགས་པ་དེ་ཉིད་ཀྱི་ཉིན་པར་གློ་བུར་དུ་ཕོ་བྲང་འཁོར་ཏུ་གསེར་རྣམ་པ་སྣ་ཚོགས་ཀྱི་ཆར་བབ་བོ། །བཙུན་མོ་དེའི་སྟེང་དུ་ཡང་ལྷའི་བླ་རེ་ཆེན་པོ་རིན་པོ་ཆེ་
སྣ་ཚོགས་ཀྱིས་སྤྲས་པ་ཞིག་བྱུང་ངོ་། །དེ་ནས་རྒྱལ་པོ་གསལ་སྟོབས་ཀྱིས་ཡ་མཚན་དེ་མཐོང་ནས་ཤིན་ཏུ་ངོ་མཚར་དུ་གྱུར་ཏེ། ལྟས་པ་རྣམས་ལ་སྨྲས་པ། ཀྱེ་སྔོན་མ་བྱུང་བའི་ཡ་མཚན་བྱུང་བ་འདི་ཅི་ཞིག །ལྟས་པ་རྣམས་
ཀྱིས་གསོལ་པ། ལྷ་བཙུན་མོའི་ལྷུམས་སུ་སྲས་ཞུགས་པ་གང་ལགས་པ་འདི་ནི་བསོད་ནམས་ཀྱི་ཆེ་བར་གྲགས་པ་ཞིག་སྟེ། སེམས་ཅན་དེའི་མཐུ་ལགས་སོ། །དེ་ནས་རྒྱལ་པོས་དེ་ཐོས་ནས་ཤིན་ཏུ་ངོ་

71-1-4b

མཚར་ཏུ་གྱུར་ཏོ། །དེ་ནས་རེ་ཤིག་ན་བཙུན་མོ་དེ་འདི་ལྟ་བུར་ཡིད་ལ་འདོད་པ་སྐྱེས་ཏེ། ཀྱེ་མ་བདག་སེང་གེའི་ཁྲི་ལ་འདུག་ཅིང་སྟེང་དུ་གདུགས་དཀར་པོ་ཐོགས་ལ་རྔ་ཡབ་ནོར་བུའི་ཡུ་བ་ཅན་ཡང་ཐོགས་ན་ཅི་མ་རུང་སྙམ་སྟེ། དེས་རྒྱལ་པོ་ལ་གསོལ་
ཏོ། །དེ་ནས་རྒྱལ་པོ་སེམས་རབ་ཏུ་དགའ་བར་གྱུར་ནས། གྲོང་ཁྱེར་རྒྱ་ཆེར་མཛེས་པར་བྱེད་དུ་བཅུག་ནས་དེ་བཞིན་དུ་ཐམས་ཅད་བྱེད་དུ་བཅུག་སྟེ། དེའི་ཡིད་ལ་འདོད་པ་སྐྱེས་པ་གང་ཡིན་པ་དེ་མེད་པར་གྱུར་ཏོ། །དེ་ནས་ཡང་དེའི་ཡིད་ལ་ཀྱེ་མ་
བདག་གསེར་དངུལ་ཀྱི་ཕུང་པོའྀ་སྟེང་དུ་འདུག་ལ་རང་གི་ལག་གིས་སྦྱིན་པ་རྣམས་སྦྱིན་ཞིང་བསོད་ནམས་དག་བྱེད་དེ། ནོར་མེད་པ་རྣམས་ནོར་དང་ལྡན་པར་བྱེད་ན་ཅི་མ་རུང་སྙམ་དུ་འདོད་པ་སྐྱེས་ཏེ། དེས་རྒྱལ་པོ་ལ་གསོལ་ཏོ། །དེ་ནས་
རྒྱལ་པོས་དེ་བཞིན་དུ་བྱེད་དུ་བཅུག་ནས་དེའི་ཡིད་ལ་འདོད་པ་སྐྱེས་པ་གང་ཡིན་པ་དེ་མེད་པར་གྱུར་ཏོ། །དེ་ནས་ཡང་དེའི་ཡིད་ལ་ཀྱེ་མ་བཙོན་ཐམས་ཅད་བཏང་ན་ཅི་མ་རུང་སྙམ་དུ་འདོད་པ་སྐྱེས་སོ། །དེ་ནས་རྒྱལ་པོས་དེའི་ཡིད་ལ་འདོད་པ་
སྐྱེས་པ་བསལ་བའི་ཕྱིར་བཙོན་ཐམས་ཅད་གཏོང་དུ་བཅུག་སྟེ། དེའི་ཡིད་ལ་འདོད་པ་སྐྱེས་པ་གང་ཡིན་པ་དེ་མེད་པར་གྱུར་ཏོ། །དེ་ནས་ཡང་དེའི་ཡིད་ལ་ཀྱེ་མ་བདག་བསྐྱེད་མོས་ཚལ་དག་མཐོང་ན་ཅི་མ་རུང་སྙམ་དུ་འདོད་པ་སྐྱེས་སོ། །
དེ་ནས་དེ་རྒྱལ་པོས་བསྐྱེད་མོས་ཚལ་མཛེས་པ་དག་བལྟར་བཅུག་སྟེ། དེའི་ཡིད་ལ་འདོད་པ་སྐྱེས་པ་གང་ཡིན་པ་དེ་མེད་པར་གྱུར་ཏོ། །དེ་ནས་ཡང་དེའི་ཡིད་ལ་ཀྱེ་མ་བདག་གིས་སྐྱེ་བོ་མང་པོའྀ་མདུན་དུ་ཚུལ་འདི་ལྟ་བུར་བདེན་པའི་ཚིག་བརྗོད་
དེ། ཇི་སྟེ་བསོད་ནམས་དག་གི་རྣམ་པར་སྨིན་པ་ཡོད་ཅེ་ན། དེ་ལས་ལྷའི་སེང་གེའི་ཁྲི་གང་ལ་འདུག་ན། སྐྱེ་བོ་མང་པོ་ལ་ཆོས་སྟོན་ཅིང་བདག་གི་གཏམ་གྱི་རྗེས་ལ་ཡང་ཡ་མཚན་འགའ་འབྱུང་བར་འགྱུར་བ་དེ་ལྟ་བུ་ལྷ་རྣམས་ཀྱིས་མྱུར་ཏུ་
བདག་ལ་ཕུལ་ན་ཅི་མ་རུང་སྙམ་དུ་འདོད་པ་སྐྱེས་ཏེ། དེས་རྒྱལ་པོ་ལ་གསོལ་ཏོ། །དེ་ནས་རྒྱལ་པོས་བཙུན་མོ་འཁོར་དང་གྲོང་ཁྱེར་རྒྱ་ཆེར་མཛེས་པར་བྱེད་དུ་བཅུག་གོ། །གྲོང་ཁྱེར་ན་གནས་པའི་སྐྱེ་བོ་མང་པོ་ཐམས་ཅད་ཀྱང་གོས་གཙང་མ་དང་རྒྱན་

71-1-5a

བགོས་ནས། སྤོས་དང་ཕྲེང་བ་དང་། བྱུག་པ་ལག་ན་ཐོགས་ཏེ་འདུས་པར་གྱུར་ཏོ། །དེ་ནས་བཙུན་མོ་རྣམ་པར་སྤ་བ་རྒྱན་ཐམས་ཅད་ཀྱིས་ཀླུབས་ཏེ། བུད་མེད་ཀྱི་འཁོར་ཀྱི་དཀྱིལ་འཁོར་གྱིས་བསྐོར་ནས་ལྷའི་བུ་མོ་བཞིན་དུ་སྐྱེ་
བོ་དག་གི་མིག་དང་། ཡིད་འཕྲོག་ཅིང་སྐྱེ་བོ་མང་པོ་དེ་དག་གི་ནང་དུ་སོང་སྟེ། སེམས་ཅན་ཐམས་ཅད་ཀྱི་རྗེས་སུ་འགྲོ་བའི་བྱམས་པའི་སེམས་ཉེ་བར་བཞག་ནས་ནམ་མཁའ་ལ་ལྟ་ཞིང་བདེན་པའི་བྱིན་གྱི་བརླབས་བྱེད་དེ་ཚིགས་སུ་བཅད་
པ་སྨྲས་པ། མི་དབང་ལྷའི་རྣམ་ཐར་འགྲུབ་པ་ཡི། །བསོད་ནམས་སྟོབས་འཕགས་ཇི་སྟེ་བདག་ལ་ཡོད། །བདེན་པ་དེས་ན་དེང་དུ་ལྷ་རྣམས་ཀྱིས། །མྱུར་ཏུ་བདག་གི་སེང་གེའི་ཁྲི་ཤོམས་ཤིག །དེ་ནས་ཚིག་དེ་སྐད་སྨྲས་མ་ཐག་ཏུ་བསོད་ནམས་
དག་གི་མཐུ་སྟོན་པའི་ལྷ་རྣམས་ཀྱིས་གློ་བུར་དུ་སེང་གེའི་ཁྲི་ཕུལ་ཏེ། ལྷའི་མེ་ཏོག་གི་ཆར་ཡང་ཕབ་བོ། །དེ་ནས་སྐྱེ་བོ་ཕལ་པོ་ཆེ་དེ་དག་གིས་ལྷ་དང་མི་མངོན་པར་དགའ་བར་བྱེད་པའི་ཆོ་འཕྲུལ་ངོ་མཚར་རྨད་དུ་གྱུར་པ་དེ་མཐོང་ནས་ཤིན་ཏུ་ཡ་
མཚན་དུ་གྱུར་ཏེ། ཀྱེ་མ་བསོད་ནམས་དག་གི་མཐུ་ཆེ་སྟེ། འདི་ལྟར་འཇིག་རྟེན་ཐམས་ཅད་ཀྱི་མཆོད་པའི་གནས་ལྷ་རྣམས་ཀྱང་བསོད་ནམས་ཀྱི་སྟོབས་ཀྱིས་བཀུག་སྟེ། མི་རྣམས་ཀྱི་ངག་ཉན་པ་ནི་ངོ་མཚར་ཏོ་ཞེས་ཆེད་དུ་རྗོད་པ་ཆེད་དུ་བརྗོད་དོ། །
དེ་ནས་བཙུན་མོ་རྣམ་པར་སྤ་བ་ཡིད་རབ་ཏུ་དགའ་སྟེ། ཚམ་ཚོམ་མེད་པར་སེང་གེའི་ཁྲི་ལ་འཛེགས་ནས་འདུག་གོ། །བཙུན་མོ་དེ་འདུག་མ་ཐག་ཏུ་ས་རྣམ་པ་དྲུག་ཏུ་གཡོས་ཏེ། སེང་གེའི་ཁྲི་ཡང་ས་ལས་མི་བདུན་གྱི་སྲིད་ཙམ་དུ་ནམ་
མཁའ་ལ་འཕགས་ཏེ་འདུག་གོ། དེ་ནས་སེང་གེའི་ཁྲི་དེའི་སྟེང་དུ་ལྷའི་བླ་རེ་རིན་པོ་ཆེ་སྣ་ཚོགས་ཀྱིས་སྤྲས་པ་ཞིག་བྱུང་ངོ་། །དེ་ནས་སྐྱེ་བོ་ཕལ་པོ་ཆེ་དེ་དག་བསོད་ནམས་ཀྱི་མཐུ་མཐོང་བས་སེམས་དགའ་བར་གྱུར་ཏེ། སྤོས་དང་ཕྲེང་བ་དང་། 
བྱུག་པ་རྣམས་ཀྱིས་བཙུན་མོ་ལ་ཡང་ལེགས་པར་མཆོད་ནས་ཐལ་མོ་སྦྱར་ཏེ། དེའི་ངག་ཉན་ཅིང་སེམས་བཏུད་ནས་མདུན་དུ་འཁོད་དོ། །རྒྱལ་པོ་གསལ་སྟོབས་ཀྱང་བསོད་ནམས་ཀྱི་རླབས་ཤིན་ཏུ་རྨད་དུ་བྱུང་བ་དེ་མཐོང་ནས་སེམས་ཀྱི་

71-1-5b

རྒྱུད་ཡང་དག་པར་དགའ་བར་གྱུར་ཏེ། འཁོར་དང་བཅས་པར་ཐལ་མོ་སྦྱར་ནས་འཁོད་དོ། །དེ་ནས་བཙུན་མོ་རྣམ་པར་སྤ་བས་དེའི་ཚེ་སྔོན་མ་བྱུང་བའི་ཚིགས་སུ་བཅད་པ་འདི་སྐད་ཅེས་སྨྲས་སོ། །བསོད་ནམས་བསགས་ན་བདེ་བར་
འགྱུར། །དེའི་ཕྱིར་མིས་ནི་བསོད་ནམས་བྱ། །དེ་ཡང་ཡང་དང་ཡང་དུ་བྱ། །དེ་ཉིད་ལ་ནི་འདུན་པར་བྱ། །ཚིགས་སུ་བཅད་པ་འདི་སྨྲས་མ་ཐག་ཏུ་བར་སྣང་ལས་ལེགས་པར་སྨྲས་སོ། །མཆོག་ཏུ་ལེགས་པར་སྨྲས་སོ་ཞེས་སྒྲ་
བྱུང་ངོ་། །ལྷའི་རོལ་མོའྀ་སྒྲ་དག་ཀྱང་སྒྲོགས་སོ། །ལྷའི་གོས་ཤིན་ཏུ་སྤ་བའི་ཆར་ཆེན་པོ་ཡང་བབ་བོ། །དེ་ནས་ཚིགས་སུ་བཅད་པ་འདི་ཐོས་མ་ཐག་ཏུ་རྒྱལ་པོ་གསལ་སྟོབས་དང་། སྐྱེ་བོ་ཕལ་པོ་ཆེ་དེ་དག་དགའ་བར་གྱུར་ཏོ། །
ནམ་མཁའ་ལ་འཁོད་པའི་ལྷ་རྣམས་ཀྱིས་ཀྱང་ཚམ་ཚོམ་མེད་པར་རང་གི་ལུས་ལས་བླ་གོས་དང་རྒྱན་རྣམས་ཕུད་ནས་བཙུན་མོ་རྣམ་པར་སྤ་བ་དང་། སེང་གེའི་ཁྲི་ལ་བཀབ་སྟེ། ཚིག་འཐུན་པར་ལེགས་པར་སྨྲས་སོ། །ལེགས་
པར་སྨྲས་སོ་ཞེས་སྒྲ་ཕྱུང་ངོ་། །དེ་ནས་བཙུན་མོ་དེ་སེང་གེའི་ཁྲི་དེ་ལས་དལ་གྱིས་བབས་ཏེ་ས་ལ་འདུག་ནས་ལྷའི་རོལ་མོའི་སྒྲ་རྣམས་ནི་ཞི་བར་གྱུར། མི་རྣམས་ཀྱི་རོལ་མོའི་སྒྲ་ནི་སྒྲོགས་སོ། །དེ་ནས་རྒྱལ་པོ་དེ་དང་སྐྱེ་བོ་ཕལ་
པོ་ཆེ་དགའ་བར་གྱུར་ནས། བཀུར་སྟི་ཆེན་པོས་མཆོད་ཅིང་བཙུན་མོའི་འཁོར་དུ་བསྐྱལ་ཏེ། བཙུན་མོ་ནང་དུ་སོང་ནས་སེང་གེའི་ཁྲི་དེ་མི་སྣང་བར་གྱུར་ཏོ། །དེ་ནས་སྐྱེ་བོ་ཕལ་པོ་ཆེ་དག་གིས་བསོད་ནམས་ཀྱི་རྣམ་པར་གཡོ་བ་དེ་
མཐོང་སྟེ། སེམས་ཡང་དག་པར་དགའ་བར་གྱུར་ནས། ཀྱེ་མ་བསོད་ནམས་དག་གི་ཆེ་བ་ཉིད། ཀྱེ་མ་བསོད་ནམས་དག་གི་འབྲས་བུ་དངར་བ་ཞེས་ཆེད་དུ་རྗོད་པ་ཆེད་དུ་བརྗོད་དོ། །དེ་ནས་བཙུན་མོ་དེའི་ཡིད་ལ་འདོད་པ་སྐྱེས་པ་གང་
ཡིན་པ་དེ་མེད་པར་གྱུར་ནས། ཕྱིས་རེ་ཤིག་ན་ཟླ་བ་དགུ་ཚང་ནས། བཙུན་མོ་རྣམ་པར་སྤ་བ་ཉི་མ་ཤར་བའི་དུས་ཀྱི་སྐབས་སུ་བུ་བཙས་ཏེ། ཁྱེའུ་གཟུགས་བཟང་ཞིང་བལྟ་ན་སྡུག་ལ་མཛེས་པ་ཞིག་བཙས་སོ། །དེའི་སྐབས་སུ་ཡང་ས་

71-1-6a

རྣམ་པ་དྲུག་ཏུ་གཡོས་ཏེ། ནམ་མཁའ་ལས་ཀྱང་རིན་པོ་ཆེ་སྣ་བདུན་གྱི་ཆར་ཆེན་པོ་བཙུན་མོའི་འཁོར་དུ་བབ་བོ། །རྒྱལ་པོའི་ཕོ་བྲང་འཁོར་དེ་དག་ཐམས་ཅད་དུ་ཡང་གོས་རྣམ་པ་སྣ་ཚོགས་ཀྱི་ཆར་བབ་བོ། །རྒྱལ་པོ་དེའི་ཡུལ་
ཐམས་ཅད་དུ་ཡང་ལྷའི་མེ་ཏོག་མཆོག་ཏུ་ཡིད་དུ་འོང་བའི་ཆར་བབ་བོ། །མེ་ཏོག་དང་འབྲས་བུའི་ཤིང་ལྗོན་པ་ཐམས་ཅད་ལས་ཀྱང་མེ་ཏོག་དང་འབྲས་བུ་རྣམས་འཐོན་ཏོ། །ཆར་ཟིམ་བུ་ཡང་ཐམས་ཅད་དུ་བབ་བོ། །ཕྱོགས་བཞི་ནས་ཀྱང་
སེར་བུ་བསིལ་བ་ལངས་སོ། །དེ་ནས་གཞོན་ནུ་བཙས་མ་ཐག་པ་ཕྱོགས་གང་ན་འདུག་པ་དེར་རྒྱལ་པོ་ཆེན་པོ་བཞིས་ལྷའི་སེང་གེའི་ཁྲི་རིན་པོ་ཆེ་སྣ་ཚོགས་ཀྱིས་སྤྲས་པས་བརྟོལ་ཏེ་གློ་བུར་དུ་ཕུལ་ལོ། །ལྷའི་རྒྱལ་པོ་བརྒྱ་བྱིན་ཡང་
བདག་ཉིད་ལག་དར་ཏེ། གཞོན་ནུའི་སྟེང་དུ་ལྷའི་གདུགས་རྩིབས་བརྒྱ་པ་དང་། རྔ་ཡབ་ནོར་བུའི་ཡུ་བ་ཅན་འཛིན་ཏོ། །དེའི་སྟེང་ན་སུམ་བཅུ་རྩ་གསུམ་གྱི་ལྷ་རྣམས་ལྷའི་གོས་ཀྱི་བླ་རེ་འགྲེམས་སོ། །ལ་ལ་ནི་རིན་པོ་ཆེ་འཐོར་རོ། །ལ་ལ་
ནི་རྒྱན་འཐོར་རོ། །ལ་ལ་ནི་གོས་འཐོར་རོ། །ལ་ལ་ནི་མེ་ཏོག་འཐོར་རོ། །ལ་ལ་ནི་ཕྱེ་མ་འཐོར་རོ། །ལ་ལ་ནི་སྤོས་དང་། ཕྲེང་བ་དང་། བྱུག་པ་རྣམས་འཐོར་རོ། །ལ་ལ་ནི་ལྷའི་རོལ་མོའི་སྒྲ་རྣམས་ལེགས་པར་སྒྲོགས་སོ། །ལྷའི་བུ་ལས་
སྣ་ཚོགས་ཅན་གྱིས་ནི་གྲོང་ཁྱེར་དེ་ཐམས་ཅད་རྡོ་དང་། གསེག་མ་དང་། གྱོ་མོ་རྣམས་མེད་པར་བྱས་ཏེ་བཞག་ནས་དར་གྱི་ལྡ་ལྡི་མང་པོ་ནི་བཏགས། རྒྱལ་མཚན་དང་། བ་དན་ནི་བསྒྲེང་། ཙན་དན་གྱི་ཆུས་ནི་ཆག་ཆག་བཏབ། བདུག་པ་
དྲི་ཞིམ་པོའི་སྣོད་ནི་བཏགས། མེ་ཏོག་སྣ་ཚོགས་ནི་གཏོར་ཏེ། ལྷ་རྣམས་ཀྱི་བསྐྱེད་མོས་ཚལ་དགའ་བའི་ཚལ་ཞེས་བྱ་བ་དང་འདྲ་བར་ཡིད་དུ་འོང་བར་བྱས་སོ། །གླང་པོ་ཆེའི་མཆོག་བརྒྱ་ནི་ནགས་ཁུང་ཆེན་པོ་ནས་རང་འོངས་ཏེ་གླང་པོ་ཆེའི་བྲེས་ན་
གནས་པར་གྱུར་ཏོ། །རྒོད་མ་བརྒྱ་ཡང་རྟེའུ་འབྲངས་འབྲུ་ཐམས་ཅད་ཀྱང་མ་རྨོས་མ་བཏབ་པར་མཐུ་དང་ལྡན་པར་སྨིན་ཏོ། །སེང་གེའི་ཁྲི་དེའི་འོག་ནས་ཀྱང་གཏེར་ཆེན་པོ་ལྔ་རིན་པོ་ཆེ་སྣ་ཚོགས་ཀྱིས་ལེགས་པར་ཡོངས་སུ་གང་བ་རྣམས་ཀྱིས་ཁ་བསྟན་ཏེ་

71-1-6b

གོད་པར་བྱས་ཀྱང་ཡོངས་སུ་ཟད་པར་མི་འགྱུར་རོ། །སེམས་ཅན་ཕན་ཚུན་འཁོད་པ་རྣམས་ཀྱང་དེའི་ཡུད་ཙམ་ལ་བྱམས་པའི་སེམས་སུ་གྱུར་ཏོ། །གཞོན་ནུ་རྫུ་འཕྲུལ་ཆེ་ཞིང་མཐུ་ཆེ་བ་དེ་བཙས་མ་ཐག་ཏུ་ཚེ་རབས་དྲན་ཏེ། ཕྱོགས་བཞིར་བལྟས་
ནས་ཚིགས་སུ་བཅད་དེ་སྨྲས་པ། བསོད་ནམས་བསགས་ན་བདེ་བར་འགྱུར། །དེ་ཕྱིར་མི་ཡིས་བསོད་ནམས་བྱ། །དེ་ཡང་ཡང་དང་ཡང་དུ་བྱ། །དེ་ཉིད་ལ་ནི་འདུན་པར་བྱ། །ཞེས་སྨྲས་སོ། །དེ་ནས་ནམ་མཁའ་ལ་གནས་པའི་ལྷ་རྫུ་འཕྲུལ་ཆེ་
ཞིང་མཐུ་ཆེ་བ་ཞིག་གིས་བསོད་ནམས་དག་གི་ཤིན་ཏུ་རྨད་དུ་བྱུང་བ་ཤིན་ཏུ་ཡིད་དུ་འོང་བ་རྣམ་པར་གཡོ་བ་དེ་མཐོང་ནས་སེམས་ཡང་དག་པར་དགའ་བར་གྱུར་ཏེ། བསོད་ནམས་དག་གི་ཆེ་བ་ཉིད་བསྟན་པའི་ཕྱིར་དེའི་ཚེ་ཚིགས་སུ་བཅད་དེ་སྨྲས་པ། 
བསོད་ནམས་དག་གི་གཡོ་བ་ལྟོས། །རྒྱལ་པོ་ཆེན་པོ་བཞི་རྣམས་དང་། །སུམ་བཅུ་རྩ་གསུམ་དབང་པོར་བཅས། །བསོད་ནམས་ཀྱིས་ནི་དེའི་དབང་བྱས། །ཤེས་སྨྲས་སོ། །དེ་ནས་རྒྱལ་པོ་དེ་བཙུན་མོའི་འཁོར་དང་། སྲས་དང་། བློན་པོ་དང་། 
ཕོ་བྲང་འཁོར་ཀྱི་མི་དང་། ཡུལ་གྱི་མི་དང་བཅས་པས་ཕུན་སུམ་ཚོགས་པ་དེ་དག་མཐོང་ནས་ཡ་མཚན་གྱིས་མིག་རྒྱས་པར་གྱུར་ཏེ། མཆོག་ཏུ་ཡ་མཚན་དུ་གྱུར་ནས། ཀྱེ་མ་གཞོན་ནུའི་བསོད་ནམས་ཀྱི་སྟོབས། ཀྱེ་མ་གཞོན་ནུའི་བསོད་ནམས་
ཀྱིས་ཆེར་གྲགས་པ་འདི་ལྟར་འདི་མིར་གྱུར་ཏུ་ཟིན་ཀྱང་འདི་ལྟ་བུར་ལྷའི་འབྱོར་པ་རྒྱས་པ་བྱུང་བར་གྱུར་པ་འདི་ནི་ཡ་མཚན་ཆེའོ་ཞེས་ཆེད་དུ་རྗོད་པ་ཆེད་དུ་བརྗོད་དོ། །དེ་ནས་རྒྱལ་པོ་སེམས་རབ་ཏུ་དགའ་ཞིང་བུ་སྙིང་དུ་སྡུག་ནས་དཀོར་པ་རྣམས་ལ་བསྒོ་
སྟེ། བཀའ་སྙན་གསོལ་པ་རྣམས་ཀྱི་ཕྱིར་རྒྱལ་པོའི་ར་བར་གསེར་དངུལ་གྱི་ཕུང་པོ་སྤུངས་ནས་སྦྱིན་པ་དག་བྱིན་ཏེ་བསོད་ནམས་དག་བྱས་སོ། །ནོར་མེད་པ་དུ་མ་ནི་ནོར་དང་ལྡན་པ་ལ་བཀོད་དོ། །དེ་ནས་རེ་ཤིག་ན་འབྱོར་པ་ཆེན་པོ་རྒྱས་པས་དེ་བཙས་
པའི་བཙས་སྟོན་བྱས་ནས་མིང་འདོགས་པར་བྱེད་དེ་གཞོན་ནུའི་མིང་ཅིར་གདགས་ཤེས་ཟེར་རོ། །དེ་ནས་བློན་པོ་དག་གིས་གསོལ་པ། ལྷ་གང་གི་སླད་དུ་སྲས་འདི་བསོད་ནམས་ཀྱི་སྟོབས་རྒྱས་ཤིང་། དེ་བཙས་པ་ན་འདི་ལྟ་བུར་ལྷའི་འབྱོར་པ་

71-1-7a

བྱུང་བར་གྱུར་པས་ན། དེའི་ཕྱིར་སྲས་འདིའི་མཚན་ནི་བསོད་ནམས་སྟོབས་ཤེས་གདགས་པའི་རིགས་སོ། །དེ་ནས་དེའི་མིང་བསོད་ནམས་ཀྱི་སྟོབས་ཤེས་བཏགས་སོ། །དེ་ནས་གཞོན་ནུ་བསོད་ནམས་སྟོབས་པང་ན་འཚོ་
བའི་མ་མ་གཉིས་དང་ནུ་མ་སྣུན་པའི་མ་མ་གཉིས་དང་། དྲི་མ་འཁྲུ་བའི་མ་མ་གཉིས་དང་། རྩེ་བའི་མ་མ་གཉིས་ཏེ་མ་མ་བརྒྱད་ལ་གཏད་ནས། མ་མ་བརྒྱད་པོ་དེ་དག་གིས་འོ་མ་དང་། ཞོ་དང་། མར་དང་། ཞུན་མར་དང་། མར་གྱི་སྙིང་ཁུ་དང་། 
གཞན་ཡང་ཡོ་བྱད་ཀྱི་ཁྱད་པར་བཟང་ངོ་ཅོག་གིས་བསྐྱེད་བསྲིངས་ཏེ་རྫིང་བུའི་པདྨ་བཞིན་དུ་སྐྱེ་དྲག་པར་གྱུར་ཏོ། །གང་གི་ཚེ་དེ་ཆེར་སྐྱེས་པ་དེའི་ཚེ་ཡི་གེ་སློབ་དུ་བཅུག་སྟེ། དེས་ཡི་གེ་མཐར་ཕྱིན་ནས་དེ་རྒྱལ་པོ་རྒྱལ་རིགས་དག་གི་གནས་
ལྔ་རྣམས་ཀྱི་བར་གང་ཡིན་པ་དེ་དག་ལ་བྱང་བར་གྱུར་ཏོ། །གཞོན་ནུ་བསོད་ནམས་སྟོབས་དེ་ཡང་དད་པ་དང་ལྡན་ལ་དགེ་ཞིང་བསམ་པ་བཟང་བ། བདག་ལ་ཕན་པ་དང་། གཞན་ལ་ཕན་པ་ལ་ཞུགས་པ། སྙིང་རྗེ་ཅན། བདག་ཉིད་ཆེ་བ་ཆོས་འདོད་པ་
སྐྱེ་དགུ་ལ་བྱམས་པ། གཏོང་བ་ལ་སྲེད་པ། སྦྱིན་པ་ལ་དགའ་བ། རབ་ཏུ་སྦྱིན་པ་ལ་མངོན་པར་དགའ་བ་ཐམས་ཅད་སྦྱིན་པ། ཐམས་ཅད་ཡོངས་སུ་གཏོང་བ། ཆགས་པ་མེད་པར་ཡོངས་སུ་གཏོང་བ། གཏོང་བ་ཆེན་པོ་ལ་གནས་པ་ཞིག་སྟེ། འདི་ལྟར་དགེ་
སྦྱོང་དང་བྲམ་ཟེ་དང་། བཀྲེན་པ་དང་། སྡུག་ཅིང་ཕོངས་པ་རྣམས་ལ་ཐ་ན་རང་གི་ཤའི་བར་དུ་དེས་མ་བྱིན་པ་དང་། ཡོངས་སུ་མ་བཏང་བ་ཅི་ཡང་མེད་དོ། །དེ་ལ་སློང་བ་དག་འོངས་ཏེ་སློང་ན་དེའི་ཚེ་དེ་དག་ལ་བྱམས་པའི་སེམས་ཀྱིས་ཉེ་བར་གནས་ཏེ། 
ནམ་མཁའ་ལ་བལྟས་ནས་ཀྱེ་མ་འདི་ལྟར་གསེར་རམ། དངུལ་ལམ། གོས་སམ། བཟའ་བ་འམ། བཅའ་བ་འམ། བཏུང་བ་འམ། མལ་སྟན་ནམ། གཞན་ཡང་གང་ཅི་ཡང་རུང་སྟེ་ཅི་འདོད་པ་དེ་དང་དེ་དག་ནམ་མཁའ་ལས་བདག་ལ་འོངས་ཀྱང་ཅི་མ་རུང་སྙམ་དུ་
སེམས་བསྐྱེད་དེ། དེས་སེམས་བསྐྱེད་ན་དེ་ལ་འོང་བར་འགྱུར་ལ་སུ་ཡང་དོན་དེ་མི་ཤེས་སོ། །དེས་ཡོ་བྱད་དེ་དག་གིས་སློང་བ་དག་གི་བསམ་པ་ཡོངས་སུ་རྫོགས་པར་བྱས་ནས་ཕྱིར་འདོང་ངོ་། །དེའི་གྲགས་པས་འཛམ་བུའི་གླིང་ཐམས་ཅད་ཀུན་ཏུ་གང་བར་

71-1-7b

གྱུར་ཏེ། འོག་ཏུ་ཀླུའི་འཇིག་རྟེན་ཐམས་ཅད་ནས་སྟེང་དུ་ཚངས་པའི་འཇིག་རྟེན་གྱི་བར་དུ་སྒྲ་གྲགས་སོ། །དེ་ནས་ཕྱིས་རེ་ཤིག་ན་གཞོན་ནུ་བསོད་ནམས་སྟོབས་ཕུ་བོ་བཞི་དང་ལྷན་ཅིག་ཏུ་འབྱོར་བ་མཆོག་གིས་བསྐྱེད་མོས་ཚལ་དུ་འཁྱམ་དུ་དོང་ངོ་། །
དེ་བར་གྱི་ལམ་དུ་ཡི་དགས་མཆུ་ཁབ་ཙམ་ལ་ལྟོ་རི་རབ་ཙམ་སྟེ། ཀེང་རུས་བསྒྲེང་བ་འདྲ་ཞིང་ལུས་ཤིན་ཏུ་འབར་བ་ཐལ་མོ་སྦྱར་བ་སྟོང་ཕྲག་དུ་མ་དག་གིས་ཡོངས་སུ་བསྐོར་ཏེ། གཞོན་ནུ་བསོད་ནམས་སྟོབས་མ་གཏོགས་པར་སུས་ཀྱང་ཡི་དགས་
དེ་དག་མི་མཐོང་ངོ་། །དེ་ནས་ཡི་དགས་དེ་དག་གིས་གཞོན་ནུ་བསོད་ནམས་སྟོབས་ལ་སྨྲས་པ། གཞོན་ནུ་ཁྱོད་བསོད་ནམས་ཀྱིས་ཆེ་བར་གྲགས་པ། སྙིང་རྗེ་ཆེན་པོ་ཡིན་ན། བདག་ཅག་བཀྲེས་ཤིང་སྐོམ་པས་ཉམ་ཐག་པ་རྣམས་ལ་ཟས་དང་སྐོམ་
བྱིན་ཅིག །བདག་ཅག་ནི་སེར་སྣའི་དབང་དུ་གྱུར་ཏེ། ཡི་དགས་ཀྱི་འཇིག་རྟེན་དུ་སྐྱེས་པས་ལོ་བརྒྱ་ཕྲག་དུ་མར་ཡང་ཆུ་ཡང་མི་རྙེད་ན་ཁ་ཟས་ལྟ་ག་ལ་མཐོང་། དེ་སྐད་ཅེས་སྨྲས་ནས་གཞོན་ནུ་བསོད་ནམས་སྟོབས་ཀྱི་སེམས་སྙིང་རྗེས་ཀུན་ཏུ་
བསྐྱོད་ནས་སྐྱེན་པར་ནམ་མཁའ་ལ་བལྟས་ཏེ། ཀྱེ་མ་ལྷའི་བཟའ་བ་དང་བཏུང་བ་བདག་ལ་འོངས་ཀྱང་ཅི་མ་རུང་སྙམ་དུ་སེམས་བསྐྱེད་དོ། །དེ་ནས་གློ་བུར་དུ་ལྷའི་བཟའ་བ་དང་བཏུང་བ་ནམ་མཁའ་ལས་འོངས་སོ། །དེ་ནས་གཞོན་ནུ་
བསོད་ནམས་སྟོབས་ཀྱིས་ཡི་དགས་རྣམས་ལྷའི་བཟའ་བ་དང་བཏུང་བས་ཡང་དག་པར་ཚིམ་པར་བྱ་བ་ལ་ཞུགས་སོ། །དེ་ནས་རེ་ཤིག་ན་ཡི་དགས་དེ་དག་གིས་སྔོན་གྱི་ལས་ཀྱི་ཉེས་པས་བཟའ་བ་དང་། བཏུང་བ་དེ་དག་མ་མཐོང་ནས་
འདི་སྐད་ཅེས་སྨྲས་ཏེ། གཞོན་ནུ་ཁྱོད་སྙིང་རྗེ་ཅན་ཞིག་ཅེས་གྲགས་ན། ཅིའི་ཕྱིར་བདག་ཅག་ཚིམ་པར་མི་བྱེད། གཞོན་ནུས་སྨྲས་པ། ལྷའི་བཟའ་བ་དང་བཏུང་བ་འདི་དག་བྱིན་པ་ཡིན་ན། ཁ་ཟས་འདི་དག་ལས་ཅི་ཉེས་ཏེ་མི་ཟ། 
ཡི་དགས་རྣམས་ཀྱིས་སྨྲས་པ། གཞོན་ནུ་བདག་ཅག་ནི་སྔོན་གྱི་ལས་ཀྱི་ཉེས་པས་ལྷའི་བཟའ་བ་དང་བཏུང་བ་དེ་དག་མི་མཐོང་ངོ་། །དེ་ནས་གཞོན་ནུ་བསོད་ནམས་སྟོབས་མི་དགའ་ནས་ཀྱེ་མ་སེར་སྣའི་རྣམ་པར་གཡོ་བ་སྙམ་དུ་

71-1-8a

ཡིད་ལ་བསམས་ཏེ། ཡི་དགས་དེ་དག་ལ་བྱམས་པས་ཁྱབ་པར་བྱས་ནས་སེམས་བསྐྱེད་དེ་ཚིག་ཏུ་སྨྲས་པ། ཇི་སྟེ་བསོད་ནམས་དག་གི་མཐུ་ཡོད་ན་བདེན་པ་དེ་དང་། བདེན་པའི་ཚིག་དེས་ཡི་དགས་འདི་དག་གིས་
ལྷའི་བཟའ་བ་དང་བཏུང་བ་འདི་དག་ཡང་དག་པ་ཇི་ལྟ་བ་བཞིན་དུ་མཐོང་ཞིང་ཟ་བའི་མཐུ་ཡོད་པར་གྱུར་ཅིག་ཅེས་གཞོན་ནུས་ཚིག་ཏུ་བརྗོད་མ་ཐག་ཏུ་ཡི་དགས་རྣམས་ཀྱིས་ལྷའི་བཟའ་བ་དང་བཏུང་བ་དེ་དག་ལོག་པར་མི་མཐོང་ཞིང་
དེ་དག་གི་ཁ་ཡང་ཐ་མལ་དུ་གྱུར་ཏོ། །དེ་ནས་གཞོན་ནུ་བསོད་ནམས་སྟོབས་ཡིད་རབ་ཏུ་དགའ་བས་ཡི་དགས་དེ་དག་ལྷའི་བཟའ་བ་དང་བཏུང་བས་ཚིམ་པར་བྱས་ཏེ། དེ་དག་གིས་བཟའ་བ་དང་བཏུང་བ་སྔོན་མ་མྱོང་བ་ཐོབ་ནས་བཀྲེས་པ་
དང་སྐོམ་པ་ཤིན་ཏུ་མི་བཟད་པ་ཆེན་པོའི་དབང་དུ་གྱུར་པས་ཧ་ཅང་མང་དུ་ཟོས་ཏེ། གསུས་པ་རྡོལ་ནས་དེ་དག་གཞོན་ནུ་བསོད་ནམས་སྟོབས་ལ་སེམས་མངོན་པར་དགའ་བཞིན་དུ་ཤི་སྟེ། དགའ་ལྡན་གྱི་ལྷའི་རིས་སུ་སྐྱེས་ནས་གཞོན་ནུ་
བསོད་ནམས་སྟོབས་ལ་གཞོན་ནུ་ཁྱོད་ཀྱིས་བདག་ཅག་དགའ་ལྡན་གྱི་ལྷའི་རིས་སུ་བཀོད་ཀྱིས་མཆོག་ཏུ་དགའ་བ་སྐྱེད་ཅིག །ད་ནི་ཁྱོད་ཉིད་ལས་བརྟེན་ཏེ་སྦྱིན་པ་དག་སྦྱིན་ཞིང་བསོད་ནམས་དག་བྱའོ་ཞེས་སྨྲས་སོ། །དེ་ནས་གཞོན་ནུ་
བསོད་ནམས་སྟོབས་མཆོག་ཏུ་དགའ་བ་སྐྱེས་ནས་ལེགས་སོ་ཞེས་སྨྲས་ཏེ། བསྐྱེད་མོས་ཚལ་ཉིད་དུ་སོང་ངོ་། །དེ་ནས་བསྐྱེད་མོས་ཚལ་དེར་འདུག་ནས་མི་རྣམས་ཀྱི་ཉམས་སུ་དཔེན་པ་གང་ཡིན་ཞེས་ཡང་དག་པའི་གཏམ་འདི་ལྟ་བུ་
གློད་ཅིང་ངེས་པར་བྱེད་དོ། །དེ་ནས་གཞོན་ནུ་གཟུགས་དང་ལྡན་པ་ན་རེ་འདི་ལ་གདོད་བརྟག་ཏུ་ཅི་ཡོད། འདི་ནི་འཇིག་རྟེན་གྱིས་རྟོགས་པ་ཁོ་ན་སྟེ། འདི་ལྟར་བྱད་གཟུགས་ནི་མི་རྣམས་ཀྱི་ཉམས་སུ་དཔེན་པ་ཡིན་ནོ། །དེ་ཅིའི་ཕྱིར་ཞེ་ན། 
བྱད་གཟུགས་དང་ལྡན་པ་མཐོང་ན་སྔོན་མ་མཐོང་བའི་སྐྱེ་བོ་ཡང་མཆོག་ཏུ་དགའ་བར་འགྱུར་ལ་མངོན་པར་དགའ་བ་མ་ཡིན་པ་རྣམས་ཀྱང་དགའ་བར་འགྱུར་བའི་ཕྱིར་རོ། །སྔོན་གྱི་དྲང་སྲོང་དག་གིས་ཀྱང་བྱེད་གཟུགས་བཟང་བ་འདི་ནི་

71-1-8b

རྙེད་པ་རྣམས་ཀྱི་ཕྱེད་དོ་ཞེས་སྨྲས་པ་ཡིན་ནོ། །གཞན་ཡང་ཁྱེད་ཀྱིས་ལྟོས་དང་ཡིད་དུ་འོང་བའི་གཟུགས་དང་ལྡན་པ་ནི་མཐོང་བ་ཙམ་གྱིས་མི་རྣམས་དགའ་བར་འགྱུར་ཏེ། དམ་པ་རྣམས་ཀྱིས་ཆོས་ཀྱི་མཆོག་ལ་བྱ་བ་བཞིན་དུ་སྙིང་ནས་བཀུར་
བར་བྱེད་དོ། །དེ་ནས་གཟུགས་དང་ལྡན་པའི་ཚིག་འདི་ཐོས་ནས་བརྩོན་འགྲུས་ཅན་གྱིས་སྨྲས་པ། གཟུགས་དག་གིས་བྱར་ཅི་ཡོད་དེ། བརྩོན་འགྲུས་འབའ་ཤིག་མི་རྣམས་ཀྱི་ཉམས་སུ་དཔེན་པ་ཡིན་ནོ། །དེ་ཅིའི་ཕྱིར་ཞེ་ན། བྱད་གཟུགས་
དང་ལྡན་ལ་བརྩོན་འགྲུས་མེད་པ་ལ་ནི་ཚེ་འདི་འམ་ཚེ་ཕྱི་མའི་འདོད་པའི་འབྲས་བུ་ཅི་ཡང་མི་སྣང་མི་གྲག་སྟེ། བྱད་གཟུགས་ཉམས་སུ་དཔེན་ཞེས་བྱ་བ་འདི་ནི་བྱིས་པ་སྐྱེ་བོ་རྨོངས་པར་བྱེད་པར་ཟད་པའི་ཕྱིར་རོ། །བརྩོན་འགྲུས་ནི་ཚེ་
འདི་ཉིད་ལ་ཡང་འདོད་པའི་འབྲས་བུ་འགྲུབ་པར་བྱེད་དེ། འདི་ལྟ་སྟེ་ཞིང་རྨེད་པ་རྣམས་ཀྱི་འབྲུ་དང་། ཚོང་པ་རྣམས་ཀྱི་ཁེ་དང་། ཞབས་འབྲིང་བྱེད་པ་རྣམས་ཀྱི་འཚོ་བ་དང་། མི་སྟོད་རིམས་རྣམས་ཀྱི་བསྟན་བཅོས་རྟོགས་པར་བྱ་
བ་དང་། བསམ་གཏན་པ་རྣམས་ཀྱི་བསམ་གཏན་གྱི་འབྲས་བུ་ཐོབ་པར་བྱ་བ་དང་། དེ་ལ་སོགས་པ་བརྩོན་འགྲུས་ཀྱི་ཚེ་འདིའི་འདོད་པའི་འབྲས་བུ་སྣང་ངོ་། །ཚེ་ཕྱི་མའི་འབྲས་བུ་ནི་འདི་ལྟ་སྟེ། བདེ་འགྲོ་དང་མཐོ་རིས་ཀྱི་འཇིག་རྟེན་
དང་། ལོངས་སྤྱོད་ཆེན་པོ་དང་། ཐར་པ་ཐོབ་པ་དང་། དེ་ལ་སོགས་པ་བརྩོན་འགྲུས་ཀྱི་ཚེ་ཕྱི་མའི་འབྲས་བུ་ཡང་སྣང་ངོ་། །གཞན་ཡང་བརྩོན་འགྲུས་ནི་ཡོན་ཏན་ཐམས་ཅད་ཀྱི་གཞིར་གྱུར་པ་དང་། གནོད་པ་རྣམས་ཟློག་པ་ཡིན་ཏེ། 
བརྩོན་འགྲུས་ལ་ནི་བསྒྲུབ་དཀའ་བ་ཅི་ཡང་མེད་དོ་ཞེས་བརྩོན་འགྲུས་ཅན་གྱིས་དེ་སྐད་ཅེས་སྨྲས་པ་ལ་བཟོ་དང་ལྡན་པས་བརྒད་དེ་སྨྲས་པ། ཁྱོད་ཀྱི་བདེན་ཞིང་མང་ལ་རྣམ་པ་སྣ་ཚོགས་ནི་སྨྲ་མོད་ཀྱི་ངའི་སེམས་ནི་མ་མགུའོ། །
དེ་ཅིའི་ཕྱིར་ཞེ་ན། བཟོ་དང་བྲལ་བའི་བརྩོན་འགྲུས་ཀྱིས་ནི་འབྲས་བུ་ཅི་ཡང་འགྲུབ་པ་མ་མཐོང་གི་བཟོ་དང་ལྡན་པ་ནི་འབྲས་བུ་ཡོད་པར་མཐོང་བའི་ཕྱིར་རོ། །དེ་བས་ན་བཟོ་འབའ་ཤིག་མི་རྣམས་ཀྱི་ཉམས་སུ་དཔེན་པ་ཡིན་ནོ། །

71-1-9a

གཞན་ཡང་བཟོ་བོ་རིགས་དམའ་བར་སྐྱེས་སུ་ཟིན་ཀྱང་རྒྱལ་པོ་རྣམས་དང་། བློན་པོ་རྣམས་དང་། བྲམ་ཟེ་དང་། ཁྱིམ་བདག་རྣམས་ཀྱིས་གདོན་མི་ཟ་བར་བཀུར་རོ། །སྣ་ཚོགས་ལས་ཅན་ལྷ་རྣམས་དང་། །མི་རྣམས་ཀྱིས་
ཀྱང་ལེགས་པར་བཀུར། །དེ་བཞིན་མ་རབས་བཟོ་ཡི་ཕྱིར། །མི་དང་ལྷ་རྣམས་ཀྱིས་ཀྱང་བཀུར། །བཟོ་དང་ལྡན་པས་སྨྲས་པ་ལ་ཤེས་རབ་ཅན་གྱིས་ཡིད་ཙམ་གྱིས་བརྒད་དེ་སྨྲས་པ། ཤེས་རབ་བཞིན་དུ་མི་རྣམས་ཀྱི་ཉམས་སུ་བྱེད་གཟུགས་
ཀྱང་དཔེན་པ་མ་ཡིན། བརྩོན་འགྲུས་ཀྱང་དཔེན་པ་མ་ཡིན། བཟོ་ཡང་དཔེན་པ་མ་ཡིན་ནོ། །དེ་ཅིའི་ཕྱིར་ཞེ་ན། ཤེས་རབ་འཆལ་པ་ནི་གཟུགས་བཟང་བ་མཐོང་ན་ཡང་རྐྱེན་དུ་འབབ་པར་འཛེམ་པ་མ་ཡིན་ལ། བརྩོན་འགྲུས་ཀྱིས་ཀྱང་དོན་
དུ་སྐྱེ་བར་མི་འགྱུར། བཟོ་ཡང་ཤེས་རབ་མེད་ན་ཤེས་པར་མི་ནུས་པའི་ཕྱིར་རོ། །དེ་བས་ན་ཤེས་རབ་འབའ་ཤིག་དོན་ཐམས་ཅད་བསྒྲུབ་པ་ལ་མི་རྣམས་ཀྱི་ཉམས་སུ་དཔེན་པ་ཡིན་ནོ། །གཞན་ཡང་ཤེས་རབ་ཀྱིས་ནི་གཟུགས་དང་
བཟོ། །བརྩོན་འགྲུས་ནོར་ཡང་ཐོབ་པར་འགྱུར། །མི་རྣམས་ལེགས་དང་བདེ་བ་ཆེ། །ཤེས་རབ་ཀྱིས་ནི་ཐམས་ཅད་འཐོབ། །ཅེས་ཤེས་རབ་ཅན་གྱིས་དེ་སྐད་སྨྲས་པ་ལ་གཞོན་ནུ་བསོད་ནམས་སྟོབས་ཀྱིས་བཞིན་འཛུམ་དམུལ་ནས་
བསོད་ནམས་དག་གི་སྟོབས་དངོས་སུ་ཁ་ནས་བྱུང་བཞིན་དུ་སྨྲས་པ། ཤེས་རབ་དང་བྲལ་བའི་གཟུགས་དང་། བཟོ་དང་། བརྩོན་འགྲུས་ཐམས་ཅད་ནི་ཉམས་སུ་དཔེན་པ་མ་ཡིན་ལ། ཤེས་རབ་ཀྱིས་ཡོངས་སུ་ཟིན་པ་ནི་འབྲས་བུ་དང་
བཅས་ཤིང་ཉམས་སུ་དཔེན་པ་ཡིན་ཏེ། དེ་ནི་བདེན་པ་ཁོ་ན་མོད་ཀྱི་འོན་ཀྱང་ཤེས་རབ་དེ་ཡང་བསོད་ནམས་མེད་པར་ཐོབ་པར་མི་འགྱུར་ཏེ། དེ་བས་ན་བསོད་ནམས་འབའ་ཤིག་མི་རྣམས་ཀྱི་ཉམས་སུ་དཔེན་པ་ཡིན་ནོ། །བསོད་
ནམས་ཤེས་བྱ་བ་ནི་གཅིག་ཏུ་སྡུག་པའི་འབྲས་བུ་རྣམས་དང་། ཕངས་པའི་འབྲས་བུ་རྣམས་དང་། དགའ་བའི་འབྲས་བུ་རྣམས་དང་། ཡིད་དུ་འོང་བའི་འབྲས་བུ་རྣམས་དང་། ཡིད་དང་འཐད་པའི་འབྲས་བུ་རྣམས་ཀྱི་གཙོ་བོ་ཡིན་

71-1-9b

ཏེ། ཡོན་ཏན་མ་ལུས་པར་ངས་བརྗོད་མི་ནུས་མོད་ཀྱི། ཁྱོད་ཁོང་དུ་ཆུད་པར་བྱ་བའི་ཕྱིར་བསོད་ནམས་དག་གི་ཡོན་ཏན་ཕྱོགས་གཅིག་ཙམ་བཤད་པར་བྱས་ཉོན་ཅིག །བསོད་ནམས་དག་གིས་བྱད་གཟུགས་འཐོབ། །བསོད་ནམས་ཀྱིས་ནི་
ཚུལ་ཁྲིམས་ལྡན། །བསོད་ནམས་དག་གིས་དཔལ་འཐོབ་ཅིང་། །དེ་བཞིན་ལོངས་སྤྱོད་ཅན་དུ་འགྱུར། །བསོད་ནམས་དག་གིས་ཤེས་རབ་འཐོབ། །སྙན་དངགས་སྦྱོར་མཆོག་བསོད་ནམས་ཀྱིས། །བསོད་ནམས་དག་གིས་ཡིད་གཞུངས་འཐོབ། །
བསོད་ནམས་དག་གིས་བཟང་འགྲོ་འཐོབ། །བསོད་ནམས་ཀྱིས་ནི་རིགས་མཐོར་སྐྱེ། །བསོད་ནམས་ཀྱིས་ནི་སྐྱེ་བ་དྲན། །བསོད་ནམས་དག་གིས་གྲགས་པ་ཐོབ། །བསོད་ནམས་དག་གིས་ངང་ཚུལ་ཅན། །བསོད་ནམས་དག་གིས་གཏོང་
ལྡན་འགྱུར། །བསོད་ནམས་དག་གིས་དབང་པོ་ཚང་། །བསོད་ནམས་དག་གིས་བདེ་བ་འཐོབ། །བསོད་ནམས་དག་གིས་མཁས་པས་མཆོད། །བསོད་ནམས་དག་གིས་སྟོབས་འཐོབ་ཅིང་། །དམ་པ་ཕྲད་པ་བསོད་ནམས་ཀྱིས། །བསོད་ནམས་
དག་གིས་དོན་ཀུན་འཐོབ། །འདིར་ནི་ཡོན་གནས་སུ་ཡང་རུང་། །ཅི་སྟེ་ཞིང་ལས་ཚོང་ཡང་རུང་། །མི་ནི་སྐྱིད་འདོད་ཕྱིར་བྱེད་ན། །ཅུང་ཟད་བྱས་པས་བསོད་ནམས་ཀྱིས། །ལོངས་སྤྱོད་རྒྱ་ཆེན་ཚོགས་ཀྱང་འཐོབ། །བསོད་ནམས་བྱེད་རྣམས་བསོད་
ནམས་ཀྱིས། །བསམས་པ་ཙམ་གྱིས་ནམ་མཁའ་ལས། །གོས་དང་ཟས་སྐོམ་རིན་ཆེན་རྣམས། །ཐམས་ཅད་བདེ་བར་འཐོབ་པར་འགྱུར། །ཡིད་འོང་ཁྱིམ་རྣམས་བསོད་ནམས་ཀྱིས། །བསོད་ནམས་དག་གིས་བུད་མེད་མཆོག །
བསོད་ནམས་ཆེན་པོས་ནོར་དང་འབྲུ། །དེ་ཡི་འདོད་དགུ་འབྱུང་བར་འགྱུར། །བསོད་ནམས་དག་གིས་འགྲོ་བ་ན། །ས་ནི་སྡོང་དུམ་ཚེར་མ་མེད། །བསོད་ནམས་ཇི་ལྟར་ལྡན་པ་བཞིན། །མཉམ་གནས་ཡང་ན་གོས་ཀྱང་བཏིང་། །ཇི་ལྟར་རེ་བ་
ཙམ་གྱིས་ན། །ནད་པ་དག་ནི་སོས་འགྱུར་བཞིན། །བསོད་ནམས་དག་གིས་རེག་གྱུར་ན། །ཟས་སྐོམ་དེ་བཞིན་གཉིས་ཀ་དང་། །གོས་དང་རིན་ཆེན་འབྲུ་དག་ཀྱང་། །རྟག་ཏུ་ཟད་པར་མི་འགྱུར་རོ། །ལྷ་ཀླུ་ལྷ་མིན་གནོད་སྦྱིན་དང་། །

71-1-10a

ཡི་དགས་ལྟོ་འཕྱེ་མི་རྣམས་ཀྱང་། །བསོད་ནམས་བདག་ཉིད་ཆེ་བའི་ཕྱིར། །དུག་དང་གནོད་པ་རྣམས་ལས་སྲུང་། །བསོད་ནམས་དག་གིས་བསྙེན་བཀུར་འཐོབ། །སྐྱེ་བོ་མང་དགའ་བསོད་ནམས་ཀྱིས། །བསོད་ནམས་དག་གིས་
གྲགས་ལྡན་འགྱུར། །བསོད་ནམས་དག་གིས་སྐལ་བཟང་འཐོབ། །བསོད་ནམས་དག་གིས་ཚིག་ཀྱང་བཙན། །བསོད་ནམས་དག་གིས་སྡུག་གུར་འགྱུར། །ཚངས་པའི་དབྱངས་འཐོབ་བསོད་ནམས་ཀྱིས། །བསོད་ནམས་ཀྱིས་ནི་ལུས་མདོག་
སྡུག །བསོད་ནམས་དག་གིས་ཚིག་ཀྱང་བཟང་། །དྲན་ལྡན་མཛའ་ལྡན་གཙོ་བོར་འགྱུར། །དེ་དང་དེར་ནི་མཁས་པར་འོང་། །མི་ཕྱེད་པ་ཡི་འཁོར་དང་ལྡན། །བསོད་ནམས་ཅན་ནི་ནད་མེད་ཅིང་། །སྨོན་པའི་གནས་འགྱུར་བསོད་ནམས་ཀྱིས། །བསོད་
ནམས་རྙེད་ལྡན་གཟི་བྱིན་ཡོད། །བསོད་ནམས་དག་གིས་རྒྱལ་སྲིད་འཐོབ། །འགྲན་ཟླ་མེད་ཅིང་གནོད་པ་མེད། །ལོངས་སྤྱོད་མི་ཉམས་བསོད་ནམས་ཀྱིས། །བསོད་ནམས་དག་གིས་གཏེར་ཡང་རྙེད། །འཁོར་ལོས་སྒྱུར་འགྱུར་བསོད་ནམས་
ཀྱིས། །རིན་ཆེན་བདུན་ནི་མདུན་དུ་འགྲོ། །ནམ་མཁའི་བར་ནས་ཀུན་ཏུ་རྒྱུ། །ཉི་ཟླ་དང་ཡང་གཟི་བྱིན་མཉམ། །ཟླ་བ་ཉིད་འཐོབ་བསོད་ནམས་ཀྱིས། །བསོད་ནམས་ཀྱིས་འཐོབ་ཉི་མ་ཉིད། །ཚངས་པ་ཉིད་འཐོབ་བསོད་ནམས་ཀྱིས། །
བསོད་ནམས་ཀྱིས་འཐོབ་བརྒྱ་བྱིན་ཉིད། །གཞལ་མེད་ཁང་ནང་རྒྱུ་བ་ཡི། །བསོད་ནམས་ཀྱིས་ནི་ལྷར་ཡང་འགྱུར། །བསོད་ནམས་དེ་བཞིན་ལྷ་ཡི་བུ། །ལྷ་མིན་དབང་པོ་སྟོབས་པོ་ཆེ། །བསོད་ནམས་དག་གིས་ངན་འགྲོ་སྤོང་། །
བསོད་ནམས་ཀྱིས་ནི་བདེ་འགྲོར་འགྲོ། །ཤིན་ཏུ་ཡིད་འོང་རབ་དཀོན་པའི། །མེ་ཏོག་བསོད་ནམས་དག་གིས་རྙེད། །བསོད་ནམས་དག་གིས་གྲུབ་པ་འཐོབ། །འགྲོ་བ་སྣང་བྱེད་བསོད་ནམས་ཀྱིས། །ལྷ་དང་ལྷ་མིན་མི་རྣམས་ཀྱིས། །
ཡང་དག་མཆོག་འགྱུར་བསོད་ནམས་ཀྱིས་ཤེས་རབ་གཞོན་ནུ་བསོད་ནམས་སྟོབས་ཀྱིས་དེ་སྐད་ཅེས་སྨྲས་ན། འོན་ཀྱང་རང་རང་གི་ཕྱོགས་འཛིན་པས་ཁས་མི་ལེན་ཏོ། །དེ་ནས་བསོད་ནམས་སྟོབས་ཀྱིས་དེ་དག་ལ་ཡང་སྨྲས་པ་ཀྱེ་ཚུར་ཤོག་བདག་

71-1-10b

ཅག་ཤིན་ཏུ་རིང་བ་གཞན་གྱི་ཡུལ་ཞིག་ཏུ་དོང་སྟེ། ཆ་ལུགས་མི་མངོན་པར་འཁོད་ན། འདི་ལྟར་ཅི་གཟུགས་མི་རྣམས་ཀྱི་ཉམས་སུ་དཔེན་པ་ཡིན་ནམ། འོན་ཏེ་བརྩོན་འགྲུས་སམ་བཟོ་འམ། ཤེས་རབ་འམ། བསོད་ནམས་སུ་དཔེན་པ་ཤེས་
པར་འགྱུར་རོ། །དེ་ནས་གཞོན་ནུ་དེ་དག་གིས་དེ་ལྟར་བྱའོ་ཞེས་བྱས་ནས་གཞོན་ནུ་བསོད་ནམས་སྟོབས་ཀྱི་ལྟར་མཉན་ཏེ། ཡབ་ལ་མ་གསོལ་བར་ཚམ་ཚོམ་མེད་པར་ཤིན་ཏུ་རིང་བ་རྒྱལ་ཁམས་གཞན་དང་། ཡུལ་གཞན་དུ་དོང་ནས་རྒྱལ་པོ་
འི་ཕོ་བྲང་འཁོར་གཞན་ཞིག་ཏུ་ཞུགས་ཏེ། ཆ་ལུགས་མི་མངོན་པར་འཁོད་དོ། །དེ་ནས་གཟུགས་དང་ལྡན་པ་ནི་མཐོང་ན་ཡིད་དུ་འོང་བས་བསྡུས་པའི་སྐྱེ་བོ་དག་གིས་བཤུགས་པའི་ལོངས་སྤྱོད་ཙམ་ཀྱིས་འཚོའོ། །བརྩོན་འགྲུས་ཅན་ནི་ཆུ་ཀླུང་
ཤུགས་དྲག་ཅིང་མགྱོགས་ལ་ཤིན་ཏུ་ཟབ་ཅིང་མཐོང་ནས་འཇིགས་པས་ཙན་དན་གྱི་ཤིང་ཆེན་པོ་ཁྱེར་བ་ན། གཞན་དག་གིས་བླང་བར་མི་ནུས་པ་བརྩོན་འགྲུས་ཀྱི་སྟོབས་ཆེན་པོས་དྲངས་ནས་འཚོང་ཞིང་དེ་ལས་བྱུང་བའི་ལོངས་སྤྱོད་ཙམ་
གྱིས་འཚོའོ། །བཟོ་དང་ལྡན་པ་ཡང་བཟོ་སྟོན་པ་ལས་བྱུང་བའི་ལོངས་སྤྱོད་ཙམ་གྱིས་འཚོའོ། །ཤེས་རབ་ཅན་གྱིས་ཀྱང་ཚོང་དཔོན་གཉིས་འཁོན་བྱུང་ནས་ཡུན་རིང་དུ་ལོན་པ་ཤེས་རབ་ཀྱི་མཁས་པས་མཛའ་བར་བྱས་ཏེ། དེ་ནས་དེ་གཉིས་
ཡོངས་སུ་མགུ་བས་ནོར་བྱིན་པ་ཙམ་གྱིས་བདེ་བར་འཚོའོ། །གཞོན་ནུ་བསོད་ནམས་སྟོབས་ཀྱང་བདག་གིས་བསོད་ནམས་བྱས་པ་རྣམས་ཀྱི་ཆེ་བ་ཉིད་བསྒྲགས་པའི་ཕྱིར་མི་ཤིན་ཏུ་དབུལ་པོ་ཞིག་གི་ཁྱིམ་དུ་ཞུགས་ནས། དེ་གང་གི་ཉིན་
པར་ཁྱིམ་དེར་ཞུགས་པ་དེའི་ཉིན་པར་ཉིད་དུ་གཞོན་ནུ་བསོད་ནམས་སྟོབས་ཀྱི་བསོད་ནམས་ཀྱི་མཐུས་ཁྱིམ་དེ་ཉིད་ཀྱི་ནང་དུ་འབྱོར་པ་ཆེན་པོ་བྱུང་སྟེ། ཁྱིམ་དེར་ནོར་དང་། འབྲུ་དང་། གསེར་དངུལ་མང་པོས་ཡོངས་སུ་གང་བར་གྱུར་ཏོ། །དེ་ནས་
མི་དབུལ་པོ་དེ་འདི་ཅི་ཞིག་སྙམ་དུ་ཡ་མཚན་དང་མཆོག་ཏུ་དགའ་བ་སྐྱེས་ཏེ། སྔོན་མ་བྱུང་བའི་འབྱོར་པ་འདི་ག་ལས་འོངས་སྙམ་དུ་སེམས་སོ། །དེ་ཡང་འདི་སྙམ་དུ་ཁྱིམ་འདིར་ལོངས་སྤྱོད་འབྱོར་པ་བྱུང་བ་འདི་ནི་སྔོན་མ་མཐོང་བའི་

71-1-11a

སེམས་ཅན་འདི་བདག་གི་ཁྱིམ་དུ་འོངས་པ་དེའི་མཐུ་ཡིན་ནོ་སྙམ་དུ་སེམས་སོ། །དེ་ནས་གཞོན་ནུ་བསོད་ནམས་སྟོབས་ཀྱིས་ལོངས་སྤྱོད་འབྱོར་པ་དེ་དག་མི་དབུལ་པོ་དེ་ལ་ཅི་བདེར་སྤྱོད་དུ་བཅུག་སྟེ། དེའི་ཚེ་མི་དབུལ་པོ་དེ་ཕྱུག་ཅིང་
ནོར་མང་ལ་ལོངས་སྤྱོད་ཆེ་བར་གྱུར་ཏོ། །དེ་ནས་འདི་སྙམ་དུ་རྟོག་སྟེ། བདག་སྔོན་ཤིན་ཏུ་དབུལ་ཞིང་འདུག་འདུག་པ་ལས། ད་བདག་གི་དཔལ་དང་སྐལ་བ་བཟང་པོ་འབྱོར་བར་གྱུར་པ་དེ་དག་ཐམས་ཅད་ནི་གཞོན་ནུ་འདི་ལས་བརྟེན་ཏེ། །གང་
གི་ཕྱིར་གང་གི་ཉིན་མོ་གཞོན་ནུ་འདི་བདག་གི་ཁྱིམ་དུ་འོངས་པ་དེའི་ཉིན་པར་ཉིད་དུ་བདག་གི་ཁྱིམ་དུ་དཔལ་བྱུང་བར་གྱུར་པ་ལས་ན། སེམས་ཅན་འདི་ནི་བསོད་ནམས་ཀྱིས་ཆེ་བར་གྲགས་པ་ཞིག་གིས་བཀུར་སྟི་བྱ་བའི་རིགས་སོ་སྙམ་
སྟེ། དེ་ནས་དེས་དེ་ལ་རྒྱུན་མི་འཆད་པར་བཀུར་སྟི་ཤིན་ཏུ་ཆེན་པོས་བཀུར་སྟི་བྱས་ནས་མི་དབུལ་པོ་ཆེ་གེ་མོ་ཞིག་གི་ཁྱིམ་དུ་གཞོན་ནུ་སྔོན་མ་བྱུང་བ་ཞིག་འོངས་ཏེ། དེའི་མཐུས་ཁྱིམ་དེར་དཔལ་བྱུང་བར་གྱུར་ཏོ་ཞེས་ཀུན་ཏུ་སྒྲ་གྲགས་སོ། །
སྐྱེ་བོ་མང་པོ་དག་གིས་དེ་ཐོས་ནས། གཞོན་ནུ་བསོད་ནམས་སྟོབས་ལ་མངོན་པར་དགའ་བར་གྱུར་ཏེ། ཀྱེ་མ་བསོད་ནམས་དག་གི་མཐུས་ཞེས་ཆེད་དུ་རྗོད་པ་ཆེད་དུ་བརྗོད་དོ། །དེའི་ཚེ་ལྗོངས་དེར་ཡང་གཞོན་ནུ་བསོད་ནམས་སྟོབས་ཀྱི་མཐུས་
མེ་ཏོག་དང་། འབྲས་བུའི་ཤིང་རྣམས་རྟག་ཏུ་རྒྱས་པར་གྱུར་ཏོ། །ལྷ་ཡང་དུས་དུས་སུ་ལེགས་པར་འཐུན་པར་ཆར་གྱི་རྒྱུན་འབེབས་ཏེ། འབྲུ་ཤིན་དུ་ཕུན་སུམ་ཚོགས་པ་བྱུང་བར་གྱུར་ཏོ། །དེ་ནས་སྐྱེ་བོ་མང་པོ་བསོད་ནམས་དག་གིས་སེམས་
དགའ་བར་བྱས་ཏེ། ལྟད་མོ་ལྟ་འདོད་པར་གྱུར་ནས་དེ་ལྟ་བའི་ཕྱིར་དོང་ངོ་། །དེ་ནས་གཞོན་ནུ་བསོད་ནམས་སྟོབས་ཀྱིས་སྐྱེ་བོ་ལྷགས་པ་དེ་དག་བསྡུ་བར་འདོད་དེ། ཀྱེ་མ་བདག་ལ་ཁྱིམ་རིན་པོ་ཆེ་ཐམས་ཅད་ཀྱིས་གང་ཞིང་འཚོག་ཆས་རྣམ་པ་སྣ་
ཚོགས་དང་ལྡན་ལ་བྲན་དང་བྲན་མོ་དང་ལས་བྱེད་པས་གང་བ་རྣམ་པ་སྣ་ཚོགས་བལྟ་ན་ཡིད་དུ་འོང་བ་ཞིག་བྱུང་ན་ཅི་མ་རུང་སྙམ་དུ་སེམས་བསྐྱེད་དོ། །དགེ་སློང་དེ་དག་སེམས་བསྐྱེད་མ་ཐག་ཏུ་གཞོན་ནུ་བསོད་ནམས་སྟོབས་ཀྱི་ཁྱིམ་ཆེན་པོ་རིན་

71-1-11b

པོ་ཆེ་ཐམས་ཅད་ཀྱིས་གང་ཞིང་འཚོག་ཆས་རྣམ་པ་སྣ་ཚོགས་དང་ལྡན་ལ། བྲན་དང་བྲན་མོ་དང་ལས་བྱེད་པས་གང་བ་རྣམ་པ་སྣ་ཚོགས་བལྟ་བ་ཡིད་དུ་འོང་བ་གློ་བུར་དུ་བྱུང་ངོ་། །དེ་མཐོང་ནས་ཀྱང་སྐྱེ་བོ་མང་པོ་དག་མཆོག་ཏུ་ངོ་མཚར་དུ་གྱུར་ཏེ། 
བསོད་ནམས་དག་ལ་གཅེས་སུ་འཛིན་པ་ཡང་དག་པར་སྐྱེས་ནས། ཀྱེ་མ་བསོད་ནམས་དག་གི་འབྲས་བུ་ནི་དངར་རོ་ཞེས་རྟོགས་ནས་གཞོན་ནུ་བསོད་ནམས་སྟོབས་ལ་བཀུར་སྟི་ཆེན་པོས་བཀུར་སྟི་བྱས་སོ། །གཞོན་ནུ་བསོད་ནམས་སྟོབས་ཀྱིས་
ཀྱང་སྐྱེ་བོ་མང་པོ་དེ་དག་སེམས་དགའ་བར་གྱུར་པར་ཤེས་ནས་བསྡུ་བའི་དངོས་པོ་བཞི་དག་གིས་ཅི་རིགས་པར་ཁ་ཅིག་ནི་སྦྱིན་པས་བསྡུས། ཁ་ཅིག་ནི་ཚིག་སྙན་པས་བསྡུས་ཁ་ཅིག་ནི་དོན་སྤྱོད་པས་བསྡུས། ཁ་ཅིག་ནི་དོན་འཐུན་པས་བསྡུས་ཏེ་
དེའི་གྲགས་པས་རྒྱལ་པོའི་ཕོ་བྲང་འཁོར་དེ་ཐམས་ཅད་ཀུན་ཏུ་གང་བར་གྱུར་ཏོ། །དེ་ནས་ཕྱིས་རེ་ཤིག་ན་རྒྱལ་པོ་གཞན་ཞིག་ལ་སྨན་ཆོས་གསོལ་བའི་མི་ཞིག་གཤེད་མ་དག་གིས་ཡན་ལག་བཅད་དེ་བཞག་ནས་དེའི་ལུས་ལས་ཁྲག་ཤིན་
ཏུ་མང་པོ་ཟགས་ཏེ་དེས་ན་དེའི་ཁ་སྐམས་པར་གྱུར་ཏོ། །དེ་ནས་གཞོན་ནུ་བསོད་ནམས་སྟོབས་ཀྱང་ས་ཕྱོགས་དེར་ཕྱིན་ཏེ། དེ་ནས་མི་དེས་དེ་མཐོང་ནས་ཉམ་ཐག་པའི་ང་རོས་ངུ་ཞིང་ཇོ་ཅོ་གཞོན་ནུ་བདག་ལ་ཡོངས་སུ་བསྐྱབ་ཏུ་གསོལ་ཞེས་སྨྲས་སོ། །
དེ་ནས་གཞོན་ནུ་བསོད་ནམས་སྟོབས་ཀྱིས་དེ་མཐོང་ནས་སྙིང་རྗེས་སེམས་བསྐྱེད་དེ། བདག་གིས་ཐབས་ཇི་ལྟ་བུ་ཞིག་གིས་འདི་ཡོངས་སུ་བསྐྱབ་པར་བྱ་སྙམ་དུ་བསམས་ནས་དེང་བདག་གིས་བསོད་ནམས་དག་གི་མཐུ་འཇིག་རྟེན་གྱི་མངོན་
སུམ་དུ་བསྟན་ཏོ། སྙམ་དུ་དེའི་བློ་སྐྱེས་སོ། །དེ་ནས་གཞོན་ནུ་བསོད་ནམས་སྟོབས་ཀྱིས་དེའི་ལུས་ཀྱི་ཉམ་དྲོད་རྟོགས་ནས་སྙིང་རྗེས་སེམས་བརླན་ཏེ། རང་གི་ལུས་ལས་རྩ་གཏར་ནས་ཁྲག་གཟག་སྟེ། མི་དེ་ལ་བླུད་ནས་དེས་མི་དེའི་ཁ་སྐམས་པ་
ཐམས་ཅད་ཞི་བར་གྱུར་ཏོ། །དེ་ནས་གཞོན་ནུ་བསོད་ནམས་སྟོབས་ཀྱིས་དེའི་རྐང་ལག་བཅད་པས་ཤིན་ཏུ་མི་བཟད་པར་ན་བ་མཐོང་ནས་སྡུག་བསྔལ་དེ་བདག་གི་ཉམས་ལ་བབ་པར་སེམས་ཤིང་བདག་ཉིད་ཀྱི་རྐང་ལག་བཅད་དེ། མི་དེའི་རྐང་ལག་

71-1-12a

གི་གནས་གནས་སུ་སྦྱར་ནས་ནམ་མཁའ་ལ་བལྟས་ཏེ། སེམས་ཅན་ཐམས་ཅད་ཀྱི་རྗེས་སུ་འགྲོ་བའི་བྱམས་པའི་སེམས་བསྐྱེད་ནས། བདེན་པའི་ཚིག་གང་གིས་བདག་གི་ལུས་འདི་སྐྱེས་ཚུན་ཆད་མི་དགེ་བའི་ལས་ཅི་ཡང་
བྱས་པར་མི་དྲན་པའི་བདེན་པ་དང་བདེན་པའི་ཚིག་འདིས་མི་འདི་ལ་བདག་གི་རྐང་ལག་འདི་དག་གནས་གནས་སུ་འབྱོར་པར་གྱུར་ཅིག །སྔོན་གྱི་ལུས་ཇི་ལྟ་བ་བཞིན་དུ་ཡང་གྱུར་ཅིག་ཅེས་བདེན་པའི་བྱིན་གྱི་བརླབས་བྱས་སོ། །དེ་ནས་
གཞོན་ནུ་བསོད་ནམས་སྟོབས་ཀྱིས་དེ་སྐད་སྨྲས་མ་ཐག་ཏུ་མི་དེ་ལ་རྐང་ལག་བཅད་པ་དེ་དག་གནས་གནས་སུ་འབྱོར་པར་གྱུར་ཏེ། མི་དེ་སྔོན་གྱི་ལུས་ཇི་ལྟ་བ་བཞིན་དུ་ཡང་གྱུར་ནས་རྨ་སོས་ཤིང་སྒྲོས་མི་མངོན་པར་གྱུར་ཏོ། །དེ་ནས་
གཞོན་ནུ་བསོད་ནམས་སྟོབས་ཀྱིས་མི་དེ་སྔོན་གྱི་ལུས་ཇི་ལྟ་བ་བཞིན་དུ་གྱུར་པར་མཐོང་ནས་ཡིད་རབ་ཏུ་དགའ་སྟེ། བསམ་པ་ཡོངས་སུ་རྫོགས་ནས་བདག་ཉོན་མོངས་པ་འབྲས་བུ་ཡོད་པར་གྱུར་ཏེ། བསམ་པ་ཡོངས་སུ་
རྫོགས་སོ་སྙམ་དུ་བསམས་སོ། །གཞན་ཡང་ཇི་ལྟར་མི་འདི་དག་གིས་རང་གི་ཁྲག་གིས་ཚིམ་པར་བྱས་ནས་རང་གི་རྐང་ལག་གིས་བཏུད་དེ་བདེན་པས་བསྐུལ་ནས་སྔོན་གྱི་ལུས་ཇི་ལྟ་བ་བཞིན་དུ་གྱུར་ཅིང་། སྲོག་ཕངས་པ་དང་
ལྡན་པར་བྱས་པ་བཞིན་དུ། དགེ་བའི་རྩ་བ་འདིས་བདག་བླ་ན་མེད་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་མི་འདི་དམ་པའི་ཆོས་ཀྱི་བཅུད་ཀྱིས་ཡང་དག་པར་ཚིམ་པར་བྱས་ཏེ། གཡུང་དྲུང་གི་མཐར་ཐུག་པ། 
གྲུབ་པ་དང་བདེ་བའི་མྱ་ངན་ལས་འདས་པ་ལ་གཞོག་པར་གྱུར་ཅིག་ཅེས་བྱས་ནས་དེའི་སྐབས་སུ་ཡང་ས་རྣམ་པ་དྲུག་ཏུ་གཡོས་ཏེ། གཡོ་བ་དེས་དབང་པོ་ཆེན་པོའྀ་ཕོ་བྲང་ཀུན་དུ་གཡོས་ནས་ལྷའི་དབང་པོ་བརྒྱ་བྱིན་གྱིས་
བསམས་པ། ས་གཡོ་བ་འདི་སུས་བྱས་སྙམ་མོ། །རེ་ཤིག་ན་གཞོན་ནུ་བསོད་ནམས་སྟོབས་ཀྱིས་ཤིན་ཏུ་དཀའ་བའི་ལས་བྱས་པ་དེ་མཐོང་ངོ་། །དེ་མཐོང་ནས་ཀྱང་ཡ་མཚན་གྱིས་སེམས་དད་པར་གྱུར་ནས་འདྀ་སྙམ་དུ་

71-1-12b

བདག་ཉིད་ཆེན་པོ་འདི་ཅིའི་ཕྱིར་འདི་ལྟར་ཤིན་ཏུ་དཀའ་བའི་ལས་བྱེད་པ་དེ་བདག་གིས་བརྟག་པར་བྱའོ་སྙམ་དུ་བསེམས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་བདག་ཉིད་བྲམ་ཟེའི་ཆ་ལུགས་སུ་སྤྲུལ་ནས་སུམ་བཅུ་རྩ་གསུམ་པའི་
གནས་ནས་བབས་ཏེ་གཞོན་ནུ་བསོད་ནམས་སྟོབས་ཀྱི་ཐད་དུ་སོང་ནས། བསོད་ནམས་སྟོབས་ཁྱོད་ཀྱིས་བདག་ཉིད་ཀྱི་རྐང་ལག་མེད་པར་བྱས་ཏེ་བཞག་པ་འདི་ཅིའི་ཕྱིར་བྱས་ཤེས་སྨྲས་སོ། །དེ་ནས་གཞོན་ནུ་བསོད་ནམས་སྟོབས་ཀྱིས་
ངོ་མ་ཤེས་ཏེ། སྐབས་འདི་རྒྱས་པར་བསྙད་ནས་ཡང་སྨྲས་པ། གྲོགས་པོ་བདག་ནི་གཞན་དག་གི་སྡུག་བསྔལ་གྱིས་སྡུག་བསྔལ་ལོ། །བདག་ནི་གཞན་དག་གི་བདེ་བཏང་ནས་མི་འདི་བདེན་པས་བསྐུལ་བས་སྔོན་གྱི་ལུས་ཇི་ལྟ་བ་བཞིན་
དུ་བཞག་གོ།    །།བསོད་ནམས་སྟོབས་ཀྱི་རྟོགས་པ་བརྗོད་པ་བམ་པོ་གཉིས་པ་སྟེ་ཐ་མ། དེ་ནས་ལྷའི་དབང་པོ་བརྒྱ་བྱིན་མཆོག་ཏུ་ཡ་མཚན་དུ་གྱུར་ནས་བྲམ་ཟེའི་ཆ་ལུགས་མི་སྣང་བར་བྱས་ནས་རང་བཞིན་དུ་གནས་པར་
གྱུར་ནས། གཞོན་ནུ་བསོད་ནམས་སྟོབས་ལ་སྨྲས་པ། གཞོན་ནུ་ཁྱོད་རང་གི་ཡན་ལག་དང་ཉིང་ལག་རྣམས་ཡོངས་སུ་གཏོང་བ་བྱས་པ་འམ་ཡོངས་སུ་གཏོང་བ་ན་སེམས་གཞན་དུ་གྱུར་པ་འམ་འགྱོད་པར་མ་གྱུར་གྲང་། གཞོན་
ནུ་བསོད་ནམས་སྟོབས་ཀྱིས་སྨྲས་པ། ཀཽ་ཤི་ཀ་བདག་ནི་རང་གི་ཡན་ལག་དང་ཉིང་ལག་རྣམས་ཡོངས་སུ་བཏང་བར་བྱས་པ་འམ་ཡོངས་སུ་གཏོང་བ་ན་སེམས་གཞན་དུ་གྱུར་པ་འམ་འགྱོད་པར་གྱུར་པ་ཡང་མེད་དོ། །བརྒྱ་
བྱིན་གྱིས་སྨྲས་པ། དེ་ཇིས་མངོན། བསོད་ནམས་སྟོབས་ཀྱིས་སྨྲས་པ། ཀཽ་ཤི་ཀ་འོ་ན་བདེན་པའི་ཚིག་བྱ་ཡིས་ཉོན་ཅིག །དེ་ནས་གཞོན་ནུ་བསོད་ནམས་སྟོབས་ཀྱིས་སེམས་ཅན་ཐམས་ཅད་ཀྱི་རྗེས་སུ་འགྲོ་བའི་བྱམས་
པའི་སེམས་ཉེ་བར་བཞག་སྟེ། ཕྱོགས་བཞིར་བལྟས་ནས་བདེན་པས་བསྐུལ་བའི་ཚིགས་སུ་བཅད་པ་སྨྲས་པ། རང་གི་ཡན་ལག་འཁྲིག་མ་གཅོད་པ་ན། །ཇི་ལྟར་དེ་རིང་འགྱོད་པར་མ་གྱུར་ན། །བདག་གི་བདེན་པའི་ཚིག་

71-1-13a

ནི་གང་ཡིན་པས། །བདག་གི་ལུས་ནི་སྔ་མཁོ་བཞིན་གྱུར་ཅིག །ཅེས་ཚིགས་སུ་བཅད་པ་སྨྲས་མ་ཐག་པའི་རྗེས་ལ་བདག་ཉིད་ཆེན་པོ་དེའི་ལུས་འཕྲལ་དུ་སྔོན་བཞིན་དུ་གྱུར་ཏེ། ནམ་མཁའ་ལས་ཀྱང་ལྷའི་
མེ་ཏོག་གི་ཆར་བབ་བོ། །ལྷའི་རོལ་མོའི་སྒྲ་རྣམས་ཀྱང་སྒྲོགས་སོ། །སེར་བུ་འཇམ་པོ་ཡང་ལངས་སོ། །དེ་ནས་ལྷའི་དབང་པོ་བརྒྱ་བྱིན་གྱིས་ལྷ་དང་མི་དད་པར་བྱེད་པའི་བསོད་ནམས་དག་གི་ཤིན་དུ་རྨད་དུ་བྱུང་བ་དེ་ཚེ་འདི་ཉིད་ལ་རྣམ་
པར་སྨིན་པའི་འབྲས་བུ་རྒྱ་ཆེན་པོ་མཐོང་ནས་མཆོག་ཏུ་ངོ་མཚར་ཆེ་བས་སེམས་ཀྱི་རྒྱུད་དང་བར་གྱུར་ཏེ། གཞོན་ནུ་བསོད་ནམས་སྟོབས་ལ་སྨྲས་པ། གཞོན་ནུ་ཁྱོད་འབད་པ་འདིས་ཅི་ཞིག་སྒྲུབ། བསོད་ནམས་སྟོབས་
ཀྱིས་སྨྲས་པ། ཀཽ་ཤི་ཀ་བདག་ནི་འབད་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་ནས་སེམས་ཅན་ཐམས་ཅད་འཁོར་བའི་རྒྱ་མཚོ་ལས་བཏོན་ཏེ། གཡུང་དྲུང་གི་མཐར་ཐུག་པ། གྲུབ་པ་དང་བདེ་བའི་
མྱ་ངན་ལས་འདས་པ་ལ་བཀོད་པར་འདོད་དོ། །དེ་ནས་ལྷའི་དབང་པོ་བརྒྱ་བྱིན་གྱིས། གཞོན་ནུ་བསོད་ནམས་སྟོབས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་རི་རབ་བཞིན་དུ་མི་གཡོ་བར་རིག་ནས་མགུ་བར་གྱུར་ཏེ་
སྨྲས་པ། སེམས་ཅན་ཆེན་པོ་ལེགས་སོ་ལེགས་སོ། །ཁྱོད་ཀྱི་སྨོན་ལམ་ནི་རྒྱ་ཆེའོ། །ཁྱོད་ཀྱི་འབད་པ་ནི་བསྐྱོད་པར་མི་ནུས་སོ། །འབད་པ་འདིས་ཁྱོད་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་སྨྲས་ཏེ། ལྷའི་དབང་པོ་བརྒྱ་བྱིན་གྱིས་གཞོན་ནུ་བསོད་ནམས་སྟོབས་ལ་མངོན་པར་བསྟོད་ནས། དེ་ཉིད་དུ་མི་སྣང་བར་གྱུར་ཏེ། །གཞོན་ནུ་བསོད་ནམས་སྟོབས་ཀྱང་བསམ་པ་ཡོངས་སུ་
རྫོགས་པར་གྱུར་ནས་རང་གི་གནས་སུ་སོང་ངོ་། །ཕྱིས་རེ་ཤིག་ན་རྒྱལ་པོའི་ཕོ་བྲང་འཁོར་དེའི་རྒྱལ་པོ་བུ་མེད་པར་དུས་ལས་འདས་སོ། །དེ་ནས་བཙུན་མོའི་འཁོར་དང་། གཞོན་ནུ་རྣམས་དང་། བློན་པོ་རྣམས་དང་། གྲོང་ཁྱེར་གྱི་

71-1-13b

མི་དང་། ཡུལ་གྱི་མི་རྣམས་འདུས་ནས། ཀྱེ་བདག་ཅག་གི་རྒྱལ་པོར་གང་ཞིག་དབང་བསྐུར་བར་བྱ་ཞེས་གྲོས་བྱེད་པ་ལ་ཞུགས་སོ། །དེ་ནས་ཁ་ཅིག་ན་རེ་སུ་བསོད་ནམས་ཀྱིས་ཆེ་བར་གྲགས་པའི་སེམས་ཅན་དེ་རྒྱལ་པོར་དབང་བསྐུར་
བར་བྱའོ་ཞེས་ཟེར་རོ། །དེ་ནས་དེ་ལྟར་བྱའོ་ཞེས་སྨྲས་ནས་དེ་དག་ཐམས་ཅད་ཀྱིས་བློ་གཅིག་ཏུ་བརྡ་སྐད་ཅིག་ཏུ་བྱས་ནས་བསོད་ནམས་ཀྱིས་ཆེ་བར་གྲགས་པ། རྒྱལ་པོར་འོས་པའི་སེམས་ཅན་ཚོལ་བ་ལ་ཞུགས་ཏེ་ཚོལ་བའི་མི་ཀུན་ཏུ་
བཀྱེའོ། །གཞོན་ནུ་བསོད་ནམས་སྟོབས་ཀྱང་རྒྱལ་པོར་འགྱུར་བའི་སྔོན་གྱི་དགེ་བའི་རྩ་བ་རྣམས་ཀྱིས་བསྐུལ་ནས་དེའི་ཚེ་སྟེན་གྲོགས་དག་དང་ལྷན་ཅིག་ཏུ་ཕྱི་རོལ་གྱི་བསྐྱེད་མོས་ཚལ་དུ་སོང་ངོ་། །སོང་ནས་དེ་ལ་བཀྲ་ཤིས་པའི་
ལྟས་རྣམས་བྱུང་སྟེ། ནམ་མཁའ་ལས་ཆུའི་རྒྱུན་མགོ་བོར་བབ་ཅིང་། བྱ་ཁ་དོག་སྣ་ཚོགས་པ་དག་གཡས་ཕྱོགས་ནས་བསྐོར་བར་བྱེད་ལ། ཁྱེའུ་དང་བུ་མོ་དག་ཀྱང་རྒྱལ་བའི་སྒྲ་སྒྲོགས་པར་བྱེད་དེ། སེམས་སྤྲོ་བ་དང་བཅས་པའི་ཡིད་བདེ་བར་
གྱུར་པས་གནས་སོ། །གཞོན་ནུ་དེ་ཡང་བ་སྤུའི་ཁུང་བུ་ཐམས་ཅད་ཟིང་ཞེས་བྱེད་དོ། །ས་གཞི་ཡང་རྡོ་དང་། གསེག་མ་དང་། གྱོ་མོ་མེད་པར་གྱུར་ཏོ། །དེའི་ལུས་ཀྱང་ཤིན་ཏུ་ཡང་བར་གྱུར་ཏོ། །དགའ་ཞིང་ཡིད་དང་འཐད་པའི་སྒྲ་ཡང་ཐོས་སོ། །
དེ་ལྟས་ཀྱི་དཔྱད་ལ་མཁས་པ་ཡིན་ཏེ། དེ་འདི་སྙམ་དུ་འདི་ལྟར་བདག་ལ་ལྟས་རྣམས་བྱུང་བས་དེང་ནི་གདོན་མི་ཟ་བར་བདག་རྒྱལ་པོ་ཆེན་པོར་དབང་བསྐུར་བར་འགྱུར་རོ་སྙམ་དུ་སེམས་སོ། །དེ་ནས་དེ་མཐར་གྱིས་བསྐྱེད་མོས་ཚལ་གྱི་ནང་དུ་
སོང་སྟེ། བསྐྱེད་མོས་ཚལ་གྱི་བདེ་བ་ཉམས་སུ་མྱོང་ནས་ཤིང་མྱ་ངན་འཚང་མེ་ཏོག་ཤིན་དུ་རྒྱས་པ་ཞིག་གི་དྲུང་དུ་ཉལ་ཏེ་གཉིད་ཀྱིས་ལོག་གོ། །དེའི་གྲོགས་པོ་དེ་དག་ཀྱང་མེ་ཏོག་དང་འབྲས་བུ་ལ་སེམས་གཡེངས་ནས་བསྐྱེད་མོས་ཚལ་
དེ་ཕན་ཚུན་ཀུན་དུ་འཁྱམ་པ་ལ་ཞུགས་སོ། །དེའི་བར་སྐབས་སུ་གཞོན་ནུ་བསོད་ནམས་སྟོབས་ཀྱི་བསོད་ནམས་ཀྱི་མཐུས་ཀླུ་རྣམས་ཀྱིས་ལྷའི་པད་མ་ཆེན་པོ་ཤིན་ཏུ་མཆོག་ཏུ་ཡིད་དུ་འོང་ལ་ཁ་དོག་དང་དྲི་དང་ལྡན་པ་འདབ་མ་སྟོང་པ་ཤིན་

71-1-14a

ཏུ་དགའ་བར་བྱེད་པ་ཞིག་ས་ལ་བརྟོལ་ཏེ་འཐོན་པར་བྱས་ནས། པད་མ་ཆེན་པོ་དེ་ལ་གཞོན་ནུ་བསོད་ནམས་སྟོབས་མཐར་ཀྱིས་དལ་ནས་བཏེག་སྟེ་བཞག་ནས་དེ་ཅི་ནས་སད་པར་མི་འགྱུར་བ་དེ་ལྟ་བུར་ཡང་བྱིན་གྱིས་བརླབས་
སོ། །དེ་ནས་ཉི་མ་གུང་ལས་ཡོལ་ཏེ་ཟན་ཟ་བའི་དུས་ལས་འདས་ནས་ཤིང་གཞན་དག་གི་གྲིབ་མ་ནི་ཤར་ཕྱོགས་སུ་གཞོལ་ཞིང་། ཤར་ཕྱོགས་སུ་འབབ་སྟེ། ཤར་ཕྱོགས་སུ་བབ་ན། ཤིང་མྱ་ངན་འཚང་དེའི་གྲིབ་མ་ནི་གཞོན་ནུ་
བསོད་ནམས་སྟོབས་ཀྱི་ལུས་མི་གཏོང་ངོ་། །བསྐྱེད་མོས་ཚལ་དེའི་མེ་ཏོག་དང་འབྲས་བུའི་ཤིང་གང་ཡིན་པ་དེ་དག་ཐམས་ཅད་ཀྱང་ཤིང་མྱ་ངན་འཚང་དེ་གང་ན་འདུག་པ་དེ་ལོགས་སུ་མངོན་པར་འདུད་པར་གྱུར་ཏོ། །རི་དགས་དང་བྱ་མཐོང་ན་ཡིད་
དུ་འོང་བ། བཀྲ་ཤིས་པར་བྱ་བ་རྣམས་ཀྱང་སྤྱོད་ལམ་ཞི་བའི་ཚུལ་གྱིས་ཀུན་ནས་བསྐོར་ཏེ་འཁོད་དོ། །གཞོན་ནུ་བསོད་ནམས་སྟོབས་གཉིད་ལོག་པའི་རྨི་ལམ་དུ་ཡང་བདག་ཉིད་མི་གཙང་བའི་ཕུང་པོ་ཆེན་པོའི་སྟེང་ན་འདུག་པ་རྨིས་
སོ། །བདག་ཉིད་མི་གཙང་བས་ཡོག་པར་ཡང་རྨིས་སོ། །བདག་ཉིད་ནམ་མཁའ་ལ་ལྕེས་ལྡག་པ་ཡང་རྨིས་སོ། །བདག་ཉིད་པད་མའི་སྟེང་ན་འདུག་པ་ཡང་རྨིས་སོ། །བདག་ཉིད་རིའི་རྩེ་མོར་འཛེགས་པ་ཡང་རྨིས་སོ། །
སྐྱེ་བོ་ཕལ་པོ་ཆེ་བདག་ལ་ཕྱག་འཚལ་བ་ཡང་རྨིས་སོ། །དེ་ནས་དེའི་སྐབས་སུ་གྲོང་ཁྱེར་གྱི་མི་དང་། བློན་པོ་དང་། ཡུལ་གྱི་མི་དེ་དག་གིས་ཚོལ་བའི་མི་བཀྱེ་བ་རྣམས་ཀྱང་གཞན་དང་གཞན་དག་ཏུ་ཀུན་དུ་འཁོར་
འཁོར་ཏེ་ཕྱོགས་དེར་ཕྱིན་ཏོ། །དེ་ནས་གཞོན་ནུ་བསོད་ནམས་སྟོབས་ཀྱི་ལྷའི་འབྱོར་པ་དེ་ལྟ་བུ་མཐོང་ནས། ཡང་མཆོག་ཏུ་ཡ་མཚན་དུ་གྱུར་ཏེ། སེམས་ཅན་འདི་ནི་བསོད་ནམས་ཀྱིས་ཆེ་བར་གྲགས་པ་ཞིག་གོ་སྙམ་དུ་
རིག་ནས་ཤིན་ཏུ་རིངས་པར་གྲོང་ཁྱེར་གྱི་མི་དང་། བློན་པོ་དང་། ཡུལ་གྱི་མི་རྣམས་ཀྱི་ཐད་དུ་དོང་ནས་སྐབས་དེ་རྒྱས་པར་བསྙད་དོ། །དེའི་སྐབས་སུ་གཞོན་ནུ་བསོད་ནམས་སྟོབས་སད་ནས་དེ་རྨི་ལྟས་ཀྱི་དཔྱད་ལ་མཁས་པས་

71-1-14b

རྨི་ལམ་དེ་དག་གི་དཔྱད་སེམས་པ་ལ་ཞུགས་ཏེ། བདག་གིས་མི་གཙང་བའི་ཕུང་པོ་ཆེན་པོའི་སྟེང་ན་བདག་ཉིད་འདུག་པ་རྨིས་པ་དེ་ནི་བདག་རྒྱལ་སྲིད་ཆེན་པོའི་དབང་ཕྱུག་གི་བདག་པོ་ལ་གནས་པར་འགྱུར་བ་དེའི་སྔ་ལྟས་ཡིན་ནོ། །
བདག་གི་མི་གཙང་བས་བདག་ཉིད་ཡོག་པར་རྨིས་པ་དེ་ནི་སེང་གེའི་ཁྲི་ཆེན་པོ་ལ་འདུག་པར་འགྱུར་བ་དེའི་སྔ་ལྟས་ཡིན་ནོ། །བདག་ཉིད་རིའི་རྩེ་མོར་འཛེགས་པ་རྨིས་པ་དེ་ནི་ཐམས་ཅད་ཀྱི་སྟེང་ན་འདུག་པར་འགྱུར་བ་དེའི་སྔ་ལྟས་ཡིན་ནོ། །
སྐྱེ་བོ་ཕལ་པོ་ཆེ་ཕྱག་འཚལ་བ་རྨིས་པ་དེ་ནི་སྐྱེ་བོ་ཕལ་པོ་ཆེས་བདག་ལ་བཀུར་སྟི་བྱེད་པར་འགྱུར་བ་དེའི་སྔ་ལྟས་ཡིན་ནོ། །འདི་ལྟར་བདག་གིས་འདི་ལྟ་བུའི་རྨི་ལམ་རྨིས་པ་དང་། འདི་ལྟ་བུའི་ལྟས་མཐོང་བ་དག་ལས་ན་
གདོན་མི་ཟ་བར་དེང་ཉིད་དུ་བདག་རྒྱལ་པོར་འགྱུར་རོ་སྙམ་མོ། །ཡང་དེའི་སྐབས་སུ་གྲོང་ཁྱེར་གྱི་མི་དང་། བློན་པོ་དང་། ཡུལ་གྱི་མི་རྣམས་ཀྱིས་ཚོལ་བའི་མི་རྣམས་ལས་ཐོས་ནས་མགུ་བར་གྱུར་ཏེ། ཐམས་ཅད་འདུས་ནས་རྒྱལ་
སྲིད་ཀྱི་དབང་བསྐུར་བའི་ཡོ་བྱད་ཁྱེར་ཏེ་བསྐྱེད་མོས་ཚལ་དེར་དོང་ངོ་། །དེ་ནས་རེ་ཤིག་ན་ལྷའི་འབྱོར་པ་དེ་དག་མཐོང་སྟེ། མཐོང་ནས་ཀྱང་མཆོག་ཏུ་ཡ་མཚན་དུ་གྱུར་ཏོ། །གཞོན་ནུ་བསོད་ནམས་སྟོབས་ཀྱང་དེ་དག་མཐོང་ནས་ལྷའི་
པད་མ་ཆེན་པོ་དེ་དག་ཉིད་ལ་སྐྱིལ་མོ་དཀྲུང་བཅས་ཏེ་འདུག་གོ། །དེ་ནས་གཞོན་ནུ་བསོད་ནམས་སྟོབས་ཀྱི་བསོད་ནམས་དག་གིས་བསྐུལ་ནས་རྒྱལ་པོ་ཆེན་པོ་བཞིས་ཆེ་བ་ལ་འོས་པའི་ལྷའི་སེང་གེའི་ཁྲི་ཕུལ་ལོ། །ལྷའི་དབང་པོ་
བརྒྱ་བྱིན་ནི་གདུགས་དཀར་པོ་དང་རྔ་ཡབ་ནོར་བུའི་ཡུ་བ་ཅན་འབུལ་ལོ། །སུམ་བཅུ་རྩ་གསུམ་གྱི་ལྷ་རྣམས་ནི་ལྷའི་བླ་རེ་རིན་པོ་ཆེ་སྣ་ཚོགས་ཀྱིས་སྤྲས་པ་འགྲེམས་སོ། །རླུང་གཏོང་བ་དང་བར་སྣང་ལ་གནས་པའི་ལྷ་རྣམས་ནི་ལྷའི་
མེ་ཏོག་རྣམ་པ་སྣ་ཚོགས་ཀྱི་ཆར་འབེབས་སོ། །རྒྱལ་ཆེན་བཞིའི་རིས་ཀྱི་ལྷའི་རིན་པོ་ཆེའི་ཆར་འབེབས་ཤིང་ལྷའི་རོལ་མོའི་སྒྲ་རྣམས་ཀྱང་སྒྲོགས་སོ། །གོས་ཀྱང་འཐོར་རོ། །རྒྱལ་པོའི་ཕོ་བྲང་འཁོར་དང་། བསྐྱེད་མོས་ཚལ་དང་། 

71-1-15a

ནགས་ཚལ་དུ་བཅས་པ་དེ་དག་ཐམས་ཅད་ཀྱང་རྡོ་དང་། གསེག་མ་དང་། གྱོ་མོ་མེད་པར་བྱས་ཏེ་བཞག་གོ། །རྒྱལ་མཚན་དང་བ་དན་ནི་བསྒྲེང་། དར་གྱི་ལྡ་ལྡིའི་ཆུན་པོ་ནི་གུན་དུ་བྲེས། དྲི་ཞིམ་པོའི་བདུག་པའི་སྣོད་
ནི་བཏགས། མེ་ཏོག་སྣ་ཚོགས་ནི་གཏོར་ཏེ་ལྷའི་གནས་འདྲ་ཞིང་། ལྷའི་བུ་ལས་སྣ་ཚོགས་ཅན་གྱིས་ནི་གཞོན་ནུ་བསོད་ནམས་སྟོབས་ཡོངས་སུ་ལོངས་སྤྱོད་པའི་ཕྱིར་བརྒྱ་བྱིན་གྱི་བཀས་བསྐྱེད་མོས་ཚལ་དེར་ལྷའི་ཁང་པ་བརྩེགས་པ་ཆེན་པོ་
རིན་པོ་ཆེ་སྣ་བཞི་ལས་བྱས་པ་རྣམ་པ་སྣ་ཚོགས་དང་ལྡན་པ་ཞིག་སྤྲུལ་ཏོ། །དེ་ནས་གྲོང་ཁྱེར་གྱི་མི་དང་། བློན་པོ་དང་། ཡུལ་གྱི་མི་དེ་དག་གིས་ལྷའི་འབྱོར་པ་དེ་དག་མཐོང་ནས་ངོ་མཚར་དུ་གྱུར་རྨད་དུ་གྱུར་ཏེ། གུས་པར་བསྒྲིམ་པས་ཚམ་ཚོམ་མེད་
པར་གཞོན་ནུ་བསོད་ནམས་སྟོབས་ལྷའི་སེང་གེའི་ཁྲི་ལ་བཞུགས་སུ་གསོལ་ནས་བཀུར་སྟི་ཆེན་པོས་རྒྱལ་སྲིད་ཀྱི་དབང་བསྐུར་བས་དབང་བསྐུར་རོ། །དགེ་སློང་དག་དབང་བསྐུར་མ་ཐག་ཏུ་གཞོན་ནུ་བསོད་ནམས་སྟོབས་ཀྱི་ལུས་ལས་སྣང་བ་གང་གིས་ཉི་
མའི་དཀྱིལ་འཁོར་གྱི་འོད་མེད་པར་བྱས་ཏེ། ཐད་ཀར་དཔག་ཚད་གཅིག་ཁོ་ར་ཁོར་ཡུག་ཁྱབ་པ་དེ་ལྟ་བུའི་ལྷའི་འོད་བྱུང་བར་གྱུར་ཏོ། །དེ་ནས་དེའི་མིང་གཞོན་ནུ་བསོད་ནམས་སྟོབས་ཤེས་བྱ་བ་དེ་མེད་པར་གྱུར་ནས་མིང་རྒྱལ་པོ་སྣང་བྱེད་རྒྱལ་པོ་སྣང་
བྱེད་ཅེས་བྱ་བར་གྱུར་ཏོ། །དེ་ནས་ལ་ལས་ནི་རྒྱལ་པོ་བསོད་ནམས་སྟོབས་ཤེས་ཤེས་སོ། །ལ་ལས་ནི་རྒྱལ་པོ་སྣང་བྱེད་ཅེས་བྱ་བར་ཤེས་སོ། །དེ་ནས་རྒྱལ་པོ་བསོད་ནམས་སྟོབས་ལྷ་དང་མིའི་འབྱོར་པ་དེ་དག་བཅས་པར་རྒྱལ་པོའི་ཕོ་
བྲང་འཁོར་དེར་སོང་ངོ་། །དེ་ནས་བརྒྱ་བྱིན་ལ་སོགས་པ་ལྷ་རྣམས་ཀྱིས་རྒྱལ་པོ་བསོད་ནམས་སྟོབས་ལ་ཚུལ་བཞིན་དུ་ཡང་དག་པར་རིམ་གྲོ་བྱས་ནས་དོང་ངོ་། །རྒྱལ་པོ་བསོད་ནམས་སྟོབས་ཀྱང་རྒྱལ་པོའི་ཕོ་བྲང་དེ་ན་རྒྱལ་པོ་བྱེད་
དེ། འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་། མི་མང་པོས་གང་བ་དང་། རྩོད་པ་དང་། འཐབ་པ་ཞི་བ་དང་། འཁྲུག་པ་དང་། ནང་འཁྲུག་པ་དང་། ཆོམ་རྐུན་

71-1-15b

དང་། ནད་དང་། མུ་གེ་མེད་པ་དང་། འབྲས་སཱ་ལུ་དང་། བུ་རམ་ཤིང་དང་། བ་ལང་དང་། མ་ཧེ་དང་ལྡན་པར་འདུག་སྟེ། བུ་གཅིག་པས་བྱ་བ་བཞིན་དུ་ཆོས་བཞིན་དུ་རྒྱལ་སྲིད་བསྐྱངས་སོ། །དེའི་མེ་ཏོག་དང་འབྲས་བུའི་ཤིང་རྣམས་ནི་རྟག་ཏུ་རྒྱས་
སོ། །ལྷ་ཡང་དུས་དུས་སུ་ཆར་གྱི་རྒྱུན་ལེགས་པར་འབེབས་ཏེ། འབྲུ་ཤིན་ཏུ་ལེགས་པར་གྱུར་ཏོ། །དེ་ནས་རེ་ཤིག་ན་གཏམ་དེའི་ཕུ་བོ་དེ་དག་གིས་ཐོས་སོ། །ཐོས་ནས་ཀྱང་དེ་དག་མཆོག་ཏུ་ཡ་མཚན་དུ་གྱུར་ཏེ་གཅིག་ལ་གཅིག་སྨྲས་པ། 
བསོད་ནམས་སྟོབས་ཀྱིས་ནི་འདི་ལྟར་དམ་བཅས་པ་དང་། དབང་ཕྱུག་རྒྱུ་རྣམ་པ་གཉིས་ཀྱིས་བདག་ཅག་ཕམ་པར་བྱས་ཏེ། གང་གི་ཕྱིར་དེ་བསོད་ནམས་དག་གིས་རྒྱལ་སྲིད་ཀྱི་དབང་ཕྱུག་ཆེན་པོའྀ་བདག་པོར་གྲུབ་པར་བྱས་པའི་
ཕྱིར་རོ། །ཚུར་ཤོག་བདག་ཅག་ལ་དེས་མ་རྨས་པའི་སྔ་རོལ་དུ་བདག་ཅག་ཟད་པར་དོང་སྟེ། རྒྱལ་པོ་བསོད་ནམས་སྟོབས་ཡང་དག་པར་མཉེས་པར་བྱའོ་ཞེས་བྱས་སོ། །དེ་ནས་རྒྱལ་པོ་བསོད་ནམས་སྟོབས་ག་ལ་འདུག་པ་དེ་ལོགས་
སུ་དོང་ངོ་། །དོང་ནས་རྒྱལ་པོ་བསོད་ནམས་སྟོབས་ལ་རྒྱལ་བར་གྱུར་ཅིག །སྐུ་ཚེ་རིང་བར་ཤོག་ཤིག་ཅེས་བྱས་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་རྒྱལ་པོ་བསོད་ནམས་སྟོབས་ལ་སྨྲས་པ། ལྷ་
ལེགས་སོ་ལེགས་སོ། །ཁྱོད་ཀྱི་དམ་བཅས་པ་ནི་བརྟན་པ་ལགས་སོ། །འདི་ལྟར་ཁྱོད་ཀྱིས་བདག་ཅག་དམ་བཅས་པ་དང་། དབང་ཕྱུག་གིས་ཕམ་པར་བྱས་ཏེ། གང་གི་ཕྱིར་བསོད་ནམས་དག་གིས་ཁྱོད་ཀྱི་དོན་བྱས་པ་བཞིན་དུ་རྒྱལ་
སྲིད་ཆེན་པོའྀ་དབང་ཕྱུག་གི་བདག་པོར་བཅུག་པའི་ཕྱིར་རོ། །དེ་ནས་རྒྱལ་པོ་བསོད་ནམས་སྟོབས་གུས་པ་དང་བཅས་པས་ལ་གོར་དུ་སེང་གེའི་ཁྲི་ལས་ལངས་ནས་ཕུ་བོ་དེ་དག་ལ་ལེགས་པར་སྟི་སྟང་བྱས་ཏེ། ཆེ་བ་ལ་འོས་པའི་
ཁྲི་དག་ལ་འདུག་ཏུ་བཅུག་ནས་དེ་དག་གིས་དད་པ་ཕུལ་ཏེ་ཕྱིར་སེང་གེའི་ཁྲི་ལ་འདུག་གོ། །འདུག་ནས་ཕུ་བོ་དེ་དག་ལ་སྔོན་བྱུང་བའི་གཏམ་གྱི་ཡང་དག་པར་གློད་པ་ངེས་པར་བྱེད་པས་ཕྱིར་མགུ་བར་བྱས་ཏེ། བཀུར་སྟི་ཆེན་

71-1-16a

པོས་བཀུར་སྟི་བྱས་ནས་ལོངས་སྤྱོད་ཆེན་པོ་དག་གིས་བགོ་སྐལ་བྱིན་ནོ། །དེ་ནས་ཕྱི་ཞིག་ན་ཕུ་བོ་དེ་དག་དང་། སྐྱེ་བོ་མང་པོ་དེ་དག་བསོད་ནམས་དག་ལ་གཟུད་པར་འདོད་ནས་འཁོར་ཆེན་པོ་འདུས་པ་རྣམས་ལ་
འདི་སྐད་ཅེས་སྨྲས་སོ། །བསོད་ནམས་མིན་པས་མི་བཟད་པའི། །སྡུག་བསྔལ་ཀུན་རྒྱས་དམྱལ་བར་འགྲོ། །བསོད་ནམས་མིན་པས་བརླག་པ་ཡི། །དུད་འགྲོའི་སྐྱེ་གནས་མི་བཟད་འགྲོ། །བསོད་ནམས་མིན་པས་བཀྲེས་
སྐོམ་གྱི། །ཤིན་ཏུ་གཟིར་བའི་ཡི་དགས་འགྲོ། །བསོད་ནམས་མིན་པས་རྟག་ཏུ་ནི། །ཤིན་ཏུ་སྡུག་བསྔལ་བྲན་དུ་འགྱུར། །བསོད་ནམས་མིན་པས་ལྐུག་པར་འགྱུར། །བསོད་ནམས་མིན་པས་འོན་པར་འགྱུར། །བསོད་
ནམས་མིན་པས་གླེན་པར་འགྱུར། །ཤེས་རབ་འཆལ་ཅིང་ཡིད་མི་བདེ། །བསོད་ནམས་མིན་པས་ལོག་པར་ཤེས། །བྱད་ངན་པོར་ཡང་དེ་བཞིན་འགྱུར། །བསོད་ནམས་མིན་ལེས་འཇིག་རྟེན་པ། །ཀུན་གྱི་སྨད་པའི་རིགས་
དམར་འགྱུར། །བསོད་ནམས་མིན་པས་སེམས་འཁྲུལ་དང་། །དེ་བཞིན་འཇིག་རྟེན་སྡང་བར་འགྱུར། །བསོད་ནམས་མིན་པས་དེ་བཞིན་སྨྱོ། །བསོད་ནམས་མིན་པས་དགྲ་རྣམས་འབྱུང་། །བསོད་ནམས་མིན་པས་དོན་རྣམས་
ཀུན། །འབད་དེ་བརྩམས་པ་ཆུད་ཟར་འགྱུར། །དེ་བཞིན་བསོད་ནམས་མ་ཡིན་པས། །ལུས་ནི་རྩུབ་ཅིང་གས་པར་འགྱུར། །བསོད་ནམས་མིན་པས་རྟག་ཏུ་ཡང་། །གཟི་བྱིན་མེད་ཅིང་མདངས་མེད་འགྱུར། །སེམས་མེད་པ་ཡི་དངོས་
པོ་ཡང་། །བསོད་ནམས་མིན་པས་དགྲ་རུ་འགྱུར། །ཡི་དགས་ལྟོ་འཕྱེ་སྲིན་རྣམས་ཀྱང་། །བསོད་ནམས་མིན་པས་མྱུར་དུ་གསོད། །བསོད་ནམས་མིན་པས་ཕན་པའི་སྨན། །ཤིན་དུ་གནོད་པ་དག་ཏུ་འགྱུར། །བསོད་ནམས་མིན་པས་
དབུལ་བར་འགྱུར། །བསོད་ནམས་མིན་པས་བརྙས་པར་འགྱུར། །བསོད་ནམས་མིན་པས་སྐྱེ་བོ་དག །སྐུར་པ་རབ་འཇིགས་བཏབ་པར་འགྱུར། །བསོད་ནམས་མིན་པས་རྟག་ཏུ་ནི། །འཁོར་དག་དང་ཡང་འབྱེ་བར་འགྱུར། །བསོད་ནམས་མིན་

71-1-16b

པས་མིག་མེད་འགྱུར། །བསོད་ནམས་མིན་པས་སྡུག་བསྔལ་འགྲོགས། །བསོད་ནམས་མིན་པས་ནད་མང་ཞིང་། །བསོད་ནམས་མིན་པས་གསོ་དཀར་འགྱུར། །བསོད་ནམས་མིན་པས་གཟུགས་མི་སྡུག །བསོད་ནམས་མིན་པས་
གདངས་མི་སྙན། །བསོད་ནམས་མིན་པས་ལག་སོར་རྡུམ། །ཐེང་པོ་དེ་བཞིན་ཚིག་མི་བཙན། །བསོད་ནམས་མིན་པས་རྒྱལ་པོ་དང་། །ཆོམ་རྐུན་མེ་ཡིས་ལོངས་སྤྱོད་བཤིག །བསོད་ནམས་མིན་པས་མི་སྙན་ཐོས། །བསོད་ནམས་མིན་
པས་རྟག་ཏུ་འཇིགས། །བསོད་ནམས་མིན་པས་འགྲོ་བ་ན། །ས་ནི་སྡོང་དུམ་ཚེར་མས་གང་། །ཇི་སྟེ་ལོངས་སྤྱོད་འདོད་པའི་མི། །མི་གླས་ཡང་ན་ཚོང་བྱེད་ཀྱང་། །བསོད་ནམས་མིན་པས་རྟག་ཏུ་ནི། །ཆུད་ཟ་དེ་ཡི་ནོར་མི་འགྱུར། །
གང་དག་ཅི་ཡང་འཇིག་རྟེན་ན། །མི་དགའ་མི་སྡུག་མི་ཕན་གང་། །དེ་བཞིན་ལོག་པར་ལྟུང་བ་ཀུན། །འདི་ཀུན་བསོད་ནམས་མིན་ལས་གྱུར། །བསོད་ནམས་ཀྱིས་ནི་བསྲུང་བར་འགྱུར། །བསོད་ནམས་དག་གིས་བརྩོན་པར་འགྱུར། །
བསོད་ནམས་ཀྱིས་ནི་ཚ་གྲང་སྐྱོབ། །ལོག་འབབ་ཆར་ཟློག་བསོད་ནམས་ཀྱིས། །བསོད་ནམས་འདོད་བཞོ་བ་བཞོན་ཡིན། །ཡིད་བཞིན་ནོར་བཟང་བསོད་ནམས་ཀྱིས། །བསོད་ནམས་དག་གིས་དཔག་བསམས་ཤིང་། །ཡིད་
འོང་འདོད་ཀུན་འབྲས་བུར་སྨིན། །བསོད་ནམས་དག་གིས་བསོད་པ་འཐོབ། །བསོད་ནམས་ཀྱིས་ནི་ཡིད་འོང་དཔལ། །བསོད་ནམས་དག་གིས་ཡིད་བརྟན་འགྱུར། །བསོད་ནམས་ཅན་ནི་རིགས་མཐོར་སྐྱེ། །བསོད་ནམས་དག་གིས་
གྲགས་པ་འཐོབ། །བསོད་ནམས་ཀྱིས་ནི་མང་ཐོས་འགྱུར། །རྒྱ་ཆེ་ཡིད་འོང་བསོད་ནམས་ཀྱིས། །བསོད་ནམས་དག་གིས་ཐོས་པ་འཛིན། །ནད་མེད་འཆི་བ་བསོད་ནམས་ཀྱིས། །བསོད་ནམས་ཀྱིས་ནི་འཆི་བདག་བཅོམ། །འཆི་
བདག་མཆོག་ཏུ་འཇིགས་པ་ཡིས། །བསོད་ནམས་དག་གིས་འཇིགས་མི་འགྱུར། །གཞལ་མེད་ཁང་གནས་ལྷ་རྣམས་ཀྱང་། །ལྷ་ཡི་བདེ་སྟེན་བསོད་ནམས་ཀྱིས། །སུམ་བཅུ་གསུམ་པ་བསོད་ནམས་ཀྱིས། །དེ་བཞིན་བསོད་

71-1-17a

ནམས་འཐབ་བྲལ་ལྷ། །དགའ་ལྡན་ལྷ་རབ་བསོད་ནམས་ཀྱིས། །འཕྲུལ་དགའ་དག་ཀྱང་དེ་བཞིན་ཏེ། །འདོད་པའི་དབང་ཕྱུག་བསོད་ནམས་ཀྱིས། །དབང་བྱེད་ལྷར་ཡང་དེ་བཞིན་འགྱུར། །བསོད་ནམས་དེ་བཞིན་ཚངས་པ་
ཆེ། །ལྷ་རྣམས་བྱེ་བ་དག་གིས་རྗེད། །ཚངས་པའི་འཇིག་རྟེན་སྟོང་དག་གི། །དབང་བྱེད་པ་ཡི་མངའ་བདག་འགྱུར། །བསོད་ནམས་དག་གིས་འདོད་དགུ་ཡི། །ཕུན་སུམ་ཚོགས་དགུ་རྟག་ཏུ་གནས། །སེམས་མེད་པ་ཡི་དངོས་པོ་ཡང་། །བསོད་ནམས་དག་
གིས་དབང་དུ་གྱུར། །རྒྱལ་པོ་བསོད་ནམས་སྟོབས་ཀྱིས་ཚེ་འདི་དང་ཚེ་ཕྱི་མ་ཡང་དག་པར་སྟོན་པ་ཡིད་འཕྲོག་པའི་ཚིག་དེ་སྐད་ཅེས་བརྗོད་པ་ན། སྐྱེ་བོ་ཕལ་པོ་ཆེ་དེ་དག་བསོད་ནམས་ལ་བརྟེན་པར་གྱུར་ཏོ། །དེ་ནས་རྒྱལ་པོ་བསོད་ནམས་སྟོབས་ཀྱིས་
སྐྱེ་བོ་ཕལ་པོ་ཆེ་དེ་དག་ལ་ཡང་ཤས་ཆེར་བསོད་ནམས་དག་ལ་གཅེས་སུ་འཛིན་པ་བསྐྱེད་པའི་ཕྱིར་ནམ་མཁའ་ལ་བལྟས་ཏེ་སེམས་བསྐྱེད་ནས་ཚིག་ཏུ་སྨྲས་པ། ཀྱེ་མ་བདག་ལ་རྒྱལ་པོའི་ཕོ་བྲང་འཁོར་འདི་ཕྱི་ནང་དུ་བཅས་པར་ལྷའི་རིན་པོ་ཆེ་སྣ་
ཚོགས་ཀྱི་ཆར་དང་། གོས་ཀྱི་ཆར་རབ་ཏུ་བབ་ཀྱང་ཅི་མ་རུང་ཞེས་བྱས་སོ། །དགེ་སློང་དག་རྒྱལ་པོ་བསོད་ནམས་སྟོབས་ཀྱིས་སེམས་བསྐྱེད་མ་ཐག་ཏུ་ནམ་མཁའ་ལས་ལྷའི་གོས་ཆེ་བ་ལ་འོས་པ་རྣམ་པ་སྣ་ཚོགས་ཀྱི་ཆར་བབ་པོ། །དེའི་རྗེས་ལ་
ལྷའི་མེ་ཏོག་ཡིད་དུ་འོང་བའི་ཆར་ཡང་བབ་བོ། །དེའི་རྗེས་ལ་ལྷའི་རིན་པོ་ཆེའི་ཆར་བབ་སྟེ། རྒྱལ་པོའི་ཕོ་བྲང་འཁོར་དེ་དག་ཐམས་ཅད་རིན་པོ་ཆེ་སྣ་ཚོགས་ཀྱིས་ཁེབས་པར་གྱུར་ནས་ཙེར་ལྷང་ཞིང་འདུག་གོ། །དེ་ནས་ལྷ་དང་མི་རྣམས་དགའ་
བར་བྱེད་པའི་བསོད་ནམས་དག་གི་རྣམ་པར་གཡོ་བའི་རྨད་དུ་བྱུང་བ་དེ་མཐོང་ནས་སྐྱེ་བོ་མང་པོ་དེ་དག་ཐམས་ཅད་མཆོག་ཏུ་ཡ་མཚན་དུ་གྱུར་ནས་བསོད་ནམས་དག་ལ་གཅེས་སུ་འཛིན་པ་ཡང་དག་པར་སྐྱེས་ཏེ་དགའ་བར་གྱུར་ནས། ཀྱེ་མ་
ལྷ་བསོད་ནམས་སྟོབས་ཀྱི་བསོད་ནམས་དག་གི་ཆེ་བ་ཉིད་ཅེས་ཆེད་དུ་རྗོད་པ་ཆེད་དུ་བརྗོད་དོ། །དེ་ནས་རེ་ཤིག་ན་སྐབས་ཀྱི་གཏམ་དེ་ཉི་འོག་གི་རྒྱལ་པོ་དག་གིས་ཐོས་སོ། །ཐོས་ནས་ཀྱང་ཡང་དེ་དག་མཆོག་ཏུ་ཡ་མཚན་དུ་གྱུར་ནས་

71-1-17b

བདག་ཉིད་ཆེན་པོ་དེ་ནི་བསོད་ནམས་ཀྱིས་ཆེ་བར་གྲགས་པ་ཞིག་སྟེ། བསྙེན་བཀུར་བྱ་བར་འོས་སོ་ཞེས་ཟེར་ནས་ཐམས་ཅད་འདུས་ཏེ་དཔུང་གི་ཚོགས་ཡན་ལག་བཞི་གླང་པོ་ཆེའི་ཚོགས་དང་། རྟའི་ཚོགས་དང་། ཤིང་རྟའི་ཚོགས་
དང་། དཔུང་བུ་ཆུང་གི་ཚོགས་རྣམས་གོ་བསྐོན་ནས། རྒྱལ་པོ་བསོད་ནམས་སྟོབས་ལ་ཕུ་དུད་བྱ་བའི་ཕྱིར་སོང་སྟེ། བཞོན་པ་དག་ལས་བབས་ནས་རྒྱལ་པོ་བསོད་ནམས་སྟོབས་ཀྱི་ཞབས་གཉིས་ལ་བཏུགས་ཏེ་ཐལ་མོ་སྦྱར་ནས་
སྨྲས་པ། ལྷ་ཁྱོད་ནི་བསོད་ནམས་ཀྱི་སྟོབས་ཀྱིས་ཆེ་བར་གྲགས་པ་ལགས་ཏེ། ཁྱོད་ཀྱིས་ནི་རྒྱལ་པོ་མཛོད་ཅིག །བདག་ཅག་ནི་ཞབས་འབྲིང་འཚལ་ལོ་ཞེས་བྱས་སོ། །དེ་ནས་རྒྱལ་པོ་བསོད་ནམས་སྟོབས་ཀྱིས་ཆེ་བ་ལ་འོས་པའི་
རིན་པོ་ཆེ་དག་གིས་ཅི་འདོད་པར་ཡང་དག་པར་འཚེངས་པར་བྱས་ནས་འཁོར་དང་བཅས་པར་དགེ་བ་བཅུའི་ལས་ཀྱི་ལམ་ལ་བཀོད་དེ། རང་རང་གི་ཡུལ་དུ་བཀྱེའོ། །དེ་ནས་རིམ་གྱིས་གཏམ་དེ་རྒྱལ་པོ་གསལ་སྟོབས་ཀྱིས་ཐོས་སོ། །ཐོས་ནས་
ཀྱང་ཐོག་མ་ཁོ་ནར་ཕོ་ཉ་བཏང་ནས་ཤིན་ཏུ་རིངས་པར་དཔུང་ཆེན་པོ་ཐམས་ཅད་དང་ཆས་ཏེ། བར་ཞིག་གིས་རྒྱལ་པོ་བསོད་ནམས་སྟོབས་ལ་ཕུ་དུད་དུ་བྱ་བའི་ཕྱིར་སོང་ནས་སྙིང་བུ་ལ་གདུང་བས་བརྒྱལ་ཏེ་མཆི་མས་རྣང་ཞིང་ངུ་ཀ་ཕྱུང་ལ་མིག་མཆི་
མས་ཀུན་དུ་གང་སྟེ། གླང་པོ་ཆེའི་རྒྱབ་ནས་བབས་ནས་ཚམ་ཚོམ་མེད་པར་རྒྱལ་པོ་བསོད་ནམས་སྟོབས་ཀྱི་མགུལ་ནས་འཁྱུད་དེ། མགོ་བོར་ཡང་བསྣམས་ཡུན་རིང་རབ་ཏུ་བརྟགས་ཏེ་སྨྲས་པ། བུ་གཞོན་ནུ་ད་ཅི་ཟེར་བ་ཤེས་པར་གྱིས་
ཤིག །ང་ནི་ད་རྒས་ཤིང་འཁོགས་ལ་བཏུགས་ཏེ་རྒྱལ་སྲིད་ཀྱི་ཁུར་ཁྱེར་མི་ནུས་ཀྱིས། རྒྱལ་སྲིད་ཀྱི་ཁུར་ལོང་ཤིག་ཅེས་སྨྲས་ནས་རྒྱལ་པོ་གསལ་སྟོབས་ཀྱིས་རང་གི་མགོ་ལས་དར་ཐོད་དང་། ཅོད་པན་དང་། དབུ་རྒྱན་ཕུད་དོ། །དེ་ནས་
རིམ་གྱིས་རྒྱལ་པོ་བསོད་ནམས་སྟོབས་འཛམ་བུའི་གླིང་ཐམས་ཅད་དུ་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །དེ་འཛམ་བུའི་གླིང་ན་གནས་པའི་སྐྱེ་བོ་མང་པོ་ཐམས་ཅད་ཅི་འདོད་པར་གསེར་དངུལ་གྱིས་འཚེངས་པར་

71-1-18a

བྱས་ནས་དགེ་བ་བཅུའི་ལས་ཀྱི་ལམ་ལ་བཀོད་དོ། །དེའི་ཚེ་འཛམ་བུའི་གླིང་འདི་ན་སུ་ཡང་དབུལ་པོ་འམ་ནད་པ་མེད་དོ། །འཛམ་བུའི་གླིང་གི་མི་ཐམས་ཅད་བདེ་བར་གྱུར་ཏེ། ནད་མེད་ཅིང་སྟོབས་དང་ལྡན་པ་དང་། དབང་པོ་རྣམས་
རྒྱས་པ་དང་། ཕྱུག་ཅིང་ནོར་མང་ལ་ལོངས་སྤྱོད་ཆེ་བ་དང་། ནོར་དང་འཚོགས་ཆས་མང་བ་དང་། བདོག་པ་མང་བ་དང་། ནོར་དང་། འབྲུ་དང་། གསེར་དངུལ་དང་། མཛོད་དང་། བང་བ་རྣམས་ཀྱི་ཚོགས་མང་བར་གྱུར་ཏོ། །འཛམ་བུའི་གླིང་འདི་ཐམས་ཅད་
ཀྱང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་མི་མང་པོས་གང་བ་དང་། རྩོད་པ་དང་འཐབ་པ་ཞི་བ་དང་། འཁྲུག་པ་དང་ནང་འཁྲུག་དང་ཆོམ་རྐུན་དང་ནད་དང་མུ་གེ་མེད་པ་དང་འབྲས་སཱ་ལུ་དང་བུ་རམ་ཤིང་དང་བ་ལང་དང་མ་
ཧེ་དང་ལྡན་པར་འདུག་སྟེ། ཚེར་མ་དང་རྡོ་དང་གསེག་མ་དང་གྱོ་མོ་རྣམས་ནི་མེད་པར་གྱུར། མེ་ཏོག་དང་འབྲས་བུའི་ཤིང་རྣམས་ནི་རྟག་ཏུ་རྒྱས་ཏེ། ལྷ་ཡང་དུས་དུས་སུ་ཆར་གྱི་རྒྱུན་ལེགས་པར་འབེབས་ཤིང་འབྲུ་ཤིན་དུ་རྒྱལ་བར་གྱུར་ཏོ། །དེ་ནས་
སྐྱེ་བོ་མང་པོ་ཐམས་ཅད་ཀྱང་དགའ་བ་སྐྱེས་ནས་བསོད་ནམས་ལ་བརྟེན་པར་གྱུར་ཏེ། རྟག་ཏུ་སྦྱིན་པ་དག་སྦྱིན་ཞིང་བསོད་ནམས་དག་བྱེད་དོ། །བསྙེན་གནས་ལ་གནས་ཤིང་ཚུལ་ཁྲིམས་ཡང་དག་པར་བླངས་ཏེ་གནས་སོ། །དེའི་ཚེ་འཛམ་བུའི་གླིང་
དུ་མིར་གྱུར་པ་ལས་འཆི་བ་གང་ཡང་རུང་བ་དེ་དག་ཐམས་ཅད་ལུས་དང་བྲལ་ནས་ལྷ་རྣམས་ཀྱི་ནང་དུ་སྐྱེ་བར་འགྱུར་ཏེ། ཕལ་ཆེར་ནི་རྒྱལ་ཆེན་བཞིའི་ལྷ་རྣམས་ཀྱི་ནང་དུ་སྐྱེའོ། །རྒྱལ་པོ་བསོད་ནམས་སྟོབས་ཀྱང་སེམས་ཅན་དཔག་ཏུ་མེད་པ་
རྣམས་ཚེ་འདི་དང་། ཚེ་ཕྱི་མའི་དོན་རྣམས་ལ་བཀོད་ནས་འཁོར་སེམས་ཅན་སྟོང་ཕྲག་དུ་མ་དག་དང་ཤི་འཕོས་ཏེ་ལྷའི་རིས་དགའ་ལྡན་དུ་སྐྱེས་སོ། །དགེ་སློང་དག་ཁྱེད་དེའི་ཚེ་དེའི་དུས་ན་རྒྱལ་པོ་བསོད་ནམས་སྟོབས་ཤེས་བྱ་བར་གྱུར་པ་དེ་གཞན་
ཞིག་ཡིན་པ་སྙམ་དུ་སེམས་ན། དེ་ལྟར་མི་བལྟའི་ང་ཉིད་དེའི་ཚེ་དེའི་དུས་ན་བྱང་ཆུབ་སེམས་དཔར་གྱུར་ཏོ། །རྒྱལ་པོ་བསོད་ནམས་སྟོབས་ཀྱི་ཡབ་རྒྱལ་པོ་གསལ་སྟོབས་ཤེས་བྱ་བ་གང་ཡིན་པ་དེ་ནི་རྒྱལ་པོ་ཟས་གཙང་མ་འདི་ཉིད་དེའི་ཚེ་དེའི་

71-1-18b

དུས་ན་རྒྱལ་པོ་གསལ་སྟོབས་ཤེས་བྱ་བར་གྱུར་ཏོ། །བཙུན་མོ་རྣམ་པར་སྤ་བ་ཞེས་བྱ་བར་གྱུར་པ་གང་ཡིན་པ་དེ་ནི་ལྷ་མོ་སྒྱུ་འཕྲུལ་ཆེན་པོ་འདི་ཉིད་ཡིན་ནོ། །གཞོན་ནུ་གཟུགས་དང་ལྡན་པ་གང་ཡིན་པ་དེ་ནི་སྲུའི་བུ་དགེ་སློང་དགའ་བོ་
འདི་ཉིད་ཡིན་ནོ། །བརྩོན་འགྲུས་དང་ལྡན་པ་གང་ཡིན་པ་དེ་ནི་དགེ་སློང་གྲོ་ཞིན་སྐྱེས་བྱེ་བ་ཉི་ཤུ་པ་འདི་ཉིད་ཡིན་ནོ། །བཟོ་དང་ལྡན་པ་གང་ཡིན་པ་དེ་ནི་དགེ་སློང་མ་འགགས་པ་འདི་ཉིད་ཡིན་ནོ། །ཤེས་རབ་ཅན་གང་ཡིན་པ་དེ་ནི་དགེ་སློང་ཤཱ་རིའི་བུ་འདི་
ཉིད་ཡིན་ནོ། །ལྷའི་དབང་པོ་བརྒྱ་བྱིན་གང་ཡིན་པ་དེ་ནི་དགེ་སློང་མཽད་གལ་གྱི་བུ་འདི་ཡིན་ནོ། །རྒྱལ་པོ་ཤི་འཕོས་ནས་བསོད་ནམས་སྟོབས་རྒྱལ་སར་ཞུགས་པ་གང་ཡིན་པ་དེ་ནི་བདུད་སྡེ་ཅན་འདི་ཉིད་ཡིན་ནོ། །སྔོན་མི་དབུལ་པོ་གང་གི་ཁྱིམ་དུ་
གཞོན་ནུ་བསོད་ནམས་སྟོབས་ཞུགས་པ་གང་ཡིན་པ་དེ་ནི་དགེ་སློང་སྒྲ་གཅན་ཟིན་འདི་ཉིད་ཡིན་ནོ། །རྒྱལ་པོས་མི་རྐང་ལག་མེད་པར་བྱས་ནས་གཞོན་ནུ་བསོད་ནམས་སྟོབས་ཀྱིས་རང་གི་ཁྲག་གིས་ཚིམ་པར་བྱས་ཤིང་། རང་གི་རྐང་ལག་གིས་
བཏུད་དེ་བདེན་པས་བསྐུལ་ནས་སྔོན་གྱི་ལུས་ཇི་ལྟ་བ་བཞིན་དུ་བཞག་པ་གང་ཡིན་པ་དེ་ནི་དགེ་སློང་ཀཽ་ཌི་ནྱ་འདི་ཉིད་དེའི་ཚེ་དེའི་དུས་ན་རྒྱལ་པོ་ལ་སྨན་ཆོས་གསོལ་བའི་མིར་གྱུར་ཏོ། །དགེ་སློང་དག་དེ་བས་ན་བསོད་ནམས་གང་ཡིན་པ་དེ་ནི་རྣམ་
གྲངས་འདི་ཉིད་ཀྱི་དུས་ཐམས་ཅད་དང་། རྣམ་པ་ཐམས་ཅད་དུ་སེམས་ཅན་ཐམས་ཅད་ཀྱི་ཉམས་སུ་དཔེན་པ་ཡིན་པར་རིག་པར་བྱའོ། །དགེ་སློང་དག་དེ་བས་ན་འདི་སྐད་དུ་བསོད་ནམས་ལྟར་སེམས་ཅན་རྣམས་ཀྱི་ཉམས་སུ་དཔེན་པ་གཞན་ཅི་
ཡང་ངས་ཡང་དག་པར་རྗེས་སུ་མ་མཐོང་ངོ་ཞེས་ང་སྨྲའོ་ཞེས་བཀའ་སྩལ་ནས། དགེ་སློང་དག་ཐེ་ཙོམ་སྐྱེས་ཏེ། ཐེ་ཙོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒྱལ་པོ་བསོད་ནམས་སྟོབས་ཀྱིས་ལས་
ཅི་བགྱིས་ན་ལས་དེའི་རྣམ་པར་སྨིན་པས་འདི་ལྟར་རྒྱལ་པོ་དབང་ཆེ་བར་གྲགས་པར་གྱུར་ལ། ལྷ་དང་མི་རྣམས་ཀྱིས་རྒྱལ་པོར་སྩོལ་ཅིང་ཅི་བསམས་པ་དང་། ཅི་འཚལ་བ་དེ་དག་ཐམས་ཅད་བསམས་པ་ཙམ་ཀྱིས་ནམ་མཁའ་ལས་འབབ་

71-1-19a

ཅིང་དེ་བཙས་པའི་ཚེ་ཡང་ས་གཡོས་པར་གྱུར་ཏེ། ལྷའི་རིན་པོ་ཆེའི་ཆར་པུས་མོ་ནུབ་པ་ཙམ་བབ་ལ་ལྷའི་སེང་གེའི་ཁྲི་ལ་བཞག་ཅིང་ལྷའི་དབང་པོ་བརྒྱ་བྱིན་གྱིས་རང་ཉིད་ལག་དར་ཏེ། ལྷའི་གདུགས་བཟུང་ཞིང་གཏེར་མི་ཟད་པ་ཡང་
བྱུང་བར་གྱུར་པ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རྒྱལ་པོ་བསོད་ནམས་སྟོབས་ཉིད་ཀྱིས་ཚོགས་རྙེད་ཅིང་རྐྱེན་གྲུབ་པ་དང་ལྡན་ཏེ་དབའ་རྒལ་བཞིན་དུ་འབྱུང་ལ། གདོན་མི་ཟ་བར་འོང་བའི་ལས་དེ་དག་བྱས་ཤིང་བསགས་པས་
ན། དགེ་སློང་དག་བསོད་ནམས་སྟོབས་ཉིད་ཀྱིས་ལས་བྱས་ཤིང་བསགས་པ་དེ་དག་གཞན་སུ་ཞིག་གིས་ཉམས་སུ་མྱོང་བར་འགྱུར་ཏེ། དགེ་སློང་དག་ལས་བྱས་ཤིང་བསགས་པ་རྣམས་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། 
ཆུའི་ཁམས་དང་མེའི་ཁམས་དང་རླུང་གི་ཁམས་ལ་རྣམ་པར་སྨིན་པར་མི་འགྱུར་ཏེ། ལས་དགེ་བ་དང་ལས་མི་དགེ་བ་བྱས་ཤིང་བསགས་པ་རྣམས་ནི་ཟིན་པའི་ཕུང་པོ་དང་། ཁམས་དང་སྐྱེ་མཆེད་རྣམས་འབའ་ཞིག་ལ་རྣམ་པར་སྨིན་པར་
འགྱུར་རོ། །ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །དགེ་སློང་དག་སྔོན་བྱུང་བ་འདས་པའི་དུས་ན་སྟོན་པ་དེ་བཞིན་གཤེགས་པ་དགྲ་བཅོམ་པ་
ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གཞན་གྱིས་
མི་ཐུབ་པ་ཞེས་བྱ་བ་འཇིག་རྟེན་དུ་བྱུང་སྟེ། ཕྱི་ཞིག་ན་ཡང་དག་པར་རྫོགས་པའི་སངས་རྒྱས་གཞན་གྱིས་མི་ཐུབ་པ་སངས་རྒྱས་ཀྱི་ཕྲིན་ལས་ཐམས་ཅད་མཛད་ནས་རྒྱལ་པོའི་ཕོ་བྲང་འཁོར་ཞིག་ཏུ་བུད་ཤིང་ཟད་པའི་མེ་བཞིན་དུ་ཕུང་པོ་
འི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་ཏེ། དེའི་སྐུ་གདུང་གི་མཆོད་རྟེན་རྒྱལ་པོ་ཞིག་གིས་བརྩིགས་ནས་དུས་སྟོན་གྱི་ལུགས་བཅས་སོ། །ཕྱིས་རེ་ཤིག་ན་མཆོད་རྟེན་གྱི་དུས་སྟོན་བྱེད་པའི་ཚེ་

71-1-19b

འགཎ་ཌཱི་ཡང་བརྡུངས། རྔ་ཡང་བདུངས་ཏེ། དུང་སྒྲིལ་མ་བུས་ནས་དགེ་སློང་ཞིག་འཁོར་ཕལ་པོ་ཆེའི་ནང་ན་འདུག་ཅིང་། ཕྱེད་ཡོལ་ཙམ་ན་སྲོག་ཆགས་འབུམ་ཕྲག་དུ་མ་འདུས་པ་དག་ལ་ཉིན་མོ་ཆོས་སྟོན་ཏོ། །དེའི་ཚེ་རྒྱལ་པོའི་
ཕོ་བྲང་འཁོར་དེ་ན་རྒྱན་པོ་པ་རྒྱལ་བ་པོ་ཞེས་བྱ་བ་རྒྱན་པོ་ལ་ཤིན་ཏུ་ཞེན་པ་ཞིག་གནས་ཏེ། དེའི་ཆུང་མ་ནི་རྣམ་པར་རྒྱལ་མ་ཞེས་བྱ་བུ་ནི་རྣམ་པར་རྒྱལ་བ་ཞེས་བྱའོ། །དེ་ནས་རེ་ཤིག་ན་རྒྱན་པོ་པ་རྒྱལ་བ་པོ་དེ་རས་ཟུང་ཅིག་གྱོན་པ་དང་། 
གདུགས་དང་མཆིལ་ལྷམ་ཟུང་གཅིག་དང་པ་ན་ལྔའི་འགྲོན་བུ་རྣམས་མ་གཏོགས་པར་ཅི་བདོག་པ་ཁྱིམ་ན་འདུག་པ་དང་། ཕྱི་རོལ་ན་འདུག་པ་ཐམས་ཅད་རྒྱན་སྐུགས་སུ་ཡལ་ནས་སྡུག་བསྔལ་དང་ཡིད་མི་བདེ་བ་མི་ཟད་པས་གདུངས་
ཏེ། ཀྱི་ཧུད་བསོད་ནམས་མ་བྱས་པ་དང་དབུལ་བ་ནི་ཐ་ཆད་མི་བཟད་པ་ཡིན་ནོ་ཞེས་སྨྲས་ནས་དབུགས་ཚ་བ་རྒྱུན་རིང་པོའྀ་ཤུགས་ཀྱང་ཕྱུང་སྟེ། མཆིལ་ལྷམ་གཉིས་ནི་བགོས། པ་ན་ལྔ་དང་གདུགས་ཀྱང་ཁྱེར་ནས་རྒྱན་པོའི་ས་ནས་སོང་སྟེ། 
མཐར་ཀྱིས་ཆོས་ཉན་པ་གང་ན་འདུག་པའི་ཕྱོགས་དེར་ཕྱིན་ནས་དེ་འབྱོར་པ་དེ་ལྟ་བུ་དང་། སྐྱེ་བོ་ཕལ་པོ་ཆེ་ཐལ་མོ་སྦྱར་ཏེ་ཆོས་ཉན་པ་དེ་དག་མཐོང་ནས་དགའ་བ་ཆེན་པོ་སྐྱེས་ཏེ། རེ་ཤིག་ཆོས་ཇི་ལྟ་བུ་ཞིག་འཆད་པ་བལྟའོ་སྙམ་དུ་བསོམས་ནས། 
དེ་ཉིད་ཀྱི་ཕྱོགས་གཅིག་ཏུ་གདུགས་བཞག་སྟེ། མཆིལ་ལམ་གཉིས་ཕུད་ནས་རྣ་བླགས་ཤིང་ཐལ་མོ་སྦྱར་ཏེ་ཆོས་མཉན་པའི་ཕྱིར་འདུག་གོ། དེ་ནས་རེ་ཤིག་ན་ཆོས་སྨྲ་བས་ཚིགས་སུ་བཅད་པ་འདི་བརྗོད་དེ། བསོད་ནམས་བསགས་ན་བདེ་བར་
འགྱུར། །དེ་ཕྱིར་མིས་ནི་བསོད་ནམས་བྱ། །དེ་ཡང་ཡང་དང་ཡང་དུ་བྱ། །དེ་ཉིད་ལ་ནི་འདུན་པར་བྱ། །ཞེས་སྨྲས་སོ། །དེ་ནས་དེས་ཚིགས་སུ་བཅད་པ་འདི་ཐོས་ནས་བསོད་ནམས་བསགས་པས་བདེ་བར་འགྱུར་བ་དེ་ནི་དེ་བཞིན་ཏེ། གང་གི་ཕྱིར་བདག་འདི་
ཁོ་ན་ལྟར་མཆོག་ཏུ་མི་བཟད་པར་དཀོས་ཐག་ཅིང་འདུག་པ་ལས་ན། བདག་གིས་ཚེ་སྔ་མ་ལ་གོར་མ་ཆག་པར་བསོད་ནམས་དག་མ་བྱས་ཀྱིས་བདག་གིས་བསོད་ནམས་ཆུང་ཟད་ཅིག་བྱའོ་སྙམ་དུ་བསམས་སོ། །དེ་ནས་དེ་ལྟར་བསམས་ནས་

71-1-20a

བདག་ལ་ཅི་བདོག་པ་རྟོག་པ་ལ་ཞུགས་སོ། །རེ་ཤིག་ན་རས་ཟུང་ཅིག་གྱོན་པ་དང་། གདུགས་དང་། མཆིལ་ལྷམ་གཉིས་དང་། པ་ན་ལྔའི་འགྲོན་བུ་ལུས་པ་རྣམས་མཐོང་སྟེ། གཞན་ཐམས་ཅད་རྒྱན་སྐུགས་སུ་ཡལ་ནས་
དེ་སེམས་པ་ལ་ཞུགས་ཏེ་ཅི་སྟེ་པ་ན་ལྔ་དང་བླ་གོས་སྦྱིན་ན་ནི་ལྟོགས་ཏེ་འཆི་བར་ཡང་འགྱུར། འོན་ཏེ་མི་སྦྱིན་ན་ནི་བསོད་ནམས་མེད་པར་འཇིག་རྟེན་ཕ་རོལ་དུ་འགྲོ་དགོས་ཏེ། དེར་ཡང་དང་ཡང་དབུལ་བའི་སྡུག་བསྔལ་ཐ་དད་དུ་འགྱུར་ན་
གང་གིས་ལྟོགས་ཏེ་འཆི་བར་ཡང་མི་འགྱུར་ལ་བསོད་ནམས་ཀྱིས་བགོད་པར་ཡང་འགྱུར་བའི་ཐབས་ཅི་ཡོད་སྙམ་ཏེ། ཡང་བསམས་པ། བསོད་ནམས་མེད་པར་འཇིག་རྟེན་ཕ་རོལ་ཏུ་འགྲོ་བས་ནི་ལྟོགས་ཏེ་ཤི་ཡང་སླས། པ་ན་ལྔ་དང་བླ་གོས་འདི་
དག་ནི་ངེས་པར་སྦྱིན་པ་སྦྱིན་པར་བྱའོ་སྙམ་སྟེ། དེ་དེ་སྙམ་དུ་སེམས་པའི་སྐབས་སུ་ཡང་ཆོས་སྨྲ་བས་ཚིགས་བཅད་པ་ཐ་དད་པ་འདི་བརྗོད་དེ། བསོད་ནམས་དལ་ནས་བྱེད་ན་ནི། །སྡིག་ལ་མངོན་པར་དགའ་བར་འགྱུར། །དེ་ཕྱིར་དགེ་བ་
སྨྱུར་ཏེ་བྱ། །སྡིག་པ་ལས་ནི་སེམས་ཀྱང་བཟློག །ཅེས་སྨྲས་སོ། །དེ་ནས་དེས་ཚིགས་སུ་བཅད་པ་འདི་ཐོས་ནས་བསམས་པ། བསོད་ནམས་སྨྱུར་ཏེ་བྱའོ་ཞེས་བཤད་པས་ན་ལ་གོར་དུ་སྦྱིན་པ་སྦྱིན་པར་བྱའོ་སྙམ་མོ། །དེ་ནས་རྒྱན་པོ་པ་
དབུལ་བའི་སྡུག་བསྔལ་གྱིས་ཉམ་ཐག་པ་དེ་དད་པའི་ཤུགས་དྲག་པོས་སེང་གེའི་ཁྲི་ལ་ཆོས་སྨྲ་བ་འདུག་པའི་སྤྱི་བོའི་སྟེང་དུ་གདུགས་བཟུང་ནས་མཆིལ་ལྷམ་གཉིས་རྐང་པའི་དྲུང་དུ་བཞག་སྟེ། པ་ན་ལྔའི་འགྲོན་བུ་དེ་དག་གིས་ཆོས་
སྨྲ་བའི་རྐང་པ་ལ་གཏོར་ནས་རང་གི་ལུས་ལས་བླ་གོས་ཕུད་དེ་ཆོས་སྨྲ་བའི་རྐང་པ་ལ་བཀབ་ནས་བ་སྤུ་ཐམས་ཅད་ཟིང་ཞེས་བྱས་ནས་དད་པར་གྱུར་ཏེ། རྐང་པ་གཉིས་ལ་གཏུགས་ནས་དད་པའི་ཤུགས་དྲག་པོས་སྨོན་ལམ་འདེབས་པ་ལ་
ཞུགས་ཏེ། དགེ་བའི་རྩ་བ་དང་། སེམས་བསྐྱེད་པ་དང་ཆོས་ཀྱི་ཕྱིར་སྦྱིན་པ་ཡོངས་སུ་བཏང་བ་འདིས་ན་བདག་ཚེ་འདི་ཉིད་ཕན་ཅད་དབུལ་པོར་མ་གྱུར་ཅིག །སྐྱེ་བ་ཐམས་ཅད་དུ་ཡང་བསོད་ནམས་ཀྱིས་ཆེ་བར་གྲགས་པར་གྱུར་ཅིག །ལྷ་དང་མི་

71-1-20b

རྣམས་ཀྱིས་ཀྱང་བདག་རྒྱལ་པོར་བཅུག་པར་གྱུར་ཅིག །ཅི་བསམས་པ་དང་ཅི་འདོད་པ་དེ་དག་ཐམས་ཅད་ནམ་མཁའ་ལས་འགྲུབ་པར་གྱུར་ཅིག །བདག་བཙའ་བ་ན་ཡང་ངོ་མཚར་དང་རྨད་དུ་བྱུང་བ་མང་པོ་དག་འབྱུང་བར་གྱུར་ཅིག །གཏེར་མི་ཟད་
པ་རིན་པོ་ཆེ་མང་པོ་དང་། རིན་པོ་ཆེ་སྣ་ཚོགས་ཀྱིས་ལེགས་པར་ཡོངས་སུ་གང་བ་དག་ཀྱང་འབྱུང་བར་གྱུར་ཅིག་ཅེས་དེས་དེ་ལྟར་སྨོན་ལམ་བཏབ་པའི་སྐབས་སུ་ཆོས་སྨྲ་བས་ཀྱང་ཁ་ཏོན་དུ་ཡོངས་སུ་བསྔོ་བ་བྱས་ཏེ་འཁོར་ཐམས་ཅད་དོང་ངོ་། །
རྒྱན་པོ་པ་རྒྱལ་བ་པོ་ཡང་ཆོས་ཀྱི་ཕྱིར་སྦྱིན་པ་དེ་ཉིད་ཡིད་ལ་སེམས་ཤིང་རས་གཅིག་པུ་གྱོན་བཞིན་དུ་བདག་གི་ཁྱིམ་དུ་སོང་ནས་ཆུང་མ་དང་བུས་མཐོང་ངོ་། །དེ་ནས་ཆུང་མ་དང་བུས་བསམས་པ། འདིས་ག་ཤེད་དུ་བླ་གོས་དང་རྒྱན་སྐུགས་སུ་
ཡུལ་བར་བྱས་ཤིག་གུ་སྙམ་སྟེ། མི་དགའ་བར་གྱུར་ནས། ད་ནི་བདག་ཅག་གཉིས་ལུས་སུ་ཟད་དེ། བདག་ཅག་གཉིས་ཀྱང་ཡལ་བར་བྱེད་དུ་འོང་གིས་འདོང་ངོ་ཞེས་སྨྲས་སོ། །དེ་ཡང་ངོ་ཚ་ནས་བདག་ནི་དབུལ་བའི་ཉེས་པས་འདི་ལྟར་སྨ་བབ་པོ་
སྙམ་བསམས་ནས་ཚིགས་སུ་བཅད་དེ་སྨྲས་པ། ཅི་ཞིག་སྡུག་བསྔལ་དབུལ་བ་སྡུག་བསྔལ་ཡིན། །ཅི་ཞིག་ཤིན་དུ་སྡུག་བསྔལ་དབུལ་དེ་ཉིད། །དབུལ་བ་དག་ནི་ཤི་བ་དང་ཡང་མཚུངས། །བདག་ནི་ཤི་བ་འདམ་གྱི་དབུལ་བ་མིན། །ཞེས་སྨྲས་ནས་
དབུགས་ཚ་བ་རྒྱུན་རིངས་པོའི་ཤུགས་ཕྱུང་སྟེ་ཅང་མི་ཟེར་བར་འདུག་གོ། །དེ་ནས་དེའི་ཁྱིམ་གྱི་ར་བ་ན་ཁྲོན་པ་ཞིག་ཡོད་དེ། དེའི་ཆུང་མས་ཆུ་བཅུ་བའི་ཕྱིར་བུམ་པ་ཐག་པས་བཏགས་ནས་དེའི་ནང་དུ་བཏང་སྟེ་ཆུ་ཡར་དབྱུང་སྙམ་པ་དང་། རེ་ཤིག་ན་ཡང་
དབྱུང་བར་མ་ནུས་ནས་དེས་རྒྱལ་བ་པོ་ལ། ཇོ་བོ་བུམ་པ་འདི་ཡར་དབྱུང་བར་མི་ནུས་ན་ཚུར་སྤྱོན་ཏེ་གཟིགས་ཤེས་བོས་སོ། །དེ་ནས་དེས་ཀྱང་ཡར་དབྱུང་བར་བརྩམས་སོ། །རེ་ཤིག་ན་དེས་ཀྱང་ཡར་དབྱུང་མ་ནུས་ནས་དེ་གཉིས་ཀྱི་བུ་ལ་བོས་སོ། །དེ་ནས་དེ་
གསུམ་ཆར་གྱིས་ཤ་དང་ལྤགས་པ་རལ་ཏེ། འབད་པ་ཆེན་པོས་དེའུ་མ་ཕྱིན་ཏེ་ཕྱིན་ཏོ། །རེ་ཤིག་ན་བལྟས་ན་བུམ་པ་དེའི་འོག་ན་ཟངས་ཟུང་ལྔ་གསེར་དངུལ་གྱིས་ཡོངས་སུ་གང་བ་ཐོགས་ཤིང་འདུག་པ་མཐོང་སྟེ། དེ་ནས་རྒྱན་པོ་པ་རྒྱལ་བ་པོས་ཚེ་འདིའི་

71-1-21a

སྦྱིན་པའི་འབྲས་བུ་ཤིན་དུ་རྨད་དུ་བྱུང་བ་དེ་མཐོང་ནས་ཡ་མཚན་གྱིས་མིག་རྒྱས་ཏེ། སྙིང་རབ་ཏུ་དགའ་ནས་ཚིགས་སུ་བཅད་དེ་སྨྲས་པ། ཀྱེ་མ་ཉེས་པ་ཀུན་སྤངས་པ། །ཡོན་ཏན་ངོ་བོ་ཉིད་ཀྱི་ཞིང་། །ད་ལྟ་བདག་གིས་ས་བོན་བཏབ། །
ད་ལྟར་ཉིད་དུ་འབྲས་བུར་སྨིན། །ཅེས་སྨྲས་སོ། །དེ་ནས་དེའི་ཆུང་མ་དེ་ཡང་ཡ་མཚན་གྱིས་མིག་རྒྱས་ཏེ་སྨྲས་པ། ཇོ་བོ་འདི་ཅི་ཞིག་ལ་དགོངས་ཏེ་གསུངས། དེས་སྐབས་འདི་རྒྱས་པར་བསྙད་དོ། །དེ་ནས་དེས་ཚེ་འདི་ཉིད་ལ་བསོད་ནམས་དག་གིས་
འབྲས་བུ་མཆོག་ཏུ་ཡིད་དུ་འོང་བ་སྨིན་པའི་རྨད་དུ་བྱུང་བ་དེ་མཐོང་ནས་ཡ་མཚན་དུ་གྱུར་ཏོ། །གཏམ་དེ་ཡང་གཅིག་ནས་གཅིག་ཏུ་ཐོས་པས་རྒྱལ་པོའི་ཕོ་བྲང་འཁོར་དེ་དག་ཀུན་དུ་གྲགས་སོ། །དེ་ཐོས་པས་སྐྱེ་བོ་ཕལ་པོ་ཆེ་ངོ་མཚར་དུ་གྱུར་ཅིང་
རྨད་དུ་གྱུར་ནས་ཕན་ཚུན་དུ་ཀྱེ་མ་ངོ་མཚར་ཏོ། །ཀྱེ་མ་བསོད་ནམས་དག་གི་ཆེ་བ་ཉིད་ཅེས་འཛིན་ཏོ། །དེ་ནས་གློ་བུར་དུ་ཕྱུག་ཅིང་ནོར་མང་ལ་ལོངས་སྤྱོད་ཆེ་བར་གྱུར་ཏེ་བསོད་ནམས་ཀྱི་འབྲས་བུ་མངོན་སུམ་དུ་མཐོང་ནས། དེས་སངས་རྒྱས་དང་ཆོས་
དང་དགེ་འདུན་རྣམས་ལ་དད་པ་དྲག་པོས་ཤས་ཆེར་བཀུར་སྟི་བྱས་སོ། །དེ་ནས་དེ་ཉིན་གཅིག་བཞིན་དུ་དེ་བཞིན་གཤེགས་པའི་མཆོད་རྟེན་ལ་མཆོད་པ་རྒྱ་ཆེར་བྱེད་དོ། །ཆོས་ཀྱང་ཉན་ཏོ། །དགེ་འདུན་གྱིས་བསྐོས་པའི་དགེ་སློང་དག་ཀྱང་ཉིན་གཅིག་
བཞིན་དུ་ཁ་ཟས་བཟང་པོས་ཡང་དག་པར་ཚིམ་པར་བྱེད་དོ། །དགེ་སྦྱོང་དང་བྲམ་ཟེ་དང་བཀྲེན་པ་དང་ནད་པ་དང་སློང་བ་གཞན་དག་ཀྱང་ནོར་གྱིས་ཅི་འདོད་པར་ཡང་དག་པར་འཚེངས་པར་བྱེད་དོ། །གཙུག་ལག་ཁང་ཆེན་པོ་ཡོ་བྱད་ཐམས་ཅད་ཀྱིས་
ཡོངས་སུ་གང་བ་ཡང་བྱེད་དུ་བཅུག་སྟེ། ཕྱོགས་བཞིའི་དགེ་སློང་གི་དགེ་འདུན་ལ་ཕུལ་ནས་དེའི་གྲགས་པས་རྒྱལ་པོའི་ཕོ་བྲང་འཁོར་དེ་ཀུན་དུ་རྒྱས་པར་གྱུར་ཏོ། །ཕྱིས་རེ་ཤིག་ན་རྒྱལ་པོའི་ཕོ་བྲང་འཁོར་དེའི་རྒྱལ་པོ་བུ་མེད་པར་དུས་ལས་འདས་
སོ། །དེ་ནས་གྲོང་ཁྱེར་གྱི་མི་དང་བློན་པོ་རྣམས་ཀྱིས་རྒྱན་པོ་པ་རྒྱལ་བ་པོ་བསོད་ནམས་ཀྱིས་ཆེ་བར་གྲགས་པར་ཤེས་ནས་རྒྱལ་པོར་བཅུག་གོ། །དེ་ནས་དེའི་མིང་རྒྱན་པོ་པ་རྒྱལ་བ་པོ་ཞེས་བྱ་བ་གང་ཡིན་པ་དེ་ནི་མེད་པར་གྱུར་ཏེ། རྒྱལ་པོ་རྒྱལ་བ་

71-1-21b

པོ་རྒྱལ་པོ་རྒྱལ་བ་པོ་ཞེས་བྱ་བར་གྱུར་ཏོ། །དེ་ནས་རྒྱལ་པོ་རྒྱལ་བ་པོས་ཚེ་དེ་ཉིད་ལ་བསོད་ནམས་དག་གི་རྣམ་པར་སྨིན་པའི་འབྲས་བུ་མཆོག་ཏུ་ཡིད་དུ་འོང་བ་མཐོང་ནས་དད་པ་སྐྱེས་ཏེ། ཤས་ཆེར་བསོད་ནམས་ལ་བརྟེན་པར་གྱུར་ཏོ། །
དེ་རྒྱུན་མི་འཆད་པར་སྦྱིན་པ་དག་སྦྱིན་ཞིང་བསོད་ནམས་དག་བྱེད་དེ། ཚུལ་ཁྲིམས་ཡང་དག་པར་བླངས་ནས་གནས་སོ། །བཙུན་མོའྀ་འཁོར་དང་། བློན་པོ་དང་གྲོང་ཁྱེར་གྱི་མི་དང་། ཡུལ་གྱི་མི་དང་སྐྱེ་བོའི་ཚོགས་གཞན་དག་ཀྱང་བསོད་
ནམས་དག་ལ་ཡང་དག་པར་བཙུད་དོ། །ཕྱི་ཞིག་ན་རྒྱལ་པོ་རྒྱལ་བ་པོ་འཆི་བའི་ཆོས་དང་ལྡན་པར་གྱུར་ནས་གཞན་འཕྲུལ་དབང་བྱེད་ཀྱི་ལྷ་རྣམས་དང་སྐལ་བ་མཉམ་པར་སྐྱེས་ཏེ། ལྷའི་རྒྱལ་པོ་དབང་བྱེད་ཀྱི་བུར་གྱུར་ཏོ། །དེ་སྐྱེས་པ་
ན་ནམ་མཁའ་ལས་ལྷའི་རིན་པོ་ཆེའི་ཆར་དང་གོས་ཀྱི་ཆར་རྣམ་པར་མཛེས་པ་བབ་བོ། །དེའི་ལུས་ལས་ཀྱང་གང་གིས་དབང་བྱེད་ཀྱི་ཕོ་བྲང་དེ་དག་ཐམས་ཅད་སྣང་བར་འགྱུར་བ་དང་། དབང་བྱེད་ཀྱི་ལྷ་གཞན་དག་གི་འོད་ཀྱང་འོད་མེད་པར་
འགྱུར་བ་དེ་ལྟ་བུའི་འོད་བྱུང་བར་གྱུར་ཏོ། །དེའི་བསོད་ནམས་དག་གི་འབྲས་བུ་རྣམ་པར་སྨིན་པ་ངོ་མཚར་རྨད་དུ་བྱུང་བ་དེ་མཐོང་ནས་གཞན་འཕྲུལ་དབང་བྱེད་ཀྱི་ལྷ་རྣམས་མཆོག་ཏུ་ཡ་མཚན་དུ་གྱུར་ཏོ། །དགེ་སློང་དག་ཁྱེད་དེའི་ཚེ་
དེའི་དུས་ན་གཞན་ཞིག་རྒྱན་པོ་པ་རྒྱལ་བ་པོ་དེར་གྱུར་པར་འཛིན་ན་དེ་ལྟར་ནི་མི་བལྟའི། རྒྱལ་པོ་བསོད་ནམས་སྟོབས་དེ་ཉིད་དེའི་ཚེ་དེའི་དུས་ན་རྒྱན་པོ་པ་རྒྱལ་བ་པོར་གྱུར་ཏོ། །དམ་པའི་ཆོས་ཐོས་ནས་སེམས་དད་པར་གྱུར་པ་དེས་
ཆོས་སྨྲ་བ་ལ་གདུགས་དང་མཆིལ་ལྷམ་གཉིས་དང་བླ་གོས་དང་པ་ན་ལྔའི་འགྲོན་བུ་རྣམས་ཕུལ་བ་གང་ཡིན་པའི་ལས་དེའི་རྣམ་པར་སྨིན་པས་ཚེ་དེ་ཉིད་ལ་གཏེར་ལྔ་ཡང་བྱུང་ངོ་། །རྒྱལ་སྲིད་ཀྱི་དབང་ཕྱུག་གི་བདག་
པོར་ཡང་བཅུག་གོ། །ལས་དེ་ཉིད་ཀྱི་རྣམ་པར་སྨིན་པས་ལན་སུམ་བཅུ་རྩ་དྲུག་གི་བར་དུ་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །ལན་སུམ་བཅུ་རྩ་དྲུག་གི་བར་དུ་

71-1-22a

འཕྲུལ་དགའ་བ་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །ལན་སུམ་བཅུ་རྩ་དྲུག་གི་བར་དུ་དགའ་ལྡན་པ་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །ལན་སུམ་བཅུ་རྩ་དྲུག་གི་བར་དུ་
འཐབ་བྲལ་བ་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །ལན་སུམ་བཅུ་རྩ་དྲུག་གི་བར་དུ་སུམ་བཅུ་རྩ་གསུམ་པ་རྣམས་ཀྱི་རྒྱལ་སྲིད་ལ་དབང་བྱེད་པར་གྱུར་ཏོ། །ལན་སུམ་བཅུ་རྩ་དྲུག་གི་བར་དུ་རྒྱལ་ཆེན་བཞི་
པ་རྣམས་ཀྱི་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །ལན་བརྒྱ་ཕྲག་དུ་མར་འཁོར་ལོས་བསྒྱུར་བའི་རྒྱལ་པོ་མཐའ་བཞིར་རྒྱལ་བ་ཆོས་ཀྱི་རྒྱལ་པོ་ཆོས་དང་ལྡན་པ་རིན་པོ་ཆེ་སྣ་བདུན་དང་ལྡན་པར་གྱུར་ཏོ། །དེའི་རིན་
པོ་ཆེ་སྣ་བདུན་ནི་རྣམ་པ་འདི་ལྟ་བུ་འདི་དག་ཡིན་ཏེ། འདི་ལྟར་འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་བདུན་པ་སྟེ་བློན་པོ་རིན་པོ་ཆེ་རྣམས་
སོ། །དེའི་བུ་སྟོང་ཐམ་པ་ཡོད་དེ་དཔའ་བ་དང་། རྟུལ་ཕོད་པ་དང་ཡན་ལག་མཆོག་གི་གཟུགས་དང་ལྡན་པ་དང་ཕ་རོལ་གྱི་སྡེ་རབ་ཏུ་འཇོམས་པ་ཤ་སྟག་གོ། །དེས་ས་ཆེན་པོ་རྒྱ་མཚོའི་མཐས་གཏུགས་པ་འདི་ཉིད་མ་ལུས་པར་གནོད་པར་
སྡོ་བ་མེད་ཅིང་འཚེ་བ་མེད་དེ། ཆད་པ་མེད་ཅིང་མཚོན་གྱིས་བདའ་བ་མེད་ལ། ཆོས་དང་འཐུན་ཞིང་སྙོམས་པས་ལེགས་པར་ཕབ་སྟེ་གནས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་དེ་བཀའ་སྩལ་པ། 
གང་གིས་བདག་ཉིད་ཆེན་པོ་ཡི། །བདག་པོར་འགྱུར་བའི་རྒྱུ་འདི་ཡིན། །སངས་རྒྱས་ཕན་འདོགས་དེ་དག་གིས། །འཇིག་རྟེན་དུ་ནི་འདི་གསུངས་སོ། །རྫུ་འཕྲུལ་རྒྱ་ཆེ་འདི་དག་དང་། །ངོ་མཚར་འདི་དག་
ཐོས་གྱུར་ན། །མཁས་དང་ནག་པོའི་རིགས་སྐྱེས་པ་འང་། །སུ་ཞིག་དད་པར་བྱེད་མི་འགྱུར། །དེ་ཕྱིར་བདག་ལ་ལེགས་འདོད་ཅིང་། །བདག་ཉིད་ཆེན་པོ་འདོད་པས་འདིར། །སངས་རྒྱས་བསྟན་པ་དྲན་བྱས་ལ། །དམ་

71-1-22b

པའི་ཆོས་ནི་བླ་མར་བྱ། །དགེ་སློང་དག་དེ་བས་ན་དམ་པའི་ཆོས་ལ་བཀུར་སྟི་བྱའོ། །བླ་མར་བྱའོ། །རིམ་གྲོར་བྱའོ། །མཆོད་པར་བྱའོ་ཞེས་དེ་ལྟར་བསླབ་པར་བྱའོ། །དགེ་སློང་དག་དམ་པའི་ཆོས་ལ་བཀུར་སྟི་བྱེད། 
བླ་མར་བྱེད་རིམ་གྲོ་བྱེད་མཆོད་པ་བྱེད་ཅིང་བརྟེན་ཏེ་གནས་པར་བྱའོ། ཞེས་དེ་ལྟར་བསླབ་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་དགེ་སློང་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་
ལ་མངོན་པར་བསྟོད་དོ། །བསོད་ནམས་སྟོབས་ཀྱི་རྟོགས་པ་བརྗོད་པ་རྫོགས་སོ།། །། རྒྱ་གར་གྱི་མཁན་པོ་འཛི་ན་མི་དྲ་དང་ཞུ་ཆེན་གྱི་ལོ་ཙྪ་བ་བན་དེ་དེ་བ་ཙན་དྲས་བསྒྱུར་ཏེ་གཏན་ལ་ཕབ་པ། །
༄༅།   །རྒྱ་གར་སྐད་དུ། ཙན་དྲ་པྲ་བྷ་ཨ་བ་དཱ་ནཾ།  བོད་སྐད་དུ། ཟླ་འོད་ཀྱི་རྟོགས་པ་བརྗོད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །སངས་རྒྱས་བཅོམ་ལྡན་འདས་
རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་ཏེ། གང་གི་ཚེ་ཚེ་དང་ལྡན་པ་དགེ་སློང་ཤཱ་རིའི་བུ་དང་། མཽད་གལ་གྱི་བུ་གཉིས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་
སུ་མྱ་ངན་ལས་འདས་པ་དེའི་ཚེ། དགེ་སློང་རྣམས་ཐེ་ཙོམ་སྐྱེས་ནས་ཐེ་ཙོམ་ཐམས་ཅད་གཅོད་པར་མཛད་པའི་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་གང་དགེ་སློང་ཤཱ་རིའི་བུ་དང་། མཽད་གལ་གྱི་བུ་
གཉིས་གཙོ་བོ་དེ་མྱ་ངན་ལས་འདས་པ་འདི་མ་བཟོད་ནས་སངས་རྒྱས་ལ་སོགས་པ། དགེ་སློང་གི་དགེ་འདུན་བཞུགས་པའི་ཐོགས་མར་ཡོངས་སུ་མྱ་ངན་ལས་འདས་པ་ནི་ངོ་མཚར་ཆེའོ། །བཅོམ་ལྡན་འདས་
གྱིས་བཀའ་སྩལ་པ། དགེ་སློང་དག་གང་དགེ་སློང་ཤཱ་རིའི་བུ་དང་མཽད་གལ་གྱི་བུ་གཉིས་འདོད་ཆགས་དང་བྲལ་བ་ཞེ་སྡང་དང་བྲལ་བ་གཏི་མུག་དང་བྲལ་བ། སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་

71-1-23a

དང་སྡུག་བསྔལ་བ་དང་ཡིད་མི་བདེ་བ་དང་འཁྲུག་པ་རྣམས་ལས་རྣམ་པར་གྲོལ་བ་ན། གཙོ་བོ་མྱ་ངན་ལས་འདས་པའང་མི་བཟོད་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་བཞུགས་པའི་ཐོག་མར་མྱ་ངན་
ལས་འདས་པ་ངོ་མཚར་ཅི་ཞིག་ཆེ། གང་འདས་པའི་དུས་ན་དགེ་སློང་ཤཱ་རིའི་བུ་དང་། མཽད་གལ་གྱི་བུ་འདོད་ཆགས་དང་བཅས་པ། ཞེ་སྡང་དང་བཅས་པ། གཏི་མུག་དང་བཅས་པ། སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་
སྨྲེ་སྔགས་འདོན་པ་དང་། སྡུག་བསྔལ་བ་དང་ཡིད་མི་བདེ་བ་དང་འཁྲུག་པ་དང་བཅས་པ་ན་ཡང་ང་ལ་གཅིག་ཏུ་སེམས་མངོན་པར་དད་པས་གཙོ་བོ་འཆི་བ་མཐོང་བར་མི་བཟོད་ནས་དུས་བྱས་ཏེ། འདོད་པའི་ཁམས་ཐམས་ཅད་
ལས་ཡང་དག་པར་འདས་ནས་ཚངས་པའི་འཇིག་རྟེན་དུ་སྐྱེས་པ་དེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན་བྱང་ཕྱོགས་ན་རྒྱལ་པོའི་ཕོ་བྲང་རྡོ་བཟངས་ཞེས་བྱ་བ་འབྱོར་པ། རྒྱས་པ་བདེ་བ་ལོ་ལེགས་པ། 
མི་དང་སྐྱེ་བོའི་ཚོགས་མང་པོས་གང་བ། ཆུར་དཔག་ཚད་བཅུ་གཉིས་ཞེང་དུ་དཔག་ཚད་བཅུ་གཉིས་ཀུན་ནས་གྲུ་བཞི་པར་གྱུར་ཏེ། ཤིན་དུ་རྣམ་པར་འབྱེས་པ། རྟ་བབས་དང་སྐར་ཁུང་དང་། སྐར་ཁུང་དྲ་བ་ཅན་མཐོན་པོ་དང་རབ་
ཏུ་ལྡན་པ་དང་། ཚོང་ཟོང་དང་རིན་པོ་ཆེ་སྣ་ཚོགས་ཀྱིས་ཀུན་དུ་གང་བ། རྒྱལ་པོ་དང་བློན་པོ་དང་ཁྱིམ་བདག་དང་ཚོང་དཔོན་དང་ཡུལ་འཁོར་གྱི་མི་རྣམས་ཀྱིས་ཡོངས་སུ་གང་བ། མི་རྣམས་གཞུང་ལུགས་ལ་གནས་པ། པི་བང་
དང་གླིང་བུ་དང་རྔ་དང་སྒྲ་བཟངས་དང་རྔ་བོ་ཆེ་དང་རྫ་རྔ་དང་རྔ་རིངས་དང་དུང་གི་སྒྲ་རྣམས་ཀྱི་སྒྲ་ངེས་པར་སྒྲོགས་པའོ། །དགེ་སློང་དག་རྒྱལ་པོའི་ཕོ་བྲང་དེ་ན་ཏ་ག་རུའི་དྲི་དང་ཨ་ག་རུའི་དྲི་དང་། ཙན་དན་གྱི་དྲི་དང་ཕྱེ་མའི་དྲི་དང་གུར་
གུམ་གྱི་དྲི་དང་མེ་ཏོག་གི་དྲི་ཞིམ་པ་རྣམས་ཏེ། དུས་ཐམས་ཅད་དུ་འདི་ལྟ་བུའི་དྲི་སྣ་ཚོགས་པ་རླུང་གིས་བསྐྱོད་ནས་ལམ་དང་སྲང་བར་དང་བཞི་མདོ་དང་སུམ་མདོ་རྣམས་སུ་ལྡང་ཞིང་རྒྱུ་བ་དང་གླང་པོ་དང་རྟ་དང་ཤིང་རྟ་དང་དཔུང་བུ་

71-1-23b

ཆུང་གི་ཚོགས་དང་ཡང་དག་པར་ལྡན་པ་དང་། བཞོན་པ་དང་ཐེག་པ་དང་སྲང་དང་ལམ་པོ་ཆེ་ཉེ་བར་མཛེས་པར་བྱས་པ་དང་གདུགས་དང་རྒྱལ་མཚན་དང་བ་དན་བསྒྲེང་བ་དང་རྟ་བབས་དང་སྐར་ཁུང་དང་སྐར་ཁུང་དྲ་བ་ཅན་དང་ཟླ་བ་ཕྱེད་
པ་བཏགས་པས་ལྷའི་གནས་བཞིན་དུ་ཉེ་བར་མཛེས་པར་གྱུར་པ་དང་ཀླུའི་དབང་པོ་དང་རིའི་རྒྱལ་པོ་ལས་མངོན་པར་འཐོན་པའི་མཚོ་དང་རྫིང་བུ་དང་ལྟེང་ཀ་དང་ཆུ་མིག་དང་འབབ་ཆུས་ཉེ་བར་མཛེས་པ་དང་ལྡན་པ་དང་ཨུད་པ་
ལ་དང་པད་མ་དང་ཀུ་མུ་ད་དང་པུན་ད་རི་ཀས་ཀུན་དུ་ཁེབས་པ། ཤིང་སཱ་ལ་དང་ཏ་ལ་དང་ཏ་མ་ལ་དང་དོང་ཀ་དང་ཨ་ཤོ་ཀ་དང་། ཏི་ལ་ཀ་དང་པུར་ན་ཀ་དང་ཙམ་པ་ཀ་དང་བ་ཀུ་ལ་དང་ཨ་ཏི་མུག་ཏ་ཀ་དང་ཏ་མ་ལའི་མེ་ཏོག་གིས་ཀུན་དུ་
ཁེབས་པ་དང་ལྡན་པ་དང་། ནགས་ཚལ་གྱི་ཕྱོགས་ན་ཀ་ལ་པིང་ཀ་དང་ནེ་ཙོ་དང་ཤ་རི་ཀ་དང་། ཁུ་བྱུག་དང་རྨ་བྱ་དང་ཤང་ཤང་ཏེའུ་སྒྲ་སྒྲོགས་པར་གྱུར་པ་དང་། ཤིང་སྣ་ཚོགས་ཀྱིས་ཉེ་བར་མཛེས་པས་ཉམས་དགའ་བར་
བྱས་པ་དང་བསྐྱེད་མོས་ཚལ་ཉམས་དགའ་བ་མདུན་ན་ཡོད་དེ། དགེ་སློང་དག་རྡོ་བཟངས་དེ་ལྟར་ཤིན་དུ་ཉམས་དགའ་བར་གྱུར་ཏོ། །དགེ་སློང་དག་རྒྱལ་པོའི་ཕོ་བྲང་རྡོ་བཟངས་དེ་ན་རྒྱལ་པོ་ཟླ་འོད་ཅེས་བྱ་བ་གཟུགས་བཟང་
བ། བལྟ་ན་སྡུག་པ་མཛེས་པ་སྐྱེ་བ་དྲན་པ། ལྷའི་མིག་དང་ལྡན་པ། གླིང་གཅིག་པའི་འཁོར་ལོས་སྒྱུར་བ་ཆོས་དང་ལྡན་པ། ཆོས་ཀྱི་རྒྱལ་པོ། །འཛམ་བུའི་གླིང་དུ་རྒྱལ་སྲིད་ཀྱི་དབང་ཕྱུག་ལ་དབང་བྱེད་པར་གྱུར་ཏོ། །དགེ་སློང་
དག་རྒྱལ་པོ་ཟླ་འོད་རང་ལ་འོད་ཡོད་པས་འགྲོ་ན་ཡང་མུན་པ་མེད་པར་གྱུར་ཏེ། ནོར་བུ་རིན་པོ་ཆེའི་འོད་དམ། མར་མེའི་འོད་དམ། སྒྲོན་མ་མདུན་དུ་མི་ཁྱེར་གྱི། དགེ་སློང་དག་གཞན་དུ་ན་རྒྱལ་པོ་ཟླ་འོད་རང་ཉིད་ཀྱི་ལུས་ལས་འོད་
བྱུང་བར་གྱུར་ཏེ། དཔེར་ན་ཟླ་བའི་དཀྱིལ་འཁོར་ལས་འོད་འབྱུང་བ་བཞིན་དུ་འདིའི་ལུས་ལ་འོད་བྱུང་སྟེ་རྒྱུ་འདིས་ན་རྒྱལ་པོ་ཟླ་འོད་ཟླ་འོད་ཅེས་མིང་དུ་གྱུར་ཏོ། །ཡང་དེའི་ཚེ་དེའི་དུས་ན་འཛམ་བུའི་གླིང་འདིར་རྒྱལ་པོའི་ཕོ་བྲང་རྡོ་བཟངས་ལ་སོགས་

71-1-24a

པ་གྲོང་ཁྱེར་དྲུག་ཁྲི་བརྒྱད་སྟོང་བྱུང་བར་གྱུར་ཏེ། འབྱོར་པ། བདེ་བ་ལོ་ལེགས་པ། སྐྱེ་བོ་མང་པོ་དང་མི་མང་པོས་གང་བར་གྱུར་ཏོ། །དགེ་སློང་དག་གཞན་ཡང་རྒྱལ་པོ་ཟླ་འོད་ཀྱི་འཛམ་བུའི་གླིང་གི་མི་རྣམས་ལ། དཔྱ་དང་
ཤོ་གམ་དང་གྲུ་བཙས་མེད་དེ། ཞིང་གི་འབྱོར་པ་དང་ལྡན་པ། སྐྱེ་བོ་རྣམས་ཞི་བ་དང་ཁྱིམ་བྱའི་སྒྲ་དང་ལྡན་པ། གྲོང་དང་གྲོང་ཁྱེར་དང་གྲོང་རྡལ་གྱི་སྐྱེ་བོའི་ཚོགས་དང་རྒྱལ་པོ་དང་རྒྱལ་རིགས་དང་ལྡན་པར་གྱུར་ཏོ། །དགེ་སློང་དག་དེའི་
ཚེ་དེའི་དུས་ན་འཛམ་བུའི་གླིང་གི་མི་རྣམས་ཀྱི་ཚེའི་ཚད་ལོ་བཞི་ཁྲི་བཞི་སྟོང་པར་གྱུར་ཏོ། །དགེ་སློང་དག་རྒྱལ་པོ་ཟླ་འོད་ནི་བྱང་ཆུབ་སེམས་དཔར་གྱུར་ཏེ། ཐམས་ཅད་སྟེར་བ། ཐམས་ཅད་ཡོངས་སུ་གཏོང་བ་སྟེ། དེས་རྒྱལ་པོའི་ཕོ་བྲང་
རྡོ་བཟངས་ནས་བྱུང་སྟེ། གྲོང་ཁྱེར་གྱི་ཤར་ཕྱོགས་སུ་གདུགས་དང་རྒྱལ་མཚན་དང་བ་དན་བསྒྲེང་སྟེ། གསེར་གྱི་རྔ་བོ་ཆེ་ཡང་དག་པར་བརྡུངས་ནས་སྦྱིན་པ་ནི་གཏོང་། བསོད་ནམས་ནི་བྱེད་དོ། །དེ་བཞིན་དུ་གྲོང་ཁྱེར་གྱི་ལྷོ་དང་། ནུབ་དང་། བྱང་དུ་
འང་སྦྱིན་པ་ནི་གཏོང་། བསོད་ནམས་ནི་བྱེད་དོ། །སུམ་མདོའྀ་དབུས་སུ་འང་སྦྱིན་པ་ནི་གཏོང་། བསོད་ནམས་ནི་བྱེད་དེ། འདི་ལྟ་སྟེ། ཟས་འདོད་པ་རྣམས་ལ་ནི་ཟས། སྐོམ་འདོད་པ་རྣམས་ལ་ནི་སྐོམ། བཟའ་བ་དང་བཅའ་བ་དང་ཕྲེང་
བ་དང་། མར་མེ་དང་དྲི་དང་བྱུག་པ་དང་མལ་ཆ་དང་སྟན་དང་རྒྱབ་རྟེན་དང་། སྐྱེ་བོ་རྣམས་ཀྱི་གནས་དང་གདུགས་དང་། ཤིང་རྟ་དང་སྤུད་པ་དང་རྒྱན་དང་གསེར་གྱི་སྣོད་དངུལ་གྱི་ཕྱེ་མས་ཡོངས་སུ་གང་བ་རྣམས་དང་། དངུལ་གྱི་
སྣོད་གསེར་གྱི་ཕྱེ་མས་ཡོངས་སུ་གང་བ་རྣམས་དང་། གསེར་གྱི་རྭ་བཏགས་པའི་བ་ལང་རྣམས་དང་། ཁར་བའི་བཞོ་སྣོད་རྣམས་དང་། གཞོན་ནུ་མ་རྒྱན་ཐམས་ཅད་ཀྱིས་བརྒྱན་པར་བྱས་པ་རྣམས་ཀྱང་སྦྱིན་པ་ནི་གཏོང་། 
བསོད་ནམས་ནི་བྱེད་དོ། །གོས་ཁ་དོག་སྣ་ཚོགས་པ་ཡུལ་སྣ་ཚོགས་པ་ལས་བྱུང་བ་རྣམ་པ་སྣ་ཚོགས་པ་ལ་འདི་ལྟ་སྟེ། དར་ལ་དང་། རྒྱའི་དར་དང་། རིན་ཆེ་བའི་གོས་དང་དུ་གུ་ལ་དང་མྲི་གཱ་པཱ་ན་དང་བག་ལེ་པ་དང་ལ་བ་དང་རིན་པོ་

71-1-24b

ཆེ་དང་གསེར་དང་གོས་གསེར་གྱི་རྒྱན་ཅན་དང་ཀ་ཤི་ཀའི་དར་དང་། གོས་དར་ལ་སོགས་པ་རྣམས་ཀྱང་སྦྱིན་པ་ནི་གཏོང་། བསོད་ནམས་ནི་བྱེད་དོ། །དགེ་སློང་དག་རྒྱལ་པོ་ཟླ་འོད་ཀྱིས་སྦྱིན་པ་ཇི་སྙེད་ཀྱིས་འཛམ་བུའི་གླིང་པའི་མི་ཐམས་ཅད་
ཕྱུག་པ་དང་ནོར་ཆེ་བ་དང་ལོངས་སྤྱོད་ཆེ་བར་གྱུར་པ་དེ་སྙེད་རབ་ཏུ་གཏོང་ངོ་། །དགེ་སློང་དག་རྒྱལ་པོ་ཟླ་འོད་ཀྱིས་གང་གླང་པོ་དང་རྟ་དང་ཤིང་རྟ་དང་གདུགས་ལ་སོགས་པའི་སྦྱིན་པ་ཇི་སྙེད་ཀྱིས་འཛམ་བུའི་གླིང་འདི་ན་མི་གཅིག་ཀྱང་
རྐང་གིས་འགྲོ་བ་མེད་པ་དེ་སྙེད་རབ་ཏུ་གཏོང་སྟེ། འཛམ་བུའི་གླིང་པའི་མི་ཐམས་ཅད་ཀྱང་གླང་པོའི་རྒྱབ་དང་། རྟ་བཞི་དང་ལྡན་པའི་ཤིང་རྟ་སྟེང་ནས་གསེར་དང་དངུལ་གྱི་གདུགས་འཛིན་པ་དང་ལྡན་པ་དང་། བསྐྱེད་མོས་ཚལ་
ནས་བསྐྱེད་མོས་ཚལ་དང་ཡུལ་འཁོར་ནས་ཡུལ་འཁོར་དང་གྲོང་ཁྱེར་ནས་གྲོང་ཁྱེར་དུ་རྗེས་སུ་འགྲོ་བར་གྱུར་ཏོ། །དགེ་སློང་དག་དེ་ནས་ཡང་རྒྱལ་པོ་ཟླ་འོད་འདི་ལྟར་སེམས་པར་གྱུར་ཏེ། ངས་སྦྱིན་པ་འདི་ཙམ་ཞིག་བྱིན་པ་ཙམ་
གྱིས་ཅི་ཞིག་བྱ་སྟེ། གོས་དང་རྒྱན་དང་ཆ་བཞག་རྣམས་ང་ཉིད་ཅི་འདྲ་བ་འཛམ་བུའི་གླིང་པའི་མི་རྣམས་ཀྱང་དེ་དང་འདྲ་བར་རབ་ཏུ་བྱིན་ན་ནི་འཛམ་བུའི་གླིང་པའི་མི་ཐམས་ཅད་རྒྱལ་པོའི་རྩེ་འཇོས་རྩེ་ཞིང་རོལ་པར་འགྱུར་རོ། །
དེ་ནས་རྒྱལ་པོ་ཟླ་འོད་ཀྱིས་འཛམ་བུའི་གླིང་པའི་མི་ཐམས་ཅད་ལ་ཅོད་པན་དང་དར་དང་གོས་དང་རྒྱན་དང་ཆ་བཞག་རྣམས་བྱིན་པ་ནི་འདི་ལྟ་སྟེ། མགུལ་གདུབ་དང་གདུ་བུ་དང་དཔུང་རྒྱན་དང་དོ་ཤལ་དང་སེ་མོ་དོ་དང་མུ་ཏིག་གི་ཆུན་
འཕྱང་དང་། རྒྱལ་པོ་ལ་འོས་པ་རྣམས་སྦྱིན་པ་རབ་ཏུ་བྱིན་ནོ། །དགེ་སློང་དག་རྒྱལ་པོ་ཟླ་འོད་ཀྱིས་རྒྱལ་པོ་ལ་འོས་པ། གོས་དང་རྒྱན་དང་ཅོད་པན་དང་དར་རྣམས་རབ་ཏུ་བྱིན་པ་གང་གིས་ཇི་ལྟར་འཛམ་བུའི་གླིང་པའི་མི་ཐམས་
ཅད་ཅོད་པན་ཐོགས་ཤིང་དར་དཔྱངས་འཆིང་བར་གྱུར་ཏེ། རྒྱལ་པོ་ཟླ་འོད་རྣམ་པ་ཅི་འདྲ་བར་གྱུར་པ་འཛམ་བུའི་གླིང་གི་མི་ཐམས་ཅད་ཀྱང་དེ་དང་འདྲ་བར་གྱུར་ཏེ། དེ་ལྟར་རབ་ཏུ་བྱིན་ནོ། །དགེ་སློང་དག་རྒྱལ་པོ་ཟླ་འོད་ཀྱིས་རྒྱལ་པོའི་ཕོ་བྲང་རྡོ་བཟངས་སུ་

71-1-25a

དྲིལ་བསྒྲགས་ཏེ། འཛམ་བུའི་གླིང་གི་མི་ཁྱེད་ཐམས་ཅད་ང་ཅི་སྲིད་འཚོའི་བར་དུ་རྒྱལ་པོའི་རྩེ་འཇོས་རྩེ་ཞིང་རོལ་ཅིག་ཅེས་བསྒྲགས་སོ། །དགེ་སློང་དག་དེ་ནས་རྒྱལ་པོ་ཟླ་འོད་ཀྱིས་དྲིལ་བསྒྲགས་པ་འཛམ་བུའི་གླིང་
གི་མི་ཐམས་ཅད་ཀྱིས་ཐོས་པ་དང་ཐམས་ཅད་རྒྱལ་པོའི་རྩེ་འཇོས་རྩེ་བ་ལ་ཞུགས་ཏེ། པི་བང་དང་གླིང་བུ་དང་འཁར་རྔ་དང་སྒྲ་བཟངས་དང་པི་བང་རྒྱུད་གསུམ་པ་དང་རྔ་རིངས་དང་རྫ་རྔ་དང་དུང་སྟོང་ཕྲག་དང་། སིལ་སྙན་བརྒྱ་སྙེད་
ཀྱི་སྒྲའི་རོལ་མོ་བརྡུང་ཞིང་དཔུང་རྒྱན་དང་དོ་ཤལ་དང་སེ་མོ་དོ་དང་ནོར་བུ་དང་མུ་ཏིག་གི་རྒྱན་རྣམས་དང་རྣ་ཆ་ཐོགས་པ་དང་རྒྱན་གྱིས་བརྒྱན་ལ་བུད་མེད་ཀྱི་ཚོགས་ཀྱིས་ཡོངས་སུ་བསྐོར་ནས་རྒྱལ་སྲིད་ཀྱི་དཔལ་ལ་རྗེས་སུ་སྤྱོད་པར་གྱུར་ཏོ། །
ཡང་དེའི་ཚེ་དེའི་དུས་ན་རྒྱལ་པོའི་ཕོ་བྲང་རྡོ་བཟངས་ན་མི་རྣམས་རྒྱལ་པོའི་རྩེ་འཇོས་རོལ་ཏེ། པི་བང་དང་གླིང་བུ་དང་འཁར་རྔ་དང་སྒྲ་བཟངས་དང་པི་བང་རྒྱུད་གསུམ་པ་དང་རྫ་རྔ་དང་རྔ་རིངས་དང་དུང་གི་སྒྲས་གྲོང་ཁྱེར་དྲུག་ཁྲི་བརྒྱད་
སྟོང་དུ་སྒྲ་བསྒྲགས་པ་དང་། གང་ཡང་རྒྱལ་པོ་ཟླ་འོད་ཀྱི་སྦྱིན་གཏོང་གི་གནས་བཞིར་གསེར་གྱི་རྔ་བོ་ཆེ་རྣམས་བརྡུངས་པ་ན་འདི་ལྟ་བུའི་ཡིད་དུ་འོང་བའི་སྒྲ་བྱུང་བར་གྱུར་ཏོ། །འདི་ལྟ་སྟེ། སུམ་བཅུ་རྩ་གསུམ་གྱི་ལྷ་རྣམས་ཀྱི་ནང་ན་ལྷའི་
གྲོང་ཁྱེར་དེ་ན་གླུ་དང་གར་དང་རོལ་མོའི་སྒྲ་སྒྲོགས་སོ། །དགེ་སློང་དག་དེ་བཞིན་དུ་དེའི་ཚེ་དེའི་དུས་ན་འཛམ་བུའི་གླིང་པའི་མི་ཐམས་ཅད་གླུ་དང་གར་དང་རོལ་མོའི་སྒྲས་གཅིག་ཏུ་བདེ་བ་ལ་འཇོག་ཅིང་ཤིན་དུ་དགའ་བར་གྱུར་ཏོ། །ཡང་དེའི་ཚེ་
རྒྱལ་པོའི་ཕོ་བྲང་རྡོ་བཟངས་ན་བྱེ་བ་སྟོང་དུང་ཕྱུར་བདུན་བཅུ་རྩ་གཉིས་ཀྱི་མི་རྣམས་གནས་སོ། །ཡང་དགེ་སློང་དག་རྒྱལ་པོ་ཟླ་འོད་ཆོས་ཉིད་ཀྱིས་གཟུགས་བཟང་བ། བལྟ་ན་སྡུག་པ་མཛེས་པ་སྟེ། གཞན་ཡང་འདི་སྐྱེ་བོའི་ཚོགས་ཆེན་པོའི་ཡིད་
དགའ་བར་གྱུར་ཏོ། །གཞན་ཡང་འདི་སྐྱེས་པ་དང་བུད་མེད་རྣམས་ཀྱིས་མཐོང་བ་ན་ངོམས་པར་མི་འགྱུར་བའི་དགའ་བ་འཐོབ་བོ། །དུས་གང་གི་ཚེ་རྒྱལ་པོ་ཟླ་འོད་གྲོང་ཁྱེར་ནས་བྱུང་སྟེ་སྦྱིན་གཏོང་གི་གནས་སུ་སོང་བ་ན་སྲོག་ཆགས་བྱེ་བ་བརྒྱ་

71-1-25b

སྟོང་དཔག་ཏུ་མེད་པ་རྣམས་ལྟ་ཞིང་འདི་སྐད་ཀྱང་སྨྲ་སྟེ། ཀྱེ་མ་རྒྱལ་པོ་ཟླ་འོད་འདི་ནི་ལྷ་ཞིག་འོངས་ནས་འཛམ་བུའི་གླིང་འདིར་རྒྱལ་པོ་བྱེད་པ་ཡིན་གྱི། རྒྱལ་པོ་ཟླ་འོད་ཀྱི་གཟུགས་དང་ཁ་དོག་དང་དབྱིབས་དེ་ལྟ་བུ་ནི་འཛམ་བུའི་གླིང་པའི་མི་
རྣམས་ལ་ཡོད་པ་མ་ཡིན་ནོ། །དེ་གང་དང་གང་དུ་བལྟས་པ་དེ་དང་དེ་དག་ཏུ་བུད་མེད་སྟོང་ཕྲག་གིས་བལྟས་ཏེ། བུད་མེད་གང་འདི་ཁྱོར་རྙེད་པ་དེ་ནི་སྐལ་བ་ཅན་ཡིན་ནོ། །གཞན་ཞིག་གིས་སྨྲས་པ། སེམས་དག་པ་རྣམས་ཀྱིས་
རྙེད་ཀྱི་གཞན་དག་གིས་ནི་མ་ཡིན་ཏེ། རྒྱལ་པོ་ཟླ་འོད་འདི་ནི་ལྷ་དང་འདྲ་བར་བལྟའོ། །དགེ་སློང་དག་རྒྱལ་པོ་ཟླ་འོད་ཀྱི་བློན་པོ་སྟོང་ཕྲག་ཕྱེད་དང་བཅུ་གསུམ་ཡོད་དེ། དེ་རྣམས་ཀྱི་ནང་ན་བློན་པོ་གཉིས་ནི་བློན་པོ་ཐམས་ཅད་ལས་ཁྱད་
དུ་འཕགས་པ་ཡིན་ཏེ། བློན་པོ་ཟླ་བ་བཟང་པོ་དང་ས་འཛིན་ཞེས་བྱ་བ་གཉིས་མཁས་པ། གྲགས་པ་བློ་དང་ལྡན་པ་ལས་ཐམས་ཅད་ལ་དབང་བྱེད་པ། རྒྱལ་པོའི་གཅེས་སྤྲས་བྱེད་པ། རྒྱལ་པོ་ཡོངས་སུ་སྐྱོང་བ། རྒྱལ་པོའི་ལས་ཀྱི་
མཐའ་ཐམས་ཅད་ལ་སེམས་ལས་ཆུང་ངུར་བྱེད་པ་དང་། བློན་པོའི་མཆོག་ཟླ་བ་བཟང་པོ་ནི་འཛམ་བུའི་གླིང་པའི་མི་ཁྱེད་རྣམས་ཇི་སྲིད་འཚོའི་བར་དུ་དགེ་བ་བཅུའི་ལས་ཀྱི་ལམ་འདི་ཡང་དག་པར་བླངས་ལ་གནས་པར་གྱིས་ཤིག་ཅེས་འཛམ་
བུའི་གླིང་པའི་མི་ཐམས་ཅད་དགེ་བ་བཅུའི་ལས་ཀྱི་ལམ་ལ་ཡང་དག་པར་སྦྱོར་བར་བྱེད་དེ། དགེ་སློང་དག་བློན་པོའི་མཆོག་ཟླ་བ་ཆེན་པོའི་གདམས་ངག་རྗེས་སུ་སྟོན་པ་འདི་ལྟ་བུ་བྱེད་པར་གྱུར་ཏོ། །དགེ་སློང་དག་འདི་ལྟ་སྟེ། 
འཁོར་ལོས་སྒྱུར་བའི་རྒྱལ་པོ་ཟླ་འོད་ནི་བློན་པོའི་མཆོག་ཟླ་བ་ཆེན་པོ་ལ་སྡུག་པར་གྱུར་པ་དང་། དགའ་བ་དང་ཡིད་དུ་འོང་བར་གྱུར་ཏེ། གཞན་ཡང་དེའི་ཁ་དོག་དང་གཟུགས་དང་དབྱིབས་ལ་འདིས་བལྟས་པ་ན་ངོམས་པ་མེད་དེ། སྐད་ཅིག་
ཀྱང་དེ་མི་སྤོང་བར་གྱུར་ཏོ། །དེ་ནས་དུས་གཞན་ཞིག་གི་ཚེ་བློན་པོའི་མཆོག་ཟླ་བ་ཆེན་པོའི་རྨི་ལམ་དུ་དུ་བའི་མདོག་ཅན་གྱི་ཤ་ཟ་རྣམས་ཀྱིས་རྒྱལ་པོ་ཟླ་འོད་ཀྱི་ཅོད་པན་ཕྲོགས་པར་རྨིས་ཏེ་སད་ནས་དེ་འཇིགས་སྐྲག་པས་རེངས་པར་གྱུར་ཅིང་སྤུ་

71-1-26a

ཟིང་ཞེས་བྱེད་དེ། ངེས་པར་རྒྱལ་པོ་ཟླ་འོད་ཀྱི་དབུ་སློང་བ་ཞིག་འོང་བར་མི་འགྱུར་རམ། ལྷ་ནི་ཐམས་ཅད་སྩོལ་བ། ཐམས་ཅད་ཡོངས་སུ་གཏོང་བ་ཡིན་ཏེ། འདི་ལ་ནི་དམན་པ་དང་མགོན་མེད་པ་དང་ཕོངས་པ་དང་སྡུག་བསྔལ་བ་
དང་སློང་བ་རྣམས་ལ་མི་སྩོལ་བ་དང་ཡོངས་སུ་མི་གཏོང་བ་ནི་གཞན་ཅི་ཡང་མི་མངའ་བས་ན། རྒྱལ་པོ་ཟླ་འོད་ལ་རྨི་ལམ་འདི་མི་ཞུའི་གཞན་དུ་ན་རིན་པོ་ཆེའི་མགོ་རྣམས་བྱས་ལ། མཛོད་དང་བང་བར་བཅུག་ལ་བཞག་སྟེ། གལ་ཏེ་འགའ་
ཞིག་ལྷའི་དབུ་སློང་བ་འོངས་པར་གྱུར་ན། དེ་ལ་རིན་པོ་ཆེའི་མགོ་འདི་རྣམས་ཀྱིས་བྲིད་པར་བྱའོ་སྙམ་ནས་རིན་པོ་ཆེའི་རྒྱུ་ལས་བྱས་པའི་མགོ་བོ་བྱས་ཏེ། མཛོད་དང་བང་བ་རྣམས་སུ་བཞག་པར་གྱུར་ཏོ། །དེ་ནས་དུས་གཞན་ཞིག་གི་ཚེ་བློན་
པོའི་མཆོག་ས་འཛིན་གྱི་རྨི་ལམ་དུ་རྒྱལ་པོ་ཟླ་འོད་ཀྱི་རིན་པོ་ཆེ་རྣམས་ཀྱི་མགོ་རྣམ་པ་བརྒྱར་ལྷགས་པར་རྨིས་པ་དང་། ཡང་འཇིགས་ཤིང་སྐྲག་ལ་ཀུན་དུ་སྐྱོ་ནས་རྒྱལ་པོ་ཟླ་འོད་རྒྱལ་སྲིད་ལས་ཉམས་པ་འམ། སྲོག་གི་བར་ཆད་དུ་མི་འགྱུར་
གྲང་སྙམ་ནས། ཡང་བྲམ་ཟེ་ལྟས་མཁན་མཁས་པ་རྣམས་བོས་ནས་བདག་གིས་འདི་ལྟ་བུའི་རྨི་ལམ་རྨིས་ན། རྨི་ལམ་དེའི་འབྲས་བུ་ཅི་ལྟ་བུ་ཡིན་པ་ལུང་སྟོན་ཅིག །ལྟས་མཁན་རྣམས་ཀྱིས་སྨྲས་པ། རྨི་ལམ་མཐོང་བའི་འདི་ཇི་ལྟ་བ་ལས་ནི་
རིང་པོ་མི་ཐོགས་པར་ལྷའི་དབུ་སློང་བ་འགའ་ཞིག་འོང་བར་འགྱུར་ཏེ། འདི་འདྲ་བར་སྟོན་པ་ཡིན་ནོ། །དེ་སྐད་ཐོས་པ་དང་ཡང་བློན་པོའི་མཆོག་ས་འཛིན་ལག་པ་འགྲམ་པ་ལ་གཏད་དེ། ཤིན་དུ་སེམས་པ་ལ་ཞུགས་པས་གནས་པར་
གྱུར་ཏེ། རྒྱལ་པོ་ཟླ་འོད་བྱམས་པའི་བདག་ཉིད་ཅན། སྙིང་རྗེ་དང་ལྡན་པ། སེམས་ཅན་ཐམས་ཅད་ལ་མཉེས་གཤིན་པ་མི་རྟག་པ་ཉིད་ཀྱི་སྟོབས་ཉེ་བར་གནས་པ་ནི་ཧ་ཅང་མྱུར་ཆེས་སོ། །དེ་ནས་དུས་གཞན་ཞིག་གི་ཚེ་བློན་
པོ་སྟོང་ཕྲག་ཕྱེད་དང་བཅུ་གསུམ་པོ་རྣམས་ཀྱིས་རྨི་ལམ་འདི་ལྟར་མཐོང་སྟེ། རྒྱལ་པོ་ཟླ་འོད་ཀྱི་སྦྱིན་གཏོང་གི་གནས་ཁང་བཞི་རུ་གནོད་སྦྱིན་ལག་ན་ཐོད་པ་ཐོགས་པ་རྣམས་ཀྱིས་གདུགས་དང་། རྒྱལ་མཚན་དང་བ་དན་རྣམས་བསྒྱེལ་བ་

71-1-26b

དང་གསེར་གྱི་རྔ་བོ་ཆེའང་བཅག་པར་རྨིས་པ་དང་། ཡང་འཇིགས་ཤིང་སྐྲག་ལ་སེམས་སྐྱོ་ནས་རྒྱལ་པོ་ཟླ་འོད་ས་ཆེན་པོ་སྐྱོང་བ། བྱམས་པའི་བདག་ཉིད་ཅན། སྙིང་རྗེ་དང་ལྡན་པ། སེམས་ཅན་ཐམས་ཅད་ལ་མཉེས་གཤིན་པ་ལ་མི་
རྟག་པ་ཉིད་ཀྱི་སྟོབས་ཀྱིས་ཕྱིན་པར་མི་འགྱུར་ཏམ། བདག་ཅག་རྣམས་ལྷ་དང་ལྷན་ཅིག་པ་ལས་གནས་པ་ལས་ཐ་དད་པར་འགྱུར་བ་དང་། སོ་སོ་བ་དང་། བྱེ་བ་དང་བྲལ་བར་མི་འགྱུར་རམ། འཛམ་བུའི་གླིང་པ་རྣམས་སྐྱབས་དང་
དཔུང་གཉེན་མེད་པར་མི་འགྱུར་རམ། དེ་རྒྱལ་པོ་ཟླ་འོད་ཀྱིས་ཀྱང་ཐོས་པ་དང་། ཡང་གྲོང་ཁྱེར་དྲུག་ཁྲི་བརྒྱད་སྟོང་དུ་དྲིལ་བསྒྲགས་ཏེ། འཛམ་བུའི་གླིང་པའི་མི་ཁྱེད་རྣམས་ཇི་སྲིད་འཚོའི་བར་དུ་རྒྱལ་པོའི་རྩེ་འཇོས་རྩེ་ཞིང་རོལ་ཅིག །
ཁྱེད་རྣམས་སྒྱུ་མ་ལྟ་བུའི་རྨི་ལམ་ལ་སེམས་པས་ཅི་ཞིག་བྱ། རྒྱལ་པོ་ཟླ་འོད་ཀྱིས་དྲིལ་བསྒྲགས་པ་ཐོས་པ་དང་། འཛམ་བུའི་གླིང་པའི་མི་ཐམས་ཅད་སིལ་སྙན་ཆེན་པོ་དང་། པི་བང་དང་གླིང་བུ་དང་འཁར་རྔ་དང་སྒྲ་བཟངས་དང་པི་བང་རྒྱུད་
གསུམ་པ་དང་རྫ་རྔ་དང་རྔ་རིངས་དང་། དུང་སྟོང་ཕྲག་སྙེད་ཀྱི་རོལ་མོ་བརྡུང་ཞིང་རྩེ་བར་བརྩམས་པ་དང་། གསེར་གྱི་དབུ་རྒྱན་དང་དོ་ཤལ་དང་སེ་མོ་དོའི་ནོར་བུའི་རྣ་རྒྱན་ཐོགས་ཤིང་རྒྱན་ཐམས་ཅད་ཀྱིས་བརྒྱན་ནས་བུད་མེད་ཀྱི་ཚོགས་
རྣམས་ཀྱིས་བསྐོར་ཏེ་རྒྱལ་པོའི་དཔལ་ལ་རྗེས་སུ་སྤྱོད་པར་གྱུར་ཏོ། །ཡང་དེའི་ཚེ་དེའི་དུས་ན་འཛམ་བུའི་གླིང་ན་གླུ་དང་གར་དང་རོལ་མོའི་སྒྲ་དང་། གྲོང་ཁྱེར་དྲུག་ཁྲི་བརྒྱད་སྟོང་དུ་གླིང་བུ་ངེས་པར་འབུད་པ་དང་། གང་ཡང་སྦྱིན་གཏོང་གི་
གནས་ཆེན་པོ་བཞིར་གསེར་གྱི་རྔ་བོ་ཆེ་བརྡུངས་པ་ལས་སྙན་ཅིང་ཡིད་དུ་འོང་བའི་སྒྲ་བྱུང་བར་གྱུར་ཏེ། དེས་འཛམ་བུའི་གླིང་ཐམས་ཅད་དུ་སྒྲ་གྲགས་པར་གྱུར་ཏེ། དཔེར་ན་སུམ་བཅུ་རྩ་གསུམ་གྱི་ལྷ་རྣམས་ཀྱི་གཞས་མེད་ཁང་གི་ནང་ན་
གླུ་དང་། གར་དང་རོལ་མོའི་སྒྲ་གྲགས་པ་བཞིན་ནོ། །ཡང་དེའི་ཚེ་དེའི་དུས་ན་རི་སྤོས་ངད་ལྡང་ན་བྲམ་ཟེ་དྲག་པོའི་མིག་ཅེས་བྱ་བ་མིག་འཕྲུལ་གྱི་བྱ་བ་ཤེས་པ་ཞིག་གནས་པ་དང་། བྲམ་ཟེ་དྲག་པོའི་མིག་གིས་རྒྱལ་པོའི་ཕོ་བྲང་རྡོ་

71-1-27a

བཟངས་ན་རྒྱལ་པོ་ཟླ་འོད་ཅེས་བྱ་བ་ཐམས་ཅད་སྟེར་བར་ཐོས་སོ། །ཐོས་ནས་ཀྱང་བདག་ཉིད་ཀྱིས་བསམས་པ། བདག་སོང་ལ་མགོ་བསླང་ན། གལ་ཏེ་ཐམས་ཅད་གཏོང་བར་གྱུར་པ་ཡིན་ན་ནི་བདག་ལ་ཡང་མགོ་སྟེར་བར་
འགྱུར་རོ། །གཞན་དུ་ན་གང་སྡུག་པ་དང་ཕོངས་པ་དང་ཡིད་དུ་འོང་བ་དང་མངོན་པར་དགའ་བར་བྱ་བ་ཡན་ལག་གི་མཆོག་མགོ་ཡོངས་སུ་གཏོང་བ་འདི་ནི་དཀའ་བ་དང་འདི་ནི་གནས་མེད་པ་དང་། འདི་ནི་གོ་སྐབས་མེད་དོ་སྙམ་ནས་རི་སྤོས་
ཀྱི་ངད་ལྡང་ལས་བབས་སོ། །དེ་ནས་སྤོས་ཀྱི་ངད་ལྡང་ན་གནས་པའི་ལྷ་མོ་ཞིག་ངུ་བར་རྩོམ་སྟེ། ཀྱི་ཧུད་རྒྱལ་པོ་ཟླ་འོད་བྱམས་པའི་བདག་ཉིད་ཅན། སྙིང་རྗེ་དང་ལྡན་པ། སེམས་ཅན་ཐམས་ཅད་ལ་མཉེས་གཤིན་པ་མི་རྟག་པ་ཉིད་
ཀྱི་སྟོབས་ཉེ་བར་གནས་པ་ནི་སྡུག་བསྔལ་ལོ། །ཡང་དེའི་ཚེ་དེའི་དུས་ན་འཛམ་བུའི་གླིང་ཐམས་ཅད་དུ་བས་མུན་ནག་ཏུ་གྱུར་ཏེ། འཁྲུགས་ཤིང་ཀུན་དུ་འཁྲུགས་པར་གྱུར་པ་དང་། སྐར་མདའ་ལྟུང་བ་དང་ཕྱོགས་སྲེག་པ་དང་བར་སྣང་ལ་
ལྷ་རྣམས་མྱ་ངན་བྱེད་པར་གྱུར་ཏོ། །ཡང་དེའི་ཚེ་དེའི་དུས་ན་རྒྱལ་པོའི་ཕོ་བྲང་རྡོ་བཟངས་དང་ཧ་ཅང་མི་རིང་བ་ཞིག་ན་སྣ་ཚོགས་བཤེས་གཉེན་ཞེས་བྱ་བའི་དྲང་སྲོང་མངོན་པར་ཤེས་པ་ལྔ་དང་ལྡན་པ། བྱམས་པ་དང་སྙིང་རྗེའི་བདག་
ཉིད་ཅན། སེམས་ཅན་ཐམས་ཅད་ལ་མཉེས་གཤིན་པ་ཞིག་འཁོར་ལྔ་བརྒྱས་བསྐོར་ནས་གནས་ཏེ། དེ་ནས་དྲང་སྲོང་དེས་འཛམ་བུའི་གླིང་ཐམས་ཅད་འཁྲུགས་ཤིང་ཀུན་དུ་འཁྲུགས་པར་མཐོང་བ་དང་འཁོར་རྣམས་ལ་སྨྲས་
པ། གང་འཛམ་བུའི་གླིང་འདི་ཐམས་ཅད་ད་ལྟར་དུ་བས་མུན་ནག་ཏུ་གྱུར་ཏེ། འཁྲུགས་ཤིང་ཀུན་དུ་འཁྲུགས་པར་གྱུར་པ་དང་། ཉི་མ་དང་ཟླ་བ་གཉིས་ཀྱང་ལམ་མེ་མ་ཡིན་ལྷང་ངེ་མ་ཡིན། ལྷན་ནེ་མ་ཡིན་པ་བུ་ཁྱེད་རྣམས་
ཀྱིས་ཤེས་སམ། ངེས་པར་སྐྱེས་བུ་ཆེན་པོ་འགའ་ཞིག་འགག་པར་འགྱུར་རོ། །འདི་ལྟར་མིའམ་ཅིའི་ཚོགས་དང་ནགས་ཀྱི་ལྷ་རྣམས་ངུ་། །ནམ་མཁར་གནས་པའི་ལྷ་རྣམས་ཀྱང་ནི་དམོད་པར་བྱེད། །ཟླ་བ་གཟི་མེད་ཉི་མ་

71-1-27b

དག་ཀྱང་འོད་མེད་གྱུར། །དེང་ནི་རོལ་མོ་བརྡུངས་ཀྱང་སྒྲ་ནི་གྲག་མ་གྱུར། །མེ་ཏོག་འབྲས་བུར་ལྡན་པའི་ཤིང་ཚོགས་འདི་དག་ཀྱང་། །རླུང་གིས་མ་བསྐྱོད་བཞིན་དུ་ས་ལ་ལྷུང་བར་གྱུར། །ཇི་ལྟར་འཇིགས་པའི་སྒྲ་འདིའང་ཀུན་དུ་ཐོས་
པས་ན། །གྲོང་ཁྱེར་དུ་ནི་སྡུག་བསྔལ་མི་ཟད་འབྱུང་བར་གསལ། །རྒྱུ་དེས་གྲོང་ཁྱེར་གནས་པའི་སྐྱེ་བོ་མ་ལུས་པ། །སེམས་ལ་སྡུག་བསྔལ་ཀུན་དུ་གཏུགས་ནས་འཇོག་པ་དང་། །ཆོ་ངེས་འདེབས་ཤིང་ལག་པ་སྙིང་ལ་རྡེབས་པར་བྱེད། །སྐྲ་
རྣམས་རབ་ཏུ་གྲོལ་ཞིང་ཚིག་ནི་རྣམ་པར་འགག །ཟླ་བའི་གདོང་ཅན་བུད་མེད་རྣམས་ནི་རབ་ཏུ་ངུ་། །གྲོང་ཁྱེར་གནས་པ་ཀུན་ཀྱང་སྙིང་བརྩེས་ངུ་བར་བྱེད། །སྤྲིན་འདི་རྣམས་ཀྱང་ཆར་མི་འབབ་པར་སྒྲ་སྒྲོགས་ལ། །ཆུ་ཡི་གནས་
རྣམས་ཉེ་བར་སྐམས་པ་ཉིད་དུ་གྱུར། །རི་དང་ནགས་རྣམས་ཀྱང་ནི་མི་ཟད་མེ་ཡིས་བསྲེགས། །མི་རྣམས་སོ་སོའི་ཁྱིམ་ན་ཤིན་དུ་འཁྲུགས་པས་ངུ་། །ཆུ་ལ་རླུང་གིས་བསྐྱོད་པའི་གྲུ་བཞིན་ས་རྣམས་གཡོས་པ་དང་། །ཤིན་དུ་རྩུབ་པའི་
རྡུལ་དང་འདྲ་བའི་རླུང་ལྡང་གྱུར། །བཀྲ་མི་ཤིས་པའི་མཚན་མ་ནི། །ད་ལྟར་འདི་ན་རྣམ་མང་སྟེ། །དེ་བས་བདག་ཅག་ཤིས་པ་ཡི། །ཕྱོགས་སུ་འགྲོ་བ་ཤིན་དུ་རིགས། །གཞན་ཡང་བུ་རྣམས་རྒྱལ་པོ་ཟླ་འོད་ཀྱི་སྦྱིན་གཏོང་གི་གནས་བཞིར་
གསེར་གྱི་རྔ་བོ་ཆེ་བརྡུངས་ན་ཡང་ཡིད་དུ་འོང་བའི་སྒྲ་བྱུང་བར་མ་གྱུར་པས། ངེས་པར་རྒྱལ་པོའི་ཕོ་བྲང་རྡོ་བཟངས་དེར་ཉེ་བར་འཚེ་བ་ཆེན་པོ་འབྱུང་བར་འགྱུར་རོ། །དེ་ནས་བྲམ་ཟེ་དྲག་པོའི་མིག་གིས་རྒྱལ་པོའི་ཕོ་བྲང་རྡོ་བཟངས་སུ་
ཕྱིན་ཏོ། །དེ་ནས་གྲོང་ཁྱེར་ན་གནས་པའི་ལྷ་མོས་བྲམ་ཟེ་དྲག་པོའི་མིག་རྒྱང་རིང་པོ་ཉིད་ནས་མཐོང་བ་དང་། རྒྱལ་པོ་ཟླ་འོད་ག་ལ་བ་དེར་སོང་སྟེ་ཕྱིན་ནས། རྒྱལ་པོ་ཟླ་འོད་ལ་འདི་སྐད་ཅེས་སྨྲས་སོ། །གང་འདི་ལྷ་མཁྱེན་པར་མཛོད་ཅིག །དེ་རིང་
ལྷའི་དབུ་སློང་བ། འཚེ་བ་རྣམ་པར་ཐོ་འཚམ་པ། གླགས་ལྟ་བ་ཞིག་འོང་བར་འགྱུར་ཏེ། དེ་ལྷའི་དབུ་སློང་བར་འགྱུར་གྱིས། དེ་ལ་ལྷས་སེམས་ཅན་རྣམས་ལ་ཐུགས་བརྩེ་བའི་སླད་དུ་བདག་ཉིད་ཡོངས་སུ་བསྲུང་བར་མཛོད་ཅིག་དེ་ནས་

71-1-28a

རྒྱལ་པོ་ཟླ་འོད་ཀྱིས་མགོ་སློང་བར་ཐོས་པས་ཡིད་རབ་ཏུ་དགའ་ཞིང་ངོ་མཚར་གྱིས་མིག་གདངས་པ་དང་། ལྷ་མོ་ལ་སྨྲས་པ། ལྷ་མོ་མ་འཇིགས་པར་སོང་ཤིག །གལ་ཏེ་འོང་བར་གྱུར་ན་ངས་འདིའི་ཡུན་རིང་པོ་ནས་མངོན་པར་
འདོད་པའི་ཡིད་ལ་རེ་བ་ཡོངས་སུ་རྫོགས་པར་བྱའོ། །དེ་ནས་ལྷ་མོ་དེས་རྒྱལ་པོ་ཟླ་འོད་རྩོལ་བའི་ཚུལ་དེ་ལྟ་བུ་ཤེས་པས་སྡུག་བསྔལ་ཞིང་ཡིད་མི་བདེ་བར་དེ་ཉིད་དུ་མི་སྣང་བར་གྱུར་ཏོ། །དེ་ནས་རྒྱལ་པོ་ཟླ་འོད་འདི་སྙམ་དུ་སེམས་ཏེ། གང་
བདག་གིས་དབྱིག་དང་གསེར་དང་ཟས་འདོད་པ་རྣམས་ལ་ཟས་བྱིན་པ་ནི་ངོ་མཚར་ཅི་ཞིག་ཆེ། གང་ཡང་བདག་གིས་སློང་བ་རྣམས་ལ་རང་ཉིད་ཀྱི་ལུས་ཀྱང་ཡོངས་སུ་གཏང་བར་བྱའོ། །དེ་ནས་བྲམ་ཟེ་དྲག་པོའི་མིག་གྲོང་ཁྱེར་གྱི་ལྷོ་
ཕྱོགས་ཀྱི་སྒོ་ནས་ཞུགས་པ་དང་། གྲོང་ཁྱེར་གྱི་ལྷ་མོས་བཟློག་སྟེ། བྲམ་ཟེ་སྡིག་ཅན་མ་ཞུགས་པར་སླར་སོང་ཤིག །སྐྱེས་བུ་གཏི་མུག་ཅན་ཁྱོད་ད་ལྟར་རྒྱལ་པོ་ཟླ་འོད་བྱམས་པའི་བདག་ཉིད་ཅན། སྙིང་རྗེ་དང་ལྡན་པ། ཡོན་ཏན་
དཔག་ཏུ་མེད་པ་ཕུན་སུམ་ཚོགས་པ། འཛམ་བུའི་གླིང་ཡོངས་སུ་སྐྱོང་བར་བྱེད་པ། ཉེས་པ་མེད་པ་གནོད་པ་མི་བྱེད་པ། མགོ་དྲག་པོའི་སེམས་ཀྱིས་ཅི་ལྟར་གཅོད་པར་བྱེད། བྲམ་ཟེ་སྡིག་ཅན་མ་ཞུགས་པར་ཕྱིར་སོང་
ཤིག །རྣམ་པ་འདི་དག་རྒྱལ་པོ་ཟླ་འོད་ཀྱིས་ཐོས་སོ། །ཐོས་ནས་ཀྱང་ངའི་སློངས་མོ་པ་ལྷ་མོས་གྲོང་ཁྱེར་གྱི་སྒོ་ན་བཀག་གོ་སྙམ་ནས། ཡང་བློན་པོའི་མཆོག་ཟླ་བ་ཆེན་པོ་ལ་སྨྲས་པ། གང་འདི་ཟླ་བ་ཆེན་པོས་ཤེས་པར་
གྱིས་ཤིག །ངའི་སློངས་མོ་པ་ལྷ་མོས་གྲོང་ཁྱེར་གྱི་སྒོ་ན་བཀག་གིས་སོང་ལ་ངའི་ཐད་དུ་རིངས་པར་ཁྱེར་ལ་ཤོག་ཤིག །ལྷ་དེ་ལྟར་འཚལ་ལོ་ཞེས་བློན་པོའི་མཆོག་ཟླ་བ་ཆེན་པོས་རྒྱལ་པོ་ཟླ་འོད་ཀྱི་ཚིག་མཉན་ནས་གྲོང་ཁྱེར་གྱི་
སྒོར་སོང་བ་དང་། གྲོང་ཁྱེར་གྱི་ལྷ་མོ་དེ་བཟློག་སྟེ། གང་འདི་ལྷ་མོ་ཤེས་པར་གྱིས་ཤིག །ལྷ་བྲམ་ཟེ་འདི་འགུགས་ཀྱིས་བྲམ་ཟེ་འདི་ཐོང་ཅིག །དེ་ནས་གྲོང་ཁྱེར་ན་གནས་པའི་ལྷ་མོས་ཟླ་བ་ཆེན་པོ་ལ་འདི་སྐད་ཅེས་སྨྲས་སོ། །གང་

71-1-28b

ཡང་ཟླ་བ་ཆེན་པོ་ཤེས་པར་གྱིས་ཤིག །བྲམ་ཟེ་འདི་ནི་གཏུམ་པའི་སེམས་དང་སྙིང་རྗེ་མེད་པའི་སེམས་དང་། མི་བཟད་པའི་སེམས་ཀྱིས་རྒྱལ་པོ་ཟླ་འོད་བརླག་པའི་ཕྱིར་རྒྱལ་པོའི་ཕོ་བྲང་རྡོ་བཟངས་སུ་འོངས་ན། ཁྱེད་ལ་རང་བཞིན་ངན་པ་
འདིས་ཅི་ཞིག་བྱ། རྒྱལ་པོ་ཟླ་འོད་ཀྱི་ཐད་དུ་སོང་ནས་མགོ་སློང་བར་འགྱུར་རོ། །དེ་ནས་བློན་པོའི་མཆོག་ཟླ་བ་ཆེན་པོས་ལྷ་མོ་ལ་སྨྲས་པ། ལྷ་མོ་གང་གིས་བྲམ་ཟེ་འདིས་ལྷའི་དབུ་ལེན་པར་མི་འགྱུར་བའི་ཐབས་ཞིག་བསམས་པ་ང་ལ་
ཡོད་དོ། །དེ་ནས་བློན་པོའི་མཆོག་ཟླ་བ་ཆེན་པོས་བྲམ་ཟེ་དྲག་པོའི་མིག་ཁྲིད་དེ། དེ་གྲོང་ཁྱེར་དུ་ཞུགས་ནས་རིན་པོ་ཆེའི་མཛོད་པ་ལ་སྨྲས་པ། ཁྱོད་ཀྱིས་རིན་པོ་ཆེ་ལས་བྱས་པའི་མགོ་རྣམས་ཁྱེར་ལ་ཤོག་ཤིག་དང་། བྲམ་ཟེ་འདི་ལ་ངས་སྦྱིན་པར་
བྱའོ། །མཛོད་པས་ཀྱང་རྒྱལ་པོའི་སྒོར་རིན་པོ་ཆེའི་མགོ་རྣམས་ཀྱི་ཕུང་པོ་ཆེན་པོ་བྱས་པ་དང་། བློན་པོའི་མཆོག་ཟླ་བ་ཆེན་པོས་བྲམ་ཟེ་དྲག་པོའི་མིག་ལ་རིན་པོ་ཆེ་ལས་བྱས་པའི་མགོ་རྣམས་ཉེ་བར་བསྟབས་ཏེ། བྲམ་ཟེ་ཆེན་པོ་རིན་པོ་ཆེའི་མགོ་
མང་པོ་ལོང་ཤིག་དང་། དབྱིག་དང་གསེར་རྣམས་ཀྱིས་ཀྱང་ཅི་ཙམ་དགོས་པ་ཁྱོད་ལ་སྦྱིན་གྱིས་ཁྱེར་ཅིག་འདིས་ནི་ཁྱོད་ཀྱི་བུ་དང་ཚ་བོའི་བར་གྱི་འཚོ་བར་འགྱུར་གྱི། ལྷའི་དབུ་གླད་པ་དང་རུས་པ་དང་ངར་སྣབས་དང་ཞག་གིས་ཡོངས་སུ་གང་བས་ཅི་ཞིག་
བྱ། དེ་སྐད་ཅེས་སྨྲས་པ་དང་། བྲམ་ཟེ་དྲག་པོའི་མིག་གིས་ཟླ་བ་ཆེན་པོ་ལ་འདི་སྐད་ཅེས་སྨྲས་སོ། །གང་འདི་ཟླ་བ་ཆེན་པོ་ཤེས་པར་གྱིས་ཤིག །ང་ལ་ནི་རིན་པོ་ཆེའི་མགོ་རྣམས་དགོས་པ་མེད་དེ། གསེར་དང་དབྱིག་ཀྱང་དགོས་པ་མེད་
ཀྱི། གཞན་དུ་ན་ས་ཆེན་པོ་སྐྱོང་བ། ཐམས་ཅད་གཏོང་བ་འདིའི་མགོ་སློང་བའི་ཕྱིར་འདིའི་ཐད་དུ་འོངས་སོ། །དེ་སྐད་ཅེས་སྨྲས་པ་དང་། བློན་པོའི་མཆོག་ཟླ་བ་ཆེན་པོ་དང་། ས་འཛིན་གཉིས་ལག་པ་འགྲམ་པ་ལ་གཏད་དེ། ད་ནི་དུས་ཀྱིས་
ཕྱིན་ཏོ་སྙམ་ནས་ཤིན་དུ་སེམས་པ་ལ་ཞུགས་པས་གནས་པར་གྱུར་ཏོ། །དེ་ནས་རྒྱལ་པོ་ཟླ་འོད་ཀྱིས་རྣམ་པ་དེ་དག་ཉེ་བར་ཐོས་ནས་བློན་པོའི་མཆོག་ཟླ་བ་ཆེན་པོ་དང་། ས་འཛིན་གཉིས་ཕོ་ཉས་བོས་ནས་འདི་སྐད་ཅེས་སྨྲས་སོ། །བྲམ་ཟེ་དེ་

71-1-29a

ངའི་གན་དུ་ཁྱེར་ལ་ཤོག་ཤིག །ངས་འདི་ལ་ཡུན་རིང་པོ་ནས་མངོན་པར་འདོད་པའི་ཡིད་ལ་རེ་བ་ཡོངས་སུ་རྫོགས་པར་བྱའོ། །དེ་སྐད་ཅེས་སྨྲས་པ་དང་། བློན་པོའི་མཆོག་ཟླ་བ་ཆེན་པོ་དང་ས་འཛིན་གཉིས་པོ་དེ་ཡུལ་
རྨུས་པ་ལྟ་བུའི་མཆི་མའི་གདོང་གིས་སྙིང་རྗེ་རྗེ་སྐད་དུ་སྨྲེ་སྔགས་འདོན་ཅིང་སྨྲས་པ། ལྷ་བྱམས་པའི་བདག་ཉིད་ཅན། སྙིང་རྗེ་དང་ལྡན་པ། སེམས་ཅན་ཐམས་ཅད་ལ་མཉེས་གཤིན་པ། ཡོན་ཏན་དཔག་ཏུ་མེད་པ་ཕུན་སུམ་ཚོགས་པ་
དང་ལྡན་པ། ཡེ་ཤེས་ལ་མཁས་པ། ལྷའི་མིག་དང་ལྡན་པ་འདིའི་མི་རྟག་པ་ཉིད་ཀྱི་སྟོབས་ཉེ་བར་གནས་པར་གྱུར་ཏོ། །བདག་ཅག་རྣམས་དེང་ལྷ་དང་ལྷན་ཅིག་པ་ལས་ཐ་དད་པར་གྱུར་པ་དང་། སོ་སོར་འགྱུར་བ་དང་བྲལ་བ་དང་བྱེ་
བར་འགྱུར་རོ་སྙམ་ནས་རྒྱལ་པོའི་རྐང་པ་ལ་གཏུགས་ཏེ་ཕྱོགས་གཅིག་ཏུ་འདུག་གོ། །དེ་ནས་རྒྱལ་པོ་ཟླ་འོད་ཐམས་ཅད་ཡོངས་སུ་གཏོང་བ། ཤིན་དུ་ཁྱད་པར་ཅན་གཏོང་ཞིང་ཡོངས་སུ་གཏོང་བར་འདོད་ནས་རིང་པོ་ནས་བྲམ་
ཟེ་དེ་ལ་སྨྲས་པ། བྲམ་ཟེ་ཚུར་ཤོག །ཁྱོད་གང་སློང་བ་དེ་ཁྱེར་ཅིག །དེ་ནས་བྲམ་ཟེ་དྲག་པོའི་མིག་རྒྱལ་པོ་ཟླ་འོད་གང་ན་བ་དེར་སོང་སྟེ་ཕྱིན་ནས། རྒྱལ་པོ་ཟླ་འོད་ལ་རྒྱལ་བ་དང་། ཚེ་སྤེལ་བ་བརྗོད་ནས་རྒྱལ་པོ་ཟླ་འོད་ལ་འདི་སྐད་
ཅེས་སྨྲས་སོ། །བྱང་ཆུབ་སེམས་དཔའ་དངོས་པོ་ཐམས་ཅད་གཏོང་ལ་ངེས་དགའ་འགྱུར། །བྱང་ཆུབ་སེམས་དཔའ་དགེ་ཁྱོད་དྲི་མེད་ཆོས་ལ་གནས། །དམ་པ་ཀུན་མཁྱེན་མངོན་པར་བཞེད་པའི་ཐུགས་ཀྱིས་ནི། །ཐུགས་རྗེའི་
བདག་ཉིད་ཐུགས་ལྡན་བདག་ལ་དབུ་སྩོལ་ཅིག །དེ་ནས་རྒྱལ་པོ་ཟླ་འོད་ཀྱིས་བྲམ་ཟེ་ལས་དེ་ལྟ་བུའི་ཚིག་ཏུ་བརྗོད་པ་ཐོས་པ་དང་། ཡིད་རབ་ཏུ་དགའ་བ་དང་། དགའ་བས་མིག་གདངས་ཏེ། བྲམ་ཟེ་དྲག་པོའི་མིག་ལ་སྨྲས་པ། ཇི་ལྟར་ཡབ་ཀྱི་
བུ་གཅིག་ང་ཡིན་ཡང་། །དེ་ལྟ་ན་ཡང་ང་ཡི་མགོ་འདི་ཁྱེར། །ཁྱོད་ཀྱིས་བསམས་པ་འབྲས་བུར་བཅས་གྱུར་ཅིང་། །མགོ་བོ་བྱིན་པས་བྱང་ཆུབ་ཐོབ་པར་ཤོག །ངའི་མགོ་གླད་པ་ཁྲག་དང་ཞག་འདི་ཡིས། །ཁྱོད་ཀྱི་འདོད་པའི་བྱ་བ་ཅི་

71-1-29b

ཡང་མི་བྱེད་ཀྱང་། །ཁྱེར་ཏེ་ཁྱོད་ལ་ང་ཡི་མགོ་གང་དགོས་གྱུར་པའི། །ཡིད་ལ་རེ་བ་འབྲས་བཅས་ཁྱོད་ནི་དགའ་བར་ཤོག །བྲམ་ཟེ་ཆེན་པོ་ཁྱོད་ཀྱིས་ངའི་ཡན་ལག་གི་མཆོག་མགོ་འདི་བར་ཆད་མེད་པར་ལེགས་པར་ཁྱེར་ཅིག་ཅེས་སྨྲས་ནས་རང་
ཉིད་ཀྱིས་ཅོད་པན་ཕུད་དོ། །དགེ་སློང་དག་རྒྱལ་པོ་ཟླ་འོད་ཀྱིས་མགོ་ལ་ཡོད་པའི་ཅོད་པན་ཕུད་མ་ཐག་ཏུ། འཛམ་བུའི་གླིང་པའི་མི་ཐམས་ཅད་ཀྱི་མགོ་ལ་ཡོད་པའི་ཅོད་པན་རྣམས་ཀྱང་ལྷུང་བར་གྱུར་ཏོ། །རྒྱལ་པོའི་ཕོ་བྲང་རྡོ་བཟངས་ཀྱི་ཕྱོགས་
བཞིར་སྐར་མདའ་རྣམས་ལྷུང་བར་གྱུར་ཏེ། གྲོང་ཁྱེར་གྱི་ལྷ་མོས་རྒྱལ་པོ་ཟླ་འོད་འདིའི་མགོ་བྲམ་ཟེ་སྡིག་པ་ཅན་གྱིས་གཅོད་པར་འགྱུར་རོ་ཞེས་སྒྲ་བསྒྲགས་སོ། །དེ་ནས་བློན་པོའི་མཆོག་ཟླ་བ་ཆེན་པོ་དང་ས་འཛིན་གཉིས་རྒྱལ་པོ་ཟླ་འོད་ཚུལ་འདི་ལྟ་
བུར་རང་ཉིད་ཀྱི་ལུས་ཡོངས་སུ་གཏོང་བར་ཤེས་ནས། དེ་ཡུལ་རྨུས་པ་ལྟ་བུའི་མཆི་མའི་གདོང་ཅན་གྱིས་རྒྱལ་པོའི་རྐང་པ་ལ་གཏུགས་ཏེ། གང་ལྷ་ཡང་མཐོང་བ་འདི་ནི་འཇིག་རྟེན་ན་སྐྱེས་བུ་སྐལ་བ་ཅན་ཡིན་ནོ་ཞེས་སྨྲ་ཞིང་དེ་གཉིས་དེ་ལ་སེམས་
མངོན་པར་དད་པས་ལྟ་ཞིང་ཡུ་བུས་བྲམ་ཟེ་དྲག་པོའི་མིག་ལ་བྱམས་པའི་སེམས་བསྐྱེད་པ་དང་། ལྷའི་མི་རྟག་པ་ཉིད་ལ་ལྟ་བར་མི་ནུས་སོ་སྙམ་དུ་བསམས་ནས་སྐད་ཅིག་མ་དེ་ཉིད་ལ་དུས་བྱས་ཏེ། འདོད་པའི་ཁམས་ཐམས་ཅད་ལས་
ཡང་དག་པར་འདས་ནས་ཚངས་པའི་འཇིག་རྟེན་དུ་སྐྱེས་སོ། །དེ་ནས་རྒྱལ་པོ་ཟླ་འོད་ཀྱི་འབད་པའི་ཚུལ་འདི་ལྟ་བུ་ཤེས་ནས་ས་ལ་གནས་པའི་གནོད་སྦྱིན་རྣམས་དང་། བར་སྣང་ལས་རྒྱུ་བའི་གནོད་སྦྱིན་རྣམས་ཆོ་ངེས་འདེབས་པར་
བརྩམས་ཏེ། ཀྱི་ཧུད་ད་ནི་རྒྱལ་པོ་ཟླ་འོད་ཀྱི་ལུས་ཡོངས་སུ་གཏོང་བར་འགྱུར་ཏེ་སྡུག་བསྔལ་ལོ། །དེ་ནས་རྒྱལ་པོའི་ཕོ་བྲང་གི་སྒོར་སྲོག་ཆགས་བརྒྱ་སྟོང་དུ་མ་འདུས་པར་གྱུར་ཏོ། །དེ་ནས་བྲམ་ཟེ་དྲག་པོའི་མིག་གིས་སྐྱེ་བོའི་
ཚོགས་ཆེན་པོ་འདུས་པ་དེ་མཐོང་ནས་རྒྱལ་པོ་ཟླ་འོད་ལ་འདི་སྐད་ཅེས་སྨྲས་སོ། །གལ་ཏེ་ལྷས་གནང་བར་མཛད་ན། སྐྱེ་བོའི་ཚོགས་ཆེན་པོའི་མདུན་དུ་ལྷའི་དབུ་ལེན་རྔོ་མི་ཐོག་གོ། །གལ་ཏེ་ཁྱོད་དབུ་ཡོངས་སུ་གཏོང་བར་མཛད་

71-1-30a

ན། ཁྱེད་དང་བདག་དབེན་པ་ཞིག་ཏུ་གཤེགས་འཚལ་ལོ། །དེ་སྐད་ཅེས་སྨྲས་པ་དང་། རྒྱལ་པོ་ཟླ་འོད་ཀྱིས་བྲམ་ཟེ་དྲག་པོའི་མིག་ལ་སྨྲས་པ། བྲམ་ཟེ་ཆེན་པོ་དེ་བཞིན་དུ་བྱ་ཡིས། ཁྱེད་ཀྱི་ཀུན་དུ་རྟོག་པ་འབྱོར་ཅིང་རང་
གི་ཡིད་ལ་རེ་བ་རྣམས་ཡོངས་སུ་རྫོགས་པར་གྱུར་ཅིག །དགེ་སློང་དག་རྒྱལ་པོའི་ཕོ་བྲང་རྡོ་བཟངས་ཀྱི་ནང་ན་ནོར་བུ་དང་རིན་པོ་ཆེའི་སྙིང་པོ་ཞེས་བྱ་བའི་བསྐྱེད་མོས་ཚལ་ཤིང་སྣ་ཚོགས་ཀྱིས་ཉེ་བར་མཛེས་པ། ཉམས་དགའ་བ་ནེ་
ཙོ་དང་ཤ་རི་ཀ་དང་ཁུ་བྱུག་དང་རྨ་བྱ་དང་ཤང་ཤང་ཏེའུ་དང་ཀ་ལ་པིང་ཀ་རྣམས་ཡིད་དུ་འོང་བའི་སྒྲ་སྒྲོགས་པས་ནགས་ཚལ་གྱི་ཚོགས་ཉམས་དགའ་བ། བསྐྱེད་མོས་ཚལ་དེའི་དབུས་ཀྱི་སྟེགས་བུ་དེའི་དབུས་སུ་ཙམ་པ་ཀའི་
ཤིང་ཞིག་སྐྱེས་པ་ཡོད་དོ། །དེ་ནས་རྒྱལ་པོ་ཟླ་འོད་རྒྱལ་པོའི་སྟན་ལས་ལངས་ཏེ། རལ་གྲི་རྣོན་པོ་ཐོགས་ནས་ནོར་བུ་དང་། རིན་པོ་ཆེའི་སྙིང་པོའི་བསྐྱེད་མོས་ཚལ་ག་ལ་བ་དེར་སོང་ངོ་། །དེ་ནས་རྒྱལ་པོ་ཟླ་འོད་འབད་པའི་
ཚུལ་འདི་ལྟ་བུ་ལ་ཞུགས་པ་མཐོང་བ་དང་། རྒྱལ་པོའི་ཕོ་བྲང་རྡོ་བཟངས་ཀྱི་གྲོང་ཁྱེར་ན་སྲོག་ཆགས་བརྒྱ་སྟོང་དུ་མ་ཆོ་ངེས་འདེབས་ཤིང་རྗེས་བཞིན་དུ་འབྲང་བ་དང་། རྒྱལ་པོ་ཟླ་འོད་ཀྱིས་སྐྱེ་བོའི་ཚོགས་ཆེན་པོ་འདུས་པ་
དེ་ཆོ་ངེས་འདེབས་པ་མཐོང་ངོ་། །མཐོང་བ་དང་ཡང་དབུགས་དབྱུང་བའི་ཕྱིར་སྨྲས་པ། ཁྱེད་རྣམས་དགེ་བའི་ཆོས་རྣམས་ལ་བག་ཡོད་པར་གྱིས་ཤིག་ཅེས་མདོར་བསྡུས་ནས་ཆོས་བསྟན་ཏེ། བྲམ་ཟེ་དྲག་པོའི་མིག་
ཁྲིད་ནས། ནོར་བུ་དང་རིན་པོ་ཆེའི་སྙིང་པོའི་བསྐྱེད་མོས་ཚལ་དུ་ཞུགས་སོ། །རྒྱལ་པོ་ཟླ་འོད་ནོར་བུ་དང་རིན་པོ་ཆེའི་སྙིང་པོའི་བསྐྱེད་མོས་ཚལ་དུ་ཞུགས་མ་ཐག་ཏུ་རྒྱལ་པོའི་ཕོ་བྲང་རྡོ་བཟངས་ཀྱི་དབང་པོའི་རྒྱལ་མཚན་
དང་། བ་དན་རྣམས་ནོར་བུ་དང་རིན་པོ་ཆེའི་སྙིང་པོའི་བསྐྱེད་མོས་ཚལ་ག་ལ་བ་དེར་འདུད་པར་གྱུར་ཏོ། །དེ་ནས་རྒྱལ་པོ་ཟླ་འོད་ཀྱིས་ནོར་བུ་དང་རིན་པོ་ཆེའི་སྙིང་པོའི་བསྐྱེད་མོས་ཚལ་གྱི་སྒོ་བཅད་ནས་བྲམ་ཟེ་ལ་སྨྲས་པ་བྲམ་ཟེ་ཆེན་པོ་ངའི་ཡན་

71-1-30b

ལག་གི་མཆོག་འདི་ཁྱེར་ཅིག །དེ་སྐད་ཅེས་སྨྲས་པ་དང་། བྲམ་ཟེ་དྲག་པོའི་མིག་གིས་རྒྱལ་པོ་ཟླ་འོད་ལ་འདི་སྐད་ཅེས་སྨྲས་སོ། །ལྷའི་དབུ་བདག་གིས་གཅོད་པར་རྔོ་མི་ཐོག་གོ། །དེ་སྐད་ཅེས་སྨྲས་པ་དང་། རྒྱལ་པོ་ཟླ་འོད་རལ་གྲི་རྣོན་པོ་ཐོགས་ནས། 
བསྐྱེད་མོས་ཚལ་དེར་གང་ན་དུས་ཐམས་ཅད་པའི་ཙམ་པ་ཀའི་ཤིང་ཡོད་པ་དེར་སོང་ངོ་། །དེ་ནས་བསྐྱེད་མོས་ཚལ་དེའི་ལྷ་མོས་རྒྱལ་པོ་ཟླ་འོད་ཚུལ་འདི་ལྟ་བུར་རང་ཉིད་ཡོངས་སུ་གཏོང་བ་ལ་ཞུགས་པར་ཤེས་ནས་ཆོ་ངེས་འདེབས་པར་རྩོམ་ཞིང་འདི་
སྐད་ཅེས་ཀྱང་སྨྲས་སོ། །བྲམ་ཟེ་སྡིག་པ་ཅན་ཁྱོད་དེ་ལྟར་རྒྱལ་པོ་ཟླ་འོད་ཉེས་པ་མེད་པ་གནོད་པ་མེད་པ། ཡོན་ཏན་དཔག་ཏུ་མེད་པ་དང་ལྡན་པ་འདིའི་མགོ་ཇི་ལྟར་གཅོད་པར་བྱེད། དེ་ནས་རྒྱལ་པོ་ཟླ་འོད་ཀྱིས་བསྐྱེད་མོས་ཚལ་གྱི་ལྷ་མོ་
དེ་ཕྱིར་བཟློག་སྟེ། ལྷ་མོ་ངའི་མགོ་སློང་བ་ལ་བར་ཆད་མ་བྱེད་ཅིག །དེ་ཅིའི་ཕྱིར་ཞེ་ན། ལྷ་མོ་སྔོན་བྱུང་བ་ན་ངའི་ཡན་ལག་གི་མཆོག་མགོ་སློང་བ་ལ་ལྷ་མོ་ཞིག་གིས་བར་ཆད་བྱས་པས་ལྷ་མོ་དེའི་བསོད་ནམས་མ་ཡིན་པ་མང་པོ་སྐྱེས་ལ། ངས་
ཀྱང་བླ་ན་མེད་པའི་ཡེ་ཤེས་ཡུན་རིང་པོ་ཞིག་གིས་འཐོབ་པར་འགྱུར་རོ། །ལྷ་མོ་ངས་ནོར་བུ་དང་རིན་པོ་ཆེའི་སྙིང་པོའི་བསྐྱེད་མོས་ཚལ་འདི་ཉིད་དུ་མགོ་སྟོང་སྙེད་ཡོངས་སུ་གཏོང་བ་བྱས་ན། ང་ལ་སུས་ཀྱང་བར་ཆད་མ་བྱས་སོ། །དེ་བས་ན་
ལྷ་མོ་ཁྱོད་ཀྱིས་ངའི་ཡན་ལག་གི་མཆོག་སློང་བ་ལ་བར་ཆད་མ་བྱེད་ཅིག །ལྷ་མོ་གང་དུ་ངས་སྟག་མོ་ལ་བདག་ཉིད་ཡོངས་སུ་བཏང་སྟེ། ལུས་ཡོངས་སུ་གཏོང་བ་གཅིག་གིས་བྱང་ཆུབ་སེམས་དཔའ་བྱམས་པ་བསྐལ་པ་བཞི་བཅུར་
ཞུགས་པ་ཕྱིར་འདུམས་པར་བྱས་པའི་ས་ཕྱོགས་ནི་འདི་ཡིན་ནོ། །དེ་ནས་ལྷ་མོ་དེ་རྒྱལ་པོ་ཟླ་འོད་ཀྱི་རྫུ་འཕྲུལ་ཆེན་པོ་དེ་མཐོང་ནས། རྒྱལ་པོ་དེ་ལ་སེམས་མགུ་བ་ཆེན་པོ་སྐྱེས་ཏེ། ཅང་མི་སྨྲ་བར་གྱུར་ཏོ། །དེ་ནས་རྒྱལ་པོ་
ཟླ་འོད་ཡང་དག་པའི་སྨོན་ལམ་བྱེད་པ་ལ་ཞུགས་ཏེ། གང་བསྐྱེད་མོས་ཚལ་གྱི་ཚོགས་ན་གནས་པའི་ལྷ་དང་ཀླུ་དང་གནོད་སྦྱིན་དང་དྲི་ཟ་དང་མི་འམ་ཅི་ཁྱེད་རྣམས་གསོན་ཅིག །བདག་བསྐྱེད་མོས་ཚལ་འདིར་རབ་ཏུ་གཏོང་བ་དང་

71-1-31a

གཏོང་བའི་ཡང་ཤིན་དུ་གཏོང་བ་རང་གི་མགོ་ཡོངས་སུ་གཏོང་བའི་གཏོང་བ་བྱེད་དེ། བདག་གི་མགོ་ཡོངས་སུ་གཏོང་བ་དེ་ཡང་རྒྱལ་པོའི་ཕྱིར་མ་ཡིན། མཐོ་རིས་ཀྱི་ཕྱིར་མ་ཡིན། བརྒྱ་བྱིན་གྱི་ཕྱིར་མ་ཡིན། བདུད་ཀྱི་ཕྱིར་མ་
ཡིན། ཚངས་པའི་ཕྱིར་མ་ཡིན། འཁོར་ལོས་སྒྱུར་བའི་ཡུལ་གྱི་ཕྱིར་མ་ཡིན་གྱི། གཞན་དུ་ན་འདིར་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་མ་དུལ་བ་གདུལ་བ་དང་། མ་
བསྒྲལ་བ་བསྒྲལ་བ་དང་། མ་གྲོལ་བ་དགྲོལ་བ་དང་། དབུགས་མ་ཕྱིན་པ་དབུགས་དབྱུང་བ་དང་། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་བཟླ་བར་བྱའོ། །བདེན་པ་དང་བདེན་པའི་ཚིག་འདིས་ངལ་བ་འབྲས་བུ་དང་བཅས་པར་གྱུར་
ཅིག །ཡོངས་སུ་མྱ་ངན་ལས་འདས་ནས་ཀྱང་ཡུངས་ཀར་གྱི་འབྲུ་ཙམ་གྱི་སྐུ་གདུང་འབྱུང་བར་གྱུར་ཅིག །ནོར་བུ་དང་རིན་པོ་ཆེའི་བསྐྱེད་མོས་ཚལ་འདིའི་དབུས་སུ་ཡང་མཆོད་རྟེན་ཆེན་པོ། མཆོད་རྟེན་ཐམས་ཅད་ལས་ཁྱད་པར་དུ་
འཕགས་པ་བྱུང་བར་གྱུར་ནས། སེམས་ཅན་གང་ལུས་ངལ་བ་མཆོད་རྟེན་ཆེན་པོ་ལ་ཕྱག་འཚལ་དུ་འོང་བར་གྱུར་ཅིག །དེ་རྣམས་ཀྱིས་མཆོད་རྟེན་ཐམས་ཅད་ལས་ཁྱད་པར་དུ་འཕགས་པ་སྐུ་གདུང་འཇོག་པ་དེ་མཐོང་བས་
ངལ་བ་མེད་པར་གྱུར་ཅིག །ངལ་བ་མེད་པར་གྱུར་ནས་ངའི་མཆོད་རྟེན་ལ་སྐྱེ་བོའི་ཚོགས་འོངས་ནས་མཆོད་པ་བྱེད་ན། མཐོ་རིས་དང་ཐར་པ་ལ་གཞོལ་བར་ཡང་གྱུར་ཅིག་ཅེས་སྨྲས་ནས། ཙམ་པ་ཀའི་ཤིང་ལ་གཙུག་
ཕུད་བཅིངས་ནས། བྲམ་ཟེ་ལ་བོས་ཏེ་སྨྲས་པ། བྲམ་ཟེ་ཆེན་པོ་ཚུར་ཤོག །བགེགས་མ་བྱེད་པར་ངའི་མགོ་ཁྱེར་ཅིག །དེ་ནས་རྒྱལ་པོ་ཟླ་འོད་རང་ཉིད་ཀྱི་ལུས་ཀྱི་མཐུ་དང་སྟོབས་ཡང་དག་པར་སྐྱེས་ནས། བྲམ་ཟེ་དེ་ལ་སྙིང་
རྗེ་ཆེན་པོ་ལྷན་ཅིག་དུ་འགྲོ་བ་དང་འབྱུང་བའི་བྱམས་པའི་སེམས་བསྐྱེད་ནས་མགོ་བཅད་དེ། བྲམ་ཟེ་དྲག་པོའི་མིག་ལ་བྱིན་ཏོ། །དུས་བྱས་པ་དང་ཚངས་པའི་འཇིག་རྟེན་ལས་ཤིན་དུ་འདས་ནས་ཕུལ་དུ་བྱུང་བའི་དགེ་རྒྱས་ཀྱི་

71-1-31b

ལྷའི་རིས་ཀྱི་ནང་དུ་སྐྱེས་སོ། །དགེ་སློང་དག་དེ་ནས་མགོ་ཡོངས་སུ་བཏང་མ་ཐག་ཏུ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འགུལ། རབ་ཏུ་འགུལ། ལྡེག་རབ་ཏུ་ལྡེག །གཡོས་རབ་ཏུ་གཡོས་ཏེ། ནམ་མཁའི་དཀྱིལ་
ན་མངོན་པར་གནས་པའི་ལྷ་རྣམས་ཀྱང་ཨ་ལ་ལ་ཞེས་སྒྲ་སྒྲོགས་སོ། །བར་སྣང་གི་ལྷ་རྣམས་ཀྱང་ལྷའི་ཨུད་པ་ལ་དང་། པད་མ་དང་ཀུ་མུ་ད་དང་པུན་ད་རི་ཀ་རྣམས་འཐོར་ཞིང་། ཨ་ག་རུའི་ཕྱེ་མ་རྣམས་དང་ཏ་ག་རུའི་ཕྱེ་མ་རྣམས་དང་ཙན་
དན་གྱི་ཕྱེ་མ་རྣམས་དང་ལྷ་རྣམས་ཀྱི་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་རྣམས་འཐོར་བ་དང་། གོས་རྣམས་ཀྱི་ཆར་ཡང་འབེབས་སོ། །ལྷ་རྣམས་ཀྱི་རོལ་མོའི་སྒྲ་ཡང་ཡང་དག་པར་རྡུང་ངོ་། །དེ་ནས་བྲམ་ཟེ་དྲག་
པོའི་མིག་མགོ་ཁྱེར་ཏེ་ནོར་བུ་དང་། རིན་པོ་ཆེའི་སྙིང་པོའི་བསྐྱེད་མོས་ཚལ་ནས་བྱུང་བ་དང་། སྲོག་ཆགས་བརྒྱ་སྟོང་དུ་མས་ཀྱི་ཧུད་ལྷ་བསད་དེ་སྡུག་བསྔལ་ལོ་ཞེས་སྒྲ་ཕྱུང་སྟེ། དེ་ན་ཁ་ཅིག་ནི་ས་ལ་འགྲེ་ལྡོག་གོ། །ཁ་ཅིག་ནི་ལག་པ་
བརྐྱང་སྟེ་ཆོ་ངེས་འདེབས་སོ། །བུད་མེད་རྣམས་ཀྱང་སྐྲ་བཤིག་ནས་ངུའོ། །སྲོག་ཆགས་བརྒྱ་སྟོང་དུ་མ་ཡང་འདུས་ཏེ་དེ་ན་གཅིག་ཏུ་གནས་ཏེ་དེ་ཉིད་དུ་གནས་ནས། བསམ་གཏན་རྣམས་བསྐྱེད་དེ། དེ་ཉིད་དུ་དུས་བྱས་ནས་རྒྱལ་པོ་ཟླ་འོད་དང་སྐལ་བ་
མཉམ་པར་དགེ་རྒྱས་ཀྱི་ལྷ་རྣམས་སུ་སྐྱེས་སོ། །ཁ་ཅིག་ནི་བསམ་གཏན་བསྐྱེད་ནས་གནས་དེ་ཉིད་དུ་དུས་བྱས་ཏེ་འོད་གསལ་གྱི་ལྷའི་རིས་སུ་སྐྱེས་སོ། །གཞན་རྣམས་ནི་འདུས་ནས་རྒྱལ་པོ་ཟླ་འོད་ཀྱི་ལུས་དྲི་ཐམས་ཅད་དང་
ལྡན་པའི་རོ་སྲེག་པའི་ཤིང་བྱས་ཏེ་བསྲེགས་སོ། །རུས་པ་དེ་རྣམས་ཀྱང་གསེར་གྱི་བུམ་པར་བཅུག་སྟེ། ལམ་པོ་ཆེའི་བཞི་མདོར་སྐུ་གདུང་གི་མཆོད་རྟེན་རབ་ཏུ་བཞག་སྟེ། གདུགས་དང་རྒྱལ་མཚན་དང་བ་དན་བཙུགས་ཏེ། 
དྲི་དང་ཕྲེང་བ་དང་སྤོས་ཀྱི་ཕྱེ་མ་དང་རོལ་མོ་རྣམས་ཀྱིས་མཆོད་པ་བྱས་ནས་རྒྱལ་པོ་ཟླ་འོད་ལ་གཅིག་ཏུ་སེམས་མངོན་པར་དད་པས་དེ་བཞིན་དུ་སྐྱོ་བས་བསམ་གཏན་བསྐྱེད་དེ། བསམ་གཏན་བསྐྱེད་པ་དེས་དུས་བྱས་ནས་

71-1-32a

ཚངས་པའི་འཇིག་རྟེན་དུ་སྐྱེས་སོ། །ལ་ལ་ནི་རྒྱལ་པོ་ཟླ་འོད་མ་མཐོང་བས་མྱ་ངན་གྱིས་ཟིལ་གྱིས་མནན་ཏེ་དུས་བྱས་ནས་འདོད་པ་ན་སྤྱོད་པའི་ལྷ་དྲུག་ཏུ་སྒྱེས་སོ། །གང་དེར་དུས་བྱས་པ་དེ་དག་ཐམས་ཅད་ཀྱང་མཐོ་
རིས་དང་ཐར་པ་ལ་གཞོལ་བར་གྱུར་ཏོ། །དགེ་སློང་དག་དེའི་ཚེ་དེའི་དུས་ན་བྱང་ཕྱོགས་ན་རྒྱལ་པོའི་ཕོ་བྲང་རྡོ་བཟངས་སུ་གྱུར་པ་དེ་གཞན་ཡིན་པར་མི་བལྟ་སྟེ། རྡོ་འཇོག་འདི་ཉིད་དེའི་ཚེ་དེའི་དུས་ན་རྒྱལ་པོའི་ཕོ་བྲང་རྡོ་བཟངས་སུ་གྱུར་ཏོ་
དགེ་སློང་དག་དེ་ཇི་སྙམ་དུ་སེམས། གང་རྒྱལ་པོ་ཟླ་འོད་ཅེས་བྱ་བ་དེ་ནི་ང་ཡིན་ཏེ། དེའི་ཚེ་དེའི་དུས་ན་བྱང་ཆུབ་སེམས་དཔའི་སྤྱོད་པ་ལ་ཞུགས་ཏེ་དེ་ཉིད་ཀྱིས་ནོར་བུ་དང་རིན་པོ་ཆེའི་སྙིང་པོའི་བསྐྱེད་མོས་ཚལ་དུ་བྲམ་ཟེ་དྲག་པོའི་མིག་ལ་
མགོ་ཡོངས་སུ་བཏང་ངོ་། །དགེ་སློང་དག་དེ་ཇི་སྙམ་དུ་སེམས། གང་བྲམ་ཟེ་དྲག་པོའི་མིག་ཅེས་བྱ་བ་དེ་ནི་ལྷ་སྦྱིན་ཡིན་ཏེ། དེའི་ཚེ་དེའི་དུས་ན་བྲམ་ཟེ་དྲག་པོའི་མིག་ཏུ་གྱུར་ཏོ། །དགེ་སློང་དག་དེ་ཇི་སྙམ་དུ་སེམས། 
གང་དེའི་ཚེ་དེའི་དུས་ན་བློན་པོའི་མཆོག་ཟླ་བ་ཆེན་པོ་དང་། ས་འཛིན་དེ་གཉིས་ནི་དགེ་སློང་ཤཱ་རིའི་བུ་དང་མཽད་གལ་གྱི་བུ་འདི་གཉིས་ཡིན་ནོ། །འདི་གཉིས་ཀྱིས་ང་ཡང་མྱ་ངན་ལས་འདས་པ་མ་བཟོད་ནས་ང་ཉིད་
འཆི་བ་མ་མཐོང་བར་ཐོག་མ་ཉིད་དུ་དུས་བྱས་སོ། །ད་ལྟར་ཡང་ང་མྱ་ངན་ལས་འདས་པ་མ་བཟོད་དེ་ང་མྱ་ངན་ལས་འདས་པ་མ་མཐོང་བར་དེ་ཐོག་མ་ཉིད་དུ་མྱ་ངན་ལས་འདས་པ་ཡིན་ནོ། །བཅོམ་ལྡན་འདས་ཀྱིས་དེ་
སྐད་ཅེས་བཀའ་སྩལ་ནས་དགེ་སློང་དེ་དག་ཡི་རང་སྟེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །རྒྱལ་པོ་ཟླ་འོད་ཀྱི་རྟོགས་པ་བརྗོད་པ་རྫོགས་སོ།། །།
རྒྱ་གར་གྱི་མཁན་པོ་དྷརྨ་ཤྲཱི་བྷ་དྲ་དང་། ཞུ་ཆེན་གྱི་ལོ་ཙྪ་བ་དགེ་སློང་ཤེས་རབ་ལེགས་པས་བསྒྱུར་ཅིང་ཞུས་ཏེ། དགེ་སློང་རིན་ཆེན་བཟང་པོས་བཅོས་ཏེ་གཏན་ལ་ཕབ་པ།། །།

71-1-32b

༄༅། །རྒྱ་གར་སྐད་དུ། ཤྲཱི་སེ་ན་ཨ་བ་ད་ན། བོད་སྐད་དུ། དཔལ་གྱི་སྡེའི་རྟོགས་པ་བརྗོད་པ། དཀོན་མཆོག་གསུམ་ལ་ཕྱག་འཚལ་ལོ། །གླེང་གཞི་མཉན་དུ་ཡོད་པ་ན་སྟེ། དེ་ནས་བཅོམ་ལྡན་འདས་ཀྱིས་དགེ་སློང་
རྣམས་ལ་བཀའ་སྩལ་པ། དགེ་སློང་དག་གལ་ཏེ་ཇི་ལྟར་ངས་སྦྱིན་པའི་འབྲས་བུ་ཡང་ཤེས་ལ་སྦྱིན་པའི་བགོ་བཤའི་འབྲས་བུ་རྣམ་པར་སྨིན་པ་ཡང་ཤེས་བཞིན་དུ་སེམས་ཅན་རྣམས་ཀྱིས་ཀྱང་སྦྱིན་པའི་འབྲས་བུ་ཡང་ཤེས་ལ་སྦྱིན་
པའི་བགོ་བཤའི་འབྲས་བུ་རྣམ་པར་སྨིན་པ་ཡང་ཤེས་སུ་ཟིན་ན་ནི་དེ་ལྟར་ན་ཁམ་གྱི་ཐ་མ་དང་ཁམ་གྱི་མཇུག་ལུས་པ་གང་ཡིན་པ་དེ་ལས་ཀྱང་གལ་ཏེ་ཡོན་གནས་ལེན་པ་པོ་རྙེད་ན། དེ་ལ་མ་བྱིན་ནམ་བགོ་བཤའ་མ་
བྱས་ཀྱི་བར་དུ་ཟ་བར་མི་བྱེད་ལ། དེ་དག་གི་སེམས་ཀྱང་སེར་སྣ་སྐྱེས་པས་ཀུན་ནས་དཀྲིས་ཤིང་འདུག་པར་མི་འགྱུར་བ་ཞིག་ན། ཇི་ལྟར་ངས་སྦྱིན་པའི་འབྲས་བུ་ཡང་ཤེས་ལ་སྦྱིན་པའི་བགོ་བཤའི་འབྲས་བུ་
རྣམ་པར་སྨིན་པ་ཡང་ཤེས་བཞིན་དུ་སེམས་ཅན་རྣམས་ཀྱི་སྦྱིན་པའི་འབྲས་བུ་ཡང་མི་ཤེས་ལ་སྦྱིན་པའི་བགོ་བཤའི་འབྲས་བུ་རྣམ་པར་སྨིན་པ་ཡང་མི་ཤེས་པས་ནི་དེའི་ཕྱིར་དེ་དག་ནི་ཀུན་དུ་འཛིན་པའི་
སེམས་གྱིས་མ་བྱིན་པ་འམ། བགོ་བཤའ་མ་བྱས་པར་ཟ་བར་བྱེད་ལ། དེ་དག་གི་སེམས་ཀྱང་སེར་སྣ་སྐྱེས་པས་ཀུན་ཏུ་དཀྲིས་ཤིང་འདུག་གོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་
གཤེགས་པས་དེ་སྐད་གསུངས་ནས། གཞན་ཡང་སྟོན་པས་འདི་སྐད་ཅེས་བཀའ་སྩལ་ཏོ། །བགོ་བཤའ་དག་གི་རྣམ་པར་སྨིན། །ཇི་ལྟར་དོན་ཆེན་གྱུར་པ་དེ། །དྲང་སྲོང་ཆེ་རྣམས་གསུངས་པ་བཞིན། །
སེམས་ཅན་རྣམས་ཀྱིས་ཤེས་ན་ནི། །མ་བྱིན་བར་དུ་མི་ཟ་ཞིང་། །སེར་སྣ་ཅན་དུ་མི་འགྱུར་ལ། །དེ་དག་ཀུན་དུ་འཛིན་པའི་སེམས། །ནམས་ཀྱང་སྐྱེ་བར་མི་འགྱུར་ན། །གང་ཕྱིར་བྱིས་པ་གཏི་མུག་གིས། །

71-1-33a

བསྒྲིབས་པ་རྣམས་ཀྱིས་མ་ཤེས་པས། །དེ་ཕྱིར་ཀུན་དུ་འཛིན་སེམས་ཀྱིས། །རྟག་ཏུ་མ་བྱིན་ཟ་བར་བྱེད། །དེ་དག་སེར་སྣ་སྐྱེས་ནས་ཀྱང་། །སེམས་ནི་ཀུན་ནས་དཀྲིས་ཤིང་འདུག །གང་གི་ཚེ་བཅོམ་
ལྡན་འདས་ཀྱིས་མདོ་འདི་བཤད་པ་དེའི་ཚེ་ས་རྣམ་པ་དྲུག་ཏུ་གཡོས་པར་གྱུར་ཅིང་། བཅོམ་ལྡན་འདས་ཉིད་ཀྱི་སྐུ་ལས་འོད་ཟེར་རྣམས་བྱུང་བར་གྱུར་ཏོ། །དེ་ནས་དགེ་སློང་རྣམས་ཀྱིས་བཅོམ་ལྡན་འདས་ཀྱི་ཆོ་འཕྲུལ་བསམ་
གྱིས་མི་ཁྱབ་ཅིང་རྨད་དུ་བྱུང་བ་འདི་ལྟ་བུ་མཐོང་བ་ནི་ངོ་མཚར་སྐྱེས་ཏེ། སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒྱུ་མ་མཆིས་རྐྱེན་མ་མཆིས་པར་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རྣམས་འདི་ལྟ་བུའི་རྨད་དུ་བྱུང་བའི་ཆོ་འཕྲུལ་སྟོན་པར་མི་མཛད་ན། བཙུན་པ་འདི་ལྟ་བུའི་ཆོ་འཕྲུལ་གྱི་རྒྱུ་གང་ལགས། རྐྱེན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་
ཆོ་འཕྲུལ་འདི་ལྟ་བུ་འདི་འབྱུང་བའི་རྒྱུ་ཉན་པར་འདོད་དམ། བཙུན་པ་དེ་ལྟར་འཚལ་ལོ། །དགེ་སློང་དག་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་པར་བྱའོ། །དགེ་སློང་དག་སྔོན་བྱུང་
བ་འདས་པའི་དུས་ན་རྒྱལ་པོའི་ཕོ་བྲང་ཨ་རི་ཤྠའི་ཞེས་བྱ་བ་འབྱོར་པ་རྒྱས་པ་བདེ་བ་ལོ་ལེགས་པ། སྐྱེ་བོ་མང་པོ་དང་མིས་གང་བ། ཆུར་དཔག་ཚད་བཅུ་གཉིས། ཞེང་དུ་དཔག་ཚད་བདུན་པ། གྲུ་བཞི་པ། 
རྣམ་པར་འབྱེས་པ། གདུགས་དང་རྒྱལ་མཚན་དང་བ་དན་དང་རྟ་བབས་སྒྲེང་བ་ཞིག་བྱུང་བར་གྱུར་ཏེ། རྒྱལ་པོའི་ཕོ་བྲང་དེར་རྒྱལ་པོ་དཔལ་གྱི་སྡེ་ཞེས་བྱ་བ་སྟོབས་ཀྱི་འཁོར་ལོས་སྒྱུར་བ། གཟུགས་བཟང་བ། 
མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ། རང་བཞིན་གྱིས་སྐྱེ་བ་དྲན་པ། ཆོས་དང་ལྡན་པ། ཆོས་ཀྱི་རྒྱལ་པོ་ཆོས་ཀྱིས་འཛམ་བུའི་གླིང་གི་དབང་ཕྱུག་གི་བདག་པོ་བྱེད་པ་ཞིག་བྱུང་བར་གྱུར་ཏོ། །

71-1-33b

རྒྱལ་པོ་དཔལ་གྱི་སྡེའི་མཐུས་ཤིང་རྣམས་རྟག་ཏུ་མེ་ཏོག་དང་འབྲས་བུར་ལྡན་ཞིང་ལྷ་རྣམས་དུས་དུས་སུ་ཆར་ཡང་དག་པར་འབེབས་ལ། ལོ་ཏོག་ཤིན་དུ་ཕུན་སུམ་ཚོགས་པར་གྱུར་ཏོ། །སེམས་ཅན་རྣམས་ཀྱང་ནད་མེད་པར་
གྱུར་ཏེ། སེམས་ཅན་ཐམས་ཅད་ཀྱང་ཕན་ཚུན་བྱམས་པའི་སེམས་ཀྱིས་གནས་སོ། །རྒྱལ་པོ་དེའི་བཙུན་མོ་དམ་པ་རྒྱལ་བའི་འོད་ཅེས་བྱ་བ་གཟུགས་བཟང་བ། མཛེས་པ། བལྟ་ན་སྡུག་པ། ཡན་ལག་དང་ཉིང་ལག་
ཐམས་ཅད་ཚང་བ། ཡུལ་གྱི་བཟང་མོ་རྒྱལ་པོ་དཔལ་གྱི་སྡེའི་ཤིན་དུ་ཡིད་དུ་འོང་བ་དང་སྡུག་པ་དང་ཕངས་པ་ཞིག་བྱུང་བར་གྱུར་ཏོ། །དགེ་སློང་དག་རྒྱལ་པོ་དཔལ་གྱི་སྡེའི་འཛམ་བུའི་གླིང་གི་མི་ཐམས་ཅད་ལ་དཔྱ་
དང་ཤོ་གམ་དང་གྲུ་བཙས་མེད་དེ། ཞིང་གི་འབྱོར་པ་དང་ལྡན་པ། སྐྱེ་བོ་རྣམས་ཞི་བ། ཁྱིམ་བྱ་རྣམས་དང་ལྡན་པའི་ཡུལ་དང་། གྲོང་ཁྱེར་དང་གྲོང་རྡལ་དང་ཡུལ་འཁོར་དང་། རྒྱལ་པོའི་ཕོ་བྲང་བྱུང་བར་གྱུར་ཏོ། །
དགེ་སློང་དག་རྒྱལ་པོ་དཔལ་གྱི་སྡེ་བྱང་ཆུབ་སེམས་དཔར་གྱུར་ཏེ། ཐམས་ཅད་སྟེར་བ། ཐམས་ཅད་ཡོངས་སུ་གཏོང་བ། ཆགས་པ་མེད་པར་ཡོངས་སུ་གཏོང་བ་དང་། གཏོང་བ་ཆེན་པོ་ལ་ཞུགས་ནས་ཐ་ན་རང་གི་
ཤ་ཡང་གཏོང་སྟེ། དེས་མ་བྱིན་པ་དང་། ཡོངས་སུ་མ་བཏང་བ་ཅི་ཡང་མེད་དོ། །དགེ་སློང་དག་རྒྱལ་པོ་དཔལ་གྱི་སྡེའི་རྒྱལ་པོའི་ཕོ་བྲང་ཨ་རི་ཤྠའིའི་ཤར་ཕྱོགས་ཀྱི་གྲོང་ཁྱེར་མཐར་སྦྱིན་གཏོང་གི་གནས་བྱས་ཏེ། 
སྦྱིན་པ་ནི་གཏོང་། བསོད་ནམས་ནི་བྱེད་དོ། །ལྷོ་དང་ནུབ་དང་བྱང་གི་གྲོང་ཁྱེར་གྱི་སྒོར་སྦྱིན་པ་ནི་གཏོང་། བསོད་ནམས་ནི་བྱེད་དོ། །སུམ་མདོའི་དབུས་ན་ཡང་སྦྱིན་པ་ནི་གཏོང་། བསོད་ནམས་ནི་བྱེད་དོ། །འདི་ལྟ་སྟེ། 
ཟས་འདོད་པ་རྣམས་ལ་ནི་ཟས། སྐོམ་འདོད་པ་རྣམས་ལ་ནི་སྐོམ། བཟའ་བ་དང་བཅའ་བ་དང་མར་མེ་དང་ཕྲེང་བ་དང་དྲི་དང་བྱུག་པ་དང་གོས་དང་མལ་ཆ་དང་སྟན་དང་། རྒྱབ་རྟེན་དང་གནས་དང་གཟུགས་རྣམས་

71-1-34a

དང་ཤིང་རྟ་དང་གླང་པོ་དང་རྟ་དང་རྒྱན་རྣམས་དང་གསེར་གྱི་སྣོད་དངུལ་གྱི་ཕྱེ་མས་ཡོངས་སུ་གང་བ་རྣམས་དང་། དངུལ་གྱི་སྣོད་གསེར་གྱི་ཕྱེ་མས་ཡོངས་སུ་གང་བ་རྣམས་དང་། བ་ལང་གསེར་གྱི་རྭ་དང་། དངུལ་གྱི་
རྨིག་པ་བཏགས་པ། འཁར་བའི་བཞོ་སྣོད་དང་། རས་ཟུང་གིས་བཀབ་པ་རྣམས་དང་། གཞོན་ནུ་མ་རྣམས་དང་། རྒྱན་ཐམས་ཅད་ཀྱིས་བརྒྱན་ནས་སྦྱིན་པ་ནི་གཏོང་། བསོད་ནམས་ནི་བྱེད་དེ། དགེ་སློང་དག་ཇི་ཙམ་དུ་རྒྱལ་པོ་
དཔལ་གྱི་སྡེས་ཅི་ཙམ་གྱིས་འཛམ་བུའི་གླིང་པའི་མི་ཐམས་ཅད་ཕྱུག་པ་དང་ནོར་མང་བ་དང་། ལོངས་སྤྱོད་ཆེ་བར་གྱུར་པ་དེ་ཙམ་དུ་སྦྱིན་པ་རྣམས་བྱིན་ནོ། །ཡང་དེའི་ཚེ་རྒྱལ་པོའི་ཕོ་བྲང་ཨ་རི་ཤྠའིའི་གྲོང་ཁྱེར་ན་བྱེ་བ་ཕྲག་དགུ་བཅུ་རྩ་
དྲུག་གི་མི་རྣམས་གནས་ཏེ། རྒྱལ་པོ་དཔལ་གྱི་སྡེ་དེ་དག་ཐམས་ཅད་ཀྱི་སྡུག་པ་དང་ཡིད་དུ་འོང་བར་གྱུར་ཏོ། །གཞན་ཡང་འདི་སྐྱེས་པ་དང་བུད་མེད་རྣམས་ཀྱིས་མཐོང་བ་ན་ངོམས་པར་མི་འགྱུར་བའི་དགའ་བ་ཐོབ་བོ། །དགེ་
སློང་དག་རྒྱལ་པོ་དཔལ་གྱི་སྡེའི་བློན་པོ་སྟོང་ཕྲག་བཅུ་གཉིས་ཡོད་དེ། བློན་པོ་དེ་རྣམས་ཀྱི་མཆོག་བློ་གྲོས་ཆེན་པོ་ཞེས་བྱ་བ་མཁས་པ། གསལ་བ། བློ་དང་ལྡན་པ། ཐམས་ཅད་ལ་དབང་བྱེད་པ། རྒྱལ་པོ་ཡོངས་
སུ་སྐྱོང་བར་བྱེད་པ། རྒྱལ་པོ་དཔལ་གྱི་སྡེའི་སྡུག་པ་དང་ཡིད་དུ་འོང་བ་དང་། ཕངས་པར་གྱུར་པ་ཞིག་བྱུང་བར་གྱུར་ཏོ། །དེས་འདིའི་གཟུགས་དང་། ཁ་དོག་དང་རྟགས་དང་དབྱིབས་མཐོང་བ་ན་ངོམས་པ་མེད་དེ། སྐད་
ཅིག་ཀྱང་འདི་དང་མི་འབྲལ་ལོ། །དགེ་སློང་དག་རྒྱལ་པོ་དཔལ་གྱི་སྡེའི་འཛམ་བུའི་གླིང་གི་མི་ཐམས་ཅད་དགེ་བ་བཅུའི་ལས་ཀྱི་ལམ་ལ་ཡང་དག་པར་སྦྱར་ཏེ། ཤེས་ལྡན་དག་འཛམ་བུའི་གླིང་གི་མི་རྣམས་དགེ་བ་བཅུའི་ལས་
ཀྱི་ལམ་རྣམས་ལ་རྟེན་ཅིག །དགེ་བ་བཅུའི་ལས་ཀྱི་ལམ་འདི་རྣམས་ཡང་དག་པར་ཟུང་ཤིག་ཅེས་དགེ་བ་བཅུའི་ལས་ཀྱི་ལམ་ལ་ཡང་དག་པར་སྦྱོར་ཏེ། དགེ་སློང་དག་རྒྱལ་པོ་དཔལ་གྱི་སྡེ་དེ་ལྟ་བུའི་གདམས་ངག་རྗེས་སུ་སྟོན་

71-1-34b

པར་གྱུར་ཏོ། །འདི་ལྟ་སྟེ་འཁོར་ལོས་སྒྱུར་བའི་རྒྱལ་པོ་དེའི་དུས་སུ་གང་འཛམ་བུའི་གླིང་པའི་མི་གང་ལ་ལ་དུས་བྱས་ཏེ་ལུས་ཞིག་ནས་དེ་ལྷའི་རིས་དྲུག་ཏུ་སྐྱེ་བར་གྱུར་ཏོ། །གང་ཕལ་ཆེར་ནི་སུམ་བཅུ་རྩ་གསུམ་གྱི་ལྷའི་རིས་སུ་སྐྱེས་སོ། །
ཡང་དེའི་ཚེ་སུམ་བཅུ་རྩ་གསུམ་གྱི་ལྷ་རྣམས་ཀྱི་ལྷའི་གྲོང་ཁྱེར་བལྟ་ན་སྡུག་ཅེས་བྱ་བ་ལྷའི་ཚོགས་ཀྱིས་གང་ངོ་། །དེ་ནས་དེར་གོ་སྐབས་མེད་པར་གྱུར་པ་དང་། བལྟ་ན་སྡུག་གི་ཕྱི་རོལ་ཡོངས་འདུ་དང་། ཤིང་རྟ་སྣ་ཚོགས་ཅན་དང་། དགའ་བའི་
ཚལ་ལ་སོགས་པའི་བསྐྱེད་མོས་ཚལ་རྣམས་སུ་གནས་པར་གྱུར་ཏོ། །དེ་ནས་སྔོན་སྐྱེས་པའི་སུམ་བཅུ་རྩ་གསུམ་གྱི་ལྷའི་ཚོགས་ཀྱིས་ཡང་དག་པའི་འབྱོར་པ་དེ་མཐོང་སྟེ་རབ་ཏུ་དགའ་ནས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་
སྨྲས་སོ། །ཀཽ་ཤི་ཀ་གང་དུ་རིའི་རྒྱལ་པོ་རི་རབ་དེ་ཉིད་ལྷའི་བུ་དེ་དག་གིས་གང་སྟེ་ལྷའི་ཚོགས་ནི་འཕེལ་བར་གྱུར། ལྷ་མ་ཡིན་གྱི་ཚོགས་ནི་འགྲིབ་པར་གྱུར་པའི་ངོ་མཚར་འདི་ལ་གཟིགས་སོ། །དེ་ནས་ལྷའི་དབང་པོ་བརྒྱ་བྱིན་གྱིས་
ལྷའི་བུ་རྣམས་ལས་ཐོས་ནས་རིའི་རྒྱལ་པོ་རི་རབ་ཐམས་ཅད་ལ་བལྟ་བར་བརྩམས་པ་དང་། ཇི་ཙམ་ན་རིའི་རྒྱལ་པོ་རི་རབ་ལྷའི་ཚོགས་རྣམས་ཀྱིས་ཀུན་ནས་གང་བ་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། རྒྱུ་
གང་དང་རྐྱེན་གང་གིས་སེམས་ཅན་འདི་སྙེད་ཅིག་འདིར་སྐྱེས་པར་གྱུར་སྙམ་ནས་འཛམ་བུའི་གླིང་ཐམས་ཅད་ལ་བལྟ་བར་བརྩམས་པ་དང་། ཇི་ཙམ་ན་རྒྱལ་པོ་དཔལ་གྱི་སྡེའི་མཐུ་ཡིན་པར་མཐོང་ངོ་། །དེ་ནས་ལྷའི་དབང་
པོ་བརྒྱ་བྱིན་སེམས་རབ་ཏུ་དགའ་བས་སུམ་བཅུ་རྩ་གསུམ་གྱི་ལྷ་རྣམས་ལ་སྨྲས་པ་གྲོགས་པོ་དག་ཁྱེད་རྣམས་ཉོན་ཅིག །འཛམ་གླིང་དབང་ཕྱུག་རྒྱལ་པོ་ནི། །དཔལ་གྱི་སྡེ་ཞེས་རྣམ་གྲགས་པ། །རྟག་ཏུ་ཆོས་ལ་
གཞོལ་བ་དང་། །རྒྱལ་པོ་ཆེན་པོ་ཆོས་ལ་གནས། །ཐོག་མ་བར་དང་མཐར་དགེ་ཞིང་། །སེམས་ཅན་ཀུན་ལ་ཕན་པར་དགའ། །གཙོ་བོ་མི་རྣམས་དགེ་བ་ལ། །རྟག་ཏུ་ཡང་དག་སྦྱོར་བར་བྱེད། །རྟག་ཏུ་སྙིང་རྗེའི་

71-1-35a

བདག་ཉིད་ཅན། །ཕྱི་རོལ་དངོས་པོ་རབ་གཏོང་ཞིང་། །དེ་ནི་ཤ་ཡང་སློང་བ་ལ། །རྗེས་སུ་བརྩེ་བ་ཉིད་ཀྱིས་སྟེར། །ནང་ངམ་ཡང་ན་ཕྱི་རོལ་ལ། །དེ་ནི་ཡོངས་སུ་འཛིན་མེད་པར། །རྗེས་བརྩེ་ཉིད་ཀྱི་གཏོང་བྱེད་ཅིང་། །བྱང་ཆུབ་
མཐར་དབྱུང་བ་ལ་བརྩོན། །དེས་ནི་རྣམ་དག་གསེར་བཞིན་དུ། །འགྲོ་བ་ཐམས་ཅད་རབ་བསྒྲུབས་པས། །རྒྱལ་པོ་དེ་ཡི་མཐུ་ཡིས་ནི། །ཐམས་ཅད་མཐོ་རིས་ལ་གཞོལ་འགྱུར། །རྒྱལ་པོ་བློ་གྲོས་ཆེ་དེ་ཡི། །མཐུ་ཡིས་
སུ་ཡང་དམྱལ་བ་དང་། །ཡི་དགས་དང་ནི་དུད་འགྲོ་ཡི། །སྐྱེ་གནས་རྣམས་སུ་སྐྱེ་མི་འགྱུར། །དེ་ཡི་གཟི་བརྗིད་མཐུ་ཡིས་ནི། །ཐམས་ཅད་སྣང་བར་འགྲོ་བ་དང་། །སྦྱིན་དང་ཚུལ་ཁྲིམས་དགའ་འགྱུར་བས། །དགའ་བའི་ཚལ་
ན་དགའ་བས་རྩེ། །དཔལ་གྱི་སྡེ་ལ་རྗེས་སྟེན་པར། །གུས་དང་བཅས་པར་གྱུར་པ་འདི། །ལྷ་ཡི་འཇིག་རྟེན་ཉམས་དགའ་བར། །དེ་ཡང་དགའ་བས་རྣམ་པར་སྣང་། །དེ་ནས་སུམ་བཅུ་རྩ་གསུམ་གྱི་ལྷ་དེ་རྣམས་ཀྱིས་
ཚིག་དེ་ཐོས་པ་དང་ཡིད་དགའ་བ་དང་། སེམས་རངས་པར་གྱུར་ཏེ། དགའ་བའི་སེམས་སུ་གྱུར་ཅིང་འདི་སྐད་ཅེས་སྨྲས་སོ། །གང་རྒྱལ་པོ་འདི་ཡན་ལག་དང་ཉིང་ལག་ཀྱང་སྦྱིན་པར་གཏོང་འདོད་པར་རྩོལ་བ་ནི་ངོ་
མཚར་ཆེའོ། །འོན་ཀྱང་འདི་ལྟར་ཡན་ལག་དང་ཉིང་ལག་སྟེར་བ་འདི་ནི་དཀའ་བ་སྟེ། བདག་དང་མཉམ་པར་ཕངས་པ་གཞན་མེད་པས་དེ་ཇི་ལྟར་ན་བདག་ཉིད་ཆེན་པོ་འདི་རང་གི་ལུས་ཀྱི་སྡུག་བསྔལ་བ་ལ་མི་སེམས་
པར་ཡན་ལག་དང་ཉིང་ལག་སྦྱིན་པར་གཏོང་བར་གྱུར་ཏེ། འདི་ནི་རྗེས་སུ་དཔག་པར་ནུས་པ་མ་ཡིན་ནོ། །བརྒྱ་བྱིན་གྱིས་སྨྲས་པ། གྲོགས་པོ་དག་ཁྱེད་རྣམས་དེ་སྐད་མ་སྨྲ་ཤིག །རྒྱལ་པོ་འདི་ནི་མཐུ་ཆེ་སྟེ་རྫུ་འཕྲུལ་ཆེ་
བ་སྙིང་རྗེ་ཆེ་བས་ཐ་ན་རང་གི་ཤ་ཡང་གཏོང་སྟེ། འདི་ལ་ཡོངས་སུ་མ་བཏང་བ་ཅི་ཡང་མེད་དོ། །ཇི་ཙམ་ན་དུས་གཞན་ཞིག་གི་ཚེ་བཙུན་མོ་རྒྱལ་བའི་འོད་སྟན་ཆེན་པོ་ལ་ཉལ་བ་ན་ཐོ་རངས་ཀྱི་དུས་སུ་རྨི་ལམ་བཞི་རྨིས་ཏེ། དཔལ་གྱི་

71-1-35b

སྡེ་སྟན་ལས་བདག་ཉིད་ཕབ་ནས་སླར་ཡང་བཏེག་པར་མཐོང་བ་དང་། རང་གི་མིག་ཕྱུང་སྟེ་སླར་ཡང་སྐྱེས་པར་མཐོང་བ་དང་། བདག་ཉིད་ཀྱི་དཔུང་པ་གཡས་པ་འདི་བཅད་དེ་ས་ལ་ལྷུང་བ་ཡང་སྐྱེས་པར་མཐོང་བ་དང་། མི་མ་ཡིན་
པ་དངུལ་གྱི་རྡོ་བཅག་པའི་མདོག་འདྲ་བ་ཞིག་གིས་རྒྱལ་པོ་དཔལ་གྱི་སྡེའི་དཔུང་པ་གཡོན་པ་མོད་ལ་ཕྱུང་སྟེ། ཕྲོགས་ནས་སླར་ཡང་སྐྱེ་བར་རྨིས་སོ། །གཉིད་སད་པ་དང་འཇིགས་པར་གྱུར་རེངས་པར་གྱུར། སྤུ་ཟིང་ཞེས་
བྱེད་དེ། ང་འམ་ལྷ་ལ་སྡུག་བསྔལ་འབའ་ཞིག་འབྱུང་བར་མི་འགྱུར་གྲང་ཞེས་བསམས་ནས། དེས་རྒྱལ་པོ་དཔལ་གྱི་སྡེ་ལ་སྨྲས་སོ། །དེ་རྨི་ལྟས་ལ་བྱང་བ་ཡིན་པས་འདི་སྙམ་དུ་སེམས་ཏེ་འདིས་རྨི་ལམ་ཇི་ལྟ་བུ་མཐོང་
བ་ལས་ན་རིང་པོ་མི་ཐོགས་པར་ཆུང་མ་འདི་ཉིད་སློང་བ་འབྱུང་བར་འགྱུར་རོ་སྙམ་ནས་སྨྲས་པ། མ་འཇིགས་ཤིག་སྒྱུ་མ་ལྟ་བུ་རྨི་ལམ་ལ་སེམས་པས་ཅི་ཞིག་བྱ། དཔལ་གྱི་སྡེ་སྟན་ལ་བདག་ཉིད་གནས་པར་
ཁྱོད་ཀྱིས་མ་མཐོང་ངམ། མིག་མ་ཉམས་པར་དེ་བཞིན་དུ་འདུག་པ་དང་། བདག་ཉིད་ཀྱི་དཔུང་པ་གཡས་པ་དེ་བཞིན་དུ་ཡོད་པ་དང་། ངའི་ཡང་དཔུང་པ་གཡོན་པ་གནས་བཞིན་པ་ཉིད་ཅེས་དེས་དབུགས་ཕྱུང་བ་དང་། 
ཅང་མི་སྨྲ་བར་འདུག་གོ། །ཇི་ཙམ་ན་མཚན་མོ་གཉིས་པ་ལ་བློན་པོའི་མཆོག་བློ་གྲོས་ཆེན་པོ་ཞེས་བྱ་བའི་རྨི་ལམ་དུ་རྒྱལ་པོ་དཔལ་གྱི་སྡེའི་རིན་པོ་ཆེ་ཐམས་ཅད་ལས་བྱས་པའི་ཁང་བཟངས་མོད་ལ་ཞིག་པ་དང་། 
རིན་པོ་ཆེ་དེ་རྣམས་ཤ་ཟ་མཐོང་ན་འཇིགས་སུ་རུང་བ་རྣམས་ཀྱིས་ཕན་ཚུན་ཁྱེར་བ་དང་། སླར་ཡང་ཁང་བཟངས་སོ་སོར་སྦྱར་བར་རྨིས་སོ། །སད་པ་དང་འཇིགས་ཤིང་སྐྲག་པ་དང་། ཡི་མུག་སྟེ་སྤུ་ཟིང་ཞེས་བྱེད་པ་
དང་། བསམས་པས་སེམས་ཅན་ཐམས་ཅད་ལ་མཉེས་གཤིན་པ་དང་། ལྷ་དཔལ་གྱི་སྡེའི་སྐུ་ལུས་སློང་བར་མི་འགྱུར་གྲང་། ལྷ་ཡང་ཐམས་ཅད་སྩོལ་བ། ཐམས་ཅད་ཡོངས་སུ་གཏོང་བ། ཆགས་པ་མེད་པར་གཏོང་སྟེ་འདི་ལྟ་སྟེ་དམན་

71-1-36a

པ་དང་ལོང་བ་དང་བཀྲེན་པ་དང་། སྡུག་ཕོངས་པ་རྣམས་ལ་འདི་ཡོངས་སུ་མི་གཏོང་བ་ཅི་ཡང་མེད་དོ། །རྒྱལ་པོ་དཔལ་གྱི་སྡེ་ལ་ནི་ཞུ་བར་མི་བྱ་སྟེ། ཤིན་དུ་སྤྲོ་བ་སྐྱེ་བར་མི་འགྱུར་གྲང་། དེ་ནས་དེས་གསང་སྟེ་མཚན་
མཁན་བོས་ནས་དམ་བསྒོ་སྟེ་ཞེས་སྨྲས་པ། ཤེས་ལྡན་ངས་འདི་ལྟ་བུའི་རྨི་ལམ་རྨིས་པའི་འབྲས་བུ་ཇི་ལྟ་བུར་འགྱུར་བ་ཁྱོད་ཀྱིས་ལུང་སྟོན་ཅིག །མཚན་མཁན་གྱིས་སྨྲས་པ། རྨི་ལམ་ཅི་འདྲ་བ་འདི་ལས་རིང་པོ་མི་ཐོགས་པར་ལྷ་
འི་སྐུ་ལུས་སློང་བ་འོང་བར་འགྱུར་རོ། །རྨི་ལམ་བསྟན་པ་འདི་ལྟ་བུ་དེ་ཐོས་པ་དང་། བློན་པོ་ཆེན་པོ་བློ་གྲོས་ཆེན་པོ་སྡུག་བསྔལ་དྲག་པོས་གདུངས་ཤིང་མིག་མཆི་མས་གང་བ་དང་། ལག་པ་འགྲམ་པ་ལ་གཏད་དེ་སེམས་ཁོངས་སུ་
ཆུད་པས་གནས་ནས་དཔལ་གྱི་སྡེ་བྱམས་པ་དང་། སྙིང་རྗེའི་བདག་ཉིད་ཅན་ཐམས་ཅད་ལ་མཉེས་གཤིན་པ། ཡོན་ཏན་དུ་མ་དང་ལྡན་པ་ལ་མི་རྟག་པའི་སྟོབས་ཉེ་བར་གནས་པ་ནི་ཧ་ཅང་མྱུར་ཆེས་སོ། །དེ་ནས་ནུབ་གསུམ་པ་ལ་
བློན་པོ་སྟོང་ཕྲག་བཅུ་གཉིས་རྨི་ལམ་ལྔ་རྨིས་ཏེ། ཁྲི་ཡིས་རྒྱལ་པོ་དཔལ་གྱི་སྡེའི་གདུགས་དང་ཅོད་པན་ཕྲོགས་ཏེ་སླར་ཡང་བྱིན་པ་དང་སྐྱེ་བོ་ཐམས་ཅད་ཀྱི་མགོ་བཅད་ནས་སླར་ཡང་བྱུང་བ་དང་། འཛམ་བུའི་
གླིང་གི་མི་ཐམས་ཅད་ཀྱི་མིག་ཕྱུང་ནས་སླར་ཡང་སྐྱེས་པ་དང་། འཛམ་བུའི་གླིང་གི་མི་ཐམས་ཅད་ཀྱི་རྐང་པ་དང་ལག་པ་རྣམས་བཅད་ནས་སླར་ཡང་སྐྱེས་པ་དང་རྒྱལ་པོ་དཔལ་གྱི་སྡེ་སེང་གེའི་ཁྲི་ལས་བབ་
ནས་སླར་འཛེག་པར་རྩོམ་པར་རྨིས་པ་དང་། འཇིགས་ཤིང་སྐྲག་ལ་ཡི་མུག་ནས་རྒྱལ་པོ་དཔལ་གྱི་སྡེ་ས་ཆེན་པོ་སྐྱོང་བ་མཛད་པ། བྱམས་པའི་བདག་ཉིད་ཅན་སྙིང་རྗེ་ཆེ་བ། སེམས་ཅན་ཐམས་ཅད་ལ་མཉེས་གཤིན་པ་ལ་
མི་རྟག་པའི་སྟོབས་ཉེ་བར་གནས་པར་མི་འགྱུར་གྲང་། བདག་ཅག་རྣམས་ལྷ་དང་ལྷན་ཅིག་གནས་པ་ལས་ཐ་དད་པར་གྱུར་པ་དང་། སོ་སོ་བ་དང་བྲལ་བ་དང་བྱེ་བར་མི་འགྱུར་གྲང་། འཛམ་བུའི་གླིང་པའི་སྐྱབས་དང་

71-1-36b

དཔུང་གཉེན་མེད་པར་མི་འགྱུར་གྲང་དེ་རྣམས་ཀྱིས་མཚན་མཁན་རྣམས་བོས་ནས་སྨྲས་པ་དང་། དེ་རྣམས་ཀྱིས་ཇི་ཙམ་ན་ཐམས་ཅད་འདི་བཞིན་དུ་འགྱུར་ཞེས་ལུང་བསྟན་ཏོ། །འདི་ལྟ་བུའི་རྨི་ལམ་བསྟན་པ་ཐོས་པ་དང་། གྲོང་ཁྱེར་
ཨ་རི་ཤྠའི་ན་གནས་པའི་སྐྱེ་བོའི་ཚོགས་རྣམས་ཉམ་ཐག་པའི་ང་རོས་ངུ་བར་བརྩམས་སོ། །ཐོས་པ་གཅིག་ནས་གཅིག་ཏུ་བརྒྱུད་པས་འཛམ་བུའི་གླིང་པའི་མི་ཐམས་ཅད་མྱ་ངན་དྲག་པོའི་སྡུག་བསྔལ་གྱིས་བཅོམ་ནས་ཤིན་དུ་
སྨྲེ་སྔགས་འདོན་པར་གྱུར་ཏོ། །དེ་ལྟར་གྱུར་པ་དེ་རྒྱལ་པོ་དཔལ་གྱི་སྡེས་ཐོས་སོ། །ཐོས་ནས་ཀྱང་ཡང་བསམས་པ། ངའི་ལུས་སློང་བ་འོང་བར་འགྱུར་རོ་སྙམ་ནས་སེམས་རབ་ཏུ་དགའ་བ་དང་། མགུ་བར་གྱུར་ཏོ། །ཤེས་ལྡན་དག་
འཛམ་བུའི་གླིང་གི་མི་ཁྱེད་རྣམས་བདེ་བ་དང་ཕེབས་པས་དགེ་བ་ལ་གཞོལ་བར་གྱིས་ཤིག །ཁྱེད་རྣམས་སྒྱུ་མ་ལྟ་བུའི་རྨི་ལམ་ལ་སེམས་པས་ཅི་ཞིག་བྱ་ཞེས་འཛམ་བུའི་གླིང་པ་ཐམས་ཅད་དུ་དྲིལ་བསྒྲགས་སོ། །དེ་ནས་རྒྱལ་པོ་དཔལ་
གྱི་སྡེས་དྲིལ་བསྒྲགས་པ་དེ་ཐོས་པ་དང་། འཛམ་བུའི་གླིང་པའི་མི་ཐམས་ཅད་དབུགས་ཕྱིན་པར་གྱུར་ཏོ། །ཡང་དེའི་ཚེ་དེའི་དུས་ན་རྒྱལ་པོའི་ཕོ་བྲང་ཨ་རི་ཤྠའིའི་བྱང་ཕྱོགས་རྒྱང་གྲགས་ཙམ་གྱིས་ཕྱོགས་ན་རི་བོ་ཞིག་ཡོད་དེ། དེ་ན་དྲང་
སྲོང་ལྔ་བརྒྱ་ཙམ་གནས་སོ། །ཇི་ཙམ་ན་དུས་གཞན་ཞིག་གི་ཚེ་དེ་རྣམས་ཀྱི་དོན་དུ་འཇུག་པ་དྲང་སྲོང་གཅིག་དོན་གྱི་བྱ་བ་འགའ་ཞིག་གི་ཕྱིར་རྒྱལ་པོའི་ཕོ་བྲང་ཨ་རི་ཤྠར་འོངས་སོ། །ཡང་དུས་དེའི་ཚེ་རྒྱལ་པོ་དཔལ་གྱི་སྡེ་ལྷ་མོ་
རྒྱལ་བའི་འོད་དང་ལྷན་ཅིག་ཏུ་ནང་དུ་ཞུགས་ནས་བསྐྱེད་མོས་ཚལ་གྱི་སར་སོང་ངོ་། །དྲང་སྲོང་དེས་རྒྱལ་བ་དང་ཚེ་རིང་བའི་བརྗོད་པ་བྱས་པ་དང་། དྲང་སྲོང་དེས་ལྷ་མོ་རྒྱལ་བའི་འོད་རྒྱན་ཐམས་ཅད་ཀྱིས་བརྒྱན་པ་མཐོང་སྟེ་
འདི་ལྟར་དེའི་སྐྱེ་བ་སྔ་མའི་ཆུང་མར་གྱུར་པ་ཡང་ཡིན་པས་སྔོན་གྱི་ཆགས་པ་དང་འབྲེལ་པའི་དབང་གིས་ཚུལ་བཞིན་མ་ཡིན་པའི་ཡིད་ལ་བྱེད་པ་སྐྱེས་པར་གྱུར་ཏེ། དེ་ཡིད་ལ་སེམས་ཤིང་ལམ་དེ་ནས་སོང་སྟེ། ལམ་དེ་ནས་

71-1-37a

འདས་པ་དང་ཇི་ཙམ་ན་དྲང་སྲོང་དེ་རྒྱལ་པོའི་ཕོ་བྲང་གྲོང་ཁྱེར་ཨ་རི་ཤྠར་བྱ་བ་འམ། བྱེད་པ་ཐམས་ཅད་བྱས་ཏེ་ཡོངས་སུ་རྫོགས་པ་དང་བསྟི་གནས་སུ་སོང་ངོ་། །ཇི་ཙམ་ན་དུས་གཞན་ཞིག་གི་ཚེ་དྲང་སྲོང་དེས་བྲམ་ཟེའི་
ཁྱེའུ་གཅིག་རིག་བྱེད་འདོན་པ་ཡོངས་སུ་རྫོགས་པ་དང་། མཁན་པོའི་རྐང་པ་ལ་གཏུགས་ནས་སྨྲས་པ། མཁན་པོ་ལ་ནོར་ཇི་ལྟ་བུ་དབུལ་བར་བགྱི། མཁན་པོས་བཀའ་སྩོལ་ཅིག །དྲང་སྲོང་གིས་སྨྲས་པ། དེ་བས་ན་བུ་རྒྱལ་
པོ་དཔལ་གྱི་སྡེའི་བཙུན་མོའི་མཆོག་བཙུན་མོ་རྒྱལ་བའི་འོད་སློངས་ལ་ངའི་བསྙེན་བཀུར་བྱ་བ་དང་། མཁན་པོ་ལ་མཁན་པོའི་ནོར་དང་། བླ་མ་ལ་མཆོད་པར་བྱ་བའི་ཕྱིར་བྱིན་ཅིག །དེ་སྐད་ཅེས་སྨྲས་པ་དང་། བྲམ་ཟེའི་
ཁྱེའུ་དེ་གནད་དུ་བསྣུན་པའི་རི་དགས་བཞིན་དུ་སྡུག་བསྔལ་དྲག་པོས་གདུངས་ཏེ་མཆོག་ཏུ་ཡི་མུག་པ་དང་། བསམས་པ་གནས་འདི་ནི་འབྱུང་བར་དཀའ་བ་དང་རྙེད་པར་དཀའ་ན། ཇི་ལྟར་ཡང་བྲམ་ཟེ་ཉོན་མོངས་པ་དག་ལྟ་བུས་རྒྱལ་པོ་ལ་
བཙུན་མོ་རྒྱལ་བའི་འོད་འདི་བྱིན་ཅིག་ཅེས་ཇི་ལྟར་སྨྲ་བར་ནུས། འདི་ལྟར་བསླང་བར་བྱ་བ་མ་ཡིན་པའི་དངོས་པོ་འདི་ལ་ཀུན་དུ་སྦྱོར་བ་གང་ཡིན་པ་དེས་ན། མཁན་པོ་ངེས་པར་བདག་ལ་དམོད་པར་འདོད་པ་ཡིན་ནོ། །དེ་ནས་
དྲང་སྲོང་དེས་དེའི་བཞིན་རྣམ་པར་འགྱུར་བས་ནང་གི་བསམ་པ་རྟོགས་ནས་སྨྲས་པ། བུ་མ་འཇིགས་ཤིག་ཇི་ལྟར་ན་སེམས་འདི་ལྟར་ཁོངས་སུ་ཆུད། རྒྱལ་པོ་འདི་ནི་བདག་ཉིད་ཆེ་བ། ཐམས་ཅད་སྟེར་བ། ཐམས་
ཡོངས་སུ་གཏོང་ཞིང་ཆགས་པ་མེད་པར་གཏོང་བས་ཐ་ན་རང་གི་ཤ་ཡང་གཏོང་སྟེ། འདི་ལ་ཡོངས་སུ་མ་བཏང་བ་ཅི་ཡང་མེད་དོ། །བུ་དེས་ན་རྒྱལ་པོས་བཙུན་མོའི་
མཆོག་སྟེར་བར་འགྱུར་གྱིས་ཡི་མུག་པར་མ་བྱེད་ཅིག །དེ་འདི་སྙམ་དུ་སེམས་ཏེ། གལ་ཏེ་མ་སོང་ན་ནི་གང་དམོད་པ་བྱེད་པའི་གནས་དེ་ཡོད་པས་འགྲོ་སྙམ་ནས་དེ་དམོད་པས་འཇིགས་པས་སྨྲས་པ། མཁན་པོ་གལ་ཏེ་དེ་ལྟ་ན་མཆིའོ་

71-1-37b

ཞེས་དེས་དེའི་རྐང་པ་ལ་གཏུགས་ནས་སོང་སྟེ། རྒྱལ་པོའི་ཕོ་བྲང་ཨ་རི་ཤྠར་ཕྱིན་ཏོ། །དེ་བཞིན་དུ་ཤིང་ཤུན་གྱི་གོས་གྱོན་ཞིང་དབྱིག་པ་དང་། རིལ་བ་ལག་ན་ཐོགས་ལ་ས་རྡུལ་གྱིས་ལུས་ལ་གོས་པ་དང་། རྒྱལ་པོ་དཔལ་གྱི་སྡེ་ག་ལ་
བ་དེར་སོང་སྟེ་ཕྱིན་ནས་རྒྱལ་པོ་དཔལ་གྱི་སྡེ་ལ་རྒྱལ་བ་དང་། ཚེ་སྤེལ་བ་བྱས་ནས་བསམས་པ། ཅི་བསླང་ངམ་འོན་ཏེ་མི་བསླང་སྟེར་བར་འགྱུར་རམ་མི་སྟེར་བར་འགྱུར། ངའི་ཡིད་ལ་རེ་བ་འབྲས་བུ་དང་བཅས་པར་འགྱུར་རམ། 
འབྲས་བུ་མེད་པར་འགྱུར་སྙམ་ནས་བདག་ཉིད་སྨོད་བཞིན་དུ་རྒྱལ་པོའི་མདུན་ན་དམན་པའི་བཞིན་གྱིས་ཅང་མི་སྨྲ་བར་འདུག་གོ། །དེ་ནས་རྒྱལ་པོ་དཔལ་གྱི་སྡེས་བསམས་པ། འདི་ནི་ང་ལ་སློང་དུ་འོངས་སོ་སྙམ་ནས་བྲམ་ཟེའི་
ཁྱེའུ་དེ་ལ་འདི་སྐད་ཅེས་སྨྲས་སོ། །བྲམ་ཟེ་ཁྱོད་ཀྱི་དགོས་པ་གང་ཡིན་པ་དེ་སྨྲོས། དེ་རིང་ཁྱོད་ཀྱི་ཡིད་ལ་རེ་བ་ཡོངས་སུ་རྫོགས་པར་བྱའོ། །དེ་སྐད་ཅེས་སྨྲས་པ་དང་། བྲམ་ཟེའི་ཁྱེའུ་དེ་མི་འཇིགས་པ་སྐྱེས་ནས་བྱང་ཆུབ་སེམས་
དཔའ་ལ་སྨྲས་པ། དེ་ལེགས་ཀྱིས་ལྷ་རི་ག་གེ་མོ་ན་བདག་གི་མཁན་པོ་དྲང་སྲོང་འདོན་དུ་འཇུག་པ་འཁོར་ལྔ་བརྒྱ་དང་གནས་ཏེ་དེ་ལས་བདག་གིས་རིག་བྱེད་འདོན་པ་ཡོངས་སུ་རྫོགས་པས་རྒྱལ་པོ་ཆེན་པོ་ད་ཐུགས་བརྩེ་བས་
བཙུན་མོ་རྒྱལ་བའི་འོད་བདག་ལ་སྩོལ་ཅིག །མཁན་པོ་ལ་མཁན་པོའི་ནོར་དང་། བླ་མ་མཆོད་པའི་ཕྱིར་བདག་གིས་མཁན་པོ་ལ་དབུལ་བར་བགྱིའོ། །དེ་སྐད་ཅེས་སྨྲས་པ་དང་། རྒྱལ་པོ་དཔལ་གྱི་སྡེ་བརྩེ་བའི་དབང་གིས་ཡིད་
མི་དགའ་བར་གྱུར་ཏེ། བཙུན་མོ་རྒྱལ་བའི་འོད་འདི་ང་དང་བྲལ་ན་ཇི་ལྟར་སྲོག་འཛིན་པར་ནུས། འཁོར་དེ་དག་ཐམས་ཅད་ཀྱང་རྒྱ་མཚོ་ཟབ་མོའི་སྒྲ་མི་གཡོ་བ་དང་། གནད་ཏུ་བསྣུན་པ་བཞིན་དུ་སྡུག་བསྔལ་དྲག་པོས་གདུངས་
པས་བརྟབས་བག་ཏུ་འདི་ཅི་འདི་ཅི་ཞེས་སྐྱོ་བས་རབ་ཏུ་གདུངས་སོ། །དེ་ནས་བྱང་ཆུབ་སེམས་དཔས་སྐད་ཅིག་ཅང་མི་སྨྲ་བར་གནས་ཏེ་བསམས་པ། བུ་དང་ཆུང་མ་ལ་སོགས་པ་བྱིན་པ་མེད་པས་ནི་བླ་ན་མེད་པ་ཡང་དག་པར་

71-1-38a

རྫོགས་པའི་བྱང་ཆུབ་འཐོབ་པར་མི་འགྱུར་རོ། །དེའི་ཕྱིར་བྲམ་ཟེ་འདི་ལ་དགའ་བས་ཆུང་མ་འདི་སྦྱིན་པར་བྱའོ་སྙམ་དུ་བསམས་ནས་གཉེན་སྡུག་པ་དང་བྲལ་བས་ཞུམ་པའི་སེམས་ཡང་དག་པར་སྤོངས་ཏེ། 
འཕྲལ་དུ་སེང་གེའི་ཁྲི་ལས་བབས་ནས་བྱང་ཆུབ་ཏུ་སྨོན་པའི་སེམས་ཀྱིས་བཙུན་མོ་བཞིན་དུ་རྣམ་པར་མཛེས་པ། ཁྱོ་དང་བྲལ་བའི་གདུང་བས་ཤིན་དུ་དབུགས་རིང་པོ་ཕྱུང་སྟེ། མཆི་མས་གང་བའི་མིག་དང་། མུན་པར་གཡང་
ས་ཆེན་པོར་ལྷུང་བ་བཞིན་དུ་མཆོག་ཏུ་སྡུག་བསྔལ་བས་གདོང་ཕབ་པ་ལག་པ་གཡོན་པས་བཟུང་སྟེ། ལག་པ་གཡས་པས་གསེར་གྱི་བུམ་པ་ཐོགས་ནས་བྲམ་ཟེའི་ཁྱེའུ་དེ་ལ་འདི་སྐད་ཅེས་སྨྲས་སོ། །བྲམ་ཟེ་ཆེན་པོ་ཚུར་
ཤོག །ཚུར་ཤོག །བྲམ་ཟེའི་དམ་པ་གཟུགས་བཟང་བ། །སྡུག་པའི་ཆུང་མ་འདི་ལོང་ཤིག །སྦྱིན་པ་འདི་ཡིས་མྱུར་དུ་ནི། །བྱང་ཆུབ་དམ་པ་ཐོབ་པར་ཤོག །ཅེས་སྨྲས་ནས་བྱང་ཆུབ་སེམས་དཔས་བྲམ་ཟེ་དེའི་ལག་པར་ཆུའི་
རྒྱུན་བླུགས་སོ། །དེ་ནས་ཡང་དགེ་སློང་དག་རྒྱལ་པོ་དཔལ་གྱི་སྡེས་ཆུའི་རྒྱུན་བླུགས་པའི་རྗེས་ཐོགས་ཉིད་ལ་དེའི་ཚེ་འཕྲལ་དུ་ས་རྣམ་པ་དྲུག་ཏུ་གཡོས་པར་གྱུར་ཏོ། །དེ་ནས་བྲམ་ཟེའི་ཁྱེའུ་དེས་བྱང་ཆུབ་སེམས་དཔའི་
གཏོང་བ་དང་། གཏོང་བ་ལས་ཀྱང་ཤིན་དུ་གཏོང་བ། ཤིན་དུ་དཀའ་བ་དེ་མཐོང་བ་དང་། མཆོག་ཏུ་ངོ་མཚར་སྐྱེས་སོ། །ནམ་མཁའི་ངོས་ན་གནས་པའི་ལྷ་བརྒྱ་སྟོང་རྣམས་ཀྱིས་ཀྱང་ཅ་ཅོའི་སྒྲ་བཏོན་ཏོ། །དེ་མ་ཐག་ཏུ་ཡང་
སྐར་མདའ་ལྟུང་བ་དང་། ཕྱོགས་འབར་བ་དང་། བར་སྣང་གི་ལྷ་ཡང་རྔ་རྡུང་བར་གྱུར་ཏོ། །དེ་ནས་བྲམ་ཟེའི་ཁྱེའུ་དེ་རྒྱལ་པོ་འགྱོད་པར་མ་གྱུར་གྲང་སྙམ་ནས་བྱང་ཆུབ་སེམས་དཔའ་ལ་མངོན་པར་བསྟོད་དེ། བདེ་ལེགས་སུ་
གྱུར་ཅིག་ཅེས་སྨྲས་ནས་བཙུན་མོ་རྒྱལ་བའི་འོད་ཁྱེར་ཏེ་རིངས་པ་རིངས་པར་བསྟི་གནས་སུ་སོང་སྟེ། མཁན་པོ་ལ་བྱིན་པ་དང་། བཙུན་མོ་རྒྱལ་བའི་འོད་ཉ་ཆུ་ལས་བཏོན་པ་བཞིན་དུ་སྡུག་པ་དང་བྲལ་བའི་སྡུག་བསྔལ་

71-1-38b

དྲག་པོས་གདུངས་ཤིང་ཉམ་ཐག་པ་དང་། བྱང་ཆུབ་སེམས་དཔའ་ཉིད་ལ་མངོན་པར་སེམས་ཤིང་འགྲོ་བ་ཐམས་ཅད་མུན་པ་མུན་ནག་ཏུ་གྱུར་པ་བཞིན་དུ་ཤེས་ཤིང་ཀྱི་ཧུད་རྒྱལ་པོ་ཆེན་པོ་ཞེས་མཆོག་ཏུ་གདུང་བའི་སེམས་
དང་ཟས་བཅད་པ་ལ་ཞུགས་སོ། །ས་གཡོས་པ་དེས་བརྒྱ་བྱིན་གྱི་གནས་གཡོས་པར་གྱུར་ཏོ། །ཆོས་ཉིད་ཀྱིས་ལྷ་རྣམས་ཀྱི་ཤེས་པ་འོག་ཏུ་མཐོང་བ་འཇུག་གི་གོང་དུ་ནི་མ་ཡིན་ནོ། །དེ་ནས་ལྷའི་དབང་པོ་བརྒྱ་བྱིན་གྱིས་བསམས་
པ། ཤིན་དུ་གྲགས་པར་ས་གཡོས་པ། །མཚན་མ་འདི་ནི་སུའི་མཐུ་ཡིན། །གང་གི་མཐུ་ནི་ཅི་འདྲ་བ། །ཤིན་དུ་གསལ་བར་འདི་ཤེས་བྱ། །འཛམ་བུའི་གླིང་ཐམས་ཅད་ལ་བལྟ་བར་བརྩམས་པ་དང་། ཇི་ཙམ་ན་བྱང་ཆུབ་སེམས་དཔའ་
འདི་ལྟ་བུ་མཆོག་ཏུ་དཀའ་བའི་ལས་བྱེད་པ་མཐོང་ངོ་། །མཐོང་ནས་ཀྱང་མཆོག་ཏུ་ངོ་མཚར་སྐྱེས་ཏེ། སུམ་བཅུ་རྩ་གསུམ་གྱི་ལྷ་རྣམས་ལ་སྨྲས་པ། གྲོགས་པོ་དག་ཁྱེད་ཅག་རྣམས་རྒྱལ་པོ་དཔལ་གྱི་སྡེའི་ངོ་མཚར་དང་རྨད་དུ་བྱུང་བའི་
ལས་ལ་ལྟོས། གང་ཞིག་འདི་ལྟར་སྡུག་པ་དང་། འདི་ལྟར་ཡིད་དུ་འོང་བ་དང་། འདི་ལྟར་ཕངས་པའི་ཆུང་མ་ལ་མི་སེམས་ཏེ་རྩྭ་བཞིན་དུ་ཡོངས་སུ་གཏོང་ངོ་། །གྲོགས་པོ་དག་རྣམ་གྲངས་དེས་ཀྱང་འདི་ལྟར་ཤེས་པར་བྱ་སྟེ། བདག་ཉིད་
ཆེན་པོ་འདི་རང་གི་ཡན་ལག་དང་ཉིང་ལག་རྣམས་ཀྱང་ཕངས་པ་མེད་པར་གཏོང་བ་ཡིན་ནོ། །ལྷ་རྣམས་ཀྱིས་སྨྲས་པ། ཀཽ་ཤི་ཀ་བུ་དང་བུ་མོ་ནི་དེ་བས་ཡོངས་སུ་གཏོང་བར་བྱེད་ཀྱི། འདི་ལྟ་སྟེ། ཡན་ལག་དང་ཉིང་ལག་སྟེར་
བ་འདི་ནི་དད་པར་བྱ་བ་མ་ཡིན་ཏེ་ཤིན་དུ་དཀའོ། །དེ་སྐད་ཅེས་སྨྲས་པ་དང་། ལྷའི་དབང་པོ་བརྒྱ་བྱིན་གྱིས་སྨྲས་པ། གྲོགས་པོ་དག་ཞོག་ཞོག །སྤུའི་རྩེ་མོའི་ཆུའི་ཐིགས་པས་རྒྱ་མཚོ་མ་གཞལ་ཅིག །ནམ་མཁའ་
མདོམ་གྱིས་མ་གཞལ་ཅིག །ཉི་མ་དང་སྲིན་བུ་མེ་ཁྱེར་འོད་མ་སྙོམ་ཅིག །རིའི་རྒྱལ་པོ་རི་རབ་དང་ཡུངས་འབྲུ་མ་སྙོམ་ཅིག །གཞན་ཡང་ངས་ཁྱེད་ཅག་རྣམས་ཀྱི་མངོན་སུམ་དུ་བྱ་ཡིས། དེ་ནས་ལྷའི་དབང་པོ་བརྒྱ་

71-1-39a

བྱིན་གྱིས་དེ་ཉིད་ཀྱི་ནམ་ནངས་པ་ན་སུམ་བཅུ་རྩ་གསུམ་གྱི་ལྷ་རྣམས་ལ་སྨྲས་པ། ཀྱེ་མའོ་གྲོགས་པོ་དག་ཤེས་པར་གྱིས་ཤིག་ཅེས་སྨྲས་ཏེ། ནང་པར་ཉིད་ལངས་ནས་ལྷའི་བུ་བཞི་དང་སུམ་བཅུ་རྩ་གསུམ་གྱི་གནས་
ལས་བབས་ཏེ་གྲོང་ཁྱེར་ཨ་རི་ཤྠའི་དང་ཧ་ཅང་མི་རིང་བའི་ནགས་ཀྱི་ཚང་ཚིང་དུ་ཞུགས་ནས་བྲམ་ཟེ་རྒན་པོའི་ཆ་བྱད་དུ་བྱས་ནས་རང་གི་ལུས་ཀྱི་ལྟེ་བ་མན་ཆད་སོག་ལེས་བཅད་པ་བཞིན་དུ་སྟོན་ཅིང་ཀུན་ནས་ཁྲག་འཛག་པ་ཁྲི་
བསྐྱོད་ནས་ལྷའི་བུ་བཞི་བྲམ་ཟེའི་ཆ་བྱད་འཛིན་པས་ཕ་དང་བྲལ་བའི་སྡུག་བསྔལ་གྱིས་ཉམ་ཐག་པ་ལྟར་ཉམ་ཐག་པའི་ང་རོས་ཆོ་ངེས་འདེབས་ཤིང་བཏེག་པར་མངོན་པར་སྤྲུལ་ཏེ། ངའི་ལུས་འདིའི་ཕྱེད་སྟག་གིས་བཅད་དེ་ཟོས་
སོ་ཞེས་འདི་ལྟར་བསྟན་པར་བྱའོ་སྙམ་ནས་ཡིད་ལ་བསམས་པ་བཞིན་དུ། ཉི་མ་ཤར་བའི་དུས་སུ་ནགས་ཚང་ཚིང་དེ་ནས་བྱུང་སྟེ། གྲོང་ཁྱེར་དུ་མངོན་པར་ཕྱོགས་ནས་ཀུན་དུ་ཆས་སོ། །ཁྲག་གི་དྲི་དེ་ལ་ཡང་སྟེང་ནས་ཁྭ་དང་
ཆུ་སྐྱར་དང་། བྱ་རྒོད་རྣམས་རྗེས་སུ་འབྲང་ངོ་། །འོག་ནས་ཀྱང་ཁྱི་དང་ཝ་རྣམས་རྗེས་སུ་འབྲང་བཞིན་དུ་རིངས་པ་རིངས་པར་གྲོང་ཁྱེར་གྱི་སྒོར་སོང་ངོ་། །དེ་ཡང་འདི་ལྟར་སྙིང་རྗེའི་གནས་སུ་གྱུར་པ། སྐྱེས་པ་དང་བུད་མེད་
རྣམས་ཀྱིས་མཐོང་ནས་སྙིང་རྗེས་གདུངས་པའི་ཡིད་ཀྱིས་གཅིག་ལ་གཅིག་སྨྲ་བ། གྲོགས་དག་བྲམ་ཟེ་འདི་རྐེད་པར་ཆད་ནས་འདིའི་དབང་པོ་ཡང་མ་འཁྲུགས་པ་ཇི་ལྟར་འཚོ་བར་འགྱུར། གཞན་ཞིག་གིས་
སྨྲས་པ། འདི་མི་མ་ཡིན་གྱི་ཤ་ཟ་མིའི་ཆ་བྱད་ཀྱིས་བདག་ཅག་བཟའ་བའི་ཕྱིར་འདིར་འོངས་ཀྱི། མི་རྐེད་པར་ཆད་པ་ནི་འཚོ་བ་མེད་དོ། །དེ་སྐད་ཅེས་ཐོས་པ་དང་སྐྱེས་བུ་སྡར་མ་ནི་འཇིགས་པས་བྲོས་པར་བརྩམས་
སོ། །སྐྱེས་བུ་དཔའ་བོ་གཞན་ཞིག་འདི་སྙམ་དུ་འདི་ནི་ཤ་ཟ་ཞིག་སྟེ། དེ་ལྟ་ན་ཡང་ཚོར་བས་ཉེན་བཞིན་དུ་འདི་ལྟར་དབང་པོ་རྣམས་བདེ་བར་སྣང་ན་དེ་ཇི་ལྟ་བུ་ཡིན། བདག་གིས་འདི་ལ་མི་མ་ཡིན་ནམ་ཤ་ཟར་གྱུར་པ་ཡིན་པར་

71-1-39b

དྲི་བར་བྱས་ན་འདིས་ཚིག་ཐོན་པར་དཀའ་མོད་ཀྱི། གལ་ཏེ་ཚིག་ཐོན་ན་ནི་ངོ་མཚར་དུ་འགྱུར་རོ། །ཇི་ཙམ་ན་གཞན་ཞིག་ལྟད་མོ་སྐྱེས་ནས་སྨྲས་པ། བྲམ་ཟེ་ཁྱོད་ཅི་མི་ཡིན་ནམ། འོན་ཏེ་ཤ་ཟ་ཡིན། ཁྱོད་ཀྱི་ལུས་འདི་རྐེད་པར་སུས་
བཅད་ནས་གནས་སྐབས་འདི་ལྟ་བུར་བྱས། ཁྱོད་ནི་ག་ལས་འོངས། དེ་ནས་ལྷའི་དབང་པོ་བརྒྱ་བྱིན་གྱིས་བདག་ཉིད་འདི་ལྟར་ཁྲིའི་སྟེང་དུ་འདུག་ཅིང་སྡུག་བསྔལ་དྲག་པོའི་ཚོར་བས་ཉེན་པ་བཞིན་དུ་ཉེ་བར་སྟོན་ཅིང་དེའི་ཚེ་ཚིགས་
སུ་བཅད་པ་འདི་དག་སྨྲས་སོ། །ཤི་བི་པ་ཁྱེད་མ་འཇིགས་ཤིག །བྲམ་ཟེ་ང་ཡིན་སྲིན་པོ་མིན། །སྔོན་གྱི་ལས་ཀྱི་ཉེས་པ་ཡིས། །གནས་སྐབས་འདི་འདྲ་ཐོབ་པར་གྱུར། །འདི་ཉིད་དུ་ནི་ཀུན་བཤད་ན། །དུས་ནི་ཀུན་དུ་འདའ་བར་
གྱུར། །འཆི་བདག་མྱུར་དུ་འོངས་ནས་ནི། །སྲོག་ནི་འཕྲོག་པར་འགྱུར་དུ་འོང་། །ཆོས་ཀྱི་རྒྱལ་པོའི་སྤྱན་སྔར་ནི། །འདི་དག་ཀུན་ཀྱང་བཤད་པར་བྱ། །སྔོན་གྱི་ལུས་ཀྱི་མཚན་ཉིད་ནི། །དེ་རིང་ང་ལ་འབྲས་བཅས་གྱུར། །
ཡོན་ཏན་ཀུན་ཀྱིས་རྣམ་མཛེས་ལ། །ཟླ་བ་ལྟ་བུར་ཞི་བ་དང་། །སྦྱིན་དང་ཚུལ་ཁྲིམས་ལ་དགའ་བའི། །གཙོ་བོ་གང་དུ་མཐོང་བར་འགྱུར། །རྒྱ་མཚོ་བཞིན་དུ་ཟབ་གྱུར་ཅིང་། །རི་རབ་ལྟ་བུར་མི་གཡོ་བ། །
འཇིག་རྟེན་ཀུན་གྱི་གཙོར་གྱུར་པ། །ཆོས་ཀྱི་རྒྱལ་པོ་གང་ན་བཞུགས། །འཇིགས་ཤིང་སྐྲག་པ་རྣམས་ཀྱི་སྐྱབས། །སློང་བ་རྣམས་ནི་བགྲོད་བྱའི་མཆོག །སྙན་སྨྲ་སྦྱིན་དང་ཚུལ་ཁྲིམས་ལྡན། །བདག་ཉིད་ཆེ་དེ་
གང་ན་བཞུགས། །བདག་མདུན་འཆི་བ་ཉེར་འོང་གིས། །ཤི་བི་པ་རྣམས་མྱུར་དུ་སྨྲོས། །ཐུགས་རྗེ་ཅན་དེ་མ་གཏོགས་པར། །གང་ལ་ལུས་ཕྱེད་སུ་ཞིག་སྟེར། །དེ་ལྟར་རྒྱལ་པོའི་ལམ་ནས་སྙིང་རྗེ་བ་དང་། དམན་པ་དང་
ཞུམ་པའི་ཚིག་སྨྲ་ཞིང་རིམ་གྱིས་རྒྱལ་པོ་དཔལ་གྱི་སྡེའི་ཕོ་བྲང་སྒོར་སོང་བ་དང་། སྲོག་ཆགས་བརྒྱ་སྟོང་དུ་མ་རྣམས་ཀྱང་ངོ་མཚར་སྐྱེས་ནས་རྗེས་བཞིན་རྗེས་བཞིན་འབྲངས་སོ། །ཡང་བར་སྐབས་དེར་ལྷ་དང་ཀླུ་དང་གནོད་སྦྱིན་དང་

71-1-40a

ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོའི་ཚོགས་རྣམས་ཀྱིས་ད་རྒྱལ་པོ་དཔལ་གྱི་སྡེའི་ཕྱིས་འབྱུང་བའི་རྒུད་པ་ཆེན་པོ་དེ་དང་། ལུས་ཀྱི་ཚོར་བ་དྲག་པོ་དེ་ཤེས་ནས་སྡུག་བསྔལ་དྲག་པོས་གདུངས་ཏེ་ཆོ་ངེས་
འདེབས་པ་ལ་ཞུགས་སོ། །ཀྱི་ཧུད་རྒྱལ་པོ་དཔལ་གྱི་སྡེ་བྱམས་པའི་བདག་ཉིད་ཅན། སྙིང་རྗེ་དང་ལྡན་པ། སེམས་ཅན་ཐམས་ཅད་ལ་མཉེས་གཤིན་པ་མི་རྟག་པ་ཉིད་ཀྱི་སྟོབས་ཉེ་བར་གནས་པ་ནི་སྡུག་བསྔལ་ལོ། །དེ་ཐོས་པ་དང་སྐྱེ་བོའི་ཚོགས་
རྣམས་སྨྲེ་སྔགས་འདོན་པར་གྱུར་ཏོ། །ཡང་དེའི་ཚེ་འཛམ་བུའི་གླིང་ཐམས་ཅད་འཁྲུགས་ཤིང་ཀུན་དུ་འཁྲུགས་པར་གྱུར་པ་དང་། དུ་བས་མུན་པར་གྱུར་པ་ལ་སྐར་མདའ་ལྟུང་བ་དང་། ཕྱོགས་སྲེག་པ་དང་། བར་སྣང་ལ་ལྷ་རྣམས་རྔ་རྡུང་
བར་ཡང་གྱུར་ཏོ། །ཡང་དེའི་ཚེ་རི་ལ་གནས་པའི་དྲང་སྲོང་དེས་བཙུན་མོ་རྒྱལ་བའི་འོད་འདི་ལྟར་ཁྱོ་དང་བྲལ་བའི་གདུང་བས་དབུགས་ཤིན་དུ་རིང་པོར་འབྱིན་ཅིང་ཟས་མི་ཟ་ལ། འདུ་ཤེས་མེད་པར་མཐོང་ནས་སྙིང་རྗེས་སེམས་
འདར་ནས་བསམས་པ། མ་ལ་ངས་རྒྱལ་པོ་དཔལ་གྱི་སྡེ་ལ་དབུལ་བར་བྱའོ་སྙམ་ནས་བཙུན་མོ་རྒྱལ་བའི་འོད་དབུགས་ཕྱུང་ངོ་། །འཛམ་བུའི་གླིང་ཐམས་ཅད་འཁྲུགས་ཤིང་ཀུན་དུ་འཁྲུགས་པར་ཡང་མཐོང་ངོ་། །མཐོང་ནས་ཀྱང་
ཡང་བྲམ་ཟེའི་ཁྱེའུ་ལ་སྨྲས་པ། བྲམ་ཟེའི་བུ་འདི་ལྟར་འཛམ་བུའི་གླིང་འདི་ཕྱོགས་ཐམས་ཅད་དུ་བས་མུན་པར་གྱུར་ལ་འཁྲུགས་ཤིང་ཀུན་དུ་འཁྲུགས་པར་གྱུར་པ་དང་། ཉི་མ་དང་ཟླ་བ་གཉིས་ཀྱང་ལྷམ་མེ་མ་ཡིན། 
ལྷང་ངེ་མ་ཡིན། ལྷན་ནེ་མ་ཡིན་པས་ངེས་པར་ན་འཛམ་བུའི་གླིང་འདིར་ཡུན་མི་རིང་བ་ཉིད་དུ་སྐྱེས་བུ་ཆེན་པོ་འགའ་ཞིག་འགག་པར་འགྱུར་རོ། །དེ་ནས་དེའི་ཚེ་དྲང་སྲོང་དེས་ཚིགས་སུ་བཅད་དེ་སྨྲས་པ། མི་འམ་ཅིའི་ཚོགས་
དང་ནགས་ཀྱི་ལྷ་རྣམས་དང་། །ནམ་མཁར་གནས་པའི་ལྷ་རྣམས་ཀྱང་ནི་སྨོད་པར་བྱེད། །ཟླ་བ་འོད་མེད་ཉི་མས་མུན་པ་སེལ་མི་བྱེད། །དེ་རིང་རོལ་མོ་བརྡུངས་ན་སྒྲ་ནི་གྲག་མ་གྱུར། །ཤིང་ཚོགས་མེ་ཏོག་འབྲས་བུར་ལྡན་པ་འདི་དག་ཀྱང་། །

71-1-40b

རླུང་གིས་བསྐྱོད་པ་བཞིན་དུ་ས་ལ་ལྷུང་གྱུར་ལ། །ཇི་ལྟར་འཇིགས་ཤིང་རྩུབ་པའི་སྒྲ་ཀུན་གྲག་པས་ན། །གྲོང་ཁྱེར་དག་ཏུ་སྡུག་བསྔལ་མི་ཟད་འབྱུང་བར་གསལ། །གྲོང་ཁྱེར་ཨ་རི་ཤྠའི་ན་གནས་དགའི་སྐྱེ་བོ་འདི་ཀུན་ཤིན་དུ་
སྡུག་བསྔལ་ཞིང་། །ཕན་ཚུན་སོ་སོར་མྱ་ངན་ཟུག་རྔུས་ངེས་བཅོམ་སྒྲ་རྣམས་རབ་ཏུ་གྲོལ་བའི་བཞིན། །ལྷ་མོ་ལྟ་བུའི་བཞིན་ལྡན་བུད་མེད་འདི་དག་ཁང་པའི་མཆོག་ན་སྨྲེ་སྔགས་འདོན། །འདི་ན་མི་དག་དྲག་པོས་རབ་ཏུ་ངུ་དང་དེར་
ནི་དུར་ཁྲོད་འཇིགས་བཞིན་ནོ། །ནམ་མཁར་གནས་པའི་སྤྲིན་འདི་ཆུ་མེད་པར་སྒྲ་སྒྲོགས། །ས་ལ་གནས་པའི་ཆུ་རྣམས་ཀྱང་ནི་སྐམས་པར་གྱུར། །རྨ་བྱ་རྣམས་ཀྱང་ནགས་ཀྱིས་བཅོམ་བཞིན་སྒྲ་བསྒྲགས་ཏེ། །མི་རྣམས་ཀྱང་ནི་
འཁྲུག་བཅས་ཁྱིམ་དུ་རྣམ་པར་རྒྱུ། །ཆུ་ལ་རླུང་གིས་བསྐྱོད་པའི་གྲུ་བཞིན་ས་རྣམས་གཡོས། །ཕྱག་དར་དང་འདྲེས་རླུང་ནི་མཁའ་ལ་རབ་ཏུ་ལྡིང་། །ཨ་རི་ཤྠའི་ན་འཇིགས་སྐྱེད་མཚན་མ་མང་བས་ནི། །བྲམ་ཟེ་ཁྱེའུ་འདི་ལས་ཀྱི་རྗེས་འཐུན་
ཡུལ་དུ་དེང་། །བཀྲ་མི་ཤིས་པའི་མཚན་མ་ནི། །ད་ལྟ་འདི་ན་རྣམ་མང་སྟེ། །དེ་བས་བདག་ཅག་ཤིས་པ་ཡི། །ཕྱོགས་སུ་འགྲོ་བ་ཤིན་དུ་རིགས། །བྲམ་ཟེའི་ཁྱེའུ་རྣམས་གཞན་ཡང་ཇི་ལྟར་ཤིང་འདི་དག་ཐམས་ཅད་རྒྱལ་པོའི་ཕོ་བྲང་
ཨ་རི་ཤྠའི་ག་ལ་བ་དེར་འདུད་པར་གྱུར་ཏེ། དེ་བས་ན་ཀྱེ་མ་བྲམ་ཟེའི་ཁྱེའུ་རྣམས་ངེས་པར་དེ་རིང་ཉིད་རྒྱལ་པོའི་ཕོ་བྲང་ཨ་རི་ཤྠར་ཉེ་བར་འཚེ་བ་དང་གནོད་པའི་འཇིགས་པ་ཆེན་པོ་འབྱུང་བར་འགྱུར་རོ། །དེ་ནས་བྱང་ཆུབ་སེམས་དཔའ་སྟེང་
གི་ཁང་བཟངས་ཀྱི་གཞི་ལ་གནས་པས་སྐྱེ་བོའི་ཚོགས་ཆེན་པོའི་ཆོ་ངེའི་སྒྲ་ཐོས་པ་དང་། རིངས་པ་རིངས་པར་རིན་པོ་ཆེ་ལས་བྱས་པའི་ཁང་བཟངས་ལས་བབས་ནས་སེང་གེའི་ཁྲི་ཆེན་པོ་ལ་འདུག་སྟེ། ཤིན་དུ་བརྟབས་བག་
གིས་ཤེས་ལྡན་དག་འདི་ཅི་ཡིན་འདི་ཅི་ཡིན་ཞེས་དྲིས་སོ། །བར་སྐབས་དེར་ལྷའི་དབང་པོ་བརྒྱ་བྱིན་ལྷའི་བུ་བཞི་པོ་དེ་རྣམས་ཀྱིས་འཕྲལ་དུ་རྒྱལ་པོའི་ཁབ་དུ་ཁྱེར་ཏེ། མོད་ལ་ཁྲི་སའི་སྟེང་དུ་བཞག་པ་དང་། ཁྲི་ལ་བསྐྱོན་པ་ལུས་ཀྱི་ཕྱེད་

71-1-41a

བཅད་པ་དེ་ལས་ཁྲག་ཀུན་ནས་འཛག་ཅིང་རབ་ཏུ་འཛག་པ་དང་། ལག་པ་གཡས་པ་བརྐྱང་སྟེ་སྙིང་རྗེ་རྗེ་དུ་བྱང་ཆུབ་སེམས་དཔའ་ལ་རྒྱལ་བ་དང་ཚེ་སྤེལ་བ་བྱས་ནས་མཆི་མས་ཁེངས་པའི་མིག་དང་། རང་གི་ལུས་ཀྱི་ཕྱེད་ཉེ་
བར་སྟོན་ཅིང་བྱང་ཆུབ་སེམས་དཔའ་ལ་སྨྲས་པ། འཇིག་རྟེན་ན་ཁྱོད་སྙིང་རྗེ་ཅན། །གཞན་གྱི་སྡུག་བསྔལ་གྱིས་སྡུག་བསྔལ། །ཉིད་ཀྱི་སྐུ་ཡི་ཕྱེད་སྩལ་བས། །གཙོ་བོ་བདག་ནི་བསྐྱབ་ཏུ་གསོལ། །དེ་སྐད་ཅེས་ཐོས་པ་དང་། བློན་པོ་
ཆེན་པོའི་མཆོག་བློ་གྲོས་ཆེན་པོས་སྨྲས་པ། ལྷ་འདི་མི་མ་ལགས་ཀྱི་ཤ་ཟ་འམ་ཤ་ཟས་བྱིན་གྱིས་བརླབས་པར་གྱུར་པ་ཞིག་སྟེ། མི་ནི་རྐེད་པར་བཅད་པ་འཚོ་ཞིང་སྔོན་ཇི་ལྟར་གནས་པ་བཞིན་ཚིག་ཏུ་སྨྲ་བ་ནི་མི་སྲིད་དོ། །དེ་སྐད་
ཅེས་སྨྲས་པ་དང་། ལྷའི་དབང་པོ་བརྒྱ་བྱིན་གྱིས་སྨྲས་པ། ཤི་བི་པ་ཁྱེད་ཅག་རྣམས་མ་འཇིགས་ཤིག །ང་ནི་ཤ་ཟ་མ་ཡིན་གྱི་གཞན་དུ་ན་ང་ནི་བྲམ་ཟེ་ཡིན་མོད་ཀྱི། དབུལ་བས་བདག་གིས་བུ་དང་ཆུང་མ་བཞག་སྟེ། ནོར་གྱི་
བསམ་པས་རྒྱལ་པོ་དཔལ་གྱི་སྡེའི་ཐད་དུ་ཆས་ནས་རིམ་གྱིས་སོང་བ་ན་རྒྱལ་པོའི་ཕོ་བྲང་འདིར་ཉི་མ་ནུབ་པ་ན་ཕྱིན་པ་དང་གྲོང་ཁྱེར་གྱི་སྒོ་རྣམས་བཅད་པར་གྱུར་ཏོ། །དེ་ནས་གྲོང་ཁྱེར་དང་ཧ་ཅང་མི་རིང་བ་ན་བསོད་ནམས་ཁང་
ཡོད་པར་སོང་སྟེ། ནུབ་མོ་གནས་པ་ན་ལམ་གྱིས་དུབ་པས་གཉིད་མཐུག་པོས་ནོན་པ་དང་། སྔོན་གྱི་ལས་ཀྱི་ཉེས་པས་ནུབ་མོ་གཅན་གཟན་སྟག་འོངས་ནས་བདག་གི་ལུས་ཀྱི་ཕྱེད་སོག་ལེ་ལྟ་བུའི་མཆེ་བ་ཤིན་དུ་རྣོན་
པོས་བཅད་ནས་ཁྱེར་ཏེ་སོང་ངོ་། །དེར་བདག་ཚོར་བ་དྲག་པོས་ཀུན་དུ་བཅོམ་པས་གཉིད་སད་པ་དང་། ཇི་ཙམ་ན་བདག་གི་ལུས་ཀྱི་རོ་སྨད་ཕྱེད་པོ་སྟག་གིས་སོག་ལེས་དྲས་པ་ལྟར་བཅད་པས་བདག་ཚོར་བ་དྲག་པོས་
ཀུན་དུ་བཅོམ་ཡང་སྔོན་བྱས་པའི་མི་དགེ་བའི་ལས་རྣམས་ཀྱིས་ཀུན་དུ་བཟུང་བས་ཤི་བར་ནི་མ་གྱུར་གྱི། གཅིག་ཏུ་སྡུག་བསྔལ་བ་དང་། གཅིག་ཏུ་དྲག་པ་དང་། གཅིག་ཏུ་རྩུབ་པ་དང་། གཅིག་ཏུ་ཚ་བ་དང་། གཅིག་ཏུ་ཡིད་

71-1-41b

དུ་མི་འོང་བའི་ཚོར་བ་རྣམས་མྱོང་ཞིང་ཉམ་ཐག་པའི་ང་རོས་སྨྲེ་བར་གྱུར་ཏེ། བདག་དེ་ལྟར་ཉམ་ཐག་པའི་སྨྲེ་སྔགས་ཐོས་པ་དང་ནམ་མཁའི་དཀྱིལ་ན་གནས་པའི་ལྷ་གཞན་དག་གིས་བདག་དབུགས་དབྱུང་བའི་ཕྱིར་སྨྲས་པ། མ་
འཇིགས་མ་འཇིགས་བྲམ་ཟེའི་མཆོག །ཁྱོད་ནི་ཚེ་ནི་རིང་བར་མཐོང་། །གྲོད་ཁྱེར་ཨ་རི་ཤྠར་ནི་མྱུར་སོང་ལ། །ཁྱོད་ནི་ལེགས་པ་དག་ཏུ་འགྱུར། །དེ་ན་ཀུན་སྟེར་རྒྱལ་པོ་ནི། །དཔལ་གྱི་སྡེ་ཞེས་རྣམ་གྲགས་པ། །དེ་ཡི་ལུས་ཀྱི་
ཕྱེད་བསླངས་ན། །དེ་ནི་ངེས་པར་ཁྱེད་ལ་སྟེར། །ཞེས་སྨྲས་ནས་ལྷ་མོ་དེ་དེ་ཉིད་དུ་མི་སྣང་བར་གྱུར་ཏོ། །དེ་ནས་བདག་གིས་ལྷ་མོའི་ཚིག་ཐོས་པ་དང་། འཚོ་བར་རེ་བ་ཀུན་དུ་སྐྱེས་ཏེ། འཚེ་བ་ཡང་ཆུང་བར་གྱུར་ཏོ། །དེ་ན་བདག་གི་ལུས་
ཀྱི་ཕྱེད་རོ་སྨད་མེད་པས་ལངས་ཡང་མ་ནུས་ན་འགྲོ་བར་ལྟ་ག་ལ་ནུས་སྙམ་ནས་ཡང་ཡི་མུག་པར་གྱུར་པ་དང་། སྟེས་དབང་གིས་ཉི་མ་ཤར་བའི་ཚེ་གཉེན་འདི་བཞི་འོངས་པར་གྱུར་ཏོ། །འདི་དག་གིས་ཀྱང་ཉམ་ང་བར་ཞུགས་པ་
མཐོང་བ་དང་། འདི་འཆི་བ་ཉིད་དོ་སྙམ་ནས་ངུ་བར་གྱུར་ཏོ། །དེ་ནས་བདག་གིས་དེ་རྣམས་ལ་དབུགས་དབྱུང་བའི་ཕྱིར་ལྷ་མོའི་ཚིག་རྒྱས་པར་སྨྲས་སོ། །དེ་ནས་བདག་འདི་རྣམས་ཀྱིས་ཁྲི་ལ་བསྐྱོན་ཏེ་འདིར་ཁྱེར་ཏེ་འོངས་སོ། །
དེ་སྐད་ཅེས་སྨྲས་ནས་ལྷའི་དབང་པོ་བརྒྱ་བྱིན་གདོང་མཆི་མའི་རླབས་ཀྱིས་གང་བ་ལྟ་བུར་བདག་ཉིད་ཉེ་བར་སྟོན་ཅིང་བྱང་ཆུབ་སེམས་དཔའ་ལ་སྨྲས་པ། རྒྱལ་པོ་ཆེན་པོ། བདག་ནི་དབུལ་ཞིང་ན་བ་དང་། །རྒན་པ་དང་ནི་བྲམ་
ཟེ་ཉིད། །རང་གི་སྐུ་ཕྱེད་སྩལ་བ་ཡིས། །རྙེད་དཀའི་སྲོག་ནི་སྩལ་དུ་གསོལ། །བདག་གི་སྲོག་ནི་སྒྲུབ་བྱེད་པའི། །སྦྱིན་པ་ཐུགས་རྗེས་སྩལ་དུ་གསོལ། །དོན་གྱི་མཆོག་ཕྱིར་སྦྱིན་པ་ནི། །སྐུ་ཕྱེད་སྦྱིན་པར་སྩལ་དུ་གསོལ། །ཉིད་ཀྱི་སྐུ་ཡི་
ཕྱེད་སྩལ་བས། །བསོད་ནམས་རྒྱ་མཚོ་ལྟར་རྒྱ་ཆེ། །དེ་བཞིན་མཁའ་ལྟར་མཐའ་མེད་པའི། །བསོད་ནམས་ཁྱོད་ཀྱིས་ཐོབ་པར་འགྱུར། །བདག་གི་ཚོར་བ་དྲག་པོ་དང་། །བཀྲེས་སྐོམ་མི་བཟད་ལ་གཟིགས་ནས། །མཆོག་

71-1-42a

ཏུ་ཐུགས་རྗེ་མཛད་ནས་ནི། །སྐུ་ཡི་ཕྱེད་ནི་བདག་ལ་གསོལ། །བྱང་ཆུབ་སེམས་དཔའ་དགེ་ཁྱོད་ཆོས་ལ་གནས། །གལ་ཏེ་ཐམས་ཅད་མཁྱེན་ཉིད་མཉམ་བཞེད་ན། །བདག་ལ་སྐུ་ཕྱེད་འདིར་སྩོལ་དེ་རིང་ནི། །ཤིན་དུ་
རྙེད་དཀའི་སྲོག་ནི་ཐོབ་པར་མཛོད། །རྒྱལ་པོ་ཆེན་པོའི་སྐུ་ཡི་ཕྱེད། །ཤིན་དུ་གཏང་དཀའ་བདག་སྩོལ་ལ། །ཆོས་དང་དེ་བཞིན་གྲགས་པ་ཡིས། །འགྲོ་བ་ཀུན་ལ་ཁྱབ་པར་མཛོད། །དེ་ནས་ཚིག་འདི་ཐོས་པ་དང་བྱང་ཆུབ་སེམས་
དཔའ་སྔོན་གོམས་པའི་དགེ་བའི་རྩ་བའི་བག་ཆགས་བློ་ལ་བསྒོས་པས་སྙིང་རྗེས་སེམས་འདར་ཞིང་སློང་བ་དེ་དབུགས་དབྱུང་བའི་ཕྱིར་སྨྲས་པ། བྲམ་ཟེ་ཆེན་པོ་མ་འཇིགས་ཤིག །ད་རིང་པོ་མི་ཐོགས་པར་ལུས་འདི་རྫོགས་པར་
འགྱུར་བ་དང་། ཡིད་ལ་རེ་བ་ཡོངས་སུ་རྫོགས་པར་འགྱུར་གྱིས། གཡོ་མེད་པའི་སེམས་ཀྱིས་ཁྱོད་ལ་ལུས་ཀྱི་ཕྱེད་སྦྱིན་པར་བྱའོ་ཞེས་སྨྲས་ནས་བྱང་ཆུབ་སེམས་དཔའ་ཡིད་རབ་ཏུ་དགའ་བ་དང་ཚིགས་སུ་བཅད་དེ་སྨྲས་པ། 
ཀྱེ་མ་རང་གི་ལུས་སློང་བ། །ཡུན་མི་རིང་བར་བལྟ་བར་བྱ། །ང་ཡི་ཡན་ལག་གཏང་བ་ནི། །དཀའ་བར་འགྱུར་བ་མ་ཡིན་ནོ། །ཇི་ལྟར་ཡབ་ཀྱི་བུ་གཅིག་ང་ཡིན་ཡང་། །དེ་ལྟ་ན་ཡང་ང་ཡི་ལུས་འདི་ཁྱེར། །ལུས་ནི་
བྱིན་པས་བྱང་ཆུབ་རྙེད་གྱུར་ཅིང་། །འགྲོ་འདི་ཤིན་དུ་སྡུག་བསྔལ་ལས་གྲོལ་ཤོག །དེ་ནས་བྱང་ཆུབ་སེམས་དཔས་བརྒྱ་བྱིན་བྲམ་ཟེའི་ཆ་བྱད་འཛིན་པ་རྣམ་པ་འདི་ལྟ་བུའི་ཚིག་སྨྲ་བ་ཐོས་པ་དང་། ཡིད་རབ་
ཏུ་མགུ་ཞིང་དགའ་བས་མིག་གདངས་བཞིན་དུ་བྲམ་ཟེ་དེ་ལ་སྨྲས་པ། བྲམ་ཟེ་ལུས་འདིའི་ཕྱེད་ལེགས་པར་བྱིན་གྱིས་བར་ཆད་མེད་པར་ལེགས་པར་ལོང་ཤིག་ཅེས་སྨྲས་ནས་འཁོར་དེ་དག་ཐམས་ཅད་ལ་བལྟས་ཏེ་
སྐྱེས་བུ་གཞན་ཞིག་ལ་སྨྲས་པ། ཀྱེ་སྐྱེས་བུ་ཁྱོད་རིངས་པར་སོང་ལ་སོག་ལེ་ཤིན་དུ་རྣོ་བ་ཁྱེར་ལ་ཤོག་ཤིག །དེ་ནས་སྐྱེས་བུ་དེ་བརྒྱ་བྱིན་གྱིས་ཀུན་རྨོངས་པར་བྱས་པས་ཤིན་དུ་རིངས་པ་རིངས་པར་སོག་ལེ་ཉེ་བར་

71-1-42b

ཁྱེར་ཏེ་འོངས་ནས་སྨྲས་པ། ལྷ་སོག་ལེ་འཚལ་ཏེ་མཆིས་སོ། །དེ་ནས་བྱང་ཆུབ་སེམས་དཔས་རིངས་པ་རིངས་པར་བློན་པོ་ལ་སྨྲས་པ། ཁྱེད་ཅག་རྣམས་ཀྱིས་ཇི་སྲིད་དུ་བྲམ་ཟེ་འདི་འཆི་བདག་གིས་འཇིག་རྟེན་ཕ་རོལ་དུ་མ་
ཁྱེར་བ་དེ་སྲིད་དུ་ངའི་རོ་སྨད་སོག་ལེས་མྱུར་དུ་ཆོད་ཅིག་དང་། ངས་བྲམ་ཟེ་འདི་ལ་སྦྱིན་པ་བྱས་སོ། །དེ་ནས་བྱང་ཆུབ་སེམས་དཔའ་མཆོག་ཏུ་མི་བཟད་པའི་ཚིག་སྨྲས་པ་ཐོས་པས་རྡོ་རྗེ་ལྷུང་བས་ཀུན་དུ་སྐྲག་པ་བཞིན་དུ་གྲོང་ཁྱེར་
ན་གནས་པའི་སྐྱེ་བོའི་ཚོགས་ཐམས་ཅད་ཤིན་དུ་ཡི་མུག་པར་གྱུར་ཏེ། སྡུག་བསྔལ་ལོ། །སྡུག་བསྔལ་ལོ་ཞེས་གསང་མཐོན་པོས་ངུ་བར་གྱུར་ཏོ། །དེ་ནས་བློན་པོ་ཆེན་པོ་བློ་གྲོས་ཆེན་པོ་ཟུག་རྔུས་གནད་དུ་བསྣུན་
པ་བཞིན་དུ་སྡུག་བསྔལ་དྲག་པོས་ཉམ་ཐག་སྟེ། བྱང་ཆུབ་སེམས་དཔའ་ཉིད་ཀྱི་སྐུ་ལ་ཆགས་པ་མེད་པར་ཡོངས་སུ་གཏོང་ངོ་སྙམ་བསམས་ནས་གདོང་ལ་མཆི་མ་ཆར་ལྟར་བབ་པ་དང་། རྐང་པ་གཉིས་བཏུད་དེ་
བྱང་ཆུབ་སེམས་དཔའ་བཟློག་པའི་ཕྱིར་སྨྲས་པ། ལྷ་འདི་མི་སྲིད་དེ། འདི་ལྟ་སྟེ་ལུས་སོག་ལེས་བཅད་ནས་བཅད་པའི་ལུས་ནི་ངེས་པར་འཆི་བར་འགྱུར་ཏེ། འཆི་ན་ལས་སུ་མི་རུང་བའི་རོར་གྱུར་ལ། ལས་སུ་
མི་རུང་བས་ནི་བྲམ་ཟེ་ལ་ཡང་བྱས་པ་དོན་མ་མཆིས་པར་འགྱུར་རོ། །གང་གཞན་གྱི་ཡན་ལག་བཅད་པ་གཞན་གྱི་ཡན་ལག་ལ་འབྱོར་བར་འགྱུར་བ་འདི་ཡང་གནས་མ་མཆིས་སོ། །དེ་ལྟ་ན་ནི་ལྷའི་ངལ་བ་
ཡང་དོན་མ་མཆིས་པར་འགྱུར་རོ། །དེ་བས་ན་བཟོད་པར་མཛོད་ལ་བདག་ཉིད་དོན་མ་མཆིས་པར་གསོད་པར་མི་མཛད་ཅིང་ཉིད་ཀྱི་སྲོག་ཡོངས་སུ་མི་གཏང་བར་གསོལ། དེ་ནས་བྱང་ཆུབ་སེམས་དཔས་བློན་པོ་
ཆེན་པོ་བློ་གྲོས་ཆེན་པོ་དབུགས་དབྱུང་བའི་ཕྱིར་སྨྲས་པ། བློ་གྲོས་ཆེན་པོ་ཞོག་ཞོག །ངས་ནམ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་ནས་འཁོར་བར་རྒྱུ་བའི་སེམས་ཅན་བསྒྲལ་བར་

71-1-43a

བྱའོ་ཞེས་ཡིད་ལ་རེ་བ་འདི་ལ་ངའི་བྱང་ཆུབ་ཀྱི་བར་ཆད་མ་བྱེད་ཅིག །བུ་དག་གཞན་ཡང་ཤིན་དུ་ཡུན་རིང་པོར་སྡུག་པ་དང་ཡང་དག་པར་གྱུར་པ་ཡང་ངེས་པར་འབྲལ་བའི་མཐའ་ཅན་དུ་འགྱུར་བ་འདི་ནི་འཇིག་རྟེན་གྱི་རང་
བཞིན་ནོ་ཞེས་སྨྲས་ནས་བྱང་ཆུབ་སེམས་དཔས་སོག་ལེ་ལ་བལྟས་ཏེ། སོག་ལེ་འདིས་ངའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཚོགས་ཀྱི་ཕྱོགས་གཅིག་ཏུ་འགྱུར་རོ་ཞེས་རྗེས་སུ་སེམས་ཤིང་ཡང་བློན་པོ་ལ་
སྨྲས་པ། ཇི་སྲིད་དུ་བྲམ་ཟེ་འདི་སྲོག་དང་བྲལ་བར་མ་གྱུར་གྱི་བར་དུ་ཁྱོད་ཀྱིས་ངའི་ལུས་ཀྱི་ཕྱེད་རོ་སྨད་མྱུར་དུ་ཆོད་ཅིག །བྲམ་ཟེ་འདི་ཤི་ན་ངའི་བསམ་པ་འབྲས་བུ་མེད་པར་འགྱུར་རོ། །དེ་ལྟར་བློན་པོ་ཆེན་པོ་བློ་གྲོས་ཆེན་པོས་བྱང་
ཆུབ་སེམས་དཔའི་དེ་ལྟ་བུའི་རང་གི་ལུས་ཡོངས་སུ་གཏོང་བའི་བསམ་པ་ཤེས་ནས་དེ་མཆི་མ་ཆར་བཞིན་དུ་བབ་པའི་གདོང་དང་། བྱང་ཆུབ་སེམས་དཔའི་རྐང་པ་ནས་བཟུང་སྟེ། གདོང་གི་མཆུས་འོ་བྱས་ནས་སྙིང་རྗེ་རྗེ་སྐད་དུ་སྨྲེ་སྔགས་
འདོན་པར་གྱུར་ཏེ། ཀྱི་ཧུད་ཇི་ལྟར་ན་འཛམ་བུའི་གླིང་ཡོངས་སུ་དབང་མཛད་པ། སྙིང་རྗེ་ཆེ་བ། ཡོན་ཏན་དུ་མ་དང་ལྡན་པ། སེམས་ཅན་ཐམས་ཅད་ལ་མཉེས་གཤིན་པའི་ལྷ་ལ་དེ་རིང་ཉིད་དུ་མི་རྟག་པ་ཉིད་ཀྱི་སྟོབས་ཉེ་བར་གནས་
པར་གྱུར། ཀྱེ་མ་མི་རྟག་པ་ཉིད་ཀྱི་སྟོབས་དང་ལྡན་པའོ། །གང་འཇིག་རྟེན་དུ་ལྷ་ཡང་མཐོང་བའི་སྐྱེས་བུ་དེ་རྣམས་ནི་སྐལ་བ་ཅན་ཡིན་ནོ་ཞེས་བྱང་ཆུབ་སེམས་དཔའི་གདོང་ལ་ཤིན་དུ་ཡུན་རིང་དུ་མིག་མི་འཛུམས་པར་བལྟས་ནས་ལྷའི་
མི་རྟག་པ་ཉིད་ལ་ལྟ་མི་ནུས་སོ་ཞེས་བསམས་ནས་སྐད་ཅིག་དེ་ཉིད་ལ་མིག་བཙུམས་ནས་བརྒྱལ་ནས་སའི་སྟེང་དུ་འགྱེལ་བར་གྱུར་ཏོ། །དེ་ནས་བྱང་ཆུབ་སེམས་དཔས་སྐྱེས་བུ་ཤིང་མཁན་གཞན་གཉིས་ཤིག་ལ་སྨྲས་པ། བཞིན་བཟངས་
དག་འདིར་ངའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་གྲོགས་བྱ་བའི་ཕྱིར་ཁྱེད་ཅག་གཉིས་ཀྱིས་སོག་ལེ་ཐོགས་ཏེ། ངའི་ལུས་ཀྱི་ཕྱེད་རོ་སྨད་མྱུར་དུ་ཆོད་ཅིག །བྲམ་ཟེའི་ཡིད་ལ་རེ་བ་ཡོངས་སུ་རྫོགས་པར་བྱའོ། །ངའི་བྱང་

71-1-43b

ཆུབ་རྙེད་པའི་ཡིད་ལ་རེ་བ་ཡོངས་སུ་རྫོགས་པར་འགྱུར་རོ། །དེ་ནས་ཤིང་མཁན་དེ་གཉིས་ཡུལ་རྨུས་པ་ལྟ་བུའི་མཆི་མའི་གདོང་ཅན་གྱིས་བྱང་ཆུབ་སེམས་དཔའི་རྐང་པ་ལ་གཏུགས་ཏེ་སྨྲས་པ། ལྷ་འདི་སྐད་གསུང་བ་ནི་རིགས་པ་མ་ལགས་ཏེ། 
དེ་ཅིའི་ཕྱིར་ཞེ་ན། གལ་ཏེ་གཞན་འགའ་ཞིག་ལྷའི་ཐུགས་སུ་མི་བྱོན་པ་བགྱིད་ན་དེ་ལ་ཡང་བདག་ཅག་གིས་བཟློག་པར་བགྱི་ལགས་ན། ལྷ་ཉིད་ཀྱི་སྐུ་ལ་མཚོན་གྱིས་འདེབས་པར་ཇི་ལྟར་རྔོ་ཐོག །ལྷ་གཞན་ཡང་གལ་ཏེ་བདག་ཅག་
གཉིས་ཀྱིས་ཐུགས་རྗེ་ཆེ་བ། བྱམས་པའི་བདག་ཉིད་ཅན། སེམས་ཅན་ཐམས་ཅད་ལ་མཉེས་གཤིན་པ། འཛམ་བུའི་གླིང་ཡོངས་སུ་སྐྱོང་བར་མཛད་པ་ཁྱེད་ཀྱི་སྐུ་ལ་སོག་ལེས་གཅོད་པར་བགྱིད་ན་ངེས་པར་འཕྲལ་དུ་རང་གི་ལས་ཀྱིས་
དམྱལ་བར་ལྟུང་བར་འགྱུར་རོ། །བྱང་ཆུབ་སེམས་དཔས་སྨྲས་པ། བུ་དག་ངའི་བྱང་ཆུབ་སེམས་དཔའི་བཟོད་པའི་བདུད་རྩི་ཐ་མའི་བར་ཆད་ཁྱེད་ཅག་མ་བྱེད་ཅིག །དེ་བས་ན་ཚུར་ཤོག །ཇི་སྲིད་དུ་བྲམ་ཟེ་འདི་གསོན་པ་དེ་སྲིད་དུ་ངའི་བྱང་ཆུབ་
ལ་གྲོགས་བྱ་བའི་ཕྱིར་མྱུར་དུ་ངའི་ལུས་ཀྱི་ཕྱེད་རོ་སྨད་ཆོད་ཅིག །དེ་ནས་ལྷའི་དབང་པོ་བརྒྱ་བྱིན་གྱིས་སྐྱེས་བུ་ཤིང་མཁན་གཉིས་ཇི་ལྟར་དེ་ལ་ཀུན་དུ་འཇུག་པར་འགྱུར་བ་དེ་ལྟར་བྱིན་གྱིས་བརླབས་སོ། །ཡང་བར་སྐབས་
དེར་སྲོག་ཆགས་བརྒྱ་སྟོང་དུ་མ་འདུས་པ་རྣམས་དང་། ནམ་མཁའི་ངོས་ན་ལྷ་བརྒྱ་སྟོང་དུ་མ་རྣམས་བྱང་ཆུབ་སེམས་དཔའ་དེའི་ཤིན་དུ་དཀའ་བ་དང་། བ་སྤུ་ལྡང་བའི་ལས་དེ་བལྟ་བར་འདོད་ནས་འདུས་པར་གྱུར་ཏོ། །དེ་ནས་
བྱང་ཆུབ་སེམས་དཔའ་མཆོག་ཏུ་དཀའ་བའི་རང་གི་ལུས་ཡོངས་སུ་གཏོང་བར་འདོད་ནས་སློང་བ་དེ་ལ་བྱམས་པས་ཁྱབ་པར་བྱས་ཏེ་འཕྲལ་དུ་སེང་གེའི་ཁྲི་ལས་བབས་སོ། །དགེ་སློང་དག་བྱང་ཆུབ་སེམས་དཔའ་དཔལ་གྱི་སྡེ་སེང་གེའི་ཁྲི་
ལས་བབས་པའི་རྗེས་ཐོགས་ཉིད་ལ་འཛམ་བུའི་གླིང་ཐམས་ཅད་ཀྱི་གདུགས་དང་། རྒྱལ་མཚན་དང་། བ་དན་དེ་དག་ཐམས་ཅད་རྒྱལ་པོའི་ཕོ་བྲང་ཨ་རི་ཤྠའི་ག་ལ་བ་དེར་འདུད་པར་གྱུར་ཏོ། །རྒྱལ་པོའི་ཕོ་བྲང་གྲོང་ཁྱེར་ཨ་རི་ཤྠའིའི་

71-1-44a

ཕྱོགས་བཞིར་སྐར་མདའ་ལྟུང་བ་དང་། གྲོང་ཁྱེར་ན་གནས་པའི་སྐྱེ་བོའི་ཚོགས་ཀྱིས་བྱང་ཆུབ་སེམས་དཔའ་དང་བྲལ་བའི་ཉམ་ཐག་པས་སྒྲ་བསྒྲགས་པ། བྲམ་ཟེ་སྡིག་པ་ཅན་འདིས་རྒྱལ་པོ་དཔལ་གྱི་སྡེ་གསོད་
པར་འགྱུར་གྱིས་གྲོང་ཁྱེར་འདི་ནས་ཕྱིར་ཕྱུང་ཤིག །དེ་ནས་ལྷའི་དབང་པོ་བརྒྱ་བྱིན་གྱིས་ཇི་ལྟར་སྒྲ་སུས་ཀྱང་མ་ཐོས་པ་དེ་ལྟར་བྱིན་གྱིས་བརླབས་ཤིང་སྐྱེ་བོའི་ཚོགས་དེ་རྨོངས་པར་བྱས་སོ། །བར་སྣང་དང་ས་ལ་རྒྱུ་བའི་གནོད་སྦྱིན་རྣམས་བྱང་
ཆུབ་སེམས་དཔའ་རང་གི་ལུས་ལ་ལྟོས་པ་མེད་པར་ཤེས་ནས་སྡུག་བསྔལ་དྲག་པོ་རྣམས་ཀྱིས་གདུངས་ནས་ཉམ་ཐག་པའི་ང་རོས་ཆོ་ངེས་འདེབས་པར་བརྩམས་ཏེ། ཀྱི་ཧུད་རྒྱལ་པོ་དཔལ་གྱི་སྡེ་འཛམ་བུའི་གླིང་ཡོངས་སུ་སྐྱོང་
བར་བྱེད་པ། སེམས་ཅན་ཐམས་ཅད་ལ་ཐུགས་བརྩེ་བ། ཐམས་ཅད་ནས་ཐམས་ཅད་དུ་ལུས་གཏོང་བར་གྱུར་ཏོ། །དེ་ནས་ཡང་ཕོ་བྲང་གི་ནང་ན་གནས་པའི་ལྷ་ཞིག་བྱང་ཆུབ་སེམས་དཔའ་དེ་ལྟ་བུའི་རང་གི་ལུས་ཡོངས་སུ་གཏོང་
བར་ཤེས་ནས་ཆོ་ངེ་འདེབས་པར་རྩོམ་ཞིང་འདི་སྐད་ཅེས་ཀྱང་སྨྲས་སོ། །ཇི་ལྟར་ད་ལྟར་འདི་ལྟ་བུའི་སློངས་མོ་པ་འོངས་ནས་རྒྱལ་པོ་དཔལ་གྱི་སྡེ་ཡོན་ཏན་དུ་མ་དང་ལྡན་པ་ཐམས་ཅད་ནས་ཐམས་ཅད་དུ་མི་འཚོ་བར་གྱུར། དེ་ནས་
བྱང་ཆུབ་སེམས་དཔས་ཕྱོགས་བཞིར་བལྟས་ཏེ་ཡང་དག་པའི་སྨོན་ལམ་འདེབས་པ་ལ་ཞུགས་པ་གང་གྲོང་ཁྱེར་འདི་ན་གནས་པའི་ལྷ་དང་། ཀླུ་དང་། གནོད་སྦྱིན་དང་། མི་འམ་ཅི་རྣམས་བདག་ལ་གསོན་ཅིག །བདག་འདིར་
གཏོང་བར་བྱེད་དེ། གཏོང་བ་ཤིན་དུ་གཏོང་བ་རང་གི་ལུས་ཡོངས་སུ་གཏོང་བར་བྱེད་ཀྱིས་བདག་གི་ལུས་ཡོངས་སུ་གཏོང་བ་དེ་ཡང་རྒྱལ་པོའི་ཕྱིར་མ་ཡིན། མཐོ་རིས་ཀྱི་ཕྱིར་མ་ཡིན། བརྒྱ་བྱིན་གྱི་ཕྱིར་མ་ཡིན། 
ཚངས་པའི་ཕྱིར་མ་ཡིན། འཁོར་ལོས་སྒྱུར་བའི་རྒྱལ་པོའི་ཕྱིར་མ་ཡིན། གཞན་དུ་ན་བདག་གིས་ཅི་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་མ་བསྒྲལ་བ་

71-1-44b

རྣམས་བསྒྲལ་བར་བྱ་བ་དང་། མ་གྲོལ་བ་རྣམས་དགྲོལ་བར་བྱ་བ་དང་། དབུགས་མ་ཕྱིན་པ་རྣམས་དབུགས་དབྱུང་བར་བྱ་བ་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བའི་བདེན་པ་དང་བདེན་པའི་
ཚིག་འདིས་ངལ་བ་འབྲས་བུ་དང་བཅས་པར་གྱུར་ཅིག །བདག་མངོན་པར་བྱང་ཆུབ་ནས་ཀྱང་མཚན་མ་ཅུང་ཟད་ཅིག་འབྱུང་བར་གྱུར་ཅིག་ཅེས་སྨྲས་ཏེ་བྲམ་ཟེ་དེ་ལ་སྨྲས་པ། དེས་པ་ཁྱོད་ཀྱི་ཀུན་དུ་རྟོག་པ་འབྱོར་པར་
གྱུར་ཅིག །ཁྱོད་ཀྱི་ཡིད་ལ་རེ་བ་ཡོངས་སུ་རྫོགས་པར་གྱུར་ཅིག །ངའི་ཡང་བླ་ན་མེད་པའི་བྱང་ཆུབ་ཡོངས་སུ་རྫོགས་པར་གྱུར་ཅིག །དེ་ནས་བྱང་ཆུབ་སེམས་དཔའ་ཉེ་དུའི་སྐྱེ་བོ་རྣམས་དང་། གྲོང་ཁྱེར་པའི་སྐྱེ་བོ་རྣམས་
ལ་བཟོད་པར་བྱས་ཤིང་དམན་པ་དང་། ནད་པ་རྣམས་དབུགས་ཕྱུང་ནས་སྐྱེས་བུ་ཤིང་མཁན་དེ་གཉིས་ལ་སྨྲས་པ། བཞིན་བཟངས་དག་ཚུར་ཤོག །ཇི་སྲིད་དུ་བྲམ་ཟེ་འདི་དུས་མ་བྱས་ཀྱི་བར་དུ་སོག་ལེ་ཟུང་ལ་ངའི་ལུས་
ལྟེ་བ་ཡན་ཅད་ཆོད་ཅིག །འགྲོ་བ་སྡུག་བསྔལ་གྱིས་ཟིན་པ་འདི་དག་ཐམས་ཅད་ཀྱང་ངས་ཡོངས་སུ་བསྐྱབ་པར་བྱའོ་ཞེས་བྱམས་པས་ཁྱབ་པར་བྱས་ནས་སྐྱེས་བུ་གཅིག་གིས་རྒྱབ་ནས་བརྟེན་ཏེ། འཕྲལ་དུ་རྐང་པ་གཉིས་ས་
ལ་བརྐྱང་ནས་གན་རྐྱལ་དུ་ཕབ་བོ། །དགེ་སློང་དག་བྱང་ཆུབ་སེམས་དཔའ་ཕབ་མ་ཐག་ཡང་ས་ཆེན་པོ་རྣམ་པ་དྲུག་ཏུ་གཡོས་པར་གྱུར་ཏོ། །དེ་ནས་བཙུན་མོ་བུད་མེད་རྣམས་ཀྱིས་དེ་ལྟ་བུའི་གཏམ་ཐོས་ནས་མྱ་ངན་དྲག་
པོས་གདུངས་ཏེ། ཀྱི་ཧུད་འདི་ནི་སྡུག་བསྔལ་ལོ་ཞེས་གདོང་ལས་མཆི་མ་ཆར་བཞིན་དུ་འབབ་ཅིང་སྐྲ་རྣམས་བཀྲོལ་ཏེ་བྲང་རྡུང་ཞིང་རྟབས་བག་ཏུ་བྱང་ཆུབ་སེམས་དཔའ་གང་ན་བ་དེར་སོང་སྟེ་ཕྱིན་ནས་ལྷ་མོ་ལྟ་བུ་སྡུག་པ་
དང་བྲལ་ནས་རྟབས་བག་ཏུ་བྱང་ཆུབ་སེམས་དཔའི་རྐང་པ་ལ་གཏུགས་ནས་སྙིང་རྗེ་རྗེ་སྐད་དུ་སྨྲེ་སྔགས་འདོན་པར་རྩོམ་པ་ན། ཀྱི་ཧུད་འཛམ་བུའི་གླིང་ཡོངས་སུ་སྐྱོང་བར་མཛད་པ། སེམས་ཅན་ཐམས་ཅད་ལ་མཉེས་

71-1-45a

གཤིན་པ། སྙིང་རྗེ་ཆེ་བ། ཡོན་ཏན་དུ་མ་དང་ལྡན་པའི་ལྷ་ལ་དེང་ཉིད་དུ་མི་རྟག་པ་ཉིད་ཀྱི་སྟོབས་ཉེ་བར་གནས་པ་འདི་སྡུག་བསྔལ་ལོ། །དེང་འདིར་བདག་ཅག་ལྷ་དང་ལྷན་ཅིག་པ་ལས་ཐ་དད་པར་གྱུར་ཏེ། སོ་སོ་བ་དང་། བྱེ་བ་
དང་བྲལ་བར་གྱུར་ཏོ། །འདི་སྐད་ཅེས་ཀྱང་སྨྲས་ཏེ། ལྷ་བཟོད་པར་མཛོད་ཅིག །ཉིད་ཀྱི་སྲོག་མེད་པར་མཛད་པས་འཛམ་བུའི་གླིང་ན་གནས་པའི་སྐྱེ་བོའི་ཚོགས་ཐམས་ཅད་མགོན་མེད་པར་མི་མཛད་དུ་གསོལ། ལྷ་བཙུན་མོའི་
འཁོར་རྣམས་དང་། མཛོད་དང་བང་བ་རིན་པོ་ཆེ་སྣ་ཚོགས་ཀྱིས་རྒྱས་ཤིང་ཡོངས་སུ་གང་བ་ལ་གཟིགས་སུ་གསོལ། འཛམ་བུའི་གླིང་གི་སྐྱེ་བོའི་ཚོགས་རྟག་ཏུ་རབ་ཏུ་དགའ་བ་རྣམ་པ་སྣ་ཚོགས་པ་ལ་ཡང་
གཟིགས་སུ་གསོལ། ལྷ་རྣམས་ཀྱི་དགའ་བའི་ཚལ་གྱི་བསྐྱེད་མོས་ཚལ་ལྟ་བུའི་གྲོང་ཁྱེར་ཨ་རི་ཤྠའི་བཟང་བ་མང་པོ་ཕུན་སུམ་ཚོགས་པར་སྐྱེ་བོ་རབ་ཏུ་དགའ་བ་རྣམས་སྟེན་པ་ལ་ཡང་གཟིགས་སུ་གསོལ། 
མགོན་པོ་ཁྱོད་ཀྱིས་རྣམ་ཀུན་དུ། །སྲས་ལྟར་ཡོངས་སུ་བསྐྱངས་པ་རྣམས། །ཁྱོད་བྲལ་མེ་ཡིས་ངེས་གདུངས་ནས། །ལུས་ཅན་ཇི་ལྟར་གནས་པར་འགྱུར། །ཁྱོད་དང་བྲལ་ན་བདག་ཅག་ཀུན། །ཤིན་དུ་འཆི་
བདག་དབང་དུ་འགྱུར། །མགོན་པོ་ཁྱོད་དང་རྣམ་བྲལ་ན། །བདག་ཅག་འཚོ་བར་མི་ནུས་སོ། །བཙུན་མོ་མྱ་ངན་གྱིས་གདུངས་དང་། །སེམས་ཅན་གཅིག་ཏུ་སྡུག་བསྔལ་ན། །ཐུགས་རྗེ་ལྡན་པའི་ཐུགས་རྗེ་ཡིས། །
མི་དབང་དེ་ནི་གཟིགས་སུ་གསོལ། །སེམས་ཅན་རྣམས་ལ་མཉེས་གཤིན་ལྷ། །བཟོད་མཛོད་སྲོག་ནི་མི་གཏང་གསོལ། །མགོན་པོ་དཔའ་བོ་ཁྱོད་གཤེགས་ན། །སུ་ཞིག་འཇིག་རྟེན་སྐྱོང་བར་འགྱུར། །དེ་ནས་བྱང་ཆུབ་
སེམས་དཔས་དེ་རྣམས་ཀྱི་སྙིང་རྗེ་རྗེ་སྐད་དུ་དེ་ལྟར་སྨྲེ་སྔགས་འདོན་པ་ཐོས་པ་དང་། སྙིང་རྗེས་གདུངས་པའི་ཡིད་ཀྱིས་དེ་རྣམས་དབུགས་དབྱུང་བའི་ཕྱིར་སྨྲས་པ། ཁྱེད་ཅག་རྣམས་ཀྱི་མྱ་ངན་གྱིས་ཆོག་གིས། ཤིན་དུ་ཡུན་རིང་

71-1-45b

པོར་སྡུག་པ་དང་ཕྲད་པར་གྱུར་པ་ཡང་ངེས་པར་ཐ་མར་འབྲལ་བའི་མཐའ་ཉིད་དུ་འགྱུར་བ་འདི་ནི་འཇིག་རྟེན་གྱི་རང་བཞིན་ཡིན་ཏེ། ཁྱེད་ཅག་རྣམས་ཀྱིས་རྟག་ཏུ་དགེ་བའི་ཆོས་རྣམས་ལ་བག་ཡོད་པར་གྱིས་ཤིག་ཅེས་སྨྲས་
ནས་ཤིང་མཁན་དེ་གཉིས་ལ་འདི་སྐད་ཅེས་སྨྲས་སོ། །བཞིན་བཟངས་དག་རིངས་པར་ཤོག་ལ་ལུས་ཡུན་རིང་པོ་མི་ཐོགས་པར་ཆོད་ཅིག་ཅེས་སྨྲས་པ་ཙམ་གྱིས་དེ་གཉིས་ཀྱང་བརྒྱ་བྱིན་གྱིས་ཀུན་དུ་རྨོངས་པར་བྱས་པས་བྱང་
ཆུབ་སེམས་དཔའི་ལུས་ལྟེ་བ་མན་ཆད་ལ་འཕྲལ་དུ་སོག་ལེས་བཏབ་སྟེ། རིང་པོར་མ་ཐོགས་པར་ཆོད་པར་གྱུར་ཏོ། །དེ་ནས་བློན་པོ་ཆེན་པོ་བློ་གྲོས་ཆེན་པོས་བྱང་ཆུབ་སེམས་དཔའི་ཤིན་དུ་དཀའ་ཞིང་བཟོད་པར་དཀའ་བའི་
སྡུག་བསྔལ་མི་བཟད་པ་དྲན་པའི་མྱ་ངན་དྲག་པོས་ཀུན་དུ་སྐྲག་པའི་ཡིད་ཀྱིས་རྟབས་བག་ཏུ་ཤིང་མཁན་གཉིས་བཟློག་ཅིང་འདི་སྐད་ཅེས་སྨྲས་སོ། །ཀྱི་ཧུད་ཀྱི་ཧུད་ཁྱེད་ཅག་གཉིས་ཀྱི་རྩོལ་བ་འདི་ཅི་ཞིག །འདི་ལྟར་
ཁྱེད་ཅག་གཉིས་ཀྱིས་བྱམས་པའི་བདག་ཉིད་ཅན། སེམས་ཅན་ཐམས་ཅད་ལ་མཉེས་གཤིན་པ། ཡོན་ཏན་དུ་མ་དང་ལྡན་པ། འཛམ་བུའི་གླིང་ཡོངས་སུ་སྐྱོང་བ། སྐྱོན་མེད་པ། གནོད་པ་མི་བྱེད་པ་ཇི་ལྟར་
གསོད། མི་གཏི་མུག་ཅན་ཁྱེད་ཅག་འདི་ལྟ་བུའི་ཆོས་ཀྱི་རྒྱལ་པོ་ཇི་ལྟར་གསོད་པར་སྤྲོ། ཁྱེད་ཅག་གཉིས་ས་ཆེན་པོའི་ལྷ་མོ་འདིས་ཇི་ལྟར་འཇོག །ཁྱེད་ཅག་གཉིས་ལ་ལྷ་དང་ཀླུ་དང་གནོད་སྦྱིན་དང་། 
ལྷ་མ་ཡིན་དང་དྲི་ཟ་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་རྣམས་ཀྱིས་རྡོ་རྗེ་རྩེ་གཅིག་པ་དང་། འཁོར་ལོ་དང་མདའ་བོ་ཆེ་དང་མཚོན་རྩེ་གཅིག་པ་ལ་སོགས་པའི་མཚོན་རྣམས་ཇི་སྟེ་མ་བསྣུན། 
ཁྱེད་ཅག་གཉིས་འདི་ལྟ་བུའི་འཕགས་པ་མ་ཡིན་པའི་ལས་བྱེད་ན་ལུས་རྣམ་པ་སྟོང་དུ་ཇི་ལྟར་མ་ལྷགས། ཁྱེད་ཅག་གཉིས་རང་གི་ལུས་ཀྱིས་འཕྲལ་དུ་དམྱལ་བར་ཇི་ལྟར་མ་ལྷུང་། མི་གཏི་མུག་ཅན་ཁྱེད་

71-1-46a

ཅག་གཉིས་བདག་ཉིད་ཆེན་པོ་འདིས་བུ་བཞིན་མ་བསྐྱངས་སམ་ཞེས་འདི་དང་གཞན་ཡང་རྣམ་པ་མང་པོ་སྨྲས་ནས་ཀྱི་ཧུད་ལྷ་ཞེས་བློན་པོ་ཆེན་པོ་བློ་གྲོས་ཆེན་པོ་རིངས་པར་སྟན་ལས་ལངས་ཏེ། ལག་པ་གཉིས་
ཀྱིས་སོག་ལེ་བཟུང་ནས་བྱང་ཆུབ་སེམས་དཔའི་ལུས་ལ་མཆི་མ་འཛག་པས་བརླན་པར་བྱས་ཏེ་ཟློག་པར་བྱེད་དོ། །དེ་ནས་བྱང་ཆུབ་སེམས་དཔས་ཞུམ་པའི་ཡིད་དེ་ལ་དབུགས་དབྱུང་བའི་ཕྱིར་སྨྲས་པ། བུ་ཞོག་ཞོག་མྱ་ངན་མ་བྱེད་
ཅིག །སྡུག་པ་དང་ཕངས་པ་དང་ཡིད་དུ་འོང་བ་དང་མངོན་པར་དགའ་བ་ཐམས་ཅད་ངེས་པར་ཐ་དད་པར་གྱུར་ཏེ། སོ་སོ་བ་དང་བྱེ་བ་དང་འབྲལ་བར་འགྱུར་རོ། །གཞན་ཡང་བུ། བསགས་པ་ཀུན་གྱི་མཐའ་ཟད་ཅིང་། །བསླང་བའི་མཐའ་
ནི་འགྱེལ་བར་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །དེའི་ཕྱིར་ཁྱོད་ལུས་སློང་བ་ལ་བར་ཆད་མ་བྱེད་ཅིག །དེ་ཅིའི་ཕྱིར་ཞེ་ན། བློ་གྲོས་ཆེན་པོ་སྔོན་བྱུང་བ་ན་ངའི་ལུས་སློང་བ་ན་ལྷ་མོ་
རྣམས་ཀྱིས་བར་ཆད་བྱས་ཏེ། དེ་རྣམས་ཀྱིས་ངའི་བར་ཆད་བྱས་པས་ངའི་བླ་ན་མེད་པའི་བྱང་ཆུབ་ལ་བར་ཆད་བྱས་ལ་བདག་ཉིད་ཀྱང་བསོད་ནམས་མ་ཡིན་པ་མང་པོ་སྐྱེས་སོ། །གལ་ཏེ་ངའི་ལུས་སློང་བ་ལ་ལྷ་མོ་
རྣམས་ཀྱིས་བར་ཆད་མ་བྱས་པར་གྱུར་ན་ནི་ཡུན་རིང་པོ་མི་ཐོགས་པར་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པར་འགྱུར་རོ། །བུ་གཞན་ཡང་ས་ཕྱོགས་འདི་ཉིད་དུ་སྟག་མོ་ཞིག་བཀྲེས་པའི་
སྡུག་བསྔལ་གྱི་ཚོར་བ་མང་པོས་ལུས་གདུངས་པས་བུ་ཟ་འདོད་པ་མཐོང་བ་དང་། མཆོག་ཏུ་སྙིང་རྗེའི་དབང་དུ་སོང་བའི་ཡིད་ཀྱིས་ཡོངས་སུ་བསྐྱབ་པའི་ཕྱིར་དེ་མ་ཐག་བདག་ཉིད་ཡོངས་སུ་བཏང་བས་བྱང་ཆུབ་
སེམས་དཔའ་བྱམས་པ་བསྐལ་པ་བཞི་བཅུར་ཞུགས་པ་ཕྱིར་ལུས་པར་བྱས་སོ། །གཞན་ཡང་བློ་གྲོས་ཆེན་པོ་ང་ཤི་བི་པའི་རྒྱལ་པོར་གྱུར་པ་ན་ཡང་བྲམ་ཟེ་རྒན་པོ་ཞིག་སློང་བ་མཐོང་སྟེ། སྙིང་རྗེས་བསྐྱོད་པའི་

71-1-46b

ཡིད་ཀྱིས་སློང་བའི་ཡིད་ལ་རེ་བ་ཡོངས་སུ་རྫོགས་པར་བྱ་བའི་ཕྱིར་རང་ཉིད་ཀྱི་ཨུད་པ་ལ་སྔོན་པོའི་ལོ་མ་ལྟ་བུ་དྲི་མ་མེད་པ། ཤིན་དུ་མཛེས་པ། སེམས་ཅན་སྐྱེ་བོའི་མིག་དང་ཡིད་འཕྲོག་པ་མ་ཉམས་པའི་མིག་གཉིས་འཕྲལ་དུ་ཁྲག་
དང་བཅས་པར་ཕྱུང་ནས་བྱིན་ནོ། །གཞན་ཡང་བློ་གྲོས་ཆེན་པོ་ཡང་ང་རྒྱལ་པོ་ཟླ་འོད་དུ་གྱུར་པ་ན་ཡང་བྲམ་ཟེ་དྲག་པོའི་མིག་མགོ་སློང་བ་ལ་མཆོག་ཏུ་སྙིང་རྗེས་བསྒོས་པའི་ཡིད་ཀྱིས་ལྷ་དང་ཀླུ་དང་། གནོད་སྦྱིན་དང་དྲི་ཟ་དང་ལྷ་
མ་ཡིན་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་གྲུབ་པ་དང་། རིག་པ་འཛིན་པའི་ཚོགས་རྣམས་དང་། ལྷ་བརྒྱ་སྟོང་དུ་མ་རྣམས་ཀྱིས་བཀག་ཀྱང་ངས་འགྲོ་བ་འདི་དག་མགོན་མེད་པར་མཐོང་ནས་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་མངོན་པར་རྫོགས་པར་བྱང་ཆུབ་སྟེ། སེམས་ཅན་རྣམས་འཁོར་བའི་འབྲོག་དགོན་པ་ལས་ཐར་བར་བྱ་སྙམ་ནས་བྱམས་པས་ཁྱབ་པར་བྱས་ཏེ། རང་གི་ནོར་བུ་དང་གསེར་དང་དངུལ་དང་བཻ་དཱུརྱ་དང་རྡོ་རྗེ་དང་ཨིན་དྲ་ནཱི་ལ་དང་། 
མར་གད་ཀྱིས་ཀུན་དུ་བརྒྱན་པ། ཨུད་པ་ལ་སྔོན་པོའི་ལོ་མ་ལྟ་བུའི་རལ་གྲིས་རང་གི་མགོ་རྩྭ་བཞིན་དུ་བཅད་ཅིང་བཅད་ཅིང་བྱིན་ནོ། །གཞན་ཡང་བློ་གྲོས་ཆེན་པོ་ཡང་ང་ཤི་བི་པའི་རྒྱལ་པོར་གྱུར་པ་ན་ཕུག་རོན་སྐྱབས་མེད་པ་
ཞིག་ཁྲས་འཇིགས་ཤིང་སྐྲག་ལ་སྡུག་བསྔལ་ཞིང་བཞིན་རྨོགས་པ། སྐྱབས་མེད་པ་སྐྱབས་སུ་འོངས་པ་མཐོང་སྟེ། མཆོག་ཏུ་སྙིང་རྗེས་འདར་བའི་ཡིད་ཀྱིས་བྱ་ཕུག་རོན་ཁྲ་ལས་ཡོངས་སུ་བསྲུང་ཞིང་བླུ་བའི་ཕྱིར་
རང་གི་ཤ་བཅད་ཅིང་བཅད་ཅིང་བྱིན་ནོ། །གཞན་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འདོད་པར་བྱ་བའི་ཕྱིར་ས་ཕྱོགས་འདི་ཉིད་དུ་རྐང་པ་དང་ལག་པ་དང་བུ་དང་ཆུང་མ་སྟོང་ཕྲག་
ཡོངས་སུ་བཏང་བ་བྱས་ན་ཡང་སུས་ཀྱང་བར་ཆད་མ་བྱས་སོ། །དེའི་ཕྱིར་འདི་ལྟར་རིག་པར་བྱ་སྟེ། ངའི་ལུས་སློང་བ་ལ་ཁྱོད་བར་ཆད་མ་བྱེད་ཅིག །དེ་ནས་བློན་པོ་ཆེན་པོ་བློ་གྲོས་ཆེན་པོས་བྱང་

71-1-47a

ཆུབ་སེམས་དཔའི་རྫུ་འཕྲུལ་ཆེན་པོ་སྐྱེས་ནས་བྱང་ཆུབ་སེམས་དཔའ་ལ་དད་པ་ཆེན་པོ་སྐྱེས་ཏེ། དེ་ནས་ཅང་མི་སྨྲ་བར་གྱུར་ཅིང་མཆི་མའི་དབའ་རླབས་ཀྱིས་ཡང་དང་ཡང་དུ་གདོང་ཁེབས་བཞིན་དུ་བསམས་པ། ཀྱི་ཧུད་
འཇིག་རྟེན་པ་འདི་དག་ནི་སྐལ་བ་ངན་པ་སྟེ། མྱུར་བ་ཉིད་དུ་ཆོས་ཀྱི་རྒྱལ་པོ་འདིས་བོར་བར་འགྱུར་རོ། །ཀྱི་ཧུད་ཆོས་ཀྱི་རྒྱལ་མཚན་འགྱེལ་བར་འགྱུར་རོ། །ཆོས་ཀྱི་སྒྲོན་མ་ཤི་བར་འགྱུར་རོ། །ཆོས་ཀྱི་སྒྲོན་མ་མི་སྣང་བར་འགྱུར་རོ། །ཆོས་ཀྱི་
རྔ་ཆག་པར་འགྱུར་རོ། །ཆོས་ཀྱི་རྒྱ་མཚོ་སྐམས་པར་འགྱུར་རོ། །ཆོས་ཀྱི་རི་བོ་རྙིལ་བར་འགྱུར་རོ། །ཆོས་ཀྱི་གྲོང་ཁྱེར་ཆོམས་པར་འགྱུར་རོ། །ཆོས་ཀྱི་གྲུ་ཞིག་པར་འགྱུར་རོ། །ཆོས་ཀྱི་ཤིང་ཕྱུང་བ་ནི་ཀྱི་ཧུད་སྡུག་བསྔལ་ལོ། །འདི་ནི་འཇིག་
རྟེན་ཀུན་གྱི་ཕ། །སེམས་ཅན་ཀུན་ལ་ཕན་བྱེད་པ། །དུས་ཀྱི་འཁོར་ལོས་བཅོམ་ནས་ནི། །རྒྱལ་པོ་ཆེན་པོ་མེད་པར་འགྱུར། །གང་ཕྱིར་མི་བཟད་དུས་འདིར་ནི། །རྣམ་པ་སྟོང་དུ་མ་གས་པ། །སྙིང་གི་བདག་ཉིད་ཆེན་པོ་ནི། །རྡོ་རྗེ་ཆེན་པོ་
བཞིན་གྱུར་ཏམ། །ཤིས་པའི་དུས་ནི་ཀུན་དུ་འདས། །མི་བཟད་དུས་ནི་ཉེ་བར་གནས། །ཤེས་རབ་ལྡན་མི་མང་པོ་དང་། །འཇིག་རྟེན་དག་ཀྱང་བརླག་པར་འགྱུར། །ཇི་ལྟ་ཇི་ལྟར་མཐོང་གྱུར་པའི། །ས་ཡི་མཚན་མ་དུ་མ་ཡིས། །
ངེས་པར་ཡུན་ནི་མི་རིང་བར། །རྒྱལ་པོ་སེང་གེ་མེད་པར་འགྱུར། །དྲི་མེད་མི་ཡི་ཉི་མ་འདི། །ཤིན་དུ་རྙེད་དཀའ་དེ་ནུབ་འགྱུར། །ཡུན་མི་རིང་བར་འཇིག་རྟེན་འདིར། །མི་སྣང་བ་ནི་འབྱུང་བར་འགྱུར། །སེམས་ཅན་ཀུན་ལ་ཕན་པ་
ཡི། །རྒྱལ་པོ་ཆེན་པོ་འདི་མེད་དེ། །ཕྱི་ནས་འཇིག་རྟེན་མི་སྣང་ན། །སུ་ཞིག་འཇིག་རྟེན་སྐྱོང་བར་འགྱུར། །དེ་ནས་ལྷའི་དབང་པོ་བརྒྱ་བྱིན་གྱིས་ཇི་ལྟ་ཇི་ལྟར་རྨོངས་པར་བྱས་པ་དེ་ལྟར་མྱ་ངན་ཆུང་བར་གྱུར་ནས་སོགས་ལེས་བཏབ་པར་གྱུར་
ཏོ། །དེ་ནས་བྱང་ཆུབ་སེམས་དཔས་ཤིང་མཁན་དེ་གཉིས་ལ་བཞིན་བཟངས་དག་ཁྱེད་ཅག་གཉིས་སོག་ལེ་མྱུར་དུ་དྲོངས་ལ་ངའི་ལུས་ཀྱི་ཕྱེད་རོ་སྨད་ཆོད་ཅིག །བྲམ་ཟེ་འདི་ཤི་བར་གྱུར་ན་ངའི་ངལ་བ་འབྲས་བུ་མེད་པར་མི་འགྱུར་གྲང་། དེ་ནས་

71-1-47b

ཤིང་མཁན་དེ་གཉིས་བརྒྱ་བྱིན་གྱི་མཐུས་ཀུན་དུ་རྨོངས་པས་ཉམ་ཐག་པའི་ང་རོས་ཆོ་ངེས་འདེབས་ཤིང་སྐྱེ་བོའི་ཚོགས་ཆེན་པོས་བཀག་བཞིན་དུ་བྱང་ཆུབ་སེམས་དཔའ་རང་གི་ལུས་ལ་སོག་ལེས་འདྲ་བར་བརྩམས་སོ། །དེ་ནས་བྱང་ཆུབ་སེམས་
དཔའ་བྱང་ཆུབ་ཡིད་ལ་སྨོན་ཅིང་དགའ་བའི་ཡིད་ཀྱིས་སློང་བའི་ཡིད་ལ་རེ་བ་ཡོངས་སུ་རྫོགས་པར་བྱའོ་ཞེས་བསམས་ནས་ཅང་མི་སྨྲ་བར་གནས་སོ། །དེ་ནས་བྱང་ཆུབ་སེམས་དཔའི་ལུས་ཀྱི་ལྟེ་བར་སོག་ལེས་བཅད་པ་ལས་ཁྲག་གི་ཚོགས་
ཆེན་པོ་འབབ་པར་གྱུར་ཏོ། །དེ་ནས་བློན་པོ་བློ་གྲོས་ཆེན་པོ་འདི་ལྟར་སོག་ལེས་བཅད་པ་ཚོར་བ་དྲག་པོས་ཉེན་པའི་ཁྲག་འབབ་པ་མཐོང་བ་དང་། ལྷ་བཀྲོངས་པ་ནི་སྡུག་བསྔལ་ལོ་ཞེས་བསམས་ནས་རེ་ཐག་ཆད་པར་གྱུར་ཏེ། འཕྲལ་དུ་བརྒྱལ་ནས་
སའི་སྟེང་དུ་འགྱེལ་བར་གྱུར་ཏོ། །ནམ་མཁའི་དཀྱིལ་ན་གནས་པའི་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་། ལྟོ་འཕྱེ་ཆེན་པོའི་ཚོགས་རྣམས་ཀྱང་མྱ་ངན་དྲག་པོས་གདུངས་ཏེ་ངུ་བར་བརྩམས་
ཏེ། དེ་རྣམས་ཀྱིས་ངུ་བའི་མཆི་མ་བླགས་སོ། །དེ་ནས་སྐྱེ་བོའི་ཚོགས་ཆེན་པོས་འདི་ཅི་ཞིག་ཡིན་སྙམ་ནས་སྟེང་དུ་བལྟ་བར་བརྩམས་པ་དང་། ཇི་ཙམ་ན་ལྷ་བརྒྱ་སྟོང་དུ་མ་རྣམས་ངུ་བར་མཐོང་ངོ་། །དེ་ནས་སྐྱེ་བོའི་ཚོགས་ཆེན་པོ་ཤས་
ཆེར་མྱ་ངན་དྲག་པོས་གདུངས་ཏེ་བྱང་ཆུབ་སེམས་དཔའ་གནས་སྐབས་འདི་ལྟ་བུར་ཤིན་དུ་སྡུག་བསྔལ་བར་མཐོང་ནས། ཀྱི་ཧུད་ལྷ་བཀྲོངས་པ་ནི་སྡུག་བསྔལ་ལོ་ཞེས་བསམས་ནས་ཀུན་དུ་རྨོངས་པར་གྱུར་ཏོ། །དེ་ནས་ལྷའི་
དབང་པོ་བརྒྱ་བྱིན་དེ་སྲོག་ཆགས་བརྒྱ་སྟོང་དུ་མ་འདི་རྣམས་བྱང་ཆུབ་སེམས་དཔའི་མྱ་ངན་གྱིས་གདུངས་པས་ཤིན་དུ་སྙིང་རྗེ་ཞིང་ཞུམ་པ་མཐོང་བ་དང་མྱུར་བར་སྙིང་རྗེའི་ཡིད་ཀྱིས་བསམས་པ་བདག་ཉིད་ཆེ་བ། སེམས་ཅན་
ཐམས་ཅད་ལ་མཉེས་གཤིན་པ། སྙིང་རྗེ་ཅན་ཐམས་ཅད་སྟེར་བ་འདིའི་ལུས་ལ་འདི་ལྟར་ཚོར་བ་དྲག་པོའི་ལས་ཀུན་དུ་སྦྱོར་བ་ནི་བཟང་པོ་མ་ཡིན་ནོ། །གཞན་དུ་ན་ད་ནི་ཇི་ལྟར་སྲོག་མི་འཇིག་པར་གྱུར་པ་དེ་ལྟར་བྱའོ། །

71-1-48a

དེ་ནས་བྱང་ཆུབ་སེམས་དཔའ་ཤིང་མཁན་དེ་གཉིས་ཀྱིས་སོག་ལེས་དྲུད་ཅིང་སོག་ལེ་རྣོན་པོས་ལུས་བཅད་པའི་ཚོར་བ་དྲག་པོས་གདུངས་པ་དང་། བརྟན་པའི་སྟོབས་དང་ལྡན་པས་སློང་བ་ལ་བྱམས་པའི་
སེམས་སྐྱེས་ནས་བསམས་པ། ངས་འཁོར་བའི་སྐྱོན་གྱི་རང་བཞིན་ཤེས་ནས་བརྩོན་འགྲུས་སྲ་ཞིང་བརྟན་པ་དང་ལྡན་པས་ལུས་ཕྱོགས་གཅིག་བཅད་པ་འདི་ལས་འདི་ལྟ་བུའི་སྡུག་བསྔལ་སྐྱེ་ན། སེམས་ཅན་
སྔ་མ་རྣམས་ཕལ་ཆེར་དམྱལ་བར་སྐྱེས་ནས་ཤིན་དུ་སྡུག་བསྔལ་བའི་ཚོར་བ་རྣམས་ཀྱིས་གདུངས་པ་ལྟ་སྨོས་ཀྱང་ཅི་དགོས། དེ་ནས་བྱང་ཆུབ་སེམས་དཔའ་སེམས་ཅན་ཐམས་ཅད་ལ་རྗེས་སུ་འགྲོ་བ་བྱམས་པའི་
སེམས་རྣམ་པར་བཞག་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་རྣམས་འདི་ལྟ་བུའི་སྡུག་བསྔལ་ལས་ཐར་བར་བྱའོ་ཞེས་སེང་གེའི་སྒྲ་བསྒྲགས་ཏེ། སྡུག་
བསྔལ་དྲག་པོས་གདུངས་པའི་རང་གི་སེམས་སྤྲོ་བར་བྱ་བའི་ཕྱིར་སྨྲས་པ། འཇིག་རྟེན་སྡུག་བསྔལ་ལྟོས་ལ་ཡིད་ཁྱོད་སྐྱོན་སྤངས་ཏེ། །ཤིན་དུ་བརྟན་པ་རྒྱ་ཆེ་བསྐྱེད་པ་ཉིད་དུ་གྱིས། །འགྲོ་བ་སྐྱེ་རྒ་ན་འཆི་སྡུག་བསྔལ་
གྱིས་གདུངས་པའི། །འདི་ནི་སྐྱབས་གྱུར་ཡིད་ཀྱིས་བཟོད་ཉིད་བརྟན་པར་གྱིས། །གཞན་ཡང་ཀྱེ་སེམས་གང་ཕྱིར་འགྲོ་ཀུན་འཁོར་བ་ཡི། །རྒྱ་མཚོ་ལས་རྒལ་རྒྱུ་ཡིན་གྱིས། །དེ་བས་ཁྱོད་ནི་གནོད་པ་རྣམས། །
མི་བཟོད་པ་ནི་རིགས་མ་ཡིན། །དེ་ལྟར་རང་གི་སེམས་ཡང་དག་པར་བཞག་ནས་སེམས་ཅན་ཐམས་ཅད་རྗེས་སུ་འགྲོ་བའི་སྙིང་རྗེ་ཉེ་བར་བཞག་སྟེ་བསམས་པ། ཀྱེ་མའོ་འཁོར་བ་ན་གནས་པའི་སེམས་ཅན་གྱི་སྡུག་
བསྔལ་ནི་ཀྱེ་མ་མི་བཟད་པ་ཡིན་ལ། འཁོར་བའི་སེམས་ཅན་དེ་རྣམས་ཀྱི་དོན་དུ་འཁོར་བའི་སྡུག་བསྔལ་ཐམས་ཅད་མནགས་པར་སྤྲོ་བར་བྱས་ཀྱིས་སེམས་ཅན་འགའ་ཡང་སྡུག་བསྔལ་བའི་སྐལ་བ་ཅན་དུ་མ་གྱུར་

71-1-48b

ཅིག །དགེ་སློང་དག་སེམས་བསྐྱེད་མ་ཐག་བྱང་ཆུབ་སེམས་དཔའི་ལུས་བཅད་པའི་ཚོར་བ་འཕྲལ་དུ་རྒྱུན་ཆད་པར་གྱུར་ཏོ། །དེ་ནས་བྱང་ཆུབ་སེམས་དཔས་བསམས་པ། ཅིའི་ཕྱིར་ངའི་ལུས་བཅད་པའི་ཚོར་
བ་འགགས་པར་གྱུར། སོག་ལེ་འགའ་ཞིག་གིས་བཏོན་པར་མ་གྱུར་གྲང་སྙམ་ནས་སོག་ལེ་དེ་ལ་བལྟས་སོ། །བལྟས་ནས་ཀྱང་མཆོག་ཏུ་ཡིད་མི་བདེ་བར་གྱུར་ནས་འདར་བར་གྱུར་ཏོ། །དེ་ནས་ལྷའི་དབང་པོ་
བརྒྱ་བྱིན་གྱིས་དེའི་བསམ་པ་ཤེས་ནས་སྨྲས་པ། ཉམ་ཆུང་ནད་པ་ཇི་བཞིན་དུ། །རྒྱལ་པོ་ཅི་ཕྱིར་འདར་བར་བྱེད། །བདག་གི་ལུས་ཕྱེད་བཅད་ན་ཡང་། །སེམས་ནི་མི་འདར་བ་ལ་ལྟོས། །ཁྱོད་ནི་ཐམས་
ཅད་སྟེར་བ་ཞེས། །ས་སྟེང་ཀུན་དུ་གྲགས་པ་ལ། །འགྱོད་པར་བྱེད་པ་མི་རིགས་ཏེ། །ཁྱོད་ཚིག་བརྫུན་དུ་མ་གྱུར་ཏམ། །དེ་ནས་བྱང་ཆུབ་སེམས་དཔས་སྨྲས་པ། བྲམ་ཟེ་དོན་དེའི་ཕྱིར་ལུས་འདར་བ་མ་ཡིན་ལ། 
འགྱོད་པར་གྱུར་པ་འགའ་ཡང་ཡོད་པ་མ་ཡིན་ནོ། །འོན་ཀྱང་སོག་ལེ་འདིས་ངའི་ལུས་ཀྱི་ཕྱེད་སྨད་ཚབས་ཆེར་ཞུགས་ཀྱང་མ་ཆོད་པ་དང་། དེ་ལ་ང་འདི་སྙམ་དུ་སེམས་ཏེ། ངའི་སྦྱིན་པ་མ་རྫོགས་པར་མི་འགྱུར་གྲང་། 
ང་ལ་སློང་བའི་ཡིད་ལ་རེ་བ་ཡང་ཡོངས་སུ་རྫོགས་པར་མི་འགྱུར་གྲང་ཞེས་དོན་དེ་རྗེས་སུ་སེམས་ཤིང་ལུས་འདར་ཏེ་སོག་ལེས་དྲག་ཏུ་གཅོད་པར་མི་འདོད་པ་མ་ཡིན་ནོ། །དེ་ལ་དེ་སྐད་ཅེས་སྨྲས་པ་དང་ལྷའི་དབང་པོ་བརྒྱ་བྱིན་མཆོག་
ཏུ་ངོ་མཚར་སྐྱེས་ནས་ཅང་མི་སྨྲ་བར་གནས་སོ། །བར་སྐབས་དེར་མི་དེ་གཉིས་བརྒྱ་བྱིན་གྱིས་ཀུན་དུ་རྨོངས་པར་བྱས་པས་དེ་གཉིས་ཀྱིས་སོག་ལེ་རྣོན་པོས་བྱང་ཆུབ་སེམས་དཔའི་ལུས་ཀྱི་ཕྱེད་རོ་སྨད་བཅད་མ་ཐག་ཏུ་སའི་སྟེང་
དུ་བཞག་པ་དང་འགུལ་བར་གྱུར་ཏོ། །དེ་ནས་བྱང་ཆུབ་སེམས་དཔའ་རང་གི་ལུས་བཅད་པའི་སྡུག་བསྔལ་མི་སེམས་པར་རིངས་བག་ཉིད་དུ་སྐྱེས་བུ་དེ་གཉིས་ལ་འདི་སྐད་སྨྲས་སོ། །བཞིན་བཟངས་དག་ཁྱོད་ཅག་གཉིས་

71-1-49a

ཀྱིས་མྱུར་དུ་ངའི་ལུས་འདི་རིངས་པ་རིངས་པར་བྲམ་ཟེའི་ལུས་ལ་སྦྱོར་ཅིག །དེ་གཉིས་ཀྱིས་ཀྱང་དེ་བཞིན་དུ་བྱས་སོ། །སྦྱར་བ་ཙམ་གྱིས་ལྷའི་དབང་པོ་བརྒྱ་བྱིན་གྱིས་ཇི་ལྟར་སྐད་ཅིག་མ་དེ་ཉིད་ལ་རྨ་ཀུན་དུ་འབྱོར་
ཅིང་མཉམ་པར་གནས་པ་དང་། མདོག་འདྲ་བར་སྣང་བ་དེ་ལྟར་བྱིན་གྱིས་བརླབས་ཏེ། སྐད་ཅིག་མ་དེ་ལ་སྟོན་ཅིང་ཡང་བྱང་ཆུབ་སེམས་དཔའ་དགའ་བར་བྱ་བའི་ཕྱིར་ལྷའི་དབང་པོ་བརྒྱ་བྱིན་ཁྲི་ལས་ལངས་ཏེ་འཆག་པ་དང་ལངས་
པ་དང་འདུག་པར་གྱུར་ཏོ། །དེ་ནས་བྱང་ཆུབ་སེམས་དཔའ་དེ་ལྟར་སློང་བ་པོའི་ལུས་ཡོངས་སུ་རྫོགས་ཤིང་ཡིད་ལ་རེ་བ་ཡོངས་སུ་རྫོགས་པར་མཐོང་བ་དང་། མཆོག་ཏུ་དགའ་བས་ཀུན་དུ་རྒྱས་པའི་ཡིད་ཀྱིས་ངལ་བ་འབྲས་བུ་
དང་བཅས་པར་གྱུར་ཅིང་ཡིད་ལ་རེ་བ་ཡོངས་སུ་རྫོགས་པར་གྱུར་ཏོ་སྙམ་ནས་རབ་ཏུ་དགའ་བའི་ཡིད་ཀྱིས་བསམས་པ། ཇི་ལྟར་ངས་བྲམ་ཟེ་འདི་ལ་རང་གི་ལུས་བྱིན་ཏེ། སྡུག་པའི་སྲོག་གིས་བསྐྱབས་ཤིང་འཆི་བའི་འཇིགས་པ་
ལས་ཡོངས་སུ་བསྐྱབས་པའི་དགེ་བའི་རྩ་བ་འདིས་འདི་ལྟར་ང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་བྲམ་ཟེ་འདི་འཁོར་བའི་སྡུག་བསྔལ་ལས་བསླངས་ཏེ། ཤིན་དུ་མཐར་ཐུག་པའི་
བདེ་བ་མྱ་ངན་ལས་འདས་པ་ལ་རབ་ཏུ་འཇོག་པར་གྱུར་ཅིག་ཅེས་སྨྲས་ནས་བྱང་ཆུབ་སེམས་དཔའ་ཚོར་བ་དྲག་པོས་གདུངས་པ་དང་། ཡིད་ཀྱིས་བྱང་ཆུབ་ཏུ་སྨོན་པ་བྱས་ནས་མིག་བཙུམས་ཏེ་བརྒྱལ་བས་གནས་པར་གྱུར་ཏོ། །
དེ་ནས་ལྷའི་དབང་པོ་བརྒྱ་བྱིན་གྱིས་དེ་མ་ཐག་ཏུ་རིངས་རིངས་པར་བྱང་ཆུབ་སེམས་དཔའི་ལུས་ལ་འཕྲལ་དུ་སྟོབས་བསྐྱེད་པ་ཡང་འཚོ་བའི་སྨན་གྱིས་ཡང་དག་པར་གསོས་སོ། །དགེ་སློང་དག་དེ་ནས་རྒྱལ་པོ་དཔལ་གྱི་སྡེའི་ལུས་ཀྱི་
ཕྱེད་བཅད་པའི་རྗེས་ཐོགས་ཉིད་ལ་ཡང་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལན་རྣམ་པ་གསུམ་དུ་གཡོས་ཏེ། གཡོས་རབ་ཏུ་གཡོས། ཀུན་དུ་རབ་ཏུ་གཡོས། འགུལ་རབ་ཏུ་འགུལ། ཀུན་

71-1-49b

དུ་རབ་ཏུ་འགུལ་ཏོ། །བྱང་ཆུབ་སེམས་དཔའ་ཤིན་དུ་ཡོངས་སུ་གཏོང་བ་ཉིད་དང་། རྨད་དུ་བྱུང་བའི་ཡོངས་སུ་གཏོང་བ་ཉིད་ས་ཆེན་པོ་འདིས་མ་ཐེག་པས་སྒྲ་ཤིན་དུ་སྒྲོགས་ཏེ། འདི་ལྟ་སྟེ་འཁར་བའི་སྣོད་ཆེན་པོ་ཀུན་དུ་བརྡུངས་ནས་
སྒྲ་འབྱིན་པ་བཞིན་དུ་དེའི་ཚེ་དེའི་དུས་ན་ས་ཆེན་པོ་འདི་ཉིད་ཤིན་དུ་སྒྲ་སྒྲོགས་པར་གྱུར་ཏོ། །རི་དང་རི་སུལ་དང་ཆུ་བོ་དང་རྒྱ་མཚོའི་ཚོགས་རྣམས་ལས་ཀྱང་འཇིགས་པའི་སྒྲ་ཆེན་པོ་བྱུང་བར་གྱུར་ཏོ། །ཀུན་ནས་སྐར་མདའ་ལྟུང་བ་དང་། 
ཕྱོགས་སྲེག་པ་དང་། བར་སྣང་ལ་ཡང་ལྷའི་བུ་རྣམས་རྔ་རྡུང་བར་གྱུར་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་མུན་པ་མུན་ནག་ཏུ་གྱུར་ཏོ། །ནམ་མཁའི་དཀྱིལ་ན་འགྲོ་བའི་ལྷ་རྣམས་
ཀྱིས་ཀྱང་བྱང་ཆུབ་སེམས་དཔའི་མྱ་ངན་གྱིས་གདུངས་པས་ཅ་ཅོའི་སྒྲ་བཏོན་ཏོ། །བར་སྣང་ལས་ཀྱང་ལྷ་རྣམས་བྱང་ཆུབ་སེམས་དཔའི་སྟེང་ནས་ལྷའི་ཨུད་པ་ལ་རྣམས་འཐོར་ཞིང་པད་མ་དང་། པུན་ད་རི་ཀ་དང་ཨ་ཀ་རུའི་
ཕྱེ་མ་དང་ཏ་ག་རུའི་ཕྱེ་མ་དང་ཏ་མ་ལའི་ལོ་མའི་ཕྱེ་མ་དང་ཙན་དན་གྱི་ཕྱེ་མ་དང་ལྷ་རྣམས་ཀྱི་མེ་ཏོག་མན་དཱ་ར་བ་རྣམས་ཀྱང་འཐོར་རོ། །གོས་རྣམས་ཀྱང་འཐོར་བར་བྱེད་དོ། །ལྷའི་རོལ་མོ་ཡང་རབ་ཏུ་རྡུང་ངོ་། །འཛམ་
བུའི་གླིང་གི་མི་ཐམས་ཅད་དེར་ཡུད་ཙམ་ཞིག་མཆོག་ཏུ་རྨོངས་པར་གྱུར་ཏེ། །གྲོང་ཁྱེར་ན་གནས་པའི་སྲོག་ཆགས་བརྒྱ་སྟོང་དུ་མ་རྣམས་ཀྱིས་བྱང་ཆུབ་སེམས་དཔའི་ལུས་ཀྱི་ཕྱེད་བཅད་པ་མཐོང་བ་དང་། སྡུག་བསྔལ་དྲག་
པོས་གདུངས་ཏེ། ཀྱི་ཧུད་ལྷ་བསད་པ་ནི་སྡུག་བསྔལ་ལོ་ཞེས་སྒྲ་གཅིག་ཏུ་བསྒྲགས་སོ། །དེ་ནས་ལ་ལ་ནི་ས་ལ་འགྲེ་ལྡོག་གོ། །ལ་ལ་ནི་དཔུང་པ་བརྐྱང་ནས་ཆོ་ངེས་འདེབས་སོ། །ལ་ལ་ནི་མཆི་མའི་
རླབས་ཀྱིས་སྐད་འཛེར་བར་ཚིག་འདོན་མི་ནུས་ཏེ། སྐད་ཆེན་པོ་དང་བྲང་རྡུང་ངོ་། །ལ་ལ་ནི་མི་རྟག་པ་ཉིད་ཀྱི་སྟོབས་དང་ལྡན་ཞེས་སེམས་སྡུག་བསྔལ་དང་བཅས་ཤིང་ཡིད་མི་བདེ་བ་དང་ལྡན་པས་ཅང་མི་སྨྲ་བར་འདུག་

71-1-50a

གོ། །དེ་ནས་ལྷའི་དབང་པོ་བརྒྱ་བྱིན་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་རི་རབ་ལྟར་ཤིན་དུ་མི་གཡོ་བར་ཤེས་ཤིང་བྱང་ཆུབ་སེམས་དཔའི་རྨད་དུ་བྱུང་བ་ཡོངས་སུ་གཏོང་ལ། 
དེ་ཡང་བ་སྤུ་ལྡང་བ་ནི་ཤིན་དུ་དགའ་ཞིང་ཕུལ་དུ་དབྱུང་བ་མཐོང་བ་དང་། ངོ་མཚར་གྱིས་མིག་གདངས་ཏེ་ལྷའི་བུ་དེ་བཞི་དང་ལྷན་ཅིག་ཏུ་བྲམ་ཟེའི་ཆ་བྱད་མི་སྣང་བར་བྱས་ནས་རང་གི་གཟུགས་ཀྱིས་གནས་ཏེ་བྱང་ཆུབ་སེམས་དཔའ་
ལ་སྨྲས་པ། རྒྱལ་པོ་ཆེན་པོ་བདག་ནི་ལྷའི་དབང་པོ་བརྒྱ་བྱིན་ལགས་ཀྱི་བྲམ་ཟེ་མ་ལགས་སོ། །རྒྱལ་པོ་ཆེན་པོ་ལེགས་སོ་ལེགས་སོ། །ཀྱེ་མའོ་ཁྱོད་ཀྱི་བརྩོན་འགྲུས། ཀྱེ་མའོ་མ་བཅོས་པར་བརྟན་པ། ཀྱེ་མའོ་རང་གི་ལུས་
ལ་མ་ཆགས་པར་ཡོངས་སུ་གཏོང་བ། ཀྱེ་མའོ་སེམས་ཅན་རྣམས་ལ་སྙིང་བརྩེ་བ། ཀྱེ་མའོ་སྦྱིན་པ་ལ་དགའ་བ་ལེགས་སོ་ལེགས་སོ། །རྒྱལ་པོ་ཆེན་པོ་ཁྱོད་གང་དུ་སྡུག་བསྔལ་དྲག་པོས་བཅོམ་ཡང་སྙིང་རྗེས་རང་གི་ལུས་སྦྱིན་པ་ལ་
སེམས་མི་ལྡོག་པ་དེ་ནི་ལེགས་སོ། །རྒྱལ་པོ་ཆེན་པོ་ཁྱོད་ལ་དྲི་ཡིས་ཁྱོད་ཤིན་དུ་དཀའ་བའི་བརྩོན་པ་འདི་ལྟ་བུས་ཅི་ཞིག་དོན་དུ་གཉེར། བྱང་ཆུབ་སེམས་དཔས་སྨྲས་པ། ཀཽ་ཤི་ཀ་ངའི་ལུས་ཀྱི་སྦྱིན་པ་འདིས་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། སེམས་ཅན་རྣམས་འཁོར་བ་ལས་བསྒྲལ་བར་བྱའོ། །བརྒྱ་བྱིན་གྱིས་སྨྲས་པ། རྒྱལ་པོ་ཆེན་པོ་ཁྱོད་རང་གི་ལུས་ཡོངས་སུ་ཟད་པ་འམ། གཏོང་བ་འམ། ཡོངས་སུ་
བཏང་བས་ཁྱོད་ཀྱི་སེམས་རྣམ་པ་གཞན་དུ་གྱུར་པ་འམ། འགྱོད་པར་མ་གྱུར་གྲང་། བྱང་ཆུབ་སེམས་དཔས་སྨྲས་པ། ཀཽ་ཤི་ཀ་ང་ལ་ནི་འགྱོད་པ་མེད་དོ། །བརྒྱ་བྱིན་གྱིས་སྨྲས་པ། ཇི་ལྟར་ཤེས་པར་བྱ། བྱང་ཆུབ་སེམས་དཔས་
སྨྲས་པ། ཀཽ་ཤི་ཀ་དེའི་ཕྱིར་ངའི་ལུས་ཀྱི་ཕྱེད་བཅད་པ་འདི་གནས་ཇི་ལྟ་བ་བཞིན་དུ་ཞོག་ཤིག །དེ་ནས་ལྷའི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའི་ལུས་ཀྱི་ཕྱེད་བཅད་པ་དེ་གནས་ཇི་ལྟ་བ་བཞིན་དུ་བཞག་གོ། །དེ་ནས་བྱང་ཆུབ་

71-1-50b

སེམས་དཔས་སེམས་ཅན་ཐམས་ཅད་ལ་རྗེས་སུ་འགྲོ་བའི་བྱམས་པའི་སེམས་ཉེ་བར་བཞག་ནས་བདེན་པ་གསོལ་བར་བྱེད་ཅིང་དེའི་ཚེ་ཚིགས་སུ་བཅད་དེ་སྨྲས་པ། ཇི་ལྟར་བྱང་ཆུབ་འདོད་གྱུར་ནས། །སྙིང་རྗེས་ལུས་ནི་བཏང་བས་ན། །སེར་
སྣ་མེད་ཅིང་ཞུམ་མེད་དེ། །དེང་ནི་འགྱོད་པར་གྱུར་པ་མེད། །འགྱོད་པའི་སེམས་ཀྱང་མེད་གྱུར་ན། །བདེན་ཚིག་འདི་དང་ལེགས་བྱས་པས། །བརྒྱ་བྱིན་དེང་ནི་ང་ཡི་ལུས། །འདི་ནི་སྔོན་གྱི་ཇི་བཞིན་དུ། །དབང་པོ་མ་ལུས་རྫོགས་གྱུར་ཅིག །
དགེ་སློང་དག་ཚིགས་སུ་བཅད་པ་དེ་སྨྲས་པའི་རྗེས་ཐོགས་ཉིད་ལ་བྱང་ཆུབ་སེམས་དཔའི་ལུས་འཕྲལ་དུ་སྔོན་གྱི་ཇི་ལྟ་བ་བཞིན་དུ་གྱུར་ཏོ། །ནམ་མཁའི་དཀྱིལ་ན་གནས་པའི་ལྷ་དང་ཀླུ་དང་གནོད་སྦྱིན་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་
ཆེན་པོ་རྣམས་ཀྱིས་ངོ་མཚར་དེ་མཐོང་བ་དང་། ངོ་མཚར་གྱིས་མིག་གདངས་ཏེ། ཅ་ཅོ་དང་ག་ཞའི་སྒྲ་སྒྲོགས་སོ། །སྐྱེ་བོའི་ཚོགས་ཆེན་པོ་འདི་དག་ཐམས་ཅད་ཀྱིས་ཀྱང་ངོ་མཚར་དང་རྨད་དུ་བྱུང་བ་དང་། ལྷ་དང་མི་རྣམས་ཡིད་སྡུག་པར་བྱེད་
པའི་ཆོ་འཕྲུལ་དང་། བྱང་ཆུབ་སེམས་དཔའི་ལུས་ཡོངས་སུ་རྫོགས་པ་མཐོང་བ་དང་སྲོག་སྟོར་བ་ལས་སླར་རྙེད་པ་བཞིན་དུ་མཆོག་ཏུ་ངོ་མཚར་སྐྱེས་སོ། །འདི་སྐད་ཅེས་ཀྱང་སྨྲས་ཏེ། ཀྱེ་མ་ཁྱེད་ནི་སླར་འཚོ་བའི། །ངོ་མཚར་དག་ནི་བལྟ་
བར་གྱིས། །ས་དང་ནགས་སུ་བཅས་པ་ཡི། །འཇིག་རྟེན་འདི་ནི་སྐལ་བར་ལྡན། །དེ་ནས་ལྷའི་དབང་པོ་བརྒྱ་བྱིན་གྱིས་བྱང་ཆུབ་སེམས་དཔའི་ལུས་སྔོན་གྱི་ཇི་ལྟ་བ་བཞིན་དུ་གྱུར་པར་མཐོང་བ་དང་ངོ་མཚར་གྱིས་གདུངས་པའི་མིག་དང་། 
སྤྲོ་བ་བསྐྱེད་པའི་ཕྱིར་སྨྲས་པ། རྒྱལ་པོ་ཆེན་པོ་ཁྱོད་ཀྱི་བློ་ཤིན་དུ་དེས་པ་དང་ཁྱོད་ཀྱི་སྨོན་ལམ་མི་འགྱུར་བ་དང་། ཁྱོད་ཀྱི་སེམས་ཅན་ལ་སྙིང་རྗེ་ཆེན་པོས་རྗེས་སུ་ཞུགས་པ་ནི་ལེགས་སོ་ལེགས་སོ། །གང་ཡང་ཁྱོད་ནི་ཡིད་
ཀུན་དུ་སྐྲག་པར་བྱེད་པ་རྣམས་ལ་མི་འཇིགས་པས་ཁྱོད་ཀྱི་འབད་པ་འདི་ཉིད་ཀྱིས་ཡུན་རིང་པོར་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ལྷའི་དབང་པོ་བརྒྱ་

71-1-51a

བྱིན་གྱིས་དེའི་ཚེ་ཚིགས་སུ་བཅད་དེ་སྨྲས་པ། ཀྱེ་མ་ཁྱོད་ཀྱི་བརྩོན་རབ་དྲག །བརྟན་པ་ཉིད་ཀྱང་བླ་ན་མེད། །ཀྱེ་མའོ་སེམས་ཅན་ལ་སྙིང་བརྩེ། །ཀྱེ་མའོ་བྱང་ཆུབ་ཡིད་ལ་བརྟན། །ཀྱེ་མའོ་
མི་རིང་འཇིག་རྟེན་འདི། །མགོན་པོ་ཁྱོད་ཀྱིས་སྐྱོང་གྱུར་ཏེ། །སྡུག་བསྔལ་རྒྱ་མཚོ་དྲག་འཇིགས་ལས། །ཡང་དག་མྱ་ངན་འདའ་བར་མཛད། །དེ་སྐད་ཅེས་སྨྲས་པ་དང་། ལྷའི་དབང་པོ་བརྒྱ་བྱིན་མཆི་མ་ཆར་བཞིན་འང་
འབབ་ཅིང་སྐད་འཛེར་བཞིན་དུ་བྱང་ཆུབ་སེམས་དཔའ་ལ་བཟོད་པ་གསོལ་བར་བརྩམས་ཏེ། རྒྱལ་པོ་ཆེན་པོ་གང་བདག་ཉམ་བསྐྱེད་པའི་བསམ་པས་ཚོར་བ་དྲག་པོ་ལས་ཀུན་དུ་སྦྱོར་བར་མཛོད་ཅིག །གཞན་ཡང་གང་གི་ཚེ་ཁྱོད་ཀྱིས་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དེའི་ཚེ་ན་ཡང་བདག་ལ་དགོངས་ཤིག །བྱང་ཆུབ་སེམས་དཔས་སྨྲས་པ། ཀཽ་ཤི་ཀ་བཟོད་ཀྱིས་དེ་བཞིན་དུ་བྱས་ཏེ་ངས་ཀྱང་དྲན་པར་བྱའོ། །བར་སྐབས་
དེར་བྱང་ཆུབ་སེམས་དཔའི་མཐུས་དེ་མ་ཐག་ཏུ་ནམ་མཁའ་ལས་ལྷའི་རིན་པོ་ཆེའི་ཆར་རྣམ་པ་སྣ་ཚོགས་པ་ཡིད་དུ་འོང་བ་འཛམ་བུའི་གླིང་ཐམས་ཅད་དུ་བབ་པར་གྱུར་ཅིང་འཛམ་བུའི་གླིང་ཐམས་ཅད་དུ་རྒྱན་རྣམ་པ་སྣ་ཚོགས་ཀྱིས་གང་
བར་གྱུར་པ། ལྷའི་སྣང་བ་བས་ཀྱང་གསལ་བར་གྱུར་ཏོ། །དེ་ནས་རི་ལ་གནས་པའི་དྲང་སྲོང་དེ་ངོ་མཚར་འདི་ལྟ་བུ་རྨད་དུ་བྱུང་བ་མཐོང་བ་དང་། ངོ་མཚར་གྱིས་བསྡུས་པའི་ཡིད་ཀྱིས་བསམས་པ། སྔོན་མ་བྱུང་བའི་ངོ་
མཚར་བྱུང་བ་འདི་ཅི་ཞིག་ཡིན། འདི་ལྟ་བུའི་མཐུ་སུའི་ཡིན་སྙམ་མོ། །དེ་ནས་དྲང་སྲོང་དེ་ལ་བསྟི་གནས་ན་གནས་པའི་ལྷ་གཞན་གྱིས་གཏམ་འདི་རྒྱས་པར་སྨྲས་སོ། །དེ་ནས་དྲང་སྲོང་དེ་བྱང་ཆུབ་སེམས་དཔའི་ཤིན་
དུ་དཀའ་ཞིང་བ་སྤུ་ལྡང་བའི་སྐད་ཐོས་པ་དང་ཡང་དག་པར་དགའ་བས་བ་སྤུ་ལྡང་ཞིང་སེམས་ཅན་ཆེན་པོ་བཀུར་བར་འོས་ཞེས་བསམས་ནས་འཁོར་ལྔ་བརྒྱ་དང་བཙུན་མོ་རྒྱལ་བའི་འོད་ཁྲིད་དེ་རིངས་པ་རིངས་པར་བྱང་ཆུབ་

71-1-51b

སེམས་དཔའི་ཐད་དུ་ཕྱིན་ནས། རྒྱལ་བ་དང་ཚེ་འཕེལ་བར་བྱས་ཏེ། བརྒྱ་བྱིན་དང་ལྷན་ཅིག་སྨྲས་པ། ལྷ་ཡི་བུ་མོ་བཟང་འདྲ་བའི། །བུ་མོ་སྡུག་པ་འདི་རྣམས་ལ། །མགོན་པོ་ཁྱོད་ཀྱིས་བསྐྱང་བ་དང་། །དགེ་
མ་འདི་དང་དགྱེས་པར་མཛོད། །ཁྱིམ་ཐབ་མི་ཕྱོ་བཙུན་མོ་སྡུག །འདི་ནི་ཁྱེད་ལ་དབུལ་ལགས་ཀྱིས། །ཁྱེད་ཀྱིས་ཡང་ནི་སློང་བ་ལ། །ནམ་དུ་ཡང་ནི་མ་སྩལ་ཅིག །དེ་ནས་བྱང་ཆུབ་སེམས་དཔས་དྲང་སྲོང་དེ་དང་
ལྷ་རྣམས་ཀྱི་དབང་པོ་བརྒྱ་བྱིན་གྱིས་གསོལ་བ་བཏབ་པ་སྙིང་རྗེས་ཅི་ཡང་མི་སྨྲ་བར་ཁས་བླངས་སོ། །དེ་ནས་ལྷའི་དབང་པོ་བརྒྱ་བྱིན་གྱིས་ལྷའི་བུ་ལས་སྣ་ཚོགས་པ་ལ་སྨྲས་པ། ལས་སྣ་ཚོགས་པ་ལྷའི་སེང་གེའི་ཁྲི་མྱུར་དུ་ཤོམས་
ཤིག །ང་ཉིད་ཀྱིས་རྒྱལ་པོ་དཔལ་གྱི་སྡེ་དབང་བསྐུར་བར་བྱའོ། །ཀཽ་ཤི་ཀ་ལེགས་ཀྱིས་དེ་ལྟར་བགྱིའོ། །ལྷའི་བུ་ལས་སྣ་ཚོགས་པས་ལྷའི་དབང་པོ་བརྒྱ་བྱིན་ལས་མཉན་ནས་སྐད་ཅིག་མ་དེ་ཉིད་ལ་རིན་པོ་ཆེ་སྣ་ཚོགས་
ཀྱིས་ཉེ་བར་མཛེས་པ། ཀུན་ནས་མུ་ཏིག་དང་། མུ་ཏིག་གི་ཚོགས་ཀྱི་དོ་ཤལ་འཕྱང་བའི་ལྷའི་སེང་གེའི་ཁྲི་མངོན་པར་སྤྲུལ་ཏོ། །དེ་ནས་ལྷའི་དབང་པོ་བརྒྱ་བྱིན་གྱིས་རང་ཉིད་ཀྱི་ལག་པ་གཉིས་ཀྱིས་བཟུང་ནས་ལྷའི་སེང་
གེའི་ཁྲི་ལ་བཞག་སྟེ། ལྷ་བརྒྱ་སྟོང་དུ་མ་རྣམས་དང་ལྷན་ཅིག་ཏུ་ལྷའི་རོལ་མོ་རྣམས་ཀུན་དུ་རྡུང་བཞིན་དུ་བསྙེན་བཀུར་ཆེན་པོ་བྱས་ནས་རྒྱལ་པོར་དབང་བསྐུར་བས་དབང་བསྐུར་ཏོ། །བར་སྐབས་དེར་བྱང་ཆུབ་སེམས་དཔའི་
མཐུས་ས་རྣམ་པ་དྲུག་ཏུ་གཡོས་པ་དང་ལྷ་རྣམས་དགའ་བ་དང་། མགུ་བས་ཡང་རྣམ་པ་སྣ་ཚོགས་པའི་མེ་ཏོག་གི་ཆར་དང་། རིན་པོ་ཆེའི་ཆར་ཕབ་སྟེ། འཛམ་བུའི་གླིང་ཐམས་ཅད་དུ་མེ་ཏོག་དང་རིན་པོ་ཆེའི་ཆར་པུས་
མོ་ནུབ་ཙམ་གྱིས་གཡོགས་པར་གྱུར་ཏོ། །ལྷ་དང་མི་རྣམས་ཀྱིས་འབྱོར་པ་བསམ་གྱིས་མི་ཁྱབ་པར་གྱུར་པ་དེ་རྣམས་མཐོང་བ་དང་། ངོ་མཚར་དུ་གྱུར་ཅིང་རྨད་དུ་བྱུང་བ་སྐྱེས་ཏེ་ཆེད་དུ་བརྗོད་པ་ཆེད་དུ་རྗོད་དེ། ཨེ་མའོ་རྒྱལ་

71-1-52a

པོ་དཔལ་གྱི་སྡེ་བསོད་ནམས་ཀྱི་སྟོབས། ཨེ་མའོ་ངོ་མཚར་ཆེའོ། །དེ་ནས་ལྷའི་དབང་པོ་བརྒྱ་བྱིན་ལྷ་བརྒྱ་སྟོང་དུ་མ་དང་ཐབས་གཅིག་ཏུ་བྱང་ཆུབ་སེམས་དཔའ་ཡང་དག་པར་དགའ་བར་བྱས་ནས་རང་གི་གནས་སུ་སོང་ངོ་། །
རི་ལ་གནས་པའི་དྲང་སྲོང་དེ་ཡང་འཁོར་ལྔ་བརྒྱ་དང་བྱང་ཆུབ་སེམས་དཔའ་ལ་མངོན་པར་བསྟོད་དེ་བསྟི་གནས་ཉིད་དུ་སོང་ངོ་། །དེ་ནས་བྱང་ཆུབ་སེམས་དཔས་སྐྱེ་བོའི་ཚོགས་ཆེན་པོས་མངོན་པར་བཏུད་ཅིང་ཡུན་རིང་དུ་ཆོས་ཀྱི་རྒྱལ་པོ་
བྱེད་པར་གྱུར་ཏོ། །འཛམ་བུའི་གླིང་གི་དམན་པ་དང་། ལོང་བ་དང་བཀྲེན་པ་དང་སྡུག་ཕོངས་པ་ཐམས་ཅད་ནོར་གྱིས་ཚིམ་པར་བྱས་ནས་དགེ་བ་བཅུའི་ལས་ཀྱི་ལམ་ལ་བཞག་སྟེ། འདོད་པ་ན་སྤྱོད་པའི་ལྷ་དྲུག་ཀུན་དགའ་བར་བྱས་ནས་
དུས་གཞན་ཞིག་གི་ཚེ་སྲོག་ཆགས་བརྒྱ་སྟོང་དུ་མ་རྣམས་དང་དེ་ལྷན་ཅིག་ཏུ་དུས་བྱས་ཏེ་དགའ་ལྡན་གྱི་ལྷའི་རིས་སུ་སྐྱེས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེའི་ཚེ་དེའི་དུས་ན་རྒྱལ་པོ་དཔལ་གྱི་སྡེ་
ཞེས་བྱ་བ་དེ་གཞན་ཞིག་ཡིན་པ་སྙམ་དུ་ཐེ་ཙོམ་འམ་ཡིད་གཉིས་སུ་གྱུར་ན་ཁྱེད་རྣམས་ཀྱིས་དེ་ལྟར་མི་བལྟའོ། །གཞན་དུ་ན་ང་ཉིད་དེའི་ཚེ་དེའི་དུས་ན་རྒྱལ་པོ་དཔལ་གྱི་སྡེ་ཞེས་བྱ་བར་གྱུར་ཏེ། དེའི་ཚེ་རང་གི་ལུས་ཡོངས་
སུ་བཏང་ངོ་། །དགེ་སློང་དག་དེའི་ཚེ་དེའི་དུས་ན་རྒྱལ་པོ་དཔལ་གྱི་སྡེའི་བཙུན་མོ་རྒྱལ་བའི་འོད་དུ་གྱུར་པ་གང་ཡིན་པ་དེ་ནི་གྲགས་འཛིན་མ་འདི་ཉིད་ཡིན་ཏེ། དེའི་ཚེ་དེའི་དུས་ན་བཙུན་མོ་རྒྱལ་བའི་འོད་ཅེས་བྱ་བར་གྱུར་ཏོ། །དགེ་
སློང་དག་བློན་པོའི་མཆོག་བློ་གྲོས་ཆེན་པོར་གྱུར་པ་གང་ཡིན་པ་དེ་ནི་དགེ་སློང་ཤཱ་རིའི་བུ་འདི་ཉིད་ཡིན་ཏེ། དེའི་ཚེ་དེའི་དུས་ན་བློན་པོ་བློ་གྲོས་ཆེན་པོར་གྱུར་ཏོ། །དགེ་སློང་དག་ལྷའི་དབང་པོ་བརྒྱ་བྱིན་དུ་གྱུར་པ་གང་ཡིན་པ་དེ་ནི་
རྒྱལ་པོ་གཟུགས་ཅན་སྙིང་པོ་འདི་ཉིད་ཡིན་ཏེ། དེའི་ཚེ་དེའི་དུས་ན་ལྷའི་དབང་པོ་བརྒྱ་བྱིན་དུ་གྱུར་ཏོ། །དགེ་སློང་དག་སུམ་བཅུ་རྩ་གསུམ་གྱི་ལྷ་གང་ཡིན་པ་དེ་རྣམས་ནི་རྒྱལ་པོ་གཟུགས་ཅན་སྙིང་པོ་དང་ལྷན་ཅིག་ཏུ་བདེན་པ་མཐོང་

71-1-52b

བ་ལྷ་བརྒྱད་ཁྲི་པོ་འདི་ཉིད་ཡིན་ནོ། །དགེ་སློང་དག་གྲོང་ཁྱེར་གྱི་སྐྱེ་བོའི་ཚོགས་གང་ཡིན་པ་དེ་ནི་རྒྱལ་པོ་གཟུགས་ཅན་སྙིང་པོ་གང་དག་དང་ཐབས་གཅིག་ཏུ་ངའི་ཐད་དུ་འོངས་པའི་མ་ག་དྷའི་བྲམ་ཟེ་དང་ཁྱིམ་བདག་འདི་དག་ཉིད་ཡིན་ནོ། །དགེ་
སློང་དག་རི་ལ་གནས་པའི་དྲང་སྲོང་དུ་གྱུར་པ་གང་ཡིན་པ་དེ་ནི་དགེ་སློང་མཽད་གལ་གྱི་བུ་ཆེན་པོ་འདི་ཉིད་ཡིན་ཏེ། དེའི་ཚེ་དེའི་དུས་ན་དྲང་སྲོང་དུ་གྱུར་ཏོ། །གང་གིས་ངའི་དྲུང་དུ་བཙུན་མོ་རྒྱལ་བའི་འོད་སློང་བའི་དྲང་སྲོང་བྲམ་ཟེའི་ཁྱེའུ་གང་ཡིན་པ་དེ་ནཱི་ཤཱཀྱའི་བུ་མོ་ས་འཚོ་མ་
འདི་ཉིད་ཡིན་ཏེ། དེའི་ཚེ་དེའི་དུས་ན་བྲམ་ཟེའི་ཁྱེའུར་གྱུར་ཏོ། །དགེ་སློང་དག་ཤིང་མཁན་གཉིས་པོར་གྱུར་པ་གང་ཡིན་པ་དེ་ནི་ལྷས་བྱིན་དང་། ཀ་ཀ་ལ་ཀ་འདི་དག་ཡིན་ཏེ། དེའི་ཚེ་དེའི་དུས་ན་ཤིང་མཁན་གཉིས་སུ་གྱུར་ཏོ། །
སྨོན་ལམ་དེའི་དབང་གིས་འདིར་དེ་བཞིན་གཤེགས་པའི་ཆོ་འཕྲུལ་རྣམ་པ་འདི་ལྟ་བུ་བྱུང་བར་གྱུར་ཏོ། །དགེ་སློང་དག་དེའི་ཕྱིར་འདི་ལྟར་བསླབ་པར་བྱ་སྟེ། གང་སྦྱིན་པ་རྣམས་བཏང་བ་དང་བསོད་ནམས་དག་བྱའོ་ཞེས་དེ་ལྟར་བསླབ་
པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །དཔལ་གྱི་སྡེའི་རྟོགས་པ་རྗོད་པ་རྫོགས་སོ།། །། རྒྱ་གར་
གྱི་མཁན་པོ་དྷརྨཱ་ཤྲི་བྷ་དྲ་དང་། ཞུ་ཆེན་གྱི་ལོ་ཙྪ་བ་དགེ་སློང་ཤེས་རབ་ལེགས་པས་བསྒྱུར། སྒྲ་སྒྱུར་གྱི་ལོ་ཙྪ་བ་ཆེན་པོ་དགེ་སློང་རིན་ཆེན་བཟང་པོས་བཅོས་ཏེ་གཏན་ལ་ཕབ་པ། །སྐར་མས་ཞུས་སོ། །
༄༅།   །རྒྱ་གར་སྐད་དུ། ཀ་ན་ཀ་བརྞ་པཱུརྦ་ཡོ་ག་ནཱ་མ། བོད་སྐད་དུ། གསེར་མདོག་གི་སྔོན་གྱི་སྦྱོར་བ་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་
པ་དུས་གཅིག་ན། བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་སོ། །བཅོམ་ལྡན་

71-1-53a

འདས་ལ་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་དང་རྒྱལ་པོ་དང་བློན་པོ་ཆེན་པོ་དང་མུ་སྟེགས་ཅན་སྣ་ཚོགས་དང་དགེ་སྦྱོང་དང་བྲམ་ཟེ་དང་སྤྱོད་པ་པ་དང་ཀུན་དུ་རྒྱུ་དང་ལྷ་དང་ཀླུ་དང་གནོད་སྦྱིན་དང་དྲི་ཟ་
དང་ལྷ་མ་ཡིན་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་རྣམས་ཀྱིས་བཀུར་སྟི་བྱས་བླ་མར་བྱས་རི་མོར་བྱས་ཤིང་མཆོད་དོ། །བཅོམ་ལྡན་འདས་ཀྱིས་ཆོས་གོས་དང་ཞལ་ཟས་དང་གཟིམས་ཆ་དང་སྙུན་གྱི་རྐྱེན་
སྨན་དང་ལྷ་དང་མི་རྣམས་ཀྱི་ཡོ་བྱད་དམ་པ་རབ་ཏུ་མང་པོ་ཡང་བརྙེས་ཏེ། དེ་དག་ལ་བཅོམ་ལྡན་འདས་རྗེས་སུ་ཆགས་པ་ཡང་མི་མངའ་སྟེ། པད་མ་ལ་ཆུ་མི་ཆགས་པ་དེ་བཞིན་ནོ། །བཅོམ་ལྡན་འདས་ཀྱི་རང་བཞིན་
ནི་འདི་ལྟ་སྟེ། རྒྱ་ཆེ་ཞིང་དགེ་ལ་གྲགས་པ་དང་སྒྲ་དང་ཚིགས་སུ་བཅད་པས་མངོན་པར་འཕགས་པ་སྟེ། འདི་ལྟར་བཅོམ་ལྡན་འདས་དེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
རིག་པ་དང་ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དེ། ལྷ་དང་བཅས་པའི་འཇིག་
རྟེན་དང་བདུད་དང་བཅས་པ་དང་ཚངས་པ་དང་བཅས་དགེ་སྦྱོང་དང་བྲམ་ཟེར་བཅས་པ་དང་ལྷ་དང་མིར་བཅས་པ་འདི་རྣམས་རང་གི་མངོན་པར་མཁྱེན་པས་མངོན་སུམ་དུ་མཁྱེན་པར་མཛད་ནས་དམ་པའི་ཆོས་སྟོན་ཏེ། ཐོག་
མར་དགེ་བ་བར་དུ་དགེ་བ་ཐ་མར་དགེ་བ་དོན་བཟང་པོ་ཚིག་འབྲུ་བཟང་པོ་མ་འདྲེས་པ་ཡོངས་སུ་རྫོགས་པ་ཡོངས་སུ་དག་པ་རྣམ་པར་བྱང་བ་ཚངས་པར་སྤྱོད་པ་ཡང་དག་པར་རབ་ཏུ་སྟོན་ཏོ། །དེ་ནས་བཅོམ་ལྡན་འདས་
ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཇི་ལྟར་ངས་སྦྱིན་པའི་འབྲས་བུ་དང་སྦྱིན་པ་ལ་འགོད་པའི་རྣམ་པར་སྨིན་པ་ཤེས་པ་ལྟར། སེམས་ཅན་རྣམས་ཀྱིས་ཀྱང་སྦྱིན་པའི་འབྲས་བུ་དང་སྦྱིན་པ་

71-1-53b

ལ་འགོད་པའི་རྣམ་པར་སྨིན་པ་ཤེས་པར་གྱིས་ཤིག །གང་འདི་ཁམ་ཕྱི་མའི་ཁམ་ཕྱི་མ་གཅིག་པོ་དེ་ཡང་། གཞན་དག་ལ་མ་བྱིན་མ་བགོས་པར་བདག་གིས་མི་བཟའ་བར་གྱིས་ཤིག །སེར་སྣའི་སེམས་ཀྱི་དྲི་མ་སྐྱེས་པས་
ཀུན་ནས་བཀྲིས་ཏེ་མ་འདུག་ཅིག །དགེ་སློང་དག་གང་གི་ཕྱིར་ཇི་ལྟར་ངས་སྦྱིན་པའི་འབྲས་བུ་དང་། སྦྱིན་པ་ལ་འགོད་པའི་རྣམ་པར་སྨིན་པ་ཤེས་པ་ལྟར། སེམས་ཅན་རྣམས་ནི་སྦྱིན་པའི་འབྲས་བུ་དང་སྦྱིན་པ་ལ་འགོད་པའི་
རྣམ་པར་སྨིན་པ་མི་ཤེས་ཏེ། དེ་ལྟ་བས་ན་སེམས་ཅན་རྣམས་གང་འདི་ཁམ་ཕྱི་མའི་ཁམ་ཕྱི་མ་གཅིག་པོ་དེ་ཡང་། གཞན་དག་ལ་མ་བྱིན་མ་བགོས་པར་བདག་ཉིད་ཟ་བར་བྱེད། སེར་སྣའི་སེམས་ཀྱི་དྲི་མ་སྐྱེས་པས་
ཀུན་ནས་དཀྲིས་ཏེ་འདུག་གོ། །དེ་ཅིའི་ཕྱིར་ཞེ་ན། དགེ་སློང་དག་སྔོན་བྱུང་བ་འདས་པའི་དུས་ན། རྒྱལ་པོ་གསེར་མདོག་ཅེས་བྱ་བ། གཟུགས་བཟང་བ་མཛེས་པ་བལྟ་ན་སྡུག་པ་ཁ་དོག་བཟང་བ་རྒྱས་པ་མཆོག་དང་ལྡན་པ་ཞིག་
བྱུང་ངོ་། །རྒྱལ་པོ་གསེར་མདོག་དེ་ཕྱུག་སྟེ་ནོར་མང་ལ་ལོངས་སྤྱོད་ཆེ་ཞིང་བདག་དབང་བ་མང་བ་དང་དབྱིག་དང་ཡོ་བྱད་མང་བ་དང་ནོར་དང་འབྲུ་དང་ནོར་བུ་དང་མུ་ཏིག་དང་མན་ཤེལ་དང་བྱི་རུ་མང་བ་དང་གསེར་དང་དངུལ་མང་བ་དང་གླང་པོ་
ཆེ་དང་རྟ་དང་བ་ལང་དང་རྟ་རྒོད་མ་མང་བ་དང་མཛོད་དང་བང་བ་ཡོངས་སུ་གང་བ་ཞིག་བྱུང་ངོ་། །རྒྱལ་པོ་གསེར་མདོག་གི་ཕོ་བྲང་གྲོང་ཁྱེར་གསེར་ཅན་ཞེས་བྱ་བར་བཏགས་ཏེ། ཆུར་ནི་ཤར་ནས་ནུབ་ཏུ་དཔག་ཚད་བཅུ་གཉིས་
ཡོད་དོ། །ཞེང་ནི་ལྷོ་ནས་བྱང་དུ་དཔག་ཚད་བདུན་ཡོད་དེ། འབྱོར་པ་དང་རྒྱས་པ་དང་བདེ་བ་དང་ལོ་ལེགས་པ་དང་ཉམས་དགའ་ཞིང་སྐྱེ་བོ་དང་མི་མང་པོ་རྣམས་ཀྱིས་གང་ངོ་། །རྒྱལ་པོ་གསེར་མདོག་ལ་གྲོང་ཁྱེར་
བརྒྱད་ཁྲི་ཡོད་དེ། འབྱོར་པ་དང་རྒྱས་པ་དང་བདེ་བ་དང་ལོ་ལེགས་པ་དང་ཉམས་དགའ་ཞིང་སྐྱེ་བོ་མང་པོ་དང་མི་མང་པོ་རྣམས་ཀྱིས་གང་ངོ་། །གྲོང་ས་ཡ་ཕྲག་ལྔ་བདུན་འབུམ་ཡོད་དེ། འབྱོར་པ་དང་རྒྱས་པ་དང་

71-1-54a

བདེ་བ་དང་ལོ་ལེགས་པ་དང་ཉམས་དགའ་ཞིང་སྐྱེ་བོ་དང་མི་མང་པོ་རྣམས་ཀྱིས་གང་ངོ་། །རི་འོར་བ་དྲུག་ཁྲི་ཡོད་དེ། འབྱོར་པ་དང་རྒྱས་པ་དང་བདེ་བ་དང་ལོ་ལེགས་པ་དང་ཉམས་དགའ་ཞིང་སྐྱེ་བོ་དང་མི་མང་པོ་
རྣམས་ཀྱིས་གང་ངོ་། །རྒྱལ་པོ་གསེར་མདོག་གི་བློན་པོ་ཁྲི་བརྒྱད་སྟོང་ཡོད་དོ། །བུད་མེད་སླས་ཉི་ཁྲི་ཡོད་པར་གྱུར་ཏོ། །དེ་ནས་རྒྱལ་པོ་གསེར་མདོག་ཆོས་དང་ལྡན་པའི་ཆོས་ཀྱི་རྒྱལ་པོའི་ཆོས་ཀྱིས་རྒྱལ་སྲིད་བྱེད་པར་
གྱུར་ཏོ། །རྒྱལ་པོ་གསེར་མདོག་ཐམས་ཅད་སྦྱིན་པར་བྱེད་དེ། དེས་ཐ་ན་རང་གི་ལུས་ཀྱི་ཤ་མན་ཆད་ཡོངས་སུ་མི་གཏོང་བ་ཅི་ཡང་མེད་དོ། །དེའི་དུས་ན་མི་རྣམས་ཀྱི་ཚེའི་ཚད་ལོ་བརྒྱད་ཁྲི་བཞི་སྟོང་ཐུབ་པར་གྱུར་ཏོ། །དེའི་
ཚེ་དུས་གཞན་ཞིག་ན། རྒྱལ་པོ་གསེར་མདོག་གཅིག་པུ་དབེན་པར་ནང་དུ་ཡང་དག་འཇོག་ལ་ཞུགས་ནས། སེམས་ཀྱིས་སེམས་ཀྱི་ཡོངས་སུ་རྟོག་པ་འདི་སྙམ་དུ་སྐྱེས་ཏེ། གང་བདག་གིས་ངེས་པར་ཚོང་པ་ཐམས་ཅད་
ལ་ནི། ལ་གཅན་དང་ཤོ་གམ་རྣམས་མི་དབབ་པར་བྱའོ། །འཛམ་བུའི་གླིང་གི་མི་ཐམས་ཅད་ལ་ནི་དཔྱ་དང་སྒྱུ་རྣམས་མི་དབབ་པར་བྱའོ་སྙམ་མོ། །དེ་ནས་རྒྱལ་པོ་གསེར་མདོག་གིས། རྩིས་པ་དང་སྣ་ཆེན་པོ་
ལ་གཏོགས་པ་དང་བློན་པོ་དང་སྒོ་བ་དང་འཁོར་རྣམས་བོས་ཏེ། འདི་སྐད་ཅེས་སྨྲས་སོ། །དེང་ཕྱིན་ཅད་གྲོང་མི་དང་ཚོང་པ་ཐམས་ཅད་ལ་ལ་གཅན་དང་ཤོ་གམ་རྣམས་མི་དབབ་པར་བྱའོ། །འཛམ་བུའི་གླིང་གི་མི་
ཐམས་ཅད་ལ་དཔྱ་དང་སྒྱུ་རྣམས་མི་དབབ་པར་བྱའོ་ཞེས་བསྒོའོ། །དེའི་ཐབས་འདིས་ལོ་མང་པོ་ཞིག་ཏུ་རྒྱལ་སྲིད་བྱེད་པ་ན། དུས་གཞན་ཞིག་གི་ཚེ་ལོ་བཅུ་གཉིས་ཀྱི་བར་དུ་ཆར་མི་འབབ་པའི་རྒྱུ་སྐར་ངན་པ་ཞིག་བྱུང་བར་གྱུར་ཏོ། །
དེའི་ཚེ་བྲམ་ཟེ་མཚན་ཉིད་འདོན་པ་དང་ལྟས་པ་དང་མོ་བ་རྣམས་ས་དང་བར་སྣང་གི་རྒྱུ་སྐར་དང་གཟའ་དང་པ་བ་སངས་རྒྱུ་བ་དག་ཐམས་ཅད་ཀྱི་མཚན་ཉིད་ཤེས་པར་བྱས་ནས། རྒྱལ་པོ་གསེར་མདོག་ག་ལ་བ་དེར་སོང་སྟེ་ཕྱིན་ནས་

71-1-54b

རྒྱལ་པོ་གསེར་མདོག་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛོད་ཅིག །དགུང་ལོ་བཅུ་གཉིས་ཀྱི་བར་དུ་ཆར་མི་འབབ་པའི་རྒྱུ་སྐར་ངན་པ་དེ་བྱུང་བར་གྱུར་ཏོ། །དེ་ནས་རྒྱལ་པོ་གསེར་མདོག་དངོས་པོ་བསྒྲགས་པ་དེ་ཐོས་
ནས། རབ་ཏུ་ངུས་ཏེ་མཆི་མ་ཕྱུང་ནས་ཨེ་མའོ་ངའི་འཛམ་བུའི་གླིང་གི་མི་རྣམས། ཨེ་མའོ་ཨེ་མའོ། །ངའི་འཛམ་བུའི་གླིང་གི་མི་རྣམས་ཨེ་མའོ་ཨེ་མའོ། །ངའི་འཛམ་བུའི་གླིང་འབྱོར་པ་དང་། རྒྱས་པ་དང་བདེ་
བ་དང་། ལོ་ལེགས་པ་དང་ཉམས་དགའ་ཞིང་སྐྱེ་བོ་དང་མི་མང་པོས་གང་བ་རྣམས་རིང་པོར་མི་ཐོགས་པ་ཉིད་ཏུ་སྟོང་ཞིང་མི་དང་འབྲལ་བར་འགྱུར་རོ། །དེ་ནས་རྒྱལ་པོ་གསེར་མདོག་ཡུད་ཙམ་ཞིག་མྱ་ངན་དང་སྨྲེ་སྔགས་འདོན་པ་
སངས་ནས། འདི་སྙམ་དུ་གྱུར་ཏེ། གང་འདི་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་དེ་དག་ནི་འཚོ་བར་ནུས་ཀྱི། གང་འདི་དབུལ་ཞིང་ནོར་ཉུང་ལ་བཟའ་བཏུང་དང་། ལོངས་སྤྱོད་ཆུང་བ་དེ་དག་ནི། ཅི་ལྟར་བྱེད་ཅིག་གུ། དེ་
འདི་སྙམ་དུ་གྱུར་ཏེ། བདག་གིས་ངེས་པར་འཛམ་བུའི་གླིང་གི་ཟས་ལ་སོགས་པ་ཐམས་ཅད་བསྡུ་བར་བྱའོ། །ཟས་ལ་སོགས་པ་བསྡུས་ཏེ། གྲོང་དང་གྲོང་ཁྱེར་དང་། གྲོང་རྡལ་དང་། རྒྱལ་པོའི་ཕོ་བྲང་འཁོར་
ཐམས་ཅད་ཏུ་བང་བ་གཅིག་བརྩིག་པར་བྱའོ། །བང་བ་གཅིག་བརྩིགས་ཏེ། འཛམ་བུའི་གླིང་གི་མི་ཐམས་ཅད་བཟའ་བ་མཉམ་པར་བགོ་བར་བྱའོ་སྙམ་མོ། །དེ་ནས་རྒྱལ་པོ་གསེར་མདོག་གིས། རྩིས་པ་དང་སྣ་ཆེན་
པོ་ལ་གཏོགས་པ་དང་བློན་པོ་དང་སྒོ་བ་དང་འཁོར་རྣམས་བོས་ཏེ། འདི་སྐད་ཅེས་སྨྲས་སོ། །གྲོང་གི་གཙོ་བོ་དག་ཁྱེད་རྣམས་དེང་ལ་འཛམ་བུའི་གླིང་གི་ཟས་ལ་སོགས་པ་ཐམས་ཅད་སྡུས་ཤིག །ཟས་ལ་སོགས་པ་བསྡུས་
ཏེ། གཅོལ་ལ་གྲོངས་ཤིག །གཅལ་ཏེ་བགྲངས་ནས། གྲོང་དང་གྲོང་ཁྱེར་དང་གྲོང་རྡལ་དང་རྒྱལ་པོའི་ཕོ་བྲང་འཁོར་ཐམས་ཅད་ཏུ་བང་བ་བཟང་པོ་གཅིག་བརྩིགས་ཤིག་ཅེས་བསྒོའོ། །དེ་ནས་རྩིས་པ་དང་སྣ་ཆེན་པོ་

71-1-55a

ལ་གཏོགས་པ་དང་བློན་པོ་དང་སྒོ་བ་དང་འཁོར་རྣམས་ཀྱིས་རྒྱལ་པོ་གསེར་མདོག་གི་ལྟར་མཉན་ནས། འཛམ་བུའི་གླིང་གི་ཟས་ལ་སོགས་པ་ཐམས་ཅད་བསྡུས་སོ། །ཟས་ལ་སོགས་པ་བསྡུས་ནས། གཅལ་
བགྲངས་ཏེ། གྲོང་དང་གྲོང་ཁྱེར་དང་གྲོང་རྡལ་དང་རྒྱལ་པོའི་ཕོ་བྲང་འཁོར་རྣམས་སུ་བང་བ་གཅིག་བྱས་ནས་བླུགས་སོ། །བང་བ་གཅིག་བྱས་ནས་བླུགས་ཏེ། རྒྱལ་པོ་གསེར་མདོག་ག་ལ་བ་དེར་སོང་སྟེ་ཕྱིན་ནས། རྒྱལ་པོ་གསེར་
མདོག་ལ་འདི་སྐད་ཅེས་སྨྲས་སོ། །ལྷ་མཁྱེན་པར་མཛོད་ཅིག །གྲོང་དང་གྲོང་ཁྱེར་དང་གྲོང་རྡལ་དང་རྒྱལ་པོའི་ཕོ་བྲང་འཁོར་ཐམས་ཅད་ཀྱི་ཟས་ལ་སོགས་པ་བསྡུས་སོ། །བསྡུས་ནས་ཀྱང་བཅལ་ཞིང་བགྲངས་ལགས་སོ། །
གཅལ་ཞིང་བགྲངས་ནས། གྲོང་དང་གྲོང་ཁྱེར་དང་གྲོང་རྡལ་དང་། རྒྱལ་པོའི་ཕོ་བྲང་འཁོར་ཐམས་ཅད་དུ་བང་བ་བགྱིས་ནས་སྩལ་ལགས་ཀྱིས། ཁྱོད་གང་གི་དུས་ཉིད་དགོངས་སམ། དེ་ནས་རྒྱལ་པོ་གསེར་མདོག་གིས་གྲངས་
པ་དང་། རྩིས་པ་དང་ཡི་གེ་པའི་མི་རྣམས་བོས་ནས་འདི་སྐད་ཅེས་སྨྲས་སོ། །གྲོང་གི་གཙོ་བོ་དག་ཁྱེད་རྣམས་དེང་ལ། འཛམ་བུའི་གླིང་གི་མི་ཐམས་ཅད་གྲོངས་ཤིག །ང་མན་ཆད་ལེགས་པར་གྲོངས་ལ། འཛམ་བུའི་གླིང་གི་
མི་ཐམས་ཅད་ཀྱི་བཟའ་བ་ལེགས་པར་མཉམ་པར་བགོ་བར་གྱིས་ཤིག །གྲངས་པ་དང་རྩིས་པ་དང་ཡི་གེ་པའི་མི་རྣམས་ཀྱིས། རྒྱལ་པོ་གསེར་མདོག་གི་ལྟར་མཉན་ནས། འཛམ་བུའི་གླིང་གི་མི་ཐམས་ཅད་ལེགས་པར་
བགྲངས་སོ། །རྒྱལ་པོ་གསེར་མདོག་མན་ཆད་ལེགས་པར་བགྲངས་ནས། འཛམ་བུའི་གླིང་གི་མི་ཐམས་ཅད་ལ་བཟའ་བ་མཉམ་པར་འགེད་དོ། །ལོ་བཅུ་གཅིག་གི་བར་དུ་ནི་ཤི་བ་མེད་དོ། །ལོ་བཅུ་གཉིས་པ་བྱུང་བའི་ཚེ་ཟླ་
བ་གཅིག་ལ། དེར་མང་དུ་སྐྱེས་པ་དང་བུད་མེད་དང་ཁྱེའུ་དང་བུ་མོ་རྣམས་བཀྲེས་པ་དང་སྐོམ་པས་ཤིའོ། །ལོ་བཅུ་གཉིས་པ་བྱུང་བའི་ཚེ། ཟླ་བ་ལྷག་མ་གཉིས་དང་གསུམ་དང་བཞི་དང་ལྔ་དང་བཅུ་གཅིག་གི་བར་དུ་དེར་མང་དུ་སྐྱེས་

71-1-55b

པ་དང་བུད་མེད་དང་ཁྱེའུ་དང་བུ་མོ་རྣམས་ཤི་བར་གྱུར་ཏོ། །དེའི་ཚེ་ན་འཛམ་བུའི་གླིང་གི་ཟས་ལ་སོགས་པ་ཐམས་ཅད་ཡོངས་སུ་ཟད་དེ། །གཞན་དུ་ན་རྒྱལ་པོ་གསེར་མདོག་ལ་ཟས་ཀྱི་ལྷག་མ་བྲེའུ་ཆུང་གང་ཞིག་ཡོད་དོ། །དེའི་ཚེ་དུས་
གཞན་ཞིག་ན། བསྐལ་པ་བཞི་བཅུར་སྤྱད་པའི་བྱང་ཆུབ་སེམས་དཔའ་ཞིག །མི་མཇེད་ཀྱི་འཇིག་རྟེན་གྱི་ཁམས་འདིར་ཕྱིན་པར་གྱུར་ཏོ། །བྱང་ཆུབ་སེམས་དཔའ་དེས་གཞན་ཞིག་ཏུ། ནགས་ཁྲོད་ཞིག་ན། བུ་དང་མ་
གཉིས་ཉལ་པོ་བྱེད་པ་ཞིག་མཐོང་ངོ་། །མཐོང་ནས་ཀྱང་འདི་སྙམ་དུ་གྱུར་ཏེ། ཨེ་མའོ་ཉོན་མོངས་སོ། །སེམས་ཅན་འདི་དག་ནི་ཉོན་མོངས་སོ། །གང་གི་ཚེ་ཟླ་བ་དགུ་རུམ་དེ་ཉིད་ཏུ་གནས་ལ། དེ་ཉིད་ཀྱི་ནུ་མ་ལ་
འཐུངས་ནས། དེ་ཉིད་ཏུ་དེ་ལྟར་བྱེད། འདི་འདྲ་བའི་སེམས་ཅན་ཆོས་མ་ཡིན་པའི་འདོད་ཆགས་ཀྱིས་ཞེན་པ། ལོག་པར་ལྟ་བ་འདོད་པ་མི་བཟད་པས་ཟིལ་གྱིས་ནོན་པ། ཕར་མི་འཛིན་པ་མར་མི་འཛིན་པ་དགེ་སྦྱོང་དུ་མི་འཛིན་པ་
བྲམ་ཟེར་མི་འཛིན་པ་རིགས་ཀྱི་རྒན་རབས་ལ་བཀུར་སྟི་མི་བྱེད་པ་རྣམས་ཀྱིས་བདག་ཆོག་སྟེ། འདི་འདྲ་བའི་སེམས་ཅན་རྣམས་ཀྱི་དོན། བྱང་ཆུབ་ཀྱི་སྤྱོད་པ་སྤྱད་པར་སུ་ཞིག་སྤྲོ། བདག་ནི་ངེས་པར་བདག་གཅིག་པུའི་དོན་
བསྒྲུབ་པོ་སྙམ་མོ། །དེ་ནས་བྱང་ཆུབ་སེམས་དཔའ་དེ་གཞན་དུ་ཤིང་ལྗོན་པའི་དྲུང་ག་ན་བ་དེར་སོང་སྟེ་ཕྱིན་ནས། ཤིང་ལྗོན་པའི་དྲུང་དེར་སྐྱིལ་མོ་དཀྲུང་བཅས་ནས་ལུས་བསྲང་སྟེ། དགའ་བ་དང་བདེ་བ་དང་དྲན་པ་མངོན་དུ་
བཞག་ནས་འདུག་གོ། །དེ་ནས་བྱང་ཆུབ་སེམས་དཔའ་དེ་ཉེ་བར་ལེན་པའི་ཕུང་པོ་ལྔ་རྣམས་ལ། སྐྱེ་བ་དང་འཇིག་པར་རྗེས་སུ་ལྟ་ཞིང་གནས་ཏེ། འདི་ནི་གཟུགས་ཏེ། གཟུགས་འདི་ནི་སྐྱེ་བའོ། །གཟུགས་འདི་ནི་
འཇིག་པའོ། །འདི་ནི་ཚོར་བ། འདི་ནི་འདུ་ཤེས། འདི་ནི་འདུ་བྱེད། འདི་ནི་རྣམ་པར་ཤེས་པ་སྟེ། རྣམ་པར་ཤེས་པ་འདི་ནི་སྐྱེ་བའོ། །རྣམ་པར་ཤེས་པ་འདི་ནི་འཇིག་པའོ་ཞེས། དེ་ཉེ་བར་ལེན་པའི་ཕུང་པོ་ལྔ་པོ་འདི་རྣམས་ལ་སྐྱེ་

71-1-56a

བ་དང་འཇིག་པར་རྗེས་སུ་ལྟ་ཞིང་གནས་སོ། །གང་ཅུང་ཟད་སྐྱེ་བའི་ཆོས་དེ་ཐམས་ཅད་ནི། ཡུན་མི་རིང་བ་ཉིད་ཏུ་འགག་པའི་ཆོས་ཡིན་ནོ་ཞེས་བྱ་བར་རིག་ནས། དེ་ཉིད་ཏུ་རང་བྱང་ཆུབ་རྗེས་སུ་ཐོབ་བོ། །དེ་ནས་བཅོམ་
ལྡན་འདས་རང་སངས་རྒྱས་དེའི་རྐྱེན་ཇི་ལྟ་བ་བཞིན་གྱིས། ཆོས་ཐོབ་པ་མཐོང་ནས། དེའི་ཚེ་ཚིགས་སུ་བཅད་པ་འདི་དག་སྨྲས་པ། ཡང་དག་བསྙེན་ནས་ཆགས་གྱུར་ལ། །ཆགས་ལས་སྡུག་བསྔལ་འདི་བྱུང་སྟེ། །ཆགས་
ལ་སྡུག་བསྔལ་འདི་འཇུག་པས། །དེ་ཕྱིར་མཁས་པས་ཆགས་སུན་ཕྱུང་། །བསེ་རུ་ལྟ་བུར་གཅིག་པུ་སྤྱད། །དེ་ནས་བཅོམ་ལྡན་འདས་རང་སངས་རྒྱས་དེ་འདི་སྙམ་དུ་གྱུར་ཏེ། བདག་གིས་སེམས་ཅན་རྣམས་ཀྱི་ཕྱིར་
དཀའ་བ་མང་ཞིག་སྤྱད་པས་ན་སུ་ལ་ཡང་ཕན་པ་བྱས་པ་མ་ཡིན་ཏེ། བདག་གིས་དེང་སུ་ཞིག་ལ་སྙིང་བརྩེ་བར་བྱ་ཞིང་། བདག་གིས་དེང་སུ་ཞིག་ལ་བསོད་སྙོམས་བླངས་ཏེ། ཡོངས་སུ་བཟའ་བར་བྱ་སྙམ་མོ། །དེ་ནས་བཅོམ་
ལྡན་འདས་རང་སངས་རྒྱས་དེ་མི་ལས་ཤིན་དུ་འདས་པའི་ལྷའི་སྤྱན་གྱིས་འཛམ་བུའི་གླིང་འདི་ཀུན་དུ་བལྟས་པ་དང་། བཅོམ་ལྡན་འདས་རང་སངས་རྒྱས་དེས་འཛམ་བུའི་གླིང་གི་ཟས་ལ་སོགས་པ་ཡོངས་སུ་ཟད་པར་མཐོང་སྟེ། 
གཞན་དུ་རྒྱལ་པོ་གསེར་མདོག་ལ་ཟས་ཀྱི་ལྷག་མ་བྲེའུ་ཆུང་གང་ཞིག་ཡོད་དོ། །དེ་འདི་སྙམ་དུ་གྱུར་ཏེ། བདག་གིས་ངེས་པར་རྒྱལ་པོ་གསེར་མདོག་ལ་སྙིང་བརྩེ་བར་བྱ་ཞིང་། བདག་གིས་ངེས་པར་རྒྱལ་པོ་གསེར་མདོག་
ལ་ཟས་ཀྱི་ལྷག་མ་བྲེའུ་ཆུང་གང་ཞིག་ཡོད་པ་ལས་བླངས་ཏེ་ཡོངས་སུ་བཟའ་བར་བྱའོ་སྙམ་མོ། །དེ་ནས་བཅོམ་ལྡན་འདས་རང་སངས་རྒྱས་དེ། དེའི་རྫུ་འཕྲུལ་འདི་ལྟ་བུས་ནམ་མཁའ་ལ་མངོན་སུམ་དུ་སོང་སྟེ། ལུས་
སྣང་བར་བྱ་བཞིན་དུ་རྫུ་འཕྲུལ་གྱིས། རྒྱལ་པོའི་ཕོ་བྲང་གསེར་ཅན་གང་ན་བ་དེར་སོང་ངོ་། །དེའི་ཚེ་རྒྱལ་པོ་གསེར་མདོག་བློན་པོ་ལྔ་སྟོང་ཙམ་དང་། ཁང་བཟངས་ཀྱི་སྟེང་ན་འཁོད་པར་གྱུར་ཏོ། །བཅོམ་ལྡན་འདས་རང་

71-1-56b

སངས་རྒྱས་དེ། རྒྱང་རིང་པོ་ནས་འདི་ལྟར་འོང་བ་ན། སྣ་ཆེན་པོ་ལ་གཏོགས་པ་གཅིག་གིས་མཐོང་ངོ་། །མཐོང་ནས་སྣ་ཆེན་པོ་ལ་གཏོགས་པ་དག་བོས་ནས། གྲོང་གི་གཙོ་བོ་དག་ལྟོས་ཤིག །འདི་ལྟར་རྒྱང་རིང་པོ་ནས་བྱ་དམར་པོ་
འཕུར་བ་ཞིག་འོང་ངོ་། །སྣ་ཆེན་པོ་ལ་གཏོགས་པ་གཉིས་པས་སྨྲས་པ། གྲོང་གི་གཙོ་བོ་དག་འདི་ནི་བྱ་དམར་པོ་འཕུར་བ་མ་ཡིན་གྱི། འདི་ནི་སྲིན་པོ་མདངས་འཕྲོག་པ་ཞིག་འོང་སྟེ། འདིས་ནི་དེང་བདག་ཅག་ཟོས་པར་འགྱུར་རོ། །
དེ་ནས་རྒྱལ་པོ་གསེར་མདོག་ལག་པ་གཉིས་ཀས་བཞིན་ལེགས་པར་ཕྱིས་ཏེ། སྣ་ཆེན་པོ་རྣམས་ལ་སྨྲས་པ། གྲོང་གི་གཙོ་བོ་དག་འདི་ནི་བྱ་དམར་པོ་འཕུར་བ་མ་ཡིན་ལ། སྲིན་པོ་མདངས་འཕྲོག་པ་ཡང་མ་ཡིན་ནོ། །འདི་ནི་དྲང་སྲོང་སྟེ། 
བདག་ཅག་ལ་སྙིང་བརྩེ་བའི་ཕྱིར་འོང་ངོ་། །དེ་ནས་བཅོམ་ལྡན་འདས་རང་སངས་རྒྱས་དེ། རྒྱལ་པོ་གསེར་མདོག་གི་ཁང་བཟངས་ཀྱི་སྟེང་དུ་བབས་སོ། །དེ་ནས་རྒྱལ་པོ་གསེར་མདོག་ལངས་ནས་བཅོམ་ལྡན་འདས་རང་སངས་རྒྱས་
དེ་བསུས་ནས། བཅོམ་ལྡན་འདས་རང་སངས་རྒྱས་དེའི་ཞབས་ལ་མགོ་བོས་ཕྱག་འཚལ་ཏེ། སྟན་བཤམས་པ་ལ་བཞུགས་པར་གསོལ་ཏོ། །དེ་ནས་རྒྱལ་པོ་གསེར་མདོག་གིས། བཅོམ་ལྡན་འདས་རང་སངས་རྒྱས་དེ་ལ་འདི་
སྐད་ཅེས་སྨྲས་སོ། །དྲང་སྲོང་ཅིའི་ཕྱིར་འདིར་བྱོན། དྲང་སྲོང་གིས་སྨྲས་པ། རྒྱལ་པོ་ཆེན་པོ་ཟས་ཀྱི་ཕྱིར་རོ། །དེ་ནས་རྒྱལ་པོ་གསེར་མདོག་རབ་ཏུ་ངུས་ཏེ་མཆི་མ་ཕྱུང་ནས། ཨེ་མའོ་བདག་དབུལ་ཏེ་འདི་ལྟར་འཛམ་བུའི་གླིང་གི་དབང་ཕྱུག་དམ་
པ་བྱས་ཀྱིས་ཀྱང་དྲང་སྲོང་གཅིག་ལ་བསོད་སྙོམས་དབུལ་བར་མ་ནུས་སོ། །དེ་ནས་རྒྱལ་པོའི་ཕོ་བྲང་གསེར་ཅན་ན་གནས་པའི་ལྷ་དེས། རྒྱལ་པོ་གསེར་མདོག་ལ་ཚིགས་སུ་བཅད་དེ་སྨྲས་པ། ཅི་ཞིག་སྡུག་བསྔལ་ཡིན་ཞེ་ན་ནི་དབུལ་བ་
འོ། །ཤིན་དུ་སྡུག་བསྔལ་གང་ཡིན་དབུལ་བ་དེ་ཉིད་དེ། །དབུལ་བ་དག་ནི་ནང་ན་ཤི་དང་མཚུངས་པར་གྱུར་པ་སྟེ། །བདག་ནི་ཤི་ཡང་སླའི་དབུལ་བ་མི་འདོད་དོ། །དེ་ནས་རྒྱལ་པོ་གསེར་མདོག་གིས་མཛོད་པ་བོས་ནས། འདི་སྐད་ཅེས་སྨྲས་སོ། །གྲོང་གི་

71-1-57a

གཙོ་བོ་ཁྱིམ་ན་བཟའ་བ་ཅུང་ཟད་ཡོད་ན་དྲང་སྲོང་འདི་ལ་དབུལ་བར་བྱའོ། །དེས་སྨྲས་པ། གང་ལྷ་ཉིད་མཁྱེན་པ་ལགས་ཏེ། འཛམ་བུའི་གླིང་གི་ཟས་ལ་སོགས་པ་ཐམས་ཅད་ཡོངས་སུ་བས་སོ། །གཞན་དུ་ན་ལྷ་ཉག་
གཅིག་བཤོས་ཀྱི་ལྷག་མ་བྲེའུ་ཆུང་གང་ཞིག་མཆིས་སོ། །དེ་ནས་རྒྱལ་པོ་གསེར་མདོག་འདི་སྙམ་དུ་གྱུར་ཏེ། གལ་ཏེ་ཟོས་ན་ནི་འཚོ་ཅི་སྟེ་མ་ཟོས་ན་ནི་འཆིའོ་སྙམ་མོ། །དེ་ཡང་འདི་སྙམ་དུ་གྱུར་ཏེ། གལ་ཏེ་ཟོས་ཀྱང་ངེས་པར་བདག་
འཆི་བར་འགྱུར་ཏེ། འཚོ་བས་ཆོག་གིས་ཇི་ལྟར་ན་འདི་འདྲ་བའི་དྲང་སྲོང་ཚུལ་ཁྲིམས་དང་ལྡན་པ་དགེ་བའི་ཆོས་ཅན་དེ། དེ་ནས་རྒྱལ་པོ་གསེར་མདོག་གིས་རྩིས་པ་དང་སྣ་ཆེན་པོ་ལ་གཏོགས་པ་དང་སྒོ་བ་དང་འཁོར་རྣམས་བསྡུས་
ནས་འདི་སྐད་ཅེས་སྨྲས་སོ། །གྲོང་གི་གཙོ་བོ་དག་ཀྱི་ཧུད། འདི་ནི་གསེར་མདོག་གི་སྦྱིན་པ་གཏོང་བ་ཐ་མ་ཡིན་ཏེ། རྗེས་སུ་ཡི་རང་བར་གྱིས་ཤིག །དགེ་བའི་རྩ་བ་འདིས་འཛམ་བུའི་གླིང་གི་མི་ཐམས་ཅད་ཀྱི་དབུལ་བ་ཡང་དག་
པར་གཅོད་པར་གྱུར་ཅིག །དེ་ནས་རྒྱལ་པོ་གསེར་མདོག་གིས་ཟས་བྲེའུ་ཆུང་གང་ཡོད་པ་དེ། བཅོམ་ལྡན་འདས་རང་སངས་རྒྱས་དེའི་ལྷུང་བཟེད་ཏུ་བླུགས་ནས། བཅོམ་ལྡན་འདས་རང་སངས་རྒྱས་དེའི་ལག་པ་གཡས་པར་
ལྷུང་བཟེད་བྱིན་ནོ། །གང་རང་སངས་རྒྱས་ཀྱི་ལུས་ཀྱིས་ཆོས་སྟོན་པ་ནི་ཆོས་ཉིད་དེ་ཚིག་གིས་ནི་མ་ཡིན་ནོ། །དེ་ནས་བཅོམ་ལྡན་འདས་རང་སངས་རྒྱས་དེ་རྒྱལ་པོ་གསེར་མདོག་གི་བསོད་སྙོམས་བླངས་ནས། འདི་ལྟར་
རྫུ་འཕྲུལ་གྱིས་ནམ་མཁའ་ལ་སོང་ངོ་། །དེ་ནས་རྒྱལ་པོ་གསེར་མདོག་ཐལ་མོ་སྦྱར་ནས། མིག་རྒྱང་གིས་སོད་དག་གི་བར་དུ་མིག་མི་འཛུམས་པར་བལྟས་སོ། །དེ་ནས་རྒྱལ་པོ་གསེར་མདོག་གིས། རྩིས་པ་དང་སྣ་ཆེན་པོ་
ལ་གཏོགས་པ་དང་བློན་པོ་དང་སྒོ་བ་དང་འཁོར་རྣམས་བོས་ནས་འདི་སྐད་ཅེས་སྨྲས་སོ། །གྲོང་གི་གཙོ་བོ་དག་རང་རང་གི་གནས་ཇི་ལྟ་བ་བཞིན་དེང་ཤིག །ཁང་བཟངས་འདིར་བཀྲེས་པ་དང་སྐོམ་པས་འཆི་བའི་དུས་མ་བྱེད་ཅིག །

71-1-57b

དེ་དག་གིས་སྨྲས་པ། གང་གི་ཚེ་ལྷའི་དཔལ་དང་སྐུ་སྐལ་དང་ལྡན་པར་གྱུར་པ་དེའི་ཚེ། བདག་ཅག་ལྷའི་ཞབས་འབྲིང་ན་རྩེ་ཞིང་དགའ་ལ་ལོངས་སྤྱོད་པ་ལགས་ན། འདི་ལྟ་སྟེ་བདག་ཅག་ལྷའི་དུས་ཕྱི་མ་དང་དུས་ཚོད་ཕྱི་མ་ཡོངས་སུ་གཏང་
བ་ག་ལ་ཞིག་བཟོད། དེ་ནས་རྒྱལ་པོ་གསེར་མདོག་རབ་ཏུ་ངུས་ཏེ་མཆི་མ་ཕྱུང་ངོ་། །མཆི་མ་དེ་ལེགས་པར་ཕྱིས་ནས་རྩིས་པ་དང་སྣ་ཆེན་པོ་ལ་གཏོགས་པ་དང་བློན་པོ་དང་སྒོ་བ་དང་འཁོར་རྣམས་ལ་འདི་སྐད་ཅེས་སྨྲས་སོ། །གྲོང་གི་གཙོ་བོ་
དག་རང་རང་གི་གནས་ཇི་ལྟ་བ་བཞིན་དེངས་ཤིག །ཐམས་ཅད་ཀྱིས་ཁང་བཟངས་འདིར་བཀྲེས་པ་དང་སྐོམ་པ་དག་གིས་འཆི་བའི་དུས་མ་བྱེད་ཅིག །དེ་ནས་རྩིས་པ་དང་སྣ་ཆེན་པོ་ལ་གཏོགས་པ་དང་བློན་པོ་དང་། སྒོ་བ་དང་འཁོར་རྣམས་
རབ་ཏུ་ངུས་ཏེ་མཆི་མ་ཕྱུང་ངོ་། །མཆི་མ་ལེགས་པར་ཕྱིས་ནས། རྒྱལ་པོ་གསེར་མདོག་ག་ལ་བ་དེར་སོང་སྟེ་ཕྱིན་ནས་རྒྱལ་པོ་གསེར་མདོག་གི་རྐང་པ་གཉིས་ལ་ཕྱག་འཚལ་ཏེ། ཐལ་མོ་སྦྱར་ནས། རྒྱལ་པོ་གསེར་མདོག་ལ་
འདི་སྐད་ཅེས་སྨྲས་སོ། །བདག་ཅག་གིས་ལྷའི་ཞལ་ལྟ་བའི་ཕྱི་མ་དེང་ལགས་ཏེ། བདག་ཅག་གིས་གང་ཅུང་ཟད་ལྷའི་བཀའ་ལ་འགལ་བ་ཅི་བགྱིས་པ་བཟོད་པར་གསོལ་ལོ། །འདི་ལྟ་སྟེ་བཅོམ་ལྡན་འདས་རང་སངས་རྒྱས་དེས་
བསོད་སྙོམས་དེ་ཡོངས་སུ་ཟོས་སོ། །དེ་ནས་སྐད་ཅིག་དེ་ཉིད་ལ་ཕྱོགས་བཞི་ཀུན་ནས་སྤྲིན་སྟུག་པོ་བཞི་ལངས་སོ། །རླུང་གྲང་བ་ཡང་ལངས་ཏེ། དེའི་ཚེ་འཛམ་བུའི་གླིང་ཕྱགས་སོ། །དེ་ནས་དེའི་དུས་ཀྱི་བྱེ་བྲག་ལ་བཅལ་བར་བྱ་བ་དང་། 
བཟའ་བར་བྱ་བ་རྣམ་པ་སྣ་ཚོགས་ཀྱི་ཆར་བབ་སྟེ། བཟའ་བར་བྱ་བའི་དངོས་པོ་འདི་ལྟ་བུ་འབྲས་ཆན་དང་ཕྱེ་དང་ཟན་དྲོན་དང་ཤ་དང་ཉ་ཤ་དང་བཟའ་བར་བྱ་བའི་དངོས་པོ་འདི་ལྟ་བུ། བཅའ་བར་བྱ་བ་ལ་ཕུག་དང་བཟའ་བར་བྱ་བ་ལོ་མ་དང་བཟའ་
བར་བྱ་བ་མེ་ཏོག་དང་བཟའ་བར་བྱ་བ་འབྲས་བུ་དང་བཟའ་བར་བྱ་བ་ཏིལ་དང་བཟའ་བར་བྱ་བ་ཏིལ་མར་དང་བཟའ་བར་བྱ་བ་བུར་མར་དང་བཟའ་བར་བྱ་བ་ཁ་ར་དང་གཞན་ཡང་བཟའ་བར་བྱ་བ་དང་བཅའ་བར་བྱ་བ་དང་མྱང་བར་བྱ་བ་རྣམ་པ་མང་

71-1-58a

པོའི་བཟའ་བ་དག་གི་ཆར་བབ་བོ། །དེ་ནས་རྒྱལ་པོ་གསེར་མདོག་མགུ་ལ་དགའ་ཞིང་ཡི་རང་སྟེ། རབ་ཏུ་དགའ་ནས་དགའ་བ་དང་ཡིད་བདེ་བ་སྐྱེས་ཏེ། རྩིས་པ་དང་སྣ་ཆེན་པོ་ལ་གཏོགས་པ་དང་བློན་པོ་དང་སྒོ་བ་དང་འཁོར་རྣམས་
བོས་ནས་འདི་སྐད་ཅེས་སྨྲས་སོ། །གྲོགས་གི་གཙོ་བོ་དག་ལྟོས་ཤིག །ཀྱེ་མ་དེང་བསོད་སྙོམས་གཅིག་ཕུལ་བའི་མྱུ་གུ་བྱུང་བར་གྱུར་ཏེ། འབྲས་བུ་དང་ལོ་མ་དང་མེ་ཏོག་ནི་ཕྱིས་འབྱུང་བར་འགྱུར་རོ། །དེ་ནས་ཉི་མ་གཉིས་པ་ལ་
ཉིན་བདུན་དུ་ནོར་དང་འབྲུའི་ཆར་རབ་ཏུ་བབ་བོ། །འདི་ལྟ་སྟེ་ཏིལ་དང་འབྲས་ཐུག་པོ་ཆེ་དང་མོན་སྲན་གྲེའུ་དང་མོན་སྲན་དཀར་རུ་དང་ནས་དང་གྲོ་དང་སྲན་ཆུང་དང་འབྲས་སཱ་ལུ་དང་འབྲུའི་རིགས་ཐམས་ཅད་དང་ཞག་བདུན་དུ་མར་སར་གྱི་ཆར་བབ་བོ། །
ཞག་བདུན་དུ་ཏིལ་མར་གྱི་ཆར་བབ་བོ། །ཞག་བདུན་དུ་བེའུ་རས་ཀྱི་ཆར་བབ་བོ། །ཞག་བདུན་དུ་ཟས་རྣམ་པ་སྣ་ཚོགས་ཀྱི་ཆར་བབ་བོ། །ཞག་བདུན་དུ་རིན་པོ་ཆེ་སྣ་བདུན་ལ། གསེར་དང་དངུལ་དང་ཤེལ་དང་བཻ་དཱུརྱ་དང་མུ་ཏིག་དམར་
པོ་དང་རྡོའི་སྙིང་པོ་དང་སྤུག་རྣམས་ཏེ། རིན་པོ་ཆེ་སྣ་བདུན་པོ་འདི་དག་གི་ཆར་བབ་བོ། །རྒྱལ་པོ་གསེར་མདོག་གི་མཐུས། འཛམ་བུའི་གླིང་གི་མི་ཐམས་ཅད་ཀྱི་དབུལ་བ་ཡང་དག་པར་བཅད་པར་གྱུར་ཏོ། །དགེ་སློང་དག་དེའི་ཚེ་
དེའི་དུས་ན། རྒྱལ་པོར་གྱུར་པ་དེ་གཞན་ཞིག་ཡིན་སྙམ་དུ་ཁྱེད་ཀྱིས་སོམ་ཉི་དང་ཡིད་གཉིས་སུ་མི་བྱའོ། །དགེ་སློང་དག་དེའི་ཚེ་དེའི་དུས་ན། རྒྱལ་པོ་གསེར་མདོག་ཅེས་བྱ་བ་བྱུང་བ་དེ་ནི། ང་ཉིད་ཡིན་པར་བལྟ་བར་བྱའོ། །
དགེ་སློང་དག་རྣམ་གྲངས་དེས་ཀྱང་འདི་ལྟར་རིག་པར་བྱ་སྟེ། ཇི་ལྟར་ངས་སྦྱིན་པའི་འབྲས་བུ་དང་སྦྱིན་པ་ལ་འགོད་པའི་རྣམ་པར་སྨིན་པ་ཤེས་པ་ལྟར། སེམས་ཅན་རྣམས་ཀྱིས་ཀྱང་སྦྱིན་པའི་འབྲས་བུ་དང་སྦྱིན་པ་ལ་འགོད་
པའི་རྣམ་པར་སྨིན་པ་ཤེས་པར་གྱིས་ཤིག །གང་ཁམ་ཕྱི་མའི་ཁམ་ཕྱི་མ་གཅིག་པོ་དེ་ཡང་གཞན་དག་ལ་མ་བྱིན་མ་བགོས་པར་བདག་གི་བར་མི་བྱའོ། །སེར་སྣའི་སེམས་ཀྱི་དྲི་མ་སྐྱེས་པ་ཀུན་ནས་བཀྲེས་ཏེ་འདུག་པར་མི་བྱའོ། །ཇི་

71-1-58b

ལྟར་ངས་ཤེས་པ་དེ་བཞིན་དུ། འདི་ལྟར་སེམས་ཅན་དག་གི་སྦྱིན་པ་ལ་འགེད་པའི་རྣམ་པར་སྨིན་པ་མི་ཤེས་ཏེ། དེ་ལྟ་བས་ན་སེམས་ཅན་གང་ཁམ་ཕྱི་མ་ཕྱི་མའི་ཁམ་གཅིག་པོ་དེ་ཡང་གཞན་དག་ལ་མ་བྱིན་མ་བགོས་པར་བདག་ཉིད་
ཀྱིས་བཟའ་བར་མི་བྱའོ། །སེར་སྣའི་སེམས་ཀྱི་དྲི་མ་སྐྱེས་པས་ཀུན་ནས་དཀྲིས་ཏེ་འདུག་པར་མི་བྱའོ། །སྔོན་གྱི་དགེ་དང་མི་དགེ་བྱས་པ་ཆུད་མི་ཟ། །མཁས་པ་དག་ལ་བརྟེན་པ་ཆུད་ནི་མི་ཟ་སྟེ། །འཕགས་པའི་སྐྱེ་བོས་ལེགས་
པར་བཤད་པ་ཆུད་མི་ཟ། །བྱས་པ་གཟོ་ལ་བྱས་པ་རྣམས་ཀྱང་ཆུད་མི་ཟ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་དེ་དག་དང་དགེ་སློང་དེ་དག་དང་ལྷ་དང་མི་དང་ལྷ་མ་ཡིན་དང་དྲི་ཟར་བཅས་པའི་འཇིག་
རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །གསེར་མདོག་གི་སྔོན་གྱི་སྦྱོར་བ་ཞེས་བྱ་བ་རྫོགས་སོ།། །། ལན་ཅིག་ཞུས་ཏེ་དག་གོ། །སྐར་མས་ཞུས་ཏེ་དག་གོ ། ༄༅། །རྒྱ་གར་སྐད་དུ། 
ཨཱརྱ་ཇི་ན་པུ་ཏྲ་ཨཪྠ་སིད་དྷི་སཱུ་ཏྲ། བོད་སྐད་དུ།  འཕགས་པ་རྒྱལ་བུ་དོན་གྲུབ་ཀྱི་མདོ།  བམ་པོ་དང་པོ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན་འཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་
དགའ་ར་བ་ན། དགེ་སློང་དང་དགེ་སློང་མ་དང་དགེ་བསྙེན་ཕ་དང་དགེ་བསྙེན་མ་གྲངས་མེད་པ་དང་ཐབས་གཅིག་ཏུ་བཞུགས་སོ། །དེའི་ཚེ་བཅོམ་ལྡན་འདས་འཛུམ་པ་མཛད་ནས། ཞལ་གྱི་སྒོ་ནས་འོད་ཟེར་ཁ་དོག་སྣ་ལྔ་དང་ལྡན་པ་
བཀྱེ་བ་དང་། ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་གོས་ཚགས་བཅོས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་གིས་སངས་རྒྱས་ཀྱི་ཞབས་འབྲིང་ལོ་ཉི་ཤུ་བགྱིས་ཀྱི་བར་
དུ་དེ་འདྲ་བར་བཞད་པ་མ་མཐོང་ན། བཅོམ་ལྡན་འདས་ཀྱིས་སངས་རྒྱས་སྔོན་འདས་པ་འམ་མ་བྱོན་པ་འམ་ད་ལྟར་བཞུགས་པའི་སངས་རྒྱས་ལ་དགོངས་སམ་དེ་མ་ལགས་པ་ཅི་ལ་དགོངས་པ་དོན་བསྟན་དུ་གསོལ། 

71-1-59a

བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སངས་རྒྱས་འདས་པ་འམ་མ་འོངས་པ་འམ་ད་ལྟར་བཞུགས་པ་ལ་དགོངས་པ་མ་ཡིན་གྱི། མངོན་པར་དྲན་པ་ང་སྔོན་བསྐལ་པ་གྲངས་
མེད་པར་འདས་པའི་ཕ་རོལ་ན་སྦྱིན་པ་སྦྱིན་པའི་དངོས་པོ་ལ་དགོངས་ཏེ། དེའི་ཚེ་དེའི་དུས་ན་ཡུལ་ཡ་བ་ཞེས་བྱ་བར་རྒྱལ་པོ་དགེ་བ་ཞེས་བྱ་བ་དྲང་པོའི་ཆོས་ཀྱིས་ཡུལ་གྱི་སྲིད་འཛིན་ཏེ། འགྲོ་བ་མང་པོ་ལ་སྐྱོང་བ་ཞིག་
བྱུང་ངོ་། །རྒྱལ་པོ་དེ་ལ་བློན་པོ་ནི་བཞི་སྟོང་ཞིག་ཡོད་དེ། རྒྱལ་ཕྲན་དྲུག་བཅུ་ལ་དབང་བསྐུར་རོ། །གྲོང་ཁྱེར་ཆེན་པོ་བརྒྱད་བརྒྱ་དང་བལ་གྱི་གླང་པོ་ཆེ་ལྔ་བརྒྱ་ཡོད་དེ། རྒྱལ་པོ་ལ་བཙུན་མོ་ཉི་ཁྲི་ཡོད་
ཀྱང་སྲས་མི་མངའ་བས་རི་དང་ཀླུང་གི་ལྷ་གཉན་པོ་ལ་མཆོད་འབྲས་བྱས་ནས་བཙུན་མོ་དམ་པ་ལ་སྲས་མངའ་བར་གྱུར་ཏེ། བཙུན་མོའི་མལ་ཅ་དང་ཟས་དང་སྐོམ་ལ་སོགས་པ་ཡོ་བྱད་བདམ་ཞིང་བཟང་པོར་སྦྱར་
ནས་རྒྱལ་པོ་ཉིད་ཀྱིས་རིམ་གྲོ་བྱས་ཏེ། ཟླ་བ་བཅུར་ཚང་ནས་རྒྱལ་བུ་གཅིག་བཙས་སོ། །ཕོ་བྲང་གི་བཙུན་མོ་ཉི་ཁྲི་སྙེད་ཀྱང་རྒྱལ་བུ་ཞིག་བཙས་ཤེས་ཐོས་ནས་ཐམས་ཅད་དགའ་མགུ་རངས་ཏེ། ནུ་ཞོ་ཡང་
རང་བྱུང་བས་རྒྱལ་བུ་མཚན་ཡང་དོན་གྲུབ་ཅེས་བཏགས་སོ། །རྒྱལ་བུ་ལ་ནུ་ཞོ་སྣུན་ཅིང་རིམ་གྲོ་བྱེད་པ་བཞི་ཞིག་བསྐོས་ཏེ། གཅིག་ནི་ནུ་ཞོ་སྣུན་པའི་ལས་བྱེད། གཅིག་ནི་རྒྱལ་བུ་པང་དུ་ཁྱེར་བར་བསྐོས་
གཅིག་ནི་རྒྱལ་བུ་བཀྲུ་བའི་ལས་བྱེད་པར་བསྐོས། གཅིག་ནི་རྒྱལ་བུ་རྩེར་འགྲོ་བའི་ལས་སུ་བསྐོས་སོ། །དེ་ལྟར་བསྐོས་ནས་རྒྱལ་བུ་ལོ་བཅུ་དྲུག་ལོན་པ་དང་ཡིག་རྩིས་དང་འཕོང་རྩལ་དང་བཟོ་དཔྱད་
དང་རོལ་མོ་ལ་སོགས་པ་གང་ཡང་མི་ཤེས་པ་མེད་དེ་ཐམས་ཅད་ཀྱང་ལོབས། རྒྱལ་པོ་ཡབ་དང་ཡུམ་ལ་ཡང་ལྷ་བཙུན་འདྲ་བར་རིམ་གྲོ་བྱེད་དོ། །རྒྱལ་པོས་ཀྱང་རྒྱལ་བུའི་ཕོ་བྲང་ལོགས་ཤིག་ཏུ་བརྩིགས་སོ། །

71-1-59b

རྒྱལ་བུ་དེ་ཆུང་ནས་སྦྱིན་པ་ལ་དགའ་ནས་མི་ལ་སོགས་ཏེ། རི་དགས་དང་འདབ་ཆགས་བྱའི་བར་དུ་སེམས་ཅན་ཐམས་ཅད་བདེ་སྐྱིད་པར་དགའ་སྟེ། ཚིག་ཏུ་ཡང་གང་མི་ཤེས་པ་གཏི་མུག་ཅན་ནི་སྦྱིན་པ་ལ་མི་དགའ་བས་
བདག་གིས་བདག་བསླུས་ཏེ་ཕན་པའི་དོན་མེད་ཀྱི། མཁས་པ་ཤེས་རབ་ཅན་ནི་འཇིག་རྟེན་ན་གནས་ཀྱང་སྦྱིན་པ་ལ་ཡོན་ཏན་ཆེར་མཐོང་སྟེ། སྦྱིན་པ་བྱིན་པས་སྔ་མ་འདས་པ་དང་མ་བྱོན་པ་དང་ད་ལྟར་བཞུགས་པའི་སངས་རྒྱས་
དང་རང་སངས་རྒྱས་དང་འཕགས་པ་དགྲ་བཅོམ་པ་ཐམས་ཅད་ཀྱིས་བསྟོད་ཅིང་བསྔགས་པར་འགྱུར་རོ་ཞེས་སྨྲས་སོ། །རྒྱལ་བུ་བགས་ཀྱིས་ཆེར་སྐྱེས་ནས། རྒྱལ་པོ་ཞིག་གི་བུ་མོ་མན་ཏེ་ཞེས་བྱ་བ་མངའ་བྱད་བཟང་ལ་
སྡུག་པ་དཔེ་ཟླ་མེད་པ་གསེར་དང་དངུལ་དང་བཻ་དཱུརྱ་དང་རིན་པོ་ཆེ་སྣ་ཚོགས་ཀྱི་རྒྱན་ཀྱིས་བརྒྱན་པ་གཅིག་བཙུན་མོར་བླངས་ནས་བུ་མིང་སྲིང་གཉིས་ཤིག་ཡོད་པར་གྱུར་ཏོ། །དེ་ནས་རྒྱལ་བུ་དེ་སྦྱིན་པའི་ཕ་རོལ་ཏུ་ཕྱིན་པའི་
དོན་སེམས་པ་ལ་ཞུགས་ནས། ཡབ་རྒྱལ་པོ་ལ་བདག་ནི་རྩེ་ཞིང་ལྟད་མོ་ལྟར་མཆིའོ་ཞེས་གསོལ་པ་དང་རྒྱལ་པོས་ཀྱང་དེ་བཞིན་དུ་གནང་ངོ་། །དེ་ནས་རྒྱལ་བུ་ཕོ་བྲང་ནས་བྱུང་བ་དང་། བརྒྱ་བྱིན་ལྷའི་དབང་
པོས་གྲོང་ཁྱེར་གྱི་སྒོ་ལམ་སྲང་དག་ན་དབུལ་ཕོངས་པ་ལོང་བ་འོན་པ་ལྐུགས་པའི་སློངས་མོ་པ་དག་ཅིག་སྤྲུལ་ནས་སྡོད་དུ་བཅུག་གོ། །རྒྱལ་བུས་དེ་དག་མཐོང་བ་དང་དེ་མ་ཐག་ཏུ་ཕྱིར་ལོག་ནས་ཕོ་བྲང་དུ་ཞུགས་ཏེ། 
མྱ་ངན་ཆེན་པོས་ནོན་ནས་མི་དགའ་ཞིང་འདུག་པ་ལ། ཡབ་རྒྱལ་པོས་སྲས་རྒྱལ་བུ་ལ་འདི་སྐད་ཅེས་བསྒོའོ། །རྩེ་ཞིང་ལྟད་མོ་ལྟར་བཏང་ན་ཅིའི་ཕྱིར་མི་དགའ་ཞིང་མྱ་ངན་བྱེད་པར་གྱུར་ཅེས་དྲིས་པ་དང་། 
རྒྱལ་བུས་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །བདག་རྩེ་ཞིང་ལྟད་མོ་ལྟར་མཆིས་པ་ལས། སློངས་མོ་པ་ལོང་བ་འོན་པ་ལྐུགས་པ་མང་པོ་དང་མཇལ་བས་མྱ་ངན་གྱིས་ནོན་པར་གྱུར་ཏེ། ང་ཡབ་རྒྱལ་

71-1-60a

པོ་ལ་གསོལ་བ་རྣམ་པ་གཅིག་གསོལ་ན་རྒྱལ་པོས་གནང་ངམ། ཡབ་རྒྱལ་པོས་ཀྱང་རྒྱལ་བུ་ཁྱོད་ཅི་དང་ཅི་འདོད་པ་སྨྲོས་ཤིག་དང་གནང་བར་བྱའོ་ཞེས་བསྒོ་བ་དང་། རྒྱལ་བུས་ཡབ་རྒྱལ་པོ་ལ་འདི་སྐད་
ཅེས་གསོལ་ཏོ། །བདག་ནི་ཡབ་རྒྱལ་པོ་ལ་མངའ་བའི་བང་མཛོད་ན་རིན་པོ་ཆེ་མཆིས་པ་རྣམས་གྲོང་ཁྱེར་གྱི་སྒོ་བཞི་དང་ཚོང་འདུས་སུ་སྤུངས་ཏེ་སློངས་མོ་པ་ཐམས་ཅད་ལ་ཡིད་དང་མི་འགལ་བར་སྦྱིན་པ་བགྱིད་པར་འཚལ་ལོ་ཞེས་
གསོལ་པ་དང་། རྒྱལ་པོས་སྲས་རྒྱལ་བུ་ལ་ཁྱོད་ཅི་དང་ཅི་དགའ་བ་ཡིད་དང་མི་འགལ་བར་གནང་ངོ་ཞེས་བསྒོའོ། །དེ་ནས་རྒྱལ་བུས་བློན་པོ་རྣམས་ལ་བསྒོ་ནས། ནོར་དབྱིག་རིན་པོ་ཆེ་རྣམས་ཤིང་རྟས་བསྐྱས་ཏེ། 
གྲོང་ཁྱེར་གྱི་སྒོ་བཞི་དང་། ཚོང་འདུས་སུ་སྤུངས་ནས་ཕ་རོལ་པོ་འདོད་པ་བཞིན་སྦྱིན་པ་བྱིན་པ་དང་། ཡུལ་ཁམས་ཕྱོགས་བརྒྱད་ཀུན་ཏུ་རྒྱལ་བུའི་ཡོན་ཏན་གྲགས་པར་གྱུར་པས། ཁ་ཅིག་ནི་དཔག་ཚད་བརྒྱ། 
ཁ་ཅིག་ནི་དཔག་ཚད་སྟོང་། ཁ་ཅིག་ནི་དཔག་ཚད་ཁྲིའི་ཕ་རོལ་ནས་ལྷགས་ཏེ། ཁ་ཟས་དང་སྐོམ་འདོད་པ་ལ་ནི་ཟས་དང་སྐོམ་བྱིན། གང་གོས་དང་བགོ་བ་འདོད་པ་ལ་ནི་གོས་དང་བགོ་བ་བྱིན། གང་གསེར་དང་
དངུལ་དང་རིན་པོ་ཆེ་འདོད་པ་ལ་ཡང་ཅི་འདོད་པ་བཞིན་ཡིད་དང་མི་འགལ་བར་གང་ཡང་མི་གཏང་བ་མེད་དོ། །དེའི་ཚེ་དེའི་དུས་ན། དགྲ་ཟླར་གྱུར་པའི་རྒྱལ་ཁམས་གཅིག་ཅིག་ཡོད་པ་དེས། རྒྱལ་བུས་སྦྱིན་པ་
སྦྱིན་པ་ལ་དགའ་བས་ཕ་རོལ་པོ་ཅི་འདོད་པ་བཞིན་ཡིད་དང་མི་འགལ་བར་ཡོངས་སུ་གཏང་ངོ་ཞེས་ཐོས་ནས་བློན་པོ་རྣམས་དང་མཁས་པ་བློ་དང་ལྡན་པ་ཀུན་ལ་སོགས་པ་བསྡུས་ཏེ་འདི་སྐད་ཅེས་བགྲོས་སོ། །ཡུལ་ཡ་
བའི་རྒྱལ་པོ་ལ་བལ་གྱི་གླང་པོ་ཆེ་པད་མོའི་སྟེང་ནས་འགྲོ་བ་སུ་ད་ཡ་ཞེས་བྱ་བ་སྟོབས་དང་ལྡན་པ་ཞིག་དེ་དག་ནམ་དགྲ་ཟླའི་རྒྱལ་ཁམས་གཞན་དང་འཐབ་པའི་ཚེ། བལ་གྱི་གླང་པོ་ཆེ་དེས་རྟག་ཏུ་རྒྱལ་བར་

71-1-60b

གྱུར་པས་ན། ཁྱེད་ལས་སུ་ཞིག་དེར་སོང་སྟེ་སློང་བར་ནུས་ཅེས་བགྲོས་ན། བློན་པོ་ལས་གང་ཡང་འགྲོ་ནུས་པ་མ་བྱུང་ངོ་། །དེའི་ནང་ན་བྲམ་ཟེ་མི་བརྒྱད་ཞིག་གིས་རྒྱལ་པོ་ལ་འདི་སྐད་ཅེས་གསོལ་ཏོ། །བདག་ཅག་
གིས་སློང་ཞིང་མཆི་བར་འཚལ་ན་བདག་ཅག་གི་ཚོགས་དང་རྒྱགས་སྦྱོར་ཅིག་ཅེས་གསོལ་པ་དང་། རྒྱལ་པོས་དེའི་ཚོགས་དང་རྒྱགས་སྦྱར་ནས་བྲམ་ཟེ་དེ་དག་ལ་འདི་སྐད་ཅེས་བསྒོའོ། །གལ་ཏེ་ཁྱོད་ཀྱིས་བལ་གླང་
དེ་ཁུགས་ཏེ་འོངས་ན་བྱ་དགའ་ཆེར་སྦྱིན་ནོ་ཞེས་གཙིགས་བྱས་སོ། །དེ་ནས་བྲམ་ཟེ་བརྒྱད་པོ་མཁར་བ་ཐོགས་ཏེ་ལ་ལུང་བགྲོད་ནས་ཡུལ་ཡ་བ་གང་ན་བ་དེར་སོང་ངོ་། །ཡུལ་དེར་ཕྱིན་ནས། རྒྱལ་པོའི་སྒོར་མཁར་
བ་ལ་རྐོམ་ཚུགས་བཅས་ཏེ་རྐང་པ་ཡ་ཅིག་གིས་འགྲེང་ཞིང་སྡོད་དོ། །དེ་ནས་རྒྱལ་བུའི་སྒོ་སྲུངས་ཕོ་བྲང་ནང་དུ་སོང་ནས་ཕྱི་རོལ་ན་བྲམ་ཟེ་དག་ཅིག་ལྷགས་ཏེ། མཁར་བ་ལ་རྐོམ་ཚུགས་བཅས་ནས་རྐང་པ་ཡ་ཅིག་
གིས་འགྲེང་ཞིང་སྡོད་དེ། བདག་ཅག་ནི་ལམ་རིང་པོ་ནས་ཆེད་དུ་འདིར་སློང་དུ་འོངས་སོ་ཞེས་མཆིའོ། །རྒྱལ་བུས་དེ་སྐད་ཅེས་སྨྲས་པ་ཐོས་ནས་རབ་ཏུ་དགའ་སྟེ། མོད་ལ་ཕྱི་རོལ་དུ་བྱུང་ནས་བསུས་ཏེ་ཕྱག་བྱས་
སོ། །དཔེར་ན་ཕ་དང་བུ་ཕྲད་པ་ཙམ་དུ་གཅིག་ལ་གཅིག་གིས་སྤྲོ་བའི་ཚིག་གིས་ཁྱེད་གང་ཕྱོགས་ནས་འོངས་ལམ་དུ་ཉོན་མ་མོངས་སམ། ཅི་འདོད་ཅི་སློང་ན་རྐང་པ་ཡ་ཅིག་འགྲེང་ཞེས་དྲིས་སོ། །བྲམ་ཟེ་བརྒྱད་
པོས་སྨྲས་པ། བདག་ཅག་ནི་རྒྱལ་བུ་ཁྱོད་སྦྱིན་པ་སྦྱིན་པ་ལ་རབ་ཏུ་དགའ་བས་ཕ་རོལ་པོ་ཅི་སློང་ཡང་ཡིད་དང་འགལ་བར་མི་མཛད་དོ་ཞེས་རྒྱལ་བུའི་ཡོན་ཏན་ཕྱོགས་མཚམས་བརྒྱད་དང་། ཡར་ནི་སྟེང་གི་གནམ་ལ་
ཐུག་མར་ནི་སའི་མཐིལ་ལ་ཐུག་པ་མན་ཅད་དུ་གྲགས་པས་ན། ཁྱོད་ཀྱི་སྦྱིན་པའི་ཡོན་ཏན་ནི་བསམ་གྱིས་མི་ཁྱབ་སྟེ། ཉེ་རིང་ཐམས་ཅད་ཀྱིས་བསྟོད་ཅིང་བསྒྲགས་པས་གང་ཡང་མ་ཐོས་པ་འམ་མི་ཤེས་པ་མེད་དེ་

71-1-61a

ཀུན་གྱིས་བརྗོད་པ་ཡང་བརྫུན་པ་མ་ཡིན་ལ། ད་ལྷའི་སྲས་སུ་གྱུར་པས་ན་ལྷ་ནི་ཅི་སྨྲ་ཡང་བརྫུན་པ་མ་ཡིན་ཏེ། ད་རྒྱལ་བུས་སྦྱིན་པ་མི་མཛད་ན་བདག་ཅག་གི་ཡིད་དང་འགལ་བར་མཛད་དམ། 
བདག་ཅག་ནི་རྒྱལ་བུ་ལས་མེ་ཏོག་པད་མོའི་སྟེང་ནས་འགྲོ་བ་བལ་གྱི་གླང་པོ་ཆེ་སློང་དུ་འོངས་སོ་ཞེས་སྨྲས་པ་དང་། རྒྱལ་བུས་དེ་དག་བལ་གླང་གི་ལྷས་སུ་ཁྲིད་དེ་བལ་གླང་གཞན་ཞིག་བྱིན་ནོ། བྲམ་ཟེ་བརྒྱད་
པོས་སྨྲས་པ། བདག་ཅག་ནི་པད་མོའི་སྟེང་ནས་འགྲོ་བའི་བལ་གྱི་གླང་པོ་ཆེ་སུ་ད་ཡན་འདོད་དོ། །རྒྱལ་བུས་སྨྲས་པ། བལ་གྱི་གླང་པོ་ཆེ་འདི་ནི་བདག་གི་ཡབ་རྒྱལ་པོ་ལ་གཅེས་ཤིང་གནང་བ་ཡིན་ཏེ། བལ་
གླང་འདི་དང་བདག་ཏུ་ཐ་མི་དད་པར་དགོངས་པས་ཁྱེད་ལ་སྦྱིན་དུ་མི་རུང་ངོ་། །གལ་ཏེ་བདག་གིས་ཁྱེད་ལ་བྱིན་ན། རྒྱལ་པོའི་དགོངས་པ་དང་འགལ་བས་གལ་ཏེ་བལ་གླང་འདིའི་རྐྱེན་གྱིས་བདག་ཡུལ་འདི་
ནས་སྐྲོད་པར་འགྱུར་རོ་ཞེས་སྨྲས་ནས་རྒྱལ་བུ་ཡང་འདི་སྙམ་དུ་བསམས་སོ། །བདག་སྔོན་ཡི་དམ་བཅས་པ་ན། ཕ་རོལ་པོ་ཅི་སློང་ཡང་ཡིད་དང་མི་འགལ་བར་བྱའོ་ཞེས་དམ་བཅས་ན། ད་བདག་གིས་སྔར་
བསམས་པ་ལས་བཟློག་སྟེ། སྦྱིན་པ་འདི་མ་བྱིན་ན། ཇི་ལྟར་ཡང་བླ་ན་མེད་པ་མཉམ་སྙོམས་པའི་སྦྱིན་པའི་ཕ་རོལ་དུ་ཕྱིན་པ་རྫོགས་པར་འགྱུར་རོ། །གལ་ཏེ་སྦྱིན་པ་འདི་བྱིན་པ་ན་བླ་ན་མེད་པ་མཉམ་སྙོམས་
པའི་སྦྱིན་སེམས་སུ་འགྱུར་རོ་སྙམ་བསམས་ནས། རྒྱལ་བུས་འདི་སྐད་ཅེས་སྨྲས་སོ། །ཤིན་ཏུ་དཀའ་སྟེ་དེ་བཞིན་དུ་སྦྱིན་པར་བྱའོ་ཞེས་སྨྲས་ནས། དྲུང་ན་འདུག་པའི་གཡོག་ལ་བལ་གྱི་གླང་པོ་ཆེ་ལ་གསེར་དངུལ་གྱི་
སྒ་བསྟད་དེ་མྱུར་དུ་ཁྲིད་དེ་ཤོག་ཅིག་ཅེས་བསྒོ་བ་དང་། བལ་གླང་ཁྲིད་དེ་འོངས་ནས་རྒྱལ་བུས་ལག་པ་གཡོན་པས་ནི་ཆུ་སྣོད་ཐོགས་ཏེ། བྲམ་ཟེའི་ལག་པ་བཀྲུས། ལག་པ་གཡས་པས་ནི་བལ་གླང་གི་སྣ་ཐག་

71-1-61b

ནས་བཟུང་སྟེ་བྲམ་ཟེ་བརྒྱད་པོ་ལ་བྱིན་པ་དང་། བྲམ་ཟེ་བརྒྱད་པོས་རྒྱལ་བུ་ལ་སྨོན་ལམ་བཏབ་བོ། །སྨོན་ལམ་བཏབ་མ་ཐག་ཏུ་བལ་གྱི་གླང་པོ་ཆེ་ལ་སྤྲུགས་ཏེ་དགའ་བཞིན་དོང་ངོ་། །དེ་ནས་རྒྱལ་བུས་བྲམ་
ཟེ་དེ་དག་ལ་ཡང་འདི་སྐད་ཅེས་བསྒོའོ། །ཁྱེད་མྱུར་དུ་མགྱོགས་པར་སོང་ཤིག །གལ་ཏེ་ཡབ་རྒྱལ་པོས་གསན་ན་སྙགས་མ་གཏོང་སྟེ་འཕྲོག་ཏུ་འོང་ངོ་ཞེས་བསྒོ་བ་དང་། དེའི་ཚེ་བྲམ་ཟེ་དེ་དག་གིས་དེ་མ་ཐག་ཏུ་མགྱོགས་
སུ་དོང་ངོ་། །བློན་པོ་རྣམས་ཀྱིས་རྒྱལ་བུས་བལ་གྱི་གླང་པོ་ཆེ་དགྲ་ཟླ་ལ་བྱིན་ནོ་ཞེས་ཐོས་ནས། ཐམས་ཅད་སྐྲག་སྟེ་ཁྲི་ལས་རྦད་དུ་ལྷུང་ནས་མྱ་ངན་གྱིས་ནོན་ཏེ། འདི་སྙམ་དུ་ཡུལ་འདི་ན་བལ་གླང་འདི་
ལ་ལྟོས་ན། ད་དགྲ་ཟླ་གཞན་ལ་བྱིན་པར་གྱུར་ཏོ་སྙམ་དུ་བསམས་ནས་རྒྱལ་པོ་ག་ལ་བ་དེར་སོང་སྟེ་འདི་སྐད་ཅེས་གསོལ་ཏོ། །རྒྱལ་བུས་ནི་ཕྱིའི་དགྲ་ཐུབ་པའི་བལ་གླང་རིན་པོ་ཆེ་ཕ་རོལ་གྱི་དགྲ་ཟླ་ལ་བྱིན་
ནོ་ཞེས་གསོལ་པ་དང་། རྒྱལ་པོ་ཡབ་ཡེད་ཡེད་པོར་གྱུར་པ་ལས། བློན་པོས་ཡང་འདི་སྐད་ཅེས་གསོལ་ཏོ། །ད་རྒྱལ་པོ་ལ་བལ་གྱི་གླང་པོ་ཆེ་འདི་མངའ་བས་ཆབ་སྲིད་ཆེ་བ་ལགས་ཏེ། བལ་གྱི་གླང་པོ་ཆེ་
དེ་ནི་བལ་གླང་དྲུག་བཅུ་སྙེད་ཀྱི་མཐུ་སྟོབས་དང་ལྡན་པ་ལགས་ན་རྒྱལ་བུས་དགྲ་ཟླ་ལ་སྩལ་ཏེ། དགྲ་ཟླས་འཚལ་བས་ཆབ་སྲིད་ཀྱང་སྟོར་དུ་མཆི་ན་ཇི་ལྟར་མཛད་པ་རིགས། འདི་ལྟ་བུ་རང་ཉམས་སུ་
སྦྱིན་པ་བྱིན་པས་བང་མཛོད་ཀྱང་སྟོངས་ཤིང་ཡུལ་གྱི་སྲིད་དང་བཙུན་མོ་དང་སྲས་ཀྱི་བར་དུ་སྦྱིན་པ་བགྱིད་པར་དགོངས་སོ་ཞེས་གསོལ་པ་དང་། རྒྱལ་པོས་དེ་སྐད་ཅེས་སྨྲས་པ་ཐོས་ནས། ལྷག་པར་མི་དགའ་
བར་གྱུར་ཏེ། བློན་པོ་གཞན་ཞིག་བོས་ནས། བློན་པོ་དེ་ལ་རྒྱལ་བུས་བལ་གྱི་གླང་པོ་ཆེ་དགྲ་ཟླ་ལ་བྱིན་པ་བདེན་ནམ་ཞེས་དྲིས་པ་དང་། བློན་པོ་དེས་ཀྱང་བྱིན་པ་བདེན་ནོ་ཞེས་གསོལ་ཏོ། །རྒྱལ་པོས་དེ་སྐད་

71-1-62a

སྨྲས་པ་ཐོས་མ་ཐག་ཏུ་ཆེར་དངངས་ནས་གདན་ཁྲི་ལས་ལྷུང་སྟེ། མི་དྲན་པར་བརྒྱལ་བར་གྱུར་པ་ལས་ཆུས་གཏོར་ནས་རིང་ཞིག་ལོན་པ་དང་ཕྱིར་སངས་པར་གྱུར། བཙུན་མོ་ཉི་ཁྲི་རྙེད་ཀྱང་ཐམས་ཅད་མྱ་ངན་
གྱིས་ནོན་པར་གྱུར་ཏེ། །དེ་ནས་རྒྱལ་པོ་དང་བློན་པོ་རྣམས་འདུས་ནས། ད་རྒྱལ་བུ་འདི་ལ་ཇི་ལྟར་བྱ་ཞེས་བགྲོས་པ་དང་། དེའི་ནང་ན་བློན་པོ་གཅིག་གིས་ནི་བལ་གླང་གི་ལྷས་སུ་སོང་བ་ནི་རྐང་པ་གཅིག་པར་རིགས། 
བལ་གླང་བཟུང་བ་ནི་ལག་པ་གཅག་པར་རིགས། མིག་གིས་བལ་གླང་ལ་བལྟས་ན་ཡང་མིག་དབྱུང་བར་རིགས་ཅེས་གསོལ། ཁ་ཅིག་གིས་ནི་མགོ་བཅད་པར་རིགས་སོ་ཞེས་བློན་པོ་རྣམས་སོ་སོ་ནས་བགྲོས་
ཏེ་གསོལ་བའི་ཚིག་རྒྱལ་པོས་ཐོས་ནས་རབ་ཏུ་མི་དགའ་ཞིང་མྱ་ངན་གྱིས་ནོན་ཏེ། བློན་པོ་རྣམས་ལ་འདི་སྐད་ཅེས་བསྒོའོ། །ངའི་བུ་འདི་ལེགས་པའི་དོན་ལ་མོས་ཏེ། སྦྱིན་པ་ལ་དགའ་བ་ཡིན་ན། ཇི་ལྟར་མཐོ་
བརྩམ་ཞིང་གཟུང་བར་བྱ། དེའི་ནང་ན་བློན་པོ་གཅིག་གིས་བློན་པོ་སྔ་མ་རྣམས་ཀྱིས་བགྲོས་པ་མི་རུང་ངོ་ཞེས་དཔྱས་ནས་འདི་སྐད་ཅེས་གསོལ་ཏོ། །རྒྱལ་པོ་ལ་སྲས་གཅིག་པུ་ཞིག་མངའ་བ་ལ་རབ་ཏུ་སྡུག་ཅིང་
གཅེས་པས་རྒྱལ་བུ་རྒྱལ་ཚབ་ལགས་ན། དེ་ལ་མཐོ་བརྩམ་ཞིང་བཟུང་གཏགས་བྱ་བའི་སེམས་བསྐྱེད་པར་མི་རིགས་ཏེ། བདག་ནི་རྒྱལ་པོ་ཆེན་པོའི་སྲས་ལ་བཟུང་གཏགས་བྱ་བར་མི་གསོལ་གྱི། རྒྱལ་བུ་འདི་
ཡུལ་འདི་ནས་སྤྱུགས་ཏེ། ལོ་བཅུ་གཉིས་ཀྱི་བར་དུ་དགོན་པར་སྤངས་ན་སྨ་བབ་ཅིང་ངོ་མཚ་བར་འགྱུར་རོ་ཞེས་གསོལ་པ་དང་། རྒྱལ་པོས་ཀྱང་བློན་པོ་ཆེན་པོ་དེའི་ཚིག་མཉན་ཏོ། །དེ་ནས་རྒྱལ་པོས་རྒྱལ་བུ་རྒྱལ་ཚབ་
བཀུག་སྟེ་འདི་སྐད་ཅེས་སྨྲས་སོ། །ཁྱོད་ཀྱིས་ངའི་བལ་གྱི་གླང་པོ་ཆེ་དགྲ་ཟླ་ལ་བྱིན་པ་བདེན་ནམ་ཞེས་དྲིས་པ་དང་། རྒྱལ་བུས་གསོལ་པ། བདག་གིས་སྩལ་བ་མད་དོ་ཞེས་གསོལ་ཏོ། །རྒྱལ་པོས་སྨྲས་པ། རྒྱལ་བུ་

71-1-62b

ཁྱོད་ཅིའི་ཕྱིར་ང་ལ་མ་ཞུས་པར་ངའི་བལ་གྱི་གླང་པོ་ཆེ་དགྲ་ཟླ་ལ་བྱིན་ཞེས་དྲིས་པ་དང་། རྒྱལ་བུས་རྒྱལ་པོ་ལ་འདི་སྐད་ཅེས་གསོལ་ཏོ། །སྔར་ཡབ་རྒྱལ་པོ་དང་དམ་བཅས་པ་ན་སྦྱིན་པ་ཅི་བྱིན་ན་ཡང་མི་འགལ་བར་མཛད་དོ་
ཞེས་གསུངས་པས་ད་རྒྱལ་པོ་ལ་མ་ཞུས་པ་ལགས་སོ། །རྒྱལ་པོས་སྨྲས་པ། སྔར་དམ་བཅས་པ་ནི་ནོར་དབྱིག་དང་རིན་པོ་ཆེ་ལ་དབང་བར་བྱས་ན། བལ་གྱི་གླང་པོ་ཆེ་མ་གཏོགས། རྒྱལ་བུས་གསོལ་པ། དེ་དག་
ཐམས་ཅད་རྒྱལ་པོ་ལ་མངའ་བའི་དཀོར་ལགས་ན། ཅིའི་སླད་དུ་འདི་བཀོལ་ཏེ་མ་གཏོགས་ཞེས་གསུངས། རྒྱལ་པོས་རྒྱལ་བུ་རྒྱལ་ཚབ་ལ་སྨྲས་པ། ཁྱོད་ནི་རི་དན་ཏིག་ཏུ་ལོ་བཅུ་གཉིས་སྤངས་ཀྱིས་ཡུལ་འདི་ནས་
མྱུར་དུ་བྱུང་སྟེ་སོང་ཤིག །རྒྱལ་བུས་རྒྱལ་པོ་ལ་གསོལ་པ། བདག་རྒྱལ་པོ་ཆེན་པོས་བཀའ་སྩལ་པའི་བཀའ་ནི་མི་གཅོག་ན། ད་དུང་ཡང་ཞག་བདུན་ཞིག་སྦྱིན་པ་བགྱིས་ཏེ། བདག་གི་བསམ་པ་རྫོགས་ནས་ཡུལ་
ནས་བྱུང་སྟེ་མཆི་བར་འཚལ་ཞེས་གསོལ་ལོ། །རྒྱལ་པོས་སྨྲས་པ། ཁྱོད་ཀྱིས་སྦྱིན་པ་མ་འོས་པར་བྱས་པས་ཡུལ་གྱི་བང་མཛོད་ཀུན་སྟོངས་ཏེ། ངའི་བལ་གླང་རིན་པོ་ཆེ་ཡང་མེད་པར་བྱས་པས་ཁྱོད་སྤངས་པ་ཡིན་
ཏེ། ད་ཕྱིར་འདུག་ཅིང་ཞག་བདུན་སྦྱིན་པ་བྱར་མི་གནང་གིས་མྱུར་དུ་སོང་ཤིག་ཅེས་བསྒོའོ། །རྒྱལ་བུས་གསོལ་པ། རྒྱལ་པོ་ཆེན་པོའི་བཀའ་བདག་མི་གཅོག་སྟེ། རྒྱལ་པོའི་བཙུན་མོ་ཉི་ཁྲི་རྙེད་ཀྱང་རྒྱལ་པོ་
གང་ན་བ་དེར་ལྷགས་ནས། རྒྱལ་བུ་རྒྱལ་ཚབ་ཞག་བདུན་ཞིག་སྦྱིན་པ་བྱིན་ཏེ་ཡུལ་ནས་མཆི་བར་གསོལ་པས་རྒྱལ་པོས་ཀྱང་དེ་བཞིན་དུ་གནང་ངོ་། །དེ་ནས་རྒྱལ་བུ་རྒྱལ་ཚབ་ཀྱིས་སོ་སོར་བྲན་གཡོག་མངགས་ཏེ། 
ཕྱོགས་བཞི་ནས་ནོར་རྫས་འདོད་པ་རྣམས་ཕོ་བྲང་སྒོར་འདུས་ཤིག །ནོར་ཟས་ཐམས་ཅད་ནི་རྟག་པ་དང་བརྟན་དུ་རུང་བ་མ་ཡིན་ཏེ། མཐར་འཇིག་ཅིང་མེད་པའི་ཆོས་ཅན་ནོ་ཞེས་བསྒོ་ནས། ཕྱོགས་བཞི་ནས་

71-1-63a

སློང་བ་མང་པོ་ལྷགས་པ་ལ་རྒྱལ་བུ་རྒྱལ་ཚབ་ཀྱིས། ཟས་དང་སྐོམ་དང་ནོར་དང་རིན་པོ་ཆེ་རྣམས་ཞག་བདུན་གྱི་བར་དུ་ཡིད་བཞིན་དུ་བྱིན་ནས། དབུལ་ཕོངས་པ་རྣམས་ལོངས་སྤྱོད་དང་ལྡན་ཞིང་ཐམས་ཅད་བདེ་སྐྱིད་པར་བྱས་སོ། །དེ་
ནས་རྒྱལ་བུ་རྒྱལ་ཚབ་ཀྱིས་ཆུང་མ་ལ་སྨྲས་པ། བཞིན་བཟངསུ་ལོངས་ལ་བདག་ཅི་ཟེར་བ་ཉོན་ཅིག །རྒྱལ་པོ་ཆེན་པོས་ནི་བདག་ལོ་བཅུ་གཉིས་ཀྱི་བར་དུ་རི་དན་ཏིག་ཅེས་བྱ་བར་སྤངས་སོ། །ཆུང་མས་རྒྱལ་བུས་སྨྲས་པའི་ཚིག་ཐོས་ནས། 
ཡེད་ཅེས་དངངས་ནས་ལངས་ནས་འདི་སྐད་ཅེས་སྨྲས་སོ། །རྒྱལ་བུ་ལ་ཉེས་པ་ཅི་ཞིག་མཆིས་ན། རྒྱལ་པོས་དེ་ལྟ་དེ་ལྟར་མཛད་པར་གྱུར། རྒྱལ་བུས་སྨྲས་པ། བདག་གིས་སྦྱིན་པ་མ་འོས་པ་ཞིག་བྱས་ཏེ། རྒྱལ་པོའི་བང་མཛོད་
ཀྱང་སྟོངས། བལ་གླང་རིན་པོ་ཆེ་ཡང་དགྲ་ཟླ་ལ་བྱིན་ཞེས་རྒྱལ་པོ་དང་བློན་པོ་རྣམས་ཁྲོས་ནས་བདག་སྤངས་པ་ཡིན་ནོ། །བཙུན་མོ་མན་ཏེས་སྨྲས་པ། རྒྱལ་པོའི་ཡུལ་དུ་ལོ་ལེགས་པ་དང་། རྒྱལ་པོ་ཆེན་པོ་དང་། བློན་པོ་དང་
འབངས་ཀྱི་བར་དུ་བདེ་སྐྱིད་པ་དང་། ལོངས་སྤྱོད་ཆེ་བར་སྨོན་ལམ་ལེགས་པར་བཏབ་ལ་བདག་ཅག་རི་ལ་སྒོམ་དུ་འདོང་ངོ་། །རྒྱལ་བུས་སྨྲས་པ། བཞིན་བཟངས་རི་ནི་འཇིགས་པའི་གནས་ཡིན་ཏེ། ཤིན་ཏུ་བྱ་དཀའ་བ་བསམ་དགོས་ལ་སེང་
གེ་དང་སྟག་ལ་སོགས་པ་གཅན་ཟན་མ་རུངས་པ་ཡོད་པས་རབ་ཏུ་འཇིགས་ན་ཁྱོད་ནི་ལོངས་སྤྱོད་མྱོང་བ་ཡིན་པས་ཁྱོད་དེ་ལྟ་བུ་དག་བཟོད་དམ། ཁྱོད་ཕོ་བྲང་གི་ནང་ན་གོས་སུ་ནི་ཕྲ་བ་དང་འཇམ་པ་གྱོན། གནས་སུ་ནི་གུར་དང་ཡོལ་བས་
བསྐོར་བ་ན་འདུག །ཟས་སུ་ནི་ཅི་ལ་དགའ་བ་བཞིན་ཞིམ་པ་དང་མངར་བ་ལ་ཟ་ན། རི་ལ་ནི་སྟན་དུ་ནི་རྩྭ་འདིངས། ཟས་སུ་ནི་འབྲས་བུ་ཟ་ན། ཁྱོད་དེ་ལ་མོས་ཤིང་དགའ་བ་ཅི་ཞིག་ཡོད། དེ་མ་ཡིན་པ་གཞན་ཡང་རླུང་དང་ཆར་པ་དང་འབྲུག་
དང་སེར་བ་ཆེ་ཞིང་བ་མོ་དང་ཟིལ་པས་མིའི་སྤུ་ཡང་ལངས་པ་ཙམ་དུ་གྲང་བའི་ཚེ་ན་ནི་གྲང་རབ་ལ་ཚ་བའི་ཚེ་ན་ནི་ཚ་རབ་སྟེ། ཤིང་གི་གསེབ་ན་འདུག་པའི་གནས་སུ་ཡང་མི་རུང་ན། ས་ལ་གཟེ་མ་དང་གསེག་མ་དང་རྡོ་བ་ཡང་མང་ཞིང་སྦྲུལ་

71-1-63b

གདུག་པ་ཡང་ཡོད་ན། ཁྱོད་དེ་ལྟ་བུ་དག་བཟོད་དམ། མན་ཏེས་སྨྲས་པ། བདག་ལ་མཉེན་ཞིང་འཇམ་པ་དང་གུར་དང་ཡོལ་བ་དང་མངར་བ་དང་ཞིམ་པ་ཅི་ཞིག་བགྱི་རྒྱལ་བུ་དང་བྲལ་ཞིང་སོ་སོར་མཆི་བ་བདག་མི་བཟོད་དེ། ནམ་དུ་ཡང་རྒྱལ་བུ་
དང་མི་འབྲལ་ཞིང་ལྷན་ཅིག་འགྲོགས་པར་དགའོ། །རྒྱལ་པོའི་ཐོག་མར་འགྲོ་བ་ནི་རྒྱལ་མཚན་མེའི་ཐོག་མར་འགྲོ་བ་ནི་དུད་པ། ཆུང་མའི་ཐོག་མར་འགྲོ་བ་ནི་ཁྱིམ་ཐབ་ཡིན་པས་བདག་ནི་རྒྱལ་བུ་ལ་ཡིད་བརྟན་ཏེ་སྐྱབས་སུ་མཆིའོ། །རྒྱལ་བུ་ནི་
བདག་གི་ལྷ་ལགས་ཏེ། རྒྱལ་བུས་ཕྱོགས་བཞི་ནས་འདུས་པ་ལ་སྦྱིན་པ་བྱིན་པའི་ཚེ། བདག་གིས་ཀྱང་རྒྱལ་བུའི་གྲོགས་བགྱིས་པས་ད་རྒྱལ་བུ་ལམ་རིང་དུ་འགྲོ་བ་ལས། གལ་ཏེ་ཕ་རོལ་པོ་སློང་བ་འོངས་ན་བདག་གིས་དེ་བཞིན་དུ་
གྲོགས་བགྱི། རྒྱལ་བུས་སྦྱིན་པ་མཛད་ན་བདག་གི་སྲོག་ལ་བབ་ཀྱང་ཕྱིར་མི་ནུར་བས་ཐེ་ཙོམ་མི་མཛད་དུ་གསོལ། རྒྱལ་བུས་སྨྲས་པ། བདག་ནི་སྦྱིན་པ་ལ་དགའ་བས་ཕ་རོལ་ཀྱི་སེམས་མི་ཟློགས་ཏེ། ཕ་རོལ་པོས་བདག་ལ་གལ་
ཏེ་བུ་འམ་ཁྱོད་ཉིད་སློང་བ་འོངས་ན་ཡང་བདག་གིས་མི་གཏོང་མི་ནུས་སོ། །ཅི་སྟེ་བདག་གིས་བསམས་པ་ཁྱོད་ཀྱིས་དེ་བཞིན་མ་བྱས་ན་ནི་བདག་གི་དགེ་བའི་སེམས་འཁྲུགས་པར་གྱུར་པས་འགྲོ་བར་མི་རིགས་སོ། །མན་ཏེས་སྨྲས་
པ། རྒྱལ་བུས་སྦྱིན་པ་མཛད་པ་ནི་འཇིག་རྟེན་ན་གང་ཡང་འདི་འདྲ་བ་མེད་པས་ཡིད་བཞིན་དུ་སྦྱིན་པ་མཛད་དུ་གསོལ། རྒྱལ་བུས་སྨྲས་པ། ཁྱོད་དེ་ལྟར་ནུས་ན་ཤིན་ཏུ་ལེགས་སོ་ཞེས་རྒྱལ་བུ་དང་བཙུན་མོ་དང་སྲས་གཉིས་དང་བཅས་
པ་འགྲོགས་ཏེ། ཡུམ་གང་ན་བ་དེར་སོང་ནས་ད་བདག་ཅག་མཆིའོ་ཞེས་མཆི་ཕྱག་བྱས་ནས་ཡུམ་ལ་འདི་སྐད་ཅེས་གསོལ་ཏོ། །ཡུམ་གྱིས་སྐབས་སྐབས་སུ་རྒྱལ་པོ་ཆེན་པོ་ལ། ཅི་ནས་དཀར་པོའི་ཆོས་ཀྱིས་ཡུལ་གྱི་སྲིད་བདེ་
ཞིང་འབངས་མང་པོ་གཏམས་ལས་མི་གཅད་པར་གྲོས་གདབ་པར་གསོལ་ལོ། །ཡུམ་གྱིས་རྒྱལ་བུ་འགྲོའོ་ཞེས་མཆི་ཕྱག་བྱས་པ་མཐོང་ནས་ལྷག་པར་མྱ་ངན་གྱིས་གདུངས་ཏེ་དྲུང་ན་འདུག་པ་ལ་འདི་སྐད་ཅེས་སྨྲས་སོ། །ཁོ་མོའི་ལུས་

71-1-64a

འདི་ནི་རྡོ་བ་ཡིན་པ་ལྟ། སྙིང་ནི་རྡོ་རྗེ་ཡིན་པ་ལྟ་སྟེ། བདག་གིས་རྒྱལ་པོ་ཆེན་པོའི་རིམ་གྲོ་བྱ་བ་ལ་སྐྱོན་མ་བྱུང་ན། ད་ཁོ་མོའི་བུ་གཅིག་པུ་འདི་དང་བྱེ་བྲལ་ཏེ། འགྲོ་ན་ཅིའི་ཕྱིར་ཁོ་མོའི་སྙིང་འདི་གས་ཏེ་ཤི་བར་མ་གྱུར། བུ་འདི་
ཁོ་མོའི་ཁོང་པ་ན་འདུག་པ་ན་སྐྱེད་ཤིང་གི་འདབ་མ་ལྟར་ཉིན་མཚན་ཆེར་སྐྱེས་ཏེ། ད་སྐྱེད་རྫོགས་ནས་ཁོ་མོ་བོར་ཏེ་སོང་བས་ན། བཙུན་མོ་ཐམས་ཅད་ཀྱང་བདག་ལ་སྙིང་ཚིམ་མོ་ཞེས་བརྗོད་ལ་རྒྱལ་པོས་ཀྱང་བཀུར་བར་མི་འགྱུར་ན། གལ་ཏེ་
ལྷ་རྣམས་ཀྱིས་བདག་གི་སྨོན་ལམ་བཞིན་མི་འགལ་བར་མཛད་ན་བདག་གི་བུ་ཕྱིར་ཡུལ་དུ་འཁོར་བར་ཤོག་ཅིག་ཅེས་སྨོན་ལམ་བཏབ་བོ། །དེ་ནས་རྒྱལ་བུ་བཙུན་མོ་དང་སྲས་གཉིས་དང་བཅས་ཏེ། ཡབ་དང་ཡུམ་ལ་མཆི་ཕྱག་
བྱས་ཏེ་དོང་ངོ་། །དེའི་ཚེ་བཙུན་མོ་ཉི་ཁྲིས་ནི་སོ་སོ་ནས་མུ་ཏིག་གི་ཆུན་པོ་རེ་རེ་བརྫངས་སོ། །བློན་པོ་ཆེན་པོ་བཞི་སྟོང་གིས་ནི་རིན་པོ་ཆེ་སྣ་བདུན་ལས་བྱས་པའི་མེ་ཏོག་པད་མོ་རེ་རེ་རྒྱལ་བུ་ལ་བརྫངས་སོ། །དེ་ནས་རྒྱལ་བུ་ཕོ་
བྲང་ནང་ནས་བྱུང་སྟེ་གྲོང་ཁྱེར་གྱི་བྱང་སྒོར་ཕྱིན་ནས། རིན་པོ་ཆེ་སྣ་བདུན་གྱི་མེ་ཏོག་དང་དོ་ཤལ་ཡང་རིལ་གྱིས་ཕྱོགས་བཞི་ནས་འདུས་པ་ལ་མ་ལུས་པར་བྱིན་ནོ། །ཡུལ་དེ་ན་གནས་པའི་མི་མང་པོ་ཁྲི་ཕྲག་དུ་མས་རྒྱལ་བུ་
བསྐྱལ་ཏེ། དེ་དག་འདི་སྐད་ཅེས་གཏམ་དུ་བརྗོད་དོ། །རྒྱལ་བུ་འདི་ནི་ཤིན་ཏུ་དགེ་བ་ཡུལ་གྱི་ལྷ་གཉན་ལྟ་བུ་ཡིན་ན། ཅིའི་ཕྱིར་ཡབ་ཡུམ་གྱིས་སྲས་རིན་པོ་ཆེ་འདི་ལམ་རིང་དུ་སྤངས་ཅེས་མཐོང་བ་ཐམས་ཅད་ཀྱིས་ཕངས་
སོ་ཞེས་སྨྲས་སོ། །དེའི་ཚེ་རྒྱལ་བུ་གྲོང་ཁྱེར་གྱི་ཕྱི་རོལ་དུ། སྐྱེད་ཤིང་གི་དྲུང་ན་འདུག་སྟེ། སྐྱེལ་བའི་མི་རྣམས་ལ་འདི་ནས་ཕྱིར་དེངས་ཤིག་ཅེས་སྤྲོ་བའི་ཚིག་སྨྲས་པ་དང་། སྐྱེལ་སྐྱེལ་བ་ཆེ་ཆུང་ཐམས་ཅད་མཆི་མ་བླགས་ཏེ་
ངུས་ནས་ཕྱིར་དོང་ངོ་། །དེ་ནས་རྒྱལ་བུས་བཙུན་མོ་དང་སྲས་གཉིས་ཤིང་རྟའི་ནང་དུ་བཞག་ནས། རྒྱལ་བུ་ཉིད་ཀྱིས་ཤིང་རྟ་ཁ་ལོ་བསྒྱུར་ཏེ་སོང་བ་ལས་རྒྱངས་ཆད་པར་ཕྱིན་ཏེ། སྐྱེད་ཤིང་གི་དྲུང་ན་ངལ་སོ་ཞིང་འདུག་པ་ལས་

71-1-64b

བྲམ་ཟེ་དག་ཅིག་ལྷགས་ནས། རྒྱལ་བུ་ལས་ཤིང་རྟ་ཁྲིད་པའི་རྟ་བསླངས་སོ། །རྒྱལ་བུས་སློང་བ་ལ་རྟ་བྱིན་ནས། སྲས་བུ་གཉིས་ཤིང་རྟའི་སྟེང་དུ་བཞག་སྟེ། བཙུན་མོས་ནི་ཤིང་རྟའི་ཕྱི་ནས་ཕུལ། རྒྱལ་བུས་ནི་མདུན་ནས་
དྲངས་ཏེ་རྐང་པས་ཤིང་རྟ་འདྲེན་ཅིང་སོང་བ་ལས། རིང་པོ་མ་ལོན་པར་ཡང་བྲམ་ཟེ་ཞིག་དང་ཕྲད་ནས་ཤིང་རྟ་བསླངས་པ་དང་། རྒྱལ་བུས་ཤིང་རྟ་ཡང་བྲམ་ཟེ་ལ་བྱིན་ནོ། །དེ་ནས་ཡང་སོང་བ་ལས་རིང་པོ་མ་ལོན་པར་ཡང་བྲམ་ཟེ་སློང་བ་
དང་ཕྲད་ནས་རྒྱལ་བུས་དེ་དག་ལ་འདི་སྐད་ཅེས་སྨྲས་སོ། །གལ་ཏེ་བདག་གིས་ཁྱོད་ལ་མ་བྱིན་ན་ནི་ཆགས་ཤིང་སེར་སྣ་བྱེད་པར་གྱུར་ན། ད་ནི་བདག་ལ་ནོར་ཟས་ཟད་དེ་ཅི་ཡང་མེད་དོ་ཞེས་སྨྲས་པ། བྲམ་ཟེ་ན་རེ་ནོར་རྫས་མེད་ན་ལུས་ལ་
གྱོན་པའི་གོས་དེ་ང་ལ་བྱིན་ཅིག་ཅེས་སྨྲས་པ་དང་། རྒྱལ་བུས་ལུས་ལ་གྱོན་པའི་གོས་རིན་པོ་ཆེ་ཡང་སློང་བ་ལ་བྱིན་ཏེ། གོས་རྙིང་པ་ཞིག་གྱོན་ཏེ་དོང་བ་ལས་རིང་པོ་མ་ལོན་པར་བྲམ་ཟེ་ཡང་སློང་བ་ཞིག་དང་ཕྲད་ནས་རྒྱལ་བུས་བཙུན་
མོའི་གོས་བྱིན་ནོ། །དེ་ནས་ཡང་དོང་བ་ལས་རིང་པོ་མ་ལོན་པར་བྲམ་ཟེ་སློང་བ་དང་ཕྲད་ནས། རྒྱལ་བུས་སྲས་གཉིས་ཀྱི་གོས་ཀྱང་བྱིན་ནོ། །དེ་ལྟར་རྒྱལ་བུས་རྟ་དང་ཤིང་རྟ་དང་ནོར་རྫས་དང་བགོ་བའི་གོས་ཀྱི་བར་དུ་མ་ལུས་
པར་ཟད་པར་བྱིན་པ་ཡང་། ཐོག་མ་ནས་འགྱོད་པའི་སེམས་སྐྲའི་ཉག་མ་ཙམ་འམ་བ་སྤུ་ཙམ་ཡང་མེད་དོ། །རྒྱལ་བུས་ནི་སྲས་བུ་ཁུར་བུ་ཐོགས། བཙུན་མོས་ནི་སྲས་མོ་པང་དུ་ཁྱེར་ནས་རྐང་པས་སོང་ཡང་རྒྱལ་བུ་དང་བཙུན་
མོ་དང་སྲས་གཉིས་ཀྱི་བར་དུ་དགའ་བའི་མདངས་དང་བཅས་ཏེ་རི་ག་ལ་བ་དེར་སོང་ངོ་། །རི་དན་ཏིག་ཅེས་བྱ་བར་ཡུལ་ཡ་བ་ནས་ལམ་སོ་རབ་ཏུ་རིང་སྟེ་དཔག་ཚད་ཕྲག་སྟོང་ཞིག་ཡོད་དོ། །དེ་ལྟར་སོང་སོང་བ་ལས་འབྲོག་དགོན་
པར་ཕྱིན་ནས། བཀྲེས་པ་དང་སྐོམ་པའི་སྡུག་བསྔལ་གྱིས་ཉེན་པ་ལས། སུམ་བཅུ་རྩ་གསུམ་གནམ་གྱི་ལྷའི་དབང་པོས་འབྲོག་དགོན་པ་དེར་གྲོང་ཁྱེར་ཁྱིམ་བཟང་པོ་ཚོང་འདུས་དང་ལམ་སྲང་ཡོད་པ། རོལ་མོ་དང་གོས་དང་བཟའ་བ་དང་

71-1-65a

བཏུང་བ་དང་ལྡན་པ། གྲོང་ཁྱིམ་དེ་ན་མི་དག་གིས་རྒྱལ་བུ་བསུ་བ་དག་སྤྲུལ་ཏོ། །མི་མང་པོས་རྒྱལ་བུ་གྲོང་ཁྱིམ་དུ་བསུས་ཏེ། ཟས་དང་སྐོམ་དང་བདེ་བའི་ཡོ་བྱད་ཀྱིས་བསྟབས་པ་དང་། བཙུན་མོས་རྒྱལ་བུ་ལ་སྨྲས་པ། ལམ་
རིང་པོར་བགྲོད་པས་རབ་ཏུ་ངལ་ད་ཐལ་བྱུང་འདུག་ཏུ་མི་རུང་ངམ། རྒྱལ་བུས་སྨྲས་པ། ཡབ་རྒྱལ་པོས་བདག་ཅག་ལ་རི་དན་ཏིག་ཏུ་སོང་ཤིག་ཅེས་བཀའ་སྩལ་ཏེ། ད་འདིར་འདུག་པར་གྱུར་ན་ཡབ་རྒྱལ་པོའི་བཀའ་དང་འགལ་བར་གྱུར་ཏེ་བུ་
སྲི་ཞུ་ཅན་མ་ཡིན་ནོ་ཞེས་གྲོང་ཁྱེར་དེ་ནས་བྱུང་སྟེ་མོད་ལ་སོང་ངོ་། །དེ་ལྟར་སོང་བ་ལས་རིང་པོ་མ་ལོན་པར་རི་དན་ཏིག་གི་རིའི་དྲུང་དུ་ཕྱིན་པ་དང་། རི་དེའི་དྲུང་ན་ཆུ་ཆེན་པོ་ཤིན་ཏུ་ཟབ་པ་རྒལ་བར་མི་ཐར་བ་ཞིག་དང་ཕྲད་དོ། །དེ་ནས་བཙུན་
མོས་རྒྱལ་བུ་ལ་རི་ཤིག་འདིར་བསྡད་དོ། །ཆུ་ཆེན་པོ་བྲི་ནས་རྒལ་ཏེ་འདོང་ངོ་ཞེས་སྨྲས་པ་དང་། རྒྱལ་བུས་སྨྲས་པ། ཡབ་རྒྱལ་པོས་བདག་ཅག་ལ་རི་དན་ཏིག་ཏུ་སོང་ཤིག་ཅེས་བཀའ་སྩལ་པས། ད་འདིར་འདུག་པར་གྱུར་ན་
རྒྱལ་པོའི་བཀའ་དང་འགལ་ཏེ། བུ་སྲི་ཞུ་ཅན་མ་ཡིན་ནོ་ཞེས་སྨྲས་ནས་རྒྱལ་བུ་དེ་མ་ཐག་ཏུ་བྱམས་པའི་སེམས་ཀྱིས་ཏིང་ངེ་འཛིན་ཏུ་ཞུགས་པ་དང་། མོད་ལ་ཆུའི་ནང་ནས་རི་ཆེན་པོ་ཞིག་བྱུང་ནས་ཆུའི་རྒྱུན་བཅད་དོ། །དེ་
ནས་རྒྱལ་བུ་དང་བཙུན་མོ་གོས་བརྫེས་ཏེ། ཆུ་རྒལ་ནས་ཕར་རྒལ་མ་ཐག་ཏུ་རྒྱལ་བུ་ཡང་འདི་སྙམ་དུ་བསམས་སོ། །ཐལ་བྱུང་སོང་བར་གྱུར་ན་ཆུ་འཁྱིལ་པ་འདིས་སེམས་ཅན་མང་དུ་འཆི་སྟེ། གྲོག་སྤུར་མང་པོ་ཆུས་ཁྱེར་
བར་འགྱུར་རོ་སྙམ་བསམས་ནས། རྒྱལ་བུ་ཕྱིར་ཆུ་ལ་བལྟས་ཏེ་འདི་སྐད་ཅེས་སྨྲས་སོ། །ཆུ་ཁྱོད་སྔ་མཁོ་བཞིན་དུ་རྒྱུན་ཏུ་འབབ་ཅིང་གལ་ཏེ་བདག་འདོད་པ་ཞིག་འོངས་ན་ཡང་ཐར་བར་བྱོས་ཤིག་ཅེས་སྨྲས་མ་ཐག་ཏུ་ཆུ་
ཡང་སྔ་མཁོ་བཞིན་དུ་འབབ་པར་གྱུར་ཏོ། །དེ་ནས་སོང་བ་ལས་རི་དན་ཏིག་ཏུ་ཕྱིན་ནས་རྒྱལ་བུས་རི་དེ་བལྟས་ནས། རི་དེ་རད་རོད་དང་ཟད་ཟེད་དུ་འདུག་ལ་ཤིང་མང་པོ་རབ་ཏུ་རྒྱས་ཤིང་བྱ་སྣ་ཚོགས་ཀྱང་སྙན་པའི་སྒྲ་འབྱིན། འབབ་

71-1-65b

ཆུ་དང་ཆུ་མིག་དང་མཚེའུ་དང་ལྟེང་ཀ་ལྡན་ཏེ་ཆུ་ནི་མངར་འབྲས་བུ་ནི་ཞིམ། ཆུ་བྱ་དང་ངར་ངུར་དང་འཇོལ་མོ་དང་རི་སྐེགས་ལ་སོགས་པ་བྱ་རྣམ་པ་སྣ་ཚོགས་དག་ཀྱང་གནས་པ་མཐོང་ནས་རྒྱལ་བུས་བཙུན་མོ་ལ་ཡང་འདི་སྐད་ཅེས་
སྨྲས་སོ། །རི་འདི་ལ་བལྟས་ན་ཤིང་དང་ཚལ་གནམ་ལ་རེག་པ་ཙམ་ཏུ་སྐྱེས་ན་ཡང་། བརྔས་པ་འམ་བཅད་པ་མེད་པས་ཆུ་མིག་ཞིམ་པོ་ལ་འཐུང་ཞིང་འབྲས་བུ་མངར་བ་ཟ་སྟེ། རི་འདི་ལ་སྒོམ་པ་དག་ཡོད་པས་འདིར་གནས་པར་
བྱའོ། །རྒྱལ་བུ་རི་དེ་ལ་ཕྱིན་པ་ན། རི་དེ་ལ་གནས་པའི་འདབ་ཆགས་བྱ་དང་གཅན་ཟན་དང་རི་དགས་ཐམས་ཅད་རབ་ཏུ་དགའ་ནས་རྒྱལ་བུ་བསུས་སོ། །དེའི་ཚེ་རི་དེ་ལ་སྒོམ་པའི་དགེ་སློང་ཨ་ཚུ་ཏ་ཞེས་བྱ་བ་ལོ་ལྔ་བརྒྱ་ལོན་པ། 
ཡོན་ཏན་མཆོག་དང་ལྡན་པ་ཞིག་གནས་ཏེ། རྒྱལ་བུ་དེའི་དྲུང་དུ་སོང་ནས། ཕྱག་བྱས་ཏེ་ཕྱོགས་གཅིག་ཏུ་འདུག་ནས་འདི་སྐད་ཅེས་སྨྲས་སོ། །རི་འདི་ལ་གང་ཕྱོགས་ན་འབྲས་བུ་དང་ཆུ་མིག་བཟང་པོར་ལྡན་པ་གནས་སུ་
རུང་བ་ཅི་ཡོད་ཅེས་དྲིས་པ་དང་། ཨ་ཚུ་ཏས་སྨྲས་པ། རི་འདི་གནས་ཐམས་ཅད་དུ་བསོད་ནམས་དང་ལྡན་པའི་ས་གཞི་ཡིན་པས་གང་དུ་གནས་ཀྱང་རུང་སྟེ། རི་འདི་ནི་ཤིན་ཏུ་དབེན་པའི་གནས་གཙང་མ་ཡིན་པས་ན་
ཅི་རྒྱལ་བུ་ཁྱོད་ཆུང་མ་དང་བུ་སྨད་དུ་བཅས་ཏེ་ཆོས་སློབ་དུ་འོངས་སམ། དེ་ལ་རྒྱལ་བུས་སྨྲ་མ་ཁོམ་པར་བཙུན་མོ་མན་ཏེས་སྨྲས་པ། དགེ་སློང་ལ་འདི་སྐད་ཅེས་སྨྲས་སོ། །བཙུན་པ་རི་ལ་ལམ་བསྒོམས་ནས་ཇི་སྲིད་ཅིག་ལོན། དགེ་སློང་
གིས་སྨྲས་པ། རི་འདིར་ཕྱིན་ནས་ལོ་བཞི་བརྒྱ་འམ་ལྔ་བརྒྱ་ཙམ་ལོན་ནོ། །བཙུན་མོ་མན་ཏེས་སྨྲས་པ། ད་དུང་བདག་དང་བདག་གི་བར་དུ་འཛིན་ན་ནམ་ཞིག་ལམ་ཐོབ་པར་འགྱུར། དེ་སྲིད་དུ་རི་ལ་གནས་ཀྱང་རྡོ་ཤིང་དང་ཐ་
མི་དད་དེ་བདག་དང་བདག་གིར་མི་འཛིན་ན་གདོད་ལམ་ཐོབ་པར་འགྱུར་རོ་ཞེའོ། །དགེ་སློང་གིས་སྨྲས་པ། བདག་གིས་ཡང་དག་པར་དོན་དེ་ལྟ་བུ་མི་ཤེས་སོ། །དེ་ནས་རྒྱལ་བུས་དགེ་སློང་ལ་སྨྲས་པ། བཙུན་པ་

71-1-66a

ཡུལ་ཡ་བའི་རྒྱལ་བུ་རྒྱལ་ཚབ་དོན་གྲུབ་ཅེས་བྱ་བ་ཐོས་སམ། དགེ་སློང་གིས་སྨྲས་པ། བདག་གིས་རྒྱུན་དུ་ཐོས་ཀྱི་མཐོང་བ་ནི་མ་ཡིན་ནོ། །རྒྱལ་བུས་སྨྲས་པ། བདག་ནི་རྒྱལ་བུ་རྒྱལ་ཚབ་དོན་གྲུབ་ཅེས་བྱ་བ་ཡིན་
ནོ། །དགེ་སློང་གིས་རྒྱལ་བུ་ཁྱོད་གར་འགྲོ་ཅི་འདོད་ཅེས་དྲིས་པ་དང་། རྒྱལ་བུས་སྨྲས་པ། བདག་ནི་ཐེག་པ་ཆེན་པོའི་ལམ་འདོད་དོ་ཞེས་སྨྲས་སོ། །དགེ་སློང་གིས་སྨྲས་པ། རྒྱལ་བུའི་ཡོན་ཏན་དང་སྦྱར་ན། རིང་པོར་མི་ཐོགས་པར་
ཐེག་པ་ཆེན་པོའི་ལམ་ཐོབ་པར་འགྱུར་ཏེ། རྒྱལ་བུ་བླ་ན་མེད་པའི་བྱང་ཆུབ་མངོན་པར་སངས་རྒྱས་པ་ན། བདག་ནི་ཉེ་གནས་རྫུ་འཕྲུལ་གྱི་མཆོག་ཏུ་གྱུར་ཅིག་ཅེས་སྨྲས་ནས། རྒྱལ་བུ་ཁྲིད་དེ་འདུག་པའི་གནས་བསྟན་ཏོ། །དེ་ནས་
དགེ་སློང་གིས་ཆོས་བཞིན་དུ་རྒྱལ་བུའི་སྐྲ་སླས་ནས་མདུད་པ་བོར་ནས། ཟས་སུ་ནི་ཤིང་གི་འབྲས་བུ་ཤིང་ཏོག་ཟ། སྐོམ་དུ་ནི་ཆུ་མིག་འཐུང་ངོ་། །དེ་ནས་རྒྱལ་བུས་ཤིང་དང་རྩྭ་བསྡུས་ཏེ། བདག་འདུག་པའི་རྩྭའི་སྤྱིལ་པོ་ཆུ་ངུ་
མ་གཅིག་བྱས། བཙུན་མོ་མན་ཏེ་བུ་མིང་སྲིང་གཉིས་འདུག་པའི་སྤྱིལ་པོ་རེ་རེ་ཡང་བྱས་སོ། །དེའི་ཚེ་ན་ཁྱེའུའི་མིང་ནི་ཡ་རི་ཞེས་བྱ་སྟེ། ལོ་བདུན་ལོན་ནས་གོས་རང་གྱོན་ནུས་ཏེ། ཕའི་ཕྱི་བཞིན་དུ་འགྲོའོ། །བུ་མོའི་
མིང་ནི་གེ་ནོ་ཡན་ཞེས་བྱ་སྟེ་ལོ་དྲུག་ལོན་པས། རི་དགས་ཀྱི་ལྤགས་པ་གྱོན་ཅིང་མའི་ཕྱི་བཞིན་འགྲོའོ། །རི་དེ་ལ་གནས་པའི་གཅན་ཟན་དང་། རི་དགས་དང་། འདབ་ཆགས་བྱ་ལ་སོགས་པ་ཐམས་ཅད་ཀྱང་རབ་ཏུ་དགའ་
ནས། རྒྱལ་བུ་ལ་རྟེན་ཅིང་གནས་སོ། །རྒྱལ་བུ་རི་དེ་ལ་ཕྱིན་ནས་ཞག་ཅིག་ལོན་པ་དང་། སྔོན་སྐམས་པའི་ཆུ་མིག་དང་། རྫིང་ཡང་ཆུས་གང་བར་གྱུར། སྐྱེད་ཤིང་སྐམས་པ་རྣམས་ཀྱང་ཐམས་ཅད་མེ་ཏོག་དང་འདབ་མ་སྐྱེས་པར་
གྱུར་ཏེ། སྲིན་བུ་གདུག་པ་རྣམས་ཀྱང་མེད་པར་གྱུར་ནས། གཅན་ཟན་གཅིག་ལ་གཅིག་ཟ་བ་ཡང་སོ་སོ་ནས་རྩྭ་ལ་ཟ་བར་གྱུར། འབྲས་བུའི་ཤིང་རྣམས་ཀྱང་རྒྱས་ཤིང་བཟང་པོར་གྱུར། བྱ་སྣ་ཚོགས་སྙིང་རྗེའི་སྐད་ཀྱི་སྒྲ་སྐད་

71-1-66b

སྙན་པ་འབྱིན་པར་གྱུར་ཏོ། །བཙུན་མོ་མན་ཏེས་ནི་ཤིང་གི་འབྲས་བུ་དང་ཤིང་ཏོག་བརྔས་ཤིང་རྒྱལ་བུ་ལ་ཕུལ་ཏེ། སྲས་མིང་སྲིང་གཉིས་ཀྱང་སྙོད་དོ། །སྲས་བུ་མིང་སྲིང་གཉིས་ནི་སྐབས་སྐབས་སུ་ཕ་མ་གཉིས་དང་བྲལ་ཏེ། 
ཧ་ཅང་ཡང་མི་རིང་བའི་ཆུ་མིག་འགྲམ་དག་ཏུ་གཅན་ཟན་ནམ་རི་དགས་དག་དང་ལྷན་ཅིག་རྩེ་སྟེ། བར་འགའ་ཞག་ལོན་པར་ཡང་རྩེའོ། །ཕྱིས་དུས་གཞན་ཞིག་ན་སྲས་ཁྱེའུ་ཡ་རི་སེང་གེ་ལ་ཞོན་པ་ལས། སེང་གེ་རྒལ་ནས་རྡབ་
ཅིག་བསྣུན་པས་སྲས་བུའི་གདོང་པ་ཅུང་ཟད་སྣད་དེ་ཁྲག་བྱུང་བ་ལས། སྤྲེའུ་ཞིག་གིས་ཤིང་གི་ལོ་མ་བླངས་ཏེ་གདོང་གི་ཁྲག་ཕྱིས་ནས་ཆུ་འགྲམ་དུ་ཁྲིད་དེ་ཁྲག་བཀྲུས་པ་ཡང་རྒྱལ་བུས་རྒྱང་མ་ནས་མཐོང་ངོ་། །དེའི་ཚེ་ཡུལ་
ཀཻ་ལཻ་ཞེས་བྱ་བར་བྲམ་ཟེ་དབུལ་པོ་ཞིག་ལོ་བཞི་བཅུ་ལོན་ནས་ཆུང་མ་བླངས་སོ། །ཆུང་མ་ནི་རབ་ཏུ་བཟང་ཞིང་སྡུག་ལ། བྲམ་ཟེ་དེ་ནི་རབ་ཏུ་མི་སྡུག་པའི་མཚན་མ་བཅུ་གཉིས་རྫོགས་པར་ཡོད་དེ། དེའི་ལུས་མདོག་
སོལ་བ་ལྟར་གནག་ལ་གདོང་ལ་འབུར་འབུར་པོ་གསུམ་ཡོད་པ། སྣ་འཁྱོར་ཞིང་མིག་གཉིས་ཤེལ་ལྟར་སྔོ་བ། གདོང་གཉེར་མ་ཅན་ལ་མ་མཆུ་འཕྱང་བ། སྨྲ་བའི་སྐད་མི་སྙན་པ། གསུས་པ་ཆེ་བ། རྐུབ་འབུར་
བ། རྐང་པ་གཉིས་གྱོལ་བ། མགོ་ཤུ་བ་ཅན་ལ་སྐྲ་མེད་པ། འདྲེ་ལྟར་མི་སྡུག་པ་ཞིག་སྟེ། ཆུང་མས་ཀྱང་མཐོང་མི་འདོད་པ་ཙམ་དུ་ཤི་ཡང་སླ་ཞེས་རྒྱུན་ཏུ་དམོད་མོ་བྱེད་པ་ཞིག་ཡོད་དོ། །དུས་གཞན་ཞིག་ན་ཆུང་མ་
དེ་ཆུ་ཆུར་སོང་སོང་བ་ལས། ལམ་དུ་ཁྱོ་ག་གཞོན་ནུ་མ་དག་ཅིག་དང་ཕྲད་ནས་ཁྱོ་ག་རྣམས་ཀྱིས་ཁྱིམ་ཐབ་ཀྱི་གཟུགས་འདི་འདྲའོ་ཞེས་ཅོ་འདྲི་ཞིང་བརྒད་ནས། ཁྱོད་ནི་དཔེ་མེད་པར་བཟང་ཞིང་སྡུག་ན། ཅི་ལྟར་འདི་འདྲ་བའི་ཆུང་
མ་བྱེད་ནུས་ཅེས་སྨྲས་པ་དང་ཆུང་མས་ཁྱོ་ག་དེ་དག་ལ་འདི་སྐད་ཅེས་སྨྲས་སོ། །རྒན་པོའི་མགོ་ནི་ཤིང་ལ་བ་མོ་ཆགས་པ་ལྟར་སྐྱ་བ་དེ་ནང་ནུབ་ཏུ་ཤི་བར་དགའ་ན་ཤིར་མི་བཏུབ་ཇི་ལྟར་བྱ། དེ་ནས་ཆུ་སྣོད་ཐོགས་ནས་ཕྱིར་ཁྱིམ་དུ་འོངས་ཏེ། 

71-1-67a

ཁྱིམ་ཐབ་ལ་འདི་སྐད་ཅེས་སྨྲས་སོ། །བདག་ཆུ་ཆུར་སོང་སོང་བ་ལས། ལམ་དུ་ཁྱོ་ག་གཞོན་ནུ་དག་ཅིག་དང་ཕྲད་དེ། དེ་དག་བདག་ལ་ཅོ་འདྲི་ཞིང་བརྒད་ནས། ད་ཁྱོད་ཀྱིས་བཀོལ་བའི་བྲན་ཁོལ་ཡོད་ན་ཆུ་ཆུ་ཡང་མི་དགོས་ཏེ། 
གཞན་གྱིས་དཔྱས་པར་ཡང་མི་འགྱུར་རོ། །ཁྱིམ་ཐབ་ཀྱིས་སྨྲས་པ། བདག་ཅག་ནི་ཤིན་ཏུ་ཡང་དབུལ་ཕོངས་པ་ཡིན་ན་བྲན་ཁོལ་ག་ལས་རྙེད་པར་འགྱུར། ཆུང་མས་སྨྲས་པ། གལ་ཏེ་བདག་གི་ཕྱིར་བྲན་ཁོལ་མ་བཙལ་ན་བདག་ཀྱང་འགྲོ་
སྟེ། ཁྱོད་དང་ལྷན་ཅིག་མི་གནས་སོ་ཞེས་ཆུང་མས་ཡང་འདི་སྐད་ཅེས་སྨྲས་སོ། །ཁོ་མོས་ཐོས་ན། རྒྱལ་བུ་དོན་གྲུབ་སྦྱིན་པ་མ་འོས་པར་བྱིན་པས་ཡབ་རྒྱལ་པོས་རི་དན་ཏིག་ཅེས་བྱ་བར་སྤངས་སོ། །རྒྱལ་བུ་དེ་ལ་བུ་ཁྱེའུ་གཅིག་དང་བུ་
མོ་གཅིག་ཡོད་ཅེས་གྲག་གིས། ཁྱོད་དེ་སློང་དུ་སོང་ཤིག །ཁྱིམ་ཐབ་ཀྱིས་སྨྲས་པ། རི་དན་ཏིག་ཅེས་བྱ་བ་འདི་ནས་དཔག་ཚད་དྲུག་སྟོང་ལྷག་ཙམ་གཅིག་གི་ལམ་སོ་ཡོད་ལ། སྔོན་ལ་ལུང་བགྲོད་ཀྱང་མ་མྱོང་ན་ད་ཅི་ལྟར་བགྲོད་པར་བྱ། 
ཆུང་མས་སྨྲས་པ། བདག་གི་ཕྱིར་བྲན་ཁོལ་མ་བཙལ་ན་བདག་འགེགས་ཏེ་འཆིའོ་ཞེས་སྨྲས་པ་དང་། ཁྱིམ་ཐབ་ཀྱིས་སྨྲས་པ། ཉེས་ན་ཁོ་བོ་ནི་གཅིག་གིས་བསད་ཀྱང་སླའོ། །ཁྱོད་ཤི་བར་མི་འདོད་དོ་ཞེས་སྨྲས་ནས། ཁྱོད་ཀྱིས་བདག་སློང་དུ་
འགྲོ་བར་དད་ན་ཁོ་བོའི་རྒྱགས་དང་དགོས་པ་སྦྱོར་ཅིག་ཅེས་བསྒོའོ། །ཆུང་མས་སྨྲས་པ། ད་སོང་ཤིག་རྒྱགས་དང་དགོས་པ་ཡང་མེད་དོ་ཞེས་སྨྲས་ནས། བྲམ་ཟེས་རྒྱགས་རང་སྦྱར་ཏེ་རྐང་པས་ལམ་དུ་ཞུགས་ཏེ་སོང་ངོ་། །དེ་ནས་བྲམ་
ཟེ་ཡུལ་ཡ་བ་ཞེས་བྱ་བ་ག་ལ་བ་དེར་སོང་སྟེ་དེར་ཕྱིན་པ་དང་རྒྱལ་པོའི་ཕོ་བྲང་གི་སྒོར་འོངས་ནས་སྒོ་སྲུང་བ་ལ་རྒྱལ་བུ་དོན་གྲུབ་ད་ལྟར་ག་ལ་འདུག་ཅེས་དྲིས་པ་དང་། སྒོ་སྲུང་དེ་ཕོ་བྲང་གི་ནང་དུ་སོང་ནས་རྒྱལ་པོ་ལ་ད་ལྟར་ཕྱི་རོལ་ན་
བྲམ་ཟེ་ཞིག་རྒྱལ་བུ་དོན་གྲུབ་ག་རེ་ཞེས་འདྲིའོ། །རྒྱལ་པོས་རྒྱལ་བུ་ག་རེ་ཞེས་སྨྲ་བའི་ཚིག་ཐོས་པ་ཙམ་གྱིས་སེམས་འཁྲུག་ཅིང་ཁྲོས་ནས། འདི་སྙམ་དུ་འདི་འདྲ་བ་ཤ་སྟག་གི་ཕྱིར་ངའི་སྲས་སྤངས་པར་གྱུར་ན། ད་ཡང་སློང་

71-1-67b

དུ་འོངས་སྙམ་བསམས་ནས། དཔེ་འདི་སྐད་ཅེས་བརྗོད་པར་གྱུར་ཏོ། །དཔེར་ན་མེ་ནི་རང་བཞིན་གྱིས་ཚ་ཞིང་འབར་བ་ཡིན་ན། དེའི་སྟེང་དུ་ཤིང་བསྣན་པ་དང་འདྲ་སྟེ་བདག་ཀྱང་ད་ལྟར་མྱ་ངན་གྱིས་གདུངས་ཏེ། མེ་དང་འདྲ་བ་ལས་ད་ཡང་རྒྱལ་
བུ་ག་རེ་ཞེས་འདྲི་བ་ནི་མེ་ལ་ཤིང་གིས་བསྣན་པ་དང་འདྲའོ། །བྲམ་ཟེས་གསོལ་པ། བདག་ནི་ལམ་རིང་པོ་ནས་འོངས་པ་ཡང་རྒྱལ་བུ་རྒྱལ་ཚབ་མིའི་ཡིད་དང་མི་འགལ་བར་སྦྱིན་པ་བགྱིད་དོ་ཞེས་མིང་ཡང་སྙན་པ་སྟེང་དུ་གནམ་ལ་ཐུག །
འོག་ཏུ་ནི་ཆུ་མིག་གི་གཏིང་ལ་ཐུག་གི་བར་དུ་གྲགས་པ་བདག་ལམ་རིང་པོ་ནས་རེ་བ་ཡོད་པས་འོངས་སོ། །རྒྱལ་པོས་སྨྲས་པ་རྒྱལ་བུ་དོན་གྲུབ་ནི་ད་ལྟར་རི་ཤིན་ཏུ་དབེན་པ་ན་གནས་ཏེ། རབ་ཏུ་དབུལ་ཞིང་ཅི་ཡང་མེད་ན། ཁྱོད་ལ་
ཅི་ཞིག་སྦྱིན་དུ་ཡོད། བྲམ་ཟེས་སྨྲས་པ། རྒྱལ་བུ་ལ་ཅི་ཡང་མེད་ཀྱང་བདག་ཕྲད་པར་དགའོ་ཞེས་སྨྲས་པ་དང་། རྒྱལ་པོས་ཀྱང་གཞན་ཞིག་ལ་ལམ་སྟོན་ཅིག་ཅེས་བསྒོའོ། །དེ་ནས་བྲམ་ཟེ་དེ་སོང་སོང་བ་ལས་དན་ཏིག་གི་རི་དྲུང་
དུ་ཆུ་ཆེན་པོ་ཞིག་ཡོད་པར་ཕྱིན་ནས། རྒྱལ་བུ་འབའ་ཤིག་བསམས་ཤིང་ཡིད་ལ་བྱས་པས་ཆུའི་ཕ་རོལ་ཏུ་ཕྱིན་པར་གྱུར་ཏོ། །དེ་ནས་བྲམ་ཟེ་རི་དེ་ལ་ཕྱིན་ནས་ཐོག་མ་རྔོན་པ་ཞིག་དང་ཕྲད་དེ་རྔོན་པ་དེ་ལ་ཁྱོད་རི་ལ་རྒྱལ་བུ་
དོན་གྲུབ་ཅེས་བྱ་བ་མཐོང་ངམ་ཞེས་དྲིས་པ་དང་། རྔོན་པ་དེས་ཀྱང་རྒྱལ་བུ་སྦྱིན་པ་ལ་དགའ་བས་བྲམ་ཟེ་འདི་དག་གི་ཕྱིར་རི་ལ་སྤངས་པར་ཤེས་པས། རྔོན་པ་དེས་ཀྱང་བྲམ་ཟེ་བཟུང་ནས་ཤིང་ལ་བཅིངས་ཏེ་བརྡེགས་པས་
ལུས་ལ་རྨ་ཡང་བྱུང་ངོ་། །རྔོན་པས་ཡང་སྨྲས་པ། ཁྱོད་རྒྱལ་བུ་དྲིས་ཏེ་ཅི་ཞིག་བྱ་མདའ་འཕང་ངོ་ཞེས་བྱས་པ་དང་། བྲམ་ཟེ་དེ་འདི་སྙམ་དུ། ད་ནི་འདིས་བདག་གསོད་ཡང་དག་ན་བརྫུན་ཞིག་བྱའོ་སྙམ་བསམས་ནས། 
རྔོན་པ་ལ་ཁྱོད་བདག་ལ་འདྲི་ན་ཅི་ཉེས་ཅེས་སྨྲས་སོ། །དེ་ནས་རྔོན་པས་འོ་ན་ཅི་ཞིག་སྨྲ་བར་སེམས་ཤེས་དྲིས་པ་དང་། བྲམ་ཟེས་བརྫུན་ཚིག་འདི་སྐད་ཅེས་སྨྲས་སོ། །རྒྱལ་པོ་ཡབ་རྒྱལ་བུ་མཐོང་བར་དགའ་བས་བདག་

71-1-68a

འདིར་རྒྱལ་བུ་ཕྱིར་འགུགས་སུ་འོངས་སོ་ཞེས་སྨྲས་མ་ཐག་ཏུ་རྔོན་པས་ཀྱང་བཀྲོལ་ཏེ་བཏང་ནས་སྔར་མ་རྟོགས་ཏེ་རྒྱུས་མ་ཤེས་སོ་ཞེས་བཟོད་པ་གསོལ་ནས་རྒྱལ་བུ་གང་ན་འདུག་པའི་གནས་བསྟན་ཏོ། །དེ་ནས་
བྲམ་ཟེ་དེ་རྒྱལ་བུའི་ཐད་དུ་ཕྱིན་པ་དང་། རྒྱལ་བུས་ཀྱང་རྒྱང་མ་ནས་བྲམ་ཟེ་འོངས་པ་མཐོང་ནས་རབ་ཏུ་དགའ་བའི་སེམས་སྐྱེས་ཏེ་བསུས་ནས་གུས་པར་ཕྱག་བྱས་ཏེ། ཁྱོད་ག་ལས་འོངས་ལམ་དུ་ཉོན་མོངས་ཤིང་ངལ་བར་མ་
གྱུར་ཏམ་ཅི་འདོད་ཅེས་སྤྲོ་བའི་གཏམ་བྱས་སོ། །བྲམ་ཟེས་སྨྲས་པ། བདག་ལམ་རིང་པོ་ནས་འོངས་ཏེ་ལུས་ཐམས་ཅད་རྩེ་ཞིང་ངལ་ཏེ་བཀྲེས་སྐོམ་མོ་ཞེས་སྨྲས་པ་དང་། རྒྱལ་བུས་ནང་དུ་ཁྲིད་ནས་སྟན་ལ་འདུག་དུ་བཅུག་སྟེ། ཤིང་
ཐོག་དང་ཤིང་གི་འབྲས་བུ་དང་བཏུང་བའི་སྐོམ་མདུན་དུ་ཕབ་ནས། བྲམ་ཟེས་ཀྱང་སྐོམ་འཐུངས་ཤིང་ཐོག་ཟོས་ཏེ། ཐལ་བྱུང་རྒྱལ་བུ་ལ་འདི་སྐད་ཅེས་སྨྲས་སོ། །བདག་ནི་ཡུལ་ཀཻ་ལཻ་ཞེས་བྱ་བའི་ཡུལ་མི་ཡིན་ཏེ། སྔ་ཞིག་ནས་
རྒྱལ་བུ་སྦྱིན་པ་ལ་དགའོ་ཞེས་ཕྱོགས་བཅུར་གྲགས་ཤིང་ཐོས་པས། བདག་ནི་དབུལ་ཕོངས་ཏེ་རྒྱལ་བུ་ལ་སློང་དུ་འོངས་སོ། །རྒྱལ་བུས་སྨྲས་པ། བདག་ལ་ཡོད་པ་ལས་ཁྱོད་ལ་མ་བྱིན་ན་ནི་ཆགས་ཤིང་སེར་སྣ་བྱེད་པར་གྱུར་ན་བདག་
ལ་ཅི་བདོག་པ་སྔར་བཏང་བས་ད་ནི་ཅི་ཡང་སྦྱིན་དུ་མེད་དོ། །བྲམ་ཟེས་སྨྲས་པ། དེ་ལྟར་ནོར་རྫས་སྦྱིན་དུ་མེད་ན་ཁྱོད་ཀྱི་བུ་མི་སྲིང་གཉིས་བདག་རྒད་པོའི་འཁོལ་བ་འམ་བྲན་དུ་བྱིན་ཅིག་ཅེས་དེ་བཞིན་དུ་ལན་གཉིས་ལན་གསུམ་
གྱི་བར་དུ་སྨྲས་ནས། རྒྱལ་བུས་ཀྱང་ཁྱོད་ལམ་རིང་པོ་ནས་འོངས་ལ། བདག་གི་བུ་མིང་སྲིང་གཉིས་འདོད་པ་རབ་ཏུ་ལེགས་ཀྱིས་སྦྱིན་ནོ། ཞེས་སྨྲས་སོ། །དེའི་ཚེ་ན་བུ་མིང་སྲིང་གཉིས་རྩེར་སོང་སོང་བ་ལས། རྒྱལ་བུས་
བོས་ནས་བུ་ལ་འདི་སྐད་ཅེས་བསྒོའོ། །བྲམ་ཟེ་འདི་ལམ་རིང་པོ་ནས་བུ་ཁྱེད་གཉིས་སློང་ངོ་ཞེས་ཟེར་ནས། ཁོ་བོས་ཀྱང་སྦྱིན་པར་བྱས་ཀྱིས་ཁྱེད་གཉིས་འདིའི་ཕྱི་བཞིན་སོང་ཤིག་ཅེས་བསྒོ་བ་དང་། བུ་གཉིས་རྒྱལ་བུའི་

71-1-68b

མཆན་དུ་བྲོས་ནས་ངུ་སྟེ་འདི་སྐད་ཅེས་སྨྲས་སོ། །བདག་ཅག་གིས་བྲམ་ཟེ་དུ་མ་ཡང་མཐོང་ན་འདི་འདྲ་བ་དག་མ་མཐོང་སྟེ། འདི་ནི་བྲམ་ཟེ་མ་ལགས་ཀྱི་ཡང་དག་པར་ཡི་དགས་ལགས་པས་བདག་ཅག་གི་མ་ཤིང་ཐོག་ཚོལ་དུ་མཆིས་པ་
ལས་སླར་མ་འཁོར་བར་བདག་ཅག་གཉིས་ཡི་དགས་འདིའི་ཟས་སུ་སྩལ་ན་གདོན་མི་འཚལ་བར་འགུམ་མོ། །བདག་གི་མ་སླར་མཆིས་ཏེ་བུ་དང་མ་མཇལ་ན་ཇི་ལྟར། བ་དང་བེའུ་བྲལ་བ་ལྟར་ངུ་ཞིང་ཆོ་ངེས་འདེབས་ཏེ་མི་དགའ་བའི་
མྱ་ངན་གྱིས་གདུངས་པར་འགྱུར་རོ། །རྒྱལ་བུས་བུ་ལ་བསྒོ་བ། ཁོ་བོས་སྦྱིན་པར་གནང་བས་བསྡད་དུ་མི་རུང་སྟེ་འདི་བྲམ་ཟེ་ཡིན་གྱི་ཡི་དགས་མ་ཡིན་པས་མི་ཟོས་ཀྱིས་ཁྱེད་གཉིས་འདིའི་ཕྱི་བཞིན་སོང་ཤིག །བྲམ་ཟེས་སྨྲས་པ། 
བདག་ནི་ད་ཆས་ཏེ་འགྲོའོ། །གལ་ཏེ་བུའི་མ་འོངས་ན་འགྲོར་མེད་དེ། མ་བཏང་ན་རྒྱལ་བུས་བདག་ལ་བྱིན་པའི་དགེ་བའི་སེམས། བུའི་མས་ཟློག་ཅིང་ཉམས་པར་འགྱུར་དུ་དོགས་སོ། །རྒྱལ་བུས་སྨྲས་པ། བདག་གིས་སྦྱིན་
པ་ཅི་བྱས་ཀྱང་ཐོག་མ་ནས་ཅི་ལ་ཡང་འགྱོད་པའི་སེམས་བྱུང་མ་མྱོང་ངོ་། །དེ་ནས་རྒྱལ་བུས་ཆུ་སྣོད་ཐོགས་ནས། བྲམ་ཟེའི་ལག་པར་ཆུ་བླུགས་ནས་བུ་གཉིས་ཀྱི་ལག་པ་ནས་བཟུང་སྟེ། བྲམ་ཟེ་ལ་ཕུལ་བ་ན་ས་ཡང་རབ་ཏུ་
གཡོས་སོ། །བུ་གཉིས་བྲམ་ཟེའི་ཕྱི་བཞིན་མཆིར་མ་བཏུབ་ནས། ཕྱིར་ཕ་རྒྱལ་བུའི་དྲུང་དུ་འོངས་ཏེ། པུས་མོ་ས་ལ་བཙུགས་ནས་ཕ་རྒྱལ་བུ་ལ་འདི་སྐད་ཅེས་གསོལ་ཏོ། །བདག་ཅག་གཉིས་ཀྱིས་ཚེ་རབས་སྔ་མ་ལ་མི་དགེ་
བའི་སྡིག་པ་ཅི་བགྱིས་ན་འདི་ལྟ་བུའི་སྡུག་བསྔལ་མྱོང་བར་གྱུར། བདག་ཅག་ནི་རྒྱལ་པོའི་རིགས་སུ་སྐྱེས་ན་ཅིའི་སླད་དུ་ཕ་རོལ་པོའི་བྲན་ཁོལ་དུ་གྱུར་ཅེས་ཕ་རྒྱལ་བུ་ལ་སྡིག་གཤགས་ན། འདིའི་རྒྱུ་འདིའི་རྐྱེན་གྱིས་སྡིག་པ་བྱང་
ཞིང་བསོད་ནམས་སྐྱེས་ཏེ་གང་ནས་གང་དུ་སྐྱེས་ཀྱང་འདི་ལྟ་བུའི་སྡུག་བསྔལ་དང་ཕྲད་པར་མ་གྱུར་ཅིག་ཅེས་སྨྲས་སོ། །རྒྱལ་བུས་བུ་ལ་སྨྲས་པ། འཇིག་རྟེན་ན་མཛའ་ཞིང་སྡུག་གོ་ཅོག་མཐར་བྱེ་བྲལ་བར་གྱུར་ཏེ། ཐམས་ཅད་

71-1-69a

མི་རྟག་པས་ཡིད་བརྟན་དུ་མི་རུང་ཁོ་བོ་ནམ་བླ་ན་མེད་པའི་མཉམ་སྙོམས་པའི་བྱང་ཆུབ་ཐོབ་པ་ན་ཁྱོད་ཐར་པའི་དོན་བྱའོ་ཞེས་བསྒོའོ། །བུ་གཉིས་ཀྱིས་ཡང་ཡབ་རྒྱལ་བུ་ལ་སྨྲས་པ། བུས་ནི་མ་ལ་མཆི་ཕྱག་བྱ་བ་ལགས་ན་
ད་གཞར་ཡང་མི་ཕྲད་དེ། མའི་ངོ་མ་མཐོང་བ་ཡང་བདག་ཅག་གི་སྔོན་གྱི་སྡིག་པའི་ལས་ཀྱིས་གདུངས་པར་ཟད་ན། བདག་ཅག་གི་མ་ཅིའི་ཕྱིར་མྱ་ངན་གྱིས་གདུངས་ཤིང་སྡུག་བསྔལ་བར་མི་འགྱུར་ཞེས་སྨྲེ་སྔགས་འདོན་ཏོ། །བྲམ་ཟེས་སྨྲས་པ། 
བདག་རྒས་ལ་ཉམ་ཆུང་བས་བུས་པ་འདི་གཉིས་བདག་བོར་ཏེ་མའི་ཐད་དུ་བྲོས་པར་གྱུར་ན་བདག་གིས་བྱར་མེད་པར་འགྱུར་གྱིས། ཁྱོད་ཀྱིས་ཆིངས་ལ་དཀྲིས་ཤིག་ཅེས་སྨྲས་པ་དང་། རྒྱལ་བུས་ཀྱང་བུ་གཉིས་ཀྱི་ལག་པ་ཕྱིང་ཀ་ལོག་
ཏུ་བཟུང་སྟེ། བྲམ་ཟེ་ཉིད་འཆིང་དུ་བཅུག་ནས་ཕྱིང་ཀ་ལོག་ཏུ་བཅིངས་པའི་ཐག་པ་བྲམ་ཟེའི་ལག་པར་བྱིན་ཏེ་སྦྲེལ་ནས་ཁྲིད་དོ། །བུ་གཉིས་ནི་དེ་ལྟར་ཁྲིད་ཀྱང་འགྲོར་མ་བཏུབ་སྟེ་འཐེན་པ་ལས་བྲམ་ཟེས་ལྕག་ཐོགས་ཏེ། 
དེད་ནས་གཞུས་པའི་ལམ་དུ་ཁྲག་བྱུང་བ་ཡང་ས་ལ་ཆལ་པར་གང་ངོ་། །རྒྱལ་བུས་དེ་ལྟར་མཐོང་ནས་མཆི་མ་བྱུང་སྟེ། མཆི་མ་ས་ལ་བོ་བས་ས་ཡང་ཁོལ་བར་གྱུར་ཏོ། །རྒྱལ་བུ་དང་རི་དགས་དང་གཅན་ཟན་མང་པོ་ཐམས་
ཅད་ཀྱིས་བུ་གཉིས་བསྐྱལ་ཏེ་མི་སྣང་བར་གྱུར་པ་དང་། བཟོད་ཕྱིར་ལོག་གོ། །རི་དགས་དང་གཅན་ཟན་ལ་སོགས་པས་རྒྱལ་བུ་བསྐྱལ་ཏེ། ཕྱིར་རྒྱལ་བུ་དང་རྩེ་བའི་གནས་སུ་ཕྱིན་ནས་སྙིང་རྗེ་བའི་སྐད་ཕྱུང་སྟེ་ལུས་
ས་ལ་རྡེབས་ཤིང་འགྲོའོ། །བྲམ་ཟེ་དེས་ལམ་དུ་ཞུགས་ཏེ་སོང་སོང་བ་ལས། ལམ་ཀར་སྐྱེད་ཤིང་ཞིག་ཡོད་པ་ལ་བུ་གཉིས་བཏགས་ཏེ་འདུག་གོ། །དེ་ནས་ཆས་པ་དང་བུ་གཉིས་མ་དང་ཕྲད་དུ་རེ་ནས་ཤིང་གི་དཔག་འཁྲི་ཞིང་
འགྲོར་མ་བཏུབ་ནས། བྲམ་ཟེས་ཡང་གཞུས་པ་ལས་བུ་གཉིས་ཀྱིས་འདི་སྐད་ཅེས་སྨྲས་སོ། །བདག་ཅག་ལ་མ་རྡེག་ཅིག །བདག་ཅག་རང་འགྲོའོ་ཞེས་གནམ་ལ་ཡར་བལྟས་ཏེ། ཡང་འདི་སྐད་ཅེས་སྨྲས་སོ། །རི་གཉེན་

71-1-69b

གྱི་ལྷ་དང་ནགས་ཚལ་གྱི་ཤིང་གི་ལྷ་རྣམས་བདག་ཅག་ལ་ཅུང་ཟད་ཐུགས་བརྩེ་བ་འམ་དགོངས་པ་མི་མངའ་འམ་བདག་ཅག་ནི་ལམ་རིང་པོར་གཞན་གྱི་བྲན་ཁོལ་བྱེད་དུ་འགྲོ་སྟེ། མ་དང་བྲལ་བར་གྱུར་ན་བདག་ཅག་གི་མ་རི་ལ་ཤིང་ཐོག་
ཚོལ་ཞིང་བརྡར་བཏང་སྟེ། མྱུར་དུ་བདག་ཅག་དང་ངོ་ཕྲད་པར་ཤོག་ཅིག་མི་སྦྲན་ནམ་ཞེས་དེ་སྐད་སྨྲས་པ་དང་། བུའི་མ་རི་ལ་འདུག་པའི་རྐང་པ་གཡོན་པའི་རྐང་མཐིལ་གཡའ་ཞིང་གཡོ་བ་དང་མིག་གཡོན་པ་ཡང་འགུལ་ནུ་མ་གཉིས་
ནས་ནུ་ཞོ་ཡང་རང་ཟག་པར་གྱུར་ནས། འདི་སྙམ་དུ་འདི་འདྲ་བའི་ལྟས་ངན་པ་གནའ་བྱུང་མ་མྱོང་ན་བདག་གི་བུ་གཉིས་ལ་ཡེ་འདྲོག་མ་བྱུང་ངམ་སྙམ་བསམས་ནས། ཤིང་ཐོག་གིས་ཅི་ཞིག་བྱ་སྙམ་སྟེ། ཤིང་ཐོག་བརྔ་བ་ཡང་
བཏང་ནས་མྱུར་བར་ཕྱིར་གནས་སུ་འགྲོ་བར་ཆས་སོ། །དེའི་ཚེ་སུམ་བཅུ་རྩ་གསུམ་པའི་གནམ་གྱི་ལྷའི་དབང་པོ། རྒྱལ་བུས་གཞན་ལ་བུ་བྱིན་པར་ཤེས་ནས། བཙུན་མོས་དགེ་བར་བསམས་པའི་སེམས་ཀྱི་བར་ཆད་
བྱེད་དུ་དོགས་པས། སེང་གེ་ཞིག་ཏུ་སྤྲུལ་ནས་ལམ་གྱི་སྲང་དུ་བསྡད་དོ། །བཙུན་མོས་སེང་གེ་ལ་སྨྲས་པ། ཁྱོད་ནི་གཅན་ཟན་གྱི་རྒྱལ་པོ། ཁོ་བོ་ནི་མིའི་རྒྱལ་མོ་ཡིན་ཏེ་རི་ལ་འཁོད་པར་འདྲ་ན་ཅུང་ཟད་ལམ་ལས་བྱོལ་ཏེ་བདག་
ཐོང་ཤིག །བདག་ལ་བུ་ཆུང་ངུ་མ་ཤེད་མ་བྱེ་བ་གཉིས་ཤིག་ཡོད་དེ། ད་ཙམ་གྱི་བར་དུ་ཅི་ཡང་མ་ཟོས་པས་བདག་འོང་དུ་རེ་སྟེ་སྡོད་དོ། །སེང་གེས་ཀྱང་བྲམ་ཟེ་དེ་རྒྱང་རིང་དུ་ཐལ་བར་ཤེས་ནས་ལམ་ལས་བྱོལ་ཏེ་བཙུན་མོ་
བཏང་ངོ་། །བཙུན་མོ་ཕྱིར་གནས་སུ་འོངས་ནས། རྒྱལ་བུ་འབའ་ཤིག་སྣང་གི་བུ་གཉིས་མ་མཐོང་བས། བདག་ཉིད་འདུག་པའི་སྤྱིལ་བུར་བལྟས་ན་ཡང་བུ་མ་མཐོང་། བུ་གཉིས་འདུག་པའི་སྤྱིལ་པོར་བལྟས་ན་ཡང་བུ་མ་མཐོང་
སྟེ། དེ་ནས་བུ་རྩེ་བའི་གནས་ཆུ་འགྲམ་དུ་བཙལ་ན་ཡང་མ་མཐོང་ངོ་། །སྔོན་བུ་དང་རྩེ་བའི་རི་དགས་ཤ་བ་དང་གཅན་ཟན་སེང་གེ་དང་སྤྲེའུ་ལ་སོགས་ཏེ་མདུན་ནས་ལུས་ས་ལ་རྡེབས་ཤིང་སྒྲ་འབྱིན་ལ། 

71-1-70a

སྔོན་རྩེ་བའི་རྫིང་བུའི་ཆུ་ཡང་སྐམས་པར་མཐོང་ནས། ཕྱིར་རྒྱལ་བུ་གང་ན་བ་དེར་སོང་སྟེ་ཕྱིན་པ་དང་རྒྱལ་བུ་ལ་བདག་གི་བུ་གཉིས་ག་རེ་ཞེས་དྲིས་ན། རྒྱལ་བུ་ཅང་མི་སྨྲའོ། །བཙུན་མོས་ཡང་སྨྲས་པ། བདག་ནམ་
ཤིང་ཐོག་ཐོགས་ཏེ་ཕྱིར་གནས་སུ་འཁོར་བ་ན་བདག་གི་བུ་གཉིས་རྒྱང་མ་ནས་རྒྱུག་ཅིང་མདུན་དུ་བསུས་ཏེ། རྡེག་འཆོས་ན་ཡང་ཕྱིར་ལངས་ཏེ་དཀྱུ་མཆོང་ཞིང་ཨ་མ་འོངས་ཨ་མ་འོངས་སོ་ཞེས་འབོད་དེ། བདག་འདུག་པ་ན་གཉིས་ཀ་
གཡས་གཡོན་ན་འདུག་ཅིང་། ཕྲག་པ་འམ་ལུས་ལ་རྡུལ་གོས་ན་ཡང་འཕྱི་ཞིང་སྤྲུག །ད་བདག་གི་བུ་ག་རེ་མ་མཐོང་ན་གཞན་ལ་མ་བྱིན་ནམ། འདི་ལྟར་མ་མཐོང་བས་བདག་གི་སྙིང་གས་པར་འགྱུར་གྱིས། བདག་གི་བུ་ག་ལ་
འདུག་མྱུར་དུ་སྨྲོས་ཤིག །བདག་མྱོས་པར་འགྱུར་རོ་ཞེས་དེ་ལྟར་ལན་གཉིས་ལན་གསུམ་གྱི་བར་དུ་དྲིས་ཀྱང་ལན་མ་སྨྲས་སོ། །བཙུན་མོས་ཡང་སྨྲས་པ། ལྷག་པར་སྡུག་བསྔལ་གྱིས་གདུངས་ཏེ། བུ་གཉིས་མ་མཐོང་བ་
ལྟ་ཚོད་ཡོད་ན། རྒྱལ་བུས་ལན་མ་སྟེར་བས་ལྷག་པར་མྱོས་ཤིང་འཁྲུགས་པར་གྱུར་ཏོ། །རྒྱལ་བུས་སྨྲས་པ། ཡུལ་ཀཻ་ལཻ་ཞེས་བྱ་བ་ནས་བྲམ་ཟེ་ཞིག་འོངས་ཏེ། བདག་ལ་བུ་གཉིས་བསླངས་པ་ལས་བདག་གིས་བྱིན་ནོ། །
བཙུན་མོས་རྒྱལ་བུས་སྨྲས་པ་ཐོས་མ་ཐག་ཏུ་རི་རྡིབ་པ་ལྟར་ས་ལ་འགྱེལ་ཏེ་འགྲེ་ཞིང་ཆོ་ངེས་བཏབ་བོ། །རྒྱལ་བུས་སྨྲས་པ་རེ་ཤིག་སྡོད་ཅིག །ཁྱོད་སྔོན་འདས་པའི་དུས་ན་སངས་རྒྱས་མར་མེ་མཛད་ཀྱི་ཚེ་དམ་ཇི་ལྟར་བཅས་པ་མི་
དྲན་ནམ། དེའི་ཚེ་དེའི་དུས་ན་བདག་ནི་བྲམ་ཟེའི་བུ་གཞོན་ནུ་ཞེས་བྱ། ཁྱོད་ནི་བྲམ་ཟེའི་བུ་མོ་སུན་ད་རི་ཀ་ཞེས་བྱ་སྟེ། ཁྱོད་ནི་དེའི་ཚེ་མེ་ཏོག་པད་མོ་བདུན་ཞིག་ཐོགས། བདག་ལ་དངུལ་གྱི་དོང་ཙེ་ལྔ་ཞིག་ཡོད་དེ། ཁྱོད་ལས་པད་
མོ་ལྔ་ཞིག་ཉོས་ནས་སངས་རྒྱས་ལ་ཕུལ་བར་བྱས་པ་ལས་ཁྱོད་ཀྱིས་པད་མོ་ལྷག་མ་གཉིས་པོ་ཡང་ང་ལ་བྱིན་ཏེ། སངས་རྒྱས་ལ་འབུལ་གྱིས་སྨོན་ལམ་དུ་ཡང་བདག་སྐྱེ་བ་ཕ་རོལ་ཏུ་རྟག་པར་ཁྱོད་ཀྱི་ཆུང་མར་ཤོག་ཅིག་ཅེས་སྨོན་

71-1-70b

ལམ་བཏབ་པ་ལས། བདག་དེའི་ཚེ་ཁྱོད་དང་འདི་སྐད་ཅེས་དམ་མ་བཅས་སམ། ཁྱོད་བདག་གི་ཆུང་མར་དགའ་ན་བདག་གི་ཡིད་དང་འགལ་བར་མ་བྱེད་ཅིག །བདག་སྦྱིན་པ་ཞིག་བྱེད་ན་ཕ་མ་གཉིས་མ་གཏོགས་པར་གཞན་སྦྱིན་ཡང་བདག་གི་
ཡིད་བཞིན་དུ་སྦྱིན་པ་ལས་འགལ་བར་མ་བྱེད་ཅིག་ཅེས་དམ་བཅས་པ་ལས། དེའི་ཚེ་ཁྱོད་ན་རེ་དེ་བཞིན་དུ་བྱའོ་ཞེས་མི་ཟེར་རམ། ད་ཁྱོད་ཀྱི་བུ་གཉིས་གཞན་ལ་བྱིན་པ་ལ་བདག་གི་དགེ་བའི་སེམས་དཀྲུག་ཏུ་ཡང་ཅི་ཡོད་ཅེས་རྒྱལ་བུས་
སྨྲས་མ་ཐག་ཏུ། བཙུན་མོས་ཐོས་པ་ཙམ་གྱིས་སེམས་དང་ཡིད་ཀྱིས་སྔོན་གྱི་གནས་དྲན་པའི་མངོན་པར་ཤེས་པ་ཚོར་བར་གྱུར་ཏེ། རྒྱལ་བུའི་བསམ་པ་མྱུར་བར་རྫོགས་པར་འདོད་པས་ཡིད་བཞིན་དུ་སྦྱིན་པ་ལ་རྗེས་སུ་ཡི་རང་བར་
གྱུར་ཏོ། །དེ་ནས་ལྷའི་དབང་པོ་བརྒྱ་བྱིན་རྒྱལ་བུས་སྦྱིན་པ་བྱིན་པ་ཇི་ལྟར་སེམས་པ་བསམས་པའི་ཕྱིར་བྲམ་ཟེ་ཞིག་ཏུ་སྤྲུལ་ཏོ། །བྲམ་ཟེ་དེ་ཡང་མི་སྡུག་པ་རྣམ་པ་བཅུ་གཉིས་དང་ལྡན་ཏེ། རྒྱལ་བུ་ག་ལ་བ་དེར་སོང་ནས་འདི་སྐད་
ཅེས་སྨྲས་སོ། །རྒྱལ་བུ་ཁྱོད་སྦྱིན་པ་ལ་དགའ་བས་ཕ་རོལ་པོའི་ཡིད་དང་འགལ་བར་མི་བྱེད་ཅེས་གྲག་སྟེ། བདག་ཀྱང་ཆེད་དུ་འདིར་སློང་དུ་འོངས་ཀྱིས་ཁྱོད་ལ་བཙུན་མོ་ཡོད་པ་དེ་བདག་ལ་བྱིན་ཅིག །རྒྱལ་བུས་སྨྲས་པ། ཤིན་
ཏུ་ལེགས་ཏེ་དེ་བཞིན་དུ་སྦྱིན་ནོ་ཞེས་སྨྲས་སོ། །བཙུན་མོས་སྨྲས་པ། བདག་ཀྱང་ཕ་རོལ་པོ་ལ་བྱིན་ན་རྒྱལ་བུའི་གཡོག་སུས་བྱ། རྒྱལ་བུས་སྨྲས་པ། ད་ཁྱོད་ཀྱང་སྦྱིན་པ་མ་བྱས་ན་ཇི་ལྟར་ཡང་བླ་ན་མེད་པའི་མཉམ་སྙོམས་པའི་བྱང་
ཆུབ་ཐོབ་པར་འགྱུར། དེ་ནས་རྒྱལ་བུས་ཆུ་སྣོད་ཐོགས་ཏེ་བྲམ་ཟེའི་ལག་པ་བཀྲུ་བའི་ཕྱིར། ལག་པར་ཆུ་བླུགས་ནས་བཙུན་མོ་ཡང་བྲམ་ཟེ་ལ་ཕུལ་ལོ། །དེ་ལྟར་རྒྱལ་བུ་ལ་འགྱོད་པའི་སེམས་ཅུང་ཟད་ཀྱང་མེད་པར་བརྒྱ་བྱིན་
གྱིས་རྟོགས་ནས་ལྷ་རྣམས་ཀྱིས་བསྟོད་ཅིང་བསྔགས་ཏེ་གནམ་ས་ཡང་ཆེར་གཡོས་སོ། །དེ་ནས་བྲམ་ཟེས་བཙུན་མོ་ཁྲིད་དེ་གོམ་པ་བདུན་ཙམ་དུ་ཕྱིན་པ་དང་། ཕྱིར་ལོག་ནས་བཙུན་མོ་འདི་རྒྱལ་བུ་ལ་ཕྱིར་གཏམས་ཀྱིས་སུ་

71-1-71a

ལ་ཡང་མ་སྦྱིན་ཅིག་ཅེས་སྨྲས་སོ། །རྒྱལ་བུས་སླར་སྨྲས་པ། ཅིའི་ཕྱིར་མི་ཁྲིད་མི་འདོད་དམ་ཅི་མིར་སྐྱེས་པའི་ཆུང་མའི་ནང་ན་ཆུང་མ་འདི་ནི་ཤིན་ཏུ་ཡང་བཟང་ཞིང་མཛེས་ཏེ་རྒྱལ་པོའི་བུ་མོ་ཡིན་ན། རྒྱལ་པོ་དེ་ལ་བུ་
མོ་འདི་གཅིག་པུ་ལས་མེད་དེ། ཆུང་མ་འདི་ནི་བདག་ལ་ཆུ་གང་ཆེ་བས་ཁ་ཟས་བཙོ་བ་དང་བསྲེག་པ་ཡང་ལག་དར་ཏེ་བྱེད། བཟའ་བ་དང་བཏུང་བ་ངན་ཀྱང་ངན་ཅེས་མི་འཁང་སྟེ། རྟག་ཏུ་འགྲུབ་ཆེ་ལ་བྱད་བཞིན་ཡང་བཟང་ལ་མཛེས་པས་
ཁྱོད་ཁྱེར་ན་བདག་དགའོ་ཞེས་སྨྲས་སོ། །བྲམ་ཟེས་རྒྱལ་བུ་ལ་སྨྲས་པ། བདག་ནི་བྲམ་ཟེ་མ་ཡིན་གྱི་བརྒྱ་བྱིན་ལྷའི་དབང་པོ་ཡིན་ཏེ་ཆེད་དུ་ཁྱོད་བགམ་པའི་ཕྱིར་འོངས་པ་ཡིན་ནོ་ཞེས་ཕྱིར་བརྒྱ་བྱིན་གྱི་ལུས་བཟང་པོར་བསྒྱུར་ནས། 
ཁྱེད་ཅི་དང་ཅིར་སྨོན་ཅེས་སྨྲས་སོ། །དེ་ནས་བཙུན་མོས་གུས་པར་ཕྱག་འཚལ་ཏེ་སྨོན་ལམ་རྣམ་པ་གསུམ་ཞིག་གསོལ་ཏོ། །གང་ཞེ་ན་གཅིག་ཏུ་བདག་གི་བུ་ཁྲིད་པའི་བྲམ་ཟེ་ཕྱིར་ཡང་བདག་གི་ཡུལ་དུ་སོང་བར་གྱུར་ཅིག །
གཉིས་སུ་ན་བདག་གི་བུ་གཉིས་བཀྲེས་པ་དང་སྐོམ་པས་སྡུག་བསྔལ་བར་མ་གྱུར་ཅིག །གསུམ་དུ་ན་རྒྱལ་བུ་དང་བདག་ཅག་གཉིས་ཀྱང་ཕྱིར་བདག་ཅག་གི་ཡུལ་དུ་མྱུར་དུ་འཁོར་བར་གྱུར་ཅིག་ཅེས་སྨྲས་པ་དང་། བརྒྱ་བྱིན་ལྷའི་དབང་
པོས་ཀྱང་དེ་བཞིན་དུ་སྨོན་ལམ་གྲུབ་པར་གྱུར་ཅིག་ཅེས་སྨྲས་སོ། །རྒྱལ་བུས་སྨྲས་པ། བདག་ནི་སེམས་ཅན་ཐམས་ཅད་སྐྱེ་བ་དང་རྒ་བ་དང་ན་བ་དང་འཆི་བའི་སྡུག་བསྔལ་ལས་སྒྲོལ་བར་གྱུར་ཅིག་ཅེས་སྨོན་ལམ་བཏབ་པ་དང་། 
བརྒྱ་བྱིན་ལྷའི་དབང་པོས་སྨྲས་པ། སྨོན་ལམ་འདི་ནི་ཤིན་ཏུ་ཡང་རྒྱ་ཆེ་སྟེ་བླ་ན་མེད་པ་ཡིན་ནོ། །གལ་ཏེ་མཐོ་རིས་སུ་སྐྱེ་ཞིང་ཉི་ཟླ་ལ་དབང་བའི་བདག་པོར་འདོད་དམ་འཇིག་རྟེན་གྱི་རྒྱལ་པོར་འདོད་དམ་ཚེ་རིང་ཞིང་ཡུན་ཏུ་གནས་པར་
འདོད་ན། བདག་གིས་སྦྱིན་ནུས་ཀྱིས་ཁྱོད་ཀྱིས་སྨྲས་པའི་སྨོན་ལམ་ཁམས་གསུམ་ལས་མཆོག་ཏུ་འདས་པ་ཡིན་པས་བདག་གིས་ནུས་པ་མ་ཡིན་ནོ། །རྒྱལ་བུས་སྨྲས་པ། ད་ལྟར་རེ་ཤིག་ཤིན་ཏུ་ཕྱུག་པོར་གྱུར་

71-1-71b

ཏེ་སྔོན་བས་ཀྱང་ལྷག་པར་རྟག་པར་སྦྱིན་པ་བྱིན་ཞིང་། ཡབ་རྒྱལ་པོ་དང་བློན་པོ་རྣམས་དང་། བདག་ཅག་ཕྲད་པར་ཤོག་ཅིག་ཅེས་སྨྲས་པ་དང་བརྒྱ་བྱིན་གྱིས་སྨོན་པ་བཞིན་དུ་ངེས་པར་གྲུབ་པར་གྱུར་ཅིག་ཅེས་སྨྲས་མ་ཐག་ཏུ་
མི་སྣང་བར་གྱུར་ཏོ། །ཡུལ་ཀཻ་ལེའི་བྲམ་ཟེ་དེས་བྱིས་པ་གཉིས་ཁྲིད་དེ་ཁྱིམ་དུ་འོངས་ན། ཆུང་མས་འདི་སྐད་དུ་ཁྱོད་ངོ་སོ་འདི་ལྟ་བུས་འཁོར་ཏེ་འོངས་པ་ལྟ་ངོ་མི་ཚ་འམ། བུས་པ་འདི་གཉིས་ནི་རྒྱལ་པོའི་གདུང་ལ་གཏོགས་
པ་ཡིན་ན་སྙིང་རྗེའི་སེམས་ཀྱང་མེད་དེ། འདི་ལྟར་བཙོགས་བརྡེགས་ཤིང་ལུས་ལ་རྨ་དང་རྣག་ཁྲག་གིས་བཙོག་བཙོག་ལྟར་བྱས་པ་བཟོད་དམ་ཞེས་སྤྱོས་བརྒྱད་ནས། བུས་པ་འདི་གཉིས་ཚོངས་ལ་བཀོལ་དུ་རུང་བ་ཁྲིད་དེ་ཤོག་ཅིག་
ཅེས་བསྒོ་བ་དང་། ཁྱིམ་ཐབ་ཀྱང་ཆུང་མས་བསྒོ་བ་བཞིན་ཚོང་འདུས་སུ་སོང་བ་ལས་བརྒྱ་བྱིན་ལྷའི་དབང་པོས་སྤྲུལ་ཏེ་ཚོང་འདུས་སུ་འོངས་ནས་བྲམ་ཟེ་དེ་ལ་བུས་པ་འདི་ནི་ཤིན་ཏུ་རིན་ཆེ་བས་སུ་ཡང་ཉོ་མི་ནུས་སོ་ཞེས་སྨྲས་སོ། །
བུས་པ་དེ་གཉིས་བཀྲེས་སྐོམ་པ་ལས། བརྒྱ་བྱིན་གྱིས་ལྷའི་རྫུ་འཕྲུལ་གྱིས་ལྷའི་དྲི་བསུང་སྤྲུལ་ཏེ། བུས་པ་གཉིས་ཀྱི་བ་སྤུའི་ཁུང་བུ་ནས་ལྟོ་འགྲངས་པར་བྱས་ཏེ། བརྒྱ་བྱིན་གྱིས་བྲམ་ཟེའི་སེམས་གྱང་བསྒྱུར་ནས་ཡུལ་
ཡ་བར་ཕྱིན་པར་བྱས་སོ། །ཡུལ་དེའི་བློན་པོ་དང་ཡུལ་མི་ཐམས་ཅད་ཀྱིས་རྒྱལ་བུའི་སྲས། རྒྱལ་པོ་ཆེན་པོའི་ཚ་བོ་ཡིན་པར་མི་ཤེས་པ་མེད་པས་ཡུལ་མི་ཐམས་ཅད་ཀྱང་མྱ་ངན་གྱིས་གདུངས་ཏེ། བློན་པོ་ལ་སོགས་
པས་བུ་གཉིས་ག་ལས་འོངས་ཤེས་དྲིས་པ་དང་། བྲམ་ཟེ་ན་རེ་བདག་གིས་བསླངས་ཏེ་འོངས་པ་ལ་ཁྱོད་ཀྱིས་དྲིར་ཅི་ཡོད་ཅེས་སྨྲས་སོ། །བློན་པོ་རྣམས་ཀྱིས་སྨྲས་པ། བདག་ཅག་གི་ཡུལ་དུ་འོངས་པས་ན་བདག་
ཅག་གིས་དྲི་བར་རིགས་ཀྱི་མི་འདྲི་བ་མ་ཡིན་ནོ་ཞེས་བློན་པོ་དང་ཡུལ་མི་རྣམས་ཀྱིས་བགྲོས་ཏེ། བྲམ་ཟེ་ལས་བུ་གཉིས་དབྲོག་པར་བྱས་པ་ལས་དེའི་ནང་ན་ཁྱིམ་བདག་གཅིག་གིས་འདི་སྐད་ཅེས་གྲོས་བཏབ་བོ། །འདི་ནི་རྒྱལ་

71-1-72a

བུས་སྦྱིན་པར་བསམས་ཏེ་བྱིན་པ་འདི་ལ་རྒྱལ་བུས་བསམས་པའི་ཡིད་དང་འགལ་ཞིང་དབྲོག་པར་མི་རིགས་ཀྱི། ཉིས་ན་རྒྱལ་པོ་ཆེན་པོ་ལ་གསོལ་ན། རྒྱལ་པོ་ཆེན་པོ་ཉིད་ཀྱིས་རིན་གྱིས་བླུ་བར་འགྱུར་རོ་
ཞེས་བྱས་པ་དང་། གྲོས་སྔ་མ་བཏང་ནས་བློན་པོ་རྣམས་ཀྱིས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོའི་དབོན་པོ་གཉིས་ད་ལྟར་བྲམ་ཟེ་ཞིག་འཚོང་ཞིང་མཆིས་ཅེས་གསོལ་པ་དང་། རྒྱལ་པོས་ཚིག་དེ་ཐོས་མ་
ཐག་ཏུ་ཆེར་དངངས་ཏེ་བྲམ་ཟེ་དང་བུ་གཉིས་ཕོ་བྲང་ནང་དུ་ཁྲིད་དེ་ཤོག་ཅིག་ཅེས་བསྒོ་ནས། བུ་གཉིས་ཕོ་བྲང་ནང་དུ་འོངས་པའི་ཚེ་རྒྱལ་པོ་དང་བཙུན་མོ་དང་ཕོ་བྲང་གི་སླས་དང་བློན་པོ་རྣམས་ཀྱིས་བུ་གཉིས་མཐོང་ནས་ཐམས་ཅད་དབུགས་
ཀྱིས་རྣངས་པ་ཙམ་དུ་མ་ངུས་པ་མེད་དོ། །དེ་ནས་རྒྱལ་པོས་བྲམ་ཟེ་དེ་ལ་ཁྱོད་ཀྱིས་བུ་འདི་གཉིས་ཇི་ལྟར་ཐོབ་ཅེས་དྲིས་ན། བྲམ་ཟེ་ན་རེ་བདག་གིས་རྒྱལ་བུ་ལས་བསླངས་ཏེ་ཐོབ་བོ་ཞེས་ཟེར་རོ། །རྒྱལ་པོས་བུས་པ་འདི་
གཉིས་བོས་ཏེ། པང་པར་བླང་སྙམ་པ་ལས་བུ་གཉིས་འོང་དུ་མ་བཏུབ་བོ། །དེ་ནས་རྒྱལ་པོས་བུ་འདི་གཉིས་ཀྱི་རིན་ཅི་ཙམ་ཡོད་ཅེས་དྲིས་ན། བྲམ་ཟེ་སྨྲ་མ་ཁོམ་པར་ཁྱེའུ་ཡིས་འདི་སྐད་ཅེས་གསོལ་ཏོ། །བདག་བུ་ཕོ་ནི་
དངུལ་གྱི་དོང་ཙེ་སྟོང་དང་བ་ལང་བརྒྱ་ཞིག་རིའོ། །བུ་མོ་ནི་གསེར་གྱི་དོང་ཙེ་སྟོང་དང་བ་བཞོན་ཉིས་བརྒྱ་རིའོ་ཞེས་གསོལ་བ་དང་། རྒྱལ་པོས་ཁྱེའུ་ལ་འདི་སྐད་ཅེས་སྨྲས་སོ། །འཇིག་རྟེན་ཆོས་ཀྱིས་མིའི་ནང་ན་ཕོ་ནི་རིན་པོ་
ཆེ་དབྱིག་ལྟར་རིན་ཆེ་བ་ཡིན་ན། ཅིའི་ཕྱིར་བུ་ཕོ་ནི་རིན་ཆུང་བུ་མོ་ནི་རིན་ཆེ་བར་འདེབས། བུ་ཁྱེའུ་ཡིས་གསོལ་པ། ཕོ་བྲང་གི་སླས་ལྟ་བུ་རྒྱལ་པོ་དང་ཉེ་བ་མ་ལགས་ལ། མ་རབས་བྲན་ལས་སླས་སུ་བཞེས་ཏེ། 
དེ་ལ་ཐུགས་དགྱེས་པས་བཀུར་ཞིང་བཙུན་པར་མཛད་དེ། རིན་པོ་ཆེའི་གོས་སྐོན་ཞིང་བཟའ་བ་དང་། བཏུང་བ་རོ་བརྒྱ་དང་ལྡན་པ་བསྟབས་ན། སྲས་གཅིག་པུ་ཞིག་མངའ་བ་རི་ལ་སྤངས་ཏེ། ཡ་མཚན་ཕོ་བྲང་གི་སླས་དང་

71-1-72b

རོལ་ཅིང་རོལ་མོ་མཛད་ཀྱང་སྲས་ལ་ཅུང་ཟད་ཙམ་ཡང་དགོངས་པའི་ཐུགས་ཀྱང་མི་མངའ་བས། དེ་བས་ན་བུ་ཕོ་ནི་རིན་ཆུང་ལ་བུ་མོ་ནི་རིན་ཆེ་བར་མངོན་ནོ། །རྒྱལ་པོས་དེ་སྐད་ཅེས་སྨྲས་པ་ཐོས་ནས་ལྷག་པར་མི་དགའ་
བའི་མྱ་ངན་སྐྱེས་ཏེ། མཆི་མ་བླགས་ནས་འདི་སྐད་དུ་བདག་ནི་རབ་ཏུ་གནོང་ན་ཁྱེད་ཅིའི་ཕྱིར་ཁོ་བོའི་པང་དུ་མི་འོང་། ཁྱེད་ང་ལ་མི་དགའ་འམ་འོན་ཏེ་བྲམ་ཟེས་འཇིགས་ཤེས་དྲིས་ན། བྱིས་པ་ན་རེ་བདག་ཅག་ནི་རྒྱལ་པོ་
ཆེན་པོ་ལ་མི་དགའ་བ་འམ་བྲམ་ཟེས་སྐྲག་པ་ཡང་མ་ལགས་ན། ཐོག་མ་རྒྱལ་པོ་ཆེན་པོའི་ཚ་བོ་ལས་ད་ལྟར་མིའི་བྲན་ཁོལ་དུ་གྱུར་པས། གང་ན་ཡང་མིའི་བྲན་ཁོལ་རྒྱལ་པོའི་པང་དུ་འདུག་པའི་ཆོས་མེད་པས་མི་སྤོབས་
སོ། །རྒྱལ་པོས་དེ་སྐད་ཅེས་སྨྲས་པ་ཐོས་ནས། ལྷག་པར་མྱ་ངན་གྱིས་གདུངས་པར་གྱུར་ཏེ་མི་དགའ་བར་གྱུར་ནས། བུས་གསོལ་པ་བཞིན་དུ་བྲམ་ཟེ་ལ་རིན་བྱིན་ཅིག་ཅེས་བསྒོ་ནས། བུ་གཉིས་གདོད་རྒྱལ་པོའི་པང་དུ་བླངས་
སོ། །བུ་གཉིས་རྒྱལ་པོས་བླངས་ནས་ཕྱག་གིས་བུ་གཉིས་ཀྱི་མགོ་ནས་བྱུགས་ཏེ་འདི་སྐད་ཅེས་སྨྲས་སོ། །ཁྱེད་རི་ལ་གནས་པ་ན། ཟས་སུ་ནི་ཅི་ཟ་གོས་སུ་ནི་ཅི་གྱོན་ཞེས་དྲིས་ན། བུ་གཉིས་ན་རེ། ཟས་སུ་ནི་ཤིང་
གི་འབྲས་བུ་ཤིང་ཐོག་ཟ། གོས་སུ་ནི་ལྤགས་པ་དང་སྣམ་བུ་གྱོན་ཏེ། བྱ་མང་པོ་དང་རྩེ་དགའ་བས་མྱ་ངན་གྱི་སེམས་མེད་དོ་ཞེས་གསོལ་ཏོ། །དེ་ནས་རྒྱལ་པོས་བྲམ་ཟེ་དེ་ལ་ཕྱི་རོལ་ཏུ་སོང་ཤིག་ཅེས་བསྒོ་བ་དང་། བུ་གཉིས་ཀྱིས་རྒྱལ་པོ་ལ་འདི་
སྐད་ཅེས་གསོལ་ཏོ། །བྲམ་ཟེ་འདི་རབ་ཏུ་བཀྲེས་སྐོམ་གྱིས་ཉེན་ན། དེ་ལ་ཁ་ཟས་ཀྱིས་ཚིམ་པར་མཛད་དུ་གསོལ། རྒྱལ་པོས་སྨྲས་པ། ཁྱོད་ལ་མི་དགའ་བ་འམ་འཁོན་ཏུ་འཛིན་པ་མེད་པར་ཕྱིར་ཁ་ཟས་སྦྱིན་པར་སེམས། བུས་སྨྲས་
པ། བདག་གི་ཕ་བྱང་ཆུབ་ཀྱི་ལམ་ལ་དགའ་བས་ནོར་རྫས་ཀྱིས་སྦྱིན་དུ་མེད་དེ། བདག་གི་ལུས་ཀྱིས་སློང་བ་ལ་བྱིན་པ་ཡང་བདག་ཅག་ལ་དབང་བའི་བདག་པོ་ལགས་ཏེ། འདིས་བདག་ཅག་ལ་བཀོལ་བའི་ལས་

71-1-73a

ཙམ་བྱེད་དུ་མ་བཅུག་པ་ཡང་ཐོག་མ་ཕས་བསམས་པ་ལྟར་མ་གྱུར་ཏེ། དེ་སྙིང་རྗེའི་སེམས་ཙམ་ཡང་མ་མཆིས་ཏེ་ལྟོགས་ཤིང་སྐོམ་པ་བཞིན་དུ་འདུག་པ་འདི་མིག་གིས་ཀྱང་སུ་ཞིག་གིས་བཟོད། བདག་གི་
ཕས་ནི་བུ་ཡང་མི་ཕངས་པར་ཕ་རོལ་པོ་ལ་སྦྱིན་པ་བྱེད་ན་རྒྱལ་པོ་ཆེན་པོས་མི་གཅིག་གི་ཁ་ཟས་ཙམ་ལ་སེར་སྣ་མཛད་དམ་ཞེས་གསོལ་པ་དང་། རྒྱལ་པོས་ཀྱང་བྲམ་ཟེ་དེ་ལ་ཁ་ཟས་ཀྱིས་ཚིམ་པར་བྱིན་ནས་བྲམ་ཟེ་ཡང་རབ་ཏུ་
དགའ་སྟེ། ཕྱིར་བདག་གི་ཡུལ་དུ་སོང་ངོ་། །དེ་ནས་རྒྱལ་པོས་རྒྱལ་བུ་འགུགས་པའི་ཕོ་ཉ་བཏང་ནས། ཕོ་ཉ་ཡང་དེ་མ་ཐག་ཏུ་ཆས་ཏེ་རྒྱལ་བུ་ག་ལ་བ་དེར་སོང་ངོ་། །དེར་ཕྱིན་པ་དང་ཆུ་ཞིག་ལ་མ་ཐར་ནས་ཕོ་ཉ་དེས་རྒྱལ་བུ་
ཉིད་ཡིད་ལ་བྱས་ཏེ་བསམས་མ་ཐག་ཏུ་ཆུ་དེ་ལས་ཐར་ནས་རྒྱལ་བུ་གང་ན་བ་དེར་ཕྱིན་ཏེ། རྒྱལ་པོའི་བཀས་རྒྱལ་བུ་སླར་ཡུལ་དུ་གཤེགས་སུ་གསོལ་ཞེས་བསྒོའོ། །རྒྱལ་བུས་ཕོ་ཉ་ལ་སྨྲས་པ། ཐོག་མ་རྒྱལ་པོས་ལོ་བཅུ་
གཉིས་ཀྱི་བར་དུ་རི་ལ་སྒོམས་ཤིག་ཅེས་བསྒོ་སྟེ། ད་དུང་ལོ་གཅིག་མ་ཚང་བས་ད་ལོ་ཚང་ནས་བདག་འགྲོའོ་ཞེས་བསྒོའོ། །དེ་ནས་ཕོ་ཉ་ཡང་ཕྱིར་ལོག་ནས་རྒྱལ་པོ་ལ་དེ་བཞིན་དུ་ལན་གསོལ་པ་ལས། རྒྱལ་པོ་ཉིད་
ཕྱག་དར་ཏེ་ཡི་གེ་བྲིས་ནས་ཕྱིར་ཕོ་ཉ་ལ་བསྐུར་ཏེ་འདི་སྐད་ཅེས་བསྒོའོ། །ཁྱོད་ནི་མིའི་ནང་ན་མཁས་པ་ཤེས་རབ་ཅན་ཡིན་པས་འགྲོ་བ་ལ་ཡང་བཟོད་ཅིང་འོང་བ་ལ་ཡང་བཟོད་པ་ཡིན་ན། ཅིའི་ཕྱིར་ཁྱོད་ཁྲོས་ཏེ་འོང་དུ་མི་
བཏུབ། ཁྱོད་དང་ལྷན་ཅིག་བཟའ་བ་དང་བཏུང་བ་གཏང་དགོས་ཀྱིས་མྱུར་དུ་ཤོག་ཅིག་ཅེས་ཕོ་ཉ་འགུགས་སུ་བཏང་ངོ་། །དེ་ནས་ཕོ་ཉ་ཡི་གེ་ཐོགས་ཏེ། རྒྱལ་བུ་གང་ན་བ་དེར་སོང་ནས་ཕྱིན་པ་དང་རྒྱལ་བུ་ལ་ཡི་གེ་ཕུལ་
ལོ། །རྒྱལ་བུས་ཡི་གེ་བླངས་ནས་མགོ་བོ་ས་ལ་གཏུགས་ཏེ་ཡི་གེ་ལ་ཕྱག་འཚལ་ནས་ལན་བདུན་བསྐོར་བ་བྱས་ཏེ། མོད་ལ་ཕྱིར་ཡུལ་དུ་འགྲོ་བར་ཆས་སོ། །དེའི་ཚེ་རི་དེ་ནས་ཆས་པ་དང་རི་དེ་ལ་གནས་པའི་རི་

71-1-73b

དགས་དང་གཅན་ཟན་ལ་སོགས་པ་རྒྱལ་བུ་འགྲོའོ་ཞེས་ཐོས་ནས། ཐམས་ཅད་ལུས་ས་ལ་བརྡབས་ནས་ས་ལ་འགྲེ་ཞིང་ངུ་བའི་སྐད་ཕྱུང་ངོ་། །ཆུ་མིག་རྣམས་ཀྱང་སྐམས་ཏེ་གཅན་ཟན་དང་རི་དགས་ཀྱི་ཕྲུ་གུ་ཡང་
མི་ནུ། འདབ་ཆགས་བྱ་མང་པོ་ཡང་སྙིང་རྗེའི་སྐད་ཀྱིས་སྒྲ་ཕྱུང་ངོ་། །དེ་ནས་རྒྱལ་བུ་གོས་གྱོན་ནས་བཙུན་མོ་དང་འགྲོགས་ཏེ། ཕྱིར་ཡུལ་དུ་སོང་བ་ལས་དགྲ་ཟླའི་ཡུལ་གྱི་རྒྱལ་པོས། རྒྱལ་བུ་ཕྱིར་འོང་ངོ་
ཞེས་ཐོས་ནས་བལ་གྱི་གླང་པོ་ཆེ་དཀར་པོ་ལ་གསེར་གྱི་སྒ་བསྟད་དེ། གསེར་གྱི་སྣོད་དུ་དངུལ་གྱི་ཉེའུས་བཀང་། དངུལ་གྱི་སྣོད་དུ་ནི་གསེར་གྱི་ཉེའུས་བཀང་བ་བཤམས་ནས། རྒྱལ་བུ་བསུ་བའི་ཕྱིར་ནམ་མཁའ་ལ་
སྟོད་དེ། རྒྱལ་བུ་བསུ་ནས་རྒྱལ་པོའི་ཕྲིན་ཏུ་འདི་སྐད་ཅེས་གསོལ་ཏོ། །བདག་ནི་མི་ཤེས་པའི་དབང་དུ་གྱུར་ཏེ། རྒྱལ་བུ་ལས་བལ་གྱི་གླང་པོ་ཆེ་བླངས་པས། དེའི་རྐྱེན་གྱིས་རྒྱལ་བུ་སྤངས་པར་གྱུར་པ་ད་འགྱོད་པས་
ན་འཐོལ་ཚངས་སུ་གསོལ་ལོ། །ད་རྒྱལ་བུ་སླར་གཤེགས་ཅེས་ཐོས་ནས་རབ་ཏུ་དགའ་སྟེ། བལ་གྱི་གླང་པོ་ཆེ་དེ་ཉིད་ཀྱང་སླར་ཕུལ་ཞིང་གསེར་དངུལ་གྱི་ཉེའུ་རྣམས་ཀྱང་ཕུལ་ན། འདི་དག་རྣམས་ཀྱང་བཞེས་ཤིག །
ནོངས་པའི་སྐྱོན་རྣམས་ཀྱང་སྦྱང་བར་གསོལ་ཏོ། །རྒྱལ་བུས་སྨྲས་པ། དཔེར་ན་མི་ཞིག་གིས་ཁ་ཟས་རོ་བརྒྱ་དང་ལྡན་པ་སྦྱར་ཏེ། ཕ་རོལ་པོ་གཅིག་ལ་བྱིན་པ་ལས། མི་དེས་ཁ་ཟས་ཟོས་ནས་ཕྱིར་ས་
ལ་སྐྱུགས་ནས། ཕྱིར་སྐྱུགས་པའི་ཁ་ཟས་དྲི་བསུང་དང་ལྡན་པ་དེ་བཟར་རུང་བར་འགྱུར་རམ། བདག་གིས་སྦྱིན་པ་བྱས་པ་ཡང་སྐྱུགས་པ་དང་འདྲ་བས་ཕྱིར་མི་འདོད་དོ། །ཕོ་ཉ་ཁྱོད་བལ་གྱི་གླང་པོ་ཆེ་འདི་ཞོན་
ལ་བདག་གི་ཡུལ་དུ་སོང་ཤིག །ཁྱོད་ཀྱི་རྒྱལ་པོ་འདི་ལྟར་བདག་བསུ་ཞིང་། སྤྲོ་བའི་ཚིག་གིས་སྙན་པར་སྨྲས་པ་རབ་ཏུ་དགའོ་ཞེས་གསོལ་ཅིག་ཅེས་བསྒོ་བ་དང་། ཕོ་ཉ་དེ་ཡང་བལ་གྱི་གླང་པོ་ཆེ་ལ་ཞོན་ཏེ་

71-1-74a

ཕྱིར་བདག་གི་ཡུལ་དུ་སོང་ནས། རྒྱལ་པོ་ལ་དེ་བཞིན་དུ་གསོལ་པ་ལས། བལ་གྱི་གླང་པོ་ཆེ་དེའི་རྐྱེན་གྱིས་འཐབ་པའི་དགྲ་ཟླ་དེ་གཅིག་ལ་གཅིག་བྱམས་ཤིང་སྡུག་པའི་སེམས་སུ་གྱུར་ཏེ། 
རྒྱལ་པོ་དང་ཡུལ་མི་ཐམས་ཅད་བླ་ན་མེད་པའི་མཉམ་སྙོམས་པའི་སེམས་སྐྱེད་པར་གྱུར་ཏོ། །དེའི་ཚེ་རྒྱལ་པོ་ཡབ་ཀྱང་བལ་གྱི་གླང་པོ་ཆེ་ལ་བཅིབས་ཏེ་རྒྱལ་བུ་བསུས་སོ། །རྒྱལ་བུས་མགོ་དང་གདོང་གིས་
ཕྱག་འཚལ་ནས་རྒྱལ་པོའི་ཕྱི་བཞིན་ཕྱིར་ཡུལ་དུ་སོང་སྟེ། ཡུལ་མི་ཐམས་ཅད་ཀྱང་རབ་ཏུ་དགའ་མགུ་རངས་ནས་མེ་ཏོག་དང་བདུག་སྤོས་དང་བ་དན་དང་རྒྱལ་མཚན་དང་བླ་རེ་ལ་སོགས་པས་མཆོད་པ་བྱ་བའི་ཕྱིར་བསམས་
ཏེ། ས་གཞི་ཡང་སྤོས་ཆུ་ཆག་ཆག་བཏབ་ནས་བསྡད་དོ། །རྒྱལ་བུ་ཕོ་བྲང་གི་ནང་དུ་འོངས་ནས། ཡུམ་གྱི་དྲུང་དུ་ཕྱིན་པ་དང་མགོ་བོས་ཕྱག་འཚལ་ནས་སྤྲོ་བའི་ཚིག་གིས་སྙུན་གསོལ་ཏོ། །དེ་ནས་རྒྱལ་པོས་
རིན་པོ་ཆེའི་བང་མཛོད་ཐམས་ཅད་ཀྱང་རྒྱལ་བུ་ལ་གཏད་དེ། ཡིད་བཞིན་དུ་སྦྱིན་པ་བྱེད་དུ་བཅུག་ནས། སྦྱིན་པ་སྔ་མ་བས་ཀྱང་ལྷག་པར་རྒྱུན་མ་ཆད་པར་སྦྱིན་པ་བྱེད་དུ་བཅུག་པས། མངོན་པར་སངས་རྒྱས་ཀྱི་
བྱང་ཆུབ་ཐོབ་པར་གྱུར་ཏོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ངས་སྔོན་གྱི་སྦྱིན་པ་བྱས་པ་མངོན་ཏུ་དྲན་པ་ནི་དེ་ལྟ་བུ་ཡིན་ནོ། །དེའི་ཚེ་དེའི་དུས་ན་རྒྱལ་བུ་དོན་གྲུབ་ཅེས་བྱ་བ་ནི་ད་ལྟར་ང་
ཉིད་ཡིན་ནོ། །དེའི་ཚེ་ཡབ་རྒྱལ་པོར་གྱུར་པ་ནི་ད་ལྟར་ངའི་ཡབ་རྒྱལ་པོ་ཟས་གཙང་མ་ཡིན་ནོ། །དེའི་ཚེ་ཡུམ་དུ་གྱུར་པ་དེ་ནི་ད་ལྟར་ཡུམ་ལྷ་མཛེས་ཡིན་ནོ། །དེའི་ཚེ་བཙུན་མོར་གྱུར་པ་ནི་ད་ལྟར་གྲགས་འཛིན་ཉིད་
ཡིན་ནོ། །དེའི་ཚེ་དགེ་སློང་ཨ་ཚུ་ཏ་ཞེས་བྱ་བ་ནི། ད་ལྟར་མཽད་གལ་གྱི་བུ་ཆེན་པོ་ཡིན་ནོ། །དེའི་ཚེ་བརྒྱ་བྱིན་ལྷའི་དབང་པོར་གྱུར་པ་དེ་ནི་ད་ལྟར་ཤཱ་རིའི་བུ་ཡིན་ནོ། །དེའི་ཚེ་རྔོན་པར་གྱུར་པ་དེ་ནི་ད་ལྟར་ཀུན་

71-1-74b

དགའ་བོ་ཁྱོད་ཡིན་ནོ། །དེའི་ཚེ་ཁྱེའུ་ཡ་རི་ཞེས་བྱ་བ་ནི་ད་ལྟར་ངའི་སྲས་སྒྲ་གཅན་འཛིན་ཡིན་ནོ། །དེའི་ཚེ་བུ་མོར་གྱུར་པ་དེ་ནི་ཡུམ་སྲུ་གཽ་ཏ་མཱི་ཞེས་བྱ་བ་ཡིན་ནོ། །དེའི་ཚེ་བྲམ་ཟེ་སློངས་མོ་པ་དེ་ནི་ད་ལྟར་ལྷ་སྦྱིན་ཉིད་ཡིན་
ནོ། །དེའི་ཚེ་བྲམ་ཟེའི་ཆུང་མར་གྱུར་པ་དེ་ནི་ད་ལྟར་བྲམ་ཟེ་མོ་ཙན་ཙ་མ་ན་ཡིན་ནོ། །དེ་ལྟར་ན་ང་ཤིན་ཏུ་བྱེད་དཀའ་བ་ཡང་གྲངས་མེད་དཔག་ཏུ་མེད། དགེ་བའི་ལས་བྱས་པ་ཡང་གྲངས་མེད་དཔག་ཏུ་མེད་དེ། དེ་བས་
མདོ་སྟེ་འདི་དགེ་སློང་དང་བྲམ་ཟེ་ལ་སོགས་པ་ལ་རྒྱས་པར་སྟོན་ཅིག །བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པ་བྱས་པའི་སྦྱིན་པའི་ཕ་རོལ་ཏུ་ཕྱིན་པ་འདི་ལྟ་བུ་དག་ཡིན་ནོ། །འཕགས་པ་རྒྱལ་བུ་དོན་གྲུབ་
ཀྱི་མདོ་ཞེས་བྱ་བ། བམ་པོ་གཅིག་པ། རྫོགས་སོ།། །། ༄༅། །རྒྱ་གར་སྐད་དུ། བྲཧྨ་ཛཱ་ལ་སཱུ་ཏྲ། བོད་སྐད་དུ། ཚངས་པའི་དྲ་བའི་མདོ། དཀོན་མཆོག་
གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དགེ་སློང་གི་དགེ་འདུན་ཆེན་པོ་སྟོང་ཉིས་བརྒྱ་ལྔ་བཅུ་དང་། དགེ་བསྙེན་སྟོང་དང་། སློངས་མོ་པ་ལྔ་བརྒྱ་རྣམས་དང་ཐབས་
གཅིག་ཏུ་ཡུལ་མ་ག་དྷའི་ལྗོངས་རྒྱུ་ཞིང་གཤེགས་གཤེགས་པ་ལས། མཚན་མོ་རྒྱལ་པོའི་ཁབ་དང་། སྐྱ་སྣར་ཅན་གྱི་གྲོང་གི་བར་དེ་ན་འོད་མའི་ལྕུག་ཕྲན་རྒྱལ་པོའི་གནས་སུ་དགེ་སློང་གི་དགེ་འདུན་དང་ཐབས་གཅིག་ཏུ་བཞུགས་
སོ། །དེའི་ཚེ་ཀུན་དུ་རྒྱུ་རབ་དགའ་རྣམ་གྲངས་དུ་མའི་སྒོ་ནས། སངས་རྒྱས་ལ་མི་སྙན་པར་བརྗོད་ལ། ཆོས་དང་དགེ་འདུན་ལ་ཡང་མི་སྙན་པར་བརྗོད་པ་དང་། ཀུན་དུ་རྒྱུ་རབ་དགའི་སློབ་མ་བྲམ་ཟེའི་བུ་ཚངས་སྦྱིན་
ཞེས་བྱ་བ་ནི། རྣམ་གྲངས་དུ་མའི་སྒོ་ནས། སངས་རྒྱས་ལ་སྙན་པ་བརྗོད་ལ། ཆོས་དང་དགེ་འདུན་ལ་ཡང་སྙན་པ་བརྗོད་པ་ཞིག་སྟེ། དེ་ལྟར་སློབ་དཔོན་དང་། སློབ་མ་དེ་གཉིས་ཕན་ཚུན་ལྟ་བ་དང་། མོས་པ་དང་

71-1-75a

བྱེ་བྲག་ཕྱེད་པ་དང་བཟོད་པ་དག་གིས་མི་འཐུན་པར་སྨྲ་ཞིང་དགེ་སློང་གི་དགེ་འདུན་དག་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཕྱི་བཞིན་ཞབས་འབྲིང་དུ་དོང་ངོ་། །
དེ་ནས་དགེ་སློང་མང་པོ་རྒྱལ་པོའི་གནས་ན་འདུས་ཤིང་འཁོད་པ་རྣམས་ན་རེ། ཚེ་དང་ལྡན་པ་དག་སེམས་ཅན་རྣམས་ཀྱི་མོས་པ་སྣ་ཚོགས་འདི་ལྟ་སྟེ། ཀུན་དུ་རྒྱུ་རབ་དགའ་རྣམ་གྲངས་དུ་མའི་སྒོ་ནས། སངས་རྒྱས་
ལ་མི་སྙན་པ་བརྗོད་ལ། ཆོས་དང་དགེ་འདུན་ལ་ཡང་མི་སྙན་པ་བརྗོད་པ་དང་། ཀུན་དུ་རྒྱུ་རབ་དགའི་སློབ་མ་བྲམ་ཟེའི་བུ་ཚངས་སྦྱིན་ཞེས་བྱ་བ་ནི་རྣམ་གྲངས་དུ་མའི་སྒོ་ནས། སངས་རྒྱས་ལ་སྙན་པ་བརྗོད་ལ། ཆོས་
དང་དགེ་འདུན་ལ་ཡང་སྙན་པ་བརྗོད་པ་ཞིག་སྟེ། དེ་ལྟར་སློབ་དཔོན་དང་སློབ་མ་དེ་གཉིས་ཕན་ཚུན་ལྟ་བ་དང་མོས་པ་དང་བྱེ་བྲག་ཕྱེད་པ་དང་བཟོད་པ་དག་གིས་མི་མཐུན་པར་སྨྲ་ཞིང་དགེ་སློང་གི་དགེ་འདུན་དང་དེ་བཞིན་གཤེགས་པ་
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཕྱི་བཞིན་ཞབས་འབྲིང་དུ་དོང་བ་འདི་ནི་ངོ་མཚར་རབ་ཏུ་ཆེའོ་ཞེས་སྐབས་ཀྱི་གཏམ་དེ་ལྟ་བུ་དག་ཡང་དག་པར་བརྗོད་པར་གྱུར་ཏོ། །དེ་ནས་དགེ་སློང་མང་པོ་དག་རྒྱལ་
པོའི་གནས་ན་འདུས་ཤིང་འཁོད་པ་རྣམས་ཀྱི་སྐབས་ཀྱི་གཏམ་དུས་ལ་བབ་པ་དག །བཅོམ་ལྡན་འདས་ཉིན་མོའི་གནས་ན་བཞུགས་བཞུགས་པའི་ལྷའི་སྙན་རྣམ་པར་དག་པ་མིའི་ལས་འདས་པས་གསན་པར་གྱུར་ཏོ། །
གསན་ནས་ཀྱང་ཏིང་ངེ་འཛིན་དེ་ལས་བཞེངས་ནས། རྒྱལ་པོའི་གནས་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་མདུན་དུ་གདན་བཏིང་བ་ཉིད་ལ་བཞུགས་སོ། །བཞུགས་ནས་ཀྱང་དགེ་སློང་རྣམས་ལ་
བཀའ་སྩལ་པ། དགེ་སློང་དག་ཁྱེད་རྒྱལ་པོའི་གནས་སུ་དགེ་སློང་མང་པོ་རྣམས་འདུས་ཤིང་འཁོད་པ་རྣམས་ཀྱི་སྐབས་ཀྱི་གཏམ་དུས་ལ་བབ་པ་ནི་གང་ཡིན། ཁྱེད་གཏམ་གང་གིས་ན་ད་ལྟར་འདུས་ཤིང་འཁོད་པ་བཙུན་

71-1-75b

པ་བདག་ཅག་དགེ་སློང་མང་པོ་རྣམས་རྒྱལ་པོའི་གནས་འདིར་འདུས་ཤིང་མཆིས་པ་ན། ཀུན་དུ་རྒྱུ་རབ་དགའ་རྣམ་གྲངས་དུ་མའི་སྒོ་ནས་སངས་རྒྱས་ལ་མི་སྙན་པ་བརྗོད་ལ། ཆོས་དང་དགེ་འདུན་ལ་ཡང་མི་སྙན་པ་
བརྗོད་པ་དང་། ཀུན་དུ་རྒྱུ་རབ་དགའི་སློབ་མ་བྲམ་ཟེའི་བུ་ཚངས་སྦྱིན་ཞེས་བགྱི་བ་ནི། རྣམ་གྲངས་དུ་མའི་སྒོ་ནས། སངས་རྒྱས་ལ་སྙན་པ་བརྗོད་ལ། ཆོས་དང་དགེ་འདུན་ལ་ཡང་སྙན་པ་བརྗོད་པ་ཞིག་སྟེ། 
དེ་ལྟར་ན་སློབ་དཔོན་དང་སློབ་མ་དེ་གཉིས་ཕན་ཚུན་ལྟ་བ་དང་མོས་པ་དང་བྱེ་བྲག་ཕྱེད་པ་དང་བཟོད་པ་དག་གིས་མི་འཐུན་པར་སྨྲ་ཞིང་དགེ་སློང་གི་དགེ་འདུན་དང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་ཀྱི་སླད་བཞིན་ཞབས་འབྲིང་དུ་མཆིས་པ་འདི་ནི་ངོ་མཚར་རབ་ཏུ་ཆེའོ་ཞེས་སྐབས་ཀྱི་གཏམ་དེ་ལྟ་བུ་དག་གླེང་གླངས་པ་ལགས་ལ། བཙུན་པ་བདག་ཅག་དགེ་སློང་མང་པོ་རྣམས་རྒྱལ་པོའི་གནས་སུ་འདུས་ཤིང་མཆིས་
པའི་སྐབས་ཀྱི་གཏམ་དུས་ལ་བབ་པ་ནི་དེ་ལགས་ཏེ། གཏམ་དེས་ད་ལྟར་བདག་ཅག་འདུས་ཤིང་མཆིས་པ་ལགས་སོ། །དགེ་སློང་དག་ང་ལ་མི་སྙན་པ་བརྗོད་པ་དང་། ཆོས་དང་དགེ་འདུན་ལ་ཡང་མི་སྙན་པ་བརྗོད་
པ་དེ་ལ། གནོད་སེམས་མི་བྱའོ། །མི་བཟོད་པ་མི་བྱའོ། །ངན་སེམས་མི་བྱའོ། །སེམས་མངོན་པར་མི་དགའ་བ་མི་བྱའོ། །དགེ་སློང་དག་ང་ལ་མི་སྙན་པར་བརྗོད་པ་དང་། ཆོས་དང་དགེ་འདུན་ལ་
ཡང་མི་སྙན་པར་རྗོད་པ་དེ་ལ། ཚེ་དང་ལྡན་པ་དག་གིས་གནོད་སེམས་དང་མི་བཟོད་པ་དང་ངན་སེམས་དང་སེམས་མངོན་པར་མི་དགའ་བར་བྱས་ནས། དེས་ན་ཁྱོད་ཀྱི་བར་དུ་གཅོད་པ་ཁོ་ནར་འགྱུར་བའི་ཕྱིར་རོ། །
དེ་ཅིའི་ཕྱིར་ཞེ་ན། དགེ་སློང་དེ་རེ་ཤིག་ཁྲོས་འཁྲུགས་ལ་རྔམས་ཏེ་ཡིད་མི་དགའ་བར་གྱུར་པས། རྗོད་པའི་དོན་གྱི་རྣམ་པ་ཐམས་ཅད་ཡོངས་སུ་རྫོགས་པར་ཤེས་པ་འམ། མཐོང་བར་འགྱུར་བ་འདི་ནི་གནས་

71-1-76a

མེད་དོ། །དགེ་སློང་དག་དེའི་ཕྱིར་ང་ལ་མི་སྙན་པར་རྗོད་ལ། ཆོས་དང་དགེ་འདུན་ལ་ཡང་མི་སྙན་པར་རྗོད་པ་ན། ཡང་དག་པ་ལ་ནི་ཡང་དག་པ་ཉིད་ཏུ་ཁས་བླང་བར་བྱ་ལ། ཡང་དག་པ་མ་ཡིན་པ་ལ་ནི་ཡང་
དག་པ་མ་ཡིན་པ་ཉིད་ཏུ་སྟེ། འདི་ལྟར་དེ་ནི་ཡང་དག་པ་མ་ཡིན་ཞིང་དེ་ཁོ་ན་མ་ཡིན་པས་ངེད་ཀྱི་ཆོས་འདི་ལ་ནི་ཡོད་པ་མ་ཡིན་ནོ་ཞེས་ལན་གདབ་པར་བྱའོ། །དགེ་སློང་དག་ང་ལ་སྙན་པ་རྗོད་ལ། ཆོས་དང་དགེ་འདུན་ལ་
ཡང་སྙན་པ་རྗོད་པ་ན། དགའ་བར་ཡང་མི་བྱའོ། །ཡིད་བདེ་བར་ཡང་མི་བྱའོ། །སེམས་ཡེ་ཡེ་པོར་ཡང་མི་བྱའོ། །དགེ་སློང་དག་ང་ལ་སྙན་པ་རྗོད་ལ། ཆོས་དང་དགེ་འདུན་ལ་ཡང་སྙན་པ་རྗོད་པ་ན། 
དགའ་བ་འམ་ཡིད་བདེ་བ་འམ་སེམས་ཡེ་ཡེ་པོར་གྱུར་ན། དེས་ན་ཁྱེད་ཀྱི་བར་དུ་གཅོད་པ་ཁོ་ནར་འགྱུར་བའི་ཕྱིར་རོ། །དགེ་སློང་དག །དེ་ཅིའི་ཕྱིར་ཞེ་ན། དགེ་སློང་དེ་རེ་ཤིག་དགའ་བར་གྱུར་པ་དང་། ཡིད་
བདེ་བར་གྱུར་པ་དང་། སེམས་ཡ་ཡ་པོར་གྱུར་པས། གཞན་རྗོད་པའི་དོན་གྱི་རྣམ་པ་ཐམས་ཅད་ཡོངས་སུ་རྫོགས་པར་ཤེས་པ་འམ། མཐོང་བར་འགྱུར་བ་འདི་ནི་གནས་མེད་དོ། །དགེ་སློང་དག་དེའི་ཕྱིར་
ང་ལ་སྙན་པ་རྗོད་ལ། ཆོས་དང་དགེ་འདུན་ལ་ཡང་སྙན་པ་རྗོད་པ་ན། ཡང་དག་པ་ལ་ནི་ཡང་དག་པ་ཉིད་དུ་ཁས་བླང་བར་བྱ་ལ། ཡང་དག་པ་མ་ཡིན་པ་ལ་ནི་ཡང་དག་པ་མ་ཡིན་པ་ཉིད་ཏུ་སྟེ། འདི་ལྟར་དེ་ནི་ཡང་དག་
པ་མ་ཡིན་ཞིང་དེ་ཁོ་ན་མ་ཡིན་པས། ངེད་ཀྱི་ཆོས་འདི་ལ་ནི་ཡོད་པ་མ་ཡིན་ནོ་ཞེས་ལན་གདབ་པར་བྱའོ། །དགེ་སློང་དག་གང་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་དག །དེ་བཞིན་གཤེགས་པའི་སྙན་པ་
ཅུང་ཟད་ཙམ་འདི་སྨྲ་ཞིང་རྗོད་པ་འདི་ལྟ་སྟེ། ཚུལ་ཁྲིམས་ཙམ་དང་འདོད་པ་དག་ལས་རབ་ཏུ་དབེན་པ་ཡིན་ནོ། །ཇི་ལྟར་ན་ཚུལ་ཁྲིམས་ཙམ་ཡིན་ཞེ་ན། གཽ་ཏ་མ་དེ་ནི་འཕེལ་བའི་ཚུལ་ཁྲིམས་ཅན་ཡིན་ལ། 

71-1-76b

ཇི་སྐད་སྨྲས་པ་དེ་བཞིན་བྱེད་ཅིང་ཇི་ལྟར་བྱེད་པ་དེ་བཞིན་སྨྲ་བ་ཡིན་ནོ། །གཽ་ཏ་མ་དེ་ནི་འདི་ལྟར་སྲོག་གཅོད་པ་སྤངས་ནས་སྲོག་གཅོད་པ་ལས་སླར་ལོག་པ་སྟེ། སྲོག་ཆགས་སུ་གྱུར་པའི་སེམས་ཅན་ཐམས་ཅད་
ལ་སྙིང་རྗེ་དང་ལྡན་ཞིང་ངོ་ཚ་ཤེས་པ་དང་། དབྱུག་པ་སྤངས་ཤིང་མཚོན་ཆ་སྤངས་པས་ཐ་ན་སྲོག་ཆགས་གྲོག་སྦུར་ཡན་ཆད་ལ་ཡང་སྲོག་གཅོད་པ་སྤངས་པ་ཡིན་ནོ། །གཽ་ཏ་མ་དེ་ནི་འདི་ལྟར་མ་བྱིན་པར་ལེན་པ་སྤངས་ནས་
མ་བྱིན་པར་ལེན་པ་ལས་སླར་ལོག་པ་སྟེ། མ་བྱིན་པར་མི་ལེན་པ། བྱིན་པ་ལ་ནི་དགའ་བ་ཡིན་ཏེ། དེ་བཞིན་དུ་རྒྱ་ཆེར་རོ། །ཇི་ལྟར་འདི་ནི་དགེ་སྦྱོང་དང་། བྲམ་ཟེ་ཁ་ཅིག་དད་པས་བྱིན་པ་ཡོངས་སུ་སྤྱོད་ཅིང་། 
རིག་པ་ཡོན་པོ་དག་གིས་ལོག་པར་འཚོ་བས་འཚོ་བར་བྱེད་དེ། འདི་ལྟ་སྟེ་ཉི་མ་དང་ཟླ་བ་གཉིས་ལམ་ནས་རྒྱུ་བའི་རྣམ་པར་སྨིན་པ་ནི་འདི་ལྟ་བུའོ། །ཉི་མ་དང་ཟླ་བ་གཉིས་ལམ་ལོག་པ་ནས་རྒྱུ་བའི་རྣམ་པར་སྨིན་པ་ནི་
འདི་ལྟ་བུའོ། །གཟའ་ཉི་མ་དང་གཟའ་ཟླ་བའི་ལམ་དང་སྐར་མདའ་ལྟུང་བ་ལས་ཕྱོགས་འབར་བ་དང་། བར་སྣང་ལས་ལྷའི་རྔ་སྒྲ་གྲག་པའི་རྣམ་པར་སྨིན་པ་ནི་འདི་ལྟ་བུའོ། །གཟའ་ཉི་མ་དང་གཟའ་ཟླ་བའི་ལམ་ལོག་
པ་དང་སྐར་མདའ་ལྟུང་བ་ལས་ཕྱོགས་འབར་བ་དང་། བར་སྣང་ལས་ལྷའི་རྔ་སྒྲ་གྲག་པ་དང་། ཡང་ཉི་མ་དང་ཟླ་བ་འདི་གཉིས་འདི་ལྟར་མཐུ་ཆེ་བ། འདི་ལྟར་རྫུ་འཕྲུལ་ཆེ་བའི་རྣམ་པར་སྨིན་པ་ནི་འདི་ལྟ་བུའོ། །
འཆར་བ་དང་འོང་བ་དང་ཀུན་ནས་ཉོན་མོངས་པ་དང་རྣམ་པར་བྱང་བ་རྣམ་པར་གཞག་པ་དག་ཏུ་མི་ཤེས་པ་ནི་འདི་ལྟ་སྟེ། ལམ་དང་ལམ་ལོག་པའི་ཕྱིར་རོ། །གཽ་ཏ་མ་དེ་ནི་རིག་པ་ཡོན་པོ་དག་གིས་ལོག་པར་འཚོ་བས་
ལོག་པར་འཚོ་བར་བྱེད་པ་དེ་ལྟ་བུ་དག་སྤངས་པ་ཡིན་ནོ། །ཇི་ལྟར་ན་འདོད་པ་རྣམས་ལས་རབ་ཏུ་དབེན་པ་ཡིན་ཞེ་ན། གཽ་ཏ་མ་དེ་ནི་འདི་ལྟར་འཕགས་པའི་ཚུལ་ཁྲིམས་ཀྱི་ཕུང་པོ་འདི་དག་དང་ལྡན་ཞིང་། དབང་

71-1-77a

པོ་རྣམས་ཀྱི་སྒོ་བསྡམས་པ་ལ་གནས་པ་དྲན་པས་ཀུན་ནས་བསྲུངས་པ་རྟག་པར་དྲན་པ་དྲན་པས་ཡིད་ཀུན་ནས་བསྲུངས་པ། གནས་སྐབས་མཉམ་པ་ལ་འཇོག་པར་བྱེད་པ། དེ་མིག་གིས་གཟུགས་
རྣམས་ལ་ལྟ་བ་ན་མཚན་མར་འཛིན་པ་མེད་པ་ཡིན་ཏེ། ཡིད་ཀྱི་དབང་པོའི་བར་དུ་ཡང་སྡོམ་པ་བླངས་པ་ཡིན་ནོ། །གཽ་ཏ་མ་དེ་ནི་འདི་ལྟར་ཚུལ་ཁྲིམས་ཀྱི་ཕུང་པོ་འདི་དང་། དབང་པོའི་སྒོ་བསྡམས་པ་འདི་དང་
ལྡན་པ་ཡིན་ལ། འགྲོ་བ་དང་འོང་བ་ལ་ཤེས་བཞིན་དུ་གནས་པ་ཡང་ཡིན་ཞིང་། ལྟ་བ་དང་རྣམ་པར་ལྟ་བ་ནས་གཉིད་ཀྱིས་དུབ་པ་སེལ་བའི་བར་དུའང་ཤེས་བཞིན་དུ་གནས་པ་ཡིན་ནོ། །གཽ་ཏ་མ་དེ་ནི་འདི་ལྟར་
འཕགས་པའི་ཚུལ་ཁྲིམས་ཀྱི་ཕུང་པོ་འདི་དང་། དབང་པོའི་སྒོ་བསྡམས་པ་འདི་དང་ལྡན་ལ། དྲན་པ་དང་ཤེས་བཞིན་མཆོག་འདི་དང་ལྡན་པའི་ཕྱིར་མལ་སྟན་བདེ་བ་ལ་གནས་པ་ནས་འདོད་པ་དག་ལས་དབེན་པ། 
སྡིག་པ་མི་དགེ་བའི་ཆོས་རྣམས་ལས་དབེན་པ་རྟོག་པ་དང་བཅས་ཤིང་དཔྱོད་པ་དང་བཅས་པ། དབེན་པ་ལས་སྐྱེས་པའི་དགའ་བ་དང་བདེ་བ་ཅན་བསམ་གཏན་དང་པོ་རྫོགས་པར་བྱས་ནས་གནས་པའི་བར་ཏེ། འདོད་པ་
རྣམས་ལས་དབེན་པ་ནི་དེ་ལྟ་བུ་ཡིན་ནོ། །དགེ་སློང་དག་ཆོས་གང་དག་གཞན་ཟབ་པ་ཟབ་པར་སྣང་བ་ཡོངས་སུ་དག་པ་ཡོངས་སུ་བྱང་བ་དེ་དག་ངས་རང་གི་མངོན་པར་ཤེས་པས་མངོན་པར་རྫོགས་པར་སངས་རྒྱས་ནས་
བཤད་ལ། ཕ་རོལ་པོས་ཀྱང་དེ་བཞིན་གཤེགས་པ་ལ་གང་ཡང་དག་པ་ཇི་ལྟ་བ་བཞིན་སྙན་པ་སྨྲ་ཞིང་རྗོད་པར་བྱེད་དོ། །དགེ་སློང་དག་ཆོས་གང་དག་གཞན་ཟབ་པ་ཟབ་པར་སྣང་བ་ཡོངས་སུ་དག་པ་ཡོངས་སུ་བྱང་
བ་དེ་དག་ངས་རང་གི་མངོན་པར་ཤེས་པས་མངོན་པར་རྫོགས་པར་སངས་རྒྱས་ནས་བཤད་ལ། ཕ་རོལ་པོས་ཀྱང་དེ་བཞིན་གཤེགས་པ་ལ་གང་ཡང་དག་པ་ཇི་ལྟ་བ་བཞིན་སྙན་པ་སྨྲ་ཞིང་རྗོད་པར་བྱེད་པ་གང་ཞེ་ན། དགེ་

71-1-77b

སློང་དག་དགེ་སྦྱོང་དང་བྲམ་ཟེ་ཁ་ཅིག་རྟག་པར་སྨྲ་བ་རྣམས་སྔོན་གྱི་མཐའ་ལ་རྟོག་ཅིང་། བདག་དང་འཇིག་རྟེན་ནི་རྟག་གོ་ཞེས་མངོན་པར་སྨྲ་ཞིང་མངོན་པར་རྗོད་པ་ཡོད་པ་ནི་འདི་ལྟ་སྟེ་གཞི་བཞི་པོ་དག་ལའོ། །
དགེ་སྦྱོང་དང་བྲམ་ཟེ་ཤེས་ལྡན་རྟག་པར་སྨྲ་བ་དེ་དག་ཅི་ལ་རྟེན་ཅིང་ཅི་ལ་གནས་ནས། ཅི་ལ་གནས་བཅས་ཏེ་སྔོན་གྱི་མཐའ་ལ་རྟོག་ཅིང་བདག་དང་འཇིག་རྟེན་ནི་རྟག་གོ་ཞེས་མངོན་པར་སྨྲ་ཞིང་མངོན་པར་བརྗོད་པ་ནི་འདི་
ལྟ་སྟེ། གཞི་བཞི་པོ་དག་ལའོ། །དགེ་སློང་དག་འདི་ནི་དགེ་སྦྱོང་དང་བྲམ་ཟེ་ཁ་ཅིག་དགོན་པ་ན་གནས་ཀྱང་རུང་། ཤིང་དྲུང་ན་གནས་ཀྱང་རུང་། ཁང་སྟོང་ན་གནས་ཀྱང་རུང་སྟེ། བརྩོན་པའི་
རྒྱུ་ལས་བྱུང་བ་དང་སྤོང་བའི་རྒྱུ་ལས་བྱུང་བ་དང་སྒོམ་པའི་རྒྱུ་ལས་བྱུང་བ་དང་ལན་མང་དུ་བྱེད་པའི་རྒྱུ་ལས་བྱུང་བ་དང་ཡང་དག་པ་ཡིད་ལ་བྱེད་པའི་རྒྱུ་ལས་བྱུང་བ་དག་གིས། སེམས་ཞི་བའི་ཏིང་ངེ་འཛིན་དེ་ལྟ་བུ་ལ་རེག་པར་
བྱེད་དོ། །དེ་ལྟར་སེམས་མཉམ་པར་བཞག་པ་ན། འཇིག་པ་དང་ཆགས་པའི་བསྐལ་པ་ཕྲག་ཉི་ཤུ་ཡང་དག་པར་རྗེས་སུ་དྲན་ནོ། །དེ་འདི་སྙམ་དུ་སེམས་ཏེ། དེའི་ཕྱིར་བདག་དང་འཇིག་རྟེན་རྟག་པ་
དེས་ན། བདག་འདི་སྙམ་དུ། བདག་དགོན་པ་ན་གནས་ཀྱང་རུང་ཤིང་དྲུང་ན་གནས་ཀྱང་རུང་ཁང་སྟོང་ན་གནས་ཀྱང་རུང་སྟེ། བརྩོན་པའི་རྒྱུ་ལས་བྱུང་བ་དང་སྤོང་བའི་རྒྱུ་ལས་བྱུང་བ་དང་སྒོམ་པའི་རྒྱུ་ལས་བྱུང་བ་དང་
ལན་མང་དུ་བྱེད་པའི་རྒྱུ་ལས་བྱུང་བ་དང་ཡང་དག་པ་ཡིད་ལ་བྱེད་པའི་རྒྱུ་ལས་བྱུང་བ་དག་གིས། སེམས་ཞི་བའི་ཏིང་ངེ་འཛིན་དེ་ལྟ་བུ་ལ་རེག་པར་བྱའོ་སྙམ་མོ། །དེ་ལྟར་སེམས་མཉམ་པར་བཞག་པ་ན། འཇིག་
པ་དང་ཆགས་པའི་བསྐལ་པ་ཕྲག་ཉི་ཤུ་ཡང་དག་པར་རྗེས་སུ་དྲན་ནོ། །དེ་ལྟར་བདག་དང་འཇིག་རྟེན་རྟག་པ་ནི་མི་འགྲོ་བ་འགྲོ་བ་མེད་པ་བསྒྱུར་དུ་མི་རུང་བ་ཐེར་ཟུག་ཏུ་གནས་པ་ལྕགས་ཀྱི་སྡོང་པོ་ལྟར་འདུག་པ་སྟེ། དེ་ལྟར་

71-1-78a

ན་སེམས་ཅན་ཤེས་ལྡན་འདི་དག་ནི་ཀུན་དུ་རྒྱུག་ཅིང་འཁོར་ལ། རྟག་པ་དེ་ལྟ་བུ་དང་མཚུངས་པ་མེད་པའོ། །རྟག་པར་སྨྲ་བ་རྣམས་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ། 
སྔོན་གྱི་མཐའ་ལ་རྟོག་ཅིང་། བདག་དང་འཇིག་རྟེན་རྟག་པའོ་ཞེས་མངོན་པར་སྨྲ་ཞིང་མངོན་པར་བརྗོད་པ་འདི་ནི་གཞི་དང་པོའོ། །གཉིས་པ་ནི་དགེ་སྦྱོང་དང་བྲམ་ཟེ་ཤེས་ལྡན་རྟག་པར་སྨྲ་བ་རྣམས་ཅི་ལ་རྟེན་ཅིང་
ཅི་ལ་གནས་ནས་ཅི་ལ་གནས་བཅས་ཏེ་སྔོན་གྱི་མཐའ་ལ་རྟོག་ཅིང་། བདག་དང་འཇིག་རྟེན་རྟག་པའོ་ཞེས་མངོན་པར་སྨྲ་ཞིང་མངོན་པར་རྗོད་པ་སྟེ། དགེ་སློང་དག་འདི་ན་དགེ་སྦྱོང་དང་བྲམ་ཟེ་ཤེས་ལྡན་རྟག་
པར་སྨྲ་བ་རྣམས་དགོན་པ་ན་གནས་ཀྱང་རུང་ཤིང་དྲུང་ན་གནས་ཀྱང་རུང་ཁང་སྟོང་ན་གནས་ཀྱང་རུང་སྟེ། བརྩོན་པའི་རྒྱུ་ལས་བྱུང་བ་དང་སྤོང་བའི་རྒྱུ་ལས་བྱུང་བ་དང་སྒོམ་པའི་རྒྱུ་ལས་བྱུང་བ་དང་ལན་མང་དུ་བྱེད་པའི་རྒྱུ་ལས་
བྱུང་བ་དང་ཡང་དག་པ་ཡིད་ལ་བྱེད་པའི་རྒྱུ་ལས་བྱུང་བ་དག་གིས་སེམས་ཞི་བའི་ཏིང་ངེ་འཛིན་དེ་ལྟ་བུ་ལ་རེག་པར་བྱེད་དོ། །དེ་ལྟར་སེམས་མཉམ་པར་བཞག་པ་ན། འཇིག་པ་དང་ཆགས་པའི་བསྐལ་པ་ཕྲག་བཞི་
བཅུ་ཡང་དག་པར་རྗེས་སུ་དྲན་ནོ། །དེ་འདི་སྙམ་དུ་སེམས་ཏེ། དེའི་ཕྱིར་བདག་དང་འཇིག་རྟེན་རྟག་པ་དེས་ན། བདག་འདི་སྙམ་དུ་བདག་དགོན་པ་ན་གནས་ཀྱང་རུང་ཤིང་དྲུང་ན་གནས་ཀྱང་རུང་ཁང་སྟོང་ན་གནས་
ཀྱང་རུང་བ་ནས། རྟག་པར་སྨྲ་བ་རྣམས་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ་སྔོན་གྱི་མཐའ་ལ་རྟོག་ཅིང་། བདག་དང་འཇིག་རྟེན་རྟག་པའོ་ཞེས་མངོན་པར་སྨྲ་ཞིང་མངོན་པར་རྗོད་
པ་འདི་ནི་གཞི་གཉིས་པའོ་ཞེས་བྱ་བའི་བར་དུ་སྔ་མ་བཞིན་ནོ། །གསུམ་པ་ནི་དགེ་སྦྱོང་དང་བྲམ་ཟེ་ཤེས་ལྡན་རྟག་པར་སྨྲ་བ་རྣམས་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ་སྔོན་གྱི་མཐའ་

71-1-78b

ལ་རྟོག་ཅིང་། བདག་དང་འཇིག་རྟེན་རྟག་པའོ་ཞེས་མངོན་པར་སྨྲ་ཞིང་མངོན་པར་རྗོད་པ་སྟེ། དགེ་སློང་དག་འདི་ན་དགེ་སྦྱོང་དང་བྲམ་ཟེ་ཁ་ཅིག་ཅེས་བྱ་བ་ནས་སེམས་མཉམ་པར་བཞག་པ་ན། འཇིག་
པ་དང་ཆགས་པའི་བསྐལ་པ་ཕྲག་བརྒྱད་བཅུ་ཡང་དག་པར་རྗེས་སུ་དྲན་ནོ་ཞེས་བྱ་བའི་བར་དུ་སྔ་མ་བཞིན་བ་དང་དེ་འདི་སྙམ་དུ་སེམས་ཏེ། བདག་དང་འཇིག་རྟེན་ནི་རྟག་པའོ་ཞེས་བྱ་བ་ནས། དེ་ལྟར་ན་སེམས་ཅན་
ཤེས་ལྡན་འདི་དག་ནི་ཀུན་དུ་རྒྱུག་ཅིང་འཁོར་ལ་རྟག་པ་དེ་ལྟ་བུ་དང་མཚུངས་པ་མེད་པའོ། །རྟག་པར་སྨྲ་བ་རྣམས་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ། སྔོན་གྱི་མཐའ་ལ་རྟོག་ཅིང་བདག་དང་
འཇིག་རྟེན་རྟག་པའོ་ཞེས་མངོན་པར་སྨྲ་ཞིང་མངོན་པར་རྗོད་པ་འདི་ནི་གཞི་གསུམ་པའོ། །བཞི་པ་ནི་དགེ་སྦྱོང་དང་བྲམ་ཟེ་ཤེས་ལྡན་རྟག་པར་སྨྲ་བ་རྣམས་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ། 
སྔོན་གྱི་མཐའ་ལ་རྟོག་ཅིང་བདག་དང་འཇིག་རྟེན་རྟག་པའོ་ཞེས་མངོན་པར་སྨྲ་ཞིང་མངོན་པར་རྗོད་པ་སྟེ། དགེ་སློང་དག་འདི་ནི་དགེ་སྦྱོང་དང་བྲམ་ཟེ་ཞེས་བྱ་བ་དག་སྔ་མ་བཞིན་ནོ། །སེམས་མཉམ་པར་བཞག་
པ་ན། ལྷའི་མིག་རྣམ་པར་དག་པ་མིའི་ལས་འདས་པས་སེམས་ཅན་འཆི་བ་དང་སྐྱེ་བ་དང་ཁ་དོག་བཟང་པོ་དང་ཁ་དོག་ངན་པ་དང་དམན་པ་དང་གྱ་ནོམ་པ་དང་བདེ་འགྲོ་དང་ངན་འགྲོར་འགྲོ་བ་དག་ལྟ་སྟེ། དེ་ལྟར་ན་
བདག་དང་འཇིག་རྟེན་རྟག་པའོ་ཞེས་བྱ་བ་ནས། རྟག་པར་སྨྲ་བ་རྣམས་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ། སྔོན་གྱི་མཐའ་ལ་རྟོག་ཅིང་བདག་དང་འཇིག་རྟེན་རྟག་པའོ་ཞེས་མངོན་པར་སྨྲ་
ཞིང་མངོན་པར་རྗོད་པ་འདི་ནི་གཞི་བཞི་པའོ་ཞེས་བྱ་བའི་བར་དུ་སྔ་མ་བཞིན་ནོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་རྟག་པར་སྨྲ་བ་རྣམས་སྔོན་གྱི་མཐའ་ལ་རྟོག་ཅིང་། བདག་དང་འཇིག་རྟེན་རྟག་

71-1-79a

གོ་ཞེས་མངོན་པར་སྨྲ་ཞིང་མངོན་པར་རྗོད་པ་དེ་ཐམས་ཅད་ནི་གཞི་བཞི་པོ་འདི་དག་ལྟ་སྟེ། དེ་ལས་མི་ལྷག་མི་མང་ལ་དེ་ལྟར་ན་ལྟ་བར་སོང་བ་འདི་དག་འདི་ལྟར་འཛིན་པ་དང་། འདི་ལྟར་མཆོག་
ཏུ་འཛིན་པ་དེ་དག་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །འདི་ལྟར་རབ་ཏུ་མཁྱེན་པ་ན་མཆོག་ཏུ་མི་འཛིན་ཏོ། །མཆོག་
ཏུ་མི་འཛིན་པས་བདག་ཉིད་མྱ་ངན་ལས་འདས་པར་ཡང་རིག་ཅིང་དེ་ལྟར་ལྟ་བར་སོང་བ་འདི་དག་གི་འགྲོ་བ་ནི་འདི་ལྟ་བུའོ། །སྐྱེ་བ་ནི་འདི་ལྟ་བུའོ། །ཚེ་ཕྱི་མ་ནི་འདི་ལྟ་བུ་ཡིན་ནོ་ཞེས་དེ་དག་དེ་བཞིན་གཤེགས་
པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་མཁྱེན། དེ་དག་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་མཁྱེན། དེ་ལས་ལྷག་པར་ཡང་དག་
པ་ཇི་ལྟ་བ་བཞིན་དུ་རབ་ཏུ་མཁྱེན་ནས་ཀྱང་མཆོག་ཏུ་མི་འཛིན་ཏོ། །མཆོག་ཏུ་མི་འཛིན་པས་བདག་ཉིད་མྱ་ངན་ལས་འདས་པར་རིག་ནས་ཀུན་འབྱུང་ཚོར་བ་རྣམས་ནུབ་པར་ཐུགས་སུ་ཆུད་དེ། འདི་ནི་སྡུག་
བསྔལ་ལོ། །འདི་ནི་སྡུག་བསྔལ་ངེས་པར་འབྱིན་པའོ་ཞེས་བྱ་བར་རབ་ཏུ་མཁྱེན་ཏོ། །དགེ་སློང་དག་ཆོས་གང་དག་གཞན་ཟབ་པ་ཟབ་པར་སྣང་བ་ཡོངས་སུ་དག་པ། ཡོངས་སུ་བྱང་བ་དེ་དག་ངས་རང་གི་མངོན་
པར་ཤེས་པས་མངོན་པར་རྫོགས་པར་སངས་རྒྱས་ནས་བཤད་ལ། ཕ་རོལ་པོས་ཀྱང་དེ་བཞིན་གཤེགས་པ་ལ་གང་ཡང་དག་པ་ཇི་ལྟ་བ་བཞིན་དུ་སྙན་པ་སྨྲ་ཞིང་རྗོད་པར་བྱེད་དོ། །དགེ་སློང་དག་ཆོས་
གང་དག་གཞན་ཟབ་པ་ཟབ་པར་སྣང་བ་དག་ཅེས་བྱ་བ་སྔ་མ་བཞིན་ནོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་སྔོན་གྱི་མཐའ་ལ་རྟོག་ཅིང་ཁ་ཅིག་ནི་རྟག་པ་སྟེ། བདག་དང་འཇིག་རྟེན་ཁ་ཅིག་རྟག་གོ་

71-1-79b

ཞེས་སྨྲ་ཞིང་། མངོན་པར་རྗོད་པ་ནི་འདི་ལྟ་སྟེ་བཞི་པོ་འདི་དག་ལའོ། །དགེ་སྦྱོང་དང་བྲམ་ཟེ་ཤེས་ལྡན་དེ་དག་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ་སྔོན་གྱི་མཐའ་ལ་རྟོག་ཅིང་ཁ་ཅིག་ནི་རྟག་པ་
པ་སྟེ། བདག་དང་འཇིག་རྟེན་རྟག་གོ་ཞེས་མངོན་པར་སྨྲ་ཞིང་མངོན་པར་བརྗོད་པ་ནི་འདི་ལྟ་སྟེ། གཞི་བཞི་པོ་དག་ལའོ། །དགེ་སློང་དག་གང་འཇིག་རྟེན་འདི་འཇིག་པའི་དུས་ལ་བབ་སྟེ། འཇིག་རྟེན་འཇིག་
པ་ན་སེམས་ཅན་ཕལ་ཆེར་འོད་གསལ་གྱི་ལྷའི་རིས་སུ་སྐྱེ་བར་འགྱུར་ཏེ། དེ་དག་དེར་ཡིད་ལས་འབྱུང་ཞིང་གཟུགས་ཅན་ཡིན་ལ་དབང་པོ་དམན་པ་མ་ཡིན་ཞིང་མ་ཚང་བ་མེད་པ། ཡན་ལག་དང་ཉིང་ལག་ཐམས་ཅད་དང་
ལྡན་ཞིང་ཁ་དོག་མཛེས་པ་དང་ལྡན་པ་རྣམས་རང་གི་མཐུས་ནམ་མཁའ་ལ་འགྲོ་ཞིང་། དགའ་བའི་ཟས་དང་ལྡན་ལ་དགའ་བའི་ཟས་ཟ་བ་དག་ཚེ་རིང་བས་ཡུན་རིང་པོར་འཁོད་དོ། །དགེ་སློང་དག་གང་འཇིག་རྟེན་འདི་
ཆགས་པའི་དུས་ལ་བབ་སྟེ། འཇིག་རྟེན་ཆགས་པ་ན་ནམ་མཁའ་སྟོང་པ་ལ་ཚངས་པའི་གཞལ་མེད་ཁང་དག་མངོན་པར་འགྲུབ་ལ། ཡང་འོད་གསལ་གྱི་ལྷའི་རིས་ཀྱི་སེམས་ཅན་འགའ་ཚེ་ཟད་ཅིང་ལས་
ཟད་ལ། བསོད་ནམས་ཟད་པ་ཞིག་ཤི་འཕོས་ནས་ཚངས་པའི་གཞལ་མེད་ཁང་སྟོང་པར་སྐྱེ་སྟེ་དེ་དེ་ན་གཅིག་པུ་ཟླ་མེད་ཅིང་གྲོགས་མེད་པར་ཚེ་རིང་བས་ཡུན་རིང་བར་གནས་སོ། །དེ་ནས་སེམས་ཅན་དེ་
ཡུན་རིང་པོ་ལས་འདས་པ་དང་སྲེད་པ་སྐྱེས་ཤིང་མི་དགའ་བར་གྱུར་ཏེ། ཀྱེ་མ་བདག་དང་སྐལ་བ་མཉམ་པའི་སེམས་ཅན་གཞན་ཞིག་འདིར་སྐྱེས་ཀྱང་ཅི་མ་རུང་ཞེས་སེམས་ཅན་དེའི་སེམས་ཀྱིས་སྨོན་པ་དང་། 
འོད་གསལ་གྱི་ལྷའི་རིས་ཀྱི་སེམས་ཅན་གཞན་ཚེ་ཟད་ཅིང་ལས་ཟད་ལ་བསོད་ནམས་ཟད་པ་ཞིག་ཤི་འཕོས་ནས་ཚངས་པའི་གཞལ་མེད་ཁང་དུ་སེམས་ཅན་དེ་དང་སྐལ་བ་མཉམ་པར་སྐྱེས་སོ། །དེ་ནས་

71-1-80a

སེམས་ཅན་དེ་འདི་སྙམ་དུ་བདག་གཅིག་པུ་ཟླ་མེད་ཅིང་གྲོགས་མེད་པར་ཚེ་རིང་བས་ཡུན་རིང་པོར་གནས་ཏེ། བདག་ཡུན་རིང་པོར་གནས་པ་ལས་འདས་པས་སྲེད་པ་སྐྱེས་ཤིང་མི་དགའ་བར་གྱུར་ཏེ། 
ཀྱེ་མ་བདག་དང་སྐལ་བ་མཉམ་པའི་སེམས་ཅན་གཞན་ཞིག་འདིར་སྐྱེས་ཀྱང་ཅི་མ་རུང་ཞེས་བདག་གི་སེམས་ཀྱིས་དེ་ལྟར་སྨོན་པ་དང་། སེམས་ཅན་འདི་དག་འདིར་བདག་དང་སྐལ་བ་མཉམ་པར་སྐྱེས་པ་ལས་ན། སེམས་
ཅན་དེ་དག་ནི་བདག་གིས་སྤྲུལ་ཏོ། །བདག་སེམས་ཅན་འདི་དག་དང་དངོས་པོ་རྣམས་ཀྱི་ཕར་གྱུར་པ་སྟེ་དབང་ཕྱུག་གོ། །བྱེད་པ་པོའོ། །འབྱིན་པ་པོའོ། །འབྱིན་བྱེད་དོ་སྙམ་མོ། །སེམས་ཅན་དེ་དག་ཀྱང་འདི་སྙམ་དུ་སེམས་ཏེ། 
སེམས་ཅན་འདི་དག་ནི་བདག་ཅག་གིས་གཅིག་པུ་ཟླ་མེད་ཅིང་གྲོགས་མེད་པར་ཚེ་རིང་བས་ཡུན་རིང་པོར་གནས་པར་མཐོང་ངོ་། །དེ་ཡུན་རིང་པོར་གནས་པ་ལས་འདས་ནས་སྲེད་པ་སྐྱེས་ཤིང་མི་དགའ་བར་གྱུར་ཏེ། ཀྱེ་མ་
བདག་དང་སྐལ་བ་མཉམ་པའི་སེམས་ཅན་གཞན་ཞིག་འདིར་སྐྱེས་ཀྱང་ཅི་མ་རུང་སྙམ་ནས། སེམས་ཅན་དེས་དེ་ལྟར་སེམས་ཀྱིས་སྨོན་པ་དང་། འདིར་བདག་ཅག་སེམས་ཅན་དེ་དང་སྐལ་བ་མཉམ་པར་སྐྱེས་པ་ལས་ན། 
བདག་ཅག་ནི་སེམས་ཅན་དེས་སྤྲུལ་པའོ། །སེམས་ཅན་དེ་ནི་བདག་ཅག་དང་དངོས་པོ་རྣམས་ཀྱི་ཕར་གྱུར་པ་སྟེ། དབང་ཕྱུག་གོ། །བྱེད་པ་པོའོ། །འབྱིན་པ་པོའོ། །འབྱིན་བྱེད་དོ་སྙམ་མོ། །དེ་ནས་སེམས་ཅན་འགའ་ཚེ་
ཟད་ཅིང་ལས་ཟད་ལ། བསོད་ནམས་ཟད་པ་ཞིག་གནས་དེ་ནས་ཤི་འཕོས་ནས། འདིར་མི་རྣམས་དང་སྐལ་བ་མཉམ་པར་གྱུར་ལ་དེ་དབང་པོ་རྣམས་ཡོངས་སུ་སྨིན་ཅིང་ནར་སོན་པའི་རྒྱུས་ན། སྐྲ་དང་ཁ་སྤུ་བྲེགས་
ཏེ་གོས་ངུར་སྨྲིག་བགོས་ནས་ཡང་དག་པ་ཉིད་ཀྱི་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་དགོན་པ་ན་གནས་ཀྱང་རུང་ཤིང་དྲུང་ན་གནས་ཀྱང་རུང་ཁང་སྟོང་ན་གནས་ཀྱང་རུང་སྟེ། བརྩོན་པའི་རྒྱུ་ལས་བྱུང་བ་

71-1-80b

དང་སྤོང་བའི་རྒྱུ་ལས་བྱུང་བ་དང་སྒོམ་པའི་རྒྱུ་ལས་བྱུང་བ་དང་ལན་མང་དུ་བྱེད་པའི་རྒྱུ་ལས་བྱུང་བ་དང་ཡང་དག་པ་ཡིད་ལ་བྱེད་པ་དག་གི་རྒྱུ་ལས་བྱུང་བ་དག་གིས་སེམས་ཞི་བའི་ཏིང་ངེ་འཛིན་དེ་ལྟ་བུ་ལ་རེག་པར་བྱེད་དོ། །དེ་
ལྟར་སེམས་མཉམ་པར་བཞག་པ་ལས་སྔོན་གྱི་ལུས་དེ་ཡང་དག་པར་རྗེས་སུ་དྲན་ནོ། །དེ་འདི་སྙམ་དུ་སེམས་ཏེ་ཚངས་པ་དེ་ནི་དངོས་པོ་རྣམས་ཀྱི་ཕར་གྱུར་པ་སྟེ། དབང་ཕྱུག་གོ། །བྱེད་པ་པོའོ། །སྤྲུལ་པ་པོའོ། །འབྱིན་པ་པོའོ། །
འབྱིན་བྱེད་དོ། །དེ་ནི་རྟག་པའོ། །བརྟན་པའོ། །ཐེར་ཟུག་པའོ། །རྣམ་པར་མི་འགྱུར་བའི་ཆོས་ཅན་ནོ། །ཡང་བདག་ཅག་ནི་ཚངས་པ་དེས་སྤྲུལ་པའི་ཕྱིར་བདག་ཅག་ནི་མི་རྟག་པའོ། །མི་བརྟན་པའོ། །ཡིད་བརྟན་དུ་མི་རུང་བའོ། །རྣམ་
པར་འགྱུར་བའི་ཆོས་ཅན་ནོ་སྙམ་མོ། །དེ་ལྟར་ཁ་ཅིག་ནི་རྟག་ལ་ཁ་ཅིག་ནི་མི་རྟག་པ་སྟེ། ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ། སྔོན་གྱི་མཐའ་ལ་རྟོག་ཅིང་ཁ་ཅིག་ནི་རྟག་པ་པ་སྟེ། བདག་དང་འཇིག་རྟེན་ཁ་ཅིག་ནི་རྟག་
གོ་ཞེས་མངོན་པར་སྨྲ་ཞིང་མངོན་པར་རྗོད་པ་འདི་ནི་གཞི་དང་པོའོ། །གཉིས་པ་ནི་དགེ་སྦྱོང་དང་བྲམ་ཟེ་ཤེས་ལྡན་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ་སྔོན་གྱི་མཐའ་ལ་རྟོག་ཅིང་ཁ་ཅིག་ནི་རྟག་པ་པ་སྟེ། བདག་དང་
འཇིག་རྟེན་ཁ་ཅིག་ནི་རྟག་གོ་ཞེས་མངོན་པར་སྨྲ་ཞིང་མངོན་པར་བརྗོད་པ་སྟེ། ཚངས་པ་དེའི་ལྟ་བ་ནི་འདི་ལྟ་བུའོ། །སྨྲ་བ་ནི་འདི་ལྟ་བུས་འདི་སྐད་ཅེས་བརྗོད་པར་བྱ་སྟེ། ས་དང་ཆུ་དང་མེ་དང་རླུང་དེ་ནི་མི་རྟག་པ་མི་བརྟན་པ་
ཡིད་བརྟན་དུ་མི་རུང་བ་རྣམ་པར་འགྱུར་བའི་ཆོས་ཅན་ཡིན་ལ། ཡང་འདི་སྐད་ཅེས་བརྗོད་པར་བྱ་སྟེ། སེམས་ཞེས་བྱ་བ་འམ་ཡིད་ཅེས་བྱ་བ་འམ་རྣམ་པར་ཤེས་པ་ཞེས་བྱ་བ་དེ་ནི་རྟག་པ་བརྟན་པ་ཐེར་ཟུག་པ་རྣམ་པར་འགྱུར་
བའི་ཆོས་ཅན་མ་ཡིན་ནོ། །ཡང་སེམས་ཅན་འགའ་ཚེ་ཟད་ཅིང་ལས་ཟད་ལ་བསོད་ནམས་ཟད་པ་ཞིག་གནས་དེ་ནས་ཤི་འཕོས་ནས་འདིར་མི་རྣམས་དང་སྐལ་བ་མཉམ་པར་འགྱུར་ལ། དེ་དབང་པོ་རྣམས་ཡོངས་སུ་སྨིན་

71-1-81a

ཅིང་ནར་སོན་པའི་རྒྱུས་ནི། སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་ཡང་དག་པ་ཉིད་ཀྱི་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་དགོན་པ་ན་གནས་ཀྱང་རུང་། ཤིང་དྲུང་ན་གནས་ཀྱང་རུང་། 
ཁང་སྟོང་ན་གནས་ཀྱང་རུང་སྟེ། བརྩོན་པའི་རྒྱུ་ལས་བྱུང་བ་དང་སྤོང་བའི་རྒྱུ་ལས་བྱུང་བ་དང་སྒོམ་པའི་རྒྱུ་ལས་བྱུང་བ་དང་ལན་མང་དུ་བྱས་པའི་རྒྱུ་ལས་བྱུང་བ་དང་ཡང་དག་པ་ཡིད་ལ་བྱེད་པའི་རྒྱུ་ལས་བྱུང་བ་དག་གིས་སེམས་ཞི་
བའི་ཏིང་ངེ་འཛིན་ལ་རེག་པར་བྱེད་དོ། །དེ་ལྟར་མཉམ་པར་བཞག་པ་དང་དེ་འདིས་སྙམ་དུ་སེམས་ཏེ། ཚངས་པ་དེ་ནི་ལྟ་བར་གྱུར་པ་ཉམས་སུ་མྱོང་བའི་ཕྱིར་འདི་སྐད་ཅེས་བྱ་སྟེ། ས་དང་ཆུ་དང་མེ་དང་རླུང་དེ་ནི་མི་རྟག་པའོ། །
མི་བརྟན་པའོ། །ཡིད་བརྟན་དུ་མི་རུང་བའོ། །རྣམ་པར་འགྱུར་བའི་ཆོས་ཅན་ཡིན་ནོ་སྙམ་ལ། ཡང་འདི་སྐད་ཅེས་བྱ་སྟེ། སེམས་ཞེས་བྱ་བ་འམ་ཡིད་ཅེས་བྱ་བ་འམ་རྣམ་པར་ཤེས་པ་ཞེས་བྱ་བ་དེ་ནི་རྟག་པའོ། །བརྟན་པའོ། །
ཐེར་ཟུག་པའོ། །རྣམ་པར་འགྱུར་བའི་ཆོས་ཅན་མ་ཡིན་པའོ་སྙམ་མོ། །དེ་ལྟར་ཁ་ཅིག་ནི་རྟག་ལ་ཁ་ཅིག་ནི་མི་རྟག་པ་སྟེ། ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ་སྔོན་གྱི་མཐའ་ལ་རྟོག་ཅིང་ཁ་ཅིག་ནི་རྟག་
པ་པ་སྟེ། བདག་དང་འཇིག་རྟེན་ཁ་ཅིག་ནི་རྟག་གོ་ཞེས་མངོན་པར་སྨྲ་ཞིང་མངོན་པར་བརྗོད་པ་འདི་ནི་གཞི་གཉིས་པའོ། །གསུམ་པ་ནི་དགེ་སྦྱོང་དང་བྲམ་ཟེ་ཤེས་ལྡན་ཁ་ཅིག་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་
བཅས་ཏེ་སྔོན་གྱི་མཐའ་ལ་རྟོག་ཅིང་ཁ་ཅིག་ནི་རྟག་པ་པ་སྟེ། བདག་དང་འཇིག་རྟེན་ཁ་ཅིག་རྟག་གོ་ཞེས་མངོན་པར་སྨྲ་ཞིང་མངོན་པར་བརྗོད་པ་ནི་དགེ་སློང་དག་འདོད་པའི་ཁམས་ན་ལྷ་རྩེད་མོས་མྱོས་ཞེས་བྱ་བ་དག་ཡོད་
དེ། དེ་དག་གང་གི་ཚེ་ཤིན་དུ་རྩེ་དགའ་རངས་པ་དང་ལྡན་ཞིང་འཁོད་དེ་རྩེ་དགའ་རངས་པ་དང་ལྡན་པའི་སེམས་ཅན་དེ་དག་གི་ནང་ནས། ལུས་དུབ་ཅིང་དྲན་པ་རྨོངས་ལ། དྲན་པའི་སེམས་ཅན་གནས་དེ་ནས་ཤི་འཕོས་ནས་འགྱུར་རོ། །

71-1-81b

འདི་ལྟ་སྟེ་སེམས་ཅན་འགའ་ཚེ་ཟད་ཅིང་ལས་ཟད་ལ་བསོད་ནམས་ཟད་པ་འགའ་ཞིག་གནས་དེ་ནས་ཤི་འཕོས་ནས་འདིར་མི་རྣམས་དང་སྐལ་བ་མཉམ་པར་འགྱུར་ལ། དེ་དབང་པོ་ཡོངས་སུ་སྨིན་ཅིང་ནར་སོན་པའི་རྒྱུས་ན་སྐྲ་དང་
ཁ་སྤུ་བྲེགས་ཏེ་གོས་ངུར་སྨྲིག་བགོས་ནས། ཡང་དག་པ་ཉིད་ཀྱི་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་སྟེ། དེ་དགོན་པ་ན་གནས་ཀྱང་རུང་ཤིང་དྲུང་ན་གནས་ཀྱང་རུང་ཁང་སྟོང་ན་གནས་ཀྱང་རུང་སྟེ། བརྩོན་པའི་རྒྱུ་ལས་བྱུང་
བ་དང་སྤོང་བའི་རྒྱུ་ལས་བྱུང་བ་དང་སྒོམ་པའི་རྒྱུ་ལས་བྱུང་བ་དང་ལན་མང་དུ་བྱེད་པའི་རྒྱུ་ལས་འབྱུང་བ་དང་ཡང་དག་པ་ཡིད་ལ་བྱེད་པ་དག་གི་རྒྱུ་ལས་བྱུང་བ་དག་གིས་སེམས་ཞི་བའི་ཏིང་ངེ་འཛིན་དེ་ལྟ་བུ་ལ་རེག་པར་བྱེད་དོ། །དེ་ལྟར་མཉམ་
པར་བཞག་པ་ན་སྔོན་གྱི་ལུས་དེ་ཡང་དག་པར་རྗེས་སུ་དྲན་ནོ། །དེ་འདི་སྙམ་དུ་སེམས་ཏེ། འདོད་པའི་ཁམས་ན་གང་ལྷ་རྩེད་མོས་མྱོས་ཞེས་བྱ་བ་དག་གི་ནང་ནས་གང་དག་རྩེ་དགའ་རངས་པ་དང་ཤིན་དུ་མི་ལྡན་པར་འཁོད་དེ། དེ་དག་ནི་
རྟག་པའོ། །བརྟན་པའོ། །ཐེར་ཟུག་པའོ། །རྣམ་པར་མི་འགྱུར་བའི་ཆོས་ཅན་ཡིན་ནོ་སྙམ་མོ། །ཡང་བདག་ཅག་ནི་ཤིན་དུ་རྩེ་དགའ་རངས་པ་དང་ལྡན་པའི་སེམས་ཀྱིས་གནས་པས་བདག་ཅག་ནི་མི་རྟག་པའོ། །མི་བརྟན་པའོ། །
ཐེར་ཟུག་མ་ཡིན་པའོ། །ཡིད་བརྟན་དུ་མི་རུང་བའོ། །རྣམ་པར་འགྱུར་བའི་ཆོས་ཅན་ནོ་སྙམ་མོ། །དེ་ལྟར་ན་ཁ་ཅིག་ནི་རྟག་ལ་ཁ་ཅིག་ནི་མི་རྟག་པ་སྟེ། ཅི་ལ་རྟེན་ནས་ཞེས་བྱ་བ་ནི་སྔ་མ་བཞིན་ཏེ། འདི་ནི་གཞི་གསུམ་པའོ། །
བཞི་པ་ནི་དགེ་སྦྱོང་དང་བྲམ་ཟེ་ཤེས་ལྡན་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ་སྔོན་གྱི་མཐའ་ལ་རྟོག་ཅིང་ཁ་ཅིག་ནི་རྟག་པ་པ་སྟེ། བདག་དང་འཇིག་རྟེན་ཁ་ཅིག་རྟག་གོ་ཞེས་མངོན་པར་སྨྲ་ཞིང་མངོན་པར་བརྗོད་
པ་ནི་དགེ་སློང་དག་འདོད་པའི་ཁམས་ན་ལྷ་ཡིད་འཁྲུག་ཅེས་བྱ་བ་དག་ཡོད་དེ། དེ་དག་གི་ཚེ་ཤིན་དུ་མིག་གིས་མིག་ཚུགས་སུ་བལྟའོ། །དེ་དག་ཤིན་དུ་མིག་གིས་མིག་ཚུགས་སུ་ལྟ་བ་ན། ཡིད་འཁྲུག་ཅིང་ཡིད་ཁྲོས་

71-1-82a

པས་སེམས་ཅན་དེ་དག་གནས་དེ་ནས་ཤི་འཕོས་པར་འགྱུར་རོ། །ཇི་སྟེ་སེམས་ཅན་འགའ་ཚེ་ཟད་ཅིང་ལས་ཟད་ལ་བསོད་ནམས་ཟད་པ་ཞིག་གནས་དེ་ནས་ཤི་འཕོས་ནས་འདིར་མི་རྣམས་དང་སྐལ་བ་མཉམ་
པར་འགྱུར་ལ། དེ་དབང་པོ་རྣམས་ཡོངས་སུ་སྨིན་ཅིང་ནར་སོན་པའི་རྒྱུས་ན་ཞེས་བྱ་བ་ནས། སྔོན་གྱི་ལུས་ཡང་དག་པ་རྗེས་སུ་དྲན་ནོ་ཞེས་བྱ་བའི་བར་དུ་སྔ་མ་བཞིན་ནོ། །དེ་འདི་སྙམ་དུ་སེམས་ཏེ། འདོད་པའི་ཁམས་ན་
གང་ལྷ་ཡིད་འཁྲུག་ཅེས་བྱ་བ་དེ་དག་གི་ནང་ནས། གང་དག་མིག་གིས་མིག་ཚུགས་སུ་ཤིན་དུ་མི་ལྟ་བ་དེ་དག་ནི་རྟག་པའོ། །བརྟན་པའོ། །ཐེར་ཟུག་པའོ། །མི་འགྱུར་བའི་ཆོས་ཅན་ནོ་སྙམ་མོ། །ཡང་བདག་ཅག་ནི་ཤིན་དུ་མིག་གིས་
མིག་ཚུགས་སུ་ལྟ་བ་དང་ལྡན་པས། བདག་ཅག་ནི་མི་རྟག་པའོ། །མི་བརྟན་པའོ། །ཡིད་བརྟན་དུ་མི་རུང་བའོ། །རྣམ་པར་འགྱུར་བའི་ཆོས་ཅན་ནོ་སྙམ་མོ། །དེ་ལྟར་ན་ཁ་ཅིག་ནི་རྟག་ལ་ཁ་ཅིག་ནི་མི་རྟག་པ་སྟེ། ཅི་ལ་རྟེན་ཅིང་ཅི་
ལ་གནས་ནས་ཅི་ལ་གནས་བཅས་ཏེ་སྔོན་གྱི་མཐའ་ལ་རྟོག་ཅིང་ཁ་ཅིག་ནི་རྟག་པ་པ་སྟེ། བདག་དང་འཇིག་རྟེན་ཁ་ཅིག་རྟག་གོ་ཞེས་མངོན་པར་སྨྲ་ཞིང་མངོན་པར་བརྗོད་པ་འདི་ནི་གཞི་བཞི་པའོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་
སྔོན་གྱི་མཐའ་རྟོག་ཅིང་། བདག་དང་འཇིག་རྟེན་ཁ་ཅིག་རྟག་གོ་ཞེས་མངོན་པར་སྨྲ་ཞིང་མངོན་པར་བརྗོད་པ་དེ་ཐམས་ཅད་ནི་གཞི་བཞི་པོ་འདི་དག་ལ་སྟེ། དེ་ལས་མི་ལྷག་མི་མང་ལ་དེ་ལྟར་ན་ལྟ་བར་སོང་བ་འདི་དག་འདི་ལྟར་
འཛིན་པ་དེ་དག་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེས་བྱ་བ་དག་ནི་སྔ་མ་བཞིན་ནོ། །དགེ་སློང་དག་ཆོས་གང་དག་གཞན་ཟབ་པ་ཟབ་པར་སྣང་བ་ཡོངས་སུ་དག་པ་ཡོངས་སུ་བྱང་བ་དེ་དག་
ངས། རང་གི་མངོན་པར་ཤེས་པས། མངོན་པར་རྫོགས་པར་སངས་རྒྱས་ནས་བཤད་ལ། ཕ་རོལ་པོས་ཀྱང་དེ་བཞིན་གཤེགས་པ་ལ་གང་ཡང་དག་པ་ཇི་ལྟ་བ་བཞིན་སྙན་པར་སྨྲ་ཞིང་རྗོད་པར་བྱེད་དོ། །དགེ་སློང་

71-1-82b

དག་ཆོས་གང་དག་གཞན་ཟབ་པ་ཟབ་པར་སྣང་བ་ཡོངས་སུ་དག་པ། ཡོངས་སུ་བྱང་བ་དེ་དག་ངས་རང་གི་མངོན་པར་ཤེས་པས། མངོན་པར་རྫོགས་པར་སངས་རྒྱས་ནས་བཤད་ལ། ཕ་རོལ་པོས་ཀྱང་དེ་བཞིན་གཤེགས་པ་
ལ་གང་ཡང་དག་པ་ཇི་ལྟ་བ་བཞིན་སྙན་པར་སྨྲ་ཞིང་རྗོད་པར་བྱེད་པ་གང་ཞེ་ན། དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་སྔོན་གྱི་མཐའ་ལ་རྟོག་ཅིང་རྒྱུ་མེད་པར་འབྱུང་བ་སྟེ། བདག་དང་འཇིག་རྟེན་ནི་རྒྱུ་མེད་པ་ལས་འབྱུང་ངོ་ཞེས་
མངོན་པར་སྨྲ་ཞིང་མངོན་པར་བརྗོད་པ་ཡོད་པ་ནི་འདི་ལྟ་སྟེ། གཞི་གཉིས་པ་ལའོ། །དགེ་སྦྱོང་དག་དང་བྲམ་ཟེ་ཤེས་ལྡན་དེ་དག་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ། སྔོན་གྱི་མཐའ་ལ་རྟོག་ཅིང་རྒྱུ་མེད་པར་
འབྱུང་བ་སྟེ། བདག་དང་འཇིག་རྟེན་ནི་རྒྱུ་མེད་པ་ལས་འབྱུང་བའོ་ཞེས་མངོན་པར་སྨྲ་ཞིང་མངོན་པར་བརྗོད་པ་ནི་འདི་ལྟ་སྟེ། གཞི་གཉིས་པོ་དག་ལའོ། །དགེ་སློང་དག་གཟུགས་ཀྱི་ཁམས་ན། འདུ་ཤེས་མེད་པའི་སེམས་ཅན་གྱི་ལྷ་
རྣམས་ཀྱི་འདུ་ཤེས་འབྱུང་བའི་ཕྱིར། སེམས་ཅན་དེ་དག་གནས་དེ་ནས་ཤི་འཕོ་བར་འགྱུར་ལ། ཇི་སྟེ་སེམས་ཅན་འགའ་ཞིག་གནས་དེ་ནས་ཤི་འཕོས་ནས། འདིར་མི་རྣམས་དང་སྐལ་བ་མཉམ་པར་འགྱུར་
ཞེས་བྱ་བ་ནས། སྔོན་འདུ་ཤེས་འབྱུང་བ་དེ་ཡང་དག་པར་རྗེས་སུ་དྲན་ནོ་ཞེས་བྱ་བའི་བར་དུ་སྔ་མ་བཞིན་ནོ། །འདི་སྙམ་དུ་སེམས་ཏེ། བདག་དང་འཇིག་རྟེན་རྒྱུ་མེད་པ་ལས་འབྱུང་བ་དེའི་ཕྱིར། དེས་ན་བདག་ནི་
འདི་སྙམ་དུ་བདག་དང་འཇིག་རྟེན་རྒྱུ་མེད་པ་ལས་བྱུང་བས། བདག་སྔོན་ཆད་མ་བྱུང་ལ་ད་ལྟར་བྱུང་ངོ་སྙམ་པ་ནི་གཞི་དང་པོ་སྟེ། ཅི་ལ་རྟེན་ཅིང་ཞེས་བྱ་བ་དག་ནི་སྔ་མ་བཞིན་ནོ། གཉིས་པ་ནི་དགེ་སྦྱོང་དང་བྲམ་ཟེ་
ཤེས་ལྡན་ཅི་ལ་རྟེན་ཅིང་ཅི་ལ་གནས་ནས་ཞེས་བྱ་བ་དག་ནི་སྔ་མ་བཞིན་ནོ། །འདི་ནི་ཁ་ཅིག་དཔྱོད་པ་ཅན་རྟོག་གེར་ཞུགས་པའི་ས་ལ་གནས་པ། རང་གི་སྤོབས་པ་ལས་བྱུང་བ། སོ་སོའི་སྐྱེ་བོ་པ། རྟོག་གེའི་རྗེས་

71-1-83a

སུ་འབྲང་བ་དེ་འདི་སྙམ་དུ་སེམས་ཏེ། བདག་དང་འཇིག་རྟེན་རྒྱུ་མེད་པ་ལས་འབྱུང་བ་དེའི་ཕྱིར། དེས་ན་བདག་ནི་འདི་སྙམ་དུ་བདག་དང་འཇིག་རྟེན་རྒྱུ་མེད་པ་ལས་བྱུང་བས། བདག་ནི་རྟོག་གེ་པ་དཔྱོད་པ་ཅན་རྟོག་
གེར་ཞུགས་པའི་ས་ལ་གནས་པ། རང་གི་སྤོབས་པ་ལས་བྱུང་བ། སོ་སོའི་སྐྱེ་བོ་དཔྱོད་པའི་རྗེས་སུ་འབྲང་བ་འདི་ནི་གཞི་གཉིས་པ་སྟེ། ཅི་ལ་རྟེན་ཅིང་ཞེས་བྱ་བ་ནི་སྔ་མ་བཞིན་ནོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་སྔོན་
གྱི་མཐའ་ལ་རྟོག་ཅིང་རྒྱུ་མེད་པར་འབྱུང་བ་པ་སྟེ། བདག་དང་འཇིག་རྟེན་ནི་རྒྱུ་མེད་པ་ལས་འབྱུང་བའོ་ཞེས་མངོན་པར་སྨྲ་ཞིང་མངོན་པར་བརྗོད་པ་དེ་ཐམས་ཅད་ནི་གཞི་གཉིས་པོ་འདི་དག་ལ་སྟེ། དེ་ལས་མི་ལྷག་མི་མང་ལ། དེ་
ལྟར་ན་ལྟ་བར་སོང་བ་དེ་དག་འདི་ལྟར་འཛིན་པ་དང་། འདི་ལྟར་མཆོག་ཏུ་འཛིན་པ་དེ་དག་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །འདི་
ལྟར་རབ་ཏུ་མཁྱེན་པ་ན་མཆོག་ཏུ་མི་འཛིན་ཏེ། མཆོག་ཏུ་མི་འཛིན་པས་བདག་ཉིད་མྱ་ངན་ལས་འདས་པར་ཡང་རིག་ཅིང་དེ་ལྟར་ལྟ་བར་སོང་བ་དེ་དག་གི་འགྲོ་བ་ནི་འདི་ལྟ་བུའོ། །སྐྱེ་བ་ནི་འདི་ལྟ་བུའོ། །ཚེ་ཕྱི་མ་ནི་འདི་ལྟ་བུ་
ཡིན་ནོ་ཞེས་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་དག་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་
མཁྱེན་དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ནས་ཀྱང་མཆོག་ཏུ་མི་འཛིན་ཏོ། །མཆོག་ཏུ་མི་འཛིན་པས་བདག་ཉིད་མྱ་ངན་ལས་འདས་པར་རིག་ནས། ཀུན་འབྱུང་ཚོར་བ་རྣམས་ནུབ་པར་ཐུགས་སུ་
ཆུད་ནས། འདི་ནི་སྡུག་བསྔལ་ལོ། །འདི་ནི་སྡུག་བསྔལ་ངེས་པར་འབྱིན་པའོ་ཞེས་བྱ་བར་མཁྱེན་ཏོ། །དགེ་སློང་དག་གང་དག་ཆོས་གཞན་ཟབ་པ་ཟབ་པར་སྣང་བ་ཞེས་བྱ་བ་སྔ་མ་བཞིན་ནོ། །དགེ་སློང་དག་

71-1-83b

ཆོས་གང་དག་གཞན་ཟབ་པ་ཟབ་པར་སྣང་བ་ནས་དེ་དག་གང་ཞེ་ན་ཞེས་བྱ་བའི་བར་དུ་ནི་སྔ་མ་བཞིན་ནོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་སྔོན་གྱི་མཐའ་ལ་རྟོག་ཅིང་མཐའ་ཡོད་པ་མཐའ་མེད་པ་པ་སྟེ། བདག་དང་
འཇིག་རྟེན་ནི་མཐའ་ཡོད་པའང་མ་ཡིན་མཐའ་མེད་པའང་མ་ཡིན་ཞེས་མངོན་པར་སྨྲ་ཞིང་མངོན་པར་བརྗོད་པ་དེ་དག་ཡོད་པ་ནི་འདི་ལྟ་སྟེ། གཞི་བཞི་པོ་དག་ལའོ། །དགེ་སྦྱོང་དང་བྲམ་ཟེ་ཤེས་ལྡན་དེ་དག་ཅི་ལ་རྟེན་ཅིང་ཅི་ལ་
གནས་ནས་ཅི་ལ་གནས་བཅས་ཏེ་སྔོན་གྱི་མཐའ་ལ་རྟོག་ཅིང་། མཐའ་ཡོད་པ་དང་མཐའ་མེད་པ་སྟེ། བདག་དང་འཇིག་རྟེན་ནི་མཐའ་ཡོད་པ་འང་ཡིན་མཐའ་མེད་པ་འང་ཡིན་ཞེས་མངོན་པར་སྨྲ་ཞིང་མངོན་པར་རྗོད་པ་
ནི་འདི་ལྟ་སྟེ། གཞི་བཞི་པོ་དག་ལའོ། །དགེ་སློང་དག་འདི་ན་དགེ་སྦྱོང་དང་བྲམ་ཟེ་ཤེས་ལྡན་ཁ་ཅིག་དགོན་པ་ན་གནས་ཀྱང་རུང་ཤིང་དྲུང་ན་གནས་ཀྱང་རུང་ཁང་སྟོང་ན་གནས་ཀྱང་རུང་སྟེ། བརྩོན་པའི་རྒྱུ་ལས་འབྱུང་བ་
དང་སྤོང་བའི་རྒྱུ་ལས་འབྱུང་བ་དང་སྒོམ་པའི་རྒྱུ་ལས་འབྱུང་བ་དང་ལན་མང་དུ་བྱེད་པའི་རྒྱུ་ལས་འབྱུང་བ་དང་ཡང་དག་པ་ཡིད་ལ་བྱེད་པའི་རྒྱུ་ལས་འབྱུང་བ་དག་གིས། སེམས་ཞི་བའི་ཏིང་ངེ་འཛིན་དེ་ལྟ་བུ་ལ་རེག་པར་བྱེད་
དོ། །དེ་ལྟར་སེམས་མཉམ་པར་བཞག་པ་ན། འཇིག་རྟེན་ལ་མཐའ་ཡོད་པའི་འདུ་ཤེས་ཅན་དུ་གནས་སོ། །དེ་འདི་སྙམ་དུ་སེམས་ཏེ། འཇིག་རྟེན་མཐའ་དང་ལྡན་པ་དེའི་ཕྱིར་དེས་ན་བདག་ནི་འདི་སྙམ་དུ་འཇིག་རྟེན་ནི་
མཐའ་དང་ལྡན་ཞིང་ཡོངས་སུ་ཆད་པས་བདག་དགོན་པ་ན་གནས་ཀྱང་རུང་། ཤིང་དྲུང་ན་གནས་ཀྱང་རུང་། ཁང་སྟོང་ན་གནས་ཀྱང་རུང་སྟེ་ཞེས་བྱ་བ་ནས། འཇིག་རྟེན་ལ་མཐའ་ཡོད་པའི་འདུ་ཤེས་ཅན་དུ་གནས་པར་བྱའོ་
སྙམ་པའི་བར་དུ་སྔ་མ་བཞིན་ནོ། །དེ་ལྟར་ན་འཇིག་རྟེན་མཐའ་དང་ལྡན་ཞིང་ཡོངས་སུ་ཆད་པ་འདི་ནི་གཞི་དང་པོ་སྟེ། ཅི་ལ་རྟེན་ཅིང་ཞེས་བྱ་བ་ནི་སྔ་མ་བཞིན་ནོ། །གཉིས་པ་ནི་དགེ་སྦྱོང་དང་བྲམ་ཟེ་ཤེས་ལྡན་ཅི་ལ་

71-1-84a

རྟེན་ཅིང་ཅི་ལ་གནས་ནས་ཞེས་བྱ་བ་ནས། འདི་ན་དགེ་སྦྱོང་དང་བྲམ་ཟེ་ཁ་ཅིག་དགོན་པ་ན་གནས་ཀྱང་རུང་ཤིང་དྲུང་ན་གནས་ཀྱང་རུང་ཁང་སྟོང་ན་གནས་ཀྱང་རུང་ཞེས་བྱ་བའི་བར་དུ་སྔ་མ་བཞིན་ནོ་དེ་ལྟར་སེམས་
མཉམ་པར་བཞག་པ་ན། འཇིག་རྟེན་ལ་མཐའ་མེད་པའི་འདུ་ཤེས་ཅན་དུ་གནས་སོ། །དེ་འདི་སྙམ་དུ་སེམས་ཏེ། འཇིག་རྟེན་ན་མཐའ་མེད་ཅིང་ཚད་མེད་པ་དེའི་ཕྱིར་དེས་ན་བདག་ནི་འདི་སྙམ་དུ་འཇིག་རྟེན་མཐའ་མེད་ཅིང་ཚད་
མེད་པས་བདག་དགོན་པ་ན་གནས་ཀྱང་རུང་ཤིང་དྲུང་ན་གནས་ཀྱང་རུང་ཁང་སྟོང་ན་གནས་ཀྱང་རུང་ཞེས་བྱ་བ་ནས། དེ་ལྟར་སེམས་མཉམ་པར་བཞག་པ་ན་འཇིག་རྟེན་ལ་མཐའ་མེད་པའི་ཕྱིར་འདུ་ཤེས་ཅན་དུ་གནས་པར་བྱའོ་སྙམ་མོ། །
དེ་ལྟར་ན་འཇིག་རྟེན་མཐའ་མེད་ཅིང་ཚད་མེད་པ་འདི་ནི་གཞི་གཉིས་པ་སྟེ། ཅི་ལ་རྟེན་ཅིང་ཅི་ལ་གནས་ནས་ཞེས་བྱ་བའི་བར་དུ་སྔ་མ་བཞིན་ནོ། །གསུམ་པ་ནི་དགེ་སྦྱོང་དང་བྲམ་ཟེ་ཤེས་ལྡན་ཅི་ལ་རྟེན་ཅིང་ཅི་ལ་གནས་ནས་ཤེས་བྱ་
བ་དག་ནི་སྔ་མ་བཞིན་ནོ། །འདི་ན་དགེ་སྦྱོང་དང་བྲམ་ཟེ་ཁ་ཅིག་དགོན་པ་ན་གནས་ཀྱང་རུང་། ཤིང་དྲུང་ན་གནས་ཀྱང་རུང་ཞེས་བྱ་བ་ནས་སེམས་མཉམ་པར་བཞག་པ་ན། སྟེང་དང་འོག་གི་འཇིག་རྟེན་ལ་ནི་མཐའ་ཡོད་པའི་
འདུ་ཤེས་ཅན་ཡིན་ཞིང་། ཐད་ཀར་ནི་མཐའ་མེད་པའི་འདུ་ཤེས་ཅན་དུ་གནས་སོ་ཞེས་བྱ་བའི་བར་དུ་སྔ་མ་བཞིན་ནོ། །དེ་འདི་སྙམ་དུ་སེམས་ཏེ། སྟེང་དང་འོག་གི་འཇིག་རྟེན་ལ་ནི་མཐའ་ཡོད་ཅིང་། ཐད་ཀར་ནི་མཐའ་མེད་དོ་
སྙམ་པ་དེའི་ཕྱིར་དེས་ན་བདག་འདི་སྙམ་དུ་སྟེང་དང་འོག་གི་མཐའ་ཡོད་ལ་ཐད་ཀར་ནི་མཐའ་མེད་དོ་སྙམ་ནས། བདག་དགོན་པ་ན་གནས་ཀྱང་རུང་ཤིང་དྲུང་ན་གནས་ཀྱང་རུང་ཞེས་བྱ་བ་ནས་འདི་ནི་གཞི་གསུམ་པ་སྟེ། ཅི་ལ་རྟེན་
ཅིང་ཅི་ལ་གནས་ཞེས་བྱ་བའི་བར་དུ་སྔ་མ་བཞིན་ནོ། །བཞི་པ་ནི་ཞེས་བྱ་བ་ནས་དགེ་སྦྱོང་དང་བྲམ་ཟེ་ཤེས་ལྡན་ཅི་ལ་རྟེན་ཅིང་ཅི་ལ་གནས་ནས་ཞེས་བྱ་བའི་བར་དུ་སྔ་མ་བཞིན་ནོ། །འདི་ན་དགེ་སྦྱོང་དང་བྲམ་ཟེ་ཤེས་ལྡན་ཁ་ཅིག་

71-1-84b

དགོན་པ་ན་གནས་ཀྱང་རུང་། ཤིང་དྲུང་ན་གནས་ཀྱང་རུང་ཞེས་བྱ་བ་དག་དང་། སེམས་མཉམ་པར་བཞག་པ་ན་འཇིག་རྟེན་མཐའ་ཡོད་པ་མ་ཡིན་པའི་འདུ་ཤེས་ཅན་དང་། མཐའ་མེད་པ་མ་ཡིན་པའི་འདུ་ཤེས་ཅན་དུ་གནས་སོ། །
དེ་འདི་སྙམ་དུ་སེམས་ཏེ། འཇིག་རྟེན་འདི་ནི་མཐའ་ཡོད་པ་ཡང་མ་ཡིན་མཐའ་མེད་པ་ཡང་མ་ཡིན་པ་དེའི་ཕྱིར། དེས་ན་བདག་འདི་སྙམ་དུ་འཇིག་རྟེན་ནི་མཐའ་ཡོད་པ་ཡང་མ་ཡིན་མཐའ་མེད་པ་ཡང་མ་ཡིན་ནོ་སྙམ་ནས། བདག་
དགོན་པ་ན་གནས་ཀྱང་རུང་ཤིང་དྲུང་ན་གནས་ཀྱང་རུང་ཁང་སྟོང་ན་གནས་ཀྱང་རུང་སྟེ་ཞེས་བྱ་བ་ནས། སེམས་མཉམ་པར་བཞག་པ་ན་འཇིག་རྟེན་མཐའ་ཡོད་པ་ཡང་མ་ཡིན་པའི་འདུ་ཤེས་ཅན་དང་། མཐའ་མེད་པ་ཡང་མ་ཡིན་པའི་
འདུ་ཤེས་ཅན་དུ་གནས་པར་བྱའོ་སྙམ་མོ། །དེ་ལྟར་ན་འཇིག་རྟེན་མཐའ་ཡོད་པ་ཡང་མ་ཡིན་མཐའ་མེད་པ་ཡང་མ་ཡིན་པ་འདི་ནི་བཞི་པ་སྟེ། ཅི་ལ་རྟེན་ཅིང་ཅི་ལ་གནས་ནས་ཞེས་བྱ་བའི་བར་དུ་སྔ་མ་བཞིན་ནོ། །དགེ་སྦྱོང་དང་
བྲམ་ཟེ་ཁ་ཅིག་སྔོན་གྱི་མཐའ་ལ་རྟོག་ཅིང་། མཐའ་ཡོད་པ་དང་མཐའ་མེད་པ་པ་སྟེ། བདག་དང་འཇིག་རྟེན་མཐའ་ཡོད་པ་དང་མཐའ་མེད་པའོ་ཞེས་མངོན་པར་སྨྲ་ཞིང་མངོན་པར་བརྗོད་པ་དེ་ཐམས་ཅད་ནི་གཞི་བཞི་པོ་དག་ལ་
སྟེ། དེ་ལས་མི་ལྷག་མི་མང་ལ་དེ་དག་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་ལྟར་ན་ལྟ་བར་སོང་བ་འདི་དག་འདི་ལྟར་འཛིན་པ་དང་
འདི་ལྟར་མཆོག་ཏུ་འཛིན་པ་དང་འདི་ལྟར་ལེན་པ་དང་འདི་ལྟར་སྤྱོད་པ་ཞེས་བྱ་བ་ནི་སྔ་མ་བཞིན་ནོ། །དགེ་སློང་དག་གང་དག་ཆོས་གཞན་ཟབ་པ་ཟབ་པར་སྣང་བ་ཞེས་བྱ་བ་ནི་སྔ་མ་བཞིན་ནོ། །དགེ་སློང་དག་ཆོས་གང་དག་གཞན་
ཟབ་པ་ཟབ་པར་སྣང་བ་དག་གང་ཞེ་ན་ཞེས་བྱ་བ་དག་ནི་སྔ་མ་བཞིན་ནོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་སྔོན་གྱི་མཐའ་ལ་རྟོག་ཅིང་ལྷ་མི་སྤོང་ལ་ལྷ་མི་སྤོང་བ་དྲི་བ་དྲིས་པ་དང་གཏམ་རླུང་བསྐུར་བ་དག་ཡོད་པ་ནི་འདི་

71-1-85a

ལྟ་སྟེ། གཞི་བཞི་པོ་དག་ལའོ། །དགེ་སྦྱོང་དང་བྲམ་ཟེ་ཤེས་ལྡན་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ། སྔོན་གྱི་མཐའ་ལ་རྟོག་ཅིང་ལྷ་མི་སྤོང་ལ་ལྷ་མི་སྤོང་བ། དྲི་བ་དྲིས་པ་དང་ཚིག་རླུང་བསྐུར་བ་ནི་
འདི་ལྟ་སྟེ། གཞི་བཞི་པོ་དག་ལའོ། །འདི་ནི་དགེ་སྦྱོང་དང་བྲམ་ཟེ་ཁ་ཅིག་མི་དགེ་བ་ཡང་དག་པ་ཇི་ལྟ་བ་བཞིན་དུ་མི་ཤེས་ཤིང་། དགེ་བ་དང་སྡུག་བསྔལ་དང་ཀུན་འབྱུང་དང་འགོག་པ་དང་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་མི་
ཤེས་སོ། །དེ་འདི་སྙམ་དུ་སེམས་ཏེ། བདག་གིས་ནི་མི་དགེ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་མི་ཤེས་ཤིང་། དགེ་བ་དང་སྡུག་བསྔལ་དང་ཀུན་འབྱུང་དང་འགོག་པ་དང་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་མ་ཤེས་སོ་
སྙམ་མོ། །དགེ་སྦྱོང་དང་བྲམ་ཟེ་ཁ་ཅིག་གང་དག་མི་དགེ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་མི་ཤེས་ཤིང་། དགེ་བ་དང་སྡུག་བསྔལ་དང་ཀུན་འབྱུང་དང་འགོག་པ་དང་ལམ་ཡང་དག་པ་ཇི་ལྟ་བ་བཞིན་དུ་རབ་ཏུ་མི་ཤེས་པ་དག་
ཡོད་དེ། དེ་དག་བདག་མི་དགེ་བའི་དྲི་བ་དྲི་བར་འགྱུར་བ་དང་དགེ་བ་དང་སྡུག་བསྔལ་དང་ཀུན་འབྱུང་དང་འགོག་པ་དང་ལམ་དག་གི་དྲི་བ་འདྲི་བར་འགྱུར་ན། བདག་གིས་དེ་དག་གིས་མི་དགེ་བ་དྲི་བ་དྲིས་པ་ལུང་བསྟན་པ་དང་དགེ་བ་དང་
སྡུག་བསྔལ་དང་ཀུན་འབྱུང་དང་འགོག་པ་དང་ལམ་དག་གི་དྲི་བ་དྲིས་པ་རྣམས་ལུང་བསྟན་དུ་ནི་བདག་གི་རྫུན་དུ་འགྱུར་བས། དེ་ལྟར་ན་དགེ་སྦྱོང་དང་བྲམ་ཟེ་དེ་བརྫུན་དུ་སྨྲ་བས་འཇིགས་པ་དང་། བརྫུན་དུ་སྨྲ་བས་འཇིགས་སྐྲག་པ་
དང་། བརྫུན་དུ་སྨྲ་བ་ཡོངས་སུ་སྨད་པས་གཞི་དེ་དང་གླིང་དེ་དང་མགོན་དེ་དང་སྐྱབས་དེ་ལ་གནས་སོ། །ལྷ་མི་སྤོང་བ་དྲི་བ་དྲིས་པ་དང་ཚིག་རླུང་སྐུར་བར་བྱེད་དེ། ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ་སྔོན་གྱི་མཐའ་ལ་རྟོག་
ཅིང་། ལྷ་མི་སྤོང་ལ་ལྷ་མི་སྤོང་བ་དྲི་བ་དྲིས་པ་དང་ཚིག་རླུང་བསྐུར་བ་འདི་ནི་གཞི་དང་པོའོ། །གཞི་གཉིས་པ་ནི་དགེ་སྦྱོང་དང་བྲམ་ཟེ་ཤེས་ལྡན་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ་ཞེས་བྱ་བ་དག་ནི་སྔ་མ་བཞིན་

71-1-85b

ནོ། །འདི་ན་དགེ་སྦྱོང་དང་བྲམ་ཟེ་ཁ་ཅིག་མི་དགེ་བ་ཡང་དག་པ་ཇི་ལྟ་བ་བཞིན་རབ་ཏུ་ཤེས་ཤིང་ཞེས་བྱ་བ་དག་ནི་སྔ་མ་བཞིན་ནོ། །དེ་ནི་བདག་གི་བརྫུན་དུ་འགྱུར་ལ་གང་བདག་གི་བརྫུན་དུ་འགྱུར་བ་དེ་ནི་བདག་གི་ལོག་པར་འགྱུར་
ཏེ། དེ་ལྟར་ན་དགེ་སྦྱོང་དང་བྲམ་ཟེ་དེ་ནི་ལོག་པར་ལྟ་བས་འཇིགས་པ་དང་ལོག་པར་ལྟ་བས་འཇིགས་སྐྲག་པ་དང་ལོག་པར་ལྟ་བ་ཉིད་ཡོངས་སུ་སྨད་པས་གཞི་དེ་ལ་གནས་སོ་ཞེས་བྱ་བ་ནི་སྔ་མ་བཞིན་ནོ། །ཅི་ལ་རྟེན་ཅིང་ཅི་ལ་གནས་
ནས་ཅི་ལ་གནས་བཅས་ཏེ་ཞེས་བྱ་བ་ནས་ཚིག་རླུང་བསྐུར་ཞེས་བྱ་བའི་བར་འདི་ནི་གཞི་གཉིས་པའོ། །གསུམ་པ་ནི་དགེ་སྦྱོང་དང་བྲམ་ཟེ་ཤེས་ལྡན་ཅི་ལ་བརྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ། སྔོན་གྱི་མཐའ་ལ་རྟོག་ཅིང་
ཞེས་བྱ་བ་དག་ནི་སྔ་མ་བཞིན་ནོ། །འདི་ན་དགེ་སྦྱོང་དང་བྲམ་ཟེ་ཁ་ཅིག་མི་དགེ་བ་ཡང་དག་པ་ཇི་ལྟ་བ་བཞིན་དུ་རབ་ཏུ་མི་ཤེས་ཤིང་། དགེ་བ་དག་ཅེས་བྱ་བ་སྔ་མ་བཞིན་ནོ། །དེ་ནི་བདག་གི་བརྫུན་དུ་འགྱུར་ལ་གང་བདག་གི་བརྫུན་དུ་
འགྱུར་བ་དེ་ནི་བདག་གི་ལོག་པར་འགྱུར་ཞིང་གང་བདག་གི་ལོག་པར་འགྱུར་བ་དེ་ནི་བདག་གི་ཤེས་བཞིན་མ་ཡིན་པར་འགྱུར་ཏེ། དེ་ལྟར་ན་དགེ་སྦྱོང་དང་བྲམ་ཟེ་དེ་ནི་ཤེས་བཞིན་མ་ཡིན་པས་འཇིགས་པ་དང་ཤེས་བཞིན་མ་ཡིན་
པས་འཇིགས་སྐྲག་པ་དང་ཤེས་བཞིན་མ་ཡིན་པ་ཉིད་ཡོངས་སུ་སྨད་པས་གཞི་དེ་དང་གླིང་དེ་ལ་གནས་སོ་ཞེས་བྱ་བ་ནས། ཚིག་རླུང་བསྐུར་བ་འདི་ནི་གཞི་གསུམ་པའོ་ཞེས་བྱ་བའི་བར་དུ་སྔ་མ་བཞིན་ནོ། །བཞི་པ་ནི་དགེ་སྦྱོང་དང་
བྲམ་ཟེ་ཤེས་ལྡན་ཅི་ལ་རྟེན་ཅིང་ཅི་ལ་གནས་ནས་ཞེས་བྱ་བ་དག་ནི་སྔ་མ་བཞིན་ནོ། །འདི་ན་དགེ་སྦྱོང་དང་བྲམ་ཟེ་ཁ་ཅིག་རང་བཞིན་ཉིད་ཀྱིས་ཡིད་རྟུལ་ཞིང་བླུན་པ་ཡིན་ཏེ། དེ་འདི་སྙམ་དུ་སེམས་ཏེ། ཇི་སྟེ་བདག་གི་ཐད་ཏུ་ལ་ལ་
ཞིག་འོངས་ནས་དེ་འཇིག་རྟེན་ཕ་རོལ་ཡོད་སྙམ་ནས། འཇིག་རྟེན་ཕ་རོལ་ཡོད་དམ་ཞེས་དྲི་བ་དྲིས་ན་བདག་གིས་དེ་ལ་འཇིག་རྟེན་ཕ་རོལ་ཡོད་དོ་ཞེས་ལུང་བསྟན་པར་བྱའོ། །འཇིག་རྟེན་ཕ་རོལ་མེད་པ་མ་ཡིན་ནམ། ཡོད་པ་ཡང་ཡིན་

71-1-86a

མེད་པ་ཡང་ཡིན་ནམ་ཡོད་པ་ཡང་མ་ཡིན་མེད་པ་ཡང་མ་ཡིན་ནམ་དེ་འཇིག་རྟེན་འདི་ལྟ་བུ་འམ་འོན་ཏེ་མ་ཡིན། རྣམ་པ་གཞན་ཞིག་གམ་འོན་ཏེ་མ་ཡིན། མ་ཡིན་ནམ་འོན་ཏེ་མ་ཡིན། འདི་ལྟ་བུ་མ་ཡིན་ནམ་འོན་ཏེ་མ་ཡིན། དེ་
འཇིག་རྟེན་ཕ་རོལ་མ་ཡིན་ནམ་འོན་ཏེ་མ་ཡིན། འདི་ལྟ་བུ་མ་ཡིན་ནམ་འོན་ཏེ་མ་ཡིན་ཞེས་དྲི་བ་འདྲི་ན། བདག་གིས་འཇིག་རྟེན་ཕ་རོལ་ཞེས་བྱ་བ་མ་ཡིན་ནམ་འོན་ཏེ་མ་ཡིན། འདི་ལྟ་བུ་མ་ཡིན་ནམ་འོན་ཏེ་མ་ཡིན་ཞེས་ལུང་བསྟན་པར་བྱའོ། །
དགེ་སྦྱོང་དང་བྲམ་ཟེ་དེ་གཏི་མུག་གི་འཇིགས་པ་དང་། གཏི་མུག་གིས་འཇིགས་སྐྲག་པ་དང་། དེས་གཏི་མུག་ཉིད་ཡོངས་སུ་སྨད་པས་གཞི་དེ་དང་གླིང་དེ་དང་མགོན་དེ་དང་སྐྱབས་དེ་དང་གཞོལ་བ་དེ་ལ་གནས་སོ། །ལྷ་མི་སྤོང་བ་དྲི་བ་དྲིས་པ་
དང་ཚིག་རླུང་བསྐུར་བ་འདི་ནི་གཞི་བཞི་པ་སྟེ། ཅི་ལ་རྟེན་ཅིང་ཅི་ལ་གནས་ནས་ཞེས་བྱ་བ་དག་ནི་སྔ་མ་བཞིན་ནོ། །དགེ་སྦྱོང་དང་བྲམ་ཟེ་སྔོན་གྱི་མཐའ་ལ་རྟོག་ཅིང་། ལྷ་མི་སྤོང་ལ་ལྷ་མི་སྤོང་བ་དྲི་བ་དྲིས་པ་དང་ཚིག་རླུང་བསྐུར་
བ་དེ་ཐམས་ཅད་ནི་གཞི་བཞི་པོ་འདི་ལྟ་སྟེ། དེ་ལས་མི་ལྷག་མི་མང་ལ་དེ་དག་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་ལྟར་ན་ལྟ་བར་སོང་
བ་འདི་དག་འདི་ལྟར་འཛིན་པ་དང་འདི་ལྟར་མཆོག་ཏུ་འཛིན་པ་དག་ནི་སྔ་མ་བཞིན་ནོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་སྔོན་གྱི་མཐའ་ལ་རྟོག་ཅིང་། སྔོན་གྱི་མཐའ་དང་ལྡན་པ་ལྟ་བར་སོང་བ་དག་མངོན་པར་སྨྲ་ཞིང་མངོན་པར་
རྗོད་པ་དེ་ཐམས་ཅད་ནི་ལྟ་བར་སོང་བ་བཅྭ་བརྒྱད་པོ་འདི་དག་སྟེ། དེ་ལས་མི་ལྷག་མི་མང་ཞེས་བྱ་བ་ནས་ལྷག་པར་མཁྱེན་ཏོ་ཞེས་བྱ་བའི་བར་དུ་སྔ་མ་བཞིན་ནོ། །དགེ་སློང་དག་ཆོས་གང་དག་གཞན་ཟབ་པ་ཟབ་པར་སྣང་བ་ཞེས་
བྱ་བ་དག་ནི་སྔ་མ་བཞིན་ནོ། །དགེ་སློང་དག་ཆོས་གང་དག་གཞན་ཟབ་པ་ཟབ་པར་སྣང་བ་དག་གང་ཞེ་ན་ཞེས་བྱ་བ་དག་ནི་སྔ་མ་བཞིན་ནོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་ཕྱི་མའི་མཐའ་ལ་རྟོག་ཅིང་འདུ་ཤེས་ཅན་དུ་སྨྲ་

71-1-86b

བ་དག་ཡོད་དེ། དེ་ཕན་ཆད་བདག་ནི་འདུ་ཤེས་ཅན་མ་ཡིན་ནོ་ཞེས་ཁ་ཅིག་མངོན་པར་སྨྲ་ཞིང་མངོན་པར་བརྗོད་པ་ནི་འདི་ལྟ་སྟེ་གཞི་བཅུ་དྲུག་ལའོ། །དགེ་སྦྱོང་དང་བྲམ་ཟེ་ཤེས་ལྡན་དེ་དག་ཅི་ལ་རྟེན་ཅིང་ཅི་ལ་གནས་ནས་ཅི་ལ་
གནས་བཅས་ཏེ། ཕྱི་མའི་མཐའ་ལ་རྟོག་ཅིང་འདུ་ཤེས་ཅན་དུ་སྨྲ་བ་དག་དེ་ཕན་ཆད་བདག་ནི་འདུ་ཤེས་ཅན་མ་ཡིན་ནོ་ཞེས་ཁ་ཅིག་མངོན་པར་སྨྲ་ཞིང་མངོན་པར་རྗོད་པ་ནི། འདི་ལྟ་སྟེ་གཞི་བཅུ་དྲུག་པོ་དག་ལའོ། །དགེ་སློང་དག་
དགེ་སྦྱོང་དང་བྲམ་ཟེ་ཁ་ཅིག་འདི་ལྟར་ལྟ་ཞིང་འདི་སྐད་ཏུ་སྨྲ་བ་དག་ཡོད་དེ། དེ་ཕན་ཆད་བདག་གཟུགས་དང་ལྡན་པའི་འདུ་ཤེས་ཅན་དང་། དེ་ཕན་ཅད་བདག་གཟུགས་དང་མི་ལྡན་པ་དང་། གཟུགས་དང་ལྡན་པ་ཡང་ཡིན་ལ་
གཟུགས་དང་མི་ལྡན་པ་ཡང་ཡིན་པ་དང་། གཟུགས་དང་ལྡན་པ་ཡང་མ་ཡིན་ལ་གཟུགས་དང་མི་ལྡན་པ་ཡང་མ་ཡིན་པའི་འདུ་ཤེས་ཅན་དང་། དེ་ཕན་ཅད་བདག་མཐའ་དང་ལྡན་པའི་འདུ་ཤེས་ཅན་དང་། མཐའ་དང་མི་ལྡན་པ་དང་དེ་
ཕན་ཅད་བདག་མཐའ་དང་ལྡན་པ་ཡང་ཡིན་ལ་མཐའ་དང་མི་ལྡན་པ་ཡང་ཡིན་པ་དང་། མཐའ་དང་མི་ལྡན་པ་ཡང་ཡིན་ལ་མཐའ་དང་མི་ལྡན་པ་ཡང་མ་ཡིན་པའི་འདུ་ཤེས་ཅན་དང་། དེ་ཕན་ཅད་བདག་གཅིག་པའི་འདུ་ཤེས་ཅན་དང་ཐ་དད་
པའི་འདུ་ཤེས་ཅན་དང་ཆུང་ངུའི་འདུ་ཤེས་ཅན་དང་ཚད་མེད་པའི་འདུ་ཤེས་ཅན་དང་། གཅིག་ཏུ་བདེ་བ་ཅན་དང་གཅིག་ཏུ་སྡུག་བསྔལ་བ་ཅན་དང་བདེ་བ་དང་སྡུག་བསྔལ་བ་ཅན་དང་བདེ་བ་དང་སྡུག་བསྔལ་བ་ཅན་མ་ཡིན་པའི་འདུ་ཤེས་
ཅན་འདི་དག་ནི་དགེ་སློང་དག་གཞི་བཅུ་དྲུག་པོ་ལ་སྟེ། ཅི་ལ་རྟེན་ཅིང་ཞེས་བྱ་བ་ནས་མངོན་པར་སྨྲ་ཞིང་མངོན་པར་བརྗོད་པ་ཞེས་བྱ་བའི་བར་དུའོ། །དགེ་སྦྱོང་དང་བྲམ་ཟེ་ཁ་ཅིག་ཕྱི་མའི་མཐའ་ལ་རྟོག་ཅིང་། འདུ་ཤེས་ཅན་དུ་སྨྲ་བ་
དག་དེ་ཕན་ཅད་བདག་གི་འདུ་ཤེས་ཅན་ནོ་ཞེས་ཁ་ཅིག་མངོན་པར་སྨྲ་ཞིང་མངོན་པར་རྗོད་པ་དེ་ཐམས་ཅད་ནི་གཞི་བཅུ་དྲུག་པོ་འདི་དག་ལ་སྟེ། དེ་ལས་མི་ལྷག་མི་མང་ལ། དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་

71-1-87a

དུ་རབ་ཏུ་མཁྱེན། དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་ལྟར་ན་ལྟ་བར་སོང་བ་འདི་དག་འདི་ལྟར་འཛིན་པ་དང་འདི་ལྟར་མཆོག་ཏུ་འཛིན་པ་དང་འདི་ལྟར་ལེན་པ་དང་འདི་ལྟར་སྤྱོད་པ་དང་འགྲོ་
བ་ནི་འདི་ལྟ་བུའོ། །སྐྱེ་བ་ནི་འདི་ལྟ་བུའོ། །ཚེ་ཕྱི་མ་ནི་འདི་ལྟ་བུ་ཡིན་ནོ་ཞེས་དེ་དག་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་དག་དེ་བཞིན་
གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ནས་ཀྱང་མཆོག་ཏུ་མི་འཛིན་ཏོ། །མཆོག་ཏུ་མི་འཛིན་པས་བདག་ཉིད་མྱ་ངན་ལས་འདས་པར་རིག་ནས་ཚོར་བ་
རྣམས་ཀུན་དུ་འབྱུང་བ་ནུབ་པར་ཐུགས་སུ་ཆུད་དེ་འདི་ནི་སྡུག་བསྔལ་ལོ། །འདི་ནི་སྡུག་བསྔལ་ངེས་པར་འབྱིན་པའོ་ཞེས་བྱ་བར་མཁྱེན་ཏོ། །དགེ་སློང་དག་ཆོས་གང་དག་གཞན་ཟབ་པ་ཟབ་པར་སྣང་བ་ཡོངས་སུ་དག་པ་ཡོངས་སུ་བྱང་
བ་དེ་དག་ངས་རང་གི་མངོན་པར་ཤེས་པས་མངོན་པར་རྫོགས་པར་སངས་རྒྱས་ནས་བཤད་ལ། ཕ་རོལ་པོས་ཀྱང་དེ་བཞིན་གཤེགས་པ་ལ་གང་ཡང་དག་པ་ཇི་ལྟ་བ་བཞིན་དུ་སྙན་པར་སྨྲ་ཞིང་རྗོད་པར་བྱེད་དོ། །དགེ་སློང་དག་ཆོས་གང་
དག་གཞན་ཟབ་པ་ཟབ་པར་སྣང་བ་ཡོངས་སུ་དག་པ་ཡོངས་སུ་བྱང་བ་དེ་དག་ངས་རང་གི་མངོན་པར་ཤེས་པས་མངོན་པར་རྫོགས་པར་སངས་རྒྱས་ནས་བཤད་ལ། ཕ་རོལ་པོས་ཀྱང་དེ་བཞིན་གཤེགས་པ་ལ་གང་ཡང་དག་པ་
ཇི་ལྟ་བ་བཞིན་དུ་སྙན་པར་སྨྲ་ཞིང་རྗོད་པར་བྱེད་པ་གང་ཞེ་ན། དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་ཕྱི་མའི་མཐའ་ལ་རྟོག་ཅིང་འདུ་ཤེས་ཅན་དུ་སྨྲ་བ་དག །དེ་ཕན་ཅད་བདག་ནི་འདུ་ཤེས་ཅན་ནོ་ཞེས་ཁ་ཅིག་མངོན་པར་སྨྲ་
ཞིང་མངོན་པར་རྗོད་པ་ཡོད་པ་ནི་འདི་ལྟ་སྟེ། གཞི་བརྒྱད་པོ་འདི་དག་ལའོ། །དགེ་སྦྱོང་དང་བྲམ་ཟེ་ཤེས་ལྡན་དེ་དག་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ། ཕྱི་མའི་མཐའ་ལ་རྟོག་ཅིང་འདུ་ཤེས་མེད་པ་ཅན་དུ་

71-1-87b

སྨྲ་བ་དག་དེ་ཕན་ཅད་བདག་ནི་འདུ་ཤེས་མེད་པ་ཅན་ཡིན་ནོ་ཞེས་ཁ་ཅིག་མངོན་པར་སྨྲ་ཞིང་མངོན་པར་རྗོད་པ་ནི་འདི་ལྟ་སྟེ། གཞི་བརྒྱད་པོ་དག་ལའོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་འདི་ལྟར་ལྟ་ཞིང་འདི་སྐད་ཏུ་སྨྲ་བ་དག་ཡོད་དེ། 
དེ་ཕན་ཆད་བདག་ནི་གཟུགས་ཅན་ཡིན་ཞིང་འདུ་ཤེས་ཅན་ཡང་ཡིན་པ་དང་། དེ་ཕན་ཆད་བདག་ནི་གཟུགས་ཅན་མ་ཡིན་པ་དང་། གཟུགས་ཅན་ཡིན་ལ་གཟུགས་ཅན་མ་ཡིན་པ་ཡང་ཡིན་པ་དང་། གཟུགས་ཅན་ཡང་མ་ཡིན་ལ་
གཟུགས་ཅན་མ་ཡིན་པ་ཡང་མ་ཡིན་ཞིང་འདུ་ཤེས་ཅན་ཡང་མ་ཡིན་པ་དང་། དེ་ཕན་ཆད་བདག་ནི་མཐའ་དང་ལྡན་ཞིང་འདུ་ཤེས་ཅན་གང་ཡིན་པ་དང་། དེ་ཕན་ཆད་བདག་ནི་མཐའ་དང་མི་ལྡན་པ་དང་། མཐའ་དང་ལྡན་པའང་ཡིན་ལ་མཐའ་
དང་མི་ལྡན་པའང་ཡིན་པ་དང་མཐའ་དང་ལྡན་པ་ཡང་མ་ཡིན་ལ་མཐའ་དང་མི་ལྡན་པ་འང་མ་ཡིན་ཞིང་འདུ་ཤེས་ཅན་ཡང་ཡིན་པ་འདི་ནི་གཞི་བརྒྱད་པའོ། །ཅི་ལ་བརྟེན་ཅིང་ཞེས་བྱ་བ་དག་ནི་སྔ་མ་བཞིན་ནོ། །དགེ་སྦྱོང་དང་བྲམ་
ཟེ་ཁ་ཅིག་ཕྱི་མའི་མཐའ་ལ་རྟོག་ཅིང་འདུ་ཤེས་མེད་པ་ཅན་དུ་སྨྲ་བ་དག །དེ་ཕན་ཆད་བདག་ནི་འདུ་ཤེས་མེད་པ་ཅན་ཡིན་ནོ་ཞེས་ཁ་ཅིག་མངོན་པར་སྨྲ་ཞིང་མངོན་པར་རྗོད་པ་དེ་ཐམས་ཅད་ནི་གཞི་བརྒྱད་པོ་དག་ལ་སྟེ། དེ་ལས་
མི་ལྷག་མི་མང་ལ། དེ་དག་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། དེ་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། དེ་ལྟར་ན་ལྟ་བར་སོང་བ་འདི་དག་འདི་ལྟར་འཛིན་པ་དང་ཞེས་བྱ་བ་དག་ནི་
སྔ་མ་བཞིན་ནོ། །དགེ་སློང་དག་ཆོས་གང་དག་གཞན་ཟབ་པ་ཟབ་པར་སྣང་བ་ཞེས་བྱ་བ་དག་ནི་སྔ་མ་བཞིན་ནོ། །དགེ་སློང་དག་ཆོས་གང་དག་གཞན་ཟབ་པ་ཟབ་པར་སྣང་བ་གང་ཞེ་ན་ཞེས་བྱ་བ་དག་ནི་སྔ་མ་བཞིན་ནོ། །དགེ་
སློང་དག་དགེ་སྦྱོང་དང་བྲམ་ཟེ་ཁ་ཅིག་ཕྱི་མའི་མཐའ་ལ་རྟོག་ཅིང་འདུ་ཤེས་ཅན་ཡང་མ་ཡིན་ལ། འདུ་ཤེས་ཅན་མ་ཡིན་པ་ཡང་མ་ཡིན་པར་སྨྲ་བ་དག་ཡོད་དེ། དེ་ཕན་ཆད་བདག་ནི་འདུ་ཤེས་ཅན་ཡང་མ་ཡིན་ལ། འདུ་ཤེས་

71-1-88a

ཅན་མ་ཡིན་པ་ཡང་མ་ཡིན་ནོ་ཞེས་ཁ་ཅིག་མངོན་པར་སྨྲ་ཞིང་མངོན་པར་རྗོད་པ་ནི་འདི་ལྟ་སྟེ། གཞི་བརྒྱད་པོ་དག་ལའོ། །དགེ་སྦྱོང་དང་བྲམ་ཟེ་དེ་དག་ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ། ཕྱི་མའི་
མཐའ་ལ་རྟོག་ཅིང་འདུ་ཤེས་ཅན་ཡང་མ་ཡིན་ལ། འདུ་ཤེས་ཅན་མ་ཡིན་པ་ཡང་མ་ཡིན་ཞེས་སྨྲ་བ་དག་དེ་ཕན་ཆད་བདག་ནི་འདུ་ཤེས་ཅན་ཡང་མ་ཡིན་ལ་འདུ་ཤེས་ཅན་མ་ཡིན་པ་ཡང་མ་ཡིན་ནོ་ཞེས་ཁ་ཅིག་མངོན་པར་སྨྲ་ཞིང་
མངོན་པར་བརྗོད་པ་དག་ནི་གཞི་བརྒྱད་པོ་དག་ལའོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་འདི་ལྟར་ལྟ་ཞིང་འདི་སྐད་ཏུ་སྨྲ་བ་དག་དེ་ཕན་ཆད་བདག་གི་གཟུགས་ཅན་ཡིན་ཞིང་། འདུ་ཤེས་ཅན་ཡང་མ་ཡིན་ལ་འདུ་ཤེས་ཅན་
མ་ཡིན་པ་ཡང་མ་ཡིན་པ་དང་། དེ་ཕན་ཆད་བདག་ནི་གཟུགས་ཅན་མ་ཡིན་པ་དང་། གཟུགས་ཅན་ཡང་མ་ཡིན་ལ་གཟུགས་ཅན་མ་ཡིན་པ་ཡང་མ་ཡིན་པ་དང་། གཟུགས་ཅན་ཡང་མ་ཡིན་ལ་གཟུགས་ཅན་མ་ཡིན་པ་ཡང་
མ་ཡིན་ཞིང་། འདུ་ཤེས་ཅན་ཡང་མ་ཡིན་ལ་འདུ་ཤེས་ཅན་མ་ཡིན་པ་ཡང་མ་ཡིན་པ་དང་། དེ་ཕན་ཆད་བདག་ནི་མཐའ་དང་ལྡན་པ་ཡིན་ཞིང་འདུ་ཤེས་ཅན་ཡང་མ་ཡིན་ལ་འདུ་ཤེས་ཅན་མ་ཡིན་པ་ཡང་མ་ཡིན་པ་དང་། དེ་ཕན་ཆད་
བདག་ནི་མཐའ་དང་མི་ལྡན་པ་དང་། མཐའ་དང་ལྡན་པ་ཡང་ཡིན་ལ་མཐའ་དང་མི་ལྡན་པ་ཡང་ཡིན་པ་དང་། མཐའ་དང་ལྡན་པ་ཡང་མ་ཡིན་ལ་མཐའ་དང་མི་ལྡན་པ་ཡང་མ་ཡིན་ཞིང་འདུ་ཤེས་ཅན་ཡང་མ་ཡིན་ལ་འདུ་ཤེས་ཅན་མ་
ཡིན་པ་ཡང་མ་ཡིན་པ་འདི་དག་གཞི་བརྒྱད་ལའོ། །ཅི་ལ་བརྟེན་ཅིང་ཅི་ལ་གནས་ནས། ཅི་ལ་གནས་བཅས་ཏེ། ཕྱི་མའི་མཐའ་ལ་རྟོག་ཅིང་འདུ་ཤེས་ཅན་ཡང་མ་ཡིན་འདུ་ཤེས་ཅན་མ་ཡིན་པ་ཡང་མ་ཡིན་ནོ་ཞེས་སྨྲ་བ་དག་
དེ་ཕན་ཆད་བདག་ནི་འདུ་ཤེས་ཅན་ཡང་མ་ཡིན་འདུ་ཤེས་ཅན་མ་ཡིན་པ་ཡང་མ་ཡིན་ནོ་ཞེས་བྱ་བ་ཁ་ཅིག་མངོན་པར་སྨྲ་ཞིང་མངོན་པར་རྗོད་པ་དེ་ཐམས་ཅད་གཞི་བརྒྱད་པོ་དག་ལ་སྟེ་དེ་ལས་མི་ལྷག་མི་མང་བ་དེ་དག་དེ་བཞིན་གཤེགས་

71-1-88b

པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་ལྟར་ན་ལྟ་བར་སོང་བ་འདི་དག་ཅེས་བྱ་བ་དག་ནི་སྔ་མ་བཞིན་ནོ། །དགེ་སློང་དག་ཆོས་གང་དག་གཞན་ཟབ་པ་
ཟབ་པར་སྣང་བ་ཞེས་བྱ་བ་དག་ནི་སྔ་མ་བཞིན་ནོ་དགེ་སློང་དག་ཆོས་གང་དག་གཞན་ཟབ་པ་ཟབ་པར་སྣང་བ་དག་གང་ཞེ་ན་ཞེས་བྱ་བ་དག་ནི་སྔ་མ་བཞིན་ནོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་ཕྱི་མའི་མཐའ་ལ་རྟོག་ཅིང་
ཆད་པར་སྨྲ་བ་དག་ཡོད་དེ། དེ་ཕན་ཆད་བདག་ནི་ཆད་པར་འགྱུར་ཏེ་མེད་དོ་ཞེས་ཁ་ཅིག་མངོན་པར་སྨྲ་ཞིང་མངོན་པར་རྗོད་པ་ནི་འདི་ལྟ་སྟེ། གཞི་བདུན་པོ་དག་ལའོ། །དགེ་སློང་དག་དགེ་སྦྱོང་དང་བྲམ་ཟེ་ཤེས་ལྡན་ཅི་ལ་རྟེན་ཅིང་
ཅི་ལ་གནས་ནས་ཅི་ལ་གནས་བཅས་ཏེ། ཕྱི་མའི་མཐའ་ལ་རྟོག་ཅིང་ཆད་པར་སྨྲ་བ་དག་དེ་ཕན་ཅད་བདག་ནི་ཆད་པར་འགྱུར་ཏེ། མེད་དོ་ཞེས་ཁ་ཅིག་མངོན་པར་སྨྲ་ཞིང་མངོན་པར་རྗོད་པ་ནི་འདི་ལྟ་སྟེ་གཞི་བདུན་པོ་དག་ལའོ། །དགེ་སློང་དག་དགེ་
སྦྱོང་དང་བྲམ་ཟེ་ཁ་ཅིག་འདི་ལྟར་ལྟ་ཞིང་འདི་སྐད་ཏུ་སྨྲ་བ་དག་ཡོད་དེ། བདག་གཟུགས་ཅན་ནི་འབྱུང་བ་ཆེན་པོ་བཞི་པོ་རགས་པ་ཇི་སྲིད་ཏུ་འཚོ་ཞིང་གནས་ལ་བརྟན་ཅིང་འདུག་པ་དེ་ཇི་སྲིད་ཏུ་ནད་དང་བཅས་སོ། །ཤུ་བ་དང་བཅས་སོ། །ཟུག་
རྔུ་དང་བཅས་སོ། །རིམས་ནད་དང་བཅས་སོ། །ཡོངས་སུ་གདུང་བ་དང་བཅས་སོ། །བདག་ནི་ནམ་ཞིག་ན་ཡོངས་སུ་ཆད་པར་འགྱུར་རོ། །འདོད་པ་ན་སྤྱོད་པའི་ལྷ་དང་གཟུགས་ན་སྤྱོད་པའི་ལྷ་དང་གཟུགས་ཅན་མ་ཡིན་པ་ནམ་མཁའ་
མཐའ་ཡས་སྒྱེ་མཆེད་ལ་གནས་པ་དང་། གཟུགས་ཅན་མ་ཡིན་པ་རྣམ་ཤེས་མཐའ་ཡས་སྒྱེ་མཆེད་ལ་གནས་པ་དང་། གཟུགས་ཅན་མ་ཡིན་པ་ཅི་ཡང་མེད་པའི་སྐྱེ་མཆེད་ལ་གནས་པ་དང་། གཟུགས་ཅན་མ་ཡིན་པ་
ཡོད་མིན་མེད་མིན་སྒྱེ་མཆེད་ལ་གནས་པ་དག་ཇི་སྲིད་ཏུ་འཚོ་ཞིང་གནས་པ་ཞེས་བྱ་བ་ནས། འདི་ནི་གཞི་བདུན་པའོ་ཞེས་བྱ་བའི་བར་དུ་སྔ་མ་བཞིན་ནོ། །ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ། ཕྱི་

71-1-89a

མའི་མཐའ་ལ་རྟོག་ཅིང་ཆད་པར་སྨྲ་བ་དག་དེ་ཕན་ཆད་བདག་ནི་ཆད་པར་འགྱུར་ཏེ། མེད་དོ་ཞེས་ཁ་ཅིག་མངོན་པར་སྨྲ་ཞིང་མངོན་པར་རྗོད་དོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་ཕྱི་མའི་མཐའ་ལ་རྟོག་
ཅིང་ཆད་པར་སྨྲ་བ་དག་དེ་ཕན་ཆད་བདག་ནི་ཆད་པར་འགྱུར་ཏེ་མེད་དོ་ཞེས་ཁ་ཅིག་མངོན་པར་སྨྲ་ཞིང་མངོན་པར་རྗོད་པ་ཐམས་ཅད་ཀྱང་གཞི་བདུན་པོ་འདི་དག་ལ་སྟེ། དེ་ལས་མི་ལྷག་མི་མང་ལ་དེ་དག་དེ་བཞིན་གཤེགས་
པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཅེས་བྱ་བ་དག་ནི་སྔ་མ་བཞིན་ནོ། །དགེ་སློང་དག་ཆོས་གང་དག་གཞན་ཟབ་པ་ཟབ་པར་སྣང་བ་ཞེས་བྱ་བ་དག་ནི་སྔ་མ་བཞིན་ནོ། །དགེ་སློང་དག་ཆོས་གང་དག་གཞན་ཟབ་པ་
ཟབ་པར་སྣང་བ་དེ་དག་ཀྱང་གང་ཞེ་ན་ཞེས་བྱ་བ་དག་ནི་སྔ་མ་བཞིན་ནོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་འདི་ལྟར་ལྟ་ཞིང་འདི་སྐད་ཏུ་སྨྲ་བ་དག་ཡོད་དེ། གང་གི་ཚེ་བདག་འདོད་པའི་ཡོན་ཏན་ལྔ་འབྱོར་པར་གྱུར་ཅིང་། 
རྩེ་དགའ་ཡོངས་སུ་སྤྱོད་པ་དེ་ཙམ་གྱིས་ན། བདག་འདི་མཐོང་བའི་ཆོས་ལ་མྱ་ངན་ལས་འདས་པ་ཐོབ་པ་ཡིན་ནོ། །གང་གི་ཚེ་བདག་འདོད་པ་དག་ལས་དབེན་ཞིང་བསམ་གཏན་བཞི་པའི་བར་དུ་རྫོགས་པར་བྱ་སྟེ། གནས་
པ་དེ་ཙམ་གྱིས་ན་བདག་འདི་མཐོང་བའི་ཆོས་ལ་མྱ་ངན་ལས་འདས་པ་ཐོབ་པ་ཡིན་ནོ་ཞེས་བྱ་བ་འདི་ནི་གཞི་ལྔ་པའོ། །ཅི་ལ་རྟེན་ཅིང་ཅི་ལ་གནས་ནས་ཅི་ལ་གནས་བཅས་ཏེ་ཕྱི་མའི་མཐའ་ལ་རྟོག་ཅིང་། མཐོང་བའི་
ཆོས་ལ་མྱ་ངན་ལས་འདས་པར་མངོན་པར་སྨྲ་བ་དག །མཐོང་བའི་ཆོས་ལ་མྱ་ངན་ལས་འདས་པར་མངོན་པར་སྨྲ་ཞིང་མངོན་པར་རྗོད་དོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་ཕྱི་མའི་མཐའ་ལ་རྟོག་ཅིང་། 
མཐོང་བའི་ཆོས་ལ་མྱ་ངན་ལས་འདས་པར་སྨྲ་བ་དག །མཐོང་བའི་ཆོས་ལ་མྱ་ངན་ལས་འདས་པར་མངོན་པར་སྨྲ་ཞིང་མངོན་པར་རྗོད་པ་ཐམས་ཅད་ཀྱང་གཞི་ལྔ་པོ་འདི་ལ་སྟེ། དེ་ལས་མི་ལྷག་མི་མང་ལ། དེ་དག་དེ་བཞིན་

71-1-89b

གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་ལྟར་ན་ལྟ་བར་སོང་བ་འདི་དག་འདི་ལྟར་འཛིན་པ་དང་ཞེས་བྱ་བ་ནས་ཐུགས་སུ་ཆུད་དོ་ཞེས་བྱ་བའི་
བར་དུ་སྔ་མ་བཞིན་ནོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་ཕྱི་མའི་མཐའ་ལ་རྟོག་ཅིང་། ཕྱི་མའི་མཐའ་ལ་གནས་པ་ལྟ་བར་སོང་བ་དག་མངོན་པར་སྨྲ་ཞིང་མངོན་པར་རྗོད་པ་ཐམས་ཅད་ཀྱང་ལྟ་བར་སོང་བ་བཞི་བཅུ་རྩ་བཞི་
པོ་འདི་དག་སྟེ། དེ་ལས་མི་ལྷག་མི་མང་ལ། དེ་དག་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་ལྟར་ན་ལྟ་བར་སོང་བ་འདི་དག་འདི་ལྟར་
འཛིན་པ་དང་ཞེས་བྱ་བ་ནས་ཐུགས་སུ་ཆུད་དོ་ཞེས་བྱ་བའི་བར་དུ་སྔ་མ་བཞིན་ནོ། །དགེ་སློང་དག་དགེ་སྦྱོང་དང་བྲམ་ཟེ་ཁ་ཅིག་ཕྱི་མའི་མཐའ་ལ་རྟོག་ཅིང་། ཕྱི་མའི་མཐའ་ལ་གནས་པས་ལྟ་བར་སོང་བ་དག་མངོན་པར་སྨྲ་ཞིང་མངོན་
པར་རྗོད་པ་ཐམས་ཅད་ཀྱང་ལྟ་བར་སོང་བ་བཞི་བཅུ་རྩ་བཞི་པོ་འདི་དག་སྟེ། དེ་ལས་མི་ལྷག་མི་མང་ལ། དེ་དག་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་
ཏུ་མཁྱེན་ཏོ། །དེ་ལྟར་ན་ལྟ་བར་སོང་བ་འདི་དག་འདི་ལྟར་འཛིན་པ་དང་ཞེས་བྱ་བ་ནས་ཐུགས་སུ་ཆུད་དོ་ཞེས་བྱ་བའི་བར་དུ་སྔ་མ་བཞིན་ནོ། །དགེ་སློང་དག་དགེ་སྦྱོང་དང་བྲམ་ཟེ་ཤེས་ལྡན་ཁ་ཅིག་སྔོན་གྱི་མཐའ་ལ་རྟོག་ཅིང་། སྔོན་
གྱི་མཐའ་ལ་གནས་པ་ལྟ་བར་སོང་བ་དག་མངོན་པར་སྨྲ་ཞིང་མངོན་པར་རྗོད་པ་དག་ཕྱི་མའི་མཐའ་ལ་རྟོག་ཅིང་། ཕྱི་མའི་མཐའ་ལ་གནས་པ་ལྟ་བར་སོང་བ་དག་མངོན་པར་སྨྲ་ཞིང་མངོན་པར་རྗོད་པ་ཐམས་ཅད་ཀྱང་ལྟ་བར་སོང་བ་དྲུག་བཅུ་རྩ་
གཉིས་པོ་འདི་དག་ལ་སྟེ། དེ་ལས་མི་ལྷག་མི་མང་ལ། དེ་དག་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དེ་ལྟར་ན་ལྟ་བར་སོང་བ་

71-1-90a

འདི་དག་འདི་ལྟར་འཛིན་པ་དང་འདི་ལྟར་ལེན་པ་དང་འདི་ལྟར་སྤྱོད་པ་དང་འགྲོ་བ་དང་ནི་འདི་ལྟ་བུའོ། །སྐྱེ་བ་ནི་འདི་ལྟ་བུའོ། །ཚེ་ཕྱི་མ་ནི་འདི་ལྟ་བུའོ་ཞེས་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་
དུ་རབ་ཏུ་མཁྱེན་ཏོ། །དེ་ལས་ལྷག་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ནས་ཀྱང་མཆོག་ཏུ་མི་འཛིན་ཏོ། །མཆོག་ཏུ་མི་འཛིན་པས་བདག་ཉིད་མྱ་ངན་ལས་འདས་པར་རིག་ནས། ཚོར་བ་རྣམས་ཀུན་འབྱུང་བ་ནུབ་པར་
ཐུགས་སུ་ཆུད་དེ་འདི་ནི་སྡུག་བསྔལ་ལོ། །འདི་ནི་སྡུག་བསྔལ་ངེས་པར་འབྱིན་པའོ་ཞེས་བྱ་བར་མཁྱེན་ཏོ། །དགེ་སློང་དག་དེ་ལ་དགེ་སྦྱོང་དང་བྲམ་ཟེ་གང་དེ་དག་སྔོན་གྱི་མཐའ་ལ་རྟོག་ཅིང་། སྔོན་གྱི་མཐའ་ལ་གནས་པ་ལྟ་
བར་སོང་བ་རྣམས་དང་ཕྱི་མའི་མཐའ་ལ་རྟོག་ཅིང་། ཕྱི་མའི་མཐའ་ལ་གནས་པ་ལྟ་བར་སོང་བ་རྣམས་ཀྱིས་གྱེན་དུ་དམྱུགས་སུ་ཟིན་ཀྱང་དེ་ཐམས་ཅད་ལྟ་བའི་ཆུའི་ནང་ན་འདུག་པས་བདུད་སྡིག་ཅན་གྱི་དབང་དུ་སོང་ཞིང་
ལག་ཏུ་སོང་བ་སྟེ། བདུད་སྡིག་ཅན་གྱིས་ཅི་དགའ་མགུར་བྱ་བ་བདུད་གྱི་ཞགས་པ་དག་ལས་ཡོངས་སུ་གྲོལ་བ་མ་ཡིན་ནོ། །དགེ་སློང་དག་དཔེར་ན་ཉ་པ་འམ། ཉ་པའི་སློབ་མ་མཁས་པ་དག་གིས་རྒྱ་མིག་ཕྲ་མོ་ཐོགས་
ཏེ་ལྟེང་ཀའི་ཆུ་ཆུང་ངུ་བཅུས་པ་ན། དེ་སྲོག་ཆགས་གང་རགས་པ་ཆེ་ལོང་རྣམས་ཀྱིས་གྱེན་དུ་དམྱུགས་སུ་ཟིན་ཀྱང་དེ་ཐམས་ཅད་ཆུའི་ནང་ན་གནས་པས་ཉ་པའི་དབང་དུ་སོང་ཞིང་ལག་ཏུ་སོང་བ་སྟེ། ཉ་པས་ཅི་དགའ་
མགུར་བྱ་བ་ཡིན་པར་རིག་པར་བྱའོ། །དེ་བཞིན་དུ་དགེ་སྦྱོང་དང་བྲམ་ཟེ་གང་ཁ་ཅིག་སྔོན་གྱི་མཐའ་ལ་རྟོག་ཅིང་། སྔོན་གྱི་མཐའ་ལ་གནས་པ་ལྟ་བར་སོང་བ་རྣམས་དང་། ཕྱི་མའི་མཐའ་ལ་རྟོག་ཅིང་ཕྱི་མའི་
མཐའ་ལ་གནས་པ་ལྟ་བར་སོང་བ་རྣམས་ཀྱིས་གྱེན་དུ་དམྱུགས་སུ་ཟིན་ཀྱང་། དེ་ཐམས་ཅད་ལྟ་བའི་ཆུའི་ནང་ན་འདུག་པས་བདུད་སྡིག་ཅན་གྱི་དབང་དུ་སོང་ཞིང་ལག་ཏུ་སོང་སྟེ། བདུད་སྡིག་ཅན་གྱིས་ཅི་དགའ་མགུར་

71-1-90b

བྱ་བ་དག་གོ། །དགེ་སློང་དག་དེ་ལ་དགེ་སྦྱོང་དང་བྲམ་ཟེ་གང་དེ་དག་སྔོན་གྱི་མཐའ་ལ་རྟོག་ཅིང་རྟག་པར་སྨྲ་བ་དག་བདག་དང་འཇིག་རྟེན་རྟག་གོ་ཞེས་མངོན་པར་རྗོད་པ་ནི་འདི་ལྟ་སྟེ། གཞི་བཞི་པོ་དག་ལ་སྟེ། དགེ་
སློང་དག་དགེ་སྦྱོང་དང་བྲམ་ཟེ་མཁས་པ་མ་ཡིན་ཞིང་མ་རིག་པར་གྱུར་པ་བག་མེད་ཅིང་རྨོངས་པ་ལ་གནས་པ་དེ་དག་སྲིད་པར་རིག་པར་བྱ་སྟེ། དེ་ནི་སྲིད་པས་རྣམ་པར་བསྐྱོད་པའོ། །དགེ་སློང་དག་དེ་ལ་དགེ་སྦྱོང་དང་བྲམ་ཟེ་
གང་དེ་དག་ཕྱི་མའི་མཐའ་ལ་རྟོག་ཅིང་ཞེས་བྱ་བ་ནི་མཐོང་བའི་ཆོས་ལ་མྱ་ངན་ལས་འདས་པར་སྨྲ་བ་དག་མཐོང་བའི་ཆོས་ལ་མྱ་ངན་ལས་འདས་པར་མངོན་པར་སྨྲ་ཞིང་མངོན་པར་རྗོད་པ་ནི་གཞི་བཞི་པོ་དག་ལ་སྟེ་ཞེས་བྱ་བའི་བར་
དུའོ། །དགེ་སྦྱོང་དང་བྲམ་ཟེ་མཁས་པ་མ་ཡིན་ཞིང་མ་རིག་པར་གྱུར་པ། བག་མེད་ཅིང་རྨོངས་པ་ལ་གནས་པ་དེ་དག་ལ་རིག་པར་བྱ་སྟེ། དེ་ནི་སྲིད་པས་རྣམ་པར་བསྐྱོད་པའོ། །དགེ་སློང་དག་དེ་ལ་དགེ་སྦྱོང་དང་བྲམ་ཟེ་གང་དེ་
དག་སྔོན་གྱི་མཐའ་ལ་རྟོག་ཅིང་རྟག་པར་སྨྲ་བ་དག་བདག་དང་འཇིག་རྟེན་ནི་རྟག་གོ་ཞེས་མངོན་པར་སྨྲ་ཞིང་མངོན་པར་རྗོད་པ་ནི་འདི་ལྟ་སྟེ། གཞི་བཞི་པོ་དག་ལ་སྟེ། དེ་ཡང་རྟེན་ཅིང་འབྲེལ་པར་འབྱུང་བ་ཡིན་པར་སྲིད་ཀྱི་
རྟེན་ཅིང་འབྲེལ་པར་འབྱུང་བ་མ་ཡིན་པར་འགྱུར་བ་དེ་ནི་གནས་མེད་དོ། །མཐོང་བའི་ཆོས་ལ་མྱ་ངན་ལས་འདས་པར་སྨྲ་བ་དག་མཐོང་བའི་ཆོས་ལ་མྱ་ངན་ལས་འདས་པར་མངོན་པར་སྨྲ་ཞིང་མངོན་པར་རྗོད་པ་དག་གཞི་ལྔ་པོ་
དག་ལ་སྟེ་ཞེས་བྱ་བའི་བར་དུའོ། །དེ་ཡང་རྟེན་ཅིང་འབྲེལ་པར་འབྱུང་བ་ཡིན་པར་སྲིད་ཀྱི་རྟེན་ཅིང་འབྲེལ་པར་འབྱུང་བ་མ་ཡིན་པར་འགྱུར་བ་འདི་ནི་གནས་མེད་དོ། །དགེ་སློང་དག་དེ་ལ་དགེ་སྦྱོང་དང་བྲམ་ཟེ་གང་དེ་དག་སྔོན་གྱི་
མཐའ་ལ་རྟོག་ཅིང་། རྟག་པར་སྨྲ་བ་དག་མཐོང་བའི་ཆོས་ལ་བདག་དང་འཇིག་རྟེན་ནི་རྟག་གོ་ཞེས་བྱ་བ་མངོན་པར་སྨྲ་ཞིང་མངོན་པར་རྗོད་པ་ནི་གཞི་བཞི་པོ་དག་ལ་སྟེ། དེ་ཡང་རེག་པའི་རྐྱེན་ལས་བྱུང་བར་སྲིད་ཀྱི་

71-1-91a

རིག་པ་ལས་འབྱུང་བ་ལས་གཞན་པའི་ཚོར་བར་འགྱུར་བ་འདི་ནི་གནས་མེད་དོ། །ཕྱི་མའི་མཐའ་ལ་རྟོག་ཅིང་ཞེས་བྱ་བ་ནི་མཐོང་བའི་ཆོས་ལ་མྱ་ངན་ལས་འདས་པར་སྨྲ་བ་དག་མཐོང་བའི་ཆོས་ལ་མྱ་ངན་
ལས་འདས་པར་མངོན་པར་སྨྲ་ཞིང་མངོན་པར་རྗོད་པ་ནི་འདི་ལྟ་སྟེ། གཞི་ལྔ་པོ་དག་ལའོ་ཞེས་བྱ་བའི་བར་དུའོ། །དེ་ཡང་རེག་པའི་རྐྱེན་ལས་བྱུང་བར་སྲིད་ཀྱི་རེག་པ་ལས་བྱུང་བ་ལས་གཞན་པའི་ཚོར་བར་འགྱུར་བ་
འདི་ནི་གནས་མེད་དོ། །དགེ་སློང་དག་གིས་གང་ཚུན་ཆད་རིག་པའི་སྐྱེ་མཆེད་དྲུག་པོ་དག་ནི་ཀུན་འབྱུང་བ་ནུབ་པ་དང་རོ་མྱང་བ་དང་ཉེས་དམིགས་ཡང་དག་པ་ཇི་ལྟ་བ་བཞིན་ཁོང་དུ་ཆུད་པ་འདི་ནི། འདི་ལྟར་ལྷག་པར་ཡང་དག་པ་ཇི་ལྟ་
བ་བཞིན་ཁོང་དུ་ཆུད་པ་ཡིན་ནོ། །དགེ་སློང་དག་དེ་ལ་གང་ཟག་ཀུན་ནས་ཉོན་མོངས་པ་ཅན། ཡང་སྲིད་པ་པ་རིམས་ནད་དང་བཅས་པ། སྡུག་བསྔལ་རྣམ་པར་སྨིན་པ། ཚེ་ཕྱི་མ་ལ་རྒ་ཤིའི་རྗེས་སུ་འཐུན་པ་དེ་དག་དེ་
བཞིན་གཤེགས་པས་སྤངས་ཤིང་ཡོངས་སུ་མཁྱེན་ལ། ཤིང་ཏ་ལའི་མགོ་བཞིན་རྩ་བ་ནས་བཅད་དེ། འགྲོ་བ་སྣང་བ་མེད་པ་སྐྱེ་སྟེ། ཕྱི་མ་ལ་མི་སྐྱེ་བའི་ཆོས་ཅན་དུ་འགྱུར་རོ། །ཆོས་ཀྱི་རྣམ་གྲངས་འདི་བཤད་པ་ན། 
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་གསུམ་དུ་གཡོས། རབ་ཏུ་གཡོས། ཀུན་དུ་རབ་ཏུ་གཡོས་སོ། །འགུལ་རབ་ཏུ་འགུལ། ཀུན་དུ་རབ་ཏུ་འགུལ་ཏོ། །ལྡེག །རབ་ཏུ་ལྡེག །
ཀུན་དུ་རབ་ཏུ་ལྡེགས་སོ། །དེའི་ཚེ་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་སྣམ་ལོགས་ན་འདུག་ཅིང་བསིལ་ཡབ་ཐོགས་ནས། བཅོམ་ལྡན་འདས་ལ་གཡོབ་ཅིང་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཙུན་པ་ཆོས་ཀྱི་རྣམ་གྲངས་འདིའི་མིང་ཅི་ལགས། ཇི་ལྟར་གཟུང་བར་བགྱི། ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་ནི་རྒྱུའི་དྲ་བ་ཞེས་བྱ་བར་ཡང་ཟུང་ཤིག །དོན་གྱི་དྲ་བ་དང་ཆོས་

71-1-91b

ཀྱི་དྲ་བ་དང་ཚངས་པའི་དྲ་བ་ཞེས་བྱ་བར་ཡང་ཟུང་ཤིག །དེ་བས་ན་ཚངས་པའི་དྲ་བ་ཞེས་བྱ་བ་འདི་ནི་ཆོས་ཀྱི་རྣམ་གྲངས་འདིའི་ཚིག་བླ་དགས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་
དེ་དག་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ། །བར་གྱི་སྡོམ་ནི། རྟག་དང་གཅིག་པུ་རྒྱུ་མེད་དང་། །མཐའ་ལྡན་དེ་བཞིན་ལྷ་མི་སྤོང་། །འདུ་ཤེས་འདུ་ཤེས་མེད་ཅན་དང་། །
ཆད་དང་མྱ་ངན་འདས་པ་དང་། །དམྱུགས་དང་ཀུན་ནས་རྨོངས་པ་དང་། །བརྟེན་དང་རེག་པ་དགེ་སློང་དང་། །རྒྱུ་དང་དོན་ཆོས་འདྲ་བ་སྟེ། །ཐ་མ་ཚངས་པའི་དྲ་བའོ། །ཚངས་པའི་དྲ་བ་རྫོགས་སོ། །
ཡེ་དྷརྨཱ་ཧེ་ཏུ་པྲ་བྷ་བཱ་ཧེ་ཏུན་ཏེ་ཥཱན་ཏ་ཐཱ་ག་ཏོ་ཧྱ་བ་དཏ། ཏེ་ཥཱཉ་ཙ་ཡོ་ནི་རོ་དྷ་ཨེ་བཱྃ་བ་དཱི་མ་ཧཱ་ཤྲ་མ་ཎཿ།། རྒྱལ་བའི་བཀའ། མདོ་སྡེ་འདི། གཞོན་དར་དས། ལེགས་པར་བྲིས། བླ་མ་ཐང་པ་དང་། 
བཤེས་གཉེན་དགེན་རིན་གཉིས་ཀྱིས་ལེགས་པར་ཞུས་ཤིང་དག་གོ། །དགེའོ། ། ༄༅། །རྒྱའི་སྐད་དུ། དེའི་ཕང་བྱ་ན་ཕུར་པོའུ་ཨིན་ཀྱེང་སཱུ་ཕིམ་དེའི་ཨིར། བོད་སྐད་དུ། ཐབས་
མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ། བམ་པོ་དང་པོ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་སྤུངས་པའི་རི་ལ། དགེ་སློང་གི་
དགེ་འདུན་ཆེན་པོ་དགེ་སློང་ཉི་ཁྲི་བརྒྱད་སྟོང་ཐམས་ཅད་ཀྱང་བྱ་བ་བྱས་པ། ཚངས་པར་སྤྱོད་པ་སྤྱད་པ། སྲིད་པར་ཀུན་དུ་སྦྱོར་བ་ཡོངས་སུ་ཟད་པ། ཀླུ་ཆེན་པོ་ལྟར་སེམས་ཀྱི་དབང་ཐོབ་པ་ཤ་
སྟག་ལ་འདི་ལྟ་སྟེ། འོད་སྲུང་ཆེན་པོ་དང་། རབ་འབྱོར་དང་། ཀུན་ཤེས་ཀཽ་ཌི་ནྱ་དང་། མཛེས་བཟང་དང་། བྱམས་མའི་བུ་གང་པོ་དང་། ལམ་ཆན་བསྟན་དང་། ཤཱ་རིའི་བུ་དང་། 

71-1-92a

ཀཱ་ཏྱའི་བུ་ཆེན་པོ་དང་། ཀུན་དགའ་བོ་དང་། སྒྲ་གཅན་འཛིན་ལ་སོགས་པ་ཅང་ཤེས་པ་དག་དང་ཐབས་གཅིག་ཏུ་བཞུགས་སོ། །བྱང་ཆུབ་སེམས་དཔའ་སེམས་དཔའ་ཆེན་
པོ་སུམ་ཁྲི་བརྒྱད་སྟོང་དག་དང་ཐབས་གཅིག་སྟེ། བྱང་ཆུབ་སེམས་དཔའ་དེ་དག་ཐམས་ཅད་ཀྱང་ཡུན་རིང་པོར་དགེ་བའི་རྩ་བ་བསྐྱེད་པས་སངས་རྒྱས་བྱེ་བ་བརྒྱ་སྟོང་ཚད་མེད་པ་རྣམས་ལ་རྟག་ཏུ་ཚངས་
པར་སྤྱོད་པ་སྤྱད་པ། སྨོན་ལམ་ཆེན་པོ་ཡོངས་སུ་རྫོགས་པ། ཏིང་ངེ་འཛིན་བརྒྱ་སྟོང་སྙེད་ཁོང་དུ་ཆུད་ཅིང་རྟོགས་པ། གཟུངས་ཡོངས་སུ་རྫོགས་པ། སྙིང་རྗེ་ཆེན་པོ་མི་
གཏོང་བ། སེམས་ཅན་ཆེན་པོ་ཇི་ལྟ་བ་བཞིན་དུ་ཐམས་ཅད་ལ་ཕན་པར་བརྩོན་པ། དཀོན་མཆོག་གསུམ་གྱི་གདུང་མི་འཆད་པར་འཚོབ་པ། ཆོས་ཀྱི་རྒྱལ་མཚན་རྣམ་པར་
འཛུགས་པ། སོ་སོའི་མ་བསྐུལ་བའི་དགེ་བའི་བཤེས་གཉེན་དུ་གྱུར་པ། ཡེ་ཤེས་ཆེན་པོའི་འགྲམ་དུ་ཕྱིན་པས་ཀུན་དུ་གྲངས་མེད་པ་ཤ་སྟག་ལ་འདི་ལྟ་སྟེ། བྱང་ཆུབ་
སེམས་དཔའ་སྤྱན་རས་གཟིགས་དབང་ཕྱུག་དང་། བྱང་ཆུབ་སེམས་དཔའ་མཐུ་ཆེན་ཐོབ་དང་། བྱང་ཆུབ་སེམས་དཔའ་རྟག་པར་བརྩོན་དང་། བྱང་ཆུབ་སེམས་དཔའ་ཡོན་
ཏན་དམ་པ་དང་བྱང་ཆུབ་སེམས་དཔའ་གློག་གི་འོད་དང་། བྱང་ཆུབ་སེམས་དཔའ་ཀུན་དུ་མཉམ་པ་དང་། བྱང་ཆུབ་སེམས་དཔའ་ཡོན་ཏན་གཙོ་བོ་དང་། བྱང་ཆུབ་
སེམས་དཔའ་རི་རབ་རྒྱལ་པོ་དང་། བྱང་ཆུབ་སེམས་དཔའ་སྤོས་ཀྱི་གླང་པོ་དང་། བྱང་ཆུབ་སེམས་དཔའ་སྤོས་ཀྱི་གླང་པོ་ཆེན་པོ་དང་། བྱང་ཆུབ་སེམས་དཔའ་སྟོབས་འཛིན་

71-1-92b

དང་། བྱང་ཆུབ་སེམས་དཔའ་ཁམས་གསུམ་འཕགས་དང་། བྱང་ཆུབ་སེམས་དཔའ་རྟག་པར་སྙིང་རྗེ་དང་། བྱང་ཆུབ་སེམས་དཔའ་ལག་ན་རིན་ཆེན་དང་། བྱང་ཆུབ་སེམས་དཔའ་
འོད་བཙན་དང་། བྱང་ཆུབ་སེམས་དཔའ་དམ་པའི་དཔལ་དང་། བྱང་ཆུབ་སེམས་དཔའ་རིན་ཆེན་ཟླ་བ་དང་། བྱང་ཆུབ་སེམས་དཔའ་སྟོབས་པོ་ཆེ་དང་། བྱང་ཆུབ་སེམས་དཔའ་བློ་གྲོས་ཚད་
མེད་དང་། བྱང་ཆུབ་སེམས་དཔའ་བཟང་སྐྱོང་དང་། བྱང་ཆུབ་སེམས་དཔའ་སེང་གེའི་སྒྲ་དང་། བྱང་ཆུབ་སེམས་དཔའ་སེང་གེ་བྱེད་དང་། བྱང་ཆུབ་སེམས་དཔའ་སེང་གེ་རྣམ་པར་
བསྒྱིངས་པ་དང་། བྱང་ཆུབ་སེམས་དཔའ་སྨོན་ལམ་རྫོགས་དང་། བྱང་ཆུབ་སེམས་དཔའ་རིན་ཆེན་བརྩེགས་དང་། བྱང་ཆུབ་སེམས་དཔའ་བྱམས་པ་དང་། བྱང་ཆུབ་
སེམས་དཔའ་འཇམ་དཔལ་གཞོན་ནུར་གྱུར་པ་ལ་སོགས་པ་འཁོར་མང་པོ་དང་ཡང་ཐབས་གཅིག་ཏུ་བཞུགས་སོ། །དེ་མ་ཡིན་པ་གཞན་ཡང་། འདོད་པའི་ཁམས་ཀྱི་ལྷའི་བུ་ཚད་མེད་པ་
བརྒྱ་སྟོང་དག་ཀྱང་ལྷགས་ནས་ལྷ་རྫས་ཀྱི་མེ་ཏོག་དང་སྤོས་རྣམས་ཐོགས་ཤིང་། །ལྷ་རྫས་ཀྱི་རོལ་མོ་དཀྲོལ་ནས་སྟེང་གི་ནམ་མཁའ་ལ་འཁོད་དོ། །དེ་
མ་ཡིན་པ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། 
མི་དང་། མི་མ་ཡིན་པ་དང་། དེ་ལ་སོགས་པ་སོ་སོ་ནས་འཁོར་བརྒྱ་སྟོང་སྙེད་ལྷགས་ནས་སངས་རྒྱས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་

71-1-93a

འཁོད་དོ། །དེའི་ཚེ་ན་བཅོམ་ལྡན་འདས་ལ་འཁོར་མང་པོས་ཡོངས་སུ་བསྐོར་ཏེ། རིམ་གྲོ་དང་མཆོད་པ་བྱས། བཀུར་སྟི་དང་བཅས་པས་ཡོངས་སུ་བསྟོད་པ་བྱས་སོ། །དེའི་ཚེ་ན་བཅོམ་ལྡན་འདས་ཀྱི་བྱིན་གྱིས་བརླབས་ཀྱིས་ཀུན་དགའ་
བོ་སྔ་དྲོའི་དུས་ཀྱི་ཚེ་རྒྱལ་པོའི་ཁབ་ཏུ་ཞུགས་ནས་མཐར་གྱིས་བསོད་སྙོམས་བླངས་སོ། །དེའི་དུས་ན་བྲམ་ཟེ་ཕ་མ་ལ་སྲི་ཞུ་ཆེར་བྱེད་པ། ཁྱིམ་སོ་ཞིག་ནས་ཅི་ཡང་མི་བདོག་པ་ཅིག་ཀྱང་མ་རྒན་ཁུར་དུ་ཁྱེར་ཏེ། མཐར་གྱིས་སློངས་མོ་བྱེད་དེ། དེ་ཡང་ཁ་
ཟས་ཞིམ་པོ་རོ་དང་ལྡན་པའམ། ཤིང་ཏོག་བཟང་པོ་དག་རྙེད་ན་ཕ་མ་ལ་སྟོབས་སོ། །ཁ་ཟས་ངན་པ་རོ་མེད་པ་འམ། ཤིང་ཏོག་སྐམ་པོ་དག་རྙེད་ན་བདག་ཟའོ། །ཀུན་དགའ་བོས་དེ་ལྟ་བུ་དག་མཐོང་ནས་རབ་ཏུ་དགའ་བའི་སེམས་སྐྱེས་ཏེ། མི་
དེ་ལ་ལེགས་སོ། །ལེགས་སོ་ཞེས་སྙན་པར་བསྟོད་ནས། རིགས་ཀྱི་བུ་ཕ་མ་ལ་སྲི་ཞུ་བྱེད་ཅིང་མཆོད་པ་བྱེད་པ་ངོ་མཚར་ཆེ་སྟེ་ལེགས་སོ་ཞེས་སྨྲས་སོ། །དེ་ནས་ཀུན་དུ་རྒྱུ་སྟོན་པ་དྲུག་གི་བསྟན་པ་ལ་ཕྱོགས་ཤིང་གྲོགས་སུ་གྱུར་པ་ཅིག་དབང་
པོ་རྣོ་ལ་གཙུག་ལག་དང་། རིག་བྱེད་རྣམ་པ་བཞི་ལ་མཁས་པར་གྱུར་པ། སྐར་མ་དང་རྩིས་ལ་མཁས་པ། དགེ་སྡིག་གི་ལྟས་རྣོ་བ། མོ་དང་གཙུག་ལག་གི་རིག་པས་ཕ་རོལ་གྱི་སེམས་ཤེས་པ། ཕལ་མང་པོའི་སློབ་དཔོན་དུ་གྱུར་པ། 
ཀུན་གྱིས་བཀུར་བ་ཅིག་ལྟ་བ་ངན་པ་ལ་ཞེན་ནས་ཁེ་དང་གྲགས་པའི་ཕྱིར་དམ་པའི་ཆོས་འཇིག་པར་བྱེད། སངས་རྒྱས་དང་། ཆོས་དང་། དགེ་འདུན་ལ་ཕྲག་དོག་བྱེད་དེ་སྨོད་པའི་ཕྱིར་ཀུན་དགའ་བོ་ལ་འདི་སྐད་ཅེས་སྨྲས་སོ། །ཁྱོད་ཀྱི་
སྟོན་པ་གཽ་ཏ་མ་ཤཱག་རིགས་ཀྱི་བུ་ང་ནི་དགེ་བ་ཡིན་ཏེ། ཡོན་ཏན་ཆེན་པོ་དང་ལྡན་ནོ་ཞེས་སྨྲ་བ་ཡང་མིང་ཙམ་དུ་ཟད་དེ་བདེན་པའི་དངོས་པོ་མེད་དོ། །ཁྱོད་ཀྱི་སྟོན་པ་གཽ་ཏ་མ་ནི་ཡང་དག་པར་ན་སྡིག་པ་ཅན་ཡིན་ཏེ། བཙས་ནས་ཞག་
བདུན་ལོན་པ་ན་མ་ཡང་ཤི་བས་སྡིག་པ་ཅན་ཡིན་པར་མངོན་ནོ། །རྒྱལ་པོའི་ཕོ་བྲང་ན་འདུག་པ་ལས་ཕོ་བྲང་ནང་ནས་བྲོས་པས་ཡབ་རྒྱལ་པོ་ཡང་མྱ་ངན་གྱིས་ནོན་ཏེ། སེམས་འཁྲུགས་ནས་བརྒྱལ་བ་ལས་ཆུས་གཏོར་ཏེ། ཞག་བདུན་ལོན་

71-1-93b

པ་དང་དྲན་པ་ཕྱིར་རྙེད་དེ་ཆོ་ངེས་བཏབ་ནས་ངའི་ལྷའི་བུ་ཅིག་དེང་དུ་སྟོར་རོ་ཞེས་སྙིང་རྗེ་རྗེ་སྐད་དུ་ངུས་ནས། ངའི་ཡུལ་དང་སྲིད་ཀྱང་ཁྱོད་འབའ་ཤིག་དབང་བར་ཟད་ན་ཅིའི་ཕྱིར་ངེད་སྤངས་ཏེ་རི་དགོན་པར་ཆས་ཤེས་སྨྲེ་སྔགས་འདོན་དུ་བཅུག་པས་
ཁྱོད་ཀྱི་སྟོན་པ་གཽ་ཏ་མ་དྲིན་མི་ཤེས་ཏེ་ཅི་ལའང་མ་བལྟས་པར་ལངས་ཏེ་སོང་བས་ན་སྲི་ཞུ་མེད་པར་ཡང་མངོན་ནོ། །ཡབ་རྒྱལ་པོས་ཕོ་བྲང་བརྩིགས་ནས་ཆུང་མ་བླངས་པ་ལས་ཀྱང་ཆུང་མའི་ལས་མ་བྱས་ཏེ་མྱ་ངན་གྱིས་གདུངས་
པར་བྱས་པས་ན་ཁྲེལ་མེད་པ་ཡང་ཡིན་པར་མངོན་ནོ། །ཀུན་དགའ་བོས་དེ་སྐད་ཅེས་སྨྲས་པའི་ཚིག་དེ་དག་ཐོས་ནས་ངོ་ཚ་ཞིང་སྐྱེངས་ཏེ། བསོད་སྙོམས་བླངས་ཏེ་ཕྱིར་སངས་རྒྱས་ག་ན་བར་འོངས་ནས་ཞབས་ལ་མགོ་བོས་
ཕྱག་འཚལ་ཏེ་ཕྱོགས་གཅིག་ཏུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་ཀྱིས་བསྟན་པའི་ཆོས་ལ་ཕ་མ་ལ་སྲི་ཞུ་བགྱི་བ་ལྟ་མ་མཆིས་སམ། 
སངས་རྒྱས་ཀྱིས་ཀུན་དགའ་བོ་ལ་བཀའ་སྩལ་པ། འདི་སྐད་དུ་ཞུ་བ་འདི་ཁྱོད་ལ་སུ་ཞིག་གིས་བསྟན། ལྷ་འམ་མི་འམ། མི་མ་ཡིན་པས་བསྟན་ཏམ། འོན་ཏེ་ཁྱོད་ཉིད་ཀྱི་ཤེས་པའི་བློས་དེ་བཞིན་
གཤེགས་པ་ལ་ཞུ་བར་གྱུར་ཅེས་བཀའ་སྩལ་པ་དང་། ཀུན་དགའ་བོས་གསོལ་པ། བདག་ལ་ལྷ་འམ། ཀླུ་འམ། ཡི་དགས་སམ། མི་འམ། མི་མ་ལགས་པ་གང་གིས་ཀྱང་བསྟན་པ་མ་མཆིས་ཏེ། 
སྔ་དྲོ་བསོད་སྙོམས་སློང་དུ་མཆིས་པའི་ཤུལ་དུ་སྟོན་པ་དྲུག་གི་འཁོར་ཀུན་དུ་རྒྱུ་གཅེར་བུ་པ་གཅིག་དང་མཇལ་བ་དང་། བདག་ལ་ཚིག་རྩུབ་མོ་དག་མཆིའོ་ཞེས་རྒྱས་པར་གསོལ་ཏོ། །དེའི་ཚེ་བཅོམ་ལྡན་འདས་འཛུམ་
པ་མཛད་ནས་ཞལ་གྱི་སྒོ་ནས་ཁ་དོག་རྣམ་པ་དུ་མ་དང་ལྡན་པའི་འོད་བྱུང་བས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་ཚད་མེད་པ་བྱེ་བ་བརྒྱ་སྟོང་འདས་པའི་ཕ་རོལ་ན་འཇིག་རྟེན་གྱི་ཁམས་བླ་མ་མཆོག་ཅེས་བྱ་བ་སྣང་བར་

71-1-94a

བྱས་སོ། །འཇིག་རྟེན་གྱི་ཁམས་དེ་ན་སངས་རྒྱས་དགའ་བའི་རྒྱལ་པོ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་
གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ། སངས་རྒྱས་བཅོམ་ལྡན་འདས། སངས་རྒྱས་ཀྱི་ཞིང་རབ་ཏུ་བཀོད་པ་ཞེས་བྱ་བ་ན་བཞུགས་ཏེ། སངས་རྒྱས་ཀྱི་
ཞིང་དེ་ཡང་ཤིན་དུ་མཉམ་ཞིང་གཞི་བཻ་དཱུརྱ་ལས་བྱས་པ། གསེར་བཙོ་མས་ཐིག་རེའུ་བྲེས་པ། རིན་པོ་ཆེ་སྣ་བདུན་གྱི་ཤིང་བསྐྱེད་པ། ཤིང་དེ་དག་ཀྱང་མདའ་རྒྱང་ཙམ་དུ་མཐོ་བ། མེ་ཏོག་དང་། འབྲས་བུ་དང་། ཡལ་ག་དང་འདབ་
མས་ཤིན་དུ་བརྒྱན་པ། རླུང་མི་དྲག་པས་བསྐྱོད་ན་སྒྲ་སྙན་པ་འབྱུང་བ། སྒྲ་དེ་དག་སོ་སོའི་སྐྱེ་བོས་ཐོས་པས་མི་ངོམས་པ། སྐབས་སྐབས་ན་ཆུ་མིག་དང་། མཚེའུ་དང་། ཁྲུས་ཀྱི་རྫིང་བུ་ཡོད་ལ་ཡོན་ཏན་བརྒྱད་དང་ལྡན་པའི་ཆུས་
ཡོངས་སུ་གང་བ། རྫིང་གི་ཞབས་ཀྱང་གསེར་གྱི་བྱེ་མས་བརྡལ་བ། རྫིང་གི་ངོས་བཞི་ན་བསུང་དམ་པ་དང་ལྡན་པའི་མེ་ཏོག་པད་མ་དང་། པུཎ་ཌ་རི་ཀ་དང་། པཱ་རུ་ཥ་ཀ་དང་། དེ་མ་ཡིན་པའི་མེ་ཏོག་སྔོན་པོ་དང་། སེར་པོ་དང་། དམར་
པོ་དང་། དཀར་པོ་ཤིང་རྟའི་ཕང་ལོ་ཙམ་གྱིས་ཆུའི་སྟེང་ཡོངས་སུ་ཁེབས་ཏེ། ཆུ་དེའི་ནང་ན་བྱ་རྣམ་པ་སྣ་ཚོགས་ཀྱང་ཤིན་དུ་ཡིད་དུ་འོང་བའི་སྒྲ་སྙན་པ་འབྱིན་ཏོ། །རྫིང་དེའི་ནང་ན་རིན་པོ་ཆེ་སྣ་བདུན་ལས་བྱས་པའི་གྲུ་ཡོད་དེ། དེ་ན་
སེམས་ཅན་མང་པོ་འདོད་དགུར་རྩེ་ཞིང་ལོངས་སྤྱོད་དོ། །རིན་པོ་ཆེའི་ཤིང་དེ་དག་གི་བར་བར་ན་སེང་གེའི་ཁྲི་མཐོ་ཁྱད་ཀྱི་ཚད་དཔག་ཚད་གཅིག་པ་བཤམས་ནས་རིན་པོ་ཆེ་སྣ་བདུན་གྱིས་བརྒྱན་ཏེ། ལྷ་རྫས་ཀྱི་ན་བཟའ་ཁྲིའི་སྟེང་དུ་རིམ་
པར་བཏིང་བ། ལྷ་རྫས་ཀྱི་སྤོས་ཀྱི་དྲི་འཐུལ་བ། ལྷ་རྫས་ཀྱི་མེ་ཏོག་གིས་ཆལ་པར་བཀྲམ་པའི་ཁྲི་དེ་ལ་དེ་བཞིན་གཤེགས་པ་དགའ་བའི་རྒྱལ་པོ་སྐྱིལ་མོ་དཀྲུང་དུ་བཅས་ཤིང་བཞུགས་པ་ལ་བྱང་ཆུབ་སེམས་དཔའ་ཚད་མེད་པ་བྱེ་བ་

71-1-94b

བརྒྱ་སྟོང་སྙེད་མདུན་དུ་བདར་ཏེ་ཐལ་མོ་སྦྱར་བ་བཏུད་ནས་དེ་བཞིན་གཤེགས་པ་དེ་ལ་སོ་སོ་ནས་ཚིག་འཐུན་པར་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་རྒྱུ་ཅིའི་རྐྱེན་གྱིས་འོད་བཟང་པོ་ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་
དང་ལྡན་པ། རབ་ཏུ་གསལ་བ། དཔེར་མི་བཟོད་པ་འདི་ནུབ་ཕྱོགས་ལོགས་ནས་འཁོར་མང་པོ་འདི་དག་ལ་སྣང་བར་གྱུར་ཏེ། གང་ལ་འོད་ཀྱིས་རེག་པ་དེ་དག་ཐམས་ཅད་ལུས་དང་སེམས་བདེ་བར་འགྱུར་བ་དེ་ཐུགས་བརྩེ་བའི་སླད་དུ་བཅོམ་ལྡན་འདས་
ཀྱིས་བསྟན་དུ་གསོལ། དེ་ལ་བཅོམ་ལྡན་འདས་དེས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ལེགས་པར་ཉོན་ལ་ཤིན་དུ་ཡིད་ལ་ཟུང་ཤིག་དང་ཁྱོད་ལ་དགྲོལ་ཞིང་བཤད་པར་བྱའོ། །འདི་ནས་ནུབ་ཕྱོགས་ལོགས་སུ་འཇིག་རྟེན་གྱི་
ཁམས་ཚད་མེད་པ་བྱེ་བ་བརྒྱ་སྟོང་འདས་པའི་ཕ་རོལ་ན་སངས་རྒྱས་ཀྱི་ཞིང་མི་མཇེད་ཅེས་བྱ་བ་ཡོད་དེ། དེ་ན་སངས་རྒྱས་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་
ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ། སངས་རྒྱས་བཅོམ་ལྡན་འདས་ཤེས་བྱ་བ་འཁོར་མང་པོས་ཡོངས་སུ་བསྐོར་ནས། འཁོར་མང་པོ་ཐམས་ཅད་
ལ་ཐབས་མཁས་པ་ཆེན་པོ་དྲིན་ལན་བསབ་པའི་མདོ་སྡེ་སྟོན་ཅིང་། སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར། སེམས་ཅན་ཐམས་ཅད་ཀྱི་ལོག་པར་ལྟ་བའི་ཟུག་རྔུ་རྩ་ནས་གདོན་པའི་ཕྱིར། སེམས་ཐོག་མ་པའི་བྱང་ཆུབ་
སེམས་དཔའ་དག་བྱང་ཆུབ་ཀྱི་ལམ་ལས་ཕྱིར་མི་ལྡོག་ཅིང་བརྟན་པར་བྱ་བའི་ཕྱིར། ཉན་ཐོས་དང་རང་སངས་རྒྱས་ཐམས་ཅད་མཐར་ཕྱིན་པའི་ཐེག་པ་གཅིག་གི་ལམ་ལ་དགོད་པའི་ཕྱིར། བྱང་ཆུབ་སེམས་དཔའ་ཆེན་པོ་རྣམས་མྱུར་དུ་
མངོན་པར་བྱང་ཆུབ་ཅིང་སངས་རྒྱས་ཀྱི་དྲིན་ལན་བསབ་པའི་ཕྱིར་སེམས་ཅན་ཐམས་ཅད་ཀྱིས་དྲིན་ལྕི་བ་དྲན་པར་བྱ་བའི་ཕྱིར། སེམས་ཅན་ཐམས་ཅད་སྡུག་བསྔལ་གྱི་རྒྱ་མཚོ་ལས་བསྒྲལ་བའི་ཕྱིར་སོ་སོའི་སྐྱེ་བོ་མཐའ་དག་ཕ་མ་དག་

71-1-95a

ལ་སྲི་ཞུ་བྱ་བར་འདོད་པའི་ཕྱིར་འོད་འདི་སྣང་བར་གྱུར་པ་ཡིན་ནོ། །དེའི་ཚེ་འཁོར་དེའི་ནང་ན་བྱང་ཆུབ་སེམས་དཔའ་འཁོར་མང་པོའི་གཙོ་བོ་དང་སྟོན་པར་གྱུར་པ་སྟོང་ཕྲག་བཅུ་སྙེད་སྟན་ལས་ལངས་ཏེ། བླ་གོས་ཕྲག་པ་
གཅིག་ཏུ་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱི་བྱིན་གྱི་བརླབས་ཀྱིས་བདག་ཅག་རྣམས་མི་མཇེད་ཀྱི་འཇིག་རྟེན་གྱི་ཁམས་དེར་མཆི་ཞིང་། དེ་བཞིན་གཤེགས་
པ་ཤཱཀྱ་ཐུབ་པ་ལ་མཆོད་པ་དང་། བསྙེན་བཀུར་བགྱི་བ་དང་། ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་དམ་པ་ཉན་ཅིང་མཆི་བར་བྱིན་གྱིས་བརླབ་ཏུ་གསོལ། དེ་ནས་སངས་རྒྱས་དེས་བྱང་ཆུབ་སེམས་དཔའ་དེ་རྣམས་ལ་འདི་སྐད་
ཅེས་བཀའ་སྩལ་ཏོ། །རིགས་ཀྱི་བུ་དག་ཁྱེད་མི་མཇེད་ཀྱི་འཇིག་རྟེན་གྱི་ཁམས་དེར་ཕྱིན་ནས་སངས་རྒྱས་བཅོམ་ལྡན་འདས་དེ་ལ་མཆོད་ཅིང་བཀུར་སྟི་བྱ་བ་དང་། ཤིན་དུ་ཕྲད་པར་དཀའ་བའི་འདུ་ཤེས་བསྐྱེད་པར་བྱའོ། །དེ་ཅིའི་ཕྱིར་ཞེ་ན། སངས་རྒྱས་
ཤཱཀྱ་ཐུབ་པ་ནི་བསྐལ་པ་གྲངས་མེད་པ་བྱེ་བ་ཁྲག་ཁྲིག་གི་བར་དུ་ཤིན་དུ་སྤྱད་དཀའ་བ་སྤྱད་དེ། སྙིང་རྗེ་ཆེན་པོས་སྨོན་ལམ་འདི་སྐད་ཅེས་བཏབ་བོ། །གལ་ཏེ་མངོན་པར་སངས་རྒྱས་པ་ན་འཇིག་རྟེན་གྱི་ཁམས་སྡིག་པ་ཅན་རི་དང་། ཤང་ཤོང་དང་གྱོ་མོ་
དང་། གསེག་མ་དང་། ཚེར་མ་ལ་སོགས་པ་ཡོད་པའི་གནས་སུ་སེམས་ཅན་དག་ཀྱང་ཉོན་མོངས་པ་དང་བཅས་པ། མཚམས་མེད་པ་ལྔ་དང་། མི་དགེ་བ་བཅུ་རྫོགས་པར་སྤྱོད་པའི་གནས་དེར་མངོན་པར་རྫོགས་པར་སངས་རྒྱས་ཏེ། 
ཕན་པ་དང་བདེ་བའི་དོན་དུ་སྡུག་བསྔལ་ཐམས་ཅད་ཡོངས་སུ་སྤྱད་དེ། བདེ་བ་ཐམས་ཅད་དང་ཡོངས་སུ་ལྡན་པར་བྱས་ནས་ཆོས་ཀྱི་སྐུ་ཡོངས་སུ་རྫོགས་ཤིང་ལྷག་མ་མ་ལུས་པའི་མྱ་ངན་ལས་འདས་པར་གྱུར་ཅིག་ཅེས་སྨོན་ལམ་
དུ་བཏབ་བོ། །སངས་རྒྱས་བཅོམ་ལྡན་འདས་དེས་ཐོག་མ་དེ་སྐད་ཅེས་སྨོན་ལམ་བཏབ་པས་ཁྱེད་རྣམས་འཇིག་རྟེན་གྱི་ཁམས་དེར་ཕྱིན་ནས་ཇི་ལྟར་སངས་རྒྱས་ཉིད་གཤེགས་པ་དང་། ཇི་ལྟར་སངས་རྒྱས་ཉིད་བཞུགས་པ་དང་འདྲ་

71-1-95b

བར་གནས་པར་བྱའོ་ཞེས་བཀའ་སྩལ་པ་དང་། བྱང་ཆུབ་སེམས་དཔའ་དེ་དག་ཐམས་ཅད་ཀྱིས་ཚིག་འཐུན་པར་བཅོམ་ལྡན་འདས་ཀྱི་བཀའ་བཞིན་དུ་བགྱིའོ་ཞེས་གསོལ་ནས་བྱང་ཆུབ་སེམས་དཔའ་དེ་དག་རེ་རེ་ཡང་འཁོར་བྱང་ཆུབ་སེམས་
དཔའ་བྱེ་བ་ཁྲག་ཁྲིག་བརྒྱ་སྟོང་སྙེད་ཀྱིས་ཡོངས་སུ་བསྐོར་ཏེ་མི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་སོང་ངོ་། །དེ་དག་འཇིག་རྟེན་གྱི་ཁམས་གང་དང་གང་དུ་ཕྱིན་པར་འཇིག་རྟེན་གྱི་ཁམས་དེ་དག་རྣམ་པ་དྲུག་ཏུ་གཡོས་ཏེ། འོད་ཟེར་ཆེན་
པོ་ཡང་ཀུན་དུ་སྣང་བར་གྱུར། སྟེང་གི་བར་སྣང་ལས་ལྷ་རྣམས་ཀྱིས་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་ཡང་ཆར་བཞིན་ཕབ་བོ། །འོད་ཟེར་ཆེན་པོས་སྣང་བར་བྱས་ཤིང་རྫུ་འཕྲུལ་གྱིས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་
སྙེད་དག་ཀྱང་གཡོས་སོ། །དེ་མ་ཡིན་པ་གཞན་ཡང་ལྷ་རྫས་ཀྱི་རོལ་མོ་ཚད་མེད་པ་བརྒྱ་སྟོང་སྙེད་ཀྱང་སྟེང་གི་བར་སྣང་ལ་མ་དཀྲོལ་བར་རང་ཟེར་བཞིན་དུ་བྱང་ཆུབ་སེམས་དཔའ་དེ་དག་བྱ་རྒོད་སྤུངས་པའི་རི་ག་ལ་བ་དེར་དེ་བཞིན་གཤེགས་
པའི་སྤྱན་སྔར་ལྷགས་ནས་ཞབས་ལ་མགོ་བོས་ཕྱག་འཚལ་ཏེ། སངས་རྒྱས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །དེའི་ཚེ་དེ་བཞིན་གཤེགས་པར་ཤཱཀྱ་ཐུ་པ་བས་ཁ་དོག་རྣམ་པ་ལྔ་དང་ལྡན་པའི་འོད་ཟེར་གྱིས་
ནུབ་ཕྱོགས་ལོགས་སུ་སངས་རྒྱས་ཀྱི་ཞིང་ཚད་མེད་པ་བྱེ་བ་ཁྲག་ཁྲིག་བརྒྱད་སྟོང་འདས་པའི་ཕ་རོལ་ན་འཇིག་རྟེན་གྱི་ཁམས་དག་པའི་ཤེས་བྱ་བ་སྣང་བར་བྱས་སོ། །འཇིག་རྟེན་གྱི་ཁམས་དེ་ན་སངས་རྒྱས་ཀྱི་མཚན་ཉི་ཟླ་མར་མེའི་
འོད་ཅེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། 
སྟོན་པ་རྒྱལ་བ། སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་བདེ་བ་ཅན་ཞེས་བྱ་བ་ན་བཞུགས་ཏེ། སངས་རྒྱས་ཀྱི་ཞིང་དེ་ཡང་ཤིན་དུ་མཉམ་ཞིང་གཞི་བེ་དཱུརྱ་ལས་བྱས་པ། གསེར་བཙོ་མས། ཐིག་རེའུ་བྲེས་པ། 

71-1-96a

རིན་པོ་ཆེ་སྣ་བདུན་གྱི་ཤིང་བསྐྱེད་པ། ཤིང་དེ་དག་ཀྱང་མདའ་རྒྱང་གང་ཙམ་དུ་མཐོ་བ། མེ་ཏོག་དང་། འབྲས་བུ་དང་། ཡལ་ག་དང་། མདབ་མས་ཤིན་དུ་བརྒྱན་པ། རླུང་མི་དྲག་པས་བསྐྱོད་པས་སྒྲ་སྙན་པ་འབྱུང་བ། སྒྲ་དེ་
དག་སོ་སོའི་སྐྱེ་བོས་ཐོས་པས་མི་ངོམས་པ། སྐབས་སྐབས་ན་ཆུ་མིག་དང་། མཚེའུ་དང་། ཁྲུས་ཀྱི་རྫིང་བུ་ཡོད་ལ་ཡོན་ཏན་བརྒྱད་དང་ལྡན་པའི་ཆུས་ཡོངས་སུ་གང་ཞིང་། རྫིང་གི་ཞབས་ཀྱང་གསེར་གྱི་བྱེ་མས་བརྡལ་བ། རྫིང་གི་ངོས་
བཞི་ན་བསུང་དམ་པ་དང་ལྡན་པའི་མེ་ཏོག་པད་མ་དང་། པུཎ་ཌ་རི་ཀ་དང་། པཱ་རུ་ཥ་ཀ་དང་། དེ་མ་ཡིན་པའི་མེ་ཏོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་ཤིང་རྟའི་ཕང་ལོ་ཙམ་ཆུའི་སྟེང་ཡོངས་སུ་ཁེབས་ཏེ། ཆུའི་ནང་ན་ཡང་
བྱ་རྣམ་པ་སྣ་ཚོགས་ཀྱང་ཤིན་དུ་ཡིད་ཏུ་འོང་བའི་སྒྲ་སྙན་པ་འབྱིན་ཏོ། །རྫིང་དེའི་ནང་ན་རིན་པོ་ཆེ་སྣ་བདུན་ལས་བྱས་པའི་གྲུ་ཡོད་དེ། དེ་ན་སེམས་ཅན་མང་པོ་འདོད་དགུར་རྩེ་ཞིང་ལོངས་སྤྱོད་དོ། །རིན་པོ་ཆེའི་ཤིང་དེ་དག་གི་བར་བར་ན་སེང་གེའི་
ཁྲི་མཐོ་ཁྱད་ཀྱི་ཚད་དཔག་ཚད་གཅིག་པ་བཤམས་ནས་རིན་པོ་ཆེ་སྣ་བདུན་གྱིས་བརྒྱན་པ། ལྷ་རྫས་ཀྱི་ན་བཟའ་ཁྲིའི་སྟེང་དུ་རིམ་པར་བཏིང་བ། ལྷ་རྫས་ཀྱི་སྤོས་ཀྱི་དྲི་འཐུལ་བ། ལྷ་རྫས་ཀྱི་མེ་ཏོག་གི་ཆལ་པར་བཀྲམ་པའི་ཁྲི་དེ་ལ་དེ་
བཞིན་གཤེགས་པ་ཉི་ཟླ་མར་མེའི་འོད་སྐྱིལ་མོ་དཀྲུང་བཅས་ཤིང་བཞུགས་པ་ལ་བྱང་ཆུབ་སེམས་དཔའ་ཚད་མེད་པ་བྱེ་བ་བརྒྱ་སྟོང་སྙེད་མདུན་དུ་བདར་ཏེ་ཐལ་མོ་སྦྱར་བ་བཏུད་ནས་དེ་བཞིན་གཤེགས་པ་དེ་ལ་སོ་སོ་ནས་ཚིག་འཐུན་པར་འདི་སྐད་
ཅེས་གསོལ་ཏོ། །བཅོམ་ལྡན་འདས་ཅིའི་རྒྱུ་ཅིའི་རྐྱེན་གྱིས་འོད་བཟང་པོ་ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོར་བཅས་པ་དང་ལྡན་པ། རབ་ཏུ་གསལ་བ། དཔེར་མི་བཟོད་པ་འདི་ཤར་ཕྱོགས་ལོགས་
ནས་འཁོར་མང་པོ་འདི་དག་སྣང་བར་གྱུར་ཏེ། གང་ལ་འོད་ཀྱིས་རེག་པ་དེ་དག་ཐམས་ཅད་ལུས་དང་། སེམས་བདེ་བར་གྱུར་པ་ཐུགས་བརྩེ་བའི་སླད་དུ་བཅོམ་ལྡན་འདས་ཀྱིས་བསྟན་དུ་གསོལ། དེ་ནས་བཅོམ་ལྡན་འདས་དེས་འདི་སྐད་

71-1-96b

ཅེས་བཀའ་སྩལ་ཏོ། །རིགས་ཀྱི་བུ་ལེགས་པར་ཉོན་ལ་ཤིན་དུ་ཡིད་ལ་ལེགས་པར་ཟུང་ཤིག་དང་། ཁྱེད་དགྲོལ་བར་བཤད་པར་བྱའོ། །འདི་ནས་ཤར་ཕྱོགས་ལོགས་སུ་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་འདས་པའི་
ཕ་རོལ་ན་སངས་རྒྱས་ཀྱི་ཞིང་མི་མཇེད་ཅེས་བྱ་བ་ཡོད་དེ། དེ་ན་སངས་རྒྱས་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་། ཞབས་སུ་ལྡན་པ། བདེ་བར་གཤེགས་པ། 
འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ། སངས་རྒྱས་བཅོམ་ལྡན་འདས་ཤེས་བྱ་བ་འཁོར་མང་པོས་ཡོངས་སུ་བསྐོར་ནས། འཁོར་མང་པོ་ཐམས་ཅད་ལ་ཐབས་མཁས་པ་ཆེན་པོ་
ལན་བསབ་པའི་མདོ་སྡེ་སྟོན་ཅིང་། སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར་སེམས་ཅན་ཐམས་ཅད་ཀྱི་ལོག་པར་ལྟ་བའི་ཟུག་རྔུ་རྩ་ནས་འདོན་པའི་ཕྱིར། སེམས་ཐོག་མ་པའི་བྱང་ཆུབ་སེམས་དཔའ་དག་
བྱང་ཆུབ་ཀྱི་ལམ་ལས་མི་ལྡོག་ཅིང་བརྟན་པར་བྱ་བའི་ཕྱིར། ཉན་ཐོས་དང་རང་སངས་རྒྱས་ཐམས་ཅད་མཐར་ཕྱིན་པའི་ཐེག་པ་གཅིག་གི་ལམ་ལ་དགོད་པའི་ཕྱིར། བྱང་ཆུབ་སེམས་དཔའ་ཆེན་པོ་རྣམས་མྱུར་དུ་མངོན་པར་བྱང་
ཆུབ་ཅིང་སངས་རྒྱས་ཀྱི་དྲིན་ལན་བསབ་པའི་ཕྱིར། སེམས་ཅན་ཐམས་ཅད་ཀྱིས་དྲིན་ལྕི་བ་དྲན་པར་བྱ་བའི་ཕྱིར། སེམས་ཅན་ཐམས་ཅད་སྡུག་བསྔལ་གྱི་རྒྱ་མཚོ་ལས་བསྒྲལ་བའི་ཕྱིར། སོ་སོའི་སྐྱེ་བོ་དག་ཕ་མ་ལ་སྲི་ཞུ་བྱ་
བར་འདོད་པའི་ཕྱིར་འོད་འདི་སྣང་བར་གྱུར་པ་ཡིན་ནོ། །དེའི་ཚེ་འཁོར་དེའི་ནང་ན་བྱང་ཆུབ་སེམས་དཔའ་འཁོར་མང་པོའི་གཙོ་བོ་དང་སྟོན་པར་གྱུར་པ་སྟོང་ཕྲག་བཅུ་སྙེད་སྟན་ལས་ལངས་ཏེ། བླ་གོས་ཕྱོགས་གཅིག་ཏུ་བྱས་ནས་
པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱི་བྱིན་གྱི་བརླབས་ཀྱིས་བདག་ཅག་རྣམས་མི་མཇེད་ཀྱི་འཇིག་རྟེན་གྱི་ཁམས་དེར་མཆི་ཞིང་དེ་བཞིན་གཤེགས་པ་ཤཱཀྱ་ཐུབ་པ་

71-1-97a

ལ་མཆོད་པ་དང་། བསྙེན་བཀུར་བགྱི་བ་དང་། ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་སྡེ་དམ་པ་ཉན་ཅིང་མཆི་བར་བྱིན་གྱིས་བརླབ་ཏུ་གསོལ། དེ་ནས་སངས་རྒྱས་དེས་བྱང་ཆུབ་སེམས་དཔའ་
དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཁྱེད་མི་མཇེད་ཀྱི་འཇིག་རྟེན་གྱི་ཁམས་དེར་ཕྱིན་ནས་སངས་རྒྱས་བཅོམ་ལྡན་འདས་དེ་ལ་མཆོད་པ་དང་བཀུར་སྟི་བྱ་བ་དང་། ཤིན་དུ་ཕྲད་དཀའ་བའི་འདུ་ཤེས་བསྐྱེད་པར་བྱའོ། །
དེ་ཅིའི་ཕྱིར་ཞེ་ན། སངས་རྒྱས་ཤཱཀྱ་ཐུབ་པ་ནི་བསྐལ་པ་གྲངས་མེད་པ་བྱེ་བ་ཁྲག་ཁྲིག་གི་བར་དུ་ཤིན་དུ་སྤྱད་དཀའ་བ་སྤྱད་དེ་སྙིང་རྗེ་ཆེན་པོས་སྨོན་ལམ་འདི་སྐད་ཅེས་བཏབ་བོ། །གལ་ཏེ་མངོན་པར་སངས་རྒྱས་པ་ན་
འཇིག་རྟེན་གྱི་ཁམས་སྡིག་པ་ཅན། རི་དང་། ཤང་ཤོང་དང་། གྱོ་མོ་དང་། གསེག་མ་དང་། ཚེར་མ་ལ་སོགས་པ་ཡོད་པའི་གནས་སུ་སེམས་ཅན་དག་ཀྱང་ཉོན་མོངས་པ་དང་བཅས་པ་མཚམས་མེད་ལྔ་དང་། མི་དགེ་
བ་བཅུ་རྫོགས་པར་སྤྱོད་པའི་གནས་དེར་མངོན་པར་སངས་རྒྱས་ཏེ། ཕན་པ་དང་བདེ་བའི་དོན་དུ་སྡུག་བསྔལ་ཐམས་ཅད་ཡོངས་སུ་བཅད་དེ། བདེ་བ་ཐམས་ཅད་དང་ལྡན་པར་བྱས་ནས་ཆོས་ཀྱི་སྐུ་ཡོངས་སུ་རྫོགས་ཤིང་ལྷག་མ་
མ་ལུས་པའི་མྱ་ངན་ལས་འདས་པར་གྱུར་ཅིག་ཅེས་སྨོན་ལམ་བཏབ་བོ། །སངས་རྒྱས་བཅོམ་ལྡན་འདས་དེས་ཐོག་མ་དེ་སྐད་ཅེས་སྨོན་ལམ་བཏབ་པས་ཁྱེད་རྣམས་འཇིག་རྟེན་གྱི་ཁམས་དེར་ཕྱིན་ནས་ཇི་ལྟར་སངས་རྒྱས་ཉིད་གཤེགས་
པ་དང་། ཇི་ལྟར་སངས་རྒྱས་ཉིད་བཞུགས་པ་དང་འདྲ་བར་བྱའོ། །ཞེས་བཀའ་སྩལ་པ་དང་། བྱང་ཆུབ་སེམས་དཔའ་དེ་དག་ཐམས་ཅད་ཀྱིས་ཚིག་འཐུན་པར། བཅོམ་ལྡན་འདས་ཀྱི་བཀའ་བཞིན་དུ་བགྱིའོ་
ཞེས་གསོལ་ནས། བྱང་ཆུབ་སེམས་དཔའ་དེ་དག་རེ་རེ་ཡང་འཁོར་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་སྙེད་ཀྱིས་ཡོངས་སུ་བསྐོར་ཏེ་མི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་སོང་སྟེ། །དེ་དག་འཇིག་རྟེན་གྱི་

71-1-97b

ཁམས་གང་དང་གང་དུ་ཕྱིན་པར་འཇིག་རྟེན་གྱི་ཁམས་དེ་དག་རྣམ་པ་དྲུག་ཏུ་གཡོས་ཏེ། འོད་ཟེར་ཆེན་པོ་ཀུན་དུ་སྣང་བར་གྱུར། སྟེང་གི་བར་སྣང་ལས་ལྷ་རྣམས་ཀྱིས་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་ཡང་ཆར་བཞིན་ཕབ་བོ། །
འོད་ཟེར་ཆེན་པོས་སྣང་བར་བྱས་ཤིང་། རྫུ་འཕྲུལ་གྱིས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ཀྱང་གཡོས་སོ། །དེ་མ་ཡིན་པའི་གཞན་ཡང་ལྷ་རྫས་ཀྱི་རོལ་མོ་ཚད་མེད་པ་བརྒྱ་སྟོང་སྙེད་ཀྱང་སྟེང་གི་བར་སྣང་ལ་མ་དཀྲོལ་བར་རང་
ཟེར་བཞིན་དུ་བྱང་ཆུབ་སེམས་དཔའ་དེ་དག་ཀྱང་བྱ་རྒོད་སྤུངས་པའི་རི་ག་ལ་བ་དེར་དེ་བཞིན་གཤེགས་པའི་སྤྱན་སྔར་ལྷགས་ནས་ཞབས་ལ་མགོ་བོས་ཕྱག་འཚལ་ཏེ། སངས་རྒྱས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །
དེའི་ཚེ་དེ་བཞིན་གཤེགས་པ་ཤཱཀྱ་ཐུབ་པས་ཁ་དོག་རྣམ་པ་ལྔ་དང་ལྡན་པའི་འོད་ཟེར་གྱིས་བྱང་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་ལྔ་བརྒྱ་འདས་བའི་ཕ་རོལ་ན་འཇིག་རྟེན་གྱི་ཁམས་དབང་ཕྱུག་གྲགས་པའི་རྒྱལ་པོ་ཞེས་
བྱ་བ་སྣང་བར་བྱས་སོ། །འཇིག་རྟེན་གྱི་ཁམས་དེ་ན་སངས་རྒྱས་པད་མོ་ལེ་བརྒན་གྱི་འོད་ཅེས་བྱ་བ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་། ཞབས་སུ་ལྡན་པ། བདེ་བར་
གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། སྟོན་པ་རྒྱལ་བ། སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་དྲི་མ་དང་བྲལ་བ་ཞེས་བྱ་བ་ན་བཞུགས་ཏེ། སངས་རྒྱས་ཀྱི་ཞིང་
དེ་ཡང་ཤིན་དུ་མཉམ་ཞིང་གཞི་བཻ་དཱུརྱ་ལས་བྱས་པ། གསེར་བཙོ་མས་ཐིག་རེའུ་བྲེས་པ། རིན་པོ་ཆེ་སྣ་བདུན་གྱི་ཤིང་བསྐྱེད་པ། ཤིང་དེ་དག་ཀྱང་མདའ་རྒྱང་གང་ཙམ་དུ་མཐོ་བ། མེ་ཏོག་དང་། འབྲས་བུ་དང་། ཡལ་ག་དང་། 
འདབ་མས་ཤིན་དུ་བརྒྱན་པ། རླུང་མི་དྲག་པས། བསྐྱོད་པས་སྒྲ་སྙན་པ་འབྱུང་བ། སྒྲ་དེ་དག་སོ་སོའི་སྐྱེ་བོས་ཐོས་ན་མི་ངོམས་པ། སྐབས་སྐབས་ན་ཆུ་མིག་དང་། མཚེའུ་དང་། ཁྲུས་ཀྱི་རྫིང་བུ་ཡོད་ལ། ཡོན་ཏན་བརྒྱད་དང་

71-1-98a

ལྡན་པའི་ཆུས་ཡོངས་སུ་གང་ཞིང་རྫིང་གི་ཞབས་ཀྱང་གསེར་གྱི་བྱེ་མས་བརྡལ་བ། རྫིང་གི་ངོས་བཞི་ན་བསུང་དམ་པ་དང་ལྡན་པའི་མེ་ཏོག་པད་མ་དང་། པུཎ་ཌ་རི་ཀ་དང་། པཱ་རུ་ཥ་ཀ་དང་། དེ་མ་ཡིན་པའི་མེ་ཏོག་སྔོན་
པོ་དང་། སེར་པོ་དང་། དམར་པོ་དང་། དཀར་པོ་ཤིང་རྟའི་ཕང་ལོ་ཙམ་དུ་ཆུའི་སྟེང་ཡོངས་སུ་ཁེབས་ཏེ། ཆུའི་ནང་ན་བྱ་རྣམ་པ་སྣ་ཚོགས་ཀྱང་ཤིན་དུ་ཡིད་ཏུ་འོང་བའི་སྒྲ་སྙན་པ་འབྱིན་ཏོ། །རྫིང་དེའི་ནང་ན་རིན་པོ་ཆེ་སྣ་བདུན་ལས་བྱས་
པའི་གྲུ་ཡོད་དེ། དེ་ན་སེམས་ཅན་མང་པོ་འདོད་དགུར་རྩེ་ཞིང་ལོངས་སྤྱོད་དོ། །རིན་པོ་ཆེའི་ཤིང་དེ་དག་གི་བར་བར་ན་སེང་གེའི་ཁྲི་མཐོ་ཁྱད་དཔག་ཚད་གཅིག་པ་བཤམས་ནས་རིན་པོ་ཆེ་སྣ་བདུན་གྱིས་བརྒྱན་ཏེ། ལྷ་རྫས་ཀྱི་ན་བཟས་
ཁྲིའི་སྟེང་དུ་རིམ་པར་བཏིང་བ། ལྷ་རྫས་ཀྱི་སྤོས་ཀྱི་དྲི་འཐུལ་བ། ལྷ་རྫས་ཀྱི་མེ་ཏོག་གི་ཆལ་པར་བཀྲམ་པའི་ཁྲིའི་ཐོག་ན། དེ་བཞིན་གཤེགས་པ་པད་མོའི་ལེ་བརྒན་གྱི་འོད་ཆགས་པ།	 སྐྱིལ་མོའི་དཀྲུང་དུ་བཅས་
ཤིང་བཞུགས་པ་ལ་བྱང་ཆུབ་སེམས་དཔའ་ཚད་མེད་པ་བྱེ་བ་བརྒྱ་སྟོང་སྙེད་མདུན་དུ་དངར་ཏེ་ཐལ་མོ་སྦྱར་བ་བཏུད་ནས། དེ་བཞིན་གཤེགས་པ་དེ་ལ་སོ་སོ་ནས་ཚིག་འཐུན་པར་འདི་སྐད་ཅེས་གསོལ་ཏོ། །བཅོམ་ལྡན་འདས་
ཅིའི་རྒྱུ་ཅིའི་རྐྱེན་གྱིས་འོད་བཟང་པོ་ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོར་བཅས་པ་དང་ལྡན་པ། རབ་ཏུ་གསལ་བ། དཔེར་མི་བཟོད་པ་འདི་ལྷོ་ཕྱོགས་ལོགས་ནས་འཁོར་མང་པོ་འདི་
དག་ལ་སྣང་སྣང་བར་གྱུར་ཏེ། གང་ལ་འོད་ཀྱིས་རེག་པ་དེ་དག་ཐམས་ཅད་ལུས་དང་སེམས་བདེ་བར་འགྱུར་པ་ཐུགས་བརྩེ་བའི་སླད་དུ་བཅོམ་ལྡན་འདས་ཀྱིས་བསྟན་དུ་གསོལ། དེ་ལ་བཅོམ་ལྡན་འདས་དེས་འདི་སྐད་ཅེས་
བཀའ་སྩལ་ཏོ། །རིགས་ཀྱི་བུ་དག་ལེགས་པར་ཉོན་ལ་ཤིན་དུ་ཡིད་ལ་ཟུང་ཤིག་དང་། ཁྱེད་ལ་དགྲོལ་ཞིང་བཤད་པར་བྱའོ། །འདི་ནས་ལྷོ་ཕྱོགས་ལོགས་སུ་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་འདས་པའི་ཕ་རོལ་

71-1-98b

ན་སངས་རྒྱས་ཀྱི་ཞིང་མི་མཇེད་ཅེས་བྱ་བ་ཡོད་དེ། དེ་ན་སངས་རྒྱས་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་། ཞབས་སུ་ལྡན་པ། བདེ་བར་
གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། སྟོན་པ་རྒྱལ་བ། སངས་རྒྱས་བཅོམ་ལྡན་འདས་ཤེས་བྱ་བ་འཁོར་མང་པོས་ཡོངས་སུ་བསྐོར་ནས། འཁོར་མང་པོ་
ཐམས་ཅད་ལ་ཐབས་མཁས་པ་ཆེན་པོ་དྲིན་ལན་བསབ་པའི་མདོ་སྡེ་སྟོན་ཅིང་། སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར། སེམས་ཅན་ཐམས་ཅད་ཀྱི་ཟུག་རྔུ་རྩ་ནས་གདོན་པའི་ཕྱིར། སེམས་ཐོག་མ་པའི་བྱང་
ཆུབ་སེམས་དཔའ་དག་བྱང་ཆུབ་ལས་ཕྱིར་མི་ལྡོག་ཅིང་བརྟན་པར་བྱ་བའི་ཕྱིར། ཉན་ཐོས་དང་རང་སངས་རྒྱས་ཐམས་ཅད་མཐར་ཕྱིན་པའི་ཐེག་པ་གཅིག་ལ་དགོད་པའི་ཕྱིར། བྱང་ཆུབ་སེམས་དཔའ་ཆེན་པོ་རྣམས་མྱུར་དུ་མངོན་པར་བྱང་
ཆུབ་ཅིང་སངས་རྒྱས་ཀྱི་དྲིན་ལན་བསབ་པའི་ཕྱིར། སེམས་ཅན་ཐམས་ཅད་ཀྱིས་དྲིན་ལྕི་བ་དྲན་པར་བྱ་བའི་ཕྱིར། སེམས་ཅན་ཐམས་ཅད་སྡུག་བསྔལ་གྱི་རྒྱ་མཚོ་ལས་བསྒྲལ་བའི་ཕྱིར། སོ་སོའི་སྐྱེ་བོ་དག་ཕ་མ་ལ་
སྲི་ཞུ་བྱ་བར་འདོད་པའི་ཕྱིར་འོད་འདི་སྣང་བར་གྱུར་པ་ཡིན་ནོ། །དེའི་ཚེ་འཁོར་དེའི་ནང་ན་བྱང་ཆུབ་སེམས་དཔའ་འཁོར་མང་པོའི་ནང་ན། གཙོ་བོ་དང་སྟོན་པར་གྱུར་པ། སྟོང་ཕྲག་བཅུ་སྙེད་སྟན་ལས་ལངས་པར་གྱུར་ནས། 
བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱི་བྱིན་གྱི་བརླབས་ཀྱིས་བདག་ཅག་རྣམས་མི་མཇེད་ཀྱི་འཇིག་རྟེན་
གྱི་ཁམས་དེར་མཆི་ཞིང་དེ་བཞིན་གཤེགས་པ། ཤཱཀྱ་ཐུབ་པ་ལ་མཆོད་པ་དང་། བསྙེན་བཀུར་བགྱི་བ་དང་ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་སྡེ་དམ་པ་ཉན་ཅིང་མཆི་བར་བྱིན་གྱིས་

71-1-99a

བརླབ་ཏུ་གསོལ། དེ་ནས་སངས་རྒྱས་དེས་བྱང་ཆུབ་སེམས་དཔའ་རྣམས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཁྱེད་མི་མཇེད་ཀྱི་འཇིག་རྟེན་གྱི་ཁམས་དེར་ཕྱིན་ནས་སངས་རྒྱས་བཅོམ་ལྡན་
འདས་དེ་ལ་མཆོད་ཅིང་བཀུར་སྟི་བྱ་བ་དང་། ཤིན་དུ་ཕྲད་དཀའ་བའི་འདུ་ཤེས་བསྐྱེད་པར་བྱའོ། །དེ་ཅིའི་ཕྱིར་ཞེ་ན། སངས་རྒྱས་ཤཱཀྱ་ཐུབ་པ་ནི་བསྐལ་པ་གྲངས་མེད་པ་བྱེ་བ་ཁྲག་ཁྲིག་གི་བར་དུ་ཤིན་དུ་སྤྱད་དཀའ་བ་
སྤྱད་པས། སྙིང་རྗེ་ཆེན་པོས་སྨོན་ལམ་འདི་སྐད་ཅེས་བཏབ་པོ། །གལ་ཏེ་མངོན་པར་སངས་རྒྱས་པ་ན། འཇིག་རྟེན་གྱི་ཁམས་སྡིག་པ་ཅན། རི་དང་། ཤང་ཤོང་དང་། གྱོ་མོ་དང་། གསེག་མ་དང་
ཚེར་མ་ལ་སོགས་པ་ཡོད་པའི་གནས་སུ་སེམས་ཅན་དག་ཀྱང་ཉོན་མོངས་པ་དང་བཅས་པ། མཚམས་མེད་པ་ལྔ་དང་། མི་དགེ་བ་བཅུ་རྫོགས་པར་སྤྱོད་པའི་གནས་དེར་མངོན་པར་སངས་རྒྱས་ཏེ། ཕན་པ་དང་བདེ་
བའི་དོན་དུ་སྡུག་བསྔལ་ཐམས་ཅད་ཡོངས་སུ་བཅད་དེ། བདེ་བ་ཐམས་ཅད་དང་ལྡན་པར་བྱས་ནས་ཆོས་ཀྱི་སྐུ་ཡོངས་སུ་རྫོགས་ཤིང་། ལྷག་མ་མ་ལུས་པའི་མྱ་ངན་ལས་འདས་པར་གྱུར་ཅིག་ཅེས་སྨོན་ལམ་བཏབ་བོ། །
སངས་རྒྱས་བཅོམ་ལྡན་འདས་དེས་ཐོག་མ་དེ་སྐད་ཅེས་སྨོན་ལམ་བཏབ་པས། ཁྱེད་རྣམས་འཇིག་རྟེན་གྱི་ཁམས་དེར་ཕྱིན་ནས། ཇི་ལྟར་སངས་རྒྱས་ཉིད་གཤེགས་པ་དང་། ཇི་ལྟར་སངས་རྒྱས་ཉིད་བཞུགས་པ་དང་འདྲ་
བར་གནས་པར་བྱའོ་ཞེས་བཀའ་སྩལ་པ་དང་། བྱང་ཆུབ་སེམས་དཔའ་དེ་དག་ཐམས་ཅད་ཀྱིས་ཚིག་འཐུན་པར་བཅོམ་ལྡན་འདས་ཀྱི་བཀའ་བཞིན་དུ་བགྱིའོ་ཞེས་གསོལ་ནས། བྱང་ཆུབ་སེམས་དཔའ་དེ་དག་རེ་རེ་
ཡང་འཁོར་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་སྙེད་ཀྱིས་ཡོངས་སུ་བསྐོར་ཏེ། མི་མཇེད་གྱི་འཇིག་རྟེན་གྱི་ཁམས་གང་ན་བ་དེར་དོང་སྟེ། དེ་དག་འཇིག་རྟེན་གྱི་ཁམས་གང་དང་གང་དུ་ཕྱིན་པར་འཇིག་

71-1-99b

རྟེན་གྱི་ཁམས་དེ་དག་རྣམ་པ་དྲུག་ཏུ་གཡོས་ཏེ། འོད་ཟེར་ཆེན་པོ་ཡང་ཀུན་དུ་སྣང་བར་གྱུར། སྟེང་གི་བར་སྣང་ལས་ལྷ་རྣམས་ཀྱིས་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་ཡང་ཆར་བཞིན་ཕབ་བོ། །འོད་ཟེར་ཆེན་
པོས་སྣང་བར་བྱས་ཤིང་རྫུ་འཕྲུལ་གྱིས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ཀྱང་གཡོས་སོ། །དེ་མ་ཡིན་པ་གཞན་ཡང་ལྷ་རྫས་ཀྱི་རོལ་མོ་ཚད་མེད་པ་བརྒྱ་སྟོང་སྙེད་ཀྱང་སྟེང་གི་བར་སྣང་ལ་མ་དཀྲོལ་
བར་རང་ཟེར་བཞིན་དུ། བྱང་ཆུབ་སེམས་དཔའ་དེ་དག །བྱ་རྒོད་སྤུངས་པའི་རི་ག་ལ་བ་དེར་དེ་བཞིན་གཤེགས་པའི་སྤྱན་སྔར་ལྷགས་ནས་ཞབས་ལ་མགོ་བོས་ཕྱག་འཚལ་ཏེ། སངས་རྒྱས་ལ་ལན་གསུམ་
བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །དེ་བཞིན་དུ་ཕྱོགས་མཚམས་བཞི་དང་། སྟེང་དང་། འོག་གི་ཕྱོགས་དང་། ཕྱོགས་བཅུ་ནས་ལྷགས་པའི་བྱང་ཆུབ་སེམས་དཔའ་ཆེན་པོ་ཐམས་ཅད་
ཀྱིས་སོ་སོ་ནས་འཁོར་བརྒྱ་སྟོང་གྲངས་མེད་པ་དང་བཅས་ཏེ། བཅོམ་ལྡན་འདས་གང་ན་བ་དེར་ལྷགས་ནས། མཆོད་པ་དང་བཀུར་སྟི་བྱས། བསྟོད་པ་བྱས་ནས་ཐམས་ཅད་ཀྱིས་མགྲིན་གཅིག་ཏུ་ཚིགས་སུ་
བཅད་པ་བརྒྱ་སྟོང་སྙེད་ཀྱིས། བཅོམ་ལྡན་འདས་ལ་ཡོངས་སུ་བསྟོད་དོ། །དེ་ལྟར་སངས་རྒྱས་ལ་བསྟོད་ནས་ཀྱང་། ཕྱོགས་གཅིག་ཏུ་འཁོད་དོ། །དེའི་ཚེ་མི་མཇེད་ཀྱི་འཇིག་རྟེན་གྱི་ཁམས་ཀྱང་ཡོངས་སུ་
དག་པར་གྱུར་ཏེ། རི་ཁྲད་ཁྲོད་དང་། རི་ཆེན་པོ་དང་། ཆུང་ངུན་དང་། གཙང་པོ་དང་། ཆུ་ཀླུང་དང་། མཚེའུ་དང་། རྫིང་དང་། ལྟེང་ཀ་དང་། ཤང་ཤོང་དང་། ངམ་གྲོག་དག་མེད་ཅིང་། དེ་ན་
གནས་པའི་སེམས་ཅན་རྣམས་ཀྱང་འོད་ཀྱིས་སྣང་བར་བྱས་པས། སངས་རྒྱས་གང་ན་བ་དེར་ལྷགས་ཏེ། དགའ་ཞིང་མགུ་བའི་སེམས་ཀྱིས་ཐལ་མོ་སྦྱར་བ་བཏུད་ནས་མགོ་བོས་ཕྱག་འཚལ་ཏེ་མིག་མི་འཛུམས་པར་

71-1-100a

ཆགས་པའི་ཡིད་ཀྱིས་ལྟ་ཞིང་འཁོད་དོ། །དེ་ནས་བཅོམ་ལྡན་འདས་ཀྱིས་འོད་ཟེར་ཕྱིར་འདུས་པར་མཛད་དེ། འོད་ཟེར་དེ་དག་གིས་སྐུ་ལ་ལན་བདུན་བསྐོར་ནས་དབུའི་སྤྱི་གཙུག་ཏུ་ནུབ་པར་གྱུར་ཏོ། །
དེ་ལྟར་གྱུར་པ་ཀུན་དགའ་བོས་མཐོང་ནས་འཁོར་མང་པོ་ཐམས་ཅད་ཀྱང་ཐེ་ཙོམ་སྐྱེས་པར་སེམས་ཀྱིས་རབ་ཏུ་ཤེས་པས། དེ་བཞིན་གཤེགས་པའི་མཛད་པ་ཐབས་མཁས་པ་མངོན་པར་བསྟན་པ་དང་། ཕྱིས་མ་འོངས་
པའི་སྐྱེ་བོ་དག་གི་ཤེས་རབ་ཀྱི་མིག་སྐྱེ་བ་དང་། སོ་སོའི་སྐྱེ་བོ་ཐམས་ཅད་སྲེད་པའི་ཆུ་ཀླུང་ལས་རྒལ་ཞིང་ཕ་རོལ་དུ་ཕྱིན་པས་བདེ་བ་ལ་དགོད་པ་དང་། སོ་སོའི་སྐྱེ་བོ་དག་ལ་ཕ་མ་དང་། སློབ་དཔོན་དང་། བླ་མའི་
དྲིན་ལྕི་བ་དྲན་ཞིང་ཤེས་པར་བྱ་བའི་ཕྱིར་སྟན་ལས་ལངས་ནས། གོས་ཚགས་སུ་བཅོས་ནས་བླ་གོས་ཕྱོགས་གཅིག་ཏུ་བྱས་ནས་པུས་མོ་ས་ལ་བཙུགས་ནས་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཙུན་པ་བཅོམ་ལྡན་འདས་བདག་ཀུན་དགའ་བོས་སངས་རྒྱས་ཀྱི་ཞབས་འབྲིང་ན་མཆིས་ནས་འཛུམ་པ་མཛད་པ་མཐོང་སྟེ་འདི་ལ་ངེས་པར་དགོངས་པ་ནི་མངའ་ན་འཁོར་མང་པོའི་ཐེ་ཙོམ་གྱི་དྲ་བ་བཅད་
པའི་སླད་དུ། བཅོམ་ལྡན་འདས་ཀྱིས་བསྟན་དུ་གསོལ། སངས་རྒྱས་ཀྱིས་བཤད་དུ་གསོལ། ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་ལས་གླེང་གཞིའི་ལེའུ་ཞེས་བྱ་སྟེ་དང་པོའོ།། །།
དེའི་ཚེ་དེའི་དུས་ན་འཁོར་མང་པོ་འདུས་པ་དེར་རིན་པོ་ཆེ་སྣ་བདུན་ལས། གྲུབ་པའི་པད་མའི་སྡོང་པོ་དངུལ་ལས་བྱས། མདབ་མ་ནི་གསེར་ལས་བྱས། གཞི་ནི་རིན་པོ་ཆེ་ཤེལ་ལས་བྱས། མུ་ཏིག་གི་དྲ་
བས་ཀུན་དུ་བརྒྱན་པ་གཅིག་དེ་ཉིད་ནས་བྱུང་བར་གྱུར་ཏོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་བཞུགས་པ་ལས་བཞེངས་ནས་པད་མོ་དེ་ལ་སྐྱིལ་མོ་དཀྲུང་བཅས་ནས་བཞུགས་སོ། །དེ་ལ་བཞུགས་མ་ཐག་ཏུ་

71-1-100b

ཡོངས་སུ་དག་པའི་སྐུ་མངོན་པར་བསྟན་ཏོ། །སྐུ་དེ་ལམ་རྒྱུད་ལྔའི་ལུས་ཀྱི་ཚོགས་བསྟན། ལུས་ཀྱི་ཚོགས་རེ་རེ་ལ་ཡང་གཟུགས་ཐ་དད་པ་རྣམ་པ་ཁྲི་བརྒྱ་སྟོང་སྙེད་བསྟན་ཏོ། །གཟུགས་རྣམ་པ་དེ་རེ་རེ་ལ་ཡང་
སྐུའི་ཚོགས་བརྒྱ་སྟོང་སྙེད་བསྟན། སྐུའི་ཚོགས་དེ་དག་རེ་རེ་ལ་ཡང་གང་གཱའི་ཀླུང་བཞིའི་བྱེ་མ་སྙེད་ཀྱི་སྐུའི་ཚོགས་བསྟན་ཏོ། །གང་གཱའི་ཀླུང་བཞིའི་བྱེ་མ་སྙེད་ཀྱི་སྐུའི་ཚོགས་དེ་དག་རེ་རེ་ལ་ཡང་གླིང་བཞིའི་རྡུལ་ཕྲ་རབ་
སྙེད་ཀྱི་སྐུའི་ཚོགས་བསྟན་ཏོ། །རྡུལ་ཕྲ་རབ་སྙེད་ཀྱི་སྐུའི་ཚོགས་དེ་དག་རེ་རེ་ལ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་སྙེད་ཀྱི་སྐུའི་ཚོགས་བསྟན་ཏོ། །རྡུལ་ཕྲ་རབ་སྙེད་ཀྱི་སྐུའི་ཚོགས་
དེ་དག་རེ་རེ་ལ་ཡང་ཕྱོགས་བཅུར་ཕྱོགས་རེ་རེར་ཡང་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་གི་རྡུལ་ཕྲ་རབ་སྙེད་ཀྱི་སྐུའི་ཚོགས་བསྟན་ནས། ནམ་མཁའི་དབྱིངས་ཀྱིས་ཀླས་པ། ཆོས་ཀྱི་དབྱིངས་དང་མཉམ་པ་
བསམ་གྱིས་མི་ཁྱབ་པ་སྙེད་ཀྱི་སེམས་ཅན་གྱི་ལུས་ཀྱི་ཚོགས་མངོན་པར་བསྟན་ཏོ། །དེའི་ཚེ་དེ་བཞིན་གཤེགས་པས་དེ་སྙེད་ཀྱི་ལུས་ཀྱི་ཚོགས་མངོན་པར་བསྟན་ནས་ཀུན་དགའ་བོ་དང་ཕྱོགས་བཅུ་ནས་འདུས་ཤིང་
ཚོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་དེང་དེ་བཞིན་གཤེགས་པས་ཐམས་ཅད་མཁྱེན་པའི་ཡེ་ཤེས་
ཀྱིས་ཡང་དག་པའི་ཚིག་གང་ཡིན་པ་དེ་བཀའ་སྩལ་པར་བྱའོ། །ཆོས་ལ་ཚིག་ཏུ་བརྗོད་པ་མེད་ཀྱི་དེ་བཞིན་གཤེགས་པས། ཐབས་མཁས་པའི་དབང་གིས་མཚན་མ་དང་མིང་མེད་པའི་ཆོས་ལ་མིང་དང་
མཚན་མར་བསྟན་པར་བྱའོ། །འདི་ལྟ་སྟེ། དེ་བཞིན་གཤེགས་པ་ནི་ཐོག་མར་སྐྱེས་ཤིང་འཁོར་བར་འཁོར་བའི་ཚེ་བསམ་གྱིས་མི་ཁྱབ་པའི་རྡུལ་ཕྲ་རབ་སྙེད་ཀྱི་ལུས་ཀྱི་ཚོགས་རྣམ་པ་ཐ་དད་པ་དེ་དག་

71-1-101a

ཐམས་ཅད་རྫོགས་པར་མྱོང་སྟེ། དེ་ལྟར་ལུས་ཀྱི་ཚོགས་དེ་དག་ཀུན་མྱོང་བས་ན། སེམས་ཅན་ཐམས་ཅད་ཀྱང་དེ་བཞིན་གཤེགས་པའི་ཕ་མར་མ་གྱུར་པ་མེད། དེ་བཞིན་གཤེགས་པས་ཀྱང་སེམས་
ཅན་གྱི་ཕ་མར་མ་གྱུར་པ་མེད་དེ། ཕ་མར་གྱུར་པ་ཐམས་ཅད་ཀྱི་ཕྱིར་རྒྱུན་དུ་ཤིན་དུ་སྤྱད་དཀའ་བ་ཡང་སྤྱད། ཤིན་དུ་གཏང་དཀའ་བ་ཡན་ལག་གི་དམ་པ་མགོ་དང་། མིག་དང་། གླད་རྒྱས་དང་། ཡུལ་དང་། གྲོང་
ཁྱེར་དང་། ཆུང་མ་དང་། བུ་ཕོ་དང་། བན་གླང་དང་། རྟ་དང་། རིན་པོ་ཆེ་སྣ་བདུན་གྱི་ཤིང་རྟ་དང་། ཐེག་པ་དང་། གོས་དང་། ཟས་དང་། སྐོམ་དང་། མལ་ཆ་དང་། ནད་ཀྱི་རྐྱེན་རྩི་དང་། དགོས་པའི་ཡོ་
བྱད་ཐམས་ཅད་གང་ཡང་མ་བཏང་བ་མེད་དོ། །ཤིན་དུ་འབད་པའི་བརྩོན་འགྲུས་ཀྱིས་ཚུལ་ཁྲིམས་བསྲུངས་པ་དང་། སྦྱིན་པ་བྱས་པ་དང་། མང་དུ་ཐོས་པ་དང་། བསམ་གཏན་བསྒོམས་པ་དང་། ཤེས་རབ་སྤྱད་
པ་ནས་སྤྱད་དཀའ་བ་ཐམས་ཅད་སྤྱད་དེ། སྐྱོ་བ་དང་། ངལ་བ་མེད་ཅིང་རྒྱུན་མི་འཆད་པར་བརྩོན་འགྲུས་སུ་འབད་པ་ཡང་ཕ་མ་ལ་སྲི་ཞུ་བྱ་བ་དང་། དྲིན་ཤེས་པ་དང་། དྲིན་ལན་བསབ་པ་དང་། སེམས་ཅན་
ཐམས་ཅད་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་དགོད་པ་དང་། དེ་བཞིན་གཤེགས་པའི་སྔོན་གྱི་སྨོན་ལམ་ཡོངས་སུ་རྫོགས་པར་བྱ་བ་དང་། དེ་ལྟར་ན་སེམས་ཅན་ཐམས་ཅད་ལ་སངས་རྒྱས་
ཀྱི་བཀའ་དྲིན་ཆེན་པོ་ཡོད་པར་ཤེས་པར་བྱ་བ་དང་། དེ་བཞིན་གཤེགས་པའི་ཐུགས་རྗེ་ཆེན་པོས་སེམས་ཅན་ཡོངས་སུ་མི་གཏོང་བ་དང་། རྟག་པར་ཤིན་དུ་ཐབས་མཁས་པས་ཁམས་གསུམ་པའི་སྲིད་པ་ཉི་ཤུ་རྩ་
ལྔར་གནས་པའི་སེམས་ཅན་ཐམས་ཅད་ལ་བསྐལ་པ་བསམ་གྱིས་མི་ཁྱབ་པའི་བར་དུ་མཉམ་སྙོམས་པའི་བྱམས་པ་བསྒོམས་ཤིང་། བཏང་སྙོམས་དང་ལྡན་པའི་ཐབས་མཁས་པས་སྤྱོད་དེ། སེམས་ཅན་ཐམས་ཅད་སྟོང་པ་

71-1-101b

ཉིད་ཏུ་རྟོགས་པ་དང་། ཆོས་སྟོང་པ་ཉིད་དང་། ཕུང་པོ་ལྔ་སྟོང་པ་ཉིད་དུ་རྟོགས་ཤིང་ཕྱིར་མི་ནུར་བ་དང་། མི་འབྱིང་བ་དང་། མི་རྒོད་པ་སྟོང་པ་ཉིད་ཏུ་ཡང་དག་པའི་མཚན་ཉིད་ལ་ཐབས་མཁས་པས་བསྒོམ་པར་བྱ་བ་
དང་། ཐེག་པ་གསུམ་མི་སྤོང་ཞིང་ཆུབ་པར་སློབ་པའི་ཐབས་ལ་མཁས་པས་ཤིན་དུ་ཟབ་མོའི་སྤྱོད་ཡུལ་དམ་པ་སྤྱད་པ་ལ་ཐབས་མཁས་པར་བྱ་བའི་ཕྱིར། ཆོས་ཀྱི་མཚན་ཉིད་ལ་ཤིན་དུ་གསལ་བར་རྟོགས་ཏེ། སངས་
རྒྱས་ཀྱི་ཆོས་རྣམས་ཐོག་མ་དང་ཐ་མའི་བར་དུ་གཅིག་མ་ཡིན་པར་རྟོགས་ཤིང་ཆུད་ཀྱང་སོ་སོའི་སྐྱེ་བོ་དག་ནི་མྱོས་ཤིང་བསླད་པས་གདུང་བ་གསུམ་གྱིས་ཡོངས་སུ་གདུངས་ཏེ། སྡུག་བསྔལ་གྱི་མཚོར་ནུབ་པར་གྱུར་ཏོ། །
ཕྱིན་ཅི་ལོག་བཞིས་བསྒྲིབས་པས་ཟག་པ་དང་བཅས་པའི་ཆོས་ལ་ཕྱིན་ཅི་ལོག་ཏུ་གྱུར་ཏོ། །མི་བདེན་པ་ཀུན་དུ་རྟོགས་པས་བདག་མེད་པ་ལ་བདག་ཏུ་ལྟ། མི་རྟག་པ་ལ་རྟག་པར་ལྟ། མི་བདེ་བ་ལ་བདེ་བར་ལྟ། མི་གཙང་བ་ལ་
གཙང་བར་ལྟ་ཞིང་སྐྱེ་བ་དང་། རྒ་བ་དང་། ན་བ་དང་། འཆི་བས་གཟིར་ཏེ་སྐད་གཅིག་ཏུ་མི་རྟག་པས་སྒྲིབ་པ་ལྔ་དང་། ཀུན་ནས་གླགས་པ་བཅུས་ཀུན་དུ་གླགས་ཏེ། སྲིད་པ་གསུམ་དུ་འཁོར་ཞིང་སྐྱེ་ཤི་ཐོག་མ་དང་ཐ་མ་མེད་པ་
མྱོང་བར་གྱུར་ཏོ། །དེ་བས་ན་དེ་བཞིན་གཤེགས་པས་ཅི་དང་ཅིར་འཕྲོད་པ་བཞིན་སྡེ་སྣོད་གསུམ་དང་། མདོ་སྡེ་དགུ་ནས་མདོ་སྡེ་བཅུ་གཉིས་ཀྱི་བར་དུ་རྣམ་པར་འཕྱེ་ཞིང་བསྟན་ཏོ། །སོ་སོའི་འདོད་པ་བཞིན་མདོ་སྡེ་མང་པོ་
གསུངས་སོ། །ཚིག་ལ་ཆགས་པ་ཁ་ཅིག་བདག་ནི་འདི་ཁོ་ནས་ཆོག་སྟེ། མྱ་ངན་ལས་འདས་པ་ཐོབ་ཅེས་འཛིན་པ་ཡང་ཡོད་དོ། །དེ་ཡང་དེ་བཞིན་གཤེགས་པའི་སྔོན་གྱི་ཐུགས་རྗེ་ཆེན་པོའི་སྨོན་ལམ་གྱི་ཤུགས་ཀྱིས་ཕྱོགས་
བཅུའི་འཇིག་རྟེན་གྱི་ཁམས་ན་ལས་འཐུན་པ་ཐམས་ཅད་བསྡུས་སོ། །དེ་ལྟར་ལས་འཐུན་པ་ཀུན་འདུས་པ་འཁོར་མང་པོའི་དཀྱིལ་འཁོར་དེར་དམ་པའི་མདོ་སྡེ་གསུངས་པར་དགོངས་ཏེ། གཟུགས་བརྙན་གྱི་ཆོས་ནམ་དུ་ཡང་རྒྱུན་མི་

71-1-102a

འཆད་ཅིང་སོ་སོའི་སྐྱེ་བོ་ཐམས་ཅད་བདེ་བ་ཆེན་པོ་ཐོབ་པར་མཛད་དོ། །དེ་བས་ན་དེ་བཞིན་གཤེགས་པ་འདུལ་ཞིང་སྟོན་པ་ཡང་དུས་ལས་མི་ཡོལ་བར་ཤེས། དུས་ལས་མི་ཡོལ་བར་མྱ་ངན་ལས་འདའོ། །འཇིག་
རྟེན་གྱི་ཁམས་ཁ་ཅིག་ཏུ་དེ་བཞིན་གཤེགས་པ་རྣམ་པར་སྣང་མཛད་ཅེས་བྱ་བ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་
ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ། སངས་རྒྱས་བཅོམ་ལྡན་འདས་ཤེས་གྲགས་སོ། །སྐབས་ཁ་ཅིག་ཏུ་ནི་དགའ་ལྡན་གནས་སུ་གཤེགས་ནས་ལྷ་རྣམས་ཀྱི་སྟོན་པ་མཛད་དོ། །སྐབས་ཁ་ཅིག་ཏུ་ནི་དགའ་ལྡན་གནས་
ནས་བབས་ཏེ། འཛམ་བུའི་གླིང་དུ་སྐུ་ཚེ་ལོ་བརྒྱད་བཅུར་བཞུགས་པ་ཡང་སྟོན་ཏོ། །དེ་བས་ན་དེ་བཞིན་གཤེགས་པ་ནི་བསམ་གྱིས་མི་ཁྱབ་བོ། །འཇིག་རྟེན་གྱི་ཁམས་ཀྱང་བསམ་གྱིས་མི་ཁྱབ་བོ། །ལས་ཀྱི་རྣམ་པར་སྨིན་པ་
ཡང་བསམ་གྱིས་མི་ཁྱབ་བོ། །སེམས་ཅན་གྱི་བསམ་པ་ཡང་བསམ་གྱིས་མི་ཁྱབ་བོ། །བསམ་གཏན་གྱི་ཏིང་ངེ་འཛིན་ཡང་བསམ་གྱིས་མི་ཁྱབ་བོ། །ཀླུའི་མཐུ་ཡང་བསམ་གྱིས་མི་ཁྱབ་བོ། །འདི་ནི་སངས་རྒྱས་བསམ་
གྱིས་མི་ཁྱབ་པ་སྟེ། སེམས་ཅན་ཐམས་ཅད་ཀྱིས་སངས་རྒྱས་ཀྱི་ཐུགས་ལ་དགོངས་པ་ཤེས་པར་འདོད་ན་སེམས་ཅན་དབང་པོ་ཞན་པ་ཐ་མའི་བར་དུ་ཡང་ཀུན་ཤེས་པར་མཛད་དོ། །སེམས་ཅན་ཐམས་ཅད་ལས་གང་ཡང་
སངས་རྒྱས་མཐོང་བར་འདོད་ན་དེ་མ་ཐག་ཏུ་མཐོང་བར་མཛད་དོ། །གལ་ཏེ་མཐོང་བར་མི་མཛད་ན་མིག་སྔར་བབ་ཀྱང་མི་མཐོང་ངོ་། །དེ་བས་ན་ཉན་ཐོས་དང་། རང་སངས་རྒྱས་དག་ལྷའི་མིག་གི་མངོན་པར་ཤེས་པ་ཡོད་ཀྱང་
མཐོང་བར་མི་ནུས་སོ། །དེ་མ་ཡིན་པ་གཞན་ཡང་སངས་རྒྱས་ཀྱིས་འོད་ཟེར་ཆེན་པོ་བཀྱེ་ནས་སྲིད་པའི་རྩེ་མོ་མན་ཆད་མཚམས་མེད་པའི་སེམས་ཅན་དམྱལ་བ་ཡན་ཆད་སྣང་བར་མཛད་ཀྱང་གང་འདུལ་བའི་སྐལ་བ་དང་ལྡན་

71-1-102b

པས་ནི་མཐོང་བར་འགྱུར། གང་སྐལ་བ་དང་མི་ལྡན་པས་ནི་མིག་སྔར་བབ་ཀྱང་མི་མཐོང་ངོ་། །དེ་བཞིན་གཤེགས་པ་སྐབས་ཁ་ཅིག་ཏུ་སྐུལ་བ་མཛད། སྐབས་ཁ་ཅིག་ཏུ་ནི་ཅང་མི་གསུང་བས་ན། སངས་རྒྱས་བཅོམ་ལྡན་འདས་ནི་
བསམ་གྱིས་མི་ཁྱབ་སྟེ། ཤིན་དུ་དཔག་པར་དཀའ་བ། ཤིན་དུ་ཤེས་ཤིང་རྟོགས་པར་དཀའ་ན། ཇི་ལྟར་ཁྱོད་ཀྱིས་དེ་བཞིན་གཤེགས་པ་ལ་སྤྱོད་དཀའ་བ་ཤིན་དུ་ཟབ་མོ་དྲི་བ་ལ་སྤོབས་པར་གྱུར། ཁྱོད་ཀྱིས་ཞུས་པ་འདི་ནི་
ཡང་དག་པར་སེམས་ཅན་ཐམས་ཅད་ལ་བྱམས་ཤིང་སྙིང་བརྩེ་བ་ཡིན་ཏེ། ངན་འགྲོ་གསུམ་གྱི་ལམ་བཀག་ནས་ལྷ་དང་མིའི་ལམ་བཏོད་པ་ཡིན་ནོ། །ཀུན་དགའ་བོ་ངས་ད་ཁྱོད་ལ་ཕ་མ་ལ་སྲི་ཞུ་བྱ་བའི་སྤྱད་དཀའ་བ་མདོ་
ཙམ་ཞིག་བསྟན་པར་བྱས་ལེགས་པར་ཉོན་ལ་ཡིད་ལ་ཟུང་ཤིག་དང་། བཅོམ་ལྡན་འདས་ཀྱིས་ཀུན་དགའ་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། འཁོར་མང་པོ་རྣམས་ལ་འདི་སྐད་ཅེས་བཀའ་
སྩལ་ཏོ། །སྔོན་བྱུང་བ་བསྐལ་པ་ཚད་མེད་པ་མཐའ་ཡས་གྲངས་མེད་པ་འདས་པའི་ཕ་རོལ་ན་ཡུལ་བཱ་ར་ཎ་སཱིར་སངས་རྒྱས་རྣམ་པར་གཟིགས་ཤེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་གདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ། འཇིག་རྟེན་གྱི་གཙོ་བོ། ལྷ་དང་མིའི་སྟོན་པ་འཇིག་རྟེན་དུ་བྱུང་ངོ་། །སངས་རྒྱས་
དེའི་སྐུ་ཚེའི་ཚད་ཀྱང་བསྐལ་པ་ཆུང་ངུ་ཉི་ཤུར་བཞུགས་སོ། །དམ་པའི་ཆོས་ཀྱང་བསྐལ་པ་ཆུང་ངུ་ཉི་ཤུར་གནས་སོ། །གཟུགས་བརྙན་གྱི་ཆོས་ཀྱང་བསྐལ་པ་ཆུང་ངུ་ཉི་ཤུར་གནས་སོ། །གཟུགས་བརྙན་གྱི་ཆོས་ལ་སྤྱོད་པའི་ཚེ་མིའི་
རྒྱལ་པོ་རཱ་ཛ་ཞེས་བྱ་བ་འཇིག་རྟེན་དུ་བྱུང་སྟེ། ཡུལ་བཱ་ར་ཎ་སཱི་ལ་དབང་སྒྱུར་རོ། །རྒྱལ་པོ་དེ་ལ་བཙུན་མོ་ནི་ཉི་ཁྲི་ཡོད། བློན་པོ་ནི་བཞི་སྟོང་སྙེད་ཡོད། བལ་གྱི་གླང་པོ་ཆེ་ཡང་ལྔ་བརྒྱ་ཡོད། རྒྱལ་ཕྲན་དྲུག་བཅུ་ལ་དབང་། གྲོང་ཁྱེར་བརྒྱད་

71-1-103a

བརྒྱ་ཞིག་ཡོད། རྒྱལ་པོ་དེ་ལ་རྒྱལ་བུ་གསུམ་ཡོད་དེ། གསུམ་ཆར་ཡང་རྒྱལ་ཕྲན་རེ་རེ་བྱེད་དོ། །དེའི་ཚེ་དེའི་དུས་ན་ཡུལ་བཱ་ར་ཎ་སཱིའི་རྒྱལ་པོ་དེ་མཁས་ཤིང་ཤེས་རབ་དང་ལྡན་ཏེ། རྟག་ཏུ་ཡང་དྲང་བའི་ཆོས་ཀྱིས་ཡུལ་གྱི་སྲིད་
འཛིན་པས་གང་ཡང་གཏམས་ལས་ཆད་ཅེས་བྱ་བ་མེད་དོ། །རྒྱལ་པོའི་བསོད་ནམས་དང་ཡོན་ཏན་གྱི་མཐུས་ཆར་ཆུ་དུས་ལས་མི་ཡོལ་ཏེ། ལོ་ཏོག་རྒྱུན་དུ་ལེགས་པས་དེ་ན་གནས་པའི་མི་རྣམས་ཀྱང་བདེ་སྐྱིད་དོ། །དེའི་ཚེ་ན་བཱ་ར་ཎ་སཱིའི་
རྒྱལ་པོ་དེ་ལ་བློན་པོ་ནག་པོ་སྒྲ་གཅན་ཞེས་བྱ་བ་ཞིག་ཡོད་དོ། །བློན་པོ་སྒྲ་གཅན་རྒྱལ་པོ་ལ་འཁུས་ནས་དམག་རྣམ་བཞི་བཤམས་པ་ལ་འདི་ལྟ་སྟེ། བ་གླང་གི་ཚོགས་དང་། ཤིང་རྟའི་ཚོགས་དང་། རྟའི་ཚོགས་དང་། དཔུང་བུ་ཆུང་གི་
ཚོགས་བཤམས་ནས་བཱ་ར་ཎ་སཱིའི་རྒྱལ་པོ་ལ་བརྒལ་ནས་རྒྱལ་པོའི་སྲོག་བཅད་དོ། །དེ་ལྟར་རྒྱལ་པོ་བསད་ནས་ཀྱང་དམག་གི་ཚོགས་རྣམ་པ་བཞི་བཀྱེ་ནས་མཐའི་རྒྱལ་ཕྲན་རྒྱལ་བུ་རབ་ཀྱང་བསད་དོ། །དེ་ནས་རྒྱལ་བུ་འབྲིང་པོ་ཡང་ཕབ་
ནས་མཐའི་རྒྱལ་ཕྲན་རྒྱལ་བུ་ཐ་ཆུངས་ཀྱི་ཐོག་ཏུ་དམག་དྲང་བར་བཤམས་སོ། །རྒྱལ་བུ་ཐ་ཆུངས་དེ་ངོ་མཚར་དུ་གཟུགས་བྱད་བཟང་ལ། འཕགས་པར་མཛེས་ཤིང་རང་བཞིན་གྱིས་དགེ་བ། དུལ་བ། འཛུམ་ཞིང་སྨྲ་བ་སྨྲའོ་ཅོག་ཀྱང་ཕན་
པའི་དོན་དུ་སྨྲ་ཞིང་འགྱུར་གྱི་གནོད་པ་མེད་པ། རྟག་ཏུ་དྲང་པོའི་ཆོས་ཀྱིས་ཡུལ་གྱི་སྲིད་འཛིན་ཏེ། ལོག་པས་མི་འཚོ་བས་ཡུལ་གྱི་མི་རྣམས་ཀྱང་བདེ་སྐྱིད་ལ་དར་བ། ལོངས་སྤྱོད་དང་ནོར་རིན་པོ་ཆེར་ལྡན་པ། བང་མཛོད་གང་བ། རྒྱལ་པོ་དེའི་
ཡོན་ཏན་ལ་ཀུན་གྱིས་བསྔགས་ཤིང་བསྟོད་པ། བར་སྣང་གི་ལྷ་དང་། འཇིག་རྟེན་གྱི་ལྷ་ཐམས་ཅད་ཀྱིས་ཀྱང་དགའ་ཞིང་བཀུར་བ། དེའི་ཚེ་ན་རྒྱལ་པོ་དེ་ལ་རྒྱལ་བུ་སུ་ཤ་དེ་བ་ཞེས་བྱ་བ་གཅིག་པུ་ཞིག་ཡོད་དེ། ཤིན་དུ་ཡིད་གཞུངས་ཤིང་
གསལ་བ། བྱམས་པའི་སེམས་དང་ལྡན་པ། སྦྱིན་པ་ལ་དགའ་བ། ལུས་ཀྱི་མདོག་གསེར་དུ་འདུག་པ། གནས་བདུན་མཉམ་པར་གང་བ། སྐྱེས་བུའི་མཚན་རྫོགས་པར་ལྡན་པ། ལོ་བདུན་ལོན་པ་ཞིག་ཡོད་པ་དེ་ལ་ཡབ་རྒྱལ་པོ་ཡང་

71-1-103b

ཤིན་དུ་བྱམས་ཤིང་སྡུག་པར་སེམས་སོ། །དེའི་ཚེ་ན་ཕོ་བྲང་སྲུང་བའི་ལྷ་ཞིག་རྒྱལ་པོ་དེ་ལ་འདི་སྐད་ཅེས་སྨྲས་སོ། །རྒྱལ་པོ་མཁྱེན་ཏམ། བློན་པོ་སྒྲ་གཅན་འཁུས་ནས་ཡུལ་སྲིད་ཕྲོགས་ཏེ་རྒྱལ་པོ་ཡབ་ཀྱང་བཀྲོངས། དམག་གི་ཚོགས་
བཞི་ཡང་བཀྱེ་ནས། རྒྱལ་པོ་གཅེན་གཉིས་ཀྱང་སྲོག་གི་དབང་པོ་དང་ཕྲལ་ཏེ། དམག་གི་ཚོགས་རྣམས་རིང་པོ་མི་ཐོགས་པར་འདིར་ཕྱིན་ན་རྒྱལ་པོ་ཅིའི་ཕྱིར་སྲོག་བསྐྱབས་ཤིང་གུད་ཏུ་མི་འགྲོ། དེའི་ཚེ་རྒྱལ་པོ་དེས་དེ་སྐད་སྨྲས་པ་ཐོས་ནས་
ལུས་ཀྱི་བ་སྤུ་ཀུན་ཟིང་ཞེས་བྱེད་དེ། ལུས་ཀྱང་འདར་ནས་ཡི་མུག་ཅིང་མྱ་ངན་གྱིས་སེམས་གདུངས་ཏེ། ས་ལ་འགྲེ་ཞིང་བརྒྱལ་བར་གྱུར་ནས་རིང་ཞིག་ལོན་པ་དང་། ཅུང་ཟད་སངས་ཏེ་དལ་གྱིས་ནམ་མཁའི་ལྷ་ལ་འདི་སྐད་ཅེས་སྨྲས་སོ། །
འདི་ལྟར་སྨྲ་བའི་སྐད་ནི་ཡོད་ལ་གཟུགས་ནི་མི་སྣང་བ་ཁྱོད་ཅི་ཡིན། སྨྲས་པའི་ཚིག་འདི་ཡང་དག་པར་བདེན་ནམ། ལྷས་སྨྲས་པ་བདག་ནི་རྒྱལ་པོའི་ཕོ་བྲང་སྲུང་བའི་ལྷ་ཡིན་ཏེ། རྒྱལ་པོ་ཁྱོད་ཤེས་པ་དང་ལྡན་ཞིང་བསོད་ནམས་དང་ཡོན་ཏན་
དུ་བཅས་པས་དྲང་པོའི་ཆོས་ཀྱིས་ཡུལ་སྲིད་འཛིན་ཏེ། དེ་བས་ན་བདག་གིས་སྨྲས་པ་ཡིན་ཏེ། སྡུག་བསྔལ་གྱིས་ཉོན་མོངས་པར་མ་གྱུར་པར་མྱུར་དུ་བྱོལ་ཞིང་འགྲོ་བའི་རིགས་སོ། །དེ་ནས་རྒྱལ་པོ་དེ་ཕོ་བྲང་དུ་ཞུགས་ནས་ད་ནི་བདག་ཡུལ་
གཞན་ཞིག་ཏུ་འགྲོ་དགོས་སོ་སྙམ་དུ་བསམས་སོ། །ཡང་འདི་སྙམ་དུ་བསམས་སོ། །ཡུལ་ཕ་རོལ་དུ་འགྲོ་བའི་ལམ་གཉིས་ཡོད་དོ། །ལམ་ཉེ་བར་ཞུགས་ན་ནི་ཞག་བདུན་གྱིས་ཡུལ་ཕ་རོལ་དུ་ཕྱིན་པར་འགྱུར། ལམ་རིང་པོར་ཞུགས་
ན་ནི་ཞག་བཅུ་བཞིས་ཕྱིན་པར་འགྱུར་བས། ཅི་ནས་ལམ་ཉེ་བར་འགྲོའོ་སྙམ་བསམས་ནས་ཞག་བདུན་གྱི་རྒྱགས་དང་ཆས་ཏེ། ཕོ་བྲང་གི་ཕྱི་རོལ་དུ་ཕྱིན་པ་དང་། ཕྱིར་ཕོ་བྲང་གི་ནང་དུ་ལོག་ནས་རྒྱལ་བུ་སུ་ཤ་དེ་བ་ཕང་དུ་བླངས་ཏེ་
མིག་མི་འཛུམས་པར་ལྟ་ཞིང་དངངས་པ་ལྟར་ལངས་ནས་ཕྱིར་ཡང་འདུག་གོ། །དེའི་ཚེ་ན་བཙུན་མོས་དེ་ལྟར་མི་བདེ་ཞིང་སྐྲག་པ་ལྟར་གྱུར་པ་མཐོང་ནས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ཅིའི་སླད་དུ་འཇིགས་སྐྲག་པ་ལྟ་བུའི་

71-1-104a

གཟུགས་སྟོན་ཅིང་སྐུ་ལ་ཡང་རྡུལ་གྱིས་གོས་པ་ལྟ་བུ། སྐྲ་ཡང་འཛིངས་ཏེ། དབུགས་ཀྱང་མི་བདེ་སྟེ། ཡུལ་སྟོར་ལ་ཐུག་པ་འམ། མཛའ་སྡུག་པ་དང་བྱེ་བ་འམ། དགྲ་སྡང་བ་དང་ཕྲད་པ་ལྟ་བུ་དང་། བཀྲ་མི་ཤིས་པའི་
མཚན་མ་དག་གདའ་བ་འདི་ཅི་ལགས་བསྟན་དུ་གསོལ། རྒྱལ་པོས་སྨྲས་པ་ཁོ་བོ་ཅི་ཉེས་པ་ཁྱོད་ཀྱིས་ཤེས་པ་མ་ཡིན་གྱིས་མ་སྨྲ་ཞིག་བཙུན་མོས་གསོལ་པ། བདག་དང་རྒྱལ་པོར་ལུས་གཟུགས་གཉིས་ཀྱང་སེམས་གཅིག་སྟེ། 
དཔེར་ན་བྱའི་འདབ་མ་གཉིས་སམ། ལུས་ཀྱི་རྐང་པ་གཉིས་སམ། མགོའི་མྀག་གཉིས་སམ། དེ་དང་འདྲ་ན་ཅིའི་སླད་དུ་བདག་ལ་གསང་སྟེ་མི་གསུང་། རྒྱལ་པོས་བཙུན་མོ་ལ་སྨྲས་པ། ཁྱོད་མི་ཤེས་སམ། བློན་པོ་སྒྲ་གཅན་ངན་
སེམས་སྐྱེས་ནས་རྒྱལ་པོ་ལ་འཁུས་ཏེ་ཡབ་རྒྱལ་པོ་ཡང་དཀྲོངས་ཏེ་གཅེན་རྒྱལ་བུ་ཡང་སྲོག་གི་བར་ཆད་བྱས་ནས་ད་ལྟར་དམག་དང་ཆས་ཏེ་ང་ལ་རྒོལ་དུ་འོང་བས། ཁོ་བོ་ཡུལ་གཞན་དུ་འབྱོལ་དུ་འགྲོ་ཞེས་སྨྲས་ནས་རྒྱལ་བུ་དགེ་དོན་
པང་དུ་བླངས་ཏེ་ལམ་དུ་ཞུགས་སོ། །དེ་ནས་བཙུན་མོ་ཡང་རྒྱལ་པོའི་ཕྱིར་འབྲངས་ཏེ་སོང་ངོ་། །དེའི་ཚེ་རྒྱལ་པོ་མྱ་ངན་གྱིས་ནོན་ཏེ། ཡིད་འཁྲུགས་ནས་ཞག་བཅུ་བཞིའི་ལམ་དུ་ཞུགས་པས་ལམ་ཡང་ནོར་ཏེ། ལམ་དེ་ཡང་བགྲོད་
དཀའ་ཞིང་རྩྭ་ཡང་རྩུབ། རྩྭ་ཆུ་ཙམ་ཡང་མེད་དེ། ཞག་དུ་མ་ཞིག་སོང་སོང་བ་ལས་རྒྱགས་ཀྱང་ཆད་དོ། །ཐོག་མ་གསང་སྟེ་རྒྱལ་པོ་གཅིག་པུ་འགྲོ་བར་བྱས་ནས་ཞག་བདུན་གྱི་རྒྱགས་ལས་ཀྱང་མ་བརྫངས་པ་ལས་ལམ་ཡང་ནོར། 
མི་གསུམ་གྱིས་ཀྱང་ཟོས་ཏེ། ཞག་བཅུ་བཞིའི་ལམ་དུ་ཞུགས་པས་ད་དུང་ལམ་རིང་ཞིག་ཡོད་པ་ལས་རྒྱགས་ཆད་ནས་དེའི་ཚེ་རྒྱལ་པོ་དང་བཙུན་མོས་སྐད་ཕྱུང་ནས་ངུས་སོ། །ཀྱི་ཧུད་ཀྱི་ཧུད་རེ་སྡུག་ཐོག་མ་བཅེས་ནས་ད་ཙམ་
གྱི་བར་དུ་འདི་འདྲ་བ་མ་མྱོང་བ་ད་འདིར་མྱོང་བར་གྱུར་ཏེ། ད་འདིར་སྡུག་ཅིང་ཕོངས་སོ་ཞེས་ཟེར་ཏེ་ལག་པས་མགོ་ལ་བརྡབས་སོ། །ས་ལ་འགྲེ་ཞིང་ལུས་ལ་རྡུལ་གྱིས་གོས་ནས་ཚིག་འདི་སྐད་དུ་སྨྲེ་སྔགས་འདོན་ཏོ། །བདག་ཅག་

71-1-104b

གིས་ཚེ་སྔ་མ་ལ་སྡིག་པ་མི་དགེ་བའི་ལས་ཅི་ཞིག་བྱས། འོན་ཏེ་ཕ་མ་དང་དགྲ་བཅོམ་པ་བསད་དམ། འོན་ཏེ་དམ་པའི་ཆོས་ལ་སྐུར་པ་བཏབ་བམ། འོན་ཏེ་འཐུན་པའི་དགེ་འདུན་གྱི་དབྱེན་བགྱིས་སམ། འོན་ཏེ་རྔོན་པ་དང་། ཉ་པ་བྱས་
སམ། འོན་ཏེ་སྲང་དང་བྲེ་བཅོས་ཏེ་ཕ་རོལ་ལ་ཕྲོག་རློམ་བྱས་སམ། འོན་ཏེ་དགེ་འདུན་གྱི་ནོར་ལ་སྤྱོད་སྤྱོད་དམ། ཅི་བྱས་ན་འདི་འདྲ་བའི་སྡུག་བསྔལ་མྱོང་བར་གྱུར་ཅེས་དེ་སྐད་སྨྲེ་ཞིང་ཅུང་ཟད་བསྟིར་ནི་དགྲས་སླེབས་ན་སྲོག་
གི་བར་ཆད་ངེས་པར་འབྱུང་། ལམ་དུ་ཞུགས་ནས་འགྲོར་ནི་བཀྲེས་པ་དང་སྐོམ་པས་ཉེན་ནས། སྲོག་ལ་བབ་ཏུ་ཆའོ། །རྒྱལ་པོ་དང་བཙུན་མོ་དེ་ལྟ་བུའི་སྡུག་བསྔལ་གྱིས་ཉེན་ཏེ་སྐད་ཕྱུང་སྟེ་ངུས་པ་དང་ས་ལ་འགྱེལ་
ནས་བརྒྱལ་བར་གྱུར་ཏོ། །དེ་ནས་རིང་ཞིག་ལོན་པ་དང་སངས་ནས་འདི་སྙམ་དུ་གསུམ་ཆར་ལྷན་ཅིག་ཏུ་འདི་ཁོ་ནར་འཆི་བར་འགྱུར་གྱིས། བཙུན་མོ་བསད་ལ་བདག་དང་བུའི་སྲོག་ཐར་བར་བྱའོ་སྙམ་བསམས་ནས་རལ་གྲི་ཕྱུང་སྟེ་བཙུན་
མོ་བསད་པར་བཤམས་པ་དང་། རྒྱལ་བུ་དགེ་དོན་གྱིས་རྒྱལ་པོའི་ལག་པ་ནས་བཟུང་སྟེ། ད་ལྟར་ཅི་ཞིག་མཛད་དགོངས་ཤེས་གསོལ་ཏོ། །ཡབ་རྒྱལ་པོས་མིག་ནས་མཆི་མས་གང་བཞིན་དུ་རྒྱལ་བུ་ལ་འདི་སྐད་ཅེས་སྨྲས་
སོ། །ཁྱོད་ཀྱི་མ་བཙུན་མོ་དམ་པ་བསད་ལ་ཁྱོད་ཀྱི་སྲོག་གསོ་སྙམ་མོ། །གལ་ཏེ་མ་བསད་ཀྱང་རང་འཆི་བར་འགྱུར་ཏེ། ཁོ་བོ་ནི་འཆི་འམ་གསོན་ཡང་རུང་ན་བུ་ཁྱོད་ཀྱི་སྲོག་གསོ་བའི་ཕྱིར་ཁྱོད་ཀྱི་མ་བཙུན་མོ་བསད་སྙམ་
མོ། །དེ་ནས་རྒྱལ་བུ་དགེ་དོན་གྱིས་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །གལ་ཏེ་བཙུན་མོ་བསད་པར་གྱུར་ན་དེའི་ཤ་ལ་བདག་མི་འཚལ་ཏེ། གང་ན་ཡང་མའི་ཤ་ལ་བུ་ཟ་བ་མི་སྲིད་པས་བདག་ཀྱང་འཆི་བར་འགྱུར་ན་
ཡབ་རྒྱལ་པོ་ཅིའི་སླད་དུ་བདག་བཀུམ་སྟེ། ཕ་མའི་སྲོག་ཐར་བར་མི་མཛད། ཡབ་རྒྱལ་པོས་དེ་སྐད་ཅེས་སྨྲས་པ་ཐོས་ནས་མོད་ལ་འཁམས་ཏེ་འགྱེལ་ནས་ས་ལ་འགྲེ་ཞིང་རྒྱལ་བུ་ལ་འདི་སྐད་ཅེས་སྨྲས་སོ། །ཁྱོད་ཁོ་བོའྀ་

71-1-105a

མིག་དང་འདྲ་ན་སུ་ཞིག་རང་གི་མིག་ཕྱུང་སྟེ་ཟ་བར་བྱེད། ཁོ་བོ་ནི་ཤིའང་བླ་བས་བུ་མི་གསོད་དོ། །བུ་བསད་དེ་ཤ་མི་ནུས་སོ། །དེ་ནས་རྒྱལ་བུ་དགེ་དོན་གྱིས་ཡང་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །གལ་ཏེ་ཡབ་ཡུམ་
གྱིས་བདག་བཀུམ་ན་ཤ་ཁྲག་ཀྱང་རིང་པོ་མི་ཐོགས་པར་རུལ་སུངས་ནས་དགོས་པ་མ་མཆིས་པར་འགྱུར་ཏེ། བདག་གིས་གསོལ་བ་གཅིག་ཅིག་མ་གནང་ན་བྱམས་པའི་ཡབ་ཡུམ་མ་ལགས་པས་བདག་གི་ཡིད་དང་མི་འགལ་བར་མཛད་ཏུ་
གསོལ། དེ་ནས་ཡབ་རྒྱལ་པོས་སྲས་རྒྱལ་བུ་ལ་ཁྱོད་ཀྱི་ཡིད་དང་མི་འགལ་བར་བྱ་བས་ཅི་གསོལ་བ་རྣམས་མྱུར་དུ་སྨྲོས་ཤིག་ཅེས་བསྒོ་བ་དང་། རྒྱལ་བུ་དགེ་དོན་གྱིས་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །
ཡབ་ཡུམ་གྱིས་བདག་ལ་ཐུགས་བརྩེ་བའི་སླད་དུ་ཉིན་རེ་རེ་ཞིང་བདག་གི་ལུས་ལས་ཤ་རྒྱ་མ་གསུམ་གསུམ་བཅད་དེ། ཆ་གཉིས་ནི་ཡབ་ཡུམ་ལ་འབུལ། ཆ་གཅིག་ནི་བདག་རང་འཚལ་ན་ལུས་སྲོག་གི་གཟུངས་སུ་འགྱུར་
རོ། །དེ་ནས་རྒྱལ་པོས་ཀྱང་རྒྱལ་བུས་གསོལ་པ་བཞིན་དུ་གནང་ནས་ཉིན་གཅིག་བཞིན་ཤ་རྒྱ་མ་གསུམ་གསུམ་བཅད་དེ། ཆ་གཉིས་ནི་རྒྱལ་པོ་དང་བཙུན་མོ་ཟ། ཆ་གཅིག་ནི་རྒྱལ་བུ་རང་ཟ་སྟེ། ལུས་དང་
སྲོག་གི་གཟུངས་བྱས་ནས་ལམ་དུ་ཞུགས་ཏེ་སོང་བ་ལས་ཞག་གཉིས་ཀྱིས་ཡུལ་ཕ་རོལ་མ་སླེབས་པར་རྒྱལ་བུའི་ལུས་ཀྱི་ཤ་ཟད་དེ་རུས་པའི་ཚིགས་དང་ཆུ་བ་ཙམ་ཞིག་འབྲེལ་ཏེ་སྲོག་གི་ལྷག་མ་ཙམ་ཞིག་ལུས་ནས་ས་
ལ་འགྱེལ་ཏོ། །དེ་ནས་རྒྱལ་པོ་དང་བཙུན་མོས་རྒྱལ་བུ་པང་དུ་བླངས་ནས་སྐད་ཆེན་པོ་ཕྱུང་ནས་ཆོ་ངེས་ཆེན་པོ་བཏབ་སྟེ་འདི་སྐད་ཅེས་སྨྲས་སོ། །ངེད་གཉིས་ཀྱིས་མ་རིག་པས་ཁྱོད་ཀྱི་ཤ་ཟོས་ཏེ་ཁྱོད་འདི་ལྟ་བུའི་ན་ཚ་བའི་
སྡུག་བསྔལ་མྱོང་བར་གྱུར་ལ། ལམ་ཡང་ད་དུང་རིང་བས། ཁྱོད་ཀྱི་ལུས་ཀྱི་ཤ་ནི་ཟད་དེ། ད་ནི་ལྷན་ཅིག་ཏུ་གནས་འདིར་རོ་གཞག་གོ། །དེ་ནས་རྒྱལ་བུ་དགེ་དོན་གྱིས་སྐད་ཆུང་ངུས་

71-1-105b

ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །ད་འདི་ནས་ཕ་རོལ་དུ་ཞག་གཅིག་ཙམ་གྱི་ལམ་ལས་མ་ལུས་ཏེ། བདག་ནི་གཡོ་ཞིང་བསྐྱོད་མི་ནུས་པས་སྲོག་འདིར་འདོར་རོ། །རྒྱལ་པོ་དང་བཙུན་མོ་ནི་མི་མ་རབས་ངན་པ་ལྟར་
ལྷན་ཅིག་ཏུ་གནས་འདིར་རོ་གཞག་གོ་མ་གསུང་ཤིག །བདག་ལ་བྱམས་ཤིང་ཐུགས་བརྩེ་བར་དགོངས་ན་བདག་གིས་བསམས་པ་དང་མི་འགལ་བར་མཛད་དུ་གསོལ། ད་དུང་ཡང་བདག་གི་རུས་པའི་གསེབ་ན་ཤ་ཅི་ཡོད་
པ་མ་ལུས་པར་བཏོགས་ལ་ཡུལ་ཕ་རོལ་དུ་གཤེགས་སུ་གསོལ། དེ་ནས་རྒྱལ་པོས་ཡང་རྒྱལ་བུས་གསོལ་པ་བཞིན་དུ་ཚིགས་དང་རུས་པའི་གསེབ་ན་ཤ་ཅི་ཡོད་པ་ཟད་པར་བཏོགས་ནས་ཆ་གསུམ་དུ་བགོས་ཏེ། ཆ་གཉིས་ནི་རྒྱལ་པོ་དང་
བཙུན་མོས་ཟོས། ཆ་གཅིག་ནི་རྒྱལ་བུ་རང་གིས་ཟོས་ཏེ། རྒྱལ་པོ་དང་བཙུན་མོ་ཡང་ལམ་དུ་ཞུགས་ནས་དོང་ངོ་། །རྒྱལ་བུ་དགེ་དོན་ལངས་ནས་འགྲེང་བཞིན་དུ་རྒྱལ་པོ་དང་བཙུན་མོ་སོང་བ་ལ་བལྟའོ། །རྒྱལ་པོ་དང་བཙུན་མོ་གཉིས་
སྐད་ཕྱུང་ནས་ངུ་ཞིང་སོང་ནས་རྒྱལ་བུ་དགེ་དོན་གྱིས་མིག་གིས་མི་སོད་ཀྱི་བར་དུ་རྒྱལ་པོ་དང་བཙུན་མོ་ལ་ཆགས་པའི་སེམས་ཀྱིས་མིག་མི་བཙུམ་པར་བལྟ་བལྟ་ནས་རིང་ཞིག་ལོན་པ་དང་ཕྱིར་ས་ལ་འགྱེལ་ཏོ། །ཤ་དང་
ཁྲག་གི་དྲི་བྲོ་བས་ཕྱོགས་བཅུ་ནས་སྦྲང་མ་དང་ཤ་སྦྲང་མང་པོ་འདུས་ནས་རྒྱལ་བུ་ཡོག་པ་ཙམ་དུ་ལུས་ལ་ཟ་ཞིང་འཛུགས་ཏེ་སྡུག་བསྔལ་གྱིས་གདུངས་སོ། །དེའི་ཚེ་ན་རྒྱལ་བུ་དེ་སྲོག་གི་ལྷག་མ་ཙམ་ཞིག་མ་ཆད་དེ་སྐད་ཕྱུང་
ནས་འདི་སྐད་ཅེས་སྨོན་ལམ་དུ་བཏབ་བོ། །བདག་གི་སྔོན་གྱི་མི་དགེ་བའི་ལས་རྣམས་ནི་འདིས་བྱང་ཞིང་ཟད་པར་གྱུར་ཅིག །དེང་སླན་ཅད་མི་བགྱིད་དོ། །བདག་གི་ལུས་ཕ་མ་ལ་ཕུལ་ཏེ་སྦྱིན་པ་བྱས་པས་བདག་གི་ཕ་མ་བས་ལྷག་པའི་
བསོད་ནམས་བཅུ་གཅིག་དང་ལྡན་ཏེ་བདེ་བར་ཉལ་བ་དང་བདེ་བར་སད་པ་དང་རྨི་ལམ་ངན་པ་མི་རྨི་བ་དང་ལྷས་སྲུང་བ་དང་། མིས་བཀུར་བ་དང་ཞལ་མཆུ་དང་། རྐུན་པོ་དང་དགྲ་དང་རྐུ་ལྟོ་བྱེད་པ་མེད་ཅིང་དུས་ཐམས་

71-1-106a

ཅད་ཏུ་བཀྲ་ཤིས་པར་ཤོག་ཤིག །བདག་གི་ལུས་ལྷག་མ་ཙམ་ཤ་ཁྲག་སྦྲང་མ་ལ་བྱིན་པས་ཐམས་ཅད་དུ་འདྲངས་ཤིང་ཚིམ་པར་གྱུར་ཏེ་བདག་མ་འོངས་པའི་དུས་ན་སངས་རྒྱས་སུ་གྲུབ་པར་ཤོག་ཤིག །སངས་རྒྱས་སུ་
གྲུབ་ནས་ཆོས་ཀྱི་སྐུ་ཐོབ་ནས་ཀྱང་ཆོས་ཀྱི་སྐུས་ཐམས་ཅད་ཀྱི་བཀྲེས་སྐོམ་པའི་མུ་གེ་དང་སྐྱེ་ཤིར་འཁོར་བའི་ནད་ལྕི་བ་སེལ་བར་ཤོག་ཤིག །རྒྱལ་བུས་དེ་སྐད་ཅེས་སྨོན་ལམ་བཏབ་པ་ན་གནམ་ས་ཡང་རྣམ་པ་དྲུག་ཏུ་གཡོས་ཉི་མ་
ཡང་འོད་མི་གསལ་བར་གྱུར། གཅན་ཟན་དང་རི་དགས་རྣམས་ཀྱང་སྐྲག་ནས་ཀུན་དུ་རྒྱུག །རྒྱ་མཚོ་ཡང་རབ་ཏུ་འཁྲུགས། རི་རབ་ཀྱང་འགུལ་ཞིང་ལྡེག །སུམ་བཅུ་རྩ་གསུམ་གནམ་གྱི་བར་དུ་ཡང་རབ་ཏུ་གཡོས་སོ། །དེའི་ཚེ་བརྒྱ་བྱིན་ལྷའི་དབང་
པོས་འདོད་པའི་ཁམས་ཀྱི་ལྷ་དག་དང་འཛམ་བུའི་གླིང་དག་ཏུ་བབས་ནས་རྒྱལ་བུ་དོན་གྲུབ་བསྡིགས་པའི་ཕྱིར་སེང་གེ་དང་། སྟག་དང་འཕར་སྤྱང་ལ་སོགས་པའི་ལུས་སུ་སྤྲུལ་ནས་མིག་བགྲད་ཁ་གདངས། སྤུ་བསྒྲེངས་ནས་སྐད་ཆེན་པོའི་ང་རོ་ཕྱུང་སྟེ། 
རྒྱལ་བུ་ལ་མཆོང་བ་བཞིན་བསྡིགས་སོ། །དེའི་ཚེ་རྒྱལ་བུ་དོན་གྲུབ་ཀྱིས་གཅན་ཟན་ཁྲོ་བོ་དེ་དག་མཐོང་ནས་ཀྱང་སྐད་མི་ཆེ་བས་འདི་སྐད་ཅེས་སྨྲས་སོ། །ཁྱེད་རྣམས་ཁོ་བོ་ཟ་འདོད་ན་ཅི་བདེར་ཟོ་ཞིག །འདི་འདྲ་བའི་མཐུ་རྩལ་གྱིས་བསྡིགས་ཅི་དགོས་
ཤེས་བསྒོའོ། །དེ་ནས་བརྒྱ་བྱིན་ལྷའི་དབང་པོས་སྨྲས་པ། བདག་ཅག་ནི་སེང་གེ་འམ་གཅན་ཟན་མ་ཡིན་གྱི། བརྒྱ་བྱིན་ལྷའི་དབང་པོ་ཡིན་ཏེ་ཁྱོད་བགམ་ཞིང་སད་དུ་འོངས་སོ། །དེའི་ཚེ་རྒྱལ་བུས་བརྒྱ་བྱིན་ལྷའི་དབང་པོ་མཐོང་ནས་ཤིན་དུ་དགའ་མགུ་རངས་
པར་གྱུར་ཏོ། །དེ་ནས་བརྒྱ་བྱིན་གྱིས་རྒྱལ་བུ་ལ་སྨྲས་པ། ཁྱོད་ཀྱིས་ཤིན་དུ་དཀའ་བ་བཏང་སྟེ། ལུས་ཀྱི་ཤ་ཁྲག་གིས་ཕ་མ་ལ་བསྟབས་པ་འདིའི་བསོད་ནམས་ཀྱིས་ཁྱོད་བདུད་ཀྱི་རྒྱལ་པོ་འདོད་དམ། འོན་ཏེ་ཚངས་པའི་རྒྱལ་པོ་འདོད་དམ། ལྷའི་དབང་
པོ་འམ། མིའི་རྒྱལ་པོ་འམ། འཁོར་ལོས་སྒྱུར་བའི་རྒྱལ་པོ་འདོད། རྒྱལ་བུས་སྨྲས་པ། བདག་ནི་བདུད་ཀྱི་རྒྱལ་པོ་འམ། ཚངས་པ་འམ། ལྷའི་རྒྱལ་པོ་འམ། མིའི་རྒྱལ་པོ་འམ། འཁོར་ལོས་སྒྱུར་བའི་རྒྱལ་པོ་གང་ཡང་མི་འདོད་དེ། སེམས་ཅན་ཐམས་ཅད་

71-1-106b

རྣམ་པར་གྲོལ་བར་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་དོ། །བརྒྱ་བྱིན་གྱིས་སྨྲས་པ། ཁྱོད་ནི་ཤིན་དུ་ཡང་གཏི་མུག་ཅན་ཞིག་ཡིན་པ་འདྲ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་ཡུན་རིང་པོ་ནས་ཤིན་དུ་དཀའ་བ་
བསྒྲུབས་པས་བཟོད་འགྲུབ་ཅེའོ། །ཁྱོད་ཀྱིས་ཤིན་དུ་སྡུག་བསྔལ་བ་བཟོད་དམ། རྒྱལ་བུས་སྨྲས་པ། གལ་ཏེ་ལྕགས་ཀྱི་འཁོར་ལོ་འབར་བ་བདག་གི་སྤྱི་བོའི་སྟེང་ནས་རྒྱུན་དུ་འཁོར་ཡང་སྡུག་བསྔལ་དེ་ཙམ་གྱིས་བདག་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ལས་ཕྱིར་མི་ལྡོག་གོ། །བརྒྱ་བྱིན་གྱིས་སྨྲས་པ། ཁྱོད་ཀྱིས་སྨྲས་པ་སྟོང་པ་འདི་ལ་སུ་ཞིག་ཡིད་ཆེས་པར་འགྱུར། དེ་ནས་རྒྱལ་བུས་དམ་བཅས་ནས་སྨོན་ལམ་འདི་སྐད་ཅེས་བཏབ་བོ། །གལ་ཏེ་བདག་གིས་སྨྲས་པའི་ཚིག་
བརྫུན་ཏེ་ལྷའི་དབང་པོ་བསླུས་པར་གྱུར་ན་བདག་གི་ལུས་ཀྱི་རྨ་འདི་ནམ་དུ་ཡང་འཚོ་བར་མ་གྱུར་ཅིག །གལ་ཏེ་སྨྲས་པའི་ཚིག་བདེན་ན་བདག་གི་ལུས་ཀྱང་སོར་ཆུད་ཅིང་ཁྲག་ཀྱང་འོ་མར་གྱུར་ཅིག་ཅེས་སྨྲས་མ་ཐག་ཏུ་ལུས་ཀྱི་རྨ་ཡང་སྔ་མཁོ་
བཞིན་སོར་ཆུད་དེ། ཁྲག་ཀྱང་འོ་མར་གྱུར་ནས་རྒྱལ་བུའི་བྱད་གཟུགས་ཀྱང་སྔ་མ་བས་ལྷག་པར་བཟང་ཞིང་སྡུག་པ་དང་མཛེས་པར་གྱུར་ཏེ་ལངས་ནས་ལྷའི་དབང་པོའི་རྐང་པ་ལ་མགོ་བོས་ཕྱག་བྱས་སོ། །དེ་ནས་ལྷའི་དབང་པོ་བརྒྱ་བྱིན་གྱིས་
རྒྱལ་བུ་ཁྱོད་ལེགས་སོ། །ཤིན་དུ་ལེགས་སོ། །ཤིན་ཏུ་དཔའ་བའི་བརྩོན་འགྲུས་ཀྱིས་གདོན་མི་ཟ་བར་བླ་ན་མེད་པ་ཡང་དག་པར་རྫོགས་པར་བྱང་ཆུབ་པར་འགྱུར་རོ། །རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཐོབ་པ་ན། ཐོག་མར་བདག་གི་དོན་མཛད་པར་གྱུར་ཅིག་ཅེས་སྨྲས་ནས་བརྒྱ་བྱིན་ལྷའི་དབང་པོ་ཡང་ནམ་མཁའི་ཕྱོགས་དེ་ཉིད་ཏུ་མི་སྣང་བར་གྱུར་ཏོ། །དེའི་ཚེ་ཡང་རྒྱལ་པོ་དང་བཙུན་མོ་ཡང་རྒྱལ་པོ་ཕ་རོལ་པོ་དེའི་དྲུང་དུ་ཕྱིན་ནས་རྒྱལ་པོ་དེས་
ཀྱང་རྒྱང་མ་ནས་བསུ་ནས་དགོས་པའི་ཡོ་བྱད་ཡིད་བཞིན་དུ་སྦྱར་རོ། །དེའི་ཚེ་རྒྱལ་པོ་དང་བཙུན་མོ་དེས་རྒྱལ་བུའི་ལུས་ཀྱི་ཤ་ཁྲག་གིས་ཕ་མ་ལ་ཇི་ལྟར་བསྟབས་པ་རྒྱལ་པོ་དེ་ལ་ཞིབ་ཏུ་བརྗོད་པ་དང་། རྒྱལ་པོ་དེས་ཇི་ལྟར་གྱུར་པ་དེ་དག་

71-1-107a

ཐོས་ནས་རྒྱལ་བུ་དེས་ལུས་ཀྱི་ཤ་ཁྲག་གིས་ཕ་མ་ལ་བསྟབས་པས་སྲི་ཞུ་ཆེར་བྱས་པའི་དྲིན་ལན་བསམས་ནས། དམག་རྣམ་བཞི་བཤམས་ནས་རྒྱལ་པོ་དེ་དང་ཡུལ་བཱ་ར་ན་སཱིར་དམག་དྲངས་སོ། །དེའི་ཚེ་རྒྱལ་པོ་དེ་དམག་རྣམ་བཞི་དང་
ཆས་ནས་ལམ་དུ་ཞུགས་ཏེ། རྒྱལ་བུ་དང་བྲལ་བའི་གནས་སུ་ཕྱིན་པ་དང་། འདི་སྙམ་དུ་བདག་གི་བུ་ནི་གདོན་མི་ཟ་བར་འདི་ཉིད་དུ་ཤི་ན་བུའི་རུས་པ་ཙམ་བསྡུས་ཏེ་ཕྱིར་བདག་གི་ཡུལ་དུ་བཀུར་རོ་སྙམ་དུ་བསམས་ནས་སྐད་ཕྱུང་ནས་ངུ་ཞིང་བུའི་རུས་བུ་
སྡུད་ཏུ་སོང་སོང་བ་ལས་རྒྱང་མ་ནས་བདག་གི་བུ་ལུས་ཀྱི་རྨ་ཡང་སོས་ནས་སྔ་བས་ཀྱང་བཟང་ཞིང་མཛེས་ཏེ་དྲུང་དུ་འོངས་སོ། །དེ་ནས་རྒྱལ་པོས་པང་དུ་བླངས་ཏེ་ཁྱོད་ད་དུང་གསོན་ནམ་ཞེས་སྨྲས་པ་དང་། རྒྱལ་བུས་ཇི་ལྟར་གྱུར་པ་ཡབ་རྒྱལ་པོ་དང་
བཙུན་མོ་ལ་སྨྲས་སོ། །རྒྱལ་པོ་དང་བཙུན་མོ་རབ་ཏུ་དགའ་སྟེ། ཐམས་ཅད་བན་གླང་ལ་ཞོན་ནས་ཕྱིར་བདག་གི་ཡུལ་དུ་ཕྱིན་པ་དང་། རྒྱལ་བུ་དེའི་བསོད་ནམས་ཀྱི་མཐུས་བདག་གི་ཡུལ་ཡང་ཕྱིར་ཐོབ་ནས་རྒྱལ་བུ་དོན་གྲུབ་རྒྱལ་པོར་དབང་བསྐུར་
ཏེ་རྒྱལ་པོར་བཅུག་གོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་ཡབ་རྒྱལ་པོར་གྱུར་པ་དེ་གཞན་ཞིག་ཡིན་སྙམ་དུ་ཁྱེད་སེམས་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེའི་ཚེ་དེའི་དུས་ན་ཡབ་རྒྱལ་པོ་དེ་ནི་ད་
ལྟར་ངའི་ཡབ་ཟས་གཙང་མ་ཞེས་བྱ་བར་གྱུར་ཏོ། །དེའི་ཚེ་དེའི་དུས་ན་ཡུམ་དུ་གྱུར་པ་དེ་ནི་གཞན་ཞིག་ཡིན་སྙམ་དུ་ཁྱོད་སེམས་ན་དེ་དེ་ལྟར་མི་བལྟ་སྟེ་དེ་ནི་ད་ལྟར་ངའི་ཡུམ་ལྷ་མཛེས་ཤེས་བྱ་བ་ཡིན་ནོ། །དེའི་ཚེ་དེའི་དུས་ན་རྒྱལ་བུ་དོན་གྲུབ་
ཅེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་སེམས་ན་དེ་དེ་ལྟར་མི་བལྟའོ། །དེའི་ཚེ་དེའི་དུས་ན་རྒྱལ་བུ་དེ་ནི་ད་ལྟར་ཤཱཀྱ་ཐུབ་པ་ཞེས་བྱ་བ་ང་ཡིན་ནོ། །དེའི་ཚེ་དེའི་དུས་ན་བརྒྱ་བྱིན་ལྷའི་དབང་པོར་གྱུར་པ་དེ་ནི་ད་ལྟར་ཀུན་ཤེས་ཀཽ་ཌི་ནྱ་ཞེས་
བྱ་བ་ཡིན་ནོ། །བཅོམ་ལྡན་འདས་ཀྱིས་ཕ་མ་ལ་སྲི་ཞུ་བྱེད་པའི་ལེའུ་འདི་བསྟན་པའི་ཚེ་འཁོར་གྱི་དཀྱིལ་འཁོར་དེ་ན་བྱང་ཆུབ་སེམས་དཔའ་ཁྲི་ཕྲག་ཉི་ཤུ་སྙེད་ཀྱིས་འགྲོ་བ་ཐམས་ཅད་ལ་ཕན་པ་དང་བདེ་བའི་དོན་ལ་མཁས་པའི་ཚིག་གི་སྤོབས་པ་

71-1-107b

ཐོབ་པར་གྱུར་ཏོ། །བྱང་ཆུབ་སེམས་དཔའ་ཁྲི་ཕྲག་བཅུ་གཉིས་ཀྱིས་མི་སྐྱེ་བའི་ཆོས་ལ་ཆོས་ཀྱི་བཟོད་པ་ཐོབ་བོ། །གཞན་ཡང་ཕྱོགས་བཅུ་ནས་འདུས་པའི་ཉན་ཐོས་དང་། རང་སངས་རྒྱས་རྡུལ་ཕྲ་རབ་སྙེད་ཀྱིས་ཐེག་པ་གཉིས་ཀྱི་སེམས་སྤངས་ཏེ་
ཐེག་པ་གཅིག་གིས་མཐར་ཕྱིན་པར་གྱུར་ཏོ། །དགེ་བསྙེན་དང་། དགེ་བསྙེན་མ་རྡུལ་ཕྲ་རབ་སྙེད་ཀྱིས་འབྲས་བུ་དང་པོ་ནས་ཐེག་པ་གཉིས་ཀྱི་འབྲས་བུའི་བར་དུ་ཐོབ་པར་གྱུར་ཏོ། །ལྷ་དང་མི་བརྒྱ་སྟོང་སྙེད་ནི་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་སེམས་བསྐྱེད་དོ། །དེ་མ་ཡིན་པ་ལྷ་དང་ཀླུ་དང་ཡི་དགས་དང་ལྷ་མ་ཡིན་དང་དྲི་ཟ་དང་ནམ་མཁའ་ལྡིང་དང་མི་འམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ལགས་པ་ལ་སོགས་པའི་ཚོགས་མང་པོ་རྣམས་ལ་ལ་ནི་བླ་ན་མེད་པའི་བྱང་ཆུབ་ཏུ་
སེམས་བསྐྱེད་ནས་ཉན་ཐོས་དང་རང་སངས་རྒྱས་ཀྱི་བར་དུ་སེམས་བསྐྱེད་པར་གྱུར་ཏོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། བྱང་ཆུབ་སེམས་དཔའ་དག་གིས་སེམས་ཅན་ཐམས་ཅད་ཀྱི་དོན་དུ་ཕ་མ་ལ་སྲི་ཞུ་བྱ་བའི་
ཕྱིར་ལུས་ཀྱི་ཤ་དང་ཁྲག་གིས་ཀྱང་ཕ་མ་ལ་བསྟབས་ཤིང་ཤིན་དུ་སྤྱད་དཀའ་བ་སྤྱོད་པ་ནི་འདི་ལྟ་བུ་ཡིན་ནོ། །འཁོར་མང་པོ་ཐམས་ཅད་ཀྱིས་སངས་རྒྱས་ཀྱིས་གསུངས་པ་ཐོས་ནས་སོ་སོ་ནས་ཕན་པ་དང་བདེ་བའི་དོན་རྙེད་དེ། དགའ་
རངས་ནས་མགོ་བོས་ཕྱག་འཚལ་ཏེ་གཡས་ཕྱོགས་ནས་བསྐོར་བ་བྱས་ནས་ཕྱིར་དོང་ངོ་། །ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་ལས་སྲི་ཞུའི་ལེའུ་ཞེས་བྱ་སྟེ་གཉིས་པའོ།། །། ཐབས་མཁས་
པ་ཆེན་པོ་སངས་རྒྱས་དྲིན་ལན་བསབ་པའི་མདོ། བམ་པོ་གཉིས་པ། དེའི་ཚེ་དེའི་དུས་ན་བཅོམ་ལྡན་འདས་འཁོར་གྱི་དཀྱིལ་འཁོར་མང་པོའི་ནང་ཉི་མའི་དཀྱིལ་འཁོར་གྱིས་སྐར་མ་མང་པོ་ཟིལ་གྱིས་མནན་པ་ལྟ་བུ་འམ། 
ཀླུ་འཁྱིལ་པའི་འཇའ་ཚོན་ལྟར་འཚེར་ཞིང་གསལ་བ་ལ་ལྟ་ན་མིག་མི་ཆགས་པ་བཞིན་ནམ། བསམས་ན་ཡིད་འཁྲུལ་པ་ཙམ་དུ་འོད་ཟེར་ལྷམ་མེ། ལྷང་ངེར་བཞུགས་ཏེ། དཔེར་མི་བཟོད་པ་ནི་སྲིན་བུ་མེ་ཁྱེར་གྱི་འོད་ཉྀ་མ་ཤར་

71-1-108a

མ་ཐག་ཏུ་མི་སྣང་བ་འམ། ཉི་ཟླ་ལ་འོད་ཟེར་བརྒྱ་སྟོང་སྙེད་ཡོད་ཀྱང་བརྒྱ་བྱིན་གྱི་དྲུང་ན་སོལ་ཕུང་ལྟ་བུ་འམ། བརྒྱ་བྱིན་ལ་འོད་གསལ་བ་ཡོད་ཀྱང་ཚངས་པ་ཆེན་པོའི་འོད་ཟེར་གྱི་དྲུང་ན་གྱོ་མོ་འམ་གསེག་མ་ལྟ་བུ་འམ་མཚན་མོ་དང་ནོར་བུ་རིན་
པོ་ཆེའི་འོད་དུ་བསྒྲུན་པ་ཙམ་འམ། ཚངས་པའི་རྒྱལ་པོ་ཆེན་པོ་ལ་འོད་ཟེར་དམ་པ་བརྒྱ་སྟོང་སྙེད་ཡོད་པའི་འོད་ཐམས་ཅད་ཀྱང་དེ་བཞིན་གཤེགས་པའི་འོད་ཟེར་གྱི་དྲུང་ན་སོལ་བའི་ཕུང་པོ་ལྟར་གྱུར་ཏོ། །དེ་ཅིའི་ཕྱིར་ཞེ་ན། དེ་བཞིན་གཤེགས་
པའི་འོད་ཟེར་གྱི་མདོག་གང་གིས་ཕྱོགས་བཅུའི་འཇིག་རྟེན་གྱི་ཁམས་ཀུན་དུ་སྣང་བར་གྱུར་ཏོ། །དེ་དག་ན་གནས་པའི་སེམས་ཅན་དག་ལ་འོད་ཟེར་དེས་རེག་ན་དམུས་ལོང་ནི་མིག་གིས་གཟུགས་མཐོང་བར་འགྱུར། ལུས་སྒུར་པོ་ནི་ལུས་
རངས་པར་འགྱུར། དབང་པོ་ཉམས་པ་རྣམས་ནི་དབང་པོ་ཚང་ཞིང་ཡན་ལག་དང་ཉིང་ལག་དང་ལྡན་པར་འགྱུར། མྱོས་པ་རྣམས་ནི་དྲན་པ་ཕྱིར་རྙེད་པར་གྱུར། མདོར་ན་ཇི་ཙམ་དུ་ཡིད་ཏུ་མི་འོང་བ་ཐམས་ཅད་དང་བྲལ་ཏེ་འདོད་པ་བཞིན་ཐོབ་
པར་འགྱུར་རོ། །དེའི་ཚེ་འཁོར་གྱི་དཀྱིལ་འཁོར་དེ་ཉིད་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་བདུན་བཅུ་སྙེད་སྟན་ལས་ལངས་ནས་སངས་རྒྱས་ཀྱི་ཞབས་ལ་མགོ་བོས་ཕྱག་འཚལ་ཏེ་ལན་བརྒྱ་སྟོང་དུ་བསྐོར་བ་བྱས་ནས་ཕྱོགས་
གཅིག་ཏུ་འཁོད་དོ། །ཐམས་ཅད་ཀྱིས་སྐད་འཐུན་པར་ཚིགས་སུ་བཅད་པ་བརྒྱ་སྟོང་གིས་དེ་བཞིན་གཤེགས་པ་ལ་མངོན་པར་བསྟོད་པ་བྱས་པ་ལ་འདི་ལྟ་སྟེ། བྱང་ཆུབ་སེམས་དཔའ་བསམ་གྱིས་མི་ཁྱབ་པ་དང་། བྱང་ཆུབ་སེམས་
དཔའ་རྟོག་མེད་དབྱངས་དང་། བྱང་ཆུབ་སེམས་དཔའ་བདེ་བ་འབའ་ཞིག་སེམས་དང་། བྱང་ཆུབ་སེམས་དཔའ་དྲི་མ་མེད་པར་གྲགས་པ་དང་། བྱང་ཆུབ་སེམས་དཔའ་ཚད་མེད་དབྱངས་དང་། བྱང་ཆུབ་སེམས་དཔའ་གྲགས་པ་ཆེན་པོ་དང་། བྱང་ཆུབ་སེམས་
དཔའ་གཙུག་ཕུད་འོད་དང་། བྱང་ཆུབ་སེམས་དཔའ་བརྟན་པའི་སེང་གེ་དང་། བྱང་ཆུབ་སེམས་དཔའ་འབའ་ཞིག་རོལ་དང་། བྱང་ཆུབ་སེམས་དཔའ་རྟོག་པ་སྤོང་བ་དང་། བྱང་ཆུབ་སེམས་དཔའ་ཡེ་ཤེས་བརྩེགས་དང་། 

71-1-108b

བྱང་ཆུབ་སེམས་དཔའ་དགེ་གནས་བློ་གྲོས་དང་། བྱང་ཆུབ་སེམས་དཔའ་རབ་ཏུ་མཚན་མེད་དང་། བྱང་ཆུབ་སེམས་དཔའ་བློ་གྲོས་འོད་ཟེར་དང་བྱང་ཆུབ་སེམས་དཔའ་ཁྲོ་ཞི་བློ་གྲོས་དང་། བྱང་ཆུབ་སེམས་དཔའ་ཤིན་
དུ་བསྲུང་འགྱུར་དང་། བྱང་ཆུབ་སེམས་དཔའ་དད་པ་བཙན་དང་། བྱང་ཆུབ་སེམས་དཔའ་མེ་ཏོག་འཕགས་དང་། བྱང་ཆུབ་སེམས་དཔའ་ཀུན་དུ་བདེ་དང་། བྱང་ཆུབ་སེམས་དཔའ་འཕགས་པའི་ཤེས་རབ་ལས་དང་། 
བྱང་ཆུབ་སེམས་དཔའ་ངོ་འཕྲལ་འཆད་དང་། བྱང་ཆུབ་སེམས་དཔའ་བསམ་དུ་མེད་པ་དང་། བྱང་ཆུབ་སེམས་དཔའ་ཚངས་པ་སྦྱིན་དང་། བྱང་ཆུབ་སེམས་དཔའ་རིན་ཆེན་ལས་དང་། བྱང་ཆུབ་སེམས་དཔའ་ལྷའི་
མེ་ཏོག་གནས་དང་། བྱང་ཆུབ་སེམས་དཔའ་ཤིན་དུ་སེམས་དང་། བྱང་ཆུབ་སེམས་དཔའ་དཔག་མེད་ཆོས་དང་། བྱང་ཆུབ་སེམས་དཔའ་གྲགས་པའི་ཡིད་དང་། བྱང་ཆུབ་སེམས་དཔའ་སྤོབས་པ་བརྩེགས་དང་། བྱང་ཆུབ་
སེམས་དཔའ་དབང་ཕྱུག་སྒོ་དང་། བྱང་ཆུབ་སེམས་དཔའ་སྟོབས་བཅུ་དང་། བྱང་ཆུབ་སེམས་དཔའ་སྟོབས་བཅུ་འཆང་དང་། བྱང་ཆུབ་སེམས་དཔའ་འཕགས་པ་ཆེན་པོས་སྐྱོང་དང་། བྱང་ཆུབ་སེམས་དཔའ་འདས་
པ་མེད་པ་དང་། བྱང་ཆུབ་སེམས་དཔའ་ཞི་བ་རོལ་དང་། བྱང་ཆུབ་སེམས་དཔའ་དེ་ན་གནས་དང་། བྱང་ཆུབ་སེམས་དཔའ་གྲངས་མེད་ལྷ་དང་། བྱང་ཆུབ་སེམས་དཔའ་རི་རབ་འོད་དང་། བྱང་ཆུབ་སེམས་དཔའ་
རབ་ཏུ་ལྕི་བའི་སྡོང་པོ་དང་། བྱང་ཆུབ་སེམས་དཔའ་རྒྱུ་ལས་འཕགས་དང་། བྱང་ཆུབ་སེམས་དཔའ་གཅིག་པུ་འགྲོ་དང་། བྱང་ཆུབ་སེམས་དཔའ་གཟི་བརྗིད་འཕགས་དང་། བྱང་ཆུབ་སེམས་དཔའ་སྡེ་ཆེན་མཁས་དང་
བྱང་ཆུབ་སེམས་དཔའ་རིས་སྐྱོབ་དང་། བྱང་ཆུབ་སེམས་དཔའ་འཇིག་རྟེན་གསུམ་འཛིན་དང་། བྱང་ཆུབ་སེམས་དཔའ་ངོ་འཕྲལ་ཡོད་དང་། བྱང་ཆུབ་སེམས་དཔའ་གྲགས་པ་བརྗོད་དང་། བྱང་ཆུབ་སེམས་དཔའ་ཉི་འོད་

71-1-109a

གསལ་དང་། བྱང་ཆུབ་སེམས་དཔའ་སེང་གེ་བཙན་དང་། བྱང་ཆུབ་སེམས་དཔའ་དུས་ཚོད་རྒྱལ་པོ་དང་། བྱང་ཆུབ་སེམས་དཔའ་སེང་གེའི་སྙིང་པོ་དང་། བྱང་ཆུབ་སེམས་དཔའ་སྲིད་མངོན་སྟོན་དང་། 
བྱང་ཆུབ་སེམས་དཔའ་འོད་རྒྱང་གསལ་དང་། བྱང་ཆུབ་སེམས་དཔའ་སེང་གེའི་རི་དང་། བྱང་ཆུབ་སེམས་དཔའ་སྲིད་ལེན་སྦྱིན་དང་། བྱང་ཆུབ་སེམས་དཔའ་རྒྱལ་བ་སྦྱིན་དང་བྱང་ཆུབ་སེམས་དཔའ་རྒྱལ་མཚན་མཆོག་དང་། བྱང་ཆུབ་སེམས་དཔའ་དགའ་མགུ་རངས་དང་། 
བྱང་ཆུབ་སེམས་དཔའ་བརྩོན་འགྲུས་བརྟན་དང་། བྱང་ཆུབ་སེམས་དཔའ་འགྲིབས་མེད་དང་། བྱང་ཆུབ་སེམས་དཔའ་གྲགས་ལྡན་དང་། བྱང་ཆུབ་སེམས་དཔའ་འཇིགས་མེད་དང་། བྱང་ཆུབ་སེམས་དཔའ་མ་ཆགས་ལྷ་དང་། བྱང་ཆུབ་
སེམས་དཔའ་སྒྲོན་མ་ཆེན་པོ་དང་། བྱང་ཆུབ་སེམས་དཔའ་འཇིག་རྟེན་འོད་དང་། བྱང་ཆུབ་སེམས་དཔའ་དམ་པའི་དབྱངས་དང་། བྱང་ཆུབ་སེམས་དཔའ་ཐབས་ཆེན་སྟོབས་དང་། བྱང་ཆུབ་སེམས་དཔའ་མུན་ནག་སེལ་དང་། བྱང་ཆུབ་
སེམས་དཔའ་མཉམ་མེད་ཕྱོགས་ལ་སོགས་པ་བྱང་ཆུབ་སེམས་དཔའ་དེ་དག་ཐམས་ཅད་ཀྱིས་སངས་རྒྱས་ཀྱི་སྤྱན་སྔར་ཡི་དམ་འདི་སྐད་བཅས་སོ། །བདག་ཅག་རྣམས་ཀྱིས་བཅོམ་ལྡན་འདས་མྱ་ངན་ལས་འདས་པའི་འོག་ཏུ་སངས་རྒྱས་ཀྱི་ཆོས་
བསྲུང་ཞིང་ཕྱོགས་བཅུའི་འཇིག་རྟེན་གྱི་ཁམས་ཀུན་དུ་རྒྱས་པར་བགྱི་ཞིང་རྒྱུན་མི་འཆད་པར་བགྱིའོ། །དེ་ཅིའི་སླད་དུ་ཞེ་ན། བདག་ཅག་གིས་དེ་བཞིན་གཤེགས་པའི་འོད་ཟེར་དམ་པ་བསམ་གྱིས་མི་ཁྱབ་པ་མཐོང་ནས་འོད་ཟེར་དེ་དག་ལས་
སངས་རྒྱས་ཀྱི་ཆོས་བསམ་གྱིས་མི་ཁྱབ་པར་ཡང་ཐོས་པར་གྱུར། ཆོས་དེ་དག་ཐོས་ནས་སེམས་ཀྱི་སྒྲིབ་པ་དང་བྲལ་ཏེ་ཀུན་ནས་ཉོན་མོངས་པ་ཐམས་ཅད་བྱང་ནས། ལྷའི་རིན་པོ་ཆེ་གསེར་ལྟར་སེམས་རྣམ་པར་དག་པར་གྱུར་པས་
ཐམས་ཅད་གསལ་བར་སྣང་བར་གྱུར་པའི་ཕྱིར་རོ། །བདག་ཅག་གིས་ཕན་པ་དང་། བདེ་བའི་ཡོན་ཏན་འདི་ལྟ་བུ་དྲན་པས་དེ་བཞིན་གཤེགས་པ་ལ་སྟོན་པ་ཆེན་པོར་འདུ་ཤེས་སྐྱེས་སོ། །བྱམས་པའི་ཕ་མ་ལྟ་བུའི་འདུ་ཤེས་སྐྱེས་ནས་

71-1-109b

རྟག་ཏུ་སངས་རྒྱས་ཀྱི་བཀའ་དྲིན་དྲན་ཏེ་སངས་རྒྱས་བཀའ་དྲིན་ཤེས་པར་བགྱིད་དོ། །དེ་ཅིའི་ཕྱིར་ཞེ་ན། དམ་པའི་ཆོས་ཐོས་པས་རིང་པོ་མི་ཐོགས་པར་བྱང་ཆུབ་ཀྱི་སྙིང་པོ་ལ་འདུག་ཅིང་དམ་པའི་ཆོས་ཀྱི་འཁོར་ལོ་བསྐོར་ཏེ་སེམས་ཅན་ཐམས་ཅད་སྒྲོལ་བར་
འགྱུར་རོ། །དེ་དག་ཀྱང་ཆོས་ཐོས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་བའི་ཕྱིར་རོ། །དེ་ནས་དེ་བཞིན་གཤེགས་པས་འཁོར་མང་པོ་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་སེམས་
དཔའ་ཆེན་པོ་བདུན་བཅུ་པོ་འདི་དག་ཡུན་རིང་པོ་ནས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་གི་རྡུལ་ཕྲ་རབ་སྙེད་ཀྱི་སྔོན་རོལ་ན། སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་བརྒྱ་སྟོང་སྙེད་ཀྱི་འཇིག་རྟེན་གྱི་ཁམས་ཀྱི་རྡུལ་ཕྲ་
རབ་སྙེད་ལ་བསྙེན་བཀུར་བྱས་ཏེ། སངས་རྒྱས་དེ་དག་ལས་རྟག་ཏུ་ཚངས་པར་སྤྱོད་པ་སྤྱད་ཅིང་རྒྱལ་བ་དེ་དག་ལ་མི་སྐྱོ་བའི་སེམས་ཀྱིས་མཉེས་པར་བྱས་ནས། བྱམས་པས་བདག་གི་ལུས་བསྲུངས་ཏེ་སངས་རྒྱས་ཀྱི་ཆོས་འཛིན་ཅིང་སྙིང་
རྗེ་ཆེན་པོས་རྒྱུན་དུ་ཕྱོགས་བཅུར་ཐམས་ཅད་ལ་ཕན་པ་དང་བདེ་བའི་དོན་བྱེད་དོ། །སེམས་ཅན་གང་ཞིག་ཐ་མ་ཤི་ཀར་བྱང་ཆུབ་སེམས་དཔའ་དེ་དག་ལ་གཅིག་གི་མིང་ངམ། གཉིས་སམ། གསུམ་འམ། བཞི་ནས་བདུན་བཅུའི་བར་དུ་བདེ་
པར་ཐོས་ཏེ། དེ་ལ་སྲོག་ཕྱོགས་སྐྱབས་སུ་སོང་ན་ཚེ་འཕོས་མ་ཐག་ཏུ་གང་ན་སངས་རྒྱས་བཞུགས་པའི་འཇིག་རྟེན་གྱི་ཁམས་སུ་པད་མོ་ལས་རྫུས་ཏེ་སྐྱེ་བར་འགྱུར་ཞིང་འདོད་ཆགས་དང་ཡོངས་སུ་བྲལ་བ་དང་། མངལ་གྱི་གནས་ནས་
མི་སྐྱེ་བ་དང་། མནམ་ཞིང་ཙོག་པ་དང་བྲལ་བར་འགྱུར་ཏེ། ལུས་ཡོངས་སུ་དག་ཅིང་ལུས་དྲི་ཞིམ་པ་དང་། ཐམས་ཅད་ཀྱི་ཡིད་དུ་འོང་ཞིང་བཀུར་སྟི་བྱེད་པར་འགྱུར་རོ། །ཀུན་གྱི་ཡིད་ཏུ་འོང་ཞིང་བཀུར་སྟི་བྱས་པས་སེམས་
རབ་ཏུ་དགའ་བར་འགྱུར་རོ། །སེམས་རབ་ཏུ་དགའ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པས་

71-1-110a

སེམས་ཅན་ཐམས་ཅད་ལ་བྱམས་པ་དང་སྙིང་རྗེ་ཆེན་པོའི་སེམས་བསྐྱེད་པར་འགྱུར། དེ་ལྟར་བྱམས་པ་དང་སྙིང་རྗེའི་སེམས་བསྐྱེད་པས་འགྲོ་བ་མ་ལུས་པ་ལ་བཏང་སྙོམས་སུ་མི་གཏོང་བའི་སེམས་སྐྱེ་
བར་འགྱུར། གཞན་ཡང་སེམས་ཅན་ལ་ཕན་པ་དང་བདེ་བར་འགྱུར་བའི་སེམས་དང་། བདག་དང་གཞན་གྱི་དོན་བྱེད་པའི་སེམས་དང་། སྒྲིབ་པ་དང་། བར་ཆད་དུ་འགྱུར་བ་བསལ་བའི་སེམས་དང་། ཉོན་མོངས་པ་ཞི་བར་བྱེད་པའི་
སེམས་དང་། དགེ་བའི་བཤེས་གཉེན་ལ་བསྙེན་ཅིང་རྟག་ཏུ་བཀུར་སྟི་བྱེད་པའི་སེམས་དང་། འདུན་པའི་ཡིད་ཀྱིས་ཆོས་ཉན་པའི་སེམས་དང་། མི་བརྗེད་པར་ཡིད་ལ་བྱེད་ཅིང་དོན་བཟང་པོ་གཟུངས་སུ་འཛིན་པའི་སེམས་དང་། 
ཉུང་དུ་ཐོས་ལ་དོན་མང་དུ་ཤེས་པའི་སེམས་དང་། མང་དུ་ཐོས་ལ་དོན་མི་ཤེས་པ་མི་འདོད་པའི་སེམས་སྐྱེ་བར་འགྱུར་རོ། །དེ་ནས་ཡང་དག་པ་ཉིད་ལ་དང་བའི་སེམས་དང་། དེ་བཞིན་ཉིད་ཀྱི་དོན་བདེན་པ་ལ་དད་པའི་སེམས་
སྐྱེ་བར་འགྱུར། ཡང་དག་པའི་དོན་བདེན་པ་ལ་དད་པའི་སེམས་སྐྱེས་པས་ཇི་ལྟར་བསྟན་པ་བཞིན་དུ་རྣལ་འབྱོར་སྤྱོད་པའི་སེམས་སྐྱེ་བར་འགྱུར་རོ། །ཇི་ལྟར་བསྟན་པ་བཞིན་དུ་རྣལ་འབྱོར་སྤྱོད་པའི་སེམས་སྐྱེས་པས་
ཕྱིར་མི་ལྡོག་པའི་སེམས་སྐྱེ་བར་འགྱུར། དེ་ལྟར་ཕྱིར་མི་ལྡོག་པའི་སེམས་སྐྱེས་པས་སེམས་ཅན་དེ་དག་ཐམས་ཅད་ལ་མཉམ་སྙོམས་པའི་གཉེན་པོའི་སེམས་སྐྱེ་བར་འགྱུར་རོ། །ཇི་ལྟར་བདག་ཁམས་གསུམ་པའི་
སྲིད་པ་ཉི་ཤུ་ལྔར་སྐྱེ་བར་མི་དགའ་བ་བཞིན་དུ་གཟུགས་ཡོད་པ་དང་། གཟུགས་མེད་པ་དང་། རྐང་བཞི་དང་། རྐང་མངས་དང་། གྲོག་སྦུར་ནས་སྲོག་ཆགས་ཐམས་ཅད་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་
དཔའ་ནི་ལུས་དང་སྲོག་གི་བར་དུ་སྟོར་ཡང་ཕ་རོལ་པོའི་སྲོག་འཕྲོག་པའི་ལས་མི་བྱེད་དོ། །ཇི་ལྟར་བདག་ལ་ནོར་རྫས་དང་། འབྲུ་དང་། གོས་དང་། ཟས་དང་། སྐོམ་དང་། བན་གླང་དང་། ཤིང་རྟ་དང་། ཐེག་པ་དང་། ཡུལ་དང་

71-1-110b

གྲོང་ཁྱེར་དང་། ཆུང་མ་དང་། བུ་དང་། ལུས་ཀྱི་ཡན་ལག་གི་བར་དུ་ལོངས་སྤྱོད་རྣམས་ལ་སྲུང་ཞིང་རིམ་གྲོ་བྱེད་དོ། །གཞན་གྱིས་ཁྱེར་ཞིང་འཕྲོག་པ་ལ་མི་དགའ་བ་བཞིན་དུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་
དཔའ་ནི་བདག་གི་ལུས་དང་སྲོག་སྟོར་ཀྱང་སེམས་ཅན་རྣམས་ཀྱི་ནོར་དང་། གོས་དང་། ཟས་དང་། སྐོམ་དང་། ལོངས་སྤྱོད་ལ་འཕྲོག་པའི་སེམས་མི་སྐྱེད་དོ། །ཇི་ལྟར་བདག་གི་གཟུགས་དམ་པ་སྲིང་མོ་འམ། ཆུང་མ་འམ། སླས་ལ་
གཞན་གྱི་མི་རིགས་པར་བྱེད་མི་འདོད་པ་དེ་བཞིན་དུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་དཔའ་ནི་བདག་གི་ལུས་དང་སྲོག་སྟོར་ཀྱང་ཕ་རོལ་པོའི་གཟུགས་དམ་པ་ལ་འདུ་ཤེས་ངན་པ་ལོག་པའི་སེམས་མི་
སྐྱེད་ན་མི་རིགས་པའི་ཆོས་ངན་པ་ལྟ་ཅི་སྨོས། ཇི་ལྟར་བདག་ཕྲ་མ་དང་ཚིག་རྩུབ་པོ་འཁྲུག་པར་འགྱུར་བ་ལ་མི་དགའ་བ་བཞིན་དུ་སེམས་ཅན་རྣམས་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་དཔའ་ནི་བདག་གི་ལུས་དང་སྲོག་ཡལ་
ཡང་བརྫུན་དུ་སྨྲ་བ་དང་ཕན་ཚུན་འཁྲུག་པའི་ཚིག་མི་སྨྲའོ། །ཇི་ལྟར་བདག་རྡོ་དབྱུག་གིས་རྡེག་པ་དང་། ལྕག་གིས་གཞུ་བ་དང་། ནན་ལ་འབོར་བ་ལ་མི་དགའ་བ་བཞིན་དུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་
དཔའ་ནི་བདག་གི་ལུས་དང་སྲོག་ཡལ་ཡང་རྡོ་དབྱུག་དང་། ལྕག་དང་ཆད་པས་གཅད་པའི་ལས་ཀྱིས་སེམས་ཅན་རྣམས་ལ་མི་འཚེའོ། །ཇི་ལྟར་བདག་ལྕགས་སྒྲོག་དང་། ཁོང་སྒྲིལ་དང་། བཟུང་བ་དང་། བཏགས་པ་དང་། བཅིང་བས་བཅིངས་
པའི་གནོད་པ་རྣམས་ལ་མི་དགའ་བ་བཞིན་དུ་སེམས་ཅན་ཀུན་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་དཔའ་ནི་ལུས་དང་སྲོག་ཡལ་ཡང་ལྕགས་སྒྲོག་དང་། ཁོང་སྒྲིལ་དང་། བཟུང་བ་དང་། བཅིང་བ་ལ་སོགས་པ་གནོད་པས་འཚེ་བར་མི་
བྱེད་དོ། །ཇི་ལྟར་བདག་གཞན་གྱིས་བརྙས་པ་དང་། དབང་དང་། དྲག་ཤུལ་བྱེད་པ་དང་། དབང་རློམ་བཙན་བྱེད། སྙེམས་ཤིང་ངན་དུ་བྱེད་པ་ལ་མི་དགའ་བ་བཞིན་དུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། དེ་བས་ན་བྱང་ཆུབ་སེམས་དཔའ་

71-1-111a

ནི་བདག་གཅིག་པུའི་ལུས་དང་སྲོག་ཡལ་ཡང་ཚུལ་བཞིན་མ་ཡིན་པའི་མི་རིགས་པས་སེམས་ཅན་ལ་གནོད་པ་མི་བྱེད་དོ། །ཇི་ལྟར་བདག་ལ་ཕ་རོལ་པོ་གཞན་གྱིས་བཀུར་སྟི་བྱེད་ཅིང་མཆོད་དམ་ཚིག་སྙན་པས་བསྟོད་ན་བདག་དགེ་
བ་ལ་དགའ་བ་བཞིན་དུ་བདག་ཀྱང་སེམས་ཅན་རྣམས་ལ་གོས་དང་། ཟས་དང་། སྐོམ་དང་། མལ་ཆ་དང་། ནད་ཀྱི་རྐྱེན་རྩི་དང་། བདེ་བའི་ཡོ་བྱད་ཐམས་ཅད་ཀྱིས་སྦྱིན་པར་བྱེད་དོ། །གལ་ཏེ་བདག་གིས་ལས་ཆེན་པོ་ཞིག་སྒྲུབ་པ་འམ། 
སངས་རྒྱས་ཀྱི་ཕྱིར་རམ། ཆོས་ཀྱི་ཕྱིར་རམ། དགེ་འདུན་གྱི་ཕྱིར་རམ། དོན་སྒྲུབ་པ་ལས་བློས་མི་ལྕོགས་ཏེ་དོན་གྲུབ་པར་མ་གྱུར་ནས། མི་དགའ་ཞིང་མྱ་ངན་གྱིས་གདུངས་པ་ལས་མཁས་པ་བློ་དང་ལྡན་པ་ཞིག་གིས་བདག་གིས་
བསྒྲུབ་པའི་དོན་མ་གྲུབ་པས་མི་དགའ་ཞིང་མྱ་ངན་བྱེད་པར་མཐོང་ན་བདག་ལ་འདི་སྐད་ཟེར་རོ། །རིགས་ཀྱི་བུ་ཁྱོད་མི་དགའ་བ་མ་བྱེད་ཅིག །ཁྱོད་ཀྱི་དོན་གྲུབ་པའི་གྲོགས་བྱའོ། དོན་ཡིད་བཞིན་དུ་བསྒྲུབ་པར་བྱའོ། །ཞེས་ཟེར་ན་དེ་ལ་
རབ་ཏུ་དགའ་བའི་སེམས་སྐྱེ་བར་འགྱུར་ཏེ། དེ་བས་ན་བདག་གིས་སེམས་ཅན་ལ་ཕན་པ་དང་བདེ་བའི་དོན་དུ་བསྒྲུབ་པའི་ལས་ཀྱི་གྲོགས་བྱའོ། །ཇི་ལྟར་བདག་ལ་རྒྱལ་པོ་དང་། རྐུན་པོ་དང་ཆུ་འམ། མེས་གནོད་པར་འགྱུར་རམ། བློན་པོ་
ལ་སོགས་པས། བཟུང་ངམ། བཏགས་སམ། བཅིངས་ན་མི་དགའ་བའི་མྱ་ངན་གྱིས་གདུངས་པར་གྱུར་པ་ལས་མཁས་པ་བློ་དང་ལྡན་པ་ཞིག་གིས་བདག་དེ་ལྟར་མྱ་ངན་གྱིས་གདུངས་པ་མཐོང་ན། སྙན་པ་སྒྲའི་ཚིག་དག་ལ་ཁྱེད་མྱ་ངན་མ་བྱེད་ཅིག །
ཁྱོད་ཀྱི་ཕྱིར་ཁོ་བོས་རྒྱལ་པོ་འམ། བློན་པོ་ཆེན་པོ་ལ་གསོལ་བ་བཏབ་སྟེ། གལ་ཏེ་ན་ནོར་གསུག་སྦྱིན་པ་འམ། ཐབས་རྣམ་པ་སྣ་ཚོགས་ཀྱིས་ཅི་ནས་ཀྱང་ཁྱོད་མི་བདེ་བའི་སྡུག་བསྔལ་ལས་ཐར་བར་བྱའོ་ཞེས་ཟེར་ན། བདག་གིས་ཚིག་དེ་ཐོས་པ་
ཙམ་གྱིས་སེམས་དགའ་བར་འགྱུར་ཏེ། དེ་བས་ན་བྱང་ཆུབ་སེམས་དཔའ་ནི་ཤེས་པར་བྱ་བའི་སྒྱུ་རྩལ་དང་བཟོའི་བར་དུ་མཐར་ཕྱིན་པར་བརྩོན་འགྲུས་སུ་སློབ་བོ། །འདི་ལྟ་སྟེ། ཤེས་པར་བྱ་བ་རིག་པའི་གནས་དང་། བཟོའི་གནས་དང་། རོལ་མོ་དང་། རྩེད་

71-1-111b

མོ་དང་། གྲངས་དང་། རྩིས་དང་། མིག་འཕྲུལ་གྱིས་བསྔགས་དང་། སྨན་དང་། བན་གླང་དང་། རྟ་དང་། བཞོན་པ་དང་། དགྲ་ཆོས་དང་། དམག་དྲང་བ་དང་། དཔྱད་ལ་སོགས་པ་ལ་མཁས་པར་སློབ་སྟེ། དེ་ལྟར་སྒྱུ་རྩལ་ཅི་ལ་ཡང་མཁས་པར་བསླབས་ནས་འགྲོ་
བ་མང་པོ་དང་། རྒྱལ་པོ་དང་། བློན་པོ་ཆེན་པོ་ལ་སོགས་པ་ཡང་བསམས་པའི་ཡིད་དང་འགལ་བར་མི་བྱེད། དེ་མ་ཡིན་པ་གཞན་ཡང་ལོངས་སྤྱོད་ཀྱི་རྐྱེན་གོས་སམ། ནོར་རམ། ཟས་སམ། བཟའ་བ་འམ། བཏུང་བ་འམ། ནོར་བུ་འམ། གདུ་བུ་འམ། ལུས་ཀྱི་
རྒྱན་ནམ། གསེར་རམ། དངུལ་ལམ། བཻ་དཱུརྱ་འམ། མན་ཤེལ་ལམ། སྤུག་གམ། མུ་ཏིག་གམ། ཨ་སྨ་གར་བྷ་འམ། ནོར་བུ་རིན་པོ་ཆེ་འམ། བན་གླང་ངམ། རྟ་འམ། ཐེག་པ་འམ། བྲན་པོ་འམ། ལས་བྱེད་པའི་མི་འམ། ཆུང་མ་འམ། སླས་ཀྱང་ཡོད། 
ཆུ་མིག་གམ། ཁྲུས་ཀྱི་རྫིང་བུ་འམ། རིན་པོ་ཆེའི་ཡང་ཏོག་བཟང་པོ་འམ། ལོངས་སྤྱོད་ཀྱི་ཡོ་བྱད་རྣམ་པ་སྣ་ཚོགས་ཡོད་ཀྱང་བྱང་ཆུབ་སེམས་དཔའ་དེ་ལ་རློམ་པ་འམ་རྒྱགས་པའི་སེམས་མེད་དོ། །དེ་ལྟར་སྒྱུ་རྩལ་ཀུན་ལ་ཡང་མཁས། རིན་པོ་
ཆེའི་བང་མཛོད་བརྒྱ་སྟོང་དང་ཡང་ལྡན། བན་གླང་དང་། རྟ་དང་། ཐེག་པ་ཡང་ཡོད། ན་ཆུང་བཟང་མོ་ཡང་གྲངས་མེད་པར་ཡོད། ཡང་ཏོག་བཟང་པོ་ཡང་ཡོད། ཆུ་མིག་དང་ཁྲུས་ཀྱི་རྫིང་བུ་ལ་སོགས་པ་འདོད་པའི་ལོངས་སྤྱོད་གང་ཡང་ཡོད་
མོད་ཀྱི། དེ་ལ་མ་ཆགས་ཏེ་རྟག་ཏུ་འདོད་པ་ཉུང་བ་དང་། ཆོག་ཤེས་པ་ལ་དགའ་ཞིང་། བས་མཐའ་དགོན་པ་དང་། རི་དང་། ཚལ་དང་། ཤིང་དྲུང་དུ་བསམ་གཏན་ལ་ཞི་བར་གནས་པ་ལ་མོས་སོ། །སྐྱེ་བོ་མང་པོ་དང་། སྨྲ་ཞིང་གཏམ་ཟེར་ཡང་། 
སེམས་ནི་རྟག་ཏུ་གཉེན་པོའི་སྒོར་འཇུག་པར་བྱེད་དོ། །སོ་སོ་སྐྱེ་བོ་དང་སྤྱོད་ཚུལ་འཐུན་པ་ལྟར་བྱེད་ཀྱང་སེམས་ཅན་ལ་ཕན་པའི་དོན་དུ་ནོར་བུ་རིན་པོ་ཆེ་གཏོང་བར་བྱེད་ཀྱིས་སེམས་ཅན་ལ་གནོད་པ་མི་ཕན་པའི་དོན་མི་བྱེད་དོ། །གང་དབུལ་བ། 
ཕོངས་པ་ཉམ་ཐག་པར་གྱུར་པ་དག་བྱང་ཆུབ་སེམས་དཔའ་ལ་སློང་དུ་འོངས་ན་དེ་ལ་ཅི་འདོད་པ་བཞིན་བྱང་ཆུབ་སེམས་དཔའ་སྦྱིན་པར་བྱེད་དོ། །སེམས་ཅན་གང་ཞིག་སངས་རྒྱས་ཀྱི་ཆོས་ལ་མོས་ཤིང་དད་དེ་བྱང་ཆུབ་སེམས་དཔའ་ལ་བསྙེན་

71-1-112a

བཀུར་དང་། མཆོད་པ་བྱ་བའི་ཕྱིར་རིམ་གྲོ་དང་གཡོག་བྱེད་ཅིང་རྐང་པ་འཁྲུ་བའི་ལས་བྱེད་དམ། ལུས་བཀྲུ་བ་དང་མཉེ་བའི་ལས་བྱེད་དམ། ཆག་ཆག་དང་ཕྱག་དར་བྱེད་དམ། སོ་ཤིང་དང་ཁྲུས་ཆུར་སྦྱོར་རམ། མལ་སྟན་འདིངས་
ཤིང་མལ་གོས་སྤྲུག་པའི་ལས་བྱེད་དམ། སྲོད་དང་ཐོ་རངས་ལ་མར་མེ་འབུད་དམ། ཁྱེའུ་སུས་དང་། དྲོ་ལ་ཁ་ཟས་ཐ་ན་པ་ན་དང་། པུ་ཤི་ན་དང་། ཁ་ད་ནེ་འབུལ་ལམ། འཐུང་བའི་སྐོམ་ཡུ་ལི་ཤི་དང་། བུ་ལ་ཤ་ཀའི་འབྲས་བུའི་སྐོམ་དང་། 
རྒུན་ཆུ་དང་། ཁ་ར་ནག་པོའི་ཆུ་ལ་སོགས་པ་སྦྱར་སྦྱར་ནས་ཡོ་བྱད་དེ་ལྟ་བུས་ཞག་བདུན་ནས་ཞག་དགུ་བཅུའི་བར་དུ་བྱང་ཆུབ་སེམས་དཔའ་ལ་ཆོས་འདོད་པའི་ཕྱིར་འབུལ་བར་བྱེད་ན་བྱང་ཆུབ་སེམས་དཔའ་དེའི་ཚེ་མཆོད་པའི་ཡོ་བྱད་འབུལ་བ་
དེ་ལ་དགའ་བའི་སེམས་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ནི་བསྐལ་པ་གྲངས་མེད་པ་ཡུན་རིང་པོ་ནས་སངས་རྒྱས་ཀྱི་ཆོས་ཚོལ་བའི་ཕྱིར། སེམས་ཅན་ཐམས་ཅད་ལ་སྐྱེད་དབྲིའི་སེམས་མེད་པའི་ཕྱིར། བྱམས་
པ་དང་སྙིང་རྗེའི་སེམས་དང་ལྡན་པའི་ཕྱིར། མཉམ་སྙོམས་པའི་སེམས་ལ་གནས་པའི་ཕྱིར་རོ། །དེ་བས་ན་དུས་ཁ་གཅིག་ཏུ་འཁོར་ལོས་སྒྱུར་བའི་རྒྱལ་པོ་བྱེད་དེ། རྟག་ཏུ་དགེ་བ་བཅུའི་ཆོས་ཀྱིས་སེམས་ཅན་གྱི་དོན་བྱེད་དོ། །
སེམས་ཅན་དེ་དག་ཀྱང་རྒྱལ་པོའི་ཡིད་བཞིན་དུ་དགའ་ཞིང་སྤྱོད་པས་ཚེའི་དུས་བྱས་ན་ཡང་ལྷ་དང་མིའི་འཇིག་རྟེན་དུ་འདོད་པ་ལྔའི་ལོངས་སྤྱོད་མཆོག་དམ་པ་དང་ལྡན་ཏེ། རིགས་ཆེ་ཞིང་མཐོ་བར་སྐྱེ་བར་འགྱུར། བསམས་པའི་ཡིད་
བཞིན་དུ་ཉལ་བ་དང་། ལྡང་བ་དང་། འགྲོ་བ་ལ་གནོད་པ་མེད་པར་འགྱུར། གནས་གང་དུ་འགྲོ་ཡང་བཞོན་པའི་རྟ་དང་ཐེག་པར་ལྡན་ཏེ་བསྐྱེད་མོས་ཚལ་དུ་རྩེད་མོ་དང་རོལ་མོ་ལ་རྩེ་ཞིང་ལོངས་སྤྱོད་པར་འགྱུར། བཟའ་བ་དང་བཏུང་བ་དམ་པ་
དང་དགའ་མགུར་སྤྱོད་པར་འགྱུར་ཡང་ཐ་མ་མི་རྟག་པ་བསྟེན་ཏེ། རྒ་བ་དང་ན་བས་གཟིར་ཏེ་ཤི་བར་གྱུར་ན་ཁྱིམ་གྱི་བུ་སྨད་མྱང་ངན་གྱིས་གདུངས་ཏེ་སྐད་ཕྱུང་ནས་ངུ་ཞིང་ལ་ལ་ནི་མགོ་ལ་ཐལ་མོ་རྡེབས། ལ་ལ་ནི་རང་རང་གི་སྐྲ་འབལ་ཏེ་མཆི་མ་

71-1-112b

འཛག་ཅིང་ས་ལ་འགྲེའོ། །དེ་ནས་ཁྱོགས་སམ་ཤིང་རྟའི་སྟེང་དུ་བཞག་ནས་དུར་ཁྲོད་ཏུ་བསྐྱེལ་ཏེ། དེ་ལྟར་བསྐྱལ་ནས་ཀྱང་བུ་སྨད་དག་གིས་ཕྱིར་ཁྱིམ་དུ་འོངས་ནས་མྱ་ངན་གྱིས་གདུངས་ཏེ་ལ་ལ་ནི་བརྒྱལ་ནས་ས་ལ་འགྲེ། ལ་ལ་ནི་དེའི་རྐྱེན་གྱིས་ནད་
ཏུ་འགྱུར། ལ་ལ་ནི་མི་དྲན་ནས་མྱོས། ལ་ལ་ནི་ཚེའི་བར་ཆད་ཏུ་ཤི་བར་བྱས་ཏེ། དེ་ལྟར་བྱས་ཀྱང་གསོན་པ་རྣམས་ལ་ནི་ཕན་པ་མེད། ཤི་བ་ལ་ནི་རབ་ཏུ་གནོད་དོ། །དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་འཁོར་དང་བཅས་ཏེ་ཡུལ་རྒྱུ་ཞིང་
སོང་བ་ལས་སེམས་ཅན་མྱ་ངན་གྱིས་གཟིར་བ་མཐོང་ནས་སྙིང་བརྩེ་བའི་སེམས་སྐྱེས་ཏེ་འདི་སྐད་ཟེར་རོ། །རྒྱལ་པོ་ཞེས་བྱ་བ་ནི་ཡུལ་ས་དབང་གིས་འགྲོ་བ་མང་པོའི་དབང་སྒྱུར་ཏེ། དེ་ལྟར་དགེ་བ་བཅུའི་ལམ་གྱིས་འགྲོ་བ་རྣམས་བཏུལ་ཏེ། 
འབྲས་བུ་འདོད་པ་ལྔ་མཆོག་དམ་པ་ཐོབ་ཏུ་ཟིན་ཀྱང་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མི་རྟག་པས་འཇིགས་པ་ལས་ཐར་བར་མ་གྱུར་ན། བདག་གིས་དྲང་པོའི་ཆོས་ཀྱིས་ཡུལ་གྱི་སྲིད་བཙས་ཀྱང་ཕན་པའི་དོན་མེད་དོ། །དེ་ལྟར་འགྲོ་
བ་རྣམས་ལ་ཕན་པའི་དོན་མེད་ན་འཁོར་ལོས་སྒྱུར་བའི་རྒྱལ་པོ་ཆེན་པོ་ཞེས་ཀྱང་ཇི་སྐད་བྱ། བྱམས་པ་ཆེན་པོའི་ཕ་ཞེ་འམ། སྨན་པའི་རྒྱལ་པོ་ཆེན་པོ་ཞེ་འམ། འདྲེན་པའི་སྟོན་པ་ཆེན་པོ་ཞེས་བྱ་བ་ནི་ཡང་དག་པའི་ལམ་དུ་འདྲེན་
ཅིང་མྱ་ངན་ལས་འདས་པའི་ལམ་སྟོན་ཏེ། འདུས་མ་བྱས་པའི་རབ་ཏུ་བདེ་བ་ཐོབ་པར་བྱེད་དོ། །བདག་ཅག་ནི་མིང་དང་སྤྱོད་པར་མི་འཐུན་ཏེ། དཔེར་ན་མི་ཞིག་སྐོམ་པས་གདུངས་ནས་སྲོག་ལ་བབ་པ་ལས་ཆུ་འདོད་པའི་ཕྱིར་ཕན་ཚུན་
བརྒྱུགས་ཏེ། ཁྲོན་པ་སྐམ་པོ་ཞིག་དང་ཕྲད་ནས་རབ་ཏུ་དགའ་བའི་སེམས་སྐྱེས་ཏེ་འདི་སྙམ་དུ་སེམས་སོ། །ད་ནི་བདག་གི་ལུས་འདི་འཆི་བ་ལས་ཕྱིར་སོས་སོ། །དེ་ཅིའི་ཕྱིར་ཞེ་ན། གལ་ཏེ་ཆུ་དང་མ་ཕྲད་ན་སྲོག་འདི་འཆི་བ་ལས་མི་རིང་
བ་ལས་ད་ཁྲོན་པ་བཟང་པོ་དང་ཕྲད་ནས་གདོན་མི་ཟ་བར་ཆུ་དོང་གྲང་མོ་གཙང་མ་དང་ཕྲད་དེ་ངོམས་ཤིང་ཚིམ་པར་འགྱུར་བས་སྲོག་འཚོ་བར་འགྱུར་རོ་སྙམ་བསམས་ནས་མྱུར་བ་མྱུར་བར་ཁྲོན་པའི་དྲུང་དུ་བསྙེན་ཏོ། །ཁྲོན་པའི་དྲུང་དུ་ཕྱིན་ནས་

71-1-113a

ལུས་ལ་གྱོན་པའི་གོས་ཕུད་དེ། ཕྱོགས་གཅིག་ཏུ་སྦས་ནས་ཆུ་འདོད་པའི་ཕྱིར་ཁྲོན་པའི་ནང་དུ་ཞུགས་སོ། །ཁྲོན་པའི་གཏིང་དུ་ཕྱིན་ན་ཆུ་ནི་མེད་ཀྱི་སྦྲུལ་གདུག་པ་དང་། སྨིགས་པ་དང་། སྡིག་པ་དང་། རྩངས་པ་དང་། 
སྦལ་པ་དང་། གྱོ་མོ་དང་། དེ་ལ་སོགས་པ་གསེག་མ་དང་། ཤིང་དང་། རྩྭ་ཉལ་ཉིལ་འབའ་ཞིག་མཐོང་བར་གྱུར་ཏོ། །དེའི་ཚེ་སྐོམ་པས་ཉམ་ཐག་པར་གྱུར་པ་དེ་ཐོག་མ་རེ་བ་བཞིན་དུ་ཆུ་ཡང་མ་རྙེད་ལ་གདུག་པ་མང་པོས་བཟས་ནས་
ཁྲོན་པ་དེ་ལས་ཕྱིར་བྱུང་བར་གཟས་ཀྱང་ཁྲོན་པ་རྙིངས་ཤིང་ཞིག་ལ་ཟབས་ཀྱང་མདའ་རྒྱང་གང་ཙམ་ཡོད་དེ། དེའི་ནང་ན་སྐས་སམ་ཐག་སྲད་དམ། འབྲུ་བའི་ཤིང་ཙམ་ཡང་མེད་དེ། མས་མཆོང་དུ་བརྩལ་ཡང་ཉམ་ཐག་ལ་སྟོབས་ཞན་པས་
འཕར་མི་ནུས་ཏེ། ཕྱིར་ཡང་ཞབས་སུ་ལྷུང་ནས་སྦྲུལ་གདུག་པ་ལ་སོགས་པས་ཟ་ཞིང་འཇིབ་བོ། །དེ་ཅུང་ཟད་ཅིག་སྲོག་མ་ཆད་ཀྱི་བར་དུ་འདི་སྐད་ཅེས་ཟེར་རོ། །བདག་ཁྲོན་པ་འདིའི་ནང་ན་ཆུ་མེད་པར་སྔར་ཤེས་ན་ལྟ་ཁྲོན་པ་འདི་ལ་མིག་གིས་བལྟ་ཡང་
མི་ཕོད་ན་འདིའི་ནང་དུ་ཞུགས་པ་ལྟ་སྨོས་ཀྱང་ཅི་དགོས་ཏེ། ད་ནི་ཁྲོན་པ་འདིའི་རྐྱེན་གྱིས་སྡུག་བསྔལ་བའི་སྡུག་བསྔལ་མྱོང་བར་གྱུར་ཏོ་ཞེས་སྨྲེ་སྔགས་འདོན་ཏོ། །འཁོར་ལོས་སྒྱུར་བའི་རྒྱལ་པོ་ཡང་དེ་ལྟར་སོ་སོའི་སྐྱེ་བོ་དག་གཅིག་ཤི་བའི་འོག་ཏུ་ཁྱིམ་
གང་གི་བུ་སྨད་དང་གཉེན་རྣམས་ཀྱིས་སྡུག་པ་དང་བྱེ་བྲལ་བའི་སྡུག་བསྔལ་གྱིས་གདུངས་པ་མཐོང་ནས་འདི་སྐད་ཟེར་རོ། །བདག་གི་ལུས་འདི་ནི་ཁྲོན་པ་སྐམ་པོ་དེ་དང་འདྲ་སྟེ། ཁྲོན་པ་མིང་ཙམ་ཡོད་ཀྱི་ཆུ་ནི་མེད་པས་ན་འཇུག་པ་ཡོད་ཀྱང་ཐོབ་
པ་མེད་པས་དེ་ལྟ་བུའི་ལུས་དང་སྲོག་སྟོར་བའི་སྡུག་བསྔལ་མྱོང་བར་གྱུར་ཏོ། །ད་ལྟར་བདག་འཁོར་ལོས་སྒྱུར་བའི་རྒྱལ་པོའི་དབང་སྒྱུར་ཞིང་རིན་པོ་ཆེ་སྣ་བདུན་དང་ལྡན་ཏེ། དགེ་བ་བཅུའི་ལས་ཀྱིས་འགྲོ་བ་འདུལ་ཞིང་དྲང་པོའི་ཆོས་ཀྱིས་ཡུལ་
གྱི་སྲིད་བཙས་ནས་སྐྱེ་བོ་མང་པོ་དག་ལྷ་དང་མིའི་མཐོ་རིས་ཀྱི་གནས་སུ་བཀོད་དེ་འདོད་པ་ལྔའི་ཡོན་ཏན་མཆོག་དམ་པ་ལ་ལོངས་སྤྱོད་དུ་བཅུག་ཀྱང་དེ་དག་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། སྡུག་པ་དང་བྱེ་བྲལ་བ་དང་། དགྲ་སྡང་བ་དང་ཕྲད་པའི་

71-1-113b

སྡུག་བསྔལ་ལས་ཐར་བར་མ་ནུས་ཏེ། གཅིག་ལ་གཅིག་ངུ་ཞིང་ཆོ་ངེ་བྱེད་པ་འདི་ནི་བདག་གིས་ཉེས་ཀྱི་སེམས་ཅན་རྣམས་ཀྱིས་མ་ཉེས་སོ། །དེ་ཇི་ལྟ་ཞེ་ན། བདག་ལ་འཇིག་རྟེན་ལས་འདས་པའི་ཆོས་འགྲོ་བ་མང་པོ་ལ་ཕན་པའི་དོན་དུ་འགྱུར་བ་མེད་དེ། 
བདག་ལས་དགེ་བའི་ཆོས་འདོད་ཅིང་རབ་ཏུ་བདེ་བ་འདོད་ཀྱང་སྡུག་བསྔལ་གྱི་མཚོ་ལས་རྒལ་མི་ནུས་སོ། །དེའི་ཚེ་འཁོར་ལོས་སྒྱུར་བའི་རྒྱལ་པོ་ཡང་འདི་སྙམ་དུ་སེམས་སོ། །ད་ལྟར་བདག་གི་ལུས་འདི་ནི་དཔེར་ན་ཤེས་པ་མེད་པ་གཏི་མུག་ཅན་གྱི་
སྦྱིན་བདག་དང་འདྲའོ། །དེའི་ཚེ་དུས་གཞན་ཞིག་ན་ལོ་བདུན་གྱི་བར་དུ་ཆར་མ་བབ་པས་ཐན་པ་ཆེན་པོ་བྱུང་སྟེ། རྩི་ཤིང་ཡང་སྐམས། འབྲུ་ཡང་རབ་ཏུ་དཀོན་པར་གྱུར། མུ་གེ་ཆེན་པོ་བྱུང་སྟེ། གཅིག་ལ་གཅིག་འཆའ་ཞིང་ཟ་བར་གྱུར་གཅིག་གི་
ཤ་ཁྲག་ལ་གཅིག་ཟ་སྟེ། ལ་ལ་ནི་བུའི་ཤ་ཁྲག་ལ་ཕ་མ་ཟ། ལ་ལ་ནི་ཕ་མའི་ཤ་ལ་བུ་ཟ་ཞིང་། ཕ་མ་དང་། ཕུ་ནུ་དང་། ཁྱོ་ཤུག་དང་། བུ་ཕོ་དང་། བུ་མོ་ཡང་གཅིག་གི་ཤ་ལ་གཅིག་ཟ་བར་གྱུར་ཏོ། །དེའི་ཚེ་ན་སྦྱིན་བདག་ཆེན་པོ་དེ་འཆག་ཅིང་འཕྱན་དུ་
སོང་སོང་བ་ལས་སེམས་ཅན་མང་པོ་དག་ལྟོགས་ནས་ད་རོད་ཉམས་དེ་རིད་ཅིང་སྐམས་ལ་ཉམ་ཆུང་ལ་མདོག་ངན་པ་དང་། སྐྲ་ཡང་འཛིངས་ནས་ལུས་གནག་ལ་རྐེམ་པ་དག་ཕྲག་པ་ལ་མི་རོ་ཁུར་དུ་ཁྱེར་ཏེ། ཁ་ཅིག་ནི་མིའི་མགོ་དང་། ལག་པ་དང་
རྐང་པ་དང་། ལྷུ་ཚིགས་དང་། ལག་ངར་དང་། ཕྲག་པ་དང་། ཚིགས་པ་དང་། སྒལ་པ་དང་། བརླ་དང་། རྗེ་ངར་དང་། ཡན་ལག་དང་། ཉིང་ལག་གི་བར་དུ་ཁྱེར། ཁ་ཅིག་ནི་ནང་ཁྲོལ་མཆིན་པ་དང་། མཚེར་པ་དང་། གློ་བ་དང་། རྒྱུ་མ་དང་། 
གཞང་རྣམས་ཁྱེར་བ་མཐོང་ངོ་། །དེ་ལྟ་བུ་དག་མཐོང་ནས་སྦྱིན་བདག་དེས་དེ་དག་མཐོང་ནས། ཁྱེད་ཁུར་དུ་ཁྱེར་བ་འདི་དག་ཅི་ཡིན་ཞེས་དྲིས་སོ། །དེ་དག་གིས་སྨྲས་པ། བདག་ཅག་གི་ཁུར་དུ་ཁྱེར་བ་འདི་དག་ནི་མི་རོ་སྟེ། མིའི་མགོ་དང་
རྐང་ལག་དང་། བརླ་དང་། རྗེ་ངར་དང་། ཡན་ལག་དང་། ཉིང་ལག་གི་བར་དུའོ། །ཁྱེད་མིའི་མགོ་དང་། ཡན་ལག་དང་། ཉིང་ལག་གི་བར་དུ་ཁྱེར་བ་འདི་ཅི་དགོས་ཅི་ཞིག་བྱ་ཞེས་དྲིས་པ་དང་། དེ་དག་གིས་སྨྲས་པ། ཁྱོད་མི་ཤེས་སམ། མུ་གེ་

71-1-114a

ཆེན་པོ་བྱུང་ནས་འབྲུ་རབ་ཏུ་དཀོན་པར་གྱུར་ཏེ། མི་ཀུན་ལྟོགས་ནས་ད་ལྟར་གཅིག་ལ་གཅིག་ཟ་བས། བདག་ཅག་གི་ཁུར་བུ་ཁྱེར་བ་འདི་ནི་བདག་ཅག་གི་ཟས་ཡིན་ནོ། །དེའི་ཚེ་སྦྱིན་བདག་ཆེན་པོ་དེས་དེ་སྐད་ཅེས་སྨྲས་པ་དེ་ཐོས་ནས་དངངས་
ཏེ། སྤུ་ཟིང་ཞེས་བྱེད་ནས་འཁམས་ཏེ་ས་ལ་འགྱེལ་བ་ལས་ཆུ་གྲང་མོས་གདོང་དུ་གཏོར་ནས་རིང་ཞིག་ལོན་པ་དང་། སེམས་སོར་ཆུད་ནས་འོ་ན་ཁྱོད་ཀྱི་ཟས་ཡིན་ན་འདི་དག་སུའི་ཤ་ཡིན་དྲིས་པ་དང་། དེ་དག་སྐད་ཆེན་པོ་ཕྱུང་ནས་ངུས་ཏེ། སྦྱིན་བདག་ལ་
བརྗོད་དུ་མི་རུང་ངོ་ཞེས་སྨྲས་སོ། །ཀྱེ་མའོ་བདག་ཅག་ནི་སྡུག་གོ། །ཀྱེ་མའོ་བདག་ཅག་ནི་སྡུག་གོ། །ཀྱི་ཧུད་ཀྱི་ཧུད་ཁྱོད་ལ་དྲང་པོར་མི་སྨྲར་མི་རུང་སྟེ། བདག་ཅག་ཁུར་དུ་ཁྱེར་བ་འདི་ལ་ལ་ནི་ཕའི་ཤ །ལ་ལ་ནི་མའི་ཤ །ལ་ལ་ནི་བུའི་ཤ །ལ་ལ་ནི་ཕུ་ནུ་བོའི་
ཤ །ལ་ལ་ནི་གཉེན་བཤེས་ཀྱི་ཤ་ཡིན་ནོ་ཞེས་ལྟོགས་པ་དེ་དག་གིས་སོ་སོ་ནས་ཁྱིམ་བདག་ལ་དྲང་པོར་གཏམ་བྱས་ནས། བདག་ཅག་ནི་ཤིན་དུ་ལྟོགས་པས་གཅིག་ལ་གཅིག་ཉིང་ཤ་ཟ་བར་གྱུར་ཏོ། །དེའི་ཚེ་སྦྱིན་བདག་དེས་དབུགས་ཀྱིས་བརྣངས་པ་
ཙམ་དུ་མི་ལྟོགས་པ་རྣམས་ལ་འདི་སྐད་ཅེས་སྨྲས་སོ། །ཁྱེད་རྣམས་དེང་ཕྱིན་ཆད་གཅིག་ལ་གཅིག་ཉིང་ཤ་ཟ་བར་མ་བྱེད་ཅིག །ཁྱེད་རྣམས་ལ་དགོས་པའི་ཡོ་བྱད་གང་ཡང་རུང་། བགོ་བའི་གོས་སམ། བཟའ་བ་འམ། བཏུང་བ་འམ། ནད་ཀྱི་
རྐྱེན་རྩི་འམ། ཡོ་བྱད་ཅི་དགོས་པ་ཐམས་ཅད་སྦྱིན་པར་བྱ་སྟེ། ཞག་བདུན་ན་ཁྱེད་རྣམས་ཁོ་བོའི་སྒོར་ཤོག་ཤིག་དང་། ཡིད་བཞིན་དུ་གོས་སམ། ཁ་ཟས་སམ། ནད་ཀྱི་རྐྱེན་རྩི་འམ། ཇི་འདོད་པ་ཚིམ་པར་བྱའོ་ཞེས་བསྒོ་བ་དང་། 
དེ་དག་རབ་ཏུ་དགའ་རངས་ནས་ཤིན་དུ་ལེགས་སོ་ལེགས་སོ། །ངོ་མཚར་ཆེའོ་ཞེས་བསྟོད་པ་བྱས་སོ། །དེ་ནས་སྦྱིན་བདག་དེ་ཕྱིར་ཁྱིམ་དུ་འོངས་ནས་ཆུང་མ་དང་། བུ་རྣམས་དང་། བྲན་ཁོལ་དང་། ལས་བྱེད་པའི་མི་རྣམས་ཀྱང་
བསྡུས་ཏེ། དགའ་བའི་མདངས་ཕྱུང་སྟེ། འཇམ་ཞིང་ཡིད་ཏུ་འོང་བའི་ཚིག་སྙན་པས་བུ་སྨད་དང་། བྲན་ཁོལ་དང་། ལས་བྱེད་པའི་མི་རྣམས་ལ་འདི་སྐད་ཅེས་བསྒོའོ། །ཁྱེད་རྣམས་ཤེས་པར་གྱིས་ཤིག །ཁོ་བོས་སྨྲས་པའི་ཚིག་

71-1-114b

ལེགས་པར་ཉོན་ཅིག །ཁྱེད་ཤེས་སམ་ཐན་པ་ཆེན་པོས་མུ་གེ་བྱུང་ནས། མི་ཐམས་ཅད་ལྟོགས་ཏེ་གྲངས་མེད་པ་གཅིག་ཤི་བར་གྱུར་ཏོ། །བདག་གི་ཁྱིམ་ན་བང་མཛོད་ཀུན་གང་ཞིང་ལུད་དེ་འབྲུ་ཡང་གྲངས་མེད་པ་ཞིག་ཡོད་པས་དུས་ལས་མ་ཡོལ་
བར་བདག་ཅག་བསོད་ནམས་བྱའོ་ཞེས་བུ་སྨད་ཀུན་གྱིས་དེ་སྐད་ཅེས་བསྒོ་བ་ཐོས་ནས་ལེགས་སོ་ལེགས་སོ། །བདག་ཅག་གི་སྲོག་ལུས་སྦྱིན་པ་བྱས་ཀྱང་མི་ཕངས་ན་བང་མཛོད་དང་། ནོར་རྫས་དང་། ཁ་ཟས་ལྟ་སྨོས་ཀྱང་ཅི་དགོས། དེ་ནས་སྦྱིན་
བདག་ཀྱང་རབ་ཏུ་དགའ་རངས་ནས་ཁྱེད་རྣམས་ནི་ཡང་དག་པར་ཁོ་བོའི་བླ་ན་མེད་པའི་བྱང་ཆུབ་ཐོབ་པར་བྱ་བའི་གྲོགས་ཡིན་པ་ལྟ་དགེའོ་ལེགས་སོ། །ཁྱེད་རྣམས་ཀྱང་སོ་སོ་ནས་ཅི་དང་ཅི་བྱ་བ་རྣམས་ཅི་དང་ཅི་བསྒྲུབ་པ་སྐོལ་བྱ་བའི་རིགས་པ་
ཡང་མོད་ལ་བྱ། བསྒྲུབ་པའི་རིགས་པ་ཡང་མྱུར་དུ་བསྒྲུབ་སྟེ། ད་སྟེ་ཞག་བདུན་ན་ངེས་པར་འབྱོར་བར་བྱའོ། །དེའི་ཚེ་སྦྱིན་བདག་དེས་སོ་སོར་བསྒོ་ནས་ཁྱིམ་གྱི་ཕྱི་རོལ་དུ་བྱུང་སྟེ། གང་ནས་མཉམ་ཞིང་ཡངས་ལ་བདེ་བའི་གནས་ཞིག་
བལྟས་ནས་མོད་ལ་ས་གཞི་དག་པར་ཉལ་ཉིལ་དང་ས་རྡོ་མེད་པར་བྱས་ཕྱགས་ཏེ་ཁྲི་སྟན་བཤམས་སོ། །དེ་ལྟར་མང་པོ་འདུ་བའི་གནས་སྦྱིན་པ་སྦྱིན་པའི་ས་གཞི་བཤམས་ནས་བན་གླང་ལྔ་བརྒྱ་ལ་ཁ་ཟས་བཀལ་ཏེ་སྦྱིན་པའི་སར་བསྐྱལ་ནས། 
ཁ་ཟས་ནི་རི་བཞིན་དུ་སྤུངས། ཞོ་ཆུ་ནི་མཚོ་བཞིན་བསྐྱིལ། མར་དང་། འབྲུ་མར་དང་། ཁུར་བ་ལ་སོགས་པ་ཁ་ཟས་རོ་བརྒྱ་དང་ལྡན་པ་ཆོ་མ་ཆོ་དགུ་སྦྱར་ཏེ། དེ་མ་ཡིན་པ་གཞན་ཡང་གོས་དང་། གདུ་བུ་དང་། ཕྲེང་བ་དང་། ལུས་
ཀྱི་རྒྱན་སྣ་ཚོགས་དང་། བན་གླང་དང་། རྟ་དང་། རིན་པོ་ཆེ་སྣ་བདུན་ལ་སོགས་ཏེ། ཐམས་ཅད་ཕུན་སུམ་ཚོགས་པར་སྦྱར་ནས་ཞག་བདུན་ལོན་པའི་སྐྱ་རེང་ཤར་ནས་ཞག་བདུན་གྱི་ཉི་མ་ལ་དྲིལ་རྔ་བརྡུངས། དུང་བུས་ཏེ། སྐད་ཆེན་
པོས་ཐམས་ཅད་སྦྱིན་པའི་གནས་འདིར་འདུས་ཤིག་ཅེས་བོས་སོ། །དེའི་ཚེ་ན་ཐམས་ཅད་ཀྱིས་བོས་པའི་སྐད་ཐོས་ནས་འཕགས་པས་བྱིན་གྱིས་བརླབས་པ་ཙམ་དུ་དགའ་བའི་སེམས་སྐྱེས་ཏེ། ཐམས་ཅད་སྦྱིན་པ་གཏོང་བའི་

71-1-115a

གནས་སུ་ལྷགས་ཏེ། ཡིད་བཞིན་དུ་གོས་དང་། མལ་ཆ་དང་། ཟས་སྐོམ་དང་། ལུས་ཀྱི་རྒྱན་སྣ་ཚོགས་པ་དང་། ནད་ཀྱི་རྩི་སྨན་མང་པོ་དང་། བན་གླང་དང་། རྟ་དང་། རིན་པོ་ཆེ་སྣ་བདུན་ལ་སོགས་པ་ཅི་དང་ཅི་འདོད་པ་ཡིད་
བཞིན་དུ་དྲངས་ནས་སྦྱིན་པའི་རྫས་ཅི་ཡོད་པ་ཐམས་ཅད་ཀྱིས་མ་ལུས་པར་ཁྱེར་རོ། །དེ་ནས་སྦྱིན་བདག་དེ་དགའ་ནས་ཕྱིར་ཁྱིམ་དུ་འོངས་ནས་ཆུང་མ་དང་བུ་རྣམས་དགའ་བ་བཞིན་དུ་འདོད་པ་ལྔ་ལ་ལོངས་སྤྱོད་དོ། །དེ་ནས་ཞག་བདུན་ཙམ་ལོན་པ་
དང་མི་དག་ན་རེ་སྦྱིན་བདག་དེས་སྔར་གོས་དང་། ཟས་དང་། སྐོམ་ལ་སོགས་པ་སྦྱིན་པ་བྱས་ན་ཁ་ཟས་ཟོས་པ་རྣམས་དུག་ལངས་ནས་ཐམས་ཅད་ཤིའོ་ཞེས་ཟེར་རོ། །དེ་ལྟར་ཤི་བར་གྱུར་པས་ཐམས་ཅད་ཚིག་ཏུ་བརྗོད་དེ་ངོ་མཚར་ཆེའོ་ངོ་མཚར་ཆེའོ། །
དེ་ལྟར་སྦྱིན་བདག་ཆེན་པོ་དེས་ཀུན་ལ་སྙིང་བརྩེ་བའི་ཕྱིར་ཅི་འདོད་པ་བཞིན་དུ་ཁ་ཟས་ལ་སོགས་པས་ཚིམ་པར་བྱས་ཏེ་ལུས་དང་སྲོག་གསོན་པར་བྱས་པར་གྱུར་ན་ཕྱིས་ཞག་མང་པོ་མ་ལོན་པར་དུག་ལངས་ནས་ཐམས་ཅད་ཤིའོ་བར་སྒྲ་སྒྲོགས་པར་གྱུར་ཏོ། །
དེའི་ཚེ་སྦྱིན་བདག་ཆེན་པོ་དེས་དེ་ལྟར་གྱུར་པ་དེ་ཐོས་ནས་ཡི་མུག་ཅིང་མི་དགའ་བར་གྱུར་ཏེ། ཆུང་མ་དང་། བུ་ལ་སོགས་པ་ལ་ཁྱེད་ཀྱི་ཁ་ཟས་ཇི་ལྟར་སྦྱར་ན་ཁ་ཟས་ཀྱི་ནང་དུ་དུག་མ་རུངས་པ་ཇི་ལྟར་འོངས་ཤེས་དྲིས་པ་དང་། 
ཆུང་མ་དང་། བུ་དང་། བྲན་ཁོལ་དང་། ལས་བྱེད་པའི་མི་རྣམས་ཀྱི་མཆིད་ནས་དུག་མི་སྲིད་དོ། །དུག་འདི་ག་ལས་འོངས་ཞིབ་ཏུ་རྟོགས་ཤིག་ཅེས་སྨྲས་སོ། །དེ་ནས་སྦྱིན་བདག་དེ་ཁྱིམ་གྱི་ཞལ་ཏ་བྱེད་ཅིང་མཐར་གྱིས་སོང་སོང་
བ་ལས་ཁྲོན་པ་ཞིག་སྟེང་བཀབ་ཅིང་གཡོགས་པ་མཐོང་ངོ་། །ཁྲོན་པ་འདི་ཅིའི་ཕྱིར་གཡོགས་ཤེས་དྲིས་པ་དང་། ཁྲོན་པ་འདི་ནི་ཁྱིམ་བདག་ཁྱོད་བུས་པ་ཆུང་ངུའི་ཚེ་ན་སྦྲུལ་གདུག་པ་གསུམ་ཞིག་གསོ་གསོ་བ་ལས་ཁྲོན་པ་འདི་
བརྐོས་ནས་སྦྲུལ་གདུག་པ་གསུམ་བཅུག་གོ། །ཁྲོན་པ་འདི་ནི་སྦྲུལ་གདུག་པ་འདུག་པའི་ཁྲོན་པ་ཡིན་ནོ། །ཆུ་ཡང་གདུག་པས་ཆུ་འདི་ཡང་འཐུངས་པས་ན་སྟེ་འཆི་བར་འགྱུར་རོ། །སྦྱིན་བདག་དེས་ཚིག་དེ་དག་ཐོས་ནས་ལས་བྱེད་

71-1-115b

པ་དག་ལ་ཁྱེད་དེ་བར་ཁ་ཟས་གཡོ་བའི་ཚེ་ཁྲོན་ཆུ་འདི་ལས་བཅུས་ཏེ་ཁ་ཟས་མ་གཡོས་སམ། ལས་བྱེད་པས་སྨྲས་པ། ཁ་ཟས་མང་དུ་གཡོས་པས་རིངས་ནས་ཆུ་འདི་ཡང་བཅུས་ནས་ཁ་ཟས་ཀྱི་གཡོས་བྱས་སོ་ཞེས་བསྒོའོ། །ཁྱིམ་
བདག་མི་དགའ་སྟེ། ངོ་མཚར་ཆེའོ། །བདག་ནི་གཏི་མུག་ཅན་ཤེས་པའི་བློ་མེད་པ་ཡིན་པ་འདྲ་སྟེ། ཅིའི་ཕྱིར་སྦྲུལ་གདུག་པ་གསོ་ཞིང་ཁྲོན་པ་གདུག་པ་རྐོ་ཞེས་འགྱོད་ནས་ཆུང་མ་དང་། བུ་ལ་བསྒོ་བ། སྦྲུལ་གདུག་པ་གསུམ་གྱི་ཁྲོན་
པ་མྱུར་དུ་ཚོངས་ཤིག །སྦྲུལ་གདུག་པ་གསུམ་ཡང་ཁོ་བོ་བདག་གིས་བསྲེག་གོ་ཞེས་བསྒོ་བ་དང་། ལས་བྱེད་པའི་མི་རྣམས་ཀྱིས་དེ་མ་ཐག་ཏུ་ཁྲོན་པ་དེ་ཡང་བསུབས་ནས་མེད་པར་བྱས་སོ། །དེ་ནས་སྦྱིན་བདག་དེས་སྦྲུལ་གདུག་
པའི་ཁྲོན་པ་དེ་མེད་པར་བྱས་ནས་ཕྱི་རོལ་དུ་འཆག་ཏུ་སོང་བ་ལས་སྦྱིན་བདག་གི་ཁ་ཟས་དུག་ཅན་གྱི་ཤི་བར་གྱུར་པ་ལས་ཐམས་ཅད་ཚིག་འཐུན་པར་སྦྱིན་བདག་འདིས་བདག་ཅག་ལ་ཁ་ཟས་དུག་ཅན་བྱིན་ནས་བདག་ཅག་སྔར་ཤི་བར་གྱུར་པ་
ཡིན་ནོ། །བདག་ཅག་གིས་དེ་ལྟར་ཤེས་ན་དེར་མ་སོང་ཡང་རུང་ཞེས་འགྱོད་པ་སྐྱེས་སོ། །དེ་བཞིན་དུ་འཁོར་ལོས་སྒྱུར་བའི་རྒྱལ་པོ་དེ་ཡང་དགེ་བ་བཅུས་སེམས་ཅན་བཏུལ་ཏེ། སེམས་ཅན་དག་ལྷ་དང་མིའི་མཐོ་རིས་སུ་སྐྱེ་ཞིང་འདོད་པ་ལྔ་
ལ་འདོད་དགུར་ལོངས་སྤྱོད་མོད་ཀྱི་སྐྱེ་བ་དང་། རྒ་བ་དང་། ན་བ་དང་། འཆི་བ་ལས་མི་ཐར་བ་ཡང་དེ་དང་འདྲའོ། །དེ་ནས་འཁོར་ལོས་སྒྱུར་བའི་རྒྱལ་པོ་དེ་དེའི་མོད་ལ་བདག་བླ་ན་མེད་པའི་སངས་རྒྱས་ཀྱི་ཆོས་དང་། འཇིག་རྟེན་
ལས་འདས་པའི་ཆོས་བསྒྲུབས་ཏེ། སེམས་ཅན་རྣམས་ཀྱང་དེ་ལ་ཀློག་པ་དང་། འདོན་པ་དང་། འདྲི་བ་དང་། གོམས་པར་བྱ་སྟེ། སྐྱེ་ཤིའི་འཁོར་བ་ཡོངས་སུ་སྤང་ཞིང་མྱ་ངན་ལས་འདས་པ་འཐོབ་པར་བྱའོ་ཞེས་དམ་
བཅས་སོ། །དེའི་ཚེ་ན་འཁོར་ལོས་སྒྱུར་བའི་རྒྱལ་པོ་སངས་རྒྱས་ཀྱི་ཆོས་ཚོལ་བའི་ཕྱིར། འཛམ་བུའི་གླིང་ན། སངས་རྒྱས་ཀྱི་ཆོས། སུས་ཤེས་ཞེས། གནས་ཀུན་དུ། བཀར་བཏགས་སོ། །

71-1-116a

འཁོར་ལོས་སྒྱུར་བའི་རྒྱལ་པོ་ཆོས་འདོད་པའི་ཕྱིར་གནས་ཀུན་དུ་བཀར་བཏགས་ཀྱང་ཤེས་པ་མ་བྱུང་ངོ་། །མཐའ་འཁོབ་ཀྱི་ཡུལ་ཆུང་ངུ་ཅིག་ཏུ་ཕྱིན་པ་དང་། དེ་ན་བྲམ་ཟེ་གཅིག་ཅིག་སངས་རྒྱས་ཀྱི་ཆོས་ཤེས་སོ་ཞེས་ཟེར་
རོ། །དེ་ནས་བྲམ་ཟེ་དེའི་སྟེང་དུ་ཕོ་ཉ་བཏང་ནས་ཕོ་ཉ་དེས་བྲམ་ཟེ་ག་ལ་བ་དེར་ཕྱིན་ནས་བཙུན་པ་སངས་རྒྱས་ཀྱི་ཆོས་ཤེས་སམ་ཞེས་དྲིས་ན་ཤེས་སོ་ཞེས་ཟེར་རོ། །དེ་ནས་ཕོ་ཉས་བྲམ་ཟེའི་རྐང་པ་ལ་མགོ་བོས་ཕྱག་བྱས་ནས་བཙུན་པ་
འཁོར་ལོས་སྒྱུར་བའི་རྒྱལ་པོས་སྤྱན་འདྲེན་དུ་བཏང་གིས་འཁོར་ལོས་སྒྱུར་བའི་རྒྱལ་པོ་དེ་ག་ལ་བ་དེར་གཤེགས་སུ་གསོལ། །དེ་ནས་བྲམ་ཟེ་ཡང་དེར་འོངས་ནས་འཁོར་ལོས་སྒྱུར་བའི་རྒྱལ་པོས་རྒྱང་མ་ནས་བསུ་སྟེ་རྐང་པ་ལ་མགོ་བོས་
ཕྱག་འཚལ་ནས་བདེ་བར་བྱོན་ཏམ། ལམ་དུ་ཉོན་མོངས་པར་མ་གྱུར་ཏམ། ངལ་བར་མ་གྱུར་ཏམ་ཞེས་གཏམ་དྲིས་ཏེ་ཕོ་བྲང་གི་ནང་དུ་ཁྲིད་ནས་ཕོ་བྲང་གི་དབུས་སུ་རྒྱལ་པོའི་གདན་ལ་བཞག་གོ། །བྲམ་ཟེས་ཀྱང་གདན་ལ་སྐྱིལ་
མོ་དཀྲུང་བཅས་ཏེ་འདུག་ནས་དེའི་ཚེ་རྒྱལ་པོས་བྲམ་ཟེ་དེ་བདེ་བར་འདུག་ནས་དགོས་པའི་ཡོ་བྱད་རྣམས་ཀུན་ཕུལ་ཏེ་སྦྱིན་པ་བྱས་ནས་ཐལ་མོ་སྦྱར་ཏེ་བྲམ་ཟེ་དེ་ལ་སྟོན་པ་ཆེན་པོ་སངས་རྒྱས་ཀྱི་ཆོས་ཤེས་སམ་ཞེས་དྲིས་པ་དང་། བྲམ་ཟེ་
ན་རེ་བདག་གིས་སངས་རྒྱས་ཀྱི་ཆོས་ཤེས་སོ་ཟེར་རོ། །དེ་ནས་རྒྱལ་པོས་བྲམ་ཟེ་ལ་སྟོན་པ་ཆེན་པོ་བདག་ལ་བསྟན་ཅིང་བཤད་ཏུ་གསོལ་ཞེས་བྱས་ནས། བྲམ་ཟེ་ན་རེ་རྒྱལ་པོ་ཁྱོད་ནི་ཤིན་དུ་གླེན་ནོ། །ཁོ་བོས་སངས་རྒྱས་ཀྱི་
ཆོས་བསླབས་པ་ན། ཡུན་རིང་དུ་ན་དཀའ་བའི་སྡུག་བསྔལ་མྱོང་ནས་གདོད་ལོབས་པ་ཡིན་ན། ད་རྒྱལ་པོས་ཐལ་བྱུང་དུ་ཐོས་པར་འདོད་དམ། རྒྱལ་པོས་སྨྲས་པ། སྟོན་པ་ཆེན་པོ་འོ་ན་ཅི་ཞིག་འདོད། བྲམ་ཟེས་སྨྲས་པ། བདག་
ལ་མཆོད་པ་ཕུལ་ཅིག་རྒྱལ་པོས་སྨྲས་པ། སྟོན་པ་ཆེན་པོ་མཆོད་པ་ཅི་ཞིག་འདོད། གོས་ཟས་སམ། མལ་ཆ་འམ། བཟའ་བ་འམ། བཏུང་བ་འདོད་དམ། འོན་ཏེ་གསེར་རམ། དངུལ་ལམ། རིན་པོ་ཆེ་འདོད་དམ། བྲམ་ཟེས་

71-1-116b

སྨྲས་པ། བདག་དེ་འདྲ་བའི་མཆོད་པ་མི་འདོད་དོ། །རྒྱལ་པོས་སྨྲས་པ། མཆོད་པ་དེ་དག་མི་འདོད་ན་འོ་ན་བན་གླང་ངམ། རྟ་འམ། ཐེག་པ་འདོད་དམ། འོན་ཏེ་ཡུལ་ལམ། གྲོང་ཁྱེར་རམ། ཆུང་མའམ། བུ་འདོད་དམ། རོལ་མོའམ། 
གླུ་འམ་གར་བྱེད་པ་འདོད་དམ། བྲམ་ཟེས་སྨྲས་པ། བདག་ནི་དེ་དག་གང་ཡང་མི་འདོད་དོ། །གལ་ཏེ་ལུས་ལ་རྨ་སྟོང་ཕྱུང་སྟེ་རྨའི་ནང་དུ་མར་བླུགས་ལ་མེ་མར་སྙིང་པོ་བཙུགས་ཏེ་མར་མེ་སྟོང་འབར་བས་མཆོད་ན་སངས་རྒྱས་ཀྱི་ཆོས་
བསྟན་ཅིང་བཤད་པར་བྱའོ། །གལ་ཏེ་དེ་ལྟར་མི་ནུས་ན་བདག་ལངས་ཏེ་འགྲོ་ཞེས་སྨྲས་ནས་རྒྱལ་པོས་སྐད་ཅིག་ཙམ་ལན་མ་སྨྲས་ཀྱི་བར་དུ་ཁྲི་ལས་བབས་སོ། །དེ་ནས་རྒྱལ་པོས་པང་དུ་བླངས་ནས་སྟོན་པ་ཆེན་པོ་ཅུང་ཟད་ཉག་བསྲིང་དུ་
གསོལ། བདག་ཤེས་པ་ཞན་ཞིང་བསོད་ནམས་ཆུངས་པས་ཅུང་ཟད་བསམས་ཏེ་མཆོད་པར་བགྱིད་དོ་ཞེས་སྨྲས་སོ། །དེའི་ཚེ་འཁོར་ལོས་སྒྱུར་བའི་རྒྱལ་པོ་དེ་འདི་སྙམ་དུ་སེམས་པར་གྱུར་ཏེ། བདག་གི་ལུས་འདི་ཐོག་མ་མེད་པའི་དུས་ནས་ཤི་
བ་གྲངས་མེད་པར་མྱོང་ན་ཡང་ཆོས་ཀྱི་ཕྱིར་མ་ཤིའི། ད་ཡང་བདག་གི་ལུས་འདི་ཡང་མཐར་འཇིག་ཅིང་རུལ་བར་འགྱུར་བས་ཕན་པ་མེད་དེ། ད་ནི་དུས་ལས་བབ་བོ་སྙམ་བསམས་ནས་སྟོན་པ་བྲམ་ཟེ་ལ་འདི་སྐད་ཅེས་སྨྲས་སོ། །སྟོན་
པ་ཆེན་པོ་བདག་མཆོད་པ་འདོད་པ་བཞིན་བགྱིད་དོ། །དེ་ནས་རྒྱལ་པོ་ཕོ་བྲང་དུ་སོང་ནས་བཙུན་མོ་རྣམས་ལ་ད་ནི་བདག་ཅག་བྱེ་འབྲལ་ལོ་ཞེས་སྨྲས་སོ། །བཙུན་མོ་རྣམས་དེ་སྐད་ཅེས་སྨྲས་པ་ཐོས་ནས་དངངས་ཤིང་འཁམས་ཏེ་ཅི་ཉེས་
གཏོལ་མེད་དེ་རྒྱལ་པོ་ད་ལྟར་ཅི་ཞིག་མཛད་སྙམ་དགོངས་ཤེས་གསོལ་ལོ། །རྒྱལ་པོས་སྨྲས་པ། བདག་གི་ལུས་འདི་ལ་མར་མེ་སྟོང་ཞིག་བཙུགས་ཏེ་སྟོན་པ་བྲམ་ཟེ་ལ་མཆོད་པ་བྱ་སྙམ་མོ། །བཙུན་མོ་རྣམས་ཀྱིས་དེ་སྐད་ཅེས་
སྨྲས་པ་ཐོས་ནས་ས་ལ་འགྲེ་ཞིང་ཆོ་ངེས་བཏབ་སྟེ་བརྒྱལ་ལོ། །རིང་ཞིག་ལོན་པ་དང་། ཕྱིར་དྲན་པ་རྙེད་དོ། །རྒྱལ་པོ་ཆེན་པོ་འཇིག་རྟེན་ན་བདག་གི་ལུས་ལས་ཕངས་པ་མེད་དེ། ཉེས་ཏེ་དོགས་ནས་གསོ་བའི་རིམ་གྲོ་ཆེར་བྱེད་ན་ཅིའི་ཕྱིར་

71-1-117a

བདག་གི་ལུས་ལ་མཐོ་འཚམ་ཞིང་གནོད་པ་བགྱིད། རྒྱལ་པོ་ནི་མཁས་པའི་བློ་དང་ལྡན་པ་ལགས་ན་ད་ལྟར་མྱོས་སམ། འོན་ཏེ་ཡི་དགས་ཀྱིས་བརླམས་སམ། ཅི་ནོངས། རྒྱལ་པོས་སྨྲས་པ། དེ་ལྟ་བུ་གང་ཡང་མ་ཡིན་ནོ། །འོ་ན་
ཅིའི་ཕྱིར་དེ་ལྟ་བུའི་གནོད་པ་མཛད་ཅིང་བྲམ་ཟེ་ལ་མཆོད་པར་དགོངས། རྒྱལ་པོས་སྨྲས་པ། བདག་ནི་སངས་རྒྱས་ཀྱི་ཆོས་འདོད་དེ། སེམས་ཅན་ཐམས་ཅད་ཀྱི་དོན་བྱེད་པར་སེམས་སོ། །དེ་ལྟར་སེམས་ཅན་ཐམས་ཅད་ལ་དགོངས་ན་ད་ཅིའི་ཕྱིར་བདག་
ཅག་རྣམས་བཀོལ་བར་གྱུར། རྒྱལ་པོས་སྨྲས་པ། འཇིག་རྟེན་ན་མཛའ་སྡུག་ཐམས་ཅད་མཐར་བྱེ་བྲལ་དུ་འགྱུར་ཏེ་དེ་བས་ན་བདག་གིས་ལུས་ཀྱི་མཆོད་པ་བྱས་ཏེ། ཁྱེད་དང་སེམས་ཅན་ཐམས་ཅད་ཀྱི་མུན་གནག་གི་ཁང་པར་ཡེ་ཤེས་ཆེན་པོའི་
སྒྲོན་མ་གཟུགས་ཤིང་སྐྱེ་ཤིར་འཁོར་བའི་མ་རིག་པའི་མུན་པ་སྣང་བར་བྱས་ལ། ཀུན་ནས་བཀྲིས་པའི་ཉོན་མོངས་པའི་མདུད་པ་བཅད་དེ། འཁོར་བའི་སྐྱོན་ལས་བསྒྲལ་ནས་མྱ་ངན་ལས་འདས་པའི་གནས་སུ་དགོད་པའི་ཆེད་ཏུ་བསམས་ཀྱིས་
ཁྱེད་རྣམས་བར་ཆད་དང་བགེགས་མ་བྱེད་ཅིག །དེའི་ཚེ་བཙུན་མོ་རྣམས་དེ་སྐད་ཅེས་བསྒོ་བ་ཐོས་ནས་བརྣངས་པ་ལྟར་ཅང་མི་སྨྲ་ཞིང་སྐད་ཆེན་པོ་ཕྱུང་སྟེ་ངུ་ཞིང་རང་རང་གི་སྐྲ་འབལ་ལོ། །བདག་ཅག་ལ་བསོད་ནམས་མེད་དེ་བཀྲ་མི་ཤིས་པས་
གསོན་པོར་བདག་ཅག་ལ་ལྷ་མེད་པར་གྱུར་ཅེས་སྨྲེའོ། །རྒྱལ་པོ་དེ་ལ་རྒྱལ་བུ་ལྔ་བརྒྱ་ཡོད་དེ་ཐམས་ཅད་ཀྱང་མངའ་བྱད་བཟང་ཞིང་སྡུག་པ། ཡིད་གཞུངས་ཤིང་མཁས་པའི་བློ་དང་ལྡན་པ། མིའི་མཚན་དང་རྫོགས་པར་ལྡན་པ། རྒྱལ་པོ་ཡང་
མིག་བཞིན་དུ་ཕངས་ཤིང་བྱམས་སོ། །དེའི་ཚེ་རྒྱལ་པོས་རྒྱལ་བུ་རྣམས་ལ་སྨྲས་པ། ཁོ་བོ་ད་མཆོད་པའི་ལས་ཤིག་བྱེད་སྙམ་ན་ལུས་དང་སྲོག་ཉམ་ཆུང་ངུ་དོགས་ཏེ་ཁྱེད་དང་བྲལ་བ་སྙམ། ཡུལ་གྱི་སྲིད་དང་འབངས་རྣམས་ཀྱི་ཚིས་ནི་ཆེ་རིམས་
ཀྱིས་བྱོས་ཤིག་ཅེས་བསྒོའོ། །རྒྱལ་བུ་རྣམས་དེ་སྐད་བསྒོ་བ་དེ་ཐོས་ནས་ལུས་ཀྱི་ཡན་ལག་དང་རྩ་རྣམས་བཅད་པ་ཙམ་དུ་སྡུག་བསྔལ་གྱིས་གདུངས་ཏེ། དཔེར་ན་མི་བརྣངས་པ་ལ་སྐྱུག་ཏུ་ཡང་མེད། མིད་ཏུ་ཡང་མེད་པ་བཞིན་དུ་རྒྱལ་པོ་ལ་འདི་

71-1-117b

སྐད་ཅེས་གསོལ་ཏོ། །ཅིའི་སླད་དུ་བདག་ཅག་རྣམས་སྤངས་ཏེ་སྐྱབས་སུ་མ་མཆིས་པར་མཛད། ལ་ལ་ནི་རྒྱལ་པོའི་གཉའ་བ་ནས་འཁྱུད། ལ་ལ་ནི་ལག་པ་དང་། རྐང་པ་ལ་བཟུང་ནས་སྐད་ཕྱུང་ཞིང་ངུ་། ཀྱི་ཧུད་ཀྱི་ཧུད་ཅིའི་ཕྱིར་མགོན་དང་སྐྱབས་མེད་པར་
འགྱུར་ཞེས་སྨྲས་སོ། །དེ་ནས་རྒྱལ་པོས་རྒྱལ་བུ་རྣམས་ལ་སྤྲོ་བ་བསྐྱེད་པའི་ཕྱིར་འཇིག་རྟེན་ན་མཛའ་ཞིང་སྡུག་པ་ཐམས་ཅད་མཐར་བྱེ་བྲལ་བར་འགྱུར་རོ་ཞེས་བསྒོའོ། །དེ་སྐད་ཅེས་བསྒོ་བ་ཐོས་ཀྱང་ཡིད་ལ་གཅགས་ཏེ་འབྲལ་མི་ཕོད་ན་བདག་གི་གསོལ་
བ་གཅིག་གནང་བར་མཛད་དུ་གསོལ། །བདག་ཅག་གི་ལུས་དང་སྲོག་རྒྱལ་པོ་ལ་འབུལ་ན་སྟོན་པ་བྲམ་ཟེ་ལ་མཆོད་པ་མཛད་དུ་གསོལ། རྒྱལ་པོས་སྨྲས་པ། བུ་ཁྱེད་རྣམས་ནི་ད་དུང་ཤེད་མ་བྱེ་ལ་ཆུང་བས་དེ་འདྲ་བའི་མཆོད་པ་བྱེད་མི་བཟོད་ཀྱིས། 
ཁོ་བོ་ནི་སྟོན་པ་ལམ་རིང་པོ་ནས་གཉེར་ཏེ་མཆོད་པ་བྱ་བར་ཁས་བླངས་པའི་ཡིད་དང་འགལ་བར་བྱར་མི་རུང་བས་བུ་སྲི་ཞུ་ཅན་ནི་ཕའི་ཡིད་དང་འགལ་བར་མི་བྱེད་ན་ཁྱེད་རྣམས་ཁོ་བོའི་ཡིད་དང་འགལ་བར་བྱེད་དམ། རྒྱལ་བུ་རྣམས་དེ་སྐད་སྨྲ་བ་ཐོས་ནས་
སྐད་ཕྱུང་སྟེ་ཆོ་ངེས་བཏབ་པས་ཡུལ་གྱི་ལྷ་རྣམས་ཀྱང་དངངས་ཏེ་རི་འགྱེལ་བ་བཞིན་དུ་ཐམས་ཅད་ལུས་ས་ལ་བརྡབས་སོ། །དེའི་ཚེ་རྒྱལ་པོ་ལ་ཡུལ་མཐའི་རྒྱལ་ཕྲན་ཐམས་ཅད་ཀྱིས་ཀྱང་མཆི་ཕྱག་བྱས་ནས་ཕོ་བྲང་གི་ནང་སྟོན་པ་ཆེན་པོ་ག་ལ་
བ་དེར་སོང་སྟེ། དེའི་དྲུང་དུ་ཕྱིན་ནས་ལུས་ཀྱི་རྒྱན་ཐམས་ཅད་ཀྱང་བཀྲོལ་ནས་གོས་ཀྱང་ཕུད་ནས་ཕྱོགས་གཅིག་ཏུ་བཞག་ནས་ལུས་དྲང་པོར་བསྲང་སྟེ་འདུག་གོ། །འདུག་མ་ཐག་ཏུ་རྒྱལ་ཕྲན་རྣམས་དང་། བློན་པོ་དང་། རྒྱལ་བུ་ལྔ་བརྒྱ་དང་
བཙུན་མོ་ཉི་ཁྲི་ལ་བསྒོའོ། །ཁྱེད་རྣམས་ལས་གང་གིས་ཁོ་བོའི་ལུས་ལ་རྨ་སྟོང་ཞིག་གཅོད་སུས་ནུས་ཞེས་སྨྲས་ན། བཙུན་མོ་དང་། རྒྱལ་བུ་དང་། བློན་པོ་དང་། རྒྱལ་ཕྲན་གྱི་མི་རྣམས་ཚིག་འཐུན་པར་བདག་ཅག་གིས་རང་གི་ལུས་
ལ་གྲི་ཐོགས་ཏེ་མིག་ཕྱུང་ཡང་བླའི་རྒྱལ་པོའི་ལུས་ལ་རྨ་འབྱིན་མི་ཕོད་དོ། །དེ་ནས་རྒྱལ་པོ་མི་དགའ་བར་གྱུར་ནས་ད་ནི་བདག་འེ་འུར་གྱུར་པ་ལྟ་འཁོར་མང་པོ་འདི་སྙེད་ཀྱི་ནང་ན་མི་འགའ་ཡང་ཁོ་བོའི་གྲོགས་སུ་འགྱུར་བ་མེད་དམ་ཞེས་སྨྲེ་

71-1-118a

བར་གྱུར་ཏོ། །དེའི་ཚེ་ན་རྒྱལ་པོ་དེ་ལ་རིགས་ངན་ཤན་པ་རང་བཞིན་གྱིས་ཁྲོ་ལ་ཀུན་ཀྱང་འཇིགས་སུ་རུང་བ་ཞིག་ཡོད་པ་ཞིག་བོས་སོ། །ཤན་པ་དེ་དེར་འོངས་སོ། །ཤན་པ་དེ་འོངས་ནས་རྒྱལ་བུ་རྣམས་ལ་ཁྱེད་མྱ་ངན་མ་བྱེད་ཅིག །
རྒྱལ་པོ་ཆེན་པོ་དོན་མི་འགྲུབ་པའི་ཐབས་བདག་ལ་མཆིས་ཀྱིས། དོན་མ་གྲུབ་ན་སྔ་མཁོ་བཞིན་དུ་རྒྱལ་པོའི་སྲིད་གཟུང་དུ་ཟད་དོ་ཞེས་སྨྲས་སོ། །རྒྱལ་བུ་རྣམས་ཀྱིས་ཚིག་དེ་སྐད་ཅེས་སྨྲས་པ་ཐོས་ནས་རབ་ཏུ་དགའ་བའི་སེམས་སྐྱེས་
པར་གྱུར་ཏོ། །དེ་ནས་ཤན་པ་དེ་རྒྱལ་པོའི་དྲུང་དུ་འོངས་ནས་རྒྱལ་པོ་ཆེན་པོ་ད་ལྟར་ཅི་ཞིག་མཛད་པར་དགོངས་ཤེས་གསོལ་པ་དང་། རྒྱལ་པོས་སྨྲས་པ། ཁོ་བོའི་ལུས་ལ་མར་མེ་སྟོང་བཙུགས་ལ་སྟོན་པ་ཆེན་པོ་བྲམ་ཟེ་ལ་མཆོད་པར་
སེམས་སོ། །ཤན་པས་སྨྲས་པ། དེ་ལྟ་ན་སྐུ་ལ་གཅོད་ནུས་སོ། །རྒྱལ་པོས་དེ་སྐད་སྨྲས་པ་ཐོས་ནས་རབ་ཏུ་དགའ་བའི་སེམས་སུ་གྱུར་ནས་ཤན་པ་ལ་ཁྱོད་ནི་ཡང་དག་པར་ཁོ་བོའི་བླ་ན་མེད་པའི་བྱང་ཆུབ་སྒྲུབ་པའི་གྲོགས་ཡིན་ནོ་ཞེས་
སྨྲས་སོ། །དེ་ནས་ཤན་པས་རྒྱལ་པོའི་དྲུང་དུ་འགྲེང་བཞིན་ངུ་ངམ་ངུར་བའི་སྐད་ཆེན་པོས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་མཁྱེན་ཏམ། མི་གསད་པའི་ཆོས་ཀྱིས་ནི་སྔར་མགོ་བཅད་པར་དགོས་ཏེ། གཉའ་བ་གཏུབས་ལ་
རྐང་ལག་ཀྱང་ཕྲལ་ཏེ། ཆུ་བ་དང་། རྒྱུས་པ་ཡང་དབྱུང་དགོས་ན་རྒྱལ་པོ་ཆེན་པོ་དེ་འདྲ་བའི་ན་ཚའི་སྡུག་བསྔལ་བཟོད་དམ། རྒྱལ་པོས་དེ་སྐད་སྨྲས་པ་ཐོས་ནས་རབ་ཏུ་དགའ་བའི་སེམས་སུ་གྱུར་ནས། དེ་ནས་ཤན་པས་གནག་ལྕེ་ལྟ་བུའི་
གྲི་ཐོགས་ཏེ་རིང་པོ་མ་ཐོགས་པར་རྒྱལ་པོའི་ལུས་ལ་རྨ་སྟོང་ཚང་བར་བཅད་དོ། །ཤན་པ་རྒྱལ་པོའི་སེམས་ཕྱིར་ནུར་བ་ཙམ་དུ་སེམས་པ་ལས། སེམས་མ་ནུར་བས་དེ་གྲི་ཡང་ས་ལ་བོར་ནས་བྲོས་སོ། །དེ་ནས་རྒྱལ་པོ་ཆེན་པོའི་ལུས་
ལ་རྨ་སྟོང་བཅད་པའི་ནང་དུ་མར་ཁུ་བླུགས་ནས་རས་བཟང་པོའི་སྙིང་པོ་བཙུགས་ཏེ་མར་མེ་སྟོང་བཙུགས་སོ། །དེའི་ཚེ་བྲམ་ཟེ་སྟོན་པ་ཆེན་པོས་དེ་ལྟར་བྱས་པ་མཐོང་ནས་འདི་སྙམ་དུ་ད་ནི་མྱུར་དུ་ཆོས་མ་བཤད་ན་ལུས་སྲོག་འཚོ་འམ་

71-1-118b

མི་འཚོ་གཏོལ་མེད་པས། གལ་ཏེ་སྲོག་མ་སོས་ན་སུས་ཆོས་མཉན་པར་འགྱུར་སྙམ་བསམས་ནས། རྒྱལ་པོ་ལ་འདི་སྐད་ཅེས་སྨྲས་སོ། །སངས་རྒྱས་ཀྱི་ཆོས་ཐོས་པར་འདོད་པས་ཤིན་དུ་དཔའ་བའི་བརྩོན་འགྲུས་ཀྱིས་བྱ་དཀའ་བའི་
སྤྱོད་པ་སྤྱད་པས་ལེགས་པར་ཉོན་ལ་ཤིན་དུ་ཡིད་ལ་ཟུང་ཤིག་དང་། ད་རྒྱལ་པོ་ལ་སངས་རྒྱས་ཀྱི་ཆོས་བསྟན་པར་བྱའོ། །དེ་སྐད་ཅེས་སྨྲས་པ་ཐོས་ནས་རྒྱལ་པོ་རབ་ཏུ་དགའ་བའི་སེམས་སུ་གྱུར་ཏེ། དཔེར་ན་བུ་སྲི་ཞུ་ཅན་ཞིག་ཕ་མ་
ཤི་ན་རབ་ཏུ་མི་དགའ་སྟེ། སྡུག་བསྔལ་གྱིས་གདུངས་པ་ལས་ཕ་མ་ཕྱིར་སོས་པ་ན་བུ་དེ་ཇི་ལྟར་རབ་ཏུ་དགའ་བ་ལྟར་རྒྱལ་པོ་དེ་ཡང་རབ་ཏུ་དགའ་བར་གྱུར་ཏོ། །དེ་ནས་བྲམ་ཟེ་དེས་རྒྱལ་པོ་ལ་སྨྲས་པ། སྐྱེ་བ་ཡོད་ན་འཆི་བར་འགྱུར། 
འགོག་པ་འདི་ནི་བདེ་བ་ཡིན། །ཞེས་ཚིགས་སུ་བཅད་པ་ཕྱེད་པ་འདི་བསྟན་ཏོ། །རྒྱལ་པོས་དམ་པའི་ཆོས་བསྟན་པ་ཐོས་ནས་རབ་ཏུ་དགའ་བའི་སེམས་སུ་གྱུར་ཏེ། རྒྱལ་བུ་དང་བློན་པོ་རྣམས་ལ་འདི་སྐད་ཅེས་བསྒོའོ། །ཁྱེད་
རྣམས་ཁོ་བོ་ལ་སྡུག་ཅིང་བརྩེ་བའི་སེམས་ཡོད་ན་ཆོས་འདི་མ་བརྗེད་པར་ཡིད་ལ་བཟུང་ལ་ཡུལ་ཕྱོགས་སུ་གང་ན་མང་པོ་འདུ་བའི་གནས་དང་། གྲོང་དང་། གྲོང་ཁྱེར་དང་། ཚོང་འདུས་སུ་འགྲོ་བ་མང་པོ་ལ་འདི་སྐད་ཅེས་བཀར་
ཐོགས་ཤིག །འཁོར་ལོས་སྒྱུར་བའི་རྒྱལ་པོ་ཆེན་པོས་སེམས་ཅན་མང་པོ་སྡུག་བསྔལ་གྱི་རྒྱ་མཚོར་བྱིང་བ་དག་འདོན་པ་དང་། སེམས་ཅན་ཐམས་ཅད་ལ་སྙིང་རྗེ་ཆེན་པོའི་སེམས་བསྐྱེད་ནས་ལུས་ལ་མར་མེ་སྟོང་བཙུགས་
ཏེ། ཚིགས་སུ་བཅད་པའི་ཚིགས་བཅད་ཕྱེད་ཐོས་པ་འདི་རྒྱལ་པོ་ཆེན་པོ་འདིའི་བྱམས་པ་དང་སྙིང་རྗེའི་སེམས་གྲུབ་པར་བྱ་བའི་ཕྱིར་ཐམས་ཅད་ཀྱིས་ཡི་གེར་བྲིས་ཏེ་གདོན་པ་དང་། ཁ་ཏོན་དུ་བྱ་བ་དང་། འདྲི་བ་དང་། གོམས་པར་
བྱེད་པ་དང་། དོན་ཡང་ཡིད་ལ་བྱ་ཞིང་ཇི་ལྟར་གཏམས་པ་བཞིན་དུ་ནན་ཏན་དུ་སྤྱད་པར་བྱའོ། །དེའི་ཚེ་ན་མི་མང་པོས་དེ་སྐད་ཅེས་བསྒོ་བ་ཐོས་ནས་རབ་ཏུ་དགའ་ཞིང་མགུ་བར་གྱུར་ཏེ། ཐམས་ཅད་ཀྱིས་ཚིག་འཐུན་པར་རྒྱལ་པོ་

71-1-119a

ལ་བསྟོད་ནས་ཤིན་དུ་དགའོ། །རྒྱལ་པོ་ཆེན་པོ་བདག་ཅག་གི་སྙིང་རྗེ་ཆེན་པོའི་ཕ་ཡང་དག་པ་ཡིན་ནོ། །སེམས་ཅན་ཐམས་ཅད་ཀྱི་ཕྱིར་ཤིན་དུ་སྤྱད་དཀའ་བ་སྤྱད་དོ་ཞེས་ཀུན་གྱིས་བསྔགས་ཏེ། ཤོག་ཤོག་དང་། དར་དང་། ཤུན་
པ་དང་། ཤིང་དང་། རྡོ་ལ་ཡི་གེར་བྲིས་ཏེ་ཁ་ཏོན་དུ་སློབ་བོ། །གང་ན་མི་མང་པོ་འདུ་བའི་གནས་སུ་ཡང་ཡི་གེར་བྲིས་ཏེ། ཐམས་ཅད་ཀྱིས་མཐོང་བར་བྱས་ནས་བླ་ན་མེད་པའི་བྱང་ཆུབ་ཏུ་སེམས་བསྐྱེད་དུ་བཅུག་གོ། །དེའི་ཚེ་རྒྱལ་པོ་ཆེན་པོས་
ལུས་ལ་མར་མེ་སྟོང་བཙུགས་ཏེ་སྟོན་པ་ཆེན་པོ་བྲམ་ཟེ་ལ་མཆོད་པ་བྱས་པའི་འོད་ཟེར་གྱིས་ཕྱོགས་བཅུའི་ཞིང་འཇིག་རྟེན་གྱི་ཁམས་སྣང་བར་གྱུར་ཏེ། མར་མེ་དེའི་འོད་དེ་ལས་ཚིགས་སུ་བཅད་པའི་ཚིགས་བཅད་ཕྱེད་ཀྱི་ཆོས་ཀྱི་སྒྲ་
ཡང་གྲགས་པར་གྱུར་ནས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །མར་མེ་དེའི་འོད་དེས་སུམ་བཅུ་རྩ་གསུམ་གནམ་གྱི་ལྷའི་ཁང་པ་ཡང་སྣང་བར་བྱས་ནས་མར་མེའི་འོད་དེས་ལྷའི་འོད་ཀུན་ཟིལ་
གྱིས་མནན་པས་སུམ་བཅུ་རྩ་གསུམ་གནམ་གྱི་ལྷ་རྣམས་མར་མེའི་འོད་དེས་ཀུན་དུ་སྣང་བར་བྱས་པས་དེ་དག་འདི་སྙམ་དུ་གྱུར་ཏོ། །ཅིའི་རྒྱུ་ཅིའི་རྐྱེན་གྱིས་འོད་ཟེར་འདི་ལྟ་བུ་སྣང་བར་གྱུར་སྙམ་ལྷའི་མིག་གིས་བལྟས་པས་འཇིག་རྟེན་གྱི་
ཁམས་ན་འཁོར་ལོས་སྒྱུར་བའི་རྒྱལ་པོ་ཆེན་པོས་སྙིང་རྗེའི་སེམས་བསྐྱེད་དེ། འགྲོ་བ་ཐམས་ཅད་ཀྱི་དོན་དུ་ལུས་ལ་མར་མེ་སྟོང་གཙུགས་ནས་སྟོན་པ་ཆེན་པོ་བྲམ་ཟེ་ལ་མཆོད་པ་བྱས་པར་མཐོང་ངོ་། །ལྷ་དེ་དག་རབ་ཏུ་དགའ་བའི་སེམས་
སྐྱེས་ནས་འཇིག་རྟེན་གྱྀ་ཁམས་སུ་བབས་ནས་མི་ཐ་མལ་པའི་ལུས་སུ་སྤྲུལ་ནས་རྒྱལ་པོ་ག་ལ་བར་ལྷགས་ཏེ་རྒྱལ་པོ་ཆེན་པོ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་ལུས་ལ་མར་མེ་སྟོང་བཙུགས་ཏེ། ཤིན་དུ་ཡང་སྤྱད་དཀའ་
བ་སྤྱད་ཅིང་ཚིགས་སུ་བཅད་པ་ཕྱེད་ཅིག་ཐོས་པས་ཅི་ཞིག་བྱ། རྒྱལ་པོས་སྨྲས་པ། རིགས་ཀྱི་བུ་བདག་ནི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་གཞུག་པའི་ཕྱིར་རོ། །དེ་ནས་སྤྲུལ་

71-1-119b

པའི་མི་དེ་ཕྱིར་བརྒྱ་བྱིན་གྱི་ལུས་སུ་བསྒྱུར་ནས་ལུས་ཀྱི་འོད་ཀྱིས་ཀུན་དུ་སྣང་བར་བྱས་ཏེ། རྒྱལ་པོ་ཆེན་པོ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་འདི་ལྟར་མཆོད་པ་བྱས་པ་འདིས་ལྷའི་རྒྱལ་པོ་འདོད་དམ། བདུད་ཀྱི་རྒྱལ་པོ་འདོད་
དམ། ཚངས་པའི་རྒྱལ་པོ་འདོད་དམ། འཁོར་ལོས་སྒྱུར་བའི་རྒྱལ་པོས་བརྒྱ་བྱིན་ལ་སྨྲས་པ། ལྷའི་དབང་པོ་བདག་ནི་ལྷ་དང་མིའི་ལོངས་སྤྱོད་གང་ཡང་མི་འདོད་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་དེ། སོ་སོའི་སྐྱེ་
བོ་ཐམས་ཅད་མི་བདེ་བ་རྣམས་བདེ་བའི་གནས་སུ་དགོད་པ་དང་། མ་གྲོལ་བ་རྣམས་གྲོལ་བར་བྱ་བ་དང་། ཕ་རོལ་དུ་མ་ཕྱིན་པ་རྣམས་ཕྱིན་པར་བྱ་བ་དང་། བྱང་ཆུབ་མ་ཐོབ་པ་ཐོབ་པར་བྱ་བར་འདོད་དོ། །བརྒྱ་བྱིན་གྱིས་སྨྲས་པ། 
རྒྱལ་པོ་ཆེན་པོ་ཁྱོད་ནི་རབ་ཏུ་བླུན་པའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་ཡུན་རིང་པོར་ཤིན་དུ་སྤྱད་དཀའ་བ་སྤྱད་པས་ཐོབ་པར་འགྱུར་ན་ཅིའི་ཕྱིར་བླ་ན་མེད་པའི་བྱང་ཆུབ་འཐོབ་པར་འགྱུར། རྒྱལ་པོས་བརྒྱ་བྱིན་ལ་
སྨྲས་པ། ཅི་སྟེ་བདག་གི་སྤྱི་བོའི་སྟེང་ན་ལྕགས་ཀྱི་འཁོར་ལོས་ཤིན་དུ་འབར་བ་རྒྱུན་དུ་འཁོར་ཡང་སྡུག་བསྔལ་དེ་ཙམ་གྱིས་བླ་ན་མེད་པའི་བྱང་ཆུབ་ལས་ཕྱིར་མི་ལྡོག་གོ། །བརྒྱ་བྱིན་གྱིས་སྨྲས་པ། ཚིག་དེ་སྐད་ཅེས་སྨྲས་པ་
ལ་སུ་ཞིག་ཡིད་ཆེས་པར་འགྱུར། དེ་ནས་འཁོར་ལོས་སྒྱུར་བའི་རྒྱལ་པོས་བརྒྱན་བྱིན་ལ་སྨྲས་པ། གལ་ཏེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདོད་པ་མ་ཡིན་ལ་ལྷའི་དབང་པོ་ཁྱོད་བསླུས་པར་གྱུར་ན། བདག་
གི་ལུས་ཀྱི་རྨ་འདི་དག་ནམ་དུ་ཡང་འཚོ་བར་མ་གྱུར་ཅིག །གལ་ཏེ་དེ་ལྟ་མ་ཡིན་ན་ཁྲག་ཀྱང་འོ་མར་གྱུར་ཅིག །རྨ་རྣམས་ཀྱང་སོས་པར་གྱུར་ཅིག་ཅེས་དམ་བཅས་མ་ཐག་ཏུ་རྨ་རྣམས་ཀྱང་སོས་པར་གྱུར་ཏོ། །བརྒྱ་བྱིན་ལྷའི་
དབང་པོས། རྒྱལ་པོ་ལ་ཤིན་དུ་དགེའོ་ཞེས་བསྟོད་ནས། རྒྱལ་པོ་ཆེན་པོ་ཁྱོད་ནི་ཡང་དག་པར་སྙིང་རྗེ་ཆེན་པོ་དང་ལྡན་པ་སྟེ། སྙིང་རྗེ་ཆེན་པོའི་སྤྱོད་པའོ། །དེ་ལྟར་སྤྱོད་དཀའ་བ་སྤྱད་པས། རིང་པོ་མི་ཐོགས་པར་བླ་ན་

71-1-120a

མེད་པ་ཡང་དག་པར་རྫོགས་པའི་བྱང་ཆུབ་འཐོབ་པར་འགྱུར་བས། ནམ་བླ་ན་མེད་པའི་བྱང་ཆུབ་ཐོབ་པ་ན། ཐོག་མ་བདག་གི་དོན་སྔར་བྱས་པར་ཤོག་ཤིག་ཅེས་སྨྲས་ནས། བརྒྱ་བྱིན་ལྷའི་དབང་པོས་ལུས་
ཀྱི་འོད་ཟེར་གྱིས་རྒྱལ་པོའི་ལུས་ཀུན་དུ་སྣང་བར་བྱས་ནས། ལྷའི་འཁོར་བརྒྱ་སྟོང་དང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །རྒྱལ་བུ་ལྔ་བརྒྱ་རྣམས་དེ་ལྟར་ཡབ་རྒྱལ་པོའི་ལུས་ཀྱི་རྨ་སོས་ཏེ་
སྔ་མཁོ་བཞིན་དུ་གྱུར་པ་མཐོང་ནས། རབ་ཏུ་དགའ་རངས་ཏེ་རྒྱལ་པོའི་རྐང་པ་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དེ། ཐལ་མོ་སྦྱར་བ་བཏུད་ནས་ཚིག་འཐུན་པར་འདི་སྐད་ཅེས་སྨྲས་སོ། །འདི་ལྟ་བུ་མཛད་པ་
ངོ་མཚར་ཆེ་སྟེ། ཡབ་རྒྱལ་པོ་ནི་ཡང་དག་པར་འགྲོ་བ་ཐམས་ཅད་ལ་སྙིང་རྗེ་ཆེ་བའོ་ཞེས་བསྟོད་དོ། །རྒྱལ་པོས་སྨྲས་པ། བུ་ཁྱེད་ང་ལ་སྲི་ཞུ་བྱེད་པ་བདེན་ན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་སེམས་བསྐྱེད་ཅིག་ཅེས་བསྒོ་ནས་རྒྱལ་བུ་རྣམས་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་བཞིན་དུ་བཙུན་མོ་ཉི་ཁྲི་དང་ཕོ་བྲང་གི་སླས་བརྒྱ་སྟོང་སྙེད་ཀྱང་བྱང་ཆུབ་ཏུ་སེམས་བསྐྱེད་དོ། །དེའི་ཚེ་
འཁོར་དེའི་ནང་ན་གནས་པའི་སེམས་ཅན་གང་གཱའི་ཀླུང་གི་བྱེ་མ་བཅུ་བདུན་སྙེད་ཀྱིས་ཉན་ཐོས་དང་། རང་སངས་རྒྱས་སུ་སེམས་བསྐྱེད་པར་གྱུར་ཏོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། 
མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ལ་སོགས་པ་གྲངས་མེད་པ་རྣམས་འདི་ལྟ་བུར་གྱུར་པ་མཐོང་ཐོས་ནས་ཐམས་ཅད་ཀྱིས་བྱང་ཆུབ་ཏུ་སེམས་བསྐྱེད་དེ་རབ་ཏུ་དགའ་ནས་ཕྱིར་དོང་ངོ་། །ཐབས་མཁས་པ་
ཆེན་པོ་སངས་རྒྱས་དྲིན་ལན་བསབ་པའི་མདོ་ལས། གཉེན་པོའི་ལེའུ་ཞེས་བྱ་སྟེ་གསུམ་པའོ།། །། དེའི་ཚེ་ན་འཁོར་གྱི་དཀྱིལ་འཁོར་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བའི་རྒྱལ་པོ་སྟན་ལས་ལངས་

71-1-120b

ཏེ་བླ་གོས་ཕྱོགས་གཅིག་ཏུ་བྱས་ནས་པུས་མོ་གཡས་པའི་ལྷ་ལྔ་ས་ལ་བཙུགས་ནས། བཅོམ་ལྡན་འདས་ག་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བྱང་ཆུབ་སེམས་དཔའ་ཇི་
ལྟར་ན་དྲིན་ཤེས་པར་བགྱི། ཇི་ལྟར་ན་དྲིན་བསབ་པར་བགྱི་ཞེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་དགའ་བའི་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ལེགས་པར་ཉོན་ཅིག །བྱང་ཆུབ་སེམས་
དཔའ་སེམས་དཔའ་ཆེན་པོ་དྲིན་ཤེས་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའོ། །དྲིན་ལན་བསབ་པ་ནི་སེམས་ཅན་ཕ་རོལ་པོ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་
གཞུག་པའོ། །གསོལ་པ། བྱང་ཆུབ་ཏུ་སེམས་བསྐྱེད་ཅེས་བགྱི་བ་ཇི་ལྟར་སེམས་བསྐྱེད་པར་བགྱི། བྱང་ཆུབ་སེམས་དཔས་དངོས་པོ་གང་གི་རྐྱེན་གྱིས་བྱང་ཆུབ་ཏུ་སེམས་བསྐྱེད་པར་འགྱུར། རིགས་ཀྱི་བུ་བྱང་ཆུབ་སེམས་དཔའ་
སེམས་དཔའ་ཆེན་པོ་ཐོག་མ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པའི་ཚེ། འདི་སྐད་དུ་ཡི་དམ་ཆེན་པོ་བཅའོ། །བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པའི་ཚེ་སེམས་ཅན་ཐམས་ཅད་
ལ་ཕན་པ་དང་བདེ་བའི་དོན་དུ་སེམས་ཅན་ཐམས་ཅད་མྱ་ངན་ལས་འདས་པ་ཆེན་པོ་ལ་ངེས་པར་དགོད་པར་དམ་བཅའོ། །གཞན་ཡང་སེམས་ཅན་ཐམས་ཅད་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་རྫོགས་པར་བྱ་བར་དམ་བཅའ་བར་བྱའོ། །
དེ་ནི་བདག་གི་དོན་དང་གཞན་གྱི་དོན་བྱེད་པ་ཞེས་བྱ་སྟེ། དེ་བས་ན་ཐོག་མ་བྱང་ཆུབ་ཏུ་སེམས་བསྐྱེད་ནས་བྱང་ཆུབ་ཀྱི་རྒྱུ་དང་ལྡན་པ་ཞེས་བྱ། སེམས་ཅན་གྱི་རྒྱུ་དང་ལྡན་པ་ཞེས་བྱ། ཡང་དག་པའི་དོན་གྱི་རྒྱུ་དང་ལྡན་པ་ཞེས་བྱ། བྱང་
ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་གྱི་ཆོས་དང་ལྡན་པ་ཞེས་བྱ། དགེ་བའི་ཆོས་ཐམས་ཅད་སྡུད་པའི་གཞི་ཞེས་བྱ། དེ་བས་ན་བྱང་ཆུབ་སེམས་དཔའ་ནི་དགེ་བ་ཞེས་བྱ། དགེ་བ་ཆེན་པོ་ཞེས་བྱ་སེམས་ཅན་ཐམས་ཅད་

71-1-121a

ཀྱི་དགེ་བའི་རྩ་བ་ཞེས་ཀྱང་བྱ། སེམས་ཅན་ཐམས་ཅད་ཀྱི་ལུས་དང་། ངག་དང་། ཡིད་ཀྱི་ལས་སྦྱོང་བ་ཞེས་བྱ་སྟེ། ལས་ངན་པ་གསུམ་སྦྱངས་པས་འཇིག་རྟེན་ན་སྨོན་ལམ་གང་ཡང་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ལས་འདའ་བ་མེད་དེ་སྨོན་ལམ་མཆོག་དམ་པ་བླ་ན་མེད་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཐོག་མ་བྱང་ཆུབ་ཏུ་སེམས་བསྐྱེད་པའི་ཚེ་དངོས་པོ་ལྔ་དང་ལྡན་པར་བྱའོ། །
ལྔ་གང་ཞེ་ན། རང་བཞིན་དང་། སྤྱོད་པ་དང་། སྤྱོད་ཡུལ་དང་། ཡོན་ཏན་དང་། བསྐྱེད་པའོ། །བྱང་ཆུབ་སེམས་དཔའ་དེ་ལྟར་བྱང་ཆུབ་ཏུ་སེམས་བསྐྱེད་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱ་སྟེ། གདོན་མི་ཟ་བར་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་ཅིང་ཐེག་པ་ཆེན་པོ་སྤྱོད་པར་འགྱུར་རོ། །དེ་བས་ན་ཐོག་མ་བྱང་ཆུབ་ཏུ་སེམས་བསྐྱེད་པས་དགེ་བའི་ཆོས་ཐམས་ཅད་སྡུད་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་
ཆེན་པོ་བྱང་ཆུབ་ཏུ་སེམས་བསྐྱེད་ནས་ཇི་ལྟར་སྤྱོད་པ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་རོ། །གལ་ཏེ་བྱང་ཆུབ་ཏུ་སེམས་མ་བསྐྱེད་ན་ནམ་དུ་ཡང་བྱང་ཆུབ་ཐོབ་པར་མི་འགྱུར་ཏེ། དེ་བས་ན་བྱང་
ཆུབ་ཏུ་སེམས་བསྐྱེད་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་གཞི་ཐོབ་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་སྡུག་བསྔལ་གྱིས་གཟིར་བ་མཐོང་ན་བྱམས་ཤིང་སྙིང་རྗེ་བའི་སེམས་སྐྱེ་སྟེ། 
དེ་བས་ན་བྱང་ཆུབ་སེམས་དཔའ་ནི་བྱམས་པ་དང་། སྙིང་རྗེའི་སེམས་ཀྱིས་རྒྱུ་བྱས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
བསྐྱེད་པའི་རྒྱུས་བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་སྒྲུབ་པར་འགྱུར་རོ། །བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་བསྒྲུབས་པའི་རྒྱུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་སྟེ། དེ་བས་ན་བྱང་ཆུབ་ཏུ་

71-1-121b

སེམས་བསྐྱེད་པ་ནི་གཞི་འམ་རྩ་བ་ཞེས་བྱའོ། །བྱང་ཆུབ་ཏུ་སེམས་བསྐྱེད་པས་བྱང་ཆུབ་སེམས་དཔའི་ཚུལ་ཁྲིམས་སྤྱོད་པར་འགྱུར་ཏེ། དེ་བས་ན་བྱང་ཆུབ་ཏུ་སེམས་བསྐྱེད་པ་ནི་རྩ་བ་ཞེས་བྱའོ། །ཡན་ལག་ཅེས་ཀྱང་བྱ། སྡུད་པ་ཞེས་ཀྱང་བྱ། གོ་
རིམས་ཞེས་ཀྱང་བྱ། ས་བོན་ཞེས་ཀྱང་བྱ། བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་པ་ཡང་མཐར་ཕྱིན་པ་དང་། མཐར་མི་ཕྱིན་པ་ཡོད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་ཐོབ་པར་བྱེད་པ་ནི་ནམ་དུ་ཡང་ཕྱིར་ལྡོག་པ་འམ་
ནུར་བ་མེད་པས་མཐར་ཕྱིན་པའོ། །མཐར་མི་ཕྱིན་པ་ནི་ལྡོག་པ་དང་ཉམས་པར་འགྱུར་ཏེ། ཕྱིར་ལྡོག་པ་ལ་རྣམ་པ་གཉིས་ཏེ། མཐར་ལྡོག་པ་དང་། མཐར་ལྡོག་པ་མ་ཡིན་པ་ཡོད་དོ། །མཐར་ཕྱིར་ལྡོག་པ་ནི་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་སེམས་བསྐྱེད་པ་ལས་ཕྱིར་མི་ལྡོག་པའི་ཆོས་གང་ཡིན་པ་དེ་བསྒྲུབ་པ་འམ་ནན་ཏན་དུ་སྤྱོད་མི་ནུས་པའོ། །མཐར་ཕྱིན་པ་མ་ཡིན་པ་ནི་བྱང་ཆུབ་ཏུ་སེམས་བསྐྱེད་ནས་ཆོས་གང་ཡིན་པ་བསྒྲུབ་ཅིང་ནན་ཏན་དུ་སྤྱོད་པའོ། །བྱང་ཆུབ་
སེམས་དཔའི་སྤྱོད་པ་ལ་རྣམ་པ་བཞི་སྟེ། རིགས་ཀྱི་བུ་འམ། རིགས་ཀྱི་བུ་མོ། གང་ཞིག་སངས་རྒྱས་སམ། བྱང་ཆུབ་སེམས་དཔའི་དོན་གྱི་དངོས་པོ་བསམ་གྱིས་མི་ཁྱབ་པ་ཐོས་སམ། མཐོང་ན་དེའི་ཚེ་དད་ཅིང་འདུན་པའི་སེམས་སྐྱེ་
བར་འགྱུར་ཏེ། འདི་སྙམ་དུ་སངས་རྒྱས་དང་བྱང་ཆུབ་སེམས་དཔའི་དོན་ཀྱི་དངོས་པོ་ནི་བསམ་གྱིས་མི་ཁྱབ་པ་སྟེ། སངས་རྒྱས་དང་བྱང་ཆུབ་སེམས་དཔའི་དོན་གྱི་དངོས་པོ་བསམ་གྱིས་མི་ཁྱབ་པ་དེ་ནི་ཐོབ་པར་བྱ་བ་ཡིན་པས་བདག་གིས་བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ་སྙམ་སེམས་ཏེ། དེ་བས་ན་སེམས་རྩེ་གཅིག་ཏུ་དྲན་པར་བྱེད་ཅིང་བྱང་ཆུབ་ཏུ་སེམས་བསྐྱེད་པ་དང་། ཁ་ཅིག་ནི་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱི་དོན་གྱི་དངོས་
པོ་བསམ་གྱིས་མི་ཁྱབ་པ་མ་མཐོང་ཡང་། སངས་རྒྱས་དང་། བྱང་ཆུབ་སེམས་དཔས་དགོངས་ཏེ་གསུངས་པའི་སྙིང་པོ་ཐོས་པ་ཙམ་གྱིས་དད་ཅིང་འདུན་པའི་སེམས་སྐྱེས་ཏེ། དད་པའི་སེམས་སྐྱེས་པས། བླ་ན་མེད་པ་ཡང་དག་པར་

71-1-122a

རྫོགས་པའི་བྱང་ཆུབ་དང་། རྣམ་པ་ཐམས་ཅད་མཁྱེན་པ་ཉིད་ཐོབ་པར་བྱ་བའི་ཕྱིར། བྱང་ཆུབ་ཏུ་སེམས་བསྐྱེད་པ་དང་། ཁ་ཅིག་ནི་སངས་རྒྱས་དང་། བྱང་ཆུབ་སེམས་དཔའི་དོན་གྱི་དངོས་པོ་བསམ་གྱིས་མི་ཁྱབ་པ་ཡང་
མ་མཐོང་། དགོངས་ཏེ་གསུངས་པའི་ཆོས་མ་ཐོས་ཀྱང་དམ་པའི་ཆོས་འཇིག་པར་འགྱུར་བར་མཐོང་ན། དེ་འདི་སྙམ་དུ་བླ་ན་མེད་པའི་སངས་རྒྱས་ཀྱི་ཆོས་སེམས་ཅན་རྣམས་ཀྱི་ཉོན་མོངས་པ་གྲངས་མེད་པ་ཞི་བར་བྱེད་ཅིང་། བདེ་བ་དང་
ཕན་པའི་དོན་དུ་འགྱུར་བ་འདི་ནི་སངས་རྒྱས་དང་། བྱང་ཆུབ་སེམས་དཔའ་འབའ་ཤིག་གིས་ཡུན་རིང་དུ་གནས་ཤིང་མི་ནུབ་པར་མཛད་དེ། ད་བདག་ཀྱང་བྱང་ཆུབ་ཏུ་སེམས་བསྐྱེད་ལ་སེམས་ཅན་ཐམས་ཅད་ཀྱི་ཉོན་མོངས་པ་ཡོངས་སུ་
སྤོང་པའི་ཕྱིར་བདག་གི་ལུས་འདི་སྡུག་བསྔལ་ཆེན་པོ་མྱོང་ཡང་། སངས་རྒྱས་ཀྱི་ཆོས་འཇིག་རྟེན་ན་ཡུན་རིང་དུ་གནས་པར་བྱའོ་སྙམ་དུ་སེམས་ནས་བྱང་ཆུབ་ཏུ་སེམས་བསྐྱེད་པ་དང་། ཁ་ཅིག་ནི་སངས་རྒྱས་ཀྱི་ཆོས་འཇིག་པ་མ་
མཐོང་ཡང་དུས་ངན་པའི་སེམས་ཅན་རྣམས་ཉོན་མོངས་པ་ཤིན་དུ་ལྕི་བ་འདོད་ཆགས་དང་། ཞེ་སྡང་དང་། གཏི་མུག་རྣམས་དང་། ངོ་ཚ་མེད་པ་དང་། ཁྲེལ་མེད་པ་དང་། སེར་སྣ་རྣམས་དང་། ཕྲག་དོག་དང་། ཁོང་ཁྲོ་བ་དང་། འཁྲུག་
པ་རྣམས་དང་། མ་དད་པ་དང་། ཐེ་ཙོམ་དང་། ལེ་ལོ་ལ་སོགས་པ་ཉོན་མོངས་པའི་དངོས་པོ་འདི་དག་མཐོང་ན། དེ་འདི་སྙམ་དུ་ཤིན་དུ་དུས་ངན་པས་སེམས་ཅན་འདི་དག་ནི་དགེ་བ་མི་སྤྱོད་དེ། དེ་ལྟར་དུས་ངན་པས་ཐེག་པ་གཉིས་ཀྱི་
སེམས་ཀྱང་བསྐྱེད་མི་ནུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ལྟ་ཅི་སྨོས་སྙམ་སེམས་ནས་བྱང་ཆུབ་ཏུ་སེམས་བསྐྱེད་པའོ། །དེ་ལྟར་བྱང་ཆུབ་ཏུ་སེམས་བསྐྱེད་ནས་སེམས་ཅན་ཐམས་ཅད་
ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ལ་བརྩོན་པར་བྱེད་དོ། །དེ་ནས་བྱང་ཆུབ་སེམས་དཔའ་དགའ་བའི་རྒྱལ་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་

71-1-122b

སེམས་དཔའ་དྲིན་ལན་ཤེས་པ་ནི་བདག་བྱང་ཆུབ་ཏུ་སེམས་བསྐྱེད་པའོ། །བྱང་ཆུབ་སེམས་དཔའ་དྲིན་ལན་བསབ་པ་ནི་སེམས་ཅན་ཕ་རོལ་པོ་བྱང་ཆུབ་ཏུ་སེམས་བསྐྱེད་དུ་བཅུག་པའོ་ཞེས་བགྱི་ན། དེ་བཞིན་གཤེགས་པ་སྔོན་འཁོར་
བ་ན་འཁོར་བའི་ཚེ་ཐོག་མ་དངོས་པོ་ཅིའི་རྒྱུས་བྱང་ཆུབ་ཏུ་སེམས་བསྐྱེད་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སྔོན་གྱི་བསྐལ་པ་གྲངས་མེད་པའི་བར་དུ་སྐྱེ་ཤིར་འཁོར་བ་ན་འཁོར་ཞིང་
ལུས་དང་ངག་དང་། ཡིད་ཀྱི་ཉོན་མོངས་པའི་ལས་ཆེན་པོས་སེམས་ཅན་དམྱལ་བ་ཆེན་པོ་བརྒྱད་མྱོང་བར་གྱུར་ཏོ། །འདི་ལྟ་སྟེ། ཨ་ཧ་ཧའི་སེམས་ཅན་དམྱལ་བ་དང་། ཨ་ལ་ལའི་སེམས་ཅན་དམྱལ་བ་དང་། ཨ་ཚ་ཚའི་སེམས་ཅན་
དམྱལ་བ་དང་། ཟངས་ཁོལ་མའི་སེམས་ཅན་དམྱལ་བ་དང་། ཟངས་ཁོལ་བ་ཆེན་པོའི་སེམས་ཅན་དམྱལ་བ་ཆེན་པོ་དང་། རྡོ་ནག་པོའི་སེམས་ཅན་དམྱལ་བ་དང་། རྡོ་ནག་པོ་ཆེན་པོའི་སེམས་ཅན་དམྱལ་བ་ནས། མེའི་ཤིང་རྟའི་དམྱལ་བ་
འི་བར་དུའོ། །ང་དེའི་ཚེ་ན་མེའི་ཤིང་རྟའི་དམྱལ་བར་ལྷུང་ནས་གུད་ནས་གཅིག་དང་གཉིས་ཀྱིས་མེའི་ཤིང་རྟ་འདྲེན་ཏེ། དམྱལ་བའི་སྲུངས་མ་ཨ་བང་ནི་ཤིང་རྟའི་སྟེང་ན་འདུག་ཅིང་མིག་སྒྲད་སོ་གཙིགས་ཏེ་མེ་འབུད་པ། ཁ་དང་། མིག་
དང་། རྣ་བ་དང་། སྣ་ནས་མེ་འབར། དུད་པ་འཐུལ་ཏེ་སྲུངས་མ་དེ་ཡང་ལུས་ཤིན་དུ་ཆེ་ཞིང་གནག་ལ། ཤིང་རྟའི་སྟེང་ན་སྐྱིལ་མོ་དཀྲུང་བཅས་ཏེ་འདུག་ནས་ལག་པ་ན་ལྕགས་ཀྱི་དབྱུག་པ་ཐོགས་ཏེ་ང་ལ་རྡེག་གོ། །དེའི་ཚེ་ང་ན་
བའི་སྡུག་བསྔལ་མ་བཟོད་ནས་སྟོབས་ཅི་ནུས་ཀྱིས་ཤིང་རྟ་དྲངས་སོ། །ངའི་གྲོགས་ཤིག་ཉམ་ཆུང་སྟེ་འདྲེན་མ་ནུས་པས་དམྱལ་བའི་སྲུངས་མ་ཨ་བང་གིས་ལྕགས་ཀྱི་མདུང་རྩེ་གསུམ་པ་ཐོགས་ནས་བྲང་དུ་བཙུགས་ཏེ། ལྕགས་
ཐོས་བརྡབས་ནས་ཁྲག་ཆར་པར་ཕབ་བོ། །དེའི་ཚེ་མི་དེ་ན་བའི་སྡུག་བསྔལ་མི་བཟོད་པས་ན་ཚའི་སྐད་ཆེན་པོ་ཕྱུང་ནས་བར་འགའ་ནི་ཕ་མ་ཞེས་འབོད། བར་འགའ་ནི་ཆུང་མ་བུ་ཞེས་བོས་ཀྱང་ཕན་པ་མེད་དོ། །ང་དེའི་ཚེ་ན་དེ་ལྟ་བུའི་སྡུག་

71-1-123a

བསྔལ་ཆེན་པོ་མྱོང་བ་མཐོང་ནས་སྙིང་རྗེའི་སེམས་སྐྱེས་སོ། །དེ་ལྟར་སྙིང་རྗེའི་སེམས་ཆེན་པོ་སྐྱེས་པའི་རྐྱེན་གྱིས་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་ནས་སྡུག་བསྔལ་མྱོང་བ་དེའི་ཕྱིར་དམྱལ་བའི་སྲུངས་མ་ཨ་བང་ལ་སྡུག་བསྔལ་མྱོང་བའི་
མི་འདི་ལ་སྙིང་རྗེའི་སེམས་ཅུང་ཟད་སྐྱེད་ཅིག་ཅེས་གསོལ་བ་བཏབ་པ་དང་། དམྱལ་བའི་སྲུངས་མ་ཁྲོས་ནས་ཞེ་སྡང་གི་སེམས་སྐྱེས་པས་ལྕགས་ཀྱི་མདུང་རྩེ་གསུམ་པ་ཐོགས་ནས་ངའི་གཉའ་བར་བཙུགས་ནས་དེར་ཚེའི་དུས་བྱས་པས་མེའི་ཤིང་
རྟའི་སེམས་ཅན་དམྱལ་བ་ལས་ཐར་ཏེ་བསྐལ་པ་བརྒྱད་སྟོང་ཀྱི་མི་དགེ་བའི་སྡིག་པ་བྱང་བར་གྱུར་ཏོ། །དེ་ལྟར་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པས་མེའི་ཤིང་རྟའི་སེམས་ཅན་དམྱལ་བ་ལས་ཐར་བར་གྱུར་ཏོ། །བཅོམ་
ལྡན་འདས་ཀྱིས་དགའ་བའི་རྒྱལ་པོ་ལ་བཀའ་སྩལ་པ། དེའི་ཚེ་མེའི་ཤིང་རྟ་འདྲེན་པ་དེ་ནི་ད་ལྟར་ང་ཡིན་ཏེ། བྱང་ཆུབ་ཏུ་སེམས་བསྐྱེད་པས་མྱུར་དུ་སངས་རྒྱས་སུ་གྲུབ་པར་གྱུར་ཏོ། །དེ་བས་ན་སེམས་ཅན་ཐམས་ཅད་ཀྱིས་བྱང་ཆུབ་ཏུ་སེམས་
བསྐྱེད་པ་ནི་དོན་གྱི་དངོས་པོ་ནི་གཅིག་ཏུ་མ་ཟད་དེ། ལ་ལ་ནི་སྙིང་རྗེའི་རྐྱེན་གྱིས་སྐྱེའོ། །ལ་ལ་ནི་ཞེ་སྡང་གི་རྐྱེན་གྱིས་སྐྱེའོ། །ལ་ལ་ནི་སྦྱིན་པའི་རྐྱེན་གྱིས་སྐྱེའོ། །ལ་ལ་ནི་སེར་སྣའི་རྐྱེན་གྱིས་སྐྱེའོ། །ལ་ལ་ནི་དགའ་བའི་རྐྱེན་གྱིས་
སྐྱེའོ། །ལ་ལ་ནི་མྱ་ངན་གྱི་རྐྱེན་གྱིས་སྐྱེའོ། །ལ་ལ་ནི་འདོད་པ་དང་བྱེ་བྲལ་གྱི་རྐྱེན་གྱིས་སྐྱེའོ། །ལ་ལ་ནི་དགྲ་སྡང་བ་དང་ཕྲད་པའི་རྐྱེན་གྱིས་སྐྱེའོ། །ལ་ལ་ནི་དགེ་བའི་བཤེས་གཉེན་ལ་སྟེན་པའི་རྐྱེན་གྱིས་སྐྱེའོ། །ལ་ལ་ནི་མི་དགེ་བའི་
བཤེས་གཉེན་གྱི་རྐྱེན་གྱིས་སྐྱེའོ། །ལ་ལ་ནི་སངས་རྒྱས་མཐོང་བའི་རྐྱེན་གྱིས་སྐྱེའོ། །ལ་ལ་ནི་ཆོས་ཐོས་པའི་རྐྱེན་གྱིས་སྐྱེའོ། །དེ་བས་ན་སེམས་ཅན་རྣམས་ལ་བྱང་ཆུབ་ཏུ་སེམས་བསྐྱེད་པ་ནི་དེ་ལྟར་སོ་སོར་མི་མཐུན་ཏེ། དགའ་བའི་རྒྱལ་པོ་
བྱང་ཆུབ་སེམས་དཔའ་སེམས་དཔའ་ཆེན་པོས་དྲིན་ལན་ཤེས་པ་དང་། དྲིན་ལན་བསབ་པའི་དོན་གྱི་དངོས་པོ་འདི་ལྟར་རིག་པར་བྱའོ། །དེའི་ཚེ་ཆོས་འདི་བསྟན་པ་ན་སྐྱེ་བོ་ཁྲི་བརྒྱ་སྟོང་སྙེད་ཀྱིས་བླ་ན་མེད་པ་ཡང་དག་པར་རྫོགས་པའི་

71-1-123b

བྱང་ཆུབ་ཏུ་སེམས་བསྐྱེད་པར་གྱུར་ཏོ། །འཁོར་མང་མོ་དེ་དག་ལས་ལ་ལ་ནི་རྒྱུན་དུ་ཞུགས་པའི་འབྲས་བུ་ཐོབ་པ་ནས་དགྲ་བཅོམ་པའི་འབྲས་བུའི་བར་དུ་ཐོབ་པར་གྱུར་ཏོ། །ལྷ་དང་། ཀླུ་དང་། ཡི་དགས་དང་། མི་དང་མི་མ་ཡིན་པ་ལ་
སོགས་པ་ཐམས་ཅད་ཉན་ཐོས་དང་། རང་སངས་རྒྱས་སུ་སེམས་བསྐྱེད་པར་གྱུར་ཏེ། ཆོས་ཐོས་པ་ལ་རབ་ཏུ་དགའ་རངས་ནས་མགོ་བོས་ཕྱག་འཚལ་ཏེ་གཡས་ཕྱོགས་ནས་བསྐོར་བ་བྱས་ནས་ཕྱིར་དོང་ངོ་། །ཐབས་མཁས་པ་ཆེན་པོ་
སངས་རྒྱས་དྲིན་ལན་བསབ་པའི་མདོ་ལས་བྱང་ཆུབ་ཏུ་སེམས་བསྐྱེད་པ་ཞེས་བྱ་བའི་ལེའུ་སྟེ་བཞི་པའོ།། །། ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ། བམ་པོ་གསུམ་པ། དེའི་ཚེ་དེ་བཞིན་གཤེགས་པ་ཡུམ་
ལྷ་མཛེས་དང་ལྷ་རྣམས་ཀྱི་དོན་དུ་ཞག་དགུ་བཅུའི་བར་དུ་ལྷ་རྣམས་ལ་ཆོས་སྟོན་དུ་གཤེགས་ཏེ། འཛམ་བུའི་གླིང་གི་མི་རྣམས་ཀྱིས་ཞག་དགུ་བཅུའི་བར་དུ། དེ་བཞིན་གཤེགས་པ་ག་ལ་བཞུགས་པ་མ་རྟོགས་སོ། །མཽད་གལ་གྱི་བུ་ཆེན་པོ་
རྫུ་འཕྲུལ་གྱི་མཆོག་ཏུ་གྱུར་པས་ཀྱང་རྫུ་འཕྲུལ་གྱི་མཐུས་གཏུགས་ཏེ་ཕྱོགས་བཅུར་བརྟགས་ཀྱང་མ་རྟོགས་སོ། །འཕགས་པ་ཉེ་བར་སྐྱོང་ལྟ་བུ་ལྷའི་མིག་མཆོག་གིས་ཕྱོགས་བཅུར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
ཀུན་དུ་བལྟས་ཀྱང་མ་མཐོང་ངོ་། །དེ་བཞིན་དུ་འཕགས་པའི་འཁོར་ལྔ་བརྒྱའི་བར་དུ་ཀུན་གྱིས་བརྟགས་ཀྱང་མ་མཐོང་ངོ་། །དེ་ལྟར་དེ་བཞིན་གཤེགས་པ་མ་མཐོང་བས་དེ་དག་མི་དགའ་སྟེ་མྱ་ངན་གྱིས་སེམས་གདུངས་པར་གྱུར་ཏོ། །
དེའི་ཚེ་རྒྱལ་པོ་ཨུ་ཏྲ་ཡ་ནས་དེ་བཞིན་གཤེགས་པ་མ་མཐོང་བས་མི་དགའ་བའི་སེམས་སྐྱེས་ཏེ། དེ་བཞིན་གཤེགས་པ་དྲན་པའི་ཕྱིར་གླང་མགོའི་ཤིང་ཙན་དན་ལས་དེ་བཞིན་གཤེགས་པའི་སྐུ་གཟུགས་བྱས་ནས་ཕྱག་འཚལ་བ་དང་
མཆོད་པ་བྱེད་པ་དེ་ཡང་དེ་བཞིན་གཤེགས་པ་མངོན་སུམ་དང་། འདྲ་བར་བཞུགས་པར་དམིགས་ནས་མཆོད་པ་བྱས་སོ། །དེའི་ཚེ་རྒྱལ་པོ་ཆེན་པོས་མུ་སྟེགས་ཅན་གྱི་སྟོན་པ་དྲུག་བོས་ནས་དེ་བཞིན་གཤེགས་པ་ད་ལྟར་ག་ལ་བཞུགས་

71-1-124a

ཞེས་དྲིས་ན་སྟོན་པ་དྲུག་གིས་རྒྱལ་པོ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་མི་མཁྱེན་ནམ། དགེ་སྦྱོང་གཽ་ཏ་མ་ནི་སྒྱུ་འཕྲུལ་ཅན་ཡིན་ཏེ་དེ་འདྲའོ། །སྒྱུ་འཕྲུལ་གྱི་སྒྱུ་མ་ནི་བདེན་པའི་དངོས་པོ་མེད་པས་བདག་ཅག་གི་
གཙུག་ལག་ལས་ལོ་སྟོང་ངམ་ཉིས་སྟོང་ན་སྒྱུ་འཕྲུལ་ཅན་སྒྱུ་མ་ཞིག་འབྱུང་ངོ་ཞེས་འཆད་པས་དགེ་སྦྱོང་གཽ་ཏ་མ་ནི་སྒྱུ་མ་དེ་ཁོ་ན་ཡིན་ནོ། །དེའི་ཚེ་འཕགས་པ་ཉེ་བར་སྐྱོང་རྒྱལ་པོ་ཆེན་པོ་ག་ལ་བར་སོང་ནས། རྒྱལ་པོ་ལ་འདི་སྐད་ཅེས་གསོལ་
ཏོ། །རྒྱལ་པོ་ཆེན་པོ་མཁྱེན་ཏམ། དེ་བཞིན་གཤེགས་པ་ནི་ད་སྟེ་ཞག་བདུན་ན་སུམ་བཅུ་རྩ་གསུམ་གནམ་ནས་འཛམ་བུའི་གླིང་དུ་གཤེགས་སོ། །རྒྱལ་པོས་དེ་སྐད་ཅེས་སྨྲས་པ་ཐོས་ནས་རབ་ཏུ་དགའ་བའི་སེམས་སུ་གྱུར་ཏེ། 
ཡུལ་མི་བསྡུས་ནས་ཆག་ཆག་དང་ཕྱག་དར་བྱས་ཏེ། སྤོས་དང་། མེ་ཏོག་ཀྱང་བཤམས། དར་གྱི་ལྡ་ལྡི་དང་། བ་དན་དང་། གདུགས་བྲེས་ཏེ། ཞལ་ཟས་མང་པོ་དང་། རོལ་མོ་ལ་སོགས་པ་མཆོད་པའི་ཡོ་བྱད་རྣམ་པ་སྣ་ཚོགས་
བཤམས་ཤིང་སྦྱར་བ་དང་། མུ་སྟེགས་ཅན་གྱི་སྟོན་པ་དྲུག་དེར་འོངས་ནས་ཁྱེད་རྣམས་འདི་ལྟར་མཆོད་པའི་ཡོ་བྱད་བཤམས་ཤིང་སྦྱར་བ་འདི་རྒྱལ་པོ་སྤྱན་འདྲེན་ནམ།  དེ་དག་གིས་དེ་མ་ཡིན་ནོ་ཞེས་སྨྲས་པ་དང་། འོ་ན་བློན་པོ་ཆེན་པོ་
འབོད་དམ། བྲམ་ཟེ་འམ་ཁྱིམ་བདག་འབོད་དམ། དེ་མ་ཡིན་ན་གཉེན་བཤེས་ཀྱི་དུས་སྟོན་བྱེད་དམ། སྨྲས་པ་དེ་མ་ཡིན་ཏེ། སངས་རྒྱས་བཅོམ་ལྡན་འདས་གཤེགས་སུ་གསོལ་ལོ། །སྟོན་པ་དྲུག་གིས་སྨྲས་པ། སངས་རྒྱས་ཤེས་
བྱ་བ་སུ་ཞིག །སྨྲས་པ། ཐམས་ཅད་མཁྱེན་པའོ། །ཡང་རྣམ་པ་ཐམས་ཅད་མཁྱེན་པ་ཞེས་བྱ་བ་དེ་སུ་ཞིག །སྨྲས་པ། བྱམས་པ་དང་། སྙིང་རྗེ་ཆེན་པོའི་ཡབ་བོ། །ཁྱེད་མི་ཤེས་སམ། རྒྱལ་པོ་ཟས་གཙང་མའི་རིགས་མཐོ་
ཞིང་བཙུན་ལ་མཆོག་ཏུ་གྱུར་པ། ཐོག་མ་བསྐལ་པ་དང་པོ་ནས་བཙུན་མོ་ཆེན་པོའི་སྲས་གཅིག་ཅིག་གིས་གདུང་བསབས་ཏེ་འཁོར་ལོས་སྒྱུར་བའི་རྒྱལ་པོ་བྱས་སོ། །བར་དུ་རབས་གཉིས་ཀྱིས་འཁོར་ལོས་སྒྱུར་བའི་རྒྱལ་པོ་མ་

71-1-124b

བྱས་མོད་ཀྱི་འཛམ་བུའི་གླིང་གི་རྒྱལ་པོ་བྱས་སོ། །རྒྱལ་པོ་དེ་ལ་སྲས་མཆེད་གསུམ་ཞིག་མངའོ། །རབ་ནི་རྒྱལ་པོ་ཟས་གཙང་མ་ཞེས་བྱ། དེའི་བར་ནི་བྲེ་བོ་ཟས་ཞེས་བྱ། དེའི་ཐ་ཆུངས་ནི་ཟས་ཟིལ་མངར་གྱི་ཟས་ཞེས་བྱ་
འོ། །རྒྱལ་པོ་ཟས་གཙང་མ་ལ་སྲས་གཉིས་ཤིག་མངའ། ཆེན་པོ་ནི་དོན་གྲུབ་ཅེས་བྱ། སྲས་ཆུང་ངུ་ནི་དགའ་བོ་ཞེས་བྱ། རྒྱལ་པོ་བྲེ་བོ་ཟས་ལ་སྲས་གཉིས་ཤིག་མངའ། ཆེན་པོ་ནི་ལྷ་སྦྱིན་ཞེས་བྱ། སྲས་ཆུང་ངུ་ནི་ཀུན་
དགའ་བོའོ། །རྒྱལ་པོ་ཟིལ་མངར་གྱི་ཟས་ལ་སྲས་མོ་གཅིག་ཡོད་དེ། བུ་མོ་ཟིལ་མངར་གྱི་རོ་ཞེས་བྱའོ། །དེའི་ཚེ་ན་སྤུན་གྱི་རབ་རྒྱལ་བུ་དོན་གྲུབ་ཕོ་བྲང་གི་ཕྱི་རོལ་དུ་འཆག་ཏུ་ལྟད་མོ་ལྟར་སོང་སོང་བ་ལས་རྒ་བ་དང་། ན་བ་དང་། 
ཤི་བ་དག་མཐོང་ནས་མི་དགའ་བར་གྱུར་ཏེ། ཁ་ཟས་ཀྱང་མི་ཟ་ཞིང་སྙིང་རྗེའི་སེམས་ཀྱིས་སེམས་པ་ལ་ཞུགས་ཏེ། མིར་སྐྱེས་པ་ལ་མཐོ་དམའ་མེད་པར་གཟུགས་སུ་རེད་པ་ཐམས་ཅད་ལ་དེ་འདྲ་བའི་ནད་དང་སྐྱོན་ཡོད་དེ་གཅིག་
ཀྱང་མི་ཐར་རོ་སྙམ་བསམས་ནས། མཚན་མོ་ཕོ་བྲང་ནས་བྲོས་ནས་བྱང་ཆུབ་ཀྱི་ཤིང་དྲུང་དུ་ལོ་དྲུག་གི་བར་དུ་སྤྱོད་པ་དཀའ་བ་སྤྱད་ནས་རྣམ་པ་ཐམས་ཅད་མཁྱེན་པ་ཞེས་བྱ་བར་གྱུར་ཏེ། ཐམས་ཅད་མཁྱེན་པའི་ཡེ་ཤེས་ཅན་
ཞེས་མངོན་པར་སངས་རྒྱས་ཏེ། སྟོབས་བཅུ་དང་། མི་འཇིགས་པ་བཞི་དང་། མ་འདྲེས་པའི་ཆོས་བཅྭ་བརྒྱད་དང་ལྡན་ཞིང་རྣམ་པ་ཐམས་ཅད་མཁྱེན་པ་ཞེས་བྱ་བར་གྱུར་ཏོ། །བལྟམ་ནས་ཞག་བདུན་ལོན་ནས་ཡུམ་ལྷ་མཛེས་
དུས་བྱས་ཏེ། སུམ་ཅུ་རྩ་གསུམ་གནམ་གྱི་ལྷའི་ནང་དུ་སྐྱེས་ནས་ཡུམ་ལ་ཞག་དགུ་བཅུའི་བར་དུ་ཆོས་བཤད་དེ། ད་སྟེ་ཞག་བདུན་ན་འཛམ་བུའི་གླིང་དུ་གཤེགས་སོ། །དེའི་ཚེ་མུ་སྟེགས་ཅན་གྱི་སྟོན་པ་དྲུག་གིས་དེ་སྐད་ཅེས་
སྨྲས་པ་ཐོས་ནས་ཕྲག་དོག་གི་སེམས་སྐྱེས་ཏེ། རབ་ཏུ་མི་དགའ་བའི་མྱ་ངན་གྱིས་གདུངས་ནས་སྟོན་པ་དྲུག་འཁོར་དང་བཅས་པ་ལྷན་ཅིག་ཏུ་འདུག་སྟེ་འདི་སྐད་ཅེས་བགྲོས་སོ། །དགེ་སྦྱོང་གཽ་ཏ་མ་གལ་ཏེ་འཛམ་བུའི་གླིང་འདིར་ཕྱིན་

71-1-125a

ཏེ་འོངས་ན་མི་ཐམས་ཅད་ཀྱིས་བདག་ཅག་སྤོང་ཞིང་དགེ་སྦྱོང་གཽ་ཏ་མ་ལ་མཆོད་པ་བྱེད་པར་འགྱུར་བས་བདག་ཅག་ནི་བྲེལ་ཞིང་ཕོངས་ལ་སྲོག་ལ་བབ་པར་འགྱུར་རོ་ཞེས་བགྲོས་ནས། མུ་སྟེགས་ཅན་གྱི་སྟོན་པ་དྲུག་
གིས་ཡང་འདི་སྙམ་བསམས་སོ། །བདག་ཅག་མི་མང་པོ་འདུས་པའི་གནས་སུ་མྱུར་དུ་སོང་ལ་མི་མང་པོའི་ནང་དུ་འདི་སྐད་ཅེས་བསྒྲག་པར་བྱའོ། །དེ་སྐད་ཀུན་ཤེས་པར་གྱིས། དགེ་སྦྱོང་གཽ་ཏ་མ་ནི་ཡང་དག་པར་ན་ཅི་ཡང་ཤེས་པ་མེད་དེ། བྱིས་པ་
ཆུང་ངུ་ན་ཁ་ཉག་གཅིག་ཤཱག་རིགས་ཀྱི་ཕོ་བྲང་ནས་བྱུང་སྟེ། བྱང་ཆུབ་ཀྱི་ཤིང་དྲུང་ན་འདུག་འདུག་ནས་ང་ནི་རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་པོ་ཞེས་ཟེར་ཏེ། ཚིག་དེ་ནི་བརྫུན་ཏེ་བདེན་པ་མ་ཡིན་ནོ། །དེ་ཅིའི་ཕྱིར་ཞེ་ན། རྒྱལ་པོ་ཨ་ཁྱི་ཏས་
བསོད་སྙོམས་སྦྱིན་པར་བོས་ནས་རྟ་ཆས་འབའ་ཤིག་བྱིན་ཏེ་ངན་དུ་བྱས་ཀྱང་མ་ཤེས་ཏེ་དེར་སོང་བས་ན་ཐམས་ཅད་མཁྱེན་པ་མ་ཡིན་ནོ། །གཞན་ཡང་ཀུན་དགའ་བོ་ལ་ད་སྟེ་ཞག་དུ་ན་ཚུལ་དུ་འཇུག་ཅེས་དྲིས་ན། ཀུན་དགའ་བོས་ཞག་བདུན་
ཞིག་ལུས་ཤེས་སྨྲས་སོ། །ཡང་ཀུན་དགའ་བོ་ལ་ཀུན་དགའ་ར་བ་ན་བྱ་མང་པོ་ཅིའི་ཕྱིར་ཅ་ཅོའི་སྐད་འབྱིན་ཅེས་དྲིས་ན། བྱ་མང་པོ་ཟས་གཏོད་པའི་ཕྱིར་རོ་ཞེས་སྨྲས་སོ། །བཙས་ནས་ཞག་བདུན་ལོན་ནས་མ་ཡང་ཤི་བར་གྱུར་པས་དེ་དང་
སྦྱར་ན་ཐམས་ཅད་ཤེས་པ་མ་ཡིན་ནོ། །བཀྲ་མི་ཤིས་ཏེ་ཤིན་དུ་སྡིག་པ་ཅན་ཡིན་ནོ། །དེར་ཅིས་མངོན་ཞེ་ན། བཙས་མ་ཐག་ཏུ་མ་ཡང་ཤིའོ། །ཡང་གཅིག་ཏུ་ན་སྲི་ཞུས་ཕ་ལ་རིམ་གྲོ་བྱེད་པའི་རིགས་ན། རིམ་གྲོ་མི་བྱེད་པར་རི་ལ་ལངས་
ཏེ་སོང་བ་ལས་དྲིན་མི་ཤེས་པ་ཡིན་ནོ། །ཡབ་རྒྱལ་པོས་བཙུན་མོ་སྐྱེ་དགུའི་བདག་མོ་བླངས་པ་ལས་ཆུང་མའི་ཚུལ་དུ་མ་བྱས་ཏེ། བཙུན་མོ་སྐྱེ་དགུའི་བདག་མོ་སྡུག་བསྔལ་ཆེན་པོ་མྱོང་བར་བྱས་པས་དྲིན་མི་ཤེས་ཤིང་དྲིན་མི་དྲན་པ་
ཡིན་ནོ། །དགེ་སྦྱོང་གཽ་ཏ་མའི་འཁོར་ནི་བཟང་ངན་མེད་དེ་སློབ་མ་ལྔ་བརྒྱ་པོ་ཡང་སོ་སོ་ནས་ང་ནི་མཆོག་ཡིན་ནོ། །ཞེས་ཟེར་ཏེ། མཁན་པོ་ལ་ཡང་ཆོས་ལུགས་མེད་པས་སློབ་མ་ལ་ཡང་ཆོས་ལུགས་སམ་སྤྱོད་པའི་ལས་མེད་དོ། །

71-1-125b

ཆུང་ངུ་ན་སྟན་འདིངས་པའི་མི་དགེ་སློང་ཐ་བྱེའུ་ལྟ་བུ་ཡང་ང་ནི་ཀུན་གྱི་མཆོག་ཡིན་ནོ་ཞེས་ཟེར། ཡིད་གཞུངས་ཤེས་རབ་ཆེ་བ་བློ་རྣོ་བའི་མཆོག་ཤཱ་རིའི་བུ་ལྟ་བུ་ཡང་དེ་ན་ཡོད། ཤེས་རབ་རྟུལ་བ་ཤེས་པ་མེད་པ་དགེ་སློང་ཕན་ཐིག་དེ་
ཡང་དེ་ལ་འཇུག །ཆུང་ངུ་ན་འདོད་ཆགས་ཆུང་བ་དགེ་སློང་མ་གྲགས་འཛིན་ཡང་དེ་ལ་འཇུག །མཉན་དུ་ཡོད་པ་ན་སྦྲུལ་འཚོང་མ་རུང་མ་ཨུད་པ་ལའི་མདོག་ཀྱང་དེ་ལ་འཇུག །ཆུང་ངུ་ན་ཤེད་མ་བྱེ་བ་ཤེས་པ་མེད་པ་བུས་པ་ཙུན་ད་ཡང་དེ་
ལ་འཇུག །ནང་གི་རྒས་འཁོགས་པ་དེ་སུ་བར་ཏ་ལ་ཞེས་བྱ་བ་ལོ་བརྒྱ་ཉི་ཤུ་ལོན་པ་དེ་ཡང་དེ་ལ་འཇུག །རིགས་བཙུན་པ་ཆེ་བ་ཤག་རིགས་ཀྱང་དེ་ལ་འཇུག །མཉན་དུ་ཡོད་པ་ན་ནང་གི་རིགས་ངན་ཕྱག་དར་ལུང་སྐྱེད་པ་ཡང་དེ་ལ་འཇུག །
དེ་བས་ན་དགེ་སྦྱོང་གཽ་ཏ་མའི་ཆོས་ནི་གོ་འདུན་བསྡུས་པ་བཟང་ངན་མེད་པ་སྟེ། མཆོད་པར་འོས་པ་འམ། བཀུར་སྟིར་བྱ་བའི་གནས་མ་ཡིན་ནོ། །དཔེར་ན་རླུང་ཆེན་པོ་ལངས་ན་ཤིང་ལོ་མ་འམ་འདབ་མ་ཐམས་ཅད་ལྷན་ཅིག་འཕུངས་
པ་ལྟར་སངས་རྒྱས་ཀྱི་ཆོས་ཀྱང་དེ་དང་འདྲའོ། །དཔེར་ན་བྱ་མང་པོ་ནི་མིས་བོར་བའི་ཁ་ཟས་སམ་བར་བུར་ལ་འདུ་བ་ལྟར་དགེ་སྦྱོང་གཽ་ཏ་མའི་འཁོར་ཡང་དེ་དང་འདྲ་སྟེ། རྙེད་རྙེད་ལེན་ཅིང་ཟའོ། །དེ་བས་ན་ཁྱེད་རྣམས་ཅིའི་ཕྱིར། དགེ་
སྦྱོང་གཽ་ཏ་མ་ལ་མཆོད་པ་བྱ་བར་སེམས་ཤེས་བསྒྲགས་སོ། །དེའི་ཚེ་ན་མི་མང་པོས་དེ་སྐད་སྨྲས་པ་ཐོས་ཀྱང་། དཔེར་ན་ས་ཆེན་པོ་བསྐྱོད་དུ་མེད་པ་བཞིན་དེ་བཞིན་གཤེགས་པ་ལ་སྐོམས་པས་གདུངས་པ་ཙམ་དུ་མོས་ཤིང་འདུད་
པའི་སེམས་མ་ནུར་ཏོ། །འཁོར་མང་པོ་རྣམས་སུ་མུ་སྟེགས་ཅན་གྱི་སྟོན་པ་དྲུག་གིས་སྨྲས་པའི་ཚིག་གིས་སེམས་ཕྱིར་མ་ནུར་བ་ནི་ཇི་ལྟར་རྡོ་རྗེ་ལྟར་བརྟན་པར་གྱུར་ཏེ། སྐྱེད་བྲི་མེད་པས་དེ་བཞིན་གཤེགས་པ་ལ་སྐོམ་པས་གདུངས་
པ་ལྟར་མོས་ཤིང་དད་པས་ཞག་བདུན་ལོན་ནས། དེ་བཞིན་གཤེགས་པ་ཡང་སུམ་ཅུ་རྩ་གསུམ་གནམ་ནས་སླར་འཛམ་བུའི་གླིང་དུ་གཤེགས་ཏེ། ལྷའི་འཁོར་གྲངས་མེད་པ་བརྒྱ་སྟོང་གིས་བསྐོར་ཅིང་དེ་བཞིན་གཤེགས་པའི་

71-1-126a

འོད་ཟེར་གྱིས་ཀུན་དུ་སྣང་ལ་གསལ་བར་བྱས་ནས་ལྷའི་རོལ་མོ་ཚད་མེད་པ་བརྒྱ་སྙེད་ཀྱིས་མཆོད་པ་ནས། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་
འཕྱེ་ཆེན་པོ་དང་མི་དང་མི་མ་ཡིན་པའི་བར་དུ་ཐམས་ཅད་འདུས་ཏེ་ཕྱག་འཚལ་ནས་མཆོད་པ་བྱས་སོ། །དེའི་ཚེ་རྒྱལ་པོ་ཨུད་ཏྲ་ཡ་ན་ཡང་འཁོར་དང་བཅས་ཏེ། རྒྱང་མ་ནས་དེ་བཞིན་གཤེགས་པ་བསུ་ནས་མགོ་བོས་དེ་བཞིན་གཤེགས་པའི་
ཞབས་ལ་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །དེ་ནས་མུ་སྟེགས་ཅན་གྱི་སྟོན་པ་དྲུག་ཀྱང་ཕྱོགས་གཅིག་ཏུ་འདུས་ནས་འདི་སྙམ་དུ་སེམས་པར་གྱུར་ཏོ། །བདག་ཅག་གི་བྱུར་ཞེས་བྱ་བ་འདིར་འོངས་ཏེ། མི་མང་པོའི་ནང་དུ་འདི་
སྐད་ཅེས་བསྒྲགས་ཀྱང་ཡིད་ཆེས་ལ་མ་ཕན་པས། ད་ནི་བདག་ཅག་གིས་ལྷ་དང་མིའི་ཚོགས་པའི་ནང་དུ་བསྒྲགས་ན་བྱེ་བྲག་མ་ཕྱེད་དོ་སྙམ་བསམས་སོ། །དེའི་ཚེ་མུ་སྟེགས་ཅན་གྱི་སྟོན་པ་དྲུག་གིས་དེ་སྙམ་བསམས་ནས་འཁོར་བརྒྱ་སྟོང་
སྙེད་དང་མདུན་གྱིས་བྱས་ཏེ། འཁོར་མང་པོ་འདུས་པའི་ནང་དུ་འོངས་ནས་ཕྱོགས་གཅིག་ཏུ་འཁོད་དོ། །དེའི་ཚེ་ན་དྲི་ཟའི་བུ་ཆོས་ཀྱི་ཕྲེང་བ་ཞེས་བྱ་བ་རིན་པོ་ཆེ་སྣ་བདུན་ལས་བྱས་པའི་པི་བང་ཐོགས་ནས་དེ་བཞིན་གཤེགས་པ་གང་ན་བར་འོངས་
ཏེ་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འདུག་ནས་གླུ་དང་བཅས་པའི་རོལ་མོ་བྱས་ནས་རོལ་མོའི་སྒྲ་སྐད་ཤིན་དུ་སྙན་པ་དེས་འཁོར་ཐམས་ཅད་ཀྱི་ཡིད་ཀྱང་ཚིམ་པར་གྱུར་ཏེ། ཉན་ཐོས་ཤཱ་རིའི་
བུ་ལ་སོགས་པ་མ་ཚོར་བར་ལུས་བསྐྱོད་ཅིང་གཡོས་ཏེ་གར་བྱས་པར་གྱུར། རི་རབ་ལྷུན་པོ་ཡང་འགུལ་གཡོས་པར་གྱུར་ཏོ། །དེའི་ཚེ་དེ་བཞིན་གཤེགས་པ་མཚན་མ་ཡོད་ཅེས་བྱ་བའི་ཏིང་ངེ་འཛིན་དུ་ཞུགས་ནས་ཏིང་ངེ་འཛིན་དེའི་མཐུས་པི་
བང་གི་སྒྲས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀུན་དུ་གྲགས་ཤིང་། པི་བང་གི་སྒྲ་དེ་ལས་སྡུག་བསྔལ་བ་དང་། སྟོང་པ་དང་། མི་རྟག་པ་དང་། མི་གཙང་བ་དང་། བདག་མེད་པ་ཞེས་བྱ་བའི་སྒྲ་བྱུང་སྟེ། སེམས་ཅན་ཐམས་ཅད་ཀྱིས་

71-1-126b

རོལ་མོའི་སྒྲ་དེ་ལས་དེ་བཞིན་གཤེགས་པའི་དྲིན་གཟོ་བ་དང་། དྲིན་ལན་བསབ་པ་དང་། བསྐལ་པ་ཚད་མེད། གྲངས་མེད་པའི་བར་དུ་ཕ་མ་ལ་སྲི་ཞུ་བྱ་བའི་སྒྲ་གྲག་པར་གྱུར་ཏོ། །སྒྲ་དེ་ཐོས་པའི་སེམས་ཅན་ཐམས་ཅད་འཛམ་བུའི་གླིང་དུ་སངས་རྒྱས་
ག་ན་བ་དེར་ལྷགས་ནས་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འཁོད་དོ། །དེའི་ཚེ་དེ་བཞིན་གཤེགས་པ་ཏིང་ངེ་འཛིན་དུ་ཞུགས་པ་ལ་འཁོར་མང་པོ་རྣམས་མིག་མི་འཛུམས་པར་དེ་བཞིན་གཤེགས་པ་ལ་བལྟ་ཞིང་ཅང་མི་སྨྲ་བར་འཁོད་
པ་ལས། འཁོར་གྱི་དཀྱིལ་འཁོར་དེ་ཉིད་དུ་རིན་པོ་ཆེ་སྣ་བདུན་ལས་བྱས་པའི་མཆོད་རྟེན་རྒྱལ་མཚན་དང་། བ་དན་གྲངས་མེད་པས་བརྒྱན་པ། རིན་པོ་ཆེའི་དྲིལ་བུ་བརྒྱ་སྟོང་གིས་བཏགས་པ། རླུང་གིས་བསྐྱོད་ན་ཤིན་དུ་སྒྲ་སྙན་པ་འབྱུང་བ། 
སའི་ནང་ནས་བྱུང་བ་ནམ་མཁའ་ལ་འཕགས་ཏེ་གནས་སོ། །དེའི་ཚེ་འཁོར་མང་པོ་ཐམས་ཅད་རིན་པོ་ཆེའི་མཆོད་རྟེན་ས་ལས་བྱུང་བ་དེ་ལ་ཐེ་ཚོམ་དུ་གྱུར་ཏེ། ཅིའི་རྒྱུ་ཅིའི་རྐྱེན་གྱིས་རིན་པོ་ཆེའི་མཆོད་རྟེན་འདི་ལྟ་བུ་ས་ལས་བྱུང་སྙམ་ཐེ་ཙོམ་དུ་གྱུར་
ཏེ། ཤཱ་རིའི་བུ་ལ་སོགས་པའི་ཤེས་པའི་བློས་གཏུགས་ཏེ་བརྟགས་ཀྱང་མ་རྟོགས། མི་མཇེད་ཀྱི་འཇིག་རྟེན་གྱི་ཁམས་ཉིད་ན་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པའི་བར་དུ་ཡང་མ་རྟོགས་སོ། །དེ་ནས་མུ་སྟེགས་ཅན་
གྱི་སྟོན་པ་དྲུག་འདི་སྙམ་དུ་སེམས་པར་གྱུར་ཏེ། ཅིའི་རྒྱུ་ཅིའི་རྐྱེན་གྱིས་རིན་པོ་ཆེའི་མཆོད་རྟེན་འདི་ལྟ་བུ་བྱུང་བར་གྱུར་པ། མི་གཞན་ཞིག་གིས་གལ་ཏེ་བདག་ཅག་ལ་དྲིས་ལ། ཅི་དེ་དག་གིས་མ་ཤེས་ན་ཐམས་ཅད་མཐོང་ཞིང་ཤེས་པ་ཞེས་ཀྱང་ཇི་
སྐད་བྱ། ད་དགེ་སྦྱོང་གཽ་ཏ་མས་འཁོར་མང་པོ་ལ་མྱུར་དུ་བསྟན་ཅིང་བཤད་ན་ཅི་མ་རུང་སྙམ་པར་སེམས་པར་གྱུར་ཏེ། དེ་ནས་བཅོམ་ལྡན་འདས་ཏིང་ངེ་འཛིན་དེ་ལས་བཞེངས་པ་དང་། བརྒྱ་བྱིན་ལྷའི་དབང་པོ་སུམ་བཅུ་རྩ་གསུམ་གནམ་གྱི་ལྷ་དང་། 
སེང་གེའི་ཁྲི་བཤམས་ཏེ་ལྷ་རྫས་ཀྱི་གོས་བཏིང་ངོ་། །དེ་བཞིན་གཤེགས་པ་སེང་གེའི་ཁྲི་ལ་ཇི་ལྟར་རི་རབ་ལྷུན་པོ། རྒྱ་མཚོའི་ནང་ན་གནས་པ་བཞིན་སྐྱིལ་མོ་དཀྲུང་བཅས་ནས་བཞུགས་སོ། །དེའི་ཚེ་བྱང་ཆུབ་སེམས་དཔའ་བྱམས་པས་འཁོར་

71-1-127a

མང་པོ་ཐེ་ཙོམ་དུ་གྱུར་པ་ཡང་སེམས་ཀྱིས་ཤེས། བདག་ཀྱང་ཐེ་ཙོམ་དུ་གྱུར་ཏེ། མ་རྟོགས་པས་སྟན་ལས་ལངས་ནས་སངས་རྒྱས་གང་ན་བར་ལོགས་སུ་ཞབས་ལ་མགོ་བོས་ཕྱག་འཚལ་ནས་ཐལ་མོ་སྦྱར་བ་བཏུད་དེ། བཅོམ་
ལྡན་འདས་ཅིའི་རྒྱུ་ཅིའི་རྐྱེན་གྱིས་རིན་པོ་ཆེའི་མཆོད་རྟེན་འདི་ལྟ་བུ་བྱུང་བར་གྱུར་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བསྔོན་འདས་པ་བསྐལ་པ་གྲངས་མེད་པ་
བསམ་གྱིས་མི་ཁྱབ་པའི་ཕ་རོལ་ན་སངས་རྒྱས་རྣམ་པར་གཟིགས་ཤེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་
བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ་ཞེས་བྱ་བ་འཇིག་རྟེན་དུ་བྱུང་ནས་སོ་སོའི་སྐྱེ་བོ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བརྟེན་པར་བྱས་སོ། །སངས་
རྒྱས་དེ་མྱ་ངན་ལས་འདས་ནས་གཟུགས་བརྙན་གྱི་ཆོས་ལ་སྤྱོད་པའི་ཚེ་ཡུལ་བཱ་ར་ཎ་སཱི་ཞེས་བྱ་བ་ཞིག་ཡོད་དེ། བཱ་ར་ཎ་སཱི་ཞེས་བྱ་བའི་རྒྱལ་པོ་ཆེན་པོ་དེ་མཁས་པའི་བློ་དང་ལྡན་ཞིང་རྟག་ཏུ་དྲང་བའི་ཆོས་ཀྱིས་ཡུལ་གྱི་སྲིད་འཚོ་སྟེ། མི་རྣམས་
ཀྱང་བདེ་སྐྱིད། རྒྱལ་པོ་ཆེན་པོ་དེ་རྒྱལ་ཕྲན་དྲུག་བཅུ་ལ་དབང་བསྒྱུར་ཏེ། གྲོང་ཁྱེར་བརྒྱད་བརྒྱ་ཡོད་ཀྱང་རྒྱལ་པོ་ལ་སྲས་མེད་དོ། །དེ་ལྟར་སྲས་མེད་པས་འཇིག་རྟེན་གྱི་ལྷ་དང་། ལྷ་ཐམས་ཅད་ལ་ལོ་བཅུ་གཉིས་ཀྱི་བར་དུ་མི་ངལ་མི་སྐྱོ་
བར་མཆོད་འབྲང་བྱས་པས་བཙུན་མོ་ཆེན་མོ་ལ་སྲས་ཤིག་མངའ་བར་གྱུར་ཏེ། ཟླ་བ་བཅུ་ཚང་ནས་སྲས་བུ་གཅིག་བལྟམ་མོ། །སྲས་བུ་དེ་ཡང་སྡུག་ཅིང་མཛེས་ལ་མཚན་ཕུན་སུམ་ཚོགས་པ་གཅིག་བཙས་མ་ཐག་ཏུ་བློན་པོ་ཆེན་པོ་རྣམས་
དང་། མཐའི་རྒྱལ་པོ་རྒྱལ་ཕྲན་ཀུན་བསྡུས་ཏེ་རྒྱལ་བུའི་མཚན་བལྟས་ནས་རྒྱལ་བུ་རང་བཞིན་གྱིས་ཁྲོ་མི་ཤེས་ཤིང་དགེ་བ་ཞིག་སྟེ། མཚན་ཡང་རྒྱལ་བུ་བཟོད་པ་ཞེས་བཏགས་སོ། །རྒྱལ་བུ་བཟོད་པ་དེ་ཆེར་སྐྱེས་ནས་སྦྱིན་པ་སྦྱིན་པ་

71-1-127b

ལ་དགའ་ཞིང་མཁས་པའི་བློ་དང་ལྡན་ཏེ། སེམས་ཅན་མང་པོ་ལ་སྙིང་རྗེའི་སེམས་ཆེར་སྐྱེས་སོ། །དེའི་ཚེ་ན་རྒྱལ་པོ་ཆེན་པོ་དེ་ལ་བློན་པོ་ཆེན་པོ་རང་བཞིན་གྱིས་ཁྲོ་བ། གཡོ་དང་སྒྱུས་འཚོ་བ། ཉེས་པ་མེད་པར་སྟབས་ལས་
གཅོད་པ་ཀུན་གྱིས་མི་འདོད་ཅིང་སྙིང་དུ་མི་སྡུག་པ་དྲུག་ཞིག་ཡོད་དོ། །བློན་པོ་ཆེན་པོ་དྲུག་པོ་དེ་དག་བདག་གི་ལུས་ལ་སྐྱོན་ཡོད་པར་ཤེས་ནས་རྟག་ཏུ་ཕྲག་དོག་བྱེད་དོ། །རྒྱལ་བུ་དེ་ལ་མི་དགའོ། །དེའི་ཚེ་རྒྱལ་པོ་ཆེན་པོ་ནད་ཚབས་ཆེན་པོས་བཏབ་
ནས་ནད་ཀྱིས་གཟིར་ཏེ། ཉམ་ཆུང་ཞིང་རིད་པར་གྱུར་པས་སྲོག་ལ་བབ་ཏུ་ཉེ་བ་དང་། རྒྱལ་བུ་བཟོད་པས་བློན་པོ་རྣམས་ལ་ཡབ་རྒྱལ་པོ་སྙུན་ཚབས་ཆེ་འམ། སྐུ་ཚེའི་བར་ཆད་དུ་མི་འགྱུར་རམ་ཞེས་དྲིས་ན། བློན་པོ་རྣམས་ཁྲོས་ཏེ་རྒྱལ་བུ་ལ་
རྒྱལ་པོའི་སྐུ་ཚེ་རིང་པོ་མི་ཐོགས་སོ་ཞེས་སྨྲས་སོ། །དེ་ཅིའི་ཕྱིར་ཞེ་ན། སྨན་བཟང་པོ་མི་རྙེད་པས་དེ་བས་ན་སྐུ་ཚེ་ཡང་རིང་པོ་མི་ཐོགས་སོ། །རྒྱལ་བུས་དེ་སྐད་ཅེས་སྨྲས་པ་ཐོས་ནས་རབ་ཏུ་མི་དགའ་བའི་སེམས་སུ་གྱུར་ཏེ། འཁམས་ནས་ས་ལ་འགྱེལ་
བ་དང་། བློན་པོ་ཆེན་པོ་དྲུག་པོ་གནས་དབེན་པར་སོང་ནས་འདི་སྐད་ཅེས་བགྲོས་སོ། །རྒྱལ་བུ་བཟོད་པ་འདི་མེད་པར་མ་བྱས་ན་བདག་ཅག་ནམ་དུ་ཡང་བདེ་བར་མི་འགྱུར་རོ་སྙམ་བསམས་ཤིང་བགྲོས་པ་ལས། བློན་པོ་གཅིག་གིས་སྨྲས་པ། རྒྱལ་བུ་
འདི་ལ་ཉེས་པ་ཡེ་མེད་ན་ཇི་ལྟར་མེད་པར་བྱ། བློན་པོ་གཅིག་གིས་སྨྲས་པ། བདག་ལ་རྒྱལ་བུ་མེད་པར་བྱ་བའི་ཐབས་ཡོད་དོ་ཞེས་སྨྲས་ནས་རྒྱལ་བུ་གང་ན་བ་དེར་སོང་ནས་རྒྱལ་བུ་ལ་འདི་སྐད་ཅེས་སྨྲས་སོ། །བདག་ཅག་གིས་མཐའི་རྒྱལ་
ཕྲན་དྲུག་བཅུའི་ཡུལ་དང་། གྲོང་ཁྱེར་བརྒྱད་བརྒྱའི་ནང་དུ་སྨན་བཙལ་ཡང་རྙེད་པར་མ་གྱུར་ཏོ། །རྒྱལ་བུས་སྨྲས་པ། རྒྱལ་པོའི་སྨན་དུ་ཅི་ཞིག་དགོས་ན་དེ་ལྟར་མི་རྙེད་ཅེས་བསྒོ་བ་དང་། བློན་པོས་སྨྲས་པ། རྒྱལ་བུ་མཁྱེན་ཏམ། རྒྱལ་པོའི་
སྨན་དུ་གཅེས་པ་ནི་ཐོག་མ་བཙས་ནས་ཐ་མ་སྐྱེས་ཀྱི་བར་དུ་ཁྲོ་མི་ཤེས་པའི་མིའི་མིག་གི་འབྲས་བུ་དང་། རྐང་དགོས་ཏེ། སྨན་འདི་ལྟ་བུ་རྙེད་ན་རྒྱལ་པོའི་སྲོག་འཚོའི་གལ་ཏེ་མི་རྙེད་ན་མི་འཚོ་བས། འདི་ལྟ་བུ་ནི་གང་ནས་ཀྱང་མ་བྱུང་ངོ་། །

71-1-128a

རྒྱལ་བུས་དེ་སྐད་སྨྲས་པ་ཐོས་ནས་མི་དགའ་ཞིང་མྱ་ངན་གྱིས་སེམས་སྐྱེས་ཏེ་བློན་པོ་རྣམས་ལ་ད་ལྟར་བདག་དེ་དང་ལྡན་ནོ་ཞེས་སྨྲས་སོ། །དེ་ཅིའི་ཕྱིར་ཞེ་ན། བདག་ནི་ཐོག་མ་བཙས་ནས་ད་ཙམ་གྱི་བར་དུ་ཁྲོ་མ་མྱོང་ངོ་། །བློན་
པོས་སྨྲས་པ། རྒྱལ་བུ་དེ་དང་ལྡན་ཡང་དོན་འདི་ནི་ཤིན་དུ་བྱ་དཀའ་བ་ཡིན་ནོ། །དེ་ཅིའི་ཕྱིར་ཞེ་ན། འཇིག་རྟེན་ན་བདག་གི་ལུས་ལས་ཕངས་པ་མེད་པའི་ཕྱིར་རོ། །རྒྱལ་བུས་སྨྲས་པ། བློན་པོ་ཁྱོད་སྨྲ་བ་ལྟར་མ་ཡིན་ཏེ། ཡབ་རྒྱལ་པོ་སྙུང་བ་
ལས་འཚོ་བར་འགྱུར་ན་ལྟ་བདག་གིས་ལུས་བརྒྱ་སྟོང་གཏོང་ན་ཡང་ནུས་ཏེ་དཀའ་བ་མ་ཡིན་ནོ། བདག་གི་ལུས་མི་གཙང་བ་འདི་བཏང་བ་ལྟ་ཅི་སྨོས། བློན་པོས་སྨྲས་པ། དོན་འདི་ལྟ་བུ་དག་ནི་རྒྱལ་བུས་ཅི་མཛད་དུ་བས་སོ། །དེ་ནས་རྒྱལ་བུ་
བཟོད་པ་རབ་ཏུ་དགའ་ནས་དགའ་བའི་སེམས་སྐྱེས་ཏེ། སྨན་འདིས་ཡབ་རྒྱལ་པོའི་སྙུན་འཚོ་ན་ལྟ་མྱུར་དུ་བྱ་བའི་དུས་ལ་བབ་བོ་སྙམ་བསམས་ནས་ཕོ་བྲང་གི་ནང་དུ་སོང་སྟེ། ཡུམ་གྱི་དྲུང་དུ་ཕྱིན་ནས་ཡུམ་གྱི་རྐང་པ་ལ་མགོ་བོས་
ཕྱག་བྱས་ཏེ་ཐལ་མོ་སྦྱར་བ་བཏུད་ནས་ཡུམ་ལ་འདི་སྐད་ཅེས་སྨྲས་སོ། །ད་ལྟར་བདག་གི་ལུས་འདི་ཡབ་རྒྱལ་པོའི་སྨན་དུ་བགོས་ཏེ། གལ་ཏེ་ན་སྲོག་མི་འཚོར་དོགས་པས་ཡུམ་ལ་མཆི་ཕྱག་འཚལ་གྱིས་ཡུམ་མི་དགྱེས་པར་
མ་མཛད་ཅིག །ཡུམ་གྱིས་དེ་སྐད་ཅེས་སྨྲས་པ་ཐོས་ནས་འཁམས་ཏེ་ཕྱོགས་ཀྱང་བསླད་པར་གྱུར་ནས། དཔེར་ན་མི་བརྣངས་པ་མིད་དུ་ཡང་མེད་སྐྱུག་ཏུ་ཡང་མེད་པ་ལྟར་སྐྲག་ནས་རྒྱལ་བུ་པང་དུ་བླངས་ནས་ས་ལ་འགྱེལ་ཏོ། །དེ་ནས་
གདོང་དུ་ཆུ་གྲང་མོ་གཏོར་ནས་རིང་ཞིག་ལོན་པ་དང་ཕྱིར་སངས་ཏེ་ཡུམ་ལ་ཡང་འདི་སྐད་ཅེས་གསོལ་ཏོ། །ཡབ་རྒྱལ་པོའི་སྐུ་ཚེ་རིང་པོར་མི་ཐོགས་ཏེ། བདག་གི་དོན་འདི་མྱུར་དུ་བསྒྲུབས་ལ་རྒྱལ་པོའི་སྐུ་ཚེ་འཚོ་བར་བགྱིའོ། །དེ་ནས་
རྒྱལ་བུ་བཟོད་པས་བློན་པོ་རྣམས་དང་། རྒྱལ་ཕྲན་རྣམས་དང་། འཁོར་མང་པོ་རྣམས་ལ་བདག་མཆི་ཕྱག་བྱའོ་ཞེས་སྨྲས་སོ། །དེའི་ཚེ་བློན་པོ་ཆེན་པོས་རིགས་ངན་པའི་ཤན་པ་གཅིག་བོས་ནས་རྒྱལ་བུའི་རུས་པ་ནི་བཅག །རྐང་

71-1-128b

ནི་ཕྱུང་། མིག་གཉིས་ཀྱི་འབྲས་བུ་ཡང་ཕྱུང་ངོ་། །དེ་ནས་བློན་པོ་དེ་དག་གིས་སྨན་དེ་དག་བརྡུངས་ནས་སྦྱར་ཏེ། རྒྱལ་པོ་ལ་བྱིན་པ་དང་། རྒྱལ་པོ་ཆེན་པོས་ཀྱང་སྨན་དེ་ཟོས་ནས་ནད་ཀྱང་སོས་པར་གྱུར་ཏོ། །རྒྱལ་པོ་ནད་སོས་ནས་བློན་པོ་རྣམས་ལ་ཁྱེད་
ཀྱིས་འདི་ལྟ་བུའི་སྨན་བཟང་པོ་ངའི་ནད་སོས་ཤིང་སྲོག་ལས་ཐར་བ་ག་ལས་རྙེད་ཅེས་སྨྲས་སོ། །བློན་པོ་རྣམས་ཀྱིས་གསོལ་པ། སྨན་འདི་ནི་རྒྱལ་བུ་བཟོད་པས་སྦྱར་བ་ལགས་སོ། །བདག་ཅག་གིས་རྙེད་ཅིང་སྦྱར་བ་ནི་མ་ལགས་སོ། །རྒྱལ་པོས་དེ་སྐད་ཅེས་
སྨྲས་པ་ཐོས་ནས་དངངས་ཏེ་འགྱེལ་ལོ། །ལུས་ཀྱི་སྤུ་ཡང་ལངས་སོ། །བློན་པོ་རྣམས་ལ་རྒྱལ་བུ་བཟོད་པ་ད་ལྟར་ག་རེ་ཞེས་དལ་གྱིས་དྲིས་སོ། །བློན་པོས་གསོལ་པ། རྒྱལ་བུ་བཟོད་པ་ད་ལྟར་ཕྱི་རོལ་ན་ལུས་ཀྱི་རྨ་གསོ་ཞིང་མཆིས་ཏེ་སྲོག་
མི་འཚོར་དོགས་སོ། །རྒྱལ་པོས་ཚིག་དེ་ཐོས་ནས་སྐད་ཆེན་པོ་ཕྱུང་ནས་ཀྱི་ཧུད་ཀྱི་ཧུད་ཅེས་སྨྲས་ནས། ལུས་ས་ལ་བརྡབས་ཏེ་ས་དང་རྡུལ་གྱིས་ལུས་ལ་གོས་ནས་ཁོ་བོ་ནི་ཡང་དག་པར་ཁྲེལ་མེད་པ་ཡིན་ཏེ། ཅིའི་ཕྱིར་བུའི་ཤ་སྨན་དུ་ཟོས་ཤེས་སྨྲས་
ནས་བུ་ག་ལ་བར་སོང་བ་ལས་མ་སླེབས་པར་རྒྱལ་བུ་ཡང་ཚེ་འདས་སོ། །རྒྱལ་པོ་དང་བཙུན་མོ་དང་བློན་པོ་རྣམས་དང་འཁོར་མང་པོ་ཐམས་ཅད་ཀྱིས་བསྐོར་ཅིང་། ཡུམ་ཡང་རྒྱལ་བུའི་རོའི་སྟེང་དུ་ལུས་བརྡབས་ནས། བདག་གིས་སྔོན་སྡིག་པ་ཅི་
ཞིག་བྱས་ན་བདག་གི་བུ་འདི་ལྟར་སྡུག་བསྔལ་མྱོང་བར་གྱུར། བདག་གི་ལུས་འདི་རྡུལ་དུ་བཏགས་ཀྱང་སླ་ན། ཅིའི་ཕྱིར་བུ་འདི་ཤི་བར་གྱུར་ཅེས་སྨྲེ་སྔགས་འདོན་ཏོ། །དེ་ནས་ཡབ་རྒྱལ་པོ་དང་། རྒྱལ་ཕྲན་རྣམས་ཀྱིས་སྤོས་གླང་མགོའི་ཙན་དན་
སྤུངས་ཏེ་རྒྱལ་བུའི་རོ་བསྲེགས་ནས་རྒྱལ་བུའི་རུས་པ་བསྡུས་ཏེ་རིན་པོ་ཆེ་སྣ་བདུན་གྱི་མཆོད་རྟེན་བྱས་སོ། །དེའི་ཚེ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཁྱེད་རྣམས་ཤེས་པར་གྱིས་
ཤིག །དེའི་ཚེ་དེའི་དུས་ན་བཱ་ར་ཎ་སཱིའི་རྒྱལ་པོ་ཆེན་པོ་དེ་གཞན་ཡིན་པར་སེམས་ན་དེ་ལྟར་མི་བལྟའོ། །དེའི་ཚེ་དེའི་དུས་ན་རྒྱལ་པོ་དེ་ནི་ད་ལྟར་ངའི་ཡབ་རྒྱལ་པོ་ཟས་གཙང་མ་ཡིན་ནོ། །དེའི་ཚེ་དེའི་དུས་ན་བཙུན་མོ་དེ་ནི་གཞན་ཡིན་པར་སེམས་ན་དེ་ལྟར་མི་

71-1-129a

བལྟ་སྟེ། དེའི་ཚེ་དེའི་དུས་ན་བཙུན་མོ་དེ་ནི་ད་ལྟར་ངའི་ཡུམ་ལྷ་མཛེས་ཡིན་ནོ། །དེའི་ཚེ་དེའི་དུས་ན་རྒྱལ་བུ་བཟོད་པ་དེ་ནི་ད་ལྟར་ང་ཡིན་ཏེ། བྱང་ཆུབ་སེམས་དཔའ་ནི་བསྐལ་པ་ཚད་མེད་གྲངས་མེད་པའི་བར་དུ་ཕ་མ་ལ་སྲི་ཞུ་བྱ་བའི་ཕྱིར་དགོས་དང་། 
ཟས་དང་། བཏུང་བ་དང་། གནས་དང་། མལ་ཆ་དང་། ལུས་ཀྱི་ཤ་དང་། ཁྲག་དང་། རྐང་གི་བར་དུ་སྦྱིན་པར་བྱེད་དེ། དེའི་རྒྱུ་དེའི་རྐྱེན་གྱིས་མངོན་པར་སངས་རྒྱས་པའི་བར་དུའོ། །ད་ལྟར་རིན་པོ་ཆེའི་མཆོད་རྟེན་ས་ལས་བྱུང་བ་འདི་ནི་ངས་སྔོན་ཕ་མའི་ཕྱིར་ལུས་
ཀྱི་རྐང་དང་སྲོག་གི་བར་དུ་ཕུལ་ཏེ་འདི་ཉིད་དུ་མཆོད་རྟེན་བརྩིགས་ཏེ་མཆོད་པ་བྱས་པས་ད་མངོན་པར་སངས་རྒྱས་ན་ཡང་མངོན་པར་བྱུང་ནས་སྣང་བར་གྱུར་པ་ཡིན་ནོ། །དེའི་ཚེ་ན་འཁོར་མང་པོ་ལྷ་དང་། ཀླུ་དང་གནོད་སྦྱིན་དང་། མི་ལ་སོགས་པ་གྲངས་མེད་པ་
རྣམས་དེ་སྐད་ཅེས་གསུང་བ་ཐོས་ནས་དགའ་བ་དང་མི་དགའ་བར་འདྲེས་པར་བྱུང་སྟེ། ཐམས་ཅད་མཆི་མ་བླགས་ནས་སྐད་འཐུན་པར། དེ་བཞིན་གཤེགས་པའི་ཡོན་ཏན་བརྒྱ་སྟོང་བསྔགས་ཤིང་བསྟོད་དེ་དུས་གཅིག་ཏུ་བླ་ན་མེད་པ་ཡང་དག་
པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །གཞན་ཡང་སེམས་ཅན་ཚད་མེད་པ་བརྒྱ་སྟོང་སྙེད་ཀྱིས། །ཉན་ཐོས་དང་རང་སངས་རྒྱས་སུ་སེམས་བསྐྱེད་དོ། །དེ་མ་ཡིན་པ་གཞན་ཡང་སྐྱེ་བོ་ཚད་མེད་པ་སྙེད་རྒྱུན་དུ་ཞུགས་པའི་འབྲས་བུ་ཐོབ་པ་
ནས་དགྲ་བཅོམ་པའི་འབྲས་བུའི་བར་དུ་ཐོབ་པར་གྱུར་ཏོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་པ་བྱེ་བ་ཁྲག་ཁྲིག་བརྒྱ་སྟོང་སྙེད་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་
སོ། །དེ་བས་ན་དེ་བཞིན་གཤེགས་པ་ནི་ཡང་དག་པར་ཕ་མ་ལ་སྲི་ཞུ་བྱེད་པའོ། །གཞན་ཡང་བྱང་ཆུབ་སེམས་དཔའ་ནི་ཕ་མའི་ཡོན་ཏན་ཤེས་ཤིང་སྔོན་གྱི་སྨོན་ལམ་གྱིས་དེ་བཞིན་གཤེགས་པའི་སྐུ་བཙས་པར་ཤེས་སོ། །དེ་ལྟར་དེ་བཞིན་གཤེགས་
པའི་སྨོན་ལམ་རྫོགས་པར་བྱ་བའི་ཕྱིར་ཡུམ་གྱིས་ཕྱག་བྱ་བར་མི་འདོད་པའི་ཕྱིར་ཚེའི་དུས་བྱས་པ་ཡིན་ནོ། །དེའི་ཚེ་ན་འཁོར་མང་པོ་ཐམས་ཅད་ཀྱིས་ཚིག་འཐུན་པར་ཡུམ་ལྷ་མཛེས་ལ་ལེགས་སོ། །ཡུམ་ལྷ་མཛེས་དེ་བཞིན་གཤེགས་པ་ལྷ་

71-1-129b

དང་མིའི་སྟོན་པ་འཇིག་རྟེན་ན་དཔེ་ཟླ་མེད་པ་བཙས་པ་ཤིན་དུ་ལེགས་སོ། །དེ་ནས་དྲི་ཟའི་བུ་ཆོས་ཀྱི་ཕྲེང་བ་འདུག་པ་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་སངས་རྒྱས་གང་ན་བར་ཐལ་མོ་སྦྱར་བ་
བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཡུམ་ལྷ་མཛེས་འདི་བསོད་ནམས་ཅི་བགྱིས་ན་ཅིའི་རྒྱུ་ཅིའི་རྐྱེན་གྱིས་དེ་བཞིན་གཤེགས་པ་བལྟམ་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། ལེགས་པར་ཉོན་ལ་ཤིན་དུ་ཡིད་ལ་ཟུང་
ཤིག་དང་ཁྱོད་ལ་བཤད་པར་བྱའོ། །སྔོན་འདས་པ་གྲངས་མེད་པ་བསམ་གྱིས་མི་ཁྱབ་པའི་ཕ་རོལ་ན་སངས་རྒྱས་རྣམ་པར་གཟིགས་ཤེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་། ཞབས་སུ་
ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ་ཞེས་བྱ་བ་འཇིག་རྟེན་དུ་བྱུང་ངོ་། །སངས་རྒྱས་དེའི་དམ་པའི་ཆོས་ནུབ་ནས་གཟུགས་བརྙན་ལ་ཆོས་སྤྱོད་པའི་བར་དུ་ནུབ་པར་གྱུར་
ནས། དེའི་ཚེ་ཡུལ་བཱ་ར་ཎ་སཱི་ཞེས་བྱ་བ་ན་འཕགས་པ་གནས་ཞེས་བྱ་བའི་རི་ཞིག་ཡོད་དེ། རི་དེ་ལ་རང་སངས་རྒྱས་ཤེས་བྱ་བ་བརྒྱ་སྟོང་སྙེད་གནས་སོ། །རི་དེ་ལ་དྲང་སྲོང་མངོན་པར་ཤེས་པ་ལྔ་དང་ལྡན་པ་གྲངས་མེད་པ་ཞིག་ཀྱང་རི་དེ་ལ་གནས་སོ། །
ད་དེ་ལྟར་འཕགས་པ་དང་དྲང་སྲོང་མང་པོ་གནས་པའི་ཕྱིར། །རི་དེ་ལ་དྲང་སྲོང་གཅིག་ནི་རི་དེའི་ལྷོ་ཕྱོགས་ན་གནས་སོ། །དྲང་སྲོང་གཅིག་ནི་རི་དེའི་བྱང་ཕྱོགས་ན་གནས་ཏེ། དྲང་སྲོང་དེ་གཉིས་གནས་པའི་བར་ན་ཆུ་མིག་གཅིག་ཡོད་དེ་ཆུ་མིག་དེའི་དྲུང་
ན་ཕ་བོང་ཕྱ་ལེབ་བཟང་པོ་གཅིག་ཡོད་དོ། །དེའི་ཚེ་དེའི་དུས་གཅིག་ན་རིའི་ལྷོ་ཕྱོགས་ལོགས་ན་གནས་པའི་དྲང་སྲོང་དེ་ཕ་བོང་དེའི་སྟེང་དུ་གོས་དང་རྐང་པ་བཀྲུས་ཏེ་ཕྱིར་གནས་སུ་སོང་བ་དང་། རིང་པོ་མ་ལོན་པར་ཤ་བ་ཡུ་མོ་ཅིག་ཆུ་མིག་ལ་ཆུ་
འཐུང་དུ་འོངས་པ་དང་། ཆུ་མིག་ལ་ཆུ་འཐུངས་པའི་འོག་ཏུ་ཕ་བོང་དེའི་སྟེང་ན་དྲང་སྲོང་གིས་གོས་བཀྲུས་པའི་ཁུ་བ་འཐུངས་སོ། །གོས་བཀྲུས་པའི་ཁུ་བ་འཐུངས་པའི་འོག་ཏུ་ཕྱིར་འཕོངས་རོལ་དུ་བལྟས་ཏེ་མོ་མཚན་ལ་བལྡགས་སོ། །དེ་ནས་ཤ་

71-1-130a

བ་ཡུ་མོ་དེའི་ལྟོར་བུ་ཆགས་ཏེ་ཟླ་བ་ཚང་བ་དང་། རི་དགས་ཀྱི་ཆོས་ཀྱིས་བུ་འབྱུང་བ་ན་ཐོག་མ་གནས་གང་དུ་མངལ་དུ་ཆགས་པ་དེར་བུ་འབྱིན་པས་ཆུ་མིག་གི་དངོར་འོངས་ཏེ་ཕ་བོང་དེའི་སྟེང་དུ་ངུ་ཞིང་འགྲེ་ནས་བུ་མོ་གཅིག་བྱུང་ངོ་། །དེའི་ཚེ་ན་ལྷོ་
ཕྱོགས་ཀྱི་དྲང་སྲོང་དེས་ཤ་བ་ངུ་བའི་སྐད་ཐོས་ནས་སྙིང་རྗེ་བའི་སེམས་སྐྱེས་ཏེ་ཤ་བའི་དྲུང་དུ་ལྟར་སོང་བ་དང་། ཤ་བ་ཡུ་མོ་དེ་ལ་བུ་མོ་གཅིག་བྱུང་སྟེ་ཤ་བ་དེ་ལ་ལྡག་ཅིང་འདུག་པ་ལས་དྲང་སྲོང་དེར་འོངས་པ་དང་ཤ་བ་ཡང་བུ་བོར་ནས་སོང་ངོ་། །དེ་ནས་དྲང་སྲོང་
དེ་ཤ་བ་ལ་བཙས་པའི་བུ་མོ་དེ་མཛེས་ཤིང་སྡུག་ལ་མཚན་དང་ལྡན་པར་མཐོང་བས་སྙིང་རྗེའི་སེམས་ཀྱིས་རྩྭའི་གོས་ཀྱིས་དཀྲིས་ཏེ་ཕང་དུ་བླངས་ནས་ཕྱིར་གནས་སུ་འོངས་ནས་ཤིང་རྟོག་དང་། འབྲས་བུ་བརྔས་ནས་གསོས་གསོས་པ་དང་། 
མཐར་གྱིས་ཆེར་སྐྱེས་ནས་ལོ་བཅུ་བཞི་ལོན་པ་དང་། དྲང་སྲོང་ཡང་བུ་མོ་དེ་ལ་ཤིན་དུ་བྱམས་ཏེ་རྟག་ཏུ་རྒྱུན་མི་འཆད་པར་མེ་གསོར་བཅུག་པ་ལས་ཉི་མ་གཅིག་ལེ་ལོ་བྱས་ནས་མེ་ཤི་བར་གྱུར་པ་དང་། དྲང་སྲོང་གིས་ཚིག་གིས་སྤྱོས་ཏེ་བུ་མོ་ཐོག་མ་བསྐྱེད་
ནས་ད་ཙམ་གྱི་བར་དུ་མེ་ཤི་མ་མྱོང་ན་ཅིའི་ཕྱིར་མེ་བསད་ཅེས་གཤེས་ཏེ། རི་བྱང་ཕྱོགས་ལོགས་ན་གནས་པའི་དྲང་སྲོང་གི་ཐད་ཏུ་མེ་ལེན་དུ་བཏང་ངོ་། །དེ་ནས་བུ་མོ་དེས་ཕས་བསྒོ་བ་བཞིན་དུ་རི་བྱང་ཕྱོགས་ལོགས་སུ་སོང་བ་ལས་གོམ་པ་རེ་རེ་ཞིང་
རྐང་པའི་འོག་ནས་པད་མོ་རེ་རེ་སྐྱེས་ཏེ། འགྲོ་བའི་རྗེས་བཞིན་ཁོད་མཉམ་པར་དངར་བ་དང་པད་མོ་སྐྱེས་ནས་རི་བྱང་ཕྱོགས་ལོགས་སུ་མེ་ལེན་དུ་སོང་ངོ་། །དེའི་ཚེ་ན་དྲང་སྲོང་དེས་བུ་མོ་དེ་ཤིན་དུ་བསོད་ནམས་དང་ལྡན་ཞིང་རྐང་པའི་འོག་ནས་པད་མོ་སྐྱེས་
པ་མཐོང་ནས་བུ་མོ་དེ་ལ་འདི་སྐད་ཅེས་སྨྲས་སོ། །ཁྱོད་མེ་འདོད་ན་ཁོ་བོའི་སྤྱིལ་པོ་འདི་ལན་བདུན་སྐོར་ལ་གོམ་པའི་བར་མཉམ་པ་དང་། ཉེ་རིང་ཐག་རན་པར་གོམ་པའི་འོག་ནས་པད་མོ་སྐྱེས་པར་བྱོས་ཤིག །དེ་ལྟར་ལན་བདུན་བསྐོར་བ་བྱས་ནས་ཀྱང་
བུ་མོ་ལ་ཁྱོད་མེ་འདོད་ན་ཕྱིར་ཡང་གཡས་ཕྱོགས་ནས་བསྐོར་ཏེ་སོང་ཤིག་དང་མེ་སྦྱིན་ནོ་བར་བསྒོའོ། །དེའི་ཚེ་ན་བུ་མོ་དེ་མེ་འདོད་པའི་ཕྱིར་དྲང་སྲོང་གིས་བསྒོ་བ་བཞིན་བྱས་ཏེ་མེ་བླངས་ནས་ཕྱིར་སོང་ངོ་། །བུ་མོ་དེ་ཕྱིར་སོང་ནས་རིང་པོ་མ་ལོན་པར་

71-1-130b

ཡུལ་བཱ་ར་ཎ་སཱིའི་རྒྱལ་པོ་དང་བློན་པོ་ཆེན་པོ་དང་། འཁོར་བརྒྱ་སྟོང་སྙེད་དང་བཅས་སུ་རི་དེ་ལ་འཆག་ཅིང་རི་དགས་ལ་ལིངས་འདེབས་སུ་འོངས་པ་དང་། དེ་ནས་བཱ་ར་ཎ་སཱིའི་རྒྱལ་པོ་བལ་གྱི་གླང་པོ་ཆེ་ལ་ཞོན་ནས་རི་བྱང་ཕྱོགས་ལོགས་ཀྱི་དྲང་སྲོང་
ག་ལ་བ་དེར་འོངས་ནས་དེར་ཕྱིན་པ་དང་། དྲང་སྲོང་དེའི་སྤྱིལ་པོ་ལ་པད་མོས་འཁོར་བར་བསྐོར་བ་དེ་མཐོང་ནས་རབ་ཏུ་དགའ་རངས་པའི་སེམས་སྐྱེས་ཏེ། དྲང་སྲོང་ཆེན་པོ་ལ་ཤིན་དུ་ལེགས་སོ་ལེགས་སོ། །ཡོན་ཏན་ཆེན་པོ་དང་ལྡན་པའི་དྲང་སྲོང་སྟོན་
ཅིང་འདྲེན་པའི་ཡོན་ཏན་དང་ལྡན་པ་དགེའོ་ཞེས་བསྟོད་དོ། །དེ་ནས་དྲང་སྲོང་དེས་རྒྱལ་པོ་ལ་འདི་སྐད་གསོལ་ཏོ། །རྒྱལ་པོ་ཆེན་པོ་མཁྱེན་ཏམ། པད་མོ་འདི་དག་ནི་བདག་གི་ནུས་པ་མ་ལགས་སོ། །རྒྱལ་པོས་སྨྲས་པ། འོ་ན་འདི་སུས་བྱས། 
དྲང་སྲོང་གིས་གསོལ་པ། རྒྱལ་པོ་ཆེན་པོ་རི་ལྷོ་ཕྱོགས་ལོགས་ན་གནས་པའི་དྲང་སྲོང་ལ་རི་དགས་ཀྱིས་བཙས་པའི་བུ་མོ་བྱད་བཞིན་བཟང་ཞིང་སྡུག་པ། མིའི་མཚན་དང་ལྡན་པ། འཇིག་རྟེན་ན་དཀོན་པ་འགྲོ་བའི་རྗེས་བཞིན་རྐང་པའི་འོག་ནས་པད་མོ་སྐྱེ་
བ་ཅིག་ཡོད་དོ། །རྒྱལ་པོས་དེ་སྐད་སྨྲས་པ་ཐོས་ནས་སེམས་རབ་ཏུ་དགའ་རངས་ཏེ། རིའི་ལྷོ་ཕྱོགས་ལོགས་ཀྱི་དྲང་སྲོང་ག་ལ་བ་ལོགས་སུ་སོང་སྟེ་ཕྱིན་པ་དང་། དྲང་སྲོང་དེའི་རྐང་པ་ལ་མགོ་བོས་ཕྱག་འཚལ་ནས་དྲང་སྲོང་དེས་སྒོར་ཕྱུང་ནས་བསུས་ཏེ་
རྒྱལ་པོ་ཆེན་པོ་ཤུལ་རིང་པོ་ནས་གཤེགས་ན་རབ་ཏུ་ངལ་བར་མ་གྱུར་ཏམ་ཞེས་བྲོ་དྲིས་སོ། །དེ་ནས་རྒྱལ་པོ་ཆེན་པོས་དྲང་སྲོང་དེ་ལ་འདི་སྐད་ཅེས་སྨྲས་སོ། །བཙུན་པ་ཁྱོད་ལ་བུ་མོ་ཞིག་ཡོད་པ་དེ་གཉེན་བྱ་བར་འདོད་དོ། །དྲང་སྲོང་གིས་སྨྲས་པ། 
རྒྱལ་པོ་ཆེན་པོ་བདག་ཕོངས་པ་ལ་བུ་མོ་གཅིག་པུ་ཞིག་ཡོད་པ་དེ་ཆུང་ལ་ཅི་ཡང་མི་ཤེས་ཏེ། ཆུང་ནས་རི་ལ་བསྐྱེད་བསྐྱེད་པས་མིའི་ཆོས་ཚུལ་ཅི་ཡང་མ་རྟོགས་ཏེ། རྩྭའི་རྩ་བ་དང་འབྲས་བུ་གཞན་མི་ཟ་ན། ཇི་ལྟར་རྒྱལ་པོ་ལ་དབུལ་དུ་
རུང་བུ་མོ་འདི་ཡང་རི་དགས་ཀྱིས་བཙས་ཏེ་དབུལ་དུ་མི་རུང་ངོ་ཞེས་ཇི་ལྟར་གྱུར་པ་རྒྱུས་ཀྱིས་ཞིབ་ཏུ་གསོལ་བའི་བར་དུའོ། །རྒྱལ་པོས་སྨྲས་པ། དེ་ལྟ་བུ་ཡིན་ཡང་སླད་ལྟར་གང་ན་འདུག་སྟོན་ཅིག །དྲང་སྲོང་གིས་སྨྲས་པ། དེ་ལྟར་སྤྱིལ་

71-1-131a

པོའི་ནང་ན་འདུག་གོ་ཞེས་སྨྲས་སོ། །དེའི་ཚེ་རྒྱལ་པོ་ཆེན་པོ་སྤྱིལ་པོའི་ནང་དུ་ཞུགས་ནས་བུ་མོ་ལ་བལྟས་ཏེ་རབ་ཏུ་དགའ་བའི་སེམས་སྐྱེས་ཏེ་རི་དགས་ཀྱི་བུ་མོ་སྤོས་ཆུས་བཀྲུས་ནས་དེ་ལྟ་བུའི་མི་མང་པོ་མ་མཐོང་བས་དངངས་
ཤིང་སྐྲག་གོ། །དེའི་ཚེ་དྲང་སྲོང་དེ་རི་མཐོན་པོའི་ཁར་སོང་ནས་བུ་མོ་དེ་ལ་མིག་མི་འཛུམས་པར་ལྟ་ཞིང་འདི་སྙམ་དུ་ད་ནི་བདག་གི་བུ་མོ་ཡང་ཇེ་རིང་ཇེ་རིང་སོང་བས་མ་མཐོང་བར་གྱུར་ནས་ཕྱིར་གནས་སུ་འགྲོ་སྙམ་བསམས་ནས་མིག་མཆི་
མ་ཟག་ཅིང་མཆིས་ཏེ། བདག་གིས་བུ་མོ་གསོས་པ་འདི་ཅི་ཡང་ཤེས་པ་མེད་པར་བྲལ་བར་གྱུར་ཏོ། །ཡང་འདི་སྙམ་དུ་བསམས་ཏེ། བདག་ད་དུང་གནས་འདི་ལས་མི་གཡོ་བར་བྱའོ། །དེ་ཅིའི་ཕྱིར་ཞེ་ན། གལ་ཏེ་བདག་གི་བུ་མོ་ཕྱིར་བདག་ལ་ལྟ་
བར་གྱུར་ལ། ཅི་སྟེ་མ་མཐོང་བར་གྱུར་ན་མི་དགའ་ཞིང་སྡུག་བསྔལ་གྱིས་གདུངས་པར་འགྱུར་གྱིས། རེ་ཤིག་ཁོ་ནས་བསྡད་དོ་སྙམ་ནས། དེ་ནས་ཀྱང་རིང་ཞིག་བསྡད་དེ་མ་མཐོང་གི་བར་དུ་བལྟས་ཀྱང་བུ་མོས་ཕྱིར་མ་བལྟས་སོ། །དེ་ལྟར་
བུ་མོས་ཕྱིར་མ་བལྟས་པས་དྲང་སྲོང་དེ་ཁྲོ་བའི་སེམས་སྐྱེས་ནས་འདི་སྐད་ཅེས་སྨྲས་སོ། །ཡོང་ཡང་བྱོལ་སོང་ལས་སྐྱེས་པས་ང་ལ་ཡང་ཕྱིར་མ་བལྟས་ཏེ། ངས་ཆུང་ངུ་ནས་གསོས་གསོས་ནས་ད་མིར་གྱུར་ཏེ་རྒྱལ་པོས་ཕྲོགས་
པས་བདག་ཡེ་འུར་གྱུར་ཏོ་ཞེས་སྤྱིལ་པོར་ཞུགས་ནས་རིག་སྔགས་བྱས་ཏེ། གལ་ཏེ་རྒྱལ་པོས་བདེན་པར་གྱུར་ན་ནི་དེར་ཡང་ཟད་དོ། །ཅི་སྟེ་གཅེས་པུ་བྱས་ལ་བདེན་པར་མ་གྱུར་ན་བསམས་པ་ལྟར་མ་གྲུབ་ཅིག་ཅེས་སྔགས་ཀྱིས་
བཏབ་བོ། །དེའི་ཚེ་ན་བཱ་ར་ཎ་སཱིའི་རྒྱལ་པོ་ཆེན་པོ་དེ་ཕོ་བྲང་དུ་ཕྱིན་ནས་གཅེས་སུ་བྱས་ནས་མཚན་ཡང་བཙུན་མོ་རི་དགས་མ་ཞེས་བཏགས་སོ། །མཐའི་རྒྱལ་ཕྲན་དང་། བློན་པོ་རྣམས་ཀྱང་འདུས་ནས་རྒྱལ་པོ་ལ་སྙན་པས་བསྟོད་
ནས་རྒྱལ་པོ་ཡང་རབ་ཏུ་དགའ་རངས་པར་གྱུར་ཏོ། །དེ་ནས་ཀྱང་རིང་པོ་མ་ལོན་པར་མངལ་དུ་བུ་ཆགས་པར་གྱུར་ནས་རྒྱལ་པོ་ཉིད་བཙུན་མོའི་རིམ་གྲོ་བྱེད་དེ། མལ་ཆ་དང་། ཁ་ཟས་དང་། བཏུང་བ་ལ་སོགས་པ་བཟང་ཞིང་འཇམ་

71-1-131b

པོར་སྦྱོར་ཏོ། །དེ་ནས་ཟླ་བ་བཅུ་ཚང་ནས་བུ་ཁྱེའུ་ཅིག །བཙས་ན་རྒྱལ་པོའི་གདུང་འཚོབ་པར་རེ་བ་ལས་ཟླ་བ་ཚང་ནས་པད་མོ་ཅིག་བཙས་སོ། །དྲང་སྲོང་གི་རིག་སྔགས་ཀྱི་མཐུས་རྒྱལ་པོ་ཁྲོས་པར་གྱུར་ནས་འདི་སྐད་དུ། བྱོལ་སོང་ལས་
སྐྱེས་པ་བདེན་ཞེས་བཙུན་མོ་ལས་ཕྱུང་སྟེ་པད་མོ་ཡང་བོར་དུ་བཅུག་གོ། །དེ་ནས་རིང་ཞིག་ལོན་པ་དང་བཱ་ར་ཎ་སཱིའི་བློན་པོ་རྣམས་དང་བསྐྱེད་མོས་ཚལ་དུ་ལྟད་མོ་ལྟ་ཞིང་རྩེར་ཕྱིན་པ་དང་། རྩེ་ཞིང་རོལ་མོ་བྱེད་དེ་རྟ་དང་གླང་པོ་ཆེ་ཡང་འཐབ་ཏུ་
བཅུག །གྱད་རྣམས་ཀྱང་སྟོབས་འགྱེད་དུ་བཅུག་པ་ལས་གྱད་ཀྱི་ནང་ན་གྱད་རབ་ཏུ་མཆོག་ཏུ་སྟོབས་ཆེ་བ་གཅིག་རྡོག་པ་ས་ལ་བརྡབས་ན་ས་ཡང་འགུལ་ཏེ། དྲུང་ན་པད་མོའི་རྫིང་ཞིག་ཡོད་པ་ཡང་འགུལ་བར་གྱུར་ཏོ། །པད་མོའི་རྫིང་གི་
དྲུང་ན་ཕ་བོང་ཞིག་ཡོད་དེ། དེའི་འོག་ན་པད་མོ་ཞིག་ཡོད་པ་རྫིང་གི་ནང་དུ་ལྷུང་། །རྫིང་དུ་ལྷུང་བའི་པད་མོ་དེ་མདོག་རབ་ཏུ་བཟང་ལ་ཁ་དོག་ལེ་བརྒན་དུ་འདུག་ལ་འཚེར་བའི་འོད་ཆགས་པ་རྒྱལ་པོས་མཐོང་ནས་སེམས་རབ་ཏུ་དགའ་སྟེ། བློན་
པོ་རྣམས་ལ་པད་མོ་འདི་ལྟ་བུ་ནི་སྔོན་ཆད་ཡང་མཐོང་མ་མྱོང་ངོ་ཞེས་སྨྲས་སོ། །དེ་ནས་པད་མོ་དེ་ཆུའི་ནང་ནས་ཕྱུང་ཤིག་ཅེས་བསྒོ་ནས་པད་མོ་ལེན་དུ་བཏང་བ་ལས། པད་མོ་དེ་ལ་འདའ་མ་ལྔ་བརྒྱ་ཡོད་དེ། འདའ་མ་རེ་རེའི་འོག་ན་ཁྱེའུ་
གཞོན་ནུ་བྱད་བཞིན་བཟང་ཞིང་མཛེས་ལ་ཕལ་ལས་འཕགས་པ་རེ་རེ་ཡོད་པར་མཐོང་ངོ་། །དེ་ནས་པད་མོ་ལེན་པའི་མི་དེས་པད་མོ་དེ་ལ་ངོ་མཚར་ཆེ་བ་དེ་ལྟ་བུ་དག་མཐོང་ནས། རྒྱལ་པོ་ཆེན་པོ་པད་མོ་དེ་ལ་འདབ་མ་ལྔ་བརྒྱ་མཆིས་
ཏེ། འདབ་མ་རེ་རེའི་འོག་ན་ལྷའི་བུ་རེ་རེ་ཡོད་དོ་ཞེས་གསོལ་ཏོ། །རྒྱལ་པོས་ཚིག་དེ་ཐོས་ནས་བ་སྤུ་ཀུན་ལངས་པ་ཙམ་དུ་དངངས་ནས་མི་དེ་ལ་ཡང་དག་པར་བདེན་ནམ་ཞེས་བཀའ་སྩལ་ཏོ། །དེ་ཉིད་བཙུན་མོ་རི་དགས་མས་བཙས་
པའི་པད་མོ་ཡིན་ནམ་ཞེས་བཙུན་མོ་ལས་བཙས་པའི་པད་མོ་གར་བོར་ཞེས་དྲིས་ན། བཙུན་མོས་གསོལ་པ། རྒྱལ་པོ་ཆེན་པོ་པད་མོ་དེ་རྫིང་གི་འགྲམ་ན་ཕ་བོང་ཞིག་མཆིས་པའི་འོག་ཏུ་སྦས་སོ་ཞེས་གསོལ་པ་དང་། དེ་ཉིད་བཙུན་མོ་

71-1-132a

རི་དགས་མས་བཙས་པ་ཡིན་པར་ཡིད་ཆེས་པས་ཕྱིར་ཕོ་བྲང་གི་ནང་དུ་འོངས་སོ། །ཕྱིར་ཕོ་བྲང་དུ་ཕྱིན་ནས་བཙུན་མོ་རི་དགས་མ་ལ་བདག་ནི་གཏི་མུག་ཅན། ཤེས་པ་མེད་པ། འཛངས་ངན་མི་རྟོགས་པས་བཙུན་མོ་བདེན་པར་འོང་ངོ་
སྙམ་ནས་བཙུན་མོའི་ཡིད་དང་འགལ་བར་གྱུར་པ་བཤགས་སོ་ཞེས་སྨྲས་ནས་ཕྱིར་བཙུན་མོ་དམ་པར་དབང་བསྐུར་རོ། །དེ་ནས་རྒྱལ་པོ་ཤིན་དུ་དགའ་ནས་བློན་པོ་རྣམས་དང་། བྲམ་ཟེ་དང་། རྒྱལ་ཕྲན་དང་། མཚན་མཁན་ཀུན་བསྡུས་ནས་རྒྱལ་བུ་ལྔ་
བརྒྱ་པང་དུ་བླངས་ནས་མཚན་མཁན་རྣམས་ལ་མཚན་བཟང་ངན་བལྟར་བཅུག་གོ། །མཚན་མཁན་གྱིས་གསོལ་པ། རྒྱལ་བུ་འདི་དག་ནི་རྒྱལ་པོའི་བསོད་ནམས་དང་དབང་ཐང་གིས་གྲུབ་སྟེ། གལ་ཏེ་ཁྱིམ་ན་གནས་ན་མཐའ་བཞི་རང་འདུ་ཞིང་
ལྷ་རྣམས་ཀྱང་འགོ་བར་འགྱུར། གལ་ཏེ་རབ་ཏུ་བྱུང་ན་གདོན་མི་ཟ་བར་སྐྱེ་ཤིའི་རྩ་བ་གཅོད་ཅིང་འདོད་པའི་ཆུ་ཀླུང་ལས་ཐར་ཏེ་འཁོར་བའི་རྒྱ་མཚོའི་ཕ་རོལ་ཏུ་ཕྱིན་ཅིང་། རིག་པ་གསུམ་དང་། མངོན་པར་ཤེས་པ་དྲུག་དང་ལྡན་ཞིང་དགེ་སྦྱོང་གི་འབྲས་བུ་
བཞི་ཐོབ་པར་འགྱུར་རོ། །རྒྱལ་པོས་ཚིག་དེ་ཐོས་ནས་ལྷག་པར་དགའ་བར་གྱུར་ནས། རྒྱལ་བུ་ལྔ་བརྒྱ་གསོ་བའི་མ་མ་ལྔ་བརྒྱ་བཏུས་པ་དང་། དེ་ནས་བཙུན་མོ་རི་དགས་མས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ཡུལ་ཁམས་
ཀུན་དུ་མ་མ་བཏུ་མི་དགོས་ཏེ། ད་ལྟར་རྒྱལ་པོའི་ཕོ་བྲང་ན་བཙུན་མོ་ལྔ་བརྒྱ་ཡོད་ལ། བཙུན་མོ་དེ་དག་བདག་ལ་བུ་ཡོད་པས་ཐམས་ཅད་ཕྲག་དོག་བྱེད་དོ། །ད་རྒྱལ་པོས་བཙུན་མོ་རེ་རེ་ཞིང་རྒྱལ་བུ་རེ་རེ་གསོར་བཅུག་ན་རྒྱལ་བུ་རྣམས་ཀྱང་སོས་
པར་འགྱུར་རོ། །རྒྱལ་པོས་བཙུན་མོ་ལ་སྨྲས་པ། བཙུན་མོ་ལྔ་བརྒྱ་བཙུན་མོ་ལ་ཕྲག་དོག་བྱེད་ན་གཞུ་བ་དང་། བརྡེག་པ་དང་། སྤང་བ་དང་སྲོག་ལ་དབབ་པའི་བར་དུ་བཙུན་མོའི་ཡིད་དང་མི་འགལ་བར་བདག་བྱེད་ན། ཅིའི་ཕྱིར་དགྲར་
གྱུར་པ་དེ་དག་ལ་དེ་ལྟ་བུའི་ཤིན་དུ་བཟོད་དཀའ་བ་ཉམས་སུ་ལེན་ཅིང་། གནམ་སའི་བར་ན་བདག་གི་བུ་བཙུན་མོ་རྣམས་ལ་སྦྱིན་པར་སེམས། དེའི་ཚེ་བཙུན་མོ་ལྔ་བརྒྱས་དེ་སྐད་ཅེས་སྨྲས་པ་ཐོས་ཏེ་རབ་ཏུ་དགའ་ནས་བཙུན་མོ་རི་དགས་

71-1-132b

མས་བདག་ཅག་ལ་བདེ་བ་དང་སྐྱིད་པ་རྒྱུན་དུ་བསྟབས་ལ་ད་ཡང་སྲས་བུ་བདག་ཅག་ལ་བྱིན་པས་རབ་ཏུ་དགའོ་ཞེས་སྨྲས་སོ། །དེའི་ཚེ་ན་འཁོར་བརྒྱ་སྟོང་སྙེད་ཀྱང་ཚིག་དེ་དག་ཐོས་ནས་རབ་ཏུ་དགའ་བའི་སེམས་སྐྱེས་ཏེ་བྱང་ཆུབ་ཏུ་སེམས་བསྐྱེད་
པར་གྱུར་ཏོ། །དེ་ནས་རྒྱལ་པོ་ཆེན་པོས་བཙུན་མོ་ལ་ངོ་མཚར་ཆེ་སྟེ། བདག་ནི་ཁྱོད་ཙམ་མི་ཕོད་དོ་ཞེས་སྨྲས་སོ། །བཙུན་མོས་སྨྲས་པ། ཕྲག་དོག་གི་དབང་གིས་ཞེ་སྡང་སྐྱེ་སྟེ། ཉེས་པའི་གཉེན་པོར་ནི་མི་བཟོད་པ་སྒོམ། ཁྲོ་བའི་
གཉེན་པོར་བྱམས་སེམས་བསྐྱེད་དགོས་ཏེ། བདག་ནི་ཐོག་མ་ནས་ཅི་ལ་ཡང་རྩོད་པ་མ་མྱོང་སྟེ། བཙུན་མོ་རྣམས་རང་ལ་འཚེ་ཞིང་གནོད་པ་བྱེད་དོ། །དཔེར་ན་མི་ཞིག་མཚན་མོ་སོང་སོང་བ་ཞིག་ལས་ཤིང་དུམ་ཅིག་མཐོང་བ་ལས་དགྲ་
འམ་ཡི་དགས་སུ་འདུ་ཤེས་སྐྱེས་ཏེ། མོད་ལ་དངངས་སྐྲག་ནས་བྲོས་སོ། །མུན་ཁུང་དུ་བྲོས་པ་ལས་ལ་ལ་ནི་བྲག་མཐོན་པོ་ལ་གཡང་དུ་ལྷུང་། ལ་ལ་ནི་ཆུ་འམ། མེ་འམ། ཚེར་ཕུང་ངམ། ནགས་ཚལ་གྱི་ནང་དུ་ལྷུང་ནས་ལུས་
རྨས་ཤིང་ཞིག་པར་གྱུར་ཏོ། །དེ་ལྟར་འདུ་ཤེས་ལོག་པའི་རྐྱེན་གྱིས་དེ་ལྟ་བུའི་གནོད་པ་དང་ཕྲད་དོ། །དེ་བཞིན་དུ་སེམས་ཅན་ཐམས་ཅད་ཀྱང་རང་སྐྱེ། རང་འཆི་བ་ནི་དར་གྱི་སྲིན་བུ་འམ། ཕྱེ་མ་ལེབ་མེར་སོང་བ་དང་འདྲ་སྟེ་སུས་ཀྱང་
གཞེན་མ་བཏབ་བོ། །ཉེས་པ་ཐམས་ཅད་ནི་མི་བདེན་པར་འདུ་ཤེས་བྱུང་སྟེ། བཙུན་མོའི་རྣམས་ཀྱང་དེ་དང་འདྲ་བས་ན་བདག་ནི་ཤེས་པ་མེད་པས། ཕལ་དང་རྩོད་པ་ཅི་ཡང་མེད་དོ། །བཙུན་མོ་ལྔ་བརྒྱ་པོ་རྣམས་བཙུན་མོ་རི་དགས་
མ་ལ་ཕྱག་བྱས་ཏེ། རང་གི་ཉེས་པ་མཐོལ་བཤགས་ནས་བཙུན་མོ་རི་དགས་མའི་གཡོག་དང་རིམ་གྲོ་བྱེད་ཅིང་མ་འམ། བུ་མོ་ལྟར་སེམས་ཏེ། རྒྱལ་བུ་ལ་ཡང་བདག་གི་བུ་དང་འདྲ་བར་གསོ་ཞིང་རིམ་གྲོ་བྱེད་དོ། །དེ་ནས་རྒྱལ་
བུ་ལྔ་བརྒྱ་བགས་ཀྱིས་ཆེར་སྐྱེས་ནས། རྒྱལ་བུ་གཅིག་ཅིག་གིས་མཐུ་སྟོབས་མི་སྟོང་ཐུབ་པས། མཐའི་རྒྱལ་ཕྲན་དག་ལྡོག་ཅིང་བཀའ་མི་ཉན་པ་ཡོད་ན། དམག་རྣམ་བཞི་མི་དགོས་པར་རྒྱལ་བུ་ཉིད་འབེབས་ཤིང་རྒོལ་དུ་འགྲོ་

71-1-133a

སྟེ། དེའི་ཚེ་ན་ཡུལ་ཡང་བདེ་ཞིང་སྐྱིད་ལ་སྲུངས་མའི་ལྷ་ཡང་དགའ་བས། རླུང་དང་། ཆར་ཆུ་ཡང་དུས་བཞིན་དུ་ལྡང་འབེབས་སོ། །མི་རྣམས་ཀྱང་དལ་ལ་བདེ་སྐྱིད་དོ། །རྒྱལ་བུ་ལྔ་བརྒྱ་ཡང་བལ་གྱི་གླང་པོ་དམ་པ་ལ་ཞོན་ཞིང་བསྐྱེད་
མོས་ཚལ་དུ་ཡིད་བཞིན་དུ་རྩེ་དགའ་ཞིང་འཁོད་པ་ལ་ཕ་མ་ཡང་རྒྱལ་བུ་དེ་དག་ལ་མིག་གི་འབྲས་བུ་དང་འདྲ་བར་སེམས་ཏེ་བྱམས་སོ། །དེའི་ཚེ་རྒྱལ་བུ་ལྔ་བརྒྱ་ཆེར་སྐྱེས་ཏེ། ཤེད་རྫོགས་ནས་ཕྱིས་དུས་གཞན་ཞིག་ན་ཐམས་ཅད་པད་མོའི་
རྫིང་དེའི་འགྲམ་དུ་འདུས་ཏེ་འདུག་འདུག་པ་ལས་སོ་སོའི་གཟུགས་བརྙན་རྫིང་གི་ཆུ་ལ་སྣང་བར་གྱུར་ནས་གཅིག་ལ་གཅིག་འདི་སྐད་ཅེས་སྨྲས་སོ། །འདི་ལྟ་སྟེ། ཆོས་ཐམས་ཅད་ནི་སྒྱུ་མ་འམ། སྤྲུལ་པ་འམ། རྨི་ལམ་འམ། ཆུའི་གཟུགས་
བརྙན་ལྟ་བུ་སྟེ། བདེན་པ་འམ། ཡང་དག་པ་མེད་དོ། །བདག་ཅག་ཀྱང་ད་ལྟར་དེ་དང་འདྲ་སྟེ། རིགས་ཆེ་ཞིང་བཙུན་ལ་ཕོ་བྲང་གི་ནང་ན་གནས་ནས་འདོད་པ་ལྔ་ལ་བག་མེད་པར་སྤྱོད་པས་ལོངས་སྤྱོད་མོད་ཀྱི། དར་བའི་ཚེ་ལོ་དང་
གཟུགས་བཟང་པོ་ནི་ཡིད་བརྟན་དུ་མི་རུང་སྟེ། གྲུབ་པ་ཡོད་ན་འཇིག་པར་འགྱུར་ཏེ་གཞོན་ཞིང་དར་བ་ཡང་རིང་པོར་མི་ཐོགས་ཏེ་རྒས་ཤིང་རྒུད་པར་འགྱུར། ཁ་ཟས་ཀྱི་ཚོད་མ་ཟིན་ན་ན་བར་འགྱུར། ཚེ་ལོ་བརྒྱ་ཐུབ་ན་ཡང་ཐ་མར་ཤི་དགོས་
སོ་ཞེས་རྒྱལ་བུ་རྣམས་མི་དགའ་བའི་མྱ་ངན་གྱིས་ནོན་ཏོ། །ཟས་དང་སྐོམ་ཡང་མི་འདོད་པར་ཕྱིར་ཕོ་བྲང་དུ་འོངས་ནས་ཡབ་རྒྱལ་པོ་ལ་འདི་སྐད་ཅེས་གསོལ་ཏོ། །འཇིག་རྟེན་དག་ནི་སྡུག་བསྔལ་བ་སྟེ་བདེ་བ་མ་མཆིས་པས་ཡབ་
རྒྱལ་པོ་བདག་ཅག་རབ་ཏུ་འབྱུང་བར་གསོལ་ལོ། །རྒྱལ་པོས་རྒྱལ་བུ་རྣམས་ལ་སྨྲས་པ། སྐྱེ་བ་དང་། རྒ་བ་དང་། ན་བ་དང་། ཤི་བ་ནི་ཐམས་ཅད་ལ་ཡོད་པར་འདྲ་ན་ཁྱེད་འབའ་ཤིག་མྱ་ངན་བྱར་ཡང་ཅི་ཡོད། རྒྱལ་བུས་གསོལ་
པ། བདག་ཅག་ནི་ཤི་ནས་སྐྱེ་བ་ཡང་ནས་ཡང་དུ་ལེན་པའི་ཉོན་མོངས་པ་དང་། འགྲོ་བ་ལྔར་རྒྱུན་དུ་འགྲོ་བར་མི་བཟོད་དོ། །དེ་ནས་རྒྱལ་པོས་ཀྱང་རྒྱལ་བུའི་ཡིད་དམ་མ་བཟློག་སྟེ། རབ་ཏུ་འབྱུང་བར་གནང་ངོ་། །བཙུན་མོས་རྒྱལ་

71-1-133b

བུ་རྣམས་ལ་སྨྲས་པ། ཁྱེད་རབ་ཏུ་བྱུང་ནས་ཁོ་མོ་སྤངས་ལ་ལམ་རིང་དུ་མ་འགྲོ་བར་ཕོ་བྲང་རྒྱབ་ཀྱི་བསྐྱེད་མོས་ཚལ་ན་རབ་ཏུ་དབེན་ལ་ཤིང་དང་ཚལ་ཡང་དབེན་པ་ཡོད་ཀྱིས། དེར་འདུ་ཤིག་དང་། ཡོ་བྱད་རྣམ་བཞིས་མི་བྲེལ་བར་བྱ་ཞིང་འབུལ་ལོ། །
རྒྱལ་བུ་རྣམས་རབ་ཏུ་བྱུང་ནས་བཙུན་མོས་གསོལ་པ་བཞིན་རྒྱབ་ཀྱི་བསྐྱེད་མོས་ཚལ་ན་གནས་པ་ལས། རྒྱལ་བུ་དེ་དག་ཐམས་ཅད་ཀྱིས་རེ་རེ་ནས་མཐར་གྱིས་རང་སངས་རྒྱས་ཀྱི་བྱང་ཆུབ་ཐོབ་པར་གྱུར་ཏོ། །དེ་ལྟར་རྒྱལ་བུ་བཞི་བརྒྱ་དགུ་བཅུ་རྩ་
དགུ་མཐར་གྱིས་རབ་ཏུ་བྱུང་། རང་བྱང་ཆུབ་ཀྱི་འབྲས་བུ་ཐོབ་པར་གྱུར་ནས་རྒྱལ་པོའི་ཕོ་བྲང་དུ་ལྷགས་ཏེ། ཡབ་རྒྱལ་པོ་དང་ཡུམ་ལ་བདག་ཅག་རབ་ཏུ་བྱུང་བའི་དོན་དེ་ཐོབ་བོ་ཞེས་སྨྲས་ནས། དགེ་སློང་དེ་དག་སྟེང་གི་ནམ་མཁའ་ལ་
འཕགས་ཏེ་ཤར་ཕྱོགས་ནས་མི་སྣང་བར་གྱུར་ན་ནུབ་ཕྱོགས་ནས་བྱུང་ངོ་། །ནུབ་ཕྱོགས་ནས་མི་སྣང་བར་གྱུར་ན་ཤར་ཕྱོགས་ནས་བྱུང་ངོ་། །ལྷོ་ཕྱོགས་ནས་མི་སྣང་བར་གྱུར་ན་བྱང་ཕྱོགས་ནས་བྱུང་ངོ་། །བྱང་ཕྱོགས་ནས་མི་སྣང་བར་
གྱུར་ན། ལྷོ་ཕྱོགས་ནས་བྱུང་ངོ་། །ཆེད་འགའ་ནི་ལུས་ཆེན་པོས་ནམ་མཁའི་ཁམས་གང་བར་གྱུར། ཆེད་འགའ་ནི་ལུས་གཅིག་ལས་ལུས་གྲངས་མེད་པར་སྤྲུལ། ཆེད་འགའ་ནི་ལུས་ཀྱི་ཆ་སྟོད་ན་ཆུ་འབབ་ན། ལུས་ཀྱི་ཆ་སྨད་
ན་མེ་འབར་བ་ལ་སོགས་པ་ཆོ་འཕྲུལ་རྣམ་པ་སྣ་ཚོགས་པ་བསྟན་ནས་ལུས་ལ་མེ་བཏང་ནས་མྱ་ངན་ལས་འདས་སོ། །དེ་ནས་བཙུན་མོ་རི་དགས་མས་སྐུ་གདུང་བསྡུས་ནས་རྒྱབ་ཀྱི་བསྐྱེད་མོས་ཚལ་དུ་མཆོད་རྟེན་བཞི་བརྒྱ་དགུ་བཅུ་
རྩ་དགུ་བྱས་ནས་མཆོད་པ་བྱེད་དོ། །རྒྱལ་བུ་ནང་གི་ཆུང་ངུ་ཡང་ཞག་དགུ་བཅུ་འདས་ནས་རང་སངས་རྒྱས་ཀྱི་བྱང་ཆུབ་ཐོབ་སྟེ། དེ་ཡང་ཡབ་དང་ཡུམ་ལ་ཆོ་འཕྲུལ་ཆེན་པོ་བསྟན་ནས་མྱ་ངན་ལས་འདས་སོ། །དེ་ནས་བཙུན་མོ་རི་དགས་མས་
སྐུ་གདུང་བསྡུས་ནས་མཆོད་རྟེན་བརྩིགས་ཏེ་མཆོད་པ་བྱས་སོ། །དེའི་ཚེ་ན་བཙུན་མོ་རི་དགས་མས་ཉིན་གཅིག་བཞིན་བདུག་སྤོས་དམ་པ་དང་། མེ་ཏོག་དམ་པ་དང་། རོལ་མོ་སྣ་ཚོགས་ཀྱིས་རང་སངས་རྒྱས་ལྔ་བརྒྱའི་མཆོད་རྟེན་ལ་མཆོད་

71-1-134a

པ་བྱེད་ཅིང་མཆོད་རྟེན་དེ་དག་གི་དྲུང་ན་མི་དགའ་ཞིང་མྱ་ངན་བྱེད་དེ་འདི་སྐད་ཅེས་སྨྲས་སོ། །བདག་གིས་བུ་ལྔ་བརྒྱ་བཙས་ནས་རབ་ཏུ་བྱུང་མོད་ཀྱི། དེ་ལ་གཅིག་ཙམ་ཡང་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་མེད་པས་འདི་
སྐད་ཅེས་སྨོན་ལམ་བཏབ་བོ། །བདག་གིས་རང་སངས་རྒྱས་ལྔ་བརྒྱ་ལ་མཆོད་པ་བྱས་ཤིང་མཆོད་རྟེན་ལྔ་བརྒྱ་བརྩིགས་ཏེ། སྐུ་གདུང་ལ་མཆོད་པའི་བསོད་ནམས་ཅི་ཡོད་པ་སེམས་ཅན་ཐམས་ཅད་ལ་བསྔོའོ། །བདག་མ་འོངས་པའི་དུས་
ན་བུ་མང་དུ་བཙས་ཤིང་བླ་ན་མེད་པའི་བྱང་ཆུབ་ཏུ་སེམས་མི་བསྐྱེད་པ་མི་འདོད་ཀྱི། བུ་གཅིག་པུ་ཞིག་བཙས་ལ་བླ་ན་མེད་པའི་བྱང་ཆུབ་ཏུ་སེམས་བསྐྱེད་དེ་ཚེ་དེ་ཉིད་ལ་རབ་ཏུ་བྱུང་ནས་ཐམས་ཅད་མཁྱེན་པའི་ཡེ་ཤེས་དང་ལྡན་པར་ཤོག་ཤིག་ཅེས་
སྨོན་ལམ་དུ་བཏབ་བོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་བཙུན་མོ་རི་དགས་མ་དེ་གཞན་ཞིག་ཡིན་སྙམ་དུ་སེམས་ན་དེ་ལྟར་མི་བལྟ་སྟེ། དེའི་ཚེ་དེའི་དུས་ན་བཙུན་མོ་རི་དགས་མ་དེ་ཉིད་ནི་ད་ལྟར་ཡུམ་ལྷ་
མཛེས་ཉིད་ཡིན་ནོ། །ཡུམ་ལྷ་མཛེས་དེ་ལྟར་རང་སངས་རྒྱས་ལྔ་བརྒྱ་ལ་མཆོད་པ་བྱས་ཏེ་དགེ་བའི་རྩ་བ་གྲངས་མེད་པ་བསྐྱེད་པས་དེ་བས་ན་ད་ལྟར་དེ་བཞིན་གཤེགས་པའི་སྐུ་བལྟམ་པ་ཡིན་ནོ། །སངས་རྒྱས་ཀྱི་ཆོས་འདི་བསྟན་པ་ན་ལྷ་དང་མི་
གྲངས་མེད་པ་འབྲས་བུ་དང་པོ་ཐོབ་པ་ནས་འབྲས་བུ་བཞི་པའི་བར་དུ་ཐོབ་པར་གྱུར་ཏོ། །སེམས་ཅན་ཚད་མེད་པ་སྙེད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་ནས་ཀུན་དགའ་བོས་བཅོམ་ལྡན་
འདས་ལ་འདི་སྐད་ཅེས་གསོལ་ཏོ། །ཡུམ་ལྷ་མཛེས་སྔོན་ལས་ཅི་ཞིག་བགྱིས་ན་དུད་འགྲོའི་ནང་དུ་དུད་འགྲོ་ལ་བཙས་ཏེ་རི་དགས་ཀྱི་བུ་མོར་གྱུར། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཁྱོད་ལེགས་པར་ཉོན་ཅིག །ཡུམ་
ལྷ་མཛེས་སྔོན་འདས་པའི་དུས་ན་ལས་ཅི་བྱས་པའི་རྒྱུ་དང་རྐྱེན་ཁྱོད་ལ་དགྲོལ་ཞིང་བཤད་པར་བྱའོ། །སྔོན་འདས་པའི་དུས་ན་བསྐལ་པ་གྲངས་མེད་ཚད་མེད་པ་འདས་པའི་ཕ་རོལ་ན། དེའི་ཚེ་དེའི་དུས་ན་སངས་རྒྱས་བཅོམ་ལྡན་འདས་རྣམ་པར་གཟིགས་

71-1-134b

ཤེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ་འཇིག་རྟེན་དུ་
བྱུང་སྟེ། སེམས་ཅན་གྱི་དོན་མཛད་ནས་མྱ་ངན་ལས་འདས་པའི་འོག་ཏུ་གཟུགས་བརྙན་ལ་ཆོས་སྤྱོད་པ་ན། དེའི་ཚེ་དེའི་དུས་ན་ཡུལ་བཱ་ར་ཎ་སཱི་ཞེས་བྱ་བར་བྲམ་ཟེ་ཞིག་ལ་བུ་མོ་གཅིག་པུ་ཞིག་བྱུང་ནས་བྲམ་ཟེ་དེ་ཚེའི་དུས་བྱས་སོ། །བྲམ་ཟེ་དེའི་
ཆུང་མ་དེས་བུ་མོ་དེ་གསོས་སོ། །བུ་མོ་དེ་ཡང་བགས་ཀྱིས་ཆེར་སྐྱེས་སོ། །བུ་མོ་མ་སྨད་ལ་བཟའ་ཤིང་གི་ར་བ་ཞིག་ཡོད་དེ་མས་བུ་མོ་ར་བ་སྲུང་དུ་བཅུག་གོ། །མ་མོ་བདག་ནི་ཟས་ཚོལ་ཞིང་ཅི་རྙེད་པ་ཕྱིར་འོངས་ནས་བུ་མོ་དང་ལྷན་ཅིག་ཟའོ། །རྟག་ཏུ་དེ་བཞིན་
དུ་ཟས་ཚོལ་བ་ལ་ཉི་མ་གཅིག་འཕྱིས་ནས་དུས་ལས་ཡོལ་ནས་བུ་མོ་བཀྲེས་པ་དང་སྐོམ་པས་གདུངས་པས་ཁྲོ་སེམས་སྐྱེས་ནས་བདག་གི་མ་དེ་རྐྱེན་ཅི་བྱུང་ན་ད་ཙམ་གྱི་བར་དུ་ཁ་ཟས་མ་བྱིན་ཏེ། བདག་འདི་ལྟར་བཀྲེས་ཤིང་སྐོམ་པར་བྱས་ཤེས་
ཁྲོས་ནས་བདག་གི་མ་དུད་འགྲོ་ཙམ་ཡང་མི་ཕོད་དེ། དུད་འགྲོས་གཅན་ཟན་དང་། རི་དགས་དང་། བྱ་ཡང་བུ་ལ་བཀྲེས་སྐོམ་དྲན་ཏེ་དུས་བཞིན་དུ་སྙོད་ཏུ་འོང་ངོ་ཞེས་སྨྲས་སོ། །དེ་སྐད་ཅེས་སྨྲས་པས་རིང་པོ་མ་ལོན་པར་མས་ཟས་ཐོགས་ཏེ། 
འོངས་ནས་ཟ་བའི་འཕྲོ་ལས་རང་སངས་རྒྱས་དགེ་སྦྱོང་གི་གཟུགས་ཅན་ཞིག་ལྷོ་ཕྱོགས་ནས་བྱང་ཕྱོགས་སུ་ནམ་མཁའ་ལ་འགྲོ་བ་དེ་བུ་མོ་དེས་མཐོང་ནས་དགེ་སློང་དེ་ལ་དགའ་བའི་སེམས་སྐྱེས་ཏེ་འདུག་པ་ལས་ལངས་ནས་ཐལ་མོ་སྦྱར་ཏེ། མགོ་བོས་
ཕྱག་འཚལ་ནས་སྤྱན་དྲངས་སོ། །སྟན་གཙང་མ་བཏིང་སྟེ་མེ་ཏོག་བཟང་པོས་མཆོད་ནས་ཁ་ཟས་དེ་ལས་བགོས་ནས་དགེ་སློང་དེ་ལ་ཕུལ་ལོ། །དགེ་སློང་དེས་ཟས་ཀྱི་བྱ་བ་བྱས་ནས་དམ་པའི་ཆོས་བསྟན་ནས་སྤྲོ་བ་དང་བར་བྱས་པས་དེའི་ཆེ་བུ་མོ་དེས་
འདི་སྐད་ཅེས་སྨོན་ལམ་དུ་བཏབ་བོ། །བདག་མ་འོངས་པའི་དུས་ན་འཕགས་པ་དང་ཕྲད་ཅིང་དེ་ལ་རིམ་གྲོ་དང་། མཆོད་པ་དང་། ཕྱག་བྱེད་པར་གྱུར་ཅིག །བདག་བྱད་བཞིན་བཟང་ཞིང་མཛེས་པ་དང་། ཆེ་ཞིང་བཙན་པ་དང་། འགྲོ་བའི་གོམ་པའི་

71-1-135a

འོག་ནས་པད་མོ་སྐྱེས་ཏེ་རྐང་པ་འདེགས་པར་ཤོག་ཤིག་ཅེས་སྨོན་ལམ་བཏབ་བོ་བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ཀྱི་བུ་མོ་དེ་ནི་བཙུན་མོ་རི་དགས་མ་ཡིན་ནོ། །དེ་ལྟར་རང་སངས་རྒྱས་ལ་བསོད་
སྙོམས་གཅིག་ཕུལ་ཏེ། མེ་ཏོག་བཟང་པོས་མཆོད་པས་ཚེ་རབས་ལྔ་བརྒྱའི་བར་དུ་ཆེ་ཞིང་བཙན་ལ། གོས་དང་ཟས་ཡིད་བཞིན་དུ་ལྡན་ཏེ་རྐང་པའི་འོག་ནས་པད་མོ་སྐྱེས་སོ། །སྨོན་ལམ་གྱི་མཐུས་ད་ཡང་རང་སངས་རྒྱས་ལྔ་བརྒྱ་དང་ཕྲད་དེ། 
མཆོད་པ་དང་རིམ་གྲོ་དང་། ཕྱག་བྱས་པར་འགྱུར་རོ། །དེའི་ཚེ་དྲིན་མི་ཤེས་ཏེ་ཚིག་ངན་པ་གཅིག་གིས་མ་ལ་དུད་འགྲོ་དང་འདྲའོ་ཞེས་སྨྲས་པའི་ངག་གི་ལས་ངན་པའི་རྐྱེན་གྱིས་ཚེ་རབས་ལྔ་བརྒྱའི་བར་དུ་རི་དགས་ཀྱི་ལྟོར་སྐྱེས་སོ། །བཅོམ་ལྡན་འདས་
ཀྱི་ཀུན་དགའ་བོ་ལ་བཀའ་སྩལ་པ། འཇིག་རྟེན་དུ་སྐྱེས་སོ་ཅོག་གི་ཉེས་པ་ནི་རང་གི་ཁ་ནས་བྱུང་བས་ངག་གི་ལས་བསྲུང་བར་བྱའོ། །ངག་གི་ལས་ནི་མེ་འབར་བས་ཚིག་པ་བས་ལྷག་སྟེ། མེ་འབར་བས་ཚིག་པ་དེ་ནི་ཚེ་གཅིག་པར་ཟད་དོ། །ངག་
གི་ལས་མི་དགེ་བའི་མེ་འབར་བས་ནི་སྐྱེ་བ་གྲངས་མེད་པར་འཚིག་གོ། །མེ་འབར་བས་ནི་འཇིག་རྟེན་གྱི་ནོར་ཙམ་འཚིག་གོ། །ངག་མི་དགེ་བའི་མེ་འབར་བས་ནི་འཕགས་པའི་ནོར་བདུན་ཚིག་པར་འགྱུར་རོ། །དེ་བས་ན་ཀུན་དགའ་བོ་སེམས་
ཅན་ཐམས་ཅད་ཀྱི་ཉེས་པ་ནི་ཁ་ནས་བྱུང་སྟེ། ཁ་དང་ལྕེ་ནི་ལུས་གཅོད་པའི་མཚོན་ཞེས་བྱའོ། །བཅོམ་ལྡན་འདས་ཀྱིས་དེ་སྐད་གསུངས་པ་ན་དགེ་བསྙེན་དང་དགེ་བསྙེན་མ་སྟོང་སྙེད་དག་གི་ལས་བསྲུངས་པས་འབྲས་བུ་དང་པོ་ཐོབ་པར་གྱུར་ཏོ། །
ལྷ་དང་མི་གྲངས་མེད་པ་སྙེད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ནས་རང་སངས་རྒྱས་ཀྱི་བར་དུ་སེམས་བསྐྱེད་པར་གྱུར་ཏོ། །འཁོར་མང་པོ་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་
ནས་ཕྱག་བྱས་ཏེ་ཕྱིར་དོང་ངོ་། །དེའི་ཚེ་བཅོམ་ལྡན་འདས་དང་ཀུན་དགའ་བོ་རྒྱལ་པོའི་ཁབ་ཏུ་བསོད་སྙོམས་བླངས་ནས་སླར་གཤེགས་པ་དང་། གྲོང་ཁྱེར་གྱི་ཕྱི་རོལ་ན་གྲོག་པོ་ཟབ་མོ་ཅིག་ཡོད། །རྒྱལ་པོའི་ཁབ་ཀྱི་གྲོང་ཁྱེར་གྱི་མི་རྣམས་བཤང་གཅི་

71-1-135b

དང་། མི་གཙང་བ་ཐམས་ཅད་གྲོག་པོ་དེར་སྐྱེལ་ལོ། །ཆར་པ་བབ་ན་གྲུ་ཆར་གྱི་ཆུ་རྣམས་ཀྱང་དེར་འབབ་བོ། །དེའི་ཚེ་གྲོག་པོའི་ཆུ་བཙོག་པ་དེའི་ནང་ན་སྲིན་བུ་མིའི་གཟུགས་འདྲ་བ་ལ་རྐང་ལག་མང་བ་ཞིག་གིས་རྒྱང་མ་ནས་དེ་བཞིན་གཤེགས་པ་བྱོན་པ་
མཐོང་ནས་ཆུའི་ནང་ནས་མགོ་བཏེག་ནས་དེ་བཞིན་གཤེགས་པ་ལ་བལྟས་ནས་མིག་ནས་མཆི་མ་ཟག་གོ། །བཅོམ་ལྡན་འདས་ཀྱིས་དེ་གཟིགས་ནས་ཐུགས་རྗེ་བར་དགོངས་ཏེ་མི་དགྱེས་པར་གྱུར་ནས་སླར་བྱ་རྒོད་སྤུངས་པའི་རི་ལ་གཤེགས་སོ། །དེ་ནས་
ཀུན་དགའ་བོས་དེ་བཞིན་གཤེགས་པའི་གདན་གདིང་བ་བཏིང་ནས་སྐྱིལ་མོ་དཀྲུང་བཅས་ནས་བཞུགས་སོ། །དེ་ནས་ཀུན་དགའ་བོས་འཁོར་ཐམས་ཅད་ལ་བལྟས་ཏེ་འཁོར་གྱི་བསམ་པ་སེམས་ཀྱིས་ཤེས་ནས་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་ད་ཅི་ཆབ་བཙོག་པའི་ནང་ན་སྲིན་བུ་ཞིག་མཆིས་པ་དེ་སྔོན་ལས་ཅི་བགྱིས་པས་ཆབ་བཙོག་པ་དེའི་ནང་དུ་སྐྱེས། དེར་སྐྱེས་ནས་ནི་ཇི་སྲིད་གཅིག་ལགས། དེ་ཡང་ནམ་ཞིག་དེ་ལས་ཐར་བར་འགྱུར། བཅོམ་ལྡན་
འདས་ཀྱིས་ཀུན་དགའ་བོ་དང་འཁོར་མང་པོ་ལ་འདི་སྐད་ཅེས་བཀའ་སྩལ་ཏོ། །ཁྱོད་ལེགས་པར་ཉོན་ཅིག །ཁྱོད་ལ་ལེགས་པར་དགྲོལ་བར་བཤད་པར་བྱའོ། །ཀུན་དགའ་བོ་སྔོན་འདས་པའི་དུས་ན་བསྐལ་པ་གྲངས་མེད་པ་སྟོང་འདས་
པའི་སྔོན་རོལ་ན། དེའི་ཚེ་དེའི་དུས་ན་སངས་རྒྱས་འཇིག་རྟེན་དུ་གཤེགས་ནས་སེམས་ཅན་གྱི་དོན་མཛད་དེ་ཡོངས་སུ་མྱ་ངན་ལས་འདས་སོ། །མྱ་ངན་ལས་འདས་ནས་གཟུགས་བརྙན་ལ་ཆོས་སྤྱོད་པ་ན་བྲམ་ཟེ་ཞིག་གིས་དགེ་འདུན་གྱི་གནས་
ཁང་བྱས་ཏེ་དགེ་འདུན་ལ་ཕུལ་ལོ། །དེའི་ཚེ་ན་ཡོན་བདག་ཞིག་གིས་དགེ་འདུན་ལ་མར་དང་། འབྲུ་མར་དག་ཕུལ་ཏེ་དེ་ན་དགེ་སློང་འདྲོན་པོ་དག་ཅིག་ཀྱང་ལྷགས་སོ། །དེའི་ཚེ་གང་ཟག་གི་ལས་གཙང་སྦྱོར་བྱེད་པ་ཞིག །དགེ་སློང་འདྲོན་
པོ་འོངས་པ་མཐོང་ནས་འཁྲེན་ཏེ་མར་དང་། འབྲུ་མར་བཅབས་ཤིང་བསྲིས་ནས་དགེ་འདུན་འདྲོན་པོ་ལ་མ་བྱིན་ནོ། །དགེ་འདུན་འདྲོན་པོས་གཙང་སྦྱོར་ལ་མར་དང་། འབྲུ་མར་དང་། སྦྲང་རྩི་འོངས་པ་ངེད་ལ་མི་སྦྱིན་ནམ་ཞེས་དྲིས་པ་དང་

71-1-136a

གཙང་སྦྱོར་གྱིས་ཁྱེད་ནི་འདྲོན་པོ། །ངེད་ནི་གཟའ་ཡིན་ནོ་ཞེས་སྨྲས་སོ། །དགེ་སློང་འདྲོན་པོས་ཡོན་བདག་གིས་མངོན་སུམ་གྱི་དགེ་འདུན་ལ་ཕུལ་བ་མ་ཡིན་ནམ་ཞེས་སྨྲས་པ་དང་། དེའི་ཚེ་ན་གཙང་སྦྱོར་གྱི་ལས་བྱེད་པ་དེ་ཁྲོས་ཤིང་འཇིགས་
སུ་རུང་བ་ཞིག་པས། དགེ་སློང་འདྲོན་པོ་ལ་ཁྱེད་བཤང་གཅི་མི་ཟ་བར་ང་ལ་མར་དང་། འབྲུ་མར་འདོད་དམ་ཞེས་ཚིག་ངན་པ་སྨྲས་སོ། །དེ་ལྟར་ཚིག་ངན་པ་སྨྲས་པའི་ལས་ཀྱིས་བསྐལ་པ་བྱེ་བ་དགུ་བཅུའི་བར་དུ་རྒྱུན་དུ་ཆུ་བཙོག་པ་འདིར་སྐྱེས་པར་གྱུར་
ཏོ། །དེའི་ཚེ་དེའི་དུས་ན་གཙང་སྦྱོར་གྱི་ལས་བྱེད་པ་དེ་ནི་ད་ཅི་ཆུ་བཙོག་པའི་ནང་ན་འདུག་པའི་སྲིན་བུ་དེ་ཡིན་ནོ། །དེ་ལྟར་འདས་པའི་དུས་ན་ཚིག་ངན་པ་གཅིག་དགེ་འདུན་ལ་སྨྲས་པས་ཚེ་རབས་བགྲངས་པ་བརྒྱ་སྟོང་གི་བར་དུ་གནས་དེར་སྐྱེས་སོ། །
བཅོམ་ལྡན་འདས་ཀྱིས་ཉེ་གནས་རྣམས་ལ་བཀའ་སྩལ་པ། ཁྱེད་རྣམས་ངག་གི་ལས་སྡོམ་ཞིང་སྲུངས་ཤིག །ངག་གི་ཉེས་པ་ནི་མེ་འབར་བ་ལས་ལྷག་གོ། །ཕ་མ་དང་དགེ་འདུན་ནི་བསྔགས་ཤིང་བསྟོད་པར་འོས་པས་ཚིག་འཇམ་པོར་སྨྲ་ཞིང་རྒྱུན་
དུ་དྲིན་དྲན་པར་བྱའོ། །དགེ་འདུན་ཞེས་བྱ་བ་ནི་ཁམས་གསུམ་ལས་འདའ་བར་བྱེད་པའི་བསོད་ནམས་ཀྱི་ཞིང་ངོ་། །ཕ་མ་ནི་ཁམས་གསུམ་གྱི་བསོད་ནམས་ཀྱི་ཞིང་མཆོག་དམ་པའོ། །དེ་ཅིའི་ཕྱིར་ཞེ་ན། དགེ་འདུན་གྱི་ནང་ན་སྐྱེས་བུ་ཟུང་
བཞི་ཡ་བརྒྱད་དང་འཕགས་པ་བཅུ་གཉིས་ཡོད་དེ། རིམ་གྲོ་བྱས་ན་བསོད་ནམས་འཐོབ་ལ་བསྒྲུབས་ན་བྱང་ཆུབ་འགྲུབ་བོ། །ཕ་མ་ནི་ཟླ་བ་བཅུའི་བར་དུ་ལྟོར་བཞག་ལ་བྱུང་ནས་ཀྱང་གཤེར་ནི་བོར། སྐམ་ནི་ལེན་ནུ་ཞོ་
བསྣུན་ནས་ཆེར་བསྐྱེད་དོ། །སྐྱེས་ནས་ཀྱང་རིག་བྱེད་མཁས་པར་སློབ་ཅིང་དུས་ལས་མི་ཡོལ་བར་རིམ་གྲོ་བྱེད་དོ། །གལ་ཏེ་རབ་ཏུ་བྱུང་ན་བསོད་ནམས་བྱེད་པས་སྐྱེ་ཤིའི་འཁོར་བའི་རྒྱ་མཚོ་ལས་རྒལ་ཏེ། བདག་གི་དོན་དང་། སེམས་
ཅན་ཐམས་ཅད་ལ་ཕན་པ་དང་། བདེ་བའི་དོན་བྱེད་དོ། །དེ་བས་ན་ཀུན་དགའ་བོ་ཕ་མ་དང་། དགེ་འདུན་ནི་སེམས་ཅན་ཐམས་ཅད་ཀྱི་བསོད་ནམས་ཀྱི་ཞིང་གཉིས་ཤེས་བྱ་སྟེ། ལྷ་དང་མི་གཉིས་དེ་རྣམས་ཀྱི་རྐྱེན་གྱིས་མྱ་ངན་ལས་འདའ་

71-1-136b

བ་རྣམ་པར་གྲོལ་བའི་འབྲས་བུ་དམ་པ་ཐོབ་པ་ཡང་དག་པའི་བྱང་ཆུབ་དུ་སེམས་བསྐྱེད་དེ། ལ་ལ་ནི་ཉན་ཐོས་དང་། རང་སངས་རྒྱས་སུ་སེམས་བསྐྱེད་དོ། །སོ་སོ་ནས་ཐལ་མོ་སྦྱར་ནས་སངས་རྒྱས་ལ་ཕྱག་འཚལ་ནས་བསྐོར་
བ་བྱས་ཏེ། རབ་ཏུ་དགའ་བས་ཕྱིར་དོང་ངོ་། །གཞན་ཡང་ཡུལ་བཱ་ར་ཎ་སཱི་ན། བློན་པོ་བྲམ་ཟེ་རབ་ཏུ་ཕྱུག་པ་ནོར་རིན་པོ་ཆེ་མང་བ། གསེར་དང་དངུལ་དང་། བེ་དཱུརྱ་དང་། མལ་ཤེལ་དང་། བྱི་རུ་དང་། སྤུག་དང་། བལ་གྱི་གླང་པོ་ཆེ་
དང་། རྟ་དང་། བ་ལང་དང་། ལུག་དང་། ཞིང་འབྲོག་དང་། བྲན་ཁོལ་དང་ལས་བྱེད་པའི་མི་མང་དུ་ཡོད་པ་ཞིག་ལ། ལོ་བརྒྱད་བཅུ་ལོན་ནས་ཁྱེའུ་ཞིག་བྱུང་ངོ་། །ཁྱེའུ་དེ་ཡང་བྱད་བཞིན་བཟང་ལ་སྡུག་པ། མཛེས་པ་མིའི་མཚན་རྫོགས་
པར་ལྡན་པས་ཕ་མ་གཉིས་རབ་ཏུ་དགའ་ནས་མཚན་མཁན་བོས་ཏེ་མཚན་བལྟས་སོ། །མཚན་མཁན་གྱིས་མཚན་བལྟས་ནས་ཁྱེའུ་དེའི་མིང་ཡང་ཙུན་ད་ཞེས་བཏགས་ནས་གསོས་བསྐྱེད་དེ་ལོ་བདུན་ལོན་ནས་ཕ་མ་གཉིས་
བྱམས་ཆེ་བས་རབ་ཏུ་བྱུང་བར་གནང་ངོ་། །རབ་ཏུ་བྱུང་བའི་ཕྱིར་དབང་ཕྱུག་གི་རི་ཞེས་བྱ་བར་དེ་བཞིན་གཤེགས་པ་གང་ན་བཞུགས་པར་ཁྲིད་དོ། །དེའི་ཚེ་ན་དེ་བཞིན་གཤེགས་པ་ལ་འཁོར་རྣམ་བཞི་དང་། ལྷ་དང་ཀླུ་དང་། 
གནོད་སྦྱིན་དང་། དེ་ལ་སོགས་པ་ལ་མདུན་གྱིས་བྱས་ཏེ་འཁོར་མང་པོ་ལ་འཇིག་རྟེན་གྱི་རིག་བྱེད་ཀྱི་གཙུག་ལག་དང་། འཇིག་རྟེན་ལས་འདས་པའི་ཆོས་སྟོན་ཏོ། །དེ་ནས་བྲམ་ཟེ་དེས་བཅོམ་ལྡན་འདས་ལ་འདི་སྐད་ཅེས་
གསོལ་ཏོ། །བཅོམ་ལྡན་འདས་བདག་རྒས་འཁོགས་ནས་ཁྱེའུ་ཞིག་མཆིས་པ། བཅོམ་ལྡན་འདས་ལ་འབུལ་གྱིས། ཐུགས་རྗེ་ཆེན་པོས་བསྐྱབ་ཅིང་བདག་གི་བུ་འདི་ཉེ་གནས་སུ་བཞེས་སུ་གསོལ་ལོ་ཞེས་སྨྲས་སོ། །དེ་ནས་
བཅོམ་ལྡན་འདས་ཀྱིས་ལེགས་པར་འོངས་སོ་ཞེས་བཀའ་སྩལ་ནས། སྐྲ་ཡང་རང་བྱི་ནས་ཆོས་གོས་ལུས་ལ་རང་ཡོད་པར་གྱུར་ཏེ། གཟེངས་བསྟོད། སྤྲོ་བ་དང་དགའ་བའི་སེམས་བསྐྱེད་དེ། ལམ་གྱི་འབྲས་བུ་ཡང་ཐོབ་སྟེ། རིག་པ་

71-1-137a

གསུམ་དང་། མངོན་པར་ཤེས་པ་དྲུག་དང་། རྣམ་པར་ཐར་པ་བརྒྱད་དང་ལྡན་པར་གྱུར་ཏོ། །དེའི་ཚེ་ཀུན་དགའ་བོས་འཁོར་མང་པོ་ལ་བལྟས་ཏེ། ཀུན་གྱི་ཐེ་ཙོམ་དགྲོལ་བའི་ཕྱིར་སྟན་ལས་ལངས་ཏེ་གོས་ཚགས་བཅོས་ནས། བླ་གོས་
ཕྱོགས་གཅིག་བྱས་ནས་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཙུན་ད་སྔོན་འདས་པའི་དུས་ན་བསོད་ནམས་ཅི་ཞིག་བགྱིས་ན་བཅོམ་ལྡན་འདས་དང་འདིར་ཕྲད་དེ་མྱུར་དུ་འབྲས་བུ་ཐོབ་པར་གྱུར། བཅོམ་
ལྡན་འདས་ཀྱིས་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །དགེ་སྦྱོང་ཙུན་ད་འདི་དུས་འདི་གཅིག་པུར་མ་ཟད་དེ། སྔོན་འདས་པའི་དུས་སུ་ཡང་ཕ་མ་དང་དགེ་འདུན་ལ་བསོད་ནམས་མཆོག་བྱས་པས་དགེ་བའི་བཤེས་གཉེན་དང་ཕྲད་དེ་
ལམ་གྱི་འབྲས་བུ་ཐོབ་པ་ཡིན་ནོ། །ཀུན་དགའ་བོས་གསོལ་པ། བཅོམ་ལྡན་འདས་དེའི་དངོས་པོ་བསྟན་དུ་གསོལ། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ལེགས་པར་ཉོན་ཅིག །སྔོན་འདས་པའི་དུས་ཚེ་ལོ་ཚད་མེད་པ་སྟོང་
འདས་པའི་ཕ་རོལ་ན་སངས་རྒྱས་བཅོམ་ལྡན་འདས་རྣམ་པར་གཟིགས་ཤེས་བྱ་བ་འཇིག་རྟེན་དུ་བྱུང་སྟེ། ལྷ་དང་མི་ལ་ཕན་པ་དང་བདེ་བའི་དོན་མཛད་ནས་ཡོངས་སུ་མྱ་ངན་ལས་འདས་སོ། །མྱ་ངན་ལས་འདས་ནས་དམ་པའི་ཆོས་ལ་སྤྱོད་པའི་
དགེ་སློང་གཞོན་ནུ་ཅིག་མ་མོ་དང་། མདོ་སྡེ་དང་། འདུལ་བ་ལ་ཤིན་དུ་མཁས་པ། བྱད་གཟུགས་མཛེས་ཤིང་བཟང་བ། མིའི་མཚན་དང་ལྡན་པ། ཆོས་སྟོན་པ་ལ་སྤོབས་པ། ཆོས་སྨྲ་བའི་ང་རོ་དང་ཚིག་སྙན་པས་རྒྱལ་རིགས་དང་བྲམ་ཟེ་རྣམས་ཀྱང་
དེ་དང་བཤེས་ཤིང་དེ་ལ་རིམ་གྲོ་དང་མཆོད་པ་བྱེད་དོ། །དེའི་ཚེ་ན་དགེ་སློང་རྒན་པོ་ཅིག་བྱད་བཞིན་རབ་ཏུ་མི་སྡུག་ལ་མིའི་མཚན་དང་ཡང་མི་ལྡན་པ། སྐད་ང་རོ་ཡང་མི་སྙན་པ། རྒྱུན་དུ་དཀོན་མཆོག་གསུམ་ལ་ཚིག་དང་ང་རོར་བཅས་པས་བསྟོད་
པ་ཞིག་བྱུང་ངོ་། །དེ་ན་མཛོད་གསུམ་དང་ལྡན་པའི་དགེ་སློང་གཞོན་ནུ་དེས་དགེ་སློང་ང་རོ་མི་སྙན་པ་དེ་ལ་འདི་སྐད་ཅེས་སྨྲས་སོ། །དེ་ནས་འདི་ལྟ་བུའི་ང་རོ་མི་སྙན་པ་ཟེར་བ་ནི་ཁྱི་ཟུགས་པའི་སྐད་དང་འདྲའོ་ཞེས་སྨྲས་སོ། །དེ་ནས་དགེ་སློང་རྒན་པོ་དེས་

71-1-137b

དགེ་སློང་གཞོན་ནུ་ལ་ཅི་ཁྱོད་ང་མི་ཤེས་སམ། ང་ལ་ཚིག་ངན་པ་བརྗོད་ཅེས་སྨྲས་སོ། །དེ་དགེ་སློང་མཛོད་གསུམ་དང་ལྡན་པས་སྨྲས་པ། བདག་ཁྱོད་ཤེས་ཏེ་ཁྱོད་ནི་སངས་རྒྱས་རྣམ་པར་གཟིགས་ཀྱི་དམ་པའི་ཆོས་ལ་རབ་ཏུ་བྱུང་བའི་དགེ་སློང་རྒན་པོ་མ་ཧ་ལ་ཞེས་
བྱ་བ་ཡིན་ཏེ། ངས་ཅིའི་ཕྱིར་མི་ཤེས། དགེ་སློང་མ་ཧ་ལས་སྨྲས་པ། ད་ནི་བྱ་བ་བྱས་སོ། །ཚངས་པར་སྤྱོད་པ་སྤྱད་དོ། །སྲིད་པ་ཕྱི་མ་མི་ལེན་ནོ་ཞེས་སྨྲས་སོ། །དེ་ནས་མཛོད་གསུམ་དང་ལྡན་པའི་དགེ་སློང་གཞོན་ནུས་ཚིག་དེ་ཐོས་པ་དང་། སྐྱི་བུང་ཞེས་
བྱས་ཏེ་དངངས་པར་གྱུར་ཏོ། །དེ་ནས་དགེ་སློང་གཞོན་ནུས་དགེ་སློང་མ་ཧ་ལ་ལག་པ་གཡས་པས་བཏེག་སྟེ། ལག་པ་ལས་འོད་ཟེར་ཆེན་པོ་བཀྱེ་ནས་ཕྱོགས་བཅུར་སྣང་བར་བྱས་སོ། །དེ་ནས་མཛོད་གསུམ་དང་ལྡན་པའི་དགེ་སློང་གཞོན་ནུས་དགེ་སློང་
རྒན་པོའི་རྐང་པ་ལ་མགོ་བོས་ཕྱག་འཚལ་ནས་འགྱོད་ཚངས་བྱས་ཏེ་བདག་ནི་མི་ཤེས་པའི་གཏི་མུག་གིས་ཁེབས་པས་འཕགས་པ་ཡིན་པར་མ་ཤེས་ཏེ། སྡིག་པའི་ལས་བྱས་པ་མ་ཤེས་པ་འདི་སྡིག་པར་མི་འགྱུར་ཞིང་བདག་མ་འོངས་པའི་དུས་
སུ་དགེ་བའི་བཤེས་གཉེན་དང་ཕྲད་ཅིང་སྟོན་པ་འཕགས་པ་ཁྱོད་དང་ཕྲད་དེ། ཟག་པ་ཟད་པར་ཤོག་ཤིག་ཅེས་བཤགས་ཤིང་འཐོལ་ལོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་དགེ་སློང་གཞོན་ནུ་མཛོད་གསུམ་
དང་ལྡན་པ་དེས་ཚིག་བརླང་པོ་གཅིག་གིས་དགེ་སློང་རྒན་པོ་ལ་སྨྲས་པས་ཚེ་རབས་ལྔ་བརྒྱའི་བར་དུ་ཁྱིའི་ལུས་མྱོང་བར་གྱུར་ཏོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་ནས་འཁོར་མང་པོ་རྣམས་ཨེ་མའོ་ཨེ་མའོ་འཇིག་རྟེན་འདི་
ན་གདུག་པའི་མཆོག་ནི་ངག་གི་ལས་ལས་འདའ་བ་མེད་དོ། །ཞེས་འཁོར་མང་པོ་ཐམས་ཅད་ཀྱིས་ཚིགས་སུ་བཅད་དེ་འདི་སྐད་ཅེས་དམ་བཅས་སོ། །ལྕགས་ཀྱི་འཁོར་ལོ་ཚ་བ་དག །སྤྱི་བོའི་སྟེང་ན་རྒྱུན་འཁོར་ཡང་། །སྡུག་བསྔལ་བར་ནི་
མི་འཛིན་ཏེ། །ནམ་དུའང་ཚིག་ངན་མི་སྨྲའོ། །ལྕགས་ཀྱི་འཁོར་ལོ་ཚ་བ་དག །སྤྱི་བོའི་ཐོག་ན་རྒྱུན་འཁོར་ཡང་། །སྡུག་བསྔལ་བར་ནི་མི་འཛིན་ཏེ། །ཚིག་ངན་འཕགས་ལ་མི་སྨྲའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ནི་སེམས་ཅན་

71-1-138a

མང་པོའི་དགེ་བའི་བཤེས་གཉེན་དུ་གྱུར་པས། ཉིན་མཚན་དུས་དྲུག་ཏུ་ལྷའི་མིག་གིས་འགྲོ་བ་ལྔའི་སྐྱེ་བོ་རྣམས་ལ་རྟོག་ཅིང་ལྟ་སྟེ། འདུལ་བའི་དུས་ལ་བབ་ན་དེའི་དོན་བྱེད་དོ། །དེའི་ཚེ་ན་ཡུལ་མ་ག་དྷཱ་དང་། ཡུལ་འདི་གཉིས་ཀྱི་བར་ན་ཚོང་པ་ལྔ་བརྒྱ་ཞིག་རྟག་ཏུ་
ཕན་ཚུན་རྒྱུ་བ་ལས། ཕན་ཚུན་དུ་རྒྱུ་བའི་ལམ་དེ་ཡང་འཇིགས་པ་ཆེ་བས་ཚོང་པ་ཅིག་ལ་ཁྱི་དཀར་པོ་ཅིག་ཡོད་དོ། དེའི་ཚེ་ཚོང་པ་གཅིག་གིས་སྲོད་ལ་ཤ་བཙོས་ནས་བཞག་གོ། །ནམ་གྱི་ཆ་སྨད་ལ་ཁྱི་དེས་བརྐུས་ནས་ཟོས། །ཕྱི་དེ་ཉིན་ནམ་ནངས་ནས་ཚོང་པ་གྲོགས་
པོས་ཤ་བཟའ་བར་བྱས་པ་ལས་མ་རྙེད་པས་གདུངས་ནས། ཁྲོས་ཏེ་མཚོན་ཐོགས་ཏེ་ཁྱི་དེའི་རྐང་ལག་བཞི་བཅད་དེ་སུ་ར་ཁུང་དུ་བོར་ནས་དོང་ངོ་། །སུ་ར་ཁུང་ན་ཁྱི་དེ་སྡུག་བསྔལ་ཆེན་པོ་མྱོང་བ་དེ་ཤཱ་རིའི་བུས་ནམ་གྱི་ཆ་སྟོད་ལ་ལྷའི་མིག་གིས་ཀུན་དུ་བཏགས་ནས་རྒྱང་
མ་ནས་ཁྱི་སྡུག་བསྔལ་བ་དེ་མཐོང་ངོ་། །དེ་ནས་ཕྱི་དེ་ཉིན་པར་ནམ་ནངས་ནས་ཆོས་གོས་བགོས། ལྷུང་བཟེད་ཐོགས་ནས་གྲོང་ཁྱེར་ནས་བསོད་སྙོམས་བླངས་ནས། གང་ན་འཇིགས་པའི་ལམ་སུ་ར་ཁུང་དུ་ཕྱིན་ནས་བསོད་སྙོམས་བསླངས་པ་ཁྱི་དེ་ལ་བསྙོད་དོ། །དེ་ནས་
སྤྲོ་བ་དང་དགའ་བའི་ཆོས་བཤད་དོ། །ཁྱི་དེས་ཆོས་ཐོས་ན་ངོ་ཚ་ཞིང་མི་དགའ་སྟེ། དེ་ནས་ཞག་བདུན་ལོན་ནས་སྡིག་པའི་ལས་བོར་ནས་ཐར་ཏེ་དེ་ནས་མིར་སྐྱེས་སོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་ཁྱི་དཀར་པོ་དེ་ནི་ད་ལྟར་དགེ་
སྦྱོང་ཙུན་ད་འདི་ཡིན་ནོ། །སྔོན་འདས་པའི་དུས་ན་འཕགས་པ་ལ་ཚིག་ངན་པ་སྨྲས་པས་ངན་འགྲོར་སྐྱེས་ཏེ། དེ་མ་ཐག་ཏུ་འགྱོད་ཅིང་བཤགས་ནས་ངོ་ཚ་བའི་སེམས་སྐྱེས་ཏེ། བདག་མ་འོངས་པའི་དུས་ན་དགེ་བའི་བཤེས་གཉེན་དང་ཕྲད་པར་ཤོག་ཤིག་པར་སྨོན་ལམ་
བཏབ་བོ། །དེ་ལྟར་སྨོན་ལམ་བཏབ་པས་དགེ་བའི་བཤེས་གཉེན་དང་ཕྲད་དེ་སྡིག་པའི་ལས་བྱང་ནས་མིར་སྐྱེས་ཏེ་སངས་རྒྱས་དང་ཕྲད་པས་ཟག་པ་ཟད་པར་གྱུར་ཏོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཕ་མ་དང་དགེ་བའི་བཤེས་གཉེན་གྱི་དྲིན་
དྲན་པར་གྱིས་ཤིག །དེ་ནས་དེ་ལྟར་དྲིན་དུ་གཟོ་བ་ཤེས་ནས་དྲིན་ལན་བསབ་པར་བྱའོ། །དགེ་བའི་བཤེས་གཉེན་ཞེས་བྱ་བ་ནི་ཕན་པའི་དོན་དུ་འགྱུར་བའི་རྒྱུ་ཡིན་ནོ་ཞེས་བཀའ་སྩལ་པ་དང་། དེའི་ཚེ་སེམས་ཅན་ཚད་མེད་པ་བརྒྱ་སྟོང་སྙེད་བླ་ན་མེད་པ་ཡང་དག་པར་རྫོགས་

71-1-138b

པའི་བྱང་ཆུབ་ཏུ་སེམས་བསྐྱེད་པ་ནས་ཉན་ཐོས་དང་རང་སངས་རྒྱས་ཀྱི་བར་དུ་སེམས་བསྐྱེད་དོ། །འཁོར་མང་པོ་རྣམས་སངས་རྒྱས་ཀྱིས་གསུངས་པ་ལ་རབ་ཏུ་དགའ་ནས་ཕྱག་བྱས་ཏེ་ཕྱིར་དོང་ངོ་། །ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་ལས་བསྟན་བཅོས་
ཀྱི་ལེའུ་ཞེས་བྱ་སྟེ་ལྔ་པའོ།། །། ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ། བམ་པོ་བཞི་པ། དེའི་ཚེ་བཅོམ་ལྡན་འདས་ལ་འཁོར་བཞི་པོས་མདུན་གྱིས་བྱས་ནས་མཆོད་པ་བྱས། རིམ་གྲོ་བྱས་བཀུར་སྟི་བྱས་ཏེ་ཚིག་གིས་བསྟོད་པ་
བྱས་སོ། །དེའི་ཚེ་དེ་བཞིན་གཤེགས་པས་འཛུམ་པ་མཛད་དེ་ཞལ་གྱི་སྒོ་ནས་འོད་ཟེར་སྔོན་པོ་དང་། སེར་པོ་དང་དམར་པོ་དང་། དཀར་པོ་དང་ལྡན་པ་སྙིང་རྗེ་ཆེན་པོ་ཞེས་བྱ་བ་བཀྱེ་ནས། ཕྱོགས་བཅུའི་འཇིག་རྟེན་གྱི་ཁམས་སྲིད་པའི་རྩེ་མོ་མན་ཆད་སེམས་ཅན་
དམྱལ་བ་ཆེན་པོ་བཅྭ་བརྒྱད་ཀྱི་བར་དུ་སྣང་བར་བྱས་ནས། ལྷ་སྦྱིན་གྱི་ལུས་ལ་ཡང་འོད་ཀྱིས་སྣང་བར་གྱུར་ཏེ། ལྷ་སྦྱིན་སྡུག་བསྔལ་མྱོང་བ་ལས་བདེ་བར་བྱས་སོ། །དེ་ནས་འཁོར་མང་པོའི་རྣམས་ཐམས་ཅད་ཚིག་འཐུན་པར་དེ་བཞིན་གཤེགས་པ་ལེགས་སོ་
ལེགས་སོ་ཞེས་བསྟོད་དེ། བཅོམ་ལྡན་འདས་ནི་བྱམས་པ་ཆེན་པོ་དང་ལྡན་པ། ཐུགས་རྗེ་ཆེན་པོ་དང་ལྡན་པ་ཡང་དག་པ་སྟེ། དགྲ་དང་གཉེན་ལ་ཐུགས་སྙོམས་པའོ། །ལྷ་སྦྱིན་ལྟ་བུ་རྟག་པར་བཅོམ་ལྡན་འདས་ལ་གནོད་པ་དང་དགྲར་བགྱིད་པ་ལགས་ན། བཅོམ་ལྡན་
འདས་ནི་གནོད་པ་ལ་ཐུགས་བརྩེ་བར་དགོངས་ཏེ་ཐུགས་རྗེ་ཆེན་པོའི་འོད་བཀྱེ་ནས་ལྷ་སྦྱིན་གྱི་ལུས་ལ་རེག་པར་བྱས་ཏེ་སྡུག་བསྔལ་ལས་ཐར་བར་མཛད་དོ། །དེ་ནས་བཅོམ་ལྡན་འདས་ཀྱིས་འཁོར་མང་པོ་ལ་འདི་སྐད་ཅེས་བཀའ་སྩལ་ཏོ། །ལྷ་སྦྱིན་
འདི་ནི་ཚེ་འདི་འབའ་ཤིག་ལ་ང་ལ་གནོད་པ་བྱེད་པར་མ་ཟད་ཀྱི། སྔོན་འདས་པའི་དུས་ན་ཡང་ང་ལ་རྟག་ཏུ་གནོད་པ་བྱས་ཀྱང་བྱམས་པ་དང་སྙིང་རྗེའི་ཤུགས་ཀྱིས་རྟག་པར་ཕན་པ་དང་བདེ་བའི་དོན་བྱས་སོ། །དེ་ནས་ཀུན་དགའ་བོས་
འཁོར་མང་པོའི་བསམ་པ་སེམས་ཀྱིས་ཤེས་ཏེ། ཀུན་གྱི་ཐེ་ཙོམ་གཅོད་པའི་ཕྱིར། སྟན་ལས་ལངས་ནས། བླ་གོས་ཕྱོགས་གཅིག་ཏུ་བྱས་ཏེ། པུས་མོ་གཡས་

71-1-139a

པའི་ལྷ་ང་ས་ལ་བཙུགས་ནས་ཐལ་མོ་སྦྱར་བ་བཏུད་དེ། དེ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷ་སྦྱིན་འདི་སྔོན་འདས་པའི་དུས་ན། བཅོམ་ལྡན་འདས་ལ་གནོད་པ་ཅི་དག་བགྱིས་པ་བཅོམ་ལྡན་འདས་ཀྱིས་དངོས་པོ་དེ་དག་
བསྟན་དུ་གསོལ། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ལེགས་པར་ཉོན་ཅིག་དང་ཁྱོད་ལ་དགྲོལ་ཞིང་བཤད་པར་བྱའོ། །བཅོམ་ལྡན་འདས་ཀྱིས་བཀའ་སྩལ་པ། སྔོན་ལོ་ཚད་མེད་པ་སྟོང་འདས་པའི་ཕ་རོལ་ན་ཡུལ་བཱ་ར་ཎ་སཱི་ཞེས་
བྱ་བར་སངས་རྒྱས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ་
འཇིག་རྟེན་དུ་བྱུང་སྟེ། ལོ་སྟོང་ཕྲག་བཅུའི་བར་དུ་སེམས་ཅན་གྱི་དོན་མཛད་ནས་མྱ་ངན་ལས་འདས་སོ། །མྱ་ངན་ལས་འདས་པའི་འོག་ཏུ་དམ་པའི་ཆོས་ལོ་ཁྲི་ཕྲག་ཉི་ཤུའི་བར་དུ་གནས་པར་གྱུར་ཏོ། །གཟུགས་བརྙན་གྱི་ཆོས་ཀྱང་ནུབ་ཅིང་མེད་པ་ནས་
ཡུལ་བཱ་ར་ཎ་སཱི་ཞེས་བྱ་བའི་རྒྱལ་པོ་མ་ཧཱ་རཱ་ཛཱ་ཞེས་བྱ་བ་རང་བཞིན་གྱིས་དགེ་ཞིང་མཁས་པའི་བློ་དང་ལྡན་པ། ཡང་དག་པའི་ཆོས་ཀྱིས་ཡུལ་གྱི་སྲིད་འཚོ་སྟེ་མི་རྣམས་ཀྱང་བདེ་སྐྱིད་དོ། །རྒྱལ་པོ་དེ་མཐའི་རྒྱལ་ཕྲན་དྲུག་བཅུ་དང་། གྲོང་ཁྱེར་ཆེན་པོ་
བརྒྱད་བརྒྱ་ལ་དབང་སྒྱུར་ཏེ། བལ་གྱི་གླང་པོ་ཆེ་ལྔ་བརྒྱ་ཡང་ཡོད་དོ། །བཙུན་མོ་ཉི་ཁྲི་ཡོད་ཀྱང་སྲས་མེད་པས། རྒྱལ་པོ་དེ་རྒྱུན་དུ་འཇིག་རྟེན་གྱི་ལྷ་དང་། རི་དང་ཆུ་ཀླུང་དང་། ཤིང་གི་ལྷ་རྣམས་ལ་མཆོད་འབྲས་བྱེད་ཅིང་གསོལ་བ་བཏབ་ནས་ལོ་བཅུ་
གཉིས་ལོན་པ་དང་། བཙུན་མོ་ཆེན་མོ་ལ་ཡང་སྲས་མངའ་བར་གྱུར། བཙུན་མོ་འབྲིང་མོ་ལ་ཡང་སྲས་མངའ་བར་གྱུར་ཏེ། རྒྱལ་པོ་ཤིན་དུ་དགའ་ནས་རྒྱལ་པོ་ལག་དར་ཏེ་རིམ་གྲོ་དང་། བཀུར་སྟི་དང་། མལ་ཆ་བྱ་བ་དང་། ཟས་དང་། སྐོམ་དང་། དེ་ལ་སོགས་
པ་ཡོ་བྱད་ཀྱི་བར་དུ་འཇམ་ཞིང་བཟང་བ་སྦྱར་ཏེ། རིམ་གྲོ་བྱས་སོ། །དེ་ལྟར་ཟླ་བ་བཅུའི་བར་དུ་རིམ་གྲོ་བྱས་ནས་བཙུན་མོ་ཆེན་མོ་ལ་སྲས་མངའ་བྱད་བཟང་ལ་མཛེས་ཤིང་མཚན་བཟང་པོས་བརྒྱན་པ། མིའི་མཚན་རྫོགས་པར་ལྡན་པ་ཞིག་བྱུང་ངོ་། །བཙུན་

71-1-139b

མོ་འབྲིང་མོ་ལ་ཡང་སྲས་ཅིག་བྱུང་བས་རྒྱལ་པོ་རབ་ཏུ་དགའ་བས་བློན་པོ་རྣམས་དང་། མཚན་མཁན་རྣམས་དང་། བྲམ་ཟེ་རྣམས་བསྡུས་ནས་སྲས་བུ་བསྟན་ནས་མཚན་བསྟན་ཏོ། །མཚན་མཁན་གྱིས་མཚན་བལྟས་ནས་རྒྱལ་བུའི་མཚན་གདགས་པའི་ཕྱིར་
སྲས་བུ་འདི་བལྟམ་པའི་ཚེ་ལྟས་ཇི་ལྟ་བུ་བྱུང་ཞེས་དྲིས་སོ། །རྒྱལ་པོས་སྨྲས་པ། རྒྱལ་བུ་ཆེན་པོའི་ཡུམ་བཙུན་མོ་ཆེན་མོ་ནི་སྔོན་རང་བཞིན་གྱིས་ཁྲོ་ལ་ཕྲག་དོག་ཆེ་ཞིང་། ང་རྒྱལ་བྱེད་པ་ལས་སྲས་མངལ་དུ་ཆགས་ནས་ནི་རང་བཞིན་གྱིས་དགེ་དེས་པར་
གྱུར་ནས། རྟག་ཏུ་འཛུམ་པ་དང་ལྡན་ཞིང་སེམས་ཅན་ལ་ཡང་བུ་གཅིག་པ་དང་འདྲ་བར་བྱམས་ཤིང་བརྩེ་བའི་སེམས་ཀྱིས་འཛུམ་པ་དང་ལྡན་ཞིང་གསོང་པོར་སྨྲ་བར་གྱུར་ཏོ། །དེ་ནས་མཚན་མཁན་གྱིས་རྒྱལ་བུའི་མཚན་དགེ་དོན་ཞེས་བཏགས་སོ། །བཙུན་མོ་འབྲིང་
མོ་ལ་སྲས་མངའ་བའི་ཚེ་སྔ་ལྟས་ཇི་ལྟ་བུ་བྱུང་ཞེས་དྲིས་ན། སྲས་བུ་འདིའི་མ་རང་བཞིན་གྱིས་དགེ་དེས་འཛུམ་པ་དང་ལྡན་ཞིང་ཚིག་གིས་སྔར་གསོང་པོར་སྨྲ་ཞིང་ཀུན་གྱི་ཡིད་ཚིམ་པར་བྱེད་པ་ལས། སྲས་མངལ་དུ་ཆགས་ནས་རང་བཞིན་གྱིས་ཁྲོ་ཞིང་ཞེ་སྡང་ཆེ་
བ་དང་། ཕྲག་དོག་དང་ང་རྒྱལ་བྱེད་པར་གྱུར་ཏོ། །མཚན་མཁན་གྱིས་སྨྲས་པ། འདི་ཡང་སྲས་བུའི་སྔོན་གྱི་ལས་འཕྲོ་ཡིན་པས། སྲས་བུའི་མཚན་ངན་དོན་ཞེས་བཏགས་སོ། །དེ་ནས་རྒྱལ་བུ་གཉིས་གསོས་བསྐྱེད་དེ་ལོ་བཅུ་བཞི་ལོན་ནས་རྒྱལ་བུ་
དགེ་དོན་རང་བཞིན་གྱིས་མཁས་པའི་བློ་དང་བྱམས་པའི་སེམས་སུ་ལྡན་ཏེ། སྦྱིན་པ་བྱེད་པ་ལ་དགའ་བས་ཕ་མ་ཡང་ལྷག་པར་སྲས་བུ་དེ་ལ་མིག་དང་འདྲ་བར་སེམས་སོ། །རྒྱལ་བུ་ངན་དོན་ནི་རང་བཞིན་གྱིས་ཁྲོ་བས་ན་ཕ་མ་ཡང་དེ་ལ་མི་དགའ་སྟེ། 
སྡང་བས་རྒྱལ་བུ་ངན་དོན་རྒྱུན་དུ་ཕྲག་དོག་བྱེད་དེ་ཕུ་བོ་ལ་གནོད་པ་བྱ་བར་སེམས་སོ། །ཕྱིས་དུས་གཞན་ཞིག་ན་རྒྱལ་བུ་དགེ་དོན་འཁོར་དང་བཅས་པ་རོལ་མོ་བྱེད་ཅིང་ཕོ་བྲང་གི་ཕྱི་རོལ་དུ་ལྟད་མོ་ལྟ་ཞིང་འཆག་ཏུ་སོང་བ་ལས་ཞིང་རྨོ་
བའི་རོལ་ནས་སྲིན་བུ་དག་བྱུང་བ་ལས་བྱ་མང་པོ་དག་ཐུ་ཞིང་ཟ་བ་མཐོང་ངོ་། །རྒྱལ་བུ་དགེ་དོན་གྱིས་དེ་ལྟ་བུ་དག་མཐོང་ནས་སྙིང་རྗེ་བའི་སེམས་སྐྱེས་ཏེ། བདག་ནི་ཕོ་བྲང་ཟབ་མོ་ནས་སྐྱེས་པས་འདི་ལྟ་བུའི་དངོས་པོ་མ་མཐོང་མ་ཐོས་

71-1-140a

ན། འཁོར་རྣམས་ལ་འདི་དག་ཅིའི་ཕྱིར་གཅིག་ལ་གཅིག་གནོད་པ་བྱེད་ཅིང་ཟ་ཞེས་དྲིས་སོ། །འཁོར་རྣམས་ཀྱིས་རྒྱལ་བུ་ལ་སྨྲས་པ། ད་ལྟར་རྒྱལ་པོ་མངའ་བའི་ཡུལ་འདི་ཡང་འབངས་ལ་རྟེན་ཏེ། འབངས་ཀྱང་ཁ་ཟས་ལ་ལྟོས་ཏེ་ཁ་ཟས་ནི་ཞིང་རྨོས་པ་ལས་འབྲུ་སྣ་
ལྔ་སྐྱེས་ཏེ་སེམས་ཅན་གྱི་སྲོག་འཛིན་ཏོ། །རྒྱལ་བུས་དེ་ལ་རེ་སྡུག་རེ་སྡུག་ཅེས་སྨྲས་ཏེ། ཡང་སོང་སོང་བ་ལས་སྐྱེས་པ་དང་། བུད་མེད་དག་སྐུད་པ་འཁལ་བ་དང་འཐག་པའི་ལས་བྱེད་དེ། ཕན་ཚུན་བསྐྱོད་ཅིང་ཉོན་མོངས་པར་མཐོང་ངོ་། །དེ་དག་མཐོང་ནས་མི་འདི་
དག་ཅི་བྱེད་ཅེས་གཡོག་པོ་གཡས་གཡོན་ན་འདུག་པ་ལ་དྲིས་སོ། །དེ་དག་གིས་སྨྲས་པ། མི་འདི་དག་ནི་བཀལ་བ་དང་འཐག་པའི་ལས་བྱེད་དེ། དེས་བདག་གི་ལུས་གཡོག་ཅིང་བདག་གི་གོས་བྱེད་དོ། །དེ་དག་ཡང་རེ་སྡུག་ཉོན་མོངས་པར་གྱུར་པའི་ལས་བྱེད་
དོ། །དེ་ནས་ཡང་སོང་སོང་བ་ལས་མི་མང་པོ་དག་བ་ལང་དང་། རྔ་མོ་དང་། རྟ་དང་ཕག་དང་། ལུག་གསོད་ཅིང་ལྤགས་པ་བཤུ་བ་དག་མཐོང་ནས་འདི་དག་ཅི་བྱེད་ཅེས་དྲིས་སོ། །སྨྲས་པ་འདི་དག་ནི་གསོད་པའི་ལས་བྱེད་དེ། ཤས་འཚོ་ཞིང་བགོ་བ་དང་
བཟའ་བའི་སྤོགས་བྱེད་དོ། །དེས་སྲོག་འཚོ་བར་བྱེད་དོ། །རྒྱལ་བུས་དེ་སྐད་ཅེས་ཐོས་ནས། བ་སྤུ་དང་ལུས་ཀྱི་ཤ་ཀུན་འགུལ་ཏེ། ཀྱི་ཧུད་ཀྱི་ཧུད་གསོད་པ་ལ་སྙིང་མི་བཟོད་དོ། །གཅིག་གིས་གཅིག་གི་ཉིང་ཤ་ཉིང་ཟ་ཞིང་བསྐལ་པ་བགྲངས་པའི་
བར་དུ་གཅིག་ལ་གཅིག་གསོད་པའི་ལས་བྱེད་དོ། །དེ་ནས་ཡང་སོང་སོང་བ་ལས་མི་མཆིས་པོ་དག་ཅིག་ཉ་རྒྱ་དང་བྱ་རྒྱ་ཐོགས་ཤིང་བྱ་དང་། ཉ་གསོད་དེ། གཅིག་ལ་གཅིག་ཉིད་ཤ་ཟ་བར་མཐོང་ངོ་། །དེ་ནས་འདི་ཅི་བྱེད་ཅེས་དྲིས་སོ། །གསོལ་པ། 
འདི་དག་ནི་བྱ་དང་ཉ་ཤོར་བ་ཡིན་ཏེ། གསོད་པའི་ལས་འདི་ལྟ་བུ་བྱེད་ཅིང་བགོ་བ་དང་ཟས་ཚོལ་ལོ། །རྒྱལ་བུ་དགེ་དོན་གྱིས་དེ་སྐད་ཅེས་སྨྲས་པའི་ཚིག་དེ་ཐོས་ནས་མིག་མཆི་མས་གང་སྟེ། འཇིག་རྟེན་གྱི་སེམས་ཅན་འདི་དག་ནི་སྡིག་པ་མི་དགེ་
བའི་ལས་བྱེད་དེ། སྡུག་བསྔལ་ལས་ནམ་དུ་ཡང་མི་ཐར་རོ་སྙམ་ནས་མི་དགའ་ཞིང་མྱ་ངན་གྱིས་ནོན་ཏེ་ཕྱིར་ཕོ་བྲང་དུ་འོངས་སོ། །ཡབ་རྒྱལ་པོས་རྒྱལ་བུ་མི་དགའ་ཞིང་མྱ་ངན་བྱེད་པའི་ཚུལ་གྱིས་ཕྱིར་འོངས་པ་མཐོང་ནས་རྒྱལ་བུ་ལ་ཅི་

71-1-140b

ཞིག་གིས་མི་དགའ་ཞེས་དྲིས་པ་དང་། རྒྱལ་བུས་ཀྱང་ཇི་ལྟར་མཐོང་བའི་དངོས་པོ་དེ་དག་ཡབ་རྒྱལ་པོ་ལ་ཞིབ་ཏུ་གསོལ་ཏོ། །རྒྱལ་པོས་རྒྱལ་བུ་ལ་སྨྲས་པ་འདི་ལྟ་བུའི་དངོས་པོ་ནི་ཡོངས་ཀྱི་ཡོད་ཅིང་སྲིད་པ་ཡིན་ན་མྱ་ངན་བྱར་ཡང་ཅི་ཞིག་
ཡོད་རྒྱལ་བུས་གསོལ་པ། བདག་རྒྱལ་པོ་ལ་འདོད་པ་གཅིག་ཅིག་གསོལ་ན་རྒྱལ་པོས་གནང་ངམ། རྒྱལ་པོས་སྨྲས་པ། ང་ལ་བུ་ཁྱོད་གཅིག་པུར་ཟད་དེ་བྱམས་ཤིང་སྡུག་པས་ཁྱོད་ཀྱི་ཡིད་དང་འགལ་བར་མི་བྱེད་དོ། །རྒྱལ་བུས་
གསོལ་པ། བདག་ནི་ཡབ་རྒྱལ་པོའི་བང་མཛོད་ན་ནོར་དང་རིན་པོ་ཆེ་དང་། བཟའ་བ་དང་། བཏུང་བ་ཐམས་ཅད་སེམས་ཅན་ཐམས་ཅད་ལ་སྦྱིན་པར་བགྱིའོ་ཞེས་གསོལ་པ་དང་། རྒྱལ་པོས་ཀྱང་ཁྱོད་ཀྱི་ཡིད་དང་འགལ་བར་མི་བྱེད་ཀྱིས་ཅི་དགའ་
མགུར་སྦྱིན་པ་གྱིས་ཤིག་ཅེས་བཀའ་སྩལ་ཏོ། །དེ་ནས་རྒྱལ་བུ་དགེ་དོན་གྱིས་བློན་པོ་བཀུག་ནས་རྒྱལ་པོའི་བང་མཛོད་ཕྱེ་ནས་བལ་གྱི་གླང་པོ་ཆེ་ལྔ་བརྒྱ་ལ་ནོར་དང་རིན་པོ་ཆེ་བཀལ་ཏེ་གྲོང་ཁྱེར་གྱི་སྒོ་བཞིར་སྤུངས་ནས་འགྲོ་བ་མང་པོ་དག་བགོ་བ་འདོད་
དམ། བཟའ་བ་དང་བཏུང་བ་འདོད་དམ། ཅི་འདོད་པ་ཡིད་བཞིན་དུ་ལོང་ལ་ཁྱེར་ཅིག་ཅེས་ཕྱོགས་བཞིར་བསྒྲགས་སོ། །དེ་ལྟར་རྒྱལ་བུ་དགེ་དོན་གྱི་སྙན་པ་ཕྱོགས་སུ་བསྒྲགས་པས་ཐམས་ཅད་འདུས་ནས་ཅི་འདོད་པ་ཡིད་བཞིན་དུ་ཁྱེར་རོ། །
རིང་པོ་མ་ལོན་པར་རྒྱལ་པོའི་བང་མཛོད་སུམ་ཆ་ཞིག་ཟད་ནས། བློན་པོ་རྣམས་ཀྱིས་རྒྱལ་པོ་ལ་དཀོར་མཛོད་སུམ་ཆ་གཅིག་བས། རྒྱལ་བུས་མ་མཆིས་པར་བགྱིས་ཀྱིས་རྒྱལ་པོ་དགོངས་ཤིག་ཅེས་གསོལ་པ་དང་། རྒྱལ་པོས་ང་ནི་
རྒྱལ་བུའི་ཡིད་དང་འགལ་བར་བྱེད་མི་ནུས་སོ་ཞེས་བཀའ་སྩལ་ཏོ། །ད་ནི་རྒྱལ་པོའི་བང་མཛོད་སུམ་ཆ་གཉིས་བས་ཀྱི་རྒྱལ་པོ་དགོངས་ཤིག་བཀའ་སྩལ་པ། ང་ནི་རྒྱལ་བུའི་ཡིད་དང་འགལ་བར་བྱེད་མི་ནུས་སོ། །ཁྱོད་ཀྱིས་ཐབས་ཅི་ལེགས་
སུ་ཅུང་ཟད་བཀག་སྟེ་ཡིད་དང་མི་འགལ་བར་གྱིས་ཤིག་པར་བཀའ་སྩལ་ཏོ། །དེ་ནས་ཡང་རྒྱལ་བུ་དགེ་དོན་བང་མཛོད་འབྱེད་ཏུ་སོང་བ་ལས། བང་མཛོད་ལ་དབང་བའི་བློན་པོ་དོན་གཉེར་དུ་སོང་ནས་རིང་ཞིག་མ་ཁུགས་ཏེ་འཕྱིས་པར་གྱུར་པས་རྒྱལ་བུ་དགེ་དོན་འདི་སྐད་དུ། བང་

71-1-141a

མཛོད་བསྲུང་བའི་བློན་པོ་ཆུང་ངུ་བདག་གི་ཡིད་དང་འགལ་བར་བྱེད་པའི་ཐུགས་མི་ཐུབ་སྟེ། འདི་ནི་རྒྱལ་པོ་ཡབ་ཀྱི་བཀའ་ཡིན་དུ་ངེས་པས་བུ་སྲི་ཞུ་ཅན་ཞེས་བྱ་བ་ཕའི་བང་མཛོད་སྟོངས་པར་བྱ་བར་མི་རིགས་ཀྱིས་ད་བདག་ཉིད་ཀྱིས་ནོར་དང་རིན་པོ་ཆེ་བཙལ་ལ་
སེམས་ཅན་ཐམས་ཅད་ཚིམ་པར་བྱའོ། །གལ་ཏེ་བདག་གིས་སེམས་ཅན་ཐམས་ཅད་ལ་བགོ་བ་དང་། བཟའ་བ་དང་། བཏུང་བ་ཡིད་བཞིན་དུ་ཆོག་པར་སྦྱིན་མི་ནུས་ན་རྒྱལ་པོ་ཆེན་པོའི་སྲས་སུ་ཇི་སྐད་གདགས་ཤེས་སྨྲས་ནས་བློན་པོ་ཆེན་པོ་དང་། བློན་པོ་ཕྲ་མོ་
ཡན་ཆད་བསྡུས་ཏེ། ནོར་དང་། ཁེ་སྤོགས་ཚོལ་བ་དག་ཅིའི་སྒོ་ནས་མཆོག་ཏུ་འགྱུར་ཞེས་བགོས་སོ། །དེ་ལ་བློན་པོ་ཆེན་པོ་གཅིག་གིས་སྨྲས་པ། དེ་ལྟར་སྤོགས་ཤིག་བྱ་ན་ཞིང་རྨོ་བ་ལས་འདའ་བ་མེད་དེ་གཅིག་ལ་ཁྲིར་འགྱུར་རོ། །ཡང་བློན་པོ་ཆེན་པོ་གཅིག་
གིས་སྨྲས་པ། འཇིག་རྟེན་ན་ཁེ་སྤོགས་བྱ་བའི་ནང་ན་རྐང་འགྲོས་ལས་ཁྱུ་བཙུགས་ལ་འབྲོག་བཟང་པོར་བཞག་ན་མང་དུ་འཕེལ་ཏེ་སྤོགས་དེ་ལས་ཆེ་བ་མེད་དོ། །ཡང་བློན་པོ་གཅིག་གིས་སྨྲས་པ། འཇིག་རྟེན་ན་ཁེ་སྤོགས་ཤིག་བྱ་ན་རྒྱ་མཚོར་
ཞུགས་ལ་ནོར་བུ་རིན་པོ་ཆེ་བཙལ་བ་ལས་འདའ་བ་མེད་དོ། །གལ་ཏེ་ཡིད་བཞིན་གྱི་ནོར་བུ་རིན་པོ་ཆེ་རྙེད་ན་ཡིད་བཞིན་དུ་སེམས་ཅན་ཐམས་ཅད་ལ་ཚིམ་པར་སྦྱིན་པར་འགྱུར་རོ། །དགེ་དོན་གྱིས་སྨྲས་པ། འདི་ནི་བདག་གི་ཡིད་ལ་བབ་སྟེ་རུང་ངོ་ཞེས་
ཕོ་བྲང་དུ་སོང་སྟེ། ཡབ་རྒྱལ་པོ་ལ་བདག་ནི་རྒྱ་མཚོ་ཆེན་པོར་ཞུགས་ཏེ། ནོར་བུ་རིན་པོ་ཆེ་ལེན་དུ་འགྲོ་བར་འདོད་དོ་ཞེས་གསོལ་ཏོ། །རྒྱལ་པོས་ཚིག་དེ་ཐོས་ནས་དཔེར་ན་མི་བརྣངས་པ་ལྟར་སྐྱུག་དུ་ཡང་མེད་ལ་མིད་ཏུ་ཡང་མེད་པ་ལྟར་མི་བདེ་བ་ལྟར་གྱུར་ནས་
རྒྱལ་བུ་ལ་འདི་སྐད་ཅེས་སྨྲས་སོ། །ཡུལ་འདི་ཡང་ཁྱོད་ཀྱི་ཡུལ་ཡིན་ཏེ། བང་མཛོད་དང་། ནོར་རིལ་དང་། རིན་པོ་ཆེ་ཅི་ཡོད་པ་ཡང་ཁྱོད་དབང་བས་ཡིད་བཞིན་དུ་སྤྱད་དུ་ཡོད་པས་ན་བདག་ཉིད་རྒྱ་མཚོར་འཇུག་ཅི་དགོས། ཁྱོད་ནི་རྒྱལ་པོའི་སྲས་ཡིན་ཏེ། ཕོ་བྲང་ཟབ་མོའི་ནང་དུ་སྐྱེས་པས་ཉལ་
ན་ནི་གུར་ཡོལ་བ་ཅན་གྱིས་བསྐོར། ཁ་ཟས་ནི་ཅི་འདོད་པ་དང་ལྡན་ཏེ། ལམ་དུ་ཞུགས་ཏེ་འདྲོན་དུ་འགྲོ་ན་ཉོན་མོངས་ཤིང་བཀྲེས་པ་དང་། སྐོམ་པ་དང་། ཚ་བས་ཉེན་པར་འགྱུར་ཡང་སུས་ཤེས་དེ་མ་ཡིན་པ་རྒྱ་མཚོའི་ནང་ན་བགེགས་སུ་གྱུར་པ་ཡང་གཅིག་ཏུ་མ་ཟད་དེ་མང་ངོ་། །འདི་ལྟ་སྟེ། 

71-1-141b

ཡི་དགས་མ་རུངས་པ་དང་། ཀླུ་གདུག་པ་དང་། དབའ་རླབས་འཁྱིལ་པ་དང་། རླུང་དྲག་པོས་བསྒུལ་ཞིང་གཡེང་བ་དང་། ཆུའི་མདོག་དང་། རི་དང་། ཆུ་སྲིན་དང་། ཉ་ཆེན་པོ་ལ་སོགས་པ་བགེགས་མང་བས་བརྒྱ་སྟོང་ཙམ་སོང་ཡང་ཕྱིར་ཡང་འཁོར་བ་ནི་གཅིག་གཉིས་ཙམ་ལས་
མེད་ན་ཅིའི་ཕྱིར་ཁྱོད་རྒྱ་མཚོ་ཆེན་པོར་འགྲོ་བར་སེམས་དེ་ནི་ཁོ་བོ་མི་ཉན་ཏོ། །དེ་ནས་རྒྱལ་བུ་དགེ་དོན་ལུས་སྨད་ལྔ་ས་ལ་ཁ་སྦུབ་ཏུ་ས་ལ་ཕབ་སྟེ། རྐང་ལག་བཞི་ཡང་བརྐྱང་ནས་ཡབ་རྒྱལ་པོ་དང་ཡུམ་ལ་འདི་སྐད་ཅེས་གསོལ་ཏོ། །གལ་ཏེ་བདག་རྒྱ་མཚོར་
མཆིར་མ་གནང་ན་བདག་འདི་ཁོ་ནར་སྲོག་ཡོངས་སུ་འདོར་གྱི་འདི་ལས་མི་ལྡང་ངོ་། །དེའི་ཚེ་རྒྱལ་པོ་ཆེན་པོ་དང་བཙུན་མོ་དག་དེ་ལྟར་གྱུར་པ་མཐོང་ནས་མིག་མི་བཙུམ་པ་ལྟར་བལྟ་ཞིང་། རྒྱལ་བུ་ཁྱོད་ལོངས་ལ་བཟའ་བ་དང་། བཏུང་བ་འཐུང་ཤིག་ཅེས་ཐབས་སྣ་
ཚོགས་ཀྱིས་སྤྲོ་བ་བསྐྱེད་ཀྱང་། རྒྱལ་བུ་དགེ་དོན་མ་ཉན་ཏེ། བདག་རྒྱ་མཚོ་ཆེན་པོར་མཆིར་མི་གནང་ན་ནམ་དུ་ཡང་བཟའ་བ་དང་བཏུང་བ་དག་མི་འཚལ་ལོ་ཞེས་གསོལ་ཏོ། །རྒྱལ་པོ་དང་བཙུན་མོ་མི་དགའ་བའི་མྱ་ངན་གྱིས་གདུངས་ཏེ་དྲུང་ན་ངུ་ཞིང་སྨྲེ་སྔགས་འདོན་ནས་
ས་ལ་འགྲེའོ། །དེ་བཞིན་དུ་ཉི་མ་གཅིག་མ་ཟོས་མ་འཐུངས་པ་ནས་ཞག་གཉིས། ཞག་གསུམ་ཞག་དྲུག་གི་བར་དུ་མ་ཟོས་མ་འཐུངས་པས་ཡབ་ཡུམ་ལྷག་པར་ཡང་མྱ་ངན་གྱིས་གདུངས་པར་གྱུར་ཏེ། སྲོག་མི་འཚོ་བར་དོགས་ནས་ཞག་བདུན་ལོན་པ་
དང་ཡབ་ཡུམ་གྱིས་རྐང་ལག་པང་དུ་བླངས་ཏེ་རྐང་ལག་ལ་འོ་བྱས་ཏེ་ཚིག་སྙན་པ་འཇམ་པོས་ད་ལོངས་ལ་བཟའ་བ་དང་། བཏུང་བ་འཐུང་ཤིག །ཁ་ཟས་ཀྱིས་བསྡུས་པའི་ལུས་འདི་ནི་ཁ་ཟས་ལ་བརྟེན་པའི་རྐྱེན་གྱིས་གསོན་པ་ཡིན་གྱིས། མ་ཟོས་མ་འཐུངས་ན་ཁྱོད་
སྲོག་མི་འཚོའོ་ཞེས་སྤྲོ་བ་བསྐྱེད་ཀྱང་རྒྱལ་བུ་མ་ཉན་ཏེ། ཡབ་དང་ཡུམ་གྱིས་བདག་མཆི་བར་མ་གནང་ན་ངེས་པར་འདི་ཁོ་ན་ལས་ནམ་དུ་ཡང་མི་ལྡང་ངོ་ཞེས་གསོལ་ཏོ། །དེའི་ཚེ་ན་བཙུན་མོ་ཆེན་མོས་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་བུས་བསམས་པའི་སེམས་
འདི་ཤིན་དུ་སྤྱོད་དཀའ་བས་རྒྱལ་བུ་འདི་ཉིད་དུ་ཚེའི་དུས་བྱེད་པར་ཐུགས་བཟོད་དམ། ཡིད་དང་འགལ་བར་མཛད་མི་རིགས་ཀྱི། ཐུགས་རྗེ་བར་དགོངས་ཏེ་རྒྱ་མཚོ་ཆེན་པོར་མཆི་བར་གནང་བའི་རིགས་སོ། །མཆིར་གནང་ན་གལ་ཏེ་བརྒྱ་ལམ་ན་སླར་འཁོར་ཡང་སྲིད་ཀྱིས། 

71-1-142a

ད་མ་གནང་ན་གདོན་མི་ཟ་བར་ཚེའི་དུས་བགྱིད་པར་འགྱུར་རོ་ཞེས་གསོལ་ཏོ། །རྒྱལ་པོས་ཀྱང་ཐུགས་མ་བཟོད་ནས་འགྲོ་བར་གནང་ངོ་། །དེ་ལྟར་གནང་ནས་དེའི་ཚེ་རྒྱལ་བུ་དགེ་དོན་ཉལ་བ་ལངས་ཏེ་རབ་ཏུ་དགའ་མགུ་རངས་ནས་ཡབ་རྒྱལ་པོའི་ཞབས་ལ་
མགོ་བོས་ཕྱག་འཚལ་ལོ། །རྒྱལ་པོའི་འཁོར་བཙུན་མོ་དང་སླས་རྣམས་དང་། མི་མང་པོ་བརྒྱ་སྟོན་སྙེད་གཅིག་ལ་གཅིག་འདི་སྐད་དུ།  རྒྱལ་བུ་དགེ་དོན་ད་ལྟར་ལངས་ཏེ་རབ་ཏུ་དགའ་ནས་བཟའ་བ་དང་བཏུང་བའི་ལས་བྱེད་དོ་ཞེས་སྨྲས་སོ། །དེ་ནས་རྒྱལ་
པོས་རྒྱལ་བུ་ལ་ཁྱོད་འདི་ལྟར་དུས་ཀྱིས་རྒྱ་མཚོར་འགྲོར་གསོལ་པ་འདིའི་དོན་ཅི་ཞིག་ཡོད། རྒྱལ་བུས་གསོལ་པ། རྒྱལ་པོ་ཆེན་པོ་བདག་ཡིད་བཞིན་གྱི་ནོར་བུ་རིན་པོ་ཆེ་ཆེན་པོ་བླངས་ཏེ་སེམས་ཅན་ཐམས་ཅད་ཀྱི་དགོས་པ་ཆོག་པར་བགྱིད་འཚལ་
ལོ། །དེ་ནས་རྒྱལ་པོ་ཆེན་པོས་ཀུན་བཀར་བཏགས་ཏེ། སུ་དག་རྒྱ་མཚོར་འགྲོ་བར་འདོད། གལ་ཏེ་རྒྱ་མཚོ་ནས་སླར་འཁོར་ན་རབས་བདུན་གྱི་བར་དུ་བགོ་བ་དང་། ཁ་ཟས་དང་། ནོར་དང་། རིན་པོ་ཆེ་མི་བྲེལ་བར་སྦྱིན་ལ། རྒྱ་མཚོར་འཇུག་པའི་ཡོ་
བྱད་ཐམས་ཅད་ཀྱང་སྦྱིན་ཞིང་སྦྱར་རོ་ཞེས་བཀར་བཏགས་སོ། །རྒྱལ་བུ་དགེ་དོན་རྒྱ་མཚོར་འཇུག་ཅིང་ནོར་བུ་རིན་པོ་ཆེ་ལེན་དུ་འགྲོ་ཞེས་ཐོས་ནས་ཐམས་ཅད་རབ་ཏུ་དགའ་ནས་འདུས་སོ། །དེའི་ནང་ན་མི་ལྔ་བརྒྱ་ཞིག་བདག་ཅག་ཀྱང་
རྒྱལ་བུའི་ཞབས་འབྲིང་དུ་མཆི་བར་གསོལ་ལོ་ཞེས་ཁས་བླངས་སོ། །དེའི་ཚེ་ཡུལ་བཱ་ར་ཎ་སཱི་ན་རྒྱ་མཚོའི་ས་མཁན་གཅིག་ཅིག་སྔ་ཕྱིར་ལན་དུ་མ་ཞིག་རྒྱ་མཚོར་ཕྱིན་ཏེ། ཐར་བ་དང་མི་ཐར་བའི་ལམ་རྒྱུས་ཤིན་དུ་མཁས་པ། ལོ་
བརྒྱད་བཅུ་ལོན་པ། མིག་གཉིས་ཀྱང་མི་མཐོང་བ་ཞིག་ཡོད་དེ། དེའི་ཚེ་རྒྱལ་པོ་ཆེན་པོ་ཉིད་ལམ་མཁན་གྱི་དེར་གཤེགས་ནས་ལམ་མཁན་ལ་འདི་སྐད་ཅེས་བཀའ་སྩལ་ཏོ། །ང་ལ་བུ་གཅིག་ལས་མེད་པས་སྒོར་བྱུང་ཡང་མ་མྱོང་ན་རྒྱ་མཚོར་
འགྲོ་བར་འདོད་དེ་ཁྱོད་ཀྱང་ཞབས་འབྲིང་དུ་འགྲོ་དགོས་སོ། །དེའི་ཚེ་ལམ་མཁན་དེས་རྒྱལ་པོའི་གསུང་ཐོས་ནས་སྐད་ཆེན་པོ་ཕྱུང་ནས་ངུས་ཏེ། རྒྱལ་པོ་ཆེན་པོ་རྒྱ་མཚོ་ཆེན་པོར་འཇུག་པ་ནི་བགེགས་དང་བར་ཆད་མང་སྟེ། ཉོན་མོངས་པར་འགྱུར་

71-1-142b

བ་ཡང་གཅིག་ཏུ་མ་ཟད་པས་བརྒྱ་སྟོང་གྲངས་མེད་པ་གཅིག་སོང་ཡང་སླར་འཁོར་བ་གཅིག་གཉིས་ཙམ་ལས་མེད་ན། རྒྱལ་པོ་ཆེན་པོ་ཅིའི་སླད་དུ་རྒྱལ་བུ་འདི་ལྟ་བུའི་ལམ་རིང་པོ་ཡ་ང་བར་གཏོང་། རྒྱལ་པོས་སྨྲས་པ། རྒྱལ་བུ་ལ་བྱམས་ཤིང་བརྩེ་
བས་ངོ་མ་ཟློགས་ཏེ་བཏང་བ་ཡིན་ནོ། །ལམ་མཁན་གྱིས་བདག་ཀྱང་འོ་ན་མཆིའོ་ཞེས་གསོལ་ཏོ། །དེ་ནས་རྒྱལ་བུ་དགེ་དོན་གྱིས་མི་ལྔ་བརྒྱའི་ལམ་རྒྱགས་དང་ཡོ་བྱད་སྦྱར་ཏེ་རྒྱ་མཚོའི་ངོགས་སུ་སྐྱས་སོ། །དེའི་ཚེ་ནུ་བོ་ངན་དོན་འདི་སྙམ་དུ་
རྒྱལ་བུ་དགེ་དོན་ལ་ཡོང་ཡང་ཡབ་ཡུམ་ལྷག་པར་བྱམས་ཏེ། ད་རྒྱ་མཚོར་ནོར་བུ་རིན་པོ་ཆེ་ལེན་དུ་འགྲོ་བ་གལ་ཏེ་ཕྱིར་ཡང་འཁོར་ན་དགེ་དོན་ལ་ཇེ་བྱམས་ཇེ་བྱམས་ཤིང་བདག་ལ་ནི་ལྷག་པར་སྡང་ཞིང་བེན་པར་འགྱུར་རོ་སྙམ་བསམས་ནས་
བདག་ཀྱང་རྒྱལ་བུ་དགེ་དོན་གྱི་ཕྱི་བཞིན་དུ་རིན་པོ་ཆེ་ལེན་དུ་འགྲོའོ་ཞེས་གསོལ་པ་དང་། ཡབ་ཡུམ་གྱིས་འགྲོ་བར་གནང་སྟེ། འདི་ཡང་སོང་ན་ལམ་ཡ་ང་བ་འམ། མི་བདེ་བ་དག་ཏུ་སྤུན་གཉིས་འགྲོགས་ན་གདོན་མི་ཟ་བར་གཅིག་
ལ་གཅིག་ཕན་ནོ་ཞེས་གསུངས་ནས་རྒྱལ་བུ་ངན་དོན་ཡང་བཏང་ངོ་། །དེ་ནས་རྒྱལ་བུ་དགེ་དོན་གྲུའི་ནང་ན་ཞུགས་ནས་གྲུ་ལ་ལྕགས་ཀྱི་ཉག་ཐག་བདུན་བཏགས་ཏེ་ཞག་བདུན་གྱི་བར་དུ་བསྡད་དོ། །ཐོག་མར་གྲུར་ཞུགས་པའི་ནང་པར་ཉི་མ་ཤར་བ་ན་རྒྱལ་བུ་དགེ་
དོན་གྱིས་རྔ་བརྡུངས་ཏེ་སྐད་ཆེན་པོས་འདི་སྐད་ཅེས་བོས་སོ། །ཁྱོད་ལ་སོགས་པ་སུ་རྒྱ་མཚོར་འགྲོ་འདོད་པ་ནི་ཅང་མ་སྨྲ་ཤིག །སུ་ཕ་མ་དང་། ཕུ་ནུ་དང་། བུ་སྨད་ལ་ཆགས་ཏེ་འཛམ་བུའི་གླིང་གི་ལོངས་སྤྱོད་དང་། བདེ་བ་ལ་དད་པ་རྣམས་ནི་འདི་ནས་ཕྱིར་དེང་
ཤིག །བདག་གི་ཕྱིར་འགྱོད་པར་གྱུར་ཏ་རེ། དེ་ཅིའི་ཕྱིར་ཞེ་ན། རྒྱ་མཚོའི་ནང་ན་བགེགས་རབ་ཏུ་མང་བས་སོང་བ་གྲངས་མེད་ཀྱང་ཕྱིར་འཁོར་བ་གཅིག་གཉིས་ཙམ་ལས་མེད་དོ་ཞེས་སྐད་ཆེན་པོས་བོས་ཀྱང་འཁོར་མང་པོ་རྣམས་ནི་ཅང་མི་སྨྲ་བས་
ཉག་ཐག་གཅིག་བཅད་དེ་གྲུའི་སྟེང་དུ་དྲངས་སོ། །དེ་བཞིན་ཉིན་རེ་ལན་རེ་ཞག་བདུན་གྱི་བར་དུ་བོས་ཀྱང་ཀུན་ཁ་རོག་འདུག་སྟེ་ཅང་མི་སྨྲ་བས་ཉག་ཐག་བདུན་ཆར་བཅད་དེ་ཉག་ཐག་གྲུའི་སྟེང་དུ་དྲངས་སོ། །དེ་ནས་རླུང་ཕྱོགས་སུ་གཡོར་མོ་བསྒྲེངས་

71-1-143a

ནས་སོང་ངོ་། །རྒྱལ་བུའི་སྙིང་རྗེའི་སེམས་དང་བསོད་ནམས་ཀྱི་ཤུགས་ཀྱིས་ཉེ་ཞོ་མེད་པར་རྒྱ་མཚོའི་གླིང་ནོར་བུ་རིན་པོ་ཆེའི་དྲུང་དུ་ཕྱིན་ནོ། །རིན་པོ་ཆེའི་དྲུང་དུ་ཕྱིན་ནས་རྒྱལ་བུ་དགེ་དོན་གྱིས་ཡང་རྔ་བརྡུངས་ཏེ་མི་མང་པོ་ལ་ལམ་རིང་ཞིང་
ཡ་ང་བས། ཁྱེད་རྣམས་འདི་ནས་རིན་པོ་ཆེ་ལོང་ལ་ཞག་བདུན་ཞིག་བསྟིས་ལ་ཕྱིར་དེང་ཤིག་པར་བསྒོའོ། །ཡང་འདི་སྐད་དུ་རིན་པོ་ཆེ་འདི་དག་ནི་འཛམ་བུའི་གླིང་ན་ངོ་མཚར་དུ་རིན་ཆེ་བ་ཡིན་གྱིས། ཧ་ཅང་ཡང་མ་ལྕི་ཞིག །ལྕིས་ན་གྲུ་འབྱིང་བར་འགྱུར་
རོ། །ཧ་ཅང་ཡང་ན་ལམ་རིང་པོར་ཉོན་མོངས་པའི་དོན་མེད་པས་རན་པར་བྱོས་ལ་དེང་ཤིག་ཅེས་མི་དེ་དག་ལ་ཁྱེད་རྣམས་ཡུལ་དུ་བདེ་བར་ཕྱིན་པར་གྱུར་ཅིག་བདག་ནི་ཡིད་བཞིན་གྱི་ནོར་བུ་རིན་པོ་ཆེ་ཚོལ་དུ་འགྲོའོ་ཞེས་བསྒོ་ནས་མཆི་ཕྱག་བྱས་ཏེ་སོ་སོར་
དོང་ངོ་། །དེའི་ཚེ་རྒྱལ་བུ་དགེ་དོན་ནི་ལམ་མཁན་དང་གཉིས་ཆས་ནས་ཞག་བདུན་གྱི་བར་དུ་ཆུ་པུས་མོ་ལས་མི་ནུབ་པའི་ནང་དུ་སོང་ངོ་། །དེ་ནས་ཞག་བདུན་ནི་བརྐྱལ་ཏེ་ཕ་རོལ་རྒྱ་མཚོའི་གླིང་དུ་ཕྱིན་ནོ། །རྒྱ་མཚོའི་གླིང་དེ་ས་གཞི་དངུལ་གྱི་བྱེ་མ་བརྡལ་
བ་ཞིག་ཏུ་ཕྱིན་ནས་ལམ་མཁན་གྱིས་ས་གཞི་འདི་ཅི་ཡིན་ཞེས་དྲིས་ན་རྒྱལ་བུས་ས་གཞི་འདི་ནི་དངུལ་གྱི་བྱེ་མ་འབའ་ཤིག་ཡོད་དོ་ཞེས་སྨྲས་སོ། །ལམ་མཁན་གྱིས་སྨྲས་པ། ཕྱོགས་བཞིར་ལྟོས་ཤིག་དང་། རི་དཀར་པོ་ཞིག་སྣང་བའི་རིགས་ན་ཁྱོད་
མཐོང་ངམ། རྒྱལ་བུས་སྨྲས་པ། ཤར་ལྷོའི་མཚམས་ན་རི་དཀར་པོ་ཞིག་སྣང་ངོ་། །ལམ་མཁན་གྱིས་སྨྲས་པ། ཕར་འགྲོ་བའི་ལམ་ནི་རི་དེའི་དྲུང་ན་ཡོད་དེ། དེའི་འགྲམ་ཕ་ཟད་ཅིག་ན་གསེར་གྱི་བྱེ་མ་བརྡལ་བའི་ས་གཞི་ཞིག་ཡོད་པའི་
རིགས་ཤེས་སྨྲས་ནས། ངལ་ཆད་དེ་ཉམ་ཐག་ནས་ས་ལ་འགྱེལ་ཏེ་རྒྱལ་བུ་ལ་འདི་སྐད་ཅེས་སྨྲས་སོ། །བདག་ནི་ཉམ་ཐག་ནས་མ་ནུས་པར་འདིར་འཆིའོ། །རྒྱལ་བུ་ཁྱོད་འདི་ནས་ཤར་ཕྱོགས་སུ་ཞག་བདུན་གྱི་བར་དུ་སོང་ཤིག་དང་། 
གསེར་གྱི་རི་དང་ཕྲད་པ་རིགས་སོ། །དེ་ནས་ཞག་བདུན་གྱི་བར་དུ་སོང་ཤིག་དང་། ས་གཞི་པད་མོ་སྔོན་པོ་འབའ་ཞིག་ཡོད་པར་ཕྱིན་པའི་རིགས་སོ། །དེ་ནས་ཡང་ཞག་བདུན་སོང་ཤིག་དང་། པད་མ་ལེ་བརྒན་འབའ་ཞིག་ཡོད་པ་དང་ཕྲད་

71-1-143b

པའི་རིགས་སོ། །པད་མོ་དེའི་ཕ་རོལ་ན་རིན་པོ་ཆེ་སྣ་བདུན་གྱི་མཁར་ཞིག་ཡོད་དེ། མཁར་དེའི་ཉེན་ནི་གསེར་ལས་བྱས། ཅོག་པར་དངུལ་ལས་བྱས། མདའ་ཡབ་ཀེ་ཀེ་རུ་དམར་པོ་ལས་བྱས། མན་ཤེལ་དང་། སྤུག་ལ་སོགས་པ་རིན་པོ་ཆེ་
སྣ་ཚོགས་ཀྱིས་སྤྲས་ཏེ། མུ་ཏིག་དམར་པོའི་དྲ་བས་སྟེང་གཡོགས་ལ། མཐའ་མ་བཻ་དཱུརྱ་མཐོན་མཐིང་གི་འོབས་རིམ་པ་བདུན་གྱིས་བསྐོར་བའི་ནང་ན་ཀླུའི་རྒྱལ་པོའི་ཕོ་བྲང་ཡོད་ཀྱིས་ཀླུའི་རྒྱལ་པོ་དེའི་རྣ་བའི་ནང་ན་ཡིད་བཞིན་གྱི་ནོར་བུ་
རིན་པོ་ཆེ་ཡོད་ཀྱིས་སློངས་ཤིག །དེ་ཐོབ་པར་གྱུར་ན་འཛམ་བུའི་གླིང་དུ་རིན་པོ་ཆེ་སྣ་བདུན་གྱི་ཆར་འབེབས་ཤིང་། གོས་དང་། ཟས་དང་། ནད་ཀྱི་རྐྱེན་སྨན་དང་རོལ་མོ་དང་། དགོས་པའི་ཡོ་བྱད་ཐམས་ཅད་ཡིད་བཞིན་དུ་ཆར་འབེབས་སོ། །
དེ་བས་ན་ཡིད་བཞིན་གྱི་ནོར་བུ་རིན་པོ་ཆེ་ཞེས་བྱའོ། །གལ་ཏེ་རྒྱལ་བུས་ཐོབ་ན་སྨོན་པ་ཐམས་ཅད་ངེས་པར་འགྲུབ་པར་འགྱུར་རོ་ཞེས་སྨྲས་ནས་ཚེའི་དུས་བྱས་པར་གྱུར་ཏེ། དེའི་ཚེ་རྒྱལ་བུ་དགེ་དོན་གྱི་ལམ་མཁན་དེ་པང་དུ་བླངས་ནས་སྐད་
ཕྱུང་སྟེ་ངུས་སོ། །ཀྱི་ཧུད་ཀྱི་ཧུད་ཅིའི་ཕྱིར་བདག་གི་ལྷ་ནང་ཅིག་སྟོར་བར་གྱུར་ཅེས་ལམ་མཁན་གྱི་རུས་བུ་གསེར་གྱི་བྱེ་མའི་ནང་དུ་སྦས་ནས་གཡས་ཕྱོགས་ནས་ལན་གསུམ་བསྐོར་བ་བྱས་ཏེ་ཕྱག་བྱས་ནས་སོང་ངོ་། །དེ་ནས་སོང་སོང་བ་
ལས་གསེར་གྱི་རིའི་དྲུང་དུ་ཕྱིན་ནོ། །གསེར་གྱི་རིའི་དྲུང་ཕ་རོལ་དུ་ཕྱིན་ནས་པད་མོ་སྔོན་པོས་ས་གཞི་ཁེབས་པར་འདུག་པ་དེ་ན་པད་མོ་དེ་དག་གི་འོག་ན་སྦྲུལ་གདུག་པ་ཆེན་པོས་གང་བར་མཐོང་ངོ་། །སྦྲུལ་གདུག་པ་ཅན་དེ་དག་ལ་གདུག་པ་
རྣམ་པ་གསུམ་ཡོད་དེ། འདི་ལྟ་སྟེ། ཟིན་པའི་གདུག་པ་དང་། རེག་པའི་གདུག་པ་དང་། ཁ་རླངས་ཀྱི་གདུག་པའོ། །སྦྲུལ་གདུག་པ་དེ་དག་པད་མའི་སྡོང་བུ་ལ་འཁྲི་ཞིང་ཁ་ནི་གདངས། མིག་ནི་སྒྲད་དེ། རྒྱལ་བུ་ལ་བལྟའོ། །དེའི་ཚེ་ན་
རྒྱལ་བུ་དགེ་དོན་བྱམས་པའི་སེམས་ཀྱི་ཏིང་ངེ་འཛིན་དུ་ཞུགས་ནས་ཏིང་ངེ་འཛིན་གྱི་མཐུས་དེ་ནས་ཆས་ཏེ། པད་མོ་དེ་དག་ལ་རྡོག་པས་བརྫིས་ཤིང་སོང་ཡང་སྦྲུལ་གདུག་པ་དེ་དག་གིས་གནོད་པར་མ་གྱུར་ཏོ། །དེ་ལྟར་བྱམས་པའི་སེམས་ཀྱི་

71-1-144a

ཏིང་ངེ་འཛིན་གྱི་ཤུགས་ཀྱིས་སོང་སོང་བ་ལས་ཀླུའི་ཕོ་བྲང་གི་དྲུང་དུ་ཕྱིན་ནོ། །ཀླུའི་རྒྱལ་པོའི་ཕོ་བྲང་གི་ཕྱི་རོལ་འོབས་རིམ་པ་བདུན་གྱིས་བསྐོར་ཏེ། འོབས་དེ་དག་གི་ནང་ན་ཀླུ་གདུག་པ་གཅིག་ལ་གཅིག་འཁྲི་ཞིང་མགོ་བཏེག་
སྟེ་མཁར་སྒོ་སྲུང་ངོ་། །དེའི་ཚེ་ན་རྒྱལ་བུ་དགེ་དོན་མཁར་སྒོ་དེར་ཕྱིན་ཏེ། ཀླུ་གདུག་པ་དེ་མཐོང་ནས་བྱམས་པའི་སེམས་ཀྱིས་འཛམ་བུའི་གླིང་གི་སེམས་ཅན་ཐམས་ཅད་ཡིད་ལ་བྱས་ཏེ། བདག་སེམས་ཅན་གྱི་དོན་དུ་སོང་སོང་བ་ལས་གལ་
ཏེ་ཀླུ་གདུག་པས་གནོད་པ་བྱས་ན། ཕན་པ་དང་བདེ་བའི་དོན་མེད་པར་འགྱུར་རོ་སྙམ་དུ་བསམས་ནས། རྒྱལ་བུ་དགེ་དོན་གྱིས་ལག་པ་གཡས་པ་བཏེག་ནས་ཀླུ་གདུག་པ་རྣམས་ལ་འདི་སྐད་ཅེས་བསྒོའོ། །ཁྱེད་རྣམས་ཤེས་པར་གྱིས་ཤིག །བདག་ནི་
སེམས་ཅན་ཐམས་ཅད་ཀྱི་དོན་དུ་ཀླུའི་རྒྱལ་པོ་དང་ཕྲད་པར་འདོད་དོ། །དེ་ནས་ཀླུ་གདུག་པ་རྣམས་ཀྱིས་ལམ་ཕྱེ་སྟེ། འོབས་རིམ་པ་བདུན་གྱི་བར་དུ་ཐལ་ཏེ་སོང་ནས་མཁར་སྒོར་ཕྱིན་ནོ། །མཁར་སྒོ་དེ་ན་ཤེལ་གྱི་བུ་མོ་གཉིས་ཤིག་ཤེལ་གྱི་སྐུད་པ་
འཁལ་ཞིང་འདུག་པ་མཐོང་ནས་ཁྱེད་ཅི་ཡིན་ཞེས་དྲིས་ན་ཁོ་མོ་ནི་ཀླུའི་རྒྱལ་པོའི་ཕྱི་སྒོ་སྲུང་བའི་བྲན་མོ་ཡིན་ནོ་ཞེས་ཟེར་རོ། །དེ་ནས་ཡང་ནང་དུ་ཞུགས་ཏེ་སོང་བ་ལས་བར་སྒོ་ན་ཤེལ་གྱི་བུ་མོ་བཞི་ཞིག་དངུལ་གྱི་སྐུད་པ་འཁལ་ཞིང་འདུག་པ་མཐོང་
ངོ་། །བུ་མོ་དེ་ལ་ཁྱེད་ཀླུའི་རྒྱལ་པོའི་བཙུན་མོ་ཡིན་ནམ་ཞེས་དྲིས་ན་མ་ཡིན་ཏེ། བདག་ཅག་ནི་ཀླུའི་རྒྱལ་པོའི་བར་སྒོ་སྲུང་བའི་བྲན་མོ་ཡིན་ནོ་ཞེས་ཟེར་རོ། །དེ་ནས་ཡང་རྒྱལ་བུ་སྒོ་དེའི་ནང་དུ་ཞུགས་ཏེ་སོང་བ་ལས་ནང་སྒོ་དེ་ལ་ཤེལ་གྱི་བུ་མོ་བརྒྱད་
ཅིག་གསེར་གྱི་སྐུད་པ་འཁལ་ཞིང་འདུག་པ་མཐོང་ངོ་། །ཁྱེད་ཅི་ཡིན་ཞེས་དྲིས་ན་བདག་ཅག་ནི་ཀླུའི་རྒྱལ་པོའི་ཕོ་བྲང་གི་ནང་སྒོ་སྲུང་བའི་བྲན་མོ་ཡིན་ནོ་ཞེས་ཟེར་རོ། །དེ་ནས་རྒྱལ་བུ་དགེ་དོན་གྱིས་བུ་མོ་དེ་དག་ལ་བདག་ནི་འཛམ་བུའི་གླིང་གི་ཡུལ་བཱ་ར་
ཎ་སཱིའི་རྒྱལ་པོའི་བུ་དགེ་དོན་ཞེས་བྱ་བ་ཡིན་ཏེ། རྒྱལ་པོ་དང་ཕྲད་འདོད་པས་ད་ལྟར་སྒོ་ན་འདུག་གོ་ཞེས་ཕྲིན་གྱིས་ཤིག་ཅེས་བསྒོའོ། །དེ་ནས་སྒོ་སྲུངས་དེས་ཀྱང་ཀླུའི་རྒྱལ་པོ་ལ་དེ་བཞིན་གསོལ་པ་དང་། ཀླུའི་རྒྱལ་པོ་ངོ་མཚར་དུ་འཛིན་

71-1-144b

ཏེ་འདི་སྙམ་དུ་འདི་ནི་བསོད་ནམས་དང་དགེ་བའི་རྩ་བ་ཤིན་དུ་བྱང་བ་ཞིག་མ་ཡིན་པར་ཐ་མལ་པ་གཞན་ཞིག་གིས་ལམ་འདི་ལྟ་བུ་བགྲོད་ཅིང་འོང་མི་ནུས་སོ་སྙམ་བསམས་ནས་ནང་དུ་བོས་ཏེ་ཀླུའི་རྒྱལ་པོ་ཉིད་ཀྱིས་བསུ་ནས་ཕོ་བྲང་གི་ནང་
དུ་ཁྲིད་དོ། །ཀླུའི་རྒྱལ་པོའི་ཕོ་བྲང་གི་ནང་ནི་ས་གཞི་བཻ་དཱུརྱ་ལས་བྱས། ཁྲི་སྟན་ནི་རིན་པོ་ཆེ་སྣ་བདུན་ལས་བྱས་སོ། །འོད་རྣམ་པ་སྣ་ཚོགས་ནི་མིག་གིས་མི་བཟོད་པ་ཙམ་དུ་འཚེར་རོ། །དེ་ནས་ཀླུའི་རྒྱལ་པོས་རྒྱལ་བུ་དགེ་དོན་སྟན་
བཏིང་བ་ལ་བཞག་ནས་གཏམ་བྱས་སོ། །དེ་ནས་རྒྱལ་བུ་དགེ་དོན་དེ་ལས་གླེངས་ཏེ་ཀླུའི་རྒྱལ་པོ་ལ་སྤྲོ་བ་དང་། གཟེང་སྟོད་པ་དང་། དགའ་བའི་གཏམ་རྣམ་པ་སྣ་ཚོགས་དང་། སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་། 
ལྷ་དང་མི་ལ་སོགས་པ་རྒྱས་པར་སྨྲས་ཏེ་ཆོས་བཤད་དོ། །དེ་ནས་ཀླུའི་རྒྱལ་པོ་རབ་ཏུ་དགའ་ཞིང་རངས་པར་གྱུར་ཏེ། འདི་ལྟར་བགྲོད་དཀའ་བ་བགྲོད་ཅིང་ལམ་རིང་པོ་ནས་འོངས་པ་འདི་ཅི་འདོད་ཅེས་སྨྲས་པ་དང་། རྒྱལ་བུ་དགེ་དོན་གྱིས་
ཀླུའི་རྒྱལ་པོ་ལ་འདི་སྐད་ཅེས་སྨྲས་སོ། །འཛམ་བུའི་གླིང་གི་སེམས་ཅན་རྣམས་ནི་གོས་དང་། ནོར་དང་ཟས་དང་སྐོམ་གྱི་ཕྱིར་མཐའ་མེད་པའི་སྡུག་བསྔལ་ཆེན་པོ་མྱོང་བར་གྱུར་པས་རྒྱལ་པོའི་སྙན་གཡོན་པའི་ནང་ན་ནོར་བུ་རིན་པོ་ཆེ་
འདོད་དོ། །ཀླུའི་རྒྱལ་པོས་སྨྲས་པ། ཞག་བདུན་གྱི་བར་དུ་བདག་གིས་མཆོད་པ་སྦྱར་བ་ཙམ་བཞེས་སུ་གནང་ན་ནོར་བུ་སྦྱིན་ནོ་ཞེས་སྨྲས་སོ། །དེ་ནས་རྒྱལ་བུ་དགེ་དོན་ཀླུའི་རྒྱལ་པོས་སྤྱན་དྲངས་པ་བཞིན་ཞག་བདུན་གྱི་བར་དུ་ཀླུའི་ཕོ་བྲང་
ན་འདུག་ནས་ཡིད་བཞིན་གྱི་ནོར་བུ་རིན་པོ་ཆེ་ཁྱེར་ཏེ་ཕྱིར་འཛམ་བུའི་གླིང་དུ་འགྲོ་བར་ཆས་པ་ལས། དེའི་ཚེ་ན་ཀླུའི་རྒྱལ་པོ་ཆེན་པོས་ཀླུ་རྣམས་ཀྱི་མཐུས་ནམ་མཁའ་ལ་འཕུར་ཏེ་རྒྱ་མཚོའི་ཚུ་རོལ་གྱི་ངོགས་སུ་བསྒྲལ་ཏོ། །དེར་ཕྱིན་པ་དང་ནུ་བོ་ངན་
དོན་དང་ཕྲད་དོ། །རྒྱལ་བུས་ནུ་བོ་ངན་དོན་ལ་ཁྱོད་ཀྱི་གྲོགས་པོ་ཀུན་ག་རེ་ཞེས་དྲིས་ནས་ཁྱོད་གཅིག་པུ་འདི་ན་འདུག་གམ་ཞེས་སྨྲས་པ་དང་། རྒྱལ་བུ་ངན་དོན་ན་རེ་གྲུ་བྱིང་ནས་ཐམས་ཅད་ཤི་སྟེ། བདག་འབའ་ཤིག་རོ་ཞིག་ལ་འཇུ་འཇུ་ནས་ཕྱིན་ཏེ་གཞན་

71-1-145a

ནི་གཅིག་ཅར་ཀུན་ཤིའོ། །རྒྱལ་བུ་དགེ་དོན་གྱིས་སྨྲས་པ། འཇིག་རྟེན་ན་རིན་པོ་ཆེའི་མཆོག་ནི་བདག་གི་ལུས་ལས་འདའ་བ་མེད་དོ། །ནུ་བོས་སྨྲས་པ། དེ་ལྟར་མ་ཡིན་ཏེ་ཕྱུག་བཞིན་དུ་ཤི་ཡང་སླའི་དབུལ་བཞིན་དུ་མི་གསོན་ནོ། །དེར་
ཅི་མངོན་ཞེ་ན། བདག་དུར་ཁྲོད་ཅིག་ན་འདུག་པར་ཕྱིན་པ་ན། དུར་ཁྲོད་དེ་ན་ཡོད་པའི་རོ་དག་དེ་སྐད་ཅེས་ཟེར་བ་ཐོས་སོ། །རྒྱལ་བུ་དགེ་དོན་རང་བཞིན་གྱིས་དྲང་བས་ནུ་བོ་ལ་ཁྱོད་རིན་པོ་ཆེ་མེད་ཀྱང་ཚོད་ཡོད་ཀྱིས། བདག་ལ་ཀླུའི་རྒྱལ་པོའི་ཡིད་
བཞིན་གྱི་ནོར་བུ་རིན་པོ་ཆེ་ཡོད་དོ། །ནུ་བོས་ནོར་བུ་ག་རེ་ཞེས་དྲིས་ན། ཕུ་བོས་སྨྲས་པ། ཡིད་བཞིན་གྱི་ནོར་བུ་རིན་པོ་ཆེ་བདག་གི་དོ་ཀེར་གྱི་ནང་ན་ཡོད་དོ་ཞེས་སྨྲས་སོ། །ནུ་བོས་དེ་སྐད་ཅེས་སྨྲས་པ་ཐོས་ནས་ཕྲག་དོག་གི་སེམས་ཀྱིས་
ལྷག་པར་འཁྲུག་ཅིང་ཞེ་སྡང་གི་སེམས་སྐྱེས་ཏེ། འདི་སྙམ་དུ་ཡབ་རྒྱལ་པོ་དང་ཡུམ་བདག་ལ་ལྷག་པར་སྡང་བའི་སྟེང་དུ་ད་ཕུ་བོས་ནི་ཡིད་བཞིན་གྱི་ནོར་བུ་རིན་པོ་ཆེ་རྙེད་པས། ད་ནི་ལྷག་པར་བདག་ལ་སྡང་ཞིང་ས་རྡོ་དང་འདྲ་བར་བེན་ནོ་པར་འགྱུར་
རོ་སྙམ་བསམས་ནས་ཕུ་བོ་དགེ་དོན་ལ་འདི་སྐད་ཅེས་སྨྲས་སོ། །ཤིན་དུ་ལེགས་སོ། །ནོར་བུ་རིན་པོ་ཆེ་ཐོབ་པ་ཤིན་དུ་ལེགས་ཀྱིས་ད་འཇིགས་པ་འདིར་ལེགས་པར་བསྲུང་དགོས་སོ། །དེ་ནས་རྒྱལ་པོ་དགེ་དོན་གྱིས་དོ་ཀེར་བཀྲོལ་ཏེ་ནོར་བུ་ནི་ནུ་བོ་ངན་
དོན་གྱི་ལག་དུ་བྱིན་ཏེ། ཁྱོད་ངལ་ཞིང་ཆད་དེ་ཉལ་བའི་ཚེ་ཁོ་བོས་བཙའ་ཞིང་བསྲུང་ངོ་། །ཁོ་བོ་ངལ་ཏེ་ཉལ་བའི་ཚེ་ན་ཁྱོད་ཀྱིས་བཙའ་ཞིང་སྲུངས་ཤིག །དེའི་ཚེ་ངན་དོན་ནོར་བུ་སྲུང་རེས་ལ་བབ་ནས་ཕུ་བོ་དགེ་དོན་དེ་གཉིད་ལོག་ཅིང་འདུག་
པ་ལས། ངན་དོན་གྱིས་སྨྱིག་མ་སྐམ་པོའི་ཚལ་པ་གཉིས་ཀྱིས་དགེ་དོན་གྱི་མིག་གཉིས་ཀྱི་ནང་དུ་བཙུགས་ནས་ནོར་བུ་རིན་པོ་ཆེ་ཁྱེར་ཏེ་བྲོས་སོ། །དེ་ནས་རྒྱལ་བུ་དགེ་དོན་གྱིས་ནུ་བོ་ངན་དོན་བོས་ཏེ། ངའི་མིག་གཉིས་སུ་རྐུན་པོས་ཤིང་ཚལ་བཙུགས་
ཀྱིས་ནོར་བུ་རིན་པོ་ཆེ་ཐོགས་ལ་བྲོས་ཤིག་ཅེས་བོས་ནས་ཅང་མི་གྲག་པས། ད་ནི་བདག་གི་ནུ་བོ་ངན་དོན་ཡང་དགྲས་བསད་པ་ལྟ་ཅང་མི་གྲག་གོ་ཞེས་སྐད་ཆེན་པོས་ལྷ་རྣམས་ཐོས་པ་ཙམ་དུ་བོས་ཀྱང་རིང་ཞིག་གི་བར་དུ་ཅང་མི་གྲག་གོ། །

71-1-145b

དེ་ནས་ཤིང་ལྗོན་པའི་ལྷ་ཞིག་འདི་སྐད་ཅེས་སྨྲའོ། །ཁྱོད་ཀྱི་ནུ་བོ་ངན་དོན་ཉིད་དགྲ་ཡིན་ཏེ། ཁྱོད་ཀྱི་མིག་གཉིས་ཕྱུང་ནས་ནོར་བུ་རིན་པོ་ཆེ་ཁྱེར་ཏེ་ཕྱིར་བྲོས་ནས་སོང་བ་ལ་ངན་དོན་ཞེས་བོས་པས་ཅི་ཕན་ཞེས་སྨྲས་སོ། །ཡང་རྒྱལ་བུ་དགེ་དོན་གྱིས་ཚིག་དེ་ཐོས་
ནས་མྱ་ངན་གྱིས་གདུངས་ཏེ་ཡི་མུག་པར་གྱུར་ཏོ། །དེའི་ཚེ་རྒྱལ་བུ་ངན་དོན་ནོར་བུ་རིན་པོ་ཆེ་ཁྱེར་ཏེ་ཕྱིར་བདག་གི་ཡུལ་དུ་ཕྱིན་ནས་ཡབ་ཡུམ་དང་ཕྲད་དེ་ཡབ་རྒྱལ་པོ་དང་ཡུམ་ལ་འདི་སྐད་ཅེས་སྨྲས་སོ། །བདག་ནི་བསོད་ནམས་དང་ལྡན་ཏེ་ཉེ་ཞོ་མེད་པར་སླར་
མཆིས་སོ། །རྒྱལ་བུ་དགེ་དོན་དང་གྲོགས་གཞན་ནི་བསོད་ནམས་ཆུང་བས་ཆུར་གུམ་སྟེ་ཟད་པར་ཤིའོ། །ཡབ་རྒྱལ་པོ་དང་ཡུམ་གྱིས་ཚིག་དེ་ཐོས་ནས་སྐད་ཆེན་པོ་ཕྱུང་ནས་ངུས་སོ། །བརྒྱལ་ཏེ་ས་ལ་འགྱེལ་ཏོ། །དེ་ནས་ཆུ་གྲང་མོ་གཏོར་
བས་རིང་ཞིག་ལོན་པ་དང་ཕྱིར་སངས་ནས་རྒྱལ་བུ་ངན་དོན་ལ་ངོ་སོ་ཅི་ཡོད་ན་ངེད་དང་ཕྲད་ཅིང་འོངས་ཤེས་སྨྲས་པ་དང་། རྒྱལ་བུ་ངན་དོན་མི་དགའ་ནས་ཁྲོས་ཏེ་ནོར་བུ་རིན་པོ་ཆེ་དབེན་པ་ཞིག་ཏུ་ས་བརྐོས་ནས་སྦས་སོ། །དེའི་ཚེ་རྒྱལ་བུ་དགེ་དོན་མིག་
གཉིས་སུ་སྨྱིག་མའི་ཚལ་པ་སྐམ་པོ་ཟུག་པ་འབྱིན་པའི་མི་མེད་པས་སྡུག་བསྔལ་གྱིས་གདུངས་ཏེ་ས་ལ་འགྲེའོ། །གར་འགྲོ་ཡང་མི་ཤེས་ཏེ་བཀྲེས་པ་དང་སྐོམ་པས་གདུངས་ན། གསོན་ན་གསོན་དུ་ཡང་མེད། ཤི་ན་ཤིར་ཡང་མེད་དེ་བགས་
ཀྱིས་འཐོམ་ཞིང་སོང་བ་ལས་རྒྱལ་པོ་ལི་ཤི་བར་གྱི་ཡུལ་འདབ་ཏུ་ཕྱིན་ཏོ། །ལི་ཤི་བར་གྱི་རྒྱལ་པོ་དེ་ལ་བུ་མོ་ཞིག་ཡོད་པ་ནི་ཡུལ་བཱ་ར་ཎ་སཱིའི་རྒྱལ་པོའི་སྲས་རྒྱལ་བུ་དགེ་དོན་ལ་སྦྱིན་པར་བྱས་སོ། །རྒྱལ་བུ་ལི་ཤི་བར་དེ་ལ་རྫིའུ་བ་ལང་ལྔ་
བརྒྱ་འཚོ་བ་ཞིག་ཡོད་དེ། རྩྭ་དང་ཆུ་ག་ལ་ཡོད་པར་འཚོ་ཞིང་འགྲོའོ། །དེའི་ཚེ་ན་རྒྱལ་བུ་དགེ་དོན་ལམ་ཀ་ཞིག་ན་འདུག་པ་ལས་རྫིའུ་དེས་གནག་ཕལ་པོ་ཆེ་དེད་ནས་དེར་ཕྱིན་པ་དང་། བ་ལང་ཕལ་གྱིས་བརྫིས་མ་ཁད་པ་ལས་བ་ལང་
དེའི་ནང་ན་ཁྱུ་མཆོག་གི་རྒྱལ་པོ་ཅིག་ཡོད་པས་རྒྱལ་བུའི་སྟེང་དུ་ཞོན་ཏེ་བ་ལང་ཕལ་ཀུན་ཐལ་བའི་འོག་ཏུ་ཕ་ཟད་སོང་ནས་ས་ལ་འགྲེ་ཞིང་རྒྱལ་བུ་ལ་ལྟ་ཞིང་ཕྱིར་ལངས་ཏེ། རྒྱལ་བུའི་མིག་གཉིས་སུ་ལྕེས་བལྡགས་པ་དང་སྨྱིག་

71-1-146a

མའི་ཚལ་པ་ཡང་ཕྱུང་ངོ་། །དེ་ནས་གནག་རྫི་ཡང་ཕྱི་བཞིན་དེར་འོངས་ནས་ཁྱོད་སུ་ཞིག་ཅེས་དྲིས་སོ། །དགེ་དོན་གྱིས་འདི་སྙམ་དུ་བདག་གིས་ཆོ་རིགས་དང་ཇི་ལྟར་གྱུར་པ་ཞིབ་ཏུ་སྨྲས་ན་གལ་ཏེ་བདག་གི་ནུ་བོ་སྡུག་བསྔལ་ཆེན་པོ་
མྱོང་ངོ་སྙམ་བསམས་ནས་བདག་ནི་ལོང་བ་མུ་ལྟོ་བ་ཡིན་ནོ་ཞེས་སྨྲས་སོ། །དེ་ནས་གནག་རྫི་དེས་བལྟས་ན། མཚན་གཞན་ལས་དཔགས་ཏེ་ཐ་མལ་པ་མ་ཡིན་པར་མཐོང་ནས་ཁོ་བོའི་ཁྱིམ་འདི་ནས་མི་རིང་བ་ཞིག་ན་ཡོད་དེ། ཁྱོད་ཀྱི་འཚོ་
བ་སྦྱར་གྱིས་ངའི་ཁྱིམ་དུ་འདོང་ངོ་ཞེས་སྨྲས་ནས་རྒྱལ་བུ་དགེ་དོན་ཁྱིམ་དུ་ཁྲིད་དོ། །གནག་རྫི་དེས་ཁྱིམ་དུ་ཁྲིད་ནས་ཟས་དང་སྐོམ་དང་། དགོས་པ་ཐམས་ཅད་སྦྱར་ནས། ཁྱིམ་གྱི་བུ་དང་བུ་མོ་དང་། ཁྱིམ་གང་གི་མི་ཐམས་ཅད་
ལ་ཁྱེད་ཐམས་ཅད་ཀྱིས་ལོང་བ་འདི་ལ་ང་དང་འདྲ་བར་རིམ་གྲོ་བྱོས་ཤིག་ཅེས་བསྒོའོ། །དེ་ནས་དེ་བཞིན་དུ་ཟླ་བ་གཅིག་ལྷག་གི་བར་དུ་ཁྱིམ་ན་གསོ་གསོ་བ་ལས་སྐྱོ་བར་གྱུར་ནས་འདི་སྐད་དུ། ད་ནི་སོ་ཚིས་ཀྱང་དམས་པས་རྟག་ཏུ་ལོང་
བ་འདི་གསོ་སུས་ནུས་ཞེས་སྨྲས་སོ། །དགེ་དོན་གྱིས་ཚིག་དེ་སྐད་སྨྲས་པ་ཐོས་ནས་སེམས་ཉམ་ང་བར་གྱུར་ཏེ། དེའི་མཚན་མོ་འདས་ནས་ཕྱི་དེ་ཉིན་ཁྱིམ་བདག་ལ་ད་བདག་མཆིསོ་ཞེས་སྨྲས་པ་དང་། ཁྱིམ་བདག་གིས་སྨྲས་པ། ཅི་ཞིག་མ་
རངས་ན་བདག་ཅག་སྤངས་ནས་འགྲོ་བར་སེམས། དགེ་དོན་གྱིས་སྨྲས་པ། བཟའ་དང་མགྲོན་ནི་ཆོས་ཀྱིས་ཡུན་རིང་དུ་འགྲོགས་ཤིང་གནས་པ་མ་ཡིན་ནོ། །དགེ་དོན་གྱིས་ཡང་སྨྲས་པ། ཁྱོད་འདི་ལྟར་བདག་ལ་བྱམས་ན་བདག་ལ་རོལ་མོ་
ཇེང་སྙན་པ་ཅིག་བྱས་ཏེ། གང་ན་མི་མང་པོ་འདུ་བའི་གནས་སམ། གྲོང་ཁྱེར་ཆེན་པོ་ཞིག་ཏུ་སྐྱོལ་ཅིག །དེ་ནས་ཁྱིམ་བདག་དེས་ཀྱང་དེའི་ཡིད་བཞིན་དུ་དགོས་པ་སྦྱར་ནས་རྒྱལ་པོ་ལི་ཤི་བར་གྱི་གྲོང་ཁྱེར་དུ་མི་མང་པོའི་ནང་དུ་བསྐྱལ་
ནས་བདེ་བར་ཕྱིར་ལོག་གོ། །དེ་ནས་རྒྱལ་བུ་དགེ་དོན་ཇེང་ལ་ཤིན་དུ་མཁས་པས་ཇེང་གི་སྒྲ་སྙན་པ་ཡིད་དུ་འོང་བས་ཐམས་ཅད་ཀྱིས་འཚོ་བའི་ཡོ་བྱད་བྱིན་ནོ། །བཟའ་བ་དང་བཏུང་བས་མི་བྲེལ་བར་བྱས་སོ། །དེའི་ཚེ་ལི་ཤི་བར་གྱི་ཡུལ་ན་སྤྲང་པོ་

71-1-146b

ལྔ་བརྒྱ་ཡོད་པ་ཡང་ཐམས་ཅད་བཟའ་བ་དང་བཏུང་བས་ཆོག་པར་བྱས་སོ། །དེའི་ཚེ་ན་རྒྱལ་པོ་དེ་ལ་བཟའ་ཤིང་གི་ར་བ་ཞིག་ཡོད་དེ། འབྲས་བུ་རབ་ཏུ་རྒྱས་ནས་རྟག་ཏུ་བྱ་མི་ཐུབ་སྟེ། ར་བ་སྲུང་བའི་སྣ་བོས་དེའི་ཚེ་ན་རྒྱལ་བུ་དགེ་དོན་ལ་
འདི་སྐད་ཅེས་སྨྲས་སོ། །ཁྱོད་བདག་གི་ཤིང་ཏོག་གི་ར་བ་སྲུང་ཞིང་འདུག་མི་ནུས་སམ། བདག་གིས་ཁྱོད་ལ་དགོས་པའི་ཡོ་བྱད་སྦྱར་རོ། །དགེ་དོན་གྱིས་སྨྲས་པ། བདག་ལ་མིག་གཉིས་མེད་དེ་མི་མཐོང་ན་ཇི་ལྟར་ཁྱོད་ཀྱི་ར་བ་སྲུང་ཞིང་བྱ་རྣམས་
བསྐྲད་ནུས། ར་བའི་སྣ་བོས་སྨྲས་པ། བདག་ལ་ཐབས་ཡོད་དེ། བདག་གི་སྐྱེད་ཤིང་གི་ཁར་ཐག་པ་བྲེས་ཏེ་ཐག་པ་ལ་དྲིལ་བུ་བཏགས་ལ་ཐག་པ་ཁྱོད་ཀྱི་ལག་ཏུ་བཞག་ལ་བྱ་སྐད་ནམ་གྲག་པ་དང་ཐག་པ་ནས་དྲངས་པས་ཆོག་གོ། །
དགེ་དོན་གྱིས་སྨྲས་པ། དེ་ལྟར་བྱས་ན་བདག་གིས་ནུས་ཀྱི་ཤིང་དྲུང་དུ་ཁྲིད་ཅིག་ཅེས་སྨྲས་ནས་དེར་སོང་ངོ་། །རྒྱལ་བུ་དགེ་དོན་ར་བ་དེ་ན་ཤིང་ཏོག་སྲུང་ཞིང་རོལ་མོ་ཇེང་བྱེད་དེ་རྩེ་ཞིང་འདུག་གོ། །དེའི་ཚེ་ན་རྒྱལ་པོའི་བུ་མོ་འཁོར་རྣམས་དང་བཟའ་ཤིང་
གི་ར་བར་འཆག་ཅིང་ལྟད་མོ་ལྟར་སོང་བ་ལས་ལོང་བ་དེ་མཐོང་ནས་ལོང་བའི་དྲུང་དུ་སོང་སྟེ། ཁྱེད་སུའི་མི་ཡིན་ཞེས་དྲིས་སོ། །སྨྲས་པ། བདག་ནི་དམུས་ལོང་མུ་ལྟོ་བ་ཡིན་ནོ། །རྒྱལ་པོའི་བུ་མོས་ལོང་བ་དེ་མཐོང་ནས་དེ་ལ་སྙིང་ཆགས་ཏེ་
གཏོང་མ་ཕོད་དོ། །རྒྱལ་པོས་བུ་མོ་འབོད་ཏུ་བཏང་བ་ལས་ཁོ་མོ་མི་འགྲོའོ། །བཟའ་བ་དང་བཏུང་བ་འདིར་སྐྱོལ་ཅིག །བདག་ལོང་བ་འདི་དང་ལྷན་ཅིག་ཟའོ། །དེ་ལྟར་ལོང་བ་དང་ལྷན་ཅིག་ཟན་ཟོས་ནས་རྒྱལ་པོ་ལ་འདི་སྐད་ཅེས་གསོལ་ཏོ། །
བདག་ལོང་བ་འདི་ལ་སྩལ་དུ་གསོལ། དེ་ལ་སྩལ་ན་བདག་གི་ཡིད་ཚིམ་པར་འགྱུར་རོ། །རྒྱལ་པོས་སྨྲས་པ། བུ་མོ་ཁྱོད་འདྲེ་གདོན་གྱིས་བརླམས་སམ། འོན་ཏེ་སྨྱོས་སམ། སྙིང་མྱོས་སམ། ཅིའི་ཕྱིར་ལོང་བ་དེ་དང་ལྷན་ཅིག་ཏུ་གནས། 
ཁྱོད་མི་ཤེས་སམ། སྔར་བཱ་ར་ཎ་སཱིའི་རྒྱལ་པོས་བུ་དགེ་དོན་གྱི་ཆུང་མར་བསླངས་ཏེ་དེ་ལ་སྦྱིན་པར་བྱས་ནས་རྒྱལ་བུ་ད་ལྟར་རྒྱ་མཚོར་སོང་བ་ལས་ཕྱིར་མ་འཁོར་ན་ཅིའི་ཕྱིར་ན་མུ་ལྟོ་བ་ཞིག་གི་ཆུང་མ་བྱེད་པར་སེམས། བུ་མོས་གསོལ་པ། དེ་ལྟ་ལགས་

71-1-147a

མོད་ཀྱི་སྲོག་འདི་ཡལ་ཡང་ལོང་བ་མི་གཏོང་ངོ་། །རྒྱལ་པོས་ཚིག་དེ་ཐོས་ནས་བུ་མོའི་ངོ་མ་ཟློགས་ནས་ལོང་བ་བཀུག་ནས་ཕོ་བྲང་གི་ནང་དུ་ཕྱོགས་དབེན་པ་ཞིག་ཏུ་བཞག་གོ། །དེ་ནས་རྒྱལ་པོའི་བུ་མོ་དེ་ལོང་བའི་ཐད་དུ་སོང་ནས་འདི་སྐད་ཅེས་སྨྲས་
སོ། །མཁྱེན་ཏམ། ད་བདག་ཁྱོད་དང་གཟའ་ཤུག་ཏུ་འདུའོ། །དགེ་དོན་གྱིས་སྨྲས་པ། ཁྱོད་སུའི་བུ་མོ་ཡིན་ཏེ་བདག་དང་གཟའ་ཤུག་ཏུ་འདུ་བར་སེམས། སྨྲས་པ་བདག་ནི་རྒྱལ་པོ་ལི་ཤི་བར་གྱི་བུ་མོ་ཡིན་ནོ། །དགེ་དོན་གྱིས་སྨྲས་པ། ཁྱེད་ནི་རྒྱལ་པོའི་བུ་མོ་
ཡིན་ཏེ་བདག་ནི་མུ་ལྟོ་བ་ཡིན་ན་གཅིག་ལ་གཅིག་ཇི་ལྟར་བཀུར་སྟི་བྱེད་པར་འགྱུར་ཆུང་མས་སྨྲས་པ། བདག་སྙིང་ནས་ཁྱོད་ཀྱི་རིམ་གྲོ་བྱ་སྟེ་ཡིད་དང་འགལ་བར་མི་བྱའོ། །དེ་ལྟར་ཞག་དགུ་བཅུའི་བར་དུ་འདུས་ཤིང་འཁོད་པ་ལས་ཉིན་གཅིག་ཆུང་མས་ཁྱིམ་ཐབ་ལ་མ་བྱས་
པར་ཕྱི་རོལ་དུ་སོང་བ་ལས་རིང་ཞིག་ལོན་པ་དང་ཕྱིར་འོངས་སོ། །དགེ་དོན་གྱིས་ཆུང་མ་ལ་ཁྱོད་གསང་སྟེ་གར་སོང་སོང་། བདག་ལ་ཡང་གཏམ་མ་བྱས་པར་གང་དུ་ཕྱིན་གང་ནས་ཕྱིར་ལོག་ཅེས་སྨྲས་སོ། །ཆུང་མས་སྨྲས་པ། བདག་གསང་སྟེ་སོང་བ་མེད་དོ། །དགེ་དོན་གྱིས་
སྨྲས་པ། ཁྱོད་གསང་ངམ་མི་གསང་མི་སུས་ཤེས། ཆུང་མས་མི་དགའ་སྟེ་ཡི་ཆད་ནས་མིག་མཆི་མས་གང་བཞིན་དུ་འདི་སྐད་དུ་སྨྲས་ཏེ་དམ་བཅས་སོ། །གལ་ཏེ་བདག་ཁྱོད་ལ་གསང་བ་ཞིག་ལ་སོང་བར་གྱུར་ན་ཁྱོད་ཀྱི་མིག་གཉིས་ནམ་དུ་ཡང་འཚོ་བར་
མ་གྱུར་ཅིག །གལ་ཏེ་དེ་ལྟ་མ་ཡིན་ན་ཁྱོད་ཀྱི་མིག་ཡ་ཅིག་སྔོན་བཞིན་དུ་མཐོང་བར་གྱུར་ཅིག་ཅེས་དམ་བཅས་པའི་ཚིག་སྨྲས་མ་ཐག་ཏུ་ཁྱིམ་ཐབ་ཀྱི་མིག་ཡ་གཅིག་སྔོན་བཞིན་དུ་མཐོང་ཞིང་གསལ་བར་གྱུར་ཏེ། སྐར་མ་ལྟར་བཀྲ་ལ་
མངོན་པར་ཆུང་མས་མཐོང་བར་གྱུར་པ་དང་། ཆུང་མས་སྨྲས་པ། ད་ཁྱོད་ཡིད་ཆེས་སམ། དགེ་དོན་འཛུམ་དམུལ་ཏེ་ཅང་མི་སྨྲའོ། །ཆུང་མས་སྨྲས་པ། ཁྱོད་ནི་ཁྲེལ་མེད་པ་དྲིན་མི་ཤེས་པ་ཞིག་སྟེ། བདག་ནི་རྒྱལ་པོ་ཆེན་པོའི་བུ་མོ་
ཞིག་སྟེ། ཁྱོད་ནི་མི་ཐ་མལ་པ་ཞིག་ལས་བདག་གིས་སྙིང་ནས་རིམ་གྲོ་བྱས་ན་འོན་ཀྱང་ཁྱོད་ཡིད་མི་ཆེས་སོ། །ཁྱིམ་ཐབ་ཀྱིས་སྨྲས་པ། ང་སུ་ཡིན་པ་ཁྱོད་ཀྱིས་ཤེས་སམ། སྨྲས་པ། མི་ཤེས་ཏེ་ཁྱོད་མུ་ལྟོ་བ་ཡིན་ནོ། །ཁྱིམ་ཐབ་ཀྱིས་སྨྲས་པ་

71-1-147b

མ་ཡིན་ནོ། །ཁོ་བོ་ནི་ཡུལ་བཱ་རཱ་ཎ་སཱིའི་རྒྱལ་པོའི་སྲས་རྒྱལ་བུ་དགེ་དོན་བྱ་བ་ཡིན་ནོ། །ཆུང་མས་སྨྲས་པ། ཁྱོད་ནི་ཆེར་གླེན་པ་ཞིག་གོ། །ཅིའི་ཕྱིར་དེ་སྐད་ཅེས་སྨྲ། བཱ་ར་ཎ་སཱིའི་རྒྱལ་པོའི་སྲས་རྒྱ་མཚོར་ཞུགས་ཏེ། རིན་པོ་ཆེ་ལེན་དུ་སོང་བ་ལས་
ད་དུང་ཕྱིར་མ་འཁོར་ན། ཅིའི་ཕྱིར་ཁྱོད་དེ་ཡིན་ཞེས་ཟེར། ཁྱོད་བརྫུན་ཟེར་བས་ཁོ་མོ་ཡིད་མི་ཆེས་སོ། །རྒྱལ་བུ་དགེ་དོན་གྱིས་སྨྲས་པ། བདག་ནི་ཐོག་མ་སྐྱེས་ནས་ད་ཙམ་གྱི་བར་དུ་བརྫུན་ཟེར་མ་མྱོང་ངོ་། །ཆུང་མས་སྨྲས་པ། ཁྱོད་སྨྲས་པ་བདེན་
ནམ་བརྫུན་པ་སུ་ཞིག་ཡིད་ཆེས་པར་འགྱུར། ཁྱིམ་ཐབ་ཀྱིས་སྨྲས་པ། ཁོ་བོས་སྨྲས་པའི་ཚིག་འདི་བརྫུན་ཏེ་ཁྱོད་བསླུས་པར་གྱུར་ན་ཁོ་བོའི་མིག་ཡ་ཅིག་གཏན་མི་མཐོང་བར་ཤོག་ཤིག །གལ་ཏེ་ཚིག་བདེན་ན་བདག་གི་མིག་ཡ་ཅིག་ཀྱང་སྔོན་
བཞིན་དུ་མཐོང་བར་ཤོག་ཤིག་ཅེས་སྨྲས་མ་ཐག་ཏུ་མིག་ཡ་གཅིག་གི་འབྲས་བུ་ཡང་སྔོན་བཞིན་དུ་གསལ་ཞིང་མཐོང་བར་གྱུར་ཏོ། །རྒྱལ་བུ་དགེ་དོན་གྱི་མིག་གཉིས་སྔོན་བཞིན་དུ་གསལ་ཞིང་མཛེས་པ་དང་། མིའི་མཚན་དང་ལྡན་ཞིང་
ཡིད་དུ་འོང་ལ་འཇིག་རྟེན་ན་དཔེ་མེད་པར་ཆུང་མས་མཐོང་ནས་རབ་ཏུ་དགའ་བའི་སེམས་སྐྱེས་ཏེ་འཕགས་པས་བྱིན་གྱིས་བརླབས་པ་ཙམ་དུ་སྤྲོ་ཞིང་མིག་མི་འཛུམས་པ་ཙམ་དུ་ལྟའོ། །དེ་ནས་ཕོ་བྲང་དུ་སོང་སྟེ། ཡབ་རྒྱལ་པོ་ལ་བདག་གི་ཁྱིམ་
ཐབ་དེ་ནི་རྒྱལ་བུ་དགེ་དོན་ཡིན་ཞེས་གསོལ་པ་དང་། རྒྱལ་པོས་སྨྲས་པ། གླེན་མ་འདི་སྨྱོས་སམ། ཡི་དགས་ཀྱིས་བསླུས་སམ། ཅི་ཉེས་ན་འདི་སྐད་ཅེས་ཟེར་རྒྱལ་བུ་དགེ་དོན་ནི་རྒྱ་མཚོར་ཞུགས་ཏེ་ད་དུང་ཡང་མ་འཁོར་ཟེར་ན། 
ཅིའི་ཕྱིར་ཁྱོད་མུ་ལྟོ་བ་ཞིག་ལ་རྒྱལ་བུ་དགེ་དོན་ཞེས་ཟེར། བུ་མོས་གསོལ་པ། དེ་ལྟ་མ་ལགས་ཏེ། རྒྱལ་པོ་ཐུགས་མི་ཆེས་ན་སྤྱན་ཀྱིས་གཟིགས་པར་ཅི་གནང་ཞེས་གསོལ་པ་དང་། རྒྱལ་པོས་གཟིགས་མ་ཐག་ཏུ་རྒྱལ་བུ་དགེ་དོན་
ཡིན་པར་རྟོགས་སོ། །དེ་ལྟར་རྟོགས་ནས་དངངས་ཏེ་འདི་སྐད་དུ། གལ་ཏེ་བཱ་ར་ཎ་སཱིའི་རྒྱལ་པོས་ཐོས་ན་བདག་ཅག་ལ་དཔྱས་པར་འགྱུར་རོ་སྙམ་ཞེས་སྨྲས་ནས། རྒྱལ་བུ་དགེ་དོན་བདག་གིས་སྔར་རྒྱལ་བུ་ཡིན་པར་མ་ཤེས་པར་ཉེས་པ་བཤགས་

71-1-148a

སོ་ཞེས་སྨྲས་སོ། །རྒྱལ་བུས་སྨྲས་པ། དེ་ལ་ཉེས་པ་མེད་དེ། རྒྱལ་པོའི་གནག་རྫི་དེ་ལ་སྦྱིན་པ་བྱིན་ཅིག་ཅེས་སྨྲས་སོ། །དེ་ནས་རྒྱལ་པོ་ལི་ཤི་བར་གྱིས་གནག་རྫི་དེ་ལ་གསེར་དང་། དངུལ་དང་། རིན་པོ་ཆེ་དང་། གོས་དང་། 
བཟའ་བ་དང་། བཏུང་བ་ཡང་བྱིན་གནག་ལྔ་བརྒྱ་ཡང་ཐལ་བྱུང་བྱིན་ནོ། །དེ་ནས་གནག་རྫི་དེ་ཡང་ཤིན་དུ་དགའ་ནས་རྒྱལ་བུ་དགེ་དོན་ལ་བདག་གིས་ཕན་པའི་དྲིན་ཅི་ཞིག་བྱས་ན་བདག་ལ་ནོར་དང་། རིན་པོ་ཆེ་འདི་སྙེད་ཅིག་
བྱིན་ཞེས་མི་མང་པོའི་ནང་དུ་སྐད་ཆེན་པོས་གསང་མ་མཁྱུད་དེ་སྦྱིན་པ་བྱས་ཀྱང་དྲིན་མངོན་སུམ་དུ་འོངས་པས་སྦྱིན་པ་བྱས་པའི་འབྲས་བུའི་རྣམ་པར་སྨིན་པ་ནི་འདི་ལྟར་རྒྱ་ཆེའོ་ཞེས་བསྒྲགས་སོ། །དེའི་ཚེ་ན་འཁོར་མང་པོ་ཀུན་
རབ་ཏུ་དགའ་ནས་སྦྱིན་པ་ལ་དགའ་བའི་སེམས་སྐྱེས་སོ། །གང་སངས་རྒྱས་འདོད་པས་ནི་ཐམས་ཅད་སྦྱིན་པར་བྱའོ་ཞེས་ལྷ་རྣམས་ཀྱང་མི་དེ་ལ་བསྔགས་ཤིང་བསྟོད་པས་དེ་བཞིན་དུ་གྲུབ་པར་གྱུར་ཏོ། །དེའི་ཚེ་ན་རྒྱལ་བུ་དགེ་དོན་རྒྱ་
མཚོར་མ་ཞུགས་པ་ཕོ་བྲང་ན་འདུག་པ་ན་ངང་པ་དཀར་པོ་ཅིག་གསོས་ཏེ་རྟག་ཏུ་འགྲོགས་ཤིང་བཟའ་བ་དང་། བཏུང་བ་དང་། འགོ་བ་དང་། སྡོད་པ་དང་། འདུག་པ་དང་། ཉལ་བ་ན་རྟག་པར་ལྷན་ཅིག་གོ། །དེ་ནས་ཡུམ་བཙུན་མོས་
བྱ་ངང་པའི་དྲུང་དུ་སོང་ནས་འདི་སྐད་ཅེས་སྨྲས་སོ། །རྒྱལ་བུ་འདུག་པའི་ཚེ་ཁྱོད་དང་རྟག་པར་འགྲོགས་ན་ད་རྒྱ་མཚོར་སོང་སྟེ་ཤི་འམ་གསོན་གཏོལ་མེད་དེ་བདག་མི་ཤེས་ན་ཁྱོད་རྒྱལ་བུ་མི་དྲན་ནམ། ངང་པས་ཚིག་དེ་ཐོས་ནས་སྐད་
ཕྱུང་སྟེ་ས་ལ་འགྲེ་ནས་མིག་མཆི་མས་གང་བཞིན་དུ་བཙུན་མོ་ལ་འདི་སྐད་ཅེས་སྨྲས་སོ། །བཙུན་མོ་བདག་རྒྱལ་བུ་ཚོལ་བར་བཀའ་སྩལ་ན་མཆིའོ་ཞེས་སྨྲས་ནས་དེའི་ཚེ་བཙུན་མོས་ཡི་གེར་བྲིས་ཏེ་ངང་པའི་མགུལ་དུ་བཏགས་ནས་རྒྱལ་བུ་
ཚོལ་དུ་བཏང་ངོ་། །དེ་ནས་ངང་པ་དེས་རྒྱལ་བུ་གང་ལོགས་སུ་སོང་བ་དྲིས་ནས་ནམ་མཁའ་ལ་འཕུར་ནས་རྒྱ་མཚོའི་ལོགས་སུ་སོང་ངོ་། །བཙུན་མོས་དེ་ལྟར་ངང་པ་སོང་བ་མཐོང་ནས་ད་ཅི་བདག་གི་བུ་གསོན་ནམ་ཤི་བའི་གཏམ་ངེས་པར་ཉེ་བར་ཐོས་པར་འགྱུར་

71-1-148b

སྙམ་སེམས་སོ། །དེ་ནས་ངང་པ་དེས་རྒྱ་མཚོའི་སྟེང་གི་ནམ་མཁའ་ལ་ལྡིང་ལྡིང་ནས་ཀུན་དུ་བརྟགས་ནས་བཙལ་ཀྱང་རྒྱལ་བུ་མ་མཐོང་ནས་མཐར་གྱིས་རྒྱལ་པོ་ལི་ཤི་བར་གྱི་ཡུལ་དུ་ཕྱིན་པ་དང་། རྒྱང་མ་ནས་རྒྱལ་བུ་དགེ་དོན་རྒྱལ་པོའི་ཕོ་བྲང་
ན་འདུག་པ་མཐོང་ངོ་། །དེ་ནས་ངང་པ་དེ་དེ་ཉིད་དུ་བབས་ཏེ་རྒྱལ་བུ་གང་ན་བར་འོངས་ཏེ། སྙིང་རྗེ་རྗེ་སྐད་ཕྱུང་སྟེ་རབ་ཏུ་དགའ་བས་རྒྱལ་བུ་ལ་བལྟའོ། །དེ་ནས་རྒྱལ་བུས་ངང་པའི་མགུལ་ནས་ཡི་གེ་བླངས་ནས་མགོ་བོས་གུས་པར་ཕྱག་འཚལ་ཏོ། །
དེ་ནས་ཡི་གེ་ཕྱེ་ནས་བཀླགས་སོ། །རྒྱལ་པོ་ཡབ་ཡུམ་གཉིས་ཉིན་མཚན་དུ་རྒྱལ་བུ་དྲན་པས་རྟག་ཏུ་ངུ་བས་མྱིག་གཉིས་ལྡོངས་པར་རྟོགས་སོ། །དེ་ནས་རྒྱལ་བུ་དགེ་དོན་གྱིས་ཇི་ལྟར་གྱུར་པ་ཞིབ་ཏུ་ཡི་གེར་བྲིས་ཏེ། ཕྱིར་ཡང་ངང་
པའི་མགུལ་དུ་བཏགས་ནས་ཕྱིར་བཏང་ངོ་། །དེ་ནས་ངང་པ་རབ་ཏུ་དགའ་ཞིང་ཕྱིར་ཡབ་རྒྱལ་པོ་དང་ཡུམ་གྱིས་དེར་འོངས་སོ། །རྒྱལ་པོས་ཡི་གེ་འོངས་པ་མཐོང་ནས་རབ་ཏུ་དགའ་མགུ་རངས་ཏེ། སྤྲོ་བ་ཚད་མེད་པར་གྱུར། རྒྱལ་བུ་དགེ་དོན་ཡང་
ངན་དོན་གྱིས་རྐུ་བྱས་ཏེ། རིན་པོ་ཆེ་ཡང་ཕྲོགས་པས་སྡུག་བསྔལ་མང་པོ་མྱོང་བར་རྟོགས་སོ། །དེ་ནས་ཡབ་རྒྱལ་པོས་དེ་མ་ཐག་ཏུ་ངན་དོན་བཟུང་ནས་ལག་པ་དང་རྐང་པ་ཁོང་སྒྲིལ་དུ་བཅུག །གཉའ་བ་ཡང་ལྕགས་ཐག་གིས་
བཏགས་ནས་ཁྲི་མོན་དུ་བོར་རོ། །དེ་ནས་རྒྱལ་པོ་ལི་ཤི་བར་གྱི་སྟེང་དུ་ཕོ་ཉ་བཏང་ནས་ཅིའི་ཕྱིར་རྒྱལ་བུ་བཀག་སྟེ་བདག་ཅག་མྱ་ངན་གྱིས་གདུངས་པར་བྱས་ཤེས་སྤྲིངས་སོ། །དེ་ནས་རྒྱལ་པོ་ལི་ཤི་བར་སྐྲག་ནས་རྒྱལ་བུ་དགེ་
དོན་གོས་དང་རྒྱན་གྱིས་བརྒྱན་ཏེ་ས་མཚམས་སུ་བཞག་སྟེ། ཕོ་ཉ་ལ་སྤྲིང་བ་ལྟར་བྱས་ནས་རྒྱལ་བུ་དགེ་དོན་རྒྱ་མཚོ་ནས་སླར་འཁོར་ཏེ་ད་འདིར་གཤེགས་སོ་ཞེས་ཕོ་ཉ་འོངས་པ་ལྟར་བྱས་སོ། །དེའི་ཚེ་རྒྱལ་པོ་ལི་ཤི་བར་གྱིས་
གང་ནས་འོངས་པའི་ས་ཕྱོགས་དེ་ཀུན་ཕྱག་དར་བྱས། ཆག་ཆག་བཏབ་ནས་རྒྱལ་མཚན་དང་། བ་དན་དང་། གདུགས་བྲེས་ཏེ། དྲིལ་བུ་དང་། རྔ་བརྡུངས་ནས་རོལ་མོ་སྣ་ཚོགས་བྱས་ཏེ། རྒྱང་མ་ནས་རྒྱལ་པོ་ཉིད་འཁོར་

71-1-149a

དང་བཅས་པས་རྒྱལ་བུ་ཕོ་བྲང་གི་ནང་ནས་བསུ་ནས་བུ་མོ་ཆུང་མར་བྱིན་ཏེ་ཡུལ་བཱ་ར་ཎ་སཱིར་སྐྱེལ་དུ་བཏང་ངོ་། །བཱ་ར་ཎ་སཱིའི་རྒྱལ་པོ་དང་། བཙུན་མོས་རྒྱལ་བུ་འོངས་ཤེས་ཐོས་ནས་རབ་ཏུ་དགའ་མགུ་རངས་ཏེ། བལ་
གྱི་གླང་པོ་ཆེ་རབ་ལ་ཞོན་ནས་རྒྱལ་བུ་བསུས་སོ། །བསུ་བའི་ས་ཕྱོགས་དེར་ཕྱག་དར་དང་ཆག་ཆག་བྱས་ཏེ། བདུག་སྤོས་དང་། བ་དན་དང་རྒྱལ་མཚན་དང་། གདུགས་ལ་སོགས་པ་སྦྱར་ཅིང་བྲེས་ནས་རོལ་མོ་སྣ་ཚོགས་
ཀྱང་བྱས་སོ། །ཡུལ་དེ་ན་གནས་པའི་ཡུལ་མི་ཕོ་མོས་ཐམས་ཅད་ཀྱིས་རྒྱལ་བུ་དགེ་དོན་རྒྱ་མཚོ་ནས་བདེ་བར་ཕྱིར་འཁོར་བར་ཐོས་ནས་ཐམས་ཅད་རབ་ཏུ་དགའ་ནས་ཀུན་གྱིས་རྒྱལ་བུ་བསུས་སོ། །དེ་ནས་རྒྱལ་བུ་དགེ་དོན་གྱིས་
ཡབ་རྒྱལ་པོ་དང་། ཡུམ་བཙུན་མོའི་ཞབས་ལ་མགོ་བོས་ཕྱག་འཚལ་ཏེ། རྒྱལ་པོ་དང་། བཙུན་མོ་མིག་ལྡོངས་ཏེ་རྒྱལ་བུ་མི་མཐོང་བས་ལག་པས་མནམས་བྱུགས་ནས་ཁྱོད་ངའི་བུ་དགེ་དོན་ཡིན་ནམ་ཁྱོད་རྟག་པར་དྲན་
ཏེ་མྱ་ངན་གྱིས་གདུངས་པས་འདི་ལྟར་གྱུར་ཏོ། །རྒྱལ་བུས་ཡབ་རྒྱལ་པོ་དང་བཙུན་མོ་ལ་ཕྱག་བྱས་ནས་རྒྱལ་ཕྲན་རྣམས་དང་། བློན་པོ་རྣམས་དང་། མི་མང་པོ་ལ་ལག་པ་བཏེག་སྟེ་སྐད་ཆེན་པོས་སྤྲོ་བ་བསྐྱེད་དོ། །བདག་ཉོན་
མོངས་ཀྱང་ཁྱོད་ཀྱི་ཡོན་ཏན་གྱིས་ཕྱིར་འཁོར་རོ་ཞེས་སྨྲས་སོ། །དེ་ནས་རྒྱལ་བུ་དགེ་དོན་གྱིས་ཡབ་རྒྱལ་པོ་ལ་བདག་གི་ནུ་བོ་ངན་དོན་ད་ལྟར་ག་རེ། གང་ན་མཆིས་ཤེས་གསོལ་པ་དང་། ཡབ་རྒྱལ་པོས་བཀའ་སྩལ་པ། ཁྱོད་དེའི་
གཏམ་མ་འདྲི་ཤིག །སྡིག་པ་ཅན་དེ་ད་ལྟར་ཁྲི་མོན་ན་ཡོད་དེ་གཏང་ཞེས་བྱ་བ་མེད་དོ། །རྒྱལ་བུ་དགེ་དོན་གྱིས་གསོལ་པ། བདག་ངན་དོན་དང་ཕྲད་ཏུ་སྩོལ་ཅིག་ཅེས་དེ་བཞིན་དུ་ལན་གཉིས་ལན་གསུམ་གྱི་བར་དུ་ངུས་ཤིང་གསོལ་ནས་
ཡིད་མ་བཟློགས་ཏེ་ཁྲི་མོན་ནས་ངན་དོན་ཕྱུང་ངོ་། །ངན་དོན་གྱི་ལག་པ་དང་། རྐང་པ་ནས་ལྕགས་དང་ཁོང་སྒྲིལ་ཕྱུང་ཤིག་པར་གསོལ་ལོ། །དེ་ནས་བཙོན་ཆ་ནས་ཕྱུང་ནས་ངན་དོན་པང་དུ་འཁྱུད་ནས་ཁྱོད་རབ་ཏུ་ཉོན་མོངས་སམ་ཞེས་ཚིག་འཇམ་པོས་

71-1-149b

སྤྲོ་བ་བསྐྱེད་དེ་གཏམ་བྱས་ནས་ངའི་ནོར་བུ་རིན་པོ་ཆེ་ཁྱེར་བ་ག་རེ་ཞེས་ལན་གཉིས་ལན་གསུམ་གྱི་བར་དུ་དྲིས་པ་དང་། གདོད་སའི་འོག་ན་སྦས་ཤིང་འདུག་གོ་ཞེས་སྨྲས་སོ། །དེ་ནས་རྒྱལ་བུ་དགེ་དོན་གྱིས་གནས་དེ་ནས་རིན་པོ་ཆེ་ཕྱུང་ནས་བླངས་སོ། །དེ་ནས་
ཡབ་རྒྱལ་པོ་དང་ཡུམ་བཙུན་མོའི་དྲུང་དུ་འོངས་ཏེ། ནོར་བུ་རིན་པོ་ཆེ་ལ་བདུག་སྤོས་བཟང་པོས་བདུགས་ནས་པུས་མོ་བཙུགས་ཏེ་སྨོན་ལམ་འདི་སྐད་ཅེས་བཏབ་བོ། །ཡིད་བཞིན་གྱི་ནོར་བུ་རིན་པོ་ཆེ་ཡིན་ཡང་དག་ན་ཡབ་རྒྱལ་པོ་དང་ཡུམ་
བཙུན་མོའི་སྤྱན་སྔོན་བཞིན་དུ་ཕྱིར་མཐོང་བར་ཤོག་ཤིག་ཅེས་སྨྲས་མ་ཐག་ཏུ་ཡབ་རྒྱལ་པོ་དང་ཡུམ་གཉིས་ཀྱི་སྤྱན་སྔོན་བཞིན་དུ་གསལ་བར་མཐོང་བར་གྱུར་ནས་རབ་ཏུ་དགའ་མགུ་རངས་པར་གྱུར་ཏོ། །དེའི་ཚེ་རྒྱལ་བུ་དགེ་དོན་ཟླ་བ་ཉ་བའི་དུས་ཚེས་བཅྭ་ལྔའི་
ཉིན་པར་ཁྲུས་བྱས་ནས་གོས་སར་པ་གཙང་མ་གྱོན་ནས་ནོར་བུ་རིན་པོ་ཆེ་ཡང་ཏོག་གི་སྟེང་དུ་བཞག་སྟེ། ལག་ན་བདུག་སྤོས་ཀྱི་སྣོད་ཐོགས་ནས་ཡིད་བཞིན་གྱི་ནོར་བུ་རིན་པོ་ཆེ་ལ་མགོ་བོས་ཕྱག་འཚལ་ནས་འདི་སྐད་ཅེས་སྨོན་ལམ་དུ་བཏབ་
བོ། །བདག་གིས་འཛམ་བུའི་གླིང་གི་སེམས་ཅན་ཐམས་ཅད་ཀྱི་ཕྱིར་སྡུག་བསྔལ་ཆེན་པོ་ཉམས་སུ་བླངས་ཏེ་ནོར་བུ་རིན་པོ་ཆེ་བླངས་སོ་ཞེས་སྨྲས་མ་ཐག་ཏུ། དེའི་ཚེ་ཤར་ཕྱོགས་ནས་རླུང་ཆེན་པོ་ལངས་ནས་སྤྲིན་དང་ན་བུན་བུས་ཏེ་ནམ་
མཁའ་ཡོངས་སུ་དག་པར་བྱས་ཏེ། འཛམ་བུའི་གླིང་ན་མི་གཙང་བའི་ཉལ་ཉིལ་དང་། བཤང་གཅི་དང་། ཕྱག་དར་དང་། མི་སྡུག་པ་ཐམས་ཅད་རླུང་གིས་བུས་ཏེ་ཡོངས་སུ་དག་པར་བྱས་ནས་ནོར་བུ་རིན་པོ་ཆེའི་བྱིན་གྱིས་འཛམ་བུའི་གླིང་
དུ་མ་རྨོས་པར་རང་གྲུབ་པའི་འབྲས་སཱ་ལུ་དེ་ཡང་འཇམ་ཞིང་ཁ་དོག་དང་རོར་ལྡན་པ། ཤང་ཤོང་ཐམས་ཅད་ཀྱང་གང་ནས་པུས་མོ་ནུབ་ཙམ་དུ་བབ་བོ། །དེའི་འོག་ཏུ་བགོ་བའི་གོས་དམ་པ་དང་། ལུས་ཀྱི་རྒྱན་གདུབ་དང་། ནོར་བུ་གདུབ་བུ་ལ་སོགས་པ་
ཆར་བཞིན་དུ་བབ་བོ། །དེའི་འོག་ཏུ་གསེར་དང་། དངུལ་དང་རིན་པོ་ཆེ་དང་། དེ་ལ་སོགས་ཏེ་རོལ་མོ་སྣ་ཚོགས་དང་། མདོར་ན་སེམས་ཅན་ཐམས་ཅད་ཀྱི་དགོས་པའི་ཡོ་བྱད་ཅི་འདོད་པ་ཐམས་ཅད་ཆར་བཞིན་དུ་བབ་ནས་ཐམས་ཅད་ཆོག་ཅིང་ཚིམ་པར་བྱས་སོ། །བྱང་

71-1-150a

ཆུབ་སམས་དཔའི་སྙིང་རྗེ་ཆེན་པོའི་ཤུགས་ཀྱིས་སྦྱིན་པའི་ཕ་རོལ་དུ་ཕྱིན་པ་ལ་སྤྱོད་དེ། སེམས་ཅན་ཐམས་ཅད་ལ་དགོས་པའི་ཡོ་བྱད་ཆོག་པར་སྦྱིན་པའི་དོན་ནི་འདི་ལྟ་བུ་ཡིན་ནོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་
སྩལ་པ། དེའི་ཚེ་དེའི་དུས་ན་ཡུལ་བཱ་ར་ཎ་སཱིའི་རྒྱལ་པོ་ཆེན་པོ་དེ་གཞན་ཞིག་ཡིན་སྙམ་དུ་སེམས་ན་དེ་ལྟར་མི་བལྟའོ། །དེའི་ཚེ་དེའི་དུས་ན་རྒྱལ་པོ་ཆེན་པོ་དེ་ནི་ད་ལྟར་ངའི་ཡབ་རྒྱལ་པོ་ཟས་གཙང་མ་ཡིན་ནོ། །དེའི་ཚེ་དེའི་དུས་ན་བཙུན་མོ་དེ་གཞན་
ཞིག་ཡིན་སྙམ་དུ་སེམས་ན་དེ་ལྟར་མི་བལྟའོ། །དེའི་ཚེ་དེའི་དུས་ན་བཙུན་མོར་གྱུར་པ་དེ་ནི་ད་ལྟར་ངའི་ཡུམ་ལྷ་མཛེས་ཡིན་ནོ། །དེའི་ཚེ་དེའི་དུས་ན་རྒྱལ་བུ་ངན་དོན་དེ་ནི་ད་ལྟར་ལྷ་སྦྱིན་ཉིད་ཡིན་ནོ། །དེའི་ཚེ་དེའི་དུས་ན་རྒྱལ་བུ་དགེ་དོན་དེ་ནི་ད་ལྟ་རང་ཉིད་
ཡིན་ཏེ། ལྷ་སྦྱིན་འདི་ནི་སྔོན་འདས་པའི་དུས་ན་ཡང་ང་ལ་རྒྱུན་དུ་ངན་སེམས་ཀྱིས་ང་ལ་གནོད་པ་བྱས་ཀྱང་ངས་ནི་བཟོད་པ་རྟག་ཏུ་དང་དུ་བླངས་ནས་རྟག་ཏུ་དེ་ལ་དྲིན་བྱིན་པས་རྒྱུན་དུ་བདེ་བར་བྱས་ན། ད་མངོན་པར་སངས་རྒྱས་པ་ལྟ་སྨོས་ཀྱང་
ཅི་དགོས། བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ན་ལྷ་དང་མི་བརྒྱ་སྟོང་སྙེད་རྒྱུན་དུ་ཞུགས་པའི་འབྲས་བུ་ཐོབ་པ་ནས་དགྲ་བཅོམ་པའི་འབྲས་བུའི་བར་དུ་ཐོབ་པར་གྱུར་ཏོ། །གཞན་ཡང་ལྷ་དང་མི་ཚད་མེད་པ་བརྒྱ་
སྟོང་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། སེམས་ཅན་ཚད་མེད་པ་བརྒྱ་སྟོང་སྙེད་ཉན་ཐོས་དང་། རང་སངས་རྒྱས་ཀྱི་བར་དུ་སེམས་བསྐྱེད་པར་གྱུར་ཏོ། །ཀུན་དགའ་བོས་སངས་རྒྱས་ལ་གསོལ་པ། 
བཅོམ་ལྡན་འདས་མདོ་སྡེ་འདིའི་མིང་ཅི་ཞེས་བགྱི། ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། མདོ་སྡེ་འདིའི་མིང་ཐབས་མཁས་པ་སངས་རྒྱས་དྲིན་ལན་བསབ་པ་སེམས་ཅན་ཐམས་ཅད་ལ་ཚིམ་པར་
སྦྱིན་པ་ཞེས་བྱའོ། །འཁོར་མང་པོ་རྣམས་མདོ་སྡེ་འདི་གསུངས་པ་ལ་རབ་ཏུ་དགའ་ནས་ཕྱག་བྱས་ཏེ་ཕྱིར་དོང་ངོ་། །གཞན་ཡང་ལྷ་སྦྱིན་ནི་སངས་རྒྱས་ཀྱིས་བསྟན་པའི་རྗེས་སུ་རབ་ཏུ་བྱུང་མོད་ཀྱི། ཁེ་བཀུར་དང་རྙེད་པའི་ཕྱིར་རྒྱུན་དུ་

71-1-150b

ཕྲག་དོག་བྱེད་དེ། ལྷ་སྦྱིན་མདོ་སྡེ་སྤོས་ཀྱི་གླང་པོ་ཆེའི་ཁལ་དྲུག་ཁྲི་སྙེད་ཁ་དོན་དུ་འདོན་ཤེས་ཀྱང་མཚམས་མེད་པའི་སེམས་ཅན་དམྱལ་བ་ལས་མ་ཐར་རོ། །དེའི་ཚེ་ན་ལྷ་སྦྱིན་རྒྱལ་པོ་མ་སྐྱེས་དགྲ་དང་རབ་ཏུ་མཛའ་ནས་གཅིག་ལ་གཅིག་
དགའ་ཞིང་ཉེ་བར་སེམས་ཏེ། གཅིག་གི་ཚིག་ལ་གཅིག་ཡིད་ཆེས་སོ། །དེ་ནས་ལྷ་སྦྱིན་གྱིས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ཁྱོད་ནི་རྒྱལ་པོ་སར་པ་བྱོས་ཤིག །བདག་ནི་སངས་རྒྱས་སར་པ་བགྱིའོ། །རྒྱལ་པོ་མ་སྐྱེས་དགྲས་སྨྲས་པ། 
ད་ལྟར་ཡབ་རྒྱལ་པོ་ཡང་བཞུགས་པས་དེ་ལྟར་མི་རུང་ངོ་། །ལྷ་སྦྱིན་གྱིས་སྨྲས་པ། དེ་མེད་པར་བྱར་རུང་ངོ་། །བདག་ཀྱང་སངས་རྒྱས་མེད་པར་བྱས་ལ། དེའི་འོག་ཏུ་རྒྱལ་པོ་སར་པ་དང་། སངས་རྒྱས་སར་པས་སེམས་ཅན་གྱི་དོན་བྱས་པ་མི་སྐྱིད་དམ། དེ་ནས་རྒྱལ་པོ་མ་སྐྱེས་
དགྲས་ལྷ་སྦྱིན་གྱིས་སྨྲས་པ་བཞིན་ཡབ་རྒྱལ་པོ་བཀྲོངས་ཏེ་རྒྱལ་པོའི་ཁབ་ཡུལ་བཱ་རཱ་ཎ་སཱི་གཟུང་ངོ་། །ལྷ་སྦྱིན་གྱིས་རྒྱལ་པོ་མ་སྐྱེས་དགྲ་ལ་སྨྲས་པ། བདག་ཀྱང་དེ་བཞིན་གཤེགས་པ་མེད་པར་བྱའོ། །མ་སྐྱེས་དགྲས་སྨྲས་པ། དེ་
བཞིན་གཤེགས་པ་ནི་རྫུ་འཕྲུལ་ཆེན་པོའི་མཐུ་མངའ་བས་གཞན་གྱིས་བསམ་པའི་སེམས་ཤེས་ན་ཁྱོད་ཀྱིས་ཇི་ལྟར་མེད་པར་བྱ་བར་ནུས། དེ་བཞིན་གཤེགས་པ་ལ་གཞན་ཡང་ཉེ་གནས་ཆེན་པོ་ཤཱ་རིའི་བུ་དང་། མཽད་གལ་གྱི་བུ་ཆེན་པོ་དང་། ན་བུན་དང་། 
མ་འགགས་པ་ལ་སོགས་པ་ཡོད་པས་མི་ནུས་སོ། །ལྷ་སྦྱིན་གྱིས་རྒྱལ་པོ་མ་སྐྱེས་དགྲ་ལ་སྨྲས་པ། རྒྱལ་པོ་ཁྱོད་ཀྱིས་བདག་གི་གྲོགས་གྱིས་ཤིག །རྒྱལ་པོས་སྨྲས་པ། ཁྱོད་ལས་ཅི་ཞིག་བྱེད་པར་སེམས་ལྷ་སྦྱིན་གྱིས་སྨྲས་པ། རྒྱལ་པོ་
ཆེན་པོས་ཡུལ་ཕྱོགས་སུ་བཀར་བཏགས་ཏེ། སུ་ཡང་དགེ་སློང་རྣམས་ལ་གོས་དང་། བཟའ་བ་དང་། བཏུང་བ་དང་། བསོད་སྙོམས་བྱིན་དུ་མ་སྩལ་ཅིག །དེ་ནས་རྒྱལ་པོ་མ་སྐྱེས་དགྲས་ཀྱང་བཀར་བཏགས་ཏེ། དགེ་སློང་རྣམས་ལ་
སུ་ཡང་གོས་དང་། ཟས་དང་། བསོད་སྙོམས་སྦྱིན་པར་གྱུར་ན་རྐང་ལག་བཅད་དོ་ཞེས་བཀར་བཏགས་སོ། །དེའི་ཚེ་བཅོམ་ལྡན་འདས་དགེ་སློང་གི་དགེ་འདུན་ཆེན་པོའི་འཁོར་དང་བཅས་ཏེ། བྱ་རྒོད་སྤུངས་པའི་རི་ནས་བསོད་སྙོམས་

71-1-151a

སློང་དུ་སོང་བ་ལས་ཅི་ཡང་མ་རྙེད་དོ། །དེ་བཞིན་དུ་ཞག་གཅིག་ནས་ཞག་བདུན་གྱི་བར་དུ་ཅི་ཡང་མ་རྙེད་པས་ཤཱ་རིའི་བུ་ལ་སོགས་པ་སློབ་མ་ཆེན་པོ་རྣམས་ནི་རྫུ་འཕྲུལ་གྱི་མཐུས་ཡུལ་ཁམས་གཞན་དུ་གོས་དང་། ཟས་དང་
བསོད་སྙོམས་སློང་དུ་སོང་ངོ་། །དེའི་ཚེ་ན་ལྷ་སྦྱིན་གྱིས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ད་ལྟར་སངས་རྒྱས་ཀྱི་སློབ་མ་ཆེན་པོ་གཅིག་ཀྱང་མེད་དེ། དེ་བཞིན་གཤེགས་པ་གཅིག་པུ་བཞུགས་ཀྱིས་རྒྱལ་པོས་དེ་བཞིན་
གཤེགས་པ་སྤྱན་འདྲེན་དུ་ཐོང་ཤིག །ཕོ་བྲང་གི་ནང་དུ་འོངས་ན་བདག་ཅག་གིས་བལ་གྱི་གླང་པོ་ཆེ་ནག་པོ་མ་རུངས་པ་ལྔ་བརྒྱ་ལ་ཆང་བླུད་དེ་རབ་ཏུ་མྱོས་པར་བྱས་ལ་སངས་རྒྱས་སྤྱན་དྲངས་ཏེ། ཕོ་བྲང་གི་ནང་དུ་འོངས་ནས་བལ་གླང་རྨིས་ཤིང་མྱོས་པ་
དེ་དག་གིས་བརྫིས་ཏེ་གསད་པར་བྱའོ། །དེ་ནས་རྒྱལ་པོ་མ་སྐྱེས་དགྲས་དེ་བཞིན་གཤེགས་པ་སྤྱན་འདྲེན་དུ་བཏང་ནས། སངས་རྒྱས་དང་། དགྲ་བཅོམ་པ་ལྔ་བརྒྱ་རྒྱལ་པོས་སྤྱན་དྲངས་པར་གཤེགས་པར་གནང་སྟེ་རྒྱལ་པོའི་ཁབ་ཏུ་གཤེགས་
སོ། །དེ་ནས་རྒྱལ་པོ་མ་སྐྱེས་དགྲས་བལ་གླང་རྨིས་ཤིང་མྱོས་པ་ལྔ་བརྒྱ་བཀྱེ་ནས་བལ་གླང་རྨིས་པས་ཤིང་བཅག་ར་བ་ཡང་དྲལ། རྩིག་པ་ཡང་བསྒྱེལ་ཏེ་ངར་བའི་སྒྲ་ཆེན་པོ་ཕྱུང་སྟེ། དེ་བཞིན་གཤེགས་པ་དང་དགྲ་བཅོམ་པ་ལྔ་བརྒྱའི་
ལོགས་སུ་མཆོངས་ཏེ་སོང་ངོ་། །དེ་ནས་དགྲ་བཅོམ་པ་ལྔ་བརྒྱ་རབ་ཏུ་སྐྲག་ནས་སྟེང་གི་ནམ་མཁའ་ལ་འཕགས་ཏེ་སངས་རྒྱས་ཀྱི་སྟེང་གི་ནམ་མཁའ་ལ་འཁོད་དོ། །དེའི་ཚེ་ཀུན་དགའ་བོ་འབའ་ཤིག་དེ་བཞིན་གཤེགས་པ་དང་
མ་བྲལ་ཏེ་འདུག་གོ། །དེའི་ཚེ་དེ་བཞིན་གཤེགས་པས་བྱམས་པ་དང་སྙིང་རྗེའི་ཤུགས་ཀྱིས་ཕྱག་གཡས་པའི་སོར་མོ་ལྔ་ལས་སེང་གེ་ཁ་གདངས་ཤིང་སྒྲ་ཆེན་པོ་སྒྲོགས་པར་སྤྲུལ་ནས་བལ་གླང་རྨིས་པ་ལྔ་བརྒྱ་འཇིགས་
སྐྲག་ནས་ས་ལ་འགྱེལ་ལོ། །དེ་ནས་དེ་བཞིན་གཤེགས་པ་འཁོར་མང་པོས་བསྐོར་ཏེ་རྒྱལ་པོའི་ཕོ་བྲང་དུ་གཤེགས་ནས་རྒྱལ་པོ་མ་སྐྱེས་དགྲ་ཕྱི་རོལ་དུ་བྱུང་སྟེ། དེ་བཞིན་གཤེགས་པ་བསུ་ནས་གདན་ལ་བཞུགས་སུ་གསོལ་ལོ། །གདན་ལ་

71-1-151b

བཞུགས་ནས་འཐོལ་ཞིང་འགྱོད་ཚངས་བྱས་ཏེ། སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ནི་བདག་གིས་བགྱིས་པ་ནི་མ་ལགས་སོ། །ལྷ་སྦྱིན་གྱིས་བགྱིད་ཏུ་སྩལ་ལོ། །བཅོམ་ལྡན་འདས་ཀྱིས་བཀའ་སྩལ་པ། 
དེ་ངས་ཤེས་ཏེ་ལྷ་སྦྱིན་འདིས་རྟག་ཏུ་ང་ལ་གནོད་པ་བྱས་ཏེ། ད་ལྟར་འབའ་ཤིག་ཏུ་མ་ཟད་དེ། འདས་པའི་དུས་ན་ཡང་རྟག་ཏུ་ང་ལ་གནོད་པ་བྱས་ན་ཡང་ངས་ནི་ཐུགས་རྗེ་ཆེན་པོའི་ཤུགས་ཀྱིས་རྟག་ཏུ་ཕན་པ་བྱས་སོ། །
དེའི་ཚེ་རྒྱལ་པོ་མ་སྐྱེས་དགྲས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷ་སྦྱིན་འདིས་སྔོན་འདས་པའི་དུས་ན་དེ་བཞིན་གཤེགས་པ་ལ་གནོད་པ་བགྱིས་པ་གང་དང་གང་ལགས། བཅོམ་ལྡན་འདས་ཀྱིས་
བཀའ་སྩལ་པ། ལེགས་པར་ཉོན་ཅིག་དང་དགྲོལ་ཞིང་བཤད་པར་བྱའོ། །སྔོན་འདས་པའི་དུས་ན་བསྐལ་པ་གྲངས་མེད་པ་འདས་པའི་ཕ་རོལ་ན་རྒྱལ་པོ་ཆེན་པོ་ངང་པའི་ཤ་ལ་དགའ་བ་ཞིག་བྱུང་སྟེ། རྒྱུན་དུ་རྔོན་པ་ཞིག་
བྱ་ངང་པ་ཤོར་དུ་བཅུག་གོ། །དེའི་ཚེ་བྱ་ངང་པ་ལྔ་བརྒྱ་ཞིག་བྱང་ཕྱོགས་ནས་ནམ་མཁའ་ལ་ལྷོ་ཕྱོགས་སུ་འཕུར་བ་ལས་ངང་པའི་རྒྱལ་པོ་དེ་རྔོན་པའི་བྱ་རྒྱ་ལ་ཟིན་ནོ། །དེའི་ཚེ་རྔོན་པ་དེ་རབ་ཏུ་དགའ་བའི་སེམས་སུ་
གྱུར་ནས་སྤྱིལ་བུ་ནས་བྱུང་སྟེ། བསད་པར་གཟས་པ་ལས། ངང་པ་མོ་ཞིག་འཕུར་ཏེ་དྲུང་དུ་འོངས་ནས་སྙིང་རྗེ་རྗེ་སྐད་ཏུ་ཟེར་བའི་སྒྲ་བྱུང་ངོ་། །དེ་ནས་རྔོན་པ་དེས་གཞུ་བདུངས། མདའ་ལྟོང་དུ་བཅུག་སྟེ་གསད་པར་
གཟས་ན་ཡང་འདས་མ་སྐྲག་སྟེ། འདབ་མ་གཉིས་བརྡབས་ནས་ངང་པའི་རྒྱལ་པོའི་སྟེང་དུ་མཆོངས་སོ། །ངང་པ་ཕལ་ལྔ་བརྒྱ་ཡང་དེའི་སྟེང་གི་ནམ་མཁའ་ལ་འཁོར་ཞིང་ལྡིང་ངོ་། །དེའི་ཚེ་ན་རྔོན་པ་དེས་ངང་མོ་དེ་སྙིང་རྗེ་བའི་
སྐད་ཕྱུང་སྟེ། ཁ་ནས་ཁྲག་སྐྱུག་ཅིང་སྲོག་ལ་ཡང་མི་ལྟ་བར་ངང་པའི་རྒྱལ་པོ་ལ་ཆགས་པ་མཐོང་ནས་རྔོན་པ་དེ་འདི་སྙམ་དུ། དུད་འགྲོའི་སྐྱེ་གནས་སུ་གྱུར་པའི་བྱ་ཡང་འདི་ལྟར་གཅིག་ལ་གཅིག་ཆགས་ཏེ་ལུས་དང་སྲོག་ཀྱང་འདོར་

71-1-152a

ན། བདག་ཇི་ལྟ་བུའི་སྙིང་ཞིག་ངང་པའི་རྒྱལ་པོ་འདི་བསད་སྙམ་བསམས་ནས་བྱ་རྒྱ་བཏེག་སྟེ་བཏང་ངོ་། །དེའི་ཚེ་ངང་མོ་ཡང་རབ་ཏུ་དགའ་སྟེ་ཕྱི་བཞིན་འཕུར་ཏེ། ངང་པ་ལྔ་བརྒྱས་བསྐོར་ནས་འཕུར་ཏེ་སོང་ངོ་། །དེའི་ཚེ་རྔོན་པ་དེས་
རྒྱལ་པོ་ལ་འདི་སྐད་ཅེས་གསོལ་ཏོ། །བདག་གིས་ངང་པའི་རྒྱལ་པོ་གཅིག་ཟིན་ཏེ་དབུལ་བར་བགྱིས་པ་ལས་ངང་པ་མོ་ཞིག་ཁ་ནས་ཁྲག་སྐྱུག་ཅིང་མདའ་གཞུ་ལ་ཡང་མི་འཛེམ་པར་ངང་པའི་རྒྱལ་པོའི་སྟེང་དུ་མཆོངས་པས་བདག་སྙིང་གིས་མ་བཟོད་ནས་
བཏང་བ་ལས་ངང་པ་ལྔ་བརྒྱས་བསྐོར་ནས་ནམ་མཁའ་ལ་འཕུར་ཏེ་སོང་ངོ་། །དེའི་ཚེ་རྒྱལ་པོ་དེ་ཚིག་དེ་ཐོས་ནས་སེམས་མི་བདེ་བར་གྱུར་ཏེ། སྙིང་རྗེ་བའི་སེམས་སྐྱེས་ནས་དུད་འགྲོའི་སྐྱེ་གནས་སུ་གྱུར་པ་ལ་ཡང་གཅིག་ལ་གཅིག་ཆུ་གང་བྱེད་དེ། ལུས་
དང་སྲོག་ཀྱང་མི་ཕངས་སོ་སྙམ་བསམས་ནས་རྒྱལ་པོ་ཡང་ངང་པའི་ཤ་མི་ཟ་བར་ཡི་དམ་བཅས་སོ། །དེའི་ཚེ་དེའི་དུས་ན་རྒྱལ་པོ་ཆེན་པོ་དེ་ནི་ད་ལྟར་རྒྱལ་པོ་ཆེན་པོ་ཉིད་ཡིན་ནོ། །དེའི་ཚེ་དེའི་དུས་ན་རྔོན་པར་གྱུར་པ་དེ་ནི་ད་ལྟར་ལྷ་སྦྱིན་ཉིད་ཡིན་
ནོ། །དེའི་ཚེ་དེའི་དུས་ན་ངང་པ་མོ་ཁ་ནས་ཁྲག་སྐྱུག་པ་དེ་ནི་ད་ལྟར་ཀུན་དགའ་བོ་ཡིན་ནོ། །དེའི་ཚེ་དེའི་དུས་ན་ངང་པ་ལྔ་བརྒྱ་ནི་ད་ལྟར་དགྲ་བཅོམ་པ་ལྔ་བརྒྱ་ཡིན་ནོ། །དེའི་ཚེ་དེའི་དུས་ན་ངང་པའི་རྒྱལ་པོར་གྱུར་པ་དེ་ནི་ད་ལྟར་ང་ཡིན་ནོ། །དེ་བས་ན་དེ་ལྟར་ཀུན་
དགའ་བོས་ད་ལྟར་ང་ལ་ཆགས་པ་ཡང་སྔོན་དང་འདྲའོ། །དེའི་ཚེ་ན་དགྲ་བཅོམ་པ་ལྔ་བརྒྱ་སྟེང་གི་ནམ་མཁའ་ལ་འཕགས་པ་ཡང་སྔོན་གྱུར་པ་དང་འདྲའོ། །དེའི་ཚེ་ན་ཡང་ལྷ་སྦྱིན་ང་ལ་གནོད་པ་བྱེད་པ་ཡང་ངས་ནི་སྙིང་རྗེ་ཆེན་པོའི་ཤུགས་ཀྱིས་རྒྱུན་
དུ་ཕན་པའི་དོན་བྱས་སོ། །ཆོས་འདི་བསྟན་པའི་ཚེ་ལྷ་དང་མི་བརྒྱ་སྟོང་སྙེད་འབྲས་བུ་དང་པོ་ཐོབ་པ་ནས་འབྲས་བུ་བཞི་པའི་བར་དུ་ཐོབ་པར་གྱུར་ཏོ། །ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་ཉན་ཐོས་དང་། 
རང་སངས་རྒྱས་ཀྱི་བར་དུ་སེམས་བསྐྱེད་པར་གྱུར་ཏོ། །གཞན་ཡང་ལྷ་སྦྱིན་ངན་སེམས་མ་ཞི་ནས་འདི་སྙམ་དུ་བདག་གི་སོར་མོ་བཅུའི་སེན་མོ་རིང་དུ་སྐྱེས་ལ། སེན་མོའི་བར་དུ་དུག་བཅུག་ལ་དེ་བཞིན་གཤེགས་པ་གང་ན་བར་སོང་ལ་

71-1-152b

མགོ་བོས་ཞབས་ལ་ཕྱག་འཚལ་ལོ། །དེ་ལྟར་ཕྱག་འཚལ་ཏེ་ཞབས་ལ་བཟུང་བའི་ཚེ་སེན་མོ་བཅུའི་འོག་ན་དུག་ཡོད་པས་ཞབས་ལ་བསྐུས་ཏེ། དུག་ལངས་ནས་གདོན་མི་ཟ་བར་ཚེའི་དུས་བྱེད་པར་འགྱུར་རོ་སྙམ་བསམས་ནས། ཇི་ལྟར་
བསམས་པ་ལྟར་དེ་བཞིན་གཤེགས་པ་གང་ན་བར་སོང་ནས་དེར་ཕྱིན་པ་དང་། ཞབས་ལ་མགོ་བོས་ཕྱག་འཚལ་ནས་ཞབས་ལ་ལག་པས་བཟུང་སྟེ་དུག་བསྐུས་པ་དང་། དེའི་ཚེ་དུག་དེ་དག་ནི་ཟིལ་མངར་དུ་གྱུར་ཏེ་དེ་བཞིན་གཤེགས་པ་ལ་
གནོད་པར་མ་གྱུར་ཏོ། །དེ་ལྟར་ལྷ་སྦྱིན་གྱིས་བསམས་པ་ལྟར་མ་གྱུར་ནས་ཡང་འདི་སྙམ་དུ་དེ་བཞིན་གཤེགས་པ་ད་ལྟར་བྱ་རྒོད་སྤུངས་པའི་རི་ལ་གཅིག་པུ་བཞུགས་ཀྱིས། རི་དེའི་སྟེང་དུ་སོང་ལ་ཕ་བོང་རྦབ་དུ་བཏང་ལ་གསད་པར་བྱའོ་སྙམ་
བསམས་ནས་རིའི་རྩེ་མོར་སོང་སྟེ་རྦབ་བཏང་བ་ལས། སངས་རྒྱས་ཀྱི་ཞབས་མཐེའུ་ཆུང་རྨས་ཀྱང་ངའི་ཐུགས་རྗེ་ཆེན་པོའི་ཤུགས་ཀྱིས་དགྲ་དང་གཉེན་ལ་མཉམ་སྙོམས་སོ། །གཞན་ཡང་ལྷ་སྦྱིན་གྱིས་སྔོན་འདས་པའི་དུས་བསྐལ་
པ་གྲངས་མེད་པའི་ཕ་རོལ་དེའི་ཚེ་དེའི་དུས་ན། སངས་རྒྱས་བཅོམ་ལྡན་འདས་རིགས་པར་སྟོན་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་
གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ་འཇིག་རྟེན་དུ་བྱུང་ངོ་། །སངས་རྒྱས་དེ་མྱ་ངན་ལས་འདས་ནས་གཟུགས་བརྙན་ལ་ཆོས་སྤྱོད་པའི་ཚེ་བསམ་གཏན་བྱེད་པའི་
དགེ་སློང་ཞིག་དགོན་པའི་ཚལ་ན་འདུག་པ་ལས་དེའི་ཚེ་དགེ་སློང་དེ་ལ་ཤིག་མང་དུ་ཟའོ། །དེ་ནས་དགེ་སློང་དེས་ཤིག་དང་འདི་སྐད་ཏུ་དམ་བཅས་སོ། །ཁོ་བོ་བསམ་གཏན་བྱེད་པའི་ཚེ་ཁྱེད་མ་འགུལ་བར་ཡིབ་ཅིང་སྡོད་ཅིག་ཅེས་
དམ་བཅས་ནས་ཤིག་རྣམས་ཀྱང་དེ་བཞིན་དུ་བྱེད་དོ། །དེ་ནས་དུས་གཞན་ཞིག་ན་འཇི་བ་ཞིག་དེར་འོངས་ནས་ཤིག་ལ་འདི་སྐད་ཅེས་སོ། །ཁྱོད་ལ་འདི་ལྟར་ཚོ་ཞིང་ཉམ་མཚག་བཟང་བ་ཅི་ལས་གྱུར་ཅེས་དྲིས་ན། ཤིག་གིས་སྨྲས་པ། 

71-1-153a

བདག་གི་གནས་པོ་རྟག་ཏུ་བསམ་གཏན་བྱེད་པ་དེས་བདག་ཅག་གི་ཟས་དང་སྐོམ་དུས་ལས་མི་ཡོལ་བར་དུས་བཞིན་དུ་ཟ་བས་ན་ཉམ་མཚག་བཟང་བ་ཡིན་ནོ། །འཇི་བས་སྨྲས་པ། བདག་ཀྱང་ཁྱེད་དང་ལྷན་ཅིག་ཏུ་འདུག་གོ་ཞེས་སྨྲས་
ནས་དེ་ན་ལྷན་ཅིག་ཏུ་འདུག་གོ། །དེའི་ཚེ་དགེ་སློང་དེ་བསམ་གཏན་བྱེད་པ་ལས་འཇི་བ་དེས་ཤ་དང་ཁྲག་གི་དྲི་ཚོར་ནས་དགེ་སློང་དེ་ལ་བཙུགས་སོ། །དེ་ནས་དགེ་སློང་དེ་སེམས་འཁྲུགས་ནས་གོས་ཕུད་དེ་མེའི་ནང་དུ་བོར་ནས་བསྲེགས་སོ། །དེའི་ཚེ་དེའི་
དུས་ན་བསམ་གཏན་བྱེད་པའི་དགེ་སློང་དེ་ནི་སངས་རྒྱས་འོད་སྲུང་ཡིན་ནོ། །དེའི་ཚེ་དེའི་དུས་ན་འཇི་བ་དེ་ནི་ལྷ་སྦྱིན་ཉིད་ཡིན་ནོ། །དེའི་ཚེ་དེའི་དུས་ན་ཤིག་ཏུ་གྱུར་པ་དེ་ནི་ད་ལྟར་ང་ཡིན་ནོ། །ལྷ་སྦྱིན་དེ་ཁེ་བཀུར་དང་རྙེད་པའི་ཕྱིར་ང་ལ་གནོད་པར་བྱས་
ན་ད་མངོན་པར་སངས་རྒྱས་ན་ཡང་ཁེ་བཀུར་དང་གྲགས་པའི་ཕྱིར་སངས་རྒྱས་ཀྱི་སྐུ་ལ་ཁྲག་ཕྱུང་བ་སེམས་ཅན་དམྱལ་བ་ཆེན་པོར་ལྷུང་ངོ་། །ལྷ་སྦྱིན་གྱིས་རྟག་ཏུ་ང་ལ་ངན་སེམས་ཀྱིས་དེ་བཞིན་གཤེགས་པ་ལ་གནོད་པ་བྱས་པ་ནི་བསྐལ་
པར་ཡང་བརྗོད་ཀྱིས་མི་རྫོགས་ཏེ། དེ་བཞིན་གཤེགས་པ་ནི་རྟག་ཏུ་ཐུགས་རྗེ་ཆེན་པོས་བྱམས་ཤིང་བརྩེ་བའི་ཐུགས་ཀྱིས་བསྐྱབས་སོ། །ང་ནི་ལྷ་སྦྱིན་དང་ཕྲད་པས་མྱུར་དུ་སངས་རྒྱས་སུ་གྲུབ་པར་གྱུར་ཏེ། དྲིན་དྲན་པའི་ཕྱིར་རྟག་ཏུ་
ཐུགས་རྗེས་བསྐྱབས་སོ། །དེའི་ཚེ་ན་དེ་བཞིན་གཤེགས་པས་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཁྱེད་སེམས་ཅན་དམྱལ་བའི་ནང་དུ་སོང་ལ་ལྷ་སྦྱིན་ཁྱོད་སྡུག་བསྔལ་གྱིས་རབ་ཏུ་ཉོན་མོངས་སམ་དྲིས་ལ་ཤོག་ཤིག །དེ་ནས་ཀུན་
དགའ་བོས་སངས་རྒྱས་ཀྱི་བཀའ་བཞིན་དུ་སེམས་ཅན་དམྱལ་བའི་ནང་དུ་སོང་ནས་དམྱལ་བའི་སྒོར་ཕྱིན་ཏེ། དམྱལ་བའི་སྲུངས་མ་ཨ་བང་ཁྱོད་ལྷ་སྦྱིན་བོས་ཤིག་ཅེས་སྨྲས་སོ། །ཨ་བང་གིས་སྨྲས་པ། ཁྱོད་སངས་རྒྱས་གང་གི་ལྷ་སྦྱིན་འདོད། 
འདས་པའི་སངས་རྒྱས་ཐམས་ཅད་ལ་ཡང་ལྷ་སྦྱིན་ཞེས་བྱ་བ་ཡོད་དོ་ཞེས་སྨྲས་ནས། དེ་ནས་ཨ་བང་གིས་ལྷ་སྦྱིན་ལ་ཀུན་དགའ་བོ་ད་ལྟར་སྒོའི་ཕྱི་རོལ་ན་སྡོད་དེ་ཁྱོད་དང་ཕྲད་དགོས་སོ་ཞེས་ཟེར་རོ། །ལྷ་སྦྱིན་དེར་འོངས་ཏེ་ཀུན་དགའ་བོ་

71-1-153b

ལ་ལེགས་པར་འོངས་སམ། ཅི་དེ་བཞིན་གཤེགས་པ་གསུང་བདག་ལ་ད་ལྟར་མཚམས་མེད་པའི་སེམས་ཅན་དམྱལ་བ་འདི་ན་བདེ་བ་ནི་དགེ་སློང་བསམ་གཏན་གསུམ་པ་ལ་ཞུགས་པའི་བདེ་བ་ཐོབ་པ་དང་འདྲའོ། །བཅོམ་ལྡན་འདས་ཀྱིས་
བཀའ་སྩལ་པ་བྱང་ཆུབ་སེམས་དཔའ་ཆེན་པོ་སེམས་ཅན་གྱི་དོན་དུ་ཐབས་མཁས་པ་ཆེན་པོས་སྐྱེ་ཤིའི་འཁོར་བའི་སྡུག་བསྔལ་ཆེན་པོ་གྲངས་མེད་པ་མྱོང་ངོ་། །ཡང་དེ་ལ་གནོད་པར་མི་མཛིན་ཏོ། །གང་ཞིག་ལྷ་སྦྱིན་ནི་ཡང་དག་པར་སྡིག་པ་ཅན་ཡིན་
ཏེ། མཚམས་མེད་པའི་སེམས་ཅན་དམྱལ་བར་ལྟུང་སྙམ་སེམས་ན་དེ་ནི་གནས་མེད་དོ། །དེའི་ཚེ་དེ་བཞིན་གཤེགས་པ་ལས་འཁོར་མང་པོ་རྣམས་ལྷ་སྦྱིན་གྱི་སྤྱོད་པ་ཐབས་མཁས་པ་ཤིན་དུ་ཟབ་མོ་འདི་གསུངས་པ་ཐོས་ནས་བྱང་ཆུབ་སེམས་
དཔའ་ཚད་མེད་པ་བརྒྱ་སྟོང་སྙེད་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ལྷ་དང་མི་ཚད་མེད་པ་བརྒྱ་སྟོང་སྙེད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལྷ་དང་མི་ཚད་མེད་པ་བརྒྱ་སྟོང་སྙེད་ནི་རྒྱུན་དུ་
ཞུགས་པའི་འབྲས་བུ་ཐོབ་པ་ནས་དགྲ་བཅོམ་པའི་འབྲས་བུའི་བར་དུ་ཐོབ་པར་གྱུར་ཏོ། །དེའི་ཚེ་བར་སྣང་གི་ལྷ་རྣམས་ཀྱིས་སྟེང་གི་ནམ་མཁའ་ལས་ལྷ་རྫས་ཀྱི་མེ་ཏོག་ཆར་བཞིན་དུ་ཕབ། ལྷ་རྫས་ཀྱི་རོལ་མོ་བྱས་ནས་འོད་ཟེར་
ཆེན་པོས་ཀུན་དུ་སྣང་བར་བྱས་ཏེ། དེ་བཞིན་གཤེགས་པས་གསུངས་པ་ངོ་མཚར་ཆེ་སྟེ་དགེའོ་ཞེས་བསྟོད་དོ། །བཅོམ་ལྡན་འདས་ཀྱིས་དེ་སྐད་ཅེས་གསུངས་པ་ལ་འཁོར་མང་པོ་མངོན་པར་དགའ་ནས་མགོ་བོས་ཕྱག་འཚལ་ཏེ་
ཕྱིར་དོང་ངོ་། །ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་ལས་ངན་དོན་གྱི་ལེའུ་ཞེས་བྱ་སྟེ་དྲུག་པའོ།། །། ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ། བམ་པོ་ལྔ་པ། དེའི་ཚེ་བཅོམ་
ལྡན་འདས་ལ་འཁོར་མང་པོས་རིམ་གྲོ་བྱས་བཀུར་སྟིར་བྱས། མཆོད་པ་བྱས་ནས་བསྔགས་ཤིང་བསྟོད་པ་བྱས་ཏེ། ཡོངས་སུ་བསྐོར་ནས་མདུན་གྱིས་བལྟས་ཏེ་བཞུགས་སོ། །དེ་ནས་དེ་བཞིན་གཤེགས་པ་ཤིན་དུ་ཟབ་མོའི་སྤྱོད་ཡུལ་ཚད་མེད་པ་

71-1-154a

ལ་རོལ་ཏེ། སྐྱེ་བོ་མང་པོ་སྲིད་པ་གསུམ་གྱི་མི་བཟད་པའི་སྡུག་བསྔལ་ལས་གདོན་པ་དང་། སྒྲིབ་པ་ལྔ་བསལ་བ་དང་། ཀུན་ནས་ཀླག་ཤིང་འཆིང་བ་དགྲོལ་བ་དང་། སེམས་ཅན་ཐམས་ཅད་རྣམ་པར་གྲོལ་བ་ཐོབ་པར་བྱ་ཞིང་འདུས་
མ་བྱས་པའི་བདེ་བ་ལ་དགོད་པའི་ཕྱིར་བསོད་ནམས་ཀྱི་ཞིང་རྣམ་པ་གཉིས་ཕྱེ་ཞིང་སྟོན་ཏོ། །གཉིས་གང་ཞེ་ན། མངོན་པར་འདུ་བྱེད་པའི་བསོད་ནམས་ཀྱི་ཞིང་དང་། མངོན་པར་འདུ་བྱེད་པ་མ་ཡིན་པའི་བསོད་ནམས་ཀྱི་ཞིང་ངོ་། །དེ་ཡང་གང་ཞེ་ན། 
ཕ་མ་དང་། མཁན་པོ་དང་། བླ་མ་དང་། སངས་རྒྱས་དང་། ཆོས་དང་། དགེ་འདུན་དང་བྱང་ཆུབ་སེམས་དཔའ་རྣམས་ཡིན་ཏེ། སེམས་ཅན་གྱིས་དེའི་ཕྱོགས་སུ་མཆོད་པའི་བསོད་ནམས་བྱས་ན། ལམ་གྱི་འབྲས་བུ་ཐོབ་པར་འགྱུར་རོ། །དེ་ནས་
བཅོམ་ལྡན་འདས་ཀྱིས་ཤེས་རབ་ཅན་གྱི་མཆོག་ཤཱ་རིའི་བུ་ལ་སོགས་པ་ཉེ་གནས་ཆེན་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ཁྱེད་རྣམས་ཤེས་པར་གྱིས་ཤིག །དེ་བཞིན་གཤེགས་པ་ནི་རིང་པོ་མི་ཐོགས་པར་མྱ་ངན་ལས་འདའོ། །ཤཱ་རིའི་བུས་
དེ་སྐད་ཅེས་བཀའ་སྩལ་པ་ཐོས་ནས་ལུས་ཀྱི་ཡན་ལག་ལ་ཁབ་ཀྱིས་བཙགས་པ་ལྟར་མི་བདེ་ཞིང་མྱ་ངན་གྱིས་ནོན་ནས་ས་ལ་འགྱེལ་ཏེ་བརྒྱལ་བ་ལས་གདོང་དུ་ཆུ་གྲང་མོས་གཏོར་ནས་རིང་ཞིག་ལོན་པ་དང་ཕྱིར་སངས་ཏེ། ལངས་ནས་ཐལ་
མོ་སྦྱར་བ་བཏུད་དེ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །སངས་རྒྱས་བསྟན་པའི་བདུད་རྩི་ལ། །ཉན་པ་ངལ་ཞིང་སྐྱོ་བ་མེད། །ལེ་ལོའི་དབང་དུ་གྱུར་པ་འམ། །ཕན་པར་མི་འགྱུར་གང་ཡང་མེད། །རྒྱུད་ལྔར་
འཁོར་བའི་རྒྱ་མཚོར་ནི། །རྙོག་པའི་འདམ་དུ་འབྱིང་བ་བཞིན། །སྲེད་ཅིང་འདོད་པས་བཅིངས་པས་ན། །ཤེས་པ་མེད་པས་འཇིག་རྟེན་འཁོར། །སྔོན་ཚེ་ཡང་དག་དྲང་སྤྱད་དེ། །སྦྱིན་པ་སྙོམས་པར་མཛད་པས་ན། །སྨིན་
མཚམས་མཚན་དང་ལྡན་གྱུར་ཏེ། །འོད་ཀྱི་སྣང་བ་དཔག་ཏུ་མེད། །སྤྱན་ནི་ཟླ་བ་ཚེས་པ་འདྲ། །ཕྱོགས་བཅུའི་ཡུལ་ཁམས་མ་ལུས་གཟིགས། །འགྲོ་བ་ཀུན་ཀྱི་སེམས་ཀྱི་མིག །མཐོང་བས་རབ་ཏུ་དགའ་བར་འགྱུར། །དེའི་ཚེ་ཤཱ་

71-1-154b

རིའི་བུས་ཚིགས་སུ་བཅད་པ་བརྒྱ་སྟོང་གིས་དེ་བཞིན་གཤེགས་པ་ལ་བསྟོད་ནས་མགོ་བོས་ཞབས་ལ་ཕྱག་འཚལ་ཏེ། ལན་བརྒྱ་སྟོང་གི་བར་དུ་བསྐོར་བ་བྱས་ནས་ལྷ་རྣམས་དང་། ཀླུ་དང་མི་དང་མི་མ་ཡིན་པ་རྣམས་ལ་འདི་སྐད་ཅེས་སྨྲས་
སོ། །རིགས་ཀྱི་བུ་དག་ཀྱི་ཧུད་ཀྱི་ཧུད་འཇིག་རྟེན་སྟོངས་སོ། །ཨེ་མ་འོ་ཨེ་མ་འོ་འཇིག་རྟེན་སྟོངས་སོ། །རེ་སྡུག་རེ་སྡུག་འཇིག་རྟེན་སྟོངས་སོ། །རིན་པོ་ཆེ་དམ་པའི་ཆོས་ཀྱི་གྲུ་ཟམ་ཞིག་གོ། །བླ་ན་མེད་པའི་བྱང་ཆུབ་ཀྱི་ཤིང་ཆག་གོ། །
རིན་པོ་ཆེ་དམ་པའི་རྒྱལ་མཚན་འགྱེལ་ལོ། །བླ་ན་མེད་པའི་སངས་རྒྱས་ཀྱི་ཉི་མ་མྱ་ངན་ལས་འདས་པ་ཆེན་པོའི་རི་ཕག་ཏུ་ནུབ་བོ། །དེ་སྐད་ཅེས་སྨྲས་པ་དང་། འཁོར་མང་པོ་ཐམས་ཅད་དངངས་ནས་ལུས་ཀྱི་བ་སྤུ་ཀུན་ལངས་པ་ཙམ་དུ་སྐྲག་པར་
གྱུར་ཏོ། །ཉི་མ་ཡང་འོད་མི་གསལ་ཞིང་རི་རྣམས་ཀྱང་འགྱེལ་ལོ། །ས་ཆེན་པོ་ཡང་རབ་ཏུ་གཡོས་སོ། །དེ་ནས་ཤཱ་རིའི་བུས་འཁོར་མང་པོ་ལ་ཚིགས་སུ་བཅད་པ་འདི་དག་སྨྲས་སོ། །བདག་གིས་སངས་རྒྱས་སྐུ་མཐོང་བ། །བཙོ་མ་གསེར་
གྱི་རི་བོ་འདྲ། །མཚན་དང་ཡོན་ཏན་ཀུན་འགགས་ཏེ། །མིང་ཙམ་འབའ་ཤིག་ལུས་པར་འགྱུར། །འཇིག་རྟེན་གསུམ་ལས་འབྱུང་བའི་ཕྱིར། །བརྩོན་འགྲུས་དབང་དུ་འབད་པར་བྱ། །དགེ་བའི་ལས་རྣམས་གདམ་བྱ་ན། །མྱ་ངན་འདའ་བ་མཆོག་
ཏུ་བདེ། །དེ་ནས་ཤཱ་རིའི་བུས་འཁོར་མང་པོ་ལ་སྤྲོ་བ་བསྐྱེད་ནས་རྫུ་འཕྲུལ་གྱི་མཐུ་མངོན་དུ་བསྟན་ཏོ། །རྫུ་འཕྲུལ་གྱི་མཐུས་སྟེང་གི་ནམ་མཁའ་ལ་འཕགས་ནས་རིན་པོ་ཆེའི་བལ་གླང་ཆེན་པོ་མགོ་བོ་སྟོང་དང་ལྡན་པ་ཞིག་ཏུ་སྤྲུལ་ཏོ། །
བལ་གྱི་གླང་པོ་ཆེ་གཅིག་ལ་གཅིག་འཁྲི་ཞིང་མགོ་བོ་སྟོང་ཕྱིར་ལྟ་བར་བསྟན་ཏོ། །བལ་གྱི་གླང་པོ་དེ་རེ་རེ་ཡང་མཆེ་བ་བདུན་བདུན་དང་ལྡན་ཏེ། མཆེ་བ་རེ་རེ་ལ་ཡང་ཁྲུས་ཀྱི་རྫིང་བུ་རེ་རེ་ཡོད་དོ། །རྫིང་བུ་རེ་རེ་ལ་ཡང་མེ་ཏོག་པད་མོ་བདུན་
བདུན་ཡོད་དོ། །པད་མ་རེ་རེ་ལ་ཡང་སྤྲུལ་པའི་སངས་རྒྱས་རེ་རེ་བཞུགས་སོ། །སྤྲུལ་པའི་སངས་རྒྱས་རེ་རེ་ལ་ཡང་ཉེ་གནས་ཤཱ་རིའི་བུ་རེ་རེ་ཡོད་ལ། ཤཱ་རིའི་བུ་རེ་རེས་ཀྱང་འོད་ཟེར་ཆེན་པོ་བཀྱེ་ནས་ཕྱོགས་བཅུའི་འཇིག་རྟེན་གྱི་ཁམས་

71-1-155a

གང་གཱའི་ཀླུང་གི་བྱེ་མ་སྙེད་སྣང་བར་བྱས་ཏེ། རྒྱུ་འཐུན་པ་ཐམས་ཅད་བསྡུས་སོ། །རྒྱུ་དང་ལྡན་པ་ཐམས་ཅད་འདུས་ནས་དེ་ནས་ཤཱ་རིའི་བུས་ལུས་ཆེན་པོས་ནམ་མཁའ་ཡོངས་སུ་གང་བ་བསྟན་ཏོ། །ལུས་ཆེན་པོ་ལས་
ཆུང་ངུར་བསྒྱུར་བ་བསྟན་པ་ཡང་བསྟན་ཏེ། སའི་ནང་དུ་ཆུ་ལ་བྱ་བ་བཞིན་དུ་འཇུག་ཅིང་འབྱུང་བ་དང་ཞུགས་པར་ཡང་མི་མངོན་ཏེ། ལུས་ཀྱི་སྨད་ནས་མེ་འབར་བ་དང་། ལུས་ཀྱི་སྟོད་ནས་ཆུ་འབབ་པ་ཡང་བསྟན་ཏོ། །སྟེང་གི་ནམ་
མཁའ་ལ་ཐོགས་པ་མེད་པར་བརྒྱ་ནས་སྟོང་གི་བར་དུ་ཆོ་འཕྲུལ་གྲངས་མེད་པ་རྣམ་པ་སྣ་ཚོགས་པ་བསྟན་ནས། ནམ་མཁའ་ལས་བབས་ཏེ་འཁོར་མང་པོ་ལ་ཆོས་རྒྱས་པར་བསྟན་ནས་སྤྲོ་བ་དང་། གཟེངས་སྟོད་པ་དང་། དགའ་
བར་བྱས་ནས་སེམས་ཅན་ཚད་མེད་པ་བརྒྱ་སྟོང་སྙེད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དུ་བཅུག །སེམས་ཅན་ཚད་མེད་པ་བརྒྱ་སྟོང་སྙེད་ནི་རྒྱུན་དུ་ཞུགས་པ་ནས་དགྲ་བཅོམ་པའི་འབྲས་བུའི་
བར་དུ་ཐོབ་པར་བྱས་ནས། གཞན་ཡང་སེམས་ཅན་ཚད་མེད་པ་བརྒྱ་སྟོང་སྙེད་ནི་ཉན་ཐོས་དང་། རང་སངས་རྒྱས་སུ་སེམས་བསྐྱེད་དུ་བཅུག་གོ། །ཤཱ་རིའི་བུས་དེ་ལྟར་ཕན་པ་དང་བདེ་བའི་དོན་ཚད་མེད་པ་བྱས་པས་འཁོར་མང་པོ་
ལ་འདི་སྐད་ཅེས་སྨྲས་སོ། །བདག་གིས་ཇི་ལྟ་བུ་ཞིག་སྙེད་ཀྱིས་དེ་བཞིན་གཤེགས་པ་སྔར་མྱ་ངན་ལས་འདའ་བ་མི་མཐོང་བར་བྱ་ཞེས་ཏེ། སྟེང་གི་ནམ་མཁའ་ལ་འཕགས་ནས་བདག་གི་ལུས་ལས་མེ་ཕྱུང་ནས་ལུས་བསྲེགས་
ནས་མྱ་ངན་ལས་འདས་སོ། །དེའི་ཚེ་ན་འཁོར་མང་པོའི་རྣམས་ཡིད་ལ་གཅགས་ནས་མིག་མི་འཛུམས་པར་ཤཱ་རིའི་བུ་ལ་ལྟ་ཞིང་སྐད་ཆེན་པོས་ཆོ་ངེས་བཏབ་སྟེ་ལུས་ལ་ས་རྡུལ་གྱིས་གོས་པར་གྱུར། ཉི་མ་ཡང་འོད་མི་གསལ་ཞིང་གནམ་
ས་ཡང་ཆེར་གཡོས་སོ། །དེ་ནས་འཁོར་མང་པོས་ཤཱ་རིའི་བུའི་རུས་པ་བསྡུས་ཏེ་མཆོད་རྟེན་བརྩིགས་ཏེ་མཆོད་པ་བྱས་སོ། །དེའི་ཚེ་ན་འཁོར་མང་པོ་བརྒྱ་སྟོང་སྙེད་ནི་ཤཱ་རིའི་བུ་དྲན་པའི་ཕྱིར། སྡུག་བསྔལ་གྱིས་སེམས་གདུངས་ནས་

71-1-155b

མྱོས་ཤིང་འཐོམས་ཏེ་དྲན་པ་ཉམས་པར་གྱུར་ཏོ། །དེ་ནས་དེ་བཞིན་གཤེགས་པས་ཐུགས་རྗེའི་ཤུགས་ཀྱིས་ཤཱ་རིའི་བུར་སྤྲུལ་ནས་འཁོར་གྱི་ནང་ན་འདུག་པར་བྱས་ནས་འཁོར་མང་པོ་དེ་དག་ཤཱ་རིའི་བུ་དེ་མཐོང་ནས་མི་དགའ་བའི་
སྡུག་བསྔལ་ཞི་ནས་ཕྱིར་རབ་ཏུ་དགའ་བར་གྱུར་ཏོ། །དེ་ལྟར་དགའ་བའི་སེམས་སུ་གྱུར་ནས་ཐམས་ཅད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་ཀུན་དགའ་བོས་དེ་བཞིན་གཤེགས་པའི་
བྱིན་གྱི་བརླབས་ཀྱིས་འཁོར་མང་པོ་ཐེ་ཙོམ་དུ་གྱུར་པ་སེམས་ཀྱིས་ཤེས་ན་སྟན་ལས་ལངས་ཏེ། བླ་གོས་ཕྱོགས་གཅིག་ཏུ་བྱས་ནས་པུས་མོ་གཡས་པའི་ལྷ་ང་ས་ལ་གཙུགས་ཏེ་ཐལ་མོ་སྦྱར་བ་བཏུད་དེ། སངས་རྒྱས་ལ་འདི་སྐད་
ཅེས་གསོལ་ཏོ། །བཅོམ་ལྡན་འདས་ཅིའི་རྒྱུ་ཅིའི་རྒྱན་གྱིས་ཤཱ་རིའི་བུ་འདི་དེ་བཞིན་གཤེགས་པ་བས་སྔར་མྱ་ངན་ལས་འདས་ཏེ་འཁོར་མང་པོ་མི་དགའ་སྟེ་མྱ་ངན་བྱེད་པར་འགྱུར། །བཅོམ་ལྡན་འདས་ཀྱིས་ཀུན་དགའ་བོ་དང་། འཁོར་
མང་པོ་ལ་བཀའ་སྩལ་པ། ཤཱ་རིའི་བུ་འདི་ད་ལྟར་འདི་འབའ་ཤིག་ཏུ་དེ་བཞིན་གཤེགས་པ་བས་མྱ་ངན་ལས་སྔར་འདས་པར་མ་ཟད་དེ། སྔོན་འདས་པའི་དུས་ན་ཡང་ང་སྔར་འདས་པ་མཐོང་བར་མི་བཟོད་ནས་སྔར་འདས་སོ། །དེ་ནས་ཀུན་
དགའ་བོས་སངས་རྒྱས་ལ་གསོལ་བ། བཅོམ་ལྡན་འདས་སྔོན་འདས་པའི་དུས་ན་ཤཱ་རིའི་བུ་སྔར་འདས་པའི་དངོས་པོ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱེད་ལེགས་པར་ཉོན་ཅིག །སྔོན་འདས་
པའི་དུས་བསྐལ་པ་གྲངས་མེད་པའི་ཕ་རོལ་དེའི་ཚེ་དེའི་དུས་ན། ཡུལ་བཱ་ར་ཎ་སཱི་ཞེས་བྱ་བ་ཞིག་ཡོད་དེ། ཡུལ་བཱ་ར་ཎ་སཱིའི་རྒྱལ་པོ་དེ་ནི་འོད་ཟེར་ཆེན་པོ་ཞེས་བྱའོ། །རྒྱལ་པོ་འོད་ཟེར་ཆེན་པོ་ཞེས་བྱ་བ་དེ་ལ་མཐའི་
རྒྱལ་ཕྲན་དྲུག་བཅུ་དང་། གྲོང་ཁྱེར་བརྒྱད་བརྒྱ་ལ་དབང་སྒྱུར་ཏེ། རྒྱལ་པོ་དེ་རྒྱུན་དུ་སྙིང་རྗེའི་སེམས་དང་ལྡན་པས་ཐམས་ཅད་ལ་ཡིད་དང་མི་འགལ་བར་སྦྱིན་པ་ཡོངས་སུ་གཏོང་ངོ་། །དེའི་ཚེ་ན་མཐའི་རྒྱལ་ཕྲན་གཅིག་རྒྱལ་

71-1-156a

པོ་དེ་ལ་མི་དགའ་སྟེ་རྒྱུན་དུ་ངན་སེམས་སྐྱེའོ། །རྒྱལ་པོ་འོད་ཟེར་ཆེན་པོས་ཟླ་བ་ངོ་རེ་རེ་ཞིང་དུས་དྲུག་གི་ཉི་མ་དང་སྦྱར་ཏེ། བལ་གྱི་གླང་པོ་ཆེ་ལྔ་བརྒྱ་ལ་རིན་པོ་ཆེ་དང་། ནོར་རྫས་དང་། གོས་དང་། བཟའ་བ་དང་། བཏུང་བ་
བཀལ་ཏེ་ཚོང་འདུས་དང་། གྲོང་ཁྱེར་གྱི་སྒོ་བཞིར་སྤུངས་ནས་ཐམས་ཅད་ལ་སྦྱིན་པ་བྱེད་དོ། །དེའི་ཚེ་ན་རྒྱལ་ཕྲན་དགྲར་གྱུར་པ་དེས་དེ་ལྟར་རྒྱལ་པོ་འོད་ཟེར་ཆེན་པོ་ཐམས་ཅད་ལ་ཡིད་དང་མི་འགལ་བར་གོས་དང་། ཟས་དང་། གསེར་
དང་། དངུལ་དང་། རིན་པོ་ཆེའི་བར་དུ་ཅི་འདོད་པ་ལས་སྦྱིན་པ་བྱེད་དོ་ཞེས་ཐོས་ནས་མཐའི་རྒྱལ་ཕྲན་དེས་རྒྱལ་པོ་འོད་ཟེར་ཆེན་པོ་སྦྱིན་པའི་བསོད་ནམས་བྱེད་པ་ལ་ཕྲག་དོག་གི་སེམས་སྐྱེས་ཏེ། བློན་པོ་རྣམས་བསྡུས་ནས་ཁྱེད་
རྣམས་ལས་སུ་ཞིག་བཱ་ར་ཎ་སཱིའི་རྒྱལ་པོ་འོད་ཟེར་ཆེན་པོའི་མགོ་སློང་དུ་འགྲོ་ནུས་ཤེས་བསྒོ་བ་དང་། བློན་པོ་རྣམས་ཀྱིས་བདག་ཅག་ནི་གང་ཡང་རྔོ་མི་ཐོག་ཅེས་སྨྲས་སོ། །དེ་ནས་ཡང་ཐམས་ཅད་ལ་བཀར་བཏགས་ཏེ། 
སུ་ཞིག་བཱ་ར་ཎ་སཱིའི་རྒྱལ་པོ་འོད་ཟེར་ཆེན་པོའི་མགོ་བསླངས་ཏེ་འོངས་ན་གསེར་རྒྱ་མ་སྟོང་སྦྱིན་པར་བཏགས་པ་དང་། བྲམ་ཟེ་ཅིག་གིས་བདག་གིས་སློང་དུ་འགྲོ་ནུས་ཀྱིས། བདག་གི་ཡོ་བྱད་དང་རྒྱགས་སྦྱོར་ཅིག་ཅེས་བསྒོའོ། །
ཡུལ་འདི་ནས་བཱ་ར་ཎ་སཱིར་རྒྱང་གྲགས་དྲུག་སྟོང་ཡོད་པས་དེ་བཞིན་དུ་རྒྱགས་དང་ཡོ་བྱད་སྦྱར་ནས། བྲམ་ཟེ་བཱ་ར་ཎ་སཱིར་སོང་ངོ་། །དེའི་ཚེ་བྲམ་ཟེ་དེ་ཡུལ་བཱ་ར་ཎ་སཱིའི་ཡུལ་ཕྱོགས་དེར་ཕྱིན་པ་ལས་ས་ཆེན་པོ་ཡང་རྣམ་པ་དྲུག་དུ་གཡོས། 
གཅན་ཟན་དང་རི་དགས་རྣམས་ཀྱང་སྐྲག་ནས་བྲོས། ཉི་མ་དང་ཟླ་བ་ཡང་བསྒྲིབས་པ་བཞིན་མི་གསལ་ཞིང་མི་སྣང་བར་གྱུར། གཟའ་ལྔ་དང་། སྐར་མ་རྣམས་ཀྱང་དུས་བཞིན་དུ་མི་རྒྱུ། འཇའ་ལྟ་བུ་དམར་པོ་དང་། ནག་པོ་དང་དཀར་
པོ་དང་། ཉིན་མཚན་དུས་དུས་སུ་སྣང་། སྐར་མ་ཡང་འཁྲུག་ཅིང་ལྷུང་བར་གྱུར། ཡུལ་དེའི་འབབ་ཆུ་དང་། ཆུ་མིག་དང་། ཁྲུས་ཀྱི་རྫིང་དང་། མེ་ཏོག་དང་། འབྲས་བུའི་ཤིང་རྒྱས་པ་ཡིད་དུ་འོང་བ་རྣམས་ཀྱང་སྐམས་པར་གྱུར་ཏོ། །

71-1-156b

དེ་ནས་བྲམ་ཟེ་ཡང་ཡུལ་བཱ་ར་ཎ་སཱིའི་རྒྱལ་པོའི་ཕོ་བྲང་གི་སྒོར་ཕྱིན་ཏོ། །དེའི་ཚེ་ན་ཕོ་བྲང་གི་སྒོ་སྲུང་བའི་ལྷས་སྒོ་བའི་མི་ལ་འདི་སྐད་ཅེས་སྨྲས་སོ། །བྲམ་ཟེ་མ་རུངས་པ་འདི་ལམ་རིང་པོ་ནས་རྒྱལ་པོ་འོད་ཟེར་ཆེན་པོའི་མགོ་སློང་དུ་
འོངས་ཀྱིས་ཁྱོད་ནང་དུ་མ་བཏང་ཤིག །དེ་ནས་བྲམ་ཟེ་དེ་ཕོ་བྲང་ནང་དུ་འགྲོར་མེད་དེ། ཞག་བདུན་གྱི་བར་དུ་སྡོད་སྡོད་ནས་སྒོ་སྲུངས་དེ་ལ་འདི་སྐད་ཅེས་སྨྲས་སོ། །བདག་ནི་ལམ་རིང་པོ་ནས་འོངས་ཏེ་རྒྱལ་པོ་ཆེན་པོ་དང་ཕྲད་འདོད་དོ་ཞེས་གསོལ་
ཅིག །དེ་ནས་སྒོ་སྲུངས་ཀྱིས་ཀྱང་དེ་བཞིན་དུ་བྲམ་ཟེ་ཅིག་ལམ་རིང་པོ་ནས་འོངས་ཏེ་ད་ལྟར་སྒོ་ན་སྡོད་དོ་ཞེས་གསོལ་ཏོ། །རྒྱལ་པོས་ཚིག་དེ་ཐོས་ནས་དེ་མ་ཐག་ཏུ་སྒོར་བྱུང་སྟེ་བསུ་ནས་ཇི་ལྟར་ཕ་དང་བུ་ཕྲད་པ་བཞིན་དུ་ཕྱག་བྱས་
ཏེ་ཁྱོད་གང་ནས་འོངས་ལམ་དུ་ཉོན་མོངས་ཤིང་ངལ་བར་མ་གྱུར་ཏམ་ཞེས་སྨྲས་སོ། །བྲམ་ཟེས་སྨྲས་པ། བདག་ཡུལ་གཞན་ནས་རྒྱལ་པོ་ཁྱོད་ཀྱིས་མིའི་ཡིད་དང་མི་འགལ་བར་སྦྱིན་པ་གཏོང་བའི་ཡོན་ཏན་ཐོས་ཏེ། ཁྱོད་
ཀྱི་མིང་སྙན་པ་ནི་གནམ་སའི་བར་ཀུན་དུ་གྲགས་ནས་ཁྱོད་ཀྱི་ཡོན་ཏན་མི་བརྫུན་ཏེ་བདེན་ནོ་ཞེས་ཐོས་པས་བདག་ཀྱང་ཆེད་དུ་ལ་ལུང་བགྲོད་དེ་རེ་བ་ཡོད་པས་འོངས་སོ། །རྒྱལ་པོས་སྨྲས་པ། བདག་ནི་ད་ལྟར་ཐམས་ཅད་སྦྱིན་པ་ཞེས་བྱ་སྟེ། 
སློང་བ་འམ། དགོས་པ་ཡོད་ན་ཐེ་ཙོམ་མ་བྱེད་པར་སློངས་ཤིག །བྲམ་ཟེས་སྨྲས་པ་བདེན་ཡང་དག་གམ། བདག་ནི་གཞན་ནི་ཅི་ཡང་མི་དགོས་ཀྱི། མཆོད་སྦྱིན་ཆེན་པོ་ཞིག་བྱེད་པས་རྒྱལ་པོའི་མགོ་སློང་དུ་འོངས་སོ། །རྒྱལ་
པོས་ཚིག་དེ་ཐོས་ནས་འདི་སྙམ་དུ་སེམས་ཏེ། བདག་ཐོག་མ་མེད་པ་ནས་སྐྱེ་ཤིར་འཁོར་ཏེ། ལུས་འདི་འདྲ་བ་ཆུད་གསན་ཀྱང་ཚུལ་བཞིན་ཆོས་ཀྱི་ཕྱིར་ནི་མ་ཡིན་གྱི། དོན་མེད་པར་སྐྱེ་ཤིར་འཁོར་བས་བདག་ཉོན་མོངས་སོ། །
བདག་གི་ལུས་འདིས་སེམས་ཅན་ཐམས་ཅད་ཀྱི་ཕྱིར་བླ་ན་མེད་པའི་བྱང་ཆུབ་བསྒྲུབ་པར་དམ་བཅས་པས་ད་མ་བྱིན་པར་གྱུར་ན་བདག་གི་ཐོག་མར་བསམས་པ་དང་ཡང་འགལ་ལ། གལ་ཏེ་ལུས་འདི་མ་བྱིན་ན། བླ་ན་མེད་པ་ཡང་

71-1-157a

དག་པར་རྫོགས་པའི་བྱང་ཆུབ་ཐོབ་པར་ཡང་ཇི་ལྟར་འགྱུར་སྙམ་བསམས་ནས་བྲམ་ཟེ་ལ་ཤིན་དུ་དགེའོ། །བདག་ཡུལ་སྲིད་ཀྱི་གདམས་པ་དང་། བཙུན་མོ་དང་། རྒྱལ་བུ་དང་། དེ་དག་ལ་བསྒོ་བ་ཆུང་ཟད་བྱས་ཏེ། དེ་ནས་
ཞག་བདུན་ན་ཁྱོད་འདོད་པ་སྦྱིན་ནོ་ཞེས་སྨྲས་སོ། །དེ་ནས་རྒྱལ་པོ་ཆེན་པོ་ཕོ་བྲང་གི་ནང་དུ་སོང་ནས་བཙུན་མོ་རྣམས་ལ་འདི་སྐད་ཅེས་བསྒོའོ། །གནམ་སའི་བར་ན་མཛའ་ཞིང་སྡུག་པ་ཐམས་ཅད་ནི་བྱེ་ཞིང་འབྲལ་བར་འགྱུར། མི་ལ་སྐྱེ་བ་
ཡོད་ན་འཆི་བ་ཡོད་ལ། གྲུབ་པ་སྲིད་ན་འཇིག་པ་ཡང་སྲིད་དེ། དབྱར་ས་ལས་ཅི་སྐྱེས་པ་ཐམས་ཅད་དགུན་ནི་ཀུན་སྐམས་པར་འགྱུར་རོ་ཞེས་སྨྲས་སོ། །བཙུན་མོ་དང་རྒྱལ་བུ་རྣམས་ཀྱིས་རྒྱལ་པོས་སྨྲས་པའི་ཚིག་དེ་ཐོས་ནས་དཔེར་ན་མི་བརྣངས་པ་དང་འདྲ་སྟེ་
སྐྱུག་ཏུ་ཡང་མེད། མིད་ཏུ་ཡང་མེད་པ་ལྟར་གྱུར་ཏེ། རྒྱལ་པོ་ལ་ཅིའི་སླད་ཏུ་འདི་སྐད་གསུངས་ཤེས་གསོལ་པ་དང་། རྒྱལ་པོས་འདི་སྐད་ཅེས་སྨྲས་སོ། །བྲམ་ཟེ་ཞིག་ལམ་རིང་པོ་ནས་འོངས་ཏེ་ངའི་མགོ་སློང་དུ་འོངས་སོ། །ངས་ཀྱང་སྦྱིན་པར་བྱས་སོ། །
བཙུན་མོ་དང་། རྒྱལ་བུ་རྣམས་ཀྱིས་ཚིག་དེ་ཐོས་ནས་ལུས་ས་ལ་བརྡབས་ནས་ཆོ་ངེས་བཏབ་ནས་སྐྲ་ཡང་འབལ། གོས་ཀྱང་གཤགས་དྲལ་ཏེ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་འཇིག་རྟེན་ན་བདག་གི་ལུས་ལས་ཕངས་པ་མེད་
ན། ཅིའི་སླད་ཏུ་འདི་ལྟར་ཤིན་དུ་གཏང་དཀའ་བ་གཏོང་ཞིང་སྦྱིན་པ་མཛད་ཅེས་གསོལ་ཏོ། །དེའི་ཚེ་ན་བློན་པོ་ལྔ་བརྒྱས་ཀྱང་བྲམ་ཟེ་ལ་ཁྱོད་འདི་ལྟར་རྣག་ཁྲག་དང་བཅས་པ་མནམ་ཞིང་བཙོག་པའི་མགོ་འདི་ཅིར་དགོས་ཞེས་སྨྲས་པ་དང་། བྲམ་
ཟེས་སྨྲས་པ། བདག་དགོས་པས་བདག་གིས་བསླངས་པ་ལ་ཁྱེད་ཀྱིས་དྲིར་ཡང་ཅི་ཡོད། བློན་པོ་རྣམས་ཀྱིས་སྨྲས་པ། ཁྱོད་བདག་ཅག་གི་ཡུལ་དུ་འོངས་པས་བདག་ཅག་གིས་ཀྱང་དྲི་ཞིང་ཁྱོད་ཀྱང་ཚུལ་བཞིན་དུ་སྨྲ་བར་
རིགས་སོ། །དེ་ནས་བྲམ་ཟེས་དྲང་པོར་སྨྲར་ཡང་བློན་པོ་རྣམས་ཀྱིས་སྲོག་གི་དབང་པོ་དང་ཕྲལ་དུ་དོགས་ནས་འཇིགས་པས་ཅང་མ་སྨྲས་སོ། །དེ་ནས་བློན་པོ་ལྔ་བརྒྱས་བྲམ་ཟེ་དེ་ལ་ཁྱོད་མ་སྐྲག་ཤིག །ཁྱོད་ལ་མི་འཇིགས་པ་སྦྱིན་ནོ་ཞེས་

71-1-157b

སྨྲས་སོ། །དེ་ནས་བྲམ་ཟེ་དེ་ལ་བྲམ་ཟེ་དབུལ་པོ་ཁྱོད་ལ་རྣག་ཁྲག་གི་མགོ་མནམ་པོ་དེས་ཅི་ཞིག་རུང་། ངེད་བློན་པོ་ལྔ་བརྒྱས་མི་གཅིག་ཅིང་ཡང་རིན་པོ་ཆེ་སྣ་བདུན་ལས་བྱས་པའི་མགོ་རེ་རེར་བརྗེ་ཞིང་། ཁྱོད་ཅི་དགོས་པ་ཡང་མི་རབས་
བདུན་གྱི་བར་དུ་ཆོག་པར་སྦྱིན་ནོ་ཞེས་སྨྲས་སོ། །བྲམ་ཟེ་ན་རེ་མི་འདོད་དོ་ཞེས་སྨྲས་སོ། །བློན་པོ་ཆེན་པོ་རྣམས་ཀྱང་བསམས་པ་ལྟར་མ་གྱུར་ནས་མྱ་ངན་གྱིས་ཡིད་གདུངས་ཏེ་སྐད་ཕྱུང་སྟེ་ངུས་ནས་རྒྱལ་པོ་ལ་འདི་སྐད་ཅེས་གསོལ་ཏོ། །
རྒྱལ་པོ་ཆེན་པོ་བྲམ་ཟེ་མི་གཅིག་གི་ཕྱིར་ཡུལ་ས་དང་། འབངས་དང་། བཙུན་མོ་དང་རྒྱལ་བུ་ལ་སོགས་པ་ཐམས་ཅད་བོར་ཏེ་བདག་ཅག་གཏན་དྭར་བོར་ཞིང་། ལུས་པར་ཐུགས་ཀྱིས་བཟོད་དམ། རྒྱལ་པོས་སྨྲས་པ། ང་ནི་ཁྱེད་སེམས་
ཅན་ཐམས་ཅད་ཀྱི་ཕྱིར་ལུས་འདི་གཏོང་ཞིང་སྦྱིན་པར་བྱེད་དོ། །དེའི་ཚེ་ན་བློན་པོ་ནང་གི་ཆེན་པོ་ཅིག་གིས་རྒྱལ་པོས་གསུངས་པ་ཐོས་ནས་རྒྱལ་པོས་ནི་གདོན་མི་ཟ་བར་བྲམ་ཟེ་འདི་ལ་སྐུ་བཏང་ངོ་བར་ཆད་དོ་སྙམ་བསམས་ནས། བདག་
ཇི་ལྟར་རྒྱལ་པོ་ལུས་གཏོང་བ་ལ་སྙིང་མི་བཟོད་ཅིང་བལྟ་བར་མི་བྱ་སྙམ་བསམས་ནས། ཁང་པ་དབེན་པར་སོང་སྟེ། མཚོན་རྣོན་པོ་ཐོགས་ཏེ་བདག་གི་སྲོག་བཅད་དོ། །དེ་ནས་རྒྱལ་པོ་ཆེན་པོ་ཕོ་བྲང་གི་རྒྱབ་ཀྱི་ར་བར་སོང་སྟེ། 
བྲམ་ཟེ་བོས་ཏེ་ཚུར་ཤོག་ད་ངའི་མགོ་ཁྱེར་ཅིག །ཁྱོད་ལ་བྱམས་ཤིང་བརྩེ་བའི་ཕྱིར་ཁྱོད་ཀྱི་སེམས་དང་ཡིད་མ་ཟློགས་ནས། སྦྱིན་པ་འདིས་མ་འོངས་པའི་དུས་སུ་ཤེས་རབ་ཀྱི་མགོ་ཐོབ་པར་གྱུར་ཅིག་ཅེས་སྨྲས་ནས། ཐལ་མོ་སྦྱར་ཏེ་
ཕྱོགས་བཅུར་ཕྱག་བྱས་སོ། །ཕྱག་བྱས་ནས་འདི་སྐད་ཅེས་སྨྲས་སོ། །ཕྱོགས་བཅུའི་སངས་རྒྱས་རྣམས་དང་། བྱང་ཆུབ་སེམས་དཔའ་རྣམས་བདག་ལ་ཐུགས་བརྩེ་བར་དགོངས་ཏེ། བདག་གི་བསམ་པ་འདི་གྲུབ་པར་
བྱིན་གྱིས་བརླབ་ཏུ་གསོལ་ཅེས་སྨྲས་ནས་བྲམ་ཟེ་ལ་ད་ཁྱོད་ལ་སྦྱིན་གྱིས་ཁྱེར་ཅིག་ཅེས་སྨྲས་སོ། །བྲམ་ཟེས་སྨྲས་པ། རྒྱལ་པོ་ལ་གྱད་གྱི་སྟོབས་ཡོད་ཏེ། ན་ཚ་མི་བཟོད་པས་ཕྱིར་བདག་ལ་གནོད་པ་བྱེད་པར་འགྱུར་གྱིས། 

71-1-158a

རྒྱལ་པོ་ཁྱོད་ཡང་དག་པར་དེ་ལྟར་ནུས་ན་རྒྱལ་པོ་ཉིད་ཀྱིས་སྐྲ་བཀྲོལ་ཏེ་ཤིང་ལ་ཐོགས་ཤིག །རྒྱལ་པོས་ཚིག་དེ་ཐོས་ནས་ལྷག་པར་སྙིང་བརྩེ་བའི་སེམས་སྐྱེས་ཏེ། བྲམ་ཟེ་འདི་རིད་ལ་ཉམ་ཆུང་བས་གལ་ཏེ་བདག་གི་
མགོ་གཅོད་མ་ནུས་ན་བདག་གི་བསམ་པ་ཆེན་པོ་མི་འགྲུབ་བོ་སྙམ་བསམས་ནས་རྒྱལ་པོ་ཉིད་ཀྱིས་ཐོར་ཏོ་ཤིང་ལ་བཏགས་ཏེ། བྲམ་ཟེ་ལ་ཁྱོད་བདག་གི་མགོ་ཆོད་ལ་ཕྱིར་བདག་གི་ལག་པར་ཞོག་ཤིག །བདག་གི་ལག་གིས་
ཁྱོད་ལ་སྦྱིན་པར་བྱའོ། །དེ་ནས་བྲམ་ཟེས་རལ་གྲི་ཐོགས་ནས་དྲུང་དུ་སྤགས་པ་ལས། དེའི་ཚེ་ཤིང་དེའི་ལྷས་བྲམ་ཟེ་ལ་ཚུགས་བྱས་པས་བརྒྱལ་ཏེ་ས་ལ་འགྱེལ་ཏོ། །དེ་ནས་རྒྱལ་པོ་འོད་ཟེར་ཆེན་པོས་ཤིང་གི་ལྷ་ལ་འདི་སྐད་
ཅེས་སྨྲས་སོ། །ཁྱོད་ཁོ་བོའི་གྲོགས་མི་བྱེད་པར་ཕྱིར་ཁོ་བོའི་དགེ་བའི་བགེགས་དང་བར་ཆད་བྱེད་དམ། དེ་ནས་ཤིང་གི་ལྷ་མྱ་ངན་གྱིས་གདུངས་ཏེ་ཀྱི་ཧུད་ཀྱི་ཧུད་ཅེས་སྨྲས་ནས་ནམ་མཁའ་ལ་སྤྲིན་མེད་པར་ཆར་པ་ཁྲག་
ཏུ་བབ་སྟེ་ས་ཆེན་པོ་ཡང་རབ་ཏུ་གཡོས། ཉི་མ་ཡང་མི་གསལ་ཞིང་མུན་པར་གྱུར། དེ་ནས་བྲམ་ཟེས་རྒྱལ་པོའི་མགོ་བཅད་དེ་ཕྱིར་ཡུལ་དུ་སོང་ངོ་། །དེ་ནས་རྒྱལ་བུ་ལྔ་བརྒྱས་བློན་པོ་རྣམས་དང་། རྒྱལ་པོ་འོད་ཟེར་ཆེན་པོའི་
རུས་བུ་བསྡུས་ནས་མཆོད་རྟེན་བརྩིགས་ཏེ་མཆོད་པ་བྱས་སོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། དེའི་ཚེ་དེའི་དུས་ན་བློན་པོ་ནང་གི་ཆེན་པོས་རྒྱལ་པོ་འོད་ཟེར་ཆེན་པོས་མགོ་སྦྱིན་པ་ཆེན་པོ་བྱེད་པ་ལ་མཐོང་བར་སྙིང་མི་
བཟོད་ནས་སྔར་ཚེའི་དུས་བྱས་པ་ནི་ད་ལྟར་ཤཱ་རིའི་བུ་ཡིན་ནོ། །དེའི་ཚེ་དེའི་དུས་ན་རྒྱལ་པོ་འོད་ཟེར་ཆེན་པོར་གྱུར་པ་ནི་ད་ལྟར་དེ་བཞིན་གཤེགས་པ་ཤཱཀྱ་ཐུབ་པ་ང་ཡིན་ནོ། །བྱང་ཆུབ་སེམས་དཔའ་དེ་ལྟར་ན་ཤིན་དུ་
སྤྱད་དཀའ་བ་སྤྱད་པར་དམ་བཅས་ཏེ། སེམས་ཅན་ཐམས་ཅད་ཀྱི་ཕྱིར་སངས་རྒྱས་རྣམས་ཀྱི་དྲིན་བསབས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །དེ་ནས་ཤཱ་

71-1-158b

རིའི་བུ་ང་མྱ་ངན་ལས་འདའ་བ་མིག་གིས་མཐོང་བར་མི་བཟོད་པས་སྔར་མྱ་ངན་ལས་འདས་ཏེ། སྔོན་འདས་པའི་དུས་ན་ཡང་ང་སྦྱིན་པ་བྱེད་པ་ལ་མཐོང་བར་མི་བཟོད་ནས་སྔར་ཚེའི་དུས་བྱས་སོ། །ཕོ་བྲང་རྒྱབ་ཀྱི་ར་བ་
འདིར་ཤིང་འདི་ཁོ་ན་ལ་འཁོར་ལོས་སྒྱུར་བའི་རྒྱལ་པོ་བྱས་པའི་མགོ་ཡང་སྟོང་ཚང་བར་ཡོངས་སུ་བཏང་ན་ལུས་ཀྱི་ཡན་ལག་ལག་པ་དང་། རྐང་པ་ལ་སོགས་པ་སྦྱིན་པ་བྱས་པ་ལྟ་སྨོས་ཀྱང་ཅི་དགོས། སངས་རྒྱས་
ཀྱིས་དཀའ་ཐུབ་མཛད་པ་འདི་བསྟན་པའི་ཚེ་སེམས་ཅན་ཚད་མེད་པ་བརྒྱ་སྟོང་སྙེད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །ལྷ་དང་མི་ཚད་མེད་པ་བརྒྱ་སྟོང་སྙེད་ནི་རྒྱུན་དུ་ཞུགས་པའི་འབྲས་
བུ་ཐོབ་པ་ནས་དགྲ་བཅོམ་པའི་འབྲས་བུའི་བར་དུ་ཐོབ་པར་གྱུར་ཏོ། །ལྷ་དང་མི་ཚད་མེད་པ་བརྒྱ་སྟོང་སྙེད་ནི་ཉན་ཐོས་དང་རང་སངས་རྒྱས་སུ་སེམས་བསྐྱེད་དོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་
པ་ལ་ལྷ་དང་། ཀླུ་དང་། གནོད་སྦྱིན་དང་། མི་དང་མི་མ་ཡིན་པ་ལ་སོགས་པ་འཁོར་མང་པོ་ཐམས་ཅད་མངོན་པར་དགའ་བས་ཕྱིར་དོང་ངོ་། །གཞན་ཡང་འདི་ལྟ་སྟེ། ཡུལ་མ་ག་དྷཱ་ན་མི་རྒོད་རི་བྲགས་པ་
ལྔ་བརྒྱ་ཞིག་རྟག་ཏུ་ཆོམ་པོ་བྱེད་དེ། འདྲོན་པོ་ཕན་ཚུན་རྒྱུར་མེད་པར་གྱུར་ནས། དེའི་ཚེ་ཡུལ་མ་ག་དྷཱའི་རྒྱལ་པོས་དམག་རྣམ་བཞི་བཤམས་ཏེ་མི་རྒོད་རྣམས་ཕབ་ནས་མིག་ཕྱུང་། རྣ་བ་དང་སྣ་ཡང་
བཅད་དེ་རི་བྲགས་ཡ་ང་བར་བོར་རོ། །དེའི་ཚེ་ན་མི་རྒོད་ལྔ་བརྒྱ་པོ་ལུས་ཀྱི་ན་ཚས་སྡུག་བསྔལ་བར་གྱུར་ཏེ་སྲོག་ལ་བབ་བོ། །མི་རྒོད་ལྔ་བརྒྱ་པོ་དེའི་ནང་ན་སངས་རྒྱས་ཀྱི་སློབ་མར་གྱུར་པ་གཅིག་ཡོད་དེ། 
དེས་སྨྲས་པ། བདག་ཅག་ནི་ཚེའི་དུས་བྱེད་པ་ལས་མི་རིང་ན། ཅིའི་ཕྱིར་ཀུན་གྱིས་སངས་རྒྱས་ལ་སྐྱབས་སུ་མི་གསོལ་ཞེས་སྨྲས་སོ། །དེ་ནས་མི་རྒོད་ལྔ་བརྒྱའི་རྣམས་སྐད་འཐུན་པར་སངས་རྒྱས་ཤཱཀྱ་ཐུབ་

71-1-159a

པ་ལ་ཕྱག་འཚལ་ལོ་ཞེས་སྨྲས་པ་དང་། དེའི་ཚེ་ན་དེ་བཞིན་གཤེགས་པ་བྱ་རྒོད་སྤུངས་པའི་རི་ལ་བཞུགས་པ་ལས། ཐུགས་རྗེ་ཆེན་པོའི་ཤུགས་ཀྱིས་རི་གན་དྷ་ཞེས་བྱ་བ་ལ་གཤེགས་ནས་རླུང་
ཆེན་པོ་ལངས་ཏེ། རི་དེ་ལ་ཤིང་ཙན་དན་གྱི་ཚལ་ཡོད་པར་ཕྱེ་མ་བུས་ནས་ནམ་མཁའི་ཁམས་ཡོངས་སུ་གང་བར་བྱས་ཏེ་མི་རྒོད་རྣམས་གནས་པའི་རི་ལ་ཡང་ཙན་དན་གྱི་ཕྱེ་མ་ཕྱིན་པར་གྱུར་ཏེ། ཙན་དན་གྱི་ཕྱེ་མ་དེས་
མི་རྒོད་ཀྱི་རྨའི་སྟེང་དུ་གོས་ནས་མིག་དང་། སྣ་དང་ལུས་ཀྱི་རྨ་ཐམས་ཅད་སོས་ཏེ་ཁྲག་ཀྱང་འོ་མར་གྱུར་པས་ཐམས་ཅད་ཀྱིས་འདི་སྐད་ཅེས་སྨྲས་སོ། །བདག་ཅག་ནི་སངས་རྒྱས་ཀྱི་ཐུགས་རྗེ་ཆེན་པོས་ལུས་ཀྱི་རྨ་ཀུན་སོས་
ནས་བདེ་བར་གྱུར་ཏེ། སངས་རྒྱས་ཀྱི་བཀའ་དྲིན་བསབ་པའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ་ཞེས་སྨྲས་ནས་ཐམས་ཅད་ཀྱིས་ཚིག་འཐུན་པར་སོ་སོའི་སྐྱེ་བོ་བདེ་བ་མ་ཐོབ་པ་རྣམས་ནི་བདེ་
བ་ཐོབ་པར་བྱའོ། །མ་གྲོལ་བ་རྣམས་ནི་གྲོལ་བར་བྱའོ། །ཕ་རོལ་དུ་མ་ཕྱིན་པ་རྣམས་ནི་ཕ་རོལ་དུ་ཕྱིན་པར་བྱའོ། །འབྲས་བུ་མ་ཐོབ་པ་རྣམས་ནི་འབྲས་བུ་ཐོབ་པར་བྱའོ་ཞེས་དམ་བཅས་སོ། །གཞན་ཡང་འདི་ལྟ་སྟེ། 
དེ་བཞིན་གཤེགས་པའི་ཐུགས་རྗེ་ཆེན་པོ་དང་ཐབས་མཁས་པའི་རྫུ་འཕྲུལ་ནི་བསམ་གྱིས་མི་ཁྱབ་པོ། །སངས་རྒྱས་མཉན་དུ་ཡོད་པ་ན་བཞུགས་པའི་ཚེ་མི་རྒོད་ལྔ་བརྒྱ་ཞིག་རི་བྲགས་ན་གནས་ཏེ་འདྲོན་པོ་འཇོམས་ཤིང་ཆོས་
མ་ཡིན་པ་བྱེད་དོ། །དེའི་ཚེ་ན་དེ་བཞིན་གཤེགས་པ་ཐབས་མཁས་པའི་ཤུགས་ཀྱིས་མི་ཞིག་ཏུ་སྤྲུལ་ནས་བལ་གྱི་གླང་པོ་ཆེ་བཟང་པོ་ལ་ཞོན་ནས་ལུས་ལ་ཡང་གོས་གྱོན་ཞིང་མདའ་གཞུ་དང་མཚོན་ཆ་ཐོགས་ཏེ། བལ་གྱི་
གླང་པོ་ཆེ་ཡང་རིན་པོ་ཆེ་སྣ་བདུན་གྱིས་བརྒྱན་ཏེ། བདག་གི་ལུས་ལ་ཡང་རིན་པོ་ཆེ་སྣ་བདུན་གྱིས་བརྒྱན་ནས་གཅིག་པུ་མི་རྒོད་འདུག་པའི་རི་བྲགས་ལོགས་སུ་སོང་ངོ་། །དེའི་ཚེ་ན་མི་རྒོད་ལྔ་བརྒྱའི་རྣམས་རྒྱང་ནས་མི་དེ་ལྟ་

71-1-159b

བུ་ཞིག་འོང་བ་མཐོང་ནས་གཅིག་ལ་གཅིག་བདག་ལོ་མང་དུ་མི་རྒོད་བྱས་ན་འདི་ལྟ་བུ་མ་མཐོང་ངོ་ཞེས་སྨྲས་སོ། །དེའི་ཚེ་ན་མི་རྒོད་དེ་དག་གི་དཔོན་པོ་ཞིག་ཡོད་པ་དེས་ཁྱེད་རྣམས་ཅི་མཐོང་ཞེས་དྲིས་ན། དེ་དག་གིས་མི་གཅིག་ཅིག་གིས་
བལ་གྱི་གླང་བཟང་པོ་ཞིག་ལ་ཞོན་ཏེ་འོང་བ་ཞིག་ཡོད་དོ། །མི་དེའི་གོས་དང་རྒྱན་ཡང་རིན་པོ་ཆེ་སྣ་བདུན་ལས་བྱས། བལ་གླང་ཡང་རིན་པོ་ཆེ་སྣ་བདུན་གྱིས་བརྒྱན་ཏེ་གནམ་ས་ལ་ཡང་འོད་འཚེར་བ་དེ་ལྟ་བུ་ཞིག་ལམ་ཐོག་ཐག་ཏུ་འོང་
ངོ་། །གལ་ཏེ་བདག་ཅག་གིས་ཐེབས་ཤིང་ཟིན་ན་མི་རབས་བདུན་གྱི་བར་དུ་ཕྱུག་པའི་ནོར་ཡོད་དོ་ཞེས་སྨྲས་སོ། །དེའི་ཚེ་མི་རྒོད་ཀྱི་དཔོན་པོ་དེས་ཚིག་དེ་ཐོས་ནས་རབ་ཏུ་དགའ་སྟེ་འདི་སྐད་ཅེས་བགྲོས་སོ། །བདག་ཅག་གིས་
དལ་གྱིས་བཞབས་ལ་དྲུང་དུ་ཕྱིན་པ་དང་། ཀུན་གྱིས་མདའ་འཕངས་ཏེ་གཟུང་བར་བྱའོ། །དེ་ནས་མི་རྒོད་ལྔ་བརྒྱས་དྲུང་དུ་བསྙེན་ནས་གཅིག་ཅར་སྐད་ཕྱུང་ནས་ཀུས་བཏབ་བོ། །དེའི་ཚེ་ན་སྤྲུལ་པའི་མི་དེས་བྱམས་ཤིང་
བརྩེ་བའི་སེམས་ཀྱིས་གཞུ་བདུངས་ནས་མདའ་འཕངས་པ་དང་མི་རྒོད་ལྔ་བརྒྱ་རྣམས་ལ་མདའ་རེ་ཕོག་སྟེ་མི་བཟོད་པའི་ན་ཚ་མྱོང་ནས་ས་ལ་འགྲེ་ཞིང་སྐད་ཆེན་པོ་ཕྱུང་ནས་ངུས་སོ། །དེ་དག་གིས་མདའ་ཕྱུང་བར་
བསྐྱོད་ན་མདའ་རབ་ཏུ་དམ་པས་སྟོབས་ཅི་ཡོད་པས་གཙལ་ཀྱང་མ་ནུས་སོ། །དེ་ནས་མི་རྒོད་ལྔ་བརྒྱས་སྐྲག་ནས་ད་ནི་བདག་ཅག་གདོན་མི་ཟ་བར་འཆིའོ་སྙམ་མོ་དེ་ཅིའི་ཕྱིར་ཞེ་ན། བདག་ཅག་འདི་སྙེད་ཀྱིས་མི་གཅིག་
པུ་ཞིག་མ་ཐུབ་པ་ངོ་མཚར་ཆེའོ་ཞེས་ཐམས་ཅད་ཚིག་འཐུན་པར་འདི་སྐད་ཅེས་སྨྲས་སོ། །མི་ཡི་ནང་ན་ཁྱོད་ཅི་ཡིན། །ལྷ་འམ་ཀླུ་འམ་ཡི་དགས་སམ། །འོན་ཏེ་རིག་སྔགས་ཀྱི་མཐུ་ཡིན་ནམ། །མདའ་ཅིག་འཕངས་པས་ལྔ་བརྒྱ་
རྨས། །ན་བའི་སྡུག་བསྔལ་བཟོད་དཀའ་བས། །བདག་ཅག་ཁྱོད་ལ་སྲོག་ཕྱོགས་ཀྱིས། །གདུག་པའི་མདའ་རྣམས་དབྱུང་དུ་གསོལ། །ཕྱིན་ཅད་འགལ་བ་མི་བགྱིད་དོ། །དེ་ནས་སྤྲུལ་པའི་མི་དེས་ཚིགས་སུ་བཅད་དེ་སྨྲས་པ། སྟ་རེ་རྨ་ལས་འདའ་བ་མེད། །

71-1-160a

འཕེན་པའི་ནང་ན་མདེའུ་ཐུང་མཆོག །ལང་ཚོ་གྱད་ཀྱིས་མི་བྱིན་ཏེ། །མང་དུ་ཐོས་པས་མེད་པར་འགྱུར། །དེའི་ཚེ་སྤྲུལ་པའི་མི་དེས་ཚིགས་སུ་བཅད་པ་འདི་སྨྲས་ནས་ཕྱིར་སངས་རྒྱས་ཀྱི་སྐུར་བསྒྱུར་ཏེ་འོད་ཟེར་ཆེན་པོ་བཀྱེ་
ནས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་སྣང་བར་བྱས་ནས་འོད་དེས་རེག་པའི་སེམས་ཅན་རྣམས་ནི་ལོང་བ་རྣམས་ནི་མིག་གིས་གཟུགས་མཐོང་བར་གྱུར། ལུས་ཞ་བོ་སྒུར་པོ་རྣམས་ནི་ཕྱིར་རངས་པར་གྱུར། ལུས་ཀྱི་
རྐང་ལག་མ་ཚང་བ་རྣམས་ནི་ཡན་ལག་དང་ལྡན་པར་གྱུར། སྨྱོས་པ་རྣམས་ཀྱང་དྲན་པ་རྙེད་པར་གྱུར། །མདོར་ན་ཇི་ཙམ་དུ་ཡིད་ཏུ་མི་འོང་བ་ཐམས་ཅད་ཡིད་ཏུ་འོང་བར་གྱུར་ཏོ། །དེའི་ཚེ་ན་དེ་བཞིན་གཤེགས་པས་མི་རྒོད་ལྔ་བརྒྱ་ལ་ཆོས་
རྣམ་པ་སྣ་ཚོགས་བསྟན་ཏེ། སྤྲོ་བ་དང་། གཟེངས་སྟོད་པ་དང་། དགའ་བར་བྱས་པས་མི་རྒོད་ལྔ་བརྒྱ་རྣམས་ཆོས་ཐོས་ནས་རབ་ཏུ་དགའ་ནས་ལུས་ཀྱི་རྨ་ཡང་སོས། ཁྲག་ཀྱང་འོ་མར་གྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་
ཆུབ་ཏུ་སེམས་བསྐྱེད་ནས་ཐམས་ཅད་ཚིག་འཐུན་པར་ཚིགས་སུ་བཅད་པ་འདི་དག་གསོལ་ཏོ། །བདག་ཅག་བྱང་ཆུབ་སེམས་བསྐྱེད་དེ། །སེམས་ཅན་ཕན་དོན་རྒྱས་པར་བགྱི། །སངས་རྒྱས་བསྟན་པ་རྗེས་སུ་བསླབ། །བཀུར་སྟི་རིམ་
གྲོ་རྒྱུན་དུ་བགྱི། །སངས་རྒྱས་ཐུགས་རྗེའི་ཤུགས་ཀྱིས་བསྐྱབས། །སྡུག་བསྔལ་ལས་ཐར་སེམས་ལུས་བདེ། །སངས་རྒྱས་བྱང་ཆུབ་སེམས་དཔའ་དང་། །དགེ་བའི་བཤེས་གཉེན་དྲིན་དྲན་བགྱི། །སློབ་དཔོན་བླ་མ་ཕ་མ་དང་། །
དེ་ལས་གཞན་པ་སེམས་ཅན་རྣམས། །བྱམས་སྡང་ཀུན་ལ་མཉམ་པར་སེམས། །དྲིན་གྱི་བསོད་ནམས་གཉིས་སུ་མེད། །དེའི་སྟེང་གི་ནམ་མཁའ་ལ་འདོད་པའི་ཁམས་ཀྱི་ལྷ་བརྒྱ་བྱིན་ལྷའི་དབང་པོ་ལ་སོགས་པས་ལྷ་རྫས་ཀྱི་མེ་ཏོག་
ཆར་བཞིན་དུ་ཕབ་ནས་ལྷ་རྫས་ཀྱི་རོལ་མོས་དེ་བཞིན་གཤེགས་པ་ལ་མཆོད་པ་བྱས་ཏེ། སྐད་འཐུན་པར་ཚིགས་སུ་བཅད་པ་འདི་སྐད་ཅེས་གསོལ་ཏོ། །བདག་ཅག་སྔོན་གྱི་བསོད་ནམས་ཀྱིས། །འོད་ཟེར་སྣང་བ་མཆོག་ཏུ་མཛེས། །མཆོད་པའི་

71-1-160b

ཡོ་བྱད་དམ་པ་ཡིས། །ཀུན་ལ་ཕན་པའི་དོན་བགྱིའོ། །སངས་རྒྱས་ཕྲད་པར་ཤིན་དུ་དཀའ། །དམ་ཆོས་ཐོས་པར་རབ་ཏུ་དཀའ། །སྔོན་ཚེ་དགེ་རྩ་བསྐྲུན་པས་ན། །ཤག་རིགས་ལྷ་དང་ཕྲད་པར་གྱུར། །སངས་རྒྱས་བཀའ་དྲིན་དྲན་སླད་
དུ། །བྱང་ཆུབ་ཏུ་ནི་སེམས་བསྐྱེད་དེ། །བདག་ཅག་སངས་རྒྱས་མཐོང་བ་དང་། །ཐེག་པ་གསུམ་གྱི་དགེ་བ་རྣམས། །འགྲོ་བ་མ་ལུས་དོན་གྱི་ཕྱིར། །བླ་མེད་བྱང་ཆུབ་ཡོངས་སུ་བསྔོ། །དེའི་ཚེ་ལྷ་རྣམས་ཀྱིས་ཚིགས་སུ་བཅད་པ་དེ་དག་
སྨྲས་ནས་ལན་བརྒྱ་སྟོང་དུ་བསྐོར་བ་བྱས་ཏེ། སངས་རྒྱས་ལ་མགོ་བོས་ཕྱག་བྱས་ནས། སྟེང་གི་ནམ་མཁའ་ལ་ཕྱིར་དོང་ངོ་། །གཞན་ཡང་འདི་ལྟ་སྟེ། དེ་བཞིན་གཤེགས་པའི་ཐབས་མཁས་པ་དང་། ཐུགས་རྗེ་ཆེན་པོའི་དགེ་བའི་
རྩ་བའི་སྟོབས་བསམ་གྱིས་མི་ཁྱབ་བོ། །དེའི་ཚེ་ཡུལ་ཡངས་པ་ཅན་ན་བྲམ་ཟེ་ཞིག་ལོག་པར་ལྟ་བ་ལ་ཞེན་ཏེ། ང་རྒྱལ་གྱིས་མངོན་པར་ཟིན་པས། ཤཱ་རིའི་བུ་དང་། མཽད་གལ་གྱི་བུ་ཆེན་པོས་བྲམ་ཟེ་དེ་དང་བཤེས་ཏེ་རྒྱུན་དུ་ཁྱིམ་དུ་སོང་
ནས་ཆོས་བསྟན་ཀྱང་དད་པར་མ་གྱུར་ཏེ་ངན་པར་ལྟ་བ་ལ་ཆགས་སོ། །བྲམ་ཟེ་དེ་རབ་ཏུ་ཕྱུག་པ་ལས་ནོར་རིན་པོ་ཆེ་རབ་ཏུ་མང་ཡང་དེ་ལ་བུ་མེད་དེ། གལ་ཏེ་ཤི་བར་གྱུར་ན་ནོར་ཕྱུགས་ཐམས་ཅད་སླར་སྡུད་དོ་སྙམ་བསམས་སོ། །
དེ་ནས་རི་གཉན་གྱི་ལྷ་དང་། ཤིང་གི་ལྷ་དང་། དེ་དག་ལ་སོགས་པ་ལ་མཆོད་ཅིང་གསོལ་ནས་ཞག་དགུ་བཅུ་ལོན་པ་དང་ཆུང་མ་ལ་བུ་ཡོད་པར་གྱུར་ཏོ། །དེ་ནས་ཟླ་བ་ཚང་བ་དང་བུ་ཁྱེའུ་བྱད་གཟུགས་བཟང་བ། བལྟ་ན་སྡུག་པ། མིའི་
མཚན་དང་ལྡན་པ། ཕ་མའི་སྙིང་དུ་སྡུག་པ། མང་པོའི་ཡིད་ཏུ་འོང་བ་ཅིག་བཙས་སོ། །བུ་དེ་གསོས་པ་བསྐྱེད་དེ། ལོ་ཉི་ཤུ་ལོན་པ་དང་གྲོགས་པོ་དང་ཕྱི་རོལ་དུ་འཁྱམ་ཞིང་ལྟད་མོ་ལྟར་སོང་བ་ལས་ལམ་དུ་བ་ལང་རྨིས་པ་དང་ཕྲད་པས་
བརྫིས་ཏེ་ཤི་བར་གྱུར་ཏོ། །དེ་ལྟར་བུ་ཤི་བ་ཕ་མས་ཐོས་ནས་སྐད་ཕྱུང་ནས་ངུ་ཞིང་ཆོ་ངེས་བཏབ་ནས་ས་ལ་འགྲེ་ཞིང་ལུས་ལ་ས་རྡུལ་བགོས་ཏེ་སྐྲ་ཡང་བལ་ནས་ནང་གཅིག་ཏུ་བདག་གི་རིན་པོ་ཆེ་མེད་པར་གྱུར་ཏོ་ཞེས་སྨྲས་ཏེ། 

71-1-161a

ཆོ་ངེས་བཏབ་སྟེ་བུའི་རོ་ག་ན་བ་དེར་སོང་ནས་བུ་རོ་པང་དུ་བླངས་ཏེ་བརྒྱལ་ཞིང་ཕྱིར་སངས་པ་ཙམ་དུ་ངུ་ངུ་ནས་མྱོས་པར་གྱུར་ཏོ། །གོས་ཀྱང་བོར་ནས་སྒྲེན་མོར་སོང་སོང་བ་ལས་དེ་བཞིན་གཤེགས་པ་དང་ཕྲད་དོ། །
དེ་ནས་དེ་བཞིན་གཤེགས་པའི་ཐུགས་རྗེ་ཆེན་པོའི་ཤུགས་ཀྱིས་དེའི་བུར་སྤྲུལ་ཏེ་བུ་དང་ཕྲད་པར་བྱས་ནས་བུའི་ཕ་མ་རབ་ཏུ་དགའ་བའི་སེམས་སྐྱེས་ཏེ། བུ་པང་དུ་བླངས་ཏེ་མྱོས་པ་ཡང་སངས་ཏེ། སེམས་ཕྱིར་སོར་ཆུད་ནས་
དེ་བཞིན་གཤེགས་པས་དེ་ལ་ཆོས་སྟོན་ཏོ། །དེས་ཆོས་ཐོས་ནས་མོད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །གཞན་ཡང་འདི་ལྟ་སྟེ། དེ་བཞིན་གཤེགས་པའི་ཐུགས་རྗེ་
ཆེན་པོ་དང་། དགེ་བའི་རྩ་བའི་སྟོབས་ནི་བསམ་གྱིས་མི་ཁྱབ་བོ། །དེའི་ཚེ་རྒྱལ་པོ་བཻ་དཱུརྱས་དམག་རྣམ་བཞི་བཤམས་ནས་ཡུལ་སེར་སྐྱ་བ་རྣམས་ཕམ་པར་བྱས་ཏེ་ཤཱག་རིགས་ཀྱི་བུ་རྣམས་བཟུང་ནས་མཆན་
ཁུང་ནུབ་པ་ཙམ་དུ་ས་བརྐོས་ནས་གཡོ་ཞིང་འགུལ་མི་ནུས་པར་ས་ཐམས་སུ་བཅུག་གོ། །དེ་ལྟར་ས་ཐམས་སུ་བཅུག་ནས་ཞག་བདུན་ལོན་པ་དང་དེ་བཞིན་གཤེགས་པས་ཐུགས་རྗེ་ཆེན་པོའི་སྟོབས་ཀྱིས་ས་
ཐམས་དེ་ཁྲུས་ཀྱི་རྫིང་བུར་སྤྲུལ་ཏེ། རྫིང་བུའི་ཆུ་དེ་ཡང་ཡོན་ཏན་བརྒྱད་དང་ལྡན་ལ་མེ་ཏོག་པད་མས་སྟེང་ཡོག་གོ། །འདི་ལྟ་སྟེ། མེ་ཏོག་པད་མ་དང་། པུཎ་ཌ་རཱི་ཀ་དང་། ཁ་དོག་སྔོན་པོ་དང་། སེར་པོ་དང་། དཀར་
པོ་ཤིང་རྟའི་འཕང་ལོ་ཙམ་གྱིས་ཡོངས་སུ་ཁེབས་ལ་བྱ་རྣམ་པ་སྣ་ཚོགས་ཀྱང་སྐད་སྙན་པ་འབྱིན་པར་སྤྲུལ་ཏོ། །དེའི་ཚེ་ཤཱག་རིགས་ཀྱི་བུ་རྣམས་དེ་ལྟར་གྱུར་པས་རབ་ཏུ་དགའ་བའི་སེམས་བསྐྱེད་ནས་མོད་ལ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་ཏུ་སེམས་བསྐྱེད་ནས་རྒྱལ་པོ་བཻ་དཱུརྱས་བལ་གྱི་གླང་པོ་ཆེ་ནག་པོ་མ་རུངས་པ་ལྔ་བརྒྱ་ཆང་བླུད་དེ་རྨིས་པར་བྱས་ནས་རྐང་པ་ལ་ལྕགས་ཀྱི་རྨིག་པ་བསྐོན་ནས་སྣ་ལ་རལ་གྲི་རྣོན་པོ་བཏགས་ནས་སྐད་ངན་

71-1-161b

ཕྱུང་སྟེ་ཤཱག་རིགས་ཀྱི་བུ་རྣམས་རྫིར་བཅུག་གོ། །བ་ལང་རྨིག་པ་རྣམས་ཀྱིས་ཤཱག་རིགས་ཀྱི་བུ་རྣམས་བརྫིས་ནས་ལྷུ་ཚིགས་དང་། ཤ་དང་ལྤགས་པ་དང་། རུས་པ་ཀུན་ཞིབ་མོར་ས་ལ་གཙོག་གཙོག་ལྟར་བཞག་གོ། །དེ་བཞིན་
གཤེགས་པའི་ཐུགས་རྗེ་ཆེན་པོའི་སྟོབས་ཀྱིས་དེ་དག་སེམས་དང་ལུས་ལ་མི་བདེ་བ་མེད་པར་གྱུར། ལུས་དང་སེམས་བདེ་བས་བྱང་ཆུབ་ཏུ་སེམས་བསྐྱེད་པར་གྱུར། བྱང་ཆུབ་ཏུ་སེམས་བསྐྱེད་པས་སེམས་ཅན་ཐམས་ཅད་ལ་མཉམ་
སྙོམས་པའི་སེམས་སུ་གྱུར། སེམས་མཉམ་པར་གྱུར་པས་ཞེ་སྡང་གི་སེམས་མེད་པར་གྱུར། ཞེ་སྡང་མེད་པས་ཚེ་འཕོས་ནས་མཐོ་རིས་ཀྱི་ལྷར་སྐྱེས་སོ། །དེ་ལྟར་མཐོ་རིས་ཀྱི་ལྷར་སྐྱེས་ནས་ལྷའི་མིག་གིས་ཐོག་མ་རྒྱུ་ཅི་ལས་གྱུར་པ་
བརྟགས་ནས་གཅིག་ལ་གཅིག་འདི་སྐད་ཏུ་བདག་ཅག་ནི་སངས་རྒྱས་ཀྱི་ཐུགས་རྗེ་ཆེན་པོའི་བཀའ་དྲིན་གྱིས་ལྷར་སྐྱེས་ཏེ། རིན་པོ་ཆེ་སྣ་བདུན་གྱི་གཞལ་ཡས་ཁང་དང་ལྷ་རྫས་ཀྱི་གོས་དམ་པ་དང་ལྡན་ཏེ། ལུས་ལ་འོད་ཀྱང་ཡོད་
ལ་རོལ་མོ་དང་བདེ་བའི་ལོངས་སྤྱོད་ཐམས་ཅད་ལྡན་པར་གྱུར་ཏོ་ཞེས་སྨྲས་སོ། །དེ་ལྟར་དེ་བཞིན་གཤེགས་པའི་རྫུ་འཕྲུལ་གྱི་མཐུས་དེ་ལྟར་གྱུར་པས་ན་བདག་ཅག་ཀྱང་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ་སྙིང་
རྗེ་ཆེན་པོའི་སེམས་བསྐྱེད་དེ། སངས་རྒྱས་ཀྱི་ཆོས་གང་ན་ཡོད་པ་ན་གྲོང་ངམ། གྲོང་རྡལ་ལམ། རི་འམ། ཚལ་ལམ་ཤིང་དྲུང་ངམ། ཕོ་བྲང་འཁོར་རམ་ཁང་ཁྱིམ་འམ། གང་ན་མདོ་སྡེ་འདི་འདྲི་འམ་ཀློག་གམ། 
འདོན་ཏམ། འཆད་པའི་གནས་དེར་ཅེས་ཀྱང་མི་བྲེལ་བ་ཡིད་བཞིན་དུ་སྦྱར་ཞིང་དབུལ་བར་བྱའོ། །གནས་དེར་མཚོན་གྱིས་གནོད་པར་བྱེད་པ་དང་། རིམ་ནད་དང་། མུ་གེ་མི་འབྱུང་བར་བདག་ཅག་གིས་ཉིན་མཚན་དུ་བསྲུང་ཞིང་བསྐྱབ་
པར་བགྱིའོ་ཞེས་དེ་སྐད་ཅེས་སྨོན་ལམ་བཏབ་ནས་ལྷ་དེ་དག་གི་ཚེ་དང་། སྟོབས་དང་། ལུས་ཀྱི་མདོག་དང་། འོད་གསལ་བ་སྔ་བས་ལྷག་པར་བཟང་བར་གྱུར་ཏེ། དེ་དག་རབ་ཏུ་དགའ་ནས་ནམ་མཁའི་ཕྱོགས་ནས་ཕྱིར་དོང་ངོ་། །

71-1-162a

གཞན་ཡང་དེ་བཞིན་གཤེགས་པའི་ཐབས་མཁས་པའི་ཐུགས་རྗེ་ཆེན་པོ་དང་། དགེ་བའི་རྩ་བའི་སྟོབས་ནི་བསམ་གྱིས་མི་ཁྱབ་བོ། །དེའི་ཚེ་རྒྱལ་པོ་བཻ་དཱུརྱས་ཡུལ་སེར་སྐྱ་ཕབ་ནས་ཤཱག་རིགས་ཀྱི་བུ་རྣམས་
མེད་པར་བྱས་པའི་འོག་ཏུ་ཤཱག་རིགས་ཀྱི་བུ་མོ་ཅི་ལ་ཡང་མཁས་པ་གཞན་པས་ལྷག་པ་ལྔ་བརྒྱ་ཞིག་གདམས་ནས་བུ་མོ་ལྔ་བརྒྱས་སྐོར་ཏེ། རོལ་མོ་བྱས་ནས་ཕྱིར་བདག་གི་ཡུལ་དུ་འོངས་ཏེ། བཙུན་མོ་དང་སླས་རྣམས་བཅས་སུ་ཕོ་བྲང་དུ་འདུས་
ཚོགས་ནས་སྐྱིལ་མོ་ཀྲུང་བཅས་ཏེ་འདུག་གོ། །གདན་ལ་འདུག་ནས་བདག་སྐྱིད་དེ་ལེགས་སོ་ཞེས་སྨྲས་སོ། །དེ་ནས་ཤཱག་རིགས་ཀྱི་བུ་མོ་རྣམས་ཀྱིས་རྒྱལ་པོ་བཻ་དཱུརྱ་ལ་ཁྱོད་ཅིས་སྐྱིད་ཅེས་སྨྲས་སོ། །རྒྱལ་པོས་སྨྲས་པ། ཁོ་བོ་དགྲ་ལས་རྒྱལ་
བས་སྐྱིད་དོ། །བུ་མོ་རྣམས་ཀྱིས་སྨྲས་པ། ཁྱོད་རྒྱལ་བ་མ་ཡིན་ནོ། །ཇི་སྟེ་རྒྱལ་པོའི་དམག་རྣམ་བཞི་ཀུན་ལོག་ན་ཡང་ཤཱག་རིགས་ཀྱི་བུ་གཅིག་ལས་མི་ཐུབ་བོ། །བདག་ཅག་ཤཱག་རིགས་ཀྱི་མི་རྣམས་སངས་རྒྱས་ཀྱི་སློབ་མར་གྱུར་ཏེ། ཅི་ལ་
ཡང་བརྟོད་པ་མེད་པས་རྒྱལ་པོ་རྒྱལ་བར་ཟད་དོ། །གལ་ཏེ་ངན་སེམས་བསྐྱེད་ནས་ཁྱོད་སྔ་ཕྱི་ལན་གསུམ་བཞིའི་བར་དུ་ཡུལ་སེར་སྐྱར་དམག་རྣམ་བཞི་དྲངས་པ་ན་རྟག་ཏུ་ཕམ་པར་བྱས་པ་མ་ཡིན་ནམ། ཁྱོད་ཐོག་མ་དམག་དྲངས་པའི་ཚེ་
ཤཱག་རིགས་ཀྱི་བུ་རྣམས་འདི་སྐད་ཟེར་རོ། །རྒྱལ་པོ་བཻ་དཱུརྱ་ཁྲེལ་མེད་པ་དྲིན་མི་ཤེས་པར་གནོད་པ་བྱེད་དུ་འོང་བ་དེ་དང་འགྱེད་པར་གྱུར་ན་འཛངས་ངན་གྱི་བྱེ་བྲག་གང་ཡང་མེད་དཀར་ནག་ཀྱང་མི་མངོན་གྱིས། བདག་ཅག་གིས་སྐྲག་པ་ཙམ་བྱས་ཏེ་
ཕྱིར་བཟློག་པའི་ཕྱིར་ཐམས་ཅད་ཀྱིས་འདི་སྐད་ཅེས་དམ་བཅས་སོ། །བདག་ཅག་གིས་མདའ་ཅིག་ཅར་འཕངས་ལ་ཕ་རོལ་ལ་སྨས་ཤིང་གནོད་པར་མི་བྱའོ་ཞེས་དམག་རྣམ་བཞི་བཤམས་ནས་རྒྱང་གྲགས་བཞི་བཅུའི་མདུན་དུ་ཁྱོད་ཀྱི་དམག་
བསུ་ནས་ཀུན་གྱིས་མདའ་འཕངས་ན་མདའི་རྒྱུན་མ་ཆད་དེ། རྒྱལ་པོ་ཁྱོད་སྐྲག་ནས་ཕྱིར་མ་ལོག་གམ། དེ་ནས་ཡང་ཞག་དགུ་བཅུ་ལོན་པའི་འོག་ཏུ་ཕྱིར་དམག་རྣམ་བཞི་དྲངས་ནས་ཤཱག་རིགས་ལ་དྲངས་ཏེ་བརྒལ་བ་

71-1-162b

ན། དེའི་ཚེ་ཤཱག་རིགས་ཀྱི་བུ་རྣམས་འདི་སྐད་ཅེས་བགྲོས་སོ། །རྒྱལ་པོ་བཻ་དཱུརྱ་སྡིག་པ་ཅན་ཁྲེལ་དང་ངོ་ཚ་མི་ཤེས་པ་དེ་ཡང་བདག་ཅག་ལ་གནོད་པ་བྱེད་ཏུ་འོངས་པས་བདག་ཅག་ཤཱག་རིགས་རྣམས་ཀྱིས་འདི་ལྟར་དམ་བཅའོ། །དགྲ་དེ་དག་ལ་བདག་གིས་གཅིག་
ཅར་མདའ་འཕངས་ལ་དེ་དག་གི་ལུས་ལ་གནོད་པར་མི་འགྱུར་བར་དེའི་ཡ་ལད་ཀྱི་རྒྱུན་ཀུན་བཅད་དེ། ཁྲབ་ཀྱི་ས་ལ་ལྷགས་པར་བྱའོ་ཞེས་དམ་བཅས་ནས་ཤཱག་རིགས་ཀུན་གྱིས་མདའ་འཕངས་ནས་ཁྲབ་ཀྱི་རྒྱུན་ཀུན་བཅད་དེ་བསྒྲེན་མོར་བཞག་གོ། །
དེ་ནས་རྒྱལ་བུ་ཁྱོད་སྐྲག་ནས་དེ་ནི་བདག་ཅག་གི་སྲོག་ལ་བབ་ན་ཇི་ལྟར་བྱ་ཞེས་བགྲོས་པ་ལས་བློན་པོ་གཅིག་གིས་འདི་སྐད་ཅེས་གྲོས་མ་བཏབ་བམ། ཤཱག་རིགས་རྣམས་ནི་སངས་རྒྱས་ཀྱི་སློབ་མ་ཡིན་པས་སྲོག་མི་གཅོད་པའི་ཁྲིམས་
སྲུངས་ཏེ་སྙིང་རྗེ་ཆེ་བས་བདག་ཅག་ལ་གནོད་པ་མ་བྱས་ཀྱི་དེ་ལྟ་མ་ཡིན་ན་བདག་ཅག་གི་ལུས་དང་སྲོག་མེད་པར་འགྱུར་རོ་ཞེས་སྨྲས་ནས་དེ་ལྟར་བདེན་ན་ད་དུང་བརྒལ་ལོ་ཞེས་སྨྲས་ཏེ། དེའི་ཚེ་ན་ཤཱག་རིགས་ཀྱི་བུ་རྣམས་ནི་ལག་པ་མི་
འགུལ་བར་སྡོད་དོ། །རྒྱལ་པོ་བཻ་དཱུརྱའི་དམག་རྣམ་བཞི་དྲུང་དུ་བསྙེན་ཀྱང་ཤཱག་རིགས་ཀྱི་བུ་རྣམས་མི་རྒོལ་བར་སྡོད་དོ། །དེ་ནས་བྲམ་ཟེ་ཞིག་འདུག་པས་ཤཱག་རིགས་རྣམས་ལ་འདི་སྐད་ཅེས་སྨྲས་སོ། །ད་མི་བདེ་བ་བྱུང་བཞིན་དུ་ཅིའི་ཕྱིར་མི་རྒོལ་བར་
སྡོད་ཅེས་སྨྲས་པ་དང་། ཤཱག་རིགས་རྣམས་ཀྱིས་སྨྲས་པ། བདག་ཅག་ནི་ཅི་ལ་ཡང་བརྟོད་པ་མེད་དེ། འདི་དང་བརྟོད་པར་གྱུར་ན་སངས་རྒྱས་ཀྱི་སློབ་མར་མི་རུང་ངོ་ཞེས་སྨྲས་སོ། །དེ་ནས་བྲམ་ཟེ་དེ་དག་གིས་སྨྲས་པ་ལ་མ་རངས་ཏེ། 
གཅིག་པུ་ཤཱག་རིགས་ཀྱི་མདུན་དུ་འཕགས་ནས་རྒྱལ་པོ་བཻ་དཱུརྱའི་དམག་ལ་བརྒལ་ཏེ་མདའ་གཅིག་འཕངས་པས་བདུན་བདུན་སྨྲས་པར་བྱས་པས་རིང་པོ་མི་ཐོགས་པར་སྨས་པ་དང་ཤི་བ་མང་བར་གྱུར་ཏེ། རྒྱལ་པོ་ཁྱོད་དམག་རྣམ་
བཞི་དང་ཕྱིར་མ་ལོག་གམ། དམག་ཕྱིར་ལོག་པའི་འོག་ཏུ་ཤཱག་རིགས་རྣམས་འདི་སྙམ་དུ་སེམས་པར་གྱུར་ཏོ། །བདག་ཅག་རྣམས་བྲམ་ཟེ་འདི་དང་ལྷན་ཅིག་འདུག་ཅིང་འགྲོགས་པའི་མི་རིགས་སོ་སྙམ་བསམས་

71-1-163a

ནས་ཤཱག་རིགས་རྣམས་འདུས་ནས་བྲམ་ཟེ་ཡུལ་དེ་ནས་བསྐྲད་དོ། །བྲམ་ཟེ་དེ་བསྐྲད་པའི་འོག་ཏུ་ཡང་རྒྱལ་པོས་དམག་རྣམ་བཞི་དྲངས་ནས་ཡུལ་སེར་སྐྱ་ཕབ་ནས་རྒྱལ་བར་བྱས་པ་ཡིན་ནོ། །དེ་ནས་རྒྱལ་པོ་
བཻ་དཱུརྱ་སྐྱེངས་ཏེ་ངོ་ཚ་བར་གྱུར་ཏོ། །དེ་ནས་རིགས་ངན་པའི་ཤན་པ་བཀུག་ནས་ཤག་རིགས་ཀྱི་བུ་མོ་རྣམས་རྐང་པ་དང་ལག་པ་གཏུབས་ལ་སྣ་དང་རྣ་བ་བཅད་དེ་ཤིང་རྟས་བསྐྱས་ནས་དུར་ཁྲོད་ཏུ་བོར་རོ། །དེའི་ཚེ་ཤཱག་རིགས་ཀྱི་བུ་མོ་རྣམས་
རྐང་ལག་བཅད་ནས་ས་ལ་འགྲེ་ཞིང་སྡུག་བསྔལ་ཆེན་པོ་མྱོང་བར་གྱུར་ནས་སྲོག་ལ་བབ་བོ། །དེའི་ཚེ་ཤག་རིགས་ཀྱི་བུ་མོ་རྣམས་སྡུག་བསྔལ་གྱིས་གདུངས་པས་ལ་ལ་ནི་ཕ་མ་དང་མིང་པོ་ཕོ་ནུ་མོའི་མིང་ནས་འབོད། ལ་ལ་
ནི་གནམ་འབོད། ལ་ལ་ནི་ས་འབོད། ལ་ལ་ནི་རབ་ཏུ་སྡུག་བསྔལ་བར་འབོད་པར་གྱུར་ཏོ། །དེའི་ནང་ན་ཤཱག་རིགས་ཀྱི་བུ་མོ་མཆོག་ཏུ་གྱུར་པ་གཅིག་གིས་བུ་མོ་རྣམས་ལ་འདི་སྐད་ཅེས་སྨྲས་སོ། །ཕུ་ནུ་མོ་དག་འདི་ལྟར་
རིག་པར་གྱིས་ཤིག །བདག་གིས་སྔོན་སངས་རྒྱས་ལས་འདི་ལྟར་ཐོས་སོ། །གང་ཞིག་ཕོངས་ཤིང་ཉམ་ཐག་པར་གྱུར་པ་ན་སེམས་རྩེ་གཅིག་ཏུ་སངས་རྒྱས་ཡིད་ལ་བྱས་ཏེ་མཚན་ནས་བརྗོད་ལ་སྲོག་ཕྱོགས་ན་བསམ་པ་བཞིན་དུ་འགྲུབ་
ཅིང་བདེ་བར་འོང་བར་ཐོས་སོ། །དེ་ནས་ཤཱག་རིགས་ཀྱི་བུ་མོ་ལྔ་བརྒྱ་རྣམས་སེམས་རྩེ་གཅིག་ཏུ་བཏུད་ནས་འཐུན་པར་སངས་རྒྱས་ཤཱཀྱ་ཐུབ་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱག་འཚལ་ལོ་ཞེས་བརྗོད་དེ། 
ཀྱི་ཧུད་ཀྱི་ཧུད། ཨེ་མ་རེ་སྡུག །ཨེ་མ་རེ་སྡུག །བཅོམ་ལྡན་འདས་བདེ་བར་གཤེགས་པ་ཞེས་བོས་སོ། །དེ་སྐད་སྨྲས་མ་ཐག་ཏུ་དེ་བཞིན་གཤེགས་པ་ཐུགས་རྗེ་ཆེན་པོའི་ཤུགས་ཀྱིས་སྟེང་གི་ནམ་མཁའ་ལ་སྙིང་རྗེ་ཆེན་པོའི་སྤྲིན་
ཆགས་ཏེ། སྙིང་རྗེ་ཆེན་པོའི་སྤྲིན་ལས་ཆར་པ་བབ་ནས་ཆར་པའི་ཐིགས་པས་བུ་མོའི་ལུས་ལ་ཕོག་གོ། །ཆར་པས་ཕོག་མ་ཐག་ཏུ་བུ་མོ་དེ་དག་གི་ལག་པ་དང་། རྐང་པ་དེ་དག་ལ་སོགས་པ་སྔ་མཁོ་བཞིན་དུ་སོས་པར་གྱུར་ཏོ། །

71-1-163b

དེའི་ཚེ་ཤཱག་རིགས་ཀྱི་བུ་མོ་རྣམས་རབ་ཏུ་དགའ་བར་གྱུར་ནས་ཐམས་ཅད་ཚིག་འཐུན་པར་དེ་བཞིན་གཤེགས་པ་བྱམས་པའི་ཕ་མ་དང་། བླ་ན་མེད་པ་བཅོམ་ལྡན་འདས་ནི་འཇིག་རྟེན་གྱི་སྨན་དམ་པའོ། །འཇིག་རྟེན་གྱི་སྣང་བའི་སྤྱན་
ནོ། །ཁམས་གསུམ་གྱི་སྡུག་བསྔལ་ལས་ཐར་བར་མཛད་པའོ། །ཤིན་དུ་བདེ་བ་སྦྱིན་པའོ། །དེ་ཅིའི་ཕྱིར་ཞེ་ན། བདག་ཅག་སྡུག་བསྔལ་གྱིས་གདུངས་པ་ལས་ཐར་བར་གྱུར་པས་བདག་ཅག་གིས་སངས་རྒྱས་ཀྱི་བཀའ་དྲིན་དྲན་པར་
བྱ་བའི་ཕྱིར་ད་སངས་རྒྱས་ཀྱི་བཀའ་དྲིན་བསབ་པར་བྱ་ན་ཐབས་ཇི་ལྟ་བུ་ཞིག་གིས་བཀའ་དྲིན་བསབ་པར་བྱ། དེ་བཞིན་གཤེགས་པའི་སྐུ་ནི་རྡོ་རྗེའི་སྐུ། རྟག་ཏུ་གནས་པའི་སྐུ། བཀྲེས་པ་དང་སྐོམ་པ་མེད་པའི་སྐུ། གཟུགས་དམ་པའི་སྐུ། 
བསམ་གཏན་དང་ཏིང་ངེ་འཛིན་དང་། དབང་པོ་དང་སྟོབས་དང་། བྱང་ཆུབ་ཀྱི་ཡན་ལག་བསམ་གྱིས་མི་ཁྱབ་པ་ཕུན་སུམ་ཚོགས་པ་དང་ལྡན་པའོ། །མཚན་སུམ་བཅུ་རྩ་གཉིས་དང་། དཔེ་བྱད་བཟང་པོ་བརྒྱད་བཅུས་ཡོངས་སུ་བརྒྱན་
པའོ། །ཡོངས་སུ་མྱ་ངན་ལས་འདས་པ་ཆེན་པོ་ལ་གནས་ཤིང་སེམས་ཅན་ཐམས་ཅད་ལ་སྒྲ་གཅན་འཛིན་དང་འདྲ་བར་གཟིགས་སོ། །དགྲ་དང་གཉེན་ལ་ཡང་མཉམ་པར་གཟིགས་ཏེ་ལན་མི་རེ་བ་ཡིན་ན། ད་བདག་ཅག་གིས་སངས་རྒྱས་ཀྱི་བཀའ་དྲིན་བསབ་
པར་བྱ་ན། བདག་ཅག་རབ་ཏུ་བྱུང་སྟེ་ཚུལ་ཁྲིམས་བསྲུངས་ལ་དམ་པའི་ཆོས་བཟུང་ངོ་སྙམ་བསམས་ནས། ཆོས་གོས་དང་ལྷུང་བཟེད་བཙལ་ཏེ། དགེ་སློང་མའི་གཙུག་ལག་ཁང་དུ་སོང་ནས་རབ་ཏུ་འབྱུང་བར་གསོལ་ཏེ་དགེ་སློང་མའི་གནས་སུ་ཕྱིན་ནས་དགེ་སློང་མ་དྲུག་སྡེ་དང་སྔར་ཕྲད་
པར་གྱུར་ཏེ། དགེ་སློང་མ་དྲུག་སྡེས་བདག་ཅག་ལ་འདི་སྐད་ཅེས་བསྒོའོ། །བུ་མོ་ཁྱོད་རྣམས་གཞོན་ཞིང་ལང་ཚོའི་དུས་ལ་བབ་ལ་བྱད་བཞིན་བཟང་ལ་སྡུག་ན་ཅིའི་ཕྱིར་འདི་ལྟ་བུ་གཏང་དཀའ་བ་གཏོང་བར་སེམས་ཤིང་རབ་ཏུ་འབྱུང་བར་སེམས། 
དེ་བས་ན་འཇིག་རྟེན་གྱི་འདོད་པ་ལྔ་ལས་ལོངས་སྤྱད་ན་མི་སྐྱིད་དམ། སྐྱིད་པ་མྱོང་ནས་ཚེ་ནར་ཕྱིན་ཏེ་རབ་ཏུ་བྱུང་ན་མི་སླེབས་སམ་ཞེས་བསྒོའོ། །དྲུག་སྡེ་མ་རྣམས་ཀྱིས་བསམས་

71-1-164a

པ། འདི་དག་རབ་ཏུ་མ་བྱུང་ན་གདོན་མི་ཟ་བར་བདག་ཅག་གི་ཆོས་གོས་དང་། ལྷུང་བཟེད་དང་། འདོད་པ་ཐམས་ཅད་དབུལ་ལོ་བར་བསམས་ནས་ཤཱག་རིགས་ཀྱི་བུ་མོ་རྣམས་རབ་ཏུ་འབྱུང་བའི་བགེགས་བྱས་
སོ། །བུ་མོ་རྣམས་ཀྱིས་ཚིག་དེ་ཐོས་ནས་ལྷག་པར་མི་དགའ་ཞིང་མྱ་ངན་གྱིས་ནོན་པར་གྱུར་ཏེ། ཅིའི་ཕྱིར་ད་དུང་ཡང་འདི་ལྟ་བུའི་འཇིགས་པ་ཆེན་པོ་དང་ཕྲད་པར་འགྱུར། ཁ་ཟས་བཟང་པོའི་ནང་ན་དུག་མ་རུངས་པ་ཡོད་པ་ལྟར་དགེ་
སློང་མ་དེ་དག་ཀྱང་དེ་དང་འདྲ་སྟེ། འཇིག་རྟེན་གྱི་འདོད་པ་ལྔ་ནི་འཇིགས་པའི་སྐྱོན་མང་བར་བདག་ཅག་གིས་ཀྱང་ཤེས་ན། ཅིའྀ་ཕྱིར་འདི་དག་དེ་ལ་ཡོན་ཏན་ཏུ་ལྟ་སྙམ་བསམས་ནས་སྐད་ཕྱུང་སྟེ་ངུས་སོ། །དེ་ནས་ཕྱིར་བྱུང་སྟེ་
སོང་སོང་བ་ལས་དགེ་སློང་མ་ཨུད་པ་ལའི་མདོག་དང་ཕྲད་དེ། བདག་ཅག་ལ་ཅིའི་ཕྱིར་ངུ་ཞེས་དྲིས་སོ། །བདག་ཅག་གིས་དགེ་སློང་མ་ལ་བསམས་པ་ལྟར་མ་གྱུར་པས་ངུ་བ་ཡིན་ནོ་ཞེས་སྨྲས་སོ། །ཨུད་པ་ལའི་མདོག་གིས་
སྨྲས་པ། ཁྱེད་ཅིར་བསམས་ན་མ་གྲུབ་པར་གྱུར། བདག་ཅག་གིས་རབ་ཏུ་དབྱུང་བར་གསོལ་བ་ལས། རབ་ཏུ་འབྱུང་དུ་མ་བཏང་ངོ་། །ཨུད་པ་ལའི་མདོག་གིས་སྨྲས་པ། ཁྱེད་རབ་ཏུ་འབྱུང་བར་དགའ་ན་ཁོ་བོས་རབ་ཏུ་དབྱུང་
ངོ་། །ཤཱག་རིགས་ཀྱི་བུ་མོ་རྣམས་རབ་ཏུ་དགའ་ནས་ཨུད་པ་ལའི་མདོག་གི་སློབ་མར་རབ་ཏུ་བྱུང་ངོ་། །དེ་ལྟར་རབ་ཏུ་བྱུང་ནས་ཐམས་ཅད་འདུས་ཏེ་འདི་སྐད་ཅེས་གཏམ་བྱས་སོ། །བདག་ཅག་རྣམས་རབ་ཏུ་མ་བྱུང་ན་སྡུག་བསྔལ་
འགའ་ཙམ་མྱོང་བར་མ་ཟད་དེ། ཕ་མ་དང་གཉེན་བཤེས་ཀྱང་དགྲས་བསད། བདག་ཅག་ཀྱང་སྣ་དང་། རྣ་བ་དང་རྐང་ལག་ཀུན་བཅད་གཏུབས་ཏེ་སྡུག་བསྔལ་མི་ཟད་མི་སྲིད་པ་མྱོང་ངོ་། །ཨུད་པ་ལའི་མདོག་གིས་སྨྲས་པ། 
ཁྱོད་ཀྱིས་སྡུག་བསྔལ་དེ་ཙམ་མྱོང་བ་ལ་གཏམ་ཡང་བྱར་ཅི་ཡོད། ཁོ་མོ་རབ་ཏུ་མ་བྱུང་བ་ཙམ་ན་སྡུག་བསྔལ་མྱོང་བའི་གཏམ་དེ་མི་གཏོལ་ཏོ། །ཤཱག་རིགས་ཀྱི་བུ་མོ་རྣམས་ཀྱིས་ཐལ་མོ་སྦྱར་ནས་སློབ་དཔོན་ལ་རབ་ཏུ་མ་

71-1-164b

བྱུང་བའི་ཚེ། སྡུག་བསྔལ་ཇི་ལྟ་བུ་མྱོང་བ་བསྟན་དུ་གསོལ་ཞེས་སྨྲས་སོ། །དེ་ནས་དགེ་སློང་མ་ཨུད་པ་ལའི་མདོག་ཏིང་ངེ་འཛིན་དུ་ཞུགས་ནས་མངོན་པར་ཤེས་པའི་མཐུས་འོད་ཟེར་ཆེན་པོ་བཀྱེ་སྟེ་འཛམ་བུའི་གླིང་སྣང་བར་
བྱས་ནས་ལས་དང་རྒྱུ་འཐུན་པས་ལྷ་དང་། ཀླུ་དང་། གནོད་སྦྱིན་དང་། མི་དང་མི་མ་ཡིན་པ་ལ་སོགས་པ་བསྡུས་ནས་འཁོར་མང་པོ་ལ་འདི་སྐད་ཅེས་སྨྲས་སོ། །ཁོ་མོ་རབ་ཏུ་མ་བྱུང་བ་ན་ཡུལ་མཉན་དུ་ཡོད་པ་ཅན་ན་
འདུག་པ་ན་ཁོ་མོའི་ཕ་མས་བྱང་ཕྱོགས་ན་འདུག་པ་ལ་བག་མར་བཏང་ངོ་། །བྱང་ཕྱོགས་ཀྱི་མི་དེ་དག་གི་ཡུལ་ཆོས་ཀྱིས་བུ་བཙའ་ཀར་ཕྱིར་ཕ་མའི་ཡུལ་དུ་བུ་བཙར་བཏོང་སྟེ། དེ་བཞིན་དུ་ལོ་དུ་མར་དེ་ལྟར་སྔ་ཕྱིར་བུ་
བཙས་ནས་ཕྱིས་བུ་ཞིག་བཙའ་བའི་ཚེ་ཁྱིམ་ཐབ་དང་འགྲོགས་ཏེ་བཞོན་པ་རྟ་དང་ཐེག་པར་བཅས་ཏེ་ཕ་མའི་ཡུལ་དུ་སོང་བ་ལས། ལམ་ཕྱེད་དུ་ཕྱིན་པ་ལས་ཆུ་ཀླུང་ཡོད་པ་ཆུ་བྲུག་སྟེ་མ་ཐར་ནས་དེའི་ནུབ་མོ་འབྲོག་དགོན་
པའི་ཆུ་འགྲམ་དེར་ཉལ་ལོ། །དེའི་ནུབ་མོ་བུ་བཙས་པ་དང་རྩྭའི་ནང་ནས་སྦྲུལ་གདུག་པ་ཡོད་པ་ཁྲག་གི་དྲི་ཚོར་ནས་བདག་བུ་བཙས་པའི་ཕྱོགས་སུ་འོངས་སོ། །བདག་གི་དྲུང་དུ་མ་ཕྱིན་པར་བདག་གི་ཁྱིམ་ཐབ་དང་བྲན་ཉལ་
བའི་སྟེང་དུ་འོངས་ནས་བཙུགས་ཏེ་སྔར་བྲན་བསད་དོ། །དེ་ནས་ཁྱིམ་ཐབ་ཀྱི་ཐོག་ཏུ་འོངས་ནས་བདག་གིས་སྦྲུལ་འོངས་སོ། །སྦྲུལ་འོངས་སོ་ཞེས་ཁྱིམ་ཐབ་ལ་བོས་ན་མ་ཚོར་ཏེ་ཁྱིམ་ཐབ་ཀྱང་བསད་དོ། །དེ་ནས་རྟ་དང་། 
བ་ལང་དང་། བཞོན་པ་ཀུན་བསད་དོ། །ཁོ་མོ་འབའ་ཤིག་ཐར་ཏེ་ཕྱི་དེ་ཉིན་ནམ་ནངས་ནས་བལྟས་ན་ཁྱིམ་ཐབ་ཀྱི་རོ་ཡང་བམ། ས་ལ་ཁྲག་གཙོག་གཙོག་ལྟར་འདུག་པ་མཐོང་ནས་ཁོ་མོ་སྐྲག་འཁམས་
ནས་ས་ལ་འགྱེལ་ཏོ། །དེ་ནས་སྐད་ཆེན་པོ་ཕྱུང་སྟེ་ངུས་ནས་ཁུ་ཚུར་གྱིས་བྲང་བརྡུངས། སྐྲ་ཡང་བལ་ནས་རོའི་སྟེང་དུ་འགྱེལ་ཏོ། །དེ་བཞིན་དུ་ཞག་དུ་མར་ཆུ་ལས་མ་ཐར་ཏེ། ཆུ་འགྲམ་ན་འདུག་འདུག་པ་ལས་ཕྱིས་ཆུ་

71-1-165a

བྲུག་པ་བྲི་ནས་བུ་ཆེན་པོ་ཚུ་རོལ་དུ་བཞག་བུ་འབྲིང་པོ་ཁུར་དུ་ཁྱེར། བུ་ཆུང་ངུ་ཐུ་བའི་ནང་དུ་བཅུག །ཐུ་བ་སོས་བཟུང་སྟེ་ཆུ་འབོགས་པ་ལས་ཆུ་ཕྱེད་ཏུ་ཕྱིན་པ་དང་བུ་ཆེན་པོ་སྟག་ཅིག་འོངས་ནས་བཟུང་བ་མཐོང་བ་དང་། 
ཁ་གདངས་ཏེ་ཁུས་བཏབ་པ་ལས་ཐུ་བ་ཤོར་བ་དང་བུ་ཆུང་ངུ་ཆུར་ལྷུང་ངོ་། །བུ་ཆུང་ངུ་བསྙབས་པ་ལས་རྒྱབ་ན་མོའི་བུ་ཡང་ཤོར་ནས་བུ་ཀུན་ཤིའོ། །དེ་ལྟར་བུ་གཅིག་སྟག་གིས་ཟོས། གཞན་ཆུར་ཤི་བས་བདག་ཕ་རོལ་དུ་ཕྱིན་ཏེ་
སྙིང་གས་པ་ཙམ་དུ་སྡུག་བསྔལ་གྱིས་གདུངས་ནས་ཁ་ནས་ཁྲག་སྐྱུགས་ཏེ། ཀྱི་ཧུད་ཀྱི་ཧུད་ཅེས་ཆོ་ངེས་བཏབ་ནས་ནང་གཅིག་ཏུ་འདི་འདྲ་བའི་སྡུག་བསྔལ་མྱོང་བར་མཐོང་བར་གྱུར་ཏོ་ཞེས་ངུ་ཞིང་འདུག་འདུག་པ་ལས། རིང་པོ་མ་ཐོགས་པར་
འདྲོན་པོ་མང་པོ་ཞིག་དེར་ལྷགས་སོ། །དེའི་ཚེ་ན་འདྲོན་པོ་དེ་དག་གི་ནང་ན་ཁྱིམ་བདག་གཅིག་ཅིག་ཁོ་མོའི་ཕ་མ་དང་མཛའ་ཞིང་བཤེས་པ་སྟེ། ཁོ་མོ་དེའི་གན་དུ་སོང་སྟེ་ཕ་མའི་གཏམ་དྲིས་སོ། །དེ་ལ་ཁྱིམ་བདག་དེས་འདི་སྐད་ཅེས་
སྨྲས་སོ། །ཁྱོད་ཀྱི་ཕ་མ་དང་ཁྱིམ་དུ་མེ་ཐར་ཏེ་ཁྱིམ་ཡང་ཚིག་གོ། །ཁྱོད་ཀྱི་ཕ་མ་ཡང་ཚིག་གོ། །བདག་གིས་ཚིག་དེ་ཐོས་ནས་བརྒྱལ་ཏེ་ས་ལ་འགྱེལ་ཏོ། །དེ་ནས་རིང་ཞིག་ལོན་པ་དང་ཕྱིར་སངས་ཏེ་སོང་སོང་བ་ལས་གྲོགས་པོ་
རྣམས་མི་རྒོད་ལྔ་བརྒྱ་དང་ཕྲད་དེ་བཅོམ་མོ། །དེའི་ཚེ་མི་རྒོད་ཀྱི་དཔོན་པོས་བདག་ཆུང་མར་བླངས་ནས་རྟག་ཏུ་སྒོ་སྲུང་དུ་བཅུག་གོ། །སྒོ་སྲུང་དུ་བཅུག་པ་ན་རིངས་དྲག་ཅིག་བྱུང་བ་ན་ཚོར་སངས་ཆེར་བྱོས་ལ་ནང་དུ་སྦྲོན་ཅིག་ཅེས་བསྒོའོ། །དེ་ནས་དུས་གཞན་
ཞིག་ན་ཁྱིམ་ཐབ་དེ་མི་རྒོད་རྣམས་དང་འཕྲོག་ཅིང་འཇོམས་སུ་སོང་སོང་བ་ལས་རྒྱལ་པོའི་གྲོང་ཁྱེར་གྱི་མི་རྣམས་ཀྱིས་བརྡས་ནས་ཉམ་ཐག་སྟེ་ཕྱིར་གནས་སུ་བྲོས་པ་ལས་དེའི་ཐད་ཀར་ཁོ་མོ་བུ་བཙའ་བའི་ཐད་ཀར་བབ་སྟེ། ཁྱིམ་ཐབ་སྒོ་ན་འབོད་པ་
ཐོས་ཀྱང་སྒོ་འབྱེད་མ་ནུས་པས། དེའི་ཚེ་ཁྱིམ་ཐབ་དེ་འདི་སྙམ་དུ་སེམས་པར་གྱུར་ཏོ། །བདག་གི་ཆུང་མ་འདི་ནི་ང་ལ་གནོད་པ་སེམས་པ་ལྟ། སྒོ་འབྱེད་དུ་ཡང་མ་བཏུབ་བོ་སྙམ་བསམས་ནས་རྩིག་པ་ལ་རྒལ་ནས་ནང་དུ་འོངས་སོ། །དེས་ཆུང་མ་ལ་

71-1-165b

ཅིའི་ཕྱིར་སྒོ་མི་འབྱེད་ཅེས་བྱས་སོ། །ཆུང་མས་སྨྲས་པ། བདག་བུ་བཙའ་ཞིང་འདུག་པས་སྒོ་འབྱེད་མ་ནུས་སོ། །དེའི་ཚེ་ན་ཁྱིམ་ཐབ་དེ་ཁྲོས་ནས་ཇི་ཙམ་དུ་ལུས་ཡོད་ན་བུ་ཡོད་པར་འགྱུར་ཏེ། ཁྱོད་ང་ལ་གནོད་པ་བྱས་པས་བུ་དེ་བདོག་ན་ཡང་ཅི་རུ་
རུང་མྱུར་དུ་སོད་ཅིག་ཅེས་བསྒོའོ། །དེའི་ཚེ་བདག་བུ་ལ་བྱམས་ཆེས་པས་གསོད་མ་ཕོད་དོ། །དེ་ནས་བདག་གི་ཁྱིམ་ཐབ་ཀྱིས་རལ་གྲི་ཕྱུང་ནས་བུའི་རྐང་ལག་བཅད་དེ་ཤ་འདི་ཟོ་ཤིག །ཤ་མ་ཟོས་ན་མགོ་བཅད་དོ་ཞེས་སྨྲས་སོ། །དེ་ནས་བདག་
སྐྲག་ནས་བུའི་ཤ་ཟོས་སོ། །དེ་ལྟར་བུའི་ཤ་ཟོས་ནས་ཁྲོ་བ་ཡང་ཞི་བར་གྱུར་ཏོ། །དེ་ནས་ཡང་དུས་གཞན་ཞིག་ན་རྐུ་ཞིང་འཕྲོག་ཏུ་སོང་སོང་བ་ལས་རྒྱལ་སོས་ཟིན་ཏེ་ཁྲིམས་དང་སྦྱར་ནས་སྲོག་བཅད་དོ། །དེའི་ཚེ་ན་རྒྱལ་པོ་དེའི་ཡུལ་
ཆོས་ཀྱིས་རྐུན་པོ་བསད་ནས་རྐུན་པོའི་རོ་དང་ཆུང་མ་གསོན་པོར་དུར་དུ་བཅུག་གོ། །ཁོ་མོ་བརྒྱན་དང་བཅས་སུ་དུར་དུ་བཅུག་པར་གཞན་གྱིས་མཐོང་ནས་དེ་ནས་མོད་ལ་གཞན་གྱིས་བདག་གི་རྒྱན་འདོད་པའི་ཕྱིར་མཚན་མོ་དུར་བྲུས་ནས་
བདག་ཀྱང་ཁྲིད་དེ་ཆུང་མར་བླངས་ནས་དུར་རྐུན་དེ་ཡང་རིང་པོ་མ་ལོན་པར་ཡང་རྒྱལ་པོས་ཟིན་ནས་ཁྲིམས་དང་སྦྱར་ནས་བསད་དོ། །ཡུལ་ཆོས་ཀྱིས་རྐུན་པོའི་ཆུང་མ་ཡང་གསོན་པོར་རོ་དང་དུར་དུ་བཅུག་གོ། །དེ་ནས་རིང་པོ་
མ་ལོན་པར་སྤྱང་ཀི་ལྟོགས་པའི་རོ་ཟོས་ནས་ཕྱིར་བྱུང་ནས་བདག་ཀྱང་དེ་ནས་ཐར་ཏེ་མྱོས་བཞིན་དུ་འཐོམ་ཞིང་སོང་སོང་བ་ལས་མི་མང་པོ་ཞིག་དང་ཕྲད་དེ། མི་དེ་དག་ལ་འདི་སྐད་ཅེས་སྨྲས་སོ། །བདག་ཤིན་དུ་སྡུག་བསྔལ་
མང་པོས་ཡོངས་སུ་གཟིར་བར་གྱུར་པས་ད་མྱ་ངན་མེད་པའི་བདེ་བའི་གནས་ཤིག་འདོད་དོ། །དེ་ནས་ཁྱིམ་བདག་བྲམ་ཟེ་ཞིག་བདག་ལ་སྙིང་བརྩེ་བའི་ཕྱིར་བདག་ལ་འདི་སྐད་ཅེས་སྨྲས་སོ། །སངས་རྒྱས་ཤཱཀྱ་ཐུབ་པའི་ཆོས་ལ་ཞུགས་ན་ཉོན་
མོངས་པའི་རྐྱེན་མེད་དེ་རབ་ཏུ་བདེའོ་ཞེས་ཐོས་སོ། །བདག་གིས་ཚིག་དེ་ཐོས་ནས་རབ་ཏུ་དགའ་བའི་སེམས་སྐྱེས་ཏེ། དགེ་སློང་མ་སྐྱེ་དགུའི་བདག་མོ་ཆེན་མོ་གྲགས་འཛིན་མ་ག་ལ་བ་དེར་སོང་ནས་ཕྱིན་པ་དང་རབ་ཏུ་བྱུང་ངོ་། །རབ་ཏུ་བྱུང་ནས་
71-1-166a

མཐར་ཀྱིས་བསྒོམས་ནས་འབྲས་བུ་ཐོབ་པར་གྱུར་ཏེ། རིག་པ་གསུམ་དང་། མངོན་པར་ཤེས་པ་དྲུག་དང་། རྣམ་པར་ཐར་པ་བརྒྱད་དང་ལྡན་པར་གྱུར་ཏོ། །དེའི་རྒྱུ་དེའི་རྐྱེན་གྱིས་ཁོ་མོ་རབ་ཏུ་མ་བྱུང་བའི་ཚེ་དེ་ལྟ་བུའི་སྡུག་
བསྔལ་ཆེན་པོ་མྱོང་ངོ་། །མྱོང་ནས་དེའི་རྐྱེན་གྱིས་རབ་ཏུ་བྱུང་ནས་འབྲས་བུ་ཡང་ཐོབ་པར་གྱུར་ཏོ། །དེའི་ཚེ་ཤག་རིགས་ཀྱི་བུ་མོ་རྣམས་དེ་སྐད་ཅེས་སྨྲས་པ་ཐོས་ནས་རབ་ཏུ་དགའ་བའི་སེམས་སྐྱེས་ཏེ་ཆོས་ལ་ཆོས་ཀྱི་མིག་རྣམ་པར་
དག་པ་ཐོབ་པར་གྱུར་ཏོ། །ཆོས་ཉན་པའི་འཁོར་རྣམས་ཀྱང་བྱང་ཆུབ་ཏུ་སྨོན་ལམ་བཏབ་ནས་དགའ་བས་ཕྱིར་དོང་ངོ་། །དེའི་ཚེ་ན་སངས་རྒྱས་ཀྱི་ཡུམ་སྲུ་དགེ་སློང་མ་གཽ་ཏ་མཱིས་དགེ་སློང་མ་དང་། བར་ཁྲིམས་མ་དང་། དགེ་སྦྱོང་མ་དང་
དགེ་བསྙེན་མ་ལ་སོགས་ཏེ་བུད་མེད་ཐམས་ཅད་འདི་སྐད་ཅེས་སྨྲས་སོ། །སངས་རྒྱས་ཀྱི་ཆོས་ནི་ཐམས་ཅད་ལ་ཕན་པ་དང་བདེ་བར་འགྱུར་བའི་ཡོན་ཏན་དང་ལྡན་ཏེ། འབྲས་བུ་རྣམ་པ་གསུམ་ཐོབ་པར་བྱ་བའི་ཕྱིར་དེ་བཞིན་གཤེགས་པའི་
ཆོས་རྒྱ་མཚོར་འཇུག་པ་ལ་སེམས་ཅན་ཐམས་ཅད་ཐོབ་པའི་སྐལ་བ་ཡོད་མོད་ཀྱི་བདག་ཅག་བུད་མེད་ཐམས་ཅད་ལ་ནི་མ་གནང་ངོ་། །དེ་ཡང་བུད་མེད་ཐམས་ཅད་ལ་བསྒྲིབས་པ་མང་ཞིང་གཏོང་མི་ཕོད་པ་ཆགས་ཤིང་ཞེན་པ་དང་། ཀུན་
ནས་ཉོན་མོངས་པའི་ལས་གྲངས་མེད་པས་ཀླགས་པ་དང་། ཤེས་པ་ཆུང་ཞིང་ཞན་པ་དང་། ལེ་ལོ་བྱེད་ཅིང་ང་རྒྱལ་ཆེ་བ་དང་། ལུས་འདི་ཉིད་ཀྱིས་བྱང་ཆུབ་ཀྱི་རྒྱུར་དུ་མི་འགྱུར་ཞིང་མཚན་སུམ་ཅུ་རྩ་གཉིས་ཐོབ་པར་མི་རུང་བ་དང་། 
འཁོར་བར་འཁོར་བ་ན་འཁོར་ལོས་སྒྱུར་བའི་རྒྱལ་པོའི་འབྲས་བུའི་མཆོག་དགེ་བ་བཅུའི་ཆོས་ཀྱིས་འགྲོ་བ་མང་པོ་སྡུད་མི་ནུས་པ་དང་། ཚངས་པའི་རྒྱལ་པོའི་ཐབས་བླ་ན་མེད་པ་མི་འཐོབ་ཅིང་སེམས་ཅན་ཐམས་ཅད་ལ་ཕན་པ་
དང་བདེ་བའི་དོན་དུ་དམ་པའི་ཆོས་ཀྱི་འཁོར་ལོ་བསྐོར་བར་བསྐུལ་མི་ནུས་པའི་ཕྱིར་དེ་བས་ན་དེ་བཞིན་གཤེགས་པས་བུད་མེད་རྣམས་ཆོས་ལ་འཇུག་པའི་སློབ་མར་མ་གནང་ངོ་། །ལྷའི་བདུད་དམ་ངན་པར་ལྟ་བ་དང་། མུ་སྟེགས་ཅན་ཐམས་ཅད་

71-1-166b

རྟག་ཏུ་ངན་པར་ལྟ་བ་ལ་ཆགས་ཤིང་ཞེན་ཏེ་དམ་པའི་ཆོས་མེད་པར་བྱ་བ་དང་། སངས་རྒྱས་དང་། ཆོས་དང་། དགེ་འདུན་གཤིག་པར་འདོད་པ་དང་འདྲ་བར་དེ་བཞིན་གཤེགས་པས་བུད་མེད་རྣམས་སངས་རྒྱས་ཀྱི་ཆོས་ལ་མོས་ཀྱང་
འཇུག་ཏུ་མ་གནང་སྟེ། ཁོ་མོས་བུད་མེད་ཐམས་ཅད་ཀྱི་ཕྱིར་དེ་བཞིན་གཤེགས་པ་ལ་ཡང་དང་ཡང་ལན་གསུམ་གྱི་བར་དུ་སངས་རྒྱས་ཀྱི་ཆོས་ལ་འཇུག་པར་གསོལ་ན་མ་གནང་ངོ་། །དེ་ལྟར་ལན་གསུམ་གྱི་བར་དུ་གསོལ་ཀྱང་མ་
གནང་ནས་བསམས་པ་བཞིན་མ་གྱུར་ནས་ཁོ་མོ་མི་དགའ་བའི་མྱ་ངན་གྱིས་ནོན་ཏེ། མིག་མཆི་མས་གང་སྟེ་ཕྱིར་བྱུང་སྟེ་སོང་སོང་བ་ལས་ལམ་དུ་ཀུན་དགའ་བོ་དང་ཕྲད་ནས་ཀུན་དགའ་བོས་ཁོ་མོ་ལ་ཡུམ་ཅིའྀ་ཕྱིར་འདི་ལྟར་
མི་དགའ་ཞིང་མྱ་ངན་བྱེད་ཅེས་དྲིས་སོ། །ཁོ་མོས་དེའི་ཚེ་ན་ཀུན་དགའ་བོ་ལ་འདི་སྐད་ཅེས་སྨྲས་སོ། །བདག་སངས་རྒྱས་ཀྱི་ཆོས་ལ་དད་ཅིང་མོས་ཏེ་ལན་གསུམ་གྱི་བར་དུ་དེ་བཞིན་གཤེགས་པ་ལ་གསོལ་བ་ལས་མ་གནང་བས་
དེའི་ཕྱིར་བདག་མི་དགའ་ཞིང་མྱ་ངན་བྱེད་དོ་ཞེས་སྨྲས་པ་དང་། དེའི་ཚེ་ཀུན་དགའ་བོས་བདག་ལ་འདི་སྐད་ཅེས་སྨྲས་སོ། །ཡུམ་མི་དགའ་བ་མ་བྱེད་ཅིག །བདག་གིས་དེ་བཞིན་གཤེགས་པ་ལ་གསོལ་ཏེ་ཡུམ་སངས་རྒྱས་ཀྱི་བསྟན་པ་ལ་
འཇུག་པར་བྱའོ་ཞེས་སྨྲས་སོ། །དེ་ནས་བདག་མོད་ལ་དགའ་བར་གྱུར་ཏོ། །དེ་ནས་ཀུན་དགའ་བོས་སངས་རྒྱས་གང་ན་བ་དེར་སོང་ནས་ཕྱིན་པ་དང་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཞུ་ཞིང་གསོལ་བའི་སྐབས་དབྱེ་
བར་གནང་ན་བཅོམ་ལྡན་འདས་ལ་ཞུའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཅི་དང་ཅི་འདོད་པ་དྲིས་ཤིག་པར་བཀའ་སྩལ་ཏོ། །དེ་ནས་བཅོམ་ལྡན་འདས་ལ་ཀུན་དགའ་བོས་འདི་སྐད་ཅེས་གསོལ་ཏོ། །ཡུམ་གཽ་ཏ་མཱི་ནི་
དེ་བཞིན་གཤེགས་པའི་གཟུགས་ཀྱི་སྐུ་གསོ་ཞིང་བསྐྱེད་བསྐྱེད་དེ། ད་མངོན་པར་སངས་རྒྱས་པའང་ཡུམ་གྱི་རྐྱེན་གྱིས་མངོན་པར་རྫོགས་པར་སངས་རྒྱས་པ་ལགས་ཏེ། ཡུམ་ནི་དེ་བཞིན་གཤེགས་པ་ལ་དྲིན་ཆེ་བ་ལགས་ན་དེ་བཞིན་གཤེགས་པས་

71-1-167a

སེམས་ཅན་ཐམས་ཅད་ཀྱང་སངས་རྒྱས་ཀྱི་བསྟན་པ་ལ་འཇུག་ཏུ་གནང་ན་ཡུམ་སངས་རྒྱས་ཀྱི་བསྟན་པ་ལ་འཇུག་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཁྱོད་སྨྲས་པ་བཞིན་ཏེ། 
དེ་བཞིན་གཤེགས་པ་ལ་ཡུམ་དྲིན་ཆེ་བར་དེ་བཞིན་གཤེགས་པས་མི་མཁྱེན་པ་མ་ཡིན་ན། བུད་མེད་རྣམས་སངས་རྒྱས་ཀྱི་བསྟན་པ་ལ་འཇུག་པར་མ་གནང་ངོ་། །གལ་ཏེ་དེ་བཞིན་གཤེགས་པས་སངས་རྒྱས་ཀྱི་བསྟན་པ་ལ་བུད་མེད་འཇུག་
ཏུ་གནང་བར་གྱུར་ན་དམ་པའི་ཆོས་ལོ་ལྔ་བརྒྱས་སྔར་ནུབ་པར་འགྱུར་ཏེ། དེ་བས་ན་དེ་བཞིན་གཤེགས་པ་ནི་བུད་མེད་རྣམས་སངས་རྒྱས་ཀྱི་བསྟན་པ་ལ་འཇུག་པར་མི་དགྱེས་སོ། །དེ་ནས་ཀུན་དགའ་བོས་སངས་རྒྱས་ཀྱི་ཞབས་ལ་མགོ་བོས་
ཕྱག་འཚལ་ཏེ། ཐལ་མོ་སྦྱར་བ་བཏུད་དེ། ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་མངོན་དུ་དྲན་པ་འདས་པའི་སངས་རྒྱས་ཐམས་ཅད་འཁོར་བཞི་དང་ལྡན་ན་སངས་རྒྱས་ཤཱཀྱ་ཐུབ་པ་འབའ་ཞིག་འཁོར་བཞི་དང་
ལྡན་པ་མ་ལགས་སམ། སངས་རྒྱས་ཀྱིས་ཀུན་དགའ་བོ་ལ་བཀའ་སྩལ་པ། དེ་ལྟར་གཽ་ཏ་མཱི་སངས་རྒྱས་ཀྱི་ཆོས་ལ་དད་ན་བརྩོན་འགྲུས་ཆེན་པོ་བསྐྱེད་དེ། བཙུན་པར་བྱ་བའི་ཆོས་རྣམ་པ་བརྒྱད་ཡོངས་སུ་དག་པར་སྤྱོད་ན་སངས་
རྒྱས་ཀྱི་ཆོས་ལ་འཇུག་ཏུ་གནང་ངོ་། །དེ་ནས་ཀུན་དགའ་བོས་སངས་རྒྱས་ཀྱི་ཞབས་ལ་མགོ་བོས་ཕྱག་འཚལ་ཏེ། ལན་གསུམ་བསྐོར་བ་བྱས་ནས་ཕྱིར་སོང་སྟེ་ཡུམ་ལ་འདི་སྐད་ཅེས་སྨྲས་སོ། །བདག་གིས་དེ་བཞིན་
གཤེགས་པ་ལ་ནན་གྱིས་གསོལ་ནས་ཡུམ་ཆོས་ལ་འཇུག་ཏུ་གནང་ངོ་། །ཤིན་དུ་ལེགས་སོ། །ཀུན་དགའ་བོ་དེ་བཞིན་གཤེགས་པ་ལ་ཡང་དང་ཡང་དུ་གསོལ་ཏེ་ཡུམ་བསམ་པ་ལྟར་གྱུར་པ་ལེགས་སོ། །ཡུམ་གྱིས་ཀུན་དགའ་
བོ་ལ་དེ་བཞིན་གཤེགས་པའི་བསྟན་པ་ལ་འཇུག་ཏུ་གནང་བ་ཐོས་ནས་རབ་ཏུ་དགའ་ནས་བདག་གི་ལུས་མི་རྟག་པ་འདིས་དེང་འདིར་རྟག་པའི་རིན་པོ་ཆེའི་ལུས་སུ་གྱུར་ཏོ། །བདག་གི་སྲོག་འདི་ཡང་སྐད་ཅིག་སྐད་ཅིག་ཅིང་འགྱུར་ཞིང་འཕོ་

71-1-167b

བ་ལས་དེང་འདིར་རིན་པོ་ཆེའི་སྲོག་ཏུ་གྱུར་ཏོ། །ད་ལྟར་བདག་གི་ལུས་དང་། སྲོག་དང་། ནོར་ཡང་རྐྱེན་འདུས་པ་ལས་ཡོད་པར་ཟད་དེ། ད་ནི་རིན་པོ་ཆེའི་ནོར་རྙེད་པར་གྱུར་ཏོ། །དེ་ལྟར་བདག་གིས་ཕན་པ་དང་བདེ་བའི་ཡོན་ཏན་ཆེན་པོ་མཐོང་
བས་ཀུན་དགའ་བོ་ལ་ལྷག་པར་བཀུར་སྟི་བྱ་བ་དང་རིམ་གྲོ་བྱ་བའི་སེམས་སྐྱེས་ཏེ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཐེ་ཙོམ་མ་ཟ་ཞིག །དེ་བཞིན་གཤེགས་པས་དགོངས་ཏེ་གསུངས་པའི་རྗེས་སུ་སྤྱོད་ཅིང་ལུས་དང་སྲོག་ཡལ་ཡང་
ཉམས་པར་མི་བགྱིད་དོ། །དེ་ནས་དེ་བཞིན་གཤེགས་པས་བཙུན་པར་བྱ་བའི་ཆོས་རྣམ་པ་བརྒྱད་ཉམས་པར་མི་བྱ་བ་ཡང་ཞིབ་ཏུ་བསྟན་ཏོ། །དེའི་ཚེ་ཡུམ་གཽ་ཏ་མཱི་སྙིང་རྗེ་ཆེན་པོའི་ཤུགས་ཀྱིས་མ་འོངས་པའི་བུད་མེད་ཐམས་ཅད་ཀྱི་ཕྱིར་བཅོམ་
ལྡན་འདས་ལ་ཡང་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་མ་འོངས་པའི་དུས་ན་སངས་རྒྱས་ཀྱི་ཆོས་ལ་དད་ཅིང་མོས་པ་ཞིག་མཆིས་ན་དེ་ཡང་བསྟན་པ་ལ་འཇུག་པར་གནང་བར་མཛད་དུ་གསོལ། །བཅོམ་ལྡན་འདས་
ཀྱིས་བཀའ་སྩལ་པ། ལེགས་སོ། །བུད་མེད་གང་སངས་རྒྱས་ཀྱི་ཆོས་སྲུང་ཞིང་འཛིན་ལ་མཐར་གྱིས་ཚུལ་ཁྲིམས་དང་། སྦྱིན་པ་དང་མང་དུ་ཐོས་པ་དང་། དགེ་བའི་ཆོས་རྣམས་ཉམས་སུ་ལེན་ན་རབ་ཏུ་འབྱུང་བ་དང་། ཁྱིམ་པར་
འདུག་ཀྱང་སྐྱབས་སུ་འགྲོ་བ་གསུམ་དང་། གཏན་ཁྲིམས་ལྔ་དང་། ཁྲིམས་རྫོགས་པའི་བར་དུ་ནོད་ཅིང་རྣམ་པར་ཐར་པ་དང་། བྱང་ཆུབ་ཀྱི་ཡན་ལག་གི་ཆོས་ཀྱི་བར་དུ་འཇུག་ཏུ་གནང་ངོ་། །དེ་ལ་ནན་ཏན་བྱས་ན་འབྲས་
བུ་རྣམ་པ་གསུམ་ཡང་འཐོབ་ཅིང་ལྷ་དང་མིའི་མྱ་ངན་ལས་འདའ་བའི་བར་དུ་ཐོབ་པར་འགྱུར་རོ། །གཽ་ཏ་མཱིས་དེ་སྐད་གསུངས་པ་ཐོས་ནས་རབ་ཏུ་དགའ་མགུ་རངས་དགའ་བའི་སེམས་སུ་གྱུར་ཏེ། བཅོམ་ལྡན་འདས་ལ་
འདི་སྐད་ཅེས་གསོལ་ཏོ། །བདག་གིས་འབྲས་བུ་ཐོབ་པར་གྱུར་པ་ཡང་སངས་རྒྱས་ཀྱི་བཀའ་དྲིན་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་སྐད་མ་ཟེར་ཅིག །དེ་བཞིན་གཤེགས་པ་ནི་སེམས་ཅན་

71-1-168a

རྣམས་ལ་དྲིན་ཡོད་པ་མ་ཡིན་ནོ། །དེ་བཞིན་གཤེགས་པ་ནི་སེམས་ཅན་རྣམས་ལ་དྲིན་ཡོད་ཅེ་འམ། དྲིན་མེད་ཅེས་མི་དགོངས་སོ། །གལ་ཏེ་དེ་བཞིན་གཤེགས་པ་སེམས་ཅན་རྣམས་ལ་དྲིན་བགྲང་ན་
མཉམ་སྙོམས་པའི་ཐུགས་ཉམས་པར་འགྱུར་ཏེ། གཽ་ཏ་མཱི་དེ་བཞིན་གཤེགས་པ་ནི་སེམས་ཅན་ལ་དྲིན་ཡོད་ཅེ་འམ་མེད་ཅེས་དགོངས་ན་མཉམ་སྙོམས་པ་ཡང་མེད་པར་འགྱུར་རོ། །དེ་ཅིའི་ཕྱིར་ཞེ་ན། སེམས་ཅན་གང་གིས་སངས་
རྒྱས་ལ་གནོད་པ་ཞིག་བྱས་ན་ཡང་དེ་ལ་ཞེ་སྡང་བ་ཡང་མེད། སེམས་ཅན་གང་སྤོས་ཙན་དན་གྱི་འདེ་གུས་དེ་བཞིན་གཤེགས་པའི་སྐུ་ལ་བསྐུས་ན་ཡང་དེ་ལ་དེ་བཞིན་གཤེགས་པ་དགྱེས་པར་མི་དགོངས་སོ། །དེ་བཞིན་གཤེགས་
པ་ནི་སེམས་ཅན་ལ་མཉམ་སྙོམས་པར་གཟིགས་ཏེ། འདི་ནི་ཀུན་དགའ་བོའི་དྲིན་ཡིན་གྱི་དེ་བཞིན་གཤེགས་པའི་དྲིན་མ་ཡིན་ན། ཀུན་དགའ་བོའི་རྐྱེན་གྱིས་བུད་མེད་རྣམས་སངས་རྒྱས་ཀྱི་བསྟན་པ་ལ་འཇུག་པར་
གྱུར་ཏོ། །གཽ་ཏ་མཱི་མ་འོངས་པའི་དུས་ན་དགེ་སློང་མ་དང་། དགེ་བསྙེན་མ་དང་། བུད་མེད་རྣམས་རྟག་པར་སེམས་རྩེ་གཅིག་ཏུ་ཀུན་དགའ་བོ་ལ་སོམས་ཤིག །བཀུར་སྟི་དང་རིམ་གྲོ་ཆེར་བྱས་ཏེ་མིང་ནས་ཡང་བརྗོད་ལ་རྒྱུན་དུ་
དྲིན་དྲན་པར་བྱའོ། །དེ་མ་ཡིན་ན་ཉིན་མཚན་དུས་དྲུག་ཏུ་ཡང་མི་བརྗེད་པར་བྱའོ། །དྲན་པར་བྱའོ། །དེ་ནས་གཽ་ཏ་མཱིས་དགེ་སློང་མ་རྣམས་དང་། བུད་མེད་རྣམས་ལ་འདི་སྐད་ཅེས་བསྒོའོ། །བདག་ཅག་རྣམས་ཀྱིས་སྟོན་པ་ཀུན་
དགའ་བོ་ལ་སྐྱབས་སུ་གསོལ་ཏེ་སྲོག་ཕྱོགས་སོ། །བུད་མེད་གང་ཞིག་རྟག་ཏུ་བདེ་སྐྱིད་པ་དང་། བཀྲ་ཤིས་པ་དང་། འབྲས་བུ་ཐོབ་པར་འདོད་ན་རྟག་ཏུ་དཔྱིད་ཟླ་འབྲིང་པོའི་ཚེས་བརྒྱད་དང་། སྟོན་ཟླ་འབྲིང་པོའི་ཚེས་བརྒྱད་ལ་གོས་སར་
པ་གཙང་མ་བགོས་ཏེ། སེམས་རྩེ་གཅིག་ཏུ་ཉིན་ཞག་གཅིག་ཁྲིམས་བརྒྱད་མནོས་ལ་དུས་དྲུག་ཏུ་བརྩོན་འགྲུས་བསྐྱེད་དེ་མཆོད་པ་བྱས་ན་ཀུན་དགའ་བོས་རྫུ་འཕྲུལ་གྱི་མཐུས་སྐྱོབ་ཅིང་བསམས་པ་བཞིན་དུ་གྲུབ་པར་བྱེད་དོ། །

71-1-168b

འཁོར་མང་པོ་རྣམས་ཆོས་ཐོས་པས་རབ་ཏུ་དགའ་ནས་བསྐོར་བ་བྱས་ནས་ཕྱིར་དོང་ངོ་། །ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་ལས་སྙིང་རྗེའི་ལེའུ་ཞེས་བྱ་སྟེ་བདུན་པའོ།། །། ཐབས་མཁས་པ་ཆེན་
པོ་སངས་རྒྱས་དྲིན་ལན་བསབ་པའི་མདོ། བམ་པོ་དྲུག་པ། དེའི་ཚེ་དེ་བཞིན་གཤེགས་པ་ལ་འཁོར་མང་པོས་ཡོངས་སུ་བསྐོར་ནས་མཆོད་པ་དང་རིམ་གྲོ་བྱས། བཀུར་སྟི་དང་ཕུ་དུད་དུ་བྱས། བསྔགས་ཤིང་བསྟོད་ནས་
འཁོད་དོ། །དེ་ནས་ཀུན་དགའ་བོས་འཁོར་མང་པོའི་ཐེ་ཙོམ་སེམས་ཀྱིས་རྟགས་ནས་སྟན་ལས་ལངས་ནས་སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་མ་འགགས་པ་ལྟ་བུ་མ་རབས་རིགས་ངན་པ་ཡང་
རབ་ཏུ་འབྱུང་དུ་གནང་། མ་འགགས་པ་རབ་ཏུ་བྱུང་བས་རྒྱལ་རིགས་དང་རྗེའུ་རིགས་ཐམས་ཅད་ཀྱི་དད་པ་དང་གུས་པའི་སེམས་ཉམས་པར་གྱུར་ཏོ། །དེ་ལྟར་དད་པའི་སེམས་ཉམས་པས་བསོད་ནམས་ཀྱི་དངོས་པོ་ཡོངས་སུ་ཉམས་
པར་གྱུར། རྒྱལ་པོ་ཟས་གཙང་མའི་སྲས་དགེ་སློང་དགའ་བོས་ཀྱང་བརྙས་པའི་སེམས་སྐྱེས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཀུན་དགའ་བོ་དང་། འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །
ཁྱེད་རྣམས་ལེགས་པར་ཉོན་ཅིག །ཁྱེད་རྣམས་ཀྱིས་དེ་བཞིན་གཤེགས་པ་ལ་མཉམ་སྙམས་པའི་ཐུགས་རྗེ་ཆེན་པོ་དང་། དྲན་པ་ཉེ་བར་བཞག་པ་གསུམ་དང་། ཡེ་ཤེས་ལྔ་དང་། ཏིང་ངེ་འཛིན་མེད་དོ་ཞེས་སྨྲས་ཀྱང་
སླའི། དགེ་སློང་མ་འགགས་པ་འདི་ཡང་དག་པར་མ་རབས་རིགས་ངན་ཡིན་ཞེ་འམ། སྤྱོད་པ་ཐ་མ་འམ། སྨོན་ལམ་ཐ་མ་འམ་བརྩོན་འགྲུས་ཐ་མ་ཡིན་ནོ་ཞེས་བྱར་རུང་ངམ། ཁྱེད་རྣམས་ཀྱིས་དེ་བཞིན་གཤེགས་པ་ནི་ཉོན་
མོངས་པ་དང་བཅས་པའོ། །མི་རྟག་པའོ། །འགྱུར་ཞིང་འཕོ་བའོ་ཞེས་བྱས་ཀྱང་སླའི། དགེ་སློང་མ་འགགས་པ་མ་རབས་རིགས་ངན་ལས་རབ་ཏུ་བྱུང་བ་ཡིན་ནོ་ཞེས་བྱ་བར་མི་རུང་ངོ་། །དེ་བཞིན་གཤེགས་

71-1-169a

ཐམས་ཅད་མཁྱེན་པའི་ཡེ་ཤེས་ཀྱིས་ཡང་དག་པ་བདེན་པའི་ཚིག་གསུང་བས་ཁྱེད་རྣམས་དེ་བཞིན་གཤེགས་པས་གསུངས་པ་ལ་ཡིད་ཆེས་པར་བྱའོ། །དེ་བཞིན་གཤེགས་པ་ནི་འཁོར་བའི་སྐྱོན་དང་ཉེས་པ་གཟིགས་
ཤིང་མཁྱེན་པས་རང་མངོན་པར་རྫོགས་པར་སངས་རྒྱས་ཏེ། དགེ་སློང་མ་འགགས་པ་ལྟ་བུ་རབ་ཏུ་བྱུང་བས་རིག་པ་གསུམ་དང་། མངོན་པར་ཤེས་པ་དྲུག་དང་། རྣམ་པར་ཐར་པ་བརྒྱད་དང་ལྡན་ཏེ། ལྷ་དང་མི་རྣམས་ཀྱི་མཆོད་པའི་གནས་
སུ་གྱུར་ཏོ། །དམ་པའི་ཆོས་སྲུང་ཞིང་འདུལ་བ་འཛིན་པའི་མཆོག་དམ་པར་གྱུར་ཏེ། ཐམས་ཅད་ཀྱིས་མཆོད་པའི་གནས་སུ་གྱུར་པས་ན་སོ་སོའི་སྐྱེ་བོ་དག་ཀྱང་འབྲས་བུ་དམ་པ་གསུམ་ཐོབ་པར་བྱེད་དོ། །འདི་ལྟ་སྟེ། ད་ལྟར་གྱི་འབྲས་བུ་
ཐོབ་པ་དང་། སྐྱེ་བའི་འབྲས་བུ་དང་། མ་འོངས་པའི་འབྲས་བུ་ཐོབ་པར་བྱེད་དེ། དེ་བས་ན་མ་འགགས་པ་ནི་སྤྱོད་པ་མཆོག་དམ་པ་དང་ལྡན་ཏེ། ཕྱོགས་གཅིག་ཏུ་སྙིང་རྗེ་ཆེ་བའི་སེམས་དཔའོ། །སྔོན་འདས་པའི་དུས་ན་ཡང་
སངས་རྒྱས་གྲངས་མེད་པ་བྱེ་བ་བརྒྱ་སྟོང་སྙེད་ལ་དགེ་བའི་རྩ་བ་བསྐྱེད་ལ་བསྙེན་བཀུར་བྱས་ནས་སངས་རྒྱས་དེ་དག་གི་ཆོས་ལ་ཡང་འདུལ་བ་འཛིན་པའི་མཆོག་བྱས། ད་ལྟར་སངས་རྒྱས་ཤཱཀྱ་ཐུབ་པའི་ཆོས་ལ་ཡང་འདུལ་བ་འཛིན་པའི་
མཆོག་ཏུ་གྱུར་ཏོ། །དེའི་ཚེ་དགེ་སློང་དགའ་བས་སངས་རྒྱས་ཀྱིས་གསུངས་པ་ཐོས་ནས་འདུག་པ་ལས་ལངས་ཏེ། མགོ་བོས་འཕགས་པ་ཀཽཎྜི་ནྱའི་རྐང་པ་ལ་ཕྱག་འཚལ་ཏེ། མཐར་གྱིས་མ་འགགས་པའི་དྲུང་དུ་ཕྱིན་ནས་
ཐལ་མོ་སྦྱར་ནས་འདུད་པ་ཙམ་བྱས་སོ། །དེ་ནས་བཅོམ་ལྡན་འདས་ཀྱིས་དགའ་བོ་ལ་ཚིགས་སུ་བཅད་དེ་བཀའ་སྩལ་པ། དགའ་བོ་ཁྱོད་ནི་ཤེས་པར་བྱོས། །དབུལ་ཞིང་སྡུག་པར་འགྱུར་བ་འམ། །ཆེ་བཙན་ཉམས་པར་མི་འགྱུར་གྱི། །
རབ་ཏུ་བྱུང་བའི་ཆོས་ཉིད་དོ། །བཅོམ་ལྡན་འདས་ཀྱིས་དེ་ལྟར་དགའ་བོ་ལ་བསྟན་པ་དང་། གཟེངས་སྟོད་པ་དང་། དགའ་བའི་ཆོས་རྣམ་པ་དུ་མ་གསུངས་ནས་དགའ་བོ་རབ་ཏུ་དགའ་མགུ་རངས་ཏེ། གོས་ཚགས་བཅོས་ནས་འཕགས་པ་མ་འགགས་པའི་རྐང་

71-1-169b

པ་ལ་མགོ་བོས་ཕྱག་འཚལ་བ་དང་། དེ་མ་ཐག་ཏུ་གནམ་ས་ཡང་རྣམ་པ་དྲུག་ཏུ་གཡོས་སོ། །ལུས་དང་སེམས་མཉེན་ཞིང་ལས་སུ་རུང་བར་གྱུར་ཏེ། བདག་གི་དོན་རབ་ཏུ་རྙེད་ཅིང་བྱ་བ་བྱས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་འཕགས་པ་མ་འགགས་པ་
ལ་ཁྱོད་ཀྱིས་མྱུར་དུ་སེང་གེའི་སྒྲ་སྒྲོགས་ཤིག །འདི་ལྟ་སྟེ། དཀོན་མཆོག་དང་། བདེན་པ་བཞི་དང་། ཁྱིམ་དང་། རབ་ཏུ་བྱུང་བའི་འཁོར་བདུན་གྱི་ཁྱད་པར་དང་། དེ་དག་གི་སྐྱབས་སུ་འགྲོ་བ་གསུམ་དང་། གཏན་ཁྲིམས་ལྔ་ནས་ཚུལ་ཁྲིམས་ཐམས་ཅད་ཀྱི་བར་དུ་སེམས་ཅན་ལ་
ཕན་པའི་ཚུལ་ཁྲིམས་དང་། ཉོན་མོངས་པ་སྦྱོང་བའི་ཚུལ་ཁྲིམས་དང་སྤྱོད་ལམ་གྱིས་གདུལ་བའི་ཚུལ་ཁྲིམས་དང་། བསམ་གཏན་གྱི་ཚུལ་ཁྲིམས་དང་། ཟག་པ་མེད་པའི་ཚུལ་ཁྲིམས་བསྟན་ཏེ་དཀོན་མཆོག་གསུམ་གྱི་གདུང་རྒྱས་པར་བྱོས་ཤིག །
དེ་ནས་མ་འགགས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པས་རྫུ་འཕྲུལ་གྱི་མཐུས་བདག་ལ་བྱིན་གྱིས་བརླབས་ན་བདག་གིས་དེ་བཞིན་གཤེགས་པ་ལ་ཆུང་ཟད་ཅིག་ཞུའོ། །གསོལ་པ། དཀོན་མཆོག་གསུམ་ཞེས་
བགྱི་བ་གང་ལགས་སངས་རྒྱས་དང་། ཆོས་དང་དགེ་འདུན་ཞེས་བགྱི་བ་དཀོན་མཆོག་གསུམ་ལ་མཚན་ཉིད་མ་མཆིས་ན་ཅིའི་སླད་ཏུ་ཆོས་དང་དགེ་འདུན་བྱེ་བྲག་དང་ཁྱད་པར་མཆིས་ཤིང་། དཀོན་མཆོག་གསུམ་ལ་སྐྱབས་སུ་མཆི་བ་ཇི་ལྟར་གཟུངས་
སུ་གཟུང་། སྐྱབས་སུ་མཆི་བ་གསུམ་གལ་ཏེ་གཅིག་ལགས་ན་གསུམ་ཞེས་གསུང་བ་ཡང་མི་རིགས། གལ་ཏེ་སྐྱབས་སུ་མཆི་བ་གསུམ་དུ་གསུངས་ན། ཅིའི་སླད་དུ་འཁོར་རྣམ་པ་བདུན་མཆིས་པར་གསུངས། བཅོམ་ལྡན་འདས་
ཅི་ལ་སྐྱབས་སུ་མཆི་ན་སྐྱབས་སུ་མཆི་བ་ཞེས་བགྱི། དེ་ནས་བཅོམ་ལྡན་འདས་ཀྱིས་དོན་དེ་དག་སོ་སོ་ནས་རྣམ་པར་བཀྲོལ་ཏེ་འདི་སྐད་ཅེས་བཀའ་སྩལ་ཏོ། །སངས་རྒྱས་ཤེས་བྱ་བ་ནི་ཚོར་བ་སྟེ། ཆོས་ཀྱི་མཚན་ཉིད་ཐམས་ཅད་
མངོན་སུམ་དུ་ཚོར་བའི་ཕྱིར་རོ། །གཞན་ཡང་སེམས་ཅན་ཐམས་ཅད་ནི་ཁམས་གསུམ་ན་རྒྱུན་དུ་གཉིད་ཀྱིས་མྱོས་ཏེ། སངས་རྒྱས་ནི་བྱང་ཆུབ་ཀྱི་སྤྱན་བྱེ་བས་ན་བདག་ཀྱང་ཚོར་ལ་ཕ་རོལ་པོ་ཡང་ཚོར་བར་བྱེད་པས་ཚོར་

71-1-170a

བ་ཞེས་བྱའོ། །སངས་རྒྱས་ནི་ཆོས་ཐམས་ཅད་ལ་ཐབས་ཐོབ་པ་ཐམས་ཅད་གསུངས་པའོ། །གསོལ་བ་ཇི་ལྟར་ན་སངས་རྒྱས་ཀྱིས་ཐམས་ཅད་གསུངས་པ་ཞེས་བགྱི་བ་ལགས། འོན་ཏེ་དུས་ཚོད་ལས་མ་ཡོལ་བར་
དབང་པོ་ཅི་དང་འཕྲོད་པ་བཞིན་དུ་གསུངས་པ་ལ་བགྱི་བ་འམ། འོན་ཏེ་སོ་སོའི་སྡེ་ཐ་དད་པ་བཞིན་དུ་རྗེས་སུ་གསུངས་པ་ལ་བགྱི། བཀའ་སྩལ་པ། སངས་རྒྱས་ནི་དབང་པོ་ཇི་བཞིན་དུས་ལས་མི་ཡོལ་བར་ཆོས་ཐམས་ཅད་གསུངས་ན་ཕྱིས་
ཉེ་གནས་རྣམས་ཀྱིས་ཆོས་ཀྱི་སྡེ་སྣོད་བསྡུས་པའི་ཚེ་སྡེ་སྡེའི་བག་ལ་བསྟན་ཏོ། །སངས་རྒྱས་ཀྱིས་ནི་སྐབས་ཁ་ཅིག་ཏུ་ཉེ་གནས་རྣམས་ལ། ཚུལ་ཁྲིམས་ཇི་ལྟ་བ་དང་། ལྟུང་བ་དང་། ལྟུང་བ་མེད་པ་བཅས་ཏེ་འདུལ་བའི་སྡེ་
སྣོད་དུ་ཕྱེའོ། །སྐབས་ཁ་ཅིག་ཏུ་ནི་རྒྱུ་དང་འབྲས་བུའི་མཚན་ཉིད་ལས་ཉོན་མོངས་པ་དང་། ཉེ་བའི་ཉོན་མོངས་པ་སྐྱེ་བས་ལས་ཀྱི་མཚན་ཉིད་གསུངས་ཏེ་ཆོས་མངོན་པའི་སྡེ་སྣོད་ཕྱེའོ། །ལྷ་དང་མིའི་འཇིག་རྟེན་དུ་བཅས་པ་ལ་
ཅི་དང་འཕྲོད་པ་བཞིན་དུ་བསྟན་ཅིང་གསུངས་པ་ནི་གཞུང་གཅིག་ནས་འཕྲོས་པ་ཞེས་བྱ་སྟེ། འདུལ་བའི་སྐལ་བ་དང་ལྡན་པའི་གང་ཟག་རྣམས་ཀྱིས་སྤྱོད་པའི་ལས་སུ་གསུངས་སོ། །སེམས་ཅན་དབང་པོ་རྣོན་པོ་རྣམས་
ལ་དོན་ཟབ་མོ་རྣམ་པ་མང་པོ་གསུངས་པ་ནི་གཞུང་བར་མ་ཞེས་བྱ་སྟེ། སློབ་མ་རྣམས་ཀྱི་སྤྱོད་པའི་ལས་སུ་གསུངས་སོ། །བསམ་གཏན་གྱི་ཆོས་རྣམ་པ་སྣ་ཚོགས་གསུངས་པ་ནི་གཞུང་སིལ་བུ་ཞེས་བྱ་སྟེ། གང་ཟག་
བསམ་གཏན་བྱེད་པ་རྣམས་ཀྱི་སྤྱོད་པའི་ལས་སུ་གསུངས་སོ། །མུ་སྟེགས་ཅན་མང་པོ་གཞིག་པའི་དོན་དུ་གཞུང་རིང་པོ་གསུངས་སོ། །གསོལ་པ། གལ་ཏེ་སངས་རྒྱས་ཐམས་ཅད་གསུངས་པ་ལ་གནས་ན་མདོ་སྡེ་ལས་
སངས་རྒྱས་ཤིང་ལྗོན་པ་ཞིག་གི་དྲུང་དུ་བཞུགས་ཏེ། ཤིང་དེའི་ཡལ་ག་གཅིག་གི་འདབ་མ་ལས་བཟུང་ནས་ཉེ་གནས་རྣམས་ལ་ཡལ་ག་བཟུང་བ་འདིའི་འདབ་མ་མང་ངམ། ཤིང་ལྗོན་པ་ཆེན་པོའི་འདབ་མ་མང་ཞེས་བཀའ་སྩལ་ནས་ཤིང་

71-1-170b

ལྗོན་པའི་འདབ་པའི་འདབ་མ་མང་ངོ་ཞེས་གསོལ་པ་ལས་སངས་རྒྱས་ཀྱིས་ཀྱང་ངས་མཁྱེན་པའི་ཆོས་ནི་ཤིང་ལྗོན་པའི་འདབ་མ་དང་འདྲའོ། །ངས་བཤད་པའི་ཆོས་ནི་ལག་པས་བཟུང་བའི་འདབ་མ་དང་འདྲའོ་ཞེས་གསུངས་ན་སངས་རྒྱས་
ནི་ཐམས་ཅད་གསུངས་པའོ་ཞེས་བགྱིར་རུང་ངམ། བཀའ་སྩལ་པ། མཚན་ཉིད་ཐ་དད་པ་ཐམས་ཅད་ཀྱི་ཐམས་ཅད་དང་། མཚན་ཉིད་གཅིག་པ་ཐམས་ཅད་ཀྱི་ཐམས་ཅད་ཡོད་དོ། །འདིར་ནི་མཚན་ཉིད་ཐ་དད་པའི་ཐམས་ཅད་ལ་དགོངས་
ཏེ་སངས་རྒྱས་ནི་ཐམས་ཅད་གསུངས་པའོ་ཞེས་བཤད་དོ། །དེ་ཡང་སེམས་ཅན་གྱི་ཟད་པར་གཟུང་མི་ནུས་པ་ལ་བྱའི། སངས་རྒྱས་ཀྱིས་གསུངས་མི་ནུས་པ་ནི་མ་ཡིན་ནོ། །གཞན་ཡང་ཐམས་ཅད་མཁྱེན་པ་ལ་ཡང་ཐམས་ཅད་གསུངས་པ་
ཞེས་བྱའི། དྲང་ཐབས་སུ་ཐམས་ཅད་གསུངས་པ་ཞེས་བྱར་མི་རུང་ངོ་། །གསོལ་པ། གལ་ཏེ་སངས་རྒྱས་ཀྱིས་མཁྱེན་པས་གསུངས་པ་ལགས་ན་ཉན་ཐོས་དང་། རང་སངས་རྒྱས་ཀྱང་ཤེས་པ་ལ་བརྟེན་ཏེ་སྨྲ་ན་ཅིའི་སླད་དུ་དེ་ལ་ཡང་སངས་རྒྱས་
ཤེས་མིང་གདགས། བཀའ་སྩལ་པ། དེ་ལྟ་བུ་མ་ཡིན་ཏེ་སངས་རྒྱས་ནི་མཁྱེན་པ་དང་གསུངས་པ་གཉིས་གའི་མཐར་ཕྱིན་ཏོ། །ཐེག་པ་གཉིས་ཀྱི་ཤེས་པ་དང་སྨྲ་བ་ནི་ཆོས་ཀྱི་མཐར་མ་ཕྱིན་པའི་ཕྱིར་རོ། །གཞན་ཡང་སངས་རྒྱས་ནི་
ཆོས་ཐམས་ཅད་ཆུབ་པར་མཁྱེན་པས་མིང་བཏགས་པ་ཡང་མཁྱེན་གྱི། ཐེག་པ་གཉིས་ཀྱིས་དེ་ལྟར་མི་ནུས་སོ། །གཞན་ཡང་སངས་རྒྱས་ནི་ཆོས་བརྙེས་པ་ཡང་མཐའ་ཡས་ལ་ཆོས་གསུངས་པ་ཡང་མཐའ་ཡས་ཏེ། ཐེག་པ་
གཉིས་ཀྱིས་དེ་ལྟར་མི་ནུས་སོ། །གཞན་ཡང་སངས་རྒྱས་བརྙེས་པའི་ཐུན་མོང་ནི་ཐེག་པ་གཉིས་ཀྱིས་ཐོབ་པ་དང་ཐུན་མོང་བ་ཡང་ཡོད། ཉན་ཐོས་ཀྱིས་ཐོབ་པ་དང་། ཐུན་མོང་མ་ཡིན་པ་ཡང་ཡོད་དོ། །ཐེག་པ་གསུམ་
གྱི་ཤེས་པ་ཐུན་མོང་ནི་ཐེག་པ་འབྲིང་གིས་ཐོབ། ཐེག་པ་གཉིས་ཀྱི་ཤེས་པ་ཐུན་མོང་ནི་སངས་རྒྱས་འབའ་ཤིག་གིས་བརྙེས་ཏེ་ཐེག་པ་གཉིས་ཀྱིས་མི་ཤེས་པ་ཡང་སངས་རྒྱས་ཉག་གཅིག་གིས་མཁྱེན་ཏོ། །གཞན་

71-1-171a

ཡང་ཇི་ཙམ་དུ་སྒྲོམ་ཆེ་ན་ཁ་གབ་ཀྱང་ཆེ་སྟེ། ཆོས་ཆེ་ན་མཚན་ཉིད་ཀྱང་མཐའ་ཡས་པས་སངས་རྒྱས་ནི་མཐའ་ཡས་པའི་ཡེ་ཤེས་ཀྱིས་མཐའ་ཡས་པའི་ཆོས་གསུངས་ཏེ། ཐེག་པ་གཉིས་ཀྱི་ཡེ་ཤེས་ནི་མཐའ་ཡོད་པས་
ཆོས་ཀྱི་མཚན་ཉིད་ཅེས་མི་གདགས་སོ། །གཞན་ཡང་དབང་པོ་དང་དོན་དུ་ལྡན་ཏེ། དབང་པོ་ཞེས་བྱ་བ་ནི་ཤེས་རབ་ཀྱི་དབང་པོའོ། །དོན་ཞེས་བྱ་བ་ནི་ཤེས་རབ་བོ། །དབང་པོའི་དོན་ཞེས་བྱ་བ་ནི་ཤེས་རབ་ཀྱིས་དམིགས་པའི་ཆོས་སོ། །
སངས་རྒྱས་ནི་དབང་པོ་དང་དོན་གཉིས་རྫོགས་ཏེ། ཤེས་རབ་ཀྱིས་དམིགས་པའི་ཆོས་ཀྱང་མཐར་མ་ཕྱིན་པ་མེད་དོ། །ཐེག་པ་གཉིས་ཀྱིས་ནི་དབང་པོ་དང་དོན་གཉིས་ཀ་མ་རྫོགས་སོ། །གཞན་ཡང་སངས་རྒྱས་ནི་ཆོས་ཐམས་
ཅད་ཀྱི་མཚན་ཉིད་ཡང་དག་པ་ཇི་ལྟ་བ་བཞིན་དུ་མཁྱེན་པའི་ཡང་དག་པའི་ཡེ་ཤེས་བརྙེས་པ་ཡིན་ནོ། །ཐེག་པ་གཉིས་ཀྱིས་ནི་ཆོས་ཀྱི་གཏིང་ཆུབ་པར་མི་ཤེས་པས་ཡང་དག་པའི་ཡེ་ཤེས་ཤེས་བྱ་བར་མི་རུང་སྟེ། དེ་ལྟར་དོན་རྣམ་པ་མང་
པོའི་སྒོ་ནས་ཐེག་པ་གཉིས་ལ་སངས་རྒྱས་ཤེས་བྱར་མི་རུང་ངོ་། །བཅོམ་ལྡན་འདས་ཤེས་བྱ་བ་ནི་ཚིག་དང་སྒྲའི་སྒོ་ནས་གདགས་སུ་མི་རུང་གི། དོན་གྱི་སྒོ་ནས་བཏགས་པས་བཅོམ་ལྡན་འདས་ཤེས་བྱ་སྟེ། དེ་ཡང་གཉེན་པོའི་
ཆོས་ཐམས་ཅད་མཁྱེན་པའི་ཕྱིར་རོ། །གཞན་ཡང་འཇིག་རྟེན་པའི་སྒྲ་སྐད་མི་མཐུན་པས་འཇིག་རྟེན་པ་རང་གིས་མི་ཤེས་པར་ཟད་ཀྱི། སངས་རྒྱས་ཀྱིས་ནི་ཀུན་མཁྱེན་པས་བཅོམ་ལྡན་འདས་ཤེས་བྱའོ། །གཞན་ཡང་དགེ་
སློང་རྩིབ་ལོགས་ཅེས་བྱ་བའི་གཞུང་ལས་ཐེག་པ་གཉིས་དང་སོ་སོའི་སྐྱེ་བོ་དག་ནི་ཁ་ཅིག་དབེན་ཞིང་ཞི་བ་ལ་དད་པ་ཡང་ཡོད། ཁ་ཅིག་ནི་བསམ་གཏན་དང་ཏིང་ངེ་འཛིན་ལ་དད་པ་ཡང་ཡོད། ཁ་ཅིག་ནི་རྐྱེན་གཞན་གྱིས་གསང་མཁྱུད་དེ་མི་སྟོན་པ་
ཡང་ཡོད་ཀྱི། སངས་རྒྱས་བརྙེས་པའི་ཆོས་ནི་བྱམས་པ་དང་ཐུགས་རྗེའི་མཐུར་ལྡན་པས་གཞན་ལ་སྟོན་ཅིང་གསུང་བར་སྤྲོའོ། །གཞན་དུ་ན་གདུག་པ་གསུམ་བཅོམ་པས་ན་བཅོམ་ལྡན་འདས་ཤེས་བྱའོ། །གསོལ་པ། ཐེག་པ་གཉིས་ཀྱང་གདུག་པ་གསུམ་

71-1-171b

བཅོམ་ན་ཅིའི་སླད་དུ་བཅོམ་ལྡན་འདས་ཤེས་མི་གདགས་བཀའ་སྩལ་པ། དེ་ལྟ་མ་ཡིན་ཏེ། ཐེག་པ་གཉིས་ནི་ཕྱིར་ལྡོག་པ་ཡོད་ཀྱི། སངས་རྒྱས་ལ་ནི་ཕྱིར་ལྡོག་པ་མེད་པའི་ཕྱིར་རོ། །ཕྱིར་ལྡོག་པ་ལ་ཡང་རྣམ་པ་གསུམ་སྟེ། 
འབྲས་བུ་ཕྱིར་ལྡོག་པ་དང་། འབྲས་བུ་མ་ཡིན་པའི་ཕྱིར་ལྡོག་པ་དང་། སྤྱོད་པའི་ལས་ཕྱིར་ལྡོག་པའོ། །འབྲས་བུ་ཕྱིར་ལྡོག་ཅེས་བྱ་བ་ནི་ཉན་ཐོས་ཀྱི་འབྲས་བུ་གསུམ་ཕྱིར་ལྡོག་པར་ཟད་ཀྱི། འབྲས་བུ་ཐ་མ་ཕྱིར་མི་ལྡོག་པ་དང་། ཐེག་པ་བར་
མ་ལ་རྣམ་པ་གཉིས་ཏེ། གལ་ཏེ་བསྐལ་པ་བརྒྱའི་བར་དུ་རྣལ་འབྱོར་སྤྱོད་པའི་རང་སངས་རྒྱས་ནི་འབྲས་བུ་ཕྱིར་མི་ལྡོག་གོ། །གལ་ཏེ་ཐོག་མ་ནས་ཐེག་པ་ཆུང་ངུའི་འབྲས་བུ་གསུམ་ལས་རང་སངས་རྒྱས་སུ་གྱུར་ན་དེའི་འབྲས་བུ་ནི་
ཕྱིར་ལྡོག་པར་འགྱུར་གྱི། སངས་རྒྱས་ཀྱི་འབྲས་བུ་ནི་ཕྱིར་མི་ལྡོག་གོ། །འབྲས་བུ་མ་ཡིན་པའི་ཕྱིར་ལྡོག་པ་ནི་གལ་ཏེ་ཐེག་པ་གསུམ་ལ་ཕྱོགས་པའི་གང་ཟག་འབྲས་བུ་མ་ཐོབ་པར་ཕྱིར་ལྡོག་པ་དང་། དགེ་སློང་རྣལ་འབྱོར་ཅན་
ལེ་ལོ་བྱེད་པ་དང་། བརྩོན་འགྲུས་མེད་པ་དང་། རྣལ་འབྱོར་སྤྱོད་པ་ལ་ཉམས་ཏེ་མི་བརྩོན་པ་འདི་གསུམ་ནི་འབྲས་བུ་མ་ཡིན་པའི་ཕྱིར་ལྡོག་པ་ཞེས་བྱའོ། །སྤྱོད་པའི་ལས་ཕྱིར་ལྡོག་ཅེས་བྱ་བ་ཅི་ཙམ་དུ་ཐོབ་པར་བྱ་བའི་ཆོས་མངོན་སུམ་དུ་
ལས་སུ་མི་རུང་བའོ། །དཔེར་ན་སངས་རྒྱས་ཀྱི་སྟོབས་བཅུ་དང་། ཐེག་པ་ཆུང་ངུའི་ཡེ་ཤེས་བཅུ་ལྟ་བུ་གཅིག་ལ་ལས་སུ་བྱས་ཀྱི་ལྷག་མ་གཞན་མི་དགོས་པ་འམ། མདོ་སྡེའི་ཚིགས་སུ་བཅད་པ་འབུམ་ཁ་ཏོན་དུ་ཤེས་པ་ལས་གལ་
ཏེ་ཁ་ཏོན་མ་བྱས་པའི་དུས་ན་དེ་ཀུན་ལ་སྤྱོད་པའི་ལས་ཕྱིར་ལྡོག་པ་ཞེས་བྱའོ། །ཐེག་པ་ཆུང་ངུ་ལ་ཡང་འབྲས་བུ་ཕྱིར་མི་ལྡོག་པ་ཡོད། ཐེག་པ་བར་མ་ལ་ཡང་འབྲས་བུ་མ་ཡིན་པའི་ཕྱིར་ལྡོག་པ་ཡོད་ཀྱི། སངས་རྒྱས་ལ་ནི་འབྲས་བུ་མ་ཡིན་པའི་ཕྱིར་
ལྡོག་པ་མེད་དོ། །དེ་ཡང་ཆོས་ཐམས་ཅད་ལ་བརྩོན་འགྲུས་མ་བྱས་པ་མེད་པའི་ཕྱིར་རོ། །ཐེག་པ་གཉིས་ལ་ནི་སྤྱོད་པ་ལས་ཕྱིར་ལྡོག་པ་ཡོད་ཀྱི། སངས་རྒྱས་ལ་ནི་གཅིག་ཏུ་མ་ངེས་ཏེ། སྟོབས་བཅུ་ལས་གཅིག་ལས་སུ་བྱས་པས་ཆོག་གི་དགུ་

71-1-172a

ལས་སུ་བྱ་མི་དགོས་པས་ལྡོག་གོ་ཞེས་བྱའོ། །ཡང་གཞན་དུ་ན་ལས་སུ་བྱ་བ་ལ། མི་དགོས་པའི་ཕྱིར་ལྡོག་པ་མེད་དེ། དཔེར་ན་མདོ་སྡེ་ཚིགས་སུ་བཅད་པ་ཁྲི་ཕྲག་ཉི་ཤུ་ཁ་ཏོན་དུ་འདོན་ཤེས་ན་གང་ཟག་ནི་མཐུ་ཞན་པས་ཉིན་ཞག་གཅིག་
གམ། ཉིན་ཞག་གཉིས་ཀྱི་བར་དུ་རྫོགས་པར་འདོན་ནུས་ཀྱི། སངས་རྒྱས་ནི་སྐད་ཅིག་ཙམ་གྱིས་རྫོགས་པས་སྟོབས་བཅུ་ཡང་དེ་དང་འདྲ་སྟེ། ལས་སུ་བྱ་དགོས་ན་སྐད་ཅིག་ཙམ་གྱིས་མཛད་པ་ཚད་མེད་པས་ལས་སུ་བྱ་བ་ལ་མི་དགོས་པའི་ཕྱིར་ལྡོག་པ་
མེད་དོ། །གཞན་ཡང་སངས་རྒྱས་ལ་ལས་སུ་བྱ་བ་ལ་མི་དགོས་པའི་ཕྱིར་ལྡོག་པ་མེད་དེ། དཔེར་ན་ན་བཟའ་སྨད་གཡོགས་གསོལ་བའི་ཚེ་སོ་སོའི་སྐྱེ་བོའི་ཆོས་ལྟ་བུར་གཞུང་མེད་པར་གསོལ་བ་ནི་མ་ཡིན་ཏེ། དེ་ཡང་སེམས་ཅན་མང་པོ་ལ་ཕན་པའི་
དོན་དུ་ཕྲིན་ལས་ཅི་མཛད་ཀྱང་ཕན་པ་ཡོད་ན་ལས་དེ་མཛད་ཀྱི། ཕན་པ་མེད་ན་ལས་དེ་མི་མཛད་དོ། །དེ་ལྟར་ལས་སུ་བྱ་བ་ལ་མི་དགོས་པའི་ཕྱིར་ལྡོག་པ་མེད་ཀྱི། སོ་སོ་ནས་དགོས་པ་ཡོད་དེ་གཅིག་ཏུ་མ་ངེས་པས་སངས་རྒྱས་ཀྱི་དགོངས་
པ་བསམ་གྱིས་མི་ཁྱབ་པ་ཞེས་བྱའོ། །གསོལ་པ། ཉན་ཐོས་ལ་ཅིའི་སླད་དུ་འབྲས་བུ་གསུམ་ནི་ཕྱིར་ལྡོག་ལ། འབྲས་བུ་ཐ་མ་ཕྱིར་མི་ལྡོག་པ་ལགས། བཀའ་སྩལ་པ། འབྲས་བུ་གསུམ་ནི་སྔོན་ཡང་ཐོབ་པས་ན་ཕྱིར་ལྡོག་གོ། །འབྲས་བུ་
ཐ་མ་ནི་ད་དུང་མ་ཐོབ་པས་ན་ཕྱིར་མི་ལྡོག་གོ། །དཔེར་ན་གང་ཟག་བཀྲེན་པ་ཞིག་ཁ་ཟས་ཞིམ་པོ་དང་ཕྲད་ན་ཡུན་རིང་པོར་མི་བརྗེད་པ་ལྟར་དོན་འདི་ཡང་དེ་དང་འདྲའོ། །གཞན་ཡང་འབྲས་བུ་ཐ་མ་ནི་བཟོད་པ་ཐོགས་པ་མེད་པའི་ལམ་དུ་འགྱུར་ལ་ཡེ་
ཤེས་རྣམ་པར་གྲོལ་བའི་ལམ་དུ་འགྱུར་རོ། །འབྲས་བུ་གསུམ་ནི་ཡེ་ཤེས་ཐོགས་པ་མེད་པའི་ལམ་དུ་མ་གྱུར་ལ་ཡེ་ཤེས་རྣམ་པར་གྲོལ་བའི་ལམ་དུ་མ་གྱུར་པའི་ཕྱིར་ལྡོག་གོ། །གཞན་ཡང་བདེན་པ་མཐོང་བའི་ལམ་ནི་ཕྱིར་མི་
ལྡོག་གི། བསམ་པའི་ལམ་ནི་ཕྱིར་ལྡོག་སྟེ། དག་པ་དང་མ་དག་པའི་འདུ་ཤེས་ཀྱིས་ཉོན་མོངས་པའི་མདུད་པ་བཅད་པའི་ཕྱིར་རོ། །སེམས་པ་ལ་ནི་ཀུན་ནས་ཉོན་མོངས་པ་ཡོད་ཀྱི། བདེན་པ་མཐོང་བ་ལ་ཀུན་ནས་ཉོན་མོངས་

71-1-172b

པ་མེད་དེ། བདེན་པ་མཐོང་བས་ཀུན་ནས་ཉོན་མོངས་པ་མེད་ཅིང་བདེན་པ་མཐོང་བས། ཀུན་ནས་ཉོན་མོངས་པ་ཡང་མཐོང་ལ་དོན་མཐོང་བས་དོན་ཟབ་མོ་སེམས་པ་ཡང་སྐྱེ་སྟེ། ཀུན་ནས་ཉོན་མོངས་པ་ཕྱིར་མི་ལྡོག་གོ། །གཞན་ཡང་
བདེན་པ་མཐོང་བའི་ཡེ་ཤེས་ཀྱི་སྟོབས་ཆེ་བ་ནི་དཔེར་ན་སྡོང་པོ་ཆེན་པོས་རྫས་མནན་པ་དང་འདྲ་སྟེ། སེམས་ཤིང་ཡིད་ལ་བྱེད་པའི་ཤེས་རབ་ཞན་པས་ཕྱིར་ལྡོག་པ་ཡོད་དོ། །གཞན་ཡང་བདེན་པ་མཐོང་བར་འདོད་པའི་ཁམས་ཀྱི་བཟོད་
པ་དང་། ཤེས་རབ་ཀྱི་སེམས་གཉིས་ཀྱིས་ནི་དགུ་པའི་ཀུན་ནས་ཉོན་མོངས་པའི་མདུད་པ་གཅོད་དོ། །ཁམས་གོང་མའི་བཟོད་པ་དང་ཤེས་རབ་ཀྱི་སེམས་གཉིས་ཀྱིས་ནི་ཀུན་ནས་ཉོན་མོངས་པ་བདུན་ཅུ་རྩ་གཉིས་གཅོད་དེ། །གཟུགས་མེད་པའི་
ཁམས་ཀྱི་མཐར་ཕྱིན་པས་ཕྱིར་ལྡོག་པ་མེད་དོ། །དོན་དེ་ལྟ་བས་ན་དེ་འབའ་ཤིག་ལ་བཅོམ་ལྡན་འདས་ཤེས་བྱའོ། །གཞན་ཡང་སངས་རྒྱས་ལ་ནི་བག་ཆགས་ཀྱི་རྣམ་པ་མེད་ཀྱི། ཐེག་པ་གཉིས་ག་ཡི་ནི་བག་ཆགས་མ་ཟད་དོ། །དཔེར་
ན་དགེ་སློང་རྟག་ཏུ་ལྡད་པ་ཞེས་བྱ་བ་རྟག་པར་བ་ལང་ལྟར་ལྡད་པ་ཡང་ཚེ་རབས་སྔ་མ་ལ་ཚེ་རབས་དུ་མར་བ་ལང་བྱེད་བྱེད་པ་ལས་མིར་སྐྱེས་པའི་ཕྱིར་རོ། །དཔེར་ན་དགེ་སློང་ཞིག་ཟག་པ་ཟད་ཀྱང་རྟག་ཏུ་མེ་ལོང་ལ་བལྟ་བ་ནི་ཚེ་རབས་དུ་མར་
བུད་མེད་སྦྲུལ་འཚོང་མ་ལས་མིར་སྐྱེས་པའི་ཕྱིར་རོ། །དཔེར་ན་དགེ་སློང་ཞིག་ཁྲི་དང་རྡང་ལ་འཛེག་པར་དགའ་བ་ཡང་ཚེ་རབས་དུ་མར་སྤྲེའོ་བྱེད་བྱེད་པ་ལས་མིར་སྐྱེས་ཏེ། དེ་དག་ལ་ནི་བཅོམ་ལྡན་འདས་ཤེས་བྱར་མི་རུང་ངོ་། གསོལ་
པ། འདི་སྐད་བདག་གིས་ཐོས་ཤེས་བགྱི་བ་སངས་རྒྱས་བཞུགས་པའི་ཚེ་བདག་གིས་ཐོས་ཤེས་གསུངས་སམ། སངས་རྒྱས་མྱ་ངན་ལས་འདས་པའི་འོག་ཏུ་ཐོས་ཤེས་གསུངས། ཆོས་ཀྱི་མཛོད་བསྡུས་པའི་ཚིག་ལས་བདག་
གིས་ཐོས་ཤེས་བྱ་ན་སངས་རྒྱས་ཤིང་བསྟན་པ་ཡང་བདག་ལ་མ་ལུས་པར་བསྟན་ཅིང་བཤད་པར་གསོལ་ལོ་ཞེས་མ་སྨྲས་སམ། གསོལ་པ། ལོ་ཉི་ཤུའི་བར་དུ་ཆོས་ཀྱི་ཚིག་ཅི་བཤད་པ་དེ་ཇི་ལྟར་བསྟན་པར་བགྱི། བཀའ་སྩལ་པ། སངས་རྒྱས་ཀྱི་

71-1-173a

ཐབས་མཁས་པས་ཚིགས་སུ་བཅད་པ་གཅིག་གིས་ཀྱང་ཆོས་གྲངས་མེད་པ་སྟོན་ལ། ཆོས་གྲངས་མེད་པའི་དོན་ཡང་ཚིགས་སུ་བཅད་པ་གཅིག་གིས་སྟོན་ཏེ། སངས་རྒྱས་ཀྱི་མདོ་ཙམ་ཞིག་བསྟན་ན་ཡང་ཀུན་དགའ་བོས་མ་ལུས་
པར་ཤེས་པ་ནི་རྣོ་བའི་ཤེས་རབ་ཀྱིས་གཟུངས་སུ་འཛིན་པའི་སྟོབས་ཆེ་བའི་ཕྱིར་རོ། །ཆོས་བརྒྱད་ཁྲི་ཡོད་ཅེས་བྱ་བ་ནི་དཔེར་ན་ཤིང་གི་རྩ་བ་དང་། ཡལ་ག་དང་། ལྕུག་མ་དང་། འདབ་མ་ལ་སྤྱིར་སྡོང་པོ་གཅིག་ཅེས་བྱ་བ་ལྟར། སངས་རྒྱས་ཀྱིས་
སེམས་ཅན་གྱི་དོན་དུ་ཐོག་མ་ནས་ཐ་མའི་བར་དུ་ཆོས་བསྟན་པ་ལ་སྡེ་སྣོད་གཅིག་ཅེས་བྱ་སྟེ། དེ་ལྟར་ན་བརྒྱད་ཁྲིའོ། །གཞན་དུ་ན་སངས་རྒྱས་གདན་གཅིག་ལས་མ་གཡོས་པར་ལོ་ཉི་ཤུའི་བར་དུ་ཆོས་བཤད་ཀྱང་ཀུན་དགའ་བོས་མ་ཐོས་ན་ཅིའི་སླད་
དུ་བདག་གིས་ཐོས་ཤེས་བགྱི། བཀའ་སྩལ་པ། ལྷ་རྣམས་ཀྱིས་ཀུན་དགའ་བོ་ལ་སྨྲས་ཤེས་ཀྱང་བྱ། གཞན་དུ་ན་སངས་རྒྱས་བཅོམ་ལྡན་འདས་ཀུན་རྫོབ་འཇིག་རྟེན་པའི་ཐུགས་ཀྱིས་ཀུན་དགའ་བོས་ཤེས་པར་བྱས་ཤེས་ཀྱང་བྱ། གཞན་དུ་ན་
དགེ་སློང་རྣམས་ལ་ཆོས་ཤེས་ཀྱང་བྱའོ། །གཞན་ཡང་ཀུན་དགའ་བོས་འདི་སྐད་ཅེས་སངས་རྒྱས་ལ་གསོལ་བ་བཏབ་བོ། །སངས་རྒྱས་ཀྱི་ན་བཟའ་རྙིང་པ་བདག་ལ་མི་སྩལ་ཅིང་ཡོན་བདག་གི་བསོད་སྙོམས་བདག་མི་སྩལ་བར་གསོལ་ཏོ། །བདག་
ནི་ཆོས་འདོད་པའི་ཕྱིར་སངས་རྒྱས་ལ་ཕུ་དུད་དང་རིམ་གྲོ་བགྱིད་དེ། ཅི་བཞེད་པ་སྦྱོར་གྱི་གོས་དང་ཟས་ཀྱི་ཕྱིར་མ་ཡིན་ནོ། །དགེ་སློང་གཞན་རྣམས་ནི་སྔ་དྲོ་དང་ཕྱི་དྲོའི་དུས་ཀྱི་ཚེ། སངས་རྒྱས་མཐོང་གི། བདག་ནི་ནམ་ལྟ་འདོད་པ་ན་མཐོང་བར་
གསོལ་ལོ། །གཞན་ཡང་ལོ་ཉི་ཤུའི་བར་དུ་ཆོས་གསུངས། ཆོས་བསྟན་པ་ལ་སྡེ་སྣོད་གཅིག་ཅེས་བྱ་སྟེ། དེ་ལྟར་ན་བརྒྱད་ཁྲིའོ། །ཡང་གཞན་དུ་ན་ཡི་གེའི་ཚེག་བར་བཅུ་དྲུག་ལ་ཚིགས་སུ་བཅད་པ་ཕྱེད་དོ། །ཡི་གེའི་ཚེག་བར་སུམ་བཅུ་
རྩ་གཉིས་ལ་ཚིགས་སུ་བཅད་པ་གཅིག་ཅེས་བྱ་སྟེ། དེ་ལྟར་བརྒྱད་ཁྲིའོ། །ཡང་གཞན་དུ་ན་ཚིགས་བཅད་ཀྱི་རྐང་པ་རིང་ཐུང་ལས་ཡི་གེའི་ཚེག་བར་བཞི་བཅུ་རྩ་གཉིས་ལ་ཚིགས་སུ་བཅད་པ་གཅིག་སྟེ། དེ་ལྟར་ན་བརྒྱད་ཁྲིའོ། །ཡང་གཞན་

71-1-173b

དུ་ན་ཟླ་བ་ཕྱེད་ཕྱེད་ཅིང་ཚུལ་ཁྲིམས་བསྟན་པ་ལ་སྡེ་སྣོད་གཅིག་ཅེས་བྱ་སྟེ། དེ་ལྟར་ན་བརྒྱད་ཁྲིའོ། །ཡང་གཞན་དུ་ན་སངས་རྒྱས་ཀྱིས་གསུངས་པའི་ཚིགས་སུ་བཅད་པ་དྲུག་ཁྲི་དྲུག་སྟོང་ལ་སྡེ་སྣོད་གཅིག་ཅེས་བྱ་སྟེ། དེ་ལྟར་ན་བརྒྱད་ཁྲིའོ། །
ཡང་གཞན་དུ་ན་སངས་རྒྱས་ཀྱིས་ཉོན་མོངས་པ་བརྒྱད་ཁྲིའི་གཉེན་པོར་ཆོས་ཀྱི་སྨན་བརྒྱད་ཁྲིར་གསུངས་པས་ཆོས་ཀྱི་སྒོ་མོ་བརྒྱད་ཁྲི་ཞེས་བྱའོ། །གསོལ་པ་ཅིའི་སླད་དུ་མདོ་སྡེ་དང་ཆོས་མངོན་པ་སངས་རྒྱས་ཀྱིས་སྔར་མ་སྨོས་ལ་འདུལ་བ་
སངས་རྒྱས་ཀྱིས་སྔར་སྨོས་བཀའ་སྩལ་པ། མཆོག་ཡིན་པ་དང་། སངས་རྒྱས་ཀྱིས་བཅས་པའི་ཕྱིར་རོ། །དཔེར་ན་མདོ་སྡེ་ལྟ་བུ་ནི་ཉེ་གནས་རྣམས་ཀྱིས་ཆོས་བསྟན་པ་ཡང་ཡོད། །དཔེར་ན་བརྒྱ་བྱིན་ལྷའི་དབང་པོ་ལྟ་བུ་བདག་ནི་སྦྱིན་པ་བྱིན་པའི་ནང་ན་
མཆོག་གོ། །དེ་ཅིའི་ཕྱིར་ཞེ་ན། བདག་གིས་སྦྱིན་པ་བྱིན་པས་ལྷའི་དབང་པོར་གྱུར་ཏེ་བསམ་པ་ཡིད་བཞིན་ནོ་ཞེས་སྨྲས་ཏེ། སངས་རྒྱས་ཀྱིས་ཀྱང་དེ་བཞིན་ནོ་ཞེས་གསུངས་པ་ཡང་ཡོད། དུས་ཁ་ཅིག་ཏུ་སངས་རྒྱས་སྤྲུལ་པའི་སངས་རྒྱས་
སུ་སྤྲུལ་ཏེ། སྤྲུལ་པའི་སངས་རྒྱས་ཀྱིས་ཆོས་གསུངས་པ་ཡང་ཡོད་ཀྱི། འདུལ་བ་ནི་དེ་ལྟ་བུ་མ་ཡིན་ཏེ་ཐམས་ཅད་སངས་རྒྱས་ཀྱིས་གསུངས་པས་དེ་བས་ན་སངས་རྒྱས་ཀྱིས་སྔར་སྨོས་སོ། །ཡང་གཞན་དུ་ན་མདོ་སྡེ་ནི་གནས་གང་ན་
བཞུགས་པ་བཞིན་གསུངས་ཀྱི། འདུལ་བ་ནི་དེ་ལྟ་བུ་མ་ཡིན་ཏེ། གནས་གང་ན་ཉེས་པ་བྱུང་ན་དེ་ཉིད་དུ་ཁྲིམས་བཅའ་བ་མ་ཡིན་གྱི། མཚམས་ཀྱི་ཕྱི་རོལ་དུ་བཅའ་བ་དང་། ཁྱིམ་པའི་ནང་ན་ཉེས་པ་བྱུང་ན་དགེ་འདུན་གྱི་ནང་དུ་བཅའ་བ་དང་
གྲོང་ཁྱེར་གཅིག་ཏུ་ཉེས་པ་བྱུང་ན་ཡང་དགེ་འདུན་གྱི་ནང་དུ་བཅའ་བ་དང་། འཁོར་རྣམ་ལྔའི་ནང་དུ་ཉེས་པ་བྱུང་ན་དགེ་སློང་དང་། དགེ་སློང་མའི་ནང་དུ་བཅའ་དགོས་པས་དེ་བས་ན་སངས་རྒྱས་ཀྱིས་སྔར་སྨོས་པ་ཡིན་ནོ། །ཡངས་པ་ཅན་ཞེས་བྱ་བ་ནི་ཡུལ་
ཁ་ཅིག་ནི་རྒྱལ་པོའི་མཚན་ལས་བཏགས་པ་ཡང་ཡོད། ཡུལ་ཁ་ཅིག་ཡུལ་ས་ལས་བཏགས་པ་ཡང་ཡོད། ཁ་ཅིག་ནི་གྲོང་ཁྱེར་ལས་བཏགས་པ་ཡང་ཡོད། ཡུལ་འདི་ནི་ཀླུ་ལས་ཡུལ་གྱི་མིང་དུ་བཏགས་སོ། །ཀ་ལན་ཏ་ཀའི་གནས་

71-1-174a

ཤེས་བྱ་བ་ནི་བྱ་ལས་མིང་དུ་བཏགས་ཏེ། གྲོང་ཁྱེར་ཞེས་བྱ་བ་ནི་གྲོང་གི་བདག་པོའི་མིང་ངོ་། །ལྷ་སྦྱིན་ཞེས་བྱ་བ་ཡང་དེའི་ཕ་མས་ལྷ་ལ་གསོལ་བ་བཏབ་པས་བུ་རྙེད་པས་ན་ལྷ་སྦྱིན་ཞེས་མིང་དུ་བཏགས་སོ། །བཙན་ཕྱུག་ཅེས་བྱ་བ་
ནི་ཕྱུག་པ་ལ་རྣམ་པ་གཉིས་ཏེ། སེམས་ཅན་གྱི་བག་དང་། སེམས་ཅན་མ་ཡིན་པའི་བག་གོ། །སེམས་ཅན་མ་ཡིན་པ་ཞེས་བྱ་བ་ནི་གསེར་དངུལ་དང་། རིན་པོ་ཆེ་སྣ་བདུན་གྱི་བང་མཛོད་དང་། ནོར་དབྱིག་དང་། ཞིང་དང་། ཁང་ཁྱིམ་མང་དུ་ཡོད་པའོ། །སེམས་ཅན་ཞེས་བྱ་བ་ནི་བྲན་ཕོ་དང་
བྲན་མོ་དང་། ལས་བྱེད་པའི་མི་དང་། བལ་གླང་དང་རྟ་དང་། བ་ལང་དང་ལུག་དང་། དབང་བྱེད་པའི་གྲོང་ཁྱིམ་མང་དུ་ཡོད་པ་སྟེ། དེ་ནི་ཕྱུག་པོ་ཞེས་བྱའོ། །བཙན་ཞེས་བྱ་བ་ནི་དབང་དང་ལྡན་པ་འམ། ལེགས་པའི་ཡོན་ཏན་དང་ལྡན་ཏེ་མིའོ་ཅོག་གིས་ཕུ་དུད་བྱེད་པ་
ཅིང་བཙུན་པར་བྱེད་པས་བཙན་ཞེས་བྱའོ། །དཀོན་མཆོག་གསུམ་ལ་ཕྱོགས་ཤིང་སྐྱབས་སུ་འགྲོ་བ་གསུམ་མནོས་པའོ། །གསོལ་པ་སྐྱབས་སུ་འགྲོ་བ་གསུམ་གྱི་རང་བཞིན་ཇི་ལྟ་བུ་ལགས། སྟོན་པ་ཁ་ཅིག་ནི་སྐྱབས་སུ་འགྲོ་བ་གསུམ་ནི་ཆོ་ག་ཡིན་
གྱི་ཆོ་ག་ལ་མཚན་ཉིད་མེད་དོ། །སྐྱབས་སུ་འགྲོ་བ་གསུམ་ནོད་པའི་ཚེ་པུས་མོ་བཙུགས་ལ་ཐལ་མོ་སྦྱར་ཏེ། སྐྱབས་སུ་འགྲོ་བ་གསུམ་ཁ་ནས་ཚིག་ཏུ་བརྗོད་པ་ནི་ལུས་དང་ངག་གི་ཆོ་ག་བསྟན་པའོ། །གལ་ཏེ་སེམས་རྩེ་ཅིག་ཏུ་བྱས་ན་ལུས་དང་ངག་ཡོད་ཀྱང་ཆོ་
གས་བསྟན་པ་མེད་དེ། དེ་ནི་ཆོ་ག་བསྟན་པ་མེད་པ་ཞེས་བྱའོ། །གཞན་དུ་ན་སྐྱབས་སུ་འགྲོ་བ་གསུམ་ནི་ལུས་དང་ངག་དང་། ཡིད་ཀྱི་ལས་ཀྱི་རང་བཞིན་གསུམ་ཞེས་བྱའོ། །ཡང་གཞན་དུ་ན་སྐྱབས་སུ་འགྲོ་བ་གསུམ་ནི་ཕུང་པོ་ལྔ་དགེ་བ་སྟེ། སེམས་
ཅན་གྱི་ཕུང་པོ་ལྔ་དགེ་བས་གསུམ་ལ་སྐྱབས་སུ་འགྲོ་བར་བྱེད་དེ། དཀོན་མཆོག་གསུམ་ནི་སྐྱབས་སུ་འགྲོ་བའི་གནས་སོ། །སྐྱབས་སུ་འགྲོ་ཞེས་བྱ་བ་ནི་མགོན་སྐྱབས་སམ་དཔུང་གཉེན་གྱི་དོན་ཏེ། དཔེར་ན་མི་ཞིག་ལ་ཉེས་པ་ཆེན་པོ་བྱུང་བ་ལས་
ཡུལ་གཞན་དུ་འཕོས་པ་ལས་རྒྱལ་པོ་ཕ་རོལ་པོ་ལ་ཕར་སྐྱབས་སུ་བཙལ་ན། ཡུལ་ཕ་རོལ་གྱི་རྒྱལ་པོས་དེ་ལ་ཁྱོད་མི་འཇིགས་པ་འདོད་ན་ངའི་ཡུལ་འདི་ནས་མི་འགྲོ་ཞིང་ངས་བསྟན་པ་ཉན་ན་མགོན་སྐྱབས་བྱའོ་ཞེས་བསྒོ་བ་དང་འདྲ་བར་

71-1-174b

སོ་སོའི་སྐྱེ་བོ་ཡང་དེ་དང་འདྲ་སྟེ། བདུད་ཀྱི་དབང་དུ་གྱུར་ལ་སྐྱེ་ཤིར་འཁོར་བའི་ཉེས་པ་ཡོད་པས་དཀོན་མཆོག་གསུམ་ལ་ཕྱོགས་ཏེ་སྐྱབས་སུ་འགྲོ་བར་བྱའོ། །གལ་ཏེ་དཀོན་མཆོག་གསུམ་ལ་རྩེ་གཅིག་ཏུ་ཕྱོགས་ཤིང་སྐྱབས་སུ་སོང་ལ་སངས་
རྒྱས་ཀྱི་བསྟན་པ་ལས་འགལ་བར་མ་བྱས་ན་བདུད་ཀྱི་རྒྱལ་པོ་སྡིག་པ་ཅན་གྱིས་ཅི་བྱར་ཡང་མེད་དོ། །སྔོན་ཕུག་རོན་གཅིག་ཁྲས་ཉེན་ནས་ཤཱ་རིའྀ་བུའི་ཕག་གྲིབ་མར་སོང་བ་ལས་འོན་ཀྱང་སྐྲག་ཅིང་དངང་བ་བཞིན་ནོ། །དེ་ནས་སངས་རྒྱས་ཀྱི་གྲིབ་
མའི་ཕག་ཏུ་སོང་བ་ལས་འཇིགས་པ་མེད་དེ་འདར་བ་ཡང་མེད་དོ། །གལ་ཏེ་རྒྱ་མཚོ་ཆེན་པོ་འཕོ་ཞིང་འགྱུར་ཡང་སྲིད་ཀྱི་ཕུག་རོན་དེ་ནི་བསྒྱུར་དུ་མེད་དེ། དེ་བས་ན་སངས་རྒྱས་ནི་བྱམས་པ་ཆེན་པོ་དང་ཐུགས་རྗེ་ཆེན་པོར་ལྡན་གྱི། ཤཱ་རིའྀ་བུ་ལ་ནི་བྱམས་
པ་དང་སྙིང་རྗེ་ཆེན་པོ་མེད་དོ། །སངས་རྒྱས་ལ་ནི་བག་ཆགས་མེད་ཀྱི། ཤཱ་རིའི་བུ་ལ་ནི་བག་ཆགས་མ་ཟད་དོ། །སངས་རྒྱས་ནི་བསྐལ་པ་གྲངས་མེད་པ་གསུམ་གྱི་བར་དུ་བྱང་ཆུབ་སེམས་དཔའི་སྤྱད་པ་སྤྱོད་ཀྱི། ཤཱ་རིའི་བུ་ནི་བསྐལ་པ་དྲུག་བཅུའི་
བར་དུ་དཀའ་ཐུབ་སྤྱད་དེ། དེ་བས་ན་ཕུག་རོན་ཡང་ཤཱ་རིའི་བུའི་གྲིབ་མར་སོང་བ་ན་འོན་ཀྱང་སྐྲག་ཅིང་འཇིགས་ཀྱི། སངས་རྒྱས་ཀྱི་གྲིབ་མར་སོང་ན་འཇིགས་པ་མེད་པར་གྱུར་ཏོ། །གསོལ་པ་གལ་ཏེ་དཀོན་མཆོག་གསུམ་ལ་སྐྱབས་སུ་སོང་བས་
སྡིག་པ་མི་དགེ་བ་བྱང་ཞིང་འཇིགས་པར་མི་འགྱུར་ན། ཅིའི་སླད་ཏུ་ལྷ་སྦྱིན་ལྟ་བུ་དཀོན་མཆོག་གསུམ་ལ་སྐྱབས་སུ་སོང་བས་དད་པས་ཁྱིམ་ནས་རབ་ཏུ་བྱུང་སྟེ་ཚུལ་ཁྲིམས་ཀྱང་རྫོགས་པ་ལས། མཚམས་མེད་པ་གསུམ་བགྱིས་
ནས་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར། བཀའ་སྩལ་པ། མགོན་སྐྱབས་བྱ་བ་ཡང་སྐྱབས་བྱ་བར་འོས་པ་ལ་སྐྱབས་སུ་བྱ་བ་ཡིན་ཏེ། ལྷ་སྦྱིན་ལྟ་བུ་ནི་མི་དགེ་བའི་སྡིག་པ་ཆེན་པོ་བྱས་ལ་གདོན་མི་ཟ་བར་མྱོང་བའི་ལས་དང་ཡང་
བཅས་པས་དེའི་ཕྱིར་ཡང་མགོན་སྐྱབས་བྱར་ཡང་དཀའོ། །གསོལ་པ། གལ་ཏེ་སྡིག་པ་ཆེན་པོ་བགྱིས་པ་ལ་སངས་རྒྱས་ཀྱིས་མགོན་སྐྱབས་མི་མཛད་ན་སྡིག་པའི་ལས་མ་མཆིས་པ་ལ་སངས་རྒྱས་ཀྱིས་མགོན་སྐྱབས་བགྱི་ཡང་ཅི་འཚལ། དཀོན་

71-1-175a

མཆོག་གསུམ་ལ་མགོན་སྐྱབས་མངའོ་ཞེས་ཀྱང་ཇི་སྐད་བགྱི། བཀའ་སྩལ་པ་ལྷ་སྦྱིན་གྱིས་དཀོན་མཆོག་གསུམ་ལ་སྐྱབས་སུ་སོང་བ་ཡང་ཡང་དག་པའི་སེམས་ཀྱིས་མ་ཡིན་ཏེ་སྐྱབས་སུ་འགྲོ་བ་གསུམ་མ་རྫོགས་སོ། །དེ་ནི་རྒྱུན་དུ་
རྙེད་པ་དང་། བཀུར་སྟི་དང་། གྲགས་པ་འདོད་པའི་ཕྱིར་བདག་ནི་ཐམས་ཅད་མཁྱེན་པའི་ཡེ་ཤེས་ཅན་ནོ་ཞེས་སངས་རྒྱས་ལ་ཡང་སྡོ་བས་ན། དེའི་ཕྱིར་དཀོན་མཆོག་གསུམ་ལ་མཐུ་སྟོབས་ཆེན་པོ་ཡོད་མོད་ཀྱི་མགོན་སྐྱབས་སུ་མི་འགྱུར་རོ། །དཔེར་ན་
རྒྱལ་པོ་མ་སྐྱེས་དགྲ་ལྟ་བུ་ལ་མཚམས་མེད་པའི་སྡིག་པ་ཡོད་དེ། མཚམས་མེད་པའི་སེམས་ཅན་དམྱལ་བར་ལྟུང་བར་རིགས་པ་ལས་ཡང་དག་པའི་སེམས་རྩེ་གཅིག་ཏུ་སངས་རྒྱས་ལ་སྐྱབས་སུ་གསོལ་བས་མཚམས་མེད་པའི་སྡིག་པ་བྱང་
ནས། ཐིག་ནག་པོའི་སེམས་ཅན་དམྱལ་བར་ལྷུང་ནས་མིའི་ནང་ནས་སྡིག་པ་ལྕི་བ་མྱོང་བས་ལྕི་བ་དང་འདྲ་བར་ཞག་བདུན་མྱོང་བ་ཙམ་གྱིས་སྡིག་པ་ཀུན་བྱང་བས་ན་དེ་ནི་དཀོན་མཆོག་གསུམ་གྱི་མགོན་སྐྱབས་ཀྱི་མཐུ་ཞེས་བྱའོ། །གསོལ་པ། ལྷ་སྦྱིན་གྱིས་
སྡིག་པ་བགྱིས་པའི་མགོན་སྐྱབས་བྱར་མི་རུང་ངོ་ཞེས་བགྱིས་པ་མདོ་སྡེའི་ནང་ནས་གང་སུ་ཡང་རུང་སངས་རྒྱས་ལ་སྐྱབས་སུ་སོང་ན་ངན་སོང་གསུམ་དུ་མི་ལྟུང་ངོ་ཞེས་བགྱི་བའི་དོན་ཇི་ལྟ་བུ་ལགས། བཀའ་སྩལ་པ། ལྷ་སྦྱིན་གྱིས་དཀོན་
མཆོག་གསུམ་ལ་སྐྱབས་སུ་སོང་བས་མཚམས་མེད་པའི་སེམས་ཅན་དམྱལ་བར་སོང་མོད་ཀྱི་སྡུག་བསྔལ་མྱོང་བ་ཡང་ཞིང་ཆུང་ལ་བསྟི་བའི་དུས་སྐབས་ཡོད་དོ། །དཔེར་ན་མི་ཞིག་རི་འམ། ནགས་ཚལ་ལམ། འབྲོག་དགོན་པ་འཇིགས་པའི་
གནས་སུ་ཕྱིན་པ་ལས། གལ་ཏེ་སངས་རྒྱས་ཡིད་ལ་བྱས་ཤིང་བསམས་ན་དེའི་ཡོན་ཏན་གྱིས་འཇིགས་ཤིང་སྐྲག་པ་ཞི་བར་འགྱུར་ཏེ། དེ་བས་ན་དཀོན་མཆོག་གསུམ་ལ་སྐྱབས་སུ་སོང་ན་མགོན་སྐྱབས་སུ་འགྱུར་བ་ཡང་མི་བརྫུན་ནོ། །གསོལ་པ། དཀོན་
མཆོག་གསུམ་ཞེས་བགྱི་བ་བདེན་པ་བཞི་ལ་བདེན་པ་གང་གི་ནང་དུ་བསྡུ། དབང་པོ་ཉི་ཤུ་རྩ་གཉིས་ལ་དབང་པོ་གང་གི་ནང་དུ་བསྡུ། ཁམས་བཅྭ་བརྒྱད་ལ་ཁམས་གང་གི་ནང་དུ་བསྡུ། སྐྱེ་མཆེད་བཅུ་གཉིས་ལ་སྐྱེ་མཆེད་གང་གི་ནང་དུ་བསྡུ། ཕུང་པོ་ལྔ་

71-1-175b

ལ་ཕུང་པོ་གང་གི་ནང་དུ་བསྡུ་བར་བགྱི། བཀའ་སྩལ་པ། དཀོན་མཆོག་གསུམ་ནི་བདེན་པ་བཞི་ལ་འགོག་པའི་བདེན་པར་བསྡུ་སྟེ། ལམ་གྱི་བདེན་པའི་ཕྱོགས་ཆ་གཅིག་གོ། །དབང་པོ་ནི་མི་ཤེས་པ་ཀུན་ཤེས་པར་བྱ་བའི་དབང་པོར་བསྡུའོ། །
ཁམས་བཅྭ་བརྒྱད་ལ་ཡིད་ཀྱི་རྣམ་པར་ཤེས་པའི་ཁམས་དང་། ཆོས་ཀྱི་ཁམས་སུ་བསྡུའོ། །སྐྱེ་མཆེད་བཅུ་གཉིས་ལ་ཡིད་ཀྱི་སྐྱེ་མཆེད་དང་། ཆོས་ཀྱི་སྐྱེ་མཆེད་ཀྱི་ནང་དུ་བསྡུའོ། །ཕུང་པོ་ལྔ་ལ་ཟག་པ་མེད་པའི་ཕུང་པོ་ལྔའི་ནང་དུ་བསྡུའོ། །
དེ་ལ་སངས་རྒྱས་དཀོན་མཆོག་ནི་བདེན་པ་བཞི་ལ་ལམ་གྱི་བདེན་པའི། ཕྱོགས་ཆ་གཅིག་གོ། །ཆོས་དཀོན་མཆོག་ནི་བདེན་པ་བཞི་ལ་འགོག་པའི་བདེན་པར་བསྡུའོ། །དགེ་འདུན་དཀོན་མཆོག་ཀྱང་བདེན་པ་བཞི་ལ་ལམ་གྱི་བདེན་པའི་ཕྱོགས་ཆ་
གཅིག་གོ། །སངས་རྒྱས་དཀོན་མཆོག་ནི་དབང་པོ་ཉི་ཤུ་རྩ་གཉིས་ལ་ཀུན་ཤེས་པའི་དབང་པོར་བསྡུའོ། །ཆོས་དཀོན་མཆོག་ནི་འགོག་པའི་བདེན་པ་ཡིན་པས་འདུས་མ་བྱས་པ་སྟེ་དབང་པོས་བསྡུ་བ་མ་ཡིན་ནོ། །དགེ་འདུན་དཀོན་མཆོག་ནི་
དབང་པོ་ཉི་ཤུ་རྩ་གཉིས་ལ་ཟག་པ་མེད་པའི་དབང་པོ་གསུམ་གྱི་ནང་དུ་བསྡུའོ། །སངས་རྒྱས་དཀོན་མཆོག་ནི་ཁམས་བཅྭ་བརྒྱད་ལ་ཡིད་ཀྱི་ཁམས་དང་། ཡིད་ཀྱི་རྣམ་པར་ཤེས་པའི་ཁམས་དང་། ཆོས་ཀྱི་ཁམས་ཀྱི་ཕྱོགས་ཆ་
གཅིག་གི་ནང་དུ་བསྡུའོ། །སྐྱེ་མཆེད་བཅུ་གཉིས་ལ་ཡིད་ཀྱི་སྐྱེ་མཆེད་དང་། ཆོས་ཀྱི་སྐྱེ་མཆེད་ཀྱི་ཕྱོགས་ཆ་གཅིག་གིས་ནང་དུ་བསྡུའོ། །ཕུང་པོ་ལྔ་ལ་ཟག་པ་མེད་པ་ཕུང་པོ་ལྔའི་ཕྱོགས་ཆ་གཅིག་གི་ནང་དུ་བསྡུའོ། །ཆོས་
དཀོན་མཆོག་ནི་ཁམས་བཅྭ་བརྒྱད་ལ་ཆོས་ཀྱི་ཁམས་ཀྱི་ཕྱོགས་ཆ་གཅིག་གི་ནང་དུ་བསྡུའོ། །སྐྱེ་མཆེད་བཅུ་གཉིས་ལ་ཆོས་ཀྱི་སྐྱེ་མཆེད་ཀྱི་ཕྱོགས་ཆ་གཅིག་གི་ནང་དུ་བསྡུའོ། །ཆོས་དཀོན་མཆོག་ནི་ཕུང་པོ་ལྔར་བསྡུས་པ་
མ་ཡིན་ནོ། །ཕུང་པོ་ལྔ་ནི་འདུས་བྱས་པས་ཆོས་ནི་འདུས་མ་བྱས་པའི་ཕྱིར་རོ། །དགེ་འདུན་དཀོན་མཆོག་ནི་ཁམས་བཅྭ་བརྒྱད་ལ་ཡིད་ཀྱི་ཁམས་དང་། ཡིད་ཀྱི་རྣམ་པར་ཤེས་པའི་ཁམས་དང་། ཆོས་ཀྱི་ཁམས་ཀྱི་

71-1-176a

ཕྱོགས་ཆ་གཅིག་གི་ནང་དུ་བསྡུའོ། །སྐྱེ་མཆེད་བཅུ་གཉིས་ལ་ཡིད་ཀྱི་སྐྱེ་མཆེད་དང་ཆོས་ཀྱི་སྐྱེ་མཆེད་ཀྱི་ཕྱོགས་ཆ་གཅིག་གི་ནང་དུ་བསྡུའོ། །ཕུང་པོ་ལྔ་ལ་ཟག་པ་མེད་པའི་ཕུང་པོ་ལྔའི་ཕྱོགས་ཆ་གཅིག་གི་ནང་དུ་བསྡུའོ། །
གསོལ་པ། སངས་རྒྱས་ལ་སྐྱབས་སུ་གསོལ་ཞེས་བགྱི་བ་སངས་རྒྱས་ཤཱཀྱ་ཐུབ་པ་ལ་སྐྱབས་སུ་གསོལ་ལམ། འོན་ཏེ་དུས་གསུམ་གྱི་སངས་རྒྱས་ལ་སྐྱབས་སུ་གསོལ། བཀའ་སྩལ་པ། དུས་གསུམ་གྱི་སངས་རྒྱས་ལ་སྐྱབས་སུ་
གསོལ་ལོ། །ཇི་ལྟ་ཞེ་ན་སངས་རྒྱས་ཀྱི་ཆོས་ཀྱི་སྐུ་གཅིག་ཏུ་འཐུན་པའི་ཕྱིར་རོ། །སངས་རྒྱས་གཅིག་ལ་སྐྱབས་སུ་སོང་བ་ཉིད་སངས་རྒྱས་ཐམས་ཅད་ལ་སྐྱབས་སུ་སོང་བ་སྟེ། སངས་རྒྱས་ལ་ཐ་དད་པ་མེད་པའི་ཕྱིར་རོ། །ཡང་
གཞན་དུ་ན་དུས་གསུམ་གྱི་སངས་རྒྱས་ལ་སྐྱབས་སུ་གསོལ་ལོ་ཞེས་བགྱི་བ་ལྷ་རྣམས་ལས་ཁ་ཅིག་ནི་བདག་སངས་རྒྱས་འོད་སྲུང་གི་ཉེ་གནས་ཡིན་པར་སྨྲ། ཁ་ཅིག་ནི་བདག་སངས་རྒྱས་རྣམ་པར་གཟིགས་ཀྱི་ཉེ་གནས་ཡིན་པར་སྨྲ་སྟེ། 
དེ་བཞིན་དུ་སངས་རྒྱས་བདུན་ཆར་ལ་ཡང་སོ་སོ་ནས་བདག་ནི་སངས་རྒྱས་ཆེ་གེ་མོ་ཞིག་གི་ཉེ་གནས་ཡིན་ཞེས་སྨྲ་བས་དེ་བས་ན་སངས་རྒྱས་གཅིག་ལ་ང་སྐྱབས་སུ་གསོལ་བར་འོས་ཀྱི་དུས་གསུམ་མི་རིགས་སོ། །གཞན་ཡང་དེ་ལྟར་
མི་རུང་ངོ་ཞེས་སྨྲ་བ་ཡང་ཡོད་དེ། དེ་ཅིའི་ཕྱིར་ཞེ་ན། དཔེར་ན་རྣམ་ཐོས་ཀྱི་བུས་དྲིས་པའི་མདོ་ལས་རྒྱལ་པོ་རྣམ་ཐོས་ཀྱི་བུ་དཀོན་མཆོག་གསུམ་ལ་སྐྱབས་སུ་གསོལ་བ་ནི་འདས་པ་དང་། མ་བྱོན་པ་དང་། ད་ལྟར་བཞུགས་པའི་སངས་རྒྱས་
ལ་སྐྱབས་སུ་གསོལ་ལོ་ཞེས་གསུངས་ཏེ། དོན་དེ་དང་སྦྱར་ན་དུས་གསུམ་གྱི་སངས་རྒྱས་རྣམས་ལ་སྐྱབས་སུ་གསོལ་བར་མངོན་ནོ། །གསོལ་པ། གལ་ཏེ་དེ་ལྟ་བུ་ལགས་ན་ལྷའི་བུ་དག་སོ་སོ་ནས་བདག་ནི་སངས་རྒྱས་ཆེ་གེ་མོ་ཞིག་གི་ཉེ་
གནས་ལགས་སོ་ཞེས་བགྱི་བའི་དོན་ཇི་ལྟ་བུ་ལགས། བཀའ་སྩལ་པ། ལྷའི་བུས་སྨྲས་པ་ལ་དོན་ངེས་པར་ཆད་པ་ཡང་ཅི་ཡོད། ལྷའི་བུ་ཁ་ཅིག་ནི་སངས་རྒྱས་གཅིག་ལ་སྐྱབས་སུ་འགྲོ་བ་ཡང་ཡོད། ཁ་ཅིག་ནི་དུས་གསུམ་གྱི་སངས་རྒྱས་ལ་

71-1-176b

སྐྱབས་སུ་སོང་བ་ཡང་ཡོད་དེ། མདོར་ན་སངས་རྒྱས་གཅིག་ལ་བྱའོ། །གསོལ་པ། གཅིག་ལ་སྐྱབས་སུ་མཆིས་ན་ནི་སངས་རྒྱས་ལ་སྐྱབས་སུ་སོང་བ་ཞེས་བགྱི། བཀའ་སྩལ་པ། སྐྱབས་སུ་འགྲོ་བ་ཞེས་བྱ་བ་ནི་ངག་གི་འཁོར་ལོ་སྟེ། 
ཐམས་ཅད་མཁྱེན་པ་སློབ་པ་མེད་པའི་ཡོན་ཏན་ལ་སྐྱབས་སུ་སོང་བའོ། །གསོལ་པ་གཟུགས་ཀྱི་སྐུ་ལ་སྐྱབས་སུ་མཆི་འམ། ཆོས་ཀྱི་སྐུ་ལ་སྐྱབས་སུ་མཆི། བཀའ་སྩལ་པ། ཆོས་ཀྱི་སྐུ་ལ་སྐྱབས་སུ་འགྲོའི་གཟུགས་ཀྱི་སྐུ་ལ་སྐྱབས་
སུ་འགྲོ་བ་མ་ཡིན་ཏེ། གཟུགས་སངས་རྒྱས་མ་ཡིན་པའི་ཕྱིར་རོ། །གསོལ་པ། གཟུགས་ཀྱི་སྐུ་སངས་རྒྱས་མ་ལགས་ན་ཅིའི་སླད་དུ་སངས་རྒྱས་ཀྱི་སྐུ་ལ་ཁྲག་ཕྱུང་བས་མཚམས་མ་མཆིས་པའི་ལས་བགྱིས་པར་འགྱུར། བཀའ་སྩལ་
པ། གཟུགས་ཀྱི་སྐུ་ནི་ཆོས་ཀྱི་སྐུའི་སྣོད་ཡིན་ཏེ། ཆོས་ཀྱི་སྐུའི་གནས་སོ། །དེ་བས་ན་གཟུགས་ཀྱི་སྐུ་ལ་གནོད་པ་བྱས་པས་མཚམས་མེད་པའི་ལས་སུ་འགྱུར་གྱི། གཟུགས་ཀྱི་སྐུ་སངས་རྒྱས་ཡིན་པས་མཚམས་མེད་པའི་ལས་
སུ་འགྱུར་བ་ནི་མ་ཡིན་ནོ། །གསོལ་པ། ཅི་ལ་སྐྱབས་སུ་མཆི་ན་ཆོས་ལ་སྐྱབས་སུ་མཆི་བ་ཞེས་བགྱི། བཀའ་སྩལ་པ། སྐྱབས་སུ་འགྲོ་བ་ཞེས་བྱ་བ་ནི་ངག་གི་འཁོར་ལོ་སྟེ། འདོད་པ་དང་། འདོད་པ་མེད་པའི་མཐར་ཕྱིན་ཅིང་
མྱ་ངན་ལས་འདས་པ་ལ་སྐྱབས་སུ་སོང་བ་ནི་ཆོས་ལ་སྐྱབས་སུ་སོང་བ་ཞེས་བྱའོ། །གསོལ་པ། བདག་གི་ལུས་མཐར་ཕྱིན་པ་ལ་སྐྱབས་སུ་མཆི་འམ། གཞན་གྱི་ལུས་མཐར་ཕྱིན་པ་ལ་སྐྱབས་སུ་མཆི། བཀའ་སྩལ་པ། བདག་
གི་ལུས་མཐར་ཕྱིན་པ་དང་། གཞན་གྱི་ལུས་མཐར་ཕྱིན་པ་ལ་སྐྱབས་སུ་འགྲོ་བ་ནི་ཆོས་ལ་སྐྱབས་སུ་སོང་བ་ཞེས་བྱའོ། །གསོལ་པ། ཇི་ལྟར་ན་དགེ་འདུན་ལ་སྐྱབས་སུ་མཆི་བ་ལགས། བཀའ་སྩལ་པ། སྐྱབས་སུ་འགྲོ་བ་ནི་ངག་གི་
འཁོར་ལོ་སྟེ། བསོད་ནམས་ཀྱི་ཞིང་སློབ་པ་དང་། མི་སློབ་པའི་ཉན་ཐོས་ཀྱི་ཡོན་ཏན་ལ་སྐྱབས་སུ་འགྲོ་བ་ནི་དགེ་འདུན་ལ་སྐྱབས་སུ་སོང་བ་ཞེས་བྱའོ། །གསོལ་པ། ཀུན་རྫོབ་ཀྱི་བདེན་པའི་དགེ་འདུན་ལ་སྐྱབས་སུ་མཆི་འམ། དོན་དམ་པའི་

71-1-177a

བདེན་པའི་དགེ་འདུན་ལ་སྐྱབས་སུ་མཆི། གལ་ཏེ་དོན་དམ་པའི་བདེན་པའི་དགེ་འདུན་ལ་སྐྱབས་སུ་མཆི་ན་ནི་སྔོན་སངས་རྒྱས་ཀྱིས་དེ་ཝི་དང་། པ་རི་ལ་སྐྱབས་སུ་འགྲོ་བ་གསུམ་ཕོག་པའི་ཚེ། ཕྱིས་
དགེ་འདུན་ཞེས་བྱ་བ་ཡོད་པར་འགྱུར་གྱིས་དེ་ལ་སྐྱབས་སུ་སོང་ཤིག་ཅེས་གསུང་བའི་མི་རིགས་ཏེ། དོན་དམ་པའི་བདེན་པའི་དགེ་འདུན་ནི་རྟག་ཏུ་འཇིག་རྟེན་ན་མཆིས་པ་ལགས། བཀའ་སྩལ་པ། ཀུན་རྫོབ་ཀྱི་བདེན་པའི་
དགེ་འདུན་ནི་དོན་དམ་པའི་དགེ་འདུན་གྱི་རྟེན་པའི་གནས་ཡིན་པས་ན་ཕྱིས་དགེ་འདུན་ཡོད་པར་འགྱུར་གྱིས་དེ་ལ་སྐྱབས་སུ་སོང་ཤིག་ཅེས་གསུངས་པ་ཡིན་ནོ། །ཡང་གཞན་དུ་ན་ཀུན་རྫོབ་ཀྱི་བདེན་པའི་དགེ་འདུན་ལ་བཀུར་ཞིང་
བཙུན་པར་བྱ་བའི་ཕྱིར་ཡང་དེ་སྐད་ཅེས་གསུངས་ཏེ། སངས་རྒྱས་ཀྱིས་ནི་འཁོར་ཐམས་ཅད་ཀྱི་ནང་ན་སངས་རྒྱས་ཀྱི་འཁོར་མཆོག་གོ། །དཔེར་ན་འོ་མ་ལས་ཞོ་འབྱུང་ལ། ཞོ་ལས་མར་འབྱུང་མར་ལས་མར་གྱི་སྙིང་པོ་འབྱུང་
སྟེ། མར་གྱི་སྙིང་པོ་ནི་མཆོག་རབ་གྱ་ནོམ་པ་དང་འདྲ་སྟེ། སངས་རྒྱས་ཀྱི་འཁོར་དགེ་འདུན་ཡང་དེ་དང་འདྲ་སྟེ། ཉེ་གནས་དགེ་འདུན་ཡོད་ན་དེའི་ནང་ན་འཇུག་པ་བཞི་དང་། འབྲས་བུ་བཞི་ཐོབ་པ་བླ་ན་མེད་པའི་བསོད་ནམས་
ཀྱི་ཞིང་ཡོད་པས་ན་འཁོར་རྣམ་པ་དགུ་བཅུ་རྩ་དྲུག་གི་ནང་ན་དགེ་འདུན་ནི་གྱ་ནོམ་པ། མཆོག་རབ་དཔེ་ཟླ་མེད་པ་སྟེ། དེ་བས་ན་ཕྱིས་དགེ་འདུན་ཡོད་པར་འགྱུར་གྱིས་སྐྱབས་སུ་སོང་ཤིག་ཅེས་གསུངས་པ་ལ་དོན་དང་འགལ་
བ་མེད་དོ། །གསོལ་པ། སངས་རྒྱས་ཉིད་ཆོས་ལགས་ལ། ཆོས་ཉིད་ཀྱང་དགེ་འདུན་ལགས་ཏེ། དགེ་འདུན་ཉིད་ཀྱང་ཆོས་ལགས་པས་ཡང་དག་པར་ན་ཆོས་གཅིག་ཏུ་བས་ན་ཁྱད་པར་རམ་བྱེ་བྲག་ཅི་མཆིས་
བཀའ་སྩལ་པ། ཆོས་དེ་དག་མཆིས་མོད་ཀྱི་དོན་གྱི་སྒོ་ནས་བྱེ་བྲག་ཡོད་དོ། །དཀོན་མཆོག་གསུམ་ཞེས་བྱ་བ་བསྟན་པ་མེད་པར་ཡེ་ཤེས་ཆེན་པོ་དང་། སློབ་པ་མེད་པའི་ས་ནོན་ཏེ། ཡོན་ཏན་ཐམས་ཅད་དང་ལྡན་

71-1-177b

པ་ནི་སངས་རྒྱས་དཀོན་མཆོག་ཅེས་བྱའོ། །འགོག་པའི་བདེན་པ་དང་། འདུས་མ་བྱས་པ་ནི་ཆོས་དཀོན་མཆོག་ཅེས་བྱའོ། །ཉན་ཐོས་ཀྱི་སློབ་པ་དང་མི་སློབ་པའི་ཡོན་ཏན་དང་ཤེས་རབ་ཏུ་ལྡན་པ་ནི་དགེ་འདུན་དཀོན་མཆོག་ཅེས་བྱའོ། །
ཆོས་ཀྱི་སྒོ་ནས་དབྱེ་ན་བསྟན་པ་མེད་པ་དང་། བསླབ་པ་མེད་པའི་ཆོས་ནི་སངས་རྒྱས་དཀོན་མཆོག་ཅེས་བྱའོ། །འགོག་པའི་བདེན་པ་དང་། འདུས་མ་བྱས་པ་དང་། སློབ་པ་ཡང་མ་ཡིན། མི་སློབ་པ་ཡང་མ་ཡིན་པའི་ཆོས་ནི་ཆོས་དཀོན་མཆོག་
ཅེས་བྱའོ། །ཉན་ཐོས་ཀྱི་སློབ་པ་དང་། མི་སློབ་པ་ནི་དགེ་འདུན་དཀོན་མཆོག་ཅེས་བྱའོ། །དབང་པོའི་སྒོ་ནས་དབྱེ་ན་སངས་རྒྱས་ནི་ཀུན་ཤེས་པའི་དབང་པོའོ། །ཆོས་ནི་དབང་པོའི་ཆོས་མ་ཡིན་པའོ། །དགེ་འདུན་ནི་ཟག་པ་མེད་པའི་དབང་པོ་
གསུམ་མོ། །བདེན་པའི་སྒོ་ནས་དབྱེ་ན་སངས་རྒྱས་ནི་ལམ་གྱི་བདེན་པའི་ཕྱོགས་ཆ་གཅིག་གོ། །ཆོས་ནི་འགོག་པའི་བདེན་པའོ། །དགེ་འདུན་ཡང་ལམ་གྱི་བདེན་པའི་ཕྱོགས་ཆ་གཅིག་གོ། །དགེ་སྦྱོང་གི་འབྲས་བུའི་སྒོ་ནས་དབྱེ་ན་སངས་རྒྱས་
ནི་དགེ་སྦྱོང་ངོ་། །ཆོས་ནི་དགེ་སྦྱོང་གི་འབྲས་བུའོ། །དགེ་འདུན་ནི་དགེ་སྦྱོང་ངོ་། །ཆོས་དཀོན་མཆོག་ནི་དགེ་སྦྱོང་གི་འབྲས་བུའོ། །བྲམ་ཟེའི་སྒོ་ནས་དབྱེ་ན་སངས་རྒྱས་ནི་བྲམ་ཟེའོ། །ཆོས་ནི་བྲམ་ཟེའི་འབྲས་བུའོ། །དགེ་འདུན་ནི་བྲམ་ཟེའོ། །
ཆོས་དཀོན་མཆོག་ནི་བྲམ་ཟེའི་འབྲས་བུའོ། །ཚངས་པར་སྤྱོད་པའི་སྒོ་ནས་དབྱེ་ན་སངས་རྒྱས་ནི་ཚངས་པར་སྤྱོད་པའོ། །ཆོས་ནི་ཚངས་པར་སྤྱོད་པའི་འབྲས་བུའོ། །དགེ་འདུན་ནི་ཚངས་པར་སྤྱོད་པའོ། །ཆོས་དཀོན་མཆོག་ནི་ཚངས་པར་སྤྱོད་
པའི་འབྲས་བུའོ། །རྒྱུ་དང་འབྲས་བུའི་སྒོ་ནས་དབྱེ་ན་སངས་རྒྱས་ནི་རྒྱུའོ། །ཆོས་ནི་འབྲས་བུའོ། །དགེ་འདུན་ནི་རྒྱུའོ། །ཆོས་དཀོན་མཆོག་ནི་འབྲས་བུའོ། །ལམ་དང་འབྲས་བུའི་སྒོ་ནས་དབྱེ་ན་སངས་རྒྱས་ནི་ལམ་མོ། །ཆོས་ནི་འབྲས་བུའོ། །
དགེ་འདུན་ནི་ལམ་མོ། །ཆོས་དཀོན་མཆོག་ནི་འབྲས་བུའོ། །སངས་རྒྱས་ཀྱི་སྟོན་པ་ནི་ཆོས་ཡིན་ཏེ། ཆོས་ལས་སངས་རྒྱས་སྐྱེས་པས་ན་ཆོས་ནི་སངས་རྒྱས་ཀྱི་ཡུམ་ཡིན་ཏེ། སངས་རྒྱས་ནི་ཆོས་ལ་གནས་སོ། །གསོལ་པ། སངས་རྒྱས་ཀྱི་སྟོན་པ་ཆོས་

71-1-178a

ལགས་ན་ཅིའི་སླད་དུ་དཀོན་མཆོག་གསུམ་ལ་ཆོས་སྔར་མི་སྨོས། བཀའ་སྩལ་པ། སངས་རྒྱས་ཀྱིས་སྟོན་པ་ཆོས་ཡིན་མོད་ཀྱི་ཆོས་ཀྱང་སངས་རྒྱས་མ་ཡིན་པ་གཞན་གྱིས་མི་སྟོན་ཏེ། ལམ་ཞེས་བྱ་བ་ཡང་མིས་བསྒྲུབ་
དགོས་པས་དེ་བས་ན་སངས་རྒྱས་སྔར་སྨོས་སོ། །དེ་ནས་མ་འགགས་པས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དཀོན་མཆོག་གསུམ་ལ་སྐྱབས་སུ་གསོལ་བ་མནོད་པའི་ཚེ། སྔར་ཆོས་དཀོན་མཆོག་
སྨོས་ལ། ཕྱིས་སངས་རྒྱས་དཀོན་མཆོག་སྨོས་ན་གསུམ་ལ་སྐྱབས་སུ་མཆི་བར་རུང་ངམ། བཀའ་སྩལ་པ། རྟོགས་ཤིང་ཤེས་པ་མེད་ན་གོ་རིམས་ནོར་ན་ཡང་ཉེས་པ་མེད་དེ་སྐྱབས་སུ་འགྲོ་བར་ཆུད་དོ། །གལ་ཏེ་ཤེས་བཞིན་དུ་ཆེད་ཏུ་ནོར་བར་
སྨྲས་ན་ཉེས་པ་དང་ཡང་བཅས་ལ་གསུམ་ལ་སྐྱབས་སུ་འགྲོ་བར་ཡང་མི་ཆུད་དོ། །གསོལ་པ། སངས་རྒྱས་དང་ཆོས་སྨོས་ལ་དགེ་འདུན་མ་སྨོས་ན་སྐྱབས་སུ་མཆི་བ་གསུམ་དུ་རུང་ངམ། གལ་ཏེ་ཆོས་དང་དགེ་འདུན་སྨོས་ལ་སངས་རྒྱས་མ་སྨོས་ན་
སྐྱབས་སུ་མཆི་བར་རུང་ངམ། གལ་ཏེ་སངས་རྒྱས་དང་དགེ་འདུན་སྨོས་ལ་ཆོས་མ་སྨོས་ན་གསུམ་ལ་སྐྱབས་སུ་མཆི་བར་ཆུད་དམ། བཀའ་སྩལ་པ། དེ་གང་ཡང་མི་རུང་སྟེ་མི་ཆུད་དོ། །གསོལ་པ། །གསུམ་ལ་སྐྱབས་སུ་མ་མཆིས་པར་ཚུལ་ཁྲིམས་ལྔ་
ཐོབ་པར་རུང་ངམ། གལ་ཏེ་གསུམ་ལ་སྐྱབས་སུ་མ་མཆིས་པར་ཡང་ཡན་ལག་བརྒྱད་ཀྱི་ཚུལ་ཁྲིམས་ཐོབ་པར་རུང་ངམ། གལ་ཏེ་གསུམ་ལ་སྐྱབས་སུ་མཆི་བ་མ་མཆིས་པར་ཚུལ་ཁྲིམས་བཅུ་ཐོབ་པར་རུང་ངམ། ཞུ་བ་དང་གསོལ་བ་བཞིའི་
ལས་མ་བགྱིས་པར་ཚུལ་ཁྲིམས་རྫོགས་པར་མནོད་དུ་རུང་ངམ། བཀའ་སྩལ་པ། དེ་དག་གང་ཡང་མི་རུང་ངོ་། །གལ་ཏེ་ཚུལ་ཁྲིམས་ལྔ་ནོད་ན་སྔར་གསུམ་ལ་སྐྱབས་སུ་འགྲོ་བར་བྱའོ། །གསུམ་ལ་སྐྱབས་སུ་སོང་བའི་འོག་
ཏུ་ཁྲིམས་ལྔ་ཐོབ་པར་འགྱུར་ཏེ། དེ་ནས་ཁྲིམས་ལྔ་གང་ཡིན་པ་བརྗོད་དེ། ཕ་རོལ་པོས་ཁྲིམས་ལྔའི་མིང་ཤེས་པར་བྱའོ། །དེ་བཞིན་དུ་གསོལ་པ་དང་ཞུ་བ་བཞིའི་ལས་བྱས་ནས་ཚུལ་ཁྲིམས་རྫོགས་པར་འགྱུར་ཏེ། དེའི་འོག་ཏུ་གནས་བཞི་

71-1-178b

དང་། རྩ་བ་བཞི་དང་། དགེ་འདུན་གྱི་ལྷག་མ་བཅུ་གསུམ་ཤེས་ཤིང་ཁོང་དུ་ཆུད་པར་བྱ་བའི་ཕྱིར་བརྗོད་ཅིང་བསྟན་པར་བྱའོ། །ཡང་གཞན་དུ་ན་སྐྱབས་སུ་འགྲོ་བ་བྱས་ནས་སྲོག་མི་གཅོད་པའི་ཁྲིམས་བསྟན་ན་ཁྲིམས་ཐོབ་པར་འགྱུར་ཏེ། དེ་བས་ན་ཁྲིམས་གཅིག་
བཤད་པས་ཁྲིམས་ལྔ་ཐོབ་ཅེས་བྱ་སྟེ། གལ་ཏེ་ཁྲིམས་གཅིག་ཐུབ་ན་ཁྲིམས་ལྔ་ཆར་ཐུབ་ཅེས་བྱའོ། །ཡང་གཞན་དུ་ན་ཁྲིམས་ལྔ་གཅིག་ལ་གཅིག་འབྲེལ་པ་ཡང་ཡིན་ལ་ཐོག་མ་ནས་ཁྲིམས་ལྔ་མནོད་པར་དམ་བཅས་པའི་ཕྱིར་རོ། །ཡང་གཞན་དུ་ན་ཁྲིམས་
ལྔ་ནི་མནོས་པའི་འོག་ཏུ་ཁྲིམས་ཐོབ་བོ། །སྟོན་པ་ཁ་ཅིག་ནི་སྐྱབས་སུ་འགྲོ་བ་གསུམ་བྱས་ནས་ཁྲིམས་ལྔ་ཐོབ་ཅེས་བྱ་བ་ནི་དོན་བདེན་པ་སྟེ། ཇི་ལྟར་གསོལ་པ་དང་། ཞུ་བའི་ལས་བྱས་པ་བཞིན་ནོ། །ཡན་ལག་བརྒྱད་པའི་ཁྲིམས་
ནོད་པ་དང་། ཁྲིམས་བཅུ་ནོད་པ་དང་། ཁྲིམས་ལྔ་ནོད་པ་བཤད་པ་བཞིན་ནོ། །གསོལ་པ། གལ་ཏེ་སྔར་གསུམ་ལ་སྐྱབས་སུ་མཆིས་ཏེ། དགེ་བསྙེན་དུ་གྱུར་པ་སླད་ཀྱིས་གལ་ཏེ་ཁྲིམས་ལྔ་ནོད་དམ། ཁྲིམས་བཅུ་ནོད་ཀྱང་རུང་
སྐྱབས་སུ་མཆི་བ་གདོད་བགྱི་འཚལ་ལམ། བཀའ་སྩལ་པ། སྐྱབས་སུ་འགྲོ་བ་གསུམ་མ་བྱས་ཀྱང་སྔར་གསུམ་ལ་སྐྱབས་སུ་སོང་བས་ཚུལ་ཁྲིམས་ཀུན་ཐོབ་བོ། །གསོལ་པ། གལ་ཏེ་གསུམ་ལ་སྐྱབས་སུ་མཆི་བ་ཡང་བགྱིས། གསོལ་
པ་དང་ཞུ་བའི་ལས་ཀྱང་མ་བགྱིས་ན་ཁྲིམས་ཐོབ་པར་འགྱུར་རམ། བཀའ་སྩལ་པ། ཁྲིམས་ལྔ་དང་། ཡན་ལག་བརྒྱད་པའི་ཁྲིམས་དང་། ཁྲིམས་བཅུ་ནོད་པ་གསུམ་ལ་སྐྱབས་སུ་སོང་ནས་ཁྲིམས་འཐོབ་བོ། །གལ་ཏེ་ཚུལ་ཁྲིམས་རྫོགས་
པར་མནོད་པ་ནི་གསོལ་བ་དང་། ཞུ་བ་བཞིའི་ལས་བྱས་པས་ཚུལ་ཁྲིམས་རྫོགས་པར་འགྱུར་གྱི་གསུམ་ལ་སྐྱབས་སུ་སོང་བས་ནི་མ་ཡིན་ནོ། །ཚུལ་ཁྲིམས་རྫོགས་པར་མནོད་པ་ནི་དེའི་ཡོན་ཏན་དང་བསོད་ནམས་ཆེ་བས་ན་ལས་ཅུང་ཟད་ཙམ་འམ། 
རྐྱེན་ཅུང་ཟད་ཙམ་གྱིས་སྒྲུབ་པར་མི་འགྱུར་བས་དེ་བས་ན་སྐྱབས་སུ་འགྲོ་བ་གསུམ་དང་། དགེ་འདུན་བཅུའི་ནང་དུ་གསོལ་བ་དང་ཞུ་བ་བཞིའི་ལས་བྱས་པས་ཚུལ་ཁྲིམས་ཐོབ་པར་འགྱུར་རོ། །ཁྲིམས་ལྔ་དང་། ཡན་

71-1-179a

ལག་བརྒྱད་པའི་ཁྲིམས་དང་། ཁྲིམས་བཅུ་ནི་ཡོན་ཏན་དང་མཐུ་དེ་ཙམ་དུ་མི་ཆེ་བས་དེ་བས་ན་གསུམ་ལ་སྐྱབས་སུ་སོང་བས་ན་ཚུལ་ཁྲིམས་ཐོབ་པར་འགྱུར་ཏེ། ལས་མང་པོ་དང་། རྐྱེན་མང་པོ་མི་དགོས་སོ། །
གསོལ་པ། ཚུལ་ཁྲིམས་རྫོགས་པར་མནོས་པའི་འོག་ཏུ་རྩ་བ་བཞི་དང་། དགེ་འདུན་གྱི་ལྷག་མ་བཅུ་གསུམ་འབའ་ཤིག་ནི་བསྟན་ལ་གཞན་དག་རྫོགས་པར་མི་སྟོན། བཀའ་སྩལ་པ། ཚུལ་ཁྲིམས་རྣམ་པ་འདི་གཉིས་
ནི་ནང་གི་ལྕི་བ་ཡིན་ཏེ། རྩ་བ་བཞི་ལས་གཅིག་ཉམས་ན་ཡང་ཕྱིར་གསོར་མི་རུང་ངོ་། །ལྷག་མ་ནི་གསོར་རུང་མོད་ཀྱི་གསོ་དཀའ་སྟེ། དེ་ཡང་དགེ་འདུན་ལ་མགུ་བ་དང་། ཆད་པའི་ལས་བྱས་ལ་གང་ན་དགེ་འདུན་ཉི་ཤུ་ཡོད་པའི་མདུན་
དུ་ཉེས་པ་བཤགས་དགོས་ཏེ། འདི་ནི་བསྲུང་དཀའ་བས་བསྲུང་དགོས་པའི་ཕྱིར་སྨོས་སོ། །གཞན་སླབས་ན་བསྲུང་སླ་བའི་ཕྱིར་སྨོས་མི་དགོས་ཏེ། དེ་བས་ན་རྣམ་པ་འདི་གཉིས་སྨོས་ཀྱི་གཞན་མ་སྨོས་པ་ཡིན་ནོ། །
གསོལ་པ། སོ་སོར་ཐར་པའི་ཁྲིམས་འདི་ཟག་པ་མེད་པའི་ཁྲིམས་ལགས་སམ། བསམ་གཏན་གྱི་ཚུལ་ཁྲིམས་ལགས། བཀའ་སྩལ་པ། ཟག་པ་མེད་པའི་ཁྲིམས་ཀྱང་མ་ཡིན། བསམ་གཏན་གྱི་ཚུལ་ཁྲིམས་ཀྱང་མ་
ཡིན་ནོ། །སོ་སོར་ཐར་པའི་ཚུལ་ཁྲིམས་འདི་ནི་གལ་ཏེ་སངས་རྒྱས་འཇིག་རྟེན་དུ་གཤེགས་ན་ནི་ཚུལ་ཁྲིམས་འདི་ཡོད་ཀྱི། གལ་ཏེ་སངས་རྒྱས་འཇིག་རྟེན་དུ་མ་གཤེགས་ན་ཚུལ་ཁྲིམས་འདི་མེད་དོ། །ཟག་པ་མེད་པ་དང་། བསམ་
གཏན་གྱི་ཚུལ་ཁྲིམས་ནི་སངས་རྒྱས་འཇིག་རྟེན་དུ་གཤེགས་ཀྱང་རུང་། མ་གཤེགས་ཀྱང་རུང་དུས་ཐམས་ཅད་ཀྱི་ཐམས་ཅད་ཏུ་ཡོད་དོ། །སོ་སོར་ཐར་པའི་ཚུལ་ཁྲིམས་ནི་བཅས་པ་ལས་ཡོད་པར་འགྱུར་གྱི། ཟག་པ་མེད་པ་དང་། བསམ་
གཏན་གྱི་ཚུལ་ཁྲིམས་ནི་བཅས་པ་ལས་ཡོད་པ་མ་ཡིན་ནོ། །སོ་སོར་ཐར་པའི་ཚུལ་ཁྲིམས་ནི་གཞན་ལས་ཐོབ་པར་འགྱུར་གྱི། ཟག་པ་མེད་པ་དང་། བསམ་གཏན་གྱི་ཚུལ་ཁྲིམས་ནི་གཞན་ལས་ཐོབ་པ་མ་ཡིན་ནོ། །སོ་སོར་ཐར་པའི་

71-1-179b

ཚུལ་ཁྲིམས་ནི་གཉིད་ཀྱིས་ལོག་གམ། མ་ལོག་པ་འམ། དགེ་བ་འམ། སྡིག་པ་འམ། ལུང་དུ་མི་སྟོན་པའི་སེམས་ཀྱི་དུས་ཐམས་ཅད་དུ་ཡོད་དོ། །ཟག་པ་མེད་པ་དང་བསམ་གཏན་གྱི་ཚུལ་ཁྲིམས་ནི་བསམ་གཏན་དུ་འདུག་
པ་དང་། ཟག་པ་མེད་པའི་སེམས་ལ་ངེས་པའི་ཚེ་ཚུལ་ཁྲིམས་ཡོད་ཀྱི། །སེམས་གཞན་ཐམས་ཅད་ལ་མེད་དོ། །སོ་སོར་ཐར་པའི་ཚུལ་ཁྲིམས་ནི་མིའི་ནང་འབའ་ཤིག་ན་ཡོད་ཀྱི། ཟག་པ་མེད་པ་དང་། བསམ་གཏན་གྱི་ཚུལ་
ཁྲིམས་ནི་ལྷ་དང་མི་གཉིས་ལ་ཡོད་དོ། །སོ་སོར་ཐར་པའི་ཚུལ་ཁྲིམས་ནི་འདོད་པའི་ཁམས་འབའ་ཤིག་ན་ཡོད་ཀྱི། ཟག་པ་མེད་པ་དང་། བསམ་གཏན་གྱི་ཚུལ་ཁྲིམས་ནི་འདོད་པའི་ཁམས་དང་། གཟུགས་ཀྱི་ཁམས་
ན་རྫོགས་པར་ཡོད་དོ། །ཟག་པ་མེད་པའི་ཚུལ་ཁྲིམས་དང་། སོ་སོར་ཐར་པའི་ཚུལ་ཁྲིམས་ནི་སངས་རྒྱས་ཀྱི་སློབ་མ་འབའ་ཤིག་ལ་ཡོད་མོད་ཀྱི། བསམ་གཏན་གྱི་ཚུལ་ཁྲིམས་ནི་མུ་སྟེགས་ཅན་ལ་ཡང་ཡོད་དོ། །
གསོལ་པ། དགེ་བསྙེན་གྱི་ཁྲིམས་ལྔ་ལ་དུ་ནི་རང་བཞིན་གྱི་སྡིག་ལགས། དུ་ནི་བཅས་པའི་སྡིག་ལགས། བཀའ་སྩལ་པ། བཞི་ནི་རང་བཞིན་གྱི་སྡིག །ཆང་འཐུང་བའི་ཁྲིམས་གཅིག་ནི་བཅས་པའི་སྡིག་གོ། །ཆང་འཐུངས་པ་ནི་
བག་མེད་པ་ལེ་ལོའི་གནས་ཡིན་པ་སྟེ། སྡིག་པ་བཞིའི་གྲོགས་སུ་འགྱུར་རོ། །ཁྲིམས་ལྔ་ལ་ཆང་འཐུང་བ་ནི་བག་མེད་པའི་གཞི་ཡིན་པས། ཁྲིམས་བཞི་ཡང་ཉམས་པར་བྱེད་དེ། དཔེར་ན་སངས་རྒྱས་འོད་སྲུང་གི་ཚེ་དགེ་
བསྙེན་ཞིག་ཆང་འཐུངས་པའི་རྐྱེན་གྱིས་གཞན་གྱི་ཆུང་མ་ལ་འདོད་པས་ལོག་པར་གཡེམ་པ་ཡང་བྱས། ཕ་རོལ་པོའི་བྱ་ཡང་བརྐུས་ནས་བསད་དོ། །གཞན་ཞིག་གིས་ཁྱོད་ཅིའི་ཕྱིར་འདི་ལྟར་བྱེད་ཅེས་དྲིས་ན་བདག་གིས་
བྱས་པ་མེད་ཅེས་ཟེར་ཏེ། དེ་ལྟར་ཆང་འཐུངས་པས་ཁྲིམས་བཞི་ཆར་ཅིག་ཆར་ཉམས་པར་བྱས་སོ། །ཆང་འཐུངས་ན་མཚམས་མེད་པ་བཞི་ཡང་བྱེད་པར་འགྱུར་ཏེ། དགེ་འདུན་གྱི་དབྱེན་འབའ་

71-1-180a

ཤིག་བྱེད་མི་ནུས་སོ། །འདི་ཡང་སྔོན་གྱི་ལས་ཀྱིས་གཉེར་བ་མ་ཡིན་མོད་ཀྱི། འོན་ཀྱང་སྨྱོ་བ་དང་མི་དྲན་པར་སྨྱོ་བ་མྱོང་བར་འགྱུར་རོ། །ཆང་འཐུངས་པས་བན་གླང་རྨྱིས་པ་ལྟར་མྱོས་ཤིང་འཁྲུག་པར་འགྱུར་ཏེ། ཆང་གིས་མྱོས་
ན་ཡང་དག་པའི་ལས་སུ་བྱ་བ་བསམ་གཏན་དང་། མདོ་སྡེ་ཀློག་པ་དང་། འདོན་པ་དང་། དགེ་འདུན་གྱི་ལས་བྱ་བ་རྣམས་ཤོར་བར་འགྱུར་ཏེ། རང་བཞིན་གྱི་སྡིག་པ་མ་ཡིན་མོད་ཀྱི་རང་བཞིན་གྱི་སྡིག་པ་དང་འདྲའོ། །དེ་ནས་མ་འགགས་པས་
ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྙེན་གྱི་ཁྲིམས་ལྟ་བུ་སེམས་ཅན་འབའ་ཤིག་ལས་ཁྲིམས་ཐོབ་བམ། སེམས་ཅན་མ་ཡིན་པ་ལས་ཀྱང་ཐོབ་པར་རུང་། འོན་ཏེ་གསད་དུ་རུང་བ་དང་། རྐུར་ཡོད་པ་དང་། མི་
ཚངས་པར་སྤྱད་དུ་རུང་བ་དང་། བརྫུན་སྨྲར་རུང་བའི་སེམས་ཅན་ལས་ཁྲིམས་ཐོབ་པར་འགྱུར་རམ། འོན་ཏེ་གསད་དུ་མ་རུང་བ་དང་། རྐུར་མ་མཆིས་པ་དང་། མི་ཚངས་པར་སྤྱད་དུ་མི་རུང་བ་དང་། བརྫུན་སྨྲར་མི་རུང་བ་དང་། 
སེམས་ཅན་ལས་ཀྱང་ཁྲིམས་ཐོབ་པར་འགྱུར། བཀའ་སྩལ་པ། སེམས་ཅན་ལས་ནི་ཁྲིམས་བཞི་ཐོབ་པར་འགྱུར་གྱི་སེམས་ཅན་མ་ཡིན་པ་ལས་ཆང་མི་འཐུང་བའི་ཁྲིམས་ཐོབ་པར་འགྱུར་རོ། །སེམས་ཅན་དུ་གཏོགས་པ་གསོད་
དུ་རུང་བ་འམ། གསོད་དུ་མི་རུང་བ་འམ། མི་ཚངས་པར་སྤྱད་དུ་རུང་བ་འམ། མི་རུང་བ་འམ། རྐུར་རུང་བ་འམ། མི་རུང་བ་འམ། བརྫུན་སྨྲར་རུང་བ་འམ། མི་རུང་བ་ཐམས་ཅད་ལས་ཚུལ་ཁྲིམས་ཐོབ་སྟེ། མཚམས་
མེད་པའི་སེམས་ཅན་དམྱལ་བ་ཡན་ཅད། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་མན་ཆད་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པ་དེ་བཞིན་གཤེགས་པའི་བར་དུ་སྲོག་དང་བཅས་པ་ཐམས་ཅད་ལས་ཚུལ་
ཁྲིམས་འདི་བཞི་ཐོབ་པར་རུང་སྟེ། དེ་ཡང་ཐོག་མ་ཚུལ་ཁྲིམས་ནོད་པའི་ཚེ་སྲོག་ཆགས་ཐམས་ཅད་ཀྱི་སྲོག་མི་གཅོད་པ་དང་། ཐམས་ཅད་མ་བྱིན་པར་མི་ལེན་པ་དང་། ཐམས་ཅད་ལ་མི་ཚངས་པར་མི་སྤྱོད་པ་དང་། བརྫུན་ཐམས་ཅད་མི་སྨྲའོ་ཞེས་བྱ་བའི་

71-1-180b

མཐའ་དང་ཚད་གཟུང་དུ་མེད་པས་དེ་བས་ན་སེམས་ཅན་ཐམས་ཅད་ལས་ཚུལ་ཁྲིམས་མི་ཐོབ་པར་འགྱུར་བ་མེད་དོ། །ཚུལ་ཁྲིམས་འབོགས་པ་ཆོ་ག་བཞིན་དུ་བྱས་ན་སྔར་ཁོང་དུ་ཆུད་ཅིང་ཡིད་ཆེས་པར་བྱ་བའི་ཕྱིར་ཆོས་བཤད་ལ་སེམས་ཅན་ཐམས་ཅད་ལ་
བྱམས་པ་དང་སྙིང་རྗེའི་སེམས་བསྐྱེད་དུ་གཞུག་གོ། །དེ་ལྟར་ལྷག་པར་མོས་པའི་སེམས་སྐྱེས་ན་ལྷག་པའི་ཚུལ་ཁྲིམས་ཐོབ་པར་འགྱུར་རོ། །ཡང་ཚུལ་ཁྲིམས་ཐོབ་པ་ནི་སེམས་ཅན་ཐམས་ཅད་ལས་སོ་སོ་ནས་ཚུལ་ཁྲིམས་བཞི་ཐོབ་པར་འགྱུར་ཏེ། ཚུལ་
ཁྲིམས་བཞི་སོ་སོ་ནས་དབྱེ་ན་ཚུལ་ཁྲིམས་བཅུ་གཉིས་སུ་འགྱུར་རོ། །སེམས་ཅན་ལས་སྲོག་མི་གཅོད་པ་དང་། མ་བྱིན་པར་མི་ལེན་པ་དང་། མི་ཚངས་པར་མི་སྤྱོད་པ་དང་། བརྫུན་མི་སྨྲ་བས་བཟློག་པའི་ཉེས་པ་བཞི་སྐྱེ་བ་ཡང་རྒྱུ་དང་རྐྱེན་གསུམ་
གྱི་ཕྱིར་ཏེ། དེ་ཡང་འདོད་ཆགས་ལས་སྐྱེ་བ་དང་། ཞེ་སྡང་ལས་སྐྱེ་བ་དང་། གཏི་མུག་ལས་སྐྱེ་བའོ། །སེམས་ཅན་ཐམས་ཅད་ལ་མི་དགེ་བ་བཅུ་གཉིས་པོ་འདི་ཡོད་དེ། མི་དགེ་བ་འདི་ལས་བཟློག་ན་དགེ་བའི་ཚུལ་ཁྲིམས་ཀྱི་རྣམ་པར་རིག་བྱེད་
གྱི་གཟུགས་བཅུ་གཉིས་ཐོབ་པར་འགྱུར་རོ། །དཔག་ཏུ་མེད་པའི་སེམས་ཅན་ཐམས་ཅད་ལས་ཐོབ་པ་ཡང་དེ་དང་འདྲའོ། །གལ་ཏེ་དགྲ་བཅོམ་པ་ཁྲི་ཕྲག་བརྒྱ་འམ། འབུམ་ཕྲག་བརྒྱ་མྱ་ངན་ལས་འདས་ཀྱང་ཐོག་མར་དགྲ་བཅོམ་པ་དེ་དག་
ལས་ཚུལ་ཁྲིམས་ཐོབ་ན་དགྲ་བཅོམ་པ་མྱ་ངན་ལས་འདས་ཀྱང་ཚུལ་ཁྲིམས་ཉམས་པར་འགྱུར་བ་མ་ཡིན་ནོ། །ཆང་མི་འཐུང་བའི་ཁྲིམས་ནི་ལུས་འདི་ཐོག་མ་ནས་ཐ་མའི་བར་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
ཇི་ཙམ་ཚད་དུ་གཏོགས་པ་ཐམས་ཅད་ལ་རྔུབ་རེ་ཞིང་ཁྲིམས་ཀྱི་རྣམ་པར་རིག་བྱེད་ཀྱི་གཟུགས་འཐོབ་སྟེ། ཐོག་མ་ཁྲིམས་ནོད་པའི་ཚེ་ཆང་ཐམས་ཅད་མི་འཐུང་ངོ་ཞེས་བྱས་པས་གལ་ཏེ་ཆང་ཐམས་ཅད་ཟད་ཀྱང་ཚུལ་ཁྲིམས་ནི་རྟག་ཏུ་ཡོད་
པས་མི་ཉམས་སོ། །གསོལ་པ། ཐོག་མ་ཁྲིམས་ནོད་པའི་ཚེ་བུད་མེད་ཐམས་ཅད་ཀྱི་སྒོ་གསུམ་ནས་འདོད་པས་ལོག་པར་མི་གཡེམ་པའི་ཁྲིམས་མནོས་ལ་ཕྱིས་ཆུང་མ་བླངས་ན་ཚུལ་ཁྲིམས་འདི་ཉམས་པར་འགྱུར་རམ། བཀའ་སྩལ་པ། ཉམས་པར་

71-1-181a

མི་འགྱུར་རོ། །ཇི་ལྟ་ཞེ་ན། ཐོག་མ་བུད་མེད་ལ་འདོད་པས་ལོག་པར་མི་གཡེམ་པའི་ཁྲིམས་ཐོབ་ལ་འདི་ནི་བདག་གི་ཆུང་མ་ཡིན་པས་འདོད་པས་ལོག་པར་གཡེམ་པ་མ་ཡིན་ཏེ། ཁྲིམས་འདི་ནི་ཉམས་པར་མི་འགྱུར་རོ། །དོན་འདི་
དང་སྦྱར་ན་ཐམས་ཅད་འཐུན་ཏེ། ཁྲིམས་བརྒྱད་དང་ཁྲིམས་བཅུ་དང་། སེམས་ཅན་དང་། སེམས་ཅན་མ་ཡིན་པ་རྣམས་ལས་ཚུལ་ཁྲིམས་ཐོབ་པ་ཡང་དེ་དང་འདྲའོ། །ཚུལ་ཁྲིམས་ཉིས་བརྒྱ་ལྔ་བཅུ་ཡང་སེམས་ཅན་ཀུན་ལ་སོ་སོ་ནས་
ཚུལ་ཁྲིམས་བདུན་བདུན་ཞིག་ཐོབ་སྟེ། དེ་ཡང་རྣམ་པར་དབྱེ་ན་ཚུལ་ཁྲིམས་ཉི་ཤུ་རྩ་གཅིག་ཏུ་འགྱུར་རོ། །སེམས་ཅན་ཐམས་ཅད་ལ་ལུས་དང་ངག་གི་སྡིག་པ་བདུན་འབྱུང་སྟེ། སྡིག་པ་འབྱུང་བ་འདི་ཡང་རྒྱུ་དང་རྐྱེན་རྣམ་པ་གསུམ་གྱིས་
སྐྱེའོ། །དེ་ཡང་འདོད་ཆགས་ཀྱིས་སྐྱེ་བ་དང་། ཞེ་སྡང་གིས་སྐྱེ་བ་དང་། གཏི་མུག་གིས་སྐྱེ་བ་སྟེ། དེ་ལྟར་ན་རྒྱུ་དང་རྐྱེན་གསུམ་གྱིས་སྡིག་པ་བདུན་སྐྱེ་སྟེ། དེ་ལྟར་ན་མི་དགེ་བའི་སྡིག་པ་བདུན་གསུམ་ཉི་ཤུ་གཅིག་གོ། །སྡིག་པ་དེ་ལས་བཟློག་ན་
ཚུལ་ཁྲིམས་སུ་འགྱུར་ཏེ། སེམས་ཅན་གཅིག་ལ་ཚུལ་ཁྲིམས་ཀྱི་རྣམ་པར་རིག་བྱེད་ཀྱི་གཟུགས་ཉི་ཤུ་རྩ་གཅིག་ཡོད་པ་བཞིན་དུ་སེམས་ཅན་ཐམས་ཅད་ལ་ཡང་དེ་དང་འདྲའོ། །དོན་དེ་དང་སྦྱར་ན་དུས་གཅིག་ཏུ་ཚུལ་
ཁྲིམས་གྲངས་མེད་པ་ཐོབ་པར་ནི་རུང་གི། དུས་གཅིག་ཏུ་ཅིག་ཆར་ཉམས་པར་འགྱུར་བ་འམ། དུས་གཅིག་ཏུ་མེད་པར་འགྱུར་བ་ནི་མ་ཡིན་ནོ། །ཚུལ་ཁྲིམས་ཉམས་ཤེས་བྱ་བ་ནི་གལ་ཏེ་ཚུལ་ཁྲིམས་ཀྱི་རྩ་བ་ཉམས་
ན་གོང་ནས་གོང་དུ་འཕར་བར་མི་འགྱུར་ཏེ། ཇི་སྟེ་ཚུལ་ཁྲིམས་ཕུལ་ལ་ཕྱིས་ནོད་ན་ཡང་ཚུལ་ཁྲིམས་ཐོབ་པར་མི་འགྱུར་རོ། །དཔེར་ན་ཉིན་ཞག་གཅིག་གི་ཡན་ལག་བརྒྱད་པའི་ཁྲིམས་ཀྱི་རྩ་བ་ཉམས་ན་ཕྱིས་ཁྲིམས་
བརྒྱད་དམ། ཁྲིམས་ལྔ་འམ། ཁྲིམས་བཅུའམ། ཁྲིམས་རྫོགས་པ་འམ། བསམ་གཏན་གྱི་ཚུལ་ཁྲིམས་སམ། ཟག་པ་མེད་པའི་ཚུལ་ཁྲིམས་སམ། ཚུལ་ཁྲིམས་འདི་དག་གང་ཡང་ནོད་དུ་མི་རུང་ངོ་། གལ་ཏེ་ཚུལ་ཁྲིམས་

71-1-181b

ལྔའི་རྩ་བ་ཉམས་ན་ཡང་ཁྲིམས་བརྒྱད་དམ། བཅུ་འམ། ཚུལ་ཁྲིམས་རྫོགས་པ་འམ། བསམ་གཏན་གྱི་ཚུལ་ཁྲིམས་སམ། ཟག་པ་མེད་པའི་ཚུལ་ཁྲིམས་ཀྱང་ཐམས་ཅད་ཐོབ་པར་མི་རུང་ངོ་། །གལ་ཏེ་ཁྲིམས་ལྔ་ཉམས་པའི་འོག་ཏུ་ཁྲིམས་ལྔ་ཕུལ་ལ་
ཁྲིམས་བཅུ་ནོད་པ་དེ་ནི་གནས་མ་ཡིན་ནོ། །གལ་ཏེ་ཁྲིམས་ལྔ་ཕུལ་བའི་འོག་ཏུ་ཁྲིམས་ལྔ་ནོད་ཀྱང་རུང་། ཁྲིམས་བརྒྱད་དམ། ཁྲིམས་བཅུ་འམ། ཁྲིམས་རྫོགས་པ་འམ། བསམ་གཏན་གྱི་ཚུལ་ཁྲིམས་སམ། ཟག་པ་མེད་པའི་ཁྲིམས་མནོས་ཀྱང་
ཁྲིམས་གང་ཡང་མི་འཐོབ་བོ། །གལ་ཏེ་ཁྲིམས་བཅུ་འམ། ཁྲིམས་རྫོགས་པའི་རྩ་བ་ཉམས་ན་གོང་ནས་གོང་དུ་འཕར་བ་འམ། ཁྲིམས་ཕུལ་ཏེ་ཁྲིམས་ནོད་པ་ནི་ཇི་ལྟར་ཁྲིམས་ལྔ་ལས་བཤད་པ་དང་འདྲའོ། །གསོལ་པ། བསམ་གཏན་གྱི་ཚུལ་ཁྲིམས་
དང་། ཟག་པ་མེད་པའི་ཚུལ་ཁྲིམས་དང་། སོ་སོར་ཐར་པའི་ཚུལ་ཁྲིམས་དང་། ཚུལ་ཁྲིམས་འདི་གསུམ་ལས་ཚུལ་ཁྲིམས་མཆོག་ཅེས་བགྱི་བ་གང་ལགས། བཀའ་སྩལ་པ། བསམ་གཏན་གྱི་ཚུལ་ཁྲིམས་མཆོག་ཏེ། གཞན་དུ་ན་སོ་སོར་ཐར་པའི་
ཚུལ་ཁྲིམས་ཀྱང་མཆོག་ཡིན་ནོ། །དེ་ཇི་ལྟ་ཞེ་ན། གལ་ཏེ་སངས་རྒྱས་འཇིག་རྟེན་དུ་གཤེགས་ན་ཚུལ་ཁྲིམས་འདི་ཡོད་པར་འགྱུར་གྱི། བསམ་གཏན་གྱི་ཚུལ་ཁྲིམས་དང་། ཟག་པ་མེད་པའི་ཚུལ་ཁྲིམས་ནི་ཐམས་ཅད་
ཀྱི་དུས་སུ་ཡོད་དོ། །སོ་སོར་ཐར་པའི་ཚུལ་ཁྲིམས་ནི་སེམས་ཅན་དང་སེམས་ཅན་མ་ཡིན་པ་ལས་ཀྱང་ཐོབ་པར་རུང་གི། བསམ་གཏན་གྱི་ཚུལ་ཁྲིམས་དང་། ཟག་པ་མེད་པའི་ཚུལ་ཁྲིམས་ནི་སེམས་ཅན་ཐམས་ཅད་ལས་ཐོབ་པ་
ཡིན་ནོ། །སོ་སོར་ཐར་པའི་ཚུལ་ཁྲིམས་ནི་སེམས་ཅན་ཐམས་ཅད་ལ་བྱམས་པའི་སེམས་ཀྱིས་ཐོབ་པར་འགྱུར་གྱི། བསམ་གཏན་གྱི་ཚུལ་ཁྲིམས་དང་ཟག་པ་མེད་པའི་ཚུལ་ཁྲིམས་ནི་བྱམས་པའི་སེམས་ཀྱིས་ཐོབ་པ་མ་ཡིན་ནོ། །སོ་སོར་
ཐར་པའི་ཚུལ་ཁྲིམས་ནི་སངས་རྒྱས་ཀྱི་ཆོས་འཛིན་པར་འཁོར་རྣམ་པ་བདུན་འཇིག་རྟེན་ན་ཡོད་ཅིང་ཐེག་པ་རྣམ་གསུམ་གྱི་འབྲས་བུ་རྒྱུན་མི་འཆད་པར་བྱེད་པའི་གཞིར་འགྱུར་བ་ཡིན་གྱི། བསམ་གཏན་གྱི་ཁྲིམས་དང་། ཟག་པ་མེད་པའི་ཁྲིམས་ནི་དེ་ལྟ་བུ་

71-1-182a

མ་ཡིན་ཏེ། དེ་བས་ན་ཁམས་གསུམ་ན་མཆོག་རབ་ཕུལ་དུ་གྱུར་པ་ཡིན་ནོ། །ཐོག་མ་ཁྲིམས་ནོད་པའི་ཚེ་གསོལ་བ་དང་ཞུ་བ་བཞིའི་ལས་བྱས་མ་ཐག་ཏུ་ཚུལ་ཁྲིམས་རྫོགས་པར་འགྱུར་ཏེ། ཐོག་མའི་སེམས་སྐད་ཅིག་མ་དང་པོའི་ཚུལ་ཁྲིམས་ཀྱི་རྣམ་
པར་རིག་བྱེད་ཀྱི་གཟུགས་ནི་ལས་ཤེས་ཀྱང་བྱ། ལས་ཀྱི་ལམ་ཞེས་ཀྱང་བྱའོ། །སེམས་སྐད་ཅིག་མ་ཕྱི་མ་ལས་ཁྲིམས་ཀྱི་རྣམ་པར་རིག་བྱེད་ཀྱི་གཟུགས་བྱུང་བ་ནི་ལས་ཤེས་བྱའི། ལས་ཀྱི་ལམ་མ་ཡིན་ནོ། །དེ་ལྟ་བས་ན་སེམས་ཀྱི་སྐད་ཅིག་མ་
དང་པོ་ལས་ཚུལ་ཁྲིམས་ཀྱི་རྣམ་པར་རིག་བྱེད་ཀྱི་གཟུགས་བསམ་པ་ཡོངས་སུ་རྫོགས་ཏེ། བསམ་པ་དང་ལྡན་པས་བསམ་པའི་ལས་ཀྱི་ལམ་ཞེས་བྱའོ། །ཚུལ་ཁྲིམས་སྔ་མས་རྒྱུ་བྱས་ཏེ། ཚུལ་ཁྲིམས་ལྷག་མའི་རྣམ་པར་རིག་བྱེད་ཀྱི་གཟུགས་
ལྷུན་གྱིས་གྲུབ་པས་དེ་བས་ན་དེ་ལ་ལས་ཤེས་བྱའི་ལས་ཀྱི་ལམ་མ་ཡིན་ནོ། །དང་པོའི་སེམས་སྐད་ཅིག་མ་གཅིག་གི་ཁྲིམས་ནི་ཆོ་ག་དང་ཡང་བཅས་ལ་ཆོ་ག་མེད་པ་ཡང་མ་ཡིན་ནོ། །ཕྱིས་རིམ་གྱིས་སྐྱེ་བའི་ཁྲིམས་ནི་ཆོ་ག་མེད་པ་འབའ་ཤིག་
དང་ལྡན་གྱི། ཆོ་ག་དང་བཅས་པ་མ་ཡིན་ནོ། །ཐོག་མའི་སེམས་སྐད་ཅིག་མ་གཅིག་གི་ཁྲིམས་ནི་ཚུལ་ཁྲིམས་ཤེས་ཀྱང་བྱ། དགེ་བར་སྤྱོད་པ་ཞེས་ཀྱང་བྱ། འདུལ་བ་ཞེས་ཀྱང་བྱའོ། །ཕྱིས་རིམ་གྱིས་དེ་མ་ཐག་ཏུ་སྐྱེ་བའི་ཚུལ་ཁྲིམས་
ཀྱང་དོན་དེ་དང་ལྡན་ནོ། །དེ་ནས་མ་འགགས་པས་ཡང་བཅོམ་ལྡན་འདས་ལ་གསོལ་པ། དུས་གསུམ་དུ་བཀུམ་པའི་ནང་ན་དུས་གང་གིས་ཚུལ་ཁྲིམས་ཐོབ་པར་འགྱུར། བཀའ་སྩལ་པ། ད་ལྟར་གྱི་དུས་ཀྱི་སེམས་སྐད་ཅིག་མ་
གཅིག་གིས་ཁྲིམས་ཐོབ་པར་འགྱུར་རོ། །འདས་པ་དང་མ་འོངས་པ་ནི་ཆོས་ཡིན་ཏེ། སེམས་ཅན་མ་ཡིན་པས་ཁྲིམས་མི་འཐོབ་ཀྱི། ད་ལྟར་གྱི་སེམས་སྐད་ཅིག་མ་གཅིག་ནི་སེམས་ཅན་ཡིན་པས་ན་ཁྲིམས་འཐོབ་བོ། །
གསོལ་པ། དགེ་བའི་སེམས་ཀྱིས་ཚུལ་ཁྲིམས་ཐོབ་བམ། མི་དགེ་བའི་སེམས་སམ། འོན་ཏེ་ལུང་དུ་མ་བསྟན་པའི་སེམས་ཀྱིས་སམ། སེམས་མེད་པས་ཁྲིམས་ཐོབ་པར་འགྱུར། བཀའ་སྩལ་པ། ཐམས་ཅད་ཀྱིས་ཐོབ་པར་

71-1-182b

འགྱུར་ཏེ། ཐོག་མ་དགེ་བའི་སེམས་ཀྱིས་དགེ་འདུན་གྱི་རྐང་པ་ལ་ཕྱག་བྱས་ལ་ཆོས་གོས་དང་ལྷུང་བཟེད་བླངས་ཏེ་མཁན་པོ་གང་ཡིན་པ་ལ་གསོལ་བ་གདབ་བོ། །དེ་ནས་ཙོག་ཙོག་པོར་འདུག་སྟེ་ཐལ་མོ་སྦྱར་ལ་གསོལ་བ་དང་ཞུ་བ་བཞིའི་ལས་བར་ཆད་
མེད་པར་དགེ་བའི་སེམས་ཀྱིས་ཁྲིམས་རྫོགས་པ་ནི་དགེ་བའི་སེམས་ཀྱིས་ཚུལ་ཁྲིམས་ཐོབ་པ་ཞེས་བྱའོ། །གལ་ཏེ་དེ་ལྟར་ཆོ་ག་རིམས་ཀྱིས་བྱེད་པ་ན་རྟག་ཏུ་དགེ་བའི་སེམས་དང་ལྡན་ཏེ། ལས་བྱེད་པ་ལས་གསོལ་བ་དང་ཞུ་བ་བཞིའི་ལས་བྱེད་
པའི་ཚེ། འདོད་ཆགས་དང་ཞེ་སྡང་ལ་སོགས་པ་མི་དགེ་བའི་བསམ་པ་བྱུང་ན་སེམས་ཅན་དེ་ཉིད་ཀྱིས་ཚུལ་ཁྲིམས་ཀྱི་རྣམ་པར་རིག་བྱེད་ཀྱི་གཟུགས་དང་ལྡན་ཡང་དེ་ནི་མི་དགེ་བའི་སེམས་ཀྱིས་ཁྲིམས་ཐོབ་པ་ཞེས་བྱ་སྟེ། དེ་ཡང་ཐོག་མའི་
དགེ་བའི་སེམས་དང་། དགེ་བའི་ལས་ཀྱི་ཤུགས་ཀྱིས་ཁྲིམས་ཐོབ་པ་ཡིན་གྱི་མི་དགེ་བའི་སེམས་ཀྱིས་ཐོབ་པ་མ་ཡིན་ནོ། །སྔར་དགེ་བའི་སེམས་ཀྱིས་ཆོ་གའི་ལས་བྱས་ལ་གསོལ་བ་དང་ཞུ་བ་བཞིའི་ལས་བྱེད་པའི་ཚེ། གལ་ཏེ་གཉིད་ལོག་གམ་
ཡུར་ན་ལོག་ཅིང་ཡུར་བའི་སེམས་ལས་ཁྲིམས་ཀྱི་རྣམ་པར་རིག་བྱེད་ཀྱི་གཟུགས་སྐྱེ་བ་ནི་ལུང་དུ་མ་བསྟན་པའི་སེམས་ཀྱིས་ཁྲིམས་ཐོབ་པ་ཞེས་བྱའོ། །སྔར་དགེ་བའི་སེམས་ཀྱིས་ཆོ་ག་བྱས་ལ་གསོལ་བ་དང་ཞུ་བ་བཞིའི་ལས་བྱེད་
པའི་འགོག་པའི་ཏིང་ངེ་འཛིན་ལ་སྙོམས་པར་ཞུགས་ན་དེའི་ཚེ་ཁྲིམས་ཀྱི་རྣམ་པར་རིག་བྱེད་ཀྱི་གཟུགས་དང་ལྡན་པས་དེ་ནི་སེམས་མེད་པ་ལས་ཁྲིམས་ཐོབ་པ་ཞེས་བྱའོ། །མ་འགགས་པས་ཡང་གསོལ་པ་གལ་ཏེ་ཁྱིམ་པས་ཁྲིམས་
ལྔ་མ་མནོས་པར་ཐལ་བྱུང་ཁྲིམས་བཅུ་མནོས་ན། ཁྲིམས་ཐོབ་པར་འགྱུར་རམ། བཀའ་སྩལ་པ། དུས་གཅིག་དུ་དགེ་བསྙེན་གྱི་ཁྲིམས་དང་། དགེ་སྦྱོང་གི་ཁྲིམས་རྣམ་པ་གཉིས་ཐོབ་བོ། །གལ་ཏེ་ཁྲིམས་ལྔ་ཡང་མ་མནོས། ཁྲིམས་བཅུ་ཡང་མ་མནོས་པར་ཐལ་བྱུང་ཁྲིམས་
རྫོགས་པར་མནོས་ན་ཡང་དུས་གཅིག་ཏུ་ཁྲིམས་གསུམ་ཆར་ཐོབ་པར་འགྱུར་རོ། །མ་འགགས་པས་གསོལ་པ། བཅོམ་ལྡན་འདས་གལ་ཏེ་ཁྲིམས་རྫོགས་པར་མནོས་པས་དུས་གཅིག་ཏུ་ཁྲིམས་རྣམ་པ་གསུམ་ཆར་ཐོབ་པར་འགྱུར་ན། རིམས་ཀྱིས་

71-1-183a

སྔར་ཁྲིམས་ལྔ་མནོས་ལ་དེའི་འོག་ཏུ་ཁྲིམས་བཅུ་མནོས་ཏེ། ཕྱིས་ཁྲིམས་རྫོགས་པར་མནོད་དོ་ཞེས་བགྱིར་ཡང་ཅི་འཚལ། བཀའ་སྩལ་པ། དུས་གཅིག་ཏུ་ཚུལ་ཁྲིམས་གསུམ་ཆར་ཐོབ་མོད་ཀྱི། གང་སངས་རྒྱས་ཀྱི་ཆོས་ལ་ལྷག་
པར་མོས་པ་ནི་གདོན་མི་ཟ་བར་རིམས་ཀྱིས་སྔར་ཁྲིམས་ལྔ་མནོས་ཏེ། དུལ་བར་བྱས་ལ་དད་པ་དང་། མོས་པ་ལྷག་པར་སྐྱེས་ནས་དེའི་འོག་ཏུ་ཁྲིམས་བཅུ་ནོད་དོ། །ཁྲིམས་བཅུ་མནོས་ནས་དགེ་བའི་རྩ་བ་ལྷག་པར་སྐྱེས་ནས་དེའི་འོག་ཏུ་ཚུལ་
ཁྲིམས་རྫོགས་པར་མནོས་ན། དེ་ལྟར་རིམས་ཀྱིས་སངས་རྒྱས་ཀྱི་ཆོས་ཀྱི་རོ་ཐོབ་ཅིང་མོས་པ་བརྟན་པ་མི་ཤིགས་པར་འགྱུར་རོ། །དཔེར་ན་རྒྱ་མཚོ་ཆེན་པོར་འཇུག་པ་ཡང་བགས་ཀྱིས་ཟབ་པ་དང་འདྲ་བར་སངས་རྒྱས་ཀྱི་ཆོས་ཀྱི་རྒྱ་མཚོར་
འཇུག་པ་ཡང་དེ་དང་འདྲ་སྟེ། ཚུལ་ཁྲིམས་རྫོགས་པར་ཅིག་ཅར་མནོས་ན་གོ་རིམས་ཀྱང་ཤོར་ལ་སྤྱོད་ལམ་ཡང་ཉམས་པར་འགྱུར་རོ། །གཞན་དུ་ན་ཚུལ་ཁྲིམས་ཀྱང་སེམས་ཅན་ཁ་ཅིག་ནི་ཁྲིམས་ལྔ་མནོས་པས་ལམ་གྱི་འབྲས་བུ་ཐོབ་པར་
འགྱུར་བ་ཡང་ཡོད་དོ། །སེམས་ཅན་ཁ་ཅིག་ནི་ཚུལ་ཁྲིམས་བཅུ་མནོས་པའི་རྐྱེན་གྱིས་ལམ་གྱི་འབྲས་བུ་ཐོབ་པ་ཡང་ཡོད་དེ། དེ་ལྟར་རྒྱུ་དང་རྐྱེན་རྣམ་པ་ཐ་དད་པས་ན་དེ་བཞིན་གཤེགས་པས་གོ་རིམས་བསྟན་པ་ཡིན་ནོ། །གལ་ཏེ་
སྔར་ཁྲིམས་ལྔ་མནོས་ལ་དེའི་འོག་ཏུ་ཁྲིམས་བཅུ་མནོས་ན་ཁྲིམས་བཅུ་མནོས་པའི་ཚེ་ཡང་ཁྲིམས་གཉིས་ཀ་དང་ལྡན་ནོ། །ཁྲིམས་ལྔ་དང་ཁྲིམས་བཅུ་མནོས་པའི་འོག་ཏུ་ཁྲིམས་རྫོགས་པར་མནོས་ན་རྫོགས་པར་མནོས་པའི་ཚེ་ཁྲིམས་གསུམ་
ཆར་དང་ཡང་ལྡན་ནོ། །ཁྲིམས་ལྔ་དང་ཁྲིམས་བཅུ་དང་། ཁྲིམས་རྫོགས་པར་མནོད་པ་རྣམ་པ་བདུན་ལ་གསོལ་བ་དང་ཞུ་བ་བཞིའི་ལས་བྱེད་པའི་ཁྲིམས་འབའ་ཤིག་ནི་རིམ་གྱིས་དུས་གསུམ་དུ་ཐོབ་བོ། །ལྷག་མ་རྣམ་པ་དྲུག་ནོད་པ་ནི་དུས་གཅིག་
གིས་ཐོབ་ཀྱི། དུས་གསུམ་གྱི་རིམ་པ་མེད་དོ། །དེ་ལྟར་ཚུལ་ཁྲིམས་རྣམ་པ་གསུམ་དུས་གཅིག་ཏུ་ཐོབ་པ་འགལ་ཏེ་ཚུལ་ཁྲིམས་ཕྱིར་དབུལ་བའི་ཚེ་བདག་ནི་དེང་ཕྱིན་ཆད་དགེ་སྦྱོང་ཡིན་ཏེ། དགེ་སློང་མ་ཡིན་ནོ་ཞེས་སྨྲས་པས་ཚུལ་ཁྲིམས་རྫོགས་པ་མེད་ཀྱང་

71-1-183b

ཚུལ་ཁྲིམས་གཉིས་མེད་པ་མ་ཡིན་ཏེ་ཡོད་དོ། །ཚུལ་ཁྲིམས་ལྔ་དང་། ཚུལ་ཁྲིམས་བཅུ་མནོས་པ་ལས་ད་ཕྱིན་ཅད་བདག་དགེ་བསྙེན་ཡིན་ཏེ། དགེ་སྦྱོང་མ་ཡིན་ནོ་ཞེས་སྨྲས་ན་ཁྲིམས་བཅུ་མེད་པར་ཟད་ཀྱི། ཁྲིམས་ལྔ་ཡོད་དོ། །གལ་ཏེ་བདག་ནི་ཁྱིམ་
པ་དང་རབ་ཏུ་བྱུང་བའི་ཚུལ་ཁྲིམས་ཐམས་ཅད་དབུལ་ཏེ། བདག་ལ་སྐྱབས་སུ་འགྲོ་བའི་དགེ་བསྙེན་དུ་ཟུང་ཤིག་ཅེས་སྨྲས་ན་ཚུལ་ཁྲིམས་རྣམ་པ་གསུམ་ཅིག་ཆར་མེད་ཀྱང་སྐྱབས་སུ་འགྲོ་བ་གསུམ་མེད་པ་མ་ཡིན་ནོ། །གོ་རིམས་ཀྱིས་ཚུལ་ཁྲིམས་རྣམ་པ་གསུམ་
ཐོབ་པ་དང་། ཕྱིར་དབུལ་བའི་ཆོ་ག་དང་། རིམ་པ་ནི་ཇི་ལྟར་དུས་གཅིག་ཏུ་ཁྲིམས་ཐོབ་པ་བསྟན་པ་དང་འདྲའོ། །གསོལ་པ་གལ་ཏེ་སྔོན་དགེ་བསྙེན་ལས་རབ་ཏུ་བྱུང་སྟེ་ཁྲིམས་བཅུ་མནོས་ན་ཁྲིམས་ལྔ་མ་མཆིས་པར་མི་འགྱུར་རམ། བཀའ་སྩལ་པ། མེད་པར་མི་འགྱུར་ཏེ། མིང་
དང་གོ་རིམས་བརྗེས་པར་ཟད་ཀྱི། ཁྲིམས་མེད་པར་འགྱུར་བ་མ་ཡིན་ནོ། །དེ་ཡང་དགེ་བསྙེན་གྱི་མིང་སྟོར་ཏེ་དགེ་སྦྱོང་གི་མིང་ཐོབ་བོ། །ཁྱིམ་པའི་གོ་རིམས་སྟོར་གྱི་རབ་ཏུ་བྱུང་བའི་གོ་རིམས་ཐོབ་བོ། །གསོལ་པ་དགེ་སློང་གི་ཚུལ་ཁྲིམས་རྫོགས་པར་མནོས་ན་
ཁྲིམས་བཅུ་དང་ཁྲིམས་ལྔ་མ་མཆིས་པར་མི་འགྱུར་རམ། བཀའ་སྩལ་པ་མེད་པར་མི་འགྱུར་ཏེ། དེ་ཡང་མིང་དང་གོ་རིམས་སྟོར་བར་ཟད་དེ། དགེ་སྦྱོང་གི་མིང་སྟོར་ནས་དགེ་སློང་གི་མིང་ཐོབ་བོ། །དགེ་སྦྱོང་གི་གོ་རིམས་སྟོར་ནས། དགེ་སློང་གི་གོ་རིམས་
ཐོབ་སྟེ། ཐོག་མ་དང་ཐ་མའི་བར་དུ་ཚུལ་ཁྲིམས་ཡིན་གྱི། མིང་ཙམ་ནི་འཕྲལ་ལ་འདོགས་སོ། །དཔེར་ན་བསྐྱེད་ཤིང་དང་ཤིང་གི་ལོ་མ་ལྟ་བུ་དཔྱིད་དང་དབྱར་ནི་སྔོ། སྟོན་ནི་སེར། དགུན་ནི་སྐྱ་སྟེ། དེ་ཡང་དུས་ཀྱིས་བསྒྱུར་བས་ཤིང་གི་ལོ་མ་ཁ་དོག་ཐ་དད་
པར་འགྱུར་གྱི། ཐོག་མ་ནས་ཐ་མའི་བར་དུ་ཤིང་གི་ལོ་མར་ཟད་དེ་ཚུལ་ཁྲིམས་ཡང་དེ་དང་འདྲ་བར་རྟག་ཏུ་ཚུལ་ཁྲིམས་གཅིག་ཏུ་ཟད་ན་དུས་ཀྱིས་ཐ་དད་པར་འགྱུར་རོ། །གཞན་ཡང་དཔེར་ན་འོ་མ་དང་། ཞོ་དང་། མར་དང་། མར་གྱི་སྙིང་
པོ་ནི་རྣམ་པ་བཞིར་ཐ་དད་དེ། དེ་ལྟར་དུས་ཀྱི་ཐ་དད་ཀྱང་གཅིག་ཏུ་ཟད་པ་དང་འདྲ་བར། ཚུལ་ཁྲིམས་ཀྱང་དེ་དང་འདྲ་སྟེ། དུས་གསུམ་གྱིས་ཐ་དད་ཀྱང་། ཚུལ་ཁྲིམས་ལ་ཐ་དད་པ་མེད་དོ། །མ་འགགས་

71-1-184a

པས་ཡང་གསོལ་པ། བཅོམ་ལྡན་འདས་དགེ་བསྙེན་ཁྲིམས་ནོད་པ་ཉམས་ཀྱིས་རྫོགས་པར་ནོད་པར་མི་ནུས་པ་ཚུལ་ཁྲིམས་གཅིག་གམ། གཉིས་སམ། བཞིའི་བར་དུ་མནོས་ན་ཚུལ་ཁྲིམས་མནོས་པར་ཆུད་དམ། བཀའ་སྩལ་པ། དེས་
ཁྲིམས་མི་འཐོབ་བོ་གསོལ་པ། གལ་ཏེ་ཁྲིམས་མི་ཐོབ་ན་མདོ་སྡེ་དག་ལས་ཕྱོགས་ཆ་ཆུང་བའི་དགེ་བསྙེན་དང་། ཕྱོགས་ཆ་ཆེ་བའི་དགེ་བསྙེན་དང་། ཕྱོགས་ཆ་རྫོགས་པའི་དགེ་བསྙེན་མཆིས་པར་གསུངས་ན་དེའི་དོན་དེ་ཇི་ལྟ་བུ་ལགས། བཀའ་
སྩལ་པ། དེ་སྐད་ཅེས་གསུངས་པ་ཡང་ཁྲིམས་བསྲུངས་པའི་ཡོན་ཏན་ཆེ་ཆུང་ཡོད་པ་ལས་དགོངས་ཏེ་གསུངས་ཀྱི། དེ་ལྟར་ཚུལ་ཁྲིམས་མནོད་དུ་རུང་བ་ནི་མ་ཡིན་ནོ། །མ་འགགས་པས་ཡང་གསོལ་པ། བཅོམ་ལྡན་འདས་ཁྲིམས་ལྔ་ནོད་པའི་ཉིན་
ཞག་གཅིག་གམ། ཉིན་ཞག་གཉིས་ནས་ཉིན་ཞག་བཅུའི་བར་དུ་དེ་ལྟར་མནོས་ན་ཁྲིམས་ཐོབ་པར་འགྱུར་རམ། བཀའ་སྩལ་པ། དེ་ལྟར་མི་རུང་ངོ་། །སངས་རྒྱས་ཀྱིས་ཚུལ་ཁྲིམས་བཅས་པ་ཡང་སོ་སོ་ནས་དུས་དང་ཚད་ཡོད་དེ། དེ་ཡང་ཚུལ་
ཁྲིམས་ལྔ་ནོད་པ་ནི་གདོན་མི་ཟ་བར་ནམ་འཚོའི་བར་དུ་མནོད་དགོས་སོ། །གལ་ཏེ་ཡན་ལག་བརྒྱད་པའི་ཁྲིམས་མནོད་ན་གདོན་མི་ཟ་བར་ཉིན་ཞག་གཅིག་པ་མནོད་དགོས་ཏེ། དེ་བས་ན་སྔ་མ་མི་རུང་ངོ་། །གསོལ་བ་དང་ཞུ་བ་བཞིའི་ལས་བྱས་ཏེ་
ཁྲིམས་ནོད་པ་ཡང་རབ་དང་། འབྲིང་དང་། ཐ་མ་ཡོད་དོ། །དེ་ལ་ཁྲིམས་ལྔ་ནི་ཁྲིམས་ཐ་མའོ། །ཁྲིམས་བཅུ་ནི་ཁྲིམས་འབྲིང་པོའོ། །ཁྲིམས་རྫོགས་པ་ནི་ཁྲིམས་རབ་ཅེས་བྱའོ། །ཁྲིམས་ལྔ་ལ་ཡང་རབ་འབྲིང་རྣམ་པ་གསུམ་སྟེ། 
གལ་ཏེ་ཆུང་ཞིང་ཞན་པའི་སེམས་ཀྱིས་ཁྲིམས་མནོས་པ་ནི་ཁྲིམས་ཐ་མ་ཞེས་བྱའོ། །སེམས་འབྲིང་གིས་ཚུལ་ཁྲིམས་མནོས་པ་ནི་ཁྲིམས་འབྲིང་ཐོབ་པར་འགྱུར་རོ། །གལ་ཏེ་སེམས་རབ་ཀྱིས་ཚུལ་ཁྲིམས་མནོས་པ་
ནི་ཁྲིམས་རབ་ཐོབ་པར་འགྱུར་རོ། །ཚུལ་ཁྲིམས་རྫོགས་པ་ལ་རབ་འབྲིང་གསུམ་ཡོད་པ་ཡང་ཁྲིམས་ལྔ་བསྟན་པ་བཞིན་ནོ། །གལ་ཏེ་སྔར་སེམས་ཐ་མས་ཁྲིམས་མནོས་པའི་འོག་ཏུ་ཁྲིམས་རབ་འབྲིང་གིས་

71-1-184b

ཁྲིམས་བཅུ་མནོས་ན་ཁྲིམས་ལྔ་ནི་སྔ་མ་ལས་སྐྱེ་ཞིང་ལྷག་པ་མེད་ཀྱི། ཁྲིམས་ལྔ་མ་གཏོགས་པར་ཁ་ཟས་དུས་མ་ཡིན་པར་མི་བཟའ་བའི་བར་དུ་ཁྲིམས་ལྷག་མ་ལྔ་ནི་ལྷག་པའི་ཁྲིམས་སུ་འགྱུར་ཏེ། ཚུལ་ཁྲིམས་སྔར་མནོས་པ་ལྔ་ནི་ཐ་
མར་འགྱུར་རོ། །སེམས་ཐ་མས་སྔར་ཁྲིམས་ལྔ་མནོས་ལ། དེའི་འོག་ཏུ་སེམས་རབ་དང་འབྲིང་གིས་ཁྲིམས་རྫོགས་པར་མནོས་ན་ཡང་ཁྲིམས་སྔར་མནོས་པ་ལྔ་ནི་སྐྱེ་བ་འམ་ལྷག་པ་མེད་ཀྱི། ཁྲིམས་སྔ་མ་ལྔ་མ་གཏོགས་པར་ཚུལ་ཁྲིམས་
གཞན་ཐམས་ཅད་ཚུལ་ཁྲིམས་རྫོགས་པར་མནོད་པའི་ཚེ་རབ་དང་ལྷག་པའི་སེམས་ཀྱིས་མནོས་པས་ལྷག་པའི་ཚུལ་ཁྲིམས་རབ་ཐོབ་པར་འགྱུར་རོ། །དེ་བས་ན་སོ་སོར་ཐར་པའི་ཚུལ་ཁྲིམས་ནི་ཉིས་རིམ་དུ་ཐོབ་པ་མེད་དེ་རིམ་པར་དབྱེ་ན་ཁྲིམས་
རིས་ལྔ་ནི་ཐ་མ་ཞེས་བྱའོ། །ཁྲིམས་བཅུ་ནི་འབྲིང་ཞེས་བྱ། ཚུལ་ཁྲིམས་རྫོགས་པ་ནི་རབ་ཅེས་བྱའོ། །དོན་གྱི་སྒོ་ནས་དབྱེ་ན་སེམས་རབ་ཀྱི་ཁྲིམས་ལྔ་མནོས་ན་ཁྲིམས་དེ་ནི་རབ་ཅེས་བྱ། སེམས་འབྲིང་གིས་ཁྲིམས་བཅུ་མནོས་ན་ཁྲིམས་
འབྲིང་ཞེས་བྱ། སེམས་ཐ་མས་ཚུལ་ཁྲིམས་རྫོགས་པར་མནོས་ན་ཚུལ་ཁྲིམས་ཐ་མ་ཞེས་བྱའོ། །དོན་དང་སྦྱར་ན་སེམས་རབ་དང་། འབྲིང་དང་། ཐ་མ་ལས་ཚུལ་ཁྲིམས་ཐོབ་པ་མི་མཐུན་ཏེ། ངེས་པར་གཅིག་ཏུ་ཆད་པ་མེད་དོ། །གལ་ཏེ་
མཁན་པོ་ཞིག་ལ་ཁྲིམས་བཅུ་ནོད་པར་གསོལ་བ་བཏབ་པ་ལས་ཁྲིམས་བཅུ་ནོད་པའི་ཚེ་མཁན་པོ་མངོན་སུམ་དུ་མ་གྱུར་ཀྱང་ཁྲིམས་བཅུ་ཐོབ་བོ། །གལ་ཏེ་ཁྲིམས་བཅུ་ནོད་པའི་ཚེ་མཁན་པོ་ཤི་ན་ཤི་བར་ཤེས་སམ་ཐོས་ན་ཁྲིམས་མནོས་ཀྱང་
ཁྲིམས་མི་འཐོབ་བོ། །གལ་ཏེ་ཤི་བར་མི་ཤེས་མ་ཐོས་ན་ཁྲིམས་ཐོབ་བོ། །གསོལ་བ་དང་ཞུ་བ་བཞིའི་ལས་བྱེད་པའི་ཚུལ་ཁྲིམས་མནོད་པ་ནི་མཁན་པོ་མངོན་སུམ་དུ་མ་གྱུར་ན་ཁྲིམས་མནོད་ཀྱང་ཁྲིམས་ཐོབ་པར་མི་འགྱུར་ཏེ། དགེ་
འདུན་གྱི་གྲངས་མ་ཚང་བའི་ཕྱིར་རོ། །གལ་ཏེ་དགེ་འདུན་གྱི་གྲངས་ཚང་ན་མཁན་པོ་མེད་ཀྱང་ཁྲིམས་མནོད་དུ་རུང་ངོ་། །མ་འགགས་པས་ཡང་གསོལ་པ། བཅོམ་ལྡན་འདས་དགེ་བསྙེན་གྱི་ཁྲིམས་ལྔ་པས་ཚོང་

71-1-185a

སྤོགས་བགྱིར་རུང་ངམ། བཀའ་སྩལ་པ། ཚོང་སྤོགས་བྱར་རུང་སྟེ། ལས་རྣམ་པ་འདི་ལྔ་ནི་མི་བྱའོ། །རྐང་འགྲོས་ཕྱུགས་ཀྱི་ཚོང་སྤོགས་ཀྱི་ལས་མི་བྱའོ། །བདག་ཉིད་ཀྱི་ཕྱུགས་ཡོད་ན་ཚོང་དུ་གནང་གི། ཤན་པ་ལ་བཙོང་དུ་མི་རུང་བ་དང་། མདའ་གཞུ་མཚོན་
ཆའི་བག་ཚོང་སྤོགས་བགྱིར་མི་རུང་བ་དང་། བདག་ལ་ཡོད་པ་ནི་འཚོང་དུ་རུང་བ་དང་། ཆང་གི་ཚོང་སྤོགས་ཀྱི་ལས་བྱར་མི་རུང་སྟེ། བདག་ཉིད་ལ་ཡོད་ན་འཚོང་དུ་རུང་བ་དང་སྲིན་བུ་མང་དུ་འཆི་བས་འབྲུ་མར་འཚིར་ཏུ་མི་རུང་བ་དང་། རྒྱ་གར་གྱི་ཆོས་ཀྱིས་དེ་བཞིན་ཏེ། ག་
བུ་ཤ་ཚུན་ཆད་ནི་འབྲུ་མར་འཚར་བའི་ནང་ན་སྲིན་བུ་མེད་ན་ཉེས་པ་མེད་དོ། །ཁ་དོག་ཚོན་ཆེན་པོ་རྣམ་པ་ལྔ་བཙོ་བླག་བྱེད་པ་ཡང་སྲིན་བུ་མང་དུ་འཆི་བས་མི་རུང་སྟེ། ཡོག་ཤ་ལ་སོགས་པ་ཡུལ་གཞན་དག་ན་ཚོན་གྱི་བཙོ་བླག་མེད་པ་ལས་སྲིན་བུ་མང་དུ་འཆི་
སྟེ། དེ་བས་ན་མ་གནང་ངོ་། །ཡུལ་རྒྱ་ཡུལ་ཡང་ཁ་དོག་མཐིང་ཀ་བཙོ་བ་ནི་སྲིན་བུ་མང་དུ་འཆི་བས་བཙོ་བླག་རྣམ་པ་ལྔའི་ནང་དུ་གཏོགས་སོ། །མ་འགགས་པས་ཡང་གསོལ་པ། བཅོམ་ལྡན་འདས་ཉིན་ཞག་གཅིག་གིས་ཁྲིམས་བརྒྱད་ཅེས་བགྱི་
བ་དུས་མ་ལགས་པར་ཕྱེམ་རེད་ཁ་ཟས་མི་འཚལ་བ་མ་གཏོགས་པ་དགུར་འགྱུར་ན་ཇི་ལྟར་བརྒྱད་ཅེས་བགྱི། བཀའ་སྩལ་པ། ཁྲིམས་ཤེས་བྱ་བ་ནི་ཆོས་ཀྱིས་ཕྱེམ་རེད་དུས་མ་ཡིན་པར་ཁ་ཟས་མི་ཟ་བ་ཡིན་ཏེ། ཁྲིམས་བརྒྱད་ཀྱི་
ཡན་ལག་ཡིན་ཏེ། གྲོགས་སུ་གྱུར་པས་ཡན་ལག་གི་ཁྲིམས་བརྒྱད་ཅེས་བྱའི། དགུར་ནི་མ་ཡིན་ནོ། །གསོལ་པ། ཡན་ལག་བརྒྱད་པའི་ཁྲིམས་མནོས་ན་གང་ཟག་དེ་འཁོར་རྣམ་པ་བདུན་ལ་འཁོར་གང་གི་ནང་
དུ་བསྡུ། བཀའ་སྩལ་པ། ནམ་འཚོ་བའི་བར་གྱི་ཁྲིམས་མ་མནོས་ཀྱང་ཉིན་ཞག་གཅིག་གི་ཁྲིམས་ཡོད་པས་དེ་ལ་ཡང་དགེ་བསྙེན་ཞེས་བྱའོ། །གཞན་དུ་ན་དགེ་བསྙེན་ཞེས་བྱར་ནི་ནམ་འཚོ་བའི་བར་དུ་ཚུལ་ཁྲིམས་
མནོས་པ་མེད་ལ། དགེ་བསྙེན་མ་ཡིན་ཞེས་བྱར་ནི་ཉིན་ཞག་གཅིག་གི་ཁྲིམས་ཡོད་པས་དེ་ནི་གང་ཟག་བར་མ་དོ་ཞེས་མདོ་སྡེ་ལས་ཀྱང་འབྱུང་ངོ་། །མ་འགགས་པས་ཡང་གསོལ་པ། བཅོམ་ལྡན་འདས་འཁོར་བདུན་མ་

71-1-185b

གཏོགས་པར་སོ་སོར་ཐར་པའི་ཚུལ་ཁྲིམས་མཆིས་སམ། བཀའ་སྩལ་པ། ཡོད་དེ་ཡན་ལག་བརྒྱད་ཀྱི་ཁྲིམས་ཉིད་ཡིན་ནོ། །དོན་དེ་དང་སྦྱར་ན་ཡན་ལག་བརྒྱད་ཀྱི་ཁྲིམས་མནོས་པ་འཁོར་རྣམ་པ་བདུན་གྱི་ནང་དུ་མ་གཏོགས་སོ། །ཡན་
ལག་བརྒྱད་པའི་ཁྲིམས་མནོས་པའི་ཆོས་ཀྱིས་ནི་ཉིན་ཞག་གཅིག་གི་བར་དུ་སྲོག་མི་གཅོད་དོ་ཞེས་ཚིག་དེ་སྐད་ཆད་པས་ན་ཁྲིམས་གཞན་ནམ་འཚོའི་བར་དུ་མནོས་པ་དང་བསྲེར་ཡང་མི་རུང་ངོ་། །གསོལ་པ། ཡན་ལག་བརྒྱད་ཀྱི་ཁྲིམས་མནོད་
པ་ཉིན་ཞག་གཉིས་སམ། གསུམ་འམ། བཅུའི་བར་དུ་ཅིག་ཆར་མནོད་དུ་རུང་ངམ། བཀའ་སྩལ་པ། ཐོག་མ་སངས་རྒྱས་ཀྱིས་ཉིན་ཞག་གཅིག་གི་ཁྲིམས་སུ་བཅས་པས་དེ་ལས་འདར་མི་རུང་ངོ་། །གལ་ཏེ་ཉམས་ཀྱིས་མནོད་ནུས་
ན་ཉིན་ཞག་གཅིག་ཅིང་ལན་རེ་མནོད་དགོས་ཏེ། ཉིན་ཞག་དུ་མནོས་ཀྱང་རུང་ངོ་། །ཉིན་ཞག་གཅིག་གི་ཡན་ལག་བརྒྱད་ཀྱི་ཁྲིམས་མནོད་པའི་ཐབས་ནི་ཕ་རོལ་པོ་གཞན་ལས་མནོད་དགོས་ཏེ། དེ་ཡང་གང་ལས་མནོད་ཅེ་ན། འཁོར་
ལྔ་པོ་གང་ཡང་རུང་བ་ལས་མནོད་དགོས་སོ། །ཡན་ལག་བརྒྱད་ཀྱི་ཁྲིམས་མནོས་པའི་འོག་ཏུ་གལ་ཏེ་སེམས་ཅན་ལ་བརྡེག་བཙོག་བྱས་ན་ཚུལ་ཁྲིམས་རྣམ་པར་དག་པ་མ་ཡིན་ནོ། །ཁྲིམས་མནོས་པའི་ཉིན་པར་བརྡེག་བཙོག་
མ་བྱས་ལ་ཕྱི་དེ་ཉིན་བརྡེག་བཙོག་བྱ་བར་དམ་བཅས་ན་ཡང་ཚུལ་ཁྲིམས་རྣམ་པར་དག་པ་མ་ཡིན་ཏེ། མདོར་ན་ལུས་དང་ངག་གིས་ཇི་ཙམ་དུ་ཚུལ་བཞིན་མ་ཡིན་པའི་ལས་བྱས་ན་ཁྲིམས་མ་ཉམས་མོད་ཀྱི་རྣམ་པར་དག་པ་མ་ཡིན་ནོ། །
གལ་ཏེ་ལུས་དང་ངག་རྣམ་པར་དག་ཀྱང་སེམས་ཀྱིས་འདོད་ཆགས་ཀྱི་རྣམ་པར་རྟོག་པ་བསྐྱེད་དམ། ཞེ་སྡང་གིས་འཚེ་བའི་རྣམ་པར་རྟོག་པ་བསྐྱེད་ན་ཡང་རྣམ་པར་དག་པ་མ་ཡིན་ནོ། །གལ་ཏེ་ལུས་དང་ངག་དང་ཡིད་ཀྱི་ལས་
གསུམ་རྣམ་པར་དག་ཀྱང་རྗེས་སུ་དྲན་པ་དྲུག་ཡིད་ལ་མ་བྱས་ན་དེ་ཡང་ཚུལ་ཁྲིམས་རྣམ་པར་དག་ཅེས་མི་བྱའོ། །ཡན་ལག་བརྒྱད་ཀྱི་ཁྲིམས་མནོས་པའི་འོག་ཏུ་རྗེས་སུ་དྲན་པ་དྲུག་ཡིད་ལ་བྱས་ན་ཚུལ་ཁྲིམས་རྣམ་པར་དག་ཅེས་

71-1-186a

བྱའོ། །མདོ་སྡེ་དག་ལས་འཛམ་བུའི་གླིང་གི་རྒྱལ་པོ་འཛམ་བུའི་གླིང་གི་ཁམས་སུ་མ་གཏོགས་པའི་མི་ཐམས་ཅད་དང་། དེའི་ནང་ན་ཡོད་པའི་གསེར་དང་། དངུལ་དང་། ནོར་དབྱིག་ཐམས་ཅད་ལ་དབང་བའི་བསོད་ནམས་ཀྱིས་
ཡན་ལག་བརྒྱད་པའི་ཚུལ་ཁྲིམས་རྣམ་པར་དག་པའི་བསོད་ནམས་བཅུ་དྲུག་ཆར་ཡང་དགོས་པའི་ཆ་གཅིག་ཙམ་ཡང་མི་ཕོད་དོ་ཞེས་འབྱུང་ངོ་། །སུ་ཡང་རུང་ཡན་ལག་བརྒྱད་པའི་ཁྲིམས་ནོད་པར་བྱས་ལ་བག་མེད་པར་རང་ཉམ་དུ་རོལ་
མོ་འམ། གལ་ཏེ་ན་ཁ་ཟས་ཞིམ་པོ་ལ་བག་མེད་པར་བཟའ་བ་དང་། རྩེད་མོ་རྣམ་པ་སྣ་ཚོགས་ཡིད་བཞིན་དུ་བག་མེད་པར་བྱས་པའི་འོག་ཏུ་ཁྲིམས་མནོད་པ་ནི་སྔ་དྲོ་ལ་ཡང་རུང་ཕྱི་དྲོ་ལ་ཡང་རུང་ཁྲིམས་ཐོབ་པར་མི་འགྱུར་རོ། །
གལ་ཏེ་སྔ་ནས་ཁྲིམས་མནོད་པའི་སེམས་མེད་ལ་བག་མེད་པའི་ལས་རྣམ་པ་སྣ་ཚོགས་བྱས་པའི་འོག་ཏུ་དགེ་བའི་བཤེས་གཉེན་དང་ཕྲད་དེ་ཁྲིམས་མནོས་ན་སྔ་དྲོ་ཡང་རུང་ཕྱི་དྲོ་ཡང་རུང་དུས་ཐམས་ཅད་དུ་ཁྲིམས་ཐོབ་བོ། །ཁྲིམས་
མནོད་པར་ཆས་པ་ལས་བགེགས་སམ་བར་ཆད་བྱུང་སྟེ་དབང་མེད་པ་ལས། ཕྱིས་བགེགས་དང་བར་ཆད་མེད་པའི་འོག་ཏུ་ཁྲིམས་མནོས་ན་སྔ་དྲོ་ཡང་རུང་ཕྱི་དྲོ་ཡང་རུང་དུས་ཐམས་ཅད་དུ་ཁྲིམས་ཐོབ་བོ། །གསོལ་པ། གལ་
ཏེ་ཉིན་པར་ཁྲིམས་བསྲུངས་ལ་མཚན་མོ་མི་སྲུང་བའི་ཁྲིམས་མནོས་ན་ཡན་ལག་བརྒྱད་ཀྱི་ཁྲིམས་ཐོབ་བམ། གལ་ཏེ་མཚན་མོ་ཁྲིམས་སྲུང་ལ་ཉིན་པར་མི་སྲུང་བའི་ཁྲིམས་མནོས་ན་ཡན་ལག་བརྒྱད་ཀྱི་ཁྲིམས་ཐོབ་པར་
འགྱུར་རམ། བཀའ་སྩལ་པ། གང་ཡང་ཁྲིམས་མི་ཐོབ་བོ། །དེ་བས་ན་སངས་རྒྱས་ཀྱིས་ཐོག་མ་ནས་ཉིན་ཞག་གཅིག་པའི་ཁྲིམས་སུ་བཅས་ཏེ། ངེས་པའི་ཚད་ཡིན་པས་འགལ་བར་བྱར་མི་རུང་ངོ་། །མ་
འགགས་པས་ཡང་གསོལ་པ། བཅོམ་ལྡན་འདས་འོ་ན་དེ་ལྟར་ཁྲིམས་མི་ཐོབ་ན་མདོ་དག་ལས་དགེ་སློང་ཨིག་ཞི་ཞིག་འབྲོག་དགོན་པ་ཞིག་ན་ཡི་དགས་ཁ་ཅིག་སྡུག་བསྔལ་སྣ་ཚོགས་མྱོང་སྟེ། ལ་ལ་ནི་ཉིན་པར་ལོངས་

71-1-186b

སྤྱོད་བགྱིད་ལ་མཚན་མོ་སྡུག་བསྔལ་བགྱིད་པ་ཡང་མཆིས། ལ་ལ་ནི་མཚན་མོ་ལོངས་སྤྱོད་བགྱིད་ལ་ཉིན་པར་སྡུག་བསྔལ་མྱོང་བ་དག་མཐོང་ངོ་། །དེ་བས་ན་དེ་དག་ཀྱང་སྔོན་མིའི་ནང་ན་ཉིན་པར་ཁྲིམས་སྲུང་ལ་མཚན་མོ་ནི་སྡིག་པ་བགྱིད་
པ་འམ། ཡང་ན་མཚན་མོ་ཁྲིམས་སྲུང་ལ་ཉིན་པར་སྡིག་པའི་ལས་བགྱིད་པ་མི་མཐུན་པའི་དོན་དེ་དག་ཇི་ལྟ་བུ་ལགས། བཀའ་སྩལ་པ། སྐྱེ་བ་སྔ་མའི་རྒྱུ་དང་རྐྱེན་འབའ་ཤིག་ལ་བརྟེན་དུ་ཡང་མི་རུང་སྟེ། འདི་སྐད་དུ་བཤད་པ་
ཡང་མདོ་སྡེ་འམ་འདུལ་བ་ལས་བཤད་པ་མ་ཡིན་ཏེ། དེ་ལ་བདེན་པའི་དོན་ངེས་པ་ཞེས་བྱར་ཡང་མི་རུང་ངོ་། །གཞན་དུ་ནི་འདི་སྐད་བཤད་པ་འདི་ནི་འཕགས་པ་ཀཱ་ཏ་ཡ་ནས་ཨིག་ཞི་ཞིག་གདུལ་བའི་ཕྱིར་སྤྲུལ་པ་ཡིན་གྱི་ཡང་དག་པ་མ་
ཡིན་ནོ་ཞེས་འབྱུང་ངོ་། །ཡན་ལག་བརྒྱད་པའི་ཁྲིམས་མནོས་པ་ལས་ཁྲིམས་ཕྱིར་འབུལ་ན་ངེས་པར་འཁོར་རྣམ་པ་ལྔ་ལ་འབུལ་མི་དགོས་ཀྱི། ཕ་རོལ་པོ་གང་ཟག་གཅིག་ལ་ཁྲིམས་ཕྱིར་དབུལ་ལོ་ཞེས་ཚིག་གཅིག་སྨྲས་པས་ཁྲིམས་
ཕུལ་བར་འགྱུར་རོ། །སོ་སོར་ཐར་པའི་ཁྲིམས་ཐོབ་པའི་སྒོ་ནས་དབྱེ་ན་ལམ་རྒྱུད་ལྔར་གཏོགས་པ་ལ་མའི་རྒྱུད་དུ་གཏོགས་པ་འབའ་ཤིག་གིས་ཁྲིམས་ཐོབ་ཀྱི་རྒྱུད་ལྷག་མ་གཞན་གྱིས་ཁྲིམས་མི་ཐོབ་བོ། །དཔེར་ན་ལྷའི་རྒྱུད་དུ་གཏོགས་
པ་ནི་བདེ་བའི་ལོངས་སྤྱོད་ལ་ཆགས་ཤིང་ཞེན་པས་ཁྲིམས་མི་ཐོབ་བོ། །དཔེར་ན་སྔོན་འཕགས་པ་མཽད་གལ་གྱི་ཉེ་གནས་ཤིག་ནད་ཀྱིས་བཏབ་པ་ལས་འཕགས་པ་མཽད་གལ་སུམ་བཅུ་རྩ་གསུམ་གནམ་དུ་སྨན་པ་འཚོ་བྱེད་ལ་དཔྱད་
འདྲིར་སོང་བ་ལས། དེའི་ཚེ་ལྷའི་བུ་རྣམས་རབ་ཏུ་དགའ་བའི་བསྐྱེད་མོས་ཚལ་དུ་རྩེར་འདོང་བའི་ཁར་བབས་ནས་འཕགས་པ་མཽད་གལ་དེ་དག་འགྲོ་བའི་ལམ་ཀར་སྡོད་ཅིང་འདུག་པ་ལས་ལྷའི་བུ་རྣམས་འཕགས་པ་མཽད་གལ་ལ་མིག་གིས་
བལྟ་ཙམ་ཡང་མི་ཁོམ་པར་སོང་ངོ་། །འཚོ་བྱེད་ཀྱི་ཐད་ཀར་ཕྱིན་པ་དང་། རྒྱང་མ་ནས་མཽད་གལ་ལག་པ་བཏེག་པ་ཙམ་ཞིག་བྱས་ནས་ཤིང་རྟ་ཁྲིད་དེ་སོང་ངོ་། །དེ་ནས་འཕགས་པ་མཽད་གལ་འདི་སྙམ་དུ་སེམས་སོ། །འཚོ་བྱེད་

71-1-187a

འདི་སྔོན་མིའི་ནང་ན་འདུག་པའི་ཚེ་བདག་གི་སློབ་མ་ཡིན་ན་ད་ནི་ལྷའི་ལོངས་སྤྱོད་ལ་ཆགས་ཏེ། སྔོན་གྱི་དྲན་པ་ཉམས་པར་གྱུར་ཏོ་སྙམ་བསམས་ནས་རྫུ་འཕྲུལ་གྱིས་འཚོ་བྱེད་ཀྱི་ཤིང་རྟ་འགྲོ་བ་མེད་པར་བྱིན་གྱིས་བརླབས་སོ། །དེ་ནས་འཚོ་
བྱེད་ཤིང་རྟ་ལས་བབས་ཏེ་འཕགས་པ་མཽད་གལ་གྱི་རྐང་པ་ལ་ཕྱག་བྱས་ནས་མཽད་གལ་གྱིས་རྒྱུ་རྐྱེན་མང་པོ་རྣམ་པ་སྣ་ཚོགས་གཏམས་སོ། །འཚོ་བྱེད་ཀྱིས་མཽད་གལ་ལ་སྨྲས་པ། བདག་མིའི་ནང་ན་འདུག་པའི་ཚེ་བཙུན་པའི་སློབ་མ་ཡིན་
པས་ལག་པ་ཙམ་བཏེག་སྟེ་བྲོ་དྲིས་ཀྱི་ལྷའི་བུ་གཞན་དག་དེ་ལྟར་བྱེད་པ་ཡོད་དམ། ལྷར་སྐྱེས་པ་ནི་བདེ་བའི་ལོངས་སྤྱོད་ལ་ཞེན་ཅིང་ཆགས་པས་དབང་མེད་དེ་དེ་ལྟར་གྱུར་པ་ཡིན་ནོ། །མཽད་གལ་གྱིས་འཚོ་བྱེད་ལ་སྨྲས་པ། སློབ་མ་ཞིག་ནད་ཀྱིས་
བཏབ་སྟེ་ན་ན་དེ་ལ་ཇི་ལྟར་གསོ་བར་བྱ་འཚོ་བྱེད་ཀྱིས་སྨྲས་པ། རེ་ཤིག་ཁ་ཟས་མི་བཟའ་བར་བྱའོ། །དེ་ནས་མཽད་གལ་གྱི་བུས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བསྐུལ་ཏོ། །སངས་རྒྱས་འཇིག་རྟེན་དུ་གཤེགས་པ་ཡང་ཤིན་
དུ་ཕྲད་དཀའ་ན་ཅིའི་ཕྱིར་སྐབས་སྐབས་སུ་དྲུང་དུ་སོང་སྟེ་དམ་པའི་ཆོས་མི་གླེང་། དེ་ནས་བརྒྱ་བྱིན་ལྷའི་དབང་པོས་འཕགས་པ་མཽད་གལ་གྱི་བསམ་པ་སེམས་ཀྱིས་ཤེས་ནས་ལྷའི་བུ་ཞིག་མངགས་ཏེ། ལྷའི་བུ་ཞིག་འབོད་དུ་བཏང་བ་
ལས་ལན་གསུམ་གྱི་བར་དུ་བོས་ན་མ་འོངས་སོ། །ལྷའི་བུ་དེ་ལ་ལྷའི་བུ་མོ་གཅིག་དང་རོལ་མོ་བྱེད་པ་གཅིག་ལས་མེད་ཀྱང་འདོད་པ་ལ་ཆགས་ཤིང་ཞེན་པས་ལྷའི་དབང་པོ་ཚིག་བཙན་མོད་ཀྱི་གཏོང་མ་ཕོད་དེ་ཕྱིས་གདོད་འོངས་སོ། །
དེ་ནས་བརྒྱ་བྱིན་གྱིས་ཅིའི་ཕྱིར་དེ་ལྟར་གྱུར་ཅེས་དྲིས་ན་ཇི་ལྟར་གྱུར་པ་དྲང་པོར་གསོལ་ཏོ། །བརྒྱ་བྱིན་གྱིས་མཽད་གལ་ལ་གསོལ་པ། ལྷའི་བུ་འདི་ལ་ལྷའི་བུ་མོ་གཅིག་དང་རོལ་མོ་བྱེད་པ་གཅིག་ལས་མེད་ཀྱང་གཏོང་མི་ཕོད་དོ། །
རྩེ་དགའ་ན་ལྷའི་དབང་པོར་གྱུར་ཏེ། གཞལ་མེད་ཁང་སྣ་ཚོགས་མང་པོ་དང་ལྷའི་བུ་མོ་གྲངས་མེད་པས་བསྐོར། ལྷའི་ཞལ་ཟས་རོ་བརྒྱ་དང་ལྡན་པ་སྣ་ཚོགས་དང་ལྷའི་རོལ་མོ་བརྒྱ་སྟོང་སྙེད་ལ་ལོངས་སྤྱོད་ཅིང་རྩེ་དགའ་བས་ཤར་ཕྱོགས་

71-1-187b

སུ་བལྟས་ན་ནུབ་ཕྱོགས་ཀྱང་བརྗེད་པ་དེ་ལྟ་ཅི་སྨོས་ཏེ། སངས་རྒྱས་འཇིག་རྟེན་དུ་གཤེགས་པ་དང་ཕྲད་པ་ཡང་དཀའ། དམ་པའི་ཆོས་ཐོས་པ་ཡང་ཤིན་དུ་དཀའ་བར་ཤེས་མོད་ཀྱི་འདོད་པའི་བདེ་བས་བཅིངས་གླགས་ཏེ་རང་དབང་མེད་པས་ཤེས་
ཀྱང་བྱར་མེད་པར་གྱུར་ཏོ། །ཚུལ་ཁྲིམས་མནོས་པའི་ཆོས་ནི་དཔའ་ཞིང་རྟུལ་ཕོད་པའི་སེམས་ཀྱིས་ཆད་པར་དམ་བཅས་པས་ཁྲིམས་ཐོབ་པར་འགྱུར་ཏེ། ལྷའི་བུ་ལྟ་བུ་ནི་འདོད་པའི་བདེ་བ་ལ་ཆགས་པས་མི་དགེ་བའི་སེམས་ཀྱི་ཤས་
ཆེ་སྟེ། དགེ་བའི་སེམས་ཀྱི་མཐུ་ཆུང་ན་ཅིའི་དབང་གིས་ཁྲིམས་ཐོབ་པར་འགྱུར། ཡི་དགས་ལྟ་བུ་ནི་བཀྲེས་པ་དང་སྐོམ་པས་སྡུག་བསྔལ་ཏེ་ལུས་དང་སེམས་འབར་ཞིང་ཚིག་པའི་ཕྱིར་རོ། །སེམས་ཅན་དམྱལ་བ་པ་ནི་ཚ་གྲང་གི་སྡུག་བསྔལ་
གྲངས་མེད་པས་གཟིར་ཏེ་མི་གཟོད་པ་སྣ་ཚོགས་མྱོང་ཞིང་ལུས་དང་སེམས་གདུངས་པར་གྱུར་པས་ཁྲིམས་ཐོབ་པའི་རྒྱུ་མེད་དོ། །དུད་འགྲོ་ལྟ་བུ་ནི་ལས་ཀྱིས་བསྒྲིབས་ཏེ་ཤེས་པ་མེད་པས་ཁྲིམས་མནོད་པའི་ཆོ་ག་མེད་དོ། །མདོ་སྡེ་ཁ་ཅིག་ལས་
སྐབས་ཁ་ཅིག་ཏུ་ཀླུས་ཚུལ་ཁྲིམས་མནོས་པར་འབྱུང་བ་དགེ་བའི་སེམས་ཀྱིས་ཡན་ལག་བརྒྱད་པའི་ཁྲིམས་མནོས་པས་ཉིན་ཞག་གཅིག་གི་བར་དུ་དགེ་བའི་སེམས་ཀྱིས་བསོད་ནམས་ནི་ཐོབ་ཀྱི་ལས་ཀྱིས་བསྒྲིབས་པས་ཚུལ་ཁྲིམས་ནི་ཐོབ་
པ་མ་ཡིན་ནོ། །གླིང་བཞིས་དབྱེ་ན་ལྷོའི་འཛམ་བུའི་གླིང་དང་། ནུབ་ཀྱི་བ་ལང་སྤྱོད་དང་། ཤར་གྱི་ལུས་འཕགས་གླིང་དང་། གླིང་གསུམ་པོ་འདིར་གཏོགས་པའི་རྒྱ་མཚོའི་གླིང་ཕྲན་ན་འཁོད་པའི་མི་རྣམས་ཀྱིས་ཁྲིམས་ཐོབ་བོ། །དཔེར་ན་ནུབ་ཀྱི་བ་
ལང་སྤྱོད་ན་འཕགས་པའི་ཕིན་འདུལ་གནས་པར་སངས་རྒྱས་ཀྱིས་ལུང་བསྟན་ཏེ། ད་ལྟར་སངས་རྒྱས་ཀྱི་མཛད་པ་ཆེན་པོ་རྒྱས་པར་བྱེད་པས་འཁོར་རྣམ་བཞི་ཡང་ཡོད་དོ། །ཤར་གྱི་ལུས་འཕགས་གླིང་ན་ཡང་དགེ་སློང་ཡོད་དེ། དེ་ན་ཡང་སངས་
རྒྱས་ཀྱི་ཆོས་བྱེད་པས་འཁོར་བཞི་པོ་དག་ཡོད་དོ། །བྱང་གི་སྒྲ་མི་སྙན་འབའ་ཤིག་ན་སངས་རྒྱས་ཀྱི་ཆོས་མེད་དེ། ཚུལ་ཁྲིམས་ཀྱང་མི་ཐོབ་བོ། །དེ་ཡང་བསོད་ནམས་ཀྱི་ལས་ཀྱི་རྣམ་པར་སྨིན་པས་བསྒྲིབས་ཤིང་གཏི་མུག་

71-1-188a

གིས་བསྒྲིབས་པའི་ཕྱིར་འཕགས་པའི་ཆོས་ཀྱི་སྣོད་དུ་མ་གྱུར་ཏོ། །གང་ཟག་ལ་རྣམ་པ་བཞི་སྟེ། གང་ཞེ་ན། སྐྱེས་པ་དང་། བུད་མེད་དང་། མ་ནིང་དང་། མཚན་མ་གཉིས་པའོ། །རྣམ་པ་འདི་བཞི་ལ་སྐྱེས་པ་དང་བུད་མེད་གཉིས་
ཀྱིས་ནི་ཁྲིམས་ཐོབ་པར་རུང་། མ་ནིང་དང་མཚན་མ་གཉིས་གཉིས་ཀྱིས་ཁྲིམས་མི་འཐོབ། དེ་ཡང་སྐྱེས་པ་དང་བུད་མེད་ལ་ཡང་གང་ཕ་མ་བསད་པ་དང་། དགྲ་བཅོམ་པ་བསད་པ་དང་། སངས་རྒྱས་ཀྱི་སྐུ་ལ་ངན་སེམས་ཀྱིས་ཁྲག་ཕྱུང་བ་
དང་། དགེ་འདུན་གྱི་དབྱེན་བྱས་པ་དང་། དགེ་སློང་མ་ལ་མི་ཚངས་པར་སྤྱད་པ་དང་། གཅའ་འཕྲང་དུ་ཆོམ་པོ་དང་རྐུན་གནས་བྱེད་པ་དང་། དགེ་བའི་རྩ་བ་བཅད་པ་དང་། གང་ཟག་འདི་དག་ནི་གང་ཡང་ཚུལ་ཁྲིམས་མི་ཐོབ་བོ། །དེ་ལ་དོན་
ཆེན་པོའི་སྒོ་ནས་བརྟགས་ན་སངས་རྒྱས་ཀྱི་ཆོས་ལ་ཤིན་དུ་དད་ཅིང་མོས་པ་ནི་འདིར་མི་གཏོགས་ཏེ། ལྷ་འམ། ཀླུ་འམ། ཡི་དགས་སམ། གནོད་སྦྱིན་ནམ། བྱང་གི་སྒྲ་མི་སྙན་ནམ། མ་ནིང་ངམ། མཚན་མ་གཉིས་པ་འམ། སྡིག་
པ་མི་དགེ་བ་སྣ་ཚོགས་བྱས་ཀྱང་སྐྱབས་སུ་འགྲོ་བ་གསུམ་མནོད་དུ་རུང་ངོ་། །གསོལ་པ། དུས་གསུམ་གྱི་སངས་རྒྱས་རྣམས་ཚུལ་ཁྲིམས་བརྙེས་པ་མཉམ་འམ། བཀའ་སྩལ་པ། མི་མཉམ་མོ། །ཚུལ་ཁྲིམས་
ཐོབ་ཅེས་བྱ་བ་ནི་སེམས་ཅན་དང་སེམས་ཅན་མ་ཡིན་པའི་རིས་ལས་ཁྲིམས་ཐོབ་པར་འགྱུར་ཏེ། སངས་རྒྱས་གཅིག་འཇིག་རྟེན་དུ་གཤེགས་ན་སེམས་ཅན་གྲངས་མེད་པ་ཇི་སྙེད་ཀྱི་དོན་མཛད་དེ་ལྷག་མ་མ་ལུས་པའི་མྱ་ངན་ལས་
བཟླས་པས་ཕྱིས་སངས་རྒྱས་འཇིག་རྟེན་དུ་གཤེགས་པ་དག་སེམས་ཅན་དེ་དག་གང་ལས་ཀྱང་ཚུལ་ཁྲིམས་བརྙེས་ཏེ། དེ་ལྟར་ན་སངས་རྒྱས་རྣམས་སྔ་ཕྱིར་ཚུལ་ཁྲིམས་བརྙེས་པ་མི་མཉམ་མོ། །དཔེར་ན་
སངས་རྒྱས་འོད་སྲུང་གིས་སེམས་ཅན་གྲངས་མེད་པ་ཞིག་བཏུལ་ཏེ་ལྷག་མ་མ་ལུས་པར་མྱ་ངན་ལས་བཟླས་ཀྱང་སངས་རྒྱས་འོད་སྲུང་གིས་ནི་སེམས་ཅན་དེ་དག་ཀུན་ལས་ཚུལ་ཁྲིམས་བརྙེས་ན། སངས་

71-1-188b

རྒྱས་ཤཱཀྱ་ཐུབ་པས་ནི་སེམས་ཅན་དེ་དག་གང་ལས་ཀྱང་ཚུལ་ཁྲིམས་མ་བརྙེས་སོ། །སངས་རྒྱས་ཐམས་ཅད་འདྲ་བར་དངོས་པོ་འདི་གསུམ་ནི་མཉམ་མོ། །གང་ཞེ་ན། སྤྱོད་པའི་ཚོགས་མཉམ་པ་དང་། 
ཆོས་ཀྱི་སྐུ་མཉམ་པ་དང་། སེམས་ཅན་གྱི་དོན་མཛད་པ་མཉམ་པའོ། །སངས་རྒྱས་ཐམས་ཅད་འདྲ་བར་བསྐལ་པ་གྲངས་མེད་པ་གསུམ་གྱི་བར་དུ་བྱང་ཆུབ་སེམས་དཔའི་སྤྱོད་པ་སྤྱད་དེ། ཡན་ལག་ལྔའི་ཆོས་ཀྱི་སྐུ་ཡོངས་
སུ་རྫོགས་ཤིང་སྟོབས་བཅུ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭོ་བརྒྱད་ཡོངས་སུ་རྫོགས་ཏེ་ཐམས་ཅད་ཀྱིས་སེམས་ཅན་གྲངས་མེད་པ་ཇི་སྙེད་མྱ་ངན་ལས་བཟླས་སོ་གསོལ་པ། མདོ་
སྡེ་དག་ལས་སངས་རྒྱས་གཅིག་འཇིག་རྟེན་དུ་གཤེགས་ན་སེམས་ཅན་བྱེ་བ་ཁྲག་ཁྲིག་དགུ་བཅུ་སྙེད་མྱ་ངན་ལས་འདའ་བའི་དོན་མཛད་དོ་ཞེས་འབྱུང་ན། ཅིའི་སླད་དུ་སེམས་ཅན་གྲངས་མེད་པའི་དོན་མཛད་ཅེས་གསུངས། 
བཀའ་སྩལ་པ། མདོ་སྡེ་དག་ལས་སངས་རྒྱས་གཅིག་འཇིག་རྟེན་དུ་གཤེགས་ན་སེམས་ཅན་བྱེ་བ་ཁྲག་ཁྲིག་དགུ་བཅུ་སྙེད་ཀྱི་དོན་མཛད་ཅེས་སྨོས་པ་ནི་སངས་རྒྱས་དེ་ལས་གྲོལ་བར་གྱུར་པ་ལ་བྱ་སྟེ། གྲོལ་བའི་སེམས་ཅན་
དེ་དག་ཀྱང་ལ་ལ་ནི་སངས་རྒྱས་ཉིད་ཀྱིས་དོན་མཛད་པ་ཡང་ཡོད། ཁ་ཅིག་ནི་སློབ་མས་དོན་མཛད་པ་ཡང་ཡོད། ཁ་ཅིག་ནི་བཞག་པའི་ཆོས་ཀྱིས་གྲོལ་བ་ཡང་ཡོད་དེ། སེམས་ཅན་བྱེ་བ་ཁྲག་ཁྲིག་དགུ་བཅུ་ཞེས་སྨོས་པ་ནི་སངས་
རྒྱས་ཉིད་ཀྱིས་དོན་མཛད་པ་ལ་བྱ། སེམས་ཅན་གྲངས་མེད་པ་ལྷག་མ་མ་ལུས་པའི་མྱ་ངན་ལས་བཟླས་ཤེས་བྱ་བ་ནི་སྤྱིར་དོན་མཛད་པ་ལ་བྱའོ། །དུས་གསུམ་གྱི་སངས་རྒྱས་ཐམས་ཅད་མཉམ་པ་ནི་དུས་གསུམ་མཉམ་
གྱི་ཚུལ་ཁྲིམས་བརྙེས་པ་ནི་མི་མཉམ་མོ། །གསོལ་པ། སྡོམ་པ་མ་ཡིན་པའི་ཁྲིམས་ཤེས་བགྱི་བ་སེམས་ཅན་དང་སེམས་ཅན་མ་ཡིན་པ་ལས་ཐོབ་པར་འགྱུར་རམ། ཟིན་པ་དང་མ་ཟིན་པ་ཀུན་གྱིས་ཁྲིམས་

71-1-189a

ཐོབ་པར་འགྱུར། བཀའ་སྩལ་པ། སེམས་ཅན་ལས་སྡོམ་པ་མ་ཡིན་པའི་ཁྲིམས་ཐོབ་པར་འགྱུར་གྱི། སེམས་ཅན་མ་ཡིན་པ་ལས་སྡོམ་པ་མ་ཡིན་པའི་ཁྲིམས་མི་ཐོབ་བོ། །གཞན་དུ་ན་གསོད་དུ་རུང་
བའི་སེམས་ཅན་ལས་སྡོམ་པ་མ་ཡིན་པའི་ཁྲིམས་ཐོབ་ཀྱི། གསོད་དུ་མི་རུང་བའི་སེམས་ཅན་ལས་ཁྲིམས་མི་ཐོབ་བོ། །ཡང་གཞན་དུ་ན་གསོད་དུ་རུང་བ་དང་། གསོད་དུ་མི་རུང་བའི་སེམས་ཅན་གཉིས་ག་ལས་སྡོམ་པ་མ་
ཡིན་པའི་ཁྲིམས་ཐོབ་ཅེས་བྱའོ། །དཔེར་ན་ཤན་པ་ལུག་གསོད་པ་ནི་རྟག་ཏུ་གསོད་པའི་སེམས་དང་ཆས་ཏེ་ལུག་གསོད་པ་འབའ་ཤིག་ཡིད་ལ་བྱེད་པས་དེའི་ཚད་གཟུང་དུ་མེད་དོ། །ཇི་སྟེ་ལྷ་དང་མིར་སྐྱེས་ན་འཕྲལ་དུ་གསོད་
པའི་ལས་མི་བྱེད་ཀྱང་སྐྱེ་བ་གཅིག་ནས་གཅིག་ཏུ་འཁོར་བས་ཕྱིར་ལུག་ཏུ་སྐྱེ་བའི་ཆོས་ཡོད་དོ། །དེ་བས་ན་སེམས་ཅན་ཐམས་ཅད་ལས་སྡོམ་པ་མ་ཡིན་པའི་ཁྲིམས་ཐོབ་པར་འགྱུར་ཏེ། སྡོམ་པ་མ་ཡིན་པའི་ཁྲིམས་
བཅུ་གཉིས་ཀྱང་དེ་དང་འདྲའོ། །སྡོམ་པ་མ་ཡིན་པའི་ཁྲིམས་བཅུ་གཉིས་ཤེས་བྱ་བ་ནི་འདི་ལྟ་སྟེ། ཤན་པ་དང་། གཤེད་མ་དང་། ཕག་གསོ་བ་དང་། བྱ་གསོ་བ་དང་། ཉ་ཤོར་བ་དང་། རྔོན་པ་དང་། བྱ་
ཤོར་བ་དང་། སྦྲུལ་ཤོར་བ་དང་། ཀླུ་ལ་སྔགས་འདེབས་པ་དང་། བཙོན་རྫི་བྱེད་པ་དང་། རྐུན་པོ་བྱེད་པ་དང་། རྐུན་པོ་འཛིན་པ་དང་བཅུ་གཉིས་སོ། །དར་གྱི་སྲིན་བུ་གསོ་བ་ཡང་སྡོམ་པ་མ་ཡིན་པའི་ཁྲིམས་ཀྱི་ནང་
དུ་འདུས་སོ། །སྡོམ་པ་མ་ཡིན་པའི་ཁྲིམས་ཉམས་པའི་དུས་གསུམ་ཡོད་དེ། ཤི་བའི་དུས་དང་ཆགས་ཤིང་ཞེན་པ་ཟད་པའི་དུས་དང་། སྡོམ་པའི་ཚུལ་ཁྲིམས་མནོད་པའི་དུས་སོ། །དཔེར་ན་སྐྱབས་སུ་འགྲོ་བ་
གསུམ་མནོད་པའི་ཚེ་ཐོག་མའི་ཚིག་དང་པོ་གཅིག་སྨྲས་པས་སྡོམ་པ་མ་ཡིན་པའི་ཁྲིམས་ཉམས་སོ། །དེའི་འོག་ཏུ་ཚིག་གཉིས་པ་དང་གསུམ་པ་སྨྲས་པའི་ཚེ་ན་དགེ་བའི་ཚུལ་ཁྲིམས་ཐོབ་པར་འགྱུར་རོ། །

71-1-189b

གསོལ་པ་གང་ཟག་གིས་སྡོམ་པ་མ་ཡིན་པའི་ལས་བྱེད་པ་ན་དུས་ཆེད་གང་གི་ཚེ་དགེ་བའི་ཚུལ་ཁྲིམས་ཉམས་ཤིང་མི་དགེ་བའི་ཁྲིམས་ཐོབ་པར་འགྱུར། བཀའ་སྩལ་པ། ཤན་པའོ་ཞེས་ཚིག་གཅིག་དང་པོར་སྨྲ་བའི་ཚེ་དགེ་
བའི་ཁྲིམས་ཉམས་པར་འགྱུར་ལ་ཤན་པའོ་ཞེས་ལན་གཉིས་ལན་གསུམ་སྨྲས་པས་མི་དགེ་བའི་ཁྲིམས་ཐོབ་པར་འགྱུར་རོ། །ཡང་གཞན་དུ་ན་གང་གི་ཚེ་དགེ་བའི་ཁྲིམས་བཏང་བ་དེ་ཉིད་ཀྱི་ཚེ་མི་དགེ་བའི་ཁྲིམས་ཐོབ་བོ། །
ཇི་སྟེ་དགེ་བའི་ཁྲིམས་སྲུང་བའི་གང་ཟག་གཅིག་བདག་ཤན་པའོ་ཞེས་དམ་ནི་མ་བཅས། ཁེ་དང་རྙེད་པ་ཙམ་ལ་ཆགས་ཏེ་ཕག་ཕྲུག་གསོ་ཞིང་གསོད་པའི་ལས་བྱེད་ན་དེའི་ཚེ་དགེ་བའི་ཁྲིམས་ཉམས་པ་ཞེས་བྱ་སྟེ། དེ་ནི་དགེ་བའི་
ཁྲིམས་གཏང་བ་མི་དགེ་བའི་ཁྲིམས་ཐོབ་པ་ཞེས་བྱའོ། །གལ་ཏེ་བདག་ཤན་པའོ་ཞེས་ངེས་པར་དམ་བཅས་ན་ཡང་མི་དགེ་བའི་ཁྲིམས་ཐོབ་པར་འགྱུར་རོ། །མི་དགེ་བའི་ཁྲིམས་ནོད་པ་ནི་བདག་གིས་དམ་བཅས་པ་ཙམ་གྱིས་ཐོབ་པར་
འགྱུར་ཏེ། ཕ་རོལ་གཞན་ལས་མནོད་མི་དགོས་སོ། །གལ་ཏེ་མི་དགེ་བའི་ཁྲིམས་ཉིན་ཞག་གཅིག་གམ་གཉིས་ནས་ཉིན་ཞག་བཅུ་འམ། ལོ་གཅིག་གམ། ལོ་གཉིས་ཀྱི་བར་དུ་མནོད་པར་དམ་བཅས་ན་དམ་བཅས་པའི་
དུས་རིང་ཐུང་ལས་དེ་བཞིན་ཐོབ་པར་འགྱུར་ཏེ། དེ་བས་ན་སྡིག་པ་མི་དགེ་བའི་ཆོས་ནི་སྐྱེ་ཤི་འཁོར་བ་ལ་གཞོལ་བར་བྱེད་ཀྱི་གོང་ནས་གོང་དུ་འཕར་བའི་དོན་མེད་དོ། །དེ་ལྟར་ན་མི་དགེ་བའི་ཁྲིམས་ནི་དངོས་པོ་དེ་ཉིད་ཀྱིས་
ཐོབ་པ་ཡིན་ཏེ། དགེ་བའི་ཚུལ་ཁྲིམས་དང་མི་འདྲའོ། །ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་ལས་མ་འགགས་པའི་ལེའུ་ཞེས་བྱ་སྟེ་བརྒྱད་པའོ།། །།
ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ། བམ་པོ་བདུན་པ་སྟེ་ཐ་མ། 

71-1-190a

གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དྲིན་ལན་ཤེས་པ་དང་། དྲིན་ལན་བསབ་པ་དང་། ཐབས་མཁས་པ་ཆེན་པོས་སེམས་ཅན་རྣམས་ལ་ཕན་པ་དང་བདེ་བའི་དོན་བྱེད་པ་དག་དུས་དང་སྐབས་
ཤེས་ན་བསྟན་ཅིང་བཅོས་པ་ལ་གནོད་པར་མི་འགྱུར་རོ། །རིགས་ཀྱི་བུ་སངས་རྒྱས་མངོན་པར་འཇིག་རྟེན་དུ་བྱུང་བ་འཇིགས་པ་མེད་པའི་རྒྱལ་པོ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
རིག་པ་དང་། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། སྟོན་པ་རྒྱལ་བ་འཇིག་རྟེན་དུ་གཤེགས་ཏེ། སྐལ་བ་དང་ལྡན་པའི་དོན་མཛད་དོ། །སྐལ་བ་དང་
ལྡན་པ་རྣམས་ཀྱི་དོན་མཛད་ནས་ཡོངས་སུ་མྱ་ངན་ལས་འདས་སོ། །མྱ་ངན་ལས་འདས་ནས་དམ་པའི་ཆོས་ལ་སྤྱོད་པའི་ཚེ་བྲམ་ཟེའི་བུ་ཡིད་གཞུངས་ཤིང་རྣོ་བའི་ཤེས་རབ་དང་ལྡན་པ་གཏན་ཁྲིམས་ལྔ་སྲུང་བ། དམ་པའི་ཆོས་འཛིན་
པ་ཞིག་བྱུང་ངོ་། །དུས་གཞན་ཞིག་ན་བྲམ་ཟེའི་བུ་དེ་ཡུལ་གཞན་ཞིག་ཏུ་དོན་གཉེར་དུ་སོང་སོང་བ་ལས་འགྲོན་དུ་འགྲོ་བའི་ལམ་དེ་འཇིགས་ས་ཆེ་བས་ལམ་གྲོགས་ལྔ་བརྒྱ་དང་འགྲོགས་ཏེ་སོང་ངོ་། །ལམ་གྲོགས་དེ་
དག་དང་འཇིགས་སར་ཕྱིན་ནས་འཇིགས་ས་དེ་ན་མི་རྒོད་ལྔ་བརྒྱ་ཞིག་གནས་ཏེ། རྟག་ཏུ་འདྲོན་པོ་རྒྱུ་བ་རྣམས་འཇོམས་སོ། །དེའི་ཚེ་ན་མི་རྒོད་དེ་དག་གིས་འདྲོན་པོ་དེ་དག་གཞོམ་པར་བྱས་ནས་མི་རྒོད་ཀྱི་དཔོན་པོ་དེས་མི་གཅིག་
སྔར་འདྲོན་པོ་དེ་དག་ཇི་ལྟར་འགྲོ་བ་ལྟ་ཞིང་རྟོག་ཏུ་བཏང་ངོ་། །དེའི་ཚེ་མི་རྒོད་དེ་དག་གི་ནང་ན་མི་གཅིག་ཅིག་སྔོན་བྲམ་ཟེའི་བུ་དེ་དང་མཛའ་ཞིང་བཤེས་པས་སྔར་མི་དེ་དག་གི་ནང་དུ་འོངས་ཏེ་བྲམ་ཟེའི་བུ་དེ་ལ་འདི་སྐད་ཅེས་བསྒོའོ། །
རིགས་ཀྱི་བུ་ཁྱོད་འདི་ལྟར་རིག་པར་བྱོས་ཤིག །དོ་ནུབ་ནམ་གྱི་ཆ་སྟོད་ལ་དགྲ་འོང་གིས། ཅི་ནས་ཀྱང་ཁྱོད་ཉིད་ལ་གནོད་པ་དང་སྨས་པར་མ་གྱུར་པར་ཁྱོད་ཉིད་ཀྱིས་བྱོལ་བའི་ཐབས་བྱོས་ཤིག་པར་བསྒོའོ། །

71-1-190b

དེའི་ཚེ་བྲམ་ཟེའི་བུ་དེས་ཚིག་དེ་དག་ཐོས་ནས་དཔེར་ན་མི་བརྣངས་པ་ལྟར་མིད་དུ་ཡང་མེད་ལ་སྐྱུག་ཏུ་ཡང་མེད་པ་བཞིན་མི་བདེ་བར་གྱུར་ནས་གྲོགས་པོ་རྣམས་ལ་གཏམ་བྱར་ནི་གྲོགས་པོ་རྣམས་ཀྱིས་མི་དེ་བསད་ཀྱིས་དོགས། ཅི་སྟེ་
གྲོགས་པོ་རྣམས་ཀྱིས་མི་དེ་བསད་ན་གྲོགས་པོ་རྣམས་ངན་འགྲོ་གསུམ་དུ་སྡུག་བསྔལ་གྲངས་མེད་པ་མྱོང་བར་འགྱུར་བ་སྟེ། གལ་ཏེ་གྲོགས་པོ་རྣམས་ལ་མ་སྨྲས་ན་ནི་དགྲས་གྲོགས་པོ་རྣམས་བསད་པར་འགྱུར་རོ། །གལ་
ཏེ་གྲོགས་པོ་རྣམས་བསད་ན་དགྲ་རྣམས་ངན་འགྲོ་གསུམ་དུ་ལྟུང་ཞིང་སྡུག་བསྔལ་གྲངས་མེད་པ་མྱོང་ངོ་སྙམ་བསམས་ནས་བདག་གིས་སེམས་ཅན་ལ་ཕན་པ་དང་། བདེ་བའི་ཐབས་བྱས་ཏེ། བདག་ཉིད་ངན་འགྲོ་གསུམ་
དུ་ལྟུང་ཞིང་སྡུག་བསྔལ་མྱོང་ཡང་སླའོ་སྙམ་བསམས་ནས་རལ་གྲི་ཐོགས་ནས་སྦྲོན་པའི་མི་དེ་བསད་ནས་གྲོགས་པོ་རྣམས་བདེ་བར་བྱས་སོ། །དེའི་ཚེ་ན་གྲོགས་པོ་རྣམས་ཀྱིས་དེ་ལྟར་གྱུར་པ་མཐོང་ནས་བྲམ་ཟེའི་བུ་
དེ་ལ་འདི་སྐད་ཅེས་སྨྲས་སོ། །བྲམ་ཟེའི་བུ་ཁྱོད་ནི་མིའི་ནང་ན་མཆོག་ཏུ་གྱུར་པ་ཤིན་དུ་དགེ་བ་ཡིན་ན། ཅིའི་ཕྱིར་དེང་འདིར་འདི་ལྟ་བུའི་སྡིག་པ་ཆེན་པོ་བྱེད་ཅེས་སྨྲས་སོ། །དེའི་ཚེ་བྲམ་ཟེའི་བུ་དེས་པུས་མོ་ས་ལ་
བཙུགས་ནས་ཐལ་མོ་སྦྱར་ཏེ་ངོ་མཚར་དང་ལྡན་པའི་སེམས་ཀྱིས་གྲོགས་པོ་དག་ལ་འདི་སྐད་ཅེས་སྨྲས་སོ། །བདག་དེ་རིང་བྱ་བར་མི་རིགས་པའི་སྡིག་པ་ཆེན་པོ་བྱས་ཏེ། དེ་ཡང་སེམས་ཅན་རྣམས་ལ་ཕན་པ་དང་། 
གྲོགས་པོ་རྣམས་ལ་བདེ་བར་བྱ་བའི་ཕྱིར་རོ། །གྲོགས་པོ་རྣམས་ཀྱིས་སྨྲས་པ། ཁྱོད་ཉིད་ཀྱིས་མི་བསད་པ་ལ་ངེད་བདེ་བར་བྱས་སོ་ཞེས་བརྗོད་དུ་ཡང་ཅི་ཡོད། བྲམ་ཟེའི་བུས་སྨྲས་པ། 
བདག་གིས་བསད་པའི་མི་འདི་ནི་དགྲ་མ་རུངས་པ་ཡིན་ཏེ། དགྲ་འདིས་གྲོགས་པོ་ཁྱེད་གསོད་དུ་འོངས་པས་བདག་ནི་གྲོགས་པོ་ཁྱེད་ཀྱི་ཕྱིར་མི་འདིའི་སྲོག་བཅད་པས་ན་ཁྱེད་རྣམས་ནི་བདེ་བར་ཡུལ་དུ་

71-1-191a

ཕྱིན་ཏེ། བདག་ནི་སེམས་ཅན་དམྱལ་བའི་སྡུག་བསྔལ་མྱོང་ཡང་སླའོ། །དེ་ནས་གྲོགས་པོ་ལྔ་བརྒྱ་རྣམས་ཀྱིས་སྐད་ཕྱུང་སྟེ་ངུས་ནས་འདི་སྐད་ཅེས་སྨྲས་སོ། །གནམ་མཐའ་
འོག་ན་ཕངས་པར་བྱ་བ་ནི་སྲོག་ལས་འདའ་བ་མེད་དོ། །འཇིགས་པའི་ནང་ན་འཆི་བ་ལས་འདའ་བ་མེད་དེ། དེ་བས་ན་སེམས་ཅན་ཐམས་ཅད་ནི་ལུས་དང་སྲོག་གི་ཕྱིར་གསེར་དང་། དངུལ་དང་། རིན་པོ་ཆེ་དང་། 
ཡུལ་ས་དང་། ཆུང་མ་དང་། བུ་དང་ཟས་དང་གོས་ཀྱང་ཡོངས་སུ་གཏོང་སྟེ། བདག་ཅག་ནི་དེང་དུ་ཕྱིར་ལན་ཅིག་འཚོ་བའི་སྲོག་ཐོབ་བོ་ཞེས་སྨྲས་ནས་བྲམ་ཟེའི་བུ་ཁྱོད་སེམས་ཅན་གྱི་ཕྱིར་ངན་འགྲོ་གསུམ་གྱི་
སྡུག་བསྔལ་ཁྱད་དུ་བསད་པས་བདག་ཅག་ནི་ཁྱོད་ཀྱི་དྲིན་ཤིན་དུ་ལྕི་བ་དྲན་པར་བྱེད་དོ། །དྲིན་ལྕི་བ་དྲན་པས་ན་དེང་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཞེས་སྨྲས་ནས་ཐམས་
ཅད་བྱང་ཆུབ་ཏུ་སེམས་བསྐྱེད་དོ། །དེའི་ཚེ་ན་མི་རྒོད་ལྔ་བརྒྱ་རྣམས་ཀྱིས་ཀྱང་འདི་སྐད་ཅེས་སྨྲས་སོ། །ཁྱོད་ནི་ཀུན་གྱི་མཆོག་ཤིན་དུ་དགེ་བ་ཡིན་ནོ་ཞེས་ཟེར་ན་ཅིའི་ཕྱིར་འདི་ལྟ་བུའི་སྡིག་པ་ཆེན་པོ་བྱེད། བྲམ་ཟེའི་བུས་སྨྲས་
པ། བདག་ནི་བྱ་བར་མི་རིགས་པའི་སྡིག་པ་ཆེན་པོ་བྱས་ཏེ། དེ་ཡང་སེམས་ཅན་ཐམས་ཅད་ལ་ཕན་པ་དང་། ཁྱེད་རྣམས་ཀྱི་ལུས་དང་སྲོག་གི་སྐྱབས་བྱ་བའི་ཕྱིར་རོ། །དེ་ནས་མི་རྒོད་དེ་དག་གིས་བྲམ་ཟེའི་བུ་ལ་སྨྲས་
པ། ཁྱོད་ཉིད་ཀྱིས་མི་བསད་པ་ལ་བདག་ཅག་ལ་ཕན་པ་ཡང་ཅི་ཞིག་ཡོད། བྲམ་ཟེའི་བུས་སྨྲས་པ། མི་རྒོད་ཁྱེད་རྣམས་འདི་ན་འདུག་པར་སྔ་ནས་ཤེས་ཀྱང་བདག་ཀྱང་མ་སྨྲས་ཏེ། རྒྱལ་པོ་ཡང་མ་སྦྲན། 
བདག་གི་གྲོགས་པོ་རྣམས་ལ་ཡང་མ་སྨྲས། གཏམ་མ་བྱས་པས་ཁྱེད་ཀྱི་ལུས་དང་སྲོག་བདེ་བར་གྱུར་པ་ཡིན་ནོ། །དེའི་ཚེ་མི་རྒོད་དག་གིས་དེ་སྐད་ཅེས་སྨྲས་པ་ཐོས་ནས་འདི་སྙམ་དུ་གྱུར་ཏོ། །བདག་ཅག་གི་ལུས་

71-1-191b

དང་སྲོག་ཀྱང་གཟོད་གསོན་ནོ་སྙམ་བསམས་ནས་བྲམ་ཟེའི་བུ་ལ་ཐལ་མོ་སྦྱར་ཏེ། སྐྱེས་བུ་ཆེན་པོ་ཤིན་དུ་ལེགས་སོ། །སྙིང་རྗེ་ཆེན་པོ་དང་ལྡན་པ་བདག་ཅག་གིས་དེང་ཕྱིན་ཆད་ཅི་དང་ཅི་བྱ་བ་བསྟན་དུ་གསོལ། 
བྲམ་ཟེའི་བུས་སྨྲས་པ་ཁྱེད་རྣམས་མྱུར་དུ་བླ་ན་མེད་པའི་བྱང་ཆུབ་ཏུ་སེམས་བསྐྱེད་ཅིག །དེ་ནས་མི་རྒོད་རྣམས་ཀྱང་དྲིན་ལན་བསབ་པའི་ཕྱིར་དེ་མ་ཐག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་
གྱུར་ཏོ། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། བྱང་ཆུབ་སེམས་དཔའ་བརྩོན་འགྲུས་ལ་གནས་པ་བྱང་ཆུབ་ཡོངས་སུ་བརྒྱན་པ་དང་། སངས་རྒྱས་ཀྱི་བཀའ་དྲིན་གྱི་ལན་
བསབ་པར་འདོད་པ་དག་རྟག་ཏུ་སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་འདུ་ཤེས་བསྐྱེད་ཅིང་དྲན་པར་བྱའོ། །རིགས་ཀྱི་བུ་འདི་ལྟར་རིག་པར་བྱ་སྟེ། དེའི་དུས་དེའི་ཚེ་ན་བྲམ་ཟེའི་བུ་དེ་གཞན་ཞིག་
ཡིན་པར་མ་སེམས་ཤིག །དེ་ལྟར་མི་བལྟའོ། །དེའི་ཚེ་བྲམ་ཟེའི་བུར་གྱུར་པ་དེ་ནི་ད་ལྟར་ང་ཉིད་ཡིན་ནོ། །དེའི་རྒྱུ་དེའི་རྐྱེན་ཀྱིས་བསྐལ་པ་དགུ་བཅུ་སྙེད་ཀྱི་འཁོར་བ་ལས་འདས་ནས་མྱུར་དུ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །གཞན་ཡང་བྱང་ཆུབ་སེམས་དཔའ་ཐབས་མཁས་པ་ཆེན་པོ་སྤྱོད་ཅིང་དྲིན་ལན་ཤེས་པ་དང་། དྲིན་ལན་བསབ་པ་ནི་འདི་ལྟ་སྟེ། 
སངས་རྒྱས་བཅོམ་ལྡན་འདས་འོད་མའི་ཚལ་ན་བཞུགས་པ་ན། དགེ་སློང་ཅིག་ལུས་ལ་འབྲུམ་བུའི་ནད་ཀྱིས་བཏབ་ནས་ལུས་ལ་ཀུན་ནས་རྣག་ཁྲག་རྒྱུན་དུ་ཟག་པས་ཐམས་ཅད་ཀྱིས་མི་འདོད་དེ། བཙུག་ལག་
ཁང་གི་ཕྱི་རོལ་གནས་ཁང་ཞིག་པར་གྱུར་པ་ཐ་མ་ཞིག་གི་ནང་དུ་བཞག་གོ། །དེའི་ཚེ་དེ་བཞིན་གཤེགས་པས་རྫུ་འཕྲུལ་གྱི་མཐུས་འཁོར་མང་པོས་གཅིག་གིས་ཀྱང་མི་ཤེས་པར་བྱིན་གྱིས་བརླབས་ནས་དེ་བཞིན་

71-1-192a

གཤེགས་པ་ཉག་གཅིག་དགེ་སློང་ནད་པའི་ཐད་ཏུ་གཤེགས་ཏེ། ཆུས་བཀྲུ་བར་དགོངས་ནས་འདོད་པའི་ཁམས་ཀྱི་ལྷ་རྣམས་ཤེས་པར་བྱ་བའི་ཕྱིར་བརྒྱ་བྱིན་ལྷའི་དབང་པོ་ལྷའི་འཁོར་ཚད་མེད་པ་བརྒྱ་སྟོང་གིས་བསྐོར་ཏེ་ལྷ་རྫས་
ཀྱི་མེ་ཏོག་ཆར་བཞིན་དུ་ཕབ། ལྷ་རྫས་ཀྱི་རོལ་མོ་རྣམ་པ་སྣ་ཚོགས་བྱས་ནས་སྟེང་གི་ནམ་མཁའ་ལ་འཁོད་དོ། །དེའི་ཚེ་ན་སུམ་ཅུ་རྩ་གསུམ་གནམ་གྱི་ལྷའི་དབང་པོ་བསོད་ནམས་བརྒྱ་ལས་གྲུབ་པའི་བུམ་པ་དམ་པའི་ནང་ན་སྙིང་རྗེ་ཆེན་པོའི་
ཆུ་གཙང་མས་བཀང་ནས་ལག་ན་ཐོགས་ཏེ། དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ནས་དེ་བཞིན་གཤེགས་པ་ལ་མདུན་ནས་བསུ་སྟེ་ཕྱོགས་གཅིག་ཏུ་སྡོད་དོ། །དེའི་ཚེ་ན་དེ་བཞིན་གཤེགས་པས་བསོད་ནམས་བརྒྱ་
དང་ལྡན་པའི་ཕྱག་བརྐྱང་ནས་ཕྱག་སོར་མཉེན་ཞིང་རིང་བ་ལྔ་ལས་འོད་ཟེར་ཆེན་པོ་བཀྱེ་ནས་ལྷ་དང་འཁོར་མང་པོ་དེ་དག་རྣམས་སྣང་བར་བྱས་ཏེ། འཁོར་མང་པོ་དེ་དག་འདུག་ནས་དེ་བཞིན་གཤེགས་པ་ཉིད་དགེ་སློང་ནད་པའི་དྲུང་དུ་གཤེགས་ཏེ་
དབུའི་སྤྱི་གཙུག་ནས་འོད་ཟེར་བཀྱེ་ནས་དགེ་སློང་ནད་པ་སྣང་བར་བྱས་སོ། །དགེ་སློང་ནད་པ་དེ་ལ་རེག་མ་ཐག་ཏུ་ན་བའི་སྡུག་བསྔལ་བྱང་བར་གྱུར་ཏེ། རྨའི་རྣག་ཁྲག་དང་བཅས་པའི་ལུས་ཀྱིས་སྐྱབས་སུ་གསོལ་ནས་ལུས་ཀྱིས་དེ་བཞིན་
གཤེགས་པ་ལ་ཕྱག་འཚལ་མ་ནུས་པས་དེ་བཞིན་གཤེགས་པས་ཕྱག་གཡས་པས་བརྒྱ་བྱིན་ལྷའི་དབང་པོ་ལས་རིན་པོ་ཆེའི་བུམ་པ་བླངས་ཏེ་དགེ་སློང་ནད་པའི་སྤྱི་བོ་ནས་ཆུ་བླུགས་ཏེ། ཕྱག་གཡོན་པས་དགེ་སློང་ནད་པའི་ལུས་ཀྱི་རྨ་བཀྲུས་
ཤིང་བྱུགས་པས་དགེ་སློང་ནད་པའི་རྨ་ཐམས་ཅད་དེ་བཞིན་གཤེགས་པའི་ཕྱག་གི་རྗེས་སུ་སོས་པར་གྱུར་ཏོ། །དེ་ལྟར་རྨ་ཀུན་སོས་ནས་དགེ་སློང་དེ་དགའ་མགུ་རངས་པར་གྱུར་ཏེ་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །ཐུགས་
རྗེ་ཆེན་པོའི་ཡབ་ལ་ཕྱག་འཚལ་ལོ། །བླ་ན་མེད་པའི་སྨན་པའི་རྒྱལ་པོ་མཆོག་ལ་ཕྱག་འཚལ་ལོ་ཞེས་བརྗོད་དོ། །བདག་གི་ལུས་ཀྱི་ནད་རྣམས་ནི་དེང་དུ་སོས་པར་གྱུར་ན་སེམས་ཀྱི་ནད་འབའ་ཤིག་མ་སོས་པས་དེ་བཞིན་

71-1-192b

གཤེགས་པས་ཐུགས་བརྩེ་བའི་སླད་དུ་བདག་ལ་ཆོས་ཀྱི་སྨན་སྩལ་ཅིང་སེམས་ཀྱི་ནད་ཀྱང་གསོ་བར་གསོལ་ཏོ། །དེ་ནས་དེ་བཞིན་གཤེགས་པས་དགེ་སློང་ནད་པ་དེ་ལ་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ནི་ཁྱོད་ཀྱི་དྲིན་ཤིན་
དུ་ལྕི་བར་དགོངས་པས་ན་དེ་བཞིན་གཤེགས་པས་ཁྱོད་ཀྱི་དྲིན་ལན་བསབ་པར་མཛད་དོ། །དེའི་ཚེ་དགེ་སློང་ནད་པ་དེ་ཤིན་དུ་དགའ་བར་གྱུར་ཏེ། དེ་བཞིན་གཤེགས་པས་སྤྲོ་བ་དང་། དགའ་བ་དང་། གཟེངས་སྟོད་པ་མཛད་ནས་དགེ་སློང་ནད་པ་དེ་དགྲ་
བཅོམ་པའི་འབྲས་བུ་ཐོབ་ནས་རིག་པ་གསུམ་དང་། མངོན་པར་ཤེས་པ་དྲུག་དང་། རྣམ་པར་གྲོལ་བ་བརྒྱད་དང་ལྡན་པར་གྱུར་ཏོ། །བརྒྱ་བྱིན་ལྷའི་དབང་པོ་ལ་སོགས་པ་ལྷའི་འཁོར་ཐམས་ཅད་ཐེ་རྩོམ་དུ་གྱུར་ཏེ། དེ་བཞིན་གཤེགས་པ་
ལ་འདི་སྐད་ཅེས་གསོལ་ཏོ། །ཅིའི་སླད་དུ་དེ་བཞིན་གཤེགས་པ་ཉིད་ཕྱག་དར་ཏེ་དགེ་སློང་ནད་པའི་ལུས་ཀྱི་རྨ་ཁྲག་ཀུན་བཀྲུས་ཏེ། དགེ་སློང་འདི་ལ་ཤིན་དུ་དྲིན་ལྕི་བ་ཡོད་དོ་ཞེས་གསུངས་པའི་དོན་བདག་ཅག་ལ་བཀྲོལ་ཞིང་བཤད་ཏུ་གསོལ། 
སངས་རྒྱས་ཀྱིས་བརྒྱ་བྱིན་ལྷའི་དབང་པོ་དང་ལྷའི་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ཁྱེད་རྣམས་ལེགས་པར་ཉོན་ལ་ཤིན་དུ་ཡིད་ལ་ཟུང་ཤིག་དང་། དངོས་པོ་དེ་དག་བསྟན་པར་བྱའོ། །བརྒྱ་བྱིན་ལྷའི་དབང་པོ་སྔོན་འདས་པའི་
དུས་བསྐལ་པ་གྲངས་མེད་ཚད་མེད་པའི་ཕ་རོལ་ན་རྒྱལ་པོ་སྡིག་པ་ཅན་ཆོས་མ་ཡིན་པར་བྱེད་པ་ཀུན་ལ་འཕྲོག་རློམ་བྱེད་པ་ཞིག་བྱུང་ངོ་། །དེའི་ཚེ་རྒྱལ་པོ་སྡིག་པ་ཅན་དེ་ལ་བློན་པོ་ལྔ་བརྒྱ་ཞིག་བཀུག་ནས་དཀུ་གསང་གཅིག་ཏུ་བྱས་ཏེ། གསང་ལ་
བཏགས་ནས་བློན་པོ་དེ་ལ་འདི་སྐད་ཅེས་བསྒོའོ། །གང་སུ་ཡང་རུང་ཁྲིམས་ལས་འགལ་བར་བྱས་ན་ཁྱེད་ཀྱིས་ཆད་པས་གཅད་པར་དབང་བསྐུར་གྱིས། ཁྱེད་ཀྱིས་ནོར་ཅི་ཐོབ་ཀྱང་རུང་ང་དང་ཐུན་མོང་དུ་བྱའོ་ཞེས་བསྒོའོ། །དེའི་ཚེ་ན་ལྔ་བརྒྱ་པོ་དེས་རྟག་
ཏུ་གཞུ་རྡེག་བྱེད་དེ་ནོར་མང་དུ་ཐོབ་པ་ནི་དེ་བཞིན་དུ་བཏང་། གང་ནོར་མེད་པ་ལ་ནི་སྲོག་ལ་བབ་ཀྱི་བར་དུ་གནོད་པ་བྱེད་དེ། དེའི་ཚེ་ན་དགེ་བསྙེན་ཅིག་ཁྲིམས་ལས་འགལ་བ་ཅུང་ཟད་ཅིག་བྱས་པས་ལྔ་བརྒྱའི་གན་དུ་ཁྲིད་ནས་གཞུ་བརྡེག་བྱ་བར་བྱས་པ་ལས་

71-1-193a

དགེ་བསྙེན་ཤིན་དུ་དགེ་བ་ཡིན་ནོ་ཞེས་པས་གནོད་པ་མ་བྱས་པར་ཡན་པར་བཏང་ངོ་། །དེའི་རྐྱེན་གྱིས་དགེ་བསྙེན་དེ་ཡང་ཤིན་དུ་དགའ་བར་གྱུར་ཏོ། །ཀཽ་ཤི་ཀ་འདི་ལྟར་རིག་པར་བྱ་སྟེ། དེའི་ཚེ་དེའི་དུས་ན་ལྔ་བརྒྱ་པོ་དེ་ནི་དགེ་སློང་ནད་པ་འདི་ཡིན་ནོ། །དེའི་ཚེ་
དེའི་དུས་ན་དགེ་བསྙེན་དུ་གྱུར་པ་དེ་ནི་ད་ལྟར་ང་ཡིན་ནོ། །དེ་བས་ན་བྱང་ཆུབ་སེམས་དཔའ་ནི་བསྐལ་པ་གྲངས་མེད་པའི་སྔོན་རོལ་གྱི་དྲིན་ཡང་བ་ཡང་ལྕི་བས་གླན་པ་ཡིན་ཏེ། མངོན་པར་སངས་རྒྱས་ཀྱི་བར་དུ་ཡང་རྟག་ཏུ་མི་བརྗེད་དོ། །དེའི་ཚེ་ན་བརྒྱ་བྱིན་ལྷའི་
དབང་པོ་དང་ལྷའི་འཁོར་མང་པོ་རབ་ཏུ་དགའ་བར་གྱུར་ཏེ། ལྷའི་འཁོར་བཞི་ཁྲི་བརྒྱད་སྟོང་སྙེད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བྱང་ཆུབ་ཏུ་སེམས་བསྐྱེད་ནས་ལྷ་རྫས་ཀྱི་རོལ་མོ་བྱས་ཏེ། ཕྱིར་རང་རང་གི་གནས་སུ་སོང་
ངོ་། །བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། རིགས་ཀྱི་བུ་འམ་རིགས་ཀྱི་བུ་མོ་གང་དྲིན་ཤེས་པ་དང་། དྲིན་ལན་བསབ་པ་ནི་དོན་རྣམ་པ་འདི་བཞི་ལ་ནན་ཏན་བྱའོ། །བཞི་གང་ཞེ་ན། དགེ་བའི་བཤེས་གཉེན་བསྟེན་པ་དང་། སེམས་རྩེ་གཅིག་ཏུ་
ཆོས་ཉན་པ་དང་། དོན་ཡིད་ལ་བྱེད་པ་དང་། ཇི་ལྟར་བསྟན་པ་བཞིན་དུ་སྤྱོད་པའོ། །གཞན་ཡང་ཆོས་རྣམ་པ་བཞི་ལ་གནས་པར་བྱའོ། །བཞི་གང་ཞེ་ན། ཆོས་ལ་གནས་ཀྱི་གང་ཟག་གི་རྗེས་སུ་མི་གནས་པ་དང་། དོན་ལ་གནས་ཀྱི་ཡི་གེའི་རྗེས་སུ་མི་
གནས་པ་དང་། ཡེ་ཤེས་ལ་གནས་ཀྱི་རྣམ་པར་ཤེས་པའི་རྗེས་སུ་མི་གནས་པ་དང་། ངེས་པའི་དོན་གྱི་མདོ་སྡེ་ལ་གནས་ཀྱི་བཀྲི་བའི་དོན་གྱི་མདོ་སྡེ་ལ་མི་གནས་པ་སྟེ། ཆོས་འདི་བརྒྱད་ལ་ནན་ཏན་བྱེད་ན་ནི་དྲིན་ལན་ཤེས་པ་ཞེས་བྱའོ། །གཞན་ཡང་
ཆོས་རྣམ་པ་བརྒྱད་དང་ལྡན་ན་དྲིན་ལན་བསབ་པ་ཞེས་བྱའོ། །བརྒྱད་གང་ཞེ་ན། འདི་ལྟ་སྟེ། རྙེད་པ་དང་། ཁེ་དང་། སྨད་པ་དང་། བསྟོད་པ་དང་གྲགས་པ་དང་། འཕྱ་བ་དང་། སྡུག་བསྔལ་དང་། བདེ་བའོ། །གཞན་ཡང་དངོས་པོ་འདི་བཞི་ལ་ནན་ཏན་བྱེད་པ་ནི་དྲིན་ལན་ཤེས་པ་ཞེས་
བྱ། དྲིན་ལན་བསབ་པ་ཞེས་ཀྱང་བྱའོ། །བཞི་གང་ཞེ་ན། འདི་ལྟ་སྟེ། བྱམས་པ་བསྒོམས་པའི་རྐྱེན་གྱིས་སེམས་ཅན་སྡིག་པ་ཅན་དག་མཐོང་ན་བྱམས་ཤིང་སྙིང་བརྩེ་བའི་སེམས་བསྐྱེད་པ་དང་། སྙིང་རྗེ་བསྒོམས་པའི་རྐྱེན་གྱིས་སྡུག་བསྔལ་བའི་སེམས་ཅན་རྣམས་མཐོང་ན་མི་

71-1-193b

སྐྱོ་བར་ལྟ་ཞིང་མི་གཏོང་བ་དང་། དགའ་བ་བསྒོམས་པའི་རྐྱེན་གྱིས་སློབ་དཔོན་དང་། བླ་མ་དང་ཕ་མ་དང་། ཡོན་ཏན་དང་ལྡན་པ་རྣམས་མཐོང་ན་དགའ་བའི་སེམས་བསྐྱེད་པ་དང་། བཏང་སྙོམས་བསྒོམས་པའི་རྐྱེན་གྱིས་དགྲར་གྱུར་པའི་སེམས་ཅན་མཐོང་ན་ཞེ་སྡང་གི་སེམས་མི་
བསྐྱེད་པའོ། །དེའི་ཚེ་ཀུན་དགའ་བོས་གོས་ཚགས་སུ་བཅོས་ནས་སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐོག་མ་ནས་བྱང་ཆུབ་ཏུ་སེམས་བསྐྱེད་པ་ན་དྲིན་ཤེས་པ་དང་། དྲིན་ལན་བསབ་པའི་དོན་གྱི་དངོས་པོ་བཞི་ཅི་ལྟར་ནན་
ཏན་དུ་མཛད་པ་ལགས། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། སྔོན་འདས་པའི་དུས་བསྐལ་པ་གྲངས་མེད་དཔག་ཏུ་མེད་ཚད་མེད་པའི་ཕ་རོལ་ན་སངས་རྒྱས་རྣམ་པར་གཟིགས་ཤེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ་སྟོན་པ་རྒྱལ་བ་འཇིག་རྟེན་དུ་བྱུང་སྟེ། སྐལ་བ་དང་ལྡན་པ་རྣམས་ཀྱི་དོན་མཛད་དོ། །སྐལ་བ་དང་ལྡན་པ་རྣམས་ཀྱི་དོན་མཛད་ནས་
ཡོངས་སུ་མྱ་ངན་ལས་འདས་ཏེ། དམ་པའི་ཆོས་དང་གཟུགས་བརྙན་ལས་ཆོས་བྱ་བ་ཡང་ནུབ་ནས་ཡུལ་བཱ་ར་ཎ་སཱི་ཞེས་བྱ་བ་ན་མི་རྣམས་ཀྱང་སྐྱིད་ཅིང་བདེ་ལོ་ཡང་ལེགས་ཏེ་རྒྱལ་པོ་དེ་ཡང་དྲང་པོའི་ཆོས་ཀྱིས་ཡུལ་གྱི་སྲིད་འཚོའོ། །ཡུལ་དེ་ན་རི་དྲང་སྲོང་འཕགས་ཤེས་
བྱ་བ་ཞིག་ཡོད་དེ། རི་དེ་ལ་རྒྱུན་དུ་རང་སངས་རྒྱས་ལྔ་བརྒྱ་གནས་སོ། །དེ་མ་ཡིན་པ་མངོན་པར་ཤེས་པ་ལྔ་དང་ལྡན་པའི་དྲང་སྲོང་ཡང་མང་དུ་གནས་སོ། །དེའི་ཚེ་རི་དེ་ལ་རི་དགས་དང་གཅན་ཟན་ཡང་མང་དུ་གནས་ཏེ། དེ་ན་སེང་གེ་ཡི་དམ་བརྟན་ཞེས་བྱ་བ་ཞིག་ལུས་ཀྱི་
སྤུ་གསེར་གྱི་མདོག་ཏུ་འདུག་པ། མཐུ་སྟོབས་དང་གཟི་བརྗིད་ཆེ་བ། སྐད་ཕྱུང་ན་བྱ་རྣམས་ཀྱང་ས་ལ་ལྟུང་བ། རི་དགས་རྣམས་ཀྱང་འབྲོས་པ་ཞིག་ཡོད་དེ། རི་དེ་ལ་འགྲོ་ཞིང་རྒྱུ་བ་དང་། རང་སངས་རྒྱས་དགེ་སྦྱོང་གི་གཟུགས་དང་སྤྱོད་ལམ་དུ་ལྡན་པ་
ཅིག་དང་ཕྲད་ནས་དེ་ལ་ཤིན་དུ་དགའ་བའི་སེམས་སྐྱེས་ཏེ། ཉིན་གཅིག་བཞིན་དུ་ཉེ་བར་བསྙེན་ནས་རྒྱུན་དུ་མདོ་སྡེ་ཀློག་པ་དང་དམ་པའི་ཆོས་འཆད་པ་ཐོས་པར་གྱུར་ཏོ། །དེའི་ཚེ་ན་རྔོན་པ་ཆེན་པོ་མ་རུངས་པ་ཞིག་གིས་སེང་གེའི་ལྤགས་པ་གསེར་གྱི་མདོག་ཏུ་འདུག་པ་

71-1-194a

དེ་མཐོང་ནས་རབ་ཏུ་དགའ་བའི་སེམས་སྐྱེས་ཏེ་འདི་སྙམ་དུ་སེམས་སོ། །གལ་ཏེ་བདག་གིས་གསེར་གྱི་སེང་གེ་བསད་དེ་ལྤགས་པ་བཤུས་ལ་རྒྱལ་པོ་ལ་ཕུལ་ན་གདོན་མི་ཟ་བར་བྱ་དགའ་ཆེན་པོ་ཐོབ་པར་འགྱུར་ཏེ། རབས་བདུན་གྱི་བར་དུ་ཕོངས་
པ་མེད་པར་འགྱུར་རོ་སྙམ་བསམས་ནས། ཡང་འདི་སྙམ་དུ་བསམས་སོ། །སེང་གེ་ཡི་དམ་བརྟན་ཞེས་བྱ་བ་འདི་ནི་གཅན་ཟན་གྱི་རྒྱལ་པོ་ཡིན་པས་མདའ་གཞུས་ཀྱང་མི་རྫི། སྙི་དང་རྒྱས་ཀྱང་བྱར་མེད་དེ། ད་བདག་གིས་ཐབས་འདི་ལྟ་བུ་ཞིག་བྱའོ། །རི་དགས་
ཀྱི་རྒྱལ་པོ་སེང་གེ་འདི་ལྟར་དགེ་སྦྱོང་གི་ཕྱི་བཞིན་འབྲང་བས་བདག་ཀྱང་དགེ་སྦྱོང་གི་གཟུགས་སུ་བྱས་ལ། ཆོས་གོས་ཀྱི་འོག་ཏུ་མདའ་གཞུ་སྦས་ལ་མིག་ཕབ་ལ་གོམ་པ་དལ་བུས་སོང་སྟེ་ཤིང་དྲུང་ཞིག་ཏུ་འདུག་ན། དེས་བདག་མཐོང་མ་ཐག་ཏུ་གདོན་
མི་ཟ་བར་བདག་གི་དྲུང་དུ་འོང་སྟེ། གལ་ཏེ་བདག་གི་དྲུང་དུ་འོངས་ན་གཞུ་བརྡུངས་བཀང་སྟེ་དུག་མདའ་འཕངས་ན་གདོན་མི་ཟ་བར་སོད་དོ་སྙམ་བསམས་ནས་ཕྱིར་ཁྱིམ་དུ་འོངས་ཏེ་འདི་སྐད་ཅེས་སྨྲས་སོ། །བདག་རྒྱུད་ཀྱིས་རྔོན་པ་བྱེད་བྱེད་དེ་གནས་ན་
གཅན་ཟན་ལ་སྤུ་གསེར་དུ་འདུག་པ་ཡོང་མ་ཐོས་ན་མཐོང་བ་ལྟ་ཅི་སྨོས་ཏེ། ད་བདག་གིས་དེ་བསད་པའི་ཕྱིར་སྐྲ་དང་ཁ་སྤུ་བྲེགས་ལ། ཆོས་གོས་གྱོན་ནས་ཕྱིར་ཡང་རི་དེ་ལ་སོང་ནས་ཤིང་དྲུང་ཞིག་ན་འདུག་ན། དེའི་ཚེ་སེང་གེ་ཡི་དམ་བརྟན་གྱིས་
དགེ་སློང་མཐོང་ནས་རབ་ཏུ་དགའ་སྟེ་མཆོང་རྒལ་ནས་དགེ་སློང་དེའི་དྲུང་དུ་བསྙེན་ཏེ། རྐང་པ་ལ་བལྡག་གོ། །དེ་ནས་རྔོན་པ་དེས་སེང་གེ་ལ་མདའ་འཕངས་སོ། །དེ་ནས་དུག་མདས་སྡུག་བསྔལ་བར་གྱུར་ཏེ་སྐད་ཕྱུང་ནས་གཟུང་ཞིང་མཆོང་བར་བྱས་པ་ལ་
འདི་སྙམ་བསམས་སོ། །འདི་ནི་དགེ་སྦྱོང་གི་ཁ་དོག་བསྒྱུར་བ་གྱོན་པ་ཡིན་ཏེ། དུས་གསུམ་གྱི་སངས་རྒྱས་ཀྱི་འཕགས་པའི་རྒྱལ་མཚན་ཡིན་པས་འདི་ལ་བདག་གིས་གནོད་པ་བྱས་ན་དཀའ་བ་མ་ཡིན་ན། གལ་ཏེ་འདི་ལ་གནོད་པ་བྱས་ཏེ་སྲོག་གི་
དབང་པོ་དང་ཕྲལ་ན་སངས་རྒྱས་རྣམས་ཀྱི་འཕགས་པའི་རྒྱལ་མཚན་མ་རུངས་པར་བྱས་པ་ཡིན་ནོ་སྙམ་བསམས་ནས་ཅང་མ་བྱས་པར་བསྡད་པ་ལས་རིང་པོ་མ་ལོན་པར་དུག་ལངས་ནས་ལྷག་པར་སྡུག་བསྔལ་མི་བཟོད་པར་གྱུར་ཏོ། ཡང་བཟའ་

71-1-194b

ཞིང་བཅའ་བ་འམ་སྙམ་བསམས་པ་ལས་འདི་ནི་དཀའ་བ་མ་ཡིན་ན། གལ་ཏེ་བདག་གིས་འདི་ལ་གནོད་པ་བྱས་ན་སངས་རྒྱས་རྣམས་དང་འཕགས་པ་རྣམས་ཀྱིས་སྨོད་པར་འགྱུར་ཏེ། འཇིག་རྟེན་ན་དགེ་བ་བྱེད་པ་དང་། སྡིག་པ་བྱེད་པ་ཡང་བྱེ་བྲག་མེད་དེ། འདི་ནི་སྡིག་པ་
ཅན་ཡིན་ཏེ་བདག་གསོད་ཏུ་འོངས་པས་གལ་ཏེ་བདག་གིས་དེ་ལ་བཟོད་པ་མ་བྱས་ན་ནི་སྡིག་པ་ཅན་དེ་དང་ཐ་དད་པ་ཡང་མེད་དེ། གང་ཡང་བཟོད་པ་སྒོམ་པ་དེ་ལ་ཐམས་ཅད་བྱམས་པར་འགྱུར་རོ། །གང་མི་བཟོད་པ་དེ་ལ་ནི་ཐམས་ཅད་སྡང་བར་འགྱུར་བས་དེ་ལ་ཉོན་མོངས་པ་
སྐྱེ་བར་འགྱུར་ཏེ། ཉོན་མོངས་པ་སྐྱེས་པར་གྱུར་ན་སྐྱེ་ཤིའི་འཁོར་བར་འགྱུར་རོ། །སྐྱེ་ཤིར་འཁོར་བ་ན་མི་ཁོམ་པའི་གནས་སུ་སྐྱེ་བར་འགྱུར། མི་ཁོམ་པའི་གནས་སུ་སྐྱེས་ན་དགེ་བའི་བཤེས་གཉེན་དང་འབྲལ་བར་འགྱུར། དགེ་བའི་བཤེས་གཉེན་དང་བྲལ་ན་དམ་
པའི་ཆོས་མི་ཐོས་པར་འགྱུར། དམ་པའི་ཆོས་མ་ཐོས་ན་ཐེ་ཙོམ་གྱི་དྲ་བས་ཀླགས་པར་འགྱུར། ཐེ་ཙོམ་གྱི་དྲ་བས་ཀླགས་པར་གྱུར་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་བྲལ་བར་འགྱུར་ཏེ། དེ་བས་ན་བདག་ནི་སྡིག་པའི་སེམས་མི་བསྐྱེད་དོ་སྙམ་
བསམས་ནས་ཚིགས་སུ་བཅད་པ་འདི་སྐད་ཅེས་སྨྲས་སོ། །བདག་གི་ལུས་སྲོག་ཡལ་བླ་ཡི། །མི་དགེ་སྡིག་པའི་སེམས་མི་བསྐྱེད། །བདག་ནི་སྲོག་དང་བྲལ་ཡང་རུང་། །ངུར་སྨྲིག་གྱོན་ལ་གནོད་མི་བྱ། །རབ་ཏུ་བྱུང་བའི་མི་དག་ལ། །ནམ་དུ་འང་ངན་སེམས་
མི་སྐྱེད་དོ། །ཚིགས་སུ་བཅད་པ་འདི་དག་སྨྲས་ནས་ཚེའི་དུས་བྱས་པར་གྱུར་ཏེ། གནམ་ས་ཡང་ལན་དྲུག་ཏུ་གཡོས་སོ། །གཅན་ཟན་དང་རི་དགས་ཀྱང་སྐྲག་ནས་ཕྱོགས་བཞིར་བྲོས་སོ། །སྤྲིན་མེད་པར་ཆར་པ་བབ་ནས་ཉི་མ་ཡང་འོད་མི་སྣང་བར་གྱུར་
ཏོ། །དེའི་ཚེ་རྔོན་པ་དེས་གོས་ཕུད་ནས་གྲི་ཐོགས་ནས་ལྤགས་པ་བཤུས་ཏེ་ཕྱིར་ཁྱིམ་དུ་སོང་ངོ་། །ཕྱིར་ཁྱིམ་དུ་སོང་ནས་རྒྱལ་པོ་ལ་ཕུལ་ལོ། །རྒྱལ་པོས་ལྤགས་པ་དེ་མཐོང་ནས་རབ་ཏུ་དགའ་སྟེ་བློན་པོ་རྣམས་ལ་འདི་སྐད་ཅེས་སྨྲས་སོ། །བདག་སྐྱེས་ནས་
དུད་འགྲོ་ལ་ལུས་ཀྱི་ལྤགས་པ་སྤུ་གསེར་གྱི་མདོག་ཏུ་འདུག་པ་ཡང་ཡོང་མ་ཐོས་ཏེ། ད་འདིར་མིག་གིས་མངོན་སུམ་དུ་མཐོང་བ་ངོ་མཚར་ཆེའོ་ཞེས་རྔོན་པ་དེ་ལ་ཁྱོད་ཇི་ལྟ་བུ་ཞིག་གི་ཐབས་བྱས་ཏེ་ལྤགས་པ་འདི་ལྟ་བུ་ཐོབ་ཅེས་དྲིས་སོ། །དེ་ནས་རྔོན་པས་རྒྱལ་པོ་

71-1-195a

ལ་འདི་སྐད་གསོལ་ཏོ། །རྒྱལ་པོ་ཆེན་པོ་འཇིགས་པ་མེད་པ་སྩལ་ན་དྲང་པོར་སྨྲའོ་ཞེས་གསོལ་ལོ། །རྒྱལ་པོས་ཀྱང་ཁྱོད་ཅི་འདོད་པ་བཞིན་གནང་ངོ་བར་བསྒོ་ནས་རྔོན་པ་དེས་ཀྱང་ཇི་ལྟར་གྱུར་པ་བཞིན་དུ་གསོལ་ཏོ། །རྒྱལ་པོས་ཀྱང་ཚིག་དེ་ཐོས་ནས་མྱ་ངན་གྱིས་
ནོན་ཏེ། དཔེར་ན་མི་བརྣངས་པ་བཞིན་མིད་དུ་ཡང་མེད་ལ་སྐྱུག་ཏུ་ཡང་མེད་པ་ལྟར་མི་བདེ་བར་གྱུར་ཏེ། །བློན་པོ་ཆེན་པོ་ཐམས་ཅད་དང་། རྒྱལ་ཕྲན་དང་། འཁོར་མང་པོ་ཀུན་བསྡུས་ཏེ་འདི་སྐད་ཅེས་བསྒོའོ། །ཁྱེད་རྣམས་ཤེས་པར་གྱིས་ཤིག་ངས་སྔོན་མཁས་པ་ཤེས་
རབ་ཅན་དག་ལས་འདི་སྐད་ཅེས་ཐོས་ཏེ། དུད་འགྲོའི་ཁམས་སུ་སྐྱེས་པའི་ནང་ན་ལུས་ཀྱི་སྤུ་མདོག་གསེར་ལྟར་བུར་འདུག་ན་གདོན་མི་ཟ་བར་བྱང་ཆུབ་སེམས་དཔའ་ཡིན་ནོ་ཞེས་ཟེར་ཏེ། གལ་ཏེ་སོ་སོའི་སྐྱེ་བོ་ལས་གཅིག་ཙམ་བླ་ན་མེད་པའི་བྱང་ཆུབ་ཏུ་སེམས་བསྐྱེད་
ན་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་ཆེན་པོ་བྱེད་པ་ཡིན་ན་ཅིའི་ཕྱིར་རྔོན་པ་སྡིག་པ་ཅན་འདིས་དེ་འདྲ་བའི་ཐབས་བྱས་ཏེ་བྱང་ཆུབ་སེམས་དཔའ་འདི་གལ་ཏེ་བདག་གིས་བློན་ཐབས་སམ། བྱ་དགའ་འམ། བལ་གྱི་གླང་པོ་ཆེ་འམ། རྟ་འམ། རིན་
པོ་ཆེ་སྣ་བདུན་ནམ། གོས་སམ་ཟས་སམ། ནོར་རམ། འབྲུ་འམ། ནོར་འདི་ལྟར་བྱིན་པར་གྱུར་ན་སྡིག་ཅན་དེ་དང་འཐུན་པར་གྱུར་ཏེ་དེའི་གྲོགས་སུ་འགྱུར་རོ་སྙམ་བསམས་ནས་རྔོན་པ་དེའི་སྲོག་གི་དབང་པོ་བཅད་དོ། །དེ་ལྟར་རྔོན་པ་དེའི་སྲོག་གི་དབང་པོ་བཅད་ནས་
སེང་གེའི་ལྤགས་པ་ཐོགས་ཏེ་རི་དེ་ལ་སོང་ནས་ཤིང་གླང་མགོའི་ཙན་དན་སྤུངས་ཏེ་སེང་གེའི་ལྤགས་པ་དང་རོ་བསྲེགས་སོ། །དེ་ལྟར་སེང་གེའི་རོ་བསྲེགས་ནས་རུས་པ་བསྡུས་ཏེ་མཆོད་རྟེན་བརྩིགས་ནས་མཆོད་པ་བྱས་སོ། །བཅོམ་ལྡན་འདས་ཀྱིས་ཀུན་དགའ་བོ་ལ་
འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་དེའི་ཚེ་དེའི་དུས་ན་སེང་གེ་ཡི་དམ་བརྟན་ཞེས་བྱ་བ་དེ་ནི་ད་ལྟར་ཤཱཀྱ་ཐུབ་པ་ང་ཉིད་ཡིན་ནོ། །དེ་བས་ན་བྱང་ཆུབ་སེམས་དཔའ་ནི་དགེ་བའི་བཤེས་གཉེན་དང་བསྟེན་པའི་ཕྱིར་ལུས་དང་སྲོག་གི་ཕྱིར་ཡལ་ཡང་སླའི་སྡིག་
པའི་སེམས་མི་བསྐྱེད་དོ། །དེ་ཅིའི་ཕྱིར་ཞེ་ན། དྲིན་ཤེས་པ་དང་དྲིན་ལན་བསབ་པའི་ཕྱིར་རོ། །དེ་ལྟར་ཇི་ལྟར་ཞེ་ན། བྱང་ཆུབ་སེམས་དཔའ་ནི་དགེ་བའི་བཤེས་གཉེན་དང་བསྟེན་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མྱུར་དུ་ཐོབ་པར་འགྱུར་རོ། །

71-1-195b

རིགས་ཀྱི་བུ་བྱང་ཆུབ་སེམས་དཔའ་ནི་རྒྱུན་དུ་བརྩོན་འགྲུས་སུ་དགེ་བའི་བཤེས་གཉེན་ལ་བསྟེན་ཏེ་ཁམས་གསུམ་གྱི་ཉོན་མོངས་པ་གཞོམ་ཞིང་རྒུད་པར་བྱ་བའི་ཕྱིར་སངས་རྒྱས་ཀྱི་ཆོས་ཚིག་གཅིག་ཙམ་འམ། ཚིགས་སུ་བཅད་པ་གཅིག་གམ། དོན་
གཅིག་ཙམ་གྱི་བར་དུ་ཉན་པ་ལ་རབ་ཏུ་བརྩོན་པར་བྱེད་དོ། །དེ་ལྟར་བྱང་ཆུབ་སེམས་དཔའ་སེམས་རྩེ་གཅིག་ཏུ་སངས་རྒྱས་ཀྱི་གསུང་རབ་ཚོལ་བ་ན་ཆོས་འདོད་པའི་སེམས་དང་ཤིན་དུ་ལྡན་པས་ལུས་དང་སྲོག་ཀྱང་མི་ཕངས་པར་མེ་མ་མུར་གྱི་ལྕགས་
སམ་ས་གཞི་ལས་ཀྱང་འབོག་ཅིང་འགྲོ་སྟེ་གནོད་པར་མི་སེམས་སོ། །བྱང་ཆུབ་སེམས་དཔའ་ནི་ཚིགས་སུ་བཅད་པ་འགའ་ཙམ་གྱི་ཕྱིར་ཡང་ལུས་དང་སྲོག་མི་ཕངས་ན་མདོ་སྡེ་བཅུ་གཉིས་ལྟ་ཅི་སྨོས། ཚིགས་སུ་བཅད་པ་གཅིག་ཙམ་གྱི་ཕྱིར་ཡང་
ལུས་དང་སྲོག་མི་ཕངས་ན་དེ་མ་ཡིན་པ་ཕྱིའི་ཟང་ཟིང་ལྟ་ཅི་སྨོས། ཆོས་ཐོས་པའི་དོན་གྱིས་ལུས་དང་སེམས་ཤིན་དུ་བདེ་བར་འགྱུར་ཏེ། ཤིན་དུ་དད་པའི་སེམས་སྐྱེས་པས་ཡང་དག་པའི་ལྟ་བའི་སེམས་ཐོབ་པར་འགྱུར་རོ། །ཆོས་སྟོན་པ་མཐོང་ན་ཕ་
མ་མཐོང་བ་ལྟར་ང་རྒྱལ་གྱི་སེམས་མི་སྐྱེའོ། །སེམས་ཅན་གྱི་དོན་དུ་ཆོས་ཉན་གྱི་རྙེད་པ་དང་གྲགས་པའི་ཕྱིར་མ་ཡིན་སེམས་ཅན་ལ་ཕན་པ་དང་བདེ་བའི་དོན་བྱེད་ཀྱི་བདག་ལ་ཕན་པའི་དོན་གྱི་ཕྱིར་མ་ཡིན་ནོ། །དམ་པའི་ཆོས་ཀྱི་ཕྱིར་རྒྱལ་པོ་དང་། 
བཀྲེས་སྐོམ་དང་གྲང་བ་དང་། ཚ་བ་དང་སྟག་དང་། སྤྱང་ཀི་ལ་སོགས་ཏེ། གཅན་ཟན་ཁྲོ་བོ་དང་། རྐུན་པོ་དང་། དགྲ་ལ་སོགས་པས་འཇིགས་པ་མ་ཡིན་ནོ། །སྔར་དབང་པོ་རྣམས་ཀྱི་ཉོན་མོངས་པ་བཏུལ་ནས་དེའི་འོག་ཏུ་ཆོས་ཉན་པར་བྱེད་ཀྱི་དུས་མ་
ཡིན་པར་ཉན་པ་ནི་མ་ཡིན་ཏེ། སེམས་རྩེ་གཅིག་ཏུ་ཉན་པར་བྱེད་དོ། །ཆོས་ལ་བཀུར་སྟི་བྱ་བའི་ཕྱིར་ཆོས་སྟོན་པ་ལ་རིམ་གྲོ་གོས་པར་བྱེད་པ་ནི་བྱང་ཆུབ་སེམས་དཔའ་དྲིན་ཤེས་པ་དང་དྲིན་ལན་བསབ་པ་ཞེས་བྱའོ། །ཇི་ལྟར་ན་བྱང་ཆུབ་སེམས་
དཔའ་སེམས་རྩེ་གཅིག་ཏུ་ཆོས་ཉན་པ་ཞེ་ན། ཆོས་ཉན་པ་ལ་རྣམ་པ་བཞི་སྟེ། ཡང་དག་པའི་སེམས་དང་། རྩེ་གཅིག་པའི་སེམས་དང་། ཐམས་ཅད་དུ་ཐམས་ཅད་ཀྱི་སེམས་དང་། དགེ་བའི་སེམས་དང་བཞི་སྟེ། དེ་ནི་བྱང་ཆུབ་སེམས་དཔའ་མདོ་སྟེ་བཅུ་

71-1-196a

གཉིས་ཚོལ་བ་ལ་བརྩོན་པ་ཞེས་བྱའོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་བཀའ་དྲིན་ལྕི་བ་དྲན་པ་ནི་སངས་རྒྱས་ཐམས་ཅད་ཀྱི་དམ་པའི་ཆོས་ཀུན་དུ་རྒྱས་པར་བྱ་བའི་ཕྱིར། སངས་རྒྱས་ཀུན་གྱི་དམ་པའི་ཆོས་སྐྱེ་ཞིང་འཕེལ་བར་བྱ་བའི་ཕྱིར། འཇིག་རྟེན་
པ་དག་སངས་རྒྱས་ཀྱི་ཆོས་ལ་དད་པར་བྱ་བའི་ཕྱིར་སེམས་ཅན་ཐམས་ཅད་བླ་ན་མེད་པའི་བྱང་ཆུབ་པར་བྱ་བའི་ཕྱིར། དེ་བས་ན་བྱང་ཆུབ་སེམས་དཔའ་ཕྱོགས་བཅུའི་སེམས་ཅན་གྲངས་མེད་པ་དྲན་པར་བྱེད་དོ། །སངས་རྒྱས་ཀུན་གྱི་བཀའ་དྲིན་ལྕི་བ་བསབ་པའི་ཕྱིར་བྱང་
ཆུབ་སེམས་དཔའ་ནི་མདོ་སྡེ་བཅུ་གཉིས་ཚོལ་བ་ལ་བརྩོན་པར་བྱེད་དོ། །བྱང་ཆུབ་སེམས་དཔས་བརྩོན་འགྲུས་སུ་སངས་རྒྱས་ཀྱི་ཆོས་ཚོལ་བ་ནི་སེམས་ཅན་ཐམས་ཅད་དད་པའི་སེམས་བསྐྱེད་པའི་ཕྱིར་རྒྱུའི་རིག་པའི་བསྟན་བཅོས་སློབ་པར་བྱེད་དོ། །གཞན་
ཡང་ཉེས་པའི་སྐྱོན་ཐམས་ཅད་ཤེས་པར་བྱ་བ་དང་། མུ་སྟེགས་ཅན་གྱི་ངན་པར་ལྟ་བའི་གཙུག་ལག་གཞིག་པར་བྱ་བ་དང་། སེམས་ཅན་གདུལ་བའི་ཐབས་མཁས་པ་ཤེས་པར་བྱ་བ་དང་། དེ་བཞིན་གཤེགས་པས་གསུངས་པའི་དོན་དང་། འཇིག་རྟེན་
པའི་ཚིག་གི་དོན་རྣམ་པར་དབྱེ་བར་བྱ་བའི་ཕྱིར་བྱང་ཆུབ་སེམས་དཔའ་རྒྱུའི་རིག་པའི་བསྟན་བཅོས་སློབ་པར་བྱེད་དོ། །བྱང་ཆུབ་སེམས་དཔའ་ཅིའི་ཕྱིར་སྒྲའི་རིག་པའི་བསྟན་བཅོས་སློབ་པར་བྱེད་ཅེ་ན། སྒྲའི་ཚིག་ཡོངས་སུ་དག་པར་བརྒྱན་པ་དང་། ཡོངས་
སུ་མ་དག་པའི་ཚིག་གིས་དོན་གསལ་བར་སྟོན་མི་ནུས་པ་དང་། དོན་ཐམས་ཅད་ཤེས་ཤིང་ཁོང་དུ་ཆུད་པར་བྱ་བ་དང་། ཡང་དག་པའི་ཚིག་མི་ཉམས་པས་ང་རྒྱལ་གྱིས་མི་ཤིགས་པ་དང་། ངན་པར་ལྟ་བ་ལས་བཟློག་ཅིང་སེམས་ཅན་གདུལ་བའི་ཐབས་
མཁས་པ་ཤེས་པར་བྱ་བའི་ཕྱིར་བྱང་ཆུབ་སེམས་དཔའ་སྒྲའི་རིག་པའི་བསྟན་བཅོས་སློབ་པར་བྱེད་དོ། །བྱང་ཆུབ་སེམས་དཔའ་ཅིའི་ཕྱིར་སྨན་དཔྱད་ཀྱི་རིག་པའི་བསྟན་བཅོས་སློབ་ཅེ་ན། སེམས་ཅན་རྣམས་མི་དགེ་བའི་ནད་བརྒྱ་རྩ་བཞི་དང་དབྲལ་བར་བྱ་བ་
དང་། སེམས་ཅན་ཐམས་ཅད་ལ་བྱམས་ཤིང་སྙིང་བརྩེ་བའི་ཕྱིར་སེམས་ཅན་རྣམས་དད་པའི་སེམས་བསྐྱེད་པར་བྱ་བ་དང་། དེ་ལྟར་ནད་དང་བྲལ་བས་དགའ་བའི་སེམས་སྐྱེ་བར་བྱ་བ་དང་། དེ་ལྟར་དགའ་བའི་སེམས་སྐྱེས་པས་རྟག་ཏུ་སངས་རྒྱས་དྲན་པར་འགྱུར་ཏེ། 

71-1-196b

སྙིང་རྗེ་ཆེན་པོས་སེམས་ཅན་རྣམས་ཕ་རོལ་དུ་ཕྱིན་པར་བྱ་བའི་ཕྱིར་བྱང་ཆུབ་སེམས་དཔའ་སྨན་དཔྱད་ཀྱི་རིག་པའི་བསྟན་བཅོས་སློབ་པར་བྱེད་དོ། །བྱང་ཆུབ་སེམས་དཔའ་ནི་ཅིའི་ཕྱིར་འཇིག་རྟེན་གྱི་བཟོའི་རིག་པ་སློབ་པར་བྱེད་ཅེ་ན། སེམས་ཅན་ལ་ཕན་པར་བྱ་བའི་
ཕྱིར་ནོར་ཟང་ཟིང་རྙེད་སླ་བས་སེམས་ཅན་རྣམས་དད་པ་བསྐྱེད་པར་བྱ་བ་རྣམས་དང་། འཇིག་རྟེན་གྱི་བྱ་བའི་དངོས་པོ་ཀུན་ཤེས་པས་ང་རྒྱལ་གཞོམ་པ་དང་། སེམས་ཅན་གདུལ་བར་བྱ་བ་དང་། སྲིད་པའི་ཆོས་ཐམས་ཅད་ཀྱི་བསྒྲིབས་པ་ཀུན་བསལ་བའི་ཕྱིར་བྱང་
ཆུབ་སེམས་དཔའ་བཟོའི་རིག་པ་སློབ་པར་བྱེད་དོ། །གལ་ཏེ་བྱང་ཆུབ་སེམས་དཔའ་རིག་པའི་དངོས་པོ་ལྔར་མ་བསླབས་ན་ནམ་དུ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐམས་ཅད་མཁྱེན་པའི་ཡེ་ཤེས་ཐོབ་པར་མི་ནུས་སོ། །དེ་བས་ན་བླ་ན་མེད་པའི་
བྱང་ཆུབ་ཐོབ་པའི་ཕྱིར་རིག་པའི་དངོས་པོ་ལྔ་བསླབ་པར་བྱའོ། །བྱང་ཆུབ་སེམས་དཔའ་ནི་དྲིན་ཤེས་པ་དང་། དྲིན་ལན་བསབ་པ་ནི་སེམས་ཅན་ལ་བཤད་པའི་དངོས་པོ་བཤད་ཅིང་བསྟན་པར་བྱའོ། །ཇི་ལྟར་བཤད་ཅེ་ན། བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཐོབ་པར་བྱ་བའི་ཕྱིར་རིག་པ་ལྔ་དང་ལྡན་པར་བཤད་པར་བྱའོ། །བཤད་པ་ལ་ཡང་རྣམ་པ་གཉིས་ཏེ། རིམ་གྱིས་བཤད་པ་དང་། ཡོངས་སུ་དག་པར་བཤད་པའོ། །དེ་ལ་ཇི་ལྟར་ན་རིམ་གྱིས་བཤད་པ་ཞེ་ན། སྔར་སྦྱིན་པའི་ཕ་རོལ་དུ་ཕྱིན་
པ་བཤད་ལ་དེའི་འོག་ཏུ་ཚུལ་ཁྲིམས་ཀྱི་ཕ་རོལ་དུ་ཕྱིན་པ་ནས་ཤེས་རབ་ཀྱི་ཕ་རོལ་དུ་ཕྱིན་པའི་བར་དུ་བཤད་པ་དང་། དྲིན་ཤེས་པ་དང་། དྲིན་བསབ་པའི་ཕྱིར་དོན་ཡིད་ལ་བྱེད་ཅིང་ཆོས་བཞིན་དུ་གནས་པ་ནི་རིམ་གྱིས་བཤད་པ་ཞེས་བྱའོ། །དེ་ལ་ཡོངས་སུ་དག་
པར་བཤད་པ་ཞེས་བྱ་བ་ནི་གང་ཞེ་ན། ཉན་པ་འདུག་ལ་འཆད་པ་འགྲེང་ན་དེ་ལ་བཤད་པར་མི་བྱའོ། །གལ་ཏེ་ཉན་པ་ཆོས་ལ་སྐྱོན་ཚོལ་ལམ་བཤད་པ་ལ་སྐྱོན་ཚོལ་ན་དེ་ལ་བཤད་པར་མི་བྱའོ། །གལ་ཏེ་ཉན་པ་གང་ཟག་ལ་རྟེན་གྱི་ཆོས་ལ་མི་རྟེན་ན་ཆོས་ལ་
མི་རྟེན་པས་དེ་ལ་བཤད་པར་མི་བྱའོ། །གལ་ཏེ་ཉན་པ་ཡི་གེ་ལ་རྟེན་ལ་དོན་ལ་མི་རྟེན་ན་བཤད་པར་མི་བྱ་བ་ནས་བཀྲི་བའི་དོན་ལ་རྟེན་གྱི་ངེས་པའི་དོན་གྱི་བར་ལ་མི་རྟེན་ན་བཤད་པར་མི་བྱའོ། །དེ་ཅིའི་ཕྱིར་ཞེ་ན། གང་

71-1-197a

ཟག་དེ་ནི་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱི་ཡོངས་སུ་དག་པའི་ཆོས་ལ་མ་གུས་པའི་ཕྱིར་རོ། །གལ་ཏེ་བཤད་ཅིང་སྟོན་པ་ཡང་ཆོས་ལ་བཀུར་སྟི་བྱེད་ལ། ཆོས་ཉན་པ་གང་གུས་པའི་སེམས་ཀྱིས་
རྩེ་གཅིག་ཏུ་ཉན་ཅིང་ང་རྒྱལ་གྱི་སེམས་མེད་པ་ནི་ཡོངས་སུ་དག་པར་བཤད་པ་ཞེས་བྱའོ། །གཞན་ཡང་རིམ་གྱིས་བཤད་པ་ཞེས་བྱ་བ་ནི་ཐམས་ཅད་བཤད་པའོ། །ཐམས་ཅད་བཤད་པ་ཞེས་བྱ་བ་ནི་མདོ་སྡེ་བཅུ་གཉིས་ནས་ཚིག་གཅིག་གམ། ཚིགས་
སུ་བཅད་པ་གཅིག་གམ། ཚིགས་སུ་བཅད་པ་ཕྱེད་ཀྱི་བར་དུ་བཤད་པ་སྟེ། དེ་ཡང་ཚིག་གི་སྒྲ་དང་། དོན་དང་། ཆོས་སུ་ལྡན་ལ། ཆོས་དང་དོན་བསྟན་པ་ཡང་སྤྲོ་བ་དང་། གཟེངས་སྟོད་པ་དང་། དགའ་བར་བྱ་བའི་ཕྱིར་དུས་སུ་བསྟན་པ་དང་། 
དུས་ཁ་ཅིག་ཏུ་གཤེ་ཞིང་སྤྱོ་བ་དང་། དུས་ཁ་ཅིག་ཏུ་དྲང་པོར་ཐད་ཀར་བསྟན་པ་དང་། དུས་ཁ་ཅིག་ཏུ་དཔེ་རྣམས་བསྟན་ཏེ་ཅི་དང་འཕྲོད་པ་བཞིན་དུ་བསྟན་པ་དང་། དུས་ཁ་ཅིག་ཏུ་དེ་བས་ཉེ་ཞིང་སླ་བར་བསྟན་པ་དང་། དུས་ཁ་ཅིག་ཏུ་ཇི་ལྟར་མོས་པ་
བཞིན་དུ་འཇུག་སླ་བ་བསྟན་པ་ནི་བྱང་ཆུབ་སེམས་དཔའི་དྲིན་ཤེས་པ་དང་། དྲིན་བསབ་པ་ལ་མཁས་པའི་མཆོག་ཆོས་རིམ་གྱིས་བཤད་པ་ཞེས་བྱའོ། །གཞན་ཡང་ཡོངས་སུ་དག་པར་བཤད་པ་ཞེས་བྱ་བ་ནི་བྱང་ཆུབ་སེམས་
དཔའ་སེམས་དཔའ་ཆེན་པོ་དགྲ་སྡང་བ་ལ་བྱམས་པའི་སེམས་སྒོམ་སྟེ། བྱམས་པའི་སེམས་ཀྱིས་སེམས་ཅན་སྡིག་པ་དང་། བཅས་པ་དང་གང་ཟག་བག་མེད་པ་དང་ལེ་ལོ་ཅན་དག་ལ་ཐབས་རྣམ་པ་མང་པོ་ནས་ཆོས་
བསྟན་ནས་རྒྱགས་ཤིང་དྲེགས་པ་དང་། གང་ཟག་དབུལ་ཕོངས་པའི་བར་དུ་ཐབས་རྣམ་པ་མང་པོས་ཆོས་སྟོན་པར་བྱེད་ཀྱི་བདག་སྟོད་པ་འམ། གཞན་སྨོད་པ་འམ། བཟའ་བ་དང་། བཏུང་བ་དང་། 
རྙེད་པ་དང་། གྲགས་པའི་ཕྱིར་མ་ཡིན་པ་ནི་བྱང་ཆུབ་སེམས་དཔའ་དྲིན་ཤེས་ཤིང་དྲིན་བསབ་པ་ལ་མཁས་པའི་ཆོས་ཡོངས་སུ་དག་པ་བཤད་པ་ཞེས་བྱའོ། །དེ་ལ་ཇི་ལྟར་ན་ཆོས་བཞིན་དུ་གནས་པ་ཡིན་ཞེ་ན། 

71-1-197b

ལུས་དང་། ངག་དང་། ཡིད་ཀྱི་ལས་དགེ་བའི་ཆོས་སྒོམ་ཞིང་ཡོངས་སུ་དག་པ་དང་ལྡན་ཏེ། དྲིན་ཤེས་པ་དང་། དྲིན་བསབ་པ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་བསྟན་པའོ། །གཞན་ཡང་བྱང་ཆུབ་
སེམས་དཔའ་སེམས་དཔའ་ཆེན་པོ་དྲིན་ཤེས་ཤིང་དྲིན་བསབ་པ་ནི་དོན་ཡིད་ལ་བྱེད་དེ། མང་དུ་ཐོས་པས་གཟུངས་ཐོབ་པར་བྱེད་ཅིང་ཆོས་ཀྱི་སྒྲོན་མ་འབར་བར་བྱ་བའི་ཕྱིར་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ་སྦྱིན་པ་དང་། ཚུལ་
ཁྲིམས་དང་། མང་དུ་ཐོས་པ་ལ་བརྩོན་པར་བྱ། ཆོས་སྟོན་ཅིང་འཆད་པ་ལ་མཆོད་པ་དང་རིམ་གྲོ་བྱའི་ཆོས་ལ་སྐྱོན་མི་གདགས། སྟོན་ཅིང་འཆད་པ་ལ་སྐྱོན་མི་གདགས། གནོད་པ་དང་འཚེ་བ་མེད་པའི་སེམས་ཀྱིས་སེམས་ཅན་ལ་མི་
འཇིགས་པ་སྦྱིན་པ་ནི་དྲིན་ཤེས་པ་ཞེས་བྱའོ། །ལྷ་དང་མིའི་ལོངས་སྤྱོད་མྱོང་ཞིང་མྱ་ངན་ལས་འདའ་བའི་ལམ་ཐོབ་པ་ནི་དྲིན་ཤེས་པ་དང་། དྲིན་བསབ་པ་ཞེས་བྱའོ། །བྱང་ཆུབ་སེམས་དཔའ་ནི་གཞན་ཡང་དངོས་པོ་བཞིས་བཟོད་པ་བསྒོམ་
ཞིང་མི་བཟོད་པ་ཡོངས་སུ་སྤངས་ཏེ་བྱང་ཆུབ་བརྒྱན་པའི་ཕྱིར་སེམས་ཅན་མང་པོ་བསྡུས་ནས་བཟོད་པ་བསྒོམ་པ་ལ་བཀོད་དེ། བདག་ཀྱང་བཟོད་པ་བྱེད། གཞན་ཡང་བཟོད་པ་བྱེད་པ་ལ་འགོད་ཅིང་འཇིགས་པ་དང་བྲལ་བ་
ནི་དྲིན་ཤེས་པ་ཞེས་བྱའོ། །དེ་ལྟར་བཟོད་པ་བྱས་པའི་རྐྱེན་གྱིས་ཞེ་སྡང་གི་སེམས་མི་འབྱུང་བས་འཁོར་ཕུན་སུམ་ཚོགས་པ་དང་ལྡན་ཏེ། སྡུག་བསྔལ་བ་འམ་ཉོན་མོངས་པ་མི་འབྱུང་བས་འགྱོད་པའི་སེམས་
མེད་དེ་ལུས་འདི་དང་བྲལ་ནས་ཀྱང་ལྷ་དང་མིའི་ལོངས་སྤྱོད་མྱོང་ཞིང་མྱ་ངན་ལས་འདའ་བ་ཐོབ་པ་ནི་དྲིན་བསབ་པ་ཞེས་བྱའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་དངོས་པོ་རྣམ་པ་བཞིས་བརྩོན་
འགྲུས་རྩོམ་སྟེ། ལེ་ལོ་ཡོངས་སུ་སྤངས་ནས་བྱང་ཆུབ་བརྒྱན་པའི་ཕྱིར་སེམས་ཅན་ཡོངས་སུ་སྡུད་དོ། །བྱང་ཆུབ་ཀྱི་ལམ་གྱི་ཕྱིར་བརྩོན་འགྲུས་རྩོམ་པས་ཉལ་ན་ཡང་བདེ་སྟེ། ཉོན་མོངས་པ་དང་

71-1-198a

བྲལ་བས་བདེ་བའི་ཆོས་སྐྱེ་ཞིང་འཕེལ་ཏེ་ལུས་ཀྱིས་བདེ་བའི་ལོངས་སྤྱོད་མྱོང་བ་ནི་བདག་ལ་ཕན་པའི་དོན་བྱེད་པ་ཞེས་བྱའོ། །བྱང་ཆུབ་སེམས་དཔའ་བརྩོན་འགྲུས་རྩོམ་ཡང་སེམས་ཅན་ལ་མི་འཚེ་སྟེ། འཚོག་རྡེག་དང་། 
གཤེ་བ་དང་། སྤྱོ་བ་མེད་པ་ནི་གཞན་ལ་ཕན་པའི་དོན་བྱེད་པ་ཞེས་བྱ་སྟེ། ལུས་འདི་དང་བྲལ་ནས་ཀྱང་ལྷ་དང་མིའི་ལོངས་སྤྱོད་མྱོང་ཞིང་མཐུ་དང་དབང་དུ་ལྡན་ཏེ། བྱང་ཆུབ་ཀྱི་ལམ་ཐོབ་པས་འབྲས་བུ་ཆེན་པོ་ཐོབ་པར་འགྱུར་ཏེ། འདི་ནི་བྱང་
ཆུབ་སེམས་དཔའ་བརྩོན་འགྲུས་རྩོམ་པའི་དངོས་པོ་བཞི་ཞེས་བྱའོ། །བྱང་ཆུབ་སེམས་དཔའི་ཏིང་ངེ་འཛིན་སྒོམ་པས་འཁྲུག་པའི་སེམས་ཡོངས་སུ་སྤངས་ཏེ་བྱང་ཆུབ་བརྒྱན་པའི་ཕྱིར་སེམས་ཅན་ཡོངས་སུ་སྡུད་དོ། །བྱང་ཆུབ་ཀྱི་ལམ་གྱི་
ཕྱིར་ཏིང་ངེ་འཛིན་བསྒོམས་པས་ཚེ་འདི་ལ་ཡང་འཇིག་རྟེན་གྱི་བདེ་བ་མྱོང་ལ། ལུས་དང་སེམས་དབེན་ཞིང་ཞི་བ་ནི་དྲིན་ལན་ཤེས་པ་ཞེས་བྱའོ། །དེ་ལྟར་ལུས་དང་སེམས་དབེན་ཞིང་ཞི་བས་སེམས་ཅན་ལ་མི་འཚེ་བ་ནི་དྲིན་བསབ་པ་ཞེས་བྱ་
སྟེ། བྱང་ཆུབ་སེམས་དཔའ་ལུས་འདི་དང་བྲལ་ནས་རྣམ་པར་དག་པའི་ལུས་ཐོབ་ཅིང་བདེ་བ་ཕུན་སུམ་ཚོགས་པའི་ལོངས་སྤྱོད་མྱོང་སྟེ། ཡོངས་སུ་མྱ་ངན་ལས་འདའ་བ་ཐོབ་པ་ནི་བྱང་ཆུབ་སེམས་དཔའི་བསམ་གཏན་སྒོམ་པའི་དངོས་
པོ་བཞི་ཞེས་བྱའོ། །གཞན་ཡང་བྱང་ཆུབ་སེམས་དཔའ་དྲིན་ཤེས་པ་དང་། དྲིན་བསབ་པ་ནི་ཤེས་རབ་དང་ལྡན་པས་མ་རིག་པ་བཅོམ་སྟེ་བྱང་ཆུབ་ཡོངས་སུ་བརྒྱན་པའི་ཕྱིར་བསྡུ་བའི་ཆོས་རྣམ་པ་བཞིས་སེམས་ཅན་ཡོངས་སུ་སྡུད་
དོ། །བྱང་ཆུབ་ཀྱི་ཕྱིར་ཤེས་རབ་བསྒོམས་པས་ཆོས་ཀྱི་དབྱིངས་ཤེས་ཤིང་རྟོགས་པའི་ཕྱིར་ལུས་ཀྱི་བདེ་བའི་ལོངས་སྤྱོད་མྱོང་བ་ནི་བདག་ལ་ཕན་པའི་དོན་ཞེས་བྱའོ། །སེམས་ཅན་རྣམས་ཀྱི་འཇིག་རྟེན་གྱི་དོན་དང་འཇིག་རྟེན་
ལས་འདས་པའི་དོན་བསྐྱེད་པ་ནི་གཞན་ལ་ཕན་པའི་དོན་ཞེས་བྱའོ། །ཉོན་མོངས་པ་དང་ཤེས་བྱའི་སྒྲིབ་པ་རྣམ་པ་གཉིས་ཡོངས་སུ་སྤངས་པས་ན་འབྲས་བུ་ཆེན་པོ་ཞེས་བྱ་སྟེ། འདི་ནི་དྲིན་ཤེས་ཤིང་དྲིན་བསབ་པའི་བྱང་ཆུབ་

71-1-198b

སེམས་དཔའི་ཤེས་རབ་ཀྱི་དངོས་པོ་བསམ་གྱིས་མི་ཁྱབ་པ་བཞི་ཞེས་བྱའོ། །གཞན་ཡང་བྱང་ཆུབ་སེམས་དཔའ་སྔོན་གྱི་གནས་དྲན་པའི་མངོན་པར་ཤེས་པས་སྔོན་འདས་པའི་དངོས་པོ་ཤེས་རབ་ཀྱིས་རྟོགས་ཏེ། སེམས་ཅན་རྣམས་ཀྱི་དགེ་བ་
དང་སྡིག་པའི་ལས་བརྟགས་ནས་དགེ་བའི་རིས་སུ་འཐུན་པའི་སེམས་ཅན་ཐམས་ཅད་ལ་ཕན་པ་དང་། བདེ་བའི་དོན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་མཁས་པས་དགའ་ལྡན་གནས་སུ་ཚེ་ཕུན་སུམ་ཚོགས་པར་སྐྱེས་སོ། །དེ་ན་
མཆོག་ཏུ་གྱུར་པ་གསུམ་དང་ལྡན་ཏེ། ཚེ་མཆོག་ཏུ་གྱུར་པ་དང་། གཟུགས་མཆོག་ཏུ་གྱུར་པ་དང་། གྲགས་པ་མཆོག་ཏུ་གྱུར་པའོ། །ཐོག་མ་གནས་དེ་ནས་བབས་པའི་ཚེ་འོད་ཟེར་ཆེན་པོ་བཀྱེ་ནས་ཕྱོགས་བཅུ་སྣང་བར་བྱས་ཏེ་ཡུམ་གྱི་ལྷུམས་
སུ་འཇུག་པ་དང་། ལྷུམས་ན་ཇི་སྲིད་གནས་པ་དང་། ལྷུམས་ནས་བལྟམ་པའི་དུས་མཁྱེན་ཏོ། །ཕྱོགས་བཅུར་ཕྱོགས་རེ་རེར་ཡང་མིས་མ་བརྟེན་པར་གོམ་པ་བདུན་བདུན་བོར་ཏེ་འདི་སྐད་ཅེས་བསྒྲགས་སོ། །བདག་གི་ད་ལྟར་གྱི་ལུས་
འདི་ནི་ནངས་ཀྱི་ཐ་མ་སྟེ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་རྣམས་ཀྱིས་མེ་ཏོག་དང་། བདུག་སྤོས་དང་། རོལ་མོ་དང་། སིལ་སྙན་དང་། 
བ་དན་དག་དང་། གདུགས་དམ་པ་རྣམས་ཀྱིས་མཆོད་པ་བྱས་སོ། །སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་དང་ལྡན་པས་དེའི་ལུས་ལས་མཆོག་ཏུ་གྱུར་པ་གཞན་མེད་དོ། །བྱམས་པའི་ཤུགས་ཀྱིས་བདུད་ཀྱི་དཔུང་རྣམས་
བཅོམ་མོ། །ལྷུ་ཚིགས་རེ་རེ་ལ་ཡང་གྱད་མཐུ་བོ་ཆེའི་སྟོབས་རེ་རེ་དང་ལྡན་ནོ། །གཞོན་ནུ་བུས་པའི་ཚེ་འཇིག་རྟེན་གྱི་དངོས་པོ་མ་བསླབས་པར་ཐམས་ཅད་ཀུན་རྟོགས་ཤིང་ཤེས་སོ། །སྟོན་པ་མེད་པར་རང་བཙལ་ཏེ་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ལྷུན་གྱིས་གྲུབ་བོ། །ཚངས་པའི་ལྷའི་དབང་པོས་བསྐུལ་ནས་སེམས་ཅན་རྣམས་ལ་ཆོས་ཀྱི་འཁོར་ལོ་བསྐོར་ཏོ། །ཏིང་ངེ་འཛིན་ལ་མཉམ་པར་བཞག་པས་འབྲུག་སྒྲ་བསྒྲགས་ཀྱང་མ་

71-1-199a

གཡོས་སོ། །གཅན་ཟན་རྣམས་ཉེ་བར་བསྟེན་ཏེ་ཕ་མ་བཞིན་དུ་སྡུག་པར་བསམས་སོ། །བྱོལ་སོང་གིས་བསོད་སྙོམས་ཕུལ་བ་ཡང་སངས་རྒྱས་ཀྱིས་དེའི་བསམ་པ་མཁྱེན་ཏོ། །ལྷ་དང་ཀླུས་ཆར་ཕབ་སྟེ་ལུས་ཀྱི་ཁྲུས་
བྱས་སོ། །ཤིང་ལྗོན་པའི་ཡལ་ག་ཡང་དེའི་ཕྱོགས་སུ་བཏུད་དེ་གྲིབ་མས་སྐྱབས་བྱས་སོ། །མངོན་པར་སངས་རྒྱས་ནས་ཀྱང་ལོ་དྲུག་གི་བར་དུ་བདུད་མ་རུངས་པས་རྒྱུན་དུ་གླགས་བཙལ་ཀྱང་གླགས་མ་རྙེད་དོ། །རྒྱུན་དུ་ཏིང་ངེ་འཛིན་ལ་མཉམ་
པར་བཞག་པས་དྲན་པ་ཉེ་བར་གཞག་པའི་སེམས་ཡོངས་སུ་རྫོགས་ཏེ། རྣམ་པར་རྟོག་པ་འབྱུང་བ་དང་འགག་པ་ལ་ཤིན་དུ་མཁས་པས་དེ་ནི་བྱང་ཆུབ་སེམས་དཔའི་སྐྱེ་བ་ཐུན་མོང་བ་བསམ་གྱིས་མི་ཁྱབ་པ་ཞེས་བྱའོ། །སྐྱེ་བ་ཐུན་མོང་
མ་ཡིན་པ་ནི་སེམས་ཅན་ལ་ཕན་པ་དང་། བདེ་བའི་དོན་དུ་དཔེར་ན་གང་ཟག་སྨྱོས་པ་དག་དེ་བཞིན་གཤེགས་པ་མཐོང་བའི་རྐྱེན་གྱིས་སྔོན་གྱི་སེམས་སོར་ཆུད་པ་འམ། དམུས་ལོང་གིས་མཐོང་བར་གྱུར་པ་འམ། མངལ་མགོ་ལོག་ཏུ་
གྱུར་པ་ལེགས་པར་བཙས་པ་འམ། འོན་པ་རྣ་བས་ཐོས་པར་གྱུར་པ་འམ། འདོད་ཆགས་དང་། ཞེ་སྡང་དང་། གཏི་མུག་ཅན་དུག་གསུམ་བྱང་བར་གྱུར་པ་དེ་ལྟ་བུ་ནི་སྐྱེ་བ་ཐུན་མོང་མ་ཡིན་པ་བསམ་གྱིས་མི་ཁྱབ་པ་ཞེས་
བྱའོ། །གཞན་ཡང་སྐྱེ་བ་ཐུན་མོང་ཞེས་བྱ་བ་ནི་དེ་བཞིན་གཤེགས་པའི་མཛད་པ་བསམ་གྱིས་མི་ཁྱབ་པ་སྟེ། རྟག་ཏུ་གློ་གཡས་པ་ཕབ་ནས་གཟིམས་པ་དང་། སེང་གེའི་རྒྱལ་པོ་ལྟ་བུར་རྩྭ་འཇག་མ་ལྟར་མི་འགྲུབ་
པ་དང་། རླུང་གི་རྒྱལ་པོ་བེ་རམ་བས་ཀྱང་ན་བཟའི་མཐའ་ཙམ་མི་གཡོས་པ་དང་། གཤེགས་པའི་གོམ་སྟབས་རི་དགས་ཀྱི་རྒྱལ་པོ་སེང་གེ་འམ་ངང་པའི་རྒྱལ་པོ་ལྟར་གཤེགས་པ་དང་། གཤེགས་སུ་ཆ་བ་ན་ཞབས་
གཡས་པ་སྔར་འདོར་བ་དང་། གང་དང་གང་དུ་གཤེགས་ཀྱང་ས་གཞི་མཐོ་དམའ་མཉམ་པ་དང་། བསོད་སྙོམས་ལ་དྲི་ང་བའི་སྐྱོན་མེད་ཅིང་ཞལ་ནས་ཕྱིར་མི་འབྲུལ་བ་ནི་སྐྱེ་བ་ཐུན་མོང་བ་བསམ་གྱིས་མི་ཁྱབ་པ་ཞེས་བྱའོ། །

71-1-199b

གཞན་ཡང་སྐྱེ་བ་ཐུན་མོང་བ་བསམ་གྱིས་མི་ཁྱབ་པ་ནི་འདི་ལྟ་སྟེ། ཞབས་ཀྱི་མཐིལ་མཉམ་ཞིང་གང་བ་ཡིན་ཞབས་ཀྱི་མཐིལ་ན་འཁོར་ལོ་རྩིབས་སྟོང་དང་ལྡན་པ་ཡོད་པ་ཡིན། ཕྱག་སོར་ཕྲ་ལ་རིང་བ་ཡིན། ཞབས་ཀྱི་རྟིང་བ་ཟླུམ་ལ་
གང་བ་ཡིན། ཕྱག་སོར་གྱི་བར་དྲ་བས་འབྲེལ་བ་ཡིན། ཕྱག་དང་ཞབས་འཇམ་ཞིང་མཉེན་པ་ཡིན། ཞབས་ཀྱི་བྱིན་པ་རི་དགས་ཀྱི་རྒྱལ་པོ་ཨེ་ན་ཡ་ལྟར་ཟླུམ་ལ་ཤུགས་ཀྱིས་གཞོལ་བ་ཡིན། ཞབས་ཀྱི་ལོང་བུ་ཕྱིར་མི་སྣང་བ་ཡིན། 
ཕྱག་པུས་མོར་སླེབས་པ་ཡིན། རྟའི་རྒྱལ་པོ་ལྟར་མཚན་སྦུབས་ཀྱི་ནང་དུ་ནུབ་པ་ཡིན། ཤིང་ནྱ་གྲོ་དྷ་ལྟར་སྐུའི་ཡན་ལག་ཡོངས་སུ་རྫོགས་པ་ཡིན། སྐུའི་བ་སྤུ་གྱེན་དུ་ཉལ་བ་ཡིན། བ་སྤུ་རེ་རེ་ནས་གཡས་སུ་འཁྱིལ་བ་ཡིན། 
སྐུ་མདོག་གསེར་བཙོ་མ་ལྟར་འདུག་པ་ཡིན། རྟག་པའི་འོད་འདོམ་གང་དང་ལྡན་པ་ཡིན། ལྤགས་པ་མཉེན་ཞིང་འཇམ་ལ་རྡུལ་དང་དྲི་མས་མི་གོས་པ་ཡིན། གནས་བདུན་ཡོངས་སུ་གང་བ་ཡིན། སྐུའི་སྟོད་སེང་གེ་ལྟར་འདུག་པ་ཡིན། ཕྱག་
གི་ལག་ངར་ཟླུམ་ལ་ཤུགས་ཀྱིས་གཞོལ་བ་ཡིན། སྒྲོག་རུས་མཉམ་པར་གང་བ་ཡིན། སྐུའི་སྟོད་སྨད་འབྱེས་པའི་མཚན་དང་ལྡན་པ་ཡིན། ཞལ་གྱི་ཚེམས་བཞི་བཅུ་དང་ལྡན་པ་ཡིན། ཚེམས་ཀྱི་ཐགས་བཟང་ཞིང་མཉམ་པ་ཡིན་
ཚེམས་ཀྱི་མདོག་དཀར་བ་ཡིན། འགྲམ་པ་རི་དགས་ཀྱི་རྒྱལ་པོ་སེང་གེ་ལྟར་གང་བ་ཡིན། རོ་བྲོ་བའི་མཆོག་དང་ལྡན་པ་ཡིན། ཤའི་དོ་ཀེར་གྱི་མཚན་དང་ལྡན་པ་ཡིན། ལྗགས་རིང་ལ་ཡངས་པ་ཡིན། ཚངས་པའི་སྒྲ་དབྱངས་དང་ལྡན་
པ་ཡིན། སྤྱན་གྱི་མདོག་མཐོན་མཐིང་ལྟར་འདུག་པ་ཡིན། སྤྱན་ཁྱུ་མཆོག་གི་རྒྱལ་པོ་ལྟར་འདུག་པ་ཡིན། སྨིན་མཚམས་ཀྱི་མཛོད་སྤུ་དཀར་པོ་དང་ལྡན་ནོ། །དེ་བཞིན་དུ་བསམ་གྱིས་མི་ཁྱབ་པའི་དཔེ་བྱད་བཟང་པོ་བརྒྱད་བཅུ་དང་
ལྡན་ཏེ། དཔེ་བྱད་བཟང་པོ་རེ་རེ་ལ་ཡང་དཔེ་བྱད་བཟང་པོའི་མཆོག་དམ་པ་བརྒྱ་སྟོང་སྙེད་ཡོད་དེ། དཔེ་བྱད་བཟང་པོ་དེ་དག་རེ་རེ་ལ་ཡང་བྱང་ཆུབ་སེམས་དཔའ་ཐོག་མ་བྱང་ཆུབ་ཏུ་སེམས་བསྐྱེད་ནས་བྱང་ཆུབ་ལ་ཤིན་དུ་བརྟན་པས་དྲིན་

71-1-200a

ཤེས་ཤིང་དྲིན་བསབ་པའི་ཕྱིར་སྤྱོད་པ་དམ་པ་དེ་དག་སྤྱད་དེ། དེ་བས་ན་བླ་ན་མེད་པའི་བྱང་ཆུབ་ཐོབ་པར་གྱུར་ཏོ། །སངས་རྒྱས་ཀྱིས་བཀའ་སྩལ་པ། དེ་བཞིན་གཤེགས་པ་ནི་སྔོན་ཡུན་རིང་པོ་བསྐལ་པ་གྲངས་མེད་པ། 
ཚད་མེད་པའི་བར་དུ་ཚུལ་ཁྲིམས་ཡོངས་སུ་དག་པར་བསྲུངས་པས་ཞབས་ཀྱི་མཐིལ་མཉམ་པར་གང་བའི་མཚན་དང་ལྡན་པར་གྱུར་པ་ཡིན་ནོ། །ཕ་མ་དང་སློབ་དཔོན་དང་། བླ་མ་དང་། གང་ཟག་ཡོན་ཏན་དང་ལྡན་པ་ལ་མཆོད་པ་དང་བཀུར་སྟི་བྱས་
པའི་རྐྱེན་གྱིས་ཞབས་ཀྱི་མཐིལ་འཁོར་ལོའི་མཚན་དང་ལྡན་པར་གྱུར་པ་ཡིན་ནོ། །སེམས་ཅན་རྣམས་ལ་མི་འཚེ་ཞིང་འཕྲོག་པ་དང་རྐུ་བའི་སེམས་མེད་ལ་ཕ་མ་དང་། སློབ་དཔོན་དང་བླ་མ་དང་། ཡོན་ཏན་དང་ལྡན་པའི་གང་ཟག་ལ་
རྒྱང་མ་ནས་བསུ་བསྐྱལ་བྱས་ཤིང་ཁྲི་སྟན་བཏིང་ལ་ང་རྒྱལ་སྤངས་ཏེ། རིམ་གྲོ་དང་། བཀུར་སྟི་དང་། ཕྱག་བྱས་པས་དེའི་རྒྱུ་དེའི་རྐྱེན་གྱིས་སོར་མོ་ཕྲ་ཞིང་རིང་བར་གྱུར་པའི་མཚན་དང་ལྡན་པར་གྱུར་པ་ཡིན་ནོ། །གོང་དུ་སྨོས་པའི་བྱ་
བ་གསུམ་དང་ལྡན་པས་རྟིང་བ་ཟླུམ་ལ་གང་བའི་མཚན་དང་ལྡན་པར་གྱུར་པ་ཡིན་ནོ། །བསྡུ་བའི་ཆོས་རྣམ་པ་བཞིས་འགྲོ་བ་མང་པོ་ཡོངས་སུ་བསྡུས་པས་དེའི་རྒྱུ་དེའི་རྐྱེན་གྱིས་སོར་མོའི་བར་དྲ་བས་འབྲེལ་པའི་མཚན་དང་ལྡན་
པར་གྱུར་པ་ཡིན་ནོ། །མར་དང་འབྲུ་མར་གྱིས་ཕ་མ་དང་། སློབ་དཔོན་དང་། བླ་མ་དང་། ཡོན་ཏན་དང་ལྡན་པའི་གང་ཟག་གི་ལུས་ལ་བསྐུས་ཤིང་མཉེས་པས་དེའི་རྒྱུ་དེའི་རྐྱེན་གྱིས་རྐང་ལག་མཉེན་ཞིང་རིང་ལ་འཇམ་པ་ཡིན་ནོ། །
དགེ་བའི་ཆོས་བསྒོམ་པ་ལ་མི་སྐྱོ་བས་དེའི་རྒྱུ་དེའི་རྐྱེན་གྱིས་ཐལ་གོང་མཉམ་ལ་ལག་ངར་ཟླུམ་ཞིང་ཤུགས་ཀྱིས་གཞོལ་བ་ཡིན་ནོ། །ཆོས་ཐོས་པར་དགའ་ཞིང་གཞན་ལ་ཆོས་སྟོན་པར་ཡང་མོས་ཏེ། ཆོས་ཀྱི་ཕྱིར་མངག་
གཞུག་གི་ལས་བྱས་ན་དེའི་རྒྱུ་དེའི་རྐྱེན་གྱིས་ལོང་བུའི་རུས་པ་མི་སྣང་བའི་མཚན་དང་ལྡན་ནོ། །སྒོ་གསུམ་ཡོངས་སུ་དག་ཅིང་ནད་གཡོག་དང་། སྨན་གྱི་སྦྱིན་པ་བྱིན་ཏེ། ང་རྒྱལ་མེད་ལ་བཟའ་བ་དང་། བཏུང་བ་ལ་ཆོག་ཤེས་པའི་

71-1-200b

རྒྱུ་དང་རྐྱེན་གྱིས་ལུས་དྲང་པོར་འགྲེང་ན་ལག་པས་པུས་མོར་སླེབས་པ་ཡིན་ནོ། །འཁོན་གཅུགས་སུ་གྱུར་པ་ལ་ཚིག་འཇམ་པོས་བསྡུམས་ཏེ། བདག་ཀྱང་ངོ་ཚ་བ་དང་ལྡན་པའི་ཆོས་སྤྱད་དེ་གཞན་ཡང་སྤྱོད་དུ་བཅུག་ན་དེའི་རྒྱུ་དེའི་རྐྱེན་
གྱིས་རྟའི་རྒྱལ་པོ་ལྟར་མཚན་སྦུབས་ཀྱི་ནང་དུ་ནུབ་པ་ཡིན་ནོ། །བདག་གི་སྒོ་གསུམ་ཡོངས་སུ་དག་ལ་གཞན་ཡང་ཡོངས་སུ་དག་པར་བྱེད་ཅིང་། སེམས་ཅན་དག་འབྱུང་བ་ཆེན་པོ་བཞི་འཁྲུགས་ཏེ། ནད་དུ་གྱུར་པའི་སྨན་དཔྱད་ཀྱིས་
གསོས་ན་དེའི་རྒྱུ་དེའི་རྐྱེན་གྱིས་ལུས་ཀྱི་མཚན་ཡོངས་སུ་རྫོགས་པ་ཡིན་ནོ། །ཆོས་ཐོས་པར་དགའ་ཞིང་གཞན་ལ་ཆོས་སྟོན་པར་མོས་ན་ལུས་ཀྱི་བ་སྤུ་གྱེན་དུ་ཉལ་བའི་མཚན་དང་ལྡན་པ་ཡིན། ཆོས་ཀྱི་དོན་ཟབ་མོ་ཡིད་ལ་བགྱིད་ཅིང་དགེ་
བའི་ཆོས་སྒོམ་པར་མོས་ལ། ཕ་མ་དང་། སློབ་དཔོན་དང་། བླ་མ་དང་། ཡོན་ཏན་དང་ལྡན་པའི་གང་ཟག་ལ་མཆོད་པ་བྱས་པ་དང་། སངས་རྒྱས་ཀྱི་མཆོད་རྟེན་དང་། དགེ་འདུན་གྱི་གནས་ཁང་དང་ལམ་སྲང་ན་འདུག་པའི་བོང་བ་འམ། 
རྡོ་བ་འམ། ཚེར་མ་འམ། མི་གཙང་བ་མེད་པར་བྱས་ན་དེའི་རྒྱུ་དེའི་རྐྱེན་གྱིས་སྤུ་རེ་རེ་ནས་གཡས་ཕྱོགས་སུ་འཁྱིལ་པའི་མཚན་དང་ལྡན་པར་གྱུར་པ་ཡིན་ནོ། །ཕ་རོལ་པོ་གཞན་དག་ལ་ཟས་དང་། སྐོམ་དང་། རྒྱན་དང་། དེ་ལ་སོགས་པ་བྱིན་
ཞིང་ཞེ་སྡང་གི་སེམས་མེད་ན་དེའི་རྒྱུ་དེའི་རྐྱེན་གྱིས་གསེར་བཙོ་མའི་མདོག་དང་ལྡན་པ་དང་། འོད་རྟག་པའི་མཚན་ཉིད་དང་ལྡན་པ་ཡིན་ནོ། །ཅིའི་ལས་ཀྱིས་བ་སྤུའི་ཁུང་བུ་རེ་རེ་ནས་སྤུ་རེ་རེ་སྐྱེས་པའི་མཚན་དང་ལྡན་ཞེ་ན། ལས་དེ་ཉིད་
ཀྱི་རྒྱུ་ལས་གྱུར་ཏེ། ལས་ཀྱི་རྒྱུ་དེ་ཉིད་ཀྱིས་ལུས་མཉེན་ཞིང་འཇམ་ལ་རྡུལ་དང་དྲི་མས་མི་གོས་པའི་མཚན་དང་ལྡན་པ་ཡིན་ནོ། །སེམས་ཅན་དག་ལ་དགོས་པའི་ཟང་ཟིང་རྒྱུན་དུ་གཏོང་བས་ན་དེའི་རྒྱུ་དེའི་རྐྱེན་གྱིས་གནས་བདུན་མཉམ་པར་
གང་བའི་མཚན་དང་ལྡན་པ་ཡིན་ནོ། །བདག་གི་ང་རྒྱལ་དང་དྲེགས་པ་བཅོམ་ནས་རང་བཞིན་གྱིས་མཉེན་ཞིང་དེས་པའི་སེམས་ཀྱིས་སེམས་ཅན་གྱི་ཡིད་དང་སྦྱོར་ཏེ། །ཆོས་བཞིན་དུ་སྤྱོད་ལ་མི་དགེ་བའི་ཆོས་སྤངས་པའི་ཕྱིར་དགེ་བའི་ཆོས་

71-1-201a

སྟོན་ན་དེའི་རྒྱུ་དེའི་རྐྱེན་གྱིས་རོ་སྟོད་རི་དགས་ཀྱི་རྒྱལ་པོ་སེང་གེ་ལྟ་བུའི་མཚན་དང་། སྨིན་མཚམས་དང་། སྒྲོག་རུས་མཉམ་པར་གང་བའི་མཚན་དང་། སོར་མོ་རིང་བའི་མཚན་དང་། ལུས་ཀྱི་མཐའ་ཡང་ཞིང་འཇམ་པའི་མཚན་
དང་ལྡན་པ་ཡིན་ནོ། །ཕྲ་མ་ཡོངས་སུ་སྤངས་ཏེ་རྩོད་ཅིང་འཁོན་པའི་སྡུམས་བྱས་པས་དེའི་རྒྱུ་དེའི་རྐྱེན་གྱིས་སོ་བཞི་བཅུ་དང་ལྡན་པའི་མཚན་དང་། སོའི་ཐགས་བཟང་བའི་མཚན་དང་། སོ་མཉམ་པའི་མཚན་དང་ལྡན་པ་ཡིན་ནོ། །འདོད་
པའི་ཁམས་ཀྱི་བྱམས་པ་བསྒོམས་པས་དེའི་རྒྱུ་དེའི་རྐྱེན་གྱིས་སོ་དཀར་བའི་མཚན་དང་ལྡན་པ་ཡིན་ནོ། །སློང་བ་མཐོང་ན་དགའ་བའི་སེམས་ཀྱིས་བསུ་བསྐྱལ་བྱས་པས་དེའི་རྒྱུ་དེའི་རྐྱེན་གྱིས་སེང་གེའི་འགྲམ་པ་ལྟ་བུའི་མཚན་དང་ལྡན་པར་
གྱུར་པ་ཡིན་ནོ། །སེམས་ཅན་ཐམས་ཅད་ལ་བུ་གཅིག་པ་བཞིན་དུ་འདྲ་བར་ལྟ་བས་དེའི་རྒྱུ་དེའི་རྐྱེན་གྱིས་རོ་བྲོ་བའི་མཆོག་གི་མཚན་དང་ལྡན་པ་ཡིན་ནོ། །སེམས་ཅན་ལ་བླ་ན་མེད་པའི་ཆོས་ཀྱི་རོ་རྟག་ཏུ་གཏོང་ཞིང་བརྗེད་ཅིང་མི་དྲན་པ་ལ་ཡང་
དྲན་པར་བྱས་ཏེ། བདག་ཀྱང་ཚུལ་ཁྲིམས་ལྔ་སྲུང་ལ་གཞན་ཡང་བསྲུང་བར་བསྐུལ་ཞིང་བྱམས་པའི་སེམས་ཀྱིས་ཆོས་ཀྱི་སྦྱིན་པ་ཆེན་པོ་བྱས་ན་དེའི་རྒྱུ་དེའི་རྐྱེན་གྱིས་ཤའི་གཙུག་ཏོར་གྱི་མཚན་དང་ལྕེ་རིང་ཞིང་ཡངས་པའི་མཚན་དང་ལྡན་
པ་ཡིན་ནོ། །བདེན་པའི་ཚིག་དང་། ཆོས་ཀྱིས་དགའ་བའི་ཚིག་དང་། མཉེན་དེས་པའི་ཚིག་སྨྲའི། དུས་མ་ཡིན་པའི་ཚིག་མི་སྨྲ་བས་དེའི་རྒྱུ་དེའི་རྐྱེན་གྱིས་ཚངས་པའི་སྒྲ་དབྱངས་དང་ལྡན་པ་ཡིན་ནོ། །སྙིང་རྗེའི་སེམས་བསྒོམས་པས་སེམས་
ཅན་རྣམས་ལ་ཕ་མ་ལྟ་བུར་ལྟ་བས་དེའི་རྒྱུ་དེའི་རྐྱེན་གྱིས་མིག་མཐོན་མཐིང་ལྟར་འདུག་པ་དང་། མིག་ཁྱུ་མཆོག་གི་རྒྱལ་པོ་ལྟ་བུའི་མཚན་དང་ལྡན་པ་ཡིན་ནོ། །ཡོན་ཏན་དང་ལྡན་པའི་ལེགས་པ་མི་བཅབས་ཤིང་བསྟོད་ཅིང་
བསྔགས་པས་དེའི་རྒྱུ་དེའི་རྐྱེན་གྱིས་མཛོད་སྤུ་དཀར་པོའི་མཚན་དང་ལྡན་པ་ཡིན་ནོ། །མཚན་སུམ་བཅུ་རྩ་གཉིས་འདི་དག་གི་རྒྱུ་དང་རྐྱེན་སོ་སོར་བཤད་མོད་ཀྱི་དེའི་རྒྱུ་དེའི་རྐྱེན་ཡང་དག་པ་ནི་ཚུལ་ཁྲིམས་དང་བརྩོན་འགྲུས་སོ། །

71-1-201b

དེ་ཅིའི་ཕྱིར་ཞེ་ན། གལ་ཏེ་ཚུལ་ཁྲིམས་མ་བསྲུངས། བརྩོན་འགྲུས་མ་སྤྱད་ན་མིའི་ལུས་ཀྱང་ཐོབ་པར་མི་ནུས་ན་མཚན་སུམ་བཅུ་རྩ་གཉིས་ཐོབ་པ་ལྟ་སྨོས་ཀྱང་ཅི་དགོས། སྤྱི་གཙུག་བལྟར་མི་སྣང་བ་དང་། ཤའི་གཙུག་ཏོར་གྱི་མཚན་
གཉིས་ལ་ཐ་དད་པ་མེད་དོ། །གཞན་ཡང་ཅི་བྱེད་དོ་ཅོག་ལ་གཅིག་དུ་མ་ངེས་ཏེ་འགྱོད་པའི་སེམས་མེད་ན་དེའི་རྒྱུ་དེའི་རྐྱེན་གྱིས་རྐང་མཐིལ་མཉམ་པར་གང་བའི་མཚན་ཐོབ་བོ། །དེ་ཡང་སེམས་རྩེ་གཅིག་ཏུ་བྱས་ན་དེའི་རྒྱུས་འཁོར་ལོའི་
རྩིབས་སྟོང་དང་ལྡན་པའི་མཚན་དང་། མཚན་གསུམ་པ་དང་བཞི་པ་དང་། སོར་མོའི་བར་འབྲེལ་པ་དང་། གནས་བདུན་མཉམ་པར་གང་བ་དང་། མཉེན་ཞིང་འཇམ་པ་དང་། ཕྲག་པ་ཟླུམ་པ་དང་། སྒྲོག་རུས་གང་བ་དང་། ལུས་དྲང་
བ་དང་། ལྕེ་རིང་ཞིང་ཡངས་པའི་མཚན་དང་ལྡན་པ་ཡིན་ནོ། །དེ་ཡང་བྱ་བ་རྟག་ཏུ་བྱས་ན་དེའི་རྒྱུས་སོར་མོ་རིང་བའི་མཚན་དང་། ལག་པས་པུས་མོར་སླེབས་པ་དང་། འོད་རྟག་པ་འདོམ་གང་གི་མཚན་དང་། སོ་ཐགས་
བཟང་ཞིང་ཡ་ཡོ་མེད་པའི་མཚན་ཐོབ་བོ། །བྱ་བ་ཡོངས་སུ་དག་པར་བྱས་ན་དེའི་རྒྱུས་མཚན་ལྷག་མ་གཞན་རྣམས་ཐོབ་པར་འགྱུར་རོ། །གཞན་ཡང་སེམས་ཅན་དག་ལ་དགེ་བ་འབའ་ཤིག་གི་སེམས་བསྐྱེད་པས་དེའི་རྒྱུས་
རྐང་ལག་མཉེན་ཞིང་འཇམ་པ་དང་། ལྤགས་པ་མཉེན་ཞིང་འཇམ་ལ་རྡུལ་དང་དྲི་མས་མི་གོས་པའི་མཚན་ཐོབ་བོ། །རིམ་གྱིས་བསྒོམ་ཞིང་སྤྱོད་པ་དང་། དུས་བཞིན་དུ་བསྒོམས་ཤིང་སྤྱོད་པས་དེའི་རྒྱུས་གཉིས་པ་དང་། གསུམ་
པ་དང་། བཞི་པའི་མཚན་ཐོབ་བོ། །དགེ་བའི་ཆོས་བསྒོམ་པ་ལ་མོས་ཤིང་འགྱོད་པའི་སེམས་མེད་པས་དེའི་རྒྱུས་ལུས་ཀྱི་མདོག་གསེར་ལྟ་བུ་དང་། འོད་རྟག་པ་དང་། སོ་དཀར་བ་དང་། སྨིན་མཚམས་ཀྱི་མཛོད་སྤུའི་
མཚན་ཐོབ་བོ། །བསྟོད་ཅིང་བསྔགས་ན་ཡང་ང་རྒྱལ་མི་སྐྱེ་ལ། བདག་གི་ལེགས་པ་བཅབས་ཏེ་རློམ་སེམས་མེད་ན་དེའི་རྒྱུས་རྟ་ལྟ་བུར་མཚན་སྦུབས་སུ་ནུབ་པའི་མཚན་ཐོབ་བོ། །དགེ་བའི་ལས་ཅི་བྱས་པ་

71-1-202a

བྱང་ཆུབ་ཏུ་བསྔོས་ན་དེའི་རྒྱུས་བ་སྤུའི་ཁུང་རེ་རེ་ནས་སྤུ་རེ་རེ་སྐྱེ་བའི་མཚན་དང་། བ་སྤུ་གྱེན་དུ་ཉལ་བ་དང་། སོ་བཞི་བཅུ་དང་ལྡན་པ་དང་། རོ་བྲོ་བའི་མཆོག་གི་མཚན་ཐོབ་བོ། །རྟག་ཏུ་བརྩོན་འགྲུས་བྱས་ན་དེའི་རྒྱུས་འགྲམ་པའི་ལྷ་
ང་ཟླུམ་པ་དང་། ལུས་ཀྱི་སྟོད་སེང་གེ་ལྟ་བུའི་མཚན་ཐོབ་བོ། །སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་སྡུག་པར་བསམས་པས་དེའི་རྒྱུས་སོ་ཐགས་བཟང་བ་དང་། མིག་མཐོན་མཐིང་དུ་འདུག་པ་དང་། མིག་ཁྱུ་མཆོག་གི་
རྒྱལ་པོ་ལྟ་བུའི་མཚན་ཐོབ་བོ། །དགེ་བའི་ཆོས་སྒྲུབ་པ་ལ་སྐྱོ་ཞིང་ངལ་བའི་སེམས་མེད་པས་མཚན་ལྷག་མ་གཞན་རྣམས་ཐོབ་བོ། །བྱང་ཆུབ་སེམས་དཔའ་སེམས་དཔའ་ཆེན་པོ་མཚན་ཉིད་ལ་སྤྱོད་ཅིང་གནས་པའི་ཚེ་མཚན་སུམ་
ཅུ་རྩ་གཉིས་ཀྱི་ལས་བྱེད་དོ། །རྣམ་པར་དག་པའི་སྤྱོད་པ་ལ་གནས་པའི་ཚེ་མཚན་སུམ་ཅུ་རྩ་གཉིས་ཡོད་མོད་ཀྱི་ཡོངས་སུ་རྫོགས་པའམ། གསལ་བ་མ་ཡིན་ནོ། །སྤྱོད་པ་བཅུ་གསུམ་པ་ལ་གནས་པ་ན་མཚན་རྣམས་ཀྱང་
མངོན་པར་གསལ་བར་ཡོངས་སུ་རྫོགས་སོ། །སངས་རྒྱས་ཀྱི་ཆོས་ཀྱི་མཚན་གྲངས་མེད་མོད་ཀྱི་སེམས་ཅན་རྣམས་ལ་མི་མཐུན་ཏེ། རབ་དང་འབྲིང་དང་། ཐ་མ་ཡོད་པས་བསམ་གྱིས་མི་ཁྱབ་པས་ན་དེ་བས་ན་སངས་
རྒྱས་ཀྱིས་མཚན་བཟང་པོ་སུམ་ཅུ་རྩ་གཉིས་གསུངས་སོ། །སེམས་ཅན་ཐམས་ཅད་ཀྱི་བསོད་ནམས་ཇི་ཙམ་ཡོད་པ་ཕྱོགས་གཅིག་ཏུ་བསྡུས་ཏེ་སྤུངས་ནས་དེ་བཞིན་གཤེགས་པའི་བ་སྤུ་གཅིག་གི་མཚན་དང་མཉམ་མོ། །བ་སྤུའི་
ཁུང་བུ་ཐམས་ཅད་ཀྱི་བསོད་ནམས་ཇི་སྙེད་ཅིག་ཡོད་པ་གཅིག་ཏུ་བསྡུས་ཏེ་སྤུངས་ནས་དཔེ་བྱད་བཟང་པོ་གཅིག་དང་མཉམ་མོ། །དཔེ་བྱད་བཟང་པོ་ཇི་ཙམ་ཡོད་པའི་བསོད་ནམས་ཇི་སྙེད་ཡོད་པ་དེ་ལས་བརྒྱ་འགྱུར་དུ་བྱས་ན་མཚན་
གཅིག་དང་མཉམ་སྟེ། སྨིན་མཚམས་ཀྱི་མཛོད་སྤུ་དཀར་པོའི་མཚན་དང་། སྤྱི་གཙུག་བལྟར་མི་སྣང་བའི་མཚན་ནི་མ་གཏོགས་སོ། །དེ་མ་ཡིན་པ་མཚན་གཞན་ཐམས་ཅད་གཅིག་ཏུ་བསྡུས་ཏེ་སྟོང་འགྱུར་དུ་བྱས་ན་མཚན་གོང་མ་གཉིས་སུ་

71-1-202b

འགྱུར་རོ། །མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་བཅུ་པོའི་བསོད་ནམས་ཇི་སྙེད་ཡོད་པ་གཅིག་ཏུ་བསྡུས་སྤུངས་ཏེ་ཁྲི་ཕྲག་སྟོང་འགྱུར་དུ་བྱས་པ་དང་། དེ་བཞིན་གཤེགས་པའི་འབྲུག་སྒྲ་ལྟ་བུའི་དབྱངས་ཟབ་ཅིང་རྒྱང་རིང་པོར་གྲགས་
པའི་མཚན་དང་མཉམ་སྟེ། གསུང་སྒྲ་དེས་ནི་སངས་རྒྱས་ཀྱི་ཞིང་ཚད་མེད་མཐའ་ཡས་བསམ་གྱིས་མི་ཁྱབ་པའི་རྡུལ་ཕྲ་རབ་སྙེད་དུ་གྲགས་ཤིང་། སེམས་ཅན་གྱི་དོན་དུ་བྱམས་པ་དང་སྙིང་རྗེ་ཆེན་པོ་སྤྱོད་པས། དྲིན་ཤེས་པ་དང་། དྲིན་བསབ་པ་འདི་
ནི་བསམ་གྱིས་མི་ཁྱབ་བོ། །དེ་ལྟར་མཚན་དང་དཔེ་བྱད་བཟང་པོ་དེ་དག་རེ་རེས་ཀྱང་སོ་སོའི་སྐྱེ་བོ་ཚད་མེད་གྲངས་མེད་པ་བྱེ་བ་བརྒྱ་སྟོང་གིས་ས་ཆེན་པོའི་རྡུལ་ཕྲ་རབ་སྙེད་ལ་ཕན་པ་དང་བདེ་བའི་དོན་བྱས་ནས་བྱང་ཆུབ་ཏུ་སེམས་བསྐྱེད་དུ་བཅུག་
གོ། །དེ་ལྟར་མཐར་གྱིས་བསྒྲུབ་པ་ཡོངས་སུ་རྫོགས་ནས་མཚན་དང་དཔེ་བྱད་བཟང་པོ་རྣམ་གཉིས་ཐོབ་སྟེ། མཚན་དང་དཔེ་བྱད་བཟང་པོ་ཡོངས་སུ་རྫོགས་ནས་བྱང་ཆུབ་ཀྱི་ཤིང་དྲུང་དུ་སོང་སྟེ། བདུད་ཀྱི་དཔུང་རྣམས་བཏུལ་ཏེ་མངོན་པར་སངས་
རྒྱས་ནས། ཡང་དག་པར་ཆོས་ཀྱི་འཁོར་ལོ་བསྐོར་ཏོ། །སོ་སོའི་སྐྱེ་བོ་ལ་ཕན་པ་དང་བདེ་བའི་དོན་དུ་འདོད་པའི་ཆུའི་ཀླུང་ལས་བསྒྲལ་ནས་ཤེས་རབ་ཀྱི་ཕ་རོལ་དུ་ཕྱིན་པའི་འགྲམ་དུ་བཀོད་དེ། སེམས་ཅན་ཐམས་ཅད་ལ་ཕན་པ་དང་བདེ་བའི་
དོན་ཡོངས་སུ་རྫོགས་པར་བྱས་སོ། །བཅོམ་ལྡན་འདས་ཀྱིས་ཀུན་དགའ་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལ་སོགས་ཏེ་འཁོར་མང་པོ་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ཁྱེད་རྣམས་ལ་
སུ་ཞིག་སངས་རྒྱས་ཀྱི་བཀའ་དྲིན་རྟག་ཏུ་གཟོ་ཞིང་དམ་པའི་ཆོས་བསྲུང་བའི་ཕྱིར་ཐབས་མཁས་པ་ཆེན་པོ་དྲིན་ལན་བསབ་པའི་མདོ་སྡེ་ཤིན་དུ་ཟབ་མོ་འདི་གླེགས་བམ་དུ་བྲི་བ་དང་། ཀློག་པ་དང་། ཁ་ཏོན་བྱེད་པར་འགྱུར། སུ་ཞིག་
གིས་ཕྱི་མའི་དུས་ངན་པའི་ཚེ་བརྩོན་འགྲུས་ཆེན་པོ་བསྐྱེད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་སྲུང་ཞིང་གཟུངས་སུ་འཛིན་པར་འགྱུར། སུ་ཞིག་གིས་ཆོས་བསྲུང་བའི་ཕྱིར་མདོ་སྡེ་འདི་རྒྱས་པར་སྤེལ་ཞིང་སེམས་ཅན་ཐམས་

71-1-203a

ཅད་ལ་ཕན་པ་དང་བདེ་བའི་དོན་བྱེད་པར་ནུས་ཤེས་བཀའ་སྩལ་པ་དང་། དེའི་ཚེ་འཁོར་དེ་ཉིད་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཁྲི་བརྒྱ་སྟོང་སྙེད་འདུག་པ་ལས་ལངས་ཏེ། གོས་ཚགས་བཅོས་ནས་བླ་གོས་
ཕྱོགས་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ཐལ་མོ་སྦྱར་བ་བཏུད་ནས་སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སླད་མའི་དུས་ངན་པའི་ཚེ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་འདི་བསྲུང་ཞིང་དམ་པའི་ཆོས་གཟུངས་སུ་བཟུང་སྟེ་སེམས་ཅན་མང་པོ་ལ་ཕན་པའི་དོན་བྱེད་པར་སྤྲོའོ། །དེ་ནས་བྱང་ཆུབ་སེམས་དཔའ་སེང་གེས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཀྱང་ཐབས་རྣམ་
པ་སྣ་ཚོགས་ཀྱིས་སེམས་ཅན་རྣམས་ཡོངས་སུ་བསྡུ་བར་སྤྲོའོ། །བྱང་ཆུབ་སེམས་དཔའ་རྡོ་རྗེས་གསོལ་པ། སེམས་ཅན་གང་ངན་འགྲོ་གསུམ་ཏུ་ལྟུང་བར་འགྱུར་བ་དག་བདག་གིས་ཅི་ནས་ཀྱང་མི་ལྟུང་བར་བགྱི་བར་སྤྲོའོ། །བྱང་ཆུབ་སེམས་
དཔའ་འཇམ་དཔལ་གྱིས་གསོལ་པ། སེམས་ཅན་རྣམས་ཅི་དང་ཅི་འདོད་པ་བདག་གིས་ཐམས་ཅད་ཡོངས་སུ་རྫོགས་པར་བགྱི་བར་སྤྲོའོ། །བྱང་ཆུབ་སེམས་དཔའ་ཡེ་ཤེས་རྒྱལ་མཚན་གྱིས་གསོལ་པ། བདག་གིས་ནི་སེམས་ཅན་རྣམས་ལ་
ཡེ་ཤེས་ཆེན་པོའི་ཆོས་ཀྱི་རྒྱལ་མཚན་སྦྱིན་པར་བགྱི་བ་སྤྲོའོ། །བྱང་ཆུབ་སེམས་དཔའ་ཆོས་ཀྱི་རྒྱལ་མཚན་གྱིས་གསོལ་པ། བཅོམ་ལྡན་འདས་བདག་གིས་ནི་སེམས་ཅན་རྣམས་ལ་ཆོས་ཡོངས་སུ་སྦྱིན་པར་སྤྲོའོ། །བྱང་ཆུབ་སེམས་དཔའ་
ཉི་འོད་ཀྱིས་གསོལ་པ། བཅོམ་ལྡན་འདས་བདག་གིས་ནི་སེམས་ཅན་རྣམས་ལ་བདེ་བ་སྦྱིན་པར་སྤྲོའོ། །བྱང་ཆུབ་སེམས་དཔའ་ཟླ་འོད་ཀྱིས་གསོལ་པ། བཅོམ་ལྡན་འདས་བདག་གིས་ནི་སེམས་ཅན་རྣམས་ལ་བསོད་ནམས་ཀྱི་ལས་
བྱེད་དུ་གཞུག་པར་བསྐུལ་བར་སྤྲོའོ། །བྱང་ཆུབ་སེམས་དཔའ་དགེ་སྦྱོང་གིས་གསོལ་པ། བཅོམ་ལྡན་འདས་བདག་གིས་ནི་སེམས་ཅན་རྣམས་ལ་ཐམས་ཅད་བག་མེད་པ་ལ་མི་གནས་པར་བསྐུལ་བར་སྤྲོའོ། །བྱང་ཆུབ་སེམས་དཔའ་བློ་

71-1-203b

གྲོས་མི་ཟད་པས་གསོལ་པ། བཅོམ་ལྡན་འདས་བདག་གིས་ནི་སེམས་ཅན་ཐམས་ཅད་ལ་ཟད་པ་མི་ཤེས་པའི་དབྱིངས་ཀྱི་དོན་མཐོང་བར་བསྟན་པར་སྤྲོའོ། །བྱང་ཆུབ་སེམས་དཔའ་ཟླ་འོད་བུས་གསོལ་པ། བཅོམ་ལྡན་འདས་བདག་ནི་
སེམས་ཅན་ཐམས་ཅད་ལ་བླ་ན་མེད་པའི་བདེ་བ་སྦྱིན་པ་བགྱི་བར་སྤྲོའོ། །ཞེས་བྱང་ཆུབ་སེམས་དཔའ་དེ་དག་སོ་སོ་ནས་དམ་བཅས་སོ། །བྱང་ཆུབ་ཡོངས་སུ་བརྒྱན་ཅིང་སེམས་ཅན་ཐམས་ཅད་ལ་ཕན་ཞིང་བདེ་བ་དང་། སངས་རྒྱས་ཀྱི་བཀའ་དྲིན་དྲན་
ཞིང་སངས་རྒྱས་ཀྱི་བཀའ་དྲིན་བསབ་པའི་ཕྱིར་སྟན་ལས་ལངས་ནས་ཐལ་མོ་སྦྱར་བ་བཏུད་དེ། སངས་རྒྱས་ཀྱི་མདོ་སྡེ་འདི་བདག་ཅག་ལ་གཏད་དུ་གསོལ་ཞེས་གསོལ་ཏོ། །དེའི་ཚེ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་
ལྡན་འདས་མདོ་སྡེ་འདིའི་མཚན་ཅི་ཞེས་བགྱི། ཇི་ལྟར་ཡོངས་སུ་གཟུང་། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། མདོ་སྡེ་འདིའི་མིང་དགེ་བའི་དངོས་པོ་ཀུན་བསྡུ་བ་ཞེས་ཀྱང་བྱ། ཐབས་མཁས་པ་ཆེན་པོ་ཞེས་ཀྱང་བྱ། དགོངས་པ་
དམ་པའི་སྤྱོད་པ་ཞེས་ཀྱང་བྱ། སངས་རྒྱས་དྲིན་ལན་བསབ་པ་ཞེས་ཀྱང་བྱའོ། །བཅོམ་ལྡན་འདས་ཀྱིས་ཀུན་དགའ་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ཁྱེད་རྣམས་ཇི་ལྟར་
བསྟན་པ་བཞིན་ཏུ་ནན་ཏན་དུ་སྤྱོད་ཅིག །སངས་རྒྱས་ཀྱིས་ཡོངས་སུ་གདམས་པའི་ལེའུ་འདི་བསྟན་པའི་ཚེ་ཉན་ཐོས་བདུན་ཁྲི་ཉིས་སྟོང་གིས་བླ་ན་མེད་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །གཞན་ཡང་ལྷ་དང་། ཀླུ་དང་། གནོད་
སྦྱིན་དང་། དྲི་ཟ་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དང་། དེ་ལ་སོགས་པ་ཐམས་ཅད་སངས་རྒྱས་ཀྱིས་གསུངས་པ་ལ་རྗེས་སུ་ཡི་རང་བར་གྱུར་ཏོ། །ཐབས་མཁས་པ་ཆེན་པོ་སངས་རྒྱས་དྲིན་
ལན་བསབ་པའི་མདོ་ལས་ཉེ་བར་བསྙེན་པའི་ལེའུ་ཞེས་བྱ་སྟེ་དགུ་པའོ། །ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པ་ཞེས་བྱ་བའི་མདོ། རྫོགས་སོ།། །།

71-1-204a

༄༅། །བོད་སྐད་དུ།  འཕགས་པ་ལེགས་ཉེས་ཀྱི་རྒྱུ་དང་འབྲས་བུ་བསྟན་པ་ཞེས་བྱ་བ་ཐེག་པ་ཆེན་པོའི་མདོ།  སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་
གཅིག་ན། བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེའི་ཚེ་བཅོམ་ལྡན་འདས་བྱང་ཆུབ་སེམས་དཔའ་ཚད་མེད་པ་དང་། ལྷ་དང་མིའི་འཁོར་མང་པོས་ཡོངས་སུ་བསྐོར་ཅིང་
སེམས་རྩེ་གཅིག་ཏུ་ཆོས་ཉན་པ་དག་ལ་ཆོས་སྟོན་པར་མཛད་དོ། །དེ་ནས་ཚེ་དང་ལྡན་པ་ཀུན་དགའ་བོས་སེམས་ཅན་རྣམས་ཀྱི་ཆེད་དུ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ད་ལྟར་འཇིག་རྟེན་ན་རྣམ་པ་
གཅིག་ཏུ་མིར་སྐྱེས་པར་མཚུངས་པ་ལ། ཁ་ཅིག་ནི་སྡུག་ཅིང་ཁ་ཅིག་ནི་བྱད་བཞིན་མི་སྡུག་པ་དང་། ཁ་ཅིག་ནི་དཔའ་ཞིང་ཁ་ཅིག་ནི་ཞན་པ་དང་། ཁ་ཅིག་ནི་དབུལ་ཞིང་ཁ་ཅིག་ནི་ཕྱུག་པ་དང་། ཁ་ཅིག་ནི་སྡུག་བསྔལ་ཞིང་ཁ་ཅིག་ནི་
བདེ་བ་དང་ལྡན་པ་དང་། ཁ་ཅིག་ནི་ཡ་རབས་སུ་གྱུར་ཅིང་ཁ་ཅིག་ནི་མ་རབས་སུ་གྱུར་ཏེ། སྒྲ་དབྱངས་མི་མཚུངས་ཤིང་སྐད་ཐ་དད་པར་གྱུར་པ་དང་། ཁ་ཅིག་ནི་ལོ་བརྒྱ་ལོན་ཀྱང་འཆི་བར་མི་འགྱུར་ལ་ཁ་ཅིག་ནི་ལོ་སུམ་བཅུ་
ལོན་ནས་སྔར་འགུམ་པ་དང་། ཁ་ཅིག་ནི་ལོ་བཅྭ་ལྔ་ལོན་ནས་གློ་བུར་དུ་འཆི་བ་དང་། ཁ་ཅིག་ནི་མའི་མངལ་ཉིད་དུ་འགུམ་པ་དང་། ཁ་ཅིག་ནི་བྱད་བཞིན་སྡུག་ཅིང་མཛེས་པ་དང་། ཁ་ཅིག་ནི་དབུལ་
ཞིང་མ་རབས་སུ་གྱུར་ལ་བྱད་བཞིན་མི་སྡུག་པ་དང་། ཁ་ཅིག་ནི་ཕྱུག་ཅིང་ཡ་རབས་སུ་སྐྱེ་བ་དང་། ཁ་ཅིག་ནི་དཔའ་ཞིང་དམན་པར་གྱུར་ལ། ཁ་ཅིག་ནི་ཞན་ཅིང་རིགས་མཐོན་པོར་སྐྱེས་པ་དང་། ཁ་ཅིག་
ནི་སྡུག་བསྔལ་ཞིང་ཚེ་རིང་ལ་ཁ་ཅིག་ནི་བདེ་ཞིང་ཚེ་ཐུང་བ་དང་། ཁ་ཅིག་ནི་དགེ་བ་སྤྱད་ཀྱང་ནོངས་སྐྱོན་དང་བཅས་པར་གྱུར་ལ། ཁ་ཅིག་ནི་སྡིག་པ་བགྱིས་ཀྱང་བསོད་ནམས་ཀྱི་ཕན་ཡོན་ཐོབ་

71-1-204b

པ་དང་། ཁ་ཅིག་ནི་ཚོ་ཞིང་དཀར་ཡང་མིག་ཡ་ཡོར་གྱུར་ཅིང་མི་གསལ་ལ། ཁ་ཅིག་ནི་སྔོ་ཞིང་གནག་ཀྱང་མངལ་བྱད་དང་ལྡན་པ་དང་། ཁ་ཅིག་ནི་ཐུང་ཞིང་བོང་ཆུང་ཡང་སེམས་རྩལ་དང་ལྡན་པ་དང་། ཁ་ཅིག་ནི་རིང་
ཞིང་བོང་ཆེ་ཡང་གཞན་དག་གི་གཡོག་བགྱིད་པ་དང་། ཁ་ཅིག་ནི་བུ་ཚ་མང་ལ་ཁ་ཅིག་ནི་གཅིག་པུ་གནས་པ་དང་། ཁ་ཅིག་ནི་སླད་རོལ་དུ་རྒྱུ་ཞིང་བཀྲེས་པ་དང་། གྲང་བ་དག་གིས་ཉེན་པར་འགྱུར་ལ། ཁ་ཅིག་
ནི་ཁྱིམ་ན་གནས་ཀྱང་གོས་ཟས་དག་ལ་དགའ་འབྱོར་པ་དང་། ཁ་ཅིག་ནི་གཞོན་པའི་ཚེ་དབུལ་ཞིང་ཕོངས་ལ་རྒས་པའི་ཚེ་གདོད་ཕྱུག་པོར་འགྱུར་བ་དང་། ཁ་ཅིག་ནི་ཡུས་མ་མཆིས་བཞིན་དུ་ཡང་ནོངས་པ་མ་
མཆིས་པར་ནན་གྱིས་གོ་རར་སྩལ་བ་དང་། ཁ་ཅིག་ནི་ཕ་མ་ཡང་སྙིང་རྗེ་དང་ལྡན་ལ་བུ་ཡང་སྲི་ཞུ་ཆེ་ཞིང་མདོ་སྡེ་དང་གཙུག་ལག་གི་དོན་གླེང་བར་བགྱིད་ལ། ཁ་ཅིག་ནི་ཕུ་བོ་ནུ་བོ་སོ་སོར་ཕྱེ་ནས་འཐབ་ཅིང་རྩོད་པར་བགྱིད་པ་དང་། 
ཁ་ཅིག་ནི་ཁང་ཁྱིམ་དག་བརྩིགས་ནས་འབྱོར་པ་སྣ་ཚོགས་དང་ལྡན་ལ། ཁ་ཅིག་ནི་ཁང་ཁྱིམ་མ་མཆིས་པས་གཞན་དག་ལ་བརྟེན་པ་དང་། ཁ་ཅིག་ནི་བྱ་མདབ་ཆགས་བཞིན་དུ་ཤིང་དང་ཐང་ལ་གནས་པ་དང་། ཁ་ཅིག་ནི་
གཅན་ཟན་གྱི་རྣམ་པ་དང་མཚུངས་ཤིང་སྤུའི་གོས་དང་ལྡན་པ་ཟས་སུ་རྩྭ་འཚལ་ཞིང་ཁྲག་འཐུང་བ་དང་། ཁ་ཅིག་ནི་ཡི་གེ་མ་འཚལ་བ་དང་། ཁ་ཅིག་ནི་ཅི་ཡང་མ་བགྱིས་པར་བདེ་བའི་རྣམ་པར་སྨིན་པ་མྱོང་བར་འགྱུར་ལ་
ཁ་ཅིག་ནི་སླ་བ་བགྱིད་པའི་གནས་ཀྱང་མི་རྙེད་པ་དང་། ཁ་ཅིག་ནི་དབང་པོ་གསལ་བས་ཤེས་པ་དང་ལྡན་ལ། ཁ་ཅིག་ནི་དབང་པོ་མི་གསལ་བས་ཤེས་པ་དང་མི་ལྡན་པ་དང་། ཁ་ཅིག་ནི་བཙལ་ན་གདོད་ཐོབ་པར་འགྱུར་
ལ། ཁ་ཅིག་ནི་མ་བཙལ་བར་ཡང་རྙེད་པར་འགྱུར་བ་དང་། ཁ་ཅིག་ནི་ཕྱུག་ཀྱང་སེར་སྣ་ཆེ་ལ། ཁ་ཅིག་ནི་དབུལ་པོར་གྱུར་ཀྱང་གཏོང་བ་ལ་དགའ་བ་དང་། ཁ་ཅིག་ནི་ཚིག་སྨྲས་པ་རྣམས་མཉེན་ཞིང་

71-1-205a

དེས་ལ། ཁ་ཅིག་ནི་ཚིག་སྨྲས་པ་རྣམས་གཏུམ་ཞིང་བརླང་བ་དང་། ཁ་ཅིག་ནི་མང་པོ་ཀུན་གྱིས་བཀུར་ཞིང་སྙིང་དུ་སྡུག་པར་འགྱུར་ལ། ཁ་ཅིག་ནི་མང་པོ་ཀུན་གྱིས་ཐག་རིང་དུ་སྤོང་བར་བགྱིད་པ་དང་། ཁ་ཅིག་ནི་
བྱམས་པའི་སེམས་ཀྱིས་སྲོག་ཆགས་གསོ་བར་བགྱིད་ལ། ཁ་ཅིག་ནི་སྲོག་ཆགས་དཔག་ཏུ་མ་མཆིས་པ་དག་གསོད་པར་བགྱིད་པ་དང་། ཁ་ཅིག་ནི་ཡངས་པ་མང་པོ་ཀུན་གྱིས་ཡིད་དུ་མཆི་བར་འགྱུར་ལ། ཁ་ཅིག་ནི་གཞན་
དག་གིས་སྤོང་བར་བགྱིད་པ་དང་། ཁ་ཅིག་ནི་ཆུང་མ་དང་གྱོས་སྒྱུག་ལ་སོགས་པས་སྡང་བར་འགྱུར་ལ། ཁ་ཅིག་ནི་གཉེན་བཤེས་ཀུན་དགའ་བར་འགྱུར་བ་དང་། ཁ་ཅིག་ནི་ཆོས་ཀྱི་ཚིག་མཉན་པར་དགའ་བ་དང་། ཁ་ཅིག་ནི་མདོ་སྡེ་
ཐོས་ནས་གཉིད་ལོག་བགྱིད་པ་དང་། ཁ་ཅིག་ནི་དཔའ་ཞིང་རྩལ་དང་ལྡན་ཡང་ཞེས་མ་མཆིས་ལ་ཁ་ཅིག་ནི་ཚིག་འབྲུ་དང་དོན་དག་ལ་སློབ་པར་མོས་པ་དང་། ཁ་ཅིག་ནི་དུད་འགྲོའི་དབྱིབས་ཐ་དད་པ་སྣ་ཚོགས་བགྱིས་པ་དག་གདའ་
ན། བཅོམ་ལྡན་འདས་དེ་དག་གིས་འབྲས་བུ་གང་ལགས་པ་རྒྱ་ཆེར་བཀས་བཤད་དུ་གསོལ། འཁོར་མང་པོ་རྣམས་ཀྱིས་ཐོས་ཤིང་རྟོགས་པར་འགྱུར་ལ་སེམས་རྩེ་གཅིག་ཏུ་དགེ་བ་ལ་གཞོལ་བར་འགྱུར་བ་ལགས་སོ། །
བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་ཇི་ལྟར་དྲིས་པ་དེ་དེ་བཞིན་ཏེ། རྣམ་པར་སྨིན་པ་མྱོང་བར་མི་མཚུངས་པར་གྱུར་པ་དེ་དག་ཐམས་ཅད་ནི་ཚེ་རབས་སྔ་མ་དག་ལས་ཀྱི་སྤྱོད་པ་མི་མཉམ་
པའི་དབང་གིས་ན་ཐ་དད་པའི་བྱེ་བྲག་བརྒྱ་སྟོང་མང་པོ་མྱོང་བར་གྱུར་པ་ཡིན་ཏེ། ཚེ་འདི་ལ་བྱད་བཞིན་སྡུག་པ་གང་ཡིན་པ་དེ་ནི་བཟོད་པ་དང་དུ་བླངས་པ་ལས་འོངས་པ་ཡིན་ནོ། །བྱད་བཞིན་མི་སྡུག་པ་གང་ཡིན་
པ་དེ་ནི་ཁོང་ཁྲོ་བ་ལས་འོངས་པ་ཡིན་ནོ། །མིར་གྱུར་ཀྱང་དབུལ་པོར་གྱུར་པ་གང་ཡིན་པ་དེ་ནི་སེར་སྣ་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་ཕྱུག་པོར་གྱུར་པ་གང་ཡིན་པ་དེ་ནི་སྦྱིན་པ་བཏང་བ་ལས་འོངས་པ་ཡིན་ནོ། །

71-1-205b

ཡ་རབས་མཐོན་པོར་གྱུར་པ་གང་ཡིན་པ་དེ་ནི་གཞན་དག་ལ་གུས་པར་ཕྱག་བྱས་པ་ལས་འོངས་པ་ཡིན་ནོ། །མ་རབས་སུ་གྱུར་པ་གང་ཡིན་པ་དེ་ནི་ང་རྒྱལ་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་ལུས་རིང་ཞིང་བོང་ཆེ་བ་གང་
ཡིན་པ་དེ་ནི་གུས་པས་བཀུར་སྟི་བྱས་པ་ལས་འོངས་པ་ཡིན་ནོ། །ལུས་ཐུང་ངུ་གང་ཡིན་པ་དེ་ནི་ཆོས་ལ་བརྙས་པ་ལས་འོངས་པ་ཡིན་ནོ། །མིར་གྱུར་ཀྱང་བཀའ་བློ་མི་བདེ་བ་གང་ཡིན་པ་དེ་ནི་སྔོན་ལུག་བྱས་པ་ལས་འོངས་པ་ཡིན་
ནོ། །མིར་གྱུར་ཀྱང་གནག་ཅིང་རིད་པ་གང་ཡིན་པ་དེ་ནི་དེ་བཞིན་གཤེགས་པའི་སྣང་བ་བསྒྲིབས་པ་ལས་འོངས་པ་ཡིན་ནོ། །མིར་གྱུར་ཀྱང་མཆུ་མི་སྡུག་པ་གང་ཡིན་པ་དེ་ནི་མཆོད་རྟེན་གྱི་ཟས་མྱངས་པ་ལས་འོངས་པ་ཡིན་ནོ། །མིར་
གྱུར་ཀྱང་མིག་དམར་བ་གང་ཡིན་པ་དེ་ནི་མེའི་སེར་སྣ་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་མིག་མི་གསལ་བ་གང་ཡིན་པ་དེ་ནི་ཁྲའི་མིག་བྲུས་པ་ལས་འོངས་པ་ཡིན་ནོ། །མིར་གྱུར་ཀྱང་ལྐུགས་པ་གང་ཡིན་པ་དེ་ནི་ཆོས་ལ་སྐུར་
པ་བཏབ་པ་ལས་འོངས་པ་ཡིན་ནོ། །མིར་གྱུར་ཀྱང་འོན་པར་གྱུར་པ་གང་ཡིན་པ་དེ་ནི་ཆོས་ཐོས་པར་མི་དགའ་བ་ལས་འོངས་པ་ཡིན་ནོ། །མིར་གྱུར་ཀྱང་སོ་རྣོན་པོར་གྱུར་པ་གང་ཡིན་པ་དེ་ནི་རུས་པ་འཆའ་ཞིང་ཤ་ཟ་བར་མངོན་
པར་དགའ་བ་ལས་འོངས་པ་ཡིན་ནོ། །མིར་གྱུར་ཀྱང་སྣ་དགྱེ་བོར་གྱུར་པ་གང་ཡིན་པ་དེ་ནི་དྲི་མི་ཞིམ་པ་དག་གིས་དེ་བཞིན་གཤེགས་པ་ལ་མཆོད་པ་བྱས་པ་ལས་འོངས་པ་ཡིན་ནོ། །མིར་གྱུར་
ཀྱང་མཆུ་ཤོ་རེར་གྱུར་པ་གང་ཡིན་པ་དེ་ནི་ཉའི་འགྲམ་པ་ཕུག་པ་ལས་གྱུར་པ་ཡིན་ནོ། །མིར་གྱུར་ཀྱང་སྐྲ་སེར་པོར་གྱུར་པ་གང་ཡིན་པ་དེ་ནི་ཕག་གི་སྤུ་བཏོགས་པ་ལས་
འོངས་པ་ཡིན་ནོ། །མིར་གྱུར་ཀྱང་རྣ་བ་རལ་བར་གྱུར་པ་གང་ཡིན་པ་དེ་ནི་གཞན་དག་གི་རྣ་བ་ཕུག་པ་ལས་གྱུར་པ་ཡིན་ནོ། །མིར་གྱུར་ཀྱང་ལུས་ཀྱི་ཤ་བྲུར་ལྟ་བུར་གྱུར་པ་གང་ཡིན་

71-1-206a

པ་དེ་ནི་གོས་ཡང་ཞིང་སྲབ་པ་དག་བགོས་ནས་དེ་བཞིན་གཤེགས་པའི་སྐུ་གཟུགས་ཀྱི་སྤྱན་སྔར་འོངས་པ་ལས་གྱུར་པ་ཡིན་ནོ། །མིར་གྱུར་ཀྱང་མདོག་གནག་པ་གང་ཡིན་པ་དེ་ནི་དེ་བཞིན་གཤེགས་པའི་སྐུ་གཟུགས་
ཁྱམས་དག་གི་འོག་ཏུ་བཞག་ནས་དུད་པས་བདུགས་པ་ལས་གྱུར་པ་ཡིན་ནོ། །མིར་གྱུར་ཀྱང་རྐང་ལག་ཞ་བོར་གྱུར་པ་གང་ཡིན་པ་དེ་ནི་མཁན་པོ་དང་བླ་མ་རྣམས་མཐོང་ཡང་ལྡང་བ་མེད་པ་ལས་གྱུར་པ་ཡིན་ནོ། །མིར་གྱུར་ཀྱང་སྒུར་པོར་
གྱུར་པ་གང་ཡིན་པ་དེ་ནི་གོས་ཡང་ཞིང་སྲབ་པ་དག་བགོས་ནས་ཕན་ཚུན་དུ་འགྲོ་བའི་ཚེ་དེ་བཞིན་གཤེགས་པའི་སྐུ་གཟུགས་ལ་རྒྱབ་ཀྱིས་ཕྱོགས་པ་ལས་གྱུར་པ་ཡིན་ནོ། །མིར་གྱུར་ཀྱང་འཕྲལ་བ་མི་སྡུག་པ་གང་ཡིན་པ་དེ་ནི་དེ་
བཞིན་གཤེགས་པ་མཐོང་བའི་ཚེ་ཕྱག་ཀྱང་མི་བྱེད་ལ། ལག་པས་འཕྲལ་བར་བརྡབས་པ་ལས་གྱུར་པ་ཡིན་ནོ། །མིར་གྱུར་ཀྱང་གཉའ་བ་ཐུང་བ་གང་ཡིན་པ་དེ་ནི་བླ་མ་དག་མཐོང་ནས་མགོ་སྦས་ཏེ་བྲོས་ནས་བྱོལ་བ་ལས་
གྱུར་པ་ཡིན་ནོ། །མིར་གྱུར་ཀྱང་རྟག་པར་སྙིང་ན་བ་གང་ཡིན་པ་དེ་ནི་སེམས་ཅན་གྱི་ལུས་ཀྱི་ཡན་ལག་བཅད་ཅིང་གཏུབས་པ་ལས་གྱུར་པ་ཡིན་ནོ། །མིར་གྱུར་ཀྱང་མཛེ་ཅན་དུ་གྱུར་པ་གང་ཡིན་པ་དེ་ནི་ཉེས་པ་མེད་པར་གཞན་
དག་གི་ནོར་བླངས་པ་ལས་གྱུར་པ་ཡིན་ནོ། །མིར་གྱུར་ཀྱང་དབུགས་ཐུང་བ་གང་ཡིན་པ་དེ་ནི་དགུན་གྲང་བའི་དུས་ཀྱི་ཚེ་གཞན་དག་ལ་ཟས་གྲང་མོ་དག་བྱིན་པ་ལས་གྱུར་པ་ཡིན་ནོ། །མིར་གྱུར་ཀྱང་བུ་ཁྱེའུ་དང་བུ་མོ་མེད་པར་
གྱུར་པ་གང་ཡིན་པ་དེ་ནི་བྱ་མང་པོ་རྣམས་ཀྱི་ཕྲུ་གུ་བསད་པ་ལས་གྱུར་པ་ཡིན་ནོ། །མིར་གྱུར་ནས་བུ་ཚ་མང་བ་གང་ཡིན་པ་དེ་ནི་སེམས་ཅན་གསོ་བར་དགའ་བ་ལས་འོངས་པ་ཡིན་ནོ། །མིར་གྱུར་ནས་ཚེ་རིང་བ་གང་ཡིན་པ་དེ་ནི་
བྱམས་པའི་སེམས་དང་ལྡན་པ་ལས་འོངས་པ་ཡིན་ནོ། །མིར་གྱུར་ནས་ཚེ་ཐུང་བ་གང་ཡིན་པ་དེ་ནི་སྲོག་ཆགས་མང་པོ་བསད་པ་ལས་གྱུར་པ་ཡིན་ནོ། །མིར་གྱུར་ནས་ཕྱུག་པོར་གྱུར་པ་གང་ཡིན་པ་དེ་ནི་སྦྱིན་པ་བཏང་བ་

71-1-206b

ལས་གྱུར་པ་ཡིན་ནོ། །མིར་གྱུར་ནས་རྟ་དང་ཤིང་རྟ་དང་ལྡན་པ་གང་ཡིན་པ་དེ་ནི་དཀོན་མཆོག་གསུམ་ལ་རྟ་དང་ཤིང་རྟ་ཕུལ་བ་ལས་གྱུར་པ་ཡིན་ནོ། །མིར་གྱུར་ནས་དབང་པོ་གསལ་བ་གང་ཡིན་པ་དེ་ནི་མདོ་སྡེ་འདྲི་ཞིང་ཁ་
ཏོན་འདོན་པ་ལས་གྱུར་པ་ཡིན་ནོ། །མིར་གྱུར་ཀྱང་དབང་པོ་མི་གསལ་བ་གང་ཡིན་པ་དེ་ནི་དུད་འགྲོའི་གནས་ནས་འོངས་པ་ཡིན་ནོ། །མིར་གྱུར་ཀྱང་གཞན་གྱི་བྲན་དང་བྲན་མོ་བྱེད་པ་གང་ཡིན་པ་དེ་ནི་བུ་ལོན་ཆགས་པ་ལས་
འོངས་པ་ཡིན་ནོ། །མིར་གྱུར་ཀྱང་མི་བརྟན་ཞིང་ཡང་བ་གང་ཡིན་པ་དེ་ནི་སྔོན་སྤྲེའུ་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་མཛེ་ནད་ཀྱིས་བཏབ་པ་གང་ཡིན་པ་དེ་ནི་དཀོན་མཆོག་གསུམ་རྣམ་པར་བཤིག་པ་ལས་གྱུར་པ་
ཡིན་ནོ། །མིར་གྱུར་ཀྱང་རྐང་ལག་འཇམ་འགྲུས་སུ་གྱུར་པ་གང་ཡིན་པ་དེ་ནི་སེམས་ཅན་གྱི་རྐང་ལག་དམ་དུ་བཅིངས་པ་ལས་འོངས་པ་ཡིན་ནོ། །མིར་གྱུར་ཀྱང་ལུས་ལ་རྨ་དང་ཤུ་བ་འབྱུང་ཞིང་ཡུན་རིང་པོར་སྨན་དང་དཔྱད་བྱས་
ཀྱང་སོས་སུ་མི་བཏུབ་པ་གང་ཡིན་པ་དེ་ནི་སེམས་ཅན་ལ་བརྡེག་བཙོག་བྱས་པ་ལས་གྱུར་པ་ཡིན་ནོ། །མིར་གྱུར་ཀྱང་རང་བཞིན་མི་སྲུན་པ་གང་ཡིན་པ་དེ་ནི་སྡིག་སྦྲུལ་བྱས་པ་ལས་འོངས་པ་ཡིན་ནོ། །མིར་གྱུར་ནས་
དབང་པོ་དྲུག་ཚང་བ་གང་ཡིན་པ་དེ་ནི་ཚུལ་ཁྲིམས་སྲུངས་པ་ལས་འོངས་པ་ཡིན་ནོ། །མིར་གྱུར་ཀྱང་དབང་པོ་རྣམས་མ་ཚང་བ་གང་ཡིན་པ་དེ་ནི་ཚུལ་ཁྲིམས་འཆལ་པ་ལས་འོངས་པ་ཡིན་ནོ། །མིར་གྱུར་ཀྱང་གཙང་སྦྲ་མེད་
པ་གང་ཡིན་པ་དེ་ནི་ཕག་བྱས་པ་ལས་འོངས་པ་ཡིན་ནོ། །མིར་གྱུར་ནས་གླུ་གར་ལ་དགའ་བ་གང་ཡིན་པ་དེ་ནི་རོལ་མོ་མཁན་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་འདོད་ཆེན་ཆེ་བ་གང་ཡིན་པ་དེ་ནི་ཁྱི་བྱས་པ་
ལས་འོངས་པ་ཡིན་ནོ། །མིར་གྱུར་ནས་གཉའ་བར་ལྦ་བ་ཡོད་པ་གང་ཡིན་པ་དེ་ནི་གཅིག་པུ་བསྣོགས་པ་ལས་འོངས་པ་ཡིན་ནོ། །མིར་གྱུར་ནས་ཁའི་དྲི་མནམ་པ་གང་ཡིན་པ་དེ་ནི་ཚིག་ངན་གྱིས་གཞན་ལ་སྤྱོས་པ་

71-1-207a

ལས་འོངས་པ་ཡིན་ནོ། །མིར་གྱུར་ཀྱང་ཕོ་མཚན་དང་མི་ལྡན་པ་དེ་ནི་ཁྱི་དང་ཕག་རྣམས་ཀྱི་རླིག་པ་བཅད་པ་ལས་གྱུར་པ་ཡིན་ནོ། །མིར་གྱུར་ནས་ལྕེ་ཐུང་བ་གང་ཡིན་པ་དེ་ནི་དབེན་པ་དག་ཏུ་བླ་མ་དག་ལ་ཚིག་
མི་སྙན་པ་བརྗོད་པ་ལས་འོངས་པ་ཡིན་ནོ། །མིར་གྱུར་ནས་གཞན་གྱི་ཆུང་མ་ལ་གཡེམ་པར་མངོན་པར་དགའ་བ་དེ་ནི་ཤི་འཕོས་ནས་བྱ་ངང་པ་དག་ཏུ་ལྟུང་བར་འགྱུར་རོ། །མིར་གྱུར་ཀྱང་བདག་དང་ཉེ་ཞིང་གཉེན་དུ་འབྲེལ་པ་
དག་ལ་གཡེམ་པར་མངོན་པར་དགའ་བ་གང་ཡིན་པ་དེ་ནི་ཤི་འཕོས་ནས་བྱེའུ་མཆིལ་པ་དག་ཏུ་ལྟུང་བར་འགྱུར་རོ། །མིར་གྱུར་ནས་མདོ་སྡེ་དང་བསྟན་བཅོས་དག་ལ་སེར་སྣ་བྱེད་ཅིང་ཤེས་ཀྱང་སྦས་ནས་གཞན་དག་ལ་མི་སྟོན་པ་
གང་ཡིན་པ་དེ་ནི་ཤི་འཕོས་ནས་ཤིང་སྲིན་དག་ཏུ་སྐྱེ་བར་འགྱུར་རོ། །མིར་གྱུར་ནས་མདའ་གཞུ་ཐོགས་ཤིང་གཞོམ་པ་ལ་མངོན་པར་དགའ་བ་གང་ཡིན་པ་དེ་ནི་ཤི་འཕོས་ནས་ཀླ་ཀློ་ཅན་དུ་ལྟུང་བར་འགྱུར་རོ། །རྔོན་པ་བྱེད་ཅིང་སྲོག་
ཆགས་གསོད་པ་ལ་མངོན་པར་དགའ་བ་གང་ཡིན་པ་དེ་ནི་ཤི་འཕོས་ནས་འཕར་སྤྱང་དག་ཏུ་ལྟུང་བར་འགྱུར་རོ། །མགོ་རྒྱན་དང་མེ་ཏོག་ཐོགས་པ་ལ་མངོན་པར་དགའ་བ་གང་ཡིན་པ་དེ་ནི་ཤི་འཕོས་ནས་གཅིན་རྟུག་གི་སྲིན་བུ་བྱེད་
པར་འགྱུར་རོ། །གོས་རིང་པོ་གྱོན་པར་དགའ་བ་དེ་ནི་ཤི་འཕོས་ནས་སྲིན་བུ་མཇུག་རིངས་བྱེད་པར་འགྱུར་རོ། །ཉལ་ཞིང་ཟ་བར་མངོན་པར་དགའ་བ་དེ་ནི་ཤི་འཕོས་ནས་ཕག་ཏུ་སྐྱེ་བར་འགྱུར་རོ། །གོས་ཚོན་ཅན་གྱོན་
པར་མངོན་པར་དགའ་བ་དེ་ནི་ཤི་འཕོས་ནས་བྱེའུ་ཁྲེའུ་བྱེད་པར་འགྱུར་རོ། །གཞན་གྱི་ཚིག་ཟློས་ཤིང་ཀུ་རེ་བྱེད་པར་མངོན་པར་དགའ་བ་དེ་ནི་ཤི་འཕོས་ནས་བྱ་ནེ་ཙོ་བྱེད་པར་འགྱུར་རོ། །ཕྲ་མ་བྱེད་པ་ལ་མངོན་པར་དགའ་བ་གང་
ཡིན་པ་དེ་ནི་ཤི་འཕོས་ནས་སྦྲུལ་ལུས་པོ་ཆེ་དག་ཏུ་སྐྱེ་བར་འགྱུར་རོ། །ཉེས་པ་མེད་པར་དགྲ་ལ་རྣམ་པར་འཚེ་བ་གང་ཡིན་པ་དེ་ནི་ཤི་འཕོས་ནས་སྲིན་བུ་འཁོན་དུ་འཛིན་པའི་སེམས་དང་བཅས་པ་དག་ཏུ་སྐྱེ་བར་འགྱུར་རོ། །གཞན་

71-1-207b

གྱི་དབྱེན་བྱེད་པར་དགའ་བ་གང་ཡིན་པ་དེ་ནི་ཤི་འཕོས་ནས་སྲིན་བྱ་དག་ཏུ་སྐྱེ་བར་འགྱུར་རོ། །དམོད་མོའི་ཚིག་སྨྲ་བ་ལ་མངོན་པར་དགའ་བ་གང་ཡིན་པ་དེ་ནི་ཤི་འཕོས་ནས་ཝ་དག་ཏུ་སྐྱེ་བར་འགྱུར་རོ། །གཞན་དག་སྐྲག་ཅིང་དངང་བར་
མངོན་པར་དགའ་བ་གང་ཡིན་པ་དེ་ནི་ཤི་འཕོས་ནས་རི་དགས་ཤ་བའི་རིགས་སུ་སྐྱེ་བར་འགྱུར་རོ། །ཚེ་སྔ་མ་ལ་ཤིང་གི་ལྷམ་བགོས་ནས་དྲི་གཙང་ཁང་དུ་ཞུགས་པ་གང་ཡིན་པ་དེ་ནི་ཚེ་འདི་ལ་རྟའི་རིགས་སུ་སྐྱེ་བར་འགྱུར་རོ། །ཚེ་
སྔ་མ་ལ་འཕྱེན་གཏོང་བ་ལ་མངོན་པར་དགའ་བ་གང་ཡིན་པ་དེ་ནི་སྲིན་བུ་མནམ་པོའི་རིགས་སུ་སྐྱེ་བར་འགྱུར་རོ། །ཚེ་སྔ་མ་ལ་དགེ་འདུན་གྱི་གཏུན་དང་རང་ཐག་ཡོངས་སུ་སྤྱོད་པ་གང་ཡིན་པ་དེ་ནི་ཚེ་འདི་ལ་སྲོག་ཆགས་སྲིན་བུ་མགོ་
རྡེབས་པ་དག་ཏུ་སྐྱེ་བར་འགྱུར་རོ། །ཚེ་སྔ་མ་ལ་གཞན་དག་གི་ཟས་ཀྱི་གེགས་བྱས་ན་ཚེ་འདི་ལ་ཤིང་སྲིན་བྱེད་པར་འགྱུར་རོ། །དགེ་འདུན་གྱི་ཆུ་བརྐུས་ནས་ཡོངས་སུ་སྤྱད་པ་གང་ཡིན་པ་དེ་ནི་ཚེ་འདི་ལ་ཉ་དང་ཆུ་སྲིན་དག་ཏུ་སྐྱེ་བར་
འགྱུར་རོ། །དགེ་འདུན་གྱི་ས་གཞི་དག་ལ་མི་གཙང་བ་འདོར་བ་གང་ཡིན་པ་དེ་ནི་བཤང་གཅིའི་ནང་དུ་སྲིན་བུ་དག་ཏུ་སྐྱེ་བར་འགྱུར་རོ། །དགེ་འདུན་གྱི་ཤིང་ཏོག་བརྐུས་པ་གང་ཡིན་པ་དེ་ནི་འཇིམ་རྫབ་ཟ་བའི་སྲིན་བུ་བྱེད་པར་འགྱུར་
རོ། །དགེ་འདུན་གྱི་དཀོར་བརྐུས་པ་གང་ཡིན་པ་དེ་ནི་རང་ཐག་འདྲེན་པའི་གླང་དང་བོང་བུ་བྱེད་པར་འགྱུར་རོ། །དགེ་འདུན་གྱི་དཀོར་ལ་ནན་གྱིས་སློང་ཞིང་སྔ་སྐྱིན་བྱེད་ན་ཕུ་རོན་དཀར་པོ་བྱེད་པར་འགྱུར་རོ། །དགེ་འདུན་ལ་འཕྱ་
ཞིང་དམོད་པར་བྱེད་ན་གླང་གི་གཉའ་བའི་སྲིན་བུར་སྐྱེ་བར་འགྱུར་རོ། །དགེ་འདུན་གྱི་ཚོད་ལྡུམ་ཟོས་ན་ཚོད་མའི་སྲིན་བུར་སྐྱེ་བར་འགྱུར་རོ། །དགེ་འདུན་གྱི་ཁྲི་སྟན་ལ་འདུག་ན་སའི་སྲིན་བུ་མཇུག་རིངས་སུ་སྐྱེ་བར་འགྱུར་རོ། །
དགེ་འདུན་གྱི་ཡོ་བྱད་སྣ་ཚོགས་དག་ལ་ཡོངས་སུ་སྤྱོད་པར་བྱེད་ན་ཕྱེ་མ་ལེབ་དུ་སྐྱེ་བར་འགྱུར་རོ། །རུས་པ་དག་ཐོགས་ནས་གཙུག་ལག་ཁང་དུ་འཇུག་པར་བྱེད་ན་བྱ་མཆུ་རིངས་སུ་སྐྱེ་བར་འགྱུར་རོ། །དམར་རྩི་དང་དཀར་རྩི་

71-1-208a

དག་མཆུ་ལ་བསྐུས་ནས་གཙུག་ལག་ཁང་དུ་འཇུག་པར་བྱེད་ན་བྱ་མཆུ་དམར་བ་དག་ཏུ་སྐྱེ་བར་འགྱུར་རོ། །གོས་ཚོན་ཅན་བགོས་ཏེ། གཙུག་ལག་ཁང་དུ་འགྲོ་བར་བྱེད་ན་བྱ་ཁ་དོག་སེར་པོ་དག་ཏུ་སྐྱེ་
བར་འགྱུར་རོ། །ཁྱོ་ཤུག་གཙུག་ལག་ཁང་དུ་གནས་ནས་ཉལ་པོ་བྱས་ན་བྱ་མགོ་སྔོན་དག་ཏུ་སྐྱེ་བར་འགྱུར་རོ། །དེ་བཞིན་གཤེགས་པའི་མཆོད་རྟེན་ལ་བརྫིས་ན་རྔ་མོའི་ལུས་བྱེད་པར་འགྱུར་རོ། །ལྷམ་བགོས་ཏེ་
དེ་བཞིན་གཤེགས་པའི་དྲི་གཙང་ཁང་དུ་འགྲོ་བར་བྱེད་ན་སྦལ་པར་སྐྱེ་བར་འགྱུར་རོ། །ཆོས་ཉན་པའི་ཚེ་ཀླག་ཅོར་ཟེར་ན་ནི་བྱ་ལྕེ་བརྒྱ་པ་དག་ཏུ་སྐྱེ་བར་འགྱུར་རོ། །དགེ་སློང་མ་གཙང་མ་སུན་པར་བྱེད་ན་ཤི་འཕོས་ནས་
སེམས་ཅན་དམྱལ་བའི་གནས་ལྕགས་ཀྱི་བྲག་ཕུག་ཏུ་ལྟུང་ཞིང་རལ་གྲིའི་འཁོར་ལོ་བརྒྱ་སྟོང་དུ་མ་དུས་གཅིག་ཏུ་བབས་ནས་ལུས་གཅོད་པར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་
ཅེས་གསོལ་ཏོ། །བཅོམ་ལྡན་འདས་ཀྱིས་འདི་སྐད་གསུངས་པ་ལྟར་དགེ་འདུན་གྱི་རྫས་ཡོངས་སུ་སྤྱོད་པ་གང་ལགས་པ་དེ་དག་ལ་ཡང་དག་པར་ཤིན་དུ་ལྕི་བ་ཞིག་ལགས་པར་གྱུར་ན་སྦྱིན་བདག་བཞི་པོ་ཇི་ལྟར་གཙུག་
ལག་ཁང་དུ་མཆི་ཞིང་བཀུར་སྟི་དང་ཕྱག་འཚལ་བར་བགྱིད་པ་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་གཙུག་ལག་ཁང་དུ་འགྲོ་བ་ལ་སེམས་རྣམ་པ་གཉིས་ཡོད་དེ། དགེ་བའི་སེམས་
དང་མི་དགེ་བའི་སེམས་གང་ཡིན་པའོ། །དགེ་བའི་སེམས་ཤེས་བྱ་བ་ཇི་ལྟ་བུ་ཞེ་ན། གང་གིས་གཙུག་ལག་ཁང་དུ་ཕྱིན་ནས་དེ་བཞིན་གཤེགས་པ་མཐོང་ན་ཕྱག་བྱེད་པ་དང་། དགེ་འདུན་མཐོང་ན་གུས་པར་བཀུར་སྟི་
བྱས་ནས་མདོ་སྡེའི་དོན་འདྲི་བར་བྱེད་པ་དང་། སྡོམ་པ་ཡང་དག་པར་བླངས་ནས་ཉེས་པ་འཆགས་པར་བྱེད་པ་དང་། ནོར་རྫས་དག་ཡོངས་སུ་བཏང་ནས་དཀོན་མཆོག་གསུམ་གྱི་ཞལ་ཏ་བྱེད་པ་དང་། ལུས་དང་སྲོག་ལ་ཕངས་

71-1-208b

པ་མེད་པར་ཆོས་ཆེན་པོ་ཡོངས་སུ་བསྲུང་ཞིང་ཡང་དག་པར་འཛིན་པར་བྱེད་པའི་གང་ཟག་དེ་ལྟ་བུ་དག་ནི་གོམ་པ་གཅིག་འདོར་བར་བྱེད་ན་ཡང་ལྷའི་གཞལ་མེད་ཁང་དྲུང་དུ་འོང་ཞིང་། མ་འོངས་པ་ན་ཁྱིམ་བདག་ཤུག་དེ་ཀ་བཞིན་
དུ་རྣམ་པར་སྨིན་པའི་འབྲས་བུ་མྱོང་བར་འགྱུར་བ་གང་ཡིན་པ་དེ་ནི་སྐྱེས་བུ་མཆོག་ཏུ་དགེ་བ་ཞེས་བྱའོ། །མི་དགེ་བའི་སེམས་དང་ལྡན་པ་ཇི་ལྟ་བུ་ཞེ་ན། སེམས་ཅན་གང་ལ་ལ་ཞིག་གཙུག་ལག་ཁང་དུ་འཇུག་པའི་ཚེ་དགེ་
འདུན་ལ་སློངས་མོ་དང་། གཡར་པོ་དང་། སྔ་སྐྱིན་འབའ་ཤིག་བྱ་བར་སེམས་པ་དང་། དགེ་འདུན་གྱི་སྐྱོན་ཚོལ་ཞིང་རྩེ་གཅིག་ཏུ་རྣམ་པར་བཤིག་པ་འབའ་ཤིག་ཏུ་འདོད་པ་དང་། དགེ་སློང་གི་དགེ་འདུན་གྱི་ཟས་ཟོས་
ན་ཡང་སེམས་ལ་གནོད་པ་ཅི་ཡང་མེད་ཅིང་ཁུར་བ་དང་། ཤིང་ཏོག་དང་། ལྡམ་ལྡུམ་དག་ཁྱེར་ནས་རང་གི་ཁྱིམ་དུ་འགྲོ་བར་བྱེད་པའི་གང་ཟག་དེ་ལྟ་བུ་དག་ཤི་འཕོས་མ་ཐག་ཏུ་ལྕགས་ཀྱི་ཐུ་ལུམ་ཟ་བའི་སེམས་ཅན་དམྱལ་
བར་ལྟུང་ཞིང་ཟངས་ཀྱི་ནང་དུ་བཙོ་བ་དང་། སྦར་བའི་མེས་བསྲེགས་པ་དང་། རལ་གྲི་ལྟ་བུའི་རི་ལོ་མ་ཅན་གྱི་ལྗོན་ཤིང་ལ་འཛེག་པ་ལ་སོགས་པའི་སྡུག་བསྔལ་གང་ཡང་མི་མྱོང་བ་མེད་པར་འགྱུར་ཏེ། འདི་ནི་སྐྱེས་བུ་
མཆོག་ཏུ་མི་དགེ་བ་ཞེས་བྱའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་འདི་ནི་ངས་མ་འོངས་པའི་དུས་ཀྱི་སློབ་མ་དག་ལ་རྗེས་སུ་བསྟན་པ་ཡིན་གྱིས་བག་ཡོད་པར་བསྒྲིམས་ཏེ། དཀོན་མཆོག་
གསུམ་པོ་དག་ལ་ཉེས་པ་མི་བྱེད་པ་དང་། ནུར་བའི་སེམས་སྐྱེ་བ་མེད་པར་དེ་བཞིན་གཤེགས་པའི་བཀའ་སྩལ་པ་བཞིན་བྱེད་ན། དེ་བཞིན་གཤེགས་པ་བྱམས་པ་འཇིག་རྟེན་དུ་བྱུང་བའི་ཚེ་ཡོངས་སུ་མྱ་ངན་ལས་འདའ་བར་
འགྱུར་བར་ཐེ་ཙོམ་མེད་དོ། །བཅོམ་ལྡན་འདས་ཀྱིས་བཀའ་སྩལ་པ། ཚེ་འདི་ལ་གཞན་གྱི་ལུས་ལས་གོས་བཤུས་ཏེ་འཕྲོག་པར་བྱེད་ན་ཤི་འཕོས་ནས་གྲང་བའི་སེམས་ཅན་དམྱལ་བར་ལྟུང་བ་དང་། གཞན་ཡང་དར་

71-1-209a

གྱི་སྲིན་བུར་སྐྱེས་ནས་འཚེད་པར་འགྱུར་རོ། །ཚེ་འདི་ལ་སྐུ་གཟུགས་དང་མདོ་སྡེའི་སྤྱན་སྔར་མར་མེ་སྦར་བར་མངོན་པར་མི་དགའ་ན་ཤི་འཕོས་ནས་རི་ཁོར་ཡུག་གི་བར་ན་སེམས་ཅན་དམྱལ་བའི་གནས་མུན་
ནག་ཡོད་པ་དག་ཏུ་ལྟུང་བར་འགྱུར་རོ། །ཚེ་འདི་ལ་སེམས་ཅན་གྱི་སྲོག་བཅད་པས་དམྱལ་ཞིང་གཏུབ་པར་བྱེད་ན་ཤི་འཕོས་ནས་སེམས་ཅན་དམྱལ་བ་མཚོན་ལྟར་རབ་ཏུ་རྣོ་བའི་རི་ལ་རལ་གྲི་ལོ་མ་ཅན་གྱི་ལྗོན་ཤིང་འཛེག་པ་དག་ཏུ་
ལྟུང་བར་འགྱུར་རོ། །ཚེ་འདི་ལ་ཁ་ཅིག་སྡིག་གཏོང་ཞིང་རྔོན་པ་བྱེད་པར་མངོན་པར་དགའ་བ་དེ་དག་ནི་ཤི་འཕོས་ནས་སོག་ལེས་འདྲལ་བའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་མང་དུ་འདོད་པས་ལོག་པར་
གཡེམ་པ་གང་ཡིན་པ་དེ་ནི་ཤི་འཕོས་ནས་ཟངས་ཀྱི་ཀ་བ་རབ་ཏུ་འབར་བ་ལ་འཇུ་བ་དང་། ལྕགས་ཀྱི་ཁྲི་རབ་ཏུ་ཚ་བ་ལ་ཉལ་བའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་ཆུང་མ་མང་པོ་འཆང་བ་གང་ཡིན་པ་
དེ་ནི་ལྕགས་ཀྱི་རང་ཐག་ཏུ་འཐག་པའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་ཁྱིམ་ཐབ་མང་པོ་བདོག་པ་གང་ཡིན་པ་དེ་ནི་ཤི་འཕོས་ནས་སྦྲུལ་གདུག་པ་དང་ལྡན་པའི་སེམས་ཅན་དམྱལ་བར་ལྟུང་བར་
འགྱུར་རོ། །ཚེ་འདི་ལ་སྒོ་ང་བསྲེགས་པ་གང་ཡིན་པ་དེ་ནི་ཤི་འཕོས་ནས་མེ་མ་མུར་རབ་ཏུ་ཚ་བ་དང་ལྡན་པའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་ཕག་དང་བྱ་རྣམས་བཤུ་ཤིང་འཐོག་པ་གང་ཡིན་པ་དེ་
ནི་ཤི་འཕོས་ནས་ཟངས་དག་ཏུ་འཚེད་པའི་སེམས་ཅན་དམྱལ་བ་དག་ཏུ་ལྟུང་བར་འགྱུར་རོ། །ཚེ་འདི་ལ་ཕག་དང་ཁྱིའི་རླིག་པ་འབྱིན་པ་གང་ཡིན་པ་དེ་ནི་ཤི་འཕོས་ནས་རྡོ་ཟུར་དང་ལྡན་པའི་སེམས་ཅན་དམྱལ་བར་
ལྟུང་བར་འགྱུར་རོ། །ཚེ་འདི་ལ་ཆང་འཐུངས་ནས་མྱོས་པར་བྱས་པ་གང་ཡིན་པ་དེ་ནི་ཤི་འཕོས་ནས་ལྕགས་ཁུ་འཐུང་བའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་སེམས་ཅན་གྱི་ལུས་ཀྱི་ཡན་ལག་

71-1-209b

བཅད་ཅིང་གཏུབ་པ་གང་ཡིན་པ་དེ་ནི་ཤི་འཕོས་ནས་ལྕགས་ཀྱི་འཁོར་ལོ་དང་ལྡན་པའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་དགེ་འདུན་གྱི་ཤིང་ཏོག་བརྐུས་པ་གང་ཡིན་པ་དེ་ནི་ཤི་འཕོས་ནས་ལྕགས་ཀྱི་ཐུ་ལུམ་ཟ་
བའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་ཕག་གི་རྒྱུ་མ་དང་ཤ་ཟོས་པ་གང་ཡིན་པ་དེ་ནི་ཤི་འཕོས་ནས་ལྗན་ལྗིན་གྱིས་གང་བའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་ཉ་གསོན་པོར་ཟོས་པ་གང་ཡིན་
པ་དེ་ནི་ཤི་འཕོས་ནས་མཚོན་ཆ་དང་། དབྱིག་པ་དང་། རལ་གྲིའི་སོ་ཅན་གྱི་ལྗོན་ཤིང་དང་ལྡན་པའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་མ་ཡར་མོར་གྱུར་ནས་ཆུང་མ་སྔ་མའི་བུ་དག་ལ་ནེར་པ་བྱས་པ་གང་
ཡིན་པ་དེ་ནི་ཤི་འཕོས་ནས་མེ་རབ་ཏུ་འབར་བའི་ཤིང་རྟ་དང་ལྡན་པའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་ཕྲ་མ་བྱས་ནས་དཀྲུགས་མ་བྱས་པ་གང་ཡིན་པ་དེ་ནི་ཤི་འཕོས་ནས་ལྕགས་ཀྱི་ཐོང་གཤོལ་གྱིས་རྨོ་
བའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་མི་སྙན་པས་གཞན་དག་ལ་སྤྱོས་པ་གང་ཡིན་པ་དེ་ནི་ཤི་འཕོས་ནས་ལྕེ་རབ་ཏུ་འབྱིན་པའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་བརྫུན་མང་
དུ་སྨྲས་པ་གང་ཡིན་པ་དེ་ནི་ཤི་འཕོས་ནས་ལྕེ་ལྕགས་ཀྱི་གཟེར་གྱིས་འདེབས་པའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་སྲོག་བཅད་ནས་ལོག་པའི་ལྷ་ལ་མཆོད་སྦྱིན་བྱས་པ་གང་ཡིན་པ་དེ་ནི་ཤི་འཕོས་
ནས་ལྕགས་ཀྱི་གཏུན་གྱིས་བརྡུངས་པའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་བོན་མོ་བྱས་ནས་འདྲེ་གདོན་གྱི་ཚིག་འདོན་ཅིང་གཞན་དག་བསླུས་ཏེ་ནོར་བླངས་པ་གང་ཡིན་པ་དེ་ནི་ཤི་འཕོས་ནས་ཤའི་རི་
ལྟ་བུའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་བོན་མོ་བྱས་ནས་མིག་བཙུམས་ཏེ། ས་ལ་ཉལ་ནས་གཞན་དག་ལ་མཐོ་རིས་སུ་སྐྱེ་བར་འགྱུར་རོ་ཞེས་དྲང་པོ་མ་ཡིན་པའི་འདྲེ་གདོན་དག་གི་ལེན་པ་

71-1-210a

གང་ཡིན་པ་དེ་ནི་ཤི་འཕོས་ནས་རྐེད་པ་གཏུབ་པའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་བོན་མོ་བྱས་ནས་གཞན་དག་གི་སྲོག་བཅད་དེ། ལྷ་འདྲེ་དང་ལམ་ལྔའི་སའི་བདག་པོ་དང་སྲིན་
མོ་ལ་སོགས་པ་ལ་མཆོད་པ་བྱེད་དུ་བཅུག་པ་གང་ཡིན་པ་འདི་ལྟ་བུ་ལ་སོགས་པ་དེ་དག་ཐམས་ཅད་ནི་སྐྱེས་བུ་བླུན་པོ་རྣམས་འདྲིད་པ་ཡིན་པས་ཤི་འཕོས་ནས་སྟ་རེས་གཅོད་པའི་སེམས་ཅན་དམྱལ་བར་ལྟུང་བར་འགྱུར་རོ། །
སེམས་ཅན་དམྱལ་བར་བསྲུངས་མ་རྣམས་ཀྱིས་ཡན་ལག་བཅད་ཅིང་གཏུབ་པ་དང་། བྱ་ལྕགས་ཀྱི་མཆུ་ཅན་རྣམས་ཀྱིས་མིག་གི་འབྲས་བུ་གཉིས་ལ་འཐོག་པར་འགྱུར་རོ། །ཚེ་འདི་ལ་བོན་མོ་བྱས་ནས་མི་ཤི་བའི་རོ་
རྣམས་སྦེད་པ་དང་། ཁང་ཁྱིམ་རྣམས་ཀྱི་བཟང་ངན་དང་། རིགས་ལྔ་པོ་རྣམས་ཀྱིས་ཁེ་འཐོབ་པ་དང་། མི་འཐོབ་པ་ལྟ་བ་དང་། ཀླུ་རྣམས་བདེ་བར་འགོད་པ་དང་། དར་གྱི་སྲིན་བུ་དག་ལ་གཏང་རག་གཏོང་བ་དང་། སྲིན་མནན་
ནས་སྐྱེས་བུ་བླུན་པོ་དག་བསླུས་ཏེ། ནོར་མང་པོར་བླངས་པ་དང་། བརྫུན་ཚིག་གིས་བཟང་ངན་སྟོན་པ་གང་ཡིན་པ་དེ་དག་ནི་ཤི་འཕོས་ནས་ལྕགས་ཀྱི་དྲ་བ་ཅན་གྱི་སེམས་ཅན་དམྱལ་བར་ལྟུང་བར་འགྱུར་བས་བྱ་འདབ་ཆགས་
མ་རུངས་པ་ཚད་མེད་པ་སྙེད་དེའི་ལུས་ལ་འདུས་ཏེ། ཤ་རྣམས་མ་ལུས་པར་ཟོས་ནས་རུས་པ་དང་རྒྱུས་པ་རྣམས་ཀྱང་འཐོག་པར་བྱེད་པས་སྡུག་བསྔལ་དཔག་ཏུ་མེད་པ་དག་མྱོང་བར་འགྱུར་རོ། །ཚེ་འདི་ལ་སྨན་པ་བྱས་ཏེ། 
ནད་གསོ་བར་མི་ནུས་བཞིན་དུ་གཞན་དག་ལ་བསླུས་ཏེ་ནོར་བླངས་པ་གང་ཡིན་པ་དེ་ནི་ཤི་འཕོས་ནས་གཏར་བ་དང་། མེ་བཙས་བསྲེགས་པའི་སེམས་ཅན་དམྱལ་བར་ལྟུང་བར་འགྱུར་བས་ལུས་ཀུན་ཏུ་མེ་རབ་ཏུ་འབར་བར་
འགྱུར་རོ། །ཚེ་འདི་ལ་མཆོད་རྟེན་དང་། གཙུག་ལག་ཁང་བཤིག་པ་དང་། མཁན་པོ་དང་། སློབ་དཔོན་གྱིས་བསྒོ་བ་མ་ཉན་པ་དང་། ཕ་མ་ལ་སྲི་ཞུ་མེད་པ་གང་ཡིན་པ་དེ་དག་ནི་ཤི་འཕོས་ནས་མནར་མེད་པའི་སེམས་

71-1-210b

ཅན་དམྱལ་བ་ཆེན་པོ་དང་། སེམས་ཅན་དམྱལ་བ་ཆེན་པོ་བརྒྱད་པོ་དག་ཏུ་སྡུག་བསྔལ་སྣ་ཚོགས་མྱོང་བ་དང་། གཞན་ཡང་སེམས་ཅན་དམྱལ་བ་ཆུང་ངུ་བརྒྱ་སུམ་བཅུ་རྩ་དྲུག་པོ་ཀུན་དུ་འཇུག་ཅིང་བསྐལ་པ་གཅིག་
གམ། བསྐལ་པ་གཉིས་སམ། བསྐལ་པ་ལྔའི་བར་དུ་སྡུག་བསྔལ་མྱོང་ནས་དེའི་འོག་ཏུ་གདོད་ཐར་བར་གྱུར་ཏེ། དགེ་བའི་བཤེས་གཉེན་དང་ཕྲད་ན་ནི་བྱང་ཆུབ་ཏུ་སེམས་སྐྱེད་པར་འགྱུར་ལ། གལ་ཏེ་ཕྲད་པར་མ་
གྱུར་ན་ནི་སླར་ཡང་སེམས་ཅན་དམྱལ་བར་ལྟུང་བར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། མིར་གྱུར་ཀྱང་ལུས་ཀྱི་བོང་ཆེ་ཞིང་ཤིན་ཏུ་མནམ་པ་དང་། ཁྲོ་སྐྱེན་ཞིང་དགྲོལ་དཀའ་བ་གང་ཡིན་པ་དེ་ནི་སྔོན་གྱི་
རྔ་མོ་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་འགྲོ་བ་ལ་དགའ་ཞིང་ཟན་ཟ་བ་འགྲུས་པ་དང་། ཉམ་ང་བ་དག་ལ་འབྱོལ་བ་མེད་པ་གང་ཡིན་པ་དེ་ནི་སྔོན་རྟ་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་གྲང་བ་དང་། 
ཚ་བ་དག་བཟོད་ཅིང་སེམས་ལ་འཛིན་པ་མེད་པ་གང་ཡིན་པ་དེ་ནི་སྔོན་གླང་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་སྒྲ་སྐད་ཆེ་བ་དང་། ངོ་ཚ་མེད་ཅིང་ཁྲེལ་མེད་པ་དང་། སྲེད་པ་དང་། དྲང་བ་མང་ཞིང་ལེགས་ཉེས་
ཀྱི་བྱེ་བྲག་མི་ཕྱེད་པ་གང་ཡིན་པ་དེ་ནི་སྔོན་བོང་བུ་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་རྟག་པར་ཤ་ལ་བརྐམ་ཞིང་བྱ་བ་དག་ལ་འཇིགས་པ་མེད་པ་གང་ཡིན་པ་དེ་ནི་སྔོན་སེང་གེ་བྱས་པ་ལས་འོངས་པ་ཡིན་ནོ། །
མིར་གྱུར་ཀྱང་ལུས་རིང་ཞིང་མིག་ཟླུམ་པ་དང་འབྲོག་དགོན་པ་ན་མང་དུ་རྒྱུ་བ་དང་། བུ་དང་ཆུང་མ་ལ་སྡང་བ་གང་ཡིན་པ་དེ་ནི་སྔོན་སྟག་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་སྤུན་ཞིང་མིག་ཆུང་བ་དང་། གནས་
གཅིག་ཏུ་གནས་པར་མོས་པ་མེད་པ་གང་ཡིན་པ་དེ་ནི་སྔོན་བྱ་འདབ་ཆགས་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་རང་བཞིན་མི་བརྟན་ཞིང་སྲོག་ཆགས་ཕྲ་མོ་གསོད་པ་ལ་དགའ་བ་གང་ཡིན་པ་དེ་ནི་སྔོན་གྱི་ཝ་

71-1-211a

བྱས་པ་ལས་འོངས་པ་ཡིན་ནོ། །མིར་གྱུར་ཀྱང་དཔའ་ཞིང་བཤོར་བ་དང་། འདོད་ཆགས་ཆུང་ཞིང་ཆུང་མ་ལ་སྲེད་པ་མེད་པ་གང་ཡིན་པ་དེ་ནི་སྔོན་སྤྱང་ཀི་བྱས་པ་ལས་འོངས་པ་ཡིན་ནོ། །མིར་
གྱུར་ཀྱང་གོས་བཟང་པོ་ལ་མི་དགའ་བ་དང་། མ་ཡིན་པ་བྱས་པ་དག་ལ་རྟོག་པ་དང་། གཉིད་ཆུང་ཞིང་ཞེ་སྡང་མང་བ་གང་ཡིན་པ་དེ་ནི་སྔོན་ཁྱི་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་གཡེམ་པ་ལ་དགའ་ཞིང་སྐྱེ་
བོ་མང་པོའི་ཡིད་དུ་འོང་བའི་གཏམ་བརྗོད་པ་ལ་མངོན་པར་དགའ་བ་གང་ཡིན་པ་དེ་ནི་སྔོན་ནེ་ཙོ་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་ལུས་ཀྱི་བོང་ཆུང་ཞིང་གཡེམ་པ་ལ་དགའ་བ་དང་། སེམས་རྩེ་གཅིག་ཏུ་མི་
གནས་པ་དང་། གཟུགས་མཐོང་མ་ཐག་ཏུ་མངོན་པར་ཞེན་པའི་སེམས་འབྱུང་བ་གང་ཡིན་པ་དེ་ནི་སྔོན་བྱེའུ་མཆིལ་པ་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་མིག་དམར་ཞིང་སོ་ཐུང་བ་དང་། སྨྲ་བའི་ཚེ་ལྦུ་བ་
འབྱུང་ཞིང་ཉལ་ན་གོས་ཀྱིས་ལུས་དཀྲི་བར་བྱེད་པ་གང་ཡིན་པ་དེ་ནི་སྔོན་སྦྲུལ་དང་རྩངས་པ་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་སྨྲས་མ་ཐག་ཏུ་ཁོང་ཁྲོ་ཞིང་ཕ་རོལ་གྱི་དོན་ལ་སོ་སོར་མི་རྟོག་པར་ངག་གི་གདུག་པ་
འབྱིན་པ་གང་ཡིན་པ་དེ་ནི་སྔོན་སྡིག་པ་བྱས་པ་ལས་འོངས་པ་ཡིན་ནོ། །མིར་གྱུར་ཀྱང་གཅིག་པུ་དབེན་པར་གནས་ཤིང་ཟས་ལ་བརྐམ་པ་དང་། མཚན་མོ་གཉིད་ཆུང་བ་གང་ཡིན་པ་དེ་ནི་སྔོན་བྱི་ལ་བྱས་པ་ལས་འོངས་པ་
ཡིན་ནོ། །མིར་གྱུར་ཀྱང་རྩིག་པ་ཕུག་ནས་རྐུན་པོ་བྱེད་པ་དང་། ནོར་ལ་བརྐམ་ཞིང་འཁོན་འབྱུང་སླ་བ་དང་། ཉེ་རིང་གི་མཚན་མ་མེད་པ་གང་ཡིན་པ་དེ་ནི་སྔོན་བྱི་བ་བྱས་པ་ལས་འོངས་པ་ཡིན་ནོ། །བཅོམ་ལྡན་
འདས་ཀྱིས་བཀའ་སྩལ་པ། མིར་གྱུར་ཀྱང་མཆོད་རྟེན་དང་། གཙུག་ལག་ཁང་བཤིག་པ་དང་། དཀོན་མཆོག་གསུམ་གྱི་དཀོར་སྦས་ནས་བདག་ཉིད་ཀྱིར་ཡོངས་སུ་སྤྱོད་པ་གང་ཡིན་པ་དེ་ནི་ཤི་འཕོས་ནས་སེམས་ཅན་དམྱལ་

71-1-211b

བ་ཆེན་པོ་མནར་མེད་པར་ལྷུང་བར་འགྱུར་རོ། །སེམས་ཅན་དམྱལ་བ་ལས་ཐར་བར་གྱུར་ན་ཡང་དུད་འགྲོའི་སྐྱེ་གནས་ཀྱི་ལུས་འདི་ལྟ་སྟེ། ཕུག་རོན་དང་། མཆིལ་པ་དང་། ངུར་པ་དང་། ནེ་ཙོ་དང་། བྱེའུ་སྔོན་པོ་དང་། 
ཉ་དང་། རུས་སྦལ་དང་། སྤྲེའུ་དང་། རི་དགས་ཀྱི་ལུས་ལེན་པར་འགྱུར་རོ། །བརྒྱ་ལམ་ན་མིའི་ལུས་ཐོབ་པར་གྱུར་ན་ཡང་མ་ནིང་དང་། བུད་མེད་དང་། མཚན་གཉིས་པ་དང་། དབང་པོ་མེད་པ་དང་། སྨད་འཚོང་མ་
དག་ཏུ་འགྱུར་རོ། །མིར་གྱུར་ཀྱང་ཁོང་ཁྲོ་བ་དག་ལ་མངོན་པར་དགའ་བ་དེ་ནི་ཤི་འཕོས་ནས་སྦྲུལ་གདུག་པ་དང་། སྟག་དང་། སེང་གེ་དང་། དོམ་དང་། དྲེད་དང་། བྱི་ལ་དང་། བྱ་ཁྲའི་རྣམ་པ་དག་ཏུ་ལྟུང་བར་འགྱུར་རོ། །བརྒྱ་
ལ་བརྒྱ་ལམ་ན་མིའི་ལུས་ཐོབ་པར་གྱུར་ན་ཡང་ཁྱིམ་བྱ་དང་། ཕག་གསོད་པ་དང་། ཤན་པ་དང་། རྔོན་པ་བྱེད་པ་དང་། བྱ་ཤོར་བ་དང་། བཙོན་བསྲུངས་བྱེད་པ་ལ་མངོན་པར་དགའ་བར་འགྱུར་རོ། །མིར་གྱུར་ཀྱང་གླེན་
ཞིང་གཏི་མུག་པ་དང་། རིགས་པའི་ཚུལ་གང་ཡིན་པ་མི་ཤེས་པ་དེ་ནི་ཤི་འཕོས་ནས་གླང་པོ་ཆེ་དང་། ཕག་དང་། བ་ལང་དང་། ཆུ་གླང་དང་། སྲོ་ཤིག་དང་། སྦྲང་མ་དང་། སྦྲང་བུ་མཆུ་རིངས་དང་། གྲོག་མ་ལ་སོགས་
པའི་ལུས་ལེན་པར་འགྱུར་ཏེ། གལ་ཏེ་མིའི་ལུས་ཐོབ་པར་གྱུར་ན་ཡང་འོན་པ་དང་། ལོང་བ་དང་། ལྐུག་པ་དང་། ལུས་ཀྱི་ཡན་ལག་མ་ཚང་བ་དང་། རྒྱབ་སྒུར་བ་དང་། དབང་པོ་མ་ཚང་བ་དག་ཏུ་འགྱུར་རོ། །མིར་གྱུར་
ཀྱང་ཁེངས་ཤིང་ང་རྒྱལ་ཆེ་བ་གང་ཡིན་པ་དེ་ནི་ཤི་འཕོས་ནས་མི་གཙང་བའི་གནས་ཀྱི་སྲིན་བུ་དང་། རྔ་མོ་དང་། བོང་བུ་དང་། སྟག་དང་། ཁྱི་དག་ཏུ་ལྟུང་བར་འགྱུར་ཏེ། གལ་ཏེ་མིར་སྐྱེས་ན་ཡང་བྲན་མོའི་ལུས་ལེན་
ཅིང་དབུལ་ཕོངས་པས་སློངས་མོ་བྱེད་པ་དང་། མང་པོ་ཀུན་གྱིས་བརྙས་ཤིང་སྨད་པ་དག་ཏུ་ལྟུང་བར་འགྱུར་རོ། །མིར་གྱུར་ཀྱང་བླ་མའི་མཐུ་བསྙེམས་པའི་རྒྱུས་གཞན་གྱི་ནོར་ལེན་པ་གང་ཡིན་པ་དེ་ནི་ཤི་འཕོས་

71-1-212a

ནས་ཤའི་རི་ལྟ་བུའི་སེམས་ཅན་དམྱལ་བར་ལྟུང་བར་འགྱུར་ཞིང་སྐྱེ་བོ་བརྒྱ་སྟོང་མང་པོས་ལུས་ཀྱི་ཤ་བཅད་ནས་ཟ་བར་འགྱུར་རོ། །ཚེ་འདི་ལ་གཞན་དག་བགྲང་དུ་གཞུག་པ་ལ་མངོན་པར་དགའ་བ་གང་ཡིན་
པ་དེ་ནི་ཚེ་འཕོས་ནས་གླང་པོ་ཆེ་དག་ཏུ་སྐྱེ་ཞིང་རྐང་ལག་དྲང་བས་ཉལ་དུ་མེད་པ་དག་ཏུ་ལྟུང་བར་འགྱུར་རོ། །ཚེ་འདི་ལ་མཆོད་སྟོན་དྲལ་ནས་ནུབ་མོ་ཟན་ཟོས་པ་གང་ཡིན་པ་དེ་ནི་ཚེ་འཕོས་ནས་ཡི་དགས་འདྲེ་བཀྲེན་དག་ཏུ་ལྟུང་
བས་ལོ་བརྒྱ་ཕྲག་མང་པོར་བཟའ་བ་དང་། བཏུང་བ་མང་པོ་ཐོབ་པར་མི་འགྱུར་རོ། །འགྲོ་བའི་ཚེ་ལྷུ་ཚིགས་ཀུན་ཏུ་མེ་རབ་ཏུ་འབར་བར་འགྱུར་རོ། །ཚེ་འདི་ལ་སྒྲེན་མོར་འདུག་པ་ལ་མངོན་པར་དགའ་བ་གང་ཡིན་པ་དེ་ནི་
ཚེ་འཕོས་ནས་གྲང་བས་སྦྲེབས་པའི་སྲིན་བུ་དག་ཏུ་སྐྱེ་བར་འགྱུར་རོ། །ཚེ་འདི་ལ་མཆོད་སྟོན་གྱི་ཟས་ལྷག་མ་ཁྱེར་བ་གང་ཡིན་པ་དེ་ནི་ཤི་འཕོས་ནས་ས་གཞི་རབ་ཏུ་ཚ་བའི་སེམས་ཅན་དམྱལ་བར་ལྟུང་བར་འགྱུར་
རོ། །བརྒྱ་ལ་མིར་སྐྱེས་པར་གྱུར་ན་ཡང་ལྐོག་མ་ནད་ཀྱིས་བཏབ་པ་དང་། ཚེ་ཐུང་བར་འགྱུར་རོ། །ཚེ་འདི་ལ་དེ་བཞིན་གཤེགས་པའི་སྐུ་གཟུགས་ལ་ཕྱག་བྱེད་ན་ཡང་མགོ་བོ་ས་ལ་མི་གཏུག་པ་གང་ཡིན་པ་དེ་ནི་
ཤི་འཕོས་ནས་མགོ་མཐུར་ཏུ་དཔྱང་བའི་སེམས་ཅན་དམྱལ་བར་ལྟུང་བར་འགྱུར་ཏོ། །བརྒྱ་ལམ་ན་མིའི་ནང་དུ་སྐྱེས་ན་ཡང་གཞན་དག་གིས་མང་དུ་སླུ་བར་འགྱུར་རོ། །ཚེ་འདི་ལ་དེ་བཞིན་གཤེགས་པའི་སྐུ་གཟུགས་ལ་ཕྱག་
བྱས་པ་ན་ཐལ་མོ་མི་སྦྱོར་བར་བྱེད་པ་གང་ཡིན་པ་དེ་ནི་ཤི་འཕོས་ནས་ཡུལ་མཐའ་འཁོབ་དག་ཏུ་སྐྱེ་བར་འགྱུར་ཞིང་འབད་པ་མང་པོས་བཙལ་ཡང་ཅི་ཡང་འཐོབ་པར་མི་འགྱུར་རོ། །ཚེ་འདི་ལ་དྲིལ་ཆེན་གྱི་སྒྲ་ཐོས་ཀྱང་མི་
ལྡང་བ་གང་ཡིན་པ་དེ་ནི་ཤི་འཕོས་ནས་སྦྲུལ་ལུས་ཆེན་པོ་དག་ཏུ་ལྟུང་བར་འགྱུར་ཞིང་ལུས་རིང་ལ་ཆེ་བས་སྲོག་ཆགས་ཕྲ་མོ་མང་པོ་རྣམས་ཀྱིས་བཟའ་བར་འགྱུར་རོ། །ཚེ་འདི་ལ་ལག་པ་རྒྱབ་ཏུ་བསྟན་ཏེ། དེ་བཞིན་

71-1-212b

གཤེགས་པ་ལ་ཕྱག་བྱས་པ་གང་ཡིན་པ་དེ་ནི་ཤི་འཕོས་ནས་ཕྱིན་ཀ་ལོག་ཏུ་བཅིངས་པའི་སེམས་ཅན་དམྱལ་བར་ལྟུང་བར་འགྱུར་ཏེ། གལ་ཏེ་མིར་སྐྱེས་པར་གྱུར་ན་ཡང་ཉེས་པ་མེད་པར་གྱོད་འབྱུང་བར་འགྱུར་རོ། །ཚེ་
འདི་ལ་ཐལ་མོ་སྦྱར་ནས་ཡན་ལག་ལྔས་ས་ལ་གཏུགས་ཏེ། ཕྱག་བྱས་པ་གང་ཡིན་པ་དེ་ནི་རྟག་པར་ཆོ་རིགས་བཙུན་པར་འགྱུར་ཞིང་རྒྱུན་དུ་བདེ་བ་མྱོང་བར་འགྱུར་རོ། །ཚེ་འདི་ལ་ཁྲོ་སྐྱེན་ཞིང་ལྟོ་ལ་འཁོང་བ་གང་ཡིན་
པ་དེ་ནི་སྔོན་སྨྱོན་པ་བྱས་པ་ལས་འོངས་པ་ཡིན་ནོ། །ཚེ་འདི་ལ་མིག་ཡ་ཡོར་གྱུར་པ་གང་ཡིན་པ་དེ་ནི་སྔོན་ལོག་པའི་སེམས་ཀྱིས་གཞན་གྱི་ཆུང་མ་ལ་བལྟས་པ་ལས་གྱུར་པ་ཡིན་ནོ། །ཚེ་འདི་ལ་ཆུང་མའི་ནོན་བྱས་ནས་
ཕ་མ་ལ་སྤྱོས་པ་གང་ཡིན་པ་དེ་ནི་ཤི་འཕོས་ནས་ལྕེ་ཐོང་གཤོལ་གྱིས་རྨེད་པའི་སེམས་ཅན་དམྱལ་བར་ལྟུང་བར་འགྱུར་རོ། །ཚེ་འདི་ལ་ཆང་གི་ནང་དུ་བསྣན་ཏེ། གཞན་དག་ལ་བྱིན་པ་གང་ཡིན་པ་དེ་ནི་ཤི་འཕོས་ནས་ཆུའི་
ནང་དུ་སྲིན་བུ་དག་ཏུ་སྐྱེ་བར་འགྱུར་ཏེ། བརྒྱ་ལ་མིའི་ནང་དུ་སྐྱེས་པར་གྱུར་ན་ཡང་ལུས་སྐྲང་ཞིང་དབུགས་ཐུང་བས་འཆི་བའི་དུས་བྱེད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། ཇི་སྐད་དུ་བསྟན་པའི་
སྡུག་བསྔལ་སྣ་ཚོགས་མང་པོ་དེ་དག་ཐམས་ཅད་ནི་སྡིག་པ་མི་དགེ་བའི་ལས་རྣམ་པ་བཅུའི་དབང་ལས་གྱུར་པ་ཡིན་པས་རབ་གང་ཡིན་པ་དེ་ནི་སེམས་ཅན་དམྱལ་བའི་རྒྱུ་དང་རྐྱེན་བྱེད་པར་འགྱུར་རོ། །འབྲིང་གང་ཡིན་པ་
དེ་ནི་དུད་འགྲོའི་སྐྱེ་གནས་ཀྱི་རྒྱུ་དང་རྐྱེན་བྱེད་པར་འགྱུར་རོ། །ཐ་མ་གང་ཡིན་པ་དེ་ནི་ཡི་དགས་ཀྱི་རྒྱུ་དང་རྐྱེན་བྱེད་པར་འགྱུར་རོ། །སྲོག་གཅོད་པའི་ཁ་ན་མ་ཐོ་བ་དེས་ནི་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། 
གཤིན་རྗེའི་འཇིག་རྟེན་དག་ཏུ་ལྟུང་བར་འགྱུར་རོ། །གལ་ཏེ་མིར་སྐྱེས་པར་གྱུར་ན་ཡང་རྣམ་པར་སྨིན་པའི་འབྲས་བུ་རྣམ་པ་གཉིས་འཐོབ་པར་འགྱུར་ཏེ། ཚེ་ཐུང་བ་དང་། ནད་མང་བ་གང་ཡིན་པའོ། །མ་བྱིན་པར་

71-1-213a

ལེན་པའི་ཁ་ན་མ་ཐོ་བ་གང་ཡིན་པ་དེ་ནི་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དག་ཏུ་ལྟུང་བར་བྱེད་དོ། །གལ་ཏེ་མིར་སྐྱེས་པར་གྱུར་ན་ཡང་རྣམ་པར་སྨིན་
པའི་འབྲས་བུ་རྣམ་པ་གཉིས་འཐོབ་པར་འགྱུར་ཏེ། དབུལ་ཞིང་ཕོངས་པ་དང་། ནོར་ཐུན་མོང་དུ་འགྱུར་ཞིང་རང་དབང་མེད་པ་གང་ཡིན་པའོ། །ལོག་པར་གཡེམ་པའི་ཁ་ན་མ་ཐོ་བ་གང་ཡིན་པ་དེ་ནི་སེམས་ཅན་
རྣམས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དག་ཏུ་ལྟུང་བར་བྱེད་དོ། །གལ་ཏེ་མིར་སྐྱེས་པར་གྱུར་ན་ཡང་རྣམ་པར་སྨིན་པའི་འབྲས་བུ་རྣམ་པ་གཉིས་ཐོབ་པར་འགྱུར་ཏེ། 
ཆུང་མ་གཞན་གྱིས་བྱི་བ་བྱེད་པ་དང་། ཆུང་མ་དང་ཕན་ཚུན་རྩོད་ཅིང་བདག་གི་སེམས་ཀྱིས་བསམས་བཞིན་དུ་མི་འགྱུར་བ་གང་ཡིན་པའོ། །བརྫུན་དུ་སྨྲ་བའི་ཁ་ན་མ་ཐོ་བ་གང་ཡིན་པ་དེ་ནི་སེམས་ཅན་རྣམས་སེམས་
ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དག་ཏུ་ལྟུང་བར་བྱེད་དོ། །གལ་ཏེ་མིར་སྐྱེས་པར་གྱུར་ན་ཡང་རྣམ་པར་སྨིན་པའི་འབྲས་བུ་རྣམ་པ་གཉིས་འཐོབ་པར་འགྱུར་ཏེ། སྐུར་པ་མང་བ་
དང་། རྟག་པར་གཞན་གྱིས་མང་དུ་བསླུས་པར་འགྱུར་བ་གང་ཡིན་པའོ། །ཕྲ་མ་བྱས་པའི་ཁ་ན་མ་ཐོ་བ་གང་ཡིན་པ་དེས་ནི་སེམས་ཅན་རྣམས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་
རྟེན་དག་ཏུ་ལྟུང་བར་བྱེད་དོ། །གལ་ཏེ་མིར་སྐྱེས་པར་གྱུར་ན་ཡང་རྣམ་པར་སྨིན་པའི་འབྲས་བུ་རྣམ་པ་གཉིས་འཐོབ་པར་འགྱུར་ཏེ། རྟག་པར་སྒྲ་མི་སྙན་པ་ཐོས་པར་འགྱུར་བ་དང་། གང་ཅི་སྨྲས་ཀྱང་རུང་སྟེ། རྒྱུན་
ཏུ་རྩོད་པ་ཅན་དུ་འགྱུར་བ་གང་ཡིན་པའོ། །ཚིག་ཀྱལ་པ་སྨྲས་པའི་ཁ་ན་མ་ཐོ་བ་གང་ཡིན་པ་དེ་ནི་སེམས་ཅན་རྣམས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དག་ཏུ་ལྟུང་བར་བྱེད་དོ། །

71-1-213b

གལ་ཏེ་མིར་སྐྱེས་པར་གྱུར་ན་ཡང་རྣམ་པར་སྨིན་པའི་འབྲས་བུ་རྣམ་པ་གཉིས་འཐོབ་པར་འགྱུར་ཏེ། བདེན་པ་ཞིག་སྨྲས་ན་ཡང་གཞན་དག་ཡིད་ཆེས་པར་མི་འགྱུར་བ་དང་། ཚིག་སྨྲས་པ་རྣམས་གཞན་གྱིས་གོ་བར་
མི་འགྱུར་བ་གང་ཡིན་པའོ། །བརྣབ་སེམས་བསྐྱེད་པའི་ཁ་ན་མ་ཐོ་བ་གང་ཡིན་པ་དེ་ནི་སེམས་ཅན་རྣམས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དག་ཏུ་ལྟུང་བར་བྱེད་དོ། །གལ་
ཏེ་མིར་སྐྱེས་ན་ཡང་རྣམ་པར་སྨིན་པའི་འབྲས་བུ་རྣམ་པ་གཉིས་འཐོབ་པར་འགྱུར་ཏེ། ནོར་ལ་བརྐམ་ཞིང་ཆོག་ཤེས་པ་མེད་པ་དང་། མང་དུ་ཚོལ་ཞིང་རྟག་པར་ཡིད་བཞིན་དུ་མངོན་པར་གྲུབ་པར་མི་འགྱུར་བ་གང་
ཡིན་པའོ། །གནོད་སེམས་ཀྱི་ཁ་ན་མ་ཐོ་བ་གང་ཡིན་པ་དེས་ནི་སེམས་ཅན་རྣམས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དག་ཏུ་ལྟུང་བར་བྱེད་དོ། །གལ་ཏེ་མིར་སྐྱེས་པར་གྱུར་
ན་ཡང་རྣམ་པར་སྨིན་པའི་འབྲས་བུ་རྣམ་པ་གཉིས་མྱོང་བར་འགྱུར་ཏེ། རྟག་པར་གཞན་གྱིས་གླགས་ཚོལ་བར་འགྱུར་བ་དང་། རྟག་པར་གཞན་གྱིས་གནོད་པ་བྱེད་པར་འགྱུར་བ་གང་ཡིན་པའོ། །ལོག་པར་ལྟ་བ་
འི་ཁ་ན་མ་ཐོ་བ་གང་ཡིན་པ་དེས་ནི་སེམས་ཅན་རྣམས་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེའི་འཇིག་རྟེན་དག་ཏུ་ལྟུང་བར་བྱེད་དོ། །གལ་ཏེ་མིར་སྐྱེས་པར་གྱུར་ན་ཡང་རྣམ་པར་སྨིན་པའི་
འབྲས་བུ་རྣམ་པ་གཉིས་འཐོབ་པར་འགྱུར་ཏེ། རྟག་པར་ལོག་པར་ལྟ་བའི་ཁྱིམ་དག་ཏུ་སྐྱེ་བར་འགྱུར་བ་དང་། སེམས་གཡོ་སྒྱུ་དང་བཅས་པར་འགྱུར་བ་གང་ཡིན་པའོ། །ཀྱེ་སངས་རྒྱས་ཀྱི་སྲས་རྣམས་དེ་ལྟར་ནི་
སྡིག་པ་མི་དགེ་བའི་ལས་ཀྱི་ལམ་བཅུ་པོ་རྣམས་ནི་སྡུག་བསྔལ་མང་པོ་སྣ་ཚོགས་ཀྱི་ཕུང་པོ་ཆེན་པོའི་རྒྱུ་དང་རྐྱེན་དུ་གྱུར་པ་ཡིན་ནོ། །དེ་ནས་དེའི་ཚེ་འཁོར་འདུས་པ་ཆེན་པོ་དེ་ཉིད་དུ་སྡིག་པ་མི་དགེ་བའི་ལས་བཅུ་པོ་དག་

71-1-214a

བྱས་པ་གང་ཡིན་པ་དེ་དག་བཅོམ་ལྡན་འདས་ཀྱིས་སེམས་ཅན་དམྱལ་བའི་སྡུག་བསྔལ་གྱི་རྣམ་པར་སྨིན་པ་བཀས་བཤད་པ་ཐོས་པ་དང་། དེ་དག་ཐམས་ཅད་སྐད་ཆེར་བྱུང་སྟེ་ངུས་ནས། བཅོམ་ལྡན་འདས་ལ་འདི་སྐད་
ཅེས་གསོལ་ཏོ། །བཅོམ་ལྡན་འདས་བདག་ཅག་དགེ་བ་ཇི་ལྟ་བུ་ཞིག་སྤྱད་ན་སྡུག་བསྔལ་འདི་དག་ལས་ཐར་བར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། སེམས་ཅན་ཐམས་ཅད་བསོད་ནམས་
ཀྱི་ལས་ལ་གཟུད་པར་བྱ་སྟེ། ཇི་ལྟར་བསོད་ནམས་མངོན་པར་བསྒྲུབ་པར་བྱ་ཞེ་ན། སེམས་ཅན་གང་ལ་ལ་ཞིག་ཚེ་འདི་ལ་ཡོངས་སུ་བསྐུལ་བའི་བདག་པོ་ཆེན་པོ་བྱས་ཏེ། དེ་བཞིན་གཤེགས་པའི་མཆོད་རྟེན་དང་
དྲི་གཙང་ཁང་དང་། གཙུག་ལག་ཁང་བརྩིགས་ན། མ་འོངས་པ་ན་གདོན་མི་ཟ་བར་རྒྱལ་པོ་བྱེད་ཅིང་སྐྱེ་བོ་མང་པོ་ལ་དབང་བྱེད་པར་འགྱུར་བས་གང་ཡང་ངག་མི་ཉན་པ་མེད་པར་འགྱུར་རོ། །ཚེ་འདི་ལ་གྲོང་
དང་གྲོང་གི་གཙོ་བོར་གྱུར་ཀྱང་དྲང་རྐན་ཆེ་ཞིང་ཆོས་བཞིན་དུ་སྐྱོང་བར་བྱེད་པ་གང་ཡིན་པ་དེ་ནི་མ་འོངས་པ་ན་གདོན་མི་ཟ་བར་རྒྱལ་པོའི་བློན་པོ་བྱེད་པར་འགྱུར་ཞིང་གོས་ཟས་དང་། རྟ་ཕུན་སུམ་ཚོགས་པ་དང་
ཅི་དང་ཅི་འདོད་པ་འབྱོར་བར་འགྱུར་རོ། །ཚེ་འདི་ལ་སྐྱེ་བོ་མང་པོ་བསོད་ནམས་བྱེད་པར་བསྐུལ་ཞིང་གཟུང་བ་གང་ཡིན་པ་དེ་ནི་མ་འོངས་པ་ན་གདོན་མི་ཟ་བར་ཆོ་རིགས་བཙུན་ཞིང་ཤིན་དུ་ཕྱུག་པའི་ཁྱིམ་བདག་ཏུ་འགྱུར་བར་
སྐྱེ་བོ་མང་པོ་ཀུན་གྱིས་བཀུར་བ་དང་། ཕྱོགས་བཅུ་པོ་དག་ཏུ་དོན་གཉེར་བ་རྣམས་ཀྱང་འགྲུབ་པར་འགྱུར་རོ། །ཚེ་འདི་ལ་མར་མེ་བཙུགས་ནས་མཆོད་པ་བྱེད་པ་ལ་མངོན་པར་དགའ་བ་གང་ཡིན་པ་དེ་ནི་ཉི་ཟླའི་ལྷར་སྐྱེ་བར་འགྱུར་
བས་འོད་ཟེར་གྱིས་བདག་ཉིད་གསལ་བར་བྱེད་པར་འགྱུར་རོ། །ཚེ་འདི་ལ་སྦྱིན་པ་གཏོང་བ་ལ་དགའ་བ་དང་། བྱམས་པའི་སེམས་ཀྱིས་སྲོག་ཆགས་གསོ་བར་དགའ་བ་གང་ཡིན་པ་དེ་ནི་སྐྱེ་བ་ཐམས་

71-1-214b

ཅད་ཕྱུག་པོར་འགྱུར་བས་གོས་ཟས་དག་རང་འབྱུང་བར་འགྱུར་རོ། །ཚེ་འདི་ལ་སྐྱེ་བོ་མང་པོ་རྣམས་ལ་བཟའ་བ་དང་བཏུང་བ་སྦྱིན་པ་ལ་མངོན་པར་དགའ་བ་གང་ཡིན་པ་དེ་ནི་སྐྱེ་བ་ཐམས་ཅད་དུ་ལྷའི་ཟས་རང་འབྱུང་བར་འགྱུར་བ་དང་། གཟུགས་
དང་སྟོབས་ཕུན་སུམ་ཚོགས་པ་དང་། དབང་པོ་རྣོ་ཞིང་སྤོབས་པ་དང་ལྡན་པ་དང་ཚེ་རིང་བར་འགྱུར་རོ། །གང་གིས་དུད་འགྲོའི་གནས་སུ་སོང་བ་རྣམས་ལ་སྦྱིན་པ་ཡོངས་སུ་བཏང་ན་རྣམ་པར་སྨིན་པའི་འབྲས་བུ་བརྒྱ་འགྱུར་སྙེད་འཐོབ་པར་འགྱུར་རོ། །
འདོད་ཆེན་པ་དག་ལ་སྦྱིན་པ་ཡོངས་སུ་བཏང་ན་རྣམ་པར་སྨིན་པ་སྟོང་འགྱུར་སྙེད་འཐོབ་པར་འགྱུར་རོ། །ཚུལ་ཁྲིམས་དང་ལྡན་པའི་དགེ་སློང་ལ་སྦྱིན་པ་ཡོངས་སུ་བཏང་ན་རྣམ་པར་སྨིན་པ་ཁྲི་འགྱུར་སྙེད་འཐོབ་པར་འགྱུར་རོ། །
གང་གིས་ཐེག་པ་ཆེན་པོ་དེ་བཞིན་གཤེགས་པའི་གསང་བའི་སྙིང་པོ་འཁོར་མང་པོ་ལ་ཡང་དག་པར་བསྒྲགས་ནས་སེམས་ཀྱི་མིག་འབྱེད་པའི་ཆོས་སྨྲ་བ་གང་དག་ལ་སྦྱིན་པ་ཡོངས་སུ་བཏང་ན་རྣམ་པར་སྨིན་པའི་འབྲས་བུ་ཚད་
མེད་པ་སྙེད་ཐོབ་པར་འགྱུར་རོ། །གང་གིས་སངས་རྒྱས་དང་། བྱང་ཆུབ་སེམས་དཔའ་རྣམས་ལ་སྦྱིན་པ་ཡོངས་སུ་བཏང་ན་རྣམ་པར་སྨིན་པའི་འབྲས་བུ་མཐར་ཐུག་པ་མེད་པ་སྙེད་ལ་ལོངས་སྤྱོད་པར་འགྱུར་རོ། །
གཞན་ཡང་གང་ཟག་རྣམ་པ་གསུམ་ལ་སྦྱིན་པ་ཡོངས་སུ་བཏང་ན་རྣམ་པར་སྨིན་པའི་འབྲས་བུ་ཡོངས་སུ་གཏུགས་པར་མི་འགྱུར་ཏེ། དེ་བཞིན་གཤེགས་པ་རྣམས་དང་། ཕ་མ་དང་
ནད་པ་རྣམས་སོ། །ཟས་ཟ་ཅིག་ཙམ་ཡོངས་སུ་བཏང་བས་ཀྱང་རྣམ་པར་སྨིན་པའི་འབྲས་བུ་ཚད་མེད་པ་སྙེད་ཐོབ་པར་འགྱུར་རོ། །རྟག་པར་ཡོངས་སུ་བཏང་བས་ཡོངས་སུ་གཏུགས་པར་མི་འགྱུར་
བ་ལྟ་སྨོས་ཀྱང་ཅི་དགོས། ཚེ་འདི་ལ་དགེ་འདུན་མང་པོའི་སྐུ་བསིལ་བ་གང་ཡིན་པ་དེ་ནི་སྐྱེ་བ་ཐམས་ཅད་དུ་བྱད་བཞིན་སྡུག་ཅིང་མཛེས་པ་དང་། རང་བཞིན་གྱིས་གོས་ཟས་དང་ལྡན་པ་དང་། 

71-1-215a

སྐྱེ་བོ་མང་པོ་ཀུན་གྱིས་བཀུར་བར་འགྱུར་རོ། །ཚེ་འདི་ལ་བསྔགས་པ་བརྗོད་པ་དང་། མདོ་སྡེའི་ཆོས་ཀློག་ཅིང་ཁ་ཏོག་དུ་འདོན་པར་དགའ་བ་གང་ཡིན་པ་དེ་ནི་སྐྱེ་བའི་གནས་ཐམས་ཅད་དུ་སྒྲ་དབྱངས་སྙན་
ཅིང་ཐོས་པ་རྣམས་རབ་ཏུ་དགའ་བར་འགྱུར་རོ། །ཚེ་འདི་ལ་ཚུལ་ཁྲིམས་སྲུང་བར་མངོན་པར་དགའ་བ་གང་ཡིན་པ་དེ་ནི་སྐྱེ་བ་ཐམས་ཅད་དུ་བྱད་བཞིན་སྡུག་ཅིང་མིའི་ནང་ན་མཆོག་ཏུ་འགྱུར་རོ། །ཚེ་འདི་ལ་ལམ་ཀར་ཁྲོན་པ་བརྐོས་
ནས་སྐྱེད་ཤིང་བཙུགས་ནས་གྲིབ་མ་མང་པོ་ཀུན་ལ་སྒྲིབ་པར་མངོན་པར་དགའ་བ་གང་ཡིན་པ་དེ་ནི་སྐྱེ་བ་ཐམས་ཅད་དུ་མིའི་རྒྱལ་པོ་བྱེད་ཅིང་རོ་བརྒྱ་དང་ལྡན་པའི་བཟའ་བ་དང་བཏུང་བ་བསམས་པ་ཙམ་གྱིས་འབྱོར་པར་འགྱུར་
རོ། །ཚེ་འདི་ལ་མདོ་སྡེ་བྲིས་ཏེ། གཞན་དག་ལ་བྱིན་ནས་ཀློག་ཏུ་བཅུག་པ་ལ་མངོན་པར་དགའ་བ་གང་ཡིན་པ་དེ་ནི་སྐྱེ་བ་ཐམས་ཅད་དུ་བདག་གི་སྤོབས་པ་མང་པོ་དང་ལྡན་པ་དང་། ཆོས་བསླབ་པ་ལ་ལན་ཅིག་ཐོས་
པ་ཙམ་གྱིས་གོ་བར་འགྱུར་བ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་ཀྱིས་བྱིན་གྱིས་རློབ་ཅིང་ཡོངས་སུ་སྲུང་བ་དང་། རྟག་པར་མིའི་ནང་ན་མཆོག་དམ་པ་གཙོ་བོ་བྱེད་པར་འགྱུར་རོ། །ཚེ་འདི་
ལ་ཟམ་པ་དང་། གྲུ་གཟིངས་བཅས་ནས་སྐྱེ་བོ་མང་པོ་སྒྲོལ་བར་མངོན་པར་དགའ་བ་གང་ཡིན་པ་དེ་ནི་སྐྱེ་བ་ཐམས་ཅད་དུ་རིན་པོ་ཆེ་སྣ་བདུན་ཕུན་སུམ་ཚོགས་པ་དང་། སྐྱེ་བོ་མང་པོ་ཀུན་གྱིས་བཀུར་ཞིང་བསྔགས་
པ་བརྗོད་ནས་མངོན་པར་དགའ་བ་དང་། ཕན་ཚུན་འགྲོ་ཞིང་འོང་བའི་ཚེ་མང་པོ་ཀུན་གྱིས་བསྙེན་བཀུར་དང་རིམ་གྲོ་བྱེད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ངས་ཇི་སྐད་དུ་མདོ་སྡེ་
དེ་དང་དེ་དག་གི་རྒྱུ་དང་འབྲས་བུ་བསྟན་ནས་སེམས་ཅན་མང་པོ་རྣམས་ཀློག་པ་དང་། ཁ་ཏོན་དུ་འདོན་པ་དང་། མངོན་པར་བསྒྲུབ་པར་བསྐུལ་ནས་སྡུག་བསྔལ་གྱི་བགེགས་ལས་ཡོངས་སུ་བཟླས་པ་དེ་བཞིན་དུ་འདིར་

71-1-215b

ཡང་དེ་ལྟར་བསྟན་པ་ཡིན་པས། གང་ལ་ལ་ཞིག་གིས་ཆོས་ཀྱི་རྣམ་གྲངས་འདི་ཐོས་ནས་སྐུར་པ་འདེབས་པར་བྱེད་པ་དེ་ནི་ཚེ་འདི་ཉིད་ལ་ལྕེའི་དབང་པོ་ལྟུང་བར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་
ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། ཇི་ལྟར་ཡོངས་སུ་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་
བོ་ཆོས་ཀྱི་རྣམ་གྲངས་འདི་ནི་ལེགས་ཉེས་ཀྱི་རྒྱུ་དང་འབྲས་བུ་བསྟན་པ་ཞེས་བྱ་སྟེ། བྱང་ཆུབ་སེམས་དཔའི་སྤྱོད་པ་མངོན་པར་སྒྲུབ་པར་སྨོན་ལམ་བཏབ་པ་ཞེས་བྱ་བར་ཡང་ཟུང་ཤིག །བཅོམ་ལྡན་འདས་ཀྱིས་
ཆོས་ཀྱི་རྣམ་གྲངས་འདི་བསྟན་པ་ན། ལྷ་དང་མི་སྟོང་ཕྲག་བརྒྱད་བཅུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བུད་མེད་བརྒྱ་སྟོང་དུ་མ་ཚེ་འདི་ཉིད་ལ་བུད་མེད་ཀྱི་དབང་པོ་མེད་པར་གྱུར་ནས་སྐྱེས་
པའི་ལུས་མངོན་པར་གྲུབ་པར་གྱུརད་ཏོ། །སྡིག་པ་སྤྱོད་པའི་སྐྱེ་དགུ་སྟོང་ཉིས་བརྒྱ་ནི་གདུག་པའི་སེམས་སྤངས་ནས་བདག་གི་ཚེ་རབས་དྲན་པར་གྱུརད་ཏོ། །དགེ་བ་སྤྱོད་པའི་སྐྱེ་བོ་ཚད་མེད་པ་དག་ནི་མི་སྐྱེ་བའི་བཟོད་པ་
ཐོབ་ནས་རྟག་པར་བདེ་བ་མྱོང་བར་གྱུར་ཏོ། །ཚེ་འཕོ་བར་འགྱུར་བ་ཚད་མེད་པ་སྙེད་ནི་སངས་རྒྱས་ཀྱི་ཞིང་ཡོངས་སུ་དག་པར་སྐྱེས་ནས་བྱང་ཆུབ་སེམས་དཔའ་རྣམས་དང་མཉམ་ཞིང་མཚུངས་པའི་གྲོགས་སུ་གྱུར་ཏོ། །བཅོམ་
ལྡན་འདས་ཀྱིས་དེ་སྐད་ཅེས་བཀའ་སྩལ་ནས། འཁོར་འདུས་པ་ཐམས་ཅད་རང་གི་གནས་སུ་དོང་སྟེ། བསོད་ནམས་མངོན་པར་འདུ་བྱེད་ཅིང་རབ་ཏུ་དགའ་བས་དགའ་བཞིན་དུ་སྤྱོད་པར་གྱུར་ཏོ། །འཕགས་པ་ལེགས་
ཉེས་ཀྱི་རྒྱུ་དང་འབྲས་བུ་བསྟན་པ་ཞེས་བྱ་བའི་མདོ། རྫོགས་སོ།། །། ཞུ་ཆེན་གྱི་ལོ་ཙྪ་བ་བན་དེ་ཆོས་གྲུབ་ཀྱིས་རྒྱ་གར་དང་རྒྱའི་དཔེ་ལས་བསྒྱུར་ཅིང་ཞུས་ཏེ་གཏན་ལ་ཕབ་པ། ། ༄༅། །དགེ་བ་དང་མི་དགེ་

71-1-216a

བའི་ལས་ཀྱི་རྣམ་པར་སྨིན་པ་བསྟན་པའི་མདོ། བམ་པོ་གཅིག་གོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་འཛེ་ཏའི་ཚལ་སྐྱབས་མེད་ཟས་
སྦྱིན་གྱི་ཀུན་དགའ་ར་བ་ན། བྱང་ཆུབ་སེམས་དཔའ་ཚད་མེད་པ་དང་། ལྷ་དང་མིའི་འཁོར་མང་པོས་བསྐོར་ནས་ཆོས་སྟོན་ཅིང་བཞུགས་སོ། །དེ་ནས་དགའ་བོས་འགྲོ་བ་མང་པོའི་དོན་གྱི་ཕྱིར་བཅོམ་ལྡན་འདས་ལ་
འདི་སྐད་ཅེས་གསོལ་ཏོ། །བཅོམ་ལྡན་འདས་ད་ལྟར་འཇིག་རྟེན་གྱི་ཁམས་འདིར་རིགས་འཐུན་པའི་ནང་འདིར་སྐྱེས་པ་ལས། བཟང་པོ་ཡང་མཆིས། མི་སྡུག་པ་ཡང་མཆིས། དྲག་པོ་ཡང་མཆིས། ཞན་
པ་ཡང་མཆིས། དབུལ་པོ་ཡང་མཆིས། ཕྱུག་པོ་ཡང་མཆིས། ཉོན་མོངས་པ་ཡང་མཆིས། བདེ་བ་ཡང་མཆིས། བཙན་པ་ཡང་མཆིས། མ་རབས་ཀྱང་མཆིས། སྐད་ནི་མི་མཚུངས། ཚིག་ནི་མི་མཐུན། 
ལ་ལ་ནི་ལོ་བརྒྱ་ལོན་ནས་འཆི་བ་ཡང་མཆིས། ལ་ལ་ནི་སུམ་བཅུ་འམ། བཅུ་ལོན་ནས་འཆི་བ་ཡང་མཆིས། ལ་ལ་ནི་བྱད་བཞིན་བཟང་ཡང་དབུལ་ལ། ལ་ལ་ནི་མི་སྡུག་པ་ལ་ཕྱུག་པ་ཡང་མཆིས། ཉམས་རྩལ་
ཆེ་བ་ནི་མ་རབས་ཀྱི་ནང་ན་ཡང་མཆིས། ཉམས་རྩལ་ཆུང་ལ་གྲལ་མཐོ་བ་ཡང་མཆིས། ལ་ལ་ནི་ཉོན་མོངས་ལ་ཚེ་རིང་བ་ཡང་མཆིས། ལ་ལ་ནི་སྐྱིད་ཅིང་ཚེ་ཐུང་། ལ་ལ་ནི་ལེགས་པར་སྤྱོད་པ་ལ་བྱུར་དང་
ཕྲད། ལ་ལ་ནི་མི་དགེ་བ་སྤྱོད་པ་ལ་ལེགས་པའི་དོན་དུ་འགྱུར་བ་ཡང་མཆིས། དཀར་ཞིང་ཤ་བཟང་ལ་མི་གཡོ་བ་ཡང་མཆིས། ལ་ལ་ནི་སྔོ་ཞིང་གནག་ལ་མདངས་དང་ལྡན་པ་ཡང་མཆིས། ལ་ལ་ནི་ལུས་
ཆུང་ཞིང་ཐུང་ལ་སྙིང་རྩལ་དང་ལྡན་པ་ཡང་མཆིས། ལ་ལ་ནི་ཆེ་ཞིང་རིང་ཡང་གཞན་གྱི་བྲན་གཡོག་བགྱིད་པ་ཡང་མཆིས། ལ་ལ་ནི་བུ་ཚ་མང་བ་ཡང་མཆིས། ལ་ལ་ནི་རྨང་བ་ཡང་མཆིས། ལ་ལ་ནི་རྟག་པར་

71-1-216b

ཕྱི་རོལ་དུ་འཁྱམ་ལ་བཀྲེས་པ་ཡང་མཆིས། ལ་ལ་ནི་ཕོ་བྲང་གི་ནང་ན་འདུག་ཅིང་གོས་དང་ཟས་ཀྱིས་མི་བྲེལ་ཏེ་ལོངས་སྤྱོད་པ་ཡང་མཆིས། གཞོན་ན་དབུལ་ཞིང་རྒས་ན་ཕྱུག་ཅིང་བཙན་པ་ཡང་མཆིས། དྲང་རྐན་
ཆེ་ཞིང་འགལ་བར་མི་བྱེད་པ་ལས་གྱོད་ལ་ཐོགས་པ་ཡང་མཆིས། ཕ་ནི་བྱམས་བུ་ནི་སྲི་ཞུ་ཆེ་སྟེ། གཙུག་ལག་གི་ཡི་གེ་དང་གཞུང་སྨོས་ཤིང་བཤད་པ་ཡང་མཆིས། སྤུན་མི་མཐུན་ནས་རྩོད་པ་ཡང་མཆིས། 
གནས་མཐོ་ཞིང་ཡོ་བྱད་རྣམ་པ་སྣ་ཚོགས་སུ་ལྡན་པ་ཡང་མཆིས། བདག་གི་ཁྱིམ་མེད་ལ་འདྲོན་ཐབས་སུ་གནས་པ་ཡང་མཆིས། བྱ་དང་། རི་དགས་དང་། གཅན་ཟན་དང་འདྲ་བར་གནས་པ་ཡང་མཆིས། གོས་
སུ་བལ་གོས་གྱོན་ཞིང་ཟས་སུ་ཤ་ཟ་ཞིང་ཡི་གེ་མི་ཤེས་པ་ཡང་མཆིས། མི་གཡོ་བར་འདུག་ཀྱང་སྐྱིད་ཅིང་ཡོན་ཏན་ཐོབ་པ་ཡང་མཆིས། གླ་ཟ་ཞིང་གནས་པ་ཡང་མཆིས། ཡིད་གཞུངས་ཤིང་ཁོང་གྲོལ་བ་ཡང་མཆིས། 
རྨོངས་ཤིང་བླུན་ལ་ངན་པ་ཡང་མཆིས། བཙལ་ཏེ་མ་རྙེད་པ་ཡང་མཆིས། མ་བཙལ་ཏེ་རྙེད་པ་ཡང་མཆིས། ཕྱུག་ཅིང་བཙན་ལ་ནོར་དང་ལྡན་ལ་སེར་སྣ་ཆེ་བ་ཡང་མཆིས། དབུལ་ལ་སྦྱིན་པ་ལ་སྲེད་པ་ཡང་མཆིས། 
ཚིག་སྨྲ་ན་བདེན་ཞིང་མཉེན་པར་ཟེར་བ་ཡང་མཆིས། ཚིག་སྨྲ་ན་གཟེར་བ་བཞིན་དུ་ཟུག་པ་ཡང་མཆིས། གཞན་གྱིས་བྱམས་ཤིང་བཀུར་བ་ཡང་མཆིས། ཀུན་གྱིས་སྤངས་ཤིང་བསྲིངས་པ་ཡང་མཆིས། སྙིང་རྗེའི་
སེམས་ཀྱིས་སེམས་ཅན་གསོ་བ་ཡང་མཆིས། བག་མེད་པར་སྲོག་གཅོད་པ་ཡང་མཆིས། ཁོང་ཡངས་ཤིང་ཀུན་དང་འཐུན་པ་ཡང་མཆིས། ཀུན་གྱིས་མི་འདོད་པ་ཡང་མཆིས། མནའ་མ་དང་སྒྱུག་མོར་མི་མཐུན་
པ་ཡང་མཆིས། ཚག་པ་མོ་དང་འཛའ་བ་ཡང་མཆིས། ལ་ལ་ནི་ཆོས་ཀྱི་གཏམ་ལ་དགའ་བ་ཡང་མཆིས། ལ་ལ་ནི་མདོ་སྡེ་ཐོས་ནས་གཉིད་བྲོ་བ་ཡང་མཆིས། ལ་ལ་ནི་བརྡལ་བག་ཅན་ལ་འཛངས་པ་ཡང་མཆིས། 

71-1-217a

ལ་ལ་ནི་གཙུག་ལག་ཁང་ལ་དགའ་ཞིང་བསྒོམ་པ་ལ་འགྲུས། ལ་ལ་ནི་བྱོལ་སོང་གི་གཟུགས་དང་མཚུངས། ལ་ལ་ནི་རི་དགས་རྣམ་པ་སྣ་ཚོགས་སུ་འགྱུར་བ་ཡང་མཆིས་ན། བཅོམ་ལྡན་འདས་ཀྱིས་
རྒྱུ་དང་འབྲས་བུ་རྒྱས་པར་བཤད་ན་འཁོར་མང་པོ་ཀུན་གྱིས་ཐོས་ནས་སེམས་རྩེ་གཅིག་ཏུ་དགེ་བའི་རྗེས་སུ་ཕྱོགས་པར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགའ་བོ་ཁྱོད་ཀྱིས་ཇི་ལྟར་རྣམ་པར་
སྨིན་པ་མི་འདྲ་བར་འདྲི་བ་དེ་བཞིན་དུ། དེ་དག་ཀུན་ཀྱང་ཚེ་རབས་སྔ་མ་ལ་སྤྱོད་པ་མི་མཐུན་པས། དེའི་ཕྱིར་ན་ཁྱད་པར་སྣ་ཚོགས་སུ་གྱུར་ཏོ། །དེ་ལ་ད་ལྟར་བྱད་བཞིན་བཟང་པོ་ནི་བཟོད་པ་ལས་འོངས་སོ། །མི་སྡུག་པ་ནི་
ཞེ་སྡང་དང་ཁོང་ཁྲོ་བ་ལས་འོངས་སོ། །དབུལ་ཕོངས་པ་ནི་སེར་སྣ་ལས་འོངས་སོ། །བཙན་ཞིང་ཆེ་བ་ནི་སངས་རྒྱས་ལ་གུས་པར་ཕྱག་འཚལ་བ་ལས་འོངས་སོ། །མི་མ་རབས་ཐམས་ཅད་ནི་རྒྱགས་ཤིང་དྲེགས་པ་ལས་
འོངས་སོ། །ལུས་རིང་ཞིང་བཟང་བ་ནི་བཀུར་སྟི་བྱས་པ་ལས་འོངས་སོ། །ལུས་ཐུང་བ་ནི་ཆོས་ལ་ལེ་ལོ་བྱས་པ་ལས་འོངས་སོ། །བླུན་པ་ནི་ལུག་ལས་འོངས་སོ། །སྐམ་ཞིང་གནག་པ་ནི་དེ་བཞིན་གཤེགས་པའི་སྐུ་སྒྲིབས་
པ་ལས་འོངས་སོ། །མཆུ་དམའ་བ་ནི་ཆོས་སྟོན་པའི་ཟས་ལ་མྱངས་པ་ལས་འོངས་སོ། །མིག་ཚག་པ་ནི་མེ་བསླངས་པ་མི་སྟེར་བ་ལས་འོངས་སོ། །མུན་སྲོས་ནས་མིག་མི་མཐོང་བ་ནི་ཁྲའི་མིག་བྲུས་པ་ལས་འོངས་སོ། །
ལྐུགས་པ་ནི་དམ་པའི་ཆོས་ལ་སྐུར་པ་འདེབས་པ་ལས་འོངས་སོ། །འོན་པ་ནི་ཆོས་ཐོས་སུ་མི་དགའ་བ་ལས་འོངས་སོ། །སོ་སྟོ་བ་ནི་རྐང་དང་རུས་པ་ལ་སྲེད་པ་ལས་འོངས་སོ། །སྣ་བསྙེར་བ་ནི་སྤོས་མི་ཞིམ་པ་
བསྲེགས་ཏེ་སངས་རྒྱས་ལ་མཆོད་པ་ལས་འོངས་སོ། །ཤོ་རེ་ནི་ཉའི་མཆུ་ཕུག་པ་ལས་འོངས་སོ། །སྐྲ་སེར་བ་ནི་ཕག་གི་སྤུ་གཏོགས་པ་ལས་འོངས་སོ། །རྣ་བ་རལ་བ་ནི་རྣ་བ་ཕུག་པ་ལས་འོངས་སོ། །ཐང་སྦྲུལ་

71-1-217b

འདྲ་བ་ནི་གོས་མི་གཙང་བ་གྱོན་ཏེ་སངས་རྒྱས་ལ་སྙོགས་པ་ལས་འོངས་སོ། །ངམས་གནག་པ་ནི་སངས་རྒྱས་ཀྱི་སྐུ་གཟུགས་ཁྱིམ་མམ་ཁྱམས་སུ་བཞག་པ་ལས་འོངས་སོ། །ཞར་བ་དང་གྱོལ་བ་ནི་མཁན་པོ་དང་
བླ་མ་མཐོང་སྟེ་མི་ལྡང་བ་ལས་འོངས་སོ། །སྒུར་བ་ནི་གོས་མི་གཙང་བ་གྱོན་ཞིང་སངས་རྒྱས་ཀྱི་སྐུ་ལ་རྒྱབ་ཀྱིས་ཕྱོགས་པ་ལས་འོངས་སོ། །དཔྲལ་བ་འབུར་བ་ནི་སངས་རྒྱས་མཐོང་ནས་ཕྱག་གུས་པར་མི་འཚལ་ཞིང་
ལག་པ་དཔྲལ་བར་གཏུགས་པ་ལས་འོངས་སོ། །འཇིང་བ་ཐུང་བ་ནི་བཙུན་པ་དང་བླ་མ་མཐོང་ནས་མགོ་སྨད་ཅིང་བྱོལ་བ་ལས་འོངས་སོ། །མཆིན་པ་ན་བ་ནི་སེམས་ཅན་གྱི་ལུས་གཏུབས་ཤིང་གཙགས་པ་ལས་འོངས་སོ། །
མཛེ་ཅན་ནི་གཞན་གྱི་ནོར་མ་འོས་པར་བླངས་པ་ལས་འོངས་སོ། །ལུད་པ་མང་བ་ནི་དགུན་མི་གཞན་ལ་ཟས་གྲང་མོ་བྱིན་པ་ལས་འོངས་སོ། །བུ་ཚ་མེད་པ་ནི་བྱ་ཕྲུག་མང་པོ་བསད་པ་ལས་འོངས་སོ། །བུ་ཚ་མང་བ་ནི་སེམས་
ཅན་མང་པོ་གསོས་པ་ལས་འོངས་སོ། །ཚེ་རིང་བ་ནི་སྙིང་རྗེ་ཆེ་བ་ལས་འོངས་སོ། །ཚེ་ཐུང་བ་ནི་སྲོག་གཅོད་པ་ལས་འོངས་སོ། །ཕྱུག་པ་ནི་སྦྱིན་པ་བྱས་པ་ལས་འོངས་སོ། །རྟ་དང་ཤིང་རྟ་བདོག་པ་ནི་དཀོན་མཆོག་གསུམ་
ལ་ཡོན་ཕུལ་བ་ལས་འོངས་སོ། །དབང་པོ་རྣོ་བ་ནི་སློབ་པ་ལ་འགྲུས་པ་དང་མདོ་སྡེ་ཁ་ཏོན་དུ་བྱས་པ་ལས་འོངས་སོ། །རྨུན་པོ་ནི་བྱོལ་སོང་ལས་འོངས་སོ། །བྲན་པོ་དང་བྲན་མོ་བྱེད་པ་ནི་བུ་ལོན་མ་གཞལ་བ་ལས་འོངས་སོ། །
སྤྲོ་ཐུང་བ་ནི་སྤྲེའུ་ལས་འོངས་སོ། །ཡང་མཛེ་ཅན་ནི་དཀོན་མཆོག་གི་རྟེན་བཤིག་པ་ལས་འོངས་སོ། །ཡན་ལག་མ་ཚང་བ་ནི་སེམས་ཅན་གྱི་རྐང་ལག་བཅད་པ་ལས་འོངས་སོ། །གདུག་པ་ནི་སྦྲུལ་དང་སྡིག་པ་ལས་
འོངས་སོ། །དབང་པོ་དྲུག་ཚང་བ་ནི་ཚུལ་ཁྲིམས་བསྲུངས་པ་ལས་འོངས་སོ། །དབང་པོ་དྲུག་མ་ཚང་བ་ནི་ཚུལ་ཁྲིམས་བཤིག་པ་ལས་འོངས་སོ། །གཙང་སྦྲ་ཆུང་བ་ནི་འཕགས་པ་ལ་མ་མཆོད་པ་ལས་འོངས་སོ། །གླུ་

71-1-218a

གར་དང་རོལ་མོ་ལ་དགའ་བ་ནི་རོལ་མོ་མཁན་དུ་སྐྱེའོ། །འདོད་ཆགས་ཆེ་བ་ནི་བྱ་ལས་འོངས་སོ། །ལྦ་བ་ཅན་སྣོག་པ་ལས་འོངས་སོ། །ཁ་དམན་པ་ནི་ཚིག་རྩུབ་མོ་སྨྲ་བ་ལས་འོངས་སོ། །མཚན་དང་
མི་ལྡན་པ་ནི་ཁྱི་དང་། ཕག་དང་། རྟའི་འབྲས་བུ་བཏོན་པ་ལས་འོངས་སོ། །ལྕེ་ཐུང་བ་ནི་བཙུན་པ་དང་བླ་མ་ལ་ཁ་བྱས་པ་དང་ལྐོག་ཏུ་འཕྱས་པ་ལས་འོངས་སོ། །གཞན་གྱི་ཆུང་མ་ལ་གཡེམ་པ་བྱས་པ་ནི་ངང་མོ་དང་ངུར་པར་
སྐྱེའོ། །གཉན་དགུ་ལ་གཡོ་བྱས་པ་ནི་བྱེའུ་མཆིལ་པར་སྐྱེའོ། །མདོ་སྡེ་དང་གཙུག་ལག་གི་ཡི་གེ་སྤྱོད་ཅིང་སེར་སྣས་གཞན་ལ་མི་སྟོན་པ་ནི་ཚེའི་དུས་བྱས་ནས་ཐང་གི་སྲིན་བུར་སྐྱེའོ། །མདའ་གཞུ་ཐོགས་པ་དང་རྟ་ཞོན་
པ་ལ་དགའ་བ་ནི་ཚེ་ཕྱི་མ་ལ་འཕར་བ་དང་སྤྱང་ཀིར་སྐྱེའོ། །སྐྲ་ཐུང་བ་དང་མགོ་རྒྱན་བཏགས་པ་ལ་དགའ་བ་ནི་ཚེ་ཕྱི་མ་ལ་སྲིན་བུ་མཆུ་རིངས་སུ་སྐྱེའོ། །ཉལ་ཞིང་ཟ་བ་ལ་དགའ་བ་ནི་ཚེ་ཕྱི་མ་ལ་ཕག་དུ་སྐྱེའོ། །དར་
མཚོན་གྱི་གོས་ལ་དགའ་བ་ནི་བྱེའུ་ཁྲེའུར་སྐྱེའོ། །མི་སྙན་པ་ཟློས་ཤིང་ཀུ་རེ་ལ་དགའ་བ་ནི་བྱ་ནེ་ཙོ་རུ་སྐྱེའོ། །ཕྲ་མ་བྱེད་པ་ལ་དགའ་བ་ནི་ཚེ་ཕྱི་མ་ལ་ལྟོ་འཕྱེ་མགོ་དྲུག་པར་སྐྱེའོ། །མ་འོས་པར་ཀུ་རེ་བྱེད་པ་ལ་
དགའ་བ་ནི་ཚེ་ཕྱི་མ་ལ་སྲིན་བུ་རྨོངས་པར་སྐྱེའོ། །གཏམ་ངན་སྐྱེལ་བ་ལ་དགའ་བ་ནི་ཚེ་ཕྱི་མ་ལ་སྲིན་བྱར་སྐྱེའོ། །མི་ལ་གནོད་པ་དང་ངན་དུ་དགའ་ཞིང་གཏམ་ལ་སྲེད་པ་ནི་ཚེ་ཕྱི་མ་ལ་ཝར་སྐྱེའོ། །མི་དངངས་པ་ལ་དགའ་
བ་ནི་ཚེ་ཕྱི་མ་ལ་སྲིན་བུ་དོ་ལོག་ཏུ་སྐྱེའོ། །ཚེ་སྔ་མ་ལ་ཤིང་ལྷམ་གྱོན་ཞིང་ལྷ་ཁང་དུ་འགྲོ་བ་ནི་ཚེ་ཕྱི་མ་ལ་རྟར་སྐྱེའོ། །ཚེ་སྔ་མ་ལ་འཕྱེན་བག་མེད་པར་བཏང་བས་ནི་ཚེ་འདི་ལ་སྦུར་བར་སྐྱེའོ། །ཚེ་སྔ་མ་ལ་དགེ་འདུན་
གྱི་རང་འཐག་དང་གཏུན་ལ་སྤྱད་པ་ནི་ཚེ་འདི་ལ་སྲིན་བུ་མགོ་རྡེབས་སུ་སྐྱེའོ། །སེམས་ཅན་གྱི་ཟས་ལ་གེགས་བྱས་པས་ནི་བྱ་ཤིང་རྟ་མོར་སྐྱེའོ། །ཚེ་སྔ་མ་ལ་དགེ་འདུན་གྱི་ཆུ་བརྐུས་པས་ནི་ཉ་དང་རུལ་སྦལ་ལ་སོགས་

71-1-218b

པ་ཆུའི་ནང་ན་གནས་པའི་སེམས་ཅན་དུ་སྐྱེའོ། །ཚེ་སྔ་མ་ལ་དགེ་འདུན་སྨྲེ་བར་བྱས་པས་ནི་གཙང་སྦྲའི་སྲིན་བུར་སྐྱེའོ། །དགེ་འདུན་གྱི་ཤིང་ཏོག་བརྐུས་པས་ནི་མཆིས་པ་ཟ་བའི་སྲིན་བུར་སྐྱེའོ། །དགེ་འདུན་གྱི་ནོར་
བརྐུས་པས་ནི་རང་འཐག་སྐོར་བའི་བོང་བུ་དང་གླང་དུ་སྐྱེའོ། །དགེ་འདུན་གྱི་ནོར་ནན་གྱིས་བསྐྱི་བརྙ་བྱས་པས་ནི་བྱ་ཕུག་རོན་དུ་སྐྱེའོ། །དགེ་འདུན་ལ་སྤྱོ་བ་བྱས་པས་ནི་གླང་གི་གཉའ་བའི་སྲིན་བུར་སྐྱེའོ། །དགེ་འདུན་གྱི་ལྡུམ་
སྐྱུར་ཟོས་པས་ནི་ལྡུམ་བུར་རྩ་བ་གང་གི་སྲིན་བུར་སྐྱེའོ། །དགེ་འདུན་གྱི་ཁྲི་སྟན་ལ་འདུག་པས་ནི་སྲིན་བུ་མགོ་དམར་དུ་སྐྱེའོ། །དགེ་འདུན་གྱི་ནོར་སྣ་ཚོགས་ལ་སྤྱད་པས་ནི་སྲིན་བུ་འཕྱེ་བོར་སྐྱེའོ། །མགོ་ལ་རུས་པའི་ཐུར་མ་
གཏུར་ནས་ལྷ་ཁང་དུ་འགྲོ་ན་བྱ་མཆུ་རིངས་སུ་སྐྱེའོ། །དཀར་རྩི་དང་དམར་རྩིས་བྱུགས་ཏེ་ལྷ་ཁང་དུ་འགྲོ་ན་བྱ་སྐྱུང་ཀར་སྐྱེའོ། །དར་ཚོན་གྱི་གོས་གྱོན་ཏེ་ལྷ་ཁང་དུ་འགྲོ་ན་བྱེའུ་སེ་རུར་སྐྱེའོ། །ཁྱོ་ཤུག་ཞག་ལོན་ཏེ་ལྷ་
ཁང་དུ་ཉལ་ན་སྲིན་བུ་མགོ་སྔོན་དུ་སྐྱེའོ། །དེ་བཞིན་གཤེགས་པའི་མཆོད་རྟེན་ལ་མཇུག་སྟེགས་འཆའ་ཞིང་འདུག་པ་ནི་རྔ་མོར་སྐྱེའོ། །ལྷམ་དང་འབོབ་གྱོན་ཞིང་གཞལ་མེད་ཁང་དུ་འགྲོ་ན་སྦལ་པར་སྐྱེའོ། །ཆོས་ཉན་
པའི་ཚེ་ལོང་གཏམ་ཟེར་ན་བྱེའུ་ལྷན་དཀར་དུ་སྐྱེའོ། །དགེ་སློང་ཁྲིམས་དག་པ་ལ་མི་གཙང་བར་བསྐྱེད་པ་ནི་ལྕགས་ཀྱི་སེམས་ཅན་དམྱལ་བར་སྐྱེའོ། །རལ་གྲི་འཁོར་ལོ་ཁྲི་ཕྲག་བརྒྱ་སྙེད་དུ་ཆར་པ་ལུས་ཀྱི་སྟེང་དུ་འབེབས་
ཤིང་དེའི་ལུས་གཏུབས་པར་འགྱུར་རོ། །དེ་ནས་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཇི་ལྟར་གསུངས་པ་དེ་ལྟར་དགེ་འདུན་གྱི་ནོར་ལ་སྤྱད་པ་སྡིག་ལྕི་བར་གསུངས་ཏེ། གལ་
ཏེ་དེ་ལྟར་དགེ་བའི་ལས་ལ་ཕྱོགས་པ་དང་། སྦྱིན་བདག་ལ་སོགས་པ་ཇི་ལྟར་གཙུག་ལག་ཁང་གི་ནང་དུ་སྟི་སྟང་བགྱིད་པ་དང་། ཕྱག་འཚལ་བར་བགྱིད་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ལྷ་ཁང་དུ་འགྲོ་

71-1-219a

བ་ལ་སེམས་རྣམ་པ་གཉིས་ཡོད་དེ། དགེ་བའི་སེམས་དང་། མི་དགེ་བའི་སེམས་སོ། །དེ་ལ་ཇི་ལྟར་ན་དགེ་བའི་སེམས་ཞེས་བྱ་ཞེ་ན། ལྷ་ཁང་དུ་ཕྱིན་པའི་ཚེ་སངས་རྒྱས་མཐོང་ན་ཕྱག་འཚལ་ཞིང་། དགེ་
འདུན་ལ་བཀུར་སྟི་བྱེད་ཅིང་། མདོ་སྡེ་འདྲི་འམ། འདོན་ནམ། ཁྲིམས་ནོད་དམ། སྡིག་པ་བཤགས་པ་འམ། དཀོན་མཆོག་གསུམ་གྱི་སྤྱི་ནོར་ལ་སོགས་པ་གཏོང་ངམ། སྲོག་ལ་ཡང་མི་ཆགས་པར་དམ་པའི་ཆོས་འཛིན་པ་ནི་
གོམ་པ་གཅིག་བོར་བས་ཀྱང་ལྷར་སྐྱེ་བར་འགྱུར་རོ། །མ་འོངས་པའི་དུས་ན་ཁྱིམ་བདག་ཏུ་ཞུགས་ཏེ། དེ་དང་འདྲ་བའི་ལོངས་སྤྱོད་དང་ལྡན་པར་འགྱུར་རོ། །དེ་ནི་དགེ་བའི་མཆོག་དང་ལྡན་པ་ཡིན་ནོ། །དེ་ལ་གང་མི་དགེ་བ་ནི་ལྷ་ཁང་
དུ་འཇུག་པའི་ཚེ་དགེ་འདུན་ལ་སློངས་མོ་དང་བསྐྱི་བརྙ་བྱེད་པ་དང་། དགེ་འདུན་ལ་སྐྱོན་ཚོལ་ཞིང་ཀླན་ཀ་ཚོལ་བ་དང་། དགེ་འདུན་གྱི་ཞལ་ཟས་ཟོས་ཀྱང་ཚིམ་པ་མེད་ཅིང་། བཟའ་ཤིང་དང་། ཤིང་ཏོག་དང་། ལྡུམ་སྐྱུར་ལ་སོགས་པ་
ཁྱིམ་དུ་ཁྱེར་བ་དེ་ལྟ་བུ་ནི་ཤིན་དུ་དམྱལ་བའི་འཁོར་ལོ་དང་། ཤིན་དུ་འབར་བ་དང་། རལ་གྲིའི་རི་དང་། རལ་གྲིའི་ཤིང་ལ་སོགས་པའི་དམྱལ་བར་ཤིན་དུ་སྡུག་བསྔལ་ལེན་པར་འགྱུར་རོ། །དེ་ནི་མི་དགེ་བའི་མཆོག་ཅེས་བྱའོ། །
བཅོམ་ལྡན་འདས་ཀྱིས་བཀའ་སྩལ་པ། དགའ་བོ་ཁྱོད་མ་འོངས་པའི་ཚེ་ངའི་ཉེ་གནས་རྣམས་ལ་དཀོན་མཆོག་གསུམ་གྱི་དཀོར་ལ་མ་སྤྱོད་པར་འདུག་ཅིག་ཅེས་གྲོས་ཐོབ་ཤིག །དེ་ལྟར་མ་གྱུར་ཏེ། བཅོམ་ལྡན་འདས་ཀྱིས་
གསུངས་པ་ལྟར་བྱས་ན་སངས་རྒྱས་བྱམས་པ་འཇིག་རྟེན་དུ་འབྱུང་བའི་ཚེ་གདོན་མི་ཟ་བར་གྲོལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ཚེ་འདི་ལ་གཞན་གྱི་ནོར་འཕྲོག་ན། ཚེ་ཕྱི་མ་ལ་ཤིན་ཏུ་གྲང་བའི་དམྱལ་བར་ལྟུང་
ངོ་། །དར་གྱི་སྲིན་བུར་འགྱུར་ཏེ། བཙོ་ཞིང་བཞུ་བར་འགྱུར་རོ། །ཚེ་འདི་ལ་སངས་རྒྱས་ཀྱི་སྐུ་གཟུགས་དང་མདོ་སྡེ་ལ་མར་མེ་ཡིས་སྣང་བ་མེད་པར་བྱེད་ཅིང་མི་དགེ་བ་ནི་ཁོ་ར་ཁོར་ཡུག་གི་མུན་ནག་གི་སེམས་ཅན་དམྱལ་བར་

71-1-219b

འགྱུར་རོ། །ཚེ་འདི་ལ་ཤན་པ་བྱེད་ཅིང་སེམས་ཅན་མང་པོའི་སྲོག་གཅོད་པ་ནི་རལ་གྲི་དང་། རལ་གྲིའི་ནགས་ཚལ་གྱི་སེམས་ཅན་དམྱལ་བར་ལྟུང་ངོ་། །ཚེ་འདི་ལ་ཁྲ་དང་ཁྱི་ལ་སོགས་པ་གཏོང་ཞིང་རྔོན་པ་བྱེད་པ་ལ་དགའ་བ་ནི་ལྕགས་
ཀྱི་སོག་ལེའི་དམྱལ་བར་ལྟུང་ངོ་། །ཚེ་འདི་ལ་ལོག་པར་གཡེམ་པ་ལ་དད་པ་ཆེ་བ་ནི་ཟངས་ཀྱི་ཀ་བ་དང་། ལྕགས་ཀྱི་ཁྲག་གི་སེམས་ཅན་དམྱལ་བར་ལྟུང་ངོ་། །ཚེ་འདི་ལ་ཆུང་མ་མང་དུ་བླངས་པ་ནི་ལྕགས་ཀྱི་གཏུན་གྱི་དམྱལ་བར་ལྟུང་ངོ་། །
ཚེ་འདི་ལ་བུད་མེད་སྐྱེས་པ་དང་མང་དུ་ཉལ་བ་ནི་སྦྲུལ་གདུག་པའི་དམྱལ་བར་ལྟུང་སྟེ། ཚེ་འདི་ལ་བསྲེག་ཅིང་བཙོ་བའི་ཐལ་བ་འབབ་པའི་དམྱལ་བར་ལྟུང་སྟེ། ཚེ་འདི་ལ་ཕག་དང་ཁྱིའི་སྤུ་བཏོགས་པས་ནི་ཤིན་ཏུ་བསྐོལ་བའི་དམྱལ་བར་
ལྟུང་ངོ་། །ཚེ་འདི་ལ་ཕག་དང་ཁྱི་དང་རྟའི་འབྲས་བུ་བཏོན་པས་ནི་རྡོ་ཟུག་རྔུའི་དམྱལ་བར་ལྟུང་ངོ་། །ཚེ་འདིའི་ལ་ཆང་མང་དུ་འཐུངས་པ་མྱོས་པ་ཟངས་ཁུ་འཐུངས་པའི་དམྱལ་བར་སྐྱེའོ། །ཚེ་འདི་ལ་སེམས་ཅན་གཏུབས་ཤིང་དམྱལ་
བས་ནི་ལྕགས་ཀྱི་འཁོར་ལོའི་དམྱལ་བར་ལྟུང་ངོ་། །ཚེ་འདི་ལ་དགེ་འདུན་གྱི་ཤིང་ཏོག་བརྐུས་པ་ནི་ལྕགས་ཀྱི་ཐུ་ལུམ་གྱི་དམྱལ་བར་ལྟུང་ངོ་། །ཚེ་འདི་ལ་ཁྱི་དང་ཕག་གི་རྒྱུ་མ་ཟོས་པས་ནི་མི་གཙང་བའི་དམྱལ་བར་ལྟུང་བར་འགྱུར་རོ། །
ཚེ་འདི་ལ་ཉ་བཤོར་བས་ནི་རལ་གྲིའི་ནགས་ཚལ་གྱི་དམྱལ་བར་ལྟུང་བར་འགྱུར་རོ། །ཚེ་འདི་ལ་མ་ཡར་མོ་བྱས་ཏེ། སྔ་མའི་བུ་ལ་ནེར་པ་བྱེད་པ་ནི་མེའི་ཤིང་དུམ་གྱི་དམྱལ་བར་ལྟུང་བར་འགྱུར་རོ། །ཚེ་འདི་ལ་དབྱེན་བྱེད་པ་
ནི་ལྕགས་ཀྱི་གཤོལ་གྱི་དམྱལ་བར་འགྱུར་རོ། །ཚེ་འདི་ལ་ཚིག་ངན་པས་མི་ལ་སྤྱོ་བས་ནི་ལྕེ་མེད་པའི་དམྱལ་བར་ལྟུང་ངོ་། །ཚེ་འདི་ལ་བརྫུན་ཟེར་བ་ནི་ལྕགས་ཀྱི་གཟེར་བུས་གཟེར་བའི་དམྱལ་བར་ལྟུང་ངོ་། །ཚེ་འདི་ལ་
སྲོག་གཅོད་ཅིང་ལྷའི་སྲིན་ལ་རྗེད་པས་ནི་ལྕགས་ཀྱི་བསྙུང་བུའི་དམྱལ་བར་ལྟུང་ངོ་། །ཚེ་འདི་ལ་བོན་མོ་བྱེད་ཅིང་འདྲེ་བོས་སོ་ཞེས་བརྫུན་ཟེར་ཞིང་ནོར་ལེན་པ་ནི་ཤལ་མ་རིའི་དམྱལ་བར་ལྟུང་ངོ་། །ཚེ་འདི་ལ་བོན་བྱེད་ཅིང་

71-1-220a

མིག་བཙུམས་ནས་ཁྱོད་ཀྱི་བླ་མ་མཆོད་འོས་སོ་ཞེས་ཟེར་ཞིང་སླུ་བ་ནི་རྐེད་པར་གཏུབས་པའི་དམྱལ་བར་ལྟུང་ངོ་། །ཚེ་འདི་ལ་བོན་བྱེད་ཅིང་སྲོག་གཅོད་དུ་བཅུག་སྟེ། ལྷ་སྲིན་རྗེད་དུ་བཅུག་པ་ནི་
སྟ་རེས་གཏུབས་པའི་དམྱལ་བར་ལྟུང་སྟེ། བསྲུངས་མས་ལུས་གཏུབས་ཤིང་ལྕགས་ཀྱི་བྱ་མཆུ་ཅན་གྱིས་མིག་གཉིས་ཀྱི་འབྲས་བུ་བཙོགས་པར་འགྱུར་རོ། །ཚེ་འདི་ལ་བོན་བྱེད་ཅིང་གཤིན་རྔོག་དུ་འདུར་བ་དང་། ཁང་
ཁྱིམ་བཟང་ངན་ལྟ་བ་དང་། རིགས་ལྔའི་ཁམས་བདེ་མི་བདེ་ལྟ་བ་དང་། གླེན་པ་བསླུས་ཏེ་ནོར་མང་དུ་ལེན་པ་ནི་ལྕགས་ཀྱི་དྲ་བར་བཅུག་པའི་དམྱལ་བར་སྐྱེའོ། །བྱ་མ་རུངས་པ་གྲངས་མེད་པས་ལུས་ཀྱི་སྟེང་དུ་འདུག་ནས་སྟེང་གི་ཤ་
ཟད་ནས་རུས་པ་དང་རྒྱུས་པ་བཏོགས་ཏེ། སྡུག་བསྔལ་མུ་མེད་པ་བྱེད་པར་འགྱུར་རོ། །ཚེ་འདི་ལ་སྨན་བྱེད་ཅིང་ནད་པ་གསོ་མི་ནུས་པར་བརྫུན་གྱིས་ནོར་ལེན་པ་ནི་ལྕགས་ཀྱི་ཐུར་མས་བཙུགས་པའི་དམྱལ་བར་ལྟུང་སྟེ། ལུས་ལ་
ཀུན་དུ་མེ་འབར་རོ། །ཚེ་འདི་ལ་ལྷ་ཁང་དང་མཆོད་རྟེན་བཤིག་ཅིང་དགེ་འདུན་དང་། ཕ་མ་དང་མཁན་པོ་ལ་བག་མེད་པར་སྲི་ཞུ་ཆུང་བ་ནི་མནར་མེད་པའི་སེམས་ཅན་དམྱལ་བ་ཆེན་པོ་བརྒྱད་དུ་མཐར་གྱིས་འགྲོའོ། །དེ་ནས་སེམས་
ཅན་དམྱལ་བ་ཆེན་པོ་བརྒྱ་སུམ་བཅུ་རྩ་དྲུག་གི་ནང་དུ་འགྲོ་སྟེ། ལ་ལ་ནི་བསྐལ་པ་གཅིག །ལ་ལ་ནི་བསྐལ་པ་གཉིས། ལ་ལ་ནི་བསྐལ་པ་ལྔའི་བར་དུ་འགྲོ་བ་ནས། གཟོད་མཐར་ཕྱིན་ནས་དགེ་བའི་བཤེས་གཉེན་དང་
ཕྲད་ན་ནི་བྱང་ཆུབ་ཏུ་སེམས་སྐྱེ་བར་འགྱུར་རོ། །གལ་ཏེ་མ་ཕྲད་ན་སླར་ཡང་སེམས་ཅན་དམྱལ་བར་ལྟུང་ངོ་། །བཅོམ་ལྡན་འདས་ཀྱིས་བཀའ་སྩལ་པ། མི་ལུས་བོང་ཆེ་ཞིང་གནག་ལ་སྤྲོ་ཐུང་བ་འགྲོ་བ་ལ་དགའ་བ་
ནི་རྔ་མོ་ལས་འོངས་སོ། །འགྲོ་བ་ལ་སྲེད་ལ་ཟ་བ་ལ་རྔམ་སྟེ། ཉམ་ང་བ་ལ་འབྱོལ་བ་ནི་སྟག་ལས་འོངས་སོ། །ཚ་བ་དང་གྲང་བས་མི་འཇིགས་ཤིང་གཟུགས་ཆེ་བ་ནི་གླང་ལས་འོངས་སོ། །སྒྲ་ཆེ་ཞིང་འཛེམ་

71-1-220b

བག་མེད་ལ་གང་འདོད་པ་དམ་དུ་འཛིན་ཅིང་བཟང་ངན་བྱེ་བྲག་མི་ཕྱེད་པ་ནི་བོང་བུ་ལས་འོངས་སོ། །རྟག་ཏུ་ཤ་ལ་སྲེད་ཅིང་རྔམ་སྟེ་འཇིགས་པ་མེད་པ་ནི་སེང་གེ་ལས་འོངས་སོ། །ལུས་རིང་ཞིང་མིག་ཟླུམ་ལ་རི་འམ་དགོན་པར་
ཤིན་དུ་འགྲོ་ལ་ཆུང་མ་ལ་སྡང་བ་ནི་སྟག་ལས་འོངས་སོ། །སྤུ་རིང་ཞིང་མིག་ཟླུམ་སྟེ་གནས་གཅིག་ཏུ་མི་དགའ་བ་ནི་བྱ་ལས་འོངས་སོ། །འགྱུར་ལྡོག་ཆེ་ཞིང་སྲིན་བུ་གསོད་པ་ལ་དགའ་བ་ནི་ཝ་ལས་འོངས་སོ། །དཔའ་བཤོར་
ཆེ་ཞིང་ཁྲེལ་འཛེམ་ཆུང་ཞིང་ཆུང་མ་དང་བུ་ལ་སྲེད་པ་ནི་སྤྱང་ཀི་ལས་འོངས་སོ། །གཡོན་ཅན་གྱི་ངོས་འཛིན་ལ་གཉིད་ཆུང་ལ་ཁྲོ་བ་ནི་ཁྱི་ལས་འོངས་སོ། །ཁྲོ་བ་ལ་དགའ་ཞིང་སྨྲ་བར་ནི་འདོད་ལ་མི་ཀུན་གྱིས་བྱམས་པ་ནི་ནེ་ཙོ་
ལས་འོངས་སོ། །མང་པོར་འདུས་ཤིང་སྨྲ་བ་ལ་དགའ་ཞིང་མྱ་ངན་མང་བ་ནི་བྱ་ཁུ་བྱུག་ལས་འོངས་སོ། །བོང་ཆུང་ཞིང་གཡེམ་པ་ལ་དད་ཆེ་སྟེ་སྙིང་མི་བརྟན་པ་ནི་བྱེའུ་མཆིལ་པ་ལས་འོངས་སོ། །མིག་ཚག་ལ་སྤྲོ་ཐུང་
ལ་ཁ་ནས་ལྦུ་བ་འོང་ལ་ཉལ་བའི་ཚེ་ན་ལུས་སྦྲིད་འདོད་པ་ནི་རྩངས་པ་ལས་འོངས་སོ། །སྨྲ་ན་ཁྲོ་ཞིང་ཕ་རོལ་གྱི་ཚིག་མི་གོ་ལ་ཁྲོ་ལ་མི་ལ་གདུག་པའི་ཚིག་འབྱུང་བ་ནི་སྡིག་པ་ལས་འོངས་སོ། །གཅིག་པུ་འདུག་ཅིང་
ཟ་བ་ལ་བརྐམ་སྟེ་ནུབ་མོ་གཉིད་ཆུང་བ་ནི་བྱི་ལ་ལས་འོངས་སོ། །ཁྱིམ་ཕུགས་དང་རྐུ་བ་ལ་དད་ཆེ་སྟེ་གཉེན་ངོ་མི་ཤེས་པ་ནི་བྱི་བ་ལས་འོངས་སོ། །བཅོམ་ལྡན་འདས་ཀྱིས་བཀའ་སྩལ་པ། གང་ལ་ལ་ཞིག་གཙུག་
ལག་ཁང་དང་མཆོད་རྟེན་འཇིག་ཅིང་། གང་གིས་དཀོན་མཆོག་གསུམ་གྱི་རྫས་བླངས་ཤིང་སྤྱད་ན་ཚེ་ཕྱི་མ་ལ་བསྟིར་མེད་པའི་སེམས་ཅན་དམྱལ་བར་སྐྱེ་སྟེ། ཅི་སྟེ་དེར་སྐྱེས་ནས་དམྱལ་བ་ལས་ཐར་ན་ཡང་འདི་ལྟ་སྟེ། 
ཕུག་རོན་དང་། མཆིལ་པ་དང་། ངུར་པ་དང་། ནེ་ཙོ་དང་། བྱེའུ་སྐེ་སྔོ་དང་། ཉ་དང་། རུས་སྦལ་དང་། སྤྲེའུ་དང་། ཕག་པ་དང་། ཤ་བར་སྐྱེའོ། །གལ་ཏེ་མིར་སྐྱེས་ན་ཡང་། མ་ནིང་དང་། བུད་མེད་དང་། མཚན་

71-1-221a

ཉིད་པ་དང་། མཚན་མ་མེད་པ་སྤུན་པ་ལ་སོགས་པར་སྐྱེའོ། །མི་ཞེ་སྡང་ཆེ་བ་ནི་སྦྲུལ་གདུག་པ་དང་། སེང་གེ་དང་། སྟག་དང་། སྤྱང་ཀི་དང་། དོམ་དང་། དྲེད་དང་། བྱི་ལ་དང་། ཁྲ་ལ་སོགས་པ་ཐམས་
ཅད་དུ་སྐྱེའོ། །ཅི་སྟེ་མི་ལུས་ཐོབ་ན་ཡང་བྱ་དང་། ཕག་དང་། གསོད་པ་ལ་དད་ཅིང་། རྔོན་པ་དང་། བཙོན་རྫིར་འགྱུར་རོ། །གཏི་མུག་ཆེ་ཞིང་དགེ་མི་དགེའི་བྱེ་བྲག་མི་ཕྱེད་པ་ནི་ཚེ་ཕྱི་མ་ལ་བལ་གླང་དང་། ཕག་དང་། བ་ལང་དང་། 
ལུག་དང་། མ་ཧེ་དང་། ཤིག་དང་། ལྗི་བ་དང་། སྦྲང་མ་དང་། མཆུ་བསྙུང་དང་། གྲོག་མོ་ལ་སོགས་པར་སྐྱེའོ། །ཅི་སྟེ་མི་ལུས་ཐོབ་ན་ཡང་། འོན་པ་དང་། དམུས་ལོང་དང་། ལྐུགས་པ་དང་། ལྦ་བ་ཅན་དང་། སྒུར་
པོ་ལ་སོགས་པར་སྐྱེའོ། །ཡན་ལག་མ་ཚང་བ་དང་། དབང་པོ་མ་ཚང་བའི་ལུས་སུ་འགྱུར་ཏེ། ཆོས་ལ་ནན་ཏན་བྱེད་མི་ནུས་སོ། །རྒྱགས་ཤིང་དྲེགས་པ་ནི་ཚེ་ཕྱི་མ་ལ་མི་གཙང་བའི་ནང་གི་སྲིན་བུ་དང་། རྔ་མོ་དང་། བོང་
བུ་དང་། ཁྱི་དང་། རྟ་ལ་སོགས་པར་སྐྱེའོ། །ཅི་སྟེ་མི་ལུས་ཐོབ་ན་ཡང་བྲན་ཁོལ་དུ་སྐྱེའོ། །དབུལ་ཕོངས་ཏེ་སློངས་མོ་བྱེད་ལ་ཐམས་ཅད་ཀྱིས་བརྙས་ཤིང་དམད་པར་འོང་ངོ་། །གང་དབང་པོ་ཡོད་པས་བྲན་དུ་གཟེར་ཞིང་
གཞན་གྱི་ནོར་ལ་ལེན་པ་ནི་ཚེ་ཕྱི་མ་ལ་ཤལ་མ་ལིའི་སེམས་ཅན་དམྱལ་བར་ལྟུང་སྟེ། སེམས་ཅན་ཁྲི་ཕྲག་བརྒྱད་སྟོང་སྙེད་སོས་ཤ་གཅོད་ཅིང་ཟ་བར་འགྱུར་རོ། །ཚེ་འདི་ལ་ཕ་རོལ་པོ་འགྲེང་དུ་མི་དགའ་བ་ནི་ཚེ་ཕྱི་མ་ལ་བ་
ལང་གི་ལུས་སུ་སྐྱེ་སྟེ། རྐང་ལག་རེངས་ཤིང་ཉལ་མི་ཤེས་པས་གཉིད་ལོག་ཏུ་མེད་པར་འགྱུར་རོ། །ཚེ་འདི་ལ་མཆོད་སྟོན་ཟོས་པའི་ནུབ་མོ་ཟས་ཟོས་ན་ཚེ་ཕྱི་མ་ལ་འདྲེ་ལྟོགས་སུ་འགྱུར་རོ། །ལོ་ཁྲི་བརྒྱ་སྟོང་
གི་བར་དུ་བཟའ་བ་དང་། བཏུང་བ་རྙེད་པར་མི་འགྱུར་རོ། །ཡན་མན་དུ་འགྲོ་བའི་ཚེ་ཚིགས་ཐམས་ཅད་དུ་མེ་འབར་རོ། །ཚེ་འདི་ལ་སྒྲེན་མོར་འདུག་པར་དད་པ་ནི་སྤུ་ཉུང་བའི་བྱ་རྟག་ཏུ་འབོད་པར་སྐྱེའོ། །ཚེ་

71-1-221b

འདི་ལ་མཆོད་སྟོན་གྱི་ཟས་ཟོས་ཀྱི་ལྷག་མ་ཁྱིམ་དུ་ཁྱེར་བ་ནི་ཚེ་ཕྱི་མ་ལ་ལྕགས་འབར་བའི་སེམས་ཅན་དམྱལ་བར་ལྟུང་ངོ་། །ཅི་སྟེ་མིར་སྐྱེས་ན་ཡང་ལྐོག་ནད་ཅན་དང་། ཚེ་ཐུང་བར་འགྱུར་རོ། །ཚེ་འདི་ལ་སངས་
རྒྱས་ལ་ཕྱག་འཚལ་བའི་ཚེ་དཔྲལ་བ་ས་ལ་མ་གཏུགས་ན་སྤྱིའུ་ཚུགས་ཀྱི་དམྱལ་བར་ལྟུང་ངོ་། །ཅི་སྟེ་མིར་སྐྱེས་ན་ཡང་མིའོ་ཅོག་གིས་བརྙས་ཤིང་སླུ་བར་སྐྱེའོ། །ཚེ་སྔ་མ་ལ་སངས་རྒྱས་ལ་ཕྱག་འཚལ་བའི་ཚེ་ཐལ་
མོ་མི་སྦྱོར་བ་ནི་ཚེ་ཕྱི་མ་ལ་མཐའ་འཁོབ་དུ་སྐྱེ་སྟེ། ལས་མང་དུ་བྱས་ཏེ་འབྲས་བུ་འགྲུབ་པ་ཆུང་ངོ་། །ཚེ་འདི་ལ་ཞལ་ཏོན་ཉལ་ནས་མི་ལངས་པ་ནི་ཚེ་ཕྱི་མ་ལ་ལྟོ་འཕྱེའི་རིས་སུ་སྐྱེའོ། །ལུས་རིང་ཞིང་ཆེ་བ་ནི་སྲིན་བུ་ཕོ་མོ་
ཐམས་ཅད་ཀྱིས་ཟ་བར་འོང་ངོ་། །ཚེ་འདི་ལ་ལག་པ་བསྣོལ་ཏེ་སངས་རྒྱས་ལ་ཕྱག་འཚལ་བ་ནི་ཚེ་ཕྱི་མ་ལ་ཕྱིན་ཀ་ལོག་ཏུ་བཅིངས་པའི་སེམས་ཅན་དམྱལ་བར་ལྟུང་ངོ་། །མི་རུ་སྐྱེས་ན་ཡང་ཉེ་བར་གྱོད་ལ་ཐོགས་པར་
འོང་ངོ་། །ཚེ་འདི་ལ་ཐལ་མོ་སྦྱར་ཏེ་ཡན་ལག་སྨད་ལྔ་ས་ལ་གཏུགས་ཏེ། རྩེ་གཅིག་པའི་སེམས་ཀྱིས་སངས་རྒྱས་ལ་ཕྱག་འཚལ་བ་ནི་གང་ནས་གང་དུ་སྐྱེས་པར་རྟག་ཏུ་བཙན་ཞིང་སྐྱིད་པར་འོང་ངོ་། །ཚེ་འདི་ལ་
མཁོང་ཞིང་སྤྲོ་ཐུང་བ་ནི་བྱོལ་སོང་ལས་འོངས་སོ། །ཚེ་འདི་ལ་མིག་ཡོན་པོར་འདུག་པ་ནི་གཞན་གྱི་ཆུང་མ་ལ་མིག་ཟུར་གྱིས་བསྟེགས་པ་ལས་འོངས་སོ། །ཚེ་འདི་ལ་ཆུང་མའི་ནོན་བྱས་ཏེ་ཕ་མ་ལ་རྒོལ་བ་ནི་ལྕེ་གཏུབས་པ་
འི་སེམས་ཅན་དམྱལ་བར་ལྟུང་ངོ་། །ཚེ་འདི་ལ་ཆང་གི་དབང་དུ་སྲེད་པ་ནི་ཚེ་ཕྱི་མ་ལ་ཆུའི་སྲིན་བུར་སྐྱེའོ། །ཅི་སྟེ་མིར་སྐྱེས་ན་ཡང་ལྷ་གོར་དང་དབུགས་མི་བདེ་བའི་ནད་ཀྱིས་འཆི་བར་འགྱུར་རོ། །བཅོམ་ལྡན་འདས་
ཀྱིས་བཀའ་སྩལ་པ། དགའ་བོ་ངས་ཇི་ལྟར་བཤད་པའི་སྡུག་བསྔལ་མང་པོ་རྣམ་པ་སྣ་ཚོགས་ཀུན་གྱིས་མི་དགེ་བ་རྣམས་ལས་གྱུར་ཏེ་རབ་ནི་སེམས་ཅན་དམྱལ་བར་ལྟུང་ངོ་། །འབྲིང་ནི་བྱོལ་སོང་གི་རྒྱུར་འགྱུར་རོ། །

71-1-222a

ཐ་མ་ནི་ཡི་དགས་ཀྱི་རྒྱུར་འགྱུར་རོ། །སྲོག་གཅོད་པས་སེམས་ཅན་ངན་སོང་གསུམ་དུ་ལྟུང་ངོ་། །ཅི་སྟེ་མིར་སྐྱེས་ན་ཡང་འབྲས་བུ་རྣམ་པ་གཉིས་སྨིན་ཏེ། དབུལ་ཕོངས་པ་དང་། ནོར་ཐུན་མོང་དུ་སྤྱད་
པའི་དབང་མེད་དོ། །མི་ཚངས་པར་སྤྱོད་པས་ཀྱང་སེམས་ཅན་ངན་སོང་གསུམ་དུ་ལྟུང་ངོ་། །ཅི་སྟེ་མིར་སྐྱེས་ན་ཡང་འབྲས་བུ་རྣམ་པ་གཉིས་སྨིན་ཏེ། བདག་གི་ཆུང་མ་ལ་འཕྱོ་བ་དང་། ཆེན་ཆུན་གཉིས་རྩོད་པ་དང་། 
བདག་གི་བསམ་པ་བཞིན་མི་འགྲུབ་བོ། །བརྫུན་དུ་སྨྲ་བ་ཡང་སེམས་ཅན་ངན་སོང་གསུམ་དུ་ལྟུང་བར་འགྱུར་རོ། །ཅི་སྟེ་མིར་སྐྱེས་ན་ཡང་འབྲས་བུ་རྣམ་པ་གཉིས་སྨིན་ཏེ། གཞན་གྱིས་སྐུར་པ་འདེབས་པ་དང་། མ་འོངས་
པ་ཀུན་གྱིས་སླུ་བར་འགྱུར་རོ། །ཕྲ་མ་བྱེད་པ་ཡང་སེམས་ཅན་ངན་སོང་གསུམ་དུ་ལྟུང་བར་བྱེད་དོ། །ཅི་སྟེ་མིར་སྐྱེས་ན་ཡང་གཉེན་ཞིག་པ་དང་། གཉེན་ངན་པ་དང་། ཕྲག་དོག་ཅན་དུ་འགྱུར་རོ། །ངག་མི་སྙན་པར་སྨྲ་
ན་ཡང་སེམས་ཅན་ངན་སོང་གསུམ་དུ་ལྟུང་ངོ་། །ཅི་སྟེ་མིར་སྐྱེས་ན་ཡང་འབྲས་བུ་རྣམ་པ་གཉིས་སྨིན་ཏེ། རྟག་ཏུ་སྒྲ་མི་སྙན་པ་མང་པོ་ཐོས་པ་དང་། སྨྲས་སོ་ཅོག་སྐྱོན་ཅན་རྩོད་པར་འགྱུར་རོ། །ཚིག་ཁྱལ་པ་
བྱེད་པ་ཡང་ངན་སོང་གསུམ་དུ་ལྟུང་བར་འགྱུར་ཏེ། ཅི་སྟེ་མིར་སྐྱེས་ན་ཡང་འབྲས་བུ་རྣམ་པ་གཉིས་སྨིན་ཏེ། བདེན་པའི་ཚིག་སྨྲས་པ་ཡང་ཀུན་གྱིས་ཡིད་མི་ཆེས་པ་དང་། སྨྲས་པ་ཐམས་ཅད་མི་གསལ་བར་འོང་ངོ་། །
འདོད་ཆགས་ཀྱི་ཁ་ན་མ་ཐོ་བ་ཡང་སེམས་ཅན་ངན་སོང་གསུམ་དུ་ལྟུང་བར་བྱེད་དོ། །ཅི་སྟེ་མིར་སྐྱེས་ན་ཡང་འབྲས་བུ་རྣམ་པ་གཉིས་སྨིན་ཏེ། ནོར་ལ་ཆགས་ཤིང་ཆོག་མི་ཤེས་པའི་རང་བཞིན་དང་། མང་དུ་ཚོལ་
ཡང་བསམས་པ་བཞིན་མི་འགྲུབ་པོ། །ཞེ་སྡང་གི་ཁ་ན་མ་ཐོ་བ་ཡང་སེམས་ཅན་ངན་སོང་གསུམ་དུ་ལྟུང་བར་བྱེད་དོ། །ཅི་སྟེ་མིར་སྐྱེས་ན་ཡང་འབྲས་བུ་རྣམ་པ་གཉིས་སྨིན་ཏེ། གཞན་གྱིས་རྟག་ཏུ་གླགས་ཚོལ་

71-1-222b

བ་དང་། རྟག་ཏུ་གཞན་གྱིས་འཚེ་བར་འགྱུར་རོ། །ལོག་པར་ལྟ་བའི་ཁ་ན་མ་ཐོ་བ་ཡང་སེམས་ཅན་ངན་སོང་གསུམ་དུ་ལྟུང་ངོ་། །ཅི་སྟེ་མིར་སྐྱེས་ན་ཡང་འབྲས་བུ་རྣམ་པ་གཉིས་སྨིན་ཏེ། རྟག་པར་ལོག་པར་ལྟ་
བའི་ཁྱིམ་དུ་སྐྱེ་བ་དང་། གཡོན་ཅན་དུ་སྐྱེ་བར་འགྱུར་རོ། །ཀྱེ་རྒྱལ་བའི་སྲས་དག་དེ་ལྟ་བུའི་མི་དགེ་བ་བཅུ་ནི་སྡུག་བསྔལ་མང་པོས་གདུངས་བའི་རྒྱུ་ཡིན་ནོ། །དེ་ནས་འཁོར་མང་པོའི་ནང་ནས་མི་དགེ་བ་བཅུའི་
ལས་ཀྱི་ལམ་བྱེད་པ་དག་བཅོམ་ལྡན་འདས་ཀྱིས་སེམས་ཅན་དམྱལ་བའི་སྡུག་བསྔལ་རྣམས་བཤད་པ་འདི་ཐོས་ནས་ཐམས་ཅད་ཀྱིས་ཆོ་ངེས་བཏབ་སྟེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་
ཅག་རྣམས་ཀྱིས་དགེ་བ་ཇི་ལྟ་བུ་ཞིག་གིས་སྡུག་བསྔལ་དེ་དག་ལས་ཇི་ལྟར་ཐར་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཁྱེད་རྣམས་སེམས་ཅན་ཐམས་ཅད་བསོད་ནམས་ཀྱི་ལས་འཐུན་པར་གྱིས་ཤིག །
ཇི་ལྟར་ན་བསོད་ནམས་བྱེད་ཅེ་ན། གང་ལ་ལ་ཞིག་བདག་ཉིད་ཀྱི་སེམས་ཅན་གྱི་དོན་ཆེན་པོ་བྱེད་པ་གཙོ་བོར་བྱས་པ་ལ་མཆོད་རྟེན་དང་། གཙུག་ལག་ཁང་བརྩིགས་ན་མ་འོངས་པའི་དུས་ན་གདོན་མི་ཟ་བར་རྒྱལ་པོར་
འགྱུར་ཏེ། འགྲོ་བ་མང་པོའི་དོན་བྱེད་ཅིང་འགྲོའོ་ཅོག་གི་ཀུན་ལ་མི་མཐུན་པ་མེད་དོ། །ཚེ་འདི་ལ་ཆོས་ཀྱི་འགྲོ་བ་དང་། ཆོས་ལ་དད་པ་ནི་མིའི་མཆོག་ཏུ་འགྱུར་རོ། །མ་འོངས་པའི་དུས་ན་གདོན་མི་ཟ་བར་
བློན་ཆེ་འམ། ཁམས་ཀྱི་དབང་པོ་བློན་དུ་འགྱུར་རོ། །གོས་དང་རྟ་དང་ལྡན་ཞིང་དགོས་སོ་ཅོག་ཚོགས་པར་འགྱུར་རོ། །ཚེ་འདི་ལ་མི་མང་པོ་ལ་བཏུད་ཅིང་བསོད་ནམས་བྱེད་པ་ནི་ཕྱུག་ཅིང་བཙན་པའི་ཁྱིམ་
བདག་ཏུ་འགྱུར་ཏེ། མང་པོ་ཀུན་གྱིས་བཀུར་བ་དང་། ཕྱོགས་བཞི་དག་ཏུ་འགྲོ་ཡང་བགེགས་མེད་ཅིང་བྱའོ་ཅོག་འགྲུབ་བོ། །ཚེ་འདི་ལ་སངས་རྒྱས་ཀྱི་མདུན་དུ་མེ་མར་འབུད་ཅིང་སྣང་གསལ་ལ་དད་པ་ནི་མ་འོངས་

71-1-223a

པའི་དུས་ན་ཉི་མ་དང་ཟླ་བའི་ལྷར་སྐྱེའོ། །འོད་ཀྱིས་བདག་ལ་གསལ་བར་འགྱུར་རོ། །ཚེ་འདི་ལ་སྙིང་རྗེའི་སེམས་ཀྱིས་སྦྱིན་པ་བྱིན་ན་མ་འོངས་པའི་དུས་ན་རབ་ཏུ་ཕྱུག་ཅིང་ཟས་དང་གོས་ཀྱང་ཡིད་བཞིན་
དུ་འགྲུབ་བོ། །ཚེ་འདི་ལ་ཟས་སྐོམ་མི་ལ་སྦྱིན་པ་ལ་དགའ་བ་ནི་གར་སྐྱེས་པ་ཐམས་ཅད་དུ་ཡིད་བཞིན་གྱི་ཟས་སུ་འགྱུར་ཞིང་ཟས་དང་། སྐོམ་ཡང་ལྡན་ལ་དབང་པོ་རྣོ་ཞིང་སྤོབས་པ་ཆེ་སྟེ་ཚེ་རིང་བར་འགྱུར་རོ། །
གང་གིས་བྱོལ་སོང་ལ་ཟས་བྱིན་ན་ནི་ལན་བརྒྱ་འགྱུར་འཐོབ་བོ། །ལོག་སྲེད་ལ་སྦྱིན་པ་སྦྱིན་པས་ནི་ལན་སྟོང་འགྱུར་འཐོབ་བོ། །དགེ་སློང་ངམ། དགེ་སློང་མ་འམ། ཁྲིམས་གཙང་མ་ལ་སྦྱིན་པ་བྱིན་པས་ནི་ལན་ཁྲིར་འགྱུར་
རོ། །ཆོས་སྨྲ་བའི་དགེ་སློང་ཐེག་པ་ཆེན་པོ་སྤེལ་ཞིང་དེ་བཞིན་གཤེགས་པའི་གཏེར་བཤད་པ་མང་པོ་ཀུན་གྱི་མིག་ཕྱེད་ནུས་པ་ལ་བྱིན་ན་ལན་གྲངས་མེད་ཚད་མེད་པ་སྙེད་དོ། །གལ་ཏེ་སངས་རྒྱས་དང་། བྱང་ཆུབ་སེམས་
དཔའ་རྣམས་ལ་བྱིན་ན་འབྲས་གུ་མཐར་གཏུགས་པར་འགྱུར་རོ། །གཞན་ཡང་སྦྱིན་གནས་གསུམ་ལ་སྦྱིན་པ་བྱས་ན་རྣམ་པར་སྦྱིན་པའི་འབྲས་བུ་ཟད་མི་ཤེས་སོ། །གསུམ་གང་ཞེ་ན། སངས་རྒྱས་དང་། ཕ་མ་དང་། 
ནད་པའོ། །དེ་དག་ལ་ཟས་གཅིག་སྦྱིན་པ་བྱས་པས་ཀྱང་དེ་ལྟ་བུའི་འབྲས་བུ་མི་ཟད་པ་འཐོབ་པར་འགྱུར་ན། རྟག་ཏུ་སྦྱིན་པ་བྱིན་པ་ལྟ་ཅི་སྨོས། ཚེ་འདི་ལ་དགེ་འདུན་མང་པོ་ལ་ཁྲུས་བྱས་ན་སྐྱེ་བ་ཐམས་ཅད་དུ་བྱད་
བཞིན་བཟང་ཞིང་། ཡིད་བཞིན་གྱི་གོས་དང་ལྡན་ལ་མང་པོ་ཀུན་གྱིས་བཀུར་བར་འགྱུར་རོ། །ཚེ་འདི་ལ་དམ་པའི་ཆོས་ཀྱི་མདོ་སྡེ་ཀློག་པ་དང་། འདོན་པ་ལ་བསྔགས་པས་ནི་སྐྱེ་བ་ཐམས་ཅད་དུ་སྒྲ་དབྱངས་
སྙན་ཅིང་ཀུན་གྱིས་ཐོས་པར་དགའ་བར་འགྱུར་རོ། །ཚེ་འདི་ལ་ཚུལ་ཁྲིམས་སྡོམ་པས་ནི་སྐྱེ་བ་ཐམས་ཅད་དུ་བྱད་བཞིན་བཟང་བ་དང་། མིའི་མཆོག་ཏུ་འགྱུར་རོ། །ཚེ་འདི་ལ་ཆུ་དཀོན་པའི་སར་ཁྲོན་པ་མང་པོ་

71-1-223b

བརྐོས་ལ་སྐོམ་སྦྱར་ལ། ལམ་སྲང་དུ་ཀུན་ཤོང་བར་བྱེད་དེ། བསྐྱེད་ཅིང་མིའོ་ཅོག་སྒྲོལ་བ་ནི་སྐྱེ་བ་ཐམས་ཅད་དུ་མིའི་རྒྱལ་པོ་བྱེད་ཅིང་ཟས་སྐོམ་རོ་བརྒྱ་དང་ལྡན་པ་ཡིད་བཞིན་དུ་འབྱུང་བར་འགྱུར་རོ། །ཚེ་འདི་
ལ་མདོ་སྡེ་ལ་སོགས་པ་འདྲི་འམ་གཞན་ལ་བྱིན་ཏེ་ཀློག་ཏུ་བཅུག་པ་ནི་སྐྱེ་བ་ཐམས་ཅད་དུ་ཚིག་ལ་ཐོགས་པ་མེད་ཅིང་སློབ་པ་ཐམས་ཅད་ལན་ཅིག་ཐོས་པས་མི་བརྗེད་པར་ཟིན་པར་འགྱུར་རོ། །སངས་རྒྱས་དང་བྱང་ཆུབ་
སེམས་དཔའ་ཡང་རྟག་ཏུ་དེ་ལ་དགོངས་པར་འགྱུར་རོ། །མིའི་ནང་ན་མཆོག་དང་ཕུལ་དུ་འགྱུར་རོ། །གཙོ་བོར་འགྱུར་རོ། །ཚེ་འདི་ལ་ཟམ་པ་དང་གྲུ་ལ་སོགས་པ་བྱེད་དེ། སྐྱེ་བོ་མང་པོ་སྒྲོལ་བར་བྱེད་པ་ལ་དགའ་བ་ནི་སྐྱེ་བ་ཐམས་
ཅད་དུ་རིན་པོ་ཆེ་སྣ་བདུན་དང་ལྡན་ཞིང་ཕལ་མང་པོས་བཀུར་ཏེ་བསྔགས་སོ། །འགྲོ་ཞིང་འོང་བ་ལ་བསུ་བསྐྱལ་བར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། དགའ་བོ་ཇི་ལྟར་ངས་མདོ་སྡེ་ཐམས་ཅད་ལས་རྒྱུ་དང་འབྲས་
བུར་བཤད་དོ། །སེམས་ཅན་རྣམས་འདོན་ནམ། ཀློག་གམ། རྗེས་སུ་སྤྱོད་ན། མི་ཁོམ་པ་དང་། སྡུག་བསྔལ་ལས་གྲོལ་བར་འགྱུར་རོ་ཞེས་གསུངས་སོ། །གང་ལ་ལ་ཞིག་གིས་མདོ་སྡེ་འདི་ལ་སྐུར་པ་འདེབས་པ་
ནི་ཚེ་འདི་ཉིད་ལ་ཡང་ལྕེ་རྩ་བ་ནས་འཆད་པར་འགྱུར་རོ། །དེ་ནས་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མདོ་སྡེའི་མིང་ཅིར་གདགས། ཇི་ལྟར་གཟུང་བར་བགྱི། བཅོམ་ལྡན་འདས་
ཀྱིས་བཀའ་སྩལ་པ། དགའ་བོ་མདོ་སྡེ་འདི་ནི་དགེ་བ་དང་མི་དགེ་བའི་རྒྱུ་དང་འབྲས་བུ་ཞེས་ཀྱང་བྱ། བྱང་ཆུབ་སེམས་དཔའི་ལམ་དང་སྤྱོད་པ་ཞེས་ཀྱང་བྱ་སྟེ། དེ་ལྟར་ཟུང་ཤིག །དེའི་ཚེ་བཅོམ་ལྡན་འདས་ཀྱིས་མདོ་སྡེ་འདི་
བཤད་ན་འཁོར་མང་པོའི་ནང་དུ་ལྷ་དང་མི་བརྒྱད་ཁྲི་སྙེད་བླ་ན་མེད་པའི་བྱང་ཆུབ་ཏུ་སེམས་བསྐྱེད་དོ། །བུད་མེད་བརྒྱད་སྟོང་སྙེད་ནི་མོའི་ལུས་ལས་ཕོར་གྱུར་ཏེ། མི་དགེ་བའི་སེམས་ཅན་ཐམས་ཅད་ཀྱང་དགེ་བར་གྱུར་ཏོ། །

71-1-224a

  དགེ་སྡིག་རྣམ་པར་དབྱེ་བའི་མདོ། རྫོགས་སོ།། །།འཕགས་པ་ཟླ་བའི་སྙིང་པོས་ཞུས་པའི་མདོ་ལས། སངས་རྒྱས་ཀྱི་བསྟན་པ་གནས་པ་དང་འཇིག་པའི་ཚུལ་ལུང་བསྟན་པ། སྔོན་སངས་
རྒྱས་བཅོམ་ལྡན་འདས་ཤཱཀྱ་ཐུབ་པ་རི་ཁ་རྷི་རྷག་གི་སྟེང་ན་བཞུགས་ཏེ། དེའི་ཚེ་ཕྱོགས་བཅུའི་བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་དང་བཅས་པ་དང་། དགྲ་བཅོམ་པ་དང་། ལྷ་དང་། ཀླུ་དང་། གནོད་སྦྱིན་དང་། དྲི་
ཟ་དང་། ལྷ་མ་ཡིན་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། ནམ་མཁའ་ལྡིང་དང་། བདུད་སྡིག་ཅན་ལ་སོགས་པ་མཐུ་བོ་ཆེ་ཐམས་ཅད་ཚོགས་པ་དེའི་དུས་ན་སངས་རྒྱས་བཅོམ་ལྡན་འདས་ཤཱཀྱ་ཐུབ་པའི་ཞལ་གྱི་སྨིན་
མཚམས་ནས་འོད་ཟེར་ཤར་གྱི་ལུས་འཕགས་དང་། ལྷོའི་འཛམ་བུའི་གླིང་དང་། ནུབ་ཀྱི་བན་གླང་སྤྱོད་དང་། བྱང་གི་སྒྲ་མི་སྙན་དང་། གླིང་འདི་བཞིར་འོད་ཟེར་ཀུན་དུ་ཁྱབ་པར་བཀྲམ་སྟེ། འོད་ཟེར་བཏང་བ་དེའི་ཚེ་རི་རབ་ལ་སོགས་
པ་རི་ཆེན་པོ་དང་། རི་དང་། ནགས་ཚལ་དང་། སྨན་ལྗོང་། རི་སུལ། གྲག་གྲོག་ཀུན་ལ་ཡང་སྣང་བར་མཉམ་སྟེ། ལག་མཐིལ་དང་འདྲ་བར་གླིང་བཞི་ཅར་སྣང་བས་གསལ་བར་གྱུར། འོད་ཟེར་དེ་དག་ལས་སངས་རྒྱས་
ཀྱི་སྐུ་གཟུགས་ཁ་དོག་དང་དབྱིབས་སྣ་ཚོགས་འོད་དང་བཅས་པ་ཕལ་པོ་ཆེ་བྱུང་བ། བྱང་ཆུབ་སེམས་དཔའ་དང་། ལྷ་དང་། ཀླུ་ལ་སོགས་པ་སེམས་ཅན་མང་པོ་ཀུན་གྱིས་མཐོང་སྟེ་ངོ་མཚར་དུ་གྱུར་ཏོ། །དེ་ནས་བཅོམ་ལྡན་
འདས་ཤཱཀྱ་ཐུབ་པ་ལ་བཻ་ཤྲ་ཝ་ན་ལ་སོགས་པ་རྒྱལ་པོ་ཆེན་པོ་བཞིས་གསོལ་པ། འོད་ཟེར་འདི་ལྟ་བུ་དེ་ཅིའི་དོན་དུ་མཛད་པ་ལགས་ཞེས་ཞུས་པ་ལས། བཅོམ་ལྡན་འདས་ཀྱིས་བཀའ་སྩལ་པ། ང་མྱ་ངན་ལས་འདས་པའི་
འོག་ཏུ་གླིང་བཞིར་ངས་གསུངས་པའི་དམ་པའི་ཆོས་ཀྱི་གསུང་རབ་དང་། རིང་བསྲེལ་དང་། གཟུགས་བརྙན་འདི་ལྟ་བུ་དག་འབྱུང་སྟེ། འདི་ཁྱེད་ཀྱི་ལག་ཏུ་གཏད་ཀྱིས་བསྲུངས་ཤིག །དེ་ནས་བཅོམ་ལྡན་འདས་ལ་བྱང་ཆུབ་

71-1-224b

སེམས་དཔའ་ཟླ་བའི་སྙིང་པོས་གསོལ་པ། བཅོམ་ལྡན་འདས་འདི་ལྟ་བུའི་ཐུགས་རྗེ་ཆེན་པོས་བཅོམ་ལྡན་འདས་མྱ་ངན་ལས་འདས་པའི་འོག་ཏུ་དམ་པའི་ཆོས་རྒྱལ་པོ་ཆེན་པོ་དག་ལ་གཏད་པ་ཤིན་ཏུ་ངོ་མཚར་ཏོ། །སྔ་མ་འདས་
པའི་སངས་རྒྱས་མྱ་ངན་ལས་འདས་ནས་དགུང་ལོ་དུ་ན་ལགས་ནས་དམ་པའི་ཆོས་ཀྱི་གཟུགས་བརྙན་ནུབ། བཅོམ་ལྡན་འདས་ཤཱཀྱ་ཐུབ་པ་མྱ་ངན་ལས་འདས་པའི་འོག་ཏུ་དམ་པའི་ཆོས་ཇི་ཙམ་གྱི་བར་དུ་གནས་པར་འགྱུར། 
དེ་ནས་བཅོམ་ལྡན་འདས་ཀྱིས་བཀའ་སྩལ་པ། འདི་ལྟ་བུའི་ཐེ་ཙོམ་ཞུས་པ་ལེགས་སོ། །ལེགས་པར་ཉོན་ཅིག་དང་། ངས་བཤད་པར་བྱའོ། །ང་མྱ་ངན་ལས་འདས་ནས་དམ་པའི་ཆོས་ཀྱི་གཟུགས་བརྙན་ལོ་ཉིས་སྟོང་དུ་
གནས་པར་འགྱུར་རོ། །བྱང་ཆུབ་སེམས་དཔའ་ཟླ་བའི་སྙིང་པོས་གསོལ་པ། བཅོམ་ལྡན་འདས་དམ་པའི་ཆོས་འདི་ཐ་མར་ཇི་ལྟར་ནུབ་པར་འགྱུར། རྒྱུ་ཅི་ལས་ཉམས། སུས་མ་མཆིས་པར་བགྱིད། བཀའ་སྩལ་པ། 
ང་མྱ་ངན་ལས་འདས་པའི་འོག་ཏུ་ལོ་ལྔ་བརྒྱའི་བར་དུ་ངའི་བསྟན་པ་ལ་སྤྱོད་པའི་སེམས་ཅན་རྣམ་པར་གྲོལ་བ་མང་དུ་འགྱུར་རོ། །དེ་ནས་ལོ་ལྔ་བརྒྱའི་བར་དུ་ཏིང་ངེ་འཛིན་ལ་སྤྱོད་པ་མང་དུ་འགྱུར་རོ། །རྒྱལ་པོ་དང་། བློན་པོ་
དང་། སེམས་ཅན་ཕལ་རྣམས་ཀྱང་དམ་པའི་ཆོས་ལ་དད་ཅིང་སྤྱོད་པ་ཡང་ཕྱིར་ཞིང་ཉུང་བར་འགྱུར་རོ། །དེ་ནས་ལོ་ལྔ་བརྒྱའི་བར་དུ་དམ་པའི་ཆོས་སྟོན་ཅིང་སེམས་ཅན་འདྲེན་པ་དང་། ཐར་བར་བྱེད་པའི་སློབ་དཔོན་མང་
དུ་འབྱུང་ངོ་། །ཉན་ཐོས་དགྲ་བཅོམ་པ་ནི་ཉུང་བར་འགྱུར་རོ། །རྒྱལ་པོ་དང་། བློན་པོ་དང་། སེམས་ཅན་ཕལ་རྣམས་ཀྱང་ཉན་པ་ཙམ་དུ་ཟད་དེ། ཉམས་སུ་ལེན་ཅིང་སྤྱོད་པ་འམ། བརྩོན་འགྲུས་ནི་མི་བྱེད་དེ། 
དད་པ་འབྲི་བར་འགྱུར་རོ། །དམ་པའི་ཆོས་ཀྱི་སྲུངས་མ་རྣམས་ཀྱང་མི་དགའ་བར་འགྱུར་ཏེ། དམ་པའི་ཆོས་ལ་མ་དད་པའི་སེམས་ཅན་རྣམས་ནི་སྔོན་བས་མཐུ་སྟོབས་སྐྱེ་བར་འགྱུར་རོ། །འཛམ་བུའི་གླིང་གི་

71-1-225a

མིའི་རྒྱལ་པོ་རྣམས་ཀྱང་ཕན་ཚུན་གཅིག་ལ་གཅིག་དམག་འདྲེན་ཅིང་འཁྲུག་པར་འགྱུར་རོ། །བདུད་ཀྱི་རིས་ཀྱང་འཕེལ་བར་འགྱུར་རོ། །དེ་ནས་ཡང་ལོ་ལྔ་བརྒྱའི་ཚེ་ལོ་སུམ་བརྒྱར་ནི་དམ་པའི་ཆོས་
ལ་གནས་པའི་ལྷ་ཀླུ་ལ་སོགས་པ་སེམས་ཅན་སྲུངས་མ་རྣམས་མི་གནས་ཤིང་དམ་པའི་ཆོས་གང་དུ་དར་བར་འགྲོ་བར་འགྱུར། སེམས་ཅན་ཆོས་ལ་མ་དད་པར་འགྱུར། སེམས་ཅན་ཆོས་སྤྱོད་པ་རྣམས་ཀྱང་ཆོས་ཀྱི་གཞུང་བཞིན་
མི་སྤྱོད། བརྩོན་འགྲུས་ཆུངས་པས་གྲུབ་པ་ཉུང་བར་འགྱུར། ཁ་དོག་བཞི་དང་བཞི་ལས་གྱུར་པ་ཡང་འབྲི། དྲི་དང་། རོ་ལ་སོགས་པ་ཡང་ཆུང་བར་འགྱུར་རོ། །མི་ནད་དང་། ཕྱུགས་ནད་དང་། མུ་གེ་ཡང་འབྱུང་བར་འགྱུར་རོ། །ལོ་ཉིས་
བརྒྱར་ནི་དགེ་སློང་ཡང་ཆོས་བཞིན་མི་སྤྱོད། འཇིག་རྟེན་གྱི་ཁེ་དང་གྲགས་པ་ཚོལ། སྙིང་རྗེ་ཆུང་ཞིང་ཁྲིམས་ལ་མི་གནས། དམ་པའི་ཆོས་ཚུལ་བཞིན་སྤྱོད་པ་རྣམས་ལ་ནི་གླན་ཀ་ཚོལ་ཞིང་སྐུར་པ་འདེབས། 
ལོངས་སྤྱོད་དང་ཡོ་བྱད་འཕྲོག །འཇིག་རྟེན་གྱི་རྒྱལ་པོའི་གསང་ལ་རྟེན་ཅིང་རྒྱལ་སྲིད་འཛིན། རྒྱལ་པོའི་ཕྲིན་པའི་ཕོ་ཉར་ངོ་འཕྲལ་ཚོལ་ཞིང་འགྲོ། རྒྱལ་པོ་དང་། འབངས་སྲིད་འཁྲུག་པའི་དབྱེན་བྱེད། ཉོ་
ཚོང་དང་ཁེ་སྤོགས་བྱེད་ཐབས་ཚོལ། དམ་པའི་ཆོས་སྤྱོད་པ་ཡང་སྙིང་ནས་ཉམས་སུ་བླངས་ཏེ་མི་སྤྱོད་ཀྱི། ཕལ་ཆེར་ཁ་གསག་དང་། འཕྲལ་གྱི་ཚུལ་འཆོས་པའི་ཡ་མ་རླ་བྱེད་དེ། དེའི་དུས་ན་ཆོས་ལ་དགའ་
བའི་ལྷ་ཀླུ་ཐམས་ཅད་ཀྱིས་རྒྱལ་ཁམས་ཀྱི་དགེ་སློང་འདི་ལྟར་སྤྱོད་པའི་ས་གཞི་བོར་ཏེ་མི་གནས་ཤིང་། བདུད་ཀྱི་རིས་ལ་སོགས་པ་ཆོས་ཀྱི་བགེགས་ཀྱི་རིས་རྣམས་དེར་འབྱུང་སྟེ། མཐུ་དང་སྟོབས་སྐྱེ་བར་
འགྱུར། རྒྱལ་པོ་དང་། བློན་པོ་ལ་སོགས་པ་དད་པ་འབྲི། དགེ་སྡིག་གི་དམིགས་མི་ཕྱེད། དམ་པའི་ཆོས་ལ་རྨ་འབྱིན། དཀོན་མཆོག་གསུམ་གྱི་དཀོར་དང་། དགེ་འདུན་གྱི་རྫས་ལ་སྤྱོད་ཅིང་རྐུ་འཕྲོག་

71-1-225b

བྱེད་དེ་སྡིག་ལ་མི་འཛེམ། གཟུགས་བརྙན་དང་མཆོད་རྟེན་རྣམས་ཁད་ཀྱིས་བཤིག །མཆོད་པའི་ཡོ་བྱད་ཕྲི། དེའི་ཚེ་དམ་པའི་ཆོས་མ་ནོར་བར་སྤྱོད་པ་དགེ་སློང་དང་། ཁྱིམ་པ་འགའ་འགའ་ཙམ་གནས་
པ་དེའི་བསོད་ནམས་ཀྱིས་ཡུལ་ཕྱོགས་སུ་ཆར་ཆུ་དུས་སུ་འབབ་ཅིང་ལོ་ལེགས། མི་རྒྱགས་ལ་ནད་ཉུང་ཞིང་ཡུལ་བདེ་བ་དག་ཀྱང་བར་འགའ་འབྱུང་། དེ་ལྟ་བུ་མི་གནས་པ་ཕལ་ཆེར་ནི་སྡུག་བསྔལ་མི་བདེ་བ་སྣ་
ཚོགས་འབྱུང་། དེའི་དུས་སུ་རྒྱ་གར་དང་། རྒྱ་མ་ཡིན་པའི་རྒྱལ་པོ་ཆེན་པོ་གསུམ་འབྱུང་སྟེ། གསུམ་ལ། ཡ་བ་ན་དང་། བལྷི་ཀ་དང་། ཤ་ཀུ་ན་དང་། འདི་གསུམ་དམ་པའི་ཆོས་མི་སྤྱོད། དམག་འདྲེན་ཅིང་
གཡུལ་འགྱེད་དེ། ནུབ་དང་བྱང་གི་ཡུལ་ཁམས་མང་པོ་ཞིག་འབེབས་པར་བྱེད་དེ། དེ་ནས་ཡུལ་ཁམས་དེའི་མཆོད་རྟེན་དང་གཙུག་ལག་ཁང་ལ་སོགས་པ་ཡང་བཤིག་ཅིང་མེས་བསྲེགས་ཏེ། དགེ་འདུན་གྱི་ཡོ་བྱད་དང་
དཀོན་མཆོག་གསུམ་གྱི་དཀོར་ལ་སོགས་པ་ཡང་ཕྲོགས་ཤིང་བཅོམ་སྟེ། རྒྱལ་པོ་འདི་གསུམ་གཅིག་ལ་གཅིག་གནོད་པ་སྣ་ཚོགས་ཀྱིས་ཐབ་མོ་བྱེད་དེ། གསུམ་ཅར་གྱི་རྒྱལ་སྲིད་མི་བདེ་བར་འགྱུར་རོ། དེའི་རྗེས་ལ་
རྒྱལ་པོ་དེ་གསུམ་ནང་སྲིད་གཅིག་ཏུ་བྱས་ནས་དམག་མང་པོ་འདུས་ཏེ་རྒྱ་གར་གྱི་ཡུལ་ཆུ་བོ་གང་གཱའི་ཚུ་རོལ་འགན་ད་ར་དང་། མ་དྷྱ་དེ་ཤ་ལ་སོགས་པའི་ཡུལ་ཕྲོགས་ནས་བཟུང་། དེའི་དུས་ན་ཆུ་བོ་གང་གཱའི་ཕ་རོལ་ལྷོ་ཕྱོགས་
ཀྱི་རྒྱུད་ན། ཡུལ་ཀོའུ་ཤམ་བི་ཞེས་བྱ་བའི་རྒྱལ་པོ་མ་ཧེན་དྲ་སེན་ཞེས་བྱ་བ་དེ་ལ་སྲས་ཞིག་བཙས་ཏེ། དེའི་མིང་ནི་དུ་སྤྲ་ས་ཧ་སྟ་ཞེས་བྱ་སྟེ། སྨིན་མཚམས་ན་ལྕགས་ཀྱི་སྨེ་བ་ཞིག་ཡོད་པ། ལག་པ་གྲུ་མོ་མན་
ཆད་ཁྲག་གིས་བསྐུས་པ་ཞིག་འབྱུང་ངོ་། །དེ་དང་དུས་གཅིག་ཏུ་རྒྱལ་པོ་དེའི་བློན་པོ་ལྔ་བརྒྱ་ལ་ཡང་བུ་ཁྱེའུ་ལྔ་བརྒྱ་བཙའ་སྟེ། དེ་རིལ་ཡང་ལག་པ་ཁྲིག་པ་མན་ཆད་ཁྲག་ཅན་དུ་བྱུང་སྟེ། དེའི་དུས་ན་རྒྱལ་པོའི་རྟ་ལ་

71-1-226a

རྟེའུ་སྨྲ་ཤེས་པ་ཞིག་སྐྱེས་ཏེ། རྒྱལ་པོ་དང་། བློན་པོའི་བུ་དང་། རྟེའུ་སྨྲ་ཤེས་པ་སྐྱེས་པའི་ནུབ་མོ་ཡང་ནམ་མཁའ་ལས་ཁྲག་གི་ཆར་པ་བབ་ནས། རྒྱལ་པོ་མ་ཧེན་དྲ་སེ་ནས་དྲང་སྲོང་གི་མཁན་
པོ་ལྔ་མངོན་པར་ཤེས་པ་ཞིག་ལ་བདག་ཅག་འཁོར་གྱི་བུ་དང་། རྟ་ལ་ཡ་མཚན་འདི་ལྟ་བུ་བྱུང་བ་དང་། ཁྲག་གི་ཆར་པ་བབ་པ་འདི་ཅིའི་ལྟས་ཞེས་སྨྲས་པ་དང་། དྲང་སྲོང་ན་རེ་ཁྱོད་ཀྱི་བུས་འཛམ་བུའི་གླིང་གི་ས་གཞི་འདི་མི་
འི་ཁྲག་གིས་གཤེར་བར་བྱེད་པར་འགྱུར་རོ། །དེའི་འོག་ཏུ་ཁྱོད་ཀྱི་བུ་འཛམ་བུའི་གླིང་གི་རྒྱལ་པོ་ཆེན་པོ་བྱེད་པར་འགྱུར་རོ་ཞེས་སྨྲས་སོ། །རྒྱལ་བུ་དེ་ཐོག་མ་བཙས་ནས་ལོ་བཅུ་གཉིས་ལོན་པ་དང་། དེའི་ཚེ་རྒྱལ་པོ་
ཡ་བ་ན་དང་། བལྷི་ག་དང་། ཤ་ཀུ་ན་གསུམ་འདུས་པའི་དམག་སུམ་འབུམ་རྒྱལ་པོ་དང་བཅས་ཏེ། རྒྱལ་པོ་མ་ཧེན་དྲ་སེ་ནའི་ཡུལ་དུ་དྲངས་པ་ལས། ཡུལ་དུ་དམག་ཕལ་མོ་ཆེ་བྱུང་བས་རྒྱལ་པོ་སྙིང་མི་དགའ་སྟེ། མྱ་
ངན་བྱེད་ཅིང་འདུག་པ་ལ་བུ་དུ་སྤྲ་ས་ཧ་སྟས་ཕ་ལ་དྲིས་པ། ཡབ་འདི་ལྟར་ཐུགས་མི་དགྱེས་པ་ཅི་ལས་གྱུར་ཅེས་ཞུས་པ་དང་། ཕ་ན་རེ་རྒྱལ་པོ་གསུམ་གྱི་དམག་བྱིན་ཆེན་པོ་བདག་ཅག་གི་ཡུལ་དུ་བྱུང་བས་མི་དགའ་
ཞེས་སྨྲས་པ་དང་། བུས་སྨྲས་པ། ཡབ་མི་དགྱེས་སུ་མ་མཛད་ཅིག །དམག་འདི་བདག་གིས་ཐུབ་པར་བགྱིའོ་ཞེས་བགྱིས་པ་དང་། ཕ་ན་རེ་ལེགས་སོ་ཞེས་སྨྲས་ནས། བུ་དང་བློན་པོའི་བུ་ཡ་མཚན་ཅན་ལྔ་བརྒྱ་
ལ་སོགས་ཏེ། དམག་ཉིས་འབུམ་བཅས་ཏེ་བཏང་ནས་ཐབ་མོ་བྱས་པའི་ཚེ། སྨིན་མཚམས་ན་ལྕགས་ཀྱི་སྨེ་བ་ཡོད་པ་བསྐྱེད་ནས་ལུས་རིལ་ལྕགས་སུ་བྱས་ནས་རབ་ཏུ་ཁྲོས་ནས་བརྒལ་བ་དང་། དུ་སྤྲ་ས་ཧ་སྟའི་
དམག་རྒྱལ་ཏེ་ཕྱིར་ལོག་པ་དང་། ཕ་ན་རེ་བུ་ཁྱོད་ཀྱིས་རྒྱལ་པོ་གསུམ་གྱི་དམག་འདི་ལྟ་བུ་དང་ཐབ་མོ་བྱས་པ་ལས་རྒྱལ་བ་ལེགས་སོ། །ད་ཕྱིན་ཅད་ཁྱོད་ཀྱིས་རྒྱལ་སྲིད་ཟུང་ཤིག །ང་ནི་འབྱུང་ངོ་ཞེས་བསྒོ་ནས་

71-1-226b

རྒྱལ་སྲིད་ཀྱང་བུ་ལ་བྱིན་ནོ། །དེ་ནས་ལོ་བཅུ་གཉིས་ཀྱི་བར་དུ་རྒྱལ་པོ་གསུམ་གྱི་དམག་དང་འཐབས་པ་ལས་དམག་དཔོན་ཡང་རིལ་གྱིས་གཏུབས། རྒྱལ་པོ་གསུམ་ཡང་བཟུང་ནས་མེད་པར་བྱས་སོ། །དེ་ཚུན་ཅད་འཛམ་
བུའི་གླིང་གི་རྒྱལ་པོ་ཆེན་པོ་བྱས་པར་གྱུར་ཏོ། །དེ་ནས་རྒྱལ་པོས་བློན་པོ་རྣམས་ལ་སྨྲས་པ། ང་འཛམ་བུའི་གླིང་གི་རྒྱལ་པོ་ཆེན་པོ་བྱེད་པ་ནི་དགའ་ན། གུད་ན་མི་དགའ་བ་ཞིག་ཀྱང་ཡོད་ཅེས་སྨྲས་པ་དང་། བློན་པོ་རྣམས་ཀྱིས་
སྨྲས་པ། ཅི་མི་དགྱེས་ཞེས་ཞུས་པ་དང་། སེམས་ཅན་མང་པོ་འདི་སྙེད་ཅིག་བསད་པ་སྡིག་ཆེ་བས་མི་དགའ་ན། སྡིག་འདི་ཇི་ལྟ་བུ་ཞིག་ཏུ་བྱས་ན་འབྱང་བར་འགྱུར་ཞེས་སྨྲས་པ་དང་། བློན་པོ་རྣམས་ཀྱིས་གསོལ་པ། ཡུལ་
པ་ཊ་ལི་པུ་ཏྲ་སྟེ་དམར་བུ་ཅན་ཞེས་བྱ་བ་ན་ཆོས་ཀྱི་མཁན་པོ་སྡེ་སྣོད་གསུམ་ལ་མཁས་པ། བྲམ་ཟེ་ཨ་ག་ནི་ཏ་ཏི་པུ་ཏྲ་སྟེ་མེས་བྱིན་གྱི་བུ་ཞེས་བྱའོ། །མིང་ནི་ཤི་ཥྱ་ཀ་སྟེ། སློབ་མ་ཅན་ཞེས་བགྱི་བ་ཞིག་དགོན་པའི་
གནས་ན་གནས་པ་དེ་སྤྱན་དྲངས་ནས་མཆོད་བཀུར་བགྱིས་ན་སྡིག་པ་འབྱང་རྔོ་ཐོག་གོ་ཞེས་གསོལ་པ་དང་། རྒྱལ་པོ་ཡང་དགྱེས་ནས་དགེ་སློང་ཤི་ཥྱ་ཀ་ཡང་འགུགས་པ་བཏང་ནས་རྒྱལ་པོའི་དྲུང་དུ་འོངས་སོ། །དེ་ནས་མཁན་
པོ་ཤི་ཥྱ་ཀ་ལ་རྒྱལ་པོས་ཕྱག་བྱས་ཏེ། མཁན་པོ་བདག་གིས་སྡིག་བྱས་པ་རྣམས་ཅིས་འབྱང་བར་འགྱུར་ཞེས་གསོལ་པ་དང་། མཁན་པོས་སྨྲས་པ། རྒྱལ་པོ་ཆེན་པོ་དཀོན་མཆོག་གསུམ་ལ་ལོ་བཅུ་གཉིས་ཀྱི་བར་
དུ་མཆོད་ཅིང་སྐྱབས་སུ་སོང་ན་སྡིག་རྣམས་འབྱང་བར་འགྱུར་རོ་ཞེས་སྨྲས་པ་དང་། དེ་ནས་རྒྱལ་པོ་དུ་སྤྲ་ས་ཧསྟས་ཕོ་ཉ་མང་པོ་ཕྱོགས་བཅུར་བཏང་སྟེ། འཛམ་བུའི་གླིང་ན་དགེ་སློང་འདུག་གོ་ཅོག་བཀུག་སྟེ། འཛམ་
བུའི་གླིང་གི་དགེ་སློང་རིལ་འོངས་ཏེ། ཆུ་བོ་གང་གཱའི་ཕ་རོལ་ཡུལ་ཀོའུ་ཤམ་བིའི་རྒྱལ་པོ་དུ་སྤྲ་ས་ཧསྟའི་གནས་ག་ལ་བ་དེར་བསྡུས་པས་འཛམ་བུའི་གླིང་གི་ཡུལ་ཁམས་གཞན་ན་ཆོས་སྤྱོད་པ་དང་། དགེ་སློང་དག་མེད་

71-1-227a

པར་གྱུར་ཏོ། །དགེ་སློང་བསྡུས་པ་དེའི་ཚེ་ན་ལམ་དུ་དགེ་སློང་གྱག་ཅིང་ཆུད་ཟོས་པ་ཡང་མང་སྟེ། རྒྱལ་པོའི་ཕོ་བྲང་དུ་ནི་འབུམ་ཙམ་ཞིག་ཕྱིན་པར་གྱུར་ཏོ། །དགེ་སློང་ལམ་དུ་གྱག་ཅིང་ཆུད་ཟོས་པ་
ཡང་གཅན་ཟན་སྣ་ཚོགས་དང་། མི་རྒོད་དང་། ཆུ་ལ་སོགས་པས་ཕལ་ཁྱེར་ཏེ་ཆུད་ཟོས་སོ། །དགེ་འདུན་མང་པོ་ཕྱིན་པ་དང་། རྒྱལ་པོས་མཆོད་སྟོན་དྲངས། ཡོན་ཕུལ་ཏེ་མཆོད་པ་བྱས་སོ། །དེའི་ཚེ་དགེ་འདུན་རྣམས་
གཅིག་ལ་གཅིག་གཏམ་དུ་སྨྲས་པ། ཁྱེད་ཀྱི་མཁན་པོ་ག་རེ། སློབ་མ་གར་སོང་། གྲོགས་པོ་ཁྲིམས་ཟླ་ག་རེ་ཞེས་སོ་སོར་གཏམ་དུ་གླེངས་པ་དང་། སྟག་དང་། སེང་གེ་དང་། མི་རྒོད་ཀྱིས་བསད་པ་དང་། ཆུས་ཁྱེར་བ་དང་། 
ནད་ཀྱིས་བཏབ་ནས་ཤི་བ་ལ་སོགས་པའི་གཏམ་བྱས་ནས་དགེ་སློང་སོ་སོ་ནས་མྱ་ངན་ལངས་ཏེ་ངུད་མོས་འདེབས་ཏེ་བྲང་རྡུང་ངོ་། །དེ་ནས་དེའི་ཚེ་རྒྱལ་པོས་མྱ་ངན་མ་བགྱིད་མ་ངུ་ཞེས་བསྒོ་བ་དང་། དགེ་འདུན་རྣམས་མ་ཉན་པ་
དང་། རྒྱལ་པོ་ཡང་མི་དགའ་ནས་ཁ་ཕྱོགས་ཏེ་ཉལ་ལོ། །ཉལ་བའི་ཚེ་སྨོན་ལམ་དུ་བཏབ་པ། གང་ཟག་གི་དགེ་འདུན་ལ་ནི་སྐྱབས་སུ་སོང་ནས་མཆོད་པ་བྱས་ན། བདག་གིས་དགྲ་བཅོམ་པའི་ཞལ་མ་མཐོང་སྟེ། བདག་
གིས་དགྲ་བཅོམ་པ་ཞིག་གི་ཞལ་མཐོང་བར་ཤོག་ཤིག་ཅེས་སྨོན་ལམ་དུ་བཏབ་པ་དང་། འཇིག་རྟེན་གྱི་ལྷ་ཞིག་གིས་རྨི་ལྟས་སུ་བསྟན་པ། གན་དྷ་མཱ་ད་ན་སྟེ་སྤོས་ངད་ལྡང་ཞེས་བྱ་བའི་རི་ལ་སུ་དྷ་ན་པུ་ཏྲ་ར་རྣ་ཤ་ཞེས་དང་
ར་ཤན་ཞེས་པའང་སྣང་ངོ་སྟེ་ཚོང་དཔོན་ནོར་བཟངས་ཀྱི་བུ་ཞེས་བྱ་བ་རབ་ཏུ་བྱུང་བ་སུ་ར་ཏ་སྟེ་དེས་པ་ཞེས་བྱ་བར་མིང་བཏགས་པ་དགྲ་བཅོམ་པའི་འབྲས་བུ་ཐོབ་པ་ཞིག་བཞུགས་ཏེ། དེ་སྤྱན་དྲངས་ནས་བསྙེན་བཀུར་བྱས་ཏེ། དེ་
ལ་སྡིག་བཤགས་ན་སྡིག་ཀྱང་འབྱང་། ཐེ་ཙོམ་ཡང་བྲལ་བར་འགྱུར་རོ་ཞེས་ལྷས་བསྟན་པ་རྨིས་པ་དང་། རྒྱལ་པོ་སད་པ་དང་འཕྲལ་དུ་ཕོ་ཉ་བཀྱེ་སྟེ། སྤོས་ངད་ལྡང་གི་རི་ལས་དགྲ་བཅོམ་པ་སུ་ར་ཏ་སྤྱན་དྲངས་ཏེ། རྒྱལ་

71-1-227b

པོའི་ཕོ་བྲང་དུ་བྱོན་པ་དང་། རྒྱལ་པོས་ཀྱང་ཚུལ་བཞིན་དུ་ཕྱག་བྱས་ཤིང་མཆོད་དེ་བསྙེན་བཀུར་བྱས་སོ། །དེའི་དུས་ན་ཚེས་བཅུ་བཞིའི་ནུབ་མོ་དགེ་འདུན་རིལ་གྱིས་འདུས་པའི་ནང་ནས། དགེ་སློང་གསར་ཞུགས་
རྣམས་ཀྱིས་སྡེ་སྣོད་གསུམ་ཤེས་པའི་མཁན་པོ་ཥྱ་ཀ་ལ་པྲཱ་ཏི་མོ་ཀྵ་གདོན་པར་གསོལ་བ་ལས། ཤི་ཥྱ་ཀ་ན་རེ་མི་ལ་མིག་ཞར། སྣ་དང་རྣ་བ་མེད་ན་མེ་ལོང་ཅི་དགོས། བལྟར་ཅི་ཡོད། འདུལ་བ་བཤད་ཀྱང་ཁྱེད་འདུལ་
བ་ལྟར་མི་སྤྱོད། ཚུལ་ཁྲིམས་མི་བསྲུང་བ་ལ་འདུལ་བ་བཤད་ཀྱང་ཅི་ཕན་ཞེས་སྨྲས་པ་དང་། དེའི་ཚེ་སུ་ར་ཏ་ཞེས་བྱ་བ་དགྲ་བཅོམ་པས་སེང་གེའི་སྒྲ་ཕྱུང་ནས་སྨྲས་པ། སངས་རྒྱས་བཅོམ་ལྡན་འདས་ཀྱི་ཚུལ་
ཁྲིམས་ངས་མནོས་ནས་ད་ཙམ་གྱི་བར་དུ་རྩྭ་མཆོག་ཙམ་ཡང་མ་ཉམས་ན། འདི་སྐད་མ་ཟེར་བར་པྲཱ་ཏི་མོ་ཀྵ་ཐོན་ཅིག་པར་སྨྲས་པ་དང་། མཁན་པོ་ཤི་ཥྱ་ཀ་ཡང་དགྲ་བཅོམ་པར་ངོ་ཤེས་ཏེ་རབ་ཏུ་སྐྱེངས་ནས་ཅང་མི་ཟེར་བ་
དང་། ཤི་ཥྱ་ཀའི་སློབ་མ་དགེ་སློང་ཨཾ་ག་ད་སྟེ་དཔུང་གི་ཚོགས་འཇིགས་སུ་རུང་ཞེས་བྱ་བ་དེ་འཁོར་འདུས་པའི་ནང་ནས་ལངས་ཏེ་སུ་ར་ཏ་ཞེས་བྱ་བ་དགྲ་བཅོམ་པ་དེ་ལ་ཁྱེད་ཅི་སྟེ་ངའི་མཁན་པོ་ལ་དེ་སྐད་སྨྲ། ཁྱོད་
ཁྲིམས་ཀྱང་མེད། འདུལ་བ་ཡང་མི་ཤེས། ངའི་མཁན་པོ་སྡེ་སྣོད་གསུམ་ལ་མཁས་པ་དེ་ལ་ཅིའི་ཕྱིར་ཁ་ཟློགས་ཤེས་ཁྲོས་ནས་སྒོ་གཏན་བླངས་ཏེ། དགྲ་བཅོམ་པ་བརྡེགས་ནས་བསད་དོ། །དེའི་ཚེ་
ཆོས་ལ་དགའ་བའི་གནོད་སྦྱིན་ད་དྷི་མུ་ཁ་ཞོ་གདོང་དིར་རྒ་མུ་ཁ་ཞེས་བྱ་བས་ལག་པར་རྡོ་རྗེ་ཐོགས་ནས་མངོན་དུ་བྱུང་སྟེ། དགེ་སློང་ཨཾ་ག་ད་ལ། ཅི་སྟེ་དགྲ་བཅོམ་པ་བསད་ཅེས་ཟེར་ཏེ་རྡོ་རྗེ་ཕྱུང་ནས་བསད་དོ། །
དེའི་དུས་ན་དགེ་སློང་གེ་རད་ཅེས་བྱ་བས་མཁན་པོ་ཤི་ཥྱ་ཀ་བརྡེགས་ཏེ་བསད་དོ། །དེ་ནས་དེའི་རྗེས་ལ་དགེ་འདུན་རིལ་གྱིས་འཁྲུགས་ནས་གཅིག་གིས་གཅིག་བསད་དེ་གཅིག་ཀྱང་མ་ལུས་སོ། །དེའི་དུས་ན་

71-1-228a

ནམ་མཁའ་ལ་ལྷ་ཀླུ་ལ་སོགས་པ་ཆོས་ཀྱི་བསྲུངས་མ་ཕལ་པོ་ཆེ་མ་དགའ་ནས་ངུས་པའི་མཆི་མ་ནི་ཁྲག་དང་མེའི་ཆར་བབ་བོ། །ནམ་མཁའ་དག་ནི་སེར་དང་ནག་པོར་གྱུར། གློག་དང་སྒྲ་
ཆེན་པོ་བྱུང་། སྐར་མ་དྷཱུ་མ་ཀེ་ཏུ་ཞེས་བྱ་བ་ལུས་ལས་དུ་བ་ནག་པོ་གཏོང་བ་ཞིག་བྱུང་ནས། དེས་སྐར་མ་དང་ཟླ་བ་ལ་སོགས་པ་འོད་ཀྱང་མེད། གཅིག་ཀྱང་བལྟར་མི་སྣང་བར་འོང་ངོ་། །དེའི་དུས་ན་སུམ་བཅུ་རྩ་གསུམ་
གནམ་གྱི་ལྷ་དང་། ཡུམ་མཱ་ཡཱ་དེ་བཱི་ལ་སོགས་པ་འཁོར་ཕལ་མོ་ཆེ་དང་དེར་འོངས་ནས་དགེ་འདུན་གྱི་གོས་ཚོན་ཅན་རིལ་གྱིས་བསྡུས་ནས་ཁྱེར་བར་འོང་ངོ་། །དེའི་དུས་ན་རྒྱལ་པོས་འདི་ལྟ་བུའི་ཀུ་ཅོ་སྒྲ་ཆེན་པོ་བྱུང་
བ་ཅི་ལས་གྱུར་ཅེས་སྨྲས་པ་དང་། དགེ་འདུན་འཁྲུགས་ནས་གཅིག་གིས་གཅིག་བསད་པར་གྱུར་ཏོ་ཞེས་གསོལ་པ་དང་། རྒྱལ་པོ་མི་དགའ་སྟེ། ལངས་ནས་ཐོ་རངས་མཁར་གྱི་ཕྱི་རོལ་གྱི་ལྷ་ཁང་དུ་ཕྱིན་པ་
དང་། དགེ་འདུན་ལ་ལ་ནི་མགོ་བཅད། ལ་ལ་ནི་མིག་ཕྱུང་། ལ་ལ་ནི་རྐང་ལག་བཅད་དེ། དེ་ལྟར་སྣ་ཚོགས་སུ་ཤི་བ་མཐོང་ནས། དགྲ་བཅོམ་པ་དང་། ཤི་ཥྱ་ཀ་སྡེ་སྣོད་གསུམ་ཤེས་པའི་མཁན་པོའི་
རོ་བཙལ་ནས་གཉིས་ཀའི་རོ་རྙེད་པ་དང་། མཆན་ཁུང་གཡས་གཡོན་དུ་བཞག་ནས་དགྲ་བཅོམ་པ་ནི་ངའི་ཕ་ཡིན། ཤི་ཥྱ་ཀ་ནི་ཆོས་ཀྱི་མཛོད་ཡིན། འདི་གཉིས་འདས་པར་གྱུར་པ་ནི་ད་ཕྱིན་ཅད་ངའི་ལུས་དང་སྲོག་
ཀྱང་གཅེས་པ་མེད། རྒྱལ་སྲིད་ཀྱང་སུ་འདོད་པ་ལ་སྦྱིན་ནོ་ཞེས་སྨྲས་པ་དང་། མིག་ཀྱང་ལྡོངས་ཏེ་མི་སྣང་བར་གྱུར་ཏོ། །དེའི་དུས་ན་བློན་པོ་རྣམས་ཀྱིས་རྒྱལ་པོ་ལ་སྙིང་བརྩེ་སྟེ། མྱ་ངན་བསང་བའི་ཕྱིར་མི་ལྔ་
བརྒྱ་བན་དེ་ལྟར་བཅོས་ཏེ། སྐྲ་དང་ཁ་སྤུ་བྲེག་ཏུ་སྤུ་གྲིས་མ་ཆོད་ནས། སྐྲ་དང་ཁ་སྤུ་མེས་བསྲེགས། ཚོན་སྣ་བརྒྱ་ཡང་དེའི་ཚེ་ནུབ་པས་བན་དེ་ལྔ་བརྒྱ་ཡང་ཆོས་གོས་མི་བདོག་ནས་ཕྱུགས་ནག་པོ་དང་། དམར་

71-1-228b

པོའི་ཀོ་བ་གྱོན་ཏེ། བན་དེ་ལྟར་བཅོས་ནས་རྒྱལ་པོའི་དྲུང་དུ་འོངས་སོ། །བློན་པོས་རྒྱལ་པོ་ལ་བན་དེ་ལྔ་བརྒྱ་འོངས་སོ་ཞེས་གསོལ་པ་དང་། རྒྱལ་པོ་དགའ་ནས་མིག་ཕྱེ་སྟེ་བན་དེ་དག་ལ་བརྟགས་ན། བན་
དེ་ཡང་རིལ་ཀྱིས་ཕྱུགས་ཀྱི་ལྤགས་པ་གོས་སུ་གྱོན་ལ། སྐྲ་དང་ཁ་སྤུ་མ་བྲེགས་པར་མེས་བསྲེགས་པ་ནི་མ་མཐོང་ནས་རྒྱལ་པོ་ཡང་དགའ་སྟེ། དཀོན་མཆོག་གསུམ་ལ་མཆོད་པའི་ཡོ་བྱད་འོན་ཅིག་ཅེས་བསྒོ་ནས་
བན་དེ་དེ་རྣམས་ལ་མཆོད་དེ། བན་དེ་རྣམས་ལ་རྒྱལ་པོས་ཞིབ་ཏུ་བརྟགས་ན། ཕྱུགས་ཀྱི་ལྤགས་པ་ཆོས་གོས་སུ་གྱོན་ལ། སྐྲ་དང་ཁ་སྤུ་མ་བྲེགས་པར་མེས་བསྲེགས་པ་གསལ་བར་མཐོང་ནས་རྒྱལ་པོ་ཉིད་སོམ་
ཉིད་དུ་གྱུར་ཏེ། འདི་དག་དགེ་སློང་ནི་མ་ཡིན་མོད་ཀྱི། བདག་གིས་ཅུང་ཟད་ཅིག་དྲིའོ་སྙམ་ནས་དགེ་སློང་གི་ལྟ་བ་དང་། ཚུལ་ཁྲིམས་གང་ཡིན་ཞེས་དྲིས་ན། དེ་རྣམས་གང་གིས་ཀྱང་དགེ་སློང་གི་ལྟ་བ་དང་། ཚུལ་ཁྲིམས་དང་། 
བརྟུལ་ཞུགས་ཅུང་ཟད་ཀྱང་མི་ཤེས་པས་རྒྱལ་པོ་དེ་ལ་ལན་མ་བཏབ་པར་ཅང་མི་སྨྲ་བར་འཁོད་པ་དང་། རྒྱལ་པོས་བསམས་པ། ད་ནི་སངས་རྒྱས་ཀྱི་བསྟན་པ་ནུབ་སྟེ། དཀོན་མཆོག་གསུམ་གྱི་ཚུལ་ཡང་དག་པར་
རྒྱུན་ཆད་པ་ལྟ་ཞིག་སྙམ་ནས་རྒྱལ་པོ་ཡང་མྱ་ངན་ཆེན་པོ་ལངས་ཏེ་ངུ་བར་འགྱུར་རོ། །དེ་ནས་རྒྱལ་པོ་དེས་བན་དེ་ཕལ་པོ་ཆེ་བཏུངས་ཏེ་ཤི་བའི་རོ་རྣམས་བླངས་ཏེ་བསྲེགས་ནས་མཆོད་པ་བྱས་ཏེ། དེའི་འོག་ཏུ་རྒྱལ་པོ་ཉིད་ཀྱང་
བསྟན་པ་ནུབ་པའི་ཐུགས་ངན་གྱིས་ཞལ་འཚོས་ཏེ་འདས་སོ། །དེའི་ཚེ་དེའི་དུས་ན་འཛམ་བུའི་གླིང་གི་དམ་པའི་ཆོས་རིལ་གྱིས་ནུབ་སྟེ། གསུང་རབ་ཀྱི་ཡི་གེ་རྣམས་ཀྱང་དུང་ཕྱིས་པ་བཞིན་དུ་བལྟར་མི་མངོན་པར་གྱུར་ཏོ། །གསེར་ནི་དངུལ་དུ་
འགྱུར་རོ། །དངུལ་ནི་ཟངས་དང་ལྕགས་སུ་འགྱུར་རོ། །ཟངས་དང་ལྕགས་ནི་རྡོར་འགྱུར་རོ། །རིན་པོ་ཆེ་དང་མུ་ཏིག་ནི་རར་འགྱུར་རོ། །ཁ་ཟས་ནི་རོ་དྲུག་ཡོད་པ་ལས་མངར་བ་དང་། སྐྱུར་བ་དང་། ལན་ཚྭའི་རོ་ལ་སོགས་པ་ནི་ནུབ་པོ། །ཁ་བ་དང་། བསྐ་

71-1-229a

བ་གཉིས་ནི་ལུས་སོ། །སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ལ་འཕགས་པ་ཟླ་བའི་སྙིང་པོས་ཞུས་པའི་མདོ་ལས། སངས་རྒྱས་མྱ་ངན་ལས་འདས་ནས་བསྟན་པ་གནས་པ་དང་འཇིག་
པའི་ཚུལ་ལུང་བསྟན་པའི་སྐབས། རྫོགས་སོ།། །། ༄། །རྒྱ་གར་སྐད་དུ། ཨཱརྱ་གོ་ཤྲིང་ག་བྱཱ་ཀ་ར་ཎ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་གླང་རུ་ལུང་བསྟན་པ་ཞེས་བྱ་བ་ཐེག་པ་ཆེན་
པོའི་མདོ། བམ་པོ་གཅིག་གོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། ལྷའི་ཡང་ལྷ་སངས་རྒྱས་ཤཱཀྱ་ཐུབ་
པ་བསྐལ་པ་གྲངས་མེད་པ་གསུམ་ནས་བསོད་ནམས་ཀྱི་ཚོགས་ཀྱི་རྣམ་པར་སྨིན་པས་ཡང་དག་པར་རྫོགས་པའི་སངས་རྒྱས་བརྙེས་ཏེ། འཛམ་བུའི་གླིང་གི་ལྗོངས་ཀྱི་ཡུལ་གཞན་དུ་འདུལ་བའི་སེམས་
ཅན་ཡོངས་སུ་སྨིན་པར་མཛད་ནས་ཡུལ་ཡངས་པ་ཅན་གྱི་ཕྱོགས་ཐུབ་པ་དྲང་སྲོང་ཆེན་པོའི་གནས་རྒྱལ་པོའི་ཁབ་ན། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་བྱམས་པ་ལ་སོགས་
པ་བྱང་ཆུབ་སེམས་དཔའ་དུ་མ་དང་། གནས་བརྟན་ཤཱ་རིའི་བུ་དང་། མཽད་གལ་གྱི་བུ་ལ་སོགས་པ་ཉན་ཐོས་ཆེན་པོ་སྟོང་ཉིས་བརྒྱ་ལྔ་བཅུ་དང་། ཚངས་པ་དང་། བརྒྱ་བྱིན་ལ་སོགས་པ་ལྷ་དུ་
མ་དང་། ལྷའི་རྒྱལ་པོ་རྣམ་ཐོས་ཀྱི་བུ་ལ་སོགས་པ་འཇིག་རྟེན་སྐྱོང་བ་དུ་མ་དང་། ཀླུའི་རྒྱལ་པོ་ཆེན་པོ་དུ་མ་དང་། གནོད་སྦྱིན་མཐུ་ཆེན་པོ་མང་པོ་དང་། དྲི་ཟའི་རྒྱལ་པོ་གཙུག་ཕུད་ལྔ་པ་ལ་སོགས་
པ་དྲི་ཟ་མང་པོ་དང་། མི་འམ་ཅིའི་རྒྱལ་པོ་ཡིད་འོང་ལ་སོགས་པ་མི་འམ་ཅི་དུ་མ་དང་། རྒྱལ་པོ་གཟུགས་ཅན་སྙིང་པོ་ལ་སོགས་པ་འཛམ་བུའི་གླིང་གི་མིའི་རྒྱལ་པོ་མང་པོའི་འཁོར་དུ་མ་དང་ཐབས་

71-1-229b

གཅིག་ཏུ་བཞུགས་སོ། །དེ་ནས་དེའི་ཚེ་ལྷའི་ཡང་ལྷ་སངས་རྒྱས་ཤཱཀྱ་ཐུབ་པས་ཕྱི་མའི་དུས་ཀྱི་ཡུལ་དགེ་བ་ལ་རྗེས་སུ་དགོངས་ཤིང་མངོན་སུམ་དུ་མཛད་ནས་འཁོར་མང་པོ་ལ་བཀའ་སྩལ་པ། རིགས་ཀྱི་
བུ་བྱང་ཕྱོགས་ལོགས་ན། རི་གླང་རུ་དང་ཉེ་བ་ཆུ་བོ་གོ་མའི་འགྲམ་ན་ཐུབ་པ་དྲང་སྲོང་ཆེན་པོའི་ཕོ་བྲང་མཆོད་རྟེན་གོ་མ་ས་ལ་གན་ད་ཞེས་བྱ་བ་ཞིག་ཡོད་དེ། དེར་གདོན་མི་ཟ་བར་བྱ་དགོས་པའི་ཕྲིན་ལས་ཤིག་ཡོད་
པས་ད་གཤེགས་པའི་དུས་ལ་བབ་བོ། །དེ་ནས་དེའི་ཚེ་ལྷའི་ཡང་ལྷ་སངས་རྒྱས་བཅོམ་ལྡན་འདས་འཁོར་ཕལ་མོ་ཆེ་དང་ནམ་མཁའ་ལ་འཕགས་ཏེ། དྲི་ཟའི་རྒྱལ་པོ་གཙུག་ཕུད་ལྔ་པ་ལ་སོགས་པ་དྲི་ཟ་གྲངས་
མེད་པ་ནི་མདུན་ན་ལྷའི་རོལ་མོ་སྣ་ཚོགས་བྱེད། མི་འམ་ཅིའི་རྒྱལ་པོ་ཡིད་འོང་ལ་སོགས་པ་མི་འམ་ཅི་དུ་མ་ནི་སྟེང་ནས་མཆོད་པའི་ལས་བྱེད་ཅིང་། སངས་རྒྱས་བཅོམ་ལྡན་འདས་ལ་དབྱངས་དང་ལྷའི་སྐད་ཡིད་
དུ་འོང་བས་བསྟོད་བཞིན་དུ་འཁོར་དེ་དག་དང་། མཆོད་པ་དེ་དག་དང་བཅས་ཏེ། རི་གླང་རུ་ག་ལ་བ་དེར་གཤེགས་སོ། །གཤེགས་ནས་ལྷའི་ཡང་ལྷ་སངས་རྒྱས་བཅོམ་ལྡན་འདས་བཞེངས་བཞིན་དུ་ཞལ་
བྱང་ཕྱོགས་སུ་མཚོ་ཆེན་པོ་ཡུན་རིང་པོ་ནས་རྒྱ་མཚོ་ལྟར་འདུག་པ་ལ་གཟིགས་ཏེ། སྐུ་དྲང་པོར་བསྲངས་ནས་དེ་བཞིན་གཤེགས་པའི་ཏིང་ངེ་འཛིན་བྱེ་བ་ཕྲག་བརྒྱ་སྟོང་དུ་མ་ལ་སྙོམས་པར་ཞུགས་ཏེ། བསྐལ་
པ་གྲངས་མེད་པ་གསུམ་ནས་བདག་ཉིད་ཀྱི་སངས་རྒྱས་ཀྱི་སྤྱོད་པ་སྨོན་ལམ་དང་བསོད་ནམས་མངོན་སུམ་དུ་མཛད་དོ། །དེ་ནས་དེའི་ཚེ་ལྷའི་ཡང་ལྷ་སངས་རྒྱས་བཅོམ་ལྡན་འདས་ཀྱིས་རི་གླང་རུ་དང་། ཡུལ་
དགེ་བ་དང་། གསེར་གྱི་དཀྱིལ་འཁོར་ནས་སྲིད་པའི་རྩེ་མོའི་བར་དུ་བྱིན་གྱིས་བརླབས་ཏེ། བསྲུང་བ་དང་། གཙང་བ་དང་། བཀྲ་ཤིས་པ་དང་། མཚམས་བཅད་པ་དང་། བཟླས་བརྗོད་དང་། དགེ་བར་མཛད་དོ། །དེ་ནས་

71-1-230a

དེའི་ཚེ་ལྷའི་ཡང་ལྷ་སངས་རྒྱས་བཅོམ་ལྡན་འདས་ཀྱིས་འཁོར་དེ་དག་ཐམས་ཅད་ལ་བཀའ་སྩལ་པ། རི་གླང་རུ་བཅོམ་ལྡན་འདས་ཀྱི་ཕོ་བྲང་མཆོད་རྟེན་གོ་མ་ས་ལ་གན་ད་དང་བཅས། ཡུལ་དགེ་བ་དང་བཅས་པ་འདི་
ནི་བསྐལ་པ་བཟང་པོའི་སངས་རྒྱས་བཅོམ་ལྡན་འདས་ཐམས་ཅད་ཀྱི་ཕྱག་མཚན་དང་། མ་འདྲེས་པ་དང་། ཐུན་མོང་མ་ཡིན་པ་དང་། དབེན་པ་ཡིན་ཏེ། རྒྱུ་དེས་ན་ཡུལ་འདི་ནི་དགེ་བ་ཞེས་བྱའོ། །དེ་ནས་དེའི་ཚེ་ལྷའི་ཡང་ལྷ་
སངས་རྒྱས་བཅོམ་ལྡན་འདས་ཀྱིས་ཡུལ་དགེ་བ་དང་། མཁར་དགེ་བ་ཅན་དང་། དགེ་འདུན་སོ་སོའི་ཀུན་དགའ་ར་བ་དང་། གཙུག་ལག་ཁང་དང་། དགོན་པའི་གནས་དང་། ཡུལ་དེར་སོ་སོ་ནས་བསོད་ནམས་བྱ་བའི་དངོས་
པོ་དགེ་བ་བྱེད་པར་འགྱུར་བའི་རྒྱལ་པོ་དང་། ཆོས་དང་ལྡན་པའི་དད་པ་ཅན་དང་། སྦྱིན་བདག་དང་། ལི་ཐམས་ཅད་འབྱུང་བར་ལུང་བསྟན་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་ལ་བཀའ་སྩལ་
པ། རིགས་ཀྱི་བུ་ཁྱེད་རྣམས་ཀྱིས་ཀྱང་མ་འོངས་པའི་དུས་ན་འབྱུང་བའི་ཡུལ་འདིར་ཅི་ནས་ཀྱང་སེམས་ཅན་རྣམས་དམ་པ་ཆེན་པོ་མྱུར་དུ་ཐོབ་པར་འགྱུར་བ་དང་། ཏིང་ངེ་འཛིན་འགྲུབ་པར་འགྱུར་བར་བྱིན་གྱིས་རློབས་
ཤིག །དེ་ནས་དེའི་ཚེ་བཅོམ་ལྡན་འདས་མཚོ་རོལ་ནས་ཅུང་ཟད་ཅིག་སླར་བཀྱེད་དེ། དེའི་མོད་ལ་རི་གླང་རུའི་སྟེང་ན་གདན་ཁྲི་བཤམས་པ་ལ་སྐྱིལ་མོ་དཀྲུང་བཅས་ཏེ་བཞུགས་ནས་ཞལ་ནུབ་ཕྱོགས་སུ་བཅོམ་ལྡན་འདས་
ཀྱི་ཕོ་བྲང་མཆོད་རྟེན་གོ་མ་ས་ལ་གན་ད་གང་ན་བ་དེ་ལོགས་སུ་གཟིགས་སོ། །དེ་ནས་དེའི་ཚེ་འཇིག་རྟེན་གྱི་ཁམས་གཞན་དང་གཞན་ནས་བྱང་ཆུབ་སེམས་དཔའ་ཉི་ཁྲི་མངོན་པར་ཤེས་པ་ལྔ་དང་ལྡན་པའི་དྲང་སྲོང་
མང་པོ་དང་ཐབས་གཅིག་ཏུ་བཅོམ་ལྡན་འདས་གང་ན་བ་དེ་ལོགས་སུ་ལྷགས་སོ། །ལྷགས་ནས་བཅོམ་ལྡན་འདས་ཀྱི་ཕོ་བྲང་མཆོད་རྟེན་གོ་མ་ས་ལ་གན་ད་ལ་ཡང་ཕྱག་འཚལ་སྐྱབས་སུ་སོང་། སངས་རྒྱས་

71-1-230b

བཅོམ་ལྡན་འདས་འཁོར་དང་བཅས་པ་ལ་ཡང་ཕྱག་འཚལ། སྐྱབས་སུ་སོང་ནས་ཕྱོགས་གཅིག་ཏུ་འཁོད་དོ། །དེ་ནས་དེའི་ཚེ་ན་སངས་རྒྱས་བཅོམ་ལྡན་འདས་ཀྱིས་འཁོར་ཕལ་མོ་ཆེ་འདུས་པར་མཁྱེན་ནས་འཁོར་དེ་དག་ལ་འདི་
སྐད་ཅེས་བཀའ་སྩལ་ཏོ། །བསྐལ་པ་བཟང་པོ་འདི་ལ་སྔོན་སངས་རྒྱས་བཅོམ་ལྡན་འདས་བཞི་བྱུང་སྟེ། དེ་དག་གིས་ཀྱང་མཆོད་རྟེན་གོ་མ་ས་ལ་གན་ད་ཡུལ་དང་བཅས་པ་བྱིན་གྱིས་བརླབས་སོ། །བསྐལ་པ་བཟང་
པོ་འདི་ལ་མ་འོངས་པའི་དུས་ནའང་སངས་རྒྱས་སྟོང་རྩ་གཅིག་འབྱུང་བར་འགྱུར་ཏེ། དེ་དག་ཐམས་ཅད་ཀྱང་འཁོར་དང་བཅས་ཏེ་འདིར་གཤེགས་ནས་མཆོད་རྟེན་གོ་མ་ས་ལ་གན་ད་ཡུལ་དང་བཅས་པ་བྱིན་གྱིས་རློབ་
ཅིང་མཚམས་གཅད་པ་དང་། བཀྲ་ཤིས་པ་དང་། དགེ་བར་མཛད་པར་འགྱུར་རོ། །ང་ཡང་ད་ལྟར་བྱིན་གྱིས་རློབ་པའི་དུས་ལ་བབ་པས་བྱིན་གྱིས་རློབ་པར་མཛད་དོ། །དེ་ནས་དེའི་ཚེ་ལྷའི་ཡང་ལྷ་སངས་རྒྱས་བཅོམ་
ལྡན་འདས་ཏིང་ངེ་འཛིན་ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བ་དང་། གཞན་ཡང་དེ་བཞིན་གཤེགས་པའི་ཏིང་ངེ་འཛིན་གྲངས་མེད་པ་ལ་སྙོམས་པར་ཞུགས་སོ། །དེའི་ཚེ་ཏིང་ངེ་འཛིན་
ལ་སྙོམས་པར་འཇུག་པ་རྣམས་དང་། བསམ་གཏན་པ་རྣམས་ཡོངས་སུ་སྐྱོང་བར་བྱེད་པ་བྱང་ཆུབ་སེམས་དཔའ་མཐུ་ཆེན་ཐོབ་ཀྱིས་ཀྱང་སངས་རྒྱས་འོད་སྲུང་གྱི་མཆོད་རྟེན་གྱི་དྲུང་དུ་བཞུགས་ཏེ། 
ཡུལ་དེ་བྱུང་བར་གྱུར་པའི་ཚེ་བདག་གི་གཟུགས་བརྙན་བྱེད་པར་འགྱུར་བར་ས་གཞི་དེ་བྱིན་གྱིས་བརླབས་སོ། །དེ་བཞིན་དུ་སྨོན་ལམ་ཆེན་པོས་གནས་པ་བྱང་ཆུབ་སེམས་དཔའ་འཇམ་དཔལ་གཞོན་ནུར་
གྱུར་པས་ཀྱང་རི་གླང་རུ་ལ་གཙུག་ལག་ཁང་སྤོང་བྱེད་ཅེས་བྱ་བ་འབྱུང་བར་འགྱུར་བའི་ས་གཞི་དེར་བསྙེན་པ་བྱེད་པ་རྣམས་འགྲུབ་པར་འགྱུར་བར་བྱིན་གྱིས་བརླབས་སོ། །དེ་བཞིན་དུ་ནམ་མཁའ་ལྟར་སྟོབས་

71-1-231a

དཔག་ཏུ་མེད་པ་བྱང་ཆུབ་སེམས་དཔའ་ནམ་མཁའི་སྙིང་པོས་ཀྱང་གཙུག་ལག་ཁང་འཇིག་ཚོགས་སྤོང་བྱེད་ཅེས་བྱ་བ་འབྱུང་བར་འགྱུར་བའི་ས་གཞི་དེ་མཆོད་གནས་སུ་འགྱུར་བར་བྱིན་གྱིས་བརླབས་སོ། །
དེ་བཞིན་དུ་ཐུགས་རྗེ་ཆེན་པོ་དང་ལྡན་པ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་ཀྱི་དབང་ཕྱུག་གིས་ཀྱང་གཙུག་ལག་ཁང་འོད་ཅན་ཞེས་བྱ་བ་འབྱུང་བར་འགྱུར་བའི་ས་གཞི་དེར་དངོས་གྲུབ་འགྲུབ་པར་
བྱིན་གྱིས་བརླབས་སོ། །དེ་བཞིན་དུ་རྟག་ཏུ་བྱམས་པ་དང་ལྡན་པ་བྱང་ཆུབ་སེམས་དཔའ་བྱམས་པས་ཀྱང་གཙུག་ལག་ཁང་བི་སི་ནོ་ཉ་ཞེས་བྱ་བ་འབྱུང་བར་འགྱུར་བའི་ས་གཞི་དེར་བདག་ཉིད་བཞུགས་པར་བྱིན་གྱིས་
བརླབས་སོ། །དེ་བཞིན་དུ་སྤྱོད་པ་ཤིན་དུ་རྣམ་པར་དག་པ་བྱང་ཆུབ་སེམས་དཔའ་སའི་སྙིང་པོས་ཀྱང་གཙུག་ལག་ཁང་ཡེ་ཤེས་རི་ཞེས་བྱ་བ་འབྱུང་བར་འགྱུར་བའི་ས་གཞི་དེ་ཕྱག་བྱ་བར་འོས་པར་འགྱུར་བར་
བྱིན་གྱིས་བརླབས་སོ། །དེ་བཞིན་དུ་འདུལ་བའི་སྐྱེ་བོ་རྣམས་གྲོལ་བར་མཛད་པ་ལ་ཐགས་ཐོགས་མི་མངའ་བ་བྱང་ཆུབ་སེམས་དཔའ་སྨན་གྱི་རྒྱལ་པོས་ཀྱང་གཙུག་ལག་ཁང་བ་ནོ་ཅོ་ཞེས་བྱ་བ་འབྱུང་བར་
འགྱུར་བའི་ས་གཞི་དེར་དངོས་གྲུབ་འགྲུབ་པར་འགྱུར་བར་བྱིན་གྱིས་བརླབས་སོ། །དེ་བཞིན་དུ་རྫུ་འཕྲུལ་ཆེན་པོ་དང་ལྡན་པ་བྱང་ཆུབ་སེམས་དཔའ་ཀུན་དུ་བཟང་པོས་ཀྱང་གཙུག་ལག་ཁང་དགེ་འདུན་སྐྱོང་
ཞེས་བྱ་བ་འབྱུང་བར་འགྱུར་བའི་ས་གཞི་དེར་དངོས་གྲུབ་འགྲུབ་པར་འགྱུར་བར་བྱིན་གྱིས་བརླབས་སོ། །དེ་བཞིན་དུ་སངས་རྒྱས་བཅོམ་ལྡན་འདས་ལ་སོགས་པ་བྱང་ཆུབ་སེམས་དཔའ་གཞན་དག་དང་། དགྲ་
བཅོམ་པ་ཆེན་པོ་རྣམས་ཀྱིས་ཀྱང་ལི་ཡུལ་གང་དང་གང་དུ་གཙུག་ལག་ཁང་དང་། བསྐྱེད་མོ་ཚལ་དང་། དགོན་པའི་གནས་འབྱུང་བར་འགྱུར་བའི་ས་གཞི་ཐམས་ཅད་དཔེར་ན་ཟླ་བ་ཉ་བ་ལ་སྐར་མའི་ཚོགས་རྣམས་

71-1-231b

ཀྱིས་ཡོངས་སུ་བསྐོར་ནས་སྟེང་གི་བར་སྣང་དག་པ་ལ་རྒྱུ་བ་བཞིན་དུ་མཛེས་པ་དང་། ཡིད་དུ་འོང་བ་དང་། རྒྱས་པ་དང་། དགའ་དགའ་ལྟར་འདུག་པར་བྱིན་གྱིས་བརླབས་སོ། །ཡང་དེའི་ཚེ་རི་གླང་རུ་ལ་སངས་རྒྱས་བཅོམ་
ལྡན་འདས་བཞུགས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། དགྲ་བཅོམ་པ་ཆེན་པོ་རྣམས་ཀྱིས་འོད་ཟེར་རྣམ་པ་སྣ་ཚོགས་དུ་མ་བཀྱེ་བས་ལི་ཡུལ་ཐམས་ཅད་སྣང་བ་ཆེན་པོས་ཁྱབ་
པར་བྱས་སོ། །དེ་ནས་སྐད་ཅིག་དེ་ཉིད་ལ་མཚོ་ཆེན་པོ་དེའི་ནང་ན་པད་མ་སུམ་བརྒྱ་ལྔ་བཅུ་རྩ་གསུམ་བྱུང་བར་གྱུར་ཏེ། པད་མ་རེ་རེའི་ནང་ན་ཡང་སངས་རྒྱས་དང་། བྱང་ཆུབ་སེམས་དཔའི་སྐུ་གཟུགས་འོད་དང་བཅས་
པ་སྣང་བར་གྱུར་ཏོ། །དེ་ནས་དེའི་ཚེ་ལྷ་རྣམས་ཀྱིས་སྔོན་མ་མཐོང་བའི་མཚན་མ་མཐོང་ནས་སངས་རྒྱས་བཅོམ་ལྡན་འདས་ལ་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་མཚོའི་ནང་
ནས་པད་མ་སུམ་བརྒྱ་ལྔ་བཅུ་རྩ་གསུམ་སངས་རྒྱས་དང་། བྱང་ཆུབ་སེམས་དཔའི་སྐུ་གཟུགས་དང་བཅས་ཏེ་བྱུང་བ་འདི་མ་འོངས་པའི་དུས་ན་ཡུལ་འདི་བྱུང་བར་གྱུར་པའི་ཚེ་ཡུལ་འདི་ཉིད་དུ་པད་མ་ཇི་སྙེད་པའི་
དགོན་པའི་གནས་དང་། གཙུག་ལག་ཁང་འགཎ་ཌཱི་བརྡུང་བར་འགྱུར་བ་དང་། གནས་གང་དང་གང་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། ཉན་ཐོས་ཆེན་པོ་རྣམས་དང་། འོད་ཟེར་རྣམ་པ་
སྣ་ཚོགས་འགྱེད་ཅིང་ཡུལ་བྱིན་གྱིས་བརླབས་པའི་ས་གཞི་དེ་དག་དང་། དེ་བཞིན་དུ་ངས་དེ་བཞིན་གཤེགས་པའི་ཕོ་བྲང་མཆོད་རྟེན་གོ་མ་ས་ལ་གན་ད་ཡུལ་དགེ་བ་དང་བཅས་པ་བྱིན་གྱིས་བརླབས་པའི་ས་གཞི་འདིར་
དད་པ་ཅན་གྱི་སྦྱིན་བདག་རྣམས་ཀྱིས་སོ་སོ་ནས་སངས་རྒྱས་ལ་སོགས་པའི་གཟུགས་བརྙན་བྱེད་པར་འགྱུར་ཞིང་། གནས་དེ་དང་དེ་དག་ཏུ་བསྙེན་པར་བྱས་ན་ཅི་དང་ཅི་འདོད་པ་འགྲུབ་པར་འགྱུར་བའི་སྔ་ལྟས་ཡིན་ནོ། །

71-1-232a

ཡང་དེའི་ཚེ་ལྷ་རྣམས་སྟན་ལས་ལངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཡུལ་འདི་དུས་ཇི་ཙམ་ཞིག་ན་ནི་འབྱུང་བར་འགྱུར། སུ་ཞིག་གིས་ནི་འབྱིན་པར་བགྱིད་པ་ལགས། 
བཙུན་པ་བཅོམ་ལྡན་འདས་ད་ལྟར་ནི་དགོན་པ་ཆབ་ཆེན་པོའི་གཏེར་ལགས་ན། སུ་ཞིག་གིས་ཇི་ལྟར་འབྱིན་པ་བཀའ་སྩལ་བར་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཉོན་ཅིག །ང་མྱ་ངན་ལས་འདས་
ནས་ལོ་བརྒྱ་ལོན་པའི་ཚེ་རྒྱའི་ཡུལ་དུ་རྒྱའི་རྒྱལ་པོ་ཅ་ཡང་ཞེས་བྱ་བ་བུ་སྟོང་ཚང་བར་བདོག་པ་ཞིག་འབྱུང་བར་འགྱུར་ཏེ། བུ་རེ་རེ་ལ་ཡང་ཡུལ་རེ་རེར་གསར་དུ་ཚོལ་དུ་བཅུག་གོ། །ཕྱིས་ནུབ་ཕྱོགས་ལོགས་ནས་རི་གླང་རུ་དང་། བཅོམ་ལྡན་འདས་
ཀྱི་ཕོ་བྲང་མཆོད་རྟེན་གོ་མ་ས་ལ་གན་ད་ཡོད་པའི་ཡུལ་དེ་བཞིན་གཤེགས་པ་དུ་མས་བྱིན་གྱིས་བརླབས་བརླབས་པ་ཞིག་ཡོད་དོ་ཞེས་ཐོས་ནས་དེ་འདི་སྙམ་དུ་མ་ལ་བདག་ལ་བུ་ཅིག་ཡོད་ན་སངས་རྒྱས་ཕལ་མོ་ཆེས་བྱིན་གྱིས་བརླབས་
པའི་གནས་དེར་ཡུལ་འདེབས་སུ་གཞུག་གོ་སྙམ་དུ་བསམས་ནས། དེའི་ཚེ་རྒྱའི་རྒྱལ་པོས་རྣམ་ཐོས་ཀྱི་བུ་ལ་བུ་ཅིག་བསླངས་སོ། །རྣམ་ཐོས་ཀྱི་བུས་ཀྱང་འཛམ་བུའི་གླིང་འདི་ན་རྒྱལ་པོ་མྱ་ངན་མེད་ཅེས་བྱ་བའི་བུ་ཞིག་བཙས་པ་བྱིན་ཏེ། 
བུ་དེ་ནི་གཟུགས་བཟང་བ། དབྱིབས་མཛེས་པ། བལྟ་ན་སྡུག་པ་ཞིག་ཡིན་ནོ། །བུ་དེའི་དོན་དུ་ས་ལས་ནུ་མ་ཞིག་བྱུང་བ་དང་། བུ་དེ་སྔོན་གྱི་བསོད་ནམས་དང་དགེ་བའི་རྩ་བའི་མཐུས་ནུ་མ་དེ་ལ་ནུ་བར་བྱེད་པས་དེས་ན་བུ་དེའི་མིང་ས་ལས་ནུ་
མ་ནུ་ཞེས་བྱ་བའོ། །བུ་དེ་མྱུར་བར་སྐྱེས་ནས་ཕ་རྒྱའི་རྒྱལ་པོས་རྒྱལ་སྲིད་ཀྱི་དབང་ནི་བསྐུར། ནོར་མང་པོ་ནི་བྱིན། བློན་པོ་ཕལ་མོ་ཆེ་ནི་ལུས་ཀྱི་རིམ་གྲོ་བར་བསྐོས་ནས། རྒྱལ་བུ་ས་ལས་ནུ་མ་ནུ་དེ་བློན་པོ་ཆེན་པོ་ཇང་ཤོ་ཞེས་
བྱ་བ་ལ་སོགས་པ་དམག་དུ་མ་དང་ལྷན་ཅིག་ཏུ་རྒྱའི་ཡུལ་ནས་བྱུང་སྟེ་ཡུལ་འདིར་འོང་བར་འགྱུར་རོ། །འོངས་ནས་འདིར་ཡུལ་འདེབས་པར་འགྱུར་ཏེ། རྒྱལ་བུ་ས་ལས་ནུ་མ་ནུ་དེས་ཡུལ་བཏབ་པའི་ཕྱིར་རྒྱུ་དེས་ན་ཡུལ་འདིའི་

71-1-232b

མིང་ནི་ས་ལས་ནུ་མ་ནུའི་ཡུལ་ཞེས་བྱ་བར་འགྱུར་རོ། །དུས་དེའི་ཚེ་ན་ནུབ་ཕྱོགས་ལོགས་ནས་རྒྱ་གར་གྱི་མི་ཕལ་མོ་ཆེ་འདིར་འོང་བར་འགྱུར་ཏེ། རྒྱལ་པོ་ས་ལས་ནུ་མ་ནུའི་འབངས་སུ་མཆིད་ཀྱིས་འཚལ་ཞིང་ཆུ་སྲིད་གཅིག་པར་དུམ་
བར་གྱུར་ནས། རྒྱའི་བློན་པོ་ཆེན་པོ་ཇང་ཤོ་ལ་སོགས་པས་རིམ་གྱིས་རྒྱ་དང་། རྒྱ་གར་གྱི་གྲོང་དང་། གྲོང་ཁྱེར་དང་། གྲོང་རྡལ་འདེབས་པར་འགྱུར་རོ། །དེ་ལྟར་རྒྱལ་པོ་ས་ལས་ནུ་མ་ནུ་དེ་མི་རབས་དུ་མའི་བར་དུ་ཡུལ་འདིའི་རྒྱལ་
པོ་བྱེད་པར་འགྱུར་རོ། །རྒྱལ་པོ་དེ་རྣམས་ཀྱིས་ཀྱང་རིམ་གྱིས་སོ་སོ་ནས་ཡུལ་འདིར་དགོན་པའི་གནས་དང་གཙུག་ལག་ཁང་བྱས་ན་ཞིང་ཆུ་དང་། འབངས་དང་། ཞལ་ཏ་བྱེད་པ་ཡང་འབུལ་ཞིང་། ལ་ལ་ཡང་བདག་ཉིད་ཀྱང་རབ་
ཏུ་འབྱུང་བར་བྱེད་དོ། །ལ་ལ་ནི་བུ་དང་བུ་མོ་རབ་ཏུ་འབྱིན་པར་བྱེད་དོ། །ལ་ལ་ནི་འབངས་ལས་གྲངས་མེད་པ་ཞིག་རབ་ཏུ་འབྱུང་བར་གནང་བར་བྱེད་དོ། །ཡུལ་འདིར་མི་བྱང་ཆུབ་སེམས་དཔའི་རིགས་ཅན་མང་པོ་ཞིག་བྱུང་སྟེ། 
རྟག་ཏུ་དཀོན་མཆོག་གསུམ་ལས་དགེ་བའི་རྩ་བ་སྩོགས་ཤིང་བསོད་ནམས་བྱ་བའི་དངོས་པོ་བྱེད་པར་འགྱུར་རོ། །དེ་ལྟར་ན་ཡུལ་འདི་ནི་རྒྱལ་པོ་ས་ལས་ནུ་མ་ནུས་ཡུལ་གཏོད་པའི་ཚུལ་དེ་ལྟ་བུས་འབྱུང་བར་འགྱུར་རོ། །ཡུལ་
འདི་ནི་སངས་རྒྱས་འབྱུང་བ་རེ་རེའི་ཚེ་ཡང་འབྱུང་ཞིང་རྒྱས་པར་འགྱུར་རོ། །ཅིའི་ཕྱིར་ཡུལ་གཞན་དང་གཞན་དག་གི་ནི་ཞིག་ནས་ཡུན་རིང་མོ་ཞིག་ཏུ་སྟོང་ཞིང་དགོན་པར་འདུག་ལ་ཡུལ་དགེ་བ་ནི་སངས་རྒྱས་འབྱུང་བ་རེ་རེའི་ཚེ་
མི་རྣམས་ཀྱིས་བརྒྱན་ཅིང་མཛེས་པར་འགྱུར་ཞེ་ན། འདི་ལྟར་ཡུལ་འདི་ནི་ཐུབ་པ་དྲང་སྲོང་ཆེན་པོའི་གནས། དེ་བཞིན་གཤེགས་པའི་སྤྱོད་ཡུལ་མཆོད་རྟེན་གོ་མ་ས་ལ་གན་ད་ཞེས་བྱ་བ་རི་གླང་རུ་དང་ཉེ་བ་ཆུ་བོ་གོ་མའི་
འགྲམ་ན་ཡོད་པའི་ཕྱིར་རོ། །མཆོད་རྟེན་འདི་མདོ་སྡེའི་ནང་ནས་ནི་མིང་གོ་མ་ས་ལ་གན་ད་ཞེས་བྱའི། འཇིག་རྟེན་ཕལ་གྱི་ཐ་སྙད་དུ་ནི་ཆུ་བོ་གོ་མའི་འགྲམ་ཞེས་བྱ་བར་འདོགས་པར་འགྱུར་ཏེ། འདི་ལྟར་ཇི་སྲིད་དུ་

71-1-233a

མཆོད་རྟེན་ཆུ་བོ་གོ་མའི་འགྲམ་ཞེས་བྱ་བ་དང་། འོད་སྲུང་གི་མཆོད་རྟེན་འདི་གཉིས་རྒྱས་ཤིང་མཆོད་གནས་སུ་བྱེད་པ་དེ་སྲིད་དུ་ནི་ཡུལ་དགེ་བ་ཡང་རྒྱས་ཤིང་བཟང་པོར་འགྱུར་རོ། །ནམ་མཆོད་རྟེན་འདི་གཉིས་
རྒུད་པའི་ཚེ་ཡུལ་ཡང་རྒུད་ཅིང་སྟོངས་པར་འགྱུར་རོ། །དེ་ནས་དེའི་ཚེ་འཁོར་དེར་འདུས་པའི་ལྷ་རྣམས་ཀྱིས་བཅོམ་ལྡན་འདས་ཀྱིས་བཀའ་སྩལ་པའི་གསུང་དེ་ཐོས་ནས་མཆོད་རྟེན་གོ་མ་ས་ལ་གན་ད་དང་། རི་གླང་རུ་ལ་དད་པ་དང་
གུས་པ་ཆེན་པོ་རྙེད་དེ། སངས་རྒྱས་བཅོམ་ལྡན་འདས་ལ་མགོ་བོས་ཕྱག་འཚལ་སྐྱབས་སུ་སོང་ནས་སྤྱན་སྔར་འདི་སྐད་དུ་བདག་ཅག་ཀྱང་དུས་དེའི་ཚེ་ཡུལ་འདིར་རིགས་མཐོན་པོར་སྐྱེས་ནས་བདེ་བར་གཤེགས་པའི་བསྟན་
པ་སྲུང་ཞིང་། ཡུལ་ཆོས་ཀྱི་བཀའ་ཁྲིམས་མི་ཉམས་པར་གྱུར་ཅིག་ཅེས་སྨོན་ལམ་བཏབ་བོ། །དེ་ནས་དེའི་ཚེ་བཅོམ་ལྡན་འདས་ཀྱིས་ལྷའི་རྒྱལ་པོ་རྣམ་ཐོས་ཀྱི་བུ་དང་། བྱང་ཆུབ་སེམས་དཔའ་སེམས་
དཔའ་ཆེན་པོ་འདུ་ཤེས་ཅན་ཞེས་བྱ་བ་དང་། ལྷའི་ལྷ་མི་ཕམ་པ་ཞེས་བྱ་བ་དང་། ཀླུའི་རྒྱལ་པོ་ཁྱིམ་འཚིག་ཅེས་བྱ་བ་དང་། ལྷ་ནམ་མཁའི་དབྱངས་ཤེས་བྱ་བ་དང་། ལྷ་གསེར་གྱི་ཕྲེང་བ་ཅན་ཞེས་བྱ་བ་དང་། ལྷ་མོ་
ལྕགས་ཀྱུ་ཅན་ཞེས་བྱ་བ་དང་། ལྷ་མོ་གནས་ཅན་ཞེས་བྱ་བ་རྣམས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱེད་རྣམས་ལ་མཆོད་རྟེན་གོ་མ་ས་ལ་གན་ད་དང་། རི་གླང་རུ་ཡུལ་དང་བཅས་པ་དང་། ངའི་བསྟན་པ་
དང་། སྲས་རྣམས་ཡོངས་སུ་གཏད་ཀྱིས་ཡོངས་སུ་བསྲུང་བ་དང་། བསྐྱབ་པ་དང་། བསྐྱང་བ་དང་། མཆོད་གནས་སུ་འགྱུར་བར་གྱིས་ཤིག །ཡུལ་འདིའི་རྒྱལ་པོ་དང་། ཡུལ་འཛིན་པའི་བློན་པོ་དང་། སྦྱིན་
བདག་ཆོས་དང་འཐུན་པ་རྣམས་ཀྱང་ཡོངས་སུ་གཏད་ཀྱིས་དེ་བཞིན་དུ་གྱིས་ཤིག །རི་གླང་རུ་ལུང་བསྟན་པའི་མདོ་འདི་ཡང་ཡོངས་སུ་གཏད་ཀྱིས་འཕེལ་ཞིང་རྒྱས་པར་གྱིས་ཤིག །གང་གི་ཚེ་ཡུལ་འདི་མེ་འམ་ཆུ་

71-1-233b

འམ་ཕ་རོལ་ཀྱི་དམག་གིས་ཉེན་ཅིང་ཕོངས་པར་གྱུར་པ་ན་མདོ་འདི་བཀླག་པ་དང་། ཁ་ཏོན་དང་། མཆོད་པ་དང་། བསམ་པ་དང་། བསྒོམ་པ་བྱས་ན་དེས་ན་ཡུལ་དེའི་གནོད་པ་ཞི་བར་འགྱུར་རོ། །མ་འོངས་པའི་དུས་
ན་སེམས་ཅན་རྣམས་ཀྱི་རྣམ་པར་སྨིན་པས་ཡུལ་འདིར་སུམ་པ་རྣམས་དང་བོད་རྣམས་འོང་བར་འགྱུར་གྱིས་དེའི་ཚེ་མདོ་འདི་ལྷོགས་ཤིག་དང་། མདོ་འདི་ཐོས་ནས་མདོ་འདིའི་མཐུ་དང་། ལྷ་རྣམས་ཀྱི་བྱིན་གྱིས་
དད་པ་མེད་པ་དེ་རྣམས་ཡུལ་འཇིག་པར་མི་བྱེད་ཅིང་ཡིད་ཀྱང་འགྱོད་པར་འགྱུར་རོ། །མ་འོངས་པའི་དུས་ན་ཡུལ་འདིར་རྒྱ་རྣམས་ཀྱང་འོང་བར་འགྱུར་གྱིས་དེའི་ཚེ་མདོ་འདི་ལྷོགས་ཤིག་དང་། མདོ་འདི་ཐོས་
ནས་དད་པ་སྐྱེ་བར་འགྱུར་རོ། །དད་པའི་སྟོབས་ཀྱིས་ཡུལ་མི་འཇིག་ཅིང་ཕྱིར་ཞིང་སྲུང་བ་དང་། བསོད་ནམས་བྱ་བའི་དངོས་པོ་ཡང་བྱེད་པར་འགྱུར་ཏེ། རྒྱུ་དེས་ན་མདོ་འདི་ནི་ཡུལ་ལ་ཕན་འདོགས་
པར་བྱེད་པ་ཡིན་ནོ། །མདོ་འདིའི་ཕན་ཡོན་གཞན་ཡང་མང་དུ་ཡོད་དེ་ཡུན་ཐུང་ངུས་ནི་བརྗོད་པར་མི་ནུས་སོ། །དེའི་ཕྱིར་མདོ་འདི་ཁྱེད་རྣམས་ལ་ཡོངས་སུ་གཏད་དོ། །དེ་ནས་དེའི་ཚེ་རྣམ་ཐོས་ཀྱི་བུ་ལ་
སོགས་པ་ལྷ་རྣམས་དང་། ཀླུའི་རྒྱལ་པོ་དང་། ལྷ་མོ་དེ་དག་ཐམས་ཅད་འཁོར་དང་བཅས་ཏེ་ལངས་ནས་བཅོམ་ལྡན་འདས་ཀྱི་སྤྱན་སྔར་པུས་མོའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་འདི་སྐད་ཅེས་
གསོལ་ཏོ། །བཙུན་པ་བཅོམ་ལྡན་འདས་བདག་ཅག་རྣམས་ཀྱིས་བཅོམ་ལྡན་འདས་ཀྱི་བཀའ་སྤྱི་བོས་ལེན་པར་འཚལ་ལོ། །ཡང་གསོལ་པ། སྟོན་པ་བཅོམ་ལྡན་འདས་ཀྱིས་ཇི་སྐད་བཀའ་སྩལ་པ་བཞིན་དུ་
མཆོད་རྟེན་གོ་མ་ས་ལ་གན་ད་དང་། རི་གླང་རུ་ཡུལ་དང་བཅས་པ་ཐམས་ཅད་ཀྱང་ཡོངས་སུ་བསྲུང་བར་འཚལ། བདེ་བར་གཤེགས་པའི་བསྟན་པ་དང་ཆོས་དང་འཐུན་པའི་རྒྱལ་པོ་དང་། རབ་ཏུ་བྱུང་བ་དང་། 

71-1-234a

ཆོས་དང་འཐུན་པར་ཡུལ་འཛིན་པ་དང་། ཆོས་དང་འཐུན་པའི་སྦྱིན་བདག་དང་། གང་ཞིག་བསོད་ནམས་བྱ་བའི་དངོས་པོ་བགྱིད་པར་འགྱུར་བ་དེ་དག་ཐམས་ཅད་ཀྱང་ཡོངས་སུ་བསྲུང་བར་ནི་འཚལ་ན། བཅོམ་ལྡན་
འདས་ཇི་སྲིད་དུ་ཡུལ་འདིར་དཀོན་མཆོག་གསུམ་མཆོད་གནས་སུ་བགྱིད་པ་དང་། ཡུལ་འཛིན་པས་ཀྱང་ཆོས་དང་འཐུན་པར་ཡུལ་སྐྱོང་ཞིང་ཆོས་དང་མི་མཐུན་པའི་སེམས་ཅན་རྣམས་ཀྱི་མགོན་མི་བགྱིད་པ་དེ་སྲིད་དུ་ནི་
བདག་ཅག་གིས་ཡོངས་སུ་བསྲུང་བར་རྔོ་ཐོག་སྟེ། མདོ་འདི་ཡང་ལི་ཡུལ་ཡུན་རིང་དུ་གནས་པར་བགྱི་བའི་སླད་དུ་ལི་ཡུལ་ལས་ཉི་འོག་ཏུ་གྱུར་པའི་རྒྱལ་པོ་དང་། བློན་པོ་རྣམས་ལ་མདོ་སྡེ་འདི་ནི་བཅོམ་ལྡན་འདས་ཀྱིས་ལི་
ཡུལ་གྱི་ཆེད་དུ་རི་གླང་རུ་ལ་བཤད་པ་ཡིན་ནོ་ཞེས་རྣར་གྲགས་པར་བགྱི། སུག་པར་ཐོབ་པར་བགྱི། སེམས་བསྒྱུར་བར་བགྱིའོ། །བཅོམ་ལྡན་འདས་ནམ་ཡུལ་འདིར་དཀོན་མཆོག་གསུམ་མཆོད་གནས་སུ་མི་བགྱིད་ཅིང་། ཆོས་
དང་མི་མཐུན་པ་རྣམས་ཀྱི་མགོན་ལྷག་པར་བགྱིད་པ་དེའི་ཚེ་བདག་ཅག་རྣམས་ཀྱི་གཟི་བརྗིད་དང་མཐུ་སྟོབས་ཉམས་པར་འགྱུར་བས་ཡུལ་འདིའི་ཆེད་དང་བསྲུང་བར་ནི་རྔོ་མི་ཐོག་གོ། །དེ་ཅིའི་སླད་དུ་ཞེ་ན། བདག་ཅག་གི་
མཐུ་སྟོབས་དང་གཟི་བརྗིད་ནི་བདེ་བར་གཤེགས་པའི་བསྟན་པ་དང་། ཆོས་དང་འཐུན་པར་ཡུལ་ཚུལ་བཞིན་དུ་སྐྱོང་བ་དང་། བསོད་ནམས་བྱ་བའི་དངོས་པོ་དགེ་བའི་རྩ་བའི་མཐུས་འཕེལ་བར་འགྱུར་བ་ལགས་སོ། །
དེ་ནས་དེའི་ཚེ་སངས་རྒྱས་བཅོམ་ལྡན་འདས་གདན་ལས་བཞེངས་ནས་རི་གླང་རུའི་སྟེང་གི་འགྲམ་ནས་མཆོད་རྟེན་གོ་མ་ས་ལ་གན་ད་གང་ན་བ་དེ་ལོགས་སུ་གཟིགས་ནས། ཡང་ནས་ཡང་དུ་དེ་བཞིན་གཤེགས་པའི་སྤྱོད་
ཡུལ་མཆོད་རྟེན་གོ་མ་ས་ལ་གན་ད་རི་གླང་རུ་དང་བཅས་པ་ལན་གཉིས་ལན་གསུམ་གྱི་བར་དུ་བྱིན་གྱིས་བརླབས་ནས་ལི་ཡུལ་ཐམས་ཅད་དང་། མཚོའི་ནང་ན་གནས་པའི་སེམས་ཅན་གྲངས་མེད་པ་རྣམས་ལ་འོད་ཟེར་

71-1-234b

དང་ཐུགས་རྗེ་ཆེན་པོས་ཁྱབ་པར་མཛད་དེ། འོད་ཟེར་དེ་དང་ཐུགས་རྗེ་ཆེན་པོ་དེས་ཆུ་ན་གནས་པའི་སེམས་ཅན་དེ་དག་ཐམས་ཅད་ཀྱི་སྡུག་བསྔལ་ནི་ཞི་བར་འགྱུར། ཁྲོ་བ་དང་འཁོན་དུ་འཛིན་པ་དང་ནི་ཕྲལ་ཏེ། བྱམས་པའི་སེམས་
དང་ལྡན་པར་གྱུར་ཅིང་ལྷའི་བདེ་བ་དང་ལྡན་ནས་སྐད་ཅིག་དེ་ཉིད་ལ་སེམས་ཅན་དེ་དག་ལས་གྲངས་མེད་པ་ཞིག་ཚེ་འཕོས་ནས་ལྷ་དང་མི་རྣམས་ཀྱི་ནང་དུ་སྐྱེས་ཏེ། སངས་རྒྱས་ཉིད་དུ་འགྱུར་བའི་ས་བོན་རྙེད་ཅིང་བྱང་ཆུབ་ལས་ཕྱིར་
མི་ལྡོག་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ལྷ་རྣམས་ལ་ལན་གསུམ་གྱི་བར་དུ་བོས་ནས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱེད་ཀྱིས་དམ་བཅས་པ་རྣམས་ནི་བརྩོན་འགྲུས་མེད་པར་མི་
འགྲུབ་བོ། །རིགས་ཀྱི་བུ་ངས་བསྐལ་པ་གྲངས་མེད་པ་གསུམ་གྱི་བར་དུ་དཀའ་བ་སྤྱད་པའི་བསྟན་པ་འདི་དང་མཆོད་རྟེན་གོ་མ་ས་ལ་གན་ད་ཡུལ་དང་བཅས་པ་ཁྱེད་རྣམས་ལ་ཡོངས་སུ་གཏད་ཀྱིས་ཡོངས་སུ་བསྲུངས་
ཤིག །ཁྱེད་རྣམས་ལས་གང་ཞིག་གིས་ང་རྗེས་སུ་དྲན་ཞིང་གཟུངས་ཡོད་པ་དང་། བསྟན་པ་བསྲུང་བ་དེས་ནི་བསྟན་པ་འདི་ལ་རབ་ཏུ་བྱུང་བ་རྣམས་ཡོངས་སུ་བསྲུང་བར་གྱིས་ཤིག །དེ་ཅིའི་ཕྱིར་ཞེ་ན། མི་
ཁྱིམ་པ་ལ་ལ་ཞིག་ལོ་བརྒྱའི་བར་དུ་ཉིན་རེ་ཞིང་དགེ་བའི་རྩ་བ་བསོད་ནམས་ཆེན་པོ་བྱེད་ལ། འགའ་ཞིག་ཉིན་གཅིག་རབ་ཏུ་བྱུང་ནས་བསྟན་པ་ལ་གནས་ན་སྔ་མས་ཕྱི་མའི་བསོད་ནམས་ཀྱི་བརྒྱའི་ཆར་ཡང་མི་ཆོག་གོ། །
དེ་ཅིའི་ཕྱིར་ཞེ་ན། སངས་རྒྱས་གང་གཱའི་ཀླུང་གི་བྱེ་མ་སྙེད་ཐམས་ཅད་ཀྱང་སྔར་ཁྱིམ་གྱི་གནས་སྤངས་ཏེ་རབ་ཏུ་བྱུང་ནས་སྤྱོད་ལམ་དེ་ཉིད་ཀྱིས་བྱང་ཆུབ་ཆེན་པོ་བརྙེས་སོ། །ང་ཡང་ཕ་རོལ་ཏུ་ཕྱིན་པ་དྲུག་ཡོངས་
སུ་རྫོགས་ཏེ། ས་བཅུ་བརྙེས་ནས་སྲིད་པ་ཐ་མའི་ཚེ་ནམ་ཕྱེད་ན་རྒྱལ་པོའི་ཁབ་ནས་བྱུང་སྟེ་ནགས་ཚལ་དུ་གཤེགས་སོ། །ནགས་ཚལ་ནས་བཞོན་པ་རྒྱལ་པོ་ཡབ་ཀྱི་ཐོག་ཏུ་དཀྲི་ནས་རང་གི་སྐྲ་རལ་གྲིས་བྲེགས་

71-1-235a

ཏེ། ངའི་གོས་གྱ་ནོམ་པ་རིན་ཐང་མེད་པ་རྔོན་པ་དེ་དག་ལས་ཆོས་གོས་ངུར་སྨྲིག་ཏུ་བརྗེས་སོ། །ངས་ཆོས་གོས་དེ་གྱོན་ནས་དུས་གསུམ་གྱི་སངས་རྒྱས་ཐམས་ཅད་ལ་ཕྱག་འཚལ་སྐྱབས་སུ་སོང་ནས་རབ་ཏུ་བྱུང་བའི་
སྤྱོད་ལམ་བཟུང་བ་དང་ལྷ་ཐམས་ཅད་ང་ལ་ཕྱག་འཚལ་སྐྱབས་སུ་སོང་ནས་ཕྱི་བཞིན་དུ་འབྲང་ངོ་། །ང་ཡང་སྤྱོད་ལམ་དེ་ཉིད་ཀྱིས་ཡང་དག་པར་རྫོགས་པའི་སངས་རྒྱས་བརྙེས་སོ། །དེའི་ཕྱིར་བདེ་བར་གཤེགས་
པའི་བསྟན་པ་ནི་དམ་པ་ཡིན་པར་ཤེས་པར་བྱའོ། །རབ་ཏུ་བྱུང་བ་ནི་བསོད་ནམས་དང་ལྡན་པར་ཤེས་པར་བྱའོ། །འཇིག་རྟེན་ན་རབ་ཏུ་བྱུང་བས་ཐོབ་པ་མ་གཏོགས་པར་ཁྱིམ་པའི་ཆ་ལུགས་ཀྱིས་དགྲ་
བཅོམ་པ་འམ། རང་སངས་རྒྱས་སམ། བླ་ན་མེད་པའི་བྱང་ཆུབ་ཐོབ་པ་ནི་སུས་ཀྱང་མ་ཐོས་མ་མཐོང་ངོ་། །རབ་ཏུ་བྱུང་བའི་སྤྱོད་ལམ་འདི་ནི་འཇིག་རྟེན་ན་ལྷ་ལ་སོགས་པ་ཐམས་ཅད་ཀྱི་མཆོད་གནས་
ཡིན་ནོ། །དེ་ནས་དེའི་ཚེ་ལྷ་དང་ལྷ་མོ་དེ་ཐམས་ཅད་སྟན་ལས་ལངས་ནས་དབྱངས་གཅིག་ཏུ་སངས་རྒྱས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་
རྣམས་ཀྱིས་བཅོམ་ལྡན་འདས་ཀྱིས་ཇི་ལྟར་བཀའ་སྩལ་པ་བཞིན་འཚལ་ཞིང་བསམས་བཞིན་དུ་ནི་བཀའ་ལས་འགལ་བ་མི་འཚལ་ལོ། །ཡུལ་འདི་སངས་རྒྱས་ཀྱིས་བསྟན་པ་དང་། དེ་བཞིན་གཤེགས་
པའི་སྤྱོད་ཡུལ་མཆོད་རྟེན་དང་བཅས་པ་ཡང་ཀུན་དུ་བསྲུང་བ་དང་། བསྐྱང་བ་དང་། རྗེས་སུ་གཟུང་བར་འཚལ་གྱིས། བཅོམ་ལྡན་འདས་ཀྱིས་ཀྱང་བདག་ཅག་རྣམས་ལ་མཐུ་བཏང་དུ་གསོལ། དེ་ཅིའི་
སླད་དུ་ཞེ་ན། མ་འོངས་པ་རྩོད་པའི་དུས་ན་བྱིན་གྱིས་བརླབས་བརླབས་པའི་ཡུལ་འདིར་དགྲ་མང་པོ་དང་། མ་དད་པ་དང་། ཕྱིར་རྒོལ་བ་བདེ་བར་གཤེགས་པའི་བསྟན་པ་ལ་དད་པའི་ཁྱད་པར་མི་རྙེད་ཅིང་། 

71-1-235b

བསྟན་པ་གཞིག་པའི་སླད་དུ་བརྩོན་པ་དག་འབྱུང་བའི་སླད་དུའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ལྷ་དེ་དག་ལ་ལེགས་སོ་ཞེས་བྱ་བ་གནང་སྟེ། སྐྱེས་བུ་དམ་པ་རྣམས་ལེགས་སོ་ལེགས་སོ། །ངས་
ཀྱང་ཡུལ་འདི་བྱིན་གྱིས་བརླབས་ཟིན་ཏེ། བྱིན་གྱིས་བརླབས་པ་དེ་ཉིད་ཀྱིས་མཚམས་བཅད་པ་ཡང་ཡིན་ནོ། །མ་འོངས་པ་རྩོད་པའི་དུས་ན་ཡུལ་འདི་གཞོམ་པའི་ཕྱིར་སུམ་པའི་དམག་ཕལ་མོ་ཆེ་དང་། གྲུ་གུ་
རུས་སྣ་ཚོགས་དང་། ཧོར་དང་། གཞན་ཡང་དད་པ་མེད་པ་དག་འོང་བར་འགྱུར་ཏེ། དེའི་ཚེ་ཡུལ་གཞན་དང་གཞན་དག་ནས་དེ་བཞིན་གཤེགས་པའི་གཟུགས་བརྙན་བྱིན་གྱིས་བརླབས་པ་དག་ཡུལ་འདིར་
གཤེགས་ནས་ཡུལ་གྱི་ས་མཚམས་བསྲུང་བར་མཛད་དེ། བསོད་ནམས་ཀྱི་སྟོབས་དེས་ན་ཡུལ་འདི་གཏན་བརླག་པར་མི་འགྱུར་རོ། །གཟུགས་བརྙན་དེ་དག་གི་ཕྱི་བཞིན་དུ་བྱང་ཆུབ་སེམས་དཔའ་དང་། 
ལྷ་དང་། ཀླུ་མཐུ་སྟོབས་དང་ལྡན་པ་མང་པོ་དག་འོང་ཞིང་ཡུལ་ཡུལ་དུ་གནོད་པ་རྣམས་ཟློག་པར་བྱེད། དགྲ་རྣམས་ཀྱིས་ཡུལ་མི་ཆོམས་པར་བྱེད་དེ། བདེ་བ་ཅན་ཞེས་བྱ་བའི་མཁར་ནས་དེ་བཞིན་གཤེགས་པ་
བདེ་བའི་འབྱུང་གནས་ཤེས་བྱ་བའི་གཟུགས་བརྙན་གཤེགས་ནས་ནུབ་ཕྱོགས་མཁར་ཀོ་ཤེད་དུ་བཞུགས་ཤིང་ཡུལ་གྱི་ས་མཚམས་བསྲུང་བར་འགྱུར་རོ། །བྱང་ཕྱོགས་ཡུལ་ཤེ་ན་ཞ་ཞེས་བྱ་བའི་དེ་བཞིན་
གཤེགས་པའི་གཟུགས་བརྙན་ཤེ་ན་ཞ་ཞེས་བྱ་བ་སའི་འོག་ནས་འབྱུང་བར་འགྱུར་ཞིང་ཡུལ་གྱི་ས་མཚམས་བསྲུང་བར་འགྱུར་རོ། །དེ་བཞིན་གཤེགས་པའི་གཟུགས་བརྙན་ཀིའུ་ལང་ཞེས་བྱ་བར་གཤེགས་
ནས་ཤར་ཕྱོགས་ཡུལ་ཕྱེ་མ་ཞེས་བྱ་བའི་མཁར་དུ་ཞུགས་ཤིང་ཡུལ་གྱི་ས་མཚམས་བསྲུང་བར་འགྱུར་རོ། །དེ་བཞིན་གཤེགས་པའི་གཟུགས་བརྙན་ཕྱི་སེ་ཞེས་བྱ་བ་གཤེགས་ནས། བྱང་ཕྱོགས་རི་

71-1-236a

གླང་རུ་ལ་འོད་བསྲུང་གི་མཆོད་རྟེན་གྱི་དྲུང་དུ་བཞུགས་ཤིང་དགེ་སློང་དགོན་པ་པ་རྣམས་ཀྱི་དགེ་བའི་རྩ་བ་བསྐྱེད་ཅིང་། དེ་བཞིན་གཤེགས་པའི་བསྟན་པ་དང་། ཡུལ་གྱི་ས་མཚམས་བསྲུང་བར་
འགྱུར་རོ། །མཁར་དགེ་བ་ཅན་ཞེས་བྱ་བའི་ནང་ན་ཚོང་འདུས་ཀ་ས་དི་ཟེ་ཞེས་བྱ་བར་དེ་བཞིན་གཤེགས་པའི་གཟུགས་བརྙན་རྒྱལ་པོའི་ཕོ་བྲང་གནས་ཤེས་བྱ་བ་བཞུགས་ཤིང་མཁར་དགེ་བ་ཡུལ་དང་བཅས་པའི་
ས་མཚམས་བསྲུང་བར་འགྱུར་རོ། །ས་གཞི་ཉོ་མོ་ཉ་ཞེས་བྱ་བ་གང་དུ་རྒྱལ་པོ་ཡོ་ལ་ཞེས་བྱ་བས་མཁར་བརྩིག་པའི་གྲོས་བྱེད་པར་འགྱུར་བ་དེར་དེ་བཞིན་གཤེགས་པའི་གཟུགས་བརྙན་ཅུ་གོ་པ་ན་ཞེས་བྱ་བ་བཞུགས་
ཤིང་མཁར་དགེ་བ་ཅན་ཞེས་བྱ་བ་ཡུལ་དང་བཅས་པའི་ས་མཚམས་བསྲུང་བར་འགྱུར་རོ། །གཙུག་ལག་ཁང་དི་ཛྱོ་ཞེས་བྱ་བར་དེ་བཞིན་གཤེགས་པ་མར་མེ་མཛད་ཀྱི་གཟུགས་བརྙན་ཐོར་ཁོང་དུ་བྱས་པ་གཤེགས་པར་འགྱུར་ཏེ། 
གཟུགས་བརྙན་དེ་ནི་འཛམ་བུའི་གླིང་གི་གཟུགས་བརྙན་ཐོར་ཁོང་དུ་བྱས་པ་ཐམས་ཅད་ཀྱི་ཐོག་མར་འབྱུང་བ་ཡིན་ནོ། །གཟུགས་བརྙན་དེ་ལ་མི་རྣམས་ཀྱིས་ནི་མཚན་བཀོར་བའི་མར་མེ་མཛད་ཅེས་བྱ་བར་འདོགས་པར་འགྱུར་
ཏེ། དེ་ནི་ལི་ཡུལ་གྱི་གཟུགས་བརྙན་ཐོར་ཁོང་དུ་བྱེད་པ་ཐམས་ཅད་ཀྱི་དཔེར་འབྱུང་ཞིང་། བདེ་བར་གཤེགས་པའི་བསྟན་པ་ཡུལ་དང་བཅས་པ་ཡོངས་སུ་བསྲུང་བར་འགྱུར་རོ། །གཞན་ཡང་དེ་བཞིན་གཤེགས་པ་རིན་ཆེན་མང་
གི་གཟུགས་བརྙན་ཡུལ་འདིའི་དབུས་སུ་གཤེགས་ནས་ཕྱོགས་བཅུའི་མཚམས་གཅད་པར་མཛད་དེ། ཇི་སྲིད་དུ་དེ་བཞིན་གཤེགས་པའི་གཟུགས་བརྙན་ཕྱོགས་ཕྱོགས་ན་བཞུགས་པ་དེ་དག་མཆོད་གནས་སུ་བྱེད་པ་དེ་སྲིད་
དུ་ཡུལ་འདི་བརླག་པར་མི་འགྱུར་རོ། །ཡུལ་འདི་ནས་སྐྱེས་པའི་མི་འམ། ཡུལ་གཞན་ནས་སྐྱེས་པའི་མི་ལ་ལ་ཞིག་དེ་བཞིན་གཤེགས་པའི་གཟུགས་བརྙན་དེ་དག་ལ་སྙིང་ཐག་པ་ནས་དད་པ་དང་གུས་པ་དང་རབ་ཏུ་དང་བར་

71-1-236b

བྱེད་ཅིང་། འདི་སྙམ་དུ་བདེ་བར་གཤེགས་པའི་གཟུགས་བརྙན་འདི་དག་ནི་ཡུལ་འདི་བསྲུང་བའི་སླད་དུ་གཤེགས་སོ་སྙམ་དུ་ཡང་སེམས་ན། གཟུགས་བརྙན་དེ་དག་ཀྱང་སངས་རྒྱས་བཞུགས་པ་བཞིན་དུ་དོན་མཛད་པར་འགྱུར་རོ། །
དེ་ཅིའི་ཕྱིར་ཞེ་ན། གཟུགས་བརྙན་དེ་དག་ང་དང་དུས་གསུམ་དུ་གཏོགས་པའི་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པའི་ཕྱིར་རོ། །གཞན་ཡང་ཡུལ་འདིར་ངའི་གཟུགས་བརྙན་ཆེན་པོ་ཤིང་རྟས་འདྲེན་པ་བྱས་ཏེ། མཁར་
དགེ་བ་ཅན་ཞེས་བྱ་བའི་ནང་དུ་བཞག་ནས་མཆོད་གནས་ཆེན་པོར་བྱེད་པར་འགྱུར་རོ། །དེས་ན་ཡུལ་འདིར་ཕྱོགས་དང་ཕྱོགས་མཚམས་ནས་ཚོང་དཔོན་ཆེན་པོ་རྣམས་འོང་བར་འགྱུར་ཞིང་གནོད་པ་རྣམས་ཀྱང་ཞི་བར་འགྱུར་རོ། །
གཞན་ཡང་ཡུལ་འདིར་དེ་བཞིན་གཤེགས་པའི་གཟུགས་བརྙན་ཉིས་བརྒྱ་རྩ་བརྒྱད་འོད་སྲུང་གི་མཆོད་རྟེན་དང་བཅས་པར་འབྱུང་བར་འགྱུར་ཏེ། དེ་དག་ཐམས་ཅད་ཀྱང་ཆོ་འཕྲུལ་ཆེན་པོ་སྟོན་ཅིང་སེམས་ཅན་རྣམས་ཀྱི་སྡིག་
པ་ཆེན་པོ་ཡོངས་སུ་སྦྱོང་བ་དང་། གནོད་པ་སེལ་བར་མཛད་པར་འགྱུར་རོ། །ཡུལ་འདིར་གནོད་པ་དང་། འཇིགས་པ་དང་། སྐྲག་པ་འགའ་ཞིག་བྱུང་ན་ཡུལ་འདིའི་ཆེད་དུ་ཕྱོགས་ལྔར་སྦྱོར་བ་བྱས་ཏེ། རྒྱལ་པོ་དང་བློན་པོ་རྣམས་
ཡུལ་འཛིན་པ་གང་ཞིག་འཇིགས་པ་དང་བྲལ་བར་བྱ་བའི་ཕྱིར་བདེ་བར་གཤེགས་པའི་བསྟན་པ་ལས་བསོད་ནམས་བསྐྱེད་པར་འདོད་ན་གཙུག་ལག་ཁང་ཚར་མ་ཞེས་བྱ་བར་བསོད་ནམས་བྱའོ། །དེ་ཅིའི་ཕྱིར་ཞེ་ན། 
ཡུལ་འདིའི་མི་རྣམས་ཀྱི་དད་པ་དང་། ཡང་དག་པའི་ལྟ་བ་ནི་དང་པོའི་གཙུག་ལག་ཁང་དེ་ནས་སྐྱེ་བར་འགྱུར་རོ། །ནམ་ཞིག་ལིའི་རྒྱལ་པོ་དང་། བློན་པོ་དང་། ཡུལ་འཛིན་པ་རྣམས་ལ་གནོད་པ་རྣམ་པ་སྣ་ཚོགས་
ཤིག་བྱུང་ན། རི་གླང་རུ་ལ་སྔོན་ཡང་དག་པར་རྫོགས་པའི་སངས་རྒྱས་གང་ན་བཞུགས་བཞུགས་པའི་གཞི་དེ་ལ་བསྐོར་བར་བྱའོ། །ཡུལ་འདིའི་སེམས་ཅན་རྣམས་ལས་མི་དགེ་བ་འཆགས་པར་འདོད་ན་མཆོད་

71-1-237a

རྟེན་གོ་མ་ས་ལ་གན་དའི་དྲུང་དུ་བཤགས་པར་བྱའོ། །དེ་ཅིའི་ཕྱིར་ཞེ་ན། མཆོད་རྟེན་དེ་ནི་སངས་རྒྱས་བཞུགས་པ་བཞིན་དུ་གང་དག་གིས་བསྐོར་བ་འམ། མེ་ཏོག་གམ། བདུག་པ་འམ། དབྱངས་སམ། 
རོལ་མོའི་སྒྲས་མཆོད་པ་བྱས་ན་དེའི་མཚམས་མེད་པ་ལྔ་ཡང་ཉམས་དམས་པར་འགྱུར་ན། གཞན་ལྟ་སྨོས་ཀྱང་ཅི་དགོས། ཡུལ་འདིའི་རྒྱལ་པོ་དང་། བློན་པོ་དང་། ཡུལ་འཛིན་པ་གང་ཞིག་བརྟུལ་ཞུགས་ཆེན་པོའི་སྡོམ་
པ་ལེན་པར་འདོད་པ་དེས་རི་གླང་རུ་ལ་གང་ན་དེ་བཞིན་གཤེགས་པའི་གཟུགས་བརྙན་པི་སེ་ཞེས་བྱ་བ་དང་། འོད་སྲུང་གི་མཆོད་རྟེན་ཡོད་པ་དེའི་དགེ་འདུན་ལས་མནོད་པར་བྱའོ། །དེ་ཅིའི་ཕྱིར་ཞེ་ན། ཡུལ་འདིར་ཆོས་ཀྱི་
སྤྱོད་པ་ཡོངས་སུ་རྫོགས་པ་དང་། ཚུལ་ཁྲིམས་ཡོངས་སུ་དག་པ་ནི་དེ་ནས་འབྱུང་བར་འགྱུར་བའི་ཕྱིར་རོ། །ཡུལ་འདིའི་མི་ལ་ལ་ཞིག་ཆད་པ་ཆེན་པོ་ལ་ཐུག་ན་དེས་རི་གླང་རུ་ལ་གནས་པའི་འཕགས་པའི་དགེ་འདུན་ལ་སྐྱབས་
སུ་འགྲོ་བར་བྱས་ཏེ། དེས་ན་ཆད་པ་དེ་ལས་ཐར་བར་འགྱུར་རོ། །དེ་ཅིའི་ཕྱིར་ཞེ་ན། གནས་དེ་ན་ཐར་པ་ཐོབ་པ་སྟོང་ཕྲག་དུ་མ་ཕྱི་མའི་མཐའི་བར་དུ་གནས་ཤིང་མི་སྟོངས་པའི་ཕྱིར་རོ། །རྒྱུ་དེས་ན་རི་གླང་རུ་དང་
མཆོད་རྟེན་གོ་མ་ས་ལ་གན་ད་ཡུལ་དང་བཅས་པ་དེ་བཞིན་གཤེགས་པ་རྣམས་ཀྱི་ཆང་ཀྱུ་ཡིན་ནོ། །དེ་ནས་དེའི་ཚེ་ཕྱོགས་བཅུའི་སངས་རྒྱས་ཀྱི་ཞིང་དག་ནས་བྱང་ཆུབ་སེམས་དཔའ་ཉི་ཁྲི་ལྷགས་ནས། བཅོམ་
ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ་དབྱངས་གཅིག་ཏུ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་ཀྱིས་ཀྱང་ཐབས་སྣ་ཚོགས་ཀྱིས་དེ་བཞིན་གཤེགས་པའི་
སྤྱོད་ཡུལ་དང་ཡུལ་འདི་ཡོངས་སུ་བསྐྱང་བར་བགྱི། བསྲུང་བར་བགྱི་ཞིང་ཇི་སྲིད་དུ་བདེ་བར་གཤེགས་པའི་བསྟན་པ་དང་། དཀོན་མཆོག་གསུམ་ལ་གནས་ཤིང་། རྒྱལ་པོ་དང་བློན་པོ་ལ་སོགས་པ་

71-1-237b

མིའི་ཚུལ་ཁྲིམས་དང་ལྡན་པ་དད་པ་ཅན་དང་། ཡུལ་ཆོས་དང་འཐུན་པར་བགྱིད་པ་མཆིས་པ་དེ་སྲིད་དུ་ཡོངས་སུ་མི་གཏང་ཞིང་ཡུལ་འདིར་དུས་དུས་སྤྱོད་ལམ་དང་ཆ་ལུགས་ཅི་དང་ཇི་ལྟ་བུས་སེམས་ཅན་མང་པོའི་
བསོད་ནམས་ཆེན་པོ་ཡོངས་སུ་སྨིན་པར་འགྱུར་བ་དང་། སངས་རྒྱས་ཉིད་དུ་སེམས་བསྐྱེད་པར་འགྱུར་བ་དང་། བསམ་གཏན་དང་། ཏིང་ངེ་འཛིན་ལ་སྙོམས་པར་འཇུག་པར་འགྱུར་བ་དང་། སངས་རྒྱས་ཉིད་
ལས་ཕྱིར་མི་ལྡོག་པར་འགྱུར་བ་དེ་ལྟ་བུའི་སྐྱེ་བ་བླང་བའི་སླད་དུ་ཁ་ཅིག་གིས་ནི་རྒྱལ་རིགས་ཡོངས་སུ་བཟུང་བར་བགྱི། ཁ་ཅིག་གིས་ནི་རབ་ཏུ་བྱུང་བ་དང་། ཁྱིམ་པ་གཞན་གྱི་ཆ་ལུགས་ཡོངས་སུ་གཟུང་
བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །རིགས་ཀྱི་བུ་ཁྱེད་རྣམས་ཀྱིས་འདི་ལྟར་བསྐལ་པ་བཟང་པོའི་སངས་རྒྱས་ཐམས་ཅད་ཀྱི་སྤྱོད་ཡུལ་དང་ཡུལ་
འདི་གང་དུ་སེམས་ཅན་རྣམས་སངས་རྒྱས་ཉིད་ལས་ཕྱིར་མི་ལྡོག་པར་འགྱུར་བ་དེ་ལྟ་བུར་ཆུ་གང་ཐོབ་ཤིག །ཡང་དེའི་ཚེ་ལྷ་རྣམ་ཐོས་ཀྱི་བུ་ཞེས་བྱ་བ་དང་། མི་ཕམ་པ་ཞེས་བྱ་བ་ལ་སོགས་པ་ལྷ་ཐམས་ཅད་
ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ད་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཡུལ་འདི་བསྲུང་བའི་སླད་དུ་མཐུ་བསྟངས་པ་དང་། བཅོམ་ལྡན་
འདས་ཀྱིས་བྱིན་གྱིས་བརླབས་པ་དང་མཐུས་བདག་ཅག་གིས་ཀྱང་དེ་བཞིན་གཤེགས་པའི་སྤྱོད་ཡུལ་དང་། བྱིན་གྱིས་བརླབས་བརླབས་པའི་ཡུལ་འདི་ཀུན་ཏུ་བསྲུང་ཞིང་ཡལ་བར་མི་གཏང་བར་བགྱི་བའི་སླད་
དུ་བརྩོན་འགྲུས་ཆེན་པོའི་ཤུགས་ཀྱིས་འབད་པར་འཚལ་ལོ། །གལ་ཏེ་ཡུལ་འདིར་གྲུ་གུ་ལ་སོགས་པ་གཏུམ་པོ་དད་པ་མ་མཆིས་པ་རྣམས་དང་ཧོར་དང་། སུམ་པའི་དམག་དག་མཆི་བར་འགྱུར་ན། 

71-1-238a

དེ་དག་ཕན་ཚུན་ནང་འཁྲུག་འབྱུང་བ་དང་། དེ་དག་གི་འཁོར་ནང་མི་མཐུན་པར་འགྱུར་བ་དང་། འགུམ་པར་འགྱུར་བར་བགྱིའོ། །ཡང་ན་དེ་དག་ཅི་ནས་ཀྱང་འདིར་མཆི་ཞིང་དེ་བཞིན་གཤེགས་པའི་བསྟན་པ་
འཇིག་མི་ནུས་པར་བགྱི་བའི་སླད་དུ་གཞན་གྱི་དབང་དུ་འགྱུར་བར་བགྱིའོ། །གལ་ཏེ་རྒྱའི་དམག་དག་མཆིས་པར་གྱུར་ན་དེ་དག་གི་སེམས་དད་པར་བགྱི་ཞིང་། སླར་ཡུལ་འདི་ལ་ཕན་འདོགས་པ་དང་ཕྱིས་ཡུལ་འདིར་བསོད་
ནམས་བྱ་བའི་དངོས་པོ་དགེ་བ་རྒྱ་ཆེན་པོ་བགྱིད་དུ་སྩལ་ཏོ། །ནམ་ཞིག་ཡུལ་འདིའི་སེམས་ཅན་རྣམས་ལ་གནོད་པ་བགྱིད་པ་དེའི་ཚེ་ན་ཡང་ཕྱིར་དད་པར་བགྱི་ཞིང་། མདོ་འདི་ཡང་ཁོང་དུ་ཆུད་པར་བགྱིད་དུ་སྩལ་ཏོ། །གང་གི་ཚེ་དེ་དག་མ་
འོངས་པའི་དཀོན་མཆོག་གསུམ་གྱི་ཡོ་བྱད་ལ་དབང་འཚལ་ཞིང་། མངའ་འཕྲོག་པ་དང་། སེམས་ཅན་བསོད་ནམས་དང་ལྡན་པ་རྣམས་ལ་འཚེ་བ་དེའི་ཚེ་ནི་བདག་ཅག་གི་འཁོར་གནོད་སྦྱིན་དད་པ་ཅན་དང་དད་པ་མ་མཆིས་པ་
དུ་མ་ཞིག་དབང་བསྐུར་ཏེ་བཀྱེ་ནས་ཡུལ་དེར་ཅི་ནས་ཀྱང་ཡུན་རིང་ཞིག་གི་བར་དུ་རྒུད་པར་བགྱི་ཞིང་ཡུལ་འདི་འཇིག་མི་ནུས་པར་བགྱི་བའི་སླད་དུ་མུ་གེ་དང་ནད་དང་ཕ་རོལ་གྱི་དམག་མཆི་བར་བགྱིད་དུ་སྩལ་ཏོ། །ལི་
ཡུལ་གྱི་ནོར་རྫས་དེ་དག་གིས་འཚལ་བ་རྣམས་ཀྱང་བཀྲ་མི་ཤིས་པར་བགྱི་ཞིང་གང་དང་གང་དུ་ཕྱིན་པའི་ཡུལ་དེ་ཐམས་ཅད་དུ་ཡང་སྨན་ཡོན་མི་ཐོགས་ཤིང་འཁྲུག་པར་བགྱིའོ། །དེ་དག་གི་ཡུལ་འཛིན་པ་དང་དམག་
དཔོན་ཡང་རྒུད་པར་བགྱིའོ། །བོད་ཀྱི་དམག་རྣམས་ལ་ཡང་དེ་བཞིན་དུ་རིག་པར་བགྱི་སྟེ། དེ་གང་གི་ཚེ་དེ་དག་ཆོས་དང་འཐུན་པར་ཡུལ་འདི་འཛིན་ཅིང་སྲུང་ན་ནི་བདག་ཅག་རྣམས་ཀྱིས་ཀྱང་དེ་དག་ཡོངས་སུ་བསྐྱང་
ཞིང་རྒྱལ་བར་འགྱུར་བར་བགྱིའོ། །ནམ་ཞིག་དེ་དག་བདེ་བར་གཤེགས་པའི་བསྟན་པ་འཇིག་པ་དང་ཡུལ་གྱི་མི་ལ་གནོད་པར་བགྱིད་པ་དེའི་ཚེ་ནི་དམག་རྣམས་ནང་འཁྲུག་འབྱུང་བ་དང་། དམག་གི་དཔོན་པོ་ཡང་

71-1-238b

ཆེ་ཐང་དུ་རྒུད་པར་བགྱི་སྟེ། རྒྱས་པར་ནི་སྔ་མ་བཞིན་ནོ། །མ་འོངས་པའི་དུས་ན་ཡུལ་འདིའི་རྒྱལ་པོ་དང་བློན་པོ་སེམས་གྱ་གྱུ་ཅན། བསོད་ནམས་ཆུང་བ་དང་། དད་པ་མེད་པ། དཀོན་མཆོག་གསུམ་གྱི་དཀོར་ལ་འཇོལ་ཉག་དུ་
རློམ་ཞིང་། ཡུལ་གྱི་རྩིས་མགོ་དང་འགལ་བར་བགྱིད་པ། ནོར་རྫས་མ་བརྟགས་པས་གོ་འཕང་ཚོལ་ལ་སེམས་ཅན་བསོད་ནམས་དང་ལྡན་པ་རྣམས་ལ་སུན་འབྱིན་ཏུ་རྒོལ་བ། ངོ་ཚ་མེད་པ། མངན་དུས་ཅན། འདོད་པའི་ཡོན་
ཏན་གྱིས་ངོམས་མི་མྱོང་བ། རབ་ཏུ་འབྱུང་བ་དག་གིས་སེམས་སྐྱོ་བ་ལ་ལ་དག་འབྱུང་བར་འགྱུར་ན་དེ་དག་ནི་བདག་ཅག་ཀྱང་ཡུལ་འདི་ནས་དབྱུང་ཞིང་ཡུལ་ངན་པ་གཞན་དང་གཞན་དག་ཏུ་སྤྱུགས་པར་བགྱི་སྟེ། ཚུལ་དེ་ལྟ་བུས་ཡུལ་
འདི་ཡོངས་སུ་བསྐྱང་བ་དང་བསྲུང་བར་བགྱིའོ། །བཅོམ་ལྡན་འདས་སླད་མ་རྩོད་པའི་དུས་ན་ཡུལ་འདི་གཞིག་པར་བརྩོན་པའི་སེམས་ཅན་བདུད་ཀྱི་ཕྱོགས་སྡིག་པ་བགྱིད་པ། མཐུ་སྟོབས་དང་ལྡན་པ། ཡུལ་དག་ཏུ་
སེམས་ཅན་རྣམས་ཀྱི་དད་པ་ཟློག་པར་བགྱིད་པ། སེམས་གདུག་ཅིང་བརླང་བའི་ལྷ་དང་། ཀླུ་དང་། གནོད་སྦྱིན་དང་། སྲིན་པོ་དུ་མ་ཞིག་འབྱུང་བར་འགྱུར་ལ། དེ་དག་ཀྱང་བདག་ཅག་གི་དབང་དུ་མི་འགྱུར་ན་དེ་ལ་བདག་གིས་
ཐབས་ཇི་ལྟར་འཚལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱེད་ཡིད་སྐྱོ་བར་མ་བྱེད་ཅིག །དེ་ཅིའི་ཕྱིར་ཞེ་ན། གླིང་བཞི་པ་འདི་ན་བྱང་ཆུབ་སེམས་དཔའ་རྣམས་དང་། ལྷ་མཐུ་སྟོབས་ཆེ་བ་དང་། 
ཀླུ་དང་། གནོད་སྦྱིན་ས་ཐོབ་པ་དུ་མ་ཞིག་གནས་པ་དེ་དག་ལ་སེམས་འཇམ་པོས་མཆོད་པ་ཆེན་པོ་བྱས་ཏེ། མཆོད་རྟེན་གོ་མ་ས་ལ་གན་ད་དང་། གཙུག་ལག་ཁང་ཚར་མ་ལ་སོགས་པ་ཡུལ་བྱིན་གྱིས་བརླབས་
བརླབས་པ་རྣམས་སུ་ཐེག་པ་ཆེན་པོའི་སྡེ་སྣོད་ཤེས་རབ་ཀྱི་ཕ་རོལ་ཏུ་ཕྱིན་པ་དང་། འདུས་པ་ཆེན་པོ་དང་། སངས་རྒྱས་ཕལ་པོ་ཆེ་དང་། དཀོན་མཆོག་བརྩེགས་པ་ལ་སོགས་པ་ཤིན་དུ་རྒྱས་པའི་སྡེ་མང་པོ་

71-1-239a

ལྷོགས་ཤིག་དང་། ཡུལ་སོ་སོ་ནས་བྱང་ཆུབ་སེམས་དཔའ་ས་བཅུ་པ་ལ་སོགས་པ་དང་། མཐུ་སྟོབས་ཆེ་བའི་སེམས་ཅན་དེ་དག་ཡུལ་འདིར་འོངས་ནས། ཆོས་ཀྱི་རོ་མནོས་ཤིང་དུས་གསུམ་དུ་གཏོགས་
པའི་དེ་བཞིན་གཤེགས་པ་རྣམས་ཀྱི་དམ་ཚིག་ལས་མི་འགལ་བར་བྱེད། བསྐལ་པ་བཟང་པོའི་སངས་རྒྱས་རྣམས་ཀྱི་སྤྱོད་ཡུལ་དང་ཡུལ་ཡང་སྲུང་བར་བྱེད། ཡུལ་འདིའི་མི་དང་བསྟན་པ་ཡང་སྲུང་བར་བྱེད་
པར་འགྱུར་རོ། །གཞན་ཡང་མ་འོངས་པའི་དུས་ན་ཡུལ་དགེ་བ་འདིའི་རྒྱལ་པོ་མཐུ་ཆུང་བར་འགྱུར་ཏེ། མཐུ་ཆུང་བ་དེས་ན་རང་གི་མཐུ་སྟོབས་ཀྱིས་ཡུལ་མི་ཐུབ་པས་རྒྱལ་པོ་དད་པ་ཅན་གཞན་འདི་ལྟ་སྟེ། བོད་
ཀྱི་རྒྱལ་པོ་དང་། རྒྱའི་རྒྱལ་པོ་ལ་སོགས་པ་ལ་སྐྱབས་བཙལ་ནས་ཡུལ་སྲུང་བར་བྱེད་དོ། །དེ་ཅིའི་ཕྱིར་ཞེ་ན། མ་འོངས་པའི་དུས་ན་རྒྱ་དང་བོད་ཀྱི་ཡུལ་དུ་དཀོན་མཆོག་གསུམ་གནས་ཤིང་མཆོད་གནས་ཆེན་པོར་བྱེད་
པ་དང་། ཡུལ་དེ་དག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོའི་གནས་སུ་འགྱུར་ཞིང་། སེམས་ཅན་དེ་དག་ཀྱང་བྱང་ཆུབ་ཆེན་པོའི་ལམ་ཚོལ་བའི་ངང་ཚུལ་ཅན་ཐེག་པ་ཆེན་པོ་ལ་དད་པ། ཏིང་ངེ་འཛིན་ལ་
གཞོལ་བར་འགྱུར་ཏེ། དེ་དག་གི་མཐུ་སྟོབས་ཀྱིས་ལི་ཡུལ་གྱི་མི་དང་། དཀོན་མཆོག་གསུམ་བརླག་པར་མི་འགྱུར་རོ། །སྐྱེས་བུ་དམ་པ་ཁྱེད་རྣམས་ཀྱིས་ཀྱང་བོད་དང་རྒྱའི་རྒྱལ་པོ་དང་བློན་པོ་དག་ཅི་ནས་
མཆོད་རྟེན་གོ་མ་ས་ལ་གན་ད་དང་། ཡུལ་དགེ་བ་འདི་ལ་རི་མོ་བྱེད་པར་འགྱུར་བ་དང་། ཡུལ་འདིར་བསོད་ནམས་བྱ་བའི་དངོས་པོ་དགེ་བ་རྒྱ་ཆེན་པོ་བྱེད་པར་འགྱུར་བ་དང་། ཡུལ་འདིའི་མི་ཉི་འོག་དད་པ་མེད་
པའི་ཡུལ་གཞན་དུ་འཁྱམས་པ་རྣམས་ཀྱང་སྡུག་བསྔལ་དང་དབྲལ་ཞིང་བདེ་བར་རང་གི་ཡུལ་དུ་བསྐྱལ་ནས་ཕྱིར་ཡང་དག་པའི་ལྟ་བ་ཅན་དང་། བསོད་ནམས་ལ་དགའ་བར་འགྱུར་བར་སེམས་པར་གྱུར་

71-1-239b

ཅིག་དང་། དགེ་བའི་རྩ་བ་དེའི་སྟོབས་ཀྱིས་སྐྱེས་བུ་དམ་པ་ཁྱེད་རྣམས་ཀྱི་དགེ་བའི་རྩ་བ་དང་། མདངས་དང་། གཟི་བརྗིད་དང་། འཁོར་འཕེལ་བར་འགྱུར་ཞིང་སངས་རྒྱས་ཉིད་དུ་ཡང་ཉེ་བར་འགྱུར་གྱིས། དུས་གསུམ་དུ་གཏོགས་
པའི་དེ་བཞིན་གཤེགས་པ་རྣམས་ཀྱི་གདམས་ངག་ལ་བྱས་པ་གཟོ་བར་གྱིས་ཤིག །འདི་ལྟར་ཡུལ་འདིའི་སེམས་ཅན་རྣམས་ནི་ཕྱིར་མི་ལྡོག་པ་བྱང་ཆུབ་སེམས་དཔའི་ལས་དང་ལྡན་པ། སྙིང་རྗེ་དང་ལྡན་པ། བདེན་པ་དང་
ལྡན་པ། གཏོང་ཕོད་པ། ཕྲག་དོག་དང་འཁོན་དུ་འཛིན་པ་རྣམ་པར་སྤངས་པ། བྱས་པ་གཟོ་བ། ཆོས་ལ་དགའ་བ། ཡང་དག་པའི་ལྟ་བ་ཅན། ལོག་པར་ལྟ་བ་ཐམས་ཅད་རྣམ་པར་སྤངས་པ། སེམས་འཇམ་པར་འགྱུར་
ཏེ། རྒྱུ་དེས་ན་དགེ་བ་རྣམས་ཤེས་བྱའོ། །ཡུལ་འདིའི་མཁར་ཡང་མི་བྱམས་པ་དང་འཇམ་པའི་སེམས་དང་ལྡན་པ་རྣམས་དང་། མཆོད་རྟེན་དང་གཙུག་ལག་ཁང་དུ་མས་བརྒྱན་པར་འགྱུར་ཏེ། དེའི་ཕྱིར་མཁར་
དགེ་བ་ཅན་ཞེས་བྱའོ། །གཞན་ཡང་ཡུལ་གཞན་དག་ནས་སེམས་ཅན་དད་པ་མེད་པ་སྡང་བ་འཁོན་དུ་འཛིན་པ་དག་ཡུལ་འདིར་འོངས་པ་ཀུན་ཡུལ་འདིའི་རྡུལ་གྱིས་རེག་ཅིང་། ཡུལ་འདི་ནས་འཁྲུངས་པའི་
འཚོ་བ་ལ་ལོངས་སྤྱོད་ན་དེ་དག་ཐམས་ཅད་ཀྱིས་སེམས་བསྒྱུར་ནས་སེམས་འཇམ་པ་དང་། མཉེན་པ་དང་། བྱམས་པའི་བསམ་པ་དང་། ཁྲོ་བ་དང་འཁོན་དུ་འཛིན་པ་སྤངས་པ་དང་། དད་པ་དང་། ཡང་ཡུལ་འདི་
འི་སྡིག་པ་མི་བྱེད་པར་འགྱུར་ཏེ། ཡུལ་འདི་ནི་ཡོན་ཏན་མང་པོ་དེ་དག་དང་ལྡན་པ་ཡིན་ནོ། །དེ་ནས་དེའི་ཚེ་སྔར་སངས་རྒྱས་བཅོམ་ལྡན་འདས་ཀྱིས་ལན་གསུམ་གྱི་བར་དུ་བྱིན་གྱིས་བརླབས་ནས་འོད་ཟེར་ཐུགས་རྗེ་
ཆེན་པོ་དང་བཅས་ཏེ་བཀྱེ་བ་དེས་ཆུ་ན་གནས་པའི་སེམས་ཅན་རྣམས་ཀྱི་སེམས་ཡོངས་སུ་དག་པ་དང་། བདེ་བ་དང་ལྡན་པར་བྱས་ནས་ཆུའི་ནང་ནས་སླར་འཐོན་ཏེ། ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་དུ་ཁྱབ་

71-1-240a

པར་གྱུར་ཏོ། །ཡང་འོད་ཟེར་དེ་དག་སླར་ལོག་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཡུལ་བྱིན་གྱིས་བརླབས་པ་དང་། ཉན་ཐོས་ཆེན་པོ་རྣམས་ཀྱིས་ཡུལ་བྱིན་གྱིས་བརླབས་
པ་དང་། མཚོའི་ནང་ནས་བྱུང་བའི་པད་མའི་སྟེང་ན་དེ་བཞིན་གཤེགས་པའི་གཟུགས་བརྙན་བཞུགས་པ་དེ་དང་དེ་དག་གི་འོད་ཟེར་དང་འདྲེས་ནས་ནམ་མཁའ་ལ་འཕགས་ཏེ་སྟེང་གི་ནམ་མཁའ་ཁེབས་པར་གྱུར་ཅིང་ལི་ཡུལ་ཐམས་ཅད་
དུ་ལྷའི་མེ་ཏོག་གི་ཆར་ཕབ་བོ། །ལྷའི་མེ་ཏོག་དེ་དག་ཕན་ཚུན་དུ་རེག་པ་ལས་ཆོས་ཀྱི་སྒོ་མོ་འདི་ལྟ་སྟེ། སངས་རྒྱས་དང་། ཆོས་དང་། དགེ་འདུན་གྱི་མཚན་དང་། ཡང་དག་པའི་ལྟ་བ་དང་། ཤེས་རབ་དང་། ཚུལ་ཁྲིམས་དང་། དགེ་བའི་རྩ་བ་དང་། 
དེ་བཞིན་གཤེགས་པ་རྣམས་ཀྱི་དཀའ་བ་སྤྱད་པ་དང་། སྨོན་ལམ་དང་། བྱང་ཆུབ་སེམས་དཔའི་རྫུ་འཕྲུལ་དང་། སེམས་ཅན་ཡོངས་སུ་སྨིན་པར་བྱེད་པ་དང་། དགེ་སྦྱོང་གི་འབྲས་བུ་བཞི་པོ་རྒྱུན་དུ་ཞུགས་པ་དང་། ལན་ཅིག་ཕྱིར་འོང་བ་
དང་། ཕྱིར་མི་འོང་བ་དང་། དགྲ་བཅོམ་པ་དང་། ཁམས་གསུམ་གྱི་སྲིད་པ་ལས་ངེས་པར་འབྱིན་པ་དང་། རྣམ་པར་ཐར་པའི་སྒོ་གསུམ་དང་། འདུ་བྱེད་འཇིག་པ་དང་། དྲན་པ་ཉེ་བར་གཞག་པ་དང་། འཕགས་པའི་བདེན་པ་དང་། རྫུ་འཕྲུལ་གྱི་
རྐང་པ་དང་། བསམ་གཏན་དང་། བསྡུ་བའི་དངོས་པོ་དང་། སོ་སོ་ཡང་དག་པར་རིག་པ་དང་། གཟུགས་མེད་པའི་སྙོམས་པར་འཇུག་པ་བཞི་དང་། དབང་པོ་ཡོངས་སུ་དག་པ་དང་། བྱང་ཆུབ་ཀྱི་ཕྱོགས་དང་འཐུན་པའི་ཆོས་
མཐའ་དག་གི་སྒྲ་འབྱིན་པར་གྱུར་ཏོ། །གཞན་ཡང་སེམས་ཡོངས་སུ་དག་པ་དང་། བྱང་ཆུབ་ཀྱི་ཡན་ལག་དང་། འཕགས་པའི་ལམ་དང་། སྙོམས་པར་འཇུག་པ་དང་། ས་དང་། སྟོབས་དང་། ཐུགས་རྗེ་དང་། བྱམས་
པ་ཆེན་པོ་དང་། རྟེན་ཅིང་འབྲེལ་པར་འབྱུང་བ་དང་། ཐེ་ཙོམ་སེལ་བ་དང་། སངས་རྒྱས་ཉིད་ལས་མི་ལྡོག་པ་དང་། ཏིང་ངེ་འཛིན་དང་། མངོན་པར་རྟོགས་པ་དང་། མི་སྐྱེ་བའི་ཆོས་ལ་བཟོད་པ་དང་། མ་འདྲེས་པ་དང་། 

71-1-240b

སངས་རྒྱས་ཉིད་དུ་འགྱུར་བ་དང་། མི་རྟག་པ་དང་། སྡུག་བསྔལ་བ་དང་བདག་མེད་པ་དང་། སྟོང་པ་དང་། མ་བྱས་པ་དང་། མ་སྐྱེས་པ་དང་། ཕྱིན་ཅི་མ་ལོག་པ་དང་། ཡང་དག་པའི་མཐའ་དང་། དེ་བཞིན་གཤེགས་པའི་སྙིང་པོའི་ཁོངས་
སུ་གཏོགས་པ་རྣམ་པར་མི་རྟོག་པའི་ཡེ་ཤེས་རྟོགས་པ་དང་། རྣལ་འབྱོར་པ་རྣམས་ཀྱིས་སོ་སོ་རང་གིས་རིག་པའི་སྤྱོད་ཡུལ་དང་། སྐྱེ་བ་སྡུག་བསྔལ་བ་དང་། རྒ་བ་དང་། སྡུག་པ་དང་བྲལ་བ་དང་། མི་སྡུག་པ་དང་ཕྲད་པ་དང་། འདོད་
པ་བཙལ་ཏེ་མ་རྙེད་པའི་སྡུག་བསྔལ་གྱི་སྒྲ་ཡང་བྱུང་བར་གྱུར་ཏོ། །གཞན་ཡང་ཕུང་པོ་ལྔ་པོ་དག་ལ་སེམས་ཅན་མེད་པ་དང་། གསོ་བ་དང་། གང་ཟག་དང་། སྲོག་མེད་པ་དང་། ཆོས་བདེན་པ་བ་མེད་པ་དང་། འགག་
པ་མེད་པ་དང་། རྟག་པ་མེད་པ་དང་། ཆད་པ་མེད་པ། འོང་བ་མེད་པ། འགྲོ་བ་མེད་པ་དང་། དཀོན་མཆོག་གསུམ་གྱི་གདུང་དང་། བྱིན་གྱིས་བརླབས་དང་། འགྲོ་བ་ལྔ་པོ་དག་གི་འཁྲུལ་བ་རྨི་ལམ་ལྟ་བུ་དང་། འཁོར་བའི་འདུ་
བྱེད་བཙོན་ར་ལྟ་བུ་དང་། སྒྱུ་མ་དང་། སྨིག་རྒྱུ་དང་། ཆུ་ཟླ་དང་། བྲག་ཆ་ལྟ་བུའོ་ཞེས་བྱ་བའི་སྒྲ་བྱུང་བར་གྱུར་ཏེ། གཞན་ཡང་དད་པ་དང་། མངོན་པར་རྟོགས་པ་དང་། བརྩོན་འགྲུས་དང་། དགེ་བ་བཅུའི་ལས་ཀྱི་ལམ་དང་། འཁོར་
བས་སྐྱོ་བ་དང་། དེ་ལྟ་བུ་ལ་སོགས་པ་སྒྲ་བརྒྱ་སྟོང་དུ་མ་བྱུང་བར་གྱུར་ཏོ། །ད་ནས་འཁོར་འདུས་པ་མང་པོ་དེ་དག་དང་། བྱང་ཆུབ་སེམས་དཔའ་ཕྱོགས་ཕྱོགས་ནས་ལྷགས་པ་དེ་དག་ཐམས་ཅད་ས་ལ་གནས་པའི་ལྷ་དང་། 
ཀླུ་དང་། ནམ་མཁའ་ལ་གནས་པའི་ལྷ་དང་། གནོད་སྦྱིན་ཐམས་ཅད་སེམས་ངོ་མཚར་དུ་གྱུར་ནས་རངས་པ་སྐྱེས་ཏེ། ཆོས་ཀྱི་སྒོ་མོའི་སྒྲ་དེ་དག་ལ་ཡིད་མི་ཕྱེད་པར་གྱུར་ཏོ། །དེ་ནས་དེའི་ཚེ་འཁོར་དེ་དག་གི་ཁོང་དུ་ཆུད་པར་བྱ་བའི་
ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་ཆོ་འཕྲུལ་ཆེན་པོ་འདི་ལྟ་བུ་བསྟན་ལགས། 

71-1-241a

བཅོམ་ལྡན་འདས་ཀྱིས་ཚངས་པའི་དབྱངས་ཀྱིས་བཀའ་སྩལ་པ། འཇམ་དཔལ་ཆོས་ཀྱི་སྒོ་མོ་འདི་དག་ནི་ཡུལ་དགེ་བ་ནས་སྐྱེ་བའི་སེམས་ཅན་རྣམས་ཀྱི་ཆེད་དང་། འཁོར་བཞི་པོ་རྣམས་ཀྱི་ཆེད་
དུ་ཡང་ལྷག་པར་བྱིན་གྱིས་བརླབས་ནས་བསྟན་པ་ཡིན་ཏེ། ཆོས་ཀྱི་སྒོ་མོ་འདིས་ནི་བྱང་ཆུབ་སེམས་དཔའ་རྣམས་ཚེགས་ཆུང་ངུ་དང་། འབད་པ་ཆུང་ངུས་དབང་པོ་དང་། ཤེས་པ་ཡོངས་སུ་དག་པར་འགྱུར་ཞིང་། ཆོས་
ཀྱི་སྒོ་མོ་དེ་དང་དེ་དག་ཀྱང་མངོན་པར་རྟོགས་པར་འགྱུར་རོ། །མ་འོངས་པའི་སྐྱེ་བོ་དེ་དག་ནི་བྱིས་པ་ཆུང་ངུ་ཡན་ཅད་ཆོས་མངོན་པར་རྟོགས་པར་དགའ་ཞིང་རྩེད་མོར་ཡང་ཆོས་ཀྱི་སྒོ་མོ་འདི་དག་སྨྲ་བར་འགྱུར་རོ། །སེམས་ཅན་
དེ་དག་དབང་པོ་ཡོངས་སུ་བརྟས་ནས་ཆོས་ཀྱི་མིག་རྣམ་པར་དག་པས་དེ་བཞིན་གཤེགས་པའི་སྐུ་ཡང་མཐོང་བར་འགྱུར། ཆོས་ཀྱི་རྣ་བ་རྣམ་པར་དག་པས་ཆོས་ཡང་དག་པར་ནོད་པ་ཡང་ཐོས་པར་འགྱུར། དེ་དག་
འཁོར་བ་ན་འདུ་བྱེད་དང་ཆོས་ཐམས་ཅད་ལས་ཀྱང་སེམས་རྣམ་པར་གྲོལ་བར་འགྱུར་ཏེ། སེམས་དེ་ལྟ་བུ་དེས་ན་ཡུལ་དགོན་པ་བྱིན་གྱིས་བརླབས་པ་འདིར་དགེ་བའི་ཕྱོགས་ལ་བརྩོན་པ་འམ། ཡང་ན་རི་གླང་
རུ་ལ་གནས་པ་དེ་དག་ཐམས་ཅད་དངོས་གྲུབ་ཐོབ་པར་འགྱུར་ཏེ། བདུད་སྡིག་ཅན་གྱིས་ཀྱང་གླགས་མི་རྙེད་ན་གཞན་དག་གིས་ལྟ་སྨོས་ཀྱང་ཅི་དགོས། འདི་ལྟ་སྟེ། ལྷ་རྣམས་ཀྱིས་འཁོར་གནོད་སྦྱིན་ནམ། 
དྲི་ཟ་འམ། མི་འམ་ཅི་ཆད་པས་བཅད་པར་འགྱུར་ནའང་མཆོད་རྟེན་གོ་མ་ས་ལ་གན་ད་དང་། རི་གླང་རུ་ལ་འཁྲས་ན་དེ་དག་གིས་མི་མཐོང་བར་འགྱུར་རོ། །བརྒྱ་ལ་མཐོང་ན་ཡང་སེམས་ཞི་བར་
འགྱུར་ཏེ། རྒྱུ་དེས་ན་རི་གླང་རུ་དང་། མཆོད་རྟེན་གོ་མ་ས་ལ་གན་ད་ནི་མཚམས་བཅད་པ་དང་། གཙང་བྱེད་དང་། སྐྱབས་དང་། འཇིག་རྟེན་གྱི་ཁམས་གཞན་དག་ན་གནས་པའི་སེམས་ཅན་རྣམས་ཀྱིས་

71-1-241b

ཀྱང་ཕྱག་བྱ་བར་འོས་པ་ཡིན་ནོ། །མཆོད་རྟེན་གོ་མ་ས་ལ་གན་ད་དང་། རི་གླང་རུ་དང་། ཡུལ་དགེ་བ་དང་། མཁར་དགེ་བ་ཅན་དང་། དགོན་པ་བྱིན་གྱིས་བརླབས་བརླབས་པའི་མིང་ཐོས་ནས་དད་པ་སྐྱེས་པ་
ཙམ་གྱིས་ཀྱང་སྡིག་པ་ཆེན་པོ་འབྱང་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་དང་། རྣམ་ཐོས་ཀྱི་བུ་ལ་བཀའ་སྩལ་པ། རིགས་ཀྱི་བུ་ཁྱེད་གཉིས་སོང་ལ་མཚོ་ཆེན་
པོ་འདི་ཤའི་རི་དྲོལ་ཏེ། བྱང་ཕྱོགས་ལོགས་སུ་གྱི་ཤོ་རྩང་པོའི་ནང་དུ་ཕོ་ལ་ཆུ་ན་གནས་པའི་སེམས་ཅན་རྣམས་ལ་མི་གནོད་པར་སྲུང་བ་དང་། ཡུལ་འདིས་མཚམས་མངོན་པར་གྱིས་ཤིག །དེ་ནས་ཉན་ཐོས་
ཆེན་པོ་ཤཱ་རིའི་བུ་དང་རྣམ་ཐོས་ཀྱི་བུས་དེ་བཞིན་འཚལ་ལོ་ཞེས་གསོལ་ནས་རྫུ་འཕྲུལ་གྱིས་ནམ་མཁའ་ལས་ཤའི་རི་གང་ན་བ་དེ་ལོགས་སུ་ཆས་ཏེ། ཤཱ་རིའི་བུས་ནི་ལག་ན་མཁར་གསིལ་ཐོགས། རྣམ་ཐོས་
ཀྱི་བུས་ནི་ལག་ན་མདུང་ཐོགས་ནས་ཤའི་རི་ཕྱེད་སྟམ་པས་བླངས་ཏེ། ནུབ་ཕྱོགས་ལོགས་སུ་བཞག་ནས་ཆུ་སྲོལ་ཆེན་པོ་བཏོད་དེ་མཚོ་སྲོག་ཆགས་དང་བཅས་པར་གྱི་ཤོ་རྩང་པོའི་ནང་དུ་ཕོ་སྟེ། ཚུལ་དེ་ལྟ་
བུས་མཆོད་རྟེན་གོ་མ་ས་ལ་གན་ད་དང་། རི་གླང་རུ་དང་། ལི་ཡུལ་དེ་མངོན་པར་བྱས་སོ། །དེ་ནས་བཅོམ་ལྡན་འདས་ཀྱིས་འཕགས་པ་སྤྱན་རས་གཟིགས་དབང་ཕྱུག་དང་། བྱམས་པ་ལ་སོགས་པ་བྱང་ཆུབ་
སེམས་དཔའ་སེམས་དཔའ་ཆེན་པོ་བརྒྱད་དང་། བྱང་ཆུབ་སེམས་དཔའ་ཉི་ཁྲི་དྲང་སྲོང་དང་བཅས་པ་དང་། རྣམ་ཐོས་ཀྱི་བུ་དང་ཁྱིམ་ཅིག་ལ་སོགས་པ་ལྷ་ཆེན་པོ་བརྒྱད་དང་། འཁོར་སུམ་ཁྲི་ལྔ་སྟོང་ལྔ་བརྒྱ་དང་
བཅས་པ་ལ་མཆོད་རྟེན་གོ་མ་ས་ལ་གན་ད་ལ་སོགས་པ་ཡོངས་སུ་གཏད་དེ། ལྷ་དེ་དག་གིས་ཀྱང་དེ་བཞིན་དུ་མནོས་སོ། །བཅོམ་ལྡན་འདས་ཀྱིས་ཀྱང་དེ་བཞིན་དུ་གནང་ངོ་། །བཅོམ་ལྡན་འདས་ཀྱིས་དེ་

71-1-242a

སྐད་ཅེས་བཀའ་སྩལ་པ་དང་། འཁོར་དེ་དག་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ། །འཕགས་པ་གླང་རུ་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ་
རྫོགས་སོ།། །། ༄། །རྒྱ་གར་སྐད་དུ། ཤཱ་རྡུལ་ཀརྞ་ཨ་བ་དཱ་ན། བོད་སྐད་དུ། སྟག་རྣའི་རྟོགས་པ་བརྗོད་པ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་
སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེ་ནས་ཚེ་དང་ལྡན་པ་ཀུན་དགའ་བོ་སྔ་དྲོའི་དུས་སུ་ཆོས་
གོས་དང་ལྷུང་བཟེད་ཐོགས་ནས་མཉན་ཡོད་དུ་བསོད་སྙོམས་ལ་ཞུགས་སོ། །དེ་ནས་ཚེ་དང་ལྡན་པ་ཀུན་དགའ་བོ་བསོད་སྙོམས་སྤྱད་དེ་ཟས་གྱི་བྱ་བ་བྱས་ནས་ཆུ་མིག་གཞན་ཞིག་ཏུ་ཆུའི་ཕྱིར་ཕྱིན་ནོ། །དེར་ཕྱིན་པ་
དང་། ཡང་དེའི་ཚེ་ཆུ་མིག་དེ་ལ་གདོལ་པའི་བུ་མོ་གཟུགས་བཟང་མོ་ཞེས་བྱ་བ་ཆུ་འཆུ་ཞིང་འདུག་གོ། །དེ་ནས་ཚེ་དང་ལྡན་པ་ཀུན་དགའ་བོས་གདོལ་པའི་བུ་མོ་གཟུགས་བཟང་མོ་ལ་འདི་སྐད་ཅེས་སྨྲས་སོ། །སྲིང་
མོ་བདག་ལ་ཆུ་བྱིན་ཅིག །དེ་ནས་གདོལ་པའི་བུ་མོ་གཟུགས་བཟང་མོས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་བདག་ནི་གདོལ་པའི་བུ་མོ་ལགས་སོ། །སྲིང་མོ་རུས་དང་
རིགས་འདྲི་བ་མ་ཡིན་གྱིས། འོན་ཀྱང་དེ་ནས་ཆུ་ཆུས་ལ་བྱིན་ཅིག་བཏུང་བར་བྱའོ། །དེ་ནས་གདོལ་པའི་བུ་མོ་གཟུགས་བཟང་མོས་ཚེ་དང་ལྡན་པ་ཀུན་དགའ་བོ་ལ་ཆུ་བྱིན་ནོ། །དེ་ནས་ཚེ་དང་ལྡན་པ་ཀུན་དགའ་བོས་ཆུ་
འཐུངས་ནས་སོང་ངོ་། །དེ་ནས་གདོལ་པའི་བུ་མོ་གཟུགས་བཟང་མོས་ཚེ་དང་ལྡན་པ་ཀུན་དགའ་བོའི་བཞིན་དང་། ལུས་དང་། སྐད་གདངས་རྣམས་རབ་ཏུ་ལེགས་པར་མཚན་མར་བཟུང་སྟེ། ཚུལ་མ་ཡིན་པའི་

71-1-242b

ཡིད་ལ་བྱེད་པས་ཀུན་ཏུ་ཆགས་པ་སྐྱེས་པར་གྱུར་ཏེ། ཚེ་དང་ལྡན་པ་ཀུན་དགའ་བོ་ལ་ཁོ་མོའི་འདོད་པ་སྐྱེས་ན། བདག་གི་མས་རིག་སྔགས་ཤེས་པས་དེའི་མཐུས། འཕགས་པ་ཀུན་དགའ་བོ་བཀུག་ལ་ཁྱོ་བྱའོ་སྙམ་
དུ་བསམས་སོ། །དེ་ནས་གདོལ་པའི་བུ་མོ་གཟུགས་བཟང་མོ་ཆུ་ཐོགས་ནས། གདོལ་པའི་ཁྱིམ་གང་ན་བ་དེར་སོང་སྟེ་ཕྱིན་ནས། ཆུ་བུམ་ཕྱོགས་གཅིག་ཏུ་བཞག་ནས་རང་གི་མ་ལ་འདི་སྐད་ཅེས་སྨྲས་སོ། །
ཀྱེ་ཡུམ་མཁྱེན་པར་མཛོད་ཅིག །ཀུན་དགའ་བོ་ཞེས་བྱ་བའི་དགེ་སློང་དགེ་སྦྱོང་གཽ་ཏ་མའི་ཉན་ཐོས་བསྙེན་བཀུར་བ་དེ་བདག་ཁྱོར་འཚལ་གྱིས་ཡུམ་ཁྱོད་ཀྱིས་དཔྱོད་ཀྱིས་དེ་འདིར་ཁུག་ཤིག །དེའི་མས་སྨྲས་པ། 
ངས་ཀུན་དགའ་བོ་ཞི་བ་དང་། འདོད་ཆགས་དང་བྲལ་བ་མ་ཡིན་ན་དགུག་པར་ནུས་མོད་ཀྱི། འོན་ཀྱང་ཀོ་ས་ལའི་རྒྱལ་པོ་གསལ་རྒྱལ་དགེ་སྦྱོང་གཽ་ཏ་མ་ལ་མཆོག་ཏུ་དད་པས་བསྟེན་ཞིང་བསྙེན་བཀུར་བྱེད་པས། གལ་
ཏེ་དེས་ཤེས་ན་དེས་གདོལ་པའི་རིགས་རྣམས་བརླག་པར་འགྱུར་རོ། །དགེ་སྦྱོང་གཽ་ཏ་མ་ནི་འདོད་ཆགས་དང་བྲལ་བ་ཐམས་ཅད་ཟིལ་གྱིས་གནོན་ཞེས་ཐོས་སོ། །དེ་སྐད་ཅེས་སྨྲས་པ་དང་། གདོལ་
པའི་བུ་མོ་གཟུགས་བཟང་མོས་མ་ལ་འདི་སྐད་ཅེས་སྨྲས་སོ། །གལ་ཏེ་དགེ་སྦྱོང་གཽ་ཏ་མ་དེ་འདོད་ཆགས་དང་བྲལ་བ་ཡིན་ཡང་རུང་དེའི་ཉེ་གནས་དགེ་སློང་ཀུན་དགའ་བོ་དེ་མ་བཀུག་ན་བདག་ལྕེབ་བོ། །
གལ་ཏེ་དེ་ཁུགས་ན་ནི་བདག་འཚོ་བར་འགྱུར་རོ། །མས་སྨྲས་པ། དགེ་སྦྱོང་ཀུན་དགའ་བོ་དགུག་གིས་སྲོག་མ་དོར་ཅིག །དེ་ནས་གདོལ་པའི་བུ་མོ་གཟུགས་བཟང་མོའི་མས་ཁང་པའི་དབུས་
ལྕི་བས་བྱུགས་ནས་གྲུ་བཞིར་བྱས་ཏེ། དུར་བ་རྔས་ནས་མེ་སྦར་ཞིང་མེ་ཏོག་དང་། ཨརྒ་བརྒྱ་རྩ་བརྒྱད་ལ་སྔགས་བཟླས་ནས་རེ་རེ་ནས་མེར་བསྐྱུར་རོ། །དེ་ལ་རིག་སྔགས་ནི་འདི་ཡིན་ཏེ། ཨ་མ་ལེ་བི་

71-1-243a

མ་ལེ་ཀུ་ཀུ་སེ་མ་མ་ནེ་ཡེ་ན་བན་དྷོ་སྨི་བིན་དུ་ན་ཨི་ཙུ་ཡཱ་དེ་བོ་བི་ར་ཤ་ཥ་ཏི་བི་དྱོ་ཏི་ཏ་གར་ཛ་ཏི་བི་སྨ་ཡ་པ་རཱ་ཛ་ཡ་མ་བྷི་བརྡྷ་ཡི་ཏུྃ་དེ་བེ་བྷྱོ་མ་ནུ་ཥེ་བྷྱོ་གན་དྷ་ར་བེ་བྷྱཿཤེ་ཀི་ཁི་གྲ་ཧ་དེ་བཱ་བི་ཤི་ཀི་གྲ་ཧ་དོ་
པ་ཨཱ་ནན་དཱ་སྱ་ཨ་ག་མ་ནཱ་ཡ་ཀྲ་མ་ནེ་ཡ་ཛུ་ཧོ་མོ་སྭཱ་ཧཱ། དེ་ནས་ཚེ་དང་ལྡན་པ་ཀུན་དགའ་བོ་སེམས་གཡོས་ཏེ། གཙུག་ལག་ཁང་དེ་ནས་ལངས་ནས་གདོལ་པའི་ཁྱིམ་གང་ན་བ་དེར་སོང་ངོ་། །
དེ་ནས་ཚེ་དང་ལྡན་པ་ཀུན་དགའ་བོ་རྒྱང་རིང་མོ་ནས་འོང་བ་གདོལ་པ་མོས་མཐོང་ངོ་། །མཐོང་ནས་ཀྱང་གཟུགས་བཟང་མོ་ལ་འདི་སྐད་ཅེས་སྨྲས་སོ། །བུ་འོང་བ་འུ་ནི་ནི་དགེ་སྦྱོང་ཀུན་དགའ་བོ་ཡིན་
གྱིས་ཤེས་པར་གྱིས་ཤིག །དེ་ནས་གདོལ་པའི་བུ་མོ་གཟུགས་བཟང་མོ་དགའ་ཞིང་མགུ་ལ་ཡི་རངས་ཏེ། ཚེ་དང་ལྡན་པ་ཀུན་དགའ་བོའི་མལ་བཤམས་སོ། །དེ་ནས་ཚེ་དང་ལྡན་པ་ཀུན་དགའ་བོ་གདོལ་
པའི་ཁྱིམ་གང་ན་བ་དེར་སོང་སྟེ་ཕྱིན་ནས་སྟེགས་བུ་ལ་བརྟེན་ནས་ཕྱོགས་གཅིག་ཏུ་འདུག་སྟེ། ཚེ་དང་ལྡན་པ་ཀུན་དགའ་བོ་ངུ་ཞིང་འདི་སྐད་ཅེས་སྨྲས་སོ། །བདག་གིས་ཉམ་ང་བའི་གནས་སྐབས་འདི་ཐོབ་
ན། ད་ལྟར་བཅོམ་ལྡན་འདས་བདག་ལ་མི་དགོངས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་དགོངས་པར་མཛད་དོ། །དགོངས་མ་ཐག་ཏུ་ཡང་དག་པར་རྫོགས་པའི་
སངས་རྒྱས་ཀྱི་སྔགས་ཀྱིས་གདོལ་པའི་སྔགས་ཉམས་པར་མཛད་དོ། །དེའི་སྔགས་ནི་འདི་ཡིན་ཏེ། སྠི་ཏི་ར་ཙུ་ཏི་ར་ནི་སྭ་ཏི་སརྦ་པྲཱ་ཎི་བྷྱཿསེ་ར་པྲ་ས་ནྃ་ནི་རྡོ་ཤྃ་ཏྃ་སརྦ་ཏོ་པཱ་ཡྃ་ཨི་ཏ་
ཡོ་ཡ་ཏྲ་ཤཱ་སྱནྟ་བྷ་ཡཱ་ནི་ཙ་ལི་ཏཱ་ནི་ཙཱ་ཏྃ་བེ་དེ་བཱ་ན་མཿ ཤྱཾ་ཏི་སརྦ་སིད་དྷ་ཙ་ཡོ་གི་ན་ཨེ་ཏེ་ན་ས་ཏྱ་བཱ་ཀྱེ་ན་སྭ་སྟྱ་ཨཱ་ནན་ད་ཡ་བི་ཀྵ་བེ། དེ་ནས་ཚེ་དང་ལྡན་པ་ཀུན་དགའ་བོ་གདོལ་པའི་རིག་སྔགས་བཀྲོལ་

71-1-243b

ནས་གདོལ་པའི་ཁྱིམ་ནས་བྱུང་ནས་རང་གི་གཙུག་ལག་ཁང་གང་ན་བ་དེར་འགྲོ་བར་བརྩམས་སོ། །གདོལ་པའི་བུ་མོ་གཟུགས་བཟང་མོས་མཐོང་ནས། ཚེ་དང་ལྡན་པ་ཀུན་དགའ་བོ་ལ་བལྟས་ནས་རང་
གི་མ་ལ་འདི་སྐད་ཅེས་སྨྲས་སོ། །ཀྱེ་ཡུམ་དགེ་སློང་ཀུན་དགའ་བོ་འདི་མཆི་ཞིང་གདའོ། །དེའི་མས་སྨྲས་པ། བུ་ངེས་པར་དགེ་སྦྱོང་གཽ་ཏ་མས་དྲན་པར་བྱས་པས་དེས་ན་བདག་གི་སྔགས་ཉམས་པར་གྱུར་ཏོ། །
གཟུགས་བཟང་མོས་སྨྲས་པ། ཡང་ཅི་ཡུམ་དགེ་སྦྱོང་གཽ་ཏ་མའི་སྔགས་ཁྱད་པར་དུ་སྟོབས་དང་ལྡན་ལ་བདག་ཅག་གི་དེ་ལྟ་མ་ཡིན་ནམ། དེ་ལ་མས་སླར་སྨྲས་པ། བུ་དགེ་སྦྱོང་གཽ་ཏ་མའི་སྔགས་ཁྱད་པར་དུ་
སྟོབས་དང་ལྡན་པ་ཡིན་གྱི། བདག་ཅག་གི་དེ་ལྟ་མ་ཡིན་ནོ། །བུ་འཇིག་རྟེན་ན་སྔགས་མཐུ་དང་ལྡན་པའི་སྔགས་གང་ཡིན་པ་དེ་དག་ཐམས་ཅད་དགེ་སྦྱོང་གཽ་ཏ་མ་འདོད་ན་རབ་ཏུ་འཇོམས་པར་བྱེད་དོ། །ཡང་འཇིག་
རྟེན་པའི་སྔགས་མཐུ་དང་ལྡན་པ་ཐམས་ཅད་ཀྱིས་དགེ་སྦྱོང་གཽ་ཏ་མའི་སྔགས་རབ་ཏུ་གཞོམ་པར་མི་ནུས་སོ། །དེ་ལྟ་བས་ན་དགེ་སྦྱོང་གཽ་ཏ་མའི་སྔགས་ནི་ཆེས་སྟོབས་དང་ལྡན་པ་ཡིན་ནོ། །དེ་ནས་ཚེ་དང་ལྡན་
པ་ཀུན་དགའ་བོ་བཅོམ་ལྡན་འདས་ག་ལ་བ་དེར་སོང་སྟེ། རིམ་གྱིས་ཕྱིན་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས། 
བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་གནས་སྐབས་དེ་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཡི་གེ་དྲུག་
པའི་རིག་སྔགས་འདི་བསྟན་གྱིས་ཟུང་ལ་ཆོངས་ཤིག །ལྷོགས་ལ་ཀུན་ཏུ་བཟུང་ན་བདག་ཉིད་ལ་ཕན་པ་དང་བདེ་བར་འགྱུར་ཞིང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་

71-1-244a

མ་རྣམས་ལ་ཕན་པ་དང་བདེ་བ་ཐོབ་པར་འགྱུར་རོ། །ཀུན་དགའ་བོ་ཡི་གེ་དྲུག་པའི་རིག་སྔགས་ནི་འདི་ཡིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲུག་གིས་གསུངས་
ཤིང་། རྒྱལ་པོ་ཆེན་པོ་བཞི་དང་། ལྷའི་དབང་པོ་བརྒྱ་བྱིན་དང་། མི་མཇེད་ཀྱི་བདག་པོ་ཚངས་པ་དང་། ད་ལྟར་ཡང་དག་པར་རྫོགས་པའི་སངས་རྒྱས་ངས་ཀྱང་གསུངས་པ་ཡིན་གྱིས། དེ་ལྟ་བས་ན་ཁྱོད་ཀྱིས་ཟུང་ཤིག །ཐོན་ཅིག །
ཀུན་དུ་ལྷོགས་ཤིག །འདི་ལྟ་སྟེ། ཨཎ་ཌ་རེ་ཀེ་ཡུ་རེ་དྷི་ཧ་སྟེ་ས་ར་གེ་བེ་བནྟ་མ་ཏི་དྷ་རི་བི་ཥ་ཙི་ལ་མི་ལི་སཱ་ཏ་ན་ཡུ་སྣ་ཐ་ཡ་སྃ་བྷ་གཱི་ལཱ་གོ་ལ་པ་ཏི་ཀ་ཌྃ་ཙི་ལ། ཀུན་དགའ་བོ་ཡི་གེ་དྲུག་པའི་རིག་སྔགས་འདི་ནི་ཡོངས་སུ་སྲུང་བ་དང་། བདག་
ཉིད་བཀྲ་ཤིས་པར་བྱེད་པ་ཡིན་ཏེ། བསད་པའི་ནི་ཆད་པས་གྲོལ་བར་འགྱུར་རོ། །ཆད་པས་བཅད་པ་ནི་བརྒྱད་པས་བྲལ་བར་འགྱུར་རོ། །བརྒྱད་པར་འོས་པ་ནི་ཡང་དེ་བཞིན་དུ་སྨྲས་པས་བྲལ་བར་འགྱུར་རོ། །ཀུན་དགའ་བོ་ངས་
ལྷ་དང་བཅས་པ་བདུད་དང་བཅས་པ། ཚངས་པ་དང་བཅས་པའི་འཇིག་རྟེན་ན། དགེ་སྦྱོང་དང་བྲམ་ཟེར་བཅས་པའི་སྐྱེ་དགུའི་ཚོགས་དང་། ལྷ་དང་། མི་རྣམས་ལས་གང་ཞིག་ཡི་གེ་དྲུག་པའི་རིག་སྔགས་འདིས་བསྲུང་བ་བྱས་
ནས། བསྲུང་སྐུད་དཔུང་པ་ལ་བཏགས་ན་བཀྲ་ཤིས་པར་བྱེད་དེ། ལས་ཀྱི་རྣམ་པར་སྨིན་པ་མ་གཏོགས་པར་གཞན་གྱིས་ཟིལ་གྱིས་གནོན་པར་ནུས་པ་དེ་ལྟ་བུ་ཡང་དག་པར་རྗེས་སུ་མ་མཐོང་ངོ་། །དེ་ནས་གདོལ་པའི་བུ་མོ་
གཟུགས་བཟང་མོས་དེ་ཉིད་ཀྱི་མཚན་མོ་ལུས་ཁྲུས་བྱས་གོས་སར་པ་བགོས་ནས་མུ་ཏིག་དོ་ཤལ་གྱིས་བརྒྱན་ཏེ། གྲོང་ཁྱེར་མཉན་ཡོད་ག་ལ་བ་དེ་ནས་བྱུང་སྟེ་སོང་ནས་གྲོང་ཁྱེར་གྱི་སྒོ་དྲུང་དུ་བསྡད་དེ། ཚེ་དང་ལྡན་པ་
ཀུན་དགའ་བོ་འོང་བ་ལ་སྡོད་ཅིང་ངེས་པར་འདིར་དགེ་སློང་ཀུན་དགའ་བོ་འོང་ངོ་ཞེས་སེམས་སོ། །དེ་ནས་ཚེ་དང་ལྡན་པ་ཀུན་དགའ་བོ་སྔ་དྲོའི་དུས་སུ་ཆོས་གོས་དང་ལྷུང་བཟེད་ཐོགས་ནས། མཉན་ཡོད་དུ་བསོད་སྙོམས་

71-1-244b

ལ་ཞུགས་སོ། །གདོལ་པའི་བུ་མོ་དེས་ཚེ་དང་ལྡན་པ་ཀུན་དགའ་བོ་རྒྱང་རིང་པོ་ནས་འོང་བ་མཐོང་ངོ་། །མཐོང་ནས་ཀྱང་ཚེ་དང་ལྡན་པ་ཀུན་དགའ་བོའི་ཕྱི་བཞིན་དུ་འབྲང་ངོ་། །འདུག་ན་འདུག་ཅིང་འགྲོ་ན་འགྲོ་བར་བྱེད་དོ། །ཁྱིམ་གང་དང་
གང་དུ་བསོད་སྙོམས་ལ་ཞུགས་པ་དེ་དང་དེར་སྒོར་ཅང་མི་སྨྲ་བར་སྡོད་དོ། །དེ་ནས་ཚེ་དང་ལྡན་པ་ཀུན་དགའ་བོས་གདོལ་པའི་བུ་མོ་གཟུགས་བཟང་མོ་ཕྱི་བཞིན་དུ་འབྲང་བ་མཐོང་ངོ་། །མཐོང་ནས་ཀྱང་ངོ་ཚ་ཞིང་ཁྲེལ་གྱིས་དོགས་
པས་སྡུག་བསྔལ་ཞིང་ཡིད་མི་བདེ་བས་མྱུར་དུ་མཉན་ཡོད་ནས་བྱུང་ནས། རྒྱལ་བྱེད་ཀྱི་ཚལ་ག་ལ་བ་དེར་སོང་ངོ་། །དེ་ནས་གདོལ་པའི་བུ་མོ་གཟུགས་བཟང་མོ་ཚེ་དང་ལྡན་པ་ཀུན་དགའ་བོའི་ཕྱི་བཞིན་དུ་རྗེས་སུ་
འབྲང་ངོ་། །ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ། །དེ་ནས་ཚེ་དང་ལྡན་པ་ཀུན་
དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གདོལ་པའི་བུ་མོ་གཟུགས་བཟང་མོ་འདི་ཕྱི་བཞིན་དུ་རྗེས་སུ་འབྲང་ཞིང་མཆིས་ལ་མཆི་ན། ཁྱིམ་གང་དང་གང་དུ་བསོད་སྙོམས་
ལ་ཞུགས་པའི་ཁྱིམ་དེ་དང་དེའི་སྒོར་མཆིས་ནས་ཅང་མི་སྨྲ་བར་མཆིས་སོ། །བཅོམ་ལྡན་འདས་བདག་ལ་བསྐྱབ་ཏུ་གསོལ། བདེ་བར་གཤེགས་པ་བདག་ལ་བསྐྱབ་ཏུ་གསོལ། དེ་སྐད་ཅེས་གསོལ་པ་དང་། 
བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །མ་འཇིགས་མ་འཇིགས་ཤིག །དེ་ནས་བཅོམ་ལྡན་འདས་ཀྱིས་གདོལ་པའི་བུ་མོ་གཟུགས་བཟང་མོ་ལ་འདི་
སྐད་ཅེས་བཀའ་སྩལ་ཏོ། །ཅི་གཟུགས་བཟང་མོ་དགེ་སློང་ཀུན་དགའ་བོ་ཁྱིམ་ཐབ་ཏུ་བྱ་བར་འདོད་དམ། བཙུན་པ་འཚལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གཟུགས་

71-1-245a

བཟང་མོ་ཕ་མས་དགེ་སློང་ཀུན་དགའ་བོ་ལ་རྗེས་སུ་འགྲོ་བར་གནང་ངམ། བཅོམ་ལྡན་འདས་གནང་ལགས་སོ། །བདེ་བར་གཤེགས་པ་གནང་ལགས་སོ། །བདག་གིས་སླར་ཡང་གོ་བར་བགྱིའོ། །དེ་ནས་
གདོལ་པའི་བུ་མོ་གཟུགས་བཟང་མོས་བཅོམ་ལྡན་འདས་ལ་རབ་ཏུ་མཉན་ནས། བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ནས་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཐད་ནས་སླར་
སོང་སྟེ། གང་ན་རང་གི་ཕ་མ་ཡོད་པ་དེར་སོང་སྟེ་ཕྱིན་ནས། ཕ་མའི་རྐང་པ་ལ་མགོ་བོས་ཕྱག་འཚལ་ནས། ཕྱོགས་གཅིག་ཏུ་འདུག་སྟེ། རང་གི་ཕ་མ་ལ་འདི་སྐད་ཅེས་སྨྲས་སོ། །ཡབ་ཡུམ་
དགེ་སྦྱོང་གཽ་ཏ་མ་རང་གིས་དགེ་སློང་ཀུན་དགའ་བོ་སྩལ་ཏོ། །དེ་ནས་ཕ་མས་གདོལ་པའི་བུ་མོ་གཟུགས་བཟང་མོ་ཁྲིད་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་
སྤྱི་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །གདོལ་པའི་བུ་མོ་གཟུགས་བཟང་མོས་ཀྱང་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་
འདུག་ནས་ཀྱང་གདོལ་པའི་བུ་མོ་གཟུགས་བཟང་མོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །འདི་གཉིས་ནི་བདག་གི་ཕ་མ་ལགས་སོ། །དེ་ནས་བཅོམ་ལྡན་འདས་ཀྱིས་གདོལ་པའི་བུ་མོ་གཟུགས་
བཟང་མོའི་ཕ་མ་ལ་འདི་སྐད་ཅེས་བཀའ་སྩལ་ཏོ། །བུ་མོ་གཟུགས་བཟང་མོ་དགེ་སློང་ཀུན་དགའ་བོ་ལ་སྟེར་རམ། དེ་གཉིས་ཀྱིས་གསོལ་པ། བཅོམ་ལྡན་འདས་སྩལ་ལོ། །བདེ་བར་གཤེགས་པ་སྩལ་
ལོ། །དེ་ལྟ་ན་ཁྱེད་གཉིས་རང་གི་ཁྱིམ་དུ་སླར་སོང་ཤིག །དེ་ནས་གདོལ་པའི་བུ་མོ་གཟུགས་བཟང་མོའི་ཕ་མས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས། བཅོམ་ལྡན་འདས་ལ་ལན་གསུམ་

71-1-245b

བསྐོར་བ་བྱས་ཏེ། བཅོམ་ལྡན་འདས་ཀྱི་ཐད་ནས་སོང་ངོ་། །དེ་ནས་བཅོམ་ལྡན་འདས་ཀྱིས་གདོལ་པའི་བུ་མོ་གཟུགས་བཟང་མོའི་ཕ་མ་སོང་ནས་རིང་མོ་མ་ལོན་པར་ཐུགས་སུ་ཆུད་ནས། གདོལ་པའི་བུ་
མོ་གཟུགས་བཟང་མོ་ལ་འདི་སྐད་ཅེས་བཀའ་སྩལ་ཏོ། །གཟུགས་བཟང་མོ་དགེ་སློང་ཀུན་དགའ་བོ་དོན་དུ་གཉེར་རམ། བཅོམ་ལྡན་འདས་དོན་དུ་གཉེར་ལགས་སོ། །བདེ་བར་གཤེགས་པ་དོན་དུ་གཉེར་
ལགས་སོ། །དེ་ལྟ་ཡིན་ན་གཟུགས་བཟང་མོ་དགེ་སློང་ཀུན་དགའ་བོའི་ཆ་བྱད་དུ་གྱིས་ཤིག །བཅོམ་ལྡན་འདས་གཟུང་བར་བགྱིའོ། །བདེ་བར་གཤེགས་པ་གཟུང་ལགས་སོ། །བཅོམ་ལྡན་འདས་
རབ་ཏུ་འབྱུང་དུ་གསོལ། བདེ་བར་གཤེགས་པ་བདག་རབ་ཏུ་དབྱུང་དུ་གསོལ། དེ་ནས་བཅོམ་ལྡན་འདས་ཀྱིས་གདོལ་པའི་བུ་མོ་གཟུགས་བཟང་མོ་ལ་འདི་སྐད་ཅེས་བཀའ་སྩལ་ཏོ། །དགེ་སློང་མ་
འདིར་ལེགས་པར་ཚངས་པར་སྤྱོད་ཅིག་ཅེས་བཅོམ་ལྡན་འདས་ཀྱིས་བཀའ་སྩལ་པ་དང་། གདོལ་པའི་བུ་མོ་གཟུགས་བཟང་མོ་སྐྲ་བྱི་ཞིང་སྣམ་སྦྱར་བགོས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་གདོལ་
པའི་བུ་མོ་གཟུགས་བཟང་མོ་དེ་ལྟར་དགེ་སློང་མར་གྱུར་ཞིང་རབ་ཏུ་བྱུང་བ་ལ་ཆོས་ཀྱི་གཏམ་ཡང་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་
དག་པར་རབ་ཏུ་དགའ་བར་མཛད་དེ། གང་ཞིག་འདི་ལྟར་ཡུན་རིང་པོར་འཁོར་བར་བྱིང་བའི་སེམས་ཅན་རྣམས་ཀྱི་གཉེན་པོར་གྱུར་པ་མཉན་པར་བྱ་བ་འདི་ལྟ་སྟེ། སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་། 
མཐོ་རིས་ཀྱི་གཏམ་དང་། འདོད་པའི་རོ་མྱང་བར་བྱ་བ་མ་ཡིན་ཞིང་སྨད་པའི་གཏམ་དང་། ངེས་པར་འབྱུང་བའི་གཏམ་དང་། འཇིགས་པ་དང་། ཉོན་མོངས་པ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་

71-1-246a

དང་། བྱང་ཆུབ་ཀྱི་ཕྱོགས་ཀྱི་ཆོས་རྣམས་དགེ་སློང་མ་དེ་ལ་བཅོམ་ལྡན་འདས་ཀྱིས་ཡང་དག་པར་བསྟན་པས། དེ་ནས་དགེ་སློང་མ་གཟུགས་བཟང་མོ་དེ་ལ། བཅོམ་ལྡན་འདས་ཀྱིས་ཡང་དག་པར་
བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་སྟོད། ཡང་དག་པར་རབ་ཏུ་དགའ་བར་མཛད། སེམས་དགའ་བ་ལས་སུ་རུང་བ་དང་། རབ་ཏུ་དགའ་བའི་སེམས་དང་། སྒྲིབ་པ་མེད་པའི་སེམས་དང་། ཐ་
བ་མེད་པའི་སེམས་ཀྱིས་བཅོམ་ལྡན་འདས་ཀྱི་བཀའ་གང་ཡིན་པ་ཤེས་ནས་དགེ་སློང་མ་གཟུགས་བཟང་མོ་དགའ་བའི་བསམ་པ་དང་། ལས་སུ་རུང་བའི་སེམས་དང་། རབ་ཏུ་དགའ་བའི་སེམས་དང་། སྒྲིབ་
པ་མེད་པའི་སེམས་དང་། ཐ་བ་མེད་པའི་སེམས་ཀྱིས་བསྒོམས་པའི་སྟོབས་རབ་ཏུ་ལྡན་པ་ཡང་དག་པར་གསལ་བར་བྱེད་པའི་ཆོས་བསྟན་པ་ཀུན་ཏུ་ཤེས་ཏེ། དེའི་ཚེ་སངས་རྒྱས་བཅོམ་ལྡན་འདས་ཀྱིས་ཀུན་གསལ་
བར་བྱེད་པའི་ཆོས་བསྟན་པ་འདི་ལྟ་སྟེ། སྡུག་བསྔལ་དང་། ཀུན་འབྱུང་དང་། འགོག་པ་དང་། ལམ་རྣམས་བཅོམ་ལྡན་འདས་ཀྱིས་དགེ་སློང་མ་གཟུགས་བཟང་མོ་ལ་རྒྱ་ཆེར་བསྟན་པས། དེ་ནས་དགེ་སློང་མ་གཟུགས་
བཟང་མོ་སྟན་དེ་ཉིད་ལ་འདུག་བཞིན་དུ་འཕགས་པའི་བདེན་པ་བཞི་པོ་སྡུག་བསྔལ་དང་། ཀུན་འབྱུང་དང་། འགོག་པ་དང་། ལམ་མངོན་པར་རྟོགས་པར་གྱུར་ཏེ། འདི་ལྟ་སྟེ། གོས་བཀྲུས་པ་དྲི་མ་མེད་པ་ཚོན་གྱིས་བསྒྱུར་ན་
ཚོན་ཡང་དག་པར་ལེན་པ་བཞིན་དུ། དགེ་སློང་མ་གཟུགས་བཟང་མོ་སྟན་དེ་ཉིད་དུ་འདུག་ནས་བདེན་པ་བཞི་པོ་སྡུག་བསྔལ་དང་། ཀུན་འབྱུང་དང་། འགོག་པ་དང་། ལམ་རྣམས་མངོན་པར་རྟོགས་པར་གྱུར་ཏོ། །དེ་
ནས་དགེ་སློང་མ་གཟུགས་བཟང་མོས་ཆོས་མཐོང་ཞིང་ཆོས་ཐོབ་ལ་ཆོས་རྟོགས་ཤིང་ཆོས་མཐར་ཐུག་པར་ཁོང་དུ་ཆུད་ནས། ཐེ་ཙོམ་ལས་རྒལ་ཞིང་སོམ་ཉི་སྤངས། ཐ་སྙད་རྣམས་དང་བྲལ་ཞིང་དྲི་མ་མེད་པ་ཐོབ་

71-1-246b

པས་གཞན་གྱི་རྐྱེན་གྱིས་མི་བཀྲི་བར་སྟོན་པའི་བསྟན་པ་ལ་ཆོས་ཀྱི་རྗེས་སུ་འབྲང་བས། བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་
གིས་ནི་ནོངས་ལགས་སོ། །བདེ་བར་གཤེགས་པ་བདག་གིས་ནོངས་ལགས་སོ། འདི་ལྟར་བྱིས་པ། འདི་ལྟར་རྨོངས་པ། འདི་ལྟར་མི་གསལ་བ། འདི་ལྟར་མི་དགེ་བ། བདག་ནི་ཤེས་རབ་འཆལ་པའི་རང་བཞིན་ཅན་ལགས་ཏེ། 
གང་བདག་གིས་དགེ་སློང་ཀུན་དགའ་བོ་ཁྱིམ་ཐབ་ཏུ་འཚལ་བ་ཀུན་ནས་ཚུལ་མ་ལགས་སོ། །དེ་ལྟ་བས་ན་བཙུན་པ་བདག་གིས་ནོངས་པ་ལ་ནོངས་པར་ཁུམས་ཤིང་། ཡང་ནོངས་པ་ལ་མཆོག་ཏུ་ནོངས་པར་ཁུམས་ནས་
ནོངས་པ་དེ་བཤགས་པར་བགྱིའོ། །སླན་ཆད་ཀྱང་ནོངས་པ་བསྡམ་པར་བགྱིའོ། །དེ་ལྟ་བས་ན་བཅོམ་ལྡན་འདས་ཀྱིས་ནོངས་པར་བཟུང་ནས་ནོངས་པ་བསྡམ་པར་བགྱིའོ། །གཟུགས་བཟང་མོ་ཁྱོད་ཀྱིས་ཉེས་པ་
ལ་ཉེས་པར་ཤེས་ནས། འདི་ལྟར་བྱིས་པ། འདི་ལྟར་རྨོངས་པ། འདི་ལྟར་མི་གསལ་བ། འདི་ལྟར་མི་དགེ་བ། ཤེས་རབ་འཆལ་པའི་རང་བཞིན་གྱིས་གང་ཁྱོད་ཀྱིས་དགེ་སློང་ཀུན་དགའ་བོ་ལ་ཁྱིམ་ཐབ་ཏུ་འཛིན་
ཞིང་ཚུལ་བཞིན་མ་ཡིན་པ་བྱས་པ་ལ་ཆོས་འདུལ་བ་རྟོགས་ནས་གང་ཁྱོད་ཀྱིས་ཉེས་པ་ལ་ཉེས་པར་ཡང་དག་པར་ལྟ་ཞིང་། ཉེས་པ་ལ་ཉེས་པར་ཡང་དག་པར་མཐོང་ནས་དེ་བཞིན་དུ་ཉེས་པ་འཆགས་ཤིང་ཕྱིན་ཆད་སྡོམ་
པ་ནི་ངས་ཀྱང་ཁྱོད་ཀྱི་ཉེས་པ་ལ་ཉེས་པར་བཟུང་བར་བྱའོ། །ཕྱིན་ཅད་སྡོམ་ལ་དགེ་བའི་ཆོས་རྣམས་འཕེལ་བ་ཉིད་བསྒྲུབ་པར་བྱའི་ཉམས་པར་ནི་མི་བྱའོ། །དེ་ནས་དགེ་སློང་མ་གཟུགས་བཟང་མོ་ལ་བཅོམ་ལྡན་འདས་ཀྱིས་བསྟན་ཞིང་ཁྱད་པར་དུ་
རྗེས་སུ་གདམས་པས་གཅིག་པུ་དབེན་པར་གནས་ཤིང་བག་ཡོད་པས་བསྡམས་ཤིང་དྲན་པ་དང་ཤེས་བཞིན་རབ་ཏུ་ཉམས་པ་མེད་པས་བདག་ཉིད་གནས་ཏེ། གཅིག་པུ་དབེན་པར་བག་ཡོད་པས་བསྡམས་ཤིང་དྲན་པ་དང་ཤེས་བཞིན་ཉམས་པ་མེད་པས་བདག་ཉིད་གནས་

71-1-247a

པས་གང་གི་དོན་དུ་རིགས་ཀྱི་བུ་མོ་སྐྲ་བྲེགས་ནས་ཆོས་གོས་བགོས་ཏེ། ཡང་དག་པར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དེ་བླ་ན་མེད་པའི་ཚངས་པར་སྤྱོད་པ་ལ་ཀུན་ཏུ་གནས་པ་ནི་མཐོང་བའི་ཆོས་ཉིད་ལ་རང་གིས་མངོན་པར་ཤེས་པ་མངོན་དུ་བྱས་ཤིང་
བསྐྱེད་ནས་ལུང་སྟོན་པར་བྱེད་པ་ཡིན་པས། དེས་ཚངས་པར་སྤྱད་པས་བྱ་བ་བྱས་ཤིང་སྐྱེ་བ་ཟད་དེ་སྲིད་པར་སྐྱེ་བ་གཞན་མི་ལེན་པར་གྱུར་ཏོ། །མཉན་ཡོད་ཀྱི་བྲམ་ཟེ་དང་། ཁྱིམ་བདག་རྣམས་ཀྱིས་བཅོམ་ལྡན་འདས་ཀྱིས་གདོལ་པའི་བུ་མོ་རབ་ཏུ་ཕྱུང་ངོ་ཞེས་ཐོས་སོ། །
ཐོས་ནས་ཀྱང་ཇི་ལྟར་གདོལ་པའི་བུ་མོ་དགེ་སློང་རྣམས་དང་ཡང་དག་པར་སྤྱོད་པར་བྱེད་ཅེས་སྨོད་པར་བྱེད་དོ། །དེ་བཞིན་དུ་དགེ་སློང་མ་རྣམས་དང་། དགེ་བསྙེན་རྣམས་དང་། དགེ་བསྙེན་མ་རྣམས་དང་ཡང་དག་པར་སྤྱད་པ་སྤྱོད་པར་བྱེད་ཅེས་སྨོད་པར་བྱེད་ཅིང་། ཇི་ལྟར་
གདོལ་པའི་བུ་མོ་ལ་བྲམ་ཟེ་དང་། རྒྱལ་རིགས་དང་། ཁྱིམ་བདག་ཤིང་སཱ་ལ་ཆེན་པོ་ལྟ་བུ་རྣམས་བལྟ་བར་བྱ་ཞེས་ཟེར་རོ། །ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ཀྱིས་གདོལ་པའི་བུ་མོ་རབ་ཏུ་ཕྱུང་ཞེས་གྲག་པ་ཐོས་སོ། །ཐོས་ནས་ཀྱང་
ཇི་ལྟར་གདོལ་པའི་བུ་མོ་ཞེས་བྱ་བ་དང་། དགེ་སློང་རྣམས་ཡང་དག་པར་སྤྱད་པ་སྤྱོད་པར་བྱེད། དགེ་སློང་མ་རྣམས་དང་། དགེ་བསྙེན་རྣམས་དང་། དགེ་བསྙེན་མ་རྣམས་དང་ཡང་དག་པར་སྤྱད་པ་སྤྱོད་པར་བྱེད། ཇི་ལྟར་བྲམ་ཟེ་དང་། རྒྱལ་རིགས་དང་། ཁྱིམ་བདག་
ཤིང་ས་ལ་ཆེན་པོ་ལྟ་བུ་རྣམས་ཀྱིས་བལྟ་བར་བྱ་ཞེས་སྨོད་ལ་སེམས་པར་བྱེད་ཅིང་བཞོན་པ་བཟང་པོ་སྦྱར་ཏེ། བཞོན་པ་བཟང་པོ་ལ་ཞོན་ནས་མཉན་ཡོད་ཀྱི་བྲམ་ཟེ་དང་། ཁྱིམ་བདག་གི་ཚོགས་ཆེན་པོས་ཡོངས་སུ་བསྐོར་ཏེ་མདུན་དུ་བདར་ནས་
མཉན་ཡོད་ནས་འཕགས་ཏེ། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ག་ལ་བ་དེར་སོང་སྟེ། ཇི་སྲིད་བཞོན་པས་འགྲོ་བའི་ས་དེ་སྲིད་དུ་བཞོན་པས་ཕྱིན་ནས་བཞོན་པ་ལས་བབས་ནས་རྐང་ཐང་གི་
འཁོར་གྱིས་བསྐོར་ཏེ། མགོན་མེད་ཟས་སྦྱིན་གྱི་ཀུན་དགའ་ར་བར་ཞུགས་སོ། །ཞུགས་ནས་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ནས་ཕྱོགས་

71-1-247b

གཅིག་ཏུ་འདུག་གོ། །མཉན་ཡོད་ཀྱི་བྲམ་ཟེ་དང་། ཁྱིམ་བདག་གི་ཚོགས་ཆེན་པོ་དེ་དག་ཀྱང་ཐ་སྙད་ལྔ་དང་ལྡན་པས་འཁོད་དོ། །ཡང་བཅོམ་ལྡན་འདས་དང་ལྷན་ཅིག་མངོན་དུ་ཕྱོགས་ཏེ་ཡང་དག་པར་དགའ་བ་དང་། མགུ་བར་གྱུར་པའི་གཏམ་སྣ་
ཚོགས་མཛད་དེ་མཇུག་བརྟུལ་བ་དང་ཕྱོགས་གཅིག་ཏུ་འདུག་གོ། །ཡང་གཞན་དག་གིས་བཅོམ་ལྡན་འདས་ལ་རང་རང་གི་ཕ་མའི་རྒྱུས་དང་། མིང་དང་། རིགས་དང་། རུས་རྣམས་བསྙད་ནས་ཕྱོགས་གཅིག་ཏུ་འདུག་གོ། །ཡང་གཞན་
དག་གིས་ལྷན་ཅིག་ཏུ་བཅོམ་ལྡན་འདས་ག་ལ་བའི་ལོགས་སུ་ཐལ་མོ་སྦྱར་ཏེ་ཕྱག་བྱས་ནས་ཕྱོགས་གཅིག་ཏུ་འདུག་གོ། །གཞན་དག་ནི་ཡང་འཐུན་པར་ཅང་མི་སྨྲ་བར་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་
ཀོ་ས་ལའི་རྒྱལ་པོ་གསལ་རྒྱལ་དང་། མཉན་ཡོད་ཀྱི་བྲམ་ཟེ་དང་། ཁྱིམ་བདག་གི་ཚོགས་ཆེན་པོ་དེ་རྣམས་ཀྱི་སེམས་ཐུགས་ཀྱིས་མཁྱེན་ནས། དགེ་སློང་མ་གཟུགས་བཟང་མོའི་སྔོན་གྱི་གནས་སྐབས་བསྟན་པར་
མཛད་པའི་ཕྱིར་དགེ་སློང་མ་དེ་བཀུག་ནས་དགེ་སློང་རྣམས་ལ་དགེ་སློང་དག་དེ་བཞིན་གཤེགས་པ་ལས་མངོན་སུམ་དུ་དགེ་སློང་མ་གཟུགས་བཟང་མོའི་སྔོན་གྱི་གནས་སྐབས་ལས་བརྩམས་ནས་ཆོས་ཀྱི་གཏམ་ཉན་
པར་འདོད་དམ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་དེའི་དུས་ལ་བབ་ལགས་སོ། །བདེ་བར་གཤེགས་པ་དེའི་དུས་ལ་བབ་ལགས་ཏེ། བཅོམ་ལྡན་འདས་གང་དགེ་སློང་
མ་གཟུགས་བཟང་མོའི་སྔོན་གྱི་གནས་སྐབས་ལས་བརྩམས་ནས་ཆོས་ཀྱི་གཏམ་བསྟན་དུ་གསོལ། བཅོམ་ལྡན་འདས་ལས་མཉན་ནས་གཟུང་བར་འཚལ་ལོ། །དགེ་སློང་དག་དེ་ལྟ་བས་ན། ལེགས་པར་རབ་
ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །བཅོམ་ལྡན་འདས་ལེགས་སོ་ལེགས་སོ་ཞེས་གསོལ་ཏེ། དགེ་སློང་དེ་དག་བཅོམ་ལྡན་འདས་ལ་སླར་ཉན་ཏོ། །དེ་དག་ལ་བཅོམ་ལྡན་འདས་ཀྱིས་འདི་སྐད་ཅེས་

71-1-248a

བཀའ་སྩལ་ཏོ། །དགེ་སློང་དག་སྔོན་བྱུང་བ་འདས་པའི་དུས་ན། ཆུ་བོ་གང་གཱའི་འགྲམ་ན་ཨ་ཏི་མུག་ཏ་ཀ་དང་། སཱ་ལའི་ཚལ་གྱི་ནགས་ཀྱི་ཕྱོགས་གཅིག་ཡོད་དེ། དེ་ན་ཏྲེ་ཤང་ཀུ་ཞེས་བྱ་བའི་གདོལ་པའི་རྒྱལ་པོ་ཡོད་དེ་གདོལ་
པ་སྟོང་ཕྲག་དུ་མའི་ཚོགས་ཆེན་པོ་དང་ལྷན་ཅིག་གནས་སོ། །ཡང་དེའི་ཚེ་དགེ་སློང་དག་གདོལ་པའི་རྒྱལ་པོ་ཏྲེ་ཤང་ཀུ་ཞེས་བྱ་བ་དེས་སྐྱེ་བ་སྔ་མའི་རིག་བྱེད་ཀྱི་ཡན་ལག་དང་། ཉེ་བའི་ཡན་ལག་དང་བཅས་པ་དང་། གསང་བ་དང་བཅས་
པ་དང་། ངེས་པར་སྦྱར་བའི་བརྡ་དང་བཅས་པ་དང་། ཡི་གེའི་རབ་ཏུ་དབྱེ་བ་དང་བཅས་པ་རྣམས་དང་། བཞད་གད་ཅེས་བྱ་བ་དང་། ལྔ་པ་དང་། བསྟན་བཅོས་གཞན་ཡང་རྐྱང་བ་དང་། བྱ་ཀ་ར་ཎ་དང་། རྒྱང་པན་པའི་གཙུག་ལག་དང་། 
མཆོད་སྦྱིན་གྱི་རབས་དང་། སྐྱེས་བུ་ཆེན་པོའི་མཚན་རྣམས་ལ་རྗེས་སུ་མཁས་ཤིང་ཇི་ལྟར་ཆོས་བཤད་པ་དང་། རིག་བྱེད་ཀྱི་བརྟུལ་ཞུགས་དང་། རྟེན་པ་མེད་པར་བཤད་པ་ལ་མཁས་པ་ཞིག་སྟེ། ཡང་རྒྱལ་པོ་ཏྲེ་ཤང་ཀུ་དེ་ལ་གཞོན་
ནུ་སྟག་རྣ་ཞེས་བྱ་བའི་བུ་ཡོད་པ་དེ་གཟུགས་དང་ལྡན་པ། རིགས་དང་ལྡན་པ། ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། ཡོན་ཏན་ཐམས་ཅད་དང་ལྡན་པ། གཟུགས་བཟང་ཞིང་བལྟ་ན་སྡུག་པ། ཁ་དོག་མཛེས་
ཤིང་མཆོག་ཏུ་ཁ་དོག་རྒྱས་པ་དང་ལྡན་པ་ཞིག་ཡོད་དོ། །དེ་ནས་རྒྱལ་པོ་ཏྲེ་ཤང་ཀུས་གཞོན་ནུ་སྟག་རྣ་ལ་སྐྱེ་བ་སྔ་མའི་རིག་བྱེད་དྲན་པ་བསླབས་ཏེ། འདི་ལྟ་སྟེ་ཡན་ལག་དང་། ཉེ་བའི་ཡན་ལག་དང་། གསང་བ་དང་
བཅས་པ་དང་། ངེས་པར་སྦྱར་བའི་བརྡ་དང་བཅས་པ་དང་། ཡི་གེའི་རབ་ཏུ་དབྱེ་བ་དང་བཅས་པ་དང་། བཞད་གད་ཞེས་བྱ་བ་དང་། ལྔ་པ་དང་། བསྟན་བཅོས་གཞན་ཡང་ཆོས་ཇི་ལྟར་བཤད་པ་དང་། རིག་བྱེད་ཀྱི་བརྟུལ་
ཞུགས་བསླབས་ནས། དེ་ནས་རྒྱལ་པོ་ཏྲེ་ཤང་ཀུས་འདི་སྙམ་དུ་བསམས་ཏེ། བདག་གི་བུ་གཞོན་ནུ་སྟག་རྣ་འདི་ནི་གཟུགས་དང་ལྡན་པ། རིག་པ་དང་ལྡན་པ། ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། ཡོན་ཏན་

71-1-248b

ཐམས་ཅད་ཀྱིས་བརྒྱན་པ། གཟུགས་བཟང་ཞིང་བལྟ་ན་སྡུག་པ། ཁ་དོག་མཛེས་ཤིང་མཆོག་ཏུ་ཁ་དོག་རྒྱས་པ་དང་ལྡན་པ། སྔགས་དང་རིག་བྱེད་ཀྱི་ཕ་རོལ་ཏུ་ཕྱིན་པ་ཡིན་གྱིས། ཁྱིམ་བྱ་སྟེ་ཡང་གང་བདག་གིས་གཞོན་
ནུ་སྟག་རྣ་དང་འཐུན་པར་གཟུགས་དང་ལྡན་པ། རིགས་དང་ལྡན་པ། ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ་དེ་ལྟ་བུའི་བུ་མོ་ཞིག་གང་ནས་བཙལ་སྙམ་མོ། །ཡང་དུས་གཞན་ཞིག་གི་ཚེ། བྲམ་ཟེ་པད་མའི་
སྙིང་པོ་ཞེས་བྱ་བ་གྱེན་དུ་འབྱུང་བའི་ལུང་པའི་སྒོ་ཞེས་བྱ་བ་ན། ཁྱབ་པར་ས་དང་། ཆུ་དང་། ཤིང་དང་ལྡན་པ་རྟག་ཏུ་འབྲུ་རྣམས་སྨིན་པ། རྒྱལ་པོ་མི་སྦྱིན་ཞེས་བྱ་བས་བྲམ་ཟེ་དེ་ལ་བྱིན་ནས་དེ་ན་གནས་སོ། །
ཡང་བྲམ་ཟེ་པད་མའི་སྙིང་པོའི་ཕ་མ་བྲམ་ཟེའི་རིགས་ཡོངས་སུ་དག་པ་དང་ལྡན་པ། རིགས་འཁྲུགས་པ་མེད་པ། རིགས་དང་རུས་མ་སྨད་པ། ཕ་མེས་དང་མ་མེས་བདུན་རྒྱུད་ཀྱི་མཁན་པོར་གྱུར་པ། ཀློག་པ་
དང་། གསང་སྔགས་འཛིན་པ། རིག་བྱེད་གསུམ་གྱི་ཕ་རོལ་ཏུ་ཕྱིན་པ་ཡན་ལག་དང་བཅས་པ་དང་། ཉེ་བའི་ཡན་ལག་དང་བཅས་པ་དང་། བརྡ་ངེས་པར་སྦྱར་བ་དང་བཅས་པ་དང་། བཞད་གད་ཅེས་བྱ་བ་དང་། 
ལྔ་པ་དང་། རྐང་པ་དང་། བྱ་ཀ་ར་ཎ་དང་། འཇིག་རྟེན་རྒྱང་པན་པའི་གཙུག་ལག་དང་། མཆོད་སྦྱིན་གྱི་རབས་དང་། སྐྱེས་བུ་ཆེན་པོའི་མཚན་རྣམས་རྗེས་སུ་སྦྱར་བ་རྒྱས་ཤིང་གྲོལ་བར་སྟོན་པ་ཞིག་གོ། །ཡང་བྲམ་
ཟེ་པད་མའི་སྙིང་པོ་དེ་ལ་གཟུགས་བཟང་མོ་ཞེས་བྱ་བའི་བུ་མོ་ཡིད་དུ་འོང་བ། གཟུགས་དང་ལྡན་པ། ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། ཡོན་ཏན་ཐམས་ཅད་ཀྱིས་བརྒྱན་པ། གཟུགས་བཟང་ཞིང་བལྟ་ན་སྡུག་པ། 
མཛེས་ཤིང་མཆོག་ཏུ་ཁ་དོག་རྒྱས་པ་དང་ལྡན་པ། བདག་གི་གཞོན་ནུ་སྟག་རྣ་དང་འཐུན་པས་ཆུང་མར་འོས་སོ་ཞེས་བསམས་ཏེ། དེ་ནས་རྒྱལ་པོ་ཏྲེ་ཤང་ཀུས་དོན་དེ་ཉིད་མཚན་མོ་ཕལ་ཆེར་སེམས་ཤིང་མཚན་མོ་འདས་ནས་ནང་

71-1-249a

པར་ནམ་ནངས་ཏེ། ཐམས་ཅད་དཀར་བའི་ཤིང་རྟ་ལ་ཞོན་ནས། གདོལ་པའི་བློན་པོའི་ཚོགས་ཀྱིས་བསྐོར་ནས་གདོལ་པའི་ཕོ་བྲང་ནས་བྱུང་ནས་བྱང་ཕྱོགས་སུ་ཆས་ཏེ། གྱེན་དུ་འབྱུང་བའི་ལུང་པའི་སྒོ་ག་ལ་བ་དེར་
སོང་སྟེ། དེ་ནས་གདོལ་པའི་རྒྱལ་པོ་ཏྲེ་ཤང་ཀུས་གྱེན་དུ་འབྱུང་བའི་ལུང་པའི་སྒོའི་བྱང་ཤར་གྱི་མཚམས་ན་ཡིད་བདེ་བ་ཞེས་བྱ་བའི་བསྐྱེད་མོས་ཚལ་ཤིང་སྣ་ཚོགས་པས་ཁྱབ་པ། ཤིང་སྣ་ཚོགས་པའི་མེ་ཏོག་དང་ལྡན་པ། 
བྱ་སྣ་ཚོགས་པ་སྒྲ་སྙན་པ་སྒྲོགས་པ། ལྷ་རྣམས་ཀྱི་དགའ་བའི་ཚལ་ལྟར་མཛེས་པ་ཞིག་ཡོད་དེ། དེར་ཕྱིན་ནས་བྲམ་ཟེ་པད་མའི་སྙིང་པོ་འོང་བ་ལ་སྡོད་དོ། །བྲམ་ཟེ་པད་མའི་སྙིང་པོ་བྲམ་ཟེའི་ཁྱེའུ་རྣམས་ལ་བྲམ་ཟེའི་
སྔགས་འཆད་དོ། །དེ་ནས་པད་མའི་སྙིང་པོ་དེ་ཉིད་ཀྱི་མཚན་མོ་འདས་ནས་ཐམས་ཅད་དཀར་བའི་རྟའི་ཤིང་རྟ་ལ་ཞོན་ནས། བྲམ་ཟེའི་ཁྱེའུ་ལྔ་བརྒྱའི་སློབ་མའི་ཚོགས་ཀྱིས་ཡོངས་སུ་བསྐོར་ཏེ་གྱེན་དུ་འབྱུང་བ་ནས་འཕགས་ཏེ། 
བྲམ་ཟེའི་ཁྱེའུ་རྣམས་ལ་བྲམ་ཟེའི་སྔགས་འཆད་དོ། །གདོལ་པའི་རྒྱལ་པོ་ཏྲེ་ཤང་ཀུས་བྲམ་ཟེ་པད་མའི་སྙིང་པོ་ཉི་མའི་འོད་ཟེར་ཀྱི་ཚོགས་ཀྱིས་བསྐོར་བ་ལྟ་བུ། མེ་འབར་བ་འོད་ཀྱིས་བསྐོར་བ་ལྟ་བུ། མཆོད་སྦྱིན་བྱེད་པ་
བྲམ་ཟེའི་ཚོགས་ཀྱིས་བསྐོར་བ་ལྟ་བུ། གངས་ཅན་སྨན་ཚོགས་ཀྱིས་མཛེས་པ་ལྟ་བུ། རྒྱ་མཚོ་རིན་པོ་ཆེས་མཛེས་པ་ལྟ་བུ། ཟླ་བ་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ་ལྟ་བུ། རྣམ་ཐོས་སྲས་གནོད་
སྦྱིན་གྱི་ཚོགས་ཀྱིས་ཡོངས་སུ་བསྐོར་བ་ལྟ་བུ། བརྒྱ་བྱིན་ལྷའི་ཚོགས་ཀྱིས་ཡོངས་སུ་བསྐོར་བ་ལྟ་བུ། བྲམ་ཟེ་སློབ་མའི་ཚོགས་ཀྱིས་ཡོངས་སུ་བསྐོར་བ་མཛེས་པ་རྒྱང་རིང་པོ་ནས་འོང་བ་མཐོང་ངོ་། །མཐོང་ནས་
ཀྱང་བསུ་སྟེ་ཆོས་བཞིན་དུ་བྱས་ནས་འདི་སྐད་ཅེས་སྨྲས་སོ། །ཀྱེ་པད་མའི་སྙིང་པོ་ལེགས་པར་འདིར་བྱོན་གྱིས་བྱ་བ་ཅུང་ཞིག་སྨྲར་ཡོད་ཀྱིས་དེ་ཉོན་ཅིག །དེ་སྐད་ཅེས་སྨྲས་པ་དང་། བྲམ་ཟེ་པད་མའི་སྙིང་པོས་གདོལ་པའི་

71-1-249b

རྒྱལ་པོ་ཏྲེ་ཤང་ཀུ་ལ་འདི་སྐད་ཅེས་སྨྲས་སོ། །ཀྱེ་ཏྲེ་ཤང་ཀུ་བྲམ་ཟེ་མ་ཡིན་པས་ཀྱེ་ཞེས་བོད་པར་མི་ནུས་ཤིང་རིགས་པ་མ་ཡིན་ནོ། །པད་མའི་སྙིང་པོ་བདག་གིས་ཀྱེ་ཞེས་བོད་པར་ནུས་ཤིང་བྱར་རུང་སྟེ། གང་གིས་ནུས་པར་
བྱར་རུང་བར་འགྱུར་ལ། གང་གིས་དེ་མི་ནུས་པ་ནི་དེ་ལྟར་ཡང་མི་བྱའོ། །ཀྱེ་པད་མའི་སྙིང་པོ་སྐྱེས་བུའི་མཉམ་པར་རྩོམ་པ་ནི་སྔོན་གྱི་མཉམ་པར་རྩོམ་པ་ལས་འགྱུར་རོ། །འདི་ལྟ་སྟེ་བདག་གི་དོན་དང་། གཞན་ཀྱི་དོན་དང་། 
བདག་གི་འཁོར་གྱི་དོན་དང་། འབྱུང་པོ་ཐམས་ཅད་ཀྱི་དོན་བསྡུས་པ་ནི་ད་ལྟར་འདིར་ཁྱད་པར་དུ་དོན་ཆེ་བ་གང་ཡིན་པ་སྨྲ་ཡིས་ཉོན་ཅིག །བདག་ལ་བུ་སྟག་རྣ་ཞེས་བྱ་བ་ཡོད་ཀྱིས་དེའི་ཆུང་མར་བུ་མོ་བྱིན་ཅིག་རིན་གང་ཞིག་
འདོད་པ་དེ་སྦྱིན་པར་བྱའོ། །ཚིག་དེ་ལྟ་བུ་ཡང་ཐོས་པ་དང་། གདོལ་པའི་རྒྱལ་པོ་ཏྲེ་ཤང་ཀུ་ལ་བྲམ་ཟེ་པད་མའི་སྙིང་པོ་མཆོག་ཏུ་ཁྲོས་འཁྲུགས་ཤིང་དོན་དེ་ལ་ཡིད་འཁྲུགས་ཤིང་སྡང་བས་དེའི་རྐྱེན་གྱིས་དཔྲལ་བར་
ཁྲོ་གཉེར་གསུམ་བསྡུས་ནས་བཞིན་རྣམ་པར་གྱུར་པས་མིག་རྣམ་པར་འགྱུར་ཞིང་ནེ་ལེ་ལྟར་སེར་སྐྱར་གྱུར་ཏེ། གདོལ་པའི་རྒྱལ་པོ་ཏྲེ་ཤང་ཀུ་ལ་འདི་སྐད་ཅེས་སྨྲས་སོ། །ཐ་མལ་པའི་གདོལ་པ། དམན་པ། སྨད་པ། 
དུ་མ་ཟ་བ། ངན་པ་ནི་གང་བྲམ་ཟེ་རིག་བྱེད་ཀྱི་ཕ་རོལ་ཏུ་ཕྱིན་པ་ལ་གདོལ་པ་དམན་པ། བཅུགས་པ་མེད་པར་འཇོམས་པར་བྱེད་པ། ཁྱོད་ཀྱིས་ཚིག་འདི་ལྟ་བུ་སྨྲ་བར་རིགས་སམ། ཀྱེ་བློ་ངན་མངོན་པའི་ང་རྒྱལ་གྱིས་
ཐ་མལ་པ་ཡིན་པར་སེམས་སམ། དམན་པ་དོན་མ་ཡིན་པ་ལ་དོན་དུ་མ་གཉེར། གསེར་ནམ་ཡང་ཐལ་བར་མི་འགྱུར་རོ། །སྣང་བ་དང་མུན་པ་གཉིས་སམ། གདོལ་པའི་སྐྱེ་གནས་སུ་སྐྱེས་པ་ཡང་བྲམ་
ཟེ་དམ་པ་རྣམས་དང་། དམན་པ་ཁྱོད་དང་འབྲེལ་པར་འདོད་པ་ཇི་ལྟར་མ་རྨོངས། གདོལ་པའི་སྐྱེ་གནས་སུ་སྐྱེས་པ་དང་། ཁོ་བོ་དམ་པར་སྐྱེས་པས་དམན་པ་དང་མཆོག་གཉིས་འབྲེལ་པར་མི་འདོད་དོ། །

71-1-250a

བྲམ་ཟེ་མཆོག་དང་མཆོག་ཏུ་འབྲེལ་པར་བྱེད་པར་འདོད་ཀྱི། མཆོག་དང་དམན་པ་གཉིས་སུ་འབྲེལ་པར་མི་འདོད་དོ། །རིགས་ཕུན་སུམ་ཚོགས་ཤིང་རིགས་ཡོངས་སུ་དག་ཅིང་འཁྲུགས་པ་མེད་པ། 
སྔགས་ཀྱི་ཕ་རོལ་ཏུ་ཕྱིན་པ་ཀློག་པ་དང་། སྔགས་མཆོག་ལས་བྱུང་ཞིང་རིག་བྱེད་ཀྱི་ཕ་རོལ་ཏུ་སོན་པ། བརྡ་ངེས་པར་སྦྱར་བ་དང་བཅས་པ། བྲམ་ཟེ་གང་གིས་རིག་བྱེད་ཀླགས་པ་དེ་ལྟ་བུའི་བྲམ་ཟེ་དང་འབྲེལ་
བར་བྱ་བ་ཡིན་གྱི། རིགས་མཆོག་དང་དམན་པར་འབྲེལ་བར་བྱར་ནི་མི་འདོད་དོ། །དོན་དུ་གཉེར་བར་བྱ་བ་མ་ཡིན་པ་དོན་དུ་གཉེར་བ་ནི་རླུང་ཞགས་པས་འཛིན་པར་རྩོམ་པ་ལ་འཇུག་པ་ཡིན་ཏེ། གང་
ང་དང་ཁྱོད་འབྲེལ་པར་བྱེད་པར་འདོད་པ་དེ་བཞིན་ནོ། །རོ་དང་རིགས་དམན་པ་གཉིས་ནི་འཇིག་རྟེན་ཐམས་ཅད་ལ་མི་གཙང་བ་ཡིན་གྱིས་དམན་པ་མྱུར་དུ་ཕར་ཁྱེད་ཅིག །འདི་ལྟ་བུ་ཉིད་ཇི་ལྟར་སེམས་གདོལ་པ་
དང་། གདོལ་པར་ལྷན་ཅིག་པ་ཡིན་ལ། དུར་བསྲུངས་རྣམས་དང་ནི་དུར་བསྲུངས་ལྷན་ཅིག་པ་ཡིན་ཏེ། རིགས་གང་དང་གང་ཡིན་པ་དེ་དང་དེ་འབྲེལ་བར་བྱེད་པ་ཡིན་ཏེ། རྒྱལ་རིགས་རྣམས་དང་ནི་རྒྱལ་
རིགས་ལྷན་ཅིག་པ་ཡིན་ལ། བྲམ་ཟེ་རྣམས་དང་བྲམ་ཟེ་ལྷན་ཅིག་པ་ཡིན་ལ། དེ་བཞིན་དུ་རྗེའུ་རིགས་རྣམས་ཀྱང་རྗེའུ་རིགས་དང་ལྷན་ཅིག་པ་ཡིན་ལ། དེ་བཞིན་དུ་དམངས་རིགས་རྣམས་
ཀྱང་དམངས་རིགས་དང་ལྷན་ཅིག་ཏུ་འདྲ་བ་རྣམས་ཕན་ཚུན་འཇུག་པ་ཡིན་གྱི། གདོལ་པ་རྣམས་དང་བྲམ་ཟེ་ནི་འབྲེལ་པ་མེད་དོ། །རིགས་ཐམས་ཅད་ལས་དམན་པ་དང་རིགས་མཆོག་རྣམས་
ཇི་ལྟར་འབྲེལ་དུ་འདོད། བྲམ་ཟེ་པད་མའི་སྙིང་ཕོ་ལས་ལན་དུ་དེ་ལྟ་བུའི་ཚིག་ཐོས་པ་དང་། གདོལ་པའི་རྒྱལ་པོ་ཏྲེ་ཤང་ཀུས་འདི་སྐད་ཅེས་སྨྲས་སོ། །ཇི་ལྟར་གསེར་དང་ཐལ་བའི་ཁྱད་

71-1-250b

པར་དམིགས་པ་ལྟར་བྲམ་ཟེ་རྣམས་དང་། རིགས་གཞན་དེ་ལྟ་བུའི་ཁྱད་པར་ནི་མི་དམིགས་སོ། །ཇི་ལྟར་མུན་པ་དང་སྣང་བའི་ཁྱད་པར་དམིགས་པ་ལྟར་བྲམ་ཟེ་རྣམས་དང་རིགས་གཞན་དེ་ལྟ་བུའི་ཁྱད་པར་ནི་མི་
དམིགས་སོ། །གང་བྲམ་ཟེ་རྣམས་ནམ་མཁའ་དང་རྒྱ་མཚོ་ལས་སྐྱེས་པ་ནི་མ་ཡིན་ནོ། །གཙུབ་ཤིང་གིས་མེ་ཕྱུང་བ་ལྟར་ས་རྣམས་ལས་སྐྱེས་པ་འང་མ་ཡིན་ནོ། །བྲམ་ཟེའི་སྐྱེ་གནས་གང་ཡིན་པ་དེ་ནས་གདོལ་པའི་
རིགས་ཀྱང་སྐྱེས་པ་ཡིན་ཏེ། མཆོག་ཉིད་དང་དམན་པ་ཉིད་དུ་བྲམ་ཟེ་རྣམས་ལ་ཅི་དམིགས། བྲམ་ཟེ་མཆོག་རྣམས་ཀྱི་རོ་འང་སྤོང་ཞིང་མི་གཙང་བར་བྱེད་དོ། །རིགས་རྣམས་ལ་དེ་ལྟ་བས་ན་གཞན་དང་དེ་ལ་ཁྱད་པར་ཅི་ཞིག་ཡོད། 
འདི་ལྟར་སྡིག་པའི་ལས་ཅུང་ཟད་བྱེད་ཅིང་རྙོག་པ་དང་། རྩོད་པས་སེམས་ཅན་རྣམས་ལ་གནོད་པ་བྱ་བར་བྲམ་ཟེ་རྣམས་རབ་ཏུ་སྟོན་ཏོ། །བྱད་དང་རོ་ལངས་ཀྱི་ལས་བྲམ་ཟེ་རྣམས་རབ་ཏུ་སྟོན་ཏོ། །ལས་མི་བཟད་པ་རྣམས་ལ་ཡང་
བསོད་ནམས་ཡིན་པར་བྲམ་ཟེ་རྣམས་སྟོན་ཏོ། །ཤ་ཟ་བར་འདོད་པས་བྲམ་ཟེ་རྣམས་ཀྱི་ཆོ་ག་སྦྱར་བ་སྔགས་བཟླས་ནས་ར་ལུག་བསད་ན་མཐོ་རིས་སུ་འགྲོ་བར་སྨྲའོ། །གང་དེ་ལྟ་བུ་མཐོ་རིས་ཀྱི་ལམ་ཡིན་ན་ཅིའི་ཕྱིར་
བྲམ་ཟེ་བདག་ཉིད་དང་གཞན་ཡང་ཉེ་དུ་དང་། ཕ་དང་མ་དང་། སྤུན་ཟླ་དང་། སྲིང་མོ་དང་། དེ་བཞིན་དུ་བུ་དང་། བུ་མོ་དང་། ཆུང་མ་རྣམས་སྔགས་བཟླས་ནས་བསད་པར་མི་སྟོན། མཛའ་བོ་དང་། གཉེན་དང་། 
བདག་ཉིད་ཀྱང་ཡུལ་ན་གནས་པ་སྔགས་དེ་བཟླས་ནས་ཡང་མཐོ་རིས་སུ་འགྲོ་བ་དྲུག་པོ་རྣམས་ཅིའི་ཕྱིར་མི་གཏོང་། ཐམས་ཅད་ཆོམ་པས་དུས་གཅིག་ཏུ་དག་ཅིང་བདེ་འགྲོ་མཆོག་ཏུ་འགྲོ་བར་འགྱུར་ན། ཅིའི་ཕྱིར་
ཕྱུགས་རྣམས་ཀྱིས་མཆོད་སྦྱིན་བྱེད་ཀྱི་བདག་ཉིད་ཀྱིས་ཅིའི་ཕྱིར་མི་བྱེད། བདེ་འགྲོ་མཐོ་རིས་སུ་ར་ལུག་འགྲོ་བར་བསྟན་པར་མི་བྱ་སྟེ། མཐོ་རིས་ཀྱི་ལམ་དེ་དག་པ་མ་ཡིན་ཏེ། བརྫུན་བསྟན་པ་ཡིན་ནོ། །བྲམ་ཟེ་རྣམས་

71-1-251a

སྡང་བའི་སེམས་ཀྱིས་ཤ་བཟའ་བར་འདོད་པས་རྣམ་གྲངས་དུ་མས་ཐབས་བསམས་ཏེ། ཕྱུགས་རྣམས་གསད་པའི་ཆོ་ག་བསྟན་པ་ཡིན་ནོ། །གཞན་ཡང་བདག་གིས་བྲམ་ཟེ་རྣམས་ཀྱི་ཆོ་ག་གང་ཡིན་པ་
བརྗོད་པར་བྱ་སྟེ། རིག་བྱེད་བཞི་ལས་སྡིག་པ་བྱ་བར་བསྟན་ཏེ། གསེར་རྐུ་བ་དང་ཆང་འཐུང་དང་། །བླ་མའི་ཆུང་མ་སྤྱོད་པ་དང་། །སྡོམ་པའི་ཚོགས་ནི་འཇིག་པ་སྟེ། །སྡིག་པ་བཞི་རུ་བྲམ་ཟེ་འདོད། །གསེར་རྐུ་བ་ནི་སྤང་བར་བྱ། །
དེ་བཞིན་ལས་གཞན་སྡིག་ཡོད་མིན། །བྲམ་ཟེ་གང་གིས་གསེར་རྐུས་ན། །དེ་དག་བྲམ་ཟེ་མིན་པར་འདོད། །ཆང་ནི་བཏུང་བར་མི་བྱ་སྟེ། །གཞན་ནི་བཏུང་བར་བྱ་བར་འདོད། །བྲམ་ཟེ་གང་ཞིག་ཆང་འཐུང་བ། །དེ་དག་བྲམ་ཟེར་མི་འགྱུར་
རོ། །བླ་མའི་ཆུང་མ་སྤྱད་མི་བྱ། །གཞན་གྱི་ཆུང་མ་བགྲོད་པར་བྱ། །བླ་མའི་ཆུང་མ་ལ་འགྲོ་བ། །དེ་དག་བྲམ་ཟེར་མི་འགྱུར་རོ། །བྲམ་ཟེ་གཅིག་ཀྱང་བསད་མི་བྱ། །བྲམ་ཟེ་མིན་པ་དུ་མ་བསད། །གང་ཞིག་བྲམ་ཟེ་གསོད་བྱེད་པ། །
དེ་དག་བྲམ་ཟེར་མི་འགྱུར་རོ། །བཞི་པོ་དེ་དག་གང་ཡིན་པ། །བྲམ་ཟེ་རྣམས་ལ་སྡིག་པར་འགྱུར། །དེ་དག་ལས་གཞན་སྡིག་མེད་འདོད། །བཞི་པོ་དེ་ལས་གཅིག་བྱས་ན། །དེ་ནི་བྲམ་ཟེ་ཡིན་མི་འགྱུར། །བྲམ་ཟེ་རྣམས་
ནི་ཚོགས་པ་རུ། །ཆུད་མིན་ཕྱག་ཀྱང་མི་བྱའོ། །སྟན་དང་ཆུ་རྣམས་མི་བསྟབ་ཅིང་། །བསུ་བར་ཡང་ནི་མི་བྱའོ། །བྲམ་ཟེ་ཉམས་པ་དེ་ལ་ཡང་། །དེ་ནི་འབྱུང་བའི་ཐབས་སྣང་སྟེ། །དེ་ཡིས་ལོ་ནི་བཅུ་གཉིས་
སུ། །བོང་བུའི་ལྤགས་པ་བགོ་བྱ་ཞིང་། །ཁ་ཊྃ་ཁ་ནི་ཐོགས་པར་བྱ། །ཐོད་པའི་ནང་དུ་བཟའ་བར་བྱ། །དཀའ་ཐུབ་འདི་ནི་ཡང་དག་བཟུང་། །ངེས་པར་རྒྱུན་ནི་མ་བཅད་པར། །གང་གིས་བརྟུལ་
ཞུགས་ཡང་དག་བླང་། །ཕྱིར་ཡང་བྲམ་ཟེ་འགྲོ་བར་འགྱུར། །ལོ་ནི་བཅུ་གཉིས་ཚང་བ་ན། །ཕྱི་ནས་དེ་ནི་བྲམ་ཟེར་འགྱུར། །དེ་ནི་འབྱུང་བའི་ཐབས་སུ་བསྟན། །བྲམ་ཟེ་ཡི་ནི་དཀའ་ཐུབ་ཡིན། །རྨོངས་

71-1-251b

པས་ལས་ནི་ངན་པ་སྟེ། །འབྱུང་བ་མེད་པར་བསྟན་པར་བྱ། །བྲམ་ཟེ་དེ་ནི་འདི་ལྟ་སྟེ། །འདི་ཤེས་ཐ་མལ་ཙམ་ཉིད་དུ། །འཇིག་རྟེན་གང་ཡིན་རྗོད་པར་བྱེད། །བྲམ་ཟེ་ཡང་དེ་ལྟ་བུའོ། །རྒྱལ་རིགས་ཀྱང་དེ་ལྟ་བུའོ། །
རྗེའུ་རིགས་ཀྱང་དེ་ལྟ་བུའོ། །དམངས་རིགས་ཀྱང་དེ་ལྟ་བུ་ཡིན་ནོ། །དེ་དག་ཐམས་ཅད་དེ་ལྟ་བུ་ཡིན་པས་རྣམ་པ་ཐམས་ཅད་དུ་བདག་གི་བུ་གཞོན་ནུ་སྟག་རྣ་ལ་བྲམ་ཟེའི་བུ་མོ་གཟུགས་བཟང་མོ་ཆུང་མའི་དོན་དུ་བྱིན་ཅིག །
རིན་གང་བབ་པ་དེ་འདོད་པ་དེ་བཞིན་དུ་བཅལ་བར་བྱའོ། །གདོལ་པའི་རྒྱལ་པོ་ཏྲེ་ཤང་ཀུ་ལས་དེ་ལྟ་བུའི་ཚིག་ཐོས་པ་དང་། བྲམ་ཟེ་པད་མའི་སྙིང་པོ་མཆོག་ཏུ་ཁྲོས་འཁྲུགས་ཤིང་དོན་དེ་ལ་ཡིད་སྡང་བས་དེའི་རྐྱེན་གྱིས་
དཔྲལ་བར་ཁྲོ་གཉེར་གསུམ་བསྡུས་ནས། ཁ་ནས་དུ་བ་འཐུལ་ཞིང་ནེ་ལེ་ལྟར་སེར་སྐྱར་གྱུར་པས་མིག་རྣམ་པར་སྒྱུར་ཞིང་གདོལ་པའི་རྒྱལ་པོ་ཏྲེ་ཤང་ཀུ་ལ་འདི་སྐད་ཅེས་སྨྲས་སོ། །དམངས་རིགས་ཁྱོད་མ་
བརྟགས་པར་འདི་ལྟ་བུའི་ཐ་སྙད་ཀྱིས་འཇིག་རྟེན་རྣམས་མཉམ་ཞིང་རིགས་གཅིག་ཅིང་ཐ་དད་པ་མ་ཡིན་པར་སྟོན་ནམ། འདི་ལྟར་ཇི་ལྟར་དམན་པའི་རིགས། །བྲམ་ཟེ་རིག་བྱེད་ཕ་རོལ་ཕྱིན། །དམན་པའི་རིགས་སུ་
གྱུར་པ་ཡིས། །རྣམ་པར་ཉམས་པར་ཁྱོད་འདོད་དམ། །རྒྱལ་པོར་གྱུར་ནས་དེ་དམན་ལ། །བྱེ་བྲག་གྱུར་པར་ཤེས་པ་མེད། །འདི་ལྟ་སྟེ་ཡུལ་ཁྲིམས་དང་། གྲོང་ཁྱེར་གྱི་ཁྲིམས་དང་། གྲོང་གི་ཁྲིམས་དང་། 
ལྗོངས་ཀྱི་ཁྲིམས་དང་། ཤོ་གམ་གྱི་ལུགས་དང་། བག་མ་གཏོང་བའི་ཁྲིམས་དང་། བག་མ་ལེན་པའི་ཁྲིམས་དང་། སྔོན་གྱི་ལས་ཀྱི་ཆོས་རྣམས་ཀྱང་མི་ཤེས་སོ། །དམངས་རིགས་རིགས་ནི་བཞི་པོ་འདི་དག་
ཡིན་ཏེ། འདི་ལྟ་སྟེ། བྲམ་ཟེའི་རིགས་དང་། རྒྱལ་རིགས་དང་། རྗེའུ་རིགས་དང་། དམངས་རིགས་ཞེས་བྱ་བ་སྟེ། དེ་དག་གི་བག་མ་ལེན་པའི་ཁྲིམས་ཀྱང་བྲམ་ཟེ་རྣམས་ཀྱི་ཆུང་མ་ནི་རྣམ་པ་བཞིར་འགྱུར་ཏེ། འདི་ལྟ་

71-1-252a

སྟེ། བྲམ་ཟེ་མོ་དང་། རྒྱལ་རིགས་མོ་དང་། རྗེའུ་རིགས་མོ་དང་། དམངས་རིགས་མོ་ཡིན་ནོ། །ཀྱེ་དམན་པ་རྒྱལ་རིགས་ཀྱི་ཆུང་མ་ནི་རྣམ་པ་གསུམ་དུ་འགྱུར་ཏེ། རྒྱལ་རིགས་མོ་དང་། རྗེའུ་རིགས་མོ་དང་། 
དམངས་རིགས་མོ་ཞེས་བྱ་བ་ཡིན་ནོ། །རྗེའུ་རིགས་ཀྱི་ཆུང་མ་ནི་རྣམ་པ་གཉིས་སུ་འགྱུར་ཏེ། རྗེའུ་རིགས་མོ་དང་། དམངས་རིགས་མོའོ། །དམངས་རིགས་ཀྱི་ཆུང་མ་ནི་གཅིག་སྟེ། དམངས་རིགས་མོ་ཉིད་ཡིན་ནོ། །
ཀྱེ་དམན་པ་བྲམ་ཟེ་རྣམས་ཀྱི་བུ་ནི་རྣམ་པ་བཞིར་འགྱུར་ཏེ། འདི་ལྟ་སྟེ། བྲམ་ཟེ་མོ་དང་། རྒྱལ་རིགས་མོ་དང་། རྗེའུ་རིགས་མོ་དང་། དམངས་རིགས་མོ་ལ་སྐྱེས་པ་ཡིན་ནོ། །རྒྱལ་རིགས་རྣམས་ཀྱི་བུ་ནི་རྣམ་པ་
གསུམ་དུ་འགྱུར་ཏེ། རྒྱལ་རིགས་མོ་དང་། རྗེའུ་རིགས་མོ་དང་། དམངས་རིགས་མོ་ལས་སྐྱེས་པ་ཡིན་ནོ། །རྗེའུ་རིགས་རྣམས་ཀྱི་བུ་ནི་གཉིས་སུ་འགྱུར་ཏེ། རྗེའུ་རིགས་མོ་དང་། དམངས་རིགས་མོ་ལས་སྐྱེས་པ་
ཡིན་ནོ། །དམངས་རིགས་རྣམས་ཀྱི་བུ་ནི་གཅིག་ཏུ་འགྱུར་ཏེ། དམངས་རིགས་མོ་ལས་སྐྱེས་པ་ཡིན་ནོ། །ཀྱེ་དམན་པ་བྲམ་ཟེ་རྣམས་ཀྱི་བུ་ནི་ལུས་ཀྱི་སྟོད་ཁ་ནས་སྐྱེས་པ་ཡིན་ནོ། །བྲང་ལས་ནི་རྒྱལ་
རིགས་སྐྱེས་པ་ཡིན་ནོ། །ལྟེ་བ་ནས་ནི་རྗེའུ་རིགས་སྐྱེས་པ་ཡིན་ནོ། །རྐང་པ་ནས་ནི་དམངས་རིགས་སྐྱེས་པ་ཡིན་ཏེ། ཀྱེ་དམན་པ་ངེས་པར་བྲམ་ཟེ་རྣམས་ནི་འཇིག་རྟེན་ཐམས་ཅད་སྒྲུབ་པར་བྱེད་པ་དེ་ལས་བདག་
ཅག་སྐྱེས་པ་ཡིན་ནོ། །དེ་ནས་ནི་རྒྱལ་རིགས་རྣམས་སོ། །དེ་ནས་ནི་རྗེའུ་རིགས་ཏེ་གསུམ་པའོ། །དེ་ནས་ནི་དམངས་རིགས་ཏེ་བཞི་པ་ཡིན་པར་འདོད་དོ། །ཀྱེ་དམན་པ་ཁྱོད་རིགས་དེ་ལྟ་བུ་བཞི་པ་ཡིན་པར་མ་མཐོང་
ངམ། བདག་རིགས་གྱི་མཆོག །རིགས་ཀྱི་གཙོ་བོ། ཕུལ་དུ་བྱུང་བ། རིགས་ཀྱི་རབ་མཆོག་དམ་པར་གྱུར་པ་དང་། ཡང་དག་པར་འབྲེལ་པར་འདོད་དམ། དམན་པ་ཁྱོད་སྤང་བར་བྱ་བ་ཡིན་གྱི་བདག་གི་དྲུང་ནས་ཕྱིར་

71-1-252b

ཁྱེད་ཅིག །ཡང་ཚིག་དེ་ལྟ་བུ་བྲམ་ཟེ་པད་མའི་སྙིང་པོ་ལས་ཐོས་པ་དང་། གདོལ་པའི་རྒྱལ་པོ་ཏྲེ་ཤང་ཀུས་འདི་སྐད་ཅེས་སྨྲས་སོ། །བྲམ་ཟེ་ཉོན་ཅིག་འདིར་ཁྱེད་ཀྱིས་འཇིག་རྟེན་ཐམས་ཅད་སྒྲུབ་པར་བྱེད་པ་དེ་ལས་བདག་
ཅག་སྐྱེས་པ་ཡིན་པས་ཐུ་བོ་བདག་ཅག་ཡིན་ལ། དེ་ནས་རྒྱལ་རིགས་རྣམས་སོ། །དེ་ནས་རྗེའུ་རིགས་ཏེ་གསུམ་པའོ། །དེ་ནས་ནི་དམངས་རིགས་ཏེ་བཞི་པ་ཡིན་པར་འདོད་དོ་ཞེས་བསྟན་པ་ལ་རྐང་པ་དང་བཅས་པ། བརླ་དང་བཅས་
པ། ལག་པ་དང་བཅས་པ། རྩིབ་ལོགས་དང་བཅས་པ། མིར་གྱུར་པ་ཡིན་ན་ཡང་ཆ་ཅིག་ལ་ཁྱད་པར་ཅི་ཞིག་ཡོད་དེ། དེ་བས་ན་རིགས་བཞི་ནི་མི་གྲུབ་བོ། །དེ་ལྟ་བས་ན་དེ་དག་ལ་བྱེ་བྲག་གང་གིས་ཁྱད་པར་དུ་བྱེད་པ་སྨྲོས་ཤིག །དེ་བས་ན་
ཁྱད་པར་མེད་པ་དེའི་ཕྱིར་ཡང་རིགས་རྣམས་བཞིར་གྲུབ་པ་མ་ཡིན་ནོ། །གང་ཞིག་འདི་ལྟར་བྱིས་པ་རྩེ་བ་ནི་ལམ་པོ་ཆེར་འཇིམ་པའི་གོང་བུ་ལས་བསྒོངས་ནས་བདག་ཉིད་མིང་འདོགས་པར་བྱེད་དེ། འདི་ནི་འོ་མའོ། །འདི་ནི་ཞོའོ། །འདི་ནི་
མར་རོ། །འདི་ནི་ཤའོ་ཞེས་བརྗོད་པས་བྱིས་པ་དེ་དག་ལ་འོ་མ་ལ་སོགས་པ་བཞིར་འགྱུར་བ་ནི་མ་ཡིན་ནོ། །ཡང་འཇིམ་པ་བསྒོངས་པའི་སྦྱོར་བའི་བྱེ་བྲག་ཡིན་པར་ཤེས་པ་ལྟར་སྐྲས་མ་ཡིན། རྣ་བས་མ་ཡིན། མགོ་བོས་མ་ཡིན། 
མིག་གིས་མ་ཡིན། ཁས་མ་ཡིན། སྣས་མ་ཡིན། མགྲིན་པས་མ་ཡིན། དཔུང་པས་མ་ཡིན། བྲང་གིས་མ་ཡིན། རྩིབ་ལོགས་ཀྱིས་མ་ཡིན། ལྟོ་དང་རྒྱབ་ཀྱིས་མ་ཡིན་ཏེ། །བརླ་དང་དེ་བཞིན་སྒྱིད་པས་མིན། །
རྐང་པ་ལག་པས་ཀྱང་མ་ཡིན། །དབྱངས་ཀྱིས་མ་ཡིན་ཁ་དོག་མིན། །གནས་དང་འདོད་པ་སྤྱོད་པས་མིན། །སྣ་ཚོགས་ཁྱད་པར་ཐམས་ཅད་ནི། །མི་རྣམས་ལ་ནི་གང་ཡོད་པ། །དེ་ལྟར་རང་གི་བསོད་ནམས་རིགས། །
སྐྱེས་པ་བུད་མེད་མཚན་མས་ཕྱེ། །རྐང་པ་ལག་པ་འཐུན་པ་ན། །དེ་ལ་རིགས་སུ་གང་གིས་འདོད། །མགོ་བོ་དང་ནི་བྲང་རྣམས་དང་། །ལྤགས་པ་དབང་པོའི་བྱ་བར་བཅས། །ལྟོ་བར་ལྡན་ལ་ཡོད་མ་ཡིན། །ཆ་གཅིག་གནས་

71-1-253a

ལ་བྱེ་བྲག་མེད། །རིགས་བཞིར་གནས་པ་གང་གིས་རྟོགས། །དེ་ལྟས་མཆོག་ནི་གང་ཞིག་ཡོད། །ཁྱད་པར་གང་འདོད་འདི་རུ་སྨྲོས། །རབ་མཆོག་བྱེ་བྲག་འདིར་ཡོད་མིན། །རིགས་བཞི་བྱེ་བྲག་མེད་པར་བཤད། །འདིར་
ཉེས་པ་དེ་ལྟ་བུ་ཡོད་པས་གང་གི་ཚེ། ཁྱོད་ཀྱིས་བརྗོད་པ་དེ་ལྟ་བུ་དེ་ནི་རིགས་པ་མ་ཡིན་ནོ། །ཀྱེ་ཤེས་ལྡན་བདག་ལ་སླར་ཉོན་ཅིག་དང་ལེགས་པར་བཤད་པ་མཆོག་ཏུ་དཀར་ཞིང་མཐར་ཐུག་པའི་ཆོས་ཀྱི་གླེང་གཞི་བསྟན་པར་བཤད་པར་
བྱ་ཡིས་ཐོས་ནས་རིགས་པ་དང་མི་ལྡན་ན་སླར་སྨྲོས་ཤིག །གང་ཡང་འདིར་བསྟན་པ་ངེས་པ་དང་ལྡན་ཞིང་རིགས་པ་མེད་པར་སྨྲ་ན། ཕྱི་ཕྱིར་བདག་ལས་ཐོས་ནས་ཤེས་ལྡན་ཁོང་དུ་ཆུད་ན་མི་རྣམས་ལ་མཆོག་ཏུ་གྱུར་པའི་ཆོས་ཀྱི་
བྱེ་བྲག་ནི་མེད་དོ། །བྲམ་ཟེ་ཁྱོད་ཀྱིས་རྗེས་སུ་དཔག་པའི་ཚད་མ་གང་གིས་དེ་ལ་རྣམ་པར་དཔྱད་ན་བྲམ་ཟེ་རྣམས་དང་གཅིག་ཡིན་ཏེ། འདིར་དེ་ལྟ་བས་ན་སྐྱེ་དགུ་རྣམས་རིགས་གཅིག་པ་ཉིད་དེ། བདག་དང་ཡང་རིགས་གཅིག་པ་ཉིད་མ་ཡིན་ནོ། །
བདག་དང་རིགས་ཐ་དད་པ་ཉིད་མ་ཡིན་ནོ། །ཚངས་པས་འཇིག་རྟེན་འདི་ཐམས་ཅད་བསྐྱེད་དོ་ཞེས་སྨྲ་བ་ནི། གལ་ཏེ་ཚངས་པས་བསྐྱེད་ཅེས་བྱ་བ་འདི་ཚང་མས་རིགས་པ་མ་ཡིན་ཏེ། རིགས་བཞི་པོ་བསྟན་པ་བྲམ་ཟེ་དང་། 
རྒྱལ་རིགས་དང་། རྗེའུ་རིགས་དང་། དམངས་རིགས་ཀྱི་ཚངས་པ་ནི་རྒྱུ་མ་ཡིན་ཏེ། བྲམ་ཟེ་རྣམས་ལ་ཡང་དག་པར་དཔྱད་ན། མི་རྣམས་ཀྱི་རིགས་སྣ་ཚོགས་པའི་རྒྱུ་འདུས་པ་ཡིན་ཏེ། འདི་ལྟ་སྟེ། མགོ་བོ་དང་། 
ཁ་དང་། མིག་དང་། རྣ་བ་དང་། སྣ་དང་། བཞིན་དང་། ཁ་དོག་དང་། དབྱིབས་དང་། རྣམ་པ་དང་། སྐྱེ་གནས་དང་། ཟས་ཀྱི་བྱེ་བྲག་ཏུ་གྱུར་པ་རྣམས་ཀྱིས་སྣ་ཚོགས་པར་ཤེས་པར་བྱའོ། །ཀྱེ་པད་མའི་སྙིང་པོ་
འདི་ལྟ་སྟེ། བ་ལང་དང་། རྟ་དང་། བོང་བུ་དང་། ཁྱི་དང་། རྔ་མོ་དང་། རི་དགས་དང་། བྱ་དང་། ར་ལུག་རྣམས་སྒོ་ང་ལས་སྐྱེས་པ་དང་། མངལ་ནས་སྐྱེས་པ་དང་། དྲོད་གཤེར་ལས་སྐྱེས་པ་དང་། བརྫུས་ཏེ་སྐྱེས་པ་

71-1-253b

རྣམས་ཀྱིས་སེམས་ཅན་རྣམས་ཐ་དད་པར་ཤེས་པར་བྱའོ། །འདི་ལྟ་སྟེ། ཡང་རྐང་པ་དང་། གདོང་པ་དང་། ཁ་དོག་དང་། དབྱིབས་དང་། ཟས་དང་། སྐྱེ་གནས་ཀྱི་སྣ་ཚོགས་པར་ཡང་ཤེས་པར་བྱའོ། །ཡང་དེ་ལྟ་
བས་ན་རིགས་བཞི་པོ་རྣམས་ཐ་དད་པར་ཤེས་པར་མི་བྱའོ། །དེ་ལྟ་བས་ན་འདི་དག་བྲམ་ཟེ་རྣམས་དང་འདྲ་ཞིང་གཅིག་པ་ཡིན་ནོ། །ཤིང་འདི་དག་ཀྱང་གང་གིས་འབྲས་བུ་ཨ་མྲ་དང་། ཛམ་བུ་དང་། ཁརྫུ་ར་དང་། པ་ན་
ས་དང་། ཕ་ལེ་པ་དང་། དགེ་ཙ་ཀ་དང་། རྒུན་འབྲུམ་དང་། པྱི་སོར་དང་། ཀ་པི་ཏ་དང་། སྟརྒ་དང་། ན་ལི་ཀེ་ར་དང་། ཏིང་ནི་ཀ་དང་། སརྫ་ཀ་དང་། འབྲས་བུ་དང་ལྡན་པ་སྣ་ཚོགས་པར་རིག་པར་བྱའོ། །འདི་ལྟ་
སྟེ། རྩ་བ་དང་། སྡོང་བུ་དང་། ཤུན་ལྤགས་ཀྱི་ཆ་དང་། མེ་ཏོག་དང་། མཐའ་ཡས་པ་སྟེ། ལོ་མ་དང་། མེ་ཏོག་དང་། འབྲས་བུ་དང་། སྣ་ཚོགས་པར་རིག་པར་བྱའོ། །འབྲས་བུ་མེད་པའི་མེ་ཏོག་རྣམས་སྣ་
ཚོགས་པར་རིག་པར་བྱའོ། །ཡང་དེ་བས་རིགས་བཞི་པོ་རྣམས་ཐ་དད་པ་མ་ཡིན་ནོ། །བྲམ་ཟེ་འདི་ལྟ་སྟེ། འདི་དག་ནི་སྐམས་ལས་སྐྱེས་པས་ཤིང་སྟེ། སཱ་ལ་དང་། ན་ད་དང་། ཏ་མ་ལ་དང་། ཀར་ནི་ཀ་དང་། 
ལོ་མ་བདུན་པ་དང་། ཤི་རི་ཤ་དང་། འོ་བོ་ད་ར་དང་། ཙན་དན་དང་། ཤ་བ་དང་། ད་པ་དང་། སེང་ལྡེང་ལ་སོགས་པ་སྣ་ཚོགས་པར་རིག་པར་བྱའོ། །འདི་ལྟ་སྟེ། རྩ་བ་དང་། སྡོང་བུ་དང་། ཤུན་ལྤགས་ཀྱི་
ཆ་དང་། མེ་ཏོག་ཙམ་དང་། སྙིང་པོ་དང་། ལོ་མ་དང་། མེ་ཏོག་དང་། འབྲས་བུ་སྣ་ཚོགས་པར་རིག་པར་བྱའོ། །ཡང་དེ་བས་ན་རིགས་བཞི་པོའི་རིགས་རྣམས་ལ་ཐ་དད་པ་མེད་པར་ཤེས་པར་བྱའོ། །
འདི་ལྟ་སྟེ། འདི་དག་ནི་འོ་མ་ཅན་གྱི་ཤིང་སྟེ། ཨུ་དུམ་བ་ར་དང་། པ་ལཀྵ་དང་། ཨ་ཤྭད་ཐ་དང་། ནྱ་གྲོ་དྷ་དང་། བལ་གུ་ཞེ་བྱ་བ་ལ་སོགས་པ་སྣ་ཚོགས་པར་རིག་པར་བྱའོ། །འདི་ལྟ་སྟེ། རྩ་བ་དང་། 

71-1-254a

སྡོང་བུ་དང་། ཤུན་ལྤགས་ཀྱི་ཆ་དང་། མེ་ཏོག་ཙམ་དང་། སྙིང་པོ་དང་། ལོ་མ་དང་། མེ་ཏོག་དང་། འབྲས་བུ་རྣམས་ཐ་དད་པར་རིག་པར་བྱའོ། །ཡང་དེ་བས་ན་རིགས་བཞི་པོའི་རིགས་རྣམས་ལ་ཐ་དད་པ་མེད་པར་
ཤེས་པར་བྱའོ། །པད་མའི་སྙིང་པོ་འདི་ལྟ་སྟེ། ཡང་འདི་དག་ནི་འབྲས་བུ་སྨན་དུ་གྱུར་པའི་ཤིང་རྣམས་ཏེ། ཨ་མ་ལ་དང་། ཨ་རུ་ར་དང་། སྐྱུ་རུ་ར་དང་། བ་རུ་ར་དང་། ཨ་རུ་ཤ་ཀ་ལ་སོགས་པ་དང་། གཞན་ཡང་སྣ་ཚོགས་
པའི་སྨན་རིགས་སྣ་ཚོགས་པ་ལས་སྐྱེས་པ་དང་། རྩྭ་དང་ནགས་ནས་སྐྱེས་པར་ཐ་དད་མེད་པར་ཤེས་པར་རིག་པར་བྱའོ། །ཡང་དེ་བས་ན་རིགས་བཞི་པོ་རྣམས་ལ་ཐ་དད་མེད་པར་ཤེས་པར་བྱའོ། །བྲམ་ཟེ་འདི་ལྟ་སྟེ། 
འདི་དག་ནི་ཐང་ལས་སྐྱེས་པའི་མེ་ཏོག་རྣམས་ཏེ། ཨ་ཏི་མུག་ཏ་ཀ་དང་། ཙམ་པ་ཀ་དང་། པ་ཏ་ལ་དང་། སུ་མ་ན་དང་། བ་རི་ཤི་ཀ་དང་། ད་ཙུ་སྐར་ལ་སོགས་པ་སྣ་ཚོགས་པར་རིག་པར་བྱའོ། །འདི་ལྟ་སྟེ། གཟུགས་དང་
ཁ་དོག་དང་། དྲི་དང་། དབྱིབས་སྣ་ཚོགས་པར་རིག་པར་བྱའོ། །བྲམ་ཟེ་འདི་ལྟ་སྟེ། འདི་དག་ནི་ཆུ་ལས་སྐྱེས་པའི་མེ་ཏོག་སྟེ། པད་མ་དང་། ཨུད་པ་ལ་དང་། ཀུ་མུ་ཏ་དང་། སོའུ་གན་དི་ག་དང་། དྲི་ཞིམ་ལ་སོགས་པ་སྣ་
ཚོགས་པར་རིག་པར་བྱའོ། །འདི་ལྟ་སྟེ། གཟུགས་དང་། དྲི་དང་། ཁ་དོག་དང་། དབྱིབས་ཐ་དད་པར་རིག་པར་བྱའོ། །ཡང་དེ་བས་ན་རིགས་བཞི་པོའི་རིགས་རྣམས་ལ་ཐ་དད་པ་མེད་པར་ཤེས་པར་བྱའོ། །བྲམ་ཟེ་བྲམ་
ཟེའི་རིགས་ཀྱང་དེ་ལྟ་བུའོ། །རྒྱལ་རིགས་ཀྱང་དེ་ལྟ་བུའོ། །རྗེའུ་རིགས་ཀྱང་དེ་ལྟ་བུའོ། །དམངས་རིགས་ཀྱང་དེ་ལྟ་བུ་ཡིན་ཏེ། དེ་ལྟ་བས་ན་ཐམས་ཅད་གཅིག་པ་ཡིན་ནོ། །གཞན་ཡང་ཁྱོད་ལ་བྲམ་ཟེ་རྣམས་ཀྱི་རྟོག་པ་
བརྗོད་པར་བྱ་སྟེ། འདི་ལྟར་སྐྱེ་དགུའི་བདག་པོ་ཚངས་པའི་ནམ་མཁའ་སྐར་མའི་ཚོགས་དང་བཅས་པ་ནི་མགོ་བོ་ཡིན་ནོ། །ལྟོ་བ་ནི་རི་རྣམས་ཡིན་ནོ། །བརླ་གཉིས་དང་རྐང་པ་གཉིས་ནི་སའོ། །མིག་གཉིས་ནི་ཉི་མ་དང་ཟླ་བའོ། །

71-1-254b

བ་སྤུ་རྣམས་ནི་རྩྭ་དང་ནགས་ཀྱི་ཚོགས་སོ། །ནམ་མཁའ་ལས་ཆར་འབབ་པ་ནི་མཆི་མའོ། །ཆུ་བོ་རྣམས་ནི་དེའི་གཅིན་ནོ། །མཚོ་རྣམས་ནི་དེའི་མི་གཙང་བ་ཡིན་ནོ། །དེ་ལྟ་བུ་ནི་སྐྱེ་དགུའི་བདག་པོ་ཚངས་པར་འདོད་དོ། །ཚངས་པ་རང་
གི་མཚན་ཉིད་ནི་དེ་ལྟ་ཡིན་པར་རིགས་སམ། །ཁྱོད་རང་གིས་དཔྱོད་ཅིག །ཚངས་པ་གང་ཡིན་པ་དེ་ལས་བྲམ་ཟེ་རྣམས་ཀྱང་བྱུང་། རྒྱལ་རིགས་རྣམས་ཀྱང་བྱུང་། རྗེའུ་རིགས་རྣམས་ཀྱང་བྱུང་། དམངས་རིགས་རྣམས་ཀྱང་བྱུང་བར་
གྱུར་ཅིང་དེ་ལྟར་ན་གལ་ཏེ་སྐྱེས་པར་ངེས་པར་གྱུར་ན་ཡང་འདི་ལྟར་འགྱུར་ཞིང་རིགས་བྱེ་བྲག་ཏུ་བྱས་པར་འགྱུར་ཏེ། བྲམ་ཟེ་རྣམས་ཚངས་པའི་འཇིག་རྟེན་དུ་འགྲོ་བར་འགྱུར་ཞིང་རིགས་གསུམ་པོ་མཐོ་རིས་སུ་མི་འགྲོ་ན་ནི་དེ་ལྟར་ན་རིགས་
བྱེ་བྲག་ཏུ་བྱས་པར་འགྱུར་རོ། །དེ་ལྟ་མ་ཡིན་ན་རིགས་བཞིར་མི་འགྱུར་རོ། །གང་གི་ཕྱིར་རིགས་བཞི་པོ་ཐ་དད་པ་རྣམས་ནི་དགེ་བའི་ལས་བྱས་པས་མཐོ་རིས་སུ་འགྲོ་བར་འགྱུར་ཏེ། ཡང་དེས་ན་དྲང་སྲོང་རྣམས་ཀྱང་ཞི་བའི་དཀའ་ཐུབ་སྤྱོད་པར་
འགྱུར་རོ། །དེའི་ཕྱིར་བྲམ་ཟེ་རྣམས་ལ་ཁྱད་པར་དུ་གྱུར་པ་མེད་དོ། །གལ་ཏེ་བྲམ་ཟེ་གཅིག་ལ་འདིར་ལྕེ་གཉིས་ཡོད་པར་འགྱུར་ཞིང་དེ་བཞིན་དབང་པོ་གཉིས་དང་། ར་བཞི་དང་། མགོ་གཉིས་ཡོད་ན་དེ་ལྟ་ནི་བྲམ་ཟེའི་རིགས་ཁྱད་པར་དུ་
བྱས་པར་འགྱུར་རོ། །ཆགས་པས་ཕྱིན་ནས་གཞན་དག་གསོད་པ་དང་། དེ་ལྟ་བུར་འགྲོ་ཞིང་གསོད་པར་བྱེད་པ་དང་། སེམས་ཅན་རྣམས་ལ་ལས་ཀྱི་སུན་འབྱིན་ཞིང་དེས་ཡང་འདི་ལྟར་བྲམ་ཟེ་རྣམས་ནི་མི་དགེ་བའི་བཤེས་
གཉེན་ཡིན་ནོ། །འཐབ་ཅིང་རྩོད་པ་དང་། ཕ་དང་ཡང་འཁྲུག་ཅིང་བ་ལང་གསོད་པར་སེམས་པ་ནི་འདིར་བྲམ་ཟེ་རྣམས་ཀྱི་ལུགས་སོ། །སྲིད་སྲུང་གི་རིག་བྱེད་ལས་སྔགས་ཀྱིས་སྐྲག་པར་བྱེད་པ་ནི་བྲམ་ཟེ་རྣམས་ཀྱི་བྱ་བ་
ཡིན་པར་བསྟན་ཏོ། །སྡིག་པ་བྱེད་པ་དང་། སྐྱེ་བོ་དུ་མ་སླུ་བ་དང་། སྒྱུ་དང་མི་བཟད་པ་དེ་ལྟ་བུའི་རྙོག་པས་འདི་ལྟར་ཕ་རོལ་ལ་གནོད་པ་རྗེས་སུ་སེམས་ཤིང་དེའི་རྗེས་ལ་མཐོ་རིས་ཉིད་དུ་འགྲོ་བར་འདོད་ན་དེ་མཐོ་རིས་ཀྱི་ལམ་མ་

71-1-255a

ཡིན་ཏེ། བྲམ་ཟེ་གང་ཞིག་དཀའ་ཐུབ་མཆོག་གིས་ཐུལ་ཞིང་བརྟུལ་ཞུགས་དང་། ཚུལ་ཁྲིམས་དང་ལྡན་པ་མི་འཚེ་ཞིང་ཞི་བ་ལ་མངོན་པར་དགའ་བའི་བྲམ་ཟེ་དེ་ནི་ཚངས་པའི་གནས་སུ་སྐྱེའོ། །ཤ་དང་རུས་པར་བཅས་པ་
དང་། སེན་མོ་དང་བཅས་པ་དང་། ལྤགས་པ་དང་བཅས་པ་དང་། བདེ་བ་དང་། སྡུག་བསྔལ་དང་། གཅིན་དང་ཕྱི་ས་ལྡན་པར་གཅིག་ལ་དབང་པོ་རྣམས་ལ་ཁྱད་པར་མེད་པས་དེའི་ཕྱིར་རིགས་བཞི་ཉིད་དུ་མ་གྲུབ་པའོ། །
བྲམ་ཟེ་འདི་ལྟ་སྟེ། ཡང་སྐྱེས་བུ་འགའ་ཞིག་ལ་བུ་བཞི་ཡོད་པར་གྱུར་ལ། དེ་དག་ལ་མིང་དགའ་བྱེད་ཅེས་བྱ་བ་དང་། འཚོ་བྱེད་ཅེས་བྱ་བ་དང་། མྱ་ངན་མེད་ཅེས་བྱ་བ་དང་། ཚེ་བརྒྱ་པ་ཞེས་བྱ་བར་བཏགས་པས་པད་མའི་སྙིང་པོ་སྐྱེས་བུ་དེའི་བུར་གྱུར་
པ་དེ་ལས་དགའ་བྱེད་ཅེས་བྱ་བ་དེས་དགའ་བར་བྱེད་དམ། འཚོ་བྱེད་ཅེས་བྱ་བ་དེས་འཚོ་བར་བྱེད་དམ། མྱ་ངན་མེད་ཅེས་བྱ་བ་དེས་ཡིད་བདེ་བར་བྱེད་དམ། གང་ཚེ་བརྒྱ་པ་ཞེས་བྱ་བ་དེས་ལོ་བརྒྱ་འཚོ་བར་བྱེད་པ་ནི་མ་ཡིན་གྱི། ཡང་བྲམ་ཟེ་དེ་དག་ནི་
མིང་གིས་ཐ་དད་པར་རིག་པར་བྱའོ། །རིགས་ཀྱིས་ནི་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་ཕ་ཡང་གཅིག་ལས་སྐྱེས་པའི་བུ་ཡིན་ཏེ། དེ་ལ་འདིར་བོད་པའི་ཆེད་དུ་ཕ་དང་། མ་དང་། སྤུན་ཟླ་དང་། ཉེ་དུས་བཏགས་པ་དེ་ཉིད་རིགས་ཡིན་ཏེ། གང་དེ་ལྟར་
རྣམ་པར་ཤེས་པ་དེ་ལས་གཞན་དུ་གྱུར་པ་ནི་འགའ་ཡང་མེད་དོ། །བྲམ་ཟེ་བདག་ཉིད་ལེགས་པར་དཔྱོད་ཅིག །བྲམ་ཟེའི་རིགས་ཤེས་བྱ་བ་དང་། རྗེའུ་རིགས་ཤེས་བྱ་བ་དང་། དམངས་རིགས་ཤེས་བྱ་བ་གང་ཞིག་ཡིན། རྒྱུ་ཐམས་ཅད་
ཀྱིས་ལག་པ་འཇས་པ་དང་། སྒུར་པོ་དང་། འགོག་པ་དང་། འབྲུམ་བུ་དང་། མཛེ་དང་། ཤ་བཀྲ་དང་། ཐ་དད་པ་རབ་ཏུ་གནས་ཏེ། ཤ་དང་གླད་པ་དང་། ལྤགས་པ་དང་། གཞུང་པ་དང་། རྩིབ་ལོགས་དང་། གསུས་པ་དང་། བཞིན་
རང་རང་གི་ལས་ཀྱིས་གྲུབ་པ་ཡིན་ཏེ། དེ་ལྟ་བུའི་འགྲོ་བ་ལ་བྲམ་ཟེར་གྱུར་པ་ནི་ཡོད་པ་མ་ཡིན། གང་གིས་རིགས་ཁྱད་པར་དུ་བྱས་པ་དེ་བས་ནི་རིགས་ཡོད་པ་མ་ཡིན། བྱེ་བྲག་ཡོད་པ་མ་ཡིན་ཏེ་རིགས་བཞི་ཉིད་དུ་མ་གྲུབ་བོ། །

71-1-255b

དེ་ལྟ་བས་ན་བྲམ་ཟེ་ཁྱོད་ལ་བདག་འདི་སྐད་སྨྲ་སྟེ། གང་འཇིག་རྟེན་འདིའི་བྲམ་ཟེ་ཞེས་བྱ་བ་དང་། རྒྱལ་རིགས་ཞེས་བྱ་བ་དང་། རྗེའུ་རིགས་ཞེས་བྱ་བ་དང་། དམངས་རིགས་ཞེས་བྱ་བ་འདི་དག་གཅིག་པ་ཡིན་ཏེ་ཐམས་ཅད་ལ་ཐ་དད་པ་ནི་མེད་དོ། །
དེ་བས་ན་བདག་གི་བུ་གཞོན་ནུ་སྟག་རྣ་ལ་བུ་མོ་གཟུགས་བཟང་མོ་ཆུང་མའི་དོན་དུ་བྱིན་ཅིག །རིན་དུ་གང་བབ་ཅིང་འདོད་པ་དེ་སྦྱིན་པར་བྱའོ། །དེ་ལྟ་བུའི་ཚིག་གདོལ་པའི་རྒྱལ་པོ་ཏྲེ་ཤང་ཀུ་ལས་ཐོས་པ་དང་། བྲམ་ཟེ་པད་མའི་སྙིང་པོས་འདི་
སྐད་ཅེས་སྨྲས་སོ། །ཡང་ཅི་ཁྱོད་ཀྱིས་ངེས་བརྗོད་ཀྱི་རིག་བྱེད་ཀྱང་བཀླགས། མཆོད་སྦྱིན་གྱི་རིག་བྱེད་ཀྱང་བཀླགས། སྙན་དངགས་ཀྱི་རིག་བྱེད་ཀྱང་བཀླགས། སྲིད་སྲུངས་ཀྱི་རིག་བྱེད་ཀྱང་བཀླགས། ཚེའི་རིག་བྱེད་ཀྱི་ཆོ་ག་ཡང་བཀླགས། 
ནང་གི་ཟླ་བའི་དཀྱིལ་འཁོར་ཁྱོད་ཀྱིས་བཀླགས་སམ། གཞན་ཡང་ཡན་ལག་གི་རིག་པ་དང་། དངོས་པོ་བརྟག་པ་དང་། བཀྲ་ཤིས་པའི་ལྟས་དང་། ལ་ཉེ་བརྟག་པ་ཡང་བསླབས་ཤིང་གཞན་ཡང་ཁྱོད་ཀྱིས་སྒྲ་གཅན་འཛིན་གྱི་འགྲོས་དང་། 
གཟའི་འགྲོས་དང་། པ་བ་སངས་ཀྱི་འགྲོས་ཁྱོད་ཀྱིས་བཀླགས་སམ། གཞན་ཡང་ཁྱོད་ཀྱིས་འཇིག་རྟེན་རྒྱང་པན་པ་དང་། རྣམ་པར་བཤད་པའི་གསུང་རབ་དང་། བྱཱ་ཀ་ར་ཎ་རྣམས་དང་། ཟླ་བ་ཕྱེད་པ་རྣམས་བཀླགས་སམ། དེ་སྐད་
ཅེས་དྲིས་པ་དང་། གདོལ་པའི་རྒྱལ་པོ་ཏྲེ་ཤང་ཀུས་བྲམ་ཟེ་པད་མའི་སྙིང་པོ་ལ་འདི་སྐད་ཅེས་སྨྲས་སོ། །བྲམ་ཟེ་དེ་བཞིན་ཏེ། བདག་གིས་དེ་དག་ཡང་དང་ཡང་དུ་རྒྱ་ཆེར་བཀླགས་ཏེ། བྲམ་ཟེ་འདི་ལྟར་བདག་ནི་འདིར་རིག་པའི་ཕ་རོལ་
ཏུ་ཕྱིན་པ་ཐོབ་པར་གྱུར་པ་ཡིན་ཏེ། དེ་ལྟ་བས་ན་ཁྱོད་ལ་བྲམ་ཟེའི་ལྷན་ཅིག་པའི་ཆོས་དེ་དག་རྗེས་སུ་དཔག་པའི་སྒོ་ནས་བཤད་པར་བྱའོ། །བྲམ་ཟེ་བསྐལ་པ་དང་པོ་སྔོན་བྱུང་བ་ན་འདི་ལྟ་སྟེ། བྲམ་ཟེའི་རིགས་ཤེས་བྱ་བ་དང་། 
རྒྱལ་རིགས་ཤེས་བྱ་བ་དང་། རྗེའུ་རིགས་ཤེས་བྱ་བ་དང་། དམངས་རིགས་ཤེས་བྱ་བ་འདི་ཐམས་ཅད་གཅིག་སྟེ་ཐ་དད་པ་མེད་དོ། །སེམས་ཅན་མི་འདྲ་བ་རྣམས་དང་། དེ་བཞིན་འདྲ་བ་དེ་དག་གི་ནང་ནས་སེམས་ཅན་འགའ་ཞིག་

71-1-256a

གིས་འབྲས་ཀྱི་ཞིང་གཅིག་ཏུ་རྨོས་ཤིང་བསྲུངས་ནས་བདག་གིར་བྱས་སོ། །དེ་ལྟ་བུ་དེ་རྣམས་ལ་རྒྱལ་རིགས་རྒྱལ་རིགས་ཞེས་ཐ་སྙད་དུ་བྱས་སོ། །བྲམ་ཟེ་གཞན་ཡང་དེ་དག་གི་ནང་ནས་སེམས་ཅན་གཞན་ཞིག་གིས་འདི་སྙམ་
དུ་བསམས་ནས་ནད་ཀྱིས་ཡོངས་སུ་བར་དུ་གཅོད་པ་དང་། ལྦ་བའི་བར་ཆད་དང་། ཟུག་རྔུའི་བར་ཆད་གང་ཡིན་པ་བདག་གིས་བར་ཆད་རྣམས་སྤངས་ནས་དགོན་པར་ཕྱིན་ལ་རྩྭ་དང་། ཤིང་དང་། ལོ་མ་དང་། འདབ་མ་དང་། ཡལ་ག་
རྣམས་ལས་རྩྭའི་སྤྱིལ་བུ་དང་། ལོ་མའི་སྤྱིལ་བུ་བྱས་ནས་བསམ་གཏན་བྱེད་ཅིང་གནས་ཏེ། དུས་ཚིགས་སུ་ཟས་དོན་དུ་གཉེར་བར་ནང་པར་གྲོང་དུ་བསོད་སྙོམས་སུ་རྒྱུའོ། །དེ་ནས་གྲོང་ཁྱེར་ན་གནས་པའི་སེམས་ཅན་རྣམས་འདི་
སྙམ་དུ་སེམས་ཏེ། ཀྱེ་མ་སེམས་ཅན་འདི་དག་ནི་མཆོག་ཏུ་དཀའ་བ་བྱེད་པ་སྟེ། བདག་ཏུ་འཛིན་པ་ཡོངས་སུ་སྤངས་ནས་གྲོང་དང་། གྲོང་ཁྱེར་དང་། ལྗོངས་དང་། ཡུལ་ནས་འཕགས་པས་དེ་དག་ལ་ཕྱི་རོལ་དུ་དགའ་བ་ཕྱི་རོལ་དུ་
དགའ་བ་ཞེས་ཐ་སྙད་དུ་བྱས་སོ། །དེ་ལ་ཡང་གྲོང་ཁྱེར་ལ་དགའ་བའི་སེམས་ཅན་བཀུར་སྟིར་བྱེད། བླ་མར་བྱེད། ཕུ་དུད་དུ་བྱེད། མཆོད་པར་བྱེད་ཅིང་དེ་དག་ལ་སྦྱིན་པར་སེམས་སོ། །དེ་ན་སེམས་ཅན་དེ་དག་ཉིད་སེམས་ཅན་
གཞན་ཁྲིམས་ལ་གནས་པའི་ནོར་དོན་དུ་གཉེར་བར་གྲོང་ཁྱེར་དུ་བབས་ནས་སྔགས་ཀྱི་ཚིག་ཀློག་དུ་འཇུག་གོ། །དེ་ལ་གྲོང་ཁྱེར་ན་གནས་པ་རྣམས་འདི་སྐད་དུ་འདི་འབའ་ཞིག་མ་ཡིན་གྱི་སེམས་ཅན་གཞན་ཀློག་ཏུ་འཇུག་པས་
སེམས་ཅན་དེ་ལ་ཀློག་ཏུ་འཇུག་པ་ཀློག་ཏུ་འཇུག་པ་ཞེས་འཇིག་རྟེན་གྱི་ཐ་སྙད་དུ་བྱས་སོ། །རྒྱུ་འདི་དང་རྐྱེན་འདིས་འཇིག་རྟེན་དུ་བྲམ་ཟེའི་རིགས་བྱུང་བར་གྱུར་ཏོ། །སེམས་ཅན་གཞན་དག་ནི་དུས་ལ་བབ་ན་རིགས་པས་ལས་
ཀྱི་མཐའ་བྱེད་པས་དེ་དག་ལ་རྗེ་རིགས་ཤེས་ཐ་སྙད་དུ་བྱས་སོ། །རྒྱུ་འདི་དང་རྐྱེན་འདིས་འཇིག་རྟེན་དུ་རྗེའུ་རིགས་བྱུང་བར་གྱུར་ཏོ། །སེམས་ཅན་གཞན་དག་ནི་སྨད་པའི་ལས་བྱེད་པས་བདག་འཚོ་བས་ན་དེ་དག་ལ་དམངས་

71-1-256b

རིགས་དམངས་རིགས་ཞེས་ཐ་སྙད་དུ་བྱས་སོ། །རྒྱུ་འདི་དང་རྐྱེན་འདིས་འཇིག་རྟེན་དུ་དམངས་རིགས་བྱུང་བར་གྱུར་ཏོ། །བྲམ་ཟེ་སྔོན་བྱུང་བ་ན་སྐྱེ་དགུ་གཞན་ཞིག་བག་མ་ལེན་དུ་ཤིང་རྟ་ཞོན་ནས་དགོན་པའི་ཕྱོགས་གཞན་ཞིག་ཏུ་ཕྱིན་པ་དང་། 
ཕྱོགས་དེར་ཤིང་རྟ་ཆག་པས་དེ་བས་ན་གདོལ་པ་གདོལ་པ་ཞེས་ཐ་སྙད་དུ་བྱས་སོ། །ཞིང་རྨོ་བ་ལ་ཞིང་པ་ཞིང་པ་ཞེས་ཐ་སྙད་དུ་བྱས་སོ། །དེ་དག་ལ་སེམས་ཅན་འགའ་ཞིག་གིས་ཚོང་བྱས་ནས་འཚོ་བར་བྱེད་པས་ཚོང་པ་ཚོང་པ་ཞེས་ཐ་
སྙད་དུ་བྱས་སོ། །ཆོས་དང་ལྡན་པའི་ཚིག་གིས་འཁོར་རྣམས་དགའ་བར་བྱེད་པས་ན་འཇིག་རྟེན་གྱི་ཐ་སྙད་དུ་ངག་འཇམ་པ་ལ་རྒྱལ་པོ་རྒྱལ་པོ་ཞེས་འཇིག་རྟེན་གྱི་ཐ་སྙད་དུ་བྱས་སོ། །ཡང་དེ་དག་ལས་སེམས་ཅན་གཞན་དག་གིས་
རབ་ཏུ་བྱུང་ནས་གཞན་ལས་རྒྱལ་བས་ན་རབ་ཏུ་བྱུང་བ་ཞེས་བྱ་སྟེ། རབ་ཏུ་བྱུང་བ་རབ་ཏུ་བྱུང་བ་ཞེས་འཇིག་རྟེན་གྱི་ཐ་སྙད་དུ་བྱས་སོ། །གཞན་ཡང་བྲམ་ཟེ་གཅིག་ཏུ་ཐ་སྙད་དུ་བྱས་པ་དེ་ཁྱོད་ལ་རབ་ཏུ་བཤད་པར་བྱའོ། །
ཚངས་པའི་འཇིག་རྟེན་དུ་དེ་རིག་བྱེད་ཀློག་པར་བྱེད་པས་ཚངས་པའོ། །ལྷའི་དཀའ་ཐུབ་མཆོག་ཏུ་གྱུར་པས་ལྷའི་དབང་པོ་ཀཽ་ཤི་ཀའི་རིག་བྱེད་ཀློག་པར་བྱེད་ཅིང་ལྷའི་དབང་པོ་གཽ་ཏ་མའི་རིག་བྱེད་གློག་པ་ནས་མཉེས་བྱེད་གཽ་ཏ་མ་
དཀར་གནས་གཽ་ཏ་མ་ཞེས་བརྗོད་ཅིང་དཀར་གནས་གཽ་ཏ་མ་ཞེས་ཟེར་རོ། །མཁས་པ་བཟང་པོ་ལས་རིག་བྱེད་ཀློག་པས་ན་བཟང་པོའི་རིག་བྱེད་ཀློག་ཅེས་བྱའོ། །འདི་ལྟ་སྟེ། རིག་བྱེད་རྣམ་པར་འབྱེད་ཅིང་འདི་ལྟར་
རྒྱས་པར་རྣམ་པར་འགྲེལ་ཞིང་ཕྱོགས་དང་སྡེབ་སྦྱོར་གྱི་ཚོགས་སྟོན་པའི་སློབ་དཔོན་ནི་ཉི་ཤུ་རྩ་གཅིག་གོ། །ལམ་གྱི་མཆོད་སྦྱིན་དང་སྲིད་བསྲུང་གི་སྡེ་རྣམས་རྣམ་པར་འགྲེལ་པས་ན་བྲམ་ཟེ་དེ་དག་ཐམས་ཅད་ལ་འཆད་པ་ཞེས་
བྱའོ། །གཅིག་ཏུ་གྱུར་པ་ལས་ཉི་ཤུ་རྩ་ལྔར་ཕྱེ་བ་ནི་འདི་ལྟ་སྟེ། སྐེམ་འཛིན་དང་། རྒྱས་འཛིན་དང་། སྙིང་པོ་ཞེས་བྱ་སྟེ། དེ་ལ་སྐེམ་འཛིན་ནི་བཅུའོ། །རྒྱས་འཛིན་ནི་བརྒྱད་དོ། །སྙིང་པོ་ནི་བདུན་ནོ། །

71-1-257a

འདི་དག་ནི་བྲམ་ཟེ་རྣམས་ཀྱིས་གཅིག་ཏུ་གྱུར་པ་ལས་བྱེ་བྲག་ཉི་ཤུ་རྩ་ལྔ་རུ་རྣམ་པར་འགྲེལ་ཏོ། །བྲམ་ཟེ་རྗེས་སུ་དཔག་པའི་ཚད་མས་སྡེབ་སྦྱོར་འདོན་པའོ། །ཕྱོགས་གཅིག་ཏུ་གྱུར་པ་ལས་རྣམ་པ་སྟོང་དུ་
བསྟན་ཏེ། འདི་ལྟ་སྟེ། ཚུལ་ཁྲིམས་ཤིང་ཤུན་དང་། དགོན་པ་དང་། འཇིག་རྟེན་གྱི་མིག་དང་། གཽ་ཏ་མ་དང་། བྲམ་ཟེ་དང་མཉམ་པ་དང་། ཆེན་པོ་དང་མཉམ་པ་དང་། བཞོན་པ་ཆེན་པོ་དང་ལྡན་པ་དང་། བདེན་དྲག་དང་། རིག་བྱེད་
ཐམས་ཅད་པའོ། །དེ་ནས་ཚུལ་ཁྲིམས་ཤིང་ཤུན་ལ་ནི་ཉི་ཤུའོ། །དགོན་པ་ལ་ནི་མཚན་མ་ཉི་ཤུའོ། །འཇིག་རྟེན་གྱི་མིག་ལ་ནི་ཉི་ཤུ་རྩ་བཞིའོ། །གཽ་ཏ་མ་ལ་ནི་བརྒྱའོ། །བྲམ་ཟེ་དང་མཉམ་པ་ལ་ནི་བརྒྱའོ། །ཆེན་པོ་
དང་མཉམ་པ་ལ་ནི་ལྔ་བརྒྱའོ། །བཞོན་པ་ཆེན་པོ་ལ་ནི་བརྒྱའོ། །བདེན་དྲག་ལ་ནི་བརྒྱའོ། །རིག་བྱེད་ཐམས་ཅད་པ་ལ་ཡང་བརྒྱ་སྟེ། འདི་དག་ནི་བྲམ་ཟེའི་སྡེབ་སྦྱོར་གྱི་འདོན་པའི་ཆའི་ཕྱོགས་གཅིག་ཏུ་གྱུར་པའི་
ལས་རྣམས་སྟོང་དུ་ཕྱེ་ནས་བསྟན་པའོ། །བྲམ་ཟེ་རྣམས་ཀྱི་རྗེས་སུ་དཔག་པའི་ཚད་མ་འདིས་ལམ་མཚོན་པ་ནི་བྲམ་ཟེ་ཐམས་ཅད་ཀྱི་ལམ་མོ། །ལམ་གཅིག་ཏུ་གྱུར་པ་ལས་ཉི་ཤུ་རྩ་གཅིག་ཏུ་ཕྱེ་བ་ནི་འདི་ལྟ་སྟེ། 
ཀ་ཐ་དང་། ཡིད་སྡུད་དང་། གནས་སྡེ་དང་། རྒྱལ་བའི་རྣ་དང་། རང་གི་རྐང་མཆོག་གོ། །དེ་ལས་ཀ་ཐ་ནི་བཅུའོ། །ཡིད་སྡུད་ལ་ནི་བཅུའོ། །གནས་སྡེ་ལ་ནི་བཅུ་གཅིག་གོ། །རྒྱལ་བའི་རྣ་བ་ལ་ནི་བཅུ་གསུམ་
མོ། །རང་གི་རྐང་མཆོག་ལ་ནི་བཅུ་དྲུག་གོ། །དྲང་སྲོང་ནི་བཞི་བཅུ་རྩ་གཅིག་སྟེ། འདི་ལྟར་བྲམ་ཟེ་ལམ་གྱི་ཆ་ནི་ཉི་ཤུ་རྩ་གཅིག་ཏུ་གྱུར་པ་ལས་ཉི་ཤུ་རྩ་གཅིག་ཏུ་ཕྱེ་བ་ཡིན་ནོ། །བྲམ་ཟེ་རྣམས་ཀྱི་རྗེས་སུ་དཔག་
པའི་ཚད་མ་ནི་སྲིད་སྲུང་གི་སྡེ་ཚན་རྣམས་ཏེ། དེ་དག་ནི་བྲམ་ཟེ་རྣམས་ཀྱི་སྲིད་སྲུང་གི་སྡེ་ཚན་ཡིན་ནོ། །མཆོད་སྦྱིན་གཅིག་ཏུ་གྱུར་པ་ལས་གཉིས་སུ་དབྱེའོ། །འབྱུང་བ་རྣམ་པ་བཞི་ལས་དབྱེ་བ་བྱས་པས་བརྒྱད་དོ། །

71-1-257b

བརྒྱད་པ་ལས་དབྱེ་བ་བྱས་པས་ཉི་ཤུ་རྩ་གཉིས་སོ། །བྲམ་ཟེ་འདི་དག་ནི་སྲིད་སྲུང་གི་དབྱེ་བའི་མཆོད་སྦྱིན་གཅིག་ཏུ་བསྡུས་པ་ལ་ཉི་ཤུ་རྩ་གཉིས་སོ། །བྲམ་ཟེ་རྣམས་ཀྱི་རྗེས་སུ་དཔག་པའི་ཚད་མ་ལ་ཐ་དད་པར་ཕྱེ་ན་བརྒྱ་
ཉི་ཤུ་རྩ་གཉིས་སོ། །ཡང་རིག་བྱེད་བཅུ་དྲུག་གི་དབྱེ་བ་སྔོན་གྱི་བྲམ་ཟེ་གང་ཡིན་པ་རྣམས་ཀྱིས་ཡང་དག་པར་བསྟན་ཏོ། །འདོན་པ་ནི་གནས་དང་། བྱཱ་ཀ་ར་ཎ་དང་། འཇིག་རྟེན་རྒྱང་པན་པའི་གཙུག་ལག་དང་། རྐང་པ་དང་། 
དཔྱོད་པའི་གཙུག་ལག་དང་། འདི་དག་རྣམས་ལས་མི་ཤེས་པ་མེད་དེ་ཁོང་དུ་ཆུད་དོ། །དེ་བས་ན་འདི་དག་ཐམས་ཅད་གཅིག་ཉིད་དུ་ཤེས་པར་བྱ་སྟེ། གཅིག་ཏུ་གྲུབ་པ་ཡིན་ནོ། །བྲམ་ཟེ་དེ་བས་ནི་འདི་དག་ནི་འཇིག་རྟེན་གྱི་
མིང་ཙམ་དང་། ཐ་སྙད་ཙམ་དུ་བསྟན་ཏེ། བྲམ་ཟེའི་རིགས་ཤེས་བྱ་བ་དང་། རྒྱལ་རིགས་ཤེས་བྱ་བ་དང་། རྗེའུ་རིགས་ཤེས་བྱ་བ་དང་། དམངས་རིགས་ཤེས་བྱ་བ་འདི་དག་ཐམས་ཅད་ནི་གཅིག་པ་ཡིན་ཏེ། ཐ་དད་པ་
མེད་ཀྱིས་བདག་གི་བུ་གཞོན་ནུ་སྟག་རྣ་ལ་བུ་མོ་གཟུགས་བཟང་མོ་ཆུང་མའི་དོན་དུ་བྱིན་ཅིག །རིན་གང་བབ་ཅིང་འདོད་པ་དེ་བཞིན་དུ་གཞལ་བར་བྱའོ། །གདོལ་པའི་རྒྱལ་པོ་ཏྲེ་ཤང་ཀུ་ལས་དེ་ལྟ་བུའི་ཚིག་ཐོས་པ་དང་། 
བྲམ་ཟེ་པད་མའི་སྙིང་པོ་ཅང་མི་སྨྲ་བར་གྱུར་ཏོ། །ཞུམ་ཞིང་ཕྲག་པ་གློད་ནས་མགོ་སྨད་དེ་ལན་ལ་སྤོབས་པ་མེད་པ་དེ་ནི་ཐ་ཆད་ཀྱི་གནས་ཡིན་ནོ། །དེ་ནས་གདོལ་པའི་རྒྱལ་པོ་ཏྲེ་ཤང་ཀུས་བྲམ་ཟེ་པད་མའི་སྙིང་པོ་
ཞུམ་པར་གྱུར་ཅིང་ཕྲག་པའི་ག་ཤ་གློད་དེ་མགོ་སྨད་ནས་ལན་ལ་སྤོབས་པ་མེད་པར་གནས་ཤིང་ཅང་མི་སྨྲ་བར་གྱུར་པ་མཐོང་ངོ་། །མཐོང་ནས་ཀྱང་འདི་སྐད་ཅེས་སྨྲས་སོ། །བྲམ་ཟེ་ཁྱོད་གང་གི་ཚེ་འདི་ལྟར་
མི་འདྲ་བ་མེད་པས་བདག་དང་ལྷན་ཅིག་ཏུ་འབྲེལ་བར་གྱུར་པར་ཤེས་པར་བྱའོ། །འོན་ཏེ་དེ་ལྟར་མ་ཡིན་ན་ནི་བྲམ་ཟེ་ཁྱོད་ཀྱིས་འདི་ལྟར་ཤེས་པར་བྱ་སྟེ། དེ་ལ་ཇི་སྙམ་དུ་སེམས། བྲམ་ཟེ་གང་ཐོས་པ་དང་། 

71-1-258a

ཚུལ་ཁྲིམས་དང་། ཤེས་རབ་དང་། ཡོན་ཏན་རྣམས་དང་ལྡན་པ་བྲམ་ཟེ་ཡིན་ནོ། །མཆོག་གང་ཡིན་པ་དེ་བདག་གི་བུ་གཞོན་ནུ་སྟག་རྣ་ལ་ཡང་ཡོན་ཏན་དེ་དག་ཉིད་ཡོད་པས་བྲམ་ཟེ་ཉིད་དུ་འགྱུར་རོ། །གང་ཞིག་
སྣོད་ལྡན་གྱི་མཆོད་སྦྱིན་བྱེད་ཅིང་རྟ་བསང་གི་མཆོད་སྦྱིན་དང་། མི་བསང་གི་མཆོད་སྦྱིན་དང་། ཡང་དག་པར་སྤྱོད་པའི་མཆོད་སྦྱིན་དང་། གཏན་པ་མེད་པའི་མཆོད་སྦྱིན་བྱེད་པས་དེ་དག་ཐམས་ཅད་ལུས་དང་བྲལ་ནས་བདེ་
འགྲོ་མཐོ་རིས་ཀྱི་འཇིག་རྟེན་དུ་སྐྱེ་ཞིང་འདི་བྱེད་པ་བྲམ་ཟེ་ཡིན་པར་འདོད་པ་ནི་བྲམ་ཟེ་ཡང་དེ་ལྟར་ནི་བལྟ་བར་མི་བྱ་སྟེ། དེ་ཅིའི་ཕྱིར་ཞེ་ན། བྲམ་ཟེ་རྣམས་སྣོད་ལྡན་གྱི་མཆོད་སྦྱིན་བྱེད་ཅིང་རྟ་བསང་གི་མཆོད་སྦྱིན་དང་། མི་བསང་
གི་མཆོད་སྦྱིན་དང་། ཡང་དག་པར་སྤྱོད་པའི་མཆོད་སྦྱིན་དང་། གཏན་པ་མེད་པའི་མཆོད་སྦྱིན་བྱེད་ཅིང་སྣ་ཚོགས་པའི་སྔགས་ཀྱིས་སྲོག་གཅོད་པ་ལ་འཇུག་པར་བྱེད་དེ། དེ་ལྟ་བས་ན་བྲམ་ཟེ་ཁྱོད་ལ་བཤད་པར་བྱ་སྟེ། 
དེ་ནི་མཐོ་རིས་ཀྱི་ལམ་མ་ཡིན་ཏེ། བདག་གིས་བྲམ་ཟེ་ཁྱོད་ཀྱི་ལམ་བཤད་པར་བྱ་ཡིས་ཉོན་ཅིག །ཚུལ་ཁྲིམས་སྲུང་ཞིང་བློ་གྲོས་དོན་དུ་གཉེར་བས་བདེ་བ་གསུམ་གྱིས་སེམས་རབ་ཏུ་ཞི་བར་གནས་པ་ནི་འཇིག་རྟེན་
ཕ་རོལ་དུ་བདེ་འགྲོ་དག་ཐོབ་བོ། །བྲམ་ཟེ་འདི་ལྟར་སྔ་མ་བཞིན་དུ་སྣོད་ལྡན་གྱི་མཆོད་སྦྱིན་ལ་དགའ་བ་དང་། རྟ་བསང་གི་མཆོད་སྦྱིན་དང་། མི་བསང་གི་མཆོད་སྦྱིན་དང་། ཡང་དག་པར་སྤྱོད་པའི་མཆོད་
སྦྱིན་དང་། གཏན་པ་མེད་པའི་མཆོད་སྦྱིན་དག་སྦྱིན་པ་ལ་དགའ་ཞིང་ཡོངས་སུ་འཛིན་པ་དེ་དག་ནི་མེད་པ་ལ་མོས་པ་སྟེ། མཐོ་རིས་ལ་དགའ་ཞིང་འདོད་པས་བྲམ་ཟེ་འདི་ལྟར་ཕྱིས་ཀྱང་སྣོད་ལྡན་གྱི་མཆོད་སྦྱིན་བྱེད་ཅིང་རྟ་
བསང་གི་མཆོད་སྦྱིན་དང་། མི་བསང་གི་མཆོད་སྦྱིན་དང་། ཡང་དག་པར་སྤྱོད་པའི་མཆོད་སྦྱིན་དང་། གཏན་པ་མེད་པའི་མཆོད་སྦྱིན་བྱེད་པ་ནི་དོན་མེད་ཅིང་མཆོག་ཏུ་བཅོམ་པ་ཆེན་པོར་འགྱུར་རོ། །བྲམ་ཟེ་བདག་གིས་

71-1-258b

སྨྲས་པ་དེ་ལྟ་བུ་ཡིན་པའི་ཕྱིར་འདིར་བདག་དང་ཁྱོད་ལྷན་ཅིག་འབྲེལ་བར་བྱ་སྟེ། དེ་ཅིའི་ཕྱིར་ཞེ་ན། ཆོས་ཀྱི་གདོལ་པ་མི་གཙང་བ་ནི་མ་ཡིན་ནོ། །གཞན་ཡང་བྲམ་ཟེ། དད་པ་ཚུལ་ཁྲིམས་དཀའ་ཐུབ་གཏོང་། །ཐོས་
དང་ཤེས་རབ་དེ་བཞིན་དང་། །ལྟ་བ་མཐོ་རིས་བརྟུལ་ཞུགས་གནས། །རྣམ་པ་བརྒྱད་པོ་དེ་དག་གིས། །མཐོ་རིས་གནས་སུ་འགྲོ་བར་འདོད། །ཕལ་ཆེར་ཤེས་པའི་ཁྱད་པར་གྱིས། །སྣ་ཚོགས་དུ་མའི་མཆོད་སྦྱིན་འདིར། །
རྣམ་པར་བརྒྱད་དུ་ངེས་པར་བསྟན། །མ་མཉམ་སྲིང་མོའི་འཇིག་རྟེན་ཏེ། །རབ་ཏུ་འཇུག་ལྡན་འདི་ལྟ་སྟེ། །ཉི་མའི་ལྷ་ལས་སྐྱེས་པ་ཡིན། །མི་སྐྱེས་རྣམས་ནི་མི་ལས་སྐྱེས། །བ་སྐྱེས་བའི་བཞོན་པ་ལས། །
གསེར་མདོག་ལྡན་ལས་སྐྱེས་པ་དང་། །ཀླུ་རྣམས་ལས་ནི་སྐྱེས་པ་དང་། །མ་ཆེན་ས་ལས་སྐྱེས་པ་ནི། །ཆེན་པོའི་ཆེན་པོ་འོད་སྲུང་སྟེ། །དྲང་སྲོང་བདེ་བའི་ཡིད་ཀྱིས་ཤེས། །དེ་ནས་ཡང་བྲམ་ཟེ་པད་མའི་སྙིང་པོ་ལ་
བདག་གིས་བྲམ་ཟེ་རྣམས་ཀྱི་རིགས་བཤད་པར་བྱ་ཡིས་དེ་ཉོན་ཅིག །རིགས་ནི་འདི་ལྟ་སྟེ། གཽ་ཏ་མ་དང་། བད་ས་དང་། ཀོད་ས་དང་། ཀཽ་ཤི་ཀ་དང་། འོད་སྲུང་དང་། རྒྱས་པ་དང་། སྙིང་པོའི་རིགས་ཏེ། འདི་དག་ནི་
བྲམ་ཟེའི་རིགས་རྣམ་པ་བདུན་ནོ། །རིགས་དེ་དག་རེ་རེ་ལ་ཡང་རྣམ་པ་བདུན་བདུན་དུ་འགྱུར་ཏེ། དེ་ལ་གཽ་ཏ་མ་ནི། ཀཽ་ཐུ་མ་དང་། དེ་ག་རྒྱ་དང་། བ་ར་དྭ་ཛ་དང་། བེ་ར་བརྒྱད་པ་དང་། བེ་ཀ་ན་ས་དང་། རྡོ་རྗེ་རྐང་པ་སྟེ། 
དེ་དག་གོ། །དེ་ལ་བད་ས་ལས་ནི་ཨ་དྲེ་ཡ་ན་དང་། མེ་ཏྲེ་ཡ་ན་དང་། བརྒ་དང་། སམ་ལ་ནི་དང་། མང་པོ་སྐྱེས་དང་། ས་པ་རྣ་དང་། ཨ་ཉ་ཙ་སྟེ་དེ་དག་གོ། །དེ་ལ་ཀོ་ས་ལས་ནི་མཽད་གལ་ཡ་ན་དང་། འགོ་ན་ཡ་ན་དང་། ལང་ཆ་ལ་
བ་དང་། བདུན་ཚད་ལག་ན་དང་། སོ་ན་བུ་ག་ན་དེ་དག་གོ། །དེ་ལ་ཀཽ་ཤི་ཀ་ལཱ་ནི་ཀ་ན་ཡ་ན་དང་། བ་ཀི་ན་དང་། ལོ་ཀ་ཨ་ཁ་དང་། ལོ་ཀི་ཧ་ད་སྟེ་དེ་དག་གོ། །དེ་ལ་འོད་སྲུང་ལས་ནི་པན་དྭ་ར་དང་། ཤུ་ཀར་དང་། སན་ཏི་ལ་དང་། 

71-1-259a

རོ་ཙ་ནི་ཡ་དང་། ཨ་ན་པ་ཁྲ་དང་། ཨག་ནི་བེ་ཤ་སྟེ་དེ་དག་གོ། །དེ་ལ་རྒྱས་པ་ལས་ནི་ཛ་ཏུ་ཀརྣ་དང་། དྷ་ན་མ་དང་། འཛ་ཡ་ཡ་ན་དང་། པ་ར་ས་ར་དང་། བྱ་ཁྲ་ན་ག་དང་། ཀན་ཏཱ་ཡ་ན་དང་། ཨོ་བ་མན་ཉ་སྟེ་དེ་དག་གོ། དེ་ལ་
སྙིང་པོ་ལས་ནི་མན་ད་ཡ་ན་དང་། འདོ་མྲ་ཡ་ན་དང་། ཀ་ཏ་ཡ་ན་དང་། ཤ་ཀ་ཡ་ན་དང་། ཡུ་གན་ད་ཡ་ན་དང་། ཁ་ན་ཡ་ན་དང་། ཀ་པི་སྟ་ལ་ཡ་ན་སྟེ་དེ་དག་གོ། །དེ་ལ་བྲམ་ཟེ་འདི་ལྟ་བུའི་རིགས་ལྔ་བཅུར་གཅིག་གིས་མ་ཚང་བ་
ཡིན་ནོ། །ཡང་དག་པའི་ལྟ་བ་དང་། སྡེབ་སྦྱོར་གྱི་གདོན་པ་དང་། བྱཱ་ཀ་ར་ཎ་དང་། རྐང་པ་དང་། སྤྱོད་པ་པའི་གཙུག་ལག་དང་། རིགས་པ་གཞན་པ་དག་རྒྱས་པར་བདག་གིས་བཀླགས་ཀྱི། གཞན་གྱིས་ནི་མ་ཡིན་པར་རིག་
པར་བྱའོ། །འདི་ལྟར་གཉེན་དུ་བྱ་བ་ལ་ངེས་པ་མེད་པར་ཁྱོད་ཀྱིས་ཤེས་པར་གྱིས་ཤིག །དེ་ལྟ་བས་ན་བྲམ་ཟེའི་རིགས་ཤེས་བྱ་བ་ནི་འཇིག་རྟེན་ཐ་མལ་པས་ཐ་སྙད་དུ་བྱ་བ་ཡིན་ནོ། །འདི་ལྟར་བྲམ་ཟེའི་རིགས་ཤེས་བྱ་བ་
དང་། རྒྱལ་རིགས་ཤེས་བྱ་བ་དང་། རྗེའུ་རིགས་ཤེས་བྱ་བ་དང་། དམངས་རིགས་ཤེས་བྱ་བ་ཡང་དེ་ལྟར་ཤེས་པར་བྱའོ། །དེ་ལྟ་བས་ན་འདི་དག་ཐམས་ཅད་ནི་གཅིག་པ་ཡིན་ཏེ། ཐ་དད་པ་ནི་མེད་དོ། །བདག་གི་བུ་གཞོན་
ནུ་སྟག་རྣ་ལ་བུ་མོ་གཟུགས་བཟང་མོ་ཆུང་མའི་དོན་དུ་བྱིན་ཅིག །གང་རིན་བབ་པ་འདོད་པ་དེ་བཞིན་དུ་སྦྱིན་པར་བྱའོ། །ཡང་ཚིག་དེ་ལྟ་བུ་གདོལ་པའི་རྒྱལ་པོ་ཏྲེ་ཤང་ཀུ་ལས་ཐོས་པ་དང་། བྲམ་ཟེ་པད་མའི་སྙིང་པོ་ཞུམ་
པར་གྱུར་ཅིང་ཕྲག་པ་བཅུམ་ནས་མགོ་སྨད་དེ་ལན་ལ་སྤོབས་པ་མེད་པ་འདི་ནི་ཐ་ཆད་ཀྱི་གནས་ཡིན་པས་ཅང་མི་སྨྲ་བར་གྱུར་ཏོ། །དེ་ནས་གདོལ་པའི་རྒྱལ་པོ་ཏྲེ་ཤང་ཀུས་བྲམ་ཟེ་པད་མའི་སྙིང་པོ་ཞུམ་པར་གྱུར་ཅིང་ཕྲག་
པ་བཅུམ་ནས་མགོ་སྨད་དེ་ལན་ལ་སྤོབས་པ་མེད་པ་ནི་ཐ་ཆད་ཀྱི་གནས་ཡིན་པས་ཅང་མི་སྨྲ་བར་གྱུར་པ་མཐོང་ངོ་། །མཐོང་ནས་ཀྱང་འདི་སྐད་ཅེས་སྨྲས་སོ། །ཅི་འདི་འདྲ་བའི་ས་བོན་བཏབ། །དེ་འདྲ་བའི་འབྲས་བུར་འགྱུར། །

71-1-259b

སྐྱེ་དགུ་འདི་ནི་གཅིག་ཡིན་ཏེ། །ཁྱད་པར་གྱུར་པ་དེ་ལ་མེད། །དབང་པོ་སྣ་ཚོགས་དེ་དག་གིས། །བྱ་བ་ཐ་དད་མཐོང་བར་བསྟན། །བྲམ་ཟེ་དང་ནི་རིགས་གཞན་ལ། །བྱེ་བྲག་ཅུང་ཟད་ཡོད་མ་ཡིན། །བདག་ཉིད་ཀུན་དུ་སྟོད་བྱེད་ཀྱང་། །
འདིར་ནི་རིགས་པ་མ་ཡིན་ཏེ། །སྐྱེ་གནས་གཉིས་ནི་ཕྲད་པ་ལས། །ཁུ་བ་ཁྲག་གཉིས་འདུས་པ་ཡིན། །རིགས་བཞི་དག་ནི་རབ་བསྟན་པ། །དེ་ལྟར་ཡིན་ན་དུད་འགྲོ་ལྟར། །ཁྱོད་ནི་སྲིང་མོ་ལ་འཇུག་པ། །སྲིང་མོ་ཆུང་མར་
རིགས་མ་ཡིན། །གང་ཚེ་རེ་ཤིག་འཇིག་རྟེན་འདི། །ཚངས་ལས་སྐྱེས་པར་རང་གིས་ཤེས། །བྲམ་ཟེའི་ཆུང་མ་སྲིང་མོ་ཉིད། །རྒྱལ་རིགས་རྒྱལ་པོའི་སྲིང་མོ་ཉིད། །དེ་བཞིན་རྗེའུ་རིགས་རྗེ་རིགས་མོ། །དམངས་རིགས་
དམངས་རིགས་དེ་རིགས་མིན། །གལ་ཏེ་བྲམ་ཟེས་ཤེས་ན་ནི། །ཆུང་མར་རིགས་པ་མ་ཡིན་ནོ། །སེམས་ཅན་བྲམ་ཟེའི་རིགས་མིན་ཏེ། །འདི་དག་ཉོན་མོངས་ལས་ལས་སྐྱེས། །དམན་པ་དག་ནི་མཆོག་ཏུ་སྣང་། །
སེམས་ཅན་སྣ་ཚོགས་རྟེན་ཐ་དད། །ཁྱོད་ལྟར་འདི་དག་རིགས་མཆོག་སྟེ། །བྲམ་ཟེ་རྒྱལ་རིགས་དེ་བཞིན་དུ། །རྗེའུ་རིགས་དམངས་རིགས་དེ་དག་ལ། །ཐ་སྙད་འཇུག་པ་ཡོད་མ་ཡིན། །ངེས་བརྗོད་རིག་བྱེད་མཆོད་སྦྱིན་དང་། །
སྙན་དངགས་རིག་བྱེད་སྲིད་སྲུང་སྟེ། །འདི་ལྟར་བཞད་གད་ངེས་སྦྱར་དང་། །སྡེབ་སྦྱོར་ཇི་ལྟར་དོན་མེད་མིན། །བདག་ཉིད་ཀྱིས་ནི་བརྗོད་བྱས་པ། །བྱམས་རིགས་དེ་བཞིན་གསོ་བ་དང་། །གོ་རིམས་དང་ནི་རྨོངས་བྱེད་དང་། །
འདོད་པའི་གཟུགས་དང་ཡིད་མགྱོགས་དང་། །དྲི་ཟ་འཇིགས་དང་ཤང་ཀ་དང་། །སྤྲུལ་དང་རིན་ཆེན་སྔགས་དང་ནི། །མིག་འཕྲུལ་རྣམས་ནི་འཇིགས་པ་དང་། །གྲངས་ལ་མཁས་པར་གྱུར་པ་དང་། །བདག་ལ་སྐྱེས་བུའི་རིགས་
ཡོད་དེ། །མཚོའི་སྙིང་པོ་རིན་ཆེན་དང་། །རང་གི་སྲིང་མོ་རྣམས་ལ་དགའ། །ལྷ་ཡི་རྫུ་འཕྲུལ་ཡང་དག་འཐོབ། །གསོ་བ་ཡི་ནི་རིག་པ་རྣམས། །གདོལ་པ་ཡིས་ནི་མ་བསླབས་ཤིང་། །བྲམ་ཟེའི་རིག་བྱེད་

71-1-260a

ཕ་རོལ་ཕྱིན། །སེར་སྐྱ་ལ་སོགས་སྐྱེས་ནས་ནི། །སྔགས་མཆོག་གི་ནི་ཕ་རོལ་ཕྱིན། །བྲམ་ཟེའི་བུ་ནི་མ་ཡིན་ནོ། །བྲམ་ཟེ་མིན་ཡང་བསམ་པར་གྱིས། །རིགས་ངན་ལས་སྐྱེས་དྲང་སྲོང་ནག །ཐུབ་པ་བྱི་བ་ཡ་ན་དང་། །
དྲག་ཤུལ་ལས་སྐྱེས་གཟི་བརྗིད་ལྡན། །འཇིགས་བྱེད་མངོན་ཤེས་ལྔ་ལྡན་པ། །ཐུབ་པ་ཆེན་པོ་དེ་དག་ནི། །བྲམ་ཟེ་ལས་སྐྱེས་མ་ཡིན་ནོ། །ཅི་ཡིན་བྲམ་ཟེ་ཡང་བརྗོད་ཀྱིས། །ཐ་སྙད་དུ་ནི་བཏགས་པ་སྟེ། །རྡུལ་ལྡན་མ་ནི་
རྒྱལ་རིགས་ལས། །མཁས་ཤིང་དུལ་དང་ལྡན་པ་དང་། །བསྟན་ཆོས་ཐམས་ཅད་ལེགས་རྟོགས་པ། །ཐུབ་པ་དགའ་བྱེད་དེ་ལས་སྐྱེས། །བྲམ་ཟེའི་བུ་ནི་མ་ཡིན་ནོ། །བྲམ་ཟེ་ཅི་ཡང་མི་བརྗོད་ཀྱིས། །གཟི་བརྗིད་དཀའ་ཐུབ་
དང་ལྡན་ལ། །མཁས་ཤིང་དུལ་དང་ལྡན་པ་སྟེ། །དྲང་སྲོང་འཇིག་རྟེན་དུ་གྲགས་པ། །གང་ཡིན་དེ་ནི་མ་ནུས་བསྐྱེད། །བྲམ་ཟེའི་བུ་ནི་མ་ཡིན་ནོ། །ཅི་ཡིན་བྲམ་ཟེ་ཡང་བརྗོད་ཀྱིས། །འདི་དག་འཇིག་རྟེན་ཐ་སྙད་དེ། །བྲམ་ཟེ་
རྒྱལ་རིགས་དེ་བཞིན་ཏེ། །དེ་ལྟར་རྗེའུ་རིགས་དམངས་རིགས་ནི། །ཐ་སྙད་དུ་ནི་འཇིགས་པ་ཡིན། །དེ་ལ་བྲམ་ཟེ་ཁྱོད་ཀྱིས་སྨྲས། །འདི་དག་འཇིག་རྟེན་ཐ་སྙད་ཙམ། །འདི་ལྟ་སྟེ། བྲམ་ཟེའི་རིགས་ཤེས་བྱ་བ་དང་། 
རྒྱལ་རིགས་ཤེས་བྱ་བ་དང་། རྗེའུ་རིགས་ཤེས་བྱ་བ་དང་། དམངས་རིགས་ཤེས་བྱ་བ་འདི་དག་ནི་ཐམས་ཅད་གཅིག་ཅིང་དེ་ལ་ཐ་དད་པ་མེད་དོ། །བདག་གི་བུ་གཞོན་ནུ་སྟག་རྣ་ལ་བུ་མོ་གཟུགས་བཟང་མོ་ཆུང་མའི་དོན་དུ་བྱིན་ཅིག །
རིན་གང་བབ་པ་དེ་འདོད་པ་བཞིན་དུ་གཞལ་བར་བྱའོ། །གདོལ་པའི་རྒྱལ་པོ་ཏྲེ་ཤང་ཀུ་ལས་འདི་ལྟ་བུའི་ཚིག་ཐོས་ནས། བྲམ་ཟེ་པད་མའི་སྙིང་པོས་གདོལ་པའི་རྒྱལ་པོ་ཏྲེ་ཤང་ཀུ་ལ་འདི་སྐད་ཅེས་སྨྲས་སོ། །ཁྱོད་ཀྱི་རིགས་
ཅི་ཡིན་བདག་གི་ཨ་ཏྲེ་ཡའོ། །སྔར་ཅི་ཞིག །སྔར་མིང་ངོ་། །ཅི་ཞིག་སྤྱོད་པར་བྱེད། བྱམས་པ་མང་དུའོ། །རབས་དུ་ཡིན། གསུམ་སྟེ། འདི་ལྟ་སྟེ། བད་ས་དང་། ཀཽ་ས་དང་། བ་ར་དྭ་ཛའོ། །ཅི་ཞིག་ལ་གོམས། །ཚངས་པར་

71-1-260b

སྤྱོད་པ་དང་བཅས་པའི་སྡེབ་སྦྱོར་འདོན་པ་ལའོ། །སྡེབ་སྦྱོར་གྱི་གདོན་པ་དུ་ཞིག །དྲུག་པོ་འདི་ལྟ་སྟེ། ཀཽ་ཏ་མ་དང་། ར་མ་ཡ་ནི་དང་། ལང་ག་ལི་དང་། སཽ་པད་ཙ་ལ་དང་། ཀ་པི་ཙ་ལི་ཡ་དང་། ཨ་ར་ཤི་སེ་ན་ཞེས་བྱ་བ་ཡིན་ནོ། །ཁྱོད་
ཀྱི་མའི་རིགས་ཅི་ཡིན། པར་ཤ་རི་ཡུམ་མོ། །ཁྱོད་ཀྱིས་ས་བྱ་ཏི་བཀླགས་སམ། ཇི་ལྟར་ཡིན། དེ་ལ་ཡི་གེ་དུ་ཞིག །གདོན་པ་ནི་དུ་ཞིག །ཚིག་ནི་དུ་ཞིག །རྐང་པ་ནི་དུ་ཞིག །ཡི་གེ་ནི་ཉི་ཤུ་རྩ་བཞིའོ། །གདོན་པ་ནི་གསུམ་
མོ། །ཚིག་ནི་གསུམ་མོ། །རྐང་པ་ནི་ཡི་གེ་བརྒྱད་དོ། །ཁྱོད་ཀྱིས་ས་བྱིན་ཏྲ་ཐོན་ཅིག །པད་མའི་སྙིང་པོ་དེ་བཞིན་ཏེ། ལྷན་ཅིག་སྐྱེས་པའི་སྔགས་བཤད་པར་བྱ་ཡིས་ཉོན་ཅིག །ཁྱོད་ཀྱིས་ཤོད་ཅིག །སྨྲས་པ། བྲམ་ཟེ་
སྔོན་བྱུང་བ་འདས་པའི་དུས་ན་བ་སུ་ཞེས་བྱ་བའི་དྲང་སྲོང་མངོན་པར་ཤེས་པ་ལྔ་དང་ལྡན་པ། གཟི་བརྗིད་འབར་ཞིང་མཐུ་ཆེ་བ། བསམ་གཏན་རྣམས་ཐོབ་པ་ཞིག་བྱུང་སྟེ། དེས་ཤིང་མཁན་གྱི་བུ་མོ་སེར་སྐྱ་མ་ཞེས་བྱ་བ་
ཆུང་མའི་དོན་དུ་བླངས་སོ། །དེ་ལ་ཀུན་དུ་ཆགས་པའི་སེམས་ཀྱིས་བུ་མོ་དེ་དང་ལྷན་ཅིག་ཆགས་པ་སྤྱད་པས་རྫུ་འཕྲུལ་ལས་ཉམས་ཤིང་བསམ་གཏན་ཤོར་རོ། །དེ་བདག་ཉིད་ཀྱི་ཉེས་པར་སྤྱོད་པས་ཉམས་པས་རྗེས་སུ་
འགྱོད་དོ། །དེའི་ཚེ་སྔགས་འདི་དག་སྨྲས་སོ། །འདི་ལྟ་སྟེ། ཨོཾ་བྷུར་བྷུ་བ་སྭ་ཏད་ས་པི་ཏུར་པ་རེ་ཎྱ་བྷར་གྷོ་དྷེ་བས། དྷི་མ་ཧི་ཙྷོ་ཡོ་ཡོན་པྲ་ཙོ་ད་ཡཱ་ཡད། བྲམ་ཟེ་སྔགས་འདིས་རྟོག་པ་མེད་པར་བཅོས་ནས་དེ་ཉིད་ཀྱི་ཉིན་
ཞག་ལ་བྲམ་ཟེ་སྔགས་བཟླས་ཏེ། སྔོན་བྱུང་བའི་སྐྱེ་དགུའི་བདག་པོས་རལ་པ་དང་དཀའ་ཐུབ་བྱས་ཏེ། ནགས་ཀྱི་ནང་ན་འདུག་སྟེ། དབེན་པའི་གནས་སུ་ཡང་དེ་དང་བདག་དགའ་བར་བྱེད་ཅིང་དཀའ་ཐུབ་བྱས་པས་ལྷས་ཟས་
མཆོག་བྱིན་ནས་གནས་ཤིང་སྔགས་འདི་བཟླས་སོ། །བྃ་ཉ་ཀ་ཨ་ཏ་སཱ་ཀ་ནྱ་ཨར་ཏ་ཐ་ཕྲ་ཁྲི་ན། འདི་ནི་རྒྱལ་རིགས་ཀྱི་དག་བྱེད་ཀྱི་སྔགས་ཡིན་ཏེ། ཨོཾ་ཙིན་ཏྲ་མ་ཧིད་དྷེ་བེ་ཤ་ཀ་པྃ་ཤ་ཤ་ཏྃ་ཤ་ཏྲ་དྃ་ཤ་དྃ། འདི་ནི་རྗེའུ་རིགས་

71-1-261a

རྣམས་ཀྱི་དག་བྱེད་ཀྱི་སྔགས་ཡིན་ཏེ། ཨོཾ་ཨ་ཏ་པ་པྲ་ཏ་པ་ཛེ་མེ་དྷ་ཧ་མ། འདི་ནི་དམངས་རིགས་རྣམས་ཀྱི་དག་བྱེད་ཀྱི་སྔགས་ཡིན་ཏེ། ཨོཾ་ཀཱ་མཱ་ཧི། ལོ་ཀེ་པྲ་པ་ར་མམ་ཕ་ཛྲ་ནྃ། དེ་ཤ་མ་ཨ་པྲ་ཧ་ན། ཙ་བྷུ་བཱ་ན་
ཏ་ར་ཡ། དེ་ལྟ་བས་ན་ཁྱོད་ཀྱིས་འདོད་པ་རབ་ཏུ་སྤངས་ནས། མཉམ་པ་མེད་པའི་ཚངས་པའི་འཇིག་རྟེན་ཐོབ་བོ། །བྲམ་ཟེ་འདི་ནི་ཚངས་པ་མི་མཇེད་ཀྱི་བདག་པོས་དག་བྱེད་དུ་སྨྲས་པ་ཡིན་ཏེ། སྔོན་གྱི་ཡང་དག་པར་རྫོགས་
པའི་སངས་རྒྱས་རྣམས་ཀྱིས་རྗེས་སུ་ཡི་རང་བར་མཛད་པ་ཡིན་ནོ། །ཀྱེ་ཏྲེ་ཤང་ཀུ་ཁྱོད་ཀྱིས་རྒྱུ་སྐར་གྱི་དབང་རྣམས་བཀླགས་སམ། ཀྱེ་དེ་བཞིན་ཏེ། བདག་གིས་རྒྱུ་སྐར་གྱི་དབང་ཚད་རྣམས་ཁྱོད་ལ་བཤད་ཀྱིས་ཉོན་
ཅིག །འདི་ལྟ་སྟེ། སྨིན་དྲུག་དང་། སྣར་མ་དང་། མགོ་དང་། ལག་དང་། ནམ་སོ་དང་། རྒྱལ་དང་། སྐག་དང་། མཆུ་དང་། གྲེ་དང་། དབོ་དང་། མེ་བཞི་དང་། ནག་པ་དང་། ས་རི་དང་། ས་ག་དང་། ལྷ་མཚམས་དང་། 
སྣོན་དང་། སྣྲུམས་དང་། ཆུ་སྟོད་དང་། ཆུ་སྨད་དང་། གྲོ་བཞིན་དང་། བྱི་ཞིན་དང་། མོན་གྲུ་དང་། མོན་གྲེ་དང་། ཁྲུམས་སྟོད་དང་། ཁྲུམས་སྨད་དང་། ནམ་གྲུ་དང་། ཐ་སྐར་དང་། བྲ་ཉེ་རྣམས་ཏེ། ཀྱེ་བྲམ་ཟེ་པད་མའི་སྙིང་
པོ་དེ་དག་ནི་རྒྱུ་སྐར་ཉི་ཤུ་རྩ་བརྒྱད་དོ། །དེ་ལ་རྒྱུ་སྐར་ནི་དུ། དབྱིབས་ནི་ཇི་སྙེད་ཡོད། ཡུད་ཙམ་དང་ལྡན་པ་ནི་ཇི་སྙེད། ཟས་ནི་ཅི། རུས་ནི་ཅི། ལྷ་རྣམས་ནི་གང་། ཀྱེ་བྲམ་ཟེ་པད་མའི་སྙིང་པོ་ཅན་སྨིན་དྲུག་ནི་སྐར་མ་དྲུག་
སྟེ། དབྱིབས་ནི་སྤུ་གྲི་ལྟ་བུ་སྟེ། ཡུད་ཙམ་སུམ་བཅུའི་ཆ་དང་ལྡན་པའོ། །ཟས་ནི་ཞོའོ། །ལྷ་ནི་མེའོ། །རུས་ནི་རྗེའུ་རིགས་སོ། །རྒྱུ་སྐར་སྣར་མ་ནི་སྐར་མ་ལྔ་སྟེ། དབྱིབས་ནི་ཤིང་རྟའི་འཕང་ལོ་གཉིས་པ་
ལྟ་བུའོ། །ཡུད་ཙམ་ནི་བཞི་བཅུ་རྩ་ལྔའི་ཆ་དང་ལྡན་པའོ། །ཟས་ནི་རི་དགས་ཀྱི་ཤའོ། །ལྷ་ནི་སྐྱེ་དགུའི་བདག་པོའོ། །རུས་ནི་པ་ར་དྭ་ཛའོ། །རྒྱུ་སྐར་མགོ་ནི་སྐར་མ་གསུམ་སྟེ། དབྱིབས་ནི་རི་དགས་ཀྱི་མགོ་ལྟ་

71-1-261b

བུའོ། །ཡུད་ཙམ་བཅྭ་ལྔའི་ཆ་དང་ལྡན་པའོ། །ཟས་ནི་འབྲས་བུ་དང་རྩ་བའོ། །ལྷ་ནི་ཟླ་བའོ། །རུས་ནི་མིག་ཡ་ནའོ། །རྒྱུ་སྐར་ལག་ནི་སྐར་མ་གཅིག་སྟེ། དབྱིབས་ནི་ཐིག་ལེ་ལྟ་བུའོ། །ཡུད་ཙམ་སུམ་བཅུ་རྩ་ལྔའི་ཆ་དང་ལྡན་
པའོ། །ཟས་ནི་མར་གྱི་སྙིང་ཁུའོ། །ལྷ་ནི་ཉི་མའོ། །རུས་ནི་རྒྱས་པའོ། །རྒྱུ་སྐར་ནམ་སོ་ནི་སྐར་མ་གཉིས་ཏེ། དབྱིབས་ནི་རྐང་པ་ལྟ་བུའོ། །ཡུད་ཙམ་བཅྭ་ལྔའི་ཆ་དང་ལྡན་པའོ། །ཁ་ཟས་ནི་སྦྲང་རྩིའོ། །ལྷ་ནི་ཕུར་བུའོ། །
རུས་ནི་དབང་བྱེད་དོ། །རྒྱུ་སྐར་རྒྱལ་ནི་སྐར་མ་གསུམ་སྟེ། དབྱིབས་ནི་རིལ་བ་ལྟ་བུའོ། །ཡུད་ཙམ་སུམ་བཅུའི་ཆ་དང་ལྡན་པའོ། །ཁ་ཟས་ནི་སྦྲང་རྩི་དང་ཡོས་སོ། །ལྷ་ནི་ཕུར་བུའོ། །རུས་ནི་ཡིད་ཉེའོ། །རྒྱུ་སྐར་སྐག་ནི་སྐར་མ་གཅིག་སྟེ། 
དབྱིབས་ནི་ཐིག་ལེ་ལྟ་བུའོ། །ཡུད་ཙམ་བཅྭ་ལྔའི་ཆ་དང་ལྡན་པའོ། །ཁ་ཟས་ནི་འོ་མ་དང་འབྲས་ཆེན་ནོ། །ལྷ་ནི་རླུང་ལྷའོ། །རུས་ནི་སྦྲུལ་ལོ། །བྲམ་ཟེ་པད་མའི་སྙིང་པོ་རྒྱུ་སྐར་འདི་བདུན་ནི་ཤར་སྒོར་གཏོགས་པའོ། །རྒྱུ་སྐར་མཆུ་ནི་སྐར་མ་ལྔ་
སྟེ། དབྱིབས་ནི་ཆུ་བོ་མགུར་ལྟ་བུའོ། །ཡུད་ཙམ་སུམ་བཅུའི་ཆ་དང་ལྡན་པའོ། །ཟས་ནི་ཏིལ་གྱི་རིལ་ལུ་དང་འོ་མའོ། །ལྷ་ནི་སྤེན་པའོ། །རུས་ནི་སེར་སྐྱའོ། །རྒྱུ་སྐར་གྲེ་ནི་སྐར་མ་གཉིས་ཏེ། དབྱིབས་ནི་རྐང་པ་ལྟ་བུའོ། །ཡུད་ཙམ་སུམ་
བཅུའི་ཆ་དང་ལྡན་པའོ། །ཁ་ཟས་ནི་བིལ་བའོ། །ལྷ་ནི་སྐལ་ལྡན་ནོ། །རུས་ནི་གཽ་ཏ་མའོ། །རྒྱུ་སྐར་དབོ་ནི་སྐར་མ་གཉིས་ཏེ། དབྱིབས་ནི་ཁྲི་ལྟ་བུའོ། །ཡུད་ཙམ་བཞི་བཅུ་རྩ་ལྔའི་ཆ་དང་ལྡན་པའོ། །ཁ་ཟས་ནི་རྡོ་སྦལ་གྱི་ཤའོ། །ལྷ་ནི་འཕགས་
པའོ། །རུས་ནི་ཀཽ་ཤི་ཀའོ། །རྒྱུ་སྐར་མེ་བཞི་ནི་སྐར་མ་ལྔ་སྟེ། དབྱིབས་ནི་ལག་པ་ལྟ་བུའོ། །ཡུད་ཙམ་སུམ་བཅུའི་ཆ་དང་ལྡན་པའོ། །ཟས་ནི་བྱ་སྣ་ཚོགས་དང་སྲེད་དའོ། །ལྷ་ནི་ཉི་མའོ། །རུས་ནི་སྲེད་ད་ལྡན་ནོ། །རྒྱུ་སྐར་ནག་པ་ནི་སྐར་མ་
གཅིག་སྟེ། དབྱིབས་ནི་པད་མའི་སྙིང་པོ་ལྟ་བུའོ། །ཡུད་ཙམ་སུམ་བཅུའི་ཆ་དང་ལྡན་པའོ། །ཁ་ཟས་ནི་ཤིང་ཏོག་སྣ་ཚོགས་ཟའོ། །ལྷ་ནི་ཉི་མའོ། །རུས་ནི་ནག་པ་ཡ་ནའོ། །རྒྱུ་སྐར་ས་རི་ནི་སྐར་མ་གཅིག་སྟེ། དབྱིབས་ནི་ཐིག་

71-1-262a

ལེ་ལྟ་བུའོ། །ཡུད་ཙམ་བཅྭ་ལྔའི་ཆ་དང་ལྡན་པའོ། །ཁ་ཟས་ནི་སྲན་སྡེའུ་དང་། འབྲས་དང་། མར་རོ། །ལྷ་ནི་རླུང་ལྷའོ། །རུས་ནི་ཡིད་ཅན་གྱི་རྒྱུད་དོ། །རྒྱུ་སྐར་ས་ག་ནི་སྐར་མ་བཞི་སྟེ། དབྱིབས་ནི་རྭའི་རྟེན་མགོ་ལྟ་བུའོ། །ཡུད་
ཙམ་ནི་བཞི་བཅུ་རྩ་ལྔའི་ཆ་དང་ལྡན་པའོ། །ཁ་ཟས་ནི་མེ་ཏོག་གོ། །ལྷ་ནི་དབང་པོ་དང་མེ་ལྷའོ། །རུས་ནི་བསྡུས་པ་ཡ་ནའོ། །ཀྱེ་པད་མའི་སྙིང་པོ་རྒྱུ་སྐར་བདུན་པོ་འདི་དག་ནི་ལྷོ་ཕྱོགས་ཀྱི་སྒོར་གཏོགས་པའོ། །རྒྱུ་སྐར་ལྷ་མཚམས་ནི་སྐར་
མ་བཞི་སྟེ། དབྱིབས་ནི་གླང་པོ་ཆེའི་མགོ་དང་སྣ་ལྟ་བུའོ། །ཡུད་ཙམ་སུམ་བཅུའི་ཆ་དང་ལྡན་པའོ། །ཟས་ནི་ཤ་དང་ཆང་ངོ་། །ལྷ་ནི་ཕུར་བུའོ། །རུས་ནི་དམིགས་པ་ཡ་ནའོ། །རྒྱུ་སྐར་སྣྲོན་ནི་སྐར་མ་གསུམ་སྟེ། དབྱིབས་ནི་ཐེམ་
སྐས་ལྟ་བུའོ། །ཡུད་ཙམ་བཅྭ་ལྔའི་ཆ་དང་ལྡན་པའོ། །ཁ་ཟས་ནི་འབྲས་དང་ནས་དང་གྲོའོ། །ལྷ་ནི་དབང་པོའོ། །རུས་ནི་རིང་པོའི་རྒྱུད་དོ། །རྒྱུ་སྐར་སྣྲུམས་ནི་སྐར་མ་དགུ་སྟེ། དབྱིབས་ནི་སྡིག་པ་ལྟ་བུའོ། །ཡུད་ཙམ་
སུམ་བཅུའི་ཆ་དང་ལྡན་པའོ། །ཟས་ནི་རྩ་བ་དང་འབྲས་བུའོ། །ལྷ་ནི་དམངས་རིགས་སྡོམ་པ་ཅན་ནོ། །རུས་ནི་ཀ་ཏ་ཡ་ནའི་རྒྱུད་དོ། །རྒྱུ་སྐར་ཆུ་སྟོད་ནི་སྐར་མ་བཞི་སྟེ། དབྱིབས་ནི་བ་ལང་གི་མཇུག་མ་བསྒྲེང་བ་ལྟ་བུའོ། །
ཡུད་ཙམ་སུམ་བཅུའི་ཆ་དང་ལྡན་པའོ། །ཁ་ཟས་ནི་ནྱ་གྲོ་དྷའི་ཐང་ཆུའོ། །ལྷ་ནི་ཆུ་ལྷའོ། །རུས་ནི་དུར་བའི་རྒྱུད་དོ། །རྒྱུ་སྐར་ཆུ་སྨད་ནི་སྐར་མ་བཞི་སྟེ། དབྱིབས་ནི་གླང་པོ་ཆེ་མཆོང་བ་ལྟ་བུའོ། །ཡུད་ཙམ་བཞི་བཅུ་
རྩ་ལྔའི་ཆ་དང་ལྡན་པའོ། །ཁ་ཟས་ནི་སྦྲང་རྩི་དང་ཡོས་སོ། །ལྷ་ནི་རྒྱས་པའོ། །རུས་ནི་མཽད་གལ་ཡ་ནའོ། །རྒྱུ་སྐར་བྱི་བཞིན་ནི་སྐར་མ་གསུམ་སྟེ། དབྱིབས་ནི་བ་ལང་གི་མགོ་ལྟ་བུའོ། །ཡུད་ཙམ་དྲུག་གི་ཆ་དང་
ལྡན་པའོ། །ཁ་ཟས་ནི་རླུང་ངོ་། །ལྷ་ནི་ཚངས་པའོ། །རུས་ནི་ཚངས་པ་དང་ལྡན་པའོ། །རྒྱུ་སྐར་གྲོ་བཞིན་ནི་སྐར་མ་གསུམ་སྟེ། དབྱིབས་ནི་རྔ་ལྟ་བུའོ། །ཡུད་ཙམ་སུམ་བཅུའི་ཆ་དང་ལྡན་པའོ། །ཁ་ཟས་ནི་

71-1-262b

བྱ་ཤའོ། །ལྷ་ནི་ཁྱབ་འཇུག་གོ། །རུས་ནི་ཀ་ཏ་ཡ་ན་གསུམ་པའོ། །ཀྱེ་བྲམ་ཟེ་པད་མའི་སྙིང་པོ་རྒྱུ་སྐར་བདུན་པོ་དེ་དག་ནི་ནུབ་ཀྱི་སྒོར་གཏོགས་པའོ། །རྒྱུ་སྐར་མོན་གྲེ་ནི་སྐར་མ་བཞི་སྟེ། དབྱིབས་ནི་བྱ་ལྟ་བུའོ། །ཡུད་ཙམ་
སུམ་བཅུའི་ཆ་དང་ལྡན་པའོ། །ཁ་ཟས་ནི་རྒྱ་སྲན་དང་སྲན་ཆུང་ངོ་། །ལྷ་ནི་ནོར་ལྷའོ། །རུས་ནི་ཀཽ་ཌི་ནྱའོ། །རྒྱུ་སྐར་མོན་གྲུ་ནི་སྐར་མ་གཅིག་སྟེ། དབྱིབས་ནི་ཐིག་ལེ་ལྟ་བུའོ། །ཡུད་ཙམ་བཅྭ་ལྔའི་ཆ་དང་ལྡན་པའོ། །ཁ་ཟས་
ནི་ནས་དང་གྲོའོ། །ལྷ་ནི་ཆུ་ལྷའོ། །རུས་ནི་དན་ད་ཡ་ནའོ། །རྒྱུ་སྐར་ཁྲུམས་སྟོད་ནི་སྐར་མ་གཉིས་ཏེ། དབྱིབས་ནི་རྟ་བ་འདྲ་བའོ། །ཡུད་ཙམ་སུམ་བཅུའི་ཆ་དང་ལྡན་པའོ། །ཁ་ཟས་ནི་ལུག་གི་ཤ་དང་ཁྲག་གོ། །ལྷ་ནི་ཀླུ་དང་གཟའ་
ལག་གོ། །རུས་ནི་བྲམ་ཟེ་རྣ་ཅན་ནོ། །རྒྱུ་སྐར་ཁྲུམས་སྨད་ནི་སྐར་མ་གཉིས་ཏེ། དབྱིབས་ནི་རྐང་པ་ལྟ་བུའོ། །ཡུད་ཙམ་བཞི་བཅུ་རྩ་ལྔའི་ཆའོ། །ཁ་ཟས་ནི་བལ་སྲན་ནོ། །ལྷ་ནི་འཕགས་པའོ། །རུས་ནི་ནོར་རྒྱས་ཀྱི་རྒྱུད་དོ། །
རྒྱུ་སྐར་ནམ་གྲུ་ནི་སྐར་མ་གཅིག་སྟེ། དབྱིབས་ནི་ཐིག་ལེ་ལྟ་བུའོ། །ཡུད་ཙམ་སུམ་བཅུའི་ཆའོ། །ཁ་ཟས་ནི་ཞོའོ། །ལྷ་ནི་རྒྱལ་པོའོ། །རུས་ནི་སྲིང་མོ་བརྒྱད་ཀྱི་རྒྱུད་དོ། །རྒྱུ་སྐར་ཐ་སྐར་ནི་སྐར་མ་གཉིས་ཏེ། །
དབྱིབས་ནི་རྟ་འགྲོ་བ་ལྟ་བུའོ། །ཡུད་ཙམ་སུམ་བཅུའི་ཆ་དང་ལྡན་པའོ། །ཁ་ཟས་ནི་སྦྲང་རྩིའི་ཐུག་པའོ། །ལྷ་ནི་དྲི་ཟའོ། །རུས་ནི་རྣ་འཇིག་ནས་ཀྱི་རྒྱུད་དོ། །རྒྱུ་སྐར་བྲ་ཉེ་ནི་སྐར་མ་གསུམ་སྟེ། དབྱིབས་ནི་མོ་མཚན་ལྟ་བུའོ། །
ཡུད་ཙམ་སུམ་བཅུའི་ཆ་དང་ལྡན་པའོ། །ཟས་ནི་ཏིལ་དང་འབྲས་སོ། །ལྷ་ནི་གཤིན་རྗེའོ། །རུས་ནི་བརྒའི་རྒྱུད་དོ། །ཀྱེ་པད་མའི་སྙིང་པོ་རྒྱུ་སྐར་བདུན་པོ་དེ་རྣམས་ནི་བྱང་གི་སྒོར་གཏོགས་པའོ། །ཀྱེ་པད་མའི་སྙིང་པོ་རྒྱུ་སྐར་
ཉི་ཤུ་རྩ་བརྒྱད་པོ་དེ་དག་ལས་རྒྱུ་སྐར་དྲུག་ནི་ཡུད་ཙམ་བཞི་བཅུ་རྩ་ལྔའི་ཆ་དང་ལྡན་ཏེ། འདི་ལྟ་སྟེ། སྣར་མ་དང་། ནམ་སོ་དང་། གྲེ་དང་། ས་ག་དང་། ཆུ་སྨད་དང་། ཁྲུམས་སྨད་ཅེས་བྱ་བ་འདི་དག་གོ། །རྒྱུ་སྐར་ལྔ་ནི་ཡུད་ཙམ་

71-1-263a

བཅྭ་ལྔའི་ཆ་དང་ལྡན་ཏེ། འདི་ལྟ་སྟེ། ལག་དང་། སྐག་དང་། ས་རི་དང་། སྣྲོན་དང་། ས་ག་ཞེས་བྱ་བ་དེ་དག་གོ། །དྲག་པོའི་ཡུད་ཙམ་གྱི་ཆོ་ག་དང་ལྡན་པ་གང་ཞེ་ན། སྔ་མ་ལས་གཞན་པ་སྟེ། ཡུད་ཙམ་སུམ་བཅུའི་ཆ་དང་ལྡན་
པའོ། །ཀྱེ་པད་མའི་སྙིང་པོ་བྱི་བཞིན་དང་བདུན་པོ་འདི་དག་ནི་ཤར་གྱི་སྒོ་བ་སྟེ། སྨིན་དྲུག་ནི་དང་པོའོ། །སྐག་ནི་ཐ་མའོ། །བདུན་པོ་འདི་དག་ནི་ལྷོ་སྒོའི་སྒོ་བ་སྟེ། མཆུ་ནི་དང་པོའོ། །ས་ག་ནི་ཐ་མའོ། །རྒྱུ་སྐར་བདུན་པོ་འདི་དག་ནི་
ནུབ་ཀྱི་སྒོ་བ་སྟེ། ལྷ་མཚམས་ནི་དང་པོའོ། །བྱི་བཞིན་ནི་ཐ་མའོ། །རྒྱུ་སྐར་བདུན་པོ་འདི་དག་ནི་བྱང་ཕྱོགས་ཀྱི་སྒོ་བ་སྟེ། མོན་གྲེ་ནི་དང་པོའོ། །བྲ་ཉེ་ནི་ཐ་མའོ། །ཀྱེ་པད་མའི་སྙིང་པོ་རྒྱུ་སྐར་ཉི་ཤུ་རྩ་བརྒྱད་པོ་དེ་དག་ལས་བདུན་ནི། 
སྟོབས་དང་ལྡན་པ་སྟེ། བདུན་གང་ཞེ་ན་འདི་ལྟ་སྟེ། ཤར་ཕྱོགས་ཀྱི་བཞི་དང་། ས་ག་དང་། ལྷ་མཚམས་དང་། ས་རིའོ། །གསུམ་ནི་དྲག་པོ་སྟེ། ལག་དང་། སྐག་དང་། བྲ་ཉེ་ཞེས་བྱའོ། །བཞི་ནི་མཆོད་པར་བྱ་བ་སྟེ། །བྱང་ཕྱོགས་
ཀྱི་གསུམ་དང་སྣར་མའོ། །ལྔ་ནི་འཇམ་པ་སྟེ། གྲོ་བཞིན་དང་། ནམ་གྲུ་དང་། མོན་གྲེ་དང་། སྣྲོན་དང་། སྣྲུམས་ཞེས་བྱའོ། །ལྔ་ནི་འཛིན་པའི་རིགས་ཏེ། མེ་བཞི་དང་། ནག་པ་དང་། སྐག་དང་། མཆུ་དང་། བྱི་བཞིན་ནོ། །བཞི་ནི་མྱུར་
བར་བྱེད་པ་སྟེ། སྨིན་དྲུག་དང་། མགོ་དང་། རྒྱལ་དང་། ཐ་སྐར་རོ། །ཀྱེ་པད་མའི་སྙིང་པོ་རྒྱུ་སྐར་ཉི་ཤུ་རྩ་བརྒྱད་པོ་དེ་དག་ནི་རིམ་གྱིས་འཇུག་པ་གསུམ་དང་ལྡན་སྟེ། ཁྱུ་མཆོག་གི་འཇུག་པ་དང་། བེའུ་ཡི་འཇུག་པ་དང་། ཟུང་ལྷན་
ཅིག་ཏུ་འཇུག་པའོ། །དེ་ལ་རྒྱུ་སྐར་སྔོན་དུ་འགྲོ་ཞིང་ཟླ་བ་ཕྱི་ནས་འགྲོ་བ་ནི་ཁྱུ་མཆོག་གི་འཇུག་པ་ཞེས་བྱའོ། །གང་གི་ཚེ་ཟླ་བ་སྔོན་དུ་འགྲོ་ཞིང་རྒྱུ་སྐར་ཕྱིར་འབྱུང་བ་ལ་ནི་བེའུ་འཇུག་པ་ཞེས་བྱའོ། །ཡང་གང་གི་ཚེ་
ཟླ་བ་དང་། རྒྱུ་སྐར་གཉིས་ལྷན་ཅིག་ཏུ་འཇུག་པ་དེ་ལྟ་བུ་ནི་འདིར་ཟུང་དུ་འཇུག་པ་ཞེས་བྱའོ། །གཞན་ཡང་པད་མའི་སྙིང་པོ་གཟའ་རྣམས་བཤད་པར་བྱ་ཡིས་ཉོན་ཅིག །འདི་ལྟ་སྟེ། པ་བ་སངས་དང་། གཟའ་

71-1-263b

ལྷག་པ་དང་། སྤེན་པ་དང་། ཕུར་བུ་དང་། མིག་དམར་དང་། སྒྲ་གཅན་དང་། མཇུག་རིངས་དང་། ཉི་མ་དང་། ཟླ་བ་ཞེས་བྱ་བ་ཡིན་ནོ། །འདི་དག་དང་། རྒྱུ་སྐར་འཇིག་རྟེན་དུ་འཛོམ་པ་བཤད་ཅིང་ཇི་ལྟར་ཉིན་མཚན་རིང་བ་ཡང་བཤད་པར་བྱ་སྟེ། དེ་ལ་དགུན་
གྱི་ཟླ་བ་གཉིས་པའི་ཚེས་བརྒྱད་ལ། རྒྱུ་སྐར་སྣར་མ་ཉིན་པར་ལ་ཡུད་ཙམ་བཅུ་གཉིས་སུ་འགྱུར་རོ། །མཚན་མོ་ལ་ནི་ཡུད་ཙམ་བཅྭ་བརྒྱད་དོ། །སོས་ཀའི་ཟླ་བ་ཐ་མའི་ཚེས་བརྒྱད་ལ་རྒྱུ་སྐར་ནི་སྣར་མའོ། །ཉིན་མོ་ལ་ནི་ཡུད་ཙམ་བཅྭ་བརྒྱད་
དུ་འགྱུར་རོ། །མཚན་མོ་ལ་ནི་ཡུད་ཙམ་བཅུ་གཉིས་སོ། །དབྱར་གྱི་ཟླ་བ་ཐ་མའི་ཚེས་བརྒྱད་ལ་རྒྱུ་སྐར་ནི་སྣར་མའོ། །ཉིན་མོ་ལ་ཡུད་ཙམ་བཅུ་བཞིའོ། །མཚན་མོ་ལ་ནི་ཡུད་ཙམ་བཅུ་དྲུག་གོ། །ཀྱེ་ཏྲེ་ཤང་ཀུ་ཉིན་པར་རྣམས་ཉིན་པར་དང་། 
ཕྱི་དེ་ཉིན་པར་རྗེས་སུ་འགྲོ་བ་ཡིན་ནམ། ཅི་ཡར་ངོ་དང་མར་ངོ་རྗེས་སུ་འགྲོ་བ་ཡིན་ནམ། ཅི་ལོ་རྣམས་དགུན་ཟླ་ཐ་ཆུངས་ཀྱིས་འཕེལ་བ་ཡིན་ནམ། ཅི་དུས་རྣམས་དབྱར་ཟླ་བས་འཕེལ་བ་ཡིན་ནམ། ཀྱེ་ཏྲེ་ཤང་ཀུ་སྐད་ཅིག་མ་རྣམས་ཀྱི་ཚད་གྲུབ་པ་ཇི་ལྟ་བུ། 
ཡུད་ཙམ་རྣམས་ཀྱི་ནི་ཇི་ལྟ་བུ་ཡིན། ཀྱེ་པད་མའི་སྙིང་པོ་བུད་མེད་རས་བལ་འཁལ་བ་འདའ་བ་ཤིན་དུ་རིང་བ་དང་ཐུང་བར་འདྲེན་པ་མ་ཡིན་པ་དེ་ལྟ་བུ་ནི་དེ་ཉིད་དེའི་སྐད་ཅིག་མ་དེའི་ཚད་དོ། །དེའི་སྐད་ཅིག་མ་ཉི་ཤུ་རྩ་དྲུག་ལ་ནི་སྐད་ཅིག་གཅིག་སྐད་ཅིག་དྲུག་ལ་
ནི་ཐང་ཅིག་གཅིག་གོ། ཐང་ཅིག་གསུམ་ལ་ནི་ཡུད་ཙམ་ཅིག་གོ། །དེ་ལྟ་བུའི་རིམ་པས་རྗེས་སུ་འབྲེལ་པའི་ཡུད་ཙམ་སུམ་བཅུ་ལ་ནི་ཞག་ཏུ་ཤེས་པར་བྱའོ། །ཡུད་ཙམ་དེ་དག་ལ་འདི་ལྟ་བུའི་མིང་དུ་འགྱུར་ཏེ། ཉི་མ་ཤར་བ་ན་སྐྱེས་བུ་དྲུག་བཅུ་
རྩ་དགུའི་གྲིབ་མ་འཇམ་པ་ནི་མཐོན་པོ་བཞི་པ་ཞེས་བྱ་བའི་ཡུད་ཙམ་དུ་འགྱུར་རོ། །སྐྱེས་བུ་དྲུག་བཅུས་གཞལ་བའི་གྲིབ་མ་ནི་དཀར་པོ་ཞེས་བྱ་བའི་ཡུད་ཙམ་དུ་འགྱུར་རོ། །སྐྱེས་བུ་བཅུ་གཉིས་ཀྱིས་གཞལ་བའི་གྲིབ་མའི་ཡུན་ཡང་དག་
པར་འཕེལ་བ་ཞེས་བྱ་བའི་ཡུད་ཙམ་དུ་འགྱུར་རོ། །སྐྱེས་བུ་དྲུག་གིས་གཅལ་བའི་གྲིབ་མའི་ཡུན་ལ་སྟོན་ཞེས་བྱ་བའི་ཡུད་ཙམ་དུ་འགྱུར་རོ། །སྐྱེས་བུ་ལྔ་ཡིས་གཅལ་བའི་གྲིབ་མའི་ཡུན་ལ་མངོན་པར་འཕེལ་བ་ཞེས་བྱ་བའི་ཡུད་ཙམ་དུ་

71-1-264a

འགྱུར་རོ། །སྐྱེས་བུ་བཞི་ཡིས་གཅལ་བའི་གྲིབ་མའི་ཡུན་ལ་གང་གསུམ་བྱ་བའི་ཡུད་ཙམ་དུ་འགྱུར་རོ། །སྐྱེས་བུ་གསུམ་གྱིས་གཅལ་བའི་གྲིབ་མའི་ཡུན་ལ་བཞིན་ལེགས་ཤེས་བྱ་བའི་ཡུད་ཙམ་དུ་འགྱུར་རོ། །ཉི་མ་གུང་ན་གནས་པ་ནི་
གང་གི་རྡོ་རྗེ་ཞེས་བྱ་བའི་ཡུད་ཙམ་དུ་འགྱུར་རོ། །དེའི་རྗེས་ལ་ནི་སྲིན་པོ་ཞེས་བྱ་བའི་ཡུད་ཙམ་དུ་འགྱུར་རོ། །དབུས་ནས་ཅུང་ཞིག་ཡོལ་བ་སྐྱེས་བུ་གཅིག་གིས་གཅལ་བའི་གྲིབ་མའི་ཡུན་ནི་རོ་ཧི་ཏ་ཞེས་བྱ་བའི་ཡུད་ཙམ་དུ་འགྱུར་རོ། །སྐྱེས་བུ་
བཞི་ཡིས་གཅལ་བའི་གྲིབ་མའི་ཡུན་ནི་སྟོབས་ཞེས་བྱ་བའི་ཡུད་ཙམ་དུ་འགྱུར་རོ། །སྐྱེས་བུ་ལྔས་གཅལ་བའི་གྲིབ་མའི་ཡུན་ནི་རྣམ་པར་རྒྱལ་བ་ཞེས་བྱ་བའི་ཡུད་ཙམ་དུ་འགྱུར་རོ། །སྐྱེས་བུ་དྲུག་གིས་གཞལ་བའི་གྲིབ་མའི་ཡུན་
ནི་རོ་ཐམས་ཅད་པ་ཞེས་བྱ་བའི་ཡུད་ཙམ་དུ་འགྱུར་རོ། །སྐྱེས་བུ་བཅུ་གཉིས་ཀྱི་གཅལ་བའི་གྲིབ་མའི་ཡུན་ནི་ནོར་ཞེས་བྱ་བའི་ཡུད་ཙམ་དུ་འགྱུར་རོ། །སྐྱེས་བུ་བརྒྱད་ཀྱིས་གཞལ་བའི་གྲིབ་མའི་ཡུན་ནི་བལྟ་ན་སྡུག་ཅེས་བྱ་བའི་ཡུད་ཙམ་
དུ་འགྱུར་རོ། །སྐྱེས་བུ་དྲུག་བཅུ་རྩ་དགུས་གཅལ་བའི་གྲིབ་མའི་ཡུན་ནི་གཞན་འཇིགས་ཤེས་བྱ་བའི་ཡུད་ཙམ་དུ་འགྱུར་རོ། །དེ་དག་ནི་ཉི་མ་ནུབ་པར་རྩོམ་པ་ཞེས་བྱ་བའི་ཡུད་ཙམ་དུ་འགྱུར་ཏེ། དེ་དག་ནི་ཉིན་མོ་རྣམས་ཀྱི་ཡུད་ཙམ་
ཡིན་ནོ། །ཀྱེ་པད་མའི་སྙིང་པོ་མཚན་མོ་རྣམས་ཀྱི་ཡུད་ཙམ་བཤད་པར་བྱ་སྟེ། འདི་ལྟ་སྟེ། ཉི་མ་ནུབ་པ་ནི་དྲག་པོ་ཞེས་བྱ་བའི་ཡུད་ཙམ་དུ་འགྱུར་རོ། །དེའི་རྗེས་ལ་ནི་སྐར་མ་རྒྱུ་བ་ཞེས་བྱ་བའི་ཡུད་ཙམ་དུ་འགྱུར་རོ། །དེ་ནས་ཡང་
དག་ཟུང་ཞེས་བྱ་བའི་ཡུད་ཙམ་མོ། །དེ་ནས་ད་ལྟར་ཞེས་བྱ་བའི་ཡུད་ཙམ་མོ། །དེ་ནས་མཐའ་མེད་ཅེས་བྱ་བའི་ཡུད་ཙམ་མོ། །དེ་ནས་བོང་བུ་ཞེས་བྱ་བའི་ཡུད་ཙམ་དུ་འགྱུར་རོ། །དེ་ནས་སྲིང་མོ་ཞེས་བྱ་བའི་ཡུད་ཙམ་མོ། །
ནམ་གྱི་གུང་ལ་གནས་པ་ན་ནི་ཆ་ཤས་ཞེས་བྱ་བའི་ཡུད་ཙམ་མོ། །ནམ་གྱི་གུང་འདས་པ་ན་བྲམ་ཟེ་ཞེས་བྱ་བའི་ཡུད་ཙམ་མོ། །དེ་ནས་ཉིས་སྐྱེད་ཅེས་བྱ་བའི་ཡུད་ཙམ་མོ། །དེ་ནས་མརྒ་ཞེས་བྱ་བའི་ཡུད་ཙམ་མོ། །དེ་ནས་མུན་འཇིགས་

71-1-264b

ཞེས་བྱ་བའི་ཡུད་ཙམ་མོ། །དེ་ནས་མེ་ཞེས་བྱ་བའི་ཡུད་ཙམ་མོ། །དེ་ནས་ཉི་མས་གདུངས་པ་ཞེས་བྱ་བའི་ཡུད་ཙམ་མོ། །དེ་ནས་བྱི་བཞིན་ཞེས་བྱ་བའི་ཡུད་ཙམ་མོ། །པད་མའི་སྙིང་པོ་ཡུད་ཙམ་སུམ་བཅུ་པོ་དེ་དག་ནི་ཉིན་ཞག་ཡིན་པར་
ཤེས་པར་བྱའོ། །དེ་ཡི་སྐད་ཅིག་ཐང་ཅིག་ཡུད་ཙམ་ནི། ཡུད་ཙམ་སུམ་བཅུའི་ཆ་མཆོག་ཐང་ཅིག་གོ། །ཐང་ཅིག་ཆ་མཆོག་དྲུག་ཆ་ཐང་ཅིག་གོ། །སྐད་ཅིག་ཉི་ཤུ་བརྒྱ་ཆ་དེ་སྐད་ཅིག །ཇི་ལྟར་བུད་མེད་རིང་ཐུང་གིས། །རས་བལ་འདའ་
བ་འདྲེན་སྤངས་པ། །འདིར་དེ་སྐད་ཅིག་རིང་པོ་སྟེ། །དེ་ཡི་སྐད་ཅིག་བརྒྱ་ཉི་ཤུ། །སྐད་ཅིག་གཅིག་དེ་དྲུག་ཐང་ཅིག །ཐང་ཅིག་སུམ་བཅུ་ཡུད་ཙམ་ཅིག །དེ་ལྟ་བུ་ཡི་སྦྱོར་བ་ཡིས། །ཡུད་ཙམ་སུམ་བཅུ་ཉིན་ཞག་གཅིག །ཉིན་ཞག་སུམ་
བཅུ་ཟླ་གཅིག་སྟེ། །ཟླ་བ་བཅུ་གཉིས་ལོ་གཅིག་གོ། །བཞི་མཐོན་དཀར་དང་འཇམ་བཅས་དང་། །ཉི་སྐྱེས་བཞིན་ལེགས་སྤོང་བྱེད་དང་། །རོ་ཧི་སྟོབས་ལྡན་རྣམ་རྒྱལ་དང་། །ཐམས་ཅད་རོ་པ་ནོར་དང་ནི། །མན་ད་ར་དང་གཞན་འཇིགས་དང་། །
དྲག་པོ་དང་ནི་སྐར་མ་སྤྱོད། །ཡང་དག་གཟུང་དང་ད་ལྟར་དང་། །མཐའ་ཡས་དང་ནི་བོང་བུ་དང་། །སྲིན་པོ་ཆ་ཤས་བྲམ་ཟེ་དང་། །ཨརྒ་དང་ནི་སྒྲུབ་པ་དང་། །མེ་དང་མེ་ཡིས་གདུངས་པ་དང་། །བྱི་བཞིན་ཞེས་ནི་བྱ་བ་རྣམས། །ཡུད་ཙམ་
རྣམས་ཀྱི་མིང་ཡིན་ནོ། །ཡང་བྲམ་ཟེ་དུས་རྣམས་ཀྱི་འབྱུང་བ་བཤད་པར་བྱ་ཡིས་ཉོན་ཅིག །དུས་རྣམས་ཇི་ལྟར་འགྱུར་བ་ཡང་བརྗོད་པར་བྱའོ། །མིག་འབྱེད་འཛུམས་གཉིས་ལ་ཐང་ཅིག་གཅིག་གོ། །ཐང་ཅིག་བཞི་ལ་མཆོག་དཀའ་
གཅིག་གོ། །མཆོག་དཀའ་གཅིག་ལ་ནི་དུས་ཚོད་གཅིག་གོ། །དུས་ཚོད་གསུམ་ལ་ཆུ་ཚོད་གཅིག་གོ། །དེ་ལ་ཆུ་ཚོད་གཉིས་ལ་ནི་ཡུད་ཙམ་ཅིག་གོ། །ཡུད་ཙམ་ཅིག་གི་ཚད་ཅི་ཙམ་ཞེ་ན། ཆུ་སྲང་བརྒྱ་བུམ་པར་བླུགས་ནས་
འཛགས་པའི་ཆུ་ཚོད་ཀྱི་བུམ་པའི་ཚད་ཅི་ཙམ་ཞེ་ན། འོལ་མ་སེ་གཅིག་གིས་གསེར་སོར་བཞིར་བསྙད་དེ། ཕྱོགས་བཞི་ནས་མཉམ་པར་ཟླུམས་པའི་ཚད་ཀྱི་བུམ་པའི་ཞབས་སུ་བརྟོལ་ནས། ཆུ་ཟད་པ་དེ་ནི་ཆུ་ཚོད་གཅིག་གི་

71-1-265a

ཚད་དོ། །ཆུ་ཚོད་གཉིས་ནི་ཡུད་ཙམ་གཅིག་གོ། །བྲམ་ཟེ་དེ་ལྟ་བུའི་ཡུད་ཙམ་སུམ་བཅུ་ལ་ནི་ཉིན་ཞག་གཅིག་ཏུ་འདོད་དོ། །མིག་འབྱེད་འཛུམས་བཅུ་དྲུག་ནི་མཆོག་དཀའོ། །མཆོག་དཀའ་བཅུ་དྲུག་ལ་ནི་དུས་ཚོད་གཅིག་
གོ། །དུས་ཚོད་དྲུག་བཅུ་རྩ་བཞི་ལ་ནི་ཡུད་ཙམ་ཅིག་གོ། །ཡུད་ཙམ་སུམ་བཅུ་ལ་ནི་ཉིན་ཞག་གཅིག་གོ། །ཉིན་ཞག་སུམ་བཅུ་ལ་ཟླ་བ་གཅིག་གོ། །ཟླ་བ་བཅུ་གཉིས་ལ་ནི་ལོ་གཅིག་གོ། །འདིར་མིག་ཕྱེ་བ་དང་བཙུམས་པ་
བྱེ་བ་ཕྲག་བཅུ་དྲུག་པ་འབུམ་ཕྲག་ལྔ་བཅུ་རྩ་བརྒྱད་དང་། སྟོང་ཕྲག་བརྒྱད་བཅུ་ལ་ནི་ལོ་སྟེ། ཡང་དེ་ལྟ་བུ་དེ་ནི་རེ་ཤིག་བྲམ་ཟེ་དུས་འབྱུང་བ་བཤད་པ་ཡིན་ནོ། །བྲམ་ཟེ་རྒྱང་གྲགས་དང་དཔག་ཚད་བསྐྱེད་པ་ཉོན་ཅིག །
རྡུལ་ཕྲ་རབ་བདུན་ལ་ནི་རྡུལ་ཕྲན་གཅིག་གོ། །རྡུལ་ཕྲན་བདུན་ལ་ནི་མཐོང་བ་ཐམས་ཅད་ལས་ཕྲ་བའི་ཉི་ཟེར་གྱི་རྡུལ་གཅིག་གོ། །ཉི་ཟེར་གྱི་རྡུལ་བདུན་ལ་ནི་རི་བོང་གི་རྡུལ་གཅིག་གོ། །རི་བོང་གི་རྡུལ་བདུན་ལ་ནི་ལུག་རྡུལ་
གཅིག་གོ། །ལུག་རྡུལ་བདུན་ལ་ནི་གླང་རྡུལ་གཅིག་གོ། །གླང་རྡུལ་བདུན་ལ་ནི་སྲོ་མ་གཅིག་གོ། །སྲོ་མ་བདུན་ལ་ནི་ཤིག་གཅིག་གོ། །ཤིག་བདུན་ལ་ནི་ནས་གཅིག་གོ། །ནས་བདུན་ལ་ནི་སོར་གཅིག་གོ། །
སོར་བཅུ་གཉིས་ལ་ནི་མཐོ་གང་ངོ་། །མཐོ་དོ་ལ་ནི་ཁྲུ་གང་ངོ་། །ཁྲུ་བཞི་ལ་ནི་གཞུ་གང་ངོ་། །གཞུ་སྟོང་ལ་ནི་རྒྱང་གྲགས་གཅིག་གོ། །རྒྱང་གྲགས་བཞི་ལ་ནི་མ་ག་དྷའི་དཔག་ཚད་གཅིག་གོ། །དཔག་ཚད་གཅིག་
ལ་རྡུལ་ཕྲ་རབ་བྱེ་བ་ཕྲག་འབུམ་ཕྲག་ཉི་ཤུ་རྩ་བཞི་དང་། བྱེ་བ་བརྒྱ་སྟོང་ཕྲག་སུམ་བཅུ་རྩ་དགུ་ཡོད་དེ། ཡང་དེ་ལྟ་བུ་ནི་དཔག་ཚད་དོ། །བྲམ་ཟེ་གསེར་བསྐྱེད་པའི་ཚད་བཤད་པར་བྱ་ཡིས་ཉོན་ཅིག །ནས་
བཅུ་གཉིས་ལ་ནི་མ་ཤ་ཀ་གཅིག་གོ། །མ་ཤ་ཀ་བཅུ་དྲུག་ལ་ནི་ཞོ་གཅིག་སྟེ། གསེར་གྱི་ཚད་དོ། །བྲམ་ཟེ་ཉོན་ཅིག །ཞོ་གཅིག་ལ་རྡུལ་ཕྲ་རབ་བྱེ་བ་ཕྲག་གཉིས་དང་། སྟོང་ཕྲག་ཉི་ཤུ་རྩ་ལྔ་དང་། 

71-1-265b

བརྒྱ་ཕྲག་ལྔ་དང་ཉག་བརྒྱད་ཡོད་དོ། །བྲམ་ཟེ་ཡང་དེ་ལྟ་བུ་དེ་ནི་གསེར་བསྐྱེད་པའི་ཚད་ཡིན་ནོ། །བྲམ་ཟེ་སྲང་གི་ཚད་ཉོན་ཅིག །མ་ཤ་ཀ་དྲུག་བཅུ་རྩ་བཞི་ལ་ནི་མ་ག་དྷཱའི་སྲང་གི་སྲང་གཅིག་གོ། །དེ་ནི་སྲང་གི་ཚད་མདོར་བསྡུས་པ་ཡིན་ནོ། །
སྲང་གཅིག་ལ་རྡུལ་ཕྲ་རབ་བྱེ་བ་ཕྲག་བརྒྱད་དང་བརྒྱ་སྟོང་ཕྲག་བཞི་བཅུ་རྩ་བཞི་དང་། བདུན་སྟོང་ཉིས་བརྒྱ་དང་ཉག་བརྒྱད་བཅུ་ཡོད་དེ། བྲམ་ཟེ་ཡང་དེ་ལྟ་བུ་དེ་ནི་སྲང་གི་ཚད་ཡིན་ནོ། །བྲམ་ཟེ་ཁུ་བ་གཞལ་བ་རྣམས་ཀྱི་ཚད་ཉོན་ཅིག །
མ་ག་དྷཱའི་སྲང་ཉི་ཤུ་རྩ་བཞི་བྲེ་གང་སྟེ། ཁུ་བ་རྣམས་གཅལ་བའི་ཚད་དོ། །མ་ག་དྷཱ་པ་རྣམས་ཀྱི་སྲང་དང་། བྲེ་མདོར་བསྟན་པ་ཡིན་ཏེ། བྲེ་གང་ལ་རྡུལ་ཕྲ་རབ་བྱེ་བ་ཕྲག་ཉིས་བརྒྱ་རྩ་གསུམ་དང་། བརྒྱ་སྟོང་ཕྲག་སུམ་བཅུ་རྩ་
དགུ་དང་། སྟོང་ཕྲག་བདུན་བཅུ་རྩ་བཞི་དང་། བདུན་བརྒྱ་དང་ཉག་ཉི་ཤུ་ཡོད་དོ། །བྲམ་ཟེ་ཡང་དེ་ལྟ་བུ་དེ་ནི་ཁུ་བ་རྣམས་གཅལ་བ་ཡིན་ནོ། །བྲམ་ཟེ་འབྲུ་རྣམས་གཅལ་བའི་ཚད་ཉོན་ཅིག །སྲང་ཉི་ཤུ་རྩ་དགུ་དང་ཞོ་གཉིས་ནི་མ་ག་དྷཱའི་
བྲེ་གང་སྟེ། འབྲུ་གཅལ་བའི་ཚད་དོ། །མ་ཤ་ཀ་དྲུག་བཅུ་ནི་ཡང་བྲེའི་ཚད་དོ། །མདོར་བསྟན་པ་ཡིན་ནོ། །བྲེ་གང་ལ་རྡུལ་ཕྲ་རབ་བྱེ་བ་ཕྲག་བརྒྱ་ལྔ་བཅུ་དང་། བརྒྱ་སྟོང་ཕྲག་བརྒྱད་བཅུ་རྩ་གཉིས་དང་། སྟོང་ཕྲག་དྲུག་བཅུ་
རྩ་གཅིག་དང་ལྔ་བརྒྱ་ཡོད་དོ། །ཡང་བྲམ་ཟེ་དེ་ལྟ་བུ་དེ་ནི་འབྲུ་གཅལ་བའི་ཚད་ཡིན་ནོ། །ཡང་ཀྱེ་ཏྲེ་ཤང་ཀུ་རྒྱུ་སྐར་རྣམས་ཀྱི་ལུང་བསྟན་ཀླགས་ན་སྨྲོས་ཤིག །ཀྱེ་གཞན་ཡང་བདག་གི་རྒྱུ་སྐར་རྣམས་ཀྱི་ལུང་བསྟན་
པའི་ལེའུ་ཞེས་བྱ་བ་བཤད་ཀྱིས་ཉོན་ཅིག །ཀྱེ་བྲམ་ཟེ་སྨིན་དྲུག་ལ་སྐྱེས་པ་ནི་གྲགས་པ་དང་ལྡན་པར་འགྱུར་རོ། །སྣར་མ་ལ་སྐྱེས་པ་ནི་ལེགས་ཤིང་སྐལ་བ་དང་ལྡན་པར་འགྱུར་རོ། །མགོ་ལས་སྐྱེས་པ་ནི་ཐབ་མོ་
དོན་དུ་གཉེར་བར་འགྱུར་རོ། །ལག་ལ་སྐྱེས་པ་ནི་ཁྲོ་བ་བླུན་ཞིང་ལོངས་སྤྱོད་དང་ལྡན་པར་འགྱུར་རོ། །ནམ་སོ་ལས་སྐྱེས་པ་ནི་ཞིང་རྨོ་ཞིང་བ་ལང་སྐྱོང་བར་འགྱུར་རོ། །རྒྱལ་ལས་སྐྱེས་པ་ནི་ཚུལ་ཁྲིམས་དང་ལྡན་པར་འགྱུར་རོ། །

71-1-266a

སྐག་ལས་སྐྱེས་པ་ནི་འདོད་ཆགས་ཆེ་བར་འགྱུར་རོ། །མཆུ་ལས་སྐྱེས་པ་ནི་མཐུ་ཆེ་བར་འགྱུར་རོ། །གྲེ་ལས་སྐྱེས་པ་ནི་ཚེ་ཐུང་བར་འགྱུར་རོ། །དབོ་ལས་སྐྱེས་པ་ནི་བསྙེན་གནས་ལ་གནས་ཤིང་ཚུལ་ཁྲིམས་དང་ལྡན་པར་ཕ་
རོལ་ཏུ་མཐོ་རིས་སུ་འགྱུར་རོ། །མེ་བཞི་ལས་སྐྱེས་པ་ནི་ལག་པ་ནས་རྐུ་བར་འགྱུར་རོ། །ནག་པ་ལས་སྐྱེས་པ་ནི་གླུ་དང་གར་ལ་མཁས་ཤིང་ཆོ་ག་དང་། རིག་པ་དང་ལྡན་པར་འགྱུར་རོ། །ས་རི་ལ་སྐྱེས་པ་ནི་རྩིས་ལ་མཁས་ཤིང་
ཚོགས་ཆེན་པོའི་གཙོ་བོར་འགྱུར་རོ། །ས་ག་ལས་སྐྱེས་པ་ནི་རྒྱལ་པོའི་མངག་གཞུག་པར་འགྱུར་རོ། །ལྷ་མཚམས་ལ་སྐྱེས་པ་ནི་ཟོང་དང་བཅས་པའི་ཚོང་པར་འགྱུར་རོ། །སྣྲོན་ལས་སྐྱེས་པ་ནི་ལོངས་སྤྱོད་ཆུང་བར་འགྱུར་རོ། །
སྣྲུམས་ལས་སྐྱེས་པ་ནི་གྲགས་པ་བསྟེན་ཅིང་བུ་དང་ལྡན་པར་འགྱུར་རོ། །ཆུ་སྟོད་ལས་སྐྱེས་པ་ནི་རྣལ་འབྱོར་པར་འགྱུར་རོ། །ཆུ་སྨད་ལ་སྐྱེས་པ་ནི་རིགས་བཙུན་ཞིང་དབང་ཕྱུག་དང་ལྡན་པར་འགྱུར་རོ། །བྱི་བཞིན་ལ་སྐྱེས་པ་ནི་
གྲགས་པ་དང་ལྡན་པའི་སྐྱེས་བུར་འགྱུར་རོ། །གྲོ་བཞིན་ལ་སྐྱེས་པ་ནི་རྒྱལ་པོས་མཆོད་པར་འགྱུར་རོ། །མོན་གྲེ་ལས་སྐྱེས་པ་ནི་རིག་པ་ཆུང་བར་འགྱུར་རོ། །མོན་གྲུ་ལ་སྐྱེས་པ་ནི་ཕྲེང་རྒྱུད་མཁན་དུ་འགྱུར་རོ། །ཁྲུམས་སྟོད་
ལ་སྐྱེས་པ་ནི་ཆོམ་རྐུན་པའི་སྡེ་དཔོན་དུ་འགྱུར་རོ། །ཁྲུམས་སྨད་ལ་སྐྱེས་པ་ནི་དྲི་ཞིམ་པར་འགྱུར་རོ། །ནམ་གྲུ་ལ་སྐྱེས་པ་ནི་གྲུ་པར་འགྱུར་རོ། །ཐ་སྐར་ལ་སྐྱེས་པ་ནི་རྟ་འཚོང་བར་འགྱུར་རོ། །བྲ་ཉེ་ལ་སྐྱེས་པ་ནི་
ཤན་པར་འགྱུར་རོ། །ཀྱེ་པད་མའི་སྙིང་པོ་དེ་ནི་རྒྱུ་སྐར་ལུང་བསྟན་པའི་ལེའུ་ཡིན་ནོ། །ཀྱེ་ཏྲེ་ཤང་ཀུ་རྒྱུ་སྐར་ངེས་པར་བསྟན་པའི་ལེའུ་ཀླགས་ན་ཤོད་ཅིག །པད་མའི་སྙིང་པོ་གཞན་ཡང་རྒྱུ་སྐར་ངེས་པར་བསྟན་
པ་ཞེས་བྱ་བའི་ལེའུ་བསྟན་པར་བྱ་ཡིས་དེ་ཉོན་ཅིག །སྨིན་དྲུག་ལ་ངེས་པར་བརྩམས་པའི་གྲོང་ཁྱེར་དེ་ནི་དཔལ་འབར་ཞིང་རིན་པོ་ཆེའི་འོད་ཀྱིས་གསལ་བ་ཉིད་དུ་ངེས་པར་བསྟན་ཏོ། །སྣར་མ་ལ་ངེས་པར་བརྩམས་

71-1-266b

པའི་གྲོང་ཁྱེར་ནི་རྣམ་པར་སྟོན་ཅིང་ཆོས་དང་ལྡན་པའི་སྐྱེ་བོས་གང་བར་འགྱུར་ཞིང་ནོར་མང་པོ་སོགས་ལ་རང་བཞིན་གྱི་རིག་པ་དང་ལྡན་པ་ལ་རང་གི་ཆུང་མས་ཆོག་ཤེས་པར་འགྱུར་རོ། །མགོ་ལ་ངེས་པར་བརྩམས་པའི་གྲོང་ཁྱེར་ནི་དཔལ་དང་
ལྡན་ཞིང་བ་ལང་དང་། ནོར་དང་། ཕྲེང་བ་དང་། ལོངས་སྤྱོད་དང་ལྡན་ལ་ཁྱུ་མཆོག་གིས་གང་བར་འགྱུར་རོ། །ལག་ལ་ངེས་པར་བརྩམས་པའི་གྲོང་ཁྱེར་ནི་བཟའ་བ་དང་། བཅའ་བ་མང་པོ་དང་ལྡན་པར་འགྱུར་ཞིང་རྨོངས་པའི་རང་བཞིན་གྱིས་གང་
བར་འགྱུར་རོ། །ནམ་སོ་ལ་ངེས་པར་བརྩམས་པའི་གྲོང་ཁྱེར་ནི་དཔལ་འབར་ཞིང་ནོར་དང་འབྲུ་མང་པོ་དང་ལྡན་པར་འགྱུར་ཞིང་ཕྱིས་ནི་འཇིག་པར་འགྱུར་རོ། །རྒྱལ་ལ་ངེས་པར་བརྩམས་པའི་གྲོང་ཁྱེར་ནི་ཡང་དཔལ་དང་ལྡན་ཞིང་སྐྱེ་བོ་མི་བཟད་པ་
ཡང་སེམས་ཞི་བར་འགྱུར་ལ། སྐྱེ་བོ་དམ་པ་མང་ཞིང་ཆོས་དང་ལྡན་ལ་དེར་ཚེ་རིང་བ་དང་། མི་གཟི་བརྗིད་དང་ལྡན་ལ་དེར་ཕྱིས་ནི་འབྲུའི་བཅུད་ཐམས་ཅད་ནུབ་པར་འགྱུར་རོ། །སྐག་ལ་ངེས་པར་བརྩམས་པའི་གྲོང་ཁྱེར་ནི་བསོད་ནམས་ཆུང་
ཞིང་ཐབ་མོ་ལ་དགའ་ལ་སྐལ་བ་དམན་ཞིང་ཚུལ་ཁྲིམས་དང་། སྡུག་བསྔལ་དང་བཅས་པ་དང་། ཤིན་དུ་སྐལ་བ་དམན་ཞིང་སྐྱེ་བོ་མ་དུལ་བས་གང་བར་འགྱུར་རོ། །མཆུ་ལ་ངེས་པར་བརྩམས་པ་གང་ཡིན་པ་དེ་ནི་རིག་པ་དང་། ནོར་ཆེ་བ་དང་
རང་གི་ཆུང་མས་ཆོག་ཤེས་པ་སྐྱེས་བུ་མཆོག་ཏུ་རྣམ་པར་རྒྱལ་བར་གནས་པར་འདོད་དོ། །གྲེ་ལ་ངེས་པར་བརྩམས་པའི་གྲོང་ཁྱེར་ནི་བུད་མེད་དང་། ཕྲེང་བ་དང་། ཟས་དང་། གོས་བཟང་པོ་དང་། བ་ལང་དང་། ནོར་དང་ལྡན་པར་
འགྱུར་རོ། །དབོ་ལ་ངེས་པར་བརྩམས་པའི་གྲོང་ཁྱེར་ནི་ནོར་དང་། འབྲུ་དང་ལྡན་ཞིང་སྐྱེས་བུ་དང་། བུད་མེད་རྨོངས་པས་གང་བར་འགྱུར་རོ། །མེ་བཞི་ལ་ངེས་པར་བརྩམས་པའི་གྲོང་ཁྱེར་ནི་རིག་པ་དང་ལྡན་ཞིང་ནོར་མང་ལ་ཕན་ཚུན་
གཅུགས་ཤིང་མལ་སྟན་དང་ལྡན་པར་འགྱུར་རོ། །ནག་པ་ལ་ངེས་པར་བརྩམས་པའི་གྲོང་ཁྱེར་ནི་བུད་མེད་དང་། སྐྱེས་བུ་ཐམས་ཅད་དཔལ་དང་ལྡན་ཞིང་ཕྱིས་གྲོང་ཁྱེར་མེས་ཚིག་པར་འགྱུར་རོ། །ས་རི་ལ་ངེས་པར་བརྩམས་པའི་

71-1-267a

གྲོང་ཁྱེར་ནི་ནོར་མང་པོ་ཚོགས་ཤིང་བརྐམ་ཆགས་དང་། ཞེ་སྡང་དང་ལྡན་ཞིང་རྨོངས་པ་མང་བར་འགྱུར་རོ། །ས་ག་ལ་ངེས་པར་བརྩམས་པའི་གྲོང་ཁྱེར་ནི་དཔལ་གྱིས་འབར་ཞིང་མཆོད་སྦྱིན་པ་དང་། བསྟན་བཅོས་ལ་
མཁས་པ་སྡུག་པར་འགྱུར་ཞིང་ཕྱིས་དེར་འབྲུ་དང་། བཅུད་མེས་བསྲེགས་ནས་འཇིག་པར་འགྱུར་རོ། །ལྷ་མཚམས་ལ་ངེས་པར་བརྩམས་པའི་གྲོང་ཁྱེར་ནི་ཆོས་དང་། ཚུལ་ཁྲིམས་ཀྱིས་དབང་པོ་ལས་རྒྱལ་ཞིང་རང་གི་ཆུང་
མས་ཆོག་ཤེས་ལ་སྐྱེས་བུ་རྣམས་ལ་བཟླས་པ་དང་། སྦྱིན་སྲེག་གིས་ཕ་རོལ་དོན་དུ་གཉེར་བར་འགྱུར་རོ། །སྣྲོན་ལ་ངེས་པར་བརྩམས་པའི་གྲོང་ཁྱེར་ནི་རིན་པོ་ཆེ་དང་། འབྲུ་རྣམས་དང་ལྡན་ཞིང་རྟག་ཏུ་རིག་བྱེད་དང་ལྡན་
པས་གང་བར་འགྱུར་རོ། །སྣྲུམས་ལ་ངེས་པར་བརྩམས་པའི་གྲོང་ཁྱེར་ནི་ནོར་དང་འབྲུ་སོགས་ཤིང་ཚུལ་ཁྲིམས་འཆལ་པའི་སྐྱེ་བོས་གང་ཞིང་ཕྱིས་ནི་སས་འཇིག་པར་འགྱུར་རོ། །ཆུ་སྟོད་ལས་ངེས་པར་བརྩམས་པའི་
གྲོང་ཁྱེར་ནི་ནོར་གྱི་སྐལ་བ་དང་ལྡན་ཞིང་བརྐམ་ཆགས་དང་། ཞེ་སྡང་ཆེ་ལ་རྨོངས་ཤིང་མ་དུལ་བའི་སྐྱེ་བོས་གང་བར་འགྱུར་རོ། །ཆུ་སྨད་ལ་ངེས་པར་བརྩམས་པའི་གྲོང་ཁྱེར་ནི་ནོར་དང་། འབྲུ་མང་ཞིང་རང་བཞིན་
གྱིས་རིག་པ་ཕུན་སུམ་ཚོགས་པ་དང་ལྡན་ལ་སྐྱེ་བོ་རྩོད་པ་ལ་དགའ་བར་འགྱུར་རོ། །གྲོ་ཞིན་ལ་ངེས་པར་བརྩམས་པའི་གྲོང་ཁྱེར་ནི་ནོར་དང་འབྲུ་སྟེན་ཅིང་ནད་མེད་ལ་སྐྱེ་བོ་འབྲེལ་བའི་བསྟན་བཅོས་ལ་མཁས་ཤིང་
གོམས་པར་འགྱུར་རོ། །མོན་གྲེ་ལ་ངེས་པར་བརྩམས་པའི་གྲོང་ཁྱེར་ནི་བུད་མེད་ལས་རྒྱལ་ཞིང་གོས་དང་། ཕྲེང་བ་དང་། འདོད་པའི་ལོངས་སྤྱོད་མང་པོ་མེད་པར་འགྱུར་རོ། །མོན་གྲུ་ལ་ངེས་པར་
བརྩམས་པའི་གྲོང་ཁྱེར་ནི་རིག་པ་དང་མི་ལྡན་ཞིང་གཡོ་ལ་དགའ་ཞིང་བུད་མེད་དང་། བཏུང་བ་དང་ལྡན་ཞིང་ཕྱིས་ནི་ཆུ་ཡིས་འཇིག་པར་འགྱུར་རོ། །ཁྲུམས་སྟོད་ལ་ངེས་པར་བརྩམས་པའི་གྲོང་ཁྱེར་ནི་དེ་དག་བདེ་བ་

71-1-267b

ལ་དགའ་ཞིང་ཕ་རོལ་ལ་གནོད་པ་སྦྱོར་བ་ལ་རྨོངས་པས་བདེ་བ་སྤོང་བར་འགྱུར་རོ། །ཁྲུམས་སྨད་ལ་ངེས་པར་བརྩམས་པའི་གྲོང་ཁྱེར་ནི་རིན་པོ་ཆེ་དང་། འབྲུ་དང་ཟས་སྐོམ་གྱིས་ཕྱུག་ཅིང་རྟག་ཏུ་ཁྱད་པར་འཕེལ་བར་འགྱུར་རོ། །
ནམ་གྲུ་ལ་ངེས་པར་བརྩམས་པའི་གྲོང་ཁྱེར་ནི་སྐྱེ་བོ་རྣམས་བལྟ་ན་སྡུག་ཅིང་བོང་བུ་དང་། རྔ་མོ་དང་། བ་ལང་དང་། ནོར་དང་། འབྲུ་མང་པོ་དང་ལྡན་པར་འགྱུར་རོ། །ཐ་སྐར་ལ་ངེས་པར་བརྩམས་པའི་གྲོང་ཁྱེར་ནི་ཤིས་པ་ལ་
སོགས་པ་རྟེན་ཅིང་སྐྱེ་བོ་ནད་མེད་ཅིང་བལྟ་ན་སྡུག་པས་གང་བར་འགྱུར་རོ། །བྲ་ཉེ་ལ་ངེས་པར་བརྩམས་པའི་གྲོང་ཁྱེར་ནི་རྩོད་པ་ལ་དགའ་ཞིང་སྐལ་བ་ཆུང་ལ་ཚུལ་ཁྲིམས་ཉམས་ཤིང་སྡུག་བསྔལ་འབྱུང་བའི་སྐྱེ་བོ་མ་དུལ་བ་
གནས་པར་འགྱུར་རོ། །གྲོང་དང་། རྒྱལ་པོའི་ཕོ་བྲང་དང་། དེ་བཞིན་གྲོང་རྣམས་རྒྱུ་སྐར་གང་ལ་བརྩམས་པ་ཡང་མཁས་པས་དེ་བཞིན་དུ་རབ་ཏུ་བརྟག་པར་བྱའོ། །བཟང་པོ་ལ་དགའ་ཞིང་འཇུག་པ་དེ་ནི་བདག་གིས་སྐྱེ་བ་སྔ་མ་
ལ་ཤེས་པར་བྱས་པ་ཡིན་ནོ། །ཀྱེ་པད་མའི་སྙིང་པོ་དེ་དག་ནི་རྒྱུ་སྐར་ངེས་པར་བསྟན་པའི་ལེའུ་ཡིན་ནོ། །ཀྱེ་པད་མའི་སྙིང་པོ་གཞན་ཡང་རྒྱུ་སྐར་ཉི་ཤུ་རྩ་བརྒྱད་པོ་དེ་དག་གི་གནས་ངེས་པར་བཤད་པར་བྱ་སྟེ། ཀྱེ་པད་མའི་
སྙིང་པོ་རྒྱུ་སྐར་སྨིན་དྲུག་གི་གནས་ནི་ནད་ག་ད་དང་། ཡུལ་ཀ་ལིང་ཀའོ། །སྣར་མ་ནི་སྐྱེ་དགུ་ཐམས་ཅད་ལ་གནས་སོ། །མགོ་ནི་ལུས་འཕགས་དང་། རྒྱལ་པོའི་ཞབས་འབྲིང་བ་ལ་གནས་སོ། །ལག་དང་། 
ནམ་སོ་དང་། རྒྱལ་དང་། སྐག་རྣམས་ནི་ཀླུང་དང་གངས་ཅན་ལ་གནས་སོ། །མཆུ་ནི་ཤར་ཕྱོགས་ཀྱི་མི་རྣམས་ལ་གནས་སོ། །གྲེ་ནི་རྐུན་མ་རྣམས་ལ་གནས་སོ། །དབོ་ནི་ས་བོན་འདི་རྣམས་ལ་གནས་སོ། །
མེ་བཞི་ནི་ཡུལ་འཁོར་བ་རྣམས་ལ་གནས་སོ། །རྒྱུ་སྐར་ནག་པ་ནི་བྱ་དང་། རྐང་གཉིས་པ་རྣམས་ལ་གནས་སོ། །ས་རི་ནི་རབ་ཏུ་བྱུང་བ་ཐམས་ཅད་ལ་གནས་སོ། །ས་ག་ནི་ཆུ་ལ་གནས་པའི་

71-1-268a

སེམས་ཅན་རྣམས་ལ་གནས་སོ། །ལྷ་མཚམས་ནི་ཚོང་པ་ཟོང་དང་ལྡན་པ་རྣམས་ལ་གནས་སོ། །སྣྲོན་ནི་སྒོ་སྲུངས་རྣམས་ལ་གནས་སོ། །སྣྲུམས་ནི་འདྲོན་པོ་རྣམས་ལ་གནས་སོ། །ཆུ་སྟོད་ནི་པ་ཧྣི་ཀ་པ་རྣམས་ལ་གནས་
སོ། །ཆུ་སྨད་ནི་ཀམ་པོ་ཙེའི་གླིང་ན་གནས་སོ། །གྲོ་བཞིན་ནི་རྐུན་མ་དང་ཕོ་ཉ་རྣམས་ལ་གནས་སོ། །བྱི་བཞིན་ནི་ལྷོ་ཕྱོགས་པ་ཐམས་ཅད་དང་། ཟངས་གླིང་པ་རྣམས་ལ་གནས་སོ། །མོན་གྲུ་ནི་ཀཽ་ཤི་ཀ་པ་
དང་། སྲིད་སྲུངས་བ་རྣམས་ལ་གནས་སོ། །མོན་གྲེ་ནི་ཀུ་རུ་དང་། ལྔ་མཚན་ན་གནས་སོ། །ཁྲུམས་སྟོད་ནི་གན་དྷ་ར་བ་རྣམས་དང་། ནས་གླིང་པ་རྣམས་དང་། ཀམ་པོ་ཙེ་རྣམས་ལ་གནས་སོ། །ཁྲུམས་སྨད་ནི་
དྲི་ཟ་རྣམས་ལ་གནས་སོ། །ནམ་གྲུ་ནི་གྲུ་པ་རྣམས་ལ་གནས་སོ། །ཐ་སྐར་ནི་རྟ་འཚོ་བ་རྣམས་ལ་གནས་སོ། །བྲ་ཉེ་ནི་ཞིང་པ་བཟང་པོ་རྣམས་ལ་གནས་སོ། །ཀྱེ་པད་མའི་སྙིང་པོ་དེ་དག་ནི་རྒྱུ་སྐར་རྣམས་
ཀྱི་གནས་ངེས་པར་བསྟན་པའི་ལེའུའོ། །ཀྱེ་ཏྲེ་ཤང་ཀུ་དུས་གང་ལ་ཆར་འབབ་པ་ཞེས་བྱ་བའི་ལེའུ་བཀླགས་སམ་ཀླགས་སོ། །ཀྱེ་དེ་ལྟར་ཡིན་ན་ཁྱོད་ཀྱིས་ཤོད་ཅིག །ཀྱེ་པད་མའི་སྙིང་པོ་དེ་ལྟར་ན་དུས་གང་ལ་ཆར་
འབབ་པ་ཞེས་བྱ་བའི་ལེའུ་བཤད་ཀྱིས་དེ་ཉོན་ཅིག །སྨིན་དྲུག་དང་ལྡན་པའི་སོས་ཀའི་ཟླ་བ་ཐ་མ་ལ་ཆར་འབབ་པ་ནི་ཨ་ལང་ཀ་དྲུག་བཅུའི་ཆར་ནུབ་བཅུའི་བར་དུ་འབབ་ཅིང་པ་བ་སངས་སྔོན་དུ་གནས་པ་ནི་ཆར་རྒྱུན་ཆད་
མེད་པར་མཚན་མོ་ཆར་འབབ་པར་ཡང་དག་པར་ཤེས་པར་བྱ་སྟེ། དགུན་དང་། དཔྱིད་ཀྱི་བར་གསུམ་བཟུང་བར་གྱུར་པ་ནི་མའི་སྟོབས་ཤེས་བྱ་བར་འགྱུར་ཏེ། སྨིན་དྲུག་གི་ཡིན་པར་བསྟན་ཏོ། །སྣར་མ་དང་ལྡན་
པ་སོས་ཀའི་ཟླ་བའི་ཐ་མ་ལ་གང་དུ་ཆར་བབ་པ་དེ་ཨ་ལང་ག་ཉི་ཤུ་རྩ་གཅིག་འབབ་ཅིང་དེར་ཞིང་རྨོས་ན་ལས་བྱེད་པ་དེས་འབྲས་བུ་དང་བཅས་ཤིང་འབྲུ་རྣམས་ཕུན་སུམ་ཚོགས་ཤིང་དེར་ནད་གཉིས་འབྱུང་བར་འགྱུར་ཏེ། 

71-1-268b

ཕོ་བའི་ནད་དང་། མིག་ནད་དང་། ཡུལ་དུ་རྐུན་པོ་མང་བ་ནི་སྣར་མའི་ཡིན་པར་བསྟན་ཏོ། །མགོ་དང་ལྡན་པའི་སོས་ཀའི་ཟླ་བ་ཐ་མ་ལ་གང་དུ་ཆར་པ་བབ་པ་དེ་ནི་ཨ་ལང་ཀ་དྲུག་བཅུ་རྩ་བཞིའི་ཆར་འབབ་ཅིང་འབྲས་
བུ་དང་བཅས་ཤིང་ཕྱིས་ཀྱང་ཡང་དག་པར་འབབ་པར་ཤེས་པར་བྱ་ཞིང་རྒྱལ་པོའི་ཆད་པ་མེད་ཅིང་བདེ་བ་དང་། གནོད་པ་མེད་པར་གྱུར་པས་ལྗོངས་རྣམས་དགའ་བར་གྱུར་པ་ནི་མགོའི་ཡིན་པར་བསྟན་ཏོ། །ལག་པ་
དང་ལྡན་པའི་སོས་ཀའི་ཟླ་བ་ཐ་མ་ལ་གང་ཆར་བབ་པ་ནི་ཨ་ལང་ཀ་བཅྭ་བརྒྱད་ཀྱི་ཆར་འབབ་ཅིང་དེར་ཞིང་ལས་ལ་སྦྱོར་བས་རླན་ཆུང་བ་སྤང་བར་བྱ་ཞིང་ཡུལ་དུ་རྐུན་མ་མང་ལ་དེར་ཡང་ནད་གསུམ་སྟོབས་དང་ལྡན་པར་འགྱུར་ཏེ། 
རིམས་དང་། ཚ་བ་དང་། ལྐོག་ནད་ཀྱིས་བུ་ཆུང་དང་། ཁྱེའུ་དང་། བུ་མོ་རྣམས་འཆི་བར་འགྱུར་ཏེ། ལག་གི་ཡིན་པར་བསྟན་ཏོ། །ནམ་སོ་དང་ལྡན་པའི་སོས་ཀའི་ཟླ་བ་ཐ་མ་ལ་གང་དུ་ཆར་བབ་པ་དེ་ནི་ཨ་ལང་ཀ་དགུ་
བཅུའི་ཆར་འབབ་ཅིང་སྤྲིན་ཆེན་པོ་འབྱུང་ཞིང་དཔྱིད་ཟླ་ཐ་ཆུངས་ལ་བབ་པ་བདེ་བར་འབབ་ཅིང་བར་དང་བཅས་ཤིང་རྒྱུན་དུ་འབབ་པར་འགྱུར་ཞིང་རྒྱལ་པོའི་ཆད་པ་མེད་པར་འགྱུར་ཏེ། ནམ་སོ་ཡིན་པར་བསྟན་ཏོ། །
རྒྱལ་དང་ལྡན་པའི་སོས་ཀའི་ཟླ་བ་ཐ་མ་ལ་གང་དུ་ཆར་བབ་པ་དེ་ནི་ཨ་ལང་ཀ་སུམ་བཅུ་རྩ་གཉིས་ཀྱི་ཆར་འབབ་པར་འགྱུར་ཏེ། དམའ་བར་ཞིང་ལས་བྱ་ཞིང་སྐམས་སྤང་བར་བྱའོ། །ངེས་པར་ཉིན་དང་མཚན་དུ་འབྲུ་བཟང་པོ་
ཕུན་སུམ་ཚོགས་ཤིང་བྲམ་ཟེ་དང་། རྒྱལ་རིགས་དེར་ཕན་ཚུན་རྩོད་ཅིང་། མཆེ་བ་ཅན་སྟོབས་དང་ལྡན་པར་འགྱུར་ལ་ནད་གསུམ་སྟོབས་དང་ལྡན་པར་འགྱུར་ཏེ། འབྲུམ་བུ་དང་འབྲུམ་བུ་ཕྲ་མོ་དང་། ཤུ་བའོ། །
འདི་ནི་རྒྱལ་དུ་ཤེས་པར་བྱའོ། །སྐག་དང་ལྡན་པའི་སོས་ཀའི་ཟླ་བ་ཐ་མ་ལ་གང་དུ་ཆར་བབ་པ་དེ་ནི་ཨ་ལང་ཀ་ཉི་ཤུ་རྩ་གཅིག་འབབ་ཅིང་དེ་ལ་དམའ་བར་ཞིང་ལས་བྱ་ཞིང་སྐམས་སྤང་བར་བྱ་སྟེ། རླུང་མི་བཟད་པར་

71-1-269a

ལྡང་ཞིང་རིག་པ་དང་ལྡན་པ་ལ་བར་ཆད་འབྱུང་ཞིང་ཆར་དེས་འབྲུ་ཐམས་ཅད་ཕུན་སུམ་ཚོགས་ཤིང་རྒྱལ་པོ་དང་། བློན་པོ་འཁྲུག་པར་འགྱུར་ཏེ། སྐག་གི་ཡིན་པར་བསྟན་ཏོ། །མཆུ་དང་ལྡན་པའི་སོས་ཀའི་ཟླ་བ་ཐ་མ་ལ་
གང་དུ་ཆར་བབ་པ་དེ་ནི་ཨ་ལང་ཀ་དྲུག་བཅུ་རྩ་བཞིའི་ཆར་འབབ་ཅིང་ཆར་དེས་འབྲུ་ཐམས་ཅད་ཕུན་སུམ་ཚོགས་ཤིང་བྱ་དང་། ཕྱུགས་དང་། རི་དགས་རྣམས་ཀྱི་མངལ་འཇིག་པར་འགྱུར་ཞིང་སྐྱེ་བ་དང་། འཆི་བར་
འགྱུར་ཏེ། མཆུ་ཡིན་པར་བསྟན་ཏོ། །གྲེ་དང་ལྡན་པའི་སོས་ཀའི་ཟླ་བ་ཐ་མ་ལ་གང་དུ་ཆར་བབ་པ་དེ་ནི་ཨ་ལང་ཀ་བརྒྱད་བཅུའི་ཆར་འབབ་ཅིང་། ཆར་དེས་འབྲུ་ཐམས་ཅད་ཕུན་སུམ་ཚོགས་ཤིང་འབྲུ་དེ་དག་ཀྱང་གཞན་
གྱི་དམག་གིས་ཁྱེར་ཞིང་མི་རྣམས་སྡུག་བསྔལ་དང་ལྡན་ལ་མི་དང་ཕྱུགས་རྣམས་ཀྱི་མངལ་འཇིག་པར་འགྱུར་ཏེ་གྲེའི་ཡིན་པར་བསྟན་ཏོ། །དབོ་དང་ལྡན་པའི་སོས་ཀའི་ཟླ་བ་ཐ་མ་ལ་གང་དུ་ཆར་བབ་པ་དེར་ནི་ཨ་ལང་ཀ་ལྔ་
བཅུ་རྩ་དགུའི་ཆར་བབ་ཅིང་འབྲུ་ཐམས་ཅད་ཕུན་སུམ་ཚོགས་ཤིང་རྒྱལ་པོའི་མཚོན་གྱིས་ཆར་པ་འབེབས་ཤིང་བྲམ་ཟེ་དང་། རྒྱལ་རིགས་རྣམས་རྩོད་པར་གྱུར་ཅིང་མྱུར་བར་ཚུལ་མ་ཡིན་པས་སྐྱེ་དགུ་རྣམས་བརླག་
པར་འགྱུར་ཏེ། དབོའི་ཡིན་པར་བསྟན་ཏོ། །མེ་བཞི་དང་ལྡན་པའི་སོས་ཀའི་ཟླ་བ་ཐ་མའི་ཉི་མ་ལ་གང་དུ་ཆར་བབ་པ་དེར་ནི་ཨ་ལང་ཀ་ལྔ་བཅུ་རྩ་དགུ་འབབ་ཅིང་དེ་ལ་འདི་ལྟ་སྟེ། སྐྱེ་བོ་རྣམས་བདེན་པ་མེད་པ་
དང་། ནད་ཀྱིས་མཆོག་ཏུ་གནོད་ཅིང་འབྲས་བུ་ཆུང་ཞིང་ཆུ་མེད་པས་ལོ་ཉེས་པར་འགྱུར་ཏེ། མེ་བཞིའི་ཡིན་པར་བསྟན་ཏོ། །ནག་པ་དང་ལྡན་པའི་སོས་ཀའི་ཟླ་བ་ཐ་མ་ལ་ཆར་བབ་པ་དེར་ནི་ཨ་ལང་ཀ་དྲུག་བཅུ་རྩ་
བཞིའི་ཆར་འབབ་ཅིང་སྙིང་པོ་དང་ལྡན་ལ། ཕྱིས་ཀྱང་འབབ་ཅིང་རྒྱལ་པོའི་མཚོན་སྤངས་ཤིང་ལྗོངས་ཀྱི་སྐྱེ་བོ་རྣམས་དགའ་བར་འགྱུར་ཏེ། ནག་པའི་ཡིན་པར་བསྟན་ཏོ། །ས་རི་དང་ལྡན་པའི་སོས་ཀའི་ཟླ་བ་ཐ་མའི་

71-1-269b

ཉི་མ་ལ་གང་དུ་ཆར་བབ་པ་དེར་ནི་ཨ་ལང་ཀ་ཉི་ཤུ་རྩ་གཅིག་གི་ཆར་འབབ་ཅིང་རྒྱལ་པོའི་མཚོན་དང་། བྲལ་བར་འགྱུར་ཞིང་རྐུན་མ་སྟོབས་དང་ལྡན་པར་འགྱུར་ཏེ། ས་རིའི་ཡིན་པར་བསྟན་ཏོ། །ས་ག་དང་ལྡན་པའི་སོས་ཀའི་ཟླ་
བ་ཐ་མ་ལ་གང་དུ་ཆར་བབ་པ་དེར་ནི་ཨ་ལང་ཀ་ལྔ་བཅུའི་ཆར་འབབ་ཅིང་འབྲུ་ཐམས་ཅད་ཕུན་སུམ་ཚོགས་ཤིང་རྒྱལ་པོ་དང་། སྐྱེ་བོ་རྣམས་སངས་པར་འགྱུར་ཏེ། མེ་མཆེད་པ་དང་། མཆེ་བ་ཅན་སྟོབས་དང་ལྡན་པས་ཟད་པར་
གྱུར་ཏེ། ས་གའི་ཡིན་པར་བསྟན་ཏོ། །ལྷ་མཚམས་དང་ལྡན་པའི་སོས་ཀའི་ཟླ་བ་ཐ་མ་ལ་ཨ་ལང་ཀ་དྲུག་བཅུའི་ཆར་འབབ་ཅིང་འབྲུ་རྣམས་ཕུན་སུམ་ཚོགས་ལ་ལོ་མ་རྣམས་རྒྱས་པར་འགྱུར་ཏེ། ལྷ་མཚམས་ཀྱི་ཡིན་པར་བསྟན་
ཏོ། །སྣྲོན་དང་ལྡན་པའི་སོས་ཀའི་ཟླ་བ་ཐ་མ་ལ་ཨ་ལང་ཀ་བཅུ་དྲུག་གི་ཆར་འབབ་ཅིང་དེར་ལས་ཀྱི་མཐའ་སྤང་བར་བྱ་ཞིང་གཤོལ་ཐོགས་པ་སྤངས་ཤིང་དེ་ནས་འགྲོ་བར་བྱ་སྟེ། གཞན་གྱི་དམག་ཚོགས་ཀྱིས་ལྗོངས་དེ་འཇིག་པར་
འགྱུར་ཏེ། སྣྲོན་གྱི་ཡིན་པར་བསྟན་ཏོ། །སྣྲུམས་དང་ལྡན་པའི་སོས་ཀའི་ཟླ་བ་ཐ་མ་ལ་ཨ་ལང་ཀ་དྲུག་བཅུ་རྩ་བཞིའི་ཆར་འབབ་ཅིང་འབྲུ་རྣམས་ཕུན་སུམ་ཚོགས་ལ། ཡུལ་དེར་རྐུན་མ་མང་བར་འགྱུར་ཞིང་ཕ་རོལ་
དང་། རྩིབ་ལོགས་གཟེར་བ་དང་། མིག་ན་བ་འབྱུང་ལ་མེ་ཏོག་དང་། འབྲས་བུ་ཕུན་སུམ་ཚོགས་པ་དང་། རྒྱལ་པོས་མཚོན་སྤོངས་བར་འགྱུར་ཏེ། སྣྲུམས་ཀྱི་ཡིན་པར་བསྟན་ཏོ། །ཆུ་སྟོད་དང་ལྡན་
པའི་སོས་ཀའི་ཟླ་བ་ཐ་མ་ལ་ཨ་ལང་ཀ་དྲུག་བཅུ་རྩ་བཞིའི་ཆར་འབབ་ཅིང་གཟའ་གཉིས་སྔོན་དུ་འགྲོ་བས། རྟ་འཐབ་པའི་ཟླ་བ་ཕྱེད་ཀྱི་ཆར་འབབ་ཅིང་དེར་འབྲུ་རྣམས་ཕུན་སུམ་ཚོགས་ཤིང་ལྟོ་བའི་ནད་དང་། མིག་གི་ནད་
གཉིས་དེར་རབ་ཏུ་སྟོབས་དང་ལྡན་པར་འགྱུར་ཏེ། ཆུ་སྟོད་ཀྱི་ཡིན་པར་བསྟན་ཏོ། །ཆུ་སྨད་དང་ལྡན་པའི་སོས་ཀའི་ཟླ་བ་ཐ་མ་ལ་ཨ་ལང་ཀ་རྫོགས་པའི་བརྒྱའི་ཆར་འབབ་ཅིང་དེ་ལ་མཐོ་བར་ཞིང་ལས་བྱ་ཞིང་དམའ་བར་སྤང་

71-1-270a

བར་བྱའོ། །ཆུ་བོ་རྣམས་ཆེར་འབབ་ཅིང་དང་པོའི་ཆར་བབ་པས་འབྲུ་རྣམས་ཕུན་སུམ་ཚོགས་ཤིང་། གཡན་པ་དང་། འབྲུམ་བུ་དང་། ཕོལ་མིག་སྟེ་ནད་གསུམ་རབ་ཏུ་སྟོབས་དང་ལྡན་པར་འགྱུར་ཏེ། ཆུ་སྨད་ཀྱི་ཡིན་
པར་བསྟན་ཏོ། །གྲོ་བཞིན་དང་ལྡན་པའི་སོས་ཀའི་ཟླ་བ་ཐ་མ་ལ་ཨ་ལང་ཀ་དྲུག་བཅུ་རྩ་བཞིའི་ཆར་འབབ་ཅིང་ཡུལ་གཅིག་ཏུ་བབ་པར་གྱུར་ནས། ཕྱིས་ཆར་ཕུན་སུམ་ཚོགས་པར་འགྱུར་ཞིང་ཆུ་ན་གནས་པ་རྣམས་ལ་གནོད་པར་
འགྱུར་ལ་ནད་མང་བ་དང་། རྒྱལ་པོའི་ཆད་པ་དྲག་པོར་འགྱུར་ཏེ། གྲོ་བཞིན་གྱི་ཡིན་པར་བསྟན་ནོ། །མོན་གྲེ་དང་ལྡན་པའི་སོས་ཀའི་ཟླ་བ་ཐ་མ་ལ་ཨ་ལང་ཀ་དྲུག་བཅུ་རྩ་གཅིག་གི་ཆར་འབབ་ཅིང་ཆར་གླེ་གར་འབབ་པས་དེ་ལ་
ནི་དམའ་བར་ཞིང་ལས་བྱེད་ཅིང་མཐོ་བ་སྤང་བར་བྱའོ། །མཚན་མོ་གནོད་པའི་སྒོར་འགྱུར་ཞིང་འབྲུ་རྣམས་ཕུན་སུམ་ཚོགས་ལ་ནད་གཅིག་སྟོབས་དང་ལྡན་ཏེ་གཡན་པའོ། །རྒྱལ་པོ་མཚོན་ཐོགས་པར་འགྱུར་ཏེ། 
མོན་གྲེའི་ཡིན་པར་བསྟན་ཏོ། །མོན་གྲུ་དང་ལྡན་པའི་སོས་ཀའི་ཟླ་བ་ཐ་མ་ལ་ཆར་ཅུང་ཞིག་འབབ་པས་དམའ་བར་ཞིང་ལས་བྱ་ཞིང་མཐོ་བ་སྤང་བར་བྱ་སྟེ། ཆར་དེས་འབྲུ་ཐམས་ཅད་ཕུན་སུམ་ཚོགས་ཤིང་དམག་གི་
ཚོགས་ཀྱིས་ལྗོངས་བསྐོར་བར་གྱུར་པས་མི་རྣམས་བུ་ཕྲག་པར་ཐོགས་ནས་ཡུལ་གཞན་དུ་འགྲོ་བར་བསྟན་ཏེ། མོན་གྲུའི་ཡིན་པར་བསྟན་ཏོ། །ཁྲུམས་སྟོད་དང་ལྡན་པའི་སོས་ཀའི་ཟླ་བ་ཐ་མ་ལ་ཨ་ལང་ཀ་དྲུག་བཅུ་
རྩ་བཞིའི་ཆར་བབ་ཅིང་དུས་དང་པོའི་མཚན་མོའི་སྒོ་ནས་མཚན་མོ་ཉི་ཤུ་རྩ་དགུའི་བར་དུ་ཐབ་མོ་འབྱུང་ཞིང་མེ་ཏོག་དང་འབྲུ་རྣམས་ཉམས་པར་འགྱུར་ཞིང་དུས་དེར་རྐུན་མ་མང་ཞིང་ནད་ཆེན་པོ་གཉིས་འབྱུང་སྟེ། དང་པོར་ནི་
འཁྲིགས་པའི་རིམས་དང་། ཕྱིས་ནི་གཟའ་ཆེན་པོའི་སྟོབས་ཀྱི་གནོད་པས་བུད་མེད་དང་། སྐྱེས་པ་རྣམས་འཆི་བར་འགྱུར་ཏེ། ཁྲུམས་སྟོད་ཀྱི་ཡིན་པར་བསྟན་ཏོ། །ཁྲུམས་སྨད་དང་ལྡན་པའི་སོས་ཀའི་ཟླ་བ་

71-1-270b

ཐ་མ་ལ་ཨ་ལང་ཀ་རྫོགས་པ་བརྒྱའི་ཆར་འབབ་པར་འགྱུང་ཞིང་ཆུ་བོ་རྣམས་ཆེར་འབབ་ལ་ནད་ཆེན་པོ་བཞི་སྟོབས་དང་ལྡན་པར་འགྱུར་ཏེ་འདི་ལྟ་སྟེ། ཕོ་བའི་ནད་དང་། མིག་གི་ནད་དང་། ཆམ་པ་དང་། རིམས་བྱུང་བས་ཁྱེའུ་
དང་། བུ་མོ་རྣམས་འཆི་བར་འགྱུར་ཞིང་དེར་མཐོན་པོར་ཞིང་ལས་བྱ་ཞིང་དམའ་བ་སྤང་བར་བྱའོ། །ནད་ཆེན་པོས་འཆི་བ་མང་ཞིང་མེ་ཏོག་དང་འབྲས་བུ་ཕུན་སུམ་ཚོགས་པར་འགྱུར་ཏེ། ཁྲུམས་སྨད་ཀྱི་ཡིན་པར་བསྟན་ཏོ། །
ནམ་གྲུ་དང་ལྡན་པའི་སོས་ཀའི་ཟླ་བ་ཐ་མ་ལ་ཨ་ལང་ཀ་དྲུག་བཅུའི་ཆར་འབབ་ཅིང་གང་དམའ་བར་ཞིང་ལས་བྱ་ཞིང་མཐོ་བ་ནི་སྤང་བར་བྱའོ། །ཆར་དེས་ལོ་ཐོག་ཐམས་ཅད་ཕུན་སུམ་ཚོགས་ཤིང་རྒྱལ་པོས་མཚོན་སྤངས་པས་
འབྲུ་དེ་དག་ཀྱང་མཛའ་བོ་དང་གཉེན་མི་རྣམས་ཀྱིས་ལོངས་སྤྱོད་ཅིང་ལྗོངས་ལ་གནོད་པ་མེད་པར་གྱུར་པས། མཛའ་བོ་དང་ལྡན་པར་འགྱུར་ཏེ། ནམ་གྲུའི་ཡིན་པར་བསྟན་ཏོ། །ཐ་སྐར་དང་ལྡན་པའི་སོས་ཀའི་ཟླ་བ་ཐ་མ་
ལ་ཨ་ལང་ཀ་བཞི་བཅུ་རྩ་བཞིའི་ཆར་འབབ་ཅིང་བར་དུ་ཆར་ཆེ་བས་དེར་ནི་དམའ་བར་ཞིང་ལས་བྱ་ཞིང་མཐོ་བར་སྤང་བར་བྱའོ། །གཉིས་སུ་ཆར་ཕུན་སུམ་ཚོགས་ཤིང་སྐྱེ་བོ་རྣམས་འདུས་པ་ལྡན་ཞིང་རྐུན་མ་སྟོབས་དང་ལྡན་
པར་འགྱུར་ཏེ། ཐ་སྐར་གྱི་ཡིན་པར་བསྟན་ཏོ། །བྲ་ཉེ་དང་ལྡན་པའི་སོས་ཀའི་ཟླ་བ་ཐ་མ་ལ་གང་དུ་ཆར་བབ་པ་དེར་ཨ་ལང་ཀ་རྫོགས་པར་བརྒྱ་འབབ་པ་དེ་མཐོ་བར་ཞིང་ལས་བྱ་ཞིང་དམའ་བ་སྤང་བར་བྱའོ། །
དེ་ལོ་ཉེས་པས་སྐྱེ་བོ་རྣམས་འཆི་བར་འགྱུར་ཞིང་། རྒྱལ་པོ་ཕན་ཚུན་འཐབ་ཅིང་བུ་དང་བུ་མོ་རྣམས་འཆི་བར་འགྱུར་ཏེ། བྲ་ཉེའི་ཡིན་པར་བསྟན་ཏོ། །ཀྱེ་པད་མའི་སྙིང་པོ་དེ་དག་ནི་དུས་གང་ལ་ཆར་བབ་པའི་ལེའུའོ། །
ཀྱེ་པད་མའི་སྙིང་པོ་རྒྱུ་སྐར་དེ་རྣམས་དང་གཟའ་སྒྲ་གཅན་དུ་ལྡན་པས་འབྲས་བུ་སྨིན་པར་བཤད་པར་བྱའོ། །ཀྱེ་པད་མའི་སྙིང་པོ་སྨིན་དྲུག་དང་གཟའ་སྒྲ་གཅན་དུ་ལྡན་པས་ནི་ཡུལ་ཀ་ལིང་ཀ་དང་། མ་ག་དྷཱ་པ་རྣམས་

71-1-271a

རྣམས་ལ་ནད་ཉེ་བར་འབྱུང་བར་འགྱུར་རོ། །གང་གི་ཚེ་སྣར་མ་དང་སྒྲ་གཅན་དུ་ལྡན་པས་ནི་སྐྱེ་དགུ་རྣམས་ལ་ནད་ཉེ་བར་འབྱུང་བར་འགྱུར་རོ། །གང་གི་ཚེ་མགོ་དང་གཟའ་སྒྲ་གཅན་དུ་ལྡན་པས་ནི་ལུས་འཕགས་པ་
རྣམས་དང་། རྒྱལ་པོའི་ཞབས་འབྲིང་བ་རྣམས་ལ་ནད་ཉེ་བར་འབྱུང་བར་འགྱུར་རོ། །དེ་བཞིན་དུ་ལག་དང་། ནམ་སོ་དང་། རྒྱལ་དང་། སྐག་དང་། གང་གི་ཚེ་སྒྲ་གཅན་དུ་ལྡན་པས་ནི་ཀླུ་རྣམས་དང་། གངས་ཅན་པ་
རྣམས་ལ་ནད་ཉེ་བར་འབྱུང་བར་འགྱུར་རོ། །གང་གི་ཚེ་མཆུ་དང་སྒྲ་གཅན་དུ་ལྡན་པས་ནི་ཤར་ཕྱོགས་པ་རྣམས་ལ་ནད་ཉེ་བར་འབྱུང་བར་འགྱུར་རོ། །གང་གི་ཚེ་གྲེ་དང་གཟའ་སྒྲ་གཅན་དུ་ལྡན་པས་ནི་རྐུན་མའི་གནས་ཉེ་བར་
འབྱུང་བར་འགྱུར་རོ། །གང་གི་ཚེ་དབོ་དང་གཟའ་སྒྲ་གཅན་དུ་ལྡན་པས་ནི་ཨ་བན་ཏི་པ་རྣམས་ལ་ནད་ཉེ་བར་འབྱུང་ངོ་། །གང་གི་ཚེ་མེ་བཞི་དང་སྒྲ་གཅན་དུ་ལྡན་པས་ནི་ཡུལ་འཁོར་བ་རྣམས་ལ་ནད་ཉེ་བར་འབྱུང་ངོ་། །གང་གི་
ཚེ་ནག་པ་དང་སྒྲ་གཅན་དུ་ལྡན་པས་ནི་བྱ་དང་། རྐང་གཉིས་པ་རྣམས་ལ་ནད་ཉེ་བར་འབྱུང་ངོ་། །གང་གི་ཚེ་ས་རི་དང་སྒྲ་གཅན་དུ་ལྡན་པས་ནི་རབ་ཏུ་བྱུང་བ་ཐམས་ཅད་ལ་ནད་འབྱུང་ངོ་། །གང་གི་ཚེ་ས་ག་དང་སྒྲ་གཅན་དུ་ལྡན་
པས་ནི་ཆུའི་སེམས་ཅན་རྣམས་ལ་ནད་དུ་འགྱུར་རོ། །གང་གི་ཚེ་ལྷ་མཚམས་དང་སྒྲ་གཅན་དུ་ལྡན་པས་ནི་ཟོང་དང་ལྡན་པའི་ཚོང་པ་རྣམས་ལ་ནད་འབྱུང་ངོ་། །གང་གི་ཚེ་སྣྲོན་དང་སྒྲ་གཅན་དུ་ལྡན་པས་ནི་སྒོ་སྲུངས་རྣམས་
ལ་ནད་འབྱུང་ངོ་། །གང་གི་ཚེ་སྣྲུམས་དང་སྒྲ་གཅན་དུ་ལྡན་པས་ནི་འདྲོན་པོ་རྣམས་ལ་ནད་འབྱུང་ངོ་། །གང་གི་ཚེ་ཆུ་སྟོད་དང་སྒྲ་གཅན་དུ་ལྡན་པས་ནི་ཨ་བན་ཏི་པ་རྣམས་ལ་ནད་འབྱུང་ངོ་། །གང་གི་ཚེ་ཆུ་སྨད་དང་སྒྲ་གཅན་དུ་
ལྡན་པས་ནི་ཀམ་པོ་ཙེའི་གླིང་པ་རྣམས་དང་ན་པ་ལི་ཀ་རྣམས་ལ་ནད་འབྱུང་ངོ་། །གང་གི་ཚེ་བྱི་བཞིན་དང་སྒྲ་གཅན་དུ་ལྡན་པས་ནི་ལྷོ་ཕྱོགས་པ་ཐམས་ཅད་དང་། ཟངས་གླིང་པ་རྣམས་ལ་ནད་འབྱུང་ངོ་། །

71-1-271b

གང་གི་ཚེ་གྲོ་བཞིན་དང་སྒྲ་གཅན་དུ་ལྡན་པས་ནི་རྐུན་མ་ལ་ནད་འབྱུང་ངོ་། །གང་གི་ཚེ་མོན་གྲེ་དང་སྒྲ་གཅན་དུ་ལྡན་པས་ནི་ཀུ་རུ་པ་དང་། རྣ་ཅན་པ་རྣམས་ལ་ནད་འབྱུང་ངོ་། །གང་གི་ཚེ་མོན་གྲུ་དང་སྒྲ་གཅན་དུ་ལྡན་པས་ནི་གསེར་
འཚོང་བ་རྣམས་ལ་ནད་འབྱུང་ངོ་། །གང་གི་ཚེ་ཁྲུམས་སྨད་དང་སྒྲ་གཅན་དུ་ལྡན་པས་ནི་རོལ་མོ་པ་རྣམས་ལ་ནད་འབྱུང་ངོ་། །གང་གི་ཚེ་ནམ་གྲུ་དང་སྒྲ་གཅན་དུ་ལྡན་པས་ནི་གྲུ་པ་རྣམས་ལ་ནད་འབྱུང་ངོ་། །གང་གི་ཚེ་ཐ་སྐར་དང་
སྒྲ་གཅན་དུ་ལྡན་པས་ནི་རྟ་འཚོ་བ་རྣམས་ལ་ནད་འབྱུང་ངོ་། །གང་གི་ཚེ་བྲ་ཉེ་དང་སྒྲ་གཅན་དུ་ལྡན་པའི་ཆེ་ཞིང་བཟང་པོ་རྣམས་ལ་ནད་འབྱུང་ངོ་། །ཀྱེ་པད་མའི་སྙིང་པོ་འདི་དག་ནི་གཟའ་སྒྲ་གཅན་དུ་ལྡན་པས་འབྲས་བུ་རྣམ་པར་
སྨིན་པ་ཞིང་བྱ་བའི་ལེའུའོ། །རྒྱུ་སྐར་སོ་སོའི་ལས་ཀྱི་དགོས་པ་བཤད་པ་ཁོང་དུ་ཆུད་པར་བྱ་སྟེ། རྒྱུ་སྐར་གང་གི་ལས་གང་ཡིན་པའི་དྲང་སྲོང་རྣམས་ནི་འདི་ལྟར་འདོད་དོ། །སྨིན་དྲུག་ནི་སྐར་མ་དྲུག་ཡིན་པར་རིག་པར་བྱ་སྟེ། 
དེ་ལ་ནི་མེའི་བྱ་བ་བྱ་སྟེ། མེ་ལྷ་མཉེས་པར་བྱ་བ་དང་། སྦྱིན་བསྲེག་བྱས་ན་འཕེལ་བར་འགྱུར་རོ། །དེ་ལ་བ་ལང་གི་གནས་བྱ་ཞིང་ཞོ་དཀྲོགས་ན་མར་ཆེ་ལ། ར་དང་ལུག་ཉོ་བར་བྱ་ཞིང་བ་གླང་དགྱེ་བར་བྱའོ། །
ལྕགས་བཞུ་བ་དང་། སྣོད་ཐམས་ཅད་བྱ་བ་དང་། རིན་པོ་ཆེ་བཅང་བ་དང་། ལས་ཀྱི་མཐའ་བྱ་བ་དང་། མཚོན་བཅང་བ་དང་། ནང་ཁང་དང་ཁྱིམ་དུ་མེ་སྦར་བ་དང་། མེ་ཏོག་སེར་པོ་དང་། དམར་པོའི་ས་བོན་གདབ་པ་
དང་། ཁྱིམ་བྱས་པ་ལ་དེར་འདུག་པར་བསྒྲུབ་པ་དང་། གོས་སར་པ་བགོ་བར་བྱ་ཞིང་རིན་གྱིས་ནི་ཉོ་བར་མི་བྱའོ། །ལས་དྲག་པོ་བསྒྲུབ་པ་གཡུལ་འགྱེད་པ་དང་། བཅིང་བ་རྣམས་ལ་བཟང་ཞིང་མཁས་པས་ཕ་རོལ་དང་
རྩོད་པའི་སྦྱོར་བ་ནི་མི་བྱའོ། །སྤུ་གྲི་བྱ་བ་དང་བཅའ་བ་ཐམས་ཅད་བྱ་ཞིང་། མེ་དང་ལྡན་པའི་སྣོད་དེར་བྱ་ཞིང་ཚེ་སྤེལ་བ་དང་། སྐྲ་བཀྲུ་བ་དང་། བུད་མེད་རྣམས་ལ་སྒེག་པ་དང་། ཉི་མ་དེ་ལ་ཆར་བབ་ན་དགྲ་ལྡང་ཞིང་

71-1-272a

ཁྲོ་བ་དང་། དགའ་བ་དང་། དྲག་པོའི་ལས་བརྩམ་ཞིང་རྐུན་མ་འགྱེད་པར་བཟང་ཞིང་དེ་ལ་སྐྱེས་པ་ཚེ་རིང་བ་དང་གྲགས་པ་དང་ལྡན་པ་དང་། མཆོད་སྦྱིན་བྱེད་ཅིང་ཚུལ་ཁྲིམས་དང་ལྡན་པར་འགྱུར་ཏེ། དེ་དག་ནི་སྨིན་
དྲུག་ལ་བྱའོ། །སྣར་མ་ལ་ནི་ས་གཞི་ལ་ཞིང་ལས་ཐམས་ཅད་བྱ་བ་དང་། ཞིང་དང་། དངོས་པོ་དང་། གཙུག་ལག་ཁང་དང་། ཁྱིམ་གསར་བྱ་བ་དང་། བདག་ཉིད་ཀྱིས་དྲག་ཤུལ་བྱ་དགོས་པ་རྣམས་དང་། ཕྱུགས་ཀྱི་
གནས་དང་། ས་བོན་ཐམས་ཅད་གདབ་པ་དང་། གོས་བགོ་བར་བྱ་བར་བསྟན་ཏོ། །བུ་ལོན་བརྡར་མི་རུང་སྟེ། དགྲ་འཕེལ་བ་དང་། སྟོན་མོ་དང་ཆང་གི་སྦྱོར་བ་གཉིས་སྤང་བར་བྱའོ། །ཉིན་པར་དེ་ལ་བབ་ནས་གང་
སྐྱེས་ཀྱང་བཀྲ་ཤིས་ཤིང་སྙིང་རྗེ་དང་བཟོད་པ་དང་ལྡན་ཞིང་བུད་མེད་དགའ་བ་དང་། ཟས་ལ་བརྐམ་པ་དང་། ཚེ་རིང་ཞིང་ཕྱུགས་མང་ལ་ནོར་དང་འབྲུ་མང་ཞིང་ལོངས་སྤྱོད་ཆེ་ཞིང་དེ་ལ་རྒྱལ་བར་འགྱུར་ཏེ། སྣར་མ་ལ་བྱའོ། །
ཟླ་བ་དང་མགོར་ལྡན་པ་ལ་རིག་པ་ཚེགས་ཆུང་ངུས་ཁྱད་པར་དུ་འཕགས་པ་དང་། དལ་བའི་ལས་ཐམས་ཅད་བྱ་སྟེ། ལས་གང་སྣར་མ་ལ་བྱ་བར་བསྟན་པ་དེ་དག་ཐམས་ཅད་ལ་བྱའོ། །འོ་མ་དང་ལྡན་པའི་ཤིང་ལས་བཞོ་
བ་དང་། འོ་མ་ཅན་གྱི་ས་བོན་གདབ་པ་དང་། རྒྱལ་པོ་རྒྱལ་སར་འཇུག་པ་དང་། གནས་ཀྱི་དོན་དུ་འགྲོ་བ་དང་། རྟ་དང་། གླང་པོ་དང་། བ་ལང་གདུལ་བ་ལ་མཆོག་ཏུ་བཟང་ངོ་། །གོས་སར་པ་བགོ་བ་དང་། རྒྱན་
གྱིས་བརྒྱན་པར་མི་བྱ་ཞིང་བྲམ་ཟེ་རྣམས་ཀྱི་ལས་ཐམས་ཅད་དེ་ལ་བྱ་བར་རུང་ངོ་། །ཉི་མ་དེ་ལ་ཆར་བབ་པ་དེ་ནི་ལེགས་པར་བབ་པར་བསྟན་ཏོ། །ཉི་མ་དེ་ལ་སྐྱེས་པ་གཉིད་ཆེ་ཞིང་ཡིད་གཡེངས་པར་འགྱུར་ཏེ། 
མགོའི་ཡིན་པར་བསྟན་ཏོ། །ལག་ལ་ནི་དོན་གཉེར་བ་དང་། ལས་བཟང་པོ་བྱ་བ་དང་། དྲག་པོའི་ལས་རྣམས་འགྲུབ་པས་མཁས་པས་འབད་པར་བྱའོ། །ཁྲོན་པ་དང་། འོབས་དང་། རྫིང་བུ་དེ་ལ་བྱ་བར་བཟང་ངོ་། །བ་ཐུལ་

71-1-272b

སར་མ་ཉོ་ན་འགྲུབ། མར་ཁུ་བཙིར་བའི་ལས་དང་། ཆང་བཙོང་བ་དང་། བུར་ཤིང་གི་ས་བོན་གཟུགས་པ་དང་། ཉི་མ་དེ་ལ་ཆར་བབ་ན་ཆར་མང་དུ་འབབ་པར་ཤེས་པར་བྱའོ། །ཉི་མ་དེ་ལ་སྐྱེས་པ་ཁྲོ་ཞིང་རི་དགས་ཀྱི་རྔོན་པ་
བྱེད་པར་འགྱུར་ཏེ་ལག་ལ་བྱའོ། །ནམ་སོ་ལ་ནི་ཁ་དོག་བཅང་བར་བྱ་བ་དང་། བ་ལང་སྦྱིན་པ་དང་། གཙུག་ཕུད་གཞག་པ་ལ་རུང་ཞིང་སྔགས་ཐམས་ཅད་འགྲུབ་པོ། །བུ་དོན་དུ་གཉེར་བར་ཆུང་མ་བླང་བ་དང་། ཡང་དང་ཡང་
དུ་བྱ་བར་འདོད་པའི་ལས་དེ་རྣམས་བསྒྲུབ་པར་བཟང་སྟེ། གལ་ཏེ་འཆི་བའི་དོགས་པ་ཡོད་པས་གཡོ་བའི་ལས་མི་བྱའོ། །ཉིན་ཞག་དེ་ལ་སྐྱེས་པ་མཆོག་ཏུ་ཤིས་ཤིང་འདོད་པ་ཆུང་ལ་བུད་མེད་ཀྱི་ཆགས་པ་སྐྱེས་བུ་དེ་ཆེ་ཞིང་སྣ་
ཚོགས་པ་ཤེས་ཤིང་། གཅིག་ལ་མི་འཇུག་པར་བསྟན་ཏེ། ནམ་སོ་ལ་བྱའོ། །རྒྱལ་ལ་ནི་བསོད་ནམས་དང་། གྲགས་པ་དང་། ཚེ་བསྲིང་བ་དང་། མཆོད་པ་རྟག་ཏུ་བྱ་བར་བཟང་ངོ་། །བྲམ་ཟེའི་ལས་ཐམས་ཅད་བྱ་བར་
རུང་ཞིང་རྒྱལ་པོ་དང་། བློན་པོ་གཞུག་པ་དང་། བླ་མ་ལ་བསྙེན་བཀུར་བ་དང་། དུལ་བ་སྤྱད་པ་དང་། རྒྱལ་པོ་དབང་བསྐུར་བ་དང་། རང་གི་བུ་ལ་རྒྱན་གདགས་པ་དང་། ཁ་སྤུ་བྲེག་པའི་བྱ་བ་རྣམས་དེ་ལ་མཁས་པར་བྱའོ། །
མདུན་ན་འདོན་བསྐོ་བ་དང་། རྒྱལ་མཚན་གཟུགས་པར་བྱའོ། །ཉི་མ་དེ་ལ་ཆར་བབ་པ་ནི་ཀུན་དུ་གནོད་པར་འབབ་ཅིང་རྐུན་མ་དང་ནད་མེད་པས་རྟག་ཏུ་བདེ་བར་འགྱུར་ཞིང་རྒྱལ་ལ་ལས་ཐམས་ཅད་བྱ་བར་རུང་ངོ་། །
དགྲ་དང་འཁོན་པའི་སྦྱོར་བ་སྤང་བར་བྱའོ། །དེ་ལ་སྐྱེས་པ་ཚེ་རིང་བ་དང་། གྲགས་པ་དང་། ལོངས་སྤྱོད་ཆེ་བར་འགྱུར་ཏེ། རྒྱལ་ལ་བྱའོ། །སྐག་ལ་དྲག་པོའི་ལས་རྣམས་བྱས་ན་ཁྱད་པར་དུ་འགྲུབ་སྟེ། རྒྱན་
བརྡུང་བ་དང་། ར་བ་བརྩིག་པ་དང་། རྫིང་དང་ལམ་བཅད་པར་བཟང་ངོ་། །དེ་ལ་སྦྲང་བུ་དང་མཆུ་སྦྲང་མང་ཞིང་ཆར་གནོད་པར་འབབ་ཅིང་དེ་ལ་སྐྱེས་པ་ནི་ཁྲོ་ཞིང་གཉིད་ཆེ་བར་འགྱུར་ཏེ། སྐག་ལ་བྱའོ། །མཆུ་ལ་ནི་འབྲུ་

71-1-273a

ཐམས་ཅད་ཀྱི་ས་བོན་བྱ་བ་དང་། བསྡུ་བར་བྱ་བ་དང་། ས་བོན་གཟུགས་པ་དང་། མཛོད་བྱ་ཞིང་འབྲུ་རྣམས་གཞུག་པ་དང་། ཕའི་བྱ་བ་དང་། དད་པས་བྱ་བ་ཐམས་ཅད་དེ་ལ་བྱ་ཞིང་ཉི་མ་དེ་ལ་ཆར་བབ་པས་ནི་འབྲུ་
རྣམས་འཕེལ་བར་འགྱུར་ཞིང་ཉེ་དུའི་དོན་དུ་དད་བ་བྱ་བ་དང་། བཅུད་རྣམས་བསྐྱེད་པ་དང་། རང་འདོད་པ་བྱའོ། །ཉི་མ་དེ་ལ་སྐྱེས་པ་ནི་ཚེ་རིང་ཞིང་བུ་མང་བ་དང་། བུད་མེད་ལ་ཆགས་པ་ཆེ་ཞིང་ཟས་ལ་གདུང་བ་དང་། གཡུལ་དུ་ཐོག་
མར་འགྲོ་ཞིང་རྒྱལ་བར་འགྱུར་ཏེ། དྲག་པོའི་ལས་ཐམས་ཅད་ལ་མཁས་པས་དེ་ལ་སྤང་བར་བྱའོ། །མཆུ་ལ་བྱའོ། །གྲེ་ལ་ནི་དགེ་བ་དང་། ཞིང་པའི་ལས་དོན་དུ་གཉེར་བར་བྱའོ། །དེ་ལ་སྐྱུ་རུ་ར་ལ་སོགས་པ་འབྲས་བུ་ཁྱད་
པར་མཉམ་པ་རྣམས་ཀྱི་ལས་བྱ་བ་དང་། གཞོན་པ་རྣམས་བཀྲ་ཤིས་ཀྱི་ཁྲུས་བྱ་བ་དང་། བག་ཕེབས་པར་བྱ་བ་དང་། གནས་བྱ་བ་དང་། སྐལ་བ་དང་ལྡན་ཞིང་ཉེ་བར་འཚོ་བའི་ལས་རྣམས་བྱ་བ་དང་། བྱིས་པའི་སྐྲ་བཀྲུ་བ་དང་། 
སྐྲ་མཛེས་པར་བྱ་བ་དང་། སྐལ་བ་དང་ལྡན་པའི་ལས་དང་། ཉི་མ་དེ་ལ་ཆར་བབ་པ་ལེགས་པར་བབ་པ་བསྟན་ཏེ་འགྲེ་ལའོ། །དབོ་ལ་ནི་ལས་ཐམས་ཅད་བྱ་སྟེ། ཁང་པ་རྙིང་པ་གསོ་བ་ལ་སོགས་པ་ཐམས་ཅད་བྱའོ། །དེ་ལ་སྐྱེས་པ་
ཡིད་གཞུངས་པ་དང་གྲགས་པ་དང་ལྡན་པར་འགྱུར་ཏེ། གཞན་ཡང་དེ་ལ་བྱིན་མི་ཉམས་ཤིང་ཐམས་ཅད་བརྟན་པར་བསྟན་ཏོ། །དེ་ལ་ཆར་བབ་ན་ནི་ཐམས་ཅད་ཕུན་སུམ་ཚོགས་པར་རིག་པར་བྱ་སྟེ། དབོ་ལ་བྱའོ། །མེ་བཞི་
ལ་ལས་ཕྲ་བ་ཐམས་ཅད་བྱ་ཞིང་བྲམ་ཟེའི་ལས་ཐམས་ཅད་བྱ་བར་བཟང་ངོ་། །གླང་པོ་དང་། གླང་པོ་མཆོག་བཞོན་པ་དང་། རྫིང་བུ་བྱ་བ་དང་། རྐུས་ན་འགྲུབ་སྟེ། མཁས་པས་གཞན་ནི་སྤང་བར་བྱའོ། །ཉི་མ་དེ་ལ་ཆར་
བབ་པ་མཆོག་ཏུ་འགྲུབ་པར་འགྱུར་ཞིང་དེ་ལ་སྐྱེས་པ་ནི་དཔའ་ཞིང་རྐུ་བ་དང་། བློ་དང་ལྡན་ལ་རིག་པ་ཐམས་ཅད་ལ་མཁས་ཤིང་ནད་མེད་ཅིང་ཡུན་རིང་དུ་འཚོ་སྟེ་མེ་བཞི་ལ་བྱའོ། །ནག་པ་ལ་ནི་གོས་བཟང་པོ་བགོ་བ་དང་། 

71-1-273b

རྒྱན་གདགས་པ་དང་། རྒྱལ་པོ་རྒྱན་གྱིས་བརྒྱན་པ་དང་། དམག་ཆས་པ་ལ་བཟང་བར་བལྟའོ། །གསེར་དང་། དངུལ་དང་། རྫས་དང་། གྲོང་ཁྱེར་རྣམས་གཞལ་བ་དང་། བདག་ཉིད་རྒྱན་གྱིས་བརྒྱན་པ་དང་། དྲི་དང་སྤོས་ཀྱིས་
བྱུག་པ་དང་། ཡོན་ཏན་གྱི་ལས་གླུ་དང་། གར་བྱ་བ་དང་། རྔ་རྡུང་བ་དང་། ལྡེར་སོ་བྱ་བ་དང་། བསྲུང་བ་དང་། རོལ་མོ་དང་། ཞལ་ཞལ་དང་། ལག་གི་བཟོ་རྣམས་བྱ་བར་བཟང་ངོ་། །ཉི་མ་དེ་ལ་ཆར་འབབ་པས་སྣ་ཚོགས་ཀྱི་ལས་འགྲུབ་
པར་བསྟན་ཏོ། །དེ་ལ་སྐྱེས་ན་ཡིད་གཞུངས་པ་དང་། མཁས་ཤིང་འདོད་པ་ཆུང་བ་དང་། ཚོལ་བའི་ངང་ཚུལ་ཅན་དང་། སྐལ་བ་དང་ལྡན་ཞིང་བློ་རྒོད་པར་འགྱུར་ཏེ། ཚེ་རིང་ཞིང་བསོད་ནམས་ཆེ་ལ་བུད་མེད་ལ་དགའ་བར་འགྱུར་ཏེ། ནག་པའི་
བྱ་བའོ། །ས་རི་ལ་ནི་རྟ་དང་བོང་བུ་དགྱེ་བའི་དགོས་པ་དང་། ཚོགས་ལ་སྟོན་མོ་སྦྱིན་པ་དང་། ཁ་ཟས་ཕྲ་མོ་དགྱེ་བ་དང་། རྔ་དང་། རྫ་རྔ་དང་། ཁར་རྔ་དང་། གླུ་རྣམས་བྱ་བ་ལ་མྱུར་ཞིང་འགྲུབ་བོ། །བག་མ་བླང་བ་དང་། བག་མ་
གཏང་བ་དང་། གཉེན་བྱ་བ་དང་། གནས་དང་། གྲོགས་པོ་དང་། མལ་ཆ་དང་། ཁྱིམ་དུ་འཇུག་པ་ལ་བཟང་ངོ་། །ཉི་མ་དེ་ལ་ཆར་བབ་ན་རླུང་མི་འཆད་པར་ལྡང་ངོ་། །ཉི་མ་དེ་ལ་སྐྱེས་པ་ནི་ཡིད་གཞུངས་ཤིང་ནད་མང་ལ་མཁས་པར་
འགྱུར་ཏེ། ས་རིའི་བྱ་བའོ། །ས་ག་ལ་ནི་ཞིང་གི་ལས་ཀྱི་མཐའ་རྣམས་བྱ་བ་དང་། ནས་དང་གྲོའི་ལས་ཀྱི་མཐའ་སྤང་བར་བྱའོ། །ལྒང་བུ་ཅན་རྣམས་སྤང་བར་བྱ་ཞིང་། འབྲུ་དང་། ཏིལ་དང་། སྲན་མ་དང་། དེ་དག་དང་། 
ཤིང་དང་། ཚོད་མ་རྣམས་གདབ་ཅིང་། ཁང་པའི་ལས་རྣམས་བྱ་བ་དང་། སྐྲ་བཀྲུ་བ་དང་། གཙང་སྦྲ་བྱ་བ་ལ་བཟང་ངོ་། །ཉི་མ་དེ་ལ་ཆར་བབ་པ་ནི་བསྐལ་པའི་ཆུ་དང་འདྲ་བར་རིག་པར་བྱའོ། །དེ་ལ་སྐྱེས་པ་ནི་ཡིད་
བདེ་བར་ལྟ་ཞིང་བློ་རྣོ་བ་དང་། ཁྲོ་ཞིང་སྐལ་བ་དམའ་བ་ལ་བུ་མེད་པར་འགྱུར་ཏེ། ས་གའི་བྱ་བའོ། །ལྷ་མཚམས་ལ་ནི་སྡུམས་བྱ་བ་དང་། དལ་བའི་ལས་ཐམས་ཅད་བྱ་བ་དང་། བརྩོན་འགྲུས་བརྩམས་ལ་མཁས་པས་

71-1-274a

བསྔགས་སོ། ། དེ་ལ་སྐྲ་བྲེག་པ་དང་། མཚོན་གྱི་ལས་བྱ་བ་དང་། བསྡུ་བའི་སྦྱོར་བ་རྣམས་འགྲུབ་པར་བྱ་སྟེ། དེ་བརྟན་པར་འགྱུར་རོ། །གཞན་ནི་ཉོན་མོངས་པས་གདུངས་ཤིང་ཉམས་པར་བསྟན་ཏོ། །ཉི་མ་དེ་ལ་ཆར་
བབ་པ་ལེགས་པར་འབབ་པར་བསྟན་ཏོ། །དེ་ལ་སྐྱེས་པ་གཉེན་དང་གྲོགས་པོར་ལྡན་ལ་ཆོས་དང་ཚུལ་ཁྲིམས་སུ་བཅས་པར་འགྱུར་ཏེ། ལྷ་མཚམས་ཀྱི་བྱ་བའོ། །སྣྲོན་ལ་ནི་ཐོག་མར་རྒྱལ་པོ་དབང་བསྐུར་བར་བཟང་ཞིང་གཞན་
ནི་ཉོན་མོངས་པས་གདུངས་པར་འགྱུར་རོ། །གྲོང་དང་། གྲོང་ཁྱེར་དང་། ལྗོངས་རྣམས་བགོ་བཤའ་བྱ་བ་དང་། རྒྱལ་པོའི་ལས་ཐམས་ཅད་བྱ་བ་ལ་བཟང་ཞིང་། དེ་ལ་སྐྱེས་པ་ནི་སྤུན་རྣམས་ཀྱི་ཕུ་བོར་འགྱུར་ཞིང་ཚེ་རིང་བ་དང་། གྲགས་པ་
དང་ལྡན་ཞིང་ངོ་མཚར་དུ་མཁས་པར་འགྱུར་རོ། །རྟ་དང་། གླང་པོ་བཞོན་པ་དང་། ཁང་བཟངས་སུ་འཇུག་པ་དང་། གྲོང་དང་། གྲོང་ཁྱེར་དང་། ཡུལ་འཁོར་རྣམས་གཟུང་བ་ལ་མཆོག་ཏུ་བསྔགས་སོ། །ཡང་དེ་ལ་སྨས་པ་ནི་མི་འཚོ་བར་
བསྟན་ཏོ། །དྲག་པོའི་ལས་རྣམས་འགྲུབ་པར་བསྟན་ཏོ། །མཁས་པས་གཞན་ནི་སྤང་བར་བྱའོ། །ཉི་མ་དེ་ལ་ཆར་བབ་པ་ནི་ལེགས་པར་འབབ་པར་བསྟན་ཏེ། སྣྲོན་གྱི་བྱ་བའོ། །སྣྲུམས་ལ་ནི་རྩ་བ་དང་། ལ་ཕུག་དང་། རྩ་བ་
དོན་དུ་གཉེར་བས་རྩ་བའི་ས་བོན་གཟུགས་པའི་སྦྱོར་བ་རུང་ཞིང་རྩ་བ་མ་ཡིན་པ་རྣམས་ལ་ནི་མ་ཡིན་ནོ། །བུ་ལོན་རྙིང་པ་བརྡས་ན་མདུན་ན་ནོར་གནས་པར་འགྱུར་རོ། །རྩ་བ་དོན་དུ་གཉེར་བར་གྲུབ་ཅིང་དེ་བཞིན་དུ་བུད་མེད་ཐམས་
ཅད་དང་། གསོ་བའི་རིགས་དང་། བུད་མེད་དང་། ཁྱེའུ་དང་། བུ་མོ་དང་། ཁྱོ་ག་རྣམས་ཁྲུས་བྱ་བ་དང་། རྩ་བ་ཐམས་ཅད་སྦྱར་བ་དང་། བཀྲ་ཤིས་ཀྱི་ལས་བྱ་བ་དང་། དྲག་པོའི་ལས་རྣམས་འགྲུབ་ཅིང་ཕྱེ་བཏག་
པ་དང་། ཆང་གི་སྦྱོར་བ་ལ་རྟག་ཏུ་བཟང་ཞིང་དེ་ལ་སྐྱེས་པ་ནོར་དང་ལྡན་ཞིང་བུ་མང་ལ་འབྲས་བུ་དང་ལྡན་པར་འགྱུར་ཏེ། དེ་ལ་སྣད་པ་མི་འཚོ་བར་བསྟན་ཏོ། །དེ་ལ་ཆར་བབ་པ་ལེགས་པར་འབབ་པར་མངོན་པར་བསྟན་ཏེ། 

71-1-274b

སྣྲུམས་ཀྱི་བྱ་བའོ། །ཆུ་སྟོད་ལ་ནི་ཆུ་བསྒྱུར་བ་དང་། ཡུར་བ་དྲང་བ་དང་། ཞིང་ལ་ཆུ་བླུག་པ་དང་། ཁྲོན་པ་བྱ་བ་དང་། ལམ་དུ་སྦྱིན་པའི་ཆུ་གཞག་པ་དང་། རྫིང་བུ་བྱ་བ་དང་། འབྲས་བུ་དང་མེ་ཏོག་ལ་ཆུ་བླུག་པ་དང་། བསྐྱེད་མོས་
ཚལ་བྱ་བ་དང་། སློང་བ་དགོས་པ་ལ་སྦྱར་བ་ལ་བཟང་ཞིང་དྲང་བའི་ལས་རྣམས་འགྲུབ་ཅིང་དེ་ལས་གཞན་ནི་མཁས་པས་མི་བྱའོ། །དེ་ལ་མེས་ཚིག་པ་དང་། རིམས་ཀྱིས་བཏབ་པ་མི་འཚོ་བར་བསྟན་ཏོ། །ཉི་མ་དེ་ལ་སྐྱེས་
པ་ནི་ཚེ་རིང་ཞིང་ཚུལ་ཁྲིམས་ཀྱི་ངང་ཚུལ་ཅན་དང་། བལྟ་ན་སྡུག་པར་འགྱུར་ཏེ། ཆུ་སྟོད་ཀྱི་བྱ་བའོ། །ཆུ་སྨད་ལ་ནི་དགྲ་མི་བྱ་ཞིང་གོས་དྲུབ་པ་བྱ་ཞིང་བགོ་བར་ནི་མི་བྱའོ། །བསྡུ་བསྐྱོག་མི་བྱ་ཞིང་ཁྱིམ་མི་དབུབ་སྟེ། བྱས་ན་
འགྲུབ་པར་མི་འགྱུར་རོ། །ཕྱུགས་ཀྱི་གནས་དང་། དེ་བཞིན་དུ་གྲོང་དཔོན་བསྐོ་བ་དང་། ཚོང་དཔོན་བསྐོ་བ་དང་། རྒྱལ་པོའི་དགོས་པ་རྣམས་དེ་ལ་བྱ་བར་བཟང་ངོ་། །ཉི་མ་དེ་ལ་སྐྱེས་པ་འཁོར་མང་བའི་ངང་ཚུལ་ཅན་དང་། 
བྱས་པ་གཟོ་བར་འགྱུར་བ་དང་། གྲོགས་པོ་དང་གཅུགས་ཤིང་བསོད་ནམས་དམན་ཞིང་མཁས་པར་འགྱུར་རོ། །ཚ་བས་བཏབ་པ་མི་སོས་ཤིང་བརྟན་པར་བསྟན་ཏོ། །ཉི་མ་དེ་ལ་ཆར་བབ་པ་ལེགས་པར་འབབ་པར་བསྟན་ཏེ། 
ཆུ་སྨད་ཀྱི་བྱ་བའོ། །བྱི་བཞིན་ལ་ཚངས་པའི་ལྷའི་མཆོད་པ་མི་བྱ་ཞིང་། གྲོ་བཞིན་ལ་ནི་གཡུལ་སྤྲད་པར་བྱའི། རོལ་མོ་བསླབ་པ་དང་། བཀླགས་པ་རྣམས་མྱུར་བར་འགྲུབ་པོ། །རྣ་ཆ་གདགས་པ་དང་། 
རྒྱལ་པོར་དབང་བསྐུར་བ་དང་། བྲམ་ཟེའི་ལས་ཐམས་ཅད་དེ་ལ་བྱ་ཞིང་གཏོར་མ་གཏོང་བ་དང་། དཔུང་ལ་བལྟ་བར་བཟང་ངོ་། །དེ་ལ་སྐྱེས་པ་ནི་ནད་མེད་པ་དང་། སྟོབས་དང་ལྡན་པ་དང་། མཆོག་སྦྱིན་གྱི་ངང་ཚུལ་ཅན་དུ་
འགྱུར་རོ། །ཉི་མ་དེ་ལ་ཆར་བབ་པ་ནི་ལེགས་པར་འབབ་པར་འགྱུར་རོ། །དེ་ལ་གྲོ་ཞིན་དང་ཟླ་བར་འཛོམ་ན་སྟོར་བ་ཕྱིར་རྙེད་པར་འགྱུར་ཏེ། གྲོ་ཞིན་གྱི་བྱ་བའོ། །མོན་གྲེ་ནི་མྱུར་བའི་རྒྱུ་སྐར་ཏེ། མཆོད་པའི་ལས་ཐམས་ཅད་

71-1-275a

དང་བྲམ་ཟེའི་རིག་བྱེད་བཀླག་པ་དང་། ཁྲུས་བྱ་བ་དང་། རྒྱལ་པོར་དབང་བསྐུར་བ་དང་། བྲམ་ཟེའི་ལས་བྱ་བ་དང་། ཚོང་དཔོན་བསྐོ་བ་དང་། གྲོང་ཁྱེར་གྱི་ཚོགས་ཀྱི་དཔོན་པོ་བསྐོ་བ་ལ་བཟང་ངོ་། །དེ་ལ་སྐྱེས་པ་ནི་
ཡིད་གཞུངས་ཤིང་གྲགས་པ་དང་ལྡན་པ་ལོངས་སྤྱོད་ཆེ་ལ་ནོར་མང་བ་དང་། བུ་མང་ཞིང་དུལ་བའི་བདག་ཉིད་ཅན་དུ་འགྱུར་རོ། །སྟོར་བ་དང་། ཚིག་པ་དང་། བསྡམས་པ་དང་། བཅིངས་པ་རྣམས་དགའ་བས་ཕྱིར་འཐོབ་བོ། །ཉི་མ་དེ་
ལ་ཆར་བབ་པ་ནི་ཞག་བཞིའི་བར་དུ་འབབ་ཏེ། མོན་གྲེའི་བྱ་བའོ། །མོན་གྲུ་ལ་ནི་རྟག་ཏུ་སྨན་སྦྱར་བ་དང་། གྲགས་པའི་ལས་དང་། སྲིད་བསྲུང་གི་ལས་རྣམས་བྱས་ན་འགྲུབ་ཅིང་ཟོང་བཙོང་བ་དང་། ཆང་བཙོང་བ་དང་། དེ་ལ་ཆུ་
འབྱུང་བ་དང་། ཏིལ་དང་སྲན་མ་བདབ་པ་དང་། རྒྱ་མཚོར་ཚོང་པ་ཆས་པ་བསྒྲུབ་པར་བཟང་ངོ་། །དེ་ལ་རྒྱལ་པོའི་བཀའ་གསལ་བ་དང་། སྡིག་པའི་ལས་མི་བྱའོ། །ཕོ་ཉ་གཏང་བ་དང་སྒོ་བསྲུངས་དང་། ཡི་གེ་པ་བསྐོ་བ་དང་། 
སྨན་བཏུ་བ་དང་། སྨན་གཏང་བ་དང་། ཉི་མ་དེ་ལ་གཏེར་བརྐོ་ཞིང་བརྫང་བ་ནི་མི་བྱའོ། །གཏེར་སར་པ་བཞག་ཅིང་སྨན་བཟའ་བར་བཟང་ཞིང་སྟོར་བ་ཡུན་རིང་པོ་ནས་བཙལ་བ་རྙེད་པར་འགྱུར་རོ། །དེ་ལ་སྐྱེས་པ་ནི་ནད་མེད་པ་
དང་། ཁྲོ་ཞིང་གཉིད་ཆེ་བར་འགྱུར་ཏེ། ཉི་མ་དེ་ལ་ཆར་བབ་པ་ནི་ལེགས་པར་འབབ་པར་བསྟན་ཏོ། །མོན་གྲུའི་བྱ་བའོ། །ཁྲུམས་སྟོད་ལ་ནི་དྲག་པོའི་སྦྱོར་བ་ཐམས་ཅད་འགྲུབ་པར་བརྗོད་དོ། །སྨས་པ་དང་རིམས་ཀྱིས་
བཏབ་པ་དེ་དག་མི་འཚོ་བར་བསྟན་ཏེ། དེ་ལ་སྐྱེས་པ་དག་ནི་རྣ་བ་གསང་ཞིང་ལོངས་སྤྱོད་ཆེ་ལ་གཉེན་རྣམས་ཡིད་དུ་འོང་ཞིང་ནོར་ཆེ་ལ་ལས་འཐུན་པར་བྱེད་ཅིང་སྤྲོ་ཐུང་བར་འགྱུར་རོ། །ཉི་མ་དེ་ལ་ཆར་འབབ་པ་ནི་དྲག་
པོར་འབབ་པར་བསྟན་ཏོ། །ཁྲུམས་སྟོད་ཀྱི་བྱ་བའོ། །ཁྲུམས་སྨད་ལ་ནི་ཚེ་རིང་བ་དང་། རྒྱས་པའི་ལས་བྱའོ། །ལྷོ་ཕྱོགས་སུ་མི་འགྲོ་ཞིང་གྲོང་མི་བརྩམ་མོ། །དེ་ལ་སྐྱེས་པ་ནི་ཚེ་རིང་ཞིང་གྲགས་པ་དང་ཚེ་དང་ལྡན་པ་དང་། 

71-1-275b

སུམ་འགྱུར་གྱིས་ལྟོ་ཆེ་ཞིང་འཇིགས་པ་མེད་པར་འགྱུར་རོ། །ཉི་མ་དེ་ལ་ཆར་བབ་པ་ནི་བདེ་བར་འབབ་པར་བསྟན་ཏོ། །ཁྲུམས་སྨད་ཀྱི་བྱ་བའོ། །ནམ་གྲུ་ལ་ནི་གསེར་དང་། དངུལ་དང་། རིན་པོ་ཆེ་དང་། འབྲུ་བསྒྲུབ་པ་དང་། མཛོད་བྱ་བ་
དང་། རིགས་རྒྱུད་ཀྱི་བྱ་བ་དང་། ཆང་གི་ལས་ཀྱི་བྱ་བར་བཟང་ཞིང་གཏང་བའི་ལས་མི་བྱའོ། །ལམ་སར་པ་གཏོད་པ་དང་། ཆུ་བསྒྱུར་བ་དང་། ཁང་པར་འཇུག་པ་དང་། མིག་སྨན་སྦྱར་བ་དང་། གོས་སར་པ་བགོ་བ་དང་། དབྱིག་བླང་བ་
བཟང་ངོ་། །དེ་ལ་སྐྱེས་པ་ནི་སློང་ཞིང་སྦྱིན་པ་དང་། ཚུལ་ཁྲིམས་དང་ལྡན་ལ་ཕོངས་ཤིང་གཉེན་རྣམས་ཀྱིས་བསྟེན་ཅིང་ཆོས་ཤེས་པར་འགྱུར་རོ། །ཆར་ལེགས་པར་འབབ་ཅིང་སྟོར་བ་རྙེད་པར་འགྱུར་བར་བསྟན་
ཏོ། །ནམ་གྲུའི་བྱ་བའོ། །ཐ་སྐར་ལ་ནི་སྐྱེས་པ་དང་། བུད་མེད་དང་། རྟ་སྦྱར་བ་དང་། མེ་ཐབ་བྱ་བ་དང་། རྟ་བསྒྲུབ་པ་དང་། ཤིང་རྟ་བྱ་བ་དང་། བུ་ལོན་བྱ་བ་དང་། ས་བོན་གདབ་པ་དང་། རྟ་དང་གླང་པོ་གདུལ་བ་དང་། གར་བྱ་བ་དང་། 
སྨན་སྦྱར་བ་དང་། སྨན་གཏང་བར་བཟང་ངོ་། །དེ་ལ་སྐྱེས་པ་ནི་བལྟ་ན་སྡུག་པ་དང་། ཡིད་གཞུངས་པ་དང་། རྒྱལ་པོའི་གནང་ཆེན་ཕུན་སུམ་ཚོགས་པ་དང་། ནད་མེད་པ་ལ་བུ་སྐྱེ་ཞིང་སྐལ་བ་བཟང་པོ་དང་ལྡན་པར་འགྱུར་རོ། །ཆར་
ལེགས་པར་འབབ་ཅིང་སྟོར་བ་རྙེད་པར་བསྟན་ཏོ། །ཐ་སྐར་གྱི་བྱ་བའོ། །བྲ་ཉེ་ལ་ནི་སྐར་མ་གསུམ་ཡོད་པས། དྲག་པོའི་ལས་བྱ་བ་དང་། བྲན་དང་གླ་པ་བསྐོ་བ་དང་། གླ་པ་བཙལ་བ་དང་། ཆུང་མ་བླང་བར་བཟང་ངོ་། །དེ་ལ་སྐྱེས་པ་
ནི་ཐབ་ཀྲོལ་དང་། བསླུས་པ་བྱེད་པ་དང་། གྱ་གྱུ་ཅན་དང་། བརྫུན་ཆེ་བ་དང་། བློ་རྣོ་བ་དང་། སྡིག་པ་སྤྱོད་པ་དང་། གཙང་སྨེ་ཆུང་བར་འགྱུར་རོ། །དེ་ལ་སྣད་པ་དང་། ནད་ཀྱིས་བཏབ་པ། སྡུག་བསྔལ་བར་འགྱུར་རོ། །འགྲོ་བ་སྤང་བར་བྱའོ། །
དེ་ལ་ཆར་ངེས་པར་འབབ་པ་དེ་ལྟར་དྲང་སྲོང་ཆེན་པོ་རྣམས་ཀྱིས་བསྟན་ཏོ། །རྒྱུ་སྐར་དེའི་ལྷ་གཤིན་རྗེ་ཡིན་པས་ཤི་བའི་ཕྱིར་ཟས་སྦྱིན་ནོ། །དེ་ལ་སྐྱེས་པ་ནི་ཚུལ་ཁྲིམས་ཉམས་ཤིང་བླ་མ་ལ་གནོད་པ་དང་། ཕ་རོལ་ལ་གནོད་པ་བྱེད་

71-1-276a

པ་དང་། བརྐམ་ཆགས་ཆེ་བ་དང་། ཕ་རོལ་ལ་དགྲ་བྱེད་པར་འགྱུར་ཏེ་བྲ་ཉེའི་བྱ་བའོ། །སྨིན་དྲུག་ལ་སོགས་པའི་རྒྱུ་སྐར་བདུན་དང་། བྲ་ཉེའི་བར་འདི་དག་ལས་འདི་ནི་བསྡུ་བར་བྱ་སྟེ། དེ་དག་གི་ནང་ནས་གང་དག་འབྲུ་ཐམས་
ཅད་དང་། སྨན་ཐམས་ཅད་ཕུན་སུམ་ཚོགས་པ་ལ་གནོད་པར་བྱེད་པའི་གཟའ་གནས་པས་བསྲུང་བར་བྱའོ། །གཞན་ཡང་རྒྱུ་སྐར་རྣམས་ཀྱི་མིང་གི་ལེའུ་བཤད་པར་བྱ་སྟེ། ཀྱེ་པད་མའི་སྙིང་པོ་འདི་ལྟ་སྟེ། རྒྱུ་སྐར་བཞི་པོ་འདི་
དག་ནི་བདེ་བར་བྱེད་པ་སྟེ། སྨད་གསུམ་དང་སྣར་མའོ། །དེ་བྲམ་ཟེ་གནས་པར་བྱེད་པ་སྟེ། དེ་ལ་གནས་བྱ་བ་དང་། རྒྱལ་པོ་དབང་བསྐུར་བ་དང་། གང་སོ་སོར་བསྟན་པའི་ལས་རྣམས་བྱ་བར་བཟང་ཞིང་གཞན་ཡང་དེ་ལ་
གཤིག་པ་དང་། བསྲེག་པ་དང་། བཅིང་བ་རྣམས་བྱས་ན་བཀྲ་ཤིས་པར་འགྱུར་བར་བསྟན་ཏོ། །གཞན་ཡང་དེ་ལ་སྐྱེས་པ་བཀྲ་ཤིས་པ་དང་། སྦྱོར་བ་ཆེན་པོ་དང་ལྡན་པར་རིག་པར་བྱའོ། །ཀྱེ་པད་མའི་སྙིང་པོ་རྒྱུ་སྐར་
བཞི་པོ་འདི་དག་ནི་བདེ་བར་བྱེད་པ་སྟེ། རྒྱལ་དང་། མེ་བཞི་དང་། བྱི་བཞིན་དང་། ཐ་སྐར་ཏེ། ལས་བྱ་བ་ལ་མྱུར་ཞིང་ཁ་ཏོན་བརྩམ་པ་དང་། ལམ་དུ་འགྲོ་བ་དང་། རྒོད་མ་བཞོན་པ་དང་། ལམ་རྣམས་མྱུར་བར་བྱ་ཞིང་མཚོན་
གྱི་ལས་དང་། སྨན་གྱི་ལས་རྣམས་བྱ་ཞིང་ཟླ་བ་བཞི་པའི་མཆོད་སྦྱིན་བྱ་བར་བརྩམ་པ་དང་། གཞན་ཡང་དེ་ལ་གཤིག་པ་དང་། བསྲེག་པ་དང་། བཅིང་བ་རྣམས་བཀྲ་ཤིས་པར་བརྗོད་པར་རིག་པར་བྱའོ། །གཞན་
ཡང་དེ་ལ་སྐྱེས་པ་ནི་བཀྲ་ཤིས་ཤིང་ལོངས་སྤྱོད་དང་ལྡན་པའི་རྒྱལ་པོར་འགྱུར་བ་དང་། དབང་ཕྱུག་དང་ལོངས་སྤྱོད་དུ་ལྡན་ཞིང་གོང་མ་ལ་སྦྱིན་པ་དང་། ཚུལ་ཁྲིམས་དང་ལྡན་པའི་རྒྱལ་རིགས་སུ་འགྱུར་བ་འམ། ཡང་བྲམ་
ཟེ་ཞིག་མདུན་ན་འདོན་དུ་འགྱུར་རོ། །ཀྱེ་པད་མའི་སྙིང་པོ་རྒྱུ་སྐར་ལྔ་པོ་འདི་དག་དྲག་པོ་སྟེ། འདི་ལྟ་སྟེ། མཆུ་དང་། སྟོད་གསུམ་དང་། བྲ་ཉེ་དང་ལྔ་སྟེ། ཡང་དེ་དག་ལ་བཤིག་པ་དང་། བསྲེག་པ་དང་། བཅིངས་པ་རྣམས་

71-1-276b

མི་འཚོ་བར་བརྗོད་དོ། །འདི་དག་ནི་མངོན་སུམ་སྟེ། འདི་ལྟ་སྟེ། ལག་དང་། སྐག་དང་། ས་རི་དང་། སྣྲོན་དང་། མོན་གྲུ་ཞེས་བྱ་བ་སྟེ། ཆ་ཤས་དགུ་དང་། དུམ་བུ་དྲུག་གོ། །བྲ་ཉེ་ནི་ཞིང་གཉིས་སོ། །ནམ་སོ་དང་། ས་ག་དང་། སྨད་གསུམ་
གཉིས་ཀྱི་ཆའོ། །ཞིང་ནི་བཅྭ་ལྔའོ། །མཆུ་དང་། སྣྲུམས་དང་། སྟོད་གསུམ་པོ་དེ་དག་ནི་ཆ་ངེས་པ་ཡིན་ནོ། །མགོ་དང་། རྒྱལ་དང་། མེ་བཞི་དང་། ནག་པ་དང་། ལྷ་མཚམས་དང་། གྲོ་ཞིན་དང་། ནམ་གྲུ་དང་། ཐ་སྐར་ཏེ། རྒྱུ་སྐར་འདི་
དག་ཆ་ཕྱི་མའོ། །ཡུད་ཙམ་སུམ་བཅུའི་ཞིང་དང་། བྱི་ཞིན་གྱི་ཡུད་ཙམ་མཉམ་པས་རྒྱལ་རིགས་སོ། །གཞན་ཡང་བྲམ་ཟེ་དགེ་བའི་ཡུད་ཙམ་དུ་འགྱུར་བ་དང་། མི་དགེ་བའི་ཡུད་ཙམ་དང་། རྒྱུ་སྐར་ཐམས་ཅད་དང་ལྡན་ཞིང་
གང་གི་གཉིས་ག་དགེ་བའི་ཡུད་ཙམ་དང་ལྡན་པའི་དགེ་བར་འགྱུར་རོ། །ཡང་གང་གི་ཚེ་དགེ་བ་དང་། མི་དགེ་བར་འགྱུར་བ་དེའི་ཚེ་ཐུན་མོང་མ་ཡིན་པར་འགྱུར་རོ། །ཇི་ལྟར་ཉིན་པར་དང་མཚན་མོ་རིང་ཐུང་དུ་འགྱུར་བར་བཤད་
པར་བྱའོ། །དབྱར་ཟླ་ར་བ་དང་། རྒྱུ་སྐར་མཆུ་དང་། ཚེས་གནམ་སྟོང་དུ་ལྡན་པར་གྱུར་ལ། གནམ་སྟོང་སྔ་མ་གྲོ་བཞིན་དང་འཛོམ་ན་ཉིན་པར་ལ་ཡུད་ཙམ་བཅུ་བདུན་ཡོད་དོ། །མཚན་མོ་ལ་ཡུད་ཙམ་བཅུ་གསུམ་དུ་འགྱུར་
རོ། །ཤིང་བུ་སོར་དྲུག་པ་ཉི་མ་ཕྱེད་ལ་བཙུགས་ནས་གྲིབ་མ་ལ་སོར་ཕྱེད་ཕྱེད་ཀྱིས་འཕེལ་ཞིང་ཉི་མ་འགྱུར་ལ། ཆུ་སྟོད་དང་མཚན་མོ་ལྡན་ལ་ཉི་མ་དང་མགོ་འགྲོགས་ཤིང་དབྱར་གྱི་ཟླ་བ་གཉིས་པའི་གནམ་སྟོང་དང་
མཆུར་འཛོམ་པ་ན། དབྱར་གྱི་གཉིས་པའི་བཅྭ་ལྔ་དང་ཁྲུམས་སྟོད་དུ་ལྡན་ན་ཉིན་པར་ནི་ཡུད་ཙམ་བཅུ་དྲུག་ཏུ་འགྱུར་རོ། །མཚན་མོ་ལ་ནི་ཡུད་ཙམ་བཅུ་བཞིར་འགྱུར་རོ། །སོར་གཉིས་ཀྱི་གྲིབ་མ་འཕེལ་ཞིང་འགྱེད་དོ། །
གྲོ་ཞིན་དང་མཚན་མོར་ལྡན་པ་ལ་ཉི་མ་དང་རྒྱལ་དུ་འགྲོགས་ཤིང་དབྱར་ཟླ་ཐ་ཆུངས་ཀྱི་གནམ་སྟོང་དང་ཆུ་སྟོད་དུ་འཛོམ་པར་འགྱུར་ཞིང་ཚེས་བཅྭ་ལྔ་ལ་ཐ་སྐར་དུ་འཛོམ་ན། །ཡུད་ཙམ་བཅྭ་ལྔ་ཉིན་པར་ལ་ཡོད་དོ། །མཚན་

71-1-277a

མོ་ལ་ཡང་ཡུད་ཙམ་བཅྭ་ལྔ་ཡོད་དོ། །སོར་གསུམ་གྱིས་གྲིབ་མ་འཕེལ་ཞིང་ཉི་མ་འགྱེད་དོ། །ཆུ་སྟོད་དང་མཚན་མོར་ལྡན་ལ་མཆུ་དང་ཉིན་མོར་འགྲོགས་ཤིང་ནག་པ་དང་དབྱར་གྱི་ཟླ་བ་བཞི་པའི་གནམ་སྟོང་དུ་
འཛོམ་ལ་སྨིན་དྲུག་དང་ཚེས་བཅྭ་ལྔར་འཛོམ་ན་ཉིན་པར་ལ་ཡུད་ཙམ་བཅུ་གསུམ་ཡོད་དོ། །མཚན་མོ་ལ་ནི་ཡུད་ཙམ་བཅུ་བདུན་ཡོད་དོ། །སོར་བཞིའི་གྲིབ་མས་ཉི་མ་འགྱེད་ལ་རྒྱུ་སྐར་ཐ་སྐར་དང་མཚན་མོར་ལྡན་ལ། ཆུ་སྟོད་དང་
ཉི་མོར་འགྲོགས་ན་དགུན་གྱི་ཟླ་བ་དང་པོའི་གནམ་སྟོང་དང་ལྷ་མཚམས་སུ་འཛོམ་ཞིང་མགོ་དང་བཅྭ་ལྔར་ལྡན་ན། ཉིན་པར་ལ་ཡུད་ཙམ་བཅུ་གསུམ་ཡོད་དོ། །མཚན་མོ་ལ་ཡུད་ཙམ་བཅུ་བདུན་ཡོད་དོ། །སོར་ལྔའི་གྲིབ་མས་ཉི་
མ་འགྱེད་ཅིང་སྨིན་དྲུག་དང་མཚན་མོར་འཛོམ་ལ། ནག་པ་དང་ཉིན་པར་འགྲོགས་ཤིང་དགུན་གྱི་ཟླ་བ་གཉིས་པའི་གནམ་སྟོང་དང་སྣྲོན་དུ་འཛོམ་པར་འགྱུར་ཞིང་རྒྱལ་དང་བཅྭ་ལྔར་ལྡན་ན། ཉིན་པར་ལ་ཡུད་ཙམ་བཅུ་གཉིས་
ཡོད་དོ། །མཚན་མོ་ལ་ནི་ཡུད་ཙམ་བཅྭ་བརྒྱད་ཡོད་དོ། །སོར་དྲུག་གི་གྲིབ་མས་ཉི་མ་འགྱུར་ཞིང་མགོ་དང་མཚན་མོར་འཛོམ་ལ། ས་ག་དང་ཉི་མར་འགྲོགས་ཤིང་དགུན་གྱི་ཟླ་བ་གཉིས་པའི་གནམ་སྟོང་དང་ཆུ་སྟོད་དུ་འཛོམ་
ལ་མཆུ་དང་བཅྭ་ལྔར་ལྡན་ན། ཉིན་པར་ལ་ནི་ཡུད་ཙམ་བཅུ་གསུམ་ཡོད་དོ། །མཚན་མོ་ལ་ནི་ཡུད་ཙམ་བཅུ་བདུན་ཡོད་དོ། །སོར་ལྔའི་གྲིབ་མ་འགྲིབས་པས་ཉི་མ་འགྱུར་ཞིང་རྒྱལ་དང་མཚན་མོར་འཛོམ་ལ། སྣྲོན་དང་ཉི་མ་འགྲོགས་
ཤིང་དགུན་གྱི་ཟླ་བ་བཞི་པའི་གནམ་སྟོང་དང་གྲོ་བཞིན་དུ་འཛོམ་ལ་ཆུ་སྟོད་དང་བཅྭ་ལྔར་འཛོམ་ན། ཉིན་པར་ལ་ཡུད་ཙམ་བཅུ་བཞིའོ། །མཚན་མོ་ལ་ནི་ཡུད་ཙམ་བཅུ་དྲུག་གོ། །སོར་བཞིའི་གྲིབ་མས་ཉི་མ་འགྱུར་ཞིང་མཆུ་དང་། 
མཚན་མོར་འཛོམ་ལ། ཆུ་སྟོད་དང་ཉི་མ་འགྲོགས་ཤིང་དཔྱིད་ཟླ་ར་བའི་གནམ་སྟོང་དང་ཁྲུམས་སྟོད་དུ་འཛོམ་པར་འགྱུར་ཞིང་ནག་པ་དང་བཅྭ་ལྔར་འཛོམ་ན། ཉིན་པར་ལ་ནི་ཡུད་ཙམ་བཅྭ་ལྔར་འགྱུར་རོ། །མཚན་མོ་ལ་ཡང་ཡུད་ཙམ་

71-1-277b

བཅྭ་ལྔར་འགྱུར་ཞིང་སོར་གསུམ་གྱི་གྲིབ་མས་ཉི་མ་འགྱུར་ཞིང་ཆུ་སྟོད་དང་མཚན་མོར་འཛོམ་ལ་གྲོ་ཞིན་དང་ཉི་མར་འགྲོགས་པར་འགྱུར་ཞིང་དཔྱིད་ཀྱི་ཟླ་བ་གཉིས་པའི་གནམ་སྟོང་དང་ཐ་སྐར་དུ་འཛོམ་ལ་ས་ག་དང་བཅྭ་ལྔར་
འཛོམ་ན་ཉིན་པར་ལ་ནི་ཡུད་ཙམ་བཅུ་དྲུག་ཏུ་འགྱུར་རོ། །མཚན་མོ་ལ་ནི་ཡུད་ཙམ་བཅུ་བཞིའོ། །སོར་གཉིས་ཀྱི་གྲིབ་མས་ཉི་མ་འགྱུར་ཞིང་ནག་པ་དང་མཚན་མོར་འཛོམ་ལ་ཁྲུམས་སྟོད་དང་ཉི་མར་འགྲོགས་པར་གྱུར་ཅིང་དཔྱིད་ཀྱི་
ཟླ་བ་གསུམ་པའི་གནམ་སྟོང་དང་སྨིན་དྲུག་ཏུ་འཛོམ་པར་གྱུར་ལ་སྣྲུམས་དང་བཅྭ་ལྔར་འཛོམ་ན། ཉིན་པར་ལ་ནི་ཡུད་ཙམ་བཅུ་བདུན་དུ་འགྱུར་རོ། །མཚན་མོ་ལ་ནི་ཡུད་ཙམ་བཅུ་གསུམ་མོ། །སོར་གཉིས་ཀྱི་གྲིབ་མས་ཉི་མ་
འགྱུར་ཞིང་སྣྲོན་དང་མཚན་མོར་འཛོམ་ལ་སྨིན་དྲུག་དང་ཉི་མར་འཛོམ་པར་གྱུར་ཅིང་། དཔྱིད་ཀྱི་ཟླ་བ་བཞི་པའི་གནམ་སྟོང་དང་རྒྱལ་དུ་འཛོམ་པར་གྱུར་ལ་ཆུ་སྟོད་དང་བཅྭ་ལྔ་རུ་འཛོམ་ན། ཉིན་པར་ལ་ནི་ཡུད་ཙམ་བཅྭ་བརྒྱད་
དུ་འགྱུར་རོ། །མཚན་མོ་ལ་ནི་ཡུད་ཙམ་བཅུ་གཉིས་སུ་འགྱུར་རོ། །ཉི་མ་ཕྱེད་སྐད་ལ་སོར་ཕྱེད་པའི་གྲིབ་མས་ཉི་མར་འགྱུར་ཞིང་ཆུ་སྟོད་དང་མཚན་མོར་འཛོམ་ལ་རྒྱལ་དང་ཉིན་པར་འགྲོགས་པར་གྱུར་ཅིང་། ལོ་བཙལ་བས་
ཡུད་ཙམ་གྱི་བྱེ་བྲག་རྣམས་ཀྱིས་རྒྱུ་སྐར་དེ་ཐམས་ཅད་ལ་ཆ་དང་ཆ་རུ་བགོ་ཞིང་གནམ་སྟོང་དང་བཅྭ་ལྔར་ཕྱེ་བས་མཚན་མོ་དང་ཉིན་ཞག་ཏུ་ཤེས་པར་བྱའོ། །ལོ་ལྔ་ལྔ་ཞིང་ཟླ་བ་རེ་རེ་ལྷག་པར་འགྱུར་ཞིང་ཟླ་བ་དྲུག་ཉིན་
མཚན་མཉམ་པར་གྱུར་ལ་དེ་ལས་གཞན་ཟླ་བ་དྲུག་ནི་ཉི་མ་རིང་ལ་ཡང་ཟླ་བ་དྲུག་ནི་མཚན་མོ་རིང་ངོ་། །ཟླ་བ་དྲུག་དྲུག་ནི་ཡུད་ཙམ་དེ་དག་མཉམ་པར་རིག་པར་བྱ་སྟེ། ཟླ་བ་དྲུག་ནི་ཉི་མ་བྱང་ཕྱོགས་སུ་འགྲོ་ལ་ཟླ་བ་དྲུག་
ནི་ལྷོ་ཕྱོགས་སུ་རྒྱུའོ། །ཟླ་བ་དྲུག་ནི་རྒྱ་མཚོ་ལ་ལྷག་པར་འབབ་པར་འགྱུར་ཞིང་ཟླ་བའི་འགྲོས་དང་། ཉི་མའི་འགྲོས་ཀྱིས་དུས་འཕེལ་བར་འགྱུར་ཞིང་རྩིས་དང་བྲལ་བས་ཤེས་པར་མི་ནུས་པ་དེ་ནི་འདི་ལྟར་ལོ་ཡིན་པར་

71-1-278a

བཤད་པར་འགྱུར་རོ། །ཉི་མ་དང་། ཟླ་བ་དང་། སྒྲ་གཅན། ཕུར་བུ་དང་། སྤེན་པ་དང་། མིག་དམར་དང་། གཟའ་ལག་དང་། འདི་རྣམས་ཀྱི་གཙོ་བོ་ནི་ཕུར་བུའོ། །སྤེན་པ་དང་། གཟའ་ལག་དང་། མིག་དམར་དང་། 
པ་བ་སངས་ཏེ། དེ་དག་ནི་དཀྱིལ་འཁོར་འགྲོས་སོ། །བྲ་ཉེ་དང་། སྨིན་དྲུག་དང་། སྣར་མ་དང་། མགོ་སྟེ། དེ་དག་ནི་ཐུན་མོང་གི་དང་པོའི་དཀྱིལ་འཁོར་རོ། །ལག་དང་། ནམ་སོ་དང་། རྒྱལ་དང་། སྐག་དང་། དེ་དག་ནི་ཐུན་མོང་བ་སྟེ། 
དཀྱིལ་འཁོར་གཉིས་པའོ། །མཆུ་དང་། གྲེ་དང་། དབོ་གཉིས་དང་། མེ་བཞི་དང་། ནག་པ་སྟེ། དེ་དག་ནི་ཐུན་མོང་གི་དཀྱིལ་འཁོར་གསུམ་པའོ། །ས་རི་དང་། ས་ག་དང་། ལྷ་མཚམས་དང་། དེ་དག་ནི་ཐུན་མོང་བའི་དཀྱིལ་
འཁོར་བཞི་པའོ། །སྣྲོན་དང་། སྣྲུམས་དང་། ཆུ་སྨད་དང་། ཆུ་སྟོད་དང་། གྲོ་ཞིན་ཏེ། དེ་དག་ནི་འཇིགས་པ་ཆེན་པོར་གྱུར་པའི་དཀྱིལ་འཁོར་ལྔ་པའོ། །མོན་གྲེ་དང་། མོན་གྲུ་དང་། ཁྲུམས་གཉིས་དང་། ནམ་གྲུ་དང་། ཐ་སྐར་
དང་། བྲ་ཉེ་སྟེ་དེ་དག་ནི་ཐུན་མོང་བའི་དཀྱིལ་འཁོར་དྲུག་པའོ། །གང་གི་ཚེ་རྒྱུ་སྐར་གྱི་དཀྱིལ་འཁོར་ལས་ནད་དེ་དང་དེའི་ལྗོངས་སུ་དེའི་ནད་ཡིན་པར་བལྟའོ། །ཡུད་ཙམ་བཅུ་གཉིས་པའི་ཉིན་པར་ནི་གཟའ་བཅུ་གཉིས་ཏེ། 
མཚན་མོ་ཡུད་ཙམ་དྲུག་དྲུག་རྒྱུ་སྟེ། དྲུག་གང་ཞེ་ན། དབྱར་ཟླ་བ་རྫོགས་པ་དང་། ཉིན་མོར་ལ་ཡུད་ཙམ་བཅུ་བདུན་ཡོད་ཅིང་ཉི་མ་ཤར་ནས་བཞི་མཐོན་ཞེས་བྱ་བའི་ཡུད་ཙམ་དུ་འགྱུར་རོ། །ཉི་མ་འཕགས་ནས་ནི་རྣམ་པར་
འགྲོ་བ་ཞེས་བྱ་བའི་ཡུད་ཙམ་དུ་འགྱུར་རོ། །ཡུད་ཙམ་བཅུ་གསུམ་དང་ལྡན་པའི་མཚན་མོ་ལ་ཡུད་ཙམ་དྲུག་ལ་ཡང་དག་པར་སྦྱོར་བ་ཞེས་བྱ་བའི་ཡུད་ཙམ་དུ་འགྱུར་རོ། །ཚ་བས་གདུངས་པ་ཞེས་བྱ་བའི་ཡུད་ཙམ་དུ་ནམ་
ནངས་པ་དང་འགྱུར་རོ། །དབྱར་གྱི་ཟླ་བ་གཉིས་པའི་བཅྭ་ལྔ་ལ་ཡུད་ཙམ་བཅུ་དྲུག་ཉིན་པར་ལ་ཡོད་ཅིང་ཉི་མ་ཤར་བ་ན་བཞི་མཐོན་ཞེས་བྱ་བའི་ཡུད་ཙམ་དུ་འགྱུར་རོ། །ཕྱེད་ལ་ནི་མི་འཕམ་ཞེས་བྱ་བའི་ཡུད་ཙམ་དུ་

71-1-278b

འགྱུར་རོ། །ཉི་མ་འཕགས་ནས་ནི་དྲག་པོ་ཞེས་བྱ་བའི་ཡུད་ཙམ་དུ་འགྱུར་རོ། །ཡུད་ཙམ་བཅུ་བཞི་དང་ལྡན་པའི་མཚན་མོ་ལ་ནི་ཉི་མ་ནུབ་པར་རྩོམ་པ་རྣམ་པར་རྒྱུ་བ་ཞེས་བྱ་བའི་ཡུད་ཙམ་དུ་འགྱུར་རོ། །མཚན་ཕྱེད་
ལ་ནི་སྒྱུ་མ་ཆེན་པོ་ཞེས་བྱ་བའི་ཡུད་ཙམ་དུ་འགྱུར་རོ། །ནམ་ལངས་པ་ན་ནི་མེ་ཡིས་གདུངས་པ་ཞེས་བྱ་བའི་ཡུད་ཙམ་དུ་འགྱུར་རོ། །རྟ་འཐབ་པའི་བཅྭ་ལྔ་ནི་ཡུད་ཙམ་བཅྭ་ལྔ་དང་ལྡན་པའི་ཉིན་པར་ལ་ཉི་མ་
འཆར་བ་ལ་ནི་བཞི་མཐོན་ཞེས་བྱ་བའི་ཡུད་ཙམ་དུ་འགྱུར་རོ། །ཉི་མ་འཕགས་ནས་ནི་མི་འཕམ་པ་ཞེས་བྱ་བའི་རྗེས་ཐོགས་ལ་དབུས་མ་ཞེས་བྱ་བའི་ཡུད་ཙམ་དུ་འགྱུར་རོ། །ཉི་མ་དེ་ལས་འཕགས་པའི་ལྷའི་
ཆར་ཞེས་བྱ་བའི་ཡུད་ཙམ་དུ་འགྱུར་རོ། །ཡུད་ཙམ་བཅྭ་ལྔ་དང་ལྡན་པའི་མཚན་མོ་ཉི་མ་ནུབ་པ་དང་དྲག་པོ་ཞེས་བྱ་བའི་ཡུད་ཙམ་དུ་འགྱུར་རོ། །མི་འཕམ་པ་ཞེས་བྱ་བའི་ཡུད་ཙམ་དང་། འགྲོ་བ་ཞེས་བྱ་བའི་ཡུད་
ཙམ་གྱི་རྗེས་ཐོགས་ལ་མཚན་མོ་ཕྱེད་དུ་གྱུར་ནས་ནམ་ནངས་པ་ན་མེ་ཡིས་གདུངས་པ་ཞེས་བྱ་བའི་ཡུད་ཙམ་དུ་འགྱུར་རོ། །རྟ་འཐབ་པའི་ཟླ་བའི་ཚེས་བཅྭ་ལྔ་ལ་ཉིན་མཚན་མཉམ་པ་ཞེས་བྱ་བའི་ཉིན་པར་ལ་ཡུད་ཙམ་
བཅྭ་ལྔར་འགྱུར་ཞིང་མཚན་མོ་ལ་ཡུད་ཙམ་བཅྭ་ལྔའོ། །ཡུད་ཙམ་ཉིན་མཚན་མཉམ་པ་ན་ཉི་མ་ཤར་བ་ན་བཞི་མཐོན་ཞེས་བྱ་བའི་ཡུད་ཙམ་དུ་འགྱུར་རོ། །ཆ་མཉམ་པར་དབུས་ན་གནས་པ་ན་མཉམ་པ་ཞེས་བྱ་བའི་ཡུད་
ཙམ་དུ་འགྱུར་རོ། །ཉི་མ་ནུབ་ནས་མཚན་མོ་ལ་བབ་པ་ན་ལྷའི་ཆ་ཞེས་བྱ་བའི་ཡུད་ཙམ་དུ་འགྱུར་རོ། །མཚན་ཕྱེད་ལ་ནི་མི་འཕམ་པ་ཞེས་བྱ་བའི་ཡུད་ཙམ་དུ་འགྱུར་རོ། །ནམ་ནངས་པ་ན་ནི་མེ་ཡིས་གདུངས་པ་ཞེས་བྱ་བའི་ཡུད་ཙམ་
དུ་འགྱུར་རོ། །སྟོན་ཟླ་འབྲིང་པོའི་བཅྭ་ལྔ་ལ་ཡུད་ཙམ་བཅུ་བཞི་ཉིན་མོ་ལ་ཡོད་ཅིང་ཉི་མ་ཤར་བ་ན་བཞི་མཐོན་ཞེས་བྱ་བའི་ཡུད་ཙམ་དུ་འགྱུར་རོ། །དགའ་བྲལ་དང་མཉམ་པའི་སྒོ་ཞེས་བྱ་བའི་ཡུད་ཙམ་གྱི་རྗེས་ལ་དབུས་སུ་འགྱུར་ནས་

71-1-279a

ཉི་མ་ནུབ་པ་ན་ཆུ་ཟླ་ཞེས་བྱ་བའི་ཡུད་ཙམ་དུ་འགྱུར་རོ། །མཚན་མོ་ལ་ཡུད་ཙམ་བཅུ་དྲུག་དང་ལྡན་ལ་ཉི་མ་ནུབ་པ་རྒྱུད་ཅེས་བྱ་བའི་ཡུད་ཙམ་དུ་འགྱུར་རོ། །སྲིན་པོ་ཞེས་བྱ་བ་དང་། མི་འཕམ་པ་ཞེས་བྱ་བ་དེའི་རྗེས་
ལ་མཚན་མོ་ཕྱེད་དུ་གྱུར་ནས་ནམ་ལངས་པ་ན་མེ་ཡིས་གདུངས་པ་ཞེས་བྱ་བའི་ཡུད་ཙམ་དུ་འགྱུར་རོ། །དགུན་ཟླ་ར་བའི་བཅྭ་ལྔ་ལ་ཡུད་ཙམ་བཅུ་གསུམ་དང་ཉིན་པར་ལྡན་ལ་ཉི་མ་ཤར་བ་ན་བཞི་མཐོན་ཞེས་བྱ་བའི་ཡུད་ཙམ་དུ་
འགྱུར་རོ། །ཕྱེད་ལ་ནི་དགའ་བྲལ་ཞེས་བྱ་བའི་ཡུད་ཙམ་དུ་འགྱུར་རོ། །ཉི་མ་ནུབ་པ་ལ་ནི་བདེན་བྲལ་ཞེས་བྱ་བའི་ཡུད་ཙམ་དུ་འགྱུར་རོ། །ཡུད་ཙམ་བཅུ་བདུན་དང་ལྡན་པའི་མཚན་མོ་ལ་ཉི་མ་ནུབ་པ་ཙམ་ན་ཆུ་ལྷ་ཞེས་བྱ་བའི་ཡུད་
ཙམ་དུ་འགྱུར་རོ། །མཚན་ཕྱེད་ལ་ནི་སྲིན་པོ་ཞེས་བྱ་བའི་ཡུད་ཙམ་དུ་འགྱུར་རོ། །ནམ་ལངས་པ་ན་མེ་ཡིས་གདུངས་པ་ཞེས་བྱ་བའི་ཡུད་ཙམ་དུ་འགྱུར་རོ། །དགུན་ཟླ་འབྲིང་པོའི་བཅྭ་ལྔ་ལ་ནི་ཡུད་ཙམ་བཅུ་གཉིས་དང་ལྡན་པའི་
ཉིན་པར་ཉི་མ་ཤར་བ་ན་བཞི་མཐོན་ཞེས་བྱ་བའི་ཡུད་ཙམ་དུ་འགྱུར་རོ། །དགའ་བྱེད་དང་། དགའ་བྲལ་ཞེས་བྱ་བའི་རྗེས་ལ་དབུས་སུ་གྱུར་ནས་ཉི་མ་ནུབ་པ་ན་རྡུལ་མེད་ཅེས་བྱ་བའི་ཡུད་ཙམ་དུ་འགྱུར་རོ། །ཡུད་ཙམ་བཅྭ་
བརྒྱད་དང་ལྡན་པའི་མཚན་མོ་ཉི་མ་ནུབ་ཙམ་ན་བདེན་བྲལ་ཞེས་བྱ་བའི་ཡུད་ཙམ་དུ་འགྱུར་རོ། །བོང་བུ་དང་། སྲིན་པོ་ཞེས་བྱ་བའི་རྗེས་ལ་མཚན་ཕྱེད་དུ་གྱུར་ནས། ནམ་ལངས་པ་ན་མེ་ཡིས་གདུངས་པ་ཞེས་བྱ་བའི་ཡུད་ཙམ་
དུ་འགྱུར་རོ། །ཇི་ལྟར་སོས་ཀའི་དང་པོ་དེ་ལྟར་དབྱར་དང་པོ། །ཇི་ལྟར་དཔྱིད་ཀའི་གཉིས་པ་དེ་ལྟར་དབྱར་གཉིས་པ། །ཇི་ལྟར་དཔྱིད་ཀ་དང་པོ་དེ་ལྟར་སྟོན་དང་པོ། །ཇི་ལྟར་དགུན་གྱི་བཞི་པའི་དེ་ལྟར་སྟོན་ཐ་ཆུངས། །ཇི་ལྟར་དགུན་
འབྲིང་དེ་ལྟར་དགུན་དང་པོ་། །ཇི་ལྟར་དགུན་འབྲིང་དེ་ལྟར་སོས་ཀའི་གཉིས། །དེ་ལྟ་བུར་ནི་རྒྱུ་སྐར་རྣམས། །རྒྱུ་ཞིང་རྒྱུ་བར་ཤེས་པར་བྱ། །རྒྱུ་སྐར་རྒྱུ་བ་དང་པོའི་ལེའུའོ། །ཇི་ལྟར་རྒྱུ་སྐར་དེ་དག་གི་ནང་ནས་ཉིན་མཚན་དུ་ལྡན་པས་

71-1-279b

འཕེལ་བ་དང་། འགྲིབ་པར་འགྱུར་བས་འགྲིབས་པ་ལས་ཉིན་པར་འཕེལ་བའི་བཅྭ་ལྔ་ལ་ཟླ་བ་ཕྱེད་ལས་གཉིས་པ་དང་། དྲུག་པ་དང་། དགུ་པ་དང་། བཅུ་གཉིས་པ་དེ་དག་གི་མཚམས་ཀྱི་ཞག་འདས་ནས་ནུབ་མོ་ས་འཛིན་པའི་
རྒྱལ་པོ་ཆེན་པོ་བཞི་པོ་ཤིན་དུ་འཆི་བ་ཞེས་བྱ་བ་དང་། རྣམ་པར་དག་པ་ཞེས་བྱ་བ་དང་། འཕེལ་བ་ཞེས་བྱ་བ་དང་། ཐ་དད་པའི་རིམ་པ་ཞེས་བྱ་བ་དེ་དག་འཐབས་པས་འབྱུང་བ་ཆེན་པོ་བཞི་གཡོ་བ་ལས་ས་འགུལ་ལོ། །ཆུ་དང་། དབང་
པོ་དང་། རླུང་དང་། མེ་སྟེ་ལེགས་ལྡན་རྣམ་པ་བཞི་པོ་ཡང་གང་དུ་ཟླ་བ་ཕྱེད་ལ་ལན་གསུམ་གཡོས་ཏེ། ཟླ་བ་གཅིག་ལ་ལན་དྲུག་གཡོས་པར་གྱུར་ན་ཕ་རོལ་གྱི་དམག་ཚོགས་འོང་བར་འགྱུར་ཏེ། དཔྱིད་ཟླ་འབྲིང་པོ་ལ་ས་གཡོས་
ན་ཞག་བཅུའི་བར་དུ་འཇིགས་པ་འབྱུང་ངོ་། །སོས་ཀའི་ཟླ་བ་དང་པོ་ལ་ཡང་དང་ཡང་གཡོས་ན་ཞག་བཅུ་གཉིས་ཀྱི་བར་དུ་འཇིགས་པ་འབྱུང་ངོ་། །སོས་ཀའི་ཟླ་བ་གཉིས་པ་ལ་ཡང་ཡང་གཡོས་ན་ཉི་ཤུ་རྩ་ལྔའི་བར་དུ་འཇིགས་
པ་འབྱུང་ངོ་། །དབྱར་ཟླ་ར་བ་ལ་ཡང་ཡང་གཡོས་ན་ཞག་བདུན་བཅུ་རྩ་ལྔའི་བར་དུ་འཇིགས་པ་འབྱུང་ངོ་། །དབྱར་ཟླ་འབྲིང་པོ་ལ་ཡང་ཡང་གཡོས་ན་ཟླ་བ་གསུམ་དང་ཞག་བཅུའི་བར་དུ་འབྱུང་ངོ་། །སྟོན་ཟླ་ཐ་ཆུངས་ལ་ཡང་ཡང་
གཡོས་ན་ཞག་ལྔའི་བར་དུ་འབྱུང་ངོ་། །དགུན་གྱི་ཟླ་བ་གཉིས་པ་ལ་ཡང་ཡང་གཡོས་ན་ཞག་ལྔ་བཅུ་རྩ་ལྔའི་བར་དུ་འབྱུང་ངོ་། །དགུན་གྱི་ཟླ་བ་གསུམ་པ་ལ་ཡང་ཡང་གཡོས་ན་ཞག་བརྒྱའི་བར་དུ་འཇིགས་པ་འབྱུང་ངོ་། །དགུན་
གྱི་ཟླ་བ་བཞི་པ་ལ་ཡང་ཡང་གཡོས་ན་ཞག་ཉི་ཤུ་རྩ་ལྔའི་བར་དུ་འཇིགས་པ་འབྱུང་ངོ་། །དཔྱིད་ཟླ་ར་བ་ལ་ཡང་ཡང་གཡོས་ན་ཞག་སུམ་བཅུའི་བར་དུ་འཇིགས་པ་འབྱུང་ངོ་། །དེ་དག་ནི་ས་གཡོས་པའི་དུས་ཇི་ཙམ་ན་
སྨིན་པ་ཡིན་པར་བསྟན་ཏོ། །དེ་དག་གི་ལས་ཀྱི་འཇུག་པ་ནི་འདི་ལྟར་ཟླ་བ་ཐམས་ཅད་ལ་དུས་རྟག་ཏུ་ས་གཡོ་ཞིང་ཤིང་དང་། རི་དང་། ཆུ་རྣམས་གཡོ་ཞིང་ཤིང་རྣམས་ཀྱི་ལོ་མ་ལྟར་གཡོ་ན་བསྐལ་པ་ལྟ་བུའི་འཇིགས་

71-1-280a

པ་འབྱུང་བར་བསྟན་ཏོ། །གྲོང་ཁྱེར་དང་། གྲོང་དང་། འབྲོག་རྣམས་ན་གནས་པའི་མི་རྣམས་མྱུར་དུ་འཕོ་ཞིང་དགོན་པར་ལོ་བཅྭ་ལྔའི་བར་དུ་གནས་པར་འགྱུར་རོ། །ཕྱོགས་རྣམས་ནས་ས་རྣམ་པར་གཡོས་
ན་མི་བདེ་བ་མི་འབྱུང་ངོ་། །སྨིན་དྲུག་ལ་ས་གཡོས་ན་གྲོང་ཁྱེར་དང་། གྲོང་རྣམས་ཡང་དང་ཡང་དུ་མེས་བསྲེགས་པས་རྩྭ་ཡང་མ་ལུས་པར་འགྱུར་རོ། །དེ་ལས་རྣམ་པར་གཡོས་ན་སོལ་བ་མཁན་དང་། ནོར་བུ་མཁན་དང་། 
ཁྱེའུ་དང་། མེས་སྐོར་བྱས་པའི་གཟའ་དང་། དེ་ལ་སྐྱེས་པ་དང་། ལམ་དུ་ཞུགས་པ་ན་ཞིང་སྡུག་བསྔལ་བར་འགྱུར་རོ། །སྣར་མ་ལ་ས་གཡོས་ན་ས་བོན་ཐམས་ཅད་ཉམས་པས་འབྲུ་རྣམས་འཐོབ་པར་མི་འགྱུར་ཞིང་སྡུག་
བསྔལ་བར་འགྱུར་བ་དང་། བུད་མེད་སྦྲུམ་མ་རྣམས་ཀྱི་མངལ་ལ་ནད་འབྱུང་བ་དང་། མུ་གེ་འབྱུང་བ་དང་། སྨས་པ་དང་། ནད་ཀྱིས་བཏབ་པའི་མི་རྣམས་སུམ་ཆ་འཚོ་བར་འགྱུར། བདག་ཉིད་ཆེན་པོ་དང་། རྒྱལ་པོ་དང་། དཔལ་དང་ལྡན་
པའི་མི་དང་མིའི་མཆོག་རྣམས་ནད་ཀྱིས་བཏབ་པར་འགྱུར་རོ། །མགོ་ལ་ས་གཡོས་ན་སྨན་རྣམས་ཉམས་ཤིང་སྨན་པ་དང་། མཆོད་སྦྱིན་རྩོམ་པ་དང་། མཆོད་སྦྱིན་བྱེད་པ་དང་། བྲམ་ཟེ་ནགས་ན་གནས་པ་དང་། དཀའ་ཐུབ་པ་དེ་
དག་ལ་ནད་འབྱུང་བར་འགྱུར་རོ། །ལག་ལ་ས་རྣམ་པར་གཡོས་ན་འོ་མ་ཅན་གྱི་ཤིང་རྣམས་ཉམས་ཤིང་ཟས་དང་སྐོམ་དཀོན་ཅིང་འགྲོན་པོ་ཡུལ་འཁོར་ཆས་པ་དང་། དོང་དང་འོབས་བརྐོ་བ་དང་། སྡིག་པ་ཅན་དང་། རྐུན་མ་རྣམས་
ལ་ས་རྣམ་པར་གཡོས་པས་ནད་ཀྱིས་འདེབས་པར་འགྱུར་རོ། །ཡང་ནམ་སོ་ལ་ས་རྣམ་པར་གཡོས་ན་དཀྱིལ་འཁོར་བྱེད་པའི་ཞལ་ཏ་པ་དང་། ལམ་གྱི་ནོར་ཅན་དང་། ལམ་དུ་འགྲོ་བ་དང་། འཁོར་ལོ་བ་དང་། བྱིས་པ་དང་། སྲུབ་
མཁན་དང་། ཤན་པ་དང་། དུད་འཚོ་བ་རྣམས་ལ་ས་རྣམ་པར་གཡོས་པས་ནད་ཀྱིས་འདེབས་པར་འགྱུར་རོ། །རྒྱལ་ལ་ས་རྣམ་པར་གཡོས་ན་བྲམ་ཟེ་རྣམས་དང་། དེ་བཞིན་དུ་གཙོ་བོ་རྣམས་དང་། ཚོང་པ་རྣམས་དང་། 

71-1-280b

དེད་དཔོན་རྣམས་དང་། ཚོང་པ་རིང་པོར་འགྲོ་བ་རྣམས་ལ་ནད་འབྱུང་བར་འགྱུར་ཞིང་སེར་བས་འབྲུ་རྣམས་རློག་ཅིང་རི་ཁྲོད་ན་གནས་པའི་རྒྱལ་པོའི་བསྙེན་བཀུར་བ་རྣམས་ས་རྣམ་པར་གཡོས་པས་ནད་ཀྱིས་འདེབས་པར་
འགྱུར་རོ། །སྐག་ལ་ས་རྣམ་པར་གཡོས་ན་ཀླུ་རྣམས་དང་། སྦྲུལ་ཁ་སྡིག་པ་དང་། གྲོག་མ་རྣམས་དང་། གྲོག་ཕྲན་རྣམས་དང་། སྲིལ་རྣམས་དང་། ཁྱིམ་རྣམས་དང་། ཀླུ་མགོ་གཅིག་པ་རྣམས་དང་། དུག་སྔགས་མཁན་རྣམས་དང་
དུག་བྱེད་པ་རྣམས་དང་། སེམས་ཅན་ཁུང་དུ་འཇུག་པ་རྣམས་ས་རྣམ་པར་གཡོས་པ་ནད་ཀྱིས་འདེབས་པར་འགྱུར་རོ། །མཆུ་ལ་ས་རྣམ་པར་གཡོས་ན་རྒྱལ་པོ་རྣམས་ལ་ནད་འབྱུང་ཞིང་མཆོད་སྦྱིན་དང་། ཤིང་ལས་
ལོག་པ་རྣམས་དང་། འདུས་པའི་སྟོན་མོ་ལས་ལོག་པ་རྣམས་དང་། ལྷའི་མཆོད་སྦྱིན་ལས་ལོག་པ་རྣམས་དང་། དེ་ལ་ལོག་པ་ཐམས་ཅད་དང་། གང་ཞིག་དེ་ལ་སྐྱེས་པ་དང་། བསྐྱེད་པ་དང་། གང་མཁས་པའི་མཆོག་ཏུ་གྱུར་
པ་དང་། གླུ་མཁན་རྣམས་འཆི་བར་འགྱུར་ཞིང་དེ་དག་དང་རིགས་མཐོན་པོ་རྣམས་ནད་ཀྱིས་ཐེབས་པར་འགྱུར་རོ། །ཆུ་སྟོད་ལ་ས་རྣམ་པར་གཡོས་ན་དུས་འགྱུར་ཞིང་ཆོས་ལ་དགའ་བའི་དང་། ཤོ་གམ་གྱི་འཚོ་བ་རྣམས་ལ་
ས་གཡོས་ན་ནད་ཀྱིས་འདེབས་པར་འགྱུར་རོ། །གལ་ཏེ་ཆུ་སྨད་ལ་ས་རྣམ་པར་གཡོས་ན་ཚོང་པ་གླིང་དུ་འགྲོ་བ་རྣམས་དང་། དེད་དཔོན་རྣམས་དང་། རི་ཁྲོད་ན་འཚོ་བ་རྣམས་དང་། ཨང་ག་དང་། ལུས་འཕགས་པོ་དང་མ་ག་
དྷཱ་པ་རྣམས་དང་། ནི་ཏིའི་བུད་མེད་བླངས་པ་རྣམས་ས་རྣམ་པར་གཡོས་པས་ནད་ཀྱིས་འདེབས་པར་འགྱུར་རོ། །མེ་བཞི་ལ་ས་རྣམ་པར་གཡོས་པས་ན་རྫ་མཁན་རྣམས་དང་། སྨན་པ་རྣམས་དང་། ཚོགས་ཀྱི་གཙོ་
བོ་རྣམས་དང་། བློན་པོ་ཆེན་པོ་རྣམས་དང་། དམག་དཔོན་རྣམས་ས་རྣམ་པར་གཡོས་པས་ནད་ཀྱིས་འདེབས་པར་འགྱུར་རོ། །འདི་ལྟར་ནམ་སོ་ལ་ས་གཡོས་པ་ཡང་སྔ་མ་བཞིན་དུ་བལྟའོ། །ས་རི་ལ་ས་རྣམ་

71-1-281a

པར་གཡོས་ན་རྐུན་མ་ཚུལ་ཁྲིམས་ཉམས་པ་རྣམས་དང་། ཤན་པ་དང་ཤན་པ་ལ་དགའ་བ་རྣམས་དང་། ཤན་པའི་བདག་པོ་དང་། རླུང་ཟའི་དཀའ་ཐུབ་པ་རྣམས་ས་གཡོས་ནས་ནད་ཀྱིས་
འདེབས་པར་འགྱུར་རོ། །ས་ག་ལ་ས་རྣམ་པར་གཡོས་ན་རི་ཆེན་པོ་རྣམས་འཆད་པར་འགྱུར་རོ། །རྟ་རྒྱུག་པ་རྣམས་དང་། ལམ་ན་འགྲོ་བ་ལ་རླུང་དྲག་པོས་རྡོ་རྣམས་འཐོར་བས་སྟོབས་མེད་པར་བྱེད་ལ་ས་གཡོས་
པས་དེ་དག་ནད་ཀྱིས་འདེབས་པར་འགྱུར་རོ། །ཡང་ནག་པ་ལ་ས་གཡོས་ན་རྐུན་མ་ཆེན་པོས་གནོད་པ་བྱེད་པ་འོང་ཞིང་བྱི་རྒྱུག་པ་དང་། ཆོ་ལོ་པ་རྣམས་དང་། མདུད་པ་འགྲོལ་བའི་མི་རྣམས་དང་། ཨན་དྲ་བ་རྣམས་དང་། 
བུ་རམ་ཤིང་འཕེལ་བ་རྣམས་དང་། ཕུ་ལིན་པ་རྣམས་ལ་སྐྱབས་མེད་པའི་འཇིགས་པ་འོང་ཞིང་གྲོགས་དང་འབྲལ་ཞིང་སྟོབས་ཆེ་བ་འབྱུང་ངོ་། །སྣྲོན་ལ་ས་གཡོས་ན་རྒྱལ་པོ་ཆེན་པོ་ལ་གནོད་པ་འབྱུང་ཞིང་ཁྲ་དང་། བྱི་བ་
དང་། སྦྲུལ་དང་། དེ་བཞིན་དུ་གཅན་ཟན་གདུག་པ་ཅན་རྣམས་དང་། གཞན་གནོད་པ་བྱེད་པ་དང་། སུ་ར་སེ་ན་པ་དང་། མ་ལ་པ་རྣམས་དང་། བ་ལྷི་བ་གྲ་ཧ་པ་དང་། གནོད་པ་མེད་པ་དང་། དེ་ལ་གུས་པའི་མི་རྣམས་མྱུར་
བར་ས་གཡོས་པས་ནད་ཀྱིས་འདེབས་པར་འགྱུར་རོ། །སྣྲུམས་ལ་ས་གཡོས་ན་རྐང་བཞི་པ་རྣམས་དང་། རྐང་གཉིས་དང་། དེ་བཞིན་དུ་གནོད་སྦྱིན་རྣམས་དང་། ཡི་དགས་རྣམས་དང་། སེམས་ཅན་དེ་དག་དང་། རི་
ཁྲོད་པ་རྣམས་དང་། ཆུ་མེད་པས་ལོ་ཉེས་ཤིང་མྱུར་དུ་མུ་གེ་འབྱུང་ཞིང་རི་རྣམས་འཆད་པར་འགྱུར་རོ། །ཆུ་སྟོད་ལ་ས་གཡོས་ན་ཆུ་ལ་གནས་པའི་ཉ་རྣམས་དང་། ཤུ་ཤུ་མ་དང་། ཉ་ཕྱིས་རྣམས་དང་། ཆུ་སྲིན་
རྣམས་དང་། རུས་སྦལ་དང་། རིགས་དང་རུས་བཙུན་པ་རྣམས་དང་། ནོར་དང་ལྡན་པ་རྣམས་དང་། མཁས་པ་རྣམས་དང་། གཉིས་པ་རིགས་དང་ལྡན་པ་རྣམས་ལ་འཇིགས་པ་ཆེན་པོ་འབྱུང་ཞིང་ས་གཡོས་པས་དེ་

71-1-281b

དག་ནད་ཀྱིས་འདེབས་པར་འགྱུར་རོ། །ཆུ་སྨད་ལ་ས་གཡོས་ན་བཟོ་བོ་མཁས་པ་རྣམས་ལ་གནོད་པ་མི་འབྱུང་ཞིང་མགར་བ་རྣམས་དང་། ཞལ་ཞལ་མཁན་རྣམས་དང་། མདའ་མཁན་རྣམས་དང་། ཤིང་
མཁན་རྣམས་དང་། དབུལ་པོ་རྣམས་དང་། གཞན་ཡང་བཟོ་སྣ་ཚོགས་པ་བྱེད་པ་དང་། གྲོང་དང་ཉེ་བའི་སྐམ་ལ་གནས་པ་ལ་གནོད་པར་འགྱུར་རོ། །གྲོ་བཞིན་ལ་ས་གཡོས་ན་མི་གང་ཞིག་རྒྱལ་པོ་མཆོད་པ་དང་། 
ཀློག་པ་རྣམས་དང་། བསྟན་བཅོས་མཁས་པ་རྣམས་དང་། སྙན་དངགས་མཁན་རྣམས་དང་། གླུ་མཁན་རྣམས་དང་། སུ་ར་སེ་ན་པ་དང་། རྗེས་སུ་འཇུག་པ་རྣམས་དང་། གོས་འཚོང་བ་དང་། གི་ཤི་ཏ་དང་། ས་
ར་དན་དང་། དེ་དག་གི་བསམ་པ་འགྲུབ་བོ། །མོན་གྲེ་ལ་ས་གཡོས་ན་ནོར་ཅན་རྣམས་ལ་གནོད་པ་འབྱུང་ཞིང་ཕྱུག་པོ་རྣམས་དང་། གྲོང་ཁྱེར་ཆེན་པོ་དང་། ཚོང་དཔོན་རྣམས་དང་། སྤྱི་ཆེར་རྣམས་དང་། བཀྲ་ཤིས་
པ་དང་། བཟང་པོ་སྔགས་མཁན་དང་། རི་ཁྲོད་པ་རྣམས་དང་། པ་རི་ཀེ་པ་དང་། མ་ལ་པ་དང་། གྲོང་ཁྱེར་ཆེ་བ་གཞན་རྣམས་ལ་གནོད་པ་འབྱུང་བར་འགྱུར་རོ། །མོན་གྲུ་ལ་ས་གཡོས་ན་ཆུ་ལ་གནས་པ་རྣམས་ལ་
གནོད་པ་ཆེན་པོ་འབྱུང་ཞིང་། གླང་པོ་དང་། རྟ་དང་། བོང་བུ་དང་། རྔ་མོ་རྣམས་ལ་ཆེར་སྡུག་བསྔལ་འབྱུང་ངོ་། །དེ་བཞིན་དུ་སོ་པི་ར་ཀ་པ་དང་། མ་དྲ་བ་དང་། བི་ལི་ཀན་པ་དང་། ཀེ་ཀ་ཡན་པ་དང་། རྟེན་མེད་པ་དང་། 
འཁོར་ལོ་གཅིག་པ་དང་། ཡུལ་དེ་དག་གི་སྐྱེ་བོ་རྣམས་ལ་ནད་འབྱུང་ངོ་། །མེ་བཞི་ལ་ས་རྣམ་པར་གཡོས་ན་སྲིན་པོའི་གདོན་གྱིས་འཛིན་ཅིང་། དེ་བཞིན་དུ་ཤན་པ་དང་། ཕག་འཚོང་བ་དང་། སོ་བ་རི་པ་རྣམས་འཆི་
བར་འགྱུར་རོ། །ཚོང་གིས་འཚོ་བའི་རྗེའུ་རིགས་དང་། དམངས་རིགས་རྣམས་དང་། ཟློས་གར་མཁན་རྣམས་དང་། ནས་གླིང་པ་རྣམས་དང་། རྟ་རྣམས་དང་། གྱད་གྱི་ཡུལ་པ་རྣམས་དང་། ཁུ་ལྗོ་དང་ལྡན་པའི་བུད་མེད་རྣམས་དང་། 

71-1-282a

མདུད་པ་འགྲོལ་བ་རྣམས་མེད་པར་འགྱུར་རོ། །མོན་གྲུ་ལ་ས་གཡོས་ན་ཚོང་པ་རྣམས་ལ་ནད་འབྱུང་ཞིང་། ཆོས་ལ་དགའ་བ་དང་། གྲུབ་པ་རྣམས་དང་། ཤོ་གམ་གྱི་ལས་བྱེད་པ་རྣམས་དང་། རྒྱལ་རིགས་སྲིད་སྒྲུབ་
ཀྱི་རྒྱུད་དང་། མཛའ་བ་རྣམས་དང་། སིན་དུ་བའི་རྒྱལ་པོ་དང་། མདའ་གཞུ་ཐོགས་པ་རྣམས་ཡུན་རིང་པོར་དོན་མེད་པར་འགྱུར་རོ། །ནམ་གྲུ་ལ་ས་རྣམ་པར་གཡོས་ན་གཡུལ་དྲག་པོ་ཤོམ་པར་འགྱུར་ཞིང་། གྲོང་འཇོམས་པར་
འགྱུར་བ་དང་། གྲོང་གིས་གྲོང་ཕུང་བ་དང་། ནི་ར་ཏ་པ་རྣམས་དང་། རྒྱ་ཡུལ་པ་རྣམས་དང་། ར་མ་ཏ་ན་གནས་པ་རྣམས་དང་། ཞིང་ལས་བཟང་པོ་བྱེད་པ་རྣམས་ལུང་པར་གནས་པའི་གཙོ་བོ་དང་། དམག་དཔོན་ཐམས་ཅད་ངེས་
པར་བསྲེགས་པར་འགྱུར་རོ། །ཐ་སྐར་ལ་ས་རྣམ་པར་གཡོས་ན་རྟ་རྣམས་ལ་ནད་འབྱུང་ཞིང་གྲོང་རྣམས་འཇོམས་པ་དང་། སྤུན་ཟླ་གསོད་པར་འགྱུར་ཞིང་དེ་ལ་མངལ་ཆགས་པ་དང་། དེ་ལ་སྐྱེས་པ་དང་། གསུམ་སྡུག་
བསྔལ་དང་། རྒྱུན་དུ་ལྡན་པར་འགྱུར་ཞིང་བདུན་བརྒྱུད་དང་མངལ་ན་གནས་པ་དང་། བཟའ་བཏུང་འཐུང་བ་དང་། སྲིད་སྒྲུབ་ཀྱི་རྒྱལ་རིགས་རྣམས་ཕན་ཚུན་གསོད་པར་འགྱུར་རོ། །བྲ་ཉེ་ལ་ས་གཡོས་ན་རྐུན་མ་རྣམས་ལ་
ནད་ཆེན་པོ་འབྱུང་ཞིང་རྩོད་པ་འབྱུང་ངོ་། །ཆོ་ལོ་མཁན་དང་། མདུད་པ་འགྲོལ་བ་དང་། མེ་ལོང་གི་འཁོར་ལོས་སླུ་བར་བྱེད་པ་རྣམས་དང་། དེ་བཞིན་དུ་བཙོན་བསྲུངས་རྣམས་དང་། ཟས་སྡོམ་པ་དང་། གནོད་པ་བྱེད་པའི་
སྐྱེ་བོ་མི་བཟད་པ་རྣམས་འཆི་བར་འགྱུར་རོ། །ས་གཡོས་ནས་ཞག་བདུན་ན་སྤྲིན་ཆེན་པོ་གཡོ་བར་འགྱུར་ཏེ། སྣུམ་ཞིང་གནག་ལ་རི་བོ་ལྟ་བུ་ལྡང་བར་འགྱུར་རོ་ཞེས་དྲང་སྲོང་རྣམས་ཀྱིས་བཤད་དོ། །གཉིད་འཕེལ་བ་
དང་། གཞན་ཡང་བཀྲ་ཤིས་ཀྱི་དབྱངས་དང་། དབང་པོ་རྡོ་རྗེ་ལྟ་བུ་དང་། དེ་བཞིན་དུ་དེར་དུས་ཚིགས་ལྟར་ཉི་མ་དང་ཟླ་བ་སྒྲིབ་ཅིང་དེ་ལ་ཀུན་ནས་སྤྲིན་ཆེན་པོའི་མཚན་ཉིད་དང་ལྡན་ཞིང་དེ་དང་འདྲ་བར་མཐོང་ཞིང་ཐེ་ཙོམ་སྐྱེད་

71-1-282b

པའི་སྤྲིན་ལྡང་ཞིང་འབྲུག་བསྒྲགས་པ་འབྱུང་བར་རིག་པར་བྱའོ་ཞེས་དྲང་སྲོང་རྣམས་ཀྱིས་བཤད་དོ། །དེ་ལྟར་ཤེས་ནས་གདོན་མི་ཟ་བར་ས་བོན་ཐམས་ཅད་གདབ་པར་བྱའོ། །བྱ་རྣམས་བསྲུག་ན་ཚོང་པ་རྣམས་ཀྱིས་བྱ་
བ་འགྲུབ་བོ། །དེ་ལྟ་བུའི་ས་གཡོས་ན་ཐམས་ཅད་དུ་བཀྲ་ཤིས་པར་བརྗོད་དོ། །ཡང་ས་གཡོས་ནས་དེའི་རྗེས་ལ་ཞག་བདུན་ན་སྤྲིན་ལྡང་སྟེ། ཡང་འདི་ལྟར་ཀ་ཤི་ཀའི་གོས་འདྲ་བའི་སྤྲིན་གྱིས་ཁྱབ་ཅིང་མི་མཐུན་པའི་སྒྲ་
སྒྲོགས་པས་ནུབ་ཕྱོགས་སུ་འགྲོ་ལ་ཆུ་ལ་གནས་པའི་ཤུ་ཤུ་མ་ར་དང་། བ་ལུ་ཀ་དང་། ཉ་དང་། ཆུ་སྲིན་འདྲ་བའི་སྤྲིན་སྣང་ཞིང་ཉི་མ་དང་། ཟླ་བ་སྒྲིབ་པ་དེ་ལྟ་བུའི་མཚན་ཉིད་དང་ལྡན་པ་སྣང་ན། དེ་ནི་ཆུས་སྤྲུལ་པ་ཡིན་པར་རིག་
པར་བྱའོ་ཞེས་དྲང་སྲོང་ཆེན་པོ་རྣམས་ཀྱིས་དེ་སྐད་བསྟན་པ་ཡིན་ནོ། །སྒང་དང་རིའི་རྩེ་མོ་དང་། ཞིང་དང་། རླན་དང་བྲལ་བ་དེ་དག་རྣམས་ལ་ས་བོན་གདབ་པར་བྱ་སྟེ། དམའ་བར་ཉམས་པར་འགྱུར་རོ། །དེ་བཞིན་དུ་འདམ་
དང་ཆུར་འགྱུར་ཞིང་དམའ་བར་འདུས་པར་འགྱུར་རོ། །དེ་ལྟ་བུའི་ས་གཡོས་ན་ནི་ཆུའི་ཡིན་པས་ཤིས་པ་ཡིན་པར་རིག་པར་བྱའོ། །ཡང་འདི་ལྟར་ས་གཡོས་ནས་དེའི་རྗེས་ལ་ཞག་བདུན་གྱི་ནང་དུ་རླུང་དྲག་པོ་མི་བཟད་པ་ལྡང་དུས་
ཚིགས་ལྟར་སེར་སྐྱར་སྣང་ལ་ཉི་མ་དང་ཟླ་བ་དམར་པོར་མཐོང་ཞིང་མཚན་ཉིད་དེ་ལྟ་བུ་དང་ལྡན་པར་སྣང་ན། དེ་ནི་རླུང་གི་ས་གཡོས་པ་ཡིན་པར་རིག་པར་བྱའོ། །དེ་ལྟ་བུ་གྱུར་པ་ནི་དྲང་སྲོང་རྣམས་ཀྱིས་བསྟན་པ་ཡིན་ནོ། །དེ་ལྟ་བུ་ལ་
མཁས་པས་འགྲོ་བར་མི་བྱ་སྟེ། བདག་ཉིད་བསྲུང་བར་བྱ་ཞིང་དགྲ་ཟླ་ལས་འཇིགས་པ་ཆེན་པོ་འབྱུང་བས་ར་བ་དང་འོབས་ཀྱིས་མཆོག་ཏུ་བསྲུང་བར་བྱའོ། །དེ་ལྟ་བུ་ནི་སའི་ས་གཡོས་པའི་ཡོན་ཏན་ཐམས་ཅད་བསྟན་པ་ཡིན་ནོ། 
མི་རྣམས་ཀྱིས་མེ་ཡིས་ས་གཡོས་པའི་ཁྱད་པར་རིག་པར་བྱ་སྟེ། གལ་ཏེ་ས་གཡོས་ནས་དེའི་རྗེས་ལ་ཞག་བདུན་གྱི་ནང་དུ་སྐར་མདའ་དྲག་པོ་ལྟུང་ཞིང་དུས་ཚིགས་ལྟར་དམར་ལ་ཉི་མ་དང་ཟླ་བ་ཡང་དམར་བར་སྣང་བ་དེ་ལྟ་བུའི་མཚན་ཉིད་

71-1-283a

དང་ལྡན་པར་སྣང་བ་ནི་མེ་ཡིས་གཡོས་པ་ཡིན་པར་རིག་པར་བྱའོ། །བུད་ཤིང་ལས་མེ་མཆེད་པར་འགྱུར་བས་ནོར་བསྲེགས་ཤིང་དུ་བའི་ཕྲེང་བ་སྣང་ཞིང་མཚོན་མཆོག་ཏུ་འབབ་ལ་ཆུ་འཁྱིལ་བ་སྣང་བ་ཟླ་བ་དགུ་པའི་
བར་དུ་ཆར་མི་འབབ་པོ། །དེ་ལྟ་བུའི་ས་གཡོས་པ་མི་བཟད་པ་ནི་མེ་ཡིས་གཡོས་པ་ཡིན་ཏེ། རྒྱལ་པོ་དང་རྒྱལ་རིགས་རྣམས་ལ་སྔ་དྲོའི་ཚ་བའི་གནོད་པ་འབྱུང་བར་འགྱུར་ཞིང་རྟ་དང་གླང་པོ་དང་བློན་པོ་ཆེན་པོ་
རྣམས་ལ་ནི་ཕྱེད་ལ་ཚ་བའི་ནད་འབྱུང་ལ་ཕྱི་དྲོ་ནི་བ་ལང་དང་ཕྱུགས་རྣམས་ལ་འབྱུང་ངོ་། །མཚན་མོ་རྐུན་མ་རྣམས་ལ་གནོད་པ་འབྱུང་ངོ་། །ནམ་ལངས་པ་ན་མཐའ་འཁོབ་པ་རྣམས་ལ་འཆི་བའི་འཇིགས་པ་
འབྱུང་ངོ་། །དེ་བཞིན་དུ་ནམ་ཕྱེད་ན་ནི་ཞག་བརྒྱད་ཀྱི་བར་དུ་ན་བར་འགྱུར་ཞིང་དེ་ནས་སོས་པར་འགྱུར་ཏེ། དེའི་ལྷ་ནི་ཉི་མ་ཡིན་པས་མར་དང་ཕྲན་སྔོན་གྱི་གཏོར་མ་བཏང་ན་གཏོར་མ་དེས་ནད་དེ་ལས་ལྡང་བར་འགྱུར་རོ། །
ས་རི་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་ཟུག་ཟེར་ཆེ་ལ་ཞག་ཉི་ཤུ་རྩ་བརྒྱད་ཀྱི་བར་དུ་ན་བར་འགྱུར་ཞིང་། དེའི་ལྷ་ནི་རླུང་ལྷ་ཡིན་པས་སྣ་ཚོགས་ཕྲེང་བའི་གཏོར་མ་བཏང་ན། གཏོར་མ་དེས་ནད་དེ་ལས་
ལྡང་བར་འགྱུར་རོ། །ས་ག་ལ་སྐྱེས་པ་འམ་བུད་མེད་ནད་ཀྱིས་བཏབ་པ་ནི་ནད་ལྕི་ཞིང་ཞག་ཉི་ཤུ་རྩ་གཅིག་གི་བར་དུ་ན་བར་འགྱུར་ཞིང་། དེ་ནས་སོས་པར་འགྱུར་རོ། །དེའི་ལྷ་ནི་མེ་ལྷ་དང་། དབང་པོ་ཡིན་པས་བྱུག་པ་དང་ཕྲེང་
བའི་གཏོར་མ་བཏང་ན། གཏོར་མ་དེས་ནད་དེ་ལས་ལྡང་བར་འགྱུར་རོ། །ལྷ་མཚམས་ལ་སྐྱེས་པ་འམ་བུད་མེད་ནད་ཀྱིས་བཏབ་པ་ནི་ཟླ་བ་ཕྱེད་ཀྱི་བར་དུ་ན་བར་འགྱུར་ཞིང་དེ་ནས་སོས་པར་འགྱུར་ཏེ། དེའི་ལྷ་ཉི་མ་ཡིན་པས་
མར་གྱིས་གང་བའི་གཏོར་མ་བཏང་ན། གཏོར་མ་དེས་ནད་དེ་ལས་ལྡང་བར་འགྱུར་རོ། །སྣྲོན་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་ནད་ཚབས་ཆེ་ཞིང་ཞག་བཅུ་གསུམ་ན་བར་འགྱུར་ཞིང་དེ་ནས་སོས་པར་འགྱུར་ཏེ། དེའི་ལྷ་ནི་

71-1-283b

དབང་པོ་ཡིན་ཏེ། བྱུག་པ་དང་ཕྲེང་བའི་གཏོར་མ་བཏང་ན། གཏོར་མ་དེས་ནད་དེ་ལས་ལྡང་བར་འགྱུར་རོ། །སྣྲུམས་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་ཟླ་བ་གཅིག་ན་བར་འགྱུར་ཞིང་དེ་ནས་སོས་པར་འགྱུར་ཏེ། དེའི་
ལྷ་ནི་དམངས་རིགས་ཡིན་པས་ཤའི་གཏོར་མ་བཏང་ན། གཏོར་མ་དེས་ནད་དེ་ལས་ལྡང་བར་འགྱུར་རོ། །ཆུ་སྟོད་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་ནད་ཚབས་ཆེ་ཞིང་ཟླ་བ་བརྒྱད་ཀྱི་བར་དུ་ན་བར་འགྱུར་ཞིང་དེ་ནས་སོས་
པར་འགྱུར་ཏེ། དེའི་ལྷ་ནི་ཆུ་ལྷ་ཡིན་པས་འབྲས་དང་ཏིལ་བཏགས་པའི་གཏོར་མ་བཏང་ན། གཏོར་མ་དེས་ནད་དེ་སོས་པར་འགྱུར་རོ། །ཆུ་སྨད་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་ཞག་བདུན་གྱི་བར་དུ་ན་ཞིང་དེ་ནས་
སོས་པར་འགྱུར་ཏེ། དེའི་ལྷ་ནི་སྣ་ཚོགས་པ་ཡིན་པས་འབྲས་དང་འོ་ཐུག་གི་གཏོར་མ་བཏང་ན། གཏོར་མ་དེས་ནད་དེ་ལས་ལྡང་བར་འགྱུར་རོ། །གྲོ་བཞིན་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་ནད་ལྕི་ཞིང་ལོ་གཅིག་
གི་བར་དུ་ན་བར་འགྱུར་ཏེ། དེའི་ལྷ་ནི་ཁྱབ་འཇུག་ཡིན་པས་བྱུག་པ་དང་། ཕྲེང་བའི་གཏོར་མ་བཏང་ན། གཏོར་མ་དེས་ནད་དེ་ལས་སོས་པར་འགྱུར་རོ། །མོན་གྲེ་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་ནད་ལྕི་ཞིང་
ཟླ་བ་བཅུ་གསུམ་གྱི་བར་དུ་ན་བར་འགྱུར་ཏེ། དེའི་ལྷ་ནི་བ་སུ་དེ་བ་ཡིན་པས་བྱུག་པ་དང་། ཕྲེང་བའི་གཏོར་མ་བཏང་ན། གཏོར་མ་དེས་ནད་དེ་ལས་ལྡང་བར་འགྱུར་རོ། །མོན་གྲུ་ལ་སྐྱེས་པ་འམ། བུད་མེད་ནད་ཀྱིས་བཏབ་
ན་ཞག་བཅུ་གསུམ་གྱི་བར་དུ་ན་བར་འགྱུར་ཞིང་། དེ་ནས་སོས་པར་འགྱུར་ཏེ། དེའི་ལྷ་ནི་ཆུ་ལྷ་ཡིན་པས་འབྲས་དང་འོ་ཐུག་གི་གཏོར་མ་བཏང་ན། གཏོར་མ་དེས་ནད་དེ་ལས་ལྡང་བར་འགྱུར་རོ། །ཁྲུམས་སྟོད་ལ་སྐྱེས་པ་འམ་
བུད་མེད་ནད་ཀྱིས་བཏབ་པར་གྱུར་ན། ཞག་བདུན་ན་བར་འགྱུར་ཞིང་། དེ་ནས་སོས་པར་འགྱུར་ཏེ། དེའི་ལྷ་ནི་ཀླུ་ཡིན་པས་བྱུག་པ་དང་། ཕྲེང་བའི་གཏོར་མ་བཏང་ན། གཏོར་མ་དེས་ནད་དེ་ལས་ལྡང་བར་འགྱུར་རོ། །ནམ་གྲུ་ལ་

71-1-284a

སྐྱེས་པ་འམ། བུད་མེད་ནད་ཀྱིས་བཏབ་པ་ནི་ནད་ཡང་ཞིང་ཞག་ཉི་ཤུ་རྩ་བརྒྱད་ན་བར་འགྱུར་ཞིང་དེ་ནས་སོས་པར་འགྱུར་ཏེ། དེའི་ལྷ་ནི་རྒྱལ་ཡིན་པས་སྤོས་དང་མེ་ཏོག་གི་ཕྲེང་བའི་གཏོར་མ་བཏང་ན། གཏོར་
མ་དེས་ནད་དེ་ལས་ལྡང་བར་འགྱུར་རོ། །ཐ་སྐར་ལ་སྐྱེས་པ་འམ། བུད་མེད་ནད་ཀྱིས་བཏབ་པར་གྱུར་ན་ཟུག་ཟེར་ཆེ་ལ་ཞག་ཉི་ཤུ་རྩ་བརྒྱད་ཀྱི་བར་དུ་ན་བར་འགྱུར་ལ། དེ་ནས་ཡང་བུད་མེད་དང་སྐྱེས་པ་ལ་འབྱུང་ཞིང་
ཐུན་གསུམ་པ་ནི་ཞིང་རྨོ་བའི་རང་བཞིན་གྱི་ལས་བྱེད་པ་རྣམས་ལ་གནོད་པ་འབྱུང་ངོ་། །མར་ངོ་ལ་ནི་དྲག་ཤུལ་གྱི་ལས་བྱེད་པའི་གཏུམ་པོ་རྣམས་ལ་ནད་འབྱུང་ངོ་། །ཡར་ངོ་ལ་ནི་བྲམ་ཟེ་མཆོད་སྦྱིན་བྱེད་པ་དང་། ཞིང་པ་
རྣམས་དང་། བྱིས་པ་རྣམས་དང་། རྒན་མོ་རྣམས་དང་། ཆོས་ལ་གནས་པའི་གཙོ་བོ་རྣམས་ལ་ཚ་བའི་ནད་འབྱུང་བར་འགྱུར་རོ། །དམན་པ་དང་། དགེ་བ་དང་། དམའ་བར་འགྱུར་བ་རྣམས་ཤེས་ཤིང་གང་གིས་སྔ་མའི་རང་
བཞིན་དུ་གྱུར་པ་ཤེས་པའི་བྲམ་ཟེའི་ཉི་མར་གྱུར་པར་བལྟའོ། །ཡང་ཕུར་བུའི་མཉམ་པའི་དགེ་བའི་ལས་རྣམ་པ་བཞི་དང་། དམངས་རིགས་ཀྱི་ལས་རྣམ་པ་བཞི་དང་། མཉམ་པའི་སྙན་དངགས་ཀྱི་ལས་རྣམས་ཤེས་
པ་དང་། སོ་མའི་ལས་རྣམ་པ་བཞི་དང་། ཚངས་པའི་ལས་དེས་མཉམ་པར་ཤེས་པ་རྣམས་ལ་གནོད་པ་འབྱུང་ངོ་། །ཀྱེ་གཞན་ཡང་པད་མའི་སྙིང་པོ་རྒྱུ་སྐར་ཉི་ཤུ་རྩ་བརྒྱད་པོ་དེ་དག་གི་ནད་ཀྱི་ལེའུ་བཤད་པར་བྱའོ། །
སྨིན་དྲུག་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ཞག་བཞི་ནས་སོས་པར་བསྟན་ཏོ། །དེའི་ལྷ་ནི་མེ་ལྷ་ཡིན་པས་ཞོའི་གཏོར་མ་བཏང་ན། གཏོར་མ་དེས་ནད་ལས་ལྡང་བར་བཤད་དོ། །སྣར་མ་ལ་སྐྱེས་པ་འམ། བུད་
མེད་ནད་ཀྱིས་བཏབ་པ་ནི་ཞག་ལྔའི་བར་དུ་ན་བར་འགྱུར་རོ། །དེ་ནས་སོས་པར་འགྱུར་ཏེ། དེའི་ལྷ་ནི་སྐྱེ་དགུའི་བདག་པོ་ཡིན་པས་མེ་ཏོག་གི་ཕྲེང་བ་གཙང་མའི་གཏོར་མ་བཏང་བས། གཏོར་མའི་ལས་དེས་ནད་ལས་ལྡང་

71-1-284b

བར་འགྱུར་རོ། །མགོ་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་ཞག་བརྒྱད་ནས་ནད་དེ་ལས་སོས་པར་འགྱུར་རོ། །དེའི་ལྷ་ནི་ཟླ་བ་ཡིན་པས་སྲན་སྔོན་གྱི་ཁུར་བའི་གཏོར་མ་བཏང་ན། གཏོར་མ་དེས་ནད་ལས་
ལྡང་བར་འགྱུར་རོ། །ལག་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་ཞག་བཅུའི་བར་དུ་ན་བར་འགྱུར་ཞིང་དེ་ནས་སོས་པར་འགྱུར་རོ། །དེའི་ལྷ་ནི་དྲག་པོ་ཡིན་པས་འབྲས་དང་། འོ་ཐུག་གི་གཏོར་མ་བཏང་ན། 
གཏོར་མ་དེས་ནད་དེ་ལས་ལྡང་བར་འགྱུར་རོ། །ནམ་སོ་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་ཞག་བརྒྱད་ཀྱི་བར་དུ་ན་ཞིང་དེ་ནས་སོས་པར་འགྱུར་རོ། །དེའི་ལྷ་ནི་ཉི་མ་ཡིན་པས་སྤོས་དང་བྱུག་པའི་གཏོར་
མ་བཏང་ན། གཏོར་མ་དེས་ནད་དེ་ལས་ལྡང་བར་འགྱུར་རོ། །རྒྱལ་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་ཞག་ལྔའི་བར་དུ་ན་ཞིང་དེ་ནས་སོས་པར་འགྱུར་རོ། །དེའི་ལྷ་ནི་ཕུར་བུ་ཡིན་པས་བྱུག་པ་དང་། ཕྲེང་བའི་
གཏོར་མ་བཏང་ན། གཏོར་མ་དེས་ནད་དེ་ལས་ལྡང་བར་འགྱུར་རོ། །སྐག་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་སྨན་གྱིས་གསོ་བས་མི་སོས་ཏེ། དེའི་ལྷ་ནི་སྦྲུལ་ཡིན་པའི་ཕྱིར་རོ། །མཆུ་ལ་སྐྱེས་པ་འམ། 
བུད་མེད་ནད་ཀྱིས་བཏབ་པ་ནི་ཞག་བརྒྱད་ཀྱི་བར་དུ་ན་ཞིང་། དེ་ནས་སོས་པར་འགྱུར་ཏེ། དེའི་ལྷ་ནི་མཚུན་ཡིན་པས་འབྲུ་དང་ཏིལ་བཏགས་པའི་རི་ལུའི་གཏོར་མ་བཏང་ན། གཏོར་མ་དེས་ནད་དེ་ལས་ལྡང་བར་
འགྱུར་རོ། །གྲེ་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་ཞག་བདུན་ན་བར་འགྱུར་ཞིང་། དེ་ནས་ནད་དེ་ལས་སོས་པར་འགྱུར་ཏེ། དེའི་ལྷ་ནི་ཀླུ་ཡིན་པས་བྱུག་པ་དང་། ཕྲེང་བའི་གཏོར་མ་བཏང་ན། གཏོར་
མ་དེས་ནད་དེ་ལས་ལྡང་བར་འགྱུར་རོ་། །དབོ་ལ་སྐྱེས་པ་འམ། བུད་མེད་ནད་ཀྱིས་བཏབ་པ་ནི་གསོ་བའི་སྨན་གྱིས་སོས་པར་མི་འགྱུར་ཏེ། དེའི་ལྷ་ནི་གཤིན་རྗེ་ཡིན་པའི་ཕྱིར་རོ། །མེ་བཞི་ལ་སྐྱེས་པ་འམ། བུད་

71-1-285a

མེད་ནད་ཀྱིས་བཏབ་པ་ནི་ཞག་ལྔ་ན་བར་འགྱུར་ཞིང་། དེ་ནས་སོས་པར་འགྱུར་ཏེ། དེའི་ལྷ་ནི་ཉི་མ་ཡིན་པས་བྱུག་པ་དང་། ཕྲེང་བའི་གཏོར་མ་ན། གཏོར་མ་དེས་ནད་དེ་ལས་ལྡང་བར་འགྱུར་རོ། ནག་
པ་ལ་སྐྱེ་བ་འམ། བུད་མེད་ནད་ཀྱིས་བཏབ་པ་སོས་པར་འགྱུར་ཏེ། དེའི་ལྷ་ནི་དྲི་ཟ་ཡིན་པས་ནས་ཀྱི་ལྗང་པུའི་གཏོར་མ་བཏང་ན། གཏོར་མ་དེས་ནད་དེ་ལས་ལྡང་བར་འགྱུར་རོ། །བྲ་ཉེ་ལ་སྐྱེས་པ་འམ། བུད་མེད་
གང་ནད་ཀྱིས་བཏབ་པར་གྱུར་ན་སྨན་གྱིས་མི་འཚོ་སྟེ། དེའི་ལྷ་ནི་གཤིན་རྗེ་ཡིན་པའི་ཕྱིར་རོ། །མཁས་པས་ཚུལ་ཁྲིམས་ལ་སྦྱར་བར་བྱ་སྟེ། དེས་མཐོ་རིས་སུ་འགྲོ་བར་འགྱུར་རོ། །ཀྱེ་པད་མའི་སྙིང་པོ་དེ་ནི་ནད་ཀུན་
ནས་འབྱུང་བ་ཞེས་བྱ་བའི་ལེའུ་ཡིན་ནོ། །གཞན་ཡང་ཀྱེ་པད་མའི་སྙིང་པོ་བཅིངས་པ་ཐར་པ་ཞེས་བྱ་བའི་ལེའུ་བཤད་ཀྱིས་ཉོན་ཅིག །ཀྱེ་པད་མའི་སྙིང་པོ་སྨིན་དྲུག་ལ་བཙོན་དུ་བཟུང་བ་ནི་ཞག་གསུམ་ནས་ཐར་བར་འགྱུར་རོ། །
ཞེས་བསྟན་ཏོ། །སྣར་མ་ལ་བཙོན་དུ་བཟུང་བ་ནི་ཡང་ཞག་གསུམ་ནས་ཐར་བར་འགྱུར་རོ། །མགོ་ལ་བཙོན་དུ་བཟུང་བ་ནི་ཞག་ཉི་ཤུ་ནས་ཐར་བར་འགྱུར་རོ། །ལག་ལ་བཙོན་དུ་བཟུང་བ་ནི་ཟླ་བ་ཕྱེད་ནས་ཐར་བར་
འགྱུར་རོ། །ནམ་སོ་ལ་བཙོན་དུ་བཟུང་བ་ནི་ཞག་གཅིག་ནས་ཐར་བར་འགྱུར་རོ། །རྒྱལ་ལ་བཙོན་དུ་བཟུང་བ་ནི་ཞག་གསུམ་ནས་ཐར་བར་འགྱུར་རོ། །སྐག་ལ་བཙོན་དུ་བཟུང་བ་ནི་ཡང་ཞག་གསུམ་ནས་ཐར་བར་འགྱུར་རོ། །
མཆུ་ལ་བཙོན་དུ་བཟུང་བ་ནི་ཞག་བཅུ་དྲུག་ནས་ཐར་བར་འགྱུར་རོ། །གྲེ་ལ་བཙོན་དུ་བཟུང་བ་ནི་ཞག་བཅུ་ནས་ཐར་བར་འགྱུར་རོ། །དབོ་ལ་བཙོན་དུ་བཟུང་བ་ནི་ཞག་བདུན་ནས་ཐར་བར་འགྱུར་རོ། །མེ་བཞི་ལ་བཙོན་
དུ་བཟུང་བ་ནི་ཞག་ལྔ་ནས་ཐར་བར་འགྱུར་རོ། །ནག་པ་ལ་བཙོན་དུ་བཟུང་བ་ནི་ཞག་བདུན་ནས་ཐར་བར་འགྱུར་རོ། །ས་རི་ལ་བཙོན་དུ་བཟུང་བ་ནི་ཞག་བཅུ་གཉིས་ནས་ཐར་བར་འགྱུར་རོ། །ས་ག་ལ་བཙོན་དུ་བཟུང་བ་ནི་

71-1-285b

ཞག་ཉི་ཤུ་རྩ་དྲུག་ནས་ཐར་བར་འགྱུར་རོ། །ལྷ་མཚམས་ལ་བཙོན་དུ་བཟུང་བ་ནི་ཞག་ཉི་ཤུ་རྩ་དགུ་ནས་ཐར་བར་འགྱུར་རོ། །སྣྲོན་ལ་བཙོན་དུ་བཟུང་བ་ནི་ཞག་བཅུ་ནས་ཐར་བར་འགྱུར་རོ། །སྣྲུམས་ལ་བཙོན་དུ་བཟུང་བ་
ནི་ཞག་ཉི་ཤུ་རྩ་དྲུག་ནས་ཐར་བར་འགྱུར་རོ། །ཆུ་སྟོད་ལ་བཙོན་དུ་བཟུང་བ་ནི་ཞག་བཅུ་བཞི་ནས་ཐར་བར་འགྱུར་རོ། །དེ་བཞིན་དུ་ཆུ་སྨད་ལ་ཡང་བརྗོད་པར་བྱའོ། །གྲོ་བཞིན་དང་། མོན་གྲེ་དང་། མོན་གྲུ་དང་། ཁྲུམས་སྟོད་
དང་། ཁྲུམས་སྨད་དང་། ནམ་གྲུ་སྟེ། དེ་དག་ལ་བཙོན་དུ་བཟུང་བ་ནི་ཞག་བཅུ་བཞི་ནས་ཐར་བར་འགྱུར་རོ། །ཐ་སྐར་ལ་བཙོན་དུ་བཟུང་བ་ནི་ཞག་གསུམ་ནས་ཐར་བར་འགྱུར་རོ། །བྲ་ཉེ་ལ་བཙོན་དུ་བཟུང་བ་
ནི་ཉོན་མོངས་ཤིང་མི་ཤོར་བར་བསྟན་ཏོ། །ཀྱེ་པད་མའི་སྙིང་པོ་དེ་དག་ནི་བཅིངས་པ་ཐར་པ་ཞེས་བྱ་བའི་ལེའུ་ཡིན་ནོ། །ཀྱེ་པད་མའི་སྙིང་པོ་གཞན་ཡང་སྨེ་བའི་མཚན་མ་བཤད་པར་བྱ་ཡིས་དེ་ཉོན་ཅིག །མགོ་དཀྱིལ་
ན་སྨེ་བ་ཕྲ་ཞིང་ས་དཀར་པོའི་ཁ་དོག་ལྟ་བུ་ཡོད་ན། བུད་མེད་དེ་ནི་རྒྱལ་པོའི་བཙུན་མོར་འགྱུར་རོ། །དེ་ནི་མཆུ་པད་མ་ལྟར་དམར་བར་འགྱུར་རོ། །བུད་མེད་གང་གི་མགོ་ལ་སྨེ་བ་ཕྲ་ཞིང་ལིག་བུ་མིག་གི་ཁ་དོག་ལྟ་བུ་ཡོད་
ན། དེ་ནི་དམག་དཔོན་གྱི་ཆུང་མར་འགྱུར་ཏེ། ནུ་མ་གཉིས་ཀྱི་དཀྱིལ་ན་ཐིག་ལེ་ལྟ་བུའི་སྨེ་བ་ཡོད་པར་འགྱུར་རོ། །སྨིན་མ་གཉིས་ཀྱི་མཚམས་ན་སྨེ་བ་ཡོད་ན། དེ་ནི་ཁྱིམ་ཐབ་ལས་འཕྱོ་ཞིང་བག་མེད་པར་སྤྱོད་
ལ། ཁྱོ་ལྔ་ཡོད་པར་འགྱུར་ཞིང་། ཟས་དང་སྐོམ་མང་དུ་རྙེད་པར་འགྱུར་རོ། །གསང་བའི་གནས་ན་སྨེ་བའི་ཐིག་ལེ་ཡོད་ན་ཁྱོ་ལྔ་པར་འགྱུར་རོ། །གང་གི་འཁུར་ཚོས་ལ་སྨེ་བ་ཡོད་ན། དེ་ནི་ཁྱིམ་ཐབ་ལས་འཕྱོ་
བར་འགྱུར་ཞིང་བཟོད་པར་དཀའ་བའི་སྡུག་བསྔལ་ཐོབ་པར་འགྱུར་རོ། །བརླའི་ཕྱེ་གཤམ་ན་སྨེ་བ་ཐེག་ལེ་ལྟ་བུ་ཡོད་པ་དང་། རྣ་བ་ལ་སྨེ་བ་ཡོད་པ་ནི་ཐོས་པ་མང་ཞིང་བག་མེད་པར་བསྟན་ཏོ། །གང་གི་

71-1-286a

མཇུག་ཏོ་ན་ཐིག་ལེ་ལྟ་བུའི་སྨེ་བ་ཡོད་པ་ནི་ཐོས་པ་མང་ཞིང་ཁྱིམ་ཐབ་ཀྱི་བརྟུལ་ཞུགས་ཅན་དུ་འགྱུར་རོ། །གང་གི་ཡ་མཆུ་ལ་སྨེ་བ་ནག་པོ་ཡོད་པ་དེ་ནི་བརྫུན་དུ་སྨྲ་ཞིང་ཁྱིམ་ཐབ་ལས་འཕྱོ་
ལ་སྡུག་བསྔལ་མི་བཟད་པ་མྱོང་བར་འགྱུར་རོ། །གང་གི་བརླ་ལ་སྨེ་བ་ཡོད་པ་དེ་ནི་སྔ་མ་དང་འདྲའོ། །གང་གི་མཆུ་ལ་སྨེ་བ་ཡོད་པ་དེ་ནི་བག་ཆུང་ཞིང་ཁྱིམ་ཐབ་ལས་འཕྱོ་བར་བསྟན་ཏོ། །གང་གསང་
བའི་ནང་ན་སྨེ་བ་ཡོད་པ་དེ་ནི་ཟས་དང་། སྐོམ་མང་དུ་རྙེད་པར་འགྱུར་རོ། །ཀོས་ཀོ་དང་གསང་བའི་ནང་ན་སྨེ་བ་ཡོད་པ་ནི་ཁྱིམ་ཐབ་ལས་འཕྱོ་ཞིང་ཟས་དང་གོས་མང་དུ་རྙེད་པར་འགྱུར་རོ། །ཀྱེ་པད་མའི་སྙིང་པོ་དེ་
ནི་སྨེ་བ་ལུང་བསྟན་པ་ཞེས་བྱ་བའི་ལེའུ་འོ། །ཀྱེ་པད་མའི་སྙིང་པོ་གཞན་ཡང་སྐྱེས་པའི་ཡོན་ཏན་གྱི་ལེའུ་བཤད་ཀྱིས་ཉོན་ཅིག །སྨིན་དྲུག་ལ་སྐྱེས་པའི་མི་ནི་དཀའ་ཐུབ་དང་ལྡན་ཞིང་རྐུན་མ་ལ་དགའ་ལ་དཔའ་
ཞིང་གཏུམ་པ་དང་། ལུགས་སྟོན་པའི་སྐྱེས་བུར་འགྱུར་རོ། །སྣར་མ་ལ་སྐྱེས་པའི་སྐྱེས་བུ་ནི་ནོར་དང་ལྡན་པ་དང་། ཆོས་ལ་དགའ་ཞིང་བརྩོན་འགྲུས་བརྟན་ཞིང་དཔའ་ལ་བདེ་བ་དང་ལྡན་པར་འགྱུར་རོ། །མགོ་ལ་སྐྱེས་
པའི་སྐྱེས་བུ་ནི་འཇམ་ཞིང་མཛེས་ལ་བལྟ་བར་འོས་པ་དང་། ཁྱད་པར་དུ་བུད་མེད་ལ་དགའ་བར་འགྱུར་རོ། །ལག་ལ་སྐྱེས་པ་ནི་གསོད་ཅིང་གཏུམ་ལ་ཕ་རོལ་འཇིགས་པར་བྱེད་ཅིང་ལས་དྲག་པོ་ལ་སྦྱོར་ལ་ཁང་པོ་བཟང་
པོ་རྙེད་པར་འགྱུར་རོ། །ནམ་སོ་ལ་སྐྱེས་པ་ནི་འདོད་པ་ཆུང་ཞིང་བློ་དང་ལྡན་ལ་ཆོས་དང་ཚུལ་ཁྲིམས་དང་བཅས་ཤིང་སྤྲོ་ཐུང་བར་འགྱུར་རོ། །རྒྱལ་ལ་སྐྱེས་པ་ནི་བྲམ་ཟེ་ཆེན་པོ་གཟི་བརྗིད་དང་ལྡན་པ་འམ། 
རྒྱལ་རིགས་སུ་གྱུར་ནས་རྗེའུ་རིགས་དང་། དམངས་རིགས་ཀྱིས་མཆོད་པར་འགྱུར་རོ། །སྐག་ལ་སྐྱེས་པ་ནི་སྣ་འབུད་ཅིང་ཁྲོ་ལ་སྤྲོ་ཐུང་ཞིང་སྐྱེས་བུ་ངན་པ་རྣམས་ལ་ལུང་གསོལ་བར་བསྟན་ཏོ། །

71-1-286b

མཆུ་ལ་སྐྱེས་པ་ནི་ཤེས་རབ་དང་ལྡན་ཞིང་ལག་པ་གཙང་ལ་བསོད་ནམས་ཆེ་ཞིང་། དེ་བཞིན་དུ་ནོར་དང་། ལོངས་སྤྱོད་དུ་ལྡན་པར་འགྱུར་རོ། །གྲེ་ལ་སྐྱེས་པ་ནི་ཆོས་མ་ཡིན་པའི་བློ་དང་ལྡན་ཞིང་རྟག་ཏུ་བླ་མ་
ལ་སྨོད་པར་འགྱུར་རོ། །དབོ་ལ་སྐྱེས་པ་ནི་ལོངས་སྤྱོད་དང་ལྡན་ཞིང་ལྷའི་མངོན་པར་ཤེས་པ་དང་ལྡན་པའི་བསོད་ནམས་ཀྱི་སྐལ་བ་ཅན་གྱི་སྐྱེས་བུར་འགྱུར་རོ། །མེ་བཞི་ལ་སྐྱེས་པ་ནི་བདག་ཉིད་སྐྱོན་མེད་ཅིང་
རྣམ་པར་གནོན་ལ་ཟས་བཟང་པོ་ཟ་ཞིང་དམག་དཔོན་བྱེད་ཅིང་འཇོམས་པར་འགྱུར་རོ། །ནག་པ་ལ་སྐྱེས་པ་ནི་མིག་མཛེས་ཤིང་གཏམ་སྣ་ཚོགས་ལ་མཁས་ལ། བལྟ་ན་སྡུག་ཅིང་དབང་དང་ལྡན་ལ་ཚུལ་
ཁྲིམས་དང་ལྡན་པར་འགྱུར་རོ། །ས་རི་ལ་སྐྱེས་པ་ནི་གཉེན་དང་ལྡན་ཞིང་མཁས་ལ་འཇམ་ཞིང་དད་པ་ཆེ་ལ་གྲོགས་དད་ཆེ་བར་འགྱུར་རོ། །ས་ག་ལ་སྐྱེས་པའི་སྐྱེས་བུ་ནི་གཟི་བརྗིད་དང་ལྡན་ལ་ནོར་མང་ཞིང་
དཔའ་ཞིང་ཕ་རོལ་གནོན་ལ། གཏོང་བ་དང་ལྡན་ཞིང་སྐལ་བ་ཆེ་བར་འགྱུར་རོ། །ལྷ་མཚམས་ལ་སྐྱེས་པའི་སྐྱེས་བུ་ནི་གྲོགས་པོ་དང་ལྡན་ཞིང་ཁྱིམ་དང་ལྡན་ལ། དག་ཅིང་བྱས་པ་གཟོ་ལ་ཆོས་ཀྱི་བདག་ཉིད་
ཅན་དུ་འགྱུར་རོ། །སྣྲོན་ལ་སྐྱེས་པའི་སྐྱེས་བུ་ནི་གྲོགས་དད་ཆེ་ལ་ཀུན་ནས་རྒྱལ་ཞིང་འཕོང་གི་བསྟན་བཅོས་ལ་མཁས་ཤིང་བུད་མེད་ལ་དགའ་བའི་བློ་ཅན་དུ་འགྱུར་རོ། །སྣྲུམས་ལ་སྐྱེས་པ་ནི་བྱས་པ་
མི་གཟོ་ལ་ཆོས་ལ་མི་དགའ་ཞིང་དཔའ་ཞིང་བརྟན་ལ་སྡིག་པ་ཅན་དུ་འགྱུར་རོ། །ཆུ་སྟོད་ལ་སྐྱེས་པའི་སྐྱེས་བུ་ནི་སེར་སྣ་ཆེ་ལ་དབང་པོ་རྒོད་པ་དང་། ཉའི་ཤ་ལ་སྲེད་ཅིང་ཤན་པར་འགྱུར་རོ། །ཆུ་
སྨད་ལ་སྐྱེས་པའི་སྐྱེས་བུ་ནི་སྤྲོ་ཐུང་ཞིང་གཏོང་བ་ལ་དགའ་ཞིང་མཁས་ལ། དགའ་མཛའ་དང་ལྡན་ཞིང་གཉེན་བཤེས་མང་བར་འགྱུར་རོ། །གྲོ་བཞིན་ལ་སྐྱེས་པ་ནི་བསྟན་བཅོས་ལ་མཁས་

71-1-287a

ཤིང་བྱ་བ་དང་ལྡན་ལ་ཚེ་རིང་བར་འགྱུར་རོ། །མོན་གྲེ་ལ་སྐྱེས་པ་ནི་བློ་རྒོད་ཅིང་ནོར་མང་ལ་སྐྱེས་བུ་ཐམས་ཅད་འཇོམས་པར་འགྱུར་རོ། །མོན་གྲུ་ལ་སྐྱེས་པ་ནི་ཞེ་སྡང་ཆེ་ཞིང་ཚུལ་
ཁྲིམས་དང་མི་ལྡན་ལ་བྱི་རྒྱུག་པར་འགྱུར་རོ། །ཁྲུམས་སྟོད་ལ་སྐྱེས་པ་ནི་སྤྱོད་པའི་ཡོན་ཏན་དང་ལྡན་ཞིང་བྱས་པ་གཟོ་ལ་དེ་ཁ་ར་བར་འགྱུར་རོ། །ཁྲུམས་སྨད་ལ་སྐྱེས་པ་ནི་ཤིན་དུ་མཁས་
ཤིང་བློ་དང་ལྡན་ལ་བུ་མང་ཞིང་ཆོས་དང་ཚུལ་ཁྲིམས་ལྡན་ཞིང་ནོར་མང་བར་འགྱུར་རོ། །ནམ་གྲུ་ལ་སྐྱེས་པ་ནི་ཆོས་ཤེས་ཤིང་རིག་པ་སྟེན་ལ་དབུལ་ཞིང་ནོར་ཉུང་ལ་གཏོང་བ་ལ་དགའ་བར་འགྱུར་རོ། །
ཐ་སྐར་ལ་སྐྱེས་པ་ནི་མཁས་ཤིང་སྐྱེ་བོའི་ཚོགས་དགའ་ལ་དཔའ་ཞིང་སྐལ་བ་དང་ལྡན་པར་འགྱུར་རོ། །བྲ་ཉེ་ལ་སྐྱེས་པ་ནི་སྡིག་པ་ལ་སྤྱོད་ཅིང་མི་མཁས་ལ་སྔར་ཞིང་སྦྱིན་པ་ལ་དགའ་ཞིང་
གཞན་ལ་རྟེན་པས་འཚོ་བར་འགྱུར་རོ། །ཀྱེ་པད་མའི་སྙིང་པོ་དེ་ནི་སྐྱེས་པའི་ཡོན་ཏན་གྱི་ལེའུའོ། །གཞན་ཡང་བྲམ་ཟེ་བདག་གིས་སྔོན་གྱི་གནས་རྗེས་སུ་དྲན་པའི་ཤེས་པས་མངོན་སུམ་
དུ་བྱས་ནས། སེམས་ཀྱིས་རིག་པ་རྣམས་གཏན་ལ་ཕབ་ཅིང་སྣ་ཚོགས་པའི་སྔོན་གྱི་གནས་རྗེས་སུ་དྲན་ཏེ། ཚངས་པ་མཆོག་ཏུ་གྱུར་པ་དེ། ཁྱོད་གཞན་ཞིག་ཡིན་སྙམ་ན། དེ་
ལྟར་བལྟ་བར་མི་བྱ་སྟེ། ང་ཉིད་དེའི་ཚེ་དེའི་དུས་ན་ལྷ་རྣམས་ཀྱི་ཚངས་པ་མཆོག་ཏུ་གྱུར་ཏོ། །བདག་དེ་ནས་ཤི་འཕོས་ནས་ལྷའི་དབང་པོ་བརྒྱ་བྱིན་དུ་གྱུར་ཏོ། །དེ་ནས་ཤི་འཕོས་
ནས་བྲམ་ཟེ་དགོན་པ་པ་མུ་ཁྱུད་གཽ་ཏ་མ་ཞེས་བྱ་བར་གྱུར་ཏོ། །དེ་ནས་ཤི་འཕོས་ནས་དྲང་སྲོང་དཀར་པོའི་ཏོག་ཅེས་བྱ་བར་གྱུར་ཏོ། །དེ་ནས་ཤི་འཕོས་ནས་ཐ་མལ་པའི་པན་ཌི་ཏ་ནེ་ཙོ་

71-1-287b

ཞེས་བྱ་བར་གྱུར་ཏོ། །དེའི་ཚེ་བདག་གིས་རིག་བྱེད་བཞི་བཀླགས་ཏེ། འདི་ལྟ་སྟེ། རྒྱལ་ཞེས་བྱ་བའི་གནོད་པའི་ཕྱོགས་དང་། སྡེབ་སྦྱོར་གྱི་གནོད་པ་དང་། ཆ་ཉི་ཤུ་རྩ་གཅིག་པ་བྱས་ཤིང་སྲིད་
སྲུང་རྣམས་བདག་གིས་བྱས་སོ། །བྲམ་ཟེ་ཁྱོད་ཡང་དེའི་ཚེ་དེའི་དུས་ན་དྲང་སྲོང་བ་སུ་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་དེ་དེ་ལྟར་མི་བལྟ་སྟེ། ང་ཉིད་དེའི་ཚེ་དེའི་དུས་ན་དྲང་སྲོང་བ་སུ་
ཞེས་བྱ་བར་གྱུར་ཏོ། །དེའི་ཚེ་ངས་ཤིང་མཁན་གྱི་བུ་མོ་སེར་སྐྱ་མོ་ཞེས་བྱ་བ་ཆུང་མའི་དོན་དུ་བླངས་སོ། །དེ་ལ་བདག་ཀུན་དུ་ཆགས་པས་རྫུ་འཕྲུལ་ཉམས་ཤིང་བསམ་གཏན་དང་བྲལ་ཏེ། དེས་
བདག་ཉིད་འགྱོད་ནས་དེའི་ཚེ་དག་བྱེད་ཀྱི་སྔགས་འདི་དག་སྨྲས་ཏེ། ཨོཾ་བྷུར་བྷུ་བ་སྭ། ཏད་ས་བྷི་ཏུ་ར་བ་རེ་ཎྱྃ་བྷར་གོ་དེ་བ་ས་དྷྲི་མ་ཧི་དྷི་ཡོ་ན་བྲ་ཛོ་ད་ཡ། དེ་བས་ན་བྲམ་ཟེ་ངས་ཁྱོད་ལ་བཤད་
པར་བྱས་ཏེ། བདག་ནི་ཐ་མལ་པ་ཙམ་ཉིད་དེ། འཇིག་རྟེན་དུ་འདི་ལྟར་བྲམ་ཟེ་ཞེས་བྱ་བ་དང་། རྒྱལ་རིགས་ཤེས་བྱ་བ་དང་། རྗེའུ་རིགས་ཤེས་བྱ་བ་དང་། དམངས་རིགས་ཤེས་བྱ་བ་འདི་
ཐམས་ཅད་གཅིག་པ་ཉིད་དེ། ཐམས་ཅད་ཐ་དད་པ་མ་ཡིན་ནོ། །དེ་བས་ན་བདག་གི་བུ་གཞོན་ནུ་སྟག་རྣ་ལ་བུ་མོ་གཟུགས་བཟང་མོ་ཆུང་མའི་དོན་དུ་བྱིན་ཅིག །གང་རིན་ཇི་སྙེད་བབ་པ་དེ་འདོད་
པ་བཞིན་དུ་གཞལ་བར་བྱའོ། །གདོལ་པའི་རྒྱལ་པོ་ཏྲེ་ཤང་ཀུ་ལས་ཚིག་དེ་ལྟ་བུ་དེ་ཐོས་པ་དང་། བྲམ་ཟེ་པད་མའི་སྙིང་པོས་འདི་སྐད་ཅེས་སྨྲས་སོ། །ཁྱོད་ནི་གཅིག་ཏུ་གྱུར་པའི་གཙོ་བོ་
མཉམ་པ་མེད་པ། ལྷ་དང་བཅས་པའི་འཇིག་རྟེན་ན་མཉམ་པ་མེད་པའི་བྲམ་ཟེ་ཆེན་པོར་གྱུར་ཏེ། ཁྱོད་ཀྱི་བུ་ལ་ངའི་བུ་མོ་གཟུགས་བཟང་མོ་སྦྱིན་པར་བྱས་སྟེ། གཞོན་ནུ་སྟག་རྣ་དང་། གཟུགས་

71-1-288a

བཟང་མོ་གཉིས་ཚུལ་ཁྲིམས་དང་གཟུགས་དང་ཡོན་ཏན་དང་ལྡན་ཞིང་བཟང་ཞིང་མཛེས་པ་ཡིན་ཏེ། འདི་ནི་བདག་ཀྱང་འདོད་པ་ཡིན་ནོ། །དེ་ནས་བྲམ་ཟེའི་ཁྱེའུ་ལྔ་བརྒྱ་པོ་དེ་དག་གིས་སྒྲ་
ཆེན་པོས་ཀྱེ་རིག་པ་དང་ལྡན་པའི་བྲམ་ཟེ་རྣམས་གདོལ་པ་དང་གཉེན་མ་མཛད་ཅིག །མཁན་པོ་རིག་པ་དང་ལྡན་པའི་བྲམ་ཟེ་རིག་པ་གསུམ་རྣམས་གདོལ་པ་དང་ལྷན་ཅིག་ཏུ་གཉེན་མཛད་དམ། དེ་ནས་
བྲམ་ཟེ་པད་མའི་སྙིང་པོས་གླེང་གཞི་བཤད་ཅིང་ལན་གྱི་ཚིགས་སུ་བཅད་པ་རྣམས་སྨྲས་པ། ཏྲེ་ཤང་ཀུ་དེས་གང་སྨྲས་པ། །དེ་བཞིན་དེ་ཉིད་དེ་ལྟ་བུར། །དེ་ཉིད་ཡིན་ཏེ་བརྫུན་པ་མིན། །ཡང་དག་
མཐར་གྱུར་བདེན་པ་ཉིད། །དེ་ནས་བྲམ་ཟེ་པད་མའི་སྙིང་པོས་བྲམ་ཟེའི་ཁྱེའུ་དེ་དག་ལ་སྨད་ནས། གདོལ་པའི་རྒྱལ་པོ་ཏྲེ་ཤང་ཀུ་ལ་འདི་སྐད་ཅེས་སྨྲས་སོ། །ཀྱེ་ཏྲེ་ཤང་ཀུ་ཚངས་པ་འདི། །མི་མཇེད་
བདག་པོས་འབྱུང་བཞི་ལས། །སྐྱེས་བུ་རྣམ་པར་སྤྲུལ་པ་སྟེ། །མགོ་ནི་སྐར་ཚོགས་ནམ་མཁའ་ཡིན། །དེ་བཞིན་ལྟོ་བ་བར་སྣང་ཡིན། །རི་བོ་རྣམས་ནི་བརླ་གཉིས་ཏེ། །རྐང་པ་གཉིས་ནི་ས་རུ་
གནས། །ཉི་མ་ཟླ་བ་མིག་གཉིས་ཡིན། །རྩྭ་དང་ཤིང་རྣམས་བ་སྤུ་སྟེ། །མཆི་མ་བར་སྣང་ཆར་པའོ། །རྒྱ་མཚོ་རྣམས་ནི་གཅིན་དུ་འདོད། །རི་བོ་རྣམས་ནི་ཕྱི་ས་ཡིན། །དེ་ནི་ཚངས་པ་མི་མཇེད་བདག །ཁྱོད་
དང་ཤེས་པ་མཉམ་པ་མེད། །དེ་དེ་བཞིན་དུ་བདག་གིས་བརྗོད། །ཀྱེ་ཏྲེ་ཤང་ཀུ་དེ་ལ་ནི་འདིར་བདག་ཉིད་ཅི་ཞིག་སྨྲ་རུ་ཡོད། ཡང་རང་གི་མཚན་ཉིད་མངོན་སུམ་དུ་དཔྱད་པས་ཕ་དང་མས་སྦྱོར་བ་བྱས་པ་ལས་
གྱུར་ཅིང་། བདེ་བ་འདོད་པས་བསླུས་ནས་སེམས་ཅན་རྣམས་མངལ་དུ་འཇུག་པ་ཡིན་ཏེ། འགའ་ཡང་མ་སྐྱེས་པ་ནི་མེད་དོ། །འཇིག་རྟེན་ཐམས་ཅད་ནི་སྐྱེ་བ་ཡིན་ཏེ། བྲམ་ཟེའི་རིགས་དང་། རྒྱལ་རིགས་དང་། 

71-1-288b

རྗེའུ་རིགས་དང་། དམངས་རིགས་དེ་དག་ཐམས་ཅད་ལ་ཞར་བ་དང་། ལག་པ་འཇས་པ་དང་། འཐེང་པོ་དང་། མཛེ་དང་། འབྲུམ་བུ་དང་། རྗེད་བྱེད་རྣམས་དང་། ཤ་བཀྲ་དང་། དེ་བཞིན་དུ་སེམས་ཅན་ཐམས་ཅད་
ཐ་དད་པར་གནས་པའི་ཕྱིར་ཏེ། རུས་པ་དང་། ལྤགས་པ་དང་། སེན་མོ་དང་། ཤ་དང་། བདེ་བ་དང་། སྡུག་བསྔལ་དང་། གཤང་བ་དང་། གཅི་བ་དང་ལྡན་ཞིང་དབང་པོ་རྣམས་ནི་རྣམ་པར་དབྱེ་བ་མེད་པའི་ཕྱིར་རིགས་བཞི་
འགྲུབ་པར་མི་འགྱུར་རོ། །བྲམ་ཟེ་གལ་ཏེ་བྲམ་ཟེའི་སྔགས་ཀྱི་འབྲས་བུ་མཐོ་རིས་སུ་འགྲོ་བ་ཡིན་ན། དགེ་སྡིག་གི་ལས་ཀྱི་འབྲས་བུ་མེད་ཅིང་ཆུད་ཟ་བར་འགྱུར་རོ། །གང་ཞིག་འགྲོ་བ་ལྔ་རྣམས་ལ་དགེ་སྡིག་
ལས་ཀྱི་འབྲས་བུ་རྣམ་པར་སྨིན་པར་ནི་མཐོང་ངོ་། །དེ་ནས་གདོལ་པའི་རྒྱལ་པོ་ཏྲེ་ཤང་ཀུས་བྲམ་ཟེ་པད་མའི་སྙིང་པོ་གྲགས་པས་ཚར་བཅད་དོ། །དེ་ནས་བྲམ་ཟེ་དེས་གདོལ་པའི་རྒྱལ་པོ་
ཏྲེ་ཤང་ཀུ་ལ་སྨྲས་པ། ཁྱོད་ནི་ཚངས་པ་དང་། ལྷའི་དབང་པོ་ཀཽ་ཤི་ཀ་དང་། གཽ་ཏ་མ་རྩིབས་ཀྱི་མུ་ཁྱུད་དང་། དཀར་པོའི་ཏོག་དང་། ནེ་ཙོ་མཁས་པའི་རིག་བྱེད་རྣམས་བཤད་པར་གྱུར་
ཅིང་། ལྷའི་དྲང་སྲོང་ཆེན་པོར་གྲགས་པ་དང་ལྡན་པའི་མཆོག་ད་ལྟར་ཡང་ཁྱོད་ཉིད་ཡིན་ཏེ། འདིར་རིག་པ་མཆོག་གིས་བསྟན་བཅོས་ཐམས་ཅད་བྱེད་ཅིང་མཆོག་ཏུ་ཁྱད་པར་ཅན་འཇིག་རྟེན་འདིའི་མཆོག་ཏུ་གྱུར་
པ་རིགས་པ་དང་ལྡན་པར་སྤྱོད་པ་ཁྱོད་ཡིན་པས། ཚུལ་ཁྲིམས་དང་ལྡན་པ་གཟུགས་དང་ལྡན་པ། ཡོན་ཏན་དང་ལྡན་པའི་བུ་མོ་གཟུགས་བཟང་མོ་མནའ་མའི་དོན་དུ་བདག་གིས་ཁྱོད་ལ་སྦྱིན་པར་བྱའོ། །གཞོན་ནུ་སྟག་རྣ་དང་། གཟུགས་བཟང་མོ་
གཉིས་མཛེས་ཤིང་འཐུན་པས་ཀྱང་འདི་ལ་མོས་ཤིང་དགའ་འོ་ཞེས་སྨྲས་ནས། གསེར་གྱི་བུམ་པ་ཆུས་བཀང་བ་ཐོགས་ནས། བྲམ་ཟེ་མངོན་པར་དད་ཅིང་དགའ་བ་དང་། མགུ་བ་དང་ལྡན་པས་ཆུ་སྦྲེངས་ནས་བུ་མོ་བྱིན་ཏེ། འདི་སྐད་དུ་ཡང་བུ་མོ་གཟུགས་

71-1-289a

བཟང་མོ་འདི་གཞོན་ནུ་སྟག་རྣའི་ཆུང་མ་རུ་དགའ་བའི་སེམས་ཀྱིས་ལོང་ཤིག །དེ་ནས་གདོལ་པའི་རྒྱལ་པོ་ཏྲེ་ཤང་ཀུས་བུ་ལ་དེ་བླངས་ནས། རང་གྲོང་ཁྱེར་དུ་ཕྱིར་ལོག་སྟེ། ཆོས་དང་ལྡན་པར་གྲགས་པས་རང་གི་རྒྱལ་སྲིད་
བསྐྱངས་པར་གྱུར་ཏོ། །ཡང་དགེ་སློང་དག་ཁྱེད་དེའི་ཚེ་དེའི་དུས་ན་གདོལ་པའི་རྒྱལ་པོ་ཏྲེ་ཤང་ཀུ་ཞེས་བྱ་བ་དེ་གཞན་ཞིག་ཡིན་སྙམ་དུ་སེམས་ན། དེ་ལྟར་བལྟ་བར་མི་བྱ་སྟེ། ང་ཉིད་དེའི་ཚེ་དེའི་དུས་ན་གདོལ་པའི་རྒྱལ་པོ་ཏྲེ་
ཤང་ཀུ་ཞེས་བྱ་བར་གྱུར་ཏོ། །ཡང་དེའི་ཚེ་དེའི་དུས་ན། གཞོན་ནུ་སྟག་རྣ་ཞེས་བྱ་བ་གདོལ་པའི་རྒྱལ་པོ་ཏྲེ་ཤང་ཀུ་ཞེས་བྱ་བའི་བུར་གྱུར་པ་དེ་གཞན་ཞིག་ཡིན་སྙམ་དུ་སེམས་ན། དེ་ལྟར་བལྟ་བར་མི་བྱ་སྟེ། 
དགེ་སློང་ཀུན་དགའ་བོ་འདི་ཉིད་དེའི་ཚེ་དེའི་དུས་ན་གཞོན་ནུ་སྟག་རྣ་ཞེས་བྱ་བར་གྱུར་ཏོ། །ཡང་ཁྱེད་དེའི་ཚེ་དེའི་དུས་ན་བྲམ་ཟེ་པད་མའི་སྙིང་པོ་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་སེམས་ན། དེ་ལྟར་
བལྟ་བར་མི་བྱ་སྟེ། དགེ་སློང་ཤཱ་ར་དྭ་ཏིའི་བུ་དེའི་ཚེ་དེའི་དུས་ན། བྲམ་ཟེ་པད་མའི་སྙིང་པོ་ཞེས་བྱ་བར་གྱུར་ཏོ། །ཡང་དེའི་ཚེ་དེའི་དུས་ན་བུ་མོ་གཟུགས་བཟང་མོ་ཞེས་བྱ་བ་བྲམ་ཟེ་པད་མའི་
སྙིང་པོའི་བུ་མོར་གྱུར་པ་དེ་གཞན་ཞིག་ཡིན་སྙམ་དུ་སེམས་ན། དེ་ལྟར་བལྟ་བར་མི་བྱ་སྟེ། དགེ་སློང་མ་གཟུགས་བཟང་མོ་འདི་ཉིད་དེའི་ཚེ་དེའི་དུས་ན། པད་མའི་སྙིང་པོའི་བུ་མོར་གྱུར་ཏེ། དེར་
གཅུགས་པ་དང་། མཛའ་བའི་རྒྱུས་ད་ལྟར་དགེ་སློང་ཀུན་དགའ་བོ་འགྲོ་ན་རྗེས་སུ་འགྲོ་ཞིང་། འདུག་ན་འདུག་ལ་ཁང་པ་གང་དང་གང་དུ་བསོད་སྙོམས་ལ་ཞུགས་པ་ན། སྒོ་དེ་དང་དེར་མི་སྨྲ་བར་གནས་
པར་གྱུར་ཏོ། །དེ་ནས་བཅོམ་ལྡན་འདས་གླེང་གཞིའི་རྣམ་པ་འདི་ཉིད་བསྟན་ནས། དེའི་ཚེ་ཚིགས་སུ་བཅད་དེ་བཀའ་སྩལ་པ། སྐྱེ་བ་སྔོན་གྱི་བག་ཆགས་ཀྱིས། །ད་ལྟར་ཡང་ནི་བརྩེ་ཉིད་དེ། །དེ་ཡིས་

71-1-289b

གཅུགས་པ་སྐྱེས་གྱུར་པ། །ཆུ་ནང་ནས་སྐྱེས་ཅི་བཞིན་ནོ། །དེ་ལྟ་བས་ན་དགེ་སློང་དག་འཕགས་པའི་བདེན་པ་བཞི་མངོན་པར་རྟོགས་པ་མངོན་དུ་མ་བྱས་པས་བརྩོན་འགྲུས་དང་མངོན་པར་འབད་པ་དང་། སྤྲོ་བ་དང་། འདུན་
པ་དྲག་པོས་ཚིག་ཏུ་མ་ཡིན་པར་རྟོགས་པར་བྱ་ཞིང་དྲན་པ་དང་། ཤེས་བཞིན་གྱིས་སྤྱད་པར་བྱའོ། །བཞི་པོ་དེ་དག་གང་ཞེ་ན། སྡུག་བསྔལ་འཕགས་པའི་བདེན་པ་སྡུག་བསྔལ་དང་། ཀུན་འབྱུང་འཕགས་པའི་
བདེན་པ་སྡུག་བསྔལ་དང་། འགོག་པ་འཕགས་པའི་བདེན་པ་སྡུག་བསྔལ་དང་། ལམ་འཕགས་པའི་བདེན་པ་སྡུག་བསྔལ་ཏེ། འཕགས་པའི་བདེན་པ་བཞི་པོ་དེ་དག་མངོན་པར་མ་རྟོགས་པ་མངོན་པར་རྟོགས་པའི་
ཕྱིར་བརྩོན་འགྲུས་དང་། མངོན་པར་འབད་པ་དང་། སྤྲོ་བ་དང་། འདུན་པ་དྲག་པོས་ཚིག་ཏུ་མ་ཡིན་པར་རྟོགས་པར་བྱ་ཞིང་དྲན་པ་དང་། ཤེས་བཞིན་གྱིས་སྦྱར་བར་བྱའོ། །ཆོས་ཀྱི་རྣམ་གྲངས་འདི་བཤད་པ་ན། 
དགེ་སློང་དྲུག་བཅུ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །མཉན་ཡོད་ཀྱི་སྐྱེ་བོའི་ཚོགས་ཆེན་པོ་བྲམ་ཟེ་དང་། ཁྱིམ་བདག་རྣམས་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བར་གྱུར་ཏོ། །
དགེ་སློང་དེ་དག་དང་། ཀོ་ས་ལའི་རྒྱལ་པོ་གསལ་རྒྱལ་དང་། མཉན་ཡོད་ཀྱི་སྐྱེ་བོའི་ཚོགས་ཆེན་པོ་དང་། བྲམ་ཟེ་དང་། ཁྱིམ་བདག་དང་། ལྷ་དང་། ཀླུ་དང་། ལྷ་མ་ཡིན་དང་། ནམ་མཁའ་ལྡིང་དང་། 
མི་འམ་ཅི་དང་། ལྟོ་འཕྱེ་ཆེན་པོ་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སྟག་རྣའི་མདོ། རྫོགས་སོ།། །།
རྒྱ་གར་གྱི་མཁན་པོ་དགེ་སློང་ཨ་ཛི་ཏ་ཤྲཱི་བྷ་དྲ་དང་། ཞུ་ཆེན་གྱི་ལོ་ཙྪ་བ་སེང་ཀར་དགེ་སློང་ཤཱཀྱ་འོད་ཀྱིས་བསྒྱུར། །༄༅། ། རྒྱ་གར་སྐད་དུ། དྭི་ད་ཤ་ལོ་ཙ་ན་ནཱ་མ་སཱུ་ཏྲ། བོད་སྐད་དུ། 

71-1-290a

མིག་བཅུ་གཉིས་པ་ཞེས་བྱ་བའི་མདོ། གྲུབ་པར་གྱུར་ཅིག །སངས་རྒྱས་བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་འོད་མའི་ཚལ་ན་བཞུགས་ཏེ། དེའི་ཚེ་གློག་བྱུང་། སྐར་མདའ་ལྟུང་། གནམ་
ལྕགས་བབ་པ་དང་། དེ་ནས་རྒྱལ་པོ་གཟུགས་ཅན་སྙིང་པོ་འཁོར་དང་བཅས་པས་ལྟས་མཁན་བྲམ་ཟེ་རྣམས་བཀུག་ནས་སྨྲས་པ། ཅིའི་རྒྱུ་ཅིའི་རྐྱེན་གྱིས་གནམ་ཀུན་འཁྲུག་པར་འགྱུར། བྲམ་ཟེ་རྣམས་
ཀྱིས་གསོལ་པ། ལྟས་འདི་ལྟ་བུ་དག་མིག་བཅུ་གཉིས་ཞེས་བགྱི་བའི་གཙུག་ལག་ལས་འབྱུང་སྟེ། བདག་གིས་ཁྲེལ་བར་རྔོ་མི་ཐོག་གོ། །དེ་ནས་རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་ག་ལ་བ་
དེར་སོང་སྟེ། ཞབས་ལ་ཕྱག་འཚལ་ནས་འདི་སྐད་གསོལ་ཏོ། །བཅོམ་ལྡན་འདས་སེམས་ཅན་གྱི་དོན་དུ་ཐུགས་བརྩེ་བར་དགོངས་ཏེ། མིག་བཅུ་གཉིས་ཀྱི་ལྟས་ཀྱི་གཙུག་ལག་བཤད་དུ་གསོལ། 
བཅོམ་ལྡན་འདས་ཀྱིས་བཀའ་སྩལ་པ། རབ་ཏུ་བྱུང་བས་ནི་ཕྱི་རོལ་པ་འཇིག་རྟེན་གྱི་གཙུག་ལག་འདི་ལྟ་བུ་དག་བཤད་པའི་ཆ་མ་ཡིན་ནོ། །དེ་ནས་ཡང་རྒྱལ་པོ་གཟུགས་ཅན་སྙིང་པོས་བཅོམ་ལྡན་
འདས་ལ་བསྐྱར་ཏེ་གསོལ་པ། བཅོམ་ལྡན་འདས་བདག་ལ་ཐུགས་བརྩེ་བར་དགོངས་ཏེ་ཐེ་ཙོམ་འདི་དགྲོལ་དུ་གསོལ། དེ་ནས་བཅོམ་ལྡན་འདས་ཀྱིས་བཤད་པར་གནང་ནས་སྔོན་གྱི་གླེང་གཞི་བཀའ་
སྩལ་པ། རྒྱལ་པོ་ཆེན་པོ་སྔོན་འདས་པའི་དུས་ན་གངས་ཀྱི་རི་དྲུང་ན་བྷ་ག་ཞེས་བྱ་བ་ཞིག་གནས་པ་དེ་དུས་གཞན་ན་སྟག་མོ་གཞོན་ནུ་ཞིག་འཁྱམ་པ་མཐོང་བ་དང་འདོད་ཆགས་སྐྱེས་ཏེ། དྲང་སྲོང་གིས་འཁྲིག་
པའི་ཆོས་སྤྱད་པ་ལས་ལོ་དུས་སུ་བུ་བཅུ་གཉིས་བྱུང་བར་གྱུར་ཏོ། །བུ་བཙས་ནས་ལོ་བདུན་ལོན་པ་དང་། ཕ་མ་གཉིས་ཤི་ནས་ཕྲུ་གུ་རྣམས་ཀྱིས་ལོ་བཅུ་གཉིས་ཀྱི་བར་དུ་ཚངས་པའི་དངོས་གྲུབ་བསྒྲུབས་ནས། 

71-1-290b

བསམ་པ་དང་རེ་བ་བསྐང་བར་གསོལ་བ་དང་། དེ་ནས་ཚངས་པས་སྙིང་རྗེས་བལྟས་ཏེ། བརྒྱ་བྱིན་ལྷའི་དབང་པོ་དང་། རྒྱལ་པོ་ཆེན་པོ་བཞི་འཁོར་དང་བཅས་པར་འཛམ་བུའི་གླིང་དུ་ལྷགས་ཏེ། དེ་ནས་ཚངས་པས་བྱིས་པ་དེ་
རྣམས་ལ་སྨྲས་པ། བུ་ཁྱེད་རྣམས་ཅི་འདོད། དེ་ནས་བྱིས་པ་རྣམས་ཀྱིས་ཚངས་པ་ལ་སྨྲས་པ། ལྷ་བདག་ཅག་རྣམས་ནི་བྱིས་པའི་རང་བཞིན་ཤིན་དུ་བློ་དམན་པ་ལགས་ཏེ། ལེགས་ཉེས་མ་འཚལ་
ལགས་ན། ཉི་ཟླ་དང་། གཟའ་དང་། རྒྱུ་སྐར་གྱི་ལྟས་དང་། དཀྱིལ་འཁོར་དང་། གཙུག་ལག་ཇི་ལྟ་བུ་ལགས་པ་བཤད་དུ་གསོལ། དེ་ནས་བརྒྱ་བྱིན་ལྷའི་དབང་པོས་ཚངས་པ་ལ་འདི་སྐད་ཅེས་
སྨྲས་སོ། །ལྷའི་སྟོན་པ་ཁྱོད་ཀྱིས་བྱིས་པ་འདི་རྣམས་ལ་དངོས་གྲུབ་སྩལ་བའི་རིགས་སོ། །དེ་ནས་ཚངས་པས་བྱིས་པ་རྣམས་ལ་སྨྲས་པ། བྱིས་པ་ཉོན་ཅིག །རྒྱུ་སྐར་ཉི་ཤུ་རྩ་བརྒྱད་དང་། 
སྐར་མ་ཐམས་ཅད་ཀྱི་དཀྱིལ་འཁོར་དང་། ལྟས་དང་། ཉི་ཟླ་དང་། གཟའ་དང་། གནམ་ལྕགས་འབབ་པ་དང་། ས་གཡོ་ཞིང་འགུལ་བ་དང་། ལྟས་ཀྱི་གཙུག་ལག་ཇི་ལྟ་བུ་ཡིན་པ་དག་
བསྟན་པར་བྱའོ། །དགུན་ཟླ་ར་བ་ཡར་གྱི་ངོ་དང་། མར་གྱི་ངོ་དང་། ཚེས་བརྒྱད་དང་། བཅུ་བཞི་དང་། བཅྭ་ལྔ་ལ་ཉི་མའི་འོད་མུན་པ་འདྲ་བ་ནག་པོར་གྱུར་ན་མི་ཡ་རབས་འཛངས་ཤིང་མཁས་པ་
རྣམས་ལ་བགེགས་ཆེན་པོ་འབྱུང་བར་འགྱུར་རོ། །རྒྱུ་སྐར་ཨ་ཐ་སྐར་ཤྭི་ནཱིའི་ཉི་མ་ལ་ཉི་མ་ལས་དུ་བ་འདྲ་བ་བྱུང་སྟེ། འཁོར་ཞིང་འཐུལ་ན་ལོ་བཅུ་གཉིས་ཀྱི་བར་དུ་ཆར་མི་འབབ་པར་འགྱུར་རོ། །རྒྱུ་སྐར་བྷ་ར་ཎཱི(བྲ་ཉེ)འི་ཉི་མ་ལ་ཉི་མ་གསེར་
གྱི་མདོག་འདྲ་བར་གྱུར་ན་ཉེ་སྐོར་གྱི་རྒྱལ་ཁམས་ཀྱི་ཡུལ་འཇིག་པ་དང་དབུས་སུ་མུ་གེ་ཆེན་པོ་འབྱུང་ངོ་། །དགུན་ཟླ་ཐ་ཆུངས་ཀྱི་ངོ་རྒྱུ་སྐར་ཀརྟི་ཀ(སྨིན་དྲུག)འི་ཉི་མ་ལ་ཉི་མ་ལྷག་པར་གསལ་བར་གྱུར་ན་མཐའི་ཡུལ་ཁམས་འཇིག་ཅིང་དབུས་སུ་
71-1-291a

ཆར་མི་འོང་ངོ་། །དཔྱིད་ཟླ་ར་བའི་ངོ་རྒྱུ་སྐར་ཨཱ་གྲཱ(ལག)འི་ཉི་མ་ལ་ཉི་མ་ཁྱིམས་པ་དང་། ཉི་མ་གཉིས་སུ་སྣང་ན་མི་ནད་འབྱུང་། རྒྱལ་པོ་སྡེ་གཉིས་ལ་གནོད་པའི་བགེགས་འབྱུང་། དགུན་ཟླ་འབྲིང་པོའི་ངོ་རྒྱུ་སྐར་པུ་ཥྱ(རྒྱལ)འི་ཉི་
མ་ལ་ཉི་མ་མུན་པ་འདྲ་བར་འགྱུར་ཞིང་ཉི་མ་ནུབ་ཀར་ཁ་དོག་སྐྱ་བོར་གྱུར་ན་རྒྱལ་པོ་ཆེན་པོ་ལ་བགེགས་འབྱུང་། དཔྱིད་ཟླ་ཐ་ཆུངས་ཀྱི་ངོ་རྒྱུ་སྐར་བྷ་ར་ཎཱི(བྲ་ཉེ)འི་དུས་ལ་ཉི་ཟླ་གཟས་ཟིན་ན་བློན་པོས་རྒྱལ་པོ་བསད་པར་འོང་ངོ་། །དབྱར་ཟླ་ར་བའི་ངོ་
རྒྱུ་སྐར་པཱུར་བ་བྷ་དྲ་པཱ་དཱ(ཁྲུམས་སྟོད)འི་དུས་ལ་ཉི་མ་དམར་པོར་གྱུར་ན། རྒྱལ་པོ་དང་། བློན་པོ་དང་། དེའི་ཡུལ་འཁོར་དུ་གནོད་པའི་བགེགས་ཆེན་པོ་འབྱུང་། དབྱར་ཟླ་འབྲིང་པོའི་ངོ་རྒྱུ་སྐར་པཱུརྦཱ་ཤཱ་ཊཱ(ཆུ་སྟོད)འི་དུས་ལ་ཟླ་བ་ཉ་ལ་གཟས་ཟིན་ན་
ཡུལ་འཁོར་འཁྲུག་པ་དང་། མི་ནད་དང་། མུ་གེ་འབྱུང་། དབྱར་ཟླ་ཐ་ཆུངས་ཀྱི་ངོ་རྒྱུ་སྐར་མཱུ་ལྃ(བསྣྲུབ)འི་དུས་ལ་ཉི་ཟླ་གས་ཤིང་སེར་ག་བྱུང་བར་སྣང་ན་ཡུལ་དེར་གནོད་པ་ཆེན་པོ་འབྱུང་། སྟོན་ཟླ་ར་བའི་ངོ་རྒྱུ་སྐར་ཨ་ཤྭི་ནཱི(ཐ་སྐར)འི་དུས་
ལ་ཉི་ཟླ་དུས་ཅིག་ཏུ་ཤར་ན་ཡུལ་འཁོར་དེར་ཁྲག་འཁྲུག་ཆེན་པོས་ཁྲག་འབབ་པར་འོང་ངོ་། །སྟོན་ཟླ་འབྲིང་པོའི་ངོ་རྒྱུ་སྐར་ཀཱརྟི་ཀ(སྨིན་དྲུག)འི་དུས་ཟླ་བ་ཉ་ལ་ཟླ་བ་མེའི་ཁ་དོག་འདྲ་བར་གྱུར་ན་ཡུལ་འཁོར་དེར་དགྲའི་དམག་
གིས་ཡུལ་འཇིག་པར་འགྱུར། དགུན་ཟླ་ར་བའི་ངོ་རྒྱུ་སྐར་བྷ་ར་ཎཱི(བྲ་ཉེ)འི་ཉི་མ་ལ་རླུང་དམར་ནག་པོ་བྱུང་ལ་ཉི་མ་མི་གསལ་བར་གྱུར་ན། དགྲའི་ཚོགས་ཀྱིས་ཡུལ་འཇིག་པར་འགྱུར་རོ། །དགུན་ཟླ་ཐ་ཆུངས་ཀྱི་ངོ་རྒྱུ་
སྐར་པཱུར་བ་ཕལ་གུ་ནཱི(གྲེ)འི་ཉི་མ་ལ་ས་བབ་ཅིང་རླུང་དམར་ཆེན་པོ་བྱུང་ན་རྒྱལ་པོ་ཆེན་པོ་ལ་གནོད་པ་འབྱུང་། དཔྱིད་ཟླ་ར་བ་དང་འབྲིང་པོའི་ངོ་རྒྱུ་སྐར་བི་ཤཱ་ཁཱ(ས་ག)འི་ཉི་མ་ལ་སེར་བ་བབ་ན་ཡུལ་འཁོར་དེར་ཁྲག་ནད་དང་
གནོད་པ་འབྱུང་། དཔྱིད་ཟླ་ཐ་ཆུངས་ཀྱི་ངོ་རྒྱུ་སྐར་ཛྱེཥྛཱ(སྣྲོན)འི་ཉི་མ་ལ་ནམ་ལངས་ཀར་སྐར་མ་ཉི་མ་བས་འོད་བཟང་པོར་གསལ་བར་བྱུང་ན་གཟའ་ཐམས་ཅད་ལ་བགེགས་ཆེན་པོ་འབྱུང་། དབྱར་ཟླ་ར་བའི་ངོ་རྒྱུ་སྐར་

71-1-291b

པཱུརྦཱ་ཤཱ་ཌཱ(ཆུ་སྟོད)འི་ཉི་མ་ལ་ས་བབ་ཅིང་ཉི་མ་མི་གསལ་ན་རྒྱལ་པོ་སྟོང་འཁྲུག་ཅིང་འཐབ་པར་འགྱུར། ཡང་དབྱར་ཟླ་ར་བའི་ངོ་རྒྱུ་སྐར་པཱུརྦཱ་ཤཱ་ཊཱ(ཆུ་སྟོད)འི་ཉི་མ་ལ་རླུང་ཆེན་པོ་བྱུང་ན་ཆུ་དཀོན། ཁ་ཟས་དང་། 
འབྲུ་ཟན་མ་རུང་བར་འགྱུར། དབྱར་ཟླ་འབྲིང་པོའི་ངོ་རྒྱུ་སྐར་ཤྲ་བ་ཎཱ(གྲོ་བཞིན)འི་ཉི་མ་ལ་རླུང་དྲག་པོར་ལངས་ཤིང་ནམ་མཁའ་མུན་པར་གྱུར་ན་ཉེན་སྐོར་གྱི་ཡུལ་ཁམས་གཞན་དུ་འཇིགས་པ་ཆེན་པོ་འབྱུང་། དབྱར་
ཟླ་འབྲིང་པོའི་ངོ་རྒྱུ་སྐར་པཱུར་བཱ་བྷ་དྲཱ་པཱ་དཱ(ཁྲུམ་སྟོད)འི་ཉི་མ་ལ་སེར་བ་བབ། གནམ་ལྕགས་གྲུམ་ན་ཡུལ་འཁོར་དེར་ནད་དང་མུ་གེ་འབྱུང་། དབྱར་ཟླ་ཐ་ཆུངས་ཀྱི་ངོ་རྒྱུ་སྐར་པཱུརྦཱ་བྷ་དྲཱ་པ་དཱ(ཁྲུམ་སྟོད)འི་ཉི་མ་ལ་བྱང་ཕྱོགས་
ནས་རླུང་དམར་ཆེན་པོ་ལངས་ནས་ལྷ་ཁང་དང་། མཆོད་རྟེན་དང་། ཁང་ཁྱིམ་དང་། ཤིང་སྡོང་པོ་ཆེན་པོ་བསྒྱེལ་ན་ཡུལ་ཁམས་སུ་གནོད་པ་ཆེན་པོ་འབྱུང་ངོ་། །སྟོན་ཟླ་ར་བའི་ངོ་རྒྱུ་སྐར་ཨཱ་ཤྭི་
ནཱི(ཐ་སྐར)འི་ཉི་མ་ལ་ཐོག་བབ་བམ། སྐར་མདའ་ལྟུང་ངམ། སེར་བ་བབ་ན་ཡུལ་ཁམས་དེར་ཐབ་མོ་ཆེན་པོ་འོང་། དགུན་ཟླ་ར་བའི་ངོ་རྒྱུ་སྐར་མ་གྷཱ(མཆུའ)འི་ཉི་མ་ལ་ཆར་པ་བབ་ན་ཡུལ་ཁམས་ཐམས་ཅད་ཁ་ཟས་མོད་པར་
འོང་། དགུན་ཟླ་ཐ་ཆུངས་ཀྱི་ངོ་རྒྱུ་སྐར་ཨཱ་གྲཱ(ལག)འི་ཉི་མ་ལ་གནམ་མེའི་ཁ་དོག་འདྲ་བར་གྱུར་ན་ལྟས་རབ་ཏུ་ངན་ཏེ། ཡུལ་ཁམས་སུ་མི་བདེ་བ་དང་འཇིགས་པ་ཆེན་པོ་འབྱུང་ངོ་། །དཔྱིད་ཟླ་ཐ་ཆུངས་ཀྱི་ངོ་རྒྱུ་སྐར་
བྷ་ར་ཎཱི(བྲ་ཉེ)འི་ཉི་མ་ལ་བྱང་ཕྱོགས་ནས་སྒྲ་ཆེན་པོ་བྱུང་ངམ། གནམ་སེར་པོར་སོང་ན་དགྲ་ཐམས་ཅད་ཀྱིས་ཡུལ་ཁམས་གཤིག་པར་འགྱུར་རོ། །དཔྱིད་ཟླ་ར་བའི་ངོ་རྒྱུ་སྐར་སྭཱ་ཏཱི(ས་རི)འི་ཉི་མ་ལ་ཆར་བབ་ལ་རླུང་མ་
ལངས་པར་འཇའ་བྱུང་ན་གྲོང་ཁྱེར་ཆེན་པོ་མེས་ཚིག་པར་འགྱུར་རོ། །དབྱར་ཟླ་ར་བའི་ངོ་རྒྱུ་སྐར་པུ་ཥྱ(རྒྱལ)འི་ཉི་མ་ལ་གློག་དང་། སྦུར་མ་དང་། ཉལ་ཉིལ་གྱི་ཆར་བབ་ན་ཡུལ་ཁམས་དེར་མུ་གེ་འབྱུང་། དབྱར་ཟླ་འབྲིང་པོའི་ངོ་རྒྱུ་སྐར་མཱུ་ལཾ(བསྣུབས)འི་ཉི་མ་ལ་ཆར་

71-1-292a

ཆེར་བབ་ལ་འཇའ་བྱུང་ན། རྒྱལ་རིགས་རྣམས་ལ་གནོད་པར་འགྱུར། དབྱར་ཟླ་ཐ་ཆུངས་ཀྱི་ངོ་རྒྱུ་སྐར་ཨུད་ཏ་ར་བྷ་དྲ་པཱ་དཱ(ཁྲུམ་སྟོད)འི་ཉི་མ་ལ་ས་ལས་སྒྲ་བྱུང་ངམ། རླུང་ནག་པོ་ལངས་ན་ཡུལ་དེར་མུ་གེ་འབྱུང་། དབྱར་ཟླ་འབྲིང་པོའི་ངོ་
ཕྱོགས་མཚམས་དག་ནས་སྒྲ་ཆེན་པོ་བྱུང་ན་ཡུལ་ཕྱོགས་དེར་ཁྲག་ཁྲུག་ཆེན་པོ་འབྱུང་། སྟོན་ཟླ་ར་བའི་ངོ་རྒྱུ་སྐར་བྷ་ར་ཎཱི(བྲ་ཉེ)འི་ཉི་མ་ལ་གནམ་ལས་སྒྲ་ཆེན་པོ་བྱུང་ན་བཙུན་པ་དང་། དཀའ་ཐུབ་ཅན་རྣམས་ལ་གནོད་པ་འབྱུང་། སྟོན་ཟླ་ར་
བའི་ངོ་དབང་པོའི་ཉི་མ་ལ་གནམ་ནས་སྒྲ་བྱུང་ན་མི་ལེ་ལོ་ཅན་དང་། ཕྱུགས་ལ་གནོད་པ་འབྱུང་། སྟོན་ཟླ་ཐ་ཆུངས་ཀྱི་ངོ་རྒྱུ་སྐར་དྷ་ནིཥྠ(མོན་གྲུ)འི་ཉི་མ་ལ་གནམ་ལས་རོལ་མོའི་སྒྲ་བྱུང་ན་རྩྭ་དང་། ལོ་ཏོག་ལེགས་པར་འགྱུར། ཆར་
དུས་སུ་འབབ། མཇུག་ཏུ་མི་ནད་འབྱུང་། དགུན་ཟླ་ར་བའི་ངོ་རྒྱུ་སྐར་སྭཱ་ཏ(ས་རི)འི་ཉི་མ་ལ་གནམ་ལས་སྒྲ་ཆེན་པོ་འབྱུང་ཞིང་གནམ་འཁྲུག་ན་ཡུལ་འཁོར་དེར་འཇིགས་པ་ཆེན་པོ་འབྱུང་། དགུན་ཟླ་ཐ་ཆུངས་ཀྱི་ངོ་རྒྱུ་སྐར་ཛྱེཥྠ(བསྣྲོན)འི་ཉི་མ་ལ་
ཚུབ་མ་ལངས་ཤིང་ས་གཡོས་ན་དགེ་སྦྱོང་དང་། བྲམ་ཟེ་རྣམས་ལ་བགེགས་དང་གནོད་པ་འབྱུང་། དཔྱིད་ཟླ་ར་བའི་ངོ་རྒྱུ་སྐར་པཱུར་བཱ་བྷ་དྲཱ་པ་དཱ(ཁྲུམ་སྟོད)འི་ཉི་མ་ལ་ཉིན་པར་ས་གཡོས་ན་ལོ་གཉིས་ཀྱི་བར་དུ་དུས་སུ་ཡུལ་ཁམས་དེར་དམག་
འོང་། དཔྱིད་ཟླ་འབྲིང་པོའི་ངོ་རྒྱུ་སྐར་པཱུརྦཱ་ཤཱ་ཌཱ(ཆུ་སྟོད)འི་ཉི་མ་ལ་ས་འགུལ་ན་བློན་པོས་རྒྱལ་པོ་བསད་པ་དང་། ཡུལ་ཁམས་དེར་འཁྲུག་པ་ཆེན་པོ་འབྱུང་། དབྱར་ཟླ་འབྲིང་པོའི་ངོ་རྒྱུ་སྐར་མཱུ་ལཾ་དབང་བ་ལ་ནུབ་མོ་ས་
གཡོས་ན་ཁམས་ཀྱི་དབང་པོ་རྣམས་ལ་གནོད་པ་འབྱུང་། དབྱར་ཟླ་ཐ་ཆུངས་ཀྱི་ངོ་རྒྱུ་སྐར་རོ་ཧི་ཎཱི(སྣར་མ)་དབང་བ་ལ་ནུབ་མོ་ས་གཡོས་ཤིང་རླུང་མར་བྱུང་། ཆར་མ་བབ་ན་འབྲུ་ཟན་མ་རུངས་པར་འགྱུར་ཞིང་དམག་
འོང་། སྟོན་ཟླ་འབྲིང་པོའི་ངོ་རྒྱུ་སྐར་ཨུད་ཏ་ར་བྷ་དྲ་པ་དཱ(ཁྲུམ་སྨད)འི་ཉི་མ་ལ་ཉིན་པར་ས་གཡོས་ན་ཕ་རོལ་གྱི་དགྲས་རྒྱལ་པོ་དེ་ཕམ་པར་འགྱུར། ཡུལ་ཕྱོགས་ཀྱང་ཆོམ་རྐུན་གྱིས་འཇིགས་པར་འགྱུར། སྟོན་ཟླ་

71-1-292b

ཐ་ཆུངས་ཀྱི་ངོ་རྒྱུ་སྐར་ཀཱརྟི་ཀཱ(སྨིན་དྲུག)འི་ཉི་མ་ལ་ས་གཡོས་ན་གྲོང་ཁྱེར་ཆེན་པོ་དང་། ཁང་ཁྱིམ་འཇིག་ཅིང་མུ་གེ་འབྱུང་། དགུན་ཟླ་ར་བའི་ངོ་རྒྱུ་སྐར་ཨ་ཤྭི་ནཱི(ཐ་ཀར)་དང་། ཨུད་ཏ་ར་ཕལ་གུ་ཎཱི་དབང་བའི་ནུབ་མོ་ས་གཡོས་ན་བྱིས་པ་ཆུང་ངུ་དང་། བུད་མེད་སྦྲུམ་མ་ལ་
བགེགས་དང་གནོད་པ་འབྱུང་། དགུན་ཟླ་འབྲིང་པོའི་ངོ་རྒྱུ་སྐར་མྲྀ་ག་ཤི་རཱ(མགོའ)་དང་། པཱུརྦཱ་བྷ་དྲཱ་པ་དཱ(ཁྲུམ་སྟོད)འི་ཉིན་པར་ས་གཡོས་ན་རྐང་འགྲོས་ལ་བགེགས་དང་གནོད་པ་འབྱུང་། དབང་པོ་འམ། མ་གྷཱ(མཆུའ)འི་ཉི་མ་ལ་གཙུག་ལག་ཁང་སྐུ་གཟུགས་གཡོས་ཞིང་འགུལ་
ལམ། ས་འཕོས་ན་ཡུལ་ཁམས་དེ་མྱུར་དུ་འཇིག་པར་འགྱུར། གཙུག་ལག་ཁང་གི་སྐུ་གཟུགས་གདན་ལས་འཕོས་སམ། དངུལ་ལྟ་བུ་བྱུང་ངམ། འགྱེལ་ན་ཡུལ་ཁམས་དེ་རྒྱལ་པོ་དང་བཅས་པར་རྒྱལ་ཁམས་གཞན་གྱི་དབང་དུ་འགྱུར། 
གཙུག་ལག་ཁང་གི་སྐུ་གཟུགས་འཕོས་སམ། སྤྱན་ནས་མཆི་མ་བྱུང་ན་ཡུལ་ཁམས་དེའི་མི་དཔའ་བོ་གཅེས་པ་བུ་སྨད་དང་བཅས་པར་ཡུལ་བྱུང་བར་འགྱུར། གཙུག་ལག་ཁང་གི་སྐུ་གཟུགས་གདན་ལས་འཕོས་སམ་འགུལ་ལ་ལྷ་ཁང་ནས་
དུད་པ་འདྲ་བ། བྱུང་ན་ཡུལ་ཁམས་དེའི་རྒྱལ་པོ་ལ་གནོད་པར་འགྱུར། གཙུག་ལག་ཁང་ཆེན་པོ་དང་། གནས་ཁང་ལྟ་བུ་གཡོས་ན། གྲོང་ཁྱེར་དེ་ཕྱོགས་རྒྱལ་ཁམས་གཞན་གྱིས་གནངས་སུ་བཅད་པ་
འམ་མེས་ཚིག་པར་འགྱུར། ཟླ་བའི་ཟུར་ལ་གཟའ་ཕུར་བུ་བྱུང་ན་མི་ཕྱུག་པོ་ལ་རྒྱལ་པོས་ནོར་འཕྲོག་ཅིང་གནོད་པར་འགྱུར། ཉི་ཟླ་དམར་པོར་སོང་ན་ཁམས་ཀྱི་དབང་པོ་ལ་གནོད་པ་འབྱུང་། 
གཟའ་སྤེན་པ་ཟླ་བའི་སྟེང་དུ་བྱུང་ན་ཡུལ་འཁོར་དེར་འཇིགས་པ་ཆེན་པོ་དང་བགེགས་འབྱུང་། ལྟས་འདི་རྣམས་བྱུང་བའི་དུས་སུ་ཟླ་བ་གཟས་ཟིན་ན་རྒྱལ་པོ་ཆེན་པོ་རྣམས་ལ་གནོད་པ་དང་བགེགས་འབྱུང་། 
རྒྱལ་པོ་དང་པོ་སྐྱེས་པའི་རྒྱུ་སྐར་གྱི་སྟེང་དུ་ཟླ་བ་བྱུང་ཞིང་། ཟླ་བའི་སྟེང་དུ་ཡང་གཟའ་མཇུག་རིངས་བྱུང་ན། ཡུལ་ཁམས་དེའི་རྒྱལ་པོ་དང་། རྒྱལ་ཁམས་ཉེ་བ་གཞན་གྱི་རྒྱལ་པོ་དང་འཐབ་

71-1-293a

མོ་འོང་། གཟའ་སྤེན་པ་རྒྱུ་སྐར་རོ་ཧ་ཎཱི་དང་། ཀཱརྟི་ཀཱའི་དབུས་སུ་ཤར་ན་རྒྱལ་ཁམས་དེའི་མི་ཐམས་ཅད་ལ་གནོད་པ་ཆེན་པོ་དང་། བགེགས་བྱུང་ནས་མི་སུམ་ཆ་ཅིག་ལུས་པར་འགྱུར། གཟའ་པ་བ་སངས་དང་། 
རྒྱུ་སྐར་མ་གྷཱ་དང་། པཱུརྦ་ཕལ་གུ་ནི་ཟླ་བའི་དབུས་སུ་ཤར་ན་ལོ་ཏོག་ལ་གནོད་པ་འབྱུང་། གཟའ་ཕུར་བུ་དང་། པ་བ་སངས་དང་། སྤེན་པ་རྣམས་དམར་པོར་སོང་ན་ཡུལ་ཁམས་དེར་འཇིགས་པ་ཆེན་པོ་འབྱུང་། གཟའ་མཇུག་རིངས་
རྒྱུ་སྐར་པུ་ཥྱཱའི་སྟེང་དུ་ཤར་ན་རིང་པོ་མི་ཐོགས་པར་ཕྱོགས་བཞི་ནས་དམག་ཆེན་པོ་འབྱུང་། གཟའ་ཕུར་བུ་དང་། མིག་དམར་རྒྱུ་སྐར་ཤྲ་བ་ཎཱའི་སྟེང་དུ་ཤར་ན་ལོ་གསུམ་གྱི་བར་དུ་ཡུལ་ཁམས་དེར་འཇིགས་པ་ཆེན་པོ་དང་གནོད་
པ་འབྱུང་། གཟའ་ཕུར་བུ་དང་། སྤེན་པ་རྒྱུ་སྐར་བི་ཤཱ་ཁཱའི་སྟེང་དུ་ཤར་ན་མི་མང་པོ་འཐབ་མོ་ལ་འཆི་བར་འགྱུར་རོ། །ལྷ་ཁང་དང་ཁང་པ་ཆེན་པོའི་སྟེང་དུ་བྱ་རོག་གར་བྱེད་ཅིང་འཕྱང་མོ་ཉུག་ན་ཡུལ་ཁམས་དེར་
འཐབ་མོ་ཆེན་པོ་འབྱུང་། བུད་མེད་ལ་མི་མ་ཡིན་པའི་བུ་བྱུང་ངམ། ཡང་ན་ཕྱུགས་ལ་མིའི་བུ་བྱུང་ན་ཡུལ་ཁམས་དེའི་བུད་མེད་ལ་བགེགས་དང་གནོད་པ་ཆེན་པོ་འབྱུང་། མའི་མངལ་ན་བུ་ཡོད་པ་རྒོད་དམ། 
སྨྲ་འམ། ངུ་ན་ཡུལ་ཁམས་དེ་འཇིག་པར་འགྱུར། བུད་མེད་ཀྱི་མངལ་ནས་བུ་རྐང་གཅིག་པ་འམ། གསུམ་པ་འམ། རྐང་བཞི་པ་བྱུང་ན་ཡུལ་དེའི་རྒྱལ་པོ་ལ་གནོད་པ་འབྱུང་། བུད་མེད་ཀྱི་ལྟོ་ནས་
བུ་མ་ནིང་མཚན་གཉིས་པ་བྱུང་ན་ཡུལ་ཁམས་དེའི་རྒྱལ་པོ་འཆི་བར་འགྱུར། བུད་མེད་ལས་བྱོལ་སོང་གི་བུ་དང་། བུ་མགོ་མང་པོ་ཅན་བྱུང་ན་ཡུལ་ཁམས་དེ་འཇིག་པར་འགྱུར། བུད་མེད་ལས་བུ་མགོ་
གཅིག་ལ་གདོང་གཉིས་མིག་གསུམ་པ་བྱུང་ན་ཡུལ་ཁམས་དེ་མྱུར་དུ་འཇིག་པར་འགྱུར། བུད་མེད་ལས་བུ་གྲུལ་བུམ་མགོ་བཞི་པ་བྱུང་ན་ཡུལ་འཁོར་དེར་འཇིགས་པ་ཆེན་པོ་འབྱུང་། བུད་མེད་ལས་བུ་ཕག་གི་

71-1-293b

གདོང་ཅན་བྱུང་ན་ཕྱོགས་བཞི་ནས་ཡུལ་ཁམས་དེ་འཇིག་པར་འགྱུར། བུད་མེད་ལས་བུ་ཉི་མའི་འོད་བཞིན་འབར་བ་བྱུང་ན་ནང་འཁྲུག་གིས་ཡུལ་ཁམས་དེ་འཇིག་པར་འགྱུར། བྱིས་པ་ཚེམ་བུ་ན་གནས་པ་ཆེན་
པོ་བཞིན་ཚིག་སྨྲ་ན་ཡུལ་འཁོར་དེ་འཇིག་པར་འགྱུར། མ་ཉིད་ཀྱིས་མ་ཚོར་བར་མངལ་ནས་བུ་བྱུང་ན་འདྲེ་གདོན་དང་། བགེགས་ནད་ཀྱིས་ཡུལ་ཁམས་དེ་འཇིག་ཅིང་འཇིགས་པ་ཆེན་པོ་འབྱུང་། བུད་མེད་
ལས་བུ་སྐྱེ་ནུབ་པ་དང་། སོ་སྐྱེས་པ་བྱུང་ན་ཡུལ་ཁམས་དེ་དགོན་པར་འགྱུར་ཏེ། མི་ཐམས་ཅད་ཀྱང་ཕྱོགས་གཞན་དུ་འགྲོ་བར་འགྱུར། བུད་མེད་ལས་བུ་མགོ་མེད་པ་ལག་པ་གཅིག་པ་བྱུང་ན་ཡུལ་ཁམས་དེར་
གནོད་པ་ཆེན་པོ་འབྱུང་། ཡུལ་ཁམས་སུ་མེ་ཏོག་དང་། ཤིང་ཏོག་འབྲས་བུ་ལས་ཁུ་བ་འཛག་ན་རྒྱལ་པོའི་རྒྱལ་འཚབ་ལ་བགེགས་དང་གནོད་པ་འབྱུང་། དུས་མ་ཡིན་པར་བཟའ་ཤིང་ལས་མེ་ཏོག་དང་འབྲས་
བུ་སྐྱེ་ན་རྒྱལ་པོ་དང་། ཡུལ་མིར་བཅས་པས་ཡུལ་བོར་བར་འགྱུར། བཟའ་ཤིང་གི་འབྲས་བུ་ལྷག་པར་མདོག་བཟང་པོར་གྱུར་ཏམ། ཡང་ན་ཁྲག་འདྲ་བ་འཛག་ན་ཡུལ་ཁམས་དེར་འཇིགས་པ་ཆེན་པོ་དང་། 
ནད་དང་། མུ་གེ་འབྱུང་། བསྐྱེད་ཤིང་གི་གྲིབ་མ་མི་འཁོར་བར་ཕྱོགས་གཅིག་ཏུ་འདུག་ན་དགྲའི་དམག་བྱིན་ཆེན་པོས་ཡུལ་ཕྱོགས་དེ་བཅོམ་པར་འགྱུར། བསྐྱེད་ཤིང་འགྲོ་བ་ལྟར་སྣང་ན་ཡུལ་ཁམས་
དེར་འཇིགས་པ་ཆེན་པོ་འབྱུང་། བསྐྱེད་ཤིང་ལྷག་པར་བརྗིད་ཅིང་གསལ་བར་སྣང་ན་ཡུལ་ཁམས་དེའི་རྒྱལ་པོ་ཚེ་ཐུང་བར་འགྱུར། འཇིག་རྟེན་པའི་ལྷ་མཆོད་པའི་ཚེ་ལྷ་སྨྲ་འམ་འཛུམ་ན། རྒྱལ་པོ་ལ་
བགེགས་དང་གནོད་པ་འབྱུང་། མེ་ཏོག་གི་ཆར་འབབ་པ་འམ། རླུང་དམར་ལངས་ཤིང་གནམ་ལས་སྲིན་བུ་བབ་ན་ཡུལ་ཁམས་དེར་ཆོམ་རྐུན་གྱིས་འཇིག་པར་འགྱུར། འཇིག་རྟེན་པའི་

71-1-294a

ལྷ་ཁང་དུ་མེ་མ་བུས་པར་དུ་བ་བྱུང་ཞིང་། ལྷ་ཡང་མཚན་དང་ཆོ་འཕྲུལ་སྟོན་ན་རྒྱལ་པོ་ལ་བགེགས་དང་གནོད་པ་འབྱུང་། འཇིག་རྟེན་པའི་ལྷ་ཁང་དུ་མེ་མར་མ་བུས་པར་མེ་མར་འདྲ་བར་སྣང་ན་རྒྱལ་པོའི་གནང་ཆེན་ལ་བགེགས་དང་གནོད་པ་
འབྱུང་། རྒྱལ་པོ་བཙུན་མོའི་འཁོར་དུ་སོང་སྟེ་འདོད་ཆགས་མི་ལྡང་ན་རྒྱལ་པོའི་ཕོ་བྲང་མེས་ཚིག་ཅིང་རྒྱལ་པོ་ལ་མི་དགེ་བ་སྣ་ཚོགས་འབྱུང་། ཆར་པ་དང་སེར་བ་འབབ་ལ། གནམ་ལ་ཁ་དོག་གསལ་བ་དག་བྱུང་ན་ཡུལ་ཁམས་དེར་འཇིགས་པ་ཆེན་
པོ་འབྱུང་། གྲོང་ཁྱེར་ཚུབ་མས་བསྐོར་ཅིང་འགྲོ་བ་དང་། རླུང་མར་ལངས་ཤིང་ཆར་པ་ཁྲག་འདྲ་བ་བབ་ན་ཡུལ་ཁམས་དེར་འཇིགས་པ་ཆེན་པོ་འབྱུང་། གློག་འབྱུང་ཞིང་ཆར་པ་འབབ་ལ་སྤྲིན་འཁོར་ལིང་འཁོར་ལིང་དུ་ཆད་དེ། སྤྲིན་ལིང་དུ་ཆད་པའི་
བར་བར་ན་དྲི་ཟའི་གྲོང་ཁྱེར་འདྲ་བ་སྣང་ན་ཡུལ་ཁམས་དེར་འཇིགས་པ་ཆེན་པོ་འབྱུང་། ཟླ་བ་དམར་པོར་གྱུར་ན་ཡུལ་ཁམས་དེར་གྲོང་ཁྱེར་མེས་ཚིག་པ་དང་། རིམས་ཀྱིས་མི་ངས་པར་འགྱུར། ཟླ་བ་མཐའ་དམར་ལ་དབུས་ནག་པོར་
སོང་ན་ཡུལ་ཁམས་དེར་འཇིགས་པ་ཆེན་པོར་འགྱུར། ཟླ་བའི་ཁ་དོག་བཙག་འདྲ་བར་དམར་པོར་སྣང་ལ་སླར་ཡང་འཕྲལ་དུ་དཀར་པོའི་རང་བཞིན་དུ་གྱུར་ན་རླུང་མི་ལྡང་བར་དྲག་པོར་འབབ། རོ་སྐམ་ལྟ་བུར་ཆུ་མིག་བྱུང་ན་ལོ་ཏོག་ལེགས་པར་འགྱུར། 
མེ་མ་བུས་པར་ཡུལ་ཁམས་དེར་དུ་བ་བྱུང་ན་ཡུལ་ཁམས་དེར་འཇིགས་པ་ཆེན་པོ་འབྱུང་། མདའ་གཞུ་སྐྱིས་ཀོར་ལ་མེའམ་དུད་པ་བྱུང་ན་ཡུལ་ཁམས་དེར་དགྲའི་འཇིགས་པ་འབྱུང་ངོ་། །དེ་སྐད་ཅེས་བཅོམ་ལྡན་འདས་
ཀྱིས་བཀའ་སྩལ་པ་དང་། རྒྱལ་པོ་གཟུགས་ཅན་སྙིང་པོ་འཁོར་དང་བཅས་པ་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ། །མིག་བཅུ་གཉིས་པ་ཞེས་བྱ་བའི་མདོ། རྫོགས་སོ།། །།
ཞུས་ཏེ་དག་གོ། །ཡང་ཞུས་ཤེ་བསོད་ནམས་ཆེན་པོའི་དཔལ་གྱིས་ཕྱོགས་ལས་རྣམ་པར་རྒྱལ་བ་གཙུག་ལག་གཉིས་ཀྱི་མཛད་པས་བསྟན་པ་རིན་པོ་ཆེའི་ཞབས་ཏོག་དང་། འགྲོ་བ་དཔག་ཏུ་མེད་པའི་མགོན་

71-1-294b

སྐྱབས་དང་དཔུང་གཉེན་དམ་པར་གྱུར་པ་སྔོན་གྱི་སྨོན་ལམ་རྣམ་པར་དག་པ་ཡོངས་སུ་རྫོགས་པས་འཇིག་རྟེན་གྱི་བྱ་བ་རྣམས་སྙིང་པོ་མེད་པར་གཟིགས་ཏེ་རྣམ་གཡེང་གི་དྲི་མ་ཀུན་སྤངས་ནས་རི་ཁྲོད་དབེན་གནས་
ཁོ་ནར་བཞུགས་ཤིང་བསླབ་གསུམ་གྱི་ཁངས་བཟང་མང་དུ་ཐོས་པའི་ནོར་གྱིས་ཕྱུག་ལ་ཐུགས་རྗེའི་རྒྱལ་མཚན་རྡོ་རྗེ་ལྟ་བུའི་ཏིང་ངེ་འཛིན་གྱི་ཏོག་གིས་མཛེས་པ་དཔལ་ལྡན་བླ་མ་བཟང་པོའི་མཚན་ཅན་དགེ་
སྦྱོང་ཆེན་པོ་དེའི་ཐུགས་དགོངས་རྫོགས་པར་བྱ་བའི་ཕྱིར་དང་། འགྲོ་བ་མ་ལུས་པའི་གནས་སྐབས་དང་མཐར་ཐུག་གི་ཕན་བདེ་མ་ལུས་པའི་འབྱུང་གནས་རྒྱལ་བའི་བསྟན་པ་རིན་པོ་ཆེ་ཡུན་རིང་དུ་གནས་ཤིང་
ཕྱོགས་ཀུན་དུ་དར་ཅིང་རྒྱས་པར་བྱ་བའི་ཕྱིར་བོད་ཁམས་སུ་སྨོན་ལམ་གྱི་སྟོབས་ཅན་མངའ་བདག་ལྷ་བཙན་པོ་བྱང་ཆུབ་སེམས་དཔའ་རྣམས་དང་། ལོ་པཎ་སྐྱེ་མཆེད་ཁྱད་པར་ཅན་རྣམས་ཀྱི་བདག་རྐྱེན་ལ་
བརྟེན་ནས། བདེ་བར་གཤེགས་པའི་གསུང་རབ་ཐོག་མཐའ་བར་དུ་དགེ་ཞིང་། སྒྲོ་སྐུར་གྱི་མཐའ་དང་བྲལ་ལ། གཞུང་ལུགས་ངན་པའི་དྲི་མས་དབེན་པ་མདོ་སྡེ་དང་། རྒྱུད་སྡེའི་ཕྱོགས་སྔ་ཕྱིར་འགྱུར་རོ་ཅོག་
རྣམས་དཔལ་ལྡན་རྒྱལ་བའི་སྡེས། ཏི་ཤྷི་ཀུན་དགའ་རྒྱལ་མཚན་དཔལ་བཟང་པོ་བསྟན་པ། སྐྱོང་བའི་དུས་རྒྱལ་བའི་བསྟན་པ་ལྔ་བརྒྱ་བདུན་པའི་མཐར་ཉེ་བ་འགྲོ་བའི་བླ་མ་སྟོན་པ་གདུལ་
བྱའི། ངོར་ཞི་བར་གཤེགས་པའི་ཚུལ་བསྟན་ནས། ལོ་སུམ་སྟོང་བཞི་བརྒྱ་བརྒྱད་བཅུ་འདས་པ་མེ་མོ་ཕག་ལོ་ལ་དབུ་གཙུགས་ཏེ། བཞེངས་པ་རྣམས་རྒྱལ་སྲས་བྱང་ཆུབ་དཔལ་གྱིས་རྒྱུའི་དངོས་
པོ་བཟང་ཞིང་ཁ་ན་མ་ཐོ་བ་མེད་པ་རྣམས་ཀྱིས་བསྟན་པའི་འབྱུང་གནས་དཔལ་ན་ལེན་དྲ་དང་མཚུངས་པའི་ཆོས་གྲ་ཆེན་པོ་དཔལ་གུང་ཐང་གི་གཙུག་ལག་ཁང་དུ་དད་པ་དང་། བརྩོན་འགྲུས་ཆེ་ཞིང་བློ་གྲོས་

71-1-295a

གསལ་ལ་ཚུལ་ཁྲིམས་ཀྱི་རྒྱན་དང་ལྡན་པའི་དགེ་བའི་བཤེས་གཉེན་རྣམས་ཀྱིས་ཞུས་དག་ལན་གསུམ་མཛད་པ་འདི་ས་མོ་གླང་གི་ལོ་གསར་གྱི་ཟླ་བ་ལོ་སྟོང་ལྔ་བརྒྱ་བཅྭ་བརྒྱད་བསྟན་པའི་
ལྷག་མར་ཡོད་པའི་དུས་སུ་ལེགས་པར་གྲུབ་པའོ། །ཁ་ཏ་དང་དོས་རྣམས་བཙུན་པ་ཐང་ཆེན་པ་ཀུན་དགའ་འབུམ་ལ་སོགས་པ་སྡོམ་བརྩོན་དམ་པ་མང་དུ་ཐོས་ཤིང་སྡེ་སྣོད་འཛིན་པ་རྣམས་ཀྱིས་
རྒྱ་གར་སྐད་ལ་སོགས་པ་ལེགས་པར་སྦྱར་བའི་སྐད་སོར་བཞག་རྣམས་ནི་སྔོན་གྱི་ལོ་ཙྪ་བ་ཆེན་པོ་རྣམས་ཀྱི་མཛད་པ་བྱེ་བྲག་ཏུ་རྟོགས་བྱེད་ཆེན་པོ་དང་། སྒྲ་སྦྱོར་བམ་པོ་གཉིས་པ་
ལ་སོགས་པ་ལ་བརྟེན་ནས་དག་པར་བྱས་ཤིང་། བོད་སྐད་རྣམས་ནི་ཡུལ་སྐད་དང་། འཕྲལ་སྐད་ངན་པ་རྣམས་དང་མ་འདྲེས་པར་བོད་ཡུལ་གྱི་སྔོན་གྱི་བརྡ་མས་མཁན་པོ་རྣམས་
དང་། སྒྱུར་བྱེད་དམ་པ་སྔ་ཕྱིར་བྱོན་པ་རྣམས་ཀྱི་བརྡ་གསར་རྙིང་། སྐད་གསར་བཅད་ལ་སོགས་པའི་རྗེས་སུ་འབྲངས་ནས་མ་མྱ་ད་དྲག་ས་སྩོགས་ལ་སོགས་པ་ཡོད་
མེད་རྣམས་མཁས་པ་རྣམས་ཀྱིས་ཇི་ལྟར་མཛད་པ་ལྟར་གསུང་རབ་ཀྱི་དཔི་བྱི་རྣམས་ལ་སྔ་ཞུས་གསུང་རབ་གསུམ་གསུམ་དང་གཏུགས་ཏེ་བརྡ་དོན་མ་ནོར་བར་དག་
པར་བགྱིས་ནས་གཞི་དུང་གི་ས་བཞི་ལྟར་དཀར་ཞིང་འཇམ་ལ་མཁྲེགས་པའི་ལྷོ་རྒྱལ་པོ་ལྷ་ཁང་གི་ཤོ་གུ་ལ། དམ་ཆེ་ཞིང་མདངས་གསལ་བ་ཨུད་པ་ལ་
སྔོན་པོ་ལྟ་བུ་རྒྱ་ནག་ཆེན་པོ་ལས་འོངས་པའི་སྣག་ཚས། །འབུར་དཀྱུས་ཚུགས་གསུམ་ལ་མཁས་པའི་མཐར་ཕྱིན་པས་ཡི་གེའི་རིག་བྱེད་ལ་སློབ་དཔོན་ཀྱི་གོ་འཕང་ཐོབ་པས་

71-1-295b

དག་སྙོམས་མཛེས་པར་བཞེངས་པ། དབུས་གཙང་གི་ཡི་གེ་པ་ཡིད་གཞུངས་ཤིང་མཁས་པ་རྣམས་ཀྱིས་ལེགས་པར་བྲིས་པ་ལ་ཕྱི་ཞུས་ལན་གསུམ་དུ་བགྱིས་ཏེ་བཞེངས་པ་རྣམས་ལས་ཁྱད་པར་དུ་
ཐུགས་དམ་མདོ་མངས་སྐྱེ་དགུའི་བློ་གྲོས་མུན་སེལ་ཕན་བདེའི་གཏེར་ཆེན་ཞེས་བྱ་བ་འདི་བླ་མ་དམ་པ་ཆོས་ཀྱི་རྒྱལ་པོ་རིན་པོ་ཆེའི་ཐུགས་དམ་ལྷ་མིའི་རྒྱན་མཆོག་མ་ཞེས་བྱ་བ་དང་། ཕོ་བྲང་ཆེན་པོ་གཙང་
ཆུ་མིག་རིང་མོའི་གཙུག་ལག་ཁང་གི་མདོ་མངས་རྣམས་ཀྱི་ནང་ནས་མཆོག་ཏུ་གྱུར་པ་དགེ་བའི་ཤེས་གཉེན་འདར་ཕྱར་ཀྱིས་བཞེངས་པའི་མདོ་མངས་འདར་ཕྱར་མ་ཞེས་གྲགས་པ་དང་། འབྲང་མཚམས་ཕུག་ཆུད་
མ་ཞེས་གྲགས་པ་དང་། དགའ་འབར་མ་ཞེས་གྲགས་པ་དང་། དཔལ་སྣར་ཐང་གི་གཙུག་ལག་ཁང་གི་མདོ་མངས་རྣམས་ཀྱི་མཆོག་ཏུ་གྱུར་པ་མཁན་པོ་ཆེན་པོ་མཆིམས་ཀྱི་ཐུགས་དམ་མདོ་མངས་གསེར་
གཞུང་མ་དང་། ཕྱུག་རྒྱལ་མ་དང་། དགོན་གསར་མ་ལ་སོགས་པ་རྣམས་དང་། གཞན་ཡང་བླ་མ་གྲུ་སྤང་རྩ་བའི་ཐུགས་དམ་མདོ་མངས་འཛམ་གླིང་རྒྱན་དང་། ཤོག་ཆུང་གི་གཙུག་
ལག་ཁང་གི་མདོ་མངས་དྲུག་བཅུ་རྩ་གཉིས་དུམ་དང་། སྤུན་གསུམ་གྱི་གཙུག་ལག་ཁང་གི་མདོ་མངས་དང་། ཞ་ལུ་གསེར་ཁང་གི་གཙུག་ལག་གི་མདོ་མངས་གཞི་མ་དང་། སྨོན་དར་ཞེས་གྲགས་
པ་ལ་སོགས་པ་མདོ་སྣ་མང་ཞིང་གོ་རིམས་ལེགས་པ་རྣམས་ལ་དཔེ་ཕྱི་བྱས་ནས་སྣར་ཐང་དུ་བཞེངས་པ་རྣམས་ཕྱི་མོར་གདན་དྲངས་ཏེ། མདོ་དངོས་མ་ཡིན་པ་རྒྱུད་སྡེར་གཏོགས་པའི་གཟུངས་རྣམས་ནི་རྒྱུད་འབུམ་གྱི་ནང་དུ་བྲིས་
ཤིང་། གསེར་མདོག་གི་རྟོགས་པ་བརྗོད་པ་དང་། དགེ་བའི་བཤེས་གཉེན་གྱི་རྟོགས་པ་བརྗོད་པ་དང་། ཀུན་ལའི་རྟོགས་པ་བརྗོད་པ་དང་། དགེ་འདུན་འཕེལ་གྱིས་ལུང་བསྟན་པ་དང་། ལི་ལུང་བསྟན་པ་ལ་སོགས་པ་རྣམས་ནི་བདེ་བར་གཤེགས་

71-1-296a

པ་མྱ་ངན་ལས་འདས་ནས་ཕྱིས་འཕགས་པ་རྣམས་ཀྱིས་མཛད་པ་ཡིན་ཞིང་། གདགས་པའི་བསྟན་བཅོས་རྣམས་ཀྱང་མདོ་སྡེ་པ་ལ་སོགས་པ་གྲུབ་མཐའ་སྨྲ་བ་ཁ་ཅིག་བཀར་མི་འདོད་ལ། སྐྱེས་རབས་དང་། 
སངས་རྒྱས་བཅོམ་ལྡན་འདས་ལ་བསྟོད་པ་བསྔགས་པར་འོས་པ་བསྔགས་པ་ལ་སོགས་པའི་བསྟོད་པ་རྣམས་དང་། གཞོན་ནུ་མ་བདུན་གྱི་རྟོགས་པ་བརྗོད་པ་ལ་སོགས་པ་རྣམས་ནི་ཕྱིས་སློབ་དཔོན་དཔའ་བོ་ལ་སོགས་པ་
བསྟན་བཅོས་མཁན་པོ་རྣམས་ཀྱིས་མཛད་པ་ཡིན་པའི་ཕྱིར་དང་། ཐུབ་པ་དྲང་སྲོང་གརྒའི་ལྟས་ཀྱི་རྣམ་པ་བསྟན་པ་ལ་སོགས་པ་འགའ་ཞིག་ཕྱི་རོལ་པའི་རིག་བྱེད་ཀྱི་གཞུང་གི་ཆ་ཤས་སུ་སྣང་བས་བསྟན་བཅོས་འགྱུར་
རོ་ཅོག་གི་ནང་དུ་བྲིས་པས་འདིར་ནི་ཐེག་པ་ཆེ་ཆུང་གི་མདོར་ངེས་པ་རྣམས་ཐེག་པ་དང་བརྗོད་བྱ་འཐུན་པ་དང་། མཚན་འཐུན་པ་དང་། སྡེ་ཚན་འཐུན་པ་རྣམས་སོ་སོར་བསྡེབས་ཏེ་གྲངས་དང་གོ་རིམས་ཚང་ལ་མ་ནོར་བར་རྒྱུ་བཟང་ཞིང་བཀོད་
པ་ལེགས་པར་བཞེངས་པ་ཡིན་ནོ། །དེ་ལྟར་བསོད་ནམས་དཔལ་གྱིས་རབ་མཐོ་བ། །དཔལ་ལྡན་བླ་མ་དགེ་སྦྱོང་ཆེན་པོ་དེའི། །ཐུགས་ཀྱི་དགོངས་པ་རྫོགས་པར་བྱ་བའི་ཕྱིར། །མཁས་པའི་འབྱུང་གནས་དཔལ་གྱི་སྣར་ཐང་ནས། །
བཀའ་འགྱུར་དྲི་མེད་ཕྱི་མོར་གདན་དྲངས་ཏེ། །ཆོས་ཀྱི་རྒྱལ་པོ་དཔལ་ལྡན་རྒྱལ་བའི་སྡེས། །ཕན་དང་བདེ་བའི་འབྱུང་གནས་རྒྱལ་བ་ཡི། །བསྟན་པ་སྤེལ་ཕྱིར་བདེ་བར་གཤེགས་པའི་གསུང་། །གངས་རིའི་
ཁྲོད་འདིར་ཇི་སྙེད་འགྱུར་རོ་ཅོག །ལེགས་པར་བཞེངས་པར་གྱུར་པ་དེ་དག་ལས། །འདི་ནི་སྐྱེ་དགུའི་བློ་གྲོས་མུན་སེལ་ཞིང་། །ཕན་བདེའི་གཏེར་ཆེན་ཞེས་བྱའི་མདོ་སྡེའོ། །དེ་ལྟར་དཔལ་ལྡན་ལྷག་
བསམ་དག་པའི་མཐུས། །གསུང་རབ་རིན་ཆེན་ཚུལ་བཞིན་བཞེངས་པ་ལས། །བྱུང་བའི་དགེ་བ་སྟོན་ཀའི་ཟླ་འོད་དང་། །མཁའ་ལྟར་དག་ཅིང་ཡངས་པ་གང་ཐོབ་དེས། །འགྲོ་ཀུན་ཕན་

71-1-296b

བདེའི་འབྱུང་གནས་རྒྱལ་བ་ཡི། །བསྟན་པ་རིན་ཆེན་ཕྱོགས་དུས་ཀུན་ཁྱབ་ཅིང་། །སྡེ་འཛིན་སྐྱོང་དང་སྲུང་བའི་དམ་པ་རྣམས། །སྐྱེ་དགུའི་དཔལ་དུ་ཡུན་རིང་བཞུགས་གྱུར་ཅིག །གང་གིས་
གསུང་རབ་དྲི་མེད་འདི་བཞེངས་པ། །ཆོས་ཀྱི་རྒྱལ་པོ་དཔལ་ལྡན་རྒྱལ་བའི་སྡེ། །བསྟན་དང་འགྲོ་བའི་རྩ་ལག་དམ་པར་ནི། །ས་ཆེན་སྟེང་འདིར་ཡུན་རིང་བཞུགས་གྱུར་ཅིག །
ཁྱད་པར་དུ་ཡང་དེས་པས་ས་སྐྱོང་བའི། །མི་དབང་ཡོན་མཆོད་འཁོར་དང་བཅས་པ་རྣམས། །སྙུན་མེད་སྐུ་ཚེ་རིང་ཞིང་ཆབ་སྲིད་བརྟན། །བྱམས་བརྩེའི་ཐུགས་ཀྱིས་སྐྱེ་
དགུ་སྐྱོང་གྱུར་ཅིག །སྲིད་འབངས་རྣམས་ཀྱང་ཕན་ཚུན་བྱམས་ལྡན་ཞིང་། །ནད་དང་མུ་གེ་འཐབ་རྩོད་ལ་སོགས་པ། །ཕྱི་ནང་ཉེར་འཚེའི་གནོད་པ་ཀུན་ཞི་ནས། །
ཚེ་རིང་འབྱོར་ལྡན་བསྟན་ལ་དད་གྱུར་ཅིག །གང་དག་འདི་ལ་སྒོ་གསུམ་གུས་པ་ཡིས། །བྱ་བ་བྱེད་དང་རྗེས་སུ་ཡི་རང་དང་། །རྒྱུ་རྐྱེན་འབུལ་དང་ཆོས་སྤྱོད་རྣམ་བཅུ་
ཡིས། །ཚུལ་བཞིན་སྒྲུབ་པར་བྱེད་པ་དེ་དག་ཀྱང་། །འདིར་ཡང་ཚེ་རིང་ནད་མེད་འབྱོར་ལྡན་ཞིང་། །སྐྱེ་ཞིང་སྐྱེ་བའི་སྐྱེ་བ་ཐམས་ཅད་དུའང་། །འཁོར་ལོ་
བཞི་དང་ཡོན་ཏན་རྣམ་བདུན་དང་། །རྣམ་སྨིན་བརྒྱད་ལྡན་དལ་འབྱོར་ལུས་ཐོབ་ནས། །མཐོང་དང་བསྒོམ་པས་སྤོང་བྱའི་ཉོན་མོངས་དང་། །ཤེས་བྱའི་སྒྲིབ་པ་བག་ཆགས་
བཅས་པ་ཀུན། །སྤོང་བྱེད་གཉེན་པོ་ལམ་ལྔ་ས་བཅུ་རྣམས། །རིམ་གྱིས་བགྲོད་ནས་ཀུན་མཁྱེན་ཐོབ་པར་ཤོག །གང་ལ་བརྟེན་ནས་ཉེས་ཚོགས་རྣམ་སྤོང་ཞིང་། །གནས་སྐབས་

71-1-297a

མཐར་ཐུག་དགེ་ལེགས་ཀུན་འབྱུང་བ། །སྤོབས་པ་བཞི་ལྡན་བདེ་བར་གཤེགས་པའི་གསུང་། །མདོ་སྡེ་དཀོན་མཆོག་རྣམས་ཀྱི་བཀྲ་ཤིས་ཤོག །ཞུས་ཏེ། དག་གོ། །
ཡང་ཞུས་ཤེ། དུས་ཕྱིས་མདོ་མངས་ཀྱི་པོ་ཏི་རང་ག་རྣམས་ཀྱི་གཞུང་ལུགས་དང་འཐུན་པའི་འཆོས་དགོས་རྣམས་ལེགས་པར་གཏན་ལ་ཕབ་ནས་དག་པར་བཞུགས་པ་སྐར་མས་བགྱིས་སོ། །བཀྲ་ཤིས་པར་གྱུར་ཅིག། །། 
ཡེ་དྷརྨཱ་ཧེ་ཏུ་པྲ་བྷ་བཱ་ཧེ་དུན་ཏེ་ཥཱྃ་ཏ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་བྃ་བཱ་དཱི་མ་ཧཱ་ཤྲ་མ་ཎཿ།། །།མདོ་མངས་པུ་ཏི་སུམ་བཅུ་རྩ་གཉིས་ལ། མདོ་གྲངས་ཉིས་བརྒྱ་བརྒྱད་བཅུ་རྩ་བཞི་བཞུགས།། །།