88-1-1a

༼ཅ༽ ༄༅། ༈ །གསང་སྔགས་རྒྱུད་འབུམ་གྱི་སྐོར་བཞུགས་སོ། །
(黃)  秘密經第五部

88-1-1b

༄༅༅། །རྒྱ་གར་སྐད་དུ།  ཨཱརྱ་ཨ་ཙ་ལ་ཀལྤ་ཏནྟྲ་རཱ་ཛ།  བོད་སྐད་དུ།  འཕགས་པ་མི་
གཡོ་བའི་རྟོག་པའི་རྒྱུད་ཀྱི་རྒྱལ་པོ། དཔལ་ངག་གི་དབང་ཕྱུག་ལ་ཕྱག་འཚལ་ལོ། །འདི་སྐད་བདག་གིས་
ཐོས་པ་དུས་གཅིག་ན། བཅོམ་ལྡན་འདས་རྡོ་རྗེ་ལ་སྙོམས་པར་ཞུགས་ནས་ཉིད་ཀྱི་སྐུ་དང་གསུང་དང་ཐུགས་རྡོ་
རྗེ་ལས་སྔགས་ཀྱི་རྒྱལ་པོ་འདི་ཕྱུང་ངོ་། །ཨོཾ་ཨཱཿཧཱུྃ། དེ་གསུངས་མ་ཐག་ཏུ་ཚངས་པ་དང་། ཁྱབ་འཇུག་
དང་། དབང་ཕྱུག་ཆེན་པོ་དང་། བརྒྱ་བྱིན་དང་། གཞོན་ནུ་དང་། བྷྲིང་གི་རི་ཊི་དང་། ཚོགས་ཀྱི་བདག་པོ་
དང་། བྷཻ་བ་ས་ཏ་དང་། དགའ་བྱེད་དབང་ཕྱུག་དང་། ནག་པོ་ཆེན་པོ་དང་། སྲིན་མོ་ཆེན་མོ་འཕྲོག་བྱེད་མ་
དང་། ཉི་མ་དང་། ཟླ་བ་དང་། མིག་དམར་དང་། ལག་པ་དང་། ཕུར་བུ་དང་། སྤེན་པ་དང་། པ་བ་
སངས་དང་། སྒྲ་གཅན་དང་། རྒྱུ་སྐར་ཉི་ཤུ་རྩ་བརྒྱད་དང་། གནོད་སྦྱིན་དང་། སྲིན་པོ་དང་། ཆུ་ལྷ་

88-1-2a

དང་། གཤིན་རྗེ་དང་། མེ་ལྷ་དང་། རླུང་གི་ལྷ་དང་། སའི་ལྷ་མོ་དང་། དགའ་བོ་དང་། ཉེ་དགའ་བོ་དང་། འཇོག་པོ་དང་། མཐའ་ཡས་དང་། དུང་སྐྱོང་དང་། རིགས་ལྡན་དང་། པདྨ་
དང་། པདྨ་ཆེན་པོ་དང་། སྲིན་པོའི་བདག་པོ་ལང་ག་མགྲིན་བཅུ་དང་། ལྷའི་བུ་དྲུག་ཁྲི་ལ་སོགས་པ་ས་སྟེང་དང་། ས་བླ་དང་། ས་འོག་པ་ཐམས་ཅད་སྐད་ཅིག་དེ་ཉིད་ལ་དཔལ་འབྱུང་བའི་མཆོད་རྟེན་གྱི་
སྤོ་དེ་ལ་འཁོད་དོ། །དེའི་ཚེ་འཇིག་རྟེན་གསུམ་གྱི་བདུད་ཐམས་ཅད་དེར་ལྷགས་ནས་བྱང་ཆུབ་ཆེན་པོའི་བར་དུ་གཅོད་པར་རྩོམ་མོ། །དེ་རྣམས་ཀྱིས་ཐལ་མོ་སྦྱར་ཏེ་མགྲིན་གཅིག་ཏུ་འདི་སྐད་ཅེས་གསོལ་ཏོ། །
ཀྱེ་བཅོམ་ལྡན་འདས་སྟོན་པ་བདེ་བར་གཤེགས་པ་བྱང་ཆུབ་ཀྱི་བར་དུ་གཅོད་པའི་བདུད་ཀྱི་རིགས་འདི་རྣམས་ཞི་བ་དང་མེད་པར་མཛད་དུ་གསོལ་ཞེས་པ་དང་། དེ་ནས་བཅོམ་ལྡན་འདས་བདུད་ཐམས་ཅད་
ལས་མཆོག་ཏུ་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གསང་སྔགས་འདི་ཉིད་སྐུ་དང་། གསུང་དང་ཐུགས་རྡོ་རྗེ་ལས་ཕྱུང་ངོ་། །ཧཱུྂ་ཧཱུྂ་ཧཱུྂ་ཞེས་བརྗོད་མ་ཐག་ཏུ་ཉིད་ཀྱི་མདུན་དུ་ཁྲོ་བོ་ཆེན་
པོ་མི་གཡོ་བ་སྐུ་མདོག་མཐིང་ནག་ཏུ་འདུག་པ། ཞལ་སྟོང་ཕྲག་སྟོང་ཧ་ཧར་བཞད་པ། ཞབས་སྟོང་ཕྲག་སྟོང་བརྐྱང་བསྐུམ་གྱི་ཚུལ་དུ་བཞུགས་པ། ཕྱག་སྟོང་ཕྲག་སྟོང་དུ་གདུག་པའི་མཚོན་ཆ་རལ་
གྲི་དང་། རལ་གྲི་ཀྱོག་པོ་དང་། ཆུ་གྲི་དང་། གྲི་གུག་དང་། སྤུ་གྲི་དང་། ཁ་ཊྭཱཾ་ག་དང་། རྩེ་གསུམ་དང་། རྩེ་དགུ་པ་དང་། མདུང་དང་། འཕེན་མདུང་དང་། ལྡོང་མདུང་དང་། མདའ་དང་། མདའ་སྟེའུ་
ཁ་དང་། མདའ་རྩེ་ལྔ་པ་དང་། མདའ་ཁ་བྲག་པ་དང་། རྡོ་རྗེ་རྩེ་གཅིག་པ་དང་། རྩེ་གསུམ་པ་དང་། རྩེ་དགུ་པ་དང་། རྩེ་མོ་བཅུ་གསུམ་པ་དང་། སྟ་རེ་དང་། དགྲ་སྟ་དང་། སྟ་ལེབ་དང་། སོ་སྟ་དང་། 

88-1-2b

འཕེན་སྟ་དང་། བཞར་སྟ་དང་། དབྱུག་པ་དང་། ཐོ་བ་དང་། གཏུན་ཤིང་དང་། འཁོར་ལོ་དང་། ཕུབ་དང་། མགོ་བོ་དང་། བིང་ཏི་པ་ལ་དང་། གཞུ་དང་། གཞུ་མཉེན་དང་། ཐོད་པ་དང་། ཐོད་ཚལ་དང་། 
གྲི་ཟླུམ་དང་། གྲི་རིངས་དང་། གྲི་ལྕགས་ཀྱོ་དང་། ཞགས་པ་དང་། རྔ་ཡབ་དང་། བ་དན་དང་། མེའི་ཕུང་པོ་དང་། ཆུའི་སྐྱོགས་དང་། བྲག་དང་། ཐོད་པ་ཁྲག་གིས་གང་བ་དང་། ཕུར་པ་དང་། ཐོད་པའི་
ཕྲེང་བ་དང་། ཞིང་དབྱུག་དང་། མེ་རི་དང་། སོའི་ཕྲེང་བ་དང་། དྲིལ་བུ་དང་། ཇེང་དང་། པི་ཝང་དང་། གླིང་བུ་དང་། རྫ་རྔ་དང་། པ་ཊ་ཧ་དང་། རྔ་ཟླུམ་དང་། རྐེད་ཉག་དང་། དུང་དང་། བསིལ་ཕྲེང་དང་། ལག་པ་
དང་། རྐང་པ་དང་། ཁབ་དང་། གསིལ་བྱེད་དང་། ནམ་མཁའ་ལྡིང་དང་། སྦྲུལ་ཞགས་ལ་སོགས་པའི་མཚོན་ཆ་དུ་མ་བཟུང་ནས་ཕྱག་ལྷག་མ་རྣམས་གཡས་ན་རལ་གྲི་ཕྱར་ནས་གཡོན་པ་བསྡིགས་མཛུབ་ཕྱར་བར་
མཛད་དོ། །ཞལ་སྟོང་ཕྲག་སྟོང་ལ་འཛུམ་པ་དང་། བཞད་པ་དང་། ཧ་ཧ་ཞེས་སྒྲོགས་པ་དང་། མཆེ་བ་གཙིགས་པ་དང་། སོ་འདར་བ་དང་། གྱེན་དུ་གདངས་པ་དང་། ཁྲག་བལྡག་པ་དང་། རྔམ་པ་དང་། ཞི་བར་
ཡང་མཛད་དེ་ཞལ་གྱི་ཁ་དོག་ཀྱང་ཐ་དད་དོ། །དབུ་སྐྲ་ཡང་ནག་པོ་དང་། སེར་པོ་དང་། དམར་པོ་ལ་སོགས་པ་ཐ་དད་དོ། །སྐུ་སྟོད་ལ་གླང་པོ་ཆེའི་ཀོ་བ་གྱོན་ནས། སྐུ་སྨད་ཀྱང་སྟག་གི་པགས་པས་དཀྲིས་ཤིང་། 
ཕྱག་དང་ཞལ་དང་ཞབས་ཀྱི་བྱེ་བྲག་གིས་རྒྱན་ཡང་ཐ་དད་དེ། རིན་པོ་ཆེ་དུ་མ་དང་། རུས་པའི་ཕྲེང་བ་དང་། སྦྲུལ་གྱི་ཆུན་པོ་དང་། མི་མགོའི་ཕྲེང་བ་དང་། མིའི་པགས་པ་དང་། སེང་གེའི་པགས་པ་དང་། མ་
ཧེའི་པགས་པ་ལ་སོགས་པ་ཐ་དད་དོ། །ཞལ་རེ་རེ་ལ་ཡང་སྤྱན་གསུམ་གསུམ་དང་། གཉིས་གཉིས་དང་། རེ་རེའོ། །དེ་ནས་བཅོམ་ལྡན་འདས་ཀྱིས་ཁྲོ་བོ་ཆེན་པོ་མི་གཡོ་བ་དེ་ལ་འདི་སྐད་དུ་བཀའ་བསྒོའོ། །

88-1-3a

ཨོཾ་ཀྱེ་མི་གཡོ་བ། ཁྲོ་བོ་དྲག་པོ། འཇིགས་བྱེད་ཆེན་པོ། གཏུམ་པོ་ཆེན་པོ། དཔའ་བོ་ཆེན་པོ། བདུད་ཀྱི་ཚོགས་ཐམས་ཅད་སོད་ཅིག །ཆིངས་ཤིག །བཏོགས་ཤིག །རྒྱོབ་ཅིག །ཕྲོལ་ཅིག །གཏུབས་
ཤིག །དྲིལ་ཅིག །ཕུལ་ཅིག །ནོན་ཅིག །གཟིར་ཅིག །ཕུག་ཅིག །ཚོས་ཤིག །སྲེགས་ཤིག །ཕྱེ་མར་གྱིས་ཤིག །མེད་པར་གྱིས་ཤིག །ཁོས་ཤིག །སྡོམས་ཤིག །ཟོ་ཤིག །འཐུང་ཤིག །བསྡིགས་ཤིག །
ཧཱུྂ་ཧཱུྂ་ཧཱུྂ་ཛ་ཛ་ཛ་ཧཾ་ལཾ་ཏྲཾ་ཕཊ། ཅེས་གསུངས་པ་དང་། ཁྲོ་བོའི་རྒྱལ་པོ་དེ་ཁྲོས་ནས་ཧཱུྂ་ཞེས་བརྗོད་པས་ཞལ་གསུམ་ཕྱག་དྲུག་པར་བྱས་ཏེ། ཀླུའི་ཚོགས་ཐམས་ཅད་མ་ལུས་པར་ཟོས་སོ། ཕཊ་ཅེས་བརྗོད་ནས་ཞལ་
བཞི་ཕྱག་བཞི་ཞབས་ཀྱང་བཞིར་བྱས་ནས་ལྷ་མ་ཡིན་ཐམས་ཅད་མེད་པར་བྱས་སོ། །ཞལ་གཅིག་ཕྱག་གཉིས་པ་དྲང་སྲོང་ཁྲོས་པའི་དབྱིབས་ལྟར་བྱས་ནས་ལྷའི་གདོན་ཐམས་ཅད་ཕམ་པར་བྱས་ཏེ། ཚོགས་ཀྱི་བདག་
པོ་གདན་དུ་བྱས་སོ། །གཞོན་ནུའི་ཆ་བྱད་དུ་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ནས་ལྷའི་བདུད་ཕམ་པར་བྱས་སོ། །གཡོན་པ་ས་ལ་བཙུགས་ནས་བི་ནཱ་ཡ་ཀ་མེད་པར་བྱས་སོ། །དེ་ནས་ཡང་
དག་བཤད་བྱ་བ། །ལྷ་ལ་སོགས་པ་རྣམས་སྡང་ཞིང་། །ཁྲོས་ནས་གདུག་པ་རྣམས་འཇིགས་བྱེད། །སྣ་ཚོགས་རབ་མང་སྦྱོར་མཛད་པའོ། །ཆོས་རྣམས་གང་གིས་ཅིར་མང་མཐོང་། །ལུས་དང་སེམས་དང་ངག་
རྣམས་དག །ཀུན་རྫོབ་སྟོང་པ་རྣམ་དག་ནས། །མི་གནས་སྣ་ཚོགས་ཟུང་འཇུག་བདེ། །འཕགས་པ་མི་གཡོ་བའི་རྟོག་པའི་རྒྱུད་ཀྱི་རྒྱལ་པོ་ལས་སྤྲུལ་པ་རྣམ་པར་དག་པའི་ལེའུ་སྟེ་དང་པོའོ།། །། 
དེ་ནས་ཡང་དག་བཤད་བྱ་བ། །བདེ་བར་གཤེགས་རྣམས་འདུས་པའི་སྐུ། །སྣ་ཚོགས་ལུས་ཅན་འཇིགས་པའི་གཟུགས། །ནམ་མཁའ་གང་བའི་བསམ་གཏན་བྱ། །སྐད་ཅིག་བསམ་གཏན་མངོན་རྫོགས་

88-1-3b

ཤིང་། །སྐད་ཅིག་ཡི་གེ་རྣམ་དགོད་བྱེད། །སྐད་ཅིག་ལ་ནི་གསང་སྔགས་འདོན། །འཇིགས་གཟུགས་སྐད་ཅིག་སྤྲུལ་པ་འགྱེད། །ཚར་གཅོད་ཟིལ་གྱིས་གནོན་མཛད་ཕྱིར། །སྐད་ཅིག་ཁྲོས་སྤྱན་ནག་པོ་
འབར། །མཁའ་ལ་གཟིགས་པས་ལྷ་རྣམས་སྐྲག །ས་ལ་གཟིགས་པས་ཀླུ་རྣམས་སྐྲག །རྒྱལ་བ་སྲས་དང་བཅས་རྣམས་དང་། །བླ་མ་ལ་ཡང་ཕྱག་འཚལ་ཞིང་། །རྟག་ཏུ་མཆོད་དེ་དགའ་ཆེན་བསྐྱེད། །
ལུས་ངག་ཡིད་ཀྱི་སྡིག་བྲལ་གང་། །དཀོན་མཆོག་གསུམ་མཆོད་བདེ་དོན་གཉེར། །སངས་རྒྱས་བཞུགས་ཤིང་ཆོས་གསུངས་པའི། །སྨོན་ལམ་དག་པའི་བློ་བསྐྱེད་བྱ། །བྱང་ཆུབ་སེམས་ཀྱང་བསྐྱེད་བྱ་ཞིང་། །
དགེ་བའི་ཕུང་པོ་དུས་གསུམ་དུ། །གཞན་གྱི་དོན་དུ་བསྔོ་བར་བྱ། །བྱམས་དང་སྙིང་རྗེ་བསམ་པར་བྱ། །དགའ་བའི་དགེ་ལ་ཡིད་ཀྱིས་དམིགས། །ནམ་མཁའ་ཆེ་མཚུངས་བློ་ཡིས་ནི། །བཏང་སྙོམས་ཆེན་པོ་བསྒོམ་
པར་བྱ། །དེ་ལྟར་དད་ལྡན་བརྩོན་འགྲུས་ཅན། །གཡོ་རྒྱུ་བྲལ་ཞིང་བླ་མ་བཀུར། སྙིང་བརྩེ་ལེ་ལོ་མེད་པ་ཡི། སྲིད་པའི་སྲེད་པ་སྤོང་བྱེད་པ། དགའ་བའི་ཚལ་ལམ་ནེའུ་བསིང་དང་། །ཕུག་གམ་ལྷ་ཁང་སྟོང་པ་
འམ། །ཤིང་དྲུང་ནགས་དགོན་ལྗོངས་རྣམས་སུ། །བདེ་བའི་ཡིད་ཀྱིས་གནས་པར་བྱ། །དེ་ནས་བཅོམ་ལྡན་འདས་ཐུབ་པ་ཆེན་པོ་ཡོངས་སུ་རྫོགས་པ་ཐམས་ཅད་མཁྱེན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ནས་རིག་པ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ནམ་མཁའི་དབྱིངས་ཀྱི་དབུས་གནས་པར། །ཧཱུྂ་གི་ཡི་གེ་ལས་སྐྱེས་པ། །མི་གཡོ་མགོན་པོ་རྒྱལ་བའི་སྐུར། །རྣལ་འབྱོར་དག་པའི་
ལུས་བསྒོམ་བྱ། །ཞལ་གཅིག་ཕྱག་གཉིས་བརྗིད་པའི་སྐུ། །ལྷ་དང་ལྷ་མིན་བདུད་ཚོགས་རྣམས། །ཤིན་ཏུ་སྐྲག་པར་མཛད་པའི་ཕྱིར། །གཡས་ཀྱིས་རལ་གྲི་མཁའ་ལ་ཕྱར། །གཡོན་པ་བསྡིགས་མཛུབ་

88-1-4a

ཞགས་པ་འཛིན། །པདྨ་ཉི་མའི་གདན་ལ་ནི། །ཚོགས་ཀྱི་བདག་པོའི་སྟེང་གནས་པ། །གཡོན་བརྐྱང་གར་བཞུགས་སྟག་ཤམ་ཅན། །ཕུ་སྒྲོགས་ཀླུ་ཆེན་བརྒྱད་ཀྱིས་བརྒྱན། །དམར་སེར་གྱེན་སྐྲ་སྤྱན་རྩ་
དམར། །སྤྱན་ཟླུམ་ཁྲོ་ཚུལ་མཆེ་བ་གཙིགས། །ཚངས་པ་ལྷ་དབང་ཁྱབ་འཇུག་དང་། །དབང་ཕྱུག་ཆེ་སོགས་ལྷ་རྣམས་དང་། །ལྷ་མ་ཡིན་རྣམས་སྐྲག་པར་བྱེད། །བསྐལ་པའི་མེ་འོད་འབར་དབུས་ན། །ཁྲོ་བོ་དུ་མའི་ཚོགས་
དང་བཅས། །བརྟན་གཡོ་ཁམས་གསུམ་མ་ལུས་རྣམས། །རང་གི་སྤྲུལ་པར་ཤེས་བྱས་ནས། །དེ་ལྟར་གུས་བཅས་ཡུན་རིངས་སུ། །རྒྱུན་མི་འཆད་པར་གང་བསྒོམས་པས། །ལས་དང་ཉོན་མོངས་ཀྱིས་བསླད་པའི། །ཐ་
མལ་པ་ཡི་རྣམ་རྟོག་ལྡོག །བདག་འདོད་ལྷ་ཡི་རྣལ་འབྱོར་ལ། །ཤིན་ཏུ་ཡིད་བརྟན་བྱེད་གྱུར་ན། །རལ་གྲི་ལ་སོགས་གྲུབ་བརྒྱད་ཀྱི། །སྣོད་དུ་རྣལ་འབྱོར་པ་དེ་འགྱུར། །དེ་ནས་བཅོམ་ལྡན་འདས་ཐུབ་པ་ཆེན་པོས་
མི་བཟད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རིག་པ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ནམ་མཁའི་དབྱིངས་ཀྱི་དབུས་གནས་པར། །ཧཾ་གི་ཡི་གེ་ལས་སྐྱེས་པར། །
དྲག་ཆེན་ཁྲོ་བོའི་རྒྱལ་པོ་ནི། །སྔོ་ནག་ཞལ་གསུམ་ཕྱག་དྲུག་བསྒོམ། །རལ་གྲི་ཆུ་གྲི་སྟ་རེ་ནི། །གཡས་ཀྱི་ཕྱག་ན་རིམ་བཞིན་འཛིན། །བསྡིགས་མཛུབ་འཁོར་ལོ་ཁ་ཊྭཱཾ་ནི། །གཡོན་གྱི་ཕྱག་ན་རིམ་བཞིན་འཛིན། །སྤྱན་
གསུམ་ཁྲོ་གཉེར་གྱེན་དུ་བསྐྱོད། །དབུ་སྐྲ་སྨ་ར་གྱེན་འགྲེང་སེར། །རོལ་པ་ཀླུ་ཡི་རྒྱན་གྱིས་བརྒྱན། །ཐོད་པའི་ཕྲེང་བ་སྟག་ཤམ་ཅན། །གླང་ཆེན་ལྤགས་པས་སྟོད་གཡོགས་བྱས། །རུས་པའི་རྒྱན་གྱིས་རབ་བརྒྱན་
ཅིང་། །པདྨ་ཉི་མའི་གདན་དབུས་ན། །གཡོན་བརྐྱང་གཡས་བསྐུམ་ཚུལ་དུ་འགྱིང་། །ཧཾ་ཕེཾ་ནམ་མཁའི་ཕྱོགས་སྒྲོགས་པ། །བསྐལ་པའི་མེ་ལྟར་གཟི་བརྗིད་ཆེ། །འདི་ལྟར་སྐད་ཅིག་དྲན་པ་འམ། །མིང་ཤེས་ཙམ་

88-1-4b

གྱིས་འདོད་པ་སྒྲུབ། །དེ་ནས་བཅོམ་ལྡན་འདས་ཐུབ་པ་ཆེན་པོ་འཇིག་རྟེན་དབང་ཕྱུག་རྣམ་པར་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་སོ། །རིག་པ་འདི་ཉིད་ཀྱི་སྐུ་དང་གསུང་
དང་ཐུགས་རྡོ་རྗེ་ལས་ཕྱུང་ངོ་། །ནམ་མཁའི་དབྱིངས་ཀྱི་དབུས་གནས་པར། །མཾ་ལས་སྐྱེས་པའི་མི་གཡོ་བ། །འཇིགས་བྱེད་ཆེན་པོ་བསམ་པར་བྱ། །ཡི་དགས་དྲོད་ཀྱི་སྟེང་ན་འགྱིང་། །ཞལ་བཞི་ཕྱག་བཞི་ཞབས་
ཀྱང་བཞི། །གཡས་པ་རལ་གྲི་རྡོ་རྗེ་འཛིན། །གཡོན་པ་བསྡིགས་མཛུབ་ཐོད་ཁྲག་གོ། ཞབས་བཞི་བདུད་བཞིའི་སྟེང་ན་འགྱིང་། །སྣ་ཚོགས་རུས་པའི་རྒྱན་ལྡན་ཞིང་། །སྟག་གི་ཤམ་ཐབས་རྣམ་པར་བརྒྱན། །སྟོད་དུ་
ན་རའི་པགས་པས་བརྒྱན། །དམར་སེར་གྱེན་སྐྲ་འཇིགས་ཚུལ་ཆེ། །ཧ་ཧར་བཞད་ཅིང་རྟ་སྐད་འཚེར། །ཁྲོ་བོ་དུ་མའི་སྤྲིན་སྤྲོ་ཞིང་། །ཞལ་རྣམས་གདངས་པས་མཆེ་བ་གཙིགས། །སྤྱན་བཅུ་གཉིས་པོ་རབ་ཏུ་
བགྲད། །འཇིགས་པ་ཡང་ནི་འཇིགས་པར་བྱེད། །ཆར་སྤྲིན་མདོག་འདྲ་མེ་ཆེན་གཟི། །ཐབས་ཆེན་འདོད་པའང་འདིས་རྫོགས་བྱེད། །དེ་ནས་ཡང་བཅོམ་ལྡན་འདས་ཐུབ་པ་ཆེན་པོ་མི་འགྱུར་རྡོ་རྗེ་ཞེས་བྱ་བའི་ཏིང་
ངེ་འཛིན་ལ་སྙོམས་པར་ཞུགས་ནས་རིག་པ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ནམ་མཁའི་དབྱིངས་ཀྱི་དབུས་གནས་པར། །ཡི་གེ་ཧཱུཾ་ལས་བྱུང་བ་ཡི། །མི་གཡོ་མགོན་པོ་གཏུམ་པོ་ཆེ། །
བདུད་རྣམས་སྐྲག་བྱེད་བསྒོམ་པར་བྱ། །ཞལ་གཅིག་ཕྱག་གཉིས་འཇིགས་པའི་སྐུ། །པད་དཀར་ཉི་མའི་སྟེང་དཀྱིལ་ན། །དཔུས་མོ་ས་ལ་བཙུགས་ནས་བཞུགས། །ཕྱག་གཡས་རལ་གྲི་འཛིན་པ་སྟེ། །གཡོན་པ་
བསྡིགས་མཛུབ་ཞགས་པ་འཛིན། །སྤྱན་གཉིས་དམར་ལ་ཟླུམ་པ་སྟེ། །གཞོན་ནུ་ཁྲོས་པའི་ཆ་བྱད་ཅན། །རིན་ཆེན་རྒྱན་གྱིས་རྣམ་པར་བརྒྱན། །སྦྲུལ་དཀར་པོ་ཡིས་དོ་ཤལ་བྱས། །སྟག་གི་པགས་པའི་ཤམ་

88-1-5a

ཐབས་ཅན། །སྣ་ཚོགས་ཁྲོོ་རྣམ་པར་འཕྲོ། །བསྐལ་པའི་མེ་ཡི་དབུས་ན་གནས། །གང་གིས་ཉི་མ་ཟླ་བ་ཡི། །མདུན་དུ་རྣམ་པར་དྲན་བྱེད་ན། །བདུད་རྣམས་མ་ལུས་ཟད་ནས་ནི། །བདེ་བ་ཆེན་པོའི་ལུས་རྙེད་
འགྱུར། །ཨ་ཏ་ས་ཡི་མེ་ཏོག་གི། འོད་ལྡན་བཅོམ་ལྡན་ལྷ་ཡིས་མཆོད། །བདག་གི་སྙིང་ངམ་སྙིང་དཀྱིལ་བསྒོམ། །མྱུར་དུ་འདོད་པ་རྫོགས་པར་བྱེད། །དེ་ནས་ཡང་དག་བཤད་བྱ་བ། །ཞལ་གཅིག་ཕྱག་གཉིས་དུ་བའི་
མདོག །ཡང་ན་སྔོན་པོ་བཻ་དཱུར་གཟི། །བདུད་རྣམས་བརླག་པར་མཛད་པའོ། །གཡོན་བརྐྱང་གཡས་བསྐུམ་བཞུགས་པ་འམ། །ཡང་ན་གཡོན་པ་ས་ལ་བཙུགས། །ཐབས་ཚུལ་རིན་ཆེན་རྒྱན་གྱིས་བརྒྱན། །སྡིག་པ་ཐམས་
ཅད་ཟད་བྱེད་པ། །བློ་གྲོས་ཕུང་པོ་རྒྱས་པར་བྱེད། །དེ་ནས་བཅོམ་ལྡན་འདས་ཐུབ་པ་ཆེན་པོ་ཡོངས་སུ་རྒྱས་པ་དཔལ་གྱི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རིག་པ་འདི་ཉིད་ཀྱི་སྐུ་དང་གསུང་དང་
ཐུགས་རྡོ་རྗེ་ལས་ཕྱུང་ངོ་། །དམ་ཚིག་སེམས་དཔའ་ལྟ་བུ་ཡི། །ཡེ་ཤེས་སེམས་དཔའ་སྙིང་གར་བསྒོམ། །འོད་ནི་ཆེར་འབར་དྲག་པོའི་གཟི། །ཤེས་བྱའི་སྒྲིབ་ལས་རྣམ་པར་རྒྱལ། །དེ་ཡི་ཐུགས་ཀར་མཚན་མ་སྟེ། །
ས་བོན་རྟག་པར་དམིགས་པ་ནི། །ལས་ཀྱི་སྒྲིབ་པ་རྣམ་དག་རྒྱུ། །ལས་ཀྱི་ལས་རྣམས་བསྒྲུབ་པའི་ཕྱིར། །ས་བོན་ལས་ནི་འོད་ཟེར་འཕྲོས། །ཡེ་ཤེས་སེམས་དཔའ་བཀུག་ནས་གཞུག །དེས་ནི་མི་ཤེས་བག་ཆགས་
རྣམས། །བློ་ལྡན་བློ་ལ་འཇོག་མི་བྱེད། །དེ་བཞིན་གཤེགས་པ་ཀུན་དམིགས་ནས། །སངས་རྒྱས་རྣམས་ཀྱིས་དབང་བསྐུར་འགྱུར། །སྤྱི་བོར་རང་གི་རིགས་བསམས་ནས། །རིགས་ཀྱི་བདག་པོས་དབུ་བརྒྱན་འགྱུར། །
དེ་ལྟར་དེ་ལ་བརྩོན་ཆེན་བྱ། །འདིས་ནི་རྒྱལ་རྣམས་མཉེས་གྱུར་ནས། །མྱུར་དུ་རྒྱལ་བ་ཉིད་ཐོབ་འགྱུར། །འཕགས་པ་མི་གཡོ་བའི་རྟོག་པའི་རྒྱུད་ཀྱི་རྒྱལ་པོ་ལས་ལྷ་འབྱུང་བའི་ལེའུ་སྟེ་གཉིས་པའོ།། །།

88-1-5b

དེ་ནས་ཡང་དག་བཤད་བྱ་བ། །དགེ་བྱེད་རས་རིས་བཀྲ་ཤིས་ཀྱིས། །སྡིག་པའི་དྲི་མ་རྣམ་བསལ་ནས། །སྒྲུབ་པོ་རྣམས་ལ་མཆོག་སྟེར་བྱེད། །གཙང་བྱེད་བྲམ་ཟེ་ལས་རྙེད་དམ། །རྒྱལ་པོ་འམ་བུ་མོ་
བཟང་གི་རས། །འཇམ་ཞིང་འཐས་པར་བརྡུངས་བྱས་ཏེ། །འདོད་པ་བཞིན་དུ་བྲི་བར་བྱ། །རམས་སམ་མིག་སྨན་ཁུ་བ་དང་། །སྨན་གསུམ་མེ་ཏོག་གཉིས་ལྡན་པའི། །ཁུ་བ་ཤིང་སྤྱིན་གསུམ་སྦྱར་ནས། །གཞན་ཡང་
སྣ་ཚོགས་ཚོན་གྱིས་བྲི། །དེ་ལས་ཁྲོ་བོའི་རྒྱལ་པོ་མི་གཡོ་བ་ནི་ཞལ་གཅིག་ཕྱག་གཉིས་པ་སྟེ། གཡས་རལ་གྲི། གཡོན་པ་བསྡིགས་མཛུབ་ཞགས་པ་དང་འབྲེལ་བ། ཀླུས་བརྒྱན་པ། པདྨ་དང་ཉི་མ་དང་། 
ཚོགས་ཀྱི་བདག་པོའི་སྟེང་ན་གཡོན་བརྐྱང་བས་འགྱིང་ཞིང་བསྐལ་པའི་མེའི་ནང་ན་ཁྲོ་བོ་དུ་མའི་ཚོགས་འཕྲོ་བ་བྲི་བའོ། །ལྷའི་དབང་ཕྱུག་མི་གཡོ་མགོན་པོ་ནི་ཞལ་གསུམ་ཕྱག་དྲུག་པ་ཞལ་གཡས་དཀར་བ་
གཡོན་དམར་བ། ཞལ་རེ་རེ་སྤྱན་གསུམ་གསུམ་དང་ལྡན་པའོ། །སྐྲ་སེར་པོ་གྱེན་དུ་བརྫེས་པ། ཕྱག་གཡས་གསུམ་ན་རལ་གྲི་དང་། ཆུ་གྲི་དང་། སྟ་རེ་བསྣམས་པ། གཡོན་གསུམ་ན་བསྡིགས་མཛུབ་དང་། འཁོར་ལོ་དང་། 
ཁ་ཊྭཱཾ་ག་འཛིན་པ་དང་། ཀླུས་བརྒྱན་ཅིང་ཐོད་པའི་དོ་ཤལ་ཅན། སྟག་གི་ཤམ་ཐབས་དང་། གླང་པོ་ཆེའི་སྟོད་གཡོགས་དང་། ཐོད་པ་ལྔའི་དབུ་རྒྱན་ཅན། རུས་པས་བརྒྱན་ཅིང་པདྨ་དང་ཉི་མའི་སྟེང་ན་གཡོན་བརྐྱང་ཞིང་
གཡས་བསྐུམ་པའི་ཚུལ་གྱིས་འགྱིང་བ། བསྐལ་པའི་མེའི་གཟི་མདངས་ཀྱི་ནང་ནས་ཁྲོ་བོ་བཅུ་འཕྲོ་བ་བྲིའོ། །ལྷ་མིན་རྒྱལ་པོ་མི་གཡོ་བ་ནི་ཞལ་བཞི་རེ་རེ་ལ་ཡང་སྤྱན་གསུམ་གསུམ་དང་ལྡན་ཞིང་། ཕྱག་
བཞིའི་གཡས་གཉིས་ན་རལ་གྲི་དང་རྡོ་རྗེ། གཡོན་གཉིས་ན་བསྡིགས་མཛུབ་དང་ཐོད་ཁྲག་ཅན། སྟོད་ལ་མིའི་པགས་པ་གྱོན་ཞིང་སྟག་གི་ཤམ་ཐབས་ཅན། རུས་པ་དང་། ཀླུས་ཡན་ལག་བརྒྱན་པ། བསྐལ་

88-1-6a

པའི་མེ་འབར་ཞིང་ཁྲོ་བོའི་ཚོགས་ཀྱི་སྤྲིན་དུ་མ་འཕྲོ་བ། པདྨ་ལ་ཞབས་བཞིས་བདུད་བཞི་མནན་ཅིང་སྐྲ་སེར་པོ་གྱེན་དུ་བརྫེས་པ་བྲིའོ། །བདུད་ཐམས་ཅད་འདུལ་བའི་མི་གཡོ་བ་ནི་གཏུམ་པོ་ཞལ་གཅིག་
ཕྱག་གཉིས་རལ་གྲི་དང་། ཞགས་པས་འབྲེལ་བ། སྐྲ་ནག་པོའམ་སེར་པོ་གྱེན་དུ་བརྫེས་པ། རིན་པོ་ཆེའི་ཅོད་པན་དང་། དོ་ཤལ་དང་། ཡན་ལག་ཐམས་ཅད་བརྒྱན་ཅིང་སྟག་གི་ཤམ་ཐབས་ཅན། སྦྲུལ་དཀར་པོ་སེ་
རལ་ཁར་ཐོགས་པ། བསྐལ་པའི་ཚོགས་ཀྱི་མེ་རི་འབར་བའི་ནང་ན་ཁྲོ་བོ་དུ་མ་འཁྲུག་ཅིང་། པད་མ་དང་ཉི་མ་ལ་པུས་མོ་གཡས་པ་འཐབ་སྟངས་ཀྱི་ཚུལ་དུ་བཞུགས་པ་འམ། ཡང་ན་གཡོན་པ་གཤེད་པོའི་ཚུལ་དུ་
བཙུགས་ཤིང་ལྷག་མ་ནམ་མཁའ་ལ་འགྲེང་ཞིང་བཏེག་པ་བྲིའོ། །གང་ཡང་རང་འདོད་པ་ཞིག་དེ་ལྟར་བྲིས་ནས། དེའི་མདུན་དུ་རང་ཉིད་ཀྱི་འདྲ་འབག་ཚོན་སྣ་ཚོགས་ཀྱིས་བྲིས་ལ། རི་མོ་མཁན་ལ་གོ་པ་ལེགས་པར་
བསྐྱེད་ནས། མཛེས་པ་གཡོན་དུ་ཕུལ་ཏེ། བཀྲ་ཤིས་བརྗོད་ནས། རང་གི་གནས་ཀྱི་དབེན་པའི་ཕྱོགས་སུ་བཞུགས་ལ་མངོན་སུམ་དུ་མི་གཡོ་བར་བསྒྲུབས་ཏེ། མེ་ཏོག་ལ་སོགས་པས་ལེགས་པར་མཆོད་ནས། 
ཡེ་ཤེས་ཀྱི་ཁྲོ་བོའི་རྒྱལ་པོ་ཡང་དེ་ཉིད་ལ་བསྟིམ་པར་བྱའོ། །གང་ཡང་དངོས་གྲུབ་འདོད་པས་སྤོས་དང་། མེ་ཏོག་དང་། སྒྲོན་མ་དང་། ཞལ་ཟས་དང་། གོས་ལ་སོགས་པས་རྒྱུན་དུ་མཆོད་ན་སངས་རྒྱས་
ཐམས་ཅད་ཀྱི་གསང་སྔགས་འགྲུབ་པ་ལ་གདོན་མི་ཟའོ། །འདིར་སྐྱེ་བོ་འགའ་ནི་དམན་པ་སྟེ། སྐུར་པ་འདེབས་ན་ཤིན་ཏུ་ཡང་ལྷུང་བར་འགྱུར་བའི་ཕྱིར་སྐུ་དབེན་པའི་ས་ཕྱོགས་སུ་སྦ་བར་བྱའོ། །ཞི་རྒྱས་
དབང་དང་བསད་པ་འམ། །རལ་གྲི་ལ་སོགས་བརྒྱད་རྣམས་དང་། །མཆོག་གི་སངས་རྒྱས་ཐམས་ཅད་ནི། །རྒྱལ་བའི་གཟུགས་བརྙན་ལས་རྙེད་འགྱུར། །འཕགས་པ་མི་གཡོ་བའི་རྟོག་པའི་རྒྱལ་པོ་ལས་

88-1-6b

བྲིས་སྐུའི་ལེའུ་སྟེ་གསུམ་པའོ།། །། དེ་ནས་ཡང་དག་བཤད་བྱ་བ། །གསང་བ་རྣམ་པར་དག་བྱེད་ཅིང་། །དངོས་གྲུབ་མྱུར་ཕྱིར་གསང་སྔགས་རྣམས། །རིམ་པ་དབྱེ་བ་ངོ་མཚར་ཉོན། །
བཅུ་བཞིའི་དབྱངས་ལས་ཡུམ་གྱིས་བརྒྱན། །གསལ་བྱེད་གཉིས་པའི་དང་པོ་ལ། །གསུམ་པའི་ལྔ་པས་ཉེ་བར་བརྒྱན། །གསུམ་པའི་གསུམ་པ་དེར་གཞག་གོ། ལྔ་པའི་ལྔ་པ་བརྒྱད་པ་ལ། །དབྱངས་ཀྱི་གཉིས་
པས་མཛེས་པར་བྱས། །མེ་དང་དབྱངས་བཅུ་གསུམ་པར་འབྲེལ། །དྲོད་གཉིས་པ་དང་དྲག་མཐའ་འབྲེལ། །སུམ་བཅུ་གསུམ་དང་དབྱངས་དྲུག་འབྲེལ། །ཉི་ཤུ་རྩ་ལྔ་པས་བརྒྱན་ནོ། །ཉི་ཤུ་གཉིས་དང་བཅུ་གཅིག་
འབྲེལ། །དེ་ལ་ཉི་ཟླས་རྣམ་བརྒྱན་པའོ། །གསང་སྔགས་རྒྱལ་པོ་ཡི་གེ་བཅུ། །སྟོང་ཁྲི་འབུམ་མམ་བྱེ་བ་བཅུ། །ས་ཡ་བཟླས་ཀྱང་ལྷ་མཐོང་འགྱུར། །སྙིང་པོ་སྡིག་བྲལ་དགའ་བ་སྟེ། །ཕྱོགས་བཅུའི་སངས་རྒྱས་ཀུན་
གྱིས་བསྔགས། །སྡུག་བསྔལ་ཟད་བྱེད་བདེ་བ་ཆེ། །སྒྲུབ་པ་རྣམས་ལ་སྐྱེད་བྱེད་པའི། །གསང་སྔགས་དྲག་པོ་དྲན་བྱེད་ན། །འཇིག་རྟེན་འདིར་ཡང་ཚེ་རིང་འགྱུར། །སངས་རྒྱས་འགྱུར་རོ་གཞན་ཅི་སྨོས། །ཨོཾ་སྭ་བྷཱ་བ་ཤུདྡྷཱ་
སརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། གཟུང་བ་དག་པ་ཡེ་ཤེས་ཀྱི་སྔགས་སོ། །ཨོཾ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། འཛིན་པའི་སེམས་དག་པ་ཡེ་ཤེས་ཀྱི་སྔགས་སོ། །ཨོཾ་བཛྲ་ཤུདྡྷཱ་སརྦ་དྷརྨཱ་བཛྲ་ཤུདྡྷོ྅་
ཧཾ། སྐུ་བརྟེན་པ་རྡོ་རྗེ་ཡེ་ཤེས་ཀྱི་སྔགས་སོ། །ཨོཾ་ཀཱ་ཡ་བཱཀྩིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྐུ་གསུང་ཐུགས་ཀྱི་ཡེ་ཤེས་ཀྱི་སྔགས་སོ། །ཨོཾ་ཨ་ཙ་ལ་ཏེ་ཛ་བཛྲ་པུཥྤེ། དྷཱུ་པེ། དཱི་པེ། གན་དྷེ། ནཻ་བི་དྱེ་
ས་པ་རི་ཝཱ་རེ་བྷྱཿཛཿཧཱུཾ་བྃ་ཧོཿ། སནྟྲོ་པ་ཏྲ་སརྦ་སཏྭཱ་ནི། ཨི་མཾ་བ་ལིཾ་གྲིཧྞ་ཁ་ཁ་ཁཱ་ཧི་ཁཱ་ཧི་བྷཀྵ་བྷཀྵ་ཎི་ཧཱུཾ་ཕཊ། མཆོད་པ་དང་གཏོར་མའི་སྔགས་སོ། །ཞོ་དང་འོ་མ་འབྲས་ཆན་དང་། །སཱ་ལུ་དཀར་དང་ཏིལ་

88-1-7a

དཀར་དང་། །གྲོ་དང་ནས་དང་བྲ་བོ་དང་། །ཤིང་ཏོག་ལ་སོགས་རྟག་པར་མཆོད། །ཨོཾ་ཙཎྜ་མ་ཧཱ་རོ་ཥ་ཎ་ཧཱུྃ་མཎྜ་ལ་མ་དྷྱེ་ཨཱ་གཙྪ་ཡ། ས་མ་ཡ་སྟྲཾ། སྤྱན་དྲང་བའི་སྔགས་སོ། །ཨོཾ་ཙཎྜ་མ་ཧཱ་རོ་ཥ་ཎ་
མ་མ་ཤ་ཏྲུཾ་ཨ་མུ་ཀསྱ་ཤི་རཾ་ཀཱི་ལ་ཡ་ཧཱུྃ་ཕཊ། ཀ་ཏི་མུ་ཏ་སྟམ་བྷ་ཡ། ཧྲྀ་ད་ཀཱི་ལ་ཡ་ཧཱུྃ་ཕཊ། པ་དེ་ཀཱི་ལ་ཡ་སྭཱ་ཧཱ། ཕུར་བུས་གདབ་པའི་སྔགས་སོ། །ན་མཿས་མནྟ་ཀཱ་ཡ་ཝཱཀྩིཏྟ་བཛྲཱ་ཎཱཾ། ཨོཾ་ཨ་ཙ་ལ་ཀཱ་ཎ་ཙཎྜ་
མ་ཧཱ་རོ་ཥ་ཎ་སྥོ་ཊ་ཡ་ཧཱུྃ་ཏྲཱཾ་མཾ་ཧཾ། ལས་ལ་བསྐུལ་བའི་སྔགས་སོ། །ན་མཿསནྟ་ཀཱ་ཡ་ཝཱཀྩིཏྟ་བཛྲཱ་ཎཱཾ། ཨོཾ་ཨ་ཙ་ལ་ཀཱ་ན་ཙཎྜ་ཏ་ན་ཏ་ན། མ་ཊ་མ་ཊ། མོ་ཊ་མོ་ཊ། ཏཊྚ་ཏཊྚ། ཧ་ན་ཧ་ན། ད་ཧ་ད་ཧ། ཏིཥྛ་ཏིཥྛ། ཨཱ་བེ་ཤ་
ཡ་ཨཱ་བེ་ཤ་ཡ། མ་ཧཱ་མནྟྲ་བཱ་ལ་ཀ ། དྷུ་ན་དྷུ་ན། ཏི་ནི་ཏི་ནི། ཁ་ད་ཁ་ད། བི་གྷ་ནཱན། མ་ར་མ་ར་དུཥྚ་ཎ་དུཥྱ་ཎ་རཀྵ་ཧཾ། སརྦཱན། ཀུ་རུ་ཀུ་རུ། ཀི་རི་ཀི་རི། མ་ཧཱ་བིགྷྣཱཾ་བཛྲ་སྥོ་ཊ་ཡ་སྥོ་ཊ་ཡ། ཧཱུྂ་ཧཱུྂ་ཧཱུྂ། ཏྲི་བ་ལིངྟ་རཾ་ག་ན་
རཀྟ། ཨོཾ་ཨོཾ་ཨོཾ། ཧཱུྃ་ཧཱུྃ་ཧཱུྃ། ཨ་ཙ་ལ་ཏེ་ཛ། སྥོ་ཊ་ཡ་སྥོ་ཊ་ཡ། ཧཱུྃ་ཧཱུྃ། ཨ་མནྟི་ཀ ། ཀྲོ་དྷ་མ་ཧཱ་བ་ལ། ཤྲ་ཏྲཱ་ཡ། མ་ནཱ་ཡ། མནྟ་ཧཾ་མྃ། ཤུདྡྷ་ཏུ་མོཀྵ། དུ་པྱ་དུ། བཛྲ་ནཱ་མ་ཏཾ་ཨ་བྷི་ཏ་ཧ་དེ་བྷྱཿ། ཛྭ་ལཱ་
ཡ་ཏྲཱ་ཡ། ཨ་ས་ཧ་ན། མ་ཧཱ་སྭཱ་ཧཱ། ལས་ཐམས་ཅད་ཀྱི་རྗེས་སུ་འགྲོ་བའི་སྔགས་སོ། །ན་མཿས་མནྟ་ཀཱ་ཡ་ཝཱཀྩིཏྟ་བཛྲཱ་ཎཱཾ། ཨོཾ་ཏྲ་ཏྲ་ཨ་མོ་གྷ་ཙཎྜ་མ་ཧཱ་རོ་ཥ་ཎ། སྥོ་ཊ་ཡ་ཧཱུྃ་ཕཊ། ཏྲ་མ་ཡ་ཏྲ་མ་ཡ་ཧཱུྃ། ཏྲ་ཏ་ཧཾ་མཾ། 
ཨོཾ་བ་ལིནྟ་ཏེ་ཛོ་མཱ་ལ་ནི་སྭཱ་ཧཱ། ཆོ་ག་ཐམས་ཅད་ཀྱི་རྗེས་སུ་འགྲོ་བའི་སྔགས་སོ། །ན་མཿས་མནྟ་ཀཱ་ཡ་ཝཱཀྩིཏྟ་བཛྲཱ་ཎཱཾ། ཨོཾ་ཨ་མོ་གྷ་ཨེ་ཧྱེ་ཧི་ཨ་པྲ་ཏི་ཧ་ཏ་ཨེ་ཧྱེ་ཧི་ཨ་ཙ་ལ་ཝ་ཏེ་ཛ། ཨ་ནནྟ་ཀ་ན། ཏིཥྛ་ཏིཥྛ། ཙུ་རུ་ཙུ་
རུ། ཏ་ཊི་ཏ་ཊི། ཏ་ཊ་ཏ་ཊ། བིགྷྣཱ་ག་ཏ་ཡ། མཱ་ར་ཡ། ཁཱ་ད་ཡ། སྥོ་ཊ་ཡ། ཏྲ་ཏ་སྟཾ། ཙ་མེ་ན། ཨ་ནུ་བནྡྷ། ཨཱ་ཛྙཱ་ཀུ་རུ། ཨ་ས་ཧ་ད་ཨ་ན་ཨ་གྲ། ཀ་ཊ་ཀ་ཊ། མ་ཊ་མ་ཊ། ཧཾ་ཧཾ། ཨ་ཊི་བ་ལ། ཨེ་ཧྱེ་ཧི་མ་

88-1-7b

ཧཱ་ཀཱ་རུ་ཎ། བི་ཥ་ཎ། ནནྟ་ནནྟ། ཨཱ་བེེ་ཤ་ཨཱ་བེེ་ཤ་ཡ། ཨ་ཙ་ལ་ཏེ་ཛ། སརྦ་ཏྲ་ཨ་ནུཏྟ་རེ་ཀི་ཙ་ཏ། ཏ་ཊ་ཏ་ཊ། དྷརྨ་དྷརྨ། ཕཊ་ཕཊ་ཧཾ། འདི་ནི་བསྲུང་བ་དམ་པའི་སྔགས་སོ། །ཁྲོ་བོའི་རྒྱལ་པོ་མི་གཡོ་
བའི། །གང་གིས་གསང་སྔགས་རྣམས་ཤེས་ན། །ཡི་གེ་ཙམ་གྱིས་བདུད་བརླག་བྱེད། །མང་དུ་བརྗོད་ན་སྨོས་ཅི་དགོས། །འཕགས་པ་མི་གཡོ་བའི་རྟོག་པའི་རྒྱུད་ཀྱི་རྒྱལ་པོ་ལས་གསང་སྔགས་རྣམས་འབྱུང་བའི་
ལེའུ་སྟེ་བཞི་པའོ།། །། དེ་ནས་ཡང་དག་བཤད་བྱ་བ། །གསང་སྔགས་གྲུབ་པ་ལས་བྱུང་བའི། །ལས་ཀྱི་སྦྱོར་བའི་དབྱེ་བ་ཡིས། །འདོད་རྣམས་ཤིན་ཏུ་འགྲུབ་བྱེད་དེ། །བསམ་གཏན་རྣམ་དག་ཆོས་
རྣམ་དག །ཡེ་ཤེས་རྣམ་དག་སྐུ་རྣམ་དག །རང་བྱུང་རྣམ་དག་དོན་རྣམ་དག །བྱ་བ་རྣམ་དག་བྱེད་པ་དག །སྒྱུ་མ་སྒྱུ་མའི་ཡེ་ཤེས་ཆེ། །སྒྱུ་འཕྲུལ་ལྟ་བུའི་འཁྲུལ་འཁོར་དང་། །མིག་ཡོར་མིག་རྒྱུའི་གཟུགས་
བརྙན་འབྲེལ། །སྣ་ཚོགས་ཆུ་བུར་བཞིན་གཡོ་བའི། །གང་གིས་བདུད་ལས་རྒྱལ་བྱེད་པའི། །ཡུངས་ཀར་རྒྱལ་པོ་བསྒྲུབ་པར་བྱ། །རྒྱལ་གྱི་སྐར་མར་བཙུགས་བྱས་ཏེ། །ཐོད་པ་དཀར་པོ་དྲི་ཆུས་བྲན། །འདི་ནི་
ལས་རྣམས་ཀུན་བྱའི་ཕྱིར། །དུས་སུ་བསྲུང་ཞིང་བསྐྱེད་བྱ་སྟེ། །དུས་སུ་མཆོད་དང་གཏོར་མ་བྱས། །བར་ཆད་ཀུན་ལས་རྣམ་རྒྱལ་ཡིན། །ཡང་ན་གྲོ་གའམ་སྤྲ་ཚིལ་ལ་སྦྲུལ་ནག་པོའི་གཟུགས་བྱས་ནས་
གུ་གུལ་ཚིལ་ཆེན་གྱིས་བདུག་ཅིང་སྔགས་དྲག་ཏུ་བརྗོད་དེ། གང་འདོད་པའི་ལུས་ལ་བྱབས་ནས། ཁྲུས་བྱས་ཏེ་རྩྭ་ཀུ་ཤའི་ཆུན་པོས་འོག་ནས་གཡུག་ཅིང་། ནཱ་ག་རཱ་ཛ་ས་མ་ཡ་དུན་ཏི། །ཕུ་ཊ་ཕུ་ཊ་ཕཊ་ཅེས་
བརྗོད་ན། གང་ལ་ཀླུ་གནོད་པ་དེ་སོས་པར་བྱེད་དོ། །ཡང་ན་གོང་དུ་བསྟན་པའི་ཡུངས་ཀར་དང་། གུ་གུལ་གྱིས་བདུག་ཅིང་སྔགས་དྲག་ཏུ་བརྗོད་ན་ཀླུ་འབྲོས་སོ། །སླར་ཡང་མི་ལྡོག་གོ། འབྱུང་པོ་ལ་སོགས་པའི་གདོན་

88-1-8a

གྱིས་ཟིན་པ་ལ་ཡུངས་ཀར་བསྐྱེད་པ་ལ་སྔགས་མང་དུ་བཟླས་ནས་གཏོར་ན་དབྱེར་རོ། །བྱིས་པ་གསར་དུ་བཙས་པ་བསྲུང་བ་ནི་ཁམ་ཕོར་ལ་རྡོ་རྒྱུས་ཀྱིས་བྲིས་པ་བཅང་ངོ་། །སྤྲ་ཚིལ་གྱི་གཟུགས་
སོར་བཞི་པའི་ཚད་དུ་བྱས་པའི་སྙིང་གར་བསྒྲུབ་བྱའི་མིང་དང་བཅས་པའི་སྔགས་བཅུག་ལ་ཁ་ལ་ཚེར་མ་བཙུགས་ན་བསྒྲུབ་བྱའི་ཁ་ལ་ཚེར་མ་བཙུགས་པར་འགྱུར་རོ། །རྐང་པ་ལ་བཙུགས་ན་རེངས་སོ། །སྙིང་ལ་གཙུགས་ན་དྲན་
པ་སྟོར་བར་བྱེད་དོ། །མིའི་རྗེ་ངར་གྱི་རུས་པའི་ཕུར་བུའམ། ལྕགས་ཕུར་ཡན་ལག་གང་དང་གང་ལ་བཏབ་པ་དེ་ཞ་བའམ་རེངས་པར་བྱེད་དོ་དུར་ཁྲོད་ཀྱི་ཐལ་བ་ལ་མང་དུ་བསྔགས་ནས་དགྲ་བོའི་སྒོ་འོག་ཏུ་བཏབ་ན་འབྱེར་རོ། །གཡུལ་དུ་ཞུགས་ནས་
རལ་གྲི་ལ་བསྔགས་ཏེ་བཟུང་ན་རྒྱལ་ལོ། །གང་ལ་ཡང་གཏོར་མའི་བྱེ་བྲག་གིས་འགྲུབ་ངེས་སོ། །དུར་ཁྲོད་དུ་ཕྱིན་ཏེ་སྣོད་ཐོད་པ་ལ་པད་སྣལ་དཀར་པོའི་སྡོང་བུ་དང་། ཚིལ་ཆེན་གྱི་མར་མེ་བྱས་ལ་ཚེས་བརྒྱད་དམ་བཅུ་བཞི་ལ་སྦར་
བའི་དུ་བ་མིག་ལ་བྱུགས་ན་གཞན་གྱིས་མཐོང་ན་དགའ་བར་འགྱུར་རོ། །གལ་ཏེ་ཉི་མའམ་ཟླ་བ་གཟས་བཟུང་བའི་ཚེ་མི་གཡོ་མགོན་པོའི་སྐུ་ཁམ་པ་ལ་བྱས་ནས་མེ་ཏོག་ཤེལ་པ་ལི་ཀའམ། དཎྚོཏྤ་ལས་མཆོད་ཅིང་སྔགས་མཚན་ཐོག་
ཐག་བཟླས་པས་ཚེ་ལོ་སྟོང་ཐུབ་བོ། །ཡང་ཟླ་བ་གཟས་བཟུང་བའི་ཚེ་དུམ་བུ་དྲུག་པའི་ཐོད་པར་ཁྲག་སྣ་ཚོགས་བླུགས་ཏེ། མཎྜལ་ནག་པོའི་ཐོག་ཏུ་གཞག་ནས་ཁ་མེ་ལོང་གིས་བཅད་དེ། དེའི་སྟེང་དུ་ཁམ་པ་ལས་བྱས་པའི་
མི་གཡོ་བ་གཞག་སྟེ། རང་ཉིད་གཅེར་བུའི་ལུས་མ་ཧེའི་རྣམ་ལྔས་བྱུགས་ཏེ། མཚན་ཐོག་ཐག་བཟླས་ན་སྲིད་པ་གསུམ་མཐོང་བར་འགྱུར་རོ། །ཡང་ཉི་མ་དང་ཟླ་བ་གཟས་བཟུང་བའི་ཚེ་མཎྜལ་གྲུ་བཞི་པ་བྱས་ནས་གྲྭ་
བཞིར་རལ་གྲི་བཙུགས་ལ། རང་ཉིད་གཅེར་བུ་ལུས་ཐམས་ཅད་ཐལ་བས་བྱུགས་ཏེ་མཚན་ཐོག་ཐག་བཟླས་ན་སྲིད་པ་གསུམ་གསལ་བར་འགྱུར་རོ། །གལ་ཏེ་གཏེར་ཁ་དབྱེ་བར་འདོད་པས་མི་གཡོ་མགོན་པོའི་སྐུ་ཁམ་པ་ལས་

88-1-8b

བྱས་ལ། སྨན་དྲུག་ལ་སོགས་པ་དྲི་ཞིམ་པོ་ཐམས་ཅད་དང་ལྷན་ཅིག་པའི་རིན་པོ་ཆེའི་སྣོད་ཁ་སྦྱར་དུ་བཅུག་ནས་མཎྜལ་དཀར་པོའི་དབུས་སུ་ཁྲིའུ་ལ་གཞག་ནས། དུས་གསུམ་དུ་མཆོད་ཅིང་བསྐོར་བ་བརྒྱ་
རྩ་བརྒྱད་བྱས་ཏེ། གསོལ་བ་གདབ་ཅིང་ཨ་ག་རུ་ལ་སོགས་པའི་སྤོས་བསྲེག་ཅིང་བསྟོད་པ་བྱས་ན་ཟླ་བ་གསུམ་གྱི་རྗེས་སུ་གཏེར་རྙེད་ངེས་སོ། །གལ་ཏེ་ཆར་འབེབས་པར་འདོད་ན། ཀླུ་ཡོད་པའི་གནས་སུ་ཀླུའི་
དཀྱིལ་འཁོར་བྱས་ཏེ། སྤྲ་ཚིལ་ལམ་བག་ཟན་ལ་དགའ་བོ་ལ་སོགས་པའི་གཟུགས་བྱས་ཏེ་ཁ་དོག་ཐ་དད་པར་བྱས་ནས་མཎྜལ་དེར་གཞུག་ཏེ། དམ་ཚིག་པ་བསྐྱེད་ནས་དབུས་སུ་མི་གཡོ་མགོན་པོ་དང་བཅས་
པ་ལ་ཡེ་ཤེས་ཀྱི་ལྷ་བཅུག་ནས། ཀ་ར་དང་། བུ་རམ་དང་། སྦྲང་དང་། འོ་མ་ལ་སོགས་པས་མཆོད་ཅིང་རྩ་བའི་སྔགས་འབྲུག་ལྟར་བསྒྲགས་པས་ཀླུ་རྣམས་སྐྲག་ནས་ཆར་པའི་རྒྱུན་འབེབས་པར་བྱེད་དོ། །གལ་ཏེ་མི་འབེབ་
ན་ཐོད་པ་དུམ་བུ་གཅིག་པར་ཀླུའི་གཟུགས་རྣམས་བཅུག་ལ། གདུག་པ་ཅན་གྱི་མེས་བསྲོས་ན་ཆར་ཤིང་རྟའི་འཕང་ལོ་ཙམ་ཞག་བདུན་དུ་འབེབས་པ་ལ་ཐེ་ཚོམ་མེད་དོ། །འཕགས་པ་མི་གཡོ་བའི་རྟོག་པའི་རྒྱུད་ཀྱི་རྒྱལ་པོ་ལས་
སྦྱོར་ཀ་ཕྲ་མོའི་ལེའུ་སྟེ་ལྔ་པའོ།། །། དེ་ནས་ཡང་དག་བཤད་བྱ་བ། །བསམ་གཏན་བརྟན་ལས་བྱུང་བ་ནི། །འཁྲུལ་མེད་ཉིད་དེ་གནོད་རྣམས་སེལ། །ཁམས་གསུམ་རྒྱལ་པོ་ཆེར་ཉོན་ཅིག །
སྤྲོ་བསྡུའི་རིམ་པ་གོམས་གྱུར་ལས། །ཇི་སྲིད་འདོད་པའི་དུས་བར་དུ། །རང་སེམས་གནས་ནས་བརྟན་པར་འགྱུར། །དངོས་མེད་དངོས་སོགས་མ་ལུས་པའི། །རྣམ་རྟོག་རབ་རིབ་ཀུན་བསལ་ནས། །ཉོན་མོངས་ནད་རྣམས་མ་ལུས་
པ། །བག་ཆགས་དང་བཅས་གཏན་བཅོམ་ནས། །འཕྲལ་དུ་ཡང་ནི་བྲོད་དགའ་སྐྱེ། །སྤྲོ་ཡང་མི་དམིགས་བསྡུ་མི་དམིགས། །སྐྱེ་མེད་འགག་མེད་ཏིང་ངེ་འཛིན། །འབྱུང་མེད་འགྲོ་མེད་བསམ་གཏན་ལ། །གནས་ན་ཡེ་

88-1-9a

ཤེས་མྱུར་དུ་ཐོབ། །བླ་མེད་ཡེ་ཤེས་ཡོན་ཏན་དང་། །མཐུ་རྣམས་ཆེ་བར་འགྱུར་བ་ནི། །བླ་མ་མཉེས་ལས་རྙེད་འགྱུར་བའི། །དེ་ཉིད་བདུད་རྩི་བཅུད་ཀྱིས་ལེན། །གུས་པས་རྟག་པར་ཉིན་མཚན་དུ། །
རྒྱུན་ཆད་མེད་པར་གོམས་བྱས་ན། །མྱུར་དུ་ཕྱག་རྒྱ་ཆེན་པོ་ཡི། །དངོས་གྲུབ་སྣོད་དུ་འགྱུར་བ་ཡིན། །འབད་རྩོལ་བྱང་ཆུབ་ཡན་ལག་སྟེ། །ལེ་ལོ་གཉིད་དང་གཡེང་བ་སྤང་། །སྔགས་གསལ་དམིགས་པ་བརྟན་གྱུར་ཅིང་། །
བསམ་གཏན་ཐོན་ནས་འཁྲུལ་འཁོར་བརྩམ། །སྐར་མ་རྒྱལ་གྱི་ཉིན་པར་ལ། །གྲོ་གའམ་ཡང་ན་ཤིང་ཤུན་ལ། །གུར་གུམ་འགི་ཝང་ཙན་དན་གྱིས། །རྡོ་རྗེ་རྒྱ་གྲམ་མུ་ཁྱུད་བཅས། །དབུས་སུ་མིང་དང་སྔགས་སྤེལ་
བྲི། །མུ་ཁྱུད་ལ་ནི་རྩ་སྔགས་བྲི། །རྭ་ཀུན་ལ་ནི་ཧཱུྃ་དང་མིང་། །སྤེལ་ཏེ་གཡས་ནས་བསྐོར་ལ་བྲི། །དཀྱིལ་འཁོར་དཀར་པོའི་དབུས་སུ་ནི། །མེ་ཏོག་དཀར་པོའི་སྟེང་གཞག་ནས། །ལྷ་ཡི་སྐུར་ནི་བསྐྱེད་བྱས་ཏེ། །སྟོང་རྩ་
བརྒྱད་དུ་བཟླས་བྱས་ནས། །གང་ཞིག་འདོད་པའི་དཔུང་པ་འམ། །ལུས་ལ་བཅངས་ན་བསྲུང་བར་བྱེད། །ཁམ་ཕོར་སར་པ་ལ་རྡོ་རྒྱུས་ཀྱིས་བྲིས་ཏེ། སྒོར་བཅངས་ན་གསར་དུ་བཙས་པའི་བྱིས་པ་བསྲུང་ངོ་། །དུར་ཁྲོད་ཀྱི་
རས་ལ་སྔགས་མིང་དང་བཅས་པ་བྲིས་ཏེ། སྤྲ་ཚིལ་གྱིས་གཏུམས་ནས་དུར་ཁྲོད་ཀྱི་བུམ་པར་བཅུག་ནས། ཁ་རྡོ་རྗེ་རྒྱ་གྲམ་གྱིས་བཅད་དེ་སྦས་ན་མངལ་སྐེམས་པར་བྱེད་དོ། །ཕྱུང་ནས་འོ་མས་བཀྲུས་ན་སོས་སོ། །
གལ་ཏེ་བསད་པར་འདོད་ན་དཀྱིལ་འཁོར་གྲུ་གསུམ་ནག་པོར་བྱས་པའི་སྟེང་དུ་ཁམ་པ་ལས་བྱས་པའི་མི་གཡོ་མགོན་པོ་ཞལ་གཅིག་ཕྱག་བཞི་པ། གཡས་པ་གཉིས་ན་རལ་གྲི་དང་རྡོ་རྗེ་བསྡིགས་མཛུབ་དང་ཐོད་ཁྲག་
གཡོན་ན་འཆང་བ་བྱས་པ། རྒྱན་ཐམས་ཅད་ཀྱིས་བརྒྱན་པ་བཞུགས་སོ། །དེ་ནས་དྲི་མ་དྲུག་དང་བག་ཟན་ལས་བསྒྲུབ་བྱའི་གཟུགས་སོར་བརྒྱད་བྱས་ནས། རྡོ་རྗེ་རྒྱ་གྲམ་གྱི་འཁོར་ལོ་བསད་པའི་ཤམ་བུ་དང་

88-1-9b

བཅས་པ་སྙིང་གར་བཅུག་སྟེ། དེའི་སྐུའི་ཞབས་སུ་གཞག་ནས་རང་ཉིད་ལྷའི་ཏིང་ངེ་འཛིན་དང་ལྡན་པས་ཟུར་བཞིར་མི་རུས་སམ་སེང་ལྡེང་ངམ། ལྕགས་ལས་བྱས་པའི་ཕུར་བུ་སོར་བཞི་པ་གཞག་པ་ལ་ཐུན་མཚམས་
ཐམས་ཅད་དུ་བཏབ་པས་ཤེས་པ་བརྒྱལ་བར་བསམ་མོ། །དེའི་འོད་ཀྱིས་མདུན་གྱི་ཕུར་པ་མི་གཡོ་བར་བསྒོམས་པའི་ཐུགས་བསྐུལ་ནས། དེ་ལས་ཁྲོ་བོ་ལྕགས་ཀྱུ་དང་ཞགས་པ་ཐོགས་པ་གྲངས་མེད་པ་སྤྲོས་པས། 
བསྒྲུབ་བྱ་རླུང་གི་འཁོར་ལོ་ལ་གཞག་ནས་འོངས་པས་སྐད་ཅིག་ཙམ་གྱིས་ཕུང་པོ་གཏོར་ནས། ཤེས་པ་ལིང་ག་ལ་བསྟིམ་པར་བྱའོ། །དེ་ལྟར་ཞག་ཉི་ཤུ་རྩ་གཅིག་ཏུ་བྱས་པས་ཧོམ་ཁུང་དུ་བསྲེག་པའམ། མནན་པ་བྱས་
ན་དབང་ཕྱུག་ཆེན་པོ་ཡང་གསོད་པར་ངེས་ན་གཞན་ལྟ་སྨོས་ཀྱང་ཅི་དགོས། ཡང་ན་དྷ་དུ་ར་དང་། ཁྱི་ཁྲག་དང་། ཉའི་ཁྲག་གིས་འཁོར་ལོ་རལ་གྲིའི་རྩེ་མོ་ལྟར་རྣོ་བར་བྱས་ནས། ལྟེ་བའི་དབུས་སུ་གྲུ་གསུམ་མའི་ནང་དུ་བསྒྲུབ་
བྱའི་མིང་དང་རྒྱུད་དུ་བཅས་པ་བྲིས་ལ། དེ་ཞགས་པས་བསྐོར་བར་བྱའོ། །རྩིབས་རྣམས་སུ་སྔགས་ཀྱི་རྐང་པ་བརྒྱད་པ་བྲིའོ། །མུ་ཁྱུད་ལ་མིང་དང་བཅས་པའི་སྙིང་པོ་བྲིའོ། །དེའི་རྒྱབ་ཀྱི་མུ་ཁྱུད་ལ་ལས་ཐམས་ཅད་པ་བྲིའོ། །མུ་
ཁྱུད་གསུམ་པ་ལ་རྡོ་རྗེ་དང་རལ་གྲི་སྤེལ་ནས་བྲི་བར་བྱའོ། །དེ་ནས་ཐོད་པ་ཁ་སྦྱར་གྱི་ནང་དུ་བཅུག་ནས་ཞིང་སྐྲས་བཅིངས་ཏེ། བསྒྲུབ་བྱ་དག་ཟ་བའི་བསམ་གཏན་དང་ལྡན་པས་ཁྲོ་བོ་ཤིན་དུ་ཁྲོས་པས་ཁྲག་འདྲེན་པའི་ལྟ་བས་
བལྟས་ན་ཞག་ཉི་ཤུ་རྩ་གཅིག་གིས་གང་ལ་བྱས་པ་དེ་ཁྲག་ཏུ་སྐྱུགས་ནས་འཆིའོ། །དུར་ཁྲོད་དུ་སྦས་ན་མཚོན་གྱི་བསྐལ་པ་བབས་ནས་འཆིའོ། །ཤིང་གཅིག་གི་རྩར་སྦས་ན་རེངས་སོ། །ཆུ་མདོར་སྦས་ན་འབྱེར་རོ། །
ལམ་རྒྱ་གྲམ་དུ་སྦས་ན་སྨྱོའོ། །ལྷ་རྟེན་ཞབས་སུ་སྦས་ན་ཞ་བོར་འགྱུར་རོ། །ཀླུ་ཡོད་པའི་སར་སྦས་ན་མཛེས་ཟིན་པ་ལ་ཐེ་ཚོམ་མེད་དོ། །རང་ཉིད་ཀྱི་ཉལ་བའི་ཞབས་སུ་སྦས་ན་འདོད་པའི་བུ་མོ་ཁུགས་སོ། །ཅི་སྟེ་རྒྱལ་

88-1-10a

མཚན་གྱི་རྩེ་མོ་ལ་བཏགས་ན་དམག་ཀྱང་རེངས་སོ། །དེ་དག་ཐམས་ཅད་ལ་ཁྲོ་བོ་འབར་བ་དུད་པའི་ཁ་དོག་དང་ལྡན་པ་ཕྱག་བཞི་ཞབས་བཞི་སྤྱན་གསུམ་དང་ལྡན་པར་བལྟའོ། །དུར་ཁྲོད་ཀྱི་རས་ལ་དམག་
དཔོན་གྱི་མིང་དང་སྤེལ་བའི་སྔགས་རྡོ་རྗེ་རྒྱ་གྲམ་གྱི་ལྟེ་བར་བྲིས་ལ་མཐའ་ཡི་གེ་ལྃ་བརྒྱད་ཀྱིས་མནན་ཏེ། དེའི་ཕྱི་རོལ་དུ་དབང་ཆེན་གྱི་དཀྱིལ་འཁོར་ལ་རྡོ་རྗེ་རྒྱ་གྲམ་བྲིས་ལ། དེ་སྤྲ་ཚིལ་ལས་བྱས་པའི་ཚོགས་ཀྱི་བདག་པོའི་སྙིང་
གར་བཅུག་ནས་གང་འཐབ་པའི་མཚམས་སུ་གཞག་ན་དམག་རེངས་སོ། །གཞན་ཡང་གཟའ་སྐར་ལ་བལྟས་ཏེ་འཕྱར་རོ། །བསྐྲད་པར་འདོད་ན་གྲོ་གའམ་རས་ལ་བྱ་རོག་དང་འུག་པའི་ཁྲག་གིས་གོང་དུ་གསུངས་པའི་འཁོར་
ལོ་བྲིས་ཏེ། ཨུཙྪཱ་ཊ་ཡ་སྤེལ་བར་བྱའོ། །ཆར་ཆེ་བའམ་སེར་བ་གཅད་པར་འདོད་ན། གྲོ་ག་ལ་གུར་གུམ་མམ་འགི་ཝང་གིས་འཁོར་ལོ་རྩིབས་བཞི་པ་བྱས་ལ་མུ་ཁྱུད་གསུམ་པ་བྱས་ཏེ། རྩིབས་བཞི་ལ་སྙིང་པོའི་སྔགས་
ཡི་གེ་ཧཱུྃ་ལ་བསྐོར་བ་བྲིས་ལ། དབུས་ཀྱི་ལྟེ་བར་ཡི་གེ་ཀྵཾི་བྲིས་ཏེ། དེ་ལ་རྩ་བའི་སྔགས་གཡོན་སྐོར་དུ་བྲིས་ནས། མུ་ཁྱུད་དང་པོ་ལ་ལས་ཐམས་ཅད་པའི་སྔགས་བྲིའོ། །གཉིས་པ་ལ་རལ་གྲིའི་ཕྲེང་བ། གསུམ་པ་ལ་
ཀུན་ཏུ་མེ་རིའོ། །དེ་ལྟར་དམིགས་ཏེ་མཆོད་ནས་རྒྱལ་མཚན་གྱི་རྩེ་མོ་ལ་བཏགས་ན་ཆར་ཆེས་པ་དང་སེར་བ་འཆད་པར་འགྱུར་རོ། །ཡང་བསད་པར་འདོད་པས་ཁམ་པའི་སྤར་བུ་ལ་མི་གཡོ་བའི་སྙིང་པོ་མཚལ་གྱིས་གཡོན་
སྐོར་དུ་བྲིས་ནས་དཀྱིལ་འཁོར་གྲུ་གསུམ་གྱི་ནང་དུ་གོང་དུ་བསྟན་པའི་ལིང་གའི་སྙིང་གར་མིང་དང་བཅས་པ་བཅུག་ནས་གན་རྐྱལ་དུ་སྟེང་དུ་ཁ་གཟར་ཏེ། ལས་ཐམས་ཅད་པའི་སྔགས་བཟླས་ཤིང་ཞག་བཅུ་དྲུག་ཏུ་ལས་
བྱའོ། །དེ་ནས་དུར་ཁྲོད་ཀྱི་ས་ལས་བྱས་པའི་མཆོད་རྟེན་ཁྲུ་གང་པ་ནག་པོའི་བུམ་པའི་ནང་དུ་རང་གིས་བསྲུང་བ་ཉིད་བཅུག་ནས། མཆོད་རྟེན་བང་རིམ་གསུམ་མན་ཆད་སྟོང་པའི་ནང་དུ་ཚ་ཚ་ལྔ་གཞག་པས་གྲུ་གསུམ་ཁ་

88-1-10b

བཀག་ཅིང་ལྷོ་ཕྱོགས་སུ་གཞག་གོ། དེས་ཟླ་བ་གཉིས་ན་འཆི་ངེས་སོ། །གལ་ཏེ་གཞན་གྱི་རིག་སྔགས་གཅད་པར་འདོད་ན་དབང་ཆེན་གྱི་དབུས་སུ་ཚོགས་ཀྱི་བདག་པོ་བྲིས་ཏེ། ཟུར་ཐམས་ཅད་རྡོ་རྗེ་རྒྱ་གྲམ་གྱིས་
མཚན་པར་བྱས་ནས། གྲྭ་ཐམས་ཅད་ལཾ་གྱིས་མཚན་པ་སྟེ། རྡོ་རྗེ་ཕུར་པས་བསྒྲུབ་བྱའི་ལིང་གའི་སྟེང་དུ་མནན་ན། ཞག་བདུན་གྱིས་རིག་སྔགས་འཆད་དོ། །ཡང་ན་ཧཱུྃ་བཞི་མགོ་སྤྲད་པའི་འཁྲུལ་འཁོར་རོ། །ད་ནི་
ཙུ་ཙུནྡྷ་རའི་པགས་པ་ལ་འཁྲུལ་འཁོར་རེངས་པའི་སྦྱོར་བ་དང་བཅས་པའམ། སྤུ་ལ་སྡོང་བུ་བྱས་ཤིང་ཚིལ་ལ་མར་མེ་བྱས་ནས། དུ་བ་དེ་གཞར་ནས་མིག་ལ་བསྐུས་ན་དགྲས་མི་མཐོང་ངོ་། །ཡང་དཔྲལ་བར་
ཐིག་ལེ་བྱ་སྟེ་ལག་པ་ལ་བསྐུས་ན་གང་ལ་རེག་པ་དེ་དབང་དུ་འགྱུར་ངེས་སོ། །རྐང་པ་ལ་བསྐུས་ན་དཔག་ཚད་བརྒྱར་འགྲོ་ནུས་སོ། །སཱ་ལུའི་ཕྱེ་མ་ལ་གཟུགས་བྱས་ཏེ་ཕྱེ་མ་དེས་བསྐུས་ན་དགྲ་རེངས་པར་
བྱེད་དོ། །དུར་ཁྲོད་ཀྱི་ཐལ་བ་དང་བཅས་པས་དགྲ་བོའི་སྒོའམ་དཔུང་ལ་གཏོར་ན་ནད་ཀྱིས་ཐེབས་སོ། །ཙུ་ཙུནྡྷ་རའི་པགས་པ་ལ་འཁྲུལ་འཁོར་བྲིས་ནས་དབུགས་ཀྱིས་བརྒྱངས་ཏེ་སྔགས་སྟོང་བཟླས་ན་དགྲ་དེ་ལྦོས་ནས་
འཆིའོ། །དེ་ལ་སྔགས་ནི། ཏདྱ་ཐཱ། ན་མོསྟུ་ཏེ། མ་ཧཱ་ག་ཎ་པ་ཏ་ཡེ་སྭཱ་ཧཱ། ཨོཾ་ག་ཎ། ག་ཎ་ཨ་དྷི་པ་ཏ་ཡེ་སྭཱ་ཧཱ། ཨོཾ་ག་ཎཿག་ཎ་པ་ཏི་བྲ་ཛྲི་ཏི་ཡེ་སྭཱ་ཧཱ། ན་མོསྟུ་ཏི་མ་ཧཱ་ག་ཎ་པ་ཏི་ཏེ་ཡེ་སྭཱ་ཧཱ། ཨོཾ་ཀཪྐ་
ཏྲ་ཀ་ཊ། མ་ཊ་མ་ཊ། དཱ་ར་དཱ་ར། བི་དཱ་ར་བི་དཱ་ར། ཧ་ན་ཧ་ན། གྲྀཧྞ་གྲྀཧྞ། དཱ་དྷ་བ་དཱ་དྷ་བ། ག་ར་ག་ར། བྷཾ་ཛ་བྷཾ་ཛ། ཛཾ་བྷ་ཛཾ་བྷ། མོ་ཧ་མོ་ཧ། དེ་ཧི་དེ་ཧི། དྷཱ་པ་ཡ་དྷཱ་པ་ཡ། དྷཱ་ཡ་ནྱ་དྷཱ་ཡ་ནྱ། སིདྡྷེ་མེ་
པྲ་ཡཙྪ། ས་མ་ས་མ། ས་མ་མཱ་ར་ཡ་མ་ཙུསྨ་ར་མ་པུ་ཏྲ་པ་ཙ་ན་ཡ་སྭཱ་ཧཱ། ཨོཾ་ཀུ་རུ་ཀུ་རུ་སྭཱ་ཧཱ། ཨོཾ་ཏུ་རུ་ཏུ་རུ་སྭཱ་ཧཱ། ཨོཾ་སུ་རུ་སུ་རུ་སྭཱ་ཧཱ། ཨོཾ་མུ་རུ་མུ་རུ་སྭཱ་ཧཱ། ཨོཾ་ཤཱནྟིྃ་པུཥྚིཾ་ཀུ་རུ་སྭཱ་ཧཱ། ཨོཾ་ག་ཏ་པྲིཾ་

88-1-11a

བི་ཏ་ཙིཏྟ། མ་ཧཱ་བི་དྷ་རཱ་ག་གས་ཚིན་ཏི། མ་ཧཱ་བྷ་ཡ། པ་ར་ཀྲ་མ། མ་ཧཱ་ཧཱསྟི། མ་ཧཱ་དྷ་ཀྲྀ་ཎི་ཡ། པྲ་ཙི་ཏ་ཡ་མི་སྭཱ་ཧཱ། ཨཾ་ཀུ་རུ་ཀུ་རུ། ཙུ་རུ་ཙུ་རུ། མུ་རུ་མུ་རུ། ཨོཾཿགཿགཿགཿགཿགཿགཿགཿགཿ
ཨོཾ་ན་མོ་ན་མཿསྭཱ་ཧཱ། བཟླས་པའི་སྔགས་ཨོཾ་པ་ར་ཏ་ཀ་སྭཱ་ཧཱ། ཞེས་བྱའོ། །གཞན་ཡང་ཚོགས་ཀྱི་བདག་པོའི་སྦྱོར་བ་ལས་རླུང་བཅིང་བར་འདོད་ན་གུར་གུམ་དང་། འགི་ཝང་དང་། ཡུང་བ་སེར་པོས་རྒྱལ་པོའི་རས་ལ་དབང་ཆེན་གྱི་དཀྱིལ་
འཁོར་གྱི་དབྱིབས་ཀྱི་སྟེང་དུ་རི་རབ་རྡོ་རྗེ་རྒྱ་གྲམ་གྱིས་མནན་པ་བྲིས་ལ། ཡཾ་དང་ལཾ་རིམ་པ་བཞིན་དུ་བཀོད་ནས་དེའི་དབུས་སུ་ཚོགས་ཀྱི་བདག་པོ་བྱི་བ་ལ་ཞོན་པ། ཁ་དོག་གསེར་བཙོ་མ་ལྟ་བུ་ཞལ་བཞི་པ། གཡས་དང་པོ་ན་
བགྲང་ཕྲེང་། གཡོན་དང་པོར་རྩེ་གསུམ་འོག་མ་གཉིས་ཀྱིས་ཐོད་པ་བདུད་རྩིས་བཀང་བ་འཛིན་པ། སྣ་ནམ་མཁའ་ལ་ཕྱར་ནས་བལྟ་བ་བྲིས་ཏེ། དེའི་སྙིང་གར་ཟླ་གམ་ལྗང་གུའི་སྟེང་དུ། ལཾ་ཡཾ་ལཾ་བྲིས་ལ་རྣལ་འབྱོར་
པ་དབང་ཆེན་ཡོངས་སུ་རྒྱས་པའི་བསམ་གཏན་དང་ལྡན་པས་སྔགས་བརྒྱ་རྩ་བརྒྱད་བཟླས་ན་རླུང་བཅིང་བའི་མཆོག་ཡིན་ནོ། །ཡང་ཐོག་གམ་ཤིང་གི་རྩེ་མོ་ལ་གཞག་ན་རླུང་བཅིང་བར་བྱེད་དོ། །ད་ནི་ཚོགས་ཀྱི་བདག་པོ་ཡི། །
སྣ་ཚོགས་ལས་གྲུབ་འདི་བཤད་བྱ། །རྡོ་རྗེ་རྩེ་གསུམ་གྱིས་མཚན་པའི། །དབང་ཆེན་ཉིས་བརྩེགས་དབུས་སུ་ནི། །ཞལ་གཅིག་ཕྱག་བཞི་རྩེ་གསུམ་དང་། །བྷི་ཏི་པཱ་ལ་བགྲང་ཕྲེང་དང་། །ཨ་ཤོ་ཀ་ནི་བཟུང་བྱས་ཏེ། །བྱི་བའི་
སྟེང་ན་སེམས་དཔའ་ཡི། །སྐྱིལ་ཀྲུང་གིས་བཞུགས་ཁྲོས་ནས་ནི། །སྔོན་པོ་རིན་ཆེན་རྒྱན་གྱིས་བརྒྱན། །བསམ་ལ་ལ་དུ་ལ་ཕུག་དང་། །འོ་མ་ཞོ་དང་སྦྲང་དཀར་དང་། །མར་དང་ཆན་དང་སྲན་མ་ཤ ། བཙོས་པའི་ཤ་དང་
ཤིང་ཏོག་རྣམས། །དུས་དང་དུས་སུ་མཆོད་བྱས་ན། །གཏེར་རྣམས་འདི་ཡིས་སྟེར་བར་བྱེད། །ཡང་ན་བདག་ཉིད་མི་གཡོ་བ། །ཞལ་གསུམ་ཕྱག་དྲུག་ཁྲོས་པའི་སྐུ། །རལ་གྲི་མདའ་དང་རྡོ་རྗེ་གཡས། །ཞགས་པ་གཞུ་

88-1-11b

དང་མདུང་ཐུང་གཡོན། །ཁམས་གསུམ་གང་བའི་ཧཱུྃ་ལས་བསྐྱེད། །སྣ་ཚོགས་མདོག་ཅན་ཁྲོ་བོ་ནི། །དུ་མ་མཚོན་ཆ་རྣམས་བཟུང་བ། །རང་ལས་སྤྲོ་ཞིང་བསྡུ་བྱེད་པའི། །མདུན་དུ་ཚོགས་ཀྱི་བདག་པོ་ནི། །
ཞལ་གཅིག་ཕྱག་གཉིས་པདྨ་ལ། །བཞེངས་ཏེ་མདའ་དང་གཞུ་འཛིན་པ། །བསྐྱེད་ནས་བཙོས་པའི་ཤས་མཆོད་ནས། །བསྙེན་པ་སྟོང་བྱས་ལས་རྣམས་འགྲུབ། །ཡུལ་གྱི་ཚྭ་དང་ས་གསུམ་ལ། །ཚོགས་བདག་
དེ་ཡི་གཟུགས་བྱས་ནས། །གནོད་པའི་མིང་དང་ལྡན་བཅུག་ན། །ལོ་ཉེས་མི་ངས་ཕྱུགས་ངས་སོགས། །གང་གི་མཚན་ནས་གཟུང་བ་དེ། །གནོད་པ་ཀུན་ལས་བསྲུང་བར་བྱེད། །འཕགས་པ་མི་གཡོ་བའི་རྟོག་པའི་རྒྱུད་
ཀྱི་རྒྱལ་པོ་ལས་འཁྲུལ་འཁོར་གྱི་ལེའུ་སྟེ་དྲུག་པའོ།། །།  དེ་ནས་ཡང་དག་བཤད་བྱ་བ། །ལས་རྣམས་གྲུབ་པའི་ཡན་ལག་ཏུ། །གཅེས་པར་གྱུར་པའི་སྦྱིན་སྲེག་གོ། ཚལ་ནི་གཉིས་ཏེ་རྩུབ་
ངོས་དང་། །ཡིད་འོང་རང་གི་ཁྱིམ་དུ་བསྒྲུབ། །ས་ནི་ལས་ཀྱི་དབྱེ་བས་ཤེས། །སྐྱོན་དང་བྲལ་བས་ཐབ་བརྩིག་བྱ། །རྒྱ་ལ་སོར་ཚད་ཉི་ཤུ་བཞི། །དེ་ཡི་ངོས་ལ་སོར་བཅུ་གཉིས། །དཔངས་ནི་དེ་ཡི་རྒྱ་ལས་ནི། །སོར་
བཞི་ཆུང་བར་བསྐོར་བར་བྱ། །པདྨའི་དབྱིབས་ཅན་བརྒྱན་བལྟས་ནས། །རལ་གྲི་འབར་བ་དགོད་པར་བྱ། །ཟུར་བཞིར་རྡོ་རྗེ་ཕྱེད་པ་བཞི། །ཐབ་ཁུང་ཁ་ལ་རྡོ་རྗེ་ཡི། །ཕྲེང་བ་གསལ་པོར་བསྐོར་བར་བྱ། །འདི་ནི་
འཕྲིན་ལས་ཀུན་གྱིའོ། །ཡང་ན་ཁྲུ་གང་ནང་གྲུ་གསུམ། །རིམ་གསུམ་སུམ་གཉིས་སོར་ཚད་དོ། །ནང་དུ་རྡོ་རྗེ་རྒྱ་གྲམ་བྲི། །བསད་པ་ལ་ནི་བསྔགས་པའོ། །ཏིལ་དང་འབྲས་དང་འོ་མ་དང་། །ཞོ་དང་མར་དང་སྦྲང་རྩི་དང་། །
པ་ལ་ཤ་དང་བེ་ཤིང་སོགས། །མེ་ཏོག་དཀར་པོ་ཡོད་པ་སྟེ། །དཀར་གསུམ་མངར་གྱིས་བསྲེས་པ་རྣམས། །ཞི་བའི་ལས་ལ་ཤིན་ཏུ་ཤིས། །སཱ་ལུ་ནས་དང་གྲོ་དང་ནི། །རྒྱ་རྩི་ཆེ་དང་ན་གུ་ལ། །སརྫ་གུ་གུལ་གུར་གུམ་

88-1-12a

བཅས། །ཙམ་པ་ཞོ་དང་ཉེའུ་ཤིང་། །མེ་ཏོག་གསེར་མདོག་ལ་སོགས་རྣམས། །རྒྱས་པའི་ལས་ལ་ཤིན་དུ་ཤིས། །ཙནྡན་དམར་དང་གུར་གུམ་དང་། །བྲ་བོ་ཏིལ་དང་རྒྱ་སྲན་དང་། །ཁྲེ་དང་ཅུང་ཙེ་སྤེལ་བ་
དང་། །བ་སེར་མོ་ཡི་བདུད་རྩི་ལྔ་། །ན་ག་ཁྲོ་དང་ཙན་དན་དམར། །མེ་ཏོག་དམར་པོ་དབང་ལ་ཤིས། །བསད་ལ་ཁྲག་དང་དུག་ཡུངས་ཀར། །ཚྭ་གསུམ་ལིང་གར་བཅས་པའོ། །གོས་དཀར་རྒྱན་ཡང་དཀར་པོ་སྟེ། །ཡོ་བྱད་
ཀུན་ཀྱང་དཀར་བྱས་དང་། །བསམ་པ་བཟང་པོས་ཤར་བལྟས་པ། །འདིས་ནི་ཞི་བའི་ལས་རྣམས་འགྲུབ། །རྒྱན་གོས་ཡོ་བྱད་ཀུན་སེར་ཞིང་། །རྒྱས་པའི་ཡིད་བྱས་བྱང་དུ་བལྟས། །དགའ་བའི་དཀྱིལ་འཁོར་བསྐོར་བྱས་
ན། །འདིས་ནི་རྒྱས་པའི་ལས་འགྲུབ་བྱེད། །རྒྱན་དང་གོས་དང་ཡོ་བྱད་ཀུན། །ཁ་དོག་དམར་ཞིང་སྣུམ་གྱུར་ནས། །མྱོས་པའི་ཡིད་ལྟ་བུས་བལྟས་ན། །དབང་གི་ལས་རྣམས་འགྲུབ་པར་བྱེད། །རྒྱན་གོས་གནག་ཅིང་ཡོ་བྱད་
གནག །རྩུབ་པའི་ཡིད་བལྟས་ཁྲོས་པའི་སྐད། །འབྱིན་ཅིང་ལྷོ་ཡི་ཕྱོགས་སུ་བལྟས། །དྲག་པོའི་ལས་རྣམས་མྱུར་དུ་འགྲུབ། །དེ་ལ་ལས་བྱེད་པའི་དུས་སུ་མི་རུས་ལས་བྱས་པའི་ཕུར་པ་མི་གཡོ་བར་བསྒོམས་ལ། སྔོན་
དུ་བསྙེན་པ་སོང་བས་དང་པོས་ཁ་གཉིས་པས་སྙིང་ག །གསུམ་པས་ལྟེ་བ། བཞི་པས་པུས་མོ་རྣམས་སུ་དམ་པར་གདབ་བོ། །སྦྲ་ཚིལ་ལམ། ཐལ་ཆེན་ནམ། བག་ཟན་ལ་ལིང་ག་བྱས་ལ་སྐེ་ཙེ་དང་། རེ་ལྕག་དང་། 
ཉའི་རྔོག་གཞོབ་རྣམས་བརྡུངས་ལ་ཁྲག་དང་སྦྱར་ནས་གྲོ་ག་ལ་རྡོ་རྗེ་རྒྱ་གྲམ་བྲིས་པའི་དཀྱིལ་དུ་མིང་དང་སྔགས་སྤེལ་ཏེ་བྲིས་པའི་སྙིང་ཀར་བཅུག་ལ། ཨོཾ་ཙཎྜ་མ་ཧཱ་རོ་ཥ་ཎ་ཨ་མུ་ཀ་སྱ་སྟཾ་བྷ་ཡ། ཀཱི་ལ་ཡ་ཧཱུྃ་
ཕཊ་ཅེས་གདབ་བོ། །བསྒྲུབ་བྱའི་ཤེས་པ་རླུང་གི་སྟེང་དུ་གཞག་ལ་དབུགས་དང་བཅས་པ་དྲང་ངོ་། །གལ་ཏེ་གསོ་བར་འདོད་ན་ཕུར་བུ་དང་མིང་བཏོན་ཏེ་འོ་མ་བླུག་ཅིང་། ཨོཾ་ཙཎྜ་མ་ཧཱ་རོ་ཥ་ཎ་ཆེ་གེ་མོ་ཤཱནྟིཾ་ཀུ་རུ་ཡེ་

88-1-12b

བནྡུ་ཡེ་སྭཱ་ཧཱ། ཞེས་བརྗོད་ན་ཞག་བདུན་ནས་སོས་པར་འགྱུར་རོ། །ཡང་གསོད་པའི་ལས་བྱ་བར་འདོད་ན། ཧཱུྃ་ལས་སྐྱེས་པའི་མི་གཡོ་བ་ལོང་བ་ཞེས་བྱ་བ་ཤིན་ཏུ་དམར་བའི་མིག་གཅིག་ཡོད་པ། རལ་གྲི་དང་
ཞགས་པ་ཅན་ཁ་དོག་ལྗང་ནག་རྩུབ་ཅིང་འཁྲུག་པ། རིན་པོ་ཆེའི་བྲག་ཕུག་དུ་གནས་པ་ལ་དུས་རྟག་པར་རྒྱུན་དུ་མཆོད་ནས་གྲུ་གསུམ་ཐམས་ཅད་ཀྱི་དབུས་སུ་བསམས་ཏེ་ཤ་དང་ཁྲག་དང་དུག་དང་གཟུགས་བརྙན་རྣམས་ཞལ་དུ་
བསྲེགས་ན་མྱུར་དུ་འཆིའོ། །རེངས་པར་འདོད་པས་རྔ་མོའི་རུས་པ་ལ་ཛེ་ཏ་ཡ་ཛེ་ཏ་ཡ་ཞེས་སྟོང་རྩ་བརྒྱད་དུ་བསྲེག་གོ། ལྐུགས་པར་འདོད་ན་རའི་ཤ་ལ་བྷ་ཏི་ར་བྷ་ཏི་ར་ཞེས་ཁྲི་ཚོ་གསུམ་བསྲེག་གོ། སྨྱོ་བར་འདོད་ན་ཁྱི་ཤ་དང་ཆང་དང་
དུག་སྣ་ཚོགས་པ་ལ་ཨུ་ནྨ་ནྡོ་ནྨ་ནྡ། ཞེས་སྟོང་རྩ་བརྒྱད་བསྲེག་གོ། དགྲ་བོའི་མིག་ལོང་བར་འདོད་པས་སྐྱེར་པའི་ཤིང་དང་བོང་བུའི་རྟུག་པ་ལ་ཨ་ཏ་ཀ་ར་ཞེས་སྟོང་རྩ་བརྒྱད་དུ་བསྲེག་གོ། ཤ་ལྔ་བདུད་རྩི་ལྔ་དང་། རྔ་མོའི་རུས་པ་ལ་མོ་ཧ་
ཞེས་སྟོང་རྩ་བརྒྱད་བསྲེགས་ན་རྨོངས་པར་བྱེད་དོ། །ཡུང་བ་དང་ཙན་དན་ལ་ཛྭ་ར་ད་པ་ན་ཡ་ཞེས་བརྒྱ་རྩ་བརྒྱད་བསྲེགས་ན་ཡམས་འཆད་དོ། །སྦལ་པ་ཛི་ར་དང་ཁྱི་ནག་པོའི་ཤ་ལ་ཙི་ཏི་ཛྭ་ལཱཾ་མ་པ་ན་ཡ། སྟོང་བསྲེགས་ན་མཛེ་
འཆད་དོ། །ཁུ་བ་དང་། ཁྲག་དང་། དྷ་རུ་ར་ལ་སུ་ཏྲི་ཚིནྡ་ཞེས་སྟོང་རྩ་བསྲེགས་ན་མངལ་སྐམས་སོ། །གཏུམ་པོ་དྲག་པོའི་ང་རྒྱལ་གྱིས། །དཱུར་བ་འམ་འགི་ཝང་ངམ་ལན་ཚྭའམ། །རྒྱ་སྐྱེགས་བསྲེགས་ན་ཡམས་ནད་དང་། །
འཁྲུགས་དང་འཇིགས་དང་འབྱུང་པོ་ལྡོག །ཞོ་དང་ཀུ་མ་ཏ་དང་སྦྲང་། །བྱ་རྒོད་ཀླད་པ་ཁྭ་ཡི་ཚུལ། །འདི་རྣམས་བསྲེགས་ན་སྨྱོ་ནད་དང་། །ལྒང་དང་བུ་མི་ཐོན་པ་སེལ་ཀྱི་གཞན་ཡང་། སྔགས་ཀྱི་རྒྱལ་པོ་འདིས། །
སྣ་ཚོགས་ལས་རྣམས་འགྲུབ་འགྱུར་ཞིང་། །བརྟན་པ་ཆེན་པོའི་ཡེ་ཤེས་ནི། །འགའ་ལས་མྱུར་དུ་ཐོབ་བྱེད་ཅིང་། །གཡོ་འདོད་སྲེད་ལ་བླ་མ་སླུ། །ཚིག་ལ་སེམས་ཞིང་དོན་མི་ཚོལ། །བག་མེད་གཡེང་དང་སེར་སྣ་དང་། །

88-1-13a

བརྐམ་ཆེན་སྙིང་རྗེ་མེད་པས་ནི། །བསྐལ་པ་བརྒྱ་དང་སྟོང་ཕྲག་ཏུ། །བསྒྲུབས་ཀྱང་ནམ་ཡང་མི་འགྲུབ་སྟེ། །ལུས་དང་ངག་དང་ཡིད་ཀྱི་སྒོ། །ངལ་བ་ལས་ནི་གཞན་དུ་མིན། །བཟའ་བཏུང་ཞིམ་པོ་
སྣ་ཚོགས་རྣམས། །རྟག་པར་ཉིན་རེ་དུས་གསུམ་དུ། །གྲོགས་པོ་ཀུན་ལ་བྱིན་པས་ཀྱང་། །ལན་གཅིག་བླ་མ་མཆོད་པ་ཡིས། །བརྒྱ་ཡི་ཆར་ཡང་མི་ཕོད་དོ། །དེ་ནས་དེའི་ཚེ་ལྷའི་དབང་པོ་དགའ་རབ་དབང་ཕྱུག་ལ་སོགས་
པ་ལྷའི་བུ་དྲུག་ཁྲིས་ཁྲོ་བོ་ཆེན་པོ་མི་གཡོ་བ་ལ་བསྟོད་པ། ཀྱེ་ཧོ་བརྩེ་བའི་སེམས་མངའ་འོན་ཀྱང་འཁྲུགས་འདྲ་ཞིང་། །དགའ་ཞིང་ཤིན་ཏུ་དག་ཀྱང་ར་རི་སྣ་ཚོགས་སྤྲས། །ལྷ་ཡི་ཁམས་རྣམས་ཀུན་ལ་རལ་གྲི་ཕྱིར་བའི་ཚེ། །
ལྷ་མིན་ཚོགས་ཀུན་བརྒྱལ་ཞིང་རབ་ཏུ་སྐྲག་པར་སྣང་། །སྲིད་པའི་ཉོན་མོངས་ཀུན་ལ་བསྡིགས་པའི་བསྡིགས་མཛུབ་ཀྱིས། །བདུད་རྣམས་བརྒྱལ་ཞིང་སྐྲག་ནས་སྐད་ཕྱུང་ཐག་རིང་འབྲོས། །ཡི་གེ་ཕྱེད་པ་ཨ་ཧེའི་ཀུ་ཅོས་ལོག་ཕྱོགས་
སྐྲག །ཆེ་བ་ཡི་ནི་ཤིན་ཏུ་ཆེ་གྱུར་ཁྱོད་ཀྱི་སྐུ། །ཕྱོགས་བཅུའི་སངས་རྒྱས་རྣམས་ཀྱིས་ཤིན་ཏུ་བསྔགས་ཤིང་བསྟོད། །ཀླུ་ཀུན་འདུས་ནི་ཆ་ཤས་ལུས་ཀྱིས་ཕྱོགས་པར་བརྒྱན། །ལྷ་དབང་བུ་མོ་རྣམས་ཀྱིས་རིན་ཆེན་རྒྱན་རབ་གསོལ། །
སྤྱན་བགྲད་ལྗགས་འདྲིལ་སྟག་ལྤགས་འཛིན་པ་ཁྱོད་ལ་བསྟོད། །བསྟོད་པ་ཆེན་པོ་དེས་བསྟོད་ནས་ཚངས་པ་ཆེན་པོ་ལ་སོགས་པ་ལྷ་ཚོགས་ཐམས་ཅད་བཅོམ་ལྡན་འདས་ལ་མངོན་པར་དགའོ། །འཕགས་པ་མི་གཡོ་བའི་རྟོག་པའི་
རྒྱལ་པོ་ལས་སྦྱིན་སྲེག་གི་ལེའུ་སྟེ་བདུན་པའོ།། །།འཕགས་པ་མི་གཡོ་བའི་རྟོག་པའི་རྒྱུད་ཀྱི་རྒྱལ་པོ་འབུམ་པ་ལས་དངོས་གྲུབ་ཐམས་ཅད་ཡོངས་སུ་འབྱུང་བ་ཞེས་བྱ་བའི་རྟོག་པ་རྫོགས་སོ།། །། །།
པཎྜི་ཏ་ཨ་ཏུ་ལ་དཱ་ས་བཛྲ་དང་། བོད་ཀྱི་ལོ་ཙཱ་བ་མར་པ་བན་དེ་ཆོས་ཀྱི་དབང་ཕྱུག་གྲགས་པས་བསྒྱུར་བའོ།། །། །། །།

88-1-13b

༄༅། །རྒྱ་གར་སྐད་དུ།  ཨཱརྱ་ཨ་ཙ་ལ་མ་ཧཱ་གུ་ཧྱ་ཏནྟྲ།  བོད་སྐད་དུ།  འཕགས་པ་མི་གཡོ་བའི་གསང་རྒྱུད་ཆེན་པོ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འདི་སྐད་བདག་གིས་
ཐོས་པ་དུས་གཅིག་ན། བཅོམ་ལྡན་འདས་རྣམ་པར་སྣང་མཛད་ཆེན་པོ་འོག་མིན་གྱི་གནས་ན་རབ་ཏུ་དགྱེས་ཤིང་བདུད་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེའི་ཚེ་ན་བྱང་ཆུབ་སེམས་དཔའ་འཇམ་
དཔལ་གཞོན་ནུར་གྱུར་པ་དང་། རྡོ་རྗེ་ཆོས་དང་། ཕྱག་ན་རྡོ་རྗེ་དང་། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང་། རྡོ་རྗེ་གནོད་སྦྱིན་དང་། རྡོ་རྗེ་ཁུ་ཚུར་ལ་སོགས་ཏེ་རབ་ཏུ་དགའ་བའི་ཚོགས་དཔག་ཏུ་མེད་པ་དང་
ཐབས་གཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཀྱིས་བཛྲ་རཀྵ་རཀྵ་ཧཱུྃ་ཞེས་གསུངས་ཏེ་རྡོ་རྗེ་ཁྲོ་བོས་ཕྱོགས་མཚམས་གཏམས་སོ། །བསྲུངས་བའི་དོན་དུ་རབ་བརྩོན་ཞིང་། །བགེགས་ཀྱི་སྦྱོར་བ་བརླག་པར་མཛད། །
ཧཱུྃ་ཕཊ་དེ་ནས་བཅོམ་ལྡན་འདས་ཀྱིས་ཧྃ་ཞེས་གསུངས་ཏེ་རང་གི་ཐུགས་ཀ་ནས་ཁྲོ་བོའི་རྒྱལ་པོ་མི་གཡོ་བ་ཕྱུང་སྟེ། གཡས་ན་རལ་གྲི་གཡོན་བསྡིགས་མཛུབ། །ཆར་སྤྲིན་ལྟ་བུར་ཤིན་ཏུ་གནག །སྦྲུལ་དང་ཐོད་པས་ཡང་
དག་བརྒྱན། །མི་བསྐྱོད་པས་ནི་བྱིན་བརླབས་ཤིང་། །བདེ་གཤེགས་འོད་ཟེར་དཔག་མེད་འཕྲོས། །དངོས་གྲུབ་བདེ་བ་ཀུན་སྩོལ་མཛད། །ཨོཾ་བཛྲ་སིདྷི་ཧཱུྃ། དེ་ནས་ཡང་དག་བཤད་བྱ་བ། །ཨཱ་ལི་ཀཱ་ལི་རབ་སྦྱར་ཞིང་། །
ཟླ་བ་རྡོ་རྗེ་སྦྱོར་ལྡན་པས། །ཡང་དག་རྫོགས་ཏེ་མངོན་སངས་རྒྱས། །སྣ་ཚོགས་རྡོ་རྗེའི་དབུས་སུ་ནི། །བརྐྱང་བསྐུམ་ཚུལ་དུ་ཡང་དག་གནས། །དགའ་བྱེད་མ་ནི་མདུན་དུ་སྟེ། །རིན་ཆེན་ཕྲེང་མ་གཡས་སུ་དགོད། །
གླུ་མཁན་མོ་ནི་གཡོན་དུ་སྟེ། །བརྩོན་འགྲུས་གར་བྱེད་རྒྱབ་ཏུ་གནས། །འགུགས་བྱེད་མ་ནི་ཤར་དུ་སྟེ། །རྣམ་པར་འཆིང་མ་ལྷོ་རུ་དགོད། །གཉིས་མེད་མ་ནི་ནུབ་ཏུ་སྟེ། །རྣམ་པར་འཕེལ་མ་བྱང་དུ་དགོད། །

88-1-14a

འདི་དག་ནི་བཅོམ་ལྡན་འདས་སྐུ་ཡོངས་སུ་རྫོགས་པའི་དམ་ཚིག་གོ། །འཕགས་པ་མི་གཡོ་བའི་རྒྱུད་གསང་བ་ཆེན་པོ་ལས་གླེང་གཞིའི་ལེའུ་སྟེ་དང་པོའོ།། །། 
དེ་ནས་བཅོམ་ལྡན་འདས་ཀྱིས་དབང་བསྐུར་བའི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་ནས་བཅོམ་ལྡན་འདས་ཀྱི་ཐུགས་ཀ་ནས་འོད་ཟེར་སྤྲོས་ཏེ་ལྷ་ཐམས་ཅད་ཀྱི་དབུ་ལ་འོད་ཟེར་
ཐིམ་པར་གྱུར་ཏོ། །རིགས་ཀྱི་བདག་པོས་དབུ་བརྒྱན་པར་གྱུར་ཏོ། །དེ་ནས་ཡང་དག་བཤད་བྱ་བ། །དཀྱིལ་འཁོར་ཆེན་པོ་དམ་པ་རུ། །མཆོད་པའི་ཚོགས་ནི་རྣམ་པར་བསྟིམ། །གཟུགས་དང་སྒྲ་དང་དྲི་དང་རོ། །
རེག་བྱ་ལྷ་མོ་དཔག་མེད་དེ། །མཆོད་པའི་ཚོགས་ཀྱིས་ཡང་དག་མཆོད། །ཀྱེ་ཀྱེ་མཐའ་གཉིས་རྣམ་པར་མ་གཡོས་ཤིང་། །སྤྲུལ་པའི་གཟུགས་ཀྱིས་འགྲོ་དོན་དཔག་མེད་མཛད། །འཇིགས་བྱེད་ཆེན་པོ་འགྲོ་བ་ཀུན་
སྒྲོལ་ཞིང་། །སྲིད་པ་གསུམ་ན་དགྱེས་པར་གར་མཛད་པ། །སྲིད་པའི་ཆུ་བོ་སྐེམས་ཤིང་མི་མཐུན་བདུད་རྣམས་འཇོམས། །སྲིད་པའི་རླུང་གིས་མ་གཡོས་ཐུགས་རྗེ་མི་གཡོ་མགོན། །རབ་བརྗིད་མི་གཡོ་མགོན་
ལ་ཕྱག་འཚལ་བསྟོད། །བཅོམ་ལྡན་འདས་ཀྱི་བསྟོད་པ་ཆེན་པོའི་དམ་ཚིག་གོ། །དེ་ནས་ཡང་དག་བཤད་བྱ་བ། །རྒྱལ་པོ་རྟག་ལྡན་ཐོད་པ་རུ། །ལྕགས་ཀྱུ་ལྔ་སོགས་གཞག་པར་བྱ། །རླུང་དང་མེ་ཡི་དཀྱིལ་འཁོར་
བཞག །ཐོད་པ་རུ་ནི་ཡང་དག་གནས། །བཅོམ་ལྡན་འདས་ཀྱི་བདུད་རྩི་ཆེན་པོའི་དམ་ཚིག་གོ། །དེ་ནས་ཡང་དག་བཤད་བྱ་བ། །ཚངས་པ་བརྒྱ་བྱིན་གཤིན་རྗེ་དང་། །ཆུ་བདག་གནོད་སྦྱིན་ཁྱབ་འཇུག་སོགས། །མེ་དང་
སྲིན་པོ་རླུང་གི་ལྷ། །འབྱུང་པོ་ས་ཡི་ལྷ་མོ་དང་། །ལྷ་མ་ཡིན་སོགས་འཁོར་བཅས་དགུག །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུཏྤ་པནྣ་ཏྭཏ་སྭཱ་ཧཱ། ཨོཾ་ཁཱ་ཧི་ཁཱ་ཧི་ཕེཾ་ཕེཾ་སྭཱ་ཧཱ། བདུད་རྩི་ཤ་དང་ཁྲག་ལ་

88-1-14b

སོགས། །གཏོར་མ་ཐམས་ཅད་སྦྱིན་པར་བྱ། །འཕགས་པ་མི་གཡོ་བའི་རྒྱུད་གསང་བ་ཆེན་པོ་ལས་མངོན་པར་རྟོགས་པའི་ལེའུ་སྟེ་གཉིས་པའོ།། །། དེ་ནས་ཡང་དག་བཤད་བྱ་བ། །
ཐུགས་ཀྱི་དཀྱིལ་འཁོར་དམ་པ་ནི། །ཁྲུ་བཞི་པ་ཡི་ཚད་དུ་བྱ། །སར་པ་ལས་ནི་བཀལ་ནས་ཀྱང་། །དཀྱིལ་འཁོར་ཉིས་འཁོར་རིང་ཐུང་ལ། །མཁས་པས་དཀྱིལ་འཁོར་ཐིག་གདབ་བོ། །འཁོར་ལོ་ལྟ་བུར་བྱས་ནས་ཀྱང་། །
རྡོ་རྗེ་ཕྲེང་བས་ཡོངས་སུ་བསྐོར། །གྲུ་བཞིར་བགྱི་ཞིང་སྒོ་བཞིར་བགྱི། །རྟ་བབས་བཞི་དང་ཡང་དག་ལྡན། །དབུས་སུ་རལ་གྲི་ཆེན་པོ་དགོད། །ཤར་དུ་རྡོ་རྗེ་ཡང་དག་དགོད། །ལྷོ་རུ་རིན་ཆེན་ཕྲེང་བ་སྟེ། །ནུབ་དུ་ཆོས་ཀྱི་
པི་བང་སྟེ། །བྱང་དུ་རྡོ་རྗེ་རྩེ་གསུམ་མོ། །སྒོར་ནི་ལྕགས་ཀྱུ་ཞགས་པ་དང་། །ལྕགས་སྒྲོག་དྲིལ་བུ་མཁས་པས་གཞག །བཅོམ་ལྡན་འདས་དཀྱིལ་འཁོར་ཆེན་པོ་དགོད་པའི་དམ་ཚིག་གོ། །དེ་ནས་ཆར་པ་མི་འབབ་ན། །སྟེགས་
བུ་གྲུ་བཞིའི་སྟེང་དུ་ཡང་། །དངུལ་གྱི་གཞོང་པ་བཞག་ནས་ཀྱང་། །བག་ཟན་ལས་ནི་བྱས་པའི་གཟུགས། །པད་མ་སུམ་བརྩེགས་དག་ཏུ་བྱ། །སྟེང་དུ་ཀླུ་ཡི་གཟུགས་བཞག་ལ། །གུར་གུམ་གྱིས་ནི་བྱུགས་བྱས་ལ། །
མཚམས་སུ་ཨོཾ་དང་བམ་བཀོད་དེ། །ཙན་དན་དཀར་པོས་སྦྱིན་སྲེག་བྱ། །ཁ་དོག་མང་པོ་སྦྱོར་ལྡན་པས། །ཀླུ་ཡི་གཟུགས་ནི་ངེས་པར་དགུག །དེས་ཀྱང་འབབ་པར་མ་གྱུར་ན། །ཁམ་པའི་གབ་ཚེ་དཀར་པོ་རུ། །
པྲི་ཡང་ཀུ་ཡི་ཁུ་བ་ཡིས། །རལ་གྲི་བརྒྱད་པའི་འཁོར་ལོ་བྲི། །རྒྱ་མཚོའི་ངོས་ལས་ས་བླངས་ལ། །ཀླུ་ཡི་གཟུགས་ནི་མངོན་བྱས་ཏེ། །ནམ་མཁའ་ལྡིང་གི་ཁུ་བས་བྱུག །ཏིལ་མར་ལ་ནི་སྦྱིན་སྲེག་བྱ། །དེ་ནས་
ཡང་དག་བཤད་བྱ་བ། །ཁམ་ཕོར་སེར་པོའི་ནང་དུ་ནི། །བསྒྲུབ་བྱ་གཟུགས་གཞུག་ལྡོང་རོས་ཀྱིས། །རི་རབ་རྩེ་མོ་བརྒྱད་པ་བྲི། །དེས་ནི་ཡང་དག་གནས་པར་བྱ། །ཤིན་ཏུ་རྣོ་བའི་ལྕགས་དག་ལ། །ཁྲུ་དོ་ཚད་ཀྱི་རལ་གྲི་

88-1-15a

བྱ། །མཎྜལ་དཀར་པོའི་སྟེང་དུ་བཞག །ཟླ་བ་དྲུག་ནི་རིག་པ་བཟླས། །ཏིལ་མར་གྱིས་ནི་བསྐུས་བྱས་ནས། །ཟླ་བ་གཟས་ཟིན་ཚེ་ན་བསྒྲུབ། །ཐོགས་པའི་མཁའ་ལ་ལྡིང་བར་འགྱུར། །
བདུད་རྩི་ལྔ་དང་ཤ་སྣ་ལྔ། །གྲིབ་མ་དག་ལ་བསྐམས་བྱས་ཏེ། །ལྕགས་གསུམ་དག་གིས་དཀྲིས་བྱས་ཏེ། །ཤར་བལྟས་ཟས་ནི་སྨྱུང་བར་གནས། །གཟས་ཟིན་ཚེ་ན་ཁར་
གཞུག་བྱ། །མཉམ་པར་གཞག་སྟེ་ཉི་ཤུ་བཟླས། །ཁར་བཅུག་གཞན་གྱིས་མངོན་མི་འགྱུར། །བཅོམ་ལྡན་འདས་དངོས་གྲུབ་ཆེན་པོའི་དམ་ཚིག་གོ། །དེ་ནས་ཡང་དག་
བཤད་བྱ་བ། །ས་གཞི་དཀར་ལ་ཟླུམ་པ་ལ། །ཙན་དན་དཀར་པོའི་མེ་སྦར་ཏེ། །སེར་སྐྱའི་མར་གྱིས་སྦྱིན་སྲེག་བྱ། །དངོས་གྲུབ་ཆེན་པོ་ཐོབ་པར་འགྱུར། །ཡུངས་ཀར་
གྱིས་ནི་སྦྱིན་སྲེག་བྱ། །རིག་པ་འཛིན་པའི་དངོས་གྲུབ་འཐོབ། །ཏིལ་ནག་པོས་ནི་སྦྱིན་སྲེག་བྱ། །སྡིག་པ་ཐམས་ཅད་ཞི་བར་འགྱུར། །དུར་བའི་མྱུ་གུས་སྦྱིན་སྲེག་
བྱ། །ཚེ་ཡི་རིག་འཛིན་ཐོབ་པར་འགྱུར། །སེང་ལྡེང་དག་ལ་ཕུར་པ་བྱ། །གསང་སྔགས་ཉི་ཤུ་གཅིག་བཟླས་ནས། །འདོད་པའི་གཟུགས་ལ་དབང་བར་
བྱ། །དགྱེས་པས་དངོས་གྲུབ་སྟེར་བར་འགྱུར། །འཕགས་པ་མི་གཡོ་བའི་རྒྱུད་གསང་བ་ཆེན་པོ་ལས་དངོས་གྲུབ་ཀྱི་ལེའུ་སྟེ་གསུམ་པའོ།། །། དེ་ནས་བཅོམ་ལྡན་འདས་
ཡོངས་སུ་དགྱེས་ནས་འཇམ་དཔལ་ལ་སོགས་པ་རྣམས་ལ་རྣམ་པར་གཟིགས་ནས། ཨོཾ་ཨཱཿཧཱུྃ་ཞེས་བྱ་བའི་སྒྲ་གསུངས་ཏེ་མི་སྣང་བར་གྱུར་ཏོ། །དེ་ནས་རབ་ཏུ་དགའ་

88-1-15b

བའི་ཚོགས་ཀྱིས་རང་གི་བདག་པོ་མཐོང་བར་མ་གྱུར་ཏེ། ཕྱོགས་བཞི་ནས་མངོན་དུ་ཕྱོགས་ནས་འདི་ཡིས་གསོལ་བ་བཏབ་བོ། །ཨེ་མ་བཅོམ་ལྡན་ངོ་མཚར་ཆེ། །སྟོང་པའི་
ངང་ལ་ཅི་སྟེ་བཞུགས། །བདག་ནི་ཚངས་སྤྱོད་བྱམས་པ་སྟེ། །མྱ་ངན་འདས་པ་ཀུན་ནས་སློང་། །ཨེ་མའོ་བདེ་བ་ཆེན་པོའི་སྐུ། །ཚིག་ཀུན་གྱིས་ནི་མ་སྤྲོས་པ། །བདག་ནི་རྗེས་ཆགས་
སྙིང་རྗེ་ཆེ། །འགྲོ་བ་ཡང་དག་སྒྲོལ་བར་མཛད། །ཨེ་མ་དྲི་མེད་དག་པའི་སྐུ། །སྟོང་པའི་ངང་ལས་མ་བཞུགས་པར། །རབ་ཏུ་དགའ་བས་བདག་ལ་རོལ། །འགྲོ་བའི་དོན་ལ་རྗེས་ཆགས་བརྗོད། །
ཨེ་མའོ་དོན་ཀུན་གྲུབ་མཛད་པ། །དག་པའི་ཡེ་ཤེས་དྲི་མེད་སྐུ། །བདག་གིས་འགྲོ་ཀུན་གཟུང་བའི་ཕྱིར། །གཙོ་བོ་ཁྱོད་ནི་ཡང་དག་བཞེངས། །དེ་ནས་བཅོམ་ལྡན་འདས་རབ་ཏུ་
དགྱེས་ཏེ་སྐུ་ཡོངས་སུ་རྫོགས་པ། རྫོགས་པར་མཛད་ནས་གསང་སྔགས་ཀྱི་རྒྱལ་པོ་འདི་དག་གསུངས་སོ། །ཨོཾ་ཨཱརྱ་ཨ་ཙ་ལ་ཧཱུྃ་ཕཊ། ཨོཾ་བཛྲ་ཀཱི་ལི་ཀཱི་ལ་ཡ། སརྦ་
བི་གཱ་ན་བནྡྷ་ཡ་ཧཱུྃ་ཕཊ། གསང་སྔགས་དང་ཕུར་བུའི་སྔགས་སོ། །ཨོཾ་ན་མཿས་མཎྟ་བཛྲ་ཙཎྚ་མ་ཧཱ་རོ་ཥ་ཎ་སྥོ་ཊ་ཡ། ཧཱུྃ་ཧཱུྃ་ཧཱུྃ་ཏྲ་ཊ་ཧཱུྃ། མཾ་པཾ་ཧཾ་མཾ་ཏ་ཤ་ཧཱུྃ། མ་མ་
ཧཱུྃ་ཕཊ་སྭཱ་ཧཱ། ཤིན་ཏུ་རྣོ་བའི་སྔགས་ཏེ་ལས་ཐམས་ཅད་པའོ། །དེ་ནས་འཁོར་རྣམས་ཀྱིས་གསང་སྔགས་ཀྱི་དོན་ཁོང་དུ་ཆུད་པར་གྱུར་ཏོ། །
འཕགས་པ་མི་གཡོ་བའི་རྒྱུད་གསང་བ་ཆེན་པོ་ལས་གསང་སྔགས་ཀྱི་ལེའུ་སྟེ་བཞི་པའོ།། །།འཕགས་པ་མི་གཡོ་བའི་རྒྱུད་གསང་བ་ཆེན་པོ་རྫོགས་སོ། ། ཞུས་དག །

88-1-16a

༄༅། །རྒྱ་གར་སྐད་དུ།  ཀྲོ་དྷ་རཱ་ཛ་སརྦ་མནྟ་གུ་ཧྱ་ཏནྟྲ་ནཱ་མ།  བོད་སྐད་དུ།  ཁྲོ་བོའི་རྒྱལ་པོ་ཐམས་ཅད་གསང་སྔགས་གསང་བའི་རྒྱུད་ཅེས་བྱ་བ། ཁྲོ་བོ་མི་གཡོ་མགོན་པོ་ལ་ཕྱག་འཚལ་ལོ། །དེ་ནས་ཡང་དག་
བཤད་བྱ་བ། །ཁམས་གསུམ་ཞེ་སྡང་ཅན་གཟིགས་ནས། །ཞེ་སྡང་ཐམས་ཅད་ཟད་བྱའི་ཕྱིར། །བཅོམ་ལྡན་ཐུགས་རྗེའི་རང་བཞིན་ཅན། །ཞེ་སྡང་མི་གཡོ་མགོན་པོར་མཛད། །ངོ་བོ་ཉིད་ཀྱིས་དག་པའི་བདག །སྔགས་ལྷ་ཕྱག་
རྒྱ་ཏིང་འཛིན་དང་། །རྣམ་དག་བསམ་གཏན་ཕྲིན་ལས་རྣམས། །བཅོམ་ལྡན་རྡོ་རྗེ་འཆང་ཆེན་གྱིས། །དུར་ཁྲོད་འབར་བ་འཁྲུགས་པའི་སར། །འཛིན་པས་བཏུད་དེ་ངེས་ཞུས་ལ། །ཀྱེ་ཀྱེ་ཡང་དག་ཁྲོ་ཆེན་གཙོ། །མ་ལུས་རྣམ་
དག་ལ་གནས་ཕྱིར། །མགོན་པོ་མི་གཡོའི་གསང་རྒྱུད་ལས། །སེམས་དཔའ་ཆེན་པོའི་ཏིང་འཛིན་གང་། །ངོ་མཚར་ཐར་པ་ངེས་པར་གསོ། །དེ་ནས་ཡང་དག་ཡེ་གསུངས་པ། །དཔའ་བོ་དུར་ཁྲོད་གནས་པས་ལེགས། །རུས་པའི་
རྒྱན་ངེས་ཕྱག་རྒྱ་དྲུག །གནས་པའི་ཚོགས་ཀྱི་བདག་ཉིད་དེ། །རྒྱུ་བཞི་ཚད་མེད་བཞི་རུ་གནས། །ཡེ་ཤེས་རྟོག་པའི་རྟོག་པའོ། །རྒྱུན་མ་ཆད་པའི་དམ་པ་ཡིས། །ཉི་ཟླ་ཤེས་རབ་ཐབས་ཀྱི་གདན། །སྐུ་གསུང་ཐུགས་ཀྱི་ངོ་བོར་གནས། །
གྱུར་པའི་མཚན་ལྡན་ཡེ་ཤེས་ལྔ། །ཕྱག་རྒྱ་དྲུག་མཛེས་བྱིན་བརླབས་ནས། །དུར་ཁྲོད་མ་ནི་འཁྱུད་པའོ། །ཕུང་པོ་ལ་སོགས་ཐུབ་པར་གནས། །པདྨ་རྡོ་རྗེ་བྱིན་གྱིས་བརླབས། །བསྲུང་བའི་སྦྱོར་བ་མེད་པ་དང་། །མཚན་མ་བྲལ་དང་
འདུས་མ་བྱས། །བྱེད་པ་རྣམ་མེད་རྟོག་པས་འདས། །སྐུ་ནི་དུག་འཇོམས་གནག་པའི་ཚུལ། །རྡོ་རྗེ་ཞགས་པ་བསྡིགས་གནས་པ། །གཡོན་བརྐྱང་གནས་པ་སྤྱན་རྩ་དམར། །པདྨ་གྲི་གུག་ཤེས་རབ་ཚུལ། །གཡོན་འཁྱུད་ཚིམ་
བྱེད་རྒྱན་བྲལ་བའི། །ཐབས་དང་ཤེས་རབ་མ་ཆགས་དང་། །ཐ་མ་བྱིན་ཟ་མནན་ཏེ་གནས། །འབར་བའི་དཀྱིལ་འཁོར་དབུས་ནའོ། །ཧཱུྃ་ལ་རྒྱ་གྲམ་རྡོ་རྗེ་གནས། །ཨེ་ལས་ཆོས་འབྱུང་གྲུབ་པ་མོ། །མཚོན་ཆ་ར་བ་དྲ་བས་སོ། །

88-1-16b

རྟེན་པ་ཕྱག་རྒྱ་ལྷ་ལྔ་གནས། །མོས་པ་རྣམ་པར་གྲུབ་པ་ཡིན། །མོས་པ་རྣམ་པར་དག་པའི་ལེའུ་སྟེ་དང་པོའོ།། །། དེ་ནས་ཡང་དག་བཤད་བྱ་བ། །གཉིས་མེད་འགྱུར་བའི་གསང་བ་ནི། །འཁོར་ལོ་མི་བསྐྱོད་ཡེ་
ཤེས་ཆེ། །མགྲིན་པ་ཕྲེང་བའི་རིན་ཆེན་འབྱུང་། །རྣ་ཆ་གཟུགས་ཀྱི་འོད་དཔག་མེད། །རུས་པའི་རྣ་རྒྱན་དོན་ཡོད་གྲུབ། །ཐལ་བ་སྣང་མཛད་རྣམ་དག་གོ། མིག་ལ་འདོད་ཆགས་རྡོ་རྗེ་མ། །རྣ་བ་ཞེ་སྡང་མ་ཞེས་གྲགས། །སྣ་ནི་སེར་
སྣའི་རྣམ་པར་བོར། །ལྕེ་ལ་ཕྲག་དོག་རྡོ་རྗེ་མ། །ལུས་ལ་རྡོ་རྗེ་གཏི་མུག་གོ། ཡིད་ལ་ཆོས་ཀྱི་དབང་ཕྱུག་སྟེ། །དཀྱིལ་འཁོར་ལུས་ཉིད་རྣམ་དག་པ། །རྩ་ནི་ཐིག་གི་རང་བཞིན་ཏེ། །ཀ་བ་བརྒྱད་ནི་རྐང་བརྒྱད་དོ། །བདུད་རྩི་རྣམ་
ལྔ་ཚོན་སྣ་ལྔ། །གཡས་གཡོན་སྟེང་འོག་སྒོ་ཉིད་དེ། །སོ་སེན་བ་སྤུ་ཏྭ་ར་ཎ། །སྙིང་གི་དབུས་ཀྱི་ལྟེ་བ་ཉིད། །ཕུང་པོ་ལྔ་ཡི་གཙོ་མོ་སྟེ། །ཁམས་དང་སྐྱེ་མཆེད་ལྷ་མོར་གྲགས། །འབྱུང་བ་སྒོ་བ་བཞི་ཉིད་དེ། །འདོམ་གང་གྲུ་བཞི་
ལྷམ་པ་སྟེ། །མི་གཡོ་མགོན་པོ་རྣམ་པར་ངེས། །ལུས་ཀྱི་རྣམ་པར་དག་པའི་ལེའུ་སྟེ་གཉིས་པའོ།། །། ཨོཾ་ཨཱརྱ་ཨ་ཙ་ལ་མཱརྱ་ར་ཀྲོ་དྷ་ཧཱུཾ་ཕཊ། སྙིང་པོའོ། །ཨོཾ་ཨཱརྱ་ཨ་ཙ་ལ་ཀྲོ་དྷ་བི་པ་ས་
ཧཱུྃ་ཕཊ། ཉེ་བའི་སྙིང་པོའོ། །ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། གསང་བའི་སྙིང་པོའོ། །ཨོཾ་ཧ། ན་མ་ཧི། །སྭཱ་ཧཱ་ཧཱུ། བོ་ཥ་ཊ་ཧེ། ཧཱུྃ་ཧཱུྃ་ཧོ། ཕཊ་ཧཾ། རྒྱན་བྱིན་གྱིས་བརླབ་པའོ། །ཨོཾ་པད་མ་བོ་ལརྒ་མི་ཡཾ། ཊཾ་ཧཾ་མཾ་བྱཾ། བཛྲ་
པྲ་ཏ་ཀ་ཀོ་ལ་ཧཱུྃ་ཕཊ། ཤེས་རབ་ཐབས་ཀྱི་ཕྱག་རྒྱ་བྱིན་གྱིས་བརླབ་པའོ། །ཀ་ས་མཱ་ར་ཁ་ན་ཧི་མཱ་ར་ཁ་ནི་ས་མཱ་ར་ཡ་ཕཊ། བསད་པའིའོ། །སརྦ་ཨ་མརྒཾ་མེ་ཨ་ཧཱུྃ། ཐུན་མོང་གྲུབ་པའོ། །གཙྪ་ཕཊ། བསྐྲད་པའིའོ། །
སྭཱ་ཧཱ་རཏྣ་ན། རྒྱས་པའི་འོ། །དྷརྨཱ་གུ་ཏ་ཧཱུྃ། དབང་གིའོ། །ཀརྨ་པུ་ཏ་ཤཱནྟིྃ་ཀུ་རུ་ཧཱུྃ། ཞི་བའི་འོ། །སྔགས་ཀྱི་རྣམ་པར་དག་པའི་རྟོག་པའི་དུམ་བུ་ལས་ཁྲོ་བོའི་རྒྱལ་པོ་ཐམས་ཅད་ཀྱི་སྔགས་གསང་བའི་རྒྱུད་ཅེས་བྱ་བ་ལས། 

88-1-17a

འཕགས་པ་མི་གཡོ་བའི་སྔགས་རྣམ་པར་དག་པའི་ལེའུ་སྟེ་གསུམ་པའོ།། །། དེ་ནས་ཡང་དག་བཤད་བྱ་བ། །ཡབ་ཡུམ་གཉིས་མེད་སྦྱོར་བ་ལས། །ཁྲོ་བོའི་
ཚོགས་རྣམས་སྤྲོས་ནས་ནི། །གཙོ་མོ་ཐབས་ཀྱི་ཡན་ལག་བཀང་། །ལག་པ་གཡས་པར་གཤིན་རྗེའི་གཤེད། །གཡོན་པ་གཞན་གྱིས་མི་ཐུབ་པ། །རྟ་མགྲིན་ཁ་ལ་བསམ་པར་བྱ། །རྡོ་རྗེ་ལ་ནི་བདུད་རྩི་འཁྱིལ་། །དཔུང་
པ་གཡས་པར་མི་གཡོ་བ། །གཡོན་པར་འདོད་པའི་རྒྱལ་པོ་འོ། །པུས་མོ་གཡས་པར་བསམ་པ་ནི། །དབྱིག་པ་སྔོན་པོ་ཆེར་འབར་བ། །པུས་མོ་གཡོན་པར་སྟོབས་པོ་ཆེ། །སྤྱི་བོར་གཙུག་ཏོར་འཁོར་ལོས་སྒྱུར། །གནོད་མཛེས་
རྒྱལ་པོ་བསམ་པ་ནི། །རྐང་པ་གཉིས་ལ་དགོད་པར་བྱ། །ཡང་ནི་ཡབ་ཡུམ་སྦྱོར་བ་ལས། །བྱང་ཆུབ་སེམས་སྤྲིན་འདུ་འཕྲོ་ལས། །ཧཱུྃ་ཚོགས་ཁྲོ་མོར་སྤྲོས་ནས་ནི། །གཙོ་མོ་ཤེས་རབ་ཡན་ལག་དགང་། །ལག་གཡས་རྡོ་རྗེ་རོ་
ལངས་མ། །གཡོན་ན་གཞན་གྱིས་མི་ཐུབ་མོ། །དེ་ཡི་ཁར་ནི་ཁྲོ་གཉེར་མ། །གསང་བར་རལ་པ་གཅིག་མའོ། །གཞན་ཡང་དཔུང་པ་གཡས་གནས་པར། །དེ་བཞིན་གཤེགས་ཡུམ་རྡོ་རྗེ་མ། །གཡོན་དུ་སྣ་ཚོགས་རིན་ཆེན་གྱི། །
ཕྱག་རྒྱ་དག་ནི་བསྒོམ་པར་བྱ། །པུས་མོ་གཡས་ལ་གནས་པར་ཡང་། །སྣ་ཚོགས་པད་མ་དེ་བཞིན་གཤེགས། །གཡོན་པ་ལས་ནི་སྣ་ཚོགས་ལས། །སྤྱི་བོར་ནམ་མཁའི་རྡོ་རྗེ་མ། །རྐང་པ་གཉིས་ལ་ས་ཡི་ནི། །ས་འཛིན་ལྷ་
མོ་གཞག་པར་བྱ། །ཐབས་དང་ཤེས་རབ་སྦྱོར་བ་ཡིས། །བྱང་ཆུབ་སེམས་སྤྲིན་འཕྲོ་འདུ་ལས། །གདོད་ནས་གྲུབ་པའི་སངས་རྒྱས་རིགས། །ཕྱུང་ནས་ལུས་ལ་དཀྱིལ་འཁོར་བཀོད། །དེ་དག་ཕན་ཚུན་སྦྱོར་བ་ལས། །རྗེས་
ཆགས་ཆེན་པོའི་སྒྲ་ཡིས་ནི། །བདེ་གཤེགས་ཚོགས་རྣམས་བསྐུལ་བྱ་སྟེ། །དེ་དག་ལ་ནི་ཡང་ཡང་གཞུག །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་བཛྲ་སྭཱ་བྷཱ་བ་ཨཱཏྨ་ཀོ྅་ཧཾ། ཆུ་ལ། ཟླ་བའི་དཀྱིལ་འཁོར་བཞིན། །གསལ་

88-1-17b

བ་ལྷ་ཡི་རང་བཞིན་ནི། །ཀུན་ཀྱང་ཞལ་གསུམ་ཕྱག་དྲུག་སྟེ། །བརྗིད་པའི་ཁྲོ་བོ་གར་དང་བཅས། །ཡང་ན་ཞལ་གཅིག་ཕྱག་གཉིས་པར། །རྣལ་འབྱོར་ཅན་གྱིས་བརྟན་པར་བསྒོམ། །དངོས་གྲུབ་རབ་མཆོག་ཐོབ་པར་འགྱུར། །
དེ་ཕྱིར་ནན་ཏན་བསྐྱེད་པར་བྱ། །འཕགས་པ་མི་གཡོ་བའི་རྟོག་པ་ལས་ལུས་ཀྱི་དཀྱིལ་འཁོར་བཀོད་པའི་རིམ་པའི་ལེའུ་སྟེ་བཞི་པའོ།། །། དེ་ནས་ཕྱི་ཡི་དཀྱིལ་འཁོར་དུ། །རིགས་ཀྱི་ཁྲོ་བོ་སྤྲོ་བ་ནི། །
ཐབས་དང་ཤེས་རབ་སྦྱོར་བ་ལས། །རྣམ་པར་འཕྲུལ་པ་བཤད་པར་བྱ། །རང་སྔགས་ས་བོན་ལས་བྱུང་བའི། །གཏི་མུག་མི་གཡོ་མགོན་པོ་ནི། །ཞལ་ནི་གནག་དང་དཀར་དང་དམར། །འབར་བའི་ཚོགས་ཀྱིས་རྣམ་པར་འཁྲིགས། །
དབྱིག་པ་འཁོར་ལོ་རྡོ་རྗེ་བསྣམས། །ཕྱག་གཡས་ན་ནི་བསྣམས་པར་མཛད། །ཐུགས་ཀར་སྡིགས་མཛུབ་ཞག་པ་དང་། །དྲིལ་བུ་དགྲ་སྟ་གཡོན་པ་ནི། །དབང་པོ་ལ་སོགས་ཚོགས་བཅས་དང་། །མི་བཟད་བགེགས་ནི་སྐྲག་པར་
མཛད། །པད་མ་ཉི་མ་མནན་ནས་ནི། །ཤར་གྱི་ཕྱོགས་སུ་བཞུགས་གྱུར་པ། །རྣམ་སྣང་དབུ་རྒྱན་ལྡན་པའོ། །རང་སྔགས་ས་བོན་ལས་བྱུང་བའི། །སེར་སྣ་མི་གཡོ་མགོན་པོ་ནི། །རིན་ཆེན་འབྱུང་ལྡན་དབུ་རྒྱན་ཅན། །གསེར་
མདོག་ཞལ་གསུམ་ཕྱག་དྲུག་པ། །སྤྱན་གསུམ་གསུས་ཆེ་ནོར་བུས་བརྒྱན། །སེར་དང་གནག་དང་དམར་བའི་ཞལ། །མཆེ་བ་གཙིགས་ཤིང་རྣམ་པར་རྒྱུ། །འབར་བའི་ཚོགས་ཀྱིས་རྣམ་པར་འཁྲིགས། །རྡོ་རྗེ་དབྱུག་པ་རལ་
གྲི་ནི། །གཡས་ཀྱི་ཕྱག་ན་བསྣམས་པར་མཛད། །སྙིང་གར་སྡིགས་མཛུབ་ཞགས་པ་དང་། །དྲིལ་བུ་དགྲ་སྟ་གཡོན་པ་ན། །གཡོན་བརྐྱང་པ་ཡི་གནས་པ་ཡིས། །མི་བཟད་བགེགས་ནི་སྐྲག་མཛད་པ། །པད་མ་ཉི་མ་མནན་
ནས་ནི། །ལྷོ་ཡི་ཕྱོགས་ན་བཞུགས་པར་གྱུར། །རང་སྔགས་ཡི་གེ་ལས་བྱུང་བའི། །འདོད་ཆགས་མགོན་པོ་མི་གཡོ་བ། །སྤྱན་གསུམ་པད་མ་རཱ་གའི་མདོག །ཞལ་ནི་དམར་དང་གནག་དང་དཀར། །ཞལ་གདངས་གསུས་

88-1-18a

ཁྱིམ་ཆེ་བ་དང་། །འོད་དཔག་མེད་པའི་ཅོད་པན་ཅན། །དཔའ་བོ་གཡོན་བརྐྱང་པ་ཡིས་གནས། །འབར་བའི་ཚོགས་ནི་རྣམ་པར་འཁྲུགས། །པདྨ་རལ་གྲི་གཏུན་ཤིང་ནི། །གཡས་ཀྱི་ཕྱག་ན་བསྣམས་པར་མཛད། །
སྙེམས་དང་བཅས་པས་དྲིལ་བུ་དང་། །དགྲ་སྟ་ཞགས་པ་གཡོན་ན་བསྣམས། །པདྨ་ཉི་མ་ལ་གནས་ཏེ། །ཕྱོགས་བཅུ་དག་ཏུ་གཟིགས་ནས་ནི། །ཀླུ་རྣམས་སྐྲག་པར་མཛད་ནས་སུ། །ནུབ་ཀྱི་ཕྱོགས་སུ་བཞུགས་པར་གྱུར། །རང་
སྔགས་ས་བོན་ལས་བྱུང་བའི། །ཕྲག་དོག་མི་གཡོ་མགོན་པོ་ནི། །དོན་ཡོད་རྡོ་རྗེའི་དབུ་རྒྱན་ཅན། །སྔོ་ལྗང་ཨུཏྤལ་འདབ་མའི་མདོག །ཞལ་ནི་སྔོ་དང་དམར་དང་དཀར། །ཞལ་གདངས་ལ་ནི་རྣམ་པར་འགྱུར། །གསུས་ཁྱིམ་
ཆེ་ཞིང་སྤྱན་གསུམ་པ། །འབར་བའི་འོད་ཀྱིས་རྣམ་པར་བརྒྱན། །སྣ་ཚོགས་རྡོ་རྗེ་འཁོར་ལོ་དང་། །གཏུན་ཤིང་རྣམས་ནི་གཡས་པ་ན། །སྡིགས་མཛུབ་ཞགས་པས་ཕྱག་མཚན་ཅིང་། །དྲིལ་བུ་དགྲ་སྟ་གཡོན་ན་བསྣམས། །
གཡོན་བརྐྱང་བ་ཡིས་གནས་པ་ཡིས། །པདྨ་ཉི་མ་མནན་ནས་ནི། །ཕྱོགས་བཅུ་དག་ཏུ་གཟིགས་ནས་ནི། །བགེགས་ཆེན་འཇིགས་པ་གསལ་མཛད་ནས། །བྱང་གི་ཕྱོགས་སུ་བཞུགས་པར་གྱུར། །དེ་ལྟར་ཕྱོགས་བཅུའི་
བགེགས་ཀྱི་ཚོགས། །མཐར་བྱེད་རབ་ཏུ་ཟད་མཛད་ནས། །སེམས་ཅན་ཡོངས་སུ་བཏུལ་བྱས་ཏེ། །ཞིང་རྣམས་སངས་རྒྱས་ཚོགས་ཀྱིས་བཀང་། །འཕགས་པ་མི་གཡོ་བའི་རྟོག་པ་ལས་བྱུང་བའི་དཀྱིལ་འཁོར་བཀོད་
པའི་ལེའུ་སྟེ་ལྔ་པ་རྫོགས་སོ།། །། ཞུས་དག །།

88-1-18b

༄༅༅། །རྒྱ་གར་སྐད་དུ། བཛྲ་ཨ་མྲྀ་ཏ་ཏནྟྲ། བོད་སྐད་དུ། རྡོ་རྗེ་བདུད་རྩིའི་རྒྱུད། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་
གཤེགས་པ་ཐམས་ཅད་ཀྱི་སྐུ་དང་། གསུང་དང་ཐུགས་ཀྱི་སྙིང་པོ་རྡོ་རྗེ་བདུད་རྩི་གསང་བའི་པདྨ་ལ་བཞུགས་སོ། །གཞལ་ཡས་བརྩེགས་པའི་ཁང་པ་ན། །མཱ་མ་ཀཱི་དང་ཐབས་གཅིག་ཏུ། །བཅོམ་ལྡན་རྡོ་རྗེ་ཅན་རོལ་ཏེ། །
དེ་ནས་ལྷ་མོས་དེ་ཞུས་པ། །གསང་ཆེན་ཞེས་བྱ་ཆེར་གནས་པའི། །རྡོ་རྗེ་བདུད་རྩི་རྒྱུད་ཀྱི་མཆོག །སྔོན་དུ་ལྷ་ཁྱོད་ཀྱིས་གསུངས་པ། །བདུད་རྩི་ཡི་ནི་སྒྲུབ་པའི་ཐབས། །བདེ་བ་ཆེན་པོས་བཀའ་སྩལ་འཚལ། །དེ་ནས་
བཅོམ་ལྡན་རྡོ་རྗེས་བཤད། །རྡོ་རྗེ་བདུད་རྩི་བདེ་ཆེན་པོ། །བསམ་མེད་ཟད་མེད་ཕྲ་མོ་སྟེ། །དོན་ཡོད་དབང་པོ་ལས་འདས་པ། །དམ་པ་ཞི་བ་རྣམ་དག་པ། །རྡོ་རྗེ་བདུད་རྩི་བརྗོད་པ་ཡིན། །དེ་ནས་བཅོམ་ལྡན་རྡོ་རྗེ་ཡིས། །
མཱ་མ་ཀཱིར་ཆགས་དང་ལྡན་ནས། །རྡོ་རྗེ་བདུད་རྩིའི་ཏིང་འཛིན་གྱིས། །གསང་ཆེན་མངོན་སུམ་དུ་ནི་མཛད། །རྒྱུད་རྣམས་ཀུན་ལ་གསང་བ་ཡི། །ཡེ་ཤེས་རྡོ་རྗེ་བདུད་རྩི་མཆོག །དེ་ནི་བདག་གིས་བཤད་པར་བྱ། །བརྟན་
པོར་འཁྱུད་དང་འོ་བྱེད་དང་། །དགའ་བའི་རོལ་པས་མཉམ་སྦྱོར་དང་། །དབྱངས་དང་སིལ་སྙན་གར་རྣམས་ཀྱིས། །རྡོ་རྗེ་བདུད་རྩི་རྒྱུད་ཀྱི་མཆོག །དེ་ལྟར་མྱུར་དུ་འགྲུབ་པར་འགྱུར། །བདུད་རྩི་ཁུ་བ་ཞེས་གསུངས་ཏེ། །འགྲོ་བ་
གསུམ་ནི་དེས་བསྐྱེད་དོ། །ཁྱོད་ལ་དགའ་མ་ཞལ་བཟང་མ། །དེ་ཡི་སྒྲུབ་པ་བདག་གིས་བཤད། །ཉོན་ཅིག་དེ་ཡི་སེམས་ཀྱིས་ཚིག །མདོར་བསྡུས་ནས་ནི་བཤད་པར་བྱ། །སེམས་ཅན་དོན་དུ་ཕན་དོན་དུ། །སྦྱོར་བའི་རྡོ་རྗེ་
བདུད་རྩི་མཆོག །རྣལ་འབྱོར་གང་གིས་ཤེས་གྱུར་ན། །འཁོར་བའི་བཅིངས་ལས་མྱུར་བར་གྲོལ། །བསྟན་དུ་མེད་ཅིང་ཡེ་ཤེས་ཆེ། །དངོས་གྲུབ་འཇིག་རྟེན་གསུམ་བསྒྲུབ་བོ། །སྐུ་གསུང་ཐུགས་ཀྱི་བསྒྲུབ་དོན་དུ། །སྒྲུབ་པ་པོས་ནི་

88-1-19a

བདེ་བ་སྤྱོད། །རྡོ་རྗེ་པདྨ་མཉམ་སྦྱོར་བས། །རྡོ་རྗེ་བདུད་རྩི་ཕྱུང་བར་བྱ། །བྷ་གའི་པདྨར་འོ་བཏབ་སྟེ། །རྡོ་རྗེ་མཱ་མ་ཀཱིས་འོ་བཏབ། །རྡོ་རྗེ་བདུད་རྩི་བདེ་བ་ཆེ། །བཅོམ་ལྡན་རྡོ་རྗེས་དེ་གསུངས་སོ། །བྷ་གའི་པད་མར་
འོ་བཏབ་པས། །དེ་ཚེ་དགའ་བའི་ལྷ་མོ་དེས། །རྡོ་རྗེ་བདུད་རྩི་ལས་བྱུང་བའི། །ཉམས་དགའ་གསང་བའི་དཀྱིལ་འཁོར་ཞུས། །ཆོ་གའི་རིམ་པ་གང་གིས་ནི། །མཆོད་པ་དཀྱིལ་འཁོར་བརྩམ་པར་བྱ། །འདིར་ནི་མཆོད་པ་
ཇི་ལྟར་ཏེ། །དེ་བཞིན་དཀྱིལ་འཁོར་ཇི་ལྟར་ལགས། །དགའ་བ་ཆེན་པོ་ཐོབ་དཀའ་བ། །རབ་ཏུ་དགྱེས་ནས་བཀའ་སྩལ་འཚལ། །དེ་ནས་བཅོམ་ལྡན་རྡོ་རྗེ་ཡིས། །རྡོ་རྗེ་བདུད་རྩི་བདེ་བ་ཆེ། །འོ་བཏབ་པས་ནི་དགར་འགྱུར་ཏེ། །
བཞད་ནས་འདི་སྐད་བཀའ་སྩལ་ཏེ། །སྐུ་གསུང་ཐུགས་ཀྱི་བསྒྲུབ་དོན་དང་། །འཁོར་བའི་རྒྱ་མཚོ་བསྒྲལ་བའི་ཕྱིར། །དགའ་བ་ཆེན་པོ་སྦྱོར་བ་ཡིས། །མཱ་མ་ཀཱིས་ནི་འདིར་བྲིས་པ། །ཟུར་གསུམ་དཀྱིལ་འཁོར་བྲིས་ནས་སུ། །
གསང་བའི་པདྨ་མཱ་མ་ཀཱི། །ནང་དུ་སྙིང་པོ་དང་ལྡན་པའི། །པད་མ་འདབ་བརྒྱད་པ་ནི་བྱ། །དེ་དབུས་གསང་ཆེན་རིག་མ་དང་། །གཙོ་བོ་ཞལ་གསུམ་ཕྱག་དྲུག་པ། །དང་པོའི་ཞལ་ནི་ནག་པོ་སྟེ། །གཡས་པ་ལ་ནི་དཀར་པོ་
འདོད། །གཡོན་དུ་དམར་པོར་རབ་གསུངས་ཏེ། །ལྷ་ཡི་རྒྱན་གྱིས་བརྒྱན་བྱས་པ། །ལྷ་ཡི་ན་བཟའ་མེ་ཏོག་ཕྲེང་། །ལྷ་ཡི་དྲི་ཡིས་བྱུག་བྱེད་པ། །ལྷ་ཡི་དངོས་གྲུབ་བྱེད་ཞི་བ། །སྐུ་གསུང་ཐུགས་ཀྱི་རྡོ་རྗེ་ཅན། །
ཕྱི་རོལ་དུ་ནི་དཀྱིལ་འཁོར་ཡང་། །སྒོ་བཞི་པ་ནི་རབ་ཏུ་བརྟགས། །ཤར་དུ་ཁྲོ་གཉེར་མ་བཞག་སྟེ། །ལྷོ་ན་འཇིགས་པར་འཇིགས་བྱེད་མ། །ནུབ་ན་རྟ་ཡི་གཟུགས་ཅན་མ། །བྱང་དུ་ཚོགས་ཀྱི་འདྲེན་མ་མོ། །མཁས་པས་
པད་མ་འདབ་བརྒྱད་ལ། །རིག་མ་བརྒྱད་ནི་མཉམ་པོར་བྲིས། །མཛེས་པ་མོ་དང་ཞི་བའི་ཞལ། །ཟླ་བ་མོ་དང་དུང་ཅན་མོ། །རི་བོང་འཛིན་དང་དཀྱིལ་འཁོར་མོ། །རི་བོང་འཛིན་རི་མོ་ཡིད་དགའ། །ཡིད་ལ་བདེ་བར་བྱེད་མ་དག །

88-1-19b

རིག་མ་བརྒྱད་དང་དགེ་མ་བརྒྱད། །ཐམས་ཅད་ཞལ་གསུམ་ཕྱག་དྲུག་པ། །སྣ་ཚོགས་གཟུགས་ནི་ཡིད་དགའ་མ། །ཕྱོགས་རྣམས་དག་ནི་མཚམས་དག་ལ། །རྟེག་པ་རུ་ནི་བྲི་བར་བྱ། །མཆོད་པ་པི་ཝང་རྔ་དེ་བཞིན། །དེ་བཞིན་
སྤོས་དང་མེ་ཏོག་སོགས། །དབྱངས་དང་གར་དང་མཆོད་པ་ནི། །དགའ་བ་རོལ་པ་སྦྱོར་བ་ཡིས། །རྡོ་རྗེ་བདུད་རྩི་བདེ་བ་ཆེ། །གསང་བའི་འཁོར་ལོ་བསྒྲུབ་པར་བྱ། །མ་དང་བྲན་མོ་བུ་མོ་དང་། །སྲིང་མོ་གཉེན་མོ་དེ་བཞིན་ཏེ། །རྡོ་རྗེ་
བདུད་རྩི་དེ་དག་ལས། །བླངས་ནས་གསང་བའི་དཀྱིལ་འཁོར་མཆོད། །མ་ལས་བདུད་རྩི་བླངས་པས་ནི། །རྡོ་རྗེ་བདུད་རྩི་དང་མཉམ་འགྱུར། །སྲིང་མོ་ནད་མེད་ན་སོ་གཞོན། །བུ་མོ་ཡི་ནི་འདོད་ཀུན་སྦྱིན། །བྲམ་ཟེ་མོ་ནི་དོན་ཡོད་
གྲུབ། །གསང་བའི་དཀྱིལ་འཁོར་ལ་འདོད་བྱས། །ལྕེ་ནི་དྲིལ་བར་བྱས་ནས་སུ། །ཁ་ཡིས་པདྨར་བླང་བར་བྱ། །རྡོ་རྗེ་བདུད་རྩི་བདེ་བ་ཆེ། །དེ་ནས་མྱུར་བར་དངོས་གྲུབ་བོ། །བུང་བ་རྩེ་བའི་ཚུལ་གྱིས་ནི། །བུད་མེད་ཐམས་ཅད་འདོད་
པ་སྤྱོད། །འདུས་དང་གྲུ་མོ་དང་བརྐྱང་བ། །ཡར་བཏེག་ཟེར་ནི་ཤིན་ཏུ་བརྐྱང་། །བྱེད་པའི་བཅིང་བ་སྦྱོར་བ་ཡིས། །ས་གསུམ་དག་ནི་བསྒྲུབ་པར་བྱ། །ཤ་ཆེན་དང་ནི་ཁྲག་ཆེན་གྱིས། །དེ་བཞིན་བཤང་གཅི་ཁུ་བ་དག །
དེ་དག་རྡོ་རྗེ་བདུད་རྩི་ལྔ། །ཉིན་དང་ཉིན་དུ་བསྒྲུབ་པར་བྱ། རྡོ་རྗེ་བདུད་རྩི་བདེ་བ་ཆེ། །གལ་ཏེ་དངོས་གྲུབ་བདག་འདོད་ན། །དེ་ཡིས་དོན་རྣམས་ཐམས་ཅད་ནི། །སྒྲུབ་པ་པོས་ནི་མཆོག་ཏུ་བསྒྲུབ། །དབང་དང་དགུག་དང་འཐབ་པ་
དང་། །གསོད་དང་བསྐྲད་པ་ལ་སོགས་པ། །རྡོ་རྗེ་བདུད་རྩི་བདེ་ཆེན་པོས། །བྱ་བ་ཐམས་ཅད་ཀུན་ཏུ་བྱ། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེས་དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་
ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཀྱི་རྒྱལ་པོ་ལས་གསང་བའི་དཀྱིལ་འཁོར་དང་བྱེད་པའི་མངོན་ཚུལ་བསྟན་པའི་ལེའུ་དང་པོའོ།། །། དེ་ནས་མགུ་བའི་ལྷ་

88-1-20a

མོ་དེ། །པད་མ་རྒྱས་པའི་མཱ་མ་ཀཱི། །བརྟན་པོ་འཁྱུད་པ་བྱས་ནས་སུ། །དབང་པོ་ཐམས་ཅད་ལ་འོ་བཏབ། །མ་མཆུ་སོས་གཟུང་འོ་བཏབ་སྟེ། །སིད་སྒྲ་སྔགས་ནི་བརྗོད་པར་བྱ། །རྡོ་རྗེ་བཅིངས་པས་སྐུ་ཡང་
འཛིན། །རྡོ་རྗེ་ཅན་གྱིས་གསང་བྱས་ཏེ། །པདྨར་རྡོ་རྗེ་བཅུག་ནས་སུ། །ཆགས་ན་དགའ་སྟེ་འདོད་པར་བྱ། །སིད་སྒྲ་སྙན་པོ་སྒྲ་རྣམས་དང་། །ཀཽཀྐི་ལེ་དང་གླིང་བུ་སོགས། །ལྷ་མོ་མཱ་མ་ཀཱི་དང་རྩེ། །རྡོ་རྗེ་བདུད་རྩི་བདེ་ཆེན་
པོས། །ནུ་མ་བཟུང་ལ་གཟིར་བྱས་ཏེ། །སེན་མོ་རེ་མོས་གདབ་པར་བྱ། །དེ་ཡང་གོས་ནི་ཕུད་བྱས་ཏེ། །སྟེང་འོག་ལ་ཡང་བལྟ་བར་བྱ། །རྒྱས་པའི་པདྨར་འོ་བཏབ་ནས། །དགའ་བའི་ཚིག་ཀྱང་བརྗོད་པར་བྱ། །རྒྱས་པའི་པདྨ་མཱ་མ་
ཀཱི། །ལྷ་མོ་ཆེན་མོ་ལེགས་སོ་ལེགས། །གཏན་དུ་འདོད་ལ་ཆགས་པ་ཡིས། །བདག་གིས་ཁྱོད་ལ་དགའ་བར་བྱ། །གང་ཞིག་འདོད་པ་ཁྱོད་ཀྱིས་ཞུས། །ཁྱོད་ལ་བདག་གིས་མཆོག་ཏུ་སྦྱིན། །དེ་ནས་ལྷ་མོ་མཱ་མ་ཀཱི། །ཚིག་
འདི་དག་ནི་ཆེད་དུ་གསོལ། །བཅོམ་ལྡན་ཉིད་ཀྱིས་དེ་བཞིན་ཉིད། །བྱང་ཆུབ་སེམས་ཀྱིས་རྣམ་སྤྲུལ་པ། །ཕྲ་བས་ཤིན་ཏུ་ཕྲ་བ་ཡིས། །ཟད་མེད་ཡེ་ཤེས་ཇི་ལྟར་རོལ། །དེ་འདྲ་ལྷ་ཡིས་སྤྱོད་པ་ནི། །དབང་པོ་གཉིས་
ཀྱི་སྙོམས་འཇུག་པས། །དེ་དག་ཐེ་ཚོམ་འབྱུང་བས་ན། །བདག་ནི་ངོ་མཚར་དམ་པར་འགྱུར། །དེ་ནས་བཅོམ་ལྡན་རྡོ་རྗེ་ཡིས། །རྡོ་རྗེ་བདུད་རྩི་བདེ་ཆེན་བཤད། །ཉོན་ཅིག་དེ་ཉིད་མཱ་མ་ཀཱི། །ཡེ་ཤེས་སྦྱོར་བ་འབིགས་བྱེད་པ། །
ཤིན་ཏུ་ཕྲ་བ་གསང་ཆེན་པོ། །ཡེ་ཤེས་ཤེས་བྱ་ངོ་བོ་ཉིད། །དེ་ནི་བདག་གིས་བཤད་བྱ་སྟེ། །སངས་རྒྱས་བྱང་ཆུབ་རབ་བསྒྲུབ་པ། །མི་འཇིགས་ཟད་མེད་རྟག་པ་ནི། །གདོད་མ་མེད་ཅིང་དབང་པོ་སྤངས། །ཡོད་ཉིད་དང་
ནི་མེད་ཉིད་ཀྱང་། །དབང་པོ་དང་བཅས་དབང་པོ་མེད། །འབྱུང་བ་ཀུན་ཏུ་མ་མཐོང་བ། །སྦྱོར་བ་ལམ་གྱིས་མཐོང་བའོ། །སྦྱོར་བ་རྣམ་པ་གཉིས་གསུངས་ཏེ། །ཕྱི་དང་ནང་དུ་བཅས་པའོ། །ཕྱི་ནི་གཟུགས་ཀྱི་ཕུང་པོ་སོགས། །

88-1-20b

འབྱུང་བ་རྣམ་པ་ཀུན་རྫོབ་སྟེ། །སྣ་ཚོགས་གཡོ་དང་མི་གཡོ་བ། །ཁམས་གསུམ་དང་ནི་མ་ལུས་པར། །དེ་གཅིག་པོས་ནི་ཁྱབ་པ་སྟེ། །ཐམས་ཅད་རྣམ་ཤེས་ཁོ་ནའོ། །ཅི་ཕྱིར་སེམས་ཅན་བདག་མེད་རྣམས། །རྣམ་ཤེས་
ཕུང་པོ་བརྟེན་པ་ཡིན། །བླུན་སེམས་སྙིགས་མའི་མི་རྣམས་ཀྱིས། །འགའ་ཡང་ཤེས་པ་མ་ཡིན་ནོ། །སེམས་ལས་མ་བྱུང་སེམས་ཀྱི་ངོས། །ཡེ་ཤེས་ཤེས་བྱའི་ངོ་བོ་ཉིད། །ཐམས་ཅད་རྣམ་ཤེས་གཅིག་ཉིད་དོ། །
གང་ཚེ་ལུས་ལ་རྐྱེན་ཉིད་འགྱུར། །ཆོས་རྣམས་དང་ནི་ཆོས་གཅིག་འགྱུར། །དངོས་པོ་དག་ནི་དེ་ཚེ་འགྱུར། །ཅི་ཡི་ཕྱིར་ན་ཆོས་རྣམས་ཀྱི། །མང་པོ་ཉིད་དུ་ཆོས་རྣམས་ཀྱང་། །ཆུ་རྒྱུན་བཞིན་དུ་རྒྱ་མཚོ་ལ། །ཐར་པ་
ནི་གཅིག་ཁོ་ན་སྟེ། །མང་པོ་ཉིད་དུ་མི་རྙེད་དེ། །ཇི་ལྟར་ནང་དུ་ཆེར་གནས་པ། །བླ་མའི་ཞལ་ཁོ་ན་ལས་ཐོབ། །བྷ་གའི་པད་མར་ནམ་མཁའ་གང་། །ནམ་མཁའ་ལྔ་ཡིས་བརྒྱན་པ་སྟེ། །སྙིང་དང་སྙིང་པོ་རྣམ་ལྡན་ཞིང་། །
འདབ་མ་བརྒྱད་ཀྱིས་རྣམ་པར་ཀླུབས། །དེ་དབུས་རྡོ་རྗེ་ཅན་བཞུགས་ཏེ། །བྱང་སེམས་བདུད་རྩི་དང་ལྡན་པ། །ཆ་ཤས་ཆོས་མིན་རྣམ་གྲོལ་བ། །ཐིག་ལེ་དེ་ཡིས་རྣམ་པར་སྤངས། །དེར་གནས་རྟག་ཏུ་ཟག་པ་ནི། །
བདུད་རྩི་བྱང་ཆུབ་སེམས་ཀྱི་གཟུགས། །ཁམས་རྣམས་ཀུན་གྱི་གཞི་ཡིན་པ། །སྟེང་འོག་ཏུ་ཡང་རྣམ་པར་ཁྱབ། །དེས་ནི་མཐོང་བ་ཐོས་པ་ཡང་། །མནམས་པ་དང་ནི་མྱང་བ་ཡང་། །རེག་དང་བདེ་བའི་ལོངས་སྤྱོད་ནི། །
ཟས་དང་མེ་ཏོག་ཕྲེང་བ་དང་། །རྒྱན་དང་གོས་ཀྱིས་བརྒྱན་པ་སྟེ། །ངག་གིས་སྣ་ཚོགས་གྲགས་པ་ཡང་། །བླང་བ་དང་ནི་གཟུང་བ་རྣམས། །རོལ་དང་ཀུན་ཏུ་འགྲོ་བ་དང་། །འདུག་དང་དེ་བཞིན་ཉལ་བ་དང་། །སད་པ་
དང་ནི་ལོག་པ་དང་། །ཐམས་ཅད་རྨི་ལམ་མཐོང་བ་སྟེ། །བཞད་དང་དེ་བཞིན་ཆོ་ངེ་དང་། །ཤིན་ཏུ་ཡིད་འཕྲོག་གར་དང་ནི། །རྔ་རྣམས་དག་ཀྱང་བརྡུང་བ་སྟེ། །སྣ་ཚོགས་པ་དག་འདིར་བརྗོད་པས། །སྨྱོན་པ་དང་ནི་

88-1-21a

མྱོས་པའི་གཟུགས། །གཏི་མུག་འདོད་ཆགས་དེ་དེ་ཉིད། །གཟུགས་མེད་མང་པོའི་གཟུགས་ཅན་དེ། །ཕོ་དང་མོ་དང་མ་ནིང་རྣམས། །དུ་མའི་གཟུགས་ཅན་ཀུན་གྱི་བདག །སྣ་ཚོགས་གཟུགས་ནི་ནོར་
བུ་བཞིན། །ཁྱབ་པའི་དངོས་ཀྱིས་ཁྱབ་ནས་སུ། །དེ་ཉིད་དམ་པ་ཆེར་གནས་སོ། །དེ་བཞིན་ཉིད་དེ་མཱ་མ་ཀཱི། །བཟླས་མེད་འཛིན་པ་ཡང་མེད་དེ། །བགྲང་ཕྲེང་བྱ་བ་འགའ་ཡང་མེད། །ཟས་སྤངས་པ་ཡང་མི་བྱའོ། །བྷ་གའི་
པད་མ་མཆོད་བྱས་ཏེ། །མཁས་པས་བདུད་རྩི་བཟའ་བར་བྱ། །རྡོ་རྗེ་བདུད་རྩི་བདེ་བ་ཆེ། །དེ་ཡིས་དེ་ཉིད་འགྲུབ་པའོ། །གང་དེ་བདུད་རྩི་འབབ་པའི་རྩ། །བྷ་གའི་དབུས་སུ་པད་མ་སྟེ། །རྩ་གཞན་སུམ་བཅུ་རྩ་གཉིས་ལ། །
དེ་ཡི་དབུས་སུ་དེ་གཙོ་སྟེ། །དེ་དག་ལས་གཞན་ཤིན་ཏུ་མཆོག །རྩ་དག་དགུ་ནི་རྣམ་པར་གནས། །སྒོ་དགུ་ལ་གནས་རིག་པ་དག །སྒྲུབ་པ་པོས་ནི་མཆོད་པར་བྱ། །འདོད་པའི་ཡོན་ཏན་ལྔ་ལྷ་མོ། །རྟག་ཏུ་རྡོ་རྗེ་ཅན་
མཉམ་བལྟ། །དེ་བས་དེ་དག་རབ་བྱེད་ན། །ཆགས་བྲལ་ཞེས་གསུངས་ཀུན་རིག་པས། །དེ་དག་གསང་ཆེན་མཆོག་རབ་ནི། །ཞལ་བཟང་མ་ཀྱེ་སྦྱོར་བར་བཤད། །སྣ་ཚོགས་རྣམ་སྣང་མཛད་སོགས་པ། །དེ་བཞིན་
གཤེགས་པས་མི་ཤེས་ཏེ། །གཏན་དུ་དགའ་བའི་ཡིད་བདེ་བ། །སྦྱོར་བས་དམ་པ་རབ་བསྟན་ཏོ། །གསང་བའི་པད་མ་མཐོང་ནས་དང་། །ཤིན་ཏུ་རྒྱས་པའི་མཱ་མ་ཀཱི། །རྡོ་རྗེའི་བདུད་རྩི་བདེ་བ་ཆེ། །དེ་ཉིད་བདག་གིས་བཤད་
པར་བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་ལས་དེ་བཞིན་ཉིད་སྦྱོར་བ་ཡེ་ཤེས་བསྟན་པ་ཞེས་བྱ་བ་ལེའུ་གཉིས་པའོ།། །།  
དེ་ནས་མགུ་བའི་ལྷ་མོ་དེས། །ཧ་ར་ནུ་པུར་གྱིས་བརྒྱན་ཏེ། །འདི་དག་དབྱངས་ནི་བླངས་ནས་སུ། །སེམས་དཔའ་ཆེན་པོ་དགྱེས་པར་བྱེད། །ཕྱུང་མཛད་བདེ་ཆེན་རྡོ་རྗེ་ལས། །བདག་གིས་མཆོག་གི་ཡིག་འབྲུ་འཚལ་བར་

88-1-21b

བགྱི། །བྷ་གའི་པད་མར་བདེ་བ་ཆེན་པོ་སྟེ། །རྡོ་རྗེའི་དོན་ཏེ་བདེ་བ་ཆེན་པོ་ལགས། །ས་འཛིན་པ་དང་སྐད་ཕྲན་དང་། །དྲུག་ལྡན་ལ་སོགས་མཐའ་འཁོབ་ཚུལ། །སྣ་ཚོགས་ཐུན་མོང་རྣམ་དག་གི། སྙན་པའི་སྒྲ་ཡིས་བླང་བར་
བྱ། །དེ་རྣམས་དབྱངས་དག་བླངས་ནས་སུ། །དགའ་བ་ཡིད་བདེ་རྣམ་སྤྲུལ་གྱིས། །རྡོ་རྗེ་བདུད་རྩི་བདེ་བ་ཆེ། །སངས་རྒྱས་བྱང་ཆུབ་བསྒྲུབ་པར་བྱ། །གསང་བའི་དཀྱིལ་འཁོར་བཀའ་སྩལ་པས། །དེ་བཞིན་ཉིད་ཀྱིས་ཐེ་
ཚོམ་བཅད། །རྡོ་རྗེ་ཅན་ཁྱོད་བཀའ་དྲིན་གྱིས། །རྟག་པར་ཡེ་ཤེས་བྱ་བ་བགྱི། །བཅོམ་ལྡན་ཆགས་པ་དང་བྲལ་བའི། །རྡོ་རྗེ་བདུད་རྩི་འབྱུང་བ་འདི། །རྡོ་རྗེ་ཐེག་པ་འབྱུང་བ་ཡི། །སྦྱོར་བ་བདག་གིས་བསྟན་པར་བགྱི། །
ད་དུང་བདག་ལ་ཐེ་ཚོམ་མཆིས། །ཕྱག་རྒྱ་གཉིས་ཀྱི་རྣམ་སྤྲུལ་པ། །ཇི་ལྟར་ཕྱག་རྒྱ་ཡང་དག་འབྱུང་། །དེ་དག་གི་སྔགས་ཇི་ལྟར་ལགས། །སྔགས་རྣམས་གང་ལས་སྐྱེ་བ་ལགས། །ཁྱད་པར་དུ་ནི་ལྷ་རྣམས་ཀྱང་། །ལྷ་
ནི་དེ་བདག་ཐེ་ཚོམ་ན། །མདོར་བསྡུས་ནས་ནི་བདག་ལ་གསུངས། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེ་ཅན་འདི་གསུངས། །ཕྱག་རྒྱ་སྔགས་དག་འབྱུང་བ་ནི། །བཤད་དེ་ཉོན་ཅིག་མཱ་མ་ཀཱི། །ཕྱག་རྒྱ་རྣམ་པ་
གསུམ་གསུངས་ཏེ། །སྐུ་དང་གསུང་དང་ཐུགས་ལས་འབྱུང་། །སྐུ་ནི་ཕྱག་རྒྱ་མཆོག་འགྱུར་ཏེ། །གསུང་ནི་ཕྱག་རྒྱ་སྔགས་ཀྱི་ལས། །ཐུགས་ཀྱི་མཚན་མའི་ཕྱག་རྒྱ་ནི། །བསམ་གཏན་རི་མོ་གཉིས་མེད་གནས། །རྡོ་རྗེ་
བདུད་རྩི་རྒྱུད་ཆེན་ལས། །སྦྱོར་བའི་ཕྱག་རྒྱ་ཤེས་བྱ་སྟེ། །མཚན་མའི་ཕྱག་རྒྱ་མི་བྲིའོ། །ཕྱག་རྒྱ་མངོན་སུམ་གཟུགས་ཡིན་ཏེ། །ལྷ་ནི་ལྷ་མོ་བུད་མེད་དོ། །དབང་པོ་ཐམས་ཅད་བདེ་བ་རུ། །བྷ་གའི་པད་མར་མཆོད་པར་བྱ། །
རྡོ་རྗེའི་པད་མ་མཉམ་སྦྱོར་ཞིང་། །ལས་ཐམས་ཅད་ནི་འགྲུབ་པར་བྱ། །ཇི་ལྟར་དཔག་བསམ་ཤིང་ཆེན་གྱིས། །ཡལ་ག་བརྒྱ་ཕྲག་སྟོང་ཅན་དང་། །རྩ་དང་དེ་ལ་གཟུང་བ་ནི། །སྐྱེ་བའི་རྐྱེན་དུ་འགྱུར་བ་བཞིན། །དེ་ལྟར་བདུད་

88-1-22a

རྩི་འབབ་པའི་རྩ། །སྔགས་དང་ཕྱག་རྒྱའི་ཡུམ་ཡིན་ཏེ། །སྔགས་འདི་རྣམས་ཀྱི་སྐྱེ་བ་ནི། །བྷ་གའི་དབུས་སུ་གནས་པའོ། །དེ་ནས་བཅོམ་ལྡན་རྡོ་རྗེ་ཅན། །རྡོ་རྗེ་བདུད་རྩི་བདེ་ཆེན་པོས། །རྡོ་རྗེ་བཅུག་ནས་མཱ་
མ་ཀཱི། །ཉོན་ཅིག་སྔགས་རྣམས་མཚན་ཉིད་ནི། །དང་པོ་རྣམ་སྣང་མཛད་སྦྱོར་ཏེ། །བཛྲ་ཨ་མྲྀ་ཏ་མ་ཧཱ་སུ་ཁ། །ས་བོན་བཞི་དང་མཉམ་ལྡན་ལ། །སྭཱ་ཧཱ་ཡི་གེ་ཡང་སྦྱོར་རོ། །རྣམ་པར་སྣང་མཛད་ཡང་འབུལ་ཏེ། །ཡི་གེ་གཉིས་
དང་བཞི་པ་སྟེ། །བཞི་པ་ཡིས་ནི་མཉམ་ལྡན་པ། །མཱ་མ་ཀཱིའོ་སྙིང་པོའི་མཆོག །བརྒྱད་དག་ཁོ་ནའོ་དབུས་མ་གང་། །བརྒྱད་ལ་རྒྱན་གྱིས་རྣམ་པར་བརྒྱན། །འདབ་བརྒྱད་ལ་ནི་སྦྱར་བྱས་ཏེ། །ལྷ་མོ་སྔགས་ཀྱིས་སྔགས་ཕྱུང་ངོ་། །སྒོ་
སྲུངས་དག་གི་སྔགས་རྣམས་ནི། །ཉོན་ཅིག་སྐལ་བཟང་མཱ་མ་ཀཱི། །དེ་ཡི་ཐ་མ་སྔགས་ཕྱུང་སྟེ། །ས་བོན་བརྒྱད་ནི་སྔགས་རིག་པས། །སྟོང་པའི་ལྷ་ཡིས་གནོན་བྱས་ཏེ། །རྣམ་པར་སྣང་མཛད་དང་ལྡན་ལ། །སྭཱ་ཧཱ་ཡི་གེ་མཉམ་
པར་ལྡན། །དངོས་གྲུབ་ཐམས་ཅད་རབ་སྦྱིན་རྣམས། །བཞི་ནི་སྒོ་སྲུངས་ཀྱི་ཡིན་ཏེ། །བཞི་ནི་སྤོས་དང་དྷུ་པེ་སོགས། །མ་ནིང་ཡི་གེས་ག་བཞི་ལ། །སྭཱ་ཧཱ་རྣམ་པར་སྣང་མཛད་ཡང་། །ལྷ་མོ་གསང་བའི་མཱ་མ་ཀཱི། །རྔ་སོགས་
ཀུན་གྱིས་མཆོད་པར་བྱ། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེས་དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་
ལས་སྔགས་ཕྱུང་བར་བསྟན་པ་ཞེས་བྱ་བའི་ལེའུ་གསུམ་པའོ།། །། དེ་ནས་སྦྱིན་བསྲེག་ལས་དག་གི། ཆོ་གའི་རིམ་པ་བཤད་པར་བྱ། །སྦྱོར་བའི་རྒྱུད་ཀྱི་ཆོ་ག་ཡིས། །སྐུ་གསུང་ཐུགས་ནི་
སྒྲུབ་པ་ཡིན། །ཞི་བ་དང་ནི་རྒྱས་པའི་ལས། །དེ་བཞིན་དབང་དང་མངོན་སྤྱོད་དང་། །འཐབ་དང་བསྐྲད་ཀྱང་དེ་བཞིན་དུ། །སྔགས་དང་ཕྱག་རྒྱའི་བསྒྲུབ་པ་རྣམས། །དེ་ཀུན་བདག་གིས་བཤད་པར་བྱ། །རྡོ་རྗེ་བདུད་རྩི་

88-1-22b

འབྱུང་བའོ། །རྡོ་རྗེ་སེམས་དཔའ་འགྱིང་བྱེད་པ། །དཀུར་བརྟེན་བཅས་པས་གཉིས་གནས་པ། །རྒྱན་ཐམས་ཅད་ཀྱིས་བརྒྱན་བྱས་ཏེ། །སློ་དཔོན་དཀྱིལ་འཁོར་འཇུག་པར་བྱ། །ཁམས་གསུམ་རྣམ་པར་རྒྱལ་གྱུར་ནས། །
རྐང་གཉིས་གཡས་བརྐྱང་བྱ་བ་དང་། །གཡོན་བརྐྱང་བྱ་བ་ཡང་བྱས་ཏེ། །རྐང་མཉམ་དང་ནི་ས་ག་ཡིས། །ས་ནི་སྦྱོང་བར་བྱེད་མ་ཐག །ས་ལ་རེག་ན་འཇམ་སྐྱེའོ། །དེ་ནས་བགེགས་རྣམས་བསྐྲད་ནས་སུ། །གཞན་ཡང་
སྲུལ་པོ་ལ་སོགས་པ། །གོང་དུ་བླ་མ་ཕྱག་འཚལ་ལོ། །ཕྱི་ནས་ས་ཡི་ལྷ་མོ་དགུག །ཨོཾ་ཨེ་ཧྱེ་ཧི་ལྷ་མོ་ཆེ། །ས་ཡི་བརྟན་མ་འཇིག་རྟེན་ཡུམ། །རིན་ཆེན་ཐམས་ཅད་རབ་རྫོགས་པའོ། །ལྷ་ཡི་རྒྱན་གྱིས་རྒྱན་བྱེད་མ། །
ཧ་ར་ནུ་ཕུར་སྒྲ་འབྱིན་མ། །རྡོ་རྗེ་སེམས་དཔའ་རབ་ཏུ་མཆོད། །ཡོན་འདི་དག་ནི་བཞེས་ནས་སུ། །སྦྱིན་སྲེག་ལས་ནི་འགྲུབ་པར་མཛོད། །ཧི་ཧི་ཧི་ཧཱ་སྭཱ་ཧཱ། བཤང་གཅི་ཁྲག་དང་ཁུ་བ་ཡིས། །དཀྱིལ་འཁོར་ས་ལ་
གཏོར་བར་བྱ། །བྱིན་བརླབས་བྱ་བའི་ཕྱིར་སྤོས་ནི། །ཤ་ཆེན་གྱི་ནི་དབུལ་བར་བྱ། །དེ་ནས་རིག་མ་འཇུག་བྱས་ཏེ། །གདོལ་པ་མ་དང་སྨེ་ཤ་མ། །གར་མཁན་མ་དང་བྲམ་ཟེ་མོ། །དེ་ཁོ་ན་བཞིན་རྒྱལ་མོ་དང་། །
དམངས་རིགས་མོ་དང་རྒྱལ་རིགས་མོ། །དྲི་དང་སྤོས་ཀྱིས་མཆོད་བྱས་ཏེ། །ལྷ་ཡི་རྒྱན་གྱིས་བརྒྱན་པར་བྱ། །ཡན་ལག་ལྔ་ལ་ཡི་གེ་ཧྲི། །བྷ་གའི་དབུས་སུ་ཡི་གེ་བྲུྃ། །སྤྱན་མ་སྒྲོལ་མ་གོས་དཀར་མ། །ཡིད་དགའ་མ་བདག་
བསྒོམ་པར་བྱ། །བྷ་གའི་དབུས་སུ་སློབ་དཔོན་གྱིས། །མེ་ཏོག་གཏོར་བ་ཁོ་ནར་བྱ། །དེ་ནས་སྔགས་པས་ཧོྃ་ཁུང་ནི། །ཚད་མར་ཀུན་ཏུ་བྲི་བྱ་སྟེ། །ཞི་ལ་ཟླུམ་པོར་བྱ་བ་སྟེ། །ཁྲུ་གང་ཙམ་དུ་
ཐིག་གདབ་པོ། །ཁྲུ་ཕྱེད་ས་ལ་བརྐོས་ནས་སུ། །དཀར་རྩི་ཚོན་གྱིས་བྱུག་པར་བྲི། །ཀུན་ཏུ་འཁོར་ལོ་ཚུལ་ལྟར་ཡང་། །གློ་རུ་མཉམ་པོར་བྲི་བའོ། །རྒྱས་པ་ལ་ནི་ཁྲུ་དོ་སྟེ། །དེ་ལ་ཁྲུ་གང་བརྐོ་བར་བྱ། །གྲུ་བཞི་པ་ནི་མཐའ་

88-1-23a

མཉམ་དུ། །མུགས་དང་བཙག་གིས་བྲི་བའོ། །མངོན་སྤྱོད་ལ་ནི་ཟུར་གསུམ་སྟེ། །སོར་ཉི་ཤུ་ནི་ཡངས་པའི་ཚད། །ཉི་ཤུ་ཕྱེད་ནི་བརྐོ་བྱས་ན། །དབུས་སུ་རྡོ་རྗེ་རྒྱ་གྲམ་ཡང་། །འབར་བ་ཕྲེང་གིས་འཁྲུགས་
པ་བྲི། །དེ་བཞིན་དབང་དང་དགུག་པ་ལ། །ཟླ་གམ་ཡང་དག་བྲི་བའོ། །ཧོམ་ཁུང་ཡང་དག་སྟོན་ནས་སུ། །ཕྱོགས་ཀྱི་ཆ་ཡང་བསྟན་པར་བྱ། །བྱང་དུ་མངོན་དུ་ཁ་བསྒྱུར་ཏེ། །སྔགས་པས་ཞི་བ་བརྩམ་པར་བྱ། །རྒྱས་པ་
ལ་ནི་ཤར་དུ་ཡང་། །མངོན་སྤྱོད་ལ་ནི་ལྷོ་ན་སྟེ། །དབང་ནི་ནུབ་ཏུ་ཁོ་ན་བཤད། །དགུག་དང་བསྐྲད་ཀྱང་དེ་བཞིན་ནོ། །མངོན་སྤྱོད་རྟག་པར་ནག་པོ་སྟེ། །ཚོན་ལྔ་ཡིས་ནི་དབང་སོགས་བྱ། །འབྲས་དང་ཏིལ་དང་འོ་མ་དང་། །
མར་དང་སྦྲང་རྩི་ལྷན་ཅིག་པར། །བདུད་རྩི་ལྔ་དང་ལྡན་པ་ཡིས། །ཞི་བ་རྒྱས་པ་སྦྱིན་སྲེག་བྱ། །བསྲེག་ཤིང་རྣམས་ཀྱང་ཐམས་ཅད་ལ། །དྲི་ཞིམ་འོ་མ་ཅན་ཤིང་ངོ་། །སྣ་ཚོགས་ཟས་སམ་གཏོར་མ་ཡང་། །འབྱུང་པོ་ཐམས་
ཅད་སྦྱིན་པར་བྱ། །གཏོར་མ་གང་ཡང་སྒྲུབ་པ་པོས། །ཁྲག་འཐུང་ཕྱག་རྒྱ་ཆེན་པོས་སྦྱིན། །གང་ཞིག་ཡིད་ཀྱི་འདོད་པ་ནི། །རྟག་ཏུ་རྣལ་འབྱོར་པ་ཡིས་འགྲུབ། །དབྱར་གྱི་དུས་ནི་ཞི་བ་སྟེ། །རྒྱས་པ་དེ་བཞིན་དགུན་གྱི་དུས། །
དཔྱིད་ཀ་མངོན་སྤྱོད་ལས་རྣམས་ནི། །སྒྲུབ་པ་པོས་ནི་ཐམས་ཅད་བྱ། །ཤར་དུས་ཞི་བ་རབ་ཏུ་གསུངས། །རྒྱས་པ་དེ་བཞིན་སྲོད་ལ་སྟེ། །ཉིན་ཕྱེད་ལ་འམ་ནམ་ཕྱེད་ལ། །རྟག་པར་མངོན་སྤྱོད་བྱ་བའོ། །ཧོམ་ཁུང་དབུས་སུ་
ཡི་དམ་ལྷ། །ཡི་གེ་ཧཱུྃ་གིས་བསྐྱེད་ནས་སུ། །ཞལ་ནི་གདངས་པ་བསམ་བྱས་ཏེ། །སྦྱིན་སྲེག་དེ་ལ་དབུལ་བར་བྱ། །སྦྱིན་སྲེག་འབུམ་ཕྲག་ཕུལ་གྱུར་ན། །མདུན་དུ་མངོན་སུམ་ཁོ་ནར་འགྱུར། །དང་པོ་མེ་ནི་དགུག་བྱ་བ། །ལྷ་
ཐམས་ཅད་ཀྱི་མཆོད་པའི་གནས། །འོད་ཟེར་ཕྲེང་འཁྲུགས་དྲག་པོའི་ལྷ། །སངས་རྒྱས་བྱང་ཆུབ་འགྲུབ་པའོ། །ཨོཾ་ཨེ་ཧྱེ་ཧི། འདིར་གཤེགས་གདོན་མི་ཟ་བར་ཁྱོད། །མེ་ལྷ་མངོན་སུམ་དངོས་གྲུབ་སྦྱིན། །དྲག་པོ་ཁམས་

88-1-23b

གསུམ་གྱིས་མཆོད་པ། །ཁྱབ་འཇུག་ཚངས་པས་ཕྱག་འཚལ་བ། །འདི་དག་ཡོན་ཡང་བཞེས་ནས་སུ། །ཞབས་གཡོན་བརྫེས་ཀྱང་རྡོ་རྗེ་ཅན། །ཨོཾ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དང་པོ་ལ་ནི་ཡོན་དབུལ་ཏེ། །ཕྱི་ནས་ལྷ་བཤོས་
མེ་ཏོག་དབུལ། །ཨོཾ་ལྷ་ཡི་མེ་ཏོག་ཤིན་ཏུ་དམར། །དྲི་ཞིམ་ཤིན་ཏུ་མཛེས་པ་ནི། །མེ་ཏོག་དེ་རིང་བཞེས་ནས་སུ། །འདི་ལ་བྱིན་གྱིས་བརླབ་པར་གསོལ། །ཧཱུྃ་མེ་ཏོག་གི་སྔགས་སོ། །ཨོཾ་མར་མེ་འོད་ཟེར་འབར་བ་ནི། །ངན་འགྲོ་
འཇིགས་པ་འཇོམས་བྱེད་པ། །ལྷ་ཡི་མིག་བྱེད་བཀྲ་ཤིས་པས། །མར་མེ་ཁྱོད་ཀྱིས་བཞེས་སུ་གསོལ། །ཧཱུྃ་མར་མེའི་སྔགས་སོ། །ཨོཾ་ཙན་དན་ག་བུར་དང་བཅས་པའི། །དྲི་ཞིམ་སྤོས་མེ་དགེ་བ་ནི། །མཐུ་དང་བཅས་པར་བྱ་བ་
འདི། །བཞེས་ནས་བྱིན་གྱིས་བརླབ་ཏུ་གསོལ། །ཧཱུྃ་སྤོས་ཀྱི་སྔགས་སོ། །ཨོཾ་སྣ་ཚོགས་ལྷ་ཡི་དྲི་ཞིམ་པ། །སྣ་ཚོགས་ག་བུར་རྣམ་བརྒྱན་པས། །སྣ་ཚོགས་ཡི་གེ་ཧཱུྃ་ལས་བྱུང་། །དྲི་འདི་འབུལ་ཏེ་བཞེས་སུ་གསོལ། །ཧཱུྃ་དྲིའི་
སྔགས་སོ། །དང་པོར་མཆོད་པའི་ཆོ་ག་ནི། །ཐེ་ཚོམ་མེད་པར་མེ་ལ་བྱ། །ཕྱི་ནས་རང་གི་ཡི་དམ་ལྷའི། །བཟླ་སྔགས་རིག་པར་བརྗོད་པར་བྱ། །དབྱངས་དང་གར་དང་ཟས་རྣམས་ཀྱི། །རྣམ་པ་དུ་མར་རོལ་བྱས་ཏེ། །རིག་མ་དང་ནི་སྒྲུབ་
པ་པོས། །ཚོགས་ལ་མཆོད་པས་མཉེས་པར་བྱ། །གལ་ཏེ་དངོས་གྲུབ་དག་འདོད་ན། །སྐུ་གསུང་ཐུགས་ནི་འགྲུབ་པའོ། །བླ་མ་མེ་ལྷ་རྡོ་རྗེ་འཛིན། །མཆོད་པར་བྱས་ནས་རྫོགས་པར་བྱ། །ཨོཾ་མེ་ལྷ་ལས་ནི་གྲུབ་པར་མཛད། །སེམས་
ཅན་ཐམས་ཅད་བདེ་བ་འདྲེན། །སྐུ་གསུང་ཐུགས་དངོས་གྲུབ་དོན་དུ། །ལྷ་རྣམས་ལས་ནི་རྗེས་སུ་སྐྱོབས། །མེ་ལྷ་ཞི་བར་གཤེགས་ནས་སུ། །ས་གཞི་ཞི་བར་མཛད་མཛོད་ཅིག །རྒྱུ་དང་མི་རྒྱུ་བཅས་པ་ཡིས། །སྒྲུབ་པ་པོ་དང་ཐམས་
ཅད་དང་། །བདག་གི་བསོད་ནམས་འབྲས་འགྱུར་དང་། །སྔགས་ཀྱི་དངོས་གྲུབ་རབ་སྦྱིན་ཅིག །ཨ་ཨཱ་ཨི་ཨཱི་ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཧཱུྃ་སྭཱ་ཧཱ། རྡོ་རྗེ་བདུད་རྩི་བདེ་བ་ཆེ། །བཅོམ་ལྡན་རྡོ་རྗེས་

88-1-24a

དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་ལས་སྦྱིན་སྲེག་གི་ཆོ་ག་བསྟན་པ་ཞེས་བྱ་བའི་ལེའུ་བཞི་པའོ།། །། 
ཁྱོད་ལ་མིག་སྨན་བཤད་པར་བྱ། །ཚིལ་ཆེན་གྱི་ནི་སྙིང་པོ་ཡི། །བན་ད་ལ་ནི་དུད་པ་བླང་། །འུག་པའི་མགོ་བོ་བསྲེགས་ནས་སུ། །ཁྲག་ཆེན་དང་ནི་བསྲེས་པར་བྱ། །མཚན་མོ་ལ་ནི་བཏགས་ནས་
སུ། །ཞིབ་མོར་ཕྱེ་མར་ཁོ་ནར་བྱ། །བྱ་རྒོད་རྗེ་ངར་བཀང་ནས་སུ། །མི་ཡི་རུས་པའི་ཐུར་མང་གིས། །མིག་ལ་བསྐུས་ནས་གཟུགས་ཀུན་ནི། །རྟག་ཏུ་རྣལ་འབྱོར་པ་ཡིས་བྱེད། །རྡོ་རྗེ་བདུད་རྩི་ལས་བྱུང་བའི། །མིག་སྨན་དངོས་
གྲུབ་སྦྱོར་བ་ནི། །ནག་པོའི་ཚེས་བརྒྱད་བཅུ་བཞི་ལ། །བྷ་གའི་དབུས་སུ་བསྒྲུབ་པར་བྱ། །ཞི་བ་དང་ནི་རྒྱས་པ་དང་། །དེ་བཞིན་དབང་འགུགས་ལས་བྱེད་དོ། །སྣ་ཚོགས་དྲག་པོའི་གདོན་རྣམས་དང་། །ཞག་བཞི་པ་ཡི་རིམས་
དང་དུག །ཐམས་ཅད་མེད་པར་བྱེད་ལྷ་མོ། །དགའ་མ་ཁྱོད་ལ་བདེན་པར་བཤད། །རྒྱལ་པོའི་ཁབ་ན་ཆེན་པོར་མཆོད། །དགྲ་བོ་རྣམས་ཀྱང་ཟད་བྱེད་དེ། །དེ་བཞིན་བགེགས་ཀྱང་འགག་པར་བྱེད། །མིག་སྨན་ལྡན་པར་བཟླ་བར་བྱ། །
ཨོཾ་འདོད་པའི་གཟུགས་ཅན་མིག་ཡངས་མ། །བཤང་གཅི་ཁྲག་ལ་དགའ་བྱེད་མ། །ཞལ་གསུམ་ཕྱག་དྲུག་པའི་ལྷ་མོ། །དྲག་པོའི་གཟུགས་ཅན་མཱ་མ་ཀཱི། །ཧྲཱཾི་ཧྲཱཾི་ཧཱུཾ་ཧཱུྃ་ཨ་ཨཾཿ། ཨ་ཧཱ་ཧཱཾ་སྭཱ་ཧཱ། དང་པོའི་ཞལ་ནི་
ནག་པོ་སྟེ། །དེ་ཁོ་ན་བཞིན་གཡས་ནི་དཀར། །གཡོན་ནི་དམར་པོར་དེ་རིག་ནས། །གཡས་ཕྱོགས་རལ་གྲི་འཁོར་ལོ་ཅན། །གཡོན་དུ་ཞགས་པ་དང་ལྕགས་ཀྱུ། །དེ་བཞིན་རྡོ་རྗེ་དྲིལ་བུ་ཡང་། །བྷ་གའི་དབུས་སུ་བསྒོམ་
བྱས་ཏེ། །དེ་ལ་མིག་སྨན་བསྒྲུབ་པར་བྱ། །བྷ་ག་གུར་གུམ་གྱིས་བཀང་ནས། །ཕྱི་ནས་ལིང་ག་གཞུག་པར་བྱ། །དེ་ལ་བརྗོད་པར་བྱ་སྔགས་ནི། །ཨོཾ་ཡིག་སྒྲ་ཡིག་ཕྱེ་བ་དང་། །བཛྲ་ཨ་མྲྀ་ཏ་ཞེས་བཀོད། །སྒྲ་སྒྲོགས་སྤྲིན་དང་

88-1-24b

ཕཊ་ཡིག་གོ། བདུད་རྩི་དང་ནི་མཉམ་ལྡན་པས། །བྷ་གའི་དབུས་ནས་དབྱུང་བར་བྱ། །དེ་ལ་སྔགས་འབུམ་བཟླས་ནས་སུ། །དེ་ཡིས་ཐིག་ལེ་ཁོ་ནར་བྱ། །བུད་མེད་ཀྱིས་ཁྱོ་འཁོལ་འགྱུར་ཏེ། །མདུན་ན་འདོན་བཅས་རྒྱལ་པོ་ཡང་། །སྐྱེས་
པ་གང་གིས་དེ་བྱས་ན། །བུད་མེད་གང་ལ་སྐལ་ཅན་འགྱུར། །རྒྱལ་པོའི་ཁབ་ཅན་ཆེན་པོར་ཆོད། །དགྲ་བོ་རྣམས་ནི་ཟད་བྱེད་དོ། །དུར་དུར་ཨར་ཀའི་འབྲས་བླངས་ཏེ། །བདུད་རྩི་དང་ནི་བསྲེས་བྱས་ན། །ཞལ་གསུམ་དྲག་པོའི་གཟུགས་
དང་ནི། །གཤིན་རྗེའི་གཤེད་ཁྲོ་བཟླས་ནས་སུ། །ཤ་ཆེན་དང་ནི་ལྡན་བྱས་ཏེ། །ཆང་དང་བསྲེས་ལ་སྦྱིན་པར་བྱ། །རྟག་ཏུ་མྱོས་ནས་འཁོར་ནས་སུ། །མི་ནི་བསྐམས་ནས་ཤི་འགྱུར་རོ། །ཨོཾ་ཧྲཱིཿཥྚྲཱིཿ་ཝི་ཀྲྀ་ཏཱ་ན་ན་སརྦ་ཤ་ཏྲཱུཾ་བི་ནཱ་ཤ་
ཡ། སྟམ་བྷ་ཡ། མཱ་ར་ཡ་ཧཱུྃ་ཧཱུྃ་ཕཊ། སྔགས་པས་འགིའུ་ཝང་བླངས་ནས། །བྷ་ག་ལ་ནི་ཡིག་འབྲུ་བྲི། །ཙན་དན་གྱིས་ནི་མཉམ་བྱུགས་ནས། །ཁྱོད་དང་ལྷན་ཅིག་གནས་པར་བྱ། །གནས་མ་དག་ནི་བདེ་ཆེན་ཏེ། །
འཁོར་གཡོག་དངོས་པོར་འགྱུར་བར་རོ། །བཤང་གཅི་གཟུགས་བརྙན་བྱས་ནས་སུ། །ཤ་ཆེན་གྱི་ནི་སྤོས་དབུལ་ཏེ། །དགྲ་ཡི་སྐྲ་ཡིས་དཀྲིས་བྱས་ནས། །རུས་པའི་ཕྱེ་མས་བྱུག་པར་བྱ། །དགྲ་སྒོར་བརྐོས་ནས་སྦས་བྱས་
བྱས་ན། །ཞག་བདུན་གྱིས་ནི་ཤི་འགྱུར་རོ། །བཤང་གཅི་ཁྲག་དང་བསྲེས་པ་ཡི། །ཤ་ཆེན་གྱིས་ནི་སྦྱིན་བསྲེག་བྱ། །དུར་ཁྲོད་ཀྱི་ནི་བསྲེག་ཤིང་ཡང་། །ཤིང་གཅིག་པ་དང་ལམ་མདོ་ན། །མེ་ཡི་ཧོམ་གུང་བྲིས་ནས་སུ། །ཉིན་
ཕྱེད་ནམ་ཕྱེད་སྦྱིན་སྲེག་བྱ། །ཁྲོ་ཆེན་གཤིན་རྗེའི་གཤེད་པོ་ཡི། །སྐུ་ལ་ཐལ་བས་བསྐུས་པས་ནི། །བསྒོམས་ནས་དགྲ་ལ་ཆེར་གནོན་ན། །གདོན་མི་ཟ་བར་ཤི་འགྱུར་རོ། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེས་
དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་ལས་ལས་ཆེན་པོ་བསྟན་པ་ཞེས་བྱ་བ་ལེའུ་ལྔ་པའོ།། །།

88-1-25a

རྡོ་རྗེ་བདུད་རྩི་རྒྱུད་ཆེན་ལས། །དཔལ་ལྡན་རྡོ་རྗེ་ཧཱུྃ་མཛད་ཀྱི། །སྒྲུབ་པ་མདོར་བསྡུས་བཤད་པར་བྱ། །དཀྱིལ་འཁོར་ཆོ་གའི་རིམ་པ་ཡང་། །དེ་ཡི་དཀྱིལ་འཁོར་ཆོ་ག་ཞེས། །ཁམས་གསུམ་རྣམ་རྒྱལ་ལས་
བྱུང་ཡིན། །གྲྭ་བཞི་པར་ནི་ཐིག་གདབ་སྟེ། །ཁྲུ་གང་ཡང་ན་ཁྲུ་དོའོ། །ཟླ་བའི་དཀྱིལ་འཁོར་དང་འདྲ་བ། །འོད་ཟེར་འབར་བ་འཁྲུགས་པ་ལ། །དཔལ་ལྡན་རྡོ་རྗེ་ཧཱུྂ་མཛད་བཞག །ཞལ་གསུམ་དེ་བཞིན་ཕྱག་དྲུག་
སྟེ། །རྒྱན་ཐམས་ཅད་ཀྱིས་ཡོངས་རྫོགས་པ། །ཕྱག་རྒྱ་ཡིས་ནི་ཕྱག་བརྒྱན་པ། །རིག་མ་བཞི་དང་མཉམ་ལྡན་པ། །ཨུ་མཱའི་སྲ་བའི་ནུ་མར་བཞུགས། །ཅུང་ཟད་མཆེ་བ་གཙིགས་པ་པོ། །ཁྲོ་དང་ལྡན་པར་བཞད་བྱེད་ཞལ། །
གཡས་པ་ལ་ནི་མདའ་བྲིས་ཏེ། །དེ་ཁོ་ན་བཞིན་གཡོན་ན་གཞུ། །ཕྱག་བཞི་པ་ནི་བྲིས་པ་ལ། །ཕྱག་གཉིས་པས་ནི་ནུ་མ་བསྣམས། །རིག་མ་ཐམས་ཅད་ཞལ་གསུམ་སྟེ། །དེ་བཞིན་སྒོ་སྲུངས་ལྕགས་ཀྱུ་དང་། །དེ་བཞིན་མེ་
ཏོག་སྤོས་མེ་མ། །དྲི་ཡང་ཡང་དག་བྲི་བར་བྱ། །སྒེག་མོ་ཕྲེང་བ་དེ་བཞིན་དབྱངས། །གར་མཁན་མ་ཡང་ཕྱག་དྲུག་ཉིད། །དེ་བཞིན་གླིང་བུ་མ་བྲི་སྟེ། །པི་ཝང་མ་དང་རྔ་ཆེན་མ། །རྫ་རྔ་མ་དང་སིལ་སྙན་ཀུན། །དཀྱིལ་འཁོར་
ལ་ནི་བྲི་བའོ། །རྡོ་རྗེ་བདུད་རྩི་རྒྱུད་ཆེན་ལས། །སྐལ་བ་བཟང་པོ་ཡང་བཞག་སྟེ། །ཕྱག་གཉིས་པ་ལ་ཞལ་གཅིག་པ། །བཟང་པོ་དེ་དག་ཁོ་ནའོ། །རྒྱན་ནི་ཐམས་ཅད་ཀྱིས་བརྒྱན་པ། །སྒྲུབ་པ་པོ་ཡང་མདུན་བྲིའོ། །བགྲང་
ཕྲེང་དེ་བཞིན་རྡོ་རྗེ་དང་། །དྲིལ་བུ་འཛིན་པ་བྲི་བར་བྱ། །གཏོར་མའི་གཏོར་མ་མཆོད་རྫས་དང་། །ཆང་སྐྱེམས་རོ་དང་དགའ་སྟོན་མཆོད། །ནག་པོའི་བརྒྱད་དང་བཅུ་བཞི་ལ། །དཀྱིལ་འཁོར་ལ་ནི་རྡུལ་ཚོན་གདབ། །དབུས་
སུ་གྲུ་བཞི་བྲི་བའོ། །གལ་ཏེ་དངོས་གྲུབ་མཆོག་འདོད་ན། །སྔགས་ཡིག་གཅིག་པ་གཙོ་བོ་ནི། །རྡོ་རྗེ་ཧཱུྃ་མཛད་བསྒྲུབ་པར་བྱ། །ཕྱི་ནས་སློབ་དཔོན་ལ་མཆོད་པ། །བདག་གམ་རྒྱལ་སྲིད་དབང་ཉིད་དམ། །བྲན་མོ་བུ་

88-1-25b

མོ་དེ་བཞིན་དུ། །མ་དང་སྲིང་མོ་དབུལ་བར་བྱ། །སྐུ་གསུང་ཐུགས་ཀྱི་བསྒྲུབ་པ་ཡི། །དངོས་གྲུབ་གལ་ཏེ་བདག་འདོད་ན། །ཁམས་གསུམ་རྣམ་རྒྱལ་ལས་བྱུང་ནི། །སྔགས་པས་རྟག་ཏུ་བསྒྲུབ་པར་བྱ། །རྡོ་རྗེ་སེམས་
དཔའི་དཀྱིལ་འཁོར་ནི། །རྡོ་རྗེ་བདུད་རྩི་ལས་བྱུང་ངོ་། །བདུད་རྩི་ལྔ་དང་མཉམ་ལྡན་པ། །ངན་སོང་ཐམས་ཅད་མེད་བྱེད་པ། །རྡོ་རྗེ་སེ་གོལ་མཉམ་སྦྱོར་གྱིས། །དཔལ་ལྡན་རྡོ་རྗེ་ཧཱུྃ་མཛད་འགྲུབ། །རྣལ་འབྱོར་པ་དང་རྣལ་འབྱོར་མའི། །
བྱང་སེམས་རྣམ་པར་སྤྲུལ་པར་གསུངས། །ལན་གྲངས་དུ་མར་རིག་མ་དང་། །དཀྱིལ་འཁོར་དུ་ནི་རོལ་བར་བྱ། །བྷ་གའི་དབུས་ལ་མྱང་བྱས་པ། །གང་དག་དཔའ་བོ་སྔགས་ལ་གནས། །པདྨར་ཁ་ཡིས་འོ་བྱས་ནས། །བདུད་རྩི་ཁུ་
བ་ཁོ་ནར་བླང་། །ལག་པ་ཡི་ནི་སོར་མོ་ལ། །གནས་དེ་ལ་ནི་བླང་མི་བྱ། །བླང་བར་གྱུར་ན་འཇིག་འགྱུར་ནས། །མཐུ་ཡང་འཇིག་ནས་འབྲས་བུ་མེད། །རིག་མ་ཆེན་མོས་ཀྱང་ཕྱུང་ནས། །རྡོ་རྗེ་ལ་ཡང་འོ་གདབ་བོ། །དེ་ནི་
སངས་རྒྱས་ཉིད་དུ་འགྲུབ། །ཁུ་བའི་གཟུགས་ཅན་བདུད་རྩི་ནི། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེས་དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་
ཆེན་པོའི་རྡོ་རྗེ་བདུད་རྩིའི་རྒྱུད་ཆེན་པོ་ལས་རྡོ་རྗེ་ཧཱུྃ་མཛད་ཀྱི་སྒྲུབ་པ་བསྟན་པ་ཞེས་བྱ་བ་ལེའུ་དྲུག་པའོ།། །། དེ་ནས་ལྷ་མོ་མཱ་མ་ཀཱི། །དགའ་བའི་རོལ་བར་ཆེར་བཞུགས་པས། །ཐལ་མོ་སྦྱར་ནས་ཕྱག་བྱས་
ནས། །དབྱངས་འདི་དག་ནི་ཆེད་དུ་བརྗོད། །དཔའ་བོ་ཆུ་སྐྱེས་སྔོན་པོའི་སྐུ། །དཔའ་བོ་གཞན་གྱིས་ཡོངས་བསྐོར་ཞིང་། །ཕྱག་རྒྱ་མོ་ཚོགས་མཉམ་ལྡན་པའི། །རྡོ་རྗེ་བདུད་རྩི་བདག་ཕྱག་འཚལ། །སྟོན་གྱི་ནམ་མཁའ་དང་འདྲ་
བ། །ང་རོ་བུང་བ་སྒྲ་སྒྲོགས་ལྟར། །བསྐལ་པར་བཞུགས་པ་སྐལ་བཟང་བ། །རྡོ་རྗེ་བདུད་རྩི་བདག་ཕྱག་འཚལ། །ཐམས་ཅད་མཁྱེན་པ་ཐམས་ཅད་མཛེས། །ཡང་དག་དབང་པོ་ལམ་གྱིས་ནི། །རྡོ་རྗེ་བདུད་རྩི་བདག་ཕྱག་

88-1-26a

འཚལ། །མ་ལུས་པ་ཡི་ཁམས་གསུམ་ལ། །རྡོ་རྗེ་བདུད་རྩི་དཔེ་མེད་པས། །ཉི་ཤུ་རྩ་བཞི་རིགས་ཆེན་མོ། །ཤིན་དུ་ཆགས་པས་དགའ་བྱེད་པ། །སེན་མོ་རྗེས་དང་བཅས་པའི་སྐུ། །རྡོ་རྗེ་བདུད་རྩི་བདག་ཕྱག་འཚལ། །མ་ལུས་པ་
ཡི་ཁམས་གསུམ་ལ། །ཨུཏྤལ་སྔོན་པོའི་འདབ་མ་ལྟ་བུར་ཕྱག་སྔོ་བ། །སངས་རྒྱས་དེ་བཞིན་གཤེགས་པ་རྡོ་རྗེ་ཁྱོད་ཀྱིས་བདག་ནང་ནི། །ཤིན་ཏུ་དགའ་བའི་རྗེས་སུ་ཆགས་པས་ལོངས་སྤྱོད་ཅིག །ཁམས་གསུམ་ལ་ནི་བསྒྲུབ་
པར་བྱ་བའི་དོན་གྱི་ཕྱིར། །ཁྱོད་ནི་སྐྱོན་མེད་དམ་པའི་སྟོང་པ་ལས། །ཡིག་འབྲུས་རྡོ་རྗེས་གྱུར་པའི་མགོན་པོ་ཁྱོད། །རྒྱུ་དང་མི་རྒྱུ་གང་གིས་ཁྱོད་མཐོང་ནས། །དེ་དག་འཁོར་བ་རུ་ནི་ག་ལ་འགྲོ། །དེ་ལྟར་དབྱངས་ནི་བླངས་ནས་སུ། །
རྡོ་རྗེ་གར་ནི་རྣམ་པར་བྱེད། །རྐེད་པ་དང་ནི་རྐང་པ་དང་། །དཔུང་པ་དང་ནི་མགོ་བོའི་གར། །གར་གྱི་གཞུང་གི་མཚན་ཉིད་དོ། །རྗེས་ཐབས་རྗེས་སུ་རིམ་པ་དང་། །བསྟོད་པ་དང་ནི་འགྱིང་བག་སྟེ། །རྒྱས་དང་འདུད་དང་གསལ་པོ་རུ། །
རྒྱས་པ་དང་ནི་སྨིན་བསྐྱོད་གར། །ལག་པའི་ཕྱག་རྒྱ་སྦྱོར་བ་ཡིས། །སྟབས་བརྒྱད་ཀྱིས་ནི་གར་བྱེད་བྱ། །རྒྱས་པའི་པདྨ་མཱ་མ་ཀཱི། །གར་བྱས་ནས་ནི་ལྷ་མོ་དེས། །རྡོ་རྗེ་ཅིང་གིས་རྡོ་རྗེ་ན། །རྡོ་རྗེ་བེ་ཅོན་འོ་བཏབ་བྱེད། །དེ་ནས་བཅོམ་ལྡན་
རྡོ་རྗེས་ཀྱང་། །འོ་བཏབ་མཱ་མ་ཀཱི་པད་མར། །སྟོན་ཅིག་ལྷ་མོ་པད་མ་ནི། །དེ་ལ་མཆོད་པ་བརྩམ་པར་བྱ། །བཞུགས་ཤིག་མི་གཡོ་བར་རིག་མོ། །བདུད་རྩི་བསམ་གཏན་བརྩམ་པར་བགྱི། །དེ་བཞིན་ཉིད་མཆོག་བརྩམ་པ་ནི། །བདུད་
རྩི་ཐིག་ལེའི་གཟུགས་ཅན་ཏེ། །མཁའ་ཡི་དབུས་སུ་ཟླ་བ་འདྲ། །སྟོང་པ་དེ་ཉིད་ཆེད་དུ་བརྗོད། །འཇིགས་མེད་ཟད་མེད་ཕྲ་མོ་ནི། །རྡོ་རྗེ་སེམས་དཔའ་འཇོམས་བྱེད་པ། །ལྟེ་བའི་དབུས་སུ་གནས་ལྷ་མོ། །སྙིང་པོ་གསང་བའི་སྤྱོད་
ཡུལ་ལ། །ཁུ་བའི་གཟུགས་ཀྱིས་ཟབས་ནས་སུ། །བྷ་ག་ལིང་གའི་དཀྱིལ་དུ་གནས། །འདི་ནི་སྲོག་ཆགས་རྣམས་ཀྱི་སྲོག །རྣམ་པར་ཤེས་པའི་ཕུང་པོ་རྟེན། །སངས་རྒྱས་དེ་བཞིན་རྡོ་རྗེ་འཛིན། །ཚངས་པ་ཁྱབ་འཇུག་དབང་

88-1-26b

ཕྱུང་ཆེ། །ས་དང་ཆུ་དང་དེ་བཞིན་མེ། །རླུང་དང་ནམ་མཁའ་ཁོ་ན་ཡང་། །གཡོ་དང་མི་གཡོ་སྣ་ཚོགས་པའི། །ཁམས་གསུམ་ལ་ནི་མ་ལུས་པར། །དེ་ནི་བདག་གིས་རྟག་ཏུ་བསམ། །དེ་ལས་བསྐྱེད་དེ་བདག་དང་ཁྱོད། །ཚངས་
པ་ལྷ་དབང་ཁྱབ་འཇུག་སོགས། །བྱང་ཆུབ་སེམས་དཔའ་དེ་བཞིན་གཤེགས། །ཤེས་བྱ་ཤེས་པའི་བདག་ཉིད་གཙོ། །དེ་ཉིད་དམ་པ་དེ་བསམ་མོ། །སྐྱེ་བ་དང་ནི་ཤི་བ་དང་། །ཐམས་ཅད་དེ་ལ་འདུས་པ་ཡིན། །སྐྱེད་པ་
བྱེད་པ་པོ་དེ་གཅིག །རང་བདག་གྱུར་པ་ལྷན་ཅིག་པ། །ཐམས་ཅད་མཁྱེན་པ་ཀུན་ནས་ཀུན། །ཞི་ནས་ཞི་བ་ཁྱབ་པ་པོ། །ཅི་ཕྱིར་ཁང་པ་དེ་བཀང་བས། །དེ་བས་སྐྱེས་བུར་བཤད་པ་ཡིན། །ལུས་ལ་གནས་ཕྱིར་ལུས་ཅན་
ཏེ། །ཤེད་བྱེད་ཕྱིར་ན་ཤེས་པར་འདོད། །བདག་ལ་བདག་གིས་རིག་པའི་ལྷ། །དེ་ཕྱིར་ལྷ་ཞེས་འདོད་པ་ཡིན། །འཇུག་ལས་ཁྱབ་འཇུག་ཅེས་གསུངས་ཏེ། །ངག་གིས་རྡོ་རྗེ་འཛིན་དུ་འགྱུར། །སྟོན་དུ་མེད་པ་གསང་བ་འདི། །
ནན་ཏན་དུ་ནི་གསང་བར་བྱ། །སྐྱོན་ཅན་མིན་དང་གཡོ་ཅན་མིན། །དམ་ཚིག་ལ་ནི་མི་སྡང་བ། །ཆད་པར་ལྟ་བ་མེད་པ་ལ། །བླ་མ་ལ་ཆགས་འདུལ་བ་ཅན། །ཕྲག་དོག་ཆགས་པ་སྤོང་བྱེད་པ། །དཀྱིལ་འཁོར་ལ་ནི་ཞུགས་
པ་དང་། །རྡོ་རྗེ་བསྟན་པའི་སློབ་མ་དག །དེ་ལ་རྒྱས་པའི་བསྟན་པ་འདི། །དེ་བཞིན་ཉིད་མཆོག་བཤད་པར་བྱ། །སློབ་དཔོན་རིག་མ་དང་ལྡན་ནས། །དེ་ལ་དབང་བསྐུར་སྦྱིན་པར་བྱ། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་
རྡོ་རྗེས་དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་ལས་དབྱངས་དང་གར་དང་། དབང་བསྐུར་བ་དང་། དེ་བཞིན་ཉིད་
ཆེར་དམིགས་པ་དག་བསྟན་པ་ཞེས་བྱ་བ་ལེའུ་བདུན་པའོ།། །། དེ་ནས་ལྷ་མོ་ཡང་ལངས་ནས། །བཞད་ནས་འདི་དག་ཞུ་བ་སྟེ། །བཅོམ་ལྡན་འདི་ལ་ཐེ་ཚོམ་ཟོས། །དམ་པའི་ངོ་མཚར་བདག་བསྐྱེད་དེ། །

88-1-27a

ཞི་གཟུགས་རྡོ་རྗེ་ཅན་དེ་ལས། །ཁྲོ་བོའི་གཟུགས་ནི་ཅི་ལྟར་འགྱུར། །དེ་ནས་བཅོམ་ལྡན་རྡོ་རྗེ་ཅན། །རྡོ་རྗེ་བདུད་རྩི་བདེ་ཆེན་པོས། །རྡོ་རྗེ་པད་མ་མཉམ་སྦྱོར་ཏེ། །ཁྲོ་བོའི་གཟུགས་ནི་རྣམ་པར་ཕྱུང་། །
འབར་བའི་ཕྲེང་འཁྲུགས་དྲག་པོ་ཅན། །འཇིགས་བྱེད་ལ་ཡང་འཇིགས་པར་བྱེད། །ཞལ་བཞི་ལ་ནི་ཕྱག་བརྒྱད་དེ། །ཐོད་པའི་དབུ་རྒྱན་འཇིགས་པར་བརྒྱན། །ཁ་ཊྭཱཾ་ག་དང་མགོ་བསྣམས་ཏེ། །ཐོད་པ་དང་ནི་ཁྲག་དགའ་བ། །
གཏུམ་པོ་རྒྱུ་མའི་ཕྲེང་འཁྲུགས་པ། །རིག་མ་བརྒྱད་ཀྱིས་ཡོངས་སུ་བསྐོར། །དུར་ཁྲོད་ཆེན་པོ་བཞིར་བཞུགས་པ། །ཕཊ་ཡིག་སྔགས་ཀྱི་ང་རོ་ཅན། །འབྱུང་པོ་རོ་ལངས་ཚོགས་པ་དང་། །དུར་ཁྲོད་ལ་ནི་རོལ་མཛད་པས། །
དེ་འོག་དབང་དང་བཅས་པའི་ལྷ། །ཚངས་པ་ཁྱབ་འཇུག་དབང་ཕྱུག་ཆེ། །བཟའ་བྱེད་རྡོ་རྗེ་ཅན་ཆེན་པོ། །དཔལ་ལྡན་ཁྲག་འཐུང་གཟུགས་ནི་ཕྱུང་། །དང་པོའི་རིག་མ་འཇིགས་ཅན་མ། །མི་སྡུག་གདོལ་པ་སྨེ་ཤ་ཅན། །
སེར་མོ་རིགས་ཅན་དྲག་མོ་དང་། །འཇིགས་པར་བྱེད་མ་བརྒྱད་དུ་འདོད། །སྔགས་འདི་དག་ནི་བཟླ་བྱས་ཏེ། །གར་ཡང་བྱེད་ནས་དབྱངས་བླང་ངོ་། །འཇིགས་བྱེད་ཆེན་པོ་མཆེ་བ་གཙིགས། །རྒྱུ་མ་ཕྲེང་གི་རྒྱན་སྐུད་
བརྒྱན། །ཤ་ཆེན་དག་ནི་གསོལ་བྱེད་པ། །དཔལ་ལྡན་ཁྲག་འཐུང་བདག་ཕྱག་འཚལ། །སྒྲུབ་པ་པོ་རྣམས་ཕན་བྱེད་ཕྱིར། །བཟླས་པའི་སྔགས་ནི་བཤད་པར་བྱ། །གསུམ་པ་ཡི་ནི་གསུམ་པ་ལ། །བདུན་པ་
ཡི་ནི་བཞི་པ་སྦྱོར། །བདུན་པ་ཡི་ཡང་གསུམ་པ་སྟེ། །གཉིས་ཀྱི་ཚིག་ནི་གཉིས་སུ་སྦྱོར། །ཀུན་ལ་དེ་བཞིན་ཉིད་ལྡན་ཏེ། །ཡི་གེ་ཕྱེད་ཀྱིས་རྣམ་པར་བརྒྱན། །དྲུག་པའི་བཞི་པ་ཕྱུང་བྱས་ཏེ། །བདུན་པའི་
དངོས་པོས་གདན་དུ་བྱ། །བཅུ་གསུམ་པ་ཡིས་སྟེང་གནོན་པའི། །སྭཱ་ཧཱ་མཐར་བཞག་སྔགས་ནི་ཕྱུང་། །དང་པོ་རྣམ་པར་སྣང་མཛད་དབུལ། །ཁྲག་འཐུང་རྩ་བའི་སྔགས་ཡིན་ནོ། །སྔགས་ཀྱི་རྒྱལ་པོ་འདི་ཉིད་

88-1-27b

ཀྱི། །མཐུ་ཆེན་ཉོན་ཅིག་མཱ་མ་ཀཱི། །ལན་ཅིག་ཙམ་གྱིས་སྔགས་བཟླས་ན། །སྐད་ཅིག་འཇིག་རྟེན་གསུམ་འཇིག་གོ། ཁམས་གསུམ་མ་ལུས་པ་རྣམས་ཀྱང་། །ཟོས་པར་བྱེད་པར་ཐེ་ཚོམ་མེད། །དེ་ཡིས་
འདོད་པ་ཐམས་ཅད་སྦྱིན། །དཔལ་ལྡན་ཁྲག་འཐུང་མཉམ་འགྱུར་རོ། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེས་དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེ་ཅན་
རྡོ་རྗེ་བདུད་རྩི་བདེ་བ་ཆེན་པོའི་རྒྱུད་ལས་དཔལ་ལྡན་ཁྲག་འཐུང་བསྐྱེད་པ་བསྟན་པ་ཞེས་བྱ་བ་ལེའུ་བརྒྱད་པའོ།། །། དེ་ནས་བདུད་རྩི་འཁྱིལ་པ་ཡིས། །གཟུགས་ནི་ཡང་དག་བཤད་པར་བྱ། །ཞལ་གསུམ་པ་ལ་ཕྱག་དྲུག་སྟེ། །
དྲག་པོ་ནག་པོ་དུད་པའི་འོད། །འོད་ཟེར་ཕྲེང་བ་འཁྲུགས་པ་དང་། །གཏུམ་མོས་སྤྱན་ནི་དམར་པོ་ཅན། །དམར་བའི་སྨིན་མ་ཨག་ཚོམ་འབར། །དྲག་ཆེན་པོ་ནི་ཟིལ་གྱིས་གནོན། །ཕྱག་ན་དགྲ་སྟ་བསྣམས་བརྩོན་པ། །
གཏུན་ཤིང་རྡོ་རྗེ་ཞགས་པ་དང་། །གཡོན་གྱི་ཕྱག་གི་སྡིག་མཛུབ་ཀྱིས། །སྡང་བ་ཐམས་ཅད་སྡིགས་པར་བྱེད། །རལ་གྲི་ཕྱག་མཚན་བསྒོམ་པར་བྱ། །རིག་མ་བརྒྱད་དང་མཉམ་ལྡན་ཞིང་། །སྒོ་སྲུངས་དང་ཡང་ཡང་དག་ལྡན། །
གསང་བའི་པད་མ་བསྒོམ་བྱས་ཏེ། །འདབ་མར་རིག་མ་བརྒྱད་ནི་བཀོད། །བདུད་རྩི་མ་དང་བདུད་རྩི་ཞལ། །བདུད་རྩི་ཅན་དང་བདུད་རྩི་སྤྱན། །གྲངས་མེད་མ་དང་གཟུགས་བཟང་མ། །མཛེས་པའི་གཟུགས་ཅན་བདེ་གྲུབ་མ། །
ཐམས་ཅད་ཞལ་གསུམ་ཕྱག་དྲུག་སྟེ། །ཕྱོགས་དང་མཚམས་ལ་བཀོད་པར་བྱ། །ཕྱག་གིས་པདྨ་བསྣམས་པར་བརྩོན། །དེ་དག་ལྷ་མོ་གར་བྱེད་ནས། །སྣ་ཚོགས་གཟུགས་རྣམས་མཆོག་སྦྱིན་མ། །བཞད་ཅིང་རོལ་པར་མཛད་
བྱེད་དོ། །སྔགས་ཀྱི་རྒྱལ་པོ་ཕྱུང་བར་བྱ། །རྣམ་པར་སྣང་མཛད་ཡང་འབུལ་ནས། །ཚིག་འདི་ཡིས་ནི་ཡོངས་སུ་དགོད། །དང་པོ་ཡི་ནི་གཉིས་པ་སྟེ། །སྟོང་པ་ཉིད་ནི་གདན་ལྡན་པ། །སྟོང་པས་སྟེང་ནས་གནོན་པའི་

88-1-28a

སྔགས། །མཐའ་ནས་སྭཱ་ཧཱ་སྦྱོར་བྱེད་དོ། །གཏན་དུ་ཤིན་དུ་དགའ་འབྱོར་ནས། །བདུད་རྩི་བདུད་རྩི་ཕྱུང་ནས་སུ། །བདུད་རྩི་བདུད་རྩི་སྦྱོར་བ་ཡིས། །བདུད་རྩི་འཁྱིལ་པ་བསྒྲུབ་པར་བྱ། །དོན་ཀུན་དངོས་གྲུབ་ཐམས་ཅད་ཡང་། །
དེ་ཡིས་མྱུར་བར་བསྒྲུབ་པར་འགྱུར། །ཕ་འམ་གལ་ཏེ་མ་དག་གིས། །བདུད་རྩི་འཁྱིལ་པ་དྲན་བྱེད་ན། །རྒྱུ་དང་མི་རྒྱུ་འཇིག་རྟེན་གསུམ། །དེ་ཡི་ཕྱག་མཐིལ་ལ་ཀུན་གནས། །རྡོ་རྗེ་བདུད་རྩི་བདེ་ཆེན་པོ། །དུས་རྟག་པར་ནི་
བསྒོམ་པར་བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་ལས་དཔལ་བདུད་རྩི་འཁྱིལ་པ་འབྱུང་བ་ཞེས་བྱ་བ་ལེའུ་དགུ་པའོ།། །། 
དེ་ནས་རོ་ལངས་ཆེན་པོ་ཡི། །བསྒྲུབ་པ་གཞན་ཡང་བཤད་པར་བྱ། །ནག་པོའི་ཚེས་བརྒྱད་བཅུ་བཞི་ལ། །ལིང་ག་གཅིག་དང་ལམ་མདོ་དང་། །ཤིང་གཅིག་དང་ནི་དུར་ཁྲོད་དང་། །རི་དང་ཆུ་འགྲམ་དེ་རྣམས་ལ། །ལས་ཐམས་ཅད་ནི་
བསྒྲུབ་བྱ་སྟེ། །དེ་བཞིན་རོ་ལངས་སློང་བ་ནི། །འགགས་ནས་ཤི་བ་མོ་རྣམས་ནི། །མཚན་ཐམས་ཅད་ནི་ཀུན་རྫོགས་པ། །གདོལ་པ་མོ་དང་སྨེ་ཤ་ཅན། །ཁྱིམ་ཆོས་མ་རྣམས་དེ་དག་ན། །མཛེས་པ་བཟང་བ་རྨ་མེད་པ། །
སུམ་བཅུ་རྩ་གཉིས་བསྔགས་པ་སྟེ། །ལོ་ནི་ཉི་ཤུ་རྩ་ལྔ་བསྐྱེད། །བུད་མེད་རོ་ཡི་སྐྲ་བཟུང་སྟེ། །གཙང་བའི་ཆུ་ཡིས་བཀྲུ་བར་བྱ། །སྔགས་དང་སྨན་གྱི་རྡོ་ལེབ་ལ། །ག་བུར་ཙནྡན་དཀར་པོ་ཡིས། །དེ་ལ་བྱུག་པར་བྱ་བྱས་སྟེ། །
སྣ་ཚོགས་མེ་ཏོག་སྤོས་རྣམས་ཀྱིས། །མཆོད་ཅིང་གཏོར་མ་དབུལ་བར་བྱ། །མར་ཁུ་ཆེན་པོས་བསྡུས་ནས་སུ། །ཡུངས་དཀར་ཀྱིས་ནི་རྡོ་ལ་བརྡེག་པར་བྱ། །ན་བལ་ཁྲག་འཐུང་ཞེས་བྱ་བའི་བསྒྲུབ་པ་པོས། །
དེ་ལ་དཀྱིལ་འཁོར་ཡང་བྲི་ཏེ། །ཐོད་པ་ཞེས་བྱ་ཟླ་གམ་འམ། །གཞུ་ཡི་ཚུལ་གྱིས་བཀང་བར་བྱ། །ཐོད་པས་ཉེ་བར་བརྒྱན་བྱེད་ཅིང་། །རིག་མ་བརྒྱད་དང་ལྡན་པར་བྱ། །ཤ་ཡི་ཁམས་ཅན་ཐོད་པ་དབང་། །

88-1-28b

ཁ་ཊྭཱཾ་ཐམས་ཅད་ཀྱིས་འཛིན་ཏེ། །ཞལ་གསུམ་པ་ལ་དྲག་པོའི་གཟུགས། །ཕྱག་དྲུག་རལ་གྲི་ཕྱག་ན་འཛིན། །དཀྱིལ་འཁོར་དེ་ཡི་ཕྱི་རོལ་དུ། །སྒོ་སྲུངས་མ་ནི་རབ་ཏུ་བརྟགས། །གླང་རྣ་དང་ནི་གླང་ཆེན་རྣ། །ཞལ་མཛེས་དེ་བཞིན་
ཞལ་གདུག་མ། །དྲག་མོ་ཞགས་པ་ལྕགས་ཀྱུ་འཛིན། །མི་སྡུག་འཇིགས་པས་འཇིགས་བྱེད་རྣམས། །ཞལ་གཅིག་པ་ལ་ཕྱག་གཉིས་པ། །མེ་ཏོག་མཆོད་པ་ཡང་དག་བྲི། །རྣམ་པ་སྣ་ཚོགས་རིག་མ་ཡང་། །དཀྱིལ་འཁོར་
ལ་ནི་མཆོད་པ་བྲི། །དེ་ནས་དཔའ་བོ་བསྒྲུབ་པ་པོས། །དུང་ཆེན་གྱིས་ནི་བརྒྱན་བྱས་པ། །ཐོད་པའི་ཕྲེང་བས་ཐོད་བཅིངས་པའི། །ཁྲག་འཐུང་གཟུགས་ནི་སྒོམ་བྱེད་པས། །དེ་ལ་ཅང་ཏེའུ་བརྡུངས་ནས་སུ། །གར་བྱེད་ཅིང་ནི་ཁང་པར་
འཇུག །དེ་ཡི་སྙིང་གར་གནོད་པའི་སྔགས། །བྷྱོ་ཡིག་དེ་ལ་བཟླ་བྱ་སྟེ། །ལྷ་ཡི་དཀྱིལ་འཁོར་མཆོད་ནས་སུ། །ཁྲག་ཆེན་གྱིས་ནི་གཏོར་བར་བྱ། །དཔལ་ལྡན་ཁྲག་འཐུང་སྔགས་ཆེན་ནི། །སྒྲུབ་པ་པོས་ནི་བཟླས་མ་ཐག །
ཁྲོ་དང་ལྡན་པའི་ཨག་བཙར་བྱ། །རོ་ལངས་གྱིས་ནི་གང་སྒྲོགས་བྱེད། །དེ་ཚེ་སྔགས་པས་མི་འཇིགས་ཏེ། །ཁྲག་འཐུང་སྔགས་ནི་དྲན་པར་བྱ། །ལངས་པའི་རོ་ལངས་དེ་ཡིས་ཀྱང་། །སྒྲུབ་པ་པོ་ལ་འདི་སྐད་སྨྲ། །དཔའ་ཆེན་
པོ་ཀྱེ་ལས་གང་ཡང་། །བདག་ལ་བཀའ་སྩོལ་རྡོ་རྗེ་ཅན། །རལ་གྲི་མིག་སྨན་ས་འོག་དང་། །མཁའ་ལ་རྒྱུ་བར་འདོད་པ་དང་། །སྒྲུབ་པ་པོས་ནི་གང་འདོད་པ། །ལས་དེ་དག་ནི་བསྒྲུབ་པར་བགྱི། །དེ་ནས་བསྒྲུབ་པ་པོ་ཡིས་ནི། །ཡིད་ལ་
གང་དང་གང་འདོད་བསླང་། །དེ་ལྟར་ཐམས་ཅད་བསྒྲུབ་བྱ་བ། །རྒྱས་པའི་པདྨ་མཱ་མ་ཀཱི། །རོ་ལངས་བསྒྲུབ་པའི་མཆོག་གྱུར་པ། །རྡོ་རྗེ་བདུད་རྩི་ལས་བྱུང་ཡིན། །སྐུ་གསུངས་ཐུགས་ཀྱི་བསྒྲུབ་དོན་དུ། །སྒྲུབ་པ་པོ་ཡི་བདེ་ཡང་འདྲེན། །
རྡོ་རྗེ་བདུད་ཆི་བདེ་ཅེན་པོ། །བཅོམ་ལྡན་རྡོ་རྗེས་དེ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུངས་དང་ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་རྡོ་རྗེ་བདུད་རྩི་རྒྱུད་ཆེན་པོ་ལས་རོ་

88-1-29a

ལངས་བསྒྲུབ་པ་བསྟན་པ་ཞེས་བྱ་བ་ལེའུ་བཅུ་པའོ།། །། དེ་ནས་བཅོམ་ལྡན་རྡོ་རྗེ་ཅན། །རྡོ་རྗེ་བདུད་རྩི་བདེ་ཆེན་པོས། །རྡོ་རྗེ་པད་མ་མཉམ་སྦྱོར་ཏེ། །ཅང་མི་གསུང་བར་ཆེར་བཞུགས་སོ། །དབུགས་
དགག་ཕྱིར་ནས་མི་གཡོ་ནས། །མི་འཇིགས་པ་དང་མི་གསུང་བར། །ཏིང་འཛིན་མཆོག་ལ་ཞུགས་པ་ལ། །མཱ་མ་ཀཱིས་ནི་ཡང་ཞུས་ཏེ། །བཅོམ་ལྡན་རྡོ་རྗེ་ཕྲ་མོ་ནི། །སེམས་ཅན་ཀུན་གྱི་ཡིད་ལ་གནས། །ཅི་ལྟར་རྣམ་
པ་གང་གིས་ནི། །དེ་བཞིན་ཉིད་དེ་ཐོབ་པར་བགྱི། །དེ་ནས་བཅོམ་ལྡན་རྡོ་རྗེ་ཅན། །རྡོ་རྗེ་བདུད་རྩི་བདེ་ཆེན་པོས། །བཞད་པ་མཛད་ནས་གསུང་འདི་ནི། །སྤྱན་ཡང་ཕྱེ་ནས་བཀའ་སྩལ་པ། །དེ་ཉིད་སྔོན་བཞིན་བཤད་པ་སྟེ། །
བདུད་རྩི་གཟུགས་ནི་ཁུ་བ་ཡིན། །བདུད་རྩི་ལྔ་དང་ལྡན་བྱས་ཏེ། །རྟག་པར་རྒྱུན་དུ་མྱང་བར་བྱ། །རྫས་ནི་རེ་རེའི་མཐུ་དག་ནི། །བཤད་པ་ཉོན་ཅིག་མཱ་མ་ཀཱི། །ཡེ་ཤེས་ཤེས་བྱ་སྒྲུབ་བྱེད་པའི། །ཁུ་བ་དངས་པར་བཟའ་བར་
བྱ། །སྐུ་གསུང་ཐུགས་ཀྱི་བསྒྲུབ་དོན་དུ། །བྲག་ཆེན་རབ་ཏུ་བསྒྲུབ་བྱ་སྟེ། །གང་ཞིག་བུད་མེད་རྣམས་ཀྱི་འམ། །བུ་མོ་ཡི་ནི་རྟག་ཏུ་བླང་། །ཁྲག་ཆེན་ངས་ནི་མཱ་མ་ཀཱི། །དོན་ནི་ཐམས་ཅད་བྱེད་པ་པོ། །དྲག་ཤུལ་ཤི་བ་རྙེད་
ན་ནི། །ཤ་ཆེན་པོ་ཡང་བཟའ་བྱ་སྟེ། །གསལ་ཤིང་བཙུགས་དང་འགགས་པ་འམ། །གཡུལ་དུ་བསད་པ་གང་དེ་ནི། །ཟབ་ཅིང་བསྟན་པས་ཟ་བྱེད་ན། །ཚེ་དང་ནད་མེད་འཕེལ་བར་འགྱུར། །དེ་བཞིན་འདོད་པའི་བདེ་བ་དང་། །
སངས་རྒྱས་བྱང་ཆུབ་གྲུབ་པ་དང་། །རྡོ་རྗེ་སེམས་དཔའ་བཞིན་དུ་ཚེ། །འདོད་ཀུན་འབྲས་བུ་དེས་སྦྱིན་ནོ། །རྡོ་རྗེ་ཆུ་དང་བཤང་གཅི་ནི། །རང་གིས་བཟའ་བར་རིག་པར་བྱ། །ཕྱེ་མ་ཞིབ་མོར་བྱས་པ་ལ། །ཁྲག་ཆེན་གྱིས་ནི་བསྲེ་བར་བྱ། །སྔ་དྲོ་དེ་
བཞིན་ཉིན་ཕྱེད་དང་། །ཕྱི་དྲོ་ལ་ནི་བཟའ་བར་བྱ། །དུས་གསུམ་ཟོས་ནས་རྣལ་འབྱོར་པས། །དེ་ནས་རྡོ་རྗེ་ཆུ་ནི་བཏུང་། །ཉིན་དང་ཉིན་དུ་མཱ་མ་ཀཱི། །སྒྲུབ་པ་པོ་གང་སྒྲུབ་བྱེད་པ། །ལུས་ལ་ནད་ནི་མེད་འགྱུར་ཞིང་། །རྒས་པའི་ནད་ཀྱང་མེད་

88-1-29b

པར་བྱེད། །སྐལ་བཟང་རྒྱས་པའི་མདངས་ལྡན་པ། །རྒྱལ་པོའི་སྒོར་ཡང་རྒྱལ་བར་འདྲེན། །དེ་ནི་འདོད་པ་ཀུན་སྦྱིན་པས། །མཆོག་རབ་དེ་ཉིད་ཐོབ་པ་ཡིན། །རྣལ་འབྱོར་དེ་ཡང་ཀུན་ཤེས་ཏེ། །རྡོ་རྗེ་སེམས་དཔའི་ཡོན་ཏན་ལྡན། །
འདོད་ཆགས་ཞེ་སྡང་ལས་གྲོལ་ནས། །བརྐམ་པ་ཕྲག་དོག་རྣམ་སྤངས་ནས། །རྡོ་རྗེ་བདུད་རྩི་བདེ་ཆེན་པོ། །དེ་ཡིས་སྒྲུབ་པ་འགྲུབ་པའོ། །རྡོ་རྗེ་བདུད་རྩིའི་རྒྱུད་འདི་ནི། །དོན་མང་གསང་བའི་རིམ་པ་ཅན། །མ་ལུས་རྡོ་རྗེ་ཐེག་པ་འདི། །
འདི་ལས་བྱུང་འགྱུར་ལྷ་མོ་ཀྱེ། །རྒྱས་པའི་པདྨ་མཱ་མ་ཀཱིས། །འདོད་ཆགས་ཀྱིས་ནི་བདེ་འགྱུར་བས། །ཁྱོད་ལ་དམ་པའི་དངོས་སྟོན་ན། །བདག་གིས་གང་ལ་ཡང་མི་སྟོན། །འདི་ནི་གསང་ཆེན་དམ་པ་ཡིན། །ཡིད་དག་ཀུན་གྱི་བདག་ལ་
གནས། །བྱང་ཆུབ་སེམས་དཔའ་མ་ཤེས་ཏེ། །གཟུགས་མེད་སྟོང་པ་མི་འགྱུར་བས། །དེ་ན་དེ་ཉིད་རིག་ཆེན་པོ། །རྡོ་རྗེ་སྤྱི་གཙུག་ནོར་བུར་འདོད། །ཤིན་ཏུ་གསང་ནས་གཟུངས་ལྷ་མོ། །ཕ་དང་བུ་ལའང་བསྟན་མི་བྱ། །གལ་ཏེ་དངོས་
གྲུབ་མཆོག་འདོད་ན། །གདན་དུ་གསང་བ་བསྟན་པ་དང་། །བླ་མ་ལ་ཆགས་བརྟུལ་ཞུགས་བརྟན། །དེ་ལ་སྦྱིན་ནས་དེ་ཉིད་བསྟན། །རྡོ་རྗེ་བདུད་རྩི་རྒྱུད་འདི་ནི། །བདེ་འགྲུབ་ཤིན་དུ་ཐོབ་དཀའ་བ། །ཡང་དག་རྫོགས་པས་སྐལ་བཟང་
ཞི། །སྙིང་པོ་ཡེ་ཤེས་འདུས་པ་ཡིན། །རྡོ་རྗེ་བདུད་རྩི་རྒྱུད་ཆེན་ལས། །སྒྲུབ་པ་པོ་གང་དབང་བསྐུར་བ། །སངས་རྒྱས་བྱང་ཆུབ་སེམས་རྣམས་ཀྱིས། །དེ་ལ་ཀུན་གྱིས་ཕྱག་བྱེད་དེ། །ཕྱག་ནི་ལན་གསུམ་བྱས་ནས་སུ། །
རྡོ་རྗེ་སློབ་དཔོན་སྐལ་བཟང་མཆོག །དེ་ཉིད་སེམས་ཅན་ཐམས་ཅད་ཀྱི། །འཁོར་བ་ལས་འདྲེན་གཙོ་ཞེས་གསུངས། །རྡོ་རྗེ་བདུད་རྩི་བདེ་ཆེན་པོ། །བཅོམ་ལྡན་རྡོ་རྗེས་དེ་གསུངས་སོ། །རྡོ་རྗེ་བདུད་རྩི་རྒྱུད་ཆེན་པོ། །སྟོན་པ་དགའ་མ་ལ་
བསྟན་ནས། །ཕྲ་མོའི་གཟུགས་སུ་རྡོ་རྗེ་ཅན། །དེ་ནས་བྷ་གར་ཆེར་བཞུགས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེ་ཅན་རྡོ་རྗེ་བདུད་རྩི་བདེ་བ་ཆེན་པོའི་

88-1-30a

རྒྱུད་ལས་བདུད་རྩི་ལྔ་བསྒྲུབ་པའི་ཐབས་བསྟན་པ་ཞེས་བྱ་བའི་ལེའུ་སྟེ་བཅུ་གཅིག་པ་རྫོགས་སྷོ།། །།ཤུ་བྷ་མསྟུ་སརྦ་ཛ་ག་ཏཱྃ། སྟག་ལུང་རྒྱུད་འབུམ་ལ་བཏུགས་པའི་
མཚལ་པ་བཀའ་འགྱུར་ནས་ཞུས།  ཞུས་དག ། ༄༅། །རྒྱ་གར་སྐད་དུ།  ཀུ་ལ་ལོ་ཀ་ནཱ་ཐཱ་པཉྩི་ཤ་ཀ་ནཱ་མ།  བོད་སྐད་དུ།  རིགས་ཀྱི་འཇིག་རྟེན་མགོན་
པོ་ལྔ་བཅུ་པ་ཞེས་བྱ་བ། དཔལ་ལྡན་རིགས་ཀྱི་འཇིག་རྟེན་མགོན་པོ་ལ་ཕྱག་འཚལ་ལོ། །དེ་ནས་འདི་ནི་མཆོག་ཏུ་གསང་། །འཇིག་རྟེན་ཡང་དག་རྨོངས་པའི་མཆོག །རིགས་དང་རིགས་བྱུང་མངོན་བརྗོད་པས། །གཉིས་མེད་སྔགས་
ནི་རབ་བཤད་བྱ། །དམ་ཚིག་སྤྱོད་པ་ངེས་པར་གྲོལ། །བྱ་བ་དུས་ཚོད་རྣམ་པར་སྤངས། །དེ་ཉིད་གསུམ་ལྡན་ཡང་དག་ལྷ། །འཇིག་རྟེན་མགོན་པོ་འགྲོ་བའི་བདག །འདོད་པའི་དབང་ཕྱུག་འདོད་པའི་ལྷ། །མཐོང་དང་མ་མཐོང་འབྲས་རབ་
སྟེར། །དེ་འདིར་སྔགས་ནི་མཚུངས་མེད་པ། །བླ་མའི་ཞལ་ལ་རྣམ་པར་གནས། །དྲག་ཆེན་འཇིགས་བྱེད་ལུས་ལ་ནི། །ལྔ་པའི་ཐིག་ལེ་དང་བཅས་ཤིང་། །རྣམ་གཅོད་དང་པོ་ཡང་དག་ལྡན། །ཆེན་པོ་ལྔ་པའི་ལྔ་པས་བརྒྱན། །ལྕེ་གཉིས་
ཡན་ལག་མེད་གཉིས་གནས། །ལུས་གསུམ་གྱི་ནི་སྔགས་མཆོག་ལ། །ཡི་གེ་རྣམས་ཀྱི་བསྡུ་བ་ལས། །མཚན་ཉིད་ཆོ་ག་བཞིན་དུ་བཟླས། །འདི་ཡི་རྗེས་དྲན་སྔགས་པ་ཡིས། །གཙང་ངམ་ཡང་ན་མི་གཙང་རུང་། །ལྷ་བཞིན་མཐོང་བ་ལྷ་
རྣམས་ཀྱིས། །དེ་ཡི་ལྷ་མོ་འདོད་ལྷ་བཞིན། །འདི་བཞིན་སྔགས་ཀྱི་འདོད་ལྷ་ཡི། །བྱ་བ་མེད་ཅིང་སྒྲུབ་པའང་མེད། །མཆོད་མེད་མེ་ལ་སྦྱིན་སྲེག་མེད། །རྣལ་འབྱོར་ལྡན་དང་ཡང་དག་ལྡན། །དུས་ཚོད་རྣམས་ལས་
རྣམ་ངེས་གྲོལ། །རྩེ་གཅིག་སེམས་ནི་གཡོ་མི་བྱེད། །སྒྲིབ་པ་དང་བྲལ་མཚུངས་པ་ཡི། །མཆོག་གི་བསམ་གཏན་ཡང་དག་སྦྱར། །རིགས་ཀྱི་འཇིག་རྟེན་དབང་ཕྱུག་གི་རྟོག་པ་ལྔ་བཅུ་པ་ལས་སྔགས་ཀྱི་དེ་ཁོ་ན་ཉིད་ཀྱི་ལེའུ་

88-1-30b

སྟེ་དང་པོའོ།། །། སྙིང་གའི་འཁོར་ལོའི་ནང་སོང་བའི། །དེ་ཉིད་གཞན་དང་གཞན་དུ་འགྲོ། །དབྱེ་བ་ཉིས་འགྱུར་དེ་ལས་ནི། །ཡེ་ཤེས་ཉིད་ནི་ཀུན་འགྲོ་བྱ། །མི་འགྱུར་དགའ་བའི་ཡུལ་རིག་པ། །
སེམས་ཀྱི་རྗེས་སུ་རྟོགས་པ་ཅན། །བྱ་བ་དེ་ཡི་བདེ་འདོད་ཕྱིར། །རྟོགས་པ་ཀུན་ནས་འཇུག་པར་འགྱུར། །དེ་ཡི་ངོ་བོ་རྟོགས་ཉིད་འཇུག །དེ་སེམས་དགའ་བའི་སྤྱོད་ཡུལ་ལ། །བྱ་བ་དང་ནི་ལས་རྣམས་
ཀུན། །ཚིག་དང་བཅས་པས་ཐེ་ཚོམ་མེད། །བསམ་གཏན་རྣལ་འབྱོར་ཡང་དག་ལྡན། །བརྟན་པར་དགོད་བྱ་བློ་ལྡན་གྱིས། །འགྲོ་ཀུན་དགྲ་ཡི་རང་བཞིན་གྱི། །ས་སྟེང་ས་འོག་མཐོ་རིས་སྒྲུབ། །
ལྟེ་བའི་པདྨར་པད་མ་ཆེ། །རྣམ་གསུམ་ནམ་མཁའི་ནང་སོང་བ། །པད་མའི་ཕྱག་རྒྱ་ཡང་དག་ལྡན། །ནམ་མཁའ་ཕྱག་རྒྱའི་བདག་ཉིད་བཞིན། །སྲོག་འབབ་པ་ཡི་ཚད་ཀྱིས་ནི། །གནས་གཉིས་པོ་ཡིས་གོམས་པར་བྱ། །
དེ་བཞིན་རབ་ཏུ་དགོད་བྱས་ནས། །འཇིག་རྟེན་མགོན་པོའི་སྐུ་རུ་འགྱུར། །གང་གིས་གཞན་དུ་བཟླས་བྱས་དང་། །ལས་རྣམས་ཀྱང་ནི་བསྒྲུབ་བྱས་ན། །དེ་ནི་མཁའ་ལ་ཁུ་ཚུར་བསྣུན། །རྨོངས་པས་སྤུན་སྟོང་འཇོམས་པར་བྱེད། །
བསམ་གཏན་སྦྱོར་བས་ཆོ་ག་བཞིན། །ལས་གང་རྟག་ཏུ་བྱ་བ་སྟེ། །དེ་ལས་མྱུར་དུ་སྒྲུབ་བྱེད་དེ། །དེའི་ལས་ནི་ཡིད་ཀྱིར་འདོད། །རིགས་ཀྱི་འཇིག་རྟེན་དབང་ཕྱུག་གི་རྟོག་པ་ལྔ་བཅུ་པ་ལས་བདག་གི་དེ་ཁོ་ན་ཉིད་ཀྱི་ལེའུ་སྟེ་གཉིས་པའོ།། །། 
རང་བཞིན་བསམ་གཏན་དང་བཅས་ཤིང་། །ཛཱ་ཏི་མཚལ་གྱི་འོད་ཟེར་བཞིན། །སེ་འབྲུ་ལེ་བརྒན་མེ་ཏོག་བཞིན། །ལི་ཁྲི་དམར་པོ་དང་མཚུངས་གཙོ། །སྔགས་ཀྱི་སྐུ་ཡི་ལྷ་ཡི་ལྷ། །ཞལ་གཅིག་ཕྱག་ནི་བཞི་པ་
སྟེ། །མཁའ་
88-1-31a

པདྨ་ཟླ་བའི་གདན་ལ་བཞུགས། །ཁྱབ་བདག་ཞགས་པ་ལྕགས་ཀྱུ་བསྣམས། །མཆོག་སྦྱིན་ཕྱག་གིས་ཡང་དག་རོལ། །མུ་ཏིག་ནོར་བུས་རྣམ་པར་བརྒྱན། །པད་མའི་ཕྱག་དང་སྤྱན་གསུམ་པོ། །གཟི་བརྗིད་ཆེན་པོ་སྣ་ཚོགས་
སྐུ། །དཔའ་བོ་དབང་ཕྱུག་འགྲོ་བའི་མགོན། །རྣལ་འབྱོར་མའི་ཐུགས་དགྱེས་པ། །དངོས་གྲུབ་ཐམས་ཅད་རབ་སྟེར་བའི། །སྔགས་རྣམས་ཀུན་ལ་བསམ་གཏན་བྱ། །གང་དང་གང་གིས་བསྒོམ་པ་ཡིས། །རྣལ་འབྱོར་གོམས་པར་
གྱུར་པའི་ཕྱིར། །དེ་ནི་དེ་ཡི་རང་བཞིན་འགྱུར། །ཡིད་བཞིན་ནོར་མཆོག་ཇི་བཞིན་ནོ། །ལྷ་ནི་དཀར་པོས་ཞི་བར་སྟེར། །དེ་བཞིན་ངག་ནི་རབ་སད་བྱེད། །དབང་དང་དགུག་པའི་དེ་ཉིད་ལ། །སྐུ་མདོག་དམར་པོ་རྣམ་པར་བསམ། །དུ་བ་དམར་པོའི་
འོད་མདོག་ཅན། །རླུང་གི་དཀྱིལ་འཁོར་གྱིས་དཀྲིས་པས། །དགྲ་བོ་རྣམས་ནི་ཉེར་སྐྲོད་པ། །འདིར་ནི་ཐེ་ཚོམ་མེད་པར་བྱེད། །དུ་བ་སྐྱ་བོ་དམར་བ་ཡིས། །རྣམ་པར་ཞེ་སྡང་ངེས་སྦྱོར་བ། །གསད་པ་ལ་ནི་ཁ་དོག་གནག །རེངས་པ་ལ་ནི་
སེར་པོར་ཤིས། །ལུག་གི་སྟེང་དུ་གནས་པ་ལ། །རྐན་གྱི་བར་དུ་རྣམ་ཕུག་ན། །སྲིད་པ་གསུམ་དུ་གང་གང་གནས། །ཐམས་ཅད་རབ་ཏུ་རྨོངས་པར་བྱེད། །གཞན་དག་རྨོངས་པས་ཅི་ཞིག་བྱ། །དོན་མང་ཚིག་ནི་རབ་འདུས་པ། །
འཇིག་རྟེན་གསུམ་གྱི་ལས་རྣམས་ནི། །ཡོན་ཏན་བརྒྱད་དང་ལྡན་པ་ཡི། །རྒྱུད་གཞན་རྣམས་ལ་ཉེར་གྱུར་པ། །གསུངས་དང་མ་གསུངས་གྱུར་པ་ནི། །རང་བཞིན་བསམ་གཏན་སྦྱོར་བ་ཡིས། །བྱ་བ་འདི་ལ་ཐེ་ཚོམ་མེད། །གང་ཞིག་
ལྷ་ནི་ནམ་མཁའི་མཚུངས། །ཁ་དོག་དབྱེ་བས་སོ་སོ་སྟེ། །འཇིག་རྟེན་གསུམ་ན་གང་སྤྱོད་པའི། །ལས་རྣམས་ཐམས་ཅད་བྱ་བའོ། །སྐལ་བཟང་བྱེད་པའི་སྔགས་རྣམས་ནི། །སྙིང་གའི་ཆུ་སྐྱེས་དབུས་སོང་བ། །
སྙིང་གའི་ཆུ་སྐྱེས་སྦྱོར་བ་ཡིས། །དབང་ལ་སོགས་པ་ཡང་དག་བསྒྲུབ། །ཡི་གེ་གསུམ་དང་བཅས་པའི་ལྷ། །སྟེང་དུ་འགྲོ་བ་གསུམ་ལྡན་པས། །མི་རྣམས་ལས་ནི་རྟག་བསྒྲུབས་པ། །རྣལ་འབྱོར་མ་རྣམས་ཞལ་ལ་གནས། །

88-1-31b

རྣམ་པ་གསུམ་གྱི་འགུགས་པར་བྱེད། །པད་མ་གཟུགས་ལྡན་གྱུར་པས་མཛོད། །རྟག་སྦྱོར་རྒྱུན་དུ་རྣལ་འབྱོར་པས། །མར་མེ་གཡོ་མེད་གནས་པ་བཞིན། །སྔོན་གསུངས་ལྷ་ཡི་ལྷ་དབང་ཕྱུག །སྐྱ་རེངས་དམར་པོ་དང་མཚུངས་འོད། །
མཚན་མོ་ཕྱེད་ཀྱི་དུས་གནས་ལ། །རྣལ་འབྱོར་ཉིད་ནི་ཡང་དག་སྤྱད། །དེ་ཡི་གཟུགས་འཛིན་ལུས་ལ་ནི། །ཡང་དག་སྔོན་དུ་བཀོད་པ་ཡིས། །ཞགས་པ་ལྕགས་ཀྱུ་འཛིན་པའི་ལྷ། །བསྒྲུབ་བྱའི་ལུས་ལ་ཡང་དག་བླང་། །
ཐམས་ཅད་བླ་མའི་ཞལ་ལ་གནས། །ཞགས་པ་ལྕགས་ཀྱུའི་འོད་ཟེར་གྱིས། །དེ་ལས་ལྕགས་ཀྱུ་བསྣུན་ནས་ནི། །ཞགས་པ་ཡིས་ནི་འགུགས་པར་བྱེད། །རྣམ་པར་མྱོས་ཤིང་ལུས་ནི་དམར། །ཡང་དང་ཡང་དུ་བརྒྱལ་གྱུར་ཏེ། །
བུ་ག་སྒོ་དགུ་ནས་བསྣུན་ནས། །ཁྲག་ནི་རབ་ཏུ་འབབ་པར་བྱེད། །སྒྲིབ་པ་མེད་པར་དང་མཚུངས་པར། །རང་ལུས་རྣམ་པར་བལྟ་བར་བྱ། །དེ་ཡི་དབུས་ལས་བཞེངས་པའི་སྔགས། །ཡི་གེའི་དབང་པོ་དང་པོར་བསམ། །
འབར་ཞིང་འབར་བ་ལྟ་བུ་ཡིས། །ཁ་ཡི་སྒོ་རུ་སྔོན་འདོད་རོལ། །པད་མའི་གཟུགས་འཛིན་དེ་ཡང་ནི། །ཁ་ཡི་ནང་ནས་ངེས་པར་འབྱུང་། །བསྒྲུབ་བྱའི་ཁ་རུ་ཐིམ་གྱུར་ཏེ། །ཇི་སྲིད་དེ་སྙིང་ཆུ་སྐྱེས་ལ། །གང་ཞིག་
དེ་ཡི་སྙིང་གནས་པ། །འདིར་ནི་དེའི་སྙིང་ཀུན་ནས་ཕྲོགས། །མེར་མེར་པོར་ནི་བླངས་པ་ཡིས། །སྒྲོལ་མའི་གཟུགས་བཞིན་ཡིད་འཕྲོག་པ། །དེ་ནི་གསུམ་པས་ཆོ་ག་བཞིན། །རླུང་གི་ལོ་མ་གཡོ་བ་ལྟར། །རང་གི་ཁྱིམ་དུ་རིམ་
པར་བསྒོམ། །གཅིག་གི་ངོ་བོར་གྱུར་པ་མཆོག །ལྷ་དང་ལྷ་ཡི་བསྒྲུབ་པའི་ཐབས། །མཚན་མོ་མདུན་དུ་བསྒྲུབ་པར་བྱ། །བྲན་གྱི་ངོ་བོས་འཇུག་འགྱུར་ཞིང་། །འཚོ་བ་དང་ནི་ནོར་གྱིས་ཀྱང་། །ས་སྟེངས་འཇིག་རྟེན་སླར་ཅི་སྨོས། །
འགྲུབ་འགྱུར་འདི་ལ་ཐེ་ཚོམ་མེད། །སྔགས་ཀྱི་དབང་པོ་བསྒྲུབ་པ་པོས། །རང་དབང་མེད་རྣམས་སྦྱར་མི་བྱ། །སྔགས་ཀྱི་རྒྱལ་དབང་བཟླས་བྱས་པས། །རྒྱལ་སྲིད་སྒྲུབ་པ་དེ་མཆོག་གོ། གཞན་དུ་གང་གིས་རབ་བསྒྲུབས་ན། །བུད་མེད་འདོད་

88-1-32a

པས་ལོང་བཞིན་མྱོས། །གལ་ཏེ་ལྷ་ཡི་བུ་མོ་ཡང་། །དེ་ཡི་སྐད་ཅིག་ཉིད་ལ་མཆི། །རིགས་ཀྱི་འཇིག་རྟེན་མགོན་པོའི་ལྔ་བཅུ་པ་ལས་ལྷའི་དེ་ཁོ་ན་ཉིད་ཀྱི་ལེའུ་སྟེ་གསུམ་པའོ།། །།
འཇིག་རྟེན་དབང་ཕྱུག་སྙིང་པོ་མཆོག །སྦ་ཞིང་སྲོག་བཞིན་ཡང་དག་བསྲུང་། །དམ་ཚིག་སྤྱོད་པ་དམན་པས་ཀྱང་། །འདྲེན་པའི་བདག་ཉིད་སྔགས་བཟླས་བྱ། །གཅིག་པུ་གྲོགས་དང་བྲལ་བྱས་ཏེ། །བློ་དང་ལྡན་པས་འབུམ་དུ་
བཟླས། །དེ་ཡི་མངོན་སུམ་འོང་འགྱུར་ཏེ། །འཁོར་ལོ་གསུམ་དུ་ལེགས་འགྲོ་མཆོག །འཇིག་རྟེན་ཐམས་ཅད་འབྱིན་པ་དང་། །སྡུད་པ་དང་ནི་ཡང་དང་ཡང་། །ནམ་མཁའི་གོ་འཕང་བདེར་འགྲོ་སྟེ། །དྲན་པས་འདི་ལ་ཐེ་ཚོམ་མེད། །
སེམས་དང་སེམས་མེད་སྦྱོར་བ་ནི། །སེམས་ནི་སེམས་མེད་ལ་དེས་མཐོང་། །སེམས་ནི་སེམས་མ་ལ་ཐིམ་ནས། །རབ་འཇུག་ལུས་སྐྱེས་མ་རྣམས་ལ། །ནད་བཅས་ནད་མེད་པ་དང་ནི། །ནད་མེད་དེ་བཞིན་ནད་བཅས་བྱེད། །ཞགས་
པ་ལྕགས་ཀྱུ་འཛིན་པའི་མཆོག །སྔགས་ཀྱི་རྒྱལ་པོའི་དབང་པོས་སོ། །གཞན་དུ་བྱིས་པ་རྨོངས་པ་ཡིས། །ཟླ་བ་འཛིན་པར་འདོད་པ་བཞིན། །གང་ཞིག་རང་བཞིན་སྦྱོར་བྲལ་བས། །ལས་རྣམས་བསྒྲུབ་པ་དེ་མཆོག་མིན། །
གང་གིས་གསུམ་གསུམ་གནས་སྐབས་གསུམ། །འཇིག་རྟེན་མགོན་པོ་ཉིད་རིག་ནས། །ཆུ་འཛིན་བྲལ་བའི་ནམ་མཁའ་བཞིན། །འཇིག་རྟེན་མགོན་པོའི་གོ་འཕང་འགྲོ། །ཞེས་པ་ནི་དཔལ་པདྨ་འབར་བའི་རྒྱུད་ཆེན་པོ་ལས་
ཕྱུང་བ་རིགས་ཀྱི་འཇིག་རྟེན་མགོན་པོ་ལྔ་བཅུ་པ་རྫོགས་སོ།། །། པཎྜི་ཏ་ཆེན་པོ་བི་མ་ལ་ཤྲཱི་བྷ་དྲའི་ཞལ་སྔ་ནས། བྱང་ཆུབ་རིན་ཆེན་གྱིས་བསྐུལ་ནས། ཤུད་ཀ་གྲགས་
པ་རྒྱལ་མཚན་གྱིས་དཔལ་ས་སྐྱའི་གཙུག་ལག་ཁང་ཆེན་པོར་བསྒྱུར་བའོ། །།    ། ཚལ་བ་བཀའ་འགྱུར་རྒྱུད་འབུམ་ལ་བསྟུན་ནས་ཞུས། གཉིས་ཞུས། །།

88-1-32b

༄༅༅། །རྒྱ་གར་སྐད་དུ།  ཨཱརྱ་ཏཱ་རེ་ཀུ་རུ་ཀུལླེ་ཀལ་པ།  བོད་སྐད་དུ།  འཕགས་མ་སྒྲོལ་མ་ཀུ་རུ་ཀུ་ལླེའི་རྟོག་པ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འཕགས་མ་ལྷ་མོ་
སྒྲོལ་མ་ལ་ཕྱག་འཚལ་ལོ། །སྒྲོལ་མ་འབྱུང་བའི་རྣལ་འབྱོར་རྒྱ་མཚོའི་རྒྱུད་ཀྱི་ནི། །གཞུང་དང་རྟོག་པ་ཉམས་ཤིང་ནུབ་པར་གྱུར་ནས་ཡང་། །སྒྲོལ་མ་འབྱུང་བའི་ཏིང་འཛིན་ཞེས་བྱ་རྒྱུད་ཀྱི་གཙོ། །དེ་ཡང་ནུབ་པར་གྱུར་ནས་རྟོག་པ་
འདི་ཡང་འབྱུང་། །སེམས་ཅན་མང་པོའི་དོན་དུ་རྣལ་འབྱོར་པ། །རྒྱས་པར་བསྟན་པའི་རྒྱུད་ལས་བསྡུས་བྱས་ནས། །རྟོག་པ་འདི་ནི་འཇིག་རྟེན་དབང་ཕྱུག་གསུངས། །བྱང་ཆུབ་སེམས་དཔའ་ཐམས་ཅད་མཉན་པར་གྱིས། །འཇིག་
རྟེན་སྐྱབས་མེད་གྱུར་ལ་རྣམ་བལྟས་ནས། །འགྲོ་ཀུན་དོན་བྱེད་པ་ཡི་ཚུལ་འདི་ནི། །སྡུག་བསྔལ་གསུམ་གྱིས་སྡུག་བསྔལ་གྱུར་བལྟས་ནས། །གུས་པ་ཆེན་པོས་ཁྱོད་ཀྱིས་བླང་བར་བྱོས། །འཇིག་རྟེན་རྣམ་རྟོག་ཞི་བར་བྱ་
ཕྱིར་རྟོག་པ་འདི། །སངས་རྒྱས་ཐམས་ཅད་ཀྱིས་ནི་རབ་ཏུ་གསུངས། །དཔལ་ལྡན་གྲུ་འཛིན་རི་ལ་འཇམ་དཔལ་དང་། །པད་མ་བསྣམས་དང་རྒྱལ་བར་བྱེད་པ་དང་། །སྒྲིབ་པ་རྣམ་སེལ་བློ་གྲོས་རྒྱ་མཚོ་དང་། །བྱམས་པ་ལ་སོགས་
ཚོགས་རྣམས་ཐམས་ཅད་ཀྱིས། །གང་ཡང་ཆོས་ཀྱི་ཚིགས་འདི་ཐོས་གྱུར་ནས། །རྗེས་སུ་ཡི་རང་སྤྱི་བོས་གུས་ཕྱག་བྱས། །རྒྱལ་བའི་སྲས་ཀྱིས་མངའ་བྱས་བསྟོད་པ་འམ། །ཡང་ན་གླུ་དང་དབྱངས་དག་བྱས་པ་ཡིས། །
སྣ་ཚོགས་གར་གྱིས་འདི་ནི་མཆོད་པ་བྱས། །གནོད་སྦྱིན་སྲིན་པོ་ཡི་དགས་འཇིག་རྟེན་དང་། །སྣ་ཚོགས་བུ་མོ་དང་ནི་རྒྱུ་སྐར་དང་། །ས་ཡི་དབང་དང་ལག་ན་རྡོ་རྗེ་དང་། །རླབས་རྣམས་སྣ་ཚོགས་ཅན་གང་གནས་པ་ཡི། །ཀླུ་ཡི་བུ་
མོ་ཟུར་གྱིས་བལྟ་བས་ལྟ་བ་དང་། །ས་འོག་སྐྱོང་དང་ལྷ་དབང་གྲུབ་པའི་བུ་མོས་མཆོད། །དྲི་ཟའི་རྒྱལ་མོ་ནུ་མ་ཤིན་ཏུ་རྒྱས་པ་དང་། །རིག་པ་འཛིན་དང་མི་འམ་ཅི་ཡི་ཆུང་མ་དང་། །གནོད་སྦྱིན་ཆུང་མ་རི་ཡི་བུ་མོའི་བུ་དག་ནི། །

88-1-33a

གང་ཡིན་བདག་དང་སྐྱབས་མེད་ཅེས་ནི་འདི་སྐད་སྨྲ། །གང་ཕྱིར་སྐྱབས་མེད་སྐྱབས་གྱུར་སངས་རྒྱས་བསྟན་པ་འདིར། །མགོན་མེད་མགོན་གྱུར་འཇིག་རྟེན་མགོན་པོ་ཁྱོད། །བདེ་བ་བསྐྱེད་ཅིང་ངོ་མཚར་ཆེ་གྱུར་གང་། །
མགོན་པོ་ཚོགས་ཀྱི་ཚིག་དབང་འདི་ཐོས་ནས། །ཉིད་ཀྱི་དབང་དུ་བྱེད་པའི་གསང་སྔགས་གསུངས། །སྔགས་ཀྱི་རྒྱལ་པོ་བུད་མེད་ཀུན་ཐོས་པས། །མཐར་ཐུག་སངས་རྒྱས་བདེ་བ་དུ་མ་འབྱུང་། །རྡོ་རྗེ་རེག་པས་ཁམས་ཀྱང་འཛག་
པར་འགྱུར། །ཟུར་གྱིས་ལྟ་བར་བྱེད་པས་ལྟ་བྱེད་ཅིང་། །རྐང་པ་དག་ཀྱང་ས་ལ་གྱ་ཚོམ་འདོར། །འདོད་ཆགས་ཤིན་ཏུ་བདོ་བས་ཁུ་འབབ་ཚེ། །འདི་ལྟར་མཐོང་ནས་ལྷ་ཡི་བུ་མོ་ལ། །འགྲོ་བ་དབང་བྱེད་ཀུ་རུ་ཀུལླེའི་སྔགས། །
རས་རིས་བྲི་དང་གསང་སྔགས་བསྒྲུབ་པའི་ཕྱིར། །དུས་ལ་བབ་པའི་ཚིག་འདི་མགོན་སྨྲོས་ཞེས། །དེ་ལྟར་བཅོམ་ལྡན་འཇིག་རྟེན་མགོན་པོས་གསུངས། །དེ་ཚེ་འཇིག་རྟེན་དབང་ཕྱུག་ལས་རྣམས་རབ་ཏུ་གསུངས། །ཀུ་རུ་ཀུ་
ལླེའི་རི་མོའི་ལུགས། །གང་ཞིག་བྲིས་པ་ཙམ་གྱིས་ནི། །སྒྲུབ་པ་པོ་ཡིས་འབྲས་ཐོབ་པ། །དེ་ནས་ཡང་དག་བཤད་པར་བྱ། །རི་མོ་མཁན་ནི་གང་ཞིག་གིས། །ཚེས་གྲངས་གང་དང་དུས་གང་ལ། །སྒྲོལ་མ་འབྱུང་ལས་བཤད་པ་བཞིན། །
དེ་ནི་བདག་གིས་བཤད་པར་བྱ། །རི་མོ་མཁན་ནི་གང་ཞིག་གིས། །གང་གི་མིག་ནི་དམར་འགྱུར་ཞིང་། །ལག་པ་དེ་བཞིན་རྐང་པ་དམར། །བྱ་ཡི་མིག་ཅན་ཨེ་ནྱའི་རྐང་། །དེས་ནི་སྒྲོལ་མ་བྲི་བར་བྱ། །དཔྱིད་ཀྱི་ཟླ་བ་དང་པོ་ཡི། །མེ་ནང་
མེ་ཡི་ཚེས་བརྒྱད་ཉིན། །ཐུན་ནི་ཕྱེད་དང་གཉིས་པ་ལ། །སྒྲོལ་མའི་མིག་ནི་བྲི་བར་བྱ། །མངར་གསུམ་བཟའ་ཞིང་ཉ་ལ་སོགས། །ཤ་དང་ཆང་ཡང་སྤང་བར་བྱ། །དམར་པོའི་གོས་ཀྱང་རྟག་ཏུ་བགོ། དམར་པོའི་དྲི་ཡིས་རྟག་ཏུ་བྱུག །
བྱམས་པའི་སེམས་ནི་བསྐྱེད་བྱས་ལ། །ཐོ་རངས་ཁྲུས་བྱས་བསངས་ནས་སུ། །ལན་གསུམ་གོས་ནི་བརྗེས་ནས་སུ། །དབང་དུ་བྱེད་མ་ཡང་དག་བྲི། །ཞལ་གཅིག་མིག་ནི་ཡངས་པ་དང་། །ཕྱག་བཞི་མ་ལ་གུར་གུམ་མདོག །

88-1-33b

བཅུ་དྲུག་ལོ་ལོན་སྒེག་བཅས་འདྲ། །བུད་མེད་སྒྱུ་མས་རྒྱགས་པ་བྲི། །གཞོན་ནུ་མ་དམར་སེར་མོས་བྱས་པའི་སྐུད་པ་ལས་རས་བྱས་ལ། དེ་དང་ཐགས་མཁན་གཉིས་ཀ་ཟན་དང་འོ་མ་བཟའ་བར་བྱ་ཞིང་། དེ་ནས་པདྨའི་གདན་ལ་
སྟོད་གཡོགས་དམར་པོའི་གོས་དང་བཅས་པས་རིན་པོ་ཆེའི་རྣ་ཆ་དང་། རིན་པོ་ཆེའི་ཅོད་པན་དང་། གཡས་པས་མི་འཇིགས་པ་སྦྱིན་པ་དང་། གཉིས་པས་མདའ་སྣ་རྩེར་འགེངས་པ། གཡོན་པས་གཞུ་འཛིན་པ་དང་། ཨུཏ་
པ་ལ་དམར་པོ་གཉིས་པ་ན་བསྣམས་པ་དང་། འོད་དཔག་མེད་ཅོད་པན་ན་བཞུགས་པ་རིའི་ཕུག་ན་གནས་པའི་ཀུ་རུ་ཀུལླེའོ། །ཀུ་རུ་ཀུལླེའི་འོག་ཏུ་ནི་སྒྲ་གཅན་འཛིན་ནོ། །དེའི་སྟེང་དུ་འདོད་པའི་དབང་ཕྱུག་ཆུང་མ་དང་བཅས་པའོ། །
འདོད་པའི་ལྷའི་སྟེང་དུ་ཟླ་བའི་དཀྱིལ་འཁོར་རོ། །དེ་ལ་པདྨ་དམར་པོའི་གདན་ནོ། །དེ་ལ་གནས་པའི་སྣ་ཚོགས་པའི་ཆ་བྱད་ཅན་གྱི་བཅོམ་ལྡན་འདས་མ་བྲིས་ལ། རས་རིས་རབ་ཏུ་གནས་པར་བྱའོ། །དེའི་མདུན་དུ་མཆོད་པ་རྣམ་པ་
བཅྭ་བརྒྱད་བྱས་ལ། ཡར་གྱི་ངོའི་ཚེས་བརྒྱད་ཟླ་བ་ཉའི་བར་དུ་བཟླས་པ་བྱའོ། །སྒྲོལ་མའི་སྙིང་པོ་ནི་འདི་ཡིན་ཏེ། ཨོཾ་ཀུ་རུ་ཀུལླེ་ཧྲཱིཿཧཱུྃ་སྭཱ་ཧཱ་ཞེས་བྱ་བའི་སྔགས་སོ། །དེ་ནས་སྔོན་དུ་བསྙེན་པ་འབུམ་ཙམ་བྱས་ལ། 
ཡང་སྟོན་ཟླ་ཐ་ཆུངས་སམ། དཔྱིད་ཟླ་འབྲིང་པོ་འམ། དབྱར་ཟླ་འབྲིང་པོའི་སངས་རྒྱས་ལ་མཆོད་པའི་དུས་ཚིགས་ཀྱི་ཉིན་པར་ཐོ་རངས་ཀྱི་ཁྲུས་བྱས་ལ་གསོ་སྦྱོང་བཟུང་ནས་མཆོད་པ་ཐམས་ཅད་ཀྱིས་མཆོད་ལ། ཉན་ཐོས་ཀྱི་
དགེ་འདུན་ལ་མཆོད་སྟོན་གསོལ། །དེ་ནས་ཐེག་པ་ཆེན་པོའི་གསང་སྔགས་པའི་ཚོགས་ལ་མཆོད་སྟོན་བྱས་ནས་ཡོན་ཕུལ་ལ། པུས་མོ་གཡས་པའི་ལྷ་ང་ས་ལ་བཙུགས་ནས། བླ་གོས་ཕྲག་པ་གཅིག་ཏུ་གཟར་ནས་ཅི་
ལྟར་འདོད་པའི་དངོས་གྲུབ་བླང་བར་བྱའོ། །ཉན་ཐོས་ཀྱི་དགེ་འདུན་གང་ན་བཞུགས་པ་དང་། ཐེག་པ་ཆེན་པོ་ལ་དགའ་བའི་ཚོགས་རྣམས་ལ་ཕྱག་བྱས་ནས་བཟོད་པར་གསོལ་ཏེ། གང་ན་བཅོམ་ལྡན་འདས་མའི་རས་རིས་

88-1-34a

བཀྲམ་པའི་ཕྱོགས་དེར་ཉེ་བར་སོང་ལ། དངོས་གྲུབ་གང་འདོད་པའི་དོན་དུ་རིག་པ་འཛིན་པས་བསམ་གཏན་དང་ལྡན་པར་གནས་ལ་ཡི་གེ་གྲངས་ཀྱི་འབུམ་བཟླས་པ་བྱའོ་ཆ་གཅིག་གིས་ནི་ཤེས་རབ་འཕེལ། །
ཆ་གཉིས་ཀྱིས་ནི་དབང་དུ་བྱེད། །གང་ཞིག་ཆ་ནི་གསུམ་པ་ཡིས། །མིས་ནི་དུག་ཀྱང་འགུགས་པར་འགྱུར། །མྱོས་ཤིང་འགྱིང་བའི་བུད་མེད་རྣམས་དང་ནི། །འཇིག་རྟེན་ཐམས་ཅད་ཀྱིས་ནི་མཆོད་པར་འགྱུར། །སྦྱོར་བ་གོམས་
པས་ལྷ་མོ་མཛེས་རྣམས་ལ། །སྔགས་འཆང་དེས་ནི་ཅི་ལྟར་འདོད་པར་སྤྱོད། །དེ་ཡི་མིང་ཙམ་གྱིས་ནི་མཚུངས་མེད་དུག་ཅན་འབྲོས་པ་དང་། །གདེངས་ཀའི་གཙོ་བོའི་འོད་ཀྱིས་དཔལ་ལྡན་དག་ཀྱང་ཉ་བཞིན་འགྱུར། །བཟླས་བརྗོད་
ལྡན་པ་ཡི་ནི་ངག་གི་དབང་ཕྱུག་བྱེད་འགྱུར་བས། །རིག་པས་འགྱིང་བའི་སྟོབས་དང་ལྡན་པའི་མཁས་པའང་ལན་མེད་བྱེད། །རིག་པ་འཛིན་པ་གླང་པོ་རྟ་ཡི་རྒྱབ་ཏུ་ཞོན་པ་དང་། །རིག་མ་མཛེས་མས་ལེགས་པར་འཁྱུད་ཅིང་མགུལ་
ནས་འཇུས་པ་ལས། །སྔགས་རིག་པ་ཡི་གཙོ་བོ་ཡི་ནི་སྟོབས་ཀྱིས་རྒྱལ་བར་འགྱུར། །མཐར་གྱུར་པ་ཡི་རྒྱལ་སྲིད་ལོངས་སྤྱོད་དག་ལ་ཡིད་ཀྱིས་སྤྱོད། །འདོད་པའི་ལྷ་ལས་དགའ་བའི་བུ་ལ་སོགས་པ་རི་ཁྲོད་མ། །སྲེད་མེད་བུ་ལས་དཔའ་
མོ་མི་ཕྱེད་པ་ལས་བདེ་སོགས་དང་། །ཚོགས་བདག་ལས་ནི་དྲི་མེད་དབྱངས་ཀྱི་དབང་ཕྱུག་དཀར་མོ་དང་། །ས་འཛིན་ལྷ་ལས་ཕུན་ཚོགས་མངའ་བ་སྔགས་ཀྱིས་རྣམ་རྒྱལ་བྱེད། །གསང་སྔགས་ལྡན་པར་བཅོམ་ལྡན་འདས་མ་གང་ཞིག་
སྒོམ་བྱེད་པ། །དེས་ནི་སྣ་ཚོགས་གཏེར་དང་གསེར་དང་དངུལ་དང་རྣ་ཆ་དང་། །གོས་ལ་སོགས་པའི་ནོར་རྣམས་ཀུན་ལ་ཆེད་དུ་གང་བསམས་པ། །སེམས་ཀྱིས་ཐམས་ཅད་མ་ལུས་ཀུན་ནས་ལོངས་སྤྱོད་བྱེད། །རྒྱལ་ལས་རྒྱལ་སྲིད་དབང་པོའི་
ཡུལ་འདས་ཤིང་ལས་འབྲས་བུ་དང་། །ཀླུ་དང་ཆུ་ཀླུང་རྒྱ་མཚོ་རྣམས་ལས་ཆུ་རྣམས་འགུགས། །སྔགས་དང་ལྡན་པས་འཐུང་ཞིང་ཟས་ལ་སྔགས་ཀྱིས་དག་པར་བྱེད། །སྐྱེ་བོ་སྔགས་མེད་པར་ནི་ལོངས་སྤྱོད་གྲུབ་པ་མེད། །ནགས་

88-1-34b

སྐྱེས་གླང་པོ་རྟ་མཆོག་རིགས་དང་ལྡན་པ་དང་། །དུག་བཅས་གདེངས་ཀ་ཅན་གྱི་སྦྲུལ་མཆོག་དང་། །ཆུ་སྲིན་ཆུ་གླང་སྟག་དང་བསེ་དག་དང་། །རང་གི་སྔགས་ཀྱི་སྟོབས་ཀྱིས་བཀུག་ནས་ནི། །ཞོན་ཡང་ངོ་མཚར་མེད་པར་བྱས་པ་ཡི་ནི་མིག་དག་གིས། །
ལྟ་བར་གལ་ཏེ་གསང་སྔགས་གྲུབ་པ་དེ་ཡིས་མཐོང་བར་འགྱུར། །གལ་ཏེ་སྙིང་རྗེའི་ལྟ་བས་འཇིག་རྟེན་འདི་ལྟར་སྡུག་བསྔལ་བས། །རྒུད་པར་གྱུར་པའི་མི་མཉམ་པ་ལ་བསྔགས་པ་དེས། །ཡིད་བཞིན་ནོར་བུ་བཞིན་དུ་འཇིག་རྟེན་ལ་
ཕན་སྒྲོན་མ་ཡིན། །འཇིག་རྟེན་མ་ལུས་སྒྲོན་མེར་བྱེད་ཅིང་ཞི་བར་བྱེད། །བདུད་རྣམས་བཅོམ་ནས་ནོར་གྱི་ཆར་རྒྱུན་འབེབས་པར་བྱེད། །དཔག་བསམ་ཤིང་དུ་གྱུར་ནས་འགྲོ་རྣམས་ཅི་འདོད་སྦྱིན་པར་བྱེད། །ནོར་གྱི་དབང་ཕྱུག་མ་ལུས་པ་ཡི་
ནོར་རྣམས་ཀུན་བཀུག་ནས། །སེམས་ཅན་ཀུན་ལ་ཕན་པའི་ཕྱིར་དུ་སྦྱིན་པར་བྱེད། །དེ་བཞིན་ཕོངས་པའི་འཇིག་རྟེན་རྣམས་ཀྱི་ཆེད་དུ་གོས་དག་དང་། །སྟན་དང་ཁྱིམ་དང་བླ་རེ་དག་ཏུ་སྒྲོལ་མས་མཛད་པ་དང་། །རྒྱ་མཚོའི་གླིང་དུ་ཚོང་བའི་གྲུ་
ཞིག་གྱུར་པའི་ཕོངས་པ་ལ། །གཟིངས་དང་གྲུ་ལ་སོགས་པར་སྒྲོལ་མས་མཛད་པར་འགྱུར། །སྒྲོལ་མ་དེ་བསྒོམས་རྣལ་འབྱོར་པ། །དང་པོ་སྡུག་བསྔལ་ལྷན་ཅིག་གྱུར། །དེ་སྤངས་ནས་ནི་ཅུང་ཞིག་ན། །མིས་ནི་སྟོན་མོ་རྙེད་པར་འགྱུར། །
གཉིས་པར་གོས་ནི་རྙེད་པར་འགྱུར། །དེ་བཞིན་བཙུན་མོ་དང་ཡང་འཕྲད། །དེ་ནས་སོ་རྩི་ལོངས་སྤྱོད་འགྱུར། །མ་བླངས་པར་ཡང་ཅི་འདོད་སྤྱོད། །གལ་ཏེ་ཚངས་སྤྱོད་ཡིན་ན་ཡང་། །ལྷ་མཆོག་བསྐྱེད་པའི་བུ་མོ་སྤྱོད། །སེམས་ཅན་
གསོད་ལ་དགའ་བ་ཡིས། །བསྟན་པ་འདི་ལ་འགྲུབ་མི་འགྱུར། །དགེ་བ་བཅུ་ལ་དགའ་འགྱུར་ཞིང་། །ཐེག་པ་ཆེ་ལ་སེམས་གཅིག་པས། །རྡོ་རྗེ་ཆོས་ཀྱི་བཀའ་བཞིན་དུ། །དངོས་གྲུབ་མཆོག་ནི་དེས་སྤྱོད་འགྱུར། །འདི་ནི་རས་རིས་ལ་
འཇུག་པའི་རྟོག་པ་སྟེ་དང་པོའོ།། །། ཆོས་མཆོད་པ་ཡི་སྦྱོར་བ་ཡིས། །གང་གི་ཆོས་ཉིད་བརྙེས་གྱུར་ན། །ཆོས་ཀྱི་དབྱིངས་སུ་རང་གྱུར་པ། །དེ་ནས་ཡང་དག་བཤད་པར་བྱ། །དེའི་རྗེས་ལ་

88-1-35a

དཔག་བསམ་ཤིང་གི་སྒྲུབ་པ་འབྱུང་བར་འགྱུར་རོ། །བྲག་གི་ཡི་གེ་ལས་བྱུང་བ། །དཔག་བསམ་ཤིང་ནི་རྣམ་པར་བསྒོམ། །ཨུཏྤལ་ཡོངས་སུ་གྱུར་པ་ལས། །ཤིང་ནི་གཡོན་དུ་བསྒོམ་པར་བྱ། །སྣ་ཚོགས་ནོར་གྱི་ཆར་པ་དག །
ནམ་མཁའི་དཀྱིལ་ནས་འབབ་པ་ཡིས། །འདོད་པའི་བསམ་པ་རྫོགས་བྱེད་པ། །དེ་ལྟར་བསྒོམས་ན་ནོར་བདག་འགྱུར། །གླིང་བཞི་པ་ཡི་སེམས་ཅན་རྣམས། །སེམས་ཀྱི་འོད་ཟེར་གྱིས་བཀུག་ནས། །རྟག་ཏུ་རིན་ཆེན་བདུན་རང་
བཞིན། །དེ་དག་ལ་ནི་རབ་སྦྱིན་བྱ། །ཡོངས་ཀྱི་གཙོ་བོ་རིན་ཆེན་དང་། །དེ་བཞིན་རིན་ཆེན་རྒྱ་མཚོ་སྐྱེས། །བུད་མེད་རིན་ཆེན་རྟ་རིན་ཆེན། །དེ་བཞིན་རལ་གྲི་རིན་ཆེན་དང་། །གླང་པོ་རིན་ཆེན་སོགས་རིན་ཆེན། །སངས་རྒྱས་རྣམས་ལ་ཡིད་ཀྱིས་
དབུལ། །བུད་མེད་རྒྱན་གྱིས་བརྒྱན་བྱས་ལ། །སྣ་ཚོགས་གཟུགས་ཅན་འགྱིང་བ་རྣམས། །སངས་རྒྱས་འབྲས་བུ་འདོད་རྣམས་ཀྱིས། །སངས་རྒྱས་རྣམས་ལ་རྟག་ཏུ་དབུལ། །འདིས་ནི་སངས་རྒྱས་ཐམས་ཅད་དང་། །རིག་པ་འཛིན་པ་
ཐོབ་པར་འགྱུར། །རིན་པོ་ཆེ་ནི་ཡོངས་རྒྱས་པའི། །ཡོངས་ཀྱི་གཙོ་བོ་ནོར་དབང་ཕྱུག །སངས་རྒྱས་འབྲས་བུ་འདོད་པ་ཡིས། །སངས་རྒྱས་རྣམས་ལ་དབུལ་བར་བྱ། །དེ་བཞིན་རིན་ཆེན་གཞན་དག་ཀྱང་། །གུས་དང་བཅས་པས་
ཡོངས་བཏང་ན། །རྡོ་རྗེ་ཆོས་སུ་གྱུར་ནས་ནི། །སེམས་ཅན་ཀུན་གྱི་དོན་བྱེད་འགྱུར། །འདི་ནི་དཔག་བསམ་ཤིང་གི་སྒྲུབ་པའི་ཐབས་སོ། །སེམས་ཉིད་སངས་རྒྱས་ཐམས་ཅད་དོ། །སེམས་ཉིད་ཀྱིས་ནི་རྣམ་པར་གྲོལ། །སེམས་ཀྱིས་འཆིང་
བ་རྣམས་ལས་ཐར། །སེམས་ཀྱིས་གྲོལ་བ་དང་ལྡན་འགྱུར། །སེམས་མ་གཏོགས་པར་དངོས་དོན་རྣམས། །གཞན་དག་གཞན་པར་མ་མཐོང་སྟེ། །སངས་རྒྱས་ཉིད་དང་དངོས་གྲུབ་ཀུན། །གང་ཕྱིར་ཕུན་ཚོགས་གཞན་མ་མཐོང་། །
གང་ཡང་སྣོད་དང་སེམས་ཅན་རྣམས། །འབྱུང་དང་འབྱུང་ལས་གྱུར་པ་དག །ཟག་མེད་ལྷག་པར་མཐོང་བ་ཡིས། །སེམས་ཙམ་ཡིན་ཞེས་རབ་ཏུ་བསྒྲགས། །དེ་བས་འབད་པ་ཐམས་ཅད་ཀྱིས། །སེམས་ཀྱི་མེ་ལོང་ཕྱིས་བྱས་ན། །

88-1-35b

རང་བཞིན་གློ་བུར་བ་ཡི་སྐྱོན། །རིམ་གྱིས་རབ་ཏུ་ཟད་པར་འགྱུར། །དབྱངས་ཡིག་དང་པོ་ལས་བྱུང་བ། །དྲི་མེད་རྫོགས་པའི་ཟླ་བ་སྟེ། །སེམས་ཉིད་ཟླ་བར་བསྒོམ་བྱས་ནས། །དེ་ཡི་སྟེང་དུ་ས་བོན་དགོད། །དྲོ་བ་རྣམས་ཀྱི་བཞི་པ་
ན། །མེ་ཡི་མདོག་གི་སྟེང་ན་གནས། །ཡི་གེ་ཨི་དང་ཡང་དག་ལྡན། །ནམ་མཁའ་གཉིས་ཀྱིས་རྣམ་པར་བརྒྱན། །དེ་ཡི་སྣ་ཚོགས་འོད་རྣམས་ཀྱིས། །འགྲོ་བའི་དྲི་མ་མེད་བྱས་ནས། །སྟོང་གསུམ་འདི་སོགས་མཁའ་དབྱིངས་
ཏེ། །ཀུ་རུ་ཀུལླེའི་རིར་ཞུགས་པས། །དེ་ཡིས་སྒྲོལ་མ་བསྐུལ་ནས་ནི། །བཀུག་ནས་མདུན་དུ་གནས་པར་བྱེད། །དེ་ནས་མཁས་པས་ས་བོན་ལ། །མཆོད་པ་ཆེན་པོའི་སྤྲིན་རྣམས་སྤྲོ། །མེ་ཏོག་སྤོས་དང་མར་མེ་དང་། །དེ་བཞིན་
དྲི་དང་ལྷ་བཤོས་སོགས། །ཕྱག་རྒྱ་ཕྲེང་བ་དེ་བཞིན་དུ། །གར་དང་གླུ་ཡིས་མཆོད་སོགས་མཆོད། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་
རྒྱས་བྱང་ཆུབ་ཡིད་ཀྱིས་བཟུང་། །སྔགས་འདི་ལན་གསུམ་བརྗོད་ནས་ནི། །དེ་ནས་གཤེགས་སུ་གསོལ་བར་བགྱི། །སེམས་ནི་བྱམས་པས་གནས་བྱས་ལ། །སླར་ཡང་དེར་ནི་གཞག་པར་བྱ། །སྙིང་རྗེའི་སེམས་ནི་བསྐྱེད་
བྱས་ནས། །རབ་དགའི་སེམས་ཀྱང་བསྐྱེད་པར་བྱ། །ཕྱི་ནས་ཐམས་ཅད་བཏང་སྙོམས་ལ། །སེམས་ཙམ་ལ་ནི་མཉམ་པར་གཞག །ཐ་མལ་རྣམ་པར་སྤངས་བའི་ཕྱིར། །སེམས་ཀྱང་སླར་ཡང་སྟོང་པར་བྱ། །ཡང་སྲིད་ལེན་
པའི་ཕུང་པོ་ལྔ། །སྟོང་པ་ཉིད་ཀྱི་མེ་ཡིས་བསྲེག །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧཾ། ཡུད་ཙམ་སྟོང་པའི་རྣལ་འབྱོར་ཉིད། །བྱས་ནས་སེམས་ནི་ངལ་སོས་བྱ། །སྔོན་གྱི་དམ་བཅས་དྲན་བྱས་ནས། །ས་བོན་
ཙམ་ཞིག་ཡང་དྲན་བྱ། །གཅིག་པུ་མྱ་ངན་འདས་པ་ཡིས། །སེམས་ཅན་བསླུས་པར་འགྱུར་བའི་ཕྱིར། །སྲིད་པའི་རྒྱ་མཚོ་མཐའ་མེད་ལས། །བདག་གིས་དེ་དག་ཅི་ལྟར་བསྒྲལ། །འདི་ལྟར་བསམས་ནས་བརྩེ་ལྡན་དེས། 

88-1-36a

སེམས་མེད་པ་ཡི་སྟོང་པ་སྡང་། །ཆོས་ཀྱི་དབྱིངས་ཀྱི་རང་བཞིན་སེམས། །སེམས་ཉིད་ཀྱིས་ནི་བསྐྱེད་པར་བྱ། །སངས་རྒྱས་བྱིན་རླབས་ལས་ས་བོན། །དེ་ལ་ཨུཏྤལ་ཞེས་བྱར་འགྱུར། །ཨུཏྤལ་དཀྱིལ་དུ་ཟླ་བའི་
གཟུགས། །ཡི་གེ་ཨ་ལས་བྱུང་བའོ། །སླར་ཡང་ཟླ་བ་དེར་ས་བོན། །དེ་ལས་འོད་ཟེར་འཕྲོས་གྱུར་པ། །དེ་ཡིས་མ་ལུས་འཇིག་རྟེན་ཁམས། །རྣམ་པར་སྦྱངས་པར་བསྒོམ་པར་བྱ། །དེ་ཡིས་སྦྱངས་ཤིང་གསལ་བྱས་ནས། །འོད་
ཟེར་ཀུན་གྱིས་སངས་རྒྱས་ཚོགས། །ཨུཏྤལ་ལ་ཞུགས་བསྒོམ་པར་བྱ། །དེ་ལས་སྒྲོལ་མ་འབྱུང་བར་འགྱུར། །བསྟན་འདྲའི་ལྷ་མོ་བཙོད་མདོག་ཅན། །རྒྱན་རྣམས་ཀུན་གྱིས་རྣམ་བརྒྱན་པས། །དམ་ཚིག་གཟུགས་ནི་
མཉམ་བསྐྱེད་ནས། །ཡེ་ཤེས་འཁོར་ལོ་ཡང་དག་བཀུག །ཡུད་ཙམ་གྱིས་ནི་ངེས་རྫོགས་པའོ། །ཡེ་ཤེས་འཁོར་ལོ་མདུན་གནས་པ། །དམ་ཚིག་ཕྱག་རྒྱའི་སྦྱོར་བ་ཡིས། །ཁ་ཡི་ལམ་ནས་གཞུག་པར་བྱ། །ལག་པ་ཐལ་
མོ་སྦྱར་བྱས་ནས། །མཐེའུ་ཆུང་གཉིས་ནི་བསྒོམ་པར་བྱ། །གུང་མོ་གཉིས་ནི་རྩེ་མོར་སྦྱར། །རྩེ་མོའི་ནང་དུ་མིང་མེད་གཞུག །མཛུབ་མོ་གཉིས་ནི་དབུ་མར་སྦྱར། །མཐེ་བོང་གཉིས་ནི་འོག་ཏུ་བཀུག །དམ་ཚིག་ཕྱག་རྒྱ་འདི་
བཅིངས་ནས། །འཁོར་ལོ་བཀུག་ནས་གཞུག་པར་བྱ། །སངས་རྒྱས་རྣམས་ལ་ཚིགས་བཅད་འདིས། །དབང་བསྐུར་བར་ནི་གསོལ་བ་གདབ། །བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཆེན་གསོལ་མཛད་པ། །བདག་ཀྱང་
བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །རྒྱལ་བའི་དབང་བསྐུར་ཞེས་བྱ་བས། །སྤྱན་ལ་སོགས་པ་ལྔ་པའོ། །རྒྱལ་པོའི་མེ་ཏོག་དབང་བསྐུར་ཞིང་། །ཆེན་པོར་གྱུར་པ་དེ་སྩོལ་མཛོད། །རྡོ་རྗེ་ཆེན་པོས་
དབང་བསྐུར་བ། །ཁམས་གསུམ་པོ་ཡིས་ཕྱག་བྱས་པ། །གསང་བ་གསུམ་གྱི་གནས་ལས་བྱུང་། །སངས་རྒྱས་ཀུན་གྱིས་སྦྱིན་པར་བྱ། །སངས་རྒྱས་སྒྲོལ་མ་དབང་བསྐུར་བས། །ཆོས་ནི་གཙུག་གི་ནོར་བུར་འགྱུར། །

88-1-36b

འོད་ཟེར་དམར་པོ་སྣ་ཚོགས་ཀྱིས། །འགྲོ་བ་གསུམ་པོ་སྣང་བར་བྱེད། །དབང་བསྐུར་རིན་ཆེན་ཐོབ་འགྱུར་ན། །དངོས་གྲུབ་ཐམས་ཅད་རབ་སྒྲུབ་བྱེད། །ཇི་ལྟར་སླར་བསྟན་ཆོ་ག་ཡིས། །ལོ་ཕྱེད་བརྟན་པར་བརྩམས་ནས་ནི། །
གཏོར་མ་དུས་གསུམ་གཏང་བར་བྱ། །སྔགས་འདི་ཡིས་ནི་ཁར་བ་འམ། །ཁུར་བ་ལ་སོགས་ཆོ་ག་ཡིས། །རྨི་ལམ་མཚན་མ་ཐོབ་པར་འགྱུར། །རལ་གྲི་ས་འོག་དངོས་གྲུབ་དང་། །མི་སྣང་བ་དང་བཅུད་ལེན་དང་། །མི་
མཐོང་བ་དང་མཁའ་སྤྱོད་ཉིད། །དེ་བཞིན་རྐང་བྱུག་མིག་སྨན་དང་། །རྨི་ལམ་མཚན་མ་སྟོན་འགྱུར་ཞིང་། །དངོས་གྲུབ་རང་ཉིད་འབྱུང་བར་འགྱུར། །གལ་ཏེ་དེ་ལ་དགའ་འགྱུར་ན། །གྲུབ་པ་ཕྲ་མོ་སྒྲོལ་མས་གྲུབ། །འཁོར་
ལོས་སྒྱུར་ནས་རྒྱལ་སྲིད་དང་། །དབང་པོའི་ལོངས་སྤྱོད་ཐམས་ཅད་བྱེད། །སྒོམ་དང་བཟླས་པར་ལྡན་པ་ལ། །རྨི་ལམ་དུ་ཡང་རབ་གྲུབ་བྱེད། །ཟླ་དྲུག་ཐ་མའི་ཟླ་གཅིག་གོ། མཚན་གཅིག་རངས་པར་བཟླས་བྱས་ཏེ། །
ཨུཏྤལ་ཕྱག་རྒྱ་བཅིངས་ནས་ནི། །བཟླས་ནས་ཕྱག་རྒྱ་ཡུད་ཀྱིས་འབར། །ཕྱག་རྒྱ་འདི་ཡི་མཐུ་ཡིས་ནི། །བཙུན་མོ་དང་བཅས་ཚངས་པ་དང་། །དབང་པོ་ཉེ་དབང་དྲག་པོ་སོགས། །བཀུག་ནས་དབང་དུ་འགྱུར་བར་
བྱེད། །དེང་ནས་བརྩམས་ནས་དངོས་གྲུབ་ཀུན། །བདག་འཁོར་འཆིང་བ་ལས་གྲོལ་འགྱུར། །ཆུ་དང་འདམ་གྱི་སྐྱོན་དག་གིས། །པདྨ་གོས་པར་མི་འགྱུར་ལྟར། །དངུལ་ཆུ་རེག་ནས་དུ་མར་འགྱུར། །བསྡུས་ནས་སླར་ཡང་གཅིག་ཏུ་
འགྱུར། །ཐམས་ཅད་མཁྱེན་པ་ཉིད་འགྱུར་ན། །དངོས་གྲུབ་ཐོབ་པའི་སེམས་དེ་བཞིན། །གྲུབ་པའི་དངུལ་ཆུས་རེག་གྱུར་ནས། །ཟངས་མ་གསེར་དུ་འགྱུར་བ་བཞིན། །གྲུབ་པའི་གསང་སྔགས་ཀྱིས་རེག་ནས། །སྔགས་
པ་སངས་རྒྱས་སྐུར་ཡང་འགྱུར། །ལྷ་ཡི་དབང་ཕྱུག་དུ་འགྱུར་ཞིང་། །ཁམས་གསུམ་ཀུན་གྱི་དབང་ཕྱུག་འགྱུར། །སངས་རྒྱས་རིགས་སུ་བྱུང་ནས་ནི། །འཁོར་ལོ་བསྐོར་བར་ཡང་འགྱུར་རོ། །བལྟམ་དང་རབ་ཏུ་འབྱུང་

88-1-37a

མཛད་པ། །དཀའ་བ་སྤྱོད་པའི་སྤྱོད་མཛད་ཅིང་། །བྱང་ཆུབ་སྤྱོད་པའང་སྤྱོད་མཛད་ན། །སངས་རྒྱས་ཉིད་ཀྱང་དྲན་པར་མཛད། །ལྷ་ལས་བབས་དང་སྤྲུལ་པ་དང་། །ཆོས་ཀྱི་འཁོར་ལོ་བསྐོར་བ་དང་། །མྱ་ངན་
འདས་པ་ཆེན་པོ་དང་། །དུར་ཁྲོད་གཤེགས་པ་དེ་བཞིན་ནོ། །འཇིག་རྟེན་གསུམ་དུ་ལུས་སྤངས་ནས། །རྒྱལ་བ་ལོངས་སྤྱོད་རྫོགས་སྐུ་ཡིས། །གནས་གཙང་མར་ནི་སླར་གཤེགས་ནས། །སྤྲུལ་པར་བྱུང་བའི་སྐུ་ཡང་འོང་། །
གླེགས་བམ་རས་རིས་རིམ་པ་ཡིས། །ཆོས་ཀྱི་སྐུ་ཡང་འཇུག་པར་མཛད། །གང་གིས་དེ་ཡི་གྲུབ་པའི་སྔགས། །སངས་རྒྱས་རྣམས་ཀྱིས་དེ་ཉིད་གསུངས། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་
ཅད་ཀྱིས་དེ་ཉིད་ཀྱི་ཐུགས་ལ་རྣམ་པར་བརྟགས་ནས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ལག་ན་རྡོ་རྗེ་ཇི་ལྟར་ན་སངས་རྒྱས་བཅོམ་ལྡན་འདས་ཀྱིས་རྡོ་རྗེའི་སྐུ་
ཆོས་ཀྱི་དབྱིངས་ཀྱི་སྐུ་སའི་ཕྱོགས་གང་དུ་དུས་བྱེད་པར་འགྱུར་བ་ཡིན། །དེ་ནས་ལག་ན་རྡོ་རྗེས་སངས་རྒྱས་དང་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་གསོལ་ཏོ། །གང་ཡང་བྱང་ཆུབ་སེམས་དཔའ་དག་གིས་འདི་
སྐད་དུ། ཅི་ལྟར་ན་སངས་རྒྱས་བཅོམ་ལྡན་འདས་རྡོ་རྗེའི་སྐུ་ཆོས་ཀྱི་དབྱིངས་ཀྱི་སྐུ་མི་ཕྱེད་པའི་སྐུ་སའི་ཕྱོགས་འགའ་ཞིག་ཏུ་དུས་བྱེད་པར་འགྱུར་བ་ཡིན་ཞེས་སྨྲ། དེས་འདི་སྐད་ཉོན་ཅིག །བྱང་ཆུབ་སེམས་དཔའ་དེ་དག་
གང་མྱ་ངན་ལས་འདས་པ་ཞེས་བྱ་བ་དེ་ནི་བདེ་བ་ཅན་དུ་འགྲོ་བའོ། །དེ་ནས་བྱང་ཆུབ་སེམས་དཔའ་རྣམས་ཀྱིས་སྨྲས་པ། ཅི་ལག་ན་རྡོ་རྗེ་སངས་རྒྱས་བཅོམ་ལྡན་འདས་རྣམས་ཆོས་སྐུ་སྤངས་ནས་བདེ་བ་ཅན་དུ་འགྲོ་བ་
འམ། རིགས་ཀྱི་བུ་འོན་ཏེ་སྤྲུལ་པའི་སྐུ་སྤངས་ནས་ལོངས་སྤྱོད་རྫོགས་པའི་སྐུས་བདེ་བ་ཅན་དུ་འགྲོ་བར་འགྱུར། ལག་ན་རྡོ་རྗེ་ཆོས་ཀྱི་སྐུ་སྤངས་ནས་འགྲོ་བར་འགྱུར་ཞེས་བྱ་བ་དེ་ཇི་ལྟ་བུ་ཡིན། ལག་ན་རྡོ་རྗེས་

88-1-37b

སྨྲས་པ། ཅི་ལྟར་སྒྱུ་མ་མཁན་གྱི་སྐྱེས་བུ་གང་ཞིག་གིས་དགོས་པའི་དོན་བསྒྲུབ་པའི་ཕྱིར་སྒྱུ་མ་སྤྲུལ་ནས་དགོས་པ་སྒྲུབ་པར་བྱེད་དོ། །དེ་བཞིན་དུ། གདོད་ནས་གྲུབ་པའི་སངས་རྒྱས་རྣམས། །སེམས་ཅན་ཡོངས་སུ་གཟུང་བའི་ཕྱིར། །
འཁོར་ལོས་སྒྱུར་བ་འདས་གྱུར་ནས། །སྐྱེ་བ་ཡོངས་སུ་འཛིན་པར་མཛད། །གང་ཚེ་སངས་རྒྱས་འདས་པ་ན། །དེ་ཚེ་འཁོར་ལོས་སྒྱུར་བ་འབྱུང་། །དེ་གཉིས་མེད་པར་འཇིག་རྟེན་འདིར། །ནམ་ཡང་འབྱུང་བ་མ་ཡིན་ནོ། །གདུལ་བྱའི་
འཇིག་རྟེན་ལ་བརྟེན་ནས། །རྐང་གཉིས་མཆོག་གིས་བརྟུལ་ནས་ནི། །ལོ་ནི་བརྒྱད་ཅུར་བཞུགས་མཛད་དེ། །སངས་རྒྱས་རྒྱལ་བའི་གནས་སུ་གཤེགས། །སངས་རྒྱས་སྒྱུ་མ་སྤངས་ནས་ནི། །རྒྱལ་པོའི་ཕོ་བྲང་བདེ་ཆེན་དུ། །རབ་ཞི་
བདེ་བ་ཆེན་པོ་ལ། །ཀུན་དུ་དགའ་བའི་གཟུགས་ཀྱིས་བཞུགས། །བྱེད་པོ་རྟག་པ་གཅིག་པུས་བཞུགས། །ཡིན་སྙམ་དྲང་སྲོང་རྣམས་སེམས་ཏེ། །དེ་ལྟའི་ངོ་བོ་དེ་མིན་ཞེས། །དེ་ནི་སྐད་ཅིག་བསྡོམས་པར་འདོད། །བདག་ཏུ་འཛིན་པས་
འཁྲུལ་པ་རྣམས། །རྟག་ཏུ་རྟག་པའི་དོན་འདོད་པ། །མི་རྟག་ཉིད་ལ་འཇུག་བྱའི་ཕྱིར། །རྒྱལ་བ་རྣམས་ཀྱི་སྐུ་གཏོང་མཛད། །དངོས་པོ་ཀུན་གྱི་དངོས་བདག་ཉིད། །ཐུགས་ཀྱིས་ཐམས་ཅད་མཁྱེན་ཏེ་དག །འདི་དག་འདི་གནས་མ་
ཡིན་ཞེས། །བྱས་པའི་ངེས་པ་ཡོད་མ་ཡིན། །ཀུན་རྫོབ་བདེན་པ་ལ་བརྟེན་ནས། །སྟོང་གསུམ་འདི་སོགས་གདུལ་བྱ་ལ། །སངས་རྒྱས་རྣམས་ཀྱིས་ཆོས་བསྟན་པ། །ནམ་མཁའ་མཉམ་པར་རབ་ཏུ་འཇུག །སངས་རྒྱས་འབྱུང་བ་དེ་
ཉིད་མིན། །སངས་རྒྱས་འགགས་པའང་དེ་བཞིན་ཏེ། །ཐམས་ཅད་རོ་གཅིག་གྱུར་པ་ཡི། །འབྱུང་དང་འཇིག་པའི་རང་བཞིན་ནོ། །དེ་ནི་ཆོས་དབྱིངས་གཟུགས་གཅིག་སྟེ། །སྒྲིབ་པ་ལྔ་པོ་སྤངས་པའོ། །ཟབ་ཅིང་རྒྱ་ནི་ཆེ་བའི་གཟུགས། །
དེ་ཉིད་ངོ་བོར་དེ་ཉིད་བཞུགས། །གཉིས་ཀ་ཡོད་པ་མ་ཡིན་ཕྱིར། །གདོད་ནས་ཡོད་པ་མ་ཡིན་ནོ། །དེ་ནི་གདོད་ནས་མ་སྐྱེས་པས། །སྐྱེ་བ་མ་ཡིན་འགག་མ་ཡིན། །བྱང་ཆུབ་སེམས་དཔའ་རྣམས་ཀྱིས་སྨྲས་པ། ལག་ན་རྡོ་རྗེ་སངས་རྒྱས་

88-1-38a

བཅོམ་ལྡན་འདས་ཁམས་གསུམ་ལ་རྗེས་སུ་སྟོན་པ་མཛད་པ། སྐྱེ་བ་མེད་པ་འགག་པ་མེད་པ་ཅི་ལྟ་བུ་ཡིན། སྨྲས་པ། ཀྱཻ་བྱང་ཆུབ་སེམས་དཔའ་རྣམས་དེ་ཇི་སྙམ་དུ་སེམས། གང་སངས་རྒྱས་ཇི་སྙེད་པ་དེ་
དག་ཞིག་ཡོད་པ་ཡིན་ནམ། འོན་ཏེ་མེད་པ་ཞིག་ཡིན། བྱང་ཆུབ་སེམས་དཔའ་རྣམས་ཀྱིས་སྨྲས་པ། ལག་ན་རྡོ་རྗེ་སངས་རྒྱས་རྣམས་ནི་ཡོད་པ་ཡང་མ་ཡིན་མེད་པ་ཡང་མ་ཡིན་ནོ། །ལག་ན་རྡོ་རྗེས་སྨྲས་པ། མ་སྐྱེས་པ་
ནི་སྐྱེ་བ་ཡིན། །སྐྱེས་པ་ཕྱིར་ཡང་སྐྱེ་མི་འགྱུར། །དོན་དམ་ཉིད་དུ་དཔྱད་ན་ནི། །དེ་ཕྱིར་གདོད་ནས་མ་སྐྱེས་པ། །དེ་བཞིན་འཆི་བ་འཆི་མི་འགྱུར། །འཆི་བ་མེད་པ་འཆི་བ་མིན། །མི་གནས་པ་ལ་གནས་པ་མེད། །གནས་པ་དེ་ལ་གནས་
མི་དགོས། །གལ་ཏེ་མ་སྐྱེས་ཉམས་འགྱུར་ཞིང་། །མ་སྐྱེས་པ་ཉིད་སྐྱེ་འགྱུར་ན། །རི་བོང་གི་ནི་རྭ་ཉིད་ཀྱང་། །སྐྱེ་བ་དང་ནི་འགག་པར་འགྱུར། །གང་ཚེ་ཡོད་པ་སྐྱེ་འགྱུར་ན། །སྐྱེས་པ་སླར་ཡང་སྐྱེ་བར་འགྱུར། །གལ་ཏེ་མེད་པ་སྐྱེ་ན་
ཡང་། །མོ་ཤམ་བུ་ཡང་སྐྱེ་བར་འགྱུར། །དེ་ཕྱིར་ཐམས་ཅད་མ་རིག་པ། །འདུ་བྱེད་གསུམ་གྱི་མཚན་ཉིད་ཡིན། །ཕུང་པོ་ལྔ་ལྡན་འགྲོ་བ་རྣམས། །སྣང་བ་ཙམ་དུ་རྣམ་པར་ཤེས། །རེ་ཞིག་རིགས་པ་འདིས་བྱང་ཆུབ་སེམས་
དཔའ་རྣམས་སངས་རྒྱས་བཅོམ་ལྡན་འདས་རྣམས་ཀྱི་མྱ་ངན་ལས་འདས་པ་ཤེས་པར་བྱའོ། །བྱང་ཆུབ་སེམས་དཔའ་རྣམས་ཀྱིས་སྨྲས་པ། ཐམས་ཅད་སྐྱེད་པ་མེད་པའི་ཕྱིར། །སྔགས་འདི་ཅི་ལྟར་རྒྱུད་ཅི་ལྟར། །དཀྱིལ་འཁོར་
སྒོམ་པ་ཇི་ལྟ་བུ། །དངོས་གྲུབ་དེ་ནི་ཇི་ལྟར་འགྲུབ། །ལག་ན་རྡོ་རྗེས་སྨྲས་པ། རྟེན་ཅིང་འབྲེལ་པར་འབྱུང་བ་ནི། །དངོས་པོ་རྣམས་ནི་འབྱུང་བ་ལྟར། །སྔགས་དང་ཕྱག་རྒྱ་སོགས་བརྟེན་ནས། །དངོས་གྲུབ་རྣམས་ནི་འབྱུང་བར་
འགྱུར། །དངོས་གྲུབ་རྣམས་ནི་ཀུན་རྫོབ་པ། །སངས་རྒྱས་ཕ་རོལ་ཕྱིན་པ་ཡང་། །སངས་རྒྱས་རྡོ་རྗེ་སེམས་དཔའ་ཉིད། །ཀུན་རྫོབ་ཉིད་དུ་རབ་སྒྲུབ་འགྱུར། །རྟོག་པ་གཉིས་པའོ།། །།

88-1-38b

སྔགས་བཟླས་པ་ཡི་ཆོ་གའི་རིམ། །དེ་ནས་ཡང་དག་བཤད་བྱ་བ། །གང་ཞིག་ཤེས་པ་ཙམ་གྱིས་ནི། །སྒྲུབ་པོས་དངོས་གྲུབ་འགྱུར་བས་སོ། །བྱི་རུ་ཡིས་ནི་དབང་དུ་བྱེད། །པུས་ཀར་གོས་ནི་དུག་ཞི་བྱེད། །ཤེལ་གྱིས་ཤེས་
རབ་འཕེལ་བར་བྱེད། །ལས་གསུམ་ལ་ནི་སྦྱར་བར་བྱ། །སྐྱེ་གནས་ཀྱི་རྣམ་པར་དག་པ་ཨ་ཤྭ་ཐའི་འདབ་མའི་རྣམ་པ་ལྟ་བུའི་ཐབ་ཁུང་བྱས་ལ། མྱ་ངན་མེད་པའི་ཤིང་ལ་མེ་སྦར་ནས། ཆོ་ག་བཞིན་དུ་ཨུཏྤལ་དམར་པོ་
བརྒྱ་རྩ་བརྒྱད་སྦྱིན་བསྲེག་བྱས་ཏེ། གར་མཁན་གྱི་ཁྱིམ་ནས་མེ་བླངས་ལ་མངར་གསུམ་གྱིས་བསྒོས་ནས། རྩ་བའི་སྔགས་དང་བྱ་བ་ཡིན་ནོ། །ཕྱི་ནས་འཁྲུལ་འཁོར་བྱ་བ་ཡིན་ཏེ། ཟླ་མཚན་གྱིས་གོས་པའི་རས་ལ་དཀྱིལ་འཁོར་གྲུ་གསུམ་
བྲིས་ནས། དཀྱིལ་འཁོར་དུ་བསྒྲུབ་བྱ་དང་། སྒྲུབ་པ་པོའི་མིང་དང་བཅས་པའི་བསྐུལ་བའི་ཚིག་དང་བཅས་པར་བྲིས་ཏེ། ཆེ་གེ་མོ་བདག་གི་དབང་དུ་གྱུར་ཅིག་བྱས་ནས། དེ་ནས་རྩ་བའི་སྔགས་ཀྱིས་སྤེལ་ནས། རྒྱ་སྐྱེགས་
ཀྱི་ཁུ་བ་དང་། ལག་པ་གཡོན་པའི་སྲིན་ལག་གི་ཁྲག་དང་། ག་པུར་དང་། གུར་གུམ་དང་། གླ་རྩི་རྣམས་ཀྱི་ཚོན་རྩིས་བྲི་བར་བྱའོ། །ཤེས་རབ་འཕེལ་བར་འདོད་ན་ཐབ་ཁུང་དེ་ཉིད་དུ་ཨརྒ་འམ། ཀ་ར་བཱི་རའི་ཤིང་ལ་
བྲམ་ཟེའི་སྦྱིན་སྲེག་གི་མེ་བླངས་ལ་སྦར་སྟེ། ཨ་ཀ་རུ་ཀའི་ཤའི་ཁྱིའི་མའམ། ཤུ་དག་གི་སྦྱིན་སྲེག་ཁྲི་བྱའོ། །དུག་ཞི་བར་བྱེད་ན་ཐབ་ཁུང་དེ་ཉིད་དུ་ཙན་དན་གྱི་ཤིང་ལ་མེ་སྦར་ལ། པིན་ཏ་ཀ་རའི་མེ་ཏོག་གི་སྦྱིན་
སྲེག་བྱའོ། །དེས་ནི་དུག་ཐམས་ཅད་ཞི་བར་འགུགས་པར་འགྱུར་རོ། །སྣ་ཚོགས་ཀྱི་ཟུག་ཟེར་རྣམས་མེད་པར་བྱེད་ཅིང་ཞི་བར་བྱེད་དོ། །མཁའ་ལྡིང་གི་རིག་པའི་རྒྱུད་ཀྱི་ཆོ་གའོ། །ཁམས་གསུམ་པ་ཡི་ལམ་
གནས་པའི། །བཙུན་མོར་གྲགས་པ་ཇི་སྙེད་པ། །སྦྱིན་སྲེག་འཁྲུལ་འཁོར་སྦྱོར་བ་ཡིས། །དེ་ཀུན་བཀུག་ནས་སྤྱོད་པར་བྱེད། །བྱམས་པ་ཆགས་པའི་ལྟ་བ་ཡིས། །སེམས་དེ་ཡིས་ནི་དབང་དུ་བྱེད། །འགྲོ་བ་ཐམས་ཅད་

88-1-39a

དབང་བྱས་ནས། །སངས་རྒྱས་བྱང་ཆུབ་ངེས་པར་སྤྱོད། །འདི་ནི་དབང་དུ་བྱ་བའི་ཆོ་གའོ། །རྣམ་པ་ཀུན་མཁྱེན་ཞེས་བྱ་བ། །ཤེས་རབ་མེད་པར་ཐོབ་མི་འགྱུར། །དེ་ཕྱིར་དེ་ཐོབ་འདོད་པ་གང་། །ཤེས་རབ་རྣོན་པོ་
བསྒྲུབ་པར་བྱ། །བཟླས་དང་སྦྱིན་སྲེག་སྦྱོར་བ་ཡིས། །ཆོས་རྣམས་ཀུན་ལ་སྤྱོད་པའོ། །བློ་ནི་དག་གསལ་དྲི་མ་མེད། །དེ་ཉིད་ཤེས་རབ་ཕ་རོལ་ཕྱིན། །རྣལ་འབྱོར་པ་ནི་གྲོལ་བར་འགྱུར། །གྲི་ཧ་པི་དའི་ལོ་མ་དང་། །ཤ་ཏི་དང་ནི་
ཤིང་མངར་དང་། །བྲམ་ཟེ་མོ་དང་མ་ག་ཏ། །སྦྲང་དང་བཅས་པས་བཟའ་བར་བྱ། །ཤེས་རབ་འཕེལ་བར་བྱ་བའི་ཆོ་གའོ།། །།དུག་རྗེས་སྦྲང་རྩི་མར་དང་བཅས། །འཁོར་ལོ་བཟང་རྩ་དེ་བཞིན་ཏེ། །མཆེ་
བའི་དུག་གིས་བཟུང་བ་ལ། །བསྐུས་དང་འཐུངས་པས་ཞི་བར་མཛད། །དུག་གཞིལ་བའི་སྨན་ནོ། །འཛ་རི་ཙན་ད་ལི་དག་དང་། །ནད་པའི་སྡི་ནི་མར་ཁུར་བཅས། །ལུས་ཀྱི་སྲིན་བུ་ཤི་བའི་རོ། །ཟོས་ནས་དབང་དུ་འགྱུར་བ་ཡིན། །
དབང་དུ་བྱ་བའི་སྨན་ནོ། །དུག་འགུགས་པས་ནི་འགྲོ་བ་ཞི། །ཤེས་རབ་འཕེལ་བས་སངས་རྒྱས་ཉིད། །ཆོས་ཀྱི་འཁོར་ལོ་སྐོར་བ་ནི། །སྐད་ཅིག་གིས་ནི་དབང་བྱེད་འགྱུར། །བདག་གཞན་དོན་རབ་བསྒྲུབ་པ་ལ། །ཐེག་པ་ཆེན་
པོར་ཐབས་གཞན་མེད། །རིག་པ་ལན་གཅིག་བསྒྲུབས་པ་ཡིས། །འཕྲལ་དུ་ཡིད་ཆེས་བྱེད་པ་ཡིན། །ཧྲཱིཿཡིག་མྱོས་པའི་སྣོད་བསམས་ནས། །བུད་མེད་རྣམས་ནི་འཛག་པར་འགྱུར། །ལྕེ་དང་སྙིང་གི་དཀྱིལ་དུ་ཧྲཱིཿདེ་ཉིད། །བསམས་
ན་བློ་རྣམས་སྐྱེ་བར་བྱེད། །མཆེ་བས་བཟུང་བ་ལས་བསྒོམས་པ། །ཆོས་ཀྱི་ཡི་གེ་མཛེས་པ་ཡིས། །ཡི་གེ་དག་ནི་དུག་ཞི་བྱེད། །སྒྲོལ་མའི་སྙིང་པོ་ཁམས་གསུམ་ལས། །རྒྱལ་བ་ཡིན་པར་བརྩེ་བ་ཅན་གྱིས་རྣམ་ཤེས་བྱ། །
ངག་གི་སྐྱོན་རྣམས་ཟད་པས་དུག་སེལ་སེམས་ཀྱི་སྐྱོན་སྤངས་པས། །ཤེས་རབ་འཕེལ་འགྱུར་ལུས་ཀྱི་སྐྱོན་རྣམས་ཟད་པས་དབང་དུ་བྱེད། །དེ་ཕྱིར་འགྲོ་འདི་མི་དགེ་ལ་ཞེན་དངོས་གྲུབ་ཐོབ་མི་འགྱུར། །དེ་ཕྱིར་རྒྱལ་བའི་

88-1-39b

སྲས་ཀྱིས་ཕན་ཕྱིར་སྡིག་རྣམས་སྤང་བར་བྱ་ཕྱིར་བགྱི། །ཕྱག་རྒྱ་བཅིང་བའི་ཁྱད་པར་གྱིས་ནི་ངེས་པར་ལུས་སྐྱོན་རྣམས་ཟད་འགྱུར། །སྔགས་ཀྱིས་ལྕེ་ཡི་ཚོགས་ཀྱི་སྐྱོན་རྣམས་གང་ཡིན་པ་ཡི་སེམས་ཀྱི་སྐྱོན། །བསམ་གཏན་
དགའ་བའི་སེམས་ཀྱིས་དགའ་བར་འགྱུར་བར་དད་པ་དྲི་མེད་ཀྱིས། །ལུས་ཀྱི་ཡིད་རྣམས་གཡོ་བ་མེད་པ་དེ་ཚེ་སངས་རྒྱས་བྱིན་གྱིས་རློབ། །སྡིག་མེད་མིག་གིས་སྡིག་ལྟ་སྙིང་རྗེ་ལྡན་པ་འཇིག་རྟེན་གསུམ་གྱི་རྒྱལ་པོར་འགྱུར། །
སྦྱིན་པས་བསོད་ནམས་སྟོབས་ལྷག་གྱུར་པར་ས་སྟེངས་གཙོ་བོ་སྦྱིན་བདག་བརྩོན་ལྡན་འགྱུར། །ལེ་ལོ་སྤངས་པས་མཁས་པས་དམྱལ་བའི་སྡུག་བསྔལ་ཅུང་ཟད་ཀྱང་མི་མྱོང་། །དེ་ཕྱིར་སངས་རྒྱས་སྲས་ཀྱི་སྙིང་རྗེའི་ནོར་དང་
བརྩོན་འགྲུས་སྤྱོད་པ་དག་ལ་བརྟེན། །ནམ་མཁའི་དཀྱིལ་དུ་སངས་རྒྱས་རྣམས་བལྟས་བསམ་གཏན་སྟོབས་ཀྱིས་སངས་རྒྱས་རྣམས་ལ་སེམས། །རྨི་ལམ་ན་ཡང་རྟག་ཏུ་བདག་ཉིད་སངས་རྒྱས་རྣམས་ཀྱིས་བསྐོར་བ་
མཐོང་། །མཁས་པས་འཆི་ཚེ་རི་རབ་རྩེར་གཤེགས་དང་། །བཞོན་པ་སྣ་ཚོགས་ཞོན་པའི་སངས་རྒྱས་རྣམས། །སྙིང་རྗེའི་བདག་ཉིད་ཅན་གྱིས་མཐོང་འགྱུར་ཞིང་། །སྡིག་པ་བྱས་པས་དམྱལ་བའི་གྲོང་ཁྱེར་མཐོང་བར་འགྱུར། །
དེ་རྣམས་རྣམ་དག་རྒྱུད་ཡིན་ཏེ། །བློ་ཡང་དེར་ནི་གནས་པར་འགྱུར། །དེ་ཡི་ཕྱིར་ནི་ཅི་ནས་ཀྱང་། །གོས་དཀར་དག་གི་བཙུན་མོར་འདོད། །དེ་ཉིད་དུག་ནི་ཞི་བྱེད་པས། །རྟ་མགྲིན་གྱིས་ནི་གོ་འཕང་གནས། །འདོད་ཆགས་རྡོ་
རྗེའི་ཚིག་འབྱུང་བ། །འགྲོ་བ་གསུམ་པོ་དབང་དུ་བྱེད། །འདོད་ཆགས་ཀྱི་རིགས་ཀྱི་རྒྱུད་བསྒྲུབ་པའོ།། །།དེ་ནས་སྦྱོར་བ་གཞན་འབྱུང་བར་འགྱུར་ཏེ། དཀྱིལ་འཁོར་གྲུ་གསུམ་བྱས་ནས་ནི། །སླར་ཡང་གྲུ་
གསུམ་གཞན་ཞིག་གོ། དབང་པོ་ཕྱོགས་ནས་བརྩམས་ནས་ནི། །ཨོཾ་ལ་སོགས་པ་མཁས་པས་བྲི། །མཚམས་དྲུག་ཏུ་ནི་ས་བོན་དྲུག །ཆོས་ཀྱི་ས་བོན་དཀྱིལ་དུའོ། །ཡི་གེ་ཕུཿཡི་ནང་བྱས་པ། །དེ་ནི་སྒོ་ཡི་མ་ཐེམ་བྲི། །

88-1-39c

སྦྲུལ་བསྐྲད་པའི་རྒྱུད་དོ། །དེ་ནས་བུད་མེད་སྐལ་བ་དང་ལྡན་པར་བྱ་བའི་ཕྱིར། སྦྱོར་བ་གཞན་དག་བཤད་པར་བྱ་སྟེ། འདབ་མ་བདུན་པའི་ཨུཏྤལ་བྱས་ལ། དེ་ལ་ཡི་གེ་བདུན་སྦྱར་བར་བྱའོ། །དེའི་ལྟེ་བ་ལ་ཧྲཱིཿགཉིས་ཀྱིས་བརྟེན་པའི་
བསྒྲུབ་བྱའི་མིང་དབང་དུ་བྱ་བའི་ཆོ་ག་བཞིན་དུ་གྲོ་ག་འམ། ཡང་ན་མེ་ཏོག་དང་བཅས་པའི་རས་ལ་བྲིས་ལ་རིག་པའི་རིལུ་བྱས་ནས་དཔུང་པ་ལ་གདགས་པར་བྱའོ། །བདག་པོ་བུད་མེད་བྲན་དུ་འགྱུར། །རྒྱལ་པོའང་ཞབས་འབྲིང་ཉིད་དུ་
འགྱུར། །ཤིན་ཏུ་དག་ཅིང་གཙང་མ་ཡིས། །སྔགས་འདི་བཏུ་བར་བྱ་བ་ཡིན། །དབང་དུ་བྱ་བའི་ཆོ་གའོ། །བསྲུང་བའི་དོན་དུ་འཁྲུལ་འཁོར་འབྱུང་བར་འགྱུར་ཏེ། ཨུཏྤལ་འདབ་བཞི་བྱས་ནས་ནི། །དེ་ལ་དབུས་སུ་ཟླ་བ་བྲི། །
ཤར་དུ་མདའ་ནི་བྲི་བར་བྱ། །ལྷོ་ཉིད་དུ་ནི་གཞུ་བྲིའོ། །མི་འཇིགས་ལག་པ་ནུབ་ཏུའོ། །བྱང་དུ་ཨུཏྤལ་བྲི་བར་བྱ། །དབུས་ཀྱི་ཟླ་བར་བསྲུང་བྱ་སྟེ། །ས་བོན་བདུན་གྱིས་བསྐོར་བའོ། །འཁོར་ལོ་ཕྱི་ཡི་རིམ་པ་ལ། །ཨུཏྤལ་
ཕྲེང་བས་བརྒྱན་པའོ། །འདི་ནི་གྲོ་ག་ལ་བྲིས་ལ། །རང་གི་དཔུང་ལ་གདགས་པར་བྱ། །གཞན་ཡང་བྱིས་པ་རྒན་པོ་དར་ལ་བབ། །འཁྲུལ་འཁོར་གྱིས་ནི་རང་སྲུང་འགྲུབ། །གལ་ཏེ་དབང་ཕྱུག་ཐོབ་པར་བྱ་འདོད་ན། ས་
བོན་གྱི་གྲོང་ཁྱེར་བྲིས་ལ་དེའི་དཀྱིལ་དུ་གཞུ་བྲི་བར་བྱའོ། །གཞུའི་དཀྱིལ་དུ་རིན་པོ་ཆེའི་རྣམ་པ་ལྟ་བུའི་ཨུཏྤལ་གྱི་མྱུ་གུ་བྲི་བར་བྱའོ། །ཨུཏྤལ་སྙིང་པོའི་དབུས་སུ་ཡི་གེ་ཛྲུ་ལ་ཡི་གེ་བདུན་གྱིས་བསྐོར་བའོ། །ས་ལེ་སྦྲམ་གྱི་
བྱང་བུ་ལ་མངོན་པར་བྲིས་ལ་ཁྱིམ་གྱི་སྟེང་དུ་ངེས་པར་གཞག་པར་བྱའོ། །ཕྱི་རོལ་ནས་ཨུཏྤ་ལའི་ཕྲེང་བས་མངོན་པར་བསྐོར་བར་བྱས་ནས་ཚེས་བཅུ་གཉིས་སམ་བརྒྱད་ལ་རིན་པོ་ཆེ་ལྔ་དང་ལྡན་པའི་བུམ་པ་གང་བས་ཕབ་ལ་ཁྲུས་བྱས་
ནས་མཆོད་ལ་ནས་བཟླས་པ་བརྒྱ་རྩ་བརྒྱད་བྱས་ན། ལོ་གཅིག་གིས་ནོར་འཛིན་དང་མཚུངས་པར་འགྱུར་རོ། །དེ་ལྟ་བུའི་རིག་པའི་རིལུ་ཡང་དག་པར་གདགས་པར་བྱའོ། །དེ་ནས་སྦྱོར་བ་གཞན་ཡང་འབྱུང་བར་འགྱུར་ཏེ། 

88-1-39d

མིག་དམར་ལ་བབ་པ་ན་འགྲོན་བུ་གན་རྒྱལ་དུ་གནས་པ་རྙེད་ན་ལག་མཐིལ་དུ་བཞག་ནས་སྔགས་འབུམ་ཕྲག་གཅིག་བཟླས་ན། རྒྱན་པོ་འདེབས་པ་ན་ཕ་རོལ་པོ་ལས་རྒྱལ་བར་འགྱུར་རོ། །འགྲོན་བུ་དེ་བླངས་ལ་ཀུ་རུ་ཀུལླེའི་སྔགས་
བརྒྱ་རྩ་བརྒྱད་བཟླས་ནས། ཚེས་བཅུ་གཉིས་སམ། བརྒྱད་ལ་ཁྲུས་བྱས་ནས་མཆོད་ལ་དར་གྱི་ནང་དུ་གཏུམས་ནས་དཔུང་པ་ལ་བཏགས་ན། འདིས་ནོར་གྱི་དབང་ཕྱུག་ཆེན་པོར་འགྱུར་རོ། །འགྲོན་བུ་དེ་སྣོད་དུ་བཅུག་པའི་
ནང་དུ་སྦ་བར་བྱས་ན་ཉིན་རེ་ཀཱར་ཤཱ་པ་ཎེ་རེ་རེ་རྙེད་པར་འགྱུར་རོ། །དོན་བསྒྲུབ་པ་དང་། རྒྱལ་སྲིད་བསྒྲུབ་པ་དང་། རྒྱལ་པོ་རྙེད་པ་དང་། འབྲས་བུ་བསྒྲུབ་པའི་རྒྱུད་དོ། །རྟོག་པ་གསུམ་པ་རྫོགས་སོ།། །།  གང་གིས་རྡུལ་
ཚོན་མཐོང་ཙམ་གྱིས། །སངས་རྒྱས་མྱུར་དུ་ཐོབ་པར་བྱེད། །དཀྱིལ་འཁོར་མཐོང་བའི་རིམ་པ་བཞིན། །དེ་ནས་ཡང་དག་བཤད་བྱ་བ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་ཉེ་བར་བརྒྱན། །དེ་ཡི་དཀྱིལ་དུ་ལྷ་མོ་བཀོད། །
བྷ་གའི་རྣམ་པ་ཁ་དོག་ལེགས། །མདའ་ནི་ཤར་དུ་བྲི་བྱ་བ། །གཞུ་ནི་ལྷོ་ཡི་ཕྱོགས་སུའོ། །མི་འཇིགས་ལག་པ་ནུབ་ཏུ་སྟེ། །བྱང་དུ་དེ་བཞིན་ཨུཏྤ་ལའོ། །མཚམས་ཀྱི་ཆ་ནི་ཐམས་ཅད་དུའོ། །རྡོ་རྗེ་འཁོར་ལོ་སོགས་
དེ་བཞིན། །གོས་དམར་པོ་ཡི་སྟོད་གཡོགས་བགོས། །དར་དམར་པོས་གདོང་བཀབ་པ་ཡི། །སློབ་མ་དེར་ནི་གཞུག་པར་བྱའོ། །འདིས་སེམས་མ་རྡོ་རྗེ་མའི་ཕྱག་རྒྱ་བཅིངས་ལ་འཁོར་ལོར་མེ་ཏོག་དབུལ་བར་བྱ་སྟེ། 
པྲ་ཏཱིཙྪ་བཛྲ་ཧོཿ། ཞེས་བྱའོ། །གཡོགས་པ་ཀྲོལ་ལ་དཀྱིལ་འཁོར་བསྟན་པར་བྱའོ། །དཀྱིལ་དུ་བབ་ན་ནི་མཆོག་གོ། མདའ་ལ་བབ་ན་ནི་དབང་དུ་བྱས་པའི་ལས་ལ་དབང་བར་འགྱུར་རོ། །མི་འཇིགས་པ་སྦྱིན་
པ་ལ་བབ་ན་ནི་དུག་འགུགས་པ་ལ་བསླབ་པར་བྱའོ། །ཨུཏྤལ་ལ་བབས་ན་ཤེས་རབ་འཕེལ་བ་ལ་བསླབ་པར་བྱའོ། །གཞུ་ལ་བབ་ན་ནི་ཐམས་ཅད་མཁྱེན་པའི་ཡེ་ཤེས་ལ་བསླབ་པར་བྱའོ། །

88-1-40a

འཇུག་པའི་དུས་སུ་འདི་སྐད་སྨྲ་བ་བྱའོ། །ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱིས་མཆོག་ཏུ་གསང་བ་འདི་དཀྱིལ་འཁོར་དུ་མ་ཞུགས་པ་གང་གི་
ཡང་མདུན་དུ་བརྗོད་པར་བྱ་བ་མ་ཡིན་ནོ། །དམ་ཚིག་ཉམས་པར་གྱུར་ཏ་རེ། ཡང་མ་སྤངས་པ་འཆི་བའི་
དུས་བྱས་ནས་དམྱལ་བར་ལྟུང་བར་གྱུར་ཏ་རེ། ཞེས་པ་བརྗོད་ནས། དེའི་རྗེས་ལ་དམ་ཚིག་སྦྱིན་པར་བྱ་སྟེ། དཀོན་
མཆོག་གསུམ་ནི་ཡོངས་མི་སྤངས། །ཞེས་བྱ་བ་ལ་སོགས་པ་རྒྱས་པ། རྒྱུད་ལས་གྲུབ་པ་ཡིན་ནོ། །མནའ་བསྒག་པ་ཡང་བྱ་སྟེ། ཆོས་གྱིས་རྒྱལ་པོ་
དམ་ཚིག་ཆེ། །ང་ལས་བླངས་ནས་འགའ་ཉམས་ན། །སངས་རྒྱས་བྱང་ཆུབ་སེམས་དཔའ་དག །གསང་སྔགས་སྤྱོད་མཆོག་སྤྱོད་པ་རྣམས། །
ཁྲག་ཆེན་དང་ནི་སྙིང་ཆེན་ཀྱང་། །དེ་ཚེ་ཕྱུངས་ནས་གསོལ་བར་བྱེད། །ཆོས་ཀྱིས་བསྟན་པ་སྐྱོང་བྱེད་པ། །ང་ལ་ཁྱོད་ཀྱིས་བརྙས་མི་བྱ། །རྟག་ཏུ་གོས་དམར་བགོ་བྱ་ཞིང་། །
ཕྲེང་བ་དམར་པོ་བཅིང་བར་བྱ། །མཚལ་གྱི་ཕྱེ་མ་དག་གམ་ནི། །དམར་པོའི་དྲིས་ཀྱང་བྱུག་བྱ་ཞིང་། །རིན་ཆེན་དམར་པོ་སོགས་ཀྱིས་བརྒྱན། །ཆགས་པའི་སེམས་གྱིས་བསྒོམ་
བྱ་ཞིང་། །སྔགས་ཀྱང་ཆགས་པའི་སེམས་གྱིས་བཟླ། །བཙག་གམ་སིན་དྷུ་ར་དག་གིས། །ཕོ་བྲང་དག་ནི་བྲི་བར་བྱ། །མཚལ་གྱི་ཕྱེ་མ་དག་གམ་ནི། །གུར་ཀུམ་དང་ནི་ཙན་དན་དམར། །བྱི་རུའི་

88-1-40b

ཕྱེ་མ་དག་ཀྱང་རུང་། །ཀར་ཀེ་ཏའི་ཕྱེ་མས་བྲིས། །སྦྱིན་སྲེག་ཡང་ན་འཁོར་ལོའོ། །རབ་ཏུ་གནས་པ་དེ་བཞིན་ཏེ། །ཀུན་ཀྱང་དམར་བའི་རང་བཞིན་སྦྱར། །སངས་རྒྱས་
ངུར་སྨྲིག་མཚོན་བྱེད་ཡིན། །སྲོག་ཆགས་གསད་པ་མི་བྱ་ཞིང་། །བདེན་པ་མིན་པ་ཡང་མི་སྨྲ། །མ་བྱིན་པ་ཡང་བླང་མི་བྱ། །གཞན་གྱི་ཆུང་མ་བསྟེན་མི་བྱ། །
ལུས་གྱིས་ལས་ནི་རྣམ་གསུམ་དང་། །ངག་གིས་རྣམ་པ་བཞི་དག་དང་། །ཡིད་གྱི་རྣམ་པ་གང་གསུམ་པའི། །མི་དགེ་བ་དག་སྤང་བ་གྱིས། །ཆོས་དང་དེ་བཞིན་ཟང་ཟིང་དང་། །བྱམས་
དང་མི་འཇིགས་ཞེས་བྱ་བཞི། །སྦྱིན་པ་ཁྱོད་གྱིས་རྟག་ཏུ་བྱིན། །མེད་ན་བསམ་གཏན་ལས་བགྱིས་སོ། །བསྡུ་བའི་དངོས་པོ་བཞི་དག་ཀྱང་། །ཁྱོད་ཀྱིས་རྟག་ཏུ་བསྟན་པར་བྱ། །
ཕ་རོལ་ཕྱིན་པའི་སྐུ་དག་དང་། །སྟོབས་རྣམས་དང་ནི་དབང་དག་དང་། །བུད་མེད་འགྲོ་བ་བརྙས་མི་བྱ། །སྒྲོལ་མའི་མིང་ཅན་ཁྱད་པར་དུ། །གསང་སྔགས་སྤྱོད་པའི་ཁྱིམ་པས་ཀྱང་། །
བུད་མེད་དེ་ནི་བླང་མི་བྱ། །གྲོང་ཁྱེར་སྒོ་དང་གྲོང་དག་དང་། །ཡུལ་གང་ན་ནི་སྒྲོལ་མ་ནི། །སྒོ་སྟེངས་བཞི་མདོ་བརྩིག་ངོས་དང་། །སུམ་མདོ་དག་ཏུ་ཁྱད་པར་དུ། །གནས་པའི་གནས་
དེར་རྟག་ཕྱག་བྱ། །བསྟོད་ཅིང་མཆོད་པ་ཆེན་པོ་བྱ། །གནས་དེར་གནས་པ་བྱས་ནས་ནི། །སྔགས་ལ་སོགས་པ་བསྒྲུབ་པར་བྱ། །སྒྲོལ་མའི་མིང་
ཅན་བུ་མེད་གང་། །ཁ་དོག་དམར་སེར་མིག་ལེགས་མ། །དེ་མཐོང་རྣལ་འབྱོར་གུས་པ་ཡིས། །ཡིད་ཀྱིས་ཕྱག་ནི་བྱ་བ་ཡིན། །བན་དུ་ཟེའུ་འབྲུའི་མེ་ཏོག་དང་། །

88-1-41a

དེ་བཞིན་ཀ་ར་བཱི་ར་འཛིན། །གཞན་ཡང་མེ་ཏོག་དམར་པོ་ལ། །སྒྲུབ་པ་པོས་ནི་འགོམ་མི་བྱ། །དེ་ལྟར་སྡོམ་པ་བྱིན་པས་ནི། །གཙང་ཞིང་དག་པའི་ལྷ་རྫས་ཆུ། །
བུམ་པ་དེ་བཞིན་གནས་པའི་ཆུས། །སློབ་མ་སྔགས་ཆུས་དག་པར་བྱ། །སློབ་དཔོན་གྱིས་ནི་རིམ་པ་བཞིན། །མདའ་གཞུ་སོགས་གྱིས་ཕྱག་རྒྱས་བཀྲུས། །དང་པོར་མདའ་ཅན་བུམ་པས་ཏེ། །
གཉིས་པ་གཞུ་དང་ལྡན་པས་སོ། །གསུམ་པ་མི་འཇིགས་པ་ལས་སྟེ། །ཨུད་པལ་གྱིས་ནི་བཞི་པ་རོ། །ཇི་ལྟར་སངས་རྒྱས་ཤཱཀྱ་ཡིས། །སེང་གེའི་སྲས་བཅས་རྡོ་རྗེ་འཛིན། །རྒྱལ་སྲིད་ཆེན་པོར་
དབང་བསྐུར་ལྟར། །དེ་བཞིན་བདག་གིས་ཁྱོད་དབང་བསྐུར། །ཁྱོད་ཀྱིས་སངས་རྒྱས་ཐམས་ཅད་ཉིད། །དེ་ཉིད་དཀྱིལ་འཁོར་འདི་རུ་རྙེད། །རྡུལ་ཚོན་འདི་གཟིགས་སངས་རྒྱས་རྣམས། །
རབ་ཏུ་དགྱེས་པར་གྱུར་པ་ཡིན། །འདི་ནི་འཆི་མེད་ནད་མེད་ཀྱང་། །མྱ་ངན་མེད་ཅིངས་འཕོངས་པ་མེད། །ཐེགས་པ་ཆེན་པོ་གཙང་མ་འདིས། །ཁྱོད་གྱིས་རྫོགས་པའི་བྱང་ཆུབ་འཐོབ། །མདའ་སོགས་
གཞུའི་དབང་བསྐུར་བས། །དམ་ཆོས་སྣོད་དུ་བྱས་ནས་ནི། །སློབ་མ་ལ་ནི་གསང་བ་དག །ཆོ་ག་བཞིན་དུ་སྦྱིན་པར་བྱ། །དེ་ལ་རེ་ཤིག་དང་པོ་ཀླུ་ལ་
བརྡེགས་པ་ལ། བསླབ་པར་བྱའོ། །ན་མོ་རཏ་ན་ཏྲ་ཡཱ་ཡ། ན་མོ་བུད་དྷ་བོ་དྷི། ས་ཏྭ་བྷྱཿན་མོ་ཨསྠ། མ་ཧཱ་ཨ་ནྱ་རྱ་

88-1-41b

པྲ་ཀ་ལཱ་ཡཾ། ན་མསྶཔྟེ་བྷྱོ་བུདྷ་ཀོ་དི་བྷྱཿ། ཏདྱ་ཐཱཿ །  ཨོཾཿ ཧྲཱིཿཧྲཱིཿཧྲཱིཿསརྦ་ནཱ་གཱ་ནཱཾ། ཨ་ནན་ཏ་ཀུ་ལཱ་ནཱཾཿ། བཱ་སུ་ཀི་ཀུ་ལཱ་ནཱྃ། ཤྃ་ཀ་པཱ་ལ་ཀུ་ལཱ་ནཱཾཿ ཀརྐོ་ཏ་ཀུ་
ལཱ་ནཱཾཿ། པད་མ་ཀུ་ལཱ་ནཱྃ། ཀུ་ལི་ཀ་ཀོ་ལཱ་ནཱཾཿ། པུནྡ་རཱི་ཀ་ཀུ་ལཱ་ནྃ། ག་ནཱ་ཀ་ཀུ་ལཱ་ནྂ། མེ་ཀ་ཀུ་ལཱ་ནྂ། ཛཱ་ལ་དཱ་ཀུ་ལཱ་ནྂ། བཛྲཱ་མུ་ཏ་ཀུ་ལཱ་ནཱྃ། སཾ་བར་
ཏ་ཀུ་ལཱ་ནཱྃ། ཨེ་ས་བར་ཏ་ཀུ་ལཱ་ནཱྃ། ཀུ་མུ་དྷ་ཀུ་ལཱ་ནཱྃ། ཀ་ཧ་ར་ཀུ་ལཱ་ནཱྃ། སཽ་གན་དྷི་ཀུ་ལཱ་ནཱྃ། ཧ་ན་ཧ་ན་ཤ་རེ་ནཿ། བན་དྷ་བན་དྷ་ཙ་བི་ན་
ཏཱ་ཊ་ཡ་ཏཱ་ཊ་ཡ་ཨུཔྟ་ལེ་ནཱྃ། བི་ཏྃ་ན་ཨ་བྷ་ཡཱ་ན། དེ་ཧི་དེ་ཧིཿ། པྲ་ལ་ཡ། ཀ་ལེ་བཛྲ་ལ་ད། ར་མ་བྷ་ཏ་ར་ཡ་ན། བ་ར་ཥ་ན་ཏ་ནཱ་གཱ་ན་བ་ཤི་ཀུ་སུཿ ཀུ་རུ་ཀུ་རུ་ཕུཿ། 
ཀུ་རུ་བ་ཡ་ཀུ་རུ་བ་ཡ༔། ཕུཿཕུཿ ཨོཾ་ཀུ་རུ་ཀུལླེ་ཧྲཱིཿ། ཧཱུྃ་སྭཱ་ཧཱ་ཕཊ། སྔགས་འདིས་དགོན་པའི་ལྕི་བ་ལས་དཀྱིལ་འཁོར་བྱས་ལ། ཆོ་ག་བཞིན་དུ་ཙན་དན་གྱིས་བྱུག་པ་པད་མ་
འདབ་མ་བརྒྱད་པ་བྲིས་ལ། ཤར་ལ་སོགས་པ་འདབ་མ་ལ། །དགའ་བོ་ལ་སོགས་པའི་ཀླུ་བརྒྱད་གཞག་ནས། ཤ་ག་ར་དང་གུ་གུལ་གྱིས། རྒྱུ་སྐར་
སྣར་མ་ལ། བབ་པའི་ཚེ། བརྒྱ་རྩ་བརྒྱད་བཟླས་ནས། ཀླུ་རྣམས་ལ་བདུག་པ་བྱིན་ནས། དེ་ནས་མཆོད་པའོ། །གལ་ཏེ་ཆར་འབབ་པར་མི་
འགྱུར་ན། ཆང་གིས་ཁྲུས་བྱས་ལ། སེང་ལྡེང་གི་མེས་གདུང་བར་བྱའོ། །དེ་ལྟར་བྱས་ན་ཆར་འབབ་པར་འགྱུར་རོ། །གལ་ཏེ་ཆར་འབེབས་པར་མི་བྱེད་ན། མཛེས་

88-1-42a

ཐེབས་པར་འགྱུར་རོ། །རིག་པ་འཛིན་པ་འདི་དག་བྱ་བའི་ཟས་དང་ལྡན་པར་བྱ་བ་ཡིན་ནོ། །ཕྱི་ནས་ཉེ་བར་བསྡུས་ལ་ཆུ་བོ་ཆེན་པོར་དོར་བར་བྱའོ། །ལྷ་ཡང་དུས་
སུ་ཆར་འབེབས་ཤིང་། །ལོ་ཐོག་ཕུན་སུམ་ཚོགས་པར་ཤོག །འཇིག་རྟེན་མཐའ་དག་སྐྱིད་པ་དང་། །རྒྱལ་པོ་ཆོས་དང་ལྡན་གྱུར་ཅིག །ཅེས་ཡོངས་སུ་བསྔོ་བ་ཡང་བྱའོ། །
ཆར་ཤིན་ཏུ་ཆེས་པ་གཅད་འདོད་ན། སྦྲུལ་འདུས་པའི་མི་ལས་སྦྲུལ་གཅིག་བླངས་ལ། ཙན་ལྡན་གྱིས་བྱུགས་ནས་འོ་མ་བླུད་པར་བྱ་ཞིང་། སྔགས་ལན་བདུན་སྔགས་
པར་བྱས་པའི། བུམ་པ་དམར་པོས་མཆོད་པའི་ནང་དུ་བཅུག་ལ། ཕྱག་རྒྱ་ཆེན་པོས་བརྒྱས་བཏབ་ནས། བུམ་པ་གཅག་པར་གྱུར་ན། དེ་མ་ཐག་
ཏུ་ཆར་པ་གཅོད་པར་བྱེད་དོ། །ཕྱི་ནས་ཚོགས་ཀྱི་སྟོན་མོ་བྱ། །ཡང་ན་ཉན་ཐོས་དགེ་འདུན་མཆོད། །ཁྱེའུ་བུ་མོར་ཟས་
སྐོམ་སྦྱིན། །དེ་ལྟར་བྱས་ན་ཀླུ་རྣམས་དགའ། །ཆར་ནི་འབབས་པར་འགྱུར་བའི་ཚེ། །གལ་ཏེ་འདི་ལྟར་མི་བྱེད་ན། །
ཀླུ་རྣམས་དགའ་བར་མ་བྱས་པས། །མཛེ་ཡིས་ཐེབས་པར་གྱུར་པ་ཡིན། །རྒྱལ་པོ་བུ་དང་བཙུན་མོའི་འཁོར་དང་བཅས་པ་ཁྲུས་བྱས་
ལ་ཕྱིར་བཟློག་པའི་ཚེས་ལྔ་ལ་ཕྱིར་བཟློག་པའི་རྩ་བ་བཙལ་ནས། འོ་མ་འམ། ཡང་ན། མར་དང་སྦྱར་ཏེ། དངུལ་གྱིས་

88-1-42b

སྣོད་དུ་བླུགས་ལ་བཏུང་ཞིང་དགེ་སློང་ལ་གསོལ་བར་བྱས་ན། ལོ་གཅིག་གི་བར་དུ་སྦྲུལ་གྱིས་འཇིགས་པ་འབྱུང་
བར་མི་འགྱུར་རོ། །དེ་ལ་མི་དགེ་བའི་ལས་ཀྱིས་གལ་ན། སྦྲུལ་དེ་ཉིད་འཆི་བར་འགྱུར་ཏེ། ལན་
བདུན་མངོན་པར་བསྔགས་པས་འགྲུབ་པར་འགྱུར་རོ། །ཡང་མཛེ་ནད་སོས་པར་འདོད་ན། སྔགས་འདི་ཉིད་ཀྱིས་དུག་མེད་པར་བྱས་
ནས། ཟོས་ན་མཛེ་ནད་སོས་པར་འགྱུར་རོ། །རྩ་བའི་སྔགས་ཀྱིས་ཆུ་ལ་བསྔགས་ལ་སྦྲུལ་གྱིས་བཟུང་བའི་རྨ་ལ་བཀྲུས་ན་དུག་མེད་པར་འགྱུར་རོ། །ཡང་
ཀླུ་མཐོང་བར་འདོད་ན། ཨུཏྤལ་དམར་པོའི་འདབ་མ་ལ། ཡི་གེའི་གྲངས་ཀྱིས་འབུམ་བཟླས་ནས། ཀླུ་གནས་ཤིང་བྱིན་གྱིས་
བརླབས་པ་དཀོན་མཆོག་ལ་གསོལ་བ་གདབས་ན། དེའི་རྗེས་ལ་ཀླུའི་ཆུང་མ་ལྡང་བར་འགྱུར་རོ། །བསྒྲུབ་པ་པོ་ལས་ཀྱིས་བཅོམ་ལྡན་འདས་ཅི་ཞིག་
གྱིས་ཞེས་བཀའ་བསྩལ་ལུང་ནོད་པར་བྱེད་དོ། །བསྔགས་པས་ཀྱང་འདོད་པ་དེ་བླངས་བར་བྱའོ། །རྟོག་པ་བཞི་པའོ།། །། དེ་ནས་གཞོན་ནུ་སྒྲ་ཅན་
འཛིན་བཟང་པོ་གང་གི་ཚེ་བསོད་སྙོམས་ལ་རྒྱལ་པོའི་ཁབ་ཏུ་ཞུགས་ནས་ཡང་འོ་མའི་ཚལ་དུ་ཞུགས་ཏེ། ལྷུང་བཟེད་བཀྲུ་བའི་

88-1-43a

ཕྱིར་རྫིང་བུ་རིང་པོར་ཞུགས་པ་ན། གྲངས་འཛིན་མའི་བུས་དགེ་སློང་དཀར་པོ་དང་འཁྲུལ་ནས་རྫིང་བུར་གྲངས་པ་དང་། དེའི་ཚེ་གཞོན་ནུ་སྒྲ་གཅན་འཛིན་བཟང་པོས་རིག་པ་འདི་བཟླས་སོ། །བཟླས་
པ་ཙམ་གྱིས་ཇི་ལྟར་འགའ་ཞིག་རང་གི་ཁྱིམ་ནས་བྱུང་བ་བཞིན་དུ། སྒྲ་གཅན་འཛིན་བཟང་པོ་ཡང་དེ་བཞིན་དུ་བཅོམ་ལྡན་འདས་ཀྱི་ཐད་དུ་སོང་ངོ་། །ཉེ་བར་སོང་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
ཡབ་ལགས་ཁྱེད་ཀྱིས་བདག་ལ་གསང་སྔགས་གང་སྩལ་བའི་མཐུ་དེ་དག་གིས་མཐོང་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གང་དུ་མཐོང་། ཀླུ་རྣམས་ཀྱི་དྲུང་དུའོ། །དེ་ལྟ་བས་ན་བཅོམ་
ལྡན་འདས་སྲོག་ཆགས་གཞན་དག་བསྲུང་བའི་སླད་དུ་སྔགས་འདི་བཅོམ་ལྡན་འདས་ཀྱིས་བསྟན་དུ་གསོལ། དེ་ནས་བཅོམ་ལྡན་འདས་ཀྱིས་དེའི་ཚེ་དེའི་དུས་སུ་སྔགས་འདི་དང་། རྟོག་པ་འདི་ལག་ན་རྡོ་རྗེ་ལ་བསྐུལ་ནས་
ཉན་ཐོས་རྣམས་དང་བྱང་ཆུབ་སེམས་དཔའ་རྣམས་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་ལ་བཀའ་དྲིན་གསལ་བར་བྱས་སོ། །རིགས་ཀྱི་བུ་དེའི་ཕྱིར་གསང་སྔགས་འདི་དང་། 
རྟོག་པ་འདི་ཙན་དན་གྱི་དཀྱིལ་འཁོར་བྱས་ནས། ཀློག་པར་བྱེད་པ་དེའི་ལུས་ལ་དུག་གི་གནོད་པ་མི་འབྱུང་། དུག་གིས་འཆི་བར་མི་འགྱུར། ཤུ་བའི་འཇིགས་པ་མི་འབྱུང་། གཡན་པའི་འཇིགས་པ་མི་འབྱུང་། མཛེ་ནད་
ཀྱི་འཇིགས་པ་མི་འབྱུང་། ནད་ཀྱི་འཇིགས་པ་མི་འབྱུང་། ཀླུའི་འཇིགས་པ་མི་འབྱུང་། སྦྲུལ་གྱི་འཇིགས་པ་མི་འབྱུང་། སྟག་དང་གཅན་ཟན་གྱི་འཇིགས་པ་མི་འབྱུང་། མཚོན་གྱི་འཇིགས་པ་མི་འབྱུང་། དགྲའི་འཇིགས་པ་
མི་འབྱུང་། དབུལ་བའི་འཇིགས་པ་མི་འབྱུང་། དུས་མ་ཡིན་པར་འཆི་བའི་འཇིགས་པ་མི་འབྱུང་བར་འགྱུར་རོ། །དེ་ནས་བཅོམ་ལྡན་འདས་ཀྱིས་བསྟན་པ་སྲུང་བའི་ཕྱིར། ནག་པོ་ཆེན་པོ་ཉིད་ཀྱི་བསོད་སྙོམས་ཀྱིས་གསོས་

88-1-43b

པའི་སྲིན་མོའི་འཕྲོག་མ་ལ་བྱིན་ནོ། །དེ་ཡང་སྔོན་གྱི་ལས་མི་དགེ་བ་ལ་སྐལ་བ་ངན་པར་གྱུར་པས། ནག་པོ་ཆེན་པོ་དང་རྗེས་སུ་མཐུན་པ་མ་ཡིན་པས་གནས་པར་མི་བྱེད། བརྩེ་བར་མི་བྱེད། བསྟན་པ་བསྲུང་བར་ཡང་མི་བྱེད་དོ། །
དེ་ནས་སྲིན་མོ་དེ་ཡི་མུག་པར་གྱུར་པ་དང་། དེ་ལ་ནག་པོ་ཆེན་པོ་དབང་དུ་བྱ་བར་འདོད་པས། ཀུ་རུ་ཀུལླེའི་རྟོག་པ་འདི་གསུངས་སོ། །དེ་ནས་བཟུང་ནས་སྐལ་བ་ཆེ་ཞིང་བཟང་བ་དང་ལྡན་པར་འགྱུར་རོ། །རིགས་ཀྱི་བུ་དེའི་ཕྱིར་
སེམས་ཅན་དབང་དུ་བྱ་བར་འདོད་པས་གསང་སྔགས་འདི་ཉིད་དང་། རྟོག་པ་འདི་ཉིད་ལ་གོམས་པར་བྱའོ། །གཞན་ཡང་ཤིན་ཏུ་དགའ་བའི་བུ་གཟུགས་བཟང་ཞིང་མཛེས་པ་སྟོབས་ཆེ་ཞིང་མཚན་དང་ལྡན་པ་ཞིག་སྐྱེས་སོ། །
འོན་ཀྱང་བློ་རྟུལ་བར་གྱུར་ཏོ། །དེ་ནས་ཤིན་ཏུ་དགའ་བས་བཅོམ་ལྡན་འདས་ལ་ཞུ་བ་ཞུས་པ། བཅོམ་ལྡན་འདས་བདག་གི་བུ་གཟུགས་བཟང་ཞིང་མཛེས་པ་སྟོབས་ཆེ་ཞིང་མཚན་དང་ལྡན་པ་ཞིག་སྐྱེས་པར་གྱུར་ན། འོན་ཀྱང་
བློ་རྟུལ་བར་གྱུར་ཏོ། །བཅོམ་ལྡན་འདས་དེ་ཇི་ལྟར་ན་དེའི་ཤེས་རབ་འཕེལ་བར་འགྱུར། གལ་ཏེ་བདག་གི་བུ་དེའི་ཡི་གེ་དང་བཅས་པར་གྱུར་ན། དེ་ལྟ་ན་ཁྱོད་ཀྱིས་བསྟན་པ་རྗེས་སུ་བསྲུང་བར་བགྱིའོ། །དེ་ལྟར་གསན་ནས་
བཅོམ་ལྡན་འདས་ཀྱིས་དྲན་པ་སྔོན་དུ་ཞུགས་ནས་རྟོག་པ་འདི་དང་གསང་སྔགས་འདི་བཀའ་སྩལ་ཏོ། །དེ་བཀའ་སྩལ་གྱིས་ཤིན་ཏུ་དགའ་བའི་བུ་གཞོན་ནུ་སྣར་མ་ཞེས་བྱ་བ་འདི་ཤེས་རབ་དང་ལྡན་པར་འགྱུར་རོ། །ལོ་བཅུ་གཉིས་ཀྱིས་
བསྟན་བཅོས་ཐམས་ཅད་ལ་འཇིགས་པ་མེད་པ་དང་། བཟོའི་གནས་ཀྱི་ཐབས་ཐམས་ཅད་ལ་མངོན་པར་ཤེས་པ་དང་ལྡན་པར་གྱུར་ཏོ། །རིགས་ཀྱི་བུ་དེའི་ཕྱིར་ཤེས་རབ་ཆེན་པོ་འཕེལ་བར་བྱ་བའི་ཕྱིར་གསང་སྔགས་དང་། རྟོག་
པ་འདི་ལ་བསླབ་པར་བྱ་བ་ཡིན་ནོ། །དེ་ནས་བཅོམ་ལྡན་འདས་ཀྱིས་མཁའ་སྤྱོད་ཀྱི་དངོས་གྲུབ་བཀའ་སྩལ་པ། རོ་ཡི་སྐྱོན་དང་བྲལ་བ་ཡི། །དངུལ་ཆུ་ལེགས་པར་བླངས་ནས་སུ། །རྡོ་རྗེ་གཏན་གཤོང་དུ་བྱས་ནས། །འཇིག་

88-1-44a

རྟེན་མགོན་དང་རྟག་པར་བྱ། །སླར་ཡང་ཆོས་སྐུ་དང་བཏགས་ལ། །འཛ་བ་ཏི་ཀི་ཏི་ཀ་དང་། །བྱི་ནའི་ལོ་མའི་ཁུ་བ་དང་། །ཉི་མ་གསུམ་དུ་མཉེ་བར་བྱ། །བན་ད་ཀ་ཀོ་ལ་ཡི་ལོ་མ་དང་། །ཧཀ་བཛྲ་འོ་མ་དང་། །
རྣ་མ་ཕུག་པའི་ཁུ་བ་དང་། །ནུ་མའི་འོ་མ་དང་མཉེ་བ། །དངུལ་ཆུ་དང་ནི་རྩབས་མོ་ཡིས། །ལན་བདུན་བར་དུ་བཀྲུ་ཞིང་མཉེ། །ལྕགས་ཀྱི་སྣོད་དུ་ལེགས་བཅུག་ནས། །པྲི་ཏ་ར་ཀའི་ཟན་བཅུག་བཙོ། །ཀ་ན་ཀ་ཡི་མེ་ཏོག་གོང་བུ་
དག །འོག་དང་སྟེང་དུ་ངེས་པར་བསྐོར། །རྩ་བའི་གསང་སྔགས་འབུམ་བཟླས་ན། །དངུལ་ཆུ་དེ་ནི་གཡས་ནས་འཁོར། །མུ་ཟི་ཉི་མས་བསྒོས་པ་ལ། །གསང་སྔགས་དེས་ནི་བཟླས་བྱས་ནས། །ལྕགས་སྣོད་མེ་ལ་བཞག་པ་
ལ། །ཕྱེ་མའི་སྦྱོར་བ་ཅུང་ཞིག་བླུགས། །མུ་ཟི་ཅུང་ཟད་ཞི་གྱུར་ནས། །ནམ་མཁའི་མདབ་མ་བཅུག་ནས་བཞུ། །ཕྱི་ནས་ཕྱི་ནི་ས་ལེ་སྦྲམ། །དེ་ལ་མ་ཀི་ཀི་ཡང་གཞག །དངུལ་དང་ཟངས་ཀྱང་དེ་ནས་གཞུག །དེ་བཞིན་
ལྕགས་ཀྱང་ལྔ་འགྱུར་རོ། །གཞན་ཀུན་དྲུག་འགྱུར་བཞུ་བྱས་ནས། །ཉི་མའི་འོད་དང་མཉམ་པར་འགྱུར། །དེ་ཡི་རི་ཐིག་གཞན་ཕུང་ཆེན། །མཁས་པས་སྒྱུར་བར་བྱེད་པ་ཡིན། །མན་ཅས་བྲ་ཞིང་བསྒྱུར་ནུས་ན། །དངུལ་ཆུ་གྲུབ་
པར་ཤེས་པར་བྱ། །མ་ཧེ་ར་དང་བཅས་པ་ཡི། །སྤྱི་ཡི་འོ་མས་རྡོ་རྗེ་བསད། །བྱི་བ་མཆུ་རིངས་ཁྲ་དང་ནི། །གྲུབ་པའི་དངུལ་ཆུ་ནང་དུ་གཞུག །འདི་དང་དངུལ་ཆུ་འདྲེས་གྱུར་ན། །མར་ཀ་ཏ་ལ་སོགས་པའང་འཇུ། །ཀུ་རུ་ཀུལླེའི་རྣལ་འབྱོར་
པས། །མིག་གི་ཕྱིར་ནི་མུ་ཏིག་བཞུག །རྟག་ཏུ་གཟིགས་མ་རྩྭ་ཟོས་མ། །བུད་མེད་བརྒྱ་ལ་འདོད་པ་སྤྱོད། །མཚན་བདུན་ཙམ་ཞིག་སྦྱོར་བས་ནི། །བརྟུལ་ཞུགས་ཅན་ནི་མཁའ་སྤྱོད་འགྱུར། །དངུལ་ཆུ་མཁའ་སྤྱོད་སྒྲུབ་པའི་རྒྱུད། །
ཞ་ཉེའི་རི་ལུ་བྱས་ནས་ནི། །འབང་ཧུའི་ས་བོན་སྣོད་དུ་ནི། །ཁྲག་འཛག་ཀཉྩུའི་སྣོད་བཅུག་ནས། །ས་སྣོད་དམར་པོར་བཅུག་ནས་སུང་། །དངུལ་ཆུ་དང་བཅས་ཞ་ཉེ་དེ། །འཆི་བར་འགྱུར་བར་ཐེ་ཚོམ་མེད། །དེ་དང་དངུལ་ཆུ་

88-1-44b

སྲང་རེ་བསྲེས། །ཕྱི་ནས་སྲང་གཅིག་དྲུག་ཅུར་བསྲེ། །རང་དང་མཉམ་པར་བསྒྲུབ་བྱས་ནས། །དངུལ་གྱི་རི་ལུ་བྱེད་པ་ཡིན། །སྒྲོལ་མས་དངུལ་ཆུ་གྲུབ་གྱུར་ནས། །སེམས་ཅན་དོན་བྱེད་ནུས་པར་འགྱུར། །སེམས་ཅན་དོན་ལས་
བསོད་ནམས་ཚོགས། །ཚོགས་ལས་བྱང་ཆུབ་མཆོག་ཏུ་འགྱུར། །དངུལ་ཆུ་བསྒྲུབ་པའི་བརྒྱུད་དོ། །བསྟན་པའི་ཀྲུན་ཏོའི་མེ་ཏོག་སྔོ། །ཙི་ཏྲ་ཀ་སྔོན་ཞེས་བྱ་དང་། །རྣལ་འབྱོར་པ་ཡིས་ཟླ་གཅིག་ཏུ། །འོ་མ་དར་འཐུངས་
ལོ་སྟོང་འཚོ། །སྔགས་ཀྱི་བཀའ་ལས་ནག་པོ་བླང་། །འོད་མའི་སྣོད་དུ་བཅུག་ནས་ནི། །ཚེས་བརྒྱད་ལ་བསྒྲུབ་རྣལ་འབྱོར་པས། །ཉི་ཟླ་སྐར་མ་གནས་ཡང་འཚོ། །ཡུང་བ་བུང་དང་འདྲ་སྙེད་ནས། །འོ་མ་དང་མཉེས་
འཐུངས་ནས་ནི། །ཚངས་པ་མདུན་ན་འདོན་མཉམ་པའི། །ཚེ་དང་ལྡན་འགྱུར་ཐེ་ཚོམ་མེད། །དེ་བཞིན་ཤིང་ཆེན་འབྲས་བུ་ཡི། །ཆུ་ཤིང་འབྲས་བུ་འདྲ་རྙེད་ནས། །གང་དང་གང་ན་གནས་པ་དེར། །གལ་ཏེ་གསོ་སྦྱོང་ལ་གནས་པ། །
འོ་མ་དང་མཉེས་འཐུངས་ནས་ནི། །སྐྲ་དཀར་གཉེར་མ་རེངས་པར་འགྱུར། །བཅུད་ཀྱིས་ལེན་བསྒྲུབ་པའི་རྒྱུད་དོ། །བུ་འདོད་པས་ནི་བུ་ག་ཡིན། །བ་བྷ་ག་ཡི་ཤིང་མེ་ཏོག །བརྟུལ་ཞུགས་གནས་པའི་འོ་མ་དང་། །
ཆུང་མ་གསོ་སྦྱོང་ལྡན་བྱས་ཏེ། །འཐུངས་ན་སྐལ་བཟང་བུ་ལྡན་འགྱུར། །སྔགས་འདི་ཤུ་དག་གི་ནི་འབྲས་བུ་དག །བཏགས་ནས་འོ་མ་དང་ནི་བསྲེ་བྱས་ནས། །བཙུན་མོ་དང་ཡང་གསོ་སྦྱོང་ལྡན་བྱས་ཏེ། །འཐུངས་
ན་རྒྱལ་བའི་མཚན་ལྡན་བུ་ཐོབ་འགྱུར། །ལག་སྨན་རྩ་བ་གང་གི་འོ་མ་དང་། །ཁྲུས་བྱས་འཐུངས་པར་གྱུར་ན་བུ་བཙས་འགྱུར། །དོན་གྲུབ་པ་ཡི་སྐུ་འདྲ་ཡོངས་རྫོགས་གཟུགས། །མཚོན་གྱི་མཚོན་རྣམས་ཀྱིས་
ནི་འཇིགས་མེད་ནི། །ཛཱ་ལ་ཤེ་ལ་རྩ་བ་ནས་བཏོན་ནམ། །རྩ་བ་བླངས་ནས་ལན་བདུན་མངོན་བསྔགས་ཏེ། །མགོ་བོ་ལ་ནི་བཅིངས་པར་བྱས་ན་ནི། །ལོ་གཅིག་རིམས་ནི་མེད་པར་བྱེད་པ་ཡིན། །རྣལ་འབྱོར་

88-1-45a

པས་ནི་གསེར་ཤིང་རྩ་བ་དག །བླངས་ནས་གང་གི་མགོ་ལ་བཅིངས་བྱས་ན། །དེ་ཡི་ཉིན་བཞི་པ་ཡི་གནོད་པ་དག །རིམས་ཀྱིས་ཟིན་པ་རིམས་ནི་མེད་པར་འགྱུར། །སོ་ཕག་དུ་བ་ཆང་དང་རྩབ་མོ་དང་། །ར་གཉིས་
པའི་རྒྱལ་བའི་ཁུ་བ་བཅས། །ཟངས་མའི་སྣོད་དུ་བུད་མེད་འོ་མ་དང་མཉེས་ནས། །མིག་ལ་བསྐུས་ན་མིག་གི་ནད་རྣམས་སེལ། །ཤིང་ཐོག་ཨུ་ཙ་ཏ་ཡི་རྩ་བ་བླངས་ནས་ནི། །སྔགས་འདི་བརྒྱ་ཕྱེད་བར་དུ་བཟླས་ནས་སུ། །ཅི་ལྟར་
འདོད་པའི་འོ་མ་དང་འཐུངས་ན། །དམ་པའི་མི་དབང་དེའི་མཚན་ལ་རུང་ནས། །ན་ག་ས་ལ་ཞེས་བྱར་རབ་གྲགས་པ། །དེ་ཡི་འོ་མ་དག་དང་ལྡན་བྱས་དེས། །མཚན་མ་སྟོབས་བསྐྱེད་བུ་འཕེལ་བུ་ཚ་བསྐྱེད། །སྔགས་འདི་བརྒྱ་ཕྱེད་
བར་དུ་བཟླས་ནུ་ལ། །འགི་ཝང་དང་ནི་སོ་མ་སྐྱེས་པའི་ལྕེ། །མི་དབང་རྩ་བ་རྒྱུ་སྐར་བཟང་པོ་ལ། །དེ་ཡི་དཔྲལ་བར་ཐིག་ལེ་བྱས་ནས་ནི། །ཐིག་ལེ་དེ་མཐོང་འཇིག་རྟེན་གསུམ་དབང་བྱེད། །ཤི་བའི་རོ་ཡི་མིག་དང་སྙིང་དང་
ལྕེ། །དཔྲལ་བ་དང་ནི་དེ་བཞིན་སྣ་དག་ནི། །བླངས་ནས་སྐར་མ་རྒྱལ་གྱི་དུས་ལ་ནི། །ཏིལ་མར་ལ་བཙོས་སྐྱེ་བོ་དབང་དུ་བྱེད། །སྦྲུལ་གྱི་དབང་པོའི་མགོ་བོའི་མིག་སྨན་དང་། །མིང་ངན་གཅོད་དང་མེ་ཏོག་ཞེས་བྱའི་ཁྲག །
མིག་སྨན་དེ་ཡི་མིག་ལ་བསྐུས་བྱས་ན། །རྒྱལ་པོའི་བཙུན་མོ་དབང་དུ་བྱེད་པར་འགྱུར། །སྔགས་འདི་བརྒྱ་ཕྱེད་རྐང་པ་སར་བཞག་ནས། །ས་ཡི་ནང་ན་ཡོད་པའི་ནོར་བཙལ་ན། །རྐང་པ་གང་དུ་བཞག་པ་གཡོ་འགྱུར་བ། །
དེ་ན་གཏེར་དག་ཡོད་པ་ཤེས་པར་བྱ། །རྐང་པའི་བོལ་འགུལ་ན་ནི་ཉེ་བར་འགྱུར། །རྐང་མཐིལ་འགུལ་ན་རིང་ན་གནས་པ་ཡིན། །གང་ན་གཏེར་ཡོད་ཟེར་བར་མངོན་བྱས་ནས། །རིག་པ་འཛིན་པས་ཉིན་བཞིན་འོག་ཏུ་བལྟ། །
གང་ཡང་བྱི་བ་མཆུ་རིངས་ཕྱི་མ་ན། །གུ་གུལ་དང་ནི་བཅས་པ་བྱུགས་ཙམ་གྱིས། །གླང་ཆེན་མྱོས་པས་གསལ་ཞིང་བདེ་བར་འབྱུང་། །ཤིན་ཏུ་གནག་པའི་ཁྱི་མོ་ཡི། །འོ་མ་བསྒྲུབས་ནས་མར་སར་གྱིས། །བསྐུས་

88-1-45b

ནས་རྔ་ལྤགས་ལྷམ་གོན་ན། །ཆུ་ཡི་སྟེང་ན་འགྲོ་བར་འགྱུར། །ས་བཀོང་ཚ་ཉའི་ཚེར་མ་དག །བསྡུས་ནས་ཚང་ཚིང་ཁྱིམ་སྦས་ན། །ཆང་རྣམས་རླག་སྟེ་ཕྱུང་ནས་ནི། །བཟང་པོ་ཉིད་དུ་འགྱུར་བ་ཡིན། །རྫ་མཁན་རྫ་མ་བསྲེགས་
པའི་མེ། །ཐོགས་གིས་བཅགས་པའི་ཤིང་བཙུགས་ན། །དེ་མེ་འབར་བར་མི་འགྱུར་ཏེ། །ཆང་བླུགས་སླར་ཡང་འབར་བར་འགྱུར། །ཟོང་ལ་གོང་བསྟན་སྔགས་བཟླས་ནས། །སྔོན་སྔགས་ཚོང་པ་རྣམས་བསྟན་ན། །རྣལ་འབྱོར་
པ་ཡིས་ཚོང་འགྲུབ་སྟེ། །ཚོང་པ་རྣམས་ལས་ཁེ་ཆེར་རྙེད། །ཆང་གི་ས་བོན་བྱེད་པ་ལ། །སྤྲེའུའི་མི་གཙང་བཅུག་གྱུར་ན། །ཆང་སྣོད་བཅས་པ་རླག་པར་འགྱུར། །བ་ཀུ་ལས་བཀྲུས་སྤྱད་དུ་རུང་། །བ་ཀུ་ལ་ཡི་ཆུས་
བཀྲུས་ན། །བྱིས་པ་མ་མས་བླངས་ནས་ནི། །འབྱུང་པོ་སྐྲ་ཡིས་བདུག་བྱས་ན། །ངུར་སྨྲིག་བཀོན་པས་སོས་པར་འགྱུར། །བྱིས་པ་ནུ་ཞོ་འཐུངས་སྐྱུགས་ན། །རྨ་བྱའི་སྒྲོ་བསྲེགས་ཐལ་བ་ཡིས། །མགུལ་པ་བཅིངས་པ་བྱས་
ན་ནི། །སྦྱོར་བ་མཆོག་གིས་སླར་སོས་འགྱུར། །ཡ་ད་ཀ་བ་ཀ་ནི་ཆོ་ག་དང་། །ལྡན་པའི་ཞ་ཉེ་བྱང་དུ་སྐོ་བྱས་ནས། །ཁ་ཡི་ནང་དུ་བཅུག་ནས་འདུག་ན་ནི། །འཆིང་དང་མཚོན་ཆ་མི་བྱམས་པ་ལས་ཐར། །ཀྵ་མ་ར་ཡ་ཡི་གེ་
རྣམས་དང་ལྡན། །ཡི་གེ་ཀུན་ཀྱང་ཨེ་ཡིས་བརྒྱན་པ་ལ། །ཡང་དག་ཀ་བ་ཀ་ཡི་མཐའ་མར་ནི། །སྒོ་ང་བཞི་དང་ཚད་གསུམ་གཉིས་གཉིས་སྦྱིན། །དན་ཏིལ་ཨུཏྤལ་ས་ར་བུ་ཀ་དང་། །ནི་ཚུ་ལ་དང་གི་རི་ཀར་ཎི་ཆུས། །ལན་
བདུན་བར་དུ་བཀྲུས་པའི་ཞ་ཉེ་ཡིས། །བྱང་བུ་ལ་ནི་བློ་དང་ལྡན་པས་བྲི། །ཤིང་སྒྲོག་ལྕགས་སྒྲོག་ཁྲི་མོན་གཡུལ་ངོ་རུ། །མཚོན་ཆའི་ཆར་འབབ་པ་དང་གཞན་དག་ནི། །ཞེ་སྡང་བ་དག་ངེས་པར་འཇོམས་བྱེད་པར། །རྒྱུད་ཆེན་
འདིས་ནི་འགྲུབ་པར་འགྱུར་བ་ཡིན། །གང་གིས་སྔགས་ཀྱི་རྒྱལ་པོ་བྲིས་ནས་ནི། །རིག་པ་བྱས་ནས་དཔུང་པ་ལ་བཏགས་ན། །དེའི་དབང་ཕྱུག་ནོར་སྦྱིན་དང་མཉམ་འགྱུར། །གཞན་གྱིས་མི་འཕྲོགས་ནོར་གྱི་གཏེར་ཐོབ་

88-1-46a

འགྱུར། །ཨོཾ་ཀུ་རུ་ཀུལླེ་སྭཱ་ཧཱ། ལྷུང་བཟེད་ལ་ནི་བཏགས་ནས་སུ། །ཡུལ་གྱི་མུ་གེ་བྱུང་བའི་ཚེ། །སློངས་མོ་པས་ནི་བསོད་སྙོམས་ཐོབ། །ཨུཏྤལ་སྡོང་བུའི་ཕྱི་ཤུན་ཁུ་བ་ནི། །འོ་མ་དང་བཀྲུས་བུད་མེད་ཀྱིས་འཐུངས་ན། །
རང་གི་ལས་ཀྱིས་མངལ་རླུགས་པ་དག་ཀྱང་། །དེས་ནི་ངེས་པར་གནས་པ་བྱེད་པ་ཡིན། །མ་ག་ཏ་ཡི་འབྲས་བུ་ལྔ་ཙམ་ཞིག །བཏགས་ནས་བུད་མེད་གང་གིས་འོ་མ་འཐུངས། །གསང་སྔགས་འདི་ཡི་མཐུ་རབ་ཆེ་བ་ཡིས། །དེ་ནི་བདེ་བ་དང་
ལྡན་བཙའ་བར་འགྱུར། །ནིམ་པས་བ་དུ་འོ་མར་རབ་བཏགས་ནས། །རྡོ་རྗེའི་ཆུ་དང་ལྷན་ཅིག་བསྲེས་བྱས་ནས། །སྐྱེས་པའི་ཚེ་ན་མངལ་ནི་བསྐུ་བྱས་ན། །བུད་མེད་དེ་ནི་བདེ་བར་བུ་བཙའ་འགྱུར། །གླང་པོ་མ་ག་ནི་ཡི་ཤུ་དག་བཅས། །
རྟ་ཡི་དྲི་དང་མ་ཧེའི་མར་གསར་བཅས། །བ་བླ་དང་ལྡན་སྦྱོར་བ་བྱས་ནས་ནི། །ནུ་མ་དག་ནི་སྒྲུབ་བྱེད་འཕེལ་བར་བྱེད། །བཟའ་བ་ཐམས་ཅད་ཟོས་ནས་ནི། །སྣ་ནས་ཆུ་ནི་འཐུངས་ན་ནི། །མགོ་བོའི་དུས་མིན་སྐྲ་དཀར་དག །སྔགས་ཀྱི་སྦྱོར་
བས་དེ་མེད་འགྱུར། །ཨ་བ་ཤ་ཡི་རྩ་བ་དང་། །ཀ་མ་ཙ་ཀ་གསེར་ཤིང་འབྲས། །ལྡན་པར་ག་བུར་ཆུས་བཏགས་ནས། །ལུས་མཆོག་བཀྲུས་བསྲུབས་མཛུབ་མོ་འཇིབ། །འཁྲིག་པའི་ཚེ་ན་མི་འཛག་ན། །བདག་པོ་མི་གུས་འགྲོ་
བར་འདོད། །འཆིང་བ་ཡི་ནི་སྦྱིན་པར་འདོད། །དེ་འཛག་བྱ་ཕྱིར་དེ་ཡིས་བསྐུ། །མཁྲིས་པ་སྦྱོར་ཚེ་ཕག་ཞིག་ལས། །མར་མེ་སྦར་བར་བྱས་ནས་ནི། །མི་འདོད་པ་ཡང་མྱུར་དུ་འབྱུང་། །དེ་ཡང་མངལ་དུ་ཡུན་རིངས་གནས། །རྡོ་རྗེ་མེ་ཡིས་ཁྱིམ་ཚིག་ན། །
མི་གང་སྔགས་ཀྱིས་ཆང་གིས་འཐོར། །མེ་ནི་འཆི་བར་གྱུར་ཏོ་ཞེས། །སྦྱོར་བ་འཇིག་རྟེན་དབང་ཕྱུག་གསུངས། །སེམས་ཅན་གང་དག་འཁོར་གནས་དང་། །འཇིག་རྟེན་མགོན་པོས་དེ་སྐད་བསྒྲགས། །རི་ཡི་རྒྱལ་པོ་པོ་ཏ་ལར། །
བཅོམ་ལྡན་གཞན་སྡུག་པས་སྡུག་པ། །སངས་རྒྱས་མ་གྱུར་ཅི་ཡང་མེད། །སེམས་ཅན་དོན་རྣམས་བསྒྲུབས་པའི་ཕྱིར། །སྔར་སྤྱད་མ་ཡིན་ཅི་ཡང་མེད། །ཉམས་པ་སླར་ཡང་གསོ་བར་བསམ། །བཅོམ་ལྡན་འདས་འཕགས་པ་

88-1-46b

སྤྱན་རས་གཟིགས་དབང་ཕྱུག་གིས་དེ་སྐད་ཅེས་བཀའ་སྩལ་ནས། ཐམས་ཅད་དང་ལྡན་པའི་འཁོར་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་
པ་ལ་མངོན་པར་བསྟོད་དོ། །འཕགས་མ་སྒྲོལ་མ་ཀུ་རུ་ཀུལླེའི་རྟོག་པ་རྫོགས་སོ།། །། རྒྱ་གར་གྱི་མཁན་པོ་ཀྲིཥྞ་པཎྜི་ཏ་དང་། ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་
ཏེ་བ་གཏན་ལ་ཕབ་པ།   །སྟག་ལུང་རྒྱུད་འབུམ་ལ་བཏུགས་པའམ་ཚལ་པ་བཀའ་འགྱུར་ལས་ཞུས།    །    །    །    །    །
  །    །    །    །    །    །    །    །མངྒ་ལྃ།    །    །ཤུ་བྷྃ།     །    །    །    །    །    །    །    །    །    །    །    །    །
༄༅། །རྒྱ་གར་སྐད་དུ།  ན་མཿཏཱ་རཱེ་ཨེ་ཀ་བིཾ་ཤ་ཏི་སྟོ་ཏྲ་གུ་ཎ་ཧི་ཏ་སཱ་ཀ ། བོད་སྐད་དུ།  སྒྲོལ་མ་ལ་ཕྱག་འཚལ་ཉི་ཤུ་རྩ་གཅིག་གིས་བསྟོད་པ་ཕན་ཡོན་དང་བཅས་པ། རྗེ་བཙུན་མ་འཕགས་མ་སྒྲོལ་མ་
ལ་ཕྱག་འཚལ་ལོ། །ཕྱག་འཚལ་སྒྲོལ་མ་མྱུར་མ་དཔའ་མོ། །སྤྱན་ནི་སྐད་ཅིག་གློག་དང་འདྲ་མ། །འཇིག་རྟེན་གསུམ་མགོན་ཆུ་སྐྱེས་ཞལ་གྱི། །གེ་སར་ཕྱེ་བའི་ལས་ནི་བྱུང་མ། །ཕྱག་འཚལ་སྟོན་ཀའི་ཟླ་བ་ཀུན་དུ། །
གང་བ་བརྒྱ་ནི་བརྩེགས་པའི་ཞལ་མ། །སྐར་མ་སྟོང་ཕྲག་ཚོགས་པ་རྣམས་ཀྱིས། །རབ་ཏུ་ཕྱེ་བའི་འོད་རབ་འབར་མ། །ཕྱག་འཚལ་གསེར་སྔོ་ཆུ་ནས་སྐྱེས་ཀྱིས། །པདྨས་ཕྱག་ནི་རྣམ་པར་བརྒྱན་མ། །སྦྱིན་པ་བརྩོན་
འགྲུས་དཀའ་ཐུབ་ཞི་བ། །བཟོད་པ་བསམ་གཏན་སྤྱོད་ཡུལ་ཉིད་མ། །ཕྱག་འཚལ་དེ་བཞིན་གཤེགས་པའི་གཙུག་ཏོར། །མཐའ་ཡས་རྣམ་པར་རྒྱལ་བར་སྤྱོད་མ། །མ་ལུས་ཕ་རོལ་ཕྱིན་པ་ཐོབ་པའི། །

88-1-47a

རྒྱལ་བའི་སྲས་ཀྱིས་ཤིན་ཏུ་བསྟེན་མ། །ཕྱག་འཚལ་ཏུཏ་ཏཱ་ར་ཧཱུྃ་ཡི་གེ། །འདོད་དང་ཕྱོགས་དང་ནམ་མཁའ་གང་མ། །འཇིག་རྟེན་བདུན་པོ་ཞབས་ཀྱིས་མནན་ཏེ། །ལུས་པ་མེད་པར་འགུགས་པར་
ནུས་མ། །ཕྱག་འཚལ་བརྒྱ་བྱིན་མེ་ལྷ་ཚངས་པ། །རླུང་ལྷ་སྣ་ཚོགས་དབང་ཕྱུག་མཆོད་མ། །འབྱུང་པོ་རོ་ལངས་དྲི་ཟ་རྣམས་དང་། །གནོད་སྦྱིན་ཚོགས་ཀྱིས་མདུན་ནས་བསྟོད་མ། །ཕྱག་འཚལ་ཏྲད་ཅེས་བྱ་དང་ཕཊ་
ཀྱིས། །ཕ་རོལ་འཁྲུལ་འཁོར་རབ་ཏུ་འཇོམས་མ། །གཡས་བསྐུམ་གཡོན་བརྐྱང་ཞབས་ཀྱིས་མནན་ཏེ། །མེ་འབར་འཁྲུགས་པ་ཤིན་ཏུ་འབར་མ། །ཕྱག་འཚལ་ཏུ་རེ་འཇིགས་པ་ཆེན་མོ། །བདུད་ཀྱི་དཔའ་བོ་
རྣམ་པར་འཇོམས་མ། །ཆུ་སྐྱེས་ཞལ་ནི་ཁྲོ་གཉེར་ལྡན་མཛད། །དགྲ་བོ་ཐམས་ཅད་མ་ལུས་གསོད་མ། །ཕྱག་འཚལ་དཀོན་མཆོག་གསུམ་མཚོན་ཕྱག་རྒྱའི། །སོར་མོས་ཐུགས་ཀར་རྣམ་པར་བརྒྱན་མ། །མ་ལུས་
ཕྱོགས་ཀྱིས་འཁོར་ལོས་བརྒྱན་པའི། །རང་གི་འོད་ཀྱི་ཚོགས་རྣམས་འཁྲུག་མ། །ཕྱག་འཚལ་རབ་ཏུ་དགའ་བ་བརྗིད་པའི། །དབུ་རྒྱན་འོད་ཀྱི་ཕྲེང་བ་སྤེལ་མ། །བཞད་པ་རབ་བཞད་ཏུཏ་ཏཱ་ར་ཡིས། །བདུད་དང་འཇིག་རྟེན་དབང་
དུ་མཛད་མ། །ཕྱག་འཚལ་ས་གཞི་སྐྱོང་བའི་ཚོགས་རྣམས། །ཐམས་ཅད་འགུགས་པར་ནུས་མ་ཉིད་མ། །ཁྲོ་གཉེར་གཡོ་བའི་ཡི་གེ་ཧཱུྃ་གིས། །ཕོངས་པ་ཐམས་ཅད་རྣམ་པར་སྒྲོལ་མ། །ཕྱག་འཚལ་ཟླ་བའི་རྩེ་མོ་དབུ་བརྒྱན། །
བརྒྱན་པ་ཐམས་ཅད་ཤིན་ཏུ་འབར་མ། །རལ་པའི་ཁྲོད་ན་འོད་དཔག་མེད་ལས། །རྟག་པར་ཤིན་ཏུ་འོད་ནི་མཛད་མ། །ཕྱག་འཚལ་བསྐལ་པ་ཐ་མའི་མེ་ལྟར། །འབར་བའི་ཕྲེང་བའི་དབུས་ན་གནས་མ། །གཡས་བརྐྱང་གཡོན་བསྐུམ་
ཀུན་ནས་བསྐོར་དགས། །དགྲ་ཡི་དཔུང་ནི་རྣམ་པར་འཇོམས་མ། །ཕྱག་འཚལ་ས་གཞིའི་ངོས་ལ་ཕྱག་གི། མཐིལ་གྱིས་བསྣུན་ཅིང་ཞབས་ཀྱིས་བརྡུང་མ། །ཁྲོ་གཉེར་ཅན་མཛད་ཡི་གེ་ཧཱུྃ་གི། །རིམ་པ་བདུན་པོ་རྣམས་ནི་འགེམས་མ། །

88-1-47b

ཕྱག་འཚལ་བདེ་མ་དགེ་མ་ཞི་མ། །མྱ་ངན་འདས་ཞིང་སྤྱོད་ཡུལ་ཉིད་མ། །སྭཱ་ཧཱ་ཨོཾ་དང་ཡང་དག་ལྡན་པས། །སྡིག་པ་ཆེན་པོ་འཇོམས་པ་ཉིད་མ། །ཕྱག་འཚལ་ཀུན་ནས་བསྐོར་རབ་དགའ་བའི། །དགྲ་ཡི་ལུས་ནི་རབ་ཏུ་འགེམས་
མ། །ཡི་གེ་བཅུ་པའི་ངག་ནི་བཀོད་པའི། །རིག་པ་ཧཱུྃ་ལས་སྒྲོལ་མ་ཉིད་མ། །ཕྱག་འཚལ་ཏུ་རེའི་ཞབས་ནི་བརྡབ་པས། །ཧཱུྃ་གི་རྣམ་པའི་ས་བོན་ཉིད་མ། །རི་རབ་མན་དཱ་ར་དང་འབིགས་བྱེད། །འཇིག་རྟེན་གསུམ་རྣམས་གཡོ་
བ་ཉིད་མ། །ཕྱག་འཚལ་ལྷ་ཡི་མཚོ་ཡི་རྣམ་པའི། །རི་དགས་རྟགས་ཅན་ཕྱག་ན་བསྣམས་མ། །ཏ་ར་གཉིས་བརྗོད་ཕཊ་ཀྱི་ཡི་གེས། །དུག་རྣམས་མ་ལུས་པར་ནི་སེལ་མ། །ཕྱག་འཚལ་ལྷ་ཡི་ཚོགས་རྣམས་རྒྱལ་པོ། །ལྷ་དང་
མིའམ་ཅི་ཡིས་བསྟེན་མ། །ཀུན་ནས་གོ་ཆ་དགའ་བའི་བརྗིད་ཀྱིས། །རྩོད་དང་རྨི་ལམ་ངན་པ་སེལ་མ། །ཕྱག་འཚལ་ཉི་མ་ཟླ་བ་རྒྱས་པའི། །སྤྱན་གཉིས་པོ་ལ་འོད་རབ་གསལ་མ། །ཧ་ར་གཉིས་བརྗོད་ཏུཏ་ཏཱ་ར་ཡིས། །
ཤིན་ཏུ་དྲག་པོའི་རིམས་ནི་སེལ་མ། །ཕྱག་འཚལ་དེ་ཉིད་གསུམ་རྣམས་བཀོད་པའི། །ཞི་བའི་མཐུ་དང་ཡང་དག་ལྡན་མ། །གདོན་དང་རོ་ལངས་གནོད་སྦྱིན་ཚོགས་རྣམས། །འཇོམས་པས་ཏུ་རེ་རབ་མཆོག་ཉིད་མ། །རྩ་བའི་
སྔགས་ཀྱིས་བསྟོད་པ་འདི་དང་། །ཕྱག་འཚལ་བ་ནི་ཉི་ཤུ་རྩ་གཅིག །ལྷ་མོ་ལ་གུས་ཡང་དག་ལྡན་པར། །བློ་ལྡན་གང་གིས་རབ་ཏུ་བརྗོད་པས། །སྲོད་དང་ཐོ་རངས་ལངས་པར་བྱས་ནས། །དྲན་པས་མི་འཇིགས་
ཐམས་ཅད་རབ་སྟེར། །སྡིག་པ་ཐམས་ཅད་རབ་ཏུ་ཞི་བ། །ངན་འགྲོ་ཐམས་ཅད་འཇོམས་པ་ཉིད་དོ། །རྒྱལ་བ་བྱེ་བ་ཕྲག་བདུན་རྣམས་ཀྱིས། །མྱུར་དུ་དབང་ནི་བསྐུར་བར་འགྱུར་ལ། །འདི་ལས་ཆེ་བ་ཉིད་ནི་འཐོབ་ཅིང་། །
སངས་རྒྱས་གོ་འཕང་མཐར་ཐུག་དེར་འགྲོ། །དེ་ཡི་དུག་ནི་དྲག་པོ་ཆེན་པོ། །བརྟན་གནས་པ་འམ་གཞན་ཡང་འགྲོ་བ། །ཟོས་པ་དང་ནི་འཐུངས་པ་ཉིད་ཀྱང་། །དྲན་པས་རབ་ཏུ་སེལ་བ་ཉིད་ཐོབ། །གདོན་དང་རིམས་དང་

88-1-48a

དུག་གིས་གཟིར་བའི། །སྡུག་བསྔལ་ཚོགས་ནི་རྣམ་པར་སྤོང་སྟེ། །སེམས་ཅན་གཞན་མ་རྣམས་ལ་ཡང་ངོ་། །གཉིས་གསུམ་བདུན་དུ་མངོན་པར་བརྗོད་ན། །བུ་འདོད་པ་ནི་བུ་ཐོབ་འགྱུར་ཞིང་། །ནོར་འདོད་པ་ནི་
ནོར་རྣམས་ཉིད་ཐོབ། །འདོད་པ་ཐམས་ཅད་ཐོབ་པར་འགྱུར་ཏེ། །བགེགས་རྣམས་མེད་ཅིང་སོ་སོར་འཇོམས་འགྱུར། །བཅོམ་ལྡན་འདས་མ་སྒྲོལ་མ་ལ་ཡང་དག་པར་རྫོགས་པའི་སངས་རྒྱས་ཀྱིས་བསྟོད་པ་
གསུངས་པ་རྫོགས་སྷོ།། །།ཞུས་དག །
༄༅༅། །རྒྱ་གར་སྐད་དུ།  བཛྲ་ཀཱི་ལ་ཡ་མུ་ལ་ཏནྟྲ་ཁཎྜཿ།  བོད་སྐད་དུ།  རྡོ་རྗེ་ཕུར་པ་རྩ་བའི་རྒྱུད་ཀྱི་དུམ་བུ། བཅོམ་ལྡན་འདས་རྡོ་རྗེ་གཞོན་ནུ་ལ་ཕྱག་འཚལ་ལོ། །རྡོ་རྗེ་ཁྲོ་བོས་ཞེ་སྡང་གཅོད། །
མཚོན་ཆེན་སྔོན་པོ་ཆེར་འབར་བ། །ནམ་མཁའི་དཀྱིལ་དུ་ཐིག་ལེ་ཤར། །སྲོག་གི་སྒོ་རུ་ཤར་བ་དང་། །སྙིང་གི་དཀྱིལ་དུ་བསྒོམ་པར་བྱ། །སྙིང་རྗེས་བསྒྲལ་བའི་དམ་ཚིག་ནི། །གསད་ཅིང་མནན་པ་ཉིད་མིན་ཏེ། །
ཕུང་པོའི་རྡོ་རྗེའི་བདག་ཉིད་དེ། །རྣམ་པར་ཤེས་པ་རྡོ་རྗེར་བསྒོམ། །ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷཱ་ན་བྃ་ཧཱུྃ་ཕཊ། དིཔྟ་ཙཀྲ་ཧ་ན་ཧ་ན་ཧཱུྃ་ཕཊ། རྡོ་རྗེ་གཞོན་ནུའི་རིག་འཛིན་རྣམས། །འཁོར་བ་རྡོ་རྗེར་བསྒྲུབ་པར་
མཛོད། །འཁོར་བ་རྡོ་རྗེ་ཕུར་པའི་ལྷ། །ཡེ་ཤེས་ཁྲོ་བོ་གྲུབ་པར་མཛོད། །སངས་རྒྱས་ཀུན་གྱི་ཡེ་ཤེས་སྐུ། །རྡོ་རྗེའི་དེ་ཉིད་རང་བཞིན་ལས། །ཆོས་ཀྱི་དབྱིངས་ཀྱི་ངོ་བོ་ཉིད། །འབར་བའི་ཁྲོ་བོ་མི་བཟད་པས། །སྐུ་
ཡི་གཏེར་དུ་བདག་སྐྱེད་ཅིག །ཐབས་ཀྱིས་སྤྱོད་པས་སེམས་ཅན་དོན། །བྱམས་དང་སྙིང་རྗེས་གང་འདུལ་བ། །སངས་རྒྱས་ཕྲིན་ལས་རྫོགས་པར་མཛོད། །དབང་དང་བྱིན་རླབས་འདིར་སྩོལ་ཅིག །ཨོཾ་བཛྲ་ཀྲོ་དྷ་

88-1-48b

‍་
ཧཱུྃ་ཀ་ར་ཧཱུྃ། གརྫ་གརྫ་ཧཱུྃ་ཕཊ། ཨོཾ་བཛྲ་ཀྲོ་དྷཱི་དཱིཔ་ཡ་ཏི་ཧཱུྃ། ཨོཾ་བཛྲ་ཨུ་ཡ་ཀ་མུ་ཁ་ཧཱུྃ། ཨོཾ་བཛྲ་ཨུ་ཥི་ཀ་མུ་ཁི་ཧཱུྃ།  འདི་ནི་ཁྲོ་བོ་ཆེན་པོ་ཧཱུྃ། མཛད་དང་། རྡོ་རྗེ་ལྷ་མོ་སྒྲ་འབྱིན་དང་། སྤྲུལ་པའི་ལྷ་མོ་ཕྲ་མེན་མ། ཕག་གི་མགོ་ཅན་
དང་། རྩངས་པའི་མགོ་ཅན་ནོ། །ཨོཾ་བཛྲ་ཀྲོ་དྷ་བི་ཛ་ཡ་ཧཱུྃ། ཧ་ན་ཧ་ན་ཧཱུྃ་ཕཊ། ཨོཾ་བཛྲ་ཀྲོ་དྷ་ལཱི་སྱ་ཀི་ཧཱུྃ། ཨོཾ་བཛྲ་བྱཱི་གྷྲི་མུ་ཁ་ཧཱུྃ། ཨོཾ་བཛྲ་དྲིཊྷྲ་མུ་ཁི་ཧཱུྃ། འདི་ནི་ཁྲོ་བོ་ཆེན་པོ་རྣམ་པར་རྒྱལ་བ་དང་། 
བ་དང་། རྡོ་རྗེ་ལྷ་མོ་སྒེག་མོ་དང་། སྤྲུལ་པའི་ལྷ་མོ་ཕྲ་མེན་མ་སྟག་གི་མགོ་བོ་ཅན་དང་། བྱ་རྒོད་ཀྱི་མགོ་ཅན་ནོ། །ཨོཾ་བཛྲ་ཀྲོ་དྷ། དཎ་ཌ་ཧཱུྂ་ད་ཧ་ད་ཧ་ཧཱུྂ་ཕཊ། ཨོཾ་བཛྲ་མ་ར་མུ་ཁི་ཧཱུྃ། ཨོཾ་
བཛྲ་ཏཱ་ན་མུ་ཁི་ཧཱུྃ། འདི་ནི་ཁྲོ་བོ་དབྱུག་སྔོན་འཆང་བ་དང་། ལྷ་མོ་རྡོ་རྗེ་སྡེར་མོ་དང་། སྤྲུལ་པའི་ལྷ་མོ་ཕྲ་མེན་མ། གཡག་མགོ་ཅན་དང་། བྱ་རོག་གི་མགོ་ཅན་ནོ། །ཨོཾ་བཛྲ་ཀྲོ་ཡ་མནྟ་ཀ་ཧཱུྃ་པ་ཙ་པ་ཙ་ཧཱུྃ་ཕཊ། ཨོཾ་བཛྲ་ཀྲོ་དྷ་ཤྨ་
ཤཱན་པ་ཏ་ཧཱུྃ། ཨོཾ་བཛྲ་ཧ་ར་ཎི་མུ་ཁ་ཧཱུྃ། ཨོཾ་བཛྲ་ཨུ་ལུ་ཀ་མུ་ཁི་ཧཱུྃ། འདི་ནི་ཁྲོ་བོ་གཤིན་རྗེ་མཐར་བྱེད་དང་། རྡོ་རྗེ་ལྷ་མོ་དུར་ཁྲོད་ཀྱི་བདག་མོ་དང་། སྤྲུལ་པའི་ལྷ་མོ་ཕྲ་མེན་མ་རི་དགས་ཀྱི་མགོ་ཅན་དང་། འུག་པའི་མགོ་
ཅན་ནོ། །ཨོཾ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུྃ་བནྡྷ་བནྡྷ་ཧཱུྃ་ཕཊ། ཨོཾ་བཛྲ་ཀྲོ་དྷི་མུ་ཧ་ལ་ཧཱུྃ། ཨོཾ་བཛྲ་ཏྱ་ཀི་མུ་ཁ་ཧཱུྃ། ཨོཾ་བཛྲ་པྲེ་ཏ་མུ་ཁི་ཧཱུྃ། འདི་ནི་ཁྲོ་བོ་མི་གཡོ་མགོན་པོ་དང་། རྡོ་རྗེ་ལྷ་མོ་གཏུན་ཁུང་མ་དང་། སྤྲུལ་པའི་ལྷ་མོ་ཕྲ་
མེན་མ་གཟིག་གི་མགོ་ཅན་དང་ཁྭའི་མགོ་ཅན་ནོ། །ཨོཾ་བཛྲ་ཀྲོ་དྷ་ཧ་ཡ་གྲཱི་བ་ཧཱུྃ་ཧུ་ལུ་ཧུ་ལུ་ཧཱུྃ་ཕཊ། ཨོཾ་བཛྲ་ཀྲོ་དྷི་ཛ་ཡ་ཏི་ཧཱུྃ། ཨོཾ་བཛྲ་བི་རཱ་ལ་མུ་ཁི་ཧཱུྃ། ཨོཾ་བཛྲ་པཀྵི་ཏ་མུ་ཁི་ཧཱུྃ། འདི་ནི་ཁྲོ་བོ་རྟ་མགྲིན་དང་། རྡོ་རྗེ་ལྷ་
མོ་གཏུམ་མོ་དང་། སྤྲུལ་པའི་ལྷ་མོ་ཕྲ་མེན་མ་བྱི་ལའི་མགོ་ཅན་དང་། པུ་ཤུད་ཀྱི་མགོ་ཅན་ནོ། །ཨོཾ་བཛྲ་ཀྲོ་དྷ་ཨ་བ་རཱ་ཛི་ཏ་ཧཱུྃ། ཏིཥྛ་ཏིཥྛ་ཧཱུྃ་ཕཊ། ཨོཾ་བཛྲ་ཀྲོ་དྷི་ས་བྱ་ཏི་ཧཱུྃ། ཨོཾ་བཛྲ་སྲྃ་ག་ལ་མུ་ཁ་ཧཱུྃ། ཨོཾ་

88-1-49a

བཛྲ་པཉྩ་ར་མུ་ཁི་ཧཱུྃ།  འདི་ནི་ཁྲོ་བོ་གཞན་གྱིས་མི་ཐུབ་པ་དང་། རྡོ་རྗེ་ལྷ་མོ་མདའ་སྙེམས་མ་དང་། སྤྲུལ་པའི་ལྷ་མོ་ཕྲ་མེན་མ་སྤྱང་ཁུའི་མགོ་ཅན་དང་། ཁྲའི་མགོ་ཅན་ནོ། །ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎ་ཌ་ལི་ཧཱུྃ། 
ཙྪིནྡྷ་ཙྪིནྡྷ་ཧཱུྃ་ཕཊ། ཨོཾ་བཛྲ་ཀྲོ་དྷི་ས་བྱ་མི་ཏི་ཧཱུྃ།  ཨོཾ་བཛྲ་སིཾ་ཧ་མུ་ཁ་ཧཱུྃ།  ཨོཾ་བཛྲ་ཏི་ཏིལ་མུ་ཁི་ཧཱུྃ། འདི་ནི་ཁྲོ་བོ་བདུད་རྩི་འཁྱིལ་པ་དང་། རྡོ་རྗེ་ལྷ་མོ་སྒྲ་མཛད་མ་དང་། སྤྲུལ་པའི་ལྷ་མོ་ཕྲ་མེན་མ་སེང་གེའི་མགོ་ཅན་དང་། 
ཕ་ཝང་གི་མགོ་ཅན་ནོ། །ཨོཾ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུྃ།  བིནྡྷ་བིནྡྷ་ཧཱུྃ་ཕཊ། ཨོཾ་བཛྲ་ཀྲོ་དྷི་མཱ་ར་ཡ་ཧཱུྃ། ཨོཾ་བཛྲ་རཀྵི་ས་མུ་ཁ་ཧཱུྃ། ཨོཾ་བཛྲ་ན་ཀུ་ལ་མུ་ཁི་ཧཱུྃ། འདི་ནི་ཁྲོ་བོ་འཇིག་རྟེན་གསུམ་ལས་རྣམ་པར་རྒྱལ་བ་དང་། རྡོ་རྗེ་ལྷ་
མོ་གསོད་བྱེད་མ་དང་། སྤྲུལ་པའི་ལྷ་མོ་ཕྲ་མེན་མ་དྲེས་ཀྱི་མགོ་ཅན་དང་། སྲེ་མོའི་མགོ་ཅན་ནོ། །ཨོཾ་བཛྲ་ཀྲོ་དྷ་མ་ཧཱ་བ་ལ་ཧཱུྃ། སྥ་ཊ་སྥ་ཊ་ཧཱུྃ་ཕཊ། ཨོཾ་བཛྲ་ཀྲོ་དྷི་མུཎྜེ་མྃ་ཧཱུྃ། ཨོཾ་བཛྲ་རཀྵ་ས་མུ་ཁི་ཧཱུྃ། ཨོཾ་བཛྲ་ཀ་ཤི་
ཀ་མུ་ཁི་ཧཱུྃ། འདི་ནི་ཁྲོ་བོ་སྟོབས་པོ་ཆེ་དང་། རྡོ་རྗེ་ལྷ་མོ་རིག་བྱེད་མ་དང་། སྤྲུལ་པའི་ལྷ་མོ་ཕྲ་མེན་མ་དོམ་གྱི་མགོ་ཅན་དང་། བྱི་བའི་མགོ་ཅན་ནོ། །ཨོཾ་བཛྲ་ཡཀྵ་ས་ད་ཧཱུྃ་ཛཿ ཨོཾ་བཛྲ་བྷེ་ར་བེ་ཧཱུྃ་ཧཱུྃ། ཨོཾ་བཛྲ་ཨ་མྲྀ་ཏ་ཧཱུྃ་བྃ། 
ཨོཾ་བཛྲ་མ་ར་ཎ་ཧཱུྃ་ཧོཿ འདི་ནི་ཤར་དུ་པུ་ཤུད་ཀྱི་མགོ་ཅན་དང་། ལྷོར་བྱ་རོག་གི་མགོ་ཅན་དང་། ནུབ་ཏུ་སྲིན་བྱའི་མགོ་ཅན་དང་། བྱང་དུ་ཁྲའི་མགོ་ཅན་ནོ། །འཁོར་བ་ཕུར་བུ་བསྒྲུབ་དོན་དུ། །དབང་དང་བྱིན་བརླབས་ཞུས་
བའི་ཕྱིར། །ཡེ་ཤེས་ཁྲོ་བོ་གཤེགས་སུ་གསོལ། །ཡེ་ཤེས་ཁྲོ་བོ་གཤེགས་ནས་ཀྱང་། །རྟགས་དང་མཚན་མ་བསྟན་པ་དང་། །ཕུར་པའི་དངོས་གྲུབ་སྩལ་དུ་གསོལ། །དམ་ཚིག་ཆེན་པོའི་དུས་ལ་བབ། །སྤྲུལ་པ་ཆེན་
པོའི་དུས་ལ་བབ། །ཕོ་ཉ་ཆེན་པོའི་དུས་ལ་བབ། །བདག་ཉིད་ཆེན་པོའི་དུས་ལ་བབ། །ས་བདག་ཆེན་མོའི་དུས་ལ་བབ། ཁྱི་ཡི་གདོང་ཅན་དུས་ལ་བབ། །བསྒྲལ་བར་བྱ་བའི་དུས་ལ་བབ། །བྱང་ཆུབ་ཏུ་ནི་སེམས་བསྐྱེད་ནས། །དུས་གསུམ་

88-1-49b

སངས་རྒྱས་སྲས་བཞིན་དུ། །རིགས་འཛིན་བདག་ཅག་རྣམས་ལ་ནི། །གནོད་ཅིང་གདུག་པའི་དགྲ་དང་བགེགས། །བདུད་དང་བར་དུ་གཅོད་པ་རྣམས། །ཁྲོ་བོ་ཆེན་པོའི་བྱིན་བརླབས་ཀྱིས། །ཡུད་ཙམ་གྱིས་ནི་དེ་བཀུག་ནས། །མངོན་
སྤྱོད་ཚུལ་གྱིས་བསྒྲལ་བ་དང་། །ལུས་ངག་ཕྱེ་མར་མཛད་ནས་ཀྱང་། །སྡུག་བསྔལ་ཉམས་སུ་མྱོང་བར་མཛོད། །ཨོཾ་ལཾ་ཧཱུྃ་ལཾ། སྟྃ་བྷ་མྃ་མོ་ཧག་ཧ་ཡ། བྷ་ག་ཝཱན། ཧྲཱིཿཥྚཱིཿབི་ཀྲི་ཏ་བཛྲ་ཧཱུྃ་ཀ་ར་ཧཱུྃ། ཨོཾ་བཛྲ་ཀི་ལི་ཀཱི་ལ་ཡ་ཛཿ
ཧཱུྃ་བྃ་ཧོ། སརྦ་བིགྣ་ནན། བཛྲ་ཀི་ལི་ཀཱི་ལ་ཡ་ཧཱུྃ་ཕཊ། བགེགས་བྱེད་པ་ཡི་བདུད་རྣམས་དང་། །སྡུག་བསྔལ་སེམས་ལ་མཉམ་སྦྱོར་བ། །ཆེ་གེ་མོ་ཞེས་བྱ་བའི་བདུད། །ཟུང་ཅིག་རྡུངས་ཤིག་རྣམ་པར་ཆིངས། །གཏོགས་ཤིག་
གྲོགས་དང་དབྱེ་བར་གྱིས། །རིང་ནས་ཁུག་ལ་སྨྲ་རུ་ཆུབ། ཕོབ་ཅིག་རྣམ་པར་གཟིར་བར་གྱིས། །བདག་གི་དབང་དུ་བྱས་གྱུར་ནས། །བསྒོ་བའི་བཀའ་ཉན་ནུས་པར་གྱིས། །ཧཱུྃ་པ་ར་བིདྱ་ཙྪིནྡྷ་ཙྪིནྡྷ་ཧཱུྃ་ཕཊ། བིནྡྷ་བིནྡྷ་
ཧཱུྃ་ཕཊ། གྲིཧྞ་གྲྀཧྞ་ཧཱུྃ་ཕཊ། བནྡྷ་བནྡྷ་ཧཱུྃ་ཕཊ། ཏྲཱ་ཤ་ཡ་ཏྲཱ་ཤ་ཡ་ཧཱུྃ་ཕཊ། ཧ་ས་ཡ་ར་ཧ་སཾ་ཡ་རི་ཧྲིཿདཎྜ་ཧཱུྃ་ཕཊ། ཤཱི་གྷྲཾ་ཨཱ་ན་ཡ་ཧཱུྃ་ཕཊ། ཛྭ་ལཱ་པ་ཡ། ཛྭ་ལཱ་པ་ཡ་ཧཱུྃ་ཕཊ། ཨཱ་བེ་ཤ་ཡ་ཨཱ་བེ་ཤེ་ཡ་ཧཱུྃ་ཕཊ། བིནྡྷ་ཡ་བིནྡྷ་ཡ་
ཧཱུྃ་ཕཊ། ཕོ་ཉ་བྲན་དང་མངག་པའི་ཚོགས། །ཁྱེད་ཀྱི་ཐུགས་དམ་དུས་ལ་བབ། །མངོན་སྤྱོད་ཇི་ལྟར་ངེས་པ་དང་། །མངོན་སྤྱོད་བྱིན་བརླབས་དེ་བཞིན་མཛོད། །ཧ་ན་ཧ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། མ་ཐཱ་མ་ཐཱ་བཛྲ། 
ཛྭ་ལ་ཛྭ་ལ་བཛྲ། སུ་རུ་སུ་རུ་བཛྲ། མུ་རུ་མུ་རུ་བཛྲ། ཀ་ཊ་ཀ་ཊ་ཡེ། ཛ་ཡ་བི་ཛ་ཡེ། ཨ་ཛི་ཏེ་ཨ་པ་རཱ་ཛི་ཏེ། མཱ་ར་སེ་ནྱ་པྲ་མ་ར་ད་ནི་ཧཱུྃ་ཕཊ། རྡོ་རྗེ་གསང་བའི་བཀའ་ལུང་གིས། །སྡིག་ཅན་གང་ཞིག་འདའ་བྱེད་པ། །སྟོབས་
ཆེན་ཁྲོ་བོ་ཆེན་པོ་ཡིས། །མགོ་བོ་ཚལ་པ་བརྒྱ་རུ་གྱིས། །ཉོན་ཅིག་བགེགས་དང་ལོག་འདྲེན་རྣམས། །ང་ཡི་བཀའ་ལས་འདའ་མ་བྱེད། །ཧཱུྃ་མ་མ་བ་ཤཱཾ་ཀུ་རུ། གདུག་ཅིང་སྡང་སེམས་ལྡན་པ་རྣམས། །སོང་ཤིག་

88-1-50a

ལྷ་མིན་ལྷ་ཡང་རུང་། །ང་ལ་བར་ཆོད་བྱེད་པའི་བདུད། །མཐུ་དང་རྫུ་འཕྲུལ་མེད་པར་མཛོད། །སརྦ་ཨཱ་ན་ཡ་ཧཱུྃ་ཕཊ། ཏ་ཐཱ་ཡ་ཏ་ཐཱ་ཡ་ཧཱུྃ་ཕཊ། རྡུངས་ཤིག་རྡོ་རྗེ་འབར་བའི་གཏུན། །བཀའ་ལས་
འདའ་བྱེད་སྡིག་ཅན་རྣམས། །རྡོ་རྗེ་མེ་ཡིས་སྙིང་བསྲེགས་ནས། །ལུས་སེམས་རྡུལ་བཞིན་བརླག་པར་མཛོད། །ཁྲོ་མོ་འབར་བའི་གཏུན་ཁུང་དུ། །རྡོ་རྗེ་ཐོ་བས་བརྡུངས་བྱས་ནས། །ལྷ་ཡང་རུང་སྟེ་བསྒྲལ་བར་བྱ། །ཁ་ཏྃ་ཁ་ཏྃ་ཁ་
ཏྃ། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། བཛྲ་ཡཀྵ་ཀྲོ་དྷ་ཁ་ཁ། ཁཱ་ཧི་ཁཱ་ཧི། ཧ་ཧ་ཧ།  ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། ཆོས་ཉིད་ཀྱི་བདེན་པའོ། །གསང་སྔགས་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་སོ། །སངས་རྒྱས་ཀྱི་བྱིན་གྱིས་
རླབས་ཀྱིས་མཐུར་འགྱུར་རོ། །བརྣག་པ་དེ་ཁོ་ན་ཉིད་དོ། །ཀཱི་ལ་ཡ་ལན་ཉི་ཤུ་རྩ་གཅིག་བཟླས་སོ། །ཀཱི་ལ་ཡ་བཅྭ་བརྒྱད་བཟླས་ནས་སྙིང་དཀར་ནག་གི་མཚམས་སུའོ། །ཧཱུྃ་ཧཱུྃ་ཧཱུྃ། ཧོ་ཧོ་ཧོ། ཕཊ་ཕཊ་ཕཊ། འདི་བརྗོད་པར་བྱའོ། །
རྡོ་རྗེ་ཕུར་པ་རྩ་བའི་རྒྱུད་ཀྱི་དུམ་བུ། སློབ་དཔོན་པདྨ་འབྱུང་གནས་དངོས་ཀྱི་རྒྱ་དཔེ་དང་མཐུན་པར། དཔལ་ལྡན་ས་སྐྱ་པཎ་ཌི་ཏས། གཡས་རུའི་ས་ཆ། ཤངས་ཀྱི་སྲེག་ཞིང་དུ་བསྒྱུར་ཅིང་ནུས་ཏེ་གཏན་ལ་ཕབ་པའོ།། །།
།།	།།	།།	།།	།།	སྟག་ལུང་རྒྱུད་འབུམ་ལས་བཏུགས་པའི་མ་ལས་ཞུས།།		།།		།།ཞུས་གཉིས་ཞུས་དག	།།	།།	།།	།།
།།		།།		།།		།།		།།		།།		།།		།།		།།		།།		།།
༄༅། །རྒྱ་གར་སྐད་དུ། མ་ཧཱ་ཀཱ་ལ་ཏན་ཏྲ་རཱ་ཛ་ནཱ་མ། བོད་སྐད་དུ། ནག་པོ་ཆེན་པོ་ཞེས་བྱ་བའི་རྒྱུད་ཀྱི་རྒྱལ་པོ། དཔལ་ནག་པོ་ཆེན་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། 

88-1-50b

བཅོམ་ལྡན་འདས་ལྷ་མོ་རྣམས་ཀྱིས་ཇི་ལྟར་ཐོབ་པ་དེ་བཞིན་བཞུགས་སོ། །ལྷ་མོས་གསོལ་པ། འཁོར་བའི་རྒྱ་མཚོར་ལྷུང་བའི་སེམས་ཅན་དེ་རྣམས་ཐབས་གང་གིས་གདོན། འཁོར་བ་ལྷ་གང་གིས་གང་ལས་གྲོལ་བར་
བགྱི། བཅོམ་ལྡན་འདས་ཀྱིས་བཀའ་སྩལ་པ། གང་གིས་བསྐྱེད་པའི་རིམ་པ་དང་། རྫོགས་པའི་རིམ་པ་སྦྱོར་བ་ལ་ཡེ་ཤེས་སུ་དེ་དག་བརྗོད་པར་བྱའོ། །ལྷ་མོ་ལེགས་པར་ཉོན་ཅིག །བསྐྱེད་པའི་རིམ་པས་འགོག་པ་ལ་
གནས་པ་དང་། དེའི་འབྲས་བུ་སྟེར་བའི་ཇི་ལྟ་བའི་ལམ་ཡང་དག་པར་འབྱུང་བར་བྱེད་པ་ལ་ངེས་པར་ཕྱག་རྒྱ་ལས་དབང་བསྐུར་བའི་བྱེ་བྲག་བྱའོ། །རྒྱུ་བ་གཅོད་པ་ལ་སྤྱོད་པ་དེ་ལ་ཡོངས་སུ་བརྟག་པ་སྟེ། ན་ར་དང་སྦྱོར་བ་
ལས་ཇི་ལྟར་ལམ་དང་ལྡན་པ་སྐྱེད་པའི་རིམ་པའོ། །ལྷ་མོས་གསོལ་པ། ཀྱེ་བཅོམ་ལྡན་འདས་དགོས་པ་གང་གིས་རྡོ་རྗེ་སེམས་དཔའ་བསྐྱེད་པ་ཡིན། དེ་ལྟར་ན་སོ་སོའི་བུམ་པ་ལ་དགོས་པ་ཅི་ཡོད། བཅོམ་ལྡན་
འདས་ཀྱིས་བཀའ་སྩལ་པ། སྐྱེས་པ་ལ་ནི་དངོས་མེད་བཀག་པ་སྟེ། རྡོ་རྗེ་ནམ་མཁའ་ཡིན་པའོ། །ངེས་པར་བདག་མེད་པ་ཡིན་ཞིང་། བདེ་བ་སྐད་ཅིག་མའོ། །ཇི་ལྟར་ཚོགས་པ་མ་ལུས་པ་དང་། གྲོང་ཁྱེར་བ་དེ་ལྟར་སྐྱེས་པ་
ལ་སྟོབས་ཀྱིས་འགོག་པ་ཡིས་བདེ་བ་རྒྱས་པ་འཆིང་བ་མེད་ན་ཇི་ལྟར་སྐྱེ། ལྷ་མོས་གསོལ་པ། ཀྱེ་བཅོམ་ལྡན་འདས་ལུས་བསྟན་པའི་དགོས་པ་གང་ལགས། ལམ་ལ་ཁྲག་དང་བྱང་ཆུབ་སེམས་འདུས་པ་ལས་
གཟུགས་བརྙན་གྱིས་གྲོལ་བ་ལས་མེད་དམ། འབྲས་བུ་སྟེར་རམ་ལྟ་བའི་དོན་དུ་འདོད་ཆགས་ཀྱི་ཕྱིར་རབ་ཏུ་སྦྱོར་བར་བརྗོད་དམ། བཅོམ་ལྡན་འདས་ཀྱིས་བཀའ་སྩལ་པ། ལུས་རྡོ་རྗེ་ཞེས་བརྗོད་པའོ། །ཇི་ལྟར་སྒྱུ་མར་
སེམས་པས་ན་ར་དང་སྦྱོར་བ་བཞིན་ནོ། །ལམ་འདུས་པ་ལས་ཁྲག་གོ་ཞེས་པ་ནི། ལ་ལ་ནཱ་དང་ར་ས་ནཱ་དང་ཨ་བ་དྷཱུ་ཏི་རྣམས་ཀྱིས་ཕུང་པོ་ལྔ་ལ་རྣམ་པར་སྤྱད་པ་ཡིས་ཐབས་གཅིག་ཏུ་མཉམ་པར་གང་གིས་ཤེས་པའི་

88-1-51a

ཚེའི་རྡོ་རྗེ་ལ་དེའི་ལམ་འདུས་པ་ལས་ཁྲག་ཅེས་བརྗོད་དོ། །རབ་ཏུ་སྦྱོར་བའི་ལུས་ཞེས་བརྗོད་པ་དེ་ནི་རྣམ་པར་སྤྱད་པ་མི་བཟོད་པ་གང་འདོད་པ་དེ་རབ་ཏུ་སྦྱོར་བའི་ལུས་སོ། །རབ་ཏུ་སྦྱོར་བས་རྨོངས་པའི་ཕྱིར་རབ་
ཏུ་སྦྱོར་བ་བྱས་པ་ཞེས་བརྗོད་དོ། །ལྷ་མོས་གསོལ་པ། ཆོས་གང་ལགས། ཆོས་ཀྱི་ཚོགས་པའི་གཏམ་བརྗོད་པ་གང་ལགས། མི་རྣམས་ཀྱི་བདེ་བ་ཕུན་སུམ་ཚོགས་པར་བྱ་བའི་ཕྱིར་རམ། དོན་ཐོབ་པར་བྱ་བའི་ཕྱིར་རམ། 
ནད་མེད་པར་འདོད་པའི་འབྲས་བུ་ཐོབ་པར་བྱ་བའི་ཕྱིར་ཡིན། བཅོམ་ལྡན་འདས་ཀྱིས་བཀའ་སྩལ་པ། མིར་སྐྱེས་པའི་སེམས་ཅན་ཆོས་ཇི་ལྟར་སྤྱད་ན་ཚེགས་མེད་པར་དེའི་དངོས་གྲུབ་ཇི་ལྟ་བར་བརྗོད་པར་བྱའོ། །དངོས་གྲུབ་
ཆེན་པོ་བརྒྱད་རྣམས་ནི་རལ་གྲི་དང་མིག་སྨན་དང་རིལ་བུ་དང་རྐང་མགྱོགས་ཀྱི་དངོས་གྲུབ་དང་། གྲུབ་པའི་སྨན་དང་། སྔགས་རྣམས་ལ་ངེས་པར་དངུལ་ཆུ་དང་བཅུད་ལེན་ཏེ། དངོས་གྲུབ་ཆེན་པོ་བརྒྱད་ཐོབ་ནས་དངོས་
གྲུབ་གཞན་བརྟགས་ན་ཇི་ལྟ་བར་སེམས་ཅན་ནག་པོ་ཆེན་པོའི་རྒྱུད་པ་རྣམས་ཀྱིས་འགྲུབ་བོ། །འདིར་ཚོགས་པ་མེད་པར་ངེས་པའོ། །ལྷ་མོས་གསོལ་པ། མིག་སྨན་དངོས་གྲུབ་འདི་ལས་འཇུག་པ་ལ་བཅིང་བྱ་བཅིང་
བྱེད་ཇི་ལྟར་ཕྲ་བར་བརྗོད། བཅོམ་ལྡན་འདས་ཀྱིས་བཀའ་སྩལ་པ། ལེགས་པར་བསྲུང་བ་དང་རྨིག་པའི་སྒྲ་ལྟར་བརླག་པ་ཇི་ལྟ་བར་སྦས་པ་དེའི་སྡོམ་པ་རྒྱས་པར་བརྗོད་དོ། །ལྷ་མོས་གསོལ་པ། བཅོམ་ལྡན་འདས་རྡོ་རྗེའི་
ལུས་ལ་རྩ་དུ་ལགས། དབུགས་འགྲོ་འོང་དང་སྐད་ཅིག་མ་དུ་ལགས། བཅོམ་ལྡན་འདས་ཀྱིས་བཀའ་སྩལ་པ། རྩ་རྣམས་ནི་སུམ་བཅུ་རྩ་གཉིས་སོ། །དབུགས་འགྲོ་འོང་ནི་ཡོངས་སུ་བཅིང་བ་དང་། 
ལུས་ལས་སྐྱེས་པའི་དབུགས་ཕྱིར་འཐོན་པ་ནི་ཟླ་བ་དང་ཉི་མ་དག་གིས་བསྐྱོད་པའོ། །གྲངས་ཀྱི་བྱེ་བྲག་བརྗོད་པ་ནི་དྲུག་བརྒྱ་ལྷག་པའི་སྟོང་ཕྲག་ཉི་ཤུ་རྩ་གཅིག་གིས་འགྲོ་འོང་ངོ་། །དེ་ལས་འགྲོ་བ་དང་འོང་བ་སྐད་

88-1-51b

ཅིག་གོ། །ལྷ་མོས་གསོལ་པ། ཀྱེ་བཅོམ་ལྡན་འདས་ཇི་ལྟར་འདོད་པའི་ལྷ་ཡིས་རབ་ཏུ་གསལ་བར་གང་མཛད། འདོད་པ་སྒྲུབ་པ་ཁྱབ་འཇུག་གིས་ཀྱང་སྒྱུ་མས་སྤྲུལ་པ་བྱས་པ་བཞིན་ལཀྵ་མེ་དང་དབྱངས་ཅན་མ་དག་གི་
ཕྱིར། དབུལ་པོ་རྣམས་ལ་མུན་པ་དག་དང་བྲལ་བ་ལྟར་ཞིང་སྐྱོང་བས་ན་སྦྱོར་བ་བསྒོ་བ་བྱས་པ་ཡིན་ནམ། བཅོམ་ལྡན་འདས་ཀྱིས་བཀའ་སྩལ་པ། ཀྱེ་ལྷ་མོ་འཛམ་བུའི་གླིང་བའི་སེམས་ཅན་རྣམས་འཁོར་བ་ན་འཁོར་
ཞིང་ཡོད་པ་དེ་རྨོངས་པ་དང་། འདོད་ཆགས་དང་། ཕྲག་དོག་དང་། ཕྲ་མ་རྣམས་སྐྱེས་པར་གྱུར་པས་དཔལ་ནག་པོ་ཆེན་པོ་ཡིས་གང་སྨྲས་པ་དེ་གུས་པ་དང་བཅས་པས་སོ། །ཁྱབ་འཇུག་ལྟར་འདོད་པའི་ལྷ་དང་། 
མཁའ་འགྲོ་མ་དྲུག་ཅུ་རྩ་བཞི་འཁོར་དང་བཅས་པ་རྣམས་བསྐྱེད་པར་བརྗོད་དོ། །ལྷ་མོས་གསོལ་པ། ཀྱེ་བཅོམ་ལྡན་འདས་ནག་པོ་ཆེན་པོ་ཞེས་བྱ་བ་ཅི་ལ་བགྱི། བཅོམ་ལྡན་འདས་ཀྱིས་བཀའ་སྩལ་པ། ནག་པོ་ཆེན་པོ་
ལ་དམིགས་ནས་སྡོད་པ་དེ་ཡིས་དུས་ཀྱི་གྲངས་ཤིན་ཏུ་ཚད་མར་བྱས་པ་དང་། ཉི་མ་རེ་རེ་ཞིང་གྲངས་གང་ལ་བཟང་པོར་རྒྱུ་བ་དེ་ནག་པོ་ཆེན་པོ་ཞེས་བརྗོད་དོ། །གང་ལ་མེད་པ་འམ། གང་ལ་དུས་ཆེན་པོའི་མཐའ་དང་ལྡན་
པ་ནག་པོ་ཆེན་པོ་སྟེ། ནག་པོ་ཆེན་པོར་ཡོངས་སུ་བྱ་བ་འདིའོ། །ལྷ་མོས་གསོལ་པ། ཡི་གེ་མ་ཞེས་བགྱི་བ་གང་ལགས། ཧཱ་ཞེས་བྱ་བ་ནི་ཅི་ལ་བགྱི། ཀཱ་ལ་ཞེས་པ་ནི་ཇི་ལྟ་བུ་ལགས། བཅོམ་ལྡན་འདས་ཀྱིས་
བཀའ་སྩལ་པ། མ་ཞེས་པ་སེམས་དཔའི་སྙིང་རྗེ་དང་། ཧཱ་ཞེས་པ་ཤེས་རབ་དང་སྦྱོར་བ་སྟེ་ཤེས་རབ་ཉིད་དོ། །ཀཱ་ལ་ནི་གཉིས་ཚོགས་པ་ལས་དུས་ཏེ། ཐབས་དང་ཤེས་རབ་ཀྱིས་སྙིང་རྗེ་ཆེན་པོ་ལ་སྦྱོར་བ་ཞེས་པའོ། །
རེངས་པ་དང་། བསྐྲད་པ་དང་། སྡེ་རེངས་པར་བྱེད་པ་དང་། མངོན་སྤྱོད་རྣམས་རྣལ་འབྱོར་གྱི་དབང་ཕྱུག་རྣམས་ཀྱིས་ཇི་ལྟར་རིགས་པས་རྣལ་འབྱོར་མ་བརྒྱད་རྒྱུད་འདིར་བཞེངས་པ། གཏུམ་པའི་དབང་ཕྱུག་མ་དང་། 

88-1-52a

ཙར་ཙི་ཀཱ་དང་། དུས་ཅན་མ་དང་། རིགས་ཀྱི་དབང་ཕྱུག་མ་དང་། དུམ་སྐྱེས་མ་དང་། མཆེ་གཙིགས་མ་དང་། མི་ཐུང་མ་དང་། དབང་ཕྱུག་ཆེན་མོ་རྣམས་གང་གིས་བསྒོམས་པ་ལ་སྐྱེ་སྟེ། འཛིན་པའི་
ཤེས་པ་དེ་དུས་ཀྱིས་གཙོ་བོ་གྲོལ་བར་འདོད་པའོ། །དེ་ནི་བསྒོམ་བྱ་དང་སྒོམ་པ་མེད་པ་ཡིན་ནོ། །གང་དང་གང་གིས་བསྒོམ་པ་རྣམས་མི་སྐྱེའོ། །དེས་ན་ཡིད་ཀྱི་མངའ་བདག་གིས་སེམས་རབ་ཏུ་བརྟགས་པ་མེད་པ། །
བཻ་ཏཱ་ལིའི་གཟུགས་ཀྱིས་ཡང་དག་པར་བསྒྲུབས་ཀྱང་མི་སྐྱེའོ། །རིགས་ལྔ་ལ་སྤྱད་པ་ཡིས་ཇི་ལྟར་གསུངས་པའི་ལས་དེ་ལྟར་འགྲུབ་པོ། །གཞན་དང་གཞན་དུ་བགྲོད་པ་ནི་ཚེས་ཀྱི་བྱེ་བྲག་བཟང་པོ་ལ་མ་བྱུང་བ་འབྱུང་
བར་འགྱུར་བའི་དོན་དུའོ། །ངེས་པར་གང་དང་གང་ཐོབ་པར་བྱེད་པར་འགྱུར་ཏེ། རྣམ་གྲངས་ཀྱི་འབྲས་བུ་དེ་རྣམས་སོ། །དཔལ་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་དེ་ཁོ་ན་ཤེས་པར་བྱེད་པའི་ལེའུ་སྟེ་དང་པོའོ།། །། 
ཐབ་ཁུང་གི་རྣམ་པའི་ལེའུ་བཤད་པར་བྱ་སྟེ། ལྷ་མོས་གསོལ་པ། ཀྱེ་རྗེ་བཙུན་སེམས་ཅན་གྱི་ཕྱིར་དངོས་གྲུབ་བརྒྱད་ཀྱི་བྱ་བ་དེའི་དོན་དུ་སྡུག་བསྔལ་མེད་པར་བྱེད་པ་གང་གིས་ཉེ་བར་འཐོབ། བཅོམ་
ལྡན་འདས་ཀྱིས་བཀའ་སྩལ་པ། ཟླ་བ་རྒྱུ་བའི་དུས་སུ་དབུགས་ཕྱིར་རྒྱུ་བ་བཟུང་སྟེ་གནས་པས་ངེས་པར་དངོས་གྲུབ་ཆེན་པོ་བརྒྱད་འགྲུབ་བོ། །གང་གི་ཚེ་ཡོངས་སུ་སྨིན་པར་འདོད་པས་འདི་བྱས་ན་འགྲུབ་བོ། །གསད་པ་
ལ་ཐབ་ཁུང་གྲུ་བཞི་པ་རྒྱར་ཁྲུ་གང་པར་མེ་ཏོག་ནག་པོས་སྦྱིན་སྲེག་བྱའོ། །རེངས་པ་ལ་ཟླུམ་པོ་རྒྱར་ཁྲུ་དོ་པའོ། །དབང་དུ་བྱ་བ་ལ་གྲུ་གསུམ་རྒྱར་ཁྲུ་གང་པ། ས་སྦྱང་བ་ཁྲུ་གང་བརྐོས་ལ་བྱས་སྟེ། མེ་ཏོག་དམར་པོས་
སྦྱིན་སྲེག་བྱ་བ་ནི་བློ་གྲོས་ཅན་གྱིས་དོམ་གྱི་པགས་པ་ལ་བསྡད་ལ་འདི་བྱའོ། །རྐང་བྱུག་སྒྲུབ་པའི་དོན་དུ་སྦྱིན་སྲེག་གི་ཐབ་ཁུང་གི་མཚན་ཉིད་བརྗོད་པ་ཟླུམ་པོ་ཁྲུ་གང་པ་ལས་སྦྱང་བ་ནི་ཁྲུ་ལྔ་བརྐོས་ལ་བྱའོ། །མིག་

88-1-52b

སྨན་དོན་དུ་སྦྱིན་སྲེག་འདིར་བརྗོད་པ། སྦྲུལ་གྱི་མགོ་ལྟ་བུ་ཁྲུ་ཕྱེད་དང་དོ་པ་ལས་སྦྱང་བ་ཁྲུ་བདུན་བརྐོས་པ་ནི་མིག་སྨན་གྱི་ཐབ་ཁུང་ངོ་། །འདིར་རི་ལུའི་བསྟན་པ་ནི་གླང་པོ་ཆེའི་རྨིག་མ་ཙམ་པ་ལ། ས་སྦྱང་བ་ཁྲུ་བཅུ་བརྐོས་པ་འདི་རི་ལུའི་
ཐབ་ཁུང་ངོ་། །བཅུད་ལེན་གྱི་དོན་དུ་ཐབ་ཀྱི་དབྱིབས་རྣ་བརྒྱན་ལྟ་བུ་ཁྲུ་ཕྱེད་དང་གཉིས་པ་ལ། ས་སྦྱང་བ་ཁྲུ་གསུམ་བརྐོས་པ་ནི་བཅུད་ལེན་གྱི་ཐབ་ཁུང་ངོ་། །རྒྱལ་པོའི་དོན་དུ་ཐབ་ཁུང་ཁྲུ་གང་བ་ཡིན་ཏེ། དབྱིབས་ཟླུམ་པོའོ། །
ས་སྦྱང་བ་ལ་ཁྲུ་བརྒྱད་བརྐོས་པ་ནི་དངོས་གྲུབ་སྒྲུབ་པའི་དོན་དུ་སྟེ། སྦྱོར་བ་འདི་ཡིས་དངོས་གྲུབ་ངེས་པའོ། །འདིར་བརྗོད་པ་ཐམས་ཅད་མེ་ཏོག་དཀར་པོས་སྦྱིན་སྲེག་བྱས་ན་དངོས་གྲུབ་ཐམས་ཅད་ཀྱི་འབྲས་བུ་ཉེ་བར་འཐོབ་པར་འགྱུར་རོ། །
ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་ཐབ་ཁུང་གི་རྣམ་པ་བསྟན་པ་ཞེས་བྱ་བའི་ལེའུ་གཉིས་པའོ།། །། དེ་ནས་སྔགས་ཀྱི་ལེའུ་བཤད་པར་བྱ་སྟེ། སྔགས་ཀྱི་བྱེ་བྲག་གཉིས་ལས་ཞི་བའི་སྔགས་ཀྱི་རིམ་པ་ནི་ཨོ་
ཡིག་གི་མིང་གིས་རྒྱུད་འདིར་ཤེས་ཏེ། སངས་རྒྱས་ཀྱི་བསྟན་པ་སྐྱོབ་པ་ཞི་བ་ལ་དགའ་བའི་སྔགས་སོ། །སངས་རྒྱས་ཀྱི་དམ་བཅའ་བྱས་པ་དེའི་ཕྱིར་ཡེ་ཤེས་ཆེན་པོའི་སྔགས་བརྗོད་པའོ། །ཨོཾ་མ་ཧཱ་ཀཱ་ལ་ཧཱུྃ་ཕཊ་སྭཱ་ཧཱ། ཕྱག་གཉིས་
པའི་སྔགས་སོ། །ཨོཾ་ཧྲཱཾི་ཧྲཱིཾ་ཧཱུྃ་ཧཱུྃ་ཕཊ་ཕཊ། ཕྱག་བཞི་པའི་སྔགས་སོ། །ཨོཾ་མ་ཧཱ་བྷཻ་ར་བ་སརྦ་སིདྡྷི། དཱ་ཡ་ཀ་ཌཾ་ཧཱུྃ་ཀུཾ་དྷྭཾ་ཊཿ། ཕྱག་དྲུག་པའི་སྔགས་སོ། །ཨོཾ་ཨཱཿཧཱུྃ་ཕཊ། ཧྲཱིཿཧཿ། ཕྱག་བརྒྱད་པའི་སྔགས་སོ། །ཨོཾ་ཧཱི་ཀཾ་ཧཱུཾ་
ཀཱི་ལ་ཀཱི་ལ་མ་ཧཱ་ནཱ་དཱ་ཀཱ་རཱ་ལ་བི་ཀ་རཱ་ལཀྵཱི་གྲཱྀ་ཧཿ། ད་ཧ་ད་ཧ། པ་ཙ་པ་ཙ། སིདྡྷི་དཱ་ཀཱ་ཡ་སྭཱ་ཧཱ། ཕྱག་བཅུ་པའི་སྔགས་སོ། །ཨོཾ་དཾ་ཥྟྲོཏ་ཀ་ཊ་བྷཻ་ར་བཱ་ཡ་སཾ་སཾ་སཾ་རུ་རུ་རུ་རུ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཕྱག་བཅུ་གཉིས་པའི་སྔགས་ཏེ་ལས་
ཐམས་ཅད་བྱེད་པ་དང་། སངས་རྒྱས་ཐམས་ཅད་ཀྱིས་ཕྱག་བྱེད་པ་དང་། འཇིག་རྟེན་གསུམ་འགྲུབ་པ་དང་། གང་འདོད་པ་བྱེད་པར་འགྱུར་རོ། །ཨོཾ་ཡ་མ་ཛ་ག་ད་ཀྵོ་བྷ་ཡ་ཀྵོ་བྷ་ཡ། ཏཱ་ལ་པ་ཏཱ་ལ་ཁཱ་ཧི་ཁཱ་ཧི། གྲྀཧྞ་བ་ལཾི་གྲ་ཧཱཿ

88-1-53a

གྲ་ཧཱཿ། ཨོཾ་མཾ་ཙཾ་མ་ཧཱ་བྷཻ་ར་བཱ་ཡ་སྭཱ་ཧཱ། དངོས་གྲུབ་ཐམས་ཅད་ཀྱི་དོན་དུ་ཕྱག་བཅུ་བཞི་པའི་སྔགས་འདིས་གཏོར་མ་རྒྱུན་དུ་སྦྱིན་ནོ། །ཨོཾ་མཾ་མཾ་རཾ་ཧཱུྃ་ཧཱུྃ་མཾ་རཀྵ་པཱ་ལཱ་ཡ་ཧཱུྃ་བཛྲ་ཕཊ། བདག་བསྲུང་བའི་སྔགས་སོ། །
ཨོཾ་དྷ་ར་ཎི་དྷ་ར་དྷ་ར་ཧཱུྃ་ཧཱུྃ་ཨ་མུ་ག་སྱ་རཀྵཱ་ཀུ་རུ་སྭཱ་ཧཱ། གཞན་བསྲུང་བའི་སྔགས་སོ། །ཨོཾ་ཧྲཱཾ་ཧྲཱཾ་ཡཾ་མཾ་ཀ་རཱ་ལ། བི་རཱ་ལཱ་ཀྵ་བཾ་ཀ་རཱ་ལ་མ་ཧཱ་ཡོ་གེ་ཤྭ་ར་སརྦ་དཱ་ཡ་ཀ་སྭཱ་ཧཱ། ཕྱག་བཅུ་དྲུག་པའི་སྔགས་སོ། །ཨོཾ་ཤྲཱི་ཀྵཱི་གྲཱིཧྞ་བ་ལི་
ཧཱུྃ་ཕཊ། མ་དྱ་མཱཾ་ས་པུཥྤ་དྷཱུ་པ། རཀྟ་ཏ་ལེ་པཱ་ཏ་ལེ་ཨཥྚ་ནཱ་ག་དེ་ཝ་ཡཀྵ་རཱཀྵ་ས་གྲཱིཧྣ་ཨི་དཾ་བ་ལིཾ་ཧཱ་ཧཱ་ཧཱ། ཧཱུྃ་ཁཱ་ཧི་ཁཱ་ཧི། ཁ་ཁ་ཧཱུྃ་ཛ་ཕེཾ་ཕེཾ་ཧཾ་ཧཾ་མ་ཧཱ་ཌ་དྷ་ར་ཧཱ་ས་གརྫྫ་གརྫྫ། ཀྲཱིཥྞ་བ་ར་ཎཱི་ཡེ་ཧེ་ཧཱུྃ་སྭཱ་ཧཱ། སྲན་མ་ཆེན་པོ་ལེགས་
པར་བཙོས་པ་དང་། ཆང་དང་། ཤ་དང་། ཁྲག་གིས་ལེགས་པར་བཀང་ལ། དེ་ནས་མཚན་མོ་རྒྱུན་དུ་གཏོར་མ་སྦྱིན་པ་སྟེ། ཞག་ཉི་ཤུ་རྩ་གཅིག་ན་དགེ་བའི་མཚན་མ་འབྱུང་ངོ་། །ཟླ་བ་གཅིག་ན་དངོས་གྲུབ་སྟེར་ཏེ། ལོ་གཅིག་ན་གང་
འདོད་པ་སྟེར་རོ། །ཨོཾ་ཧྲཱི་ཧྲཱི་ཧཱུྃ་ཕཊ། འདི་ནི་སྔགས་ཀྱི་རྒྱལ་པོ་སྔགས་བཀླགས་པ་ཙམ་གྱིས་སྡིག་པ་ཐམས་ཅད་ཟད་པར་འགྱུར་ཞིང་རྒྱུན་དུ་བཟླས་ན་དངོས་གྲུབ་ཐམས་ཅད་འགྲུབ་བོ། །སྒྱིད་སྙོམས་དང་བཅས་པར་སྟོང་ཕྲག་
ལྔ་བཟླས་ན་ཞི་བ་ངེས་པར་འགྲུབ་བོ། །ཁྲི་ཕྲག་གཅིག་བཟླས་ན་བུད་མེད་དབང་དུ་འགྱུར་རོ། །འབུམ་གྱིས་རྒྱལ་པོ་དབང་དུ་འགྱུར་རོ། །འབུམ་ཕྲག་ལྔ་ཡིས་ལྷ་དང་གནོད་སྦྱིན་ཐམས་ཅད་ངེས་པར་དབང་དུ་འགྱུར་རོ། །ངེས་པར་འགུགས་
པར་ཡང་བྱེད་ན་སྐྱེས་པ་དང་བུད་མེད་ལྟ་སྨོས་ཅི་འཚལ། དབང་དུ་བྱ་བའི་སྔགས་སོ། །ཨོཾ་མ་ཧཱ་ཀཱ་ལ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྤྱིའི་སྔགས་སོ། །ཨོཾ་མ་ཧཱ་ནཾ་དེ་ཤྭ་ར་ཧཱུྃ་ཕཊ་སྭཱ་ཧཱ། མེའི་ཁ་དོག་ཁ་ལ་བསྒོམས་ན་འཆིའོ། །ཨོཾ་ཀྵཱིཾ་ཤྲཱིཾ་ཧོ་ཀྵཿདེ་བ་དཏ་ཏཾ་མཾ་
མཾ་མཱ་ར་ཡ་ཕཊ། གསད་པའི་སྔགས་སོ། །ཨོཾ་ཀྵཱི་ཧེ་ཙ་ཏ་ཌེ་ཤྭ་རཱི་ཧཱུྃ་ཤྲཱི་སྭཱ་ཧཱ། གཏུམ་པའི་དབང་ཕྱུག་མའི་སྔགས་སོ། །ཨོཾ་ལཱ་ཀེ་ཀུ་ལི་གེ་ཤྭ་རི་ཧེ་ཕེཾ་སྭཱ་ཧཱ། རིགས་ཀྱི་དབང་ཕྱུག་མའི་སྔགས་སོ། །ཨོཾ་མཱཾ་མ་ཧེ་ཤྭ་རཱི་ཧཱུྃ་ཤྲཱི་ཧེ་ཕེཾ། དབང་

88-1-53b

ཕྱུག་མ་ཆེན་མོའི་སྔགས་སོ། །ཨོཾ་ཀི་ལི་བི་ཀ་རཱི་ལ་ཤྲཱིཿཀྵཾི་ཀྵཱཾི་ཧཱུཾ་ཕཊ་སྭཱ་ཧཱ། དུས་ཅན་མའི་སྔགས་སོ། །ཨོཾ་ཙྃ་ཙ་ར་ཙ་ཡ་ཧཱུྃ་ཧྲཱིཿཙར་ཙི་ཀཱའི་སྔགས་སོ། །ཨོཾ་ཙ་མུ་ཎ་ཌེ། ད་ཧ་ད་ཧ་པ་ཙ་པ་ཙ། ཨོཾ་དཾ་བ་ལིཾ་གྲྀཧྞ་གྲྀཧྞ་ཧཱུྃ་ཕེཾ་ཧེཾཤྺུ་ཕཊ་
སྭཱ་ཧཱ། ལྷ་མོ་དུམ་བུ་ཅན་གྱི་གཏོར་མའི་སྔགས་སོ། །ཨོཾ་ཧྲཱི་ཧཱཿཧཱུྃ་ཤྲཱི་ཕཊ་སྭཱ་ཧཱ། ལྷ་མོ་ཨུ་མཱའི་སྔགས་སོ། །ཨོཾ་ཨཱཿཧཱུྃ། ལུས་ངག་ཡིད་གསུམ་བྱིན་གྱིས་བརླབ་པའི་སྔགས་སོ། །ཨཿཧཱུཾ་ཀྵིཾ་ཥཱིཾ་ཨོཾ་གྷཾ་དེ་བ་དཏྟ་
ཧི་མཱ་ར་ཡ་མཱ་ར་ཡ་ཧཱུྃ་ཕཊ། ཐམས་ཅད་གསད་པའི་སྔགས་སོ། །ཨོཾ་ཀྵིཾ་ཧ་ཧཱཾ། ཆེ་གེ་མོ་ཨུཙྩ་ཊ་ཡ་ཧཱུྃ་ཕཊ། བསྐྲད་པའི་སྔགས་སོ། །ཨོཾ་མཾ་ཛཾ་ཀྵཾ། དགྲ་རེངས་པར་བྱེད་པའི་བསྔགས་སོ། །ཨོཾ་ཛཾ་ཧཱུྃ་ཧ་སྟིཾ་སྟཾ་བྷ་ཡ་ཕཊ། 
བྱི་བའི་མཇུག་མ་ལ་ལན་བདུན་དུ་བསྔགས་ཏེ། བརྒྱབ་ན་གླང་པོ་ཆེ་རེངས་པའོ། །ཨོཾ་ཁཿཧཿཕཊ། གྷོ་ཏ་ཀསྟིཾ་བྷ་ནཾ་ཞེས་པས་བ་ལང་གི་ཤ་ལ་སྔགས་ཏེ་བརྒྱབ་ན་རྟ་རེངས་པར་འགྱུར་རོ། །ཨོཾ་མུཿཧཱཾ་སརྦ་པཱ་ཤུ་ན་སྟོྃ་བྷཱ་
ཡ་མོ་ཧཱ་ཡ་ཧཱུྃ་ཕཊ། སྟག་གི་ལྤགས་པ་ལ་ལན་བདུན་སྔགས་ནས་བརྒྱབ་ན་མ་ཧེ་དང་། ཁྱི་དང་། གླང་པོ་ཆེ་དང་། བ་ལང་དང་། ཅེ་སྤྱང་དང་། སྟག་དང་། དོམ་རྣམས་ངེས་པར་རེངས་པར་འགྱུར་རོ། །ཨོཾ་མ་ཧཱ་ནཾ་ཏ་ཧཱུྃ་ཧཿདངུལ་
ལ་ལན་བདུན་བཟླས་ནས་སྦྲུལ་ལ་བརྒྱབ་ན་སྦྲུལ་རེངས་པར་བྱ་བའི་སྔགས་སོ། །ཨོཾ་མུ་ཁཾ་སྟཾ་བྷ་ཡ་ཆེ་གེ་མོའི་བཾ་ཕཊ། མིའི་ངག་རེངས་པར་བྱ་བ་ལའོ། །ཨོཾ་ཧྲཱིཿམཾ་རཾ་ཙ་མུཎྜ་ཧཿཤྲཱི་ཧཱུྃ་ཕཊ། རལ་གྲི་ལ་སོགས་པ་
རེངས་པར་བྱ་བའི་སྔགས་སོ། །ཨོཾ་མ་ཧི་ལ་ལ་བྷ་ལེ་ལ་ཧ་ཧོཿ ལོང་པ་རེངས་པར་བྱེད་པའོ། །ཨོཾ་གྷཾ་ཧཱུྃ། བུད་མེད་རྨོངས་པར་བྱེད་པའི་སྔགས་སོ། །ཨོཾ་ཧཿཀ་ཧ་ཀ་ཧ་མ་ལི་ནི་མུ་ཁེ། ཡ་སཱ་དྷ་ཡ། མ་ཧཱ་
ཀཱ་ལ་བུད་དྷ་ཛྙཱཾ། པྲ་ཧི་ཏོ་སི། མཱ་ར་ཡ་མཱ་ར་ཡ། ཀཱ་ར་ཡ་ཀཱ་ར་ཡ་སརྦ་དུ་པྲ་དུ་གྲཱྀཧྞ་གྲཱྀཧྞ། མ་ར་མ་ར། ཁ་ཁ་ཁཱ་ཧི་ཁཱ་ཧི། ཤཱི་གྷྲཾ་ད་ཧ་ད་ཧ། པ་ཙ་པ་ཙ། ཧཱུ་རེ་ཧཱུ་རེ། མཾ་རཾ་ཧཱུྃ་ཕཊ། ཨི་དཾ་བ་ལིཾ་གྲ་ཧ་གྲ་ཧ། 

88-1-54a

ཤྲཱི་སྭཱ་ཧཱ། སངས་རྒྱས་ཀྱི་བསྟན་པ་ལ་བྱ་བ་མ་ཡིན་པ་བྱེད་པའི་མི་རྩོད་པ་དང་རབ་ཏུ་རྩོད་པ་དག །སྔགས་འདིས་མིའི་ཐོད་པ་བཟའ་རྒྱུས་བཀང་ལ་ནག་པོའི་ཚེས་བརྒྱད་ལ་གཏོར་མ་སྦྱིན་ནོ། །སྐད་ཅིག་དེ་ཉིད་ལ་འཆིའོ་
རིམས་ཀྱིས་ཐེབས་པར་འགྱུར་རོ། །མེ་ཡིས་རབ་ཏུ་འཚིག་པར་འགྱུར་རོ། །མགོ་འགེམས་པར་འགྱུར་རོ། །གཏོར་མ་ཆེན་པོའི་སྔགས་ཏེ་དགྲ་གནོན་པའོ། །ཨོཾ་ཙ་མུཎ་ཌེ། ཧ་ན་ཧ་ན། ད་ཧ་ད་ཧ། ཧཱུྃ་ཕཊ། གསད་པའི་
སྔགས་སོ། །ཨོཾ་ཧཱུྃ་མྃ་མཱ་ར་ཡ་སྭཱ་ཧཱ། དགྲ་གསད་པའི་སྔགས་སོ། །ཧཱུྃ་ཕཊ། ཨ་ཐ་བྷ་ག་བཱན་བོ་དྷི་སཏྭཱ་མ་ཧཱ་སཏྭཱ་མ་ཧཱ་ཀཱ་རུ་ཎི་ཀཱ། ཏདྱ་ཐཱ། ཨོཾ་ཀཱ་རཱ་ལ་བི་ཀ་ཊེ་ཤྭ་ར། ཧཱུ་ལུ་ཧཱུ་ལུ། ཀི་ལི་ཀི་ལི། མ་ཧཱ་ཀ་ཀཱ་ལ་ཧ་ལ།  
ཀྵཱཾ་ཤྲཱིཾ་བྃ་ཙཾ་མཾ་ཧཾ་ཧཱུྃ། མ་ཧཱ་ནཾ་དེ་ཤྭ་རཱ་ཡ་སྭཱ་ཧཱ། སྔགས་འདི་ཉི་མ་རེ་རེ་ལ་ལན་བདུན་བདུན་དུ་བཟླས་ལ་གདོང་བ་བཀྲུས་ན་སྐྱེ་བོ་ཐམས་ཅད་ཀྱི་ཡིད་དུ་འོང་བར་འགྱུར་རོ། །དགྲ་ཐམས་ཅད་ངེས་པར་ཞི་བར་འགྱུར་རོ། །བྱ་བ་
ཐམས་ཅད་སྒྲུབ་པར་འདོད་པ་དེ་ལ་ཉིས་འགྱུར་དུ་སྟེར་བར་བྱེད་དོ། །སྒྲུབ་པ་ཐམས་ཅད་ལ་ཆེར་དགའ་བའི་གཟུགས་ནག་པོ་ཆེན་པོའི་སྔགས་སོ། །ཨོཾ་མ་ཧཱ་ཀཱ་ལ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ལས་ཚོགས་ཐམས་ཅད་བསྒྲུབ་པས་
འབྲས་བུ་འབྱུང་བར་བྱེད་པ་དཔལ་མགོན་པོ་ནག་པོའི་རྒྱུད་ཀྱི་རྒྱལ་པོ་ལས་སྔགས་ཀྱི་ལེའུ་སྟེ་གསུམ་པའོ།། །། དེ་ནས་དབང་གི་ལེའུ་བཤད་པར་བྱ་སྟེ། དང་པོར་ནག་པོ་ཆེན་པོ་ཕྱག་གཉིས་པའི་
སྔགས་སྟོང་ཕྲག་བཅུ་བཟླས་ལ་སློབ་མ་ལ་དབང་བསྐུར་ཏེ། ཐོག་མར་བུམ་པའི་དབང་བསྐུར་བ་ཐུབ་པ་དྲིལ་བུའི་སྒྲ་དང་། རྡོ་རྗེའི་སྦྱོར་བ་དང་ལྡན་པས་ཆུ་ལ་སོགས་པ་དབང་ལྔ་རྣམས་ཀྱི་བྱེ་བྲག་གིས་སོ། །དྲུག་པ་
ལ་རྡོ་རྗེའི་རིམ་པ་རྣམས་ཀྱིས་དང་། བདུན་པའི་དབང་བསྐུར་བའི་བྱེ་བྲག་ནི་ཇི་ལྟ་བར་ཤེས་རབ་དང་མཉམ་པར་སྦྱོར་བའོ། །བརྒྱད་པ་ཞེས་པ་ནི་འདི་ལ་རྣལ་འབྱོར་མས་ཡོངས་སུ་འཁྱུད་པའོ། །དགུ་པ་ལ་སྐྱེས་བུ་ཉིད་ལ་

88-1-54b

རྗེས་སུ་སྐྱེ་བའོ། །བཅུ་པ་ལ་ནམ་མཁའི་ཆུ་རྣམས་ཀྱིས་སོ། །བཅུ་གཅིག་པ་རྣམས་ཀྱིས་ཀྱང་རིམ་པས་ཡང་དག་པའི་རིག་པས་བསྒྲུབས་པས། གནས་དང་གནས་སུ་རྗེས་སུ་འབྱུང་བ་ཐུབ་པ་ཀ་པི་ལ་བརྞ་ཤི་བ་ཇི་ལྟ་བར་རིམ་
པས་ཞི་བའི་ཡེ་ཤེས་སྒྲུབ་པ་འདི་གསང་ལ་སྤྱད་པར་བྱ་བ་བདུད་རྩི་ལྔ་དང་ཤེས་རབ་མ་འདི་རྣམས་ཀྱིས་སོ། །མ་དང་སྲིང་མོ་དང་། བྱ་རོག་རྐང་མ་དང་། མི་ཐུང་མ་དང་། སྒུར་མོ་རྣམས་དང་ཡང་དག་པར་སྦྱོར་བར་བྱ་བ་དང་། 
ཇི་ལྟར་བཀའ་སྩལ་པ་ལྟར་མིང་ཐམས་ཅད་ཡང་དག་པར་གཟུང་ངོ་། །དེ་ལྟར་བྱས་ན་མངའ་བདག་ལས་དབང་བསྐུར་ཇི་ལྟ་བ་བཞིན་ཉེ་བར་འགྱུར་རོ། །བླ་མས་སློབ་མ་བརྟགས་ལ་སྦྱིན་པར་བྱའོ། །མངའ་བདག་ཁྱོད་ཐབས་
དང་ལྡན་པས། བདག་ཉིད་ཆེན་པོ་བདག་ཅག་གིས་མིང་ཐམས་ཅད་སྤྱད་པས་སེམས་ཅན་གྱི་སྡུག་བསྔལ་སྤོང་བ་ཇི་ལྟ་བའི་ལམ་གསུངས་པ་ཞིག་བཅོམ་ལྡན་འདས་སྐྱེ་བོ་རྣམས་ཀྱི་དོན་དུ་གང་ཡིན་པ་དེ་དབང་གི་དོན་བྱེ་བྲག་
གི་རིམ་པ་ལས་ཇི་ལྟ་བར་ཤེས་པར་མཛོད་ཅིག །དུས་དང་ཚོད་ཇི་ལྟ་བར་ཤེས་པ་ལས་སོ། །དཔལ་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་དབང་གི་རིམ་པར་ཕྱེ་བ་སྟེ་ལེའུ་བཞི་པའོ།། །། དེ་ནས་ཡང་ལྷ་རྣམས་
དབང་བ་བཤད་པར་བྱ་སྟེ། དང་པོར་ལྷ་མོ་ལ་སོགས་པ་རྣམས་ཀྱིས་བུམ་པའི་དབང་བསྐུར་བར་བྱའོ། །ལྷ་མོ་བརྒྱད་རྣམས་ཀྱིས་ནི་བདུད་རྩིས་སོ། །མཆོད་ཡོན་དང་ཞབས་བསིལ་བྱིན་ནས་བསྟོད་པ་དང་། སྔགས་ཀྱིས་བྱིན་
གྱིས་བརླབ་པ་ནི། ཨོཾ་ཀ་ལ་ཤ་ཨ་བྷི་ན་ཡ་ནཾ་སྣ་ནཾ། ཨོཾ་ཤཱུནྱ་ཏཱ་ཨ་དྷིཥྛི་ཏེ་སྭཱ་ཧཱ། ཆུའི་དབང་བསྐུར་བ་བྱིན་པ་དང་། བདུད་རྩི་ལྔ་བྱིན་པ་ནི་ལྷ་མོ་རྣམས་ཀྱིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །
ལྷ་མོ་རྣམས་ཀྱིས་མེ་ཏོག་གི་ཆར་འབབ་པར་འགྱུར་རོ། །གླ་རྩི་དང་དྲི་ཞིམ་པོ་ཡོངས་སུ་འཛིན་པར་འགྱུར་རོ། །སྲེད་མེད་ཀྱི་བུ་ལ་སོགས་པས་བྱིན་གྱིས་རློབ་པར་འགྱུར་རོ། །ལྷ་ཐམས་ཅད་ཀྱི་དམ་ཚིག་གིས་སྐྱོང་ཞིང་སྲོག་ལ་བབ་ཀྱང་གཏོང་བར་མི་འགྱུར་རོ། །

88-1-55a

འདི་ནི་ནག་པོ་ཆེན་པོའི་རྒྱུད་ལས་ལྷ་དབང་བསྐུར་བའི་ལེའུ་སྟེ་ལྔ་པའོ།། །། དེ་ནས་ཡང་རྡོ་རྗེ་འབྱུང་མོ་ལ་སོགས་པའི་ལྷ་མོ་གཙོར་གྱུར་པ་རྣམས་ཐེ་ཚོམ་སྐྱེས་ཏེ་ཡིད་མི་བདེ་བར་གྱུར་ནས། བཅོམ་ལྡན་
འདས་ལ་ཐམས་ཅད་ཀྱིས་འདི་སྐད་ཅེས་གསོལ་ཏོ། །ཀྱེ་བཅོམ་ལྡན་འདས་ཐེ་ཚོམ་འདི་རྣམས་བསལ་དུ་གསོལ། །འདི་ལྟར་ལེའུ་འདིར་བཤད་པའི་གར་གྱི་ཉམས་དགུ་དང་། གླུ་ཡིས་གྲུབ་པར་འགྱུར་བ་དེ་བདག་ཐེ་ཚོམ་མཆིས་
ན་གླུ་དང་གར་གྱིས་དོན་ཇི་ལྟར་དུ་འགྱུར་བ་ལགས། ལྷ་ལ་དབང་བསྐུར་བ་ཉེ་བར་སྤྱོད་པ་ཇི་ལྟར་འགྱུར་བ་ལགས། ཞེ་སྡང་ལ་སོགས་པའི་ཕྱག་རྒྱས་ཇི་ལྟར་རྒྱས་འདེབས་པར་འགྱུར་བ་ལགས། ས་བོན་ཐམས་ཅད་སྔགས་ཀྱི་ལེའུ་ལས་བརྗོད་
པ་ཇི་ལྟར་ལགས། ལྷ་མོའི་ས་བོན་ལ་ཐེ་ཚོམ་སྐྱེས་པ་གང་ལགས། གཟུགས་ཅན་གྱི་ས་བོན་གྱི་མཐུ་གང་ལགས། ཀྱཻ་བཅོམ་ལྡན་འདས་དམ་ཚིག་ཅན་རྣམས་ཀྱི་སྤྱོད་པ་གང་ལགས། བཅོམ་ལྡན་འདས་གྱིས་བཀའ་སྩལ་པ། ཀོ་ཡི་གྷ་ཎ་
པི་ཊ་ཊ་ཡི་ར་ཧཱ་ཧཱ་ཀཱ་རི་མ་ཧཱ་ཀཱ་ལ་ཨུཙྪ་ལ་ཡ་ཡི། ཀཀྐེ་ལེ་གྷ་ཎ་ཌ་མ་རུ་བཛྲ་ཛི་ཡ་ཡི། ཀཱ་རུ་ཎེ་ཡཱ་ཡི་ན་རེ་ལི་ཡཱ་ཡི། ཏ་ཧི་མ་ཧཱ་མ་ས་ནི་བ་བྷ་རེ་ཁཱ་ཧི་ཡ་ཡི། པི་བ་ཡི་མ་ཡ་ཎཱ་གྷཎྚེ། ཧ་རེ་ཀ་ལི་ཛྙཱ་ཛ་ར་པ་ཡི་ས་ཡི་བཱ་ཡི་ཡ་ཡི། དུཏ་ཏ་ར་མཱ་ག་པ་ཨི་
བཏྟེ། ཀསྟུ་ར་ཀཱ་ཏ་ཐ་རི་སིལླ་ཙ་ཨུ་ས་མ་ལཱ་གཱ་བི་ཡཱ་ཡི། སི་ལི་ནི་བྷ་ར་མཱཾ་ས། ཀཱི་ཏ་ཧི་ལ་ཧི་ཡ་ཡི། ནཱ་ཊེ་གཱི་ཏཾ་ཨེ་ཀོ་ན་མུ་ཡི་ལཱི་ལཱ་བྷ་ར་ཎ་མཱ་ལཱ་བྷ་རི་ཡ་ཡི་ཏ་ཧི་པ་ཎི་ཡ་ཡི། ས་ཧཱ་གཱ་ཐི་ཎ་ཀུན་དུ་རུ་པ་ཡི་ཡཱ་ཡི། ཌཱ་མ་རུ་ནཱ་ད་ཨུ་ཙ་ཚ་ལི་
ཡ་ཡི། གར་ནི་དཔལ་ནག་པོ་ཆེན་པོའི་རྣལ་འབྱོར་གྱིས་ཇི་ལྟར་བདེ་བའི་སྦྱོར་བས་སྐྱ་རེང་ཤར་བ་དང་བསམ་གཏན་ལ་ཆགས་པའི་སེམས་ཀྱིས་སོ། །གོམས་པའི་རིགས་པའི་སེམས་ནི་སངས་རྒྱས་ཐམས་ཅད་ཀྱི་
དེ་བཞིན་ཉིད་ཀྱི་རྣལ་འབྱོར་གྱི་མ་རྣམས་ལའོ། །གཞན་དུ་ནི་མ་ཡིན་ནོ། །གར་དང་གླུ་འདི་དག་གིས་མཆོག་ཏུ་བདེ་བ་སྐྱེ་བར་འགྱུར་རོ། །འདི་ཉིད་ཀྱིས་བདག་བསྲུང་བ་དང་། ཚོགས་བསྲུང་བ་དང་། བདུད་རྩི་ལྔ་དང་མཆོག་ཏུ་དགའ་བའི་དབང་དུ་གྱུར་པའི་སྔགས་

88-1-55b

བཟླས་པ་འདིས་འཇིག་རྟེན་དུ་ཚེགས་མེད་པར་བྱ་བ་བྱེད་པ་དེའི་ཕྱིར་དངོས་གྲུབ་རྟག་ཏུ་བླང་བར་བྱའོ། །བར་དུ་གར་ཡང་བྱའོ། །ཡང་ཡང་དུ་ཚོགས་ཀྱི་བདག་པོ་དེ་ཉིད་ལ་དང་པོར་བྱ་རྒོད་ཀྱི་དྲི་དང་། གཉིས་པ་དཔལ་སྲེད་མེད་ཀྱི་
བུའི་དྲི་སྣའི་ཉེ་བར་དམིགས་པར་འགྱུར་རོ། །གསུམ་པ་གླ་རྩིའི་དྲི་དང་། གུར་གུམ་ལ་སོགས་པའི་དྲི་སྣ་ཚོགས་མཉམ་པར་ལོངས་སྤྱོད་པར་འགྱུར་བ། །རྣལ་འབྱོར་དབང་ཕྱུག་གི་སའོ། །དེའི་རྗེས་ལ་གླུ་བྱིན་གྱིས་བརླབས་པས་
བུང་བའི་སྒྲ་ཉན་པ་དང་། ངང་པ་དང་། ཁུ་བྱུག་དང་། གོ་མཱ་ཡུ་དང་། གལ་ཏེ་གར་བྱེད་ན་ཐམས་ཅད་དང་སྒྲ་བཞིན་ནོ། །དེ་ནས་ཀླུའི་ཚོགས་བྱིན་གྱིས་བརླབ་པ་ནི། ཕྱི་མི་འམ་ཅི་དང་། སྲེད་མེད་ཀྱི་བུ་ལ་སོགས་པ་དག་ཚིགས་
རྣམས་ཀུན་དུ་སྤྱད་པར་བྱའོ། །གྲོང་ཁྱེར་གྱི་མཐའ་འམ། སྐྱེད་མོས་ཚལ་ལམ། ནགས་ཚལ་དུ་ངེས་པར་མཚོན་པར་བྱའོ། །ཕྱག་རྒྱ་ཐམས་ཅད་ཀྱི་ངེས་པར་དངོས་གྲུབ་ཏུ་འགྱུར་རོ། །ལྷ་མོས་གསོལ་པ། ཀྱེ་བཅོམ་
ལྡན་འདས་འཛམ་བུའི་གླིང་པའི་སེམས་ཅན་གྱི་དོན་བྱེད་པར་འདོད་པ་དང་། བཅུད་ལེན་བྱེད་པར་འདོད་པ་རྣམས་དེ་བཞིན་དུ་དབང་ལ་སོགས་པ་དེ་རྣམས་ཀྱི་ཐབས་ཀྱིས་ཇི་ལྟར་འབྱུང་བ་བསྟན་དུ་གསོལ། བཅོམ་ལྡན་འདས་
ཀྱིས་བཀའ་སྩལ་པ། ལྷ་མོ་རྣམས་ཀྱིས་ཕྱག་རྒྱ་བཞི་ཇི་ལྟ་བར་ཤེས་པར་བྱའོ། །དེའི་རྗེས་སུ་ཐམས་ཅད་སྟོན་གྱིས། ཡང་ལྷ་མོས་གསོལ་པ། རིམ་པ་རྣམས་ཇི་ལྟར་ཡིད་ཆེས་པར་བཤད་པར་བྱེད། བཅོམ་ལྡན་འདས་
སེམས་ཅན་རྣམས་ཀྱིས་དོན་ཐོབ་པར་བྱ་བའི་ཕྱིར་ཡིན་ནམ། ལྷ་མོ་ངས་ལེའུ་བརྒྱད་པ་ལ་སོགས་པ་བཤད་པར་བྱའོ། །རིགས་རྣམ་པ་ལྔ་ལ་བཞུགས་ནས་གང་ཉི་མ་རེ་རེ་དེའི་འབྲས་བུ་དངོས་གྲུབ་ངེས་པར་འཐོབ་པར་འགྱུར་
རོ། །འདི་ནི་ནག་པོ་ཆེན་པོའི་རྒྱུད་ལས་སྤྱོད་པའི་ལེའུ་སྟེ་དྲུག་པའོ།། །། དེ་ནས་ཐོག་མར་ཉེ་བར་མཁོ་བའི་མཆོད་པ་དང་། སྡིག་པ་བཤགས་པ་ལ་སོགས་པ་ཚངས་པའི་གནས་བཞི་བསྒོམས་ནས་ལྷག་

88-1-56a

མ་ཉིད། ཨོཾ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧྃ་བྱས་ནས་སྒྱུ་མའི་སྤྱོད་པ་ཐམས་ཅད་སྦྱངས་ནས། ནག་པོ་ཆེན་པོ་ཞལ་གསུམ་པ། དབུ་སྐྲ་སེར་པོ་འབར་བ་གྱེན་དུ་བརྫེས་པ། སྐྲ་དང་སྨིན་མ་འབར་བ། 
མཆེ་བ་གཙིགས་ཤིང་རྒོད་པས་འཇིགས་པར་མཛད་པ། ཤིན་ཏུ་འཇིགས་པའི་ཞལ་དང་པོ་གནག་པ། གཡོན་དཀར་པོ། གཡས་ཀྱི་ཞལ་ལྗང་གུ། སྟག་གི་པགས་པ་གོས་སུ་གྱོན་པ། མིའི་མགོ་བོའི་ཕྲེང་བས་ཉེ་བར་འཕྱང་
བ། ཐུང་ཞིང་གསུས་པ་འཕྱང་བ། ཀླུ་བརྒྱད་ཀྱི་བརྒྱན་གྱི་གདེངས་ཀས་བརྒྱན་པའོ། །ཕྱག་བརྒྱད་པ་གཡས་གཡོན་གྱི་དང་པོ་གཉིས་ཀྱིས་ལྷ་མོ་ལ་འཁྱུད་པ། གཉིས་པ་གྲི་གུག །གསུམ་པ་རྡོ་རྗེ། བཞི་པ་ཌཱ་མ་རུ། 
ཕྱག་གཡོན་ན་ཁྲག་གིས་བཀང་བའི་ཐོད་པ། གསུམ་པ་ན་དྲིལ་བུ། བཞི་པ་ན་ཐོ་བ། རོ་ལ་ཞོན་པ། ཞབས་གཡོན་བརྐྱང་བས་གནས་པ། རྣལ་འབྱོར་མ་བཞིས་ཡོངས་སུ་བསྐོར་བ། ཤར་ཕྱོགས་ཀྱི་སྣམ་བུ་ལ་ཙཎ་ཌེ་སྭ་རི་ཕྱག་
ན་གྲི་གུག་དང་ཐོད་པ་བསྣམས་པ། ཁ་དོག་དཀར་མོ་སྐྲ་གྲོལ་བ། མཆེ་བ་གཙིགས་ཤིང་འཇིགས་པར་མཛད་པ། ལྷོའི་སྣམ་བུ་ལ་ཙར་ཙི་ཀཱ་ཁ་དོག་ནག་མོ། གཅེར་བུ་སྐྲ་སིལ་བུ། ལག་པས་གྲི་གུག་དང་ཐོད་པ་བསྣམས་
པ། ཞབས་གཡོན་བརྐྱང་བས་གནས་པ། མཆེ་བ་གཙིགས་པ་ལ་སོགས་པ་འཇིགས་པར་བྱེད་པའོ། །ནུབ་ཀྱི་འཕར་མ་ལ་ཀཱ་ལི་ཀཱ་ཁ་དོག་ནག་པོ་མདུང་རྩེ་གསུམ་པ་དང་ཐོད་པ་བསྣམས་པ། སྐྲ་སིལ་བུ། ཐམས་ཅད་སྔ་མ་
སྨོས་པ་བཞིན་ནོ། །བྱང་དུ་རིགས་ཀྱི་དབང་ཕྱུག་མ་ལག་པ་གྱེན་དུ་བརྐྱང་སྟེ། གཡོན་པ་ན་ཐོད་པ་ཁ་དོག་ལྗང་གུ། ལྷག་མ་ཐམས་ཅད་སྔ་མ་བཞིན་ནོ། །ལྷ་མོ་ཐམས་ཅད་སྤྱན་གསུམ་པ། ལྷ་མོ་བཞིས་ཡོངས་སུ་བསྐོར་བའི་
བཅོམ་ལྡན་འདས་ལྷ་མོ་ལ་འཁྱུད་པ། ལྷན་ཅིག་སྐྱེས་པའི་ཁ་སྦྱོར་ལ་མངོན་པར་གནས་པ། སྦྱོར་བ་དེ་དག་སྤྱོད་པའི་རྣལ་འབྱོར་གྱིས་ཕྱག་བརྒྱད་པ་བཞེངས་པའོ། །དང་པོ་ཧཱུྃ་ལས་འོད་བྱུང་བས་ཁམས་གསུམ་ན་གནས་

88-1-56b

པའི་ལྷ་དང་། བླ་མ་དང་། སངས་རྒྱས་དང་། བྱང་ཆུབ་སེམས་དཔའ་རྣམས་སྤྱན་དྲངས་ལ། ཨོཾ་ཤཱུནྱ་ཏཱ་ལ་སོགས་པས་འགྲོ་བ་ཐམས་ཅད་རང་བཞིན་མེད་པར་བསྒོམས་ནས་ཧཱུྃ་གི་ས་བོན་ལས་འོད་ཟེར་བྱུང་ནས་དེས་
བཀུག་པའོ། །ཕྱི་ནས་རྡོ་རྗེ་དྲ་བ་རྣམ་པར་བསྒོམ་པར་བྱའོ། །རྟག་ཏུ་རྣལ་འབྱོར་པ་ཞལ་བཞི་པ། དང་པོ་ནག་པོ། གཡས་པ་དམར་པོ། གཡོན་པ་དཀར་པོ། རྒྱབ་ཕག་གི་གདོང་པ། ཞབས་བཞི་པ། གཡོན་བརྐྱང་
བས་གནས་པ། ཁ་དོག་ནག་པོ། གསུས་པ་འཕྱང་བ། ཞལ་རེ་རེ་ལ་སྤྱན་གསུམ་གསུམ་པ། དབུ་སྐྲ་གྱེན་དུ་བརྫེས་པ། ཨ་ཚོམས་འབར་བ། ལྷག་མ་སྔ་མ་བཞིན་ནོ། །ཕྱག་བཅུ་གཉིས་པ། ཕྱག་གཡས་
གཡོན་དང་པོ་གཉིས་ཀྱིས་ལྷ་མོ་ལ་འཁྱུད་པ། བཅོམ་ལྡན་འདས་ཀྱི་མཆེ་བས་ལྷ་མོའི་མཆུ་བཙིར་བ། གཡོན་གཉིས་པ་ན་རྔ་མ་དཀར་པོ། གསུམ་པ་ན་རྩེ་གསུམ་པ། བཞི་པ་ན་ཐོད་པ། ལྔ་པ་ན་གླང་པོ་ཆེའི་པགས་
པ་དང་། དྲུག་པ་ན་ལོག་འདྲེན་གྱི་མཆེ་བ། གཡས་ཀྱི་གཉིས་པ་ན་གྲི་གུག །གསུམ་པ་ན་རྡོ་རྗེ་རྩེ་གཅིག་པ། བཞི་པ་ན་ཐོ་བ། ལྔ་པ་ན་གླང་པོ་ཆེའི་པགས་པ། དྲུག་པ་ན་རྡོ་རྗེ། མ་ཧེ་ལ་ཞོན་པ། བདུད་ཐམས་ཅད་
ཞབས་ཀྱིས་མནན་པ། ལྗགས་འདྲིལ་བ། ཁྲག་འཛག་པ། ཞལ་ཁ་སྦྱོར་དུ་བྱེད་པས་གནས་པ། ལྷག་མ་སྔ་མ་བཞིན་ནོ། །རྣལ་འབྱོར་མ་བཞིས་ཡོངས་སུ་བསྐོར་བ། གླུའི་མཆོད་པ་ཉེ་བར་ལོངས་སྤྱོད་པ་རྣམས་
དང་། ཕེམ་གྱི་སྒྲ་ཆེན་པོ་སྒྲོགས་པ། གད་མོ་ཆེན་པོ་རྒྱུན་མི་འཆད་པར་འབྱུང་བའི་ལྷ་མཆོག་ཏུ་དགའ་བའི་རང་བཞིན་ཅན་གྱི་ཨཱ་ལི་ཀཱི་ལིའི་སྒྲ་དང་ལྡན་པ། འཇིག་རྟེན་པ་རབ་ཏུ་ཞི་བའི་དོན་དུ་འགྲོ་བ་འདི་རྣམས་
དགའ་བ་ཆེན་པོའི་རིམ་པའི་མགོན་པོ་ནི་ཧི་ལི་ཀཱི་ལིའི་སྔགས་ཀྱི་ཕྲེང་བ་དང་ལྡན་པའོ། །བུད་དྷའི་བསྟན་པ་དང་ལྡན་པ། ཕྱག་བཞི་པ་བཞེངས་པ་བཤད་པ་ནི་བཅོམ་ལྡན་འདས་ཀྱིས་དངོས་གྲུབ་ཐམས་ཅད་ཀྱི་དོན་དང་། 

88-1-57a

བགེགས་ཉེ་བར་ཞི་བར་བྱེད་པ་ལ་ཞལ་གཅིག་ཕྱག་བཞི་པ། སྐུ་མདོག་ནག་པོ། མཆེ་བ་རྣམ་པར་གཙིགས་ཤིང་འཇིགས་པར་བྱེད་པ། ལྟོ་འཕྱང་བ། དབུ་སྐྲ་ཁམ་པ་གྱེན་དུ་བརྫེས་པ། ཨག་
ཚོམས་ཁམ་སེར། ཀླུ་བརྒྱད་ཀྱི་རྒྱན་གྱིས་བརྒྱན་པ། རོའི་གདན་ལ་བཞུགས་པ། རྒྱབ་སྟག་ལ་སྙེས་པ། ཧཱུྃ་ལས་བསྐྱེད་པ་ཕྱག་བཞི་པ། གཡས་ན་རྩེ་གསུམ་དང་ཐོ་བ། གཡོན་ན་གྲི་གུག་དང་ཐོད་པ། ཕེཾ་གྱི་སྒྲ་
འབྱིན་པ། ཕྱོགས་གཉིས་སུ་རྣལ་འབྱོར་མ་གཉིས་གནས་པ་བསྒོམ་པར་བྱའོ། །བགེགས་ཐམས་ཅད་ཞི་བར་བྱ་བའི་དོན་དུ་ཕྱག་དྲུག་པ་བཞེངས་པ་བཤད་པ། གསུམ་པ་མཆོག་ཏུ་དགའ་བའི་རང་བཞིན་ཅན། སངས་
རྒྱས་ཀྱི་བསྟན་པ་ལ་ཉེ་བར་ཕན་པར་བྱེད་པ། སྡིག་པ་ལ་སོགས་པ་ཡོངས་སུ་སྤོང་བ། དང་པོ་སྟོང་པ་ཉིད་ལ་སོགས་པ་ཡོངས་སུ་བསྒོམས་ནས་རྣལ་འབྱོར་པས་དང་པོར་རྡོ་རྗེ་གུར་གྱི་སྦྱོར་བ་བྱའོ། །དེ་དང་དུས་མཉམ་དུ་
ཧྲཱིཿའི་ས་བོན་ལས་ལངས་པའི་ལྷའོ། །སེང་གེའི་སྟེང་ན་གནས་པ། ཞལ་གསུམ་པ། དང་པོ་སྤྲིན་ནག་པོའི་མདོག །གཡས་དཀར་ལ་གཡོན་ལྗང་བ། མི་བརྟན་པའི་ཡན་ལག་ཅན། མཆེ་བ་གཙིགས་ཤིང་འཇིགས་པ། སྐྲ་
དམར་པོ་གྱེན་དུ་བརྫེས་པ། སྤྱན་གསུམ་པ། ཀླུ་བརྒྱད་ཀྱིས་བརྒྱན་པ། གཡས་ན་གྲི་གུག་ཐོ་བ་ཌཱ་མ་རུ། གཡོན་ན་ཐོད་པ་རྩེ་གསུམ་རལ་གྲི། གཏུམ་པའི་དབང་ཕྱུག་མ་དང་། ཀ་ལཾི་ག་དང་། རིགས་ཀྱི་དབང་ཕྱུག་
མ་དང་། ཙར་ཙི་ཀཱ་བཞི་རྣམས་ཀྱིས་བསྐོར་བ་ནི་ཁ་སྦྱོར་གྱི་རྣལ་འབྱོར་གྱིས་གནས་པ། ལྷ་མོ་བཞིར་གནས་པ་ཐམས་ཅད་ཀྱིས་ཡང་དག་པར་བསྐུལ་ནས་ལངས་པ། འབྱུང་བ་ལྔ་ལས་ཡང་དག་པར་བཞེངས་
པ། ཐམས་ཅད་ཀྱི་མིང་གིས་བསྐོར་བ། ལྷ་མོས་གསོལ་པ། ཀྱཻ་བཅོམ་ལྡན་འདས་རང་གི་ལྷའི་གཟུགས་ཀྱིས་འགྲོ་བའི་དངོས་གྲུབ་ཀྱི་མཚན་ཉིད་ཇི་ལྟར་ཤེས། བཅོམ་ལྡན་འདས་ཀྱིས་གསུངས་པ། ལྷ་མོ་

88-1-57b

ཨུ་མའི་རྣལ་འབྱོར་གྱི་བདག་ཉིད་དང་། དཔལ་ནག་པོ་ཆེན་པོའི་སྐྱེ་བོ་ལ་སོགས་པའི་དོན་དུ་སྐད་ཅིག་དང་གཅིག་ཤོས་གཞན་དང་གཞན་དུ་གང་བཀག་པ་དེ་ལ་དངོས་གྲུབ་མི་འཇུག་གོ། །དང་པོ་གོམས་པའི་དུས་སུ་དངོས་
གྲུབ་ཀྱི་མཆོག་གི་གནས་བརྟག་པར་བྱ་སྟེ། གང་དུ་གྲུབ་པའི་གནས་དེའམ། སྔགས་པ་རང་གི་ཁྱིམ་མམ། ཐང་སྟོང་ངམ། ཕྱི་རོལ་བླ་གབ་མེད་པ་འམ། དབེན་པའི་ཕྱོགས་སམ། དེར་མཉམ་པར་བཞག་སྟེ། 
ཁང་སྟོང་དུ་རྟག་ཏུ་བསྒོམ་པར་བྱའོ། །ཕྱག་བཅུ་དྲུག་པ། རྣལ་འབྱོར་མ་བརྒྱད་ཀྱིས་བསྐོར་བ། ཡང་དག་པར་ལྡན་པ་དེའི་འཁོར་རྣམས་སྲེད་མེད་ཀྱི་བུ་ལ་སོགས་པས་ཀྱང་ཡོངས་སུ་གང་བ་བསྒོམ་པར་བྱའོ། །དངོས་གྲུབ་
བསྒྲུབ་པ་ཞེས་ངས་བསམ་པར་བྱའོ། །རིགས་ལྔ་ལ་བཞུགས་པ། ཤེས་རབ་ཀྱིས་ཀྱང་མཉམ་པར་སྦྱོར་བའོ། །རྣལ་འབྱོར་པས་རྟག་ཏུ་བཟའ་བ་ནི་ཤ་ཆེན་ནམ་བ་ལང་དང་། ཁྱི་དང་། མི་ལ་སོགས་པ་ཤ་ལྔ་དང་། 
བདུད་རྩི་ལྔ་རྣམས་རྟག་ཏུ་བཟའ་བར་བྱའོ། །འདིར་དངོས་གྲུབ་འདོད་པའི་རྣལ་འབྱོར་པ་རྣམས་ཀྱིས་དངོས་གྲུབ་སྒྲུབ་བོ། །གང་རིགས་ལྔ་ལ་གནས་པས་སེར་སྐྱའི་ཤ་བཟའ་བར་བྱའོ། །དེ་ནས་བདག་གི་སེམས་ཀྱིས་ནག་
པོ་ཆེན་པོ་བསྒོམ་པར་བྱའོ། །རྣལ་འབྱོར་པས་ཕྱག་བཅུ་དྲུག་པ། རྟག་ཏུ་དེ་ཉིད་ཀྱིས་བྱེད་པ་བརྗོད་པར་བྱའོ། །གང་དང་གང་དུ་ཕྱག་གཉིས་པ་བསྒོམས་པས་དངོས་གྲུབ་ཐམས་ཅད་བསྒྲུབ་པའི་དོན་ནོ། །ཕྱག་རྒྱ་བསྒྲུབ་པ་
རབ་ཏུ་འབད་པ་ཡིས་ཕྱི་ནས་དུས་འདིར་དངོས་གྲུབ་ཐམས་ཅད་ངེས་པའོ། །དངོས་པོ་བསྒོམ་པ་བསྒོམ་པ་མེད་པའོ། །རྟག་ཏུ་དངོས་གྲུབ་ཀྱི་ཡེ་ཤེས་ཉེ་བར་འཐོབ་པའོ། །གང་དངོས་གྲུབ་ཐོབ་པའི་རྣམ་པ་ཇི་ལྟར་འགྱུར། 
དེ་ནས་དང་པོ་མཆོད་པ་ཉེ་བར་བྱ་སྟེ། དྲི་སྣ་ཚོགས་པ་ལ་སོགས་པ་སྤོས་དང་མེ་ཏོག་ཕྲེང་བ་ལ་སོགས་པའོ། །སྙིང་གར་ཧཱུྃ་ཡིག་བལྟས་ལ་མཆོད་པ་ལ་སོགས་པ་བྱས་ནས་མདུན་དུ་བལྟ་བར་བྱའོ། །སྡིག་པ་བཤགས་

88-1-58a

པ་ལ་སོགས་པ་བྱས་ནས་ཚངས་པའི་གནས་བཞི་བསྒོམ་པར་བྱའོ། །ལག་པ་ལ་དགོད་པ་ལ་སོགས་པ་བྱ་སྟེ། ལག་པ་གཡས་ལ་ཨོཾ་གཡོན་པ་ལ་ཨཾ། གནས་རྣམས་སུ་བྱིན་གྱིས་བརླབ་པ་ནི། 
ཨོཾ་ཐ་མུ་ཨཱཿཧཱུྃ། མིག་ཏུ་ཀྵི། རྣ་བ་གཡོན་པ་ལ་ཨཱ། རྣ་བ་གཡས་པ་ལ་ཨཱ། སྣ་ལ་ཏྲཾ། ལྕེ་ལ་ཧྲཱིཿ རྐང་པ་གཉིས་ལ་བཾ་བཱཾ། རྡོ་རྗེ་ལ་ཧཱུྃ། ཕྱིན་ནས་ལུས་ངག་ཡིད་བྱིན་གྱིས་བརླབ་པར་བྱའོ། །ཨོཾ་ཧཾ་ཧཱུྃ། སྙིང་
ཀར་ཧཱུྃ། མགྲིན་པར་ཨོཾ།  སྤྱི་གཙུག་ཏུ་ཧཾ། གཞལ་ཡས་ཁང་རྟ་བབས་བཞི་དང་ལྡན་པ། གྲུ་བཞི་པ། སེང་གེའི་གདན་ཡོངས་སུ་བསྒོམ་པར་བྱའོ། །སྟོང་པ་ཉིད་དུ་བསྒོམ་པར་བྱའོ། །ཨོཾ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་
བ་ཨཱཏ་མ་ཀོ྅་ཧཾ། ཇི་ལྟར་གྱུར་པ་དེ་ནས་བལྟ་བར་བྱ་སྟེ། པི་བང་དང་རྔ་བྲན་དང་། གླིང་བུ་དང་། ཏིང་ཏིང་ཤག་དང་། གར་དང་། གླུ་དང་། རྔ་སྒྲ་དང་། སྲེད་མེད་ཀྱི་བུ་ལ་སོགས་པས་ཧཱུྃ་གི་ཡི་གེ་བསམ་པར་བྱའོ། །
རྡོ་རྗེ་གུར་བཅིངས་པ་ལ་སོགས་པ་མ་ལུས་པ་སྔར་བཞིན་བྱའོ། །ལྷ་མོས་གསོལ་པ། ཀྱེ་བཅོམ་ལྡན་འདས་བཞེངས་ལ་སེམས་ཅན་གྱི་དོན་མཛོད་ཅིག །ཅིའི་ཕྱིར་སྟོང་པ་ཉིད་དུ་སེམས། སྟོང་པ་ཉིད་ཀྱི་ཏིང་ངེ་འཛིན་ལ་
མ་ཞེན་པར་གང་སེམས་ཅན་འཛམ་བུའི་གླིང་པ་རྣམས་ལ་གཟིགས་ཤིང་དངོས་གྲུབ་སྣ་ཚོགས་པ་རྣམས་བྱིན་ཅིག །བཅོམ་ལྡན་འདས་ཀྱིས་ལྷ་མོ་མ་ལུས་པ་ལ་གསུངས་པ། ལྷ་མོ་ཆེན་མོའི་བདག་ཉིད་ལྟོས་ཤིག་ལྟོས་
ཤིག །དཔལ་ནག་པོ་ཆེན་པོ་མཆོག་ཏུ་དགའ་བའི་རང་བཞིན་ནམ་མཁའི་རང་བཞིན་རྣམས་ཞལ་བཞི་པ་ཧཱུྃ་ལས་བསྐྱེད་པ། དང་པོའི་ཞལ་ནག་པོ། གཡོན་ལྗང་གུ། གཡས་དམར་པོ། རྒྱབ་མ་ཧི་ཥའི་གདོང་པ་ཅན། 
མཆེ་བ་གཙིགས་ཤིང་འཇིགས་པར་བྱེད་པ། འཇིགས་པ་ཆེན་པོའི་ང་རོ་ཤིན་དུ་དྲག་པ། འཇིགས་པ་ཡང་ཤིན་ཏུ་འཇིགས་པར་བྱེད་པ། སྨ་ར་སེར་པོ་དང་། སྐྲ་སེར་པོ་གྱེན་དུ་བརྫེས་པ། ཞལ་རེ་རེ་ལ་ཡང་སྤྱན་

88-1-58b

གསུམ་གསུམ་པ། སྐྲ་ཤིན་དུ་གྱེན་དུ་བསྒྲེང་བ། འོད་ཟེར་དང་ལྡན་པ། ཀླུ་འཇོག་པོས་དཀྲིས་པ། ཞབས་བཞི་པ། མ་ཧི་ཥ་འོག་ཏུ་གནོན་པ། ཕྱག་བཅུ་དྲུག་པ། གཡས་གཡོན་གྱི་དང་པོ་གཉིས་ཀྱིས་ལྷ་མོ་ལ་འཁྱུད་པ། 
ཞབས་གཡས་བརྐྱང་བས་གནས་པ། བདུད་བཞི་ཡང་དག་པར་མནན་པ། གཡས་ཀྱི་གཉིས་པ་ན་གྲི་གུག །གསུམ་པ་ན་ཐོ་བ། བཞི་པ་ན་རྔ་མ་དཀར་པོ། ལྔ་པ་ན་གཤིན་རྗེའི་དབྱུག་པ། དྲུག་པ་ན་རྡོ་རྗེ། བདུན་པ་
ན་ལོག་འདྲེན་གྱི་མཆེ་བ། བརྒྱད་པ་ན་གླང་པོ་ཆེའི་པགས་པ། གཡོན་གྱི་གཉིས་པ་ན་ཁྲག་གིས་བཀང་བའི་ཐོད་པ། གསུམ་པ་ན་རྩེ་གསུམ་པ། བཞི་པ་ན་རྔེའུ་ཆུང་། ལྔ་པ་ན་རྡོ་རྗེ། དྲུག་པ་ན་དྲིལ་བུ། བདུན་པ་ན་མ་
ཧེའི་མགོ། བརྒྱད་པ་ན་གླང་པོ་ཆེའི་པགས་པ་ལྟོ་འཕྱང་བ། སྟག་གི་པགས་པས་རྐེད་པ་དཀྲིས་པ། རིགས་ཅན་གྱིས་དཔུང་པ་བརྒྱན་པ། མགོ་བོའི་ཕྲེང་བའི་དོ་ཤལ་འཕྱང་བ། རྐེད་པ་དང་མགྲིན་པ་ལ་སོགས་པ་རྣམས་
ལ་དགའ་བོ་དང་། ནོར་རྒྱས་ལ་སོགས་པ་རྣམས་ཀྱིས་ཡོངས་སུ་བརྒྱན་ཞིང་། ཀླུ་ཐམས་ཅད་ཀྱིས་བརྒྱན་པ། མཁའ་འགྲོ་མ་བརྒྱད་ཀྱིས་ཡོངས་སུ་བསྐོར་བ། སྲེད་མེད་ཀྱི་བུ་ལ་སོགས་པ་རྣམས་ཀྱི་ཞབས་ལ་འཇུས་ནས་
ཕྱག་བྱེད་པ། ཕེཾ་གྱི་སྒྲ་ཆེན་པོ་ཡོངས་སུ་སྒྲོགས་པ། ཀི་ལི་ཀཱི་ལའི་སྒྲ་དང་ལྡན་པ། འབྲུག་གི་སྒྲ་སྒྲོགས་པ། ཧ་ཧཱ་ཧི་ཧཱི་ཧེ་ཧཻ་ཧོ་ཧཽ་སྒྲ་རབ་ཏུ་འབྱུང་བ། ཤར་གྱི་འཕར་མ་ལ། གཏུམ་པའི་དབང་ཕྱུག་མ། ཙཾ་གྱི་ས་བོན་
ལས་བསྐྱེད་པ། ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ། མགོ་བོའི་ཕྲེང་བའི་དོ་ཤལ་ཅན་ཁ་དོག་དཀར་མོ་མཆེ་བ་རྣམ་པར་གཙིགས་ཤིང་འཇིགས་པར་བྱེད་པ། ལྷོའི་འཕར་མ་ལ་ཙ་ཀཱ་ཁ་དོག་ནག་མོ་ཀཾ་གི་ས་
བོན་ལས་བསྐྱེད་པ། ཕྱག་གཉིས་ན་གྲི་གུག་དང་ཐོད་པ་འཛིན་པ། ལྷག་མ་སྔར་བཞིན། ནུབ་ཀྱི་འཕར་མ་ལ་ཀཱ་ལི་ཀཱ། ལཾ་གྱི་ས་བོན་ལས་བསྐྱེད་པ་གཡས་གཡོན་ན་རྩེ་གསུམ་པ་དང་ཐོད་པ། ལྷག་མ་རྣམས་སྔར་བཞིན་

88-1-59a

ནོ། །བྱང་དུ་རིགས་ཀྱི་དབང་ཕྱུག་མ། ར་གྱི་ས་བོན་ལས་བསྐྱེད་པ་ཁ་དོག་སེར་མོ། གཡས་པ་གྱེན་དུ་བསྒྲེང་བ། གཡོན་པ་ན་ཐོད་པ་ཐོགས་པ། ལྷག་མ་ནི་སྔ་མ་བཞིན་ནོ། །ལྷ་མོ་ཐམས་ཅད་སྤྱན་གསུམ་
པ། མགོ་བོའི་ཕྲེང་བ་རབ་ཏུ་འཕྱང་བ། ཀླུ་བརྒྱད་ཀྱིས་ཡང་དག་པར་བརྒྱན་པ། རོའི་སྟེང་ན་ཞབས་གཡོན་བརྐྱང་བས་གནས་པ། དེ་བཞིན་དུ་གཅེར་བུ་སྐྲ་སིལ་བུ་འཇིགས་པར་བྱེད་པ། ཕྱིའི་སྣམ་བུ་ལ་ཆོམ་རྐུན་མ་ལག་
པ་རྔ་མ་བཟུང་བ་ཁ་དོག་ནག་མོ། ཙམ་གྱི་ས་བོན་ལས་བསྐྱེད་པ། ལྷག་མ་སྔར་བཞིན་ནོ། །ལྷོའི་སྣམ་བུ་ལ་ལན་ཚ་ནི་ཁ་དོག་ལྗང་གུ། ཙམ་གྱི་ས་བོན་ལས་བྱུང་བ། ལག་པས་སྤོས་ཁང་བཟུང་བ། ནུབ་ཏུ་དགའ་ཆེན་མོ་
མཾ་གྱི་ཡི་གེ་ལས་བསྐྱེད་པ་ཁ་དོག་དམར་མོ། ལག་པ་རྡོ་རྗེ་དང་དྲིལ་བུ་ཐོགས་པ། བྱང་དུ་དགའ་བའི་དབང་ཕྱུག་མ་ནཾ་གྱི་ཡི་གེ་ལས་ཡོངས་སུ་རྫོགས་པ། ཁ་དོག་སེར་མོ། ལྷག་མ་སྔར་བཞིན་ནོ། །ལྷ་མོ་ཨུ་མཱས་གཙོ་བོ་ལ་འཁྱུད་
པ་ཁ་དོག་དཀར་མོ་ཕྱག་བཞི་པ་དགའ་བ་ཆེན་པོས་གནས་པ། དེ་བཞིན་དུ་མཆེ་བ་རྣམ་པར་གཙིགས་པ། ལྷག་མ་སྔར་བཞིན་ནོ། །ཕྱག་རྒྱ་ཤིན་ཏུ་དགའ་བས་གནས་པ། སངས་རྒྱས་རྣམས་ཀྱིས་སྔགས་གསལ་བར་བཤད་
པར་བྱ་སྟེ། དངོས་གྲུབ་སྣ་ཚོགས་མཆོག་ཏུ་སྟེར་བའི་ཕྱིར། དཔལ་སེམས་ཅན་རྣམས་ལ་ཆགས་པས་སེམས་ཅན་རྣམས་ལ་ཕན་པ་དང་མི་ཕན་པའི་རྣམ་པ་མི་སྤྱོད་པས་དགའ་བ་ཆེན་པོར་གནས་པའི་སྒྲུབ་པ་པོས་བརྒྱད་དམ་བཅུ་
འམ་བཅུ་གཉིས་ལ་བསྒོམ་པར་བྱའོ། །གང་རྣལ་འབྱོར་པ་ཆང་དང་གོ་ཀུ་ད་ཧ་ན་ལ་སོགས་པ་བདུད་རྩི་ལྔ་དང་། ཡང་དག་པར་ལྡན་པས་སྤྱད་པར་བྱའོ། །རྟག་ཏུ་བཏུང་བ་ཁྲག་གིས་བྱའོ། །གལ་ཏེ་ཐེ་ཚོམ་ཟ་ན་སྐྱེ་བར་མི་འགྱུར་རོ། །
གང་གིས་འབད་པ་ཆེན་པོས་བསྙེན་པ་བྱས་ནས་དངོས་གྲུབ་ངེས་པར་འབྱུང་ཞིང་དེས་ཡུན་མི་རིང་བར་འཇོམས་པར་འགྱུར་རོ། །གསང་བའི་རིགས་ལ་གནས་ན་དེ་བཞིན་དུ་ལས་བྱའོ། །ཇི་ལྟར་གསལ་བར་མི་འགྱུར་རོ། །གལ་ཏེ་

88-1-59b

གང་གིས་གསལ་བར་བྱས་ན་ནི་དེ་དངོས་གྲུབ་ཏུ་མི་འགྱུར་རོ། །ཆེན་པོར་མི་གསལ་བར་བསམ་པར་བྱའོ། །ལྷ་མོས་གསོལ་པ། ཀྱེ་བཅོམ་ལྡན་འདས་དགོངས་པའི་སྐད་ནི་ཇི་ལྟར་གསུངས། དེ་ཁོ་ན་ཉིད་ཇི་ལྟ་བ་བཞིན་ཉན་པར་
འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། དགོངས་པའི་སྐད་ནི་ཇི་ལྟ་བར་རྒྱས་པར་ཚང་ལ་སྟོབས་ཅན་ཞེས་བྱ། ཤ་ལ་བ་ལ་ཞེས་སོ། །སྐད་ཆེན་མི་ཡིས་མ་རྟོགས་པར་བྱ། །དངོས་གྲུབ་ཐོབ་པར་ཤེས་པར་བྱ་བའི་ཕྱིར། 
རིགས་ཅན་ལྔ་རབ་ཏུ་གསལ་བར་བཤད་པར་བྱ་སྟེ། གཡུང་མོ་རྡོ་རྗེའི་རིགས་ལས་བྱུང་བ་དང་། གར་མཁན་མ་པད་མའི་རིགས་ལས་བྱུང་བ་དང་། བྲམ་ཟེ་མོ་རིན་པོ་ཆེའི་རིགས་ལས་བྱུང་བ་དང་། ཚོས་མཁན་མ་ལས་ཀྱི་རིགས་ལས་
ཡང་དག་པར་སྐྱེས་པ་དང་། རྒྱལ་རིགས་མོ་སྐུའི་རིགས་ལས་བྱུང་བའོ། །ཕྱག་རྒྱ་འདི་ནི་རང་གི་དངོས་གྲུབ་སྟེར་བ་དང་། དེ་འདི་དག་རྣམས་ལ་བུད་མེད་རྣམས་ཀྱིས་རྡོ་རྗེ་དཀར་པོ་འཛིན་པ་སྔགས་པས་ངེས་པར་དེ་ཡིས་རབ་ཏུ་མཆོད་པ་
དང་། རྟག་ཏུ་བཏུང་བར་བྱའོ། །ཀྱཻ་ལྷ་མོ་ལ་བཤད་པ་དེ། འདི་ལྟར་གང་ཁྱོད་སྙིང་རྗེ་དང་ལྡན་པས་ཐམས་ཅད་དུ་གུས་པ་ཆེན་པོའི་བདག་ཉིད་ཀྱིས་ཡོངས་སུ་གཟུང་བར་བྱའོ། །སྐད་གཞན་གྱིས་ངོ་མཚར་བ་དང་། མི་གང་དབང་
མ་བསྐུར་བ་དང་། སྐད་འདིས་དཔལ་ནག་པོ་ཆེན་པོའི་དབང་མ་བསྐུར་བ་ལ་རབ་ཏུ་བཤད་ན། དེ་ཉི་མ་བདུན་གྱིས་འཆི་བར་འགྱུར་རོ། །གལ་ཏེ་མ་ཤི་ན་ཡང་ན་བ་དང་། ཚེ་ཐུང་བ་དང་། པོ་ཏི་མིག་གིས་མི་མཐོང་བར་འགྱུར་
རོ། །དབང་མ་བསྐུར་བ་དང་། བརྫུན་དུ་སྨྲ་བ་དང་། མི་གུས་པའི་མི་དེ་རྣམས་རྣལ་འབྱོར་མ་དང་མཁའ་འགྲོ་མ་ཐམས་ཅད་དང་། ལྷ་རྣམས་འཁྲུག་པར་འགྱུར་རོ། །ལྷ་མོ་གང་དང་གང་དུ་ངས་བཤད་པ་ཐམས་ཅད་མ་ལུས་
པ་འབད་པ་ལ་ངས་བྱིན་གྱིས་བརླབ་པོ། །དངོས་གྲུབ་ཆེན་པོ་བརྒྱད་འགྲུབ་བོ། །རྒྱུད་ཐམས་ཅད་ཀྱི་གླེང་གཞི་རྒྱུད་འདིར་སྨྲས་པ། དེའི་ཕྱིར་དབང་བསྐུར་བའི་མིས་ཀློག་པའམ་འདྲི་བས་དངོས་གྲུབ་འགྲུབ་བོ། །རྗེ་བཙུན་བྲི་

88-1-60a

བར་བྱ་སྟེ། སོར་བཅུ་དྲུག་ཙམ་གྱི་ཚད་ཙམ། རྒྱ་སྐྱེགས་ཀྱི་ཁུ་བ་འམ། སེན་རྩི་འམ། དྲི་སྣ་ཚོགས་ཀྱིས་བསྲེས་ཏེ། ནིམ་པའི་ཤིང་གི་སྨྱུག་གུས་གྲོ་ག་ལ་གཟུགས་བརྙན་ཇི་ལྟ་བར་བྲིས་ནས་རས་དམར་པོ་
འམ་དུར་ཁྲོད་ཀྱི་རས་ལ་བརྟེན་ནས་ལག་པ་བྱིན་གྱིས་བརླབ་པ་ལ་སོགས་པ་བསྒོམ་པར་བྱ་སྟེ། ཡང་ན་ནིམ་པའི་ཤིང་ལ་བྱས་པ་ལ་རྟག་ཏུ་ཡང་དག་པར་བསམ་པར་བྱའོ། །ལྷ་མོས་གསོལ་པ། ཀྱཻ་བཅོམ་ལྡན་འདས་ཁྱོད་ཉོན་
ཅིག །བཞེངས་ཤིག་བདག་གིས་འདི་བསྐུལ་ནས་ནག་པོ་ཆེན་པོའི་བདག་ཉིད། ཨུ་ཊ་ཋི་ཡ། བྷ་རཱ་ཊོ། ཀཱ་རུ་ཎ་མ་ཎྱ། ནཱ་ཙ་མི་ཧ་ཝུཾ་དེ་བི། ཨི་ཐི་ཏ་ཀཱི་ས་ཀ་རི་བ་མ་ཡི་ཛ་ཡི་ཏུ་ཧཱུྃ་བུ་ཙྪ་ཚ་སི་ཀཱ་ཛ་ཛ་ཏ་ག་ཁ་ཎེ་ཧོ་ཡི་སརྦ་ཡཱ་རཱ་ཧཱ་སཾ་
ཎ་ཙ་ཙ་ཡི། ཨེ་ཀ་ལ་བི་ར། ཏི་ཎ་ཎི་བྷུ་ཡ་ཎེ་ཀ་ཀ་རི་ཡཱ་ཁ་ཌཱ་རུ་ཧ་ཡེ། ཨ་ཙ་ཚན་ཏེ་ཀཱ་ལཱི་བོ་ལཱི། ཙཎ་ཌེས་ས་རཱི་ཀུ་ལི་ཀཱི་ནཱི་བྷི་རི་ལཱ་ཨ་གེ་ཏ་ཡི་ཀིཾ་པཱུརྞྞ་པུ་ཙྪ་སི་ལོ་བྷོ་ལཱི། ཨ་ཨཱི་ན་ཨན་ཏ་ན་ན་ཧི་ཏོ་ཧེ་ཀ ། ཨེ་ཀཱ་ནཻ་ཀ་རི་
ཡ་སི་སཏ་ཏ་བཱ་ཐཱ། ཨེད་བྷུ་ཏ་སུ་མ་ཧི་ཡ་ཀ་རི་ཧི་སི་ཛོ་ཡི། ཇི་ལྟར་བསྐུལ་བའི་དུས་སུ་བཅོམ་ལྡན་འདས་སྐད་ཅིག་དེ་ཉིད་ལ་རྫོགས་པར་ལོངས་ཤིག །ཡིད་ཀྱི་འགྱུར་བ་གསལ་བས་ཕྱག་བཅུ་དྲུག་པ་རྫོགས་པར་བྱས་ནས་
ཕྱག་གཉིས་པ་བཤད་པར་བྱ་སྟེ། སེམས་ཅན་རྣམས་ཀྱི་སྡུག་བསྔལ་བསལ་བའི་དོན་དུ་ཇི་ལྟར་ཕན་པར་བསམས་པ་ཙམ་གྱིས་སྡུག་བསྔལ་ཐམས་ཅད་ལ་ཡང་དག་པར་འདོན་པའོ། །ལྷའི་རིགས་བསམ་པར་བྱའོ། །བཅོམ་
ལྡན་འདས་ཀྱིས་གསུངས་པ། དང་པོར་ཧཱུྃ་ཡིག་བསམ་པར་བྱ་བ་དང་། ཕྱི་ནས་མཆོད་པ་དང་བསྙེན་བཀུར་ལ་སོགས་པ་བྱས་ནས་དངོས་གྲུབ་འདོད་པས་བསྒོམ་པར་བྱའོ། །ཞལ་གཅིག་ཕྱག་གཉིས་པ་གཡས་གྲི་གུག་
གཡོན་ཐོད་པ། སྐུ་མདོག་ནག་པོ་སྐྲ་སེར་པོ་གྱེན་དུ་བརྫེས་པ། རོའི་སྟེང་ན་གནས་པ། ཀླུ་ཆེན་པོ་བརྒྱད་ཀྱིས་བརྒྱན་པ། ལྟོ་འཕྱང་བ། བོང་ཐུང་བ། རྣལ་འབྱོར་མ་གཉིས་ཀྱིས་ཡོངས་སུ་བསྐོར་བ་དང་ཐབས་གཅིག་

88-1-60b

ཏུ་བསྒོམ་པར་བྱའོ། །ཆར་སྤྲིན་གྱི་མདོག་ལྟ་བུ་འབྲུག་གི་སྒྲ་སྒྲོགས་པ་པོ། སྐྱེ་བོ་གནས་པ་དེའི་དུས་སུ་སྒྲ་སྙན་པ། སྦས་པ་རྣམས་ཀྱིས་དུང་སྐྱོང་དྲན་པར་བྱའོ། །ཀྱཻ་ལྷ་མོ་མི་འགྲུབ་ན་ཉེ་བར་སྤྱོད་པ་ལ་དགོས་པ་ཅི་ཡོད། ལྷ་
མོས་གསོལ་པ། ཀྱཻ་བཅོམ་ལྡན་འདས་ཅིའི་ཕྱིར་རྣལ་འབྱོར་གྱི་དབང་ཕྱུག་ཇི་ལྟར་དུ་རྒྱུ། གལ་ཏེ་རིགས་ལྔ་ལ་གནས་པའི་ཀྱཻ་ལྷ་ཆེན་པོ་མེ་ཏོག་གི་ཆར་འབབ་པ། ཡན་ལག་སྟོང་དང་ལྡན་པ། ཡན་ལག་གཅིག་ཏུ་གྱུར་པ། ཇི་
ལྟར་ཡན་ལག་བཞི་ཡིས་ཡང་དག་པར་སྤྱོད་པ་ལགས། བཅོམ་ལྡན་འདས་ཀྱིས་གསུངས་པ་ས་གསུམ་དང་མཉམ་པར་སྦྱོར་བའི་རྣལ་འབྱོར་མ་རྣལ་འབྱོར་བསྒྲུབ་པའི་དོན་དུ་ངེས་པར་ཡོངས་སུ་བསྒྲུབ་པར་བྱའོ། །འདི་ནི་དཔལ་
ནག་པོ་ཆེན་པོའི་རྒྱུད་ལས་ལྷ་རྣམས་བཞེངས་པའི་ལེའུ་སྟེ་བདུན་པའོ།། །། དེ་ནས་ལྷ་མོས་གསོལ་པ། འོན་ཀྱང་མཉམ་པར་ལོངས་སྤྱོད་ཅིང་ལོངས་སྤྱོད་པར་འདོད་པའི་སེམས་ཅན་དབུལ་པོ་རྣམས་ཀྱི་དོན་དུ་
ཐབས་ཇི་ལྟར་ལགས། བཅོམ་ལྡན་འདས་ཀྱིས་གསུངས་པ། ཇི་ལྟར་འཛམ་བུའི་གླིང་པའི་དངོས་གྲུབ་སྣ་ཚོགས་ཉེ་བར་སྤྱོད་པ་ཞེས་བྱ་བ་བཤད་པར་བྱའོ། །རྣལ་འབྱོར་པ་རྣམས་ཀྱིས་བྱིན་གྱིས་བརླབས་པས་ས་སྟེངས་ཀྱི་དངོས་
གྲུབ་རྣམས་འགྲུབ་བོ། །མཚན་མོའི་ཆ་ལ་རྡོ་རྗེའི་ཁྱིམ་དུ་སྣ་ཚོགས་པའི་ཉ་དང་། ཤ་དང་ཁྲག་དང་བཅས་པ་བཟའ་བར་བྱའོ། །བགེགས་ཉེ་བར་ཞི་བར་བྱེད་པའི་གཏོར་མ་བྱ་སྟེ་སྔགས་ཀྱི་ལེའུ་ལས་བཤད་པ་ཇི་ལྟར་འབྱུང་བ་
ལྟར་བྱའོ། །དགྲ་རྣམས་བཙིར་བ་ཨརྐྐའི་འདབ་མ་ལ་བ་བླས་སྔགས་བྲིས་ལ། རབ་ཏུ་སྦྱོར་བ་དང་ལྡན་པས་ཕྱི་ནས་མིང་བྲིས་ཏེ་ས་འོག་ཏུ་བཅུག་ནས། རྐང་པ་གཡོན་པས་མནན་ལ་སྔགས་བཟླས་ཏེ། ནག་པོ་ཆེན་པོའི་
གཟུགས་སུ་བསྒོམས་ནས་སོ། །ཞི་བར་འདོད་ན་འཁར་བའི་སྣོད་དུ་འོ་མས་བཀྲུས་ལ། ཨོཾ་མ་ཧཱ་ཀཱ་ལ་ཀཱ་རུ་ཎཱི་ཀཱ་སརྦ་ཤ་ཏྲཱུཾ་ཎི་མུ་ཁཾ་བཾ་དྷ་ཡ་སྟཾ་བྷ་ཡ་མོ་ཧ་ཡ་ཧཱུྃ་ཏེཾ་ཕཊ། ཚ་བ་གསུམ་དང་། བྷ་ལཱ་ཏ་ཀ་དང་། སྒེ་གཤེར་དང་། 

88-1-61a

ཀེ་སུའི་རྩ་བ་དང་། ཉི་མ་བདུན་གྱིས་རྫོགས་པར་མུ་ཟི་ལྷན་ཅིག་ཕྱེ་མར་བྱས་པ་བླུགས་ལ། ཇི་ལྟར་རྣལ་འབྱོར་པས་སྦྲང་རྩི་དང་ལྷན་ཅིག་བཟའ་བར་བྱའོ། །དེའི་ལུས་ལ་དགྲ་ཡིས་མི་ཚུགས་སོ། །དེ་ནི་བསྒྲུབ་
པར་རིགས་པ་སྟེ་ལུས་རྒྱས་པར་བྱེད་པའོ། །ཉི་མ་ཉི་ཤུ་རྩ་གཅིག་ཏུ་གོམས་པས་སོ། །ལྟེ་བའི་མེ་གཞན་པ་རྒྱས་པར་བྱ་བ་ནི་དེ་ནས་དེ་ཉིད་ཙི་ཏྲ་ཀ་དམར་པོ་པི་པི་ལིང་གི་རྩ་བ་དང་། ལེགས་མཐོང་གི་རྩ་བ་དང་ཚ་བའི་མར་
ཁུ་ཡང་དག་པར་ལྡན་པས་བྱང་ཆུབ་ཀྱི་ཤིང་གི་ཁུ་བ་ཨ་རུ་རཱ་བཙོས་པ་དང་། ཚྭ་དང་ལྷན་ཅིག་ཏུ་བཟའ་བར་བྱའོ། །རི་ལུ་ཉི་མ་ཉི་ཤུ་རྩ་གཅིག་དང་ལྡན་པར་བྱས་པས་སྔར་གྱི་གཟུགས་བཞིན་དུ་འགྱུར་རོ། །མེའི་དྲོད་ཆེན་པོ་དང་ལྡན་
པར་འགྱུར་རོ། །ལུས་བརྟན་པའི་དངོས་གྲུབ་བསྟན་པའོ། །དང་པོ་བ་རུ་ར་དང་། ཏ་ཀའི་རྩ་བ་དང་། སྐྱུ་རུ་ར་དང་། ཏིལ་ཏི་ལ་དང་། དེ་དང་དེ་མཉམ་པར་ལྡན་པ། ནཱ་ག་མཆོག་ཏུ་བྱས་པ། ཁའི་ནང་དུ་བཅུག་ནས་སྲིན་བྱའི་ཁྲག་
མིག་གཉིས་ལ་བྱུགས་ནས་འོག་གི་བུག་པ་མཐོང་བར་འགྱུར་རོ། །གཞན་ཡང་ནཱ་ག་ཁར་བཅུག་ལས་ཧ་དེ་བའི་འདབ་མའི་ཁུ་བས་དངུལ་ཆུ་བཅིངས་པ་དང་། ཁྲག་དང་། ག་བུར་དང་ལྡན་པ་མིག་སྨན་དུ་བསྐུས་ན་ས་འོག་གི་
བུག་པ་མཐོང་བར་འགྱུར་རོ། །ནག་པོ་ཆེན་པོའི་འབྲས་བུ་དང་སྐུ་བ་ཁན་དེ་དང་། སེ་བའི་འབྲས་བུ་དང་སེ་འབྲུ་དང་འདི་རྣམས་བསྲེས་ནས་ཚ་བ་གསུམ་དང་སྦྲང་རྩི་དང་བཅས་ནས་བཙོས་ནས་ཏིལ་ནག་པོ་དང་། ལུས་རྣམ་པར་
དག་པར་བྱས་ནས་ཇི་ལྟར་གོམས་པ་ཡིས་མན་ཆ་ངེས་པར་བྱས་ནས་ཟོས་ན་ཉི་མ་ལྔ་ན་སའི་བུག་པ་མཐོང་བར་འགྱུར་རོ། །འབད་དེ་ལུས་ལ་བྱུགས་ན་གངས་ཏི་སེ་ལ་སོགས་པ་མཐར་ཐུག་པ་མཐོང་བར་འགྱུར་རོ། །ཅོང་ཟིའི་
ཆུས་ཁྲུས་བྱས་ན་སྔ་མ་བཞིན་དུ་ལེགས་པར་གནས་པར་འགྱུར་རོ། །ཙ་ལ་ཏའི་ཁུ་བ་དང་། བྱ་རྒོད་ཀྱི་ཤ་དང་། ཏིལ་ནག་པོའི་མར་རྣམས་སྦྱར་ནས། རབ་ཏུ་ཟོས་ན་ཉི་མ་ཉི་ཤུ་རྩ་གཅིག་ཏུ་ཕྱི་ནས་རང་གི་ཆུས་མིག་སྨན་

88-1-61b

བྱས་ན་ས་འོག་གི་གཏེར་ཐམས་ཅད་མཐོང་བར་འགྱུར་རོ། །ས་འོག་གི་སྦྲང་དང་། སྦྲུལ་དུག་མེད་ཀྱི་ཚིལ་དང་། འགི་ཝང་དང་ལྡན་པས་ཆ་མཉམ་པར་བྱ་སྟེ་ཅོང་ཟིའི་ཆུ་དང་བསྲེས་ཏེ་མིག་གཉིས་སུ་མིག་སྨན་བྱས་ན་ཁྲུ་ལྔ་ཙམ་
ན་ཡོད་པའི་ས་འོག་གི་གཏེར་རྣམས་དྲག་ཏུ་ངེས་པར་མཐོང་བར་འགྱུར་རོ། །པོ་རོ་ལཱིའི་ཁུ་བ་དང་། ཁྲག་དང་། འགི་ཝང་དང་། པགས་པ་འདུལ་བྱེད་ཀྱི་སྨན་དང་། དུར་ཁྲོད་ཀྱི་རས་ལེགས་པར་སྦངས་ཏེ་སྡོང་བུ་བྱས་ལ་རའི་
ཞག་དང་། བྲམ་ཟེའི་ཐོད་པ་རུ་མིག་སྨན་བྱས་ནས་དེའི་ཕྱི་ནས་མིག་ལ་བསྐུས་ན་དྲི་མ་དག་པར་འགྱུར་རོ། །ཡང་ན་རས་ཀྱིས་མིག་བཀབ་པས་ཀྱང་མཐོང་བར་འགྱུར་རོ། །རྒྱུ་སྐར་ས་རི་ལ་པད་མའི་སྐུད་པ་དང་། ཙན་དན་
ཡོངས་སུ་སྦྱངས་ནས་གླིང་དཀར་པོ་ལ་གུར་གུམ་དང་གླ་རྩི་བྱུགས་ལ་སྡོང་བུ་བྱས་ན། ལྕེ་སྤྱང་ཚིལ་བུ་དང་མིའི་ཐོད་པར་མིག་སྨན་བ་བླ་བསིལ་བའི་དུས་སུ་མིག་སྨན་བྱས་ན་ས་འོག་གི་བུག་པ་མཐོང་བར་འགྱུར་རོ། །ཕྱི་
ནས་མིག་གཉིས་བཀྲུ་བར་བྱའོ། །རས་དན་ཁ་དང་ལྕགས་གསུམ་ལ་བ་ལང་གི་ཚིལ་བུ་བཙོས་ནས་ཡང་ཚིལ་ཆེན་དུ་བཙོས་ནས་གཞན་ཡང་མ་ཧེའི་མར་དང་། ཕྱི་ནས་རི་ལུ་བུ་ཁར་བཅུག་ནས་ཉི་མ་གསུམ་དུ་སྨྱུང་བར་གནས་ཏེ། 
རང་གི་མཆིལ་མས་རང་གི་མིག་སྨན་བྱས་ན་ས་འོག་གི་བུག་པ་མཐོང་བར་འགྱུར་རོ། །དང་པོ་ལྟོ་དག་པར་བྱ་བ་ནི། ཉི་མ་གཅིག་ཟས་མི་ཟ་བར་བྱས་ལ་སའི་ལྕུག་མའི་མར་ཁུ་དང་། སྒོག་སྐྱ་བཙོས་ནས་རིལ་བུ་བཅུ་བཞིར་བྱས་
པ་ཉི་མ་དང་པོར་ཟོས་ནའོ། །ཉི་མ་གསུམ་པ་ལ་ཉི་ཤུ་རྩ་གཅིག་བཟའ་བར་བྱའོ། །ཉི་མ་བཞི་པ་ལ་སུམ་ཅུ་གསུམ་བ་བའི་བར་བྱའོ། །ཉི་མ་ལྔ་པ་ལ་སུམ་ཅུ་རྩ་ལྔ་བཟའ་བར་བྱའོ། །དྲུག་པ་དང་བདུན་པ་ལ་ཡང་སུམ་ཅུ་
རྩ་ལྔ་བཟའ་བར་བྱའོ། །ཉི་མ་རེ་རེ་འོ་མ་བཏུང་བར་བྱའོ། །ཉི་མ་བརྒྱད་པ་ལ་རའི་འོ་མ་བཏུང་བར་བྱའོ། །དང་པོ་དང་གཉིས་པ་ལ་མ་ཧེའི་འོ་མ་བཏུང་བར་བྱའོ། །ཉི་མ་གསུམ་པ་ལ་བ་སེར་སྐྱའི་འོ་མ་བཏུང་བར་བྱའོ། །བཞི་པ་ལ་

88-1-62a

སྣ་བུག་ནས་ཐུན་མོང་གི་འོ་མ་བཏུང་བར་བྱའོ། །ཐུན་ཚོད་ལྔ་པ་ལ་རང་གི་ཆུས་མིག་སྨན་བྱས་ན་ངེས་པར་ས་འོག་རིམ་པ་བདུན་གྱི་སའི་བུག་པ་མཐོང་བར་འགྱུར་རོ། །འབྲས་བུ་གསུམ་དང་། གུ་གུལ་དང་། བ་ལང་
གི་ཆུ་ཡིས་བཤལ་བྱས་ནས། ཡུངས་ཀར་གྱི་མར་དང་། སྦྲང་དང་བུ་རམ་དང་། ཚ་བ་གསུམ་དང་། སྒོག་སྐྱ་དང་། མར་དག་ཟོས་ནས་རའི་འོ་མ་འཐུངས་ན། ཇི་སྲིད་ཉི་མ་བདུན་གྱི་ཕ་རོལ་དུ་ཏིལ་ནག་པོའི་མར་དང་སའི་
ལྕུག་མ་བཙོས་ནས་ཟོས་ན་ལྕུག་མ་ལྔའི་ཚད་ཙམ་ལྷག་མ་ཉི་མ་བདུན་པ་ལ་ཏིལ་གྱི་མར་ཁུ་དང་། སོ་བའི་ཟན་ཟོས་ན་ཉི་མ་ཉི་ཤུ་རྩ་གཅིག་ན་ཉིན་མོ་དང་མཚན་མོ་ལ་ངེས་པར་ས་འོག་གི་བུག་པ་མཐོང་བར་འགྱུར་རོ། །ཚེས་
བརྒྱད་ལ་ཕྱག་བཞི་པའི་མགོན་པོ་ནག་པོའི་སྔགས་བཟླས་ན་སྟོང་ཕྲག་ལྔ་རུ་ཆང་དང་། ཤ་དང་། ཉ་དང་། ལྕགས་ཀྱུ་ལྔ་ལ་སོགས་པ་བཟའ་བར་བྱའོ། །ལྷ་མོའི་རྟེན་ལ་དེ་ནས་མིག་འབྲས་ལ་མིག་སྨན་བྱས་ནས་ས་སྟེངས་ན་
གནས་པའི་གནོད་སྦྱིན་ལ་སོགས་པ་རྣམས་མཐོང་བར་འགྱུར་རོ། །གལ་ཏེ་མ་གྲུབ་ན་སྦྱོར་བའི་མཆོག་འདིས་དེ་ནི་མཚམས་མེད་པ་ལྔའི་ལས་བྱས་པར་འགྱུར་རོ། །མ་བྱུང་བར་གྱུར་ན་ནག་པོ་ཆེན་པོ་ངའི་ཡང་དག་པའི་མིག་
སྨན་མ་ཡིན་ནོ། །ས་ལིན་ཙི་དང་། མ་ལིན་ཙི་དང་། ཀེ་ཤ་ར་ཛ། བྲིང་ག་རཱ་ཛ། བཅུ་གང་དང་། ཚ་བ་གསུམ་དང་། པ་ལ་ཤའི་ཤུན་པ་དང་། ཀ་མ་ཙི་དག་བཙོས་ནས་ཀུ་མུ་ཧའི་ཤ་དང་། ལན་བདུན་དུ་བཙོ་བའི་རིམ་པ་འདིས་
ཏིལ་ནག་པོའི་མར་ཁུ་དང་། ལྟོ་དག་པར་བྱས་ན་སུམ་མམ་གཉིས་ཉི་མ་དང་པོ་ལ་བཟའོ། །གཉིས་པ་ལ་སུམ་མམ་གསུམ་མོ། །གསུམ་པ་ལ་སུམ་མམ་ལྔའོ། །བཞི་པ་ལ་སུམ་ནམ་དྲུག་གོ། །ལྔ་པ་ལ་སུམ་ནམ་བརྒྱད་དོ། །
དྲུག་པ་ལ་སུམ་ནམ་བཅུའོ། །བདུན་པ་ལ་སུམ་ནམ་བཅྭ་ལྔའོ། །ངེས་པར་སྭ་བའི་ཁུ་བ་ཟོས་ནས་བརྟན་པར་བྱའོ། །གཞན་དུ་ན་ཉི་མ་བརྒྱད་པ་ལ་འགར་ད་མའི་སྦྲང་རྩིས་མིག་གཉིས་ལ་བསྐུས་ན་དེས་བུག་པ་ཐམས་ཅད་

88-1-62b

མཐོང་བར་འགྱུར་རོ། །སྣ་བུག་གཡོན་ནས་རའི་འོ་མ་འཐུངས་ནས་ཇི་སྲིད་ཉི་མ་ཉི་ཤུ་རྩ་གཅིག་ཏུ་འོ་མའི་བཏུང་བའོ། །འགི་ཝང་དང་སྦྲང་རྩིས་མིག་སྨན་བྱས་ནས་མིག་གཉིས་ལ་བསྐུས་ན། ས་གཞི་ལ་ཡོད་པའི་
གཏེར་ཐམས་ཅད་མཐོང་བར་འགྱུར་རོ། །ཁོ་ཌིའི་ས་བོན་དང་། ཛ་ཡན་ཏིའྀ་ས་བོན་དང་། པ་ལཀྵ་པ་དྲ་བའི་ཁུ་བ་དང་། སི་ཏི་ལིའི་ཁུ་བ་དང་། འགི་ཝང་དང་། རང་བྱུང་དང་། དྷ་དུ་རའི་ཁུ་བ་དང་། ཀླུ་འདུལ་བ་དང་། པ་ན་
རའི་ལོ་མ་དང་། རྩ་བའི་ཁུ་བ་དང་། སྨན་འགར་ད་མ་དུ་དང་། སྦྲུལ་དུག་མེད་ཀྱི་མཁྲིས་པ་དང་བཅས་པ་བཏགས་ནས་རིལ་བུ་བྱས་ཏེ་ཉི་མ་གཉིས་པར་གྱུར་པ་ལ་སྲོད་ཀྱི་དུས་སུ་མིག་སྨན་བྱས་ན་ས་འོག་གི་བུག་པ་མཐོང་བར་
འགྱུར་རོ། །གྷི་ལ་ཀའི་འབྲུ་གུ་དང་། འགར་ད་མ་དུ་ཡ་དང་། ཡང་དག་པར་ལྡན་པ་དང་། བ་སེར་སྐྱའི་མར་དང་། འགི་ཝང་དང་། ཁུ་བ་དང་ཁྲག་དང་མཉེས་ནས་ཕྱི་ནས་བསྨྱུང་བར་གནས་ནས་ལྟོགས་པའི་དུས་སུ་མིག་སྨན་བྱས་
ན་ས་འོག་གི་བུག་པ་མཐོང་བར་འགྱུར་རོ། །རིག་པར་བྱ་བ་ནི་བཅུ་བཞི་ལ་གྲོ་གའི་ལོ་མ་ལ་སྔགས་བྲིས་ནས་ཁར་བཅུག་ནས་སྔར་བཞིན་དུ་མིག་ལ་མིག་སྨན་བྱས་ན་ཉིན་མོ་སའི་གཏེར་ཐམས་ཅད་མཐོང་བར་འགྱུར་རོ། །ཇི་ལྟར་
རྗེས་སུ་གནས་པ་བཞིན་དུ་མིག་སྨན་གྱི་དངོས་གྲུབ་དེ་ཉིད་དེ་ལྟར་རིག་པས་དཔྱད་པར་བྱའོ། །རྣལ་འབྱོར་པས་ཇི་ལྟར་འདོད་པའི་བྱེ་བྲག་གིས་གོ་རིམ་བཞིན་བྱའོ། །འདིར་བྱེ་བྲག་ཏུ་བསམ་པ་ནི་ཇི་ལྟ་བས་རྣལ་འབྱོར་པས་རྟག་
ཏུ་ཐོབ་པར་བསྐྱེད་པར་བྱ་སྟེ། དེ་ནས་ནག་པོ་ཆེན་པོའི་འཁོར་ལོ་བསྒོམས་ནས་བགེགས་ཞི་བར་བྱ་བའི་དོན་དུ་དུར་ཁྲོད་དུ་གནས་ནས་ཉི་མ་ལྔར་བདུད་རྩི་ལྔ་ལ་ལོངས་སྤྱད་པར་བྱའོ། །གང་དང་གང་དུ་རྟག་ཏུ་གནས་པ་དེ་དང་དེར་
སྔོན་དུ་གནས་པ་བལྟ་བར་བྱའོ། །ས་སྦྱང་བ་ནི་གཏོར་མ་དང་མཛེས་པའི་སྟོན་མོ་དང་། ལྷ་བཤོས་སྔགས་ཀྱིས་བྱིན་གྱིས་བརླབས་ནས་ཕྱི་ནས་ངེས་པར་ས་བརྐོ་བར་བྱས་ན། དངོས་གྲུབ་གཞན་དུ་ངེས་པར་མི་འགྱུར་རོ། །ལྷ་

88-1-63a

མོས་གསོལ་པ། ཀྱཻ་བཅོམ་ལྡན་འདས་གང་དང་གང་དུ་རྟག་ཏུ་གནས་པ་དེའི་མཚན་ཉིད་ཇི་ལྟར་ལགས། གང་སེམས་ཅན་རྣམས་ཀྱི་སྡུག་བསྔལ་བ་བསལ་བ་གང་ལགས། བཅོམ་ལྡན་འདས་ཀྱིས་བཀའ་སྩལ་
པ། གང་དུ་གནས་པའི་མཚན་ཉིད་ནི་ཅི་བརྗོད་པའི་ངག་རུང་བ་དང་། མི་རུང་བའི་སྨན་རྣམས་ཇི་ལྟ་བར་འགྱུར་རོ། །དེ་བསྐྱང་བ་ལ་སོགས་པའི་རིག་པས་བཟའ་བ་དང་ཡོ་བྱད་དུ་ཇི་ལྟ་བར་འགྱུར་རོ། །ངེས་པར་ལེའུ་འདིའི་དངོས་གྲུབ་ཏུ་
གང་འགྱུར་བ་རྣལ་འབྱོར་པ་ཡོངས་སུ་ཚོལ་བཞིན་པས་ཉིན་པར་དང་ནུབ་མོ་མཐོང་བར་བྱ་བ་མེ་ཏོག་ཨུཏ་པ་ལ་ལ་སོགས་པ་ལྟར་རམ་གལ་ཏེ་དུ་བ་ལྟར་སེམས་ངེས་པར་བྱའོ། །ཁང་པ་སྟོང་པ་ན་བྱི་བའི་སྒྲ་ཐོས་ནས་གང་དང་གང་དུ་ངེས་
པར་གྱུར་པ་ན་དེ་ན་གཏེར་ཡོད་པར་འགྱུར་རོ། །ཡུལ་དབུས་སམ་ཐད་ཀ་ལ་ཆུ་འཛིན་པ་མཐོང་ན་གང་དང་གང་དུ་མེ་ཏོག་དོར་བ་དེ་བརྟན་པར་གྱུར་པ་དང་། དེ་ནས་གཏེར་འབྱུང་བར་འགྱུར་རོ། །ཕྱག་བཅུ་དྲུག་པའི་སྔགས་ཀྱི་འབེ་
ཏའི་ཤིང་ལ་ལན་བདུན་དུ་བསྔགས་ནས་གསོལ་བ་བཏབ་ན་དེར་ངེས་པར་རྨི་ལམ་མཐོང་བར་འགྱུར་རོ། །མགོའི་སྒྲུ་གང་ན་འདོན་པའི་ས་དེ་ན་གཏེར་ཡོད་པར་འགྱུར་རོ། །རྨ་བྱའི་སྒྲ་ཐོས་པའི་ས་གང་ན་གྲག་པ་དེའི་ས་ན་ནོར་བུ་
ཡོད་པར་འགྱུར་རོ། །འདིས་ནི་སེམས་ཅན་གྱི་དོན་ཡོངས་སུ་རྫོགས་པར་འགྱུར་རོ། །འདི་ནི་དཔལ་ནག་པོ་ཆེན་པོའི་རྒྱུད་ལས་ས་འོག་གི་བུག་པ་བརྟག་པའི་ལེའུ་སྟེ་བརྒྱད་པའོ།། །། དེ་ནས་རྣལ་འབྱོར་
པ་ཐམས་ཅད་ཀྱི་དོན་དུ་རི་ལུའི་ལེའུ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིལ་བུ་ནི་ལུས་དང་ངག་དང་ཡིད་གཅིག་ཏུ་བྱས་པའོ། །གུ་ཞེས་བྱ་བ་ནི་ལུས་ལ་བརྟེན་པའོ། །ཌི་ཞེས་བྱ་བ་ནི་ངག་གི་རང་བཞིན་ནོ། །
ཀ་ཞེས་བྱ་བ་ནི་སེམས་སོ། །གསུམ་གཅིག་ཏུ་བྱས་པ་ནི་རིལ་བུའོ། །དབང་པོ་གཉིས་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ནི་དུས་ཀྱི་མེ་ཡིས་རབ་ཏུ་འབར་བ་གསུམ་རོ་གཅིག་པ་ནི་རིལ་བུ་སྟེ། སེམས་ཅན་རྣམས་ཀྱི་བདེན་པ་

88-1-63b

ཕུན་སུམ་ཚོགས་པའི་རྒྱུའོ། །ལྷ་མོས་གསོལ་པ། ཀྱཻ་བཅོམ་ལྡན་འདས་སེམས་ཅན་རྣམས་ཀྱི་བདེ་བ་ཕུན་སུམ་ཚོགས་པའི་རྒྱུ་ཉེ་བར་བསྟན་པར་བྱ་བའི་དོན་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། ཟླ་བ་
གཟས་ཟིན་པའི་དུས་སུ་སྨན་ཏ་ཀ་རིའི་རྩ་བ་དང་། ཨུ་པ་ལམ་དྷི་ཀའི་རྩ་བ་དང་། དེའི་རྩ་བ་ཡོངས་སུ་བཟུང་ནས་བཞག་སྟེ། སྨིན་དྲུག་གི་ཟླ་བ་ལ་ཉི་མ་གཟས་ཟིན་པའི་དུས་སུ་ལྕགས་གསུམ་གྱིས་ལེགས་པར་ཡོངས་སུ་དཀྲིས་
ནས་ཁར་བཅུག་ན་རི་ལུའི་དངོས་གྲུབ་ཏུ་འགྱུར་རོ། །ཉིན་རེ་བཞིན་དུ་ཉི་མ་དང་པོ་ལ་བ་ཏིའི་རྩ་བ་དང་། གཉིས་པ་ཐོག་གིས་ལྷུང་བའི་ཤིང་དང་། གསུམ་པ་ལ་ནི་རེ་ཀེ་ལ་དང་། བཞི་པ་ལ་སེ་བའི་འབྲས་བུ་དང་། ལྔ་པ་ལ་བུད་
མེད་ཀྱི་ཁྲག་དང་། དྲུག་པ་ལ་དངོས་གྲུབ་མཆོག་གོ། །བཅོམ་ལྡན་འདས་ཀྱིས་རི་ལུའི་དམ་ཚིག་སྤྱད་པའོ། །གཞན་དུ་ནི་དངོས་གྲུབ་ཏུ་མི་འགྱུར་རོ། །རྒྱལ་གྱི་ཟླ་བའི་ནག་པོའི་ཕྱོགས་ཀྱི་བཅུ་བཞི་ལ། བི་ཌཱ་ལའི་རྩ་བ་དང་། 
ལཛྫ་ལུའི་མེ་ཏོག་རྣམས་གཅིག་ཏུ་བྱས་ནས་གོ་རིམས་བཞིན་དུ་ལུས་ལ་བྱུགས་ན་ཇི་ལྟར་རིགས་པར་རི་ལུའི་དངོས་གྲུབ་འགྲུབ་པར་འགྱུར་རོ། །ཛ་ལུའི་རྩ་བ་དང་། སྲོད་ཀྱི་དུས་སུ་རིལ་བུ་བྱས་ལ་དངུལ་ཆུ་དང་བསྲེས་ལ་
བྱུག་པ་བྱས་ན་མི་མཐོང་བར་འགྱུར་རོ། །ནག་པོའི་ཕྱོགས་ཀྱི་ཚེས་བརྒྱད་ལ་མི་གྲིར་ཤི་བའི་ཤ་དང་ཁྲག་བླངས་ནས་ཕྱག་དྲུག་པའི་མགོན་པོ་ནག་པོ་བསྒོམས་ལ། ཉི་མ་ཤར་བའི་དུས་སུ་བདུད་རྩིའི་རིལ་བུ་ཁར་བཅུག་ན་མི་
མཐོང་བར་འགྱུར་རོ། །གཟའ་མིག་དམར་ལ་སྨན་མ་ཧཱུ་ག་ག་ས་བོན་རང་གི་ཁུ་བ་དང་བསྲེས་ཏེ་ལྕགས་གསུམ་གྱི་ཕྱེ་མ་དང་བསྲེ་བ་བྱས་ནས། པཏ་ཏྲ་པི་ཤ་ཙིའི་ཁུ་བ་དང་ཡོངས་སུ་བསྲེ་བ་བྱས་པ་བྱི་བླའི་མཁྲིས་པ་དང་རིལ་བུ་བྱས་
ནས་ཉི་མ་བདུན་དུ་དུར་ཁྲོད་དུ་སྦས་ཏེ། མཚན་མོའི་དུས་སུ་བླངས་ནས་ཇི་ལྟར་བགེགས་མེད་པར་བྱ་བའི་ཕྱིར། ནག་པོ་ཆེན་པོ་ཕྱག་བཅུ་དྲུག་པའི་སྔགས་བཟླས་ལ་བསྲུང་བའི་དོན་དུ་ལན་བདུན་དུ་གཏོར་མ་སྦྱིན་པར་བྱའོ། །

88-1-64a

དེས་དེར་བགེགས་ཞི་བར་འགྱུར་ཏེ། འཕོངས་སུ་བཅུག་ན་ལམ་ནས་འགྲོ་ན་ཡང་མི་མཐོང་བར་འགྱུར་རོ། །ཙ་ཏྲས་ཀུ་ལ་མཉམ་པ་དང་དུར་ཁྲོད་ཀྱི་སོལ་བ་བླངས་ནས་རང་བྱུང་སྲེག་བླུགས་ལྔ་བརྒྱ་དབུལ་བར་བྱའོ། །ཨོཾ་
ཀ་རཱ་ལ་བི་ཀྃ་རཱ་ལ་མ་ཧཱ་ན་ད་ཧཱུྃ་གྲིཧྞ་ཀ་ཏཾ་གི་སྭཱ་ཧཱ། སྲེག་བླུགས་ཀྱི་སྔགས་སོ། །འདི་ནི་དངོས་གྲུབ་ཀྱི་སྔགས་ཏེ་དེའི་མིག་བཟུང་ནས་ཁར་བཅུག་ན་མི་སྣང་བར་འགྱུར་རོ། །འཛམ་བུའི་གླིང་ན་རྙེད་པར་དཀའ་བའི་དངོས་གྲུབ་འབྱོར་
པས་ངེས་པར་འགྲུབ་པར་འགྱུར་རོ། །སོ་མ་སྐྱེས་པའི་བྱིས་པའི་ལྕེ་བླངས་ལ་ཀ་ཉེ་ཇིའི་ནང་དུ་ཉི་མ་གཅིག་བཞག །ཉི་མ་གཉིས་པ་ལ་རའི་མར་ལ་བཞག །དེ་བཏོན་ནས་ཉི་མ་གསུམ་པ་ལ་རང་འབྱུང་གི་ནང་དུ་བཞག །
དེ་ནས་དེ་རིལ་བུ་བྱས་ནས་མར་ཁུ་ཆེན་པོ་དང་བཙོས་ནས་དེ་ནས་ཉི་མ་བདུན་དངུལ་ཆུའི་ནང་དུ་བཞག་པ་དང་། ཉི་མ་ལྔ་སྦྲང་རྩིའི་ནང་དུ་བཞག །རིགས་ངན་གྱི་ཐོད་པའི་ནང་དུ་ཉི་མ་གཅིག་བཞག་པ་དེ་བླངས་པ་དང་། བྱི་བླའི་ཁྲག་
བསྐུས་ནས་བསྐམས་པ་དང་། བྱ་བཟང་པོའི་ཤ་དང་ལྕེ་སྤྱང་གི་ཤ་རྣམས་མཉེས་ནས་རིལ་བུ་བྱས་པ་བཅས་ཏེ། ཁར་བཅུག་ན་མི་སྣང་བར་གྱུར་ཏོ། །ལྷ་མོ་འདི་ནི་ཤིན་ཏུ་ངོ་མཚར་རྣམས་སོ། །ཤི་ཀ་དང་ག་པུར་དང་། 
དེ་བཞིན་དུ་ན་ག་རཱ་དང་། མུ་རཱ་དང་། དྲི་མ་མེད་པ་དང་། ཧཱ་རཱ་དང་། སྨྱོ་བྱེད་ཀྱི་ལོ་མའི་ཁུ་བ་རྣམས་བཏགས་ནས་རིལ་བུ་བྱས་ན་རི་ལུའི་མཆོག་གོ། །གཞན་ཡང་བཅུ་དྲུག་ནམ་གཅིག་ཏུ་བཞུགས་པ་ནི་ཚིལ་ཆེན་དང་། 
འཛོ་ཏིས་མའི་མར་ཁུ་དྲུག་མ་བཞི་བྲམ་ཟེའི་ཐོད་པར་མཉེས་པ་དང་། གིང་ཧེ་ཀའི་མར་ཁུ་དང་། སོལ་བའི་ལོ་མའི་ཁུ་བ་ལུས་ལ་བྱུགས་ན་ངེས་པར་མི་མཐོང་བར་འགྱུར་རོ། །བལ་པོའི་ཟངས་ཀྱི་སྣོད་དུ་བའི་མར་བསྐོལ་བ་དང་
ཚིལ་ཆེན་བྲཧྨ་ཀཱ་པ་ལའི་ནང་དུ་གླིང་དཀར་པོ་ལ་སྡོང་བུ་བྱས་ནས་བླངས་པ་དང་ཛན་དུ་པི་ཤ་ཙིའི་ཁུ་བ་དང་། བསྲེས་པས་མིག་སྨན་དང་ཐིག་ལེ་བྱས་ན་ཡང་མི་མཐོང་བར་འགྱུར་རོ། །ཀྱཻ་བཅོམ་ལྡན་འདས་ཁྱོད་ཀྱིས་འཛམ་བུའི་གླིང་པའི་

88-1-64b

སེམས་ཅན་རྣམས་ཀྱི་དོན་དུ་གསུངས་པ། ངས་ཀྱང་རི་ལུ་ཅུང་ཞག་བཤད་པར་བྱའོ། །སྔགས་ཀྱི་ལེའུ་ཡིས་སྔགས་བརྗོད་པ་དེ་ནི་སྔགས་ལན་བདུན་བཟླས་པས་གསོལ་བ་བཏབ་ན་རི་ལུའི་དངོས་གྲུབ་མཆོག་ཏུ་འགྱུར་ཏེ། 
གཞན་དུ་ནི་མ་ཡིན་ནོ། །ཐམས་ཅད་དུ་ཡོངས་སུ་རྫོགས་པར་བྱས་ན་རབ་ཏུ་འགྲུབ་པར་འགྱུར་རོ། །སྣ་ཚོགས་ཡོངས་སུ་རྫོགས་པར་འགྲུབ་པར་འགྱུར་རོ། །དང་པོ་ནི་སུ་ད་རའི་འདབ་མ་ཕྱེ་མར་བྱས་ནས་སེ་ད་ཀ་ཎྜཱ་ཕྱེ་མ་དང་ལུག་
གི་གཅིན་དང་མི་ཤ་དང་ཆ་མཉམ་པོར་བྱས་ནས་རབ་ཏུ་བཏགས་ཏེ་རིལ་བུ་བྱས་ནས་མིད་ན་མི་མཐོང་བར་འགྱུར་རོ། །ཇི་ལྟར་མཐོང་བར་འདོད་ན་ཀ་ན་ཛི་འཐུངས་ན་དེ་ལྟར་མཐོང་བར་འགྱུར་རོ། །རྒྱུ་སྐར་ནག་པ་ལ་པ་ཊའི་རྩ་བ་བཏོན་
ནས་རྒྱུ་སྐར་བྲ་ཉེ་ལ་ཏ་ཀ་རའི་རྩ་བ་དང་། ཁྲུམས་སྟོད་ལ་ལུང་ཐང་གི་རྩ་བ་དང་། རྒྱུ་སྐར་མགོ་ལ་ཀུན་དའི་རྩ་བ་དང་། ཚེས་ལྔ་ལ་མཉམ་པོར་བྱས་ཏེ་བཏགས་ན་ནམ་མཁའི་ཆུ་དང་མཉེས་ནས་རིམ་གྱིས་རིལ་བུ་བྱས་ཏེ། ལྷ་མོའི་སྔགས་
བརྗོད་ན་མི་མཐོང་བར་འགྱུར་རོ། །རྟག་པར་བྱས་ཏེ་ཇི་སྲིད་དུ་འོ་མ་ནག་པོར་སོང་སོང་གི་བར་དུ་བཞག་ན་འགྲུབ་པར་འགྱུར་རོ། །འོ་མ་ནག་པོར་མི་འགྱུར་ན་རིགས་ལྔས་བསྒྲུབ་ཅིང་བྲམ་ཟེ་ལ་ཟན་དང་ཞོ་སྦྱིན་པ་དང་། མཁན་པ་ལ་ཆང་
བྱིན་ན་འགྲུབ་པར་འགྱུར་རོ། །ཤུ་དག་དང་། རུ་རྟ་དང་། པི་པི་ལིང་དང་། ལྷ་སྐྱ་དང་ཨ་རུ་ར་དང་། སྐྱུ་རུ་ར་དང་། ནིམ་པ་དང་། སོ་ཤིང་གི་རྩ་བ་དང་། ལུང་ཐང་རྣམས་ཆུ་བྱའི་ཤ་དང་། །མིའི་འབྲས་བུ་རྣམས་བཏག་ན་
ཀན་ཛི་ནའི་ནང་དུ་ཉི་མ་བདུན་དུ་རའི་མར་དང་སྟབས་གཅིག་བཞག་ན་མི་མཐོང་བར་འགྱུར་རོ། །ཇི་ལྟར་མཐོང་བར་འདོད་ན་ཀན་ཟི་མཐུངས་ན་དེ་ལྟར་མཐོང་། འགྱུར་རོ། །པད་མའི་ཟེ་འབྲུའི་རྡུལ་དང་། གྲོག་མཁར་དང་། 
ལང་ཀའི་སྟེང་གི་ས་རྣམས་གཅིག་ཏུ་བྱས་ཏེ་རིལ་བུ་བྱས་ནས་རྣམས་སྣང་གི་ལམ་དུ་བཅུག་ན་མི་སྣང་བར་འགྱུར་རོ། །དེ་གལ་ཏེ་མ་གྲུབ་ན་དེས་མཚམས་མེད་པ་ལྔའི་ལས་བྱས་པར་འགྱུར་རོ། །རང་གི་དབང་པོ་ལྔ་ཇི་ལྟར་འགྱུར་

88-1-65a

བ་རིགས་ལྔ་ལ་ཡང་དང་ཡང་དུ་གནས་པར་བྱའོ། །རིགས་ལྔ་བཟུང་ནས་ལྕགས་གསུམ་གྱིས་དཀྲིས་པ་དང་། དུར་ཁྲོད་དུ་ཕྱིན་ལ་ཕྱག་རྒྱ་མ་བཟུང་སྟེ་ཞལ་ནས་སྔགས་ཟློས་ཤིང་ནམ་མཁའ་ལ་སྒྲ་འབྱུང་བ་ཐོས་པ་དང་ཁྱིམ་དུ་ལོག་ནས་
མིག་སྨན་བྱས་ན་དེ་ནས་མི་མཐོང་བར་འགྱུར་རོ། །ནིམ་པ་རློན་པ་བཟུང་སྟེ་ལུས་ལ་བྱུགས་ནས་གཟའ་ཉི་མ་ལ་སུ་མ་ཀ་ཏ་ལག་པ་གཡོན་པས་ལུས་ལ་བྱུགས་ཏེ་ཚེས་བརྒྱད་ལ་མིའི་མར་ཁུས་ལུས་ལ་བྱུགས་ནས་རིམ་པ་ཇི་ལྟ་བ་
བཞིན་དུ་བྱས་ན་མི་སྣང་བར་འགྱུར་རོ། །གཟའ་མིག་དམར་ལ་སེམས་ཅན་དུ་མ་ནི་ཀ་བཟུང་སྟེ། གཟའ་ལག་པ་ལ་རིན་པོ་ཆེའི་རལ་གྲི་བཟུང་ནས་ཀླུ་ལྷག་མ་ཅན་གྱི་ལྕེ་བཅད་ནས་བཟུང་བ་དེ། དང་པོ་གསེར་གྱི་སྣོད་དུ་བཅུག་
ནས་ཕྱི་ནས་བཏོན་ཏེ། དེ་བཞིན་དུ་ཕྱི་རོལ་ནས་ཟངས་མ་དེ་བཞིན་དུ་ལྕགས་གསུམ་གྱིས་དཀྲིས་ནས་ཁར་བཅུག་ན་མི་མཐོང་བར་འགྱུར་རོ། །སྨན་འཛག་བྱེད་ཀྱི་རྩ་བ་ལ་གསོལ་བ་བཏབ་ནས་སྐུད་པས་བཅིངས་ཏེ་ཉི་མ་བཟང་པོ་
ལ་བླངས་ནས་སེན་དྷ་བ་དང་ཚིལ་ཆེན་དང་ལྷན་ཅིག་ཏུ་བཙོས་ཏེ་ཟོས་ན་མི་མཐོང་བར་འགྱུར་རོ། །ལྷ་མོའི་སྔགས་ལན་བདུན་སྨན་ཛ་ཡན་ཏིའི་ལོ་མ་ལ་བཟླས་ནས་ཀན་ཛིའི་ནང་དུ་ཉི་མ་གཅིག་བཅུག་ནས་བཏོན་ཏེ། ནིམ་པའི་
ཤིང་གི་ནང་དུ་སྦས་ནས། དེ་ཉིད་ལས་དེ་བཞིན་དུ་བླངས་ནས་བ་ཏ་པའི་ཤིང་དེ་ལ་དེ་བཞིན་དུ་གཞུག །ཕྱི་ནས་སྨལ་པོའི་ཟླ་བ་ནག་པོའི་ཕྱོགས་ཀྱི་བཅུ་གསུམ་ལ་བཏགས་ནས་ལུས་ལ་བྱུགས་ན་མི་མཐོང་བར་འགྱུར་རོ། 
ཇི་སྲིད་དུ་ལོ་གཅིག་ཏུ་ཡང་དེ་བཞིན་ནོ། །ལྷ་མོའི་རིལ་བུ་ཆེན་པོ་ནི་མེ་ཏོག་བདུན་གྱི་སུལ་དང་། ན་རི་ཀེ་ལའི་མེ་ཏོག་དང་། སྨན་ཀ་ཏ་ཀ་པ་ཏྲ་དང་། ས་མ་ཡ་གོ་ལ་དག་དང་། ནཱ་ག་པུཥྤ་དང་། པིན་ཏ་དྷ་ཀ་རའི་རྩ་བ་དང་། །ཏྲི་པུ་
ར་དང་། དྷ་དུ་རའི་རྩ་བ་དང་། འབྲས་བུ་གསུམ་རྣམས་ལ་རིལ་བུ་ཉི་ཤུ་རྩ་གཅིག་ལུང་ཐང་གི་ལྔ་ཆ་ཙམ་མོ། །པིན་ཏ་དྷ་ཀ་ར་དང་། རང་བྱུང་དང་། ད་བརྟ་ནཱ་ར་དང་། རིལ་བུ་ཉི་ཤུ་རྩ་གཅིག་དང་། ནག་པོ་ཆེན་པོའི་འབྲས་བུ་

88-1-65b

རིལ་བུ་ཉི་ཤུ་རྩ་གཅིག་དང་མཉམ་པའོ། །དེ་རྣམས་བཏགས་ནས་སྦྲང་རྩི་དང་རིལ་བུ་ལྔ་བྱས་ནས་དང་པོ་རིལ་བུ་གཅིག་ཁར་གཞུག །གཉིས་པ་རྣམ་པར་སྣང་མཛད་ཀྱི་ལམ་དུ། གསུམ་པ་དང་བཞི་པ་ལག་པ་གཡས་གཡོན་གཉིས་
རེ་རེའོ། །ལྔ་པ་ནི་དཔྲལ་བར་ཐིག་ལེ་བྱའོ། །ངེས་པར་མི་སྣང་བར་འགྱུར་རོ། །དེ་ནས་ཡང་གཟའ་མིག་དམར་ནག་པོ་ཕྱོགས་ཀྱི་བཅུ་གཉིས་ལ་སུ་ར་བི་ཙའི་རྩ་བ་བཟུང་ནས་ཚིལ་ཆེན་དང་བཙོས་ཏེ། དེ་ནས་མུ་རུ་མུ་རི་གའི་ཁུ་བ་དང་། 
སྨན་བྷ་གི་ནའི་ཁུ་བ་ལ་རིལ་བུ་བྱས་ཏེ། ལྷ་མོའི་སྔགས་བདུན་བཟླས་ཏེ་རིལ་བུ་བྱས་ནས་རྣམ་སྣང་དུ་བཅུག་ན་མི་སྣང་བར་འགྱུར་རོ། །ཉི་མ་བདུན་དུ་ལྷ་མོའི་སྔགས་བཟླས་ནས་སྔགས་པས་གྷོ་དྷ་ཟོས་ནས་ཆང་འཐུངས་ན་
ཐམས་ཅད་མཐོང་བར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་དངོས་གྲུབ་ཐམས་ཅད་ཀྱི་མཐུ་ཁྱོད་ཀྱིས་བརྗོད་པས་ཇི་ལྟ་བར་དེ་ཁོ་ན་ཉིད་སྟོན་པར་བྱེད་དོ། །དེའི་ཕྱིར་ནུས་པ་གང་དང་གང་བྱེད་པ་ཇི་ལྟ་བའི་
དངོས་གྲུབ་ཐམས་ཅད་ཀྱི་འཕྲུལ་པའོ། །ལྷ་མོས་གསོལ་པ། ཀྱེེ་བཅོམ་ལྡན་འདས་འཛམ་བུའི་གླིང་གི་སེམས་ཅན་རྣམས་ལ་ཕན་པ་དང་བདེ་བའི་དོན་དུ་ཇི་ལྟ་བ་བཞིན་དུ་བསྟན་དུ་གསོལ། འདི་ནི་དཔལ་ནག་པོ་ཆེན་པོའི་རྒྱུད་
ཀྱི་རྒྱལ་པོ་ལས་ལྷ་མོས་ཞུས་པ་དང་ལན་ལས་རིལ་བུའི་ལེའུ་སྟེ་དགུ་པའོ།། །། དེ་ནས་ཡང་དག་པར་བཤད་པར་བྱ་སྟེ། སེམས་ཀྱིས་བསམ་གྱིས་མི་ཁྱབ་པའི་རྐང་མགྱོགས་ཀྱི་མཚན་ཉིད་སྣ་ཚོགས་པ་
ཞེས་བྱ་བ་སྟེ། བཅོམ་ལྡན་འདས་ཀྱིས་བཀའ་སྩལ་པ། རྐང་མགྱོགས་ལ་ཕྱག་བཅུ་གཉིས་པའི་སྔགས་འབུམ་ཕྲག་ལྔ་བཟླས་ན་མཆོག་ཏུ་འགྲུབ་པའོ། །ཉི་མ་དང་པོའི་དུས་སུ། དངུལ་ཆུ་དང་། རང་འབྱུང་དང་། པ་ལ་ཤའི་རྩ་བའི་
ཁུ་བ་དང་། ཤ་དུ་རི་བཏགས་ནས་རྔ་མོའི་ཆུ་ཡིས་མདེ་གུ་བྱས་ཏེ། རྐང་པ་ལ་བྱུགས་ན་བར་སྣང་ལ་འགྲོ་བར་འགྱུར་རོ། །ཟླ་བའི་ཆུ་ཡིས་ཡོངས་སུ་བྱེད་པ་དང་ཡང་དག་པར་ལྡན་པས་དངོས་གྲུབ་བརྒྱད་པ་དང་མཉམ་པ་རི་ཀ་ན་བ་སུ་དང་

88-1-66a

ལྡན་པས། སྨན་དྷ་ན་ཆ་ལྔས་ལྷག་པ་རྐང་པ་ལ་བྱུགས་པ་ཙམ་གྱིས་ནམ་མཁའ་ལ་འགྲོ་བར་འགྱུར་རོ། །ཇི་ལྟར་གཟའ་ཡིས་ཟིན་པ་ན་དེ་ནས་དེ་ཉིད་དུ་འབུམ་ཕྲག་གཅིག་གི་ནང་ནས་གཅིག་བླངས་པ་ལ་སྔགས་
དེ་ཉིད་ཇི་སྙེད་གྲོལ་གྲོལ་གྱི་བར་དུ་བྱ། སྦྲང་རྩི་རྐང་པ་ལ་བྱུགས་ན་ངེས་པར་བར་སྣང་ལ་འགྲོ་བར་འགྱུར་རོ། །དམ་ཚིག་ཅན་གྱིས་བསྟེན་པ་ན་བཅོམ་ལྡན་འདས་ཀྱིས་དངོས་གྲུབ་མཉམ་པ་མེད་པ་བདག་ལ་སྩོལ་བའོ། །དེ་ནས་
ཡང་ཉི་མ་གཟས་ཟིན་པ་ལ་སེན་དྷ་བ་དང་། ལན་ཚྭ་དང་། གོ་ཊ་བྱས་པ་ཡོངས་སུ་བསྡུས་ནས་ཕྱག་བཅུ་དྲུག་པའི་སྔགས་ལན་བདུན་དུ་བཟླས་ནས་རྐང་པ་ལ་བྱུགས་ན་བར་སྣང་ལ་འགྲོ་བར་འགྱུར་རོ། །དང་པོའི་བུད་མེད་
ཀྱི་རྡུལ་དང་། སིཧླ་དང་། ཆུ་དྲོན་གཅིག་ཏུ་བྱས་ནས་སྔར་གསུངས་པའི་སྔགས་ཀྱིས། ཡིད་སྤྲོ་བས་སྦྱངས་པར་གྱུར་ན་དངོས་གྲུབ་ཏུ་འགྱུར་བ་ནི་མཚན་མོ་ཀུན་ལ་རིམ་པ་བཞིན་དུ་འཆག་པར་འགྱུར་རོ། །སྨན་པཎྜི་གོ་
ལ་ཀ་དང་། སྒ་དང་། ཨ་རུ་ར་དང་། བ་ལ་ཏ་ཀི་དང་མཉམ་པར་བསྲེས་ནས་རྐང་པ་གཉིས་ལ་བྱུགས་ན་བར་སྣང་ལ་འགྲོ་བར་འགྱུར་རོ། །གལ་ཏེ་མ་གྲུབ་ན་དེ་ཡིས་མཚམས་མེད་པ་ལྔའི་ལས་བྱས་པར་འགྱུར་བའོ། །ཇི་
ལྟར་མར་དང་དེ་བཞིན་ནོ། །མེ་ཏོག་ཉི་ཤུ་རྩ་ལྔའམ། ཀུན་དྷའི་མེ་ཏོག་དང་ཚིལ་ཆེན་བསྲེས་ནས་སྦྱིན་སྲེག་བྱ་བ་ནི། ཨོཾ་དྷ་མུ་དྷ་མུ་ཀྵ་མུ་ཀྵ་སྭཱ་ཧཱ། དེ་ནས་སྔགས་འདི་ཉིད་དང་། ཀླུ་འདུལ་བའི་མེ་ཏོག་དང་། མི་སྐམ་པའི་མེ་ཏོག་དང་། 
བ་སེར་སྐྱའི་ཞག་དང་། མིའི་ཞག་དང་མཉེས་ནས་རྐང་པ་ལ་བྱུགས་ན། དེ་ཡང་མེ་ཏོག་རེ་རེ་འམ་ཐམས་ཅད་ཀྱིས་བར་སྣང་ལ་འགྲོ་བར་འགྱུར་རོ། །ཨོཾ་མ་ཎི་དྷཱ་རི་ཎི། མ་ཧཱ་ཀཱ་ལི་ནི་ཁ་ཁ་ཁཱ་ཧི་ཁཱ་ཧི། ཧ་ན་ཧ་ན། 
གྷཱ་ཏ་ཡ་གྷཱ་ཏ་ཡ། ཙ་ལ་ཙ་ལ། ཧཱུྃ་ཧྲཱིཿཧྲཱིཿཧཿ སྔགས་འདི་ལན་བརྒྱ་བཟླས་པ་དང་ལྡན་པས། སྨན་ཤི་ལ་པ་ཏ་ཀ་རྐང་པ་ལ་བྱུགས་ན་བར་སྣང་ལ་འགྲོ་བར་འགྱུར་རོ། །ས་བླ་རུ་འགྲོ་བར་འདོད་པའི་མིས་

88-1-66b

སྨན་པ་ལི་ཀའི་རྩ་བ་དང་། བ་ལང་གི་ལྕེའི་རྩ་བ་དང་། སྨན་ཀུན་སུ་མ་དང་། ཨ་རུ་རའི་རྩ་བ་དང་། ཡུང་བ་དང་འདི་རྣམས་སུམ་འགྱུར་དུ་བྱས་ནས་གླང་པོ་ཆེའི་ཆང་དང་། ལྷན་ཅིག་རྡོ་ཀྱོང་སེར་པོར་རབ་ཏུ་མཉེས་ནས་སྦྲང་
དང་ལྷན་ཅིག་རྐང་པ་ལ་བྱུགས་ན་ངེས་པར་ས་བླ་ལ་འཕྱོ་བར་འགྱུར་རོ། །དེ་ནས་ལྷ་མོས་གསོལ་པ། སྦྱོར་བ་ལྔ་ཇི་ལྟར་འགྱུར་བ་རབ་ཏུ་བཤད་དུ་གསོལ། །ད་ནི་ཡང་དག་པར་རབ་ཏུ་སྦྱིན་པས་འགྲུབ་པ། དང་པོ་
ལ་སྨན་སེ་བྷའི་ཁུ་བ་བླངས་ནས། ཉི་མ་གཉིས་པ་དང་གསུམ་པ་ལ་བ་རུའི་ཆུ་དང་། བཞི་པ་ལ་ས་ཧོར་གྱི་འབྲས་བུ་ལྔ་དང་། ལྔ་པ་ལ་ཤིང་བ་ཏའི་འདབ་མ་རྣམས་ལ་རའི་ཆུས་བླུགས་ལ་ཉི་མ་ལྔ་བཞག་ལ་མ་ཧེའི་
འོ་མ་ལ་ཉི་མ་ལྔ་སྦང་། རྔ་མོའི་ཆུ་ལ་ཉི་མ་ལྔ་སྦང་། དེ་རྡོ་ཀྱོང་སེར་པོར་སི་སི་རི་དང་བཏགས་ཏེ། དངུལ་ཆུ་དང་གཉིས་སྦྱར་ནས་དེའི་རྗེས་ལ་མཆོད་སྦྱིན་གྱི་ཤིང་དང་ལྷན་ཅིག་ཏུ་རིལ་བུ་བྱས་ནས་ཉ་ཕྱིས་ཀྱི་ནང་དུ་
རང་གི་ཁུ་བ་དང་གཉིས་མཉེས་ནས་རྐང་པ་ལ་བྱུགས་ན་ངེས་པར་བར་སྣང་ལ་འགྲོ་བར་འགྱུར་རོ། །ཟླ་འཛིན་གྱི་ཆུ་དང་སྨན་ནཱ་ག་དྷ་མན་དང་། ཕ་ན་ཀི་ར་ཎའི་འདབ་མ་གཉིས་ཤི་ལ་པཏྟའི་ཁུ་བ་དང་། སུ་གན་དྷ་ཏི་
ཀ་ཏ་ཆེན་པོ་དང་། སྒྲ་སྙན་གྱི་སྨན་དང་། ཧྲི་རན་ནྱ་པ་རི་ག་དང་། སུ་ག་ཏྲ་མུ་ཏྲ་མུ་ཁི་འདི་རྣམས་ཐམས་ཅད་གཅིག་ཏུ་བསྡུས་ནས་ཡུངས་ཀར་གྱི་མར་ལ་སྦགས་ཏེ། ཡན་ལག་ཐམས་ཅད་ལ་བྱུགས་ན་ཐུན་ཚོད་གཅིག་
ལ་བར་སྣང་ལ་འགྲོ་བར་འགྱུར་རོ། །གལ་ཏེ་ཟླ་བ་གཟས་ཟིན་པའི་དུས་སུ་མ་གྲུབ་ན་རྒྱལ་གྱི་ཟླ་བའི་དཀར་པོ་ཕྱོགས་ཀྱི་ཚེས་ལྔ་ལ་བྱི་ལ་ནག་པོའི་མཁྲིས་པ་བླངས་ནས་དེའི་རྗེས་ལ་ཚེས་བདུན་ལ་རྨ་བྱའི་མཁྲིས་པ་དང་། 
ཟླ་བ་དང་། ལུག་གི་ཁྲག་དང་བཅས་པས་རྐང་པ་གཉིས་ཀྱི་མཐེ་བོང་ལ་བྱུགས་ན་ཐུན་གཅིག་གིས་བར་སྣང་ལ་འགྲོ་བར་འགྱུར་རོ། །གལ་ཏེ་མ་གྱུར་ན་བསྒོམ་དོན་དུ་གཉེར་བའི་སྐྱེས་བུས་དེ་ནས་ཆོས་ཐམས་ཅད་ཉམས་པར་

88-1-67a

བྱས་པའོ། །བདག་ཉིད་ཀྱིས་སྨྲས་པ་བསླུས་པའོ། །སྨན་སོ་ཀ་རའི་རྩ་བ་དང་། སྨན་ས་བ་ད་ལི་བླངས་ནས་བ་ལང་གི་ཤ་དང་བཏགས་ནས་རྐང་པ་ལ་བྱུགས་ན་དེ་ནས་སུ་ར་སི་ཡིས་བཀྲུས་ན་ངེས་པར་བར་སྣང་ལ་འགྲོ་བར་
འགྱུར་རོ། །སྨན་ན་མ་ས་དང་། དབུ་རྩ་བ་དང་། ས་ཤ་མ་རན་དང་། སུ་ཀ་ཏ་དང་། ཨེ་རན་ཏ་དང་། ས་ཐོ་ཏ་ཀ་རྣམས་ལྕགས་གསུམ་དང་། ཨིནྡ་རོ་དང་། དཔལ་འབྲས་ཀྱི་ས་བོན་དང་། བ་ཏ་བའི་ས་བོན་དང་། ནིམ་པའི་ས་བོན་དང་། 
ས་ཏ་ནིའི་རྩ་བ་དང་། ལོ་མ་དང་། དེ་རྣམས་གཅིག་ཏུ་བཏགས་ནས་རྐང་པ་ལ་བྱུགས་ན་བར་སྣང་ལ་འགྲོ་བར་འགྱུར་རོ། །གལ་ཏེ་མ་གྲུབ་ན་སྒྲུབ་པ་པོས་མཚམས་མེད་པ་ལྔའི་ལས་བྱས་པར་འགྱུར་རོ། །ཁྱོད་ཀྱིས་ཆོས་ཐམས་ཅད་
རྒྱུད་ལ་ཆགས་པ་ཉམས་པར་བྱས་པས་སོ། །དེའི་ཚེ་ང་ཡིས་རྫུན་སྨྲས་ཤིང་བསླུས་པར་གྱུར་པའོ། །དེ་ནས་ཡང་རིའི་རྩེ་ལ་རབ་ཏུ་གནས་ཏེ། ལྷ་མོའི་སྔགས་ལན་བདུན་བརྗོད་དོ། །ལྡོང་རོས་ཀྱི་ཕྱེ་མ་དང་། ཀེན་དུའི་ལོ་མ་དང་། 
ཛཱ་ཏིའི་ལོ་མ་དང་། ས་བོན་རབ་ཏུ་མཉེས་ཏེ་བཀྲུས་ནས་འདི་རྣམས་ཀྱིས་རྐང་པ་ལ་བྱུགས་ན་བར་སྣང་ལ་འགྲོ་བར་འགྱུར་རོ། །དེ་ནས་ཡང་རྩ་བ་བདུན་པའི་ཁུ་བ་དང་། ཟླ་བའི་ཆུའི་འགུ་ལི་ཀ་རྐང་པ་ལ་བྱུགས་ན་ངེས་པར་བར་
སྣང་ལ་འགྲོ་བར་འགྱུར་རོ། །གང་དེ་ཁོ་ན་ཉིད་ཤེས་པའི་མི་དེ་དང་དེའི་རྒྱུ་ཉེ་བར་མཚུངས་པ་ལ་དངོས་གྲུབ་སྣ་ཚོགས་མཆོག་ཏུ་སྟེར་བ་འདི་བྲིས་པའོ། །སྐྱེས་བུ་དེ་ཉིད་གླུ་སྣ་ཚོགས་ཀྱིས་རབ་ཏུ་བརྒྱན་པས་སོ། །འདི་ནི་དཔལ་ནག་
པོ་ཆེན་པོའི་རྒྱུད་ལས་རྐང་བྱུག་གི་ལེའུ་སྟེ་བཅུ་པའོ།། །། དེ་ནས་ཆོས་ཐམས་ཅད་ཀྱི་མཐུ་བཤད་པར་བྱ་སྟེ། ལྷ་མོས་གསོལ་པ། ཆོས་རྣམས་ཐམས་ཅད་ནི་ནམ་མཁའ་བཞིན་དེ་ཉིད་དེ་ལྟར་རྒྱ་
མཚོ་ལ་བྱའི་རྒྱལ་པོ་ངང་པ་སྤྱོད་པ་བཞིན་སྐྱེ་འམ། དངོས་གྲུབ་གང་གི་རང་བཞིན་རང་གི་ལྷའི་གཟུགས་ཀྱིས་གནས་པས་སམ། བཅོམ་ལྡན་འདས་ཀྱིས་བཀའ་སྩལ་པ། ཀྱཻ་ལྷ་མོ་གཞན་དུ་ན་སྐད་ཅིག་ཙམ་སེམས་ཡོད་པ་

88-1-67b

དང་། སེམས་མེད་པར་གནས་པས་དངོས་གྲུབ་དཀར་པོ་འདོད་པ་རྣམས་ལ། འོད་ཟེར་དཀར་པོ་དང་ལྡན་པས་དྲི་མ་མེད་པའི་དངོས་གྲུབ་འདོད་པ་སྟེར་བས་ཉི་མ་དང་པོ་ལ་གོམས་ཤིང་གོམས་པའི་དུས་སུ་ཡང་དང་ཡང་དུ་གནས་པས་
བརྟན་པར་བྱ་སྟེ། ཇི་ལྟར་བདེ་བའི་དོན་དུའོ། །ལྷ་མོས་གསོལ་པ། ཀྱཻ་བཅོམ་ལྡན་འདས་སྐད་ཅིག་གིས་སེམས་ཡོད་པར་ཡོངས་སུ་འཁྲུལ་པའི་མི་ཡིས་དེ་ལྟར་རིགས་ལྔ་ལ་སོགས་པ་ལ་སྤྱད་པས་འགྲུབ་པར་ཇི་ལྟར་རིགས། 
ཁམས་རྣམས་བསྲུང་བ་ནི་སྔགས་གཅིག་གིས་ཇི་ལྟར་རིགས། འདིས་ནི་དངོས་གྲུབ་ཆེན་པོ་མཐར་ཐུག་པ་དངོས་གྲུབ་ཀྱི་འབྲས་བུ་ཡོངས་སུ་འགྲུབ་པར་འགྱུར་རམ། བཅོམ་ལྡན་འདས་ཀྱིས་བཀའ་སྩལ་པ། ཀྱཻ་ལྷ་མོ་གང་
ཁྱོད་ཀྱིས་སྨྲས་པ་ལ་དགོས་པ་ཅི་ཡོད། དངོས་གྲུབ་ཐམས་ཅད་ངེས་པར་གྱུར་པ་སྒོམ་པ་ཆེན་པོ་གོམས་པ་ནི་རྐང་མགྱོགས་སོ། །སྦྱོར་བ་ཆེན་པོ་འདུས་པ་ནི་རིལ་བུའོ། །དམ་ཚིག་གི་ཆོས་ཀྱི་མཚན་ཉིད་ནི་མིག་སྨན་ནོ། །
མཆོག་གི་གནས་ཡང་དག་སྦྱོར་བ་ནི་རལ་གྲིའོ། །ཇི་སྲིད་རྟོག་པ་མེད་པའི་བར་དང་ཡོད་པར་སྨྲ་བ་མཆོག་ཏུ་ཞི་བ་མ་ཡིན་ཏེ་དེས་ན་འཁྲུལ་པའོ། །དྲི་མ་མེད་པའི་སྔགས་ཀྱིས་ངེས་པར་དངོས་གྲུབ་ཏུ་འགྱུར་རོ། །མཆོག་ཏུ་དགའ་བའི་
གོ་འཕང་བཅུད་ཀྱི་དངོས་གྲུབ་མིས་དོན་དུ་གཉེར་བས་ལྷག་མ་མཁའ་སྤྱོད་དང་ས་སྤྱོད་ལ་སོགས་པར་ཡང་འགྱུར་བས་སོ། །ཚེ་རིང་པོའང་རབ་ཏུ་འགྲུབ་པའོ། །ལེའུ་འདིའི་སྒོམ་པ་དོན་དུ་གཉེར་བས་རྒྱལ་པོར་འགྱུར་རོ། །རྩ་
རྣམས་ཐམས་ཅད་ཀྱི་ནང་ནས་ནི་རྒྱལ་པོ་ཨ་བ་དྷུ་ཏིའི་རྩའོ། །ལྷ་མོས་གསོལ་པ། ཀྱཻ་བཅོམ་ལྡན་འདས་ཐམས་ཅད་ཟོས་ནས་དེ་ཁོ་ན་ཉིད་ཀྱི་རྗེས་སུ་འབྲངས་ནས་ཉེ་བར་དམིགས་པས་ཇི་ལྟར་དངོས་གྲུབ་འཐོབ། བཅོམ་ལྡན་འདས་
ཀྱིས་བཀའ་སྩལ་པ། ལྷ་མོ་གཉིས་ཀ་ལ་མཉམ་པར་འདུས་པ་ལས་ཇི་ལྟ་བའི་བདེ་བ་ཐོབ་པའི་རྒྱུ་ཉེ་བར་བསྟན་པར་བྱའོ། །དབང་པོ་གཉིས་མཉམ་པར་སྦྱོར་བའི་ཀུན་དུ་རུ་ལས་ཀུན་དུ་རུ་མཚོན་པ་ལས་གཞན་དུ་ནི་མ་ཡིན་ནོ། །

88-1-68a

གང་གི་སེམས་མཉམ་པར་བཞག་པ་ལས་དེ་ལ་བདེ་བ་སྟེར་བར་འགྱུར་རོ། །ཕྱག་བཅུ་དྲུག་པ་ལ་གོམས་པས་དབང་བསྐུར་བ་མཚོན་པའི་རྣལ་འབྱོར་པ་དེས་རྒྱུད་ཀྱི་རྒྱལ་པོ་བྲི་བར་བྱ་བ་དང་། རིགས་ལྔ་ལ་
ཆགས་པ་དང་ལྡན་པས་སོ། །ཇི་ལྟར་བརྗོད་པ་རྣམས་ལ་ཐེ་ཚོམ་བྱས་ན་མགོ་ཨརྫ་ཀའི་དོག་པ་བཞིན་འགྱེས་པ་འབྱུང་བ་དང་། ནད་མང་བ་དང་། ཚེ་ཐུང་བ་དང་། མི་མཐོང་བར་འགྱུར་རོ། །འདི་ནི་ནག་པོ་ཆེན་པོའི་རྒྱུད་
ཀྱི་རྒྱལ་པོ་ལས་ལྷ་མོ་མཐུ་ཡིས་བརྒྱན་པའི་ལེའུ་སྟེ་བཅུ་གཅིག་པའོ།། །།  དེ་ནས་ཡང་འདི་ཉིད་དུ་མིག་སྨན་གྱི་ལེའུ་བཤད་པར་བྱ་སྟེ། མིག་སྨན་ནི་རྡོ་རྗེ་དང་པད་མ་མཉམ་པར་སྦྱོར་བ་ལས་རོ་གཅིག་
པར་བརྗོད་པའོ། །ཕྱི་རོལ་གྱི་མིག་སྨན་ནི་མཁའ་སྤྱོད་ཀྱི་བྱ་རྒོད་བཞིན་ནོ། །ནག་པོའི་བརྒྱད་ལ་བྱི་བའི་རུས་པ་ཡང་དག་པར་བཟུང་ནས། མ་ལི་ཀའི་སྣོད་དུ་གཟའ་ཉི་མ་ལ་ཨ་ས་མི་ནི་བྱས་ནས་དར་ལིང་ལ་སྡོང་བུ་
བྱས་ཏེ། དེའི་རྗེས་སུ་ཁྱིའི་ཞག་དང་། བྲམ་ཟེའི་ཐོད་པར་མིག་སྨན་ཕབ་ནས་མིག་གཉིས་ལ་བསྐུས་ན་ཕོ་རོག་གི་མིག་བཞིན་ནམ་མཁའ་ལ་རྒྱུ་བའོ། །དེ་ནས་ཡང་ལྕགས་ཀྱུ་མཆོག་གིས་རིལ་བུ་གཉིས་བྱས་ཏེ། 
རབ་ཏུ་བཟུང་ནས་གཟའ་མིག་དམར་ལ་ཟོས་ནས་གླང་ནག་པོ་བཟུང་ནས་གང་བཞག་པ་དེ་ལ་ཇི་སྲིད་དུ་བསྣུན་ནས། གླང་སྐད་ཕྱུང་བ་དང་། དེ་ནས་བདག་ཉིད་ཞོན་ནས་བཟའ་བ་ཟོས་ན་ཡང་ཐོ་རངས་ཀྱི་དུས་སུ་ཕྱག་
བཅུ་དྲུག་པའི་སྔགས་ལན་བདུན་བཟླས་ནས་མིག་ལ་བྱུགས་ན་གླང་ལས་རྣམ་པར་གྲོལ་ནས་ངེས་པར་ནམ་མཁའ་ལ་འགྲོ་བར་འགྱུར་རོ། །རིགས་ལ་ཡང་དག་པར་གནས་པ། ནག་པོའི་ཕྱོགས་ཀྱི་བཅུ་བཞི་
ལ་རིམ་པས་དྲི་བུ་གན་དྷ། ནཱ་ག་ར་ག་ཏ་དང་། གུར་གུམ་དང་། གླ་རྩི་དང་། ཙན་དན་དང་། ཙམ་བུ་ལི་ཀ་དང་། ཤིཧླ་ཀའི་བར་ཐམས་ཅད་རྡོ་གཏུན་གྱི་སྟེང་དུ་མཉེས་ནས་རིལ་བུ་བྱས་ཏེ་སྦྲང་རྩི་དང་

88-1-68b

བཅས་པས་མིག་སྨན་བྱས་ན་སྤྲིན་བཞིན་དུ་ཐམས་ཅད་དུ་འཁོར་བར་འགྱུར་རོ། །དེ་ནས་ཡང་དག་པར་བཤད་པར་བྱ་སྟེ། རྣལ་འབྱོར་པའི་སྙིང་ག་དང་མགྲིན་པའི་རྣལ་འབྱོར་པའི་ངོ་མཚར་བ་ནག་པོ་ཆེན་པོ་ལ་
གུས་པ་གང་རྣལ་འབྱོར་པ་སྣ་རིང་བར་ངེས་པ་དེ་མིག་སྨན་ནོ། །ཐ་མ་དང་འབྲིང་གི་སེམས་ཅན་འདི་ནི་དེའི་དངོས་གྲུབ་མཆོག་ཏུ་འགྱུར་རོ། །ལྷ་མོས་གསོལ་པ། སྨན་ཤ་བ་རིའི་རྩ་བ་དང་སྦྲང་བུ་བཏགས་ཏེ་
སྦྱར་ནས་མིག་གཉིས་ལ་བསྐུས་ན་དངོས་གྲུབ་གྲུབ་པར་འགྱུར་བ་ནི་སྤྲིན་བཞིན་དུ་ནམ་མཁའ་ལ་འཕྱོ་ཞིང་ཇི་ལྟ་བ་བཞིན་བསྐྱོད་པར་འགྱུར་རོ། །དེ་ནས་གཟའ་པ་བ་སངས་ལ་སྨྱོ་བྱེད་ཀྱི་རྩ་བ་བླངས་ལ་གཟའ་
སྤེན་པ་ལ་སྨན་ཉི་དགའ་བླངས་པ་དང་། གཟའ་ཉི་མ་ལ་ཛ་ཡན་ཏིའི་རྩ་བ་བླངས་པ་དང་། གཟའ་ཟླ་བ་ལ་བྱི་ལ་ནག་པོའི་མཁྲིས་པ་བླངས་པ་རྡོ་ཀྱོང་སེར་པོ་རུ་སྦྲང་དང་ལྷན་ཅིག་ཏུ་རབ་ཏུ་མཉེས་ལ་མིག་གི་
མིག་སྨན་དུ་འགྱུར་བ་ནི་སྤྲིན་བཞིན་དུ་འཁོར་བར་འགྱུར་རོ། །རྡོ་ཁ་དོག་གཅིག་པའི་སྟེང་དུ་ཛ་ཡ་རའི་འབྲས་བུའི་ནང་བཅུད་དང་སྨན་ཉི་འཁོར་དང་། དཔལ་འབྲས་ཀྱི་མེ་ཏོག་དང་། ལྕམ་པ་དང་། ཅོད་པན་ཅན་གྱི་མཁྲིས་པ་
དང་། སྦྲང་རྩི་རྣམས་རབ་ཏུ་མཉེས་པའི་མིག་སྨན་མིག་གཉིས་ལ་བྱས་ན་མི་བྱ་རྒོད་བཞིན་དུ་ལྡིང་བར་འགྱུར་རོ། །དེ་ཡང་ལྷ་མོ་རྐང་མགྱོགས་ཀྱི་དངོས་གྲུབ་བཞིན་ནོ། །འདི་ལྟར་ཡང་འདི་ནི་དངོས་གྲུབ་སླ་བའོ། །འདི་ནི་
ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་མིག་སྨན་གྱི་ལེའུ་སྟེ་བཅུ་གཉིས་པའོ།། །། དེ་ནས་ཡང་བཅོམ་ལྡན་འདས་ཀྱིས་གསུངས་པ། འཛམ་བུའི་གླིང་པ་ཇི་ལྟར་མཆོག་ཏུ་བདེ་བ་གང་འདོད་པ་ལ་
བཅུད་ཀྱི་ལེན་རབ་ཏུ་བཤད་པར་བྱའོ། །གང་གིས་སེམས་ཅན་རྣམས་གྲོལ་བར་འགྱུར་བ། བཅུད་ཀྱི་ནུས་པ་ཆེན་པོ་གསོལ་བའི་བཅུད་བསྟེན་པར་བྱ་སྟེ། སྦས་པ་རྣམས་རབ་ཏུ་གསལ་བའི་སྐད། དགོངས་པའི་སྐད་དང་། 

88-1-69a

སྐད་ངན་པ་དང་། བརྡ་ཡིས་སོ། །མཆོག་ཏུ་དགའ་བའི་དགའ་བ་ཆེན་པོ་ཕུན་སུམ་ཚོགས་པ་ཞེས་བྱའོ། །བཅུད་ཀྱི་རིག་པ་ཤེས་པའི་རྣལ་འབྱོར་པས་དེའི་ཡང་མཆོག་ཏུ་དཔག་ཏུ་མེད་པའི་སྟོབས་
བསྐྱེད་པར་འགྱུར་རོ། །བཅུད་བསྡུས་པ་ཕུན་སུམ་ཚོགས་པའི་དུས་སུ་བཅུད་སྒོང་བར་ནུས་སོ། །ར་ས་ཞེས་པའི་ཡི་གེ་གཉིས་ནི་གཉིས་ལ་ཟུང་དུ་འཇུག་པའི་རིམ་པས་བླང་ངོ་། །དང་པོར་བཅུད་རབ་ཏུ་བླུགས་པ་ནི་རའི་
འོ་མར་གནུར་རོ། །དྷ་དུ་རའི་འདབ་མའི་ཁུ་བ་དང་། སེན་ད་བ་དང་། ལན་ཚྭ་དང་། བ་ལང་གི་ལྕི་བའི་ཁུ་བ་རྣམས་ཀྱིས་དེ་བཞིན་བྱས་ལ་ཀརྨ་ར་གའི་ཁུ་བ་བླུགས་ལ་ཉི་མ་ལ་ཐུན་ཚོད་གསུམ་དུ་བཞག་སྟེ། དེ་ནས་ནམ་
མཁའི་ཆུ་དང་། ཅོང་ཟིའི་ཆུས་བཀྲུས་ནས། མིའི་ཁྲག་དང་ཀ་རུ་ཎའི་ཁུ་བ་བླུགས་ལ། དེ་ནས་གསེར་གྱི་ཕྱེ་མ་མན་ཆ་གཅིག་དང་། དངུལ་ཆུ་མན་ཆ་ཉི་ཤུ་རྩ་བཞི་དང་། ཟླ་བ་གཅིག་ཏུ་སིམ་པའི་འདབ་མའི་ཁུ་བ་དང་
སྟབས་གཅིག་ཏུ་བཞག་ནས་མཉེས་ཏེ་དེ་བཞིན་དུ་བཀྲུས་ནས་དེའི་རྗེས་ལ་སྡེ་ཚན་གཉིས་ཀྱི་དབུ་མའི་ཡི་གེ་ཞེས་བྱ་བ་ནི་མིང་གི་ཡི་གེ་དང་པོར་བཞག་པའོ། །མཐའ་ཞེས་བྱ་བ་རབ་ཏུ་བསྟན་པ་ནི་སྡེ་ཚན་བཞི་པའི་དང་པོ་དང་། 
དབྱངས་ཡིག་བཞི་པས་བརྒྱན་པ་དབུ་མར་རབ་ཏུ་བསྟན་པ་ནི་སྡེ་ཚན་དྲུག་པའི་ཡི་གེ་དང་པོ་དང་། འདིའི་ཡང་མཐའ་སྡེ་ཚན་བཞི་པའི་མཐའ་མའི་ཡི་གེའོ། །ཨས་སྔར་གྱི་ཡི་གེ་གཉིས་བརྒྱན་པ། དེའི་མིང་ནི་ཤིང་ཛ་ཡན་
ཏཱི་ཞེས་བྱ་བར་རབ་ཏུ་གྲགས་པའོ། །དེའི་ལོ་མའི་ཁུ་བ་མེ་མདག་ལ་བསྲོས་ནས་མཁས་པས་ལྷང་ཚེར་བ་དཀར་པོའི་ཕྱེ་མ་མན་ཆ་གསུམ་དང་སྲང་གཅིག་དང་ངེས་པར་བྱས་ནས་བཞི་འགྱུར་དུ་བསྲེ་བར་བྱའོ། །རྣལ་འབྱོར་
མཁས་པས་ཟླ་བ་གཅིག་ཏུ་བཙོ་ཞིང་ཉི་མ་རེ་རེ་བལྟ་བར་བྱའོ། །ལྷང་ཚེར་ཟངས་སུ་བླུགས་པར་བྱའོ། །གལ་ཏེ་གསེར་དུ་གྱུར་པ་ན་ངེས་པར་ཉི་མ་ཉི་ཤུ་རྩ་གཅིག་ཏུ་མི་ཡིས་བཟའ་བར་བྱའོ། །ཟ་བའི་དུས་སུ་ལོ་མ་དང་། 

88-1-69b

སྐྱུར་པོ་དང་། བུད་མེད་དང་། ཉི་མ་རྣམས་བསྲུངས་ན་ཟས་གང་དུ་འདོད་པ་དེར་འགྲོ་བར་འགྱུར་རོ། །གཉེར་མ་དང་སྐྲ་དཀར་དག་ནས་ཚེ་ལོ་སྟོང་ཕྲག་དུ་འཚོའོ། །ངན་པ་ཐམས་ཅད་སྤོང་བར་འགྱུར་རོ། །གཟུགས་དང་ལྡན་
པར་འགྱུར་བ་དང་། ཤིན་ཏུ་བློ་རྣོ་བར་འགྱུར་རོ། །ཞ་ཉེར་བླུགས་ན་དངུལ་དུ་འགྱུར་ཏེ་གོང་མ་ལྟར་རོ། །དེའི་དུས་ཀྱི་གཏོར་མའི་སྔགས་བརྗོད་པ། ཨོཾ་བ་ལི་མ་ཎི་རཾ་ཧཱུྃ་ཛཿརཀྵ་ཎི་རཀྵ་མི་ཀྵ་མི་ཁ་ཁ། གྲྀཧྞ་གྲྀཧྞ་བ་ལི། 
མ་ཧཱ་བྷཱི་ཥ་ཎཾ། པྲ་སཱ་དྷ་ཡ་པྲ་སཱ་དྷ་ཡ། ཧུ་ལུ་ཧུ་ལུ་ཕཊ་སྭཱ་ཧཱ། སྲན་མ་ཛམ་བུ་ཌི་དང་། མིའི་ཤ་དང་། ཆང་དང་། དྲི་དང་། བདུག་པ་དང་། ཕྲེང་བ་དང་། མར་མེ་དང་། ཕྱེ་མ་དང་། གདུགས་དང་། དྲིལ་བུ་དང་། བ་
དན་ལ་སོགས་པ། ཁྲག་དང་འབྲས་ས་ལུ་དང་། ཉི་མ་རེ་རེ་ལ་ཕོགས་གསུམ་གསུམ་དུ་གཏོར་མ་ཆེན་པོ་ཇི་སྲིད་དུ་ཉི་མ་བདུན་དུ་བརྩམ་པར་བྱའོ། །བཅུད་ཀྱི་ལས་དེའི་དུས་སུ་ཕྱག་བཅུ་དྲུག་པའི་སྔགས་བཟླས་པར་
བྱའོ། །རིང་པོ་མ་ལོན་པར་ཐེ་ཚོམ་མེད་པར་འགྲུབ་པར་འགྱུར་རོ། །དེ་ནས་ཡང་བཅུད་བླངས་ནས་གནུར་བར་བྱ་སྟེ་ཚི་མི་ལིའི་ལོ་མའི་ཁུ་བ་དང་། ཡང་བ་ཀི་ཏའི་ལོ་མའི་ཁུ་བས་སོ། །དེ་ནས་ཡང་སྨན་ཨ་ལམ་བུ་
བླུགས་ལ་དེ་ཉིད་རིམ་པ་འདིས་སྦྲུལ་གྱི་ལྕེ་དང་། གོ་ར་ཀྵཾ་དུ་ལའི་འདབ་མ་དང་། སྨན་ཉི་འཁོར་དང་གཅིག་ཏུ་བྱས་ནས་ལྷང་ཚེར་བ་ནག་པོ་དང་། འདི་ཐམས་ཅད་བཏགས་ལ་སྟེང་འོག་གི་རིམ་པས་ཀོང་བུ་ལེགས་
པར་གཡོགས་ལ་ཐབ་ཁུང་གླང་པོ་ཆེའི་ལག་པ་ལྟ་བུ་རུ་བཅུག་ལ་སྣོད་དུ་སྲ་བར་གྱུར་པ་དང་། ཞ་ཉེ་དཀར་པོ་སྲང་རེ་རེ་སྲ་བར་གྱུར་པ་མན་ཆ་རེ་རེ་ལ་བླུགས་ན་དངུལ་དུ་གྱུར་པས་ན་འདི་ཐམས་ཅད་མཁས་པས་
བཟའ་བར་བྱའོ། །བཅུད་བཟུང་ནས་བྱི་ལའི་མཁྲིས་པ་དང་སྦྱར་ནས་ཆུ་ཤིང་གི་ཁུ་བས་བཀྲུས་པ་དང་། བཙག་དམར་པོའི་ཕྱེ་མ་དང་། ཆུ་ཤིང་དང་། ས་རྩི་ཀའི་ཚ་དང་། རོ་བསྲེགས་པའི་ཤུལ་གྱི་འདག་པ་དང་། 

88-1-70a

དེ་རྣམས་ཡོངས་སུ་མཉེས་ནས། དེ་ཡང་ལྕེ་སྤྱང་གི་ཞག་དང་། དེ་ནས་ཡང་སེ་འབྲས་ཀྱི་ཁུ་བས་ཕྱིས་བཀྲུས་ནས་དེའི་རྗེས་ལ་སྨན་སི་སི་རི་དང་། ཀཉྫིའི་ནང་དུ་བཞག་ནས་ཉི་མ་རིང་བའི་དུས་སུ་ཐུན་དྲུག་
ཏུ་བཞག་ནས་དེ་ནས་ཕྱུང་སྟེ་ཆུ་དྲོན་མོས་བཀྲུས་ནས་ཛམ་བྷི་རའི་ཁུ་བའི་ནང་དུ་ཉི་མ་གཉིས་བཞག་ནས་དེ་ནས་ཚིལ་ཆེན་དང་། དེའི་རྗེས་ལ་ནམ་མཁའི་ཅོང་ཟིའི་ཆུས་རབ་ཏུ་བཀྲུས་ནས་ཉི་མ་རིང་བའི་དུས་སུ་ཐུན་གཅིག་
བཞག་ན། འདིས་ཀྱང་ལེགས་པར་བྱས་པ་ཤེས་སོ། །ད་ནི་ཞུགས་ཤིང་གི་འདུ་བྱེད་ཅེས་བྱ་སྟེ་དཀར་པོ་དང་ནག་པོའི་གསེབ་ནས་འདབ་མ་གཅིག་པར་བྱས་ཏེ། ཀཉྫི་ཀ་དང་། མ་ཧི་ཥའི་ཞོ་དང་། རའི་འོ་མ་དང་། སྟབས་
གཅིག་ཏུ་ཉི་མ་གཅིག་ཏུ་བཞག་ནས། དེ་ནས་དེའི་ལྕི་བའི་ཁུ་བ་དང་། གླང་པོ་ཆེའི་སྦངས་ཀྱི་ཁུ་བ་དང་། ཀ྅ཛི་རྣམས་ཀྱི་ནང་དུ་བཅུག་ནས་དེ་ཕྱུང་སྟེ་ཉ་རོ་ཧི་ཏའི་མཁྲིས་པ་དང་། ཁྱིའི་མཁྲིས་པ་དང་། ཉིན་ཞག་ལྔ་
རབ་ཏུ་མཉེས་ནས་བསྐམས་པ་ལ་ཀ་རཱོ་ཉྫ་ན་བླུགས་ཏེ་ཉིན་ཞག་གཅིག་བསྐམས་པ་འདི་ནི་མཁས་པ་ལྷང་ཚེར་བ་སྦྱངས་པར་བྱས་ཏེ། རྒྱུད་འདིར་གང་སྨྲས་པ་འདི་འགྲུབ་པར་འགྱུར་རོ། །འདུ་བྱེད་གཉིས་ཀྱི་རིག་པ་
ལེགས་པར་སྦྱངས་པས་ཐམས་ཅད་ཉེ་བར་འབྱོར་པ་ཡིས་དངུལ་སྲང་གཅིག་དང་། ཞ་ཉེ་སྲང་བཞི་ཕྱེ་མར་བྱས་པ་དང་། ཉིས་འགྱུར་གྱི་ལྷང་ཚེར་ཀོང་བུ་རུ་བླུགས་ཏེ་ཀ་ལི་ཀའི་རྩ་བའི་ཁུ་བ་བྱིན་ནས་བཟུང་སྟེ། རྭ་ཛའི་
ཁུ་བ་དང་། ཛ་ཡན་ཏའི་འདབ་མའི་ཁུ་བ་དང་། ཤུ་དག་རྣམས་ཟླ་བ་ཕྱེད་དུ་གཟགས་ནས་ཇི་སྲིད་རྡོག་པོར་གྱུར་གྱི་བར་དུའོ། །དེ་ནས་མེ་ལ་བསྲེགས་ལ་ཕྱེ་མ་བྱས་པ་མན་ཆ་གཅིག་ཞ་ཉེ་སྲང་གཅིག་ལ་བཅུག་ན་
དངུལ་དུ་འགྱུར་རོ། །བཅུད་འདུས་པ་སྔར་གྱི་དེ་ཉིད་བླངས་ནས་རྣལ་འབྱོར་པ་གང་གིས་ར་ཏི་རེ་རེ་ཙམ་ཟོས་ན་སྨྲས་པའི་རིམ་པས་ལུས་ཀྱི་དངོས་གྲུབ་འགྲུབ་པར་འགྱུར་རོ། །ཀཱ་རུ་ཎའི་འདབ་མའི་ཁུ་བ་མར་ནག་

88-1-70b

ལ་ཟངས་ཀྱི་སྣོད་དུ་བཙོས་ནས་དེ་ལ་བཅུད་བྱུགས་ཏེ་ཐུན་གསུམ་ཉི་མ་ལ་བསྐམས་ལ་སིམ་པའི་འདབ་མའི་ཁུ་བ་དང་མཉེས་པ་དང་དེ་ནས་པེ་དྲི་དང་ན་རི་ཀེ་ལའི་རྩ་བ་དང་། སྨན་ལོ་མ་བཟང་པོ་ལ་འཁྲིལ་བ་དང་། ནེ་ལེ་དང་། 
མུད་ག་དང་། ག་ག་ན་རྣམས་ཀོང་བུར་བླུགས་ལ་སྟེང་དང་འོག་འཇིམ་པས་བྱུགས་པ་གླང་པོ་ཆེའི་རྨིག་པ་ལྟ་བུའི་ས་དོང་དུ་བཙོས་ན་སྲ་བར་འགྱུར་རོ། །གལ་ཏེ་རྣལ་འབྱོར་པས་ཟོས་ན་ཞི་བ་དང་མཉམ་པར་འགྱུར་ཏེ། 
གཞན་དང་མཉམ་པ་མ་ཡིན་ནོ། །ཟླ་བ་གཅིག་གིས་འགྲུབ་པར་འགྱུར་རོ། །གལ་ཏེ་མ་གྲུབ་པར་གྱུར་ན་བདག་ནག་པོ་ཆེན་པོ་མ་ཡིན་ནོ། །སྔར་གྱི་ཟངས་མན་ཆ་གཅིག་ལ་དེ་བཅུག་ན་ངེས་པར་གསེར་དུ་འགྱུར་རོ། །ལྷ་མོས་
གསོལ་པ། ཀྱེེ་བཅོམ་ལྡན་འདས་ཉི་མ་གང་ལ་དངོས་གྲུབ་དང་བཅུད་དུ་འགྱུར་བ་ཐེ་ཚོམ་མཆིས་ན། ཀྱེེ་བཅོམ་ལྡན་འདས་ཁྱད་པར་དུ་རྟོགས་པ་ལྷ་མོ་ད་ཀཀྐོ་ལ་ལ་རྣམ་པར་ཆགས་ནས་ས་སྟེང་དུ་རབ་ཏུ་སྤྱོད་པར་
འགྱུར་བས་བླངས་ན་ངེས་པར་བཅུད་ཀྱི་དངོས་གྲུབ་འགྲུབ་པར་འགྱུར་རམ། བཅོམ་ལྡན་འདས་ཀྱིས་བཀའ་སྩལ་པ། ཀྱེེ་ལྷ་མོ་གལ་ཏེ་ལྷ་མོ་བྱུང་བ་ཙམ་གྱིས་འབྱུང་བར་འགྱུར་ན་རྟག་ཏུ་ངེས་པར་ཤེས་པར་འགྱུར་བའོ། །
ཇི་ལྟར་ནུས་པ་མེད་ན་ནད་མ་རུངས་པ་བཟློག་པར་མི་ནུས་པ་དང་། རབ་རིབ་དང་མཆིན་ནད་དང་རྐང་ནད་ལ་ཐུག་པ་བཟློག་པར་མི་ནུས་པས་མི་རྣམས་ཀྱིས་རྗེས་སུ་གནས་པས་དངོས་གྲུབ་བརྒྱད་ཀྱང་རྣམ་པར་བསམ་པར་བྱའོ། །
འཁོར་བ་མི་བཟད་པའི་རྒྱ་མཚོ་ཆེན་པོ་ལས་སྒྲོལ་བར་བྱེད་པ་དང་། སྒྱུ་མར་ཡོངས་སུ་བརྟགས་པས་དུ་མ་དང་བྲལ་བ་རབ་ཏུ་སྤྱོད་ན། སྔོན་དུ་བསགས་པའི་དངོས་པོ་ངན་པ་སྤངས་པས་ཚེགས་མེད་པར་ས་སྟེངས་ཀྱི་དངོས་
གྲུབ་སྣ་ཚོགས་འདིར་འགྲུབ་པར་འགྱུར་རོ། །འདི་ནི་དཔལ་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་དངུལ་ཆུའི་ལེའུ་སྟེ་བཅུ་གསུམ་པའོ།། །། ལྷ་མོས་གསོལ་པ། ཇི་ལྟར་གསུངས་པ་དེ་ལྟར་བགེགས་

88-1-71a

རྣམས་ཀྱིས་གང་བ་ཇི་ལྟར་མནན། དང་པོར་རྣལ་འབྱོར་པ་མཁས་པས་ཐམས་ཅད་བསྒྲུབ་པར་འགྱུར་རམ། དཀར་པོ་དང་ནག་པོ་དང་སྦྱར་བ་ནི་འདབ་མ་གཅིག་ཏུ་བྱས་ནས་ཀཉྫི་དང་བཏགས་པས་ཡང་སྨན་
སོ་ནའི་ཁུ་བ་ལན་གཉིས་སུ་བགོས་པར་གྱུར་པས་དེ་ནས་པ་ལ་ཤའི་འདབ་མའི་ཁུ་བ་དང་། དེ་ནས་མེ་ཏོག་ཨོ་དྷ་དཀར་པོའི་ཁུ་བ་དང་། དེ་ཡང་ལྕི་བའི་ཁུ་བ་དང་། དེ་ནས་ཡང་ཉ་རོ་ཧི་ཏའི་མཁྲིས་པ་དང་། ལན་དགུ་རུ་འདི་
རྣམས་རྫོགས་པར་སྨན་ཀ་ར་ལི་དང་། ཀ་རུ་ཎ་དང་། གང་ཉི་མའི་མཐའ་རུ་གྱུར་པ་ན་ངེས་པར་དངོས་གྲུབ་འགྲུབ་པར་འགྱུར་རོ། །རྒྱ་མཚོ་དང་། སྨྱོ་བྱེད་ཀྱི་ལོ་མའི་ཁུ་བ་དང་། མི་བསྲེགས་པའི་ས་དང་བ་བླ་དང་། བ་ཤ་ཀ་
དང་བསྲེས་ནས་དད་པ་ཅན་གྱི་ཉི་མའི་འོད་ལ་བཞག་ནས་ཛྃ་བྷི་རའི་ཁུ་བ་དང་། མཚན་མོ་གཅིག་ཏུ་དངུལ་ཆུས་བརླན་པའི་བསྡུས་པ་ཡང་ཡང་དེས་ལྷན་ཅིག་ཏུ་བཞག་པ་གང་འདོད་པ་དེ་དག་པར་འགྱུར་ཏེ་མཁས་པས་
བྱའོ། །གལ་ཏེ་བཅུད་བརྩོམ་ཞིང་རྩོམ་པའི་དུས་སུ་བགེགས་གློ་བུར་དུ་འོང་བ་ནི་རྩོད་པ་བྱེད་ཅིང་སྐྲ་ཁམ་པ་དེ་བཞིན་དུ་ཁ་དོག་དཀར་པོ་གེགས་བྱེད་པའི་སྐྱེས་བུ་སྟེ། རྣམ་པར་འཇོམས་པ་དེའི་དུས་སུ་ཇི་ལྟར་ནུས་
པས་གཏོར་མ་སྦྱིན་པར་བྱ་སྟེ། ཤ་དང་། ཆང་དང་། མེ་ཏོག་དང་། བདུག་པ་དང་། དྲི་དང་། ཕྲེང་བ་དང་། ཁྱིམ་བྱའི་ཤ་དང་། ཞིང་སྐྱོང་འོངས་པ་ལ་སྦྱིན་ནོ། །ནག་པོ་འོངས་ན་ཡང་སྔོན་བཞིན་དུ་གཏོར་མ་སྦྱིན་པར་བྱ་བ་སྟེ། 
གནོད་སྦྱིན་འོངས་པས་སོ། །གལ་ཏེ་བཅུད་ཟག་པ་ལ་ཉི་མ་བདུན་གྱི་བར་དུ་འོངས་ན་ཤེས་པར་བྱ་བ་ནི། ཨོཾ་ཡཀྵ་ཀཱི་ལི་ཀཱི་ལི་ནཱ་མ་ཕཊ་ཀཱ་ར་རཀྵ་རཀྵཱ་དི་སམ་བན་དྷ། མུ་ཁཾ་བན་དྷ་ཧ། ཏཾ་བན་དྷ་བན་དྷ་སརྦ་ཨཾ་གཾ་
ཧཱུྃ་ཧཱུྃ་རྃ་ཧཱུྃ་ཕཊ་སྭཱ་ཧཱ། སྔགས་འདིས་འོངས་པ་རྣམས་ལས་རང་བསྲུང་བར་བྱའོ། །རྣལ་འབྱོར་གང་གིས་ཤེས་ནས་དེའི་དུས་ཀྱི་བགེགས་བཅོམ་ན། དངོས་གྲུབ་ངེས་པར་འགྲུབ་པར་འགྱུར་རོ། །རྩོམ་པའི་དུས་སུ་གནོད་

88-1-71b

སྦྱིན་མོ་གདོང་ཐུག་ཏུ་འོངས་པའམ་བློ་བུར་དུ་འོངས་པ་དེ་ཡང་བུད་མེད་ནག་མོ་ཅུང་ཞིག་མིག་དམར་པོར་ཤེས་པ། བག་ཙམ་བོང་ཐུང་བ། སྨྲ་མཁས་པ། སྙན་པར་སྨྲ་བ་གོ་ལ་སྟེར་བཞིན་པ་ཞེ་ས་དང་བཅས་པ་དེ་ལ་
དངོས་གྲུབ་ཀྱི་དོན་དུ་གཏོར་མ་སྦྱིན་པར་བྱའོ། །གང་རྣམ་པར་འཇོག་པ་ཁ་དོག་སེར་སྐྱ་བོང་གེ་རིང་བ། རྗེ་ངར་ལ་སོགས་པའི་ཡན་ལག་རིང་བ་དང་། ཤིན་དུ་གཟུགས་དང་ལྡན་པ། སྨིན་མ་བརྫེས་པ་ཁ་དོག་
གཉིས་ཉེ་བར་མཚོན་པ། བཅུད་ཀྱི་བར་ཆད་བྱེད་ཅིང་འཇོམས་པ་སྟེ་རབ་ཏུ་གཏུམ་མའོ། །མཚན་མོ་མའི་གཟུགས་དང་། སྲིང་མོའི་གཟུགས་དང་། དེ་བཞིན་དུ་ཚ་མོ་དང་། ཕའི་མ་དང་། སྒྱུག་མོའམ། མཛའ་མོ་ལ་སོགས་པ་དེ་ལྟ་
བུའི་གཟུགས་བཟུང་ནས་བྱུང་ན། ཨོཾ་ཀ་ཏི་མེ་ཛཿཧཱུྃ་ཞེས་པས་བདག་བསྲུང་བར་བྱས་པ་དང་། བཅུད་ལ་ཐོད་ལེ་བསྐོར་གྱིས་ཕོགས་བདུན་མངོན་པར་བསྔགས་པར་བྱས་ཏེ་བསྣུན་ནས་ཅུང་ཟད་འདོད་པ་བརྗོད་པ་དང་། ཤིན་ཏུ་ཡང་
དག་པར་བལྟ་བ་དང་ལྡན་པས་རྨི་ལམ་བརྟག་སྟེ། བསྟན་ན་བཅུད་ལེན་གྱི་དོན་ཡང་དག་པར་བྱེད་པས་དེ་བླང་བའི་སྦྱོར་བ་བྱའོ། །མིན་དང་མ་བྱེད་ཅེས་པ་འབྱུང་བར་འགྱུར་བ་ན་མི་འགྲུབ་པར་ཤེས་པར་བྱའོ། །དངུལ་དང་སྨན་
བཎ་ཌའི་འབྲས་བུ་དངུལ་ཆུ་དང་གནུར་བ་སྲང་གཅིག་དང་། དེ་ལ་གསེར་དྲུག་ནམ་པ་གཅིག་བསྣུན་པ་རྡོ་བའི་སྣོད་དུ་བྱི་ལ་ནག་པོའི་མཁྲིས་པ་དང་དངུལ་ཆུ་རྣམས་བསྲེས་པ་ལ་ཕྱི་ནས་སིངས་པོ་བླུགས་སོ། །གསུམ་པ་ལ་མ་ཧེའི་གཅན་
དང་། བཞི་པ་ལ་མིའི་ཤ་དང་། ལྔ་པ་ལ་སྐྱུ་རུ་ར་བྲེ་གང་མཉེས་པ་དང་། དྲུག་པ་ལ་བྷལ་ཏེ་ཀ་དང་། བདུན་པ་ལ་འབྲས་བུ་གསུམ་མོ། །ཕྱི་ནས་མིའི་གཅིན་བྱན་གྱིས་བཀྲུས་ནས་ཉི་མ་ལ་སྨན་ཛམ་བྷི་རའི་ཁུ་བ་བླུགས་ལ་ཐུན་གཅིག་བཞག་སྟེ། དེ་ནས་
བཏན་ལ་སྨན་སིམ་བི་དང་བ་རུ་ཎ་དང་ཀཱ་ལིང་ཀ་དང་། ཧི་མ་རང་ག་དང་ཙི་ཏཱ་ཀ་དང་མུད་ག་རྣམས་ཀྱི་ཁུ་བ་ལ་དབྱུག་གུ་གཅིག་ཏུ་བཞག་ནས། སྨན་སིམ་བྷི་དང་། ཛ་ཡན་ཏིའི་ཁུ་བས་བཀྲུས་ལ་ཉི་མ་གསུམ་དུ་བསྐམས་ཏེ། ལྷང་

88-1-72a

ཚེར་དཀར་པོ་སྲང་བཞི་སྔོན་དུ་བརྗོད་པ་ལྟར་སྦྱངས་པས་སོ། །ཟླ་བ་བཅུ་གཉིས་སུ་ཉི་མ་རེ་རེ་ལྷང་ཚེར་ངེས་པར་བྱའོ། །དཀྱུ་རུ་རའི་ཁུ་བ་དང་། སྨན་སུ་དང་། ཤ་ནའི་ལོ་མའི་ཁུ་བ་དག་གིས་ཟླ་བ་གཅིག་ཏུ་གདུལ་
ལོ། །ཇི་སྲིད་གཡས་སྐོར་དུ་བྱུང་ན་དངོས་གྲུབ་མཉམ་པ་མེད་པ་ལྷ་དང་ཚངས་པ་དག་གིས་བྱིན་པ་སྟེ། ཉི་མ་ལྔའི་བར་དུ་ར་ཏི་རེ་རེ་ཉིན་རེ་བཞིན་ཟོས་ན་ལྕགས་བརྒྱད་ལ་རེག་པ་ཙམ་གྱིས་ངེས་པར་གསེར་དུ་འགྱུར་
རོ། །དེའི་དུས་སུ་ཟླ་བ་དང་ཉི་མ་དག་ཤྭ་བར་གྱུར་ན་སྐད་ཅིག་དེ་ལ་དེ་གང་འདོད་པ་བྱེད་དོ། །གཞན་ཡང་དཔུང་ཆེན་པོའི་གསེབ་ཏུ་བུད་མེད་དབང་དུ་བྱེད་དོ། །དཔལ་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་དངུལ་ཆུའི་སྒྲུབ་ཐབས་ཀྱི་
ལེའུ་སྟེ་བཅུ་བཞི་པའོ།། །། ལྷ་མོས་གསོལ་པ། ཀྱེ་བཅོམ་ལྡན་འདས་མི་རྣམས་གནས་གང་དང་གང་དུ་འགྲོ་ཞིང་སྐྱེ། མངའ་བདག་དང་རྣལ་འབྱོར་མ་རྣམས་འཆི་བ་དང་གནམ་དང་། རྣམས་ཀྱི་གནས་ཇི་ལྟར་ལགས་
གསུངས་ཤིག །བཅོམ་ལྡན་འདས་ཀྱིས་བཀའ་སྩལ་པ། རི་རབ་ཀྱི་བྱང་ཕྱོགས་ན་གྲོང་ཁྱེར་བཱ་ལ་བྷཉྫ་བྱ་བ་དེ་ན། ཀླུའི་རྒྱལ་པོ་བུ་ག་བོ་ག་དྷི་ག་ཞེས་པ་འབྱུང་སྟེ། ཕྱག་རྒྱ་ཆེན་པོའི་དངོས་གྲུབ་ཐོབ་བོ། །དེའི་བུ་རིགས་རྒྱུད་སྟོང་
གི་བར་དུ་གྲོང་ཁྱེར་ཀླུའི་གདུང་རྒྱུད་དུ་འགྱུར་ཏེ། རྗེ་བཙུན་འཇམ་དཔལ་གྱི་སྙིང་པོ་སྟོང་ཕྲག་བྱེ་བ་གཅིག་ཏུ་ཟླས་པ་དང་། ང་སྐྱེ་བ་བརྒྱད་ནས་ཐང་ཤིང་གི་ལོ་མ་ཙམ་གྱིས་དངོས་
གྲུབ་ཐོབ་བོ། །དེ་ནས་གྲོང་ཁྱེར་དེ་རྒྱ་མཚོས་ནུབ་ནས་འགྲོའོ། །ཡང་གླིང་བ་རི་ཀ་ཞེས་བྱ་བ་རུ་གྱུར་ནས་དེ་རུ་སྐྱེ་བ་སྟེ། མིང་ནི་ཎ་ཊེན་དྲ་ཞེས་པ་དང་ལྡན་པ་ལྷ་མ་ཡིན་གྱི་རྒྱལ་པོ་འབྱུང་ངོ་། །ཕྱི་ནས་སྐྱེས་བུ་བདུན་གྱི་
བར་དུ་གར་དྷ་བ་ཞེས་པའི་མིང་ཅན་གྱི་སྲིན་པོར་སྐྱེས་ཏེ་ལོ་འབུམ་ཕྲག་ཉི་ཤུའི་བར་དུའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་ལ་འཇུག་པ་དེ་དང་དེ་ལ་གང་དང་གང་གི་གཟུགས་ཀྱིས་ཆོས་སྟོན་ཏེ། དེའི་གཟུགས་

88-1-72b

ཐམས་ཅད་ལ་འཇུག་པ་ཞེས་བསྟན་ཏེ། དེའི་བྱང་དུ་གླིང་ཨུཏྟ་ར་ཨཾ་ཀུ་ར་ཞེས་པར་དམ་ཚིག་དང་བསྒོམ་པ་ཡོངས་སུ་ཤེས་པའི་ནུས་པས་པ་རི་ཀ་ཏི་བར་ཏ་ནའི་དུས་འབྱུང་སྟེ་ལོ་བྱེ་བ་ཕྲག་བཅུ་གཅིག་དང་ཁྲི་ཕྲག་ཉི་ཤུ་རྩ་བདུན་གྱིས་
རྫོགས་སོ། །དེ་ན་ཀི་ཏ་ནན་དའི་དུས་འབྱུང་སྟེ། དུས་ཚིགས་སུ་དུང་ཕྱུར་ཕྲག་བཅུ་དང་། འབུམ་ཕྲག་བདུན་བཅུ་རྩ་གཅིག་དང་། སྟོང་ཕྲག་བཅུ་གཉིས་དང་། བརྒྱ་རྩ་གཅིག་སོང་བ་དང་། བ་བླ་བརྒྱ་ཕྲག་ལྔ་བཅུ་རྩ་གཅིག་དང་། བཞི་ཡིས་ལྷག་
པའི་འབུམ་ཕྲག་བཞི་སྟེ། འདི་རྣམས་ལ་ཨུཏ་ཏར་ཨཾ་ཀུ་ར་ཞེས་པར་ཡོངས་སུ་བསྒྲགས་སོ། །ཡང་རི་རབ་ཀྱི་ལྷོ་ཕྱོགས་ལང་ཀ་ལ་ཐུག་པ་ན་རི་བ་ཧུ་ར་ཞེས་པ་འབྱུང་སྟེ། དེ་ན་སྲིན་པོའི་ཚོགས་ཉི་མ་དང་ཟླ་བ་ཇི་སྲིད་གནས་
ཀྱི་བར་དུ་འབྱུང་ངོ་། །དེའི་ལྷོ་ཕྱོགས་ན་གྲོང་ཁྱེར་ས་མོ་རི་ཞེས་པ་འབྱུང་སྟེ། དེའི་རྒྱལ་པོ་ར་ས་ན་ཞེས་བྱའོ། །དེའི་ལྷོ་ཕྱོགས་ན་གྲོང་ཁྱེར་ཀཱ་མ་རུ་ཞེས་པ་རུ་དེ་རུ་རྒྱལ་པོ་མཚན་ཉིད་བདུན་པ་ཞེས་པ་འབྱུང་ངོ་། །རྒྱལ་པོ་
འབྱུང་བའི་གནས་དེར་མ་བྱུང་འབྱུང་བར་མི་འགྱུར་བའི་འདོད་པའི་གཟུགས་ཅན་མ་འབྱུང་བར་འགྱུར་རོ། །ཙ་ཎཱི་ཀ་ཡང་འབྱུང་བར་ལུང་བསྟན་ཏོ། །ཉ་པ་གཅིག་ཉ་ཡིས་ཟོས་ནས་ཤི་བ་དང་། དེ་རྣལ་འབྱོར་པ་དྷ་རི་ཀ་
ཞེས་པར་སྐྱེས་ནས་དེས་ཆུ་བོ་གང་གཱ་ལ་ཆང་འཕངས་པས་ཆུ་ཚོད་གཅིག་ན་ཡུལ་པ་ད་ཧ་ཞེས་པར་འགྱུར་རོ། །དེའི་སྔགས་ཀྱི་འབྲས་བུས་མཁའ་འགྲོ་དང་མཁའ་འགྲོ་མ་འཆིང་ངོ་། །ཡུལ་དེར་རྩིས་མཁན་ཆེན་པོ་བ་ར་
ཧ་ཞེས་པ་འབྱུང་ངོ་། །རྒྱལ་པོ་སུ་བཱ་ཧ་ཞེས་བྱ་བའི་བུ་དང་བུའི་ཡང་བུའི་བར་དུ་འབྱུང་སྟེ། ལོ་ཉི་ཤུ་རྩ་བཞིའི་བར་ལ་ལྷ་རྟེན་འབུམ་ཕྲག་གཅིག་བརྩིགས་པ་དང་ལོ་ལྔ་བཅུའི་བར་ལ་རྫོགས་སོ། །དེ་ནས་ལོ་བརྒྱད་ལྷག་པའི་
འབུམ་ཕྲག་ལྔ་བཅུ་དང་དུས་ཚིགས་གསུམ་གྱི་བར་ལ་རྣལ་འབྱོར་ཁྲི་ཕྲག་གཅིག་དང་། སངས་རྒྱས་སྟོང་ཕྲག་གཅིག་འབྱུང་བར་འགྱུར་རོ། །དེའི་ཤར་དུ་རིའི་རྒྱལ་པོ་ཆེན་པོ་འབྱུང་

88-1-73a

སྟེ། རྒྱ་མཚོས་ཕོགས་གསུམ་དུ་ནུབ་ནས་འོང་ངོ་། །དེར་ཡང་ནི་དྷྲི་ཏ་ཞེས་པའི་གནོད་སྦྱིན་དུས་ཚིགས་གཉིས་སུ་གནས་པ་འབྱུང་ངོ་། །ཕྱི་ནས་བྷྃ་ག་ལའི་རི་ཁྲོད་པ་རྣམས་ཀྱི་དཔོན་པོའི་ཆུང་མར་སྐྱེས་
ནས་ལྷ་མོ་ཙུན་དཱ་ལ་མཆོད་པ་བྱེད་པར་འགྱུར་རོ། །དེ་ནས་སྐྱེ་བ་བརྒྱད་ན་ཀཱ་མ་རཱུ་པའི་རྒྱལ་པོར་སྐྱེས་ཏེ། བཙུན་མོ་བཞི་བརྒྱ་དང་། ཕོ་བྲང་དགུ་དང་། འབྲུ་སྣ་ཚོགས་ཚང་བ་དང་། ཨ་ག་རུ་ནག་པོ་རྣམས་དང་ལྡན་པ་འབྱུང་
བར་འགྱུར་རོ། །དེའི་ལྷོ་ཕྱོགས་སུ་མ་གན་དྷ་རི་ཞེས་པའི་ཚོང་འདུས་འབྱུང་སྟེ། ལོ་འབུམ་ཕྲག་བརྒྱའི་བར་དུ་གནས་སོ། །ཕྱི་ནས་དེ་དཔལ་གྱི་ཚོང་འདུས་ཞེས་པར་གྱུར་ནས་འགྲོ་སྟེ་དེའི་ལྔ་ཆ་གཅིག་ལྕི་བ་དང་ཡང་བ་དང་། 
གཞོན་པའི་ཨ་ག་རུ་ནག་པོ་འབུམ་ཕྲག་དང་ལྡན་པར་འགྱུར་བ་དང་། ལོ་བརྒྱ་ཕྲག་སུམ་བཅུ་སོ་གཉིས་ཀྱི་བར་དུའོ། །ཀཱ་མ་རཱུ་པའི་ཤར་ལྷོ་མཚམས་ཀྱི་རི་ཀུ་ཧ་ར་ཞེས་པར་ཇི་སྲིད་ཉི་ཟླ་གནས་ཀྱི་བར་དུ་གནས་པ་ཧ་ན་མནྟ་ཞེས་པ་
འབྱུང་ངོ་། །དེའི་ལྷོ་ཕྱོགས་སུ་རྒྱལ་པོ་ཡང་དག་པའི་དོན་ཅན་ཞེས་པ་ར་མ་དང་། ལ་ཁྨ་ཎའི་ཕ་ཤིང་རྟ་བཅུ་པ་དང་། ཨ་ཛ་ཏིའི་བུ་བཱ་ལི་དང་པུ་དྲི་བ་དང་། ཐམས་ཅད་ཡོངས་སུ་བྱེད་པ་བྷུ་ཛཾ་ག་པོད་དྷི་ཀ་རྣམས་ཀྱི་བར་འདོད་
ཆགས་དང་། གཏི་མུག་དང་། མྱ་ངན་གསུམ་གྱིས་བསྐྱེད་ནས་རྒྱལ་པོར་འགྱུར་རོ། །དེའི་ནུབ་ཕྱོགས་སུ་བ་སུ་དེ་བའི་སྤྲུལ་པ་པཱ་ཎ་ཌུ་ཞེས་པ་རྟགས་ལྔ་འཛིན་པ་ལག་པས་དབྱུག་པ་མ་བཟུང་བར་འདུལ་བར་ནུས་པ་འབྱུང་
བ་དང་། ལྷ་མ་ཡིན་གྱི་རྒྱལ་པོ་བཱ་ལའི་རིམ་པ་འབྱུང་སྟེ། དེ་དག་གི་ཡུལ་རྒྱ་མཚོས་བསྐོར་བ་འབྱུང་བར་འགྱུར་རོ། །དེའི་དབུས་སུ་པ་ཏི་ཀོ་ར་ཀ་ཞེས་པའི་ཡུལ་དུ་བུ་དང་བུའི་བུ་ལ་སོགས་པའི་རྒྱལ་པོ་ལོ་ལྔ་བཅུ་ལྷག་
པའི་ལྔ་བརྒྱའི་བར་ལ་ལྷ་རུ་ཕྱུགས་བདག་མཆོད་པ་འབྱུང་བར་འགྱུར་ཏེ། དེ་རྣམས་ནི་གནས་སྐབས་ཀྱི་རྒྱལ་པོ་པཱ་ལ་ཞེས་པ་དང་ལྡན་པའི་བརྒྱུད་པ་ལྔ་བཅུ་འབྱུང་བར་འགྱུར་རོ། །དེའི་ལྷོ་ནུབ་ཏུ་གྲོང་ཁྱེར་བྷན་ཌ་པུ་རི་ཞེས་

88-1-73b

པའི་རྒྱལ་པོའི་བཞུགས་ས་འབྱུང་སྟེ། དེར་རྒྱལ་པོ་བི་ཀྲ་མ་ཨ་དི་དྱ་ཞེས་པ་ཛཾ་བྷ་ལའི་བཀའ་དྲིན་གྱིས་གྲུབ་པ་ཐོབ་པ་ལོ་བཞི་བརྒྱ་གནས་པར་འབྱུང་བ་དང་། གྲོང་ཁྱེར་དེ་རུ་དངོས་གྲུབ་བྱེ་བྲག་ཐམས་ཅད་འཐོབ་པ་འབྱུང་བ་དང་། 
དེའི་ལྔ་ཆ་ཡིས་བུའི་བྱ་བ་བྱེད་པ་འབྱུང་བར་འགྱུར་རོ། །ལོ་ལྔ་བཅུའི་བར་ལ་འབྱུང་པོ་དང་ལྷ་ཡིས་སྐྱོང་བར་འགྱུར་རོ། །དེ་རྣམས་བསྡོམས་པས་ལོ་སྟོང་ཕྲག་གཅིག་སོང་ནས་རྒྱལ་པོ་རུས་སྦལ་ཞེས་པ་ལོ་ཉིས་བརྒྱའི་བར་
དུ་གནས་སོ། །བྷ་ག་ལའི་མངའ་བདག་ལོ་བརྒྱ་ཕྲག་བཅྭ་བརྒྱད་ཀྱིས་བར་ལ་གང་སྐྱེས་པའི་སྐྱེས་བུ་ཁ་དོག་སེར་པོ་སོ་སྟོ་བ་དེ་ག་བ་ཞེས་པ་དང་ལྡན་པའི་བརྒྱུད་པར་ཡུལ་ཨ་བ་ལུ་ཀའི་རྒྱལ་པོར་འགྱུར་ཏེ། དེའི་བུ་དང་བུའི་ཡང་
བུ་ལ་སོགས་པ་རྣམས་རྒྱལ་པོ་བྱེད་པར་འགྱུར་རོ། །རྒྱལ་པོ་དེ་རྣམས་ཀྱི་དུས་ལ་གྲུབ་པ་ཐོབ་པའི་རྣལ་འབྱོར་པ་ལྔ་དང་། རྣལ་འབྱོར་མ་གཉིས་ཀྱང་འབྱུང་བར་འགྱུར་རོ། །དེ་ལྟར་ཡུལ་ཨོ་རུ་བཱི་ས་ཡང་མཚུངས་པར་ངེས་པའོ། །
དེར་སྐྱེས་བུ་བརྩོན་འགྲུས་ཆེན་པོའི་སྦྱོར་བ་དང་ལྡན་པ། ར་མ་ནའི་བཀའ་དང་མཚུངས་པ། སྡེ་ཚན་དང་པོའི་དང་པོ་ཀ་ལ་དབྱངས་ཡིག་དང་པོས་བརྒྱན་པ། སྡེ་ཚན་བདུན་པའི་བཞི་པ་ཅུང་ཟད་ན་ལ་ཞོན་པའི་མིང་ཅན་རྣལ་འབྱོར་
དབང་པོ་གཅིག་པོ་འདིས་དངོས་གྲུབ་ཆེན་པོ་བརྒྱད་ཐོབ་པར་འབྱུང་ངོ་། །འཛམ་བུའི་གླིང་དུ་མ་བྱུང་འབྱུང་བར་མི་འགྱུར་རོ། །དེའི་སློབ་མ་རྣལ་འབྱོར་པ་དྲུག་གིས་ལུས་དངོས་པོ་སྤངས་པའི་ཕྱག་རྒྱ་ཆེན་པོ་ཐོབ་པར་འགྱུར་རོ། །དེ་
ནས་ཙཎ་དྲ་ཞེས་པའི་མིང་དང་ལྡན་པའི་རྒྱལ་པོའི་རིགས་རྒྱལ་ཁམས་སྐྱོང་བ་འབྱུང་བ་ལས་རིགས་དེ་འགྲིབ་པའི་དུས་ཟླ་བའི་མིང་དང་ལྡན་པའི་བྲམ་ཟེའི་བུ་དམངས་རིགས་ནཱ་མ་བྷ་པཱ་ལི་ཏ་ཞེས་པ་འབྱུང་བར་འགྱུར་རོ། །དེ་ནས་
སློབ་མ་སྡེ་ཚན་དང་པོའི་གཉིས་པ་ལ་དབྱངས་ཡིག་གསུམ་པས་བརྒྱན་པ། སྡེ་ཚན་བཞི་པའི་དང་པོ་ལ་དབྱངས་ཡིག་བཅུ་གསུམ་པས་བརྒྱན་པ་འབྱུང་སྟེ། ཟླ་བའི་མིང་དང་ལྡན་པ་རྫོགས་ནས་སོ། །དེ་ནི་སྔོན་གྱི་དུས་སུ་
88-1-74a

རྗེ་བཙུན་འཇམ་དཔལ་གྱིས་བཟླས་པ་བྱེ་བ་ཕྲག་བཅུ་གཉིས་བཟླས་པའི་འབྲས་བུའོ། །དེའི་ཕྱི་ནས་བྲམ་ཟེའི་མིང་ཅན་གྱི་རྒྱལ་པོ་འབྱུང་བར་འགྱུར་ཏེ། ཕྱི་ནས་དེའི་བུ་དང་བུའི་ཡང་བུ་ངེས་པར་རྣལ་འབྱོར་
པར་འགྱུར་རོ། །ཡང་པཱ་ལ་ཞེས་པའི་མིང་དང་ལྡན་པར་གྱུར་ཏེ་སྐྱེས་བུ་གཅིག་ཁོ་ནའོ། །དེ་སྤངས་ནས་དཏ་ཏ་དང་། གྷོ་ཥ་དང་དྷ་མ་དང་། སིང་ཧ་དང་། ནན་ཏི་དང་། ཨཾ་པ་ར་དང་། ཨཱ་དི་དྱ་དང་། སེ་ནཱ་རྣམས་ཀྱིས་རིམ་གྱིས་
རིམ་གྱིས་སྐབས་སྐབས་སུ་སྐྱོང་བར་བྱེད་དོ། །ཕྱི་ནས་བསོད་ནམས་ཆུང་བར་གྱུར་པའི་རྒྱལ་པོ་འབྱུང་བར་འགྱུར་རོ། །པ་ཌི་ཀེ་ར་ཀའི་བྱང་ཕྱོགས་སུ་རྒྱ་མཚོ་གཅིག་འབྱུང་སྟེ། ཕྱིས་བྱེ་མའི་ས་གཞིར་འགྱུར་རོ། །ཡུལ་དེ་ལ་
མ་ཌ་ཞེས་སོ། །དེར་སྐམ་པོ་ཛ་ཞེས་པའི་རྒྱལ་པོ་འབྱུང་བར་འགྱུར་རོ། །དེའི་བུའི་མིང་ཀོ་ཤཱམྦ་ཞེས་པ་དང་ལྡན་པའི་རྒྱལ་པོ་འབྱུང་ཞིང་གྲོང་ཁྱེར་གྱི་མིང་ཡང་ཀོ་ཤམ་པ་ཞེས་པ་འབྱུང་ངོ་། །ཕྱི་ནས་ཡུལ་པ་ཧྲི་ཀ་རེ་ཀ་ར་ཤ་བྷ་ལ་ཞེས་
པ་འབྱུང་སྟེ། དེའི་བུ་རྒྱལ་པོར་འགྱུར་རོ། །ཡང་བི་ཀྲ་མ་པུ་རི་ཞེས་པ་ཡུལ་གྱི་དབུས་སུ་བརྟགས་པ་དེར་འོན་ཀྱང་རྣལ་འབྱོར་མ་དངོས་གྲུབ་དང་ལྡན་པ་འབྱུང་སྟེ། དེའི་དབུས་སུ་རྣལ་འབྱོར་མ་གཅིག་གིས་བཙུན་མོ་བྱེད་པར་འགྱུར་རོ། །
དེའི་བསོད་ནམས་ཀྱིས་བུའི་བུ་ལ་སོགས་པའི་རིགས་རྒྱུད་ཀྱི་བ་ག་ལ་དག་པར་བྱ་སྟེ། འོན་ཀྱང་འདིར་ས་གཞིའི་བཟོད་པ་ཟད་པ་ལ་རྩོད་པའི་དུས་ཞེས་བརྗོད་དོ། །དེ་རྫོགས་ནས་མགོན་པོ་བྱམས་པ་ཞེས་པའི་སངས་རྒྱས་འབྱུང་སྟེ། 
དངོས་པོ་མེད་པའི་རང་བཞིན་མཐོང་བ་བློ་གྲོས་ཀྱིས་འཆད་པར་འགྱུར་རོ། །གཞན་ཡང་ཡུལ་ཨོ་རུ་བྷི་ས་དང་། ཙོ་དྷ་དང་སིངྒྷ་ལ་དྷཱི་པ་རྣམས་སུ་དུས་དུས་སུ་ཀླུའི་རྒྱལ་པོས་ཆར་འབེབས་པར་འགྱུར་རོ། །ཡང་ཡུལ་ར་དྷ་རུ་པ་ལ་
ཞེས་པའི་མིང་ཅན་སྐྱེས་བུ་སུམ་བཅུའི་བར་དུ་འབྱུང་སྟེ། བརྒྱུད་པ་ཐ་མའི་བུས་ཡུལ་ཨོ་རུ་བྷི་སའི་རྒྱལ་པོ་འབྲས་བུ་ལ་ཕན་པ་ཞེས་པའི་ལྷ་སྐོར་དང་བཅས་པ་འཇོམས་ཤིང་། རྣལ་འབྱོར་མ་རྣམས་འཇོམས་པ་འབྱུང་སྟེ། 

88-1-74b

དེས་རྣལ་འབྱོར་པ་རྣམས་ཀྱི་གཙོ་བོ་མཆོག་གི་དབང་ཕྱུག་ཐོབ་པ་ནི་སངས་རྒྱས་དང་མཉམ་པར་སྡོམ་པ་དང་ལྡན་པས་བཟླས་པ་བྱེ་བ་ཕྲག་བཅུ་གཉིས་བཟླས་པས་སོ། །དེའི་སློབ་མ་གཉིས་དང་། སློབ་པའི་
སློབ་མ་གསུམ་དང་། དེའི་ཡང་སློབ་མ་རྣལ་འབྱོར་པ་རྣམས་དང་། པཎ་ཌི་ཏ་རྣམས་ཀྱི་གཙོ་བོར་གྱུར་པ་ཆོས་ཀྱི་གྲགས་པ་ཞེས་པར་ཡོངས་སུ་གྲགས་པ་འདི་དང་སྐྱེས་བུ་དྲུག་བསྟན་པ་ལ་ཕན་པ་ཚངས་པར་སྤྱོད་པ་
ལ་གནས་པ་རྣམས་ཀྱིས་གྲུབ་པ་འཐོབ་བོ། །ཕྱི་ནས་མ་ཏི་ལ་དང་། བཱ་ག་ར་དང་། བྷ་བྱ་གྷོ་ཥ་དང་། ས་ཧཱ་སྲི་ཀཱརྞ་ཞེས་པའི་མིང་ཅན་ཡོངས་སུ་སྐྱོང་བ་རྣམས་ལོ་བཅུ་གསུམ་གྱིས་གྲུབ་པ་ཐོབ་པ་འབྱུང་ངོ་། །
ཡང་རྣལ་འབྱོར་པས་སརྨ་དང་། ཧ་ཏི་ན་དང་། གར་མུ་ཀ་དང་། པ་ཙན་ན་དང་། སམ་བེ་དུ་དང་། བུད་དྷ་སྷ་དང་། པ་ཏེ་ལ་རྣམས་ཀྱིས་རུས་སྦལ་གྱི་རིགས་རྫོགས་སོ། །དེའི་ནུབ་ཕྱོགས་སུ་གྲོང་ཁྱེར་མཱ་ལ་ཝ་ཞེས་པ་
གྲུབ་པ་ཐོབ་པའི་གནས་དེར་བྷོ་ཛྱ་དེ་བ་ཞེས་པར་ཡོངས་སུ་གྲགས་པར་རྫོགས་ནས། ཀོ་ཏི་ཀ་དང་པཱ་ལི་ཏ་དག་འཁོར་དང་བཅས་པ་ཡིས་ཚེ་ལོ་སྟོང་ཕྲག་གཅིག་ཐུབ་པའི་རྒྱལ་པོ་འབྱུང་ངོ་། །དེའི་ནུབ་ཕྱོགས་སུ་གྲོང་ཁྱེར་སམ་བུ་
ཀ་ཞེས་བྱ་བ་འབྱུང་སྟེ་དེར་རྒྱལ་པོ་སྟོང་ཕྲག་ལྔ་རུ་བྷ་དྷ་ན་ཞེས་པ་དང་ལྡན་པའི་མིང་ཅན་འབྱུང་ངོ་། །ཕྱི་ནས་ཀ་ལེ་དང་མ་ལ་ཞེས་པ་འབྱུང་སྟེ། དེ་དག་གིས་གྲུབ་པ་ཐོབ་པར་འགྱུར་རོ། །དེའི་ལྷོ་ཕྱོགས་སུ་གྲོང་ཁྱེར་ཨ་ཛ་ར་ཡོ་
གི་ནི་ཞེས་པ་འབྱུང་སྟེ། དེར་ཀླུ་སྒྲུབ་པ་ཞེས་བྱ་བའི་རྣལ་འབྱོར་པས་ཤིང་ས་ལ་ཞོན་པ་གོ་པཱ་ལ་ཞེས་པ་ལ་རྒྱལ་པོ་བྱིན་པས་བུ་ཤི་ནས་བ་ཧྣའི་ཚ་བོ་ལ་སོགས་པའི་རྒྱལ་པོ་འབྱུང་ངོ་། །དཔལ་རྣལ་འབྱོར་གྱི་དབང་ཕྱུག་རྫོགས་
ནས་འཇིག་རྟེན་གསུམ་གྱི་རྒྱལ་པོའི་འབྲེལ་པ་དངོས་གྲུབ་ཆེན་པོ་བརྒྱད་ཀྱི་རྙེད་པ་ཐོབ་པ་འབྱུང་སྟེ། དེའི་མིང་ནི་ཀེ་བ་ཏ་པུ་ཏྲ་ཞེས་པའི་རྒྱལ་པོའི་བུ་རྗེ་རིགས་ཀྱིས་བསད་ནས་དེའི་བུ་

88-1-75a

དང་བུའི་ཡང་བུའི་བར་དུ་ནུབ་ཕྱོགས་སུ་གང་དང་གང་སོང་བ་དེ་དང་དེ་རྡོ་རྗེར་གཤེགས་སོ། །དེའི་ཡང་ནུབ་ཕྱོགས་ན་ཏྲི་པ་ཊ་ན་ཞེས་པའི་ལྷ་རྟེན་ཡོད་པས་སོ། །དེའི་ལྷོ་ཕྱོགས་སུ་དེའི་བུ་ཉི་མ་ཞེས་པ་འབྱུང་ངོ་། །
དེའི་ལྷོ་ནུབ་མཚམས་སུ་གྲོང་ཁྱེར་བྷ་ཊ་ཀུ་ནི་རེ་ཞེས་པར་གྲོང་ཁྱེར་བ་རྣམས་བློ་གྲོས་དང་ལྡན་པ་འབྱུང་ཞིང་རྒྱལ་པོ་ནི་བྷན་དུ་དེ་ཝ་ཞེས་པ་འབྱུང་ངོ་། །དེའི་བུ་དང་བུའི་ཡང་བུ་རྫོགས་ནས་སིན་དྷུ་ཞེས་པར་གྱུར་ནས་འགྲོའོ། །
དེ་ཤི་ན་གར་ཞེས་པར་འབྱུང་ངོ་། །ཕྱི་ནས་སྐྱེ་བ་བདུན་གྱི་བར་དུ་རྣལ་འབྱོར་པར་འབྱུང་བར་ཤེས་པར་བྱས་ཏེ་ཕྱོགས་དང་ཕྱོགས་བྲལ་བ་རྣམས་ཀྱང་ངོ་། །དེ་ནས་གྲོང་ཁྱེར་དེ་ལ་བྷན་དྷ་ནི་ཞེས་པར་འགྱུར་ནས་འགྲོའོ། །
དེ་རུ་ཙཎ་ཌ་མ་ཧཱ་རོ་ཥ་ཎའི་རྣལ་འབྱོར་ཉམས་སུ་བླངས་པས་རྒྱལ་པོར་འགྱུར་རོ། །དེ་ཡིས་སྐྱེ་བ་འདི་ལ་སངས་རྒྱས་ཀྱི་འབྲས་བུ་འཁོར་དང་བཅས་པ་ཡིས་འཐོབ་བོ། །ལྷོ་ཕྱོགས་ན་གྲོང་ཁྱེར་ས་བྷིཉྫི་ཀ་ཞེས་པ་
སངས་རྒྱས་ཀྱིས་དུས་ཐམས་ཅད་དུ་བྱིན་གྱིས་བརླབས་པའི་གནས་སུ་སངས་རྒྱས་རྗེ་བཙུན་གྱིས་རྒྱལ་པོ་མཛད་པ་ལ་འཁོར་གྲུབ་ཐོབ་རྣམས་ཀྱིས་བསྐོར་བ་འབྱུང་སྟེ་ལོ་སྟོང་གི་བར་དུའོ། །དེའི་བྱང་ཕྱོགས་སུ་ལྷས་
མཛད་པའི་རྡོ་རྗེའི་ཁྲི་ལ་བཞུགས་པའི་རྗེ་བཙུན་བཞུགས་སོ། །དེའི་ཤར་ཕྱོགས་མཚམས་སུ་ཡུལ་ཁར་ས་པ་ཎི་ཞེས་པར་རྗེ་བཙུན་འཕགས་པ་སྤྱན་རས་གཟིགས་ངེས་པར་འབྱུང་བར་འགྱུར་རོ། །ནུབ་ཕྱོགས་སུ་གྲོང་ཁྱེར་
མ་ཧཱ་བྷ་བྫ་པུ་རི་ཞེས་པ་འབྱུང་ངོ་། །དེར་རྒྱལ་པོ་བ་སུ་བྷ་དྷ་ན་ཞེས་པ་འབྱུང་སྟེ། དེའི་བུ་དང་བུའི་ཡང་བུ་རྫོགས་ནས་རྒྱལ་པོ་གདུང་རྒྱུད་འཆད་དོ། །དེ་ནས་ཐམས་ཅད་རྒྱ་མཚོས་ནུབ་པར་འགྱུར་རོ། །གཞན་ཡང་ཡུལ་ལ་ཊ་དང་
ཙོ་ཌེ་དང་། གོ་དྷ་བང་ག་ལ་དང་པོ་ཨོ་ཌི་ཡཱ་ན་དང་། ཛ་ལཾ་དྷ་ར་དང་། བ་ཊི་ཀེ་ར་ཀ་དང་། ཀཱ་མ་རཱུ་པ་ལ་སོགས་པ་རྣམས་པ་རྒྱུན་དུ་སངས་རྒྱས་ཀྱིས་བྱིན་གྱིས་བརླབས་མཛད་པར་འགྱུར་རོ། །ཡུལ་དེ་རྣམས་སུ་འདོད་

88-1-75b

པ་ཐམས་ཅད་འབྱུང་སྟེ། རྒྱལ་པོ་དང་། འཁོར་དང་། རྣལ་འབྱོར་པ་དང་། གྲུབ་པ་ཐོབ་པ་ལ་སོགས་པ་དོན་རྣམས་ཡོངས་སུ་མཛད་པ་ལ་འཛམ་བུའི་གླིང་ཞེས་གྲགས་སོ། །རྒྱ་མཚོའི་ཤར་ཕྱོགས་སུ་རི་བོ་ཧུ་ར་ཞེས་པ་ན། ལྷ་མ་
ཡིན་དཔག་ཏུ་མེད་པ་གནས་པ་འབྱུང་ངོ་། །ལྷོ་ཕྱོགས་སུ་བྱ་རོག་གི་གདོང་པ་ཅན་ཞེས་པ་གནས་པར་འགྱུར་ཏེ། དེ་དག་ཐམས་ཅད་ཀྱིས་ཀྱང་ཐབས་མཆོག་ཏུ་གྱུར་པ་ཤེས་པ་འབྱུང་ངོ་། །རྒྱ་མཚོའི་ལྷོ་ཕྱོགས་སུ་མི་གདོང་གྲུ་གསུམ་
པ་དང་། སྲིན་པོ་དང་། མི་འམ་ཅི་དང་། ལྷ་མ་ཡིན་ལ་སོགས་པ་རྣམས་དང་། སྤྲེའུ་ལ་སོགས་པ་རྣམས་ཧ་ཧ་ཞེས་པའི་སྒྲ་སྒྲོགས་པ་དང་། ཧ་ནུ་མན་ཏ་རྣམས་ངེས་པར་གནས་པར་འབྱུང་བར་འགྱུར་རོ། །རྒྱ་མཚོའི་
ནུབ་ཕྱོགས་སུ་ཟླ་བ་ཕྱེད་པའི་གདོང་པ་ཅན་གྱི་མི་གནས་པར་འགྱུར་རོ། །དེའི་ནུབ་ཕྱོགས་ན་ལྷ་ལ་སོགས་པ་གནས་པ་འབྱུང་ངོ་། །རྒྱ་མཚོས་བསྐོར་བ་ན་གནས་པའི་མི་རྣམས་ལ་བ་ལང་སྤྱོད་ཅེས་བསྒྲགས་ཏེ། དེ་ན་
གནས་པའི་མི་རྣམས་གདོང་ཟླུམ་པོ་དང་ལྡན་པ་དང་། དེ་རྣམས་ཀྱི་རྒྱལ་པོར་གནས་པ་དེ་ཡུལ་ཐམས་ཅད་ཀྱི་རྒྱལ་པོ་སྟེ། འཆི་འཕོ་བ་དང་སྐྱེ་བ་མེད་པར་འབྱུང་བར་འགྱུར་རོ། །དེའི་ནུབ་ཕྱོགས་ཀྱི་གྲོང་ཁྱེར་ར་ས་ལན་
དྷི་ཞེས་པར་དང་པོའི་དུས་སུ་ལྷ་མ་ཡིན་གྱི་རྒྱལ་པོ་འབྱུང་ངོ་། །དེ་ནས་རྒྱལ་པོ་ལྷའི་ལུས་ཅན་ཞེས་བྱ་བའི་མིང་གི་རྒྱལ་པོ་འབྱུང་ངོ་། །དེ་བསད་ནས་ཀཾ་བི་སི་ཧ་ཞེས་པ་དང་བུ་དང་བུའི་ཡང་བར་དུ་འབྱུང་ངོ་། །དེ་ནས་བྷེ་ས་
ཛྱ་སེ་ན་ཞེས་པའི་མིང་གི་མཐའ་རྟེན་དང་ལྡན་པའི་སྐྱེས་བུ་བདུན་གྱི་བར་དུ་འབྱུང་ངོ་། །དེ་ནས་པ་ལ་ཞེས་པའི་རྒྱལ་པོ་འབྱུང་སྟེ། དེ་ནས་དེས་ཉ་བའི་ཤུ་བི་ལ་གྲོང་འཇུག་བྱས་པས་རྒྱལ་པོ་ས་ཧ་དེ་ཝ་ཞེས་པར་འགྱུར་བ་
འབྱུང་ངོ་། །གྲོང་ཁྱེར་གསེར་གླིང་གི་ཤར་ཕྱོགས་སུ་གྲོང་ཁྱེར་མཎ་ཌ་ཀ་ཞེས་པ་ན་རྒྱུན་དུ་གནས་པའི་མི། རྨ་བྱའི་མདོངས་ལ་བརྒྱན་པ། ཞལ་རྒྱས་པ། ཨོཾ་སུ་མུ་ཁི་ནི་སརྦ་ཞེས་པའི་སྔགས་བརྗོད་ནས་ཟས་སུ་ལྦུ་བ་

88-1-76a

ཟ་བ་དེ་རྣམས་ཀྱི་ལྷག་མ་མེད་པར་བསོད་ནམས་དང་ཡེ་ཤེས་ཀྱི་ཚོགས་ཐོབ་བོ། །དེའི་རྒྱལ་པོ་སྦྲུལ་གྱིས་ཕྱོགས་བཞིའི་རྒྱན་བྱེད་པ་འབྱུང་ངོ་། །དེ་ནས་སྲིན་པོར་འགྱུར་ཏེ། དེའི་བུ་དང་བུའི་ཡང་བུའི་བར་
རྫོགས་ནས་རྒྱ་མཚོ་ཡིས་ཐམས་ཅད་ནུབ་པར་འགྱུར་རོ། །ལྷ་མོས་གསོལ་པ། ཀྱེེ་བཅོམ་ལྡན་འདས་ཅིའི་ཕྱིར་གནས་ཐམས་ཅད་རྫོགས་པར་མི་གསུང་ཐམས་ཅད་དུ་ཡོངས་སུ་གསུངས་པའི་བྱང་ཆུབ་སེམས་དཔའ་ཞེས་པ་
སྤངས་ནས་གསུངས་པ་ཅིའི་ཕྱིར། དེའི་ཕྱིར་འདི་སྐད་ལ་སོགས་པ་མི་བདེན་ནོ། །བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་ཆེན་མོ་ཉོན་ཅིག་ཉོན་ཅིག །གང་དང་གང་དུ་ང་ཡིས་གནས་བརྟན་པ། དེ་དང་དེ་ནི་སངས་
རྒྱས་ཀྱིས་བྱིན་གྱིས་བརླབས་པའོ། །གནས་གཞན་རྣམས་ནི་སངས་རྒྱས་མ་ཡིན་པའི་ལྷ་རྣམས་ཀྱིས་རྣམ་པར་བཏགས་པའོ། །གང་གྲུབ་པ་ཐོབ་པ་ཐམས་ཅད་ཀྱི་མིང་གནས་ཀྱིས་བཏགས་སོ། །སྡིག་པ་རེ་རེ་དག་པར་བྱེད་
པ་གང་དང་གང་ལ་ཡོད་པ་དེ་དང་དེ་ཏིང་ངེ་འཛིན་ནོ། །བུམ་པ་གསུམ་ལ་སོགས་པ་རྣམས་དང་། གང་དང་གང་ལ་ཕུང་པོ་ལྔ་རྣམས་ཡོད་པ་ལ་ལུས་ཞེས་བྱ་སྟེ། རྒྱལ་པོ་དང་རྒྱལ་སྲིད་རྣམས་དང་། རྣལ་འབྱོར་པ་དང་། 
རྣལ་འབྱོར་མ་རྣམས་ལ་དབུགས་དབྱུང་བ་དང་། དབུགས་འཇུག་པས་དག་པ་ནི་དཔེར་ན་དབང་པོ་དང་ཡུལ་བཞིན་ནོ། །བདེ་བར་གཤེགས་པའི་ལམ་དང་འབྲེལ་པ་ལ་སྐྱབས་སུ་གང་འགྲོ་བ་དེས་སྐྱེ་བ་འདི་ལ་བསྒྲུབ་པར་བྱས་པ་
ཐམས་ཅད་འགྲུབ་བོ། །གང་གིས་རྒྱལ་པོའི་གཏམ་རྒྱུད་འདི་ཀླགས་ན་དེས་ལྐོག་ཏུ་གྱུར་པའི་ཡེ་ཤེས་འཐོབ་བོ། །ལེའུ་སུམ་བཅུ་སོ་དྲུག་པར་རྩིས་ཀྱི་ཡེ་ཤེས་བརྗོད་པར་བྱ་སྟེ། འདས་པ་དང་། མ་འོངས་པ་དང་། ད་ལྟར་
བ་ཇི་ལྟར་ཤེས་པ་དེའི་བྱ་བ་བྱེད་དོ། །ཀྱེེ་ལྷ་མོ་ལེའུ་ཉི་ཤུ་རྩ་ལྔ་པ་ལ་སོགས་པར་མིང་གང་གིས་ཐམས་ཅད་ཤེས་པར་བྱེད་པར་ནུས་པ་དེའི་དུས་ཀྱི་ཡེ་ཤེས་སོ། །དེ་ལྟར་ཐམས་ཅད་བདུད་ཀྱིས་བསླུས་པར་མི་འགྱུར་རོ། །འདི་ནི་ནག་པོ་

88-1-76b

ཆེན་པོའི་རྒྱུད་ཀྱི་རྒྱལ་པོ་ལས་རྒྱལ་པོའི་གཏམ་བརྒྱུད་བསྟན་པའི་ལེའུ་སྟེ་བཅྭ་ལྔ་པའོ།། །། དེ་ནས་བཅོམ་ལྡན་འདས་ཀྱིས་བཀའ་སྩལ་པ། བསྒྲུབ་པར་བྱ་བ་རྒྱལ་པོ་འདོད་པས་རྒྱལ་པོ་ལ་བལྟ་བར་བྱའོ། །
བསྒྲུབ་པར་བྱ་བ་དངུལ་ཆུ་འདོད་པས་དངུལ་ཆུ་ལ་བལྟ་བར་བྱའོ། །བསྒྲུབ་པར་བྱ་བ་ལུས་གྲུབ་པར་འདོད་པས་ལུས་ལ་བལྟ་བར་བྱའོ། །བསྒྲུབ་པར་བྱ་བ་དེ་ཁོ་ན་འདོད་པས་དེ་ཁོ་ན་ལ་ལྟ་བར་བྱའོ། །བསྒྲུབ་པར་བྱ་བ་
འདོད་པའི་ཡོན་ཏན་འདོད་པས་འདོད་པའི་ཡོན་ཏན་ལ་བལྟ་བར་བྱའོ། །ལྷ་མོ་དེའི་ཕྱིར་བསྒྲུབ་བྱ་གཅིག་གྲུབ་ནས་ཐམས་ཅད་ཚེགས་མེད་པར་འགྲུབ་བོ། །དེ་སྤངས་པའི་གཞན་སྒྲུབ་པ་རྣམས་འབྲས་བུ་མེད་པ་ལ་འབད་རྩོལ་
བྱེད་པའོ། །མཚན་མ་གཅིག་པ་འམ། དུར་ཁྲོད་དམ་ཆུ་འགྲམ་རྣམས་སུ་རྨ་མེད་པ་མ་གོད་པའི་རོའི་སྟེང་དུ་བསྡད་ནས་སྔགས་བརྒྱ་ཕྲག་བརྒྱད་བཟླས་ན་སྔགས་ཀྱི་རྗེས་ལ་ལྕེ་རེག་ཏུ་འོང་སྟེ། དེ་བཅད་ནས་ལག་པ་གཡས་
པས་བཟུང་ན་རལ་གྲིའི་དངོས་གྲུབ་འགྲུབ་བོ། །དེ་ནས་གཞན་ཡང་བརྗོད་པར་བྱ་སྟེ། ཚྭ་བླངས་ལ་རོ་ལ་བསྣུན་ན་གསེར་དྲུག་ནམ་བརྒྱད་སྟེར་བར་བྱེད་དོ། །ཚེས་བརྒྱད་དམ་བཅུ་འམ་བཅུ་བཞི་རྣམས་ལ་རང་གི་བཞི་མཉམ་བླངས་
ནས་ལུས་ལ་བྱུགས་ཏེ་ཕྱི་ནས་བྲམ་ཟེའི་ཐོད་པའི་སྟེང་དུ་བསྡད་ནས། སྨན་མུ་ཏ་ཀ་དང་ཤི་ཧླ་ཡིས་ལྷ་མོ་ལྔ་ལ་སོགས་པའི་མར་མེ་སྦར་ལ་རྡོ་རྗེའི་ཁང་པར་སྔགས་སྟོང་ཕྲག་གཅིག་བཟླས་པར་བྱ་སྟེ་དེ་ཡིས་བཟླས་པ་བྱ་བའི་སྔགས་
ཀྱི་རྒྱལ་པོ་ནི་འདི་ཡིན་ཏེ། ཨོཾ་མ་ཧཱ་ཙཎ་ཌ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ་ཅེས་པའོ། །ནག་པོའི་ཕྱོགས་ཀྱི་ཚེས་བརྒྱད་ལ་ཆུ་འགྲམ་དུ་སོང་སྟེ། མེ་ཏོག་ཨ་པ་རཱ་ཙི་ཏ་ཡིས་མཎ་ཌལ་བྱས་ཏེ་ཆུ་འགྲམ་གྱི་བྱེ་མའི་སྟེང་དུ་གནོད་
སྦྱིན་གྱི་ཀཱི་ལི་ཀཱི་ལའི་གཟུགས་བརྙན་ཡོངས་སུ་འདྲི་བ་བྱས་ལ་དྲི་སྣ་ཚོགས་ཀྱིས་ལུས་ལ་བྱུག་གོ། །ཕྱི་ནས་དེ་རུ་བསྡད་ནས་སྔགས་བཟླས་པ་ནི། ཨོཾ་སུཿཥཿཧཱུྃ་ཞེས་པའི་སྔགས་སྟོང་ཕྲག་ལྔ་བཟླས་ན་ཁྱོད་བཟའི་ཞེས་

88-1-77a

སྨྲ་ཞིང་འོང་སྟེ། སྒྲུབ་པ་པོས་ཀྱང་འཇིགས་པར་མི་བྱ་བར་གཡོག་པོ་ཁྱོད་ང་ཅག་གི་དོན་གྱིས་ཤིག་ཅེས་བརྗོད་ཅིང་དེའི་མགོ་ལ་ཨརྒ་ཕུལ་ན་གསེར་སྲང་ལྔ་བརྒྱ་ལྔ་བརྒྱ་ཉིན་རེ་ཞིང་སྟེར་བར་བྱེད་ཅིང་བཅུད་དང་
བཅུད་ཀྱིས་ལེན་དང་ངོ་། །གལ་ཏེ་མ་བྱུང་ན་དེའི་ཚེ་མུ་ཟི་དང་། ལྷང་ཚེར་དང་། སུ་པརྞ་མ་ཀྵི་རྣམས་ལག་པ་གཡོན་པས་བཟུང་ལ། དེའི་སྤྱི་སྟེངས་སུ་ཐལ་ལྕག་གསུམ་རྒྱབ་ན་ངེས་པར་འོང་ངོ་། །མ་འོངས་ན་མགོ་ཨརྫ་ཀའི་
འབྲས་བུ་ལྟར་འགས་པར་འགྱུར་བས་རིམ་པ་དེ་ལྟར་བསྒྲུབ་པ་བྱས་ན་གང་འདོད་པ་དེ་བྱེད་དེ། དེ་ལྟར་བྱས་ན་གནོད་སྦྱིན་བརྒྱད་ཀ་ཡང་འོང་བར་འགྱུར་རོ། །རྣལ་འབྱོར་པས་གྲོང་ཁྱེར་གྱི་མཐར་སོང་ལ་ནག་པོ་ཆེན་པོ་ཕྱག་
བཞི་པའི་སྔགས་སྟོང་ཕྲག་ལྔ་སོང་བ་དང་། ཕྱི་ནས་ནག་པོ་ཆེན་པོའི་དཀྱིལ་འཁོར་བཞེངས་ལ་ཤ་ཎའི་རྩ་བ་དང་། སྨན་ཛ་ཏ་ཀའི་ལྤགས་པ་དང་། སྨན་ཏི་མི་རིའི་རྩ་བ་རྣམས་བཏགས་པས་ལུས་ལ་བྱུགས་ན། འཇིགས་
བྱེད་ཆེན་པོ་སྒྲ་ཆེན་པོ་དང་བཅས་ནས་འོངས་པས་ཙན་དན་གྱི་ཆུ་དང་ནམ་མཁའི་ཆུ་ཡིས་ཨརྒ་དབུལ་ཏེ། དེ་མཐོང་བ་ལ་འཇིགས་པར་མི་བྱའོ། །སྒྲུབ་པའི་གྲོགས་པོ་བྱང་ཕྱོགས་ན་གནས་པས་སྐྱེས་བུ་ཞེས་པ་དང་བཅས་པས་
ཕྱོགས་གསུམ་དུ་བསྒོ་བ་བྱས་ན་གང་འདོད་པ་དེ་ཡིས་བྱེད་དོ། །གཞན་ཡང་སྐྱེད་མོས་ཚལ་དུ་སོང་ནས་ཤིང་མྱ་ངན་མེད་པའི་འོག་ཏུ་སྟག་གི་ལྤགས་པའི་སྟེང་དུ་བསྡད་ལ་གཅེར་བུར་ཕུད་སྐྲ་བཀྲོལ་བ། བདག་སྲུང་བ་ཡན་
ཆོད་དེ་ལྟར་བྱས་ནས་ཤིང་པུ་པ་སིམ་པའི་ལོ་མའི་ཁུ་བས་ལུས་ལ་བྱུགས་ནས་ནག་པོ་ཆེན་པོ་ཕྱག་གཉིས་པའི་སྔགས་སྟོང་ཕྲག་གཅིག་བཟླས་པ་དང་། གཏོར་མ་སྦྱིན་པ་ནི་མར་དང་། སྦྲང་རྩི་དང་། སུལ་ཀ་དང་། སྲན་
མ་དང་། ཏུ་མུ་ལ་དང་། ཆང་དང་། ཤ་རྣམས་ཀྱིས་ཡང་དག་པར་བརྒྱན་ལ་ཕྱི་ནས་རལ་གྲི་ཐོགས་ནས་སྤྱོན་ཞེས་པ་ཕྱོགས་གསུམ་བརྗོད་པ་དང་། དགའ་བ་ཆེན་པོ་ཐལ་མོ་རྡེབས་ཤིང་འོང་སྟེ། དེ་ལ་འཇིགས་པར་མ་བྱས་

88-1-77b

ན་རྣལ་འབྱོར་པ་དངོས་གྲུབ་འདོད་པས་མཐོང་བ་དང་གསེར་སྲང་སྟོང་ཕྲག་གཅིག་སྟེར་བར་འགྱུར་རོ། །མཚན་མ་གཅིག་པར་སོང་ནས་ཤར་ཕྱོགས་སུ་ཁ་བལྟས་ཏེ་ནག་པོ་ཆེན་པོའི་སྔགས་སྟོང་ཕྲག་ལྷག་པ་བཟླས་ཤིང་དེའི་དུས་
སུ་བདུད་རྩི་ལྔས་ལུས་ལ་བྱུག་གོ། །ཡང་སྔགས་བརྒྱ་ཕྲག་བཟླས་པའི་ཕྱི་ནས་སུ་པ་སིམ་པའི་ཁུ་བས་ལུས་ལ་བྱུགས་ཏེ་རོ་སྟེང་དུ་བསྡད་དེ་སྔགས་བཟླས་པ་ནི། ཨོཾ་མུཿཧཱུཾཿཛཿབཾ་ཧིཿཞེས་བརྗོད་པས་ཐུན་ཚོད་གསུམ་
ན་གནོད་སྦྱིན་མོ་སྣ་ཚོགས་པའི་གཟུགས་བཟུང་ནས་སྣ་ཚོགས་པའི་རྫས་ཀྱི་མཆོད་པ་བཟང་པོ་དང་བཅས་པར་འོངས་ཏེ། གྲོགས་བྱེད་པས་ལས་གཞན་དུ་མ་ཡིན་པས་ཉིན་རེ་ཞིང་གསེར་སྲང་ལྔ་ལྔ་སྟེར་བར་བྱེད་དོ། །
ཤིང་བསྲུང་བ་ལྡན་གྱི་དྲུང་ངམ་མེ་ཏོག་ཅན་གྱི་དྲུང་དག་གོང་དང་མཚུངས་སོ། །གཞན་ཡང་ལེགས་པར་བརྗོད་པར་བྱ་སྟེ། ཟླ་བ་དང་ཉི་མ་དགུག་པ་ནི་སངས་རྒྱས་ཀྱི་རྟེན་ཡོད་པར་སོང་ལ་གཏོར་མ་ཆེན་པོ་བྱིན་ནས་རྒྱ་
སྐྱེགས་དང་ཆུ་དང་ཙན་དན་རྣམས་ལེགས་པར་སྦྱར་བས་ལུས་ལ་བྱུགས་ཏེ། རོའི་སྟེང་དུ་ཤར་དུ་བལྟས་པས་བསྡད་ལ་ཡང་བདུད་རྩི་ལྔས་ལུས་ལ་བྱུགས་ནས་སྒྲ་ཆེན་པོ་དང་བཅས་པས་སྔགས་སྟོང་ཕྲག་ལྔ་བཟླས་ན་འདིར་
ཉི་མ་འོང་སྟེ། འོངས་པ་དང་བྱང་ན་གནས་པའི་སྒྲུབ་པོས་གི་ཧང་དང་ཙན་དན་དག་གིས་ཨརྒ་བྱིན་ན་ངས་ཅི་བྱ་བ་ཞེས་ཉི་མས་བརྗོད་པར་འགྱུར་རོ། །དེ་ལ་སྒྲུབ་པ་པོས་བཅུད་ལེན་གྱི་དངོས་གྲུབ་བདག་ལ་གསོལ་
ཞེས་ཕོགས་གསུམ་དུ་བརྗོད་དོ། །ཤིང་ཀུན་དའི་འོག་ཏུ་རྩ་བ་བདུན་པས་རྒྱན་བྱས་ལ་ཇི་ལྟ་བའི་ཆོ་གས་གཏོར་མ་བྱིན་ནས་མེ་ཏོག་པད་མ་བཀྲམ་པའི་སྟེང་དུ་བསྡད་ནས་སྔགས་བཟླས་ན་ཟླ་བ་ངེས་པར་འོངས་ནས་
གང་འདོད་པ་དེ་བྱེད་དོ། །དེའི་ཁྱིམ་དུ་མཉམ་པར་བཞག་སྟེ། སིན་དྷུ་ར་དང་སྤོས་ཆུ་དག་གིས་ལུས་ལ་བྱུགས་ནས་རྣལ་འབྱོར་པས་མིའི་ཐོད་པའི་སྟེང་དུ་བསྡད་དེ། ནག་པོ་ཆེན་པོའི་ཐང་ཀའི་མདུན་དུ་སྔགས་སྟོང་ཕྲག་

88-1-78a

བརྒྱད་བཟླས་ན་དེར་དུས་ཅན་མ་འོང་ངོ་། །གལ་ཏེ་མི་འོང་ན་སྤྱི་བོ་ལ་ཐལ་མོ་རྡེག་པའི་ཕྱག་རྒྱ་བྱས་ན་ངེས་པར་འོངས་ན་ཏཱི་ན་ར་བརྒྱ་བརྒྱ་ཉིན་རེ་ཞིང་སྟེར་ཏེ་གཡོག་མོར་ངེས་སོ། །གཞན་ཡང་ཙ་ཀཱ་བསྒྲུབ་
པར་བྱ་སྟེ། འོན་ཀྱང་ཕྱག་རྒྱ་དཔྱི་གཡོན་པར་བཅས་ན་ངེས་པར་འོངས་ནས་ནོར་བུ་དང་ནོར་བུ་རིན་པོ་ཆེ་སྟེར་རོ། །ཡང་དེ་ཡིས་བསྒྲུབ་པར་བྱ་སྟེ། རྣལ་འབྱོར་མ་གཉིས་ཀྱིས་བཅུད་དང་བཅུད་ཀྱིས་ལེན་གང་འདོད་པ་དེ་སྟེར་ཏེ། བླང་
བའི་སྔགས་ནི་ཨོཾ་ཡཀྵ་ཧཱུྃ་ཊཿཞེས་པས་རྣལ་འབྱོར་མ་ཐམས་ཅད་ཅ་ཅོའི་སྒྲ་སྒྲོགས་ཤིང་ས་དང་ཕེཾ་ཆེན་པོའི་སྒྲ་སྒྲོགས་ཤིང་འོངས་པས་འཇིགས་པར་མི་བྱ་བར་མཐོང་བ་དང་བྱང་གི་སྒྲུབ་པ་པོས་བརྗོད་པ་ཁྱོད་ཀྱིས་ངའི་གཡོག་མོ་
གྱིས་ཤིག་ཅེས་བྱའོ། །དུར་ཁྲོད་དུ་སོང་ལ་ནག་པོ་ཆེན་པོའི་ཐང་སྐུའི་མདུན་དུ་མ་ཧེའི་ཐོད་པའི་སྟེང་དུ་མཉམ་པར་གཞག་པས་ཉིན་ཞག་བདུན་དུ་སྔགས་བཟླས་ན་ཐུན་ཚོད་གསུམ་ནས་ནག་པོ་ཆེན་པོ་འཁོར་དང་བཅས་པ་འོང་སྟེ། 
དེ་རྣམས་མཐོང་ཡང་འཇིགས་པར་མི་བྱའོ། །སྐྱེ་སྒྲུབ་པ་པོ་ཁྱོད་བཟའ་བོ་ཞེས་དེས་སྨྲ་ན། དེ་ལ་བྱང་ན་གནས་པའི་སྒྲུབ་པ་པོས་ཧཱུྃ་སོད་ཅིག་ཅེས་བརྗོད་ནས་གི་ཧང་དང་ཙན་དན་དག་གི་ཆུས་ཨརྒ་དབུལ་ལོ། །ཕྱི་ནས་དེ་ཡིས་
གསུངས་པ། ཀྱཻ་དཔའ་བོ་ཆེན་པོ་ཅིའི་ཕྱིར་ང་འབོད་ཅེས་གསུངས་ན། བྱང་ན་གནས་པའི་སྒྲུབ་པ་པོས་གསོལ་པ། གང་དང་གང་གི་དུས་སུ་ཁྱོད་ལ་ལས་བཅོལ་ན་གཏོང་དགོས་པ་དེའི་དོན་དུ་ཞེས་བརྗོད་དོ། །དངོས་གྲུབ་གང་དང་
གང་འདོད་པ་སྦྱིན་ནོ་ཞེས་དེས་གསུངས་སོ། །དེ་ལ་སེང་གེའི་ཕྱག་རྒྱ་བཅས་ན་རྙེད་པར་དཀའ་བའི་སེང་གེའི་ལུས་ཀྱང་འཐོབ་བོ། །འདི་ཡིས་རྫས་དང་དངོས་གྲུབ་སྣ་ཚོགས་ཀྱང་སྟེར་བར་འགྱུར་རོ། །དེའི་སྔགས་ནི་ཨོཾ་ཨཱ་གཙྪ་
མ་ཧཱ་ཧཱུྃ་ཧོ་ཧོ་ཞེས་སོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་གཡོག་མོ་བསྒྲུབ་པའི་ལེའུ་སྟེ་བཅུ་དྲུག་པའོ།། །། གཞན་ཡང་དབང་དུ་བྱ་བའི་ལེའུ་བཤད་པར་བྱ་སྟེ། བཅོམ་ལྡན་འདས་ཀྱིས་བཀའ་

88-1-78b

སྩལ་པ། ལྷ་མོ་ང་ཡིས་སྨན་དང་སྔགས་དང་ཕྱག་རྒྱ་རྣམས་བཤད་པར་བྱའོ། །ལྷ་མོས་གསོལ་པ། ཀྱེེ་བཅོམ་ལྡན་འདས་སྨན་གྱི་འབྲས་བུ་ཆེན་པོ་གསུངས་ཤིག །བཅོམ་ལྡན་འདས་ཀྱིས་བཀའ་སྩལ་པ། ཚེས་བརྒྱད་
ལ་སྦྱིན་སྲེག་གི་ཆོ་ག་གང་ཡིན་པ་ལྟར་བྱས་ལ་ཤིང་ཨརྒའི་འབྲས་བུའི་བལ་བླངས་པ་ལ་དུར་ཁྲོད་ཀྱི་རས་ཀྱིས་དཀྲིས་པ་དང་། གི་ཧང་དང་། བདུད་རྩི་ལྔ་དང་། མི་ལྕེ་རྣམས་ཕྱེ་མར་བཏགས་ཏེ་སྡོང་བུ་བྱས་ལ་ཟངས་
ཀྱི་ནང་དུ་མིའི་ཚིལ་ལ་མིག་སྨན་ཕབ་ལ་རང་གི་བྱང་སེམས་དང་བསྲེས་ནས་ཐིག་ལེ་བྱས་ཏེ། གང་དང་གང་གི་བུ་མོ་ལ་བལྟས་ན་འབབ་པར་འགྱུར་རོ། །གལ་ཏེ་མི་འབབ་ན་ནག་པོ་ཆེན་པོ་མ་ཡིན་ཏེ། སངས་རྒྱས་ཀྱི་བསྟན་
པ་བསྲུང་བར་དམ་བཅས་པ་སྤངས་པས་མཚམས་མེད་པ་བྱས་པའོ། །ཨོཾ་ཧྲཱིཿཀྵཿཨ་མུ་ཀི་ཨཱ་གཙྪན་ཏི་ཡ་ཞེས་པའི་སྔགས་འདིས་ཤིང་སིམ་པའི་ལོ་མས་སྦྱིན་སྲེག་སྟོང་ཕྲག་ལྔ་བྱས་ཏེ་གོས་དང་བྲལ་ཞིང་སྐྲ་
གྲོལ་བ་སེམས་མ་ཡེངས་པར་བསྒོམས་ན། རྐང་པའི་དྲུང་དུ་སྔགས་ཀྱི་ནུས་པས་ངེས་པར་འོང་སྟེ། གཡོག་མོའི་གཟུགས་ཀྱིས་བདེ་བ་སྐྱེད་ཅིང་གཞན་གྱི་དབང་དུ་མི་འགྱུར་རོ། །གལ་ཏེ་མི་འོང་ན་སྔགས་མགོ་མཇུག་
བཟློག་ནས་བརྒྱ་རྩ་བརྒྱད་བཟླས་བརྗོད་བྱས་ན་མགོ་གས་ནས་འཆི་ཞིང་དངོས་གྲུབ་མཆོག་སྟེར་རོ། །དགུན་ཟླ་ཐ་ཆུངས་ཀྱི་ཚེས་བཅུ་བཞི་ལ་ནག་པོ་ཆེན་པོ་སྐུ་མདོག་དམར་པོར་སྤྲོས་ཏེ་དེ་ལ་མཆོད་པ་རྒྱ་ཆེན་པོ་བྱས་ནས་ཁ་
ཤར་ཕྱོགས་སུ་བལྟས་ལ་ཆང་དང་། ཨུཏྤལ་དམར་པོ་དག་གིས་སྟོང་ཕྲག་ཕྱེད་དུ་སྦྱིན་སྲེག་བྱས་ན་ནམ་ཕྱེད་ནས་རྒྱལ་པོའི་བུ་མོ་ཡང་དབང་དུ་འགྱུར་ན། གཞན་གྱི་བུ་མོ་ལ་སྨོས་ཅི་དགོས་གལ་ཏེ་དབང་དུ་མ་གྱུར་ན། 
སྔགས་བཟླས་པས་ངེས་པར་དབང་དུ་འགྱུར་ཏེ། འཛམ་བུའི་གླིང་ན་རྙེད་པར་དཀའ་བའི་དབང་དུ་བྱ་བའོ། །དེའི་སྔགས་ནི་འདི་ཡིན་ཏེ། ཨོཾ་བཛྲ་ཧཱུྃྃྃྃྃྃྃ་ཕཊ་སྭཱ་ཧཱ་ཞེས་པའོ། །སྨན་སཱ་ལུ་ཀ་དང་ཀྱི་ལྕེ་བ་དང་ཙན་དན་དང་ཨ་ཀ་

88-1-79a

རུ་དང་བདུད་རྩི་ལྔ་རྣམས་ཏིལ་མར་གྱིས་ཕྲུལ་ནས་ཕྱག་བཅུ་དྲུག་པའི་སྔགས་ཀྱིས་ཕོགས་ཉི་ཤུ་རྩ་གཅིག་བཟླས་ཏེ། དེས་ཁ་བཀྲུས་ཏེ་རྒྱལ་པོའི་ཕོ་བྲང་དུ་བསྡད་ནས་རྒྱལ་པོ་ལ་ཁྲོ་ཞིང་ཅུང་ཟད་སྨྲ་དང་འཐུན་པའི་
ཚིག་སྨྲར་འོང་ངོ་། །ངོ་མཚར་ཅན་གྱིས་སྦྱོར་བ་འདི་སངས་རྒྱས་ཐམས་ཅད་ཀྱིས་ཡོངས་སུ་བསྒྲགས་པ་སྟེ། ཕྱ་རྒོད་ཀྱི་ཤ་གི་ཧང་དང་བཅས་པ་རང་གི་བྱང་ཆུབ་སེམས་ཀྱིས་ཕྲུལ་ལ་བུ་མོ་ལ་སྦྱིན་ནོ། །བཟླས་པའི་སྦྱོར་བས་གཡོག་
མོར་ངེས་པར་འགྱུར་ཏེ། དབང་དུ་བྱ་བ་ཆེན་པོའི་སྦྱོར་བའོ། །བ་ལང་གི་ཞག་དང་། ནེ་ཚོའི་ཞག་དང་། ཏིལ་གྱི་མར་རྣམས་ཀྐོ་ལའི་ས་བོན་དང་ཕྲུལ་ནས་བུ་མོ་ལ་བསྣུན་ན་ཕྱི་ནས་ཁུ་བ་འཛག་ཅིང་རང་ལུས་སྟེར་བར་འགྱུར་ཏེ། 
མ་ཤི་བར་དུ་སྡོད་དོ། །གྲོ་གའི་ལོ་མ་ལ་གི་ཧང་དང་རྒྱ་སྐྱགས་ཀྱི་ཕོ་ཚོས་དང་སིན་དྷུ་ར་རྣམས་སྐྱུ་རུ་རའི་ཁུ་བས་ཕྲུལ་ལ། འཁོར་ལོ་གྲུ་གསུམ་ཆ་ཤས་གསུམ་པ་བྲིའོ། །དེའི་དབུས་སུ་སྡེ་ཚན་གསུམ་པའི་དང་པོ་ཅུང་ཟད་ར་ལ་
ཞོན་པ་སྣ་ལྡན་གྱིས་བརྒྱན་པ་དབུས་སུའོ། །ཡང་ཕྱི་རོལ་ཏུ་ཨོཾ་ཛོཾ་ཨ་མུ་ཀི་ཀཱ་མ་དེ་བ་ཨ་མུ་ཀ་ས་ཡ་ཧཱ་ཀཱ་རཱ་ཧཱཿཧཿཧཿཕཊ་སྭཱ་ཧཱ། ཞེས་པ་བཀོད་ལ་དེ་དུར་ཁྲོད་ཀྱི་རས་ལ་གཏུམས་ཏེ་ཙན་དན་གྱི་ཆུ་ལ་བཅུག་ནས་ཐུན་ཚོད་
གཅིག་བཞག་ན་དུས་དེ་ཉིད་དུ་ངེས་པར་དབང་དུ་འགྱུར་ཏེ། གང་འདོད་པ་དེ་བྱེད་དོ། །ཡང་ཉིན་རེ་ཞིང་དྷ་དུར་སུམ་བརྩེག་གི་ས་བོན་ལ་སྔགས་འདིས་སྟོང་ཕྲག་ལྔ་བསྣུན་ན་ཉིན་ཞག་ལྔ་ན་བཱི་བཱ་ཧ་དབང་དུ་འགྱུར་རོ། །ཨོཾ་སྟྲི་ཀྵཱིཿ
ཨ་མུ་ཀྃ་ཨཿསྱཿབི་ཏཱ་བི་བཱ་ཧོ་ན་མ་ཧྱྃ་དྃ་པ་ཡ་སྭཱ་ཧཱཿ། ཞེས་པའི་སྔགས་ནག་པོའི་ཚེས་བརྒྱད་དམ་བཅུ་གཅིག་དག་ལ་ཨུཏྤལ་ནག་པོ་དང་། མར་དང་སྦྲང་རྩི་དང་། བུ་རམ་རྣམས་ཡང་དག་པར་སྦྱར་བས་སྦྱིན་སྲེག་བརྒྱ་ཕྲག་ལྔ་
བྱས་ན་ཉིན་ཞག་བདུན་གྱིས་རྣལ་འབྱོར་པས་བུ་མོ་དབང་དུ་འགྱུར་རོ། །གལ་ཏེ་དབང་དུ་མ་གྱུར་ན་སྔགས་བརྒྱ་བརྒྱ་བཟླས་ན་ངེས་པར་དབང་དུ་འགྱུར་རོ། །དུར་ཁྲོད་ཀྱི་ས་དང་ལྡོང་རོས་དང་ཡབ་ཀྵར་དང་བུ་རམ་རྣམས་རང་གི་ཁུ་བ་

88-1-79b

བྲུལ་ནས་ལུས་ལ་བྱུགས་ན་ཕྱུགས་ཐམས་ཅད་ངེས་པར་དབང་དུ་འགྱུར་རོ། །འདི་ནི་དཔལ་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་དབང་དུ་བྱ་བའི་ལེའུ་སྟེ་བཅུ་བདུན་པའོ།། །། གཞན་ཡང་ཕ་རོལ་གྱི་བྱ་བ་ཆུད་གསན་པར་
བྱ་བའི་ལེའུ་བཤད་པར་བྱའོ། །མི་གང་གིས་ལོག་པར་བྱེད་པ་དེ་བསད་པའི་སྨན་ཤིན་ཏུ་མཆོག་ཏུ་གྱུར་པ། ཨ་མུ་ཧ་བ་ཏུས་ལ་སྐམས་ཏེ་གཏོར་ན་བྱ་བ་ངེས་པར་ཆུད་གསོན་ནོ། །ལྡོང་རོས་གཏོར་ན་ངེས་པར་ཆུད་གསོན་ནོ། །
བུད་མེད་ཀྱི་ཁྲག་གཏོར་ན་བྱ་བ་ངེས་པར་ཆུད་གསོན་ནོ། །རྗེས་སུ་ཤི་བའི་རས་གྱོན་ན་ངེས་པར་ཆུད་གསོན་ནོ། །འདི་ནི་དཔལ་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་ཕ་རོལ་གྱི་བྱ་བ་ཆུད་གསོན་པའི་ལེའུ་སྟེ་བཅྭ་བརྒྱད་པའོ།། །།  
གྲོང་ཁྱེར་གང་ན་ལྷ་མོས་འདོད་པ་གསུམ་དང་ལྡན་པའི་སངས་རྒྱས་ཀྱི་མཚན་ཉིད་བྱེད་པ་ཡོད་པ་དེ་རེངས་པར་བྱེད་པའི་གནས་ཏེ། དེ་འདི་རྗེས་སུ་འགྲོའོ། །དེའི་དུས་སུ་སངས་རྒྱས་ཐམས་ཅད་འདུས་པའི་ནག་པོ་ཆེན་པོ་ཞེ་སྡང་
གི་རང་བཞིན་ཞལ་གཅིག་པ། སྐུ་མདོག་དཀར་པོ་འཇིགས་པ་ཆེན་པོར་བྱེད་པ། གཡས་བརྐྱང་བའི་འོག་ཏུ་ལྷ་མ་ཡིན་ནག་པོ་སྒྱེལ་བ། གྲི་གུག་དང་ཐོད་པ་ཕྱག་ན་བསྣམས་པ། སྤྱན་གསུམ་པ་རྒྱན་ཐམས་ཅད་ཀྱིས་བརྒྱན་པ། 
འདི་བསྒོམ་པ་ཙམ་གྱིས་ཐམས་ཅད་རེངས་པར་འགྱུར་རོ། །བསྒོམས་པས་སྐྱོ་ན་སྔགས་ཀྱི་རྗེས་སུ་འབྲང་བ་སྟེ། ཨོཾ་མུཿཛཿཨ་མུ་ཀཾ་སྟྃ་བྷཱ་ཡ་ཧཱུྃ་ཕཊ་ཅེས་པ་ཁྲི་ཕྲག་གཅིག་སྔོན་དུ་བསྙེན་པ་བྱས་ན་དངོས་པོ་ཐམས་ཅད་རེངས་པར་
འགྱུར་རོ། །མེ་ཏོག་ཅན་གྱི་རས་ལ་ཚེས་བརྒྱད་དམ་བཅུ་བཞི་ལ་ལྷ་རྣམས་ཀྱི་རྗེ་བྲི་བར་བྱ་སྟེ། བདུད་རྩི་ལྔ་ཉིན་རེ་བཞིན་ཁར་བཅུག་ལ་རེངས་པར་བསྒོམ་པར་བྱའོ། །འདིར་མི་གང་གིས་བསྒྲུབ་ཐབས་གཞན་བསྒྲུབ་པ་སྟེ་རྐང་
པ་བཞི་ལ་སོགས་པ་ཡང་དག་པར་རེངས་པར་བྱ་བ་ནི་དེའི་དུས་སུ་བློ་གྲོས་ཅན་གྱིས་སྨན་བརྩམ་པར་བྱ་སྟེ། བྱི་བའི་ཤ་དང་། རུས་སྦལ་གྱི་ཤ་དང་། སྦྲུལ་གྱི་ཤ་རྣམས་ཕྱེ་མར་

88-1-80a

བྱས་ལ་བསྣུན་ན་ཕྱུགས་ཐམས་ཅད་རེངས་པར་འགྱུར་རོ། །གཞན་ཡང་སྨན་སུ་ཏ་ཀ་དང་། ཕ་ལ་ནི་དང་རུས་སྦལ་གྱི་མགོ་བོ་དང་། སྨན་ཛ་ཡན་ཏེ་རྣམས་བསྲེས་ནས་གཏོར་ན་མི་རྣམས་ངེས་པར་
འགྱུར་རོ། །གུ་གུལ་དཀར་པོ་དང་། སྨན་ཀ་ན་རྡུ་ཀ་ཡ་ར་ཀའི་སིམ་བཱུ་རི་དང་ཕུ་ལ་དེ་རྣམས་ཆ་མཉམས་ཏེ་སྦྱངས་པ་གཏོར་ན་སྦྲུལ་རེངས་པར་འགྱུར་རོ། །ཤུ་དག་དང་། སྨན་ཀུ་མཱ་རཱི་དང་། བེ་ལི་དྷ་རྣམས་བསྣུན་ན་ངེས་པར་
རེངས་པར་འགྱུར་རོ། །སྨན་སིམ་བྷེ་དང་། ཀ་ལ་ད་དང་། ཀ་ཀྴ་ཏྭི་དང་རང་འབྱུང་རྣམས་ཕྲེང་བར་བྱས་རྐེད་པར་བཅིངས་ན་ས་བོན་རེངས་པར་འགྱུར་རོ། །སྤྲིན་རེངས་པར་བྱེད་པ་ཡང་དེ་ཉིད་དོ། །སྤྲིན་རེངས་པ་དགྲོལ་
བ་བརྗོད་པར་བྱ་སྟེ། སྨན་སི་ཛི་རཱ་ད་དང་པུ་ག་ནཱ་དང་། ས་མ་ན་ད་དང་། རུ་སྦལ་རྣམས་ཆ་བསྙམ་པ་ཡིས་སྤྲིན་རེངས་པ་གྲོལ་བར་འགྱུར་རོ། །འདི་ནི་དཔལ་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་རེངས་པའི་ལེའུ་སྟེ་བཅུ་དགུ་
པའོ།། །། གཞན་ཡང་འདིར་ཡང་དག་པར་བརྗོད་པར་བྱ་སྟེ། བྱ་བ་མ་ཡིན་པ་བྱེད་པ་རྣམས་བསད་ནས་འཇིག་རྟེན་པ་བདེ་བ་ལ་དགོད་པའི་ཕྱིར་འཇིགས་བྱེད་ཆེན་པོ་སྒོམས་པར་བྱ་བ་ནི་ཞལ་གཅིག་པ། ཁ་དོག་ནག་པོ་
ལྟོ་འཕྱང་བ། གྲི་གུག་དང་ཐོད་པ་ཕྱག་ན་འཛིན་པ། མ་ཧེ་ལ་ཞོན་པ་ཀླུ་བརྒྱད་ཀྱིས་བརྒྱན་པ། མཆེ་བ་གཙིགས་པ་དབུ་སྐྲ་གྱེན་དུ་འབར་བ། འཇིགས་པར་བྱེད་པ་ཡང་འཇིགས་པར་བྱེད་པ། ལོ་བཅུ་དྲུག་པའི་ཆ་བྱད་
འཛིན་པ། མཚན་མ་གྱེན་དུ་བསྒྲེང་བ། གཅེར་བུ་སྦོམ་ལ་ཐུང་བ། ས་བོན་ཡི་གེ་ཧཱུྃ་ལས་འོད་ཟེར་འཕྲོ་བ་འདི་རྣམས་དང་ལྡན་པ་བསམས་པ་ཙམ་གྱིས་དགྲ་ཐམས་ཅད་བརླག་པར་འགྱུར་ཞིང་རྒྱུན་གཅོད་པ་དང་། མགོ་བོ་འགས་སོ། །
དེའི་སྔགས་ནི་ཨོཾ་མཾ་ཧཱུྃ་ཨ་མུ་ཀ་སྲུཾ་ཕཊ་ཅེས་པ་གྲི་ཕྲག་གཅིག་གིས་བསྙེན་པའོ། །བཀྲ་ཤིས་པའི་ཡན་ལག་ཏུ་ནག་པོ་ཆེན་པོའི་བརྒྱད་ལ་མེ་ཏོག་ཅན་གྱི་རས་ལ་བྲིས་པ་དང་བདུད་རྩི་ལྔ་ཁར་བཅུག་ལ་བསྒོམས་ལ་རབ་ཏུ་གནས་པར་

88-1-80b

བྱ་བ་ནི་ཚེས་བཅུ་བཞིའི་ནུབ་མོ་དམ་ཚིག་གི་རོ་རྣམས་རྣལ་འབྱོར་པ་ཉི་ཤུ་རྩ་གཅིག་དང་སྟབས་གཅིག་ཏུ་རྣལ་འབྱོར་མ་ལྔ་ཤིན་ཏུ་དག་པ་དམ་ཚིག་སྐྱོང་བར་སེམས་པ་རྣམས་ཀྱིས་སྔགས་འདི་སྟོང་ཕྲག་གཅིག་བཟླས་སོ། །
སློབ་དཔོན་གྱིས་སྔགས་འདི་ལན་བདུན་བཟླས་ལ་མེ་ཏོག་པད་མ་བརྒྱ་རྩ་བརྒྱད་ཀྱིས་མཆོད་པ་དང་། མཎྡལ་གྲུ་གསུམ་བྱས་ཏེ་དེ་ལ་རྡོ་རྗེའི་ཕྲེང་བས་བསྐོར་བ་དང་། རལ་གྲི་དང་། གུ་གྲི་གུག་བཀོད་ལ་ཁྲག་གིས་བཀྲུ་བར་བྱ་
བ་དང་། འཇིགས་བྱེད་ཆེན་པོ་ལ་བདུད་རྩི་ལྔས་བསྣུན་པར་བྱ་བ་རྣམས་ཀྱི་སྔགས་ནི་ཨོཾ་བུཾ་ཨཿབྷཻ་ར་ཝ་སྭཱ་ཧཱ། ཞེས་པ་ཡིས་རབ་ཏུ་གནས་པར་བྱས་ཏེ། དེའི་ནུབ་མོ་ཐམས་ཅད་ཀྱིས་ཁྲག་དང་ཆང་བཏུང་བར་བྱ་ཞིང་བཟའ་
ཐམས་ཅད་རྫོགས་པར་བཟའོ། །དེ་ནས་གསེར་དྲུག་ནམ་རེ་རེ་དབུལ་བ་བྱས་ན་འཇིགས་བྱེད་ཆེན་པོས་ངེས་པར་བྱིན་གྱིས་རློབ་སྟེ་གླུ་དང་སྒྲ་ཡང་བྱའོ། །གང་གི་ཚེ་གསོད་པར་བྱེད་པའི་དུས་ནི་ཚེས་བརྒྱད་དམ། བཅུ་བཞི་ལ་
ཐུང་སྐུ་བཀྲམ་ལ་ཁྲག་དང་། ཆང་དང་། ཤ་རྣམས་ཀྱིས་རྣལ་འབྱོར་བྱས་ལ། དགྲའི་མིང་བླངས་ཏེ་སྔགས་བརྒྱ་རྩ་བརྒྱད་བཟླ་ཞིང་མཚན་མོ་རྐེ་ལ་རྐང་པས་གནོན་ན་ངེས་པར་རིམས་ཆེན་པོས་ཐེགས་པ་དང་། ཤིན་ཏུ་རབ་ཏུ་
གཏུམ་པའི་རྒྱུ་གཟེར་གཏོང་ཞིང་རྨི་ལམ་དུ་འཇིགས་བྱེད་ཆེན་པོས་འདི་སྐད་དུ་བྱང་ཆུབ་སེམས་དཔའ་ལ་བརྙས་པ་བྱས་པས་བཟོད་གསོལ་གྱིས་ཞེས་སྨྲར་འོང་ངོ་། །དེའི་དུས་སུ་བཟོད་གསོལ་བྱས་ན་དུས་དེ་ཉིད་དུ་ནད་ཐམས་ཅད་ཞི་
བར་འགྱུར་རོ། །ཐང་སྐུ་འདི་ལ་རྣལ་འབྱོར་པས་ཉི་མ་རེ་རེ་ཞིང་ཤ་ལྔ་ལ་སོགས་པས་མཆོད་པའི་གཏོར་མ་སྦྱིན་པར་བྱས་ཏེ། ཨོཾ་མཿཧཱུྃ་ཁ་ཁ་ཁཱ་ཧི་ཁཱ་ཧི། མཱ་ར་མཱ་ར་སརྦ་ཏྲ་ཝ་མ་ཧཱ་བྷཻ་ར་ཝ་ཏྲ་ཡཙྩ་ཏུ་སྭཱ་ཧཱ། ཞེས་པའི་སྔགས་འདིས་སོ། །
མགོ་བོའི་ནད་དང་རིམས་ནད་དང་རྒྱུ་གཟེར་དང་ཆོས་གཅིག་གི་གོང་མ་ལ་སམ་བཅུག་གིས། ནག་པོ་ཆེན་པོའི་འབྲས་བུ་བྱུགས་ནས་ཡུངས་ཀར་དང་། སྨན་ཀ་ཀ་ལེའི་ས་བོན་དང་། ཕོ་བ་རིས་དང་ལྒ་ཐོལ་དང་། 

88-1-81a

རྡོ་རྗེའི་འོ་མ་དང་། ཤིས་དྱ་ཀནྠ་རྣམས་ཕྱེ་མར་བྱས་པ་བྱུགས་ལ་བ་ལང་གི་ལྕི་བའི་གསེབ་ཏུ་བཅུག་ན་འདུས་པའི་ནད་ཀྱིས་འཆི་བར་འགྱུར་རོ། །མིའི་ཐོད་པར་བཅུག་ན་རྒྱུ་གཟེར་གྱིས་སོ། །གཅིན་གྱི་ནང་དུ་བཅུག་
ན་མགོ་ནད་ཀྱིས་སོ། །ཆུ་གསབ་ཏུ་བཅུག་ན་རིམས་ཆེན་པོ་ཡིས་སོ། །བ་ལང་གི་ར་བར་སྦས་ན་ལོང་བར་འགྱུར་རོ། །ཉི་མ་ལ་བཞག་ན་པགས་པ་འདྲུལ་བར་འགྱུར་རོ། །མེ་ལ་བཞག་ན་མགོ་འགས་པར་འགྱུར་རོ། །སྦྱོར་བ་འདི་
ནི་འཛམ་བུའི་གླིང་ན་ཤིན་དུ་རྙེད་པར་དཀོན་ནོ། །ངོ་མཚར་འདི་རྣམས་རྣལ་འབྱོར་གང་འདོད་བྱ་བའི་དོན་དུ་དང་པོ་ཞི་བར་བྱས་ལ་བྱའོ། །ལན་ཚ་དང་དུར་ཁྲོད་ཀྱི་ས་དང་ཤི་རི་ཁནྡ་དང་ཤིང་མ་ད་ནའི་ཚེར་མ་དང་། ཤིང་བ་ཡ་
རའི་འབྲས་བུ་རྣམས་དེ་བཞིན་མ་ཧེའི་འོ་མར་བཅུག་ནས་སྐར་མ་སྣར་མ་དང་ལྡན་པས་སྔགས་ལན་བདུན་བཟླས་ན་འཆི་བར་འགྱུར་ཏེ། སྐད་ཅིག་དེ་ལ་སྦྲང་རྩིའི་ནང་དུ་བཅུག་ན་སླར་འཚོ་བར་འགྱུར་རོ། །འདི་ནི་ཤིན་དུ་ངོ་
མཚར་བའོ། །ནག་པོའི་བརྒྱད་དམ་བཅུ་བཞི་ལ་ཡུངས་ཀར་དང་། བ་ལང་གི་ཤ་དང་ལྷན་ཅིག་བྱས་ནས་ཤིན་དུ་འདྲ་བའི་གཟུགས་བརྙན་བྱས་པ་ལ་སྔགས་སྟོང་ཕྲག་གཅིག་ཏུ་བཟླས་ཤིང་། ཤི་རི་ཁནྡའི་ཚེར་མས་
བཙུགས་ན་ཉི་མ་བདུན་གྱིས་ངེས་པར་འཆིའོ། །ཕྱིས་འཚོ་བ་མེད་པས་བསྒྲུབ་པར་བྱ་བ་མ་ཡིན་ཏེ། སྐར་མ་ཁྲུམས་ལ་སྐྱེས་པའི་མི་ཚིག་པར་འགྱུར་བ་དང་། སྐར་མ་སྨིན་དྲུག་ལ་སྐྱེས་པའི་མི་ངེས་པར་འཆི་བར་
འགྱུར་བས་སོ། །གཟའ་བཀྲ་ཤིས་ལ་དུག་དང་སྨན་ར་ཙི་ཀ་དང་ལ་ཕུག་རྣམས་ཀྱིས་གཟུགས་བརྙན་བྱས་ལ་བ་ལང་གི་ཁྲག་གིས་ཀྱང་ངོ་། །ཁར་དུག་བཅུག་ནས་ལན་བདུན་སྔགས་བཟླས་ན་སྐད་ཅིག་དེ་ཉིད་ལ་དབང་པོ་ཆེན་
པོའི་རིམས་ཀྱིས་ཐེབས་ནས་ཟླ་བ་དྲུག་ནས་འཆིའོ། །རའི་འོ་མས་བཀྲུས་ན་སླར་འཚོ་བར་འགྱུར་རོ། །གཟའ་ཉི་མའི་ཚེ་གྲོ་གའི་ལོ་མ་ལ་རྒྱ་སྐྱགས་ཀྱི་ཁུ་བ་དང་དུག་དག་གིས་གཟའ་ཉི་མ་བྲིས་ལ་དཔྲལ་བ་ལ་ཡི་

88-1-81b

གེ་ཧཱུྃ། མིག་ལ་ཡི་གེ་ཁཾ། ནུ་མ་གཉིས་ལ་ཡི་གེ་ཐ། ལྟེ་བར་ཡི་གེ་ཧྲཱིཿ གསུས་པ་ལ་མིང་། བརླ་གཉིས་ལ་ཡི་གེ་ཧཱ་རྣམས་བྲིས་ལ་ཤིང་ཀཎྜ་ཕ་ལའི་མེ་ལ་བསྲོས་ན་དང་པོར་རིམས་ཀྱིས་ཐེབས་ནས་ངེས་པར་འཆི་བར་འགྱུར་རོ། །
རྡོ་རྗེའི་ཆུས་བཀྲུས་ན་སླར་རབ་ཏུ་ཞི་བར་འགྱུར་རོ། །གཟའ་ཟླ་བའི་ཚེ་ཤིང་ཥ་ཎའི་ལོ་མ་ལ་བ་བླ་ཡིས་གཟའ་ཟླ་བ་བྲིས་ལ་ལྕེ་ལ་ཡི་གེ་ཧཱུྃ། དཔྲལ་བ་ལ་ཡི་གེ་ཀྵཿདང་། གསུས་པ་ལ་སྔགས་མིང་དང་སྤེལ་བ་རྣམས་བྲིས་
ཏེ། ཕག་གི་སའི་ནང་དུ་བཅུག་ནས་ཆུར་བཅུག་ན་མཛེས་ཐེབས་པར་འགྱུར་རོ། །བཀྲ་ཤིས་ཀྱི་ཚེ་གྲོ་ག་ལ་འགི་ཝང་དང་ཁྲག་གིས་གཟའ་བཀྲ་ཤིས་བྲིས་ལ་སྤྱི་གཙུག་ལ་ཡི་གེ་ཁྃ། དཔྲལ་བ་ལ་ཡི་གེ་ཧཾ། མིག་ལ་ཡི་གེ་
གསུས་པ་ལ་མིང་། རྐང་པ་གཉིས་ལ་ཡི་གེ་ཧྲཱིཿརྣམས་བྲིས་ནས་ལྕགས་ཀྱི་སྣོད་དུ་བསྲོས་ན་སྐམས་ནས་འཆི་བར་འགྱུར་རོ། །འོ་མས་བཀྲུས་ན་སླར་འཚོ་བར་འགྱུར་རོ། །གཟའ་ལག་གི་ཚེ་རྡོ་བ་ལ་བཙག་གིས་གཟའ་ལག་བྲིས་
ལ་རྣ་བ་ལ་ཡི་གེ་ཤྃ། དཔྲལ་བར་ཡི་གེ་ཧཾ། སྣ་ལ་ཡི་གེ་མུཾ། སྐེ་ལ་ཡི་གེ་ཛཾ། གསུས་པ་ལ་མིང་། བརླ་གཉིས་ལ་བཾ་ཛཾ། ལྟེ་བ་ལ་ཡི་གེ་ཧཱུྃ་མེའི་མདོག་ལྟ་བུ་རྣམས་བྲིས་ཏེ། ཉི་མ་ལ་སྐམས་ན་རིམས་མི་བཟད་པས་
ཐེབས་ནས་ཁྲག་སྐྱུགས་ཏེ་འཆི་བར་འགྱུར་རོ། །སྔ་མ་ལྟར་བྱས་ན་རབ་ཏུ་ཞི་བར་འགྱུར་རོ། །གཟའ་ཕུར་བུའི་ཚེ་མེ་ཏོག་གི་འདབ་མ་ལ་ཁྲག་གིས་གཟའ་ཕུར་བུ་བྲིས་ལ་དཔྲལ་བ་ལ་ཡི་གེ་ཀྵཾ། མགྲིན་པ་ལ་ཡི་གེ་ཧཱུྃ། གསུས་
པ་ལ་མིང་རྣམས་བྲིས་ནས། ཕྲུ་བར་བཅུག་ན་གསུས་པ་སྦོས་ནས་འཆི་བར་འགྱུར་རོ། །བཅག་ན་རབ་ཏུ་ཞི་བར་འགྱུར་རོ། །གཟའ་པ་བ་སངས་ཀྱི་ཚེ་གྲོ་ག་དཀར་པོ་ལ་བྱང་སེམས་ཀྱིས་གཟའ་པ་བ་སངས་བྲིས་ལ། ཁ་
ལ་ཡི་གེ་ཧཱུྃ། དཔྲལ་བ་ལ་ཡི་གེ་ཧེ། སྙིང་གར་ཡི་གེ་ཊཾ་རྣམས་བྲིས་ཏེ་སྦས་ནས་ཐོ་བ་བསྣུན་ན་ངེས་པར་སྒུར་པོར་འགྱུར་རོ། །གཟའ་སྤེན་པའི་ཚེ་ཤིང་ཨརྒའི་ལོ་མ་ལ་གཟའ་སྤེན་པ་ལ་བྲིས་ལ་དཔྲལ་བ་ལ་ཡི་གེ་ལྃ། 

88-1-82a

བྱས་ལ་བསྣུན་ན་ཕྱུགས་ཐམས་ཅད་རེངས་པར་འགྱུར་རོ། །གཞན་ཡང་སྨན་སུ་ཏ་ཀ་དང་། ཕ་ལ་ནི་དང་རུསྦལ་གྱི་མགོ་བོ་དང་། སྨན་ཛ་ཡན་ཏི་རྣམས་བསྲེས་ནས་གཏོར་ན་མི་རྣམས་ངེས་པར་རེངས་པར་འགྱུར་
རོ། །གུ་གུལ་དཀར་པོ་དང་། སྨན་ཀ་ཎརྡུ་ཀ་ཡ་ར་ཀའི་སིམ་བཱུ་རི་དང་ཕུ་ལ་ཌི་རྣམས་ཆ་བསྙམས་ཏེ་སྦྱངས་པ་གཏོར་ན་སྦྲུལ་རེངས་པར་འགྱུར་རོ། །ཤུ་དག་དང་། སྨན་ཀུ་མཱ་རཱི་དང་། བེ་ལི་དྷ་རྣམས་བསྣུན་ན་ངེས་པར་རེངས་པར་
འགྱུར་རོ། །སྨན་སིམ་བྷི་དང་། ཀ་ལ་ཌ་དང་། ཀ་ཀྵ་ཏྭི་དང་རང་འབྱུང་རྣམས་ཕྲེང་བར་བྱས་རྐེད་པར་བཅིངས་ན་བོན་རེངས་པར་འགྱུར་རོ། །སྤྲིན་རེངས་པར་བྱེད་པ་ཡང་དེ་ཉིད་དོ། །སྤྲིན་རེངས་པ་དགྲོལ་བ་བརྗོད་པར་བྱ་སྟེ། སྨན་
སི་ཛ་དཱི་དང་པུ་ག་ནཱ་དང་། ས་མཎ་ཌ་དང་། རུ་སྦལ་རྣམས་ཆ་བསྙམས་པ་ཡིས་སྤྲིན་རེངས་པ་གྲོལ་བར་འགྱུར་རོ། །འདི་ནི་དཔལ་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་རེངས་པའི་ལེའུ་སྟེ་བཅུ་དགུ་པའོ།། །།
གཞན་ཡང་འདིར་ཡང་དག་པར་བརྗོད་པར་བྱ་སྟེ། བྱ་བ་མ་ཡིན་པ་བྱེད་པ་རྣམས་བསད་ནས་འཇིག་རྟེན་པ་བདེ་བ་ལ་དགོད་པའི་ཕྱིར་འཇིགས་བྱེད་ཆེན་པོ་ནི་ཞལ་གཅིག་པ། ཁ་དོག་ནག་པོ་ལྟོ་འཕྱང་བ། 
གྲི་གུག་དང་ཐོད་པ་ཕྱག་ན་འཛིན་པ། མ་ཧེ་ལ་ཞོན་པ་ཀླུ་བརྒྱད་ཀྱིས་བརྒྱན་པ། མཆེ་བ་གཙིགས་པ་དབུ་སྐྲ་གྱེན་དུ་འབར་བ། འཇིགས་པར་བྱེད་པ་ཡང་འཇིགས་པར་བྱེད་པ། ལོ་བཅུ་དྲུག་པའི་ཆ་བྱད་འཛིན་པ། མཚན་
མ་གྱེན་དུ་བསྒྲེང་བ། གཅེར་བུ་སྦོམ་ལ་ཐུང་བ། ས་བོན་ཡི་གེ་ཧཱུྃ་ལས་འོད་ཟེར་འཕྲོ་བ་འདི་རྣམས་དང་ལྡན་པ་བསམས་པ་ཙམ་གྱིས་དགྲ་ཐམས་ཅད་བརླག་པར་འགྱུར་ཞིང་རྒྱུན་གཅོད་པ་དང་། མགོ་བོ་འགས་སོ། །
དེའི་སྔགས་ནི་ཨོཾ་མཾ་ཧཱུྃ་ཨ་མུ་ཀ་སྲུ་ཕཊ་ཅེས་པ་ཁྲི་ཕྲག་གཅིག་གིས་བསྙེན་པའོ། །བཀྲ་ཤིས་པའི་ཡན་ལག་ཏུ་ནག་པོ་ཆེན་པོའི་བརྒྱད་ལ་མེ་ཏོག་ཅན་གྱི་རས་ལ་བྲིས་པ་དང་བདུད་རྩི་ལྔ་ཁར་བཅུག་ལ་བསྒོམས་ལ་རབ་ཏུ་

88-1-82b

གནས་པར་བྱ་བ་ནི་ཚེས་བཅུ་བཞིའི་ནུབ་མོ་དམ་ཚིག་གི་རོ་རྣམས་རྣལ་འབྱོར་པ་ཉི་ཤུ་རྩ་གཅིག་དང་སྟབས་གཅིག་ཏུ་རྣལ་འབྱོར་མ་ལྔ་ཤིན་ཏུ་དག་པ་དམ་ཚིག་སྐྱོང་བར་སེམས་པ་རྣམས་ཀྱིས་སྔགས་འདི་སྟོང་ཕྲག་གཅིག་བཟླས་
སོ། །སློབ་དཔོན་གྱིས་སྔགས་འདི་ལན་བདུན་བཟླས་ལ་མེ་ཏོག་པདྨ་བརྒྱ་རྩ་བརྒྱད་ཀྱིས་མཆོད་པ་དང་མཎྜལ་གྲུ་གསུམ་བྱས་ཏེ་དེ་ལ་རྡོ་རྗེའི་ཕྲེང་བས་བསྐོར་བ་དང་། རལ་གྲི་དང་། གྲི་གུག་བཀོད་ལ་ཁྲག་གིས་བཀྲུ་བར་བྱ་
བ་དང་། འཇིགས་བྱེད་ཆེན་པོ་ལ་བདུད་རྩི་ལྔས་བསྣུན་པར་བྱ་བ་རྣམས་ཀྱི་སྔགས་ནི་ཨོཾ་བུཾ་ཨཿབྷཻ་ར་ཝ་སྭཱ་ཧཱ་ཞེས་པ་ཡིས་རབ་ཏུ་གནས་པར་བྱས་ཏེ། དེའི་ནུབ་མོ་ཐམས་ཅད་ཀྱིས་ཁྲག་དང་ཆང་བཏུང་བར་བྱ་ཞིང་བཟའ་
བ་ཐམས་ཅད་རྫོགས་པར་བཟའོ། །དེ་ནས་གསེར་དྲུག་ནམ་རེ་རེ་དབུལ་བ་བྱས་ན་འཇིགས་བྱེད་ཆེན་པོས་ངེས་པར་བྱིན་གྱིས་རློབ་སྟེ་གླུ་དང་སྒྲ་ཡང་བྱའོ། །གང་གི་ཚེ་གསོད་པར་བྱེད་པའི་དུས་ནི་ཚེས་བརྒྱད་དམ་བཅུ་བཞི་ལ་ཐང་
སྐུ་བཀྲམ་ལ་ཁྲག་དང་། ཆང་དང་། ཤ་རྣམས་ཀྱིས་རྣལ་འབྱོར་བྱས་ལ། དགྲའི་མིང་བླངས་ཏེ་སྔགས་བརྒྱ་རྩ་བརྒྱད་བཟླ་ཞིང་མཚན་མོ་རྐེ་ལ་རྐང་པས་གནོན་ན་ངེས་པར་རིམས་ཆེན་པོས་ཐེབས་པ་དང་། ཤིན་ཏུ་རབ་ཏུ་གཏུམ་པའི་
རྒྱུ་གཟེར་གཏོང་ཞིང་རྨི་ལམ་དུ་འཇིགས་བྱེད་ཆེན་པོས་འདི་སྐད་དུ་བྱང་ཆུབ་སེམས་དཔའ་ལ་བརྙས་པ་བྱས་པས་བཟོད་གསོལ་གྱིས་ཞེས་སྨྲར་འོང་ངོ་། །དེའི་དུས་སུ་བཟོད་གསོལ་བྱས་ན་དུས་དེ་ཉིད་དུ་ནད་ཐམས་ཅད་ཞི་བར་
འགྱུར་རོ། །ཐང་སྐུ་འདི་ལ་རྣལ་འབྱོར་པས་ཉི་མ་རེ་རེ་ཞིང་ཤ་ལྔ་ལ་སོགས་པས་མཆོད་པའི་གཏོར་མ་སྦྱིན་པར་བྱས་ཏེ། ཨོཾ་མ་ཧཱུྃ་ཁ་ཁ་ཁཱ་ཧི་ཁཱ་ཧི། མཱ་ར་མཱ་ར་སརྦ་ཏྲ་ཝ་མ་ཧཱ་བྷཻ་ར་ཝ་ཏྲ་ཡཙྪཾ་ཏུ་སྭཱ་ཧཱ་ཞེས་པའི་སྔགས་
འདིས་སོ། །མགོ་བོའི་ནད་དང་རིམས་ནད་དང་རྒྱུ་གཟེར་དང་ཆོས་གཅིག་གི་གོང་མ་ལ་སམ་བཅུག་གིས་ནག་པོ་ཆེན་པོའི་འབྲས་བུ་བྱུགས་ནས་ཡུངས་ཀར་དང་། སྨན་ཀ་ཀ་ལིའི་ས་བོན་དང་། ཕོ་བ་རིས་དང་ལྒལ་ཐོལ་དང་། 

88-1-83a

མཆུ་ལ་ཡི་གེ་དཾ། ལག་པ་གཉིས་ལ་ཡི་གེ་མཾ། སྙིང་ཀར་མིང་། ལྟེ་བར་ཡི་གེ་སཿརྣམས་དེ་བཞིན་དུ་བྲི་བར་བྱས་ནས་མེ་ལ་བསྲོས་ན་ངེས་པར་བློ་ཡིས་ཐེབས་པར་འགྱུར་རོ། །ཚེས་བཅུ་གཅིག་གི་དུས་སུ་ཤིང་
བ་ཌའི་ལོ་མ་ལ་ཁྲག་གིས་སྤྲེའུ་བྲིས་ལ་ལག་པ་གཉིས་ལ་ཡི་གེ་བཾ་བྲིས་ནས་ཤིང་ནཱ་ག་གེ་སར་ལ་བཅུག་སྟེ་ཐལ་ལྕག་བརྒྱབ་ན་དུས་ཐམས་ཅད་དུ་རྩོད་པ་འབྱུང་བར་འགྱུར་རོ། །དེ་རྣམས་ཀུན་གྱི་སྔགས་ནི། ཨོཾ་མཱཾ་ཧཱུྃ་
ཨ་མུ་སྲུཾ་ཕཊ་ཅེས་པ་འདི་བསྒྲགས་ན་ངེས་པར་འགྲུབ་སྟེ། དེ་རྣམས་ཐམས་ཅད་སྡུག་བསྔལ་སྟེར་བར་གོ་བར་བྱའོ། །ནག་པོའི་བརྒྱད་ཀྱི་དུས་སུ་གྲོ་གའི་ལོ་མ་ལ་རྒྱ་སྐྱེགས་དང་བ་བླ་དག་གིས་གཟའ་
སྒྲ་གཅན་བྲིས་ལ། ས་ལ་ཡི་གེ་རྃ་གསུམ། དཔྲལ་བ་ལ་ཡི་གེ་ཧྲིཿ མགོ་ལ་མིང་རྣམས་བྲིས་ཏེ་མེ་ལ་བསྲོས་ན་མགོ་ནད་འབྱུང་ཞིང་ཉིན་ཞག་གསུམ་ན་དབང་པོ་ཆེན་པོའི་རིམས་འབྱུང་བར་འགྱུར་རོ། །
ཆུར་བཅུག་ནས་སླར་རབ་ཏུ་ཞི་བར་འགྱུར་རོ། །ཤིང་ཨརྒའི་ལོ་མ་ལ་བ་བླའི་སེང་གེ་བྲིས་ལ་ས་ལ་ཡི་གེ་དེ་བཞི་ལྕེ་ལ་ཡི་གེ་ཧཱུྃ་ལས་མིང་དང་སྔགས་རྣམས་བྲིས་ནས་བ་ལང་ཆུ་ལ་བཅུག་ན་དུག་ཆུ་བུར་འབྱུང་བར་འགྱུར་རོ། །
འོ་བས་སླར་རབ་ཏུ་ཞི་བར་འགྱུར་རོ། །ཤིང་བ་ཌའི་ལོ་མ་ལ་བསེ་རུའི་ཁྲག་གིས་ཆུ་བདག་བྲིས་ལ། ལྟོ་བ་ལ་སྔགས། ལྕེ་ལ་ཡི་གེ་ཧླཱིཾ། ། མགོ་ལ་ཡི་གེ་ཙམ་དང་མིང་རྣམས་བྲིས་ཏེ་གཙང་པོ་ལ་བཅུག་ན་སྦྲུལ་གྱིས་
གསོད་པར་འགྱུར་རོ། །གང་གིས་གསོ་བར་འདོད་ན་སྟེང་དུ་ལག་པས་བཟུང་ངོ་། །ཚེས་ལྔའམ་བཅུ་གསུམ་ལ་ཤིང་བ་ཌིའི་ལོ་མ་ལ་བྱང་སེམས་ཀྱིས་སྒུར་ལ་རྒས་པ་བྲིས་ལ་བྲང་ལ་ཡི་གེ་ཏྲཱཾ། སྙིང་ག་ལ་མིང་
རྣམས་བྲིས་ནས་ཆུ་ལ་བཅུག་ན་ངེས་པར་སྒུར་པོར་འགྱུར་རོ། །རྗེ་བཙུན་གྱིས་གང་གསུངས་པ་དེས་ཚེགས་མེད་པར་འགྲུབ་སྟེ། རྗེས་སུ་གནང་ནས་བྱེད་པས་ཇི་ལྟར་བསྒྲུབས་པ་ལྟར་འགྲུབ་པར་

88-1-83b

འགྱུར་རོ། །བརྗོད་བྱའི་གཙོ་བོར་ཐམས་ཅད་ཀྱི་ལུས་རྣམས་བཤིག་པར་བྱེད་པ་ཅིའི་ཕྱིར་ན་སྒྲུབ་པ་པོ་སངས་རྒྱས་ཀྱི་བྱ་བ་མ་ཡིན་པ་བྱེད་པ་དེས་རྙེད་པར་དཀོན་པའོ། །གཞན་ཡང་བརྫུན་པའི་སྡུག་བསྔལ་ཉམས་སུ་
ལེན་པ། ནུ་མ་ཉེད་པ་རང་དོན་མི་ཤེས་པ། བཞིན་བཟློག་པ། བདུད་རྩི་ལྔ་དང་དྲི་ཞིམ་པོ་རྒྱུན་དུ་ཟ་བའི་རྣལ་འབྱོར་པ། ཧ་ཧཱུྃ་ཞེས་བརྗོད་ཅིང་ཀུན་ཏུ་འགྲོ་བ། དད་པ་རྒྱུན་དུ་འགྲོ་བ་བརླག་པའི་བྱང་ཆུབ་སེམས་དཔའི་ཕྱིར་རོ། །
འདི་ནི་དཔལ་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་བསད་པའི་ལེའུ་སྟེ་ཉི་ཤུ་པའོ།། །།  གཞན་ཡང་བཅོམ་ལྡན་འདས་ཀྱིས་བཀའ་སྩལ་པ། ཀྱེ་ལྷ་མོ་མཚན་ཉིད་ཐམས་ཅད་ཚང་བའི་བུད་མེད་ང་ཡིས་འཁྱུད་པའི་ལྷ་མོ་སྟེ། ས་སྟེང་བདེ་བ་གང་ཡང་
འགྲུབ་པའོ། །ལྷ་མོས་གསོལ་པ། ཀྱེེ་བཅོམ་ལྡན་འདས་ཉི་མ་གང་ལ་དངོས་གྲུབ་འགྲུབ། བཅོམ་ལྡན་འདས་ཀྱིས་བཀའ་སྩལ་པ། ཉོན་ཅིག་ལྷ་མོ་སྒྲུབ་པ་པོ་གང་གིས་བསྒྲུབ་པ་ནི་འདིར་དགུན་ཟླ་ཐ་ཆུངས་ཀྱི་ནག་པོའི་ཚེས་བརྒྱད་ལ་
འཛམ་བུའི་གླིང་དུ་སྐྱེས་པའི་དུས་སུ་ལ་རྣལ་འབྱོར་པས་བསྒྲུབས་ན་དངོས་གྲུབ་བརྒྱད་དེ་ཡིས་འགྲུབ་བོ། །འདི་ལ་ཐེ་ཚོམ་མེད་དོ། །དཔྱིད་ཟླ་ཐ་ཆུང་གི་ལྔ་ལ་སྒྲུབ་པའི་མིས་མྱུར་བར་འགྲུབ་བོ། །དབྱར་ཟླ་ཐ་ཆུང་གི་ནག་
པའི་བཅུ་བཞི་ལ་ངེས་པར་དངོས་གྲུབ་ཆེན་པོ་ཐོབ་པར་འགྱུར་རོ། །སྟོན་ཟླ་ཐ་ཆུང་ལ་ཡང་དེ་དང་མཚུངས་སོ། །སྟོན་ཟླ་འབྲིང་པོའི་དཀར་པོའི་བཅུ་གཅིག་ལ་ལུགས་མ་དང་པོ་ཏི་དང་ཐང་སྐུ་རྣམས་རྩོམ་པའི་རྣལ་འབྱོར་པ་དེ་
ལ་བྱིན་བརླབས་ངེས་པར་འོངས་པས་རབ་ཏུ་གནས་པ་ཡང་ཚེས་དེ་ཉིད་ལ་བྱ་སྟེ། ཁྲག་དང་ཤ་ལྔ་ལ་སོགས་པ་དང་། ཆང་དང་ཤ་སྣ་ཚོགས་དང་། བཟའ་བ་དང་བཏུང་བ་དང་རང་འདོད་པ་རྣམས་བྱས་ན་ཐེ་
ཚོམ་མེད་པར་དངོས་གྲུབ་ཐམས་ཅད་འགྲུབ་པར་འགྱུར་རོ། །འདིའི་དཔལ་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་དངོས་གྲུབ་ངེས་པའི་ལེའུ་སྟེ་ཉི་ཤུ་རྩ་གཅིག་པའོ།། །།

88-1-83c

དེ་ནས་སྤྲིན་དྲལ་བ་དང་བསྡུ་བའི་ལེའུ་བཤད་པར་བྱ་སྟེ། ཆར་ཆེན་པོ་བབ་པའི་དུས་སུ་དུར་ཁྲོད་དུ་ཕྱིན་ལ་ཕྱག་བརྒྱད་པའི་སྔགས་སྟོང་ཕྲག་ལྔ་། ཨུཏྤ་ལ་སྟོང་ཕྲག་ལྔ་ལ་བཟླས་ཤིང་སྦྱིན་སྲེག་བྱས་ན། 
ཆར་ངེས་པར་རབ་ཏུ་ཞི་བར་འགྱུར་རོ། །གྲོང་གི་མཐར་ཕྱིན་ལ་བ་ལང་གི་ཐོད་པའི་སྟེང་དུ་བསྡད་ནས་ཏིལ་མར་ཆེན་པོས་ལུས་ལ་བྱུགས་ཏེ། འཇིགས་བྱེད་ཆེན་པོ་རབ་ཏུ་བཀྲམ་ལ་བསམ་པ་དང་ལྡན་པས་ཨུཏྤ་ལ་སྔོན་པོ་བརྒྱ་
ཕྲག་ལྔ་ཡིས་སྦྱིན་སྲེག་བྱས་པ་དང་། ཤ་དང་ཆང་དང་ཁྲག་རྣམས་བཏུང་བ་དང་། བཟའ་བ་ཡིས་བདག་ཉིད་བདེ་བར་བྱས་ལ། ཨོཾ་ཀྴཾ་ཨཱུ་ཨཱུ་ཨཱུ་སྭཱ་ཏ་ཡ་ནཱར་ཡ། གརྫྫ་གརྫྫ་རུ་ཏ་རུ་ཏ་ཧཿཧཱུྃ་ཕཊ། ཨཥྚ་ནཱ་གཱ་ནཱཾ་
ཁ་ཁ་ཁཱ་ཧི་ཁཱ་ཧི། ཨཱུཿཨཱུཿཞེས་པ་བཟླས་ན་ངེས་པ་ཉིད་དུ་དེས་ནས་ཆར་རབ་ཏུ་ཞི་བར་འགྱུར་རོ། །ཨརྒ་སྦྱངས་ནས་སྔགས་ཡང་དག་པར་བཟླས་ན་དེས་ཡོན་ཏན་ཐམས་ཅད་འགྱུར་རོ། །མཚན་མ་གཅིག་
ཕྱིན་ལ་ལྗོན་ཤིང་གི་འོག་ཏུ་བསྡད་ནས་ལག་པ་གཡོན་པའི་མཛུབ་མོ་ཁར་བཅུག་སྟེ། ལག་པར་སེང་གེ་བསམ་པ་དང་ཕྱག་བཅུ་དྲུག་པའི་སྔགས་སྟོང་ཕྲག་ལྔ་བཟླས་ན་ངེས་པར་སྤྲིན་ཞིག་ནས་འགྲོ་བར་འགྱུར་རོ། །མཎྜ་ལར་
ཕྱིན་ལ་སྟག་གི་པགས་པའི་སྟེང་དུ་བསྡད་ནས་ཁར་རྗེ་རང་གྱི་ཁྲག་བླུགས་ཏེ། ཕྱག་བཅུ་པའི་བསྔགས་ཀྱིས་བྲུན་ལ་སྟོང་ཕྲག་གཅིག་བཟླས་ན་ངེས་པར་ཆར་འཆད་པར་འགྱུར་རོ། །ཀྲིཥྞ་ཨ་པ་ར་ཛི་ཏའི་མེ་ཏོག་དང་བུ་རམ་
དང་ཏིལ་རྣམས་བསྲེས་ལ་སྟོང་ཕྲག་ལྔར་སྦྱིན་སྲེག་བྱ་སྟེ། ཨོཾ་མ་ཧཱ་ཛྙཱ་ནཱ་ས་མ་ཡ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་མེ་གྷཱཾ་སྥཱ་ཏ་ཡ་ཧཱུྃ་ཕཊ་ཅེས་པ་འདི་ཁོ་ན་བཟླས་ན་མིའི་འཇིག་རྟེན་དུ་ངེས་པར་སྤྲིན་འཇིག་པའི་སྦྱོར་བ་འདི་ནི་རྨད་དུ་བྱུང་བ་སྟེ། 
ངེས་པར་ཆར་འཆད་པར་འགྱུར་རོ། །གལ་ཏེ་ཆར་མི་འབབ་པའི་དུས་སུ་ཁང་སྟོང་དུ་ཕྱིན་ལ། མཎྜལ་གྲུ་བཞི་པ་བཅས་པའི་དབུས་སུ་དོང་ཁྲུ་གང་བྲུས་པར་མེ་ཏོག་སྟོང་ཕྲག་གཅིག་སྦྱིན་སྲེག་བྱ་བའི་

88-1-83d

སྔགས་ནི། ཨོཾ་ཧཱུྃ་པྲ་ཤ་པྲ་བཪྵ་ཛཿཛཿཛཿཧཿཧཿཧཿཕཊ་ཅེས་པ་འདི་ཁོ་ན་བཟླས་ན་ངེས་པར་ཆར་འབབ་པར་འགྱུར་རོ། །དེ་ནས་སྦྱོར་བ་ཆེན་པོ་གསུངས་པ་བར་གྲོང་ཁྱེར་གྱི་ཕྱི་རོལ་ཏུ་སྤྲེའུ་ཡི་ཐོད་པའི་སྟེང་དུ་
བསྡད་ལ་ཏིལ་མར་ཆེན་པོས་ལུས་ལ་བྱུགས་ཏེ། སྦྱོར་བ་ཇི་ལྟ་བས་ཆང་བཏུང་བ་དང་། བཟའ་བ་དང་བཏུང་བར་འདོད་པའི་རྣལ་འབྱོར་པས་ཐེ་ཚོམ་མེད་པར་འགྲུབ་པར་འགྱུར་ཏེ། ཨ་པ་རཱ་ཛི་ཏའི་མེ་ཏོག་སྟོང་ཕྲག་ལྔའི་
སྦྱིན་སྲེག་བྱ་བ་འམ། འོན་ཏེ་བདག་ཉིད་སེང་གེའི་གཟུགས་སུ་བསྒོམས་ལ་ཁྲོ་བ་དང་བཅས་པས་དང་པོ་སྒྲ་དང་ལྡན་པར་བཟླས་པ་ནི། ཨོཾ་མུཿ་ཧ་པྲ་བཪྵ་ཡ་པྲ་བཪྵ་ཡ་ཧ་ཧ། ཧི་སྭཱ་ཧཱ་ཞེས་པས་ལག་པའི་སྙིམ་པ་ཕྱེ་ལ་
ང་ལ་ཆར་པ་སླང་ཞེས་བརྗོད་ཅིང་ཁང་པའི་རང་བཞིན་ནས་སྣོད་ཀྱི་འཇིག་རྟེན་དུ་འབབ་པར་བསམ་མོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་ཆར་དབབ་པ་དང་གཅད་པར་བྱ་བ་དག་གི་ལེའུ་སྟེ་
ཉི་ཤུ་རྩ་གཉིས་པའོ།། །། དེ་ནས་སེམས་ཅན་རྣམས་ཀྱི་དོན་དུ་བསྐྲད་པའི་ལེའུ་བཤད་པར་བྱའོ། །རྙེད་དཀའ་བའི་དུས་སུ་རྣལ་འབྱོར་པ་བདག་ཉིད་ཀྱིས་ནག་པོ་ཆེན་པོའི་གཟུགས་སུ་བསྒོམས་ལ་
ཤིང་བིལ་བའི་འབྲས་བུས་སྟོང་ཕྲག་གཅིག་སྦྱིན་སྲེག་བྱ་བ་ནི། ཨོཾ་ཁཿཧཱུྃ་བཛྲ་ཨ་གྷ་ཡེ་སྭཱ་ཧཱ། ཞེས་པའི་སྔགས་ཀྱིས་རྙེད་པ་སླ་བར་འགྱུར་རོ། །ཨོཾ་ཙི་ཧི་ལི་ཧི་ལི་ཧཱུྃ་མ་ཧཱ་ས་ནཻ་ཤ་ཙ་ར་ཁ་ཁ་ཧཱུྃ་ཕཊ་ཅེས་པས་བ་
ལང་གི་ཞག་གིས་ཀང་ལ་སུན་ད་ལ་བྱུགས་པས་བརྒྱ་ཕྲག་གིས། སྦྱིན་སྲེག་བྱས་ན་འདིས་ནི་སྤེན་པ་འབྲོས་ཏེ་རྙེད་སླ་བར་འགྱུར་བ་དང་། དུས་ཐམས་ཅད་དུ་འཆི་བར་ཡང་འགྱུར་བས་གྲོང་ཁྱེར་ཐམས་ཅད་ནོར་དང་ཟས་
དང་ལྡན་པར་འགྱུར་རོ། །ཕྱག་བཅུ་གཉིས་པ་བཀྲམ་ལ་ཆང་གི་སྦྱོར་བས་མཆོད་པར་བྱས་ནས་དེའི་སྔགས་སྟོང་ཕྲག་ལྔ་བཟླས་པ་དང་། སེ་འབྲུ་སྟོང་ཕྲག་གཅིག་སྦྱིན་སྲེག་བྱས་ན། འདིས་ནི་ངེས་པར་སྤེན་པ་

88-1-84a

འབྲོས་པ་འམ་འཆི་བར་འགྱུར་རོ། །གལ་ཏེ་མ་བྱུང་ན་དེའི་ཚེ་སྔར་གྱི་སྟེང་དུ་བཟླས་ན་ངེས་པར་འབྲོས་པར་འགྱུར་རོ། །ནག་པོའི་བརྒྱད་ཀྱི་ནུབ་མོ་སྟག་གི་ལྤགས་པ་ལ་བསྡད་ནས། ཨོཾ་ཀེ་ཏུ་ཁཾ་ཧཱུྃ་
ཕཊ་ཅེས་པའི་སྔགས་རྣལ་འབྱོར་མ་ལྔ་དང་སྟབས་གཅིག་ཏུ་བཟླས་ན་མཇུག་རིངས་ངེས་པར་འབྲོས་སོ། །ཚེས་བཅུ་བཞི་ལ་རྣལ་འབྱོར་མ་ལྔ་དང་སྟབས་གཅིག་ཏུ་བཟའ་བ་སྣ་ཚོགས་པ་དང་ཆང་ལ་སོགས་པ་བཏུང་
ལ་སྔོན་དུ་བརྗོད་པའི་སྔགས་སྟོང་ཕྲག་གཅིག་བཟླས་ན་སྒྲ་གཅན་ངེས་པར་འབྲོས་པར་འགྱུར་རོ། །པེ་ཆག་པའི་དགྲ་བྱུང་ན་དེའི་དུས་སུ་ཐང་ཕྲོམ་གྱི་མེ་ཏོག་སྟོང་ཕྲག་ལྔ་དང་ཆང་སྦྱིན་སྲེག་བྱས་ན་པེ་ཆག་པ་ཐམས་
ཅད་འབྲོས་པ་དང་འཆི་བར་འགྱུར་རོ། །ཨོཾ་ཧྲཱིཿཧཱུྃ་པ་ཏཾ་གྷ་ནུ་ཙྪེ་དཾ་ཡཀྵཿཕཊ་ཅེས་པ་ཆོ་ག་འདིའི་སྔགས་སོ། །དེ་རྣམས་བྱས་ན་བར་དུ་གཅོད་པ་ཐམས་ཅད་རབ་ཏུ་ཞི་བར་འགྱུར་རོ། །ཆུ་གང་དུ་བྱུང་སར། ཨོཾ་ཛ་ལ་
ཧཾ་ཛཿཞེས་པའི་སྔགས་ཀྱིས་བ་དམར་མོའི་འོ་མ་ལ་སྟོང་ཕྲག་གཅིག་དང་པོར་བཟླས་ནས་མེ་ཏོག་ཀུནྡ་སྟོང་ཕྲག་ལྔའི་སྦྱིན་སྲེག་བྱས་ན། འོ་མ་དེས་ངེས་པར་ཆུ་རབ་ཏུ་ཞི་བར་འགྱུར་རོ། །འབྲུ་ཐམས་ཅད་བརླག་ན་
དེའི་དུས་སུ་སྐྱུ་རུ་ར་སྐམ་པོ་སྟོང་ཕྲག་ལྔ་དང་ཆང་སྦྱིན་སྲེག་བྱས་ནས་བཟའ་བ་དང་བཏུང་བ་དང་། གླུ་ལེན་པ་དང་། ཆང་དང་བཅས་པས་ལྷ་མོ་ལྔ་ལ་མཆོད་པ། ཨོཾ་སྟུཾ་བཾ་ཤཱནྟཾ་པྲ་ཀུ་རུ་སྭཱ་ཧཱ་ཞེས་པ་འདིས་འབྲུ་ཐམས་
ཅད་དང་ལྡན་པར་འགྱུར་རོ། །གལ་ཏེ་མ་གྲུབ་ན་དེའི་ཚེ་ངས་མཚམས་མེད་པ་ལྔ་བྱས་པར་འགྱུར་བ་དང་། ཆོས་ཐམས་ཅད་བརྫུན་དུ་འགྱུར་རོ། །དེའི་ཕྱིར་རྣལ་འབྱོར་པ་ཀློག་པ་དང་མཉེན་པ་ངེས་པར་བྱའོ། །གལ་ཏེ་
ཉན་པ་དང་ཀློག་པ་མི་བྱེད་ན་དེའི་ཚེ་རྣལ་འབྱོར་པ་འཆི་བ་དང་། ཞར་བ་དང་སྒུར་བར་བྱ་བ་རྣམས་ཅུང་ཟད་ཙམ་དང་མི་འགྲུབ་པར་འགྱུར་རོ། །གང་དང་གང་དུ་བཅོམ་ལྡན་འདས་ཀྱིས་གསུངས་པ་ལྟར་ངེས་པར་བྱས་ན་

88-1-84b

མྱུར་བར་ཐམས་ཅད་འགྲུབ་པར་འགྱུར་རོ། །གྲོང་ཁྱེར་ན་གནས་པའི་མི་རྣམས་ལ་གང་གི་ཚེ་སྐར་མདའ་ལྟུང་ན་ནག་པོ་ཆེན་པོ་ཕྱག་བཞི་པའི་ཐང་སྐུའམ་ལུགས་མའི་མདུན་དུ་འདི་ཉིད་ཀྱི་སྔགས་ཀྱིས་ཐང་ཕྲོམ་གྱི་ས་
བོན་གྱིས་བརྒྱ་ཕྲག་ལྔ་སྦྱིན་སྲེག་བྱས་ལ་རྣལ་འབྱོར་མ་ལྔ་ཡིས་བཟའ་བ་དང་བཏུང་བ་ཡིས་མཆོད་ནས་དེ་ནས་གཏོར་མ་སྦྱིན་ནོ། །རིམ་པ་འདི་ཡིས་ཞི་བར་འགྱུར་གྱི་གཞན་གྱིས་མ་ཡིན་ནོ། །རབ་ཏུ་དྲག་པའི་རིམ་གྱིས་
ངེས་པར་ཐེབས་ན་དེའི་ཚེ། ཨོཾ་ཧྲཱིཿསརྦ་ས་ཏྭ་ན་ནུ་པཾ་པ་ཡ་ཧྲཱིཿཧཱུྃ་ཕཊ་སྭཱ་ཧཱ་ཞེས་པའི་སྔགས་ཀྱིས་མེ་ཏོག་ཀུནྡ་སྟོང་ཕྲག་ལྔ་སྦྱིན་སྲེག་བྱ་བ་སྟེ། རྣལ་འབྱོར་མ་ལྔས་སྔ་མ་ལྟར་ཞི་བར་འགྱུར་རོ། །གང་གི་ཚེ་
འབྲུམ་བུ་དང་རྒྱུ་གཟེར་དང་མིག་སེར་རྣམས་ལ་རྣལ་འབྱོར་མ་ལྔས་ཤ་ལྔ་ལ་སོགས་པ་རང་གང་འདོད་པ་ཟོས་འཐུངས་ཏེ། སྔོན་དུ་སོང་བའི་སྔགས་སྟོང་ཕྲག་གཅིག་བཟླས་ནས་སྟོང་ཕྲག་ལྔ་སྦྱིན་སྲེག་བྱས་ན་ངེས་
པར་རབ་ཏུ་ཞི་བར་འགྱུར་རོ། །གང་དང་གང་རྒྱུད་འདིར་བཤད་པ་རྣམས་གཞན་དུ་མ་བཤད་དེ། དེ་བག་ཙམ་བཤད་ན་ཡང་ལུང་བསྟན་པ་ཙམ་དུ་བཤད་པའོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་གཙོ་
བོར་རྙེད་པར་དཀའ་བའི་སེམས་ཅན་ཐམས་ཅད་ལ་བདེ་བ་སྟེར་བར་བྱེད་པའི་ལེའུ་སྟེ་ཉི་ཤུ་རྩ་གསུམ་པའོ།། །། རྒྱལ་པོར་བྱ་བའི་དོན་དུ་ཕྱག་བཅུ་དྲུག་པ། བསྒོམ་པ་དང་། སྟོང་ཕྲག་གཅིག་བ་
བཟླས་ན་གང་དང་གང་གིས་རྒྱལ་པོ་འཐོབ་པར་འགྱུར་རམ་མི་འགྱུར་གྱི་ལྟས་བཤད་པར་བྱ་སྟེ། རྒྱལ་པོ་འགྲུབ་པར་འགྱུར་རམ། མི་འགྱུར་བརྟག་པ་ནི་བྲམ་ཟེ་ཁ་དོག་ནག་པོ་དྲུང་དུ་འོངས་ནས་སློང་ཞིང་བགེགས་
བྱེད་པར་ངེས་པར་འདོད་པ་བྱུང་ན་ངེས་པར་དེ་ནི་དངོས་གྲུབ་སྟེར་བ་སྟེ། བགེགས་ཇི་ལྟ་བ་བཞིན་དུ་ཞི་བར་བྱས་ནས་བསྒྲུབས་ན་འགྲུབ་བོ། །ཡང་གང་དང་གང་དུ་རྒན་མོའི་གཟུགས་སུ་འོངས་ནས་མགྲོན་བུ་བཞི་སློང་

88-1-85a

དུ་བྱུང་ན་དེ་ནི་རྡོ་རྗེ་རྣལ་འབྱོར་མའི་སྤྲུལ་པ་སྟེ། འདིར་དེས་འགྲུབ་པར་ཐེ་ཚོམ་མེད་དོ། །གལ་ཏེ་གཤན་པ་ལག་ན་མེ་ཏོག་ཐོགས་པ་འོངས་ན་འཇིགས་བྱེད་བགེགས་བྱེད་དུ་འོངས་པའོ། །རྨི་ལམ་དུ་བྱ་རྒོད་ཀྱི་རྒྱུ་མ་
ཟ་བ་མཐོང་ན་རྒྱལ་པོ་འཐོབ་པའི་མཚན་མའོ། །ཡང་ཐང་ཆེན་པོ་མཐོང་ན་ཡང་ངོ་། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་རྒྱལ་པོ་འགྲུབ་བམ་མི་འགྲུབ་བརྟག་པའི་ལེའུ་སྟེ་ཉི་ཤུ་རྩ་བཞི་པའོ།། །། འདིར་གཞན་
ཡང་ཡང་དག་པར་བཤད་པར་བྱ་སྟེ། བསྒྲུབ་པར་འདོད་པའི་མི་གང་གིས་ཇི་ལྟར་བསྒྲུབ་ན། འདི་ལྟར་འདིར་ཐབས་གང་དང་གང་གིས་དང་པོར་ལམ་བཙལ་བ་ནི་ལྷ་མོ་སྐྱེ་བོ་རྣམས་རབ་ཏུ་བརྟག་པར་བྱས་ནས་ས་སྟེངས་ཀྱི་རྒྱལ་པོ་དེ་
ལ་ཡོངས་སུ་བསྒྲགས་སོ། །ལམ་ལ་སོགས་པ་གང་གི་དུས་སུ་ཞུ་བ་དབུལ་ན་དཔྱིད་ཟླ་ཐ་ཆུངས་པ་སནྟའི་བརྒྱད་དམ། བཅུའམ། བཅུ་བཞི་ནས་རྒྱུན་དུ་བསྒྲུབས་ན་ངེས་པར་འདི་ལ་ཐེ་ཚོམ་མེད་དོ། །རིའི་རྩེ་ལ་ཕྱིན་ལ་སྔོན་དུ་
གསུངས་པའི་ནག་པོ་ཆེན་པོ་བསྒོམ་ཞིང་སྔགས་འབུམ་ཕྲག་ལྔ་བཟླས་པ་དང་། ལྕགས་གསུམ་ཁར་བཅུག་ནས་མེ་ཏོག་པད་མ་སྟོང་ཕྲག་ལྔ་སྦྱིན་སྲེག་བྱས་ན་ངེས་པར་འགྲུབ་པར་འགྱུར་རོ། །དུར་ཁྲོད་དུ་ཕྱིན་ནས་རོའི་སྟེང་
དུ་བསྡད་དེ་ལག་པར་རལ་གྲི་བཟུང་ལ་དང་པོར་དྲི་དང་མེ་ཏོག་ལ་སོགས་པ་ཁ་དོག་བཟང་པོ་རྣམས་བཀྲམ་པའི་སྟེང་དུ་རལ་གྲི་བསྐྱུར་ན་རྣལ་འབྱོར་པས་གང་འདོད་པ་ཐེ་ཚོམ་མེད་པར་འདིས་འགྲུབ་པར་འགྱུར་རོ། །ངེས་པར་ཁང་
སྟོང་དུ་ཙརྩི་ཀཱའི་ཐང་སྐུ་བཀྲམ་ལ་སྔགས་སྟོང་ཕྲག་ལྔ་བཟླས་པ་དང་། ཕྱི་ནས་ཨུཏྤལ་སྟོང་ཕྲག་བརྒྱད་སྦྱིན་སྲེག་བྱ་བའི་སྔགས་ནི། ཨོཾ་བཾ་ཁཎྜཱ་ལི་ནི་སྭཱ་ཧཱ་ཞེས་པའོ། །དེ་ནས་སྨན་རྩ་བ་བརྒྱད་པ་དང་འོ་མ་མཐུངས་ན་ངེས་པར་
རྒྱལ་པོར་འགྱུར་རོ། །སྟོན་ཟླ་ར་བའི་ཚེས་ལྔ་ལ་ནག་པོ་ཆེན་པོ་ཕྱག་བཞི་པའི་ཐང་སྐུ་བྲིས་ལ་མཆོད་པ་ཆེན་པོ་བྱས་ནས་ལྕགས་བརྒྱད་དང་གསེར་ལས་རིལ་བུ་བྱས་ནས་ཁར་བཅུག་སྟེ་ནག་པོ་ཆེན་པོའི་གཟུངས་སྟོང་ཕྲག་གཅིག་

88-1-85b

བཟླས་པ་དང་། ཤ་ཆང་ལ་ལོངས་སྤྱད་པ་ཡིས་དེ་རྣམས་སོང་ནས་གཟུངས་འདི་བཟླས་ཏེ། ཨོཾ་སུ་མུ་ཁི་སུ་སརྦ་དེ་ཧི་དེ་ཧི་ཧཱུྃ་ཧཱུྃ་ཙ་ཊ་ཙ་ཊ། རི་ཊ་རི་ཊ། རཱཾ་ཀུ་ཊ་ཀུ་ཊ། ཧཱུྃ་ཕཊ་སྭཱ་ཧཱ་ཞེས་པ་ཟླ་བ་དྲུག་གི་བར་དུ་སྦྱོར་བས་
རྒྱལ་པོར་འགྱུར་ཏེ། གཞན་དུ་ནི་མ་ཡིན་ནོ། །གལ་ཏེ་ལོ་གཅིག་ཏུ་འཁོར་ལོས་སྒྱུར་བའི་མཚན་ཉིད་ཆེན་པོ་འཛིན་པ་ཤིན་དུ་རོལ་པས་བཞུགས་ན་འཁོར་ལོས་སྒྱུར་བའི་རྒྱལ་པོ་ཆེན་པོའི་མཚན་ཉིད་ཅན་དུ་འགྱུར་རོ། །
ཆུ་འགྲམ་གྱི་ས་བླངས་པ་དང་། དུང་གི་ཕྱེ་མ་དང་ཕག་པའི་ཤ་རྣམས་སྟབས་གཅིག་ཏུ་སེང་གེ་བྱས་ལ་ཡི་གེ་བཾ་ཁར་བསམས་ནས་སྔགས་ཁྲི་ཕྲག་གཅིག་བཟླས་ན་རྒྱལ་པོར་འགྱུར་རོ། །གལ་ཏེ་མ་གྲུབ་ན་མེ་ཏོག་
པདྨ་སྟོང་ཕྲག་གཅིག་སྦྱིན་སྲེག་བྱས་ན་འགྲུབ་པར་འགྱུར་ཏེ་ཐེ་ཚོམ་མེད་པར་སྐྱེ་བ་འདི་ལ་ཐམས་ཅད་འགྲུབ་པར་འགྱུར་རོ། །མཚན་མ་གཅིག་པའམ་དུར་ཁྲོད་དུ་ཕྱིན་ལ་རོའི་སྟེང་དུ་བསྡད་ནས་ལག་ཏུ་རལ་གྲི་བཟུང་བས་
ཚྭ་གསུམ་སྦྱར་བ་བརྡུངས་ན་རྒྱལ་པོར་འགྱུར་རོ། །ཤེས་རབ་ཀྱིས་གང་འདོད་པའི་རྗེས་སུ་འགྲོ་བར་བྱ་བའི་ཕྱིར་མཁས་པས་བརྟག་པར་བྱའོ། །བསམ་པ་ཙམ་གྱིས་ཞི་བར་བྱ་བ་འགྲུབ་ན་ལུས་ཀྱི་བྱ་བ་འགྲུབ་བོ། །འདི་ནི་ནག་
པོ་ཆེན་པོའི་རྒྱུད་ཀྱི་རྒྱལ་པོར་བྱ་བའི་ལེའུ་སྟེ་ཉི་ཤུ་རྩ་ལྔ་པའོ།། །། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་སྟོབས་དང་ལྷ་མོ་གཉིས་ཀྱིས་སྟབས་གཅིག་ཏུ་ཡང་དག་པར་གསོལ་བ་བཏབ་
པ། ཀྱེེ་བཅོམ་ལྡན་འདས་གསུངས་ཤིག །འདོད་པ་དང་གཏི་མུག་གི་རང་བཞིན་ཇི་ལྟར་གོ་བར་བྱེད། བཅོམ་ལྡན་འདས་ཀྱིས་བཀའ་སྩལ་པ། ལྷ་མོ་ལྔ་ལ་དབང་བསྐུར་བ་ཐོབ་པའི་མི་གང་གིས་བླང་བར་བྱ་སྟེ། ཚེས་བརྒྱད་
དམ་བཅུ་བཞི་ལ་གསེར་སྲང་ལྔ་བཤིག་ལ་མཎྜལ་གྲུ་བཞི་པ་གཅུས་པར་ཟུར་བཞི་རུ་ལྷ་མོ་བྲིས་ནས་སྦྱིན་སྲེག་གི་བྱ་བ་བྱའོ། །ཤེས་རབ་ཡེ་ཤེས་གོ་བས་ཕྱག་རྒྱ་དང་མཉམ་པར་རབ་ཏུ་སྦྱོར་ཞིང་བཟའ་བ་དང་བཏུང་བ་ལ་ལོངས་

88-1-86a

སྤྱད་ན་ངེས་པར་འགྲུབ་པར་འགྱུར་རོ། །ཀྱེེ་ཚེ་དང་ལྡན་པ་ཤེས་རབ་རྗེ་མོ་དེས་ངེས་པར་གཞན་ཡང་ངེས་སོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་ཕྱག་རྒྱའི་དཀྱིལ་འཁོར་གྱི་ལེའུ་སྟེ་ཉི་ཤུ་རྩ་དྲུག་པའོ།། །།
 བསླབ་པའི་ལེའུ་བཤད་པར་བྱའོ། །བསླབ་པ་རབ་ཏུ་གསལ་བར་འགྲོ་བ་ཇི་ལྟར་བསླབ་པར་འདོད་པས་སློབ་པའི་དུས་སུ་ཆང་དང་ཤ་དང་བླ་མ་རྡོ་རྗེ་སེམས་དཔའི་ཤེས་རབ་ལ་དུས་ཐམས་ཅད་དུ་གནས་པས་གཙུག་ཏོར་སྟེང་གི་ཆུ་བོ་
ལ་ཤེས་རབ་ཅེས་པ་དང་། རྣལ་འབྱོར་མ་ཞེས་པར་བདག་དང་གཞན་གྱི་དོན་དང་ལྡན་པས་བཤད་པར་བྱ་བ་བྱེད་པས་ཞུ་བ་ལ་ཕྱག་རྒྱ་མ་ཞེས་པ་དང་། རྡོ་རྗེའི་གནས་ཞེས་པ་དང་། རྗེ་མོ་ཞེས་པར་ཐེ་ཚོམ་མེད་དོ། །སེམས་གཡོ་འགུལ་
མེད་པ་ལ་བསླབ་པ་ཞེས་བྱའོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་བསླབ་པའི་སྡོམ་པའི་ལེའུ་སྟེ་ཉི་ཤུ་རྩ་བདུན་པའོ།། །། གཞན་ཡང་བཅོམ་ལྡན་འདས་ཀྱིས་བཀའ་སྩལ་པ། དེ་ཁོ་ན་ཞེས་པ་ནི་མཚུངས་
པ་རྒྱུན་དུ་འགྲོ་བའི་སེམས་རྗེས་སུ་གནས་པའི་རང་བཞིན་ཡིད་ལ་མི་བྱེད་པ་གང་ལ་འཕེལ་བ། དེ་དང་ལྡན་པ་དེ་དངོས་པོ་མེད་པའོ། །ཨུ་ཎུ་ཨ་ར་ནཱ་ཧི་ཏཏྟ་ཧ་ལུ་ཨེ་ཏེ་ཎི་ཛ་ཧི་ཀ་ཧ་ཝི་ནཱ་སཾ་ཧོ། ཙི་ཨ་ར་གོ་ཙ་ར་ཨི་ཙིཏྟ་
ཧ་ཧ་ཐཾ་བི་ན་སུ་ཧ་ལ་པ་རི་བྷཱ་སི་ཨོམྷ་རེ་ཁ་ཎ་པི་ན་ཐཀྐ་ཨོ། ཨུཛྫ་ཎི་ཨེ་ལེ་ཁ་ས་ཎོ། བྷ་ཎ་ཨི་བྷེ་ཨོ་ས་ཝ་རཏྟ་ཀ་ཧི་ཝི་ཎ་ཙྪི་ཊྛི་ཨོ་ཞེས་པ་དང་། བྷཾ་བཱ་ལོ་ཨ་གོ་ཨ་ར་ཙིནྟཱ་གྷ་རཾ་གྷ་ར་གྷ་རེ་ཎི་ཧེ་ཊ་མུ་ཀྵ་ཧི་ཨོ། མ་ཧཱ་ཛ་ནན་དེ་
ཝི་ཨ་སོ་ཧི་ཎ་བྷ་ཎི་ཨོ། བི་ཧ་ཧ་ད་ཏེ་པ་རི་བྷ་ཝཾ་ཏེ། ཀ་ཧ་ཝི་ན་ཛ་ཨི་ཞེས་པ་འདི་དག་ནི་སྐད་ངན་པའི་བྱེ་བྲག་གིས་དེ་ཁོ་ན་བཤད་པའོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་དེ་ཁོ་ནའི་ལེའུ་སྟེ་ཉི་ཤུ་རྩ་བརྒྱད་པའོ།། །།
གཞན་ཡང་ཞིང་སྐྱེས་བརྗོད་པར་བྱ་སྟེ། བྲམ་ཟེའི་རིགས་ལས་སྐྱེས་པའི་བུད་མེད་བོང་གེ་རིང་བ། མིག་ཆེ་བ། ཁ་དོག་སེར་སྐྱའམ་ནག་པོ་སྟེ། འདི་ལྟ་བུའི་རྣལ་འབྱོར་མས་དག་པར་བྱེད་དོ། །དམངས་རིགས་ལས་སྐྱེས་

88-1-86b

པའི་རྐང་པ་འཁྱོག་པ་ཁ་དོག་སྔོ་སངས་སམ། སེར་སྐྱ་འམ། ནག་མོ་སྐྲ་འཁྱིལ་བ་སྐད་འཛེར་བ་ནི་མཁའ་འགྲོ་མའོ། །རྡོ་རྗེའི་རིགས་ཀྱང་དེ་དང་མཚུངས་སོ། །རེག་མི་བཏུབ་པ་ལས་སྐྱེས་པའི་མཚན་ཉིད་ཐམས་ཅད་རྫོགས་
པ་དེས་ཁྲུམས་སྟོད་དང་། ནག་པ་དང་། ས་རི་དང་། ལག་དང་། ཆུ་སྟོད་དང་། ནབ་སོ་དང་། བྲ་ཉེ་དང་། སྨིན་དྲུག་རྣམས་ལས་སྐྱེས་པའི་མི་དེ་རྣམས་ཀྱིས་འཇིགས་བྱེད་ཆེན་པོའི་དངོས་གྲུབ་ཐོབ་པར་འགྱུར་རོ། །སྣར་
མ་དང་། མགོ་དང་། མཆུ་དང་། སྐག་རྣམས་ལ་ཡང་ངོ་། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་ཞིང་སྐྱེས་ཀྱི་ལེའུ་སྟེ་ཉི་ཤུ་རྩ་དགུ་པའོ།། །། དེ་ནས་ཞིང་སྐྱོང་བཤད་པར་བྱའོ། །གང་གིས་ངེས་པར་
བགེགས་ཡོད་པའི་སར་ཕྱིན་ལ་ཇི་ལྟར་བསྐྱེད་པར་བྱ་བ་དེ་ལྟར་བསྐྱེད་པ་ནི་དང་པོར་ཡི་གེ་ཧཱུྃ་གིས་དམིགས་ལ་མཆོད་པ་སྣ་ཚོགས་པས་མཆོད་ལ། སྡིག་པ་བཤགས་པ་ལ་སོགས་པ་བྱ་བ་དང་། སྙིང་གར་ཧཱུྃ་ཡོངས་སུ་
གྱུར་པ་ལས་གྲི་གུག་ཡི་གེ་ཀྵཾ་དང་ཧཱུྃ་གིས་བྱིན་གྱིས་བརླབ་པའོ། །དེ་རྣམས་ཡོངས་སུ་གྱུར་པ་ལས་བདག་ཉིད་ཞིང་སྐྱོང་ཕྱག་གཉིས་པ། གྲི་གུག་དང་ཐོད་པ་ཕྱག་ན་བསྣམས་པ། གཡས་བརྐྱང་གིས་བཞུགས་
པས་ཁྱི་མནན་པ། ཕཊ་ཅེས་པའི་སྒྲ་སྒྲོགས་པ། མཆེ་བ་གཙིགས་པ། ཁ་དོག་སྔོ་ནག་སྤྱན་གསུམ་པ། དབུ་སྐྲ་ཁམ་པ་གྱེན་དུ་བརྫེས་པ། སྟག་གི་ལྤགས་པ་ན་བཟར་གསོལ་བ། ཁྲག་མཐུངས་པ། རྣལ་
འབྱོར་མ་གཉིས་ཀྱིས་བསྐོར་བ་བསྒོམས་ནས་སྔགས་རྒྱུན་དུ་བཟླས་སོ། །ཆུ་འགྲམ་གྱི་ས་ལས་ཕྲེང་བ་བྱ། ཥ་ཎ་པའི་སྐུད་པ་ལ་བརྒྱུས་པ་ཐོགས་ལ། ཨོཾ་ཧཱུྃ་ཙཾ་སརྦ་སིདྡྷི་དཱ་ཡཀྵ་ཡ་སྭཱ་ཧཱ་ཞེས་པ་ཟླ་བ་དྲུག་
བཟླས་ན་རྣལ་འབྱོར་པ་གང་འདོད་པ་འགྲུབ་པར་འགྱུར་རོ། །ཁྲག་དང་། ཆང་དང་། ཤ་གསར་པ་དང་། སྲན་མ་མ་ཥ་ལས་བྱས་པའི་ཟན་རྣམས་ལ་གཏོར་མ་བྱས་དེ་ཡིས་ཉི་མ་རེ་སྦྱིན་ནོ། །ལྗོན་ཤིང་གི་དྲུང་ངམ། 

88-1-87a

དུར་ཁྲོད་དམ། ཆུ་འགྲམ་རྣམས་སུ་ཡང་དེ་ལྟར་བྱའོ། །ས་བོན་ཡི་གེ་ཙཾ་ལས་ཞིང་སྐྱོང་སེར་སྐྱ་གསུམ་བསྐྱེད་པ་ནི་རྣལ་འབྱོར་པ་དགེ་བ་དང་མི་དགེ་བའི་ལས་རྒྱུན་ཏུ་སོ་སོར་བྱས་ནས་དངོས་
གྲུབ་བསྒྲུབ་པར་བྱའོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་ཞིང་སྐྱོང་བཞེངས་པའི་ལེའུ་སྟེ་སུམ་བཅུ་པའོ།། །། རྩའི་འཁོར་ལོ་བཤད་པར་བྱའོ། །གསུམ་འདྲེས་པའི་རྣལ་འབྱོར་དང་
ལྡན་པའི་སློབ་དཔོན་ལ་བྱང་ཆུབ་སེམས་དཔའ་ཆེན་པོ་གནས་པ་སྟེ། རང་འདོད་སྤངས་པ་ལ་ཡང་དག་པར་སྤྱོད་པ་ནི་ཨ་བ་དྷཱུ་ཏཱི་དང་ལ་ལ་ནཱ་དང་ར་ས་ནཱ་རྣམས་འདུས་པར་བྱའོ། །རྩ་དྲུག་བཅུ་རྩ་བཞི་བསྟན་པར་
གྱུར་པའི་ནུས་པ་བརྩིས་པ་ནི་ལ་ལ་ནཱ་ཤེས་རབ་ཀྱི་རང་བཞིན་ཅན་དུ་ཤེས་པའོ། །ར་ས་ནཱ་ཁམས་བདེ་བའི་རང་བཞིན་ཅན་ཚོད་ཤེས་པའོ། །ཨ་བ་དྷཱུ་ཏཱི་ནི་བདེ་བ་ཆེན་པོའི་རང་བཞིན་ཅན་མན་ཤེས་པའོ། །ཁམས་དཀར་པོ་བསྐྱེད་པ་
དང་། ཁམས་གསུམ་བསྐྱེད་པའོ། །ཨཊྛ་ཨུཊྛེ་ཧཱ་ནཱ་ཧཱ་ཨི་ཨ། ས་ཨ་ལ་སཾ་མོ་ཧེ། ཙ་ཙ་ཙི་ཨུ་ཧ་རཱ་ཛ་ནེ་ཏཱཾ་བྷཱནྟི་ཨོ། ནཱ་ཧ་ཧ་ནཱ་དྷ་སཾ་ཀུ་ལ་བྷ་ཝ་ཨི་སྭ་ར་ཧ་བྷ་ན་ཨི་ཀཱ་ལ། ཀཱ་ལ་ཧ་ཀ་རི་ཙི་ཨ་ནཾ་པ་ཨི་སྭཱ་ཧཱ། 
འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་རྩའི་འཁོར་ལོའི་ལེའུ་སྟེ་སུམ་བཅུ་སོ་གཅིག་པའོ།། །། དེ་ནས་བཅོམ་ལྡན་འདས་བྱང་ཆུབ་སེམས་ཀྱི་རྡོ་རྗེས་བདག་ལ་སྨྲས་པ་ནི་སེམས་ཀྱི་རང་བཞིན་སྐད་
ཅིག་མ་བཅུ་དྲུག་ཏུ་ཡང་དག་པར་སྐྱེ་བ་དེ། ཡེ་ཤེས་ཆེན་པོའི་རྒྱུའི་རང་བཞིན་ནོ། །རྣམ་པར་ཤེས་པ་དང་ཡུལ་རྐང་པ་གཉིས་འདུ་བ་ལ་བར་དུ་གཅོད་པའི་བུ་མོ་ལ་སྐད་ཅིག་མ་བཅུ་དྲུག་འཛིན་མར་འདོད་པ་ཚ་རེག་དང་གྲང་རེག་ཇི་
བཞིན་ནོ། །ཨ་ཧ་ཀ་ཧ་རེ། ཨི་ཎི་བུདྡྷ་སྭ་བྷཱ་བེ། ཙིཏྟ་བ་ཌནྟི་བོ། བྷ་ཝཱ་ན་སི་ལ། ཨུ་པ་ལཀྑ་མ་ཛ་ཛྷེཾ། ཙཱི་ཨ་པ་ལ་བི་པ་ཕཱ་ར་ཎཱ་ཀཱཾ་ཏི་མ་ཎཱ། བྷནྟི་ཀ་ཐ་ནཾ། འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་དགེ་བ་དང་

88-1-87b

མི་དགེ་བ་བརྗོད་པའི་ལེའུ་སྟེ་སུམ་བཅུ་སོ་གཉིས་པའོ།། །། དེ་ནས་བསམ་གཏན་གྱི་བསྒྲུབ་པ་བཤད་པར་བྱའོ། །གང་དང་གང་གིས་སེམས་ཅན་གྱི་སྡུག་བསྔལ་དགྲོལ་བར་ཤེས་པ་དེས་གྲོ་ག་ལ་དུག་དང་
གཅིན་དང་ཁྲག་རྣམས་ཀྱིས་ཡི་གེ་མཾ་དང་རཾ་དང་གཉིས་ཀྱི་བར་དུ་བསྒྲུབ་བྱའི་མིང་ཧཱུྃ་ཕཊ་དང་ལྡན་པའི་འཁོར་ལོ་བྲིས་པ། དེ་དྲིལ་ཏེ་མེས་བསྲོས་ན་སྐད་ཅིག་དེ་ཉིད་ལ་སྦྱོར་བ་དེས་འཆི་བར་འགྱུར་རོ། །ནང་པར་སྔ་བར་
ལངས་ཏེ་གདོང་བཀྲུས་པ་དང་། ཨོཾ་མ་ཎི་བྷ་དྲཱ་ཡ་མ་ཧཱ་ཀ་ལ་པྲཱ་ཀྲྀ་ཏི་སེ་ན་པ་ཏ་ཡེ། ཨོཾ་མི་ལི་མི་ལི་མཱནྡྷ་ནཱཾ་དྷ་ད་དཱ་པ་ཡེ་སྭཱ་ཧཱ་ཞེས་པས་ཕོགས་བཅྭ་ལྔ་རུ་བྱུག་ཅིང་མཎྜལ་ཟླུམ་པོ་བྱས་ལ། ཨོཾ་ནཾ་དཱི་མ་ཧཱ་ཀཱ་ལཱ་ཡ་བཛྲ་
པུཥྤེ་ཧཱུྃ། ཞེས་པས་མེ་ཏོག་ཨ་པ་རཱ་ཙི་ཏ་ནག་པོ་དབུས་སུ་དབུལ་ལོ། །ཨོཾ་ཀཱ་ལཱ་ཡ་ཀ་ཡཀྵཱ་ཡ་བཛྲ་པུཥྤེ་ཧཱུྃ་ཞེས་པས་ཤར་ཕྱོགས་སུའོ། །ཨོཾ་བ་ཌཱ་ལ་མུ་ཁཱ་ཡཀྵཱ་ཡ་བཛྲ་པུཥྤེ་ཧཱུྃ་ཞེས་པས་ལྷོ་ཕྱོགས་སུའོ། །ཨོཾ་ཨ་སྭ་མུ་
ཁཱ་ཡཀྵཱ་ཡ་བཛྲ་པུཥྤེ་ཧཱུྃྃ་ཞེས་པས་ནུབ་ཕྱོགས་སུའོ། །ཨོཾ་ཀྲྀ་མི་མུ་ཁཱ་ཡཀྵཱ་ཡ་བཛྲ་པུཥྤེ་ཧཱུྃ་ཞེས་པས་བྱང་ཕྱོགས་སུའོ། །མཚམས་རྣམས་སུ་ནི་ར་ཧུ་མུ་ཁཱི་ཡཀྵཱི་ཡཀྵི་ཡ་ཎྱཻ་མཾ། སཱུ་ཀ་ར་མུ་ཁཱི་ཡཀྵི་ཎྱཻ་ཧཱུྃ། ཨུ་ལཱུ་ཀ་མུ་ཁཱི་སྭ་དྷི་ཏ་ཡཀྵཱི་ཎེ་
བཾ། ཨ་སུ་ཙ་ཏི་ཡ་མུ་ཁཱི་ཡ་ཁཱི་ཎེ་བཾ་ཞེས་པ་ཐམས་ཅད་ལ་སྭཱ་ཧཱ་སྦྱར་བས་སོ། །ཕྱི་ནས་ཡང་མེ་ཏོག་དབུས་སུ་དབུལ་བ་ནི། ཨོཾ་མུཀྟ་མུཀྟ་མ་ཧཱ་ཀཱ་ལཱ་ཡ་སྭཱ་ཧཱ། ཨོཾ་སྥོ་ཊ་ཀ་མ་ཧཱ་ཀཱ་ལཱ་ཡ་སྭཱ་ཧཱ། ཨོཾ་ཀུ་རུ་ཀི་ཏ་མ་ཧཱ་ཀཱ་ལཱ་ཡ་སྭཱ་
ཧཱ། ཨོཾ་གཱ་ཌྷ་ཙཀྲ་མ་ཧཱ་ཀཱ་ལཱ་ཡ་སྭཱ་ཧཱ། ཨོཾ་ཁི་ཊ་གུ་རུ་མ་ཧཱ་ཀཱ་ལཱ་ཡ་སྭཱ་ཧཱ། ཞེས་པ་རྣམས་དང་བཅས་པས་སོ། །གཟུངས་བརྒྱ་རྩ་བརྒྱད་ཀྱང་བཟླས་པར་བྱའོ། །ཕྱི་ནས་བཟོད་གསོལ་བྱས་ལ། ཨོཾ་སུ་ག་པད་མ་ཧཱ་ཀཱ་ལཱ་
ཡ་མུཿཞེས་པས་གཤེགས་སུ་གསོལ་ལོ། །འདིའི་དུས་སུ་ཤིང་ནིམ་པ་ལ་སྟན་བྱ། གོས་སྔོན་པོ་བགོ་ཞིང་གཞོན་ནུ་མ་བདུན་ལ་ཉི་མ་རེ་རེ་ཞིང་རས་ཡུག་རེ་རེ་སྦྱིན། རྗེ་བཙུན་ལ་མེ་ཏོག་ཨ་པ་རཱ་ཛི་ཏ་དབུལ། བཟའ་བ་དང་། 

88-1-88a

བཏུང་བ་སྔོན་དུ་གསུངས་པ་ལྟར་བཟའ་བཏུང་བྱ། དེ་ལྟར་ཐམས་ཅད་དུས་གསུམ་དུ་བྱས་ན་སངས་རྒྱས་ཐམས་ཅད་ལ་བསྙེན་བཀུར་བྱས་པའོ། །མཎྜལ་འདི་བྱ་རོག་སྐད་མ་བཏོན་པའི་དུས་སུ་ལངས་ལ་བྱའོ། །
ནམ་གྱི་ཆ་སྨད་ལ་ནག་པོ་ཆེན་པོ་ཕྱག་བཅུ་དྲུག་པ་བཀྲམ་ལ་ཆང་འཐུང་ཞིང་ཐུན་ཚོད་རེ་རེའི་བར་དུ་གཟུངས་ཀྱི་སྔགས་ཀྱིས་བྱིན་གྱིས་བརླབ་པའི་སྦྱོར་བ་འདི་སྒྲུབ་པ་པོས་བྱས་ན། རྗེ་བཙུན་ནག་པོ་ཆེན་པོས་ཟླ་བ་གསུམ་གྱི་བར་ལ་རྨི་
ལམ་སྟོན་ཅིང་ངེས་པར་དངོས་གྲུབ་ཀྱང་འཐོབ་པར་འགྱུར་རོ། །སྒོམ་ཆེན་པའི་གཟུགས་ཀྱི་གསེར་སྲང་ཕྱེད་དང་གསུམ་སྟེར་བར་འགྱུར་རོ། །ཟླ་བ་དྲུག་གི་བར་གྱིས་མཁའ་སྤྱོད་ཀྱི་དངོས་གྲུབ་ཐོབ་ཅིང་རིམ་གྱིས་ཐམས་ཅད་འགྲུབ་
སྟེ། ངེས་པར་ཕྱག་རྒྱའི་དངོས་གྲུབ་འཐོབ་པར་འགྱུར་རོ། །གལ་ཏེ་གཅིག་ཀྱང་མ་གྲུབ་ན་ངས་ངེས་པར་མཚམས་མེད་པ་ལྔའི་ལས་བྱས་པར་འགྱུར་ཞིང་ལྷ་ཐམས་ཅད་བསད་པ་དང་མཚུངས་སོ། །རྒྱུད་འདི་ནི་རྣལ་འབྱོར་གྱི་ཆོ་
གའི་བཅུད་ཐམས་ཅད་བསྡུས་པ་ཉིད་དོ། །གལ་ཏེ་ལེའུ་འདིའི་སྦྱོར་བ་ལ་ཉེ་བར་གནས་ནས་བསྒྲུབས་ན་སྐད་ཅིག་གིས་ཁྱབ་པར་བྱེད་པའི་མཚམས་མེད་པ་ལྔའི་རྣམ་པར་སྨིན་པ་ཉམས་སུ་མྱོང་བར་མི་འགྱུར་རོ། །ཉེ་བར་
ལོངས་སྤྱད་པར་བྱ་བའི་མཆོད་སྦྱིན་གྱི་ཤིང་ནི་མཚན་ཉིད་དང་ལྡན་པའི་ཐབ་ཁུང་བས་ཅུང་ཟད་ཐུང་བའོ། །ཞི་བར་བྱ་བའི་དོན་དུ་ཐང་སྟོང་གི་ལྕི་བ་བླངས་ལ་བྱའོ། །རྒྱས་པར་བྱ་བ་ལ་རྗེ་བཙུན་གྱི་མདུན་དུ་ཇི་ལྟ་བ་བཞིན་
ཐབ་བཅས་ལ་རྟེན་དུ་བྱས་པའི་ཤིང་འབྲས་བུ་དང་ལྡན་པ་ལ་ཐབ་ཁུང་དམའ་བར་བྱས་པས་སོ། །ལྷ་མོས་གསོལ་པ། ཀྱེ་རྗེ་བཙུན་སྦྱིན་སྲེག་ཤིང་གི་བྱེ་བྲག་བླངས་ལ་བསྲེག་པར་བྱ་བ་རྣམས་ཀྱི་ནང་ནས་མཆོག་ཏུ་གྱུར་པ་
གང་ལགས། སེམས་ཅན་རྣམས་ལ་ཕན་པ་དང་བདེ་བའི་དོན་དུ་གསུངས་ཤིག །བཅོམ་ལྡན་འདས་ཀྱིས་བཀའ་སྩལ་པ། དེ་རྣམས་ཀྱི་ནང་ནས་མཆོད་སྦྱིན་གྱི་ཤིང་སྲོག་ཆགས་མེད་པ། སྐམ་པ། ཐབ་ཁུང་བས་ཅུང་ཟད་

88-1-88b

དམའ་བ། སྔར་བཤད་པའི་འབྲས་བུ་ཅན་གྱི་ཤིང་རྒྱས་པའི་ཐབ་ཁུང་དུ་ལྕི་བ་སྤངས་པས་སོ། །མངོན་སྤྱོད་ལ་ཤིང་རོ་ཚ་བ་ཚེར་མ་དང་ལྡན་པས་དྲི་ཞིམ་པའམ། དུར་ཁྲོད་ནས་བྱུང་བ་འམ། བོང་བུ་འམ། རྟ་ལ་སོགས་པའི་
སྦངས་སྐམ་པོས་ངེས་པར་འགྲུབ་པར་འགྱུར་རོ། །དབང་དུ་བྱ་བ་ལ་ཤིང་དྲི་ཞིམ་པ་ཨཾ་པའི་འབྲས་བུ་དང་། མེ་ཏོག་དང་ལྡན་པས་སོ། །དགུག་པ་ལ་ཤིང་ཚེར་མ་ཅན་ལ་སོགས་པ་སྟེ་སྦྱིན་སྲེག་གི་རིམ་པའི་བྱེ་བྲག་གོ། །ལྷ་
མོས་གསོལ་པ། གལ་ཏེ་དངོས་གྲུབ་ཆེན་པོ་བརྒྱད་ཐོབ་པར་འདོད་པའི་རྣལ་འབྱོར་པས་ཚེས་བརྒྱད་དམ་བཅུའི་དུས་སུ་གོང་དུ་གསུངས་པ་ལྟར་མཎྜལ་བྱས་ལ་སྔགས་སྟོང་ཕྲག་ལྔ་ཤ་དང་ཆང་བཟའ་བ་དང་བཏུང་བ་
དང་བཅས་ཏེ་བཟླས་པར་བྱའོ། །ཉལ་བའི་དུས་སུ་ཆང་ཕོགས་བརྒྱ་རྩ་བརྒྱད་དུ་མཉེས་པས་གདོང་བཀྲུས་ནས་ཉལ་ན། རྨི་ལམ་དུ་དགེ་བ་དང་མི་དགེ་བ་སྟོན་ནོ། །དེ་རྣམས་ཀྱི་སྔགས་ནི་ཨོཾ་མུ་སྭཔྣ་ག་ཀ་ཐཱ་ཡ་ཧཱུྃ་ཞེས་པའོ། །
དེ་ལྟར་མིན་ན་སྔགས་དེས་ལྕེ་སྤྱང་གི་ཤ་ལ་སོགས་པ་ཆང་གིས་སྦགས་ལ། ཆུ་ནང་གི་ཤིང་མེ་ལ་ཁྲི་ཕྲག་གཅིག་ཏུ་སྦྱིན་སྲེག་བྱས་ན་ཉལ་བའི་དུས་སུ་མར་མེའི་མར་གྱིས་སྔགས་བརྒྱ་ཕྲག་གཅིག་བཟླས་ཤིང་རྐང་པ་
ལ་བྱུགས་ཏེ་ཉལ་ན་རྨི་ལམ་དུ་འབྱུང་བ་དང་མི་འབྱུང་བ་ངེས་པར་ཤེས་པར་འགྱུར་རོ། །གཉིད་མ་ལོག་པའི་དམིགས་པའི་སྦྱོར་བ་ནི། ཨོཾ་མ་ཎི་དྷཱ་རི་ཎཱི་ནནྡ་ཡ་ནནྡ་ཡ། སྭཔྣ་ཀཱ་ཐ་ཡ་ཀཱ་ཐཱ་ཡ་ཧཱུྃ་ཕཊ་སྭཱ་ཧཱ། ཞེས་ཁྲི་
ཕྲག་ལྔ་བཟླས་ཏེ་རང་གི་ཆུས་གདོང་བཀྲུས་ནས་བྱ་བ་ལ་སེམས་ཤིང་ཉལ་ན་དགེ་བ་དང་མི་དགེ་བའི་དོན་འབྱུང་བ་དང་མི་འབྱུང་བ་སྟོན་ཏོ། །གཞན་ཡང་སྔགས་པས་སྦྱོར་བས་བསྒྲུབ་པར་བྱ་བ་ནི་ཆོ་གའི་རིམ་པ་ཇི་
ལྟ་བ་བཞིན་དུ། རྔ་མོ་ལ་སོགས་པ་འམ། བ་ལང་ངམ། མ་ཧེ་རྣམས་དང་སྟབས་གཅིག་ཏུ་འགྲོ་ཞིང་། སྔར་གྱི་སྔགས་མཆོག་བཟླས་ན་ཐེ་ཚོམ་མེད་པར་འགྲུབ་པར་འགྱུར་རོ། །གྲོང་ཁྱེར་གྱི་ཕྱི་རོལ་

88-1-89a

ལམ། ལྡུམ་ར་འམ། མཚན་མ་གཅིག་པ་འམ། དུར་ཁྲོད་རྣམས་སུ་དུས་ཐམས་ཅད་དུ་ཕྱིན་ལ་རྣལ་འབྱོར་པ་གསུམ་མམ་ལྔ་དང་སྟབས་གཅིག་ཏུ་ཆང་དང་ཤ་ལ་བདེ་བར་ལོངས་སྤྱད་ལ། དེ་ནས་ཁྱིམ་དུ་
འོངས་ལ། ཀུན་དུ་རུའི་སྦྱོར་བ་བྱས་ནས་ཇི་ལྟར་འབྱོར་པའི་རྫས་ཀྱིས་གཏོར་མ་གཏང་སྟེ། སེམས་ཀྱི་བྱ་བ་བྱས་ལ་ཉལ་ན། འཇིགས་བྱེད་ཆེན་པོས་ངེས་པར་དགེ་བ་དང་མི་དགེ་བའི་རྨི་ལམ་སྟོན་ཞིང་རིལ་བུ་དང་བཀྲ་ཤིས་པའི་
གནས་དང་། ཚེ་ལོ་ལྔ་བརྒྱ་ཐུབ་པའི་སྨན་རྣམས་ཐེ་ཚོམ་མེད་པར་མངོན་སུམ་སུ་སྟེར་བར་འགྱུར་རོ། །རིམས་གཞོམ་པ་ནི་ཡི་གེ་ཧཱུྃ་བརྗོད་ཅིང་སྨན་ཛ་ཡནྟའི་རྩ་བ་བཟའ་བར་བྱས་ན་ཐེ་ཚོམ་མེད་པར་ཞི་བར་འགྱུར་རོ། །ཡང་
ཨོཾ་ཨ་མོ་གྷ་རི་ཏི་མ་ཧཱ་ཀཱ་ལཱ་ཧཱུྃ་ཕཊ་ཕཊ། ཀི་ལི་ཀི་ལི། མ་ར་མ་ར། ཀཱ་ར་ཡ་ཀཱ་ར་ཡ། ས་མ་ས་མ། ཙ་མ་ཙ་མ། ད་མ་ད་མ། ཛྭ་ར་མེ་ཀཱ་ཧི་ཀཌྜྷྱ་ཧི་ཀཌྜྷྱ་ཏ་ཀིཾ་ཙ་ཏུརྦ་ཀཾ། མཱ་སི་ཀཾ། མ་དྷ་མཱ་སི་ཀཾ། བེེཏྟི་ཀཾ། ཀླེཥྨི་ཀཾ། ཧཱུྃ་
ཏ་ཛཾ། བཻ་ཏཱ་ཌཱཾ། ཧ་ན་ཧ་ན། ཤཱན་ཏི་མ་མུ་ཀ་སྱ་ཀུ་རུ་ཧ་ཧཱ་ཧི་ཧཱི་ཧུྃ་ཧཱྃ་ཧེ་ཧཻ་ཧོ་ཧོ་ཧཾ་ཧཿཞེས་བཟླས་པ་དང་། དབུགས་ཕྱེད་ལ་སྐུད་པ་བསྒྲིམས་པ་ལ་མདུད་པ་བྱས་ལ་སྐྲ་ལ་བཏགས་ན། ནད་རིམས་རབ་ཏུ་ཞི་བར་འགྱུར་རོ། །
ཡང་ཨོཾ་མ་ཧཱ་ཀཱ་ལ་ཤུ་ཙི་ར་པུ་ཝི་རྭ་སྤུ་ར་བརྡྷ་ན་ཧཱུྃ་ཕཊ་སྭཱ་ཧཱ། ཞེས་པའི་སྔགས་ཀྱི་རྒྱལ་པོ་ཆེན་པོ་ཡི་གེ་བཅུ་བདུན་པ་འདི་འབུམ་ཕྲག་གཅིག་བཟླས་ནས་བསྒྲུབ་པར་བྱ་བ་ནི། སྨན་ག་ལ་ར་ཊ་དང་། སུ་པ་ལ་ན་དང་། མ་
ཧཱནྟ་ར་དང་། ཨི་ཀྑ་ར་ཡ་ཝ་དང་། ས་མ་ཊ་ར་ཎི་དང་། ཨ་ལ་ཝུ་དང་། ནཱི་ར་ཀ་ལ་དང་། ཀཱཾ་ཊཱ་ཧཱ་པཱི་ཀ་ཛ་དང་། ཆུ་ཤིང་གི་འབྲས་བུ་དང་། སྦྲང་དང་། ཊ་སུ་རཱི་དང་། མུ་ཏི་རི་དང་། ས་པྟ་དང་། ལི་དང་། ཨྃ་ག་བ་ལཱི་
དང་། ར་ཎ་སཱ་སུ་ར་དང་། ཕེ་ཊ་ཝཱ་ར་དང་། གྷ་ན་ཊ་ཀ་ཕ་ལ་དང་། སུ་མུ་རི་དང་། ཙནྡྲ་མ་སུ་རི་དང་། ཨུ་བྷཀྟ་ཙི་དང་། ལ་ཊ་ཀཱི་དང་། ཏེ་ན་ཧ་དང་། ཙཪྚ་པྲི་དང་། པུཀྵ་ཡཱ་དང་ཙ་ར་ཊ་དང་། མ་དི་ར་བཱི་ཛ་དང་ཧཱཾ། སུཾ་ཕ་ལ་

88-1-89b

དང་། ཧ་སྒོར་དྲ་བྱ་ནེ་ཧ་ར་དང་། སུདྡྷ་མུ་ཎི་པྲཱ་ཙཱརྱ་ཕ་ལ་དང་། ཨཾ་མྲ་ཕ་ལ་དང་། པྲ་ཧ་རི་དང་། ཀུནྡྷི་ལི་ཙ་ལཱི་དང་། ཛ་ལ་ཙ་ར་ཌིབྦ་དང་། ཧངྶ་ཌིབྦ་དང་། མཱ་ག་ཊ་དང་། བུ་མ་ལ་ཧ་དང་། ཨ་ཡན་ཏ་ཕ་ལ་དང་། ཀཉྫ་རུ་དང་། པུ་ག་དང་། ཨ་མུ་ག་ལ་དང་། 
གྷན་པཱ་ར་མཱ་ན་སཱ་དང་། རྣལ་འབྱོར་པས་རྫས་བཞི་བཅུ་པོ་དེ་རྣམས་བཟུང་ལ། ཟླ་བ་དང་། ཉི་མ་གཟས་བཟུང་བའི་དུས་སུ་དེ་རྣམས་ཆ་མཉམས་ལ་ལྟོ་སྟོང་ལ་མིད་ནས་ཇི་སྲིད་གྲོལ་གྱི་བར་དུ་སྔགས་བཟླས་ན་སྐད་ཅིག་དེ་ཉིད་ལ་འཆི་
བ་མེད་དེ་མཁའ་སྤྱོད་ཀྱི་དངོས་གྲུབ་འགྲུབ་པར་འགྱུར་རོ། །གལ་ཏེ་མ་གྲུབ་ན་སྒྲུབ་པ་པོས་ཟླ་ཕྱེད་བསྐྱར་ན་ལོ་སྟོང་ཕྲག་གཅིག་ཏུ་འཚོ་ཞིང་དངོས་གྲུབ་ཆེན་པོ་བརྒྱད་རྣམས་ལས་གང་འདོད་པ་དེ་འགྲུབ་པར་འགྱུར་རོ། །ཟླ་བ་དང་ཉི་མ་
གཟས་གཏོང་བའི་དུས་སུ་གོང་གི་བྱ་བ་བྱེད་པ་དེས་ཐེ་ཚོམ་མེད་པར་ཐམས་ཅད་མཁྱེན་པ་དང་མཚུངས་པའི་སངས་རྒྱས་འཐོབ་བོ། །གལ་ཏེ་དངོས་གྲུབ་འདི་མ་གྲུབ་ན་སངས་རྒྱས་དང་ཆོས་དང་དགེ་འདུན་རྣམས་རྣམ་པར་སྨད་པ་
ཡིན་ནོ། །དེའི་ཕྱིར་ཚིག་མང་པོས་དགོས་པ་མེད་དེ། གང་གིས་དེ་རྣམས་ལས་འདི་མཐོང་བ་ལ་ཉེ་བར་གནས་པར་མི་བྱེད་པའི་མི་དེ། སྡིག་པའི་གོང་བུ་དང་མཚུངས་པར་རིག་པར་བྱ་སྟེ། སྐྱེ་བ་འདིར་དགྲོལ་བར་མི་ནུས་སོ། །
ལེའུ་འདི་ནི་དད་པ་དམན་པ་རྣམས་ལ་གསལ་པོར་བསྒྲག་པར་མི་བྱའོ། །གལ་ཏེ་གསལ་པོར་བསྒྲགས་ན་སློབ་དཔོན་དེས་དེ་བཞིན་གཤེགས་པ་ལྔ་རྣམ་པར་ཉམས་པར་བྱས་པའོ། །ལེའུ་འདི་མཐོང་བ་ཙམ་ཡང་རྙེད་པར་དཀོན་ནོ། །སྨན་
བྷན་དུཾ་དང་། ཀཱི་རཾ་དང་། མ་ཀ་རི་དང་། སུ་མི་ཏཾ་དང་། པྲ་བྷཾ་ཌཾ་རྣམས་ཟླ་བ་དང་ཉི་མ་གཟས་བཟུང་དུས་སུ་ཟོས་ན་ངག་གི་དབང་ཕྱུག་འགྲུབ་པར་འགྱུར་རོ། །ལྗོན་ཤིང་པུ་ན་ལའི་རྩ་བ་དང་། ས་ག་རའི་འདབ་མ་དང་། པ་ར་ད་རྣམས་
དང་། ཚ་བའི་མར་དང་ཡང་དག་པར་ལྡན་པ་གཟས་བཟུང་བའི་དུས་སུ་ཟོས་ན་ཐོས་པ་ཙམ་གྱིས་འཛིན་པར་ནུས་པ་དང་། བཀླགས་པ་ཙམ་གྱིས་ཟིན་པར་ནུས་པ་དང་། ཐེ་ཚོམ་མེད་པར་ཚིགས་སུ་བཅད་པ་རྩོམ་པར་ནུས་པར་འགྱུར་རོ། །

88-1-90a

སྨན་བྲ་ཧྨི་ཙུ་ཊ་དང་། བྷོ་ཊཱ་ར་ལཱ་དང་། ཐང་ཤིང་གི་ཁུ་བ་དང་། སྟོབས་གཅིག་ཏུ་འཐུངས་ན་པཎྜི་ཏར་འགྱུར་རོ། །ཤུ་དག་དང་། མཱ་ནི་དང་། ལྒ་དང་། གོ་སྙོད་དང་། ཀམྚ་བཛྲ་མ་ལི་རྣམས་སྦྲང་དང་སྦྱར་ཏེ་ཟོས་ན། 
སྐད་ཅིག་གིས་པཎྜི་ཏ་ཆེན་པོར་འགྱུར་རོ། །ཨོཾ་མཱ་ཧྲཱིཿཞེས་པའི་སྔགས་འདི་གཟས་བཟུང་བའི་དུས་སུ་སྨན་བདར་ཁར་བཅུག་སྟེ་ཇི་སྲིད་བཏང་གི་བར་དུ་བཟླས་ན་ཉིན་རེ་ཞིང་ཚིགས་སུ་བཅད་པ་བརྒྱ་ཕྲག་རེ་རེ་ཟིན་པར་འགྱུར་རོ། །
སྔགས་སྟོང་ཕྲག་གཅིག་བསྙེན་པ་བསྐྱལ་ནས་ལག་པའི་མཐིལ་དྲུལ་ཏེ་ཆུ་ཁྱོར་བ་གང་འཐུངས་ན་དབྱངས་ཅན་མ་འགྲུབ་པར་འགྱུར་ཏེ། ངེས་པར་ཐོས་པ་ཙམ་གྱིས་ཟིན་པར་འགྱུར་རོ། །སྔགས་འདི་ཁྲི་ཕྲག་གཅིག་སྦྱིན་སྲེག་
བྱས་ན་གསུང་ཆེན་པོ་ཚིག་དག་པ་ཡང་ཐོབ་པར་འགྱུར་རོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་དབྱངས་ཅན་མའི་ཆོ་ག་བསམ་གཏན་གྱི་བསྒྲུབ་པའི་ལེའུ་སྟེ་སུམ་བཅུ་སོ་གསུམ་པའོ།། །།
གཞན་ཡང་གཞོན་ནུ་མས་རྩི་བའི་ལེའུ་བཤད་པར་བྱའོ། །མཛྗྷེཾ་ཧ་རི་པུ་ཧ་ཨུ་ར་ཧ་རི་ཨོ། ཨནྟེ་ཨ་རུ་ཛུ་ཨུ་ར་པ་སི་ཨོ། ཛ་ཛཱ་ཛ་ཏ་ཐ་མ་ཛཱ་ཨི་ཨོ་ཏ་ཀྑ་ཎ་ཧོ། ཨི་ཎུ་པཱ་ཝི་ཨོ་ཀ་ཧ་ནཾ། ཨ་ར་ཝཱ་ར་ཎི་ཡུ་ཏྟི་ཨ་ནཱ་ཧི་ཨོ། 
སུ་ཏི་ཨོ་པ་ཨི་ཊི་ཨུ་སེ་ས་ཝཀྐཱ་ན་ཏེ་ས་ཀ་ཁུ་ས་ཧི་ཨོ། ཛཾ་ཧ་ཨུ་དཱ་ཐ་ཨ་ཧ་ཨོ། ཀ་ཧ་ཀ་ཧ་ཏ་ག་ཁ་ཎུ་ཀ་ཧི་ཨོ། འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་གཞོན་ནུ་མས་རྩི་བའི་ལེའུ་སྟེ་སུམ་བཅུ་སོ་བཞི་པའོ།། །།
གཞན་ཡང་རིམ་གྱིས་སྣའི་རྒྱུ་བ་གཉིས་གཅིག་ཏུ་བྱ་སྟེ། བརྒྱུས་ན་ལྷ་རྣམས་ཀྱང་འཆི་བར་འགྱུར་བས་སོ། །དཔེར་ན་གྲོང་ཁྱེར་གྱི་སྐྱེ་བོ་མི་ཤེས་པ་རྣམས་ཀྱིས་ཁྲིམས་དང་འགལ་བ་བྱས་ཏེ། ཡུལ་ནས་འཐོན་པ་དང་
སྐྲག་ཅིང་དངངས་པས་དེ་རྣམས་བྲོས་ཀྱང་སྲོག་དང་འབྲལ་བར་འགྱུར་བ་ལྟར་རོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་མཉམ་པར་སྦྱོར་བའི་ལེའུ་སྟེ་སུམ་བཅུ་སོ་ལྔ་པའོ།། །། གཞན་ཡང་གི་ཝང་

88-1-90b

དང་། སཱ་ཥཱ་དང་། ཙོ་ཎ་དང་། པྲེ་ཏ་རྣམས་ཆ་བསྙམས་ནས་ཁར་བཅུག་སྟེ་སྔགས་བཟླས་ན་འདས་པ་དང་མ་འོངས་པའི་དོན་ངེས་པར་ཤེས་པར་འགྱུར་རོ། །ཡང་འགི་ཝང་དང་སུ་ཁ་ད་ཡཱི་དང་། པ་ར་སོ་དྷཱ་ནཱི་དང་། ཧ་པུ་རུ་རུ་དང་། 
ཨ་རུ་དཱུ་ནི་རྣམས་དཀའ་བ་སྤྱོད་པས་ཆ་བསྙམས་ནས་རིལ་བུ་བྱ་སྟེ། མིད་ན་སྐད་ཅིག་དེ་ལ་འདས་པ་དང་མ་འོངས་པའི་དོན་ཤེས་པར་འགྱུར་རོ། །ཡང་ཡུང་བ་དང་། སེ་ན་དང་། ར་ཎ་པ་ཎ་རྣམས་ཀྱི་ཁུ་བས་མིག་གཉིས་ལ་
བྱུགས་ན་འཇིག་རྟེན་གསུམ་ན་གནས་པ་ཤེས་ཤིང་མཐོང་བར་འགྱུར་རོ། །ཡང་ཨ་ཤ་མཱུ་ལི་དང་། ཛ་ཡནྟ་མུ་ལ་དང་། པཎྜ་ཏ་ཀ་ར་མཱུ་ལ་རྣམས་ཟླ་བ་དང་། ཉི་མ་གཟས་བཟུང་བའི་དུས་སུ་ཁུ་བ་ལ་བསྣུར་ནས། བྱ་བ་ཐམས་
ཅད་བསྔོགས་ལ་ཁར་བཅུག་སྟེ་སྔགས་བཟླས་སོ། །ཕྱི་ནས་ཁའམ་གསང་བའི་ལམ་དུ་བཅུག་ན་ངེས་པར་འདས་པ་དང་མ་འོངས་པའི་དོན་ཤེས་པར་འགྱུར་རོ། །གལ་ཏེ་མི་ཤེས་ན་ངས་མཚམས་མེད་པ་ལྔ་བྱས་པའོ། །
ལྗོན་ཤིང་གང་དང་གང་གི་རྩ་བ་ཟིལ་པའི་ཆུ་ལ་བསྣུར་ན་ཁ་དོག་བཟང་པོར་འགྱུར་རོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་ཁ་དོག་འབྱུང་བའི་ལེའུ་སྟེ་སུམ་བཅུ་སོ་དྲུག་པའོ།། །།
གཞན་ཡང་རེངས་པར་བྱ་བའི་སྔགས་བཤད་པར་བྱའོ། །ཨོཾ་ཛ་ལ་ཡ་ཝ་ཧཱུྃ་ཞེས་པ་འབུམ་ཕྲག་གཅིག་བཟླས་ན་འདས་པ་དང་མ་འོངས་པའི་དོན་ཤེས་པར་འགྱུར་རོ། །ཨོཾ་ཝ་ར་ཝ་ར། པྲ་ཝ་ར་པྲ་ཝ་ར་ཧཱུྃ་ཞེས་
པ་ཁྲི་ཕྲག་གཅིག་བཟླས་ཏེ་ཕྱི་ནས་ཕོགས་བདུན་བཟླས་ཤིང་གདོང་བཀྲུ་བ་དང་བཏུང་བར་བྱས་ན། ཐོས་པ་ཙམ་གྱིས་ཟིན་པ་དང་། བཀླགས་པ་ཙམ་གྱིས་ཟིན་པར་འགྱུར་རོ། །ཨོཾ་པྲ་ཝ་ར་ཧྲཿརབ་ཏུ་དགུག་པའི་སྔགས་
སོ། ཨོཾ་པཱ་སུ་ག་ཡ་ལི་ཧཱུྃ་བསྐྲད་པའི་སྔགས་སོ། །ཨོཾ་ཁ་ཊ་པ་ཙ་ཏྲ་ཧྲཿགསད་པའི་སྔགས་སོ། །ཨོཾ་རུ་ཨ་སྭཱ་ས་བི་དུ་པཿ། རྨུགས་པར་བྱེད་པའི་སྔགས་སོ། །ཨོཾ་ཧཿཧཿཛཿདགུག་པའི་སྔགས་སོ། །ཨོཾ་ཧེ་

88-1-91a

ཏིཥྛ་ཧེ་བཿཧཱུྃ་མཁའ་འགྲོ་མ་འཆིང་བའི་སྔགས་སོ། །ཨོཾ་མཱཾ་རཾ་ཧ་འབྱུང་པོ་འཆིང་བའི་སྔགས་སོ། །ཨོཾ་ཨཱཿསྭཱ་ཧཱ་བྱ་ཁྱུང་བཅིང་བའི་སྔགས་སོ། །ཨོཾ་མཱཾ་ཧཱུྃ་བྱ་སྐྲད་པའི་སྔགས་སོ། །ཨོཾ་ཛྭཾ་རཾ་མེ་
རེངས་པར་བྱ་བའི་སྔགས་སོ། །ཨོཾ་ཛཾ་ཛཾ་ཛཾ་ཆུ་རེངས་པར་བྱ་བའི་སྔགས་སོ། །ཨོཾ་ཧཾ་ཛཾ་ཡཾ་སྭཱ་ཧཱ་རལ་གྲི་རེངས་པར་བྱ་བའི་སྔགས་སོ། །ཨོཾ་ཛཾ་མཾ་རཾ་ཁུ་བ་རེངས་པར་བྱ་བའི་སྔགས་སོ། །བཅོམ་ལྡན་འདས་ཀྱིས་
བཀའ་སྩལ་པ། དབེན་པའམ་རྡོ་རྗེའི་ཁྱིམ་མམ་ཁང་སྟོང་རྣམས་སུའོ། གཞན་དུ་ནི་མ་ཡིན་ནོ། །ནག་པོ་ཆེན་པོའི་དཀྱིལ་འཁོར་བསྒོམས་ལ་བྱ་བ་ཐམས་ཅད་བྱ་བ་ནི་ཆང་དང་ཤ་དང་ཁྲག་དང་བ་ལང་ཤ་རྣམས་དང་
བཅས་པས་སྲུ་མོ་དང་། ནེ་ནེ་མོ་དང་སྲིང་མོ་དང་། ཚ་མོ་དང་མ་ཡར་མོ་དང་། བུ་མོ་དང་། ཞང་པོའི་ཆུང་མ་རྣམས་ལ། རྣལ་འབྱོར་པས་སྙོམས་པར་འཇུག་པ་ནི་དང་པོ་སྐེ་ནས་འཁྱུད་དེ། མཆུ་ནས་སོས་བཟུང་
ལ་ནུ་མ་ལ་སེན་མོས་བྲུད་མཚན་མར་སོར་མོ་གཞུག་གོ། །དེ་ནས་བསྐྱོད་པ་དང་དེས་བྷ་ག་ཙུམ་པ་ན་བྱའོ། །ཨོཾ་གཽ་རི་བན་དྷ་མུ་ཧྲཾ་སརྦ་གཽ་རི་ཏ། ཛྙཱ་ནཾ་ད་དཱ་མཎ་ཌ་ལེ་སྥཱ་ཊ་ཡེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། ཞེས་
པ་ནི་རྣལ་འབྱོར་མ་བྱིན་གྱིས་བརླབ་པའི་སྔགས་སོ། །བློ་གྲོས་ཅན་གང་གིས་འདི་རྣམས་བྱེད་པས་ངེས་པར་བདེ་བ་ཐམས་ཅད་འགྲུབ་པར་འགྱུར་རོ། །བཟའ་བ་དང་བཏུང་བ་དང་ལྡན་པར་རྣལ་འབྱོར་མ་དང་སྟབས་
གཅིག་ན། ལྷ་མོ་ཨུ་མཱ་ཐེ་ཚོམ་མེད་པར་སྤྱན་དྲངས་པར་འགྱུར་རོ། །དགུན་གྱི་དུས་ན་མེ་ཏོག་བན་དྷུ་སྤྱི་བོར་བཏགས་ན་སྤྱན་དྲངས་པར་འགྱུར་རོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་རེངས་པར་བྱ་བའི་
སྔགས་ཀྱི་ལེའུ་སྟེ་སུམ་བཅུ་སོ་བདུན་པའོ།། །། གཞན་ཡང་མི་རྣམས་ཞི་བར་བྱ་བའི་སྦྱིན་སྲེག་བཤད་པར་བྱ་སྟེ། ཐབ་ཁུང་གྲུ་བཞི་པ་གཏིང་དུ་ཁྲུ་ཕྱེད་བྲུས་པར་སྦྱིན་སྲེག་སྟོང་ཕྲག་བདུན་བྱ་

88-1-91b

བ་ནི་ཇི་ལྟར་རྙེད་པའི་མེ་ཏོག་གིས་ཨོཾ་ཀྵཾ་ས་མ་སིདྡྷེ་དྷ་པ་ཡ་ཧྲཱཾ་སྭཱ་ཧཱ་ཞེས་པ་དང་བཅས་པར་གཞན་དུ་མི་སེམས་པར་རོ། །ཨརྒྷ་དབུལ་སྦྱིན་སྲེག་ཐམས་ཅད་དུ་མར་དང་སྦྲང་རྩི་དབུལ་ལོ། །གལ་ཏེ་མ་གྲུབ་ན་རྒྱུད་
ཐམས་ཅད་དུ་བཤད་པའི་སེམས་ཅན་ཐམས་ཅད་ལ་ཕན་པར་མཛད་པ་པོ་བཏགས་པ་དེ་རྣམས་མི་རིགས་པར་འགྱུར་རོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་སྦྱིན་སྲེག་གི་ལེའུ་སྟེ་སུམ་བཅུ་སོ་
བརྒྱད་པའོ།། །། དེ་ནས་ཡང་ལྷ་མོས་གསོལ་པ། ཀྱེེ་བཅོམ་ལྡན་འདས་མི་ལ་བདེ་བ་སྟེར་བར་འགྱུར་བའི་ཐེག་པ་གང་དང་གང་གི་དེ་ཁོ་ན་ཉིད་ངེས་པར་ཉན་པར་འཚལ་བས་སྒྲུབ་པ་པོ་གང་དང་
གང་གིས་བཟའ་བ་དང་བཏུང་བ་ལ་ལོངས་སྤྱད་ན་ལུས་འགྲུབ་པ་ལ། གལ་ཏེ་གཤེ་བར་བྱེད་པ་ལ་ཆད་པ་མ་བཅད་ན། ཡེ་ཤེས་འབྱུང་བར་འགྱུར་རམ། བཀའ་སྩལ་པ། གང་དང་གང་གིས་ཁྱོད་ཀྱིས་ཆང་
འཐུངས་པ་དང་སྲིང་མོ་བླངས་པ་དང་ཤ་ཆེན་པོ་ཟོས་པ་ཞེས་སྨྲ་ན། དེའི་ཚེ་ཤིང་སུ་བྷ་ཨཉྫ་ནའི་རྩ་བ་བརྡུངས་པ་ཆང་གིས་ཕྲུལ་པ་ལ་བསྒྲུབ་བྱའི་གཟུགས་བརྙན་བྱས་ཏེ་དེའི་ཁར་ཆང་བླུགས་ནས་ཕྱིས་གསུས་
པ་ལ་སྔགས་བྲི་ཞིང་བཟླས་པར་བྱ་བ་ནི། ཨོཾ་ཀ་མ་ལེ་བི་མ་ལེ། ར་ཏྭཱཾ་སྨ་རཱ་མི་ཆེ་གེ་མོ་ལས། བ་ཝ་མ་དྱཱ་མཱན་སྃ་ཧྃ་ཧྃ་ཧཿཧཿཞེས་པའི་སྔགས་དྲན་པ་ཙམ་གྱིས་ཆང་དང་ཤ་ངེས་པར་སྐྱུག་པར་འགྱུར་རོ། །དེའི་
ཕྱིར་ཆེ་གེ་མོས་སྲིང་མོ་བླངས་པ་ལ་སོགས་པ་གང་གིས་ཀྱང་སྨྲ་བར་མི་ནུས་ཤིང་། རང་གི་ལུས་རྣམ་པར་དག་པར་ཡང་བྱེད་དོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་སྟོན་མོ་དང་ཤེས་རབ་མས་རྣམ་
པར་དག་པར་བྱེད་པའི་ལེའུ་སྟེ་སུམ་བཅུ་སོ་དགུ་པའོ།། །། ཡང་བཅོམ་ལྡན་འདས་ཀྱིས་བཀའ་སྩལ་པ། ཉན་ཐོས་ལ་སོགས་པའི་རིམ་པས་ཚངས་པར་སྤྱོད་པ་ལ་བརྟན་པར་གནས་པ་ཡོངས་

88-1-92a

སུ་སྤྱད་པར་བྱས་ནས་ཉི་མ་རྒས་པ་དང་། ཆེན་པོར་གནས་པས་ཐམས་ཅད་རབ་ཏུ་ཕྱེ་ལ། རྔ་བོ་ཆེ་དང་། རྔ་པ་ཊ་ཧ་དང་། པ་ཊ་ཧ་ཆེན་པོ་དང་། རྫ་རྔ་དང་། རྫ་རྔ་ཆེན་པོ་དང་། ཏམ་བུ་ར་དང་། གླིང་བུ་ལ་སོགས་པའི་སྒྲ་
རྡུང་ལུགས་སྣ་ཚོགས་པ་དང་། དྲི་ཟ་རྗེས་ཀྱི་གླུ་ལ་སོགས་པའི་སྒྲ་དང་གར་ཐམས་ཅད་ཡོངས་སུ་རྫོགས་པར་བྱ་ཞིང་དམ་ཚིག་ཅན་དང་སྟབས་གཅིག་ཏུ་གནས་ལ། ཕྱི་ནས་ཐམས་ཅད་བྱིན་གྱི་བརླབས་པའི་སྔགས་
ནི། ཨོཾ་ཨ་ཤྲུ་ཎི་པྲ་ཧཱུྃ། ཞེས་པ་འདི་བརྗོད་ན་ངེས་པར་ནག་པོ་ཆེན་པོའི་བྱིན་གྱིས་བརླབས་ཐེ་ཚོམ་མེད་པར་འབྱུང་ངོ་། །སླད་ཀྱིས་ཐམས་ཅད་འགྲུབ་པར་འགྱུར་རོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་
ལས་རོལ་མོའི་རྒྱ་མཚོ་ཞེས་བྱ་བའི་ལེའུ་སྟེ་བཞི་བཅུ་པའོ།། །། གཞན་ཡང་རབ་ཏུ་སྦྱོར་བའི་ལེའུ་བཤད་པར་བྱའོ། །དུས་ཤེས་པས་ཤེས་བྱ་ཐམས་ཅད་རྐང་པར་མནན་པར་བསམས་པས་བརླག་པར་
འགྱུར་བ་ནི་ཤེས་པས་བདེ་བ་ཐོབ་པར་ཇི་ལྟར་བྱ་ན། བསྒོམ་བྱ་སྒོམ་བྱེད་སྒོམ་པ་སྤངས་ལ། བརྟན་པར་གནས་པའི་སྦྱོར་བ་བསམ་དུ་མེད་པར་མཐར་གཏུགས་ཀྱི་བར་དུ་ངེས་པར་བྱའོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་
པོ་ལས་རབ་ཏུ་སྦྱོར་བའི་ལེའུ་སྟེ་བཞི་བཅུ་རྩ་གཅིག་པའོ།། །། གཞན་ཡང་བྱོལ་སོང་བསྐྲད་པར་བྱ་བའི་སྔགས་བཤད་པར་བྱ་སྟེ། ཨོཾ་ཛཾ་ཛཾ་ཞེས་པ་དྲན་པར་བྱས་ན་གླང་པོ་ཆེ་འབྲོས་པར་འགྱུར་རོ། །ཧཾ་ར་ཞེས་
པ་དྲན་པར་བྱས་ན་ཁྱི་འབྲོས་པར་འགྱུར་རོ། །པྲཿཔྲཿཞེས་པ་དྲན་པར་བྱས་ན་རྟ་འབྲོས་པར་འགྱུར་རོ། །ཊ་ཧཱུྃ་ཞེས་པ་དྲན་པར་བྱས་ན་སེང་གེ་འབྲོས་པར་འགྱུར་རོ། །ཨེ་ཧི་ཌཾ་ས་ཎ་ཧཿཞེས་པ་དྲན་པར་བྱས་ན་སྦྲུལ་འབྲོས་པར་
འགྱུར་རོ། །མུཿཞེས་པ་དྲན་པར་བྱས་ན་སྤྲེའུ་འབྲོས་པར་འགྱུར་རོ། །གཽ་ཝ་གཿཞེས་པ་དྲན་པར་བྱས་ན་གླང་འབྲོས་པར་འགྱུར་རོ། །ས་ཀུ་ལུ་ཀུ་ལུ་ཞེས་པ་དྲན་པར་བྱས་ན་རྒྱལ་པོས་ཅུང་ཟད་ཀྱང་གནོད་པ་བྱ་བར་ནུས་པར་མི་འགྱུར་རོ། །

88-1-92b

འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་བྱོལ་སོང་བསྐྲད་པའི་ལེའུ་སྟེ་བཞི་བཅུ་རྩ་གཉིས་པའོ།། །། གཞན་ཡང་མཉམ་པར་སྦྱོར་བས་རྗེ་བཙུན་རྟོགས་ཏེ། མཆོག་ཏུ་ཟབ་པ་ལ་མཉམ་པར་སྦྱར་ན་རང་བཞིན་
བདེ་བ་མཆོག་ཏུ་འགྱུར་བ་སྐྱེ་བས་སོ། །བདེ་བ་ཐོབ་པར་བྱེད་པ་ནི་སེམས་མ་ཡིན་ཞིང་སེམས་ལས་བྱུང་བ་ཡང་མ་ཡིན་ནོ། །དངོས་པོ་དང་དངོས་པོ་མེད་པ་ཡང་རྟོགས་པ་དང་མི་ལྡན་པ་བློན་པོ་གཅོལ་ཆུང་མཆོག་ཏུ་ཟབ་པ་གང་
གིས་མི་ཤེས་པའི་མི་དེས་གཉིས་སུ་མེད་པའི་ཡེ་ཤེས་ཚིག་ཙམ་དུ་ཡང་དྲན་པར་མི་འགྱུར་རོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས། མཉམ་པར་སྦྱོར་བའི་ལེའུ་སྟེ་བཞི་བཅུ་རྩ་གསུམ་པའོ།། །།  
གཞན་ཡང་རྣལ་འབྱོར་གྱི་ལེའུ་བཤད་པར་བྱ་སྟེ། སྟེང་འོག་ཡང་དག་པར་མནན་ཏེ། ལྟེ་བའི་དབུས་སུ་ཟླ་བ་བསྒོམས་ན་ཟླ་བ་དྲུག་གིས་ངེས་པར་འགྲུབ་པར་འགྱུར་རོ། །སྣའི་བུག་པ་བཀག་སྟེ་ཐིག་ལེ་བསྒོམས་ན་ཉིན་ཞག་ཉི་ཤུ་
རྩ་གཅིག་གིས་འགྲུབ་པར་འགྱུར་རོ། །ལྕེ་སྟེངས་སུ་བཀུག་ན་རྒས་པ་དང་ཤི་བ་ལས་གྲོལ་བར་འགྱུར་རོ། །དགང་བ་དང་། དབྱུང་བ་དང་། བུམ་པ་ཅན་རིམ་པ་ཇི་ལྟ་བར་དྲན་པར་བྱས་ན་ཟླ་བ་ཕྱེད་ཀྱིས་མཁའ་སྤྱོད་འགྲུབ་པར་འགྱུར་རོ། །
རླུང་གིས་ཡིད་བསད་པ་ལ་ཟླ་བའི་སྦྱོར་བ་བྱ་བ་ནི་སྔགས་ཀྱི་སྦྱོར་བ་རྣམ་པར་བྱེད་པས་སྐད་ཅིག་ཙམ་གྱིས་ཀྱང་འཕྲོག་སྟེ། ལག་པ་རབ་ཏུ་གཅག་པར་བྱའོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་རྣལ་འབྱོར་གྱི་ལེ་
འུ་སྟེ་བཞི་བཅུ་རྩ་བཞི་པའོ།། །།  འདིར་རྣལ་འབྱོར་པ་གཟའ་རྣམས་ཀྱི་གཙོ་བོ་བསྒྲུབས་ནས་ཡང་དག་པའི་བདེ་བ་ཤིན་ཏུ་ཁྱབ་པར་བྱེད་པའི་སྦྱིན་སྲེག་བྱ་སྟེ། བདག་ཉིད་ལ་གུར་གུམ་དང་། སྨན་ཧ་རེ་ཎུ་དང་ཁུ་བ་དང་
དངུལ་ཆུ་རྣམས་ལུས་ལ་བྱུགས་ན་ཕས་ཀྱི་དཔུང་འཇོམས་པར་འགྱུར་རོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་ཕས་ཀྱི་དཔུང་འཇོམས་པའི་ལེའུ་སྟེ་བཞི་བཅུ་རྩ་ལྔ་པའོ།། །། གཞན་ཡང་ལྷ་མོས་

88-1-93a

གསོལ་པ། ཀྱེེ་བཅོམ་ལྡན་འདས་ཉི་མ་གང་དང་གང་ལ་སྔགས་དང་སྨན་གྱི་ནུས་པ་འགྲུབ་པར་འགྱུར་གསུངས་ཤིག་ཉན་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ཉི་མ་ཐམས་ཅད་བཟང་
པོ་ཡིན་ཏེ། འོན་ཀྱང་དུས་ཚོད་ལ་ལྟོས་པར་རིགས་པས་དེའི་ཕྱིར་དུས་ཚོད་བརྗོད་པར་བྱའོ། །ཉི་མ་ནི་ལྔ་པ་ལའོ། །ཟླ་བ་ནི་གཉིས་པ་ལའོ། །གཟའ་རྣམས་ཀྱི་གཙོ་བོ་ནི་བདུན་པ་ལའོ། །སྔགས་པ་ནི་བཞི་པ་ལའོ། །གཟའ་ལྷག་
པ་ནི་གསུམ་པ་ལའོ། །མིག་དམར་ནི་དྲུག་པ་ལའོ། །སྤེན་པ་ནི་གཅིག་པ་ལ་སྟེ། རང་རང་གི་དུས་ཚོད་ངེས་པར་འགྲུབ་པར་འགྱུར་རོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་གཟུང་བ་དང་དོར་བའི་ལེའུ་སྟེ་བཞི་བཅུ་རྩ་དྲུག་པའོ།།  
གཞན་ཡང་ནང་གི་བདག་ཉིད་ཅན་གྱིས་རྨི་ལམ་བརྟགས་ལ་སེམས་ཅན་རྣམས་ཀྱི་རྨོངས་པ་དང་བྲལ་བའི་དུས་ཚོད་དང་རབ་ཏུ་ལྡན་པར་བྱ་བའི་ཕྱིར་གཟའ་དང་། སྐར་མ་དང་། ཚེས་གྲངས་ཀྱི་གོ་རིམ་བརྗོད་པར་བྱ་སྟེ། ནག་པོའི་
ཕྱོགས་ཀྱི་བཅུ་བཞི་འམ། བརྒྱད་དམ། བཅུ་འམ། ཚེས་གཅིག་རྣམས་ཀྱིས་རི་དང་། ཆུ་སྟོད་དང་། མེ་བཞི་དང་། སྐག་དང་། མཆུ་དང་། ནག་པ་དང་། ཐ་སྐར་དང་། བྲ་ཉེ་དང་། སྨིན་དྲུག་རྣམས་དང་རབ་ཏུ་ལྡན་པར་བྱའོ། །
འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་སྐར་མའི་ལེའུ་སྟེ་བཞི་བཅུ་རྩ་བདུན་པའོ།། །། གཞན་ཡང་ནམ་ཡིད་ཆེས་པའི་དུས་སུ་མཁས་པས་རྒྱུ་བའི་རྩ་གཉིས་མནན་པར་བྱ་ཞིང་། ཤིན་ཏུ་དགའ་བ་ལ་
སོགས་པ་ལ་ཉེ་བར་གནས་ནས་ཤེས་བྱ་ཐམས་ཅད་ལྟེ་བའི་དཀྱིལ་འཁོར་དུ་མནན་ན་འགྲོ་བ་རྣམས་ཀྱི་བདེ་བ་ཐེ་ཚོམ་མེད་པར་ཐོབ་པ་ནི་ཡུལ་རྣམས་ཡེ་ཤེས་ཀྱི་མེས་བསྲེགས་ནས་སྒྱུ་མ་སྣང་བའོ། །མ་འོངས་པའི་དུས་ན་འང་འགྲོ་བ་
རྣམས་ཀྱིས་ཤིན་ཏུ་ཡོངས་སུ་དག་པ་དྲི་མ་མེད་པ་བསམ་དུ་མེད་པའི་ཞིང་བཟང་པོར་སྐྱེ་བར་འགྱུར་རོ། །རྣལ་འབྱོར་འདིས་འོ་མ་འཐུངས་ན་ལྦུ་བ་ལྟར་དྲི་མ་མེད་པར་འགྱུར་རོ། །རླུང་ཕྱིར་འདོན་ཅིང་དག་པར་བྱས་ན་དགེ་བ་བསམ་

88-1-93b

པ་འགྲུབ་པར་འགྱུར་རོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་དགེ་བ་བསམ་པའི་ལེའུ་སྟེ་བཞི་བཅུ་རྩ་བརྒྱད་པའོ།། །། ལྷ་མོས་གསོལ་པ། བཅོམ་ལྡན་འདས་ལམ་གྱི་ཆོ་གའི་རིམ་པ་བཤད་དུ་
གསོལ། གང་གིས་གང་སྦར་ལ་སྦྱིན་སྲེག་བྱ། སྙིང་རྗེ་དང་ལྡན་པས་སེམས་ཅན་ཐམས་ཅད་བདེ་བ་ལ་ཇི་ལྟར་དགོད། དང་པོར་དངོས་གྲུབ་འདོད་པའི་སྔགས་བཟླས་པ་བྱས་ནས་སྦྱིན་སྲེག་བྱའོ། །མྱུར་བ་ནི་རྟག་
པ་བསྟན་ན་བདེ་བའི་རང་བཞིན་ཡེ་ཤེས་གོ་སྟེ། སྐད་ཅིག་དེ་ལ་ལུས་ཅན་རྣམས་ཀྱིས་ཡེ་ཤེས་འཐོབ་པར་འགྱུར་རོ། །འདི་ནི་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་ལམ་གྱི་ཆོ་གའི་རིམ་པའི་ལེའུ་སྟེ་བཞི་བཅུ་རྩ་
དགུ་པའོ།། །། གཞན་ཡང་ཨ་ཐརྦ་ཤ་བ་རཱིའི་སྔགས་ཀྱི་ལེའུ་བཤད་པར་བྱའོ། །ཨོཾ་སརྦ་མནྟྲ་ཎི་དཱ་ནཾ་ཀྵེ་མཾ་རཾ་ཧཱུྃ་ཀྵཿཧཿཞེས་པའི་སྔགས་ཀྱི་རྒྱལ་པོ་འདི་ཕོགས་གཅིག་
བཀླགས་པ་ཙམ་གྱིས་སྒྲུབ་པ་པོ་རྣམས་ཀྱི་སྡིག་པ་ཐམས་ཅད་ཚེགས་མེད་པར་ཟད་པར་འགྱུར་རོ། །འདི་ནི་དཔལ་ནག་པོ་ཆེན་པོའི་རྒྱུད་ཀྱི་རྒྱལ་པོ་ལས་ཨ་ཐརྦ་ཤ་བ་རཱིའི་སྔགས་ཀྱི་ལེའུ་སྟེ་ལྔ་བཅུ་པ་རྫོགས་སྷོ།། །།
ལྡང་འབུལ་གྱི་གཙུག་ལག་ཁང་ཆེན་པོ་ར་ས་ར་མོ་ཆེར་ཕ་རྒྱལ་ཁམས་པས་ཞུས་པའི་དོན་དུ། པཎ་ཌི་ཏ་
ཆེན་པོ་ས་མནྟ་ཤྲཱི་དང་། ཞུ་ཆེན་གྱི་ལོ་ཙྪ་བ་རྭ་དགེ་སློང་ཆོས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །ཡེ་དྷཱརྨཱ་ཧེ་བུ་དྷ་ཝཱ་ཧེ་ཏུནྟེ་ཥཱན་ཏ་ཐ་ག་ཏོ་ཧྱ་བ་དཏ་
ཏེ་ཥཉྩ་ཡོ་ནི་རོ་དྷ་ཨེ་བྃ་བ་དཱི་མ་ཧཱ་ཤྲ་མ་ཎཿ། མངྒ་ལྃ་བྷ་བ་ཏུ། ཤུ་བྷྃ་མསྟུ་སརྦ་ཛཱ་ག་ཏྃ། ཤུ་བྷྃ།། །།

88-1-94a

༄༅། །རྒྱ་གར་སྐད་དུ།  ཡ་ཐཱ་ལབྡྷ་ཁ་ས་མ་ཏནྟྲ་ནཱ་མ།  བོད་སྐད་དུ།  ཇི་བཞིན་བརྙེས་པ་ནམ་མཁའ་དང་མཉམ་པ་ཞེས་བྱ་བའི་རྒྱུད། བཅོམ་ལྡན་འདས་རྡོ་རྗེ་སེམས་དཔའ་ལ་ཕྱག་འཚལ་ལོ། །གང་ཞིག་
སངས་རྒྱས་ལྔ་ཡི་ཅོད་པན་ཅན། །ས་གསུམ་ཀུན་གྱི་སྙིང་པོ་དང་ལྡན་པ། །དཔལ་ལྡན་དང་པོའི་སངས་རྒྱས་ངོ་བོ་མཛད། །དེ་ནི་མཁའ་དང་མཉམ་པར་སྤྱོད་པའོ། །གལ་ཏེ་དེ་འདྲའི་ངོ་བོར་སེམས་དག་
པ། །བྱིས་པ་འདི་ནི་དོན་དམ་སྒོམ་པ་ཡིན། །སངས་རྒྱས་རྣམས་ཀྱི་རང་བཞིན་མཐོང་མིན་ཏེ། །སངས་རྒྱས་དང་ནི་རྡོ་རྗེ་འཛིན་པ་དང་། །རིན་ཆེན་ཏོག་དང་པད་ལྡན་འཇུག་པ་སྟེ། །ལྷ་དེ་རྣམས་ཀྱི་རང་
བཞིན་ཡོད་མ་ཡིན། །དང་པོའི་སངས་རྒྱས་ནམ་མཁའི་རང་བཞིན་ནོ། །དང་པོའི་ཆོས་ལས་དེ་རྣམས་འབྱུང་བ་སྟེ། །མཁའ་དང་ལྷན་ཅིག་སེམས་ཅན་ཁམས་རྣམས་ཀྱང་། །གཞུག་རྣམས་སུ་
ནི་བསྟན་བཅོས་ཚད་མར་བྱས། །གདོད་ནས་དག་པའི་གོ་འཕང་མཁའ་མཉམ་མཚུངས། །སངས་རྒྱས་ལྔ་ཡི་ཅོད་པན་དང་ཡང་ལྡན། །གང་ཞིག་ཆོས་དེ་ཉིད་ཀྱི་རང་བཞིན་ཅན། །ས་གསུམ་པོ་
ཡི་ཆོས་ནི་འབྱུང་འགྱུར་བ། །རྡོ་རྗེ་སེམས་དཔའ་དེ་ལ་ཕྱག་འཚལ་ལོ། །རྡོ་རྗེ་སེམས་དཔའ་ལ་ནི་ཕྱག་འཚལ་བའི། །བསོད་ནམས་ཀྱང་ནི་མཐའ་ཡས་འབྱུང་འགྱུར་ཞིང་། །རྡོ་རྗེ་སེམས་དཔའ་
དེ་ལ་ཕྱག་འཚལ་བས། །ཆོས་ཀྱི་བདག་ཉིད་ཆེན་པོ་འཐོབ་པར་འགྱུར། །སེམས་ཅན་ཐམས་ཅད་ཡོངས་སུ་བསྒོམ་པར་ཡང་། །བྱ་བ་འདི་ནི་ཐར་པའི་རང་བཞིན་ནོ། །དངོས་ཀུན་རྡོ་རྗེ་སེམས་
དཔར་དག་བྱས་པའི། །ཐར་པ་ཆོས་ཀྱི་རང་བཞིན་བྱ་བ་སྟེ། །ཆོས་འདི་འཇིག་པ་མེད་པའི་རང་བཞིན་ཅན། །འཇིག་རྟེན་པས་ནི་རང་བཞིན་གཞན་དུ་བྱས། །འདི་ནི་སྐུ་དང་གསུང་དང་ཐུགས་དག་

88-1-94b

ནི། །ཆོས་འདི་ཡི་ནི་དང་པོ་འབྱུང་བ་སྟེ། །རྣལ་འབྱོར་གནས་ནི་ལྷ་མོ་སྐུལ་བྱེད་མ། །དེར་ནི་དང་པོར་ཆོས་རྣམས་འབྱུང་འགྱུར་བའོ། །དེར་ནི་སྔགས་རྣམས་རྡོ་རྗེ་གཅིག་དངོས་བསྒོམ། །ཆོས་ཀྱི་རང་བཞིན་
རྡོ་རྗེ་དངོས་དམིགས་སམ། །རལ་པའི་ཐོར་ཚུགས་ཀྱིས་ཀྱང་རབ་བརྒྱན་ཅིང་། །སྐུ་མདོག་ཀྱང་ནི་སྔོན་པོའི་རང་བཞིན་ཅན། །རྡོ་རྗེ་སེམས་དཔའི་ཏིང་འཛིན་དགེ་བ་སྟེ། །གཅིག་པའི་རང་བཞིན་
ཉིད་ནི་བསྒོམ་པར་བྱ། །ཉི་མའི་དཀྱིལ་འཁོར་གྱི་ནི་དབུས་གནས་པར། །ཡི་གེ་བསྐྱེད་པ་ཉིད་དུ་བསམ་པར་བྱ། །ཡི་གེའི་གཟུགས་ནི་ཡོངས་སུ་གྱུར་པ་ལས། །རྡོ་རྗེ་རང་བཞིན་ཉིད་དུ་བསམ་
པར་བྱ། །མཆུ་ཡི་མཐའ་ནི་སྔགས་པས་བསྒོམ་བྱ་བ། །རང་གི་ངོ་བོ་ཉིད་ཀྱིས་རང་བཞིན་ཏེ། །གཉིས་སུ་མེད་པའི་སྐུ་ཡི་རང་བཞིན་ཅན། །རྡོ་རྗེ་སེམས་དཔའ་དམིགས་པར་བྱ་བའོ། །འདི་ནི་སེམས་
ཉིད་ཡོངས་སུ་གྲུབ་པ་སྟེ། །རྡོ་རྗེ་འཛིན་པ་ཡིས་ནི་གསུངས་པ་ཡིན། །གང་ཞིག་བསྒོམ་པ་འདི་ཡིས་བསྒོམ་བྱེད་པ། །སེམས་ཀྱི་རང་བཞིན་ཉིད་ནི་འགྲུབ་པར་འགྱུར། །འདི་ནི་ལྷ་མོ་བཞི་རྣམས་རོ་
གཅིག་པའོ། །ངོ་བོ་བློས་ནི་མཁའ་དང་མཉམ་ལས་བསྒོམ། །དེ་ལྟའི་ཆོས་བྱས་སེམས་ཀྱི་རང་བཞིན་ཏེ། །ལྷ་མོ་ཐར་པའི་རང་བཞིན་ཉིད་དུ་བསྒོམ། །རྡོ་རྗེ་སེམས་དཔའ་དེས་མཐོང་བ། །
ཆོས་རྣམས་ཀུན་གྱི་རང་བཞིན་ཅན། །རྣལ་འབྱོར་གནས་དང་རོལ་པ་སྟེ། །ཐམས་ཅད་མཉམ་པའི་བཙུན་མོར་བཅས། །བཀོད་པ་དག་དང་ལྡན་པར་གནས། །མཁས་བཅས་དངོས་
ལས་བྱུང་དེ་ལ། །རྡོ་རྗེ་སེམས་དཔའ་གང་མཐོང་བར། །གཟུང་བ་སངས་རྒྱས་སྤྲོ་བསྡུའོ། །བཞི་ཡི་ངོ་བོ་ལྷ་མོ་བཞི། །དབུས་སུ་ངེས་པར་གནས་པ་སྟེ། །སྒྱུ་མ་ལྟ་བུའི་རང་བཞིན་གྱིས། །ས་གསུམ་

88-1-95a

ལ་ནི་ཁྱབ་པའོ། །ལྷ་ཡི་དེར་ནི་ཁ་བཞི་པའི། །ལྷ་ཚོགས་རྡོ་རྗེ་ཉིད་ཡིན་ནོ། །དེ་ལ་སངས་རྒྱས་རྣམས་ཀྱི་ནི། །རྣམ་འཕྲུལ་ཐམས་ཅད་འདི་ཡིའོ། །ཅི་ལྟ་ཅི་ལྟར་སེམས་ཅན་རྣམས། །སྐྱེ་བར་འགྱུར་བ་
ལན་ཉིད་དེ། །སངས་རྒྱས་རྣམས་ཀྱི་རྣམ་འཕྲུལ་ནི། །སྣ་ཚོགས་རྡོ་རྗེ་ཡིན་པར་འགྱུར། །དེ་ལས་གང་བྱུང་ལྷ་ཀུན་ཀྱང་། །རྡོ་རྗེ་སེམས་དཔའི་རྣམ་འཕྲུལ་ཡིན། །སེམས་ཅན་རྣམས་ནི་ཆོས་ཀྱི་ངོ་བོར་བལྟ། །ས་
གསུམ་ཐམས་ཅད་གཅིག་པའི་ངོ་བོ་ཉིད། །རོལ་པ་མཛད་པ་སངས་རྒྱས་ཀྱིས་གཟིགས་ཤིང་། །དེ་ཡིས་རྣལ་འབྱོར་དབང་ཕྱུག་མ་ཀུན་མཐོང་། །ལྷ་ཡི་དམ་ཚིག་གི་ལེའུ་སྟེ་དང་པོའོ།། །། 
རྟག་ཏུ་མཆོག་ལྡན་ཁྱོད་ཀྱི་ནི། །དམ་ཚིག་ལྷ་མོ་ཐམས་ཅད་ཀྱི། །མཆོག་ཏུ་གྱུར་པའི་ལྷ་མོ་ནི། །དུ་མཆིས་བདག་ཅག་ཞུ་བར་འཚལ། །དེ་ལ་གླུ་བཞི་གསུངས་པ་སྟེ། །སྟེང་དང་དབྱེར་མེད་བྱས་པའི་
ཆོས་མཉམ་རང་སྣང་མ། །ཞི་ལ་ཐར་པ་མ་དང་མཆོག་ཏུ་མཉམ་བྱེད་མ། །གང་ཕྱིར་སྒྱུ་མའི་མཛད་པས་སངས་རྒྱས་རྣམས་དང་མཉམ། །མཁའ་མཉམ་ཐམས་ཅད་རོལ་པ་ཞི་བ་མེད་པའོ། །
རུ་ལུ་རུ་ལུ་བྷྱོ་རུ་དྷ། མཁའ་དང་མཉམ་པའི་ཆོས་རྣམས་ཀུན་དུ་རོལ་པ་སྟེ། །སྒྱུ་མའི་རང་བཞིན་དང་ནི་སྒྲ་བརྙན་ཆོས་མཉམ་སྣང་། །ལྷན་ཅིག་གནས་མིན་ཆ་སྟེ་རང་ཉིད་པི་ཝང་མཚུངས། །
བྱས་པའི་སྣང་བ་དང་ནི་མཉམ་པར་གྱུར་པའོ། །གང་ཞིག་ཆོས་རྣམས་སྣང་བ་ནམ་མཁའ་དང་མཉམ་པ། །དེར་ནི་རྡོ་རྗེ་མཛད་པ་གཟུགས་ཅན་ལྟ་བུ་སྟེ། །རྡོ་རྗེའི་ཐེག་པ་དེར་ནི་གཟུགས་
སོགས་འདོད་ཡོན་གྱི། །བདེ་བ་མི་ཟད་སྣ་ཚོགས་དང་མཉམ་སྩོལ་མཛད་པའོ། །རྣལ་འབྱོར་གནས་ནི་དུ་མའི་རྡོ་རྗེའི་ཚུལ་འདི་ནི། །དུ་མའི་གཟུགས་འཛིན་དེར་ནི་རྡོ་རྗེ་དང་མཉམ་ཞིང་། །ཉིད་

88-1-95b

དང་འདྲ་བའི་སེམས་དཔའ་རྣམས་ནི་སྤྲོ་མཛད་པའི། རྡོ་རྗེ་དབྱིངས་དང་ལྷན་ཅིག་མཆོག་སྩོལ་མཛད། རང་བདག་མཁའ་མཉམ་བཞུགས་ལ་བསྐུལ་བ་ནི། གང་ཞིག་རྩེ་གཅིག་སེམས་
ཀྱིས་འདི་ཉན་ཅིང་། བརྗོད་བཅས་སེམས་ཀྱི་གླུ་འདི་འཛིན་པའོ། །གླུ་འདི་ནམ་མཁའ་དང་ནི་མཉམ་པ་སྟེ། དེར་ནི་གཟུགས་བཅས་རྡོ་རྗེ་ལེན་པའི་ཕྱིར། རྡོ་རྗེའི་བདག་ཉིད་ཐུགས་ནི་སད་
བྱེད་ཅིང་། །རང་བཞིན་གཅིག་པའི་ཕྱིར་ནི་རྒྱུད་ཀྱང་ལེན་པར་འགྱུར། འདི་ནི་རྡོ་རྗེའི་ཚིག་སྟེ་རྡོ་རྗེ་གཞན་རང་བཞིན། སྔགས་པས་ཐུགས་ཆུད་དཀྱིལ་འཁོར་ཀུན་བསྒོམས་ཤིང་། ཆོས་ཀྱི་
དཀྱིལ་འཁོར་དབུས་གནས་པད་མཆོག་དེར་བསྒོམ་པ། དཀྱིལ་འཁོར་དབུས་གནས་ཆོས་ནི་ཧཱུྃ་གི་དབྱེ་བ་ཅན། །གཟུགས་རྣམས་ཐམས་ཅད་སྒྱུ་མའི་ངོ་བོར་ངེས་པར་བརྟག །ཐུགས་ཀྱི་ངོ་བོར་
གཅིག་བསམ་རྡོ་རྗེ་ཐེག་པའོ། །སེམས་ནི་མཁའ་མཉམ་སེམས་ཀྱི་ཐེག་པ་རང་བཞིན་མེད། གཉིས་ཀའི་རང་བཞིན་ཡང་ནི་ལུས་ཅན་མ་ཡིན་ཏེ། དེར་ནི་རྡོ་རྗེ་ལ་ནི་མེད་པ་ཡིས། རྡོ་རྗེ་སེམས་
དཔའ་ཁྱོད་ནི་གཅིག་པའི་རང་བཞིན་ཏེ། འཇིག་རྟེན་པ་ལ་སྒྱུ་མའི་རང་བཞིན་ཉིད་དུ་མཛད། སེམས་ཅན་འདུལ་བའི་རང་བཞིན་དུ་ནི་སད་མཛད་པ། ཀྱེ་ལགས་རྡོ་རྗེ་སེམས་དཔའ་ཁྱོད་ནི་གཅིག་
པའི་དངོས། ལྷ་མོ་བཞིས་སྨྲས་རྡོ་རྗེ་ཀུན་ཏུ་སྤངས་པ་སྟེ། ནང་དུ་གནས་པ་རྡོ་རྗེ་རོལ་པར་ལྡན་པ་དང་། ཐུགས་ཀྱི་ངོ་བོ་ཉིད་ཀྱིས་དེར་ནི་རབ་ཏུ་གནས། ཐུགས་ཀྱི་གསང་བའི་ཆོས་ནི་
རྣམ་པར་འབྱུང་བའོ། །ནམ་མཁའི་རང་བཞིན་ཅན་གྱི་རྡོ་རྗེ་སྤྲོ་བྱ་ཞིང་། སྤྲོས་པའི་རྡོ་རྗེ་སླར་ཡང་བསྡུ་བྱས་ཏེ། སེམས་ཀྱི་རང་བཞིན་དུ་ནི་གཅིག་ཕྱིར་རོ། །སེམས་ནི་འགོག་པར་གྱུར་པ་ན། །

88-1-96a

ཀུན་ཀྱང་མཉམ་ཞིང་མཚུངས་པར་མཐོང་། །ཡང་དང་ཡང་དུ་སྔགས་བསྡུས་པས། །གཅིག་པའི་རྣམ་པར་བྱ་བའོ། །ཐུགས་ཀྱི་དཀྱིལ་འཁོར་གྱི་ལེའུ་སྟེ་གཉིས་པའོ།། །། བྲམ་ཟེ་དང་
ནི་གདོལ་པ་གཅིག་པའི་རང་བཞིན་དུ། །ཆོས་རྣམས་ཀྱི་ནི་རང་བཞིན་སངས་རྒྱས་ཀྱིས་གསུངས་པའོ། །གཅིག་གི་རང་བཞིན་ལ་གནས་པ་ཡི་དངོས་པོ་སྟེ། །དེ་ལ་རྡོ་རྗེ་ཅན་གྱིས་མཉམ་པའི་ངོ་བོར་
གསུངས། །བྲམ་ཟེ་དང་ནི་ཁྱི་དག་གཅིག་པའི་དངོས་ཡིན་ཞིང་། །རུས་པའི་རྒྱན་རྣམས་ཀྱང་ནི་སྒྱུ་མའི་རང་བཞིན་ཏེ། །རྡོ་རྗེའི་གོ་འཕང་དེ་ལ་ལེན་པའི་རང་བཞིན་ནོ། །རྣལ་འབྱོར་དེ་ལ་མཉམ་པའི་ངོ་བོར་དེས་མཐོང་སྟེ། །དེ་དང་
མཉམ་པའི་རང་བཞིན་སེམས་ཅན་རྣམས་ལ་སྦས། །དེ་ཡི་རྣལ་འབྱོར་རང་བཞིན་ལྷ་མོས་གསུངས་པ་ནི། །ལྷ་མོ་ཐམས་ཅད་དེར་ནི་གཅིག་པའི་རང་བཞིན་ཏེ། །གཙོ་བོ་དང་བཅས་མཛེས་པ་གཅིག་པུ་འབྱུང་
གྱུར་ཁྱོད། །མཉམ་པ་རང་བཞིན་དེ་ནི་སྔགས་པ་གཅིག་པུ་སྟེ། །རྡོ་རྗེ་རྣམ་པར་སད་པར་བྱེད་པ་གཅིག་པུ་ཉིད། །དེར་ནི་ཞེ་སྡང་རང་བཞིན་དག་ནི་ཞིག་པ་སྟེ། །ཡན་ལག་ཕྱེད་པའི་ཆོས་ནི་འབྱུང་
བར་འགྱུར་བ་ཡིན། །དེར་ནི་རྡོ་རྗེའི་བཙུན་མོ་གཅིག་རང་བཞིན། །གང་ཚེ་རྡོ་རྗེ་ལ་ནི་དབྱངས་ཀྱིས་བསྟོད་པའི་ཚེ། །ལྷ་ཡི་གཡོན་གྱི་ཕྱེད་དང་གཅིག་ཏུ་གྱུར་པར་བལྟ། །ལུང་ཉིད་ཚད་མར་བྱས་ནས་
རྡོ་རྗེ་སེམས་དཔའ་དེ་བསྒོམ་བྱ། །གསུང་གི་དཀྱིལ་འཁོར་གྱི་ལེའུ་སྟེ་གསུམ་པའོ།། །། གླང་པོ་དང་ནི་རྟ་དང་མི་དང་ཁྱི་དང་ནི། །བ་ལང་ཤ་སྟེ་ཐམས་ཅད་མ་ལུས་གྱུར་པ་རྣམས། །དམ་ཚིག་དེ་
ཉིད་གཅིག་པའི་རང་བཞིན་ཉིད་ཡིན་ཏེ། །མཁའ་མཉམ་རང་བཞིན་ཅན་གྱིས་རྣལ་འབྱོར་པས་བཟའ་བའི། །དམ་ཚིག་འདི་ནི་ལྷ་མོ་བཞི་པོས་གསུངས་པའོ། །རྣལ་འབྱོར་པ་ལ་བསྒོམ་པའི་སེམས་

88-1-96b

དང་ལྡན་གྱུར་ཅིང་། །སེམས་གཅིག་པ་ནི་རྡོ་རྗེ་འཆང་ཉིད་འགྲུབ་འགྱུར་ཏེ། །དངོས་པོ་ཉིད་དང་བཅས་པའི་ཐུགས་ནི་སྐྱེ་བར་འགྱུར། །རྡོ་རྗེའི་དངོས་མཛད་ཞི་བ་མ་གསུངས་སྙིང་པོ་སྟེ། །འདི་ལྟར་ཆོས་རྣམས་མཉམ་
པ་ཉིད་དུ་རྟོགས་བྱ་ཞིང་། །དེ་ལྟར་མཁའ་དང་མཉམ་པར་རྣམ་པར་དཔྱད་པར་བྱ། །ལྷ་འདི་རྣམ་སྣང་ལྷ་མོ་ལྔ་རྣམས་དེའི་བདག་ཉིད། །རྡོ་རྗེ་ཐེག་པ་ལ་ནི་མཉམ་པའི་རང་བཞིན་ཏེ། །སྐུལ་བྱེད་མས་ནི་སྲིད་པའི་
རང་བཞིན་ཡིན་ཕྱིར་རོ། །གཅིག་པའི་དང་པོ་རྡོ་རྗེ་སེམས་ཏེ་སྐུར་མཐོང་བ། །རྡོ་རྗེའི་ཐེག་པར་འདོད་རྣམས་ལྷ་མོས་འདི་སྐད་གསུངས། །བདེན་པ་བསྐྱེད་པ་འདི་ནི་རྣམ་སྣང་ལྷ་མོས་གསུངས། །
འདི་ནི་ཟླ་བའི་དབུས་གནས་བསྒོམ་པ་རྡོ་རྗེའི་གསང་སྔགས་ཏེ། །དེ་ནི་སེམས་གཅིག་པ་ཡིས་རྡོ་རྗེ་རྣམ་བསྒོམ་པ། །རབ་ཏུ་འབར་བའི་རྡོ་རྗེ་རྩེ་གསུམ་པ་ཉིད་དོ། །རྣལ་འབྱོར་གནས་ཀྱི་དབུས་
གནས་རྡོ་རྗེའི་རང་བཞིན་བསྒོམ། །ངས་ནི་རྡོ་རྗེའི་ཐེག་པར་འདི་སྐད་དུ། །ཆོས་རྣམས་གཅིག་པའི་རང་བཞིན་ཉིད་དུ་བསྟན། །སྐུའི་དཀྱིལ་འཁོར་གྱི་ལེའུ་སྟེ་བཞི་པའོ།། །། དངོས་མེད་མི་
རྟག་པ་ལས་དངོས་བཅས་ལུས་བསྒོམ་མིན། །ལྷ་མོས་སྐུལ་བ་བྱེད་པའི་དངོས་པོ་སྟེ། །དེ་ལྟར་ཆོས་ལས་ངེས་པར་བརྟག་བྱ་བས། །སེམས་ནི་ནམ་མཁའ་ལྟ་བུའི་མཚན་ཉིད་དང་། །དངོས་པོ་ཐེག་པ་མེད་པའི་དངོས་པོར་བྱ། །
དངོས་པོའི་རང་བཞིན་ལ་ནི་ཐེག་པ་མེད་པ་སྟེ། །སེམས་ནི་ནམ་མཁའ་ཉིད་དང་མཉམ་པའི་རང་བཞིན་ཅན། །སྔ་མ་ཅི་བཞིན་སེམས་ནི་རྣམ་པར་སྦྱར་བར་བྱ། །ཅི་ལྟར་དེ་ནི་དངོས་པོར་བྱ་བ་སྟེ། །དངོས་པོ་འདི་ནི་ཐེག་
པར་འགྲུབ་པར་མི་འགྱུར་ཏེ། །སེམས་ཅན་ནམ་མཁའ་ལྟ་བུའི་མཚན་ཉིད་དང་། །དབུས་སུ་ཚིག་ནི་ཆོས་ལ་ངེས་རྟོག་པར། །སེམས་ལས་དངོས་པོ་ཉིད་དུ་བྱ་བ་སྟེ། །རྣམ་པ་དུ་མའི་ཚུལ་གྱི་རང་བཞིན་

88-1-97a

གྱིས། །རྡོ་རྗེ་སེམས་དཔའ་བསྐྱེད་པར་བྱ་བའོ། །ཅི་ལྟར་དང་ཞིང་རྙོག་པ་མེད་པའི་ཆུ། །འདི་འདྲའི་སེམས་ནི་མྱུར་བའི་ངོ་བོར་བསྒྲུབ། །དེ་ལྟར་བསྟན་དུ་མེད་པ་འདི་ནི་ང་ཡིས་བསྟན། །རྡོ་རྗེ་སེམས་དཔའི་སྐུ་
ཡི་རང་བཞིན་གྱིས། །བཞི་པའི་རྣམ་པའི་ངོ་བོར་བྱ་བ་སྟེ། །དེ་ལ་རྡོ་རྗེའི་ཆུ་ནི་ཡི་དམ་ལྷ་ཡི་རང་བཞིན་ཅན། །ཐུགས་ཀྱི་ངོ་བོའི་རྣལ་འབྱོར་པས་བཟའ་བྱ། །ཆོས་དང་དགེ་འདུན་དང་ནི་རྡོ་རྗེའི་ཆུ་སྟེ་དེ་རྣམས་མཉམ་པའི་རང་བཞིན་
ཏེ། །ཞག་དང་ཁྲག་སོགས་མཆོག་ཏུ་མཛེས་པར་རབ་བཞུགས་དངོས་པོའི་ལུས་ནི་བསྒྱུར་བར་བྱ། །བཟའ་དང་བཅའ་དང་མལ་སྟན་ལ་སོགས་དེ་རྣམས་ཐམས་ཅད་འདིའི་རང་བཞིན། །གང་ཞིག་ཏིང་ངེ་
འཛིན་དུ་ངེས་པར་བསྟན་པའང་དེ་དང་གཅིག་པའི་རང་བཞིན་ནོ། །སངས་རྒྱས་ཀྱིས་ནི་གསུམ་ཆར་རྡོ་རྗེའི་ངོ་བོར་མཛད། །ཆོས་རྣམས་ཐམས་ཅད་དངོས་པོ་མེད་པའི་རང་བཞིན་ཏེ། །རྡོ་རྗེ་ཅན་གྱིས་སྒྱུ་མའི་རང་
བཞིན་ཉིད་དུ་གསུངས། །དེ་ཡི་རང་བཞིན་མཁའ་མཉམ་སོ་སོར་སྣང་བར་འགྱུར། །སྒྱུ་མའི་ངོ་བོར་ངེས་པར་བསྟན་པ་ཡིས། །རྡོ་རྗེ་ཡི་ནི་ངེས་པར་འཇུག་པར་བྱ་བ་སྟེ། །སེམས་ཅན་རང་བཞིན་ལ་ནི་ཐེག་
པར་མེད། །སེམས་ནི་དེ་ལ་གནས་པའི་སྙིང་པོའོ། །དེ་ལྟའི་ངོ་བོས་ཐུགས་ཀྱི་བདག་ཉིད་ཀྱི། །སྔགས་པ་ཁྱོད་ནི་འགྲུབ་པར་འགྱུར་བ་སྟེ། །ཐུགས་དང་སྤྲོ་དང་སླར་ཡང་བསྡུས་བྱ་བ། །གསུམ་ཅར་ཡང་ནི་
གཅིག་པའི་རང་བཞིན་ནོ། །སེམས་ནི་རི་རབ་ཧཱུཾ་དང་མཉམ་བྱས་ཏེ། །དག་པའི་སངས་རྒྱས་སུ་ནི་སེམས་སླར་བསྐྱེད། །སེམས་དུབ་གྱུར་ན་སླར་ཡང་བསྡུ་བ་དག །དེར་ནི་སྔགས་པས་དེས་བརྟག་
བསྒོམ་པར་བྱ། །བསྡུས་པའི་ངོ་བོས་སླར་ཡང་སྦྱར་བར་བྱ། །རྡོ་རྗེ་སེམས་དཔའ་དེར་ནི་སྐུ་གཡོས་མཛད། །སླར་ཡང་ནམ་མཁའི་ངོ་བོས་ཁྲོ་བས་ཏེ། །དེ་ལྟར་སྤྲོས་དང་བསྡུས་པའི་རང་བཞིན་

88-1-97b

ནོ། །དེ་ལ་རྡོ་རྗེ་སེམས་དཔའ་གཅིག་དངོས་གྲུབ་པའི་ཕྱིར། །དེའི་ཕྱིར་སྤྲོ་བའང་རྡོ་རྗེ་འཆང་དུ་རིགས། །སྔགས་པས་བརྟན་པར་གྱུར་ན་སྤྲོ། །བརྟན་པར་མ་གྱུར་འདིར་སྤྲོས་པ། །ལུས་ཉོན་མོངས་ཀྱི་འབྲས་མི་
འབྱིན། །ངེས་པར་འགྲུབ་འགྱུར་ཐེག་པའི་དངོས། །ཐམས་ཅད་བདེན་པ་འདི་རྣམས་བསྟན། །དེ་ལྟའི་ཆོས་ནི་བསྒོམ་པ་ཡི། །དངོས་པོ་རྡོ་རྗེའི་རང་བཞིན་ནོ། །མཁའ་དང་མཉམ་པའི་སེམས་ནི་སྨད་མི་བྱ། །
གང་ཡང་དྲི་མ་ཅིས་ཀྱང་གོས་པ་མིན། །ཀྱེ་རྣལ་འབྱོར་པ། བཅོམ་ལྡན་འདས་ཡུམ་སྐུལ་བྱེད་མ་ནི་དང་པོའི་རང་བཞིན་ཏེ། །རྡོ་རྗེ་བསྐྱེད་པར་བསྒོམས་པས་སངས་རྒྱས་བསྐྱེད་མཛད་པའོ། །ལྷ་མོ་རྣམས་ནི་ལྷ་དང་
གཅིག་པའི་རང་བཞིན་ཏེ། །རྡོ་རྗེ་སེམས་དཔའ་སངས་རྒྱས་འབྱོར་པ་བསྐྱེད་མཛད་པའོ། །རྗེས་སུ་འཛིན་པས་བསྒོམ་པའི་སེམས་དང་ནི། །ཡི་གེ་ཧཱུཾ་གིས་ཀྱང་ནི་དེ་འགྲུབ་འགྱུར། །བརླ་དང་རྐང་པ་དག་ཏུ་རྣམ་
རྟོག་པའི། །རྨོངས་པ་ཡིད་ལ་བྱ་བ་མ་ཡིན་ནོ། །འཇིག་རྟེན་གསུམ་གྱི་འཁོར་ལོ་འདི་ཉིད་ནི། །རྡོ་རྗེའི་འོད་ཟེར་གྱིས་ནི་ཡང་དག་བཅིངས། །སྔགས་པས་ནམ་མཁའི་ཁམས་སུ་ཁྲོ་བོའི་ལྷ། །བྱེ་བ་སྟོང་ཕྲག་
དག་ནི་སྤྲོ་བྱ་སྟེ། །གཅིག་པའི་ངོ་བོར་གྱུར་པའི་རྡོ་རྗེར་ནི། །སླར་ཡང་ངེས་པར་བསྡུ་བར་བྱ་བ་ཡིན། །བྱང་ཆུབ་ཐེག་པ་སེམས་ཀྱི་རང་བཞིན་ཏེ། །བྱང་ཆུབ་ཀྱང་ནི་སེམས་ཀྱི་རང་བཞིན་ནོ། །གཉིས་
ཀ་རང་བཞིན་སེམས་ཀྱི་ཐེག་པ་སྟེ། །སེམས་ཀྱང་མཁའ་དང་མཉམ་པའི་རང་བཞིན་ནོ། །རྒྱུད་གཞན་དང་ཐུན་མོང་བའི་ལེའུ་སྟེ་ལྔ་པའོ།། །།ཇི་བཞིན་བརྙེས་པ་ནམ་མཁའ་དང་མཉམ་པའི་
རྒྱུད་རྫོགས་སྷོ།། །། རྒྱ་གར་གྱི་མཁན་པོ་ཆེན་པོ་ཏཱཀྵ་ཀ་ག་ཎ་དང་། །ལོ་ཙཱ་བ་མང་འོར་དགེ་སློང་བྱང་ཆུབ་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།ཐང་ཆེན་རིང་མོས་ཞུས། །སྟག་ལུང་རྒྱུད་ལ་བཏུགས་ཏེ་ཞུས་དག ། 

88-1-98a

༄༅། །རྒྱ་གར་སྐད་དུ།  སརྦ་ཏ་ཐཱ་ག་ཏ་ཀཱ་ཡ་བཱ་ཀ་ཙིཏ་ཏ་ར་ཧ་སྱོ་གུ་ཧྱ་ས་མཱ་ཛ་ནཱ་མ་མ་ཧཱ་ཀལ་པ་རཱ་ཛ།  བོད་སྐད་དུ།  དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་གསང་
ཆེན་གསང་བ་འདུས་པ་ཞེས་བྱ་བ་བརྟག་པའི་རྒྱལ་པོ་ཆེན་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་
པ་ཐམས་ཅད་ཀྱི་སྐུ་གསུང་ཐུགས་ཀྱི་སྙིང་པོ་རྡོ་རྗེ་བཙུན་མོའི་བྷ་ག་རྣམས་ལ་བཞུགས་སོ། །བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བའི་སངས་རྒྱས་ཀྱི་ཞིང་གི་རྡུལ་ཕྲ་རབ་སྙེད་ཀྱི་བྱང་ཆུབ་
སེམས་དཔའ་སེམས་དཔའ་ཆེན་པོ་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དམ་ཚིག་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྐུ་རྡོ་རྗེ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་གསུང་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཐུགས་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་རྡོ་རྗེ་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་རྒྱལ་བ་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ས་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མེ་རྡོ་རྗེ་དང་། 
བྱང་ཆུབ་སེམས་དཔའ་སེམས་དཔའ་ཆེན་པོ་རླུང་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའ་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཟུགས་རྡོ་རྗེ་དང་། བྱང་ཆུབ་སེམས་
དཔའ་སེམས་དཔའ་ཆེན་པོ་སྒྲ་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དྲི་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རོ་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རེག་

88-1-98b

བྱ་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་དབྱིངས་རྡོ་རྗེ་དང་། དེ་དག་ལ་སོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བའི་
སངས་རྒྱས་ཀྱི་ཞིང་གི་རྡུལ་ཕྲ་རབ་སྙེད་རྣམས་དང་། དེ་བཞིན་གཤེགས་པ་ནམ་མཁའི་ཁམས་དང་མཉམ་པ་ལ་ཡང་འདི་ལྟ་སྟེ། དེ་བཞིན་གཤེགས་པ་རྡོ་རྗེ་མི་བསྐྱོད་པ་དང་། དེ་བཞིན་གཤེགས་པ་རྡོ་རྗེ་རྣམ་པར་
སྣང་མཛད་དང་། དེ་བཞིན་གཤེགས་པ་རྡོ་རྗེ་རིན་ཆེན་ཏོག་དང་། དེ་བཞིན་གཤེགས་པ་རྡོ་རྗེ་འོད་དཔག་མེད་དང་། དེ་བཞིན་གཤེགས་པ་རྡོ་རྗེ་དོན་ཡོད་པ་དང་དེ་དག་ལ་སོགས་པ་ནམ་མཁའི་ཁམས་
ཐམས་ཅད་དང་མཉམ་པའི་དེ་བཞིན་གཤེགས་པ་རྣམས་དང་། ཐབས་གཅིག་ཏུ་འདི་ལྟ་སྟེ་དཔེར་ན་ཏིལ་གྱི་གང་བུ་བཞིན་དུ་དེ་བཞིན་གཤེགས་པ་ཐམས་ཅད་ཀྱིས་ནམ་མཁའི་ཁམས་ཐམས་ཅད་ཤིན་དུ་ཡོངས་སུ་གང་
བར་སྣང་བར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་རྣམ་པར་སྣང་མཛད་ཆེན་པོ་དེ་བཞིན་གཤེགས་པ་ཐམས་ཅད་ཀྱི་འདོད་ཆགས་ཆེན་པོའི་ཚུལ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ནས་དེ་བཞིན་གཤེགས་པ་ཐམས་ཅད་ཀྱི་བཀོད་པ་དེ་དག་ཉིད་ཀྱི་སྐུ་ལ་ཞུགས་པར་མཛད་དོ། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་
ཀྱི་སྐུ་གསུང་ཐུགས་ཀྱི་བདག་པོ་ཡོངས་སུ་མཉེས་པར་བྱ་བའི་ཕྱིར་ཉིད་ཀྱི་སྐུ་བུད་མེད་ཀྱི་གཟུགས་སུ་མངོན་པར་སྤྲུལ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོའི་སྐུ་ལས་མངོན་པར་བྱུང་བར་གྱུར་ཏོ། །
དེ་ལ་ལ་ལ་ནི་སངས་རྒྱས་སྤྱན་གྱི་རྣམ་པར་རོ། །ལ་ལ་མཱ་མ་ཀཱིའི་རྣམ་པར་རོ། །ལ་ལ་གོས་དཀར་མོའི་རྣམ་པར་རོ། །ལ་ལ་དམ་ཚིག་སྒྲོལ་མའི་རྣམ་པར་ཡང་དག་པར་གནས་པར་གྱུར་ཏོ། །ལ་ལ་གཟུགས་

88-1-99a

ཀྱི་ངོ་བོའི་རྣམ་པས། ལ་ལ་ནི་སྒྲའི་ངོ་བོའི་རྣམ་པས། ལ་ལ་དྲིའི་ངོ་བོའི་རྣམ་པས། ལ་ལ་རོའི་ངོ་བོའི་རྣམ་པས། ལ་ལ་རེག་བྱའི་ངོ་བོའི་རྣམ་པས་ཡང་དག་པར་
གནས་པར་གྱུར་ཏོ། །དེ་ནས་དེ་བཞིན་གཤེགས་པ་མི་བསྐྱོད་པས་དེ་བཞིན་གཤེགས་པ་ཐམས་ཅད་ཀྱི་བཙུན་མོའི་བྷ་ག་ལ་གྲུ་བཞི་རྡུལ་མེད་པ་དམ་ཚིག་ཆེན་པོའི་དཀྱིལ་འཁོར་བྱིན་གྱིས་བརླབས་
པ་ནི། གསལ་བ་དེ་ཡི་ངོ་བོ་ཉིད། །སྣ་ཚོགས་གཟུགས་ཀྱིས་ཀུན་དུ་རྒྱས། །སངས་རྒྱས་སྤྲིན་ནི་ཀུན་ཏུ་བཀྲམ། །མེ་སྟག་འཕྲོ་བ་མང་པོ་འཁྲུག །གསལ་བ་ལ་སོགས་
དཀྱིལ་འཁོར་ལྡན། །དེ་བཞིན་གཤེགས་པ་ཀུན་གྱི་གནས། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་བདག་པོ་དེ་དེ་བཞིན་གཤེགས་པ་ཐམས་
ཅད་ཀྱི་དམ་ཚིག་ཆེན་པོའི་དཀྱིལ་འཁོར་གྱི་དབུས་སུ་བདག་ཉིད་བཞག་པར་གྱུར་ཏོ། །དེ་ནས་དེ་བཞིན་གཤེགས་པ་མི་བསྐྱོད་པ་དང་། དེ་བཞིན་གཤེགས་པ་རིན་ཆེན་ཏོག་དང་། དེ་བཞིན་
གཤེགས་པ་འོད་དཔག་མེད་དང་། དེ་བཞིན་གཤེགས་པ་དོན་ཡོད་གྲུབ་པ་དང་། དེ་བཞིན་གཤེགས་པ་རྣམ་པར་སྣང་མཛད་རྣམས་དེ་བཞིན་གཤེགས་པ་བྱང་ཆུབ་ཀྱི་སེམས་རྡོ་རྗེའི་ཐུགས་
ལ་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བྱང་ཆུབ་ཀྱི་སེམས་རྡོ་རྗེས་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་སྙོམས་པར་ཞུགས་པ་དེ་མ་ཐག་ཏུ། དེ་ནས་ནམ་མཁའི་དབྱིངས་འདི་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་

88-1-99b

རྡོ་རྗེའི་ངོ་བོར་གནས་པར་གྱུར་ཏོ། །དེ་ནས་ནམ་མཁའི་དབྱིངས་ཐམས་ཅད་ན་གནས་པའི་སེམས་ཅན་ཇི་སྙེད་པ་དེ་དག་ཐམས་ཅད་རྡོ་རྗེ་སེམས་དཔའི་བྱིན་གྱིས་བརླབས་ཀྱིས་དེ་བཞིན་གཤེགས་
པ་ཐམས་ཅད་ཀྱི་བདེ་བ་དང་ཡིད་བདེ་བ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བྱང་ཆུབ་ཀྱི་སེམས་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་
རྗེའི་དམ་ཚིག་བྱུང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རིག་པ་ཆེན་པོ་སྐྱེས་བུའི་གཟུགས་དེ་བཞིན་གཤེགས་པ་ཐམས་ཅད་ཀྱི་སྔགས་ཀྱི་བྱིན་གྱིས་བརླབས་ཀྱིས་བྱིན་
གྱིས་བརླབས་སོ། །བྱིན་གྱིས་བརླབས་པ་ཙམ་གྱིས་དེ་མ་ཐག་ཏུ་བཅོམ་ལྡན་འདས་བྱང་ཆུབ་ཀྱི་སེམས་རྡོ་རྗེ་དེ་བཞིན་གཤེགས་པ་དེ་ཉིད་ཞལ་གསུམ་པའི་རྣམ་པར་དེ་བཞིན་གཤེགས་པ་
ཐམས་ཅད་ཀྱིས་གཟིགས་པར་གྱུར་ཏོ། །དེ་ནས་དེ་བཞིན་གཤེགས་པ་མི་བསྐྱོད་པ་ལ་སོགས་པ་བཅོམ་ལྡན་འདས་རྣམ་པར་སྣང་མཛད་ཆེན་པོའི་ཐུགས་ཁ་ནས་མངོན་པར་བྱུང་སྟེ་ཆེད་དུ་བརྗོད་པ། 
ཨེ་མ་ཧོ་སངས་རྒྱས་ཐམས་ཅད་ཀྱི། །བྱང་ཆུབ་སེམས་ནི་རབ་འཇུག་པ། །དེ་བཞིན་གཤེགས་པ་ཀུན་གྱི་གསང་། །རབ་ཏུ་མི་རྟོག་གནས་མེད་པའོ། །
དེ་ནས་དེ་བཞིན་གཤེགས་པ་ཐམས་ཅད་ཡང་གཅིག་ཏུ་འདུས་ནས་བཅོམ་ལྡན་འདས་དེ་བཞིན་གཤེགས་པ་བྱང་ཆུབ་ཀྱི་སེམས་རྡོ་རྗེ་ལ་དེ་བཞིན་གཤེགས་པ་ཐམས་ཅད་ཀྱི་མཆོད་པ་སྤྲོས་པའི་དམ་
ཚིག་དེ་ཁོ་ན་ཉིད་ཀྱི་རིན་པོ་ཆེའི་སྤྲིན་གྱིས་ཡང་དག་པར་མཆོད་དེ་ཕྱག་འཚལ་ནས་འདི་སྐད་ཅེས་གསོལ་ཏོ། །འདུས་པ་གསང་བ་ལས་བྱུང་བ། །དེ་བཞིན་གཤེགས་པ་

88-1-100a

ཀུན་གྱི་གསང་། །རྡོ་རྗེ་སྙིང་པོ་བཏུས་པ་ཡི། །དེ་ཉིད་བཅོམ་ལྡན་བཤད་དུ་གསོལ། །དེ་ནས་བཅོམ་ལྡན་འདས་དེ་བཞིན་
གཤེགས་པ་བྱང་ཆུབ་ཀྱི་སེམས་རྡོ་རྗེས་དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ལེགས་སོ་
ལེགས་སོ། །འོན་ཀྱང་འདི་ནི་དེ་བཞིན་གཤེགས་པ་ཐམས་ཅད་ཀྱང་ཐེ་ཚོམ་སྐྱེ་བར་བྱེད་པ་ཡིན་ན་བྱང་ཆུབ་སེམས་དཔའ་གཞན་རྣམས་ལྟ་ཅི་སྨོས། དེ་ནས་བཅོམ་ལྡན་
འདས་དེ་བཞིན་གཤེགས་པ་ཐམས་ཅད་ངོ་མཚར་དུ་གྱུར། རྨད་དུ་བྱུང་བར་གྱུར་ཏེ། དེ་བཞིན་གཤེགས་པ་ཐམས་ཅད་ཀྱི་ཐེ་ཚོམ་ཐམས་ཅད་གཅོད་པར་མཛད་པ་
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ལ་འདི་སྐད་ཅེས་གསོལ་ཏོ། །གང་བཅོམ་ལྡན་འདས་འདི་ལྟ་བུའི་ཡོན་ཏན་ཁྱད་པར་ཅན་ལ་ཡང་། དེ་བཞིན་
གཤེགས་པ་ཐམས་ཅད་ཀྱི་འཁོར་དུ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་སྟོན་པར་མི་སྤྲོ་བར་དེ། བཅོམ་ལྡན་འདས་དེ་བཞིན་གཤེགས་
པ་ཐམས་ཅད་ལ་བྱིན་གྱིས་བརླབ་པ་མཛད་ནས། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་དམ་ཚིག་འབྱུང་བའི་ཚིག་གིས་དེ་བཞིན་གཤེགས་པ་ཐམས་ཅད་ཀྱི་བདེ་བ་དང་། 
ཡིད་བདེ་བ་མྱོང་བར་བགྱི་བ་ནས། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་དང་། མངོན་པར་ཤེས་པའི་འབྲས་བུ་ཐོབ་པར་བགྱི་བའི་བར་གྱི་ཕྱིར་ཡང་དག་པར་བསྟན་དུ་གསོལ། 

88-1-100b

དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་དེ་བཞིན་གཤེགས་པས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པ་དེ་མཁྱེན་ནས། ཡེ་
ཤེས་སྒྲོན་མ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཞེ་སྡང་གི་རིགས་ཀྱི་སྔགས་མཆོག་གི་སྙིང་པོ་འདི་སྙིང་པོ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །བཛྲ་དྷྲྀཀ །
དེ་ནས་འདི་ཕྱུང་མ་ཐག་ཏུ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རིག་པའི་སྐྱེས་བུ་དེ་ཉིད་མི་བསྐྱོད་པའི་ཕྱག་རྒྱ་ཆེན་པོར་སྦྱོར་བ་མཆོག་གི་གནས་
ཀྱིས་ནག་པོ་དཀར་པོ་དམར་པོའི་རྣམ་པས། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་སྐུ་གསུང་ཐུགས་རྡོ་རྗེ་ལ་བཞུགས་སོ། །དེ་ནས་བཅོམ་ལྡན་འདས་
དེ་བཞིན་གཤེགས་པ་ཐམས་ཅད་ཀྱི་དམ་ཚིག་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་གཏི་མུག་གི་རིགས་ཀྱི་སྔགས་མཆོག་གི་སྙིང་པོའི་སྙིང་པོ་འདི་ཉིད་ཀྱི་སྐུ། གསུང་
ཐུགས་རྡོ་རྗེ་ལས་ཕྱུང་ངོ་། །ཛི་ན་ཛིཀ ། དེ་ནས་འདི་ཕྱུང་མ་ཐག་ཏུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རིག་པའི་སྐྱེས་བུ་དེ་ཉིད་
རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་སྦྱོར་བ་མཆོག་གི་གནས་ཀྱིས་དཀར་པོ་ནག་པོ་དམར་པོའི་རྣམ་པས་དེ་བཞིན་གཤེགས་པ་ཐམས་ཅད་ཀྱི་སྐུ་
གསུང་ཐུགས་རྡོ་རྗེའི་སྤྱན་སྔར་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེ་འབྱུང་བའི་རྡོ་རྗེ་དཔལ་ཞེས་

88-1-101a

བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཡིད་བཞིན་ནོར་བུའི་རིགས་ཀྱི་སྔགས་མཆོག་གི་སྙིང་པོའི་སྙིང་པོ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །རཏྣ་དྷྲིཀ ། དེ་ནས་འདི་ཕྱུང་མ་ཐག་ཏུ་བཅོམ་ལྡན་འདས་
དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རིག་པའི་སྐྱེས་བུ་དེ་ཉིད་རིན་ཆེན་ཏོག་གི་ཕྱག་རྒྱ་ཆེན་པོ་སྦྱོར་བ་ནམ་མཁའ་མཆོག་གི་གནས་ཀྱིས་སེར་པོ་ནག་པོ་དཀར་པོའི་རྣམ་པས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་
ཐུགས་རྡོ་རྗེའི་གཡས་ཕྱོགས་སུ་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་འདོད་ཆགས་ཆེན་པོ་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་འདོད་ཆགས་ཀྱི་
རིགས་ཀྱི་སྔགས་མཆོག་གི་སྙིང་པོའི་སྙིང་པོ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨཱ་རོ་ལིཀ ། དེ་ནས་འདི་ཕྱུང་མ་ཐག་ཏུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རིག་པའི་སྐྱེས་བུ་དེ་
ཉིད་འཇིག་རྟེན་དབང་ཕྱུག་གི་རིག་པའི་བདག་པོ་ཆེན་པོའི་ཕྱག་རྒྱ་ཆེན་པོ་སྦྱོར་བ་མཆོག་གི་གནས་ཀྱིས་དམར་པོ་ནག་པོ་དཀར་པོའི་རྣམ་པས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རྒྱབ་ཏུ་བཞུགས་སོ། །
དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དོན་ཡོད་མཆོག་གི་དམ་ཚིག་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དམ་ཚིག་དགུག་པའི་རིགས་མཆོག་གི་སྙིང་པོའི་སྙིང་པོ་
འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །པྲཛྙཱ་དྷྲྀཀ ། དེ་ནས་འདི་ཕྱུང་མ་ཐག་ཏུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རིག་པའི་སྐྱེས་བུ་དེ་ཉིད་རྡོ་རྗེ་དོན་ཡོད་པའི་ཕྱག་རྒྱ་ཆེན་
པོ་སྦྱོར་བ་མཆོག་གི་གནས་ཀྱིས་ལྗང་ཁུ་ནག་པོ་དཀར་པོའི་རྣམ་པས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་བྱང་ཕྱོགས་སུ་བཞུགས་སོ། །ཞེ་སྡང་གཏི་མུག་དེ་བཞིན་ཆགས། །ཡིད་བཞིན་ནོར་བུ་

88-1-101b

དམ་ཚིག་སྟེ། །རིགས་ནི་ལྔ་པོ་འདི་རྣམས་ཉིད། །འདོད་དང་ཐར་པར་བསྒྲུབ་པའོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་འཛིན་པ་རྗེས་སུ་ཆགས་པའི་དམ་ཚིག་ཅེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ནས་རྡོ་རྗེ་འཛིན་པ་ཐམས་ཅད་ཀྱི་བཙུན་མོའི་མཆོག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །དྭེ་ཥ་ར་ཏི། དེ་ནས་འདི་ཕྱུང་མ་ཐག་ཏུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་
ཐུགས་ཀྱི་རིག་པའི་སྐྱེས་བུ་དེ་ཉིད་བུད་མེད་ཀྱི་གཟུགས་འཛིན་པར་གྱུར་ཏེ་ལྷོ་ཕྱོགས་ཀྱི་གྲྭར་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་རྗེས་སུ་ཆགས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་བཙུན་མོའི་མཆོག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །མོ་ཧ་ར་ཏི། དེ་ནས་འདི་ཕྱུང་མ་ཐག་ཏུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་
གསུང་ཐུགས་ཀྱི་རིག་པའི་སྐྱེས་བུ་དེ་ཉིད་བུད་མེད་ཀྱི་གཟུགས་འཛིན་པར་གྱུར་ཏེ་ཤར་ཕྱོགས་ཀྱི་གྲྭར་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་འདོད་ཆགས་འཛིན་པ། 
རྗེས་སུ་ཆགས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་འདོད་ཆགས་འཛིན་པའི་བཙུན་མོའི་མཆོག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །རཱ་ག་ར་
ཏ། དེ་ནས་འདི་ཕྱུང་མ་ཐག་ཏུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རིག་པའི་སྐྱེས་བུ་དེ་ཉིད་བུད་མེད་ཀྱི་གཟུགས་འཛིན་པར་གྱུར་ཏེ་ནུབ་ཕྱོགས་ཀྱི་གྲྭར་བཞུགས་སོ། །དེ་ནས་བཅོམ་ལྡན་
འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་སླུ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་ཤེས་རབ་འཆང་བ་རྗེས་སུ་ཆགས་པའི་རྡོ་རྗེ་འདི་ཉིད་

88-1-102a

ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །བཛྲ་ར་ཏི། དེ་ནས་འདི་ཕྱུང་མ་ཐག་ཏུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རིག་པའི་སྐྱེས་བུ་དེ་ཉིད་བུད་མེད་ཀྱི་གཟུགས་འཛིན་པར་གྱུར་ཏེ། 
བྱང་གི་གྲྭར་བཞུགས་སོ། །དེ་བཞིན་གཤེགས་པ་ཐམས་ཅད་ཀྱི་བཙུན་མོའི་མཆོག་ཕུན་སུམ་ཚོགས་པའོ། །དེ་ནས་བཅོམ་ལྡན་འདས་རྣམ་པར་སྣང་མཛད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་
གཤེགས་པ་ཐམས་ཅད་ཀྱི་དཀྱིལ་འཁོར་བྱིན་གྱིས་རློབ་པ་ཞེས་བྱ་བའི་ཁྲོ་བོ་ཆེན་པོ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཡ་མཱན་ཏ་ཀྲྀཏ། དེ་ནས་འདི་ཕྱུང་མ་ཐག་ཏུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་
སྐུ་གསུང་ཐུགས་ཀྱི་རིག་པའི་སྐྱེས་བུ་དེ་ཉིད་དེ་བཞིན་གཤེགས་པ་ཐམས་ཅད་བསྙེངས་པར་བྱེད་པའི་རྣམ་པས་ཤར་ཕྱོགས་ཀྱི་སྒོར་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་མངོན་པར་རྫོགས་
པར་བྱང་ཆུབ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་བྱིན་གྱིས་རློབ་པ་ཞེས་བྱ་བའི་ཁྲོ་བོ་ཆེན་པོ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །པྲཛྙཱན་ཏ་
ཀྲྀཏ། དེ་ནས་འདི་ཕྱུང་མ་ཐག་ཏུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རིག་པའི་སྐྱེས་བུ་དེ་ཉིད་རྡོ་རྗེ་དམ་ཚིག་བསྙེངས་པར་བྱེད་པའི་རྣམ་པས་ལྷོ་ཕྱོགས་ཀྱི་སྒོར་བཞུགས་སོ། །དེ་ནས་
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཆོས་རིན་པོ་ཆེ་འབྱུང་གནས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་འདོད་ཆགས་འཆང་བའི་དཀྱིལ་
འཁོར་བྱིན་གྱིས་རློབ་པ་ཞེས་བྱ་བའི་ཁྲོ་བོ་ཆེན་པོ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །པད་མཱན་ཏ་ཀྲྀཏ། དེ་ནས་དེ་ཕྱུང་མ་ཐག་ཏུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་

88-1-102b

ཐུགས་ཀྱི་རིག་པའི་སྐྱེས་བུ་དེ་ཉིད་དེ་བཞིན་གཤེགས་པ་ཐམས་ཅད་ཀྱི་གསུང་བསྙེངས་པར་བྱེད་པའི་རྣམ་པས་ནུབ་ཕྱོགས་ཀྱི་སྒོར་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་
ཐུགས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་དཀྱིལ་འཁོར་བྱིན་གྱིས་རླབ་པ་ཁྲོ་བོ་ཆེན་པོ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །
བིགྷན་ཏ་ཀྲིཏ། དེ་ནས་དེ་ཕྱུང་མ་ཐག་ཏུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རིག་པའི་སྐྱེས་བུ་དེ་ཉིད་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་བསྙེངས་པར་བྱེད་པའི་རྣམ་
པས་བྱང་ཕྱོགས་ཀྱི་སྒོར་བཞུགས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་མཉེས་པར་བྱེད་པ་དང་དཀྱིལ་འཁོར་གྱི་དམ་ཚིག་སེམས་དཔའ་རྣམས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་
གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས། དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་གྱི་དཀྱིལ་འཁོར་བྱིན་གྱིས་རློབ་པའི་ལེའུ་སྟེ་དང་པོའོ།། །། དེ་ནས་
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བདག་པོ་ལ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་མཆོད་པ་བྱས་ཏེ་ཕྱག་འཚལ་ནས་འདི་སྐད་ཅེས་གསོལ་ཏོ། །སྙིང་པོ་སྐུ་གསུང་
ཐུགས་མཆོག་ནི། །དེ་བཞིན་གཤེགས་པ་ཀུན་གྱི་གསང་། །བླ་ན་མེད་པའི་བྱང་ཆུབ་སེམས། །བཅོམ་ལྡན་འདས་ཀྱིས་བཤད་དུ་གསོལ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་
ཐུགས་རྡོ་རྗེའི་བདག་པོས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པ་མཁྱེན་ཅིང་། བྱང་ཆུབ་སེམས་དཔའ་ཐམས་ཅད་ཀྱི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས་བྱང་ཆུབ་སེམས་

88-1-103a

དཔའ་དེ་རྣམས་ལ་འདི་སྐད་ཅེས་བཀའ་སྩལ་ཏོ། །ཁྱེད་ཀྱིས་སེམས་ལུས་ཀྱི་རྣམ་པ་དང་ལུས་སེམས་ཀྱི་རྣམ་པ་དང་། སེམས་ཚིག་ཏུ་བརྗོད་པས་སྐྱེད་ཅིག །དེ་ནས་བྱང་ཆུབ་སེམས་དཔའ་
སེམས་དཔའ་ཆེན་པོ་དེ་དག་གིས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྣམས་ནི་ནམ་མཁའ་ལྟ་བུར་ཡང་དག་པར་སྦྱར་ནས་ཆེད་དུ་བརྗོད་པ་འདི་ཆེད་དུ་བརྗོད་དོ། །ཨེ་མ་ཧོ་ཀུན་དུ་བཟང་པོ་ཡི། །
སྐུ་དང་གསུང་ཐུགས་རྡོ་རྗེ་ཅན། །སྐྱེ་བ་མེད་པ་སྦྱོར་བ་ཡིས། །སྐྱེ་བ་འདི་ནི་རབ་ཏུ་བསྒྲགས། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་དེ་བཞིན་གཤེགས་པས་དེ་བཞིན་གཤེགས་པ་
ཐམས་ཅད་ཀྱིས་མངོན་པར་རྫོགས་པར་བྱང་ཆུབ་པའི་ཚུལ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །དངོས་པོ་མེད་ལ་སྒོམ་པ་མེད། །བསྒོམ་པ་བསྒོམ་པ་མ་ཡིན་ཉིད། །
དེ་ལྟར་དངོས་པོ་དངོས་མེད་དེ། །སྒོམ་པ་དམིགས་སུ་མེད་པའོ། །ཞེས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་དེ་བཞིན་གཤེགས་པས་གསུངས་སོ། །དེ་ནས་བཅོམ་ལྡན་འདས་
རྣམ་པར་སྣང་མཛད་རྡོ་རྗེ་དེ་བཞིན་གཤེགས་པས་དེ་བཞིན་གཤེགས་པ་ཐམས་ཅད་ཀྱི་མངོན་པར་རྟོགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །
དངོས་པོ་ཐམས་ཅད་རྣམ་བྲལ་ཕུང་པོ་ཁམས། །སྐྱེ་མཆེད་གཟུང་བ་འཛིན་པ་རྣམ་སྤངས་པ། །ཆོས་བདག་མེད་མཉམ་ཉིད་ཀྱིས་རང་གི་སེམས། །གདོད་ནས་མ་སྐྱེས་སྟོང་ཉིད་རང་བཞིན་ནོ། །ཞེས་བཅོམ་ལྡན་འདས་
དེ་བཞིན་གཤེགས་པ་རྡོ་རྗེ་རྣམ་པར་སྣང་མཛད་ཀྱིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་མི་བསྐྱོད་པས་དེ་བཞིན་གཤེགས་པ་ཐམས་ཅད་མི་ཟད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་

88-1-103b

ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་པོ་འདི་རྣམས་མ་སྐྱེས་པ། །ཆོས་དང་ཆོས་ཉིད་མེད་པ་སྟེ། །ནམ་མཁའ་ལྟ་བུར་བདག་མེད་པར། །བྱང་ཆུབ་ཚུལ་འདི་བསྟན་པའོ། །ཞེས་བཅོམ་
ལྡན་འདས་དེ་བཞིན་གཤེགས་པ་རྡོ་རྗེ་མི་བསྐྱོད་པས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་རིན་ཆེན་ཏོག་གིས། དེ་བཞིན་གཤེགས་པ་ཐམས་ཅད་ཀྱི་བདག་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་ཐམས་ཅད་དངོས་མེད་ཅིང་། །ཆོས་ཀྱི་མཚན་ཉིད་རྣམ་པར་སྤངས། ཆོས་བདག་མེད་ལས་ཀུན་ཏུ་བྱུང་། །བྱང་ཆུབ་ཚུལ་འདི་བརྟན་པའོ། །
ཞེས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཏོག་གིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་ཚེ་དཔག་ཏུ་མེད་པས་ཡེ་ཤེས་འོད་ཟེར་སྒྲོན་མ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །མ་སྐྱེས་པ་ཡི་ཆོས་རྣམས་ལ། །ངོ་བོ་མེད་དེ་སྒོམ་པའང་མེད། །ནམ་མཁའི་གནས་ཀྱི་སྦྱོར་བ་ཡིས། །འདིས་ནི་དངོས་པོ་རབ་ཏུ་བསྒྲགས། །ཞེས་བཅོམ་ལྡན་
འདས། དེ་བཞིན་གཤེགས་པ་རྡོ་རྗེ་ཚེ་དཔག་ཏུ་མེད་པས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་དོན་ཡོད་གྲུབ་པས་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པ་རྡོ་རྗེ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་རང་བཞིན་འོད་གསལ་བ། །གདོད་ནས་དག་པ་ནམ་མཁའ་བཞིན། །བྱང་ཆུབ་སེམས་ཅིང་མངོན་རྟོགས་མེད། །
བྱང་ཆུབ་ཚུལ་འདི་བརྟན་པའོ། །ཞེས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་དོན་ཡོད་གྲུབ་པས་གསུངས་སོ། །དེ་ནས་བྱམས་པ་ལ་སོགས་པའི་བྱང་ཆུབ་སེམས་དཔའ་སེམས་

88-1-104a

དཔའ་ཆེན་པོ་རྣམས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བའི་ཆོས་ཉིད་ཀྱི་ཡི་གེ་ཐོས་ནས་ངོ་མཚར་དུ་གྱུར། རྨད་དུ་བྱུང་བར་གྱུར་ཏེ་ཆེད་དུ་བརྗོད་པ་འདི་ཆེད་དུ་བརྗོད་
དོ། །ཨེ་མའོ་སངས་རྒྱས་ཨེ་མའོ་ཆོས། །ཆོས་བཤད་པ་ནི་ངོ་མཚར་ཆེ། །ཡང་དག་དོན་ནི་དག་པའི་དོན། །བྱང་ཆུབ་སེམས་ཁྱོད་ཕྱག་འཚལ་ལོ། །ཆོས་ཀྱི་བདག་མེད་ཡང་དག་བྱུང་། །སངས་རྒྱས་བྱང་ཆུབ་རྫོགས་མཛད་པ། །རྣམ་
པར་མི་རྟོག་དམིགས་སུ་མེད། །བྱང་ཆུབ་སེམས་ཁྱོད་ཕྱག་འཚལ་ལོ། །ཀུན་ཏུ་བཟང་པོ་ཐམས་ཅད་དོན། །བྱང་ཆུབ་སེམས་ནི་རབ་སྐོར་བ། །བྱང་ཆུབ་སྤྱོད་པ་རྡོ་རྗེ་ཆེ། །བྱང་ཆུབ་སེམས་ཁྱོད་ཕྱག་འཚལ་ལོ། །ཐུགས་ནི་དེ་
བཞིན་གཤེགས་པའི་དག །སྐུ་དང་གསུང་ཐུགས་རྡོ་རྗེ་ཅན། །སངས་རྒྱས་བྱང་ཆུབ་རབ་སྟོན་པ། །བྱང་ཆུབ་སེམས་ཁྱོད་ཕྱག་འཚལ་ལོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་
གསང་བ་འདུས་པ་ལས་བྱང་ཆུབ་ཀྱི་སེམས་ཀྱི་ལེའུ་སྟེ་གཉིས་པའོ།། །།   དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་དེ་བཞིན་གཤེགས་པས་དེ་བཞིན་
གཤེགས་པ་ཐམས་ཅད་འཕྲོ་བ་སྤྲིན་བཀོད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་རྡོ་རྗེ་བཀོད་པ་ཞེས་བྱ་བའི་ཏིང་ངེ་འཛིན་གྱི་ལེའུ་འདི་གསུངས་སོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བཱ་ཨཱཏ་མ་ཀོ྅་ཧཾ། 
ནམ་མཁའི་ཁམས་ཀྱི་དབུས་གནས་པར། །སངས་རྒྱས་དཀྱིལ་འཁོར་སྒོམ་བྱ་སྟེ། །འོད་ཟེར་སྤྲིན་གྱི་བཀོད་པ་ཆེ། །སངས་རྒྱས་འབར་བའི་འོད་དང་མཉམ། །འོད་ཟེར་ལྔ་ནི་ཀུན་ཏུ་ཁྱབ། །ཀུན་ནས་ཡོངས་སུ་ཟླུམ་པོ་
སྟེ། །འདོད་པའི་ཡོན་ཏན་ལྔ་ཡིས་སྤྲས། །མཆོད་པ་རྣམ་པ་ལྔས་བརྒྱན་པ། །བསྒོམ་པར་བྱས་ནས་བསྡུས་པ་ཡིས། །གཟུགས་ནི་དབུས་སུ་བསྒོམ་པར་བྱ། །རྣམ་པར་སྣང་མཛད་ཕྱག་རྒྱ་ཆེ། །སྐུ་གསུང་ཐུགས་ཀྱི་མཚན་

88-1-104b

པའོ། །སྐུ་གསུང་ཐུགས་ཀྱི་རྡོ་རྗེ་ཡི། ཕྱག་རྒྱ་ཡང་ནི་བསྒོམ་པར་བྱ། །བསྡུས་པ་གཉིས་མེད་སྦྱོར་བ་ཡིས། །མི་བསྐྱོད་ཕྱག་རྒྱ་མཆོག་རབ་དང་། །རིན་ཆེན་ཏོག་གི་ཕྱག་རྒྱ་ཆེ། །ཚེ་དཔག་མེད་པའི་འོད་བྱེད་དང་། །དོན་གྲུབ་ཕྱག་རྒྱ་ཆེན་པོ་རྣམས། །
སངས་རྒྱས་དཀྱིལ་འཁོར་དག་ཏུ་བསྒོམ། །སྐུ་གསུང་ཐུགས་ཀྱི་རྡོ་རྗེ་ཅན། །ཨིན་དྲ་ནཱི་ལའི་ཁ་དོག་འདྲ། །རབ་འབར་ཕྱག་ན་རྡོ་རྗེ་བསྣམས། །རྣམ་པར་གཙིགས་གསལ་འཇིགས་སུ་རུང་། །ཤེལ་དང་ཟླ་བའི་འོད་དང་འདྲ། །ཐོར་ཚུགས་ཅོད་
པན་གྱིས་བརྒྱན་པ། །རབ་འབར་ཕྱག་ན་འཁོར་ལོ་བསྣམས། །སྣ་ཚོགས་རྒྱན་གྱིས་མཛེས་པར་བརྒྱན། །འཛམ་བུ་ཆུ་བོའི་གསེར་འོད་འདྲ། །སངས་རྒྱས་སྤྲིན་ནི་ཀུན་དུ་འཁྲིགས། །རྩེ་མོ་དགུ་པའི་རྡོ་རྗེ་ཆེ། །དེ་ཡི་ཕྱག་ཏུ་རྣམ་པར་
བསྒོམ། །མ་ར་ཀ་ཏའི་འོད་འདྲ་བ། །རྡོ་རྗེ་འབར་བས་རྣམ་པར་བརྒྱན། །ཀུན་ཏུ་འབར་བའི་སྤྲིན་གྱིས་ཁྱབ། །ཕྱག་ན་རིན་ཆེན་བསྣམས་པར་བསྒོམ། །པད་མ་རཱ་གའི་མདོག་འདྲ་བ། །གཙོ་བོ་འདོད་ཆགས་འོད་འབར་འཆང་། །
རབ་འབར་ཕྱག་ན་པད་མ་བསྣམས། །འདོད་ཆགས་རྡོ་རྗེ་ཅན་བསྒོམ་བྱ། །འོད་ཟེར་ལྔ་ཡི་མདོག་འདྲ་བའི། །སྣ་ཚོགས་དོན་ཡོད་རྡོ་རྗེ་ཅན། །ཞི་བ་ཕྱག་ན་རལ་གྲི་བསྣམས། །སངས་རྒྱས་དཀྱིལ་འཁོར་དུ་ནི་བསྒོམ། །དེ་
ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་དེ་བཞིན་གཤེགས་པས་ཆོས་ཀྱི་དབྱིངས་ཀྱི་ངོ་བོ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྐུ་གསུང་ཐུགས་
བྱིན་གྱིས་རློབ་པའི་སྔགས་འདི་གསུངས་སོ། །ཨོཾ་དྷརྨ་དྷཱ་ཏུ་སྭ་བྷཱ་བ་ཨཱད་མ་ཀོ྅་ཧཾ། རིན་ཆེན་ཆེན་པོ་ཁ་དོག་ལྔ། །ཡུངས་ཀར་གྱི་ནི་འབྲུ་ཚད་ཙམ། །སྣ་ཡི་རྩེ་མོར་ནན་ཏན་དུ། །རྣལ་འབྱོར་གྱིས་ནི་རྟག་ཏུ་བསྒོམ། །
རིན་ཆེན་བརྟན་པར་གྱུར་ན་སྤྲོ། །བརྟན་པར་མ་གྱུར་ཡོང་མི་སྤྲོ། །སངས་རྒྱས་འབར་བ་མཉན་པའི་འོད། །རབ་མཆོག་སྤྲིན་རྣམས་སྤྲོ་བར་བྱ། །འཁོར་ལོ་རྡོ་རྗེ་རིན་ཆེན་ཆེས། །པད་མ་རལ་གྲི་མཚོན་ཆ་འཛིན། །བྱང་

88-1-105a

ཆུབ་སེམས་དཔའི་སྤྲིན་ཆེན་རྣམས། །སྤྲོ་བའི་བདག་ཉིད་ཅན་གྱིས་སྤྲོ། །ནམ་མཁའི་ཁམས་ཀྱི་དབུས་གནས་པར། །ཟླ་བའི་དཀྱིལ་འཁོར་བྲི་བར་བྱ། །གསལ་བའི་དཀྱིལ་འཁོར་དབུས་གནས་པར། །འཁོར་ལོའི་
དཀྱིལ་འཁོར་བསྒོམ་པར་བྱ། །པད་མའི་དཀྱིལ་འཁོར་ཡང་དག་གསལ། །པད་མ་སྒོམ་པས་བསྒོམ་པར་བྱ། །རིན་ཆེན་དཀྱིལ་འཁོར་ཡང་དག་གསལ། །རིན་ཆེན་བརྩོན་པས་བསྒོམ་པར་བྱ། །སྦྱོར་བའི་དཀྱིལ་འཁོར་ལས་བྱུང་
བ། །ནམ་མཁའ་འདྲ་བར་བྲི་བར་བྱ། །སངས་རྒྱས་རབ་མཆོག་འདི་རྣམས་ཉིད། །སྐུ་གསུང་ཐུགས་ནི་སྒྲུབ་པ་ཡིས། །དཀྱིལ་འཁོར་རྡོ་རྗེ་ལས་བྱུང་བ། །ཐམས་ཅད་མཁྱེན་པའི་ཚུལ་ཐོབ་པའོ། །དེ་བཞིན་གཤེགས་པ་ཐམས་
ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས་རྡོ་རྗེ་བཀོད་པའི་ཏིང་ངེ་འཛིན་ཞེས་བྱ་བའི་ལེའུ་སྟེ་གསུམ་པའོ།། །། 
དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་ཡང་འདུས་ནས། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བདག་པོ་ལ་བསྟོད་པའི་རྒྱལ་པོ་འདིས་གསོལ་བ་བཏབ་བོ། །དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་
པ་ཀུན་གྱི་གནས། །ཆོས་ཀུན་བདག་མེད་པའི་མཆོག །དཀྱིལ་འཁོར་དམ་པ་བཤད་དུ་གསོལ། །མཚན་ཉིད་ཐམས་ཅད་ཡང་དག་རྫོགས། །མཚན་ཉིད་མིན་པ་ཐམས་ཅད་སྤངས། །ཀུན་དུ་བཟང་པོ་སྐུ་ཡི་མཆོག །
དཀྱིལ་འཁོར་དམ་པ་བཤད་དུ་གསོལ། །ཞི་བའི་ཆོས་མཆོག་ལས་བྱུང་བ། །ཡེ་ཤེས་སྤྱོད་པ་རྣམ་སྦྱོང་མཛད། །ཀུན་ཏུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། །སེམས་ཅན་
ཀུན་གྱི་སེམས་ཆེན་པོ། །རང་བཞིན་དག་ཅིང་དྲི་མ་མེད། །ཀུན་བཟང་ཐུགས་མཆོག་ཁ་ལོ་སྒྱུར། །དཀྱིལ་འཁོར་དག་ནི་བཤད་དུ་གསོལ། །དེ་ནས་སྟོན་པ་རྡོ་རྗེ་འཛིན། །འཇིག་རྟེན་གསུམ་པ་ཁམས་

88-1-105b

གསུམ་པ། །འཇིག་རྟེན་གསུམ་མཆོག་རྡོ་རྗེ་གཙོ། །འཇིག་རྟེན་གསུམ་མཆོག་སྟོན་པ་པོ། །དེ་བཞིན་གཤེགས་པ་ཀུན་གྱི་གནས། །དེ་བཞིན་གཤེགས་པ་ཐམས་ཅད་ཀྱི། །ཐུགས་ཀྱི་དཀྱིལ་འཁོར་
དཀྱིལ་འཁོར་ཚུལ། །དཀྱིལ་འཁོར་ཉམས་དགའ་རབ་ཏུ་བཤད། །དེ་ནས་དེ་ཕྱིར་ཐུགས་དཀྱིལ་འཁོར། །མཆོག་ཐུགས་རྡོ་རྗེ་རབ་འདྲ་བ། །སྐུ་དང་གསུང་དང་ཐུགས་རྣམས་ཀྱི། །དཀྱིལ་འཁོར་ཡང་དག་
རབ་བཤད་བྱ། །ལུས་དང་ངག་སེམས་བསྒོམས་པ་ཡིས། །ཤེས་རབ་ཅན་གྱིས་ཐིག་གདབ་པ། །ཐིག་སྐུད་སར་པ་ལེགས་བཀལ་བ། །ཚད་མ་བཟང་པོ་མཛེས་པ་ཡིས། །ཐུགས་ཀྱི་དཀྱིལ་འཁོར་
དམ་པ་ནི། །ཁྲུ་ནི་བཅུ་གཉིས་ཚད་དུ་བྱ། །ངོས་བཞི་དང་ནི་གྲྭ་བཞི་དང་། །སྒོ་བཞི་བར་ནི་རབ་ཏུ་བརྟག །དེ་ཡི་དབུས་སུ་འཁོར་ལོ་ནི། །རབ་ཏུ་ཟླུམ་པོ་བྲི་བར་བྱ། །ཆོ་ག་མཐོང་བའི་ལས་ཀྱིས་ནི། །དེ་ནས་ཕྱག་རྒྱ་
དགོད་པར་བྱ། །དེ་དབུས་རྡོ་རྗེ་བྲི་བ་ནི། །ཨིན་དྲ་ནཱི་ལའི་ཁ་དོག་འདྲ། །འབར་བ་ཆེན་པོ་རྩེ་ལྔ་པ། །འཇིགས་པ་དག་ཀྱང་རབ་འཇིགས་བྱེད། །ཤར་དུ་འཁོར་ལོ་ཆེན་པོ་ནི། །རྡོ་རྗེ་འབར་བས་རྣམ་པར་
བརྒྱན། །ལྷོ་རུ་རིན་ཆེན་ཆེན་པོ་ནི། །འོད་ཟེར་མང་པོ་རབ་ཏུ་འཁྲིགས། །ནུབ་ཏུ་པད་མ་ཆེན་པོ་ནི། །པད་མ་རཱ་གའི་ཁ་དོག་འདྲ། །བྱང་དུ་རལ་གྲི་ཆེན་པོ་ནི། །འོད་ཟེར་འབར་བ་རབ་འཁྲིགས་བྲི། །དབུས་
སུ་སྤྲིན་ནི་ཞི་བའི་འོད། །སྤྱན་ནི་ཤར་གྱི་གྲྭ་རུ་བྲི། །མཱ་མ་ཀིའི་རིགས་བྱུང་བའི། །རྡོ་རྗེ་དེ་བཞིན་ལྷོ་རུའོ། །པད་མ་ཁ་བྱེ་སྡོང་བུར་བཅས། །ནུབ་ཏུ་ཀུན་དུ་བྲི་བར་བྱ། །བྱང་དུ་ཨུཏ་པལ་མཛེས་པ་ནི། །མཐིང་
ཀ་སྤྲིན་དང་འདྲ་བ་བྲི། །ཐོ་བ་ཀུན་ནས་འོད་མཛེས་འབར། །ཤར་གྱི་སྒོར་ནི་བྲི་བར་བྱ། །རྡོ་རྗེ་འབར་སོགས་འོད་བཟང་བ། །དབྱུག་པ་ལྷོ་རུ་ཀུན་ཏུ་བྲི། །པད་མ་རལ་གྲི་འབར་འོད་བྱེད། །ནུབ་ཏུ་ཀུན་ཏུ་བྲི་བར་བྱ། །

88-1-106a

རྡོ་རྗེ་འཁྱིལ་བ་རྡོ་རྗེ་ཅན། །བྱང་དུ་རྡོ་རྗེ་བྲི་བར་བྱ། །ཐུགས་ཀྱི་དཀྱིལ་འཁོར་དམ་པ་དེ། །ཡོངས་སུ་གསལ་བར་ཤེས་བྱས་ནས། །ལུས་དང་ངག་སེམས་མཆོད་པ་ཡིས། །ནན་ཏན་དུ་ནི་མཆོད་པར་བྱ། །
བཙུན་མོ་མཛེས་ཤིང་མདངས་བཟང་བ། །ལོ་གྲངས་བཅུ་དྲུག་ལ་རྙེད་ནས། །དྲི་དང་མེ་ཏོག་བརྒྱན་བྱས་ཏེ། །དེ་དབུས་སུ་ནི་འདོད་པ་བྱ། །ཡོན་ཏན་སྐེ་རགས་མཱ་མ་ཀཱི། །ཤེས་རབ་ཅན་གྱིས་དེ་བྱིན་བརླབས། །ཞི་བ་སྤྲོ་བྱ་
སངས་རྒྱས་གནས། །ནམ་མཁའི་དབྱིངས་ནི་རབ་ཏུ་བརྒྱན། །བཤང་གཅི་ཁུ་བ་ཁྲག་ལ་སོགས། །ལྷ་རྣམས་ལ་ནི་དབུལ་བར་བྱ། །དེ་ལྟར་བྱས་ན་སངས་རྒྱས་དང་། །བྱང་ཆུབ་སེམས་དཔའ་གྲགས་ཆེན་མཉེས། །
དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས། །དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་དཀྱིལ་འཁོར་གྱི་ལེའུ་སྟེ་བཞི་པའོ།། །། དེ་ནས་
དེ་བཞིན་གཤེགས་པ་ནི། །ཀུན་གྱི་སྐུ་དང་གསུང་ཐུགས་ཀྱི། །རྡོ་རྗེ་འཆང་བའི་རྒྱལ་པོ་ནི། །གནས་ཀྱི་དབང་ཕྱུག་ཀུན་མཆོག་གིས། །སྤྱོད་པ་ཀུན་མཆོག་ཆོས་ཀྱི་དོན། །སྤྱོད་པའི་མཚན་ཉིད་བཀའ་སྩལ་ཏོ། །
རྣམ་པར་མི་རྟོག་དོན་ལས་བྱུང་། །འདོད་ཆགས་ཞེ་སྡང་གཏི་མུག་འཁྲུགས། །ཐེག་པའི་མཆོག་ནི་བླ་ན་མེད། །རབ་མཆོག་དངོས་གྲུབ་སྒྲུབ་པར་བྱེད། །གདོལ་པ་སྨྱིན་མ་མཁན་ལ་སོགས། །གསོད་དོན་དོན་གཉེར་
སེམས་པ་རྣམས། །ཐེག་ཆེན་བླ་ན་མེད་པ་ཡི། །ཐེག་མཆོག་འདི་ལ་འགྲུབ་པར་འགྱུར། །སེམས་ཅན་མཚམས་མེད་ལས་སོགས་པ། །སྡིག་པ་ཆེན་པོ་བྱེད་པ་ཡང་། །དེ་རྣམས་ཀུན་ཀྱང་ཐེག་པ་ཆེ། །མཆོག་གི་
སྒྲུབ་པ་འདིར་འགྲུབ་འགྱུར། །སློབ་དཔོན་སྨོད་པ་པོ་གཞན་དག །བསྒྲུབས་ཀྱང་འགྲུབ་པར་ཡོང་མི་འགྱུར། །སྲོག་གཅོད་པ་ཡི་སེམས་ཅན་གང་། །བརྫུན་དུ་སྨྲ་ལ་དགའ་བ་དང་། །གཞན་གྱི་ནོར་ལ་ཆགས་པ་དང་། །

88-1-106b

རྟག་ཏུ་འདོད་པ་སྤྱོད་དགའ་གང་། །བཤང་གཅི་ཟས་སུ་ཟ་བ་སྟེ། །དེ་རྣམས་སྒྲུབ་པའི་སྐལ་ལྡན་འགྱུར། །མ་དང་སྲིང་མོ་བུ་མོ་ལ། །སྒྲུབ་པོ་གང་གིས་འདོད་བྱས་ན། །ཐེག་ཆེན་མཆོག་གི་ཆོས་སུ་ནི། །དངོས་གྲུབ་རྒྱ་ཆེན་དེས་
འཐོབ་པོ། །སངས་རྒྱས་གཙོ་བོའི་ཡུམ་དག་ལ། །མཉེས་པར་བྱས་ཀྱང་མི་གོས་ཏེ། །དེ་ནི་བློ་ཅན་རྣམ་མི་ཏོག །སངས་རྒྱས་ཉིད་དུ་འགྲུབ་པར་འགྱུར། །དེ་ནས་སྒྲིབ་པ་ཐམས་ཅད་རྣམ་པར་སེལ་བ་ལ་སོགས་པ། 
བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ངོ་མཚར་དུ་གྱུར། རྨད་དུ་བྱུང་བར་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཅིའི་སླད་དུ། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་
ནང་དུ་འདི་ལྟ་བུའི་ཚིག་ངན་པ་གསུང་ཞེས་གསོལ་ཏོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་སྒྲིབ་པ་ཐམས་ཅད་རྣམ་པར་སེལ་བ་ལ་སོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་
ཚིག་གསན་ནས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་རྣམས་མཐོང་དེ་སྐད་མ་སྨྲ་ཅིག །ཆོས་ཉིད་དག་འདི་སངས་རྒྱས་ནི། །སྙིང་པོ་ཡེ་ཤེས་ཅན་རྣམས་ཀྱིས། །སྙིང་པོའི་
ཆོས་ཀྱི་དོན་བྱུང་བ། །འདི་དག་བྱང་ཆུབ་སྤྱོད་པའི་གནས། །དེ་ནས་ཡང་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བའི་སངས་རྒྱས་ཀྱི་ཞིང་རི་རབ་ལ་སོགས་པའི་རྡུལ་ཕྲ་མོ་སྙེད་ཀྱི་བྱང་ཆུབ་སེམས་
དཔའ་རྣམས་འཇིགས་ཤིང་སྐྲག་ལ་བརྒྱལ་བར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བྱང་ཆུབ་སེམས་དཔའ་དེ་དག་བརྒྱལ་བར་གྱུར་པ་གཟིགས་ནས། བཅོམ་ལྡན་འདས་དེ་
བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བདག་པོ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་སླང་དུ་གསོལ། དེ་ནས་

88-1-107a

བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་དེ་བཞིན་གཤེགས་པ་ནམ་མཁའ་དང་མཉམ་པ་ཉིད་གཉིས་སུ་མེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །
སྙོམས་པར་ཞུགས་མ་ཐག་ཏུ་བཅོམ་ལྡན་འདས་སྐུ་གསུང་ཐུགས་རྡོ་རྗེའི་བདག་པོའི་འོད་ཀྱིས་རེག་པ་ཙམ་གྱིས། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་རང་རང་གི་སྟན་ལ་གནས་པར་གྱུར་ཏོ། །དེ་
ནས་དེ་བཞིན་གཤེགས་པ་ཐམས་ཅད་ངོ་མཚར་དུ་གྱུར་རྨད་དུ་གྱུར། དགྱེས་པས་ཁྱབ་པར་གྱུར་ནས་ཆོས་ཀྱི་དབྱིངས་འདི་སྐད་ཅེས་གསུངས་སོ། །ཨེ་མའོ་ཆོས་ཨེ་མའོ་ཆོས། །ཨེ་མའོ་ཆོས་ཀྱི་དོན་འབྱུང་བ། །ཆོས་
དོན་དག་པ་བདག་མེད་པ། །རྡོ་རྗེ་རྒྱལ་པོ་ཕྱག་འཚལ་འདུད། །སྐུ་དང་གསུང་ཐུགས་རབ་ཏུ་དག །ནམ་མཁའ་དང་ནི་མཉམ་ཉིད་གནས། །རྣམ་པར་མི་འགྱུར་སྣང་བ་མེད། །རྡོ་རྗེའི་སྐུ་ལ་ཕྱག་འཚལ་འདུད། །
ཐུགས་ནི་དེ་བཞིན་གཤེགས་པའི་གཙོ། །དུས་གསུམ་དག་གི་ལམ་དུ་འབྱུང་། །ནམ་མཁའ་ཆེན་པོར་ཁམས་གྱུར་པ། །ནམ་མཁའི་ལམ་ལ་ཕྱག་འཚལ་འདུད། །ནམ་མཁའི་སྐུ་ལས་ཡང་དག་བྱུང་། །ནམ་མཁའི་
ལམ་ལ་གནས་པ་པོ། །ནམ་མཁའ་ཐུགས་ཏེ་ཆོས་ཀྱི་མཆོག །སྤྱོད་པའི་གནས་ཁྱོད་ཕྱག་འཚལ་ལོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས་
ཀུན་དུ་སྤྱོད་པའི་མཆོག་གི་ལེའུ་སྟེ་ལྔ་པའོ།། །། དེ་ནས་དེ་བཞིན་གཤེགས་པ་རྡོ་རྗེ་མི་བསྐྱོད་པས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་གསང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་ཐུགས་བྱིན་གྱིས་རློབ་པའི་སྔགས་འདི་གསུངས་སོ། །ཨོཾ་སརྦ་ཏ་ཐཱ་ག་ཏ་ཙིཏྟ། བཛྲ་སྭ་བྷཱ་བ་ཨཱཏྨ་ཀོ྅་ཧྃ། དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་རྣམ་པར་སྣང་མཛད་ཀྱིས་རྡུལ་དང་

88-1-107b

བྲལ་བའི་རྡོ་རྗེའི་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་སྐུ་བྱིན་གྱིས་རློབ་པའི་སྔགས་འདི་གསུངས་སོ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་བ་ཨཱཏྨ་ཀོ྅་ཧྃ། དེ་ནས་བཅོམ་ལྡན་འདས་དེ་བཞིན་
གཤེགས་པ་རྡོ་རྗེ་ཚེ་དཔག་ཏུ་མེད་པས་མཉམ་པ་ཉིད་མི་གཉིས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་གསུང་བྱིན་གྱིས་རློབ་པའི་སྔགས་འདི་གསུངས་སོ། །ཨོཾ་སརྦ་ཏ་ཐཱ་ག་ཏ་ཝཱ་ཀ་བཛྲ་སྭ་
བྷཱ་བ་ཨཱཏྨ་ཀོ྅་ཧྃ། །རྡོ་རྗེ་གསུམ་པ་དེ་བཞིན་གཤེགས་པའི་གསང་། །གནས་དང་གནས་ནི་རྣམ་པར་བསྒོམ་པ་སྟེ། །དེ་དག་ཉིད་མཆོག་རབ་ཀྱི་སྔགས་ཀྱི་ནི། །མཚན་ཉིད་མཚན་མ་བསྒྲུབ་པ་ཉིད་དུ་བྱ། །དེ་ནས་བཅོམ་
ལྡན་འདས་དེ་བཞིན་གཤེགས་པ་རྡོ་རྗེ་རིན་ཆེན་ཏོག་གིས་ཡེ་ཤེས་སྒྲོན་མ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་སྔགས་འདི་གསུངས་སོ། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་བ་ཨཱཏྨ་
ཀོ྅་ཧྃ། དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་དོན་ཡོད་གྲུབ་པས་རྡོ་རྗེ་དོན་ཡོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་སྔགས་འདི་གསུངས་སོ། །ཨོཾ་སརྦ་ཏ་ཐཱ་ག་ཏ་པཱུ་ཛཱ་
བཛྲ་སྭ་བྷཱ་བ་ཨཱཏྨ་ཀོ྅་ཧྃ། རྟག་ཏུ་འདོད་པའི་ཡོན་ཏན་ལྔས། །སངས་རྒྱས་ཚུལ་བཞིན་མཆོད་པར་བྱ། །མཆོད་པ་རྣམ་པ་ལྔ་རྣམས་ཀྱིས། །མྱུར་དུ་སངས་རྒྱས་ཉིད་ཐོབ་འགྱུར། །ཞེས་བཅོམ་ལྡན་འདས་དེ་བཞིན་
གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བདག་པོ་རྡོ་རྗེ་འཆང་ཆེན་པོས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བདག་པོ་རྡོ་རྗེ་འཆང་ཆེན་
པོས་དེ་བཞིན་གཤེགས་པ་ཐམས་ཅད་ཀྱི་སྔགས་ཀྱི་གསང་ཆེན་འདི་གསུངས་སོ། །སྔགས་དམིགས་པ་ཡི་ལུས་ཀྱིས་ནི། །ངག་དང་ཡིད་ལ་བསྐུལ་བྱས་པས། །བསྒྲུབ་བྱ་རབ་མཆོག་དངོས་གྲུབ་དང་། །

88-1-108a

ཡིད་ནི་ཡང་དག་དགའ་མཛེས་པ། །སེམས་ཀྱི་དམིགས་པ་བདག་མེད་པ། །ངག་དང་ལུས་ཀྱང་རྣམ་པར་བསྒོམ། །རྣམ་གསུམ་སྦྱོར་བ་ནམ་མཁའ་དང་། །མཉམ་ཉིད་གནས་ནི་གྲུབ་པར་བྱ། །ལུས་དང་ངག་
དང་སེམས་དམིགས་པའི། །ངོ་བོ་ཉིད་ནི་དམིགས་སུ་མེད། །སྔགས་ཀྱི་སྐུ་ཡི་སྦྱོར་བ་ཡིས། །བྱང་ཆུབ་མེད་ཅིང་སྒོམ་པའང་མེད། །སྐུ་གསུང་ཐུགས་ཀྱི་མཚན་ཉིད་འདི། །རྣམ་པར་དཔྱད་ནས་བསྡུ་བ་ཡིས། །བྱང་ཆུབ་སྦྱོར་བ་
ཏིང་ངེ་འཛིན། །སྔགས་ཀྱི་བརྟགས་པ་བསྒོམ་པར་བྱ། །དེ་ནས་དཔལ་ལྡན་རྡོ་རྗེ་འཛིན། །དེ་བཞིན་གཤེགས་པ་ཀུན་གྱིས་མཆོད། །སངས་རྒྱས་ཀུན་མཆོག་ཀུན་མཁྱེན་གྱིས། །སྒོམ་པའི་མཆོག་ནི་
བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །ཟླ་བའི་དཀྱིལ་འཁོར་བསྒོམ་པར་བྱ། །སངས་རྒྱས་གཟུགས་ནི་རབ་བསྒོམས་ནས། །ཕྲ་མོའི་སྦྱོར་བ་ཀུན་ཏུ་བརྩམ། །སྣ་ཡི་རྩེ་མོར་ཡུངས་ཀར་
བསམ། །ཡུངས་དཀར་རྒྱུ་དང་མི་རྒྱུ་བ། །ཡེ་ཤེས་གནས་ནི་ཉམས་དགའ་བ། །གསང་བའི་ཡེ་ཤེས་བརྟགས་པ་བསྒོམ། །ནམ་མཁའི་དབྱིངས་ཀྱི་དབུས་གནས་པར། །ཉི་མའི་དཀྱིལ་འཁོར་བསྒོམ་པར་བྱ། །
སངས་རྒྱས་སྐུ་ཡི་གནས་བསྒོམ་ཏེ། །དེ་ཡི་སྟེང་དུ་གནས་དགོད་དོ། །ཧཱུྃ་ནམ་མཁའི་དབྱིངས་ཀྱི་དབུས་གནས་པར། །གསལ་བའི་དཀྱིལ་འཁོར་བསྒོམ་པར་བྱ། །སྤྱན་གྱི་ཚུལ་གྱི་སྦྱོར་བ་ལ། །དེ་ནས་པད་མ་རྡོ་རྗེ་སྒོམ། །
ནམ་མཁའི་དབྱིངས་ཀྱི་དབུས་གནས་པར། །རིན་ཆེན་དཀྱིལ་འཁོར་བསྒོམ་པར་བྱ། །དང་པོའི་སྦྱོར་བ་ནན་ཏན་གྱིས། །དེ་ཡི་སྟེང་དུ་ཡོངས་སུ་བསྒོམ། །ནམ་མཁའི་དབྱིངས་ཀྱི་དབུས་གནས་པར། །འོད་ཀྱི་དཀྱིལ་འཁོར་
བསྒོམ་པར་བྱ། །སངས་རྒྱས་ཚུལ་ནི་ཞི་བ་སྤྲོ། །འཁོར་དག་ཁྱད་པར་དག་ཏུ་སྤྲོ། །ཨུཏྤལ་མཐིང་ཀའི་མདོག་འདྲ་བ། །རྩེ་མོ་ལྔ་པ་ཁྱད་པར་དུ། །ནས་ཀྱི་འབྲུ་ཚད་ནན་ཏན་གྱིས། །སྣ་ཡི་རྩེ་མོར་རྣམ་པར་

88-1-108b

བསམ། །ཙ་ན་ཀ་ཡི་འབྲུ་ཚད་ཀྱི། །འདབ་མ་བརྒྱད་པ་གེ་སར་བཅས། །སྣ་ཡི་རྩེ་མོར་འདི་ཤེས་ཏེ། །བྱང་ཆུབ་གཞོལ་བས་བསྒོམ་པར་བྱ། །འཁོར་ལོ་ལ་སོགས་ཁྱད་པར་དུ། །བསྒོམ་པ་དེར་ནི་བརྟག་པར་བྱ། །དངོས་གྲུབ་
ཐམས་ཅད་ཡོན་ཏན་གནས། །ཉམས་དགའ་བྱང་ཆུབ་གནས་འགྲུབ་འགྱུར། །སངས་རྒྱས་བྱང་ཆུབ་གནས་རྣམས་ནི། །བསྡུ་བས་དེར་ནི་སྤྲོ་བར་བྱ། །སྐུ་གསུང་ཐུགས་ཀྱི་མཚན་མ་ཡི། །ཆོས་ཀྱི་གནས་ནི་རབ་ཏུ་དབྱུང་། །
དེ་ནས་དཔལ་ལྡན་རྡོ་རྗེ་འཆང་། །དེ་ཉིད་དོན་ཀུན་སྟོན་པ་པོས། །སྤྱོད་པ་ཀུན་མཆོག་ལེགས་དག་པ། །གསང་བའི་དམ་པ་བཀའ་སྩལ་ཏོ། །གཟུགས་དང་སྒྲ་དང་རོ་ལྡན་པ། །ཤེས་རབ་ཅན་གྱིས་ཟླ་དྲུག་བསྒོམ། །གསང་བ་
འི་དེ་ཉིད་མཆོད་ཆེན་ནི། །ལེགས་མཆོད་ནས་ཀྱང་བསྒོམ་པར་བྱ། །ཟས་སུ་བཤང་གཅི་བྱ་བའི་ཕྱིར། །དངོས་གྲུབ་འབྲས་བུ་འདོད་པས་བྱ། །བླ་མེད་དེ་ཉིད་འགྲུབ་པ་ནི། །སངས་རྒྱས་བྱང་ཆུབ་སྐྱོན་མེད་པའོ། །ཤ་
ཡང་བཟའ་བར་བྱ་བའི་ཕྱིར། །ཤ་ཆེན་པོ་ནི་རབ་ཏུ་བརྟག །གསང་བའི་སྐུ་དང་གསུང་དང་ཐུགས། །དངོས་གྲུབ་ཐམས་ཅད་འགྲུབ་པར་འགྱུར། །གླང་པོའི་ཤ་དང་རྟ་ཡི་ཤ ། དེ་བཞིན་དམ་པ་ཁྱི་ཡི་ཤ ། ཟས་ཀྱི་ཕྱིར་
ནི་བཟའ་བར་བྱ། །གཞན་ཟས་བཟའ་བར་ཡང་མི་བྱ། །སངས་རྒྱས་རྣམས་ནི་མཉེས་པར་འགྱུར། །བྱང་ཆུབ་སེམས་དཔའ་བློ་ཅན་ཡང་། །འདི་ལྟ་བུ་ཡི་སྦྱོར་བ་ཡིས། །མྱུར་དུ་སངས་རྒྱས་ཉིད་འཐོབ་འགྱུར། །འདོད་
ཁམས་དབང་ཕྱུག་འཇིག་རྟེན་དུ། །གོ་འཕང་ལས་ནི་བྱེད་པར་འགྱུར། །སྟོབས་ལྡན་གཙོ་བོ་གཟི་བརྗིད་ཅན། །མདངས་བཟང་མཐོང་ན་ཡིད་དུ་འོང་། །མཐོང་བ་ཙམ་གྱིས་བསྐུལ་མེད་པར། །འཇིག་རྟེན་འདི་དག་དབང་བྱེད་འགྱུར། །འདི་ནི་
ཐམས་ཅད་སངས་རྒྱས་ཀྱི། །གསང་བ་བྱང་ཆུབ་དམ་པ་སྟེ། །ཡང་དག་སྔགས་ཀྱི་གསང་བ་འདི། །ལུས་ངག་སེམས་ལས་འདའ་བའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས་སྐུ་དང་

88-1-109a

གསུང་དང་ཐུགས་བྱིན་གྱིས་རློབ་པའི་ལེའུ་སྟེ་དྲུག་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བདག་པོས་དམ་ཚིག་ཆེན་པོའི་དེ་ཁོ་ན་ཉིད་སྔགས་ཀྱི་སྤྱོད་
པ་མཆོག་རྫོགས་པར་བྱང་ཆུབ་པའི་ལེའུ་འདི་གསུངས་སོ། །འདོད་པ་ཐམས་ཅད་ལོངས་སྤྱོད་པ། །བསྟེན་པས་ཇི་ལྟར་འདོད་པ་ལས། །འདི་ལྟ་བུ་ཡི་སྦྱོར་བ་ཡིས། །ངེས་པར་སངས་རྒྱས་མྱུར་ཐོབ་འགྱུར། །འདོད་པ་ཐམས་ཅད་ལོངས་
སྤྱོད་པ། །ཇི་ལྟར་འདོད་པ་བསྟེན་བྱ་ཞིང་། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །དཀའ་ཐུབ་ངེས་པ་མི་བཟད་པས། །བསྟེན་པས་འགྲུབ་པར་མི་འགྱུར་གྱི། །འདོད་པ་ཐམས་ཅད་ལོངས་སྤྱོད་པས། །བསྟེན་
ན་མྱུར་དུ་འགྲུབ་པར་འགྱུར། །སློངས་མོ་ཟ་ཞིང་མི་བཟླས་ཏེ། །བསླངས་ལ་དགའ་བར་ཡང་མི་བྱ། །འདོད་པ་ཀུན་ལ་ལོངས་སྤྱོད་ཅིང་། །སྔགས་ཀྱི་ཡན་ལག་དབྱེར་མེད་བཟླས། །ལུས་དང་ངག་དང་སེམས་རྣམས་ནི། །བདེར་གནས་ཐོབ་
ན་བྱང་ཆུབ་འཐོབ། །གཞན་དུ་དུས་མིན་འཆི་བ་དང་། །དམྱལ་བར་ངེས་པར་སྲེག་པར་འགྱུར། །སངས་རྒྱས་བྱང་ཆུབ་སེམས་དཔའ་ནི། །སྔགས་ཀྱི་སྤྱོད་པ་མཆོག་སྤྱོད་པས། །ཆོས་དང་མི་འགྱུར་མཆོག་བརྙེས་རྣམས། །འདོད་
པ་ཐམས་ཅད་བསྟན་པས་སོ། །ཆགས་ཅན་ཡེ་ཤེས་འདོད་པ་ཡིས། །འདོད་ཡོན་ལྔ་རྣམས་རྟག་ཏུ་བརྟེན། །བྱང་ཆུབ་སེམས་དཔའ་མཉེས་པར་བྱ། །བྱང་ཆུབ་ཉི་མ་ཆགས་པར་བྱ། །གཟུགས་ལ་རྣམ་གསུམ་ཤེས་བྱས་ནས། །
མཆོད་པའི་བདག་ཉིད་ཅན་མཆོད་བྱ། །དེ་ཉིད་བཅོམ་ལྡན་སྣ་ཚོགས་པ། །སངས་རྒྱས་རྣམ་པར་སྣང་མཛད་གཞི། །སྒྲ་ལ་རྣམ་གསུམ་ཤེས་བྱས་ནས། །ལྷ་རྣམས་ལ་ནི་དབུལ་བར་བྱ། །དེ་ཉིད་བཅོམ་ལྡན་སྣ་ཚོགས་པ། །སངས་
རྒྱས་རིན་ཆེན་འབྱུང་གནས་གཙོ། །དྲི་ལ་རྣམ་གསུམ་ཤེས་བྱས་ནས། །སངས་རྒྱས་སོགས་ལ་དབུལ་བར་བྱ། །དེ་ཉིད་བཅོམ་ལྡན་སྣ་ཚོགས་པ། །འདོད་ཆགས་ཆོས་ཀྱི་འབྱུང་གནས་གཙོ། །རོ་ལ་རྣམ་གསུམ་ཤེས་བྱས་ནས། །

88-1-109b

ལྷ་རྣམས་ལ་ནི་དབུལ་བར་བྱ། །དེ་ཉིད་སངས་རྒྱས་སྣ་ཚོགས་པ། །སངས་རྒྱས་དོན་ཡོད་རྡོ་རྗེ་འཛིན། །རེག་བྱ་རྣམ་གསུམ་ཤེས་བྱས་ནས། །རང་གི་རིགས་ལ་དབུལ་བར་བྱ། །དེ་ཉིད་བཅོམ་ལྡན་རྡོ་རྗེ་ཅན། །མི་བསྐྱོད་པ་ཡི་
ཚུལ་བརྙེས་རྣམས། །གཟུགས་སྒྲ་དྲི་ལ་སོགས་པ་ལ། །རྟག་ཏུ་སེམས་ནི་སྦྱར་བར་བྱ། །འདི་དེ་སངས་རྒྱས་ཐམས་ཅད་ཀྱི། །གསང་བ་སྙིང་པོ་བཏུས་པའོ། །གཟུགས་སྒྲ་དྲི་སོགས་སྔགས་པ་ཡིས། །ལྷ་རྣམས་ཉིད་དུ་
རྟག་ཏུ་བསྒོམ། །ཡང་ན་དེ་ལ་རིགས་ཀྱི་ནི། །དབྱེ་བ་རྣམ་པར་བསྒོམ་པས་བསྒོམ། །སངས་རྒྱས་རྗེས་སུ་དྲན་པར་སྦྱོར། །ཆོས་ནི་རྗེས་སུ་དྲན་སྒོམ་པ། །ལུས་དང་ངག་དང་སེམས་ནི་བསྒོམ། །རྡོ་རྗེ་རྗེས་སུ་དྲན་སྒོམ་
པ། །རིགས་ནི་རྗེས་དྲན་སྦྱོར་བ་ལས། །ཁྲོ་བོ་རྗེས་སུ་དྲན་སྒོམ་པ། །དམ་ཚིག་རྗེས་དྲན་སྦྱོར་བ་ལས། །བསྒོམས་ན་བྱང་ཆུབ་ཐོབ་པར་འགྱུར། །བུད་མེད་གཟུགས་ལྡན་མདངས་བཟང་བ། །
ལོ་གྲངས་བཅུ་དྲུག་ལོན་རྙེད་ནས། །བྱིན་གྱིས་རློབ་པའི་གནས་གསུམ་གྱིས། །དབེན་པར་མཆོད་པ་རབ་ཏུ་བཙམ། །དེ་བཞིན་གཤེགས་པའི་བཙུན་མོ་ཆེ། །སྤྱན་ལ་སོགས་པ་བསྒོམ་པར་བྱ། །དབང་པོ་
གཉིས་ནི་མཉམ་སྦྱར་བས། །སངས་རྒྱས་དངོས་གྲུབ་ཐོབ་པར་འགྱུར། །ཡི་གེ་ཧཱུྃ་དང་ཨོཾ་དག་དང་། །ཕཊ་ཀྱང་རྣམ་པར་བརྟག་པར་བྱ། །འོད་ཟེར་སྣ་ལྔས་ཁྱབ་པ་ཡི། །རྡོ་རྗེ་པད་མོ་བསྒོམ་པར་བྱ། །དེ་ནི་འབར་བཅས་
ཟླ་འོད་བཞིན། །ཡིད་དུ་འོང་བ་བསྒོམ་པར་བྱ། །སངས་རྒྱས་རྗེས་དྲན་སྦྱོར་ལ་སོགས། །བྱང་ཆུབ་འདོད་པས་བསྒོམ་པར་བྱ། །དེ་ལ་སངས་རྒྱས་རྗེས་སུ་དྲན་པ་ཇི་ལྟར་བསྒོམ་ཞེ་ན། །བྷ་གར་ལིང་ག་རབ་བཞག་ནས། །
སངས་རྒྱས་གཟུགས་ནི་བསྒོམ་པར་བྱ། །བ་སྤུའི་བུ་ག་རྩེ་བར་ནས། །མཁས་པས་སངས་རྒྱས་སྤྲིན་རྣམས་སྤྲོ། །དེ་ལ་ཆོས་རྗེས་སུ་དྲན་པ་ཇི་ལྟར་བསྒོམ་ཞེ་ན། བྷ་གར་ལིང་ག་རབ་བཞག་ནས། །རྡོ་རྗེ་ཆོས་ནི་རབ་

88-1-110a

བསྒོམ་བྱ། །བ་སྤུའི་བུ་ག་རྩེ་བར་ནས། །མཁས་པས་ཆོས་ཀྱི་སྤྲིན་རྣམས་སྤྲོ། །དེ་ལ་རྡོ་རྗེ་རྗེས་སུ་དྲན་པ་ཇི་ལྟར་བསྒོམ་ཞེ་ན། བྷ་གར་ལིང་ག་རབ་བཞག་ནས། །རྡོ་རྗེ་སེམས་དཔའ་རྣམ་པར་བསྒོམ། །
བ་སྤུའི་བུ་ག་རྩེ་བར་ནས། །རྡོ་རྗེ་སྤྲིན་རྣམས་སྤྲོ་བར་བྱ། །དེ་ལ་རིགས་རྗེས་སུ་དྲན་པ་ཇི་ལྟར་བསྒོམ་ཞེ་ན། བྷ་གར་ལིང་ག་རབ་བཞག་ནས། །སངས་རྒྱས་གཟུགས་ནི་རབ་ཏུ་བསྒོམ། །བ་སྤུའི་བུ་གའི་རྩེ་བར་
ནས། །མཁས་པས་རིགས་ཀྱི་སྤྲིན་རྣམས་སྤྲོ། །དེ་ལ་ཁྲོ་བོ་རྗེས་སུ་དྲན་པ་ཇི་ལྟར་བསྒོམ་ཞེ་ན། བྷ་གར་ལིང་ག་རབ་བཞག་ནས། །ཁྲོ་བོའི་དབང་པོ་རབ་ཏུ་བསྒོམ། །བ་སྤུའི་བུ་ག་རྩེ་བར་ནས། །མཁས་པས་
ཁྲོ་བོའི་སྤྲིན་རྣམས་སྤྲོ། །དེ་ལ་དམ་ཚིག་རྗེས་སུ་དྲན་པ་ཇི་ལྟར་བསྒོམ་ཞེ་ན། རང་གི་རྡོ་རྗེ་པད་མར་ལྡན། །དབང་པོ་གཉིས་ནི་མཉམ་སྦྱར་ཏེ། །རང་གི་ཁུ་བའི་ཐིགས་པ་ཡིས། །སངས་རྒྱས་རྡོ་རྗེ་སེམས་དཔའ་
མཆོད། །དེ་ལ་དཀྱིལ་འཁོར་རྗེས་སུ་དྲན་པ་ཇི་ལྟར་བསྒོམ་ཞེ་ན། དབང་པོ་གཉིས་ནི་མཉམ་གཞག་སྟེ། །མཁས་པས་རང་གི་ཁུ་བ་དག །རྣལ་འབྱོར་པ་ནི་ཆེན་པོས་དབྱུང་། །དཀྱིལ་འཁོར་དཀྱིལ་འཁོར་
ཚུལ་དུ་བྱ། །དེ་ལ་སྐུ་རྗེས་སུ་དྲན་པ་ཇི་ལྟར་བསྒོམ་ཞེ་ན། སངས་རྒྱས་ཀུན་གྱི་སྐུ་གང་ཞིག །ཕུང་པོ་ལྔ་ཡིས་རབ་ཏུ་རྒྱས། །སངས་རྒྱས་སྐུ་ཡི་ངོ་བོ་ཡིས། །བདག་ཀྱང་དེ་དང་འདྲར་གྱུར་ཅིག །དེ་ལ་
གསུང་རྗེས་སུ་དྲན་པ་ཇི་ལྟར་བསྒོམ་ཞེ་ན། རྡོ་རྗེ་ཆོས་ཀྱི་གསུང་གང་ཞིག །ངེས་པའི་ཚིག་ནི་ཕུན་སུམ་ཚོགས། །བདག་གི་ཚིག་ཀྱང་དེ་འདྲ་བར། །ཆོས་འཛིན་པ་དང་འདྲར་གྱུར་ཅིག །དེ་ལ་ཐུགས་
རྗེས་སུ་དྲན་པ་ཇི་ལྟར་བསྒོམ་ཞེ་ན། ཀུན་ཏུ་བཟང་པོའི་ཐུགས་གང་ཞིག །གསང་བའི་བདག་པོ་བློ་ལྡན་པ། །བདག་གི་སེམས་ཀྱང་དེ་འདྲ་བར། །རྡོ་རྗེ་འཛིན་དང་འདྲར་གྱུར་ཅིག །དེ་ལ་སེམས་ཅན་

88-1-110b

རྗེས་སུ་དྲན་པ་ཇི་ལྟར་བསྒོམ་ཞེ་ན། སེམས་ཅན་ཀུན་གྱི་སེམས་གང་ཡིན། །སྐུ་དང་གསུང་དང་ཐུགས་ཀྱི་མཚན། །བདག་གི་སེམས་ཀྱང་དེ་འདྲ་ཞིང་། །མཁའ་དང་མཚུངས་པར་དཔའ་བོ་རྣམས། །དེ་ལ་སྔགས་
ཀྱི་གཟུགས་དང་སྐུ་དང་གསུང་དང་ཐུགས་ཐམས་ཅད་རྗེས་སུ་དྲན་པ་ཇི་ལྟར་བསྒོམ་ཞེ་ན། སྔགས་ཀྱི་རྡོ་རྗེའི་སྐུ་གང་ཡིན། །གསུང་གི་སྐུ་ནི་རྣམ་བསྒོམ་པ། །བདག་ཀྱང་དེ་དང་འདྲ་བའི་སྐུ། །རྟག་ཏུ་སྔགས་འཛིན་
པ་དང་མཉམ། །དེ་ལ་དམ་ཚིག་རྗེས་སུ་དྲན་པ་ཇི་ལྟར་བསྒོམ་ཞེ་ན། དམ་ཚིག་ཁུ་ཆུ་ཆོ་ག་བཞིན། །འབྲས་བུ་འདོད་པས་བཏུང་བྱ་ཞིང་། །དེ་བཞིན་གཤེགས་པའི་ཚོགས་གསད་བྱ། །དངོས་གྲུབ་རབ་
མཆོག་ཐོབ་པར་འགྱུར། །དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་དམ་ཚིག་རྗེས་སུ་དྲན་པ་ཇི་ལྟར་བསྒོམ་ཞེ་ན། ཐམས་ཅད་རང་བཞིན་འོད་གསལ་བ། །སྐྱེ་བ་མེད་ཅིང་ཟག་པ་མེད། །བྱང་ཆུབ་མེད་ཅིང་
མངོན་རྟོགས་མེད། །ཁམས་ཀྱང་མེད་ཅིང་འབྱུང་བ་མེད། །དེ་ལ་མ་སྐྱེས་པ་རྗེས་སུ་དྲན་པ་ཇི་ལྟར་བསྒོམ་ཞེ་ན། རང་བཞིན་འོད་གསལ་དེ་ནས་ནི། །ནམ་མཁའ་མཚན་མེད་མི་འགྱུར་དེས། །གཉིས་མེད་
གཉིས་སུ་མེད་མིན་ཞི། །ཤིན་ཏུ་དྲི་མེད་ནམ་མཁའ་བཞིན། །དེ་ལ་ཞེ་སྡང་གི་རིགས་ཀྱི་མཆོད་པ་རྗེས་སུ་དྲན་པ་ཇི་ལྟར་བསྒོམ་ཞེ་ན། བུད་མེད་སེམས་ནི་རབ་བརྟན་པ། །ལོ་གྲངས་བཅུ་གཉིས་ལོན་རྙེད་
ནས། །རིགས་ཀྱི་སྦྱོར་བའི་རབ་དབྱེ་བས། །རང་གི་ཁུ་བས་མཆོད་པར་བྱ། །འདིས་ནི་དེ་བཞིན་གཤེགས་པའི་སྐུ། །རྡོ་རྗེ་འཛིན་པའི་ཐུགས་དག་དང་། །ཆོས་འཛིན་མཆོག་གི་གསུང་དག་ནི། །ཚེ་འདི་ཉིད་ལ་
ཐོབ་པར་འགྱུར། །སྐུ་དང་གསུང་ཐུགས་ཡང་དག་གྲུབ། །དམན་སྐྱེས་གང་གཞན་བཤད་པ་རྣམས། །རྡོ་རྗེ་མི་ཕྱེད་གསུམ་བསྒོམས་པས། །བཟླས་པས་དེ་ལ་འགྲུབ་པར་འགྱུར། །དེ་བཞིན་གཤེགས་པ་

88-1-111a

ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས་སྔགས་ཀྱི་སྤྱོད་པ་མཆོག་གི་ལེའུ་སྟེ་བདུན་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་རིན་ཆེན་
རྟོག་གིས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་དམ་པའི་དབང་ཕྱུག་རྡོ་རྗེ་འཆང་ཆེན་པོ་ལ་བསྟོད་པའི་རྒྱལ་པོ་འདིས་གསོལ་བ་བཏབ་པོ། །རྡོ་རྗེ་རྒྱལ་པོ་ཐེག་པ་ཆེ། །ནམ་མཁའི་སྤྱོད་པས་རྣམ་
སྦྱོང་བ། །ཀུན་དུ་བཟང་པོའི་སྤྱོད་པ་མཆོག །རྒྱལ་མཆོག་མཆོད་པ་བཤད་དུ་གསོལ། །འདོད་ཆགས་ཞེ་སྡང་གཏི་མུག་ཆེ། །རྡོ་རྗེ་ཐེག་པ་རབ་སྟོན་པ། །ནམ་མཁའི་དབྱིངས་དང་མཚུངས་པའི་མཆོག །རྒྱལ་
གཞི་མཆོད་པ་བཤད་དུ་གསོལ། །བར་པའི་ལམ་ནི་རབ་སྟོན་པ། །ཐེག་པ་གསུམ་གྱི་ལམ་འཇུག་མཛད། །སངས་རྒྱས་སྐལ་མཆོག་དག་པའི་བདག །མི་མཆོག་མཆོད་པ་བཤད་དུ་གསོལ། །བྱང་ཆུབ་སེམས་ནི་རྒྱས་
པའི་སྤྱན། །ཆོས་ཀྱི་འཁོར་ལོ་རབ་སྐོར་བ། །སྐུ་དང་གསུང་ཐུགས་ཤིན་དུ་དག །རྡོ་རྗེ་ཐེག་པ་ཁྱོད་ཕྱག་འཚལ། །དེ་ནས་རྒྱལ་པོ་རྡོ་རྗེ་འཛིན། །ཐམས་ཅད་ནམ་མཁའ་མི་འགྱུར་ཆེ། །ཐམས་ཅད་དབང་བསྐུར་ཀུན་གྱི་དོན། །ཀུན་
དབང་རྡོ་རྗེ་རིན་ཆེན་འཛིན། །དེ་བཞིན་གཤེགས་པའི་མཆོད་པའི་མཆོག །རྡོ་རྗེ་གསུམ་ནི་མི་ཕྱེད་གནས། །སྐུ་དང་གསུང་དང་ཐུགས་སྐལ་མཆོག །རྒྱལ་བ་འབྱུང་བར་འགྱུར་བ་བཤད། །ན་ཆུང་ཡངས་པའི་མིག་ཅན་ནི། །
གཟུགས་དང་ལང་ཚོས་བརྒྱན་རྙེད་ནས། །ལོ་གྲངས་ཉི་ཤུ་ལྔ་ལོན་གཟུང་། །བྱོལ་སོང་ལས་ཀྱང་རབ་ཏུ་བརྟག །ས་ཕྱོགས་གཙང་ཞིང་རྣམ་པར་དབེན་པ་འམ། །རྒྱལ་བ་ཉིད་སྐྱེས་ཞི་བ་ཞི་བའི་གནས། །བཤང་
གཅི་ཆུ་ལ་སོགས་པས་བྱུག་པ་ཡང་། །རྒྱལ་བ་མཆོད་ཕྱིར་རྟག་པར་རབ་ཏུ་བྱ། །ནུ་མའི་དབུས་གང་སྤྱི་གཙུག་མཐའ་དབུས་སུ། །ཆོ་ག་ཤེས་པས་རྐང་པའི་བར་དུ་ཡང་། །ལྟེ་བ་རོ་སྨད་གསང་བ་རྒྱལ་བའི་སྲས། །

88-1-111b

རིགས་ལྔ་རྣམས་ནི་དགོད་པར་རབ་ཏུ་བྱ། །ནམ་མཁའི་དབྱིངས་ཀྱི་དབུས་གནས་པར། །ཡེ་ཤེས་རྒྱ་མཚོ་བསྒོམ་པར་བྱ། །བདག་ཉིད་ཟླ་བའི་དབུས་གནས་བསྒོམ། །མཁས་པས་ཞི་བ་རྡོ་རྗེ་འཛིན། །
སྙིང་གར་གང་ཞིག་འདོད་པ་ནི། །བསྡུ་བ་དག་ཀྱང་རབ་ཏུ་བྱ། །མཆོད་རྟེན་རིན་ཆེན་བཞིའི་རང་བཞིན། །འོད་ཟེར་ཕྲེང་བས་རྣམ་བརྒྱན་པ། །ཡེ་ཤེས་རྒྱ་མཚོ་དུས་གསུམ་གྱི། །གནས་སུ་གྱུར་པར་རྣམ་པར་
བསམ། །རང་གི་བ་སྤུའི་བུ་ག་ནས། །མཁས་པས་མཆོད་པའི་སྤྲིན་རྣམས་སྤྲོ། །མཁས་པས་ཨུཏ་པ་ལ་དག་དང་། །པད་མ་རྣམ་པ་ལྔ་ཤེས་བྱ། །ཛ་ཏི་རྣམ་གསུམ་ཤེས་བྱས་ནས། །ལྷ་རྣམས་ལ་ནི་འབུལ་
བར་བྱ། །མེ་ཏོག་ཀར་ནི་ཀ་ར་དང་། །མལླི་ཀ་དང་ཡ་ཐི་ཀ ། མེ་ཏོག་ཀ་ར་བཱི་ར་ཡང་། །བསམས་ནས་མཆོད་པ་རབ་ཏུ་བརྟག །དཔག་ཚད་བརྒྱ་ཡི་ཁྱོན་ཙམ་དུ། །འཁོར་ལོའི་དཀྱིལ་འཁོར་བསྒོམ་བྱ་ཞིང་། །རྣམ་པར་
མཁས་པས་རྟག་པར་ནི། །རིགས་རྣམས་རབ་ཏུ་དགོད་པར་བྱ། །དེ་བཞིན་པད་མ་རྡོ་རྗེ་དང་། །རལ་གྲི་ཨུཏ་པལ་མཁས་པས་བསྒོམ། །དཔག་ཚད་བྱེ་བའི་ཁྱོན་ཙམ་ལ། །གྲུ་བཞི་ཤིན་ཏུ་མཛེས་པ་ཡི། །མཆོད་རྟེན་
རིན་ཆེན་བཞིའི་རང་བཞིན། །གསལ་ཞིང་རང་བཞིན་དྲི་མ་མེད། །རིགས་རྣམས་གནས་ནི་མཆོད་པའི་ཕྱིར། །ཤེས་རབ་ཅན་གྱིས་བསྒོམ་པར་བྱ། །འདོད་པའི་ཡོན་ཏན་ལྔ་རྣམས་ཀྱིས། །དེ་ལ་མཆོད་པ་རྒྱ་མཚོ་བརྩམ། །
རིན་ཆེན་ན་བཟའ་ལ་སོགས་པས། །བྱང་ཆུབ་འདོད་པས་རྟག་ཏུ་མཆོད། །མཆོད་པ་རྣམ་ལྔ་མཆོག་རྣམས་ཀྱིས། །རྟག་ཏུ་ལྷ་རྣམས་མཉེས་པར་བྱ། །རིན་ཆེན་འབྱུང་གནས་ན་ཆུང་མཆོག །རིན་ཆེན་སྣ་ཚོགས་ལ་སོགས་
བརྒྱན། །བསྒྲུབ་ཅིང་རབ་ཏུ་བསྒྲུབ་པའི་ཕྱིར། །སངས་རྒྱས་ཀུན་ལ་དབུལ་བར་བྱ། །རིན་ཆེན་བདུན་གྱིས་ཡོངས་བཀང་བའི། །ཞིང་འདི་རྣམ་པར་མཁས་པས་ནི། །ཡེ་

88-1-112a

ཤེས་འདོད་པས་དངོས་གྲུབ་འདོད། །ཉིན་རེ་ཤེས་རབ་ཅན་གྱིས་དབུལ། །བདག་པོའི་ཕྱག་རྒྱར་མཉམ་གཞག་ལ། །སངས་རྒྱས་དཀྱིལ་འཁོར་དབུས་དག་ཏུ། །འདོད་ཆགས་བློ་ཅན་སངས་རྒྱས་ལ། །རེག་
བྱའི་སྦྱོར་བ་དབུལ་བར་བྱ། །ནམ་མཁའི་དབྱིངས་ཀྱི་དབུས་གནས་པར། །དཀྱིལ་འཁོར་བཀོད་པ་བསྒོམ་པར་བྱ། །རང་ལུས་དེ་བཞིན་གཤེགས་རང་བཞིན། །བཤང་བ་གཅི་བས་བླ་མ་མཆོད། །བཞིན་བཟང་
ཡིད་དུ་འོང་བ་ཡི། །ན་ཆུང་སྐལ་བའི་མཆོག་ལྡན་པ། །བྱིན་གྱི་བརླབས་ཀྱི་གནས་བསམ་ཏེ། །དེ་ཉིད་མཆོད་པ་རབ་ཏུ་བརྟག །མིག་ཡངས་ཁུ་བ་བླངས་ནས་ནི། །བརྟན་པའི་བློ་དང་ལྡན་པས་བཟའ། །འདི་དེ་
སྔགས་རྣམས་ཐམས་ཅད་ཀྱི། །སྐུ་གསུང་ཐུགས་ཀྱི་མཆོད་པ་སྟེ། །ཡེ་ཤེས་རྡོ་རྗེ་ཅན་གྱི་གསང་། །སྔགས་རྣམས་དངོས་གྲུབ་བྱེད་པར་གསུངས། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་
ཐུགས་ཀྱི་གསང་ཆེན་གསང་བ་འདུས་པ་ལས་བཤང་གཅིའི་དམ་ཚིག་གི་ལེའུ་སྟེ་བརྒྱད་པའོ།། །། དེ་ནས་རྒྱལ་པོ་རྡོ་རྗེ་འཛིན། །ཐམས་ཅད་ནམ་མཁའ་མི་འགྱུར་ཆེ། །ཐམས་ཅད་དབང་བསྐུར་
སྤྱོད་པའི་མཆོག །ཀུན་དོན་དབང་ཕྱུག་དམ་པ་ཡིས། །སྐུ་གསུང་ཐུགས་ཀྱི་ལོངས་སྤྱོད་པ། །རྡོ་རྗེ་མི་ཕྱེད་གསུམ་དཀྱིལ་འཁོར། །སངས་རྒྱས་ཐེག་པ་ཅན་ལ་གསང་། །ཉམས་དགའ་མཆོག་ནི་རབ་ཏུ་
བཤད། །ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་བསྒོམ་པར་བྱ། །མི་བསྐྱོད་རྡོ་རྗེ་རབ་བསྒོམས་ནས། །ལག་ཏུ་རྡོ་རྗེ་བསྒོམ་པར་བྱ། །འོད་འཕྲོ་མང་པོ་འབར་བ་དང་། །
འོད་ཟེར་སྣ་ལྔས་རབ་ཏུ་གང་། །དུས་གསུམ་འབྱུང་བའི་སངས་རྒྱས་རྣམས། །བསྒོམས་ནས་རྡོ་རྗེས་ཕྱེ་མར་བརླག །སྐུ་གསུང་ཐུགས་ཀྱི་ལོངས་སྤྱོད་ནི། །རྡོ་རྗེས་ཕྱེར་བརླགས་མེད་གྱུར་པ། །བསམ་གཏན་

88-1-112b

མཆོག་དེ་བསྒོམས་ན་ནི། །ཐུགས་ཀྱི་དངོས་གྲུབ་ཐོབ་པར་འགྱུར། །རྡོ་རྗེ་གསང་བ་འདི་ཡིས་ནི། །སེམས་ཅན་ཐམས་ཅད་བསད་ན་ནི། །མི་བསྐྱོད་སངས་རྒྱས་ཞིང་དུ་ནི། །རྒྱལ་
བའི་སྲས་སུ་སྐྱེ་བར་འགྱུར། །འདི་ནི་རིགས་ཐམས་ཅད་ཀྱི་རྒྱ་མཚོ་ལས་ཞེས་སྡང་གི་རིགས་ཀྱི་དམ་ཚིག་གི་དེ་ཁོ་ནར་ཤེས་པར་བྱའོ། །དེ་ནས་རྒྱལ་པོ་རྡོ་རྗེ་འཛིན། །མི་ཤེས་ཐར་པ་
རབ་སྒྲུབ་པ། །ངོ་བོ་ཉིད་དག་གོས་པ་མེད། །བྱང་ཆུབ་སྤྱོད་པ་རབ་སྟོན་པས། །སངས་རྒྱས་བྱང་ཆུབ་བསྒྲུབ་པ་ཡི། །ཡང་དག་དམ་ཚིག་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་
གནས་པར། །འཁོར་ལོའི་དཀྱིལ་འཁོར་བསྒོམ་པར་བྱ། །རྣམ་པར་སྣང་མཛད་རབ་བསྒོམས་ཏེ། །སངས་རྒྱས་ཐམས་ཅད་རྣམ་པར་བསྒོམ། །རིན་ཆེན་ཀུན་གྱི་སྦྱོར་བ་ཡིས། །
རྡོ་རྗེའི་གཟུགས་ནི་རབ་ཏུ་བརྟག །ནོར་རྣམས་ཐམས་ཅད་ཕྲོགས་ནས་སུ། །རྡོ་རྗེ་གསུམ་གྱིས་རྣམ་པར་བསྒོམ། །ཡིད་བཞིན་ནོར་བུ་འདྲ་བ་ཡིས། །ནོར་གྱི་རྒྱ་མཚོས་
རབ་གང་འགྱུར། །སངས་རྒྱས་ཀུན་གྱི་སྲས་རྣམས་དང་། །ཐུབ་པའི་སྐྱེས་བུ་རྣམས་སུ་འགྱུར། །འདི་ནི་རིགས་ཀྱི་རྒྱ་མཚོ་ཐམས་ཅད་ལས་གཏི་མུག་གི་རིགས་ཀྱི་
ཡང་དག་པའི་དམ་ཚིག་ཏུ་ཤེས་པར་བྱའོ། །དེ་ནས་རྒྱལ་པོ་རྡོ་རྗེ་འཛིན། །འདོད་ཆགས་ཐར་པ་རབ་བསྒྲུབ་པ། །གསང་བ་དག་པ་དམིགས་མེད་པས། །དཀྱིལ་འཁོར་
རབ་ཏུ་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །པད་མའི་དཀྱིལ་འཁོར་བསྒོམ་པར་བྱ། །འོད་དཔག་མེད་ནི་རབ་བསྒོམས་ཏེ། །སངས་རྒྱས་རྣམས་ཀྱིས་ཐམས་ཅད་ནི། །དགང་

88-1-113a

ཞིང་དེ་རུ་ཐམས་ཅད་ནི། །བཙུན་མོའི་རྣམ་པའི་སྦྱོར་བར་བསྒོམ། །དམ་ཚིག་བཞི་ཡི་སྦྱོར་བ་ཡིས། །འདི་ནི་རྡོ་རྗེའི་ཚུལ་མཆོག་གོ། །དབང་པོ་གཉིས་ནི་རབ་སྦྱོར་བས། །དེ་དག་ཐམས་ཅད་
ཉེ་བར་སྤྱད། །འདི་ནི་སྔགས་རྣམས་ཐམས་ཅད་ཀྱི། །མི་ཕྱེད་སྐུ་གསུམ་སྒྲུབ་པའོ། །འདི་ནི་འདོད་ཆགས་ཀྱི་རིགས་ཀྱི་ཡང་དག་པའི་དམ་ཚིག་སྟེ། སྔགས་པས་བསྒོམ་པར་བྱ་བ་ཉིད་དོ། །དེ་ནས་རྒྱལ་
པོ་རྡོ་རྗེ་འཛིན། །རྡོ་རྗེ་སྔགས་ཀྱི་དོན་སྒྲུབ་པ། །ཡེ་ཤེས་ལས་བྱུང་བདག་མེད་པས། །གསུང་ནི་འདི་སྐད་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་བསྒོམ་
པར་བྱ། །རྡོ་རྗེ་དོན་ཡོད་རབ་བསྒོམས་ཏེ། །སངས་རྒྱས་ཐམས་ཅད་བསྒོམ་པར་བྱ། །བརྫུན་གྱི་ངག་ནི་རྡོ་རྗེའི་གནས། །ཐམས་ཅད་གཟུགས་སུ་རྣམ་བསྒོམ་བྱ། །རྒྱལ་བའི་གནས་ནི་ཐམས་ཅད་
དང་། །རྒྱལ་བ་ཐམས་ཅད་བསླུ་བར་བྱ། །འདི་དེ་སངས་རྒྱས་ཐམས་ཅད་ཀྱི། །ནམ་མཁའི་གསུང་སྟེ་དྲི་མེད་པ། །ཡེ་ཤེས་བློ་ཅན་ཀུན་གྱི་གསང་། །སྔགས་ཀྱི་དངོས་གྲུབ་བྱེད་པར་བཤད། །འདི་ནི་དམ་
ཚིག་འགུགས་པའི་རིགས་ཀྱི་དམ་ཚིག་གི་དེ་ཁོ་ན་ཉིད་དེ། དོན་ཇི་ལྟ་བ་བཞིན་དུ་སྤྲོ་བར་བྱའོ། །དེ་ནས་རྒྱལ་པོ་རྡོ་རྗེ་འཛིན། །རྡོ་རྗེ་གསུམ་མི་ཕྱེད་རྒྱལ་གནས། །དངོས་གྲུབ་རྡོ་རྗེ་རབ་སྟོན་པས། །གསུང་
ནི་འདི་སྐད་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །དམ་ཚིག་དཀྱིལ་འཁོར་བསྒོམ་པར་བྱ། །རིན་ཆེན་ཏོག་ཏུ་རབ་བསྒོམས་ཏེ། །གཟུགས་རྣམས་ཀུན་གྱིས་འདི་དག་དགང་། །རྩུབ་
པའི་ངག་ལ་སོགས་པ་ཡིས། །བསྟེན་ན་ཡེ་ཤེས་ཐོབ་པར་འགྱུར། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་བཀོད་པས་དེ་སྐད་ཅེས་བཀའ་སྩལ་ཏོ། །དེ་ནས་ཡང་དེ་བཞིན་གཤེགས་

88-1-113b

པ་ཐམས་ཅད་ཀྱི་དམ་ཚིག་རྡོ་རྗེ་ཏོག་ལ་སོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ངོ་མཚར་ཞིང་རྨད་དུ་བྱུང་བར་གྱུར་ནས་རྡོ་རྗེའི་ཚིག་འདི་སྨྲས་སོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་
བདག་པོ་ཁམས་གསུམ་ལས་འདས་ཤིང་འཇིག་རྟེན་གྱི་ཁམས་ཐམས་ཅད་ལས་འདས་པས་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱི་འཁོར་གྱི་དཀྱིལ་འཁོར་གྱི་ནང་དུ་འདི་ལྟ་བུ་རྨད་དུ་
བྱུང་བའི་ཚིག་གི་ལམ་རྡོ་རྗེའི་ཚིག་འདི་ཅིའི་སླད་དུ་གསུང་། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བརྗོད་ཀྱི་མི་ལང་བའི་ཡང་བརྗོད་ཀྱི་མི་ལང་བའི་སངས་རྒྱས་ཀྱི་ཞིང་གི་རི་རབ་ཀྱི་རྡུལ་ཕྲ་མོ་སྙེད་ཀྱི་དེ་
བཞིན་གཤེགས་པ་ཐམས་ཅད་ཀྱི་དམ་ཚིག་རྡོ་རྗེ་ཏོག་ལ་སོགས་པའི་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དམན་པའི་འདུ་ཤེས་དང་། སྨད་པའི་འདུ་ཤེས་འདི་ལྟ་བུ་མ་སྐྱེད་ཅིག །
དེ་ཅིའི་ཕྱིར་ཞེ་ན། རིགས་ཀྱི་བུ་གང་འདི་བྱང་ཆུབ་སེམས་པའི་སྤྱོད་པ་ནི་མཆོག་གི་སྤྱོད་པའོ། །གང་འདི་སྔགས་ཀྱི་སྤྱོད་པ་ནི་དེ་བཞིན་གཤེགས་པའི་སྤྱོད་པའོ། །རིགས་ཀྱི་བུ་འདི་ལྟ་སྟེ་དཔེར་ན་ནམ་མཁའ་
ནི་ཐམས་ཅད་ལ་རྗེས་སུ་སོང་བ་སྟེ། ཆོས་ཐམས་ཅད་ནི་ནམ་མཁའི་ཁོངས་སུ་གཏོགས་པའོ། །དེ་དག་ཀྱང་འདོད་པའི་ཁམས་ན་མི་གནས། གཟུགས་ཀྱི་ཁམས་ན་མི་གནས། གཟུགས་མེད་པའི་ཁམ་
ས་ན་མི་གནས། འབྱུང་བ་ཆེན་པོ་བཞི་ལ་མི་གནས་སོ། །རིགས་ཀྱི་བུ་ཆོས་ཐམས་ཅད་ནི་དེ་ལྟར་རྗེས་སུ་རིག་པར་བྱའོ། །འདི་ལྟ་བུའི་དོན་གྱི་དབང་མཁྱེན་ནས་དེ་བཞིན་གཤེགས་པ་རྣམས་སེམས་
ཅན་རྣམས་ཀྱི་བསམ་པ་མཁྱེན་ནས་ཆོས་འཆད་པར་མཛད་དོ། །རིགས་ཀྱི་བུ་དེ་ལྟ་བུ་ཉིད་ཀྱི་ནམ་མཁའི་ཚིག་ངེས་པར་བརྗོད་པས་དེ་བཞིན་གཤེགས་པའི་དམ་ཚིག་དེ་དག་རྗེས་སུ་རིག་པར་བྱའོ། །

88-1-114a

རིགས་ཀྱི་བུ་འདི་ལྟ་སྟེ་དཔེར་ན་གཙུབ་ཤིང་དང་གཙུབ་སྟན་དང་མིའི་ལག་པ་བསྐྱོད་པའི་རྐྱེན་གྱིས་དུ་བ་རབ་ཏུ་འབྱུང་ཞིང་མེ། འབྱུང་བར་འགྱུར་མོད་ཀྱི། མེ་དེ་ཡང་གཙུབ་ཤིང་ལ་ཡང་མི་གནས། གཙུབ་སྟན་ལ་
མི་གནས། མིའི་ལག་པ་བསྐྱོད་པ་ལ་ཡང་མི་གནས་སོ། །རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་དམ་ཚིག་རྗེས་སུ་རིག་པར་བྱ་སྟེ། འགྲོ་བ་དང་འོང་བ་ལ་སོགས་པས་ཞེས་པའོ། །དེ་
ནས་བྱང་ཆུབ་སེམས་དཔའ་དེ་དག་ངོ་མཚར་དུ་གྱུར། རྨད་དུ་བྱུང་བར་གྱུར་པས་ངམ་ཞིང་མིག་གདངས་ཏེ་ཚིག་འདི་སྐད་ཅེས་སྨྲས་སོ། །རྨད་བྱུང་ཆེན་པོའི་ཆོས་རྣམས་ནི། །ནམ་མཁའ་དང་ནི་མཚུངས་པ་
དང་། །རྣམ་པར་མི་རྟོག་དག་པ་ལ། །ཀུན་རྫོབ་ཡང་ནི་བཤད་པ་མཚར། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས། དོན་དམ་པའི་དག་པ་དེ་ཁོ་ན་
ཉིད་ཀྱི་དོན་གྱི་དམ་ཚིག་གི་ལེའུ་སྟེ་དགུ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་འདུས་ཏེ། བཅོམ་ལྡན་འདས་དམ་ཚིག་ཆེན་པོའི་རྡོ་རྗེ་དེ་ཁོ་ན་ཉིད་
མངོན་པར་རྫོགས་པར་བྱང་ཆུབ་པ་སྐུ་གསུང་ཐུགས་ཀྱི་གསང་བ་དེ་བཞིན་གཤེགས་པ་ལ་ཕྱག་འཚལ་ཏེ་འདི་སྐད་ཅེས་གསོལ་ཏོ། །དེ་ཉིད་སྔགས་སྙིང་ཀུན་བསྡུས་པ། །སྐུ་དང་གསུང་ཐུགས་གསང་བར་
སྒྲགས། །དངོས་གྲུབ་ཆེན་པོའི་ཚུལ་གྱི་མཆོག །བཅོམ་ལྡན་འདས་ཀྱིས་བཤད་དུ་གསོལ། །དེ་ནས་རྒྱལ་པོ་རྡོ་རྗེ་འཛིན། །ཉོན་མོངས་ཀུན་གྱི་རྒྱ་མཚོ་གཙོ། །འབར་བ་གཏུམ་པོ་སྤྱན་ཡངས་པས། །གསུང་
ནི་འདི་སྐད་བཀའ་སྩལ་ཏོ། །ལུས་དང་ངག་དང་སེམས་རྣམས་བསྒོམ། །སྐུ་གསུང་ཐུགས་ཀྱི་རྡོ་རྗེ་རྣམས། །རྣམ་པར་མི་རྟོག་མི་དམིགས་པ། །མཉམ་ཉིད་གར་ཡང་མི་གནས་པ། །དེ་ནས་བཅོམ་ལྡན་

88-1-114b

འདས་རང་བཞིན་གྱིས་དག་པའི་དེ་བཞིན་གཤེགས་པས་ཕ་རོལ་ཏུ་ཕྱིན་པ་སྔགས་ཀྱི་ཚུལ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་ཅེས་
བཀའ་སྩལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་མི་བསྐྱོད་པ་ལ་སོགས་པ་དེ་བཞིན་གཤེགས་པ་ཐམས་ཅད་རིག་པ་དུ་མ་བྱེ་བ་ཁྲག་ཁྲིག་བརྒྱ་སྟོང་དང་ཐབས་གཅིག་ཏུ་སེམས་ཅན་
ཐམས་ཅད་ཀྱི་དོན་བྱ་བའི་གར་གྱི་རོལ་བ་སྟོན་པར་མཛད་དེ། ཕྱོགས་བཅུའི་འཇིག་རྟེན་གྱི་ཁམས་མཐའ་ཀླས་པར་འདོད་པའི་ཡོན་ཏན་ལྔ་རྣམས་ཀྱིས་རོལ་པ་དགྱེས་པར་ཡོངས་སུ་སྤྱོད་པ་ཡོད་ཀྱང་དེ་དག་
སྔགས་སྤྱོད་པ་ལ་མངོན་པར་བརྩོན་པ་རྣམས་ལ་སྤྱན་རས་ཀྱིས་མི་འཚོ་སྟེ། དེ་རྒྱུ་གང་གི་ཕྱིར་ཞེ་ན། ཀྱེ་མ་འདི་དག་ནི་དེ་བཞིན་གཤེགས་པ་ཐམས་ཅད་སྔགས་སྤྱོད་པའི་ཚུལ་གྱིས་ཆོས་ཐོས་པས་སོ། །དེའི་
ཕྱིར་སྐྱེས་བུ་དམ་པ་ཆེན་པོ་དེ་རྣམས་ཀྱི་སྤྱན་རས་ཀྱིས་བཙའ་བའི་ཕྱིར་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་གསང་བ་སྔགས་ཐམས་ཅད་ཀྱི་ཐུགས་ཀུན་དུ་སྐུལ་བར་བྱེད་པ་ཞེས་
བྱ་བའི་རབ་ཏུ་གསང་བ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་དམ་ཚིག་དམིགས་པ། རྡོ་རྗེ་འཛིན་པ་ཐམས་ཅད་ཀྱི་སྐུ་གསུང་ཐུགས་ཀྱི་དམ་ཚིག་དམིགས་པ། ཆོས་འཛིན་པ་ཐམས་
ཅད་ཀྱི་སྐུ་གསུང་ཐུགས་ཀྱི་དམ་ཚིག་དམིགས་པ། ཉིད་ཀྱི་སྐུ་གསུང་ཐུགས་རྡོ་རྗེ་ལས་ཚིག་གི་ལམ་ངེས་པར་བརྗོད་པས་སྔགས་བསྡུས་པ་འདི་གསུངས་སོ། །ཨོཾ་ཧཱུྃ་ཨཱཿསྭཱ་ཧཱ། དེ་ནས་འདི་ནི་གསུངས་ཙམ་
གྱིས། །སངས་རྒྱས་ཐམས་ཅད་སྲས་དང་བཅས། །རབ་ཏུ་འདར་ཞིང་རྒྱལ་བར་གྱུར། །རྡོ་རྗེ་སེམས་དཔའ་རྗེས་སུ་དྲན། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་དམ་ཚིག་འདི་

88-1-115a

གསུངས་སོ། །ནམ་མཁའི་དབྱིངས་ཀྱི་དབུས་གནས་པར། །བཀོད་པའི་དཀྱིལ་འཁོར་བསྒོམ་པར་བྱ། །དེ་ཡི་དབུས་གནས་ཡི་གེ་ཧཱུྃ། །རང་གི་གཟུགས་སུ་རབ་ཏུ་བརྟག །རྡོ་རྗེའི་འོད་ཟེར་ཆེར་འབར་བ། །
རྣམ་པར་འཕྲོ་བ་བསམ་པར་བྱ། །སངས་རྒྱས་རྣམས་ཀྱི་སྐུ་གསུང་ཐུགས། །དྲངས་པར་དེ་ཡིས་རྣམ་པར་བསྒོམ། །དེ་མ་ཐག་ཉིད་དེར་འགྱུར་བ། །སྐུ་གསུང་ཐུགས་ཀྱི་རྡོ་རྗེ་འཛིན། །རྡོ་རྗེ་སེམས་དཔའ་
རྒྱལ་པོ་ཆེ། །ཀུན་གྱི་གཙོ་བོ་དབང་ཕྱུག་མཆོག །རང་གི་དཀྱིལ་འཁོར་རང་རྡོ་རྗེས། །སྐྱེད་པར་བྱེད་པའི་ཆོ་གར་འགྱུར། །འདི་དེ་སངས་རྒྱས་ཐམས་ཅད་ཀྱི། །སྙིང་པོ་རྡོ་རྗེ་བསྡུས་པའོ། །རང་སྔགས་
སྐྱེས་བུ་བསྒོམས་ནས་ནི། །གནས་བཞི་རྣམས་སུ་གཟུགས་ཀྱི་ཚུལ། །ཞལ་གསུམ་རྣམ་པའི་སྦྱོར་བ་ཡིས། །ཁ་དོག་གསུམ་གྱིས་རབ་ཏུ་བསྒོམ། བཅོམ་ལྡན་འདས་རྡོ་རྗེ་དམ་ཚིག་གིས་དེ་སྐད་
ཅེས་བཀའ་སྩལ་ཏོ། །དེ་ལ་འདི་ནི་མཆོག་རྡོ་རྗེའི་གསང་བའོ། །དཀྱིལ་འཁོར་རྣམས་ཀྱི་ཐུགས་ཀ་ཡི། །དབུས་ཆུད་ཕྲ་མོ་རྣམ་བསྒོམ་བྱ། །དེ་ཡི་དབུས་སུ་ཆུད་པར་ནི། །ཡི་གེ་མཆོག་གི་ཚིག་བསམ་མོ། །སྦྱོར་
བ་རྡོ་རྗེ་ཆེན་པོ་ནི། །རྩེ་མོ་ལྔ་པ་རྟག་ཏུ་བསྒོམ། །རྡོ་རྗེ་ལྕགས་ཀྱུའི་སྦྱོར་བ་ཡིས། །རྡོ་རྗེ་གསུམ་རྣམས་བསྒོམ་པར་བྱ། །དེ་ཡིས་ཐུགས་ནི་གཟིར་བྱ་སྟེ། །ལྷ་ཡང་རབ་ཏུ་བསྐུལ་བར་བྱ། །འདི་དེ་རྡོ་རྗེ་ཐམས་
ཅད་ཀྱི། །སངས་རྒྱས་བྱང་ཆུབ་རབ་སྒྲུབ་པའོ། །རྡོ་རྗེ་ལྕགས་ཀྱུ་རྣམ་བསྒོམ་པ། །རྡོ་རྗེ་པད་མོའི་རིགས་ལ་སོགས། །ཐུགས་ནི་བསྐུལ་བ་རབ་བཤད་པ། །འདི་དེ་རོལ་མོ་འབྱུང་བ་སྟེ། །རྡོ་རྗེ་ཡི་ནི་ཚུལ་
མཆོག་འདི། །ཞག་བདུན་བར་དུ་བྱས་ན་ནི། །གསང་ཆེན་སྐུ་དང་གསུང་དང་ཐུགས། །ཡེ་ཤེས་རྡོ་རྗེ་ཅན་གྲུབ་འགྱུར། །འཇིགས་ཤིང་ཡིད་ནི་སྐྲག་གྱུར་ནས། །མཆོག་སྩོལ་བ་ནི་རྣམ་

88-1-115b

པར་གཟིགས། །ཡིད་ནི་མགུ་བས་དགའ་བ་ཡི། །དངོས་གྲུབ་རྒྱ་ཆེན་སྟེར་བར་འགྱུར། །སངས་རྒྱས་བྱང་ཆུབ་སེམས་དཔའ་དང་། །སྔགས་ཀྱི་སྤྱོད་པའི་མཆོག་འཛིན་རྣམས། །གལ་ཏེ་རྨོངས་བདག་ཉིད་འདས་ན། །དེ་ཡི་སྲོག་ནི་དེར་
ཟད་འགྱུར། །དེ་ནས་རྒྱལ་པོ་རྡོ་རྗེ་འཛིན། །རྡོ་རྗེ་གསུམ་མཆོག་སྟོན་པ་པོ། །འཇིག་རྟེན་གསུམ་མཆོག་རྡོ་རྗེ་གཙོས། །གསུང་ནི་འདི་སྐད་བཀའ་སྩལ་ཏོ། །སྔགས་ཀྱི་སྐྱེས་བུ་ཇི་སྙེད་པ། །རྡོ་རྗེ་གསུམ་གྱི་ཡེ་ཤེས་རྫོགས། །
དབང་པོ་གཉིས་ཀྱི་སྦྱོར་བ་ཡིས། །དངོས་པོ་ཐམས་ཅད་བརྟག་པར་བྱ། །འདི་དེ་སངས་རྒྱས་ཐམས་ཅད་ཀྱི། །སྔགས་ཀྱི་དམ་ཚིག་སྒྲུབ་པའོ། །རིག་མའི་དབང་ཕྱུག་ཞུགས་པ་ལ། །རྡོ་རྗེའི་སྦྱོར་བ་རབ་བསྒོམ་ཞིང་། །
ཆགས་ཤིང་ཆགས་པའི་ལྟ་བས་བལྟ། །འདི་ནི་དམ་ཚིག་དཀྱིལ་འཁོར་རོ། །དེ་ནས་རྒྱལ་པོ་རྡོ་རྗེ་འཛིན། །དེ་བཞིན་གཤེགས་ཀུན་བདག་ཉིད་སྐྱེས། །ཐམས་ཅད་དབང་བསྐུར་སངས་རྒྱས་གཙོས། །གསུང་
ནི་འདི་སྐད་བཀའ་སྩལ་ཏོ། །འཇིག་རྟེན་ཁམས་ནི་ཐམས་ཅད་ན། །ཇི་སྙེད་བུད་མེད་བརྗོད་པ་ཀུན། །ཕྱག་རྒྱ་ཆེན་པོའི་སྔོན་སྦྱོར་བས། །དེ་དག་ཐམས་ཅད་ཉེ་བར་སྤྱད། །བྱེ་བ་གྲངས་མེད་རྡོ་རྗེ་ཅན། །སངས་
རྒྱས་གནས་ནི་དེར་སྤྲོ་བྱ། །བཅོམ་ལྡན་འདས་བྱང་ཆུབ་ཀྱི་དམ་ཚིག་གིས་འདི་སྐད་ཅེས་བཀའ་སྩལ་ཏོ། །བྱང་ཆུབ་འདི་ཡིས་འཐོབ་པར་འགྱུར། །རྡོ་རྗེ་གསུམ་པོ་མཁའ་འདྲ་བའི། །བྱང་ཆུབ་སེམས་དཔའ་
རྒྱལ་རྒྱ་མཚོ། །རྡོ་རྗེ་སེམས་དཔའ་ཚེ་དེས་འཐོབ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས་དེ་བཞིན་གཤེགས་པ་ཐམས་ཅད་ཀྱི་ཐུགས་བསྐུལ་
བ་ཞེས་བྱ་བའི་ལེའུ་སྟེ་བཅུ་པའོ།། །། དེ་ནས་བཅོམ་ལྡན་འདས་སྐུ་གསུང་ཐུགས་རྡོ་རྗེ་དེ་བཞིན་གཤེགས་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སྐྱེས་བུ་མཆོག་ཅེས་བྱ་བའི་ཏིང་ངེ་འཛིན་ལ་

88-1-116a

སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་སྔགས་རྡོ་རྗེ་རིགས་པ་སྐྱེས་བུ་མཆོག་གི་ལེའུ་འདི་གསུངས་སོ། །རྡོ་རྗེ་གསུམ་ཡིག་སྔགས་ཀྱི་མཆོག །ཕྱག་རྒྱ་ཆེན་པོ་རྣམ་བསྒོམ་པ། །བྱང་ཆུབ་ཐམས་
ཅད་འཐོབ་པ་ནི། །ཡེ་ཤེས་རྡོ་རྗེ་དག་གིས་བྱ། །ཨོཾ་ཡིག་ཡེ་ཤེས་སྙིང་པོ་སྟེ། །རྡོ་རྗེ་སྐུ་ནི་འཐོབ་བྱེད་པའོ། །ཨཱཿཡིག་བྱང་ཆུབ་སྤྲུལ་པའི་བདག །རྡོ་རྗེ་གསུང་ནི་འཐོབ་བྱེད་པའོ། །ཧཱུྃ་ཡིག་སྐུ་གསུང་ཐུགས་ཡིན་ཏེ། །རྡོ་རྗེ་
གསུམ་ནི་མི་ཕྱེད་འཐོབ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་སྔགས་ཀྱི་སྐྱེས་བུས་དེ་སྐད་ཅེས་བཀའ་སྩལ་ཏོ། །ནམ་མཁའ་རྡོ་རྗེའི་དབུས་གནས་པར། །རྡོ་རྗེ་ཀུན་སྐྱེས་དཀྱིལ་འཁོར་
བསམ། །དེ་རུ་ཡི་གེ་ད་བྷྲུྃ་བསམ་སྟེ། །རྡོ་རྗེ་སྤྲིན་ནི་འཕྲོ་སྐྱེད་པའོ། །དེ་ལ་འདི་ནི་ཡེ་ཤེས་རྡོ་རྗེའི་སྙིང་པོའོ། །བྷྲུྃ། རྡོ་རྗེའི་དཀྱིལ་འཁོར་དབུས་གནས་པར། །ཡི་གེ་ཧཱུྃ་ནི་རབ་ཏུ་བསྒོམ། །གསལ་བའི་དཀྱིལ་འཁོར་དབུས་གནས་
པར། །ཡི་གེ་ཨོཾ་ནི་རྣམ་པར་བསམ། །ཆོས་ཀྱི་དཀྱིལ་འཁོར་དབུས་གནས་པར། །ཡི་གེ་ཨཱཿནི་རབ་ཏུ་བསྒོམ། །ཡི་གེ་བྷྲུྃ་གི་གནས་བསྒོམས་ཏེ། །རྡོ་རྗེ་གསུམ་བྱུང་བསྒོམ་པར་བྱ། །བཅོམ་ལྡན་འདས་དམ་ཚིག་གསུམ་
གྱི་གསང་བས་འདི་སྐད་ཅེས་བཀའ་སྩལ་ཏོ། །སྙིང་པོ་དུས་གསུམ་སངས་རྒྱས་ཀྱི། །སྐུ་གསུང་ཐུགས་ནི་མཉེས་བྱེད་པ། །ཨོཾ་ཡིག་སངས་རྒྱས་སྐུ་ཡི་མཆོག །ཨོཾ། ཨཱཿཡིག་སངས་རྒྱས་གསུང་གི་ལམ། །ཨཱཿཧཱུྃ་
ཡིག་ཡེ་ཤེས་འཇིངས་ནི་ཐུགས། །ཧཱུཾ་འདི་ནི་བྱང་ཆུབ་ཚུལ་མཆོག་ཡིན། །འདི་དེ་སངས་རྒྱས་ཐམས་ཅད་ཀྱི། །སངས་རྒྱས་བྱང་ཆུབ་རབ་སྒྲུབ་པ། །ཡེ་ཤེས་རྡོ་རྗེས་སྤྲུལ་པ་སྟེ། །སངས་རྒྱས་རྒྱུ་དང་འབྲས་བུ་འབྱུང་། །
འདི་དག་སངས་རྒྱས་སྐྱེས་བུ་ཉིད། །སྔགས་དང་རིག་པ་ཞེས་བསྒྲགས་པ། །བསྐྱེད་པ་ལ་སོགས་དམ་ཚིག་དག །རྡོ་རྗེ་གསུམ་མི་ཕྱེད་བསྒོམས་པས། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་དམ་ཚིག་དེ་

88-1-116b

ཁོ་ན་ཉིད་ཡེ་ཤེས་རྡོ་རྗེ་བྱིན་གྱིས་རློབ་པའི་རྒྱུ་ཞེས་བྱ་བའི་ཏིང་ངེ་འཛིན་ཏོ། །རྣམ་པར་དབེན་ཞིང་ཉམས་དགའ་བར། །སྦྱོར་བ་འདི་ནི་ཀུན་ཏུ་བརྩམ། །རྡོ་རྗེའི་སྐུ་དང་གསུང་ཐུགས་འགྲུབ། །ཕྱོགས་གཅིག་གིས་ནི་ཐེ་ཚོམ་
མེད། །ནམ་མཁའ་རྡོ་རྗེའི་དབུས་གནས་པ། །གསལ་བའི་དཀྱིལ་འཁོར་དམ་པ་བསམ། །རང་གི་སྔགས་ཀྱི་དམ་ཚིག་བསྐྱེད། །ཡི་གེ་ཨོཾ་ནི་ཐུགས་ཀར་དགོད། །འོད་ཟེར་ལྔ་པ་སྤྲིན་ཆེན་པོ། །རྣམ་པར་སྣང་མཛད་
མཆོག་སྒོམ་པ། །འདི་ཡིས་སངས་རྒྱས་ཀྱི་ནི་སྐུ། །རྡོ་རྗེ་རྣམ་སྣང་རྒྱ་མཚོར་འགྱུར། །སངས་རྒྱས་སྐུ་དང་འདྲ་བའི་འོད། །རྡོ་རྗེ་གསུམ་གྱི་ཀལྤ་ནི། །ཡེ་ཤེས་ལྔ་ལྡན་བསྟེན་ཅིང་གནས། །ཕྱོགས་
ཙམ་གྱིས་ནི་འགྲུབ་པར་འགྱུར། །བཅོམ་ལྡན་འདས་སྐུ་རྡོ་རྗེ་གསང་བས་དེ་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེའི་འོད་ཟེར་བཀོད་པ་ཞེས་བྱ་བའི་ཏིང་ངེ་འཛིན་ཏོ། །
ནམ་མཁའི་རྡོ་རྗེ་དབུས་གནས་པའི། །ཆོས་ཀྱི་དཀྱིལ་འཁོར་དམ་པ་བསམ། །རང་གི་སྔགས་ཀྱི་སྐྱེས་བུ་བསྐྱེད། །ཨཱཿཡིག་ངག་གི་ལམ་ལ་དགོད། །ཁ་དོག་ལྔ་པ་རྡོ་རྗེ་ཆེ། །འཇིག་རྟེན་དབང་ཕྱུག་
མཆོག་བསྒོམས་པས། །དམ་ཚིག་ཡེ་ཤེས་རྫོགས་བྱས་ཏེ། །ཚིག་གི་དམ་ཚིག་ལྔ་ཡི་མཆོག །ཆོས་གྱི་ཚིག་གི་ལམ་གནས་པ། །རྡོ་རྗེ་ཆོས་དང་མཚུངས་པར་འགྱུར། །རྡོ་རྗེ་གསུམ་གྱི་ཀལྤ་ནི། །
ཡེ་ཤེས་ལྔ་ལྡན་བསྟེན་ཅིང་གནས། །བཅོམ་ལྡན་འདས་རྡོ་རྗེའི་གསུང་གསང་བས་དེ་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་དམ་ཚིག་འབྱུང་བ་ཞེས་བྱ་བའི་ཏིང་ངེ་
འཛིན་ཏོ། །ནམ་མཁའ་རྡོ་རྗེའི་དབུས་གནས་པའི། །རྡོ་རྗེ་དཀྱིལ་འཁོར་དམ་པ་བསམ། །རང་སྔགས་སྐྱེས་བུ་བསྐྱེད་ནས་ནི། །ཐུགས་ལ་གནས་པའི་ཡི་གེ་ཧཱུྃ། །དམ་ཚིག་ཆེན་པོ་དེ་ཉིད་ནི། །ཁ་དོག་ལྔ་

88-1-117a

པ་རྣམ་བསྒོམ་བྱ། །རྡོ་རྗེ་ཀུན་དང་རྒྱལ་བའི་གནས། །ཡེ་ཤེས་རྡོ་རྗེ་དག་གིས་བྱ། །སྟོན་པ་རྡོ་རྗེ་ཐུགས་ལས་བྱུང་། །ཡེ་ཤེས་ཡོན་ཏན་རྒྱ་མཚོར་འགྱུར། །རྡོ་རྗེ་གསུམ་གྱི་ཀལྤ་ནི། །
ཡེ་ཤེས་ལྔ་ལྡན་བསྟེན་གནས་ཤིང་། །བཅོམ་ལྡན་འདས་རྡོ་རྗེ་ཐུགས་གསང་བས་དེ་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་དམ་ཚིག་རྡོ་རྗེ་ཞེས་བྱ་བའི་
ཏིང་ངེ་འཛིན་ཏོ། །ཡེ་ཤེས་དཀྱིལ་འཁོར་དབུས་སུ་ནི། །རྡོ་རྗེ་ཆེན་པོ་བསྒོམ་པར་བྱ། །ལུས་རྣམས་ཀུན་ལ་ཡི་གེ་ཁྃ། །རྡོ་རྗེ་ཡེ་ཤེས་མཁའ་མཉམ་འགྱུར། །ཁྃ། སངས་རྒྱས་བྱང་ཆུབ་སེམས་དཔའ་ཡིས། །
ཡང་དང་ཡང་དུ་མཆོད་པ་དང་། །ཀལ་པ་གསུམ་ནི་དམ་ཚིག་གནས། །སངས་རྒྱས་ཀྱིས་ཀྱང་གཟིགས་མི་འགྱུར། །བཅོམ་ལྡན་འདས་ནམ་མཁའ་རྡོ་རྗེའི་དམ་ཚིག་གིས་དེ་སྐད་ཅེས་བཀའ་སྩལ་ཏོ། །སྐུ་
གསུང་ཐུགས་རྡོ་རྗེ་མི་སྣང་བ་འབྱུང་བ་བཀོད་པ་ཕྲེང་བ་ཅན་ཞེས་བྱ་བའི་ཏིང་ངེ་འཛིན་ཏོ། །རྡོ་རྗེའི་དཀྱིལ་འཁོར་དབུས་ལས་ནི། །རང་སྔགས་སྐྱེས་བུ་རབ་བསྒོམས་ལ། །སྙིང་གར་རྡོ་རྗེ་ཧྃ་ཞེས་པ། །བཞག་
སྟེ་འོད་ཟེར་རྣམ་པར་བསྒོམ། །ཧྃ། འཇམ་དཔལ་དམ་ཚིག་རྫོགས་ལོངས་སྤྱོད། །སྐུ་གསུང་ཐུགས་ཀྱི་རྡོ་རྗེ་ཅན། །བྱང་ཆུབ་སེམས་དཔའི་བདག་ཉིད་དུ། །ས་བཅུ་དག་ལ་གནས་དེ་འགྱུར། །བྱང་ཆུབ་
སེམས་དཔའ་ཡེ་ཤེས་དམ་ཚིག་ཟླ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའི་དབྱིངས་ཀྱི་དབུས་གནས་པར། །འོད་ཟེར་རབ་འབར་ཡི་གེ་ཐླཱིྃ ། །མཚན་མཆོག་རྡོ་རྗེའི་ལུས་སུ་ནི། །བསྒོམས་
ན་རྡོ་རྗེའི་སྐུ་མཉམ་འགྱུར། ཐླཱིྃ། ནམ་མཁའ་རྡོ་རྗེའི་དམ་ཚིག་གི་བཀོད་པའི་གནས་ཞེས་བྱ་བའི་ཏིང་ངེ་འཛིན་ཏོ། །མངོན་ཤེས་ལྔ་དང་མཉམ་པར་འགྱུར། །སངས་རྒྱས་མངོན་ཤེས་དམ་ཚིག་མཆོག །

88-1-117b

འདི་ནི་དངོས་གྲུབ་ཐམས་ཅད་ཀྱི། །སངས་རྒྱས་མངོན་ཤེས་མཆོག་སྒྲུབ་པའོ། །ནམ་མཁའི་ཁམས་ཀྱི་དབུས་གནས་པར། །སངས་རྒྱས་དཀྱིལ་འཁོར་དམ་པ་བསམ། །རྡོ་རྗེ་སེམས་དཔའ་རབ་བསྒོམས་ལ། །
ཡེ་ཤེས་ཨོཾ་ཡིག་བསྒོམ་པར་བྱ། །ཨོཾ། རྡོ་རྗེ་དམ་ཚིག་གསུམ་བསྒོམས་པས། །མི་བསྐྱོད་རྡོ་རྗེ་གསུམ་འདྲར་འགྱུར། །བཅོམ་ལྡན་འདས་རྡོ་རྗེ་མི་བསྐྱོད་པས་དེ་སྐད་ཅེས་བཀའ་སྩལ་ཏོ། །མི་བསྐྱོད་པ་ཡི་
སྐུ་འདྲ་དང་། །གསུང་དང་ཐུགས་མཆོག་རྟག་ཏུ་འཛིན། །འཇིག་རྟེན་ཁམས་རྣམས་ཐམས་ཅད་དུ། །མི་བསྐྱོད་རྡོ་རྗེས་མཆོད་པར་འགྱུར། །བཅོམ་ལྡན་འདས་མི་བསྐྱོད་པའི་དམ་ཚིག་མངོན་པར་འབྱུང་བའི་རྡོ་རྗེ་
ཞེས་བྱ་བའི་ཏིང་ངེ་འཛིན་ཏོ། །ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་འོད་བཟང་བསམ། །ནམ་མཁའ་རྡོ་རྗེ་རབ་བསྒོམས་ལ། །རིན་ཆེན་ཨོཾ་ཡིག་བསྒོམ་པར་བྱ། །ཨོཾ། 
རྡོ་རྗེ་དམ་ཚིག་གསུམ་བསྒོམས་པས། །རྡོ་རྗེ་གསུམ་གྱི་ཏོག་འདྲར་འགྱུར། །བཅོམ་ལྡན་འདས་རྡོ་རྗེ་རིན་ཆེན་ཏོག་གིས་དེ་སྐད་ཅེས་བཀའ་སྩལ་ཏོ། །སྐུ་དང་གསུང་ཐུགས་རྡོ་རྗེ་ཡིས། །རིན་ཆེན་ཏོག་
གི་འོད་དང་འདྲ། །དེ་ནི་བདག་མེད་བྱང་ཆུབ་དང་། །ཡེ་ཤེས་གསང་བ་མཉམ་གནས་འགྱུར། །རིན་པོ་ཆེ་དམ་ཚིག་ལོངས་སྤྱོད་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའི་དབྱིངས་ཀྱི་དབུས་གནས་པར། །
སངས་རྒྱས་དཀྱིལ་འཁོར་དམ་པ་བསམ། །འཇིག་རྟེན་དབང་ཕྱུག་རབ་བསྒོམས་ལ། །ཆོས་ཀྱི་ཨོཾ་ཡིག་བསྒོམ་པར་བྱ། །ཨོཾ། རྡོ་རྗེ་དམ་ཚིག་གསུམ་བསྒོམས་པས། །རྡོ་རྗེ་གསུམ་དཔག་མེད་འདྲར་འགྱུར། །ལུས་དང་ངག་
སེམས་རྡོ་རྗེ་ཡིས། །འོད་དཔག་མེད་དང་འདྲ་བར་འགྱུར། །དེ་ནི་སེམས་ཅན་ཐམས་ཅད་ཀྱི། །ཐེག་ཆེན་ལམ་ནི་འབྱུང་བར་འགྱུར། །བཅོམ་ལྡན་འདས་རྡོ་རྗེ་འོད་དཔག་ཏུ་མེད་པས་དེ་སྐད་ཅེས་བཀའ་སྩལ་ཏོ། །ཡོན་

88-1-118a

ཏན་དཔག་ཏུ་མེད་པའི་འོད་ཀྱི་དཔལ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་དམ་པ་བསམ། །རྡོ་རྗེ་ཨུཏ་པལ་རབ་བསྒོམས་ནས། །དམ་ཚིག་ཨོཾ་ཡིག་
རབ་ཏུ་བསྒོམ། །ཨོཾ། རྡོ་རྗེ་དམ་ཚིག་གསུམ་བསྒོམས་པས། །རྡོ་རྗེ་དོན་ཡོད་གསུམ་འདྲར་འགྱུར། །ལུས་དང་ངག་སེམས་རྡོ་རྗེ་ཡིས། །རྡོ་རྗེ་དོན་ཡོད་འདྲ་བའི་འོད། །དེ་ནི་དཔལ་ལྡན་ཡེ་ཤེས་མཚོ། །སེམས་ཅན་ཀུན་དོན་
འབྱུང་བར་འགྱུར། །བཅོམ་ལྡན་འདས་རྡོ་རྗེ་དོན་ཡོད་པས་དེ་སྐད་ཅེས་བཀའ་སྩལ་ཏོ། །དོན་ཡོད་པའི་དམ་ཚིག་འབྱུང་བ་འོད་ཟེར་ཡེ་ཤེས་ཀྱི་མཆོག་འབྱུང་བ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའི་དབྱིངས་
ཀྱི་དབུས་གནས་པའི། །སངས་རྒྱས་དཀྱིལ་འཁོར་འོད་བཟང་བསམ། །རྡོ་རྗེ་སྣང་མཛད་རབ་བསྒོམས་ལ། །སྐུ་གསུམ་ཨོཾ་ཡིག་རབ་ཏུ་བསྒོམ། །ཨོཾ། རྡོ་རྗེ་དམ་ཚིག་གསུམ་བསྒོམས་པས། །རྣམ་པར་སྣང་
མཛད་མཉམ་པར་འགྱུར། །ལུས་དང་ངག་ཡིད་རྡོ་རྗེ་ཡིས། །རྣམ་པར་སྣང་མཛད་འདྲ་བའི་འོད། །དེ་ནི་ཡེ་ཤེས་རྫོགས་བྱང་ཆུབ། །སྐུ་གསུམ་མི་ཕྱེད་སྒྲུབ་བྱེད་འགྱུར། །བཅོམ་ལྡན་འདས་རྡོ་རྗེ་རྣམ་པར་སྣང་
མཛད་ཀྱིས་དེ་སྐད་ཅེས་བཀའ་སྩལ་ཏོ། །ལུས་དང་ངག་དང་ཡིད་དམིགས་པ་རྫོགས་པར་བྱང་ཆུབ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །རི་བོ་རྣམ་པར་དབེན་པ་དང་། །ཆུ་ཀླུང་འབབ་པ་རྣམས་དང་ནི། །དུར་
ཁྲོད་ལ་སོགས་རྣམས་སུ་ཡང་། །བསམ་གཏན་བསྡུས་པ་འདི་དག་བྱ། །མི་བསྐྱོད་ཡེ་ཤེས་རྡོ་རྗེ་སོགས། །རྡོ་རྗེ་ནམ་མཁའི་དཀྱིལ་གནས་བསམ། །མངོན་ཤེས་ལྔ་པོའི་སྦྱོར་བ་ཡིས། །གནས་སུ་སངས་
རྒྱས་མཆོག་རྣམས་བསྒོམ། །བཅོམ་ལྡན་འདས་རྡོ་རྗེ་ཆེན་པོ་དམ་ཚིག་རྡོ་རྗེ་མངོན་པར་མཁྱེན་པས་དེ་སྐད་ཅེས་བཀའ་སྩལ་ཏོ། །རྡོ་རྗེ་ཆེན་པོ་རྩེ་ལྔ་པ། །འབར་བ་ལྔ་ཡིས་རྣམ་པར་བརྒྱན། །གནས་ལྔར་

88-1-118b

རབ་ཏུ་སྦྱོར་བ་ཡིས། །རྡོ་རྗེ་མངོན་ཤེས་འདྲ་བར་འགྱུར། །མེ་སྟག་མང་པོ་འཁྲུག་པ་ཡི། །རང་སྔགས་འཁོར་ལོ་བསྒོམ་པར་བྱ། །རྡོ་རྗེ་ལྔ་ནི་སྦྱོར་བ་ཡིས། །རྡོ་རྗེ་མངོན་ཤེས་འདྲ་བར་འགྱུར། །ནམ་མཁའ་
རྡོ་རྗེའི་དཀྱིལ་གནས་པར། །འཁོར་ལོ་སངས་རྒྱས་འབར་འོད་འདྲ། །བསྒོམས་ནས་སངས་རྒྱས་འཇུག་པ་ཡིས། །སངས་རྒྱས་གནས་དང་འདྲ་བར་འགྱུར། །སངས་རྒྱས་དཀྱིལ་འཁོར་དབུས་གནས་པའི། །
རང་གི་ལུས་ལ་སྣང་མཛད་བཞག །སྙིང་གར་ཡི་གེ་ཨོཾ་བསམ་ལ། །སྔགས་ལ་རྣམ་པར་ཤེས་པ་བསྒོམ། །དེའི་སེམས་འགོག་པའི་རྡོ་རྗེར་ཚུད། །གང་ཚེ་སྐྱེ་བར་འགྱུར་བ་དེ། །སངས་རྒྱས་ཀུན་གྱི་མཆོག་
སྒྲུབ་པ། །ཡིད་བཞིན་ནོར་བུ་དཔལ་ལྡན་འགྱུར། །སངས་རྒྱས་དཀྱིལ་འཁོར་དབུས་གནས་པའི། །རྡོ་རྗེ་མི་བསྐྱོད་རབ་ཏུ་བསྒོམ། །སྙིང་གར་ཡི་གེ་ཧཱུྃ་བསྒོམས་ནས། །སེམས་ནི་ཐིག་ལེར་གྱུར་པར་བཞག །
སངས་རྒྱས་དཀྱིལ་འཁོར་དབུས་གནས་པའི། །ཚེ་དཔག་མེད་པར་རབ་ཏུ་བསྒོམ། །སྙིང་གར་ཡི་གེ་ཨཱཿབསམས་ཏེ། །རྡོ་རྗེ་ཐིག་ལེར་གཏོགས་པ་བཞག །འདི་དེ་དམ་ཚིག་མཆོག་གི་མཆོག །རྡོ་རྗེ་
གསུམ་ནི་མི་ཕྱེད་བསྒོམ། །འགོག་པའི་དམ་ཚིག་ཡེ་ཤེས་ཏེ། །སངས་རྒྱས་དངོས་གྲུབ་འཐོབ་འགྱུར་བའི། །ནམ་མཁའ་རྡོ་རྗེ་དབྱིངས་གནས་པར། །བསྒོམ་བྱ་གསལ་བའི་དཀྱིལ་འཁོར་ནི། །ལུས་ངག་
སེམས་ལ་ཡི་གེ་ཨོཾ། །བསམས་ན་དེ་ནི་བསྐལ་པར་གནས། །ནམ་མཁའ་རྡོ་རྗེ་དབྱིངས་གནས་པར། །བསྒོམ་བྱ་ཆོས་ཀྱི་དཀྱིལ་འཁོར་ནི། །ལུས་ངག་སེམས་ལ་ཡི་གེ་ཨཱཿ། །བསམས་ན་དེ་ནི་བསྐལ་
པར་གནས། །ནམ་མཁའ་རྡོ་རྗེ་དབྱིངས་གནས་པར། །བསྒོམ་བྱ་རྡོ་རྗེ་དཀྱིལ་འཁོར་ནི། །ལུས་ངག་སེམས་ལ་ཡི་གེ་ཧཱུྃ། །བསམས་ན་དེ་ནི་བསྐལ་པར་གནས། །བཅོམ་ལྡན་འདས་རྡོ་རྗེ་གསུམ་གྱི་རྟོག་

88-1-119a

པའི་དམ་ཚིག་གིས་དེ་སྐད་ཅེས་བཀའ་སྩལ་ཏོ། །སྐུ་དང་གསུང་ཐུགས་རྡོ་རྗེ་ཡི། །རྣལ་འབྱོར་འདི་གང་ནས་བཟུང་སྟེ། །ཀློག་གམ་ཡང་ན་སེམས་ཀྱང་རུང་། །དེ་ཡང་རྡོ་རྗེ་འཛིན་པར་འགྱུར། །
དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས་དེ་བཞིན་གཤེགས་པ་ཐམས་ཅད་ཀྱི་སྔགས་ཀྱི་དམ་ཚིག་དེ་ཁོ་ན་ཉིད་རིག་པའི་སྐྱེས་བུ་མཆོག་གི་
ལེའུ་སྟེ་བཅུ་གཅིག་པའོ།། །། དེ་ནས་སྟོན་པ་རྡོ་རྗེ་འཛིན། །བསྐྱེད་པ་ཡེ་ཤེས་མཆོག་སྒྲུབ་པས། །དམ་ཚིག་རྡོ་རྗེ་གསུམ་དེ་ཉིད། །རྡོ་རྗེ་གསུང་གིས་བཀའ་སྩལ་པ། །མཁའ་དང་མཚུངས་
པར་མཉམ་གྱུར་པ། །རྣམ་པར་མི་རྟོག་ངོ་བོ་ཉིད། །ཆོས་རྣམས་རང་བཞིན་དག་པ་ལ། །རོལ་མོ་འདི་དག་རབ་ཏུ་བསྒོམ། །དགོན་པ་ཆེན་པོའི་ས་ཕྱོགས་མཆོག །མེ་ཏོག་འབྲས་བུ་སོགས་པས་བརྒྱན། །
རི་བོ་སྐྱེ་བོས་དབེན་པ་རུ། །དངོས་གྲུབ་ཐམས་ཅད་བསྡུས་པ་བསྒྲུབ། །མྃ། ལུས་དང་ངག་སེམས་རྡོ་རྗེ་ལ། །འཇམ་པའི་རྡོ་རྗེ་རབ་ཏུ་བསྒོམ། །ལུས་དང་ངག་སེམས་ལ་སྤྲོ་བ། །འཇམ་པའི་རྡོ་རྗེ་འདྲ་བར་
འགྱུར། །དཔག་ཚད་བརྒྱར་ནི་རྒྱ་ཆེ་བ། །རྡོ་རྗེ་འབར་བའི་འོད་དེས་ནི། །སྣང་འགྱུར་དག་པའི་བདག་ཉིད་དེ། །རྒྱན་རྣམས་ཀུན་གྱིས་བརྒྱན་པ་ནི། །ཚངས་པ་དྲག་པོ་ལ་སོགས་ལྷས། །ནམ་ཡང་མཐོང་
བར་མི་ནུས་སོ། །འཇམ་པའི་རྡོ་རྗེ་མཆོག་གི་དམ་ཚིག་མི་སྣང་བར་བྱེད་པ་ཞེས་བྱ་བའི་ཏིང་ངེ་འཛིན་ཏོ། །རྡོ་རྗེ་མི་ཕྱེད་གསུམ་ལས་བྱུང་། །བཤང་གཅི་དམ་ཚིག་ལྔ་རྣམས་ནི། །ལྕགས་གསུམ་
དང་ནི་ལྡན་བྱས་ནས། །ཁར་བཅུག་ནས་ནི་བསྒོམ་པར་བྱ། །སངས་རྒྱས་ཀུན་གྱི་མི་ཕྱེད་པའི། །ཐུགས་ནི་དེ་རུ་རབ་ཏུ་བསྒོམ། །དེ་ནི་དེ་མ་ཐག་ཉིད་དུ། །འཇམ་པའི་རྡོ་རྗེ་འོད་འདྲར་འགྱུར། །རང་གི་སྔགས་

88-1-119b

ལས་འཁོར་ལོ་ནི། །འོད་འཕྲོ་མདངས་མཆོག་ཅན་བསྒོམས་ནས། །སངས་རྒྱས་ཐམས་ཅད་བཞུགས་པའི་གནས། །བསྒོམས་ན་སངས་རྒྱས་མཉམ་པར་འགྱུར། །རི་རབ་སུམ་བཅུ་རྩ་དྲུག་གི། རྡུལ་ཕྲན་ཇི་
སྙེད་ཡོད་པ་ཡི། །དེ་ཡི་རྗེས་སུ་འབྲང་བར་འགྱུར། །ཐམས་ཅད་རྡོ་རྗེ་འཛིན་དང་འདྲ། །འདི་ནི་འཁོར་ལོའི་དམ་ཚིག་ཅེས་བྱ་བའི་ཏིང་ངེ་འཛིན་ཏོ། །རྡོ་རྗེ་ཆེན་པོ་རང་སྔགས་ཀྱིས། །དཀྱིལ་འཁོར་དབུས་སུ་རབ་
བསྒོམས་ལ། །རྡོ་རྗེ་ཀུན་གྱི་གནས་ཡིན་པར། བསམས་ན་རྡོ་རྗེ་འདྲ་བར་འགྱུར། །རི་རབ་སུམ་བཅུ་རྩ་དྲུག་གི། ཕྲ་རབ་རྡུལ་རྣམས་ཇི་སྙེད་པའི། །དེ་སྙེད་ཀྱི་ནི་བུད་མེད་རྣམས། །ཡོན་ཏན་ཅན་གྱི་གནས་སུ་འགྱུར། །
དྲག་པོ་དག་གིས་ཕྱག་བྱས་པ། །ཁམས་གསུམ་རྡོ་རྗེ་ཆེན་པོར་འགྱུར། །རྡོ་རྗེ་མཉམ་པ་ཉིད་ཅེས་བྱ་བའི་ཏིང་ངེ་འཛིན་ཏོ། །པད་མ་ཆེན་པོ་འདབ་བརྒྱད་པ། །རང་སྔགས་རྡོ་རྗེས་བསམས་ནས་སུ། །ཆོས་རྣམས་
ཀུན་གྱི་གནས་ཡིན་པ། །རྡོ་རྗེ་ཆོས་དང་འདྲ་བར་འགྱུར། །རི་རབ་སུམ་བཅུ་རྩ་དྲུག་གི། ཕྲ་རབ་རྡུལ་རྣམས་ཇི་སྙེད་པའི། །སངས་རྒྱས་མཆོད་མཆོག་དཀྱིལ་འཁོར་དུ། །དག་པའི་བདག་ཉིད་འཇོག་པར་བྱེད། །
པད་མོ་མཉམ་པ་ཉིད་ཅེས་བྱ་བའི་ཏིང་ངེ་འཛིན་ཏོ། །གསུམ་གྱི་ཀལ་པའི་དམ་ཚིག་ནི། །ཡེ་ཤེས་ལྔ་ལྡན་བསྟེན་ཅིང་གནས། །ཕྱོགས་བཅུའི་སངས་རྒྱས་ཐམས་ཅད་ཀྱི། །གསང་བ་རྣམ་གསུམ་བསྙེན་བཀུར་
བྱེད། །འོད་ཟེར་ལྔ་ཡི་མདོག་འདྲའི་འོད། །རང་གི་སྔགས་ལ་རལ་གྲི་བསྒོམ། །མིག་ཡངས་ལག་ན་ཐོགས་ནས་ནི། །རྡོ་རྗེ་གསུམ་རིག་འཛིན་པར་འགྱུར། །ཁམས་གསུམ་ཆེན་པོས་མཆོད་བྱ་དང་། །ཚངས་དབང་
ལྷ་མིན་ཕྱག་བྱས་པ། །སྟོང་གསུམ་ན་ནི་གཅིག་པུ་དཔའ། །གསང་བ་འཛིན་པའི་མཆོག་ཏུ་འགྱུར། །སྐུ་གསུང་ཐུགས་ཀྱི་རྡོ་རྗེ་རྣམས། །སེམས་ཀྱིས་གང་ཞིག་འདོད་པ་ནི། །རྡོ་རྗེ་ཐུགས་ལས་རབ་ཏུ་བྱུང་། །

88-1-120a

དེ་ལྟ་བུ་ཡི་དངོས་གྲུབ་སྟེར། །རལ་གྲི་ཐམས་ཅད་དམ་པ་ཞེས་བྱ་བའི་ཏིང་ངེ་འཛིན་ཏོ། །ཨོཾ་ཡིག་རི་ལུ་ཙ་ན་ཀའི། །འབྲུ་ཚད་དུ་ནི་བསམས་ནས་ནི། །དབུས་སུ་རང་གི་ལྷ་ཡི་གཟུགས། །བསམས་ཏེ་
ཁ་རུ་བསྒོམ་པར་བྱ། །དེ་ནི་དེ་མ་ཐག་ཉིད་དུ། །བྱང་ཆུབ་སེམས་དཔའི་འོད་འདྲར་འགྱུར། །ཉི་མ་ཤར་བའི་འོད་འདྲ་ཞིང་། །འཛམ་བུ་ཆུ་བོའི་གསེར་གྱི་མདོག །ཨཱཿཡིག་རི་ལུ་ཙ་ན་ཀའི། །འབྲུ་ཚད་ཙམ་དུ་བསམས་
ནས་ནི། །དབུས་སུ་རང་གི་ལྷ་ཡི་གཟུགས། །བསམས་ཏེ་ཁ་རུ་བསྒོམ་པར་བྱ། །དེ་ནི་དེ་མ་ཐག་ཉིད་དུ། །བྱང་ཆུབ་ཡེ་ཤེས་འོད་འདྲར་འགྱུར། །ཉི་མ་ཤར་བའི་འོད་འདྲ་ཞིང་། །འཛམ་བུ་ཆུ་བོའི་གསེར་གྱི་
མདོག །ཧཱུྃ་ཡིག་རི་ལུ་ཙ་ན་ཀའི། །འབྲུ་ཚད་ཙམ་དུ་བསམས་ནས་ནི། །དབུས་སུ་རང་གི་ལྷ་ཡི་གཟུགས། །བསམས་ཏེ་ཁ་རུ་བསྒོམ་པར་བྱ། །དེ་ནི་དེ་མ་ཐག་ཉིད་དུ། །རྡོ་རྗེའི་སྐུ་དང་འོད་འདྲར་འགྱུར། །ཉི་མ་
ཤར་བའི་འོད་འདྲ་ཞིང་། །འཛམ་བུ་ཆུ་བོའི་གསེར་འོད་འདྲ། །མཁའ་དབྱིངས་གསལ་བའི་དཀྱིལ་གནས་པའི། །རྣམ་པར་སྣང་མཛད་རབ་ཏུ་བསྒོམ། །ལག་ཏུ་འཁོར་ལོ་རབ་བསྒོམས་ན། །འཁོར་ལོའི་རིག་པ་
འཛིན་པར་འགྱུར། །འཁོར་ལོ་ཆེན་པོའི་རིགས་བསྒོམས་ཏེ། །སངས་རྒྱས་སྐུ་ནི་རབ་སྦྱོར་བས། །ཡེ་ཤེས་མཆོག་གི་སྒྲུབ་པ་འདི། །ཡེ་ཤེས་རྡོ་རྗེ་དག་གིས་བྱ། །མཁའ་དབྱིངས་རྡོ་རྗེའི་དབུས་གནས་པར། །
ཡེ་ཤེས་མི་བསྐྱོད་རབ་བསྒོམས་ཏེ། །ལག་ཏུ་རྡོ་རྗེ་རྣམ་བསྒོམས་ན། །རྡོ་རྗེའི་རིག་པ་འཛིན་པར་འགྱུར། །རྡོ་རྗེ་ཆེན་པོའི་རིགས་བསྒོམས་ཏེ། །རྡོ་རྗེའི་སྐུར་ནི་རབ་སྦྱོར་བས། །རྡོ་རྗེ་མཆོག་གི་སྒྲུབ་པ་འདི། །ཡེ་
ཤེས་རྡོ་རྗེ་དག་གིས་བྱ། །མཁའ་དབྱིངས་རིན་ཆེན་དབུས་གནས་པར། །རིན་ཆེན་རྡོ་རྗེ་རབ་ཏུ་བསྒོམ། །ལག་ཏུ་རིན་ཆེན་རབ་བསྒོམས་ན། །རིན་ཆེན་རིག་པ་འཛིན་པར་འགྱུར། །རིན་ཆེན་ཆེན་པོའི་རིགས་བསྒོམས་

88-1-120b

ནས། །རིན་ཆེན་སྐུར་ནི་རབ་སྦྱོར་བས། །རིན་ཆེན་མཆོག་གི་སྒྲུབ་པ་འདི། །ཡེ་ཤེས་རྡོ་རྗེ་དག་གིས་བྱ། །མཁའ་དབྱིངས་ཆོས་ཀྱི་དབུས་གནས་པར། །ཚེ་དཔག་མེད་པ་རབ་ཏུ་བསྒོམ། །ལག་ཏུ་པད་མོ་རབ་བསྒོམས་ན། །པད་
མོའི་རིག་པ་འཛིན་པར་འགྱུར། །པད་མོ་ཆེན་པོའི་རིགས་བསྒོམས་ནས། །ཆོས་ཀྱི་སྐུར་ནི་རབ་སྦྱོར་བས། །པད་མོའི་མཆོག་གི་སྒྲུབ་པ་འདི། །ཡེ་ཤེས་རྡོ་རྗེ་དག་གིས་བྱ། །མཁའ་དབྱིངས་དམ་ཚིག་དབུས་གནས་པར། །
དོན་ཡོད་ཡེ་ཤེས་རབ་ཏུ་བསྒོམ། །ལག་ཏུ་རལ་གྲི་རབ་བསྒོམས་ན། །རལ་གྲིའི་རིག་པ་འཛིན་པར་འགྱུར། །དམ་ཚིག་ཆེན་པོའི་རིགས་བསྒོམས་ཏེ། །དམ་ཚིག་སྐུར་ནི་རབ་སྦྱོར་བས། །དམ་ཚིག་མཆོག་གི་སྒྲུབ་
པ་འདི། །ཡེ་ཤེས་རྡོ་རྗེ་དག་གིས་བྱ། །རྩེ་གསུམ་ཡེ་ཤེས་ལྕགས་ཀྱུ་སོགས། །རྡོ་རྗེའི་ཁྱད་པར་གྱིས་བསྒྲུབས་ན། །སྐུ་གསུང་ཐུགས་ཀྱི་སྒྲུབ་པ་ཡིས། །བསམ་གཏན་དེས་ནི་འགྲུབ་པར་འགྱུར། །བཅོམ་
ལྡན་འདས་དམ་ཚིག་ཆེན་པོའི་དངོས་གྲུབ་རྡོ་རྗེས་དེ་སྐད་ཅེས་བཀའ་སྩལ་ཏོ། །ལམ་གྱི་བཞི་མདོ་འམ་ཤིང་གཅིག་དྲུང་། །མཚན་མ་གཅིག་དང་ཞི་གནས་སུ། །རྡོ་རྗེ་དགུག་པའི་ཁྱད་པར་གྱིས། །སྒྲུབ་པ་པོས་ནི་རྟག་
ཏུ་བསྒྲུབ། །སྦྱོར་གསུམ་སྔགས་ཀྱི་སྐྱེས་བུ་ནི། །རྡོ་རྗེ་ཅན་གསུམ་སྦྱོར་བསམས་ནས། །སྐུ་དང་གསུང་ཐུགས་ལྕགས་གྱུ་ནི། །སངས་རྒྱས་ཡེ་ཤེས་བློ་ལྡན་གྱི། །རླུང་གི་དཀྱིལ་འཁོར་མཆོག་གནས་པ། །སངས་རྒྱས་
དགུག་པ་དམ་པ་ཡིན། །དམ་ཚིག་ལས་བྱུང་ཕྱོགས་བཅུ་པ། །རྡོ་རྗེས་བཀུག་ནས་ཉེ་བར་སྤྱད། །ནམ་མཁའི་དབྱིངས་ཀྱི་དམ་ཚིག་རྡོ་རྗེ་དགུག་པའོ། །རྣམ་པར་སྣང་མཛད་འཁོར་ལོ་ཆེ། །རྒྱལ་གནས་ལྕགས་ཀྱུ་བསམས་
ནས་ནི། །རྡོ་རྗེ་པད་མ་ལ་སོགས་པས། །དམ་ཚིག་དགུག་པའི་མཆོག་ནི་བྱ། །ཁམས་གསུམ་གྱི་དམ་ཚིག་དགུག་པའོ། །རྣམ་པ་ཀུན་གྱི་མཆོག་ལྡན་པའི། །སངས་རྒྱས་སྐུ་ནི་རྣམ་བསྒོམས་ལ། །ལག་ཏུ་སྐུ་དང་

88-1-121a

གསུང་ཐུགས་ནི། །ཀྱོ་བ་ལ་སོགས་རབ་ཏུ་བསྒོམ། །འདི་ལྟ་བུ་ཡི་སྦྱོར་བ་ཡིས། །དེ་ནི་གནས་ལས་བྱེད་པར་འགྱུར། །རྣམ་པ་ཀུན་གྱི་མཆོག་ལྡན་པའི། །རྡོ་རྗེ་སྐུ་ནི་རྣམ་བསྒོམས་ཤིང་། །ལྕེ་ཡི་རྡོ་རྗེའི་
སྦྱོར་བས་བསྒོམ། །རྡོ་རྗེའི་གསུང་དང་འདྲ་བར་འགྱུར། །རྣམ་པ་ཀུན་གྱི་མཆོག་ལྡན་པའི། །སངས་རྒྱས་སྐུར་ནི་རྣམ་བསྒོམས་ལ། །ལག་ཏུ་བསྒྲུབ་བྱ་བསམས་ན་ནི། །རྡོ་རྗེ་དང་ནི་འདྲ་བར་འགྱུར། །གསང་གསུམ་
དམ་ཚིག་མཆོད་པའི་མཆོག །མཆོད་པས་མཆོད་ནས་རབ་བསྒྲུབ་འདི། །དེ་ནི་སངས་རྒྱས་ཐམས་ཅད་ཀྱི། །གསང་བའི་སྙིང་པོ་བསྡུས་པ་ཡིན། །བཅོམ་ལྡན་འདས་གསང་བ་ཆེན་པོའི་དམ་ཚིག་གིས་དེ་སྐད་ཅེས་
བཀའ་སྩལ་ཏོ། །ཤ་ཆེན་དམ་ཚིག་མཆོག་གིས་ནི། །རྡོ་རྗེ་གསུམ་མཆོག་བསྒྲུབ་པར་བྱ། །བཤང་གཅི་དམ་ཚིག་མཆོག་གིས་ནི། །རིག་པ་འཛིན་པའི་གཙོ་བོར་འགྱུར། །གླང་པོའི་དམ་ཚིག་ཤ་ཡིས་ནི། །
མངོན་ཤེས་ལྔ་ཉིད་ཐོབ་པར་བྱ། །རྟ་ཤ་དག་གི་དམ་ཚིག་གིས། །མི་སྣང་བ་ཡི་བདག་པོར་འགྱུར། །ཁྱི་ཤ་དག་གི་དམ་ཚིག་གིས། །དངོས་གྲུབ་ཐམས་ཅད་འགྲུབ་པར་འགྱུར། །བ་གླང་ཤ་ཡི་དམ་ཚིག་གིས། །རྡོ་རྗེ་
དགུག་པའི་མཆོག་ཏུ་འགྱུར། །ཤ་རྣམས་ཐམས་ཅད་མ་རྙེད་ན། །ཐམས་ཅད་བསམས་པས་རྣམ་པར་བརྟག །རྡོ་རྗེའི་སྦྱོར་བ་འདི་བྱས་ན། །སངས་རྒྱས་ཐམས་ཅད་བྱིན་གྱིས་རློབ། །རྣམ་པ་ཀུན་མཆོག་ལྡན་པ་
ཡི། །སྐུ་གསུང་ཐུགས་ནི་རྡོ་རྗེ་ཅན། །སྙིང་གར་ཡེ་ཤེས་དམ་ཚིག་དང་། །དབུ་རྒྱན་རྡོ་རྗེ་མཆོག་འཛིན་པ། །སངས་རྒྱས་ཐམས་ཅད་མཉེས་འགྱུར་ལ། །འདི་ནི་དམ་ཚིག་ཚུལ་གྱི་མཆོག །དམ་ཚིག་མཆོག་གི་བྱ་བ་ནི། །
དངོས་གྲུབ་ཐམས་ཅད་བྱེད་པའི་མཆོག །དམ་ཚིག་ཐམས་ཅད་ཀྱི་ཡེ་ཤེས་རྡོ་རྗེའི་ཟས་ཞེས་བྱ་བའི་ཏིང་ངེ་འཛིན་ཏོ། །ལྕེ་ནི་དམ་ཚིག་རྡོ་རྗེ་མཆོག །ཧཱུྃ་ཡིག་རྡོ་རྗེ་ཅན་བསྒོམས་ཏེ། །བདུད་རྩི་ལྔ་ཡི་སྦྱོར་བ་

88-1-121b

ཡིས། །ཟོས་ན་རྡོ་རྗེ་གསུམ་ཐོབ་འགྱུར། །འདི་ནི་རྡོ་རྗེའི་ཚུལ་མཆོག་སྟེ། །ཨཱཿདང་ཨོཾ་གྱི་དམ་ཚིག་ཀྱང་། །འདི་ལྟ་བུ་ཡི་སྦྱོར་བ་ཡིས། །རྡོ་རྗེ་སེམས་དཔའ་འདྲ་བར་འགྱུར། །རྡོ་རྗེ་དམ་ཚིག་བདུད་རྩིའི་ཕྲེང་བ་
ཞེས་བྱ་བའི་ཏིང་ངེ་འཛིན་ཏོ། །རྡོ་རྗེ་དམ་ཚིག་གསུམ་གྲུབ་མཆོག །སྐུ་གསུམ་རྡོ་རྗེ་ཅན་དུ་འགྱུར། །ཕྱོགས་བཅུའི་སེམས་ཅན་ཐམས་ཅད་ཀྱི། །ཡིད་བཞིན་ནོར་བུའི་རྒྱ་མཚོར་འགྱུར། །འཇིག་རྟེན་ཁམས་ནི་ཐམས་
ཅད་དུ། །རྡོ་རྗེའི་བདག་ཉིད་སྣང་བར་བྱེད། །འཁོར་ལོའི་དམ་ཚིག་གྲུབ་པ་མཆོག །སངས་རྒྱས་སྐུ་དང་མཉམ་པར་འགྱུར། །གང་གཱའི་བྱེ་སྙེད་ཐམས་ཅད་དུ། །ཀུན་ནས་གྲུབ་པ་རྣམ་པར་སྤྱོད། །ཐམས་
ཅད་དམ་ཚིག་མཆོག་གིས་ནི། །རིག་པ་འཛིན་པའི་གཙོ་བོར་འགྱུར། །ཐམས་ཅད་དམ་ཚིག་གཟུགས་མཆོག་ནི། །རྡོ་རྗེ་སྐུ་ནི་རབ་བསྒོམས་པས། །མི་སྣང་གྱུར་པ་ཐམས་ཅད་ལ། །སྟོང་གསུམ་གཅིག་
པུས་སྣང་བྱེད་པས། །སངས་རྒྱས་ཀུན་གྱི་འཕྲོག་པ་དང་། །ལྷ་མཆོག་བུ་མོ་དག་ལ་སྤྱོད། །གང་གཱའི་བྱེ་སྙེད་སངས་རྒྱས་རྣམས། །རྡོ་རྗེ་གསུམ་གྱི་གནས་བཞུགས་པ། །རང་ལག་སྐྱུ་རུ་ར་བཞག་བཞིན། །
རྡོ་རྗེའི་མིག་གིས་མཐོང་བར་འགྱུར། །གང་གཱའི་བྱེ་སྙེད་ཞིང་རྣམས་ན། །སྒྲ་གྲག་པ་ནི་ཇི་སྙེད་པ། །རྣ་བའི་དྲུང་ན་འཁོད་པ་བཞིན། །མངོན་ཤེས་ཁྱུ་མཆོག་གིས་ཐོས་འགྱུར། །གང་གཱའི་བྱེ་སྙེད་ཞིང་དག་
གི། སེམས་ཅན་ཀུན་གྱི་སེམས་རྣམས་ནི། །སྐུ་གསུང་ཐུགས་ཀྱི་མཚན་ཉིད་ཅན། །རོལ་མོ་ལྟར་བྱུང་སེམས་རིག་འགྱུར། །བསྐལ་པ་གང་གཱའི་བྱེ་སྙེད་དུ། །འཁོར་བར་གནས་པར་འབྱུང་བ་ཡི། །སྔོན་གྱི་
གནས་ཀྱི་གཏན་ཚིགས་རྣམས། །ཞག་གསུམ་ལོན་པ་བཞིན་དུ་དྲན། །གང་གཱའི་བྱེ་མ་སྙེད་ཀྱི་སྐུ། །སངས་རྒྱས་སྤྲིན་ལ་སོགས་བརྒྱན་པས། །བསྐལ་པ་གང་གཱའི་བྱེ་སྙེད་དུ། །རྫུ་འཕྲུལ་མཆོག་གི་རྡོ་རྗེས་

88-1-122a

འགེངས། །བཅོམ་ལྡན་འདས་དམ་ཚིག་མངོན་པར་མཁྱེན་པས་དེ་སྐད་ཅེས་བཀའ་སྩལ་ཏོ། །དེ་ལ་མངོན་པར་ཤེས་པ་ལྔ་ནི་རྡོ་རྗེའི་སྤྱན་དང་། རྡོ་རྗེའི་སྙན་དང་རྡོ་རྗེའི་ཐུགས་དང་། རྡོ་རྗེའི་
གནས་དང་རྡོ་རྗེའི་རྫུ་འཕྲུལ་ལོ། །སངས་རྒྱས་མངོན་ཤེས་དོན་གྲུབ་ཅིང་། །སངས་རྒྱས་སྐུ་དང་འདྲ་བར་འགྱུར། །གང་གཱའི་བྱེ་སྙེད་གྲངས་མེད་པའི། །འཁོར་གྱིས་ཡོངས་སུ་བསྐོར་ནས་སུ། །རྡོ་རྗེའི་སྐུ་
དང་གསུང་དང་ཐུགས། །འཇིག་རྟེན་ཁམས་ཀུན་རྣམ་པར་བསྒྲོད། །བསྙེན་པ་དམ་ཚིག་སྦྱོར་བ་དང་། །ཉེ་བར་སྒྲུབ་པ་འབྱུང་བ་དང་། །སྒྲུབ་པའི་དོན་དུ་དམ་ཚིག་དང་། །སྒྲུབ་པ་ཆེན་པོ་དག་དང་བཞི། །
ཤེས་བྱས་རྡོ་རྗེའི་བྱེ་བྲག་གིས། །དེ་ནས་ལས་རྣམས་བསྒྲུབ་པར་བྱ། །བསྙེན་པ་ཏིང་འཛིན་རབ་སྦྱོར་བ། །བྱང་ཆུབ་མཆོག་ནི་བསྒོམ་པར་བྱ། །ཉེ་བར་སྒྲུབ་པ་གྲུབ་མཆོག་ལ། །རྡོ་རྗེའི་སྐྱེ་མཆེད་རྣམ་དཔྱད་པ། །སྒྲུབ་
པ་བསྐུལ་བ་རབ་བརྗོད་པ། །སྔགས་དང་བདག་པོ་རྣམ་བསྒོམ་པ། །སྒྲུབ་པ་ཆེན་པོ་བྱེད་པའི་ཚེ། །རང་སྔགས་རྡོ་རྗེ་ཅན་གྱི་གཟུགས། །དབུ་རྒྱན་ལ་ནི་བདག་པོ་བསམ། །ཡེ་ཤེས་རྡོ་རྗེ་འགྲུབ་པར་འགྱུར། །བསྙེན་
པ་ཡེ་ཤེས་བདུད་རྩིས་བྱ། །ཐམས་ཅད་དུ་ནི་རྟག་ཏུ་ཉིད། །འདི་གང་སྔགས་རྣམས་ཐམས་ཅད་ཀྱི། །སྔགས་དང་དེ་ཉིད་དོན་སྒྲུབ་པའོ། །དགོན་པ་ཆེན་པོའི་ས་ཕྱོགས་དང་། །རབ་ཏུ་སྐྱེ་བོས་དབེན་པ་དང་། །རི་
བོ་ནགས་འདབ་ཆུ་ངོགས་སུ། །རྟག་ཏུ་དངོས་གྲུབ་ཐོབ་པར་འགྱུར། །བཅོམ་ལྡན་འདས་རྡོ་རྗེ་སྒྲུབ་པ་ཆེན་པོས་དེ་སྐད་ཅེས་བཀའ་སྩལ་ཏོ། །ཡང་ན་རྡོ་རྗེ་བཞི་དག་གིས། །བརྟུལ་ཞུགས་བརྟན་པས་བསྙེན་པར་
བྱ། །རྡོ་རྗེ་སྐུ་གསུམ་མཉམ་དེ་ཡིས། །བསྒོམས་ན་དངོས་གྲུབ་ཐོབ་པར་འགྱུར། །ཐུན་བཞི་རྣམས་དང་རབ་སྦྱོར་བས། །གནས་ལྔར་བློ་དང་ལྡན་པ་ཡིས། །ཨོཾ་གྱི་ཡི་གེ་བསྒོམས་ནས་ནི། །ཡེ་ཤེས་རྡོ་རྗེས་སྡོམ་པ་བསྟན། །

88-1-122b

ཞག་བདུན་དང་ནི་ཟླ་ཕྱེད་དང་། །ཟླ་གཅིག་ཟླ་བ་ཕྱེད་དང་གཉིས། །རྡོ་རྗེ་དམ་ཚིག་བསྒྲུབས་ན་ནི། །དངོས་གྲུབ་མྱུར་དུ་ཐོབ་པར་འགྱུར། །ཞག་གྲངས་བྱེ་བྲག་རབ་དབྱེ་བས། །ང་ཡིས་རྒྱས་པར་རབ་ཏུ་བསྟན། །ཕྱོགས་ཀྱི་ནང་
ལས་དངོས་གྲུབ་གསུངས། །གསང་བ་མཆོག་ལས་བྱུང་རྣམས་ཀྱིས། །དེ་ལ་འདི་ནི་ཉེ་བར་བསྒྲུབ་པའི་སྡོམ་པའི་ཡུལ་ལོ། །སངས་རྒྱས་སྐུ་འཛིན་དཔལ་དང་ལྡན། །རྡོ་རྗེ་གསུམ་དང་མི་ཕྱེད་དངོས། །བདག་ལ་བྱིན་གྱིས་
བརླབ་གནས་དེང་། །སྐུ་ཡི་རྡོ་རྗེས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་གསུམ་དང་མི་ཕྱེད་དངོས། །བདག་ལ་བྱིན་གྱིས་བརླབ་གནས་དེང་། །སྐུ་ཡི་རྡོ་རྗེས་མཛད་དུ་གསོལ། །དེ་ལ་འདི་
ནི་སྒྲུབ་པའི་སྡོམ་པའི་ཡུལ་ལོ། །ཆོས་ཉིད་གསུང་ལམ་དཔལ་དང་ལྡན། །རྡོ་རྗེ་གསུམ་དང་མི་ཕྱེད་དངོས། །བདག་ལ་བྱིན་གྱིས་བརླབ་གནས་དེང་། །གསུང་གི་རྡོ་རྗེས་མཛད་དུ་གསོལ། །ཕྱོགས་བཅུར་བཞུགས་པའི་
སངས་རྒྱས་རྣམས། །རྡོ་རྗེ་གསུམ་དང་མི་ཕྱེད་དངོས། །བདག་ལ་བྱིན་གྱིས་བརླབ་གནས་དེང་། །གསུང་གི་རྡོ་རྗེས་མཛད་དུ་གསོལ། །དེ་ལ་འདི་ནི་སྒྲུབ་པ་ཆེན་པོའི་སྡོམ་པའི་ཡུལ་ལོ། །རྡོ་རྗེ་ཐུགས་འཛིན་
དཔལ་དང་ལྡན། །རྡོ་རྗེ་གསུམ་དང་མི་ཕྱེད་དངོས། །བདག་ལ་བྱིན་གྱིས་བརླབ་གནས་དེང་། །ཐུགས་ཀྱི་རྡོ་རྗེས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་གསུམ་དང་མི་ཕྱེད་
དངོས། །བདག་ལ་བྱིན་གྱིས་བརླབ་གནས་དེང་། །ཐུགས་ཀྱི་རྡོ་རྗེས་མཛད་དུ་གསོལ། །སངས་རྒྱས་རྡོ་རྗེ་སེམས་དཔའ་འམ། །ཡང་ན་ཆོས་ཀྱི་སེམས་དཔའང་རུང་། །གལ་ཏེ་རྨོངས་བདག་ཉིད་འདའ་ན། །ཚལ་བར་
འགས་འདིར་གདོན་མི་ཟ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྦྱོར་བ་དམ་ཚིག་སྒྲུབ་པ་མཆོག་ངེས་པར་བསྟན་པའི་ལེའུ་སྟེ་བཅུ་གཉིས་པའོ།། །།   དེ་ནས་བཅོམ་ལྡན་བདེ་

88-1-123a

གཤེགས་ཀུན། །ཡེ་ཤེས་རྡོ་རྗེ་མཆོག་འཛིན་དང་། །སེམས་ཅན་ཀུན་དོན་ཡང་དག་འབྱུང་། །བྱང་ཆུབ་སེམས་དཔའ་བློ་ལྡན་གྱིས། །ཐུབ་པ་དོན་ཀུན་རྡོ་རྗེ་ཅན། །སྟོན་པ་ཆེ་ལ་ཕྱག་འཚལ་ནས། །དམ་ཚིག་དེ་ཉིད་མཁྱེན་པ་ལ། །མཆོད་དེ་རྡོ་
རྗེའི་དབྱངས་འདི་གསུངས། །ཨེ་མའོ་སངས་རྒྱས་ཚུལ་རེ་བཟང་། །ཨེ་མའོ་བྱང་ཆུབ་ཚུལ་གྱི་མཆོག །ཨེ་མའོ་ཆོས་ཀྱི་ཚུལ་རེ་ཞི། །ཨེ་མའོ་སྔགས་ཀྱི་ཚུལ་རེ་བརྟན། །མ་སྐྱེས་པའི་ཡི་ཆོས་རྣམས་ནི། །
ངོ་བོ་ཉིད་ཀྱིས་ཁྱད་པར་ཅན། །རྣམ་པར་མི་རྟོག་ཡང་དག་ལ། །ཡེ་ཤེས་འབྱུང་བར་རབ་ཏུ་གསུངས། །ཡིད་འོང་སྔགས་རྣམས་ཀུན་བསྡུས་པ། །རྡོ་རྗེ་བཟླས་པ་ཡེ་ཤེས་ཆེ། །སྐུ་གསུང་མི་ཕྱེད་དཀྱིལ་འཁོར་ནི། །སངས་
རྒྱས་ཡེ་ཤེས་ཐོབ་འགྱུར་བ། །རྡོ་རྗེ་མི་ཕྱེད་གསུམ་བསྒོམས་པས། །བཟླས་པ་རྡོ་རྗེའི་སྦྱོར་བ་ཡིས། །སངས་རྒྱས་ཀུན་གྱིས་བྱིན་གྱིས་བརློབ། །རིགས་ནི་སྔགས་རྣམས་ཐམས་ཅད་ཀྱི། །སྐུ་དང་གསུང་
དང་ཐུགས་མཚན་ཉིད། །སྔགས་ཀྱི་བཟླས་པ་དེ་རིང་གསུངས། །ཡེ་ཤེས་རྒྱ་མཚོ་གསན་པ་དང་། །སྐུ་གསུང་ཐུགས་ཀྱི་རྡོ་རྗེ་ཅན། །སངས་རྒྱས་དུས་གསུམ་བྱུང་བ་རྣམས། །རྡོ་རྗེ་སྔགས་ནི་རབ་བསྒོམས་
པས། །ཡེ་ཤེས་མཉམ་མེད་ཐོབ་འགྱུར་བ། །བཅོམ་ལྡན་འདས་ཀྱི་བཤད་དུ་གསོལ། །དེ་ནས་སྟོན་པ་རྡོ་རྗེ་འཛིན། །ནམ་མཁའ་རྡོ་རྗེ་ཡེ་ཤེས་བྱུང་། །བྱེད་སྐྱེད་དམ་པ་མཆོག་གི་གཙོས། །རྡོ་རྗེ་བཟླས་
པ་འདི་གསུངས་སོ། །སྔགས་ཀུན་དོན་གྱི་བཟླས་པ་ནི། །རྡོ་རྗེ་མི་ཕྱེད་གསུམ་མཚན་ཉིད། །དབྱེ་བ་གསུམ་གྱི་རྡོ་རྗེའི་མཐར། །བཀོད་པ་རྡོ་རྗེ་གསུམ་བརྗོད་བྱ། །སྐུ་གསུང་ཐུགས་ཀྱི་གནས་རྣམས་
སུ། །སྤྲོ་བ་རྣམ་པ་གསུམ་དག་བྱ། །རྡོ་རྗེ་བཟླས་པ་འདི་ཡིས་ནི། །རྡོ་རྗེ་གསུམ་གྱི་ཐུགས་འདྲར་འགྱུར། །སངས་རྒྱས་རྣམས་ཀྱི་སྐུ་གསུང་ཐུགས། །བསྒོམས་ནས་མཆོད་པའི་མཆོག་བརྟག་པ། །ཡེ་ཤེས་

88-1-123b

རྡོ་རྗེས་བྱས་ན་ནི། །རྡོ་རྗེ་གསུམ་གྱི་ཐུགས་འདྲར་འགྱུར། །སངས་རྒྱས་རྣམས་ཀྱི་སྐུ་གསུང་ཐུགས། །བསམས་ནས་མཆོད་པའི་མཆོག་བརྟག་པ། །ཡེ་ཤེས་རྡོ་རྗེས་རབ་ཏུ་བྱ། །འདི་ནི་བྱང་ཆུབ་མཆོག་འཐོབ་པའོ། །
ཡང་ན་དབྱེ་བ་རྣམ་གསུམ་གྱིས། །སོ་སོ་སོ་སོར་སྤྲོ་བར་བྱ། །སྐུ་དང་གསུང་ཐུགས་བདག་མེད་པ། །ཡེ་ཤེས་སེམས་ཀྱི་ཡང་དག་སྤྲོ། །བརྗོད་ནས་རྡོ་རྗེ་སྤྲོ་བྱ་ཞིང་། །རྫོགས་ནས་རབ་ཏུ་བསྡུ་བར་བྱ། །འདི་ནི་
ཡེ་ཤེས་སྤྱན་ཕྱེ་བའི། །སངས་རྒྱས་རྣམས་ནི་ཀུན་གྱི་ཡིན། །སྐུ་ཡི་རྡོ་རྗེ་རྫོགས་བྱང་ཆུབ། །དངོས་དང་དངོས་མེད་རྣམ་དཔྱད་པ། །སངས་རྒྱས་སྐུ་ཞེས་བྱ་བར་གསུངས། །དེ་ནི་སྐུ་ཡི་བཟླས་པར་བཤད། །གསུང་
གི་དམ་ཚིག་རྫོགས་བྱང་ཆུབ། །སྒྲ་དང་སྒྲ་མིན་རྣམ་དཔྱད་པ། །གསུང་གི་རྡོ་རྗེ་ཞེས་གསུངས་ཏེ། །དེ་ནི་གསུང་གི་བཟླས་པར་བཤད། །ཐུགས་ཀྱི་དམ་ཚིག་རྫོགས་བྱང་ཆུབ། །གནས་པའི་རྡོ་རྗེ་
རྣམ་དཔྱད་པ། །ཐུགས་ཀྱི་རྡོ་རྗེ་ཞེས་གསུངས་ཏེ། །དེ་ནི་ཐུགས་ཀྱི་བཟླས་པར་བཤད། །དོན་གྱི་རྗེས་རྟོགས་བཟླས་པ་ནི། །ངོ་བོ་ཉིད་བྱུང་བཟང་པོ་ཡིས། །དུས་གསུམ་སངས་རྒྱས་རྣམས་དཔྱད་པ། །དེ་ནི་
རིན་ཆེན་བཟླས་པར་བཤད། །སངས་རྒྱས་ཞིང་ལས་ཐམས་ཅད་དུ། །སྐུ་ཡི་སྤྲིན་རྣམས་སྤྲོ་བ་ནི། །བཞུད་ཅིང་བྱོན་པ་རྡོ་རྗེའི་དོན། །དེ་ནི་དོན་ཡོད་བཟླས་པར་བཤད། །ཁྲོ་བོའི་དམ་ཚིག་ཤེས་པ་ཡིས། །རང་གི་
རྡོ་རྗེས་བསྒྲགས་དཀྱིལ་འཁོར། །སྔགས་ཀྱི་ཡི་གེའི་ཚིག་ཐོས་པ། །དེ་ནི་ཁྲོ་བོའི་བཟླས་པར་བཤད། །འདོད་པའི་དོན་གྱིས་མྱོས་གྱུར་མ། །སེམས་ཅན་ཀུན་ལ་ཕན་དགའ་མེད། །སེམས་ཅན་གཏི་མུག་གནས་
ལ་འཇོག །དེ་ནི་གཏི་མུག་བཟླས་པར་བཤད། །འདོད་ཆགས་རྡོ་རྗེ་ལས་བྱུང་ཚིག །ལུས་དང་ངག་སེམས་ལ་གནས་པ། །སེམས་ཅན་འདོད་ཆགས་མཚོར་གནས་བཞག །དེ་ནི་འདོད་ཆགས་བཟླས་

88-1-124a

པར་བཤད། །ཞེ་སྡང་རྡོ་རྗེ་ལས་བྱུང་སེམས། །ལུས་དང་ངག་སེམས་ལ་གནས་པ། །སེམས་ཅན་ཞེ་སྡང་གནས་ལ་བཞག །དེ་ནི་ཞེ་སྡང་བཟླས་པར་བཤད། །དམ་ཚིག་རྡོ་རྗེ་གསུམ་དེ་ཉིད། །དམ་
ཚིག་རྡོ་རྗེ་ཅན་དབུ་མ། །དེ་ཉིད་དམ་ཚིག་རྡོ་རྗེ་ཡི། །མ་ནིང་བཟླས་པ་ཞེས་བཤད་དོ། །འདོད་ཆགས་དེ་ཉིད་དོན་བསྒོམ་པ། །རྡོ་རྗེ་བདག་པོ་ཐམས་ཅད་ནི། །སེམས་ཅན་ཀུན་ལ་ཕན་འདོད་པའི། །འདོད་
ཆགས་ལས་སྐྱེས་བྱང་ཆུབ་མཛད། །རིག་པ་ཆེན་པོ་སྤྱན་ལ་སོགས། །རྟག་ཏུ་འདོད་པའི་དོན་བརྩོན་པ། །འདོད་པའི་ལོངས་སྤྱོད་དག་གིས་ནི། །ཇི་ལྟར་འདོད་པ་བསྟེན་ན་འགྲུབ། །གཏི་མུག་དམ་ཚིག་
ལས་བྱུང་བ། །རིག་པའི་རྒྱལ་པོ་རྡོ་རྗེ་ཅན། །མ་ནིང་དག་གི་གནས་གྲུབ་པ། །དངོས་གྲུབ་དམ་པ་རབ་ཏུ་སྟེར། །ཁྲོ་བོ་ཞེ་སྡང་གནས་ལས་སྐྱེས། །རྟག་ཏུ་གསོད་ལ་བརྩོན་པ་རྣམས། །གསོད་པའི་དོན་གྱིས་
སྒྲུབ་པ་པོ། །མཆོག་གི་ཆོས་ཅན་གྱིས་འགྲུབ་འགྱུར། །བཅོམ་ལྡན་འདས་སྐྱེས་བུ་ཆེན་པོའི་དམ་ཚིག་གིས་དེ་སྐད་ཅེས་བཀའ་སྩལ་ཏོ། །ཡེ་ཤེས་འཁོར་ལོ་ཅན་གྱི་ནི། །སྙིང་ཀའི་དབུས་སུ་འཁོར་ལོ་བསྒོམ། །
གསལ་བའི་དཀྱིལ་འཁོར་དབུས་གནས་པ། །དབུས་སུ་འཁོར་ལོའི་དོན་བསྒོམ་མོ། །ཡེ་ཤེས་རྡོ་རྗེ་ཅན་གྱིས་ནི། །སྙིང་ཀའི་དབུས་སུ་རྡོ་རྗེ་བསྒོམ། །རྡོ་རྗེ་དཀྱིལ་འཁོར་དབུས་གནས་པ། །རྡོ་རྗེའི་སྔགས་དོན་
བསྒོམ་པར་བྱ། །རིན་ཆེན་ཡེ་ཤེས་ཅན་གྱིས་ནི། །སྙིང་གའི་དབུས་སུ་རིན་ཆེན་བསྒོམ། །རིན་ཆེན་དཀྱིལ་འཁོར་དབུས་གནས་པ། །རིན་ཆེན་སྔགས་དོན་བསྒོམ་པར་བྱ། །པད་མ་ཡེ་ཤེས་ཅན་གྱིས་ནི། །སྙིང་གའི་
དབུས་སུ་པད་མ་བསྒོམ། །ཆོས་ཀྱི་དཀྱིལ་འཁོར་དབུས་གནས་པ། །པད་མའི་སྔགས་དོན་བསྒོམ་པར་བྱ། །རལ་གྲི་ཡེ་ཤེས་ཅན་གྱིས་ནི། །སྙིང་གའི་དབུས་སུ་རལ་གྲི་བསྒོམ། །དམ་ཚིག་དཀྱིལ་འཁོར་དབུས་གནས་

88-1-124b

པ། །རལ་གྲིའི་སྔགས་དོན་བསྒོམ་པར་བྱ། །དཀྱིལ་འཁོར་ཀུན་གྱི་ངོས་རྣམས་སུ། །སངས་རྒྱས་ལྔ་རྣམས་དགོད་པར་བྱ། །འོད་ཟེར་ལྔ་ཡི་བྱེ་བྲག་གིས། །སྤྲོས་ན་བྱང་ཆུབ་ཐོབ་པར་འགྱུར། །སྔགས་རྣམས་ཐམས་ཅད་
སྤྲོ་བ་ནི། །བྱེ་བྲག་རྣམ་པ་གཉིས་སུ་བསྒྲགས། །སྐུ་གསུམ་རྡོ་རྗེའི་བྱེ་བྲག་གིས། །སྤྲོ་བ་དང་ནི་བསྡུ་བར་བྱ། །ལུས་ནི་སྐུ་ཡི་ངོ་བོ་ཉིད། །སེམས་ནི་ཐུགས་ཀྱི་ངོ་བོ་ཉིད། །ངག་ནི་གསུང་གི་རང་བཞིན་གྱིས། །མཆོད་ན་
མཆོད་པའི་གནས་ཐོབ་འགྱུར། །དཀྱིལ་འཁོར་ཆེན་པོའི་འཁོར་ལོ་ཡིས། །རྡོ་རྗེ་ལྔ་ནི་བསྒོམ་པར་བྱ། །སྐུ་གསུང་རྡོ་རྗེའི་དབུས་སུ་ནི། །རང་གི་བདག་པོའི་གཟུགས་བསམས་ནས། །རང་གི་སྔགས་ཀྱི་རྡོ་རྗེའི་
གཟུགས། །དཀྱིལ་འཁོར་རྣམ་པ་བཞི་དག་ནི། །ཁ་དོག་རྣམ་བཞིར་ཀུན་བརྟགས་ལ། །སྙིང་གར་སྔགས་ཀྱི་དོན་བསྒོམ་པ། །རྡོ་རྗེ་རྣམ་པ་བཞི་ཡི་ལས། །བསམ་གཏན་རྡོ་རྗེ་ཅན་དག་བྱེད། །འདི་ནི་
སྔགས་རྣམས་ཐམས་ཅད་ཀྱི། །མཆོག་ཏུ་རྟག་པ་གསང་ཆེན་ནོ། །ཞི་བ་ལ་ནི་སྤྱན་གྱི་ཚུལ། །རྒྱས་པ་པད་མོ་རྡོ་རྗེ་ཅན། །དབང་ལ་རྣམ་པར་སྣང་མཛད་གནས། །རྡོ་རྗེ་ཁྲོ་བོ་མངོན་སྤྱོད་
ལ། །འདི་དེ་རྡོ་རྗེ་ཐམས་ཅད་ཀྱི། །གསང་བ་སྐུ་གསུམ་ལས་བྱུང་བས། །སྤྲུལ་པ་སྔགས་རྣམས་ཐམས་ཅད་ཀྱི། །བྱ་བའི་རོལ་མོས་མཚན་པའོ། །མ་དད་སྨྲ་བའི་སེམས་ཅན་དང་། །སློབ་དཔོན་རྡོ་རྗེ་ཅན་སྨོད་པ། །གདུག་
པའི་སེམས་ཅན་གཞན་རྣམས་ལའང་། །རབ་ཏུ་བསྐུལ་བ་འདི་བྱའོ། །བཅོམ་ལྡན་འདས་ཡེ་ཤེས་ཆེན་པོ་འཁོར་ལོ་རྡོ་རྗེས་དེ་སྐད་ཅེས་བཀའ་སྩལ་ཏོ། །ཁམས་གསུམ་གནས་པའི་སེམས་ཅན་རྣམས། །སངས་རྒྱས་སྐུར་
ནི་རྣམ་བསྒོམས་ལ། །དགྲ་བོ་བསད་པར་བསམས་ནས་སུ། །དེ་ནས་ལས་རྣམས་བརྩམ་པར་བྱ། །ནམ་མཁའི་དབྱིངས་ཀྱི་དབུས་གནས་པ། །རྡོ་རྗེ་རྩེ་ལྔ་ཞལ་བཞི་པ། །རྣམ་པ་ཀུན་གྱི་མཆོག་དང་ལྡན། །རྡོ་རྗེ་

88-1-125a

སེམས་དཔར་རྣམ་པར་བསྒོམ། །དུས་གསུམ་དམ་ཚིག་ལས་བྱུང་བའི། །སངས་རྒྱས་འཁོར་ལོ་རྣམ་བསྒོམས་ལ། །སངས་རྒྱས་འཁོར་ལོ་སྟོབས་པོ་ཆེ། །ལག་པ་གཡས་པས་འདི་བྱའོ། །ཕྱོགས་བཅུ་
ནས་བྱུང་སེམས་ཅན་རྣམས། །སངས་རྒྱས་སྐུ་ཡི་བྱེ་བྲག་གིས། །བསྡུས་ཏེ་གོང་བུའི་ཚུལ་གྱིས་སུ། །དེ་དག་རང་གི་ལུས་ལ་གཞུག །སངས་རྒྱས་ཡེ་ཤེས་འཁོར་ལོ་ཅན། །སླར་ཡང་སྤྲོ་བར་རབ་ཏུ་བྱ། །ཁྲོས་པས་
འཁྲུགས་པའི་ཁྲོ་བོ་བསམ། །མི་སྡུག་རབ་གསལ་འཇིགས་སུ་རུང་། །མཚོན་ཆ་སྣ་ཚོགས་མཆོག་འཛིན་པ། །གསོད་པའི་དོན་གྱི་མཆོག་སེམས་པ། །གདུག་པ་ཆེན་པོ་གསོད་པར་བྱེད། །རྡོ་རྗེ་སེམས་དཔའ་རང་ཉིད་
ཀྱང་། །སངས་རྒྱས་སྐུ་གསུམ་མཆོག་སྩོལ་བས། །རྡོ་རྗེ་གསུམ་གྱི་དཀྱིལ་འཁོར་གནས། །དངོས་གྲུབ་སྟེར་འགྱུར་རྨོངས་བདག་ཉིད། །འདི་ལ་ཐེ་ཚོམ་མི་བྱའོ། །འདི་ནི་ཉིན་ཞག་བདུན་བྱ་སྟེ། །སངས་རྒྱས་
ཀྱིས་ཀྱང་མི་འགྲུབ་བོ། །རྡོ་རྗེའི་དམ་ཚིག་ཡེ་ཤེས་ཀྱི་བཀའི་འཁོར་ལོ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའི་དབྱིངས་ཀྱི་དབུས་གནས་པ། །འཁོར་ལོ་རྡོ་རྗེ་འབར་བས་བརྒྱན། །རྣམ་པ་ཀུན་གྱི་མཆོག་དང་ལྡན། །རྣམ་
པར་སྣང་མཛད་རབ་ཏུ་བསྒོམ། །དུས་གསུམ་དམ་ཚིག་ལས་བྱུང་བ། །རྡོ་རྗེ་སེམས་དཔའ་གྲགས་ཆེན་པོ། །རྡོ་རྗེ་མེ་སྟག་འཕྲོ་བ་ཅན། །དེ་ཡི་ཕྱག་ན་བསྣམས་པར་བསྒོམ། །ཕྱོགས་བཅུ་ནས་བྱུང་སེམས་
ཅན་རྣམས། །རྡོ་རྗེའི་སྐུ་ཡི་ཁྱད་པར་གྱིས། །འོད་ཟེར་ཚུལ་གྱིས་བསྡུས་ནས་ནི། །དེ་དག་བདག་གི་ལུས་ལ་གཟུད། །རྡོ་རྗེ་ཐམས་ཅད་སྤྲོ་བ་ནི། །ཡེ་ཤེས་མཆོག་གི་གཉེན་གྱིས་བྱ། །སྐུ་གསུང་ཐུགས་ཀྱི་སྦྱོར་བ་ཅན། །
སངས་རྒྱས་ཐམས་ཅད་བདག་ཉིད་གསོན། །བདག་ནི་དཔལ་ལྡན་རྡོ་རྗེ་འཆང་། །བཀའ་ཡི་འཁོར་ལོ་རབ་སྦྱོར་བས། །གལ་ཏེ་དམ་ཚིག་ལས་འདས་ན། །རྡོ་རྗེ་ཀུན་ནས་འབར་གཟུགས་ཀྱིས། །སྐུ་གསུམ་

88-1-125b

ལས་བྱུང་དགས་པར་བགྱིས། །ཞིག་པར་འགྱུར་འདིར་གདོན་མི་འཚལ། །འཁོར་ལོའི་དམ་ཚིག་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །སངས་རྒྱས་དཀྱིལ་འཁོར་རྡོ་རྗེ་ཅན། །ནམ་མཁའ་རྡོ་རྗེའི་དབུས་
གནས་བསམ། །གཤིན་རྗེ་གཤེད་ནི་འཁོར་ལོ་ཆེ། །རང་གི་རྡོ་རྗེ་རབ་ཏུ་བརྟག །དུས་གསུམ་སངས་རྒྱས་སེམས་དཔའ་རྣམས། །སྐུ་གསུམ་དཀྱིལ་འཁོར་ལ་བཞུགས་པ། །སླར་ཡང་སངས་རྒྱས་གཤིན་རྗེ་གཤེད། །རྣམ་
པ་འདྲ་བར་སྤྲོ་བར་བྱ། །སེམས་ཅན་དུས་གསུམ་ལ་བཞུགས་པ། །གདུག་སེམས་ཅན་དང་དགྲ་བོ་རྣམས། །ཁྲོས་པས་ཐམས་ཅད་གསོད་པར་བསྒོམ། །འདི་ནི་རྡོ་རྗེ་བཀའ་དཀྱིལ་འཁོར། །དམ་ཚིག་ཐམས་
ཅད་ལས་བྱུང་བ་སྐུ་གསུམ་གྱི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །སྐུ་གསུང་ཐུགས་ཀྱི་རྡོ་རྗེ་འམ། །རང་སྔགས་དོན་གྱི་ཡོན་ཏན་ནམ། །ཡང་ན་གཙུག་ཏོར་དམ་ཚིག་གིས། །བཀའ་ཡི་འཁོར་ལོ་
སྦྱར་བར་བྱ། །སྔགས་ཀུན་བསྲུང་ཕྱིར་ཡེ་ཤེས་མཆོག །རྡོ་རྗེ་ཅན་གྱིས་བྱ་བ་སྟེ། །འདི་ནི་རྡོ་རྗེ་ཐམས་ཅད་ཀྱི། །བྱང་ཆུབ་བསྲུང་བའི་དོན་ཞེས་བྱ། །བཅོམ་ལྡན་འདས་བྱང་ཆུབ་སེམས་དཔའ་རྡོ་རྗེས་དེ་སྐད་ཅེས་
བཀའ་སྩལ་ཏོ། །ནམ་མཁའི་རྡོ་རྗེའི་དབུས་གནས་པར། །རྣམ་པར་སྣང་མཛད་སྐུ་མཆོག་ལས། །འབྱུང་བའི་སྐུ་གསུམ་དམ་ཚིག་ཆོས། །བསམས་ནས་གདན་དེ་རབ་ཏུ་བརྟག །མཁའ་དབྱིངས་སངས་རྒྱས་
ཐམས་ཅད་ཀྱིས། །ཡོངས་སུ་གང་བར་རྣམ་པར་བསྒོམ། །རང་སྔགས་ཡི་གེ་གནས་ཡེ་ཤེས། །ཐུགས་ཀྱི་རྣམ་པར་བསྒོམ་པར་བྱ། །སླར་ཡང་སངས་རྒྱས་སེམས་ཙམ་དུ། །བསྒོམས་པ་རྣམས་ནི་རབ་ཏུ་བསྡུ། །
ཐུགས་ཀྱི་རྡོ་རྗེར་བྱས་ནས་སུ། །སྐུ་གསུམ་ལ་ནི་དེ་དག་གཟུད། །བཅོམ་ལྡན་འདས་ནམ་མཁའི་རྡོ་རྗེས་དེ་སྐད་ཅེས་བཀའ་སྩལ་ཏོ། །རྡོ་རྗེའི་སྔགས་རིན་པོ་ཆེ་རབ་ཏུ་སྣང་བར་བྱེད་པ་ཞེས་བྱ་བའི་ཏིང་ངེ་འཛིན་

88-1-126a

ཏོ། །རྣམ་པ་ཀུན་གྱི་མཆོག་ལྡན་པའི། །རྡོ་རྗེ་སེམས་དཔའ་རབ་ཏུ་བསྒོམ། །སངས་རྒྱས་རིམ་པར་བཀོད་ནས་ནི། །ཆུ་ཡི་སྟེང་དུ་བཅག་པར་བྱ། །རྐང་པ་མཉམ་བཞག་སྦྱོར་བ་ཡིས། །སྤྱི་བོའི་སྟེང་དུ་རྐང་
པ་བསྒོམ། །བཅོམ་ལྡན་འདས་ངོ་བོ་ཉིད་དག་པས་དེ་སྐད་ཅེས་བཀའ་སྩལ་ཏོ། །རྡོ་རྗེ་ཆུ་གཏེར་རྐང་པས་གནོན་པ་ཞེས་བྱ་བའི་ཏིང་ངེ་འཛིན་ཏོ། །དབུས་སུ་དབང་ཆེན་དཀྱིལ་འཁོར་ནི། །བསམས་ཏེ་ཁྲོ་བོའི་རིགས་
བཞག་ལ། །ལས་ཀྱི་རྡོ་རྗེ་གནས་གནོན་པ། །དེ་ཡི་སྤྱི་བོར་བསྒོམ་པར་བྱ། །མུ་སྟེགས་ཐམས་ཅད་དང་། ཕས་ཀྱི་རྒོལ་བའི་འཁྲུལ་འཁོར་གནོན་པ་ཞེས་བྱ་བའི་ཏིང་ངེ་འཛིན་ཏོ། །ཁྲོ་བོའི་གཟུགས་གསུམ་རྡོ་རྗེ་
མཆོག །གེ་སར་སེར་པོའི་མདོག་འདྲ་བ། །ཐམས་ཅད་རི་ཡི་རྒྱལ་པོ་ལྟར། །སྤྱི་བོར་བསམས་ནས་རབ་ཏུ་བསྒོམ། །སངས་རྒྱས་དཔུང་ཡང་གནོན་བྱེད་ན། །མི་དབང་ལ་འདིར་ཐེ་ཚོམ་མེད། །བཅོམ་ལྡན་འདས་
དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ལས་བྱུང་བས་དེ་སྐད་ཅེས་བཀའ་སྩལ་ཏོ། །དཔུང་ཐམས་ཅད་གནོན་པ་ཞེས་བྱ་བའི་ཏིང་ངེ་འཛིན་ཏོ། །དགྲ་བོ་སྐྲག་པའི་དམ་ཚིག་ལ། །བསམ་གཏན་
འདི་ནི་རབ་ཏུ་བརྟག །སངས་རྒྱས་ཀྱིས་ཀྱང་གལ་ཏེ་བགྲོད། །གསལ་བར་འགྱུར་འདི་གདོན་མི་ཟ། །བཅོམ་ལྡན་འདས་རྡོ་རྗེ་གསུམ་གྱི་དམ་ཚིག་གིས་འདི་སྐད་ཅེས་གསུངས་ཏེ། ཡི་གེ་ཧཱུྃ་ལས་ཕུར་
བུ་ཡི། །ཚད་ནི་རྩེ་མོ་ལྔ་པ་སྟེ། །རྡོ་རྗེ་ཕུར་བུར་བྱས་བསྒོམ་ལ། །སྙིང་ཀར་དེ་ཡིས་འདི་རབ་བསྒོམ། །སངས་རྒྱས་དཔུང་ནི་ཁྲོས་པ་ཡང་། །འཇིག་པར་འགྱུར་འདིར་གདོན་མི་ཟ། །དགྲ་རྨོངས་པ་གནོན་པར་
བྱེད་པ་ཞེས་བྱ་བའི་ཏིང་ངེ་འཛིན་ཏོ། །གྲོང་ཁྱེར་རམ་ནི་ཡང་ན་གྲོང་། །ལྗོངས་སུ་ཡང་ནི་རབ་སྦྱར་བྱ། །ནད་ཀུན་སྤོང་བའི་ཞི་བ་ཡང་། །འདིས་ནི་རྟག་ཏུ་སྦྱར་བར་བྱ། །བར་སྣང་ལ་གནས་རྡོ་རྗེ་ནི། །རྩེ་མོ་

88-1-126b

ལྔ་པ་རྣམ་པར་བསྒོམ། །བསྐལ་པ་སྲེག་པ་ལྟར་བསམས་ལ། །སླར་ཡང་རབ་ཏུ་བསྡུ་བར་བྱ། །སྤྲོ་བ་དག་ཀྱང་སླར་བྱའོ། །རིན་ཆེན་ཡིད་བཞིན་ནོར་བུའི་འོད། །ཆོས་ཀྱི་སྤྲིན་ནི་བསྒོམས་ནས་ཀྱང་། །དབང་
བསྐུར་བ་ནི་ཡང་དག་བྱ། །རྡོ་རྗེའི་བསམ་གཏན་འདི་ཡིས་ནི། །དགང་དཀའ་བ་ཡང་རབ་ཏུ་འགེངས། །སྦྱིན་པའི་རྡོ་རྗེ་རབ་སྣང་བྱེད། །ཡིད་བཞིན་ནོར་བུ་དཔལ་ལྡན་འགྱུར། །དེར་ནི་སངས་རྒྱས་ཆོས་ཆེན་དང་། །
རྡོ་རྗེ་སེམས་དཔའི་སྤྲིན་སྤྲོ་བྱ། །བསྐལ་པ་གྲངས་མེད་གསུམ་ཡང་གནས། །སངས་རྒྱས་ཀུན་གྱིས་བྱིན་གྱིས་རློབ། །འདི་དེ་སངས་རྒྱས་ཐམས་ཅད་ཀྱི། །སྐྱོན་མེད་སྐུ་ཡི་གསང་བའོ། །ནད་ཐམས་ཅད་མེད་པར་
བྱེད་པ་རྡོ་རྗེ་འབྱུང་བ་ཞེས་བྱ་བའི་ཏིང་ངེ་འཛིན་ཏོ། །བསམ་གཏན་ལས་བྱུང་དམ་བཅས་པ། །གནས་གང་དུ་ནི་བརྩམ་པར་བྱ། །འདི་ཡིས་བསམ་གཏན་སྦྱོར་བ་ཡིས། །གནས་ན་སངས་རྒྱས་བྱིན་གྱིས་རློབ། །
རྡོ་རྗེ་བདུད་རྩི་རྒྱལ་པོ་ཆེ། །རྡོ་རྗེ་ཕུར་བུར་རབ་བསྒོམས་ལ། །ཕྱོགས་བཅུའི་དཀྱིལ་འཁོར་མཆོག་རྣམས་ལ། །མེ་སྟག་འབར་བ་འདྲ་བས་གདབ། །ཅེས་ཀྱང་གསུངས་སོ། །འགྲོ་བ་འདུལ་བ་ཞི་བ་རྡོ་རྗེ་ཞེས་བྱ་བའི་
ཏིང་ངེ་འཛིན་ཏོ། །ནམ་མཁའི་དབྱིངས་ཀྱི་དབུས་གནས་པའི། །ཞི་བའི་དཀྱིལ་འཁོར་དམ་པ་བསམ། །རྣམ་པར་སྣང་མཛད་གཟུགས་བསམས་ནས། །རང་གི་ཐུགས་ཀར་དོན་གཉེར་བཞག །མཁའ་དབྱིངས་
སྤྱན་གྱི་མཆོག་རྣམས་ཀྱིས། །ཡོངས་སུ་གང་བར་རྣམ་པར་བསྒོམ། །བསྡུས་ནས་འོད་ཀྱི་གོང་བུ་ཡིས། །ནད་པ་ལ་ནི་ཕབ་ནས་སུ། །སྤུ་ཁུང་རྩེ་བར་ནས་སངས་རྒྱས། །སྤྲིན་རྣམས་བརྟུལ་ཞུགས་ཅན་གྱིས་སྤྲོ། །
སངས་རྒྱས་སྤྲིན་རྣམས་དེ་ཡི་ཚེ། །དེ་ལ་དབང་བསྐུར་རབ་ཏུ་སྩལ། །དམ་ཚིག་རྡོ་རྗེ་ནད་པ་ཡིས། །སྐད་ཅིག་གིས་ནི་དཔལ་ལྡན་འགྱུར། །སངས་རྒྱས་ཀྱི་དམ་ཚིག་གི་སྤྲིན་བཀོད་པ་ཞེས་བྱ་བའི་ཏིང་ངེ་
88-1-127a

འཛིན་ཏོ། །ནམ་མཁའི་རྡོ་རྗེའི་དབུས་གནས་པ། །དབང་ཆེན་དཀྱིལ་འཁོར་དམ་པ་བསམ། །ཆོས་འཛིན་པ་ཡི་གཟུགས་བསམ་མོ། །ཐུགས་ཀར་དོན་གཉེར་གཞག་པར་བྱ། །མཁའ་དབྱིངས་
གནས་ནི་ཉམས་དགའ་བར། །དཀར་མོ་ཞེས་བྱས་རབ་ཏུ་དགང་། །ཡིད་བཞིན་ནོར་བུ་རིན་ཆེན་འོད། །འོད་ཀྱི་གོང་བུ་བསྡུ་བར་བྱ། །འདི་དག་འདོད་པའི་ལུས་དང་ངག །སེམས་ཀྱི་གནས་ལ་དབབ་པར་བྱ། །
སྤུ་ཁུང་རྩེ་བར་ནས་རིན་ཆེན། །སྤྲིན་རྣམས་བརྟུལ་ཞུགས་ཅན་གྱིས་སྤྲོ། །ཆོས་ཀྱི་སྤྲིན་ནི་བསྒོམ་བྱ་ཞིང་། །དབང་བསྐུར་བ་ནི་ཡང་དག་བྱ། །རྡོ་རྗེ་བསམ་གཏན་འདི་ཡིས་ནི། །དགང་དཀའ་བ་ཡང་རབ་ཏུ་
འགེངས། །དེ་ནི་ཡིད་བཞིན་ནོར་དཔལ་ལྡན། །སྦྱིན་པའི་རྡོ་རྗེ་རབ་སྣང་བའོ། །ཆོས་ཀྱི་སྤྲིན་གྱི་དམ་ཚིག་བཀོད་པ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའི་དབྱིངས་ཀྱི་དབུས་གནས་པའི། །རྡོ་རྗེ་ཟླ་གམ་དཀྱིལ་འཁོར་
བསམ། །རྡོ་རྗེ་ནམ་མཁའ་ཆོས་མདུན་གཟུགས། །ཐུགས་ཀར་འདོད་པ་གཞག་པར་བྱ། །སངས་རྒྱས་བྱང་ཆུབ་སེམས་དཔའ་ཡིས། །ནམ་མཁའི་དཀྱིལ་འཁོར་ཡོངས་སུ་གང་། །འོད་ཟེར་ལྔ་ཡི་སྦྱོར་བ་ཡིས། །གཟི་
བརྗིད་དེ་ལ་དབབ་པར་བྱ། །དེ་ནི་དེ་མ་ཐག་ཉིད་དུ། །སངས་རྒྱས་ཀུན་གྱི་ཐུགས་སུ་བྱོན། །འཇམ་དཔལ་དང་ནི་མཉམ་ཞིང་གསལ། །གནས་ལས་བྱེད་པར་དེར་འགྱུར་རོ། །དགྱེས་པའི་བདག་ཉིད་ཅན་དབང་བསྐུར། །དགའ་
སྟོན་ཆེན་པོ་སྩོལ་བར་མཛད། །མཐོང་བ་ཉིད་ཀྱིས་བྱུང་བ་ཡི། །འགྲོ་བ་ཐམས་ཅད་དབང་དུ་འགྱུར། །རིན་པོ་ཆེའི་དམ་ཚིག་གི་སྤྲིན་བཀོད་པ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའ་རྡོ་རྗེར་སྲིན་པོ་ནི། །དྲག་ཅིང་
ཁྲོ་ལ་རབ་གཏུམ་དང་། །ཝ་དང་སྣ་ཚོགས་བྱ་རོག་དང་། །བྱ་རྒོད་ཁྱི་ཡིས་གང་བར་བསྒོམ། །མེ་ཡི་དཀྱིལ་འཁོར་ལ་གནས་པའི། །དགྲ་བོ་རྣམས་ནི་རྟག་པར་བསྒོམ། །སངས་རྒྱས་ཀུན་ལ་གནོད་བྱེད་པ། །

88-1-127b

བསམས་ནས་རྣལ་འབྱོར་སྦྱར་བར་བྱ། །རྒྱུ་མ་རུས་བཅུད་ཁྲག་ལ་སོགས། །ཀུན་གྱིས་གྲངས་པར་རྣམ་པར་བསྒོམ། །མཚོན་ཆ་སྣ་ཚོགས་ཐོགས་པས་མནན། །བསྒོམས་ན་དགྲ་རྣམས་འཆི་བར་འགྱུར། །སངས་རྒྱས་རྡོ་རྗེ་
འཛིན་པས་ཀྱང་། །གལ་ཏེ་འདི་ལྟར་རབ་བསྒོམས་ན། །ཟླ་ཕྱེད་ནང་དུ་རྫོགས་པ་ལ། །འཆི་བར་འགྱུར་འདིར་གདོན་མི་ཟ། །རྡོ་རྗེ་སྤྲིན་དམ་ཚིག་བཀོད་པ་ཞེས་བྱ་བའི་ཏིང་ངེ་འཛིན་ཏོ། །རྣམ་པར་སྣང་མཛད་ཞལ་གསུམ་པ། །
སྟོན་ཀའི་ཆུ་སྒོང་མདོག་འདྲ་བསམ། །དཀར་པོ་ནག་པོ་རབ་ཏུ་དམར། །ཐོར་ཚུགས་དབུ་རྒྱན་དག་གིས་བརྒྱན། །རྡོ་རྗེ་ཅན་ནི་ཞལ་གསུམ་བསམ། །ནག་པོ་དཀར་པོ་དམར་པོའི་ཞལ། །འབར་བའི་ཐོར་ཚུགས་དབུ་
རྒྱན་ཅན། །འཇིག་རྟེན་ཁམས་རྣམས་འཁྲུག་བྱེད་པའོ། །འདོད་ཆགས་ཅན་ནི་ཞལ་གསུམ་བསམ། །དམར་པོ་ནག་པོ་དཀར་པོའི་ཞལ། །ཐོར་ཚུགས་དབུ་རྒྱན་ལོངས་སྤྱོད་ཅན། །བསྒོམས་ན་ངེས་པར་འགྲུབ་
པར་འགྱུར། །འཁོར་ལོ་རྡོ་རྗེ་པད་མོ་ཆེ། །གཡས་པའི་ཕྱག་ཏུ་རྣམ་པར་བསྒོམ། །རྡོ་རྗེ་ཕྱག་དྲུག་བཟང་པོ་ནི། །མཚོན་ཆ་སྣ་ཚོགས་བསྣམས་པར་བསྒོམ། །སེམས་ཅན་ཀུན་ལ་ཕན་བཞེད་མ། །སྤྱན་མ་ཞལ་
གསུམ་དག་ཏུ་བསམ། །དཀར་པོ་ནག་པོ་དམར་པོ་ཆེ། །མཛེས་པའི་གཟུགས་སུ་རབ་ཏུ་བསྒོམ། །མཁའ་སྐྱེས་སྤྱན་ནི་རྒྱལ་མོ་ཆེ། །དྲི་མ་མེད་ཅིང་ཞལ་གསུམ་པ། །གནག་དང་དམར་དང་དཀར་བའི་ཚུལ། །
མཛེས་པའི་གཟུགས་སུ་རྟག་ཏུ་བསྒོམ། །གསུང་རྡོ་རྗེ་སྤྱན་རྒྱལ་མོ་ཆེ། །དམར་གནག་དཀར་པོའི་རྣམ་པ་ཡི། །ཞལ་གསུམ་པ་ནི་མྱུར་དུ་འགྲུབ། །ཁ་དོག་མཛེས་པར་རབ་ཏུ་བསྒོམ། །རིག་མ་རྡོ་རྗེ་
ཨུཏ་པལ་བསྣམས། །ཞལ་གསུམ་རབ་ཏུ་གསལ་བའི་མདངས། །སེར་གནག་དཀར་བའི་རྣམ་པ་ནི། །བསྒོམས་ན་ཡེ་ཤེས་ཐོབ་པར་འགྱུར། །ཁྲོ་བོ་ཆེན་པོ་གཤིན་རྗེ་གཤེད། །ཞལ་གསུམ་དྲག་པོའི་

88-1-128a

འོད་བཟང་བ། །རྣོན་པོ་འཇིགས་པའང་འཇིགས་པར་བྱེད། །ཁ་དོག་ནག་པོ་རབ་ཏུ་བསྒོམ། །གཞན་གྱི་མི་ཐུབ་ཁྲོ་བོ་ཆེ། །དྲག་ཏུ་བཞད་པའི་སྒྲ་འབྱིན་པ། །ཞལ་གསུམ་འོད་ཟེར་མང་པོ་དག །རབ་ཏུ་
འཕྲོ་བར་རྣམ་པར་བསམ། །ཁྲོ་བོ་ཆེན་པོ་རྟ་མགྲིན་ནི། །བསྐལ་པའི་མེ་བཞིན་རབ་ཏུ་འབར། །ཞལ་གསུམ་གདུག་པ་ཞབས་ཀྱི་མནན། །སྦྱོར་བ་ཅན་གྱི་རྟག་ཏུ་བསྒོམ། །རྡོ་རྗེ་བདུད་རྩི་ཁྲོ་བོ་ཆེ། །འོད་ཟེར་
འཕྲོ་བ་རབ་ཏུ་འཁྲུག །དྲག་པོ་རྡོ་རྗེ་འབར་བ་འདྲ། །འཇིགས་པ་དག་ཀྱང་འཇིགས་པར་བྱེད། །འདོད་པའི་ཡེ་ཤེས་ཁྲོ་བོ་ཆེ། །ཞལ་གསུམ་པ་ནི་འཇིགས་པར་བྱེད། །ཕྱག་བཞི་འཇིགས་པར་བྱེད་
པའི་མཆོག །ཊཀྐིའི་རྒྱལ་པོ་རབ་ཏུ་བསྒོམ། །སྟོབས་པོ་ཆེ་ནི་རྡོ་རྗེ་ཆེ། །འཇིག་རྟེན་གསུམ་གྱི་མུན་སེལ་བ། །གདུག་པ་ཐམས་ཅད་འཇོམས་པར་བྱེད། །ཞལ་གསུམ་པ་ནི་རྟག་ཏུ་བསྒོམ། །ཁྲོ་བོ་
ཆེན་པོ་དབྱུག་སྔོན་ཅན། །ཁམས་གསུམ་དག་ནི་འཇིགས་པར་བྱེད། །ཞལ་གསུམ་རྡོ་རྗེ་ལས་བྱུང་བ། །འབར་བ་རྣོན་པོ་ཅན་དུ་བསྒོམ། །རྡོ་རྗེ་མི་གཡོ་ཁྲོ་བོ་ཆེ། །རྡོ་རྗེ་ལས་བྱུང་ཟུར་གྱིས་བལྟ། །
ཞི་བ་རལ་གྲི་ཞགས་པ་བསྣམས། །བརྟུལ་ཞུགས་ཅན་གྱིས་ཞལ་གསུམ་བསྒོམ། །གཙུག་ཏོར་ཆེན་པོ་ཡི་གེ་གཅིག །འོད་ཟེར་དག་ནི་ཀུན་ཏུ་འཕྲོ། །ཞལ་གསུམ་འབར་བའི་འཁོར་ལོ་ཅན། །
བསམ་གཏན་འོད་བཟང་བསྒོམ་པར་བྱ། །གནོད་མཛེས་ཡེ་ཤེས་མཆོག་འཛིན་པ། །འཇིགས་པའི་རྒྱ་མཚོ་ཡང་དག་བྱེད། །ཞལ་གསུམ་འབར་བའི་འོད་འཕྲོ་སྐུ། །བསམ་གཏན་དཀྱིལ་འཁོར་
བསྒོམ་པར་བྱ། །གཟི་བརྗིད་ཕུང་པོ་གཙུག་ཏོར་རྒྱལ། །གང་གཞན་སྔགས་ཀྱི་འཁོར་ལོ་ཅན། །དམ་ཚིག་ལོངས་སྤྱོད་འདི་རྣམས་ཀྱིས། །སོ་སོ་སོ་སོར་བསྒོམ་པར་བྱ། །སྔགས་རྣམས་ཀྱི་ནི་ཏིང་ངེ་འཛིན། །

88-1-128b

དཔག་ཏུ་མེད་པ་བཤད་པ་ཡིན། །ཁྲོ་བོ་དག་ནི་རེ་རེ་ཡང་། །ནམ་མཁའི་སྟེང་བས་ཤིན་ཏུ་འཕགས། །ནམ་མཁའི་དབྱིངས་ཀྱི་དབུས་གནས་པར། །གསལ་བའི་དཀྱིལ་འཁོར་དམ་པ་བསམ། །སངས་རྒྱས་
གཟུགས་ནི་རབ་བསྒོམས་ལ། །རྣམ་པར་སྣང་མཛད་རྣམ་པར་བསམ། །གསལ་ཞིང་ཟླ་བ་བཞིན་ཞི་བ། །འོད་ཟེར་སྣ་ཚོགས་འདྲ་བའི་འོད། །མེ་ལོང་ལྟ་བུར་ཡང་དག་བྱུང་། །ཁམས་གསུམ་དག་ནི་རྒྱན་
གྱུར་པ། །རྒྱན་རྣམས་ཀུན་གྱིས་བརྒྱན་པ་དག །བསམས་ན་བྱང་ཆུབ་དེ་ཡིས་མཐོང་། །བསམ་གཏན་རྡོ་རྗེ་རབ་བསྒོམ་པ། །དེ་ཡིས་སངས་རྒྱས་ཆེ་བའི་བདག །འཇིག་རྟེན་ཐམས་ཅད་
དབང་བྱེད་པ། །ཚེ་འདི་ཉིད་ལ་ཐོབ་པར་འགྱུར། །རྣམ་པར་སྣང་མཛད་དམ་ཚིག་འབྱུང་བ་མཛེས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའི་དབྱིངས་ཀྱི་དབུས་གནས་པར། །རྡོ་རྗེ་དཀྱིལ་འཁོར་
དམ་པ་བསམ། །སངས་རྒྱས་གཟུགས་ནི་རབ་བསྒོམས་ལ། །རྡོ་རྗེ་སེམས་དཔའ་རྣམ་པར་བསམ། །ཁྲོས་པ་གསལ་བའི་ལུས་དང་འདྲ། །འབར་བ་སྣ་ཚོགས་མཉམ་པའི་འོད། །རྣམ་པ་ཀུན་གྱི་མཆོག་དང་ལྡན། །
རྒྱན་རྣམས་ཀུན་གྱིས་རྣམ་པར་བརྒྱན། །ཞི་བའི་ཡེ་ཤེས་གནས་བསྒོམས་ན། །རྡོ་རྗེ་ཉིད་ནི་མྱུར་དུ་འཐོབ། །བསམ་གཏན་རྡོ་རྗེ་རབ་བསྐུལ་བ། །འདིས་ནི་རྡོ་རྗེའི་བདག་ཉིད་ཆེ། །སེམས་ཅན་ཐམས་ཅད་
དབང་བྱེད་པ། །ཚེ་འདི་ཉིད་ལ་ཐོབ་པར་འགྱུར། །དམ་ཚིག་ཐམས་ཅད་འབྱུང་བ་མཛེས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའ་རྡོ་རྗེའི་དབུས་གནས་པ། །ཆོས་ཀྱི་དཀྱིལ་འཁོར་དམ་པ་
བསམ། །སངས་རྒྱས་གཟུགས་ནི་རབ་བསྒོམས་ལ། །ཆོས་ཀྱི་སེམས་དཔའ་རྣམ་པར་བསྒོམ། །གསལ་བའི་ལུས་འཛིན་ཞི་བ་ནི། །རྒྱན་རྣམས་ཀུན་གྱིས་རྣམ་པར་བརྒྱན། །འོད་ཟེར་སྤྲིན་ནི་འཁོར་

88-1-129a

ལོ་ཆེ། །རྣམ་པར་འཕྲོ་བ་རབ་ཏུ་བསྒོམ། །འདི་ཡིས་ཆོས་ཀྱི་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་བ། །ཡེ་ཤེས་རྒྱ་མཚོས་རྣམ་བརྒྱན་པས། །ཚེ་འདི་ཉིད་ལ་ཐོབ་པར་འགྱུར། །ཆོས་ཀྱི་སེམས་
དཔའ་འབྱུང་བའི་དམ་ཚིག་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའ་རྡོ་རྗེའི་དབུས་གནས་པར། །ཟླ་བའི་དཀྱིལ་འཁོར་དམ་པ་བསམ། །སངས་རྒྱས་གཟུགས་ནི་རབ་བསྒོམས་ལ། །སྤྱན་མ་མཆོག་ནི་
རྣམ་པར་བསྒོམ། །ཞལ་མཛེས་སྤྱན་ནི་རབ་ཏུ་ཡངས། །སྣ་ཚོགས་རྒྱན་གྱིས་རྣམ་པར་བརྒྱན། །མཚན་རྣམས་ཐམས་ཅད་རབ་ཏུ་རྫོགས། །བུད་མེད་སྒྱུ་མའི་མཆོག་ལྡན་པ། །ཁམས་གསུམ་དག་ནི་དབང་བྱེད་
པ། །ཡེ་ཤེས་དངོས་གྲུབ་ཐམས་ཅད་བྱེད། །འཁོར་ལོའི་ཡིད་བཞིན་ནོར་བུའི་འོད། །ཕྱག་ཏུ་འཁོར་ལོ་བསྒོམ་པར་བྱ། །སྤྱན་གྱི་དམ་ཚིག་ཕྱག་གི་མཆོག་དང་ལྡན་པ་ཞེས་བྱ་བའི་ཏིང་ངེ་འཛིན་ཏོ། །ནམ་
མཁའ་རྡོ་རྗེའི་དབུས་གནས་པར། །རྡོ་རྗེ་དཀྱིལ་འཁོར་འོད་མཆོག་བསམ། །སངས་རྒྱས་གཟུགས་ནི་རབ་བསྒོམས་ནས། །ནམ་མཁའ་རྡོ་རྗེ་མཆོག་རབ་བསྒོམ། །ཞལ་བཟང་སྤྱན་ནི་རབ་ཏུ་ཡངས། །ཨུད་ཨུཏྤ་
པལ་མཐིང་གའི་མདོག་འདྲ་བ། །མཚན་རྣམས་ཐམས་ཅད་རབ་ཏུ་རྫོགས། །ནམ་མཁའ་དམ་ཚིག་མཆོག་རབ་བསྒོམ། །ཕྱག་ན་ཨུད་པལ་སྔོ་དམར་བསྣམས། །ཁམས་གསུམ་དག་གིས་ཕྱག་བྱས་པ། །སངས་རྒྱས་བྱང་
ཆུབ་བྱེད་པའི་མཆོག །དངོས་གྲུབ་རྡོ་རྗེ་ཅན་གྱི་གསང་། །ནམ་མཁའ་ཡུམ་རིན་པོ་ཆེའི་འོད་ཀྱི་སྤྲིན་རྡོ་རྗེ་ཚིམ་པར་བྱེད་པ་དང་ལྡན་པ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའ་རྡོ་རྗེའི་དབུས་གནས་པར། །ཆོས་
ཀྱི་དཀྱིལ་འཁོར་དམ་པ་བསམ། །སངས་རྒྱས་གཟུགས་ནི་རབ་བསྒོམས་ལ། །རྡོ་རྗེ་ཆོས་མ་རབ་ཏུ་བསྒོམ། །ཞལ་བཟང་སྤྱན་ནི་རབ་ཏུ་ཡངས། །པད་མ་རཱ་གའི་མདོག་འདྲ་བ། །སྒྱུ་མས་མཛིན་པའི་མཆོག་

88-1-129b

ལས་བྱུང་། །འདོད་ཆགས་ཆགས་པ་འཛིན་སྡུག་པ། །མཚན་ཉིད་ཐམས་ཅད་ཡོངས་རྫོགས་ཤིང་། །རྒྱན་རྣམས་ཀུན་གྱིས་བརྒྱན་པ་སྟེ། །ཕྱག་ན་ཨུད་པལ་དམར་མཛེས་བསྣམས། །སངས་རྒྱས་ཐམས་
ཅད་རབ་བསྒོམས་པ། །ཆོས་ཀྱི་ཡེ་ཤེས་འབྱུང་གནས་མཆོག །དམ་ཚིག་རྡོ་རྗེ་ཅན་གྱི་གསང་། །ཆོས་ཀྱི་དམ་ཚིག་དེ་ཁོ་ན་ཉིད་མངོན་པར་རྫོགས་པར་བྱང་ཆུབ་པ་ཀུན་ཏུ་སྟོན་པའི་རྡོ་རྗེ་ཞེས་བྱ་བའི་ཏིང་ངེ་
འཛིན་ཏོ། །ནམ་མཁའ་རྡོ་རྗེའི་དབུས་གནས་པར། །དངོས་གྲུབ་དཀྱིལ་འཁོར་དམ་པ་བསམ། །སངས་རྒྱས་གཟུགས་ནི་རབ་བསྒོམས་ལ། །སྒྲོལ་མ་མཆོག་ནི་བསྒོམ་པར་བྱ། །ཞལ་བཟང་སྤྱན་ནི་རབ་ཏུ་ཡངས། །
སྣ་ཚོགས་རྒྱན་གྱིས་རྣམ་པར་བརྒྱན། །ཁ་དོག་ལྗང་སེར་འདྲ་བའི་འོད། །བུད་མེད་སྒྱུ་མས་རབ་ཏུ་མྱོས། །རྡོ་རྗེ་ཏིང་ངེ་འཛིན་ལས་བྱུང་། །སེམས་ཅན་ཀུན་གྱིས་ཕྱག་བྱས་པ། །ཨུད་པལ་ལྗང་སེར་དམར་བའི་
མདངས། །ཕྱག་ན་བསྣམས་པ་རབ་ཏུ་བསྒོམ། །དམ་ཚིག་སྒྲོལ་མ་མཆོག་དང་ལྡན་པ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའ་རྡོ་རྗེའི་དབུས་གནས་པར། །ཉི་མའི་དཀྱིལ་འཁོར་དམ་པ་བསམ། །སངས་
རྒྱས་གཟུགས་ནི་རབ་བསྒོམས་ལ། །གཤིན་རྗེ་གཤེད་མཆོག་རྣམ་པར་བསྒོམ། །འབར་བའི་འོད་ཟེར་མང་པོ་འཕྲོ། །འཇིགས་པའི་དཀྱིལ་འཁོར་རབ་ཏུ་ཁྲོས། །སྤྱན་དམར་མཆེ་བ་རྣམ་པར་གཙིགས། །
ཕྱག་ན་རལ་གྲི་བསྣམས་པར་བསྒོམ། །དབུ་རྒྱན་སྣང་མཛད་བཞུགས་བསྒོམས་ན། །རྡོ་རྗེ་ཅན་ནི་དགྱེས་པར་འགྱུར། །འདི་ནི་ཡེ་ཤེས་རྡོ་རྗེ་ཅན། །ཐམས་ཅད་ཁྲོ་བོའི་དམ་ཚིག་ཡིན། །གཤིན་རྗེ་གཤེད་
སྤྲོ་བའི་སྣང་བ་བཀོད་པ་བསྒོམ་པ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའ་རྡོ་རྗེའི་དབུས་གནས་པར། །ཉི་མའི་དཀྱིལ་འཁོར་དམ་པ་བསམ། །སངས་རྒྱས་གཟུགས་ནི་རབ་བསྒོམས་ལ། །གཞན་

88-1-130a

གྱིས་མི་ཐུབ་རབ་ཏུ་བསྒོམ། །འབར་བ་འོད་ཟེར་མང་པོ་ཅན། །སྦྲུལ་གྱིས་བརྒྱན་ཅིང་སྐེ་རགས་ཅན། །ཞལ་ནི་རྣམ་པར་གཙིགས་ཤིང་བགྲད། །ཁ་དོག་དཀར་པོ་རབ་ཏུ་བསྒོམ། །མི་བསྐྱོད་དམ་
ཚིག་དབུ་རྒྱན་ལ། །བསམས་ན་རྡོ་རྗེ་ཅན་དག་དགྱེས། །འདི་ནི་ཡེ་ཤེས་རྡོ་རྗེ་ཅན། །ཐམས་ཅད་ཁྲོ་བོའི་དམ་ཚིག་གོ། །གཞན་གྱིས་མི་ཐུབ་པའི་རྡོ་རྗེ་བཀོད་པ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའ་
རྡོ་རྗེའི་དབུས་གནས་པར། །ཉི་མའི་དཀྱིལ་འཁོར་དམ་པ་བསམ། །སངས་རྒྱས་གཟུགས་ནི་རབ་བསྒོམས་ལ། །རྡོ་རྗེ་རྟ་མགྲིན་རབ་ཏུ་བསྒོམ། །ཁྲོ་བོའི་འོད་ཟེར་མང་པོ་དག །ཐམས་ཅད་དུ་ནི་རྣམ་
པར་འཕྲོ། །གདུག་པ་ཐམས་ཅད་ཞབས་ཀྱིས་མནན། །ཁ་དོག་དམར་པོ་རྣམ་པར་བསམ། །རྫོགས་སངས་དཔག་མེད་དབུ་རྒྱན་ལ། །བསྒོམས་ན་རྡོ་རྗེ་ཅན་དག་མཉེས། །འདི་ནི་རྡོ་རྗེ་ཡེ་ཤེས་ཅན། །
ཐམས་ཅད་ཁྲོ་བོའི་དམ་ཚིག་ཡིན། །རྟ་མགྲིན་སྐྱེད་པ་འབྱུང་བ་རྣམ་པར་བཀོད་པ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའ་རྡོ་རྗེའི་དབུས་གནས་པར། །ཉི་མའི་དཀྱིལ་འཁོར་དམ་པ་བསམ། །སངས་རྒྱས་
གཟུགས་ནི་རབ་བསྒོམ་ལ། །རྡོ་རྗེ་བདུད་རྩི་རབ་བསྒོམ་པ། །འབར་བའི་འོད་ཟེར་མང་པོ་འཕྲོ། །རྡོ་རྗེའི་སྤྲིན་ནི་ཀུན་དུ་འཁྲུག །ཁྲོས་ཤིང་ཁྲོ་བཅས་གནག་པ་དང་། །མཆེ་བ་རྣོན་པོ་རབ་ཏུ་བསྒོམ། །མི་
བསྐྱོད་དམ་ཚིག་དབུ་རྒྱན་ལ། །བསྒོམས་ན་རྡོ་རྗེ་ཅན་མཉེས་འགྱུར། །འདི་ནི་ཐམས་ཅད་ཁྲོ་བོ་ཡི། །འདའ་བར་དཀའ་བའི་དམ་ཚིག་གོ། །བདུད་རྩིའི་དམ་ཚིག་འབྱུང་བ་རྡོ་རྗེ་ཞེས་བྱ་བའི་ཏིང་ངེ་
འཛིན་ཏོ། །ནམ་མཁའ་རྡོ་རྗེའི་དབུས་གནས་པར། །ཉི་མའི་དཀྱིལ་འཁོར་དམ་པ་བསམ། །སངས་རྒྱས་གཟུགས་ནི་རབ་བསྒོམས་ལ། །ཊཀྐིའི་རྒྱལ་པོ་རབ་བསྒོམ་བྱ། །ཁྲོ་བོ་འཇིགས་པའི་ཆ་ལུགས་

88-1-130b

གཏུམ། །འཇིགས་པ་དག་ཀྱང་འཇིགས་པར་བྱེད། །རྒྱན་རྣམས་ཐམས་ཅད་ཡོངས་སུ་རྫོགས། །རྡོ་རྗེ་འོད་བཟང་བསྒོམ་པར་བྱ། །མི་བསྐྱོད་དམ་ཚིག་དབུ་རྒྱན་ལ། །བསྒོམས་ན་མཉེས་པ་རབ་ཏུ་འཕེལ། །འདི་
ནི་ཐམས་ཅད་ཁྲོ་བོ་ཡི། །འདའ་བར་དཀའ་བའི་དམ་ཚིག་གོ། །བསམ་གཏན་རྡོ་རྗེ་རྫོགས་པར་བྱང་ཆུབ་པ་དགའ་བ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའ་རྡོ་རྗེའི་དབུས་གནས་པར། །ཉི་མའི་དཀྱིལ་
འཁོར་དམ་པ་བསམ། །སངས་རྒྱས་གཟུགས་ནི་རབ་བསྒོམས་ལ། །སྟོབས་པོ་ཆེ་ནི་རབ་ཏུ་བསྒོམ། །འབར་བའི་འོད་ཟེར་མང་པོ་འཕྲོ། །རྡོ་རྗེ་གསུམ་གྱི་གནས་དཀྱིལ་འཁོར། །ཁྲོ་ཞིང་དྲག་པོ་ཞགས་
པ་འཛིན། །རྡོ་རྗེ་སྟོབས་ཅན་བསྒོམ་པར་བྱ། །མི་བསྐྱོད་དམ་ཚིག་དབུ་རྒྱན་ལ། །བསྒོམས་ན་མཉེས་པ་རབ་ཏུ་འཕེལ། །འདི་ནི་ཐམས་ཅད་ཁྲོ་བོ་ཡི། །འདའ་བར་དཀའ་བའི་དམ་ཚིག་གོ། །རྡོ་རྗེ་གསུམ་གྱི་
སྟོབས་ཞེས་བྱ་བའི་ཏིང་ངེ་འཛིན་ཏོ། །ནམ་མཁའ་རྡོ་རྗེའི་དབུས་གནས་པར། །ཉི་མའི་དཀྱིལ་འཁོར་དམ་པ་བསམ། །སངས་རྒྱས་གཟུགས་ནི་རབ་བསྒོམས་ལ། །རྡོ་རྗེ་སྔོན་པོ་རྣམ་པར་བསྒོམ། །ཁྲོ་བོ་
འཇིགས་པའི་ཆ་ལུགས་ཅན། །འཇིགས་པ་དག་ཀྱང་འཇིགས་པར་བྱེད། །གཟུགས་ནི་རབ་ཏུ་གནག་ལ་རྣོ། །ནག་པོའི་རྒྱ་མཚོ་སྐྱེད་པར་བྱེད། །འབར་བའི་འོད་ཟེར་མང་པོ་འཕྲོ། །རྡོ་རྗེ་དབྱུག་ཐོགས་
བསྒོམ་པར་བྱ། །མི་བསྐྱོད་དམ་ཚིག་དབུ་རྒྱན་ལ། །བསྒོམས་ན་རབ་ཏུ་མཉེས་པར་འགྱུར། །འདི་ནི་ཐམས་ཅད་ཁྲོ་བོ་ཡི། །འདའ་བར་དཀའ་བའི་དམ་ཚིག་གོ། །རྡོ་རྗེ་དབྱུག་པའི་དམ་ཚིག་མཆོག་
དང་ལྡན་པ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའ་རྡོ་རྗེའི་དབུས་གནས་པར། །ཉི་མའི་དཀྱིལ་འཁོར་དམ་པ་བསམ། །སངས་རྒྱས་གཟུགས་ནི་རབ་བསྒོམས་ལ། །མི་གཡོ་མཆོག་ནི་རྣམ་པར་

88-1-131a

བསྒོམ། །ཁྲོས་ཤིང་འཇིགས་པའི་ཟུར་གྱིས་ལྟ། །རལ་གྲི་ཞགས་པ་བསྣམས་པ་འཁྲུག །འབར་བའི་འོད་ཟེར་མང་པོ་འཕྲོ། །མི་གཡོ་རྡོ་རྗེ་ཅན་བསྒོམ་བྱ། །མི་བསྐྱོད་དམ་ཚིག་དབུ་རྒྱན་ལ། །བསྒོམས་ན་མཉེས་པ་རབ་ཏུ་འཕེལ། །
འདི་ནི་ཐམས་ཅད་ཁྲོ་བོ་ཡི། །འདའ་བར་དཀའ་བའི་དམ་ཚིག་ཡིན། །རྡོ་རྗེ་ནམ་མཁའ་དབྱིངས་ཀྱི་གནས། གནོན་པ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའ་རྡོ་རྗེའི་དབུས་གནས་པར། །ཉི་མའི་དཀྱིལ་འཁོར་དམ་པ་
བསམ། །སངས་རྒྱས་གཟུགས་ནི་རབ་བསྒོམས་ལ། །རིག་པའི་འཁོར་ལོར་རབ་ཏུ་འབྱུང་། །མཚན་རྣམས་ཐམས་ཅད་ཡོངས་སུ་རྫོགས། །འཁོར་ལོ་འབར་བས་ཡོངས་སུ་བསྐོར། །གཙུག་ཏོར་འཁོར་ལོ་དམ་ཚིག་ནི། །
རྣམ་པར་འཕྲོ་བ་རབ་ཏུ་བསྒོམ། །མི་བསྐྱོད་དམ་ཚིག་དབུ་རྒྱན་ལ། །བསྒོམས་ན་མཉེས་པ་རབ་ཏུ་འཕེལ། །འདི་ནི་ཐམས་ཅད་ཁྲོ་བོ་ཡི། །འདའ་བར་དཀའ་བའི་དམ་ཚིག་གོ། །གཙུག་ཏོར་གྱི་དམ་ཚིག་རིག་པའི་སྟོབས་
འཁོར་ལོ་ཞེས་བྱ་བའི་ཏིང་ངེ་འཛིན་ཏོ། །ནམ་མཁའ་རྡོ་རྗེའི་དབུས་གནས་པར། །ཉི་མའི་དཀྱིལ་འཁོར་དམ་པ་བསམ། །སངས་རྒྱས་གཟུགས་ནི་རབ་བསྒོམས་ལ། །རྡོ་རྗེ་སུམ་བྷ་རབ་ཏུ་བསྒོམ། །མེ་ལྕེ་རྣོན་པོ་
འབར་བའི་སྐུ། །རྡོ་རྗེའི་སྤྲིན་ནི་རབ་ཏུ་འཕྲོ། །ཕྱག་ན་རྡོ་རྗེ་རབ་འབར་བ། །བསྒོམས་ན་དངོས་གྲུབ་ཐོབ་པར་འགྱུར། །མི་བསྐྱོད་དམ་ཚིག་དབུ་རྒྱན་ལ། །བསྒོམས་ན་མཉེས་པ་རབ་ཏུ་འཕེལ། །འདི་ནི་ཐམས་
ཅད་ཁྲོ་བོ་ཡི། །འདའ་བར་དཀའ་བའི་དམ་ཚིག་གོ། །རྡོ་རྗེ་དམ་ཚིག་སུམ་བྷ་རབ་ཏུ་འབྱུང་བའི་ཏིང་ངེ་འཛིན་ཏོ། །འགོག་པ་ཁྲོ་བོའི་འཁོར་ལོ་ནི། །སངས་རྒྱས་འཁོར་ལོ་བསྟན་པ་ཡིས། །
ཏིང་འཛིན་རྡོ་རྗེ་ཡེ་ཤེས་རྣམས། །རྡོ་རྗེའི་དཀྱིལ་འཁོར་གྲུབ་པར་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས། 

88-1-131b

རྡོ་རྗེའི་དམ་ཚིག་བཀོད་པ་དེ་ཁོ་ན་ཉིད་ཀྱི་དོན་བསྒོམ་པ་མངོན་པར་རྫོགས་པར་བྱང་ཆུབ་པ་ཞེས་བྱ་བའི་ལེའུ་སྟེ་བཅུ་གསུམ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་
བདག་པོ་རྡོ་རྗེ་འཛིན་པ་ཆེན་པོས་ཞི་བའི་དམ་ཚིག་གི་མཆོག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་བཙུན་མོ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨོཾ་རུ་རུ་
སྥུ་རུ་ཛྭ་ལ་ཏིཥྛ་སིདྷ་ལོ་ཙ་ནི་སརྦཱ་ཨརྠ་སཱ་དྷ་ནི་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །ཕུན་སུམ་ཚོགས་ཀུན་ཡིད་བཞེས་པ། །མཉེས་ཤིང་རབ་ཏུ་དགྱེས་གྱུར་པས། །སངས་རྒྱས་རྡོ་རྗེ་རྗེས་སུ་དྲན། །སངས་རྒྱས་
རྣམས་ཀྱི་ཞི་སྐྱེད་མ། །ལས་རྣམས་ཐམས་ཅད་རབ་སྒྲུབ་ཅིང་། །རྡོ་རྗེའི་དམ་ཚིག་སྐུལ་མཛད་མ། །ཤི་བ་སོས་པར་བྱེད་པར་གསུངས། །རྡོ་རྗེ་འཆང་ཆེན་པོས་དེ་སྐད་ཅེས་གསུངས་སོ། །དེ་ནས་བཅོམ་ལྡན་
འདས་སྐུ་གསུམ་གྱི་དམ་ཚིག་ཁྲོ་བོ་རྡོ་རྗེས་དངོས་པོ་དང་དངོས་པོ་མེད་པའི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་འཛིན་ཐམས་ཅད་ཀྱི་བཙུན་མོའི་མཆོག་འདི་ཉིད་ཀྱི་སྐུ་
གསུང་ཐུགས་རྡོ་རྗེ་ལས་ཕྱུང་ངོ་། །ཨོཾ་ཤང་ཀ་རི་ཥཱན་ཏ་ཀ་རེ་གྷུཊ་ཊ་གྷུཊ་ཊ་ནི་གྷུཊ་ཊ་ནི། གྷུ་ཏ་ཡ་གྷུ་ཏ་ཡ་གྷུ་ཊ་ཏེ་ནི་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །རྡོ་རྗེ་གསུམ་ནི་མི་ཕྱེད་པ། །
རྡོ་རྗེ་ཅན་མཉེས་སྤྱན་གདངས་ནས། །རྡོ་རྗེ་ཐུགས་ནི་རྗེས་སུ་དྲན། །སྲུང་བའི་རྡོ་རྗེ་སྦྱོར་བ་ལ། །རྟག་ཏུ་ལས་ནི་རབ་བསྒྲུབ་པ། །རྡོ་རྗེ་ཆེན་པོ་འཇིགས་ཉེན་ལ། །
རྟག་ཏུ་སྟོབས་ནི་བྱེད་པར་བཤད། །དེ་ནས་བཅོམ་ལྡན་འདས་འདོད་ཆགས་ཆེན་པོའི་དམ་ཚིག་གཟིགས་

88-1-132a

པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཆོས་ཀྱི་དམ་ཚིག་གི་སྐུའི་བཙུན་མོའི་མཆོག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨོཾ་ཀ་ཊེ་བི་ཀ་ཊེ་ནི་ཀ་ཊེ་ཀ་ཊེ་ད་ཀ་ཊེ་སྭཱ་ཧཱ། 
དེ་ནས་འདི་ནི་གསུངས་ཙམ་གྱིས། །རྡོ་རྗེ་ཆོས་མཆོག་འཛིན་པ་རྣམས། །རྡོ་རྗེ་ཆོས་ནི་རྗེས་སུ་དྲན། །མཉེས་ནས་བསམ་གཏན་ཐོབ་གྱུར་པས། །རྟག་ཏུ་ཆོས་རྒྱས་སྟོབས་དང་ལྡན། །རྟག་ཏུ་མཛད་
པོ་ཆེ་མཛད་པ། །རྡོ་རྗེ་གསུང་གི་བཀའ་བཞིན་དུ། །བཟླས་པ་ཙམ་གྱིས་བྱེད་པར་འགྱུར། །དེ་ནས་བཅོམ་ལྡན་འདས་དམ་ཚིག་ཀུན་ནས་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ནས། དམ་ཚིག་སེམས་དཔའི་བཙུན་མོའི་མཆོག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨོཾ་ཏཱ་རེ་ཏུད་ཏཱ་རེ་ཏུ་རེ་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །སངས་རྒྱས་
ཀུན་བདག་ཆེ་སྐྱེས་མཉེས། །རྡོ་རྗེའི་སྐུ་ནི་རྗེས་སུ་དྲན། །བསམ་གཏན་ཡེ་ཤེས་ཐོབ་གྱུར་པས། །སངས་རྒྱས་རྡོ་རྗེ་སྡེ་ཆེན་དང་། །སེམས་ཅན་ཁམས་ནི་ཀུན་ནས་སུ། །སྐད་ཅིག་གིས་ནི་
བྲན་བཞིན་དུ། །ཐམས་ཅད་གཡོ་མེད་དབང་དུ་བྱེད་ཅེས་བཅོམ་ལྡན་འདས་ཀྱིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་དེ་
བཞིན་གཤེགས་པས་དྲི་མ་མེད་པའི་འོད་ཟེར་གྱི་སྤྲིན་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་གཤིན་རྗེ་གཤེད་པོ་ཆེན་པོ་རྡོ་རྗེ་ཁྲོ་བོ་འདི་ཉིད་ཀྱི་སྐུ་གསུང་ཐུགས་
རྡོ་རྗེ་ལས་ཕྱུང་ངོ་། །ན་མཿས་མན་ཏ་ཀཱ་ཡ་བཱཀྩིཏྟ་བཛྲཱ་ཎཱ། ཨོཾ་ཁ་ཁ་ཁཱ་ཧི་ཁཱ་ཧི། སརྦ་དུཥྚ་སཏྭ་ད་མ་ཀ ། ཨ་སི་མུ་ས་ལ་པར་ཤུ་པཱ་ཤ་ཧསྟ། ཙ་ཏུར་མུ་ཁ། ཙ་ཏུར་བྷུ་ཛ། ཤ་ཊ་ཙ་ར་ཎ། 

88-1-132b

ཨཱ་གཏ་ཚ། ཨཱ་གཏ་ཚ། །སརྦ་དུཥྚ་པྲ་ཎཱ་ཨ་པ་ཧཱ་རི་ཎེ། མ་ཧཱ་བི་གྷཱ་ཏ་ཀ ། བི་ཀྲྀ་ཏཱ་ནན། །སརྦ་བྷཱུ་ཏ་བྷ་ཡྃ་ཀ་ར། ཨཊྚཱཊྚ་ཧ་ས་ནཱ་དེ་ནེ། བྱཱ་གྷཱ་ཙར་མ་ནི་བ་ས་ན། ཀུ་རུ་ཀུ་རུ། སརྦ་ཀརྨཱ་ནི། ཚིནྡྷ་ཚིནྡྷ་
སརྦ་མཱན་ཏྲཱ་ན། བིནྡྷ་བིནྡྷ་པ་ར་མུ་དྲཱན། ཨཱ་ཀར་ཥ་ཡ། ཨཱ་ཀར་ཥ་ཡ། སརྦ་བྷཱུ་ཏཱན། མ་ཐ་མ་ཐ། ནིར་མ་ཐ་ནིར་མ་ཐ། སརྦ་དུཥྚཱན། པྲ་བེ་ཤ་ཡ་པྲ་བེ་ཤ་ཡ། མཎ་ཌ་ལ་མ་དྷྱེ་བཻ་བ་སྭ་ཏ། 
ཛཱི་བི་ཏཱན་ཏ་ཀ་ར། ཀུ་རུ་ཀུ་རུ་མ་མ་སརྦ་ཀཱརྱམ། ད་ཧ་ད་ཧ། པ་ཙ་པ་ཙ། མཱ་བི་ལམ་བ་མཱ་བི་ལམ་བ། ས་མ་ཡ་མ་ནུ་སྨ་ར། ཧཱུྃ་ཧཱུྃ། ཕཊ་ཕཊ། བི་སྥོ་ཊ་ཡ་བི་སྥོ་ཊ་ཡ། སརྦཱན་ནཱ་ཤ་ཡ་ཀ་ར་ཀ་ར། བིགྷ་
ནཱྃ་སརྦཱ་ཨ་ཤཱ་པ་རི་པཱུ་ར་ཀ ། ཧེ་ཧེ་བྷ་ག་བན། ཀིན་ཙི་ར་ཡ་སི། མ་མ་སརྦ་ཨརྠཱྃ་སཱ་དྷ་ཡ་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །སངས་རྒྱས་ཀུན་ནི་གྲངས་ཆེན་པོ། །འཇིགས་ཤིང་ཀུན་དུའི་
སྐྲག་གྱུར་ནས། །རྡོ་རྗེ་སེམས་ནི་རྗེས་སུ་དྲན། །ཐོད་པ་མ་ཆག་མ་གས་པ། །གཟུགས་མཛེས་ཡིད་འོང་རྙེད་པ་ལ། །རྐང་པས་མནན་པའི་ཚུལ་བྱས་ནས། །སྔགས་འདི་རྗེས་སུ་དྲན་པར་བྱ། །
མཱ་མ་ཀཱི་འམ་སྤྱན་ཡང་རུང་། །རྡོ་རྗེ་ཆེན་པོ་རིགས་མཐོན་པོ། །ལན་གསུམ་དག་ཏུ་བརྗོད་ན་ནི། །དེ་མ་ཐག་ཏུ་ངེས་པར་འགུགས། །བཅོམ་ལྡན་འདས་ཐུགས་རྡོ་རྗེས་དེ་སྐད་ཅེས་གསུངས་སོ། །དེ་ནས་
བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱིས་དམ་ཚིག་འོད་ཟེར་མཐུག་པོ་མཆོག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། བདུད་རྩིའི་དམ་ཚིག་གི་རྡོ་རྗེ་ཁྲོ་བོ་
འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ན་མཿས་མན་ཏ་ཀཱ་ཡ་བཱཀ་ཙིཏ་ཏ་བཛྲཱ་ཎཱྃ། ན་མོ་བཛྲ་ཀྲོ་དྷཱ་ཡ། མ་ཧཱ་དྃཥྚོ་ཏ་ཀ་ཊ་བྷཻ་ར་བཱ་ཡ། ཨ་སི། མུ་ཤ་ལ། པར་ཤུ་པཱ་ཤ་ཧསྟཱ་ཡ། ཨོཾ་ཨ་མྲྀ་ཏ་ཀུཎ་

88-1-133a

ཌ་ལི། །ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། གརྫྫ་གརྫྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣ་བི་ནཱ་ཡ་ཀཱན། མ་ཧཱ་ག་ན་པ་ཏི། ཛཱི་བི་ཏཱན་ཏ་ཀ་རཱ་ཡ་སྭཱ་ཧཱ། །དེ་ནས་འདི་
ནི་གསུངས་ཙམ་གྱིས། །སངས་རྒྱས་ཀུན་ནི་གྲགས་ཆེན་པོ། །བརྒྱལ་ཞིང་རབ་ཏུ་འཇིགས་གྱུར་ནས། །རྡོ་རྗེ་སྐུ་ནི་རྗེས་སུ་དྲན། །སྔགས་རྣམས་ཀུན་གྱི་སྦྱོར་བ་ལ། །རྡོ་རྗེ་བསྐྲད་པའི་ལས་རྣམས་ནི། །ཆོ་གས་
སངས་རྒྱས་དཔུང་དག་ཀྱང་། །རང་ཉིད་ཀྱིས་ནི་སྤྲོད་པར་འགྱུར། །དེ་ནས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཏོག་སངས་རྒྱས་ཀྱི་འོད་ཟེར་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ནས། རྡོ་རྗེ་ཁྲོ་བོ་ཆེན་པོ་གཞན་གྱིས་མི་ཐུབ་པ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ན་མཿས་མན་ཏ་ཀཱ་ཡ་བཱ་ཀ་ཙིཏ་ཏ་བཛྲཱ་ཎཱྃ། ཨོཾ་ཧཱུཾ་ཛི་ན་རི་ཊིཊྚ་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ནས་འདི་ནི་
གསུངས་ཙམ་གྱིས། །སངས་རྒྱས་བདག་ཉིད་ཆ་སྐྱེས་ཀུན། །འཇིགས་ཤིང་ཀུན་དུ་སྐྲག་གྱུར་པས། །བྱང་ཆུབ་སེམས་ནི་རྗེས་སུ་དྲན། །སྲིན་པོ་མ་རུངས་གཏུམ་པོ་དང་། །འཇིགས་པ་ཆེན་པོ་འཁྲུགས་པ་
ལ། །རྡོ་རྗེ་སེམས་ཀྱིས་རབ་སྦྱར་བས། །ལས་རྣམས་ཆོ་ག་བཞིན་དུ་བྱེད། །དེ་ནས་བཅོམ་ལྡན་འདས་དེ་བཞིན་གཤེགས་པ་ཚེ་དཔག་ཏུ་མེད་པས་དཔག་ཏུ་མེད་པ་འབྱུང་བའི་རྡོ་རྗེ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ནས། པད་མོ་འབྱུང་བའི་རྡོ་རྗེ་ཁྲོ་བོ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ན་མཿས་མན་ཏ་ཀཱ་ཡ་བཱ་ཀ་ཙིཏ་ཏ་བཛྲཱ་ཎཱཾ། ཨོཾ་ཧཱུྃ་ཧཱུྃ་ཧཱུྃ་ཏ་རུ་ལ། བི་རུ་ལ། སརྦ་བི་ཥ་
གྷཱ་ཏ་ཀ ། ཛྭ་ལི་ཏ་བི་སྥུ་ལིང་ག ། ཨཊྚཱཊྚ་ཧཱ་ས། ཀེ་ས་རིས་ཊ་ཨ་ཏོ་པ། བཛྲ་ཁུ་ར་ནིར་གྷ་ཏ་ན། ཙ་ལི་ཏ་བ་སུ་དྷཱ་ཏ་ལ་ནི་ཤྭཱ་ས་མཱ་རུ་ཏོཏ་ཀྵི་པ་ཏ་དྷ་ར་ཎི་དྷ་ར། བྷཱིཥ་ཎ་ཨཊྚཱཊྚ་ཧཱ་ས། ཨ་པ་རི་མི་ཏཱ་བ་ལ་པ་རཱ་

88-1-133b

ཀྲཱ་མ། ཨཱ་བྱ་ག་ཎཱ་བྷཱི་ཏ་བྷཱུ་ཏ་ག་ཎཱ་དྷྱུ་ཥི་ཏ། བུདྷྱ་བུདྷྱ། ཧ་ཡ་གྲཱི་བ། ཁཱ་ད་ཁཱ་ད། བ་ར་མན་ཏྲཱན། ཚིནྡྷ་ཚིནྡྷ།  སིདྡྷི་མ་མེ་དྷེ་ཤ །ཨཱ་བེ་ཤ་ཡ་ཨཱ་བེ་ཤ་ཡ། སརྦ་ཛྭ་ར་པི་ཤཱ་ཙཱ་ན། སརྦ་གྲ་ཧེ་ཥྭ་ཨ་པྲ་ཏི་ཧ་ཏོ་བྷ་བ། བཛྲ་
དྃཥྚ་ཀིཉྩི་རཱ་ཡ་སི། ཨི་དཾ་དུཥྚ་གྲ་ཧ་ན། དུཥྚ་སརྦམ་བཱ། དྷུ་ན་དྷུ་ན། མ་ཐ་མ་ཐ། མར་ད་མར་ད། པཱ་ཊ་ཡ། པཱ་ཊ་ཡ། མ་ཊ་མ་ཊ། བནྡྷ་བནྡྷ། བུདྡྷ་དྷརྨ་སང་གྷ་ཨ་ནུ་ཛྙཱ་ཏྃ་ཀརྨ་ཀུ་རུ་ཧ་ཡ་གྲི་བཱ་ཡ་ཕཊ། བཛྲ་
ཡ་ཕཊ། བཛྲ་གཱ་ཏྲཱ་ཡ་ཕཊ། བཛྲ་ནེ་ཏྲཱ་ཡ་ཕཊ། བཛྲ་དྃཥྚཱ་ཡ་ཕཊ། བཛྲ་ཁུ་རཱ་ཡ་ཕཊ། བཛྲ་ཀུར་ནིར་གྷཱ་ཏ་ནཱ་ཡ་ཕཊ།  སརྦ་ཏྲཻ་ལོ་ཀྱ་བྷ་ཡང་ཀ་རཱ་ཡ་ཕཊ། སརྦ་ཀརྨེ་ཥྱེ་ཨ་པྲ་ཏི་ཧ་ཡ་ཕཊ། བཛྲ་ཀུ་ལ་
སན་ཏྲཱ་ས་ན་ཡ་ཕཊ། ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །ཆོས་ཀྱི་རྡོ་རྗེ་མཆོག་སྐྱེས་རྣམས། །འཇིགས་ཤིང་རབ་ཏུ་བརྒྱལ་བར་འགྱུར། །ཡེ་ཤེས་རྒྱལ་པོ་རྗེས་སུ་དྲན། །མཁའ་
དབྱིངས་དུག་གིས་ཡོངས་གང་བ། །རྡོ་རྗེ་ཧ་ལ་ཧ་ལའི་འོད། །ཁྲོ་བོའི་རྒྱལ་པོ་བསྐུལ་བ་ཡིས། །དུག་རྣམས་ཐམས་ཅད་མེད་པར་བྱེད། །དེ་ནས་བཅོམ་ལྡན་འདས་དེ་བཞིན་གཤེགས་པ་གདོན་མི་ཟ་བར་
གྲུབ་པས་གདོན་མི་ཟ་བའི་དམ་ཚིག་འབྱུང་བའི་ཏོག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་བེ་ཅོན་སྔོན་པོ་ཁྲོ་བོའི་རྒྱལ་པོ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །
ན་མཿས་མན་ཏ་ཀཱ་ཡ་བཱ་ཀ་ཙིཏ་ཏ་བཛྲཱ་ཎཱ། ཨོཾ་ཨེ་ཧྱེ་ཧི་བྷ་ག་བན། ནཱི་ལ་བཛྲ་དཎ་ཌ། ཏུ་རུ་ཏུ་རུ། ཧུ་ལུ་ཧུ་ལུ། ཧཱ་ཧཱ། གུ་ལུ་གུ་ལུ། གུ་ལཱ་པ་ཡ། གུ་ལཱ་པ་ཡ། ཀྲ་མ་ཀྲ་མ། བྷ་ག་བན་བཱ་ཡུ་བེ་ག་ན། བྷཱུ་
ཏཱན་ཤཱི་གྷན། ད་ཧ་ད་ཧ། ད་ར་ད་ར། བ་ཧ་བ་ཧ། པ་ཙ་པ་ཙ། མ་ཐ་མ་ཐ། པཱ་ཏ་ཡ། པཱ་ཏ་ཡ། མ་ཊ་མ་ཊ། མོ་ཊཱ་པ་ཡ་མོ་ཊཱ་པ་ཡ། སརྦ་ཀརྨཱ་ཎི། ཚིནྡྷ་ཚིནྡྷ། བྷཀྵ་ཡ་བྷཀྵ་ཡ། ཨསྠི་མེ་དམ་ཨསྱ། 

88-1-134a

རུ་དྷི་ར་མཛྫ་མེད། པ་ཤཱ་མཛྫ། རུ་དྷི་ར་པྲི་ཡ་ཨེ་ཧྱ་ཧི། བྷ་ག་བན། སརྦ་བིགྷྣ་ནི། སརྦ་བིདྱཱ་ནི། སརྦ་མན་ཏྲཱ་ཎི། སརྦ་མཱུ་ལ་ཀརྨཱ་ཎི། ཀྲི་ཏྲ་མ་ཎི་ཥཱ་དཱི་ནི། སརྦ་གྲ་ཧཱ་ན། ཧ་ན་ཧ་ན། བྷན་ཛ་བྷན་ཛ། མར་ད་མར་ད་པ་ཨེ་
དམ་མེ་ཀཱརྱམ་སཱ་དྷ་ཡ། ཧཱུྃ་ནཱི་ལཱ་ཡ། ནཱི་ལཱ་ཡ། ནཱི་ལ་བཛྲ་དཎ་ཌཱ་ཡ། ཏུ་རུ་ཏུ་རུ། བིགྷྣན་བི་ནཱ་ཡ་ཀཱྃ། ནཱ་ཤ་ཡ་ནཱ་ཤ་ཡ། ཧུ་རུ་ཧུ་རུ། དཱིབ་ཏ་ཙཎ་ཌཱ་ཡ། སརྦ་ཤ་ཏྲུྃ་ཎཱྃ་ཧྲཱི་ད་ཡཱ་ནི་པཱི་ཌ་ཡ། ཚིནྡྷ་ཚིནྡྷ། པ་ར་བིདྱཱ་ནམ་
ཙྪེ་ད་ཀ་ཧཱུྃ་བིདྱཱ་ནཱ་མ། ཤིཥྚ་ཀ ། ས་མ་ཡ་མ་ནུ་སྨར། །བཛྲ་དྷ་ར་བ་ཙ་ནྃ་ཙ། མར་མཱ་ནི་ནི་ཀྲིན་ཏ།  ཧཱུྃ་ཧ་ན་ཧ་ན། ད་ཧ་ད་ཧ། ཀུ་རུ་ཀུ་རུ། ཏུ་རུ་ཏུ་རུ། ཧུ་རུ་ཧུ་རུ། ཕཊ་ཕཊ་ཧཱུྃ་ཧཱུྃ་ཀྲི་ཏན་ཏཱ་ཡ། དེ་བ་རི་ཥི་བི་དྲཱ་པ་ཀཱ་ཡ། 
ཧ་ན་ཧ་ན། བཛྲ་དཎ་ཌེ་ན་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །གདུག་པའི་མཆོག་ལས་བྱུང་བ་ཀུན། །ཡིད་ནི་འཇིགས་ཤིང་རབ་སྐྲག་ནས། །སེམས་དཔའི་རྡོ་རྗེ་རྗེས་སུ་དྲན། །གྲགས་ཆེན་ཁྲོ་བོའི་
རྒྱལ་པོ་འདི། །བརྒྱ་རྩ་བརྒྱད་དུ་བཟླས་ན་ནི། །ཆོ་གའི་ཚུལ་བཞིན་བསྐུལ་བ་ཡིས། །གདུག་པ་ཐམས་ཅད་གསོད་པར་འགྱུར། །དེ་ནས་བཅོམ་ལྡན་འདས་དེ་བཞིན་གཤེགས་པ་མི་བསྐྱོད་པས་ཀུན་ནས་སྤྲིན་གྱི་
དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་སྟོབས་པོ་ཆེ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ན་མཿས་མན་ཏ་ཀཱ་ཡ་བཱ་ཀཱ་ཙིཏ་ཏ་བཛྲ་ཎཱྃ། ཨོཾ་ཧཱུྃ་ཧཱུཾྃ་ཧཱུྃ་ཕཊ་ཕཊ་ཕཊ། ཨུ་གྲ་
ཤཱུ་ལ་པཱ་ཎི་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཨོཾ་ཛྱོ་ཏི་ནིར་ནཱ་ད་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཨོཾ་མ་ཧཱ་བ་ལཱ་ཡ་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །སྟོབས་པོ་ཆེ་ཡི་ཀླུ་རྣམས་ཀུན། །ཡིད་ནི་འཇིགས་ཤིང་རབ་སྐྲག་
ནས། །སྐུ་གསུམ་རྡོ་རྗེ་རྗེས་སུ་དྲན། །བཟླས་པ་ཙམ་དང་སྦྱོར་བ་ཡིས། །ལས་རྣམས་ཐམས་ཅད་བསྒྲུབ་པར་བྱ། །ཐན་པ་བྱུང་བའི་དུས་སུ་ཡང་། །ཆུ་ཡི་དཀྱིལ་འཁོར་འབེབས་པར་བྱེད། །དེ་ནས་བཅོམ་

88-1-134b

འདས་ཀུན་ཏུ་སྒྲོགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་ཊཀྐིའི་རྒྱལ་པོ་ཆེན་པོ་ཁྲོ་བོ་ཆེན་པོ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ན་
མཿས་མན་ཏ་ཀཱ་ཡ་བཱ་ཀ་ཙིཏ་ཏ་བཛྲཱ་ཎཱྃ། ཊཀྐི་ཧཱུྃ་ཛཿ། དེ་ནས་འདི་ནི་གསུངས་ཙམ་གྱིས། །སངས་རྒྱས་ཀུན་བདག་ཆེ་སྐྱེས་རྣམས། །འཇིགས་ཤིང་རྡོ་རྗེ་སྐུ་གསུམ་ནི། །རྗེས་དྲན་དམ་ཚིག་ལྡན་གྱུར་ནས། །
རྡོ་རྗེ་སེམས་དཔའི་སྦྱོར་བ་ཡིས། །རྐང་པ་གཡས་པས་ལིང་ག་མནན། །རྡོ་རྗེ་གསུམ་གྱི་སྔགས་བཟླས་པས། །སྔགས་རྣམས་ཐམས་ཅད་འགུགས་པར་བྱེད། །དེ་ནས་བཅོམ་ལྡན་འདས་ཡེ་
ཤེས་ཀྱི་ཕྲེང་བ་ཆུའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། མི་གཡོ་བ་རྡོ་རྗེ་གཏུམ་པོའི་དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ན་མཿས་མན་ཏ་ཀཱ་ཡ་བཱཀ་
ཙིཏ་ཏ་བཛྲཱ་ཎཱྃ། ཨ་ཙ་ལ་ཀཱ་ཎ་ཙཎ་ཌ། ན་ཊ་ན་ཊ། མཊྚ་མཊྚ། མོཊྚ་མོཊྚ། སཊྚ་སཊྚ། ཏཊྚ་ཏཊྚ། ཧ་ན་ཧ་ན། ད་ཧ་ད་ཧ། མོ་ཧ་མོ་ཧ། མོ་ཧ་ཀ་ར། ཧ་ས་ཧ་ས། བཛྲ་ཧ་ས་ཀུ་རུ། ཧ་ས་ཧ་ས། 
མམྚ་རཊ་མར་ད་རཊ། གརྫྫ་གརྫྫ། ཧ་ན་ཧ་ན། བནྡྷ་བནྡྷ། ཏིཥྛ་ཏིཥྛ། ཨཱ་བི་ཤ་ཨཱ་བི་ཤ ། མ་ཧཱ་མན་ཏྲ། བཱ་ལ་ཀ ། དྷུ་ན་དྷུ་ན། ཏི་ཎི་ཏི་ཎི། ཁཱ་ད་ཁཱ་ད། བིགྷ་ནཱན། མཱ་ར་ཡ་མཱ་ར་ཡ། དུཥྚཱན། བྷཀྵ་
བྷཀྵ། སརྦཱ་ན་ཀུ་རུ་ཀུ་རུ། ཀི་རི་ཀི་རི། མ་ཧཱ་བི་ཥ་ཎ་བཛྲ། སྥོ་ཊ་ཡ་སྥོ་ཊ་ཡ། ཧཱུྃ་ཧཱུྃ་ཧཱུྃ་ཏྲི་བ་ལཱི་ཏ་རང་ག་ན་རྟ་ཀ ། ཨྃ་ཨྃ་ཨྃ། ཧཱྃ་ཧཱྃ་ཧཱྃ། ཨ་ཙ་ལ་ཙེ་ཊ། སྥོ་ཊ་ཡ་སྥོ་ཊ་ཡ། ཧཱུྃ་ཧཱུྃ་ཨ་ས་མན་ཏི་ཀ་ཏྲཱཊ། 
མ་ཧཱ་བ་ལ་མ་ཤཱ་ཏ་ཡ། བ་ར་མན་ཏྲཱན། ཨཱྃ་ཨཱྃ། ཧཱུྃ་ཧཱྃ། མཱྃ་ཤུད་དྷྱྃ་ཏུ་ལོ་ཀ ། ཏུ་ཥཾ་ཏུ་བཛྲཱི། ན་མཿསྟུ་ཨ་པྲ་ཏི་ཧ་ཏ་བ་ལེ་བྷྱཿཛྭ་ལ་ཡ། ཏྲཱཊ་ཨ་ས་ཧ་ན་མཿསྭཱ་ཧཱ། དེ་ནས་འདི་ནི་གསུངས་ཙམ་གྱིས། །

88-1-135a

ལྷ་ཀུན་འཁོར་དང་བཅས་པ་རྣམས། །བརྒྱལ་ཞིང་ཡིད་ནི་རབ་སྐྲག་ནས། །རྡོ་རྗེའི་སྐུ་ནི་རྗེས་སུ་དྲན། །ཁྲོ་བོ་ཆེན་པོའི་སྔགས་འདི་ཡིས། །ལྷ་ཆེན་པོ་ལ་སོགས་པའི་ལྷ། །མཐུ་ཆེན་དག་ཀྱང་
སྐྲག་གྱུར་ནས། །ཁ་སྦྱར་ལུས་ཀྱིས་འགུགས་པར་འགྱུར། །དེ་ནས་བཅོམ་ལྡན་འདས་དམ་ཚིག་རྣམ་པར་འཕྲུལ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་འཛིན་ཐམས་ཅད་
ཀྱི་དམ་ཚིག་ཁྲོ་བོ་ཆེན་པོ་གནོད་མཛེས་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨོཾ་སུམྦྷ་ནི་སུམ་བྷ་ཧཱུྃ། གྲཱིཧྞ་ཧཱུྃ། གྲཱིཧྞཱ་པ་ཡ་གྲཱིཧྞཱ་པ་ཡ་ཧཱུྃ། ཨཱ་ན་ཡ་ཧོཿབྷ་ག་བཱན། བིདྱཱ་རཱ་ཛ་ཧཱུྃ་ཕཊ། དེ་
ནས་འདི་ནི་གསུངས་ཙམ་གྱིས། །བུ་མོ་མཐུ་ཆེན་ཐམས་ཅད་ནི། །སྐྲ་བཤིག་གོས་དང་བྲལ་བདག་ཉིད། །རྡོ་རྗེ་སེམས་དཔའ་རྗེས་སུ་དྲན། །རྡོ་རྗེ་སེམས་དཔའི་ཞབས་ཀྱིས་མནན། །དེ་བཞིན་
གཤེགས་ཀུན་བདག་པོ་ནི། །རྡོ་རྗེ་ལྕགས་ཀྱུ་ཞགས་པ་ཡིས། །བཅིངས་ན་བུ་མོ་དགུག་པའི་མཆོག །དེ་ནས་བཅོམ་ལྡན་འདས་དམ་ཚིག་ཆེན་པོའི་དེ་ཁོ་ན་ཉིད་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ནས། དམ་ཚིག་ཆེན་པོ་རྡོ་རྗེ་གསུམ་གྱི་གསང་བ་གསུང་གི་དམ་ཚིག་གི་དེ་ཁོ་ན་ཉིད་ཀྱི་གནས་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །སངས་རྒྱས་རྡོ་རྗེའི་སྐུ་གསུམ་
ལ། །རྡོ་རྗེ་སེམས་དཔའ་རྣམ་བསྒོམ་པ། །ཞགས་པ་རྡོ་རྗེ་ཀྱོ་བ་འཛིན། །སངས་རྒྱས་དགུག་པ་དམ་པའོ། །སངས་རྒྱས་གསུང་སྐུའི་སྦྱོར་བ་ཡིས། །འཁོར་ལོ་ཆེན་པོ་སྦྱོར་བ་ལས། །རྡོ་རྗེ་སེམས་དཔའ་
རྒྱལ་ཆེན་པོ། །རྟག་ཏུ་ངེས་པར་འཁུགས་པར་འགྱུར། །འཁོར་ལོ་པད་མོ་རྡོ་རྗེ་ཆེས། །མི་ཕྱེད་རྡོ་རྗེ་གསུམ་བསྒོམས་པས། །རྡོ་རྗེ་ཀྱོ་བའི་དབྱེ་བ་ཡིས། །སྔགས་རྣམས་ཐམས་ཅད་དགུག་པའི་མཆོག །

88-1-135b

རང་སྔགས་སྐྱེས་བུ་བསྒོམས་ནས་ནི། །ཐམས་ཅད་རྡོ་རྗེའི་དངོས་ཞི་བ། །མི་ཡི་བུ་མོ་མཆོག་རྣམས་ཀྱི། །སྙིང་གར་རྡོ་རྗེ་ཀྱོ་བ་སྦྱར། །རླུང་གི་དཀྱིལ་འཁོར་སྦྱོར་བ་ཡིས། །ངེས་པར་རྟག་ཏུ་མགུགས་
པར་འགྱུར། །རྣམ་པར་སྣང་མཛད་གཟུགས་ཆེན་པོ། །ཟླ་བའི་དཀྱིལ་འཁོར་བསྒོམ་པར་བྱ། །ཤ་ཙི་དེར་ནི་གནས་པར་བསམ། །རྡོ་རྗེ་བདུད་རྩིའི་སྦྱོར་བ་ཡིས། །ལན་གྲངས་ལྔ་བཅུ་བརྗོད་ན་ནི། །ངེས་པར་
རྟག་ཏུ་མགུགས་པར་འགྱུར། །རྡོ་རྗེ་ལྕགས་ཀྱུ་གཟུགས་པོ་ཆེ། །འབར་བ་རྣོན་པོ་འདྲ་བའི་འོད། །རྡོ་རྗེ་དཀྱིལ་འཁོར་རབ་བསྒོམས་ལ། །ནམ་མཁའི་པད་མོ་དགུག་པའི་མཆོག །ཁྲོ་བོ་རྡོ་
རྗེའི་དམ་ཚིག་རང་། །རྡོ་རྗེ་ས་འོག་གནས་པ་ལ། །ཤཱུ་ལ་རྡོ་རྗེ་ཀྱོ་ཞགས་པས། །ལྷ་མིན་བུ་མོ་འགུགས་པའི་མཆོག །བཙུག་གམ་རྡོ་རྒྱུས་དག་ཀྱང་རུང་། །རྡོ་རྗེ་ཀྱོ་བའི་སྦྱོར་བ་ཡིས། །ཟླ་བ་གཟའ་
ཡིས་ཟིན་པའི་ཚེ། །ཁར་བཅུག་ནས་ནི་བསྒྲུབ་པར་བྱ། །ཚངས་དབང་དྲག་པོ་ལ་སོགས་ལྷ། །རང་གི་མིང་རྣམས་བྲིས་ན་ནི། །རྡོ་རྗེ་གསུང་གི་བཀའ་བཞིན་དུ། །འཇིགས་ཤིང་སྐྲག་ནས་འོང་
བར་འགྱུར། །རྣམ་པ་ཀུན་གྱི་མཆོག་ལྡན་པའི། །འཇམ་པའི་རྡོ་རྗེ་རབ་ཏུ་བསྒོམ། །ཁྲོ་བོ་ཆེན་པོ་གཤིན་རྗེ་གཤེད། །རྡོ་རྗེ་ལྕགས་ཀྱུ་རྣམ་པར་བསམ། །བསྐལ་པ་སྲེག་པའི་འཁོར་ལོ་
ཆེ། །བསྒོམས་ནས་གནོད་སྦྱིན་མོ་དང་སྤྱད། །ཕྱག་རྒྱའི་དབྱེ་བས་ཐམས་ཅད་ཀྱི། །སྔགས་ཀྱི་དབྱེ་བས་ཐམས་ཅད་དུ། །དགུག་པའི་རབ་ཏུ་སྦྱོར་བ་གསུངས། །གཞན་དུ་བྱས་ན་འཇིག་པར་
འགྱུར། །རྡོ་རྗེ་སེམས་དཔའ་རྒྱལ་པོ་ཆེ། །ཡང་དང་ཡང་དུ་བསྐུལ་བར་བྱ། །དེ་ཉིད་སྔགས་རྣམས་ཐམས་ཅད་ཀྱི། །རྒྱལ་པོ་མཆོག་ཏུ་རྟག་པའོ། །དེ་ནས་བཅོམ་ལྡན་འདས་ནམ་མཁའ་ཀུན་

88-1-136a

དུ་རྣམ་པར་འཕྲུལ་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་རལ་པ་གཅིག་མ་དམ་ཚིག་ཆེན་པོའི་གསུང་རྡོ་རྗེའི་མཆོག་འདི་ཉིད་ཀྱི་སྐུ་གསུང་
ཐུགས་རྡོ་རྗེ་ལས་ཕྱུང་ངོ་། །ཨོཾ་ཤཱུ་ལི་ནི་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །ཀླུ་ཡི་བུ་མོ་མཐུ་ཆེན་རྣམས། །ཚིག་པར་གྱུར་ཅིང་གོས་དང་བྲལ། །སངས་རྒྱས་བྱང་ཆུབ་རྗེས་སུ་དྲན། །སྔགས་ཀྱི་
རིག་པ་འདི་ཡིས་ནི། །ཀླུ་རྣམས་ཐམས་ཅད་མགུགས་པར་འགྱུར། །ཀླུ་ཡི་བུ་མོ་མིག་བཟངས་དག །བཀུག་ནས་ཉེ་བར་སྤྱད་པར་བྱ། །དེ་ནས་བཅོམ་ལྡན་འདས་ནམ་མཁའི་དམ་ཚིག་འབྱུང་བ་
རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆོས་ཆེན་པོའི་དམ་ཚིག་རྡོ་རྗེ་ཁྲོ་གཉེར་ཅན་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨོཾ་སརྦྦ་བྷ་ཡ་ནཱ་ཤ་ནི། ཏྲཱ་ས་ནི་ཏྲཱ་སེ། ཏྲཱ་ས་ཡ་ཏྲཱ་ས་ཡ། བཻ་ར་ཊ་ཏྲི་
ཀུ་ཊཱི་ཏི་ཊི། བཻ་ར་ཏི་བཻ་ར་ཊི། ཤྭེ་ཏེ་ཤྭེ་ཏ། ཛ་ཊི་ནི་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །རིག་འཛིན་བདག་ཉིད་སྐྱེས་མ་ཀུན། །འདར་ཞིང་འཇིགས་པར་གྱུར་པས་ནི། །ཡེ་ཤེས་རྡོ་རྗེ་རྗེས་སུ་
དྲན། །རིག་པ་འཛིན་པའི་བུ་མོ་མཆོག །གསེར་གྱི་རྣ་ཆ་གཡོ་བ་རྣམས། །སྔགས་ཀྱི་རིག་པ་འདི་དང་ནི། །དམ་ཚིག་མཆོག་གིས་དགུག་པར་བྱ། །འགོག་པ་རྡོ་རྗེ་རྒྱལ་པོ་ནི། །ཡོངས་སུ་རྫོགས་
པས་མཛེས་མཆོག་གིས། །ཡེ་ཤེས་རྡོ་རྗེ་གསུམ་ལས་བྱུང་། །ཀུན་ནས་དེ་མ་ཐག་ཏུ་མགུགས། །ཡང་ན་ཁྲོ་བོ་ཐམས་ཅད་ནི། །དབེན་པའི་གནས་དང་ཆེན་པོ་རུ། །སྔགས་པས་འབུམ་དུ་
བཟླས་པ་ཡིས། །ལས་རྣམས་ཐམས་ཅད་བྱེད་པར་བཤད། །རྡོ་རྗེ་སློབ་དཔོན་སྨོད་པ་གཞན། །ཐེག་པ་ཆེ་མཆོག་སྨོད་པ་དག །རབ་ཏུ་འབད་པས་གསད་པར་བྱ། །ཡང་ན་གནས་ནས་སྤོ་

88-1-136b

བར་བྱ། །འདི་ཡིས་བྱང་ཆུབ་མཆོག་གི་ནི། །སྔགས་ཀྱི་དངོས་གྲུབ་ཐོབ་པར་འགྱུར། །ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །ཡང་གསུངས་པ། ཕྱོགས་བཅུའི་སེམས་ཅན་ཐམས་
ཅད་ཀྱི། །ལུས་དང་ངག་སེམས་གསོད་པ་ནི། །ཆོ་ག་བཞིན་དུ་བསྒོམ་བྱས་པ། །གདུག་སེམས་ཅན་གྱི་དགྲ་རྣམས་ནི། །ཁྲག་དང་ཆུ་ཡིས་གཤེར་བ་འམ། །བཤང་གཅིས་གཤེར་བར་བྱས་པའི་གོས། །
བགོས་ནས་ལིང་ག་རྐང་པས་མནན། །ཁྲོ་བོའི་རྒྱལ་པོ་སྦྱར་བར་བྱ། །བརྒྱ་རྩ་བརྒྱད་ནི་ཡོངས་བཟླས་ན། །སངས་རྒྱས་ཀྱང་ནི་ངེས་པར་འཇིག །ཡང་གསུངས་པ། ཆུ་ཡིས་གོས་ནི་གཤེར་བར་བྱས། །
ཁྲོ་བོ་མཆོག་གི་བཅིངས་པ་ཡིས། །ལིང་ག་རྐང་པས་མནན་ན་ནི། །སངས་རྒྱས་དག་ཀྱང་ངེས་པར་འཇིག །བཤང་གཅིས་གཤེར་བར་བྱས་པའི་གོས། །ངན་པ་རུལ་པའི་དྲི་མནམ་པ། །
བགོས་ཏེ་སྔགས་ནི་བཟླས་བྱས་ན། །སྐད་ཅིག་གིས་སྐམས་འཆི་བར་འགྱུར། །ཐལ་བའི་སྐྱོ་མས་གཤེར་བའི་གོས། །བགོས་ནས་ཁྲོ་བས་འཁྲུགས་བཞིན་དུ། །བརྒྱ་རྩ་བརྒྱད་དུ་བཟླས་
ན་ནི། །རྡོ་རྗེ་སེམས་དཔའང་འཇིག་པར་འགྱུར། །ཡང་གསུངས་པ། གཅེར་བུར་ཕུད་དེ་སྐྲ་བཤིག་ལ། །འཇིགས་པའི་ཚུལ་ཅན་གཙིགས་ཤིང་བསྒྱུར། །ལིང་ག་རྐང་པས་མནན་ན་ནི། །ནམ་མཁའི་དབྱིངས་
ཀྱང་འཇིག་པར་འགྱུར། །མ་མོའི་གནས་སམ་དུར་ཁྲོད་དམ། །ཁང་སྟོང་དང་ནི་བཞི་མདོ་དང་། །མཚན་མ་གཅིག་དང་ཤིང་གཅིག་དྲུང་། །མངོན་པར་སྤྱོད་པ་བརྩམ་པར་བྱ། །མི་རུས་ལས་བྱས་ཕུར་བུ་ནི་
སོར་བརྒྱད་པ་ཡི་ཚད་དག་ལ། །བརྒྱ་རྩ་བརྒྱད་དུ་བཟླས་བྱས་ཏེ། །དགྲ་ཡི་སྒོ་ཁར་སྦས་ན་ནི། །སངས་རྒྱས་སྐུ་གསུམ་མཆོག་སྦྱིན་པ། །ཤེས་དང་མི་ཤེས་རྣམ་སྤངས་པ། །ཟླ་བ་ཕྱེད་ནང་རྫོགས་པ་

88-1-137a

ཡིས། །ཉམས་སམ་ཡང་ན་འཆི་བར་འགྱུར། །ཡང་ན་ཐོད་པ་གང་བ་དག །ཁྱད་པར་དུ་ནི་མཁས་པས་བཙལ། །དེར་ནི་སྔགས་ཀྱི་ཚིག་བྲིས་ཏེ། །རྡོ་རྗེའི་ཚིག་གིས་བཟླས་པ་བྱ། །
དགྲ་ཡི་སྒོ་འམ་གྲོང་དག་ཏུ། །སྦས་ན་ངེས་པར་སྐྲོད་པར་འགྱུར། །ཏཱ་ལའི་ལོ་མའམ་གཞན་དག་ལ། །ཁྲོ་བོའི་སྔགས་ནི་ཀུན་བྲིས་ལ། །དགྲ་ཡི་ཁྱིམ་མམ་སྒོ་དག་ཏུ། །སྦས་ན་སྐམས་ཤིང་འཆི་
བར་འགྱུར། །བཅོམ་ལྡན་འདས་དམ་ཚིག་ཆེན་པོའི་རྒྱུའི་རྡོ་རྗེས་དེ་སྐད་ཅེས་བཀའ་སྩལ་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ལུས་དང་ངག་དང་ཡིད་ངེས་པར་འཆིང་བ་
རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཁམས་གསུམ་པ་ཐམས་ཅད་ཀྱི་ལུས་དང་ངག་དང་ཡིད་ཕུར་བུས་གདབ་པའི་སྔགས་རྡོ་རྗེ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་
ཕྱུང་ངོ་། །ཨོཾ་གྷ་གྷ། གྷཱ་ཏ་ཡ་གྷཱ་ཏ་ཡ། སརྦ་དུ་ཥྚྲཱན་ཕཊ་ཕཊ། ཀཱི་ལ་ཡ་ཀཱི་ལ་ཡ། སརྦ་པཱ་པྃ་ཕཊ་ཕཊ། ཧཱུྃ་ཧཱུྃ་ཧཱུྃ་བཛྲ་ཀཱི་ལ། བཛྲ་དྷ་ར་ཨཱ་ཛྙཱ་པ་ཡ་ཏི། ཀཱ་ཡ་བཱ་ཀ་ཙིཏ་ཏ་བཛྲྃ། ཀཱི་ལ་ཡ་ཧཱུྃཾ་ཧཱུྃ་ཧཱུྃ་ཕཊ་
ཕཊ། དེ་ནས་འདི་ནི་གསུངས་ཙམ་གྱིས། །རྡོ་རྗེ་རྫུ་འཕྲུལ་ཆེན་པོ་ཀུན། །བརྒྱལ་ཞིང་རབ་ཏུ་འཇིགས་གྱུར་ནས། །ནམ་མཁའ་རྡོ་རྗེ་ཐུགས་དྲན་གྱུར། །མི་རུས་ལས་བྱས་ཕུར་བུ་འམ། །
ཡང་ན་སེང་ལྡེང་མཆོག་ལས་སྐྱེས། །ལྕགས་ལས་བྱས་པའི་ཕུར་བུ་དག །རྡོ་རྗེ་སྐུ་གསུམ་འཇིག་པར་བྱེད། །རྡོ་རྗེ་སེམས་དཔའ་མཉམ་གཞག་ལ། །འོད་འཕྲོ་འཁྲུག་ཅིང་མདངས་བཟང་བ། །
རྡོ་རྗེ་སྐུ་ནི་གསུམ་གྱི་མཐའི། །གཟུགས་ནི་བསམས་ནས་སྦྱར་བར་བྱ། །རྣམ་པར་སྣང་མཛད་ཕྱག་རྒྱ་ཆེ། །ཡང་ན་འདོད་ཆགས་རྡོ་རྗེ་ཅན། །གཤིན་རྗེ་གཤེད་ཀྱི་ཕྱག་རྒྱ་ཆེ། །བསམས་ན་

88-1-137b

རྡོ་རྗེ་གསུམ་ཕུར་བུ། །རྡོ་རྗེ་བདུད་རྩི་འཁྱིལ་བ་ཡིས། །གདུག་པའི་ཁྲོ་བོ་ཚར་གཅོད་པ། །རྡོ་རྗེའི་སྦྱོར་བས་བྱ་བ་ཡིན། །སངས་རྒྱས་བདག་ཉིད་ཆེན་པོའི་ཡང་། །སྙིང་ག་ནས་ནི་རྐང་པའི་བར། །རྡོ་རྗེ་ཕུར་
བུ་རྣམ་པར་བསྒོམ། །དེ་ཉིད་གོང་དུ་དམ་ཚིག་བྱ། །ཕུར་བུའི་རྣམ་པར་འཕྲུལ་པ་འདི། །བསམ་གཏན་རྡོ་རྗེའི་སྦྱོར་བ་ཡིས། །སངས་རྒྱས་ཀྱིས་ཀྱང་ངེས་པར་འདེབས། །རྡོ་རྗེ་སེམས་དཔའ་རྒྱལ་པོ་ཆེ། །
ཕུར་བུས་བཏབ་ན་མྱུར་དུ་འཆི། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོའི་སྐུ་རྣམ་པར་འཕྲུལ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། སྐུའི་དམ་ཚིག་ཚམ་ངམ་
གྱི་རྡོ་རྗེ་ཕུར་བུའི་སྔགས་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨོཾ་ཙྪིནྡྷ་ཙྪིནྡྷ། ཧ་ན་ཧ་ན། ད་ཧ་ད་ཧ། དཱི་པ་ཏ་བཛྲ་ཙཀྲ་ཧཱུྃ་ཕཊ། ཕན་ཚུན་དཀྲི་བའི་ཚུལ་དང་ནི། །མཐེ་བོང་གཞི་ནི་རབ་ཏུ་བསྡམ། །
རྣམ་པར་སྣང་མཛད་གནས་མནན་ཏེ། །རྡོ་རྗེ་ཕུར་བུ་ངེས་པར་གདབ། །བཏབ་མ་ཐག་ཏུ་སེམས་དཔའ་ཆེ། །རྡོ་རྗེ་སྐུ་གསུམ་ལས་བྱུང་བ། །དམ་ཚིག་མཆོག་གིས་ལྡང་བར་འགྱུར། །ཉམས་པའི་
གནས་སུ་མི་འགྱུར་ནའོ། །དེ་ནས་བཅོམ་ལྡན་འདས་འཇིག་རྟེན་དབང་ཕྱུག་གསུང་གི་རྣམ་པར་འཕྲུལ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། གསུང་གི་དམ་ཚིག་ཚམ་ངམ་གྱི་
རྡོ་རྗེ་ཕུར་བུའི་སྔགས་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨོཾ་ཧྲཱིཿབྷཱུ་ར་བྷུ་བཿ། །ཡེ་ཤེས་པད་མོ་ཁ་ཕྱེ་བ། །རྡོ་རྗེ་སོར་མོ་ངེས་པར་བཞག །འདོད་ཆགས་རྡོ་རྗེའི་གནས་མནན་ཏེ། །རྡོ་རྗེ་ཕུར་བུ་ངེས་
པར་གདབ། །བཏབ་མ་ཐག་ཏུ་རྡོ་རྗེ་ཆེ། །སྐུ་གསུམ་དྲི་མེད་ལས་བྱུང་བ། །དམ་ཚིག་མཆོག་གིས་ལྡང་བར་འགྱུར། །ཉམས་པའི་གནས་སུ་མི་འགྱུར་ནའོ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་

88-1-138a

ཐུགས་རྣམ་པར་འཕྲུལ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཐུགས་ཀྱི་དམ་ཚིག་ཚམ་ངམ་གྱིས་གནོན་པའི་སྔགས་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨོཾ་
བཛྲ་རཱ་ཛ་ཧཱུྃ། རྩེ་མོ་ལྔ་པར་བཅིངས་ནས་ནི། །འོད་འཕྲོ་མང་པོ་འཁྲིགས་པར་བསྒོམ། །སེམས་ཀྱི་རྡོ་རྗེའི་གནས་མནན་ཏེ། །རྡོ་རྗེ་ཕུར་བུས་ངེས་པར་གདབ། །བཏབ་པ་ཙམ་གྱིས་རྡོ་རྗེ་ཆེ། །རྡོ་རྗེ་དྲི་མེད་
གསུམ་ལས་བྱུང་། །དམ་ཚིག་མཆོག་གིས་ལྡང་བར་འགྱུར། །ཉམས་པའི་གནས་སུ་མི་འགྱུར་ནའོ། །སྐུ་གསུང་ཐུགས་ཀྱི་སྦྱོར་བ་ཡིས། །ཆོ་ག་ཡང་དག་བྱས་ཙམ་གྱིས། །མཁའ་དབྱིངས་རྡོ་རྗེ་
མཐའ་ཀླས་པར། །ཕུར་བུས་འདེབས་འདིར་གདོན་མི་ཟ། །བཅོམ་ལྡན་འདས་རྡོ་རྗེ་ཕུར་བུ་ཆེན་པོས་དེ་སྐད་ཅེས་བཀའ་སྩལ་ཏོ། །དེ་ནས་སངས་རྒྱས་སྐུ་གསུམ་མཆོག །སེམས་ཅན་
ཁམས་ལ་ཕན་མཛད་པ། །མཉེས་ཤིང་རབ་ཏུ་དགྱེས་གྱུར་ནས། །གསུང་ནི་འདི་སྐད་བཀའ་སྩལ་ཏོ། །ཨེ་མའོ་གསང་བའི་གནས་ཀྱི་མཆོག །ཨེ་མའོ་སྙིང་པོ་ཀུན་བཏུས་པ། །ཨེ་མའོ་ཆོས་
ཀྱི་གནས་ཞི་བ། །ཨེ་མའོ་རྡོ་རྗེ་རྣམ་པར་འཇོམས། །ཕུར་འདེབས་སངས་རྒྱས་ཐམས་ཅད་དང་། །བྱང་ཆུབ་སེམས་དཔའ་གྲགས་ཆེན་པོ། །སྐུ་གསུང་ཐུགས་ཀྱི་རྡོ་རྗེ་རྣམས། །ཕུར་
བུས་གདབ་པ་ཡང་དག་བཤད། །འདི་ནི་སྔགས་རྣམས་ཐམས་ཅད་ཀྱི། །ཕུར་གདབ་དེ་ཉིད་ལས་བྱུང་བ། །སྐུ་གསུང་ཐུགས་ལས་མཆོག་སྦྱིན་པ། །སྔགས་ཀྱི་དེ་ཉིད་བསྡུས་པའོ། །དེ་བཞིན་
གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས་སྐུ་དང་གསུང་དང་ཐུགས་རྨད་དུ་བྱུང་བ་སྔགས་འགུགས་པ་རྣམ་པར་སྤྲུལ་པའི་རྒྱལ་པོ་ཞེས་བྱ་བའི་

88-1-138b

ལེའུ་སྟེ་བཅུ་བཞི་པའོ།། །། དེ་ནས་རྒྱལ་པོ་རྡོ་རྗེ་འཛིན། །ཐམས་ཅད་ནམ་མཁའ་མི་འགྱུར་ཆེ། །ཐམས་ཅད་དབང་བསྐུར་ཀུན་མཁྱེན་པས། །རྡོ་རྗེ་གསུང་ནི་བཀའ་སྩལ་པ། །
སྨེ་ཤ་ཅན་གྱི་བདག་ཉིད་ཆེ། །བུ་མོ་ལོ་གྲངས་བཅུ་གཉིས་པ། །དབེན་པའི་གནས་སུ་ཁྱད་པར་དུ། །སྒྲུབ་པ་པོས་ནི་རྟག་ཏུ་བསྒྲུབ། །བཤང་གཅིའི་དམ་ཚིག་ལ་སོགས་པས། །གྲུ་བཞི་
པ་ནི་ཆོ་ག་ཡིས། །དཀྱིལ་འཁོར་བྱའོ་དེ་རུ་ནི། །རྡོ་རྗེ་དཀྱིལ་འཁོར་བསྒོམས་པ་ཡིས། །མཚན་ཉིད་ཐམས་ཅད་ཡོངས་སུ་དག །བཞིན་ཡང་མཛེས་ལ་རབ་ཏུ་བཟང་། །རྒྱན་རྣམས་ཐམས་
ཅད་ཡོངས་རྫོགས་པ། །པང་པར་བཞག་ནས་རྣམ་པར་བསྒོམ། །དཀྱིལ་འཁོར་ལྔ་ཡི་འཁོར་ལོ་ཡིས། །སངས་རྒྱས་གཟུགས་ནི་རྣམ་པར་བསྒོམ། །སྔགས་ཀྱི་འཁོར་ལོ་ཅན་གྱི་
གསང་། །མཆོད་པའི་གནས་ནི་ཉམས་དགའ་བསྒོམ། །སྐུ་གསུང་ཐུགས་ནི་རྡོ་རྗེ་ཅན། །རྣམ་པར་སྣང་མཛད་སྐུ་ཆེན་པོ། །བསམ་གཏན་སྔགས་ཀྱི་སྦྱོར་བ་ཡིས། །སངས་རྒྱས་ཀྱི་ནི་འོད་
འདྲར་འགྱུར། །གཙོ་བླག་མཁན་ནི་བདག་ཉིད་ཆེ། །བུ་མོ་ཨུད་པལ་མཐིང་གའི་མདོག །འདྲ་བ་དག་ནི་རྟག་ཏུ་བསྒྲུབ། །རྡོ་རྗེ་སེམས་དཔའི་སྦྱོར་བ་ཡིས། །དེ་ཉིད་སྦྱོར་བའི་ཆོ་ག་ནི། །
བྱས་ནས་ལས་ནི་བརྩམ་པར་བྱ། །འདི་ནི་སྔགས་རྣམས་ཐམས་ཅད་ཀྱི། །དམ་ཚིག་ཤིན་ཏུ་འདའ་དཀའ་བའོ། །དེ་ནི་དེ་མ་ཐག་ཉིད་དུ། །རྡོ་རྗེ་སེམས་དཔའི་འོད་འདྲར་འགྱུར། །
ཆོས་རྣམས་ཀུན་འཛིན་རྒྱལ་པོ་མཚུངས། །འདོད་དང་ཐར་པ་རབ་སྒྲུབ་པ། །རྡོ་རྗེ་ཆོས་ནི་རྣམ་བསྒོམས་པས། །གར་མཁན་བུ་མོ་རབ་མཛེས་ཤིང་། །བཞིན་བཟང་མིག་ནི་དཀྱུས་རིང་བ། །སྒྲུབ་

88-1-139a

པ་པོས་ནི་རྟག་ཏུ་བསྒྲུབ། །དེ་ནི་རྡོ་རྗེ་ཆོས་བདག་ཉིད། །ས་བཅུ་ལ་ནི་གནས་པར་འགྱུར། །རྒྱལ་པོ་གསུང་གི་དམ་ཚིག་འཛིན། །ཀུན་མཆོག་དབང་ཕྱུག་དམ་པའོ། །བྲམ་ཟེ་རྒྱལ་
རིགས་རྗེའུ་རིགས་དང་། །དམངས་རིགས་ལས་བྱུང་བུ་མོ་ནི། །རྡོ་རྗེ་ཆོས་བདག་ཉིད་འདི་ནི། །གསང་བ་ཐོབ་པར་བྱེད་པ་བསྒྲུབ། །རྡོ་རྗེ་ཉི་མ་ནུབ་ནས་ནི། །སྒྲུབ་པ་ཀུན་ཏུ་བརྩམ་པར་བྱ། །
སྐྱ་རེངས་ཤར་བའི་དུས་སུ་ནི། །བསྒོམ་པ་མཆོག་གིས་འགྲུབ་པར་འགྱུར། །རྒྱན་རྣམས་ཐམས་ཅད་ཡོངས་སུ་རྫོགས། །དྲི་དང་མེ་ཏོག་རྣམས་ཀྱིས་བརྒྱན། །བསྒོམས་ན་རྡོ་རྗེ་སེམས་
དཔའ་མཆོག །གྲུབ་པ་མྱུར་དུ་ཐོབ་པར་འགྱུར། །འདི་ནི་སྐུ་གསུམ་མཆོག་སྦྱིན་པ། །སངས་རྒྱས་མཚན་གྱིས་མཚན་པར་འགྱུར། །དཔག་ཚད་བརྒྱ་ཡི་ཁྱོན་ཙམ་དུ། །དེ་ཡི་འོད་ཀྱང་
སྣང་བར་བྱེད། །དབང་པོ་གཉིས་ནི་སྦྱོར་བ་ཡིས། །སྦྱོར་བ་ཐམས་ཅད་བརྩམ་པར་བྱ། །འདི་ནི་དངོས་གྲུབ་ཐམས་ཅད་ཀྱི། །དམ་ཚིག་ཤིན་ཏུ་འདའ་དཀའ་བའོ། །གལ་ཏེ་རྡོ་རྗེ་ཅན་གྲུབ་འདོད། །
གཤང་གཅིའི་དམ་ཚིག་བཟའ་བར་བྱ། །འདི་ནི་དངོས་གྲུབ་ཐམས་ཅད་ཀྱི། །དམ་ཚིག་ཤིན་ཏུ་འདའ་དཀའ་བའོ། །བཤང་གཅིའི་དམ་ཚིག་ལ་སོགས་པས། །དབང་པོ་གཉིས་ཀྱི་སྦྱོར་བ་
ཡིས། །སངས་རྒྱས་བྱང་ཆུབ་གནས་ཞི་བ། །དེ་ཉིད་བླ་ན་མེད་པ་འགྲུབ། །བཅོམ་ལྡན་འདས་འདོད་པ་དང་ཐར་པའི་དམ་ཚིག་རྡོ་རྗེས་དེ་སྐད་ཅེས་བཀའ་སྩལ་ཏོ། །དེ་ནས་བཅོམ་ལྡན་འདས་དམ་ཚིག་
ཆེན་པོ་རྡོ་རྗེ་ཁྲོ་བོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཀུན་ཏུ་སྐྲག་པར་བྱེད་པའི་ཁྲོ་བོ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་

88-1-139b

ཕྱུང་ངོ་། །ཨོཾ་ཧྲཱིཿཥྚཱིཿབི་ཀྲི་ཏཱ་ན་ན་སརྦ་ཤ་ཏྲཱུྃ་ནཱ་ཤ་ཡ། སྟམ་བྷ་ཡ། ཧཱུྃ་ཧཱུྃ་ཕཊ་ཕཊ་སྭཱ་ཧཱ། དུག་ནི་ཁྲག་དང་ཀུན་ཏུ་སྦྱར། །ལན་ཚྭ་སྐེ་ཚེ་དེ་བཞིན་ཏེ། །ཚེར་མའི་མེ་ལས་ཁྲོས་པས་བསྲེག །བུ་མོའི་མིང་གི་ཚིག་དང་
བཅས། །ཉི་མ་གུང་ངམ་ནམ་ཕྱེད་ན། །འདི་ནི་རྣམ་པ་ཀུན་ཏུ་ཤིས། །ཤེས་རབ་ཅན་གྱིས་གྲུ་གསུམ་དུ། །སྟོང་ཕྲག་བརྒྱད་ནི་ཚུལ་བཞིན་བསྲེག །བུ་མོ་དག་གི་དོན་གྱི་ཕྱིར། །འདི་ནི་ཉི་མ་གསུམ་དུ་བྱ། །བསྐལ་པ་
གསུམ་དང་གྲངས་མེད་ནི། །དེས་ནི་རྟག་ཏུ་གནོན་པར་འགྱུར། །སངས་རྒྱས་དང་ནི་ཆོས་འཛིན་པ། །རྡོ་རྗེ་སེམས་དཔའ་གཞན་ཡང་རུང་། །གལ་ཏེ་རྨོངས་པས་འདས་ན་ནི། །དེ་ཡི་ཚེ་ནི་དེར་ཟད་འགྱུར། །བཅུ་
བཞིའམ་ཡང་ན་ཚེས་བརྒྱད་ལ། །དུར་ཁྲོད་སོལ་བ་བླངས་ནས་ནི། །ཆོ་ག་བཞིན་དུ་སྔགས་བཏབ་ན། །དེ་ནི་རྟག་ཏུ་སྟེར་བར་འགྱུར། །སྔགས་ཤེས་པ་ཡིས་གང་རུང་བའི། །དགྲ་ཡི་གཟུགས་བརྙན་བྱས་ནས་ནི། །
བསམ་གཏན་དག་གིས་བྲིས་ན་ནི། །འཆི་བར་འགྱུར་འདིར་གདོན་མི་ཟ། །ཐོ་བ་བསམ་གཏན་སྦྱོར་བ་ཡིས། །དེ་ལྟར་བྱས་ན་ངེས་པར་ལྟུང་། །ཧཱུྃ་ཡིག་རབ་ཏུ་འབར་དང་བཅས། །རྡོ་རྗེ་འབར་བ་རབ་ཏུ་
བསྒོམ། །གདུག་པ་ཐམས་ཅད་འཇིག་པར་བྱེད། །ཕྱག་ན་རྡོ་རྗེའི་རིགས་དྲན་ཏེ། །རྡོ་རྒྱུས་སོལ་བ་ལ་སོགས་པས། །སྐྱེས་པའམ་བུད་མེད་གཟུགས་བྲིས་ལ། །ལག་པར་སྟ་རེ་བསམས་ནས་སུ། །
མགྲིན་པ་བཅད་པར་རྣམ་པར་བསྒོམ། །སངས་རྒྱས་སྐུ་གསུམ་རིན་ཆེན་མཆོག །སེམས་ཅན་ཀུན་ལ་ཕན་འདོད་པ། །འདི་ཡིས་སྣད་པར་འགྱུར་བ་འམ། །ཤི་བར་འགྱུར་འདིར་གདོན་མི་ཟ། །ལས་
ཀྱི་རྡོ་རྗེ་རབ་འབར་ཆེ། །མེ་སྟག་མང་པོ་འཁྲིགས་པ་ཅན། །དབུས་སུ་རྡོ་རྗེ་རྣམ་བསྒོམས་ལ། །ཆུ་རྣམས་གནོན་པའི་མཆོག་ཡིན་ནོ། །དཀྱིལ་འཁོར་དག་ནི་འདྲི་བ་ན། །རླུང་ལ་སོགས་པ་བྱུང་ན་ནི། །

88-1-140a

མཆེ་བའི་ཕྱག་རྒྱ་བཅིངས་ནས་སུ། །གདུག་པའི་དགྲ་ནི་རྗེས་དྲན་བྱ། །སངས་རྒྱས་བྱང་ཆུབ་སེམས་དཔས་ཀྱང་། །སྤྲུལ་པར་གང་ཞིང་གྱུར་པ་ནི། །མཐོང་བ་ཙམ་གྱིས་འགག་
འགྱུར་ཏེ། །གཞན་དུ་བྱས་ན་འཇིགས་པར་འགྱུར། །སངས་རྒྱས་བྱང་ཆུབ་སེམས་དཔའ་དང་། །སྐྱེ་བོ་གདུག་པ་གཞན་དག་ཀྱང་། །སྔགས་འདིས་སྐྲག་པར་བྱས་ན་ནི། །འཆི་བར་འགྱུར་བར་གདོན་མི་
ཟ། །དེ་ལ་འདི་ནི་སྔགས་ཐམས་ཅད་ཀྱི་གསང་བའི་སྙིང་པོའོ། །ཕཊ། ཡེ་ཤེས་སེམས་དཔའི་སྦྱོར་བ་ཡིས། །དབུས་སུ་གཟུགས་ནི་བསྒོམ་པར་བྱ། །སྔགས་ཤེས་པ་ཡིས་གནས་བཞི་རུ། །བཙུན་
མོ་རྟག་ཏུ་གཞག་པར་བྱ། །རྒྱན་རྣམས་ཐམས་ཅད་ཡོངས་སུ་རྫོགས། །མཚན་རྣམས་ཐམས་ཅད་ཀྱིས་མཚན་པ། །པད་མོ་རབ་ཏུ་རྒྱས་བྱས་ནས། །སྔགས་འདི་རབ་ཏུ་བསྒོམ་པར་བྱ། །ཧཱུྃ། 
འོད་ཟེར་ལྔ་འོད་རབ་འབར་བ། །རྡོ་རྗེ་ཅན་གྱི་སྦྱོར་བ་བསྒོམ། །རང་ལུས་ངག་སེམས་རྡོ་རྗེ་ལ། །ཕབ་ན་བྱང་ཆུབ་ཐོབ་པར་འགྱུར། །དེ་ནི་དེ་མ་ཐག་ཉིད་དུ། །རྣམ་པར་སྣང་མཛད་འོད་འདྲ་ཞིང་། །
རྡོ་རྗེ་སེམས་དཔའ་རྒྱལ་པོ་ཆེ། །སངས་རྒྱས་སྐུ་གསུམ་རྡོ་རྗེ་འཛིན། །སེམས་དཔའ་ཐམས་ཅད་སྐྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བཞིན་བཟངས་ཕན་པར་འདོད་པ་ཡི། །བུད་མེད་རྙེད་
ན་ཆོ་ག་བཞིན། །བདེན་པར་མཆོད་པ་བརྩམ་པར་བྱ། །གསང་བ་བླངས་ནས་བཟའ་བར་བྱ། །དེ་ནི་དེ་མ་ཐག་ཉིད་དུ། །འཇམ་དཔལ་དང་ནི་གཟི་བརྗིད་མཉམ། །མི་སྣང་བདག་པོ་དཔལ་དང་
ལྡན། །འཛམ་བུའི་གསེར་གྱི་མདངས་འདྲར་འགྱུར། །བཤང་པའམ་ཡང་ན་བཟའ་བ་འམ། །ཤ་ཡང་ཆོ་ག་བཞིན་དུ་ནི། །མངོན་པར་བསྔགས་ནས་གཞུག་པར་བྱ། །ཟོས་ན་མཁས་རྣམས་ཀྱིས་

88-1-140b

མི་མཐོང་། །བཅོམ་ལྡན་འདས་རྡོ་རྗེ་འཆང་ཆེན་པོས་དེ་སྐད་ཅེས་བཀའ་སྩལ་ཏོ། །བཤང་བ་ཆོ་ག་བཞིན་བླངས་ནས། །ཁམ་ཕོར་སྦྱར་མར་བཞག་པར་བྱ། །བརྒྱ་རྩ་བརྒྱད་དུ་བསྐུལ་ན་ནི། །སངས་
རྒྱས་ཉི་མས་མི་མཐོང་ངོ་། །ཁྱི་ཡི་ཤ་དང་རྟ་ཤ་དང་། །ཤ་ཆེན་དག་ནི་ཆོ་ག་བཞིན། །བླངས་ནས་ཁ་སྦྱར་སྦྱོར་བ་ཡིས། །ཟོས་ན་དེ་ཡིས་མི་མཐོང་ངོ་། །བཤང་དང་ལྷན་ཅིག་ལྡན་པ་ཡིས། །རི་ལུ་ལྕགས་གསུམ་གྱིས་དཀྲིས་པ། །
དབང་པོ་གཉིས་ཀྱི་སྦྱོར་བ་ཡིས། །སངས་རྒྱས་ཀུན་གྱིས་མི་མཐོང་ངོ་། །ཁྱི་ཡི་ཤ་དང་སྦྱར་བ་ཡི། །རི་ལུ་ལྕགས་གསུམ་གྱིས་དཀྲིས་པ། །དབང་པོ་གཉིས་ཀྱི་སྦྱོར་བ་ཡིས། །སངས་རྒྱས་ཀུན་གྱིས་མི་
མཐོང་ངོ་། །ཤ་ཆེན་དང་ནི་སྦྱོར་བ་ཡི། །རི་ལུ་ལྕགས་གསུམ་གྱིས་དཀྲིས་པ། །དབང་པོ་གཉིས་ཀྱི་སྦྱོར་བ་ཡིས། །སངས་རྒྱས་ཀུན་གྱིས་མི་མཐོང་ངོ་། །བ་གླང་ཤ་དང་སྦྱོར་བ་ཡི། །རི་ལུ་ལྕགས་གསུམ་གྱིས་
དཀྲིས་པ། །དབང་པོ་གཉིས་ཀྱི་སྦྱོར་བ་ཡིས། །སངས་རྒྱས་ཀུན་གྱིས་མི་མཐོང་ངོ་། །བཤང་བ་ལས་བྱུང་སྲོག་ཆགས་ལས། །བརྟུལ་ཞུགས་ཅན་གྱིས་རི་ལུ་བྱ། །དབང་པོ་གཉིས་ཀྱི་སྦྱོར་བ་ཡིས། །
སངས་རྒྱས་ཀུན་གྱིས་མི་མཐོང་ངོ་། །ག་བུར་ཙན་དན་སྦྱར་བ་ཡི། །རི་ལུ་ལྕགས་གསུམ་གྱིས་དཀྲིས་པ། །དབང་པོ་གཉིས་ཀྱི་སྦྱོར་བ་ཡིས། །སངས་རྒྱས་ཀུན་གྱིས་མི་མཐོང་ངོ་། །གི་ཝང་ཨ་ག་རུ་སྦྱར་བའི། །
རི་ལུ་ལྕགས་གསུམ་གྱིས་དཀྲིས་པ། །དབང་པོ་གཉིས་ཀྱི་སྦྱོར་བ་ཡིས། །རྡོ་རྗེ་སྟོབས་པོ་ཆེར་འགྱུར་རོ། །ག་བུར་གུར་གུམ་སྦྱར་བ་ཡི། །རིལ་བུ་ལྕགས་གསུམ་གྱིས་དཀྲིས་པ། །དབང་པོ་གཉིས་ཀྱི་སྦྱོར་
བ་ཡིས། །སངས་རྒྱས་ཀུན་གྱིས་མི་མཐོང་ངོ་ཞེས་གསུངས་སོ། །རྡོ་རྗེ་ཅན་རྣམས་གང་ཡང་རུང་། །ཕྱག་རྒྱ་ཆེན་པོར་བྱིན་བརླབས་ན། །དེ་འདྲར་འགྱུར་ཏེ་དཔལ་དང་ལྡན། །སྟོབས་ཆེན་ཕ་རོལ་གནོན་པ་པོ། །

88-1-141a

དཔག་ཚད་བྱེ་བ་རྫོགས་པ་ཡི། །སྟེང་དུ་རྡོ་རྗེ་འགྲོ་བར་འགྱུར། །སྟོང་གསུམ་བགྲོད་པ་དཔལ་དང་ལྡན། །སངས་རྒྱས་འོད་དང་འདྲ་བར་འགྱུར། །འདོད་ཁམས་གནས་པའི་བུ་མོ་དང་། །ལྷ་ཡི་
ལོངས་སྤྱོད་རིགས་བརྟུལ་ཞུགས། །ཡང་ན་གཟུགས་ཁམས་གནས་པ་ལ། །སྟོབས་ཆེན་གྱིས་ནི་འདོད་པ་སྤྱོད། །བཅོམ་ལྡན་འདས་དམ་ཚིག་མི་སྣང་བའི་རྡོ་རྗེ་ཆེན་པོས་དེ་སྐད་ཅེས་བཀའ་སྩལ་ཏོ། །དེ་ནས་
སངས་རྒྱས་རབ་དགྱེས་བདག །སེམས་འཁྲུགས་ཡིད་ལ་དབང་བ་དག །ངོ་མཚར་གྱུར་ཅིང་སྤྱན་གདངས་ནས། །གསུང་ནི་འདི་སྐད་བཀའ་སྩལ་ཏོ། །ཨེ་མའོ་འདི་རབ་ངོ་མཚར་ཆེ། །ཨེ་མའོ་གསང་
གནས་མི་འགྱུར་བ། །ཨེ་མའོ་ངོ་བོ་ཉིད་ཀྱིས་དག །ཨེ་མའོ་ཤིན་ཏུ་དྲི་མེད་ཆོས། །དེ་ནས་སྟོན་པ་རྡོ་རྗེ་འཛིན། །སྐྱེད་པོ་བྱེད་པོ་མི་འགྱུར་ཆེ། །སངས་རྒྱས་རྡོ་རྗེ་ཆོས་ཆེན་པོས། །རྡོ་རྗེའི་གསུང་དུ་བཀའ་
སྩལ་པ། །སེམས་དཔའ་རྡོ་རྗེའི་སྦྱོར་བ་ཡིས། །རྡོ་རྗེ་འཛིན་རྣམས་མཉེས་པར་བྱ། །སངས་རྒྱས་བྱང་ཆུབ་རབ་དབྱེ་བས། །སངས་རྒྱས་རྡོ་རྗེ་ཅན་མཉེས་འགྱུར། །རྡོ་རྗེ་སྤྱན་དང་གཟུགས་སོགས་
ཀྱིས། །གཙུག་ཏོར་མཉེས་པར་བྱེད་པར་དྲན། །ཁྲོ་བོ་རྣམས་ལའང་དེ་མཆོག་སྟེ། །སངས་རྒྱས་རྡོ་རྗེ་རབ་བསྒོམ་པའོ། །རིག་པའི་རྒྱལ་པོ་ཆོས་མཆོག་རྣམས། །རིན་ཆེན་ཏོག་ནི་རྣམ་པར་
བསྒོམ། །རིག་པའི་རྒྱལ་མོའི་སྦྱོར་བ་ལ། །ཚེ་དཔག་མེད་པ་རབ་ཏུ་བསྒོམ། །ཐམས་ཅད་ལས་བྱེད་སྔགས་རྣམས་ལ། །གདོན་མི་ཟ་བའི་ཡེ་ཤེས་བསྒོམ། །སྔགས་རྣམས་ཐམས་ཅད་ཉིད་ལ་
ནི། །རྡོ་རྗེ་སེམས་དཔའ་རྣམ་པར་བསྒོམ་ཞེས་གསུངས་སོ། །གནོད་སྦྱིན་མོ་ཡི་སྔགས་རྒྱུད་ལ། །གཤིན་རྗེ་གཤེད་ཉིད་བརྟག་པར་བྱ། །ཐམས་ཅད་སྦྱོར་བའི་སྔགས་རྣམས་ལ། །སྤྱི་བོ་རུ་ནི་

88-1-141b

བསྐུལ་བ་ཤིས། །བཅོམ་ལྡན་འདས་དམ་ཚིག་ཆེན་པོས་དེ་སྐད་ཅེས་བཀའ་སྩལ་ཏོ། །བསམ་གཏན་འཁོར་ལོ་འདི་ཡིས་ནི། །སྔགས་མཉེས་པ་ཡི་དཀྱིལ་འཁོར་དག །དམ་ཚིག་ཆེན་པོ་སྒྲུབ་
བྱེད་པ། །སྒྲུབ་པོ་རྣམས་ལ་ཕན་པ་གསུངས། །དེ་ནས་སྟོན་པ་རྡོ་རྗེ་འཛིན། །གཙོ་བོ་ཆོས་རྣམས་ཀུན་དབང་ཕྱུག །སྐུ་དང་གསུང་ཐུགས་ཡོངས་དག་པས། །ཡེ་ཤེས་རྡོ་རྗེ་བཀའ་སྩལ་ཏེ། །
རི་རྩེ་ཉམས་ནི་དགའ་བ་དང་། །ནགས་ཚལ་རབ་ཏུ་དབེན་པར་ཡང་། །བསམ་གཏན་རྡོ་རྗེ་རབ་བྱ་བ། །སྔགས་དང་བཟླས་པའི་སྦྱོར་བ་ཡིས། །རྡོ་རྗེ་སེམས་དཔའ་ལ་སོགས་ཀུན། །
སྔགས་དང་བསམ་གཏན་གྱིས་བསྐུལ་བས། །གསུང་གི་ལས་ཀྱི་བཀའ་བཞིན་དུ། །ལས་རྣམས་སྣ་ཚོགས་བྱེད་པར་འགྱུར། །རྡོ་རྗེ་ཆོས་ཀྱི་གཟུགས་ཆེན་པོ། །པད་མ་རཱ་གའི་
འོད་འདྲ་བ། །སྐུ་གསུང་ཐུགས་ཀྱི་རྡོ་རྗེ་ནི། །གནས་གསུམ་དུ་ནི་རིགས་བརྟག་གོ། དབབ་པའི་ཆོ་ག་ཐམས་ཅད་ནི། །བྱས་ན་གདོན་མི་ཟ་བར་འགྲུབ། །བསྐུལ་དང་རེངས་པ་ལྷ་ཆེན་པོ། །
འཕགས་པའི་ས་ནི་བཞི་པོ་དག །རྡོ་རྗེ་གྲུབ་པ་དག་གིས་བྱ། །དེ་ལྟར་བྱས་ན་རྟག་པར་འགྲུབ། །བུ་མོ་ལོ་གྲངས་བཅུ་གཉིས་མའམ། །ཁྱེའུ་ལོ་གྲངས་བཅུ་གཉིས་པ། །མཚན་ཉིད་ཐམས་ཅད་
ཡོངས་རྫོགས་པ། །བཟུང་ནས་དབབ་པར་རབ་ཏུ་བརྟག །ཆོ་ག་ཐམས་ཅད་བྱས་ནས་ནི། །ལས་རྣམས་རབ་ཏུ་བསྒྲུབ་པར་བྱ། །རྣམ་པ་གཞན་དུ་བྱས་ན་ནི། །ཁམས་གསུམ་སྐྱེ་བོས་དཔྱོས་
པར་འགྱུར། །དེ་ལ་སྙིང་པོའི་སྔགས་ཀྱི་ཡི་གེའི་ཚིག་ནི་འདི་རྣམས་སོ། །ཧཱུྃ་ཧཱཿཨཱཿཛྷཻཿ ནམ་མཁའི་ཁམས་ནི་སེམས་མེད་ཅིང་། །རྟོག་པ་ཐམས་ཅད་རྣམ་སྤངས་དང་། །རྡོ་རྗེ་སེམས་དཔའ་

88-1-142a

རང་ཉིད་ཀྱང་། །འབབ་པར་འགྱུར་རོ་ཆོ་ག་ཡིས། །ཧཱུྃ་ཡིག་རྡོ་རྗེ་སེམས་དཔའི་བདག །ཧཱཿཡིག་སྐུ་ཡི་རྡོ་རྗེ་ཅན། །ཨཱཿཡིག་ཆོས་འཛིན་རྒྱལ་པོ་སྟེ། །འདི་ནི་སྔགས་ཚིག་བསྟན་པའོ། །ཡི་
གེ་ཛྷཻཿཡིས་བསྐུལ་བར་བཤད། །འཁོར་བ་དང་ནི་གཡོ་བ་ཡིན། །འདི་ནི་བསྐུལ་བ་ཐམས་ཅད་ཀྱི། །གསང་བ་ཡིན་པར་འདི་རབ་བཤད། །ཁྲུ་གང་ཙམ་མམ་ཁྲུ་དོ་འམ། །ཇི་སྲིད་ཁྲུ་བརྒྱད་ལྔ་ཙམ་དུ། །
རྡོ་རྗེ་རྒྱལ་པོ་རབ་བསྐུལ་ན། །འཇིགས་ཤིང་སྐྲག་ནས་འཕར་བར་འགྱུར། །དེ་བཞིན་ཐམས་ཅད་སྔར་ཇི་ལྟར། །འདི་ནི་གསང་བ་ཐོབ་བྱེད་པའོ། །དེ་ནས་རྒྱལ་པོ་རྡོ་རྗེ་འཛིན། །དེ་བཞིན་གཤེགས་
པ་ཀུན་གྱི་བདག །སྐུ་གསུམ་གནས་ནི་ཡོངས་དག་པས། །གསུང་ནི་འདི་སྐད་བཀའ་སྩལ་ཏོ། །རྩེ་གཅིག་མ་གྱུར་པ་ཡིས་ཀྱང་། །བརྟུལ་ཞུགས་བརྟན་པས་བྱ་བ་འདི། །སྦྱོར་བ་གཞན་མིན་པ་
ཡིས་བྱ། །གདུག་པ་ཐམས་ཅད་རྣམ་གཞིག་པའོ། །དུར་ཁྲོད་སོལ་དང་ཕུབ་སོགས་ལས། །དགྲ་ཡི་གཟུགས་བརྙན་བྱས་ནས་ནི། །སྐྲ་བཤིག་གཅེར་བུར་བྱུང་བ་ཡིས། །ཁམས་གསུམ་དག་ཀྱང་
འཇིག་པར་བྱེད། །དུར་ཁྲོད་རོ་བསྲེགས་ཐལ་བ་ཡིས། །དགྲ་ཡི་གཟུགས་བརྙན་བྱས་ནས་ནི། །སྟོང་བརྒྱ་རྩ་བརྒྱད་བཟླས་པས་ཀྱང་། །འཆི་བར་འགྱུར་འདིར་གདོན་མི་ཟ། །དཀྱིལ་འཁོར་གྲུ་
གསུམ་བྱས་པ་ལ། །བ་ལང་ཤ་དང་རྟ་ཡི་ཤ ། ཁྱི་ཡི་ཤ་འམ་སྣ་ཚོགས་ཀྱིས། །རྡོ་རྗེའང་གདོན་མི་ཟ་བར་འཇིག །ཤ་ཆེན་པོ་ཡིས་འཇིག་པ་ནི། །ཐམས་ཅད་རྡོ་རྗེ་ལས་བྱུང་དྲན། །འདི་ནི་
དགྲ་རྣམས་ཐམས་ཅད་ཀྱི། །འཇིགས་པ་ཤིན་དུ་མི་བཟད་དྲན། །ཆོས་མཆོག་ཅན་གྱི་བཤང་གཅི་ཡིས། །དགྲ་ཡི་གཟུགས་བརྙན་བྱས་ནས་ནི། །ཚེར་མའི་མེ་ལ་ཁྲོས་ནས་བསྲེགས། །སངས་རྒྱས་

88-1-142b

དག་ཀྱང་ངེས་པར་འཇིག་ཅེས་གསུངས་སོ། །ཆུ་བོའི་འགྲམ་གཉིས་ས་ཡིས་ཀྱང་། །དགྲ་ཡི་གཟུགས་བརྙན་བྱས་ནས་ནི། །དུག་ལས་བྱུང་བའི་ཚེར་མ་ནི། །ཏིལ་འབྲུ་ཙམ་གྱིས་ཡན་ལག་ཀུན། །དགང་
ཞིང་སྐུལ་བའི་ཚིག་དང་བཅས། །སངས་རྒྱས་དག་ཀྱང་ངེས་པར་འཇིག །ཅེས་གསུངས་སོ། །སྐེ་ཚེ་ལན་ཚྭ་འབྲུ་མར་དང་། །དུག་དང་དྷ་དུ་ར་དག་ནི། །སངས་རྒྱས་ཐམས་ཅད་གསད་པ་ལ། །འདི་དག་
རབ་མཆོག་གྱུར་པར་བཤད། །སོལ་ཁུས་གཤེར་བའི་གོས་དག་ནི། །གྱོན་ཏེ་སེམས་ནི་ཁྲོས་ནས་སུ། །ལིང་ག་རྐང་པས་མནན་ནས་ནི། །སྲིན་པོས་འཛིན་པར་གདོན་མི་ཟ། །རུས་ཕྱེ་ཁྲག་དང་དུག་
རྣམས་ཀྱིས། །གཟུགས་བརྙན་རབ་ཏུ་བྱས་ན་ནི། །རྡོ་རྗེ་སེམས་དཔའ་དྲག་པོ་ཡང་། །མྱུར་བ་དག་ཏུ་འཛིན་པར་འགྱུར། །སྐེ་ཚེ་དང་ནི་ཡང་དག་ལྡན། །བཤང་གཅི་དག་གིས་རྫོགས་པ་ཡི། །ལིང་ག་
རྐང་པས་མནན་ན་ནི། །ཚ་བ་ཆེན་པོས་འཛིན་པར་འགྱུར། །དེ་ལ་འདི་ནི་དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཆེན་པོ་རྡོ་རྗེ་ཁྲོ་བོའི་སྙིང་པོའོ། །ན་མཿས་མན་ཏ་ཀཱ་ཡ་བཱཀ་ཙིཏ་ཏ་བཛྲཱ་ཎཱྃ། ཨོཾ་ཧུ་ལུ་ཧུ་ལུ། 
ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣྰ་བི་ནཱ་ཡ་ཀཱན། མ་ཧཱ་ག་ཎ་པ་ཏི་ཛཱི་བི་ཏ་ཨན་ཏ་ཀ་རཱ་ཡ་ཧཱུྃ་ཕཊ། སྦྱིན་བསྲེག་སླར་ཡང་བསམ་གཏན་
དག །ལུས་དང་ངག་སེམས་འཇིག་པ་སྟེ། །མ་ཡེངས་པ་ཡི་སེམས་ཀྱིས་ནི། །གསོད་པ་ཡིན་ན་མཆོག་འདི་བྱ། །རྡོ་རྗེ་སེམས་དཔའ་ཁྲོ་བོ་ཆེ། །རྣམ་པར་བགྲད་པ་འཇིགས་འཇིགས་ལྟ། །སྟ་རེ་ཐོ་བ་ཕྱག་ན་
བསྣམས། །བསམས་ནས་བསམ་གཏན་རབ་ཏུ་བརྟག །དེ་ལ་འདི་ནི་དྲག་པོ་ཆེན་པོ་ཁྲོ་བོའི་དམ་ཚིག་གོ། །མཁའ་དབྱིངས་སངས་རྒྱས་ཐམས་ཅད་ཀྱིས། །ཡོངས་སུ་གང་བར་རབ་བསྒོམས་ལ། །གདུག་པ་དེ་

88-1-143a

ཡིས་བསད་པར་ནི། །བསམས་ནས་དེ་མ་ཐག་ཏུ་འཆི། །སངས་རྒྱས་བྱང་ཆུབ་སེམས་དཔའ་ཡིས། །ཡོངས་སུ་གང་བར་བསྒོམས་ནས་ནི། །གདུག་པའི་སེམས་དཔས་བསད་ན་ནི། །རྡོ་རྗེ་
འཛིན་པ་ཉིད་ཀྱང་འཆི། །སངས་རྒྱས་གནོད་བྱེད་དགྲ་བོ་རྣམས། །སྐྲག་ཅིང་འཇིགས་པས་དཀྲུགས་པར་ནི། །སྔགས་མཁན་གྱིས་ནི་མདུན་བསམས་ན། །འཆི་བར་འགྱུར་འདིར་གདོན་མི་ཟ། །སྲིན་པོ་
ཁྲོ་བོ་སྣ་ཚོགས་པ། །གཏུམ་ཞིང་ཁྲོ་བོ་མི་བཟད་པས། །སྐྲག་པར་གྱུར་པར་བསམས་དེས་ནི། །རྡོ་རྗེ་འཛིན་པ་ཉིད་ཀྱང་འཆི། །འུག་པ་ཁྲ་དང་བྱ་རྒོད་དང་། །མཆུ་རིངས་པ་དང་ཝ་རྣམས་ཀྱིས། །ཟོས་པར་
བསམས་ན་དེ་ཡིས་ནི། །སངས་རྒྱས་དག་ཀྱང་ངེས་པར་འཇིག །སྦྲུལ་ནག་རབ་ཏུ་ཁྲོ་བ་ནི། །འཇིགས་པ་དག་ཀྱང་འཇིགས་བྱེད་པ། །དུག་གི་མཆོག་གི་དམ་ཚིག་ནི། །དཔྲལ་བར་བསམས་ན་འདི་ཁྱད་
འཕགས། །སྦྲུལ་དེས་ཟོས་པར་གྱུར་པ་ཡིས། །བསྒྲུབ་བྱ་དག་ཀྱང་ངེས་པར་འཇིག །ཕྱོགས་བཅུའི་སེམས་ཅན་ཐམས་ཅད་ཀྱི། །ཡམས་སམ་ཉེ་བར་ཚེ་བ་རྣམས། །འཇིགས་པ་དགྲ་ལ་
དབབ་པའི་མཆོག །འདི་ནི་བསྐུལ་བའི་མཆོག་ཡིན་ནོ། །ཐོ་བ་རབ་ཏུ་དྲག་པོ་ཡིས། །བརྟུལ་ཞུགས་ཅན་གྱིས་སྙིང་གར་བརྡེག །རྡོ་རྗེ་འཛིན་པའི་བཀའ་བཞིན་དུ། །དགྲ་ཡི་སྲོག་ནི་མེད་པར་འགྱུར། །རྡོ་རྗེ་
ཅན་གྱིས་སྟ་རེ་སོགས། །གཤེགས་ཅིང་གཏུབ་པར་བསམས་ན་ནི། །སྐུ་གསུམ་གྱི་ནི་མཆོག་སྦྱིན་པ། །རྡོ་རྗེ་སེམས་དཔའ་དྲག་པོའང་འཆི། །བསྲུང་བ་ལ་སོགས་དང་པོ་སྔགས། །ལྷ་རྣམས་ཀྱང་
ནི་ཕུར་བུས་གདབ། །འདི་ནི་གསོད་བྱེད་མཆོག་གི་མཆོག །དམ་ཚིག་ཤིན་ཏུ་འདའ་དཀའ་བའོ། །ཕུང་པོ་རྡོ་རྗེས་དཀྱིལ་འཁོར་དུ། །སེམས་ཅན་ཇི་སྙེད་གནས་པ་ལ། །གསང་བདག་ཉིད་གཏོགས་

88-1-143b

བསམས་ན་ནི། །འདི་ལྟས་མཉེས་འགྱུར་གཞན་དུ་མིན། །སྟོན་པ་སངས་རྒྱས་རྡོ་རྗེ་འཛིན། །རྡོ་རྗེ་ཆོས་དང་རྡོ་རྗེ་ཅན། །བསམ་གཏན་སྦྱོར་བས་འཆི་བར་འགྱུར། །རྡོ་རྗེ་ཐུགས་ཀྱི་བཀའ་ཇི་བཞིན། །བཅོམ་ལྡན་
འདས་ཁྲོ་བོ་ཆེན་པོའི་དམ་ཚིག་རྡོ་རྗེ་ཁྲོ་བོས་དེ་སྐད་ཅེས་བཀའ་སྩལ་ཏོ། །དེ་ནས་རྒྱལ་པོ་རྡོ་རྗེ་འཛིན། །ཐམས་ཅད་ནམ་མཁའ་ཐུབ་ཆེན་པོ། །ཐམས་ཅད་དབང་བསྐུར་རྫོགས་སངས་རྒྱས། །ཡེ་
ཤེས་རྡོ་རྗེས་བཀའ་སྩལ་པ། །ཨེ་མའོ་ངོ་བོ་ཉིད་ཀྱིས་དག །རྡོ་རྗེ་ཐེག་པ་བླ་ན་མེད། །མ་སྐྱེས་པ་ཡི་ཆོས་རྣམས་ལ། །རྒྱལ་བ་རྣམས་ཀྱིས་སྐྱེ་བར་བསྟན། །དེ་ལ་འདི་ནི་ལས་ཕྲན་ཚེགས་ཀྱི་
རྡོ་རྗེ་གསང་བའོ། །སྦྲུལ་ནི་མི་སྡུག་འཇིགས་བྱེད་པ། །ནག་པོ་འབར་བ་འཁྲུག་ཅིང་ཁྲོ། །ལྕེ་གཉིས་མཆེ་བའི་ཕྲེང་བ་ཅན། །རྡོ་རྒྱུས་དག་གམ་སོལ་བས་བྲིས། །དེ་ལ་འདི་ནི་ཀླུ་ཁྲོ་བོ་སྐུལ་
བའི་སྙིང་པོའོ། །ཁྃ། ཁ་ཡི་ནང་དུ་དེ་བསམ་ཞིང་། །དུག་ནི་ཧ་ལ་ཧ་ལ་འདྲ། །སྲེག་པ་མེ་ཡི་ཁ་དོག་དང་། །བསྒོམས་ན་འགུལ་བར་གདོན་མི་ཟ། །དེ་ལ་འདི་ནི་དུག་ཐམས་ཅད་དགུག་པའི་སྙིང་
པོའོ། །ཧྲཱིཿ། རྣམ་པ་སྣ་ཚོགས་ལས་བྱུང་དུག །ཁམས་གསུམ་ན་ནི་གནས་པ་ཀུན། །དེ་ཡིས་ཁྱེར་བར་བསྒོམས་ནས་ནི། །བབ་པར་གྱུར་པར་རྣམ་པར་བསམ། །དེ་ནི་དེ་མ་ཐག་ཉིད་དུ། །
དུག་གི་རྒྱ་མཚོ་མི་བཟད་འགྱུར། །རེག་མ་ཐག་ཏུ་འགྲོ་བ་ཀུན། །འཇིག་པ་འདི་ལ་ཐེ་ཚོམ་མེད། །སྡིག་པ་སྦལ་པ་ལ་སོགས་དང་། །སྦྲུལ་རྣམས་སྣ་ཚོགས་པ་དག་ལའང་། །ཆོ་ག་བཞིན་དུ་
རབ་ཏུ་བྱ། །སྦྱོར་བ་འབྱུང་བའི་མཚན་ཉིད་ཀྱིས། །དེ་ལ་འདི་ནི་དུག་ཐམས་ཅད་འཕོ་བའི་སྙིང་པོའོ། །ཨོཾ། ལྟ་བ་རྡོ་རྗེའི་དུག་ལ་སོགས། །གཞན་ཡང་མི་བཟད་པ་ཡི་དུག །ནམ་མཁའ་རྡོ་རྗེའི་དཀྱིལ་འཁོར་

88-1-144a

དུ། །ཡེ་ཤེས་རྡོ་རྗེས་བཀུག་ནས་འཇུག །བཅོམ་ལྡན་འདས་དུག་གི་དམ་ཚིག་ཆེན་པོ་རྡོ་རྗེས་དེ་སྐད་ཅེས་བཀའ་སྩལ་ཏོ། །དེ་ལ་འདི་ནི་དུག་གསོ་བའི་དམ་ཚིག་རྡོ་རྗེའི་སྙིང་པོའོ། །ཧཱུྃ། སྙིང་པོ་འདི་ནི་རྡོ་རྗེ་ཆེ། །ཁ་
དོག་དཀར་པོར་རྣམ་པར་བསྒོམ། །འོད་ཀྱི་སྤྲིན་ནི་ཆེར་འབར་བ། །ཟླ་བའི་འོད་ཟེར་བཞིན་དུ་བསིལ། །གནས་བཞི་དག་ཏུ་སྦྱོར་བ་ཡིས། །དེ་མ་ཐག་ཏུ་སྡུད་པས་ལྡང་། །ལན་གཉིས་ལན་གསུམ་རབ་བསྒོམས་ནས། །
སྐྱུག་པ་དག་ཏུ་རྣམ་བསམས་ན། །ནམ་མཁའི་ཁམས་ཀུན་གང་བ་ཡང་། །སྐད་ཅིག་གིས་ནི་དུག་མེད་བྱེད། །ཞེས་དེ་སྐད་ཅེས་ཀྱང་བཀའ་སྩལ་ཏོ། །དེ་ལ་འདི་ནི་ཉེ་བའི་དུག་ཐམས་ཅད་དྲང་བའི་སྙིང་པོའོ། །
ཨཱཿ འབྲས་དང་ཕོལ་མིག་འབྲུམ་བུ་དང་། །གང་གཞན་ནད་དུ་བཤད་པ་རྣམས། །ཕྱག་ན་རྡོ་རྗེའི་བཀའ་བཞིན་དུ། །བསམས་པ་ཙམ་གྱིས་མེད་པར་འགྱུར། །པད་མ་ཆེན་པོ་འདབ་མ་བརྒྱད། །རི་བོང་ཅན་བཞིན་
དྲི་མེད་པ། །དེ་ཡི་དབུས་ན་འདུག་བསམ་པ། །འོད་ཟེར་ལྔ་ནི་རབ་རྫོགས་པའོ། །སྡུད་པ་ན་ནི་དམ་ཚིག་གནག །སྐུལ་བ་ན་ནི་དཀར་པོ་འདྲ། །བསམ་གཏན་གནས་འདི་གསང་བ་སྟེ། །གསང་ཆེན་ཡེ་ཤེས་དྲི་
མ་མེད། །དེ་ལ་འདི་ནི་ཕྱི་ནང་གི་ནད་རྣམས་གསོ་བའི་རྡོ་རྗེ་སྙིང་པོའི་སྔགས་ཀྱི་ཡི་གེའི་ཚིག་རྣམས་སྟེ། །ཛི་ན་ཛིཀ ། ཨཱ་རོ་ལི་ཀི ། བཛྲ་དྷྲཱིཀ ། ཡི་གེའི་ཚིག་ནི་གང་འདོད་པ། །དད་པས་ཡོན་ཏན་ཐོབ་པར་འགྱུར། །དེ་འདྲའི་
གཟུགས་ནི་བསྒོམ་པར་བྱ། །ནད་ཀྱི་རྡོ་རྗེ་བསྐུལ་བ་ཡིས། །དམ་ཚིག་སྤྲེའུའི་རྣམ་པ་འམ། །ཡང་ན་ཁྱིར་ནི་བྱུང་བའང་རུང་། །རང་གི་ལུས་ངག་སེམས་གནས་ལས། །བྱུང་བ་དག་ཏུ་རྣམ་པར་བསམ། །འཁོར་ལོ་
འམ་ནི་རྡོ་རྗེའང་རུང་། །རྡོ་རྗེའི་གོ་འཕང་གནས་བསྒོམ་ལ། །ལུས་དང་ངག་སེམས་དམ་ཚིག་རྣམས། །དེས་ནི་ཕྱེ་མར་བརླག་པར་བསྒོམ། །དེ་ནས་བརྩམས་ཏེ་རྫོགས་སངས་རྒྱས། །བྱང་ཆུབ་སེམས་

88-1-144b

དཔའ་གྲགས་ཆེན་རྣམས། །བྱིན་བརླབས་གོ་འཕང་དམ་པ་དག །དགྱེས་པའི་སྤྱན་གྱིས་རབ་ཏུ་སྩོལ། །འདི་སྐད་ཅེས་ཀྱང་བཀའ་སྩལ་ཏོ། །རང་ལུས་ངག་སེམས་རྡོ་རྗེ་ལ། །སངས་རྒྱས་སྤྲིན་དག་རྣམ་པར་བསམ། །
རྡོ་རྗེ་རྒྱལ་པོ་སྤྲིན་ཆེན་པོ། །ནད་ལས་ཐར་བར་བསྒོམ་པར་བྱ། །ཕྱོགས་བཅུའི་སངས་རྒྱས་ཐམས་ཅད་དང་། །བྱང་ཆུབ་སེམས་དཔའ་བློ་ལྡན་རྣམས། །ཁྲོས་པ་དེ་ལ་བསམ་པར་བྱ། །འཆི་བར་བྱེད་པ་
དམ་པའི་དོན། །བསམ་གཏན་སྦྱོར་བ་འདི་དག་གིས། །ལས་སྐྱེས་སུ་ཡང་གང་གྲགས་པ། །བརྒྱ་རྩ་བརྒྱད་བཟླས་སྦྱོར་བ་ཡིས། །ཉི་མ་བདུན་གྱིས་འཇིག་པར་འགྱུར། །ཡང་ན་རང་གི་སྔགས་རྒྱལ་གྱིས། །རྡོ་རྗེའི་
བསམ་གཏན་ཆོ་ག་བསམ། །འདི་ནི་ནད་རྣམས་ཐམས་ཅད་ཀྱི། །དམ་ཚིག་ཤིན་ཏུ་འདའ་དཀའ་བའོ། །དེ་ནས་རྒྱལ་པོ་རྡོ་རྗེ་འཛིན། །ཡེ་ཤེས་ཀྱོ་བ་འོད་ཆེན་པོ། །འདོད་པ་ཐར་པ་རྡོ་རྗེ་ཆེས། །གསུང་ནི་འདི་
སྐད་བཀའ་སྩལ་ཏོ། །ཆོས་རྣམས་རྨི་ལམ་ལྟ་བུ་ནི། །ངོ་བོ་ཉིད་ཀྱིས་མ་སྐྱེས་ཤིང་། །རང་བཞིན་དག་པའི་དེ་ཉིད་ལ། །འཁྲུལ་པའི་རྡོ་རྗེ་རབ་ཏུ་གསུངས། །བསམ་གཏན་བཟླས་པའི་དོན་བརྩོན་པའི། །སྒྲུབ་
པ་པོས་ནི་རྟག་ཏུ་མཐོང་། །སངས་རྒྱས་བྱང་ཆུབ་སེམས་དཔའ་རྣམས། །དབྱེ་བ་རྣམ་པ་གཉིས་སུ་མཐོང་། །དེ་ལ་འདི་ནི་རྨི་ལམ་ཆེན་པོའི་དམ་ཚིག་གི་གནས་ཏེ། །བྱང་ཆུབ་ཡེ་ཤེས་མཆོག་ཐོབ་པ། །
སངས་རྒྱས་འོད་ནི་བཟང་པོར་མཐོང་། །སངས་རྒྱས་ལོངས་སྤྱོད་རྫོགས་པ་ཡི། །སྐུར་ཡང་བདག་ཉིད་མྱུར་དུ་མཐོང་། །སེམས་ཅན་ཆེན་པོ་ཁམས་གསུམ་པས། །མཆོད་པ་བྱེད་པར་དེ་ཡིས་མཐོང་། །
རང་གཟུགས་ཡེ་ཤེས་ཆེ་འོད་མཉམ། །སངས་རྒྱས་བྱང་ཆུབ་སེམས་དཔའ་ཡིས། །འདོད་པའི་ཡོན་ཏན་ལྔ་རྣམས་ཀྱིས། །ངེས་པར་མཆོད་པ་བྱེད་པར་མཐོང་། །རྡོ་རྗེ་སེམས་དཔའི་གཟུགས་ཆེན་དང་། །

88-1-145a

གྲགས་པ་ཆེན་པོ་རྡོ་རྗེ་ཆོས། །གསང་བ་རྡོ་རྗེ་གྲགས་པ་ཆེ། །རྨི་ལམ་དག་ན་རང་གཟུགས་མཐོང་། །བྱང་ཆུབ་སེམས་དཔའ་རྡོ་རྗེ་ཅན། །སངས་རྒྱས་ཆེན་པོ་ཕྱག་འཚལ་བ། །སྐུ་གསུང་ཐུགས་ཀྱི་དངོས་གྲུབ་
སྩོལ། །རྨི་ལམ་འདི་འདྲ་མཐོང་བར་འགྱུར། །རྒྱན་རྣམས་ཐམས་ཅད་ཡོངས་རྫོགས་པའི། །ལྷ་ཡི་བུ་མོ་ཡིད་འོང་དང་། །ཁྱེའུ་བུ་མོ་དག་མཐོང་ན། །དེ་ནི་དངོས་གྲུབ་ཐོབ་པར་འགྱུར། །ཕྱོགས་བཅུའི་སངས་རྒྱས་ཐམས་
ཅད་ཀྱང་། །ཞིང་ན་བཞུགས་པར་ངེས་པར་མཐོང་། །ཐུགས་ནི་དགྱེས་པར་གྱུར་ནས་ཀྱང་། །ཆོས་མཛོད་ཡིད་དུ་འོང་བ་སྩོལ། །ཆོས་ཀྱི་འཁོར་ལོར་གནས་པའི་ལུས། །སངས་རྒྱས་ཀུན་གྱིས་ཡོངས་བསྐོར་བ། །བསམ་
གཏན་རྡོ་རྗེ་ལ་གནས་པའི། །དམ་ཚིག་སྦྱོར་བས་མཐོང་བར་འགྱུར། །ཀུན་དགའ་བསྐྱེད་ཚལ་སྣ་ཚོགས་པ། །ལྷ་ཡི་བུ་མོ་སོགས་པས་བརྒྱན། །སངས་རྒྱས་ཀུན་གྱིས་བྱིན་བརླབས་པས། །བསམ་གཏན་དམ་ཚིག་ཅན་
གྱིས་མཐོང་། །སངས་རྒྱས་བྱང་ཆུབ་སེམས་དཔའ་ཡིས། །དེ་ནི་མངོན་པར་དབང་བསྐུར་མཐོང་། །རིག་འཛིན་རྒྱལ་པོ་ཆེན་པོ་ཡིས། །མཆོད་པ་བྱེད་པར་ངེས་མཐོང་ངོ་། །ཞེས་ཀྱང་གསུངས་སོ། །རྡོ་རྗེ་ལས་བྱུང་
སྣ་ཚོགས་པའི། །རྨྱི་ལམ་དྲི་མ་མེད་མཐོང་དེས། །སྐུ་གསུང་ཐུགས་ཀྱི་རྡོ་རྗེ་ལས། །སྐྱེས་པ་བླ་མེད་འགྲུབ་པར་འགྱུར། །གདོལ་པ་ཁྱི་ཡི་སྦྱོར་ལ་སོགས། །གལ་ཏེ་རྡོ་རྗེ་བློས་མཐོང་ན། །བློ་ལྡན་རྡོ་རྗེ་སེམས་
དཔའ་ཡི། །སེམས་ཀྱི་གནས་ནི་འགྲུབ་པར་འགྱུར། །དེ་ལ་འདི་ནི་རྨི་ལམ་རྣམ་པར་དཔྱད་པའི་དམ་ཚིག་གི་སྙིང་པོའོ། །རང་སེམས་སེམས་ནི་དམིགས་པ་ལ། །ཆོས་རྣམས་ཐམས་ཅད་རབ་གནས་པ། །ནམ་
མཁའ་རྡོ་རྗེའི་སེམས་གནས་འདི། །ཆོས་མེད་ཆོས་ཉིད་མེད་པའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ངོ་མཚར་དུ་གྱུར། རྨད་དུ་བྱུང་བར་གྱུར་ནས་དེ་བཞིན་གཤེགས་པ་ཐམས་ཅད་

88-1-145b

ཀྱི་སྐུ་གསུང་ཐུགས་ཀྱི་དམ་ཚིག་གི་ཐེ་ཚོམ་གཅོད་པ་རྡོ་རྗེ་སེམས་དཔའ་ལ་ཞུས་པ། བཅོམ་ལྡན་འདས་འདི་ཅི་ཞིག་ལགས། ངོ་བོ་ཉིད་མེད་ཆོས་རྣམས་ལ། །ཆོས་ཀྱི་དེ་ཉིད་ཀུན་བཤད་པ། ནམ་མཁའ་ལ་ནི་
ནམ་མཁའ་བསྒོམ། །ཨེ་མའོ་ངོ་མཚར་ཡང་དག་བྱུང་། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཕྱག་ན་རྡོ་རྗེ་དེ་བཞིན་གཤེགས་པས་དེ་བཞིན་གཤེགས་པ་ཐམས་
ཅད་ལ་འདི་སྐད་ཅེས་བཀའ་སྩལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ནམ་མཁའ་ནི་ཆོས་གང་དང་ཡང་མི་ལྡན་ཏེ། མི་ལྡན་པ་ཡང་མ་ཡིན་ནོ། །ནམ་མཁའ་དེ་ནི་ཆོས་ཐམས་ཅད་དུ་
གཏོགས་ལ། ཐམས་ཅད་ཀྱི་རྗེས་སུ་བལྟའོ་སྙམ་དུ་ཡང་མི་སེམས་སོ། །དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་རྨི་ལམ་དང་། རྨི་ལམ་ལས་བྱུང་བར་རྗེས་སུ་རིག་པར་བྱའོ། །བཅོམ་
ལྡན་འདས་དེ་བཞིན་གཤེགས་པ་ཐམས་ཅད་འདི་ལྟ་སྟེ། གཞན་ཡང་ནམ་མཁའ་ནི་བརྟག་ཏུ་མེད་པ། བལྟར་མེད་པ་ཐོགས་པ་མེད་པའོ། །དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་
ཆོས་ཐམས་ཅད་ཀྱང་རྗེས་སུ་རིག་པར་བྱའོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་འདི་ལྟ་སྟེ། གཞན་ཡང་ལུས་དང་ངག་དང་སེམས་དང་ཆོས་ཐམས་ཅད་དང་རྡོ་རྗེའི་གནས་ཀྱི་དམ་ཚིག་
ནི་ཐམས་ཅད་ལ་རྗེས་སུ་སོང་བ་ངོ་བོ་ཉིད་གཅིག་པ་སྟེ། འདི་ལྟ་སྟེ། སེམས་ཀྱི་ངོ་བོ་ཉིད་དོ། །ལུས་དང་ངག་དང་སེམས་ཀྱི་ཁམས་གང་ཡིན་པ་དང་། ནམ་མཁའི་ཁམས་དེ་དག་གཉིས་སུ་མེད་ཅིང་གཉིས་སུ་
བྱར་མེད་དོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་འདི་ལྟ་སྟེ། གཞན་ཡང་སེམས་ཅན་ཐམས་ཅད་ནི་ནམ་མཁའི་ཁམས་སུ་གནས་ཏེ། ནམ་མཁའི་ཁམས་དེ་ཡང་འདོད་པའི་ཁམས་ན་གནས་པ་

88-1-146a

མ་ཡིན། གཟུགས་ཀྱི་ཁམས་ན་གནས་པ་མ་ཡིན། གཟུགས་མེད་པའི་ཁམས་ན་ཡང་གནས་པ་མ་ཡིན་ཏེ། ཆོས་གང་ཁམས་གསུམ་ན་མི་གནས་པ་དེ་ནི་སྐྱེ་བ་མེད་པའོ། །གང་ལ་སྐྱེ་བ་མེད་པ་
དེ་ནི་ཆོས་གང་གིས་ཀྱང་བརྟག་པར་མི་ནུས་སོ། །དེ་བས་ན་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཆོས་ཐམས་ཅད་ངོ་བོ་ཉིད་མེད་པའོ། །ཀྱེ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་འདི་ལྟ་
སྟེ། གཞན་ཡང་བྱང་ཆུབ་ཀྱི་སེམས་ནི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་འབྱུང་བར་བྱེད་པ་རྡོ་རྗེའི་གནས་ཀྱི་རྣམ་པ་སྟེ། བྱང་ཆུབ་ཀྱི་སེམས་དེ་ཡང་ལུས་ལ་མི་གནས། ངག་ལ་མི་གནས། 
སེམས་ལ་མི་གནས་སོ། །ཆོས་གང་ཡང་ཁམས་གསུམ་ན་མི་གནས་པ་དེ་ལ་སྐྱེ་བ་མེད་དེ། །འདི་ནི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་འབྱུང་བར་བྱེད་པ་རྡོ་རྗེའི་གནས་ཡིན་ནོ། །ཀྱེ་བཅོམ་ལྡན་འདས་
དེ་བཞིན་གཤེགས་པ་ཐམས་ཅད་རྨི་ལམ་ནི་བདག་གིས་ཁམས་གསུམ་དུ་རྨི་ལམ་གྱི་གནས་མཐོང་བར་བྱའོ་སྙམ་དུ་མི་སེམས་སོ། །མི་ཡང་བདག་གིས་རྨི་ལམ་མཐོང་བར་བྱའོ་སྙམ་དུ་མི་སེམས་ཏེ། 
ཁམས་གསུམ་གྱི་བྱ་བ་དེ་རྣམས་ཀྱང་རྨི་ལམ་ལྟ་བུ། རྨི་ལམ་དང་འདྲ་བ་རྨི་ལམ་ལས་བྱུང་བའོ། །དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཕྱོགས་བཅུའི་འཇིག་རྟེན་གྱི་ཁམས་
ཐམས་ཅད་ན་སངས་རྒྱས་དང་བྱང་ཆུབ་སེམས་དཔའ་ཇི་སྙེད་བཞུགས་པ་རྣམས་དང་། སེམས་ཅན་ཇི་སྙེད་པ་དེ་དག་ཐམས་ཅད་ཀྱང་རྨི་ལམ་ལ་བདག་མེད་པའི་གནས་སུ་རྗེས་སུ་རིག་པར་བྱའོ། །བཅོམ་
ལྡན་འདས་དེ་བཞིན་གཤེགས་པ་ཐམས་ཅད་འདི་ལྟ་སྟེ། དཔེར་ན། ཡིད་བཞིན་གྱི་ནོར་བུ་རིན་པོ་ཆེ་ནི་རིན་པོ་ཆེ་ཐམས་ཅད་ཀྱི་གཙོ་བོ་ཡོན་ཏན་ཐམས་ཅད་དང་ལྡན་པ་སྟེ། རིན་པོ་ཆེ་ཐམས་ཅད་ཀྱི་གཙོ་བོ་ཡོན་

88-1-146b

ཏན་ཐམས་ཅད་དང་ལྡན་པ་གང་ཡིན་པ་དེ་ལ་སེམས་ཅན་གང་དག་གིས་གསེར་རམ། རིན་པོ་ཆེའམ་དངུལ་ཡང་རུང་སྟེ། གང་གསོལ་བ་བཏབ་པ་དེ་དག་ཐམས་ཅད་བསམས་པ་ཙམ་ཉིད་ཀྱིས་འབྱོར་པར་བྱེད་དེ། 
རིན་པོ་ཆེ་ལ་སོགས་པ་དེ་དག་ཀྱང་སེམས་ལ་མི་གནས། ཡིད་བཞིན་གྱི་ནོར་བུ་ལ་གནས་པ་ཡང་མ་ཡིན་ནོ། །དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཆོས་ཐམས་ཅད་
དང་སངས་རྒྱས་ཀྱི་ཆོས་ཐམས་ཅད་ཀྱང་རྗེས་སུ་རིག་པར་བྱའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དེ་དག་ཐམས་ཅད་རབ་ཏུ་དགྱེས་པའི་སྤྱན་གདངས་ནས་དེ་བཞིན་གཤེགས་པ་ཐམས་ཅད་
ཀྱི་སྐུ་གསུང་ཐུགས་རྡོ་རྗེ་དེ་བཞིན་གཤེགས་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གང་ལ་ནམ་མཁའི་ཁམས་ཀྱི་རྗེས་སུ་འབྲང་བའི་ཆོས་ཐམས་ཅད་ལ་སངས་རྒྱས་ཀྱི་ཆོས་རྣམས་རྗེས་སུ་
འབྲང་བར་འགྱུར་རོ་ཞེས་པ་ནི་ངོ་མཚར་ཆེའོ། །དེ་ནས་སངས་རྒྱས་དང་བྱང་ཆུབ་སེམས་དཔའ་དེ་དག་ཐམས་ཅད་ཀྱིས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པའི་ཞབས་གཉིས་ལ་ཕྱག་
འཚལ་ནས་འདི་སྐད་ཅེས་གསོལ་ཏོ། །གང་བཅོམ་ལྡན་འདས་ཀྱིས་སྔགས་ཐམས་ཅད་ཀྱི་རྡོ་རྗེའི་དངོས་གྲུབ་ཀུན་ནས་བཏུས་ཏེ་གསུངས་པ། སྔགས་ཐམས་ཅད་ཀྱི་རྡོ་རྗེ་ཀུན་ནས་བཏུས་པའི་དངོས་གྲུབ་
དེ་དག་གང་ལ་གནས་པ་ལགས། གང་ནས་བྱུང་བ་ལགས། དེ་ནས་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་དེ་དག་ཐམས་ཅད་ལ་ལེགས་སོ་ཞེས་བྱ་
བ་བྱིན་ནས། དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་སྔགས་ཐམས་ཅད་ཀྱི་རྡོ་རྗེའི་ཀུན་ནས་བཏུས་པའི་དངོས་

88-1-147a

གྲུབ་ནི་སྔགས་ཐམས་ཅད་ཀྱི་སྐུ་གསུང་ཐུགས་ལ་མི་གནས་སོ། །དེ་ཅིའི་ཕྱིར་ཞེ་ན། འོན་ཀྱང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་དངོས་གྲུབ་ཐམས་ཅད་དང་། སངས་རྒྱས་ཀྱི་ཆོས་
ཐམས་ཅད་རང་གི་ལུས་དང་ངག་དང་སེམས་རྡོ་རྗེ་ལ་གནས་སོ། །ལུས་དང་ངག་དང་སེམས་རྡོ་རྗེ་དེ་དག་ཀྱང་འདོད་པའི་ཁམས་ན་མི་གནས། གཟུགས་ཀྱི་ཁམས་ན་མི་གནས། གཟུགས་མེད་པའི་ཁམས་
ན་མི་གནས། སེམས་ནི་ལུས་ལ་མི་གནས། ལུས་ཀྱང་སེམས་ལ་མི་གནས། ངག་ནི་སེམས་ལ་མི་གནས། སེམས་ཀྱང་ངག་ལ་མི་གནས་སོ། །དེ་ཅིའི་ཕྱིར་ཞེ་ན། ནམ་མཁའ་ལྟར་ངོ་བོ་ཉིད་དག་པའི་
ཕྱིར་རོ། །དེ་ནས་དེ་བཞིན་གཤེགས་པ་དེ་དག་གིས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་
ཅད་ཀྱི་ཆོས་གང་ལ་གནས་པ་ལགས། གང་ནས་བྱུང་བ་ལགས། རྡོ་རྗེ་འཆང་གིས་བཀའ་སྩལ་པ། རང་གི་ལུས་དང་ངག་དང་སེམས་ལ་གནས་སོ། །རང་གི་ལུས་དང་ངག་དང་སེམས་ལས་བྱུང་ངོ་། །
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་གསོལ་པ། སེམས་གང་ལ་གནས། བཀའ་སྩལ་པ་ནམ་མཁའ་ལ་གནས་སོ། །གསོལ་པ་ནམ་མཁའ་གང་ལ་གནས། བཀའ་སྩལ་པ་གང་ལ་ཡང་མི་གནས་
སོ། །དེ་ནས་སངས་རྒྱས་དང་བྱང་ཆུབ་སེམས་དཔའ་དེ་དག་ཐམས་ཅད་ངོ་མཚར་དུ་གྱུར། རྨད་དུ་བྱུང་བར་གྱུར་ནས་རང་གི་སེམས་ཀྱི་ཆོས་ཉིད་ལ་གནས་ནས་སེམས་ཤིང་ཅང་མི་སྨྲ་བར་འཁོད་པར་གྱུར་ཏོ། །དེ་བཞིན་
གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས་སེམས་ཅན་ཐམས་ཅད་ཀྱི་དམ་ཚིག་གི་སྙིང་པོ་རྡོ་རྗེ་འབྱུང་བ་ཞེས་བྱ་བའི་ལེའུ་སྟེ་བཅོ་ལྔ་པའོ།། །།

88-1-147b

དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་འདུས་པར་གྱུར་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་ལ་དེ་བཞིན་གཤེགས་པ་ཐམས་
ཅད་ཀྱི་སྐུ་གསུང་ཐུགས་རྡོ་རྗེའི་ཚིག་གིས་གསོལ་བ་བཏབ་ནས། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་རིན་ཆེན་གྱི་མཆོད་པའི་བཀོད་པས་མཆོད་པ་བྱས་སོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་
བཞིན་གཤེགས་པས་རྡོ་རྗེ་ཐམས་ཅད་ཀྱི་དཀྱིལ་འཁོར་སེང་གེའི་དམ་ཚིག་གི་རྒྱལ་པོའི་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་སྐུའི་དཀྱིལ་འཁོར་འདི་སངས་རྒྱས་ཐམས་
ཅད་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །དེ་ནས་དེ་ཕྱིར་སྐུའི་དཀྱིལ་འཁོར། །མཆོག་ཐུགས་དཀྱིལ་འཁོར་རབ་འདྲ་བ། །དཀྱིལ་འཁོར་རྣམས་ནི་ཀུན་གྱི་མཆོག །ལེགས་པར་རབ་ཏུ་བཤད་པར་བྱ། །ཁྲུ་ནི་
བཅུ་དྲུག་ཚད་དུ་བྱ། །གྲུ་བཞི་ལྷམ་པ་རབ་ཏུ་མཛེས། །སངས་རྒྱས་ཀུན་གྱི་དཀྱིལ་འཁོར་ཏེ། །སྐུ་ཡི་རྡོ་རྗེ་རབ་ཏུ་གནས། །དེ་ཡི་ནང་དུ་འཁོར་ལོ་ནི། །ཆོ་ག་རྡོ་རྗེས་བྲི་བར་བྱ། །སྔགས་རྣམས་ཀྱི་ནི་གསང་བ་མཆོག །
དབུས་སུ་རྣམ་པར་སྣང་མཛད་གནས། །ཕྱག་རྒྱ་རྡོ་རྗེའི་གནས་བྱའོ། །མི་བསྐྱོད་པ་ལ་སོགས་པའང་བྲི། །སྐུ་དང་གསུང་ཐུགས་རྡོ་རྗེ་མཆོག །གྲྭ་རྣམས་ཀུན་དུ་དགོད་པར་བྱ། །ཁྲོ་བོ་དང་པོ་རྣམས་སྒོར་བྲི། །
སྟོབས་ཆེན་ཕ་རོལ་གནོན་པ་རྣམས། །རྡོ་རྗེ་གསང་བ་རབ་བསྒོམ་པའི། །མཆོད་པ་སྔགས་ཤེས་པ་ཡིས་བྱ། །འདི་ནི་སྔགས་རྣམས་ཐམས་ཅད་ཀྱི། །དམ་ཚིག་ཤིན་ཏུ་འདའ་དཀའ་བའོ། །བཤང་དང་གཅི་
བ་ལ་སོགས་པ། །བྱེ་བྲག་ཏུ་ནི་ངེས་པར་དབུལ། །འདི་ནི་སྐུ་ཡི་རྡོ་རྗེ་ཅན། །སྔགས་རྣམས་ཀུན་གྱི་དམ་ཚིག་གོ། །འདི་ནི་དེ་བཞིན་གཤེགས་པ་ཐམས་ཅད་ཀྱི་སྐུའི་དཀྱིལ་འཁོར་རོ། །དེ་ནས་བཅོམ་ལྡན་འདས་

88-1-148a

ཕྱག་ན་རྡོ་རྗེ་དེ་བཞིན་གཤེགས་པས་གསུང་རྡོ་རྗེ་ཐམས་ཅད་ཀྱི་དམ་ཚིག་གི་སྤྲིན་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གསུང་རྡོ་རྗེའི་དཀྱིལ་འཁོར་འདི་ཉིད་ཀྱི་སྐུ་གསུང་ཐུགས་
རྡོ་རྗེ་ལས་ཕྱུང་ངོ་། །དེ་ནས་དེ་ཕྱིར་གསུང་དཀྱིལ་འཁོར། །མཆོག་ཐུགས་དཀྱིལ་འཁོར་རབ་ཏུ་འདྲ། །དཀྱིལ་འཁོར་རྣམས་ནི་ཀུན་གྱི་མཆོག །ལེགས་པར་རབ་ཏུ་བཤད་པར་བྱ། །ཁྲུ་ནི་ཉི་ཤུའི་ཚད་དུ་བྱ། །གྲུ་
བཞི་ལྷམ་པ་ཆོ་ག་བཞིན། །གྲྭ་བཞི་པ་ལ་སྒོ་བཞི་པར། །རྡོ་རྗེ་བསྒོམ་པས་ཐིག་གདབ་བོ། །ཉིད་ཀྱི་སྐུ་ཡི་དཀྱིལ་འཁོར་གནས། །རྡོ་རྗེའི་གསུང་གི་ཡོན་ཏན་སྐྱེད། །རྒྱལ་པོ་ཆེན་པོ་རྡོ་རྗེ་ཆོས། །རིག་པའི་དབང་
པོ་འཇུག་པར་བྱ། །དེ་དབུས་འཁོར་ལོ་ཆེན་པོ་ནི། །ཀུན་ཏུ་ཟླུམ་པོ་བྲི་བར་བྱ། །མདོར་ན་ཕྱག་རྒྱ་ཐམས་ཅད་ནི། །ཆོ་ག་བརྩོན་པས་བྲི་བར་བྱ། །ཚེ་དཔག་མེད་ཀྱི་ཕྱག་རྒྱ་ཆེ། །དེ་ཡི་དབུས་སུ་དགོད་པར་བྱ། །རྡོ་རྗེའི་གནས་
ནི་ཉམས་དགའ་ཉིད། །དེ་དག་ཐམས་ཅད་ཡོངས་སུ་བརྟག །ཡོངས་སུ་གསལ་བར་ཆོ་ག་ཡིས། །དཀྱིལ་འཁོར་དམ་པ་བྱས་ནས་ནི། །དེ་ནས་གསང་བའི་མཆོད་པ་བྱ། །དེ་ལྟས་རྡོ་རྗེ་ཅན་མཉེས་འགྱུར། །བཤང་གཅི་ཁུ་བའི་
དམ་ཚིག་གིས། །མཆོད་ན་དངོས་གྲུབ་ཐོབ་པར་འགྱུར། །འདི་ནི་སངས་རྒྱས་ཐམས་ཅད་ཀྱི། །དམ་ཚིག་ཤིན་ཏུ་འདའ་དཀའ་བའོ། །དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་དཀྱིལ་འཁོར་རོ། །དེ་ནས་བཅོམ་
ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པས་ཀུན་ནས་སྤྲིན་གྱི་བཀོད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རབ་ཏུ་གསང་བའི་དཀྱིལ་འཁོར་གསང་ཆེན་འདི་ཉིད་ཀྱི་སྐུ་གསུང་ཐུགས་རྡོ་རྗེ་
ལས་ཕྱུང་ངོ་། །རྡོ་རྗེ་འཛིན་མཆོག་གང་ཡིན་པའི། །གཟུགས་ནི་དབུས་སུ་ལེགས་བྲིས་པ། །དེ་ཡི་དཀྱིལ་འཁོར་གནས་སུ་འགྱུར། །སྐུ་གསུང་ཐུགས་ཀྱི་གསང་ལས་བྱུང་། །འདི་ནི་དེ་བཞིན་གཤེགས་པ་ཐམས་ཅད་

88-1-148b

ཀྱི་སྐུ་དང་གསུང་དང་ཐུགས་རྡོ་རྗེའི་གནས་ཤེས་པའི་གསང་ཆེན་རབ་ཏུ་གསང་བའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པས་དཀྱིལ་འཁོར་ཐམས་ཅད་འཁོར་ལོ་འབྱུང་བ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ནས། དཀྱིལ་འཁོར་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་གསང་བ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །དེ་ལ་འདི་ནི་རྡོ་རྗེའི་དཀྱིལ་འཁོར་གྱི་སྔགས་
ཀྱི་སྙིང་པོའི་ཐིག་གི་ཡི་གེའི་གནས་རྣམས་ཏེ། ཨོཾ་ཨཱཿཧཱུཾ། རྡོ་རྗེའི་ཐིག་ནི་གདབ་པ་དང་། །མཚོན་རྩི་རྣམས་ཀྱང་དགྱེས་པ་དག །སྔགས་ཀྱི་སེམས་པས་མི་བྱ་སྟེ། །བྱས་ན་བྱང་ཆུབ་རྙེད་པར་
དཀའ། །དེ་བས་དམ་ཚིག་ཆོ་ག་ཤེས། །སྔགས་ཀྱི་ལྷ་རྣམས་བཅུག་ནས་སུ། །བྱིན་གྱིས་བརླབས་པའི་གནས་བསྒོམས་ལ། །དཀྱིལ་འཁོར་རྣམས་ནི་རྣམ་པར་བརྟག །རྒྱལ་ཆེན་རྣམ་པར་སྣང་མཛད་
དང་། །སྤྱན་མ་ཡང་ནི་གཞུག་པར་བྱ། །སྐུ་ཡི་དཀྱིལ་འཁོར་གནས་ཡིད་འོང་། །རྡོ་རྗེའི་སྐུ་ཡི་ཡོན་ཏན་འཐོབ། །རྡོ་རྗེ་ཆོས་ནི་རྒྱལ་པོ་ཆེ། །རང་གི་ཆོས་མ་འཇུག་པར་བྱ། །འདི་ནི་སྔགས་རྣམས་ཐམས་ཅད་
ཀྱི། །མཆོག་ཏུ་རྟག་པའི་གསང་བའོ། །རྡོ་རྗེ་སེམས་དཔའ་རྒྱལ་པོ་ཆེ། །མཱ་མ་ཀཱི་ཡང་འཇུག་པར་བྱ། །འདི་དེ་སྔགས་རྣམས་ཐམས་ཅད་ཀྱི། །མཆོག་ཏུ་རྨད་བྱུང་གསང་ཆེན་ནོ། །དེ་ལྟར་བྱས་པས་
མྱུར་དུ་རང་། །རབ་དང་ཡིད་དབང་རྣམས་བྱོན་ནས། །རབ་ཏུ་དགྱེས་པར་གྱུར་པ་རྣམས། །གསང་བ་མཆོག་ནི་འདྲི་བར་བྱེད། །འདི་སྐད་ཀྱང་གསུངས་སོ། །སྔགས་གྲུབ་པ་ཡིས་བྱ་བ་ནི། །རྡོ་རྗེ་གསང་བ་
རྨད་བྱུང་ཆེ། །ཁྲོ་བོའི་རྒྱལ་པོ་ཡིས་སངས་རྒྱས། །ཐམས་ཅད་བཀུག་ནས་མཆོད་པར་བྱ། །རྡོ་རྗེ་གསུམ་དང་གནས་དག་ལ། །དམ་ཚིག་མཆོད་པ་དུས་གསུམ་པ། །རྡོ་རྗེ་གསུམ་གྱི་སྦྱོར་བས་བྱ། །སྔགས་

88-1-149a

ཀྱི་དངོས་གྲུབ་ཐོབ་པར་བྱེད། །འདི་སྐད་ཀྱང་གསུངས་སོ། །སྔགས་རྣམས་ཐམས་ཅད་ཉིད་ལ་ཡང་། །རྨད་བྱུང་ཆེན་པོའི་གཏོར་མ་དབུལ། །བཤང་གཅི་ཤ་དང་འབྲུ་མར་དང་། །ལྔ་པ་སེམས་ལས་
བྱུང་བ་དང་། །ཁུ་བ་དག་གིས་སྔགས་རྣམས་ཀུན། །ཚིམ་པར་འགྱུར་བར་ཀུན་ཏུ་བཤད། །འདི་ནི་དམ་ཚིག་མཆོག་ཡིན་ཏེ། །སངས་རྒྱས་བྱང་ཆུབ་རྫོགས་བྱེད་པའོ། །ཐིག་གདབ་པ་ཡི་ཆོ་ག་འདི། །རང་ཉིད་གང་ཚེ་
སྤྱོད་པ་ན། །རྣམ་པར་སྣང་མཛད་རབ་བསྒོམས་ནས། །རྡོ་རྗེ་སེམས་དཔའ་རབ་ཏུ་བསྒོམ། །ཡང་ན་རྡོ་རྗེ་བདུད་རྩིར་གྲགས། །སློབ་མ་རྡོ་རྗེ་འོད་པོ་ཆེར། །བསྒོམ་བྱ་ལས་ཀྱི་གོ་འཕང་ནི། །སངས་རྒྱས་ཀུན་གྱིས་ངེས་
སྟེན་པའོ། །སངས་རྒྱས་རྒྱལ་ཆེན་ལྔ་རྣམས་ནི། །རྡོ་རྗེའི་ཐིག་སྐུད་གཤེགས་རྣམས་དགོད། །འདི་ནི་སངས་རྒྱས་ཐམས་ཅད་ཀྱི། །གསང་བ་རབ་ཏུ་རྨད་བྱུང་བའོ། །ཉི་ཤུ་རྩ་ལྔའི་བྱེ་བྲག་གིས། །ཚོན་རྩི་དག་
ཀྱང་རྣམ་པར་དགྱེ། །འདི་ནི་སངས་རྒྱས་ཐམས་ཅད་ཀྱི། །གསང་ཆེན་བྱང་ཆུབ་དམ་པའོ། །སྔགས་རྣམས་ཐམས་ཅད་ཉིད་ལ་ཡང་། །རྡོ་རྗེ་ཧཱུྃ་མཛད་བསྒོམ་པར་བྱ། །མཆོག་གི་སྐུ་གསུང་ཐུགས་དམ་ཚིག །
གནས་ལྔ་དག་ཏུ་བསྒོམ་པར་བྱ། །དེ་ལྟར་བྱས་ན་ཉེ་མི་འགྱུར། །རྡོ་རྗེ་མི་ཕྱེད་གསུམ་ལས་སྐྱེས། །རྡོ་རྗེ་སེམས་དཔའ་བློ་ལྡན་པ། །འཇིགས་ཤིང་སྐྲག་ནས་བྱིན་རློབ་མཛད། །རྡོ་རྗེ་བུམ་པ་རྣམས་དགོད་པ། །
སྔགས་རྒྱུད་བདག་པོས་ཤེས་བྱས་པ། །རྡོ་རྗེ་སེམས་དཔའི་ཏིང་འཛིན་གནས། །བརྟན་པའི་བློས་ནི་བརྟག་པར་བྱ། །དངོས་གྲུབ་ཀུན་འབྲས་འདོད་པ་ཡི། །སྔགས་ཤེས་པས་ནི་སྦྱིན་སྲེག་བྱ། །བཤང་གཅི་འབྲུ་
མར་ཤ་ལ་སོགས། །བསྲེག་རྫས་དག་ནི་དབུལ་བར་བྱ། །རྡོ་རྗེ་མི་ཕྱེད་གསུམ་འཁོར་ལོ། །རྡོ་རྗེ་གསང་བའི་སྦྱིན་བསྲེག་དབུལ། །དབུས་སུ་རང་གི་ལྷ་ཡི་གཟུགས། །བསམས་ཏེ་ཞལ་དུ་དབབ་པར་བྱ། །

88-1-149b

འདི་སྐད་ཀྱང་གསུངས་སོ། །དབང་པོ་གཉིས་ནི་རབ་སྦྱོར་བས། །བརྒྱ་རྩ་བརྒྱད་ནི་སྦྱིན་བསྲེག་བྱ། །འདི་ནི་སངས་རྒྱས་ཐམས་ཅད་ཀྱི། །དམ་ཚིག་ཤིན་ཏུ་འདའ་དཀའ་བའོ། །རྣམ་པར་སྣང་མཛད་སྦྱོར་བ་ཡིས། །
སློབ་མ་རྡོ་རྗེ་གསུམ་ལས་བྱུང་། །ཨཿཡིག་ལུས་དང་ངག་སེམས་ལ། །བསྒོམས་ནས་རྡོ་རྗེས་འཛིན་པར་བྱེད། །རྒྱལ་ཆེན་རྡོ་རྗེ་སེམས་དཔའ་དང་། །གྲགས་ཆེན་རྣམ་པར་སྣང་མཛད་ནི། །སྐུ་གསུང་
ཐུགས་ཀྱི་དམ་ཚིག་ཏུ། །བྱིན་གྱིས་བརླབས་ནི་རབ་ཏུ་སྩོལ། །དེ་ལ་འདི་ནི་དཀྱིལ་འཁོར་ཆེན་པོར་གཞུག་པའི་རྡོ་རྗེའི་དམ་ཚིག་གོ། །ཨཱཿཁྃ་བཱི་ར་ཧཱུྃ། འདི་ནི་དམ་ཚིག་ཐམས་ཅད་ཀྱི་ལུས་དང་ངག་དང་སེམས་ཀྱི་
སྙིང་པོའི་སྔགས་ཀྱི་རྒྱལ་པོའོ། །དེ་ལ་འདི་ནི་རྡོ་རྗེ་ཆེན་པོ་དབང་བསྐུར་བའི་གསང་བའི་ཡེ་ཤེས་གསང་ཆེན་ནོ། །སངས་རྒྱས་ཀུན་གྱིས་ནམ་མཁའི་ཁམས། །ཡོངས་སུ་གང་བར་རབ་ཏུ་བསྒོམ། །རྡོ་རྗེའི་བློ་ཡིས་
སིལ་སྙན་དང་། །དྲི་སོགས་དམ་ཚིག་སྤྲིན་ཚོགས་བསྒོམ། །འདི་སྐད་ཀྱང་གསུངས་སོ། །རྡོ་རྗེ་སྐུ་གསུམ་སྔགས་ཀྱིས་ནི། །ཡུངས་ཀར་བརྟུལ་ཞུགས་ཅན་གྱིས་བརྡེག །དེ་ལ་དེ་ཡི་ཚེ་ན་ནི། །རང་ཉིད་དབང་བསྐུར་
རབ་ཏུ་སྩོལ། །ཡང་ནི་རྡོ་རྗེ་སེམས་དཔའ་ཡིས། །ཏིང་ངེ་འཛིན་གྱིས་སངས་རྒྱས་བསྒོམ། །བུམ་པ་དམ་ཚིག་མཆོག་རྣམས་ཀྱིས། །བཟུང་བར་མཁས་པས་བསྒོམ་པར་བྱ། །རྟག་ཏུ་སློབ་མ་བློ་བརྟན་པ། །རྡོ་རྗེ་
རྣམ་པར་སྣང་མཛད་བསམ། །ལུས་དང་ངག་སེམས་རྡོ་རྗེ་ཅན། །སྔགས་ཤེས་པས་ནི་དགོད་པར་བྱ། །དེ་ལ་འདི་ནི་དབང་བསྐུར་བ་ཐམས་ཅད་ཀྱི་གསང་ཆེན་ཏེ། སློབ་དཔོན་ཐམས་ཅད་ཀྱིས་རྡོ་རྗེའི་ཚིག་སྨྲ་
བར་བྱའོ། །དབང་བསྐུར་ཆེན་པོ་རྡོ་རྗེ་ནི། །ཁམས་གསུམ་པ་ཡིས་ཕྱག་བྱས་པ། །རྡོ་རྗེ་གསང་བ་གསུམ་བྱུང་བ། །སངས་རྒྱས་ཀུན་གྱིས་སྦྱིན་པར་བྱ། །དེ་ལ་འདི་ནི་སློབ་མ་ཐམས་ཅད་ཀྱིས་རྡོ་རྗེ་ཆེན་པོ་

88-1-150a

གསོལ་བ་གདབ་པའི་ཆོ་ག་གསང་ཆེན་ནོ། །བྱང་ཆུབ་རྡོ་རྗེས་སངས་རྒྱས་ལ། །མཆོད་ཆེན་ཇི་ལྟར་སྩལ་བ་བཞིན། །བདག་ཀྱང་རབ་ཏུ་སྒྲལ་བའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །དེ་ཚེ་དེ་ལ་དབང་བསྐུར་བ། །
རབ་དགའི་སེམས་ཀྱིས་སྦྱིན་པར་བྱ། །ལྷ་ཡི་གཟུགས་ཀྱི་སྦྱོར་བ་ཡིས། །སྙིང་ཁར་བདག་པོ་གཞག་པར་བྱ། །རྡོ་རྗེ་སློབ་མ་བློ་ལྡན་ལ། །དེ་ལ་དཀྱིལ་འཁོར་བསྟན་པར་བྱ། །སངས་རྒྱས་ཐམས་ཅད་ཀྱིས་གསུངས་པའི། །
དམ་ཚིག་གསང་བ་བསྒྲག་པར་བྱ། །ཁྱོད་ཀྱིས་སྲོག་ཆགས་གསད་པར་བྱ། །བརྫུན་གྱི་ཚིག་ཀྱང་སྨྲ་བར་བྱ། །མ་བྱིན་པ་ཡང་ཁྱོད་ཀྱིས་བླང་། །ཕ་རོལ་བུད་མེད་བརྟེན་པར་བྱ། །རྡོ་རྗེའི་ལམ་ནི་འདི་དག་གིས། །སེམས་
ཅན་ཐམས་ཅད་རབ་བཀུལ་བྱ། །འདི་ནི་སངས་རྒྱས་ཐམས་ཅད་ཀྱི། །དམ་ཚིག་མཆོག་ཏུ་རྟག་པའོ། །ཞེས་ཀྱང་གསུངས་སོ། །སྔགས་ཀྱིས་བསྐུལ་བ་སྨྲས་པ་ཡི། །དེ་ལ་
སྔགས་ཀྱང་སྦྱིན་པར་བྱ། །སྔགས་ཀྱི་རྒྱལ་པོའི་ཏིང་འཛིན་ནི། །བྱིན་ནས་གསང་བ་ཡང་དག་བརྩམ། །ཁུ་བའམ་ཡང་ན་བཤང་བའང་རུང་། །མངོན་པར་བསྔགས་ནས་ཆོ་ག་བཞིན། །རྡོ་རྗེའི་བློས་ནི་ཟར་གཞུག་
བྱ། །འདི་ལྟས་དངོས་གྲུབ་རྙེད་མི་དཀའ། །རྣམ་པ་འདི་བཞི་གསང་ཆེན་ཏེ། །རྡོ་རྗེ་ཅན་ནི་ཀུན་གྱི་གསང་། །སྔགས་ཀྱི་འཁོར་ལོས་བུད་མེད་གཟུགས། །སེམས་ཅན་དོན་སྤྱོད་ཕྱིར་གནས་པའོ། །དེ་ལ་འདི་ནི་རྡོ་རྗེའི་
དཀྱིལ་འཁོར་སྔགས་ཐམས་ཅད་ཀྱིས་མཉེས་པར་བྱ་བ་གསང་བའོ། །གླང་པོའི་ཤ་དང་རྟ་ཡི་ཤ ། ཤ་ཆེན་དག་ཀྱང་བཟའ་བར་བྱ། །སྔགས་རྣམས་ཀུན་ལ་དབུལ་བར་བྱ། །དེ་ལྟར་བྱས་ན་མགོན་
པོ་མཉེས། །ཉིན་རེ་རྡོ་རྗེ་སློབ་མ་ལ། །མཁས་པས་དཀྱིལ་འཁོར་བསྟན་པར་བྱ། །བཤང་གཅི་ཤ་ཡི་བྱ་བ་དང་། །རྡོ་རྗེ་གསང་བའི་གནས་ཀྱིས་ཀྱང་། །སྔགས་རྣམས་ཀུན་གྱི་ཡི་གེ་ཨོཾ། །བསྒོམས་

88-1-150b

ན་དེ་མ་ཐག་ཏུ་འབར། །བཅོམ་ལྡན་འདས་སྔགས་ཀྱི་རིག་པའི་སྐྱེས་བུ་ཆེན་པོས་དེ་སྐད་ཅེས་བཀའ་སྩལ་ཏོ། །དངོས་གྲུབ་ཐམས་ཅད་བསྒྲུབ་པ་སྟེ། །དམ་ཚིག་ཆེན་པོ་བསྒྲུབ་པའོ། །རབ་ཏུ་འབད་པས་བསྒྲུབ་བྱ་བ། །སངས་རྒྱས་
བྱང་ཆུབ་རང་ཉིད་ཀྱང་། །མི་སྣང་སྟོབས་དང་བརྩོན་འགྲུས་དང་། །རྡོ་རྗེ་འགུགས་པ་མཆོག་དག་ནི། །རྡོ་རྗེ་སྐུ་ཡི་བཀའ་ཇི་བཞིན། །དཀྱིལ་འཁོར་དུ་ནི་ཐམས་ཅད་འགྲུབ། །བཤང་གཅི་དང་ནི་ཤ་ཆེན་རྣམས། །ཆ་ནི་མཉམ་
པར་བྱས་ནས་སུ། །ཁམ་ཕོར་སྦྱར་མར་བཞག་ནས་ནི། །སངས་རྒྱས་ཀུན་དང་ལྷན་ཅིག་འཁོད། །འདི་སྐད་ཅེས་ཀྱང་གསུངས་སོ། །དེ་ལ་འདི་ནི་གསང་བ་ཐམས་ཅད་ཀྱི་རྡོ་རྗེ་མངག་གཞུག་པ་རབ་ཏུ་བསྒྲུབ་པའི་
དམ་ཚིག་གི་མཆོག་གོ། །ཧཱིཿཡྀག་འབར་བ་འོད་བཟང་པོ། །ནམ་མཁའ་རྡོ་རྗེའི་དབུས་གནས་བསམ། །སངས་རྒྱས་ཀུན་གྱིས་ནམ་མཁའི་ཁམས། །ཡོངས་སུ་གང་བར་རྣམ་པར་བསྒོམ། །དེ་ཡི་སྐུ་གསུང་
ཐུགས་ཀྱི་གནས། །དེར་ནི་སྔགས་ལ་དབབ་པར་བྱ། །དེ་ལ་འདི་ནི་སྐུ་དང་གསུང་དང་ཐུགས་ཀྱི་སྔགས་རྡོ་རྗེའི་བྱིན་གྱིས་རློབ་པའི་གནས་སོ། །ཨོཾཿཁཾ་དྷཱིཿ ཕྱག་ན་རྡོ་རྗེ་གཟུགས་ཆེན་པོ། །ཕྱག་ན་པད་མོ་འོད་ཆེན་དང་། །གཞན་གྱིས་
མི་ཐུབ་གཟུགས་ཆེན་དག །བསྒོམས་ནས་གསང་བའི་གནས་གཞག་གོ། །འདི་ལ་འདི་ནི་རྡོ་རྗེ་གསང་བའི་གནས་སོ། །ཉི་མའི་དཀྱིལ་འཁོར་དབུས་གནས་པར། །མི་བསྐྱོད་པ་ནི་རབ་ཏུ་བརྟག །ཚེ་དཔག་མེད་པའི་རྡོ་རྗེ་ཆེ། །
རྡོ་རྗེ་སྣང་མཛད་དེ་བཞིན་ཏེ། །ཐམས་ཅད་འོད་ཆེན་སྡུག་བསྔལ་ནི། །ཆེན་པོས་སྙིང་པོས་བསྐུལ་བར་བྱ། །དེ་ལ་འདི་ནི་རྡོ་རྗེ་ཐམས་ཅད་ཀྱི་སྙིང་པོ་བསྐུལ་པའོ། །ཨཱཿན་དུང་རྩེ་ཆེ་དང་རྡོ་རྗེ་ཆེ། །ལྕགས་ཀྱུ་སྣ་ཚོགས་མཆོག་
རྣམས་ཀྱིས། །རྡོ་རྗེ་ཆོ་ག་བཞིན་དུ་བསྐུལ། །སངས་རྒྱས་བྱང་ཆུབ་རབ་ཏུ་འགྲུབ། །འདི་སྐད་ཅེས་ཀྱང་གསུངས་སོ། །ཉམས་དགའ་བ་དང་རི་དབང་དང་། །ཆུ་གླིང་རྣམ་པ་སྣ་ཚོགས་སུ། །

88-1-151a

ཟླ་ཕྱེད་ནང་དང་རྫོགས་པ་ཡིས། །ངེས་པར་སངས་རྒྱས་ཉིད་ཐོབ་འགྱུར། །རི་རབ་སུམ་བཅུ་རྩ་དྲུག་གི། རྡུལ་ཕྲན་ཇི་སྙེད་ཡོད་པ་ཡི། །འཁོར་གྱི་ཚོགས་རྣམས་དེ་དག་ནི། །བྱང་ཆུབ་རྡོ་རྗེ་ཅན་
གྲུབ་འགྱུར། །ཕྱོགས་བཅུའི་སངས་རྒྱས་ཐམས་ཅད་ཀྱི། །སངས་རྒྱས་ཞིང་དུ་འགྲོ་བར་འགྱུར། །ཟབ་མོའི་ཆོས་ནི་ཐོས་འགྱུར་ཞིང་། །སངས་རྒྱས་ས་ཡང་ཐོབ་པར་འགྱུར། །བཅོམ་ལྡན་འདས་དམ་ཚིག་
རྡོ་རྗེ་བཞད་པ་ཆེན་པོས་དེ་སྐད་ཅེས་བཀའ་སྩལ་ཏོ། །དེ་ལ་འདི་ནི་མངག་གཞུག་པ་ཐམས་ཅད་ཀྱི་གསང་བ་རྡོ་རྗེ་གསང་ཆེན་ནོ། །རྡོ་རྗེ་སེམས་དཔའ་ཡེ་ཤེས་ཆེ། །དེ་བཞིན་གསུང་གི་རྡོ་རྗེ་འཛིན། །རྡོ་རྗེ་
སྐུ་ཡི་དགོད་པ་ཆེས། །མངག་གཞུག་པ་རྣམས་རྟག་ཏུ་བསྐུལ། །དེ་ལ་འདི་ནི་རྡོ་རྗེ་ཡེ་ཤེས་འཁོར་ལོ་སྔགས་ཀྱི་དམ་ཚིག་གི་གནས་རྣམ་པ་བཞི་སྟེ། དམ་ཚིག་བསྐུལ་བ་དང་དམ་ཚིག་གཏོང་བ་དང་། 
དམ་ཚིག་བོད་པ་དང་དམ་ཚིག་འཆིང་བའོ། །མཁའ་དབྱིངས་རྒྱ་ཆེན་དག་པ་ནི། །ཆོས་རྣམས་ཐམས་ཅད་རྣམ་སྤངས་པ། །གོང་བུའི་ཚུལ་གྱིས་རྡོ་རྗེ་ནི། །རྨད་བྱུང་གཟུགས་ཅན་བྱེད་པར་འགྱུར། །བཅོམ་ལྡན་
འདས་སངས་རྒྱས་ཐམས་ཅད་ཀྱི་བུ་གཅིག་པ་རྡོ་རྗེ་སེམས་དཔའ་ཆེན་པོས་དེ་སྐད་ཅེས་བཀའ་སྩལ་ཏོ། །སངས་རྒྱས་རྡོ་རྗེ་སེམས་དཔའང་རུང་། །གལ་ཏེ་དབང་དུ་བྱ་འདོད་ན། །རྡོ་རྗེ་མཆོག་གསུམ་
འཛིན་པ་ཆེ། །གསང་བ་ཆེན་པོ་འདི་བསམ་མོ། །འཇམ་པའི་རྡོ་རྗེ་སྟོབས་པོ་ཆེ། །ནམ་མཁའ་རྡོ་རྗེའི་དབུས་གནས་བསམ། །མདའ་ལྔའི་རབ་ཏུ་སྦྱོར་བ་ཡིས། །དབུ་རྒྱན་རྩེ་མོར་ཡང་དག་སྤྲོ། །གནས་
ལྔ་དག་ཏུ་སྔགས་ཤེས་པས། །རྡོ་རྗེ་ཁྲོ་བོ་དབབ་པར་བྱ། །བྱིས་པའི་བློ་ནི་གྲགས་ཆེན་གྱིས། །སྔངས་ཤིང་བརྒྱལ་བར་བསྒོམ་པར་བྱ། །བསམ་གཏན་འདི་ནི་གསང་བ་ཡི། །སྐུལ་བ་དག་གིས་ཕྱོགས་གཅིག་

88-1-151b

བསྒོམ། །སྔགས་རྣམས་ཀུན་གྱི་རབ་ཏུ་གསང་། །རྡོ་རྗེའི་དོན་གྱི་བློ་ཡིས་གསུངས། །ནམ་མཁའ་རྡོ་རྗེའི་དབུས་གནས་པའི། །ཧཱུྃ་ཡིག་སངས་རྒྱས་དཀྱིལ་འཁོར་མཆོག །བསམ་བྱ་རྡོ་རྗེའི་སྔགས་སོགས་ཀྱིས། །རྡོ་རྗེ་གསུམ་
ལ་སོགས་པ་བསྒོམ། །མིག་གནས་ཡི་གེ་ཨོཾ་བསམས་ནས། །འདི་དག་ཆོ་གས་བསྟན་པར་བྱ། །སྔགས་རྣམས་ཀུན་གྱི་གཟུགས་དག་ནི། །སྐུ་གསུང་རྡོ་རྗེ་ཅན་རྣམས་མཐོང་། །བཀྲེས་སྐོམ་ལ་སོགས་ཉོན་མོངས་
ཆེ། །སྦྱོར་བ་འདི་ནི་རྣམ་བསམ་ན། །རྡོ་རྗེ་ཐུགས་ཀྱི་བཀའ་བཞིན་དུ། །སྡུག་བསྔལ་ཐམས་ཅད་བྱང་བར་འགྱུར། །རྣམ་པར་སྣང་མཛད་གཟུགས་ཆེན་པོ། །དོན་རྣམས་ཐམས་ཅད་འབྱོར་བསམ་ལ། །ཡི་
གེ་བྃ་ཁར་གནས་པ་བསྒོམ། །ཨོཾ་ཡིག་ལྕེ་ལ་འདུག་པར་བསམ། །བཟའ་བར་བྱ་བ་ཀུན་གྱི་གནས། །ཡིད་བཞིན་ནོར་བུ་རྣམ་བརྒྱན་པ། །ཞི་བ་སྡུག་བསྔལ་ཐམས་ཅད་སེལ། །ཡེ་ཤེས་རྡོ་རྗེ་རབ་བསྐུལ་བའོ། །
བཅོམ་ལྡན་འདས་ཡིད་བཞིན་གྱི་ནོར་བུས་དེ་སྐད་ཅེས་བཀའ་སྩལ་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་དཔའ་བོ་ཆེན་པོ་དེ་བཞིན་གཤེགས་པས་རྡོ་རྗེ་བསྒོམ་པའི་ཚིག་གི་མཆོག་
རྡོ་རྗེ་གསུང་ལས་ཕྱུང་ངོ་། །བཱིཿནམ་མཁའ་རྡོ་རྗེའི་དབུས་གནས་པར། །སངས་རྒྱས་དཀྱིལ་འཁོར་འོད་བཟང་བསམ། །རྡོ་རྗེ་སྐུ་གསུམ་སྦྱོར་བ་ཡིས། །བསྐྱེད་དེ་འདི་ནི་རྣམ་པར་བསམ། །རྒྱན་རྣམས་
ཐམས་ཅད་ཡོངས་རྫོགས་པ། །སེར་པོ་རྡོ་རྗེ་རྣམ་པར་འགྱིང་། །ཞི་བ་ཐོར་ཚུགས་དབུ་རྒྱན་ཅན། །བསམས་ནས་ཐམས་ཅད་བརྩམ་པར་བྱ། །དཔའ་བོ་རྡོ་རྗེའི་རླབས་ཀྱི་ཕྲེང་བ་ཞེས་བྱ་བའི་ཏིང་
ངེ་འཛིན་ཏོ། །དེ་ནས་བཅོམ་ལྡན་འདས་རྡོ་རྗེ་འཆང་ཀུན་ནས་ངེས་པར་བསྒྲགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་ཆེན་པོ་བསྒོམ་པའི་ཚིག་འདི་ཉིད་ཀྱི་སྐུ་གསུང་ཐུགས་

88-1-152a

རྡོ་རྗེ་ལས་ཕྱུང་ངོ་། །ཅུྃ། ནམ་མཁའ་རྡོ་རྗེའི་དབུས་སུ་ནི། །ཉི་མའི་དཀྱིལ་འཁོར་དམ་པ་བསམ། །ཆོ་ག་དག་གིས་སངས་རྒྱས་སྤྲིན། །རྡོ་རྗེ་གསུམ་མཆོག་གྲགས་ཆེན་ནི། །སྐུ་དང་གསུང་དང་ཐུགས་ཀྱིས་ལྟུང་། །
སྐུལ་བྱེད་རྡོ་རྗེ་མ་བསྒོམ་མོ། །རྒྱན་རྣམས་ཐམས་ཅད་ཡོངས་རྫོགས་པ། །ཁ་དོག་དཀར་མོར་རབ་ཏུ་བསྒོམ། །རྡོ་རྗེ་སེམས་དཔའ་རྒྱལ་པོ་ཆེ། །བསམས་ལ་སྔགས་ཀྱི་གནས་དགོད་དོ། །རྡོ་རྗེའི་དམ་ཚིག་ཡེ་ཤེས་ཀྱི་འོད་
ཟེར་ཞེས་བྱ་བའི་ཏིང་ངེ་འཛིན་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པས་བསམ་པ་ཐམས་ཅད་རྡོ་རྗེའི་ལོངས་སྤྱོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཏིང་ངེ་འཛིན་འཁོར་
ལོའི་ཚུལ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཛཾ། ནམ་མཁའ་རྡོ་རྗེའི་དབུས་གནས་པར། །སངས་རྒྱས་དཀྱིལ་འཁོར་དམ་པ་བསམ། །སངས་རྒྱས་ཀུན་གྱི་ཆོ་ག་ཡིས། །རྡོ་རྗེ་བསྒོམ་པས་དབབ་པར་བྱ། །
ཛྃ་བྷ་ལ་ནི་ནོར་བསྒྲུབ་པ། །གནོད་སྦྱིན་ཆེན་པོ་བསྐྱེད་པར་བྱ། །ཞི་བ་གནོད་སྦྱིན་གཟུགས་འཛིན་པ། །ཐོར་ཚུགས་དབུ་རྒྱན་རྡོ་རྗེ་ཅན། །སངས་རྒྱས་ལྔ་ནི་ཆོ་ག་ཡིས། །གནས་ལྔ་དག་ཏུ་བསྒོམ་པར་བྱ། །
དེ་ཡི་རྡོ་རྗེ་བདུད་རྩིའི་ཆུ། །བསམ་གཏན་གནས་ལ་འདུག་པས་དབུལ། །རྡོ་རྗེ་སེམས་དཔའི་ཆོ་ག་ཡིས། །དེ་ཡི་དབུ་རྒྱན་རྣམ་པར་བསམ། །དེ་ལྟར་བྱས་ན་གནོད་སྦྱིན་དབང་། །འབྲོག་གནས་དབང་པོ་
འོད་ཆེན་མཉེས། །རྡོ་རྗེའི་ཕྱག་རྒྱའི་དམ་ཚིག་རྫས་སྒྲུབ་པའི་རྟོག་གི་དཔལ་ཞེས་བྱ་བའི་ཏིང་ངེ་འཛིན་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པས་འདོད་པ་ཉེ་བར་སྤྱོད་པའི་དཔལ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། གནོད་སྦྱིན་མོ་ཐམས་ཅད་ཀྱི་དམ་ཚིག་རྡོ་རྗེའི་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཀྵིཾ། མཁའ་དབྱིངས་རྡོ་རྗེའི་དབུས་གནས་

88-1-152b

པར། །གྲུ་བཞི་ལྷམ་པ་རབ་ཏུ་མཛེས། །ཐམས་ཅད་རིན་ཆེན་བཞི་ལས་བྱས། །མེ་ཏོག་སྤོས་ཀྱིས་ཀུན་ཏུ་འཁྲིགས། །གནོད་སྦྱིན་མོ་ནི་ཐམས་ཅད་ཀྱིས། །མཁའ་དབྱིངས་ཡོངས་སུ་གང་བར་བསམ། །རྡོ་རྗེ་གསུམ་
གྱི་སྦྱོར་བས་དབབ། །གཟུགས་ནི་གཅིག་ཏུ་བསམ་པར་བྱ། །རྡོ་རྗེ་གསུམ་ལས་བྱེ་བྲག་གིས། །དེ་ཡི་བསམ་གཏན་བསམ་པར་བྱ། །འཇམ་པའི་རྡོ་རྗེའི་ཏིང་འཛིན་གནས། །དབུ་རྒྱན་ལ་ནི་ཁྲོ་བོ་བསྒོམ། །སྙིང་གར་
སྔགས་ཀྱི་ཚིག་བསྒོམས་ལ། །རྡོ་རྗེའི་སྦྱོར་བ་བརྩམ་པར་བྱ། །གནོད་སྦྱིན་མོ་ཐམས་ཅད་མཉམ་པ་ཉིད་གནས་པ་བསྒོམ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དེ་ནས་བཅོམ་ལྡན་འདས་ཕྱག་ན་རྡོ་
རྗེ་དེ་བཞིན་གཤེགས་པས་རྡོ་རྗེའི་སྔགས་ཐམས་ཅད་དངོས་གྲུབ་ཀྱི་རྣམ་པར་འཕྲུལ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཕྲ་མོའི་དངོས་གྲུབ་འདི་ཉིད་ཀྱི་སྐུ་གསུང་ཐུགས་རྡོ་རྗེ་
ལས་ཕྱུང་ངོ་། །སྐུ་དང་གསུང་ཐུགས་ཡང་དག་གྲུབ། །སངས་རྒྱས་གཟུགས་འཛིན་འོད་བཟང་པོ། །འཛམ་བུ་ཆུ་ཡི་གསེར་འོད་འདྲ། །དངོས་གྲུབ་ཕྲ་མོ་དག་ལ་གནས། །མི་སྣང་ལ་སོགས་ཀུན་གྲུབ་
ནི། །གཙོ་བོ་རྡོ་རྗེ་འཆང་དུ་འགྱུར། །གནོད་སྦྱིན་རྒྱལ་མོ་གྲུབ་པ་ཆེ། །རིག་པ་འཛིན་པའི་གཙོ་བོར་འགྱུར། །དེ་ལ་འདི་ནི་རྡོ་རྗེའི་དངོས་གྲུབ་ཐམས་ཅད་ཀྱི་གཟུགས་གསང་བ་སྔགས་ཀྱི་དངོས་གྲུབ་རྣམས་
སོ། །སྔགས་ཀྱི་དངོས་གྲུབ་ཡིད་འོང་བའི། །མཛེས་པའི་གཟུགས་རྣམས་ཐམས་ཅད་ནི། །འཇིག་རྟེན་ཁམས་ནི་ཐམས་ཅད་དུ། །མཐོང་བ་ཉིད་ཀྱི་དགའ་བར་འགྱུར། །གཙུག་ཏོར་ཐམས་ཅད་གྲུབ་པ་ཡི། །
ཡིད་བཞིན་ནོར་བུའི་བདག་པོར་འགྱུར། །སངས་རྒྱས་བྱང་ཆུབ་བྱེད་པའི་མཆོག །སངས་རྒྱས་ཉིད་ཀྱང་རབ་བསྒོམ་པའོ། །བཅོམ་ལྡན་འདས་བསམ་པ་ཐམས་ཅད་ཡོངས་སུ་རྫོགས་པའི་རྡོ་རྗེས་

88-1-153a

དེ་སྐད་ཅེས་བཀའ་སྩལ་ཏོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་དེ་བཞིན་གཤེགས་པ་ཐམས་ཅད་ཀྱི་བདག་པོས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་
རིག་པའི་བརྟུལ་ཞུགས་ཡང་དག་པར་ལེན་པའི་སྤྱོད་པ་འདི་ཉིད་ཀྱི་སྐུ་གསུང་ཐུགས། རྡོ་རྗེ་ལས་ཕྱུང་ངོ་། །སྐུ་གསུང་ཐུགས་ཀྱི་རྡོ་རྗེ་རྣམས། །ལུས་དང་ངག་སེམས་དམིགས་པ་ནི། །རང་གཟུགས་ཉིད་
ཀྱིས་དེ་བྱ་སྟེ། །དེ་ལྟས་དངོས་གྲུབ་ཐོབ་པར་འགྱུར། །དེ་ལ་འདི་ནི་སྐུ་དང་གསུང་དང་ཐུགས་ཀྱི་རྡོ་རྗེའི་རིག་པའི་བརྟུལ་ཞུགས་སོ། །གཟུགས་ནི་ཐོར་ཚུགས་དབུ་རྒྱན་འཆང་། །ཆེན་པོ་ཁ་དོག་
དཀར་པོ་འདྲ། །ཆོ་ག་བཞིན་དུ་ཐམས་ཅད་བྱ། །སྔགས་ཀྱི་སྡོམ་པས་ཀུན་དུ་བསྡམ། །ལོ་གྲངས་བཅུ་དྲུག་ལོན་པ་ནི། །རྒྱན་རྣམས་ཀུན་གྱིས་རྣམ་པར་བཀླུབས། །བཞིན་སྡུག་མིག་གི་དཀྱུས་རིང་
བ། །རྙེད་ནས་རིག་པའི་བརྟུལ་ཞུགས་སྤྱད། །སྤྱན་གྱི་གོ་འཕང་ལོངས་སྤྱོད་ཅིང་། །རྡོ་རྗེའི་མཚན་མ་ཡིས་ནི་བྱ། །ཕྱག་རྒྱ་སྔགས་ཀྱི་ཆོ་ག་ཤེས། །སྔགས་དང་རྒྱུད་ནི་ལེགས་པར་བརླབས། །དེ་བཞིན་
གཤེགས་པའི་བཙུན་མོར་བྱ། །སངས་རྒྱས་བྱང་ཆུབ་ལ་རབ་གནས། །བརྟུལ་ཞུགས་ཆེན་པོས་ཐུན་བཞིར་ནི། །གསང་བའི་མཆོད་པ་རབ་ཏུ་བྱ། །སྡོང་བུ་རྩ་བ་འབྲས་བུ་རྣམས། །བཟའ་དང་བཅའ་
བ་ཐམས་ཅད་སྤྱད། །འདི་ཡིས་མྱུར་དུ་སངས་རྒྱས་འགྱུར། །བདག་པོ་ཡེ་ཤེས་རྒྱ་མཚོ་ཆེ། །ཟླ་བ་དྲུག་གིས་དེ་དག་ཀུན། །གདོན་མི་ཟ་བར་འདིར་ཐོབ་འགྱུར། །རྟག་ཏུ་གཞན་གྱི་ནོར་བརྐུ་ཞིང་། །
གསད་པའང་རྨད་དུ་བྱུང་བ་ཆེ། །འདོད་ཆགས་རྡོ་རྗེའི་གནས་སྤྱད་པ། །སྡོམ་པ་འདིས་ནི་ཀུན་དུ་བསྡམ། །འདོད་ཆགས་རྡོ་རྗེའི་ལྕགས་ཀྱུ་ཡུམ། །ཡོན་ཏན་ལུག་རྒྱུད་མཱ་མ་ཀཱིར། །གསུང་གི་རྡོ་རྗེ་མཆོག་ཐུགས་

88-1-153b

ཀྱིས། །འདི་ནི་རྣམ་པ་ཀུན་དུ་རིགས། །རང་གི་ཕྱག་རྒྱའམ་སེམས་ཀྱིས་བསམ། །བསམ་གཏན་ཡིག་གསུམ་རྡོ་རྗེ་ཅན། །དེ་ལྟར་སངས་རྒྱས་ཀུན་མཁྱེན་ཡང་། །མཉེས་པར་འགྱུར་འདིར་གདོན་མི་ཟ། །སྒྲུབ་པ་པོ་ནི་
བློ་བརྟན་པས། །ནགས་ཚལ་དག་ཏུ་བསོད་སྙོམས་ཚོལ། །ཁ་ཟས་བཟང་པོ་བསྟར་བ་དག །འཇིགས་ཤིང་སྐྲག་ནས་སྟེར་བར་འགྱུར། །རྡོ་རྗེ་གསུམ་བདག་ཉིད་འདས་ན། །འཇིག་ཅིང་རྡོ་རྗེའི་ཡི་གེར་འགྱུར། །ལྷ་མོ་ཀླུ་མོ་
གནོད་སྦྱིན་མ། །ལྷ་མ་ཡིན་མོ་མི་མོའང་རུང་། །རྙེད་ནས་རིག་པའི་བརྟུལ་ཞུགས་བྱ། །རྡོ་རྗེ་གསུམ་གྱི་ཡེ་ཤེས་བསྟན། །འདི་དེ་སྔགས་རྣམས་ཐམས་ཅད་ཀྱི། །གསང་བའི་དེ་ཉིད་ཚུལ་ཆེན་ཏེ། །རྡོ་རྗེ་གསུམ་གྱི་ཡེ་
ཤེས་འབྱུང་། །སངས་རྒྱས་བྱང་ཆུབ་རབ་འཇུག་པའོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རིག་པའི་བརྟུལ་ཞུགས་ཀྱི་དམ་ཚིག་གི་དེ་ཁོ་ན་ཉིད་ཀྱི་རྡོ་རྗེས་དེ་སྐད་ཅེས་བཀའ་སྩལ་ཏོ། །དེ་བཞིན་
གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས་དངོས་གྲུབ་ཐམས་ཅད་ཀྱི་དཀྱིལ་འཁོར་རྡོ་རྗེ་མངོན་པར་རྫོགས་པར་བྱང་ཆུབ་པ་ཞེས་བྱ་བའི་ལེའུ་སྟེ་བཅུ་དྲུག་པའོ།། །། 
དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་འདུས་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་དེ་བཞིན་གཤེགས་པ་ལ་གསོལ་བ་
བཏབ་པ། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་པ་ཆེ། །རྡོ་རྗེ་གསུམ་མཆོག་དཀྱིལ་འཁོར་གསུམ། །གསང་བ་གསུངས་ཁྱོད་ཕྱག་འཚལ་ལོ། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་
བ་དགའ་བ་ཆེ། །རང་བཞིན་འོད་གསལ་ཆོས་རྣམས་ནི། །སྟོན་མཛོད་རྡོ་རྗེ་ཁྱོད་ཕྱག་འཚལ། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མེད་མཁའ། །རང་བཞིན་དག་པས་གོས་པ་མེད། །གསང་བ་

88-1-154a

གསུངས་ཤིག་ཁྱོད་ཕྱག་འཚལ། །རྡོ་རྗེ་དཔག་མེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་ཅན། །འདོད་ཆགས་ཕ་རོལ་ཕྱིན་པ་བརྙེས། །རྡོ་རྗེ་གསུངས་ཁྱོད་ཕྱག་འཚལ་ལོ། །དོན་ཡོད་རྡོ་རྗེ་རྫོགས་སངས་རྒྱས། །
བསམ་པ་ཐམས་ཅད་ཡོངས་རྫོགས་མཛད། །དག་པ་ངོ་བོ་ཉིད་ལས་བྱུང་། །རྡོ་རྗེ་སེམས་དཔའ་ཁྱོད་ཕྱག་འཚལ། །སངས་རྒྱས་ཀུན་གྱིས་བསྐུལ་བ་ཡི། །བསྟོད་ཚིག་ཞི་བ་འདི་རྣམས་ཀྱིས། །རྡོ་རྗེ་ལོངས་སྤྱོད་
བསྟོད་ན་ནི། །དེ་ཡང་སངས་རྒྱས་མཉམ་པར་འགྱུར། །དེ་ནས་སྟོན་པ་རྡོ་རྗེ་འཛིན། །སངས་རྒྱས་ཀུན་ལ་རྗེས་བརྩེ་བས། །རྡོ་རྗེ་གསང་བའི་གནས་དག་པ། །རྡོ་རྗེ་གསུང་ནི་བཀའ་སྩལ་ཏོ། །ཨེ་མའོ་སངས་རྒྱས་
ཐམས་ཅད་ཀྱི། །ཆོས་ཀྱི་དབྱིངས་ཀྱི་ཡི་གེ་ཆེ། །རང་བཞིན་འོད་གསལ་དག་པ་ནི། །ནམ་མཁའི་དབྱིངས་བཞིན་དྲི་མ་མེད། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་སངས་རྒྱས་ཐམས་
ཅད་ཀྱི་སྐུ་རྡོ་རྗེའི་དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །སངས་རྒྱས་ཡེ་ཤེས་མཚོ་འོད་ཀྱིས། །དམ་ཚིག་བཞི་ནི་བསྲུང་བྱ་སྟེ། །ཤ་ཆེན་རྟག་ཏུ་བཟའ་བྱའོ། །འདི་ནི་དམ་ཚིག་མཆོག་ཡིན་ནོ། །
དེ་ནས་ཕྱག་ན་རྡོ་རྗེ་དེ་བཞིན་གཤེགས་པའི་བདག་པོས་སངས་རྒྱས་ཐམས་ཅད་གསུང་རྡོ་རྗེའི་དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །དམ་ཚིག་བཞི་པོ་བསྲུང་བྱ་སྟེ། །གསུང་གི་རྡོ་རྗེ་ཡི་གེ་ཆེས། །
བཤང་གཅི་རྟག་ཏུ་བཟའ་བྱ་ཉིད། །འདི་ནི་གསུང་བ་རྨད་བྱུང་བའོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་འཛིན་པ་ཐམས་ཅད་ཀྱི་ཐུགས་རྡོ་རྗེའི་དམ་ཚིག་འདི་ཉིད་སྐུ་གསུང་
ཐུགས་རྡོ་རྗེ་ལས་ཕྱུང་ངོ་། །རྡོ་རྗེ་སེམས་དཔའ་རྫུ་འཕྲུལ་ཆེས། །དམ་ཚིག་བཞི་པོ་བསྲུང་བྱ་སྟེ། །ཁྲག་དང་ཁུ་བ་སྦྱར་བ་དག །བརྟུལ་ཞུགས་བརྟན་པས་རྟག་ཏུ་བཟའ། །སྐུ་གསུང་ཐུགས་ཀྱི་རྡོ་རྗེ་ཡི། །

88-1-154b

དམ་ཚིག་དེ་ནི་རྨད་བྱུང་ཆེ། །སངས་རྒྱས་ཀུན་གྱི་རྟག་པ་ནི། །རྡོ་རྗེ་འཛིན་ཕྱིར་ཡང་དག་བསྲུང་། །གང་ཞིག་དམ་ཚིག་འདི་སྲུང་བ། །རྡོ་རྗེ་སེམས་དཔའ་འོད་པོ་ཆེ། །དེ་ཡི་སྐུ་གསུང་ཐུགས་རྟོགས་པ། །དེ་
མ་ཐག་ཏུ་སངས་རྒྱས་འགྱུར། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་རང་སངས་རྒྱས་ཀྱི་དོན་གྱི་དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །སྟོན་པ་ལུས་ཀྱིས་དེ་
རྣམས་ནི། །རྡོ་རྗེ་སྐུ་ལ་རབ་ཏུ་གནས། །སེམས་ཅན་འཇུག་པའི་ངང་ཚུལ་ཏེ། །མཆོག་ཏུ་རྟག་པའི་དམ་ཚིག་གོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ཉན་ཐོས་ཀྱི་བསླབ་པའི་
དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །དགེ་བ་བཅུ་ཡི་ལས་ཀྱི་ལམ། །བྱེད་པ་ཡེ་ཤེས་སྤངས་པ་རྣམས། །དམན་པར་མོས་པ་ཐམས་ཅད་ཀྱི། །དམ་ཚིག་དེ་ནི་རྨད་བྱུང་ཆེ། །
དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ཚངས་པའི་དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །གཏི་མུག་ལམ་གྱིས་ལས་གང་རྣམས། །བྱེད་པ་འཇིགས་
ཤིང་མི་སྡུག་པ། །སངས་རྒྱས་བྱང་ཆུབ་སྟོན་པ་སྟེ། །སྐུ་ཡི་རྡོ་རྗེ་ཉིད་དུ་འགྱུར། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་དྲག་པོའི་དམ་ཚིག་འདི་
ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཁམས་གསུམ་པར་ནི་གནས་པ་ཡི། །བུད་མེད་རྡོ་རྗེ་ལས་བྱུང་ཀུན། །སྣ་ཚོགས་དངོས་པོས་སྤྱད་པ་ནི། །དམ་ཚིག་མཆོག་
ཏུ་རྨད་བྱུང་བའོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ཁྱབ་འཇུག་གི་དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །

88-1-155a

སེམས་ཅན་སྐྱེས་པ་ཇི་སྙེད་པ། །སྐུ་གསུམ་དབྱེར་མེད་ལ་གནས་རྣམས། །བསམ་གཏན་རྡོ་རྗེས་གསད་པར་བྱ། །རྡོ་རྗེ་མཁའ་ཁམས་བདག་ཉིད་ཀྱང་། །དེ་ནས་ཕྱག་ན་རྡོ་རྗེ་དེ་བཞིན་གཤེགས་
པ་ཐམས་ཅད་ཀྱི་བདག་པོས་རྡོ་རྗེ་གསུམ་གྱི་དམ་ཚིག་གི་རྡོ་རྗེ་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །སྐུ་ཡི་རྡོ་རྗེ་ཚངས་པར་འགྱུར། །གསུང་གི་རྡོ་རྗེ་དབང་ཕྱུག་ཆེ། །ཐུགས་ཀྱི་རྒྱལ་པོ་རྡོ་རྗེ་
འཛིན། །དེ་ཉིད་ཁྱབ་འཇུག་རྫུ་འཕྲུལ་ཆེ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་གནོད་སྦྱིན་མོ་ཐམས་ཅད་ཀྱི་དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་
ངོ་། །ཤ་དང་ཁྲག་ནི་ཟ་བ་དང་། རྟག་ཏུ་བུད་མེད་འདོད་མཆོག་གཞོལ། །རྡོ་རྗེ་ཆེན་པོ་འདི་རྣམས་ཀྱི། །དམ་ཚིག་བསྟེན་དཀས་མཉེས་པར་བྱ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་
ཅད་ཀྱི་བདག་པོས་ཀླུའི་དབང་པོའི་རྒྱལ་མོ་ཐམས་ཅད་ཀྱི་དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཕྲ་མ་དང་ནི་འོ་མ་འཐུང་། །འདོད་དང་དྲི་མ་རྟག་ཏུ་འབད། །དམ་ཚིག་འདི་
རྣམས་ཀྱིས་བསྒྲུབ་བྱ། །གཞན་དུ་ངེས་པར་ཉོན་མོངས་འགྱུར། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ལྷ་མ་ཡིན་གྱི་བུ་མོའི་དམ་ཚིག་འདི་ཉིད་ཀྱི་སྐུ་གསུང་ཐུགས་
རྡོ་རྗེ་ལས་ཕྱུང་ངོ་། །ཁྲོ་ཞིང་ང་རྒྱལ་ཁུར་གྱིས་ནོན། །སྤོས་དང་མེ་ཏོག་སྤྱོད་པ་སྐྱེས། །དམ་ཚིག་རྡོ་རྗེ་ས་འོག་ཏུ། །གདུལ་དཀའ་རྡོ་རྗེ་འཇིགས་བྱེད་དེ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་
པ་ཐམས་ཅད་ཀྱི་བདག་པོས་སྲིན་མོ་རྣམས་ཀྱི་དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཐོད་རུས་གདུག་པའི་འབྲུ་མར་དང་། །ཞག་གིས་རབ་ཏུ་དགའ་བར་འགྱུར། །འབྱུང་པོ་ཀུན་

88-1-155b

གྱི་དམ་ཚིག་འདི། །དག་བྱེད་རྡོ་རྗེ་དོན་ཆེན་བྱེད། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་མཁའ་འགྲོ་མ་ཐམས་ཅད་ཀྱི་དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་
ལས་ཕྱུང་ངོ་། །བཤང་བ་གཅི་བ་ཁྲག་བཟའ་ཞིང་། །ཆང་ལ་སོགས་པ་རྟག་ཏུ་བཏུང་། །རྡོ་རྗེ་མཁའ་འགྲོ་མའི་སྦྱོར་བས། །གནས་ཀྱི་མཚན་ཉིད་ཀྱིས་གསང་བྱ། །ངོ་བོ་ཉིད་ཀྱིས་ཀུན་འབྱུང་བ། །ཁམས་
གསུམ་དག་ཏུ་རྣམ་པར་སྤྱོད། །དམ་ཚིག་མ་ལུས་དངོས་གྲུབ་ཀུན། །ཕན་པར་འདོད་པས་སྤྱད་པར་བྱ། །ཁམས་གསུམ་པ་ཐམས་ཅད་ཀྱི་རྡོ་རྗེའི་དམ་ཚིག་གི་རྗེས་སུ་འབྲང་བ་ཞེས་བྱ་བའི་ཏིང་ངེ་
འཛིན་ཏོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ལུས་ཀྱི་དངོས་གྲུབ་ཀྱི་དམ་ཚིག་རྡོ་རྗེ་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ལུས་ཀྱི་རྣམ་གསུམ་ཐམས་ཅད་
ནི། །རྡོ་རྗེ་ཡང་དག་བྱུང་བར་བྱ། །སེམས་ཅན་ཁམས་ནི་རྣམ་ཀུན་དུ། །རྟག་ཏུ་སངས་རྒྱས་སྐུ་བྱེད་པའོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ངག་གི་དངོས་གྲུབ་ཀྱི་
རྡོ་རྗེའི་དམ་ཚིག་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ངག་གི་ལས་ལམ་མ་ལུས་པར། །ཁམས་གསུམ་དྲི་མེད་དཀྱིལ་འཁོར་དུ། །ངག་གི་གྲུབ་གནས་ཉམས་དགའ་འདི། །དམ་ཚིག་ཤིན་ཏུ་འདའ་
དཀའ་བའོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་སེམས་རྣམ་པར་དག་པའི་དམ་ཚིག་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཡིད་ཀྱི་རྡོ་རྗེའི་རང་བཞིན་ཀུན། །
བརྟན་པ་རྡོ་རྗེའི་བློ་ཡིས་བསྒོམ། །རྡོ་རྗེ་མི་ཕྱེད་གསུམ་ལྡན་གྱི། །དམ་ཚིག་བཤད་པ་འདི་ཡིན་ནོ། །བཅོམ་ལྡན་འདས་ཀུན་དུ་བཟང་པོ་རྡོ་རྗེ་སེམས་དཔས་དེ་སྐད་ཅེས་བཀའ་སྩལ་ཏོ། །དེ་ནས་ཕྱག་ན་རྡོ་རྗེ་དེ་

88-1-156a

བཞིན་གཤེགས་པ་ཐམས་ཅད་ཀྱི་བདག་པོས་སྔགས་ཐམས་ཅད་ཀྱི་རྡོ་རྗེའི་དམ་ཚིག་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །སངས་རྒྱས་བྱང་ཆུབ་སེམས་དཔའ་དང་། །རང་རྒྱལ་ཉན་ཐོས་དེ་
བཞིན་ཏེ། །སྐུ་གསུང་ཐུགས་ཀྱི་སྦྱོར་བ་ཡིས། །ཕྱག་འཚལ་ན་ནི་ཉམས་པར་འགྱུར། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་
རྡོ་རྗེའི་བསམ་གཏན་གྱི་དམ་ཚིག་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཀུན་ཏུ་སྐུ་དང་གསུང་ཐུགས་ཀྱི། །དཀྱིལ་འཁོར་རྡོ་རྗེ་སེམས་དཔའ་ཡི། །རྡོ་རྗེ་གསུམ་གྱི་སྦྱོར་བ་ཡིས། །བསམ་གཏན་སྔགས་
ཟློས་པས་བསྒོམ་བྱ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་སྔགས་རྡོ་རྗེ་ཐམས་ཅད་ཀྱི་སྡོམ་པ་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །སེམས་ཅན་ཁམས་
རྣམས་བསྡུས་ནས་ནི། །བསམ་གཏན་རྡོ་རྗེས་བསྐུལ་བར་བྱ། །རྡོ་རྗེ་གསུམ་ཕྱག་མཆོག་གི་མཆོག །དམ་ཚིག་རྡོ་རྗེ་འབྱུང་བའོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་
བསྙེན་པ་དང་། །བསྒྲུབ་པ་དང་ཉེ་བར་སྒྲུབ་པ་དང་སྒྲུབ་པ་ཆེན་པོའི་སྡོམ་པ་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །རྡོ་རྗེ་བཤང་གཅིས་ནམ་མཁའི་དབྱིངས། །ཡོངས་སུ་གང་བར་རྣམ་པར་བསམ། །དུས་
གསུམ་རྡོ་རྗེ་དག་ལ་དབུལ། །དམ་ཚིག་རབ་ཏུ་རྟག་པའོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་ཐམས་ཅད་མི་སྣང་བའི་དམ་ཚིག་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཐུན་
བཞི་པོ་ནི་གང་ཞིག་མཆོག །རྡོ་རྗེ་མོ་ནི་ཉིན་རེ་སྤྱད། །སླར་ཡང་རྫས་ཀྱང་རྟག་ཏུ་དབྲོག །རྡོ་རྗེ་རྫོགས་བྱེད་དམ་ཚིག་གོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ནམ་མཁའི་

88-1-156b

རིག་པ་འཛིན་པའི་དམ་ཚིག་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །སྐུ་གསུང་ཐུགས་ཀྱི་རྡོ་རྗེ་རྣམས། །དབུ་རྒྱན་གྱི་ནི་བསམ་གཏན་བསམ། །རྡོ་རྗེ་གསུམ་གྱི་དམ་ཚིག་ཀུན། །ཁྲོས་པ་རྣམས་ཀྱིས་རྒྱལ་མི་ནུས། །
དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་སྔགས་འཆང་ལས་དང་པོ་པ་ཐམས་ཅད་ཀྱི་དམ་ཚིག་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཁ་ཟས་ལ་ནི་སྐུའི་རྡོ་རྗེ། །ཕྱི་རོལ་རྡོ་རྗེ་འཛིན་
པ་དང་། །རྡོ་རྗེ་ཆོས་སུ་རྟག་ཏུ་བྱ། །མདོ་འདོན་ཆོ་གའི་བྱ་བ་ལ། །བཅོམ་ལྡན་འདས་ངོ་བོ་ཉིད་དག་པ་རྡོ་རྗེས་དེ་སྐད་ཅེས་བཀའ་སྩལ་ཏོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་འཛིན་
པ་ཐམས་ཅད་སྐུ་དང་གསུང་དང་ཐུགས་ཀྱི་རྡོ་རྗེ་སྙིང་པོ་རྡོ་རྗེ་མཉམ་པ་ཉིད་རྣམ་པར་དགོངས་ནས་ཅང་མི་གསུང་བར་གྱུར་ཏོ། །དེ་ནས་ཡང་བརྗོད་དུ་མེད་པའི་ཡང་བརྗོད་དུ་མེད་པའི་སངས་རྒྱས་ཀྱི་ཞིང་གི་རི་
རབ་ཀྱི་རྡུལ་ཕྲ་རབ་དང་མཉམ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་དེ་བཞིན་གཤེགས་པ་ཐམས་ཅད་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་
བཞིན་གཤེགས་པ་ཐམས་ཅད་ཀྱི་བདག་པོ་འདི་ཅིའི་སླད་དུ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་གྱི་ནང་དུ་ཅང་མི་གསུང་བར་བཞུགས་པ་ལགས། 
དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་བཞིན་གཤེགས་པ་ཐམས་ཅད་ཀྱི་སྐུ། གསུང་
ཐུགས་ཀྱི་བདག་པོ་འདི་སྐུ་དང་གསུང་དང་ཐུགས་རྡོ་རྗེའི་དམིགས་སུ་མེད་པའི་ངོ་བོ་ཉིད་མི་འགྱུར་བའི་གནས་ལ་གང་ངོ་བོ་ཉིད་མེད་པ་མི་འགྱུར་བའི་གནས་རྣམ་པར་དཔྱད་ནས་ཅང་མི་གསུང་བར་བཞུགས་སོ། །

88-1-157a

རིགས་ཀྱི་བུ་དེ་བཞིན་གཤེགས་པ་ཐམས་ཅད་ཀྱི་བདག་པོ་འདི་ནི་འདི་སྙམ་དུ་སེམས་པར་གྱུར་ཏེ། སྐུ་ཡི་ཡི་གེ་མ་སྐྱེས་པ། །གསུང་དང་ཐུགས་ཀྱང་མཚན་ཉིད་མེད། །ནམ་མཁའ་རྡོ་རྗེའི་རྟོག་པར་བྱུང་། །
ལོག་པར་བཟུང་བས་གཟུང་བ་ཡིན། །དེ་ནས་འཇམ་དཔལ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་
ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་གསུང་རྡོ་རྗེའི་ཚིག་ལ་ལོག་པ་ཀུན་འབྱུང་བས་མི་བརྟག་ཏུ་གསོལ། དེ་ཅིའི་སླད་དུ་ཞེ་ན། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་
དབྱངས་ཀྱི་ངོ་བོ་ཉིད་སྤྱོད་པ་གཤེགས་པ་དང་བྱོན་པ་ནི་དེ་བཞིན་གཤེགས་པ་ཐམས་ཅད་ཀྱི་བདག་པོ་འདི་ཡིན་ནོ། །དེ་ཅིའི་སླད་དུ་ཞེ་ན། ཚངས་པ་ལ་སོགས་པའི་བྱང་ཆུབ་ཆེན་པོ་སེམས་པ་མངོན་པར་
ཤེས་པ་ཆེན་པོའི་ཡེ་ཤེས་ཐོབ་པ་རྣམས་ཆོས་ཐམས་ཅད་ཀྱི་མཚན་ཉིད་ཀྱི་ངོ་བོ་ཉིད་མི་ཤེས་པས་འདི་སྙམ་དུ་ཡོངས་སུ་རྟོག་པར་བྱེད་དེ། ཅི་རྡོ་རྗེ་ཆེན་པོའི་བདག་ཉིད་འདི་དེ་བཞིན་གཤེགས་པ་ཐམས་ཅད་ཀྱི་ཆོས་
ཐམས་ཅད་ཀྱི་རྡོ་རྗེ་དེ་ཁོ་ན་ཉིད་མངོན་པར་མ་མཁྱེན་ནས་གསང་བའི་ཡི་གེ་འཆད་དམ་སྙམ་པ་ཡང་མཆིས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བྱང་ཆུབ་
སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རེ་ཤིག་བྱང་ཆུབ་ཆེན་པོ་སེམས་དཔའ་ཁྱེད་རྣམས་ལྟ་ཅི་སྨོས། དེ་བཞིན་གཤེགས་པ་ཐམས་ཅད་སྐུ་གསུང་ཐུགས་ཀྱི་གསང་བའི་ཡི་གེ་རྙེད་པ་ངེད་
ཀྱིས་ཀྱང་སྐུ་གསུང་ཐུགས་ཀྱི་བྱང་ཆུབ་མི་ཤེས་སོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པ། མི་འགྱུར་བ་ལས་བྱུང་བ། སྐྱེ་བ་མེད་པའི་རྡོ་རྗེ་མངོན་པར་རྫོགས་པར་བྱང་ཆུབ་པས་སོ། །རིགས་ཀྱི་བུ་དག་སེམས་

88-1-157b

ཅན་གྱི་ཁོངས་སུ་གཏོགས་པའི་སེམས་ཅན་ཇི་སྙེད་ཡོད་པ་དེ་དག་ཐམས་ཅད་བྱང་ཆུབ་ལ་གནས་པ་སངས་རྒྱས་རྡོ་རྗེའོ། །དེ་ཅིའི་ཕྱིར་ཞེ་ན། ཡོང་ཡེ་སེམས་ཅན་འདི་དག་ནི་སྐུ་གསུམ་རྡོ་རྗེ་འཛིན་པ་ཉིད་ཉེ་
བར་བཟུང་ནས་སྐུ་གསུང་ཐུགས་རྡོ་རྗེའི་ཡེ་ཤེས་ཐོབ་པའོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་བདག་པོས་དེ་བཞིན་གཤེགས་པ་ཐམས་ཅད་དང་། བྱང་
ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རང་བཞིན་དག་ཅིང་བདག་མེད་པ། །ཆོས་ཀྱི་དབྱིངས་ནི་མ་ལུས་གནས། །རྟོག་པ་རྡོ་རྗེ་ཡང་དག་བྱུང་། །སྨྲ་བྱ་སྨྲ་བྱ་ཡང་མ་ཡིན། །དེ་ནས་
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཕྱག་ན་རྡོ་རྗེ་ཆེན་པོ་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་
ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་དངོས་གྲུབ་གང་ནས་ཡང་དག་པར་འབྱུང་། གང་དུ་གནས་གང་དུ་མེད་པར་འགྱུར་བ་ལགས། དེ་བཞིན་གཤེགས་པ་
ཐམས་ཅད་ཀྱི་བདག་པོ་རྡོ་རྗེ་འཆང་གིས་བཀའ་སྩལ་པ། བཅོམ་ལྡན་འདས་རང་གི་སྐུ་དང་གསུང་དང་ཐུགས་ཀྱི་རྒྱུད་ལ་རྡོ་རྗེ་རབ་ཏུ་གནས་སོ། །དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཐམས་ཅད་
དང་། ཐམས་ཅད་མཁྱེན་པའི་ཡེ་ཤེས་དང་། ཁམས་གསུམ་ཇི་སྙེད་པ་དག་ཀྱང་ངོ་། །དེ་བཞིན་གཤེགས་པ་ཐམས་ཅད་ཀྱིས་སླར་གསུངས་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་
སྐུ་གསུང་ཐུགས་རྡོ་རྗེའི་དངོས་གྲུབ་དང་། ཁམས་གསུམ་པ་ཐམས་ཅད་གང་ན་གནས། ཡེ་ཤེས་རྡོ་རྗེའི་བདག་པོས་བཀའ་སྩལ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་

88-1-158a

གསུང་དང་ཐུགས་ཀྱི་དངོས་གྲུབ་དང་། ཁམས་གསུམ་པ་ཐམས་ཅད་ནི་ནམ་མཁའི་ཁམས་ལ་གནས་སོ། །དེ་བཞིན་གཤེགས་པ་ཐམས་ཅད་ཀྱིས་གསུངས་པ། བཅོམ་ལྡན་འདས་ནམ་
མཁའ་གང་ན་གནས། རྡོ་རྗེ་འཛིན་པས་བཀའ་སྩལ་པ། གང་ན་ཡང་མ་ཡིན་ནོ། །དེ་ནས་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་དེ་དག་ངོ་མཚར་དུ་གྱུར། རྨད་དུ་བྱུང་བར་
གྱུར་ནས་དབྱངས་འདི་དག་བརྗོད་དོ། །ཨེ་མའོ་རྡོ་རྗེ་ཨེ་རྡོ་རྗེ། །ཨེ་མའོ་རྡོ་རྗེའི་བསྟན་པ་ནི། །གང་དུ་ལུས་དང་ངག་སེམས་མེད། །དེ་རུ་སྐུ་ནི་རྣམ་སྒོམ་པ། །དེ་ནས་སྟོན་པ་རྡོ་རྗེ་འཛིན། །སངས་རྒྱས་
ཀུན་གྱིས་ཕྱག་བྱས་པ། །རྡོ་རྗེ་གསུམ་མཆོག་མཆོག་ཆེན་མཆོག །རྡོ་རྗེ་གསུམ་མཆོག་དབང་ཕྱུག་གིས། །དངོས་གྲུབ་དག་ནི་ཐམས་ཅད་ཀྱི། །རིག་པའི་སྐྱེས་བུ་བསྒོམ་པ་གསུངས། །མཁའ་དབྱིངས་རྡོ་
རྗེའི་དབུས་གནས་པར། །སངས་རྒྱས་དཀྱིལ་འཁོར་བསྒོམ་པར་བྱ། །སྐུ་ཡི་རྡོ་རྗེ་རབ་བསྒོམས་ནས། །སྤྱི་བོར་རྡོ་རྗེ་རབ་ཏུ་བསྒོམ། །ཞལ་གསུམ་སྐུ་གསུམ་ཡང་དག་བྱུང་། །རྣམ་པར་འཕྲོ་བ་
བསམ་པར་བྱ། །རྡོ་རྗེ་འཁོར་ལོ་འཛིན་བསམས་ན། །མྱུར་དུ་བྱང་ཆུབ་ཐོབ་པར་འགྱུར། །ཐམས་ཅད་རིགས་ཀྱི་བྱེ་བྲག་གིས། །གསང་བ་འདི་ནི་རྣམ་པར་བསམ། །གཞན་དུ་རྣམ་པར་
བསྒོམ་པ་ནི། །དེ་དག་དངོས་གྲུབ་མཆོག་མི་འགྱུར། །བཅོམ་ལྡན་འདས་རིག་པའི་སྐྱེས་བུ་རྡོ་རྗེ་གསང་བས་དེ་སྐད་ཅེས་བཀའ་སྩལ་ཏོ། །ཁམས་གསུམ་ལས་བྱུང་རྒྱལ་མོ་ཆེ། །མཉེས་
པར་བྱེད་པ་རྣམ་པར་བསམ། །འདི་ལྟས་མཉེས་འགྱུར་ཁྱུ་མཆོག་ནི། །རྡོ་རྗེ་སྐུ་གསུམ་མཚན་པ་རྣམས། །གང་ཞིག་ལ་ལ་འདི་སྒོམ་པའི། །བྱང་ཆུབ་སེམས་དཔའ་གྲགས་ཆེན་རྣམས། །

88-1-158b

འོད་ཆེན་པོས་ནི་ཞག་བདུན་གྱིས། །སྐུ་གསུམ་དངོས་གྲུབ་ཐོབ་པར་འགྱུར། །དེ་ནས་ཡང་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་སྐུ་གསུང་ཐུགས་རྡོ་རྗེ་བསྡུས་པའི་གསང་བ་གསང་
ཆེན་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །སྐུ་གསུང་ཐུགས་ཀྱི་དམ་ཚིག་ནི། །ཕྱག་རྒྱ་ཆེན་པོའི་དོན་རྟོགས་པ། །ཀུན་མཚན་ཉིད་ཀྱིས་ཆོ་ག་བཞིན། །བསྒོམས་ན་སངས་རྒྱས་ཉིད་ཐོབ་འགྱུར། །དེ་ནས་ཕྱག་
ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ཡང་སྒྲུབ་པ་པོ་ཐམས་ཅད་ཀྱི་ལུས་དང་ངག་དང་སེམས་ཀྱི་གསང་ཆེན་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །གལ་ཏེ་བྱང་ཆུབ་མཆོག་འདོད་
ན། །ལག་པའི་ཕྱག་རྒྱ་མི་བཅིང་ངོ་། །སྔགས་རྣམས་ཀུན་གྱི་དམ་ཚིག་འདི། །རྒྱལ་བ་རྣམས་ཀྱང་མི་འདའོ། །དེ་ནས་ཡང་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་སངས་རྒྱས་ཐམས་
ཅད་ཀྱི་དམ་ཚིག་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །བཤང་གཅི་ཁུ་བ་ཁྲག་རྣམས་ནི། །སྨད་པ་ཉིད་དུ་ཡོང་མི་བྱ། །ཆོ་ག་བཞིན་དུ་རྟག་ཏུ་བཟའ། །གསང་འདི་རྡོ་རྗེ་གསུམ་བྱུང་ཡིན། །དེ་ནས་ཡང་
བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་གསུང་རྡོ་རྗེའི་དམ་ཚིག་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཁམས་གསུམ་ལམ་ནི་ཉམས་དགའ་བར། །བུད་མེད་ཇི་སྙེད་
ཡོད་པ་རྣམས། །ཐམས་ཅད་ཆོ་ག་བཞིན་དུ་སྤྱད། །གསུང་གི་རྡོ་རྗེ་མི་སྨད་དོ། །དེ་ནས་ཡང་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ཐུགས་ཀྱི་རྡོ་རྗེའི་དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་
ལས་ཕྱུང་ངོ་། །རྡོ་རྗེ་སྐུ་གསུམ་ལ་གནས་པའི། །དམ་ཚིག་ཇི་སྙེད་ཡོད་པ་ཀུན། །རྡོ་རྗེ་གསུམ་གྱི་དམ་ཚིག་གིས། །མགུ་བྱ་ཐུགས་རྡོ་རྗེ་མི་སྨད། །བཅོམ་ལྡན་འདས་རྡོ་རྗེ་གསུམ་གྱི་དམ་ཚིག་ཆེན་པོས་དེ་སྐད་

88-1-159a

ཅེས་བཀའ་སྩལ་ཏོ། །དེ་ནས་ཡང་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་དེ་བཞིན་གཤེགས་པ་ཐམས་ཅད་ཀྱི་གསང་བའི་རྡོ་རྗེ་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །མདོར་ན་ཕུང་
པོ་ལྔ་རྣམས་ནི། །སངས་རྒྱས་ལྔར་ནི་རབ་ཏུ་བསྒྲགས། །རྡོ་རྗེའི་སྐྱེ་མཆེད་རྣམས་ཉིད་ནི། །བྱང་ཆུབ་སེམས་དཔའི་དཀྱིལ་འཁོར་མཆོག །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ཁམས་གསུམ་
བསགས་པའི་རྡོ་རྗེ་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ས་ནི་སྤྱན་ཞེས་བྱ་བ་ཡིན། །ཆུའི་ཁམས་མཱ་མ་ཀཱི་ཞེས་བྱ། །དཀར་དང་སྒྲོལ་མ་ཞེས་བྱ་བ། །མེ་དང་རླུང་དུ་རབ་ཏུ་བསྒྲགས། །མཁའ་དབྱིངས་རྡོ་རྗེའི་དམ་
ཚིག་ནི། །དེ་ཉིད་རྡོ་རྗེ་འཛིན་པ་ཡིན། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གནས་ཀྱི་དབང་ཕྱུག་རྡོ་རྗེ་སེམས་དཔའ་ཆེན་པོས་དེ་སྐད་ཅེས་བཀའ་སྩལ་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་
ཐམས་ཅད་ཀྱི་སྐུ་གསུང་ཐུགས་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་ཀྱི་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས་ཀྱང་དེ་བཞིན་གཤེགས་
པ་ཐམས་ཅད་ཀྱི་འཁོར་གྱི་དཀྱིལ་འཁོར་ལ་གཟིགས་ནས་ཅང་མི་གསུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ། བྱམས་པས་དེ་བཞིན་གཤེགས་པ་ཐམས་ཅད་ལ་ཕྱག་
འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་གསང་ཆེན་གསང་བ་འདུས་པར་མངོན་པར་དབང་བསྐུར་བའི་སློབ་དཔོན་
ལ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱིས་ཇི་ལྟར་བལྟ་བར་བགྱི། དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་

88-1-159b

དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱིས་བྱང་ཆུབ་ཀྱི་སེམས་རྡོ་རྗེ་ཉིད་དུ་བལྟ་བར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་ཀྱི་སེམས་རྡོ་རྗེ་དང་སློབ་དཔོན་འདི་ནི་གཉིས་སུ་མེད་
ཅིང་གཉིས་སུ་བྱེར་མེད་དོ། །རིགས་ཀྱི་བུ་ཇི་སྙེད་མདོར་བསྡུས་ཏེ་བསྟན་ན་ནི་ཕྱོགས་བཅུའི་འཇིག་རྟེན་གྱི་ཁམས་ན། སངས་རྒྱས་དང་བྱང་ཆུབ་སེམས་དཔའ་གང་རྣམས་བཞུགས་པ་དང་འཚོ་བ་དང་
སྐྱོང་བ་དེ་རྣམས་ཐམས་ཅད་ཀྱང་དུས་གསུམ་དུ་བྱོན་ནས། རྡོ་རྗེ་སློབ་དཔོན་དེ་ལ་དེ་བཞིན་གཤེགས་པ་ཐམས་ཅད་ཀྱི་མཆོད་པ་རྣམས་ཀྱིས། ཡང་དག་པར་མཆོད་ནས་རང་གི་སངས་རྒྱས་ཀྱི་ཞིང་དུ་
འགྲོ་ཞིང་། ངག་རྡོ་རྗེའི་ཡི་གེའི་ཚིག་འདི་སྐད་དུ་ཡང་འབྱིན་ཏོ། །བདག་ཅག་དེ་བཞིན་གཤེགས་པ་ཐམས་ཅད་ཀྱི་ཕའོ། །བདག་ཅག་དེ་བཞིན་གཤེགས་པ་ཐམས་ཅད་ཀྱི་མའོ། །བདག་ཅག་དེ་བཞིན་གཤེགས་
པ་ཐམས་ཅད་ཀྱི་སྟོན་པའོ། །ཞེས་བྱ་བའི་བར་དུའོ། །འདི་ལྟ་སྟེ་གཞན་ཡང་རིགས་ཀྱི་བུ་སངས་རྒྱས་བཅོམ་ལྡན་འདས་ཕྱོགས་བསུ་བཅིང་། ཇི་སྙེད་བཞུགས་པའི་སངས་རྒྱས་བཅོམ་ལྡན་འདས་དེ་རྣམས་ཀྱི་སྐུ་
དང་གསུང་དང་ཐུགས་རྡོ་རྗེ་ལས་བྱུང་བའི་བསོད་ནམས་ཀྱི་ཕུང་པོ་ཇི་སྙེད་པ་དེ་བས་ཀྱང་། སློབ་དཔོན་གྱི་བ་སྤུའི་བུ་ག་གཅིག་གི་བསོད་ནམས་ཁྱད་པར་དུ་འཕགས་སོ། །དེ་ཅིའི་ཕྱིར་ཞེ་ན། རིགས་ཀྱི་བུ་
བྱང་ཆུབ་ཀྱི་སེམས་ནི་སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྙིང་པོར་གྱུར་པ་བསྐྱེད་པ་གནས་པར་གྱུར་པ་ནས། ཐམས་ཅད་མཁྱེན་པའི་ཡེ་ཤེས་ཀྱི་འབྱུང་གནས་ཡིན་པའི་བར་དུའོ། །དེ་ནས་ཡང་བྱང་ཆུབ་སེམས་དཔའ་ཆེན་པོ་བྱམས་
པ་ཡིད་འཇིགས་ཤིང་སྐྲག་ནས་ཅང་མི་སྨྲ་བར་གྱུར་ཏོ། །དེ་ནས་དེ་བཞིན་གཤེགས་པ་མི་བསྐྱོད་པ་དང་། དེ་བཞིན་གཤེགས་པ་རིན་ཆེན་ཏོག་དང་། དེ་བཞིན་གཤེགས་པ། འོད་དཔག་

88-1-160a

མེད་དང་། དེ་བཞིན་གཤེགས་པ་དོན་ཡོད་གྲུབ་པ་དང་། དེ་བཞིན་གཤེགས་པ་རྣམ་པར་སྣང་མཛད་ཀྱིས་རྡོ་རྗེ་འཛིན་པ་དངོས་གྲུབ་ཀྱི་དམ་ཚིག་ཐམས་ཅད་དམིགས་པ་རྡོ་རྗེ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ནས། བྱང་ཆུབ་སེམས་དཔའ་དེ་དག་ཐམས་ཅད་ལ་བཀའ་སྩལ་པ། བྱང་ཆུབ་སེམས་དཔའ་ཁྱེད་རྣམས་ཐམས་ཅད་ཉོན་ཅིག །གང་ཡང་ཕྱོགས་བཅུའི་སངས་རྒྱས་
བཅོམ་ལྡན་འདས་དུས་གསུམ་གྱི་རྡོ་རྗེ་ཡེ་ཤེས་ཡང་དག་པར་བྱུང་བ་དེ་རྣམས་ཀྱང་བྱོན་ནས་གསང་བ་འདུས་པའི་སློབ་དཔོན་ལ་མཆོད་པ་བྱེད་ཅིང་ཕྱག་འཚལ་ལོ། །དེ་ཅིའི་ཕྱིར་ཞེ་ན། དེ་ཉིད་དེ་བཞིན་
གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱི་སྟོན་པ་བཅོམ་ལྡན་འདས་རྡོ་རྗེ་འཛིན་པ་ཆེན་པོ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་བདག་པོ་ཡིན་པའི་ཕྱིར་རོ། །དེ་ནས་
བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཀྱིས་དེ་བཞིན་གཤེགས་པ་ཐམས་ཅད་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་
ཐུགས་ཀྱི་དངོས་གྲུབ་རྣམས་གང་ལ་གནས། དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། སྐུ་གསུམ་གསང་བའི་སྐུ་གསུང་ཐུགས་ནི་རྡོ་རྗེ་སློབ་དཔོན་གྱི་ལུས་དང་ངག་དང་སེམས་རྡོ་རྗེ་ལ་གནས་
སོ། །བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་པ། ལུས་དང་ངག་དང་སེམས་རྡོ་རྗེ་གང་ལ་གནས། དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། གང་ལ་ཡང་མི་གནས་སོ། །དེ་
ནས་བྱང་ཆུབ་སེམས་དཔའ་ཆེན་པོ་དེ་དག་ངོ་མཚར་དུ་གྱུར་རྨད་དུ་བྱུང་བར་གྱུར་ནས་ཅང་མི་སྨྲ་བར་གནས་པར་གྱུར་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པས་གསང་བའི་

88-1-160b

རྡོ་རྗེའི་ཏིང་ངེ་འཛིན་ལས་བཞེངས་ནས། དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་རྣམས་ལ་བཀའ་སྩལ་པ། ཁྱོད་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་
དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སེམས་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་གྱི་དཀྱིལ་འཁོར་ཆེན་པོ་ཉོན་ཅིག །དེ་ནས་ཡང་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་
དེ་དག་ཐམས་ཅད་ཀྱིས་ཐལ་མོ་སྦྱར་ནས་བཅོམ་ལྡན་འདས་རྡོ་རྗེ་འཆང་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དཀྱིལ་འཁོར་ཆེན་པོ་བཤད་དུ་གསོལ། བདེ་བར་གཤེགས་པ་བཤད་དུ་གསོལ། །
ནམ་མཁའི་དབྱིངས་ཀྱི་དབུས་གནས་བསམ། །གྲུ་བཞི་ལྷམ་པ་རབ་ཏུ་མཛེས། །སངས་རྒྱས་དཀྱིལ་འཁོར་སྦྱོར་བ་ཡིས། །བསམ་གཏན་རྡོ་རྗེ་རབ་བསྐུལ་བྱ། །རྡོ་རྗེ་དཀྱིལ་འཁོར་བསམ་གཏན་གྱིས། །
འཁོར་ལོ་ཅན་ཀུན་གདན་དུ་བྱ། །མཆོད་པ་ཆོ་ག་དེ་ཉིད་ཀྱིས། །བློ་དང་ལྡན་པས་རྟག་ཏུ་བྱ། །སློབ་དཔོན་སྙིང་གར་རབ་བསྒོམས་ནས། །དབང་བསྐུར་བ་ནི་ཡང་དག་སྤྱད། །མཁའ་དབྱིངས་སངས་རྒྱས་
ཐམས་ཅད་ཀྱིས། །ཡོངས་སུ་གང་བར་རྣམ་བསྒོམས་ལ། །ཐམས་ཅད་དབང་བསྐུར་གནས་གསུམ་གྱིས། །ཆོ་ག་བཞིན་དུ་དབབ་པར་བྱ། །འདི་ཡིས་སེམས་ཅན་ཐམས་ཅད་ལ། །ཕན་བཞེད་བྱང་ཆུབ་ཐོབ་
འགྱུར་ཞིང་། །དངོས་གྲུབ་ཐམས་ཅད་རྨད་བྱུང་ཆེ། །སྐུ་གསུང་ཐུགས་ནི་འགྲུབ་པར་འགྱུར། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་དམ་ཚིག་གི་རྡོ་རྗེ་ཞེས་བྱ་བ་བསམ་གཏན་གྱི་དཀྱིལ་
འཁོར་རོ། །དེ་ནས་སླར་ཡང་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ཐམས་ཅད་དེ་བཞིན་གཤེགས་པའི་རྡོ་རྗེའི་སྦྱོར་བ་ཞེས་བྱ་བ་སྐུ་དང་གསུང་དང་ཐུགས་རྡོ་རྗེའི་གསང་བ་ཉིད་ཀྱི་སྐུ་

88-1-161a

གསུང་ཐུགས་རྡོ་རྗེ་ལས་ཕྱུང་ངོ་། །ཧཱུྃ་ཧྲཱིཿཁྃ། ཤ་རུས་ལ་སོགས་དཀྱིལ་འཁོར་ནི། །ནམ་མཁའི་དབྱིངས་ཀྱི་དབུས་གནས་བསམ། །སྐུ་དང་གསུང་ཐུགས་གསུམ་སྙིང་པོ། །རྡོ་རྗེ་སེམས་དཔའ་བསྒོམ་པར་
བྱ། །དྲག་པོ་མི་སྡུག་ཀུན་ཏུ་ཁྲོས། །ཨུད་པལ་སྔོན་པོའི་ཁ་དོག་འདྲ། །ཕྱག་བཞི་པ་ནི་ཆོ་ག་ཡིས། ཕྱག་ན་ཐོད་པ་བསྣམས་པར་བསྒོམ། །ལྔ་ཡི་འོད་ཟེར་རབ་གསལ་བའི། །རང་ལྕེ་བརྟུལ་ཞུགས་ཅན་གྱིས་བསྒོམ། །བསམ་
གཏན་རྡོ་རྗེའི་སྦྱོར་བ་ཡིས། །ཁྲག་དྲང་བ་ཡི་མཆོག་ཡིན་ནོ། །རྩེ་གསུམ་རྡོ་རྗེ་དམ་ཚིག་དང་། །ཕུར་བུ་དྲག་པོ་མཆོག་དག་གིས། །སངས་རྒྱས་ཉིད་ཀྱི་སྐུ་དག་ཀྱང་། །རྡོ་རྗེའི་སྦྱོར་བས་གཟིར་བར་བྱ། །དེ་ནས་ཕྱག་
ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་སླར་ཡང་རྡོ་རྗེ་ཁ་ཟས་ཀྱི་དམ་ཚིག་གིས་བྱ་བ་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །བཟའ་བའམ་བཏུང་བ་གང་ཅུང་ཟད། །བརྟུལ་ཞུགས་ཅན་
གྱིས་གང་ཟ་བ། །བཤང་གཅི་ཤ་ཡི་སྦྱོར་བ་ཡིས། །ཆོ་ག་བཞིན་དུ་ཡོངས་སུ་བརྟག །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ཡང་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་
དང་ཐུགས་རྡོ་རྗེ་མཆོད་པའི་མཆོག་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཉེར་སྤྱོད་ལྔ་ཡི་མཆོད་མཆོག་གིས། །མཆོད་བྱ་དེ་དག་ཀྱང་མཆོད་བྱ། །འདི་ནི་རྡོ་རྗེ་ཐམས་ཅད་ཀྱི། །དམ་ཚིག་ཤིན་ཏུ་འདའ་དཀའ་
བའོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ཡང་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་མཆོད་པ་གསང་བ་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །
དབང་པོ་གཉིས་ཀྱི་སྦྱོར་བ་ཡིས། །རང་གི་ཁུ་བ་སོགས་བཟུང་བས། །ཆོ་ག་བཞིན་དུ་ཀུན་མཆོད་བྱ། །སངས་རྒྱས་བྱང་ཆུབ་ཐོབ་པར་འགྱུར། །དེ་ནས་ཡང་ཕྱག་ན་རྡོ་རྗེ་དེ་བཞིན་གཤེགས་པ་ཐམས་

88-1-161b

ཅད་ཀྱི་བདག་པོས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་སྡོམ་པ་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །སེམས་ཅན་ཁམས་རྣམས་མཐའ་ཡས་ཀྱི། །མ་རྣམས་དམ་ཚིག་འཛིན་
པ་ནི། །དམ་ཚིག་གསུམ་གྱི་རྡོ་རྗེས་སྤྱད། །སྡོམ་པ་འདི་ནི་རྨད་བྱུང་ཆེ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ཐམས་ཅད་སྒྲུབ་པའི་སྡོམ་པའི་རྡོ་རྗེ་ཉིད་ཀྱི་སྐུ་གསུང་ཐུགས་
རྡོ་རྗེ་ལས་ཕྱུང་ངོ་། །ལུས་དང་ངག་སེམས་ལོངས་སྤྱོད་རྫོགས། །གསང་བ་གསུམ་གནས་རྡོ་རྗེ་སྐྱེས། །བཟང་པོ་བདག་གིས་བསྒྲུབ་པར་བྱ། །མིན་ན་ཐམས་ཅད་འཇིག་པར་འགྱུར། །དེ་ནས་ཡང་ཕྱག་
ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ཐམས་ཅད་སྒྲུབ་པའི་རྡོ་རྗེ་སེམས་དཔའི་སྡོམ་པ་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །མཐོ་གང་ཙམ་གྱིས་སྤགས་པར་ནི། །མགོ་བོར་
དཀྱིལ་འཁོར་བརྟག་པར་བྱ། །ཨོཾ་ཡིག་དབུས་སུ་གནས་བསམས་ནས། བདུད་རྩི་ལྔ་བོ་དབབ་པར་བྱ། རྡོ་རྗེ་སྦྱོར་བ་འདི་ཡིས་ནི། སྐད་གཅིག་གིས་ནི་གཟི་ཅན་འགྱུར། ལུས་དང་ངག་སེམས་
བདེར་གནས་པར། འགྱུར་བར་འདིར་ནི་ཐེ་ཚོམ་མེད། དེ་ནས་ཡང་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་སྔགས་ཐམས་ཅད་འཛིན་པའི་ལུས་དང་ངག་དང་སེམས་ཀྱི་
གསང་བ་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །མཆོད་རྟེན་དག་གི་ལས་མི་བྱ། གླེག་བམ་བཀླག་པའང་མི་བྱ་ཞིང་། །དཀྱིལ་འཁོར་དག་ཀྱང་ཡོང་མི་བྱ། །རྡོ་རྗེ་མཆོག་གསུམ་ཕྱག་མི་བྱ། །
དེ་ནས་ཡང་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་དུག་ཐམས་ཅད་བསལ་བ་གནོན་པ་འདྲེན་པའི་གསང་བ་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨོཾ། འོད་ཟེར་

88-1-162a

དཀར་འབར་ཕྲེང་བ་ཅན། །འཁོར་ལོའི་དབུས་སུ་ཆུད་པར་བཞག །འོད་ཟེར་སེར་པོ་འཁྲིགས་པ་ཡིས། །སེར་པོ་ལྟ་བུར་བསྒོམ་པར་བྱ། །རྡོ་རྗེ་གསུམ་འོད་དམ་ཚིག་གིས། །ས་བོན་འདི་ནི་གསང་གསུམ་བྱུང་། །
དེ་ནས་སླར་ཡང་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་ལུས་དང་ངག་དང་སེམས་སྲུང་བའི་འཁོར་ལོའི་སྔགས་རྡོ་རྗེ་དང་ལྡན་པ་ཉིད་ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ཨོཾ་ཧུ་ལུ་ཧུ་ལུ། 
ཏིཥྛ་ཏིཥྛ། བནྷ་བནྷ། ཧ་ན་ཧ་ན། ད་ཧ་ད་ཧ། ཨ་མྲཱི་ཏེ་ཧཱུྃ་ཕཊ། གྲོ་ག་སོགས་ལ་འཁོར་ལོ་ནི། །ལས་ཀྱི་རྡོ་རྗེ་ལ་གནས་པར། །ཧཱུཾ་ཡིག་དབུས་སུ་བཞག་ནས་སུ། །མིང་ནི་དབུས་སུ་བྲི་བར་བྱ། །སྔགས་ཀྱི་ཡི་གེའི་ཚིག་རྣམས་ཀྱིས། །
ཡང་དག་བརྒྱན་ཏེ་རྟག་ཏུ་བཞག །འདི་ནི་སྔགས་རྣམས་ཐམས་ཅད་ཀྱི། །གསང་བ་གསུམ་གྱི་གནས་བསྡུས་པའོ། །དེ་ནས་སླར་ཡང་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་ཨན་ཛའི་གནས་ཉིད་
ཀྱི་སྐུ་གསུང་ཐུགས་རྡོ་རྗེ་ལས་ཕྱུང་ངོ་། །ལམ་གྱི་བཞི་མདོའམ་ཤིང་གཅིག་དྲུང་། མ་མོའི་གནས་སམ་ཞི་གནས་སུ། །དེ་རུ་རྡོ་རྗེ་ཨན་ཛ་ན། །ཐོད་པར་རྟག་ཏུ་དབབ་པར་བྱ། །མར་ཁུ་ཆེན་པོ་དང་། ཁྲག་དང་བཤང་བ་དང་པད་
མའི་སྐུད་པ་དང་ཨར་གའི་སྐུད་པས་མེ་མར་གྱི་སྙིང་པོ་བྱས་ལ་མར་ངོའི་བཅུ་བཞིའི་ནམ་ཕྱེད་ན། རྡོ་རྗེ་ཨན་ཛ་ན་མཁས་པས་དབབ་པར་བྱའོ། །སྔགས་དེ་ཉིད་ལན་བརྒྱ་རྩ་བརྒྱད་བཏབ་ན་དངོས་གྲུབ་རྣམ་པ་གསུམ་དུ་འགྱུར་
རོ། །ཞེས་བཅོམ་ལྡན་འདས་ཀུན་ཏུ་བཟང་པོས་གསུངས་སོ། །དེ་ནས་བཅོམ་ལྡན་འདས། དེ་བཞིན་གཤེགས་པ་ཐམས་ཅད་ཀྱིས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོ་ལ་འདི་སྐད་
ཅེས་གསོལ་ཏོ། །བཅོམ་ལྡན་འདས་གསང་བའི་ཡི་གེ་དུ་རྟོགས་པ་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དེ་བཞིན་གཤེགས་པ་ཐམས་ཅད་ཀྱི་གསང་བའི་དམ་ཚིག་གིས་སྤྱད་པའི་

88-1-162b

རྡོ་རྗེ་འདི་ལ་དད་ཅིང་སྒོམ་པར་འགྱུར། དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཕྱག་ན་རྡོ་རྗེས་དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །བཅོམ་ལྡན་འདས་དེ་བཞིན་གཤེགས་
པ་ཐམས་ཅད་གསང་བའི་ཡི་གེ་གསུམ་རྟོགས་པ་དང་ལྡན་ན་བྱང་ཆུབ་སེམས་དཔའ་དེ་དག་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སྤྱོད་པའི་རྡོ་རྗེ་གང་ཡིན་པ་འདི་ལ་དད་ཅིང་སྒོམ་པར་འགྱུར་རོ། །དེ་བཞིན་
གཤེགས་པ་ཐམས་ཅད་ཀྱིས་གསོལ་པ། གསུམ་པོ་གང་ཞིག་ལགས། རྡོ་རྗེ་འཛིན་པས་བཀའ་སྩལ་པ། དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེ་དང་། དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེ་
དང་། དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་སྟེ་གསུམ་པོ་འདི་དག་གོ། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་བཅོམ་ལྡན་འདས་ཕྱག་ན་རྡོ་རྗེའི་ཞབས་གཉིས་ལ་ཕྱག་འཚལ་ནས་
ཅང་མི་གསུང་བར་བཞུགས་པར་གྱུར་ཏོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་དེ་བཞིན་གཤེགས་པ་དེ་དག་ཐམས་ཅད་དང་། བྱང་ཆུབ་སེམས་དཔའ་དེ་དག་ཐམས་
ཅད་ལ་བཀའ་སྩལ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་སྔོན་བྱུང་བ་ན་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བའི་སངས་རྒྱས་ཀྱི་ཞིང་གི། རྡུལ་ཕྲ་རབ་དང་
མཉམ་པའི་བསྐལ་པ་འདས་ནས། གང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
མར་མེ་མཛད་ཀྱང་འདས་ནས། ཐུབ་པ་ཆེན་པོ་འོད་བསྲུངས་

88-1-163a

མངོན་པར་རྫོགས་པར་སངས་རྒྱས་པའི་བར་གྱིས་ཀྱང་མ་གསུངས་སོ། །དེ་རྒྱུ་ཅིའི་ཕྱིར་ཞེ་ན། བཅོམ་ལྡན་འདས་གསང་བ་ཆེན་པོའི་གནས་ཀྱི་དོན་མ་བཤད་པ་ནི་དེའི་ཚེ་དེའི་དུས་ན་སེམས་
ཅན་རྣམས་ལ་སྐལ་བ་མེད་པའི་ཕྱིར་རོ། །འོན་ཀྱང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་གསང་བ་འདུས་པ་འདི་ལ་སྐད་ཅིག་ཐང་ཅིག་ཡུད་ཙམ་ཉིད་ཀྱིས་སངས་རྒྱས་ཀྱི་བྱང་ཆུབ་རྫོགས་
པར་བྱེད་དོ། །གང་ཞིག་གང་གཱའི་ཀླུང་གི་བྱེ་མ་དཔག་ཏུ་མེད་པ་སྙེད་ཀྱི་ཀལ་པར་བྱང་ཆུབ་སེམས་དཔའ་རྣམས་ཀྱིས་འབད་ཅིང་བཙལ་ཀྱང་བྱང་ཆུབ་ཐོབ་པར་མི་འགྱུར་བ་དེ་གསང་བ་འདུས་པ་ལ་
མངོན་པར་དགའ་བའི་བྱང་ཆུབ་སེམས་དཔས་ཚེ་འདི་ཉིད་ལ་དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཞེས་བྱ་བའི་གྲངས་སུ་འགྲོའོ། །དེ་ནས་བྱང་ཆུབ་སེམས་དཔའ་དེ་དག་གིས་གསུང་རྡོ་རྗེའི་ཡི་
གེའི་ཚིག་འདི་ཐོས་ནས་རབ་ཏུ་ངུས་སོ། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་དེ་རྣམས་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་ཁྱེད་རྣམས་མ་
ངུ་ཤིག །སྡུག་བསྔལ་གསུམ་མ་བསྐྱེད་ཅིག །དེ་ནས་དེ་བཞིན་གཤེགས་པ་དེ་དག་ཐམས་ཅད་ལ་བྱང་ཆུབ་སེམས་དཔའ་དེ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་
པ་ཐམས་ཅད་ཇི་ལྟར་མི་ངུ་བར་བགྱི། ཇི་ལྟར་སྡུག་བསྔལ་གསུམ་མི་བསྐྱེད་པར་བགྱི། དེ་རྒྱུ་ཅིའི་ཕྱིར་ཞེ་ན། བཅོམ་ལྡན་འདས་གསང་བ་གསུམ་གྱི་ཡི་གེའི་སྐལ་བ་མ་མཆིས་ཏེ། ཐ་ན་མིང་ཐོས་པའི་སྐལ་བ་ཡང་
མ་མཆིས་སོ། །དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། རིགས་ཀྱི་བུ་དེ་སྐད་མ་ཟེར་ཅིག །ཡི་གེ་ནི་ཐུན་མོང་བ་སྟེ། རིགས་ཀྱི་བུ་ཇི་ལྟར་ཁྱེད་རྣམས་ཀྱིས་མི་ཤེས་པ་དང་མ་ཐོས་པ་དེ་

88-1-163b

བཞིན་དུ། ངེད་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱིས་ཀྱང་རིགས་ཀྱི་བུ་གང་གསང་བ་གསུམ་གྱི་ཡི་གེ་འདི་དག་ཡང་དག་པར་མ་ཐོབ་ཅིང་མངོན་པར་རྫོགས་པར་སངས་
མ་རྒྱས་སོ། །དེ་རྒྱུ་ཅིའི་ཕྱིར་ཞེ་ན། གསང་བ་གསུམ་གྱི་ཡི་གེ་རྣམ་པར་དག་པའི་ཕྱིར་རོ། །དེ་ནས་བྱང་ཆུབ་སེམས་དཔའ་དེ་དག་ཐམས་ཅད་ཅང་མི་སྨྲ་བར་གནས་པར་གྱུར་ཏོ། །དེ་ནས་བཅོམ་ལྡན་འདས་
དེ་བཞིན་གཤེགས་པ་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་སྙིང་པོ་རྡོ་རྗེ་བཙུན་མོའི་བྷ་ག་རྣམས་ལ་བཞུགས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་སྐུ་
གསུང་ཐུགས་ཀྱི་བཙུན་མོས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཛིན་པ་ཆེན་པོ་ལ་དགའ་བས་བསྟོད་པ། སེམས་ཅན་ཁམས་ནི་གནས་ཀྱི་དབང་ཕྱུག་ཁྱོད་
ནི་རྡོ་རྗེའི་ཐུགས། །དགའ་བ་ཡིད་འོང་དོན་ཆེན་འདོད་པས་བདག་ལ་བསྐྱབ་ཏུ་གསོལ། །མགོན་པོས་གལ་ཏེ་དེ་རིང་བདག་ནི་གསན་པར་མཆིས་བཞེད་ན། །སེམས་ཅན་ཡབ་གཉེན་མཆོག་ཆེན་བདག་ལ་
བགྱེས་པར་མཛད་དུ་གསོལ། །དེ་ནས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་བཙུན་མོ་མཱ་མ་ཀཱིས་བཅོམ་ལྡན་འདས་དེ་བཞིན་གཤེགས། པ་ཐམས་ཅད་ཀྱི་བདག་པོ་རྡོ་རྗེ་འཆང་ཆེན་པོ་ལ་རྡོ་རྗེ་འདོད་
པ་དགའ་བ་མཆོད་པའི་མཆོག་གི་ཡི་གེའི་ཚིག་འདིས་ཡང་དག་པར་བསྟོད་པ། རྡོ་རྗེའི་སྐུ་ཁྱོད་བཀའ་ཡི་འཁོར་ལོ་སེམས་ཅན་མང་པོར་ཕན། སངས་རྒྱས་རྣམས་དོན་བྱང་ཆུབ་མཆོག་དོན་
ཕན་པ་རྗེས་སྟོན་པ། །མགོན་པོས་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །ཆགས་པས་འདོད་ཆགས་དམ་ཚིག་བདག་ལ་དགྱེས་པར་མཛད་དུ་གསོལ། །དེ་ནས་འཇིག་རྟེན་དབང་

88-1-164a

ཕྱུག་གི་བཙུན་མོ་སྐུ་གསུང་ཐུགས་རྡོ་རྗེའི་སྤྱན་གྱིས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཆང་ཆེན་པོ་ལ་འདོད་པ་ཉེ་བར་ལོངས་སྤྱོད་པའི་དམ་ཚིག་གིས་ཡང་དག་པར་
བསྟོད་པ། ཁྱོད་ནི་རྡོ་རྗེའི་གསུང་སྟེ་ཀུན་ལ་ཕན་ཞིང་ཐུགས་བརྩེ་བ། །འཇིག་རྟེན་དག་ནི་དགོས་པའི་དོན་མཛད་པ་ལ་རྟག་ཏུ་བརྩོན། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །རབ་དགའི་སྤྱོད་པ་ཀུན་དུ་
བཟང་པོས་བདག་ལ་དགྱེས་པར་མཛོད། །དེ་ནས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་དམ་ཚིག་རྡོ་རྗེའི་བཙུན་མོའི་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཆང་ཆེན་
པོ་ལ་བདེ་བ་དང་ཡིད་བདེ་བའི་དགའ་བ་འདིས་བསྟོད་དོ། །ཁྱོད་ནི་རྡོ་རྗེ་འདོད་པ་དམ་ཚིག་མཆོག་གི་ཕན་དོན་ཆེ། །རྫོགས་སངས་རྒྱས་ཀྱི་གདུང་མཆོག་མཉམ་ཉིད་རྗེས་སུ་ཐུགས་བརྩེ་བ། །མགོན་པོས་གལ་ཏེ་དེ་རིང་བདག་
ནི་གསོན་པར་མཆིས་བཞེད་ན། །ཡོན་ཏན་རིན་ཆེན་དམ་པའི་གཏེར་གྱུར་བདག་ལ་དགྱེས་པར་མཛོད། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་འདོད་པ་ཐམས་ཅད་ཉེ་བར་ལོངས་སྤྱོད་པའི་
དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་བཙུན་མོ་དེ་དག་ལ་དམ་ཚིག་གི་འཁོར་ལོས་འདོད་པ་སྤྱོད་ཅིང་ཅང་མི་གསུང་བར་གྱུར་ཏོ། །
དེ་ནས་ནམ་མཁའི་དབྱིངས་འདི་དག་ཐམས་ཅད་ནི་དེ་བཞིན་གཤེགས་པ་ཐམས་ཅད་ཀྱི། སྐུ་དང་། གསུང་དང་། ཐུགས་རྡོ་རྗེའི་དམ་ཚིག་གིས། ཡོངས་སུ་གང་སྟེ། བུམ་པ་རྡོ་རྗེ་ཆུས་
གང་བ་ལྟར་གནས་པར་གྱུར་ཏོ། །དེ་ནས་རྡོ་རྗེ་ནམ་མཁའི་དབྱིངས་འདི་ན་གང་སེམས་ཅན་སྐུ་གསུམ་ཡང་དག་པར་འབྱུང་བ་དེ་རྣམས་རྡོ་རྗེའི་དཔལ་གྱིས་ཡང་དག་པར་རིག་པ་དེ་དག་ཐམས་ཅད་དེ་བཞིན་

88-1-164b

གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་གསུམ་གྱི་ཡེ་ཤེས་ཅན་དུ་གྱུར་ཏོ། །དེ་ནས་བརྩམས་ཏེ་སེམས་ཅན་ཐམས་ཅད་ཀུན་ནས་བཟང་པོ། ཀུན་ཏུ་བཟང་པོ་ཞེས་དེ་བཞིན་གཤེགས་པ་ཐམས་ཅད་
ཀྱི་སྐུ་དང་གསུང་དང་ཐུགས་རྡོ་རྗེས་དབང་བསྐུར་བར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཕྱག་ན་རྡོ་རྗེས། དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཆོས་ཐམས་ཅད་ཀྱི་མཉམ་པ་ཉིད་མཐོང་ངམ། དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོ་ལ་འདི་
སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་མཉམ་པ་ཉིད་དང་། རྡོ་རྗེ་ཡེ་ཤེས་ཀྱི་སྤྱོད་པ་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །དེ་ནས་
བཅོམ་ལྡན་འདས་དེ་བཞིན་གཤེགས་པ་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་བཙུན་མོའི་བྷ་ག་ལས་མངོན་པར་བྱུང་ནས་བཅོམ་ལྡན་འདས་དེ་བཞིན་གཤེགས་པ་ཕྱག་ན་རྡོ་རྗེ་ཆེན་
པོ་ལ་འདི་སྐད་ཅེས་གསོལ་ཏོ། །གང་གི་ཕྱིར་འདོད་ཆགས་ཀྱི་ཡི་གེའི་ཚིག་གིས་སངས་རྒྱས་ཀྱི་བྱང་ཆུབ་རྗེས་སུ་རྟོགས་པར་བྱའོ། །ཞེས་བྱ་བ་ནི་བཅོམ་ལྡན་འདས་ངོ་མཚར་ཏོ། །
བདེ་བར་གཤེགས་པ་ངོ་མཚར་ཏོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །
བཅོམ་ལྡན་འདས་དེ་བཞིན་གཤེགས་པ་ཐམས་ཅད་དེ་སྐད་མ་གསུངས་ཤིག །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་ནམ་མཁའ་རྡོ་རྗེའི་དམ་ཚིག་

88-1-165a

དང་མཚུངས་པའི་ཕྱིར་གཟུགས་ཀྱི་ཕུང་པོ་མ་ཡིན། ཚོར་བའི་ཕུང་པོ་མ་ཡིན། འདུ་ཤེས་ཀྱི་ཕུང་པོ་མ་ཡིན། འདུ་བྱེད་ཀྱི་ཕུང་པོ་མ་ཡིན། རྣམ་པར་ཤེས་པའི་ཕུང་པོ་མ་ཡིན། ཁམས་མ་ཡིན་སྐྱེ་
མཆེད་མ་ཡིན། དེ་བཞིན་དུ་འདོད་ཆགས་མ་ཡིན་ཞེ་སྡང་མ་ཡིན་གཏི་མུག་མ་ཡིན། ཆོས་མ་ཡིན་ཆོས་མ་ཡིན་པ་ཡང་མ་ཡིན་ནོ། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཅང་མི་གསུང་བར་གྱུར་ཏོ། །དེ་ནས་
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་དེ་རྣམས་ལ་བཀའ་སྩལ་པ། ཁྱེད་རྣམས་ཀྱིས་འཇིག་རྟེན་གྱི་
ཁམས་ཐམས་ཅད་དུ་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་གསང་བ་འདི་བསྒོམ་པར་གྱིས་ཤིག །དེ་ཅིའི་ཕྱིར་ཞེ་ན། ཕྱོགས་བཅུ་ན་གནས་པའི་བྱང་ཆུབ་སེམས་དཔའ་འདི་རྣམས་ལ་ཆོས་
ཀྱི་རྣམ་གྲངས་འདིའི་སྐལ་བ་ཡོད་པའི་ཕྱིར་རོ། །དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་ཆོས་ལ་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ཐམས་ཅད་ཀྱི་དམ་
ཚིག་གི་དེ་ཁོ་ན་ཉིད་འདི་ཟུང་ཤིག །ཁྱོད་ནི་དེ་བཞིན་གཤེགས་པ་ཐམས་ཅད་ཀྱིས་ཆོས་ཐམས་ཅད་ཀྱི་དབང་ཕྱུག་རྡོ་རྗེ་ཞེས་བྱ་བར་དབང་བསྐུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་
རྡོ་རྗེ་ཆོས་ཀྱིས་དེ་བཞིན་དུ་བགྱིའོ་ཞེས། གསོལ་ནས་ཅང་མི་སྨྲ་བར་གྱུར་ཏོ། །དེ་ནས་དེ་བཞིན་གཤེགས་པ་དེ་དག་ཐམས་ཅད་རྡོ་རྗེ་སེམས་དཔའི་ཡི་གེ་གསུམ་ལ་རང་གི་སྐུ་དང་གསུང་དང་ཐུགས་ཞུགས་
པར་གྱུར་ཏོ། །དེ་ནས་དེ་བཞིན་གཤེགས་པ་རྣམ་པར་སྣང་མཛད་ཁམས་གསུམ་པ་ཐམས་ཅད་ཀྱི་ལུས་རྡོ་རྗེ་ལ་གནས་ཤིང་དེ་བཞིན་གཤེགས་པ་ཐམས་ཅད་ཀྱི་སྐུ་མཉམ་པ་ཉིད་ལ་དམིགས་ནས་ཅང་མི་

88-1-165b

གསུང་བར་གྱུར་ཏོ། །དེ་ནས་དེ་བཞིན་གཤེགས་པ་གསུང་རྡོ་རྗེ་ཁམས་གསུམ་པ་ཐམས་ཅད་ཀྱི་ངག་རྡོ་རྗེ་ལ་གནས་ཤིང་དེ་བཞིན་གཤེགས་པ་ཐམས་ཅད་ཀྱི་གསུང་མཉམ་པ་ཉིད་ལ་དམིགས་ནས་ཅང་
མི་གསུང་བར་གྱུར་ཏོ། །དེ་ནས་དེ་བཞིན་གཤེགས་པ་ཕྱག་ན་རྡོ་རྗེ་ཁམས་གསུམ་པ་ཐམས་ཅད་ཀྱི་སེམས་རྡོ་རྗེ་ལ་གནས་ཤིང་དེ་བཞིན་གཤེགས་པ་ཐམས་ཅད་ཀྱི་ཐུགས་མཉམ་པ་ཉིད་ལ་དམིགས་ནས་
ཅང་མི་གསུང་བར་གྱུར་ཏོ། །དེ་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་ལས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་
དང་སྡོམ་པ་རྡོ་རྗེའི་བྱིན་གྱི་བརླབས་ཀྱི་རྒྱལ་པོ་ཞེས་བྱ་བའི་ལེའུ་སྟེ་བཅུ་བདུན་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་ཆེན་གསང་བ་འདུས་པ་
ཞེས་བྱ་བ་བརྟག་པའི་རྒྱལ་པོ་ཆེན་པོ་རྫོགས་སོ།། །།སྟག་ལུང་རྒྱུད་འབུམ་དང་བསྟུན་པའི་མ་ལ་ཞུས་དག ། རྒྱ་གར་གྱི་མཁན་པོ་ཤྲད་དྷཱ་ཀ་ར་ཝརྨ་དང་། ཞུ་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་
བསྒྱུར་ཅིང་ཞུས་ཏེ་གཏན་ལ་ཕབ་པ། སླད་ཀྱིས་པཎ་ཌི་ཏ་བླ་མ་རྡོ་རྗེ་འཛིན་པ་ཆེན་པོ་རྗེ་བཙུན་ཉི་མའི་དབང་པོའི་ཞལ་སྔ་ནས་ཆག་ལོ་ཙྪ་བ་དགེ་སློང་ཆོས་རྗེ་དཔལ་གྱིས་གུས་པས་ཞུས་ཤིང་དག་པར་
བཅོས་ཏེ་གཏན་ལ་ཕབ་པ། །ཐང་ཆེན་པ་དང་རྒྱལ་མཚན་རིང་མོས་ཞུས་ཆེན་བགྱིའོ། ། ༄༅། །རྒྱུད་ཕྱི་མ། དེ་ནས་བྱམས་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དེ་བཞིན་གཤེགས་
པ་ཐམས་ཅད་ཀྱི་དབང་བསྐུར་བ་དང་སྐུ་དང་གསུང་དང་ཐུགས་ཀྱི་གསང་བ་བསྟན་པ་ལ་དངོས་པོ་ཐམས་ཅད་ཀྱིས་ཇི་ལྟ་བ་དང་། དུས་ཇི་ལྟ་བ་བཞིན་དུ་མཐོང་ཞིང་ཐོས་ལ་ཁོང་དུ་ཆུད་ནས་ཆོས་གཟིགས་པ་

88-1-166a

དང་ལྡན་པའི་དེ་བཞིན་གཤེགས་པ་དེ་དག་ཐམས་ཅད་ལ་འདི་སྐད་ཅེས་གསོལ་ཏོ། །ཨེ་མའོ་ཀུན་དུ་བཟང་པོ་ཡི། །སྐུ་གསུང་ཐུགས་ཀྱི་ངེས་པར་དག །རྡོ་རྗེ་གསུམ་གྱིས་ཀུན་དུ་ནི། །རྡོ་རྗེ་གསུམ་ལ་
ཀུན་ཏུ་བཞུགས། །སེམས་ཅན་ཐམས་ཅད་དུས་གསུམ་གྱི། །རྡོ་རྗེའི་ངོ་བོར་ཡང་དག་བྱུང་། །སངས་རྒྱས་རྡོ་རྗེ་རྫུ་འཕྲུལ་ཆེ། །བྱང་ཆུབ་རྡོ་རྗེའི་གནས་ཐོབ་པའོ། །ཨེ་མའོ་འདི་རབ་ངོ་མཚར་ཆེ། །
ཨེ་མའོ་ཞི་བ་དབང་པོ་འདས། །ཨེ་མའོ་འཁོར་བ་དག་གི་རྒྱུན། །ཨེ་མའོ་མཆོག་ཏུ་མྱ་ངན་འདས། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་
དཔའ་ཆེན་པོ་དེ་རྣམས་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་དེ་དེ་བཞིན་ནོ། །སེམས་དཔའ་ཆེན་པོ་དེ་དེ་བཞིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཡང་འདུས་པར་གྱུར་
ནས། །དེ་བཞིན་གཤེགས་པ་དེ་དག་ཐམས་ཅད་ལ་གསང་བ་དང་། ཕྱིའི་མཆོད་པ་རྣམས་ཀྱིས་ཡང་དག་པར་མཆོད་ནས་ཕྱག་བྱས་ཏེ་མགྲིན་གཅིག་ཏུ་འདི་སྐད་ཅེས་གསོལ་ཏོ། །ཨེ་མའོ་ཤིན་ཏུ་
རྙེད་དཀའ་བ། །བྱང་ཆུབ་སྒྲུབ་པའི་ཐབས་འདི་ཡིན། །རྒྱུད་ཀྱི་མཆོག་གི་མཆོག་གྱུར་པ། །གསང་བ་འདུས་པ་ཞེས་བྱའི་རྒྱུད། །སྦས་པ་དེ་ནི་རྟོགས་ཕྱིར་དང་། །སེམས་ཅན་རྣམས་ལ་ཕན་
འདོད་པས། །ཡང་དག་གསུང་བས་གང་བཤད་པ། །མགོན་པོ་ཁྱེད་ལ་གསོལ་བར་འཚལ། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་དེ་རྣམས་ལ་
འདི་སྐད་ཅེས་བཀའ་སྩལ་ཏོ། །གང་ཞིག་སྦས་པའི་རྒྱུད་ཚིག་དེ། །དེ་དག་ཐམས་ཅད་འདྲི་འདོད་པ། །སེམས་དཔའ་ཆེན་པོ་ལེགས་སོ་ལེགས། །ཡོན་ཏན་འབྱུང་གནས་ལེགས་སོ་ལེགས། །

88-1-166b

དེ་ནས་བྱང་ཆུབ་སེམས་དཔའ་ཀུན། །རབ་ཏུ་དགའ་བས་མིག་གདངས་ཏེ། །ཡང་དང་ཡང་དུ་ཕྱག་འཚལ་ནས། །འདི་ཡི་སོམ་ཉི་ཞུས་པར་གྱུར། །གསང་བ་ཞེས་འདི་གང་ལ་བགྱི། །འདུས་པ་ཞེས་ནི་
གང་ལ་བརྗོད། །རྒྱུད་ཀྱི་འབྲེལ་པ་ཇི་ལྟ་བུ། །རྣལ་འབྱོར་རྒྱུད་འདིར་ཅི་ལ་བགྱི། །དེ་ཉིད་རྣམ་པ་དུ་རུ་བཤད། །དེ་བཞིན་གསང་བ་རྣམ་པ་དུ། །གསང་ཆེན་ཞེས་ནི་གང་ལ་བགྱི། །དམ་པ་རྣམ་པ་དུ་ཞིག་
མཆིས། །བྱང་ཆུབ་སེམས་ཞེས་གང་ལ་བགྱི། །དེ་བཞིན་རིག་པའི་སྐྱེས་བུ་ཅི། །བཛྲ་དྷྲཱིཀ་ཅེས་ཅི་ལ་བགྱི། །དེ་བཞིན་ཛི་ན་ཛིཀ་ནི་གང་། །དེ་ལ་རཏ་ན་དྷྲྀཀ་ནི་གང་། །དེ་བཞིན་ཨཱ་རོ་ལིཀ་ནི་ཅི། །
པྲཛྙཱ་དྷྲྀཀ་ཅེས་གང་ལ་བགྱི། །རིགས་འདིར་དེ་བཞིན་གང་ཞིག་ལགས། །མོ་ཧ་ཞེས་ནི་གང་ལ་བགྱི། །དྭེ་ཥ་ཞེས་བྱ་འདིར་གང་ལགས། །རཱ་ག་ཞེས་ནི་ཅི་ལ་བགྱི། །བཛྲ་སྔགས་ནི་གང་ལ་བགྱི། 
ར་ཏི་ཞེས་འདིར་གང་ལ་བགྱི། །ཕུན་སུམ་ཚོགས་པ་གང་ཞིག་ལགས། །ཡ་མཱན་ཏ་ཀྲྀཏ་དོན་ནི་གང་། །དེ་བཞིན་པྲཛྙཱ་ན་ཏ་ཀྲྀཏ་ཅི། །པད་མཱན་ཏ་ཀྲྀཏ་མིང་ཅི་ལྟ། །དེ་བཞིན་བིགྷྣན་ཏ་ཀྲྀཏ་ཅི། །
ཀུན་དུ་སྤྱོད་པ་གང་ཅི་ལགས། །དེ་བཞིན་སྔགས་ཀྱི་སྤྱོད་པ་གང་། །འདིར་ནི་བཟླས་པ་གང་ཞིག་ལགས། །རྒྱས་བཏབ་པ་ཞེས་གང་ལ་བགྱི། །ཆོས་འབྱུང་བ་ནི་ཇི་ལྟར་བསྒོམ། །དེ་བཞིན་
སྡོམ་པ་ཇི་ལྟ་བུ། །ཞེ་སྡང་གཏི་མུག་འདོད་ཆགས་ཆོས། །སེམས་ཅན་དོན་མཛད་ཇི་ལྟ་བུ། །དཀྱིལ་འཁོར་ཞེས་ནི་གང་ལ་བགྱི། །ཕྱག་རྒྱའི་དགོད་པ་ཇི་ལྟར་ལགས། །འདིར་ནི་མེ་ཏོག་ཅི་
ཞིག་ལགས། །མཆོད་རྟེན་ཞེས་ནི་གང་ལ་བཤད། །ཡེ་ཤེས་འཁོར་ལོ་ཇི་ལྟར་ཤེས། །འདིར་ནི་གནས་ཤེས་གང་ལ་བཤད། །མགོན་པོ་བསྐུལ་བ་ཇི་ལྟ་བུ། །གཏོང་བ་དག་ཀྱང་ཇི་ལྟ་བུ། །

88-1-167a

ཇི་ལྟར་དེ་རྣམས་སྤྱན་དྲང་བགྱི། །བཅིང་བ་འདིར་ནི་ཇི་ལྟ་བུ། །དབང་བསྐུར་བ་ནི་ཇི་ལྟར་སྩལ། །དེ་བཞིན་རིག་པའི་བརྟུལ་ཞུགས་གང་། །བདུད་རྩི་ལྔ་རྣམས་ཅི་ལྟར་བཟའ། །དེ་བཞིན་དཔའ་བོ་ལྔ་གང་
ལགས། དངོས་གྲུབ་ཐ་མལ་ཇི་ལྟ་བུ། །དེ་བཞིན་མཆོག་ཀྱང་ཇི་ལྟ་བུ། །དེ་ལ་ཐབས་ནི་རྣམ་པ་དུ། །དེ་བཞིན་ཐབས་བྱུང་ཇི་ལྟ་བུ། །རྣལ་འབྱོར་རྡོ་རྗེ་ཅན་ཀུན་གྱི། །བཀའ་ནི་ཇི་ལྟར་བསྒོ་བར་བགྱི། །ལས་
ཀྱི་མཆོག་གི་ཚོགས་རྣམས་ནི། །སྣ་ཚོགས་ཇི་ལྟར་བྱེད་པར་འགྱུར། །དེ་ནས་དེ་བཞིན་གཤེགས་པ་དེ་དག་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཀྱིས་ཞུས་པའི་ཚིག་ཉེ་
བར་གསན་ནས། བྱང་ཆུབ་སེམས་དཔའ་ཆེན་པོ་རྡོ་རྗེ་འཛིན་པ་ལ་དམིགས་པར་མཛད་ནས་སྐད་ཅིག་ཅང་མི་གསུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཆེ། །སྙིང་རྗེའི་བདག་ཉིད་རབ་དགའ་ནས། །
རྫོགས་པའི་སངས་རྒྱས་བདེ་བར་གཤེགས། །མགོན་ལ་ཡང་དང་ཡང་རབ་བསྐུལ། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་དེ་རྣམས་ལ་འདི་སྐད་ཅེས་བཀའ་
སྩལ་ཏོ། །སྐུ་གསུང་ཐུགས་ཀྱི་རྡོ་རྗེ་ཡིས། །སྐུ་གསུང་ཐུགས་ནི་རྡོ་རྗེ་ལ། །བཞག་ནས་བྱང་ཆུབ་སེམས་དབང་པོ། །ཞུས་པ་རྒྱ་ཆེན་མཉན་པར་གྱིས། །དེ་ནས་བྱང་ཆུབ་སེམས་དཔའ་སེམས་དཔའ་
ཆེན་པོ་དེ་དག་ཐམས་ཅད་དེ་བཞིན་གཤེགས་པ་དེ་དག་ཐམས་ཅད་ཀྱིས་རྗེས་སུ་གཟུང་པའི་བཀའ་སྤྱི་བོས་རབ་ཏུ་མནོས་ཏེ། བཅོམ་ལྡན་འདས་ལེགས་སོ་ལེགས་སོ། །བདེ་བར་གཤེགས་པ་ལེགས་སོ་
ལེགས་སོ་ཞེས་གསོལ་ནས། རང་རང་གི་ལུས་དང་ངག་དང་ཡིད་རྡོ་རྗེས་བྱང་ཆུབ་སེམས་དཔའ་ཆེན་པོ་རྡོ་རྗེ་འཛིན་པ་ཆེན་པོའི་སྐུ་དང་གསུང་དང་ཐུགས་རྡོ་རྗེ་ལ་དམིགས་ཏེ་ཅང་མི་སྨྲ་བར་གྱུར་ཏོ། །དེ་ནས་

88-1-167b

དེ་བཞིན་གཤེགས་པ་དེ་དག་ཐམས་ཅད་རང་རང་གི་ཐུགས་ཐུགས་རྡོ་ཆེན་པོ་ལ་དམིགས་པར་བྱིན་གྱིས་བརླབས་ནས་བྱང་ཆུབ་སེམས་དཔའ་ཆེན་པོ་དེ་དག་རྣམས་ལ་ཞུས་པ་དེ་དག་གསུང་གཅིག་གིས་
བཀའ་སྩལ་པ། སྐུ་གསུང་ཐུགས་ནི་རྣམ་པ་གསུམ། །གསང་བ་ཞེས་ནི་བསྟན་པ་ཡིན། །སངས་རྒྱས་ཐམས་ཅད་ཅེས་བྱ་བ། །ཚོགས་པ་འདུས་པ་ཡིན་པར་བཤད། །ལྔ་པ་དང་ནི་དགུ་པ་དང་། །བཅུ་བདུན་
པ་དང་བཅུ་གསུམ་པ། །སངས་རྒྱས་བྱང་ཆུབ་སེམས་རྣམས་ཀྱིས། །བསྟན་པ་དག་ནི་སྒྲུབ་ཆེན་ཡིན། །བཞི་པ་དང་ནི་བཅུ་དྲུག་པ། །བརྒྱད་པ་དེ་བཞིན་བཅུ་གཉིས་པ། །སློབ་དཔོན་སྤྱི་ཡི་ལས་དང་ནི། །
དངོས་གྲུབ་བརྟུལ་ཞུགས་སྡོམ་པ་ཡིན། །དྲུག་པ་དང་ནི་གཉིས་པ་དང་། །བཅུ་པ་དང་ནི་བཅུ་བཞི་པ། །དྲག་སྤྱོད་རྗེས་སུ་ཆགས་པ་དང་། །ཉེ་བར་སྒྲུབ་པའི་སྡོམ་པའོ། །བདུན་པ་དང་ནི་གསུམ་པ་དང་། །
བཅུ་གཅིག་པ་དང་བཅྭ་ལྔ་པ། །དངོས་གྲུབ་ཞིང་དང་མཚན་མ་ནི། །བསྙེན་པ་སྒྲུབ་པའི་སྡོམ་པའོ། །དེ་བཞིན་གཤེགས་པ་ཀུན་གྱི་ལས། །ཚར་གཅོད་ཕན་འདོགས་སྤྱོད་པ་དག །དུལ་དང་གདུལ་དཀའ་ཞི་
བ་ཡི། །སེམས་ཅན་རྣམས་ཀྱི་འཇུག་པའོ། །བསྐྱེད་པའི་རིམ་དང་འབྲེལ་བ་ཡི། །བསྙེན་པ་རྡོ་རྗེའི་ཆོ་ག་བཞི། །ཐུན་མོང་དངོས་གྲུབ་འབྲེལ་པ་ཡིན། །མཆོག་ཏུ་གྱུར་པའི་གཞུང་ཉིད་དོ། །དཀྱིལ་འཁོར་
བརྟུལ་ཞུགས་འབྲེལ་བ་ཡི། །གཞུང་ནི་སློབ་དཔོན་ཕུན་ཚོགས་པའོ། །བླ་མས་སྔགས་ཀྱི་ལམ་གྱིས་ནི། །སློབ་མ་ཡོངས་སུ་སྨིན་བྱ་བ། །བརྟུལ་ཞུགས་བཟང་དང་དབང་བསྐུར་བ། །རང་གི་སློབ་མ་བདག་
ཉིད་ཆེ། །སངས་རྒྱས་བྱང་ཆུབ་སེམས་རྣམས་ཀྱིས། །སྟོན་པས་ཡོངས་སུ་གྲོལ་བ་ཡིན། །ཐབས་དང་ཤེས་རབ་སྙོམས་འཇུག་པ། །རྣལ་འབྱོར་ཞེས་ནི་བཤད་པ་ཡིན། །གང་ཞིག་དངོས་མེད་ཤེས་

88-1-168a

རབ་སྟེ། །ཐབས་ནི་དངོས་པོའི་མཚན་ཉིད་དོ། །རྒྱུད་ནི་རྒྱུན་ཞེས་བྱ་བར་གྲགས། །རྒྱུན་དེ་རྣམ་པ་གསུམ་འགྱུར་ཏེ། །གཞི་དང་དེ་བཞིན་རང་བཞིན་དང་། །མི་འཕྲོག་པ་ཡིས་རབ་ཕྱེ་བ། །རྣམ་པ་རང་བཞིན་རྒྱུ་ཡིན་ཏེ། །
དེ་བཞིན་མི་འཕྲོགས་འབྲས་བུའོ། །གཞི་ནི་ཐབས་ཤེས་བྱ་བ་སྟེ། །གསུམ་གྱིས་རྒྱུད་ཀྱི་དོན་བསྡུས་པའོ། །རིག་ནི་ལྔ་དང་གསུམ་དག་དང་། །ངོ་བོ་ཉིད་གཅིག་རིགས་བརྒྱའོ། །བྱང་ཆུབ་རྡོ་རྗེ་བཅས་གསུངས་པ། །དེ་ནི་ཕྱི་མའི་
རྒྱུད་དུ་འདོད། །དེ་ཉིད་རྣམ་པ་ལྔ་རུ་བཤད། །གསང་བ་རྣམ་པ་གསུམ་དུ་བཤད། །ལྷག་མའི་ལྷ་ནི་གསང་ཆེན་ཏེ། །དམ་པའི་རིགས་ནི་རྣམ་པ་བརྒྱ། །ཐོག་མ་ཐ་མ་མེད་ཞི་བ། །དངོས་དང་དངོས་མེད་ཟད་པའི་གཙོ། །སྟོང་ཉིད་སྙིང་རྗེ་
མི་ཕྱེད་པ། །བྱང་ཆུབ་སེམས་ཞེས་བྱ་བ་ཡིན། །སྐུ་གསུང་ཐུགས་ཀྱི་རྡོ་རྗེ་ཡིས། །མི་ཕྱེད་དབྱེ་བའི་ངོ་བོ་ཉིད། །རིགས་དང་ལྷན་ཅིག་ལྡན་པས་ན། །རིག་པའི་སྐྱེས་བུ་ཞེས་བརྗོད་དོ། །རྒྱུ་ལྔ་དང་ནི་འབྲས་བུ་ལྔ། །
རྡོ་རྗེ་ཞེས་ནི་བཤད་པ་ཡིན། །འཆང་བ་འཛིན་པ་ཅེས་གྲགས་ཏེ། །བཛྲ་དྷྲིཀ་ནི་རྣམ་ཤེས་ཡིན། །ཡོད་དང་མེད་དང་དབུས་ལས་འདས། །འབྱུང་དང་འབྱུང་ལས་གྱུར་ལས་བྱུང་། །སེམས་ཅན་ཀུན་གྱི་ལུས་ཡིན་
ཏེ། །སྐྱེ་ལས་རྒྱལ་བ་ཛི་ན་ཛིཀ ། དོན་རྣམས་ཐམས་ཅད་འབྱུང་བས་ན། །སེམས་ནི་རིན་པོ་ཆེ་ཞེས་བྱ། །ཚོར་བ་པོ་ཡིས་ངེས་ཚོར་བས། །ཚོར་བ་རད་ཎ་དྷྲིག་ཏུ་འདོད། །མཚན་གཞི་མཚན་ཉིད་དངོས་པོ་ཡིས། །
ཀུན་ལ་ཀུན་གྱིས་ཐམས་ཅད་དུ། །དགའ་བའི་མཚན་ཉིད་མཚན་གཞི་ནི། །ཨཱ་རོ་ལིཀ་ཅེས་བཤད་པ་ཡིན། །རྣམ་ཤེས་རབ་མཐར་ཕྱིན་བྱེད་པ། །གང་ཡིན་དེ་ནི་ཤེས་རབ་སྟེ། །འདུ་བྱེད་སེམས་
པ་འཛིན་པས་ན། །པྲཛྙཱ་དྷྲིཀ་ཅེས་བྱ་བར་བཤད། །རིགས་ནི་རྒྱུད་ཅེས་བྱ་བར་བཤད། །རྒྱུད་ནི་ཐོག་མ་ཞེས་བརྗོད་དེ། །མི་འཇིག་སྐྱེ་བ་མེད་གང་ཡིན། །མགོན་པོ་དེ་ནི་ཡིན་པར་བཤད། །རྒྱུ་འབྲས་གཉིས་ལ་སྡང་

88-1-168b

བས་ན། །རྣམ་ཤེས་ཞེ་སྡང་ཡིན་པར་བཤད། །བེམས་པོ་བཅིངས་པའི་རང་བཞིན་པས། །གཟུགས་ནི་གཏི་མུག་ཅེས་བྱར་བཤད། །བདག་ཏུ་རློམ་པའི་ངོ་བོ་བས། །ཚོར་བ་དྲེགས་པ་ཡིན་པར་བཤད། །དངོས་ལ་ཆགས་པའི་མཚན་
ཉིད་ཅན། །འདུ་ཤེས་ཡང་དག་ཆགས་བདག་ཉིད། །རྒྱན་གྱིས་དྲང་བའི་བདག་ཉིད་ཅན། །འདུ་བྱེད་རྟག་ཏུ་ཕྲག་དོག་ཡིན། །བྱང་ཆུབ་སེམས་ཀྱི་ངོ་བོ་ཉིད། །སྲིད་པ་ཀུན་འབྱུང་ཐམས་ཅད་དུ། །འདོད་ཆགས་ཞེ་སྡང་རྨོངས་
ལྡན་པའི། །སེམས་ནི་འདོད་པ་ཞེས་བྱར་བཤད། །དམ་ཚིག་སྣ་ཚོགས་འདྲ་བ་ཡིན། །མངོན་ཕྱོགས་ལས་ལས་སྐྱེས་འབྲས་བུ། །གཉིས་མེད་ཡེ་ཤེས་ཆོས་རྣམས་ལ། །ང་རྒྱལ་བྱེད་པ་རྨོངས་ཤེས་བཤད། །དེ་ལ་ཕན་
ཚུན་འཛེར་བ་ནི། །ཞེ་སྡང་ཞེས་ནི་བྱ་བར་བཤད། །མཚན་ཉིད་འདོད་ཆགས་ཞེན་པ་ཡིན། །ཡེ་ཤེས་ཐབས་ནི་རྡོ་རྗེར་བཤད། །དགའ་བ་རྫོགས་པའི་ལོངས་སྤྱོད་མཆོག །བུད་མེད་བདེ་མཆོག་ཕུན་སུམ་ཚོགས། །
གཏི་མུག་ཞེ་སྡང་འདོད་ཆགས་དང་། །རྡོ་རྗེ་ལ་དགའ་རྟག་པར་གནས། །དེ་ནས་སངས་རྒྱས་རྣམས་ཀྱི་ཐབས། །རྡོ་རྗེ་ཐེག་པ་ཞེས་བཤད་དོ། །མི་འཇིག་བདག་ཉིད་ཆོས་རྣམས་ནི། །མ་སྐྱེས་པ་ཡི་ངོ་བོ་ཉིད། །
དངོས་པོ་ཀུན་གྱི་དམ་ཚིག་སྟེ། །དེ་ཉིད་གཤིན་རྗེ་མཐར་བྱེད་དོ། །རྣམ་ཤེས་མིན་བདག་ཆོས་རྣམས་ནི། །དོན་དམ་མི་འགྱུར་དག་གྱུར་ཏེ། །སེམས་ཀུན་གྱི་ནི་དམ་ཚིག་སྟེ། །དེ་ནས་
རྒྱལ་བ་ཤེས་མཐར་བྱེད། །བརྗོད་མེད་བདག་ཉིད་ཆོས་རྣམས་ནི། །མིང་དང་གཟུགས་བློ་དངོས་པོ་མེད། །ཆོས་རྣམས་ཀུན། གྱི་དམ་ཚིག་
སྟེ། །དེས་ན་ཁྱབ་བདག་པད་མཐར་བྱེད། །མི་རྟོག་བདག་ཉིད་ཆོས་རྣམས་ནི། །རང་བཞིན་གྱིས་ནི་ཞི་

88-1-169a

བའི་དངོས། །རྡོ་རྗེ་ཀུན་གྱི་དམ་ཚིག་སྟེ། །དེས་ན་གཙོ་བོ་བགེགས་མཐར་བྱེད། །མི་འཇིག་རྣམ་པར་མི་ཤེས་པ། །བརྗོད་དུ་མེད་དང་རྟོག་བྲལ་བ། །སངས་རྒྱས་བྱང་ཆུབ་ཡེ་ཤེས་འདི། །ཤེས་ན་བདེ་བ་
ཐོབ་པར་འགྱུར། །གཏི་མུག་གཏི་མུག་ལོངས་སྤྱོད་པས། །གཏི་མུག་ཟད་ཕྱིར་གཤིན་རྗེ་གཤེད། །དེས་ན་ལུས་མཐར་བྱེད་པ་སྟེ། །དེས་ན་ཤེས་བྱ་མཐར་བྱེད་འགྱུར། །ཉེས་པ་ཉེས་པ་ལོངས་སྤྱད་
པས། །ཉེས་པ་ཟད་ཕྱིར་ཤེས་མཐར་བྱེད། །དེས་ན་སེམས་ནི་མཐར་བྱེད་དེ། །དེས་ན་ཉོན་མོངས་མཐར་བྱེད་འགྱུར། །འདོད་ཆགས་འདོད་ཆགས་ལོངས་སྤྱོད་པས། །འདོད་ཆགས་ཟད་པས་པད་
མཐར་བྱེད། །དེས་ན་ཆགས་པ་མཐར་བྱེད་དེ། །དེ་བཞིན་སྙོམས་འཇུག་མཐར་བྱེད་འགྱུར། །ཉོན་མོངས་ཀུན་ཟད་གང་ཡིན་དང་། །དེ་བཞིན་ལས་ནི་ཐམས་ཅད་ཟད། །སྒྲིབ་པ་ཀུན་ཟད་ཡེ་
ཤེས་ནི། །བགེགས་མཐར་བྱེད་ཅེས་བྱ་བར་བཤད། །ཉོན་མོངས་རྡོ་རྗེའི་སྒྲིབ་དག་ན། །ལས་རྣམས་ཐམས་ཅད་རྣམ་པར་དག །ལས་རྣམས་ཐམས་ཅད་རྣམ་དག་པས། །ལས་སྐྱེས་
འབྲས་བུ་རྣམ་དག་འགྱུར། །གཟུང་དང་ཆགས་པ་ཉིད་དང་ནི། །རྣམ་པ་དེ་བཞིན་མི་གཡོ་དང་། །རྒྱུ་ཉིད་འབྲས་བུ་ཉིད་དག་སྟེ། །དྲུག་ལས་ཐུགས་ནི་ཀུན་དུ་འབྱུང་། །འདོད་པའི་རྒྱལ་པོ་ལ་སོགས་
དྲུག །ཁྲོ་བོའི་དབང་པོར་རྣམ་པར་གྲགས། །དམ་ཚིག་རྡོ་རྗེ་ལ་སོགས་དྲུག །ས་ལ་སོགས་པ་རྣམ་པ་ལྔ། །འབྱུང་དང་འབྱུང་ལས་གྱུར་པར་གྲགས། །རིག་པའི་རྒྱལ་པོར་ཞེས་བཤད་དོ། །གཟུགས་
ཀྱི་རྡོ་རྗེ་ལ་སོགས་དྲུག །རྡོ་རྗེའི་བདག་པོ་ཞེས་བཤད་དོ། །སྐུ་གསུང་ཐུགས་ཀྱི་རྡོ་རྗེ་ལས། །བདག་ཉིད་ཆེན་པོ་ཀུན་དུ་འབྱུང་། །ཐབས་དང་ཤེས་རབ་ལས་བྱུང་བའི། །ཕུང་པོ་ཁམས་དང་སྐྱེ་

88-1-169b

མཆེད་གཟུགས། །རྫོགས་པའི་རིམ་པའི་སྦྱོར་བ་ཡིས། །སྔགས་པས་སྦྱོར་བ་ངེས་བྱས་ལ། །ཐམས་ཅད་དག་པར་མོས་པ་ཡིས། །འཇིགས་པ་ཐམས་ཅད་སྤངས་ནས་སུ། །དོགས་པ་མེད་པའི་
སེམས་ཀྱིས་ནི། །སྔགས་པས་སེང་གེ་བཞིན་དུ་སྤྱོད། །འདི་ལ་མི་བྱ་ཅི་ཡང་མེད། །དེ་བཞིན་མི་བཟའང་ཡོད་མ་ཡིན། །སྨྲ་བར་མི་བྱ་ཅུང་ཟད་མེད། །རྟག་ཏུ་མི་བསམ་ཅི་ཡང་མེད། །མཉམ་པར་མ་
བཞག་སྦྱོར་བ་ཡིས། །རྟག་པ་ཉིད་དུ་མཉམ་པར་འཇོག །གང་གིས་སེམས་ཀུན་ལ་སྤྱོད་པ། །ཀུན་དུ་སྤྱོད་པ་ཞེས་བཤད་དོ། །དབང་པོ་དང་ནི་ཡུལ་རྣམས་ཀྱི། །རྐྱེན་གྱིས་གང་དང་གང་བྱུང་
ཡིད། །ཡིད་དེ་མན་ཞེས་བྱ་བར་བཤད། །ཏ་ནི་སྐྱོབ་པར་བྱེད་པའི་དོན། །འཇིག་རྟེན་སྤྱོད་ལས་རྣམ་གྲོལ་བར། །གང་བཤད་དམ་ཚིག་སྡོམ་པ་སྟེ། །རྡོ་རྗེ་ཀུན་གྱིས་བསྲུངས་པ་ནི། །སྔགས་ཀྱི་སྤྱོད་
པ་ཞེས་བཤད་དོ། །རང་རང་གི་ནི་ངོ་བོ་ཉིད། །སྙིང་པོ་ཡིད་ཀྱིས་རྣམ་བསམས་ཏེ། །གསང་སྔགས་ཟློས་པའི་དབྱེ་བ་ཡིས། །ཟློས་པར་བྱེད་ཅིང་སྤྲོ་ཞིང་བསྡུ། །སངས་རྒྱས་སྣ་ཚོགས་རྡོ་རྗེའི་བདག །ཡེ་
ཤེས་ས་བོན་དག་གིས་བསྡུ། །བྱང་ཆུབ་བདག་མེད་ས་བོན་གྱིས། །བརྟུལ་ཞུགས་ཅན་གྱིས་བདག་མེད་གཟུང་། །སྣ་ཚོགས་བཞིན་དུ་སྣ་ཚོགས་སྤྲོ། །དུས་གསུམ་ས་བོན་དག་གིས་བཟླ། །བཟླས་པ་
སྨྲ་བར་གྲགས་པས་ན། །ངག་ཀུན་བཟླས་པ་ཞེས་བཤད་ལ། །སྔགས་ཀུན་འབོད་པ་ཞེས་བཤད་དེ། །དེ་ཉིད་བསྐུལ་བར་སྨྲ་བའོ། །ཇི་ལྟར་ཐུགས་སོགས་བྱིན་རློབ་པ། །ཏིང་ངེ་འཛིན་ཀྱང་དེ་བཞིན་ནོ། །དེ་རྣམས་
སྤྱི་བོར་དབང་བསྐུར་དང་། །དེ་བཞིན་ཀུན་ཏུ་མཆོད་པའོ། །རྡོ་རྗེ་འཆང་བ་གང་ཡིན་པའི། །རིག་པ་ཡོད་པའི་སྦྱོར་བ་དང་། །བདག་བྱིན་བརླབ་སོགས་དེ་བཞིན་ཏེ། །དེ་ཡི་ལོངས་སྤྱོད་བཞིར་ཤེས་བྱ། །དཔའ་བོ་རྡོ་རྗེ་

88-1-170a

གཅིག་པུ་ཡི། །སྤྱི་བོར་དབང་བསྐུར་རེ་རེ་སྟེ། །སྙིང་པོ་ཕྱག་རྒྱ་སྔགས་ཙམ་དང་། །རང་རིགས་རིམ་གྱིས་རྒྱས་གདབ་པའོ། །འབྲས་བུས་རྒྱུ་ནི་རྒྱས་གདབ་ཅིང་། །རྒྱུ་ཡིས་འབྲས་བུ་རྒྱས་གདབ་པར། །བསྒོམ་
གྱི་གཞན་དུ་དངོས་གྲུབ་ནི། །བསྐལ་པ་བྱེ་བར་འབྱུང་མི་འགྱུར། །ལོངས་སྤྱོད་བཞི་དང་ཡང་དག་ལྡན། །རིག་པའི་སྐྱེས་བུ་རྡོ་རྗེ་ཅན། །སྐུ་གསུང་ཐུགས་ཀྱི་དབྱེ་བ་ཡིས། །གྲུ་གསུམ་དུ་ནི་རྣམ་པར་བསྒོམ། །
ཀུན་ནས་སེར་བའི་འཁོར་ལོ་ནི། །རྩིབས་བཅུ་དེ་དབུས་རྣམ་པར་བསྒོམ། །རྩིབས་ཀུན་ལ་ནི་ཁྲོ་བོ་བཅུ། །ཡེ་ཤེས་བདག་ཉིད་བཅུ་ལས་བྱུང་། །འགོག་པའི་རྡོ་རྗེས་བསྒོམ་བྱ་ཞིང་། །མཆོག་ཏུ་མཛེས་
པས་བསྒྲུབ་པར་བྱ། །རྡོ་རྗེ་འབར་བའི་སྤྲིན་སྤྲོས་པས། །མི་གཡོ་བ་དང་མཚུངས་པར་འཁོར། །དེ་ལྟར་ཆོས་འབྱུང་ཡེ་ཤེས་ནི། །རང་བཞིན་དྲི་མ་མེད་ཞི་བ། །བསྒོམས་པས་སྐད་ཅིག་ཉིད་ཀྱིས་ནི། །
སངས་རྒྱས་སྤྱན་ནི་རབ་ཏུ་འབྱུང་། །རྡོ་རྗེ་ཅན་གྱིས་ཆོས་བསྟན་པ། །རིམ་པ་གཉིས་ལ་ཡང་དག་བརྟེན། །བསྐྱེད་པ་ཡི་ནི་རིམ་ཉིད་དང་། །དེ་བཞིན་རྫོགས་པའི་རིམ་པའོ། །སྒྲུབ་པ་དང་ནི་
ནན་ཏན་དང་། །དམ་ཚིག་དེ་བཞིན་སྡོམ་པ་རྣམས། །སྔར་ནི་དེ་ཀུན་རྒྱས་པར་ནི། །རིམ་པའི་དབྱེ་བས་ཕྱེ་བ་ཡིན། །གཟུགས་དང་སྒྲ་སོགས་འདོད་པ་ནི། །བདེ་སྡུག་གཉི་གའི་བདག་ཉིད་ཅན། །
འདོད་ཆགས་ཞེ་སྡང་གཏི་མུག་སོགས། །རྟག་ཏུ་སྙིང་ལ་སྐྱེ་བར་འགྱུར། །ཆགས་ལ་འདོད་ཆགས་རྡོ་རྗེ་ཅན། །རྡོ་རྗེ་འདྲ་བར་རིན་ཆེན་འབྱུང་། །རིན་ཆེན་བཞིན་དུ་དམ་ཚིག་ཤེས། །འདོད་པ་དེ་རྣམས་དམ་ཚིག་མཚུངས། །
རྣམ་བཅས་དང་ནི་རྣམ་པ་མེད། །ཀུན་འགྲོ་ཡི་གེ་གསུམ་བདག་ཉིད། །བྱ་བ་དང་ནི་དབྲོག་པ་དང་། །སྤྱོ་དང་རང་གི་བཟླས་པ་བྱའོ། །དེ་ལྟར་ཞེ་སྡང་གཏི་མུག་དག །ས་གསུམ་དུ་ནི་བསྐྱེད་པར་བྱ། །གསང་བའི་བདག་

88-1-170b

པོས་རྒྱས་བཏབ་ཅིང་། །རྡོ་རྗེ་ཅན་གྱི་དོན་བྱེད་དོ། །ཞེ་སྡང་སྦྱོར་བའི་རྣལ་འབྱོར་པས། །ཞེ་སྡང་འཁོར་ལོ་བསྐྱེད་ནས་སུ། །རྡོ་རྗེ་དྲག་པོས་བཅོམ་ནས་ནི། །ཡེ་ཤེས་རྡོ་རྗེ་ཅན་གྱིས་བསྡུ། །དེ་ནི་སྤྲོ་བས་རྟོགས་
བྱས་ལ། །དེ་བཞིན་སླར་ཡང་བསྡུ་བར་བྱའོ། །འདི་ལྟའི་སྦྱོར་བ་གོམས་བྱས་ན། །ཞེ་སྡང་རྡོ་རྗེར་བདག་ཉིད་འགྱུར། །ཁམས་གསུམ་པོ་ནི་མ་ལུས་པ། །གསད་དང་དེ་བཞིན་གསོ་བ་དང་། །སྐད་ཅིག་ཙམ་
གྱིས་བྱེད་པར་ནི། །མངོན་དུ་ནུས་པར་ཐེ་ཚོམ་མེད། །གཏི་མུག་སྦྱོར་བའི་རྣལ་འབྱོར་པས། །གཏི་མུག་འཁོར་ལོ་བསྐྱེད་ནས་ནི། །རྒྱན་ལ་སོགས་པ་གང་ཅིའང་རུང་། །དེ་དག་ཐམས་ཅད་རྟག་ཏུ་
བརྐུ། །གཏི་མུག་སེམས་ཀྱི་རྒྱ་མཚོ་བསྒོམ། །རིན་ཆེན་ཀུན་གྱིས་རབ་ཏུ་དགང་། །གཏི་མུག་འཁོར་ལོ་ཅན་ཀུན་གྱིས། །སྦྱིན་པའི་ཆར་ནི་རབ་ཏུ་འབེབས། །རྫས་རྣམས་ཐམས་ཅད་མ་ལུས་པར། །
རབ་ཏུ་སྦྱིན་དང་དབྲོག་པ་ཉིད། །སེམས་ཀྱི་རྡོ་རྗེ་བསྟན་པོ་ཡིས། །སྐད་ཅིག་ཙམ་གྱིས་དབྱེ་བར་འགྱུར། །འདོད་ཆགས་སྦྱོར་བའི་རྣལ་འབྱོར་པས། །འདོད་ཆགས་འཁོར་ལོ་བསྐྱེད་ནས་ནི། །ལྷ་མོ་
ཐམས་ཅད་ཕྲོགས་ནས་སུ། །འདོད་པའི་སྦྱོར་བས་འདོད་པ་སྤྱོད། །དགའ་སྡུག་བདེ་བས་རངས་པ་ཡིས། །འདོད་པའི་རྩེད་མོས་རྣམ་པར་འཕྲུལ། །དེ་ནས་འཁོར་ལོ་ཅན་ཀུན་ལ། །ལྷ་མོ་རབ་ཏུ་དབུལ་
བར་བྱ། །ཁམས་གསུམ་དག་དུ་བྱུང་བ་ཡི། །ལྷ་དང་ལྷ་མིན་ཆུང་མ་ཡང་། །སྐད་ཅིག་ཙམ་གྱིས་འདོད་སྤྱོད་ན། །མི་ཡི་བུད་མེད་སྨོས་ཅི་དགོས། །དཀྱིལ་འཁོར་དང་ནི་དབང་བསྐུར་དང་། །ལས་མཆོག་གི་ནི་
ཚོགས་རྣམས་དག །ཉམས་སུ་ལེན་ཅིང་བྱིན་རློབ་པ། །གྲུབ་པའི་བགྲོད་པ་གཞན་ཡིན་ནོ། །བྷ་གའི་དཀྱིལ་འཁོར་ཞེས་གྲགས་དང་། །བྱང་ཆུབ་སེམས་ཀྱི་དཀྱིལ་འཁོར་དང་། །ལུས་ཀྱི་དཀྱིལ་འཁོར་

88-1-171a

ཞེས་བཤད་པ། །གསུམ་པོ་དཀྱིལ་འཁོར་ཡིན་པར་གསུངས། །ཕུང་པོ་སྐྱེ་མཆེད་ཁམས་རྣམས་ནི། །སངས་རྒྱས་ཐམས་ཅད་རྒྱས་བཏབ་པའོ། །དེས་ནི་རྟག་པར་རྒྱ་དགོད་པ། །དཀྱིལ་འཁོར་ཞེས་ནི་
བསྟན་པ་ཡིན། །ལྕགས་ཀྱུ་དབྱིག་ཏོ་རྩེ་གསུམ་དང་། །རལ་གྲི་མཚམས་སུ་རྣམ་པར་དགོད། །འདོད་རྒྱལ་དབྱིག་སྔོན་སྟོབས་མི་གཡོ། །སྟེང་དུ་འཁོར་ལོ་འོག་གནོད་མཛེས། །རིག་རྒྱལ་རྡོ་རྗེ་ཅན་རྣམས་
ཀྱི། །འཁོར་ལོས་སྒྱུར་བ་དྲུག་གི་རྒྱ། །ས་ལ་སོགས་པ་སེམས་དཔའ་ཡི། །ཕྱག་རྒྱ་རང་གི་དཀྱིལ་འཁོར་པ། །མེ་ལོང་པི་བང་དུང་དང་ནི། །དེ་བཞིན་སྣོད་དང་སྣ་ཚོགས་རས། །ཆོས་འབྱུང་བ་ཡི་ཕྱག་རྒྱ་དྲུག །
རྡོ་རྗེའི་བདག་པོ་རྡོ་རྗེ་ཅན། །སངས་རྒྱས་བྱང་ཆུབ་སེམས་དཔའ་དང་། །ཁྲོ་རྒྱལ་རྣམས་ཀྱིས་རྒྱས་གདབ་བོ། །དེ་ནས་གཞན་ཡང་དཔའ་བོ་གཅིག །རིགས་ནི་ཁ་དོག་དག་གིས་བརྟག །ལྷ་མོ་
དགུ་དང་ནམ་མཁའི་ཁམས། །མེ་ཏོག་ཅེས་ནི་བཤད་པ་ཡིན། །སྐུ་གསུང་ཐུགས་ཀྱི་དབྱེ་བ་ཡིས། །རིགས་ཀྱི་རིམ་གྱིས་དགོད་པར་བྱ། །མཆོད་རྟེན་སངས་རྒྱས་ཐམས་ཅད་ཀྱི། །བཞུགས་གནས་ཕོ་བྲང་
ཡིན་པར་བཤད། །ཡེ་ཤེས་སེམས་དཔས་གང་རེག་པ། །ཡེ་ཤེས་འཁོར་ལོ་ཞེས་བཤད་དོ། །མི་འགྱུར་རྡོ་རྗེ་གསུམ་ཡི་གེ། །ས་བོན་ཡི་གེ་གནས་ཞེས་བཤད། །སྐུ་གསུང་ཐུགས་ཀྱི་དེ་ཉིད་ནི། །སད་
པར་བྱས་པས་བསྐུལ་བར་བཤད། །ཕྱོགས་བཅུའི་འཇིག་རྟེན་ཁམས་རྣམས་སུ། །འོད་ཟེར་འགྱེད་པ་གཏོང་བའོ། །རྡོ་རྗེ་ཅན་ཀུན་སྤྱན་འདྲེན་པས། །རྡོ་རྗེ་ཅན་ཀུན་སྤྱན་དྲང་བའོ། །རྡོ་རྗེ་ཅན་གྱི་གནས་དེ་ཡི། །འོད་
ཟེར་གྱིས་ནི་རྡོ་རྗེ་ཀུན། །བསྡུས་ནས་གོང་བུའི་ཚུལ་གྱིས་སུ། །བཅིངས་པ་བཅིང་བ་ཡིན་པར་བཤད། །སྐུ་གསུང་ཐུགས་ཀྱི་རྡོ་རྗེ་ཡིས། །སྐུ་གསུང་ཐུགས་ཀྱི་དཀྱིལ་འཁོར་དུ། །སྐུ་གསུང་ཐུགས་ནི་རྒྱས་བཏབ་སྟེ། །

88-1-171b

རི་མོའི་དཀྱིལ་འཁོར་བརྟག་པར་བྱ། །དབང་བསྐུར་དབྱེ་བ་རྣམ་གསུམ་དུ། །རྒྱུད་འདི་ལ་ནི་རབ་ཏུ་བརྟག །བུམ་པའི་དབང་བསྐུར་དང་པོ་སྟེ། །གཉིས་པ་གསང་བའི་དབང་བསྐུར་བ། །ཤེས་རབ་ཡེ་ཤེས་གསུམ་
པ་སྟེ། །བཞི་པ་དེ་ཡང་དེ་བཞིན་ནོ། །མིག་ཡངས་སྔགས་ཀྱི་སྣོད་དུ་རུང་། །མེ་ཏོག་བཅས་ཤིང་ས་བོན་བྱུང་། །བླངས་ནས་གསང་བའི་དབང་བསྐུར་བ། །སྔགས་པས་སློབ་མ་དག་ལ་སྦྱིན། །ནམ་མཁའི་
དབྱིངས་ཀྱི་དབུས་གནས་པར། །དྲི་ཆུ་རྐང་དང་ཡང་དག་ལྡན། །རྡོ་རྗེ་པད་མའི་སྦྱོར་བ་ཡིས། །རྡོ་རྗེ་ཅན་ཀུན་ཡང་དག་བསྡུ། །སྐུ་གསུང་ཐུགས་ཀྱི་རྡོ་རྗེ་ཡིས། །དེ་དག་ཐམས་ཅད་སྙིང་གར་བསྡུ། །རྡོ་རྗེའི་ལམ་
ནས་བྱུང་ནས་སུ། །སློབ་མའི་ཁར་ནི་དབབ་པར་བྱ། །འདི་ནི་གསང་སྔགས་དེ་ཀུན་གྱི། །དབང་བསྐུར་བ་ཡི་གོ་འཕང་མཆོག །ལས་མཆོག་གི་ནི་ཚོགས་རྣམས་དང་། །གསང་སྔགས་ཐམས་ཅད་འགྲུབ་
པར་འགྱུར། །མཆོག་ཏུ་དད་ཅིང་ཤེས་རབ་ཆེ། །གཟུགས་བཟང་སྒྲུབ་པ་པོ་ལ་དགའ། །སྦྱོར་བ་གཅིག་གིས་བྱ་བ་གོམས། །དམ་ཚིག་དག་གི་དམ་ཚིག་ཅན། །བླ་མ་ལ་ནི་སློབ་མ་ཡིས། །ཡོན་རྣམས་
རབ་ཏུ་ཕུལ་ནས་ནི། །བླ་མས་དེ་ནི་བྱིན་བརླབས་ཏེ། །སྒྲུབ་པ་པོ་ལ་སྦྱིན་པར་བྱ། །རྨོངས་པས་གཏི་མུག་བདག་ཉིད་སྦྱོར། །གཏི་མུག་དགའ་དང་ཡང་དག་ལྡན། །གཏི་མུག་རྒྱུན་གྱིས་དབང་བསྐུར་ན། །གཏི་
མུག་རྡོ་རྗེར་བདག་ཉིད་འགྱུར། །ཞེ་སྡང་སྡང་བའི་བདག་ཉིད་སྦྱོར། །ཞེ་སྡང་དགའ་དང་ཡང་དག་ལྡན། །ཞེ་སྡང་རྒྱུན་གྱིས་དབང་བསྐུར་ན། །ཞེ་སྡང་རྡོ་རྗེར་བདག་ཉིད་འགྱུར། །ཆགས་པས་འདོད་ཆགས་བདག་ཉིད་
སྦྱོར། །འདོད་ཆགས་དགའ་དང་ཡང་དག་ལྡན། །འདོད་ཆགས་རྒྱུན་གྱིས་དབང་བསྐུར་ན། །འདོད་ཆགས་རྡོ་རྗེར་བདག་ཉིད་འགྱུར། །ཤེས་རབ་ཡེ་ཤེས་བདག་ཉིད་སྦྱོར། །རྡོ་རྗེ་དགའ་དང་ཡང་དག་ལྡན། །

88-1-172a

ཡེ་ཤེས་རྒྱུན་གྱིས་དབང་བསྐུར་ན། །ཤེས་རབ་ཡེ་ཤེས་བདག་ཉིད་འགྱུར། །རིག་པའི་ལྷ་མོ་དེ་ཉིད་ནི། །རྡོ་རྗེ་ཅན་གྱི་སློབ་མས་བླང་། །ལག་པར་ལག་པ་བཞག་ནས་ནི། །དེ་བཞིན་གཤེགས་རྣམས་དབང་བྱས་
ལ། །སློབ་མའི་མགོ་བོར་ལག་བཞག་སྟེ། །བླ་མ་རྡོ་རྗེ་ཅན་གྱིས་བསྒོ། །ཐབས་གཞན་གྱིས་ནི་འཚང་མི་རྒྱ། །དེ་བས་རིག་པ་འདི་མཆོག་ཡིན། །ཆོས་ཀུན་གཉིས་སུ་མེད་པ་ལ། །དངོས་པོ་གཉིས་སུ་བཏགས་པ་
ཡིན། །དེ་བས་འཁོར་བ་རྣམ་བྲལ་བར། །རྟག་ཏུ་ཁྱོད་ཀྱིས་མི་བྱའོ། །འདི་ནི་སངས་རྒྱས་ཐམས་ཅད་ཀྱི། །རིག་པའི་བརྟུལ་ཞུགས་བླ་མེད་པའོ། །རྨོངས་པ་གང་ཞིག་འདས་གྱུར་ན། །དེ་ཡི་དངོས་གྲུབ་མཆོག་
མི་འགྱུར། །ཐལ་མལ་ལུས་ཀྱི་ཆོས་ལ་ནི། །དྲི་མ་ལྔ་རྣམས་སྣང་བ་ནི། །ཡེ་ཤེས་ལྔ་ཡིས་བྱིན་བརླབས་པས། །བདུད་རྩི་ལྔ་ཞེས་བྱ་བར་བཤད། །སྦྱར་དང་དེ་བཞིན་བསྲེག་པ་དང་། །སྣང་བར་བྱེད་
དང་གཟུགས་སྣང་བ། །སྔགས་ཀྱི་ལུས་སུ་རབ་སྦྱོར་བས། །བདུད་རྩི་ལྔ་ནི་བཟའ་བར་བྱ། །རྡོ་རྗེ་ཧཱུྃ་ལས་བྱུང་བ་ནི། །བར་སྣང་ལ་གནས་བསམ་པར་བྱ། །ཨཱ་ལས་བྱུང་བའི་པད་མ་ནི། །དེ་ཡི་
འོག་ཏུ་བསྒོམ་པར་བྱ། །ཨོཾ་གྱིས་མཚན་པའི་བདུད་རྩི་ནི། །དེ་ཡི་དབུས་སུ་གཞག་པར་བྱ། །རྡོ་རྗེའི་པད་མ་མཉམ་སྦྱོར་བ། །འབར་བས་རྣལ་འབྱོར་ཚིམ་པར་བྱ། །ཤེལ་དང་མཚུངས་པར་སྣང་
གྱུར་ཅིང་། །ཡེ་ཤེས་ཉི་མ་གཉིས་པར་གྱུར། །ཕྱོགས་བཅུའི་འཇིག་རྟེན་ཁམས་རྣམས་ཀྱི། །མཚོན་ཆ་མཆོག་གིས་དྲང་ནས་ནི། །བདུད་རྩི་དེ་རུ་ཕབ་ནས་ཀྱང་། །བཟའ་བའི་སྦྱོར་བས་བཟའ་
བར་བྱ། །བསྒྲུབ་བྱའི་དངོས་གྲུབ་ཆོ་ག་ཡིས། །དེ་བཞིན་དཔའ་བོ་ལྔ་རྣམས་བཟའ། །ཡིག་གསུམ་ས་བོན་ལས་བསྐྱེད་བྱ། །གཞན་དུ་དེ་ནི་འགྲུབ་མི་འགྱུར། །མི་སྣང་ལ་སོགས་དངོས་གྲུབ་ནི། །

88-1-172b

ཐ་མལ་པ་ཞེས་བཤད་པ་ཡིན། །སངས་རྒྱས་ཉིད་བསྒྲུབ་སངས་རྒྱས་ཀྱིས། །དངོས་གྲུབ་མཆོག་ཅེས་གསུངས་པ་ཡིན། །ཐབས་ནི་རྣམ་པ་བཞི་པོ་དག །བྱང་ཆུབ་རྡོ་རྗེ་ཅན་གྱིས་གསུངས། །
རྣལ་འབྱོར་རྒྱུད་ནི་ཐམས་ཅད་དུ། །རྣལ་འབྱོར་པ་ཡིས་རྟག་པར་སྔགས། །བསྙེན་པའི་ཆོ་ག་དང་པོ་སྟེ། །ཉེ་བར་སྒྲུབ་པ་གཉིས་པ་ཡིན། །སྒྲུབ་པ་ཡང་ནི་གསུམ་པ་སྟེ། །སྒྲུབ་པ་ཆེན་པོ་
བཞི་པའོ། །ཐུན་མོང་མཆོག་གི་བྱེ་བྲག་གིས། །བསྙེན་པ་རྣམ་པ་གཉིས་སུ་འགྱུར། །རྡོ་རྗེ་བཞི་པོ་ཐུན་མོང་སྟེ། །ཡེ་ཤེས་བདུད་རྩི་མཆོག་ཡིན་ནོ། །དང་པོ་སྟོང་ཉིད་བྱང་ཆུབ་སྟེ། །གཉིས་པ་
ས་བོན་བསྡུས་པ་ཡིན། །གསུམ་པ་གཟུགས་ནི་རྫོགས་པ་སྟེ། །བཞི་པ་ཡི་གེ་དགོད་པའོ། །རྡོ་རྗེ་རྣམ་བཞི་འདི་དག་གིས། །ཐ་མལ་སྒྲུབ་ལ་བསྙེན་པ་བྱ། །མཆོག་གི་ཡེ་ཤེས་བདུད་རྩི་
ཉིད། །སྦྱོར་བ་དྲུག་གི་བྱ་བ་ཡི། །བསྙེན་པ་ཡན་ལག་དྲུག་གིས་ནི། །བྱས་པས་སྒྲུབ་པ་མཆོག་ཏུ་འགྱུར། །གཞན་དུ་སྒྲུབས་པར་གྱུར་ན་ནི། །སོ་སོར་སྡུད་དང་བསམ་གཏན་དང་། །སྲོག་རྩོལ་དེ་བཞིན་འཛིན་
པ་དང་། །རྗེས་སུ་དྲན་དང་ཏིང་འཛིན་ཏེ། །སྦྱོར་བའི་ཡན་ལག་དྲུག་ཏུ་བཤད། །དབང་པོ་བཅུ་པོ་རྣམས་ཀྱི་ཡང་། །རང་གི་འཇུག་གནས་ཐམས་ཅད་དུ། །འདོད་པ་སོ་སོར་སྡུས་པས་ན། །སོ་སོར་སྡུད་པ་
ཞེས་བཤད་དོ། །འདོད་པ་ལྔ་ནི་མདོར་བསྡུས་ནས། །སངས་རྒྱས་ལྔ་རུ་སྦྱོར་བ་ཡིས། །བརྟག་པ་བསམ་གཏན་ཞེས་བཤད་དེ། །བསམ་གཏན་དེ་ནི་རྣམ་ལྔར་འགྱུར། །རྟོག་དང་དཔྱོད་
དང་དགའ་བ་དང་། །དེ་བཞིན་བདེ་བ་ཉིད་དང་ཡང་། །སེམས་ཀྱི་རྩེ་གཅིག་ཉིད་དག་སྟེ། །ལྔ་པོ་དེར་ནི་བསམ་གཏན་བསྡུ། །གསང་བའི་རྒྱུད་ནི་ཐམས་ཅད་དུ། །རྣམ་པ་དུ་མར་ཡོངས་

88-1-173a

བཤད་པ། །གསང་བ་གསུམ་འབྱུང་རྟོག་པ་སྟེ། །དེ་ཡི་ལོངས་སྤྱོད་བྱེད་པའོ། །དགའ་དང་འདྲ་བ་གསུམ་པ་སྟེ། །བདེ་བ་བསྡུས་པ་བཞི་པའོ། །ཤེས་དང་ཤེས་བྱ་བྱུང་ཟད་པའི། །རང་སེམས་ལྔ་པར་ཤེས་པར་བྱ། །སངས་རྒྱས་ཀུན་དངོས་
ཞི་བ་ནི། །འདོད་པ་ཀུན་ལ་རབ་ཏུ་གནས། །ཡེ་ཤེས་ལྔ་ཡི་རང་བཞིན་དབུགས། །འབྱུང་བ་ལྔ་ཡི་ངོ་བོ་ཉིད། །གོང་བུའི་གཟུགས་ཀྱི་ཕྱུང་ནས་ནི། །སྣ་ཡི་རྩེ་མོར་རབ་ཏུ་བརྟག །རིན་ཆེན་ཁ་དོག་སྣ་ལྔ་པ། །སྲོག་དང་རྩོལ་བ་ཞེས་བྱར་བཤད། །
རང་སྔགས་སྙིང་གར་བསམ་ནས་ནི། །སྲོག་ནི་ཐིག་ལེར་གྱུར་པར་བཞག །རང་དབང་རིན་ཆེན་དག་པ་ཡིན། །གཟུང་བ་འཛིན་པ་ཡིན་པར་བཤད། །སེམས་ནི་འགོག་པའི་རྡོ་རྗེར་གྱུར། །མཚན་མར་ཉེར་འཛིན་འབྱུང་བར་འགྱུར། །
མཚན་མའི་ཁམས་ནི་རྣམ་པ་ལྔར། །བྱང་ཆུབ་རྡོ་རྗེས་གསུངས་པ་ཡིན། །སྨིག་རྒྱུ་འདྲ་བ་དང་པོ་སྟེ། །དུ་བ་ལྟ་བུ་གཉིས་པ་ཡིན། །མཁའ་སྣང་འདྲ་བ་གསུམ་པ་སྟེ། །མར་མེ་ལྟར་འབར་བཞི་པའོ། །སྤྲིན་མེད་ནམ་མཁའ་ལྟ་
བུར་ནི། །རྟག་ཏུ་སྣང་བ་ལྔ་པའོ། །བརྟན་གྱུར་རྡོ་རྗེའི་ལམ་ནས་ནི། །ནམ་མཁའི་ཁམས་སུ་སྤྲོ་བར་བྱ། །རྗེས་དྲན་གང་ཞིག་རྣམ་བསྒོམ་པ། །དེ་དང་འདྲ་བར་སྤྲོ་བར་བྱ། །རྗེས་སུ་དྲན་པ་ཞེས་བཤད་དེ། །སོ་སོར་སྣང་བ་དེ་ལ་སྐྱེ། །
ཐབས་དང་ཤེས་རབ་སྙོམས་འཇུག་པས། །དངོས་པོ་ཐམས་ཅད་མདོར་བསྡུས་པ། །གོང་བུའི་ཚུལ་གྱིས་བསྡུས་ནས་ནི། །དབུས་སུ་གཟུགས་ནི་རྣམ་པར་བསྒོམ། །ཡུད་ཀྱིས་ཡེ་ཤེས་རྫོགས་བྱེད་པ། །ཏིང་ངེ་འཛིན་ཅེས་བྱ་
བར་གནས། །སོ་སོར་སྡུད་ལ་སྙོམས་འཇུག་ན། །སྔགས་རྣམས་ཐམས་ཅད་བྱིན་གྱིས་བརློབ། །བསམ་གཏན་ཡེ་ཤེས་སྙོམས་འཇུག་ན། །མངོན་ཤེས་ལྔ་པོ་འཐོབ་པར་འགྱུར། །སྲོག་དང་རྩོལ་བས་ངེས་
པར་ནི། །བྱང་ཆུབ་སེམས་དཔའ་རྣམས་ཀྱིས་གཟིགས། །རྟག་ཏུ་འཛིན་པའི་སྟོབས་ཀྱིས་ནི། །རྡོ་རྗེ་སེམས་དཔའ་ཡང་དག་འབྱུང་། །རྗེས་དྲན་མཉམ་པར་སྦྱོར་བ་ཡིས། །ནོར་གྱི་དཀྱིལ་འཁོར་འབྱུང་བར་འགྱུར། །ཏིང་འཛིན་དབང་

88-1-173b

གྱུར་ཙམ་གྱིས་ནི། །སྒྲིབ་པ་རྣམས་དང་བྲལ་བར་འགྱུར། །སྙིང་པོ་དེ་ནི་ཐུགས་ཀ་རུ། །ཟླ་བ་རྡོ་རྗེའི་སྦྱོར་བས་བལྟ། །མཚོན་ཆ་མཆོག་གིས་དྲངས་ནས་ནི། །སེམས་ནི་སྔགས་ཀྱི་དངོས་བྱས་ཏེ། །སྔགས་ཀྱི་གཟུགས་ཀྱི་ཚུལ་གྱིས་
ནི། །བྱང་ཆུབ་ཚིགས་བཅད་བརྗོད་པར་བྱ། །ཆོ་ག་ཡང་དག་སྦྱོར་བསྒོམ་པས། །རང་གི་དཀྱིལ་འཁོར་ལ་གནས་ཏེ། །སེམས་དེ་ཡེ་ཤེས་གཟུགས་ཀྱིས་ནི། །བསྒོམ་པ་ཉེ་བར་བསྒྲུབ་པའོ། །ཇི་སྲིད་མཐོང་བ་དེ་སྲིད་དུ། །རྣམ་
གཉིས་ཟླ་བ་དྲུག་ཏུ་བསྒོམ། །འདོད་པ་ཀུན་ལ་ལོངས་སྤྱོད་པས། །ཐམས་ཅད་དུ་ནི་རྟག་ཏུ་བྱ། །གལ་ཏེ་ཟླ་བ་དྲུག་གིས་ནི། །ཇི་སྐད་གསུངས་པ་མ་མཐོང་ན། །ཇི་སྐད་བཤད་པའི་ཆོ་ག་དང་། །སྡོམ་པ་ལན་གསུམ་བརྩམ་པར་
བྱ། །དེ་ལྟར་བྱས་ཀྱང་སྒྲུབ་པ་པོས། །མཐོང་བ་འབྱུང་བར་མ་གྱུར་ཅིང་། །གང་ཚེ་བྱ་བ་མ་གྲུབ་ན། །དྲག་ཤུལ་སྦྱོར་བས་བསྒྲུབ་པར་བྱ། །དེ་ཚེ་དེ་ཡི་ཡེ་ཤེས་ནི། །འགྲུབ་པ་ངེས་པར་ཉེ་བར་འབྱུང་། །རིགས་ཀྱི་དབྱེ་བའི་སྦྱོར་
བས་ནི། །རྡོ་རྗེ་ཕུར་བུས་ཕུར་བུ་གདབ། །དེ་ནས་དབང་དུ་བྱ་བ་དང་། །བསྲུང་བའི་སྦྱོར་བ་དག་ཀྱང་བྱ། །འདོད་ཆགས་ཆེན་པོའི་ཚུལ་ཉིད་ཀྱིས། །ཡེ་ཤེས་འཁོར་ལོ་ཅན་རྣམས་བསྡུ། །ལྷ་མོ་དགུ་ནི་སྤྲོས་ནས་སུ། །བསྒྲུབ་པར་
བྱ་བའི་ལུས་ལ་དགོད། །ཡོངས་སུ་གྱུར་ལས་ཕྱག་རྒྱ་བཞི། །དཀྱིལ་འཁོར་དེར་ནི་རྟག་པར་བྱ། །བདག་ཉིད་དབུས་སུ་གནས་བྱས་ལ། །འཁོར་ལོ་ཅན་ཀུན་བསྡུ་བར་བྱ། །ཐམས་ཅད་རྡོ་རྗེའི་དངོས་བྱས་ལ། །དེ་འོག་བྱང་ཆུབ་
བསྒོམ་པར་བྱ། །བསྐུལ་བའི་གླུ་དབྱངས་བཞི་ཡིས་ནི། །ལྷ་མོས་སྙིང་པོ་བསྐུལ་བ་ཡིས། །དུས་གསུམ་རྡོ་རྗེའི་རང་བཞིན་སེམས། །
ཡེ་ཤེས་ལྟ་བུར་ལུས་བསྒོམས་མོ། །དྲེགས་

88-1-174a

པས་ཁ་དོག་རྣམ་པར་དབྱེ། །དེ་བཞིན་ཉམས་ཀྱིས་སྙིང་པོ་སྟེ། །དབང་བསྐུར་བས་ནི་རང་གི་རྒྱུ། །གཞི་ཡིས་འབྲས་བུ་ཕྱེ་བ་ཡིན། །སྔགས་ཀྱིས་ཆོས་ནི་བྱེད་འགྱུར་ལ། །རིག་པའང་ཆོས་ཀྱི་ཕྱག་རྒྱས་སོ། །
འཁོར་ལོས་སྒྱུར་བའི་རྒྱལ་པོ་དྲུག །གཙུག་གཏོར་ཞེས་ནི་རྣམ་པར་གྲགས། །རྫུ་འཕྲུལ་ཆེན་པོ་ལོངས་སྤྱོད་བཞི། །རིག་པའི་རྒྱལ་མོ་ཞེས་བྱར་གྲགས། །དེ་བཞིན་རྡོ་རྗེའི་བདག་པོ་རྣམས། །འདོད་པ་ཐམས་ཅད་
ཅེས་བྱར་བཤད། །བསམ་གཏན་རྡོ་རྗེ་ཐམས་ཅད་ལ། །དབང་བསྐུར་བ་ནི་རབ་ཏུ་བསྔགས། །ཆོ་གའི་སྦྱོར་བ་འདི་ཡིས་ནི། །ཡེ་ཤེས་ལུས་དང་ལྷན་ཅིག་ཏུ། །སྐུ་གསུང་ཐུགས་ཀྱི་རྡོ་རྗེ་ཡིས། །གཉིས་སུ་མེད་
པར་བྱེད་སྒྲུབ་པ། །སྔར་བཤད་པ་ཡི་རིམ་གྱིས་ནི། །རིག་པའི་སྐྱེས་བུ་རྡོ་རྗེ་ཅན། །བདག་དང་འདྲ་བར་དཀྱིལ་འཁོར་བསྐྱེད། །བསྒྲུབ་པ་ཆེན་པོ་ཞེས་བཤད་དོ། །བསྙེན་པའི་དུས་སུ་གཙུག་ཏོར་ཆེ། །
སྦྱོར་བ་ཉིད་ཀྱིས་གཟུགས་སུ་དམིགས། །ཉེ་བར་སྒྲུབ་པའི་དུས་སུ་ནི། །བདུད་རྩི་འཁྱིལ་པའི་གཟུགས་ཀྱི་བར། །སྔགས་པ་ཆོ་ག་ཤེས་པ་ཡིས། །སྒྲུབ་པ་རང་ལྷའི་སྦྱོར་བས་བྱ། །སྒྲུབ་པ་ཆེན་པོའི་དུས་
སུ་ནི། །གཙོ་བོ་སངས་རྒྱས་བདག་པོའི་སྐུ། །འདི་ནི་རྡོ་རྗེ་ཅན་ཀུན་དང་། །རྣལ་འབྱོར་མཆོག་གི་གསང་བ་ཆེ། །དེ་ལྟའི་རྣམ་ཕྱེས་ཤེས་བྱས་ནས། །དངོས་གྲུབ་མཆོག་ནི་བསྒྲུབ་པར་བྱ། །གཞན་དུ་བསྐལ་པ་
བྱེ་བས་ནི། །སངས་རྒྱས་སྐྱོབ་པ་རྣམས་ཀྱིས་ཀྱང་། །དངོས་གྲུབ་མཆོག་ནི་ཞི་བ་དག །ངེས་པར་འབྱུང་བར་མི་འགྱུར་རོ། །བསྒྲུབ་བྱ་བསྒྲུབ་པར་ཡང་དག་སྦྱོར། །གང་ཡིན་དེ་ནི་བསྙེན་པར་བཤད། །རྡོ་རྗེ་
པད་མ་མཉམ་སྦྱོར་བ། །ཉེ་བར་སྒྲུབ་པ་ཞེས་བཤད་དོ། །ཡི་གེ་ཧཱུྃ་དང་ཕཊ་ལྡན་པ། །བསྐྱེད་པ་སྒྲུབ་པ་ཞེས་བཤད་པ། །ངོ་བོ་ཉིད་ནི་ཞི་བདེ་བ། །སྒྲུབ་པ་ཆེན་པོ་ཞེས་བཤད་དོ། །དཔལ་ལྡན་སངས་རྒྱས་

88-1-174b

ཀུན་གྱི་བདག །རྡོ་རྗེ་འཆང་བ་ཆེན་པོའི་གནས། །སངས་རྒྱས་ཀུན་གྱི་ཐབས་ལས་བྱུང་། །དེ་ཉིད་ཆོས་རྣམས་ཆོས་ཉིད་དོ། །ལས་དང་རྗེས་འཐུན་གང་གང་གིས། །རྣལ་འབྱོར་པ་ཡིས་སྦྱོར་བ་
དམིགས། །དཀྱིལ་འཁོར་དེ་དང་དེ་བསྐྱེད་ནས། །དམ་ཚིག་མི་ཟད་བསྒོ་བར་བྱ། །སྐུ་གསུང་ཐུགས་ཀྱི་རྡོ་རྗེ་ཡི། །དམ་ཚིག་དང་པོ་བསྲུང་བར་བྱ། །དེ་ནས་གཙུག་ཏོར་དམ་ཚིག་ནི། །ཆོ་ག་ཇི་སྐད་གསུངས་
ལས་བྱུང་། །ལས་དང་གང་གང་རྗེས་མཐུན་པས། །རང་གི་འཁོར་ལ་བཀའ་ཡང་བསྒོ། །བསྒྲུབ་བྱའི་ལུས་གང་ཡིན་པ་ལའང་། །དཀྱིལ་འཁོར་རྣམ་པར་བསྒོམས་ནས་སུ། །དེ་ཡི་ལུས་གནས་འཁོར་
ལོ་ལ། །དེ་ཡི་ཉེས་པ་བསྒྲག་པར་བྱ། །དེ་ནས་དེ་རྣམས་དེས་བཅོམ་ནས། །བྱུང་བར་གྱུར་པ་རྣམ་པར་བསྒོམ། །དངོས་པོ་ཀུན་གྱིས་རྣམ་བསྒོམས་ནས། །དངོས་པོ་ཀུན་གྱིས་དྲངས་ནས་ནི། །དེ་ནི་རང་
གི་འཁོར་ལོར་གཞུག །ཇི་སྐད་གསུངས་པའི་རྫས་རྣམས་ཀྱིས། །དེ་ཡི་གཟུགས་བརྙན་བྱས་ནས་ནི། །ཁྲོ་བས་ཁྱབ་པའི་སེམས་ཀྱིས་ནི། །རྐང་པས་མཚན་མ་གནོན་པར་བྱ། །དེ་ནས་བཀའ་
མནོས་ཁྲོ་བོ་ནི། །སྣ་ཚོགས་ཚོགས་ཀྱིས་བསྐོར་བ་རྣམས། །སྒྲུབ་པ་རྡོ་རྗེ་ཅན་གྱིས་ནི། །བསྒྲུབ་བྱ་གསང་ཕྱིར་གཏང་བར་བྱ། །ཁྲོ་བོའི་རྒྱལ་པོ་དེས་བསྐོར་ནས། །དེ་ནི་བཅིང་ཞིང་བརྡེག་པ་དང་། །དེ་ནས་གདུངས་
ཤིང་སྐྲག་གྱུར་པ། །སྒྲུབ་པ་པོས་ནི་དགུག་པར་བྱ། །རྡོ་རྗེ་གསུམ་གྱི་སྔགས་ཀྱིས་ནི། །དེ་ཡི་གཟུགས་བརྙན་ལ་ཕབ་ནས། །སྔགས་པས་རྡོ་རྗེ་དག་གིས་ནི། །སྤྱི་བོ་མགྲིན་པ་སྙིང་ག་རུ། །ཕུར་བའི་
སྔགས་ཀྱིས་ཕུར་བུ་གདབ། །ཡམས་དང་ཉེ་བར་འཚེ་བ་ཀུན། །སྣ་ཚོགས་ཡུལ་ལས་བྱུང་བ་རྣམས། །གཟུགས་དེ་ལ་ནི་ཕབ་ནས་སུ། །དེ་རྣམས་ཀྱིས་ནི་ཕུར་བུས་གདབ། །དེ་ནས་སྦྱོར་བ་ཐམས་ཅད་ཀྱིས། །

88-1-175a

ཆོ་ག་ཇི་སྐད་གསུངས་པ་བཞིན། །འཁྲུལ་འཁོར་སྔགས་ཀྱི་སྦྱོར་ལ་སོགས། །ལས་ཀྱི་དབྱེ་བས་སྦྱར་བར་བྱ། །མཚན་མ་མནན་ནས་བཟླས་པའམ། །ཁྲོ་བོའི་དཀྱིལ་འཁོར་སྦྱིན་སྲེག་
གམ། །བསྒོམ་པས་གདུག་པའི་སེམས་ཅན་གྱིས། །ཟོས་པར་གྱུར་པར་རབ་ཏུ་བརྟག །ཞི་ལ་ཞི་བའི་སེམས་ཀྱིས་བྱ། །རྒྱས་ལ་དགའ་བའི་ཡིད་ཀྱིས་ཏེ། །དབང་ལ་ཆགས་པའི་ཡིད་དུ་བྱ། །ཁྲོ་ལ་
གཏུམ་པས་རབ་ཏུ་བསྒྲུབ་ཅེས་པའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཀྱི་ཐེ་ཚོམ་ཐམས་
ཅད་བཅད་པར་མཛད་ནས། ཐེ་ཚོམ་ཐམས་ཅད་གཅོད་པར་མཛད་པ་སྐུ་དང་གསུང་དང་ཐུགས་རྡོ་རྗེ་རང་གི་སྐུ་དང་གསུང་དང་ཐུགས་རྡོ་རྗེ་ལ་བཞུགས་པར་རང་གི་སྐུ་དང་གསུང་དང་ཐུགས་ཀྱིས་དམིགས་
ནས་ཅང་མི་གསུང་བར་བཞུགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱིས་དེ་བཞིན་གཤེགས་པ་དེ་དག་ཐམས་ཅད་ལ་བསྟོད་པའི་རྒྱལ་པོ་འདིས་
བསྟོད་དོ། །ཐམས་ཅད་སྐུ་ཁྱོད་ཕྱག་འཚལ་ལོ། །ཐམས་ཅད་གསུང་ལ་ཕྱག་འཚལ་འདུད། །ཐམས་ཅད་ཐུགས་ཁྱོད་ཕྱག་འཚལ་ལོ། །ཐམས་ཅད་མཛད་ལ་ཕྱག་འཚལ་འདུད། །སྐུ་གསུང་ཐུགས་ནི་རྡོ་རྗེ་ཡི། །
སྐུ་གསུང་ཐུགས་ནི་ཐོབ་འགྱུར་བས། །སེམས་ཅན་སངས་རྒྱས་མི་མཉམ་མཉམ། །བསྒྲུབ་བྱ་སུ་ཡིན་སྒྲུབ་པོ་གང་། །སྒྲུབ་པའི་དབང་པོ་བདག་ཉིད་ཆེ། །སངས་རྒྱས་ཐམས་ཅད་གསོད་པ་ཡིས། །ཇི་ལྟར་སྡིག་
པས་གོས་མི་འགྱུར། །གལ་ཏེ་གོས་འགྱུར་འབྲས་བུ་གང་། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ལ་ལེགས་སོ་ལེགས་

88-1-175b

སོ་ཞེས་བྱ་བ་བྱིན་ཏེ། སེམས་དཔའ་ཆེན་པོ་ལེགས་སོ་ལེགས། །བདག་ཉིད་ཆེན་པོ་ལེགས་སོ་ལེགས། །གསུང་དབྱངས་ཆེན་པོ་ལེགས་སོ་ལེགས། །མཆོད་པ་ཆེན་པོ་ལེགས་སོ་ལེགས། །སློབ་དཔོན་བྱང་
ཆུབ་རྡོ་རྗེ་ཅན། །དཔལ་ལྡན་སངས་རྒྱས་ཀུན་གྱི་བདག །དངོས་རྣམས་ཐམས་ཅད་སྒྱུ་མ་བཞིན། །སྐྱེད་དང་སྡུད་པར་མཛད་པ་པོ། །དེས་ན་དེ་ཡི་སྡིག་མི་འགྱུར། །བསོད་ནམས་དག་ཀྱང་དེ་བཞིན་ནོ། །གང་
ལ་སྡིག་དང་བསོད་ནམས་མེད། །དེ་ནི་བྱང་ཆུབ་ཡིན་པར་གསུངས། །མགོན་པོ་དེ་ཡི་སླུ་བ་ཡིས། །ལུས་ཅན་ཐམས་ཅད་འཇིག་མཛད་ཀྱང་། །ངན་འགྲོར་སྐྱེ་བར་མི་འགྱུར་ཞིང་། །བྱང་ཆུབ་ཀྱང་ནི་རྙེད་མི་དཀའ། །
སྔོན་ནི་མི་བཟད་ལས་བྱས་པས། །གལ་ཏེ་དམྱལ་བ་རྣམས་སུ་ནི། །སྐྱེ་བོ་སྐྱེ་འགྱུར་དེ་རྣམས་ཀྱི། །དམྱལ་བ་རྣམས་ཀྱི་འབྲས་བུ་ཆེ། །བྱང་ཆུབ་རྡོ་རྗེས་སྒྲུབ་བྱ་འདི། །ཡེ་ཤེས་ཀྱིས་ནི་རྒྱས་བཏབ་པས། །
སེམས་ཅན་རྣམས་ལ་སྦྱོར་བ་དེས། །མཆོག་ཏུ་ཕན་བཏགས་ཤེས་པར་བྱ། །ཚར་གཅོད་པ་དང་རྗེས་བཟུང་ལས། །བདག་ཉིད་ཆེན་པོ་དེ་ཡིས་བྱ། །སྒྲུབ་པ་ཆེན་པོའི་མཐར་ཐུག་པར། །བྱས་ནས་
ལས་རྣམས་བརྩམ་པར་བྱ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་རྡོ་རྗེ་ཅན་ཐམས་ཅད་ཀྱི་ཐུགས་རྗེ་ཆེན་པོའི་ཚུལ་གྱི་ཆོས་ཐོས་པས་དགའ་ཞིང་རབ་ཏུ་དགའ་ལ་
འགུ་བའི་ཡིད་ཀྱིས་ལེགས་སོ་ཞེས་བྱ་བ་གསོལ་ཏེ། མགོན་པོ་ཆེན་པོ་ལེགས་སོ་ལེགས། །ཐུབ་པ་ཆེན་པོ་ལེགས་སོ་ལེགས། །ཆོས་རྣམས་ཆེན་པོ་ལེགས་སོ་ལེགས། །ཐུགས་རྗེ་ཆེན་
པོ་ལེགས་སོ་ལེགས། །ཨེ་མའོ་ཀུན་ཏུ་བཟང་པོ་ཡི། །ཐུགས་རྗེ་ཆེན་པོ་དྲི་མ་མེད། །གདུག་པའི་མི་བཟད་ལས་ཀྱིས་ཀྱང་། །སངས་རྒྱས་ཉིད་ཀྱི་འབྲས་བུ་སྩོལ། །དེ་ནས་དེ་བཞིན་གཤེགས་པ་དེ་

88-1-176a

དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་ལྟ་བས་ན་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་
བའི་གསང་བ་འདུས་པར་དབང་བསྐུར་བའི་སྔགས་པས་འཇིགས་པར་མི་བྱ་ཞིང་། །སྐྲག་པར་མི་བྱ། དངང་བར་མི་བྱའོ། །དེ་ཅིའི་ཕྱིར་ཞེ་ན། བྱང་ཆུབ་རྡོ་རྗེ་ལས་བྱུང་བ། །ཞེ་སྡང་རྡོ་རྗེ་ཆེ་ལ་སོགས། །
སྔགས་ཀྱི་རྒྱུན་ནི་བསྡུས་པ་དག །ཡོངས་སུ་སྤང་བར་མི་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱིས་དེ་བཞིན་གཤེགས་པ་དེ་དག་ཐམས་ཅད་ལ་མགྲིན་གཅིག་ཏུ་
ཚིགས་སུ་བཅད་པ་འདིས་མངོན་པར་བསྟོད་དོ། །དུས་གསུམ་རྡོ་རྗེའི་ཐུགས་ཡིན་སྲིད་དང་ཐར་གྱུར་གང་། །ཞི་ཞིང་སྒྲིབ་མེད་ནམ་མཁའ་དག་པའི་ངོ་བོ་ཉིད། །སངས་རྒྱས་རྣམ་རྒྱས་བྱང་ཆུབ་དབང་ཕྱུག་
རྡོ་རྗེ་ཅན། །དེ་ལ་ལུས་ངག་ཡིད་ཀྱིས་རྟག་ཏུ་ཕྱག་འཚལ་ལོ། །གང་ཞིག་གཟུགས་དང་ཚོར་བ་འདུ་ཤེས་འདུ་བྱེད་དང་། །རྣམ་པར་ཤེས་དང་སྐྱེ་མཆེད་དྲུག་དང་དབང་པོ་དྲུག །ས་ཆུ་མེ་དང་རླུང་དང་ནམ་
མཁའ་ཐམས་ཅད་ནི། །བྱང་ཆུབ་སེམས་འདྲ་རྒྱ་ཆེན་དེ་ལ་ཕྱག་འཚལ་ལོ། །གཏི་མུག་ཉེས་པ་འདོད་ཆགས་རྡོ་རྗེ་ཆོས་བཅས་གང་། །རིག་པའི་སྦྱོར་བ་ལས་བྱུང་རྟག་ཏུ་རབ་འབྲེལ་བར། །རྣམ་པ་སྣ་ཚོགས་
དགའ་བས་མྱོས་པའི་དངོས་གྱུར་པ། །བྱང་ཆུབ་སེམས་འདྲ་རྒྱ་ཆེན་དེ་ལ་ཕྱག་འཚལ་ལོ། །སྤྲོ་དང་དགའ་དང་རྣམ་པ་དེ་བཞིན་མི་འགྱུར་དང་། །རྒྱུ་དང་འབྲས་བུའི་རང་བཞིན་སེམས་སུ་རྗེས་གཏོགས་
ཆོས། །རྨོངས་དང་ཞེ་སྡང་འདོད་ཆགས་སྒྲིབ་པ་རྡོ་རྗེ་སྟེ། །བྱང་ཆུབ་སེམས་འདྲ་རྒྱ་ཆེན་དེ་ལ་ཕྱག་འཚལ་ལོ། །གང་ཞིག་ཐོག་མེད་དངོས་པོ་རྣམ་དག་འདི་བསྒོམ་པ། །ཐབས་དང་ཤེས་རབ་ལས་བྱུང་

88-1-176b

སྤྲོས་དང་རྣམ་པར་བྲལ། །གསང་བའི་དབང་བསྐུར་བརྟུལ་ཞུགས་དམ་ཚིག་སྦྱོར་བ་བརྟག །བྱང་ཆུབ་རྡོ་རྗེ་འདྲར་བལྟ་དེ་ལ་རྟག་ཕྱག་འཚལ། །གང་ཞིག་དངོས་གྲུབ་མཆོག་གི་ཐབས་ནི་འདི་སྒོམ་ཞིང་། །
བསྙེན་པའི་ཆོ་ག་ཉེ་བར་སྒྲུབ་དང་སྒྲུབ་པ་དང་། །སྒྲུབ་པ་ཆེན་པོས་བློ་མི་འགྱུར་བའི་སྒྲུབ་དབང་པོ། །བྱང་ཆུབ་རྡོ་རྗེ་འདྲར་བལྟ་དེ་ལ་རྟག་ཕྱག་འཚལ། །གང་ཞིག་ཐུན་བཞིའི་རྡོ་རྗེ་དག་ནི་སྒྲུབ་བྱེད་པ། །
མི་སྣང་ལ་སོགས་སྣ་ཚོགས་མཆོག་དང་དམན་གྲུབ་ཅིང་། །བླ་མའི་དྲིན་གྱིས་འདི་ན་མ་ནོར་ལམ་རྟོགས་པ། །བྱང་ཆུབ་རྡོ་རྗེ་འདྲར་བལྟ་དེ་ལ་རྟག་ཕྱག་འཚལ། །གང་ཞིག་རབ་གསང་འདུས་པའི་རྒྱུད་འདི་
ཉན་པ་དང་། །འདོན་པར་བྱེད་དང་ཀློག་པ་དང་ནི་སེམས་པ་དང་། །མཆོད་པ་བྱེད་པ་དང་ནི་འདྲིའམ་འབྲིར་འཇུག་པ། །བྱང་ཆུབ་རྡོ་རྗེ་འདྲར་བལྟ་དེ་ལ་རྟག་ཕྱག་འཚལ། །གང་དུ་ཞི་སོགས་ལས་
ཚོགས་ཤིན་ཏུ་བརྟགས་པ་ཡིས། །འཁྲུལ་འཁོར་སྔགས་ཀྱི་ཆོ་ག་དེ་བཞིན་རྒྱས་འདེབས་པའི། །སྒྲུབ་བྱ་འདི་དང་ལྡན་པའི་སྒྲུབ་པའི་དབང་པོ་ནི། །བྱང་ཆུབ་རྡོ་རྗེ་འདྲར་བལྟ་དེ་ལ་རྟག་ཕྱག་འཚལ། །གང་གིས་
གཙོ་བོ་སྒྲུབ་པ་པོ་མཐོང་རེག་པ་དང་། །ལེགས་པར་དྲན་དང་མིང་ཙམ་ངེས་པར་ཐོས་པ་དང་། །དད་པར་བྱེད་ཅིང་ཕྱོགས་གཅིག་ཙམ་ཞིག་འཛིན་པ་དག །བྱང་ཆུབ་རྡོ་རྗེ་འདྲར་བལྟ་དེ་ལ་རྟག་
ཕྱག་འཚལ། །བསྟོད་པའི་ཚིག་ནི་ཞི་བ་འདིས། །འདྲེན་པ་ཀུན་ལ་བསྟོད་པ་དང་། །བྱང་ཆུབ་སེམས་དཔའ་མཆོད་ཆེན་ལ། །མགོན་པོ་དེ་དག་རྗེས་ཡི་རང་། །འདུས་པ་གསང་བ་ལས་བྱུང་བ། །
དེ་བཞིན་གཤེགས་པ་ཀུན་གྱི་གསང་། །རྒྱུད་ཀུན་བདག་པོའི་དབང་པོ་ཡིས། །རྒྱུད་འདི་ལེགས་པར་གསུངས་པ་ཡིན། །དེ་ནས་དེ་བཞིན་གཤེགས་པ་དེ་དག་ཐམས་ཅད་དང་། བྱང་ཆུབ་

88-1-177a

སེམས་དཔའ་དེ་དག་ཐམས་ཅད་ཀྱིས་དེ་སྐད་ཅེས་གསུངས་ནས་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལ་བཞུགས་ཏེ། སྐུ་དང་གསུང་དང་ཐུགས་རྡོ་རྗེའི་སྐུ་དང་གསུང་དང་ཐུགས་རང་
གི་སྐུ་དང་གསུང་དང་ཐུགས་རྡོ་རྗེ་ལ་དམིགས་ཏེ་ཅང་མི་གསུང་བར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་ཆེན་པོ་གསང་བ་འདུས་པ་ལས་གསང་
བ་ཐམས་ཅད་སྟོན་པ་རྡོ་རྗེའི་ཡེ་ཤེས་ཀྱིས་བྱིན་གྱིས་རློབ་པ་ཞེས་བྱ་བའི་ལེའུ་སྟེ་བཅོ་བརྒྱད་པ་རྫོགས་སྷོ།། །། རྒྱ་གར་གྱི་མཁན་པོ་ཨ་ཙཱརྱ་ཤྲད་དྷཱ་ཀ་ར་ཝརྨྨ་དང་། ཞུ་ཆེན་གྱི་ལོ་ཙཱ་
བ་དགེ་སློང་རིན་ཆེན་བཟང་པོས་བསྒྱུར་ཏེ་གཏན་ལ་ཕབ་པ། །ལྟག་ལུང་རྒྱུད་འབུམ་ལ་བསྟུན་པའི་ཐང་ཆེན་པ་དང་རྒྱལ་མཚན་རིང་མོ་ཞུས་དག་གྲུབ། །
༄༅། །རྒྱ་གར་སྐད་དུ།  ཤྲཱི་བཛྲ་མཱ་ལ་ཨ་བྷི་དཱ་ན་མ་ཧཱ་ཡོ་ག་ཏན་ཏྲ་སརྦ་ཏན་ཏྲ་ཧྲི་ད་ཡ་ར་ཧ་སྱ་བི་ཀ་ཊྃ་ཨི་ཏི།  བོད་སྐད་དུ།  རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་
བརྗོད་པ་རྒྱུད་ཐམས་ཅད་ཀྱི་སྙིང་པོ་གསང་བ་རྣམ་པར་ཕྱེ་བ་ཞེས་བྱ་བ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བཅོམ་ལྡན་འདས་རྣམ་པར་སྣང་མཛད་ཆེན་པོ་ལ་
ཕྱག་འཚལ་ལོ། །དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། །དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་
གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་རྡོ་རྗེ་བཙུན་མོའི་བྷ་ག་རྣམས་ལ་ཚད་མེད་པའི་ཕྱག་རྒྱ་ཆེན་པོས་མངོན་པར་རྟོགས་པས་བཞུགས་ཏེ། དཔག་ཏུ་མེད་

88-1-177b

པའི་རྡོ་རྗེའི་རིགས་དང་འབྲེལ་བའི་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་དུ་མ་དང་ཐབས་གཅིག་ཏུ་ཐམས་ཅད་ཀྱི་ཕྱག་རྒྱ་ཆེན་པོ་མངོན་པར་རྟོགས་པ་མངོན་དུ་བྱ་བ་ལ་བཞུགས་
པ། གཉིས་སུ་མེད་པའི་བདེ་བ་ཆེན་པོ་ཉམས་སུ་མྱོང་བས་དགྱེས་པས་མཆོག་ཏུ་པད་མ་དགྱེས་པ། ཆོས་ཐམས་ཅད་ཀྱང་ཇི་ལྟ་བ་བཞིན་ཉམས་སུ་མྱོང་བ་མཐོང་བས་རྣམ་པར་མི་
རྟོག་པའི་ཡེ་ཤེས་ཀྱི་དེ་ཁོ་ན་ཉིད་ལ་མངོན་དུ་ཕྱོགས་པ། རྡོ་རྗེ་འཆང་ཆེན་པོའི་དམ་ཚིག་བླ་ན་མེད་པའི་དབང་དུ་གྱུར་པ་ལ་རབ་ཏུ་མཁས་པ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་
ཆེན་པོ་དམ་ཚིག་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཞེ་སྡང་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆགས་པ་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་
རྡོ་རྗེ་ལས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཡེ་ཤེས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ས་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་རྡོ་རྗེ་དང་། བྱང་
ཆུབ་སེམས་དཔའ་སེམས་དཔའ་ཆེན་པོ་མེ་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རླུང་རྡོ་རྗེ་དང་། དེ་ལྟ་བུ་རྣམས་གཙོ་བོར་གྱུར་པ་དམ་ཚིག་ཆེན་པོའི་རིགས་
དང་འབྲེལ་བ་བྱང་ཆུབ་སེམས་དཔའ་སྟོང་ཕྲག་བདུན་བཅུ་རྩ་གཉིས་དང་། གཞན་ཡང་རིགས་ཆེན་པོ་དང་འབྲེལ་པའི་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ལ་ནི་འདི་
ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའ་ལ་འགྲོ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའ་རྣམ་པར་རྒྱས་པ་དང་། བྱང་ཆུབ་སེམས་

88-1-178a

དཔའ་སེམས་དཔའ་ཆེན་པོ་ནམ་མཁའི་ཟླ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་གཙུག་ཏོར་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཚམས་རྣམས་
ཀྱིས་ངེས་པར་གྲོལ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སེམས་དཔའ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྙིང་པོ་དང་། བྱང་ཆུབ་སེམས་དཔའ་སེམས་དཔའ་
ཆེན་པོ་རྡོ་རྗེ་བློ་གྲོས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་རྒྱལ་པོ་དང་། བྱང་ཆུབ་སེམས་དཔའ་སེམས་དཔའ་ཆེན་
པོ་རྡོ་རྗེ་དམ་ཚིག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ཆོས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ལོངས་སྤྱོད་དང་། བྱང་ཆུབ་སེམས་དཔའ་སེམས་དཔའ་ཆེན་
པོ་རྡོ་རྗེ་སྤྱི་བོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཀྱི་རྩལ་གྱིས་རྣམ་པར་གནོན་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་རྟོག་མེད་པའི་སྤྱིན་
གཙུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་རྟོག་མེད་པའི་སྒྲ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་རྟོག་མེད་པའི་ཆོས་དང་། བྱང་ཆུབ་སེམས་དཔའ་སེམས་
དཔའ་ཆེན་པོ་རྣམ་རྟོག་མེད་པའི་དམ་ཚིག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བའི་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་དགའ་བའི་རྡོ་རྗེ་དང་། བྱང་ཆུབ་
སེམས་དཔའ་སེམས་དཔའ་ཆེན་པོ་སྣ་ཚོགས་དགའ་བའི་རྡོ་རྗེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ལྷན་ཅིག་སྐྱེས་པའི་རྡོ་རྗེ་དང་། གཞན་ཡང་དཔག་ཏུ་མེད་པའི་རྡོ་རྗེའི་ཐེག་པས་ལྷག་པར་

88-1-178b

གྲོལ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་ཐབས་གཅིག་ཏུ་བཞུགས་སོ། །བཅོམ་ལྡན་འདས་དེ་ཡང་ཆོས་ཀྱི་འཁོར་ལོ་ནི་ཤིན་ཏུ་བསྐོར། སངས་རྒྱས་ཀྱི་མཛད་པ་ཤིན་དུ་ཡོངས་སུ་
མཐར་ཕྱིན། བསོད་ནམས་དང་ཡེ་ཤེས་ཀྱི་ཚོགས་ནི་ཤིན་ཏུ་ཡོངས་སུ་རྫོགས་པ་དེ་འཁོར་ལ་ཞལ་རབ་ཏུ་འཛུམ་པར་བཅས་པས་བཞུགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་
ཆེན་པོའི་འཁོར་རྒྱ་ཆེན་པོ་རྣམས་ལ་གཟིགས་ནས། དེ་དག་སྣོད་དུ་རུང་བར་བྱ་བའི་ཕྱིར་རྡོ་རྗེ་ཕྲེང་བ་མངོན་པར་བྱང་ཆུབ་པའི་རྡོ་རྗེ་ཐེག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ནས། བ་སྤུའི་བུ་ག་ཐམས་ཅད་ལས་འོད་ཟེར་གྱི་དྲ་བ་ཆེན་པོ་བཀྱེ་སྟེ་བཞུགས་སོ། །འོད་ཟེར་གྱི་དྲ་བ་ཆེན་པོ་དེས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ལ་རེག་པས་མཆོག་ཏུ་དགའ་
བ་ཐོབ་པ་ནི་གཉིས་སུ་མེད་པའི་སྦྱོར་བ་དང་ལྡན་པའི་བཅོམ་ལྡན་འདས་རྡོ་རྗེ་འཆང་ཆེན་པོ་ཇི་ལྟ་བ་བཞིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཉིད་དགའ་བ་དང་བདེ་བ་དང་
མཆོག་ཏུ་མགུ་བ་སྐྱེས་ནས་བརྒྱལ་བར་གྱུར་ཏོ། །དེ་ནས་ཡང་དེའི་དུས་སུ་བཅོམ་ལྡན་འདས་ཀྱི་མཛོད་སྤུར་འོད་ཟེར་གྱི་དྲ་བ་ཆེན་པོ་བསྡུས་པར་གྱུར་ཏོ། །བསྡུས་པ་དེ་ཡང་རྡོ་རྗེའི་ལམ་ནས་ལྕགས་
ཀྱུའི་རྣམ་པ་ཅན་གྱི་འོད་ཟེར་ཆེན་པོ་ཉེ་བར་ཕྱུང་བར་གྱུར་པ་དེས་བརྒྱལ་བ་དེ་དག་ལ་རེག་ནས་རྡོ་རྗེ་ཕྲེང་བ་ལྟ་བུ་ཉིད་རྡོ་རྗེའི་ལམ་ནས་གཙུག་ཏོར་གྱི་འཁོར་ལོ་ལ་ཞུགས་ནས་གནས་སོ། །སླར་ཡང་
བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་བདེ་བ་ཆེན་པོ་རྗེས་སུ་མྱོང་བར་གྱུར་ཏེ། རྡོ་རྗེའི་ཡི་གེ་ཧཱུྃ་བརྗོད་པ་དེ་ཉིད་ཀྱིས་བདེ་བ་ཆེན་པོ་དེ་ཉིད་ཉམས་སུ་མྱོང་བ་ཉིད་ཀྱི་ཐུགས་ཀའི་ལྟེ་བའི་

88-1-179a

རྩ་སྦུབས་ནས་འོད་ཟེར་ཆེན་པོ་ཕྱུང་སྟེ་རང་རང་གི་སྟན་ལ་འཁོད་པར་གྱུར་ཏོ། །དེ་ནས་དེ་རྣམས་ཆུའི་གཏིང་ནས་འཐོན་པ་ལྟ་བུར་སེམས་དགའ་བ་སྐྱེས་ཏེ། བཅོམ་ལྡན་འདས་ཀྱི་ངོ་མཚར་ཆེན་པོའི་ཆོ་
འཕྲུལ་མཐོང་ནས་ཤིན་ཏུ་མིག་གདངས་ཏེ། བཅོམ་ལྡན་འདས་ལ་དབྱངས་གཅིག་གིས་ཡང་དག་པར་བསྟོད་དོ། །བཅོམ་ལྡན་རོ་གཅིག་གྱུར་པ་ཡི། །ལྷན་ཅིག་སྐྱེས་པའི་དགའ་བས་རྒྱས། །བཅོམ་ལྡན་མཆོག་
ཏུ་ངལ་བསོ་ཀྱེ། །ངག་གི་ལམ་གྱི་སྤྱོད་ཡུལ་འདས། །བཅོམ་ལྡན་ཉིད་ཀྱི་དགྱེས་ཉམས་ལྟར། །འགྲོ་བ་གསུམ་པོ་ཡང་དག་བདེ། །ཨེ་མའོ་ལྷན་ཅིག་སྐྱེས་བདུད་རྩི། །རོ་བསྟེན་ཐུགས་རྗེ་ཆེན་པོ་སྐྱེ། །
བཅོམ་ལྡན་འདས་སེམས་ཅན་ཐམས་ཅད་ཀྱི། །སེམས་ཅན་དོན་ཀུན་གསལ་བར་མཛད། །དེ་ཉིད་གསུམ་གྱི་རོ་གཅིག་པ། །ཕྱག་རྒྱ་ཆེན་པོ་རབ་དབྱེ་བ། །བཅོམ་ལྡན་རྣལ་འབྱོར་ཆེ་ལ་དགྱེས། །འཆིང་བ་
ཐམས་ཅད་གཅོད་མཛད་ཀྱི། །བཅོམ་ལྡན་དགྱེས་པ་ཆེར་མཛད་ཅིང་། །འགྲོ་བ་སྐལ་བཟང་ངེས་པར་མཛད། །ཨེ་མའོ་རྡོ་རྗེ་ཐེག་པ་བདེ། །རབ་ཏུ་དགའ་ཞིང་མགུ་བ་སྩོལ། །ཨེ་མའོ་སྔགས་ནི་རབ་རྒྱས་
པ། །རང་བྱུང་གོ་འཕང་སྒྲུབ་པ་པོ། །ཨེ་མའོ་ཤིན་ཏུ་ཟབ་མོའི་ཆོས། །དམིགས་པ་མེད་པར་སྟོན་པར་མཛད། །ཨེ་མའོ་རྡོ་རྗེ་འཆང་ཆེན་གཙོ། །གསང་བའི་བདག་པོ་ཤིན་ཏུ་གསང་། །ཨེ་མའོ་མཆོག་
ཏུ་བྱང་ཆུབ་པ། །ཨེ་མའོ་སྤྲོས་པ་རྣམ་སྤངས་ཤིང་། །བདེན་པའི་དོན་ནི་གསལ་མཛད་པ། །ཐེག་པའི་སྒྲོན་མས་སྣང་བར་མཛད། །མགོན་པོ་བདག་ཅག་ཁྱེད་དྲིན་གྱིས། །རྡོ་རྗེ་སེམས་དཔའི་གོ་འཕང་ཐོབ། །
མགོན་པོ་བདག་ཅག་ལམ་ལོག་ཞུགས། །ཁྱེད་གྱིས་ཡང་དག་ལམ་ལ་བཀོད། །མགོན་པོ་བདག་ཅག་མུན་པར་འཐོམས། །ཡེ་ཤེས་སྣང་བ་ཐོབ་པར་མཛད། །དམ་ཚིག་རྡོ་རྗེ་ཉི་མ་

88-1-179b

ཀྱཻ། །ཕྱག་རྒྱ་ཆེན་པོའི་དོན་སྟོན་མཛད། །བཅོམ་ལྡན་ཁྱོད་ལ་ཕྱག་འཚལ་བསྟོད། །ཐུགས་རྗེའི་ཕྱག་རྒྱ་ཆེ་བདག་ཉིད། །ཕྱག་འཚལ་གཉིས་མེད་དགའ་བའི་མཁའ། །དགའ་བའི་ཟླ་བ་ཁྱེད་ལ་འདུད། །
ཅེས་བྱ་བ་ལ་སོགས་པའི་ཚིགས་སུ་བཅད་པས་བཅོམ་ལྡན་འདས་ལ་བསྟོད་པ་མཛད་ནས་སླར་ཡང་འདུས་པར་གྱུར་ཏེ། རྡོ་རྗེའི་ཕྲེང་བ་མངོན་པར་བརྗོད་པ་ཞེས་བྱ་བ་ཤིན་ཏུ་ཕྲ་བའི་ས་ཇི་ལྟ་
བའི་ངོ་བོ་འདྲི་བར་འདོད་ནས་ཡིད་ལ་བྱེད་པ་གཅིག་པ་དང་། སེམས་རྩེ་གཅིག་གིས་དགའ་བར་བྱེད་པའི་གསུང་ཉན་པར་འདོད་ནས་བ་སྤུ་ལྡང་བ་དང་དབུགས་གཡོ་བ་དང་བཅས་པས་ཡང་དང་ཡང་
དུ་བཅོམ་ལྡན་འདས་ལ་ཕྱག་བྱེད་ཅིང་རང་གི་སྟན་ལ་འཁོད་ནས་སེམས་རེ་དོགས་དང་བཅས་པས་གནས་སོ། །བཅོམ་ལྡན་འདས་ཀྱིས་དེ་རྣམས་ཀྱི་དེ་ལྟ་བུའི་སེམས་ཀྱི་རྟོག་པ་ཐུགས་ཀྱིས་
མཁྱེན་ནས་སླར་ཡང་རྡོ་རྗེ་ཕྲེང་བ་མངོན་པར་བྱང་ཆུབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གསང་བའི་རྡོ་རྗེ་ལས་རང་གི་རིག་མ་འཕྱུང་སྟེ། སྒེག་པ་ལ་སོགས་པའི་ཉམས་དང་
ལྡན་པ་བདག་ཉིད་ཀྱིས་འདོད་ཆགས་དང་བྲལ་བའི་གཟུགས་སྤངས་ནས་སྒེག་པ་ལ་སོགས་པའི་ཉམས་དང་ལྡན་པའི་གཟུགས་བླངས་ནས་རང་རང་གི་རིག་མ་ལ་འཁྱུད་དེ། ཕྱག་རྒྱ་ཆེན་པོའི་
རྣལ་འབྱོར་ལ་རྗེས་སུ་ཞུགས་ནས། སླར་ཡང་དེ་དག་དེ་ལྟ་བུའི་གཟུགས་ཉིད་དུ་མཐོང་སྟེ་ངོ་མཚར་སྐྱེས་ནས་མིག་གདངས་ཏེ་རི་མོའི་བཀོད་པ་ལྟ་བུར་མཐོང་བ་ཉིད་ཀྱིས་ཅི་ཡང་མི་སྨྲ་བར་
གྱུར་པས་དེ་ལ་འཁོར་རྣམས་ཡང་དག་པར་འཁོད་པར་གྱུར་ཏོ། །དེ་ནས་བཅོམ་ལྡན་འདས་རང་གི་རིག་མ་ཡང་དག་པར་བསྐུལ་ཏེ། ཕྱག་རྒྱ་ཆེན་པོའི་རྣལ་འབྱོར་དོར་ནས་ཉིད་ཀྱི་སྐུ་གསུང་

88-1-180a

ཐུགས་རྡོ་རྗེ་ལས་རྡོ་རྗེ་བཙུན་མོ་རྡོ་རྗེ་རིགས་ཀྱི་སྙིང་པོ་འདི་གསུངས་སོ། །ཨོཾ་ཨཱཿཧཱུྃ། དེ་ནས་དེ་སྐད་དུ་གསུངས་མ་ཐག་ཏུ་བཅོམ་ལྡན་འདས་ཀྱི་བ་སྤུའི་བུའ་ག་ལས་དེ་བཞིན་གཤེགས་
པ་ཐམས་ཅད་དང་། རིག་མ་དང་བྱང་ཆུབ་སེམས་དཔའ་དང་། ཁྲོ་བོའི་རྒྱལ་པོ་རྣམས་ཕྱུང་བར་གྱུར་ཏོ། །ཕྱུང་ནས་ཀྱང་བཅོམ་ལྡན་འདས་ཀྱི་ཤར་ལ་སོགས་པའི་ཕྱོགས་སུ་རང་རང་གི་སྟན་ལ་གནས་པར་གྱུར་ཏེ། ཁ་
ཅིག་ནི་རྣམ་པར་སྣང་མཛད་ཀྱི་གཟུགས་ཀྱིས་སོ། །ཁ་ཅིག་ནི་རིན་ཆེན་འབྱུང་ལྡན་གྱི་གཟུགས་ཀྱིས་སོ། །ཁ་ཅིག་ནི་འོད་དཔག་ཏུ་མེད་པའི་གཟུགས་ཀྱིས་སོ། །ཇི་སྲིད་གནོད་མཛེས་རྒྱལ་པོ་
དང་གཙུག་ཏོར་འཁོར་ལོས་སྒྱུར་བའི་རྒྱལ་པོའི་བར་གྱིས་གཟུགས་ཀྱིས་སོ། །དེ་ནས་བཅོམ་ལྡན་འདས་ཅུང་ཟད་ཅིག་ཅི་ཡང་མི་གསུང་བར་བཞུགས་སོ། །གང་གི་ཚེ་བྱང་ཆུབ་སེམས་དཔའ་དེ་
དག་ཐམས་ཅད་ཀྱིས་དབྱངས་ཅིག་གིས་ཆེད་དུ་བརྗོད་ནས་སྨྲས་པ་ནི། ཨེ་མའོ་རྡོ་རྗེ་རིགས་ཆེན་པོ། །རྡོ་རྗེ་ཕྲེང་བའི་དོན་སྟོན་མཛད། །ཨེ་མའོ་རྡོ་རྗེ་ཐེག་གསལ་བ། །ཆོས་ཀྱི་དབྱིངས་ཀྱི་
དོན་སྟོན་མཛད། །ཅེས་ལན་གསུམ་བརྗོད་ནས་དེ་དག་གིས་རྡོ་རྗེ་འཆང་ཆེན་པོ་ལ་ཕྱག་འཚལ་ནས་འདུག་པར་གྱུར་ཏོ། །དེ་ནས་དེའི་ཚེ་སྐད་ཅིག་ཐང་གཅིག་ཡུད་ཙམ་དེ་ལ་བྱང་ཆུབ་
སེམས་དཔའ་སེམས་དཔའ་ཆེན་པོའི་འཁོར་རྒྱ་ཆེན་པོ་འདུས་པ་དེ་དག་མཐོང་ནས་ཕྱག་ན་རྡོ་རྗེས་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་
ཡེ་ཤེས་རྡོར་དབང་ཕྱུག །གསང་བའི་པད་མའི་ནང་བཞུགས་པ། །དམ་ཚིག་ཆེན་པོའི་རྣལ་འབྱོར་དབང་། །ཐུགས་རྗེས་བདག་གི་ཚིག་གསོན་ཅིག །བསྐལ་པ་བཟང་པོའི་སངས་རྒྱས་

88-1-180b

རྣམས། །རྡོ་རྗེ་ཐེག་པ་མངོན་འདོད་པ། །བྱང་ཆུབ་སེམས་དཔའ་སེམས་དཔའ་ཆེ། །འདི་དག་ལུས་ཀྱིས་ཕྱག་འཚལ་འཁོད། །སྙིགས་མ་ལྔ་ཡི་དུས་ན་ནི། །མ་འོངས་པ་ཡི་སེམས་ཅན་རྣམས། །བརྩོན་འགྲུས་
ཆུང་ཞིང་བསོད་ནམས་ཆུང་། །ལྟ་བ་ངན་པ་མང་པོ་དང་། །ཚེ་ཐུང་བ་ཡི་སེམས་ཅན་རྣམས། །གོ་འཕང་མཆོག་ནི་ཐོབ་ཅིང་ཞུ། །རྒྱལ་བའི་སྲས་ནི་དེ་དག་དང་། །མ་འོངས་པ་ཡི་སེམས་ཅན་རྣམས། །འཁོར་
བ་ལས་ནི་ཕ་རོལ་དུ། །གང་གིས་མྱུར་དུ་ཐར་བར་འགྱུར། །གཙོ་བོ་རྡོ་རྗེ་འཆང་ཆེན་ལ། །འདི་ལྟར་བདག་ནི་གསོལ་བ་འདེབས། །འགྲོ་བའི་གཙོ་བོ་ཁྱོད་དྲིན་གྱིས། །དེ་ཉིད་མཆོག་ནི་བདག་གིས་འཚལ། །
སངས་རྒྱས་ཀུན་གྱི་གསང་བ་ཡི། །རྒྱུད་རྣམས་ཀུན་གྱི་དོན་བསྡུས་པ། །བླ་ན་མེད་པའི་རིམ་པ་གཉིས། །རྡོ་རྗེ་ཕྲེང་བ་མངོན་རྟོགས་པ། །ཅུང་ཟད་འདྲི་བར་འཚལ་ལགས་ཀྱིས། །རྫོགས་པའི་རིམ་
པའི་རྣལ་འབྱོར་གྱིས། །ཁྱོད་ཀྱིས་བདག་ལ་བསྟན་དུ་གསོལ། །དཔལ་ལྡན་འདུས་པར་བརྡ་ཙམ་གང་། །རྣལ་འབྱོར་བླ་ན་མེད་རྒྱུད་དུ། །ཐུབ་པ་ཆེན་པོས་ཆོས་ཕུང་པོ། །བརྒྱད་ཁྲི་དང་ནི་བཞི་སྟོང་
ངོ་། །དེ་སྐད་སྨྲས་ནས་མདུན་འདུག་སྟེ། །ལུས་ཀྱིས་ཕྱག་ནི་བྱས་ནས་ཀྱང་། །ཡེ་ཤེས་ཆེན་པོ་བཅོམ་ལྡན་འདས། །རྡོ་རྗེ་སེམས་དཔའ་འགྲོ་བའི་བླ། །རྡོ་རྗེ་གསུམ་ནི་རོ་གཅིག་དོན། །དེ་ཉིད་གསུམ་གྱི་
གོ་འཕང་སྟོན། །རྣལ་འབྱོར་རྒྱུད་ཀྱི་སྦས་པའི་དོན། །བདག་ལ་བསྟན་པར་མཛད་དུ་གསོལ། །རྡོ་རྗེ་ཕྲེང་བའི་མིང་ནི་ཅི། །འདུས་པ་ཅི་ཞིག་སྟོང་བ་ཅི། །ཐིག་ལེའི་དབྱེ་བ་དང་ནི་སྒྲ། །གསང་བ་དང་ནི་
དམ་ཚིག་དང་། །སྡོམ་པ་དང་ནི་སྒྲ་ཙམ་དང་། །རླུང་གི་དེ་ཉིད་བདེ་ཆེན་ཅི། །རྡོ་རྗེ་པད་མོ་མཉམ་སྦྱོར་དང་། །སྔགས་ཀྱི་དེ་ཉིད་རྣལ་འབྱོར་པ། །རླུང་རྣམས་དང་ནི་འཁོར་ལོ་དང་། །གྲངས་ནི་ཅི་ཙམ་གང་

88-1-181a

དུ་གནས། །རྣལ་འབྱོར་ལུས་ལ་རྩ་གང་ལགས། །རྣམ་པ་སྣ་ཚོགས་སོགས་སྐད་ཅིག །དགའ་བ་བཞི་དང་རྫས་དང་ནི། །སྔགས་དང་རླུང་དང་ཐིག་ལེ་དང་། །ཡི་གེ་གསུམ་གང་དེ་ཉིད་གསུམ། །
དེ་བཞིན་སྣ་ཡི་རྩེ་མོ་གསུམ། །ལུས་ཀྱི་སྟོང་ཉིད་ཡེ་ཤེས་དང་། །ལྷ་རྣམས་ཀྱང་ནི་ཇི་ལྟར་གནས། །དེ་རྣམས་ཀྱི་ནི་མིང་ནི་ཅི། །འཆར་བ་དང་ནི་ནུབ་པ་ཅི། །མགོན་པོ་དགའ་རྣམས་ཇི་ལྟར་ནི། །
ཡང་དག་སྐྱེ་བ་གསལ་བར་གསུངས། །སྔར་བཤད་རྩ་རྣམས་རྟག་ཏུ་ནི། །རྡོ་རྗེའི་ལུས་ལ་ཇི་ལྟར་རྒྱུ། །མཚམས་ཀྱི་རྩ་གསུམ་དེ་དག་ནི། །གཙོ་བོ་རུ་ནི་ཇི་ལྟར་གསུངས། །རླུང་རྣམས་ཇི་ལྟར་
ལྡང་བ་དང་། །གཙོ་བོ་དེ་རྣམས་ཇི་ལྟར་ཐིམ། །དེ་ནི་མཁའ་འགྲོ་མར་སྡུད་པ། །གཙོ་བོ་ཇི་ལྟར་ཡང་དག་འཐོབ། །རྣམ་རྟོག་རླུང་ནི་རབ་བཅད་ནས། །རྣམ་རྟོག་མེད་པར་ཇི་ལྟར་འཆར། །རྩ་རྣམས་
ཇི་ལྟར་ནུབ་པ་དང་། །སྦྱོར་བ་དྲུག་གིས་ཇི་ལྟར་རྩོམ། །དུས་ཀྱི་མཚན་ཉིད་ཇི་ལྟ་བུ། །གསང་བའི་ཡང་ནི་འབྲས་བུ་ཅི། །ཆོས་ཀྱི་དབྱིངས་ཀྱི་རྡོ་རྗེ་དང་། །རིགས་ཀྱི་དབྱེ་བ་ཇི་ལྟ་བུ། །ཕྱག་རྒྱའི་དབྱེ་
བ་ཇི་ཙམ་ཞིག །ཕུང་པོ་ལ་སོགས་སྐྱེ་མཆེད་དང་། །ཕྱག་རྒྱ་ཆེན་པོའི་མིང་ནི་ཅི། །རོ་རྣམས་ཀྱི་ནི་དབྱེ་བ་དང་། །བདག་གི་སྒྲ་ནི་གང་ལ་གནས། །སྟོང་ཉིད་དབྱེ་བ་བསྡུས་པ་དང་། །སྟོང་པ་ཉིད་ནི་
གང་དུ་སྐྱེ། །ཉིན་མོ་དང་ནི་མཚན་མོ་གང་། །ཨཱ་ལི་ཀཱ་ལི་བརྡ་དང་ནི། །མཚམས་ཀྱི་འཆར་བ་ཇི་ལྟ་བུ། །རྒྱུད་གསུངས་སྔོན་ནི་བསྙེམས་པ་སོགས། །ཆོ་ག་ཉི་ཤུའི་ལས་དང་ནི། །རྒྱུ་མཚན་ཅི་
ཞིག་འབྲས་བུའང་ཅི། །མཆོད་པའི་ཆོ་ག་ཇི་ལྟར་གསུངས། །དེ་བཞིན་ལྷ་མོའི་རང་བཞིན་དང་། །ལྷ་མོའི་མིང་ནི་ཇི་ལྟར་གསུངས། །རྒྱུད་དུ་ཐོག་མར་གསུངས་པ་ཡི། །འདི་སྐད་བདག་སོགས་

88-1-181b

ཇི་ལྟ་བུ། །འདི་སྐད་ཅེས་སོགས་དང་པོའི་ངག །དོན་རྒྱས་པར་ནི་ཇི་ལྟར་འགྱུར། །ནང་གི་བདག་ཉིད་སྦྱིན་བསྲེག་ཅི། །བདུད་རྩི་ལྔ་ནི་བཟའ་བ་དང་། །རྣལ་འབྱོར་མ་ཚོགས་འདུས་པ་དང་། །དེ་བཞིན་གསང་བའི་
བརྡ་དང་ནི། །སྐུ་གསུང་ཐུགས་ཀྱི་རྡོ་རྗེ་ཡི། །དཀྱིལ་འཁོར་རྣམས་ནི་ཇི་ལྟར་གསུངས། །སངས་རྒྱས་དམ་ཆོས་དགེ་འདུན་གྱི། །མིང་རྣམས་བཤད་པ་ཇི་ལྟ་བུ། །བླ་མ་སྟོན་པ་སློབ་དཔོན་དང་། །རྡོ་རྗེ་འཆང་ནི་
བཤད་པ་ཅི། །སློབ་མའི་ཡོན་ཏན་གང་ལྡན་ན། །རྣལ་འབྱོར་རྒྱུད་ཀྱི་སྣོད་དུ་འགྱུར། །དེ་ཡི་སྤྱོད་པའི་དབྱེ་བ་དུ། །དེ་ཡི་འབྲས་བུ་ཇི་ལྟ་བུ། །ཞི་བ་རྒྱས་པ་དབང་དང་ནི། །དེ་བཞིན་བསད་དང་བསྐྲད་པ་དང་། །
རེངས་པར་བྱེད་པ་ཉིད་དང་ནི། །ཇི་ལྟར་བསྒྲུབ་པར་སྦྱོར་བ་དང་། །བསྒྲུབ་བྱ་ལ་ནི་མངོན་སྤྱོད་དང་། །སྔགས་ཀྱི་ཚིག་ནི་ཅི་ཞིག་དང་། །མགོན་པོ་ཁྲོ་བོའི་བཟླས་པ་ཅི། །དངོས་གྲུབ་བརྒྱད་ནི་ཐོབ་པ་དང་། །མངོན་
ཤེས་ལྔ་ནི་ཇི་ལྟར་ཐོབ། །རྣལ་འབྱོར་རྣམས་ཀྱིས་དེ་ཉིད་མཐོང་། །སྐད་ཅིག་གཅིག་ལ་མངོན་བྱང་ཆུབ། །ལུས་བརྟན་པ་དང་རྒས་པ་མེད། །བཅུད་ཀྱིས་ལེན་གྱི་སྦྱོར་བ་དང་། །གསེར་འགྱུར་སོགས་
ཀྱི་སྦྱོར་བ་དང་། །རྡོ་རྗེའི་ཕྱག་རྒྱ་དངོས་གྲུབ་ཆེ། །འགྲོ་བའི་བླ་མ་ཇི་ལྟར་འཐོབ། །ལུས་ཀྱི་རང་བཞིན་གཞལ་ཡས་ཁང་། །དེ་ནི་རང་བཞིན་ཇི་ལྟ་བུ། །འདིས་ནི་གནས་སོགས་ཇི་ལྟར་གནས། །ཐིམ་དང་
ལོངས་སྤྱོད་བདག་པོ་དང་། །རླུང་ནི་གང་གི་མཚན་ཉིད་ཅི། །དེ་དག་འཇིག་པར་ཇི་ལྟར་འགྱུར། །དེ་ལྟར་དྲི་ཚིག་རྫོགས་པ་དང་། །ལག་ན་རྡོ་རྗེ་ཐལ་སྦྱར་ཏེ། །འགྲོ་བའི་བླ་མའི་མདུན་འདུག་ནས། །ལུས་
ཀྱིས་ཕྱག་བྱས་དེ་ནས་ནི། །གཙོ་བོས་རྡོ་རྗེ་སེམས་དཔའ་ལ། །ལེགས་སོ་བྱ་བ་བྱིན་ནས་ནི། །ཚངས་དབྱངས་ཟབ་མོ་སྙན་པ་ཡིས། །འགྲོ་བའི་མགོན་པོས་གསུངས་པ་ཡིན། །རྣལ་འབྱོར་ཆེན་པོའི་
88-1-182a

རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་གསོལ་བ་གདབ་པ་དང་དྲི་བ་དང་། སློབ་མའི་ལས་ཉིད་ལ་སོགས་པ་རྒྱུད་ཀྱི་གླེང་གཞིའི་ལེའུ་ཞེས་བྱ་བ་སྟེ་དང་པོའོ།། །། 
དེ་ནས་བཅོམ་ལྡན་རྡོ་རྗེས་གསུངས། །དེ་ཉིད་གསུང་གིས་འགྲོ་མགོན་གྱིས། །ལག་ན་རྡོ་རྗེ་ལ་བོས་ཏེ། །ཡང་དག་དྲིས་པ་ངེས་བཤད་པ། །སྙིང་པོའི་དོན་ནི་དོན་བསྡུས་པ། །དབྱེ་བར་དཀའ་བའི་
དངོས་པོ་ཀུན། །ཁྱོད་ཀྱིས་དྲི་བར་བྱས་པ་རྣམས། །རྡོ་རྗེ་དབང་ཕྱུག་གསང་ཆེན་བདག །བྱ་བ་སྤྱོད་པའི་རྒྱུད་རྣམས་དང་། །རྣལ་འབྱོར་རྒྱུད་ནི་གང་དུ་ཡང་། །མཆོག་ཏུ་གསང་བ་མ་གསུངས་པ། །རྡོ་
རྗེའི་དབང་ཕྱུག་དེ་ཉིད་མཆོག །དྲིས་པའི་ལན་རྣམས་གསལ་པོར་ནི། །ངེས་པར་ང་ཡིས་རབ་བཤད་བྱ། །སྐད་ཅིག་གིས་ནི་སྤྱན་ཕྱེ་ལ། །མཆོག་ཏུ་རྨད་བྱུང་སྟོན་མཛད་ལ། །ཐུགས་རྗེས་ཁྱབ་པས་
དེ་སྐད་གསུངས། །དེ་ཕྱིར་ཁྱོད་ནི་ལེགས་པར་ཉོན། །དེ་ནས་བཅོམ་ལྡན་འདས་ཐུགས་རྗེས་ཐུགས་བརླན་ཅིང་ཐེ་ཚོམ་ཐམས་ཅད་གཅོད་པ་ལ་ཕྱག་ན་རྡོ་རྗེས་གསོལ་བ་བཏབ་སྟེ་མཆོག་ཏུ་གསང་
བའི་ཚིག་གིས་བཤད་པ་གསུངས་པ་ནི། དབང་བསྐུར་བ་ནི་གཙོ་བོ་སྟེ། །དངོས་གྲུབ་ཐམས་ཅད་རྟག་ཏུ་གནས། །ང་ཡིས་ཇི་བཞིན་དོན་བཤད་ཀྱིས། །དེ་ཕྱིར་ཐོག་མར་ཡང་དག་ཉོན། །
ཐོག་མར་སློབ་མ་གང་གི་ཚེ། །བློ་ལྡན་ཡང་དག་དབང་བསྐུར་ན། །རྫོགས་པའི་རིམ་པའི་རྣལ་འབྱོར་ལ། །དེ་ཡི་ཚེ་ན་སྣོད་དུ་འགྱུར། །ཡང་དག་དབང་བསྐུར་གྱིས་དབེན་ན། །སྒྲུབ་པོས་རྒྱུད་ཀྱི་དོན་
ཤེས་ཀྱང་། །སློབ་དཔོན་སློབ་མར་མཚུངས་པར་ནི། །མི་བཟད་དམྱལ་བ་ཆེན་པོར་འགྲོ། །དེ་ཕྱིར་ཡང་དག་བླ་མ་ནི། །རབ་ཏུ་གུས་པས་བསྙེན་བཀུར་བྱ། །དབང་བསྐུར་ཐོབ་ཅིང་དེ་ཉིད་

88-1-182b

ཤེས། །བློ་ལྡན་སྙིང་རྗེའི་བདག་ཉིད་ཅན། །ཟབ་ཅིང་རྒྱ་ཆེ་དྲི་མ་མེད། །གནོད་དང་འཚེ་བ་རྣམ་པར་སྤངས། །སྐལ་བཟང་ལུས་ནི་རྫོགས་པ་དང་། །མཚན་དང་དཔེ་བྱད་རྣམ་པར་བརྒྱན། །ཆགས་པ་ཆེ་
ལ་གཅིག་ཏུ་དགའ། །ཡུལ་ལ་ཕྲག་དོག་རྣམ་པར་སྤངས། །བག་ཡོད་རྟག་ཏུ་དགའ་བ་དང་། །རྣལ་འབྱོར་མ་ཡི་མངལ་ནས་སྐྱེས། །རྡོ་རྗེ་ཐེག་པ་གཅིག་ཏུ་མོས། །ཐེག་པ་དམན་ལ་རྒྱབ་ཀྱིས་
ཕྱོགས། །དེ་ལ་སོགས་པའི་ཡོན་ཏན་ལྡན། །བླ་མ་སློབ་མས་བསྙེན་བཀུར་བྱ། །ཡང་དག་བླ་མ་རྙེན་ནས་ནི། །སློབ་མའི་རང་བཞིན་དྲི་མ་རྣམས། །དག་དང་རྟོགས་དང་སྨིན་བྱས་ནས། །
ཇི་བཞིན་ཡེ་ཤེས་བཟང་དང་ལྡན། །ཇི་ལྟར་རིན་ཆེན་བདར་བ་དང་། །གསེར་ནི་བསྲེགས་དང་བཅད་པས་བརྟག །དེ་བཞིན་དུ་ནི་སློབ་མ་ཡང་། །ལོ་ནི་བཅུ་གཉིས་བར་དུ་བརྟག །དེ་ཕྱིར་ཕན་
ཚུན་དེ་ལྟ་བུས། །དུས་ཀུན་དུ་ནི་དེ་ལྟར་བརྟག །གཞན་དུ་བགེགས་ནི་འབྱུང་འགྱུར་ཏེ། །དངོས་གྲུབ་འཇོམས་ཤིང་སྡུག་བསྔལ་སྟེར། །དུག་ནི་སྔགས་ཀྱིས་འཇོམས་པ་བཞིན། །སྔགས་ཀྱི་དག་
བྱས་བཅུད་ལེན་བྱེད། །དེ་ཕྱིར་འབད་པ་ཐམས་ཅད་ཀྱིས། །སྔགས་ཀྱི་སློབ་མ་རྟོགས་བྱས་ནས། །བླ་མ་དབང་བསྐུར་ལ་སོགས་ཀྱིས། །དངོས་གྲུབ་ཕྱིར་ནི་ཇི་ལྟའི་དོན། །དེ་ཕྱིར་དབང་བསྐུར་
སློབ་མ་ནི། །མ་དག་པ་ཡང་དག་པར་འགྱུར། །རྡོ་རྗེ་སེམས་དཔའ་བདེ་ཆེན་ལ། །དེ་ལ་ལག་ན་རྡོ་རྗེས་ཞུས། །དབང་བསྐུར་ཇི་ལྟར་རྒྱུད་དུ་ནི། །གཙོ་བོ་རུ་ནི་གསུངས་པ་ལགས། །རྡོ་རྗེ་
སེམས་དཔའ་ཐམས་ཅད་མཁྱེན། །ཐེ་ཚོམ་ཐམས་ཅད་གཅོད་མཛད་པ། །དེ་ཁོ་ན་ཉིད་མཁྱེན་པས་ནི། །ལག་ན་རྡོ་རྗེ་ལ་གསུངས་པ། །དོན་དེ་ཇི་ལྟ་བ་བཞིན་དུ། །ང་ཡིས་ཡང་དག་

88-1-183a

བཤད་ཀྱིས་ཉོན། །དབང་བསྐུར་བ་ཡི་དབྱེ་བ་ནི། །དང་པོའི་དབང་ནི་གཙོ་བོ་སྟེ། །གཉིས་པ་གསང་བའི་མིང་ཅན་ནོ། །གསུམ་པ་ཀུན་ནས་སྦྱོར་བ་སྟེ། །བཞི་པའི་དོན་ནི་དམ་པའོ། །གཙོ་བོ་དབྱེ་བ་བཅུ་གཅིག་སྟེ། །བཅུ་
གཉིས་པ་ནི་གསང་བའོ། །བཅུ་གསུམ་པ་ནི་ཡང་དག་སྦྱོར། །བཅུ་བཞི་པ་ནི་དོན་དམ་སྟེ། །དབང་བསྐུར་རེ་རེ་ས་རེའོ། །རྣམ་པ་གསུམ་ནི་རྒྱུ་ཡི་དབང་། །བཞི་པ་འབྲས་བུར་ཤེས་པར་བྱ། །དགའ་བ་ལ་སོགས་རིམ་པ་
ཡིས། །ཐམས་ཅད་ལ་ནི་ང་ཡིས་ཁྱབ། །མར་ངོ་ཡི་ནི་ཚེས་གསུམ་དང་། །དེ་བཞིན་ཚེས་བཅུ་ཚེས་བཅུ་བཞི། །ཡོན་ཏན་བཟང་ལྡན་སློབ་མ་ལ། །བླ་མས་ཆོ་ག་བཞིན་དབང་བསྐུར། །ལུས་ཕྲ་ལོ་ནི་བཅུ་དྲུག་ལོན། །
གཟུགས་དང་སྐལ་བ་དག་གིས་བརྒྱན། །སྔོ་བསངས་མིག་ནི་ཡངས་པ་དང་། །སྙིང་རྗེའི་བསམ་ལྡན་ཡང་དག་མོས། །དགེ་སྙན་དབང་བསྐུར་ཐོབ་པ་དང་། །རྣལ་འབྱོར་རྒྱུད་ལ་ལྷག་པར་མོས། །ཡང་ན་ལོ་ནི་ཉི་ཤུ་
ལོན། །ཉམས་དགའ་བདེ་བར་བྱེད་པ་སྟེ། །དེ་ལས་ལྷག་པར་སྐལ་མེད་འགྱུར། །དེ་ནི་དངོས་གྲུབ་རིང་དུ་བྱེད། །ལྷག་པར་འཇམ་པའི་བུ་མོ་ལ། །ཆུང་མའམ་ཡང་ན་སྲིང་མོ་འམ། །ཡང་ན་བུ་མོའམ་དད་
པ་ཡིས། །བླ་མ་ལ་ནི་དབུལ་བར་བྱ། །གསེར་དང་རིན་ཆེན་གོས་དང་ནི། །མུ་ཏིག་ཕྲེང་བ་སྣ་ཚོགས་པས། །མཆོད་ནས་བླ་མའི་མདུན་འདུག་ནས། །སློབ་མ་ཡིས་ནི་འདི་སྐད་བརྗོད། །དེང་ནས་བརྩམས་
ཏེ་བདག་བྲན་དུ། །གཙོ་བོས་བདག་ནི་མཆོད་པ་བཞེས། །དེ་ལྟའི་རྣམ་པས་མཉེས་ནས་ནི། །བདག་ཉིད་ཀུན་གྱིས་བླ་མ་མཆོད། །བླ་མའི་ངོ་བོ་རྡོ་རྗེ་འཆང་། །དེ་ཕྱིར་ཡང་དག་བླ་མ་མཆོད། །དེ་ནས་བཅོམ་
ལྡན་ཡུམ་ཕྱག་རྒྱ། །ཡང་དག་མཆོད་ནས་བསྟེན་པར་བྱ། །བསྟེན་པ་ལས་ནི་གང་བྱུང་བ། །ལྟུང་བ་སྐལ་བཟང་ཁ་ལ་ནི། །སྦོམ་པོ་ཐ་ལྟག་སྦྱོར་བ་ཡིས། །ཡང་དག་པར་ནི་ལོངས་སྤྱོད་བྱ། །

88-1-183b

དེ་ལས་སྐྱེས་པའི་ཡེ་ཤེས་ནི། །བདེ་བ་ཆེན་པོ་རང་རིག་པ། །དབྱུང་རྔུབ་པ་ནི་རོ་གཅིག་ཅིང་། །རབ་ཏུ་དགའ་བས་མཆོད་པར་བྱ། །ཧཱུྃ་ཕཊ་སྔགས་ཀྱི་ནོར་བུའི་སྒོར། །བཀོད་དེ་རྡོ་རྗེ་རབ་བསྐྱོད་བྱ། །
དགའ་རྣམས་ཇི་ལྟ་བ་བཞིན་དུ། །སྐད་ཅིག་དེ་ལ་སྐྱེས་གྱུར་པ། །དགའ་བའི་སེམས་ཀྱིས་བདེ་བ་ལ། །རྡོ་རྗེ་བཙུན་མོའི་ཁ་ནས་བརྗོད། །དེ་ཡང་སློབ་མའི་ལག་ཏུ་ནི། །གཏད་ནས་གསལ་བར་
འདི་སྐད་བརྗོད། །ཇི་ལྟར་པད་མཆོད་བྱ་བ་ནི། །བྱས་ལ་ཨེ་བྃ་མཆོག་གི་གདོང་། །གང་ཕྱིར་རྡོ་རྗེ་དབྱིངས་དབང་ཕྱུག །རང་ཉིད་འདི་ཡི་སྙིང་ལ་ཞུགས། །ཐབས་གཞན་གྱིས་ནི་སངས་རྒྱས་ཉིད། །
རྣལ་འབྱོར་པ་ཡིས་ཐོབ་མི་འགྱུར། །ཤིན་དུ་ཕྲ་བའི་དངོས་དེ་ཡང་། །བདེ་ཆེན་རྣལ་འབྱོར་པ་ཡིས་རྟོགས། །རབ་ཏུ་འབད་པས་བསྟེན་པར་བགྱིས། །ལྷན་ཅིག་སྐྱེས་དགའི་མཚན་ཉིད་ནི། །
དབང་བསྐུར་གཙོ་བོར་གྱུར་པས་ན། །ཐམས་ཅད་ཇི་ལྟ་བ་བཞིན་ཐོབ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སློབ་དཔོན་དང་སློབ་མ་བརྟག་པ་དང་དབང་
བསྐུར་བའི་ལེའུ་སྟེ་གཉིས་པའོ།། །། དེ་ནས་དེ་ཉིད་གཞན་ཡང་ཉོན། །རྡོ་རྗེ་ཕྲེང་བའི་དོན་གསལ་བ། །རྒྱུད་རྣམས་ཀུན་དུ་སྦས་པ་ནི། །དྲི་བ་གཞན་ལ་བརྗོད་མི་
བྱ། །རྡོ་རྗེ་ཕྲེང་བ་ཞེས་བྱའི་མིང་། །དེ་ཡང་ས་ནི་བཅུ་གསུམ་པ། །དགའ་བ་བཞི་ཡི་དོན་གྱི་གནས། །ཐམས་ཅད་སྟོང་པ་དགའ་བ་སྟེ། །ངག་གི་སྤྱོད་ཡུལ་རྣམས་ལས་འདས། །
གཉིས་པ་ཐམས་ཅད་རྣམ་པར་སྤངས། །སྐལ་བཟང་རྣལ་འབྱོར་ཀུན་གྱི་མཐའ། །རྣལ་འབྱོར་མ་ཡི་ངག་གི་ཡུལ། །སྟོང་ཉིད་ཡེ་ཤེས་རྡོ་རྗེ་དང་། །རྡོ་རྗེ་ཕྲེང་བ་ཞེས་བཤད་དོ། །སྟོང་

88-1-184a

ཉིད་རྡོ་རྗེ་གསང་པད་མ། །རྩ་ནི་རྡོ་རྗེ་དབྱིངས་དབང་ཕྱུག །ཡེ་ཤེས་མཆོག་ཏུ་བདེ་བ་ཆེ། །ལྷན་ཅིག་སྐྱེས་དགའ་རྨད་བྱུང་བ། །རྡོ་རྗེ་དེ་ཡང་རྣམ་རྟོག་རྣམས། །འབིགས་པར་བྱེད་པར་ཡོངས་སུ་
གྲགས། །ཕྲེང་བ་དེ་རྣམས་ཀྱི་ཡང་རྒྱུན། །བྱང་ཆུབ་སེམས་ཀྱི་རྡོ་རྗེ་རྣམས། །མི་ཕྱེད་པས་ནི་རྡོ་རྗེར་གསུངས། །རྒྱུད་རྣམས་ཀུན་དུ་སྦས་པ་ནི། །གང་ཡང་རུང་བས་བརྗོད་མི་བྱ། །དེ་ནི་དབུགས་སུ་ཡོངས་
སུ་གྲགས། །ཕྲེང་བ་རྒྱུན་ནི་མི་འཆད་པར། །དགའ་བ་རབ་འབབ་བདག་ཉིད་ཀྱིས། །རྣམ་རྟོག་རླུང་ཀུན་འབིགས་པར་བྱེད། །རླུང་ལ་འབིགས་པར་མི་ནུས་སོ། །ཉིན་དང་མཚན་མོ་རྟག་ཏུ་ནི། །བརྒྱ་དང་
བརྒྱད་ལྷག་གསལ་བར་ཡང་། །རྣམ་རྟོག་རང་བཞིན་རླུང་རྣམས་ནི། །འཆར་བ་དང་ནི་འཇོམས་པ་དག །ཇི་ལྟ་བ་བཞིན་རབ་དབྱེ་ཡིས། །རླུང་རྣམས་ཀྱི་ནི་མིང་ཉོན་ཅིག །བཏང་བཟུང་དང་ནི་
དུང་ཕྱུར་དང་། །མྱོས་པ་དང་ནི་བློ་ངན་དང་། །བསིལ་བྱེད་དང་ནི་གཡབ་ས་དང་། །ངར་རྣམས་དང་ནི་སྟ་རེ་དང་། །གཟེགས་པ་ཆུ་སྲིན་ཛ་ཤ་དང་། །རྣམ་པར་གཙིགས་དང་མྱོས་པའི་དུས། །འདོད་
མྱོས་ཆུ་བ་ཆུ་སྲིན་དང་། །སྣ་ཚོགས་སྐྱེད་དང་འདུད་པ་དང་། །སྙེམས་དང་རྔ་དང་སྒྲ་སྒྲོགས་དང་། །རླུང་ལྷ་དང་ནི་གནད་འབིགས་དང་། །མེ་དང་དུས་དང་ཅི་བགྱི་དང་། །རྡོ་རྗེ་མཆོག་སྦྱིན་ཙུ་ཏ་དང་། །
སྦྲ་མ་དང་ནི་ཟླ་བའི་འོད། །ཀམ་པོ་ཛ་དང་རལ་པ་ཅན། །ཡུངས་ནག་རབ་བཀྲམ་དུས་འགུགས་དང་། །སྡིག་པ་དང་ནི་གཡོན་ཅན་སྟེན། །གྲིམས་མོ་དང་ནི་མགྲིན་པ་དང་། །ཀུན་སེལ་མཆོག་སྟེར་
སྨྱོ་བྱེད་དང་། །ང་རྒྱལ་མཚོ་དང་ཚོགས་བདག་དང་། །རྩངས་པ་དང་ནི་ས་ཡི་བློ། །ཐེག་པ་བཟང་དང་མཆོག་ཏུ་སྐྱེས། །དྲི་མེད་ཕྲུ་གུ་ཉི་མ་དང་། །གསལ་བྱེད་དང་ནི་ཉི་མ་གནོན། །སྟོབས་བཞིན་ང་

88-1-184b

རོ་དང་ནི་དུས། །སྡོམ་པ་དང་ནི་མཆོངས་ནས་འགྲོ། །སྦྲང་མ་ཁྱི་དང་མཚན་མ་དང་། །ཐོད་དང་སྒུར་པོ་དྲང་པོ་དང་། །ས་དང་ས་ལ་འགྲོ་མ་དང་། །བྲམ་ཟེ་དང་ནི་སྣ་འགྱུར་གནས། །མ་མོའི་རིགས་དང་ལྕེ་
བསྐྱོད་པ། །མི་སྨྲ་དང་ནི་རྔ་སྒྲའི་སྤྲིན། །དགའ་བར་བྱེད་དང་མིག་ཡངས་དང་། །དྲི་མེད་འོད་བསྲུང་ནེ་ཙོ་དང་། །སྣ་ཚོགས་མཆུ་དང་མིག་མཉམ་དང་། །མཛེས་དང་ཆོས་ཀྱི་དབྱིག་པ་དང་། །འགྲོ་ཀུན་
སྙིང་སྟོབས་བརྟན་པ་དང་། །ཟ་ཕོད་བོང་བུ་སྙོམ་ལས་དང་། །ཁ་གདངས་སྒྲ་ཆེན་སྟོབས་ཀྱིས་རྩེ། །རྩ་བྲན་དབང་བྱེད་གཡོ་སྒྱུ་ཅན། །གཙོ་བོ་ཆེ་དང་རྟག་ཏུ་དགའ། །གློག་ཕྲེང་དང་ནི་དགའ་བྱེད་དང་། །
དབུགས་དབྱུང་ར་ག་ལྕེ་དང་ནི། །བདེ་མཆོག་ཨུ་དུམ་བ་ར་རྨོངས། །པད་མའི་དྲ་བ་པད་མ་བསྐོར། །དགྲ་སྟ་རྨ་བྱ་རླུང་དང་ནི། །རྡོ་རྗེ་དབང་ཕྱུག་རླུང་གི་མིང་། །དེ་ལྟར་ང་ཡིས་བསྟན་པ་ཡིན། །བཅོམ་
ལྡན་དྲིས་པའི་རླུང་རྣམས་ཀྱི། །གནས་རྣམས་ཀྱི་ནི་དབྱེ་བ་ཡིས། །དེ་དག་གང་ལས་ལྡང་བ་དང་། །མཆེད་པ་རྣམས་སུ་བགྱིད་པ་ལགས། །བཅོམ་ལྡན་རྡོ་རྗེ་ཅན་གྱིས་གསུངས། །རླུང་གི་གནས་ཀྱི་
མཚན་ཉིད་ནི། །འཁོར་ལོ་དྲུག་ལ་ཁྱབ་པའི་རླུང་། །ཆོས་ཀྱི་འཁོར་ལོ་རྟག་ཏུ་གནས། །སྲོག་ཅེས་བྱ་བས་འགྲོ་ལ་ཁྱབ། །རྣམ་རྟོག་མེད་པ་མཚན་ཕྱེད་ན། །ནམ་མཁའ་མཆོག་ལས་ཤར་ནས་ནི། །རླུང་
གི་རང་བཞིན་འཇོམས་པར་བྱེད། །རླུང་དེ་དགུ་ཡི་རྣམ་པར་རྒྱུ། །ཆོས་ཀྱི་འཁོར་ལོའི་ཆ་ན་གནས། །མཚན་ཕྱེད་དུས་ནས་བརྩམས་ནས་ནི། །འཁོར་ལོ་དྲུག་ལ་དགུ་བདག་ཉིད། །ཉི་མ་ཕྱེད་ཀྱི་མཐའ་
རུ་ནི། །རླུང་རྣམས་ཀྱང་ནི་ལྡང་བར་བྱེད། །ཉི་མ་ཕྱེད་ནས་བརྩམས་ནས་ནི། །འཁོར་ལོ་དྲུག་ལས་དགུ་བདག་ཉིད། །མཚན་ཕྱེད་ཀྱི་ནི་དུས་ཀྱི་མཐར། །རླུང་རྣམས་གསལ་བར་རྒྱུ་བ་ན། །དེ་ཉིད་གནས་ཀྱི་

88-1-185a

དབྱེ་བ་ཡིས། །སྣ་ཚོགས་པ་ཡི་རྟོག་པར་འགྲོ། །རྣམ་པར་རྟོག་པ་རྣམས་ཕྱེ་ནས། །དེ་དག་མིང་རྣམས་བཤད་པར་བྱ། །འདོད་ཆགས་ཞེ་སྡང་གཏི་མུག་དང་། །རྒྱགས་དང་ང་རྒྱལ་མངོན་པར་ཞེན། །
ཕྲ་དོག་ཁྲོ་དང་སེར་སྣ་དང་། །གཡོ་དང་སྒྱུ་ལ་ཆ་ལུགས་ངན། །བློ་རྒོད་བརྐམ་ཆགས་གཉིད་དང་ནི། །ཐེ་ཚོམ་དང་ནི་ངར་འཛིན་དང་། །དགའ་དང་ཆགས་བྲལ་དྲེགས་པ་དང་། །འཆབ་དང་སྲེད་དང་བག་ཆགས་དང་། །སྒྱུར་
དང་རྨོངས་དང་འདོད་ཆེན་དང་། །རྩོད་དང་རྩེ་འཇོ་སྤྱི་བརྟོལ་དང་། །ཚུལ་འཆོས་དྲེགས་དང་ཀུན་ནས་གདུངས། །རྣམ་འགྱུར་མ་ཞི་ཤེས་བཞིན་མེད། །བེམས་པོ་ལོག་པའི་ང་རྒྱལ་དང་། །འགྱོད་དང་
ཁྲེལ་ནི་མེད་པ་དང་། །གུས་པ་མེད་དང་ཆེས་པ་མེད། །བློ་དམན་ངོ་ཚ་མེད་དང་འཆིང་། །ངོ་ཚ་ཤེས་དང་ངོ་ཚ་དང་། །མི་སྟེར་བ་དང་མྱ་ངན་དང་། །ཡིད་གཉིས་དང་ནི་རློམ་སེམས་མེད། །བསྒྲིམས་དང་ཐེ་ཚོམ་
ངལ་བ་དང་། །དབང་དང་འཁྲུལ་བའི་སྙིང་སྟོབས་དང་། །སྙམ་སེམས་པ་དང་བརྒྱལ་བ་དང་། །ཐིམ་པ་དང་ནི་མི་སྲུན་དང་། །གྱ་གྱུ་སྙོམས་དང་མྱོས་པ་དང་། །རིག་བྱེད་མིན་དང་བག་ཡོད་དང་། །གནས་ངན་ལེན་དང་
ཉམ་ཆུང་ཉིད། །ཡིད་མི་བདེ་དང་ལྷག་པར་རྟོག །སྐྲག་དང་རྨུགས་དང་གཉིད་དང་ནི། །བརྐྱམ་ཆགས་རོལ་པ་ཁྲུང་ཁྲུང་དང་། །འཚེ་བ་ལེ་ལོ་ཡོན་པོ་ཉིད། །བསམ་དང་སྤྱོད་དང་ཞུམ་པ་དང་། །ཀུན་རྫོབ་
དེ་ཉིད་དོན་ཡོད་དང་། །སྟེར་དང་དགའ་བའི་འདོད་པ་དང་། །འཇིགས་དང་འདར་དང་ཕྲ་བདག་ཉིད། །གསལ་དང་རྣམ་གསལ་ལྷད་འཇུག་དང་། །འབྲལ་དང་རྟག་པའི་དེ་ཉིད་དང་། །རུ་སྦལ་
ངོམས་མེད་གནོད་པ་དང་། །མི་གསལ་བ་དང་ཡིད་དུ་འོང་། །གནས་མེད་མང་དུ་སྨྲ་བ་དང་། །བདག་ཉིད་སྐྱེས་བུ་ཉིད་དང་ནི། །ཡ་མཚན་དགའ་དང་སྐྱེ་བོ་ངན། །དམན་པའི་དེ་ཉིད་སྡུག་

88-1-185b

བསྔལ་གསུམ། །འཁོར་བ་ལ་ནི་ཆགས་པ་དང་། །རྟག་ཏུ་བརྒྱ་དང་བརྒྱད་ལྷག་པ། །ཉིན་དང་མཚན་མོར་རྟག་ཏུ་ནི། །རླུང་གི་རང་བཞིན་རྒྱུ་བ་ཡིན། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་
པར་རྟོགས་པ་ལས་རྡོ་རྗེ་ཕྲེང་བའི་ཚིག་དབྱེ་བའི་ལེའུ་སྟེ་གསུམ་པའོ།། །། དེ་ནས་རྡོ་རྗེ་གསུམ་ཉི་མ། །གསང་བའི་པད་མ་ཁ་འབྱེད་པ། །བདེ་བ་ཆེན་པོའི་གོ་འཕང་བཞུགས། །འདུས་པའི་
མཆོག་དོན་རབ་གསུངས་པ། །འདུས་པ་འདྲེས་པ་ཞེས་ནི་བཤད། །འདྲེས་པ་ང་ཡིས་ཁྱོད་ལ་བཤད། །འཁོར་ལོ་བཞི་དང་ཐ་མི་དད། །སྔགས་ནི་ལྷན་ཅིག་ཆོ་ག་བཞིན། །དཔའ་བོ་རྣལ་འབྱོར་མ་
སྦྱོར་བ། །གང་ཚེ་གསང་བའི་རྩ་གཉིས་ནི། །ཡང་དག་སྦྱོར་བ་རེག་གྱུར་པ། །དེ་ཚེ་ནམ་མཁའ་རྣམ་རྒྱས་ཉིད། །ནམ་མཁའ་ལས་ནི་སྐྱེས་པའི་རླུང་། །དེ་ཡིས་མེ་ནི་རབ་ཏུ་འབར། །རྩ་ནི་
སྟོང་ཕྲག་བདུན་བཅུ་གཉིས། །རྩ་རྣམས་རབ་སད་གཟི་བརྗིད་ཀྱིས། །བདེ་བ་ཀུན་གྱི་གོ་འཕང་མཆོག །བདེ་བ་ཆེན་པོའི་འཁོར་ལོར་ཁྱབ། །བདེ་བ་ཆེན་པོའི་བྱང་ཆུབ་སེམས། །རྣམ་པར་ཞུ་
ནས་རྩར་གནས་པ། །རྡོར་གསུམ་རང་བཞིན་གཅིག་འགྱུར་ཕྱིར། །ཁམས་རྣམས་རོ་གཅིག་གྱུར་པ་དང་། །ཕུང་པོ་རྣམས་ནི་ཡོངས་ཟད་དང་། །ངལ་བསོ་བ་ལ་རླུང་རྣམས་ནི། །དགའ་བ་
རྣམས་ནི་ཡང་དག་སྐྱེ། །དེ་ནས་བྱང་ཆུབ་སེམས་ཀྱང་ནི། །གནས་ཀུན་ནས་ནི་ཞུ་གྱུར་ནས། །ངོ་བོ་གཅིག་ཏུ་གྱུར་པ་དང་། །རྩ་ནི་གཅིག་གི་འབྲས་བུ་ནི། །རོ་གཅིག་ཏུ་ནི་གྱུར་པ་ལ། །
འདྲེས་པ་ཞེས་ནི་དེ་ལ་གསུངས། །ཕུང་པོ་ཁམས་དང་དབང་པོ་དང་། །ཡུལ་རྣམས་སུ་ནི་སྦས་པ་རྣམས། །རྣམ་རྟོག་ཀུན་ནས་ཟད་པ་ལས། །བདེ་བ་ཆེན་པོ་ཡང་དག་སྐྱེས། །

88-1-186a

རོ་གཅིག་པ་ནི་ངལ་བསོ་བ། །དེ་ནི་འདུས་པ་འདྲེས་པ་སྟེ། །དེ་ཁོ་ན་ཉིད་མཆོག་གསང་བ། །རྡོ་རྗེ་སེམས་དཔའི་གོ་འཕང་གསུངས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་
པར་རྟོགས་པ་ལས་འདུས་པའི་ཚིག་ལྷག་པར་བཤད་པའི་ལེའུ་སྟེ་བཞི་པའོ།། །། དེ་ནས་གཞན་ཡང་དེ་ཉིད་ཉོན། །སྟོང་ཉིད་དོན་ནི་རབ་རྒྱས་པ། །སྟོང་པ་ཉིད་ནི་ཆོས་རྣམས་ཀུན། །
ནང་དུ་ཁྱབ་པའང་ཆོས་ཉིད་དེ། །དེ་ཉིད་ཡང་དག་ཤེས་པ་ནི། །དེ་བཞིན་ཉིད་དང་རྣམ་མི་རྟོག །བདག་དང་གང་ཟག་ཆོས་རྣམས་ནི། །བདག་མེད་རང་བཞིན་གཅིག་པ་ཉིད། །སྟོང་པ་ཉིད་དང་རང་
རིག་དང་། །ཐམས་ཅད་བདག་ཉིད་རྟག་བཞུགས་པ། །རྣལ་འབྱོར་གཅིག་པུས་རྟོགས་པ་སྟེ། །རྟོག་གེ་པ་ཡི་སྤྱོད་ཡུལ་མིན། །ཆོས་རྣམས་ཐམས་ཅད་མདོར་བསྡུས་པ། །འཁོར་ལོ་དྲུག་ཏུ་རྣམ་
པར་བརྗོད། །དེ་ནས་ནང་དུའང་ཁྱབ་པ་ནི། །རྩ་ཡི་འཁོར་ལོ་ལེགས་རྒྱས་པ། །དེ་ནི་ནམ་མཁའ་ཁྱབ་ཅིང་ཕྲ། །ཁྱབ་བྱེད་ཞི་བའི་མཚན་ཉིད་ཅན། །དམིགས་པ་མེད་ཅིང་རྟེན་པ་མེད། །གཟུགས་མེད་
ཉོན་མོངས་མེད་པ་དང་། །རྣམ་པར་མི་རྟོག་མཆོག་ཏུ་ཞི། །རང་བཞིན་མེད་ཅིང་དྲི་མ་མེད། །གཉིས་སུ་མེད་ཅིང་བྱ་བ་མེད། །གཟུང་དང་འཛིན་པ་རྣམ་པར་སྤངས། །དུས་དང་དཔེ་ལས་འདས་པ་
སྟེ། །ངག་གི་ལམ་གྱི་སྤྱོད་ཡུལ་བྲལ། །ཆོས་ཉིད་ཆོས་ནི་ཐམས་ཅད་ཀྱིས། །ཇི་ལྟ་བ་བཞིན་མངོན་པར་བརྗོད། །དངོས་དང་དངོས་མེད་རྣམ་པར་བྲལ། །དགེ་དང་མི་དགེའི་སྲིད་ལས་གྲོལ། །དེ་ནི་ཀུན་ནས་
བསྒྲིབས་པ་མེད། །ནམ་མཁའ་ལྟ་བུར་མཆོག་ཏུ་ཁྱབ། །ཆོས་རྣམས་ཇི་ལྟ་བ་བཞིན་སྐྱེ། །དེ་ནི་དེ་བཞིན་ཉིད་ཅེས་བརྗོད། །གང་ནས་ཀྱང་ནི་མ་འོངས་ཤིང་། །གང་དུ་ཡང་ནི་འགྲོ་བ་མེད། །རྨོངས་དང་

88-1-186b

འཁྲུལ་པ་གཅིག་པུ་ལས། །དེ་ནི་རབ་ཏུ་སྤྲོ་བར་སྣང་། །བདེ་བ་དང་ནི་སྡུག་བསྔལ་སྤངས། །འདོད་ཆགས་ཞེ་སྡང་སོགས་མི་གོས། །འཁྲུལ་དང་རྣམ་པར་འཁྲུལ་པར་འབྲེལ། །རྟོག་པ་དང་བྲལ་དྲི་མ་མེད། །བདག་
དང་སྲོག་དང་སྐྱེ་བ་པོ། །སྐྱེས་བུ་དེ་བཞིན་གང་ཟག་དང་། །ཤེད་ལས་སྐྱེས་དང་ཤེད་བུ་དང་། །བྱེད་པ་པོ་དང་ཚོར་བ་པོ། །ཤེས་པ་པོ་དང་མཐོང་བ་པོ། །སྒྲོ་འདོགས་པ་ཡི་རྣམ་པར་སྤངས། །ཕུང་པོ་སྐྱེ་
མཆེད་ཁམས་ལ་སོགས། །རྣམ་ཤེས་དང་ནི་གཟུང་བ་ཡིས། །སྒྲིབ་པ་མེད་ཅིང་མཆོག་ཏུ་ཕྲ། །ནམ་མཁའ་མཆོག་ལ་ཡང་དག་གནས། །དེ་ལྟར་མ་ལུས་སྟོང་ཉིད་དོ། །བརྗོད་དང་བརྗོད་བྱའི་དོན་
དང་བྲལ། །མིང་ཙམ་གཅིག་པུ་ཁོ་ན་ཡང་། །རང་བྱུང་མཆོག་ཏུ་རྨད་བྱུང་བའོ། །བརྗོད་པ་ཡི་ནི་ཀུན་རྫོབ་ཏུ། །དེ་ནི་ང་ཡིས་ཡང་དག་བཤད། །རང་རིག་ཤིན་ཏུ་ཕྲ་བའི་ཕྱིར། །དེ་ཁོ་ན་ཉིད་མཐོང་
བ་མེད། །བདག་ཉིད་རང་གི་ངོ་བོར་རིག །ཕ་རོལ་གཞན་གྱི་སྤྱོད་ཡུལ་མིན། །དེ་ནི་རང་རིག་པར་བཤད་དོ། །ཆོས་ཀུན་གནས་ནི་ཞི་བའོ། །རྣམ་རྟོག་གིས་འཁྲུལ་རྟོག་གེ་གང་། །མི་ཤེས་པ་ཡི་
རྨོངས་པ་རྣམས། །དོན་དམ་པར་ནི་མི་ཤེས་ཤིང་། །ཀུན་རྫོབ་དགྲ་ཡི་མཛོད་འཛིན་པ། །ཡེ་ཤེས་མཆོག་ནི་མི་ཤེས་ཤིང་། །རྟོག་གེ་སྟོང་ཉིད་སྨྲ་བར་བྱེད། །རྣལ་འབྱོར་བསམ་གཏན་རྣལ་འབྱོར་
པས། །དེ་ནི་མཆོག་ཏུ་ཕྲ་བར་སྤྱོད། །སྟོང་ཉིད་ཡང་དག་ནམ་མཁའ་ཆེ། །ཤེས་དང་ཤེས་བྱ་རྣམ་པར་སྤངས། །རྟོག་པའི་རྣམ་པ་རྣམས་དང་བྲལ། །སྟོང་པ་ཉིད་ཀྱི་འཁོར་ལོར་བརྗོད། །ཕུང་པོ་ལྔ་
ཡི་བདག་ཉིད་ལུས། །འཁོར་ལོ་དྲུག་གི་ཕུག་ནང་ན། །ཟླ་བ་ཕྱེད་པའི་ཆ་ལྟ་བུ། །སྟོང་ཉིད་རླུང་གི་འཁོར་ལོར་གནས། །ཕྱེད་མིན་གང་བ་མེད་པ་དང་། །ཇི་ལྟར་བག་ཆགས་ཆུ་ཟླ་བཞིན། །རླུང་གི་འཁོར་

88-1-187a

ལོ་སྲོག་ཏུ་བཤད། །མཚན་ཕྱེད་སྐད་ཅིག་མ་ལ་འཆར། །དེ་ལྟར་ཡང་དག་བསྒོམ་པ་ནི། །འདི་ནི་སྟོང་ཉིད་སྒོམ་བྱེད་པའོ། །དོན་དམ་གཉིས་མེད་རྣལ་འབྱོར་གྱིས། །ཡང་ན་རྒྱུ་འབྲས་སྦྱོར་
བའི་ཕྱིར། །དེ་ནི་རང་བཞིན་འགྲུབ་པར་བསྒོམ། །དོན་དམ་རང་གི་ངོ་བོར་ནི། །ཀུན་རྫོབ་ཀྱང་ནི་དེ་བཞིན་དུ། །བསྒོམས་པས་འཁོར་བ་འཇོམས་པར་འགྱུར། །ཇི་ལྟར་ཏིལ་ལ་ཏིལ་མར་ནི། །གནས་
པ་ཉིད་ལ་མཐོང་མི་འགྱུར། །དེ་བཞིན་ལུས་ལ་སྟོང་པ་ཉིད། །གནས་ཀྱང་བསྒྲིབས་པས་མཐོང་བ་མེད། །བླ་མའི་ཞལ་ལས་འདི་ཤེས་པར། །ཡང་དག་རིག་པས་ཀུན་རྫོབ་སྤངས། །རྣལ་འབྱོར་
ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྟོང་པ་ཉིད་ཀྱི་དོན་བསྟན་པའི་ལེའུ་སྟེ་ལྔ་པའོ།། །། དེ་ནས་གཞན་ཡང་བཤད་ཀྱིས་ཉོན། །ཐིག་ལེའི་
དབྱེ་བ་བླ་ན་མེད། །འཇིག་རྟེན་ཐིག་ལེ་དབྱེ་བས་དབེན། །འཁོར་བར་ཡང་དང་ཡང་དུ་འཁོར། །མཛོད་སྤུའི་དབུས་ན་གནས་པ་ནི། །ཐིག་ལེ་རླུང་དུ་ཡང་དག་བཤད། །སྔགས་ཀྱི་དེ་ཉིད་ཀྱིས་ནི་འབྱེད། །
རྣལ་འབྱོར་མདུད་པ་བཀྲོལ་ནས་ནི། །རླུང་གི་དེ་ཉིད་རིག་པ་དེ། །མཆོག་ཏུ་འབྱེད་པའི་སྦྱོར་བ་ཡིས། །སྦྱོར་བ་དེ་ཡང་མི་ཤེས་པར། །རླུང་དང་སྔགས་ཀྱི་རྣལ་འབྱོར་གྱིས། །རྗོད་དང་བརྗོད་བྱའི་དཔེ་
ལས་འདས། །མིག་གསལ་ལོག་པར་མཐོང་རྣམས་ཀྱིས། །བསམ་གཏན་བསྒོམ་བྱ་དང་བྲལ་བའི། །སངས་རྒྱས་རྣམས་ནི་ཐོབ་པ་དཀའ། །རྣལ་འབྱོར་མ་ཡི་དྲིན་གྱིས་ནི། །ཞལ་ནས་ཞལ་དུ་
བརྒྱུད་ནས་གནས། །བཅོམ་ལྡན་བདེ་བ་ཆེན་པོ་ལ། །རྡོ་རྗེ་སེམས་དཔས་སླར་ཞུས་པ། །འགྲོ་བའི་མགོན་གྱིས་བསྟན་དུ་གསོལ། །ཐིག་ལེའི་དབྱེ་བ་རིག་བཅས་པ། །རྣལ་འབྱོར་མཆོག་ནི་གང་

88-1-187b

གིས་ཤེས། །སྦྱོར་བས་མདུད་པ་འབྱེད་པར་བྱེད། །ཁམས་གསུམ་པ་ཡི་འགྲོ་བ་འདི། །མྱུར་དུ་དངོས་གྲུབ་མཆོག་ཏུ་འགྲོ། །དེ་སྐད་ཞུས་ནས་རྡོ་རྗེ་ཅན། །རྡོ་རྗེ་དབང་ཕྱུག་ལ་གསུངས་པ། །མཆོག་ཏུ་
གསང་བ་འདི་ཉིད་ནི། །གང་དུའང་གསལ་བར་མ་གསུངས་པ། །ཐིག་ལེའི་དབྱེ་བ་དེ་ཡང་ནི། །ང་ཡིས་བཤད་ཀྱིས་དེ་ཉིད་ཉོན། །སྙིང་གི་པད་སྦུབས་ནམ་མཁའ་ལ། །ཡེ་ཤེས་རྡོ་རྗེ་རྟག་ཏུ་བཞུགས། །
སྟེང་དང་འོག་ལ་བརྟེན་ནས་ནི། །སྲོག་དང་ཐུར་སེལ་རླུང་ཆེན་གནས། །དེ་ཡང་དབྱེ་བར་དཀའ་བ་ཡི། །དབུས་སུ་མདུད་པ་གསུམ་གྱིས་དཀྲིས། །དེ་ཡིས་མཆོག་དང་བཅོམ་བྱས་པས། །
སྟེང་དུ་འགྲོ་བ་ཐོབ་མི་བྱེད། །དེས་བཅོམ་སླར་ཡང་རྣམ་ལྔ་རྒྱུ། །སྲོག་དང་ཐུར་སེལ་གྱེན་རྒྱུ་དང་། །ཁྱབ་བྱེད་དང་ནི་མཉམ་གནས་ཉིད། །རྩེ་མོ་ལྔ་ལས་རྒྱུན་དུ་ནི། །རྩ་ལྔ་ལ་ནི་ཡང་དག་བརྟེན། །རྒྱགས་
དང་རྣམ་པར་རྒྱས་པ་དང་། །མྱོས་དང་བཏུང་དང་འཛའ་བོ་སྟེ། །དེ་དག་རྩ་ནི་ལྔར་ཤེས་བྱ། །རྡོ་རྗེའི་འོག་ཏུ་གསལ་བར་ཁྱབ། །སྟེང་གི་སྲོག་གི་དབུས་ན་ཡང་། །རྡོ་རྗེའི་ལྟེ་བའི་མཁའ་དབྱིངས་
འགྲོ། །སྲོག་ཅེས་བྱ་བའི་རླུང་ཆེན་པོ། །ལྟེ་བ་མདུད་པ་དང་ཕྲད་པས། །བཅོམ་ནས་ཀྱང་ནི་རྣམ་ལྔར་རྒྱུ། །རྩེ་མོ་རྣམས་ལ་རྩ་ལྔར་ནི། །ཟླ་བའི་ཆ་དང་སྣ་དང་ནི། །བསྙེན་བཀུར་ལྐོག་ཤལ་
མཆིན་པ་སྟེ། །རྩ་ནི་ལྔ་ཡི་མིང་ཡིན་ནོ། །རྩ་ནི་ལྔ་ལས་རྒྱུ་བའི་རྒྱུན། །ཀླུ་དང་རུས་སྦལ་རྩངས་པ་དང་། །ལྷ་སྦྱིན་དང་ནི་གཞུ་ལས་རྒྱལ། །དེ་ལྟར་རྩ་དེ་དང་བཅས་པ། །ལུས་ཀྱི་ཐུར་དུ་འགྲོ་བས་
ན། །སྤྲུལ་པའི་འཁོར་ལོའི་རྩ་རྣམས་ནི། །ཡང་དང་ཡང་དུ་བསྐུལ་བྱས་ནས། །བསྐུལ་བས་ཀྱང་ནི་རྒྱས་པ་ན། །གཏི་མུག་ཆེན་པོས་དབང་དུ་བྱེད། །དེ་སྟེང་ཆོས་ཀྱི་འཁོར་ལོ་ན། །

88-1-188a

གནས་པའི་རྩ་ནི་བསྐུལ་བྱས་ནས། །དེ་རྣམས་ལྷན་ཅིག་རྩ་དེ་དག །ཞེ་སྡང་གིས་ནི་དབང་དུ་བྱེད། །ཡང་དག་བསྐུལ་ནས་དེ་སྟེང་གི། ལོངས་སྤྱོད་མཆོག་ཏུ་ངོ་མཚར་སྐྱེ། །རྩ་དེ་རྣམས་དང་
ལྷན་ཅིག་ཏུ། །ཆགས་པ་ཆེན་པོས་དབང་བྱས་ནས། །བསྐུལ་བ་དང་ནི་དེ་སྟེང་གི། སྤྱི་བོའི་འཁོར་ལོའི་བདེ་ཆེན་དུ། །རྩ་དེ་རྣམས་དང་ལྷན་ཅིག་ཏུ། །བྱང་ཆུབ་སེམས་ཀྱིས་གང་བར་བྱེད། །རྣམ་རྟོག་
རྣམ་པར་རྒྱུ་བྱེད་ཅིང་། །སྣ་ཚོགས་དབྱེ་བ་ཐམས་ཅད་ལས། །སྟེང་མ་རྣམས་ཀྱང་ཐུར་དུ་འགྲོ། །སྲོག་གིས་རབ་ཏུ་བཅོམ་ནས་ནི། །དེ་དག་ཐམས་ཅད་རྡོ་རྗེའི་རྩེར། །ཞུགས་ནས་ཐུར་དུ་ཁ་བལྟས་
པའོ། །དེ་ཡང་ཐུར་དུ་མི་འགྲོ་སྟེ། །མ་རིག་མདུད་པའི་འཁོར་ལོ་ནི། །རྣམ་པར་ཤེས་པའི་ཤིང་རྟའི་རླུང་། །དེ་ནི་བག་ཆགས་དང་འདྲེས་པས། །མིག་དང་རྣ་བ་དེ་བཞིན་སྣ། །ལྕེ་སྟེ་རྣམ་པར་
ཤེས་པ་བཞི། །རྩེ་མོ་བཞི་ནས་ཕྱུང་ནས་ནི། །བག་ཆགས་རྣམ་ཤེས་དང་འདྲེས་ནས། །རྣམ་ཤེས་དབང་པོ་ལྷན་ཅིག་ཏུ། །དོན་ནི་རབ་ཏུ་རྒྱས་པར་བྱེད། །སླར་ཡང་ལམ་དེ་ཉིད་ནས་ནི། །ཇི་ལྟ་
བ་ཡི་རིམ་པས་འཇུག །དེ་ཡི་དངོས་ཉིད་དེ་སྦྱོར་བས། །རྣམ་ཤེས་བསྟེན་པའི་སྐད་ཅིག་ལ། །དེ་ཡི་བག་ཆགས་བཅས་ཀྱིས་འཕེལ། །འཁྲུལ་བཅས་འཁོར་བའི་འཁོར་ལོ་ལས། །དེ་ལྟར་
བག་ཆགས་ཀྱིས་བསླད་པའི། །རྣམ་ཤེས་ལས་ཀྱི་ངོ་བོར་འགྲོ། །དེ་ཉིད་ཀྱང་ནི་སྲོག་སྦྱོར་བས། །ཁམས་གསུམ་པར་ནི་འཁྲུལ་པའོ། །བྱེད་པོ་ལས་ཀྱི་འབྲས་བུར་མྱོང་། །གཞན་ཉིད་དུ་ནི་
འཁོར་བ་མེད། །དེ་ཕྱིར་འཁོར་བ་གཞོམ་དོན་དུ། །ཐིག་ལེ་གོ་འཕང་གསལ་བར་དབྱེ། །བསྒོམ་པ་ལ་ནི་འབད་པར་བྱ། །མ་རིག་གཞན་ནི་མི་ཤེས་པ། །དབུས་ཀྱི་མདུད་པ་དེ་

88-1-188b

ཡང་ནི། །དེ་ཕྱེད་ན་ནི་དངོས་གྲུབ་འགྱུར། །རྣལ་འབྱོར་རྣལ་འབྱོར་གྲུབ་པ་སྟེ། །ཡེ་ཤེས་ལྔ་ནི་ཐོབ་ནས་ནི། །མངོན་ཤེས་ལྔ་ནི་ཐོབ་པ་དང་། །མཆོག་ཏུ་གསང་བ་ཐོབ་ནས་ནི། །བློ་བཟང་ཇི་ལྟ་བ་
བཞིན་གནས། །ཕྲེང་བ་མི་དགོས་བསྒོམ་མི་དགོས། །བྱ་བ་མི་དགོས་དགག་མི་དགོས། །སྔགས་ཀྱི་དེ་ཉིད་གཅིག་པུ་ཡིས། །ཡང་དག་རྫོགས་པའི་སངས་རྒྱས་འཐོབ། །ལས་ཆོས་དམ་ཚིག་ཕྱག་
རྒྱ་ཡི། །དབྱེ་བ་འདི་ནི་མ་གསུངས་སོ། །འཁོར་ལོའི་དབྱེ་བས་མ་ཡིན་ཞིང་། །དེ་བཞིན་དགའ་བ་སོགས་ཀྱི་མིན། །ཕྱག་རྒྱ་ཆེན་པོའི་གོ་འཕང་གསལ། །སྔགས་ཀྱི་དེ་ཉིད་ཀྱིས་ནི་འཐོབ། །སྟོང་
ཉིད་ཡེ་ཤེས་རྡོ་རྗེ་དང་། །གཉིས་མེད་བདེ་བ་དེ་ཉིད་དང་། །གསང་བའི་ཐིག་ལེའི་དབྱེ་བ་དང་། །རྣལ་འབྱོར་གྲུབ་པའི་བདེ་ཆེན་པོ། །མ་རིག་སྒོ་ངའི་སྦུབས་འབྱེད་ཅིང་། །འཇིག་ཚོགས་ལྟ་བའི་རི་བོ་འཇོམས། །
ཕྱག་རྒྱ་ཆེན་པོའི་དངོས་གྲུབ་དང་། །རབ་ཏུ་བྱེད་པ་མཆོག་ཏུ་བཤད། །སྔགས་ཀྱི་དེ་ཉིད་ངེས་སྦྱོར་བས། །རིགས་ཤིང་ཡན་ལག་གསལ་བ་གང་། །རྣལ་འབྱོར་མ་ཡི་བཀའ་དྲིན་དང་། །བླ་མའི་ཞལ་
ལས་ངེས་རྟོགས་འགྱུར། །མན་ངག་མེད་པའི་བཟླས་པ་ནི། །སྔགས་ཀྱི་རྒྱལ་པོ་བློ་རྨོངས་བྱེད། །དེ་ཡིས་དཀའ་བ་གཅིག་པུ་དང་། །ཆུ་བསྲུབས་མར་ནི་མི་འགྱུར་ལྟར། །དེ་བཞིན་མན་
ངག་དང་བྲལ་སྔགས། །སྐྱེས་བུས་ཇི་སྲིད་འཚོ་ཡི་བར། །བཟླས་ཀྱང་དེ་ཡི་འབྲས་བུ་ཡི། །ཆ་ཙམ་ཐོབ་པར་མི་འགྱུར་རོ། །མི་ཤེས་པ་ཡི་མི་འགའ་ཞིག །རྒྱ་མཚོ་བཞི་ཡི་
ཕ་མཐའ་ཡི། །ས་ལ་ཤིན་ཏུ་འགྲོ་འདོད་པ། །ལམ་ནི་གང་ཡིན་མི་འདྲི་གང་། །དེ་ལྟར་བདག་ཉིད་འགྲོ་བར་བྱེད། །དེ་བཞིན་དཀའ་བ་ཆེར་བྱེད་པའི། །མན་ངག་དང་བྲལ་སྒྲུབ་པ་

88-1-189a

པོ། །འབྲས་བུ་མེད་ཅིང་མཁས་པ་ཡང་། །སྒྲུབ་པ་པོ་ནི་ཁོང་ཁྲོ་སྐྱེ། །ཁོང་ཁྲོ་སྐྱེས་པའི་སྐད་ཅིག་ལ། །འབྲས་བུ་མེད་ཅིང་ངུ་འབོད་འགྲོ། །དེ་ཕྱིར་འབད་པ་ཐམས་ཅད་ཀྱིས། །དད་
པས་བླ་མ་བརྒྱུད་པ་ལས། །མན་ངག་དག་ནི་བསླབ་པར་བྱ། །གང་ཕྱིར་བརྒྱུད་པའི་ལུང་གིས་ཁྱབ། །བརྒྱུད་པའི་རིམ་པས་གནས་པར་བྱེད། །དེ་ནི་རྣལ་འབྱོར་མ་ཞལ་དང་། །བླ་མའི་
ཞལ་ལས་འབད་པ་ཡིས། །དེ་ཉིད་མཆོག་ནི་བསླབ་པར་བྱ། །སྔགས་ཀྱི་མན་ངག་བརྒྱུད་པའི་ལུང་། །དེ་ཐོས་ལག་ན་རྡོ་རྗེས་ཀྱང་། །རྡོ་རྗེ་སེམས་དཔའ་བདེ་བ་ཆེ། །ཐེ་ཚོམ་ཐམས་ཅད་
གཅོད་པ་ལ། །ཕྱག་བྱས་ནས་ནི་ཞུས་པ་ནི། །ཁྱེད་ཀྱིས་བསྟན་པ་འདི་ཉིད་མཆོག །བཅོམ་ལྡན་འདས་ཀྱིས་རྒྱལ་པོ་ནི། །སྔགས་ཀྱི་དངོས་གྲུབ་བླ་ན་མེད། །གང་བརླབས་སྐད་ཅིག་དངོས་གྲུབ་
འགྱུར། །དེ་ནས་བཅོམ་ལྡན་རྡོ་རྗེས་གསུངས། །སྔགས་ཀྱི་དེ་ཉིད་རབ་གསལ་བ། །དེ་ཉིད་མཆོག་ཏུ་གསང་བ་ནི། །གང་དུའང་ང་ཡིས་མ་བཤད་པ། །སྐལ་བ་མེད་པ་བསམ་པའི་རྒྱུས། །རྒྱུད་རྣམས་ཀུན་དུ་
སྦས་བྱས་ལ། །དེ་ནི་ང་ཡིས་བཤད་ཀྱིས་ཉོན། །སྔགས་ཀྱི་རྒྱལ་པོ་བླ་ན་མེད། །སྔགས་ཀྱི་སྤྱད་པ་སྤྱོད་པ་ཡིས། །གང་གི་མྱུར་དུ་དངོས་གྲུབ་འགྱུར། །ཐོག་མར་ཨུཥྨའི་ཐ་མ་བྲི། །དབྱངས་ཡིག་དྲུག་པས་
རྣམ་པར་བརྒྱན། །སྡེ་ཚན་ཐ་མའི་མཐའ་དང་ལྡན། །དབྱངས་མེད་པ་ཡི་ཆ་དང་བཅས། །ཨུཥྨའི་མཐའ་ལ་དབྱངས་ཡིག་འདི། །དགུ་པ་དང་ནི་ཡང་དག་ལྡན། །མཐར་ནི་ཚེག་དྲག་མཆོག་གི་སྒྲ། །སྔགས་
ཀྱི་གཙོ་བོ་བཏུ་བར་བྱ། །དེ་ལྟར་ཡི་གེ་གཉིས་ཀྱི་མིང་། །སྔགས་ཀྱི་བརྡ་ནི་རྨད་བྱུང་བ། །འཛིན་པ་ཐམས་ཅད་སྤངས་པའི་ཕྱིར། །སྒྲ་དང་ཐིག་ལེའི་མིང་དུ་བྱས། །རླུང་གཉིས་ཀྱིས་ནི་ཕྱེ་ནས་ནི། །མ་

88-1-189b

རིག་མདུད་པ་འབྱེད་པར་བྱེད། །ཕྱག་རྒྱ་ཆེན་པོ་མཆོག་གི་རྒྱུ། །མཆོག་ཏུ་ཞི་བའི་ཡི་གེ་གཉིས། །མན་ངག་ཐོབ་པའི་འདོད་པའི་དོན། །གང་གིས་ཟླ་བ་དྲུག་བཟླས་ན། །ཐིག་ལེའི་སྒྲ་ཡི་གོ་འཕང་གསལ། །འདོད་
པའི་དོན་ཀུན་སྒྲུབ་པར་བྱེད། །སྐྱེ་བོས་དབེན་པ་ལྷ་ཡི་གནས། །སྒྲ་ཡི་ཚེར་མ་རྣམས་དང་བྲལ། །བགེགས་མེད་སྐལ་བཟང་ཉམས་དགའ་བ། །བསྐྱེད་མོས་ཚལ་གཞི་བདེ་བ་ཆེ། །འདོད་པ་ལྔ་ལ་ལོངས་
སྤྱོད་པས། །སྔགས་ཀྱི་གཙོ་བོ་འགྲུབ་པར་འགྱུར། །འདི་ནི་གཞན་ཡང་བཤད་ཀྱིས་ཉོན། །ཁྱིམ་དུ་བདེ་བའི་ཕྱག་རྒྱས་གནས། །གང་གིས་དངོས་གྲུབ་མཆོག་ཏུ་འགྱུར། །སྒྲུབ་པོ་བདེ་བའི་སྟན་འདུག་
ནས། །མིག་གཉིས་སྣ་རྩེར་གཏད་བྱས་ནས། །སྣ་ནི་ལྟེ་བའི་ཚད་དུ་བཞག །ཕྲག་གོང་བསྙམས་ལ་ལྕེ་རྐན་སྦྱར། །སོ་དང་མཆུ་ནི་བདེ་བར་བཞག །དབུགས་ཀྱི་འབྱུང་རྡུབ་ཀློད་ནས་ནི། །ཅུང་ཟད་
ཅུང་ཟད་རྩོལ་བྲལ་ནས། །ཇི་ལྟ་བ་བཞིན་འབྱུང་རྡུབ་ནི། །རྡོ་རྗེ་དཀྱིལ་ཀྲུང་ལེགས་གནས་པས། །དེ་ལྟར་ཕྱག་རྒྱ་དང་ལྡན་པས། །ཡི་གེ་གཉིས་ནི་རྟག་ཏུ་བཟླས། །ཐིག་ལེའི་དབྱེ་བས་བདེ་བ་ཆེ། །
ཟླ་བ་དྲུག་གིས་རྣལ་འབྱོར་མཆོག །ཐོབ་འགྱུར་འདི་ལ་ཐེ་ཚོམ་མེད། །རྩ་བའི་རྒྱུད་ནི་དང་པོ་འདི། །ཨ་བ་དྷཱུ་ཏཱི་དྲི་མེད་གནས། །རླུང་གི་དེ་ཉིད་ཡེ་ཤེས་ཆེས། །རྡོ་རྗེ་སེམས་དཔའ་ཡི་ནི་རྒྱུ། །རི་
ལུ་རལ་གྲི་རོ་ལངས་དང་། །རྒྱལ་པོ་མིག་སྨན་བཅུད་ཀྱིས་ལེན། །དམག་དཔུང་རེངས་དང་བརྩིགས་པ་འབིགས། །རིག་འཛིན་གྱི་ནི་གོ་འཕང་མཆོག །མི་སྣང་བ་དང་གཏེར་མཐོང་བ། །འདོད་
དགུར་བསྒྱུར་དང་གཟུགས་མཐོང་དང་། །གསེར་འགྱུར་དང་ནི་དུག་ལས་རྒྱལ། །མེ་ཡི་ནང་དུ་འཇུག་པ་དང་། །མངོན་ཤེས་ལྔ་ཡི་གོ་འཕང་དང་། །ཡེ་ཤེས་ལྔ་ནི་ཐོབ་པར་འགྱུར། །དེ་ལྟར་སྐད་ཅིག་

88-1-190a

གཅིག་ལ་ནི། །བྱང་ཆུབ་མཚན་ཉིད་གོ་འཕང་ངོ་། །དཀའ་བ་སྤྱོད་པ་སྤངས་ནས་ནི། །ཤེས་རབ་སྙིང་རྗེ་ཡང་དག་ལྡན། །བཤད་པའི་བདེ་བ་ཆེན་པོ་སྟེར། །སྡོམ་པ་མི་དགོས་སྦྱིན་སྲེག་མིན། །ཕྲེང་བ་མི་དགོས་
བགྲང་མི་དགོས། །འདི་ནི་བསྐྱེད་རིམ་དབྱེ་མི་དགོས། །གསུངས་པའི་དཀའ་ཐུབ་སོགས་མི་དགོས། །སྔགས་ཀྱི་རྣལ་འབྱོར་གཅིག་པུ་ཡིས། །བླ་མའི་ཞལ་ལས་བརྒྱུད་པ་དང་། །ཟླ་བ་དྲུག་ཏུ་མངོན་སྦྱོར་བས། །གོ་འཕང་མཆོག་
ནི་ཐོབ་པར་འགྱུར། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཐིག་ལེའི་དབྱེ་བ་དང་རྣལ་འབྱོར་མཆོག་ཐོབ་པར་བྱེད་པའི་ལེའུ་སྟེ་དྲུག་པའོ།། །། དེ་ནས་གཞན་ཡང་དེ་ཉིད་ཉོན། །
བླ་ན་མེད་པ་ནཱ་དའི་དོན། །གང་གིས་ཤེས་པ་ཙམ་གྱིས་ནི། །ཚེ་འདི་ཉིད་ལ་དངོས་གྲུབ་འགྱུར། །སྒྲ་ཡང་མི་ཤིགས་པར་ནི་བཤད། །རང་བཞིན་འོད་གསལ་དྲི་མ་མེད། །རྣམ་པ་ཀུན་ལས་རྣམ་པར་གྲོལ། །ལྟེ་བ་
སྤྲུལ་པ་ཡང་དག་གནས། །སྦྲུལ་གྱི་ལྕེ་ལྟར་ཕྲ་བ་ནི། །གཉིས་མེད་ཡེ་ཤེས་རྨད་བྱུང་བ། །ཚངས་པ་ཁྱབ་འཇུག་དྲག་པོ་དང་། །དབང་ཕྱུག་དང་ནི་རྟག་ཞི་བ། །དེ་དག་དེ་ལྟར་རིན་པོ་ཆེ། །སྐྱེད་པ་པོ་ཡི་ཕ་དང་མས། །
ཡི་གེ་མེད་ཅིང་གོང་བུ་མེད། །འབྱུང་བ་ཆེན་པོ་རྣམ་པར་སྤངས། །དུས་དང་རྟོག་པ་རྣམས་ལས་གྲོལ། །སྐྱེ་མེད་ཟད་མེད་རྨད་དུ་བྱུང་། །འཛིན་པ་ཀུན་ལ་ཞེན་ལ་སོགས། །སྤངས་ཤིང་ལྷག་མ་མེད་པ་དང་། །མཆོག་
གི་མཆོག་སྟེ་ཞི་བ་མེད། །དངོས་པོ་ཀུན་གྱི་དབུས་ན་གནས། །རྣམ་རྟོག་མེད་ཅིང་བརྟེན་པ་མེད། །ཀུན་གཞི་རྣམ་ཤེས་ཞེས་གསུངས་པ། །ཉོན་མོངས་ཅན་གྱི་ཡིད་ཀྱིས་ནི། །བེམས་པོ་རྣམས་ཀྱིས་སད་པར་བྱེད། །མཆོག་
ཏུ་གཉིས་མེད་རྣལ་འབྱོར་གྱིས། །ཐོབ་པའི་གོ་འཕང་བླ་ན་མེད། །གཉིས་མེད་མཆོག་ཏུ་གསལ་བ་དང་། །རླུང་གི་དེ་ཉིད་ཡང་དག་རྟེན། །ཡི་གེ་ཧོཿཡིས་བསྐུལ་ནས་ནི། །མེ་ཡི་འཁོར་ལོ་སད་པར་བྱེད། །དེ་

88-1-190b

ལྟའི་ནཱ་དའི་གོ་འཕང་དོན། །བླ་མའི་ཞལ་ལས་ཡང་དག་གནས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ནཱ་དའི་ཚིག་རྣམ་པར་བཤད་པའི་ལེའུ་སྟེ་བདུན་པའོ།། །། དེ་ནས་གཞན་ཡང་
གསང་བའི་དོན། །བླ་ན་མེད་པ་བཤད་ཀྱིས་ཉོན། །གསང་བ་བྷ་ག་ཞེས་སུ་གསུངས། །བྷ་ག་དེ་བཞིན་ཆོས་འབྱུང་བ། །བདེ་བ་ཆེན་པོའི་གོ་འཕང་བརྟེན། །དགའ་བ་སྐྱེད་པར་བྱེད་པའི་རྒྱུ། །རྡོ་རྗེ་སེམས་དཔའ་
ཡི་ནི་གནས། །ཡེ་ཤེས་ལྔ་ཡི་བདག་ཉིད་གསལ། །ཡེ་ཤེས་ཆེན་པོ་སྤྲོས་པ་མེད། །རྣམ་པར་རྟོག་པ་ཐམས་ཅད་སྤངས། །བྲལ་དགའི་མཐའ་སྟེ་མཆོག་ཏུ་ཕྲ། །ལྷན་ཅིག་སྐྱེས་དགའ་ཀུན་བདག་གནས། །
དགའ་བྲལ་ལ་སོགས་སྐད་ཅིག་གནས། །ཕྲ་བ་ཡང་དག་བྱང་ཆུབ་སེམས། །སྲོག་ལ་ཕན་པར་འཚོ་བ་སྟེ། །སྲང་མདའི་འཁྲུལ་འཁོར་ལྟ་བུར་གནས། །དུས་བྲལ་རྣམ་རྟོག་མེད་པ་སྟེ། །སྟོང་ཉིད་སྐྱེ་མེད་
འཆི་བ་མེད། །སྤྲུལ་པའི་འཁོར་ལོར་ཐིམ་པ་དང་། །བདེ་བ་ཆེན་པོའི་འཁོར་ལོ་སྐྱེ། །བསམ་གྱིས་མི་ཁྱབ་ཞི་བ་སྟེ། །ཆགས་བྲལ་འགྲོ་ཀུན་སྐྱེ་བ་མེད། །རྡོ་རྗེ་པད་མ་མཉམ་སྦྱོར་བས། །
བདེ་བ་ཐམས་ཅད་སྟེར་བར་བྱེད། །རླུང་གི་དེ་ཉིད་རིག་པ་ཡིས། །རྩ་ཡི་དབུས་སུ་འཛིན་པར་བྱེད། །གང་དེ་སྐྱེ་བ་ཉམས་མྱོང་བར། །གསང་བ་ཞེས་ནི་བྱ་བར་གྲགས། །དེ་ཉིད་
གསང་བ་ཡི་ནི་མཆོག །བླ་མའི་ཞལ་ལ་ལྷག་པར་གནས། །ཕན་ཚུན་བརྒྱུད་པའི་རིམ་པ་ཡིས། །བླ་མ་བཟང་པོའི་ཞལ་ལས་ཤེས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་
མངོན་པར་རྟོགས་པ་ལས་གསང་བ་ཆེན་པོའི་ཚོགས་མ་ལུས་པར་བསྟན་པ་ཞེས་བྱ་བའི་ལེའུ་སྟེ་བརྒྱད་པའོ།། །།

88-1-191a

དེ་ནས་གཞན་གང་སྡོམ་པའི་དོན། །དེ་ཁོ་ན་ཉིད་བཤད་ཀྱིས་ཉོན། །སྡོམ་པ་སྲུང་བར་བྱེད་པ་གང་། །དེ་ནི་བྱང་ཆུབ་སེམས་ཞེས་བརྗོད། །རྡོ་རྗེའི་རྩེ་མོར་སེམས་འཛིན་པ། །དེ་ནི་བསྲུང་
བ་ཞེས་ནི་གྲགས། །དབང་པོ་རྣམས་ནི་ཡུལ་རྣམས་ལ། །འཇུག་ཅིང་རྟག་ཏུ་གང་གནས་པ། །དེ་ནི་སྡོམ་པ་བསྲུང་བ་དང་། །དམ་ཚིག་བསྲུང་བར་བཤད་པ་ཡིན། །གདུལ་དཀའ་ཚུལ་འཆོས་གཡོ་སྒྱུ་ཅན། །རྨོངས་
དང་སེམས་ཁྲོས་གཡོ་ཅན་དང་། །དད་མེད་རྟོག་གེ་བ་ལྷན་ཅིག །རྟགས་ཀྱིས་ཉེ་བར་འཚོ་བ་དང་། །ཉན་ཐོས་ནོར་ལ་བརྐམ་ཆགས་ཅན། །དེ་ཁོ་ན་ཉིད་སུན་འབྱིན་ཅིང་། །དོན་དམ་པ་ནི་མི་ཤེས་པ། །
མེད་པར་ལྟ་དང་ཚུལ་ཁྲིམས་འཆལ། །གཏམ་དང་ཚིག་གི་ཀྱལ་པ་དང་། །འདྲི་བ་ལ་སོགས་མི་བྱ་ཞིང་། །སེ་གོལ་ཏོགས་པ་ཙམ་དུ་ཡང་། །དེ་དང་ལྷན་ཅིག་གནས་མི་བྱ། །ལས་ཀྱི་ཕྱག་རྒྱ་ཉམས་དགའ་བ། །
གལ་ཏེ་བྱིས་པའི་སྐྱེ་བོ་དང་། །དེ་དང་ལྷན་ཅིག་དམ་ཚིག་ནི། །མི་བྱ་རྣལ་འབྱོར་ཉམས་པར་འགྱུར། །སྐྱེད་ན་དམ་ཚིག་དབུས་ཞུགས་དང་། །པད་སྣོད་ཕྱག་རྒྱ་སོགས་བརྟན་དང་། །བརྐམ་དང་འབྲེལ་པས་
འཇུག་པ་དང་། །དམ་ཚིག་ལ་ནི་འཇུག་མི་བྱ། །སྣོད་དང་ཅང་ཏེའུ་གྲི་གུག་དང་། །གླེགས་བམ་དང་ནི་བགྲང་ཕྲེང་དང་། །དམ་ཚིག་མེད་པ་གཞན་དག་ལ། །གང་དུའང་བསྟན་པར་མི་བྱའོ། །དགེ་སློང་སྡོམ་ལ་གནས་
པ་ལ། །རྣལ་འབྱོར་སྤྱོད་སོགས་བྱ་བ་དང་། །མན་ངག་རྣམས་ནི་བསྟན་མི་བྱ། །རས་རིས་ལ་སོགས་མི་བསྟན་ཅིང་། །གང་གིས་དམ་ཚིག་ལྷན་ཅིག་ཏུ། །ཇི་ལྟར་སྤྱོད་པ་ཡང་དག་སྤྱོད། །བླ་མ་ལ་ཡང་སྨྲ་མིན་ན། །གཞན་
རྣམས་ལ་ནི་སྨོས་ཅི་དགོས། །དབང་པོ་ཡུལ་ལ་སྤྱོད་པ་ནི། །གང་ནས་དེ་ནི་བསྡམས་ནས་ནི། །སྟོང་ཉིད་གཉིས་མེད་སྒྱུ་མ་ལ། །སོགས་པས་ཀུན་རྫོབ་ལྷག་སྤྱད་ན། །ཤེས་རབ་ཡེ་ཤེས་དབང་བསྐུར་སོགས། །ཉམས་སུ་

88-1-191b

མྱོང་བའི་བདེ་བ་ཡིས། །བདེ་བ་ཆེན་པོའི་དྲན་པ་ཡིས། །དབང་པོ་རྣམས་ནི་ཡུལ་ལས་ལྡོག །བདག་བསྟོད་གཞན་ལ་སྨོད་པ་དང་། །ཡེ་ཤེས་སྙེམས་སོགས་ངེས་སྤངས་པ། །བློ་ལྡན་རྡོ་རྗེ་དབང་ཕྱུག་གི། ཡང་དག་
སྡོམ་པ་བཤད་པ་ཡིན། །དེ་ལྟ་བུ་སོགས་དམ་ཚིག་ནི། །རྣལ་འབྱོར་པ་ཡིས་རྟག་བསྲུང་བྱ། །གཞན་དུ་རྣལ་འབྱོར་ཉམས་པར་འགྱུར། །རྣལ་འབྱོར་ལྡན་པ་རྡོ་རྗེ་ཅན། །བགྲང་ཕྲེང་དང་ནི་དབུ་རྒྱན་དང་། །རུས་
པའི་རང་བཞིན་ཕྱག་རྒྱ་དང་། །གླེགས་བམ་བསམ་གཏན་རས་རིས་དང་། །ཐོད་པ་ལ་སོགས་རྣལ་འབྱོར་མ། །ཐམས་ཅད་དུ་ནི་དངོས་གྲུབ་ཕྱིར། །བླ་མ་ལ་ཡང་སྦ་བར་བྱ། །སྔགས་ནི་ཚིག་ཏུ་བརྗོད་མི་བྱ། །མཆུ་
འགུལ་བར་ཡང་མི་མངོན་ཞིང་། །ཅུང་ཟད་མགྲིན་པར་བརྗོད་བྱ་ཡིས། །སྔགས་ཀྱི་རྒྱལ་པོ་དེ་ལྟར་བཟླས། །གསང་ལས་དངོས་གྲུབ་མཚུངས་པ་མེད། །གང་ཕྱིར་དེ་ནི་སྡོམ་པར་བཤད། །སྣོད་མིན་ནོར་ནི་ཆེན་པོ་དང་། །ལྡན་
ཡང་རྒྱུད་ལས་སྐྱོན་དུ་གསུངས། །བླ་མས་བླ་མེད་དངོས་གྲུབ་ཕྱིར། །འབད་པ་ཡིས་ནི་སྤང་བར་བྱ། །བཟའ་བཏུང་གོས་ལ་སོགས་པ་དང་། །ནོར་ནི་ཆེན་པོ་ལ་ཆགས་ཤིང་། །སྣོད་མིན་སློབ་མ་མན་ངག་མཆོག །རྨད་དུ་བྱུང་བ་
སྨྲ་བ་གང་། །རྣལ་འབྱོར་ཤེས་པ་ཚེ་འདི་ལ། །དེ་ནི་དམྱལ་བ་ངུ་འབོད་འགྲོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྡོམ་པའི་ཚིག་གཏན་ལ་དབབ་པའི་ལེའུ་སྟེ་དགུ་པའོ།། །། 
དེ་ནས་གཞན་ཡང་དེ་ཉིད་ཉོན། །དམ་ཚིག་དོན་ནི་བླ་ན་མེད། །བཟའ་བ་ཡི་ནི་དམ་ཚིག་གང་། །དེ་ནི་དེ་ཡི་དོན་བཤད་བྱ། །བཟའ་བ་རུ་ནི་བཤད་པ་གང་། །དེ་ནི་བདུད་རྩི་ལྔ་རུ་བརྗོད། །རླུང་གི་དེ་ཉིད་སྦྱོར་བ་ཡིས། །ཞུ་ནས་རོ་གཅིག་སླར་
ཡང་ནི། །རྡོ་རྗེ་ལམ་ནས་སྟེང་སོང་སྟེ། །གཅིག་ཏུ་གྱུར་པ་བཟའ་བའོ། །དམ་ཚིག་ལུས་དང་ངག་ཡིད་ཀྱིས། །དེ་ཉིད་གསུམ་དང་གང་ཤར་དང་། །འཁོར་ལོ་བཞི་པོ་རྣམས་ལ་ཡང་། །བདེ་བ་ཉམས་སུ་མྱང་བ་གང་། །དེ་དང་རོ་གཅིག་

88-1-192a

རྣལ་འབྱོར་པ། །རྟག་ཏུ་སྤྱོད་པ་བཟའ་བའོ། །བྱང་ཆུབ་སེམས་ཀྱི་དེ་ཉིད་མཆོག །བདེ་བ་ཆེན་པོའི་གོ་འཕང་ཐིམ། །ཞུ་བ་རླུང་གི་དེ་ཉིད་ཀྱིས། །བཟའ་བ་བསམ་གཏན་བཟང་པོའོ། །སྤྱི་བོ་ཐོད་
པའི་སླད་ནས་ནི། །དེ་ཙམ་རྣལ་འབྱོར་པས་རྟག་ཏུ། །དེ་ལ་སྙིང་རྗེ་བཏུང་བ་ནི། །བྱང་ཆུབ་སེམས་དཔའ་བདེ་བ་ཆེ། །སྣོད་མཆོག་གསང་བའི་པད་མར་བླུགས། །རྟེན་ནི་བཟའ་བ་རབ་རྟོགས་བྱེད། །སེམས་ཀྱིས་བདུད་
རྩི་མཐུང་བྱེད་ན། །བདུད་རྩི་ལྔ་ཡི་རོ་རྫས་འཐུང་། །དེ་ཟ་བ་ནི་རྡོ་རྗེ་འཆང་། །གླང་མོ་རྟ་ཁྱི་བ་ལང་མི། །བྱང་ཆུབ་སེམས་དང་བཅས་པའི་ཁྲག །བསྲེས་ནས་སྐད་ཅིག་དེ་ལ་བཟའ། །དེ་ནི་བདུད་རྩི་ལྔ་ཞེས་
བརྗོད། །རྣམ་རྟོག་དང་ནི་ཀུན་རྟོག་གིས། །སྟོང་པ་ཉིད་དུ་གསལ་བའི་སྣོད། །རྡོ་རྗེ་ཅན་གྱིས་རྟག་ཏུ་བཟའ། །སྟོང་ཉིད་ཡེ་ཤེས་ཕ་རོལ་འགྲོ། །དགའ་བ་གསུམ་པའི་བདེ་བ་ནི། །ལྷན་སྐྱེས་ལྷན་ཅིག་སྣོད་དུ་ནི། །
རྡོ་རྗེ་ཅན་གྱིས་རྟག་ཏུ་བཟའ། །བདེ་བ་ཆེན་པོའི་གོ་འཕང་གནས། །རྣམ་རྟོག་རླུང་རྣམས་ཐམས་ཅད་ནི། །ཞི་བའི་དེ་ཉིད་སྣོད་བཟང་པོར། །རླུང་གི་དེ་ཉིད་ཤེས་པས་བཟའ། །རྣམ་རྟོག་མེད་པའི་
གོ་འཕང་གནས། །ཕྱག་རྒྱ་གསུམ་དང་ཡང་དག་སྦྱོར། །ཕྱག་རྒྱ་ཆེན་པོར་བཤད་སྣོད་དུ། །རྣལ་འབྱོར་དེ་ཉིད་ཤེས་པས་བཟའ། །སྲོག་དང་རྩོལ་བའི་གོ་འཕང་གནས། །རྣམ་རྟོག་དང་ནི་ཀུན་རྟོག་གིས། །སྒོམ་དང་སྒོམ་
མིན་སོགས་འཁྲུལ་པ། །སྲོག་ཆེན་པོ་ཡི་སྣོད་དུ་ནི། །རྣམ་རྟོག་དྲ་བའི་ས་བོན་ཚོགས། །ཕུང་པོའི་བུད་ཤིང་སྣོད་བཟང་པོར། །ཡེ་ཤེས་ཆེན་པོའི་མེ་ཡིས་མིན། །སྔགས་ཀྱི་དེ་ཉིད་རྟོགས་པས་བཟའ། །བདུད་བཞིའི་ཁྲོ་བོ་
ཆེན་པོ་ཡི། །སྟོབས་ཀྱི་རིག་པས་སྒྲུབ་པ་པོས། །སྒྲུབ་པོས་ལེགས་པར་མཉམ་གཞག་ནས། །རྟག་ཏུ་རྣལ་འབྱོར་སྣོད་དུ་བཟའ། །རླུང་དང་སྔགས་དང་རྫས་རྣམས་ཀྱི། །ཐིག་ལེ་གསུམ་སྟེ་བླ་ན་མེད། །མི་ཤིགས་གོ་འཕང་

88-1-192b

སྣོད་དུ་ནི། །ཟོས་ན་རྣལ་འབྱོར་ཕ་རོལ་འགྲོ། །སྟོང་ཉིད་ཡེ་ཤེས་མཚུངས་མེད་པ། །སྙིང་རྗེའི་སྣོད་ཀྱིས་མཆོག་ཏུ་ནི། །ཡེ་ཤེས་ཆེན་པོ་མཉམ་བཞག་ནས། །བཏུང་ཞིང་རྟག་ཏུ་བཏུང་བའོ། །ཕྱག་རྒྱའི་དམ་ཚིག་ཅེས་
སུ་བཤད། །རྡོ་རྗེ་པད་མ་ཡང་དག་སྦྱོར། །དེ་ཁོ་ན་ཉིད་མཆོག་སྐྱེས་གང་། །དེ་ནི་སྐལ་ལྡན་སྣོད་ལ་ནི། །རྣལ་འབྱོར་པས་འཐུངས་ཉམས་དགའ་བ། །བསྒྲུབ་པར་བྱ་བའི་དེ་ཉིད་མཆོག །ཉོན་མོངས་དང་བྲལ་ལྷན་ཅིག་སྐྱེས། །ཕྱག་
རྒྱ་ཆེན་པོའི་དོན་བསྒྲུབ་བྱ། །དེ་ལྟ་བུ་སོགས་དམ་ཚིག་སོགས། །གཞན་ནི་གང་དུའང་ངས་མ་བཤད། །རྡོ་རྗེ་སེམས་དཔའི་གོ་འཕང་མཆོག །བླ་མའི་ཞལ་ལས་གསལ་བར་རྟོགས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་
པར་རྟོགས་པ་ལས་དམ་ཚིག་གི་དོན་གཏན་ལ་དབབ་པའི་ལེའུ་སྟེ་བཅུ་པའོ།། །། དེ་ནས་གཞན་ཡང་བཤད་ཀྱིས་ཉོན། །སྒྲ་ཙམ་དོན་ནི་བཤད་པར་བྱ། །གང་གིས་ཤེས་པ་ཙམ་གྱིས་ནི། །འཕོ་བ་མེད་པའི་གོ་འཕང་
འཐོབ། །ཆོས་ཀྱི་འཁོར་ལོའི་པད་སྦུབས་སུ། །སྒྲ་ཙམ་ཡང་དག་གནས་པ་ནི། །ཆགས་མེད་སྣང་བ་མེད་པ་དང་། །གཉིས་སུ་མེད་ཅིང་དྲི་མ་མེད། །དཔེ་བྲལ་གཡོ་བ་མེད་པ་དང་། །གཞི་མེད་བླ་གབ་མེད་པ་དང་། །ལྷ་ཡི་དབང་ཕྱུག་
ཡེ་ཤེས་མཆོག །འབྱུང་དང་རྔུབ་པ་རྣམ་པར་སྤངས། །རྣལ་འབྱོར་རྣམས་ཀྱི་ལྷ་དབང་ཕྱུག །དེ་ལྟ་བུ་ནི་རྙེད་པར་དཀའ། །མཆོག་ཏུ་ཞི་བ་བདེ་བ་ཆེ། །གཟུགས་མཆོག་འཆི་བ་མེད་པའི་མཆོག །རྟེན་ཅིང་འབྲེལ་འབྱུང་རང་བཞིན་
གྱིས། །རྒུན་ཆང་རོ་ཡིས་མྱོས་པ་ལྟར། །མཆོག་ཏུ་ནང་དུ་སོང་གྱུར་ནས། །དེ་བཞིན་རྣམ་པ་ཀུན་གྱི་གནས། །སྔགས་ཀྱི་དེ་ཉིད་རིག་པའི་རྟེན། །རང་གི་ཉམས་མྱོང་རྟོག་པའི་གནས། །དེ་ནས་སྟོན་པ་བླ་མེད་པ། །རྡོ་རྗེ་སེམས་དཔས་ཞུས་
པ་ནི། །བཅོམ་ལྡན་དེ་ཉིད་ཞི་བ་མཁྱེན། །སྔགས་ཀྱི་དེ་ཉིད་རབ་དབྱེ་བ། །གང་གིས་རྣམ་པར་ཤེས་ཙམ་གྱིས། །དེ་ཁོ་ན་ཉིད་འགྲུབ་པར་འགྱུར། །དེ་ནས་རྡོ་རྗེ་ཅན་གྱིས་གསུངས། །སྔགས་ཀྱི་དེ་ཉིད་བླ་ན་མེད། །མཆོག་དང་རབ་མཆོག་

88-1-193a

ཕྲ་བ་དང་། །ཡེ་ཤེས་ཆེན་པོ་མཆོག་ཆེན་པོ། །སྙིང་པོ་ཡི་ཡང་སྙིང་པོ་མཆོག །ཡང་དག་བཤད་ཀྱིས་མཉན་པར་གྱིས། །རྒྱུད་རྣམས་ཀུན་དུ་སྦས་པ་རྣམས། །གསང་བའི་གོ་འཕང་འཕོ་བ་མེད། །ལྟེ་བའི་
འཁོར་ལོ་དེ་ཉིད་མཆོག །སྒྲ་ཙམ་དུ་ནི་ཡང་དག་གནས། །སྟོང་ཉིད་ཆེན་པོའི་དབུས་སུ་ཐིམ། །བདེ་བ་ཆེན་པོའི་གོ་འཕང་གསལ། །གཉིས་མེད་འཇིགས་བྲལ་ཞི་བ་དང་། །སྣང་བ་མེད་ཅིང་ཀུན་རྫོབ་མེད། །གཉིས་མེད་ཏིང་
འཛིན་སྦྱོར་བ་ཡིས། །སྔགས་ཀྱི་དེ་ཉིད་རབ་གསལ་བ། །ཐོག་མ་མེད་ཅིང་ཞི་བ་དང་། །དངོས་དང་དངོས་མེད་བདག་ཉིད་གཙོ། །སྟོང་ཉིད་སྙིང་རྗེ་དབྱེར་མེད་པ། །བྱང་ཆུབ་སེམས་ཀྱི་རང་བཞིན་ནི། །དེ་ཚེ་ཐོག་མར་སྟོང་ཉིད་སྒོམ། །སྣང་
བ་མེད་པའི་གོ་འཕང་ཞི། །རང་བཞིན་མེད་གནས་ཉམས་དགའ་བ། །རྣམ་རྟོག་མེད་ལ་མཆོག་ཏུ་བརྟེན། །སྟོང་ཉིད་ཡེ་ཤེས་མཚུངས་པ་མེད། །བྱང་ཆུབ་སེམས་ཀྱི་རྒྱུད་དང་ནི། །ཡི་གེ་ཧཱུྃ་ལས་ཡང་དག་བྱུང་། །རྣལ་
འབྱོར་ཤེས་པ་རྨད་བྱུང་ཆེ། །དེ་ཉིད་གསུམ་ནི་རོ་གཅིག་དོན། །ཨ་བ་དྷཱུ་ཏཱིའི་གོ་འཕང་གནས། །སླར་ཡང་དགའ་བའི་སྦྱོར་བ་ཡིས། །འཇུག་པ་ལ་སོགས་རྣམ་པར་སྤངས། །བདེ་བ་ཆེན་པོའི་གོ་འཕང་ནི། །བྱང་ཆུབ་སེམས་
ནི་དྲི་མ་མེད། །སྣ་ཚོགས་སྐད་ཅིག་དབྱེར་མེད་པ། །བརྗོད་པའི་བདག་ཉིད་དབྱངས་བྲལ་བ། །རྟག་ཏུ་གནས་པའི་རྒྱུན་གྱིས་ཀྱང་། །བྱང་ཆུབ་སེམས་ནི་འབབ་པ་ནི། །སྔགས་ཀྱི་རྣལ་འབྱོར་གྱིས་ནི་ཐོབ། །སྐྱེ་
མེད་ཞི་བའི་ཐིག་ལེ་ཙམ། །སྔགས་ཀྱི་སྤྱོད་པས་སྤྱད་པས་ན། །ཡེ་ཤེས་མཆོག་ནི་རང་རིག་པའོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྒྲ་ཙམ་གྱི་དོན་གཏན་ལ་དབབ་པའི་
ལེའུ་སྟེ་བཅུ་གཅིག་པའོ།། །། དེ་ནས་རླུང་གི་དེ་ཉིད་མཆོག །དོན་དམ་པ་ནི་བཤད་ཀྱིས་ཉོན། །རྣལ་འབྱོར་པ་ཡིས་རླུང་བསྒོམས་ན། །མྱུར་དུ་དངོས་གྲུབ་ཐོབ་པར་འགྱུར། །རླུང་གི་ཐིག་ལེ་ཡེ་ཤེས་

88-1-193b

ཆེ། །ཕྲ་ཞིང་དེ་ཉིད་གོ་འཕང་གསལ། །དངོས་གྲུབ་ཀུན་བྱེད་ཉམས་དགའ་བ། །གཉིས་མེད་རྣལ་འབྱོར་མི་ཟད་པ། །སྐྱེ་མེད་ཀུན་འགྲོ་ཞི་བ་དང་། །ལུས་རྣམས་ཀུན་ལ་ཁྱབ་པ་དང་། །མ་ཕམ་སྟོང་པ་བསམ་མི་ཁྱབ། །
ཐམས་ཅད་བདག་ཉིད་རྟག་ཏུ་བཞུགས། །སྒོམ་དང་བསམ་གཏན་རྣལ་འབྱོར་གྱིས། །ཐིག་ལེ་རང་གི་ངོ་བོ་ཤེས། །ཆོས་རྣམས་གཅིག་ཏུ་གྱུར་པའི་གནས། །སྔགས་ཀྱི་དེ་ཉིད་ཀྱི་ནི་རྒྱུ། །བག་ཆགས་ཀུན་ལས་
རྣམ་པར་གྲོལ། །ཀུན་མཁྱེན་བདེ་བ་ཀུན་གསལ་བ། །སྣ་ཡི་རྩེ་མོར་དེ་ཉིད་མཆོག །འོད་ཟེར་ཐིག་ལེ་བསམ་པར་བྱ། །སྲོག་དང་རྩོལ་བ་ཡང་དག་སྦྱོར། །རྟོག་པ་རྣམས་ཀྱི་གྲངས་སྟེར་བ། །སྐལ་བཟང་
ཡེ་ཤེས་ལྔ་ཡི་བདག །སངས་རྒྱས་ལྔ་ཡི་ཆོ་ག་ནི། །རིན་ཆེན་ལྔ་ཡི་སྦྱོར་བའི་གཟུགས། །འབྱུང་བ་ལྔ་ཡི་བདག་ཉིད་ཙམ། །ཐོག་མ་ལུས་ཀྱི་ཕྱག་རྒྱའི་དངོས། །ངག་གི་གྲངས་ཀྱི་ཟློས་མཚན་ཉིད། །ཡིད་
ཀྱི་རྣལ་འབྱོར་ཆེ་ལ་ཞེན། །སྒོམ་པའི་གོ་འཕང་མི་ཟད་པ། །དབུགས་ཀྱི་ཚོགས་ནི་བགྲང་བ་དང་། །རླུང་གི་རྣམ་པར་དཔྱད་པ་དང་། །གནས་ཀྱི་དབྱེ་བ་རྩ་རྣམས་ཀྱི། །དུས་ཀྱི་དབྱེ་བ་རྟོགས་པ་དང་། །རླུང་རྣམས་
ཀྱི་ནི་ཟློག་པ་དང་། །རྟོག་པ་དང་བཅས་སྤངས་པ་སྟེ། །དེ་ལྟར་མདོར་བསྡུས་རྣམ་དྲུག་གིས། །འབྱུང་དང་རྔུབ་པ་ཞེས་སུ་བརྗོད། །ཐོག་མར་འབྱུང་དང་རྔུབ་པ་རྣམས། །ཉི་ཁྲི་དང་ནི་ཆིག་སྟོང་དང་། །དེ་བཞིན་
གྲངས་ནི་བརྒྱ་ཕྲག་དྲུག །ཉིན་དང་མཚན་མོ་ངེས་པ་ནི། །ཇི་སྲིད་གྲངས་ནི་ཐོབ་པའི་གནས། །ཉིན་ཞག་ཉི་ཤུ་རྩ་བདུན་དུ། །གྲངས་ཀྱི་རྗེས་སུ་སྦྱོར་བ་ཡིས། །གྲངས་ནི་ཡང་དང་ཡང་དུ་བརྟག །དུས་མཚམས་
ཀྱི་ནི་རབ་དབྱེ་བས། །དེ་ནས་རྗེས་སུ་ཟློས་པར་འགྱུར། །ཐུན་ཚོད་སོ་སོར་སྲོག་རྣམས་དང་། །རྩོལ་བ་རུ་ནི་བརྟག་པ་སྟེ། །ཉིས་སྟོང་བདུན་བརྒྱའི་གྲངས་ཀྱིས་ནི། །ཡང་དག་པར་ནི་ངེས་བཟུང་མེད། །ཡོངས་

88-1-194a

སུ་གསལ་བར་བཅད་ནས་ནི། །ཉིན་ཞག་ཉི་ཤུ་རྩ་བདུན་ལ། །འཁོར་ལོ་བཞི་ཡི་དབྱེ་བ་ཡིས། །ཉིན་དང་མཚན་དུ་ངེས་པར་ནི། །དེ་རྗེས་གནས་ཀྱི་རྩོལ་བ་ཡིས། །ཐ་དད་དུ་ནི་རབ་ཏུ་བརྟག །རྩ་ཡི་འཁོར་ལོ་རྒྱུ་བ་
ཡིས། །འབྱུང་དང་རྔུབ་པ་ངེས་པར་ནི། །ངེས་པར་གཟུང་བའི་སྦྱོར་བ་ལས། །རྩ་ཡི་འཁོར་ལོ་སྤྱད་པར་བྱ། །དེ་ཡི་འཁོར་ལོའི་རྩ་དབྱེ་བས། །ཉིན་ཞག་ཉི་ཤུ་རྩ་བདུན་ལས། །དེ་རྗེས་གནས་ཀྱི་སྦོལ་པའི་ས། །གནས་ཀྱི་དབྱེ་བས་
བརྟག་པར་བྱ། །གནས་ནི་སོ་སོར་བརྟགས་པ་ཡིས། །བརྒྱ་དང་བརྒྱད་ནི་ལྷག་པར་རྒྱུ། །རྣམ་རྟོག་མེད་པའི་སྦྱོར་བ་མཆོག །རྟོག་པ་སྤངས་པའི་མཚན་ཉིད་ཅན། །དངོས་པོ་ཀུན་གྱི་རང་བཞིན་བདག །བརྒྱ་དང་བརྒྱད་ནི་ལྷག་པར་རྒྱུ། །འདི་
ནི་ཡང་དག་རྣལ་འབྱོར་མཆོག །ཉིན་ཞག་ཉི་ཤུ་རྩ་བདུན་གྱིས། །མཚན་ཉིད་སྒོམ་པའི་རྣལ་འབྱོར་པ། །ཇི་ལྟར་གནས་པར་རང་ངོ་བོ། །རྟོག་དང་བཅས་པའི་རྣལ་འབྱོར་པ། །དེ་ནས་རྣལ་འབྱོར་ལོག་ནས་ནི། །རྟོག་པ་དང་བྲལ་རླུང་ཆེན་པོ། །
རྩ་ཡི་འཁོར་ལོ་རྣམ་པར་རྒྱུ། །དེ་ཐོབ་ནས་ནི་ལོག་པ་དང་། །ཀུན་ནས་ཉོན་མོངས་རྣལ་འབྱོར་པས། །ངེས་པ་ལ་ནི་དོན་དམ་པ། །ཉིན་ཞག་ཉི་ཤུ་རྩ་བདུན་ལས། །ལས་དང་པོ་པའི་སྦྱོར་བ་ཡིས། །བློ་དང་ལྡན་པ་ལོག་པ་ལས། །དེ་ནས་དགག་པ་དེ་དག་
ཀྱང་། །ཡང་དག་རྣལ་འབྱོར་སྟོབས་ཀྱིས་ནི། །སྲོག་དང་རྩོལ་བའི་རྣམ་རྟོག་རྣམས། །ཀུན་ནས་རབ་ཏུ་སྤངས་ནས་ནི། །རླུང་གི་དེ་ཁོ་ན་ཉིད་རྒྱུ། །རྣལ་འབྱོར་མཆོག་ནི་བསྒོམ་པར་བྱ། །གཉིས་མེད་མཆོག་གི་རྣལ་འབྱོར་གྱིས། །ཉིན་
ཞག་ཉི་ཤུ་རྩ་བདུན་ལ། །རླུང་གི་དེ་ཁོ་ན་ཉིད་རྟེན། །འཁྲུལ་པའི་རྣལ་འབྱོར་དག་པ་ནི། །དེ་ལ་རྩེ་གཅིག་སེམས་ཀྱིས་ནི། །རྟོག་མེད་དེ་ཁོ་ན་ཉིད་ཀྱིས། །རླུང་གི་དེ་ཉིད་རྣལ་འབྱོར་མཆོག །ཡང་དག་རྩོལ་ལ་བྱས་པ་གསལ། །ཁང་བཟང་
བྱེད་པ་བཞིན་དུ་ནི། །ཐོག་མར་ས་ནི་ཡོངས་སུ་སྦྱང་། །དེ་སྟེང་བགེགས་དང་བྲལ་བྱས་ལ། །གནས་ནི་ལེགས་པར་དག་པར་བྱ། །ཁང་བཟང་སྐལ་བ་ཉམས་དགའ་བ། །བློ་ལྡན་ཇི་ལྟར་འདོད་པར་བྱ། །དེ་བཞིན་རྣལ་འབྱོར་སྤྱོད་པས་

88-1-194b

མཆོག །རླུང་གི་དེ་ཉིད་རྣམ་པར་བསྒོམ། །སྔ་མ་བཞིན་དུ་མཉམ་བཞག་ནས། །སྲོག་དང་རྩོལ་བའི་སྦྱོར་བ་དང་། །རྣལ་འབྱོར་མཆོག་གི་ཡེ་ཤེས་ཆེ། །རྣལ་འབྱོར་རིག་པ་བསྒོམ་པར་བྱ། །ཐོག་མར་རླུང་གི་དེ་ཉིད་
དང་། །དེ་ནས་སྔགས་ཀྱི་དེ་ཉིད་གསལ། །དེ་ལ་རླུང་གི་འོད་ཟེར་མཆོག །གསལ་བ་ཆེན་པོའི་ཁ་དོག་ལྔ། །དེ་བཞིན་གཤེགས་པ་ལྔ་རང་བཞིན། །ཕུང་པོ་ལྔ་ཡི་རང་ངོ་བོ། །དེ་ནི་ཡེ་ཤེས་ལྔ་དག་པ། །རླུང་ལྔ་རུ་
ནི་རྒྱུ་བར་བྱེད། །མངོན་པར་བྱང་ཆུབ་རྣམ་པ་ལྔའི། །དེ་ཉིད་མཚན་ཉིད་གོ་འཕང་མཆོག །སྣ་ཡི་རྩེ་མོ་དེ་ཉིད་མཆོག །རླུང་ལྔ་དང་ནི་རང་ངོ་བོ། །རླུང་གི་ཐིག་ལེ་ཞེས་ནི་བཤད། །ཡང་དག་དེ་ཉིད་གསལ་བ་ཡང་། །
སྣ་རྩེར་ཡུངས་ཀར་དེ་ཡང་ནི། །རྒྱུད་གཞན་རྣམས་སུ་གསུངས་པ་ནི། །སྣ་རྩེར་ཡུངས་ཀར་དེ་ཡང་ནི། །སྲོག་དང་རྩོལ་བའི་བརྟག་པ་སྟེ། །སྲོག་དང་རྩོལ་བ་ལ་གནས་པ། །འོད་ལྔ་སངས་རྒྱས་རྣམས་སུ་
བསྒོམ། །སྟེང་གི་སྣ་ལས་ངེས་འབྱུང་བ། །གཡས་དང་གཡོན་དང་གཉིས་ག་ཡང་། །དལ་བར་རྒྱུ་དང་རྣམ་བཞིར་འགྱུར། །ནང་གི་དུས་ནི་ཡིན་པར་བཤད། །ལྐོག་མ་སྙིང་ག་ལྟེ་བ་དང་། །གསང་བའི་པད་མར་འགྲོ་འོང་
སྟོན། །ཐུན་ཕྱེད་ཀྱི་ནི་དུས་དག་ཏུ། །གོ་རིམ་ཇི་བཞིན་གནས་པས་བསྟན། །གཡས་པ་ནས་ནི་འབྱུང་བའི་ཁམས། །མེ་ཡི་དཀྱིལ་འཁོར་ཉིད་ཡིན་ཏེ། །ཁ་དོག་དམར་ཞིང་གསལ་བ་ཉིད། །པད་མའི་མགོན་པོ་རྒྱུ་བའོ། །
གཡོན་པ་ནས་ནི་འབྱུང་བའི་ཁམས། །རླུང་གི་དཀྱིལ་འཁོར་ཞེས་བྱ་བ། །ལྗང་སེར་དག་ཏུ་སྣང་བ་སྟེ། །ལས་ཀྱི་མགོན་པོ་རྒྱུ་བའོ། །གཉིས་ཀ་ལས་ནི་འབྱུང་བའི་ཁམས། །གསེར་གྱི་མདོག་ཏུ་སྣང་བ་སྟེ། །དབང་ཆེན་
གྱི་ནི་དཀྱིལ་འཁོར་ཉིད། །རིན་ཆེན་མགོན་པོ་རྒྱུ་བའོ། །དལ་ཞིང་རྒྱུ་བ་མེད་པའི་ཁམས། །དག་པའི་ཤེལ་ལྟར་སྣང་བ་ནི། །ཆུ་ཡི་དཀྱིལ་འཁོར་ཉིད་ཡིན་ཏེ། །རྡོ་རྗེ་མགོན་པོ་རྒྱུ་བའོ། །ལུས་ཀུན་ལ་ནི་གནས་

88-1-195a

པའི་རླུང་། །བྱ་བ་ཀུན་ལ་འཇུག་པའོ། །འདི་ནི་རྣམ་སྣང་ངོ་བོ་སྟེ། །འཆི་བའི་ལུས་ལ་འབྱུང་བར་འགྱུར། །རླུང་གི་དེ་ཉིད་གསལ་བ་འདི། །ཡེ་ཤེས་ལྔ་ཡི་རང་བཞིན་ཅན། །རྣལ་འབྱོར་བྱིས་པའི་
ཡུལ་མིན་ཞིང་། །རྟོག་གེ་པ་ཡིས་མི་ཤེས་སོ། །དངོས་གྲུབ་ཐམས་ཅད་གསལ་བྱེད་པ། །རྣལ་འབྱོར་ཀུན་གྱི་དངོས་གྲུབ་པ། །དེ་ཉིད་ཀུན་གྱི་གོ་འཕང་གསལ། །རྣལ་འབྱོར་ཀུན་གྱི་དོན་བསྡུས་པ། །རྡོ་རྗེ་སེམས་
དཔའི་གོ་འཕང་གསལ། །ཐམས་ཅད་བདག་ཉིད་རྟག་ཏུ་བཞུགས། །དེ་ཉིད་མཆོག་ནི་ཤིན་ཏུ་ཕྲ། །བླ་མའི་ཞལ་ལས་རྟོགས་པར་འགྱུར། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རླུང་གི་
དེ་ཁོ་ན་ཉིད་བཤད་པའི་ལེའུ་སྟེ་བཅུ་གཉིས་པའོ།། །།  དེ་ནས་གཞན་ཡང་བཤད་ཀྱིས་ཉོན། །བདེ་བ་ཆེན་པོ་གསལ་བའི་ཚིག །རྡོར་སེམས་གོ་འཕང་མི་ཕྱེད་པ། །རང་རིག་པས་ནི་མཆོག་གི་མཆོག །ཀུན་རྟོག་གི་བརྟགས་
ཀྱིས་སྟོང་པ། །བདེ་བ་ཆེན་པོ་ཞེས་འདི་བརྗོད། །ལྷན་ཅིག་སྐྱེས་པའི་དུས་དུ་ནི། །གཟུང་དང་འཛིན་པ་རྣམ་པར་སྤངས། །བདེ་དང་སྡུག་བསྔལ་རྣམ་པར་སྤངས། །ཞི་བ་གཉིས་མེད་རྣམ་པར་བྲལ། །དངོས་པོ་ཀུན་གྱི་རང་བཞིན་བདག །
བདེ་ཆེན་ཞེས་ནི་འདི་ལ་བརྗོད། །རྡོ་རྗེ་ཡེ་ཤེས་ལྔ་ཡི་དངོས། །སངས་རྒྱས་ལྔ་ཡི་རང་བཞིན་ཅན། །ལྔ་ནི་རྩ་ནས་འབབ་པའི་རྒྱུན། །སྟོང་ཉིད་རྡོ་རྗེའི་གོ་འཕང་གསལ། །རང་བཞིན་མེད་ཅིང་རྟེན་མེད་པ། །གཉིས་མེད་དངོས་པོ་རྣམ་བྲལ་ཞིང་། །
ཆ་མེད་ཆ་ནི་རྣམ་པར་སྤངས། །རྟག་ཏུ་རྟོག་པ་ཀུན་ལས་གྲོལ། །འཕོ་བ་མེད་ཅིང་ཞི་བ་དང་། །ཟད་མེད་བདེ་བ་ཐམས་ཅད་གསལ། །ཉོན་མོངས་ཀུན་ལས་རྣམ་གྲོལ་བ། །བདེ་བ་ཐམས་ཅད་ལ་འཇུག་པ། །སྟོང་པ་སྟོང་པ་ཆེན་པོ་དང་། །ཤིན་དུ་སྟོང་པ་
མཆོག་གི་མཆོག །སྟོང་པ་དང་གཞན་སྟོང་པའི་གནས། །ནམ་མཁའ་ལྔ་ཡི་ངོ་བོ་ཉིད། །མི་མཆོད་མི་འགྱུར་ངོ་བོ་ཉིད། །མི་ཚིག་པ་དང་མཆོག་ཏུ་འབིགས། །སངས་རྒྱས་ལྔ་ཡི་ཡེ་ཤེས་མཆོག །རང་བཞིན་རྡོ་རྗེ་ཞེས་ནི་བརྗོད། །སྙིང་རྗེ་རྣལ་འབྱོར་ཡང་

88-1-195b

དག་འདྲེས། །མཆོག་ཏུ་སྐྱེ་བའི་བདེ་བ་འདི། །དེ་ཉིད་གཅིག་པུ་རོ་གཅིག་པ། །རྗོད་དང་བརྗོད་བྱ་རྣམ་པར་སྤངས། །བདེ་ཆེན་ཞེས་བྱའི་འཁོར་ལོར་གནས། །དབང་པོ་རྣམས་ཀྱི་སྤྱོད་ཡུལ་མིན། །མཆོག་ཏུ་གཉིས་མེད་རྣལ་
འབྱོར་གྱིས། །ཞི་བ་དགའ་བའི་མཚན་ཉིད་གཅིག །འཁོར་ལོ་བཞི་ཡི་རིམ་གྱིས་ཐོབ། །རྣལ་འབྱོར་བཞི་ཡི་གོ་འཕང་གསལ། །སྟོང་ཉིད་ལྔ་ཡིས་ཀུན་ནས་གང་། །ཆ་བཞི་ཡིས་ནི་རྣམ་བཀག་པ། །རྡོ་རྗེ་མོར་ནི་འཛིན་པ་ནི། །
སེམས་དཔའ་ཞེས་བྱར་གཏན་ལ་དབབ། །ནམ་མཁའ་ལྔ་ཡི་ཆ་ཡིས་གང་། །འདི་ནི་རྡོ་རྗེ་སེམས་དཔར་བརྗོད། །དེ་ཉིད་བདེ་ཆེན་གོ་འཕང་སྟེ། །བཞི་པ་དགའ་བ་ཀུན་ལ་ཁྱབ། །དཔའ་བོ་རྣལ་འབྱོར་མ་སྦྱོར་སྐྱེས། །
མི་ཕྱེད་དབྱེ་བ་རྣམ་པར་སྤངས། །དེ་ཡི་ངོ་བོ་དེ་ཉིད་དེ། །རང་ཉིད་ཚོར་བ་རིག་པའོ། །ཕ་རོལ་གཞན་གྱི་སྤྱོད་ཡུལ་མིན། །དཔེ་བྲལ་མཚོན་པར་དཀའ་བ་དང་། །རང་གི་བློ་ལ་ཡང་དག་གནས། །རང་རིག་པ་ཞེས་བཤད་
པའོ། །གཞོན་ནུ་མ་ཡི་རབ་དགའ་བཞིན། །མཆོག་ཏུ་གསལ་བར་ཉམས་སུ་མྱོང་། །དེ་ཉིད་མཆོག་དང་ཕ་རོལ་འགྲོ། །མཆོག་ནི་ཐུབ་པ་ཀུན་ལ་སོགས། །རྟོག་པ་གསལ་བའི་གོ་འཕང་ནི། །དེ་ནི་མཆོག་དང་བདེ་བ་ཆེ། །དེ་
ཉིད་གསུམ་དུ་མཚན་ཉིད་གཅིག །དངོས་དང་དངོས་མེད་ལས་གྲོལ་བདེ་བའི་བདག་ཉིད་འཁོར་བའི་སྡུག་བསྔལ་ལས་ནི་གྲོལ་བར་རྟོགས། །གཉིས་དང་གཉིས་མེད་རྣམ་དཔྱོད་རང་བཞིན་དང་བྲལ་བློ་ནི་ཞི་བའི་བདག་ཉིད་
ཅན། །གསུངས་པའི་ཉོན་མོངས་གཅོད་ཅིང་འཇིག་རྟེན་ཀུན་རྟོག་དང་ནི་བྲལ་བ་ཞེས། །ཤེས་དང་ཤེས་བྱའི་རྣམ་རྟོག་དབེན་པ་སྤངས་ཤིང་བདེན་པའི་རང་བཞིན་དང་། །མཐར་གྱུར་ཀུན་ཁྱབ་ཞི་བ་མཆོག་དང་མཆོག་རབ་དེ་ཉིད་
འགྲོ་བ་བདེ་ལ་སྩོལ། །དུས་ནི་དུས་ཀྱི་མཐའ་ཞེས་བརྗོད། །བཞི་པའི་དུས་སྦྱོར་ཞེས་བྱ་བ། །འཁོར་བ་འཁྲུལ་བའི་རྟོག་སྤངས་ཤིང་། །མྱ་ངན་འདས་པ་ཐོབ་པ་སྤངས། །མཉམ་པའི་ཉམས་ནི་ཆེན་པོར་མྱོས། །མཉམ་ཉིད་ཡེ་ཤེས་

88-1-196a

མཚན་ཉིད་ཅན། །གཟུང་བ་རྣམས་ཀྱི་ཡུལ་རྣམས་ཞེས། །ཀུན་ནས་གཟུགས་ལ་སོགས་པ་ལས། །འཛིན་པ་དབང་པོ་རྣམ་ཤེས་རྣམས། །མིག་ལ་སོགས་པའི་རང་བཞིན་གྱིས། །དེ་དང་བྲལ་
ཞིང་མཆོག་ཏུ་ཕྲ། །ཡེ་ཤེས་བདེ་བ་ཀུན་གྱི་བདག །སྡུག་བསྔལ་ཀུན་ལས་རྣམ་པར་གྲོལ། །གཟུང་དང་འཛིན་པ་རྣམ་པར་སྤངས། །བདེ་བ་སེམས་ནི་ཞི་བ་ཉིད། །སྡུག་བསྔལ་འཁོར་བའི་མཚན་ཉིད་དེས། །
དེ་ལས་རྣམ་གྲོལ་འཇིགས་པ་མེད། །མི་གནས་མྱ་ངན་འདས་པ་པོ། །སྟོང་ཉིད་ཡེ་ཤེས་ཆེན་པོའི་བདག །འཁོར་བའི་སྡུག་བསྔལ་མི་འབྱུང་ཞིང་། །ཐུགས་རྗེ་ཞི་བར་མཛད་པའི་ཕྱིར། །མྱ་ངན་འདས་པའི་བདེ་མི་
གནས། །ཉན་ཐོས་ཡེ་ཤེས་ཞི་བ་ཉིད། །གཉིས་མེད་མཆོག་དང་བསེ་རུའོ། །དེ་དག་བདེ་བ་རྟོགས་པ་ཡི། །དེ་དང་བྲལ་བའི་བདེ་ཆེན་པོ། །དགང་ཕྱིར་མཆོག་ཏུ་དཀའ་བའི་དུས། །ཉན་ཐོས་ཡེ་ཤེས་ཞེས་བརྗོད་དོ། །དེ་མཐའ་བྲལ་
བའི་དགའ་བ་ནི། །རང་རྒྱལ་མྱ་ངན་འདས་པ་དང་། །དེ་ནི་གཉིས་མེད་ཡེ་ཤེས་ཞི། །བདེ་བ་ཡིས་ནི་བྱེ་བྲག་བྱས། །དངོས་པོ་མཁྱེན་པའི་ཡེ་ཤེས་ཆེ། །བྱང་ཆུབ་སེམས་ཀྱང་འཛིན་པར་བྱེད། །རྩ་རྣམས་ཀུན་ལ་བདེ་བ་ནི། །བདེ་བ་ཆེན་
པོའི་གོ་འཕང་གནས། །དེ་ཡི་བདག་ཉིད་དེ་ཉིད་ནི། །བདེ་བ་ཆེན་པོ་ཞེས་ནི་བརྗོད། །རྣལ་འབྱོར་གཅིག་པུས་དེ་ཉིད་ནི། །རྟོག་པ་རྣམ་རྟོག་བདག་ཉིད་མིན། །བསྙེན་ནས་བཟླས་པ་སྦྱིན་སྲེག་མིན། །བསམ་གཏན་རླུང་ནི་བགེགས་
པས་མིན། །བྱ་བ་མ་ཡིན་ཕྲེང་བས་མིན། །བསྐྱེད་པའི་རིམ་པ་བསྒོམས་པས་མིན། །ཅུང་ཟད་བཞི་པའི་དབང་བསྐུར་གྱིས། །བླ་མ་དམ་པའི་ཞལ་ནས་འཐོབ། །རྣལ་འབྱོར་མ་ཀུན་ཀུན་སྤྱོད་ནི། །མཆོག་གི་ཡེ་ཤེས་བདེ་
བ་ཆེ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་བདེ་བ་ཆེན་པོའི་ཚིག་རྣམ་པར་བཤད་པའི་ལེའུ་སྟེ་བཅུ་གསུམ་པའོ།། །། དེ་ནས་གཞན་ཡང་བཤད་ཀྱིས་ཉོན། །

88-1-196b

རྡོ་རྗེ་པད་མ་མཉམ་པར་སྦྱོར། །གང་གིས་ཡང་དག་དངོས་གྲུབ་འགྱུར། །ཚེ་འདི་ཉིད་ལ་རྣལ་འབྱོར་པ། །མི་ཕྱེད་རྡོ་རྗེ་ཞེས་ནི་བརྗོད། །དེ་ནི་རླུང་དུ་ཡང་དག་གྲགས། །ཡི་གེ་ཨ་ནི་ཕྱེ་བ་ཡིས། །རྣལ་འབྱོར་ཤེས་པས་རྟོག་
མཆོག་སྩོལ། །དེ་རྟེན་སྙིང་གའི་པད་མ་ཡིས། །འདབ་མ་བརྒྱད་ཀྱིས་རྣམ་པར་བརྒྱན། །ཆོས་ཀྱི་འཁོར་ལོ་སྐལ་བ་བཟང་། །ཐམས་ཅད་བདག་ཉིད་རྟག་ཏུ་བཞུགས། །དེ་ཡི་འདབ་མ་ལ་སྐྱེས་པ། །རྣམ་ཤེས་བརྒྱད་ནི་
ཀུན་རྫོབ་བོ། །མིག་ལ་སོགས་པ་ཡང་དག་རྟེན། །འགྲོ་བ་གསུམ་དུ་རྣམ་པར་སྤྱོད། །དེ་དག་འཇོམས་པ་རླུང་རྡོ་རྗེ། །བགེགས་མཐར་བྱེད་པ་ཞེས་ནི་བརྗོད། །རྣམ་ཤེས་རྣམས་དང་གང་དེ་ལ། །འཇིག་རྟེན་སྐྱོང་བ་རྣམས་
སུ་བརྗོད། །འཇིག་རྟེན་གསུམ་དུ་ཀུན་ནས་ཁྱབ། །འཇིག་རྟེན་པ་ཡི་ལྷ་རྣམས་གནས། །སྐྱོང་བ་ཡང་ནི་ཐམས་ཅད་ཀྱིས། །ཡུལ་ལ་སོགས་པའི་འབྲས་བུ་གནས། །དེ་ལ་རླུང་གིས་ཡང་དག་སྦྱོར། །རྡོ་རྗེ་པད་མོ་ཞེས་
ནི་བརྗོད། །རྡོ་རྗེ་སྙིང་རྗེར་ཤེས་པར་བྱ། །པད་མ་ཡང་ནི་སྟོང་པ་ཉིད། །དེ་དག་སྦྱོར་བའི་མཆོག་ཏུ་ཤེས། །རྡོ་རྗེ་པད་མ་མཉམ་སྦྱོར་བ། །རྡོ་རྗེ་ཉི་མ་ཞེས་ནི་གསུངས། །འོད་ཟེར་ཚོགས་ཀྱི་བདག་ཉིད་ཅན། །དེ་རྣམས་
ཀྱིས་ནི་འབྱེད་པ་གང་། །དེ་ནི་པད་མ་ཞེས་སུ་བརྗོད། །དེ་ཡི་རྣལ་འབྱོར་མཆོག་ཏུ་ཤེས། །རྡོ་རྗེ་པད་མ་མཉམ་སྦྱོར་བ། །བྱང་ཆུབ་སེམས་ཀྱང་རྡོ་རྗེར་འགྱུར། །བདེ་ཆེན་འཁོར་ལོ་པད་མའོ། །དེ་ལའང་དེ་ཡི་སྦྱོར་བ་གང་། །
སྦྱོར་བ་མཆོག་ཏུ་རྨད་དུ་བྱུང་། །བླ་མའི་གསུང་ནི་རྡོ་རྗེ་སྟེ། །སློབ་མ་བཟང་གིས་ཐོས་པའི་སྣོད། །པད་མ་དེ་ཡི་གནས་དེ་ལ། །དེ་ཡི་སྦྱོར་བའང་མཆོག་ཏུ་གསལ། །ཞི་གནས་པད་མ་ཞེས་གསུངས་ལ། །དེ་ལ་
ལྷག་མཐོང་རྡོ་རྗེའོ། །དེ་གཉིས་གཅིག་གྱུར་རྣལ་འབྱོར་ནི། །སྒོམ་པ་ཡིས་ནི་དེ་ཉིད་མཐོང་། །རྣལ་འབྱོར་མ་ཞལ་པད་མར་གནས། །རྡོ་རྗེ་བདེ་ཆེན་བླ་ན་མེད། །པད་མ་སློབ་མ་བཟང་གི་ཁ། །མན་ངག་གི་ནི་དོན་གྱི་སྣོད། །

88-1-197a

དེ་གཉིས་རྣལ་འབྱོར་ཀུན་བདག་ཉིད། །ཡང་དག་དེ་ཉིད་དོན་མཐོང་བྱེད། །བློ་ལྡན་རྣམ་རྟོག་བྲལ་བ་ཡི། །རྡོ་རྗེ་ལིང་ག་ཞེས་ནི་བཤད། །རྣམ་རྟོག་བྲལ་བའི་བློ་ལྡན་གྱིས། །བྷ་ག་པད་མ་ཞེས་ནི་བརྗོད། །
དམ་ཚིག་གིས་བརླན་རྣལ་འབྱོར་མ། །དེ་གཉིས་དངོས་གཅིག་ཡང་དག་སྦྱོར། །གཉིས་མེད་ཡེ་ཤེས་མཐོང་བར་བྱེད། །སྟོང་ཕྲག་གཉིས་དང་བདུན་ཁྲི་ཡི། །རྩ་རྣམས་རྡོ་རྗེ་ཞེས་ནི་བརྗོད། །བྱང་ཆུབ་སེམས་ནི་འབབ་པའི་རྩ། །
པད་མ་ཞེས་ནི་ཡོངས་སུ་གྲགས། །དེ་ནི་ཀུན་དུ་སྦྱོར་བ་དེས། །དགའ་བ་སྐྱེད་པར་བྱེད་པ་ཡིས། །རྡོ་རྗེ་ཡི་ཡང་ཉམས་དགའི་སྟན། །རང་རིག་རྡོ་རྗེ་འཆང་པད་མ། །དེ་ལ་དེ་གཉིས་མཉམ་སྦྱོར་བ། །སངས་རྒྱས་ཡེ་ཤེས་གོ་འཕང་
གསལ། །དབང་བསྐུར་མཆོག་ནི་རྡོ་རྗེ་སྟེ། །བླ་མ་སློབ་མ་སྣོད་བཟང་པོ། །དེ་གཉིས་མཆོག་ཏུ་ཡང་དག་སྦྱོར། །ཡང་དག་དེ་གཉིས་ཀྱི་ནི་རྒྱུ། །ཨེ་ནི་པད་མ་ཞེས་སུ་བརྗོད། །ཡི་གེ་བྃ་ནི་རྡོ་རྗེ་ཉིད། །ཐིག་ལེ་དེ་ཉིད་མི་
ཤིགས་པ། །དེ་གཉིས་སྦྱོར་བའི་ངོ་མཚར་ནི། །དེ་ལྟར་སྦྱོར་བ་མཆོག་ཏུ་ཤེས། །རྡོ་རྗེ་པད་སྣོད་སྡོམ་པ་ནི། །རྣལ་འབྱོར་མ་ཡི་མན་ངག་དང་། །བླ་མའི་དྲིན་གྱིས་ཡོངས་སུ་ཤེས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་
ཕྲེང་བ་མངོན་པར་རྟོགས་པ་ལས་རྡོ་རྗེ་པད་མ་ཡང་དག་པར་སྦྱོར་བ་བཤད་པའི་ལེའུ་སྟེ་བཅུ་བཞི་པའོ།། །།  སྔགས་ཀྱི་དེ་ཉིད་ཡེ་ཤེས་མཆོག །བཤད་ཀྱིས་རྡོ་རྗེ་ཅན་ནི་ཉོན། །སྔགས་ཀྱི་སྤྱོད་པ་སྤྱད་པ་
ཡིས། །ངག་གིས་དངོས་གྲུབ་མྱུར་འགྲུབ་འགྱུར། །སྐུ་གསུང་ཐུགས་ཀྱི་རྡོ་རྗེ་རྣམས། །སྔགས་ནི་གཟུངས་བཞིན་བཟླས་བརྗོད་བྱ། །དེ་ཡིས་མྱུར་དུ་དངོས་གྲུབ་འགྱུར། །རླུང་གི་དེ་ཉིད་ཕ་མཐར་ཕྱིན། །རྡོ་རྗེའི་ཕྱག་རྒྱ་གོ་
འཕང་ཞིང་། །ཕྱག་རྒྱ་ཆེན་པོའི་སྡོམ་པའི་དོན། །མཆོག་གི་དེ་ཉིད་ཡེ་ཤེས་ཆེ། །སྔགས་ཀྱི་དེ་ཉིད་བསྟན་པ་ཡིན། །དམིགས་པ་མེད་པའི་གོ་འཕང་གསལ། །རྡོ་རྗེ་སེམས་དཔའ་ངེས་པའི་རྒྱུ། །སྔགས་ནི་ཡོན་ཏན་ཀུན་གྱིས་

88-1-197b

གསལ། །ལུས་ངག་ཡིད་ཀྱི་སྡོམ་པའོ། །དེ་ཉིད་དེ་སྐྱེས་ཡེ་ཤེས་མཆོག །དེ་ཉིད་ཀུན་གྱི་དོན་བསྡུས་པ། །སྙིང་གའི་པདྨར་མཆོག་ཏུ་གསལ། །དེ་ཉིད་ཡེ་ཤེས་བླ་ན་མེད། །ཟླ་དྲུག་བཟླས་པས་འགྲུབ་པར་ནི། །
འགྱུར་ཏེ་གཞན་དུ་མ་ཡིན་ནོ། །རྣལ་འབྱོར་མཆོག་གི་ཐབས་དང་ནི། །རྣལ་འབྱོར་པས་ནི་ཡོངས་སུ་གྲགས། །དམིགས་མེད་ཞེས་ནི་གང་གསུངས་པ། །དེ་ནི་དོན་དམ་པར་ནི་བརྗོད། །སྦྲུལ་སོགས་པ་ཡི་དབྱེ་བ་ཡིས། །
སྔགས་མི་བཟློས་པ་གཉིས་སུ་མེད། །འོན་ཀྱང་མི་ཕྱེད་དེ་ཉིད་གསུམ། །སྔགས་ཀྱི་དོན་དམ་བསྡུས་པའོ། །བཟླས་པའི་དངོས་གྲུབ་མཚུངས་པ་མེད། །ཡང་དག་མཉམ་པར་བཞག་བཟླས་ན། །དངོས་གྲུབ་མཚུངས་པ་
མེད་པར་འགྲོ། །རྣམ་དག་གོ་འཕང་བཟང་པོ་གསལ། །གང་ཤེས་དེ་ནི་འགྲོ་བའི་བླ། །སྔགས་དོན་སྔགས་དེ་ཉིད་དང་ནི། །སྔགས་ཀྱི་མན་ངག་ཁ་བརྒྱུད་པ། །སྔགས་ཀྱི་མན་ངག་མི་གསལ་བ། །གང་ཤེས་
དེ་ནི་འགྲོ་བའི་བླ། །དེ་ནས་རྡོ་རྗེ་སེམས་དཔའ་ནི། །ཀུན་མཁྱེན་འགྲོ་བའི་བླ་མ་ལ། །རྡོ་རྗེ་སེམས་དཔས་ཡང་ནས་ཡང་། །ཕྱག་བྱས་ནས་ནི་ཡོངས་སུ་ཞུས། །སྔགས་ཀྱི་མཚན་ཉིད་ཇི་ལྟ་བུ། །
བཅོམ་ལྡན་འདས་ཀྱིས་མིང་དང་དོན། །རང་བཞིན་ཅི་ཞིག་རབ་གསལ་བ། །སྔགས་ཀྱི་དེ་ཉིད་མན་ངག་ནི། །སྔགས་ཀྱི་སྡོམ་དོན་ཇི་ལྟ་བུ། །དེ་ནས་བཅོམ་ལྡན་རྡོ་རྗེས་གསུངས། །རྣལ་
འབྱོར་གསུམ་གྱི་འབྲས་བདག་ཉིད། །སྔགས་ཀྱི་དོན་དང་མིང་མཆོག་དང་། །གཉིས་མེད་ཡེ་ཤེས་མཚན་ཉིད་ཅན། །དེ་ཁོ་ན་ཉིད་བཤད་ཀྱིས་ཉོན། །སྙིང་པོའི་སྙིང་པོའི་དོན་བསྡུས་པ། །
། །                        ། །                        ། །                        ། །                          ། །                   ། །                   ། །                       ། །

88-1-198a

ཐོག་མ་མེད་ཅིང་ཞི་བ་དང་། །དངོས་དང་དངོས་མེད་བདག་ཉིད་གཙོ། །སྟོང་ཉིད་སྙིང་རྗེ་དབྱེར་མེད་པ། །སྔགས་དོན་རིག་པའི་མཚན་ཉིད་ནི། །ཉོན་མོངས་མེད་ཅིང་མི་གསལ་བ། །རང་བཞིན་
མེད་པའི་མཆོག་གི་མཆོག །མིང་མེད་རང་བཞིན་མེད་པ་དང་། །རྣམ་པ་མེད་པའི་ཆེན་པོའི་མཆོག །གཉིས་པ་ཐམས་ཅད་རྣམ་པར་སྤངས། །བདེ་བ་ཡང་དག་འཕེལ་བར་བྱེད། །སྐལ་བཟང་བདེ་བ་འཕེལ་བར་
བྱེད། །ཐམས་ཅད་ཤེས་ཤིང་ཆ་དང་བྲལ། །གཉིས་མེད་ཡེ་ཤེས་རྣལ་འབྱོར་སྐྱེས། །དེ་ཉིད་དེ་ནི་དོན་དམ་ཡང་། །དེ་ཉིད་དེ་བཞིན་ཉིད་གཞན་མིན། །དེ་ཉིད་རྡོ་རྗེ་འཆང་བའི་དངོས། །ཡེ་ཤེས་ལྔ་ཡི་རང་བཞིན་ཉིད། །
ཁྱབ་པ་ཀུན་འགྲོ་སྟོང་པ་ཉིད། །ཉོན་མོངས་ཐམས་ཅད་རབ་ཏུ་འཇོམས། །དྲི་མེད་དྲི་བྲལ་དགའ་བ་དང་། །རང་རིག་པ་ཡི་གོ་འཕང་མཆོག །དང་པོའི་ལྷ་སྟེ་ཉམས་དགའ་བཟང་། །ཆ་ཡི་ཚོགས་རྣམས་རྒྱས་
པར་བྱེད། །མན་ངག་གནས་ཀྱི་བྱེ་བྲག་གིས། །འཁོར་ལོའི་དབྱེ་བས་བཏུ་བར་བྱ། །རྩ་དང་མགྲིན་པ་སྙིང་ག་རྐན། །རྩོལ་བ་ཇི་བཞིན་བརྗོད་པ་ཡི། །དེ་བཞིན་དུ་ནི་ལས་བྱ་བ། །ཞི་བ་ལ་སོགས་གོ་རིམ་བཞིན། །
ཇི་བཞིན་དངོས་གྲུབ་ཡེ་ཤེས་དང་། །ཇི་བཞིན་ཉམས་སུ་མྱོང་མཚན་ཉིད། །རང་བཞིན་རྫོགས་པ་ཇི་ལྟ་བུ། །རྒྱུན་གྱི་དབྱེ་བ་ཇི་ལྟ་བུ། །རིག་པ་ཇི་བཞིན་སྦྱོར་ཇི་བཞིན། །འབྲས་བུ་ཇི་ལྟ་བ་བཞིན་གནས། །ཡང་དག་
བསམ་གཏན་ཕྱག་རྒྱའི་རིམ། །གཟུགས་རྫོགས་པ་ལ་སོགས་པ་ཡི། །བླ་མ་བརྒྱུད་པས་ཡང་དག་གནས། །རབ་ཏུ་འབད་པས་བསླབ་པར་བྱ། །གསེར་དང་དོ་ཤལ་གོས་དང་ནི། །རིན་ཆེན་སྣ་ཚོགས་ཡོན་ཏན་མཆོག །
བྲན་དང་ལས་བྱེད་གྲངས་མེད་དང་། །དད་ཅིང་གུས་པ་ལ་སོགས་ཀྱིས། །ཇི་ལྟར་བཞེད་པ་སྟོན་པ་ལ། །རྙེད་པར་དཀའ་བའི་དངོས་རྣམས་ཀྱིས། །སྔགས་ཀྱི་དོན་སྟོན་བླ་མ་ནི། །དགོངས་པ་ཡོངས་སུ་རྫོགས་པར་བྱ། །ཕྱག་བྱས་དེ་

88-1-198b

རྗེས་སྔགས་པ་ཡིས། །ཡང་དག་བཟུང་ནས་འབྲས་བུའི་དོན། །མི་ཡི་རུས་པའི་སྨྱུ་གུ་དང་། །ས་གཞི་རིན་ཆེན་རབ་འབར་བ། །ཡང་ན་དུར་ཁྲོད་ཐལ་བ་ནི། །རབ་བརྡལ་དངོས་གྲུབ་སྟེར་བར་བྱེད། །ཐོག་མར་དབང་བསྐུར་
བླང་བྱས་ནས། །མདུན་དུ་དཀྱིལ་འཁོར་ལ་སོགས་བྱ། །བགེགས་མཐར་བྱེད་ལ་གཏོར་མ་ནི། །ཆེན་པོ་གཙུག་ལག་ཁང་དུ་སྦྱིན། །སྐུ་གསུང་ཐུགས་ནི་སྒྲུབ་བྱེད་པའི། །མཚུངས་པ་མེད་པའི་སྔགས་བཏུ་བྱ། །དང་པོའི་
ཡི་གེ་ཐོག་མར་བྲི། །དབྱངས་ཡིག་ལྔ་པ་ཡང་དག་ལྡན། །སྡེ་ཚན་ཐ་མའི་མཐའ་ཆ་ལྡན། །སྐུ་ཡི་ས་བོན་དུ་ནི་བརྗོད། །ཐོག་མའི་ཡི་གེ་ཉིས་འགྱུར་ལ། །ཨུཥྨ་ཥ་ཡི་ཆ་དང་ལྡན། །མཚུངས་པ་མེད་པའི་སྔགས་བཏུ་
བྱ། །གསུང་གི་རྡོ་རྗེ་སྙིང་པོ་མཆོག །ཨུཥྨ་ཥ་ཡི་ཆ་དང་བཅས། །དབྱངས་ཡིག་དྲུག་པར་ཡང་དག་ལྡན། །སྡེ་ཚན་མཐའ་ཡི་མཐའ་ཆར་བཅས། །ཐུགས་ཀྱི་རྡོ་རྗེ་གོ་འཕང་གསལ། །སྐུ་གསུང་ཐུགས་ཀྱི་དམ་
ཚིག་གསུམ། །འཇིག་རྟེན་གསུམ་ཡང་འགྲུབ་པར་བྱ། །རྣལ་འབྱོར་པ་ཡི་དེ་ཉིད་མཆོག །སྔགས་བཏུ་བ་ནི་བླ་ན་མེད། །དེ་ཉིད་དངོས་གྲུབ་ཐམས་ཅད་བྱེད། །སྔགས་རྣམས་ཀུན་གྱི་དོན་བསྡུས་པ། །སྔགས་ཀྱི་ཐེག་པ་
ཀུན་ཡིན་ནོ། །རྒྱུ་དང་མི་རྒྱུ་ས་ཉིད་ལ། །དངོས་གྲུབ་རྣམས་ཀྱི་རྣལ་འབྱོར་མཆོག །རྣལ་འབྱོར་ཡེ་ཤེས་བླ་ན་མེད། །རྡོ་རྗེ་སེམས་དཔའི་སྙིང་པོ་ནི། །ཡེ་ཤེས་བླ་ན་མེད་པའི་མཆོག །མན་ངག་ཇི་བཞིན་སྔགས་
ཟློས་པ། །དངོས་གྲུབ་ཕྱིར་ནི་ལུང་བཞིན་གྱིས། །དེ་ཡི་དངོས་གྲུབ་རྒྱ་ཆེན་འགྲོ། །ཚེ་འདི་ཉིད་ལ་སྔགས་ཤེས་པས། །ཡེ་ཤེས་ཆེན་པོ་ཞེས་བཤད་པའི། །སྐུ་གསུང་ཐུགས་ཀྱི་རྣལ་འབྱོར་ཆེ། །རབ་གསལ་སྔགས་ནི་
མཚུངས་པ་མེད། །འདོད་པ་ཀུན་ལ་ལོངས་སྤྱོད་བྱེད། །གང་ཞིག་སྔགས་ནི་མགུལ་པ་རུ། །རྟག་འཆང་དེ་ཁོ་ན་ཉིད་ཤེས། །རྟོག་པ་ཀུན་ཡང་འགྲུབ་པར་བྱེད། །དཀྱིལ་འཁོར་ཀུན་དུ་ཞུགས་པ་དང་། །དམ་ཚིག་ཐམས་

88-1-199a

ཅད་ཤེས་པ་དང་། །བློ་བཟང་འཇིག་རྟེན་གསུམ་ཡང་འགྲུབ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྔགས་ཀྱི་དེ་ཁོ་ན་ཉིད་གསུངས་པའི་ལེའུ་སྟེ་བཅྭ་ལྔ་པའོ།། །། 
དེ་ནས་གཞན་ཡང་བཤད་ཀྱིས་ཉོན། །གྲངས་ཀྱི་རིམ་པ་བླ་ན་མེད། །ཇི་ལྟར་གནས་པའི་རླུང་རྣམས་ཀྱི། །རིམ་པ་ཇི་ལྟ་བ་བཞིན་དུ། །གང་གིས་ཐོབ་པ་སྐལ་བ་བཟང་། །སྲོག་ནི་ཐམས་ཅད་བདག་ཉིད་གནས། །གང་
གིས་ཡང་དག་ཡོངས་སུ་ཤེས། །རྣལ་འབྱོར་མཆོག་ནི་ཐོབ་པར་བྱེད། །རླུང་གི་མཚན་ཉིད་མི་ཤེས་པ། །འཇིག་རྟེན་གསུམ་དུ་རྣམ་པར་འཁོར། །གོམས་པ་ཐོབ་པ་དེ་ཡང་ནི། །བླ་མ་རྣལ་འབྱོར་དེ་ཤེས་བརྒྱུད། །རླུང་གི་
མཚན་ཉིད་ཇི་ལྟ་བུ། །ལོ་ཚིགས་ཀྱི་ནི་མཚན་ཉིད་ནི། །མདོར་བསྡུས་ནས་ནི་བཤད་པར་བྱ། །སྤྲིན་གྱི་དཔལ་ལས་གསལ་བ་གང་། །མདོར་བསྡུས་ནས་ནི་དུས་ནི་དྲུག །ལོ་ཚིགས་སུ་ནི་ཡོངས་སུ་གྲགས། །སྦྱོར་བ་
གཉིས་ནི་དུས་ཡིན་ཏེ། །དུས་དེ་ཉིན་ཞག་དྲུག་བཅུའོ། །ཉིན་དང་མཚན་དུ་ངེས་པ་ལ། །ཉིན་ཞག་གཅིག་ཅེས་ཡོངས་སུ་གྲགས། །ཉིན་མཚན་ཆུ་ཚོད་དྲུག་བཅུ་སྟེ། །དེ་བཞིན་དབྱུགུ་ཙ་ཤའོ། །འབྱུང་དང་རྔུབ་པའི་དུས་དྲུག་
ལ། །ཙ་ཤ་ཞེས་ནི་ཡོངས་སུ་གྲགས། །སྐད་ཅིག་མ་དྲུག་ལ་ནི་དབུགས། །དེ་ཉིད་སེ་གོལ་གཏོགས་པའི་ཚད། །ཐང་ཅིག་གསུམ་ལ་སྐད་ཅིག་གོ། །དེ་ལ་ཡུངས་ཀར་བསྐོར་བ་ཙམ། །དབུགས་གསུམ་ལ་ནི་ཐང་ཅིག་གོ། །ཐང་ཅིག་
དེ་ནི་ཡུད་ཙམ་མོ། །ཐང་ཅིག་གསུམ་ལ་མིག་བཙུམས་ཏེ། །དེ་ཡང་མིག་ནི་འཛུམས་པ་ཡི། །ཙམ་གསུམ་ལ་ནི་མིག་བཙུམས་ཏེ། །ཙམ་ནི་ཐལ་མོ་བརྡབས་པའོ། །བདེ་བ་འཆར་བ་དེ་གསུམ་ཙམ། །དེ་ནི་ཐིག་ལེ་འཕོ་བའོ། །སྔགས་པ་
གསུམ་ལ་བདེ་བར་གནས། །དེ་ནི་རབ་འགྱེལ་འཇིགས་པར་བརྗོད། །དུས་གསུམ་ལ་ནི་འཇིགས་པར་བཤད། །དུས་ནི་ཕྲ་བ་སྐད་ཅིག་བདག །འདས་པ་དང་ནི་ད་ལྟར་དང་། །མ་འོངས་པ་ཡི་མཚན་ཉིད་དོ། །འདས་པའི་སྐད་ཅིག་གསུམ་

88-1-199b

དུ་གསུངས། །ད་ལྟར་ཡང་ནི་སྐད་ཅིག་གསུམ། །མ་འོངས་སྐད་ཅིག་གསུམ་དུ་བཤད། །དེ་ལས་སླར་ཡང་སྐད་ཅིག་གསུམ། །དེ་ལྟར་སྐད་ཅིག་གསུམ་གྱི་ཆ། །དེ་ལས་ཆ་གསུམ་དེ་ལས་ཆ། །དེ་སྲིད་གྲངས་ནི་ཇི་སྲིད་དུ། །
རྟོག་པ་སྟོང་པ་གཉིས་སུ་མེད། །རྣལ་འབྱོར་མཆོག་ནི་ཐོབ་པར་འགྱུར། །སྲོག་གི་གནས་ནི་བླ་ན་མེད། །ཕྱོགས་དང་དུས་ཀྱི་རྟོག་པ་བྲལ། །རིགས་པའི་མཚན་ཉིད་སྤངས་པ་དང་། །དེ་ཡི་སྲོག་ནི་ཤར་ནས་ཐིམ། །གཉིས་
མེད་དེ་ནི་བསྡུས་པའོ། །གཞན་ཡང་བཤད་པར་བྱ་ཡིས་ཉོན། །སྲོག་ནི་ཐིམ་དང་འཆར་བ་ཡི། །གང་ཚེ་སྐད་ཅིག་ལ་སོགས་རྟོགས། །ཀུན་ནས་རབ་ཏུ་མ་ཞི་བ། །དེ་སྲིད་སྲོག་ནི་རླུང་གི་གནས། །གྲོལ་བའི་གནས་ནི་མི་ཤེས་
སོ། །བཤང་སྒོ་གསང་བའི་དབུས་ན་གནས། །མིང་ནི་མ་སྐྱེས་ཆ་ཆེན་པོ། །དེ་ཡང་རྣམ་ཤེས་དང་བྲལ་བ། །ཡེ་ཤེས་ལུས་ནི་བདག་མེད་པ། །དེར་ནི་སྐྱེ་བ་མཆོག་གི་མཆོག །སྲོག་ཆགས་རྣམས་ཀྱི་མཆོག་ཏུ་བརྗོད། །
རྣམ་པར་ཤེས་པའི་ངོ་བོ་སྟོན། །ཐོག་མར་འབྱུང་བ་བཞི་པོ་ལ། །སྒྲོ་འདོགས་བསྐྱེད་པའི་ངོ་བོར་བྱེད། །དེ་ཚེ་རང་གི་གནས་སུ་ཐིམ། །རྣམ་ཤེས་ལས་ནི་སྐྱེ་བ་རླུང་། །དེ་ལས་མེ་ནི་སྐྱེ་བར་འགྱུར། །མེ་ལས་ཆུ་ནི་འབྱུང་བར་
བྱེད། །དེ་ལས་ས་ནི་ཡང་དག་སྐྱེ། །དེ་དག་རྣམས་ལས་ཕུང་པོར་བྱུང་། །དེ་ཕྱིར་སྐྱེ་མཆེད་རྣམས་དང་ནི། །དེ་ལས་རྣམ་ཤེས་རང་བཞིན་མེད། །བརྒྱ་དང་བརྒྱད་ཀྱིས་ལྷག་པའི་རིམ། །ཇི་ལྟར་སྐྱེ་བོ་དེ་ཡི་གནས། །ཐིམ་ནས་
འགྲོ་བའི་རང་བཞིན་དུ། །རྒྱགས་པ་བསྐྱེད་པའི་རླུང་ཆེན་པོ། །ཉོན་མོངས་ཡིད་ནི་འདས་ནས་ནི། །སྔགས་ཐོབ་ནས་ནི་རྣམ་རྒྱས་ཏེ། །སྐྱེ་མཆེད་རྣམས་ནི་སྡུད་པར་བྱེད། །དེ་ལས་རྒྱགས་པས་ཆུ་ཡི་རླུང་། །རྒྱགས་པ་བསྐྱེད་པ་
ཟ་བའི་ཕྱིར། །ཕུང་པོ་རྣམས་ཀྱང་སྡུད་བྱེད་ཉིད། །རིམ་གྱིས་ལུས་ཆེན་སྒྲ་སྒྲོགས་བྱེད། །དེ་ལས་རྒྱགས་པའི་ཆ་ནི་འབྱུང་། །རྒྱགས་པའི་ཆུ་ནི་སྡུད་པར་བྱེད། །འབྱུང་བ་རྣམས་ཀྱིས་བསྡུས་ནས་ཀྱང་། །གོ་རིམ་ཇི་ལྟ་བ་

88-1-200a

བཞིན་དུ། །དེ་ལ་རླུང་ནི་བཏང་བཟུང་འབྱུང་། །རྒྱགས་པའི་ཆ་ནི་ཟ་བར་བྱེད། །དེ་ནས་ཀྱང་ནི་རླུང་ནི་སྡུད། །ཁྱབ་ཅིང་ཕྲ་ལ་སྒྲིབ་པར་བྱེད། །དེ་ལས་མི་ཟད་བཏང་བཟུང་དང་། །རྣམ་ཤེས་སྐད་
ཅིག་སྒྲིབ་པར་བྱེད། །བསྒྲིབས་ནས་དེ་ལས་རྣམ་ཤེས་ཀྱང་། །བེམས་པོར་སོང་ནས་བརྒྱལ་བར་འགྱུར། །སྐྱེ་མཆེད་ཆ་ནི་སྒྲིབ་པར་བྱེད། །དག་པའི་ཡེ་ཤེས་མཆོག་གི་མཆོག །དེ་ལས་ཐིམ་པར་གྱུར་པའི་སྲོག །
རྣམ་ཤེས་དང་ནི་མཚུངས་པར་ལྡན། །དེ་ཉིད་མཆོག་ནི་དེ་ལྟར་བཤད། །སྲོག་ནི་ཐིམ་ཞིང་འཆར་བ་དང་། །ཇི་ལྟ་བ་བཞིན་ཡོངས་སུ་ཤེས། །བླ་མ་བརྒྱུད་པའི་རིམ་པ་འབྱུང་། །རིགས་པ་གཞན་ཡང་བཤད་པར་བྱ། །
རྡོ་རྗེའི་སྐུ་ནི་བསྒྲུབ་པའི་ཕྱིར། །འཆི་བ་མེད་པའི་བསྒྲུབ་པ་ནི། །གང་གིས་འཆི་མེད་ལུས་མཆོག་ནི། །ཐོབ་པ་ཡོན་ཏན་རྣམས་ཀྱི་རྟེན། །གང་ཕྱིར་སེམས་ཅན་ཚེ་ཐུང་བས། །འཆི་མེད་གོ་འཕང་བསྒྲུབ་མི་ནུས། །
དེ་ཕྱིར་འབད་པ་ཐམས་ཅད་ཀྱིས། །འཆི་བ་མེད་པར་རབ་བསྒྲུབ་བྱ། །བཅོམ་ལྡན་མགོན་པོ་ཡེ་ཤེས་མཆོག །རྣལ་འབྱོར་དེ་ཉིད་ཕ་རོལ་བྱོན། །རྡོ་རྗེ་སེམས་དཔས་ཕྱག་བྱས་ཞུས། །འཆི་བ་མེད་ཉིད་རིགས་པར་ནི། །
ཇི་ལྟར་ཡང་དག་ཐིམ་པ་ལགས། དེ་ནས་བཅོམ་ལྡན་རྡོ་རྗེས་གསུངས། །བྱ་བ་ཀུན་བསྒྲུབ་གོ་འཕང་ནི། །འཆི་བ་མེད་པའི་རྣལ་འབྱོར་ཆེ། །ཡང་དག་དེ་ཉིད་རྣམ་ངེས་པ། །སེམས་ཅན་ཚེ་ནི་ཐུང་བ་ཡིས། །དངོས་
གྲུབ་འགྲུབ་པ་གང་ཡང་མེད། །དེ་བས་རྣལ་འབྱོར་བཟང་པོ་རྣམས། །ཚེ་རིང་བ་ནི་དགེ་བའོ། །དེ་ལ་ཐོག་མར་རྣལ་འབྱོར་མཆོག །བློ་བཟང་ནང་གི་བདག་ཉིད་བསྒྲུབ། །ལྕེ་ནི་རྐན་གྱི་དབུས་སྦྱར་བ། །བྱས་ནས་དེ་ཁོ་ཉིད་
ཚིག་བཟླ། །སེམས་དཔའི་དཀྱིལ་ཀྲུང་བཅས་ནས་ནི། །ཡང་དག་རྣལ་འབྱོར་རྗེས་དྲན་བྱ། །སྣ་རྩེར་དབུགས་ནི་རྒྱུ་བྱ་ཞིང་། །ཁ་ནི་གསལ་བར་དགག་པར་བྱ། །རྐན་གྱི་གནས་སོན་ཟླ་བ་ནི། །སྔགས་ཀྱི་རྣལ་འབྱོར་

88-1-200b

གྱིས་ནི་ཞུ། །ཞུ་བ་རླུང་གི་རྣལ་འབྱོར་གྱིས། །རྟག་ཏུ་རྣལ་འབྱོར་གཙོ་བོས་བཏུང་། །མཚན་ཕྱེད་ཀྱི་ནི་དུས་ཚོད་མཐར། །ཇི་སྲིད་ཐུན་གཅིག་མ་ཆད་པར། །དེ་སྲིད་རྣལ་འབྱོར་པས་སྔགས་བཟླ། །རྡོ་རྗེའི་ལུས་ནི་བྱེད་པར་འགྱུར། །
སྡེ་ཚན་གཉིས་པའི་གསུམ་པ་ལ། །དབྱངས་བཅས་པ་དང་ཡང་དག་ལྡན། །ཡན་ལག་མ་ཉམས་རྟག་ཏུ་བཟླ། །སྒྲུབ་པ་པོ་ཡི་སྲོག་ནི་འགུགས། །རྫས་ཀྱང་རྟག་ཏུ་བསྟེན་པར་བྱ། །དེ་ཉིད་ལྔ་ཡི་རིམ་པས་སྐྱེ། །བཟླས་
པ་རྫོགས་ནས་རྟག་ཏུ་ནི། །ལུས་ལ་འབྱུང་བའི་དྲི་མ་མེད། །ལྕགས་ལྔའི་རང་བཞིན་སྣོད་དུ་ནི། །བཞག་ནས་ཇི་སྲིད་ཉི་མ་ནི། །འཆར་ཀར་དེ་ནས་དེ་ལ་ཡང་། །ཡོ་ཥིག་རག་གཏམ་བདེ་བ་ནི། །བླུགས་ནས་རྟག་ཏུ་རྫས་
ཀྱི་མཆོག །བདུད་རྩི་བདུན་པའི་མིང་ཅན་ནོ། །ཉལ་ཀར་ཡང་ནི་དེ་འཐུངས་ན། །རྫས་ཀྱིས་ཚེ་ནི་འཕེལ་བར་བྱེད། །སྔགས་ཀྱི་རྒྱལ་པོ་ཨོཾ་ཨཱཿཧཱུཾ། །དེ་ནས་ལན་བདུན་བཟླ་བར་བྱ། །ལག་གཡས་བ་དན་གྱིས་མཚན་
ལ། །སྣོད་བཟངས་དེ་ལ་བཀབ་ནས་སུ། །ཡི་གེ་བརྒྱ་པའི་སྔགས་ཀྱིས་ནི། །ལན་གསུམ་དུ་ནི་དག་པར་བྱ། །དེ་ཕྱིར་བུད་མེད་གཞོན་ནུ་ནི། །རྟག་ཏུ་འཁུར་བ་བཀང་ཞིང་བཏུང་། །དེ་ནི་བཟའ་བ་སྦྱིན་པ་ཡང་། །མར་ལ་བཏགས་
པའི་འབྲས་དང་ནི། །མ་ཤ་དང་ནི་ཉི་དགའ་དང་། །ར་ཡི་འོ་མ་ཁ་ར་ཀར། །ཏིལ་རྣམས་ཆ་མཉམས་བྱས་ནས་ནི། །མོས་པ་ཡིས་ནི་སྦྱིན་སྲེག་བྱ། །ཉལ་ཀར་དེ་ལ་བཟའ་བ་སྦྱིན། །བླ་ན་མེད་པའི་བཟའ་བ་པོ། །དེ་ལྟར་
རིག་པས་ཆོག་ཤེས་ནས། །སུ་ལའང་སྨྲ་བར་མི་བྱའོ། །ཐམས་ཅད་སྔོན་བཞིན་ཞི་བ་ནི། །མྱུར་དུ་དངོས་གྲུབ་སྟེར་བར་བྱེད། །ཟླ་བ་དྲུག་ཏུའང་གང་བསྟེན་པ། །དེ་ནི་རྡོ་རྗེའི་ལུས་སུ་འགྱུར། །བཅུད་ཀྱིས་ལེན་དང་
གསེར་འགྱུར་སོགས། །ཚེ་དགུག་པ་ནི་བླ་ན་མེད། །རབ་ཏུ་འབད་པས་བསྟེན་པར་བྱ། །ཕྱག་རྒྱ་ཆེ་དོན་སྒྲུབ་པ་པོས། །རྒས་པ་མེད་ཅིང་སྲིན་ནད་མེད། །སྙོམ་ལས་མེད་ཅིང་ལྐུགས་པ་མེད། །གློ་སྐམ་རླུང་མཁྲིས་ནད་སོགས་

88-1-201a

མེད། །ནད་དང་འབྲས་དང་འབྲུམ་བུ་དང་། །ཤུ་བ་གཡན་པ་འབྲུམ་ཕྲན་མེད། །མཛེ་ནད་མཚན་མ་རྡོལ་བ་མེད། །དུང་དང་པད་དཀར་དཔལ་ལུས་ལྡན། །འཛམ་བུའི་ཆུ་བོ་གསེར་ལྟར་འབར། །རིག་པ་
འཛིན་པའི་བུ་མོ་མཆོག །དེ་ནི་རྟག་ཏུ་འགུགས་པར་བྱེད། །དེ་ཡི་མཛའ་ཆེན་ལྷ་རྣམས་ཏེ། །རྣལ་འབྱོར་མ་རྣམས་སེམས་པར་བྱེད། །ལུས་ཀྱི་རང་བཞིན་རྟག་ཏུ་ནི། །ཕྱག་བྱ་བ་དང་མཆོད་པར་འགྱུར། །རྣལ་འབྱོར་
ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རླུང་གི་གྲངས་ཀྱི་རིམ་པའི་གནས་བསྟན་པའི་ལེའུ་སྟེ་བཅུ་དྲུག་པའོ།། །། དེ་ནས་གཞན་ཡང་རྩ་རྣམས་ནི། །གྲངས་དང་གནས་ནི་བསྡུས་
པ་ཉོན། །འཁོར་ལོའི་གྲངས་ཀྱི་དབྱེ་བ་ཡིས། །ཇི་བཞིན་རྨད་དུ་བྱུང་བའི་མཆོག །འཁོར་ལོ་དྲུག་ལ་རྟེན་བཅུ་དྲུག །ལུས་ལ་ལྷ་ཡི་གཞལ་ཡས་ཁང་། །རྣལ་འབྱོར་ཇི་བཞིན་གནས་ཇི་བཞིན། །མདོར་བསྡུས་ནས་ནི་བཤད་
པར་བྱ། །རླུང་གི་འཁོར་ལོར་གནས་པའི་རྩ། །འདབ་དྲུག་རླུང་ནི་མཁའ་ལ་སྤྱོད། །འདབ་གསུམ་མེ་ཡི་འཁོར་ལོར་བཤད། །རྩ་གསུམ་གནས་ནི་རིམ་གྱིས་འཆར། །དེ་བཞིན་ལོངས་སྤྱོད་འཁོར་ལོ་ཡང་། །རྩ་ནི་བཅུ་
དྲུག་ཡང་དག་བརྗོད། །ཆོས་ཀྱི་འཁོར་ལོར་གནས་པའི་རྩ། །བརྒྱད་ནི་ཀུན་ལ་ཁྱབ་པའོ། །དེ་བཞིན་སྤྲུལ་པའི་འཁོར་ལོ་ཡང་། །དྲུག་བཅུ་རྩ་བཞིར་འཆར་བར་བཤད། །བདེ་བ་ཆེན་པོའི་འཁོར་ལོ་ཆེར། །རྩ་ནི་སུམ་ཅུ་
གཉིས་སུ་བཤད། །དེ་ལྟར་མདོར་བསྡུས་རིམ་པ་ཡང་། །བརྒྱ་དང་སུམ་བཅུ་གཅིག་ལྷག་པར། །རྩ་རྣམས་སུ་ནི་ཡང་དག་བཤད། །གཞན་དག་ཏུ་ནི་རྒྱས་པར་ཡང་། །རྩ་ནི་བདུན་ཁྲི་ཉིས་སྟོང་དུ། །གནས་ཀྱི་དབྱེ་བས་
ཕྱེ་བ་ནི། །ངེས་པར་བརྗོད་པ་འབུམ་སྡེར་གསུངས། །རྒྱུད་ནི་ཆུང་ངུའང་འདི་ཉིད་དུ། །སྙིང་པོ་ལས་ནི་སྙིང་པོར་གསུངས། །སྨིན་མའི་དབུས་གནས་རླུང་འཁོར་ལོ། །བྱེ་བ་འཁྱིལ་པ་མི་བཟད་པ། །མི་བཟང་བརྟན་དང་མཚན་

88-1-201b

ཉིད་ཅན། །རྩ་ཐུང་དྲུག་གི་མཚན་ཉིད་དོ། །འཛིན་པ་རྟོག་མེད་གང་བ་ནི། །རྩ་གསུམ་གྲུ་གསུམ་མེ་དཀྱིལ་འཁོར། །མགྲིན་པའི་འོག་ཏུ་བཤད་པ་ཡིན། །དྲི་མ་དང་བྲལ་གསལ་བ་དང་། །དྲག་པོ་དང་ནི་གསུམ་ཡིན་
ནོ། །ཡང་དག་ཞུགས་དང་ཤིན་ཏུ་ཞུགས། །ཤིན་དུ་བཟང་དང་བཟང་པོར་འགྲོ། །སྟོབས་ཆེན་དང་ནི་མི་བཟད་ཆེ། །མཛེས་ཆེན་མདུན་དུ་སྐྱེས་པ་ཆེ། །རྒྱགས་པའི་རྟག་དང་རྒྱགས་པའི་ཆ། །རྒྱགས་པའི་ཆུ་དང་རྒྱས་
སྨྱོ་བྱེད། །རྒྱགས་དང་རྒྱགས་པའི་རྒྱུ་མཐུན་དང་། །རྒྱགས་པའི་རླན་དང་རྒྱགས་པ་འཆང་། །རྩུབ་དང་མཁའ་དང་འབྱུང་བརླང་དང་། །དབུགས་མི་བདེ་དང་གཡའ་མཁའ་འགྲོ། །འདབ་ཆགས་ཡན་ལག་ཁྭ་ཡི་གདོང་། །
ཟ་ཕོད་མི་བཟད་སྒྲ་སྒྲོགས་དང་། །དྲི་ལྡན་རྡེག་དང་རྡུལ་བ་དང་། །དབྱངས་དང་དབྱངས་སྐྱེས་དང་ནི་སྤྲིན། །ཆུ་བ་མཐོང་དང་རྒྱུན་ལྟར་སྔོ། །ཡུད་ཙམ་གཙོ་བོ་ཡུད་མ་སྐྱེས། །རྒྱབ་ཏུ་ཁ་བལྟས་དབྱུག་པ་དང་། །དབྱུག་སྙོམས་
དང་ནི་རྙིང་པ་དང་། །ཚིགས་ཀྱི་ལྷ་དང་ཚིགས་ཀྱི་ཚིག །ཚིགས་ཀྱི་ཚད་དང་བརྟུལ་བ་དང་། །ཚིགས་ཀྱི་གནས་དང་ཚིགས་ཀྱི་གདོང་། །ཚིགས་འོད་ཚིགས་ཀྱི་ལུ་གུ་རྒྱུད། །དུལ་བྱེད་དུད་འགྲོ་གཟི་བརྗིད་དང་། །དྲི་མེད་དུལ་བའི་
སྙེམས་པ་དང་། །ཆུ་འཕྱང་ལྟོ་དང་ཆུ་འཕྱང་ཆགས། །ཆུན་འཕྱང་ཆུན་འཕྱང་ཕྱེད་སྦྲང་བུ། །ཕྲུ་གུ་ཕྲུ་གུ་སྟེར་དྲི་བ། །ལོ་མ་ལོ་མའི་མགྲིན་པ་དང་། །རབ་མཆོག་མ་དང་རབ་གསལ་ཏེ། །དེ་ལྟར་དྲུག་བཅུ་རྩ་བཞིར་བཤད། །ལྟེ་བ་
སྤྲུལ་པའི་འཁོར་ལོ་གནས། །བདུད་རྩི་མཆོག་གིས་ཡོངས་སུ་གང་། །རིན་ཆེན་ཆེན་པོ་པད་མ་དང་། །རྡོ་རྗེ་ཆེན་པོ་སྟོབས་པོ་ཆེ། །མགོ་བོ་ཆེ་དང་སྒྲ་ཆེ་དང་། །ཉེས་དགའ་ཆེན་པོ་མྱོས་པ་ཆེ། །འདི་བརྒྱད་ཆོས་ཀྱི་འཁོར་
ལོའི་དབུས། །སྙིང་གའི་པད་མར་ཡང་དག་གནས། །ལོངས་སྤྱོད་ལོངས་སྤྱོད་སྟེར་ལྡན་དང་། །ཉི་འགྲོ་གསལ་དང་སྐལ་བ་དང་། །སྒོམ་པ་དང་ནི་ཐལ་བའི་གདོང་། །བཟའ་སྟེར་བཟའ་དང་བཀྲེས་པ་དང་། །བཅུད་ལེན་རོས་ནི་

88-1-202a

བཀུར་བ་དང་། །རོ་འཇིགས་པ་དང་རོ་དང་ནི། །ཁྲུང་ཁྲུང་ལོངས་སྤྱོད་འཁོར་ལོར་གནས། །གྲངས་ནི་བཅུ་དྲུག་ཏུ་ནི་བརྗོད། །དེ་སྟེང་རིམ་རིགས་འདོད་པ་ཅན། །འདོད་ཅན་མ་དང་སྲོག་གི་ལུས། །ཟླ་འཐུང་
ཟླ་སྟེར་མཛེས་པ་ནི། །འདོད་ཆགས་མིན་སྨྲ་ཀུ་ཤ་དང་། །ཤི་བ་སྤོ་དང་དག་པ་དང་། །མེ་དང་མེ་རོ་ནེ་ཙོ་དང་། །གང་ལ་གཉིས་རོ་ལྡན་པ་དང་། །ཀོས་རིང་ཆང་སྟེར་བདུད་རྩི་དང་། །དུང་ཅན་དང་ནི་དུང་རྣ་དང་། །དུག་གི་མིག་དང་དུག་གི་
སྣ། །རྒྱགས་དབང་རྒྱགས་པ་བརྐམ་པ་དང་། །རྒྱགས་པས་བརྒྱལ་དང་ངོ་མཚར་རྒྱགས། །སྙེམས་པ་དང་ནི་ཚོགས་ཀྱི་སྟེན། །སུམ་བཅུ་རྩ་གཉིས་ཞེས་ནི་བརྗོད། །བདེ་བ་ཆེན་པོའི་འཁོར་ལོ་ཆེ། །མཆོག་ཏུ་དགའ་བ་སྟེར་
བར་བྱེད། །ཕྲ་དང་རེག་བྱ་མཆོག་ཏུ་ཕྲ། །གཟུང་དང་འཛིན་པ་རྣམ་པར་སྤངས། །རང་ཉིད་བདེ་ཆེན་རང་བཞིན་དང་། །གཞན་དག་ལ་ཡང་སྟེར་བར་བྱེད། །དེ་ལྟར་ཡང་དག་རྩ་ཡི་རིམ། །བླ་མའི་ཞལ་ལས་ཤེས་པར་བྱ། །རྩ་
ཡི་རིམ་མེད་ངེས་པར་ནི། །ཕུང་པོ་ལ་སོགས་མི་འབྱུང་ངོ་། །ཕུང་པོ་མེད་ན་ཡེ་ཤེས་ཆེ། །རྣལ་འབྱོར་པ་ཡིས་ཐོབ་མི་འགྱུར། །ཕུང་པོ་ལྔ་ཡི་བདག་ཉིད་ལུས། །མཁའ་འགྲོ་ལྔར་ནི་རབ་ཏུ་གྲགས། །དེ་ཉིད་འབྱུང་བ་
ལྔ་ཡིས་ནི། །ཡེ་ཤེས་ལྔར་ནི་རྣམ་པར་གནས། །དེ་ཕྱིར་འབད་པ་ཐམས་ཅད་ཀྱིས། །རྩ་ཡི་འཁོར་ལོ་ཤེས་པར་བྱ། །ཇི་ལྟར་ཆུ་ཡི་དབུས་ཀྱི་ཤིང་། །མྱུར་དུ་ཡང་ནི་འཕེལ་ནས་འགྲོ། །དེ་ལས་འབྲས་བུ་སོགས་ལྡན་པ། །
སྟེར་བར་འདི་ལ་ཐེ་ཚོམ་མེད། །དེ་བཞིན་ཕུང་པོ་ཤིང་ཞེས་བྱ། །རྩ་ཡི་ཆུ་ཡིས་འཕེལ་ནས་ནི། །འཕེལ་བས་ཡང་དག་འབྲས་བུ་ནི། །ཐམས་ཅད་མཁྱེན་པ་ཉིད་སྟེར་བྱེད། །ལྷ་ཡི་རྣམ་པའི་ངོ་བོ་ཡིས། །རྩ་རྣམས་རང་
བཞིན་བསྒོམ་པར་བྱ། །གཉིས་ཕྲད་པ་ལས་རེག་བྱ་གཉིས། །གལ་ཏེ་རྡོ་རྗེ་ལྷག་གྱུར་ན། །དེ་ཚེ་མེ་ནི་ཡང་དག་འབར། །དེ་རྗེས་མེ་ཡི་འཁོར་ལོའི་དབུས། །འཁོར་ལོའི་མིང་ཅན་པད་མ་རྣམས། །རིམ་གྱིས་རིམ་གྱིས་བྱེ་བར་

88-1-202b

འགྱུར། །འདི་ནི་རྩ་ལས་འབབ་དེ་ལས། །བྱང་ཆུབ་སེམས་ནི་བདེ་བ་ཆེ། །སྤྲུལ་པའི་སྙིང་པོ་ཡང་དག་ཐོབ། །ངོ་བོ་གཅིག་གྱུར་བསྡུས་ནས་ནི། །འབབ་པའི་ཉི་མ་ཟླ་བའོ། །མི་དབང་དཀྱིལ་འཁོར་དབུས་སུ་ཡང་། །
གང་ཕྱིར་སྲད་བུའི་རྣམ་པར་གནས། །རྒྱུ་གཅིག་ཏུ་ཡང་ཤེས་ནས་ནི། །དེ་ཉིད་འབྲས་བུ་རྣམ་པ་གཉིས། །གཡས་པ་ཉི་མའི་རྣམ་པ་དང་། །གཡོན་པ་ཟླ་བའི་རྣམ་པར་འབྱུང་། །གང་ཚེ་གཡས་པའི་ཉི་མ་ནི། །
དེ་ཚེ་ཁྲག་འགྱུར་བདེ་བའོ། །གང་ཚེ་གཡོན་པའི་ཟླ་བ་གསལ། །བདེ་བ་ཀུན་ཀྱང་དེ་ལྟ་བུའོ། །དེ་གཉིས་ཁོངས་སུ་ཆུད་པའི་མེ། །ཡན་ལག་བདུན་ཉིད་ཡང་དག་གནས། །སྔོན་ལ་རླུང་གི་རྣམ་ཤེས་ནི། །བརྒྱ་ལམ་གང་ཚེ་འཁྲུལ་
གྱུར་ན། །ཕ་ཡི་མཁའ་ལ་མཚུངས་པར་གནས། །དེ་ཚེ་ཆགས་པའི་དབང་དུ་འགྱུར། །གསང་གནས་ཟླ་མཚན་ལྡན་པའི་རྩ། །མེ་དང་ཉི་མ་འཆར་བ་ན། །དེ་ཚེ་ལྷག་པར་ཆགས་པས་ནོན། །ཆགས་པ་མཆོག་ཏུ་འདོད་པར་འགྱུར། །རྡོ་རྗེ་པད་མ་འདྲེས་
པའི་གདོང་། །འཇུག་པ་ཕ་ཡི་ཁ་ཡི་རླུང་། །དེ་ཚེ་ས་བོན་དུ་ནི་འགྱུར། །ས་བོན་ལས་ནི་སེམས་ཅན་འབྱུང་། །དེ་ཕྱིར་རྩ་ལས་ཡང་དག་འཆར། །འབྲས་བུ་ངོ་མཚར་ཅན་ནི་སྐྱེ། །དེ་ཉིད་བྱང་ཆུབ་སེམས་ཀྱང་ནི། །འཛིན་པ་སྲོག་ནི་བསྡུས་
པའོ། །ཡེ་ཤེས་མཆོག་དང་དེ་ཉིད་མཆོག །མཆོག་ཏུ་བདེ་བ་རྨད་བྱུང་ཆེ། །ཡེ་ཤེས་རྣལ་འབྱོར་ཐོབ་པ་ཡིས། །མཆོག་ཏུ་བདེ་བ་བླ་ན་མེད། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྩའི་འཁོར་
ལོའི་གནས་ཀྱི་རིམ་པར་བསྟན་པའི་ལེའུ་སྟེ་བཅུ་བདུན་པའོ།། །།  དེ་ནས་གཞན་ཡང་བཤད་བྱ་བ། །རྣལ་འབྱོར་ལུས་ལ་རིམ་ཇི་བཞིན། །རྩ་རྣམས་རྟག་ཏུ་ཡང་དག་ནི། །རྒྱུད་པ་
ཡི་ནི་རིགས་ཀྱིས་སྐྱེ། །གསལ་བ་རུ་ནི་མ་གསུངས་པ། །དད་པའི་བསམ་པ་རྣམ་སྤངས་པ། །སྐྱེ་བོ་སྐལ་བ་མེད་དོན་དུ། །གང་དུའང་གསལ་བར་མ་གསུངས་པ། །སྙིགས་མ་ལྔ་ཞེས་བྱ་བའི་དུས། །སེམས་ཅན་མྱུར་དུ་དངོས་

88-1-203a

གྲུབ་དོན། །སྣོད་དུ་བྱ་བར་འདོད་པ་ཡིས། །རང་བྱུང་ཡེ་ཤེས་རྨད་བྱུང་བ། །རྣལ་འབྱོར་ལུས་ཀྱི་བདེ་ཆེན་པོའི། །འཁོར་ལོའི་རྩ་ནི་སུམ་བཅུ་གཉིས། །བྱང་ཆུབ་སེམས་ནི་གསལ་འབབ་པའི། །རྩ་
རྣམས་ཡང་དག་རྣམ་བཤད་བྱ། །དེ་ནི་བདེ་བ་ཆེན་པོའི་གནས། །དེ་ནི་མཚན་ཉིད་བཤད་པར་བྱ། །ཀ་ཙ་ཊ་ཏ་པའི་སྡེ་ཚན། །ཡ་ར་ལ་ཝ་ཥ་ཤ་ས། །དེ་དག་རིམ་པར་ཤེས་པར་བྱ། །སླར་ཡང་དེ་དག་བསྡུས་ནས་ནི། །
སྡེ་ཚན་ཙམ་ནི་གཅིག་ཏུ་འགྲོ། །དེ་ཡང་ཞི་བའི་ཡེ་ཤེས་མཆོག །བྱང་ཆུབ་སེམས་ལ་ཐིམ་ནས་འགྲོ། །ཀུན་རྟོག་ཐམས་ཅད་སྤངས་ནས་ནི། །བདེ་བ་ཀུན་གྱི་གཞི་ཡི་མཆོག །ཤེས་དང་ཤེས་བྱ་རྣམ་པར་སྤངས། །
ཐམས་ཅད་བདག་ཉིད་རྟག་ཏུ་བཞུགས། །དེ་ལས་འཁོར་ལོ་གསུམ་དབྱེ་བས། །རྩ་ནི་བརྒྱད་ཀྱི་དབྱེ་བ་ལས། །སྐུ་གསུང་ཐུགས་ཀྱི་སྔགས་ཀྱིས་ནི། །གསུམ་ཕྱེ་བདུན་བཅུ་རྩ་གཉིས་གསལ། །དེ་ནི་སྟོང་དུ་རབ་
ཕྱེ་བ། །སོ་སོར་འཕྲོས་པའི་བདག་ཉིད་ཅན། །སྟོང་ཕྲག་བདུན་བཅུ་རྩ་གཉིས་ཀྱིས། །རྩ་རྣམས་ཀྱི་ནི་གྲངས་ཞེས་བྱ། །རླུང་དང་མཁྲིས་པ་བད་ཀན་ནི། །ཁམས་གསུམ་གྱི་ནི་དབྱེ་བ་ཡིས། །སྟོང་ཕྲག་ཉི་ཤུ་རྩ་
བཞིར་ནི། །འཁོར་ལོ་འཁོར་ལོའི་དབྱེ་བ་ཡིས། །རྣལ་འབྱོར་ཆེན་པོའི་རྒྱུད་ཀྱི་ནི། །ངེས་པའི་མན་ངག་རྗེས་འབྲངས་ན། །ཕྱག་རྒྱའི་རྣལ་འབྱོར་དེ་ཉིད་མཆོག །ལྷ་ཡི་རིམ་པའི་མཚན་ཉིད་ནི། །རྩ་ནི་སོ་སོར་དབྱེ་
བ་ཡིས། །བླ་མའི་ཞལ་ལས་ཤེས་པར་བྱའོ། །དེ་ལས་ཡང་ནི་སྡོམ་སྦྱོར་བར། །སོང་ནས་ཕན་ཚུན་ཀུན་ནས་བརྟེན། །སླར་ཡང་བདུན་བཅུ་རྩ་གཉིས་འགྲོ། །བདེ་ཆེན་འཁོར་ལོ་རྩ་ཡི་གནས། །རྩ་ནི་སུམ་བཅུ་
རྩ་གཉིས་ལས། །དེ་ཡང་འཁོར་ལོ་སྡོམ་པར་འགྱུར། །འཁོར་ལོ་རེ་རེའི་གཙོ་བོའི་རྩ། །བརྒྱད་བརྒྱད་དུ་ནི་འགྱུར་བར་གསལ། །རྣལ་འབྱོར་ལུས་ཀྱི་རྩ་མཆོག་ཅེས། །རྨད་བྱུང་སུམ་བཅུ་རྩ་གཉིས་ནི། །ཡི་གེ་

88-1-203b

སུམ་བཅུ་གཉིས་དབྱེ་བས། །རྟག་ཏུ་རྣལ་འབྱོར་གཙོ་བོས་ཐོབ། །ཕུང་པོ་ཁམས་དང་དོན་ཡུལ་ཉིད། །དབང་པོའི་སྒོ་ནི་སྲུང་བའོ། །སུམ་བཅུ་རྩ་གཉིས་དབྱེ་བདག་ཉིད། །གསལ་བ་ཡི་ནི་དཀྱིལ་འཁོར་མཆོག །
ལུས་ཀྱི་གཞལ་ཡས་ཁང་དུ་ཡང་། །དེ་ཉིད་ཀྱི་ནི་ནང་བཞུགས་པ། །དེ་བཞིན་གཤེགས་དང་ལྷ་མོ་དང་། །གཟུགས་ལ་སོགས་དང་རྒྱལ་སྲས་རྣམས། །ཁྲོ་བོ་བཅུ་ཞེས་བྱ་བ་ཡི། །དེ་ཉིད་མཆོག་ནི་ཡང་དག་བཞུགས། །སླར་
ཡང་ཁྲོ་བོ་རྒྱལ་སྲས་ལ། །ནང་དུ་མི་སྣང་བར་ནི་འགྲོ། །རྒྱལ་སྲས་རྣམས་ནི་གཟུགས་ལ་སོགས། །ལྷ་མོ་རྣམས་ལ་བསྡུས་ནས་ནི། །དེ་རྣམས་ཀྱང་ནི་ས་སོགས་འགྲོ། །དེ་དག་དེ་བཞིན་གཤེགས་ལྔ་ལ། །སྐུ་གསུང་ཐུགས་
ཀྱི་རྡོ་རྗེ་ལ། །དེ་དག་ལ་ཡང་བསྡུས་ནས་འགྲོ། །དེ་ཁོ་ན་ཉིད་བདེ་གཅིག་པུ། །དེ་ལ་ཡང་ནི་ཐིམ་ནས་འགྲོ། །གཟུང་དང་འཛིན་པ་རྣམས་ལས་གྲོལ། །བདེ་བ་ཀུན་རྟེན་པ་ཡི་མཆོག །དེ་ཡང་ཉམས་མྱོང་ཙམ་ལས་སླར། །དེ་ནི་
ཡི་གེ་ཙམ་ལ་ཐིམ། །ཡི་གེ་ཙམ་ནི་ཐིག་ལེར་ཐིམ། །ཐིག་ལེ་ཡང་ནི་སྒྲ་ལ་ཐིམ། །སྒྲ་ཡང་སྒྲ་ཙམ་ལ་ནི་ཐིམ། །སྒྲ་ཙམ་འོད་གསལ་བ་ལའོ། །འོད་གསལ་གོ་འཕང་ཡང་དག་པར། །སྤྲོ་དང་བསྡུ་བའི་མཚན་ཉིད་དོ། །རྣམ་པར་ཤེས་དང་ཆོས་དབྱིངས་དང་། །
དོན་དམ་པ་དང་བདེ་བ་ཆེ། །གཟུང་དང་འཛིན་པ་ལས་གྲོལ་བ། །བྱང་ཆུབ་སེམས་ནི་དྲི་མ་མེད། །རྡོ་རྗེ་སེམས་དཔའི་ཞི་བ་ཆེ། །གཉིས་མེད་ཡེ་ཤེས་རྨད་དུ་བྱུང་། །དབང་བསྐུར་བཞི་པ་བདེ་བ་དང་། །བཞི་བའི་དགའ་བ་གོ་འཕང་
མཆོག །དེ་ལ་སོགས་མིང་བྱེ་བྲག་གིས། །གོ་འཕང་མཆོག་ནི་གསུངས་པ་ཡིན། །སྤྲོ་དང་བསྡུ་བའི་དབྱེ་བ་ཡིས། །རིམ་པ་ཇི་ལྟ་བ་བཞིན་དུ། །དེ་ལྟར་བསྐྱེད་དང་རྫོགས་པ་ཡི། །རིམ་དོན་བླ་མ་བརྒྱུད་ལས་ཤེས། །ཞི་བ་གཉིས་
མེད་མཚན་ཉིད་ཅན། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྣལ་འབྱོར་པའི་ལུས་ཀྱི་རྩ་བསྡུས་པའི་ལེའུ་སྟེ་བཅྭོ་བརྒྱད་པའོ།། །། དེ་ནས་གཞན་ཡང་བཤད་

88-1-204a

བྱ་བ། །སྣ་ཚོགས་ལ་སོགས་སྐད་ཅིག་བདག །ཡང་དག་གཞུང་ལུགས་མཚན་ཉིད་ནི། །དེ་ཉིད་ཇི་ལྟ་བ་བཞིན་ཉོན། །རྣམ་པ་སྣ་ཚོགས་རྣམ་པར་སྨིན། །རྣམ་པར་འཇོམས་དང་མཚན་ཉིད་བྲལ། །
སྐད་ཅིག་མ་ནི་བཞི་ཞེས་གསུངས། །རྣམ་པར་ཕྱེ་ནས་སླར་བཤད་བྱ། །རྣམ་པ་སྣ་ཚོགས་མངོན་པར་འདོད། །དེ་ཡི་སྐད་ཅིག་དབྱེ་བར་བྱ། །ཨ་ལིང་ག་ན་དང་། ཙུམ་པ་ན་ཤ་དང་ཙུམ་ཤ་ན་དང་ཀུ་ཙ་གྲ་ཧ་དང་བུ་ལ་ཏྲ་ཏྲ་ཧན་དང་
ད་ཤ་ན་དང་ད་ཁ་ད་ན་དང་དོ་ལ་དང་པུ་ཙི་ཙི་དང་ཀུར་པ་ལ་སོགས་པའི་ཀ་ར་ན་དང་། །རྣམ་པ་སྣ་ཚོགས་སྐད་ཅིག་གོ། ན་ལི་སྟོང་ཕྲག་བདུན་བཅུ་གཉིས། །ལུས་ནི་བདེ་བ་རྒྱས་པ་ན། །མགྲིན་པ་དག་ཏུ་གང་ཕྱིན་པ། །རྣམ་སྨྱིན་ཞེས་
བྱ་སྐད་ཅིག་གོ། ལྷན་ཅིག་སྐྱེས་པའི་ཡེ་ཤེས་ནི། །རྡོ་རྗེ་ཕྲེང་བའི་མཚན་ཉིད་ཅན། །ཐམས་ཅད་མངོན་པར་བྱང་ཆུབ་པའི། །རྣམ་པ་མེད་པའི་སྐད་ཅིག་གོ། ན་ལི་ལས་བྱུང་ཤུ་ཀྲ་འདས། །རྣམ་པ་དང་བྲལ་སྐད་ཅིག་གོ། ཡེ་ཤེས་
བཞི་དང་སྟོང་པ་བཞི། །སྐད་ཅིག་མ་ནི་བཞི་ལས་རྟོགས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྐད་ཅིག་མའི་མཚན་ཉིད་རྒྱས་པར་བཤད་པའི་ལེའུ་སྟེ་བཅུ་དགུ་པའོ།། །། 
དེ་ནས་གཞན་ཡང་བཤད་བྱ་བ། །དགའ་བ་བཞི་ཡི་མཚན་ཉིད་ནི། །ལུགས་འབྱུང་ལུགས་ལས་བཟློག་པ་ཡི། །ཇི་ལྟ་བ་ཡི་རིམ་པ་ཡི། །དགའ་བའི་བདེ་བ་དང་པོ་སྟེ། །མཆོག་ཏུ་དགའ་བ་གཉིས་པ་དང་། །དགའ་བྲལ་ཞེས་པ་
གསུམ་པ་དང་། །བཞི་པ་ལྷན་ཅིག་སྐྱེས་པར་བཤད། །སྤྲུལ་པའི་འཁོར་ལོར་དགའ་བ་དང་། །མཆོག་དགའ་ཆོས་ཀྱི་འཁོར་ལོར་གནས། །ལོངས་སྤྱོད་བྲལ་བའི་དགའ་བ་དང་། །ལྷན་ཅིག་སྐྱེས་དང་བདེ་བ་ཆེ། །ལུགས་བཟློག་རིམ་པ་
ཞེས་ནི་གསུངས། །དེ་རྗེས་ལུགས་འབྱུང་བཤད་བྱ་སྟེ། །བདེ་ཆེན་འཁོར་ལོ་སྤྱི་བོ་ལ། །དེ་ནི་དགའ་བར་བཤད་པ་ཡིན། །ལོངས་སྤྱོད་འཁོར་ལོར་མཆོག་དགའ་དང་། །དགའ་བྲལ་ཆོས་ཀྱི་འཁོར་ལོར་གནས། །སྤྲུལ་པའི་འཁོར་

88-1-204b

ལོར་ལྷན་ཅིག་སྐྱེས། །དགའ་བ་ཉམས་སུ་མྱོང་བར་བྱེད། །བལྟ་དང་དགུག་དང་དེ་བཞིན་བརྡ། །ཁ་ལ་ཙུམ་པ་བྱེད་པ་ཡི། །དགའ་བ་ཉམས་སུ་མྱོང་བར་ཤེས། །རྣམ་པ་སྣ་ཚོགས་མཚན་ཉིད་དོ། །རྣལ་འབྱོར་རྣལ་འབྱོར་
མ་མཆོག་ཏུ། །དེ་བཞིན་སྐྲ་ལ་འཛིན་པ་དང་། །རྡོ་རྗེ་པད་མར་བཞག་ནས་ནི། །ཉམས་མྱོང་ས་ནི་སྐད་ཅིག་མཆོག །རྣམ་སྨིན་ཞེས་བྱ་སྐད་ཅིག་ཉིད། །དེ་ཉིད་རྒྱུར་ནི་རྣམ་པར་ཤེས། །རྩ་ཡི་དབུས་ན་རབ་གསལ་གནས། །
གཏུམ་མོ་ཡང་ནི་རྣམ་རྟོག་འཇོམས། །བདེ་བ་ཆེན་པོའི་འཁོར་ལོ་ཆེ། །མཆོག་གི་ཆ་ནི་ཞུ་བར་བྱེད། །བྲལ་དགའི་གནས་སུ་མྱོང་བ་ན། །རྣམ་རྟོག་སྐད་ཅིག་མཚན་ཉིད་དོ། །དེ་ལ་རོ་གཅིག་རང་བཞིན་ནི། །རྩ་ནི་གཅིག་གི་
རྒྱུན་ལ་རྟེན། །བདེ་བ་ཆེན་པོའི་གོ་འཕང་ཞི། །ལྷན་ཅིག་སྐྱེས་པའི་མཚན་ཉིད་ནི། །རྣམ་པ་སྣ་ཚོགས་སྐད་ཅིག་གསུངས། །སྟོང་ཉིད་ཀུན་གྱི་གཞི་ཡི་མཆོག །ཆོས་ཀྱི་འཁོར་ལོ་དེ་ལ་ཏེ། །རྣལ་འབྱོར་པ་ཡིས་
བསྒྲུབ་བྱ་བ། །ཉམས་སུ་མྱོང་བ་མཆོག་དགའ་སྟེ། །རྣམ་སྨིན་སྐད་ཅིག་མཚན་ཉིད་དོ། །ལོངས་སྤྱོད་འཁོར་ལོ་དེ་ལས་ནི། །སྟེང་དུ་བྱེད་པའི་སྐད་ཅིག་ལ། །ཉམས་མྱོང་བྲལ་བའི་དགའ་བ་ནི། །རྣམ་འཇོམས་མཚན་
ཉིད་སྐད་ཅིག་གོ། བདེ་བ་ཆེན་པོའི་འཁོར་ལོ་ཆེ། །དེ་ཐོབ་མཚན་ཉིད་སྐད་ཅིག་མ། །ལྷན་ཅིག་སྐྱེས་དགའི་ཉམས་མྱོང་བ། །མཚན་ཉིད་དང་བྲལ་སྐད་ཅིག་གོ། རྩ་གསུམ་ཀུན་གྱི་ནམ་མཁའ་ཆེ། །རྣལ་འབྱོར་མ་ཚོགས་ཡང་དག་གཟུགས། །དེ་ལས་
རབ་སད་ཉམས་མྱོང་བ། །མཚན་ཉིད་གཅིག་པར་རོ་མཚུངས་པ། །རྣལ་འབྱོར་ཆེན་པོས་ཉམས་སུ་མྱོང་། །སླར་ཡང་མཚན་ཉིད་མེད་པར་འགྲོ། །རབ་ཏུ་སད་པ་ཉམས་སུ་མྱོང་། །སྟོང་ཕྲག་བཅུ་དྲུག་བདག་ཉིད་དོ། །
བདེ་ཆེན་གོ་འཕང་མི་ཕྱེད་པ། །གཉིས་མེད་རྡོ་རྗེ་སེམས་དཔའི་གནས། །དེ་ལྟར་འདི་ནི་དགའ་དབྱེ་བ། །གཞན་དུ་གསལ་བར་མ་གསུངས་སོ། །རྣལ་འབྱོར་མ་ཡི་བཀའ་དྲིན་གྱིས། །བླ་མ་བརྒྱུད་པ་ལས་ཤེས་བྱ། །

88-1-205a

རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་དགའ་བའི་མཚན་ཉིད་རྣམ་པར་དབྱེ་བའི་ལེའུ་སྟེ་ཉི་ཤུ་པའོ།། །། དེ་ནས་གཞན་ཡང་
བཤད་ཀྱིས་ཉོན། །ཐིག་ལེ་གསུམ་ནི་བླ་ན་མེད། །གང་གིས་ཤེས་པ་ཙམ་གྱིས་ནི། །རྣལ་འབྱོར་པ་ཡི་དངོས་གྲུབ་འགྱུར། །རྩ་རྣམས་ཀུན་དུ་འབབ་པ་དང་། །བྱང་ཆུབ་སེམས་ནི་ཞུ་བྱས་པ། །རྡོ་རྗེ་འམ་ནི་པད་
མའི་རྩེ། །རླུང་ནི་བཟུང་བའི་སྐད་ཅིག་ལ། །རྐན་དགུག་པ་ཡི་སྦྱོར་བ་དང་། །ཀྵྨི་གྱི་སྔགས་ཀྱི་སྦྱོར་བ་ཡིས། །རྣལ་འབྱོར་མཆོག་ནི་ཐོབ་པར་བྱེད། །བདེ་བ་ཀུན་གྱི་གཞི་ཡི་མཆོག །ཆོས་ཀྱི་འཁོར་ལོ་དེ་ཉིད་
མཆོག །སྙིང་གའི་པད་མའི་ལྟེ་བ་ལ། །དབུས་སུ་ཧཱུྃ་ནི་བཀོད་ནས་ནི། །ཐམས་ཅད་སྟོང་པའི་མཚན་ཉིད་ནི། །དངོས་དང་དངོས་མེད་རྣམ་པར་གྲོལ། །དེ་ཁོ་ན་ཉིད་ལུས་སྐྱོབ་པ། །ཕྱོགས་ཡུལ་དུས་དང་རྣམ་པར་གྲོལ། །
སྟེང་དང་འོག་ནི་རྣམ་པར་སྤངས། །སེམས་བྲལ་རང་གི་ངོ་བོར་གནས། །ངག་གི་དྲ་བ་ཡོངས་སུ་སྤངས། །རྒྱུད་དང་མཚན་མ་དང་བྲལ་ཞིང་། །རྟོག་པའི་སྤྱོད་ཡུལ་རྣམས་དང་བྲལ། །གཉིས་པ་ཀུན་ལ་རྣམ་པར་གྲོལ། །མཆོག་
ཏུ་རྟག་ཅིང་ཞི་བའོ། །རླུང་གི་ཐིག་ལེ་རྣལ་འབྱོར་མཆོག །ཁ་དོག་ལྔ་པ་གསལ་བ་ཆེ། །སྣ་རྩེར་སྦྱོར་བའི་རྣལ་འབྱོར་གྱིས། །ཀུན་ནས་ཀྱང་ནི་བསྒོམ་པར་བྱ། །ཡི་གེ་ཨོཾ་ནི་སྔགས་ཀྱི་མཆོག །རྣལ་འབྱོར་པ་ཡིས་
བཟླ་བར་བྱ། །སྔ་མ་བཞིན་དུ་ཡེ་ཤེས་ལྔ། །ཞི་བ་ལ་སོགས་དེ་བཞིན་བསྒྲུབ། །བག་ཆགས་རིམ་པའི་མཚན་ཉིད་ནི། །སྐུ་གསུང་ཐུགས་ཀྱི་དབྱེ་བ་ཡིས། །རྩ་ནི་གསུམ་པོ་འདི་ནི་མཆོག །བསྡུས་ནས་སླར་ཡང་
དབྱེ་བ་ནི། །ཕན་ཚུན་དུ་ནི་སོ་སོར་འགྲོ། །རྫས་ཀྱི་ཐིག་ལེ་ཁོང་ཆུད་པ། །ཐིག་ལེ་གཉིས་ཏེ་སྔགས་དང་རླུང་། །སྔགས་ཀྱི་ཐིག་ལེ་དེ་ཉིད་མཆོག །ཐིག་ལེ་གཉིས་ནི་འོད་དང་རྫས། །སླར་ཡང་རླུང་གི་ཐིག་ལེ་ཡང་། །

88-1-205b

ཐིག་ལེ་གཉིས་ཀྱི་ནང་དུ་འགྲོ། །སྔགས་དང་རྫས་ཀྱི་བདག་ཉིད་ཅན། །རྣལ་འབྱོར་པ་ཡིས་ཡང་དག་ཤེས། །ཟླ་བ་ཉི་མ་མེ་ཡི་རྩ། །གསུམ་ཞེས་བྱ་བའི་མཚན་ཉིད་དོ། །ལ་ལ་ནཱ་དང་ར་ས་ནཱ། །ཨ་བ་དྷཱུ་ཏཱི་ཞེས་བྱའི་
མིང་། །སྐུ་གསུང་ཐུགས་ཀྱི་རང་བཞིན་དང་། །དེ་ཉིད་དུ་ནི་ཡོངས་སུ་གྲགས། །སྟེང་དང་འོག་ཏུ་ཁྱབ་པ་ཉིད། །སོ་སོར་ལུ་གུ་རྒྱུད་ཚུལ་དུ། །རྩ་རྣམས་ཀུན་ལ་ཁྱབ་ནས་ནི། །ཡང་དག་མན་ངག་རིམ་པས་གནས། །
དེ་ལྟར་རྣལ་འབྱོར་མཆོག་ཏུ་ཕྲ། །ཤེས་དང་ཤེས་བྱ་རྣམ་པར་སྤངས། །དངོས་གྲུབ་ཐམས་ཅད་ཀྱི་ནི་གཞི། །རྣལ་འབྱོར་ཆེན་པོའི་རྨད་བྱུང་ཆེ། །གསོ་སྦྱོང་གིས་མིན་བཟླས་པས་མིན། །ཕྲེང་བས་མ་ཡིན་
འགོག་པས་མིན། །གྲངས་མིན་དུས་མིན་སྦྱིན་སྲེག་མིན། །འབྱིན་བྱེད་འགོགས་བྱེད་ཀྱིས་ནི་མིན། །ཡེ་ཤེས་ཆེན་པོའི་གོ་འཕང་ཞི། །རྣལ་འབྱོར་གཅིག་པུས་རྟོགས་པར་བྱེད། །མངོན་པར་ཤེས་པ་ལྔ་དང་ནི། །དེ་བཞིན་ཡེ་ཤེས་ལྔ་ཡི་མཆོག །ཐིག་
ལེ་གསུམ་ནི་རྣམ་སྒོམ་པ། །ཞི་སོགས་བྱ་བ་ཡང་དག་ནི། །རྣལ་འབྱོར་མཆོག་གིས་འགྲུབ་པར་འགྱུར། །སྟོང་ཉིད་ཡེ་ཤེས་མཚན་ཉིད་ནི། །ཡེ་ཤེས་སེམས་དཔའ་རྡོ་རྗེ་སེམས། །དམ་ཚིག་སེམས་དཔའ་ཞེས་བྱ་
གསུངས། །གནས་དང་གྲངས་ཀྱི་དབྱེ་བ་ཡིས། །བླ་མ་བརྒྱུད་པ་ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཐིག་ལེ་གསུམ་རྣམ་པར་དབྱེ་བའི་ལེའུ་སྟེ་ཉི་ཤུ་རྩ་གཅིག་
པའོ།། །། དེ་ནས་གཞན་ཡང་དེ་ཉིད་ཉོན། །དེ་ཉིད་གསུམ་གྱི་གོ་འཕང་མཆོག །སྐུ་གསུང་ཐུགས་ཀྱི་རྡོ་རྗེ་ཡི། །སྙིང་པོ་བདག་ཉིད་དམ་ཚིག་ནི། །ཡི་གེ་གསུམ་ནི་སྐུ་གསུང་ཐུགས། །
སྙིང་པོ་ཡང་ནི་བཤད་པར་བྱ། །དེ་ནི་རྣམ་ཕྱེ་ཁྱོད་ཉོན་ཅིག །དེ་ནི་ཇི་ལྟ་བ་བཞིན་བཤད། །ཨོཾ་ནི་སྐུ་ཡི་རྡོ་རྗེ་ཡི། །སྙིང་པོ་རུ་ནི་ཡང་དག་བཤད། །ཡི་གེ་ཨ་དང་ཡི་གེ་ཨུ། །ཡི་གེ་མ་ཞེས་བྱ་བ་གསུམ། །ཨཱཿནི་ཆོས་

88-1-206a

འཁོར་པད་མ་ལ། །རླུང་གི་འཁོར་ལོ་ལ་ནི་ཁྱབ། །སྒྲིབ་མེད་པ་ཡི་རླུང་ཆེན་པོ། །སྲོག་ཏུ་གསུངས་པ་ཐམས་ཅད་བསྡུས། །ཆ་མེད་ཆ་དང་བྲལ་བ་དང་། །དངོས་པོ་དངོས་མེད་དབུས་ན་གནས། །ཐིག་
ལེ་འཁོར་ལོའི་ཆ་ལ་ཁྱབ། །ནམ་མཁའི་ཁམས་ཀྱི་ཡི་གེ་མཆོག །སྔགས་རྣམས་ཀུན་གྱི་དོན་གྱི་གནས། །སྔགས་རྣམས་ཐམས་ཅད་རབ་སད་བྱེད། །སྔགས་རྣམས་ཀུན་གྱི་ཕན་བྱེད་ཅིང་། །ངག་གི་འཁོར་ལོ་
རབ་སད་བྱེད། །དངོས་སུ་ལན་གསུམ་གྱི་ནི་གཞི། །འབྱུང་བ་ཐམས་ཅད་དབང་དུ་བྱེད། །ཟད་མེད་འཕེལ་བ་མེད་པའི་གནས། །བྱང་ཆུབ་ས་བོན་བདེ་བ་ཆེ། །གཟུགས་མེད་ཁམས་སུ་ཡང་དག་བཤད། །འཁོར་ལོ་བཞི་
ཡི་དོན་བསྡུས་པའོ། །ཨུ་ནི་ལོངས་སྤྱོད་འཁོར་ལོར་གནས། །མེ་དང་ཉི་མ་འདྲ་བ་ཡི། །མགྲིན་པའི་མཐའ་ནས་སྤྱི་གཙུག་མཐའ། །ཁྱབ་པ་གཟི་བརྗིད་ཀྱི་ནི་ལུས། །གཟུགས་ཀྱི་ཁམས་ཞེས་བྱ་བར་ཤེས། །གནས་རིས་
བཅུ་བདུན་བདག་ཉིད་ཅན། །བདེ་ཆེན་འཁོར་ལོ་ཞེས་བྱར་བཤད། །ཡི་གེ་མ་ནི་ཐིག་ལེ་ཙམ། །གདོང་ཚད་མཐའ་ཡི་སོར་བཞི་ཙམ། །དགའ་བའི་གཙུག་ཏོར་གནས་ན་གནས། །ཟླ་བའི་གཟུགས་དང་འདྲ་བ་ཡི། །བདེ་བ་ཆེན་
པོའི་གོ་འཕང་ཞི། །རྩ་ནི་ཀུན་ལ་ཁྱབ་པ་པོ། །མི་ཕྱེད་ལུས་ཀྱི་གོ་འཕང་ནི། །འདོད་པའི་ཁམས་ཞེས་བཤད་པ་ཡིན། །བསྡུས་ན་གནས་རིས་ཉི་ཤུའོ། །དེ་ལྟར་རླུང་ནི་གནས་གསུམ་གྱི། །རྩ་གསུམ་གྱི་ནི་གནས་སུ་འདུས། །
ཡི་གེ་ཨོཾ་གྱི་བརྡ་ཤེས་ན། །ཁམས་གསུམ་རྣམ་པར་སད་པར་བྱེད། །རྣམ་པར་སྣང་མཛད་འགྲོ་བའི་གཟུགས། །སྤྲོ་བའི་བདག་ཉིད་ཅན་གྱི་རྒྱུ། །རྣམ་པར་རྟོག་པའི་རླུང་གཉིས་ནི། །སྣ་ཡི་བུ་ག་ནས་ནི་བྱུང་། །ཡང་དག་ཉི་མ་ཟླ་བ་
གཉིས། །སྦས་པ་ནང་ནས་རྒྱུ་བར་བྱེད། །མེ་ནི་འབར་བ་རྩེ་མོ་ལ། །སྨིན་མའི་དབུས་སུ་སྲོག་གི་རླུང་། །དེ་ལྟར་གཅིག་པུའང་གསུམ་དུ་བཤད། །གཏན་ལ་ཕབ་སྟེ་དེ་ཉིད་གསུམ། །ཞི་བ་ཁམས་གསུམ་ལ་ཁྱབ་པ། །

88-1-206b

སྐྱེ་བའི་ས་བོན་རྒྱས་པའོ། །ཡི་གེ་ཨ་ནི་ཡེ་ཤེས་མཆོག །གསུང་གི་རྡོ་རྗེ་སྙིང་པོ་མཆོག །ཨ་ནི་གཉིས་དང་ཡི་གེ་ཧྃ། །རིང་པོར་བྱས་ཏེ་དབྱེ་བ་གསུམ། །ཆོས་ཀྱི་དབྱིངས་ཀྱི་དོན་བསྡུས་པ། །ཡི་གེ་ཨཱཿནི་སྔར་བཤད་
ཟིན། །གཉིས་པ་ཡང་ནི་སྲོག་གི་རླུང་། །སྟོང་ཉིད་ཡེ་ཤེས་མིང་ཅན་ཏེ། །སྲོག་དང་རྩོལ་བ་གཉིས་སུ་རིགས། །ཡུལ་དང་དབང་པོ་བསྡུས་པའོ། །ཀུན་གཞི་དང་ནི་ཉོན་མོངས་ཡིད། །གཟུང་དང་འཛིན་པའི་ངོ་བོ་ཉིད། །
ངོ་བོ་གཅིག་ཏུ་གྱུར་ནས་ནི། །གསུང་གི་རྡོ་རྗེ་བརྗོད་པའི་མཆོག །ཨཱཿནི་ཆོས་འཁོར་པད་མ་ལས། །མགྲིན་པར་ཡི་གེ་ཨཱཿཉིད་འགྱུར། །སྲོག་ཉིད་དང་ནི་ཐུར་སེལ་དང་། །ཡི་གེ་ཧ་ཡིས་ཀུན་ནས་ནི། །མགྲིན་པའི་
དབུས་ན་གནས་པ་བཅིངས། །ཨ་ཧྃ་ཁ་ནས་གསལ་བར་བརྗོད། །རོ་འབབ་པ་ཡི་ཁྲུང་ཁྲུང་ནི། །རོ་སྐྱུར་བ་ཞེས་བྱ་བར་གསུངས། །བཀུག་ནས་རྟག་ཏུ་ཁྱབ་པར་བྱེད། །གཟུགས་ཀྱི་ཁམས་ནི་འབར་བའོ། །ཧ་དང་དེ་
བཞིན་ཡི་གེ་ཨུ། །དེ་ནི་ཡི་གེ་མ་དང་གསུམ། །རྐང་པ་ནས་ནི་མགོ་མཐའི་བར། །འཁོར་ལོ་བཞི་ཡི་དོན་བསྡུས་པ། །ཧ་ནི་ཐུར་སེལ་མིང་ཅན་རླུང་། །བཤང་སྒོ་གསང་བའི་དབུས་ན་གནས། །ཡི་གེ་ཨུ་ནི་ཁྱབ་བྱེད་རླུང་། །
མགྲིན་པ་པད་མའི་དབུས་ན་གནས། །ཡི་གེ་མ་ནི་སྲོག་རླུང་ཡིན། །དཔྲལ་བ་རླུང་གི་འཁོར་ལོ་ལ། །དེ་དག་གཅིག་གྱུར་སྙིང་ག་ནས། །ཐུགས་ཀྱི་ས་བོན་དུ་ནི་བརྗོད། །མི་བསྐྱོད་སྙིང་པོ་ཁ་དོག་གནག །གཟུགས་མེད་ཁམས་
ཀྱི་མིང་ཅན་ནོ། །སྐུ་གསུང་ཐུགས་ཀྱི་རྡོ་རྗེ་ཡི། །སྙིང་པོ་གསུམ་དུ་རབ་ཏུ་བཤད། །ལག་ན་རྡོ་རྗེས་ཐལ་སྦྱར་ནས། །སླར་ཡང་ཐམས་ཅད་མཁྱེན་ལ་ཞུས། །རྡོ་རྗེ་གསུམ་གྱི་སྔགས་དོན་དང་། །གནས་ཀྱི་དབྱེ་བ་འཚལ་
ལགས་ན། །འདི་རྣམས་དབུས་ན་བདག་པོ་གང་། །ཇི་ལྟ་བུ་ཞིག་གཙོ་བོས་གསུངས། །གཙོ་བོ་རྡོ་རྗེ་འཆང་བ་ཆེ། །བཅོམ་ལྡན་འདས་ཀྱིས་སླར་གསུངས་པ། །གསང་བའི་མཆོག་ཏུ་གསུངས་པ་ཡི། །སྦས་པའི་དོན་ནི་ཁྱོད་

88-1-207a

འདྲི་བ། །རྒྱུད་རྣམས་ཀུན་དུ་མ་གསུངས་པ། །རབ་ཏུ་བཤད་ཀྱིས་མཉན་པར་གྱིས། །ཐུགས་ཀྱི་ས་བོན་བདག་པོ་སྟེ། །ཀུན་གྱི་ནང་ན་རྣམ་རྟོག་མེད། །གང་ཕྱིར་གཙོ་བོས་གཞན་རྣམས་ནི། །སྒྲིབ་
དང་དེ་བཞིན་འཕྲོག་པ་དང་། །རྣམ་པར་རྟོག་པའི་རླུང་གཉིས་ནི། །ལུས་ཀུན་ལ་ནི་ཁྱབ་པར་བྱེད། །སྣ་ཡི་བུ་ག་ལས་ནི་རྒྱུ། །ལུས་ལ་རྟག་ཏུ་འབྱུང་བར་བྱེད། །འགྲོ་བ་དྲུག་གི་འཁོར་ལོའི་ལམ། །གང་གི་སྟོབས་
ཀྱིས་ཁྱབ་པར་བྱེད། །གསུམ་པ་རྣལ་འབྱོར་པ་ཡིས་རྟོགས། །རྣམ་རྟོག་མེད་པར་རྨད་བྱུང་ཆེ། །རླུང་རྣམས་ཐམས་ཅད་འགགས་པས་ན། །སྐྱེས་པ་དེ་ཉིད་རྟོགས་པའོ། །རླུང་ནི་ཐམས་ཅད་འགོག་
པ་ཡང་། །ཡང་དག་རིགས་པར་ང་ཡིས་བཤད། །སྤྲུལ་པའི་ཆོས་ཀྱི་འཁོར་ལོའི་དབུས། །རྒྱུད་འདི་པད་མ་གཉིས་སུ་གསུངས། །དྲུག་བཅུ་རྩ་བཞི་བརྒྱད་འདབ་གཉིས། །སྟེང་དང་འོག་ཏུ་ཁ་
བལྟས་ནས། །སླར་ཡང་ཁ་སྦྱོར་ཚུལ་དུ་གནས། །སྲོག་དང་མཐུར་སེལ་རྒྱུད་བར་བྱེད། །དེ་ཉིད་རྟོག་པ་དང་བཅས་པ། །རླུང་གཉིས་སུ་ནི་གསལ་བར་གསུངས། །སྐུ་དང་གསུང་གི་སྙིང་པོ་གཉིས། །ལ་ལ་ནཱ་
དང་ར་ས་ནཱ། །ཨ་བ་དྷཱུ་ཏཱི་མཆོག་གི་གནས། །དེ་གཉིས་དབུས་ན་མཆོག་གི་མཆོག །རྣམ་རྟོག་མེད་པ་རླུང་གི་རླུང་། །རྟག་ཏུ་རྒྱུ་ཞིང་ཀུན་ལ་ཁྱབ། །རྣམ་རྟོག་གང་ཐོབ་རྟག་ཏུ་ནི། །ལས་ཀུན་བྱེད་ཅིང་མཁས་པར་
འགྱུར། །རླུང་གི་རང་བཞིན་བྱེ་བྲག་ནི། །བརྒྱ་དང་བརྒྱད་ལས་གང་རྒྱལ་བ། །དུས་ཀུན་དུ་ནི་འཕེལ་བར་རིགས། །རྣལ་འབྱོར་བྱིས་པས་མི་ཤེས་པ། །སྐད་ཅིག་གཅིག་མངོན་རྫོགས་བྱང་ཆུབ། །དེ་ཡིས་ཐོབ་པར་རྒྱུད་འདིར་
གསུངས། །དེ་ནི་གང་ཚེ་སྐད་ཅིག་ཐོབ། །དེ་ནི་སྐད་ཅིག་མཆོག་ཏུ་གསུངས། །དེ་ཡང་ཇི་ལྟར་ཐོབ་པར་བྱེད། །དེ་ལ་རིགས་པ་རུ་ནི་བརྗོད། །ཐོག་མར་རྣལ་འབྱོར་པ་ཆེན་པོ། །བློ་བཟང་གིས་ནི་ཞི་གནས་བསྒོམ། །བསྐྱེད་པའི་རིམ་

88-1-207b

པའི་སྦྱོར་བ་ཡིས། །ཁྲོ་བོའི་ཕྱག་རྒྱ་བྱས་ནས་ཀྱང་། །དབང་པོ་ཡི་ནི་སྒོ་དགུ་ལ། །ཐམས་ཅད་དུ་ནི་ཀུན་རྫོབ་པ། །ཧཱུྃ་བཟླས་པ་ནི་མཚུངས་པ་མེད། །མཆོག་ཏུ་རྒྱུན་མི་འཆད་པར་ནི། །ཟླ་བ་གཅིག་ཏུ་བཟླས་བྱས་ན། །དེ་རྗེས་
སྐད་ཅིག་དེ་ལ་ཐོབ། །གང་ཕྱིར་དེ་ནི་བཟླས་བྱས་ན། །སྙིང་གའི་པད་མའང་སྟེང་བལྟས་འགྲོ། །དེ་ནས་གསང་བའི་པད་མ་ལས། །ཁ་སྦྱོར་བ་ནི་དེ་བས་ཀྱང་། །རྣམ་པར་རྟོག་པའི་རླུང་གཉིས་ནི། །དེ་ལས་རྣམ་པར་བཅས་ནས་
འགྲོ། །རྣམ་རྟོག་མེད་པའི་རླུང་ཆེན་པོ། །སྐུ་གསུང་རྡོ་རྗེ་བཅད་ནས་ནི། །རྣམ་རྟོག་མེད་པའི་བདེ་བ་སྟེར། །སྔགས་ཀྱི་དེ་ཉིད་ཀྱིས་ནི་འཐོབ། །ཨ་བ་དྷཱུ་ཏཱིའི་རྒྱུན་ལ་གནས། །སྨིན་དབུས་རླུང་ནི་བཅད་བྱས་པ། །དེ་ཐོབ་ཐོབ་
བྱས་དགའ་བ་ནི། །རྒྱུན་དུ་འཆང་ཞིང་མི་བཟད་པ། །ཆགས་སོགས་བྲལ་ཞིང་ཞི་བ་དང་། །རང་རིག་བདེ་བ་ཆེན་པོའོ། །འདིར་ནི་རྒྱུ་མཚན་བཤད་པར་བྱ། །སྔགས་གྲུབ་པ་ཡི་རྣལ་འབྱོར་པས། །འདར་དང་རྔུལ་དང་བ་སྤུ་ལངས། །
རྟག་ཏུ་དགའ་བའི་བསམ་པ་དང་། །གདོང་ནི་ཟངས་མདོག་ཡིད་དུ་འོང་། །ཀུན་གྱིས་མཐོང་དང་དགའ་བ་དང་། །གྲངས་ལྷག་ཆད་པ་ལ་སོགས་དང་། །འཇིག་རྟེན་ཆོས་དང་དེ་བཞིན་གནས། །རྣལ་འབྱོར་སྔགས་ཀྱི་དེ་ཉིད་
ནི། །གནོད་པ་ཉིད་དུ་མི་འགྱུར་རོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྐུ་གསུམ་གྱི་སྙིང་པོ་བཤད་པའི་ལེའུ་སྟེ་ཉི་ཤུ་གཉིས་པའོ།། །། 
དེ་ནས་གཞན་ཡང་བཤད་ཀྱིས་ཉོན། །དེ་ཉིད་གསུམ་གྱི་ཚིག་བསྟན་བྱ། །བདག་ཉིད་སྔགས་སོགས་བྱེད་པ་ཡིས། །ཇི་ལྟ་བ་བཞིན་རིམ་པ་རྣམས། །བདག་གི་དེ་ཉིད་རྣལ་འབྱོར་མཆོག །རྡོ་རྗེ་སེམས་དཔའ་
ཉིད་ཀྱི་རྒྱུ། །སངས་རྒྱས་ཀུན་གྱི་རང་བཞིན་བདག །སངས་རྒྱས་ཀུན་གྱི་སྐུ་གཅིག་པུ། །ཀུན་མཁྱེན་གོ་འཕང་མི་གསལ་བྱེད། །རིགས་ཀྱི་དབྱེ་བས་རབ་གསལ་བྱེད། །རིགས་ནི་ལྔ་ཡི་རྣམ་པ་གང་། །དེ་ནི་ཕུང་པོའི་

88-1-208a

མཚན་ཉིད་དོ། །ཕྲ་རག་ལ་སོགས་དབྱེ་བ་ཡིས། །ཐོགས་བཅས་ཐོགས་མེད་མཚན་ཉིད་དང་། །འབྱུང་བ་ཆེན་པོ་བཞི་ཡི་དངོས། །འདི་ནི་གཟུགས་ཀྱི་ཕུང་པོར་གསུངས། །དེར་ནི་རྣམ་
སྣང་ངོ་བོ་དང་། །ཐམས་ཅད་སྤྲོས་བར་བྱེད་པའི་རྒྱུ། །བདེ་དང་སྡུག་བསྔལ་མཆོག་ཏུ་ཞི། །གྲང་དང་དྲོ་བ་མཆོག་གི་མཆོག །གང་གིས་ཤིན་དུ་རིག་པ་ནི། །དེ་ནི་ཚོར་བའི་ཕུང་པོར་བཤད། །རིན་ཆེན་འབྱུང་ལྡན་ཉིད་
ཀྱི་མཚན། །དེ་བཞིན་གཤེགས་པའི་སྤྲོས་བདག་ཉིད། །གླང་པོ་བོང་བུ་ཅེ་སྤྱང་དང་། །རྟ་དང་རི་དགས་དང་ནི་ཕག །ཕ་དང་མ་དང་ཕ་ཡི་སྤུན། །མཛའ་བོ་སྣག་གི་གཉེན་ཚན་སོགས། །གང་གིས་ཡང་དག་ཤེས་པ་ནི། །
འདུ་ཤེས་ཕུང་པོའི་མཚན་ཉིད་ནི། །དེ་བཞིན་གཤེགས་པ་འོད་དཔག་མེད། །དེ་ནི་སྤྲོས་པ་ཀུན་ནས་གསལ། །འགྲོ་བ་ཁྱབ་པར་ཡོངས་སུ་ཤེས། །དགེ་དང་མི་དགེའི་ལས་འབྲས་བུ། །གཞན་ཡང་ལུང་དུ་མ་བསྟན་མིན། །
དེ་ཡི་འདུ་བྱེད་དུ་ནི་བཤད། །དོན་ཡོད་སྤྲོ་བའི་རང་བཞིན་ཅན། །འཁོར་བ་དངོས་དང་དངོས་མེད་སོགས། །ཀུན་རྟོག་འབྱུང་བའི་བདག་ཉིད་ཅན། །རྣམ་ཤེས་ཞེས་ནི་རྣམ་པར་ཤེས། །མི་བསྐྱོད་སྤྲོ་བའི་བདག་ཉིད་ཅན། །
དེ་ལྟར་ཕུང་པོ་ཡོངས་ཤེས་ན། །ལུང་དང་རིགས་པའི་ཤེས་པ་སྐྱེ། །ཛི་ན་ཛིཀ་དང་རཏ་ན་དྷྲྀཀ ། ཨཱ་རོ་ལིཀ་དང་པྲཛྙཱ་དྷྲྀཀ ། བཛྲ་དྷྲྀག་ཅེས་བྱ་བའི་སྔགས། །ཅི་རིགས་པར་ནི་རིམ་བཞིན་ཤེས། །སྤྱན་ལ་སོགས་པ་བཞི་
པོ་གང་། །དེ་ནི་ཁམས་གསུམ་ཡོངས་སུ་བརྟག །སྲ་བ་ལ་སོགས་བཞིར་ཕྱེ་བས། །ས་ཡི་ཁམས་སུ་ཡོངས་སུ་བརྟག །གཏི་མུག་དགའ་བར་མངོན་པར་བརྗོད། །དེ་ཡི་སྤྱན་དུ་ཡོངས་སུ་གྲགས། །ཞུ་བ་ཅི་མཆི་ཁུ་བ་
སོགས། །རྫས་ཀྱི་བྱེ་བྲག་ཡང་དག་བསྟན། །ཆུ་ཡི་ཁམས་སུ་རྣམ་པར་ཤེས། །མཱ་མ་ཀཱི་ཡི་བདག་ཉིད་ཅན། །དྲོ་བ་བཟའ་བཏུང་སྨིན་པ་དང་། །གཟི་བརྗིད་འཕྲོ་བ་ཉིད་ཐམས་ཅད། །མེ་ཡི་ཁམས་སུ་ཤེས་

88-1-208b

པར་བྱ། །གོས་དཀར་སྤྲོ་བའི་བདག་ཉིད་ཅན། །འབྱུང་བ་རྔུབ་པ་རབ་ཏུ་འཕེལ། །རླུང་རྣམས་ཀྱི་ནི་ཚོགས་ཀྱི་མཆོག །བརྐྱང་བ་དང་ནི་བསྐུམ་པ་དང་། །སྟེང་དང་འོག་ཏུ་བྱེད་པ་དག །དེ་ནི་རླུང་གི་ཁམས་སུ་ཤེས། །སྒྲོལ་མ་སྤྲོ་
བའི་བདག་ཉིད་ཅན། །དེ་ལྟར་འབྱུང་བ་བཞི་པོ་ཡང་། །རྣལ་འབྱོར་མཆོག་ཉིད་རྣམ་པར་ཤེས། །མོ་ཧ་ར་ཏི་དྭེ་ཥར་ཏི། །རཱ་ག་ར་ཏི་བཛྲ་ར་ཏི། །དེ་ལྟར་རིམ་པས་སྔགས་རྣམས་ནི། །དེ་དག་མངོན་སུམ་ཆོ་ག་ཡིས། །གཟུགས་
ལ་སོགས་པ་ཡུལ་གྱི་ཚོགས། །ལྷ་མོའི་གཟུགས་ཀྱི་མཚན་ཉིད་དུ། །རྣལ་འབྱོར་མཆོག་གིས་རྣམ་པར་ཤེས། །སྟོང་ཉིད་གཅིག་པུ་རྒྱུ་གཅིག་པུ། །སྔོ་སེར་སོགས་ཀྱི་དབྱེ་བ་དང་། །རིང་དང་ཐུང་བའི་རྣམ་པ་ཡིས། །
ལྷ་མོ་དེ་གཟུགས་རྡོ་རྗེ་མ། །ཕྱི་རོལ་གཟུང་བའི་རང་བཞིན་ཅན། །མཁར་རྔ་སིལ་སྙན་སྦུབས་རོལ་མོ། །དེ་བཞིན་རྔ་སྙན་པི་བང་དང་། །བསྟོད་དང་སྨད་སོགས་སྒྲ་དག་ནི། །སྒྲ་ཡི་རྡོ་རྗེ་མ་ཞེས་བྱ། །གཟུང་བ་
དང་ནི་རང་བཞིན་མཆོག །རྣམ་པར་ཤེས་པ་སད་པར་བྱེད། །དྲི་ང་བ་དང་དྲི་བཟང་དང་། །སྦྱར་བའི་དྲི་ཡི་མཆོག་རྣམས་ནི། །དྲི་རྡོ་རྗེ་མར་དེ་ཤེས་བྱ། །གཟུང་བའི་རྣམ་པར་ཆེར་དམར་བ། །རོ་དྲུག་མཆོག་ཏུ་
ལྡན་པ་ནི། །ལན་ཚྭ་སྐྱུར་ལ་སོགས་དབྱེ་ཡིས། །རྡོ་རྗེ་རོ་མར་དེ་ཤེས་བྱ། །ཀུན་ཀྱང་གཟུང་བའི་རྣམ་པའོ། །མིག་སོགས་དབང་པོ་ལ་བརྟེན་པ། །རྣམ་པར་ཤེས་པའི་ཚོགས་བརྒྱད་ནི། །རིམ་པ་ཇི་ལྟ་བ་
བཞིན་དུ། །བྱང་ཆུབ་སེམས་དཔའ་བརྒྱད་དུ་ཤེས། །བྱང་ཆུབ་སེམས་དཔའི་བདག་ཉིད་ཆེ། །མིག་གཉིས་ས་ཡི་སྙིང་པོར་གསུངས། །གཟུགས་ལ་སོགས་པ་ཅི་རིགས་པར། །རང་གི་ངོ་བོ་སྤྲོ་བར་བྱེད། །སྒྲ་ཡི་
རྣམ་པ་ཐམས་ཅད་ནས། །བྱེ་བྲག་སོ་སོ་ཅི་རིགས་པར། །སྒྲ་ཡི་རྣམ་པར་ཤེས་པ་ནི། །ཕྱག་ན་རྡོ་རྗེར་ཡང་དག་བཤད། །དྲི་ཡི་བྱེ་བྲག་ལ་སྤྱོད་པ། །སོ་སོར་ཇི་ལྟར་རིགས་པར་ནི། །སྣ་ཡི་རྣམ་ཤེས་མཚན་ཉིད་

88-1-209a

ནི། །ནམ་མཁའ་སྙིང་པོ་རྣམ་པར་ཤེས། །རོ་ཡི་བྱེ་བྲག་ལ་སྤྱོད་པ། །དབྱེ་བ་སོ་སོའི་གོ་རིམས་བཞིན། །ལྕེ་ཡི་རྣམ་ཤེས་མཚན་ཉིད་ནི། །འཇིག་རྟེན་དབང་ཕྱུག་ཏུ་ནི་ཤེས། །རེག་བྱའི་བྱེ་
བྲག་ལ་སྤྱོད་པ། །བྱེ་བྲག་སོ་སོའི་གོ་རིམས་བཞིན། །རེག་བྱའི་རྣམ་ཤེས་མཚན་ཉིད་ནི། །སྒྲིབ་པ་རྣམ་པར་སེལ་བར་ཤེས། །ཡིད་ཀྱི་བྱེ་བྲག་ལ་སྤྱོད་པ། །དབྱེ་བ་སོ་སོའི་གོ་རིམས་བཞིན། །ཡིད་ཀྱི་རྣམ་ཤེས་
ཞེས་གསུངས་པ། །འཇམ་དཔལ་ཞེས་བྱའི་མིང་ཅན་ནོ། །རྒྱུས་པ་ཀུན་ལ་ཡང་དག་སྦྱོར། །དབྱེ་བ་སོ་སོའི་གོ་རིམས་བཞིན། །བག་ཆགས་ཡུལ་གྱི་བདག་ཉིད་ཅན། །བྱམས་པ་རུ་ནི་རྣམ་པར་ཤེས། །རྩ་རྣམས་
སོ་སོའི་མཚན་ཉིད་ཅན། །བདེ་བ་ཀུན་གྱི་གཞི་ཡི་མཆོག །དངོས་པོ་ཀུན་གྱི་རང་བཞིན་ཅན། །འདི་ནི་ཀུན་ཏུ་བཟང་པོར་བཤད། །དེ་ལྟར་རྣམ་ཤེས་ཚོགས་བརྒྱད་མཆོག །ཡང་དག་དེ་ཉིད་བླ་ན་མེད། །མིག་སོགས་
དབང་པོའི་རྣམ་ཤེས་ནི། །གཟུགས་སོགས་མཐོང་བའི་རང་བཞིན་ནོ། །རྗེ་ངར་དཔུང་པ་བརླ་ཐལ་གོང་། །སྒོ་གཉིས་དང་ནི་ཐམས་ཅད་ཀྱི། །ཤེས་པ་བཅུ་ཡི་མཚན་ཉིད་ནི། །ཁྱབ་པ་རྣམས་སུ་ཡོངས་སུ་ཤེས། །
གཤིན་རྗེ་མཐར་བྱེད་ཤེས་མཐར་བྱེད། །པད་མ་མཐར་བྱེད་བགེགས་མཐར་བྱེད། །འདོད་པའི་རྒྱལ་པོ་མི་གཡོ་བ། །དབྱིག་སྔོན་དང་ནི་སྟོབས་པོ་ཆེ། །གནོད་མཛེས་གཙུག་གཏོར་འཁོར་ལོ་སྒྱུར། །དེ་ལྟར་དེ་
རྣམས་གནས་དབྱེ་བས། །ཡེ་ཤེས་གསུམ་གྱིས་ཡོངས་སུ་གསལ། །ངོ་བོ་གཅིག་ཏུ་གྱུར་ནས་ནི། །ཡང་དག་དེ་ཁོ་ན་ཉིད་རྟེན། །གང་གིས་དེ་ཉིད་ཆོ་ག་བཞིན། །བླ་མ་བརྒྱུད་པ་ལས་ཤེས་བྱ། །སྔགས་ཀྱི་དེ་ཉིད་རྣལ་
འབྱོར་མཆོག །ཡེ་ཤེས་ཆེན་པོ་ལེགས་རྒྱས་པ། །སྐྱེ་མེད་ཟད་མེད་མི་གསལ་དང་། །འགྱུར་བ་མེད་ཅིང་སྒྲིབ་པ་མེད། །གཉིས་མེད་འཇིགས་བྲལ་ཞི་བ་དང་། །བདེ་བ་ཆེན་པོའི་གོ་འཕང་མཆོག །སྤྲུལ་དང་བཏུས་དང་

88-1-209b

མཐའ་མེད་དང་། །མགོ་མེད་ཡོངས་སུ་དབྱེ་བ་ཡིས། །ཨོཾ་དང་ཧཱུྃ་ཕཊ་སྭ་ཧཱའི་མཐའ། །སྦྲུལ་ཞེས་བྱ་བ་མངོན་པར་བརྗོད། །རང་མིང་ཡོན་ཏན་དང་ནི་གཟུགས། །བཏུས་པའི་མཚན་ཉིད་མིང་ཅན་ནོ། །ཨོཾ་ལ་སོགས་
པ་ཞབས་མེད་པ། །མཐའ་མེད་ཅེས་བྱའི་མིང་ཅན་ནོ། །སྭཱ་ཡི་མཐའ་ཅན་ཨོཾ་མེད་པ། །མགོ་མེད་ཞེས་ནི་བཤད་པ་ཡིན། །ཐམས་ཅད་ཡོད་ལ་ཨོཾ་མེད་པ། །མགོ་མེད་ཅེས་ནི་བཤད་པ་ཡིན། །དེ་ལྟར་མཚན་ཉིད་
ཤེས་ནས་ནི། །སྔགས་ཀྱི་དེ་ཉིད་བླ་ན་མེད། །རྩ་བའི་རྒྱུད་ཀྱི་རྗེས་འབྲངས་ནས། །འདི་ཡི་རྒྱ་ཆེན་དོན་ཤེས་བྱ། །ཡེ་ཤེས་དེ་ཉིད་རྣལ་འབྱོར་མཆོག །གཉིས་པ་ཐམས་ཅད་རྣམ་པར་སྤངས། །དབང་པོ་ཐམས་
ཅད་མཉམ་པར་སྦྱོར། །དངོས་པོ་ཐམས་ཅད་གཅིག་པུའི་ལུས། །ངག་གི་རྣམ་རྟོག་ཀུན་སྤངས་པ། །སྣང་བ་ཐམས་ཅད་རྣམ་སྤངས་པ། །བདག་བྱིན་བརླབ་པའི་རང་བཞིན་ཅན། །ཀུན་ལ་ཁྱབ་པ་རྨད་དུ་བྱུང་། །རང་
རིག་པ་ཡི་རྣལ་འབྱོར་མཆོག །སྐད་ཅིག་བཞི་ཡི་མཚན་ཉིད་ནི། །ཆ་བྲལ་ཀུན་འགྲོ་ཁྱབ་པ་དང་། །རྣལ་འབྱོར་བྱིས་པས་མི་ཤེས་ཤིང་། །ཀུན་རྫོབ་ཡོངས་སུ་མི་ཤེས་པ། །དོན་དམ་རང་གི་ངོ་བོ་ནི། །རྫོགས་པའི་
རིམ་པས་དབྱེ་བ་དང་། །སྔགས་ཀྱི་དེ་ཉིད་རབ་ཏུ་གསལ། །ཨ་ནི་དེ་ཉིད་མཐའ་ཐིག་ལེར། །ཡང་དག་ཐིམ་པ་རྣམ་པར་སྒོམ། །ཐིག་ལེ་ཡི་གེ་ཨ་ལ་ཐིམ། །ཨ་ནི་མཐའ་ཡི་ཧ་ཙམ་ལའོ། །ཧ་ཡང་ཡི་གེ་
ཧཱུྃ་ལའོ། །ཡི་གེ་ཨཱུ་ནི་ཧྃ་ལའོ། །ཡི་གེ་ཧྃ་ཡང་ཨ་ལ་ཐིམ། །ཡི་གེ་ཨ་ནི་ཐིག་ལེ་ཙམ། །ཐིག་ལེ་ཡང་ནི་སྒྲ་ལ་ཐིམ། །སྒྲ་ཡང་སྒྲ་ཙམ་ལ་ནིའོ། །སྒྲ་ཙམ་མཆོག་ནི་ནམ་མཁའ་ལའོ། །དེ་ཡང་འོད་གསལ་
བ་ལ་ཐིམ། །འོད་གསལ་གོ་འཕང་གསལ་བ་ནི། །ཤིན་དུ་རྣམ་དག་ཆོས་དབྱིངས་ཏེ། །གཉིས་སུ་མེད་པའི་ཡེ་ཤེས་མཆོག །རབ་ཏུ་སད་ཅིང་རབ་ཏུ་འཆར། །ངག་གི་སྤྱོད་པ་རྣམས་དང་བྲལ། །གཉིས་པ་

88-1-210a

ཐམས་ཅད་རྣམ་པར་སྤངས། །ཕུང་པོ་ལྔ་ནི་གཅིག་པུའི་གཞི། །འབྱུང་བ་ལྔ་ནི་ཡང་དག་བསྟེན། །རྣམ་ཤེས་བརྒྱད་ཀྱི་ཚོགས་དབེན་པ། །ཕྱི་ཡི་ཡུལ་དྲུག་བསྡུས་པ་ནི། །རླུང་བཅུས་ཤེས་པ་བཅུ་བསྡུས་པ། །དེ་ལྟར་མཚན་
ཉིད་ཀུན་བསྡུས་པའོ། །ཀུན་ནས་སྤྲོ་བའི་རྣལ་འབྱོར་གྱིས། །གང་གིས་བཞུགས་གནས་སྲིད་པ་གསུམ། །དངོས་གྲུབ་ཀུན་བྱེད་དཔལ་དང་ལྡན། །སྐལ་བ་བཟང་པོ་ཀུན་འཕེལ་བ། །རྡོ་རྗེ་དེ་ནི་རྡོ་རྗེ་སེམས། །རྡོ་རྗེ་འཇིགས་བྱེད་
དབང་ཕྱུག་དང་། །ཧེ་རུ་ཀ་དང་དུས་འཁོར་ལོ། །དང་པོའི་སངས་རྒྱས་ཐུབ་པ་ཆེ། །ཀུན་དུ་བཟང་པོ་འཇམ་དཔལ་དང་། །སྣ་ཚོགས་སྤྲོ་བའི་བདག་ཉིད་ཅན། །སྣ་ཚོགས་ཡོན་ཏན་ཚོགས་ཀྱི་གཞི། །ཀུན་ནས་སྤྲོ་བའི་རྣལ་
འབྱོར་ནི། །རྣལ་འབྱོར་ཆེན་པོ་དྲི་མ་མེད། །ཡེ་ཤེས་དེ་ཉིད་གསལ་བ་ནི། །རྟོག་པ་མེད་ཅིང་གནས་པ་མེད། །ཆོས་དབྱིངས་འཕོ་བ་ཞེས་བཤད་དོ། །བསྐྱེད་དང་རྫོགས་པའི་མཚན་ཉིད་དག །སྐྲ་ཡི་རྩེ་མོ་བརྒྱད་སྟོང་འདྲ། །ཤིན་ཏུ་
གསལ་ཞིང་འོད་གསལ་བ། །ལུང་དང་རིགས་པའི་དབྱེ་བ་ཡིས། །བླ་མ་བརྒྱུད་པ་ལས་ནི་ཤེས། །དེ་ལྟར་དེ་ཉིད་གསུམ་དེ་མཆོག །ཉལ་ནས་བརྒྱུད་པའི་རིམ་པ་སྐྱེ། །གསང་བ་ཡི་ནི་ཡེ་ཤེས་མཆོག །བཞི་པའི་མཚན་ནི་
སྐད་ཅིག་མཆོག །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་དེ་ཁོ་ན་ཉིད་གསུམ་གྱི་དམ་ཚིག་གཏན་ལ་དབབ་པའི་ལེའུ་སྟེ་ཉི་ཤུ་གསུམ་པའོ།། །། དེ་ནས་ཡང་དག་བཤད་ཀྱིས་ཉོན། །
སྣ་རྩེ་གསུམ་གྱི་མཚན་ཉིད་ནི། །གསང་བ་སྙིང་ག་གདོང་སྣའི་མིང་། །གསུམ་པོ་རྒྱུད་ལས་གསལ་བ་ནི། །འཁོར་ལོ་གསུམ་གྱི་དབྱེ་བ་ཡིས། །རྣལ་འབྱོར་པ་ཡིས་བསྒོམ་པའི་རིམ། །ཤིན་དུ་ཆགས་པའི་དབང་སོང་
བའི། །སེམས་ཀྱི་བདེ་བ་སྟེར་བར་བྱེད། །རླུང་གི་དེ་ཉིད་སྦྱོར་བ་ཡིས། །རྩ་ཡི་འཁོར་ལོ་སད་པར་བྱེད། །བདེ་བ་ཆེན་པོ་ཀུན་ནས་སྐྱེ། །ཁམས་གསུམ་རོ་གཅིག་གྱུར་ནས་ནི། །དགུག་དབང་ཆོ་ག་བཞིན་དུ་བྱ། །བྱང་

88-1-210b

ཆུབ་སེམས་ནི་བདེ་བ་ཆེ། །ལྷན་སྐྱེས་སྐད་ཅིག་མཚན་ཉིད་ནི། །རྡོ་རྗེ་རྩེ་མོར་གཟུང་བར་བྱ། །དེ་ཉིད་བདེ་བ་ཆེན་པོ་སྟེ། །ཡེ་ཤེས་ལྔ་ཡི་རང་བཞིན་ཅན། །ཀུན་རྟོག་ཐམས་ཅད་རྣམ་པར་སྤངས། །གསང་བའི་སྣ་རྩེར་རྫས་ཐིག་ལེ། །ཡང་དག་གཟུང་
བའི་བདག་ཉིད་ཅན། །ཆགས་ཆེན་སེམས་ནི་གཅིག་པུ་ཡིས། །རྣལ་འབྱོར་མཆོག་ཏུ་ཤེས་པར་བྱ། །པད་འདབ་བཅུ་དྲུག་རྩ་བཞི་ལ། །རྩ་ཡི་འཁོར་ལོ་རིམ་བཞིན་འཆར། །དེ་ཡི་ལྟེ་བ་སྣར་ནི་བཤད། །གསང་བ་བདེ་བ་ཐམས་ཅད་
སྟེར། །སྙིང་གའི་པད་མ་འདབ་མ་བརྒྱད། །དེ་ཡང་ལྟེ་བ་སྣར་ནི་བརྗོད། །ཞེས་སྡང་ཉིད་ཀྱི་སེམས་ནི་བསྒོམ། །གསང་སྔགས་འབར་བའི་ཡེ་ཤེས་སེམས། །ཡང་དག་སྤྲོ་བར་བྱེད་པའི་རྒྱུ། །ངག་གི་རྟོག་པ་ཀུན་སྤངས་པ། །རྨད་
བྱུང་ཆེན་པོ་ཡེ་ཤེས་མཆོག །རྟག་ཏུ་སྔགས་ནི་ནཱ་ད་འབྱུང་། །རྣམ་རྟོག་མེད་པའི་བདེ་བ་ཆེ། །བསམ་གཏན་ལ་སྦྱོར་བདེ་བའི་མཆོག །མན་ངག་ཐོབ་པས་བདེ་བ་རྒྱལ། །ཞེ་སྡང་མྱུར་དུ་དབང་བྱས་ནས། །ཞི་བའི་དེ་ཉིད་རྒྱུ་གཅིག་ནི། །
ཟླ་བ་ཉི་མ་མེ་དང་གསུམ། །ལན་གསུམ་གྱི་ནི་དབུས་ནས་ཁྱབ། །གདོང་གི་སྣ་ནི་ཞེས་བྱར་བཤད། །རླུང་རྣམས་གནས་ཀྱི་མཚན་ཉིད་དང་། །དེ་ལ་གནས་པའི་ཡེ་ཤེས་ཆེ། །ཐིག་ལེ་གཏི་མུག་གིས་གནོན་ཡིས། །བསམ་གཏན་གཏི་
མུག་མཆོག་ལས་རྒྱལ། །དངོས་པོ་ཐམས་ཅད་རྣམ་པར་སྤངས། །ཡེ་ཤེས་ལྔ་ཡི་བདག་ཉིད་གསལ། །དེ་ཁོ་ན་ཉིད་ལྔ་རྟེན་མཆོག །དེ་ཡི་འོད་ཟེར་ཐིག་ལེ་ཙམ། །གདོང་གི་སྣ་རྩེར་ཡང་དག་བརྟེན། །རྣལ་འབྱོར་མཆོག་ནི་བསྒོམ་
པར་བྱ། །གཏི་མུག་རྒྱ་མཚོ་ལས་ནི་རྒྱལ། །དེ་ཉིད་དམ་ཚིག་སེམས་དཔའ་ཡི། །མིང་ཅན་དུ་ནི་ཡང་དག་བཤད། །སངས་རྒྱས་ཀུན་གྱི་དམ་ཚིག་ནི། །ཡེ་ཤེས་ལྔ་ཡི་མཚན་ཉིད་ཅན། །རྣལ་འབྱོར་མཁས་པ་རྣམས་
ཀྱིས་ནི། །གཏི་མུག་མུན་པ་རྣམ་འཇོམས་པ། །ཀུན་མཁྱེན་རྟོགས་པའི་མཚན་ཉིད་ནི། །སངས་རྒྱས་ལྔ་ཡི་རིགས་གནས་ན། །སྣ་རྩེ་བུ་ག་ལས་བྱུང་ཞིང་། །རླུང་ལྔ་སྟེང་དུ་ཡང་དག་རྒྱུ། །ལུས་ལ་རྟག་ཏུ་སྤྱོད་པར་འགྱུར། །ཀུན་རྫོབ་སྣར་ནི་རྒྱུ་

88-1-211a

བ་ཡི། །སྒོ་དེ་ལས་ནི་རྣམ་པར་བྱུང་། །གཡོན་དང་གཡས་དང་གཉིས་ཀ་དང་། །དལ་བར་རྒྱུ་དང་རྣམ་པ་བཞི། །གཡས་པ་ལས་ནི་འབྱུང་བའི་ཁམས། །མེ་ཡི་དཀྱིལ་འཁོར་ཉིད་ཡིན་ཏེ། །ཁ་དོག་དམར་
པོ་བཟང་པོ་འདི། །པད་མ་མགོན་པོ་རྒྱུ་བའོ། །གཡོན་པ་ནས་ནི་འབྱུང་བའི་ཁམས། །རླུང་གི་དཀྱིལ་འཁོར་དང་འདྲེས་པ། །ལྗང་སེར་དག་ཏུ་སྣང་བ་སྟེ། །དབང་ཆེན་གྱི་ནི་དཀྱིལ་འཁོར་ཉིད། །རིན་ཆེན་མགོན་པོ་རྒྱུ་བའོ། །དལ་
ཞིང་རྒྱུ་བ་མེད་པའི་ཁམས། །དག་པའི་ཤེལ་ལྟར་སྣང་བ་ནི། །འདི་ནི་ཆུ་ཡི་དཀྱིལ་འཁོར་ཏེ། །རྡོ་རྗེ་མགོན་པོ་རྒྱུ་བའོ། །ཁམས་གསུམ་ལས་ནི་ཡང་དག་བྱུང་། །རྟེན་དང་བརྟེན་པར་བཟུང་བ་ནི། །རྣམ་པར་སྣང་མཛད་རང་བཞིན་
ཏེ། །འཆི་བའི་མཐར་ནི་འབྱུང་བར་འགྱུར། །དཀྱིལ་འཁོར་བཞི་པོ་དེ་དག་ནི། །མཉམ་པར་བཞག་པས་རྟག་ཏུ་བཟློས། །སྔགས་བཟླས་པ་ཡི་གྲངས་ཀྱིས་ནི། །ཉིན་མཚན་རྟག་ཏུ་ཟློས་པ་ཡིན། །དེ་ལྟར་རླུང་ནི་སྣ་རྩེར་ནི། །
ཁ་དོག་ལྔ་པར་རྣམ་པར་བསྒོམ། །གཉིས་མེད་མཆོག་གི་རྣལ་འབྱོར་གྱིས། །འོད་ཟེར་ཚོགས་ནི་དྲི་མ་མེད། །དེ་ཡིས་ཞི་སོགས་བྱ་བ་ནི། །རིམ་གྱིས་སྦྱོར་བས་འགྲུབ་པར་འགྱུར། །རྡོ་རྗེ་སེམས་དཔར་འགྲོ་བར་འགྱུར། །
རྡོ་རྗེ་སེམས་དཔའ་འགྲོ་མགོན་ལ། །དེ་ནས་ལག་ན་རྡོ་རྗེས་ཞུས། །ཐིག་ལེ་གསུམ་གྱི་གཞུང་ལུགས་ནི། །ཁྱོད་ཞབས་བསྙེན་བཀུར་གྱིས་འཚལ་ན། །འདི་ལ་ཅུང་ཟད་ཐེ་ཚོམ་མཆིས། །སྲིད་པ་མཐར་མཛད་གསལ་བར་
མཛད། །རྫས་དང་སྔགས་དང་དེ་བཞིན་རླུང་། །ཐིག་ལེ་གསུམ་ནི་བསྒོམས་པ་ན། །རྣལ་འབྱོར་པ་གཅིག་ཉིད་དམ་ནི། །ཡང་ན་རྣལ་འབྱོར་སོ་སོར་བསྒོམ། །དེ་ལ་ཐེ་ཚོམ་ཀུན་གཅོད་གཙོ། །བཅོམ་ལྡན་རྡོ་རྗེ་སེམས་
དཔས་གསུངས། །ཡུན་རིངས་ཆགས་ཆེན་དབང་སོང་བས། །སྲིད་པ་གསུམ་དུ་སྐྱོབ་པ་རྣམས། །དེ་དག་དགྲོལ་བའི་དོན་དུ་ནི། །རྫས་ཀྱི་ཐིག་ལེ་གསུངས་པ་ཡིན། །ཞེ་སྡང་ཆེན་པོ་དབང་སོང་བ། །མི་གང་མི་སྲུན་པ་ཡི་

88-1-211b

ལུས། །དེ་རྣམས་མྱུར་དུ་གྲོལ་དོན་དུ། །སྔགས་ཀྱི་ཐིག་ལེར་གསུངས་པ་ཡིན། །གཏི་མུག་ཆེན་པོས་ཀུན་ནས་འཁྲུལ། །སྲིད་པའི་རྒྱ་མཚོ་ལས་སྐྱོབ་གང་། །དེ་དག་དངོས་གྲུབ་བརྒྱད་འབྲས་བུ། །ཐོབ་ཕྱིར་ཡེ་ཤེས་རྒྱ་
མཚོ་ནི། །རླུང་གི་ཐིག་ལེར་གསུངས་པ་ཡིན། །ཡང་དག་དེ་ཉིད་སྤྲོས་པ་ནི། །དེ་ལྟར་ཡང་དག་ཐིག་ལེ་གསུམ། །བསམ་པ་ཇི་བཞིན་སྦྱོར་ཇི་བཞིན། །ཚེ་འདི་ཉིད་ལ་གྲུབ་དོན་དུ། །སྒྲིབ་པ་ཐམས་ཅད་དག་པའི་ཕྱིར། །རྩེ་གཅིག་པ་ཡི་སེམས་ཀྱིས་ནི། །ཡེ་ཤེས་
གསུམ་གནས་ཉམས་དགའ་བ། །མེ་ཏོག་འབྲས་བུ་ཆུ་ཡིས་བརྒྱན། །སྐྱེ་བོས་དབེན་པའི་རི་ཡི་རྩེར། །དངོས་གྲུབ་ཐམས་ཅད་བསྡུས་པ་ནི། །འབད་པ་ཡིས་ནི་བསྒྲུབ་པར་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་
ལས་སྣའི་རྩེ་མོ་གསུམ་གཏན་ལ་ཕབ་པའི་ལེའུ་སྟེ་ཉི་ཤུ་རྩ་བཞི་པའོ།། །། དེ་ནས་ཡང་དག་བཤད་ཀྱིས་ཉོན། །སྟོང་ཉིད་ཡེ་ཤེས་མཚན་ཉིད་ནི། །ལུས་ལ་གནས་པ་དེ་ཉིད་མཆོག །ཐམས་ཅད་བདག་
ཉིད་རྟག་ཏུ་བཞུགས། །ཆོས་རྣམས་ཐམས་ཅད་སྣང་བར་བྱེད། །མཚན་ཉིད་སྟོང་པ་ཉིད་དུ་འདོད། །དེ་ལས་ཡེ་ཤེས་བདེ་བ་ཆེ། །འོད་གསལ་བ་ནི་རྣམ་དག་པ། །གང་ཕྱིར་ཨ་བ་དྷཱུ་ཏཱིར་ཞུགས། །ཡང་དག་སྟོང་པ་ཉིད་དུ་འདོད། །ཆོས་རྣམས་རྣམ་
རྟོག་སྣང་བ་མཆེད། །ཀུན་རྟོག་ཐམས་ཅད་གཅོད་པར་བྱེད། །རྣམ་རྟོག་རླུང་གི་ངལ་སོ་བ། །དེ་ནི་སྟོང་པ་ཉིད་དུ་བཤད། །གཙོ་བོ་ཆེན་པོ་མི་བསྐྱོད་པའི། །འཇིག་རྟེན་ཁམས་ནི་དེ་ཉིད་དོ། །དེར་ནི་རྟག་ཏུ་བཞུགས་པའི་ས། །སྲོག་གི་ཡེ་ཤེས་མིང་
ཅན་ཏེ། །གཟུགས་མེད་དྲག་པོ་ཆེན་པོ་ཡི། །ཞི་བའི་རང་བཞིན་མཚན་ཉིད་ཅན། །དེ་ལ་ཡེ་ཤེས་བདེ་བ་ཆེ། །བྱང་ཆུབ་སེམས་ཀྱིས་གང་བ་ཉིད། །དེ་ཉིད་བདེ་ཆེན་གོ་འཕང་གནས། །ཡེ་ཤེས་ཡང་དག་བྱང་ཆུབ་སེམས། །དེ་ལ་སོགས་པ་མིང་གི་སྒྲས། །བརྗོད་
བྱ་གཅིག་པུ་བདེ་བ་ཆེ། །དངོས་པོ་གཅིག་དང་ལྡན་པ་ཉིད། །སྟོང་ཉིད་ཡེ་ཤེས་ཞེས་ནི་བརྗོད། །བདེ་བ་ཅན་ཞེས་དེ་ལ་བཤད། །བདེ་བ་དགེ་བའི་ཐོབ་མཚན་ཉིད། །གང་དེ་བདེ་བར་གནས་པ་ནི། །དེ་ནི་བདེ་བ་ཅན་ཞེས་བརྗོད། །ཚེ་དཔག་མེད་པའི་ཞིང་

88-1-212a

ཁམས་ན། །བདེ་བ་ཀུན་གྱི་གཞི་ཡི་མཆོག །བྱང་ཆུབ་སེམས་ནི་ཚེ་དཔག་མེད། །དེ་ལས་བྱུང་ཞིང་སྐྱེ་བའི་འོད། །དེ་ཕྱིར་འོད་དཔག་མེད་དུ་ཤེས། །བདེ་བ་ཀུན་གྱི་གཞི་ཡི་མཆོག །སྟོང་ཉིད་རྡོ་རྗེ་
དབྱིངས་དབང་ཕྱུག །ཡེ་ཤེས་རྡོ་རྗེའི་དབང་ཕྱུག་དང་། །དེ་ཉིད་མཉམ་པར་སྦྱོར་བ་ནི། །སྟོང་ཉིད་ཡེ་ཤེས་ཞེས་ནི་བརྗོད། །ཤེས་རབ་པད་མ་ལ་ལ་ནཱ། །ཟླ་མཚན་ཉི་མ་འབབ་པ་ན། །དེ་ཡང་སྟོང་པར་རྣམ་པར་ཤེས། །
གཉིས་པ་ཐམས་ཅད་རྣམ་པར་སྤངས། །ཐབས་ཀྱི་རྡོ་རྗེ་ར་ས་ནཱ། །ཟླ་བ་ཤུ་ཀྲ་རབ་ཏུ་འབབ། །དེ་ནི་ཡེ་ཤེས་མཆོག་ཏུ་གསུངས། །བདེ་བ་ཆེན་པོའི་གོ་འཕང་མཆོག །དེ་གཉིས་སྦྱོར་བ་མཆོག་ཏུ་ཤེས། །སྟོང་ཉིད་
ཡེ་ཤེས་མི་ཟད་པ། །ཟླ་བ་ཉ་དང་དེ་ཉིད་ཡིན། །རྣལ་འབྱོར་མ་ཡི་ཞལ་ལས་ཤེས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྟོང་པ་ཉིད་ཀྱི་ཚིག་བཤད་པའི་ལེའུ་སྟེ། 
ཉི་ཤུ་ལྔ་པའོ།། །། དེ་ནས་གཞན་ཡང་བཤད་ཀྱིས་ཉོན། །ལུས་ནི་སྟོང་པ་ཉིད་ཀྱི་གནས། །ལུས་ནི་གང་གིས་ཤེས་པ་ནི། །ལྷ་རྣམས་ཀུན་གྱི་ཕོ་བྲང་མཆོག །
ལོངས་སྤྱོད་ཆོས་དང་སྤྲུལ་པ་དང་། །བདེ་བ་ཆེན་པོ་ཡི་ནི་རྟེན། །འཁོར་ལོ་ཡང་ནི་གང་བཤད་པ། །རིམ་པ་ཇི་བཞིན་མ་ལུས་པ། །དེ་ལྟར་རྟག་ཏུ་ཡང་དག་བཞུགས། །ཐིམ་དང་ལོངས་སྤྱོད་བདག་པོ་ནི། །ལྷ་ཉིད་མཆོག་ཏུ་གཉིས་སུ་
མེད། །ཡང་དག་ངོ་བོའི་གོ་འཕང་རྟེན། །ཡེ་ཤེས་ཆེན་པོའི་གོ་འཕང་ཕྱིར། །བདེ་བ་ཆེན་པོའི་ཡང་དག་རྟེན། །ཞེ་སྡང་ཆེ་དང་གཏི་མུག་ཆེ། །ཕྲག་དོག་ཆེ་དང་ཆགས་དངོས་ཀྱིས། །ཁྲོ་བོ་ཆེ་དང་རྣམ་པའི་མཆོག །འཁོར་བའི་མདུད་པ་ངེས་གཅོད་པ། །
ས་དང་ཆུ་དང་དེ་བཞིན་མེ། །རླུང་དང་ནམ་མཁའི་དབྱེ་བ་ཡིས། །གཟུགས་དང་སྒྲ་དང་དེ་བཞིན་དྲི། །རོ་དང་རེག་བྱ་ཉིད་དང་ནི། །ཆོས་ཀྱི་དབྱིངས་དང་མིག་བཟངས་དང་། །རྣ་བ་སྣ་དང་ལྕེ་དང་ནི། །ལུས་ཀྱི་རྣམ་ཤེས་ཆོས་དང་ནི། །ཀུན་གཞི་

88-1-212b

ཉོན་མོངས་ཅན་གྱི་ཡིད། །དད་དང་བརྩོན་འགྲུས་དྲན་ཏིང་འཛིན། །ཤེས་རབ་དབང་པོའི་དབྱེ་བ་ཡིས། །དད་སྟོབས་བརྩོན་འགྲུས་སྟོབས་དང་ནི། །དྲན་པའི་སྟོབས་དང་ཏིང་འཛིན་སྟོབས། །ཤེས་རབ་སྟོབས་ནི་བླ་ན་མེད། །ཇི་བཞིན་གནས་
སུ་ཡང་དག་ཤེས། །ལུས་ཀྱི་ལྷ་རུ་གསལ་བ་ཡིན། །སྔོན་བཞིན་མིང་གི་དབྱེ་བ་ཡིས། །སྔགས་ཀྱི་དབྱེ་བས་རིམ་པ་དང་། །སྔགས་དགོད་པ་ཡི་རྣལ་འབྱོར་གྱིས། །རིམ་བཞིན་གནས་ཀྱི་དབྱེ་བ་ཡིས། །ལུང་གིས་རྣམ་པར་ངེས་བྱས་
པའི། །ཡང་དག་གནས་ཀྱི་དབྱེ་བ་དང་། །ལྷ་མོ་རྟག་ཏུ་རྣལ་འབྱོར་པས། །བདག་ལ་བྱིན་བརླབས་གོ་འཕང་གནས། །འདོད་པ་ལྔ་ལ་ལོངས་སྤྱོད་ཅིང་། །རབ་ཏུ་འབད་དེ་མཆོད་པ་བྱ། །རྡོ་ཤིང་ས་ཡི་རང་བཞིན་གྱི། །ཕྱི་རོལ་ལྷ་ལ་ཕྱག་
མི་བྱ། །བདག་ལ་བྱིན་བརླབས་རིམ་དེ་ཉིད། །གཞན་དུ་སྲིད་པ་གསུམ་ན་མེད། །དེ་ཁོ་ན་ཉིད་རྣལ་འབྱོར་མཆོག །བདག་ལ་བྱིན་བརླབས་སྒྲིབ་མེད་པ། །སྔགས་དང་ཕྱག་རྒྱའི་རིམ་པ་སོགས། །ཕྱི་ཡི་དངོས་པོ་མི་བགྲང་སྟེ། །དེ་
ཉིད་ཐོབ་པའི་རྣལ་འབྱོར་པ། །རྣལ་འབྱོར་མ་ལ་མཆོག་ཏུ་ནི། །འབད་པས་བྱིན་གྱིས་བརླབ་པར་འདོད། །བདག་བྱིན་རློབ་ཐབས་མཚན་ཉིད་དོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ལུས་ཀྱི་
ལྷ་ཡེ་ཤེས་ཀྱི་མཚན་ཉིད་ཀྱི་ལེའུ་སྟེ་ཉི་ཤུ་དྲུག་པའོ།། །། དེ་ནས་གཞན་ཡང་ལྷ་མོ་ཡི། །དེ་རྣམས་ཀྱི་ནི་མིང་བཤད་བྱ། །འཁོར་ལོ་བཞི་ཡི་དབྱེ་བ་ཡིས། །རྩ་ཡི་རིམ་པའི་གྲངས་
ཀྱིས་ནི། །ལས་དང་རྡོ་རྗེ་པད་མ་དང་། །འཁོར་ལོ་ལ་སོགས་རིགས་དབྱེ་བས། །རིམ་པ་བཞི་ཡི་དབྱེ་བ་ཡིས། །རྩ་ཡི་རིམ་པས་ཡང་དག་བཞུགས། །འདིར་ནི་རིགས་ནི་ལྔ་པར་ཡང་། །དེ་ཁོ་ན་ཉིད་ཉམས་མྱོང་མཆོག །
ཚོར་བ་ཉམས་སུ་མྱོང་བ་ཡི། །ཐམས་ཅད་ལ་ནི་ཁྱབ་པར་གནས། །སྤྲུལ་པ་རང་གི་རིགས་ལས་སྐྱེས། །ལྷ་མོ་འདི་དག་ཡང་དག་ཞུགས། །མཁྱེན་མ་གཏུམ་མོ་དཔའ་མོ་མ། །ལས་སྒྲོལ་མ་དང་ཡིད་གཅུགས་མ། །འཁྲུལ་

88-1-213a

འཁོར་མ་དང་འབུད་མ་དང་། །དེ་བཞིན་རླུང་རྒྱུ་མ་དང་ནི། །སྙིང་སྟོབས་ཡང་དག་སངས་རྒྱས་མ། །རབ་དང་མ་དང་ཡིད་འོང་མ། །གྲུབ་མ་སྤྲུལ་འཚོ་སྒྲ་མ་དང་། །གཏེར་འཛིན་ལྷ་ཡི་དབང་ཕྱུག་མ། །
གེ་སར་པད་མ་དྲི་མེད་མ། །རླུང་གི་ལུ་གུ་རྒྱུད་བྱེད་མ། །བཟང་མོ་དང་ནི་ཁྭ་ཡི་གདོང་། །གཉིད་ལོག་མ་དང་མི་འཕེལ་མ། །འཕར་མ་སྔོ་བསངས་དུས་མཚན་མ། །རྩེ་འཇོ་མ་དང་སྐལ་བཟང་འཕེལ། །ན་ར་ཛྭ་
ན་ཁྱི་གདོང་མ། །ཆགས་མ་དགའ་མ་རྣམ་སྒེག་མ། །བརྩོན་འགྲུས་འཕེལ་དང་དཀར་མོ་དང་། །བདུད་རྩི་ལྔ་ནི་འཕེལ་བ་མ། །དངོས་འབེབས་ཤིན་དུ་དཔའ་མོ་དང་། །པད་མ་རྔ་དང་འདོད་མ་དང་། །སྒྱུ་མ་ཡིད་འོང་མཛའ་མོ་
དང་། །སྐྱུར་དང་ཆང་གི་དབང་ཕྱུག་མ། །མི་བཟད་ཆེ་དང་ལས་སྐལ་བཟང་། །མེ་ཏོག་བཟང་མོ་གདུག་རྨོངས་མ། །སྟེང་གཟིགས་ཞལ་དང་རྩེ་གསུམ་མཚན། །མཛེས་མ་དང་ནི་ལྗགས་བསྐྱོད་མ། །རྟག་བམ་མ་དང་གར་
མ་དང་། །རི་དགས་མིག་དང་ཆགས་དགའ་མ། །སྣ་ཚོགས་རྨོངས་པར་རོལ་པ་མོ། །དཀར་མོ་འཇིག་རྟེན་གསུམ་པ་མོ། །རོ་བླན་དྲི་མེད་འགྲོ་བསྟུན་མ། །རལ་ག་རྣམས་ནི་ཡང་དག་བཞུགས། །རྟག་ཏུ་བརྒྱད་དང་བརྒྱད་
སྤེལ་གྲངས། །ཞལ་གསུམ་ཕྱག་དྲུག་དྲི་མ་མེད། །རིགས་ཀྱི་ཕྱག་རྒྱ་དབྱེ་བ་ཡིས། །མཚོན་ཆ་རྣམས་ཀྱིས་ཡང་དག་བརྒྱན། །དེ་དག་སྣ་ཚོགས་རྡོ་རྗེ་གཡས། །གཡོན་པ་འགྱིང་བས་ཨུཏ་པ་ལ། །གཡས་ན་འཁོར་
ལོ་རིན་ཆེན་དང་། །དེ་བཞིན་རལ་གྲི་ཆོས་འབྱུང་ནི། །གཡོན་གྱི་ཕྱག་གཉིས་ལ་ནི་འགྱུར། །སེམས་དཔའི་དཀྱིལ་ཀྲུང་གིས་ལེགས་བཞུགས། །ཞལ་ནི་ལྗང་ཁུ་སྤྱན་གསུམ་པ། །དོན་ཡོད་གྲུབ་པའི་ཅོད་པན་ཅན། །ཞལ་
རྣམས་བཞད་པར་བསྒོམ་པ་དང་། །བདེ་བ་ཐམས་ཅད་འཕེལ་བར་བྱེད། །རང་གི་མིང་གི་དབྱེ་བ་ཡིས། །ཡི་གེ་གསུམ་དང་རྣམ་པར་སྤེལ། །སྔགས་ཀྱིས་ཡང་ནི་ཡང་དག་མཆོད། །འདོད་པའི་དེ་ཉིད་རབ་སྩོལ་མཛད། །

88-1-213b

ཆོས་ཀྱི་འཁོར་ལོ་རྩིབས་བརྒྱད་དབུས། །ལྷ་འདི་དག་ནི་ཡང་དག་བཞུགས། །རྡོར་དབྱིངས་དབང་ཕྱུག་ལཱ་མ་དང་། །རྡོ་རྗེ་ཕྱག་རྒྱ་སྟོབས་ཆེན་མོ། །རྡོ་རྗེ་སྒེག་མོ་རྡོ་རྗེ་གདོང་། །རྡོ་རྗེ་ཆོས་མ་རྡོ་རྗེ་བཟང་། །རྡོ་རྗེ་རོལ་མོར་ཤེས་
པར་བྱ། །ཆོས་ཀྱི་འཁོར་ལོར་དགུ་བདག་ཉིད། །ཞལ་གསུམ་ཕྱག་དྲུག་རྣམ་པ་དང་། །སེམས་དཔའི་དཀྱིལ་ཀྲུང་གིས་ལེགས་བཞུགས། །རྡོ་རྗེ་འཁོར་ལོ་རིན་ཆེན་དང་། །གཡས་པ་ཡི་ནི་ཕྱག་ན་འཛིན། །གཡོན་ན་རལ་གྲི་
པད་མ་དང་། །དྲིལ་བུ་འཛིན་པ་བླ་ན་མེད། །སྐུ་མདོག་སྔོན་པོ་སྤྱན་གསུམ་པ། །ཞལ་གྱི་མཆེ་བ་ཅུང་ཟད་གཙིགས། །རང་མིང་ཡི་གེ་གསུམ་དང་སྤེལ། །སྔགས་ཀྱིས་དེ་དག་རབ་ཏུ་མཆོད། །ལོངས་སྤྱོད་འདབ་མ་བཅུ་དྲུག་ལ། །པད་པདྨ་
མའི་དབུས་ན་ལྷ་རྣམས་བཞུགས། །པད་མའི་སྒྲོལ་མ་པད་དཀར་མོ། །པད་མ་ཀུ་མུ་ད་འཕེལ་མ། །པད་མའི་སྤྱན་དང་པད་གཙུག་ཕུད། །པད་མའི་ཕྲེང་བ་པད་སྐྱེས་མ། །པད་གདན་པད་མའི་དྲ་བ་མ། །དེ་བཞིན་པད་མའི་འོད་དང་ནི། །པད་པདྨ་
མའི་སྤྱན་དང་པད་བཟངས་མ། །པད་མའི་ནང་བཞུགས་པད་སྐྱེས་མ། །པད་མའི་གེ་སར་པད་མ་མ། །དེ་ལྟར་འདི་ནི་ཡང་དག་བཤད། །ཞལ་གསུམ་ཕྱག་དྲུག་རྣམ་པ་ཅན། །སེམས་དཔའི་དཀྱིལ་ཀྲུང་གིས་ལེགས་བཞུགས། །
གཡས་ན་པད་མ་འཁོར་ལོ་དང་། །རྡོ་རྗེ་ཡང་ནི་འདེབས་པར་མཛད། །གཡོན་ན་རལ་གྲི་དྲིལ་བུ་དང་། །རིན་པོ་ཆེ་ཡིས་རྣམ་པར་བསྡིགས། །སྤྱན་གསུམ་རྣམ་པར་འཆར་བ་དང་། །པད་མ་དམར་པོའི་མདོག་ལྟར་དམར། །ཉི་མའི་དཀྱིལ་
འཁོར་ཉེར་བཞུགས་ཤིང་། །སེམས་དཔའི་དཀྱིལ་མོ་ཀྲུང་གིས་བཞུགས། །རང་མིང་ཡི་གེ་གསུམ་དང་བཅས། །འདི་རྣམས་སྔགས་ནི་བླ་ན་མེད། །བདེ་བ་ཆེན་པོའི་འཁོར་ལོ་ཆེ། །པད་འདབ་སུམ་བཅུ་རྩ་གཉིས་ལ། །རྟག་ཏུ་
ལྷ་མོ་རྣམས་ནི་བཞུགས། །རབ་ཏུ་སད་པ་འབད་པ་ཅན། །འཁོར་ལོའི་ཤུགས་མ་རྡོ་རྗེ་ལྡན། །རིན་ཆེན་སྒྲོལ་མ་པད་ཞུགས་མ། །སྣ་ཚོགས་ལས་མ་གཏི་མུག་དགའ། །ཞེ་སྡང་རྡོ་རྗེ་དགའ་ཆགས་མ། །རྡོ་རྗེ་ལས་ཆགས་

88-1-214a

གཟུགས་རྡོ་རྗེ། །སྒྲ་ཡི་རྡོ་རྗེ་རོ་རྡོ་རྗེ། །རེག་བྱ་རྡོ་རྗེ་ཆོས་དབྱིངས་མ། །སྤྱན་འོད་མ་དང་ཐོད་དབྱངས་མ། །སྣ་ཡི་སྣང་བ་རོ་དགའ་མ། །སྐུ་ཡི་རྒྱལ་མཚན་ཡིད་དགའ་མ། །ཁམས་བཅས་མ་དང་
རྒྱུ་འབབ་མ། །གཤིན་རྗེ་འཇོམས་པའི་བློ་ཡི་ནི། །བྱེ་བྲག་རྣམ་པར་རྒྱས་མ་དང་། །པད་མའི་རལ་པ་གྱེན་དུ་བརྫེས། །བགེགས་རྣམས་ཐམས་ཅད་འཇོམས་པ་མོ། །སྦས་པའི་མཐིལ་དང་དབྱུག་སྔོན་མ། །ཤིན་ཏུ་བརྟན་
མ་སྟོབས་ཆེན་མ། །རང་བྱུང་མ་དང་འཁོར་ལོའི་གཙུག །དེ་ལྟར་རྩ་ཡི་དབུས་ནས་ཤར། །སླར་ཡང་ལྷ་མོ་ཞལ་གསུམ་དང་། །ཕྱག་དྲུག་བདེ་བ་འཕེལ་བ་ཅན། །ཟླ་བའི་དཀྱིལ་འཁོར་ལ་ཡང་བཞུགས། །དྲི་མེད་པད་མ་
དཀར་མོའི་མདོག །ཞི་བ་ཞལ་གསུམ་སྤྱན་གསུམ་པ། །གཡས་པའི་ཕྱག་ན་བསྣམས་པ་ནི། །འཁོར་ལོ་ལྕགས་ཀྱུ་རྡོ་རྗེ་རིམ། །དེ་བཞིན་གཡོན་པའི་ཕྱག་གསུམ་ལ། །པད་མ་ཞགས་པ་རིན་པོ་ཆེ། །འཆར་དང་
འདེབས་དང་སྒེག་པར་མཛད། །པད་མ་དཀར་པོ་འདྲ་བའི་འོད། །སྤྱི་བོར་རྣམ་པར་སྣང་མཛད་འཆང་། །རང་གི་མིང་དང་ཡིག་གསུམ་མིང་། །འདི་དག་སྔགས་ནི་གོ་རིམ་བཞིན། །དེ་ཉིད་མཆོག་ནི་རབ་ཏུ་གསལ། །སྐུ་གསུང་
ཐུགས་ཀྱི་སྡོམ་པ་ནི། །དེ་ལྟ་བུ་ཡི་སྡོམ་པ་མཆོག །ལྷ་མོ་རྣམས་ཀྱི་དེ་ཉིད་མཆོག །རྟག་ཏུ་གཉིད་ལོག་ལུས་ལ་གནས། །འདོད་པ་ལྔ་ཡི་ལོངས་སྤྱོད་བསྟེན། །མཆོད་པ་ཉིད་ཀྱིས་ཡང་དག་མཉེས། །རྡོ་རྗེ་པད་པདྨ་
མའི་བདེ་བས་མྱོས། །རྡོ་རྗེ་སེམས་དཔའི་གོ་འཕང་མཆོག །མཉེས་ནས་སླར་ཡང་གསོ་བར་བྱེད། །དེ་ཡི་ཞི་སོགས་བྱ་བ་རྣམས། །འགྲུབ་འགྱུར་འདི་ལ་ཐེ་ཚོམ་མེད། །བསམ་གཏན་རྣལ་འབྱོར་སོགས་སྤྱོད་དང་། །
སྔགས་དབྱིབས་ལ་སོགས་བྱ་བ་ནི། །དགོས་མེད་མཆོག་ཏུ་ཅུང་ཟད་ནི། །བླ་མའི་ལུང་ལས་ཡང་དག་སྐྱེས། །དེ་ཕྱིར་རྡོ་རྗེ་སློབ་དཔོན་ནི། །འབད་པས་དངོས་གྲུབ་ཀྱིས་མཉེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་

88-1-214b

ཕྲེང་བ་མངོན་པར་རྟོགས་པ་ལས་འཁོར་ལོ་བཞིའི་ལྷ་མོ་བཞི་རིམ་པ་རྣམ་པར་ཕྱེ་བའི་ལེའུ་སྟེ་ཉི་ཤུ་བདུན་པའོ།། །། དེ་ནས་གཞན་ཡང་བཤད་བྱ་བ། །འཆར་དང་ནུབ་པའི་
མཚན་ཉིད་ནི། །རྩ་རྣམས་ཀྱིས་ནི་རྣལ་འབྱོར་མཆོག །དངོས་གྲུབ་ཐམས་ཅད་ཀྱི་ནི་གནས། །མདུན་གནས་པ་ཡི་ཡུལ་རྣམས་ལས། །ཡིད་ལ་བྱེད་པས་དེར་མི་འགྲོ། །སྔོན་གྱི་བག་ཆགས་ནང་གནས་པ། །དེ་ཚེ་
དབང་པོ་རབ་ཏུ་གསལ། །དེ་ཡིས་དེ་ནི་རབ་ཏུ་སད། །དེ་རྣམས་རྩ་ལ་རིམ་བཞིན་གནས། །རབ་སད་དེ་ཡིས་སད་བྱས་ནས། །ལྷ་མོ་རང་ཡང་འཁོར་ལོ་ལས། །དེ་ཡིས་འཆར་བའི་རིམ་པར་གསུངས། །ནུབ་པ་ཡང་
ནི་བཤད་པར་བྱ། །ཡུལ་རྣམས་ཀྱང་ནི་དངོས་བྲལ་མེད། །ཡིད་ལ་བྱེད་ནས་གཞན་དུ་གནས། །བག་ཆགས་ཀྱང་ནི་སད་མི་སད། །རྩ་རྣམས་འཆར་བར་མི་འགྱུར་ཞིང་། །ལྷ་རྣམས་ཡང་དག་སད་པར་ནི། །དེ་ཡི་ཕྱིར་ནི་
མི་འགྱུར་ཏེ། །སྙིང་གི་དབུས་ནས་བདེ་བའི་དངོས། །སངས་རྒྱས་ཉི་མ་གསལ་བའི་འོད། །གཟུང་དང་འཛིན་པའི་གཟུགས་ཀྱིས་ཀྱང་། །དེ་ནི་འོད་ཟེར་བཅུ་གཉིས་ཏེ། །འོད་འཕེལ་འོད་ཟེར་གཟི་བརྗིད་མ། །གསལ་
བ་འབར་མ་འོད་འབར་མ། །མིག་ལ་སོགས་པ་ལ་བརྟེན་ནས། །ཕྱི་རོལ་གཟུགས་སོགས་འཛིན་པའོ། །མུན་སེལ་འོད་མ་སྣང་བ་མོ། །གསལ་མཛེས་གསལ་འོད་ཉི་མ་གསལ། །ཕྱི་རོལ་གཟུགས་སོགས་རྣམ་
པའོ། །དྲུག་པོ་འདི་དག་འོག་ཏུ་འདོད། །ལྷ་མོ་རྣམས་ནི་གང་འཆར་བའང་། །ཡེ་ཤེས་ཉི་མ་འཆར་བ་ཡིན། །དེ་ཡང་ཡང་དག་ནུབ་པ་ནི། །དེ་ཡང་མཆོག་ཏུ་ནུབ་པའོ། །འཆར་བ་ནུབ་པ་རྣམས་ཆུད་པ། །གོ་འཕང་
མཆོག་ཏུ་ཤེས་པར་བྱ། །རྣལ་འབྱོར་ཆེན་པོ་ལེགས་པར་སད། །སངས་རྒྱས་ཉི་མ་སྡོམ་པའོ། །འདི་ནི་རྣལ་འབྱོར་དེ་ཉིད་མཆོག །འཆར་དང་ནུབ་པའི་མཚན་ཉིད་དོ། །རྡོ་རྗེ་གསང་བའི་རྗེས་འབྲངས་ནས། །བླ་མ་རྒྱུད་

88-1-215a

པ་ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་འཆར་བ་དང་ནུབ་པའི་ལེའུ་སྟེ་ཉི་ཤུ་བརྒྱད་པའོ།། །།  དེ་ནས་གཞན་ཡང་བཤད་ཀྱིས་ཉོན། །དགའ་བ་
སྐྱེས་པའི་མཚན་ཉིད་ནི། །གང་གིས་ཡང་དག་ཤེས་པ་ཡིས། །རྡོ་རྗེ་སེམས་དཔའི་གོ་འཕང་མཆོག །དེ་ནི་རྩ་ཡི་འཁོར་ལོ་ལ། །སླར་ཡང་རྒྱས་དང་བསྡུས་པ་ཡིས། །འཁོར་ལོ་བཞི་ཡི་དབང་དག་སྦྱོར། །
རྩ་རྣམས་བརྒྱད་དང་གཉིས་ལྷག་པ། །མཚམས་ཀྱི་རྩ་ཡི་རིམ་པ་ཡང་། །རྩ་ནི་བཅུ་དྲུག་ལ་ཡང་བརྟེན། །བཞི་དང་བཞི་ཡིས་རྟག་ཏུ་ཁྱབ། །དེ་རྣམས་དགའ་བའི་རིམ་པའོ། །ཆུ་ཁམས་ཁོང་དུ་ཆུད་པ་ཅན། །པད་མའི་
སྣལ་མ་ལྟ་བུའི། །དེ་ནས་དེ་ཡིས་ཁྱབ་བྱས་ཤིང་། །བདེ་བ་ཆེན་པོ་ཕན་པར་བྱེད། །འཁོར་ལོ་སོ་སོའི་དབྱེ་བ་ཡིས། །ཆ་བཞི་པ་ཡི་ཡི་གེ་ཧ། །ཤིན་དུ་ཕྲ་བའི་ཆ་དག་ཏུ། །ཁྱབ་པ་རྟེན་གྱི་ཚུལ་དུ་གནས། །རིམ་པ་
བཞི་ཡི་དབྱེ་བ་ལས། །རིམ་པ་བཅུ་དྲུག་དབྱེ་བས་འཐོབ། །འཕྲེང་བའི་བདག་ཉིད་རྨད་བྱུང་བའོ། །རོ་གཅིག་པ་ཡི་གོ་འཕང་འཐོབ། །རིམ་གྱིས་སོ་སོར་ཉམས་མྱོང་ལས། །སྣ་ཚོགས་ཆུ་ཡི་སྦྱོར་བ་ལས། །རིམ་གྱིས་
རྒྱ་མཚོ་ཆུ་བཞིན་དུ། །སྦྱོར་བ་བཞི་ཡི་འཁོར་ལོའི་དུས། །དགའ་བ་བཞི་ནི་དེ་ལ་བརྗོད། །རྣལ་འབྱོར་མ་རྒྱུད་སྤྱོད་པ་ལས། །གོ་འཕང་མཆོག་ནི་ཐོབ་པར་འགྱུར། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་
རྟོགས་པ་ལས་དགའ་བ་སྐྱེད་པའི་མཚན་ཉིད་ཀྱི་ལེའུ་སྟེ་ཉི་ཤུ་དགུ་པའོ།། །།  དེ་ནས་གཞན་ཡང་ཡང་དག་ཉོན། །རྡོ་རྗེ་བརྟན་པའི་ལུས་ཀྱིས་ནི། །རྟག་ཏུ་རྩ་རྣམས་ཀྱི་ནི་རྒྱུན། །དེ་ཁོ་ན་ཉིད་ངས་
བཤད་བྱ། །སྟོང་ཕྲག་ཉི་ཤུ་རྩ་བཞི་ནི། །རྩ་ནི་རྟག་ཏུ་རྨད་བྱུང་བ། །བྱང་ཆུབ་སེམས་ནི་འབབ་པར་ཤེས། །བདེ་བ་ཐམས་ཅད་རབ་ཏུ་འཕེལ། །རྟག་ཏུ་རྨད་དུ་བྱུང་བའི་རྩ། །སྟོང་ཕྲག་ཉི་ཤུ་རྩ་བཞི་ནི། །ཁྲག་འབབ་པར་ནི་

88-1-215b

ཤེས་པར་བྱ། །ཉི་མ་འཕོ་བའི་བདག་ཉིད་ཅན། །རྟག་ཏུ་རྨད་དུ་བྱུང་བའི་རྩ། །སྟོང་ཕྲག་ཉི་ཤུ་རྩ་བཞི་ནི། །རླུང་རྒྱུ་བར་ནི་ཤེས་པར་བྱ། །རྒྱ་མཚོ་ཆེན་པོའི་རྒྱུད་ལས་ནི། །ལུས་ཀྱི་གནས་ནི་དབྱེ་བ་ཡིས། །དེ་ཉིད་ཉི་ཤུ་རྩ་བཞིར་
བརྗོད། །ཐིམ་དང་ལོངས་སྤྱོད་བདག་པོ་ཉིད། །གྲངས་ནི་བདུན་བཅུ་རྩ་གཉིས་བརྗོད། །རེ་རེའང་འཁོར་ལོ་སྟོང་སྟོང་ངོ་། །ཐིམ་པ་ལོངས་སྤྱོད་བདག་འདོད་པ། །གཙོ་བོ་ཡང་ནི་བསྡུས་པ་ལས། །གནས་རྣམས་ཀྱི་ནི་
གྲངས་སུ་འགྱུར། །སླར་ཡང་བསྡུས་ནས་འགྲོ་བ་ན། །གསུམ་པོ་བརྒྱད་བརྒྱད་དབྱེ་བའང་ནི། །ཉིན་དང་མཚན་མོའི་དབྱེ་བ་དང་། །ཐུན་ཚོད་སྐད་ཅིག་སྦྱོར་བ་ཡིས། །རྩ་རྣམས་གོང་ནས་གོང་དུ་ནི། །ནང་དུ་འགྲོ་བར་
ཤེས་པར་བྱ། །གཡོན་པ་བྱང་ཆུབ་ཟླ་བ་འབབ། །གཡས་པ་ཁྲག་དང་ཉི་མ་འབབ། །དབུས་ནི་རླུང་རྒྱུ་བ་ཡིས་ནི། །མི་སད་བྱེད་པར་ཤེས་པར་བྱ། །ལ་ལ་ནཱ་དང་ར་ས་ནཱ། །ཨ་བ་དྷཱུ་ཏི་ཞེས་བྱའི་མིང་། །དེ་རྣམས་སྤྲོ་
བའི་སྦྱོར་བ་ཡིས། །རེ་རེའི་རིམ་གྱིས་ཐུན་བརྒྱད་བརྒྱད། །གསུམ་པོ་ཉི་ཤུ་རྩ་བཞི་འགྲོ། །ཐིམ་དང་ལོངས་སྤྱོད་བདག་པོའི་ཕྱིར། །རིམ་གྱིས་གྲངས་ནི་བདུན་བཅུ་གཉིས། །སླར་ཡང་དེ་སྤྲོ་སྦྱོར་བ་ཡིས། །རེ་རེའང་
སྟོང་སྟོང་དབྱེ་བ་ཡིས། །རྟག་ཏུ་གྲངས་ཉིད་འགྱུར་བ་ནི། །སྟོང་ཕྲག་བདུན་བཅུ་རྩ་གཉིས་སོ། །གཙོ་བོ་གསུམ་པོ་སླར་ཡང་ནི། །སྦྱོར་བས་གཅིག་པ་ཉིད་དུ་འགྲོ། །དང་པོ་ལས་ནི་རྣལ་འབྱོར་པས། །
ཕྲ་བ་དེ་ནི་ཤེས་པར་དཀའ། །བསམ་གྱིས་མི་ཁྱབ་མཆོག་ཏུ་ནི། །ཐིག་ལེ་ནཱ་ད་རྣམ་པར་སྤངས། །བདེ་བ་ཀུན་གྱི་གཞི་གསང་བ། །སྲོག་གི་རྟེན་གྱི་མཚན་ཉིད་དང་། །རྡོ་རྗེ་དབྱིངས་ཀྱི་དབང་ཕྱུག་དང་། །
དུས་ཀྱི་རྩ་ནི་རྣམ་པར་བཤད། །རོ་གཅིག་གོ་འཕང་བདག་ཉིད་ཅན། །རྣལ་འབྱོར་མ་ཡི་རྒྱུད་ལས་ཤེས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་

88-1-216a

རྟོགས་པ་ལས་རྩ་འབབ་པའི་མཚན་ཉིད་ཀྱི་གོ་ཆ་ཞེས་བྱ་བའི་ལེའུ་སྟེ་སུམ་བཅུ་པའོ།། །།  དེ་ནས་གཞན་ཡང་བཤད་ཀྱིས་ཉོན། །མཚམས་ཀྱི་རྩ་ཡི་ངོ་བོ་
ཉིད། །རྩ་རྣམས་སྡོམ་པ་འཆར་བ་ནི། །གང་གིས་ཤེས་ན་རྟག་ཏུ་ནི། །མཆོག་ཏུ་དགའ་བ་ཉམས་མྱོང་བ། །ལྷ་ཡི་ཡེ་ཤེས་གསལ་བར་བྱེད། །ལྷ་ཡི་སྔགས་སུ་ཡང་དག་སྦྱོར། །ལྷ་ཡི་རྣལ་འབྱོར་དོན་ངེས་པ། །དེ་ཉིད་གསུམ་སྦྱོར་དྲི་མ་མེད། །
དེ་གསུམ་ཅིག་ཆར་བདག་ཉིད་སྡོམ། །འཇིག་རྟེན་གསུམ་དུ་ཁྱབ་ཅིང་ཕྲ། །ལུས་ཀུན་ལ་ནི་ཡང་དག་བརྟེན། །ཡེ་ཤེས་སེམས་དཔའ་རྡོ་རྗེ་སེམས། །གང་ཕྱིར་དམ་ཚིག་སེམས་དཔའ་བདེ། །རྣལ་འབྱོར་མཆོག་ཏུ་ཤེས་པར་བྱ། །ཁྱབ་
པའི་དེ་ཉིད་རྨད་བྱུང་བ། །མཆོག་རབ་མཆོག་དང་ཕྲ་བ་དང་། །རང་བྱུང་ཡེ་ཤེས་མི་ཟད་པ། །བྱང་སེམས་སུམ་བཅུ་རྩ་གཉིས་འབབ། །རྩ་ནི་ཐམས་ཅད་མཆོག་ཏུ་རྒྱས། །བདེ་བ་ཆེན་པོའི་འཁོར་ལོར་གནས། །ཆ་ཀུན་བདག་ཉིད་རྩ་བ་
ནི། །དེ་ཡི་དབུས་སུ་རྩ་གསུམ་སྟེ། །གཙོ་བོ་ཡང་ནི་ཡང་དག་བཤད། །ཟླ་བ་ཉི་མ་མེ་རྒྱུ་བ། །འབྱུང་བ་ཐམས་ཅད་ལ་ནི་ཁྱབ། །ཇི་ལྟར་ཤིང་རྩ་ཅུང་ཟད་ཅིག །ས་ལ་བརྟན་པར་གནས་པ་ན། །སྡོང་བུ་ཡལ་ག་འདབ་ཕྲེང་བུ། །
སོགས་པ་ཡིས་ནི་ཀུན་ནས་ཁྱབ། །དེ་བཞིན་སྐྱེས་བུ་མགོར་ལྡན་པས། །ཕུང་པོ་ཁམས་ལ་སོགས་ཚོགས་ལ། །མཆོག་ཏུ་ཀུན་ནས་ཁྱབ་པའོ། །རྣམ་པར་ཐར་པའི་སྒོ་གསུམ་དངོས། །དེ་ཁོ་ན་ཉིད་གསུམ་སྡོམ་པ། །འདོད་
ཆགས་ཞེ་སྡང་གཏི་མུག་དང་། །རང་བཞིན་མཚན་ཉིད་དབྱེ་བ་གསུམ། །མཚན་མོ་ཉིན་མོ་མཚམས་ཀྱིས་ཀྱང་། །དམ་ཚིག་མཚན་ཉིད་རྣམ་པ་གསུམ། །སངས་རྒྱས་དམ་ཆོས་དགེ་འདུན་ནི། །གསུམ་ཕྱེ་དམ་ཚིག་མཚན་ཉིད་
དང་། །སྟོང་ཉིད་ཡེ་ཤེས་རྡོ་རྗེ་ནི། །རྣམ་གསུམ་དེ་ཉིད་མཚན་ཉིད་དོ། །རྒྱུ་དང་འབྲས་བུ་ཉེ་འཁོར་ནི། །རྣལ་འབྱོར་གསུམ་གྱི་མཚན་ཉིད་དོ། །རླུང་དང་བད་ཀན་མཁྲིས་པ་ནི། །གསུམ་ཕྱེ་ཁམས་ནི་བསྡུས་པའོ། །འདོད་ཁམས་

88-1-216b

གཟུགས་ཁམས་གཟུགས་མེད་ཁམས། །འཇིག་རྟེན་གསུམ་པོའི་མཚན་ཉིད་དོ། །རྩ་བ་གསུམ་དང་འབྲས་བུ་གཅིག །རིམ་བཞིན་གྱུར་ནས་ཆོས་འཁོར་འགྲོ། །དེ་ནི་སྤྲུལ་པ་གསུམ་དུ་གསལ། །སྐུ་གསུང་ཐུགས་ཀྱི་
རང་བཞིན་གྱིས། །གང་ཚེ་དེ་ལ་དེ་སྦྱོར་བ། །དེ་ནི་གཟས་ཟིན་མཚན་ཉིད་དོ། །གང་ཚེ་ཅུང་ཟད་སྦྱོར་བ་ན། །དེ་ཚེ་ཕྱེད་འཛིན་མཚན་ཉིད་དོ། །གང་ཕྱིར་སྲོག་གི་རླུང་བཅོམ་ན། །དེ་ཚེ་འཆི་བའི་མཚན་ཉིད་ཡིན། །རྩ་ཡི་གཙོ་བོ་
ཉིད་རྣམས་ནི། །གསུམ་པོ་ངེས་པ་ཞེས་ནི་བྱ། །རྒྱས་པར་རྣལ་འབྱོར་མ་རྒྱུད་ལས། །རྣལ་འབྱོར་པ་ཡིས་གསལ་པོར་ཤེས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་མཚམས་ཀྱི་རྩ་
གསུམ་གྱི་ངེས་པའི་ལེའུ་སྟེ་སུམ་བཅུ་གཅིག་པའོ།། །། དེ་ནས་གཞན་ཡང་བཤད་ཀྱིས་ཉོན། །རླུང་སྐྱེ་བ་ཡི་མཚན་ཉིད་ནི། །དུས་ཀྱི་གླགས་ནི་བཙལ་བ་ན། །ཇི་ལྟར་དངོས་སུ་
ཡང་དག་ཤེས། །བག་ཆགས་ཉོན་མོངས་ཅན་གྱི་ཡིད། །རང་གི་ངོ་བོ་གཟུགས་གཞན་མཐོང་། །དོན་ནི་ཤེས་པར་མི་ཤེས་ཤིང་། །རླུང་ཙམ་གཅིག་པུས་རྨོངས་པའོ། །ཀུན་གཞི་རྣམ་ཤེས་བཀུག་ནས་ནི། །བག་ཆགས་ནང་
དུ་རྣམ་པར་སྤྱོད། །བག་ཆགས་ཀྱིས་ནི་རྣམ་ཤེས་བཟུང་། །བག་ཆགས་དང་འདྲེས་རིམ་པ་ལས། །ནང་གི་བག་ཆགས་བསྒོས་པ་ཡིས། །དེ་རྣམས་ཟླ་མཚན་དུས་སུ་ནི། །མངལ་གྱི་རྩ་ལ་འཇུག་པ་ན། །རྡོ་རྗེ་ཁུ་ཁྲག་ཞུ་ཐིག་ལེ། །
འདྲེས་པ་རུ་ནི་གྱུར་པ་དང་། །ཀུན་གཞི་ལས་ནི་རྣམ་ཤེས་སྐྱེ། །ཇི་ལྟར་ཆང་རོས་མྱོས་པ་བཞིན། །ཀུན་གཞི་རྣམ་ཤེས་བག་ཆགས་ལས། །རྣམ་པར་ཤེས་པའི་རྒྱུན་ནི་སྐྱེ། །ཉོན་མོངས་ཅན་ཉིད་སྲོག་རླུང་ཉིད། །སྐད་ཅིག་གཅིག་
ལ་ཡང་དག་འགྲོ། །ཐོག་མར་འཕོ་བའི་དུས་སུ་ནི། །ཉ་ཡི་རྣམ་པ་ལྟ་བུར་འགྱུར། །འཕོ་བ་གཉིས་པའི་དུས་སུ་ནི། །སླར་ཡང་ཁྲག་དང་འདྲེས་པ་ནི། །སྟེང་དང་འོག་གི་དབྱེ་བ་ཡིས། །སྲོག་གི་རླུང་ནི་གཉིས་སུ་འགྲོ། །མཐུར་

88-1-217a

སེལ་རླུང་གི་འགྲོ་འོང་ལ། །རུ་སྦལ་རྣམ་པར་འཛིན་པར་འགྱུར། །དེ་ནས་འཕོ་བ་གསུམ་པ་ལ། །ཁྲག་དང་ཁུ་བ་ཟོས་པ་ན། །ཐུར་དུ་སེལ་བའི་རླུང་གི་ཚོགས། །སྐམས་ནས་ཀུན་དུ་རླུང་ནི་
འབྱུང་། །སྟེང་དུ་ཁ་བལྟས་ནས་ནི་གནས། །ཕག་རྒོད་འདྲ་བའི་ལུས་འཆང་འགྱུར། །སླར་ཡང་འཕོ་བ་བཞི་པ་ལ། །ཁྲག་དང་ཁུ་བ་བསྒོས་པ་ནི། །གྱེན་དུ་རྒྱུ་བའི་རླུང་བཀུག་ནས། །འོག་ཏུ་ཁ་བལྟས་ནས་ནི་འགྲོ། །སེང་
གེའི་རྣམ་པ་ཡིས་ཀྱང་ནི། །ཁྱབ་བྱེད་རླུང་ནི་སྤྲོ་བར་བྱེད། །དེ་ནས་འཕོ་བ་ལྔ་པ་ལ། །ཁྲག་དང་ཁུ་བ་འཕེལ་ནས་ནི། །མཉམ་གནས་རླུང་ནི་འདར་ནས་ནི། །མེ་ཡི་གཟུགས་རེད་རིམ་བཞིན་འགྲོ། །མཉམ་གནས་རླུང་
གིས་ཁྱབ་བྱེད་སྤྲོ། །གང་གིས་འགུལ་དང་འདར་བར་འགྱུར། །ཕུང་པོ་ལྔ་ནི་རྫོགས་པ་ན། །དེ་ལྟར་གསུངས་པ་དེ་ལས་སླར། །འཕོ་བ་དྲུག་པའི་དུས་ཚོད་ལ། །ས་ཡི་ཁམས་དང་མིག་གཉིས་དང་། །ཁྱབ་བྱེད་རླུང་གིས་ཀླུ་
རླུང་སྤྲོ། །རླུང་གི་དངོས་པོ་འཕེལ་བར་བྱེད། །དེ་ནས་འཕོ་བ་བདུན་པ་ལ། །ཆུ་ཡི་ཁམས་དང་སྣ་སུག་དོད། །ཀླུ་ཡི་རླུང་གིས་རུ་སྦལ་རླུང་། །སྤྲོས་ནས་གཉིས་སུ་མེད་པར་སྤྲོད། །དེ་ནས་འཕོ་བ་བརྒྱད་པ་ལ། །མེ་དང་སྣ་
ཡི་བུ་ག་འབྱུང་། །རུ་སྦལ་རླུང་གིས་རྩངས་རླུང་སྤྲོ། །རང་གི་རང་བཞིན་ཤེས་པར་བྱེད། །དེ་ནས་འཕོ་བ་དགུ་པ་ལ། །རླུང་གི་ཁམས་དང་རོ་ནི་ཚོར། །རྩངས་པ་ཞེས་བྱའི་རླུང་ཆེན་པོས། །ལྷ་སྦྱིན་རླུང་ནི་སྤྲོ་བར་བྱེད། །དེ་
རྗེས་འཕོ་བ་བཅུ་པ་ལ། །ལྷ་སྦྱིན་རླུང་གིས་གཞུ་རྒྱལ་སྤྲོ། །རླུང་ཀུན་བསྡུས་པའི་མཚན་ཉིད་ཅན། །དགུ་པའི་དབུས་ན་ཁྱབ་པའི་ཁམས། །ཕྲ་ཞིང་ཐོགས་མེད་མཚན་ཉིད་ཅན། །རྩ་དང་རྒྱུ་མ་རྒྱུས་པའི་སྦུབས། །
སྒོ་ནི་དགུ་པོ་རྒྱས་པར་བྱེད། །ལུས་ཀྱི་མཆོག་ཏུ་ཚོར་བ་དང་། །གཅིག་ཏུ་རེག་པའི་མཚན་ཉིད་འཛིན། །རབ་སད་མཆོག་ནི་ནམ་མཁའ་ལ། །འོད་གསལ་བཟང་པོ་ཡང་དག་གནས། །སངས་རྒྱས་རྣམས་ཀྱི་ཤེས་པ་

88-1-217b
88-1-217b

བཅུ། །དེ་ལྟ་བུ་ཉིད་བཤད་པར་བྱ། །འཕོ་བ་བཅུ་ནི་ས་བཅུ་སྟེ། །རིམ་པ་ཡི་ནི་རྣམ་པར་ཤེས། །མ་ནི་ཤེས་རབ་ཕ་རོལ་ཕྱིན། །བྷ་ག་ཕྱག་རྒྱ་ཆེན་པོར་བརྗོད། །བྱིས་པ་ཡང་དག་རྫོགས་སངས་རྒྱས། །ཐམས་ཅད་མཁྱེན་
ཅིང་ཐམས་ཅད་གཟིགས། །མགོ་བོའི་སྐྲ་ནི་བྲེགས་པ་དང་། །ཁྲུ་མའི་ཆོས་གོས་དམར་པོ་བགོས། །དཔལ་དང་ལྡན་པ་ཐལ་མོ་སྦྱར། །སྤྱི་བོ་ས་ལ་གཏུགས་པ་ཕྱག །མཚན་ནི་སུམ་བཅུ་རྩ་གཉིས་འཆང་། །དཔེ་བྱད་
བཟང་པོ་བརྒྱད་བཅུས་བརྒྱན། །ཡེ་ཤེས་ཆེན་པོ་ལེགས་པར་སད། །འདུ་བྱེད་ཐོབ་པ་གྲོལ་དང་བཅས། །དཔའ་བོ་ཆེན་པོ་རྣམ་རྟོག་མེད། །སྐྱེད་བྱེད་ཤ་ནི་འཇིག་པར་བྱེད། །བདུད་རྩི་ལྔ་ནི་ཡེ་ཤེས་ཆེ། །རྟག་ཏུ་བདུད་
རྩི་ལྔ་མྱང་བྱེད། །དངོས་པོ་ཐམས་ཅད་རྣམ་སྤངས་པ། །རྣལ་འབྱོར་སེང་གེ་བཞིན་དུ་སྤྱོད། །འདི་གཉིས་མཆོག་ནི་གསང་བ་སྟེ། །གང་དུ་ཡང་ནི་མ་གསུངས་སོ། །རླུང་སྐྱེས་པ་ཡི་ངེས་པ་ནི། །བླ་མ་བརྒྱུད་པ་
ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རླུང་གིས་བསྐྱེད་པ་སྐྱེས་བུ་སྐྱེ་བ་འཇུག་པའི་ལེའུ་སྟེ་སུམ་བཅུ་གཉིས་པའོ།། །། དེ་ནས་གཞན་ཡང་
བཤད་བྱ་བ། །རླུང་རྣམས་མཆོག་ཏུ་ནུབ་པ་ནི། །གང་གིས་ཡང་དག་ཤེས་པ་ཡིས། །འཆི་བའི་སྐད་ཅིག་མཚན་ཉིད་ནི། །ཕན་ཚུན་དུ་ནི་ཡང་དག་སད། །སྐྱེ་བའི་རིམ་ལྟར་ཐིམ་པར་འགྱུར། །རླུང་རྣམས་
ཡང་དག་སྐྱེ་བ་ནི། །ཕན་ཚུན་ནུབ་པའི་ཉི་མ་བཞིན། །ཐོག་མར་ལོ་བཅུ་ལོན་ནས་ནི། །རྒྱགས་པས་མྱོས་པའི་རླུང་སྐྱེས་ན། །གཞུ་ལས་རྒྱལ་བའི་རླུང་ཟོས་ཏེ། །རིམ་གྱིས་སྒྲ་གཅན་ཟླ་བ་བཞིན། །དེ་རྗེས་ལོ་བཅུ་
ཕྱིན་པ་ནི། །རྒྱགས་ཆུ་རླུང་གིས་ཡང་དག་སྐྱེ། །ལྷ་སྦྱིན་ཞེས་བྱའི་རླུང་ནི་ཟ། །རླུང་གི་རིམ་པ་སྔ་མ་བཞིན། །གཞན་ཡང་ལོ་བཅུ་ཕྱིན་པ་ན། །རྒྱགས་པའི་ཆུ་རླུང་སྐྱེས་པར་འགྱུར། །རྩངས་པ་ཞེས་བྱའི་རླུང་ནི་

88-1-218a

ཟ། །དེ་ནས་གཞན་ཡང་ལོ་བཅུ་ཕྱིན། །ལོ་ལས་སྐྱེས་པའི་རིམ་པ་ཡིས། །བཏང་གཟུང་རླུང་ནི་ཆེན་པོ་ཡིས། །རུ་སྦལ་རླུང་ནི་ཟ་བར་བྱེད། །ཀླུ་ཡི་རླུང་དང་གཏང་གཟུང་རླུང་། །སྟོབས་དང་གཟི་བརྗིད་མཚུངས་
པའི་ཕྱིར། །དུས་གཞན་ལོ་བཅུར་ཕྱིན་པ་ན། །གནོད་པར་བྱེད་པར་མི་ནུས་ཏེ། །སྟོབས་དང་ནུས་པ་མཚུངས་པའི་ཕྱིར། །གང་གིས་གང་ལ་གནོད་པ་ནི། །བྱེད་པ་ཉིད་དུ་མི་ནུས་སོ། །བཅུ་དེ་གཞན་དུ་ཕྱིན་པའོ། །ལོང་བ་བཏང་གཟུང་
སྟོབས་ཆེན་ཐོབ། །ཀླུ་ཡི་རླུང་ནི་རིམ་གྱིས་ཟ། །དེ་ནས་བཅུ་པ་གཞན་ཕྱིན་ན། །ཁྲག་དང་ཤ་ནི་རྣམ་པར་འཕེལ། །རྒྱགས་ཤིང་མྱོས་པའི་རིམ་པ་ཡིས། །བཏང་གཟུང་རླུང་ནི་ཟ་བར་བྱེད། །དེ་རྗེས་ལོ་བཅུ་ལོན་པ་ན། །
མྱོས་ཆུ་རླུང་ནི་བཀུག་ནས་ནི། །ཚིལ་དང་ཁ་ཆུ་རྣམ་པར་འཕེལ། །དེ་ཡི་བཏང་གཟུང་ཀླུ་ཟ་བྱེད། །དེ་ནས་བཅུ་པ་གཞན་ཕྱིན་པའི། །ལོ་ལ་བཏང་གཟུང་རླུང་སྟོབས་སྐྱེས། །མྱོས་པའི་དུས་རླུང་ཟ་བར་བྱེད། །མེ་དང་རླུང་ནི་
འཕེལ་བར་བྱེད། །བཏང་གཟུང་རླུང་ཉིད་རྣམ་གྱུར་ནས། །ལོངས་སྤྱོད་ཆེན་པོ་འཕེལ་གྱུར་ནས། །དེ་ནས་ལོ་བཅུ་གཞན་ལོན་ནས། །རླུང་གིས་ལུས་རྒྱས་ལྕི་བར་འགྱུར། །ཆུ་དང་རླུང་ནི་འདྲེས་པ་ན། །ཁྱབ་ཅིང་སྒྲིབ་
བྱས་རིམ་པ་ལས། །དེ་ལས་ལོ་བཅུ་གཞན་དུ་ཕྱིན། །ཆུ་ཤིང་འབྲས་བུ་བཞིན་དུ་མེད། །རྩ་བ་དང་བཅས་མེད་པར་འགྱུར། །ལས་ཀྱི་རྣམ་སྨིན་མཐའ་ཡིས་ནི། །དེ་ལྟར་རིམ་པ་བཅུ་པ་ཡིས། །ཟླ་བ་འམ་ནི་ཉིན་ཞག་གཞན། །
ཚེ་ནི་ཉུང་ངུར་བྱས་ནས་ནི། །སྲོག་ཟད་པར་ནི་ཤེས་པར་བྱ། །མཁའ་འགྲོ་སྡུད་པའི་རྒྱུད་ལས་ནི། །ཤིན་དུ་རྒྱས་པར་ཤེས་པར་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རླུང་གི་རིམ་པས་སྲོག་
ཟད་པ་རྒྱས་པར་བཤད་པའི་ལེའུ་སྟེ་སུམ་བཅུ་གསུམ་པའོ།། །། དེ་ནས་གཞན་ཡང་བཤད་ཀྱིས་ཉོན། །མཚན་ཉིད་ཆེན་པོ་ཡེ་ཤེས་མཆོག །བསྡུ་བའི་མཁའ་འགྲོ་རྣལ་

88-1-218b

འབྱོར་མཆོག །སྙིང་པོས་སྙིང་པོའི་དོན་བསྡུས་པ། །གང་ཕྱིར་མཁའ་འགྲོ་མས་བསྡུས་པ། །དེ་ཕྱིར་བསྡུས་པའི་མཁའ་འགྲོ་བརྗོད། །ལྟེ་བའི་དབུས་ན་རྟག་བཞུགས་པ། །ཉི་མ་སྟོང་དང་མཚུངས་པའི་འོད། །ཡེ་ཤེས་ཆེན་
པོའི་མེ་འབྱུང་བ། །ཀུན་རྟོག་ཐམས་ཅད་འཇོམས་པར་བྱེད། །འཆར་བས་ཕུང་པོ་རྣམ་རྟོག་ནི། །བསྲེགས་བྱས་བར་ཆད་མེད་པའི་ལུས། །རྡོ་རྗེ་ཁམས་ཀྱི་རྣམ་རྟོག་ནི། །བསྡུས་ནས་སླར་ཡང་རང་བཞིན་གྱིས། །གཟུང་དང་འཛིན་
པའི་རྣམ་རྟོག་ནི། །སྙིང་རྗེས་དེར་ནི་སླར་ཡང་སྡུད། །དེ་ལྟར་གང་ལ་ཕྱེ་ལེབ་བཞིན། །འཆིང་བ་ཐམས་ཅད་སྲེག་པར་བྱེད། །རླུང་གི་དེ་ཉིད་མངོན་སྦྱོར་བས། །སྔགས་ཀྱི་ལུས་ཀྱི་སྦྱོར་བ་ཡིས། །རྣམ་པར་རྟོག་པ་ཙམ་ཡང་
ནི། །སྲིང་པ་ཉིད་དུ་ཐེ་ཚོམ་མེད། །མཁའ་འགྲོ་སྡུད་པའི་རྒྱུད་ལས་ནི། །རྣལ་འབྱོར་མཆོག་གི་རིམ་ཤེས་ན། །མཁའ་འགྲོ་ཡེ་ཤེས་རྒྱས་པར་ནི། །རྣལ་འབྱོར་བསྟེན་པས་རིག་པར་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་
ཕྲེང་བ་མངོན་པར་རྟོགས་པ་ལས་མཁའ་འགྲོ་མ་སྡུད་པའི་ལེའུ་སྟེ་སུམ་བཅུ་བཞི་པའོ།། །། དེ་ནས་གཞན་ཡང་བཤད་ཀྱིས་ཉོན། །རྣམ་རྟོག་རླུང་ནི་རྣམ་པར་གཅོད། །ཉིན་དང་མཚན་དུ་ཤེས་པར་ནི། །བརྒྱ་དང་
བརྒྱད་ནི་ལྷག་པར་རྒྱུ། །རླུང་རྣམས་དེ་ནི་རྣམ་རྟོག་ནི། །གང་ཕྱིར་རྣམ་པར་གཅོད་པར་བྱེད། །རྣལ་འབྱོར་དེ་ནི་མཆོག་ཏུ་ཞི། །ཐམས་ཅད་སྟོང་པའི་ངོ་བོར་བྱེད། །ཐེ་ཚོམ་ཐོག་མར་སྦྱོར་བ་དྲུག །རྣལ་འབྱོར་རིག་པས་མཆོག་
ཏུ་བསྒྲུབ། །དེ་ནས་དབྱངས་མེད་ཡི་གེ་ཧ། །ཤིན་དུ་རྒྱ་ཆེ་བཟླས་པར་བྱ། །གང་ཕྱིར་མདུད་པ་འཇོམས་བྱེད་ཅིང་། །བདེ་བ་སྐྱེ་བ་སྟེར་བར་བྱེད། །དེ་ཡིས་རྣམ་རྟོག་ཐམས་ཅད་ནི། །སྐད་ཅིག་གིས་ནི་གཅོད་པར་བྱེད། །རྣལ་འབྱོར་
རྗེས་སུ་རྣལ་འབྱོར་དང་། །ཤིན་དུ་རྣལ་འབྱོར་རྣལ་འབྱོར་ཆེ། །དེ་ཡི་དབྱེ་བ་བཅྭོ་བརྒྱད་ཀྱིས། །དང་པོ་སྦྱོར་བ་བསྒོམ་པར་བྱ། །བཅུ་བདུན་རྗེས་སུ་རྣལ་འབྱོར་སོགས། །དེ་ལས་དཀྱིལ་འཁོར་རྒྱལ་མཆོག་ནི། །རྣལ་

88-1-219a

འབྱོར་མཆོག་ལ་དབྱེ་བ་ལྔ། །དེ་ལས་ཀྱང་ནི་ལས་རྒྱལ་མཆོག །རྣལ་འབྱོར་དབྱེ་བ་བཅུ་གཉིས་སོ། །དེ་ཉིད་དབྱེ་བ་བཞི་བཅུ་དགུ། །བསྐྱེད་པའི་རིམ་པ་བསྡུས་པ་ཡིས། །མངོན་སུམ་བྱེད་པའི་རྣལ་འབྱོར་རོ། །
དེ་ལ་རྡོ་རྗེ་བཟླས་རིམ་མཆོག །རྫོགས་རིམ་རྣལ་འབྱོར་ཡན་ལག་ནི། །རྣམ་པར་རྟོག་པ་ཛེས་བྱེད་པ། །ཕྲ་བ་འདི་ཉིད་བླ་ན་མེད། །ཆོ་ག་ཇི་བཞིན་རྣལ་འབྱོར་པ། །བློ་དང་ལྡན་པས་སྔོན་བཞིན་བསྒོམ། །སྲིད་པའི་འཆིང་བ་གཅོད་
པར་བྱེད། །རྣལ་འབྱོར་ཆེན་པོ་ཡེ་ཤེས་ཆེ། །དེ་ཉིད་ཆེན་པོ་རྨད་འབྱུང་ཆེ། །ངེས་པར་བསྒོམས་པས་ཡང་དག་ནི། །རྣམ་རྟོག་རླུང་ནི་འཇོམས་པར་བྱེད། །དོན་གྱི་རྗེས་འགྲོ་བཟླས་པ་ཡིས། །དངོས་མེད་ངོ་བོ་གཅིག་པ་དང་། །
སྟོང་ཉིད་བསྟེན་པ་མངོན་པར་ཞེན། །སྒོམས་པ་ངེས་པར་བརྟན་པར་བྱེད། །སྒྲུབ་པོས་ཡང་དག་བསྒོམ་བྱས་ན། །རྡོ་རྗེ་བཟླས་རིམ་བླ་ན་མེད། །དེ་ཡི་རིམ་པ་བཞིན་ཡེ་ཤེས། མཆོག་ཐོབ་འགྱུར་འདི་ཐེ་ཚོམ་མེད། །
རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས། རྣམ་པར་རྟོག་པའི་རླུང་གཅོད་པའི་མཚན་ཉིད་ཀྱི་ལེའུ་སྟེ་སུམ་བཅུ་ལྔ་པའོ།། །།  དེ་ནས་གཞན་ཡང་བཤད་ཀྱིས་ཉོན། །རྣམ་རྟོག་
མེད་པའི་རླུང་ཤར་ན། །གང་ཤེས་རྡོ་རྗེ་སེམས་དཔའ་ཡི། །རང་དངོས་གོ་འཕང་བཟང་པོ་འཐོབ། །རྣམ་རྟོག་མེད་པའི་རླུང་ཆེན་པོ། །གཉིས་པ་ཐམས་ཅད་རྣམ་པར་སྤངས། །དངོས་པོ་ཀུན་གྱི་རང་བཞིན་བདག །
སྒོམ་དང་སྒོམ་མིན་གོ་འཕང་བྲལ། །རྣལ་འབྱོར་ཆེན་པོའི་ཡེ་ཤེས་ཆེ། །གནས་པ་མེད་ཅིང་དྲི་མ་མེད། །ཕྲ་བའི་ཆ་ཀུན་དབུས་ན་གནས། །ཐིག་ལེ་ནཱ་ད་རྣམ་པར་སྤངས། །ཀུན་ལ་ཁྱབ་ཅིང་ཞི་བ་དང་། །
བདག་བྱིན་བརླབ་པའི་མཚན་ཉིད་གཅིག །མཚན་གཞི་མཚན་ཉིད་རྣམས་ལས་གྲོལ། །བག་ཆགས་རྣམ་རྟོག་རྣམ་པར་སྤངས། །ཚིགས་དང་མདུད་པའི་ལམ་དང་ནི། །སྒོམ་དང་བསྒོམ་བྱ་རྣམ་པར་སྤངས། །

88-1-219b

སྟོང་ཉིད་ཡེ་ཤེས་མཚན་ཉིད་དོ། །སྔགས་དང་ཕྱག་རྒྱའི་རྣམ་པའི་ཆ། །རྣམ་པའི་སྤྱོད་པ་རྣམ་པར་སྤངས། །བྱ་བ་སྤྱོད་པ་རྣལ་འབྱོར་གྱི། །རྒྱུད་རྣམས་ལ་ཡང་བཀླག་མི་བྱ། །རྣལ་འབྱོར་ཆེན་པོའི་རྒྱུད་ཆེན་པོ། །
བཤད་པར་བྱ་བ་དམ་ཚིག་མཆོག །མན་ངག་ཇི་བཞིན་ཆོ་ག་བཞིན། །ཐོག་མ་ཉིད་དུ་བཤད་པར་རིགས། །དེ་ཡི་རིམ་པའི་རྗེས་འགྲོ་ཤེས། །བླ་མ་བརྒྱུད་པའི་གོ་འཕང་མཆོག །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་
བ་མངོན་པར་རྟོགས་པ་ལས་རྣམ་རྟོག་མེད་པའི་མཚན་ཉིད་ཀྱི་ལེའུ་སྟེ་སུམ་བཅུ་རྩ་དྲུག་པའོ།། །། དེ་ནས་རྡོ་རྗེ་ཅན་གྱི་གསུངས། །རྩ་རྣམས་ནུབ་པའི་རྣལ་འབྱོར་ནི། །དེ་ཁོ་ན་ཉིད་བཤད་ཀྱིས་ཉོན། །
ཡུལ་དང་དབང་པོ་ཡང་དག་སྦྱོར། །རྩ་རྣམས་ཀྱང་ནི་འཆར་བར་འགྱུར། །ཤར་ནས་སྔོན་བཞིན་སོང་ནས་ནི། །བསྐྱེད་པའི་རིམ་པ་བླ་ན་མེད། །རྣམ་རྟོག་སྐྱེ་བ་དེ་ཡི་ཕྱིར། །བརྒྱ་དང་བརྒྱད་ཀྱིས་ལྷག་པའི་རིམ། །
དེ་ལས་སྐྱེ་དང་རྒ་དང་ན། །འཆི་ཞིང་སླར་ཡང་ལྡོག་པར་འགྱུར། །ཡུལ་རྣམས་དངོས་པོ་མེད་པ་ཡིས། །སྦྱངས་པའི་ཡེ་ཤེས་དེ་ཉིད་ཕྱིར། །དེ་ཉིད་འདི་ལ་སྤྱོད་པའི་ཕྱིར། །དངོས་སུ་ཡུལ་རྣམས་དངོས་མེད་ཕྱིར། །དབང་པོ་རྣམས་
ནི་སྐྱེ་བ་མིན། །དེ་ལས་གཉིས་གཉིས་ཡང་དག་སྦྱོར། །དངོས་དང་དངོས་མེད་སྟོང་པ་ཉིད། །དེ་ནས་རྩ་རྣམས་ནུབ་འགྱུར་ཏེ། །འཁོར་ལོའི་རིམ་པ་ལ་ཡང་རྟོན། །དེ་རྣམས་ནུབ་པ་ལས་ནི་ཞི། །སྟོང་ཕྲག་བདུན་བཅུ་རྩ་གཉིས་ནི། །
ཀུན་ཀྱང་རྩ་ཡི་འཁོར་ལོར་འགྱུར། །དེ་ཉིད་ཀུན་ཆོས་ནང་དུ་ཁྱབ། །སྟོང་ཉིད་བསྒོམ་པ་རྣལ་འབྱོར་ལས། །ཡུལ་རྣམས་ཀྱི་ནི་ངོ་བོ་ཉིད། །ངེས་པ་རུ་ནི་ཤེས་པ་ཞེས། །རིག་པའི་རྡོ་རྗེ་རྣམ་པར་འཇོམས། །
རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྩ་རྣམས་ནུབ་པའི་སྦྱོང་བའི་ལེའུ་སྟེ་སུམ་བཅུ་རྩ་བདུན་པའོ།། །།  དེ་ནས་གཞན་ཡང་

88-1-220a

བཤད་ཀྱིས་ཉོན། །སྤྱོད་དྲུག་གོ་འཕང་མཚན་ཉིད་ནི། །ཇི་ལྟ་ཇི་ལྟ་བ་བཞིན་སྦྱོར། །ཇི་ལྟར་འདོད་པའི་ཡན་ལག་རྟེན། །རྣམ་པ་དྲུག་པོ་དེ་ལས་ཕྱེད། །དེ་བཞིན་བརྒྱད་བརྒྱད་དེ་ལས་ལྷག །
བརྒྱད་གཉིས་བརྒྱད་ཕྲག་བཞི་དང་ནི། །དེ་ལྟར་གྲངས་ཀྱིས་སྦྱོར་བ་གསལ། །ཟླ་བ་ཕྱེད་པའི་ཆ་ལྟ་བུ། །སྟོང་ཉིད་རླུང་གི་འཁོར་ལོར་གནས། །ཕྱེད་པ་མ་ཡིན་རྫོགས་པ་མིན། །ཆུ་ཡི་ཟླ་བ་ལྟ་བུར་སྣང་། །སྒྱུ་
མ་ཆེན་པོ་འགྲོ་བའི་མ། །ཐམས་ཅད་རྟེན་པའི་མཚན་ཉིད་ནི། །རླུང་གི་འཁོར་ལོ་སྲོག་ཅེས་བཤད། །མཁས་པ་རྣམས་ཀྱི་སྤྱོད་ཡུལ་མིན། །མེ་ཡི་འཁོར་ལོ་སྟོང་ཉིད་ཁྱབ། །དབུས་ན་ཐིག་ལེ་ལྟ་བུ་ནི། །མི་འགྱུར་ཀུན་དུ་འགྲོ་བ་དང་། །
རང་བྱུང་ཀུན་ལ་ཁྱབ་པ་དང་། །བདེ་བ་ཡང་དག་འཕེལ་བར་བྱེད། །དབྱངས་དང་གསལ་བྱེད་རྣམ་པར་སྤངས། །འཇིག་རྟེན་གསུམ་ནི་མ་ལུས་པ། །གཅིག་ཏུ་བྱས་ན་སྐྱེད་པར་བྱེད། །མི་ཤིག་ནཱ་དའི་གོ་འཕང་ཅན། །
རྣམ་པ་ཐམས་ཅད་རྣམ་པར་སྤངས། །སྦྲུལ་གྱི་ལྕེ་ལྟར་གཡོ་བ་དང་། །ཚངས་པ་ལ་སོགས་ཕ་མེས་དང་། །འཇིགས་པ་མ་ཡིན་གཡོ་བ་མིན། །ཡི་གེ་དང་ནི་ཚིག་མ་ཡིན། །འབྱུང་བའི་ཚོགས་ནི་རྣམ་པར་སྤངས། །
གྲངས་བྲལ་ཟད་མེད་སྐྱེ་བ་མེད། །ལྟེ་བ་སྤྲུལ་པའི་འཁོར་ལོར་གནས། །ཆོས་ཀྱི་འཁོར་ལོའི་དབུས་གནས་པ། །སྒྲ་ཙམ་དྲི་མ་དང་བྲལ་བ། །ཆགས་བྲལ་ཆགས་པ་མེད་པ་དང་། །བྱ་བ་བྱེད་དང་གནས་མེད་པ། །
དཔེ་མེད་གནས་པ་མེད་པ་དང་། །སྲོག་དང་རྩོལ་བ་རྣམ་པར་སྤངས། །ལྷ་ཡི་དབང་ཕྱུག་ཡེ་ཤེས་མཆོག །དེ་ལྟ་བུ་ཡང་རྙེད་པར་དཀའ། །ལོངས་སྤྱོད་འཁོར་ལོ་མཆོག་ཏུ་གནས། །འཆིང་བ་མེད་པའི་རྣམ་པ་མཆོག །མཆོག་
ཏུ་ཁོང་དུ་ཆུད་གྱུར་པ། །རྣམ་པ་ཀུན་གྱིས་ཡང་དག་བཞུགས། །རྟེན་ཅིང་འབྲེལ་འབྱུང་རང་བཞིན་གྱི། །ཆང་གི་རོ་ཡིས་མྱོས་པ་བཞིན། །མཆོག་ནི་དང་པོ་མ་ལུས་པ། །དངོས་པོ་ཀུན་གྱི་ནང་ན་གནས། །ཐོག་མ་ཐ་མ་ལྷག་པར་

88-1-220b

གནས། །མཚན་ཉིད་མེད་ཅིང་སྣང་བ་མེད། །མཚན་ཉིད་ཐམས་ཅད་རྣམ་པར་སྤངས། །ཞི་བ་མི་འཇིགས་བརྗོད་དུ་མེད། །རང་བཞིན་ཉམས་མྱོང་རང་ངོ་བོ། །བདེ་བ་ཆེན་པོའི་འཁོར་ལོར་གནས། །བླ་མ་བརྒྱུད་པ་ལས་ནི་ཐོབ། །དེ་
ལྟར་ཡེ་ཤེས་བྱེ་བྲག་ཆེ། །རང་གི་ངོ་བོ་རྣམ་ཤེས་དྲུག །སྟེང་དང་འོག་ཏུ་ཡང་དག་སྦྱོར། །རྣལ་འབྱོར་ཞེས་ནི་རབ་ཏུ་གྲགས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་འཁོར་ལོ་དྲུག་སྒོམ་པའི་
ལེའུ་སྟེ་སུམ་བཅུ་བརྒྱད་པའོ།། །།  དེ་ནས་བཅོམ་ལྡན་རྡོ་རྗེས་གསུངས། །དུས་ཀྱི་མཚན་ཉིད་སྡོམ་པ་ནི། །རྣལ་འབྱོར་གང་གིས་རྣམ་པར་ཤེས། །གྲངས་ཀྱི་རྣལ་འབྱོར་བླ་ན་མེད། །དུས་ནི་དུས་ཚོད་ཞེས་ནི་
བཤད། །བསམ་དང་བསམ་བྲལ་རང་དངོས་ནི། །དུས་བཟང་དང་ནི་དུས་ངན་དང་། །རྣམ་པ་གཉིས་ལ་ཡང་དག་གནས། །སྣ་ཡི་བུ་ག་ལས་བྱུང་ནས། །ཕྱི་ཡི་སྒོ་ལས་རྟག་ཏུ་འཆར། །ནང་དུ་སྡུད་པར་དུས་བཟང་གསུངས། །འབྱུང་བ་
ཡང་ནི་དུས་ངན་འདོད། །དུས་ངན་ལས་ནི་གཞན་པ་མཆོག །དུས་བཟང་མཆོག་སྟེ་རང་ཉིད་ནི། །རྫོགས་ལྡན་དང་ནི་གསུམ་ལྡན་དང་། །གཉིས་ལྡན་དང་ནི་དུས་བཟང་པོ། །རྩོད་པའི་དུས་ནི་ངན་པ་སྟེ། །དེ་ལྟར་གསུངས་པའི་དུས་
མཚན་ཉིད། །དགའ་དང་མཆོག་ཏུ་དགའ་བ་དང་། །ལྷན་ཅིག་སྐྱེས་པ་དུས་བཟང་སྟེ། །དགའ་དང་བྲལ་བ་ངན་དུས་སོ། །དུས་ཀྱི་མཚན་ཉིད་དེ་ལྟར་བཤད། །འཇུག་པ་དང་ནི་གནས་པའི་དུས། །དུས་བཟང་པོར་ནི་ཡོངས་སུ་གྲགས། །ལྡང་
བ་ཡང་ནི་དུས་ངན་ཏེ། །དེ་ལྟར་དུས་ཀྱི་མཚན་ཉིད་དོ། །དུས་ནི་ཁམས་རྣམས་ཐམས་ཅད་དེ། །མཉམ་པ་རོ་གཅིག་གོ་འཕང་མཆོག །ཡེ་ཤེས་རྣམ་ཤེས་རྣམ་སྤངས་ཏེ། །དུས་ནི་གཅིག་ནི་བརྗོད་པ་ཡིན། །དངོས་དང་དངོས་མེད་སྤྲོས་བྲལ་བ། །བཞི་པའི་སྐད་
ཅིག་མཚན་ཉིད་ནི། །བརྗོད་བྱ་རྗོད་བྱེད་ལས་གྲོལ་བ། །དུས་གཅིག་ཞེས་ནི་བརྗོད་པ་ཡིན། །ཆགས་དང་ཆགས་བྲལ་ངེས་གྲོལ་བ། །བདེ་བ་ཆེན་པོ་གོ་འཕང་སྤངས། །ཕྱག་རྒྱ་ཆེན་པོའི་དོན་གྱི་གཞི། །དུས་གཅིག་ཞེས་ནི་བརྗོད་པ་ཡིན། །མཚན་

88-1-221a

ཉིད་མེད་ཅིང་སྣང་བ་མེད། །གྲངས་ནི་རྣལ་འབྱོར་རྣམ་པར་སྤངས། །དེ་ཉིད་དུས་སུ་ངེས་བཤད་དེ། །བླ་མ་བརྒྱུད་པ་ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་
པ་ལས་དུས་དང་དུས་ཚད་རྣམ་པར་བཤད་པའི་ལེའུ་སྟེ་སུམ་བཅུ་རྩ་དགུ་པའོ།། །། དེ་ནས་གཞན་ཡང་བཤད་བྱ་བ། །གསང་བའི་འབྲས་བུ་མཆོག་ཉོན་ཅིག །གང་གིས་
དངོས་གྲུབ་མཆོག་ཏུ་འགྲོ། །ཕྱག་རྒྱ་ཆེན་པོ་ཡང་དག་བསྟེན། །གསང་བ་སྦས་པ་ཞེས་ནི་བཤད། །རྣལ་འབྱོར་བྱིས་པས་མི་ཤེས་ཤིང་། །བཞི་པའི་དབང་ཞེས་བྱ་བའི་མིང་། །ཞལ་ནས་བརྒྱུད་པའི་རིམ་པ་རྣམས། །མཆོག་
ཏུ་ཞི་བའི་ཡེ་ཤེས་ཆེ། །རྣམ་རྟོག་ཐམས་ཅད་རྣམ་པར་སྤངས། །ཕྱག་རྒྱ་ཆེན་པོའི་དངོས་གྲུབ་ཆེ། །རྣལ་འབྱོར་ཆེན་པོའི་དོན་བསྡུས་པ། །རྣལ་འབྱོར་མ་རྒྱུད་ལས་བསླབས་པ། །མཆོག་ཏུ་རྨད་བྱུང་ངོ་བོ་ཉིད། །ཡེ་ཤེས་ཆེན་པོའི་རོ་
འབེབས་པ། །དེ་ཉིད་ཆེན་པོའི་ཡོན་ཏན་ལྡན། །ནམ་མཁའ་མཆོག་ལ་གནས་པའི་ས། །རྡོ་རྗེ་སེམས་དཔའ་རང་ངོ་བོ། །བདེ་བ་རྣམས་ནི་འཕེལ་བར་བྱེད། །བདེ་བ་ཆེན་པོའི་གོ་འཕང་འདས། །ཤེས་དང་ཤེས་བྱ་རྣམ་པར་བྲལ། །
སྒོམ་དང་བསྒོམ་བྱ་རྣམ་པར་སྤངས། །སྔགས་དང་རྒྱུད་ཀྱི་བྱ་བས་སྟོང་། །ཀུན་དུ་རྟོག་པ་ཐམས་ཅད་སྤངས། །དངོས་པོ་ཀུན་གྱི་གོ་འཕང་གསལ། །འཇིག་རྟེན་གསུམ་གྱི་རྣམ་པའི་ནི། །ཆགས་དང་ཆགས་བྲལ་རྣམ་པར་སྤངས། །
དམ་ཚིག་ཆེན་པོ་ལ་གནས་པ། །གྲངས་མེད་འཇིག་རྟེན་གསུམ་གཅིག་དངོས། །དངོས་གྲུབ་དེ་ཁོ་ན་ཡི་རྒྱུད། །དེ་ལྟར་གསང་བའི་འབྲས་བུ་གསལ། །གཞན་ནི་གང་དུའང་མ་གསུངས་པ། །རྣལ་འབྱོར་མཆོག་གི་ཡེ་ཤེས་མཆོག །རྣལ་
འབྱོར་མ་རྒྱུད་ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་གསང་བའི་འབྲས་བུ་ཞེས་བྱ་བའི་ལེའུ་སྟེ་བཞི་བཅུ་པའོ།། །། དེ་ནས་བཅོམ་ལྡན་

88-1-221b

རྡོ་རྗེས་གསུངས། །ཆོས་ཀྱི་དབྱིངས་ཀྱི་གོ་འཕང་མཆོག །ཆོས་ཀྱི་དབྱིངས་ནས་ཁྱབ་པའི་ཁམས། །ཆོས་ཀྱི་དབྱིངས་ཀྱིས་དེ་ལ་བརྗོད། །ཀུན་ཁྱབ་མཆོག་ཏུ་ཕྲ་བ་དང་། །ཀུན་འགྲོ་རྟག་ཏུ་འཆར་བ་དང་། །ཕུང་པོ་ལྔ་ཉིད་འབྱུང་བ་ལྔ། །
ཡུལ་དང་སྐྱེ་མཆེད་རྣམ་ཤེས་དང་། །དེ་དག་ཡང་དག་ལྡན་ཆོས་ཀུན། །བཤད་དེ་གསང་བའི་དབང་ཕྱུག་སྟེ། །དེ་དག་དབུས་ན་གནས་པའི་ཁམས། །ཁྱབ་ཅིང་སྤྱོད་ཡུལ་མ་ཡིན་པ། །ཇི་ལྟར་ཏིལ་གྱི་ཏིལ་མར་དང་། །ཇི་ལྟར་ཤིང་ལ་མེ་
བཞིན་དུ། །དེ་བཞིན་ཆོས་རྣམས་ཐམས་ཅད་ལ། །ཁྱབ་ཀྱང་མཐོང་བ་མ་ཡིན་ནོ། །ནམ་མཁའ་བཞིན་དུ་དྲི་མ་མེད། །ཆོས་ཀུན་གྱི་ནི་གཞི་ཡི་མཆོག །གཟུང་དང་འཛིན་པའི་ཀུན་རྟོག་གིས། །ཁྱབ་ཀྱང་མཐོང་བ་མ་ཡིན་ནོ། །སྟོང་
ཉིད་ཡེ་ཤེས་རྣལ་འབྱོར་གྱིས། །རྣལ་འབྱོར་པ་ཡིས་གསལ་བར་མཐོང་། །ཆོས་དབྱིངས་བྷ་ག་ཞེས་ནི་བརྗོད། །བྷ་ག་རིན་ཆེན་ཟ་མ་ཏོག །གང་ཕྱིར་དབང་ཕྱུག་སོགས་ཡོན་ཏན། །ལྡན་པ་དེ་ཕྱིར་བྷ་ག་བརྗོད། །བྷ་ག་ཆོས་རྣམས་
སུ་ཡང་བཤད། །དབྱིངས་ནི་བྱང་ཆུབ་སེམས་སུ་གསུངས། །ཁམས་གསུམ་པ་ཡི་འགྲོ་བ་ཡི། །རྒྱུ་ནི་བྷ་ག་ཞེས་བྱར་བཤད། །དབྱིངས་ནི་ཡང་དག་སྦྱོར་དངོས་ཀྱིས། །ཆུ་ཟླ་བཞིན་དུ་ཡང་དག་གནས། །དོན་དམ་གཅིག་པུའི་
དེ་ཉིད་ཤེས། །ལག་མཐིལ་སྐྱུ་རུ་བཞག་པ་བཞིན། །མཆོག་གི་དེ་ཉིད་ལྟར་ནི་སྣང་། །རང་རིག་ཤིན་ཏུ་དྲི་མ་མེད། །དངོས་དང་དངོས་མེད་ཟད་ནས་ནི། །རྟག་ཏུ་དེ་ཉིད་མཐོང་ཞིང་སྣང་། །ཆོས་ཀྱི་དབྱིངས་ཀྱི་གོ་འཕང་གསལ། །
དེ་ལྟར་ཤིན་ཏུ་རྒྱས་པར་བཤད། །གཟུང་དང་འཛིན་པ་དང་བྲལ་བས། །སྦྱོར་བྲལ་ཤེས་པ་རྨད་དུ་བྱུང་། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཆོས་ཀྱི་དབྱིངས་ཀྱི་དོན་བཤད་པའི་ལེའུ་སྟེ་བཞི་བཅུ་
གཅིག་པའོ།། །། དེ་ནས་བཅོམ་ལྡན་རྡོ་རྗེས་གསུངས། །རྡོ་རྗེ་ཡི་ནི་མཚན་ཉིད་མཆོག །དེ་ཡི་དོན་དུ་བཤད་ཀྱིས་ཉོན། །ཇི་ལྟ་བ་བཞིན་བཤད་པར་བྱ། །རྡོ་རྗེ་མི་ཕྱེད་ཞེས་ནི་གསུངས། །ཡེ་

88-1-222a

ཤེས་ལྔ་ཡི་བདག་ཉིད་མཆོག །རྩ་ལྔ་ཡི་ནི་ནམ་མཁར་རྟེན། །རྩེ་མོ་ལྔ་ཡི་རང་ངོ་བོ། །ས་དང་ཆུ་དང་དེ་བཞིན་མེ། །རླུང་དང་ནམ་མཁའ་ཉིད་དང་ནི། །རྩ་ཡི་ནམ་མཁའི་ཆ་ཡི་གཟུགས། །བླ་མའི་བརྒྱུད་
ལས་ཤེས་པར་བྱ། །ཨྃ་རྃ་ལྃ་བྃ་ཡྃ་ས་བོན། །བརྗོད་པ་རྩ་ནི་ལྔ་རྣམས་ཏེ། །འབད་པ་ཡིས་ནི་ཤེས་པར་བྱ། །རྡོ་རྗེས་སྐྱེ་བའི་མཚན་ཉིད་ནི། །པད་མ་ལྟེ་བའི་དབུས་གནས་པ། །ཐིག་ལེར་བཤད་པ་འགྲོ་བ་མེད། །དམ་ཚིག་
གནས་ནི་ཤེས་པ་དང་། །བདུད་རྩི་མཆོག་གིས་རབ་ཏུ་གང་། །རྣམ་པ་ཀུན་ལྡན་རྣམ་པ་མེད། །དེ་ནི་རྡོ་རྗེར་ཡོངས་སུ་གྲགས། །མེ་ལོང་མཉམ་ཉིད་ཡེ་ཤེས་དང་། །སོ་སོར་རྟོག་དང་བྱ་ནན་ཏན། །རྣམ་པར་དག་པ་ཆོས་ཀྱི་དབྱིངས། །
ཡེ་ཤེས་ལྔ་ཡི་རང་བཞིན་ནོ། །དེ་ཡི་ངོ་བོ་ཡོངས་སུ་ཤེས། །རྡོ་རྗེ་རང་ཉིད་ཉམས་མྱོང་མཆོག །ནམ་མཁར་ཆེར་གནས་ཞི་བ་དང་། །རྟོག་པ་མེད་ཅིང་ཉོན་མོངས་མེད། །རྡོ་རྗེ་སེམས་དཔའ་ཡང་དག་གཞི། །བླ་མ་བརྒྱུད་པ་ལས་
ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྡོ་རྗེ་བཤད་པའི་ལེའུ་སྟེ་བཞི་བཅུ་གཉིས་པའོ།། །། དེ་ནས་བཅོམ་ལྡན་རྡོ་རྗེས་གསུངས། །རིགས་ཀྱི་
དབྱེ་བ་དོན་བསྡུས་པ། །དེ་ཚེ་རིགས་ནི་རྣམ་པ་ལྔ། །རྩ་བའི་རྒྱུད་དུ་གསལ་བར་གསུངས། །རྣལ་འབྱོར་སྤྲོས་པ་དབྱེ་བ་ཡིས། །རྣལ་འབྱོར་ཆེན་པོའི་དམ་ཚིག་གོ། རྒྱུད་དུ་གྲགས་པ་དབྱེ་བ་ཡི། །མཐར་ཐུག་དེ་ནི་ཡང་
དག་གསུངས། །དེ་ཉིད་ལས་ནི་བསྡུས་ནས་ཀྱང་། །རིགས་ཀྱི་དབྱེ་བ་བརྒྱ་རུ་གསུངས། །སྣ་ཚོགས་སྤྲོས་པའི་རྣལ་འབྱོར་གྱིས། །རྡོ་རྗེ་སེམས་དཔའ་ཞེས་ནི་བརྗོད། །གང་གིས་དེ་ཡི་རྣམ་པ་མཐོང་། །སྣ་ཚོགས་ནོར་བུ་ཇི་
བཞིན་ནོ། །སེམས་ཅན་མོས་པ་སྣ་ཚོགས་དང་། །སྣ་ཚོགས་བསམ་པའི་བྱེ་བྲག་གིས། །སྣ་ཚོགས་ཉོན་མོངས་མནན་ནས་ནི། །འགྲོ་བའི་བླ་མས་གྲོལ་བའི་ཕྱིར། །གཞུང་ནས་གང་གིས་དེ་ཡིས་ནི། །སྣ་ཚོགས་སྤྲོ་བའི་

88-1-222b

ངོ་བོ་ཉིད། །གྲངས་མེད་པ་ཡི་དབྱེ་བ་ཡིས། །དབྱེ་བ་གྲངས་མེད་སྦྱོར་བ་ཡིས། །དོན་དམ་རིགས་ཀྱི་དབྱེ་བ་ཉིད། །རྒྱུད་གཞན་རྣམས་སུ་གསུངས་པ་ཡི། །སེམས་ཅན་བསམ་པའི་བྱེ་བྲག་གིས། །དེ་ནི་བསྡུས་ན་དབྱེ་བར་
འགྱུར། །རྩ་ཡི་འཁོར་ལོའི་རིམ་པ་ཡིས། །སྟོང་ཕྲག་བདུན་བཅུ་རྩ་གཉིས་པའོ། །དེ་ལ་སྟོང་ཕྲག་སུམ་བཅུ་དྲུག །ལུས་ཀྱི་རྫས་དང་གནས་སོགས་ཀྱིས། །རིམ་པའི་དབྱེ་བ་དེ་ལས་ཀྱང་། །སྟོང་ཕྲག་ཉི་ཤུ་རྩ་
བཞིའོ། །དེ་རྗེས་བརྒྱ་ཡིས་མཆོག་ཏུ་གང་། །བདུན་བཅུ་རྩ་གཉིས་དྲུག་བཅུ་བཞི། །སུམ་བཅུ་རྩ་དྲུག་བསྡུས་པ་ལས། །ཉི་ཤུ་རྩ་བཞི་དེ་ལས་ཀྱང་། །སུམ་བཅུ་དང་ནི་དགུ་ཡང་ངོ་། །དེ་ལས་ལྔ་དང་དེ་ཕྱིར་
གསུམ། །གསུམ་ཡང་བསྡུས་ན་གཅིག་ཉིད་དེ། །རྫོགས་པའི་རིམ་པའི་སྦྱོར་བ་ཡིས། །གཞན་ནས་གཞན་དུ་འདྲེས་ནས་འགྲོ། །དེ་ཡང་འོད་གསལ་གོ་འཕང་ལའོ། །རྣམ་རྟོག་མེད་པའི་བདེ་བ་ཆེ། །གཉིས་
མེད་ཡེ་ཤེས་དྲི་མ་མེད། །ཆོས་ཀྱི་དབྱིངས་ཀྱི་བདག་ཉིད་མཆོག །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རིགས་ཀྱི་དབྱེ་བའི་བསྡུས་པ་ཞེས་བྱ་བའི་ལེའུ་སྟེ་བཞི་བཅུ་རྩ་གསུམ་པའོ།། །། 
དེ་ནས་བཅོམ་ལྡན་རྡོ་རྗེས་གསུངས། །ཕྱག་རྒྱའི་དབྱེ་བ་བླ་ན་མེད། །ཆོས་དང་ལས་དང་དམ་ཚིག་དང་། །ཕྱག་རྒྱ་ཆེན་པོ་མངོན་པར་བརྗོད། །ལས་ཀྱི་རྣམ་སྨིན་ངེས་པ་ཡིས། །ཀུན་ནས་རྒྱས་བཏབ་ལྟ་བུར་གནས། །གང་ཡང་འདི་ནི་ལས་གང་གིས། །དེ་འབྲས་
ཇི་ལྟ་བ་བཞིན་འགྱུར། །ཆོས་རྣམས་རང་བཞིན་མེད་པ་ཉིད། །རང་བཞིན་གྱིས་ནི་རྒྱས་བཏབ་ནས། །དམ་ཚིག་རང་གི་ཡོན་ཏན་དངོས། །རྒྱལ་སྲས་རྣམས་ཀྱི་རྒྱས་བཏབ་པ། །སྟོང་དང་སྙིང་རྗེ་མི་ཕྱེད་པ། །སངས་རྒྱས་
ཞིང་ནི་རྣམ་སྦྱོང་བ། །དེ་བཞིན་གཤེགས་པའི་དམ་ཚིག་ནི། །ཡོངས་སུ་དག་པའི་མཛད་པའི་ས། །དེ་ཡི་རང་བཞིན་རང་བཞིན་མེད། །ཕྱག་རྒྱ་ཆེན་པོ་ཞེས་ནི་བརྗོད། །ལས་ཀྱི་ཕྱག་རྒྱ་ཡོངས་ཤེས་ན། །སྔགས་པ་ལས་ནི་

88-1-223a

ཐོབ་པར་སྐྱེ། །བླ་མས་ཤེས་རབ་དབང་བསྐུར་ན། །ཇི་ལྟར་མཐོང་བའི་མཚན་ཉིད་ནི། །རྡོ་རྗེ་སེམས་དཔའ་རང་དངོས་དོན། །སྙིང་རྗེའི་བསམ་པས་གསལ་བ་ནི། །དེ་ལས་ངེས་པར་ཐོབ་ནས་ནི། །ཆོས་ཉིད་
སྒོ་ནས་ངེས་པར་བྱེད། །དེ་ལྟར་དེ་ཉིད་དེ་ཡེ་ཤེས། །དེ་ལྟར་རྣལ་འབྱོར་མ་མཚན་ཉིད། །དམ་ཚིག་ལ་ཞེན་མཁས་པ་དང་། །རླུང་གིས་དེ་ཉིད་ཕ་རོལ་སོན། །དཔལ་ལྡན་འདུས་པའི་དོན་བསླབ་པ། །ངག་འཇམ་ཤེས་རབ་ལྡན་མ་དང་། །
མིག་ཡངས་མ་ཡི་བུ་མོ་རྙེད། །གཟུགས་དང་ལང་ཚོས་རྣམ་པར་བརྒྱན། །ཇི་བཞིན་རྣལ་འབྱོར་དམ་ཚིག་ལ། །ཕྱག་རྒྱས་ལྷན་ཅིག་སྒྲུབ་པར་བྱེད། །དེ་ནས་དེ་ཉིད་ཐོབ་པ་ན། །ཕྱག་རྒྱ་ཆེན་པོའི་མཚན་ཉིད་དོ། །དེ་ཉིད་བདེ་ཆེན་གོ་འཕང་
ནི། །ཀུན་དུ་རྟོག་པ་ཐམས་ཅད་སྤངས། །སྟོང་ཉིད་ཡེ་ཤེས་དྲི་མ་མེད། །ཆོས་ཀྱི་དབྱིངས་ཀྱི་གོ་འཕང་གསལ། །དེ་ནས་གཞན་ཡང་བཤད་བྱ་བ། །ཕྱག་རྒྱའི་དབྱེ་བ་བླ་ན་མེད། །རིགས་དང་ཕ་རོལ་ཕྱིན་དབྱེ་བས། །ཕྱག་རྒྱ་དྲུག་
ཏུ་ཡང་དག་བཤད། །ཡྃ་རྃ་ལྃ་བྃ་ཨྃ་ཧྃ་དང་། །ལྷ་མོ་རྣམས་ཀྱི་རིམ་པ་ལས། །མཆོད་པའི་རིམ་པ་རོ་གཅིག་པ། །རྟག་ཏུ་ཡང་ནི་མཆོད་པར་བྱ། །གདོལ་པ་མོ་དང་ཁྲུས་མཁན་མོ། །སྨེ་ཤ་ཅན་དང་གར་མཁན་མ། །
རོ་བསྲེགས་མོ་དང་བྲམ་ཟེ་མོ། །གྲུབ་འགྱུར་དོན་དུ་རྣལ་འབྱོར་པས། །བདག་ཉིད་རོལ་ཅིང་གནས་པར་བྱ། །ཁྲུས་མཁན་རིན་ཆེན་རིགས་ལས་སྐྱེས། །གདོལ་པ་པད་མའི་རིགས་ལས་སྐྱེས། །དེ་བཞིན་གར་མཁན་
ལས་ཀྱི་རིགས། །རོ་བསྲེགས་མ་ནི་འཁོར་ལོའི་རིགས། །སྨེ་ཤ་ཅན་ནི་རྡོ་རྗེའི་རིགས། །ཡེ་ཤེས་ཕྱག་རྒྱ་བྲམ་ཟེ་མོ། །རྡོ་རྗེ་སེམས་དཔའི་རིགས་སུ་བརྗོད། །འདི་ནི་རིགས་ནི་དྲུག་ཏུ་འགྱུར། །བྲམ་ཟེ་མོ་ནི་མ་ཡིན་ཏེ། །
ཁྲུས་མཁན་མོ་ནི་སྲིང་མོར་བརྗོད། །གར་མཁན་མོ་ནི་བུ་མོར་ཤེས། །སྨེ་ཤ་ཅན་ནི་ཆུང་མར་གྲགས། །རོ་བསྲེགས་མོ་ནི་མནའ་མ་སྟེ། །སྒྱུག་མོ་གདོལ་པ་མ་ཞེས་བྱ། །ཤེས་རབ་ཐབས་ཀྱི་ཆོ་ག་ཡིས། །རྣམ་

88-1-223b

རྟོག་མེད་པས་བརྗོད་པར་བྱ། །གང་ཕྱིར་རྣམ་རྟོག་མེད་གྱུར་ན། །དངོས་གྲུབ་ཀུན་ལ་དུས་ཀུན་དུ། །སེམས་ནི་མ་རུ་གྱུར་ནས་ནི། །སྲིང་མོ་དག་ཏུ་ཡང་དག་བཤད། །ལུས་ནི་བུ་མོར་ཤེས་པར་བྱ། །སྲོག་ནི་ཆུང་མར་རབ་ཏུ་
གསལ། །མནའ་མ་ཐུར་དུ་སེལ་བའི་རླུང་། །དབུ་མའི་རླུང་ནི་སྒྱུག་མོར་བརྗོད། །མ་ནི་རྒྱགས་པའི་རྩ་ཡི་ཆ། །སངས་རྒྱས་རིན་ཆེན་ཟ་མ་ཏོག །སྲིང་མོ་ཁུ་བ་འབབ་པའི་རྩ། །སྤྱི་བོའི་གནས་ན་ཡང་དག་གནས། །བུ་མོ་
ཁྲག་རྒྱུ་བ་ཡི་རྩ། །དེ་ནི་ཕྱེད་ཕྱེད་ལྷག་པར་གནས། །ཆུང་མ་གཅིན་ནི་འབབ་པའི་རྩ། །དེ་ཉིད་ཀྱི་ནི་དབུས་ན་གནས། །མནའ་མ་མཆི་མ་འཛག་པའི་རྩ། །མགྲིན་པའི་གནས་སུ་ལྷག་པར་གནས། །མ་ནི་ས་རུ་ཡང་དག་བཤད། །
ཆུ་ཡི་ཁམས་ནི་སྲིང་མོར་བརྗོད། །མེ་ནི་བུ་མོར་ཤེས་པར་བྱ། །རླུང་ནི་ཆུང་མར་རབ་ཏུ་གྲགས། །མནའ་མ་ནམ་མཁའ་རུ་ནི་བཤད། །སྒྱུག་མོ་ནམ་མཁའ་ཆེན་པོའོ། །མངར་བར་གྱུར་པས་མ་དང་ནི། །སྐྱུར་ག་སྲིང་མོ་རུ་ནི་བརྗོད། །
ཁ་བ་རང་གི་བུ་མོ་དང་། །ལན་ཚྭ་ཆུང་མར་ཡོངས་སུ་གྲགས། །བསྐ་བ་སྒྱུག་མོར་ཤེས་པར་བྱ། །ཚ་བ་མནའ་མར་ཡོངས་སུ་གྲགས། །དེ་དག་འབད་པས་འདོད་བྱ་ཞིང་། །དངོས་གྲུབ་འདོད་པས་བསྟེན་པར་བྱ། །ལས་ཀྱི་ཕྱག་རྒྱ་དབྱེ་
བ་འདི། །དེ་ཡི་ཡོན་ཏན་བསྟེན་པའི་མཆོག །དམ་ཚིག་དེ་དང་རྟོག་པར་འཇུག །ཕྱག་རྒྱ་ཆེན་པོའི་བདེ་བ་ཆེ། །རྡོ་རྗེ་སེམས་དཔའི་གོ་འཕང་ཞི། །ཡེ་ཤེས་མཆོག་ནི་བླ་ན་མེད། །དེ་ལྟར་ཕྱག་རྒྱའི་གོ་འཕང་གསལ། །རྣལ་འབྱོར་
མ་རྒྱུད་སྤྱོད་ཡུལ་ལོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཕྱག་རྒྱའི་དབྱེ་བ་རྒྱས་པར་བཤད་པའི་ལེའུ་སྟེ་བཞི་བཅུ་བཞི་པའོ།། །།  དེ་ནས་གཞན་ཡང་
ཡང་དག་བཤད། །ཕུང་སོགས་སྐྱེ་མཆེད་མཚན་ཉིད་ནི། །རྒྱལ་བ་རྒྱལ་ནི་གཟུགས་ཞེས་བཤད། །རྡོ་རྗེ་འཛིན་ནི་རྣམ་ཤེས་དང་། །རིན་ཆེན་འཛིན་ལ་ཚོར་བར་གསུངས། །འཁོར་ལས་བརྒལ་བར་འདུ་ཤེས་གསུངས། །ཤེས་རབ་འཛིན་

88-1-224a

ནི་འདུ་བྱེད་དང་། །དེ་ལྟར་ཕུང་པོར་རབ་ཏུ་གྲགས། །ས་ནི་གཏི་མུག་དགའ་མར་བཤད། །དེ་བཞིན་ཆུ་ནི་ཞེ་སྡང་དགའ། །མེ་ནི་ཆགས་ལ་དགའ་བ་དང་། །དེ་བཞིན་རླུང་ནི་རྡོ་རྗེ་དགའ། །ནམ་མཁའ་རྡོ་རྗེ་དབྱིངས་དབང་
ཕྱུག །གཟུགས་ནི་གཟུགས་ཀྱི་རྡོ་རྗེ་དང་། །སྒྲ་ནི་སྒྲ་ཡི་རྡོ་རྗེ་སྟེ། །དྲི་ནི་དྲི་ཡི་རྡོ་རྗེ་དང་། །རོ་ནི་རོ་ཡི་རྡོ་རྗེར་བཤད། །རེག་བྱའི་རྡོ་རྗེ་རེག་བྱར་འགྱུར། །ཆོས་ཀྱི་དབྱིངས་ཀྱི་དབང་ཕྱུག་མ། །མིག་གཉིས་ས་ཡི་སྙིང་པོ་དང་། །རྣ་བ་ཕྱག་
ན་རྡོ་རྗེ་དང་། །སྣ་ནི་ནམ་མཁའི་སྙིང་པོ་དང་། །ལྕེ་ནི་འཇིག་རྟེན་མགོན་པོ་དང་། །ལུས་ནི་སྒྲིབ་པ་རྣམ་སེལ་མཛོད། །ཡིད་ནི་ཀུན་དུ་བཟང་པོ་དང་། །རྩ་ནི་བྱམས་པ་རུ་ནི་བརྗོད། །ཡེ་ཤེས་མཆོག་ནི་འཇམ་དཔལ་ཉིད། །ཁྱབ་པ་རུ་
ནི་ཡང་དག་བཤད། །དེ་བཞིན་ལུས་ཀྱི་ཆོས་རྣམས་ནི། །ཁྲོ་བོ་བཅུར་ནི་ཡང་དག་བཤད། །དེ་ལྟར་ལུས་ཀྱི་དཀྱིལ་འཁོར་གསུངས། །ཕུང་པོ་ལ་སོགས་སྐྱེ་མཆེད་སོགས། །རྣལ་འབྱོར་གཉིས་མེད་མཆོག་གིས་ནི། །བླ་མ་བརྒྱུད་པ་
ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཕུང་པོ་ལ་སོགས་པ་དང་སྐྱེ་མཆེད་ཀྱི་མཚན་ཉིད་ཀྱི་ལེའུ་སྟེ་བཞི་བཅུ་ལྔ་པའོ།། །། དེ་ནས་གཞན་ཡང་བཤད་བྱ་བ། །ཕྱག་རྒྱ་ཆེན་པོའི་
དོན་མཚན་ཉིད། །རྣལ་འབྱོར་ཆེན་པོའི་འབྲས་བུ་ཞི། །ཡེ་ཤེས་ཆེན་པོའི་དོན་བསྡུས་པ། །བདེ་བ་ཆེན་པོའི་སྐལ་བ་ཆེ། །རོ་མཆོག་ཆེན་པོའི་བདག་ཉིད་ཅན། །སྒྱུ་མ་ཆེན་མོ་མཆོག་ཏུ་ཕྲ། །ཆེན་པོའི་ཆེན་པོ་ནམ་མཁའ་ཆེ། །ཕྱག་རྒྱ་
དེ་བཞིན་གཤེགས་ཡེ་ཤེས། །རྣམ་རྟོག་མེད་པའི་གོ་འཕང་སྟེ། །མི་ཕྱེད་རྡོ་རྗེ་སེམས་དཔའི་གནས། །རྣམ་རྟོག་མེད་པའི་བདེ་བ་ཆེ། །ནམ་མཁའ་བཞིན་དུ་གོས་པ་མེད། །རང་བཞིན་མེད་ཅིང་གཞི་དང་བྲལ། །གཉིས་མེད་བདག་
མེད་བརྗོད་དུ་མེད། །རྣལ་འབྱོར་རྣམས་ནི་རང་རིག་པ། །ཕུང་པོ་ཁམས་དང་སྐྱེ་མཆེད་ཆའི། །ཀུན་རྟོག་ཆོས་ནི་ཡོངས་སུ་སྤངས། །སྒོམ་དང་བསྒོམ་བྱ་སྙོམ་འཇུག་དང་། །རིམ་པ་གཉིས་ནི་རྣམ་པར་སྤངས། །རྣམ་ཤེས་ཡེ་ཤེས་དང་བྲལ་བ། །

88-1-224b

སྔགས་དང་བཟླས་བརྗོད་བསྙེན་པ་སྤངས། །དངོས་པོ་ཀུན་གྱི་གནས་ལས་བརྒལ། །ཡེ་ཤེས་ཆེན་པོ་རབ་གསོལ་བ། །དངོས་གྲུབ་ཆེན་པོ་འདིར་ཤེས་བྱ། །ཕྱག་རྒྱ་ཆེན་པོ་བླ་ན་མེད། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་
མངོན་པར་རྟོགས་པ་ལས་ཕྱག་རྒྱ་ཆེན་པོའི་དོན་རྣམ་པར་ངེས་པའི་ལེའུ་སྟེ་བཞི་བཅུ་རྩ་དྲུག་པའོ།། །། དེ་ནས་བཅོམ་ལྡན་རྡོ་རྗེས་གསུངས། །ཉམས་ཀྱི་མཚན་ཉིད་དབྱེ་བ་ནི། །གང་གིས་ཡོངས་ཤེས་རྣལ་འབྱོར་
པ། །རྣལ་འབྱོར་ཆེན་པོ་དག་ཤེས་པར། །གྱུར་ནས་ཀྱང་ནི་ཡེ་ཤེས་ཆེ། །དེ་ཉིད་རྣལ་འབྱོར་ཀུན་ལས་བསྒྱིངས། །འདར་དང་རྔུལ་དང་བ་སྤུ་ལངས། །དབྱངས་འགྱུར་བ་དང་ལྡིབས་པ་དང་། །མདོག་འགྱུར་མཆི་འཛག་ཐིམ་པ་དང་། །
སྙིང་སྟོབས་ཅན་གྱིས་འདི་བརྒྱད་ཉམས། །དགའ་བ་རྒྱས་པའི་རྩ་ཡི་ཆ། །རྒྱགས་པའི་ཆ་ཡི་རྩ་དགའ་ནི། །ཁོང་སྟོང་འདར་བར་སྐྱེད་པར་བྱེད། །རྒྱགས་པའི་ཆུ་ཡི་རྩ་དེ་ནི། །རབ་ཏུ་རྔུལ་བྱེད་སྐྱེད་པར་བྱེད། །དེ་བཞིན་
རྒྱགས་པས་གཡེངས་པའི་རྩ། །ཁོང་སྟོང་བ་སྤུ་ལྡང་བར་བྱེད། །དེ་བཞིན་ན་ས་ར་ཡི་རྩ། །ཁོང་སྟོང་ཚིག་ནི་ལྡིབ་པར་བྱེད། །རུས་སྦལ་ཆེན་པོའི་རྩ་རྒྱས་ན། །ཁ་དོག་འགྱུར་བ་སྐྱེ་བར་བྱེད། །མགོ་བོ་ཆེན་པོའི་
རྩ་རྒྱས་ནས། །བརྒྱལ་ཞིང་སྡུག་བསྔལ་བཅས་པར་བྱེད། །འུར་འུར་ཆེན་པོའི་རྩ་བྱེ་ན། །བ་སྤུ་ལངས་པ་སྐྱེད་པར་བྱེད། །དགའ་བ་ཆེན་པོའི་རྩ་རྒྱས་ན། །ཁོང་སྟོང་མཆི་མ་འཛག་པར་བྱེད། །མྱོས་པ་ཆེན་པོའི་རྩ་བྱེ་ན། །
སྲོག་གི་རླུང་ནི་ཐིམ་པར་བྱེད། །བརྒྱལ་དང་སེམས་མེད་བདེ་བ་ཆེ། །དེ་ནས་དྲན་པ་ཉམས་པར་འགྱུར། །སྒེག་པ་ལ་སོགས་ཉམས་སུ་ཤེས། །སྔར་བཤད་རིམ་པས་སད་པར་བྱེད། །ཛཿཧཱུྃ་བྃ་ཧོཿདེ་བཞིན་དུ། །ཨ་ལ་ལ་
ལ་ལ་ཧོ་སྔགས། །རབ་ཏུ་བསྐུལ་བས་རྒྱས་ནས་སུ། །ཉམས་ནི་སོ་སོའི་དབྱེ་བས་ཤེས། །དེ་ལྟར་དེ་ནི་དབྱེ་བརྒྱུད་པའོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཉམས་ཀྱི་

88-1-225a

དབྱེ་བ་བཤད་པའི་ལེའུ་སྟེ་བཞི་བཅུ་རྩ་བདུན་པའོ།། །། དེ་ནས་བཅོམ་ལྡན་རྡོ་རྗེས་གསུངས། །བདག་ཅེས་བྱ་བ་སྒྲ་ཡི་རྟེན། །གང་གིས་ཡང་དག་ཤེས་པ་ཡིས། །སྲིད་པའི་འཆིང་བའི་མཚན་
ཉིད་ནི། །ཨ་ཧྃ་འཁོར་ལོའི་འཆིང་བ་དག །དེ་ནི་ཡོངས་ཟད་གྲོལ་བའོ། །ཨ་ནི་དངོས་པོ་ཀུན་གྱི་མཆོག །ལུས་རྣམས་ཀུན་ལ་ལྷག་པར་གནས། །རྣམ་པ་ཀུན་གྱི་མཆོག་དང་ལྡན། །ཀུན་ཁྱབ་ཀུན་མཁྱེན་ཟད་པ་མེད། །ཐོགས་མེད་
སྙིང་སྟོབས་ཞེས་བྱ་བ། །ཐབས་གཅིག་ཏུ་ནི་སྐྱེ་བར་བྱེད། །སྲིད་དང་སྲིད་རྩེ་བརྩེ་བ་མེད། །སྤྲུལ་པའི་སྐུ་ཡི་མཆོག་དང་ནི། །དོན་ཀུན་བྱེད་པ་ལ་མཁས་པ། །དེ་བཞིན་གཤེགས་པའི་དབུགས་འབྱུང་བའོ། །ཧྃ་ནི་དངོས་པོ་དང་
བྲལ་བ། །ལུས་ལ་གནས་ཀྱང་ལུས་བསྐྱེད་མིན། །དབང་པོ་ལས་འདས་མི་གསལ་བ། །རྣམ་པ་ཐམས་ཅད་རྣམ་པར་སྤངས། །དངོས་དང་དངོས་མེད་ལས་གྲོལ་ཞིང་། །གང་ལའང་ལྷག་པར་གང་གནས་པ། །དངོས་པོ་ཐམས་ཅད་
ནུབ་པ་དང་། །ཆོས་ཀྱི་སྐུ་ཡི་ངོ་བོ་ཉིད། །སེམས་ནི་རྡོ་རྗེ་འཆང་དབུགས་ཕྱུང་། །དོན་ཀུན་བྱེད་པ་དང་བྲལ་བ། །སྟོང་པའི་རང་བཞིན་མྱ་ངན་འདས། །ཡེ་ཤེས་སྐུ་ཡི་རང་བཞིན་ཉིད། །རྗོད་དང་བརྗོད་བྱ་རྣམ་པར་གྲོལ། །
དེ་ཡང་ཡི་གེ་ཧྃ་དུ་གྲགས། །ཐམས་ཅད་ཨ་ཧྃ་ཀུན་ལ་ཁྱབ། །ཐམས་ཅད་བདག་ཉིད་རྟག་ཏུ་བཞུགས། །ཨ་ཧྃ་དངོས་པོ་ཐམས་ཅད་ལ། །ཁྱབ་པའི་ས་ནི་ལྷག་པར་གནས། །ཨ་ཧྃ་དང་བྲལ་སྐྱེས་བུ་ནི། །རྩ་བ་བཅད་པའི་
ཤིང་བཞིན་ནོ། །ཧྃ་ནི་དཔྲལ་བའི་སྐྲ་མཚམས་ན། །ཨ་ནི་ལྟེ་བར་ཡང་དག་གནས། །འདིར་ནི་ཨ་ལས་ཟླ་བར་བཤད། །འོད་ཟེར་སྟོང་འགྱེད་པ་ཡི་ཧྃ། །འདིར་ཡང་ཨ་ཡི་མིང་ལ་བརྟེན། །རྟེན་པའི་ཧྃ་དུ་རབ་ཏུ་གྲགས། །
ཨ་ནི་སྲོག་གི་རླུང་དུ་བཤད། །དེ་བཞིན་མཐུར་སེལ་ཧྃ་དུ་བརྗོད། །དེ་གཉིས་གཅིག་གྱུར་འཁོར་བ་སྟེ། །དེས་ན་ཨ་ཧྃ་ཞེས་པར་གྲགས། །རྣམ་རྟོག་བྲལ་བའི་གནས་པ་ནི། །ཨ་ཧྃ་གང་དུ་གནས་པ་མེད། །གཞན་ནི་འགའ་ཞིག་

88-1-225b

འདི་ལ་ཡང་། །དོན་དམ་པར་ནི་དམིགས་སུ་མེད། །དེ་ལྟར་ཨ་ཧྃ་ང་ཡིས་བཤད། །རྒྱུད་རྣམས་ཀུན་དུ་རྙེད་པར་དཀའ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཨ་ཧྃ་གི་སྒྲའི་དོན་བཤད་པའི་
ལེའུ་སྟེ་བཞི་བཅུ་རྩ་བརྒྱད་པའོ།། །། དེ་ནས་བཅོམ་ལྡན་རྡོ་རྗེས་གསུངས། །སྟོང་ཉིད་དབྱེ་བ་བསྡུས་པ་ནི། །རྣལ་འབྱོར་པ་ནི་གང་གིས་ཤེས། །སྟོང་ཉིད་དེ་ནི་ཤེས་པར་འགྱུར། །
མི་མཐུན་པ་དང་གཉེན་པོའི་ཕྱིར། །སྟོང་ཉིད་བསྒོམ་པར་ཡོངས་སུ་གསུངས། །ནང་གི་བདག་ཉིད་ཆོས་རྣམས་ནི། །ཀུན་དུ་རྟོག་པའི་གཉེན་པོ་དང་། །ཕྱིན་ཅི་ལོག་ནི་རྣམ་དག་པ། །ཕྱི་ནས་སྟོང་པ་ཉིད་དུ་འདོད། །ཕྱི་རོལ་
དམིགས་པ་དང་བྲལ་བ། །ནང་གི་བདག་ཉིད་ཆོས་རྣམས་དང་། །ཕྱི་རོལ་དུ་ཡང་མི་རྟོག་པ། །འདིར་ནི་ཕྱི་དང་ནང་གི་ནི། །སྟོང་པ་ཉིད་དུ་ཡང་དག་བཤད། །སྣོད་ཀྱི་འཇིག་རྟེན་དང་བྲལ་བ། །ཆེན་པོ་སྟོང་པ་ཉིད་དུ་བརྗོད། །ཡེ་ཤེས་
གང་གིས་དེ་སྟོང་པར། །མཐོང་བ་དེ་ཡང་སྟོང་པར་བརྗོད། །མེ་ལོང་ཡེ་ཤེས་རྫོགས་པ་ལ། །རྗེས་སུ་དམིགས་པར་བྱེད་ཕྱིར་རོ། །དེ་ཡི་མི་མཐུན་ཕྱོགས་སྟོང་པ། །དངོས་མེད་སྟོང་པ་ཉིད་སྟོང་ཉིད། །དོན་དམ་པར་ནི་བརྫུན་
པའི་དངོས། །ཤེས་པ་དོན་དམ་སྟོང་པ་ཉིད། །འདུས་བྱས་སྦྱིན་པ་ལ་སོགས་ཀྱི། །དགེ་བ་དམིགས་སུ་མེད་པའི་ཕྱིར། །རང་གི་རྣམ་རྟོག་མཚན་ཉིད་སྤྱོད། །འདུས་བྱས་སྟོང་པ་ཉིད་དུ་བཤད། །ཡང་དག་བྱང་ཆུབ་འདུས་མ་བྱས། །
རྒྱུ་མཚན་ཡང་ནི་དམིགས་སུ་མེད། །དངོས་དང་དངོས་མེད་རྣམ་པར་སྤངས། །འདུས་མ་བྱས་པའི་སྟོང་ཉིད་གསུངས། །སེམས་ཅན་དོན་དུ་སྨོན་ལམ་སོགས། །རང་དགའ་སོགས་པ་དམིགས་པ་མེད། །ཤིན་ཏུ་སྟོང་པ་ཉིད་དུ་
བཤད། །ཀུན་རྟོག་ཐམས་ཅད་རྣམ་པར་སྤངས། །མཐའ་ལས་འདས་པའི་སྟོང་ཉིད་གསུངས། །ཐོག་མཐའ་མེད་པའི་འཇིག་རྟེན་གྱི། །འགྲོ་བའི་ཕྱིར་ནི་སྨོན་ལམ་ཉིད། །རློམ་སེམས་མེད་པར་དེ་བརྗོད་དོ། །ཐོག་མཐའ་མེད་པའི་

88-1-226a

སྟོང་པ་ཉིད། །མྱ་ངན་འདས་ལ་དམིགས་པ་མེད། །དགེ་བའི་བདག་ཉིད་མི་སྟོང་བ། །རློམ་སེམས་མེད་པ་ཞེས་བཤད་དོ། །དོར་བ་མེད་པ་སྟོང་པ་ཉིད། །འདོད་ཆགས་ལ་སོགས་དྲི་མ་ནི། །བདག་ནི་རང་
བཞིན་གྱིས་དག་པའི། །དེ་ལྟར་རློམ་སེམས་མེད་གསུངས་པ། །རང་བཞིན་སྟོང་པ་ཉིད་དུ་གསལ། །མཚན་དང་དཔེ་བྱད་ལ་སོགས་པ། །སྐུ་གཟུགས་དེ་ཡི་ཡོན་ཏན་ནི། །གཞན་རྣམས་ལ་ཡང་མི་དམིགས་པ། །རང་གི་
མཚན་ཉིད་སྟོང་པ་ཉིད། །བྱང་ཆུབ་ཕྱོགས་ཀྱི་ཆོས་རྣམས་ཉིད། །སྤྱོད་པ་ལ་ཡང་རློམ་སེམས་མེད། །ཆོས་རྣམས་ཐམས་ཅད་སྟོང་པར་བཤད། །བདག་དང་སྐྱེས་པའི་ཆོས་རྣམས་ནི། །སྒྲོ་བཏགས་དངོས་པོ་མེད་པའི་མཆོག །
འཆིང་བ་ཐམས་ཅད་རྣམ་པར་གཅོད། །དངོས་མེད་སྟོང་པ་ཉིད་དུ་གསུངས། །ཇི་ལྟར་སྔོན་གསུངས་སྟོང་པ་ཉིད། །དེ་ལྟར་དངོས་པོ་མེད་ཤེས་པ། །སླར་ཡང་མི་དམིགས་པ་ཉིད་ནི། །དངོས་པོ་མེད་པ་སྟོང་ཉིད་འདོད། །དེ་ལྟར་
སྟོང་ཉིད་དབྱེ་བ་ཡང་། །བག་ཆགས་རྣམས་ཀྱི་གཉེན་པོའི་ཕྱིར། །རྒྱུ་ཡི་གཉེན་པོ་མི་མཐུན་ཕྱོགས། །བླ་མ་བརྒྱུད་པ་ལས་ཤེས་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྟོང་པ་ཉིད་ཀྱི་
མཚན་ཉིད་ཀྱི་ལེའུ་སྟེ་བཞི་བཅུ་རྩ་དགུ་པའོ།། །། དེ་ནས་བཅོམ་ལྡན་རྡོ་རྗེས་གསུངས། །སྟོང་པ་ཉིད་ནི་སྐྱེ་བའི་རྒྱུ། །རྣམ་པ་མེད་པའི་ཉམས་མྱོང་དངོས། །ལུས་རྣམས་ལ་ནི་ཁྱབ་པ་དང་། །
ཕུང་པོ་ལྔ་ནི་རང་བཞིན་ལུས། །འཁོར་ལོ་དྲུག་ལ་ཁྱབ་པ་དང་། །ཆོས་རྣམས་ཀུན་གྱི་དབུས་གནས་ཕྱིར། །རིང་བ་མ་ཡིན་ཉེ་བ་མིན། །དེ་ནི་ཀུན་རྫོབ་དང་དབྱེར་མེད། །སྟོང་པ་ཉིད་ནི་དོན་དམ་མོ། །རྡོ་རྗེ་ཕྲེང་བ་དེ་ལྟར་བཤད། །སྲོག་གི་
རྟེན་གྱི་མཚན་ཉིད་ནི། །སྐུ་མདོག་སྔོན་པོ་ཞལ་གསུམ་པ། །སྤྱན་གསུམ་པོ་ལ་ཕྱག་དྲུག་མཆོག །རྡོ་རྗེ་འཁོར་ལོ་ནོར་བུ་གཡས། །གཡོན་པ་དྲིལ་བུ་པད་མ་དང་། །རལ་གྲི་ཤིན་དུ་རྣོན་པོ་དང་། །ཕྱར་བ་གོ་རིམས་བཞིན་དུ་བསྣམས། །

88-1-226b

ཨཱ་ལི་ཀཱ་ལི་ལས་བྱུང་བ། །ཟླ་བ་ཉི་མའི་གདན་ལ་བཞུགས། །སྣ་ཚོགས་པད་རྒྱས་གདན་ལ་ནི། །སེམས་དཔའི་དཀྱིལ་མོ་དཀྲུང་གིས་བཞུགས། །ཧཱུྃ་གི་ས་བོན་རྫོགས་པ་དང་། །རྡོ་རྗེ་ཆེན་པོའི་རིགས་ལས་བྱུང་། །
ཀུན་རྟོག་རྣམས་ནི་སྐྱེད་པའི་རླུང་། །རྣམ་པར་གཅོད་ཅིང་ཐིམ་པར་བྱེད། །གནོད་བྱེད་དེ་དག་སེལ་བར་བྱེད། །གཉིས་པ་ཐམས་ཅད་རྣམ་པར་གཅོད། །སྒྱུ་མ་ཆེན་མོ་སྟོང་པ་ཆེ། །སངས་རྒྱས་ས་ནི་རྨད་དུ་བྱུང་། །སངས་རྒྱས་
ཉིད་ཀྱི་འབྲས་སྟེར་བའོ། །འདི་ཡི་སྔགས་ནི་བརྗོད་པར་བྱ། །ཨོཾ་དང་བཛྲ་མཱ་ལེེ་དང་། །དེ་བཞིན་ཨཱཿདང་ཧཱུྃ་དང་གཉིས། །ཕཊ་དང་སྭཱ་ཧཱ་ཡང་དག་ལྡན། །སྔགས་མཆོག་བཏུས་པ་བླ་ན་མེད། །རླུང་འཕྲོག་དེ་ཁོ་ན་ཉིད་ཀྱིས། །ཡིད་ཀྱི་རྣམ་
རྟོག་སེལ་བར་བྱེད། །ཞི་བའི་གནས་དང་ཆུ་འགྲམ་དང་། །ཤིང་གཅིག་ལམ་གྱི་བཞི་མདོ་དང་། །ཡང་ན་སུམ་མདོར་འབུམ་ཕྲག་བཅུ། །གསལ་བར་ཡང་ནི་བཟླས་པར་བྱ། །དེ་ནི་དངོས་གྲུབ་མཆོག་ཏུ་འགྲོ། །རྫོགས་པའི་རིམ་པའི་
རྣལ་འབྱོར་གྱིས། །དེ་ཡི་ཡོན་ཏན་གསལ་བར་འབྱུང་། །ཞི་བ་ལ་སོགས་འབད་མི་དགོས། །སྐད་ཅིག་གཅིག་ལ་མངོན་པར་རྟོགས། །དེ་ནི་དེ་ཉིད་རིགས་མཆོག་ཤེས། །དཔའ་བོ་གཅིག་པུའི་ཆོ་ག་འདི། །དཔའ་མོ་གཅིག་
པུ་ཉིད་བསྒྲུབ་པ། །དེ་ཡི་མཚན་ཉིད་སྒོམ་པ་གང་། །རྣམ་རྟོག་སྤངས་པའི་རྣལ་འབྱོར་པ། །ཤིན་དུ་རྣམ་དག་མཁའ་ཡི་དངོས། །རང་གི་དངོས་གྲུབ་མཆོག་ཏུ་འགྲོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་
རྟོགས་པ་ལས་སྟོང་པ་ཉིད་ཀྱི་རྡོ་རྗེའི་ཕྲེང་བ་སྐྱེད་པའི་མཚན་ཉིད་ཀྱི་ལེའུ་སྟེ་ལྔ་བཅུ་པའོ།། །། དེ་ནས་བཅོམ་ལྡན་རྡོ་རྗེས་གསུངས། །མཚན་མོ་ཉིན་མོའི་མཚན་ཉིད་ནི། །མཚན་
མོ་ཤེས་རབ་ཤེས་པར་བྱ། །འབྱུང་པོ་ཐམས་ཅད་ཐིམ་ནས་འགྲོ། །མཚན་མོའི་ཆ་ནི་ཟླ་བར་འགྱུར། །ཟླ་བ་མྱ་ངན་འདས་མཚན་ཉིད། །ཀུན་རྫོབ་དང་ནི་དོན་དམ་གྱི། །ཤེས་རབ་རྣམ་པ་གཉིས་ཞེས་བྱ། །ཀུན་རྫོབ་ཤེས་

88-1-227a

བྱར་ཤེས་པར་བྱ། །དོན་དམ་རེག་བྱ་རྣམ་པར་སྤངས། །རེག་བྱ་དང་བྲལ་བདེ་བ་གང་། །བདེ་བ་མཆོག་དེ་ཐོབ་པར་དཀའ། །ཉིན་མོ་སླར་ཡང་ཐབས་སུ་བཤད། །ཐབས་ནི་ཉིན་མོར་གྱུར་པ་དང་། །གང་ཚེ་
དངོས་ལས་སྐྱེས་ཉི་མ། །རྟག་ཏུ་བྷ་གའི་བདག་པོར་འགྱུར། །འཁོར་བའི་རྣམ་པ་ཉི་མར་འགྱུར། །ཉི་མ་ལས་ནི་ཟླ་བ་སྐྱེ། །དེ་ལས་གཉིས་མེད་ངོ་བོར་བཤད། །འབར་བའི་ཕྱིར་ནི་ཉི་མར་འགྱུར། །རྣམ་པར་དཔྱད་པའི་དོན་དམ་
དང་། །ཆགས་བྲལ་མཆོག་ཏུ་ཕྲ་བ་དང་། །མི་སྣང་བ་དང་སྟོང་པའི་ལུས། །འོད་གསལ་བ་ཡི་གོ་འཕང་ཞི། །གང་དུ་ཡང་དག་མི་གནས་སོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་མཚན་
མོ་ཉིན་མོ་རྒྱས་པར་བཤད་པའི་ལེའུ་སྟེ་ལྔ་བཅུ་གཅིག་པའོ།། །།  དེ་ནས་བཅོམ་ལྡན་རྡོ་རྗེས་གསུངས། །ཨཱ་ལི་ཀཱ་ལིའི་དམ་ཚིག་ནི། །རྒྱུད་རྣམས་གཞན་དུ་མ་གསུངས་པའི། །རྒྱལ་སྲས་
རྣམས་ལ་དགོངས་པ་ཡི། །འོད་གསལ་གོ་འཕང་ལས་སྐྱེས་པའི། །སྣང་བ་མཆེད་པའི་མཚན་ཉིད་ནི། །གསལ་བྱེད་སུམ་བཅུ་རྩ་གསུམ་ལྡན། །ཀཱ་ལིའི་དཀྱིལ་འཁོར་རྒྱས་པའོ། །སྣང་བ་མཆེད་པའི་གོ་འཕང་ནི། །སྣང་བ་ལས་བྱུང་
ཟད་པ་མེད། །དབྱངས་ནི་བཅུ་དྲུག་དང་ལྡན་པ། །ཨཱ་ལིའི་དཀྱིལ་འཁོར་རྒྱས་པའོ། །དེ་གཉིས་གསང་བའི་སྦྱོར་བ་ལས། །དབུས་སུ་སྐྱེས་པའི་བདེ་བ་ཆེ། །ཨཱ་ལི་ཀཱ་ལིའི་དམ་ཚིག་ཅེས། །དགོངས་པའི་ཚིག་གིས་བྱེ་བྲག་
བྱས། །ཤིན་ཏུ་ཕྲ་བའི་ཡེ་ཤེས་མཆོག །བླ་མ་བརྒྱུད་ལས་ཤེས་པར་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཨཱ་ལི་ཀཱ་ལི་རྒྱས་པར་བཤད་པའི་ལེའུ་སྟེ་ལྔ་བཅུ་གཉིས་པའོ།། །། 
དེ་ནས་གཞན་ཡང་བཤད་ཀྱིས་ཉོན། །མཚམས་ཀྱི་མཚན་ཉིད་བླ་ན་མེད། །སྣང་དང་མི་སྣང་བྲལ་བའི་མཚམས། །ཤེས་རབ་རྡོ་རྗེ་ལས་བྱུང་བ། །གཉིས་མེད་འདྲེས་པའི་དབུས་ན་གནས། །འབགས་ཤིང་གོས་པ་རྣམ་པར་

88-1-227b

སྤངས། །རྡོ་རྗེ་པད་མ་འཆི་མེད་སྐྱེས། །ཟླ་བ་ཉི་མ་ཡང་དག་འདྲེས། །མཐར་ནི་ཡང་དག་མི་འགྲོ་གང་། །མཚམས་མེད་འཁོར་བ་དག་པར་བྱེད། །རང་གི་ངོ་བོ་རྣམ་པ་མཆོག །ཕྲ་བའི་མཚན་ཉིད་བསམ་མི་ཁྱབ། །སེམས་ཅན་ཀུན་གྱི་
མཚམས་ཀྱི་ནི། །རྡོ་རྗེ་འཆང་གི་བཙུན་མོ་དང་། །འཆར་བ་མཆོག་ཏུ་དག་པར་བཤད། །དགའ་བྲལ་ལ་སོགས་རྣམ་པར་སྤངས། །མདུད་པའི་རྩེར་གནས་མཆོག་ཏུ་ཞི། །ཙ་ན་ཀ་ཡི་ཚིག་གུ་ཙམ། །མཚན་མོ་བདག་པོ་དེ་ཤར་བ། །གང་ཕྱིར་
སྟེང་གི་གོ་འཕང་གནས། །ལ་ལ་ཐིག་ལེའི་རང་ངོ་བོར། །རྣམ་པ་བཞི་ཡིས་ཡང་དག་གནས། །ལ་ལར་ཐོག་མ་ལ་སོགས་སྤངས། །ལ་ལར་དེ་ཡང་དམིགས་སུ་མེད། །གང་ཕྱིར་རང་གི་བདག་ཉིད་ཅན། །དེ་ཕྱིར་བརྗོད་དུ་མེད་པའོ། །
རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་མཚམས་ཀྱི་འཆར་བའི་མཚན་ཉིད་ཀྱི་ལེའུ་སྟེ་ལྔ་བཅུ་རྩ་གསུམ་པའོ།། །།  དེ་ནས་བཅོམ་ལྡན་རྡོ་རྗེས་གསུངས། །
རྣམ་པ་ཉི་ཤུའི་མིང་ཙམ་ནི། །སློབ་དཔོན་ལས་སུ་ཡོངས་སུ་བཤད། །སྔགས་ཀྱི་རྣལ་འབྱོར་ལེགས་རྒྱས་པ། །སྔོན་དུ་བསྙེན་པ་ས་སྦྱང་དང་། །འབྱུང་པོ་བསྐྲད་པ་ཉིད་དང་ནི། །ས་གཟུང་ཉིད་དང་ཐིག་སྐུད་ནི། །སྦྱང་དང་ལྷག་པར་
གནས་པ་དང་། །བགེགས་བསྐྲད་དེ་བཞིན་དཀྱིལ་འཁོར་གྱི། །ཐིག་ནི་རབ་ཏུ་གསལ་བ་དང་། །ཕུར་བུས་ཡང་དག་གདབ་པ་དང་། །བུམ་པ་བྱིན་གྱིས་བརླབ་པ་དང་། །བཅོམ་ལྡན་འདས་ཀྱི་ལྷག་གནས་དང་། །ཁྲུས་དང་རབ་ཏུ་སྦྱང་བ་དང་། །
མཆོད་པ་རབ་གནས་གཏོར་མ་དང་། །སློབ་མ་ལྷག་པར་གནས་པ་དང་། །མེ་ལ་སྦྱིན་སྲེག་ཆོ་ག་བཞིན། །དབང་བསྐུར་བ་དང་གཤེགས་སུ་གསོལ། །དེ་ལྟར་ཆོ་ག་ཉི་ཤུའི་ལས། །གང་གིས་དེ་ཤེས་འགྲོ་བའི་བླ། །དགེ་
སློང་རྡོ་རྗེ་འཛིན་པས་བྱ། །བདུད་ལས་སྡིགས་འཛུབ་དེ་ནི་མཆོག །ཡི་གེ་གསུམ་ཟློས་པ་ལ་ཞེན། །རྡོ་རྗེ་ཐེག་པ་ལྷག་པར་གྲོལ། །ཞི་བ་ལ་སོགས་ལས་གང་གིས། །རྟག་ཏུ་ལག་པའི་མཐིལ་ལ་གནས། །དེ་ཡི་ཡང་དག་ཆོ་ག་

88-1-228a

ཡིས། །ཆོ་ག་མཆོག་ནི་བྱ་བ་ཡིན། །རྣལ་འབྱོར་རྗེས་སུ་རྣལ་འབྱོར་སོགས། །ཆོ་ག་ལ་སོགས་བརྩམ་པར་བྱ། །བགེགས་མཐར་བྱེད་པའི་སྙིང་པོའི་སྔགས། །ཡི་གེ་ཉི་ཤུ་རྩ་བཞི་མཆོག །སྟོང་ཕྲག་བཅུ་ནི་
ཡོངས་སུ་བཟླ། །ཐོག་མར་མཁས་པ་ཇི་བཞིན་དུ། །བགེགས་རྣམས་ཐམས་ཅད་བསལ་བའི་ཕྱིར། །སྔོན་དུ་བསྙེན་པ་ཞེས་ནི་བཤད། །དེ་འོག་ཡི་གེ་གསུམ་ཁྲིར་ནི། །བསམ་པ་ཀུན་གྱིས་བཟླས་བྱས་ན། །ཡིད་ལ་འདོད་པའི་དངོས་གྲུབ་
སྟེར། །སློབ་མ་རྣམས་ཀྱི་དངོས་གྲུབ་རྒྱུར། །སྐྱེ་བོས་དབེན་པའི་ཕྱག་དར་བྱས། །ས་གཟུང་ཆུ་ནི་ཉེ་བར་བཅས། །གྲོང་དང་ཧ་ཅང་མི་ཉེ་ཞིང་། །རིང་པོར་ཡང་ནི་བརྩམ་མི་བྱ། །ཤིན་དུ་འཇམ་ཞིང་སྲོག་ཆགས་མེད། །རྒྱལ་པོའི་ཕོ་
བྲང་ཤིན་དུ་རིང་། །ཁང་ཁྱིམ་ཚོང་དུས་ལས་རྒྱང་རིང་། །ཡང་ན་བདེ་གཤེགས་རྟེན་ལ་ནི། །ཐོག་མར་སོར་མོ་རྣམས་ལ་ནི། །བདེ་བར་གཤེགས་པའི་སྔགས་དགོད་བྱ། །ཁྲུ་གང་སོར་ནི་བཞི་པ་ཡིས། །སེང་ལྡེང་ཕུར་པ་བྱས་ནས་ནི། །ཡི་
གེ་གསུམ་སྔགས་ཆུ་ཡིས་བཀྲུ། །ཡི་གེ་བརྒྱ་པ་ལན་བདུན་དང་། །ཡི་གེ་གསུམ་གྱི་སྔགས་ཀྱིས་བརྐོ། །ས་ནི་ཆུ་ཡི་མཐར་ཐུག་པ། །ཡང་ན་ཁྲུ་ནི་ཕྱེད་དང་གསུམ། །ཡང་ན་སེམས་ཀྱིས་སྦྱང་བར་བྱ། །དེ་ལ་གནས་པའི་འབྱུང་པོ་ནི། །
ཡང་དག་འགྲོར་ནི་འཇུག་པར་བྱ། །ཨོཾ་མ་ཧཱ་ཀྲོ་དྷ་ཛྭ་ལཱརྐ། །ཧཱུྃ་ཕཊ་མཐའ་དང་ཡང་དག་ལྡན། །དེ་ལྟར་ལག་མཐིལ་སྔགས་བཀོད་ལ། །འབྱུང་པོ་རྣམས་ནི་བསྐྲད་པར་བྱ། །ས་ལ་ཐལ་མོ་ལན་གསུམ་དུ། །བརྡབ་པ་བྱས་ནས་སྔགས་
བཟླས་ཏེ། །ཨུ་གཙྪ་ད་ལན་གཉིས་བརྗོད། །སརྦ་བུད་དྷ་གྲ་ཧ་ཨུད་གཙྪ། །ཡི་གེ་གསུམ་ནི་མཐའ་རུ་བརྗོད། །བཛྲ་སཏྭ་བེ་ཤད་དེ། །ལས་ནི་ཐམས་ཅད་པར་གསུངས་པའི། །གཏོར་མ་བྱིན་ནས་འགྲོ་རུ་གཞུག །ས་ནི་ཡོངས་སུ་བཟུང་རྗེས་ལ། །
རྡོ་རྗེ་སློབ་དཔོན་གྱིས་བརྩམ་བྱ། །ཚྭ་སྒོ་མེད་ཅིང་དྲི་མ་བསལ། །མཉམ་ཞིང་ཟུག་རྔུ་མེད་པ་དང་། །མེ་ལོང་ལྟ་བུར་འཇམ་པ་དང་། །མཉམ་པ་ཡང་ནི་མཁས་པས་བྱ། །བ་ཡི་ལྕི་བ་ལ་སོགས་པ། །རྣམ་པ་ལྔ་ཡིས་བྱུག་པར་བྱ། །བྱུགས་

88-1-228b

ནས་དེ་རྗེས་ཁྲུས་བྱས་ལ། །སློབ་དཔོན་ཁྲོ་བོའི་སྐུ་དང་ནི། །དཀྱིལ་འཁོར་འཇམ་པའི་རྡོ་རྗེ་ཡི། །མཆོག་ཏུ་མི་གཡོ་གཟུགས་ཀྱིས་ནི། །འཇམ་པ་དང་ནི་སུམ་སྒྲིལ་གྱིས། །རས་སམ་ཡང་ན་གསོ་མ་ཡིས། །ཡི་གེ་གསུམ་
གྱིས་རྣམ་པར་སྦྱང་། །ཐིག་སྐུད་ཀྱིས་ནི་ཀུན་ནས་མཉམ། །གྲུ་བཞི་པར་ནི་བྱས་ནས་ཀྱང་། །རྡོ་རྗེ་ཅན་གྱིས་ཁྲུ་གསུམ་གསུམ། །གྲུ་བཞི་པར་ནི་གཟུང་བར་བྱ། །དེ་ཡི་དབུས་སུ་ལྟེ་བའི་ཆ། །སྒྲིབ་པའི་སྐྱོན་ནི་སྤང་བར་བྱ། །སྐུ་གདུང་
དང་ནི་རིན་ཆེན་གཞུག །ལེགས་པར་བསངས་ནས་བྱིན་གྱིས་བརླབ། །ཡི་གེ་གསུམ་ཡང་སྭཱ་ཧཱའི་མཐའ། །ཕཊ་ཀྱི་དབུས་སུ་ཡང་དག་སྦྱར། །སྔགས་འདི་ཡང་ནི་བཟླས་པར་བྱ། །བརྒྱ་དང་བརྒྱད་ཀྱིས་ལྷག་པར་གསལ། །
ཚངས་པའི་ཐིག་ནི་བཏབ་ནས་ནི། །ཡི་གེ་བརྒྱ་པ་བཟླ་བར་བྱ། །དེ་རྗེས་དེ་ལ་མེ་ཏོག་ཆར། །སྔགས་ནི་བརྗོད་ནས་གཏོར་བར་བྱ། །ཨོཾ་དང་ཨ་མོ་གྷཱ་པད་མོ། །དེ་བཞིན་དུ་ནི་ཕྱི་ནས་སུ། །བྷ་སུ་དྷ་རི་དྷ་ར་གཉིས། །དྷ་ར་ཎི་མཎ་ཌ་
ལི་ཧཱུྃ། །ཡི་གེ་བརྒྱ་པའི་སྔགས་དང་ནི། །ལན་གསུམ་བར་དུ་ཐིག་སྐུད་ལ། །ཞབས་བསིལ་ཆུ་ཡིས་བསང་བར་བྱ། །ཡི་གེ་གསུམ་གྱིས་ཐིག་གདབ་བྱ། །ཟུར་བཞི་པ་ལ་སྒོ་བཞི་པ། །རྡོ་རྗེ་ཅན་གྱིས་མཚམས་བཞི་པ། །
ཐོག་མར་ཤར་དང་བྱང་དང་ནི། །ཇི་སྲིད་ལྷོ་དང་ནུབ་དག་དང་། །མཚམས་སུ་ཡང་དག་ཐིག་སྐུད་དང་། །སླར་ཡང་ཡང་དག་གདབ་པར་བྱ། །ཤར་དང་ལྷོ་ཡི་མཚམས་དང་ནི། །ནུབ་དང་བྱང་གི་མཚམས་སུ་ནི། །ཐིག་སྐུད་ཀྱིས་ནི་ཚད་
གཞལ་བྱ། །ཟུར་བཞི་དང་ནི་ཐིག་སྐུད་བྱ། །སྐོར་ཐིག་གསུམ་ནི་སྒོ་བཞི་པ། །རྡོ་རྗེ་ཕྲེང་བ་གསུམ་གྱིས་མཛེས། །ཚངས་པའི་ཐིག་གཉིས་བཏབ་ནས་ནི། །དེ་ལས་དབང་པོའི་ཕོ་བྲང་ནི། །རྣམ་པ་ཀུན་གྱིས་ཡང་དག་ཐིག །རྒྱལ་
བ་ཀུན་གྱི་བཞུགས་གནས་གསལ། །དེ་ལ་རིག་པ་འཛིན་པ་བྲི། །སླར་ཡང་རིན་ཆེན་ཕྱེ་མ་འམ། །ཚོན་སྣ་ལྔ་རྣམས་མེ་ཏོག་དང་། །རྫས་སམ་ལས་ཀྱི་སྦྱོར་བ་ལས། །རིམ་པ་ཇི་ལྟ་བ་བཞིན་དུ། །མཚན་མའི་ཕྱག་རྒྱ་ལ་སོགས་བྲི། །

88-1-229a

མི་བསྐྱོད་སྐུ་མདོག་ཕྱག་རྒྱ་སོགས། །རིགས་ནི་དབུས་སུ་དགོད་པར་བྱ། །རྒྱལ་བ་རྒྱལ་དང་རིན་ཆེན་འཆང་། །འཁོར་བ་འདས་དང་ཤེས་རབ་འཆང་། །རིམ་བཞིན་སྐུ་མདོག་དབྱེ་བ་ཡིས། །
ཤར་ལ་སོགས་པའི་ཕྱོགས་སུ་དགོད། །གཏི་མུག་ཞེ་སྡང་ཆགས་པ་དང་། །རྡོ་རྗེ་དགའ་སོགས་རིམ་པ་བཞིན། །མེ་ལ་སོགས་པའི་མཚམས་རྣམས་སུ། །ཇི་ལྟ་བ་བཞིན་དགོད་པར་བྱ། །སྣ་ཚོགས་པད་མ་ཟླ་བ་ཡི། །གདན་
བདུན་གཞན་གྱི་ཉི་མ་གཉིས། །འཁོར་དགའ་ཞེ་སྡང་དགའ་བར་བཅས། །ཀ་ཡི་ཕྲེང་གིས་རྣམ་པར་བརྒྱན། །ཞལ་གསུམ་ཕྱག་དྲུག་རྣམ་པ་ཅན། །གཡོན་ན་ཤེས་རབ་རལ་གྲི་བསྣམས། །གཟུགས་དང་དབྱིབས་རྣམས་
ཇི་བཞིན་དུ། །དབུས་ཀྱི་དཀྱིལ་འཁོར་མཆོད་པར་བྱ། །ཕྱི་རོལ་གཟུགས་ཀྱི་རྡོ་རྗེ་སོགས། །མཚམས་ཀྱི་ཆར་ནི་རྣམ་པར་དགོད། །ཤར་ལ་སོགས་པའི་སྣམ་བུ་ལ། །བྱམས་པ་ས་ཡི་སྙིང་པོ་ཤར། །འཇམ་དཔལ་ཕྱག་ན་རྡོ་རྗེ་
ལྷོར། །མཁའ་སྙིང་འཇིག་རྟེན་དབང་ཕྱུག་ནི། །ཀུན་ནས་ནུབ་ཏུ་བསྒོམ་པར་བྱ། །སྒྲིབ་པ་རྣམ་པར་སེལ་བ་དང་། །ཀུན་དུ་བཟང་པོ་བྱང་དུ་དགོད། །ཞལ་གསུམ་ཕྱག་དྲུག་རྣམ་པ་ཅན། །གཡོན་ན་རལ་གྲི་དགོད་པ་དང་། །ཕྱག་ན་
རྡོ་རྗེ་དྲི་མེད་པའི། །ཉི་མའི་དཀྱིལ་འཁོར་གྱི་ནི་གདན། །ལྷ་མོ་རྣམས་ལ་ཟླ་བའི་གདན། །སྣ་ཚོགས་པད་མའི་སྟེང་ན་གསལ། །རྣམ་པར་སྣང་མཛད་རིགས་ལས་བྱུང་། །མཚན་མའི་ཕྱག་རྒྱ་ལ་སོགས་དགོད། །ཤར་ལ་སོགས་པའི་སྒོ་
རྣམས་སུ། །གཤིན་རྗེ་གཤེད་ལ་སོགས་པ་དགོད། །ཞལ་གསུམ་ཕྱག་དྲུག་རྣམ་པ་ཅན། །དེ་བཞིན་རལ་གྲི་གཡོན་ན་འཛིན། །མི་གཡོ་ལ་སོགས་མཚམས་རྣམས་སུ། །གཤིན་རྗེ་གཤེད་ཀྱི་རང་ངོ་བོ། །ཞལ་གསུམ་ཕྱག་དྲུག་
རྣམ་པ་ཅན། །གཡོན་ན་རལ་གྲི་རྣམ་པར་བསམ། །གང་ཕྱིར་ཤེས་རབ་རང་བཞིན་གཡོན། །དེ་བཞིན་གཡོན་ནས་རལ་གྲི་བརྗོད། །གནོད་མཛེས་དེ་བཞིན་གཙུག་ཏོར་ནི། །འོག་དང་སྟེང་དུ་རྣམ་པར་དགོད། །ཁྲོ་བོ་རྣམས་ནི་ཉི་མར་བཞུགས། །

88-1-229b

དེ་བཞིན་སྣ་ཚོགས་པད་མའི་གདན། །དེ་བཞིན་ཕྱག་རྒྱ་དབྱུག་ལ་སོགས། །ཉེ་བར་མཚོན་ནས་དགོད་པར་བྱ། །དེ་བཞིན་གཤེགས་པ་རྣམ་དག་པའི། །རི་མོ་ལྔ་ནི་རྣམ་པར་དགོད། །དེ་ལ་རྡོ་རྗེ་འབར་བའི་ཕྲེང་། །ར་བ་ཡིས་ནི་ཡོངས་སུ་བསྐོར། །རིན་ཆེན་དྲ་བ་རྔ་མ་དང་། །
ལྷ་མོ་རྣམས་ཀྱི་སྣམ་བུ་ཡིས། །ཀ་བ་རྟ་བབས་འཁོར་ལོར་མཚན། །རི་དགས་རྣམས་ཀྱི་མཚན་པས་བརྒྱན། །གདུགས་དང་རྒྱལ་མཚན་བ་དན་སོགས། །རྔ་ཡབ་མེ་ལོང་ལ་སོགས་ཀྱིས། །བརྒྱན་པ་རུ་ནི་རྣམ་པར་བཤད། །
སངས་རྒྱས་རྣམས་ཀྱིས་ཡང་དག་བརྟེན། །སློབ་དཔོན་མཆོག་གི་དཀྱིལ་འཁོར་ནི། །རང་གི་ལུས་ཀྱི་གཟུགས་བརྙན་ནོ། །རྡོ་རྗེ་སློབ་དཔོན་གྱིས་བྱ་བ། །བགེགས་བསྐྲད་པ་ནི་སྔོན་སོང་བས། །སུྃ་བྷའི་སྒྲ་དང་ནི་སུྃ་བྷ། །ཐོག་མར་ཨོཾ་
དང་ངོ་མཚར་ཆེ། །ཧཱུྃ་གཉིས་ཕཊ་ཀྱི་མཐའ་དང་ལྡན། །ཤར་གྱི་སྒོ་རུ་དགོད་པར་བྱ། །ཨོཾ་དང་གྲྀཧྞ་གྲྀཧྞ་ཞེས། །ཧཱུྃ་གཉིས་ཕཊ་དང་ཡང་དག་ལྡན། །བློ་དང་ལྡན་པས་ལྷོ་རུ་དགོད། །ཨོཾ་དང་གྲྀཧྞཱ་པ་ཡ་གཉིས། །ཧཱུྃ་གཉིས་ཕཊ་ཀྱི་མཐའ་
དང་ལྡན། །ནུབ་དུ་ཡང་དག་སྤྲོ་བར་བྱ། །ཨོཾ་ཨཱ་ན་ཡ་ཧོ་བྷ་ག །བཱན་དང་བིདྱཱ་རཱ་ཛཱ་དང་། །ཧཱུྃ་གཉིས་དང་ནི་ཕཊ་མཐར་དགོད། །དེ་རྗེས་ཡང་ནི་བྱང་དུ་དགོད། །འདི་ཡིས་གདུག་པ་བཀུག་ནས་ནི། །དེ་ནས་སྔགས་པས་ཕུར་པ་གདབ། །སེང་
ལྡེང་ལས་ནི་བྱས་པ་ཡི། །ཕུར་བུ་སོར་ནི་བཅུ་གཉིས་ཚད། །ཟུར་གསུམ་ཡི་གེ་གསུམ་གྱིས་མཚན། །ཡི་གེ་བརྒྱ་པ་སོ་སོར་བཟླས། །སྔགས་ཀྱི་ཆུ་ཡིས་བསངས་ནས་ནི། །ཕྱོགས་དང་མཚམས་སུ་དགོད་པར་བྱ། །ཨོཾ་དང་ཡི་གེ་གྷ་ལན་
གཉིས། །དེ་བཞིན་གྷཱ་ཏ་ཡ་ན་གཉིས། །སརྦ་དུ་ཥྚ་ཕཊ་ཞེས་དང་། །དེ་བཞིན་ཀཱི་ལ་ཡ་གཉིས་དང་། །སརྦ་པཱ་པྃ་ཕཊ་དང་ནི། །ཧཱུྃ་གསུམ་བཛྲ་ཀཱི་ལ་ཡ། །བཛྲ་དྷ་ར་ཨཱ་ཛྙཱ་པ་ཡ་ཏི། །ཀཱ་ཡ་བཱཀ་ཙིཏྟ་བཛྲ་དང་། །ཀཱི་ལ་ཡ་ཧཱུྃ་ཕཊ་ཡི་གེའི། །
མཐའ་ཅན་གྱི་ནི་ཕུར་བུས་གདབ། །ཨོཾ་དང་བཛྲ་མུད་ག་ར། །བཛྲ་ཀཱི་ལ་ཡ་ཨཱ་ཀོ་ཊ། །ཡ་དང་ཧཱུྃ་གཉིས་ཕཊ་མཐའ་དང་། །སྔགས་དང་ཕུར་བུས་བརྡུང་བ་བརྗོད། །དེ་རྗེས་བགེགས་ནི་འཇུག་ལ་སོགས། །བསྐྲད་དོན་རྡོ་རྗེ་ར་བ་དང་། །

88-1-230a

སྟེང་དུ་མདའ་ཡི་དྲ་བ་དང་། །འོག་ཏུ་སྣ་ཚོགས་རྡོ་རྗེ་དང་། །གཙུག་ཏོར་གནོད་མཛེས་སྔགས་ཀྱིས་ནི། །བྱིན་གྱིས་བརླབ་པའི་ཆོ་ག་ཡིས། །བུམ་པ་བཅུ་འམ་ཡང་ན་དྲུག །རིན་ཆེན་ལས་བྱས་རྣམ་དག་པ། །
སྨན་ལྔ་དང་ནི་འབྲས་བུ་ལྔ། །འབྲུ་ལྔ་ལ་སོགས་ཀྱིས་གང་བ། །རིན་ཆེན་ལྔ་དང་སྣ་མ་སོགས། །ལོ་མ་ལྔ་ཡིས་རྣམ་པར་བརྒྱན། །གུར་གུམ་གླ་རྩི་ག་པུར་དང་། །ཙན་དན་ཆུ་ཡིས་གང་བར་བྱ། །མེ་ཏོག་ལ་སོགས་ཀྱིས་མཆོད་
བྱ། །རང་རང་སྔགས་ཀྱིས་བྱིན་གྱིས་བརླབ། །བཛྲ་དྷྲྀཀ་དང་ཛི་ན་ཛིག །རད་ན་དྷྲྀག་དང་ཨཱ་རོ་ལིག ། དེ་བཞིན་པྲཛྙཱ་དྷྲྀཀ་སྔགས་དང་། །ལྕགས་ཀྱུའི་རྣམ་པའི་འོད་ཟེར་གྱིས། །འོག་མིན་འཇིག་རྟེན་ཁམས་ནས་ནི། །བུྂ་པ་རང་
གིས་བསྐུར་བྱས་པ། །དེ་ནས་སྤྱན་དྲངས་ནས་ནི་གཞུག །དེ་ནས་ལྷ་མོའི་གཟུགས་སྤྲོས་ནས། །དེ་རྗེས་གཞན་ལ་དགོད་པར་བྱ། །ཨོཾ་དང་རུ་རུ་སྤུ་རུ་དང་། །དེ་ནས་ཛྭ་ལ་ཏིཥྠ་གསལ། །དེ་བཞིན་སིད་དྷ་ལོ་ཙ་ནེ། །སརྦ་ཨར་
ཐ་སཱ་དྷ་ནེ། །སྭཱ་ཧཱ་ཞེས་ནི་དེ་ལ་བཟླས། །སྤྱན་གྱི་རྣམ་པ་རྫོགས་ནས་ནི། །བུམ་པའི་དབུས་སུ་མཆོད་པར་བྱ། །ཨོཾ་དང་ཤྃ་ཀ་རེ་དང་ཡ། །དེ་ལས་ཤཱན་ཏིང་ཀུ་རུ་དང་། །དེ་བཞིན་གྷུཊྚི་གྷུཊྚེ་དང་། །གྷུཊྚི་ནེ་དང་གྷུཊྚི་ནེ། །གྷ་ཏ་ཡ་ནི་
ལན་གཉིས་བརྗོད། །སྭཱ་ཧཱའི་མཐའ་ཅན་སྔགས་བརྗོད་བྱ། །མཱ་མ་ཀཱི་ཡི་རྣམ་པ་རྫོགས། །བུམ་པའི་དབུས་སུ་མཆོད་པར་བྱ། །ཨོཾ་དང་ཀ་ཊེ་བི་ཀ་ཊེ། །ནི་ཀ་ཊེ་ཀ་ཊྃ་ཀ་ཊེ། །ཀ་རོ་ཊ་བཱིརྱེ་སྭཱ་ཧཱ། །གོས་དཀར་རྣམ་པར་
རྫོགས་ནས་ནི། །བུྃ་པའི་དབུས་སུ་མཆོད་པར་བྱ། ཨོཾ་དང་ཏཱ་རེ་ཏུད་ཏཱ་རེ། །ཏུ་རེ་སྭཱ་ཧཱ་དགོད་པར་བྱ། །སྒྲོལ་མའི་རྣམ་པ་རྫོགས་ནས་ནི། །བུྃ་པའི་དབུས་སུ་མཆོད་པར་བྱ། །གཤིན་རྗེ་གཤེད་སོགས་གཞན་རྣམས་
ལ། །གཅིག་ལ་ལས་ནི་ཐམས་ཅད་པ། །ཨོཾ་ན་མཿས་མན་ཏ་ཀཱ་ཡ་བཱ་ཀ་ཙིཏྟ་བཛྲཱ་ཎཱྃ། ན་མོ་བཛྲ་ཀྲོ་དྷཱ་ཡ། མ་ཧཱ་དྃཥྚོ་ཏ་ཀ་ཊ་བྷཻ་ར་བཱ་ཡ། ཨ་སི་མུ་ས་ལ། །བ་ར་ཤུ་པཱ་ཤ་ཧསྟཱ་ཡ། ཨོཾ་ཨ་མྲྀ་ཏ་ཀུཎ་ཌ་ལི། ཁ་ཁ་

88-1-230b

ཁཱ་ཧི་ཁཱ་ཧི། ཏིཥྛ་ཏིཥྛ། བན་དྷ་བན་དྷ། ཧ་ན་ཧ་ན། ད་ཧ་ད་ཧ། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣ་བི་ནཱ་ཡ་ཀཱན། མ་ཧཱ་ག་ཎ་པ་ཏི། ཛི་བི་ཏ་ཨན་ཏ་ཀ་རཱ་ཡ་ཧཱུྃ་ཕཊ་སྭཱ་ཧཱ། སྔགས་འདི་ལན་བདུན་བར་དུ་ནི། །ལས་
ནི་ཐམས་ཅད་པ་ཡིན་ཏེ། །སྙིང་པོའི་སྔགས་ནི་བཟླས་བྱས་ལ། །རིགས་ཀྱི་དབང་ཕྱུག་མཆོད་པར་བྱ། །ཡི་གེ་བརྒྱ་པའི་སྔགས་ཀྱིས་ནི། །ལན་བདུན་བར་དུ་བསྒོམ་པར་བྱ། །བརྒྱ་དང་རྩ་བརྒྱད་རིམ་པ་ཡིས། །ཡི་གེ་གསུམ་
ཡང་བཟླས་པ་ནི། །དེ་ནས་རང་ལྷའི་རྣལ་འབྱོར་གྱིས། །མཆོད་ཡོན་སྣོད་དུ་མཆོད་པར་བྱ། །དེ་ནས་དུ་གུ་ལ་རས་ནི། །ག་པུར་ཨ་ག་རུས་བདུགས་པ། །བཀབ་ནས་རང་རང་སྔགས་དང་ནི། །དེ་ལ་རིམ་བཞིན་ལྷག་གནས་
བྱ། །ཞལ་གསུམ་ཕྱག་དྲུག་རྣམ་པ་ཅན། །སྤྲིན་བྲལ་ནམ་མཁའ་ལྟ་བུའོ། །དེ་ལྟ་བུ་ཡི་སྐུ་མདོག་ཕྱག །རང་སྣང་བ་ཡི་སྐུ་ལ་འཁྱུད། །ཨཱ་ལི་ཀཱ་ལི་ལས་བྱུང་བ། །སྣ་ཚོགས་པད་མའི་གདན་ལ་བཞུགས། །
གཞལ་ཡས་ཁང་དབུས་ཉམས་དགའ་བའི། །འོག་མིན་ཞིང་ཁམས་ན་བཞུགས་པའི། །དཀྱིལ་འཁོར་འཁོར་དང་བཅས་པར་ནི། །སངས་རྒྱས་ལྔ་ཡི་ཅོད་པན་ཅན། །བསྒོམས་ནས་དེ་ལས་འོད་ཟེར་སྤྲོ། །ཁ་
དོག་ལྔ་དང་ལྕགས་ཀྱུ་ཡི། །དེ་ཡི་སྤྱན་དྲངས་སློབ་དཔོན་གྱིས། །སྔགས་བརྗོད་ནས་ནི་སྤྱན་དྲང་བྱ། །ཨེ་ཧྱེ་ཧི་དང་བྷ་ག་བཱན། །ས་མ་ཡ་མ་ནུ་སྨ་ར། །ཏིཥྛ་གཉིས་དང་ས་མ་ཡ། །དེ་ལ་ཨ་ནུ་སྨ་ར་གཉིས། །སྐུ་གསུང་ཐུགས་
ཀྱི་རྡོ་རྗེ་དང་། །སྭཱ་ཧཱའི་མཐའ་ཅན་ལན་གསུམ་བརྗོད། །འཇམ་པའི་རྡོ་རྗེ་སྤྱན་དྲང་བྱ། །དཀྱིལ་འཁོར་བ་དང་ཡང་དག་ལྡན། །དཀྱིལ་འཁོར་དབུས་སུ་སྤྱན་དྲང་བྱ། །རང་གི་གདན་གྱི་དབྱེ་བ་ལ། །བཞུགས་ཤིང་ཡང་དག་
མཆོད་པར་བྱ། །རང་རང་སྔགས་དང་རིམ་ཇི་བཞིན། །ལྷ་ཡི་མེ་ཏོག་སོགས་ཀྱིས་མཆོད། །འཁོར་ལོ་མཆོག་ནི་མཆོད་པར་བྱ། །བདག་མིང་འདི་ཞེས་བགྱི་བ་འདིར། །ཆོས་ཀྱི་དབྱིངས་ཀྱི་རང་བཞིན་གྲོང་། །ཡོ་བྱད་ཅི་འབྱོར་པ་ཡིས་

88-1-231a

ནི། །དཀྱིལ་འཁོར་མཆོད་པ་བགྱི་བར་འཚལ། །ཐུགས་ཀྱིས་བརྩེ་བར་ཉེར་དགོངས་ཏེ། །མགོན་པོས་མཆོད་པ་འདི་བཞེས་ཤིག །ཨོཾ་སརྦ་ཏ་ཐཱ་ག་ཏཱ་ནཱྃ། པཱུ་ཛོ་པསྠཱ་ན་ཡཱ་ཨཱཏ་མཱ་ནྃ་ནིརྱཱ་ཏ་ཡཱ་མི། 
བླ་མས་ཡི་གེ་གསུམ་ནི་བརྗོད། །ལྷ་ཡི་རྣམ་པར་བྱས་ནས་ནི། །དེ་རྗེས་བདག་ལ་མཆོད་པར་བྱ། །ཨོཾ་སརྦ་ཏ་ཐཱ་ག་ཏེ། །པཱུ་ཛཱ་བཛྲ་སྭ་བྷཱ་བ། །ཨཱཏ་མ་ཀོ྅་ཧྃ་ཞེས་ནི་བརྗོད། །རང་ལྷའི་ང་རྒྱལ་བྱས་ནས་ནི། །ཇི་ལྟར་བསྐྱེད་པའི་
ཡུལ་རྣམས་དང་། །གནོད་བྱེད་ཁ་ན་མ་ཐོ་མེད། །ཞེ་སྡང་ཆེན་པོའི་རིགས་ལས་བྱུང་། །དཀྱིལ་འཁོར་དབང་ཕྱུག་མཆོད་བྱ་ཞིང་། །དེ་ནས་ལྷ་རྣམས་ལྷག་གནས་བྱ། །ཡིད་འཕྲོག་སྣ་ཚོགས་ལྷ་ཡི་གོས། །ག་པུར་ཨ་ག་རུ་
ཡིས་བདུག །སྔགས་ཀྱིས་དག་བྱས་དགབ་པར་བྱ། །ཨོཾ་དང་ཏིཥྛ་བཛྲ་ཧོ། །བརྗོད་ནས་དཀྱིལ་འཁོར་ལྷག་གནས་བྱའོ། །ཨོཾ་དང་སྥ་ར་བཛྲ་ཧོ། །བློ་དང་ལྡན་པས་སྔགས་འདི་བརྗོད། །མེ་ཏོག་སྤར་བས་གཏོར་ནས་ནི། །
ལྷག་གནས་དེར་ནི་གཤེགས་པར་བྱ། །རྣམ་པ་ཀུན་དང་ཡང་དག་ལྡན། །དཀྱིལ་འཁོར་མཆོག་ནི་མཐོང་བར་བྱ། །རིགས་ལྔའི་རང་བཞིན་བཟང་པོ་ཡིས། །བཅོམ་ལྡན་གཟུགས་བརྙན་བསྒོམས་ནས་ནི། །མེ་ལོང་སོགས་ལ་
ཁྲུས་བྱ་ཞིང་། །དེ་བཞིན་རྫས་དང་འོ་མ་སོགས། །ཇི་ལྟར་ལྟམས་པ་ཙམ་གྱིས་ཀྱང་། །དེ་བཞིན་གཤེགས་ཀུན་ཁྲུས་གསོལ་བ། །དེ་བཞིན་བདག་གི་སྐུ་ཁྲུས་གསོལ། །ཅོད་པན་དབང་ཕྱུག་རྡོ་རྗེ་སེམས། །དབུས་སུ་ཡི་གེ་
གསུམ་དང་སྤེལ། །སྭཱ་ཧཱའི་མཐའ་ཅན་བརྗོད་པར་བྱ། །ལས་ཀྱི་དེ་ཉིད་ཆོ་ག་ཤེས། །དེ་རྗེས་སྦྱར་བའི་གཏོར་མ་བྱ། །ཨོཾ་སརྦ་ཨཱ་བ་ར་ཎ། །ཤུད་དྷ་སརྦ་པཱ་པྃ་དང་། །བི་ཤུད་དྷ་བཛྲ་ཧཱུཾྃ་ཕཊ། །སྭཱ་ཧཱའི་མཐའ་ཅན་སྔགས་བརྗོད་བྱ། །
པད་མ་བསྐོར་བའི་ཕྱག་རྒྱ་དང་། །ཡུངས་ཀར་དཀར་པོ་བསྲེགས་བྱས་ནས། །ཉོན་མོངས་པ་ནི་སེལ་བར་བྱེད། །མཁྱུད་ཅིང་བསྐོར་བས་དོར་བར་བྱ། །དེ་ནས་ཆོ་ག་བཞིན་ལེགས་མཆོག །སིལ་སྙན་གླུ་ལ་སོགས་པ་དང་། །བཅོམ་ལྡན་

88-1-231b

འདས་ལ་དབུལ་བར་བྱ། །རང་རང་སྔགས་དང་གོ་རིམ་བཞིན། །ཨོཾ་སརྦ་ཏ་ཐཱ་ག་ཏ། །པུཥྤ་པཱུ་ཛཱ་མེ་གྷ་དང་། །ས་མུ་དྲཱ་དང་སྥ་ར་ཎ། །ས་མ་ཡེ་དང་ཤྲཱི་ཡེ་ཨཱཿ། །ཧཱུྃ་གི་སྔགས་ནི་རྗེས་སུ་བརྗོད། །རྫས་རྣམས་ཀུན་ལ་རང་མིང་ནི། །
གཟུགས་ལ་སོགས་པ་སྔ་མ་བཞིན། །ཆོ་ག་བཞིན་དུ་ཡང་དག་བརྗོད། །རྡོ་རྗེ་སེམས་དཔའ་ལེགས་བསྒྱིངས་པ། །རྡོ་རྗེ་སློབ་དཔོན་ཆོ་ག་ཤེས། །སྔགས་འདི་ཡིས་ནི་རབ་གནས་བྱ། །ཨོཾ་དང་སུ་པྲ་ཏིཥྛ་དང་། །བཛྲ་
སྭཱ་ཧཱའི་མཐའ་ཅན་བཟླས། །ཡི་གེ་གསུམ་གྱི་སྙིང་པོ་ནི། །སྐུ་གསུང་ཐུགས་ལ་བཀོད་ནས་ནི། །མེ་ཏོག་ཆར་ནི་དབབ་པར་བྱ། །སློབ་དཔོན་སློབ་མའི་ཚོགས་དང་བཅས། །གླུ་ཡིས་ཡང་དག་བསྐུལ་ནས་ནི། །སད་པ་ན་ནི་ཕྱག་
ཀྱང་བྱས། །ལས་ཀུན་བདག་ཉིད་རྣལ་འབྱོར་བདག །གཏོར་མ་དོན་ཀུན་གྲུབ་པར་བྱེད། །ལས་ལ་བྱང་ཞིང་མཁས་པ་དང་། །ཆོ་ག་བཞིན་དུ་བསྒྱིངས་བཅས་དང་། །ཆང་དང་སྣ་ཚོགས་ཤ་དང་ནི། །དེ་བཞིན་ལ་དུ་འོ་མ་དང་། །འབྲས་
ཆན་ཕྱེ་ཡི་ཁུར་བ་དང་། །སྲན་ཁུར་བྱེ་བ་མང་པོ་དང་། །མཆོད་ཡོན་མེ་ཏོག་སོགས་ཀྱིས་མཆོད། །སྣོད་བཅུ་ཆུ་ཡིས་གང་བ་ལའོ། །གསུངས་པའི་ཁྲོ་བོ་བཅུ་སྔགས་ཀྱིས། །སྔ་མ་བཞིན་དུ་ཆོ་ག་ཡིས། །དེ་དབུས་འབྱུང་པོ་ཀུན་
ལ་ནི། །ངོ་མཚར་ཆེན་པོའི་གཏོར་མ་སྦྱིན། །སྔ་མ་བཞིན་དུ་ཆོ་ག་ཡིས། །ཏིལ་བསྲེགས་བཟའ་བས་ཁྱད་པར་དུ། །བློ་དང་ལྡན་པས་སྔགས་བཟླས་བྱ། །འདི་ནི་དོན་ཀུན་སྒྲུབ་བྱེད་པ། །ཨོཾ་བྲཧྨ་དེ་བ་ཏཱ་སརྦ། ཨིན་དྲ་ད་ཤ་
ལོ་ཀ་རཀྵ་ཀ ། ནཱ་ག་གན་དྷ་རྦ་ཀུྃ་བྷ་ཎ་ཌ། ཡཀྵ་བྷཱུ་ཏ་ག་ཎ། ཏ་ཐཱ་པྲེ་ཏ་ཨུ་ག་ཏ། པི་ཤཱ་ཙེ་ཨ་པསྨཱ་ར། ཌཱ་ཀི་ནི་གྲ་ཧ། བིགྷ་ནན་མཱ་ཏྲྀ་ག་ཎཱ། སརྦ་ཏ་ཐཱ་ཨག་ནེ་མ་ར་གྲ་ཧཱ། ཨོཾ་ཛོ་བྷཀྵ་མ་ཧཱ་ཏེ་ཛ། མ་ནུ་ཥྱ་ན་མ། བི་ཧི་ས་ཀ །
མུ་དྲ་མན་ཏྲ་ཨ་དྷི་དྷོ་བྷྱཿཙ། གྲ་ཧ་ནཀྵ་ཏྲ་མ་ནུ་ཥྱ། ཨི་མྃ་བ་ལི། པྲ་གྲཱི་ཧྣན་སིད་དྷ་ཡད་ཚན་དུ་མེ་སན་དྷ། ས་ཏྱ་མ་ནེ་ཥྱ་ཀ་ར་མེ་ཥུ། སད་ས་ཧ་ཡ་བྷ་བན་དུ་ཙེ། དྷཱ་ན་དྷཱ་ན། སུ་པ་ར་ནཉྩ། དྷ་ཌཱན་ཏུ་མ་མ་ཏོ་

88-1-232a

ཥི་ཏ། ཨི་ཏི་ཨུ་པཱ་ཏྲཱ་ན་ཏྲོ་ཥ་ཎི་སཏྭཱ་ཏ་ནམ་ན་ཤ་ཡན་ཏུ་ཙ། ཐོག་མར་ཨོཾ་དང་ཨཱཿཧཱུྃ་ཕཊ། །སྭཱ་ཧཱའི་མཐའ་ཅན་ལས་ཀུན་བྱེད། །དེ་ལྟར་སྔགས་འདི་སྣོད་ལ་བཟླས། །རྡོ་རྗེ་སེམས་དཔའ་རྣམ་པར་
རོལ། །སློབ་མ་ལྷག་པར་གནས་པར་བྱ། །མཚན་ཉིད་ཡོན་ཏན་གྱིས་བརྒྱན་པ། །ཙན་དན་ག་པུར་གླ་རྩི་ཡི། །ཆུ་ཡིས་ཀྱང་ནི་ཁྲུས་བྱས་ཏེ། །དད་པའི་ཆུ་ནི་འཆང་བ་ཡིས། །སེམས་ཀྱི་དྲི་མ་རྣམ་པར་འཁྲུད། །བདོག་པ་ཐམས་
ཅད་གཏོང་བར་བྱེད། །གོས་གཙང་བ་ནི་མཆོག་ཏུ་བགོ། ཁང་པ་བརྩེག་མ་བྱས་ནས་ནི། །རས་ཀྱི་ཡོལ་བ་ཀུན་ནས་བྲེ། །ཡི་གེ་གསུམ་དང་ཡང་དག་ལྡན། །རྡོ་རྗེ་ཅན་གྱིས་སྔགས་ཆུ་ནི། །ལན་བདུན་གཏོར་ལ་གཏོར་མ་ཡིས། །
ལས་སྐྱེས་དྲི་མ་སྦྱོང་བར་བྱེད། །དེ་ནས་ས་ཡི་སྙིང་པོ་སོགས། །མིག་ལ་སོགས་ལ་རྣམ་པར་དགོད། །སོར་མོ་དབུ་མ་གཉིས་ཀྱིས་ནི། །དབང་པོ་སོ་སོ་ལ་རེག་པས། །སྔགས་བརྗོད་བྱ་ཞིང་བྱིན་གྱིས་བརླབ། །ལུས་ཀྱི་དཀྱིལ་
འཁོར་རྣལ་འབྱོར་གྱིས། །ཨོཾ་དང་ཙཀྵུ་ཙཀྵུཿདང་། །ས་མན་ཏ་དང་ཙཀྵུཿབཟླས། །མཻ་ཏྲི་སཏྭ་ལོ་ཙ་ནེ། །སརྦ་ཨཪྠ་སཱ་དྷ་ནི། །སྭཱ་ཧཱའི་མཐའ་དང་སྔགས་འདི་བརྗོད། །མཐེ་བོ་གུང་མོ་ཡང་དག་སྦྱར། །ཞབས་བསིལ་ཆུ་དང་མཉེས་
ནས་ནི། །སྔགས་དེ་ལན་གསུམ་བཟླས་པར་བྱ། །སློབ་མའི་མིག་ལ་སོ་སོར་ནི། །མཐེ་བོའི་ཕྱག་རྒྱས་རེག་པར་བྱ། །ཁྲུ་གང་བ་ལ་སོར་བཞི་པའི། །སྐུད་པ་ཞགས་པ་འདྲ་བ་ལ། །ཡི་གེ་བརྒྱ་པའི་སྔགས་ལན་གསུམ། །བཟླས་
ནས་ཞབས་བསིལ་ཆུས་བསང་བྱ། །སྐུད་པ་ལན་གསུམ་དཀྲིས་པ་ནི། །རྡོ་རྗེ་གསུམ་ནི་མདུད་པར་ལྡན། །དཔུང་པ་གཡོན་པར་བཅིངས་པ་ནི། །སྔགས་འདི་ལན་གསུམ་བརྗོད་པར་བྱ། །ཨོཾ་དང་ལོ་ཙ་ནེ་ཡི་སྒྲ། །ཡ་ཏ་ཏྭད་ཏྃ་སྃ་
པྲ་ཏྃ། །མི་བྷ་བི་ཤུད་དྷི་ཡི་སྒྲ། །རྃ་དང་རད་ན་ཏྲ་ཡཱ་ཡ། །སིད་དྷི་ན་ནི་ད་ད་ཤ ། ཡ་སྭཱ་ཧཱ་ཡི་སྔགས་འདི་ནི། །ཐེག་པ་བླ་མེད་ལན་བདུན་བཟླས། །སློབ་མ་ལ་ནི་མེ་ཏོག་གཏོར། །དེ་ནས་རྡོ་རྗེ་འཆང་གིས་ནི། །སོར་ནི་བཅུ་གཉིས་གཞལ་བ་ཡི། །

88-1-232b

ཟུར་ནི་གསུམ་དུ་ཡོངས་སུ་བྱ། །ཡི་གེ་གསུམ་གྱིས་བྱིན་བརླབ་བསྒོམ། །སློབ་མའི་ལག་ཏུ་གཏད་པར་བྱ། །ཨོཾ་དང་པྲ་ཏི་བཛྲ་དང་། །ས་ཡན་ཏ་དང་ཨི་ཤྭ་རི། །ཨོཾ་ཨཱཿཧཱུྃ་སྭཱ་ཧཱའི་མཐའ་ཅན་སྔགས། །བཟླས་ནས་སློབ་མས་དོར་
བར་བྱ། །སར་འབབ་པ་ཡི་ཕུར་བུ་སྟེ། །ཕྱོགས་ནི་གང་དུ་ལྟ་བ་ཉིད། །སློབ་དཔོན་དང་ནི་སློབ་མ་ཡིས། །དེ་ཡི་ཕྱོགས་བལྟས་ཉལ་བར་བྱ། །ནམ་ལངས་ཡང་དག་བླ་མ་ལ། །ཇི་ལྟར་མཐོང་བའི་དོན་ཀུན་ཞུ། །དེ་ལ་དམིགས་ནས་
སྦྱིན་བསྲེག་ནི། །ཞི་བ་ལ་སོགས་རབ་དབྱེ་བས། །ལས་ནི་ཐམས་ཅད་པ་ཉིད་དམ། །བགེགས་ཞི་བ་ཡི་དོན་དུ་བྱ། །རྡོ་རྗེ་སེམས་དཔའ་བསྒྱིངས་བཅས་པས། །རྣལ་འབྱོར་ཇི་བཞིན་ཆོ་ག་བཞིན། །སྔར་བཞིན་འདིར་ཡང་གཏོར་
མ་ནི། །བགེགས་རྣམས་ཞི་ཕྱིར་སྦྱིན་པར་བྱ། །དེ་ནས་གསོལ་འདེབས་སློབ་མ་ནི། །རྡོ་རྗེ་སློབ་དཔོན་ཐུགས་རྗེས་ཁྱབ། །ཐལ་མོ་སྦྱར་བར་བྱས་ནས་ནི། །མདུན་དུ་འདུག་ནས་ཕྱག་བྱས་ཏེ། །དགའ་ཆེན་ཁྱོད་བདག་སྟོན་པ་བས། །སློབ་
དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་གསལ་དུ་སྩོལ། །སྡོམ་པ་རྣམས་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་
བདག་ནི་འཇུག་པར་འཚལ། །དེ་ནས་བླ་མས་དེ་ལ་ཡང་། །བྱ་དང་མི་བྱ་གསུངས་པ་ནི། །སེམས་ཅན་ལས་ཀྱི་སྲད་བུས་གདབ། །རྡུལ་ཚོན་བཀྱེ་བའི་རིམ་པ་དགྱེ། །འགྲོ་བ་འདི་དག་དཀྱིལ་འཁོར་ཏེ། །རང་བཞིན་དག་པ་གཉིས་མེད་
པའོ། །ཐོག་མར་དཀྱིལ་འཁོར་རྣལ་འབྱོར་བདག །རྡོ་རྗེ་སློབ་དཔོན་རང་ཉིད་བསྒོམ། །སློབ་མ་བདག་ཉིད་འདྲར་དམིགས་ནས། །དེ་འོག་ཐམས་ཅད་རབ་བསྒྲུབ་བྱ། །བླ་མ་བཟང་ལ་དབང་བསྐུར་ཕྱིར། །སློབ་མས་དེ་རྗེས་གསོལ་བ་
གདབ། །འདི་ནས་འཁོར་བའི་རྒྱ་མཚོ་ལ། །ཉོན་མོངས་ཆུ་སྲིན་ན་ཀྲས་ཁྱབ། །ལས་ཀྱི་རླུང་གིས་དབའ་ཀློང་འཁྲུགས། །བདག་བྱིན་ཐུགས་རྗེའི་རྒྱ་མཚོ་ཀྱེ། །མི་ཤེས་ལིང་ཏོག་གིས་སྒྲིབས་མིག །ཉོན་མོངས་དབང་དུ་བྱ་བ་ནི། །བདེ་བ་

88-1-233a

སྡུག་བསྔལ་འཇིགས་ལས་སྐྱོབ། །ཐུགས་རྗེའི་རྒྱ་མཚོས་བདག་སྐྱབས་མཛོད། །དེ་འདྲ་ཚིག་གསན་རྡོ་རྗེ་ཅན། །ཐུགས་རྗེའི་ཐུགས་ནི་ཡོངས་སུ་གང་། །སློབ་མ་ལ་ནི་ཡོངས་སུ་གསུངས། །བུ་ཁྱོད་
དུས་འདི་ནས་བཟུང་སྟེ། །རྡོ་རྗེ་ཐེག་པའི་གཞུང་ལུགས་བསྟན། །རྣལ་འབྱོར་མཆོག་ནི་ཁྱོད་ཀྱིས་ཟུང་། །རྡོ་རྗེ་སེམས་དཔའི་སྤྱོད་པའི་གནས། །བུ་ཁྱོད་འདི་ནི་བདུད་རྩི་སྟེ། །སྲུངས་ཤིག་མ་སྲུང་ན་ནི་སྲེག །བསྲུངས་ན་དངོས་གྲུབ་
ཀུན་འགྲུབ་འགྱུར། །ཉོན་མོངས་ཐམས་ཅད་སེལ་བའི་ཀླུང་། །ཨོཾ་དང་པཉྩ་ཨ་མྲྀ་ཏ། །ཨུ་ད་ཀ་དང་ཨཱཿཧཱུྃ་ཋ། །སློབ་མས་བདུད་རྩི་ལྔ་བཏུང་བྱ། །རྡོ་རྗེ་ཡེ་ཤེས་རྨད་བྱུང་བའོ། །གསང་བ་དྲན་ན་སྐྱོན་འགྱུར་ཕྱིར། །རྡོ་རྗེ་སློབ་མ་ལ་ནི་
དབབ། །དྲི་ཆེན་དྲི་ཆུ་ལ་སོགས་པ། །མཚལ་ཆེན་འབབ་པའི་བུ་མོའི་གོས། །ཁྲག་དང་ཁུ་བས་ཡང་དག་བསྒོས། །གུ་གུལ་དང་ནི་རྣམ་པར་བསྲེས། །ཡི་དགས་མེ་ནི་བླངས་
ནས་སུ། །པད་མའི་སྣོད་དུ་བཞག་ནས་ནི། །དེར་ནི་ཐམས་ཅད་གཞུག་པར་བྱ། །ཁྲོ་བོ་རྡོ་རྗེ་གསུམ་བདག་ཉིད། །གཡས་བརྐྱང་བ་ཡི་གནས་པས་གནས། །རྡོ་རྗེ་འཆང་དབང་སློབ་མ་ལ། །རྨད་བྱུང་ཆེན་པོའི་བདུག་པས་བདུག ། །འབབ་
པར་འགྱུར་བར་ཐེ་ཚོམ་མེད། །ཨོཾ་ཏིཥྛ་མ་ཧཱ་ཀྲོ་དྷ། །དེ་བཞིན་ཨཱ་བེ་ཤ་ཡ་ཧཱུྃ། །རྣལ་འབྱོར་པ་ཡིས་སྔགས་འདི་བརྗོད། །སློབ་མ་ལ་ནི་གསལ་བར་དབབ། །བཛྲ་ས་ཏྭ་ཧི་མ་ཧེ། །བིདྱཱ་རཱ་ཛཱ་ཡ་བིདྱཱ་མ་ཧེ། །དེ་ལྟར་སྔགས་ནི་འདི་ཡིས་
ཀྱང་། །སླར་ཡང་སློབ་མ་དབང་བསྐུར་ནས། །རང་བཞིན་གྱིས་དག་རང་གི་ལུས། །དཀྱིལ་འཁོར་མཆོག་འདི་མཐོང་བ་ན། །དེ་བཞིན་གཤེགས་དང་ལྷ་མོ་དང་། །རྒྱལ་བའི་སྲས་ཀྱི་ཡང་དག་གཞི། །ཁྲོ་བོ་ཁྱབ་པའི་གསང་བའི་མཆོག །
རྡོ་རྗེ་སེམས་དཔའ་རྟེན་དང་ནི། །ཕྱི་དང་ནང་གི་དཀྱིལ་འཁོར་ནི། །གཉིས་པོ་དེ་ལ་བསྟན་པར་བྱ། །སླར་ཡང་སློབ་མས་གསོལ་བ་གདབ། །བདག་ལ་དབང་བསྐུར་མཛད་དུ་གསོལ། །རྣམ་རྒྱལ་བུམ་པ་བླངས་ནས་ནི། །པད་མའི་

88-1-233b

སྣོད་ནི་བཟང་པོ་ལ། །དེ་ཡི་དབུས་སུ་བློ་བཟང་པོ། །ཧཱུྃ་རྡོར་ལས་བྱུང་མི་བསྐྱོད་བསྒོམ། །རང་ཉིད་ཡེ་ཤེས་ས་བོན་གྱི། །འོད་ཟེར་ཡང་དག་བསྐུལ་བས་བྱུང་། །སླར་ཡང་ཡེ་ཤེས་སེམས་དཔའ་བསྒོམ། །
མི་བསྐྱོད་པ་ཡི་རྣམ་པ་མཆོག །མི་བསྐྱོད་ངོ་བོ་དེ་ཉིད་ཀྱིས། །རྣམ་པར་ཤེས་པའི་ཕུང་པོ་བསྒོམ། །སློབ་མའི་མགོ་བོར་ལག་པ་བཞག །རྡོ་རྗེ་སློབ་དཔོན་ཐུགས་རྗེས་ཁྱབ། །ཨོཾ་དང་མ་ཧཱ་ས་ཏྭ་དང་། །དེ་བཞིན་ཨཱི་ཤ་ར་
ཏཾ་དང་། །ཨ་བྷི་ཥིཉྩ་མི་ས་ཧཱ། །ཨོཾ་སརྦ་ཏ་ཐཱ་ག་ཏ། །ཨ་བྷི་ཥེ་ཀ་ས་མ་ཡ། །ཤྲི་ཡེ་ཨཱཿཧཱུྃ་དེ་ནས་བཟླ། །ཆུ་ཡི་གཏིང་ནས་སློབ་མ་ལ། །དབུ་རྒྱན་དབང་བསྐུར་དོན་དུ་ནི། །ཅོད་པན་འཇིག་རྟེན་གསུམ་རྒྱལ་པོ། །སེམས་ཅན་
ཀུན་གྱི་དོན་སྒྲུབ་པ། །སྙིང་རྗེས་ཁྱབ་པ་ངེས་བྱིན་གྱིས། །རྡོ་རྗེ་སེམས་དཔའི་ཡོན་ཏན་གནས། །ས་བོན་ཏྲི་ལས་བྱུང་བ་ཡི། །རིན་ཆེན་འབྱུང་ལྡན་བསྒོམས་ནས་ནི། །རི་མོ་དར་སོགས་ཅོད་པན་ཡང་། །སློབ་མའི་མགོ་ལ་སྦྱིན་པར་བྱ། །
ཨོཾ་སརྦ་ཏ་ཐཱ་ག་ཏ། །རད་ན་མུ་ཀུ་ཊ་སྒྲ་དང་། །དེ་བཞིན་སྒྲ་དང་པཱུ་ཛ་ཡ། །ཨ་ཏིཥྛ་དང་ཨཱཿཧཱུྃ་དང་། །སྔགས་འདི་དག་ནི་བརྗོད་ནས་ནི། །མེ་ཏོག་མགོ་ལ་སྦྱིན་པར་བྱ། །སློབ་མ་རྡོ་རྗེ་དབང་བསྐུར་ཕྱིར། །སླར་ཡང་བླ་མ་ལ་
གསོལ་གདབ། །ཡེ་ཤེས་ལྔ་ཡི་རང་བཞིན་དངོས། །རྡོ་རྗེ་བརྟུལ་ཞུགས་ངས་བྱིན་གྱིས། །གང་གིས་མ་རིག་སྒོ་ང་འབྱེད། །ཡེ་ཤེས་ཐོབ་འགྱུར་ང་ཡིས་བྱས། །ཧྲཱིཿལས་པད་མ་རྫོགས་པར་ནི། །འོད་དཔག་མེད་དུ་རྣམ་པར་
བསྒོམ། །རྡོ་རྗེ་ལག་པ་གཡས་པར་སྦྱིན། །སློབ་མ་ལ་ནི་འདི་སྐད་བརྗོད། །ངས་ཁྱོད་དེ་རིང་དབང་བསྐུར་བྱ། །འདི་དེ་སངས་རྒྱས་ཐམས་ཅད་དེ། །ཀུན་ཏུ་བཟང་པོའི་བརྟུལ་ཞུགས་བརྟན། །དངོས་གྲུབ་བཟང་ཕྱིར་རྡོ་རྗེ་
ལོང་། །ཁྃ་ལས་བྱུང་བའི་རལ་གྲི་འམ། །དོན་ཡོད་གྲུབ་པའི་རང་ངོ་བོ། །རྫོགས་པར་ལག་པ་གཡོན་པར་ནི། །སློབ་མ་བསྒྱིངས་པའི་ཕྱག་རྒྱ་འཛིན། །འདི་ནི་སངས་རྒྱས་ཐམས་ཅད་ཀྱི། །དྲིལ་བུ་སྒྲ་ཡི་རྗེས་འགྲོར་བརྗོད། །

88-1-234a

ཁྱོད་ཀྱིས་ཀྱང་ནི་རྟག་ཏུ་བཅང་། །བྱང་ཆུབ་མཆོག་ནི་རྒྱལ་བའི་གཞི། །རྡོ་རྗེ་དྲིལ་བུ་བཟུང་རྗེས་ལ། །རྡོ་རྗེ་སེམས་དཔའ་རང་ངོ་བོ། །རང་བཞིན་ཡོན་ཏན་རྣམས་ཀྱིས་གང་། །བདག་པོ་ཡི་ནི་རྣལ་འབྱོར་འགྱུར། །རྣམ་པར་
སྣང་མཛད་རང་ངོ་བོ། །སློབ་མའི་མགོ་ལ་ལག་བཞག་སྟེ། །རྡོ་རྗེ་ཅན་གྱིས་མིང་དབང་བསྐུར། །གཟུགས་ཀྱི་ཕུང་པོ་རྣམ་པར་བསྒོམ། །ཨོཾ་སརྦ་ཏ་ཐཱ་ག་ཏ། །ཆེ་གེ་མོ་ཞེས་བཛྲ་ས་ཏྭྃ། །ཨ་བྷི་ཥཱིཉྩ་མི་སྭཱ་ཧཱ། །ཕུང་པོ་ལྔ་ཡི་
རྣམ་དག་པས། །ཐོག་མར་ཆུ་ནས་མིང་གི་མཐར། །དབང་བསྐུར་བ་ནི་མཆོག་ཏུ་ཤེས། །རྨད་བྱུང་ཆེན་པོ་བཤད་པར་བྱ། །སངས་རྒྱས་ལྔ་ནི་དག་པ་འདི། །དབང་བསྐུར་ལྔ་ནི་ཐོབ་པར་འགྱུར། །མ་རིག་པ་ནི་བསལ་ནས་ནི། །
ཡེ་ཤེས་ལྔ་ནི་ཐོབ་པར་འགྱུར། །དེ་ནས་རྡོ་རྗེ་སེམས་དཔའ་ཡི། །སློབ་མ་འདོད་དོན་སྔགས་དབང་སྦྱིན། །སྔགས་ཀྱི་དབང་བསྐུར་ཡེ་ཤེས་མཆོག །ངས་བྱིན་དངོས་གྲུབ་སྟེར་བར་བྱེད། །དེ་ནས་ཡི་གེ་དྲུག་སྔགས་ཕཊ། །སྭཱ་ཧཱའི་
མཐའ་ཅན་ཡི་གེ་གསུམ། །ཁ་ནི་དམ་ཚིག་གིས་བཀང་ནས། །སྔགས་ཀྱི་སྐུ་ཡིས་དག་པ་དང་། །བླ་མའི་ཞལ་ལས་ཡང་དག་བརྗོད། །བླ་མས་དངོས་གྲུབ་སྦྱིན་བྱའི་ཕྱིར། །འདི་ནི་སངས་རྒྱས་ཐམས་ཅད་ཀྱི། །སྙིང་པོ་ཡི་ནི་
ཡེ་ཤེས་མཆོག །སངས་རྒྱས་ཐམས་ཅད་བསྡུས་པ་ནི། །ཁྱོད་ཀྱིས་ཀྱང་ནི་རྟག་ཏུ་བཅང་། །དེ་ནས་སློབ་མ་སྤྱོད་བརྟུལ་ཞུགས། །སྣ་ཚོགས་བསམ་པའི་བྱེ་བྲག་གིས། །གང་གི་སྤྱོད་པ་རྣམ་དག་པ། །འདོད་ལ་ཐུགས་རྗེའི་གཙོ་
བོ་ཡིས། །སེམས་ཅན་དོན་ནི་བྱེད་པའི་ཐབས། །ང་ཡིས་སྤྱོད་པའི་བརྟུལ་ཞུགས་སྦྱིན། །དེ་ནས་གླེགས་བམ་དུང་ལ་སོགས། །མདའ་གཞུ་རལ་གྲི་འཁོར་ལོ་དང་། །སྔོན་བཞིན་སྔགས་ཀྱིས་དག་པར་བྱེད། །སློབ་མའི་ལག་ཏུ་རིམ་
བཞིན་སྦྱིན། །འདི་ནི་ཀུན་བཟང་སྤྱོད་བརྟུལ་ཞུགས། །བསམ་པ་སྣ་ཚོགས་རྣམ་དག་བྱེད། །ཁྱོད་ཀྱིས་ཀྱང་ནི་རྟག་ཏུ་བཅང་། །སེམས་ཅན་ཀུན་གྱི་དོན་གྱིས་བྱོས། །ཨོཾ་སརྦ་ཏ་ཐཱ་ག་ཏ། །དེ་བཞིན་དྷཱི་ཊར་ཏྭྃ་དང་། །དྷརྱ་མི་ཨཱཿཧཱུྃ་དང་། །དེ་ལྟར་སྔགས་འདི་དགོད་

88-1-234b

པར་བྱ། །དེ་ནས་ལུང་བསྟན་ཐོབ་དོན་དུ། །བསམ་པ་དང་བས་བླ་མ་ལ། །ད་ལྟར་སངས་རྒྱས་རིགས་སུ་འཇུག །ཁྱེད་ཀྱིས་བདག་ལ་ལུང་བསྟན་གསོལ། །དོན་ཡོད་རྡོ་རྗེ་ཞེས་བྱ་ཁྱོད། །རིགས་ཀྱི་དབང་ཕྱུག་ལུང་བསྟན་བྱ། །དེ་ནས་
སློབ་མ་དབུགས་དབྱུང་འདོད། །བླ་མའི་ཞལ་སྔ་ནས་ནི་སྐྱེ། །མགོན་པོ་ཡང་དག་བདག་དབུགས་ཕྱུང་། །བྱང་ཆུབ་སྤྱོད་པའི་བརྟུལ་ཞུགས་བརྟན། །དེ་ནས་རྡོ་རྗེ་ཆོས་གོས་མཐའ། །གཡོན་པའི་ལག་པས་བཟུང་ནས་ནི། །གཡས་
པ་མི་འཇིགས་སྦྱིན་བྱས་ལ། །དབུགས་དབྱུང་བ་ཡི་མཆོག་བྱ་བ། །ང་ཡིས་རྡོ་རྗེ་གསུང་བདག་ཁྱོད། །སངས་རྒྱས་ཀུན་གྱི་གོ་འཕང་མཆོག །རྡོ་རྗེ་སེམས་དཔའ་མངོན་པར་བརྗོད། །ཁམས་གསུམ་གྱི་ནི་རྒྱལ་པོ་ཆེ། །དཔལ་ལྡན་
ཡོན་ཏན་འབྱུང་གནས་བདག །བདུད་ཀྱི་སྟོབས་ནི་ཀུན་ལས་རྒྱལ། །གྲོང་ཁྱེར་མཆོག་ཏུ་ཁྱོད་ཞུགས་སོ། །དེ་ནས་སློབ་མ་དོན་འདོད་ལ། །ཕྱིར་མི་ལྡོག་པའི་དབང་བསྐུར་བྱ། །ཕྱིར་མི་ལྡོག་པའི་དབང་བསྐུར་ཆེ། །རྡོ་རྗེ་
སེམས་དཔའ་བདག་ལ་སྩོལ། །དེ་ནས་ཡེ་ཤེས་རྡོར་དབང་ཕྱུག །ཡེ་ཤེས་སེམས་དཔའི་འོད་ཟེར་གྱིས། །སྤྱན་དྲངས་སངས་རྒྱས་ལྔ་ལ་སོགས། །ལྷ་མོའི་འཁོར་ལོ་རིམ་བཞིན་འབྱུང་། །དེ་ཡིས་ཡེ་ཤེས་ཆུས་བཀང་བའི། །
བུམ་པ་ཕྱག་བསྣམས་དེ་བཞིན་གཤེགས། །རྡོ་རྗེ་འཛིན་དང་རྒྱལ་བ་རྒྱལ། །རིན་ཆེན་འཛིན་དང་འཁོར་བ་སྒྲོལ། །ཤེས་རབ་འཆང་ནི་རིམ་པ་བཞིན། །གཏི་མུག་ཞེ་སྡང་འདོད་ཆགས་ལ། །དེ་བཞིན་རྡོ་རྗེ་དགའ་མ་སོགས། །གཤིན་
རྗེ་མཐར་བྱེད་ཤེས་མཐར་བྱེད། །པད་མ་མཐར་བྱེད་བགེགས་མཐར་བྱེད། །འདི་ཡིས་ཀུན་ནས་དབང་བསྐུར་བས། །རྡོ་རྗེ་སློབ་མ་རྣམ་པར་བསམ། །དབང་བསྐུར་བ་ནི་རྡོ་རྗེ་ཆེ། །ཁམས་གསུམ་ཀུན་གྱིས་ཕྱག་བྱས་པ། །གསང་
བ་གསུམ་གྱི་གནས་ལས་བྱུང་། །སངས་རྒྱས་ཀུན་ནི་ང་ཡིས་སྦྱིན། །དེ་ནས་དེ་བཞིན་གཤེགས་ལྷ་མོ། །ཁྲོ་བོ་རང་གི་གནས་སུ་དགོད། །འཇམ་དཔལ་རྣམ་པར་བསྒོམས་ནས་ནི། །ཡེ་ཤེས་རྡོ་རྗེས་རྣམ་པར་བརྒྱན། །ཨོཾ་དང་དྷ་

88-1-235a

སུ་པྲ་ཏིཥྛ། བཛྲ་སྭཱ་ཧཱ་ཞེས་ནི་དགོད། །བློ་བཟང་གིས་ནི་སྔགས་བརྗོད་ནས། །སློབ་མ་ལ་ནི་མེ་ཏོག་གཏོར། །དེ་ནས་མེ་ཏོག་སོགས་ཀྱིས་མཆོད། །སློབ་མའི་དཀྱིལ་འཁོར་འཁོར་ལོ་འདྲ། །ཐུགས་རྗེས་
ཁྱབ་པའི་བླ་མ་ཡིས། །དེ་ནས་སློབ་མ་རྗེས་གནང་བྱ། །དེ་ཉིད་ཤེས་པའི་རྣལ་འབྱོར་པས། །མི་བྱ་བ་ནི་ཅི་ཡང་མེད། །དཔལ་ཆེན་ཁྱོད་ཀྱིས་བཀའ་དྲིན་གྱིས། །ང་ནི་འདོད་ཡོན་ལྔ་ལ་སྤྱོད། །སྒྱུ་མ་རྨི་ལམ་འདྲར་ཤེས་ནས། །རྟེན་
འབྲེལ་ལས་བྱུང་ཆོས་རྣམས་ནི། །གཟུགས་བརྙན་ལྟ་བུར་ཤེས་ནས་ནི། །སེམས་ཅན་དོན་ནི་མཉམ་མེད་བྱོས། །བྱ་བ་བྱས་པའི་སློབ་མ་ནི། །ཅི་བདེ་བར་ནི་བསྒྲུབ་པར་གྱིས། །དེ་ནས་བླ་མ་ལ་ཡོན་དབུལ། །བསྟོད་ཅིང་ཀུན་ནས་ཕྱག་
ཀྱང་བྱ། །སྐྱེ་བོ་བཟང་དང་ལྷན་ཅིག་ཏུ། །དེ་ནས་བླ་མ་གསང་དོན་གཉེར། །མཐུར་དུ་ཁ་བལྟས་ཁ་སྦྱར་ཏེ། །ཇི་ལྟར་བདག་ཉིད་ཆེན་པོ་ཁྱེད། །བདག་ཀྱང་དེ་དང་འདྲ་བར་མཛོད། །དེ་ནས་རིགས་ལྔ་ལས་བྱུང་བའི། །ལས་དང་
ཆོས་སོགས་དབྱེ་བ་ཡིས། །སྔགས་ཀྱི་ཐེག་པས་ལྷག་པར་གྲོལ། །སྐལ་ལྡན་བུད་མེད་ཕྱག་རྒྱར་བཤད། །སྐྱེ་བོས་དབེན་པའི་མཚན་ཕྱེད་ན། །རོ་ཡི་གཞི་ཡི་གནས་སོང་ནས། །ཐུགས་རྗེ་ཆེན་པོས་ཁྱབ་པ་ཡི། །རྡོ་རྗེ་སློབ་དཔོན་
ཡོན་ཏན་འབྱུང་། །ཇི་ལྟར་དེ་ལྟར་རྙེད་ཕྱག་རྒྱ། །སྙོམས་འཇུག་ལ་ནི་གང་བྱུང་བའི། །བླ་ན་མེད་པའི་རང་བཞིན་གྱི། །སངས་རྒྱས་ཐམས་ཅད་འདུས་པ་ནི། །རྣལ་འབྱོར་མ་ཡི་ཡང་དག་ལྟུང་། །ཀུན་རྫོབ་བྱང་ཆུབ་སེམས་གང་ཡིན། །
གསང་བ་དེ་ཡིས་དབང་བསྐུར་བྱ། །འདི་དེ་སངས་རྒྱས་ཐམས་ཅད་ཀྱི། །དམ་ཚིག་ཆེན་པོ་རྣམ་བྱུང་བ། །ཁམས་ལྔ་ལས་བྱུང་བཅུད་ཀྱིས་ལེན། །བདེ་བ་ཆེན་པོས་མྱོང་བར་གྱིས། །སློབ་མ་རྟོག་པ་དང་བྲལ་བས། །པད་མ་ལ་གནས་
དེ་མྱང་གྱིས། །འདས་པའི་རྡོ་རྗེ་འཆང་བ་ཡིས། །རྒྱལ་སྲས་ཇི་ལྟར་དབང་བསྐུར་བ། །བྱང་ཆུབ་སེམས་ཀྱི་ཆུ་ཡིས་ནི། །བུ་ཁྱོད་དེ་བཞིན་དབང་བསྐུར་བྱ། །དེ་ནས་ཤེས་རབ་དབང་བསྐུར་ཕྱིར། །བླ་མས་དོན་འདོད་སློབ་མ་ལ། །དངོས་

88-1-235b

གྲུབ་ཐམས་ཅད་བསྡུས་པ་ནི། །བདག་ལ་ཁྱེད་ཀྱིས་དབང་བསྐུར་སྩོལ། །དེ་ནས་སློབ་དཔོན་བདག་ཉིད་ཆེ། །ཕྱག་རྒྱ་ཡང་དག་བྱིན་གྱིས་རློབ། །མཆོག་ནི་ཐོབ་པར་བྱ་བའི་ཕྱིར། །དེ་འོག་སློབ་མ་ལ་ནི་སྦྱིན། །ལྷ་མོ་ཕྱག་རྒྱ་ཆེན་
པོ་འདི། །དཔག་མེད་བདེ་བ་རབ་སྟེར་བ། །བུ་ཡིས་ཀུན་ནས་བླངས་ནས་ནི། །བླ་ན་མེད་པའི་མཆོད་པ་གྱིས། །དེ་ནས་ཤེས་རབ་ཡེ་ཤེས་དེའི། །སྒྲུབ་པོ་མཆོག་ཏུ་འདོད་པའི་དོན། །ལྷ་མོའི་ཡེ་ཤེས་དེ་ཉིད་མཆོག །དངོས་
གྲུབ་དོན་དུ་ང་ཡིས་སྦྱིན། །ལྷ་མོས་དེ་ལ་བཀའ་བསྒོ་བ། །དཔའ་བོའི་བུ་ནི་བླ་ན་མེད། །དཔའ་བོ་ཁྱོད་ནི་སྤྲོ་འམ་ཅི། །བྱང་ཆུབ་སེམས་ནི་ཟ་ནུས་སམ། །ཡང་དག་དེ་ནི་ངེས་པར་ནི། །ཇི་ལྟར་འདོད་པ་བཞིན་དུ་སྨྲོས། །ཇི་ལྟར་
གསུངས་པའི་དམ་ཚིག་མཆོག །ལྷ་མོ་ཅི་ཕྱིར་བདག་མི་ནུས། །དེ་ནས་ལྷ་མོ་དེ་དགྱེས་ནས། །སྐྲ་བཀྲོལ་གོས་ནི་བོར་ནས་ཀྱང་། །པད་མ་དག་ནི་འབྱེད་བྱེད་ཅིང་། །བྷཉྫ་མོཀྵ་ཧོ་ཞེས་གསུངས། །བཀའ་ཡི་པད་མའི་དབུས་གནས་
པ། །བདེ་བ་ཀུན་དུ་རྒྱུ་བའི་རྩ། །སོར་མོས་བསྐུལ་ནས་དགའ་བར་བྱ། །ཛི་ཧྭས་ཀྱང་ནི་རོལ་བར་བྱ། །ལྷན་ཅིག་སྐྱེས་པའི་བདེ་བྱེད་པ། །འདི་ཉིད་རིག་པ་བཟང་བསྟེན་ན། །མཆོག་ཏུ་དགའ་བས་ཉམས་མྱོང་ནས། །ལྷུང་བའི་བདེ་བས་
དེ་མྱང་བྱ། །དེ་ནས་བཅོམ་ལྡན་མ་དགྱེས་ནས། །བྷཉྫ་མོཀྵའི་སྔགས་གསུང་ཞིང་། །རྐང་པ་གཡོན་པ་མགོ་ལ་བཞག །བཀའ་ཡིས་དེ་ཉིད་ཡང་དག་བསྟན། །དེ་རིང་ཕན་ཆད་བུ་ཁྱོད་ཀྱིས། །ཇི་སྲིད་བྱང་ཆུབ་སྙིང་པོའི་བར། །རྨི་
ལམ་བཞིན་དུ་སེམས་ཅན་གྱི། །བླ་ན་མེད་པའི་དོན་བྱོས་ཤིག །བསྐྱེད་པའི་རིམ་པ་བསྒོམ་པ་ཡི། །མན་ངག་ལས་ནི་འདི་མི་ཤེས། །རིག་པ་འདི་ནི་དོར་བྱས་ན། །ཐབས་གཞན་གྱིས་ནི་སངས་མི་རྒྱ། །བརྟུལ་ཞུགས་རྣམས་
ཀྱི་མཆོག་གི་མཆོག །རིག་པའི་བརྟུལ་ཞུགས་བུ་ཡིས་སྤྱོད། །དེ་ལྟར་འདི་ནི་བྱང་ཆུབ་མཆོག །རྡོ་རྗེ་རྣལ་འབྱོར་རྣལ་འབྱོར་མ། །རིམ་པ་བཞིན་དུ་ཡོངས་ཤེས་བྱ། །རྡོ་རྗེ་སེམས་དཔའི་གོ་འཕང་རྟེན། །བདག་ལ་གོ་འཕང་

88-1-236a

མཆོག་སྩོལ་ལགས། །ཏིང་འཛིན་ཀུན་གྱིས་འབྲས་བུ་གསལ། །སེམས་ཅན་ཀུན་ལ་ཅི་འདོད་པར། །དངོས་གྲུབ་བླ་ན་མེད་པ་གསོལ། །སླར་ཡང་གཤེགས་པར་མཛད་པའི་ཕྱིར། །རང་གི་གནས་གཤེགས་
བཛྲ་མུཿ། །དེ་ནས་ལྷག་མའི་གཏོར་མ་སྦྱིན། །འཁོར་ལོ་ལྷག་པར་འབྱུང་བའི་རིམ། །ཨུ་ཙྪིཥྚ་ཀྵེ་ཏྲ་པ་ལ། །ཨ་ཏི་ཙཀྲ་ཨུ་ཙྪིཥྚ། །སུ་བྷོ་ཛ་ནཱྃ་བི་བ་གཉིས། །བྷུ་རཀྵ་གཉིས་དང་སརྦ་དང་། །སིད་དྷི་པྲྃ་ཡཙྪ་མེ་དང་། །ཨོཾ་སྔོན་ཨཱཿཧཱུྃ་
ཕཊ་སྭཱ་ཧཱ། །དེ་ཡི་རྗེས་ལ་བརྗོད་པར་བྱ། །རྡོ་རྗེ་དྲིལ་བུ་འཆང་འགྱུར་བ། །གཡོན་བརྐྱང་བ་ཡི་གནས་པས་གནས། །ཁམས་གསུམ་རྣམ་རྒྱལ་རང་བཞིན་དང་། །རྡོ་རྗེ་སློབ་དཔོན་རང་བཞིན་ནི། །ཁམས་གསུམ་རྣམ་རྒྱལ་རང་བཞིན་འཆང་། །
དེ་ལྟར་ཆོ་ག་ཉི་ཤུ་ལས། །བསྐྱེད་པའི་རིམ་པའི་མཚན་ཉིད་བསྟན། །དེ་ཉིད་མང་དུ་ཤེས་པ་ཡིས། །བླ་མ་དགེ་བའི་ལས་བཟང་པོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཆོ་ག་ཉི་ཤུའི་ལས་རྒྱས་པའི་
ལེའུ་སྟེ་ལྔ་བཅུ་རྩ་བཞི་པའོ།། །། དེ་ནས་གཞན་ཡང་བཤད་བྱ་བ། །དེ་ཡི་རྒྱུ་མཚན་འབྲས་བུ་ནི། །ལས་ནི་ཆོ་ག་ཉི་ཤུར་བཤད། །དབང་ཕྱུག་ཆེན་པོའི་རྒྱུ་མཚན་ཅི། །དེ་ཡི་འབྲས་བུ་ཅི་ཞིག་འགྱུར། །ཆེན་
པོའི་ཆེན་པོ་ཇི་སྐད་གསུངས། །དེ་ནས་བཅོམ་ལྡན་རྡོ་རྗེས་གསུངས། །ལས་ཀྱི་རྒྱུ་མཚན་འབྲས་བུ་དང་། །སྔོན་དུ་བསྙེན་པའི་ལས་ཀྱིས་ནི། །རྒྱུ་མཚན་འཇིག་རྟེན་དངོས་གྲུབ་བརྒྱད། །སེར་སྣ་ལ་སོགས་བསལ་བའི་ཕྱིར། །
སངས་རྒྱས་མཆོད་པ་རྣམ་བསྒོམ་ཞིང་། །སྦྱིན་པ་ཚུལ་ཁྲིམས་བཟོད་པ་དང་། །བརྩོན་འགྲུས་བསམ་གཏན་རབ་ཏུ་རྫོགས། །ཤེས་རབ་ཡེ་ཤེས་དབང་བསྐུར་གྱིས། །ཤེས་རབ་ཕ་རོལ་ཕྱིན་པ་རྫོགས། །གསང་བ་ལ་སོགས་ལ་
གནས་པ། །སྐྱེ་བོ་ཆགས་པའི་རྒྱུ་མཚན་ནོ། །ཀུན་དུ་སྤྱོད་པའི་ཆོས་རྣམས་ཀྱིས། །མཉམ་ཉིད་ཡེ་ཤེས་རྒྱུ་ཡིས་ནི། །བླ་མ་དད་པས་མཆོད་པ་ནི། །རྡོ་རྗེ་སེམས་དཔའི་གོ་འཕང་དོན། །ཆུ་སོགས་མིང་ནི་མཐར་ཐུག་པ། །ཡེ་ཤེས་ལྔ་ཡི་

88-1-236b

རྣམ་དག་ཕྱིར། །སྤྱོད་པ་ཕྱིར་མི་ལྡོག་པའི་མཐའ། །སེམས་ཅན་བསམ་པ་རྣམ་དག་ཕྱིར། །ཤེས་རབ་བརྟུལ་ཞུགས་སོགས་ཀྱི་མཐའ། །དཔེ་ཡིས་བདེ་བ་བསྟན་པའི་ཕྱིར། །དཀྱིལ་འཁོར་ས་ཚོན་ཕྲ་རབ་དང་། །མཚུངས་པ་
དེ་བཞིན་གཤེགས་པ་ཀུན། །མཆོད་པ་ཉིད་དུ་འགྱུར་བ་དང་། །དེ་ལྟར་འབྲས་བུ་འཁོར་ལོ་འཇུག །སངས་རྒྱས་ཐམས་ཅད་མཆོད་པ་ནི། །ལས་ཀྱི་སྒྲིབ་པ་དག་པར་འགྱུར། །ཤིན་དུ་རྣམ་དག་ཆོས་ཀྱི་དབྱིངས། །དབང་བསྐུར་
བ་ནི་ཐོབ་པ་དང་། །དངོས་པོའི་ངོ་བོ་ཇི་བཞིན་དུ། །ཤེས་རབ་ཡེ་ཤེས་ཀྱིས་ནི་ཐོབ། །བླ་མ་ཡིས་ནི་སྒྲུབ་པ་ཡང་། །མཆོད་པ་དེ་ཡི་གོ་འཕང་མཆོག །དེ་ལྟར་ཡུན་མི་རིང་བར་འཐོབ། །དག་པའི་སྤྱོད་པ་བརྟུལ་ཞུགས་མཆོག །
རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཆོ་ག་ཉི་ཤུ་པའི་རྒྱུ་མཚན་དང་འབྲས་བུ་བསྟན་པའི་ལེའུ་སྟེ་ལྔ་བཅུ་རྩ་ལྔ་པའོ།། །། དེ་ནས་རྡོ་རྗེ་སེམས་དཔས་
གསུངས། །མཆོད་པའི་ཆོ་ག་བླ་ན་མེད། །གཉིས་མེད་མཉམ་པའི་རྣལ་འབྱོར་གྱིས། །ལུས་ལ་མཆོད་པའི་ཆོ་གའི་རིམ། །རྡོ་ཤིང་ས་དང་གསེར་གྱི་ནི། །སྐུ་གཟུགས་ལ་ནི་ཕྱག་མི་བྱ། །རབ་གནས་དཀྱིལ་འཁོར་སྦྱིན་བསྲེག་དང་། །
དེ་ནས་ནམ་ཡང་མི་བྱའོ། །དྲི་ཆེན་རྡོར་ཆུ་དཀོན་མཆོག་སོགས། །བདག་ཉིད་ལྔ་ནི་རྟག་ཏུ་མཆོད། །དེ་ཕྱིར་དེ་ལ་མངོན་ཞུགས་པའོ། །ཐུགས་ཀྱི་རྡོ་རྗེ་རང་ཉིད་གཙོ། །སེམས་དེ་ཡང་ནི་དེ་དངོས་མེད། །གང་ཕྱིར་སྟོང་ཉིད་མཚན་ཉིད་ནི། །
སྟོང་ཉིད་ཀྱང་ནི་རྣམ་པ་མེད། །དེ་ཕྱིར་ཐམས་ཅད་ནམ་མཁའ་འདྲ། །དེ་ལྟར་རྣམ་དག་རྣམ་ཤེས་ཀྱང་། །རྩ་ནི་གསུམ་ལའང་མཆོད་པར་བྱ། །གང་ཕྱིར་སེམས་ཀྱི་རང་བཞིན་ཀུན། །སེམས་ལས་གཞན་པ་ཡོད་མ་ཡིན། །
རང་ཉིད་རྡོ་རྗེ་སེམས་དཔའ་དང་། །སེམས་ཀྱི་རང་བཞིན་ལ་ནི་གནས། །ལྷ་ཡི་གཟུགས་ནི་བླ་མེད་པ། །སེམས་མ་གཏོགས་པ་གཞན་ནི་མེད། །དེ་ཕྱིར་དེ་ལྟར་རྣམ་དཔྱོད་པ། །རང་ལུས་གཅིག་པུ་རྟག་ཏུ་མཆོད། །རིགས་ལྔ་

88-1-237a

རྟག་ཏུ་རྟག་སྤྱོད་པ། །རིགས་གཅིག་ཏུ་ནི་རྣམ་པར་བརྟག །འདོད་དང་མི་འདོད་དབྱེ་བ་དང་། །བཏུང་དང་མི་བཏུང་རྣམ་པར་སྤངས། །རྣལ་འབྱོར་སྐལ་ཡོད་སྐལ་མེད་ཅེས། །ནམ་ཡང་སྨྲ་བར་མི་བྱའོ། །ཕྱག་
རྒྱའི་རྣམ་པ་སྔོན་པོ་སོགས། །དེ་བཞིན་གཟུགས་ལའང་དབྱེ་བ་གསུམ། །གཟུགས་རྡོ་རྗེ་མ་བཀུག་ནས་སུ། །ས་སྙིང་ལ་ནི་དབུལ་བར་བྱ། །ཡང་དག་གླུ་དང་བརྗོད་བྲལ་དབྱངས། །དེ་བཞིན་སྒྲ་ལའང་དབྱེ་བ་གསུམ། །སྒྲ་རྡོ་རྗེ་མ་ཡང་དག་
དགུག །ཕྱག་ན་རྡོ་རྗེ་ལ་ནི་དབུལ། །ག་པུར་ཨ་གར་ཛ་ཏི་སོགས། །དེ་བཞིན་དྲི་ཡང་དབྱེ་བ་གསུམ། །དྲི་རྡོ་རྗེ་མ་ཡང་དག་དགུག །ནམ་མཁའི་སྙིང་པོ་ལ་ཡང་དབུལ། །འོ་བྱེད་པ་དང་འཇིབ་པ་དང་། །རོ་དྲུག་དེ་བཞིན་དབྱེ་བ་གསུམ། །
རྡོ་རྗེ་རོ་མ་ཡང་དག་དགུག །འཇིག་རྟེན་དབང་ཕྱུག་ལ་ནི་དབུལ། །རྡོ་རྗེ་པད་མ་ཡང་དག་སྦྱོར། །གོས་དང་འཁྱུད་པའི་དབྱེ་བ་གསུམ། །རེག་བྱ་རྡོ་རྗེ་ཡང་དག་དགུག །སྒྲིབ་སེལ་ལ་ནི་དབུལ་བར་བྱ། །ཕྱི་ཡི་ཆོས་རྣམས་
འདི་དག་ཀུན། །བརྟགས་པ་དང་ནི་མ་བརྟགས་པའང་། །ཆོས་དབྱིངས་རྡོ་རྗེ་ཡང་དག་དགུག །འཇམ་པའི་རྡོ་རྗེ་ལ་ནི་དབུལ། །དེ་བཞིན་ཕྱི་དང་ནང་དང་ནི། །གཉིས་ཀ་ཡང་ནི་མི་དམིགས་པ། །གཟུགས་ལ་གསུམ་དུ་བྱས་
ནས་ནི། །ལྷ་རྣམས་ལ་ནི་དབུལ་བར་བྱ། །ཡུལ་ནི་ལྔ་ནི་ངེས་གནས་ཏེ། །རྒྱུད་ལྔར་ངེས་པར་འབྱུང་བ་ནི། །རྨི་ལམ་རླུང་དང་ལྡན་པ་རུ། །འདོད་པ་ལྔ་རྣམས་སྤྱོད་པར་བྱེད། །དབང་པོ་གང་དང་གང་ལམ་གྱིས། །སྒྲུབ་པ་པོ་
ནི་ཡུལ་འཐོབ་བོ། །དེ་དག་ཐམས་ཅད་ཐུགས་རྗེ་ཆེ། །མཉེས་པའི་ཕྱིར་ནི་དབུལ་བར་བྱ། །ཡང་དག་དགའ་བའི་མེ་ཏོག་གིས། །རྡོ་རྗེ་ཉི་མ་པད་མ་འབྱུང་། །མེ་ཏོག་བདག་ཉིད་ལ་མཆོད་པ། །རྡོ་རྗེ་གསུམ་གྱི་དམ་ཚིག་
མཆོག །རྣམ་རྟོག་ཚུལ་གྱི་ཡུལ་མིན་ཞིང་། །དེ་ལྟར་གཏུམ་མོའི་མེ་ཡིས་ནི། །ངེས་པར་བསྲེགས་པ་དེ་ནི་སྤོས། །ཐུགས་ཀྱི་རྡོ་རྗེ་ལ་ནི་དབུལ། །རྡོ་རྗེ་པད་མ་ཡང་དག་པར། །ཞུགས་པ་ལ་སོགས་རིམ་ལས་བྱུང་། །རྣལ་འབྱོར་
88-1-237b

པ་ཡི་མི་ཤིགས་སྒྲ། །ཐུགས་རྡོ་རྗེ་ལ་དབུལ་བར་བྱ། །ཡི་གེ་ཧཱུྃ་ལས་ཡང་དག་བྱུང་། །སྔགས་ཀྱི་འོད་ཟེར་ཤིན་དུ་གསལ། །མར་མེ་འབར་བའི་ཡང་དག་འོད། །ཐུགས་ཀྱི་རྡོ་རྗེ་ལ་དབུལ་བྱ། །བདེ་བ་ཆེན་པོ་ནམ་མཁར་གནས། །
བྱང་ཆུབ་སེམས་ནི་སད་པ་དང་། །དེ་ཉིད་ཀྱིས་ཀྱང་བྱུགས་པ་ནི། །ཐུགས་ཀྱི་རྡོ་རྗེ་ལ་དབུལ་བྱ། །འདིར་ནི་གང་དང་གང་ལོངས་སྤྱོད། །དབང་པོ་ཐམས་ཅད་ཡང་དག་བསྟེན། །དེ་དག་ཐམས་ཅད་ཐུགས་རྡོ་རྗེ། །བཟའ་བའི་སྣོད་དུ་
མཆོད་པར་བྱ། །དགོད་དང་སྒེག་དང་རྩེ་འཇོ་ནི། །སྣ་ཚོགས་ཀྱིས་ནི་སེམས་དགའ་བྱེད། །རྣམ་པར་ཐར་པའི་སྒོ་དག་དང་། །ཐུགས་ཀྱི་རྡོ་རྗེ་ལ་ནི་དབུལ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་
ལས་ནང་གི་བདག་ཉིད་མཆོད་པའི་ཆོ་གའི་རྣམ་པར་དབྱེ་བའི་ལེའུ་སྟེ་ལྔ་བཅུ་རྩ་དྲུག་པའོ།། །། དེ་ནས་བཅོམ་ལྡན་རྡོ་རྗེས་གསུངས། །ལྷ་མོ་ཡི་ནི་མཚན་ཉིད་མཆོག །རྣལ་འབྱོར་བདེ་ལ་རྟོག་པ་རྣམས། །རྩ་
དབྱེ་བ་ཡི་རང་བཞིན་གྱིས། །རྟག་ཏུ་ལུས་ཀྱི་རྩེ་འཇོ་བྱ། །དེ་ཡི་ལྷ་རྣམས་སུ་ནི་བཤད། །རྟག་ཏུ་བདེ་བ་ཀུན་གྱིས་དགའ། །ཀུན་ནས་རྣམ་པར་སྒེག་པའི་ལུས། །བདེ་བ་ཆེན་པོས་ཀུན་དུ་ཁྱབ། །ལྷ་ཉིད་དུ་ནི་ཡང་དག་བརྗོད། །དགའ་དང་
མཆོག་ཏུ་དགའ་བ་དང་། །བྲལ་བ་ལྷན་ཅིག་སྐྱེས་སྐད་ཅིག །ཆར་པ་དང་ནི་རྩེ་འཇོ་དང་། །ཀུན་ནས་ལྷག་པར་སྒེག་པ་དང་། །བརྒྱལ་དང་སད་པར་གྱུར་པ་དང་། །དེ་རྣམས་ལྷ་མོ་རུ་ནི་བཤད། །ཕྱི་རོལ་དུ་ནི་བྱུང་བ་ན། །གང་ཕྱིར་ཡང་
དག་སྦྱོར་བར་འགྱུར། །ལུས་ཀྱི་རྩ་རྣམས་ཡང་དག་སད། །དེ་ཕྱིར་རྣལ་འབྱོར་མར་ནི་བཤད། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ལྷ་མོའི་མཚན་ཉིད་ཀྱི་ལེའུ་སྟེ་ལྔ་བཅུ་རྩ་བདུན་པའོ།། །།
 དེ་ནས་བཅོམ་ལྡན་རྡོ་རྗེས་གསུངས། །ཨེ་བྃ་ཞེས་བྱ་ཡི་གེ་གཉིས། །ཨེ་ནི་སྟོང་པ་ཉིད་དུ་བཤད། །དེ་བཞིན་བྃ་ནི་ཐུགས་རྗེ་དང་། །ཐིག་ལེ་དེ་གཉིས་སྦྱོར་ལས་བྱུང་། །དེ་ནི་རྣལ་འབྱོར་རྨད་མཆོག་བྱུང་། །ཨེ་བྃ་གཉིས་

88-1-238a

ནི་སངས་རྒྱས་དང་། །མདོར་བསྡུས་ཆོས་ཀྱི་ཕྱག་རྒྱའོ། །རྒྱལ་པོ་ཆེན་པོ་ཕྱག་རྒྱ་གཉིས། །རྒྱུད་རྣམས་སུ་ནི་ཐོག་མར་གསུངས། །ཨེ་ནི་བྷ་གའི་མཚན་ཉིད་དོ། །པད་མའི་སྟེན་དུ་ཤེས་པར་བྱ། །རྟེན་པ་
རྡོ་རྗེ་ཞེས་ནི་གསུངས། །བརྟན་པ་རྡོ་རྗེ་འཆང་བ་ཡི། །དེ་ལ་གནས་པའི་ཐིག་ལེའི་གཟུགས། །སྣ་ཚོགས་སྤྲུལ་པ་སྟོན་པར་བྱེད། །བདེ་བ་ཀུན་གྱི་གཞི་ཡི་གནས། །རྡོ་རྗེ་སེམས་དཔའ་བདེ་བ་ཆེ། །ཨེ་ནི་གསང་བའི་
མཁའ་དབྱིངས་སམ། །བྷ་ག་ཆོས་འབྱུང་པད་མ་ལ། །རྣལ་འབྱོར་སེང་གེའི་གདན་ལ་བཞུགས། །མཆོག་ཏུ་རྨད་བྱུང་སྟོན་པར་མཛད། །རྡོ་རྗེ་སེམས་དཔའ་བྃ་རྡོ་རྗེ། །རྡོ་རྗེ་འཇིགས་བྱེད་དབང་ཕྱུག་དང་། །ཧེ་རུ་ཀ་དང་དུས་
འཁོར་ལོ། །དང་པོ་སངས་རྒྱས་ལ་སོགས་མཚན། །ཨེ་བྃ་དེ་བཞིན་གཤེགས་པའི་རྒྱ། །གཉིས་སུ་མེད་པའི་བདེ་མཆོག་དང་། །སྟོང་ཉིད་སྙིང་རྗེ་དབྱེར་མེད་དང་། །གང་ལ་དེ་ཉིད་མངོན་པར་བརྗོད། །དེ་ལ་དེ་བཞིན་གཤེགས་
པའི་རྒྱ། །གཉིས་མེད་ཡེ་ཤེས་མཚན་མ་ནི། །རྒྱུད་ཀུན་གྱི་ནི་གླེང་གཞིར་གསུངས། །རྒྱུད་ཀུན་གྱི་ནི་དོན་བསྡུས་པ། །སྟོང་ཉིད་སྙིང་རྗེ་མི་ཕྱེད་པ། །གང་ལ་དེ་ཉིད་མངོན་པར་བརྗོད། །ཨེ་བྃ་ཞེས་བྱའི་ཡི་གེ་གཉིས། །གང་ལ་
འདི་ཉིད་མེད་པ་ནི། །དེ་ལ་དེ་ཁོ་ན་ཉིད་མེད། །གང་ལ་དེ་ཉིད་ཡོངས་ཤེས་པ། །བཙོ་མའི་གསེར་ལྟར་གསལ་པོར་ནི། །རྒྱུད་ནི་ལེགས་བཤད་དེ་ཉིད་ཤེས། །སྔགས་ཀྱི་སྤྱོད་པ་ལ་གནས་པར། །དེ་ལྟར་འདི་ནི་དེ་ཉིད་མཆོག །
ཨེ་བྃ་དོན་ནི་རྣམ་པར་ངེས། །ཆོས་ཀྱི་ཕྱག་རྒྱ་ཡི་གེ་གཉིས། །དང་པོའི་ངག་ཏུ་ཡང་དག་བཤད། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཨེ་བྃ་ཞེས་བྱ་བ་དང་པོའི་ངག་བཤད་པ་དང་རྒྱུ་མཚན་
བསྟན་པའི་ལེའུ་སྟེ་ལྔ་བཅུ་རྩ་བརྒྱད་པའོ།། །། དེ་ནས་གཞན་ཡང་བཤད་ཀྱིས་ཉོན། །ཨེ་བྃ་ལ་སོགས་དོན་རྒྱས་པ། །གང་གིས་ཡང་དག་ཡོངས་སུ་ཤེས། །ཆོས་ཀྱི་དེ་ནི་ཡང་དག་རྟོགས། །

88-1-238b

ཨེ། ཨེ་ནི་ཤེས་རབ་དམ་པ་སྟེ། །འདོད་ཆགས་བྲལ་སོགས་སྐད་ཅིག་བདག །སྲིད་པ་གསུམ་ན་ཡོངས་ཤེས་པ། །འདི་ནི་རྩ་བར་རྣམ་པར་བསྟན། །བྃ། འོད་མ་བསྒྲེང་བ་ལྟར་མཛེས་ཤིང་། །ཆགས་ལ་སོགས་པ་
རབ་བསྐྱེད་ལྡན། །སྣང་བ་གསལ་བ་རྣམ་པར་ཤེས། །མིང་ནི་ཐབས་ཤེས་བྱ་བ་ཡིན། །མ། རིག་ཆེན་རང་ཉིད་རྩ་བ་སྟེ། །མ་རིག་པ་ནི་ཟློག་པ་ཡིན། །མ་རིག་པ་ལས་འདི་འབྱུང་བས། །དེ་བས་སྣང་བ་འབྱུང་བའོ། །ཡཱ། འགྲོ་བ་
རྣམ་ཤེས་གསུམ་དང་པོའི། །དེ་མིང་སྣང་བ་གསལ་བ་སྟེ། །དེ་ནི་སྟོང་པ་ཆེར་འགྱུར་ལ། །དེ་ཡང་འོད་གསལ་བར་འགྲོའོ། །ཤྲུ། སྣང་བ་གསུམ་གྱི་མཚན་ཉིད་ཅན། །གང་འདི་རྣམ་ཤེས་གསུམ་ཐོབ་པ། །སེམས་
ཅན་ཁམས་ནི་མ་ལུས་པའི། །རང་བཞིན་རྩ་བ་འདི་ཡིན་ནོ། །ཏི། དེ་ནི་རེ་རེའི་དོན་སྣང་བ། །རླུང་གིས་བླངས་ནས་འཛིན་བྱེད་པ། །རླུང་དང་ལྡན་པའི་རྣམ་ཤེས་ནི། །ཀུན་དུ་འགྲོ་ལ་གནས་པར་འགྱུར། །ཨེ། འདི་ནི་རླུང་ཁམས་
ཆེན་པོ་སྟེ། །རྣམ་ཤེས་གསུམ་གྱི་བཞོན་པ་ཡིན། །དེ་ཡིས་རང་བཞིན་དག་ཏུ་ནི། །ཇི་ལྟ་ཇི་ལྟར་འགྲོ་བར་འགྱུར། །ཀ ། སྲ་བའི་ས་ཁམས་ཆུ་ཉིད་དང་། །དེ་བཞིན་མེ་དང་རླུང་དག་ནི། །རྣམ་པར་ཤེས་པར་བླངས་ནས་སུ། །སྲིད་
གསུམ་གནས་སུ་སྐྱེ་བར་འགྱུར། །སྨི། འདི་ནི་ཕུང་པོ་ལྔ་རྣམས་སུ། །འབྱུང་བ་འདུས་བྱས་མཚན་ཉིད་ནི། །གཟུགས་ཚོར་འདུ་ཤེས་འདུ་བྱེད་དང་། །རྣམ་ཤེས་ཉིད་ནི་ལྔ་པའོ། །ས། མཉམ་ཉིད་སོ་སོར་རྟོག་པ་དང་། །བྱ་བ་
གྲུབ་པ་ཉིད་དང་ནི། །མེ་ལོང་དང་ནི་ཆོས་ཀྱི་དབྱིངས། །འདི་ནི་ཡེ་ཤེས་ལྔ་པོ་ཡིན། །མ། ཡིད་ཀྱི་སྐྱེ་མཆེད་ཉིད་དང་ནི། །མིག་དང་དེ་བཞིན་རྣ་བ་དང་། །སྣ་དང་ལྕེ་དང་ལུས་རྣམས་ཏེ། །འདི་ནི་སྐྱེ་མཆེད་རྣམས་འབྱུང་བའོ། །ཡེ། གང་
ཡང་ཁམས་གསུམ་སེམས་ཅན་རྣམས། །སྲོག་དང་རྩོལ་བ་ལ་བརྟེན་པ། །གསང་སྔགས་རྒྱལ་པོ་ཟློས་བཞིན་དུ། །མི་ཤེས་བསམ་གཏན་ཀློག་པ་སྤངས། །བྷ། འདི་ལས་རང་བཞིན་ཆགས་པ་དང་། །ཆགས་མེད་ལ་སོགས་

88-1-239a

པར་ཡང་འགྱུར། །དེ་ལས་དགེ་དང་མི་དགེའི་ལས། །དེ་ལས་སྐྱེ་བ་འབྱུང་བ་ཡིན། །ག །འགྲོ་བ་འབྱུང་བའི་ཕུང་པོ་རྣམས། །སངས་རྒྱས་ལྔ་ཡི་བདག་ཉིད་དེ། །མངོན་པར་བྱང་ཆུབ་རྣམ་ལྔ་ཞེས། །མིང་གིས་
རབ་ཏུ་བསྐུལ་བ་ཡིན། །བཱན། རླུང་དང་ཆུ་དང་མེ་དང་ས། །སྤྱན་ལ་སོགས་པ་བཞི་པོ་སྟེ། །ཡེ་ཤེས་བདག་ཉིད་ཅན་གསུམ་དུ། །ཤེས་བྱ་སངས་རྒྱས་བྱང་ཆུབ་སྟེར། །ས། ཐམས་ཅད་དེ་བཞིན་གཤེགས་པའི་སྐུར། །ཕྱག་རྒྱ་
བཞིས་ནི་རྒྱས་བཏབ་ཅིང་། །མིག་ལ་སོགས་པའི་བདག་ཉིད་དེར། །ས་སྙིང་ལ་སོགས་རྒྱལ་སྲས་སོ། །རྦ། རོལ་པས་དགའ་བ་གང་ཡིན་པའི། །ཁྲོ་བོའི་རྒྱལ་པོ་སྟོབས་ཆེན་རྣམས། །དེ་ཡི་ཕྱོགས་མཚམས་ངོ་བོ་རུ། །དཔུང་པ་
ཡན་ལག་རྣམས་སུ་བརྟག །ཏ། དེ་དང་དེ་ཡི་རིགས་ལས་བྱུང་། །ལྷ་དང་ལྷ་མོ་ཐ་དད་པ། །དེ་ནི་ཡོད་མིན་དེ་དག་ཀྱང་། །འགྲོ་བའི་དོན་ཕྱིར་སྟོན་པ་ཡིན། །ཐཱ། འདི་ལས་གཉིས་མེད་མཐོང་བ་ཡི། །རྣལ་འབྱོར་པ་ནི་ཡེ་ཤེས་གསུམ། །མཐོང་
ཕྱིར་དམན་དང་བར་མ་དང་། །དམ་པའི་ཡུལ་ལ་གཞག་པར་བྱ། །ག །དབང་པོ་རང་ཉིད་རང་ཡུལ་ལ། །འགྲོ་བར་འགྱུར་བ་དེ་དང་དེ། །དབང་པོའི་སྤྱོད་ཡུལ་གང་དང་གང་། །དེ་དང་དེ་སྣང་ཙམ་ཉིད་དོ། །ཏ། དབང་པོ་དེ་ཡི་ལམ་ནས་ནི། །སྒྲུབ་པ་པོས་ནི་
ཡུལ་ཐོབ་པ། །དེ་བཞིན་དེ་ལས་མ་གསུངས་པར། །ཚིམ་པར་བྱ་ཕྱིར་དབུལ་བར་བྱ། །ཀཱ། སྐུ་གསུམ་དག་ནི་ཐ་དད་པར། །སྐྱོབ་པ་ཡིས་ནི་ཡང་དག་བསྟན། །རྫོགས་པའི་རིམ་གྱིས་སྦྱོར་བ་ཡིས། །གཅིག་ཏུ་ཡང་ནི་འགྱུར་བ་ཡིན། །ཡ། 
གང་ཞིག་སངས་རྒྱས་སྐུ་མཚན་ཉིད། །ཀུན་རྫོབ་བདེན་པར་གསུངས་པ་ནི། །དེ་ཉིད་རྫོགས་རིམ་སྦྱོར་བ་ཡིས། །འོད་གསལ་བར་ནི་རྣམ་དག་འགྱུར། །བཱ་ཀ ། ཚིག་གི་ལམ་གྱི་ཡུལ་འདི་ཉིད། །གཙོ་བོ་ཡེ་ཤེས་སྐུ་རང་བཞིན། །
སེམས་ཅན་ཀུན་ལ་ཕན་པའི་ཕྱིར། །འཇའ་ཚོན་བཞིན་དུ་སྣང་བ་ཡིན། །ཙི་ཏ། །སེམས་དང་སེམས་བྱུང་མ་རིག་པ། །ཤེས་རབ་ཐབས་དང་ཉེར་ཐོབ་དང་། །སྟོང་དང་ཤིན་དུ་སྟོང་པ་དང་། །སྟོང་ཆེན་ཞེས་ཀྱང་རབ་ཏུ་བརྗོད། 

88-1-239b

།རང་བཞིན་སྣང་བའི་དབྱེ་ཤེས་ན། །དེ་ནས་སྤྱོད་པ་རབ་ཏུ་བྱ། །ལས་ཀྱི་ལུས་ནི་ཡོངས་སྤངས་ནས། །རྡོ་རྗེ་སྐུ་ཉིད་ཐོབ་པར་འགྱུར། །ཧྲྀ། ཐུགས་ལ་འཇིག་རྟེན་པ་རྣམས་ཀྱི། །དོན་སྤྱོད་བཞག་ནས་དེ་བཞིན་གཤེགས། །ཀུན་
རྫོབ་ཏུ་ནི་སྤྲུལ་སྐུར་གནས། །ཇི་ལྟ་ཇི་ལྟར་འདོད་པ་སྤྱོད། །ད། ཡིད་བཞིན་ནོར་བུ་མཆོག་བཞིན་དུ། །འདོད་པ་ཐམས་ཅད་སྟེར་བར་འགྱུར། །སངས་རྒྱས་རྣམས་ཀྱི་ཕུན་ཚོགས་ཀྱང་། །སྟོབས་ཀྱིས་བླངས་ནས་སྤྱོད་པར་
འགྱུར། །ཡ། རྣལ་འབྱོར་དབང་པོ་གང་གང་འདོད། །དེ་ནི་སྒྲིབ་པ་མེད་པར་བྱ། །མཉམ་པར་མ་བཞག་རྣལ་འབྱོར་གྱིས། །རྟག་ཏུ་མཉམ་པར་འཇོག་པར་འགྱུར། །བ། རྡོ་རྗེ་པད་མོ་མཉམ་སྦྱོར་བས། །ཡེ་ཤེས་གསུམ་གྱི་ཆ་རིག་
པ། །བློ་ལ་གོས་དང་མ་གོས་པ། །དེར་ནི་བདེ་བས་རྟག་ཏུ་གནས། །ཛྲ། སྒྱུ་མ་ལྟ་བུའི་ཏིང་འཛིན་གྱིས། །དངོས་དག་ཀུན་ལས་རྣམ་པར་རོལ། །སངས་རྒྱས་མཛད་པ་བྱེད་བཞིན་དུ། །གཏན་ལ་ཕབ་པའི་གཞི་ལ་གནས། །ཡོ། །རྣལ་
འབྱོར་ལྷག་པའི་རྣལ་འབྱོར་དང་། །རྣལ་འབྱོར་ཆེན་པོ་རང་ཉིད་འགྱུར། །རྡོ་རྗེ་ཅན་དང་མཁའ་འགྲོ་མ། །གང་ཡང་རྣལ་འབྱོར་དེ་རང་ཉིད། །ཥཱིཏ། དགག་པ་དག་ཀྱང་བྱེད་པས་ན། །བྱ་དང་བྱ་མིན་རྣམ་སྤངས་ཏེ། །པད་མ་ལ་ནི་
འདམ་གྱིས་བཞིན། །ངོ་བོ་ཉིད་ཅེས་གོས་མི་འགྱུར། །བྷ། ཡོན་ཏན་བརྒྱད་དང་ཉེར་ལྡན་པས། །སེམས་ཅན་ཐམས་ཅད་རིགས་འགྱུར་ཞིང་། །འཇིག་རྟེན་ཁམས་ནི་མ་ལུས་པར། །བདག་ཉིད་ཡེ་ཤེས་ལུས་ཀྱིས་སྤྱོད། །གེ། གཙོ་བོ་
གང་དུ་སྤྱོད་པ་ཡི། །དེ་ཡི་ཁྱིམ་ནི་ནམ་མཁའ་ཉིད། །བདེ་བ་ཆེན་པོའི་ཏིང་འཛིན་གྱིས། །དེ་ཉིད་དུ་ནི་རྟག་ཏུ་རོལ། །ཥུ། འདི་ལ་སྣང་བ་དབྱེ་བ་ལ། །ཐུན་མཚམས་ཉིན་མོ་མཚན་མོ་ཡི། །འཇིག་རྟེན་ཐ་སྙད་བྱས་པ་ཡིས། །
ཡེ་ཤེས་གསུམ་ནི་མཐོང་ཕྱིར་རོ། །བེ། སྣ་ཚོགས་པ་ཡི་ཐ་སྙད་དག །འཇིག་རྟེན་པས་ནི་ཡོངས་བརྟགས་པ། །ལམ་གསུམ་གྱི་ནི་དབྱེ་བ་ཡིས། །ཡེ་ཤེས་གསུམ་ལས་བྱུང་བའོ། །ཛ། སྐྱེ་དང་གནས་དང་འཇིག་པ་དང་། །

88-1-240a

སྲིད་པ་བར་མར་གནས་པ་སྟེ། །ཇི་སྙེད་འཇིག་རྟེན་གྱིས་བརྟགས་པ། །སེམས་ཀྱི་རླུང་ནི་རྣམ་འཕྲུལ་ལོ། །ཧ། དགོད་དང་རྩེད་མོ་བྱེད་པ་དང་། །གར་གྱི་ཉམས་དགུར་ལྡན་པ་དང་། །སྔགས་དང་
ཕྱག་རྒྱ་རྣམ་རྟོག་པ། །རྡོ་རྗེ་སེམས་དཔའི་སྤྱོད་པའོ། །ར། བདག་བྱིན་བརླབས་ཆེན་མ་གཏོགས་པ། །རིན་ཆེན་གཞན་དག་འདི་ན་མེད། །མེ་ཡིས་སྦྱངས་པའི་ནོར་བུ་བཞིན། །རང་བཞིན་འོད་གསལ་རྣམ་པའོ། །འདི་སྐད་ལ་
སོགས་དང་པོའི་ངག །མཆོག་ཏུ་གསུངས་པའི་དོན་རྒྱས་པ། །གསང་བ་འདུས་པའི་རྩ་བའི་མདོ། །དེ་ཉིད་བཤད་པ་བསྡུས་པ་ནི། །རིམ་པ་ཇི་ལྟ་བ་བཞིན་ཤེས། །སྒྲུབ་པོའི་དེ་ཉིད་ཤེས་པ་ནི། །ཡེ་ཤེས་མཆོག་གི་མཚན་
ཉིད་ཀྱིས། །གང་དུ་གསལ་བར་མ་གསུངས་སོ། །རིམ་པ་འདི་ཡིས་རྣལ་འབྱོར་པས། །དཔལ་ལྡན་འདུས་པ་རྒྱས་བཏབ་པ། །དེ་ལྟར་རིམ་པ་འདི་ཡིས་ཤེས། །སེམས་ཅན་ཀུན་ལ་ཕན་སྐྱེད་པའོ། །རྣལ་འབྱོར་ཆེན་པོའི་རྒྱུད་
དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཨེ་བྃ་མ་ཡཱ་ཞེས་བྱ་བ་དང་པོའི་ངག་བཤད་པའི་ལེའུ་སྟེ་ལྔ་བཅུ་རྩ་དགུ་པའོ།། །། དེ་ནས་གཞན་ཡང་བཤད་ཀྱིས་ཉོན། །ནང་གི་བདག་ཉིད་
སྦྱིན་བསྲེག་མཆོག །ནང་དུ་རྒྱུ་བའི་འབྱུང་བ་རྣམས། །གང་གིས་ཐིམ་པར་གྱུར་པ་དང་། །རྣམ་རྟོག་བག་ཆགས་ས་བོན་ནི། །ཕུང་པོ་ལྔ་ཡི་བུད་ཤིང་དང་། །རྣལ་འབྱོར་ཡེ་ཤེས་ཆེན་པོའི་མེས། །རྟག་ཏུ་སྦྱིན་བསྲེག་རྨད་བྱུང་བྱ། །ལྟེ་
དབུས་གནས་པའི་སྒྲ་ཙམ་ནི། །སྒྲ་ཙམ་ཕྱི་རོལ་གསང་པད་མ། །དེ་ལ་རང་རྒྱུད་རླུང་གིས་ནི། །ཡོངས་སུ་བསྐུལ་བའི་མེ་ཡིས་ནི། །དབང་པོ་གཉིས་ནི་ཡང་དག་སྦྱོར། །གཟི་བརྗིད་གསལ་བར་རབ་ཏུ་འབར། །གང་ཚེ་མར་གང་གསང་པད་
མ། །དེ་ལ་འདི་ནི་སྣོད་དུ་བརྗོད། །ཧྃ་ནི་བླུགས་གཟར་ཞེས་བྱར་གསུངས། །རྡོ་རྗེ་དགང་གཟར་དུ་ནི་བརྗོད། །བྷ་ག་ཐབ་ཁུང་ཞེས་ནི་བཤད། །དབང་པོ་ལྔ་ཡི་བསྲེག་རྫས་དང་། །ཕུང་པོ་ཡམ་ཤིང་དུ་ནི་གྱུར། །མར་ནི་བྱང་ཆུབ་སེམས་

88-1-240b

སུ་བཤད། །གནམ་སྟོང་ནས་བརྩམས་ཉ་ཡི་བར། །ཇི་སྲིད་བྱེད་པ་གཤེགས་སུ་གསོལ། །མེ་ཐབ་ཐིག་ལེ་ཙམ་དུ་གསུངས། །བླུགས་གཟར་ནམ་ཡང་མི་འབོ་བ། །སངས་རྒྱས་གཏི་མུག་དགའ་ལ་སོགས། །གཟུགས་རྡོ་
རྗེ་སོགས་རྒྱལ་སྲས་རྣམས། །ཁྲོ་བོའི་རྒྱལ་པོ་བཅུ་ལ་ནི། །རྟག་ཏུ་སྦྱིན་བསྲེག་གིས་ཚིམ་བྱ། །རྡོ་རྗེ་སེམས་དཔའི་མཆོད་པ་གང་། །དེ་ཡང་དགང་བླུགས་སུ་ནི་བརྗོད། །ཧཱུྃ་ཕཊ་ཡང་དག་ལྡན་སྔགས་ཀྱིས། །ཆོ་ག་བཞིན་
དུ་བསྲེག་བླུགས་དབུལ། །དེ་ཡིས་ལུས་གནས་མཉེས་འགྱུར་ན། །ལྷ་ཡི་དམ་ཚིག་བླ་ན་མེད། །ཡིད་ལ་ཇི་ལྟར་འདོད་པ་རྣམས། །དེ་ལྟར་དངོས་གྲུབ་སྩལ་ནས་ནི། །སྦྱིན་བསྲེག་འདི་ནི་མཆོག་ཏུ་གསུངས། །དངོས་གྲུབ་
ཀུན་གྱི་འབྲས་བུ་སྩོལ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ནང་གི་བདག་ཉིད་ཀྱི་སྦྱིན་བསྲེག་གི་ལེའུ་སྟེ་དྲུག་བཅུ་པའོ།། །། དེ་ནས་བཅོམ་ལྡན་རྡོ་རྗེས་
གསུངས། །བདུད་རྩི་ལྔ་ནི་བཟའ་བ་ནི། །དངོས་གྲུབ་ཀུན་བྱེད་དེ་ཉིད་མཆོག །ཇི་ལྟར་རིགས་པའི་རིམ་པ་བཞིན། །རྣམ་སྣང་མཛད་དང་མི་བསྐྱོད་དང་། །དོན་ཡོད་གྲུབ་དང་འོད་དཔག་མེད། །རིན་ཆེན་རྒྱལ་མཚན་ལྔ་པོ་ནི། །
བདུད་རྩི་ལྔ་ཡི་མཚན་ཉིད་དོ། །ཁྲག་ནི་རིན་ཆེན་དབང་ཕྱུག་དང་། །བྱང་ཆུབ་སེམས་ནི་འོད་དཔག་མེད། །དེ་བཞིན་དོན་ཡོད་གྲུབ་པ་ཤ ། མི་བསྐྱོད་དེ་བཞིན་རྡོ་རྗེ་ཆུ། །དྲི་ཆེན་རྣམ་སྣང་མཛད་དུ་བཤད། །དེ་དག་བདུད་རྩི་ལྔ་ནི་
མཆོག །བས་མཐའ་ཉམས་དགའ་སྐྱེ་བོས་དབེན། །སྒྲ་ཡི་ཚེར་མ་རྣམ་པར་སྤངས། །དེ་ལ་ཁང་པ་བྱ་བ་ནི། །ཁང་པ་གཉིས་བརྩེགས་སྒོ་དང་བཅས། །ས་འོག་ཁང་པ་གཅིག་བྱ་ཞིང་། །གཞན་དག་དེ་ཡི་སྟེང་དུ་
བྱ། །གཞན་ནི་གསངས་ནས་བྱ་བ་སྟེ། །འཇིག་རྟེན་པ་ནི་གཅིག་ཏུ་ཤེས། །སྒྲུབ་པོས་དེ་ཉིད་ཀུན་ཤེས་ཤིང་། །སྔགས་ཤེས་བསམ་པ་རྒྱ་ཆེ་བ། །བརྟན་ཞིང་སྙིང་རྗེ་མཁས་པ་དང་། །ཡུལ་ལ་ཕྲག་དོག་རྣམ་པར་

88-1-241a

སྤངས། །སྒྲུབ་པོ་གཙོ་བོའི་ཡོན་ཏན་གང་། །དེ་ལྟ་བུ་ཉིད་སྒྲུབ་གྲོགས་མཆོག །ཆགས་དང་ཆགས་བྲལ་རྣམ་པར་སྤངས། །བརྩོན་ཞིང་བརྐམ་ཆགས་མེད་པ་དང་། །ཁྲོ་མེད་དང་བཅས་དཔའ་
བ་དང་། །མང་དུ་ཐོས་ཤིང་ཡོད་པར་ལྟ། །ཐོག་མ་གཉིས་ཀ་ཡི་ནི་ལུས། །འབྲས་བུ་སོགས་ཀྱིས་དག་བྱ་བ། །གནོད་མཛེས་སྐུལ་བྱེད་འབུམ་ཕྲག་གཅིག །དེ་རྗེས་སྔགས་པས་བཟླ་བར་བྱ། །ཨོཾ་སུྃ་བྷ་ནི་སུྃ་བྷ་
ཧཱུྃ་ཧཱུྃ་ཕཊ། ཨོཾ་གྲྀཧྞ་གྲྀཧྞ་ཧཱུྃ་ཧཱུྃ་ཕཊ། ཨོཾ་གྲྀཧྞ་པ་ཡ་གྲྀཧྞ་པ་ཡ་ཧཱུྃ་ཧཱུྃ་ཕཊ། ཨོཾ་ཨཱ་ན་ཡ་ཧོ་བྷ་ག་བན་བིདྱཱ་རཱ་ཛཱ་ཧཱུྃ་ཧཱུྃ་ཕཊ། དེ་ནས་ཟླ་གཅིག་ཡི་གེ་གསུམ། །སྒྲུབ་པོས་མི་སྨྲ་བཟླས་པར་བྱ། །ཀུན་དུ་བཟང་པོ་འགྲོ་
བའི་གཙོ། །དེ་ནི་སྐད་ཅིག་རྨི་ལམ་མཐོང་། །དེས་ནི་བཀའ་ཡིས་བསྒོ་བ་ནི། །ཀ་ནྱ་མཆོག་ནི་བསྟེན་གྱིས་ལ། །སེམས་ཅན་དོན་ནི་མཚུངས་མེད་བྱོས། །ཇི་ལྟར་དེ་ཉིད་རྡོ་རྗེ་འཆང་། །བུ་མོ་སྐལ་ལྡན་མིག་ཡངས་
མ། །གཟུགས་དང་ལང་ཚོས་རྣམ་པར་བརྒྱན། །བརྐམ་ཆགས་མེད་ཅིང་ཆགས་བཅས་སེམས། །བསྒེག་པས་མྱོས་ཤིང་བསྒྱིངས་དང་བཅས། །ནུ་རྒྱས་སྔོ་བསངས་ཉམས་དགའ་བ། །རྣམ་རྟོག་མེད་ཅིང་མང་དུ་ཐོས། །
སྒྲུབ་པོས་དེ་སྲིད་འདོད་པར་བྱ། །ཇི་སྲིད་ཁུ་བ་དང་བཅས་གྱུར། །དེ་ནས་གདོང་ནི་པད་མ་གཉིས། །གཉིས་ཀ་འབྱུང་བ་བླངས་ནས་ནི། །པད་མའི་སྣོད་དེར་གཞག་པར་བྱ། །མཚན་ཉིད་བཟང་པོར་ཞག་བདུན་དུ། །གླང་པོ་
རྟ་ཁྱི་བ་ལང་མི། །དཔྱིད་ཟླ་ཐ་ཆུངས་གཉིས་ཀ་ཤར། །སྐྱེ་གནས་ནས་ནི་བླངས་ནས་ནི། །དེ་བཞིན་དེ་རུ་རིམ་པ་བཞིན། །པད་སྣོད་དེ་ཉིད་ལ་ནི་དེར། །ཞག་བདུན་བར་དུ་གཞག་པར་བྱ། །ཉིན་ཞག་ཉི་ཤུ་རྩ་གཅིག་ཏུ། །
ཡི་གེ་གསུམ་ནི་སྔགས་བཟླས་བྱ། །འདུ་འཛི་མེད་ཅིང་དབེན་པའི་གནས། །ཙན་དན་བཟང་པོ་བྱུགས་ནས་ནི། །ཛཿཧཱུྃ་བྃ་ཧོཿའི་སྔགས་བཀོད་པའི། །པད་མོའི་སྣོད་ལ་གཞག་པར་བྱ། །ར་ཡི་འོ་མ་ཏིལ་གྱི་མར། །མར་དང་ལི་ཁ་དཀར་པོ་དང་། །

88-1-241b

ཆ་བསྙམས་བསྐོལ་བ་བྱས་ནས་ནི། །དེ་དང་ལྷན་ཅིག་སྣོད་བཞག་བསྲེ། །རྒྱ་ཤུག་ཚིག་གུ་ཚད་ཙམ་གྱིས། །བློ་དང་ལྡན་པས་རི་ལུ་བྱ། །གྲིབ་མ་ལ་ནི་བསྐམ་བྱས་ནས། །རིམ་གྱིས་བསྐྱེད་ཅིང་བཟའ་བར་བྱ། །རྡོ་རྗེ་
མིང་སྲིང་སྤུན་དང་ནི། །རྣལ་འབྱོར་མ་དང་ལྷན་ཅིག་བཟའ། །ཟླ་བ་གཅིག་ནས་དེ་ནས་ལྷག །མཛའ་བོ་རྣམས་དང་ཡང་དག་བསྒོ། །མར་ངོའི་ཚེས་བརྒྱད་ཚེས་བཅུ་འམ། །ཡང་ན་བཅུ་བཞི་ནས་བརྩམས་ཏེ། །དེ་ལ་གཏོར་
མ་བྱ་བ་ནི། །ལས་ཀུན་ལ་ནི་བླ་ན་མེད། །དེ་ལས་ཀྱང་ནི་དངོས་གྲུབ་སྐྱེ། །ཕྱག་རྒྱ་ཆེན་པོ་མངོན་རྫོགས་དང་། །དངོས་གྲུབ་རྒྱས་དང་ཞི་བ་སོགས། །དེ་ཡིས་འབད་མི་དགོས་པར་འཐོབ། །རླུང་གི་དེ་ཉིད་ཡང་དག་སློབ། །མཁའ་སྤྱོད་
ཉིད་ནི་ཐོབ་པར་འགྱུར། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་བདུད་རྩི་ལྔ་བཟའ་བའི་ཆོ་གའི་ལེའུ་སྟེ་དྲུག་བཅུ་རྩ་གཅིག་པའོ།། །། དེ་ནས་གཞན་ཡང་བཤད་
ཀྱིས་ཉོན། །ཚོགས་ཀྱི་འཁོར་ལོ་ཆོ་ག་མཆོག །གང་གིས་མཆོད་པ་ལས་བྱུང་བ། །རྒྱལ་སྲས་རྣམས་ཀྱི་དངོས་གྲུབ་མཆོག །རྣལ་འབྱོར་ཆེ་དང་ལྷན་ཅིག་ཏུ། །སྒྲུབ་པའི་ཕྱིར་ནི་ཡང་དག་གནས། །ཕྱག་རྒྱ་བརྡ་ནི་ཡོངས་
ཤེས་ཤིང་། །དེ་དང་དམ་ཚིག་ལ་ནི་འཇུག །དེ་རྣམས་ཚོགས་ནི་རབ་མཆོག་དང་། །ཚོགས་ཀྱི་འཁོར་ལོ་ཞེས་ནི་བརྗོད། །ཀུན་ཀྱང་དམ་ཚིག་ལ་གནས་པ། །རྟོག་པ་ཐམས་ཅད་རྣམ་པར་སྤངས། །བླ་མ་ལ་དད་དམ་ཚིག་གནས། །
གཏོང་སོགས་ཡོན་ཏན་རྣམས་ཀྱིས་བརྒྱན། །ཐབས་ཞེས་བྱ་བ་བགེགས་མེད་ན། །ཚོགས་ཀྱི་འཁོར་ལོ་ལ་ནི་འཇུག །གཞན་དུ་སྐྱོན་ནི་འབྱུང་འགྱུར་ཏེ། །འཁོར་ལོ་ལ་ཡང་འགྲུབ་མི་འགྱུར། །ཤེས་རབ་ཀྱང་ནི་ཐབས་དང་
མཚུངས། །མཛའ་བོ་བཟང་དང་རབ་ཏུ་མཁས། །ལོ་ནི་ཉི་ཤུ་རྩ་ལྔ་ལོན། །ལྷག་མ་ཡོངས་སུ་སྤངས་ནས་ནི། །ཐབས་དང་སོ་སོར་ཤེས་རབ་དང་། །ཀུན་ལ་གཅིག་ནི་ཕན་ཡོན་མེད། །ཐོག་མ་ཡིད་འོང་ཉམས་དགའ་བར། །མེ་ཏོག་གི་ནི་

88-1-242a

དཀྱིལ་འཁོར་བྱ། །དེ་ཉིད་སྣ་ཚོགས་མཆོད་པ་ནི། །ལེགས་པར་མཉམ་པར་བཞག་ནས་མཆོད། །གཙོ་བོ་དངོས་པོ་ཀུན་གྱིས་ནི། །རྡོ་རྗེ་སེམས་དཔའ་བཞིན་དུ་མཆོད། །ཚོགས་ཀྱི་མཆོད་པ་བྱས་རྗེས་ལ། །
དཀྱིལ་འཁོར་ལུགས་འབྱུང་ལུགས་བཟློག་པས། །དད་པ་དངོས་པོས་ཀུན་ནས་ནི། །མཉམ་པས་བལྟ་བས་བསྒོམས་ནས་ནི། །བསྟན་བཅོས་ཉམས་མྱོང་འཇིག་རྟེན་དང་། །འགལ་བ་དེ་ནི་གཞུག་མི་བྱ། །གཞན་ཡང་བསྟན་
བཅོས་ལས་གསུངས་པ། །མཚན་ཕྱེད་ན་ནི་དགུག་པར་བྱ། །སློབ་དཔོན་མགོན་ལ་ཡང་དག་མཆོད། །ཇི་ལྟར་གདན་སྟེངས་བཞུགས་གསོལ་ནས། །གདན་ནི་རྡོ་རྗེ་སེམས་དཔའ་ཡི། །ཕྱག་རྒྱ་ཆེན་པོ་ཡང་དག་ལྡན། །རྡོ་རྗེ་
སློབ་དཔོན་དེ་ཉིད་ཀྱང་། །མཁྱེན་པ་འཁོར་ལོའི་དབུས་ན་བཞུགས། །དཀྱིལ་འཁོར་པ་ནི་གཞན་རྣམས་དང་། །དེ་བཞིན་འཁོར་ལོ་གནས་པ་གཞན། །དཀྱིལ་འཁོར་པ་བཞིན་ཤེས་པར་བྱ། །ཚོགས་ཀྱི་འཁོར་ལོར་གཏམ་སྨྲ་དང་། །
རྩོད་དང་དེ་བཞིན་སྒྲུབ་པ་དང་། །མཆིལ་སྣབས་དོར་ཞིང་དགོད་པ་དང་། །རྐང་པ་ལ་སོགས་རྐྱོང་བ་དང་། །ཡང་དང་ཡང་དུ་ལྡང་བ་ནི། །དེ་ལ་དུས་ཀུན་དུ་མི་བྱ། །ཕྱག་རྒྱ་བརྡ་ཡི་ཚོགས་རྣམས་ཀྱིས། །བྱ་ཞིང་བྱ་བར་
ཤེས་པར་བྱ། །ཤེས་བཞིན་དུ་ནི་གར་དང་གླུ། །ཚོགས་ཀྱི་དཀྱིལ་འཁོར་དུ་ནི་བྱ། །གཙོ་བོ་ལ་ནི་སྣོད་ཀྱི་མཆོག །དུམ་བུ་གཅིག་པ་མཚན་ཉིད་བཟང་། །དེ་མེད་དུམ་བུ་གསུམ་པ་ལ། །མེ་ཏོག་སྣ་ཚོགས་རྣམས་ཀྱིས་མཆོད། །ལྷ་ཡི་ཆང་
ལ་སོགས་པ་གང་། །ལེགས་པར་མཉམ་པར་གཞག་སྟེ་དབུལ། །ཚོགས་རྣམས་ལ་ཡང་སོ་སོར་སྣོད། །མེ་ཏོག་ཚོགས་ཀྱིས་ཡོངས་གང་བ། །ཐོག་མར་གཏོར་མ་ཆེན་པོ་སྦྱིན། །སྔོན་བཞིན་བཟའ་བ་ལ་སོགས་ལྡན། །གང་གིས་དགའ་བ་
རྣམས་ཉམས་པ། །དེ་འདྲ་བཏུང་བར་མི་བྱའོ། །ཡང་དང་ཡང་དུ་ཕྱག་བྱས་ནས། །ཕྱག་རྒྱ་བཅིངས་ནས་བཏུང་བར་བྱ། །དེ་ནས་བཟའ་བ་ཐམས་ཅད་ནི། །སྦྱང་བྱ་སོགས་ཀྱིས་ཡང་དག་སྦྱངས། །ཨོཾ་དང་ཨཱཿདང་ཧཱུྃ་གིས་ནི། །སྦྱང་དང་སད་དང་

88-1-242b

རྟོགས་པར་བྱ། །གུར་གུམ་ཙན་དན་དཔའ་བོ་དང་། །གངས་དང་རི་དགས་ལྟེ་བ་དང་། །འདི་ནི་དག་བྱེད་བདུད་རྩི་ལྔ་། །བཟའ་བ་འདི་རྣམས་རབ་ཏུ་སྤྱོད། །སྦོམ་པོ་མིང་མེད་སྦྱོར་བ་ཡིས། །དཔའ་བོ་རྣལ་འབྱོར་མ་རིམ་བཞིན། །རང་གི་
ལྕེ་ཡིས་མྱང་བར་བྱ། །དཔའ་བོ་དབུས་སུ་དུས་ཀུན་དུ། །ཁ་ལ་དཔའ་བོ་རྣམ་པར་དགོད། །བླ་ན་མེད་པའི་མཆོད་པ་བྱ། །པད་མའི་ལྟེ་བའི་དབུས་ལ་ནི། །དཔའ་བོ་རྣམས་ཀྱི་གདན་དུ་བརྗོད། །གལ་ཏེ་དཔའ་བོས་མ་ཤེས་ན། །དཔའ་
བོ་དོན་གྱི་མཚན་ཉིད་རྣམས། །དངོས་གྲུབ་ཐམས་ཅད་སྩོལ་བ་ཡི། །འཁོར་ལོ་དེ་ཡི་འབྲས་བུ་མེད། །དེ་ལྟའི་འབྲས་བུ་ཅུང་ཟད་གང་། །ཕྱི་ནང་བདག་ཉིད་ཡང་དག་སྤྱོད། །དེ་ཡིས་རྣམ་དག་དངོས་གྲུབ་འགྱུར། །ཚོགས་ཀྱི་འཁོར་ལོའི་
འབྲས་བུ་སྟེར། །རྣལ་འབྱོར་མ་དང་ལྷན་ཅིག་འདྲེས། །རབ་ཏུ་བཤད་ཀྱིས་དེ་ཉིད་ཉོན། །འདུལ་བའི་མཁའ་འགྲོ་མ་འགའ་ཞིག །སེམས་རྟོག་མེད་པའི་ཕྱིར་འོངས་ནས། །དེ་ལ་དེ་ཚེ་སྨྲ་བ་ཡང་། །སྒྲུབ་པ་པོས་ནི་མི་བྱ་ཞིང་། །ཚིག་
ཙམ་གྱིས་ནི་ལན་མི་གདབ། །བདེ་བར་འོངས་སམ་ཕྱག་རྒྱས་བྱ། །དེ་ལ་ཅུང་ཟད་བྱ་སྨྲ་གང་། །སློབ་དཔོན་རང་ཉིད་ཀྱིས་ནི་བྱ། །ཡང་ན་བྱ་བ་ཐམས་ཅད་ནི། །ལས་ཀྱི་རྡོ་རྗེས་ཡང་དག་སྦྱར། །གང་ཕྱིར་རང་ཉིད་རྡོ་རྗེ་སེམས། །
ལས་ཀྱི་རྡོ་རྗེ་གཞན་དགའ་མིན། །སྣ་ཚོགས་གཟུགས་ཀྱི་རྣལ་འབྱོར་མ། །ཡང་དང་ཡང་དུ་དགུག་པར་བྱ། །དེ་ལ་གཡོ་བའི་སྤྱོད་པ་མེད། །སློབ་དཔོན་དཔའ་བོ་བཞིན་དུ་སྤྱོད། །གང་ཡང་སྐྱོན་གྱི་སྤྱོད་པས་ནི། །དེ་ཡི་ལུས་ནི་
ལྟུང་བར་འགྱུར། །ཤིན་དུ་དགའ་བ་ཡང་དག་སྐྱེས། །བཀའ་བསྒོ་གར་གྱི་སྤྱོད་པ་བྱ། །རྡོ་རྗེ་བཅིང་བ་དེ་ཡང་བྱ། །ལྷ་རྣམས་ཇི་ལྟར་མཉེས་པ་ཉིད། །མ་འམ་སྲིང་མོ་བུ་མོ་འམ། །གལ་ཏེ་མཆོད་པར་འདོད་པ་ན། །ཤེས་རབ་ཐབས་
ཀྱི་ཆོ་ག་ཡིས། །རྟོག་པ་མེད་པས་བསྟན་པར་བྱ། །རབ་མཆོག་དེ་ཡི་དངོས་གྲུབ་ནི། །ཐོབ་པར་འདི་ལ་ཐེ་ཚོམ་མེད། །ལྷག་མའི་གཏོར་མ་བླངས་ནས་ནི། །དགོན་པ་ཆེན་པོར་སོང་ནས་དོར། །ཀྵྨྲཱི་ཨུ་ཙྪིཥྚ་ཀྵེ་ཏྲ་པཱ། །ལཱ་ཡ་སྭཱ་ཧཱ་སྔགས་

88-1-243a

བརྗོད་བྱ། །གལ་ཏེ་དེ་ལྟར་རབ་བྱེད་པའི། །རྣལ་འབྱོར་པ་ཡིས་སླར་ཡང་མཐོང་། །དེ་ལྟར་དེ་ནི་ཡོངས་ཤེས་ནས། །རྣལ་འབྱོར་པ་ཡི་མཚན་ཉིད་མཆོག །གང་གིས་གདོང་ནི་འབར་བའི་འོད། །ཟླུམ་
ཞིང་འཇམ་ལ་མཛེས་པ་དང་། །སྨིན་མ་རིང་བ་དེ་ཤེས་བྱ། །འོད་དཔག་མེད་ཀྱི་རིགས་ལས་བྱུང་། །དེ་ལས་པད་མའི་ཕྱག་རྒྱ་བསྟན། །རུས་སྦལ་ཕྱག་རྒྱ་ལན་ཡིན་ནོ། །མཆུ་རླེ་མིག་དཀྱུས་རིང་བ་དང་། །ཁ་དོག་སེར་མོ་ཡིད་འཕྲོག་
མ། །འདི་ཡི་དཔྲལ་བར་རི་མོ་གསུམ། །ཇི་སྲིད་སྐྲ་མཚམས་བར་དུ་གནས། །གཡུལ་དུ་འཆི་བ་རྣམས་ཀྱིས་ནི། །གཏམ་དག་ལ་ནི་རབ་ཏུ་ཉན། །འདི་འདྲའི་ཉན་པ་མ་མཐོང་ནས། །མདུང་གི་ཕྱག་རྒྱ་བསྟན་པར་བྱ། །རྐང་པ་
གཡོན་པ་བསྐུམ་པ་དང་། །དེ་ནི་གར་བྱེད་རབ་ཏུ་སྟོན། །གཡོན་པ་ཡོངས་སུ་བསྐོར་ནས་ནི། །ཕྱག་རྒྱའི་ལན་ནི་བསྟན་པར་བྱ། །སྣ་ཚོགས་པ་ཡི་གོས་ལ་དགའ། །རིན་ཆེན་འབྱུང་ལྡན་རིགས་ལས་བྱུང་། །ཁ་དོག་གནག་ཅིང་གོས་
ཀྱང་གནག །།སྐྲ་ནི་འཁྱིལ་ཅིང་དར་གྱིས་བཅིངས། །དཔྲལ་བར་གཞུ་ཡི་རྣམ་པ་ཡི། །དེ་འདྲའི་མཚན་མ་མཐོང་ན་ནི། །རྟག་ཏུ་དེ་ཡི་སེམས་གཡོ་བ། །མ་མོ་ཞེས་ནི་རབ་ཏུ་གྲགས། །དྲིལ་བུའི་ཕྱག་རྒྱ་བསྟན་པར་བྱ། །དེ་ཡི་གཡོན་
པས་ཕྱག་རྒྱ་སྟོན། །མི་བསྐྱོད་རིགས་ལས་བྱུང་བར་ཤེས། །མཚན་མོ་འོངས་ནས་འགྲོ་བ་མཆོག །ཐུང་ངུ་ལྟོ་སྦོམ་ཁ་དོག་དཀར། །བྱིན་པ་སྦོམ་ཞིང་ཤིན་དུ་མཛེས། །ས་སྤྱོད་མར་ནི་ཤེས་པར་བྱ། །དུང་གི་ཕྱག་རྒྱ་ལན་ཡིན་
ནོ། །རྣམ་པར་སྣང་མཛད་རིགས་ལས་བྱུང་། །མིག་ཡངས་རྫི་མ་སྟུག་པ་དང་། །ཡན་ལག་ཀུན་ལ་བ་སྤུས་ཁྱབ། །སྔོ་བསངས་མིག་ནི་དམར་བ་དང་། །ཡན་ལག་ཕྲ་ཞིང་དཔུང་པ་རིང་། །དེ་ནི་མཁའ་འགྲོ་མ་རུ་གྲགས། །དོན་
ཡོད་གྲུབ་པའི་རིགས་ལས་བྱུང་། །དེ་འདྲ་བ་ནི་རབ་མཐོང་ན། །བ་དན་གྱི་ནི་ཕྱག་རྒྱ་དང་། །གཡོན་པའི་ཕྱག་རྒྱ་ལན་ཡིན་ནོ། །དེ་ལྟར་འབད་པས་ཤིས་ནས་ནི། །མཁས་པས་མཚན་མོ་སོང་ནས་ནི། །དེ་ལ་ཅུང་ཟད་འཇིགས་མི་བྱ། །

88-1-243b

གང་ཕྱིར་དེ་ཉིད་མཆོད་པར་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཚོགས་ཀྱི་འཁོར་ལོའི་མཆོད་པ་དང་རྣལ་འབྱོར་མ་དང་འདྲེས་པའི་ལེའུ་སྟེ་དྲུག་བཅུ་རྩ་གཉིས་པའོ།། །། 
དེ་ནས་གཞན་ཡང་བཤད་ཀྱིས་ཉོན། །གསང་བའི་ཚིག་ནི་བཤད་པ་ནི། །རྡོ་རྗེའི་གནས་སོགས་གནས་རྣམས་སུ། །རིགས་ཀུན་ལས་བྱུང་རྣལ་འབྱོར་མ། །མཚན་མོའི་འདྲེ་བའི་དམ་ཚིག་ནི། །འདི་འདྲ་བ་ཡི་ཚིག་རྣམས་དང་། །དེ་ལྟ་
བུ་ཡི་གསང་བ་ནི། །བདག་གིས་དད་པ་ཡིས་ནི་ཉོན། །སྃ་པོ་དང་ཀྃ་ཆང་འཐུང་བ། །བྲི་རྃ་ཤ་རུ་རྣམ་པར་བརྗོད། །ནི་ལ་ནཱ་པླ་ཏྲྃ་ཐོད་པ། །གུ་ལང་མི་ཡི་ཐོད་པས་བརྒྱན། །ཀུན་དུ་རྃ་འདོད་ཡང་དག་སྤྱོད། །ཚ་དྲུྃ་རོ་དྲུག་བཟའ་བ་པོ། །
སུྃ་སུ་ཊཱྃ་དབང་གཉིས་སྦྱོར་བ། །ཨ་ལོ་ཀྃ་ཡོད་པ་ཡི་མིང་། །ཤར་མི་ག་སྐམ་སྐལ་ཡོད་ཤེས། །ཙཀྲ་ཀ་ནི་སྐལ་མེད་བརྗོད། །ཏུྃ་ཤཱྃ་རྃ་ནི་ཁུ་ཚུར་ཤེས། །མེ་ཀ་མ་ཏྲྃ་གཅིག་ཏུ་བརྗོད། །ཙན་དྲ་མ་ནི་ཁྲག་ཏུ་བཤད། །ག་ནྃ་བཤང་
བར་ཡོངས་སུ་གྲགས། །གྷ་ནྃ་ཤ་ཆེན་དུ་ནི་བཤད། །ནི་ཛྃ་དྷ་དུ་ར་རུ་བརྗོད། །བྷ་ས་ནྃ་ནི་ཆུ་རུ་བཤད། །བ་ཀྵྃ་ཡན་ལག་རབ་ཏུ་བཤད། །ཤུ་པྃ་བཟང་པོ་ཞེས་ནི་བརྗོད། །ཧོ་ནི་ཚིམ་པ་ཞེས་ནི་གྲགས། །མརྒ་ལྟོགས་པ་
རུ་ནི་བརྗོད། །གྷི་ཏྃ་ལམ་དུ་བཤད་པ་དང་། །བྱོ་མ་གྃ་ནྃ་ཕ་རོལ་དཔུང་། །ཀ་མ་ཡ་ནི་གྱིས་ཤིག་བརྗོད། །ན་ག་རྃ་ནི་བདག་ལུས་བརྗོད། །པ་ཏ་ཀ་ནི་ཉོས་ཞེས་བརྗོད། །ཨ་ཛྃ་ཡ་ནི་མེ་ཞེས་བརྗོད། །ཤ་ཁམ་ཟ་བ་ཞེས་ནི་བརྗོད། །ར་གམ་འདོར་ནི་ཆོ་
ག་བརྗོད། །ཤ་ཏ་ཀྃ་མི་བཟའ་བར་བརྗོད། །ཅི་འདྲ་བ་ནི་སྔགས་ཞེས་བརྗོད། །ཤ་རྃ་ཁྱི་འཚེད་ཤ་ཞེས་བརྗོད། །རྃ་པ་ཀ་ནི་བླ་མར་བཤད། །ཀ་ཡ་འདིར་ནི་རྒྱལ་རིགས་བརྗོད། །ར་གྃ་རྗེ་རིགས་ཞེས་ནི་བཤད། །བ་རྃ་རྒྱ་
ནི་དམངས་རིགས་བརྗོད། །ཙ་བྃ་རིགས་ངན་ཞེས་ནི་བརྗོད། །ཤ་རྃ་སྨེ་ཤ་ཅན་དུ་བརྗོད། །བྷ་བ་ཙ་ཀྲྃ་ཀོ་ལྤགས་མཁན། །ཁད་ཀོམ་རི་སྲེག་མ་རུ་བཤད། །ས་མུན་ཏྲ་ནི་རྒྱལ་པོར་བརྗོད། །མི་རྃ་མ་ཡི་རིང་དུ་བརྗོད། །བྷ་

88-1-244a

ར་ཧ་གང་ཞེས་ནི་བཤད། །བིམྑྱ་ཕག་ཅེས་བརྗོད་པར་བྱ། །པ་ལྃ་ཤ་ནི་ཉ་ཞེས་བརྗོད། །དི་ནམ་ར་སྐྱེས་སུ་ནི་བཤད། །ནག་ཏུྃ་སྦྱིན་བསྲེག་ཏུ་ནི་བཤད། །མརྟ་ཨཧྣ་ནི་འདབ་ཆགས་བརྗོད། །ཧི་ར་ཕྱུ་
ནི་མེ་ཏོག་བརྗོད། །ཤ་དྲུལ་ལྃ་ནི་སྤོས་སུ་བཤད། །མཱ་ལ་ཏྲི་ནི་དྲི་རུ་བཤད། །ཤ་ཀུ་ནི་ཀ་མར་མེར་བརྗོད། །ཀ་ཤི་ཀྃ་ནི་གོས་སུ་བཤད། །ཀེ་ས་ར་ནི་གདོང་དུ་བརྗོད། །བྃ་ཏྲྃ་དཔྲལ་བ་ཞེས་སུ་
བཤད། །མ་ལ་སྨིན་མར་ཡང་དག་གྲགས། །ཀོ་བལ་ཡྃ་ནི་མིག་ཏུ་ཤེས། །ཨ་ད་ར་ནི་སོ་རུ་བརྗོད། །པལ་ལ་པོ་ནི་མཆུ་རུ་ཤེས། །པ་ཤ་མགྲིན་པ་རུ་ནི་གྲགས། །ཧཱུྃ་སོ་འཕྲག་པ་རུ་ནི་བཤད། །ཨ་གུ་རོ་ནི་དཔུང་པར་བརྗོད། །
སོ་སོ་རུ་ནི་ལག་པར་བཤད། །ཤྲི་པང་ལེ་ནི་ནུ་མར་བརྗོད། །ཛ་ཏི་ཕ་ལྃ་རྐང་པར་བརྗོད། །ད་ལ་ནྃ་ནི་ལྟེ་བར་བརྗོད། །པད་མ་འཛའ་ལམ་གསང་བའི་གནས། །ཀ་ཏྃ་བ་ཀྃ་བརླ་གཉིས་སོ། །བེ་སྃ་རྗེ་ངར་དུ་ནི་བཤད། །ཚ་ག་
ན་ནི་རྐང་པར་བརྗོད། །པ་ར་ཨ་ཀ་ཀེ་ས་ར། །སེན་མོ་ཞེས་ནི་ཡང་དག་བཤད། །པད་མ་གར་ནི་ག་ནི་སྣང་། །ཤ་ཀྲ་ཀུ་སུ་ལྃ་མལ་སྟན། །ཤག་ཏུ་བུ་ཞེས་བྱ་བར་བརྗོད། །ན་ལ་ནི་ནཱ་ལམ་སྟོན་མེད། །གོ་བག་ཥྨ་ལམ་ཐམས་ཅད་
བརྗོད། །སཱ་ག་རྃ་ནི་རྒས་པར་བཤད། །ས་ལྃ་རོ་ནི་ཞིམ་པོར་བརྗོད། །ཨ་ཀྵོ་རྃ་རིམ་མི་ཞིམ་བཤད། །མྲྀ་གྃ་མི་སྨྲ་བར་ནི་བཤད། །པ་གོ་ལ་མུ་དྃ་གླུ་ལེན། །མི་ཏྲ་གར་ཞེས་བྱ་བར་བརྗོད། །ཤབ་ཏ་ཚུལ་འཆོས་སུ་ནི་བཤད། །སྤར་ཤ་
ཞགས་པར་རབ་ཏུ་གྲགས། །ར་ས་སྒེག་མོའི་རོ་འབེབས་མ། །རུ་པྃ་རི་ཡི་རྩེ་མོའོ། །རྟ་ནེ་ཧ་ནི་བསད་པར་བཤད། །པཱ་རཱ་པ་ཏ་འཆི་བར་བརྗོད། །ཏ་མ་ལཱ་ཀོ་སེ་མ་ཡུལ། །ཕ་ལྃ་གྲོང་ཁྱེར་དུ་ནི་བརྗོད། །པྲ་ན་གྲོང་དུ་བཤད་
པ་ཡིན། །ཐྱ་ནྱ་སྲོག་ཅེས་བྱ་བར་བཤད། །ཀུ་རུ་ཏ་ར་མཁས་པར་བཤད། །ན་ཡ་ན་ནི་རྣམ་ཤེས་བརྗོད། །ཨ་བི་ན་པྃ་དགོད་པར་བཤད། །རུ་ཏི་ར་ནི་འཆང་བར་བརྗོད། །ཀུ་མུ་ར་ནི་ཉིན་མོར་བཤད། །ཀན་ཉ་མཚན་མོར་རབ་ཏུ་གྲགས། །

88-1-244b

ད་ས་ཉི་མ་ཕྱེད་དུ་བཤད། །ད་པི་མཚན་གྱི་ཆ་རུ་གྲགས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་གསང་བའི་ཚིག་བཤད་པའི་ལེའུ་སྟེ་དྲུག་བཅུ་རྩ་གསུམ་པའོ།། །། 
དེ་ནས་གཞན་ཡང་བཤད་ཀྱིས་ཉོན། །སྐུ་གསུང་ཐུགས་ཀྱི་དཀྱིལ་འཁོར་ནི། །སྐུ་ནི་མགོ་བོར་གནས་པ་སྟེ། །སུམ་བཅུ་རྩ་གཉིས་བྱང་སེམས་འབབ། །དེ་ནི་སོ་སོར་རབ་ཕྱེ་བས། །སྐུ་ཡི་འཁོར་ལོ་རུ་ཞེས་བྱ། །ཡི་གེ་
ཕྱི་མོའི་དབྱེ་བ་ཡིས། །གསུང་ལ་གནས་པར་རབ་ཏུ་ཤེས། །ཆགས་སོགས་བག་ཆགས་དབྱེ་བ་ཡིས། །ཐུགས་ཀྱི་འཁོར་ལོ་རུ་ནི་ཤེས། །སྐུ་གསུང་ཐུགས་ཀྱི་བཤད་པ་ནི། །སེམས་དཔའ་ཆེན་པོ་ཁྱོད་ཉོན་ཅིག །རྡོ་རྗེ་
སློབ་དཔོན་སྐུ་ལ་ནི། །རྒྱལ་བའི་སྐུ་ནི་རིམ་བཞིན་གནས། །དང་པོ་སྐུ་ཡི་རྡོ་རྗེ་ནི། །གཟུགས་ཕུང་ལ་ནི་ཡང་དག་བཞུགས། །དེ་རྗེས་ནམ་མཁའ་རྡོ་རྗེ་ནི། །ཚོར་བ་ཡི་ནི་ཕུང་པོར་བཞུགས། །བཅོམ་ལྡན་གསུང་གི་རྡོ་རྗེ་ནི། །
འདུ་ཤེས་ཀྱི་ནི་ཕུང་པོར་བཞུགས། །ལས་རྣམས་ཀྱི་ནི་རྡོ་རྗེ་ནི། །འདུ་བྱེད་ཀྱི་ནི་ཕུང་པོར་བཞུགས། །བཅོམ་ལྡན་ཐུགས་ཀྱི་རྡོ་རྗེ་ནི། །རྣམ་ཤེས་ཕུང་པོར་ཡང་དག་བཞུགས། །ཡང་འདིའི་ཤ་སོགས་ས་ཁམས་ལ། །
བཅོམ་ལྡན་འདས་ཡུམ་སྤྱན་བཞུགས་སོ། །ཁྲག་སོགས་ཆུ་ཡི་ཁམས་ལ་ནི། །བཅོམ་ལྡན་འདས་ཡུམ་མཱ་མ་བཞུགས། །དྲོ་བ་ལ་སོགས་མེ་ཁམས་ལ། །བཅོམ་ལྡན་འདས་ཡུམ་གོས་དཀར་བཞུགས། །མི་
བསྐྱོད་ལ་སོགས་རླུང་ཁམས་ལ། །བཅོམ་ལྡན་འདས་ཡུམ་སྒྲོལ་མ་བཞུགས། །དེ་མིག་དབང་པོ་གཉིས་ལ་ནི། །དེ་བཞིན་གཤེགས་པ་ས་སྙིང་པོ། །དེ་ཡི་རྣ་བའི་དབང་གཉིས་ལ། །བདེ་གཤེགས་ཕྱག་ན་རྡོ་རྗེའོ། །དེ་ཡི་
སྣ་བུག་གཉིས་ལ་ནི། །དེ་བཞིན་གཤེགས་པ་ནམ་མཁའི་མཛོད། །དེ་བཞིན་གཤེགས་པ་འཇིག་རྟེན་དབང་། །དེ་ཡི་ལྕེ་ཡི་དབང་ལ་གནས། །དེ་ཡི་ཡིད་ཀྱི་དབང་པོ་ལ། །དེ་བཞིན་གཤེགས་པ་འཇམ་དབྱངས་བཞུགས། །

88-1-245a

ཁམས་བཞིའི་རང་བཞིན་གོང་བུ་ནི། །ལུས་ཞེས་བྱ་བར་བརྟགས་པ་ལ། །སྒྲིབ་པ་ཐམས་ཅད་རྣམ་སེལ་བ། །དེ་བཞིན་གཤེགས་པ་དེ་བཞུགས་སོ། །ལུས་ཀྱི་ཚིགས་ནི་ཐམས་ཅད་ལ། །དེ་བཞིན་
གཤེགས་པ་ཀུན་དུ་བཟང་། །ལུས་ཀྱི་རྩ་རྒྱུས་ཐམས་ཅད་ལ། །དེ་བཞིན་གཤེགས་པ་བྱམས་པའོ། །ལག་པ་གཡས་པའི་རྩ་བར་ནི། །དེ་བཞིན་གཤེགས་པ་གཤིན་རྗེའི་གཤེད། །ལག་པ་གཡོན་པའི་རྩ་བར་ནི། །དེ་བཞིན་
གཤེགས་པ་གཞན་མི་ཐུབ། །ཁ་ཡི་པད་མར་བཞུགས་པ་ནི། །དེ་བཞིན་གཤེགས་པ་རྟ་མགྲིན་ནོ། །གསང་བའི་གནས་སུ་བཞུགས་པ་ནི། །དེ་བཞིན་གཤེགས་པ་བདུད་རྩི་འཁྱིལ། །དཔུང་པ་གཡས་པར་བཞུགས་པ་ནི། །དེ་བཞིན་གཤེགས་པ་
མི་གཡོ་བ། །དཔུང་པ་གཡོན་པར་བཞུགས་པ་ནི། །དེ་བཞིན་གཤེགས་པ་འདོད་པའི་རྒྱལ། །པུས་མོ་གཡས་པར་བཞུགས་པ་ནི། །དེ་བཞིན་གཤེགས་པ་དབྱིག་པ་སྔོ། །པུས་མོ་གཡོན་པར་བཞུགས་པ་ནི། །དེ་བཞིན་གཤེགས་པ་སྟོབས་པོ་ཆེ། །རང་གི་མགོ་
སྟེངས་བཞུགས་པ་ནི། །དེ་བཞིན་གཤེགས་པ་འཁོར་ལོ་སྒྱུར། །རྐང་པའི་འོག་ཏུ་བཞུགས་པ་ནི། །དེ་བཞིན་གཤེགས་པ་གནོད་མཛེས་ཏེ། །ལུས་ནི་འདི་ཉིད་ཀུན་ལ་འདིར། །དེ་བཞིན་གཤེགས་པ་ཐམས་ཅད་
བཞུགས། །སྐུ་ཡི་དཀྱིལ་འཁོར་ཞེས་བརྗོད་པ། །རྡོ་རྗེ་སེམས་དཔའ་ཉིད་ཀྱི་སྐུ། །རྡོ་རྗེ་སེམས་དཔའི་དབྱེ་བ་ཡིས། །རྫོགས་པའི་སངས་རྒྱས་མ་ལུས་འདི། །ལུས་པ་མེད་པ་སངས་རྒྱས་སྐུ། །སྐྱེ་བ་འདི་ལ་
རྣལ་འབྱོར་པ། །མྱ་ངན་འདས་པ་མྱུར་དུ་འཐོབ། །ཁྱོད་ཀྱི་དགེ་བ་ཡོངས་སྦྱིན་པ། །དེ་བས་རྡོ་རྗེ་སློབ་དཔོན་གྱི། །ལུས་ལ་རྒྱལ་བ་ཐམས་ཅད་བཞུགས། །མཐོང་ན་དོན་ནི་ཡོད་པ་ཀྱེ། །ཕྱི་མའི་དུས་ན་སེམས་དཔའ་ཆེ། །
དེ་བས་སེམས་ཅན་ཐམས་ཅད་ཀྱི། །ལྷ་ཡི་མཆོད་པའི་ཡོ་བྱད་ཀྱིས། །རབ་ཏུ་འབད་དེ་བླ་མ་བསྟེན། །དེ་ནས་མཐོང་བ་དོན་ཡོད་བཅས། །བྱང་ཆུབ་སེམས་དཔའ་གྲགས་པ་ཆེ། །དགའ་ཞིང་མགུ་བས་ཕྱག་བྱས་

88-1-245b

ནས། །བཅོམ་ལྡན་འདས་ལ་མཆི་མ་བླགས། །གསུང་དང་ཐུགས་ཀྱི་དཀྱིལ་འཁོར་བཞུགས། །ལེགས་སོ་བྱ་བ་བྱིན་ནས་ནི། །བཅོམ་ལྡན་འདས་ཀྱིས་འདི་སྐད་གསུངས། །ཨ་ཨཱ་ཨི་ཨཱི་ཨུ་ཨཱུ་དང་། །རྀ་རཱྀ་
ལྀ་ལཱྀ་ཨེ་ཨཻ་དང་། །ཨོ་ཨཽ་ཨྃ་ཨཿདབྱངས་ཞེས་བྱ། །ཀ་ཙ་ཊ་ཏ་པ་སྡེ་ཚན། །ཡ་ར་ལ་ཝ་ཤ་ཥ་ས། །ཧ་དང་གསུང་གི་དཀྱིལ་འཁོར་ཤེས། །ངག་ཀུན་རབ་ཏུ་སྤྲོ་དང་ལྡན། །འདོད་ཆགས་ལ་སོགས་བག་ཆགས་
ཀྱང་། །གྲངས་ནི་ཉི་ཤུ་བརྒྱད་ཀྱིས་སོ། །ཐུགས་ཀྱི་དཀྱིལ་འཁོར་ལེགས་རྒྱས་པ། །དཔལ་མཆོག་ལས་ནི་ཤེས་པར་བྱ། །དེ་ལྟར་འདུས་པའི་རྣལ་འབྱོར་རྣམས། །རྡོ་རྗེ་གསུམ་ནི་དམ་ཚིག་མཆོག །མཆོག་
ཏུ་རྨད་བྱུང་རྒྱས་པ་ནི། །སྒྲུབ་པའི་དབང་པོས་ཡང་དག་ཤེས། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སྐུ་གསུང་ཐུགས་ཀྱི་དཀྱིལ་འཁོར་བཤད་པའི་ལེའུ་སྟེ་དྲུག་བཅུ་རྩ་བཞི་པའོ།། །། 
དེ་ནས་བཅོམ་ལྡན་རྡོ་རྗེས་གསུངས། །སངས་རྒྱས་དམ་ཆོས་དགེ་འདུན་དང་། །བླ་མ་སྟོན་པ་སློབ་དཔོན་དང་། །རྡོ་རྗེ་འཆང་དང་སློབ་མ་ཡི། །མཚན་ཉིད་ཐམས་ཅད་བསྡུས་པ་ནི། །དྲི་མེད་སེམས་ནི་སངས་རྒྱས་འགྱུར། །ཆོས་
ནི་ངག་ཏུ་ཡང་དག་གསུངས། །སྐུ་ནི་དགེ་འདུན་ཞེས་བྱ་སྟེ། །བྱང་ཆུབ་སེམས་དཔའི་ཚོགས་ཀྱི་གནས། །སངས་རྒྱས་ཡི་གེ་ཧཱུྃ་དུ་བཤད། །གསུང་ནི་ཡི་གེ་ཨཱཿརུ་བརྗོད། །དགེ་འདུན་ཞེས་བྱ་ཡི་གེ་ཨོཾ། །ཀུན་ནས་འཕྲོ་བའི་
བདག་ཉིད་དོ། །སངས་རྒྱས་ཨ་བ་དྷཱུ་ཏཱིར་འགྱུར། །ཆོས་ཀྱང་ལ་ལ་ནཱ་རུ་བརྗོད། །དགེ་འདུན་ར་ས་ནཱ་རུ་བརྗོད། །འདི་ནི་གསུམ་པོའི་མཚན་ཉིད་དོ། །གཟུགས་མེད་ཁམས་ནི་སངས་རྒྱས་འགྱུར། །གཟུགས་ཀྱི་ཁམས་ནི་
ཆོས་དང་ནི། །འདོད་ཁམས་དེ་བཞིན་དགེ་འདུན་ཏེ། །དེ་ལྟར་ཁམས་གསུམ་མཚན་ཉིད་མཆོག །སྙིང་པོར་གྱུར་པ་རང་སྲོག་ལས། །ཁམས་གསུམ་ན་ནི་གཞན་མེད་དེ། །སྒྱུ་མ་རླུང་གི་ཁམས་གསུམ་པ། །རྨི་ལམ་རྨི་བ་

88-1-246a

བཞིན་དུ་མཐོང་། །ཁམས་གསུམ་བདག་ཉིད་དེ་བཞིན་ཉིད། །གཅིག་པུར་མྱུར་བར་མཐོང་བར་འགྱུར། །བྱིན་གྱིས་བརླབ་ནས་དེ་བཞིན་ཉིད། །དངོས་གྲུབ་མྱུར་དུ་ཐོབ་པར་འགྱུར། །སངས་རྒྱས་ལོངས་སྤྱོད་
རྫོགས་པའི་སྐུ། །དམ་པའི་ཆོས་ནི་ཆོས་ཀྱི་སྐུ། །དགེ་འདུན་སྤྲུལ་པའི་སྐུར་ནི་འགྱུར། །དེ་ནི་སྐུ་གསུམ་བདག་ཉིད་ཅན། །སྣང་བ་སངས་རྒྱས་ཀྱི་ནི་གཟུགས། །ཆོས་ནི་སྣང་བ་ཐོབ་པའོ། །དགེ་འདུན་སྣང་བ་མཆེད་པར་
འགྱུར། །དེ་ནི་སྣང་བ་གསུམ་མཚན་ཉིད། །ཞི་བ་ལ་སོགས་ལས་ལ་བྱང་། །སྔགས་དང་རྣལ་འབྱོར་ཆེ་རྣམས་ཤེས། །ཆོ་ག་ཉི་ཤུ་བྱ་བ་བསླབས། །དེ་ནི་བླ་མར་མངོན་པར་བརྗོད། །ཚུལ་ཁྲིམས་དག་ཅིང་སྦྱིན་པ་གཏོང་། །བཟོད་དང་
བརྩོན་འགྲུས་མཆོག་ཏུ་ལྡན། །ཉིན་དང་མཚན་དུ་སྒོམ་ལ་ཞེན། །ཤེས་རབ་ལྡན་ཞིང་བཟོ་ལ་མཁས། །བླ་མའི་སྤྱིར་ནི་ཡོན་ཏན་ཚོགས། །དཔལ་ལྡན་སློབ་དཔོན་ཞེས་ནི་བརྗོད། །ནང་གི་གསང་འདུས་ལ་རབ་དགའ། །
ཕྱི་རོལ་ཉན་ཐོས་ལ་སྤྱོད་པ། །དེ་ལྟའི་མན་ངག་རིམ་པ་ཡིས། །སློབ་མ་རྣམས་ལ་རྗེས་སུ་བསླབ། །དེ་ནི་སྟོན་པར་ཡོངས་སུ་གསུངས། །དེ་སྐད་སྨྲས་པ་དེ་བཞིན་བྱེད། །རྟོག་པ་རྣམས་དང་དཀྱིལ་འཁོར་ཚོགས། །
དམ་པའི་དོན་གྱི་བྱ་བ་དང་། །སླར་ཡང་སྣང་བ་གསུམ་དང་ནི། །རྣལ་འབྱོར་མཆོག་གི་སྤྱོད་པ་ལ། །སློབ་ཅིང་གཞན་ཡང་སློབ་ཏུ་འཇུག །དེ་ནི་སློབ་དཔོན་ཞེས་བྱའོ། །དེ་ཉིད་བཅུ་ནི་ཡོངས་ཤེས་ནས། །དཀྱིལ་འཁོར་
ལ་སོགས་བྱ་བ་ཤེས། །སློབ་མ་རྗེས་སུ་ནུས་པ་དང་། །གསང་བའི་དབང་ནི་བསྐུར་བ་དང་། །ཤེས་རབ་སྙིང་རྗེ་ཡང་དག་ལྡན། །རྒྱུད་ཀྱི་མན་ངག་ལ་མི་འཇིགས། །ཟབ་ཅིང་རྒྱ་ཆེར་ཡང་དག་ལྡན། །རྡོ་རྗེ་སེམས་དཔའ་
གཉིས་པ་མཆོག །ཚར་གཅོད་ཕན་འདོགས་པ་ལ་མཁས། །དེ་ནི་རྡོ་རྗེ་འཆང་དུ་བཤད། །དད་ཅིང་བླ་མ་ལ་ཡང་གུས། །རྟག་ཏུ་དགེ་བའི་ལས་ལ་གནས། །གཉིས་མེད་སྒྱུ་ཡང་མེད་པ་དང་། །རྟོག་པ་ངན་པ་རྣམ་པར་སྤངས། །

88-1-246b

ལུང་ནི་མང་དུ་ཐོས་པ་དང་། །གསོད་པ་དང་ནི་འཚེ་བ་སྤངས། །སེམས་ཅན་རྣམས་ནི་འདོན་པའི་བློས། །ཀུན་དུ་བརྩོན་དང་ཡང་དག་ལྡན། །དེ་ལ་སོགས་པའི་ཡང་དག་ལྡན། །དད་པ་ཆེན་པོའི་སློབ་མ་བཟང་། །སྟོང་ཉིད་
སྙིང་རྗེ་དབྱེར་མེད་པ། །གང་ལ་དེ་ཉིད་ངེས་ཤེས་བྱ། །གོང་ན་མེད་པའི་སྤྱོད་རབ་མཆོག །སྔགས་དང་རྣལ་འབྱོར་རིམ་པ་སོགས། །ཡེ་ཤེས་ལྔ་ནི་རྣམ་དག་དང་། །སངས་རྒྱས་ལྔ་ནི་རང་བཞིན་ཉིད། །མངོན་པར་བྱང་ཆུབ་རྣམ་
ལྔ་ཡིས། །སྣང་བ་གསུམ་གྱི་མཚན་ཉིད་དང་། །ཆོས་དང་ལོངས་སྤྱོད་སྤྲུལ་པ་དང་། །སྐུ་གསུམ་རྣམ་པར་བསྒོམ་པ་དང་། །བདེ་ཆེན་ཡོན་ཏན་མཚན་ཉིད་ནི། །དགའ་བ་ལ་སོགས་དབྱེ་བ་དང་། །དེ་བཞིན་སྒེག་སོགས་ཉམས་
དང་ནི། །རྣལ་འབྱོར་རྗེས་སུ་རྣལ་འབྱོར་དང་། །ཤིན་དུ་རྣལ་འབྱོར་རྣལ་འབྱོར་ཆེ། །དང་པོ་སྦྱོར་བ་མདོར་བསྡུས་པས། །དེ་བཞིན་དཀྱིལ་འཁོར་རྒྱལ་པོ་མཆོག །ལས་ཀྱི་རྒྱལ་པོ་རྣལ་འབྱོར་མཆོག །འཇུག་དང་གནས་དང་ལྡང་བ་ནི། །
རྫོགས་པའི་རིམ་པའི་རྣལ་འབྱོར་དང་། །བདེ་གཉིས་དབུགས་འབྱུང་གཉིས་ལ་སོགས། །གང་ལ་རྒྱས་བཤད་དེ་ཉིད་རྒྱུད། །རྣལ་འབྱོར་ཆེན་པོའི་རྒྱུད་དུ་བརྗོད། །ཡོན་ཏན་ཇི་ལྟ་བུ་ཡི་རྒྱུད། །ཐོས་སོགས་ཡོན་ཏན་མཆོག་གི་ནི། །རྟེན་དང་
སྣོད་ཅེས་བྱ་བར་གསུངས། །མཚན་རྣམས་ཀུན་གྱིས་བརྒྱན་པ་དང་། །ཇི་ལྟར་སེང་གེའི་འོ་མ་ནི། །ས་ཡི་སྣོད་དུ་བཞག་མི་བྱ། །དེ་བཞིན་རྣལ་འབྱོར་ཆེན་པོའི་རྒྱུད། །སྣོད་མིན་དག་ལ་སྦྱིན་མི་བྱ། །སློབ་མ་སྐད་ཅིག་དེ་ལ་འཆི། །འདི་དང་
ཕ་རོལ་དུ་ན་ཕུང་། །སྣོད་མིན་མན་ངག་རབ་བཤད་ན། །སློབ་དཔོན་དངོས་གྲུབ་ཉམས་པར་འགྱུར། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས། སངས་རྒྱས་དང་དམ་པའི་ཆོས་དང་དགེ་འདུན་ལ་སོགས་
པའི་མཚན་ཉིད་ཀྱི་ཚིག་རྒྱས་པའི་ལེའུ་སྟེ་དྲུག་ཅུ་རྩ་ལྔ་པའོ།། །། དེ་ནས་བཅོམ་ལྡན་རྡོ་རྗེ་གསུངས། །སློབ་མའི་བྱ་བའི་སྤྱོད་པ་ནི། །ཞི་བ་ལ་སོགས་བྱ་བ་ཡང་། །སྔགས་དང་རྣལ་འབྱོར་

88-1-247a

རིམ་པ་ཡི། །ལྷམ་དང་གདུགས་དང་གཙུག་ཏོར་དང་། །སོ་རྩི་ལ་སོགས་མྱང་བ་དང་། །སྣབས་ཀྱི་གོང་བུ་མཆིལ་མ་སོགས། །འདོར་ཞིང་རྐང་པ་རྐྱོང་བ་དང་། །གཞན་དུ་ལྟ་དང་སྤྱི་བརྟོལ་སྨྲ། །ནོར་གྱིས་སྙེམས་དང་ངར་
འཛིན་དང་། །རྒྱན་ལ་སོགས་པ་བལྟ་བ་དང་། །བག་མེད་པར་ནི་སྨྲ་བ་དང་། །བླ་མའི་གྲིབ་མ་འགོམ་པ་དང་། །དེ་ལ་སོགས་པ་སྐྱོན་གྱི་ཚོགས། །བླ་མའི་མདུན་དུ་རྣམ་པར་སྤངས། །འཇིགས་པས་ཐལ་མོ་སྦྱར་ནས་ནི། །སྤྱི་
བོར་ཕྱག་རྒྱ་བཀའ་ལུང་ནོད། །རབ་བདོག་ཀུན་གཏོང་དམ་བཅས་པས། །ངོ་ཚ་བཅས་ཤིང་གདོང་སྨད་པས། །སློབ་མས་བླ་མའི་མདུན་གནས་བྱ། །གལ་ཏེ་དངོས་གྲུབ་མཆོག་འདོད་ན། །བླ་མའི་མདུན་དུ་སློབ་མ་རྣམས། །
དེ་ལྟ་བུ་སོགས་སྤྱོད་ཞེས་བྱ། །དམ་ཚིག་སྡོམ་པ་སྔར་བཤད་པ། །དེ་རྣམས་སློབ་མའི་སྤྱོད་པའོ། །དེ་ཡི་ཞི་སོགས་བྱ་བ་ནི། །བླ་མས་བསྟན་པར་བྱ་བའི་རིགས། །དེ་ལ་མདོར་བསྡུས་བཤད་པར་བྱ། །ཐུན་མོང་ཆོ་གའི་མཚན་
ཉིད་ནི། །ཞི་བ་དང་ནི་རྒྱས་པ་གཉིས། །ཟླ་བ་ཡར་གྱི་ངོ་ལ་བྱ། །དབང་དང་མངོན་སྤྱོད་ཀྱི་ནི་ལས། །ཟླ་བ་མར་གྱི་ངོ་ལ་བརྩམ། །བྱང་དུ་ཁ་བལྟས་ཞི་བ་ལ། །དེ་བཞིན་རྒྱས་པ་ཤར་དུ་བལྟ། །དྲག་པོའི་ལས་ལ་ལྷོ་ཕྱོགས་སུ། །
དབང་གི་ལས་ལ་ནུབ་ཏུ་བལྟ། །གསོད་པ་ཉིད་ལ་མེ་ཡི་ཕྱོགས། །སྡང་བར་བྱ་ལ་བདེན་བྲལ་དུ། །གནས་ནས་བསྐྲད་ལ་རླུང་གི་ཕྱོགས། །རེངས་པ་ལ་ནི་དབང་ལྡན་ཕྱོགས། །ཞི་བའི་ཁ་དོག་དཀར་པོ་སྟེ། །རྒྱས་པ་ལ་ནི་སེར་
པོ་བྱ། །དབང་དང་དགུག་པ་ལ་ནི་དམར། །ཁ་དོག་ནག་པོ་གསོད་པ་ལའོ། །བྱམས་པའི་སེམས་ཀྱིས་ཞི་བ་ལ། །དགའ་བའི་སེམས་ཀྱིས་རྒྱས་པ་ལ། །ཆགས་པའི་སེམས་ཀྱིས་དབང་དག་ལ། །ཁྲོ་བའི་སེམས་ཀྱིས་
གསོད་པའོ། །ཞི་ལ་ཕལ་ཆེར་ཐོ་རངས་བྱ། །དེ་བཞིན་རྒྱས་པ་སྔ་དྲོ་བྱ། །དབང་དང་མངོན་སྤྱོད་དག་གི་ལས། །ཉི་མ་གུང་དང་མཚན་ཕྱེད་ལའོ། །དེ་ལྟར་རིགས་པར་ཡང་དག་བཤད། །སྔགས་ཀྱི་རྒྱུད་གསུངས་མཚན་ཉིད་ཀྱིས། །

88-1-247b

ཞི་བ་ལ་སོགས་དངོས་གྲུབ་བརྒྱད། །བློ་ལྡན་ཆོ་ག་བཞིན་དུ་བསྒྲུབ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་སློབ་མའི་སྤྱོད་པ་རྣམ་པར་དག་པ་དང་ཞི་བ་ལ་སོགས་པའི་ལས་ཀྱི་འབྲས་བུ་བསྟན་
པའི་ལེའུ་སྟེ་དྲུག་བཅུ་རྩ་དྲུག་པའོ།། །། དེ་ནས་གཞན་ཡང་བཤད་ཀྱིས་ཉོན། །ཁྲོ་བོ་བཟླས་པའི་མཚན་ཉིད་ནི། །གང་གིས་རྣལ་འབྱོར་དངོས་གྲུབ་བརྒྱད། །ཐོབ་འགྱུར་འདི་ལ་ཐེ་ཚོམ་མེད། །
ཁྲོ་བོའི་སེམས་ཀྱི་བཟླས་པ་ནི། །ཁྲོ་བོའི་བཟླས་པ་ཞེས་ནི་བརྗོད། །ཡང་ན་ཁྲོ་བོའི་རྒྱལ་པོ་རྣམས། །སྔགས་བཟླས་པ་ཡི་སྦྱོར་བ་ཡིས། །ཁྲོ་བོའི་བཟླས་པ་དེ་ཤེས་བྱ། །དངོས་གྲུབ་བརྒྱད་ཀྱི་འབྲས་བུ་སྩོལ། །འཇིགས་སུ་
རུང་བའི་དུར་ཁྲོད་དུ། །འཇིགས་པ་འཇིགས་པར་བྱེད་པའི་གནས། །སྐྱེས་བུ་ཐོད་པའི་ཁྲག་གིས་གོས། །རྨ་མེད་པ་ཡི་མཚན་ཉིད་བླང་། །སྐྱེས་བུའི་ཁུ་བ་ཟླ་མཚན་དང་། །བསྲེས་ནས་བྲི་བར་བྱ་བ་ནི། །དེ་ན་བསྒྲུབ་བྱའི་རྣམ་པ་
དང་། །གསལ་དང་འཇིགས་པ་སྐྲག་པ་དང་། །གཡོན་བརྐྱང་བ་ཡིས་མནན་ནས་ནི། །ཞག་བདུན་བར་དུ་དུས་གསུམ་དུ། །གཤིན་རྗེ་གཤེད་ཀྱི་སྔགས་འདིས་ནི། །དངོས་གྲུབ་རྒྱུར་ནི་བཟླས་པར་བྱ། །ན་མཿས་མན་ཏ་ཀཱ་ཡ་བཱཀ་
ཙིཏྟ་བཛྲཱ་ཎཱྃ། ཨོཾ་ཁ་ཁ་ཁཱ་ཧི་ཁཱ་ཧི། སརྦ་དུཥྚ་ས་ཏྭ་ད་མ་ཀ ། ཨ་སི་མུ་ཁ་ལ་བ་ར་ཤུ་པཱ་ཤ་ཧསྟ། ཁཌྒ་བཱ་མ་ཏ་ར་ཙ་ནི་ཧཥྛ། ཙ་ཏུར་མུ་ཁ། ཙ་ཏུར་བྷུ་ཛ། ཥ་ཌ་ཙ་ར་ཎ། ཨཱ་གཙྪ་ཨཱ་གཙྪ། སརྦ་དུཥྚ་པྲཱ་ཎ་ཨ་པྲ་ཧ་རི་
ཎེ། མ་ཧཱ་བིགྷྣ་གྷཱ་ཏ་ཀ ། བི་ཀྲྀ་ཏ་ཨཱ་ནན། སརྦ་བྷཱུ་ཏ་བྷ་ཡྃ་ཀ་ར། ཨཊ་ཊ་ཨཊ་ཊ་ཧ་ས་ནཱ་དི་ནེ། །བྱཱ་གྷྲ་ཙརྨཱ་ནི་བཱ་ས་ན། ཀུ་རུ་ཀུ་རུ། སརྦ་ཀརྨཱ་ཎི། ཙྪིན་ད་ཙྪིན་ད། སརྦ་མན་ཏྲཱན། བིན་དྷ་བིན་དྷ། པ་ར་མུ་དྲཱན། ཨཱ་ཀར་ཥ་ཡ་
ཨཱ་ཀར་ཤཥ་ཡ། སརྦ་བྷཱུ་ཏཱན། མ་ཐ་མ་ཐ། ནིར་མ་ཐ་ནིར་མ་ཐ། སརྦ་དུཥྚཱ་ན། པྲ་བེ་ཤ་ཡ་པྲ་བེ་ཤ་ཡ། མཎ་ཌལ་མ་དྷྱེ། བཻ་བ་ཤྭ་ཏ། ཛཱི་བི་ཏ་ཨན་ཏ་ཀ་ར། ཀུ་རུ་ཀུ་རུ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། མཱ་བི་ལམ་བ་

88-1-248a

མཱ་བི་ལམ་བ། ས་མ་ཡ་མ་ནུ་སྨ་ར། ཧཱུྃ་ཧཱུྃ། ཏརྫ་ཡ། བྷེ་གཱ་ནཱྃ། ཕཊ་ཕཊ། སྥོ་ཊ་ཡ་སྥོ་ཊ་ཡ། ཀ་ར་ཀ་ར། སརྦཱ་ཨ་ནཱ་ན་པ་རི་པུ་ར་ཡ། ཧེ་ཧེ་བྷ་ག་བཱན། ཀིཉྫི་རཱ་ཡ་སི། ན་མཿ་སརྦཱརྠ་སཱ་དྷ་ཡ་ཧཱུྃ་ཕཊ་སྭཱ་
ཧཱ། ཐོག་མར་ཁྲོ་བོའི་བཟླས་པ་འདི། །དབང་དུ་བྱ་དང་དགུག་པའི་མཆོག །བསྐྲད་པ་རབ་ཏུ་བཤད་པར་བྱ། །ཁྲོ་བོ་གཉིས་པའི་བཟླས་པ་ཡང་། །སྐྱེ་ཚེ་ལན་ཚྭ་ཡུངས་མར་དང་། །དུག་དང་དྷ་དུ་རའི་ཁུ་བ། །སྡིགས་མཛུབ་ཁྲག་དང་
བསྲེས་ནས་སུ། །དུར་ཁྲོད་རས་དང་བྱ་བ་ནི། །ཟླ་བ་ཕྱེད་པ་ལྟ་བུ་མཆོག །རླུང་གི་དཀྱིལ་འཁོར་བྲི་བར་བྱ། །ལོགས་གཉིས་རྡོ་རྗེས་མཚན་པར་བྱ། །དེ་དབུས་བསྒྲུབ་བྱའི་མིང་བྲིས་ལ། །གཡོན་བརྐྱང་བར་ནི་གནས་ནས་ནི། །སྔགས་
འདི་ཡོངས་སུ་བཟླ་བར་བྱ། །སྔར་བཞིན་བསྒྲུབ་བྱའི་མིང་བཀུག་ནས། །མཚན་ཕྱེད་ཀྱི་ནི་དུས་སུ་ནི། །ཀུན་ནས་ཞག་བདུན་བསྒྲུབ་པར་བྱ། །བསྐྲད་པར་ཡང་ནི་འགྲུབ་པར་འགྱུར། །ན་མཿས་མན་ཏ་ཀཱ་ཡ་ཝཱཀ་ཙིཏྟ་བཛྲཱ་ཎཱྃ། ན་མོ་
བཛྲ་ཀྲོ་དྷཱ་ཡ། མ་ཧཱ་དཾཥྛ་ཀ་ཊ་བྷཻ་ར་ཝཱ་ཡ། ཨ་སི་མུ་ས་ལ་བ་ར་ཤུ་པཱ་ཤ་ཧ་སྟཱ་ཡ། ཨོཾ་ཨ་མྲཱི་ཏེ་ཀུཎ་ཌ་ལི། ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བན་དྷ་བན་དྷ། ཧ་ན་ཧ་ན། ད་ཧ་ད་ཧ། གརྫ་གརྫ། སྥོ་ཊ་སྥོ་ཊ། 
བི་སྥོ་ཊ་ཡ་བི་སྥོ་ཊ་ཡ། སརྦ་བིགྷ་ན་བི་ནཱ་ཡ་ཀཱན། མ་ཧཱ་ག་ཎ་པ་ཏི། ཛཱི་བི་ཏ་ཨནྟ་ཀ་རཱ་ཡ་ཧཱུྃ་ཕཊ་སྭཱ་ཧཱ། སྔགས་འདིས་གདུག་པའི་སེམས་ཅན་ནི། །བསྐྲད་པའི་དོན་དུ་བྱས་པ་ཡིན། །ཞི་བའི་ལས་ནི་བཤད་བྱ་བ། །
གཞན་གྱིས་མི་ཐུབ་མིང་དང་ནི། །ཁྲོ་བོ་གསུམ་པ་བཟླས་ནས་ནི། །མེ་དང་སྦྲུལ་སོགས་ཞི་བར་བྱེད། །ལག་པ་གཉིས་ལ་ཉི་མ་གཉིས། །དེ་ལ་ཧཱུྃ་གཉིས་བསྒོམ་པར་བྱ། །བསྒྲུབ་བྱའི་མགོ་ལ་ལག་གཉིས་ཀྱིས། །བྲབས་
ལ་དེ་ལ་ཞུགས་ནས་ནི། །བསྒྲུབ་བྱའི་སྙིང་ལ་དེ་གཉིས་ཀྱིས། །འབྱུང་པོ་བསྲེག་པར་བསམ་པར་བྱ། །མེ་དང་འབྱུང་པོ་འཇིགས་བྱེད་པའི། །འདི་ཡི་སྔགས་ནི་བཤད་པར་བྱ། །ན་མཿས་མན་ཏ་ཀཱ་ཡ་ཝཱཀ་ཙིཏྟ་

88-1-248b

བཛྲཱ་ཎཱྃ། ཨོཾ་ཨ་པ་རཱ་ཛཱི་ཏི་རི་ཛྀ་ཧཱུྃ་ཕཊ། ཆེ་གེ་མོ་འབྱུང་པོའི་གདོན་ལས་གྲོལ་བར་མཛོད་ཅིག །གྷྲྀཿདུག་སེལ་བའི་སྔགས་ཀྱིས་ནི། །བཞི་པ་བཤད་ཀྱིས་དེ་ཉོན་ཅིག །ཁྲོ་བོ་རྟ་མགྲིན་བཟླས་པས་ནི། །ཡང་དག་མི་མཚུངས་
པ་ཡི་མཆོག །བསྒྲུབ་བྱ་སེམས་དཔའ་སུམ་བརྩེག་བསྒོམ། །སྙིང་གར་ཟླ་གནས་ཡེ་ཤེས་སེམས། །དེ་ཡི་འོད་ཟེར་གྱིས་རབ་གང་། །བསྒྲུབ་བྱའི་ལུས་ལ་མཆོག་ཏུ་བསམ། །རབ་ཏུ་འབར་བ་དེ་ཡིས་དུག །དེ་ནས་ལག་
གཡས་བསམ་པ་ནི། །ཟླ་བ་ཧྃ་གིས་རྣམ་པར་བརྒྱན། །ཁ་དོག་དཀར་པོར་སོར་མོར་དགོད། །དེ་ལྟར་སྒྲུབ་པ་པོ་ལ་བྱ། །ཧཱུྃ་དྷྲྀཿཛི་ཀྵཱི་སཱ་དྷ་དགོད། །ལས་རྣམས་ཀུན་ནི་འགྲུབ་པར་བྱེད། །བསྒྲུབ་བྱའི་མགོ་བོ་ནས་བརྩམས་
ཏེ། །རྐང་པའི་མཐའ་ཡི་བར་དུ་བསྒོམ། །ཆུ་རྒྱུན་རྒྱུན་མི་འཆད་པ་ནི། །དུག་ནི་འོག་བཏང་རིམ་པ་ཡིས། །འདིར་ནི་སྔགས་འདི་བཟླས་བྱ་སྟེ། །རྟ་མགྲིན་དུ་ནི་མངོན་པར་བརྗོད། །ན་མཿས་མན་ཏ་ཀཱ་ཡ་ཝཱཀ་ཙིཏྟ་བཛྲཱ་ཎཱྃ། 
ཨོཾ་ཧཱུྃ་ཧཱུྃ་ཧཱུྃ། ཏ་རུ་ལ་བི་རུ་ལ། སརྦ་བི་ཥ་གྷཱ་ཏ་ཀ་ཏ་ཀ་ཛྭ་ལི་ཏ་བཱི་སྥུ་ལི་ག ། ཨཊྚཱཊྚ་ཧཱ་ས་ནཱ་ད་ས་ཧཱི་ཏ། ཀ་ས་རི་ས་ཧོ་བ་ཏྃ་ཨད་དེ་བ་བཛྲ་ཁུ་གྷ་ཏ་ན། ཙ་ཏ་བ་སུ་དྷ་ཏ་ལ་ནི་ཤྭཱ་ས་མ་རུ་ཏ་ཨོད་ཀྵི་བ་ཏ་དྷ་ར་ཎི་དྷ་ར། བི་ཥ་ན་
ཨཊྚ་ཧཱ་ས་ཨ་པ་རི་མི་ཏ་ཝལ་པ་ར་ཀྲ་མ་ཨཱརྱ་ག་ཎ་བྷི་ཏ། བུད་དྷ་བུད་དྷ། ཧ་ཡ་གྲཱི་བ་ཁ་ཁ། ཙྪིན་ད་ཙྪིན་ད། ཨཱ་བེ་ཤ་ཡ། སརྦ་གྲ་ཧེ་ཥྭ། པྲ་ཏི་ཧ་ཏོ་བྷ་བ། བཛྲ་དཾ་ཀི་ཙི་རཱ་ཡ་སི་ཨི་དྃ་དུཥྚ་གྲ་ཧྃ་དྃཥྚ་སརྦྃ་བཱ། དུ་ན་དུ་ན། 
མཱ་ཐ་མཱ་ཐ། མམྚ་མམྚ། བུད་དྷ་དྷརྨ་ར་དྷ། བུད་དྷ་དྷརྨ་སྃ་གྷེ་ཨ་ནུ་ཛྙཱ་ན་ཀར་མ་ཀུ་རུ་སྭཱ་ཧཱ། ཆེ་གེ་མོའི་དུག་ལ་སོགས་པ་སེལ་བར་མཛོད་ཅིག་ཧཱུྃ་ཞེས་བྱ་བ་དང་སྔགས་སྤེལ་ལོ། །རྩ་བའི་རྒྱུད་ཀྱི་རྗེས་འབྲངས་ཏེ། །ལྷག་མ་རྒྱས་
པར་ཤེས་པར་བྱ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་ཁྲོ་བོའི་བཟླས་པ་དང་ཞི་བ་ལ་སོགས་པའི་དངོས་གྲུབ་བརྒྱད་ཀྱི་ལེའུ་སྟེ་དྲུག་བཅུ་རྩ་བདུན་པའོ།། །།

88-1-249a

དེ་ནས་གཞན་ཡང་བཤད་པར་བྱ། །དངོས་གྲུབ་ཐམས་ཅད་བསྡུས་པ་ནི། །སངས་རྒྱས་རྣམས་ཀྱི་ཡེ་ཤེས་མཆོག །དངོས་གྲུབ་ལ་སོགས་མཚན་ཉིད་ནི། །ས་སྙིང་ཕྱག་ན་རྡོ་རྗེ་དང་། །འཇམ་དཔལ་སྒྲིབ་པ་
སེལ་བ་དང་། །བྱམས་པ་ལྔ་པོ་འདི་དག་དང་། །ཡི་གེ་གསུམ་དང་རྣམ་པར་སྤེལ། །མིག་དང་རྣ་བ་ཡིད་དང་ལུས། །རྩ་ཡི་འཁོར་ལོ་བྱིན་གྱིས་བརླབ། །མཚན་གསུམ་ཉིན་མོ་དེ་དང་འདྲ། །མངོན་ཤེས་ལྔ་ཉིད་ཐོབ་པར་བྱེད། །བཞི་
པ་ཡི་ནི་དབང་བསྐུར་བས། །བློ་ལྡན་དེ་ཉིད་མཐོང་བར་འགྱུར། །སྣང་བ་མཚན་མོའི་ཆ་རུ་འགྱུར། །ཉིན་མོ་སྣང་བ་མཆེད་པའོ། །མཚམས་ནི་སྣང་བ་ཐོབ་པའོ། །དེ་ལྟར་སྣང་ལ་སོགས་མཚན་ཉིད། །མཚན་མིན་མཚམས་
དང་ཉིན་མོ་མིན། །ཀུན་རྟོག་རླུང་ནི་སྤོང་བར་བྱེད། །དེ་ནི་སྐད་ཅིག་མངོན་བྱང་ཆུབ། །མཚན་ཉིད་སྐད་ཅིག་མར་ནི་བརྗོད། །ཐ་མར་འབྱུང་དང་ཐོག་མར་འབྱུང་བ་འམ། །དབུས་མི་འབྱུང་བའང་དབུས་སུ་འབྱུང་བ་འམ། །མཐའ་མིན་
འབྱུང་བའང་མཐར་ནི་འབྱུང་བ་འམ། །དེ་ནི་ཐམས་ཅད་སྟོང་པའི་སྐད་ཅིག་གཅིག་ཏུ་གསུངས། །གང་དུ་འགྲོ་བ་དང་ནི་འོང་མེད་ཅིང་། །ཟད་མེད་འཕེལ་མེད་དངོས་དང་དངོས་མེད་མིན། །ངོ་མཚར་གཟུགས་ཅན་ཡིན་ཞིང་ངོ་མཚར་མིན། །གནས་པར་འགྱུར་མིན་མྱུར་དུ་འགྲོ་
བ་མིན། །གང་ཞིག་ཡོད་དང་མེད་པའི་ཐ་སྙད་རྣམས་དང་བྲལ། །བསོད་ནམས་གཟུགས་མིན་སྡིག་པའི་གཟུགས་མ་ཡིན། །བསོད་ནམས་སྡིག་གི་བདག་མིན་མཆོག་གྱུར་པ། །དེ་ནི་ཐམས་ཅད་སྟོང་པའི་སྐད་ཅིག་
གཅིག་ཏུ་གསུངས། །སྐད་ཅིག་གཅིག་ལ་མངོན་བྱང་ཆུབ། །མཚན་ཉིད་འདི་ནི་སྐད་ཅིག་མཆོག །རྡོ་རྗེ་རྩེ་མོ་བྱང་སེམས་ནི། །འཛིན་པས་ལུས་ཀྱི་བརྟན་པ་ཉིད། །དེ་ཡིས་དེ་ཉིད་བྱང་སེམས་ནི། །རླུང་གི་དེ་ཉིད་
རབ་སྦྱོར་བས། །རིགས་པས་སྟེང་དུ་བྱེད་པ་ནི། །རྒས་པ་མེད་པར་ཐེ་ཚོམ་མེད། །ཧཱུྃ་ཧོཿརིམ་བཞིན་ཤེས་པ་ནི། །འཛིན་པ་སྟེང་དུ་རྣམ་པར་སྤེལ། །སྔར་བཤད་པ་ཡི་བདུད་རྩི་ལྔ། །འདི་ནི་བཅུད་ཀྱིས་ལེན་དུ་བརྗོད། །

88-1-249b

འདི་ཉིད་ཀྱིས་ནི་གྲུབ་པར་བྱེད། །ལྕགས་ཀྱི་གསེར་འགྱུར་བྱས་ནས་ནི། །རྡོ་རྗེ་ཕྱག་རྒྱ་དངོས་གྲུབ་ཆེ། །ཟུང་དུ་འཇུག་པས་ཐོབ་པར་འགྱུར། །བསྐྱེད་པའི་རིམ་པའི་སྦྱོར་བ་དང་། །དེ་བཞིན་རྫོགས་པའི་རིམ་པ་ཡང་། །གང་ལ་དེ་
གཉིས་གཅིག་འགྱུར་བ། །དེ་ནི་ཟུང་དུ་འཇུག་པར་བཤད། །འཁོར་བ་དང་ནི་མྱ་ངན་འདས། །རྟོག་པ་གཉིས་པོ་སྤངས་པས་ནི། །གང་དུ་དངོས་པོ་གཅིག་འགྱུར་བ། །ཟུང་དུ་འཇུག་ཅེས་དེ་ལ་བཤད། །ཀུན་རྫོབ་དང་ནི་དོན་དམ་དག །རྟོག་པ་གཉིས་
དང་རྣམ་པར་བྲལ། །གང་དུ་ཡང་དག་འདྲེས་གྱུར་པ། །དེ་ནི་ཟུང་དུ་འཇུག་པར་བཤད། །རྡོ་རྗེ་བཟླས་པའི་རབ་སྦྱོར་བས། །རླུང་གི་མཚན་ཉིད་ཤེས་ནས་ནི། །རྣམ་རྟོག་རླུང་རྣམས་རྣམ་པར་གཅོད། །སེམས་ལ་དམིགས་པ་འཐོབ་པར་འགྱུར། །བདག་
ལ་བྱིན་བརླབས་རིམ་པས་ཀྱང་། །དངོས་གྲུབ་བརྒྱད་ནི་ཐོབ་པར་འགྱུར། །སྣང་བ་ལ་སོགས་དབྱེ་བ་ཤེས། །མངོན་པར་བྱང་ཆུབ་རིམ་པ་ཐོབ། །ཟུང་འཇུག་རིམ་པ་ལ་གནས་པ། །དངོས་གྲུབ་ཐམས་ཅད་བསྡུས་པ་ནི། །ཚེ་འདི་ཉིད་ལ་འགྲུབ་པར་འགྱུར། །
རྣལ་འབྱོར་པ་ཡིས་ཐེ་ཚོམ་མེད། །ཕྱག་རྒྱ་ཆེན་པོའི་དངོས་གྲུབ་ཆེར། །ཟུང་དུ་འཇུག་པའི་ཏིང་འཛིན་གྱིས། །རྣམ་རྟོག་མེད་པར་ཞུགས་ནས་ནི། །ཐོབ་པ་འདི་ལ་ཐེ་ཚོམ་མེད། །ལུས་ནི་གཞལ་ཡས་ཁང་དུ་འགྱུར། །སངས་རྒྱས་ཀུན་གྱིས་ཡང་
དག་བརྟེན། །ཟུར་བཞི་པ་ཡི་མདུན་རྒྱབ་དང་། །གཡས་དང་གཡོན་གྱི་དབྱེ་བས་སོ། །སྟེང་འོག་སྒོ་ཡི་དབྱེ་བ་ཡིས། །སྒོ་བཞི་ཞེས་ནི་བཤད་པ་ཡིན། །སྣ་རྩེ་བཞི་ཡི་དབྱིབས་ཀྱིས་ནི། །རྟ་བབ་བཞི་ནི་བརྗོད་པར་བྱ། །དྲ་བ་ཆུ་བར་ཡང་དག་བཤད། །
རྒྱུས་པར་གྱུར་པ་དྲ་བ་ཕྱེད། །ཆ་ནི་ཟླ་བ་ཕྱེད་པ་དང་། །བུམ་པ་ལྟོ་བར་ཡང་དག་ཤེས། །རྗེ་ངར་བླ་དཔུང་ལག་ངར་ནི། །ཀ་བ་བརྒྱད་དུ་ཡང་དག་བཤད། །མིག་གི་རྣམ་ཤེས་མེ་ལོང་སོགས། །སྒྲ་ཡི་རྣམ་ཤེས་རོལ་མོ་དང་། །སྣ་ཡི་རྣམ་ཤེས་
མེ་ཏོག་ཕྲེང་། །རིན་ཆེན་ཕ་གུ་ལྕེ་རྣམ་ཤེས། །ལུས་ཀྱི་རྣམ་ཤེས་རས་འཕན་དང་། །ཡིད་ཀྱི་རྣམ་ཤེས་རི་དགས་སོ། །མིག་ནི་འཁོར་ལོའི་མཚན་མ་དང་། །རྣ་བ་ཀུན་ནས་རྡོ་རྗེ་རྣམས། །སྣ་ནི་བ་དན་དུ་ནི་བཤད། །ལྕེ་ནི་དྲིལ་བུ་རུ་ནི་གསུངས། །

88-1-250a

རྔ་ཡབ་ལ་སོགས་རྣམ་དག་པ། །ལུས་ཀྱི་ཚོགས་ཞེས་བྱ་བར་བཤད། །ཡིད་ནི་དབུས་ཀྱི་པད་མར་གསུངས། །རྣམ་རྟོག་རླུང་ནི་ཡང་དག་བརྟེན། །ཡེ་ཤེས་ལྔ་ནི་རྣམ་དག་པ། །རེ་ཁཱ་ལྔར་ནི་ཡང་དག་བརྗོད། །
ཕུང་པོ་ལྔ་ནི་རྣམ་དག་ལྔ་། །རྣམ་དག་ཁ་དོག་ལྔ་ནི་དབྱེ། །དེ་དག་གཞལ་ཡས་ཁང་དུ་བསྒོམ། །དང་པོ་སྦྱོར་བར་ཤེས་པར་བྱ། །མངོན་པར་བྱང་ཆུབ་རྣམ་པ་ལྔ་། །རིགས་ཀྱི་དབྱེ་བ་རང་ངོ་བོ། །དེ་ཉིད་ཕྱི་རོལ་གནས་པར་བརྗོད། །དཀྱིལ་
འཁོར་རྣམ་པར་དག་པའོ། །ཁམས་བཞིའི་རང་བཞིན་བདག་ཉིད་ནི། །གཟུགས་ཀྱི་ཕུང་པོ་མདོར་བསྡུས་ན། །གཟུགས་ཀྱི་ཕུང་པོ་རྣམས་དང་ནི། །མིག་གི་རྣམ་ཤེས་ས་སྙིང་པོ། །ཕྱི་རོལ་གཟུགས་ཀྱི་རྡོ་རྗེར་བཤད། །བྱམས་པ་རྩ་རྒྱུས་
དབུས་ན་བཞུགས། །དེ་བཞིན་ཁྲོ་བོའི་རྒྱལ་པོ་གཉིས། །ཤར་དང་ལྷོ་ཡི་མཚམས་སུ་ནི། །མེ་ལོང་ཡེ་ཤེས་སུ་ནི་བཤད། །རྣམ་པར་སྣང་མཛད་རྣམ་དག་ཉིད། །བདེ་དང་སྡུག་བསྔལ་འཇིགས་དང་སྐྱོ། །ཚོར་བའི་མཚན་ཉིད་དུ་ནི་
འདོད། །ཚོར་བ་ཆུ་ཡི་ཁམས་དང་ནི། །ཕྱི་རོལ་སྒྲ་ནི་རྡོ་རྗེ་དང་། །རྣ་བ་ཕྱག་ན་རྡོ་རྗེར་བཤད། །རིགས་ནི་གཉིས་པོ་འདྲེས་པ་ཉིད། །དེ་ཡི་རྡོ་རྗེ་ཕྱི་རོལ་འགྱུར། །སྣ་ཡི་ཡེ་ཤེས་མཁའ་སྙིང་པོ། །ཁྲོ་བོ་གཉིས་པོ་རྣམ་པར་ཤེས། །མཉམ་
ཉིད་རིན་ཆེན་འབྱུང་བ་དང་། །དངོས་དང་དངོས་མེད་སོགས་འདུ་ཤེས། །སྔ་མ་རྗེས་དྲན་མཚན་ཉིད་ཅན། །འདུ་ཤེས་ཕུང་པོ་མེ་ཁམས་དང་། །ཕྱི་རོལ་དྲི་ཡི་རྡོ་རྗེ་དང་། །ལྕེ་ཡི་རྣམ་ཤེས་འཇིག་རྟེན་མགོན། །དེ་བཞིན་ཁྲོ་བོའི་རྒྱལ་པོ་
གཉིས། །དེ་ནི་སོ་སོར་རྟོག་ཡེ་ཤེས། །འོད་དཔག་མེད་ཀྱི་རིགས་ལས་བྱུང་། །དགེ་དང་མི་དགེའི་ལས་རྣམས་ཀྱིས། །བག་ཆགས་འདུ་བྱེད་མཚན་ཉིད་ནི། །འདུ་ཤེས་ཕུང་པོ་རླུང་གི་ཁམས། །ཕྱི་རོལ་རོ་ཡི་རྡོ་རྗེ་དང་། །ལུས་ཀྱི་རྣམ་
ཤེས་སྒྲིབ་རྣམ་སེལ། །ཀུན་བཟང་ཚིགས་ཀྱི་མཚམས་དབུས་བཞུགས། །དེ་བཞིན་ཁྲོ་བོའི་རྒྱལ་པོ་གཉིས། །བྱ་བ་ནན་ཏན་གྲུབ་ཡེ་ཤེས། །དོན་ཡོད་གྲུབ་པའི་རིགས་ལས་བྱུང་། །དངོས་པོ་ཀུན་གྱི་རང་བཞིན་ནི། །ཡེ་ཤེས་

88-1-250b

མཚན་ཉིད་རྣམ་ཤེས་བརྗོད། །རྣམ་པར་ཤེས་པ་ནམ་མཁའི་ཁམས། །ཡིད་ཀྱི་རྣམ་ཤེས་འཇམ་རྡོ་རྗེ། །དེ་བཞིན་ཁྲོ་བོའི་རྒྱལ་པོ་གཉིས། །ཤིན་དུ་རྣམ་དག་ཆོས་ཀྱི་དབྱིངས། །མི་བསྐྱོད་པ་ཡི་རིགས་ལས་བྱུང་། །མངོན་པར་བྱང་ཆུབ་
རྣམ་པ་ལྔ་། །གཞལ་ཡས་ཁང་ན་འདི་དག་བཞུགས། །དེ་ཉིད་ཁམས་ཀྱི་དབྱེ་བ་ཡིས། །རིམ་པ་ཇི་བཞིན་བཤད་པར་བྱ། །སྐྲ་རུས་ཕྱི་ས་མཆིལ་མ་སྙིང་། །ས་ནི་རྣམ་སྣང་བདག་ཉིད་དོ། །སྤུ་དང་གནག་དང་ཉེ་བའི་སྙིང་། །སེན་མོ་ཆུ་ཡི་ཁམས་སུ་
ཤེས། །རིན་ཆེན་འབྱུང་ལྡན་བདག་ཉིད་ཀྱི། །རིགས་ཀྱི་རྟེན་དུ་ཤེས་པར་བྱ། །སོ་དང་ལྤགས་པ་ཤ་དང་སྙིང་། །མེ་ཡི་ཁམས་ཞེས་བྱ་བར་བརྗོད། །འོད་དཔག་མེད་ཀྱི་རང་བཞིན་དང་། །རིགས་ཀྱི་དབྱེ་བར་ཤེས་པར་བྱ། །རྒྱུས་པ་ཤ་
དང་རྩིབས་ལོགས་སྙིང་། །རླུང་ནི་དོན་ཡོད་གྲུབ་པའོ། །དྲི་མ་རྒྱུས་པ་མཁྲིས་པ་སྙིང་། །དེ་ནི་ནམ་མཁའི་ཁམས་སུ་གྲགས། །མི་བསྐྱོད་པ་ཡི་རང་བཞིན་དང་། །སྙིང་ནི་རྣམ་ཤེས་ལྔ་ཞེས་བྱ། །རེ་རེ་ལ་ཡང་སོ་སོར་ནི། །རྣམ་པ་ལྔ་ནི་སྤྲོ་
བ་ཤེས། །དེ་བཞིན་གཤེགས་པའི་ཕུང་པོ་ལྔ། །ནང་གི་བདག་ཉིད་རྫས་ཕྱེ་བ། །ཤ་རྩ་རྒྱུས་པ་ཤ་ཁམ་ཚད། །གླད་པ་དང་ནི་གླད་རྒྱས་དང་། །རུས་པ་རྐང་དང་སྙེ་མ་དང་། །མཁལ་མ་སྙིང་དང་ལྟོ་བ་དང་། །གློ་བ་མཚེར་པ་གཅིན་དང་ནི། །
བཤང་བ་ཕོ་བ་ལོང་ཀ་དང་། །ཞག་དང་ཆུ་སེར་གནག་དང་ནི། །ཁྲག་དང་མཁྲིས་པ་བད་ཀན་དང་། །ངར་སྣབས་སྐྲ་དང་ཁ་སྤུ་དང་། །སེན་མོ་སྤུ་དང་ལྤགས་པ་དང་། །ལག་པ་རྐང་མིག་ཡན་ལག་སོགས། །མཚོགས་མ་དཔུང་པ་ཞེས་
ནི་བརྗོད། །དེ་དག་རིམ་པར་ཤེས་པར་བྱ། །གཞལ་ཡས་ཁང་ནི་རྣམ་དག་པས། །དེ་ལ་གནས་ཀྱི་དབྱེ་བ་ནི། །མདོར་བསྡུས་ནས་ནི་བཤད་པར་བྱ། །པཱུ་ལླི་ར་ནི་མགོ་བོར་ཤེས། །སྤྱི་གཙུག་ཛཱ་ལན་དྷ་ར་དང་། །རྣ་བ་གཡས་པར་
ཨོ་ཊུན་དང་། །སྤྱི་བོའི་རྒྱབ་ནི་ཨརྦུ་ད། །གོ་དཱ་བ་རི་རྣ་བ་གཡོན། །རཱ་མེ་ཤྭ་རི་སྨིན་མའི་དབུས། །མིག་གཉིས་དེ་ཝི་ཀོ་ཊི་དང་། །མཱ་ལ་ཝེ་ནི་དཔུང་པའི་རྩ། །ཀཱ་མ་རཱུ་པ་མཆན་ཁུང་གཉིས། །ཀུ་ལུ་ནུ་མ་གཉིས་སུ་གྲགས། །

88-1-251a

ཀོ་ས་ལ་ནི་ལྟེ་བར་ཤེས། །ཏྲི་ས་ཀུ་ནི་སྣ་ཡི་རྩ། །ཁ་ཡི་པད་མ་ཀ་ལིང་ག །མགྲིན་པ་ལམ་བཱ་ཀར་ནི་བརྗོད། །སྙིང་ནི་ཀཉྩིར་ཤེས་པར་བྱ། །ཧི་མ་ལ་ཡ་མདོམས་སུ་ཤེས། །མཚན་མ་གྲྀ་ཧ་དེ་ཝ་དང་། །
པྲེ་ཏ་པུ་རི་བཤང་བའི་ལམ། །བརླ་གཉིས་སུ་ཝརྞྞ་དྭཱི་པ། །སཽ་རཥྚ་ནི་བྱིན་པ་གཉིས། །རྐང་པའི་བོལ་ནི་སིན་དྷཱུའི་ཡུལ། །སོར་མོ་རྣམས་ལ་ནཱ་ག་ར། །མཐེ་བོང་གཉིས་ནི་མ་རུར་ཤེས། །ཀུ་ལུ་ཏ་ནི་རྐང་པའི་མཐིལ། །དེ་ལྟར་
གནས་ཀྱི་རྣམ་དག་དང་། །ས་བཅུ་རྣམ་པར་དག་པ་ཉིད། །དེ་ཉིད་དང་ལྡན་ཤེས་པར་བྱ། །ཐིམ་དང་ལོངས་སྤྱོད་བདག་པོ་ཉིད། །འཇུག་པ་ལ་སོགས་བྱེ་བྲག་གིས། །རིམས་ཀྱིས་རྡོ་རྗེ་སེམས་དཔའ་ཉིད། །དེ་ནས་གཞན་ཡང་རབ་
བཤད་པ། །རླུང་རྣམས་ཀྱི་ནི་མཚན་ཉིད་མཆོག །སྲོག་གི་རླུང་ནི་སྙིང་གར་གནས། །མི་བསྐྱོད་བྱེ་བྲག་རིགས་ལས་སྐྱེས། །མདོམས་ན་གནས་པའི་ཐུར་སེལ་ནི། །རིན་ཆེན་འབྱུང་ལྡན་བྱེ་བྲག་སྐྱེས། །སྟོད་དུ་རྒྱུ་བ་ལྐོག་མཐར་གནས། །
འོད་དཔག་མེད་པའི་རང་བཞིན་ནོ། །མེ་དང་མཉམ་གནས་ལྟེ་བར་གནས། །དོན་ཡོད་གྲུབ་པའི་རང་བཞིན་ནོ། །ཁྱབ་བྱེད་ཡན་ལག་ཀུན་ལ་གནས། །རྣམ་སྣང་མཛད་ཀྱིས་བྱིན་གྱིས་བརླབས། །དབང་པོའི་སྒོ་ཡི་རྒྱུན་ལས་ནི། །སྲོག་དང་རྩོལ་
བ་རྒྱུན་འདི་དང་། །དུས་ཀུན་དུ་ནི་རྒྱུ་བ་ནི། །སྲོག་ཅེས་བྱ་བ་ཡིན་པར་བཤད། །སྲོག་དང་རླུང་དང་ཕྱི་ས་དང་། །དེ་བཞིན་དུ་ནི་ཁུ་བ་སོགས། །འོག་འདྲེན་འདི་ནི་ཐུར་སེལ་རླུང་། །རྟག་ཏུ་རྣལ་འབྱོར་པས་ཤེས་བྱ། །དགོད་དང་ཟ་དང་ལྡག་པ་
དང་། །ཀུན་དུ་འཐུང་དང་འཇིབ་པ་དང་། །གང་ཞིག་རྟག་ཏུ་མཉམ་གནས་པ། །མཉམ་དུ་གནས་པ་ཞེས་བྱར་བརྗོད། །གྱེན་དུ་འགྲོ་ཞིང་སྡུད་པ་དང་། །བཟའ་དང་མྱང་བ་ལ་སོགས་པ། །ཤེས་ནས་ལྷན་ཅིག་འབྱོར་པ་དག །གྱེན་རྒྱུའི་ལས་
སུ་ཤེས་པར་བྱ། །ཁྱབ་དང་འཛིན་པ་ཉིད་དང་ནི། །དེ་བཞིན་འགྲོ་དང་ལྡོག་པ་སོགས། །ཚིགས་ཀུན་དུ་ནི་ཁྱབ་པའི་ཕྱིར། །ཁྱབ་བྱེད་ཅེས་ནི་བྱ་བར་བཤད། །རླུང་གི་མཚན་ཉིད་བཤད་པ་ནི། །དེ་ནས་དེ་ཡི་འཇིགས་པར་བརྗོད། །སྔ་མ་

88-1-251b

བཞིན་དུ་བཏང་བཟུང་སོགས། །ཕན་ཚུན་དུ་ནི་གནོད་པར་བྱེད། །གཞན་ནི་གཞན་ལ་འཚེ་བ་ཡིན། །སྟོབས་ནི་ཐོབ་པའི་རང་བཞིན་གྱིས། །གཅིག་ནི་གཅིག་ལ་ཐིམ་པར་འགྲོ། །ཇི་ལྟར་ཟླ་བ་གཟས་བཟུང་ལ། །རླུང་རྣམས་རིམ་གྱིས་
ཉམས་འགྱུར་བ། །སྔ་མ་བཞིན་དུ་གོང་ནས་གོང་། །རང་གི་བདག་ཉིད་ལ་ཐིམ་པར། །བཏང་བཟུང་སླར་ཡང་འགྲོ་བར་བྱེད། །ཇི་ལྟར་མེས་བསྲེགས་དངོས་མེད་དང་། །རྒྱུ་མེད་པར་ནི་ཐིམ་པར་འགྲོ། །སླར་ཡང་སྲོག་གི་རླུང་ཤར་བ། །ལས་
ཀྱི་རླུང་ནི་སྣ་ཚོགས་པ། །དེ་ནི་ལྷན་ཅིག་རྣམ་ཤེས་དང་། །སླར་ཡང་འཇིག་རྟེན་གསུམ་དུ་གནས། །དེ་ལས་ལས་དང་དེ་ལས་སྐྱེས། །དེ་ལས་ཆགས་སོགས་བག་ཆགས་དང་། །དེ་ལས་སླར་ཡང་འཆི་དང་སྐྱེ། །དེ་ལྟར་འཁོར་ལོ་བསྐོར་བ་
འདྲ། །སྔོན་བཞིན་རྡོ་རྗེ་བཟླས་ལ་སོགས། །རིམ་གྱིས་དེ་ཡི་དབྱེ་བར་འགྱུར། །དེ་ནས་སེམས་དཔའ་ཆེན་པོ་ཀུན། །དེ་ཉིད་མིག་སྨན་ཐུར་མ་ཡིས། །ཐམས་ཅད་འཁྲུལ་བའི་ལོང་བ་བསལ། །ཡང་དག་དངོས་པོ་ཉིད་ནི་མཐོང་། །དེ་ནས་
ཡང་འདི་ཕྱག་བྱས་ཏེ། །མཆི་བཅས་མིག་གིས་བཅོམ་ལྡན་ལ། །ལན་གསུམ་དུ་ནི་བསྐོར་བྱས་ནས། །རྡོ་རྗེ་འཆང་ལ་ཡང་དག་བསྟོད། །ཨེ་མའོ་ཀུན་འགྲོ་ཀུན་དབང་ཕྱུག །ནམ་མཁའ་དང་ནི་མཚུངས་པ་བརྙེས། །ཨེ་མའོ་དམ་ཚིག་
དེ་ཉིད་གསུམ། །མཆོག་ཏུ་རྨད་བྱུང་སྟོན་པར་མཛད། །ཁམས་གསུམ་ལས་ནི་རྣམ་པར་གྲོལ། །ཆོས་ཀྱི་དབྱིངས་ཀྱི་ངོ་བོ་ཉིད། །འདོད་པ་རྣམས་ཀྱིས་མ་གོས་པ། །དམིགས་མེད་ཁྱོད་ལ་ཕྱག་འཚལ་ལོ། །ཕུང་པོ་རྣམས་དང་ཁམས་
རྣམས་དང་། །སྐྱེ་མཆེད་རྣམས་ལ་མི་རྟེན་ཅིང་། །སྲིད་དང་མྱ་ངན་འདས་ལས་གྲོལ། །དམིགས་མེད་ཁྱོད་ལ་ཕྱག་འཚལ་བསྟོད། །དེ་ལྟར་ནམ་མཁའ་གནས་མེད་ཅིང་། །སྤྲོས་པ་མེད་ཅིང་གོས་པ་མེད། །མཁའ་དང་མཉམ་པའི་ཐུགས་མངའ་བ། །དམིགས་
མེད་ཁྱོད་ལ་ཕྱག་འཚལ་བསྟོད། །དེ་ནས་བཅོམ་ལྡན་འདས་ཀྱི་སྐུ། །འཇིག་རྟེན་གསུམ་ལས་རྒྱལ་གྱུར་པ། །འཇིག་རྟེན་གསུམ་འདི་རྣམ་པར་གཡོས། །བདུད་རྣམས་བཅོམ་པར་མཛད་ནས་ནི། །འཇིག་རྟེན་གསུམ་ནས་ལྷ་ལས་

88-1-252a

རྒྱལ། །ཁྲོ་བོ་བཅུ་ནི་ཀུན་ནས་ནི། །འཇིག་རྟེན་གསུམ་རྒྱལ་གཙོ་བོ་ཡིས། །འདི་ལྟར་བཀའ་ནི་བསྒོ་བར་འགྱུར། །ས་ཡི་ཆ་ནི་གང་ན་འདི། །རྡོ་རྗེ་ཕྲེང་བར་མངོན་བརྗོད་པའི། །རྣལ་འབྱོར་ཆེན་པོའི་དམ་
ཚིག་བརྒྱད། །དུས་ཀུན་དུ་ནི་སྤྱོད་འགྱུར་ཞིང་། །རྒྱུད་དུ་དེ་ཉིད་རང་ཉིད་ཀྱིས། །ཁྲོ་བོ་བཅུ་ཡིས་དེ་ལས་ནི། །རྟག་ཏུ་ཕུར་བུས་བགེགས་ཀུན་ལ། །བསྲུང་བའི་དོན་དུ་ཡུལ་འཁོར་དང་། །རང་རང་ཕྲེང་བའི་སྔགས་ཀྱིས་ནི། །དེ་རྣམས་ལ་ནི་
གཏོར་མ་དབུལ། །སེམས་ཅན་ཡོངས་སུ་གཟུང་བའི་ཕྱིར། །སྣ་ཚོགས་སྤྲུལ་པ་བསྟན་ནས་ནི། །རྡོ་རྗེ་སེམས་དཔའ་དུས་ཀུན་དུ། །ཉིན་དང་མཚན་དུ་བཞུགས་པར་འགྱུར། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་
པ་ལས་དངོས་གྲུབ་ཐམས་ཅད་བསྡུས་པའི་ལེའུ་སྟེ་དྲུག་བཅུ་རྩ་བརྒྱད་པའོ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་ཕྲེང་བ་མངོན་པར་རྟོགས་པ་ལས་རྒྱུད་ཐམས་ཅད་ཀྱི་སྙིང་པོ་གསང་བ་རྣམ་པར་
ཕྱེ་བ་ཞེས་བྱ་བ་རྫོགས་སྷོ།། །།ཐུགས་དམ་སའི་སྙིང་པོ་ཐོ་ལིང་སྙིང་པོ་དཔལ་དཔེ་མེད་ལྷུན་གྱིས་གྲུབ་པའི་གཙུག་ལག་ཁང་དུ་རྒྱ་གར་གྱི་མཁན་པོ་སུ་ཛ་ན་ཤྲཱི་ཛྙཱ་ན་དང་། སྒྲ་བསྒྱུར་གྱི་ལོ་ཙཱ་བ་ཆེན་པོ་བོད་ཀྱི་
ལྷ་བཙན་པོ་བླ་མ་དགེ་སློང་ཞི་བའི་འོད་ཀྱི་ཞལ་སྔ་ནས་བསྒྱུར་ཅིང་ཞུས་ཏེ་གཏན་ལ་ཕབ་པ། སྟག་ལུང་རྒྱུད་འབུམ་དང་བསྟུན་པའི་ཞུ་དག་གྲུབ།། །།

88-1-252b

༄༅༅། །རྒྱ་གར་སྐད་དུ། སན་དྷི་བྱཱ་ཀ་ར་ཎ་ནཱ་མ་ཏན་ཏྲ།  བོད་སྐད་དུ།  དགོངས་པ་ལུང་བསྟན་པ་ཞེས་བྱ་བའི་རྒྱུད། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ།  །དེ་ཉིད་འདི་སྐད་བདག་
གིས་ཐོས། །ཤིན་དུ་གསལ་བའི་དུས་གཅིག་ན། །གསང་གཙོ་རྡོ་རྗེ་བཅོམ་ལྡན་འདས། །དམ་ཚིག་མཆོག་ནི་རྡོ་རྗེ་གསུམ། །དེ་བཞིན་གཤེགས་ཀུན་ཡེ་ཤེས་ནི། །ཡོན་ཏན་ཕུན་ཚོགས་བསམ་མི་ཁྱབ། །ཡོད་མེད་
གཉི་ག་ལས་འདས་པ། །གནས་མེད་པ་ལ་གནས་ཤེས་བྱ། །ནམ་མཁའ་རང་བཞིན་གཅིག་པ་འདིར། །ཀུན་མཁྱེན་ཡེ་ཤེས་རྣམ་བསྒོམ་པ། །འགྲོ་སྙིང་རྣམ་དག་ཅེས་བྱ་ལ། །ཐུབ་པ་ཆེན་པོ་བཞུགས་པ་ཡིན། །མ་རིག་
པ་དང་འདུ་བྱེད་དང་། །རྣམ་པར་ཤེས་དང་མིང་དང་གཟུགས། །སྐྱེ་མཆེད་དྲུག་དང་རེག་པ་དང་། །ཚོར་བ་དང་ནི་སྲེད་པ་དང་། །ཉེར་ལེན་སྲིད་པ་སྐྱེ་བ་དང་། །རྒ་ཤི་ཞེས་བྱ་རིག་མ་ཡིན། །ང་རྒྱལ་ཆེ་བའི་ང་རྒྱལ་དང་། །ངའོ་སྙམ་རྒྱལ་
མངོན་ང་རྒྱལ། །གཞན་ཡང་ང་རྒྱལ་ལས་ང་རྒྱལ། །ཅུང་ཟད་ང་རྒྱལ་ལོག་པར་བཅས། །འདི་དག་རྡོ་རྗེ་མཐའ་ཅན་མཆོག །བྱང་ཆུབ་སེམས་དཔའ་དེ་བཞིན་གཤེགས། །དེ་རྣམས་བརྗོད་མི་ལང་བའི་གྲངས། །བརྗོད་ཀྱིས་མི་
ལང་ཉིད་དུ་གྱུར། །སངས་རྒྱས་ཞིང་ནི་གྲངས་མེད་པའི། །རི་རབ་རྡུལ་ཕྲན་གྲངས་མཉམ་པ། །བྱང་ཆུབ་སེམས་དཔའ་སེམས་དཔའ་ཆེ། །ཏིལ་གྱི་གང་བུ་མཚུངས་པ་དང་། །དེ་བཞིན་གཤེགས་པ་རྣམས་ཀྱིས་ཀྱང་། །ནམ་མཁའི་
ཁམས་ཀུན་གང་བར་སྣང་། །དེ་ནས་དཔལ་ལྡན་རྣམ་སྣང་མཛད། །སྐུ་གསུང་ཐུགས་ཀྱི་རྡོ་རྗེ་ཅན། །འཁོར་གྱི་དཀྱིལ་འཁོར་ལ་གཟིགས་ནས། །དེ་ཉིད་གསུམ་སྐྱེས་སྐུར་མཛད་དོ། །ཚངས་པ་ཁྱབ་འཇུག་ལྷ་ཆེན་དང་། །འདོད་དང་
རིག་བྱེད་དེ་བཞིན་ཟུང་། །ཚངས་ལྷ་དེ་བཞིན་ཟླ་བ་སྟེ། །ཕུང་པོ་ལ་སོགས་གྲངས་དང་མཉམ། །སྒྲ་སྒྲོགས་དེ་བཞིན་དགའ་བྱེད་དང་། །སྐྱ་བསེང་སྐེམ་བྱེད་ཐུབ་པ་དང་། །སྣ་ཡོན་དང་ནི་དཀོན་མཆོག་གསུམ། །དེ་བཞིན་གཤེགས་

88-1-253a

ཀུན་གཅིག་པུ་ཉིད། །དེ་ཚེ་ཕྱུང་བ་གསོལ་བ་ཡི། །གསང་སྔགས་གསུངས་པ་དང་པོ་ཉིད། །ཐུབ་ཆེན་བྱང་ཆུབ་སེམས་ཚུལ་དུ། །མཛད་པ་གཉིས་པ་ཡིན་པར་བཤད། །རྣམ་ལྔ་མངོན་པར་བྱང་ཆུབ་པའི། །ཕྲ་མོ་རྣལ་
འབྱོར་གསུམ་པ་ཡིན། །དབང་བསྐུར་བ་ནི་རྣམ་པ་བཞི། །གཟུགས་ཀྱི་དཀྱིལ་འཁོར་ཉིད་བཞི་པ། །བསྲུང་བའི་བསླབ་གཞི་རྣམ་བཞི་དང་། །སྤྱོད་པའང་འདིར་ནི་ལྔ་པ་སྟེ། །དྲུག་པ་རང་སངས་རྒྱས་ཉིད་ཀྱི། །ཏིང་འཛིན་ཕྲ་མོའི་རྣལ་
འབྱོར་རོ། །བདུན་པ་དེ་ཉིད་མཆོད་པར་བཤད། །གསང་བའི་དབང་དུ་གཙོ་བོས་མཛད། །ཕྱག་རྒྱས་དབང་བསྐུར་བརྒྱད་པ་བསྟན། །དམ་ཚིག་བཞི་པོ་དགུ་པ་ཡིན། །རྣམ་པ་བཅུར་ཕྱེ་ཡང་དག་རྟོག །བཟླས་པའི་སྔགས་ཀྱང་
གསུངས་པ་ཡིན། །བཅུ་གཅིག་མིང་དུ་བྱུང་བ་ན། །ཕྱག་རྒྱ་གཅིག་པར་བཤད་དཀྱིལ་འཁོར། །བཅུ་གཉིས་པ་ཡི་བདག་ཉིད་སྐུ། །ཉན་ཐོས་བྱང་ཆུབ་སྟོན་པར་མཛད། །དེ་བཞིན་རིག་པ་སྤྱོད་གྲུབ་པ། །མངོན་ཤེས་ལྔ་ནི་བཅུ་གསུམ་པ། །
བཅུ་དང་བཞི་པར་བཞི་པོ་དང་། །ཕྲེང་སྔགས་བླ་མ་སྟོན་པར་མཛད། །ཕྱོགས་དང་སྐྱ་བསེང་ཉིད་གྱུར་པ། །དངོས་གྲུབ་དཀྱིལ་འཁོར་བླ་མེད་པའོ། །སྒྲ་སྒྲོགས་དུས་དང་ཡང་དག་ལྡན། །དཀྱིལ་འཁོར་རྡུལ་ཚོན་ལྡན་པའོ། །སློབ་མ་དབང་
བསྐུར་ཉི་ཟླ་དག །ཆགས་བྲལ་སྣ་ཚོགས་ཉིད་གྱུར་པ། །སྣ་ཚོགས་ཚིག་གི་དོན་གྱི་བརྡ། །སྣ་ཚོགས་མིང་ཅན་མིང་གཅིག་པུ། །དེ་ལྟར་རྣམ་པ་སྣ་ཚོགས་པའི། །སོ་སོར་སྡུད་པ་རབ་ཏུ་བསྟན། །གཅིག་དང་དུ་མ་ལས་གྲོལ་བ། །ཡང་
དག་མཐོང་ནས་ཡོངས་སུ་བསྒོམ། །ཡོངས་སུ་བསྒོམས་པར་གྱུར་པའི་བདག །རྟེན་འབྲེལ་དུ་ཡང་བསྟན་པར་བྱ། །དེ་ནས་མ་སྐྱེས་སྦྱོར་བ་ལ། །ཐུབ་པ་རྣམ་པར་སྣང་མཛད་ཆེ། །རྟེན་འབྲེལ་ཡན་ལག་བཅུ་གཉིས་པའི། །ཏིང་འཛིན་
དེ་འོག་སྟོན་པར་མཛད། །འདོད་པའི་ཡན་ལག་འགྲོ་བའི་ཚོགས། །གཉིས་པ་ཐམས་ཅད་དེ་བཞིན་གཤེགས། །འདོད་ཆགས་ཆེ་ཚུལ་ཞེས་བྱ་བའི། །ཏིང་ངེ་འཛིན་ལ་སྙོམས་པར་ཞུགས། །དེ་བཞིན་གཤེགས་ཀུན་གཙོ་བོ་ཡི། །རང་

88-1-253b

གི་སྐུ་ལ་ཞུགས་པར་མཛད། །བྱང་ཆུབ་སེམས་དཔའ་སེམས་དཔའ་ཆེ། །རྒྱུན་དེ་ལ་ནི་སྦྱོར་བར་གྱུར། །དེ་ནས་དེ་བཞིན་གཤེགས་ཀུན་དང་། །དེ་བཞིན་བྱང་ཆུབ་སེམས་དཔའ་རྣམས། །དེ་བཞིན་གཤེགས་བདག་མཉེས་བྱའི་ཕྱིར། །
དེ་རྣམས་ཞུགས་ནས་གྱུར་གྱུར་པ། །སྲོག་དང་གྱེན་རྒྱུ་ཐུར་སེལ་དང་། །མཉམ་གནས་ཁྱབ་བྱེད་ཅེས་བྱ་དང་། །ཀླུ་དང་རུས་སྦལ་རྩངས་པ་དང་། །ལྷ་སྦྱིན་གཞུ་རྒྱལ་ཞེས་བྱ་བ། །འདི་དག་ཏུ་ནི་ཉིད་སྐུ་མཛད། །བུད་མེད་གཟུགས་སུ་
སླར་སྤྲུལ་ཏེ། །རང་གི་ངོ་བོ་ཇི་བཞིན་དུ། །དེ་སྐུའི་སྐུ་ལས་བྱུང་བར་གྱུར། །དེ་ཉིད་གསུམ་ནི་མཉམ་སྦྱོར་ལས། །རང་གི་གསང་སྔགས་དེ་དག་བསྒོམ། །ཡན་ལག་ཀུན་ལས་ངེས་གྲོལ་ཞིང་། །ཤིན་དུ་ཕྲ་བ་ཉིད་དུ་གྱུར། །དབུ་
དགོས་མིང་ལས་བྱུང་བ་ནི། །ཞི་གནས་དང་ནི་ལྷག་མཐོང་སྟེ། །དངོས་མེད་ངོ་བོ་ཉིད་ཡིན་པས། །རང་ཉིད་ཀྱང་ནི་མི་ཤེས་སོ། །འོན་ཀྱང་འདི་ལྟར་ཐུབ་པ་ལ། །དེ་བཞིན་གཤེགས་རྣམས་གསོལ་བ་འདེབས། །བཅོམ་ལྡན་
དགོངས་པ་ལུང་བསྟན་པ། །ཆོས་ཀྱི་མཆོག་ནི་བསྟན་དུ་གསོལ། །ཁྱབ་བདག་ཁྱེད་ནི་ཆོས་འདི་རྣམས། །དངོས་མེད་ཉིད་ནི་ཐུགས་སུ་ཆུད། །འགྲོ་བའི་དོན་ནི་རབ་སྒྲུབ་པས། །ཡིད་བཞིན་ནོར་བུ་ལྟ་བུར་མཛེས། །གང་ཞིག་ཡང་
དག་ཤེས་གྱུར་ན། །འཇིག་རྟེན་པ་དང་རྩོད་མེད་ཅིང་། །དེ་བཞིན་འཇིག་རྟེན་འདས་པ་དང་། །འཇིག་རྟེན་ཤིན་དུ་འདས་དེ་བཞིན། །གང་འདི་ཞི་བ་ཉིད་ཀྱི་ཆོས། །ཞི་གནས་ཤིན་དུ་སྔོན་འགྲོ་བ། །བྱང་ཆུབ་སེམས་དཔས་ཐོས་ན་ཡང་། །
དེ་བཞིན་ཉིད་ཀྱི་བདེ་བ་བྱེད། །དེ་ནས་ས་སྙིང་ལ་སོགས་པའི། །བྱང་ཆུབ་སེམས་དཔའ་སེམས་དཔའ་ཆེ། །མགོན་པོ་རྣམ་སྣང་ཆེན་པོ་ལ། །དེ་དག་གིས་ནི་ཞུས་གྱུར་པ། །གང་ཤེས་བླ་མེད་བྱང་ཆུབ་ནི། །མ་འོངས་སྐྱེ་བོས་ཐོས་
འགྱུར་བའི། །གསང་སྔགས་དེ་ཉིད་དོན་འབྱུང་བ། །རྣལ་འབྱོར་བཅོམ་ལྡན་བཤད་དུ་གསོལ། །ལན་གཉིས་གསོལ་ཀྱང་མགོན་པོ་ནི། །མི་གསུང་བར་ནི་རྣམ་པར་བཞུགས། །རྡོ་རྗེ་ཅན་གྱིས་དེ་ཤེས་ནས། །དེ་ནས་སླར་

88-1-254a

ཡང་ཞུས་པར་གྱུར། །གང་འདི་ཞི་གནས་ལ་སོགས་པའི། །རྣལ་འབྱོར་ཟབ་མོ་བླ་མེད་པ། །དེ་ནི་འདི་ལྟར་སྔགས་པས་བསྔགས། །འཚལ་འགྱུར་དེ་ནི་གཙོ་བོས་གསུངས། །བྱ་བ་དག་བྱའི་རྣལ་འབྱོར་དང་། །རྣལ་འབྱོར་འབའ་
ཤིག་པ་ཉིད་དང་། །ལུང་ནི་ཡང་དག་གང་ཡིན་པ། །དེ་ནི་བསྟན་པར་མཛད་པའི་རིགས། །ཞུས་པའི་དོན་ནི་མཁྱེན་ནས་ནི། །བཅོམ་ལྡན་རྡོ་རྗེ་ཅན་གྱིས་གསུངས། །གསང་སྔགས་ཚུལ་ནི་མཆོག་གྱུར་འདི། །གསང་བ་ཁྱོད་ལ་བསྟན་
པར་བྱ། །འདི་སྐད་ཅེས་བྱའི་གསང་སྔགས་ཆེ། །གསང་སྔགས་ཀུན་དོན་སྔགས་སྟེར་བའོ། །དེར་ནི་ལྔ་ཡི་བདག་གྱུར་ཅིང་། །སྦྱོར་བ་བཞི་དང་བཅུ་ཡི་བདག །ལྔ་པ་ལྔ་པོའི་མིང་འདི་ནི། །གསལ་དང་མི་གསལ་དག་ཏུ་སྦྱར། །རྒྱ་
མངོན་ཕྱོགས་པའི་སྦྱོར་བཤད་པ། །དཀྱིལ་འཁོར་ལྔ་ཡིས་བརྒྱན་པ་ཡིན། །བཅུ་བདུན་ཞེས་ནི་བཤད་པ་འདིའི། །གསུངས་པའི་དོན་དེ་མ་ཤེས་པས། །སྔགས་པས་གསང་སྔགས་སྦྱོར་བ་དག །དེ་ཚེ་ཇི་ལྟར་བྱེད་པར་འགྱུར། །དོན་འདི་
རྟོགས་པར་གྱུར་ནས་ནི། །སྣ་ཚོགས་དོན་ནི་སྟོན་པ་དང་། །འགྲོ་བའི་དོན་ནི་རབ་སྒྲུབ་པ། །གསང་སྔགས་རིག་པ་མཆོག་རྣམས་བྱེད། །བདག་ནི་སྟོང་དང་ཡང་དག་སྦྱར། །ཡི་གེ་ཨ་ནི་སྟེང་དུ་གནས། །ཕྱི་མ་ཞེས་བྱ་གནས་བྱ་ལ། །སྔགས་
པས་སེམས་ཅན་དོན་རྣམས་བྱ། །ཡི་གེ་ཨ་གཉིས་སྦྱོར་བ་གང་། །ཨ་སྒོ་ལས་སྐྱེས་ཉིད་དུ་འགྱུར། །སྟེང་འོག་ཕྱོགས་ཀྱི་རྣམ་པ་དེ། །དངོས་པོ་མེད་པའི་ངོ་བོ་ཉིད། །གང་ཞིག་འདི་ལས་གསུངས་པ་ནི། །བསམ་མི་ཁྱབ་པའི་ཐབས་
ཆོས་ཉིད། །བདག་གིས་ཞེས་རྟོགས་དེ་འགྱུར་བ། །ཐོགས་མེད་རྟོག་པ་འདི་གནས་སོ། །སྟོན་པ་པོ་དང་བསྟན་དང་གནས། །ཕྲ་རབ་ཙམ་གྱི་ངོ་བོ་མེད། །ཀུན་རྫོབ་དུས་གསུམ་སྦྱོར་གཅིག་པ། །སྔགས་པ་རྣམས་ཀྱི་ཐོས་དེ་འགྱུར། །ཤིན་
དུ་གྲངས་མེད་བསྐལ་པ་རུ། །སངས་རྒྱས་རྣམས་ཀྱིས་གང་མཁྱེན་པ། །སྔགས་པ་རྣམས་ཀྱིས་དུས་གཅིག་ན། །སྐད་ཅིག་ལ་རྫོགས་བྱང་ཆུབ་ཐོབ། །ཀུན་མཁྱེན་ཀུན་རིག་ཐུགས་ཆུད་པ། །གསང་སྔགས་སྟོན་པའི་ཆོས་ཅན་ཏེ། ། དེ་ཉིད་

88-1-254b

ཁོ་ན་བཅོམ་ལྡན་མཆོག །སྐུ་གསུང་ཐུགས་རྡོ་རྗེ་ལས་སྐྱེས། །མི་རྟག་ནམ་མཁའ་ཇི་བཞིན་ཏེ། །གསང་སྔགས་ཐམས་ཅད་ཉི་མ་འདྲ། །ས་ལ་རླུང་བཞིན་སྔགས་པ་ནི། །འདོད་པ་ཀུན་ལ་ཉེ་བར་སྤྱོད། །ཐམས་ཅད་འགྱུར་བ་གང་གང་ཡི། །
དེ་དེ་སྟོང་པ་ཉིད་དུ་འགྱུར། །དེ་བཞིན་སྦྱོར་བ་དེ་མཐོང་བས། །ཀུན་རིག་དེ་ནི་དེ་བཞིན་གཤེགས། །དེ་བཞིན་ཉིད་གཟུགས་བརྙན་གྱུར་པ། །དེ་ནི་སྐུ་ཡི་རྡོ་རྗེར་གྱུར། །འགྲོ་བ་ཡང་དག་ཚིམ་པར་འབྱུང་། །མི་ཕྱེད་གསུང་གི་རྡོ་རྗེར་གྱུར། །ནམ་
མཁའི་གནས་ཀྱི་སྦྱོར་བ་གང་། །བསམ་མི་ཁྱབ་པར་སྤྲོ་བདག་ཉིད། །དེ་ཉིད་ཡེ་ཤེས་རྒྱ་མཚོ་ལ། །ཐུགས་ཀྱི་རྡོ་རྗེ་ཡང་དག་བྱུང་། །སེམས་ཅན་ཀུན་གྱི་སེམས་གང་ཡིན། །ནམ་མཁའ་ཡོངས་སུ་བརྟགས་པ་སྟེ། །དེ་ཡང་དེ་རུ་ཀུན་གནས་
པས། །བུད་མེད་ཆོས་གཅིག་པུ་ཡི་གཟུགས། །སངས་རྒྱས་ཀུན་གྱིས་གང་བརྟེན་པ། །སར་གྱུར་དེ་ནི་བཅུ་གསུམ་པ། །དེ་ནི་བུད་མེད་ཅེས་བཤད་དེ། །དེ་བས་ཆོས་དེ་བྷ་ག་ཡིན། །བྱ་བ་ལ་སོགས་ཇི་སྐད་བཤད། །དམ་ཚིག་ཆེན་པོ་
གཅིག་ཏུ་གྱུར། །དངོས་མེད་ཆོས་ཉིད་གཅིག་པུ་རུ། །འདི་ནི་དེ་དག་མཉམ་པར་འགྱུར། །དམ་ཚིག་སྐུ་གསུང་ཐུགས་དང་ནི། །ཏིང་འཛིན་དེ་བཞིན་རྒྱལ་བ་དང་། །ས་དང་ཆུ་དང་དེ་བཞིན་མེ། །རླུང་དང་ནམ་མཁའ་ཉིད་དག་དང་། །གཟུགས་
དང་སྒྲ་དང་དྲི་དང་རོ། །རེག་དང་དེ་བཞིན་ཆོས་ཀྱི་དབྱིངས། །འདི་རྣམས་རྡོ་རྗེའི་མཐའ་ཅན་བྱུང་། །བྱང་ཆུབ་སེམས་དཔའ་རྫུ་འཕྲུལ་ཆེ། །དེ་ལྟར་བརྗོད་མི་ལང་ཞེས་པ། །བརྗོད་མི་ལང་བ་ཉིད་གྱུར་རྣམས། །སངས་རྒྱས་ཞིང་གི་རི་རབ་ཀྱི། །
རྡུལ་ཕྲན་གྱི་ནི་གྲངས་མཉམ་པའི། །བྱང་ཆུབ་སེམས་དཔའ་སེམས་ཆེན་དང་། །ནམ་མཁའ་མཉམ་པའི་དེ་བཞིན་གཤེགས། །མི་བསྐྱོད་རྣམ་སྣང་མཛད་རིན་ཆེན། །དཔག་མེད་ཚེ་དང་གདོན་མི་ཟ། །འདི་དག་ནམ་མཁའི་ཁམས་
མཉམ་པའི། །རྡོ་རྗེ་སྙིང་པོ་དེ་བཞིན་གཤེགས། །དཔེར་ན་ཏིལ་འབྲུ་མཚུངས་པ་ཡི། །དེ་བཞིན་གཤེགས་པ་ཐམས་ཅད་ཀྱིས། །ནམ་མཁའི་ཁམས་ནི་ཡོངས་ཁེབས་པ། །དེ་རྣམས་དེར་ནི་ཡང་དག་སྣང་། །དེ་ནས་མགོན་པོ་རྣམ་སྣང་

88-1-255a

མཛད། །དེ་བཞིན་ཉིད་དང་གཅིག་ཏུ་གྱུར། །གང་ཡང་དམ་ཚིག་སྔོན་འགྲོ་དང་། །སྐུ་རྡོ་རྗེ་སོགས་མིང་ཅན་གྱི། །བྱང་ཆུབ་སེམས་དཔའ་སེམས་ཆེན་དང་། །དོན་ཡོད་ཐམས་ཅད་དེ་བཞིན་གཤེགས། །འདི་རྣམས་སྐུ་ཡི་
ཡན་ལག་གྲགས། །ཞི་གནས་བསམ་མི་ཁྱབ་ལས་བྱུང་། །མ་སྐྱེས་གཅིག་པུ་གཟིགས་པ་ནི། །འདོད་ཆགས་ཆེན་པོའི་ཚུལ་དུ་གྱུར། །འདོད་ཆགས་ཆེན་པོའི་ཚུལ་མཆོག་གི། ཏིང་ངེ་འཛིན་ལ་སྙོམས་ཞུགས་ཏེ། །དེ་བཞིན་
གཤེགས་པ་ཀུན་གྱི་ཚོགས། །དེ་ནི་ཉིད་ཀྱི་སྐུ་ལ་བཅུག །དེ་ནི་དེ་བཞིན་གཤེགས་པ་ཀུན། །དེ་ནི་རྣམ་པར་སྣང་མཛད་ཆེ། །འདི་ཉིད་མཉེས་པར་བྱ་བའི་ཕྱིར། །ཉིད་སྐུ་བུད་མེད་ཉིད་དུ་མཛད། །དེ་ནས་མགོན་པོ་བསམ་ཡས་ལས། །
བུད་མེད་གཟུགས་སུ་བྱུང་བར་གྱུར། །དེ་ནི་སངས་རྒྱས་སྤྱན་འདྲ་དང་། །མཱ་མ་ཀཱི་འདྲ་སྦྱོར་བ་དང་། །གོས་དཀར་མོ་འདྲའི་གཟུགས་དང་ནི། །སྒྲོལ་མའི་གཟུགས་སུ་ཡང་དག་གནས། །སྒྲ་ཡི་ངོ་བོའི་གཟུགས་ཅན་དང་། །དྲི་ཡི་ངོ་བོའི་
གཟུགས་དང་ནི། །དེ་བཞིན་རོ་ཡི་ངོ་བོའི་གཟུགས། །རེག་གི་ངོ་བོའི་གཟུགས་ཅན་དང་། །ལ་ལ་གཟུགས་ཀྱི་ངོ་བོ་ཡིས། །དེ་བཞིན་གཤེགས་པ་དེ་རྣམས་བཞུགས། །དེ་ནས་ཚུལ་གསུམ་དོན་གཅིག་དང་། །མི་བསྐྱོད་པ་ཡང་བསྟན་ཕྱིར་
དང་། །འཇིག་རྟེན་རྒྱང་པན་གདུལ་དོན་དུ། །འཇིག་རྟེན་འདས་པའི་ཚུལ་བྱུང་ངོ་། །གཉིས་མེད་མཉམ་པ་ཉིད་རྣལ་འབྱོར། །རྡོ་རྗེ་བུད་མེད་བྷ་ག་མཆོག །དམ་ཚིག་ཆེན་པོའི་དཀྱིལ་འཁོར་དུ། །དེ་ནི་མི་བསྐྱོད་ཡང་དག་བྲི། །ཟུར་བཞི་པ་ལ་སྒོ་
བཞི་པ། སྦྱོར་གཞི་གཅིག་ཏུ་སྦྱོར་བ་ཉིད། །དྲི་མ་མེད་པར་བྱིན་བརླབས་པ། །ཀུན་ནས་ཤིན་དུ་གསལ་བའི་གཟུགས། །སངས་རྒྱས་སྤྲིན་གྱིས་ཀུན་དུ་ཁྱབ། །འབར་བ་མང་པོས་རྣམ་པར་འཁྲུག །གསལ་བ་ལ་སོགས་དཀྱིལ་འཁོར་
ལྡན། །དེ་བཞིན་གཤེགས་པ་ཀུན་གྱི་གནས། །དེ་ནས་དེ་ནི་བཅོམ་ལྡན་འདས། །དེ་བཞིན་གཤེགས་ཀུན་བདག་པོ་འདི། །དཀྱིལ་འཁོར་ཆེན་པོའི་དབུས་སུ་ཡང་། །རྣམ་པར་བཞག་སྟེ་བཞུགས་པར་གྱུར། །མི་བསྐྱོད་རིན་ཆེན་

88-1-255b

དཔག་མེད་དང་། །དོན་གྲུབ་རྣམ་སྣང་དེ་བཞིན་གཤེགས། །དེ་རྣམས་བྱང་ཆུབ་སེམས་རྡོ་རྗེའི། །ཐུགས་ལ་རྣམ་པར་བཞུགས་པར་གྱུར། །དེ་རྣམས་ཟིལ་གྱིས་མནན་པའི་ཕྱིར། །དེ་བཞིན་གཤེགས་པ་བྱང་ཆུབ་སེམས། །དངོས་མེད་ངོ་
བོར་གཅིག་པར་ནི། མཁའ་འདྲ་རྡོ་རྗེ་ལས་བྱུང་གཟིགས། །ཤེས་རབ་ཏིང་འཛིན་གཞི་གཅིག་པུ། །དེ་ནི་གྲིབ་མ་ལྟར་ཐུགས་ཆུད། །རྡོ་རྗེའི་རང་བཞིན་སྐུར་མཛད་ནས། །འགྲོ་དོན་མཉམ་དང་མི་མཉམ་མཛད། །ཇི་ལྟར་མཚམས་གནས་
ཉི་མ་ཡིས། །འགྲོ་བ་གཉིད་ལོག་སད་པར་བྱེད། །དེ་བཞིན་དེ་བཞིན་གཤེགས་པ་ཀུན། །བྱང་ཆུབ་སེམས་ཀྱིས་སད་པར་བྱེད། །སྐུ་གསུང་ཐུགས་ནི་རྡོ་རྗེ་གཅིག །དེ་རྣམས་སྐྱེ་བར་བཞེད་པ་ཡིས། །བྱང་ཆུབ་སེམས་ཀྱི་ངོ་བོ་
ཡིས། །རྡོ་རྗེའི་སྔགས་སུ་མཛད་པར་གྱུར། །རིག་པ་སྐྱེས་བུའི་གཟུགས་དག་ནི། །སྔགས་ཀྱིས་བྱིན་བརླབས་བླ་ན་མེད། །དེར་ནི་ཞལ་གསུམ་པ་ལྟ་བུར། །དེ་བཞིན་གཤེགས་པ་ཀུན་གྱིས་གཟིགས། །དེ་ནས་མགོན་
པོ་བཅོམ་ལྡན་གྱི། །ཐུགས་རྗེས་བཞུགས་པ་ལས་བྱུང་སྟེ། །བྱང་ཆུབ་སེམས་ནི་རབ་བསྐོར་ལ། །ལན་གསུམ་ཆེད་དུ་བརྗོད་པ་མཛད། །བསམ་མི་ཁྱབ་ཅིང་གནས་མེད་གང་། །དེ་བཞིན་གཤེགས་པ་ཀུན་གྱི་གསང་། །
རྡོ་རྗེ་བྱང་ཆུབ་སེམས་གཅིག་ལས། །སྤྱོད་ཡུལ་དེར་ནི་གྱུར་པ་ཡིན། །དེ་ནས་གསང་ཚུལ་ཐོས་པ་དང་། །དེ་འོག་གསང་བའི་བདག་པོས་ནི། །ཁྱབ་བདག་རྣམ་པར་སྣང་མཛད་ལ། །ཇི་བཞིན་ཚུལ་དུ་དེ་བཏུད་ཞུས། །ཕུང་
པོ་ཁམས་ལ་སོགས་པའི་ཆོས། །འདུས་ལ་གང་ཞིག་གནས་པའི་རྣམས། །རྟེན་འབྲེལ་ལས་སྐྱེས་ཡིན་པར་ནི། །ཁྱེད་ཆོས་སྟོན་པར་མཛད་པས་ཁུམས། །སྨན་པའི་ཆོས་རྣམས་འདི་དག་ནི། །ཞེ་སྡང་ལ་སོགས་རྐྱེན་དང་
ལྡན། །འདི་དག་ཇི་ལྟར་བདེ་གཤེགས་དང་། །རྫུ་འཕྲུལ་ཆེན་པོ་རིགས་མ་ལགས། །བྱང་ཆུབ་སེམས་དཔའ་སེམས་ཆེན་དེ། །ལུས་ལ་སོགས་པ་ཇི་ལྟར་འགྱུར། །གང་ཞིག་ཕྱི་དུས་སྐྱེ་བོ་ཡིས། །འདི་དག་འཚལ་བར་མི་འགྱུར་རོ། །

88-1-256a

དེ་ནས་བཅོམ་ལྡན་རྡོ་རྗེ་ཅན། །འོད་ཆེན་ལྡན་པས་བཀའ་སྩལ་པ། །མ་འོངས་སྐྱེ་བོ་མཐོང་ནས་ནི། །གང་ཞིག་ཁྱོད་ཀྱིས་ང་དྲིས་པ། །ལེགས་སོ་ལེགས་སོ་སེམས་དཔའ་ཆེ། །གསང་བའི་བདག་པོ་ཁྱོད་ལེགས་སོ། །
སྨྲས་དོན་ཇི་ལྟ་ཇི་ལྟ་བར། །དེ་ལྟར་ཁྱོད་ལ་ལུང་བསྟན་བྱ། །མ་འོངས་དུས་ན་མི་རྣམས་ནི། །འཇིག་རྟེན་རྒྱང་པན་མཆོག་གཞོལ་འགྱུར། །ལོག་པར་ལྟ་བ་ལ་གནས་ཏེ། །ཅི་དགའ་བར་ཡང་སྤྱོད་པར་བྱེད། །ལ་ལ་གླུ་དང་གར་ལ་
དགའ། །དགོད་དང་སྒེག་ལ་མཆོག་ཏུ་གཞོལ། །དྲི་དང་ཕྲེང་བ་ལ་དགའ་ཞིང་། །དེ་བཞིན་འཁྲིག་པ་ལ་དགར་འགྱུར། །རྨོངས་པ་ལ་ལ་སྡང་བ་དང་། །དེ་བཞིན་གཏི་མུག་ལ་རབ་གཞོལ། །ལ་ལ་དེ་བཞིན་འདོད་ཆགས་ཞེན། །ཤེས་པ་
གཞན་དག་འདོད་པར་འགྱུར། །ཉ་དང་ཤ་དང་དེ་བཞིན་ཆང་། །བཤང་གཅི་ཁུ་བ་ཁྲག་རྣམས་ནི། །སྐྱེས་བུ་གླེན་པ་ཟ་བྱེད་ཅིང་། །མེད་པར་སྨྲ་བ་ཆོས་སུ་སྒྲོགས། །མ་དང་སྲིང་མོ་ལ་སོགས་པ། །བགྲོད་མིན་ལ་ནི་འགྲོ་བ་དང་། །ཕ་དང་མ་ཡང་
གསོད་པ་དང་། །དེ་བཞིན་སྲོག་ཆགས་གཞན་རྣམས་གསོད། །བརྫུན་གྱི་ཚིག་ཉིད་སྨྲ་བ་དང་། །ཁྱད་པར་དུ་ཡང་རྐུ་བ་དང་། །གཞན་གྱི་ཆུང་མའི་ཐད་འགྲོ་ཞིང་། །སྨད་པ་གཞན་ཡང་བྱེད་པར་འགྱུར། །ལ་ལ་དམ་ཆོས་སྤོང་
བ་དང་། །དེ་བཞིན་མཚམས་མེད་བྱེད་པ་སྟེ། །སྣ་ཚོགས་སྡིག་པ་བྱས་ནས་ཀྱང་། །སྔགས་པ་དངོས་གྲུབ་འདོད་པར་འགྱུར། །གཟེར་ནད་དུག་དང་སྦྱར་བའི་དུག །སྣ་ཚོགས་ནད་ནི་མི་བཟད་པར། །འདི་རྣམས་ཀྱིས་ནི་གཟིར་གྱུར་
ནས། །ཞི་བ་ཉིད་ནི་འདོད་པར་འགྱུར། །འདོར་བར་བྱེད་པ་རྨོངས་པ་དེ། །མི་བཟད་སྡིག་པ་བྱས་པ་དང་། །ལོག་པར་ལྟ་ལ་མཆོག་གཞོལ་རྣམས། །ངན་སོང་གསུམ་དུ་འགྲོ་བར་འགྱུར། །དེ་རྣམས་རྗེས་སུ་གཟུང་བའི་ཕྱིར། །གསང་
བ་འདི་ལྟར་བསྟན་པ་ཡིན། །གང་ཞིག་ཡང་དག་ཐོབ་པ་ཉིད། །འདིར་ནི་དེ་བཞིན་གཤེགས་པར་འགྱུར། །གསང་བའི་བདག་པོ་མཁས་རྣམས་ཀྱིས། །ཚུལ་མཆོག་འདི་ནི་རྙེད་གྱུར་ནས། །དོན་གསལ་ཡང་དག་རྙེད་པ་དང་། །དེ་ཡང་

88-1-256b

ང་རྒྱལ་དག་ཏུ་ལྟུང་། །དེ་རྣམས་ཏིང་འཛིན་ཞི་ཉིད་དང་། །ཤེས་རབ་ཉིད་ཀྱང་ཤིན་དུ་རིང་། །རབ་ཏུ་དགའ་དང་ལྡན་པ་ཡིས། །རྣལ་འབྱོར་པ་ནི་བདག་ཉིད་ཅེས། །མངོན་པའི་ང་རྒྱལ་ལ་རྟག་དགའ། །སྒྱུ་དང་བཅོས་མའི་ཆོས་དང་ལྡན། །
མྱ་ངན་འདས་དང་གཞན་འགྲོ་བ། །ཕན་ཚུན་དག་ནི་སུན་ཡང་འབྱིན། །གསང་སྔགས་སྨྲ་བ་ལ་བརྟེན་ནས། །གཅིག་ལ་གཅིག་ནི་རྩོད་པར་འགྱུར། །དེ་རྣམས་བདུད་ཀྱི་བྱིན་བརླབས་ཀྱིས། །གལ་ཏེ་དངོས་གྲུབ་ཕྲ་ཐོབ་ན། །དེས་
ནི་མངོན་པར་ང་རྒྱལ་བས། །མཁས་པ་སྙམ་དུ་ཤེས་པར་འགྱུར། །ཚོགས་པའི་ནང་དུ་རྩོད་པ་དང་། །ཁྱི་བཞིན་ཁ་ཟས་ལ་སྤྱོད་འགྱུར། །རང་ལས་འབྲས་ལས་བྱུང་བ་ཡི། །ཕན་པ་ལ་ནི་གནོད་པ་བྱེད། །དེ་རྣམས་དགེ་དང་
མི་དགེ་རྣམས། །བདག་ཅག་རྣམས་ཀྱི་སྟོབས་ཡིན་ཟེར། །མངོན་སུམ་སངས་རྒྱས་འདྲ་བ་ཡི། །སློབ་དཔོན་སྨོད་ཅིང་བསྙེན་བཀུར་མེད། །སྐད་ཅིག་གཅིག་གིས་སྡང་བྱེད་ཅིང་། །དེ་ལ་སྐད་ཅིག་གིས་རྗེས་ཆགས། །ཁྱི་དང་
ཕག་དང་ཁྭ་རྣམས་ཀྱི། །སྤྱོད་པ་དག་ནི་སྟོན་པར་བྱེད། །དེ་རྣམས་ཕན་ཚུན་རྣམ་འཚེ་བར། །མངོན་པར་དགའ་བར་བྱེད་པར་འགྱུར། །གསང་བ་འདུས་པ་མི་ཤེས་པར། །དམ་ཚིག་ལ་སོགས་བྱེད་པར་འགྱུར། །གསང་བ་
སྲུང་བར་མི་བྱེད་པར། །ཐམས་ཅད་དུ་ནི་སྟོན་པར་བྱེད། །འཇིག་རྟེན་ལ་ནི་སྨད་བྱས་ནས། །གཞན་དག་ལ་ཡང་རབ་གསལ་བྱེད། །བདག་ཉིད་རྩ་བ་མེད་པར་ནི། །དམ་ཚིག་འདས་པར་བྱེད་པར་འགྱུར། །སྒྲ་བཅས་སྤྲོར་ལྡན་
གྱིས་བསྐུལ་བས། །རང་ལ་རང་གི་གླགས་རྙེད་མེད། །དེ་ཉིད་ཡེ་ཤེས་འབྱུང་བ་ཡི། །ཏིང་འཛིན་དེ་ཡིས་ཤེས་མི་འགྱུར། །ཉེས་པ་ཅུང་ཟད་ཙམ་གྱི་ཕྱིར། །མངོན་སྤྱོད་རབ་ཏུ་བྱེད་པར་འགྱུར། །རྣལ་འབྱོར་རབ་སྦྱོར་དམན་པ་
ཡི། །སྔགས་པ་རྣམས་ནི་འགྲུབ་མི་འགྱུར། །ཕྱི་རོལ་བསྟན་བཅོས་ལ་རྟག་དགའ། །དེ་ཡི་སྦྱོར་ལ་གཅིག་ཏུ་མཁས། །རང་གི་དམ་ཚིག་ཡོངས་སྤངས་ནས། །ལྕགས་ཀྱུ་མེད་པ་བཞིན་དུ་སྤྱོད། །སྔགས་དང་ཕྱག་རྒྱའི་སྦྱོར་

88-1-257a

བ་ཡིས། །དེ་རྣམས་འཚོ་བ་སྒྲུབ་པར་འགྱུར། །གང་དུ་རྙེད་པ་ཐོབ་འགྱུར་བར། །དམ་པའི་ཆོས་ནི་སྟོན་པར་བྱེད། །དེ་རྣམས་ཡང་དག་སྡུད་བྱེད་པའི། །གསང་བ་དགོངས་པས་བཤད་པ་ཡིན། །དམ་ཚིག་
ཉམས་ཏེ་གནས་པ་རྣམས། །འདི་ཡིས་ཐམས་ཅད་དགུག་པར་བྱ། །རང་གི་རྗེས་རིག་མི་ཤེས་ན། །དེ་རྣམས་ཞི་བར་ག་ལ་འགྱུར། །དེ་ནས་རྗེས་སུ་གཟུང་དོན་དུ། །ཚུལ་འདི་དག་ནི་གྱུར་པ་ཡིན། །དེ་ནས་བཅོམ་ལྡན་དེ་
བཞིན་གཤེགས། །གཅིག་ཏུ་འདུས་པར་གྱུར་ནས་སུ། །དེ་བཞིན་གཤེགས་ཀུན་བདག་པོ་ལ། །རང་མཆོད་དེ་ཉིད་དམ་ཚིག་སྤྲིན། །ཡང་དག་འབྱུང་བས་ལེགས་མཆོད་དེ། །ཕྱག་འཚལ་ནས་ནི་འདི་སྐད་གསོལ། །དེ་
བཞིན་གཤེགས་པ་གསང་བ་མཆོག །དེ་བཞིན་གཤེགས་པ་ཀུན་བསྡུས་པ། །འདུས་པ་གཉིས་མེད་རྣལ་འབྱོར་པའི། །ཉམས་དགའ་རྡོ་རྗེ་སྙིང་པོ་འདི། །དེ་ཉིད་བསྡུས་པ་རྣམས་ཀྱི་མཆོག །དེ་ཉིད་བཅོམ་ལྡན་བཤད་
དུ་གསོལ། །དེ་ནས་དེ་བཞིན་གཤེགས་ཀུན་ལ། །བཅོམ་ལྡན་འདས་ཀྱིས་སླར་གསུངས་པ། །གང་ཡང་འདི་ལྟར་གསོལ་འདེབས་པ། །དེ་བཞིན་གཤེགས་རྣམས་ལེགས་སོ་ལེགས། །འདི་ནི་དེ་བཞིན་གཤེགས་རྣམས་ཀྱང་། །
ཐེ་ཚོམ་སྐྱེ་བར་བྱེད་ཡིན་ན། །བྱང་ཆུབ་སེམས་གཞན་ཅི་སྨོས་ཞེས། །དེ་བཞིན་གཤེགས་དེ་རྣམས་ལ་གསུངས། །དེ་ནས་ངོ་མཚར་རྨད་བྱུང་ནས། །ཐེ་ཚོམ་ཐམས་ཅད་གཅོད་མཛད་པའི། །བཅོམ་ལྡན་དེ་བཞིན་གཤེགས་
ཀུན་གྱི། །བདག་པོ་ལ་ནི་འདི་སྐད་ཞུས། །བཅོམ་ལྡན་དེ་བཞིན་གཤེགས་ཀུན་གྱི། །ཡོན་ཏན་ཀུན་གྱིས་ཕུལ་ཕྱུང་ཡང་། །གཙོ་བོ་འདིར་ནི་སྟོན་མཛད་པར། །ཇི་ལྟར་སྤྲོ་བ་མངའ་མ་གྱུར། །བྱིན་གྱིས་བརླབ་པའི་གནས་མཛད་དེ། །
དེ་བཞིན་གཤེགས་ཡིད་བདེ་ལ་སོགས། །ཡེ་ཤེས་རྒྱུ་འབྲས་ཐོབ་པའི་ཕྱིར། །དེ་ནི་ཡང་དག་བཤད་དུ་གསོལ། །དེ་བཞིན་གཤེགས་ཀུན་བདག་པོ་ནི། །དེ་རྣམས་ཞུ་བར་མཁྱེན་ནས་སུ། །ཡེ་ཤེས་སྒྲོན་མ་རྡོ་རྗེ་གྲགས། །ཏིང་འཛིན་
88-1-257b

ཞེ་སྡང་རིགས་འབྱུང་བ། །གཙོ་བོས་མི་བསྐྱོད་སྙིང་པོ་ནི། །སྐུ་གསུང་ཐུགས་ནི་དཔལ་ལྡན་པས། །དེ་ནས་ཡང་དག་ཕྱུང་བ་ནི། །བཛྲ་དྷྲྀག་ཅེས་བྱ་བའི་སྔགས། །དེ་ནས་འདི་ནི་གསུངས་ཙམ་གྱིས། །ཞེ་སྡང་རིགས་བྱུང་ལས་
སྐྱེས་པ། །དེ་ནི་རིག་པ་སྐྱེས་བུར་འགྱུར། །མི་བསྐྱོད་རྒྱ་ཆེན་ཐབས་ཀྱིས་སྦྱོར། །ཞལ་གསུམ་གནག་དང་དཀར་དང་དམར། །བདག་ཉིད་ཆེན་པོ་དེ་ཞལ་ཡིན། །རྡོ་རྗེ་གསུམ་འདིར་དེ་བཞིན་གཤེགས། །བཞུགས་པ་ཡེ་ཤེས་
ཞེས་བྱའོ། །དེ་ནས་དེ་བཞིན་གཤེགས་བདག་པོ། །དམ་ཚིག་འབྱུང་རྡོ་རྗེ་ཞེས་བྱའོ། །ཏིང་ངེ་འཛིན་ལ་གཙོ་བོ་ནི། །སྙོམས་པར་ཞུགས་པ་ཉིད་དུ་མཛོད། །དེ་ནས་ཛཱི་ན་ཛཱིཀ་ཅེས་པའི། །སྙིང་པོ་དེ་བཞིན་ཡང་དག་ཕྱུང་། །
དེ་ནས་གསུངས་པ་ཙམ་གྱིས་ཀྱང་། །གཏི་མུག་རིགས་བྱུང་ལས་སྐྱེས་པ། །རིག་བཅས་སྐྱེས་བུར་གྱུར་པ་ནི། །རྣམ་པར་སྣང་མཛད་དེ་བཞིན་གཤེགས། །དཀར་དང་གནག་དང་དམར་བཅས་པའི། །ཞལ་གྱིས་མདུན་དུ་བཞུགས་པར་
གྱུར། །དེ་ནས་རིན་ཆེན་བྱུང་བ་ཡི། །དཔལ་ཞེས་བྱ་བའི་ཏིང་འཛིན་ལ། །སྙོམས་པར་ཞུགས་ནས་བདེར་གཤེགས་ཀུན། །བདེ་དང་ཡིད་བདེར་གྱུར་པའི་ཕྱིར། །ཡིད་བཞིན་ནོར་བུ་རིན་ཆེན་རིགས། །དེ་བཞིན་གཤེགས་ཀུན་བདག་པོ་འདི། །
དེ་ནས་རཏྣ་དྷྲཱྀཀ་ཅེས་བྱའི། །སྙིང་པོ་དཔལ་ལྡན་དེ་ཚེ་བྱུང་། །དེ་ནས་ཕྱུང་བ་ཙམ་གྱིས་ནི། །རིག་དང་བཅས་པའི་སྐྱེས་བུར་གྱུར། །སེར་དང་དཀར་དང་གནག་པ་ཡི། །ཞལ་དང་རིན་ཆེན་འབྱུང་ལྡན་ནི། །རྡོ་རྗེ་གསུམ་གྱི་བདག་པོ་ཡི། །
ལྷོ་ཕྱོགས་ལོགས་སུ་བཞུགས་པར་གྱུར། །དེ་ཡང་བྱང་དུ་གཟིགས་གྱུར་ཏེ། །མཉམ་ཉིད་ཡེ་ཤེས་ཞེས་བྱའོ། །དེ་ནས་བཅོམ་ལྡན་བདག་པོ་དེ། །རྡོ་རྗེ་གསུམ་གྱི་དམ་ཚིག་བདག །འདོད་ཆགས་ཆེན་པོ་ལས་བྱུང་བ། །རྡོ་རྗེ་ཞེས་ནི་
བྱ་བ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །འདོད་ཆགས་ཆེན་པོའི་རིགས་ལས་བྱུང་། །ཨཱ་རོ་ལཱིཀ་ཅེས་བྱ་སྙིང་པོ། །རྡོ་རྗེ་གསུམ་ལས་དེ་ནས་ཕྱུང་། །དེ་ནས་ཕྱུང་བ་ཙམ་གྱིས་ནི། །དེ་འོག་བཅོམ་ལྡན་གཙོ་བོ་ནི། །རིག་དང་

88-1-258a

བཅས་པའི་སྐྱེས་བུར་གྱུར། །འཇིག་རྟེན་དབང་པོ་འོད་དང་མཚུངས། །དམར་དང་དཀར་དང་གནག་པའི་ཞལ། །དཔལ་ལྡན་རིགས་ཆེན་པོ་ཡི་བདག །དེ་བཞིན་གཤེགས་པའི་བདག་པོ་ཡི། །ནུབ་ཕྱོགས་སུ་ནི་བཞུགས་པར་
གྱུར། །དེ་ནས་བཅོམ་ལྡན་སྣ་ཚོགས་པ། །དོན་ཡོད་དམ་ཚིག་ཅེས་བྱ་བའི། །ཏིང་འཛིན་རྡོ་རྗེ་ཡང་དག་བྱུང་། །རྡོ་རྗེ་དེ་ལ་སྙོམས་ཞུགས་ནས། །སྙིང་པོ་མཆོག་གི་མཆོག་ཅེས་བྱའོ། །དམ་ཚིག་རྣམས་ནི་དགུག་པའི་རིགས། །སྙིང་པོ་
པྲཛྙཱ་དྷྲྀཀ་ཅེས་པ། །རྡོ་རྗེ་གསུམ་ཞེས་བྱ་ལས་བྱུང་། །དེ་ནས་ཕྱུང་བ་ཙམ་གྱིས་ནི། །དོན་ཡོད་རྡོ་རྗེ་སྦྱོར་བ་ཡི། །དེ་ཉིད་མགོན་པོ་བཅོམ་ལྡན་འདས། །སྐུ་གསུང་ཐུགས་ཀྱི་རྡོ་རྗེ་ཅན། །རིག་དང་བཅས་པའི་སྐྱེས་བུར་གྱུར། །ལྗང་དང་གནག་
དང་དཀར་བའི་ཞལ། །དེ་བཞིན་གཤེགས་པའི་བདག་པོ་ཡི། །བྱང་ཕྱོགས་སུ་ནི་བཞུགས་པར་གྱུར། །ཞེ་སྡང་གཏི་མུག་རིགས་དང་ནི། །དེ་བཞིན་ཡིད་བཞིན་རིན་ཆེན་དང་། །འདོད་ཆགས་དམ་ཚིག་ཅེས་བྱ་བ། །འདོད་དང་ཐར་པ་རབ་
བསྒྲུབས་པའོ། །དེ་ནས་ཁྱབ་བདག་རྡོ་རྗེ་འཛིན། །འདོད་ཆགས་དམ་ཚིག་འབྱུང་བ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །རྡོ་རྗེ་འཛིན་པ་བཙུན་མོ་མཆོག །སྐུ་གསུང་ཐུགས་ཀྱི་རྡོ་རྗེ་ལས། །དམ་པ་དག་ནི་ཕྱུང་བར་གྱུར། །
སངས་རྒྱས་ཀུན་གྱི་ཡུམ་གཅིག་པུ། །ཡུམ་ཞེས་བྱ་བར་ཡང་དག་བཤད། །དེ་ནི་དེ་བཞིན་གཤེགས་བདག་པོ། །གང་ཕྱིར་ལྷ་མོ་བཙུན་མོ་མཆོག །སྐུ་དང་གསུང་ཐུགས་ལས་བྱུང་བ། །དྭེ་ཥ་ར་ཏི་ཞེས་བྱར་གྲགས། །རིག་པ་
སྐྱེས་བུ་ཞེས་བྱ་བའི། །དེ་ནི་བུད་མེད་གཟུགས་འཛིན་མ། །ཞལ་གསུམ་ལྟ་བུའི་གཟུགས་ཀྱིས་ནི། །མེ་ཡི་ཕྱོགས་སུ་རྣམ་པར་བཞུགས། །དེ་ནས་རྗེས་མཉེས་རྡོ་རྗེ་གྲགས། །སྐུ་གསུང་ཐུགས་རྡོ་རྗེ་ལས་བྱུང་། །ཏིང་ངེ་
འཛིན་ལ་སྙོམས་ཞུགས་ཏེ། །རྡོ་རྗེ་གསུམ་ལས་བྱུང་བ་ནི། །དེ་ནི་མོ་ཧ་ར་ཏི་སྟེ། །གང་ཕྱིར་དེ་བཞིན་གཤེགས་པའི་ཡང་། །རིག་པ་སྐྱེས་བུ་བྱུང་བ་སྟེ། །ཞལ་གསུམ་ལྟ་བུའི་རྣལ་འབྱོར་མ། །གཉིས་མེད་མཉམ་པའི་རྣལ་

88-1-258b

འབྱོར་པས། །སངས་རྒྱས་ཀུན་གྱི་ཡིད་འོང་གཅིག །གསང་བ་བསྡུས་པའི་སྦྱོར་བ་ཡིས། །བདེན་བྲལ་ཕྱོགས་སུ་རྣམ་པར་བཞུགས། །དེ་ནས་རྗེས་ཆགས་རྡོ་རྗེ་ཞེས། །བྱ་བ་རྡོ་རྗེ་གསུམ་ལས་སྐྱེས། །ཏིང་ངེ་འཛིན་ལ་
སྙོམས་ཞུགས་ནས། །བདེ་བ་ཆེན་པོ་ཕྱུང་བ་ནི། །འདི་ལྟར་ནཱ་ག་ར་ཏི་ཕྱུང་། །ཞལ་གསུམ་པ་ཡི་གཟུགས་ཅན་ཏེ། །གཙོ་བོ་བུད་མེད་གཟུགས་འཛིན་པ། །དེ་ནི་རིག་པ་སྐྱེས་བུར་གྱུར། །གོས་མེད་ཡེ་ཤེས་ལས་བྱུང་བ། །རྡོ་རྗེ་
གསུམ་གྱི་དམ་ཚིག་མཆོག །དེ་བཞིན་གཤེགས་པའི་བཙུན་མོ་སྟེ། །རླུང་གི་ཕྱོགས་སུ་རྣམ་པར་བཞུགས། །དེ་ནས་བཅོམ་ལྡན་འདས་བདག་པོ། །རྡོ་རྗེ་གསུམ་གྱི་དམ་ཚིག་ཅན། །བསླུ་བ་རྡོ་རྗེ་ཞེས་བྱ་བའི། །ཏིང་ངེ་འཛིན་ལ་
སྙོམས་ཞུགས་ནས། །དེ་བཞིན་གཤེགས་ཀུན་བཙུན་མོ་མཆོག །ཞལ་གསུམ་ལྟ་བུའི་གཟུགས་ཅན་མ། །བཛྲ་ར་ཏི་ཞེས་བྱ་བ། །རྡོ་རྗེ་གསུམ་ལས་ཕྱུང་བར་གྱུར། །དེ་ནི་ཕྱུང་མ་ཐག་ཏུ་ཡང་། །གཙོ་བོ་རིག་མ་སྐྱེས་བུར་གྱུར། །
བུད་མེད་ཀྱི་ནི་གཟུགས་འཛིན་ཏེ། །དབང་ལྡན་ཕྱོགས་སུ་རྣམ་པར་བཞུགས། །དེ་ནས་བཅོམ་ལྡན་མགོན་པོ་དེ། །རྣམ་སྣང་རྡོ་རྗེ་ལས་བྱུང་བའི། །ཏིང་ངེ་འཛིན་ལ་སྙོམས་ཞུགས་ཏེ། །སྐུ་གསུང་ཐུགས་ཀྱི་རྡོ་རྗེ་ལ། །དཀྱིལ་འཁོར་
འདིར་ནི་གཤིན་རྗེའི་གཤེད། །ཁྲོ་བོ་ཆེན་པོ་ཕྱུང་བ་དང་། །ཕྱུང་ནས་དེ་བཞིན་གཤེགས་པ་རྣམས། །བསྙེངས་པར་བྱ་བར་ཤར་ཕྱོགས་བཞུགས། །དེ་ནས་བདག་པོ་བཅོམ་ལྡན་འདས། །དེ་བཞིན་གཤེགས་པ་ཐམས་ཅད་ཀྱི། །མངོན་
བྱང་རྡོ་རྗེ་ཞེས་བྱ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །ཁྲོ་བོ་ཆེན་པོ་ཕྱུང་བ་ནི། །པྲ་ཛྙཱན་ཏ་ཀྲྀཏ་རྡོ་རྗེ་ཅན། །དེ་ནས་དཔལ་ལྡན་ཕྱུང་བ་ནི། །རིག་པ་སྐྱེས་བུར་ཡང་དག་ཕྱུང་། །དཀྱིལ་འཁོར་ཆེན་པོའི་སྦྱོར་བ་ལས། །འོད་ཆེན་
ཕུར་བུའི་གཟུགས་ལྟ་བུ། །རྡོ་རྗེ་དམ་ཚིག་བསྙེངས་བྱེད་པ། །ལྷོ་ཡི་སྒོར་ནི་རྣམ་པར་བཞུགས། །དེ་ནས་རིན་ཆེན་འབྱུང་གནས་གྲགས། །ཏིང་ངེ་འཛིན་ལ་སྙོམས་ཞུགས་ཏེ། །གསུང་གི་དཀྱིལ་འཁོར་ཀུན་གྱི་

88-1-259a

གཙོར། །རྡོ་རྗེ་གསུམ་ལས་ཁྲོ་བོ་ཆེ། །པད་མཱན་ཏ་ཀྲིཏ་འོད་པོ་ཆེ། །བདག་པོ་དེ་ནས་ཕྱུང་བར་གྱུར། །དེ་ནས་ཕྱུང་བ་ཙམ་གྱིས་འདིར། །གཙོ་བོའི་རིག་པ་སྐྱེས་བུར་བཅས། །དེ་བཞིན་གཤེགས་པ་ཐམས་ཅད་ཀྱིའང་། །
གསུང་གི་ཚུལ་དུ་རྣམ་སྤྲུལ་ཞིང་། །གོས་མེད་ཡེ་ཤེས་བླ་མེད་པ། །ནུབ་ཀྱི་སྒོར་ནི་བཞུགས་པར་གྱུར། །བཅོམ་ལྡན་དེ་ཉིད་སྣ་ཚོགས་པ། །ཐུགས་ཀྱི་རྡོ་རྗེ་ཏིང་འཛིན་ལ། །ཀུན་ནས་སྙོམས་པར་ཞུགས་ནས་ནི། །དེ་ནས་
གཙོ་བོས་ཕྱུང་བར་གྱུར། །ཁྲོ་བོ་ཆེན་པོ་རྣམ་ཕྱུང་བ། །ཀུན་ནས་བགེགས་མཐར་བྱེད་པ་སྟེ། །ཐུགས་ཀྱི་དཀྱིལ་འཁོར་སྦྱོར་བ་ཡིས། །བྱང་གི་སྒོར་ནི་རྣམ་པར་བཞུགས། །དེ་ནས་དཔལ་ལྡན་རྡོ་རྗེ་འཛིན། །དཀྱིལ་འཁོར་མཆོག་
འདི་ཐོས་པ་དང་། །མགོན་པོ་རྣམ་པར་སྣང་མཛད་ཆེ། །དེ་ལ་སླར་ཡང་ཞུས་གྱུར་པ། །མཁའ་དང་དབྱེར་མེད་སྦྱོར་གཅིག་ཅིང་། །དངོས་མེད་དེ་བཞིན་གཤེགས་པ་རྣམས། །དགའ་བའི་མཆོག་སོགས་བགྱིས་ནས་ནི། །ཇི་ལྟར་
དེ་རྣམས་ཞུས་པར་གྱུར། །འདི་དག་ཐོག་མཐའ་ཡོད་མིན་ན། །འདི་ཡི་གཙོ་བོ་ཇི་ལྟར་འགྱུར། །ཕྱོགས་ཀྱི་ཆ་རྣམས་བཞག་པ་ལ། །འདི་ནི་གང་གིས་རྣམ་པར་སྦྱང་། །གསང་བ་འདི་ནི་མི་སྲིད་ཅེས། །ཐེག་པ་གསུམ་པོ་རྟོག་
པ་དང་། །སོ་སོའི་སྐྱེ་བོའི་ཚིག་གིས་ཀྱང་། །སྤང་བ་དག་ཀྱང་བགྱིད་པར་འགྱུར། །གང་ཞིག་ཉན་ཐོས་རྣམས་དང་ནི། །དེ་བཞིན་མདོ་སྡེ་ལས་སྤངས་པའི། །ཞེ་སྡང་སོགས་དང་འདོད་ལྔ་སོགས། །དེ་བཞིན་གཤེགས་
རྣམས་སྟེན་མཛད་པ། །རྗེས་སུ་སྤྱོད་དང་ཐུན་མོང་བའི། །བྱ་བ་དེ་དག་ཕྱིན་ཅི་ལོག །དགའ་མཐའི་སྤྱོད་པ་དེ་རྣམས་ནི། །དེ་བཞིན་གཤེགས་དེ་རྣམ་མཛད་པ། །ཚིག་གཅིག་ལ་ནི་དཔག་མེད་དོན། །གསང་བ་
དམ་པ་འདི་དག་ནི། །མགོན་པོ་གང་ཞིག་མ་འོངས་པའི། །སྐྱེ་བོས་ཇི་ལྟར་འཚལ་བར་འགྱུར། །དེ་ནས་བཅོམ་ལྡན་བཀའ་སྩལ་པ། །ཕྱག་ན་རྡོ་རྗེ་ཚུལ་འདི་ནི། །དགོངས་པ་གསང་བ་བླ་མེད་པ། །དྲིས་

88-1-259b

པ་རྣམས་ནི་བཤད་པར་བྱ། །ཞེ་སྡང་གཏི་མུག་དེ་བཞིན་ཆགས། །ལུས་ལ་སོགས་པའི་ཕུང་པོ་ལྔ་། །འདི་དག་བདག་མེད་རྟོགས་ནས་ནི། །རྫོགས་སངས་རྒྱས་ནི་ཚུལ་གསུམ་གནས། །ཕ་ནི་ཞི་གནས་ཡིན་ཞེས་བྱ། །
མ་ནི་ལྷག་མཐོང་ཡིན་པར་བཤད། །དེ་བཞིན་ཉིད་ཤེས་ལུས་སུ་འགྱུར། །ཞི་བ་རྣལ་འབྱོར་པ་ཡི་ཟས། །ཇི་ལྟར་བཟོ་བོས་བདེར་གཤེགས་ཀྱི། །སྐུ་ཡི་གཟུགས་བརྙན་བྱས་པ་ལྟར། །གང་ཞིག་སྐུ་ལྟ་བུ་ཡི་སྐུ། །
དེ་བཞིན་གསུང་གི་རྣམ་པས་གསུང་། །ཐུགས་ཀྱི་རྣམ་པས་ཐུགས་སུ་ནི། །ཞི་གནས་ལ་སོགས་པ་ལས་བྱུང་། །ཕུང་པོ་ལ་སོགས་ཆོས་རྣམས་ནི། །སྟོང་ཞིང་རྟེན་འབྲེལ་ལས་བྱུང་མཐོང་། །ཡེ་ཤེས་ཉི་མ་ཤར་བའི་
གཟུགས། །ཞི་ལས་རྣལ་འབྱོར་པ་རྣམས་བྱེད། །དེ་བས་སྐུ་གསུང་ཐུགས་རྡོ་རྗེ། །གྲིབ་མ་ལྟ་བུར་བྱུང་བ་ཡིན། །དེ་བཞིན་ཕུང་པོ་ཁམས་ལ་སོགས། །དམ་ཚིག་གཅིག་ལ་རྣམ་པར་གནས། །དེ་ནས་ཚུལ་གསུམ་དོན་གཅིག་པ། །
ཞི་གནས་ལ་སོགས་པ་ལས་བྱུང་། །དེ་བས་རྡོ་རྗེ་ཚུལ་ཡིད་འོང་། །གསང་བའི་བདག་པོ་མཉན་པར་གྱིས། །སྟོང་པ་རྟེན་འབྲེལ་ལས་བྱུང་བར། །རྣལ་འབྱོར་པ་ཡི་རྡོ་རྗེ་ཞེས། །ནམ་མཁའ་མཐའ་ཡས་རྣལ་འབྱོར་ནི། །ཕུང་
པོ་ལ་སོགས་ཆོས་འབྱུང་བ། །ལུས་དང་ངག་སེམས་ཀུན་རྟོག་ནི། །ཕུང་པོ་སོགས་བྱུང་འབྱུང་ལས་གྱུར། །འདི་དག་དངོས་མེད་ཡང་དག་སྦྱར། །དེ་ལས་ཏིང་འཛིན་སྐྱེས་པར་གྱུར། །འདི་དག་ཏིང་འཛིན་གཉིས་མེད་
སྦྱོར། །མི་ཕྱེད་རྡོ་རྗེ་ཉིད་དུ་གྱུར། །ཟབ་དང་རྒྱ་ཆེན་རྟོགས་བྱང་ཆུབ། །དེ་རྟོགས་པས་ནི་སེམས་དཔར་གྱུར། །འདི་དག་ནམ་མཁའ་མཚུངས་གྱུར་པ། །ཆེན་པོ་ཞེས་བྱ་ཤེས་བྱེད་པའོ། །དེ་ལ་རྟོགས་པ་མཐའ་
ཡས་པ། །རྡོ་རྗེ་ཐེག་པར་སྟོན་པ་ཡིན། །ཏིང་ངེ་འཛིན་ནི་དེ་ཉིད་ལས། །རྡོ་རྗེའི་ཐེག་པ་བྱུང་བ་ཡིན། །འདི་ལས་འཇིག་རྟེན་འདས་འགྱུར་ཞིང་། །དེ་བཞིན་འཇིག་རྟེན་ཤིན་དུ་འདས། །དངོས་དོན་དེ་བཞིན་ཉིད་གཅིག་

88-1-260a

པུ། །གསང་བ་འཇིག་རྟེན་པ་ཞེས་བཤད། །མ་སྐྱེས་པ་ལས་བྱུང་བ་ནི། །ཀུན་རྫོབ་དང་ནི་དོན་དམ་ཡིན། །བདུད་གྱུར་ལྷ་ཡི་བུར་བཤད་དེ། །ཕུང་པོ་ཉོན་མོངས་འཆི་བདག་བཅས། །འདི་ལས་དངོས་མེད་
པས་རྒྱལ་བས། །རྒྱལ་བའི་རྡོ་རྗེར་རྣམ་པར་བཤད། །ལུས་སོགས་ཕྱི་ཡི་ཕུང་པོར་བཤད། །འབྱུང་དང་འབྱུང་ལས་གྱུར་པ་གང་། །བྱང་ཆུབ་སེམས་དཔའ་སེམས་དཔའ་ཆེ། །འདི་དག་རྡོ་རྗེའི་རིགས་ཅན་འགྱུར། །
དངོས་པོ་གང་དང་གང་དག་གིས། །ཕུང་པོ་ལྔ་པོ་བརྟགས་གྱུར་པ། །དེ་རྣམས་དེ་བཞིན་ཡང་དག་དམིགས། །དེ་བཞིན་གཤེགས་པ་རྣམས་སུ་འགྱུར། །ཇི་ལྟར་མེ་ལོང་མཚུངས་གསལ་བ། །དངོས་པོ་ཀུན་གྱི་བདག་ཉིད་ཅན། །
དེར་ནི་བདག་གིས་བདག་མཐོང་བ། །དཀྱིལ་འཁོར་མཆོག་འགྱུར་རྣལ་འབྱོར་པ། །ཕུང་པོ་དེ་བཞིན་གཤེགས་གྲགས་པ། །དེ་བཞིན་ཉིད་ལས་སྤྲོས་བྱ་བ། །ཆོས་ཀྱི་སྐུ་ཅན་རྒྱལ་བ་ཡི། །མཆོད་པ་ཆེན་པོར་དེ་འགྱུར་
རོ། །འདི་ནི་སྤྲོས་དང་བསྡུས་པ་དག །དེ་ནི་དགའ་བར་ཡོངས་སུ་བསྒྲགས། །སེམས་ཅན་གང་ཞིག་ལོངས་སྤྱོད་ཅིག །དེ་ནི་གསོལ་འདེབས་ཞེས་བཤད་དོ། །ཡང་དག་ཤེས་རབ་ཐབས་གཉིས་མེད། །མཁའ་དབྱིངས་དབྱེར་
མེད་རབ་སྦྱོར་བ། །དེ་ནི་འདོད་ཆགས་ཆེ་ཚུལ་འགྱུར། །རྣལ་འབྱོར་པ་ནི་མངོན་བཞུགས་པའོ། །རྡོ་རྗེ་ཐེག་པ་རྣལ་འབྱོར་ཆེ། །བདག་ཉིད་ངེས་པར་སྦྱོར་བ་གང་། །དངོས་པོ་ཐམས་ཅད་བདེ་སྐྱེད་པའི། །ཡིད་བདེ་བ་ནི་སྐྱེ་བར་
འགྱུར། །ཞལ་གསུམ་རྣམ་ཐར་གསུམ་དུ་གང་། །མཐོང་ཞིང་དེ་ལས་ཕུང་པོ་སོགས། །ལྷ་ཡི་བདག་ཉིད་རིག་འགྱུར་བ། །དེ་ཉིད་གསུམ་དུ་བཤད་པ་ཡིན། །དངོས་མེད་པ་ནི་ལམ་གྱི་མཆོག །མྱ་ངན་འདས་པར་གཉིས་
མེད་འཇུག །འོན་ཀྱང་སོ་སོར་གྱུར་པ་དེ། །ཆོས་ཀྱི་སྐུ་ལས་ཞེ་སྡང་གྱུར། །བཅོམ་ལྡན་བདག་པོ་དེ་ཉིད་ནི། །དེ་བཞིན་གཤེགས་པའི་རིགས་ཕྱུང་ཞིང་། །མྱ་ངན་འདས་ཚུལ་རྡོ་རྗེ་ཅན། །དེ་ཉིད་དབང་པོ་ཀུན་བྱེད་པའོ། །

88-1-260b

དམ་ཚིག་ལ་སོགས་འབྱུང་བའི་ཆོས། །རང་གིས་རིག་པར་མ་གྱུར་ཀྱང་། །དེར་ནི་གནས་པ་ཡང་དག་བཤད། །དེ་ནི་གཏི་མུག་དེ་བཞིན་སེམས། །གང་གིས་ཇི་ལྟར་བརྟགས་ཆོས་ཀྱིས། །ལོངས་སྤྱོད་རྫོགས་ཞེས་བྱ་བྱེད་པ། །
དེ་ནི་ཡིད་བཞིན་རིན་ཆེན་འབྱུང་། །རིན་ཆེན་ཆེན་པོའི་རིགས་ཀྱི་གཙོ། །དེ་ཉིད་བཅོམ་ལྡན་འདོད་ཆགས་ནི། །ཀུན་མཁྱེན་ཡེ་ཤེས་ལས་བྱུང་བ། །གནས་མེད་གནས་པའི་སྦྱོར་གྱུར་པ། །འདོད་ཆགས་ཆེན་པོའི་ཚུལ་གྱི་
མཆོག །ཇི་ལྟར་འདམ་གྱི་པད་མ་ནི། །དེ་ཡི་ཉེས་པས་གོས་མི་འགྱུར། །དེ་བཞིན་རྣལ་འབྱོར་རིག་པ་མཆོག །འདོད་པ་ཀུན་ལ་ཉེ་བར་སྤྱོད། །འགྲོ་བ་གཅིག་ཏུ་འདོད་པ་ཁྱབ། །དེ་ཉིད་རྡོ་རྗེ་རིགས་མཆོག་ཡིན། །ཆོས་དང་
ལོངས་སྤྱོད་སྤྲུལ་པ་སྟེ། །གསུམ་པོ་དེ་དག་མདོར་བསྡུས་པའོ། །ཞེ་སྡང་གཏི་མུག་དེ་བཞིན་ཆགས། །རྡོ་རྗེ་དགའ་བའི་མཐའ་ཅན་གཙོ། །ངན་འགྲོ་གསུམ་འདོན་པས་བུད་མེད། །གཅིག་པུ་ཡིན་ཡང་དུ་མར་གྱུར། །གསུམ་པོ་
ཡང་དག་འདུག་གྱུར་པ། །གཤིན་རྗེ་ཤེས་རབ་གྱུར་དེ་བཞིན། །པད་མ་བགེགས་གྱུར་ཁྲོ་བོ་སྟེ། །མཐར་འབྱེད་མཐའ་ཡི་མིང་ཅན་ནོ། །འཇུག་པ་ལ་སོགས་གསུམ་ཉིད་ལ། །ཕུང་པོར་གྲགས་ཏེ་དེ་བཞིན་གཤེགས། །སྐྲག་
བྱེད་གཤིན་རྗེའི་གཤེད་ཀྱིས་ཀྱང་། །ཐམས་ཅད་འབྱུང་བའི་དཀྱིལ་འཁོར་རོ། །རྡོ་རྗེ་དམ་ཚིག་སྐྲག་བྱེད་པ། །དེ་བཞིན་གཤེགས་རབ་མཐར་བྱེད་གཙོ། །པད་མོ་འང་གསུང་ཞེས་བྱ་བར་གྱུར། །འཆི་བྲལ་རྣལ་འབྱོར་
གྲུབ་པ་ཡིན། །བགེགས་མཐར་བྱེད་ཀྱང་ཐུགས་ཀྱི་གཙོ། །རིགས་པའི་བདག་ཉིད་ཅན་བདག་པོ། །འདི་ལྟར་རྟག་སྤྱོད་རྣལ་འབྱོར་པ། །གསང་བའི་ལུས་ཀྱིས་རྣམ་པར་སྤྱོད། །དགོངས་པ་ལུང་སྟོན་ལ་གནས་པར། །
གང་ཞིག་ཡིད་ནི་བཟོད་གྱུར་པ། །དེས་འདི་དེ་བཞིན་བྱ་བ་དང་། །དེ་ནས་གསང་བ་ཡང་དག་བསྲུང་། །ནུ་ཞོ་ཟས་ཀྱིས་བུ་གསོ་བཞིན། །སྲིད་པ་གསུམ་ན་བཅོམ་ལྡན་གཙོ། །སེམས་ཅན་བསམ་དབང་ཇི་བཞིན་དུ། །ཆོས་ཀྱི་

88-1-261a

བདུད་རྩིས་ཚིམ་པར་མཛད། །ཆོས་དང་ལོངས་སྤྱོད་སྤྲུལ་པ་ཡི། །སྐུ་གསུམ་གཅིག་ཏུ་སྦྱོར་བ་ལས། །བཅོམ་ལྡན་གསང་བ་དགོངས་མཛད་པ། །བདེན་པ་མ་ཡིན་བརྫུན་པའང་མིན། །ཞེ་སྡང་གཏི་མུག་རིན་ཆེན་དང་། །
འདོད་ཆགས་སྣ་ཚོགས་རིགས་བྱུང་བ། །དགོངས་པའི་རིགས་ཀྱི་བརྡར་གྱུར་པས། །གླེང་གཞི་ཡིན་ཏེ་དང་པོའོ།། །། དེ་ནས་དེ་བཞིན་གཤེགས་བདག་ལ། །སླར་ཡང་དེ་བཞིན་
གཤེགས་ཀུན་གྱིས། །ལྷག་པར་མཆོད་པ་བྱས་ནས་ནི། །ཐུབ་ཆེན་དེ་ལ་འདི་སྐད་གསོལ། །དགོངས་པ་རྡོ་རྗེ་དམ་པ་ནི། །དེ་བཞིན་གཤེགས་པ་ཀུན་ཡེ་ཤེས། །བྱང་ཆུབ་སེམས་ནི་བླ་མེད་པ། །གསང་བ་བཅོམ་ལྡན་
བཤད་དུ་གསོལ། །བཅོམ་ལྡན་འདས་ཀྱིས་དེ་རྣམས་ཀྱིས། །ཞུ་བ་ཡང་དག་ཐུགས་ཆུད་ཅིང་། །བྱང་ཆུབ་སེམས་དཔའ་ཡོངས་རྟོག་པ། །ཐུབ་ཉིད་ཀྱིས་ནི་རྣམ་མཁྱེན་པ། །དེ་ནས་བྱང་ཆུབ་སེམས་ཀུན་ལ། །བཅོམ་ལྡན་
འདས་ཀྱིས་དེ་སྐད་གསུངས། །ལུས་སེམས་དེ་དང་འདྲ་བ་དང་། །དེ་བཞིན་ངག་ནི་ཚིག་བརྗོད་ལྟའི། །བྱང་ཆུབ་སེམས་ནི་བླ་མེད་པ། །ཁྱེད་ཀུན་གྱིས་ནི་བསྐྱེད་པར་བྱ། །དེ་ལྟར་བྱང་ཆུབ་སེམས་དཔའ་ལ། །སྟོན་པས་ཇི་བཞིན་
སྟོན་པར་མཛད། །དེ་ནས་དེ་བཞིན་གཤེགས་རྣམས་ཀྱིས། །སྐུ་དང་ཐུགས་དང་དེ་བཞིན་གསུང་། །དེ་འདྲའི་ཚུལ་དུ་སྦྱར་ནས་ནི། །བྱང་ཆུབ་སེམས་དཔའ་སེམས་དཔའ་ཆེ། །སྐུ་གསུང་ཐུགས་རྡོ་རྗེ་ཅན་ལ། །ཆེད་དུ་བརྗོད་པ་ཆེད་
དུ་བརྗོད། །ཨེ་མ་ཀུན་དུ་བཟང་པོ་ཡི། །རྟེན་ཅིང་འབྲེལ་འབྱུང་ལས་སྐྱེས་པ། །སྐྱེ་བ་མེད་པའི་ཚུལ་གྱིས་ནི། །སྐྱེ་བ་འདིར་ནི་རབ་ཏུ་བསྒྲགས། །དེ་ནས་དེ་བཞིན་གཤེགས་བདག་པོ། །དེ་བཞིན་གཤེགས་པའི་རྡོ་རྗེ་གསུམ། །
དེ་བཞིན་གཤེགས་པ་ཐམས་ཅད་ཀྱི། །མངོན་རྫོགས་བྱང་ཆུབ་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ནས། །དཔལ་ལྡན་བྱང་ཆུབ་སེམས་འདི་གསུངས། །དངོས་པོ་མེད་པའི་དངོས་གནས་ན། །དངོས་དང་དངོས་མེད་གཉིས་ཀ་མིན། །

88-1-261b

དེ་ལྟར་དངོས་པོ་དངོས་མེད་པས། །སྒོམ་པ་དངོས་པོར་ཡོད་མ་ཡིན། །དེ་ནས་དཔལ་ལྡན་རྣམ་སྣང་མཛད། །དེ་བཞིན་གཤེགས་པ་ཐམས་ཅད་ཀྱི། །གཉིས་མེད་དམ་ཚིག་རྡོ་རྗེ་གྲགས། །ཏིང་ངེ་འཛིན་ལ་སྙོམས་པར་ཞུགས། །དེ་བཞིན་
གཤེགས་པ་ཀུན་གྱི་མཆོག །གསང་བ་དགོངས་པ་རྡོ་རྗེ་ཅན། །བྱང་ཆུབ་སེམས་ནི་ཐམས་ཅད་ནས། །དེ་ནི་ཡང་དག་བཀའ་སྩལ་ཏོ། །དག་པ་དེ་བཞིན་གཤེགས་ཀུན་གྱི། །ཕུང་པོ་ཁམས་སོགས་རྣམ་སྤངས་ཤིང་། །གཟུང་
དང་འཛིན་པ་ལས་གྲོལ་བ། །ཆོས་བདག་མེད་པའི་སྟོང་ཉིད་ཅན། །བྱང་ཆུབ་སེམས་ནི་འདི་གསུངས་པ། །རྟེན་ཅིང་འབྲེལ་འབྱུང་མིང་ཅན་ཏེ། །ཐོག་མ་མེད་ནས་མ་སྐྱེས་བརྡ། །རང་སེམས་མཉམ་པ་ཉིད་ཀྱང་ཡིན། །དེ་ནས་
མི་བསྐྱོད་དེ་བཞིན་གཤེགས། །ཀུན་གྱི་གཉིས་མེད་མི་ཟད་པའི། །ཡེ་ཤེས་ཏིང་འཛིན་སྙོམས་ཞུགས་ཏེ། །བྱང་ཆུབ་སེམས་ནི་འདི་གསུངས་སོ། །དངོས་པོ་འདི་དག་མ་སྐྱེས་པས། །ཕུང་པོར་གྲགས་པའི་ཆོས་ཉིད་མེད། །ནམ་
མཁའ་ལྟ་བུར་བལྟ་དཀའ་བའི། །བདག་མེད་བྱང་ཆུབ་ཅེས་བྱའོ། །དེ་ནས་བཅོམ་ལྡན་དཀོན་མཆོག་དཔལ། །བདག་མེད་རྡོ་རྗེ་ཞེས་བྱ་བའི། །ཏིང་ངེ་འཛིན་ལ་སྙོམས་ཞུགས་ནས། །བྱང་ཆུབ་སེམས་འདི་རབ་ཏུ་གསུངས། །
ཆོས་རྣམས་ཐམས་ཅད་དངོས་མེད་ཅིང་། །ཆོས་ཀྱི་མཚན་ཉིད་རྣམ་སྤངས་པ། །བདག་མེད་ཆོས་ལས་ཡང་དག་འབྱུང་། །བྱང་ཆུབ་ཚུལ་འདི་བསྟན་པའོ། །དེ་ནས་འོད་དཔག་མེད་མཚན་ཅན། །ཡེ་ཤེས་འབར་བ་སྒྲོན་རྡོ་རྗེའི། །
ཏིང་ངེ་འཛིན་ལ་སྙོམས་ཞུགས་ཏེ། །བྱང་ཆུབ་སེམས་ནི་འདི་གསུངས་སོ། །མ་སྐྱེས་པ་ཡི་ཆོས་རྣམས་ལ། །དངོས་པོ་མེད་ཅིང་བསྒོམ་པའང་མེད། །ནམ་མཁའི་གནས་སུ་སྦྱོར་བ་ཡིས། །དངོས་པོ་ཞེས་ནི་རབ་ཏུ་བཤད། །དེ་ནས་
དེ་བཞིན་གདོན་མི་ཟ། །ཟིལ་གྱིས་གནོན་པའི་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །བྱང་ཆུབ་སེམས་ནི་འདི་གསུངས་སོ། །ཆོས་འདི་རང་བཞིན་འོད་གསལ་ཞིང་། །གཟོད་ནས་དག་པས་མཁའ་དང་མཚུངས། །

88-1-262a

བྱང་ཆུབ་མེད་ཅིང་མངོན་རྟོགས་མེད། །བྱང་ཆུབ་སེམས་ནི་ཡིན་པར་བཤད། །དེ་ནས་དཔལ་ལྡན་རྡོ་རྗེ་འཛིན། །བྱང་ཆུབ་སེམས་ནི་ཐོས་པ་དང་། །དགོངས་པའི་དོན་ནི་རབ་བཤད་པར། །རྣམ་པར་སྣང་མཛད་ཆེ་ལ་
གསུངས། །དངོས་པོ་མེད་ཅིང་དམིགས་མེད་པ། །བྱང་ཆུབ་སེམས་དཔའ་མཁའ་དང་མཚུངས། །གསང་བའི་ཚུལ་ནི་འདི་ཐོས་ནས། །དངོས་པོ་ཡི་ནི་རྟོག་པ་སྐྱེ། །ལུས་ལ་སོགས་པ་གསུང་སྦྱོར་བས། །སེམས་ནི་
དེ་རྣམས་སྐྱེད་པར་བྱེད། །ཡང་དག་བྱང་ཆུབ་དུ་མའི་མཐར། །འདི་ལ་སོ་སོ་སྐྱེ་བོ་སྨྲ། །ཐུབ་པའི་གསུང་ནི་དེ་རྣམས་ལ། །རང་གི་སྒྲ་བཞིན་འཛིན་པར་བྱེད། །བསམ་པའི་དབང་ནི་ཇི་བཞིན་དུ། །འགྲོ་བའི་དོན་དུ་བཀའ་སྩོལ་
ཅིག །དེ་ནས་བཅོམ་ལྡན་བདག་པོ་འདི། །རྣམ་པར་སྣང་མཛད་ཐུབ་པ་ཆེ། །ལེགས་ཤེས་ལན་གསུམ་གསུངས་ནས་ནི། །ལག་ན་རྡོ་རྗེ་ལ་འདི་གསུངས། །རྣམ་པར་མི་རྟོག་དོན་དེ་ཉིད། །རབ་ཏུ་ཕྱེ་སྟེ་བཤད་པར་བྱ། །ཚིག་
ཏུ་བརྗོད་དང་དམིགས་པར་བཤད། །བརྡ་དང་དོན་དམ་པ་ཡིན་ནོ། །རྐྱེན་དང་ཉན་ཐོས་རྣམས་ཀྱི་དང་། །མདོ་དང་གསང་སྔགས་སྤྱོད་རྣམས་ཀྱིས། །དེ་བཞིན་གཤེགས་པས་གསུངས་པ་ཡི། །བྱང་ཆུབ་སེམས་ནི་བླ་ན་མེད། །
དེ་བཞིན་ཡང་དག་སྦྱོར་བ་འདི། །དངོས་པོའི་གསང་བ་བླ་ན་མེད། །གཉིས་མེད་དམ་ཚིག་རྡོ་རྗེ་དང་། །པད་མ་དེ་ལས་སྐྱེད་པར་བྱེད། །ཚིག་ཏུ་བརྗོད་པ་ཐུན་མོང་སྟེ། །སངས་རྒྱས་སྐུ་ནི་དམིགས་ཅན་ཡིན། །གསང་
སྔགས་དེ་ཉིད་ཅེས་བྱ་བརྡ། །དེ་བཞིན་ཉིད་ནི་དོན་དམ་པའོ། །དང་པོ་གཅིག་ནི་དགུ་དབུས་ན། །གང་ཞིག་བཅུ་ཡིས་མ་བཅིངས་པ། །དེ་ནི་བཅིངས་མེད་ཤེས་བྱ་སྟེ། །དེ་ཤེས་པ་ནི་མཆོག་གི་གནས། །དབྱངས་དང་གསལ་
བྱེད་ཡི་གེ་སྟེ། །གྲངས་དགུ་ཡི་ནི་རྗེས་འཇུག་པ། །ཨས་བཅིངས་ཕན་ཚུན་སྦྱོར་བ་ལས། །གང་གིས་ཤེས་ཏེ་འགྲོ་བའི་བླ། །གང་ཞིག་ཤེས་པ་རྣམ་གྲོལ་བ། །འབྲས་བུ་ཕུན་ཚོགས་གྲུབ་འདོད་པ། །དེ་ནི་དེ་ཉིད་གྲུབ་

88-1-262b

འདོད་དེ། །གཟུགས་མེད་པས་ནི་གཟུགས་སྤངས་པ། །འབྱུང་བའི་མཐའ་ནི་ཡང་དག་ལྡན། །ཆ་ལ་སོགས་པ་བཅུ་དྲུག་གནས། །ལྔ་པ་ལྔ་དང་ཡང་དག་ལྡན། །བཞི་ནི་གསུམ་དུ་ངེས་པར་སྦྱར། །ཡི་གེ་ཨྃ་བཅས་རིང་པོར་
བཅས། །ཡོན་ཏན་སྦྱོར་སོགས་ཕྱིས་དང་མཚུངས། །ཐུང་ངུ་མ་ལུས་ངག་ཏུ་འགྱུར། །གཅིག་མིན་དུ་མ་མ་ཡིན་ནོ། །ཡ་ཡི་དོན་གྱིས་གང་ཡང་རུང་། །བྱ་བའི་དངོས་གྲུབ་འདོད་གྱུར་པ། །ར་ལ་སོགས་པ་གསུམ་ཉིད་ཀྱིས། །
འགྲོ་བའི་དོན་ལ་རབ་ཏུ་འཇུག །ཡི་གེ་གང་ཞིག་སྔར་བཤད་དང་། །གང་ཡང་མངོན་དུ་ཕྱོགས་པ་རྣམས། །བུད་མེད་སྐྱེས་པ་མ་ནིང་སྟེ། །ཁམས་ལ་སོགས་པར་རབ་ཏུ་བརྟག །འོག་ནས་སྟེང་དུ་བཅས་པར་ནི། །ཤེས་རབ་
བློས་ནི་ངེས་པར་སྦྱར། །དྲུག་བཤད་བཞི་དང་གསུམ་དང་གཅིག །དངོས་མེད་ངོ་བོ་གཅིག་ལས་བྱུང་། །དེ་ནི་ཡ་སོགས་དོན་སྦྱར་ན། །དུས་གསུམ་ཤེས་པའང་འབྱུང་བར་འགྱུར། །མཁས་པས་སྒྱུ་མ་མིག་འཕྲུལ་
བཞིན། །འགྲོ་བ་རྣམས་ནི་སྒྱུ་མཐར་བྱ། །བརྗོད་པ་ཡི་ནི་སྔགས་འདི་དག །དངོས་མེད་ངོ་བོ་ལས་བྱུང་བ། །དེ་ནི་ཡོངས་སུ་གྱུར་པའི་གཟུགས། །ལྷ་རུ་ཉེ་བར་མཚོན་པ་གང་། །བརྡ་ཡིས་དེ་ཉིད་གསུམ་གནས་པ། །རང་
བཞིན་བཟླས་པའི་མཚན་ཉིད་དོ། །མིང་མེད་བརྗོད་དུ་མེད་པ་སྟེ། །བྱང་ཆུབ་སེམས་མཆོག་འདི་ཡིན་ནོ། །གསུམ་པོ་དེ་ཉིད་གཅིག་གྱུར་པ། །འགྲོ་བ་མེད་ཅིང་འོང་བ་མེད། །འགག་མེད་རབ་ཏུ་ཞི་བ་སྟེ། །རྟག་དང་ཆད་པ་
རྣམ་སྤངས་པ། །དུས་གསུམ་མཁྱེན་པས་མ་བྱས་པའི། །རྟོག་པ་ནམ་མཁའ་དབྱེར་མེད་མཚན། །དེ་ཉིད་ཁོ་ན་དོན་དམ་སྟེ། །སོ་སོ་རང་རིག་མཚན་ཉིད་དོ། །དེ་འདི་སེམས་ཅན་ཀུན་ཞེས་བྱའི། །སངས་རྒྱས་བྱང་ཆུབ་ངོ་བོ་ཉིད། །
བྱང་ཆུབ་སེམས་དཔའ་གཅིག་འབྱུང་ཡང་། །རྟེན་ཅིང་འབྲེལ་འབྱུང་རང་བཞིན་ཅན། །གང་འདི་བྱང་ཆུབ་སེམས་བདག་ཉིད། །རྣལ་འབྱོར་པ་ནི་ཉི་འདྲར་འགྱུར། །འདི་ནི་རྣམ་རྟོག་ཀུན་བྲལ་ཡང་། །རིགས་ཀུན་ལ་ནི་འཇུག་པར་

88-1-263a

འགྱུར། །སྲེག་དང་སྐེམས་དང་བདེ་ཅན་དང་། །ཀུན་ཟེར་འགྱུར་བའི་མེ་བཞིན་ནོ། །འདི་ནི་ལྷས་ཀྱང་མཆོད་བྱ་བར། །སེམས་ཅན་ལ་ལ་རྣམ་པར་གནས། །བྱང་ཆུབ་སེམས་འདོད་བདག་ཉིད་དེ། །འགྲོ་བ་བུ་
གཅིག་བཞིན་ལྟ་ཞིང་། །གང་ཞིག་བདག་དང་མཉམ་གནས་པ། །བྱམས་པ་ཆེན་པོ་དེ་བསྐྱེད་བྱ། །ཕྱིན་ཅི་མ་ལོག་འདི་མཐོང་ནས། །བྱང་ཆུབ་སེམས་ནི་ཡང་དག་འབྱུང་། །དེས་ནི་སྙིང་རྗེ་ཆེར་གྱུར་ནས། །དེས་ནི་འཁོར་བ་
ངེས་པར་འཇོམས། །སེམས་ཅན་ཀུན་དང་དེ་བཞིན་བདག །བྱང་ཆུབ་སེམས་ལ་མ་མཐོང་ན། །འོན་ཀྱང་འགྲོ་བའི་དོན་བྱེད་པ། །དེ་ལས་དགའ་བ་སྐྱེ་བར་འགྱུར། །འཁོར་བ་དངོས་པོ་ཡོད་མིན་ལ། །སེམས་ཅན་རྣམས་ཀྱང་
དེ་དང་འདྲ། །བྱང་ཆུབ་སེམས་ནི་མཐོང་ནས་ནི། །བཏང་སྙོམས་ཆེན་པོར་གྱུར་པ་ཡིན། །དེ་ནས་རྡོ་རྗེ་འཛིན་པ་ཡིས། །ཐོས་པའི་བྱང་ཆུབ་སེམས་དྲན་ཞིང་། །སླར་ཡང་དེ་དོན་མཚན་ཉིད་ནི། །རྣམ་པར་སྣང་མཛད་ཆེ་ལ་
ཞུས། །འཁོར་དང་གཅིག་ཤོས་ཞེས་བྱ་བ། །འདི་ཀུན་བྱང་ཆུབ་སེམས་ཡིན་ན། །ཇི་ལྟར་སོ་སོར་གྱུར་ནས་ནི། །ཕན་ཚུན་འགལ་བར་རབ་ཏུ་གནས། །བདག་ཉིད་ཀྱིས་ནི་བདག་ཉིད་ལ། །གཉིས་སུ་འགོག་བྱེད་གང་
ཡང་མེད། །གང་ཞིག་ནོར་བུ་གཅིག་ལས་བྱུང་། །མི་མཐུན་ཕྱོགས་སུ་ཇི་ལྟར་སྣང་། །དམན་དང་བར་མ་དེ་བཞིན་མཆོག །འཁོར་བར་ཉོན་མོངས་མི་བཟད་པ། །སེམས་ཅན་ཁ་ཅིག་གཟིར་བ་དང་། །བྱང་ཆུབ་བདེ་ལ་
སྦྱར་བར་གྱུར། །དེ་ལྟའི་རྣམ་རྟོག་ཀུན་རྟོག་པར། །མ་འོངས་སྐྱེ་བོ་བགྱིད་འགྱུར་གྱི། །རྟེན་ཅིང་འབྲེལ་འབྱུང་ལས་བྱུང་བ། །འདི་དག་འཚལ་བར་མི་འགྱུར་རོ། །དངོས་པོ་མེད་པའི་ཆོས་རྣམས་ལ། །བྱིས་པ་རྣམས་ནི་
རྩོད་པར་འགྱུར། །དེ་རྣམས་རྩོད་པ་མེད་པའི་ཕྱིར། །དགོངས་པ་བཤད་པར་མཛད་དུ་གསོལ། །དེ་ནས་བདག་པོ་བཅོམ་ལྡན་འདས། །རྡོ་རྗེ་ཅན་ལ་གསང་དགོངས་པ། །ཤིན་དུ་རྙེད་དཀའ་བྱང་ཆུབ་སེམས། །དེ་ནི་ཡང་

88-1-263b

དག་བཀའ་སྩལ་ཏོ། །ཕྱི་མའི་མཐའ་གང་སྟོང་པ་གཅིག །སྔོན་གྱི་མཐར་ཐུག་དེ་བཞིན་ཏེ། །སེམས་དེ་མངོན་དུ་བྱས་ནས་ནི། །ཅི་དགའ་བར་ནི་བྱ་བ་ཡིན། །སེམས་ནི་དེ་ཡིས་མ་མཐོང་བས། །ལྟ་བ་སོ་སོར་གྱུར་པ་ཡིན། །
དེ་བས་དེ་རྣམས་འཁོར་བ་རུ། །འགྲོ་བ་དྲུག་གི་མིང་དུ་གྱུར། །དེས་ན་ཚངས་པ་ཁྱབ་འཇུག་དང་། །དབང་ཕྱུག་ཆེ་ལ་ཀུན་དུ་སྟེན། །ཟླ་བ་ཉི་མ་བྱ་བ་ཡི། །ཀུན་དུ་སྤྱོད་པ་དེ་རྣམས་བྱེད། །སུམ་བཅུ་རྩ་གསུམ་པར་བཤད་དང་། །
དགའ་ལྡན་གྱི་ནི་གནས་དག་དང་། །དེ་བཞིན་གཞན་དག་དམྱལ་བར་ཡང་། །ལྟ་བས་སྐད་ཅིག་དག་གིས་འགྲོ། །ཡི་དགས་སུ་ཡང་འགྲོ་བ་དང་། །འགྲོ་བ་སྣ་ཚོགས་དག་ཏུ་འགྲོ། །གང་ཚེ་མ་རིག་ཀུན་བསྟེན་པས། །བདག་
ཉིད་ཀྱང་ནི་མི་ཤེས་སོ། །འདུ་ཤེས་ཅན་དང་འདུ་ཤེས་མེད། །སེམས་ཅན་དུ་བརྟགས་འདི་གནས་པ། །དེ་རྣམས་རླུང་ལས་བྱུང་བ་སྟེ། །རླུང་ལས་སླར་ཡང་འགག་པ་ཡིན། །ཉིན་དང་མཚན་མོའི་ཆ་ཡིས་ཀྱང་། །རང་གི་རྣམ་པར་
རྟོག་པར་ལྷུང་། །དེ་ནས་འཁོར་བར་སྐྲག་བཞིན་དུ། །སྣ་ཚོགས་འགྲོ་བར་དེ་དག་འགྲོ། །མི་རྟོག་པ་ཡི་སེམས་དེ་ནི། །འཁོར་བའི་རྒྱ་མཚོར་གནས་གྱུར་ཀྱང་། །དེ་ནི་ཕྱིན་ཅི་ལོག་གྱུར་པས། །ཁྱི་དང་ཅེ་སྤྱང་གླང་པོ་དང་། །སེམས་དེ་ལྟར་
ཡང་འགྲོ་བར་འགྱུར། །དེ་བཞིན་དུ་ནི་ཕ་ཉིད་དང་། །མ་ཡི་རིགས་ནི་སྨྱིག་མཁན་དང་། །སྨེ་ཤ་ཅན་དང་རིགས་ངན་དང་། །བཟའ་དང་མི་བཟའ་བྱ་ཀུན་དང་། །བྱང་ཆུབ་སེམས་དེ་སྐྱེ་བར་འགྱུར། །བྲམ་ཟེ་ལ་སོགས་འཇིག་རྟེན་ཤེས། །བྱང་ཆུབ་
སེམས་ལས་འབྱུང་བར་འགྱུར། །ཕུང་སོགས་དངོས་པོ་མེད་གྱུར་ལས། །རང་གིས་མྱོང་བར་ཤེས་པར་གྱུར། །དེ་ནི་འཇིག་རྟེན་ཤེས་ཞེས་བཤད། །ཀུན་མཁྱེན་པ་ནི་བྱང་ཆུབ་སེམས། །ཉེ་བར་དམིགས་པའི་སྦྱོར་བ་ཡིས། །སངས་
རྒྱས་སྐུ་རུ་འདི་འབྱུང་སྟེ། །སྒྱུ་མ་ལྟ་བུའི་རང་བཞིན་ཉིད། །ཚིག་གིས་བརྗོད་པ་ཙམ་དུ་འགྱུར། །དེ་ནས་བཅོམ་ལྡན་རྡོ་རྗེ་ཅན། །རྡོ་རྗེ་སྙིང་པོའི་དོན་གསུངས་པ། །འགྲོ་བའི་བླ་མ་གཅིག་པུ་ལ། །ཕྱག་འཚལ་ནས་ནི་སླར་གསོལ་

88-1-264a

པ། །འཇིག་རྟེན་པ་ཡི་ལུང་ཉིད་ནི། །བྱང་ཆུབ་སེམས་ནི་རབ་གསུངས་ན། །ཇི་ལྟར་འཇིག་རྟེན་ལས་འདས་པ། །མ་འོངས་པ་ཡིས་ཇི་ལྟར་རྟོགས། །ལྟ་བ་ཐམས་ཅད་རབ་སྤངས་ཕྱིར། །ཁྱེད་ཀྱིས་ཆོས་རྣམས་སྟོན་མཛད་ན། །
ཇི་ལྟར་བྱང་ཆུབ་སེམས་དེ་ཉིད། །ལྟ་བ་དེ་ནི་རབ་བརྟན་འགྱུར། །དགོངས་པའི་ཚིག་ལ་རྨོངས་པ་རྣམས། །གསུངས་པའི་དོན་ནི་མ་རྟོགས་ནས། །གསུངས་པ་འདི་ལས་གཞན་མིན་ཞེས། །དེ་ནི་ཇི་བཞིན་སྒྲར་འཛིན་ཏོ། །དེ་ནས་
བཅོམ་ལྡན་སྣ་ཚོགས་པས། །ལག་ན་རྡོ་རྗེ་ལ་གསུངས་པ། །ཁྱེད་གསུང་དགོངས་པ་མ་རྟོགས་པ། །དྲི་བར་བྱེད་པ་ལེགས་སོ་ལེགས། །བྱང་ཆུབ་སེམས་ནི་རླུང་གྱུར་ཅིང་། །ནམ་མཁའ་ལ་ནི་རྣམ་གནས་པ། །སེམས་ཅན་
ཀུན་གྱི་སྲོག་གྱུར་གང་། །ལྔ་ཡི་བདག་ཉིད་བཅུ་མིང་ཅན། །རྟེན་འབྲེལ་བཅུ་གཉིས་ཞེས་གྲགས་པ། །ངོ་བོ་ཉིད་རྣམ་གསུམ་དུ་གྱུར། །རླུང་ཞེས་བྱ་བའི་བྱང་ཆུབ་སེམས། །དབང་པོ་ཀུན་གྱི་གཙོ་འདི་ཡིན། །ཇི་ལྟར་མི་མངོན་
ཕྲ་བ་ལས། །རྟག་ཏུ་གསལ་བར་བརྗོད་པ་ཡིན། །འགྲོ་བ་ཡུལ་སོགས་ལས་བྱེད་པ། །འདིར་ནི་དེ་ལ་རྟེན་པ་ཡིན། །ཞི་བ་དང་ནི་རྒྱས་པ་དང་། །དབང་དང་དེ་བཞིན་མངོན་སྤྱོད་རྣམས། །དེ་ཉིད་གསུམ་གནས་ལ་རྟེན་ནས། །དེ་
ཀུན་བྱང་ཆུབ་སེམས་ཀྱིས་བྱེད། །ཇི་སྲིད་འཇིག་རྟེན་གདགས་པ་དང་། །དེ་བཞིན་བཏགས་པ་སྣ་ཚོགས་རྣམས། །རྣམ་རྟོག་བྱང་ཆུབ་སེམས་ཤེས་པའི། །རླུང་ལས་རྟག་ཏུ་འབྱུང་བ་ཡིན། །བདེ་སྡུག་ལ་སོགས་ཆོས་
རྣམས་ཀྱི། །ས་བོན་ལྟ་བུར་བཤད་པ་ཡིན། །བྱང་ཆུབ་སེམས་ཀྱི་ངོ་བོ་འདི། །ཕུང་སོགས་གཉིས་མེད་མཁའ་དང་མཉམ། །ཤེས་རབ་ཐབས་གཅིག་སྦྱོར་བ་ཡིས། །བྱང་ཆུབ་སེམས་ནི་འགྲོ་བར་འགྱུར། །ཀློག་དང་
བསམ་གཏན་རྣམ་སྤངས་པར། །བདག་པོར་རང་ཉིད་ཟློས་པ་དེ། །ཉིན་དང་མཚན་མོའི་དབྱེ་བ་ཡིས། །ཉི་ཟླ་རབ་ཏུ་སྦྱོར་བ་ཡིས། །དངོས་པོ་མེད་པར་འགྲོ་ཁྱབ་པ། །བྱང་ཆུབ་སེམས་ཀྱི་རླུང་གཅིག་པུ། །དགེ་དང་མི་དགེ་འབྲས་

88-1-264b

སྤངས་ནས། །ནམ་མཁའ་འདྲ་བར་འགྱུར་བ་ཡིན། །འགྲོ་བའི་དོན་ནི་ཤེས་པས་ཀྱང་། །མིང་ནི་དེ་བཞིན་ཉིད་ཅེས་བྱ། །དབྱངས་ཀྱི་ཐུང་ངུ་ཉིན་མོར་བཤད། །རིང་པོ་མཚན་མོ་ཡིན་པར་བཤད། །དབྱངས་དང་གསལ་བྱེད་དབྱེ་
བ་ཡིས། །དེ་ཉིད་མིང་ལས་སྦྱར་བར་བྱ། །ཨེ་མའོ་འགྲོ་བའི་བྱ་བ་བྱུང་། །དེ་ཉིད་གཞན་ལས་དེ་ཉིད་གསལ། །དེ་ལས་འཇིག་རྟེན་པ་ཡི་བརྡ། །མྱུར་དུ་མངོན་པར་ཤེས་པར་འགྱུར། །དེ་ནས་གསང་བའི་བདག་པོས་ནི། །
བྱང་ཆུབ་སེམས་འདི་ཐོས་པ་དང་། །གཙོ་བོ་རྣམ་སྣང་ཆེན་པོ་ལས། །ཁྱབ་བདག་ལ་ནི་སླར་གསོལ་པ། །སེམས་ཅན་ཐམས་ཅད་སྐྱེད་པ་པོ། །སྣ་ཚོགས་གཟུགས་ཅན་སེམས་འདི་ནི། །དེ་བས་དངོས་པོ་མེད་གྱུར་ཀྱང་། །སྲིད་པ་
དག་ཏུ་རབ་ཏུ་གྲགས། །བྱང་ཆུབ་སེམས་ནི་མཁའ་མཉམ་པ། །ལེགས་པར་རྗེས་སུ་མྱོང་མཛད་པ། །འགྲོ་བའི་དོན་ནི་མཛད་པ་པོ། །སྐྱེ་བོ་མཆོག་ལ་དེ་བསྟན་གསོལ། །སྒྲུབ་པ་ཡི་ནི་ཐབས་ཙམ་ཞིག །ཤེས་ནས་རྒྱུད་ལ་རྒྱབ་ཀྱིས་
ཕྱོགས། །འདི་ལྟར་བདག་ནི་སློབ་དཔོན་ཞེས། །མ་འོངས་པ་ན་སྨྲ་བར་འགྱུར། །བདག་གི་ཚིག་ནི་འདི་ཉིད་དག །ཡིན་ཞེས་སྨྲ་ཞིང་བྱས་པ་འཇིག །དེས་ནི་དགོངས་པའི་བྱང་ཆུབ་སེམས། །ཇི་བཞིན་དོན་དུ་མི་ཤེས་སོ། །དེ་བཞིན་
འཇིག་རྟེན་པ་རྣམས་ནི། །སྐལ་མེད་ཆོས་ཀུན་རྣམ་སྤངས་ལ། །རིག་པ་ཡང་ནི་མི་མཐོང་བས། །དེ་རྣམས་ལ་ཡང་གནས་མེད་འགྱུར། །དེ་བས་བྱང་ཆུབ་སེམས་བདུད་རྩི། །དེ་ནི་སྨྲ་བར་རིགས་པ་ཡིན། །འབྲེལ་པའི་ཉི་མ་ཐོབ་པ་ནི། །
མ་འོངས་པ་ན་འབྱུང་བར་འགྱུར། །དེ་ནས་བཅོམ་ལྡན་སྣ་ཚོགས་པས། །གྲགས་ལྡན་རྡོ་རྗེ་འཛིན་པ་ལ། །བྱང་ཆུབ་སེམས་ཀྱི་ངེས་པའི་དོན། །སླར་ཡང་དེ་ཉིད་ལ་གསུངས་པ། །ནང་ན་མ་ཡིན་ཕྱི་རོལ་མིན། །གཉི་ག་མིང་དུའང་
འགྱུར་མ་ཡིན། །རྟག་པ་མ་ཡིན་སྐད་ཅིག་མིན། །དེ་ནི་སོ་སོ་རང་རིག་ཡིན། །མི་རྟོག་ནམ་མཁའ་ཇི་བཞིན་དུ། །བྱང་ཆུབ་སེམས་ནི་རྡོ་རྗེ་འཛིན། །དེ་བཞིན་གཤེགས་པ་འགྲོ་བའི་དོན། །ཡིད་བཞིན་ནོར་བུ་ལྟ་བུར་འབྱུང་། །འདས་

88-1-265a

དང་མ་འོངས་པ་ཉིད་དང་། །ད་ལྟར་ཞེས་ནི་བྱ་བ་དང་། །སངས་རྒྱས་སྐུ་ཡང་འབྱུང་འགྱུར་བ། །དོན་དམ་གཅིག་ནི་ཀུན་རྫོབ་ཡིན། །རིག་བྱེད་དུས་དང་མེ་ཡི་བརྡ། །ཉི་ཟླ་རླུང་གི་གཟུགས་ཅན་ཏེ། །བཞི་ཕྱེད་གསུམ་པ་དག་
ལས་བྱུང་། །བྱང་ཆུབ་སེམས་གཅིག་དབྱེ་བ་ཉིད། །དེ་ནི་ཤེས་རབ་ཐབས་ཟུང་འབྲེལ། །དེ་བཞིན་བདེ་བྱེད་འཛིན་པ་དང་། །ཧ་ནི་སོ་ལ་གནས་པ་ཡི། །གནས་སྐབས་ཇི་སྙེད་དེ་བཞིན་དུ། །མིང་ནི་ཡོད་པ་མ་ཡིན་པ། །དེ་འདི་བྱང་ཆུབ་
སེམས་སུ་འགྱུར། །རྡོ་རྗེ་ནང་དུ་ཞུགས་གྱུར་པ། །བསམ་བྱའི་སྙིང་པོའང་དེ་ཉིད་ཡིན། །ལྷོད་པ་གནས་ཞེས་བྱ་བ་ནི། །ཚེག་དྲག་བཅས་པའི་རླུང་ཡིན་ནོ། །རང་ཉིད་ལྡོག་པར་བྱེད་པའི་མཆོག །དེ་ནི་སྲོག་དབང་ཡིད་ཀྱང་ཡིན། །ང་རྒྱལ་
དང་ནི་དེ་བཞིན་བློ། །དེ་དང་ལྡན་པ་བྱང་ཆུབ་སེམས། །བཞིར་གྲགས་ཆ་ལས་ཡང་དག་བྱུང་། །ཡོད་མེད་རབ་ཏུ་ཞི་བ་ཅན། །དངོས་པོ་མེད་པའི་སེམས་འདི་ནི། །རང་རིག་གཅིག་པུའི་ཡུལ་ཡིན་ནོ། །དེ་ཉིད་དོན་ནི་རིག་བྱེད་པ། །དགོངས་
པས་ཡང་དག་བཤད་པ་ཡིན། །དེ་ནས་གསང་བའི་དགོངས་པ་འདི། །ཆོས་ཀྱི་ཡི་གེ་མཆོག་ཐོས་ནས། །བྱམས་པ་ཞེས་ལ་སོགས་པ་ཡི། །བྱང་ཆུབ་སེམས་དཔའ་སེམས་དཔའ་ཆེ། །ངོ་མཚར་རྨད་བྱུང་ལེགས་སྐྱེས་ནས། །ཆེད་
དུ་བརྗོད་པ་ཆེད་དུ་བརྗོད། །ཨེ་མའོ་སངས་རྒྱས་ཨེ་མའོ་ཆོས། །ཨེ་མའོ་ཆོས་ནི་སྟོན་མཛད་པ། །དངོས་ཀུན་དག་པའི་དོན་གཅིག་པུ། །དག་པ་དེ་ཉིད་དོན་དག་སྟེར། །རྣམ་པར་མི་རྟོག་མཁའ་མཚུངས་བཤད། །བྱང་ཆུབ་སེམས་ལ་ཕྱག་
འཚལ་ལོ། །བདག་མེད་ཆོས་ལས་ཡང་དག་བྱུང་། །བྱང་ཆུབ་ཚོགས་ནི་རྫོགས་བྱེད་པ། །ངོ་བོ་མེད་ཅིང་དམིགས་སུ་མེད། །བྱང་ཆུབ་སེམས་ལ་ཕྱག་འཚལ་ལོ། །ཀུན་བཟང་གཅིག་ལས་ཡང་དག་བྱུང་། །དགོངས་དོན་
བྱང་ཆུབ་སྟེར་བ་པོ། །བྱང་ཆུབ་སྤྱོད་མཆོག་རྡོ་རྗེ་མཆོག །བྱང་ཆུབ་སེམས་ལ་ཕྱག་འཚལ་ལོ། །དག་པ་དེ་བཞིན་གཤེགས་པའི་ཐུགས། །སངས་རྒྱས་བྱང་ཆུབ་རབ་སྒྲུབ་པ། །རྡོ་རྗེ་གསུམ་ནི་རང་བཞིན་གཅིག །བྱང་

88-1-265b

ཆུབ་སེམས་ལ་ཕྱག་འཚལ་ལོ། །དགོངས་པ་ལུང་སྟོན་ལ་དད་པར། །གང་གང་ཡིད་ནི་བཟོད་གྱུར་པ། །དམ་ཚིག་གསུམ་གྱིས་རྡོ་རྗེ་ལས། །དེས་ནི་དེ་བཞིན་བྱ་བ་ཡིན། །དེ་བཞིན་གཤེགས་པ་ཐམས་ཅད་ཀྱི། །རྡོ་རྗེ་གསུམ་གྱི་
གསང་བ་ལས། །ཡང་དག་བྱང་ཆུབ་སེམས་བཤད་པ། །ལེའུ་གཉིས་པ་ཡིན་པར་བཤད།། །། དེ་ནས་དེ་ཉིད་གསང་རྡོ་རྗེ། །གསུམ་དང་ཚུལ་གསུམ་ལམ་གསུམ་མཆོག །རྣམ་
ཐར་གསུམ་དང་དཀོན་མཆོག་གསུམ། །དེ་བཞིན་གཤེགས་པ་ཀུན་བདག་པོ། །དེ་བཞིན་གཤེགས་པ་ཀུན་བཀོད་པ། །འཕྲོ་བའི་སྤྲིན་གྱི་རྡོ་རྗེ་ཅན། །ཏིང་ངེ་འཛིན་ལ་སྙོམས་ཞུགས་ཏེ། །དེ་ནས་རྡོ་རྗེ་འཛིན་ལ་གསུངས། །རྡོ་རྗེ་
བཀོད་པ་མཆོག་འདི་ཡི། །ལེའུ་བརྟུལ་ཞུགས་བཟང་པོ་ཉོན། །འདི་ནི་དེ་བཞིན་གཤེགས་པ་ཀུན། །ཕྲ་མོ་རྣལ་འབྱོར་དག་ལ་བཞུགས། །ཨོཾ་ནི་གཅིག་དང་ཡང་དག་ལྡན། །ཤཱུ་ནྱ་ཏཱ་ནི་གཉིས་པ་སྟེ། །ཛྙཱ་ན་ཞེས་ནི་གསུམ་པ་
ཡིན། །རྡོ་རྗེ་བྱ་བ་བཞི་པའོ། །སྭ་བྷཱ་ཝཱཏྨ་ཀཿལྔ་པ། ཨ་ཧྃ་ཞེས་པ་དྲུག་པར་བརྗོད། །དེ་ལྟར་བདེ་གཤེགས་དྲུག་པོ་ནི། །སྐྱེ་བོ་མཆོག་ལ་བསྟན་པ་ཡིན། །ཨོཾ་ཤཱུ་ནྱ་ཏཱ་ཟུང་དང་པོ། །ཛྙཱ་ན་བཛྲ་གཉིས་པ་ཡིན། །སྭ་བྷཱ་
ཝཱཏྨ་ཀོ྅་ཧྃ་གྱུར། །དེ་ཉིད་གསུམ་ནི་འདིར་བརྟགས་པའོ། །དེ་ཉིད་གསུམ་ནི་གཅིག་གྱུར་པར། །མི་གསལ་གསལ་བའི་མིང་ཅན་ནོ། །མཁའ་དབུས་སངས་རྒྱས་དཀྱིལ་འཁོར་ནི། །འོད་ཟེར་སྤྲིན་གྱི་ཚོགས་ཆེན་པོ། །ཡི་གེ་མ་
ཡི་འོད་ཀྱིས་ཁྱབ། །ཀུན་ནས་ཡོངས་སུ་ཟླུམ་པོའོ། །འདོད་ཡོན་ལྔ་ཡིས་ཀུན་དུ་ཁྱབ། །མཆོད་པ་རྣམ་པ་ལྔས་བརྒྱན་པ། །མདོར་ན་དེ་ལྟར་བསྒོམས་ནས་སུ། །དབུས་སུ་གཟུགས་ནི་བསྒོམ་པར་བྱ། །རྣམ་པར་སྣང་མཛད་
ཕྱག་རྒྱ་མཆོག །དེ་ཉིད་གསུམ་གྱི་རྡོ་རྗེ་མཚན། །ཡང་ན་རྡོ་རྗེ་གསུམ་མགོན་གྱི། །ཕྱག་རྒྱ་ཡང་ནི་རྣམ་པར་བསྒོམ། །མི་བསྐྱོད་པ་ཡི་ཕྱག་རྒྱ་ཆེ། །ཚོགས་ནི་གཉིས་མེད་སྦྱོར་བ་དང་། །དཀོན་མཆོག་དཔལ་གྱི་རྒྱ་

88-1-266a

ཆེན་དང་། །ཚེ་དཔག་མེད་པའི་འོད་བྱེད་དང་། །དེ་བཞིན་དོན་ཡོད་གཟུགས་ཅན་རྒྱ། །སངས་རྒྱས་དཀྱིལ་འཁོར་དག་ཏུ་བསྒོམ། །རྡོ་རྗེ་གསུམ་གཅིག་རྡོ་རྗེ་ཅན། །ཨིན་དྲ་ནཱི་ལའི་མདོག་འདྲ་བ། །རབ་འབར་ཕྱག་ན་རྡོ་རྗེ་
བསྣམས། །རྣམ་པར་གཙིགས་པ་འཇིགས་འཇིགས་ལྟའི། །འཛམ་བུ་ཆུ་བོའི་གསེར་འོད་འདྲ། །སངས་རྒྱས་སྤྲིན་གྱིས་རབ་ཏུ་འཁྲིགས། །དེ་ཡི་ཕྱག་ན་རྡོ་རྗེ་ཆེ། །རྩེ་མོ་དགུ་པ་རྣམ་པར་བསྒོམ། །ཤེལ་དང་ཟླ་བའི་འོད་འདྲ་བ། །
ཐོར་ཚུགས་ཅོད་པན་དག་གིས་བརྒྱན། །རབ་འབར་ལག་ན་འཁོར་ལོ་བསྣམས། །སྣ་ཚོགས་རྒྱན་གྱིས་རྣམ་པར་བརྒྱན། །མར་ཀ་ཏའི་འོད་འདྲ་བ། །རྡོ་རྗེ་འབར་བས་རྣམ་པར་བརྒྱན། །འབར་ཞིང་འབར་བའི་ཚོགས་ཀྱིས་
ཁྱབ། །རིན་ཆེན་དེ་ལ་རྣམ་པར་བསྒོམ། །འདོད་ཆགས་ཆེན་པོ་རྡོ་རྗེ་ཅན། །པད་མ་རཱ་གའི་མདོག་འདྲ་ཞིང་། །ཐོར་ཚུགས་ཅོད་པན་དག་གིས་བརྒྱན། །ཕྱག་ན་པད་མ་བསྣམས་པར་བསྒོམ། །སྣ་ཚོགས་རྡོ་རྗེ་གདོན་མི་ཟ། །
འོད་ཆེན་སྣ་ལྔའི་འོད་འདྲ་བ། །ཞི་བ་སངས་རྒྱས་དཀྱིལ་འཁོར་དུ། །ཕྱག་ན་རལ་གྲི་བསྣམས་པར་བསྒོམ། །དེ་ལྟར་རྣལ་འབྱོར་བཤད་པ་དག །གསང་བའི་བདག་པོས་ཐོས་ནས་ནི། །ཕྲ་མོའི་རྣལ་འབྱོར་ཆ་དག་ཀྱང་། །
དེ་བཞིན་གཤེགས་བདག་ལ་ཞུས་པ། །ཕུང་པོ་ཁམས་སོགས་སྦྱོར་བ་ཡིས། །དེ་བཞིན་གཤེགས་པས་བཀའ་སྩལ་ན། །མཁའ་དབུས་སངས་རྒྱས་དཀྱིལ་འཁོར་དུ། །དེ་རྣམས་ཀྱང་ནི་ཇི་ལྟར་འགྱུར། །གཅིག་ཤོས་ཕྱི་
རོལ་དུ་བསྒོམ་པ། །དཀྱིལ་འཁོར་སངས་རྒྱས་མིང་ཅན་ནི། །དངོས་པོ་མེད་པའི་དངོས་པོ་ལ། །སྒོམ་པ་པོ་རྣམས་ཇི་ལྟར་བརྟག །མགོན་པོ་ཕྲ་མོའི་རྣལ་འབྱོར་འདི། །དཀྱིལ་འཁོར་གང་ཞིག་བཀའ་སྩོལ་ཞེས། །གང་ཞིག་མ་
འོངས་པ་རྣམས་ནི། །འདི་ལྟར་མཆོག་ཏུའང་སོམ་ཉི་འཚལ། །ལག་ན་རྡོ་རྗེ་གྲགས་ལྡན་པ། །ཕྲ་མོའི་རྣལ་འབྱོར་དེ་ཉིད་སྐྱེས། །འགྲོ་བ་གཉིས་མེད་སྦྱོར་བ་ཡིས། །ཕྲ་བ་དགོངས་པས་གསུངས་པ་ཡིན། །རྣམ་ལྔ་མངོན་པར་

88-1-266b

བྱང་ཆུབ་འདི། །མ་འོངས་སྐྱེ་བོའི་རྒྱུར་གྱུར་པ། །ཆོས་ནི་ཡང་དག་སྡུད་གྱུར་གང་། །ཇི་ལྟ་ཇི་ལྟར་སྟོན་པར་བྱེད། །ཕུང་པོ་ཉིད་ནི་སངས་རྒྱས་གྱུར། །བྱང་ཆུབ་དོན་གྱི་རྐྱེན་ལས་བྱུང་། །དེ་ཡང་དེ་བཞིན་གཤེགས་བཤད་པ། །
དེ་ཉིད་གཉིས་མེད་སྦྱོར་བས་སོ། །སྟོན་དང་འཇོག་པ་པོ་འདི་ནི། །བློ་ཡི་དངོས་གྲུབ་སྟོན་པ་པོ། །ཐོག་མཐའ་མེད་པ་རྣལ་འབྱོར་ནི། །ཕྲ་མོ་ཞེས་ནི་བྱ་བར་བརྟག །མི་གསལ་གསལ་བར་ཡང་དག་སྦྱོར། །དངོས་མེད་ངོ་
བོ་ལས་སྐྱེས་པའོ། །གཟོད་མ་ཉིད་ནས་རབ་གྲུབ་པ། །གཅིག་དང་དུ་མ་རྣམ་སྤངས་པ། །རྟེན་འབྲེལ་ཆོས་ཞེས་གྲགས་པ་སྟེ། །དངོས་པོ་ཐམས་ཅད་གཅིག་ཏུ་བྱུང་། །བདག་ཉིད་འདི་འདྲར་བྱས་ནས་ནི། །ཆོས་ཀྱི་དཀྱིལ་
འཁོར་ཡང་དག་བྲིས། །དམར་དང་ནག་དང་དེ་བཞིན་སེར། །དཀར་པོ་ཉིད་ནི་མདོ་རུ་སྟེ། །བཞི་བཞི་གཅིག་ཏུ་སྦྱོར་བ་ཡང་། །གོས་དཀར་ལ་སོགས་ཡང་དག་བྲི། །དེ་རྣམས་དབུས་སུ་ལྷ་མོར་བཅས། །ཞི་སྦྱོར་མཆོག་དང་
མཆོག་མིན་ཅན། །སྟེང་དང་ཐད་ཀ་མཉམ་དང་འོག །ཇི་ལྟ་ཇི་ལྟར་གོས་དཀར་སོགས། །མེ་དང་རླུང་དང་དབང་ཆེན་དང་། །ཆུ་སྟེ་སོ་སོའི་དཀྱིལ་འཁོར་ལ། །བཅྭ་བརྒྱད་དག་ཏུ་ཡང་དག་བཤད། །དེ་ཡང་འདི་ཉིད་དག་ལ་
བཤད། །ཇི་ལྟར་འོ་མ་ཁྱད་པར་ནི། །མར་སར་གནས་པར་གྱུར་པ་ཡིན། །དེ་བཞིན་གོས་དཀར་ལ་སོགས་ལ། །ཞི་བ་ཉིད་ནི་དེ་གནས་སོ། །གཟུགས་ལ་སོགས་པ་ནང་གི་ཆོས། །མཐོང་བ་དེ་ནི་ལྷག་མཐོང་ཡིན། །མི་
བསྐྱོད་ལ་སོགས་གྲངས་ཇི་བཞིན། །རྟོག་པ་དག་ནི་ཞི་གནས་ཡིན། །འདི་གཉིས་དངོས་པོ་མེད་པའི་བདག །དེ་བཞིན་ཉིད་ནི་ཞི་ཞེས་བྱ། །དེ་བཞིན་ཉིད་ཀྱི་དཀྱིལ་འཁོར་དུ། །སངས་རྒྱས་ཐམས་ཅད་གཞུག་པར་
བྱ། །རྣལ་འབྱོར་པ་ཡི་དབུགས་རྔུབ་དབྱུང་། །སྦྱོར་བ་དེ་ཉིད་གཅིག་པ་ཉིད། །ཤེས་རབ་ཐབས་ལ་གནས་ནས་ནི། །སྔགས་ཀྱི་ཡན་ལག་མ་ཉམས་བཟླས། །བྱ་བ་ཐམས་ཅད་ཉིད་དུ་ཡང་། །རྣལ་འབྱོར་རིག་པས་

88-1-267a

ཉལ་སོགས་ལ། །མིང་མང་བརྗོད་དུ་མེད་པ་དང་། །དུས་གསུམ་འདས་པ་རྟག་ཏུ་བཟླ། །གོས་དཀར་ལ་སོགས་བཟླས་བཤད་པ། །བརྒྱ་ཕྲག་གཉིས་དང་ཉི་ཤུ་ལྔ། །བཞི་པ་ལེགས་པར་བསྒྲེས་པ་ཡིས། །
སྦྱོར་བཞིས་བསྡུས་པ་བརྒྱ་ཕྲག་དགུ། །དགུ་བརྒྱ་དག་ཏུ་གང་བསྟན་པ། །ཉི་ཤུ་རྩ་བཞིའི་རིམ་གྱིས་ནི། །དེ་ནི་སོ་སོར་འབྱུང་བ་ལས། །ཉི་ཁྲི་གཅིག་སྟོང་དྲུག་བརྒྱའོ། །དེ་འདིར་གསང་བ་དགོངས་པ་ཡིས། །ཕྲ་མོའི་
རྣལ་འབྱོར་བསྟན་པ་ཡིན། །ཀློག་དང་བསམ་གཏན་མེད་མོད་ཀྱི། །འོན་ཀྱང་བཟླས་པ་ཡིན་པར་བཤད། །དེ་ལྟར་རྣམ་པ་མང་པོ་ཡི། །འགྲོ་ལ་ཕན་པའི་གསུང་ཐོས་ནས། །དེ་བཞིན་གཤེགས་ཀུན་བདག་པོ་ལ། །
རྡོ་རྗེ་ཅན་གྱིས་སླར་ཡང་ཞུས། །གང་ཞིག་བསྒོམས་ན་མ་འོངས་འགྲོ། །ཐམས་ཅད་མི་རྟོག་པར་འགྱུར་བ། །རྡོ་རྗེ་གསུམ་གྱི་སྙིང་པོ་མཆོག །སྙིང་པོ་བཅོམ་ལྡན་བཤད་དུ་གསོལ། །དེ་ཉིད་གསུམ་ཉིད་མང་སྦྱོར་བ། །
དེ་ནི་ཕྲ་མོའི་རྡོ་རྗེ་བསྒོམ། །མྱུར་བ་ལ་སོགས་གསུམ་སྤངས་པའི། །རྣལ་འབྱོར་པར་ཡང་བདག་ཅག་འགྱུར། །དེ་ནི་བདག་རིག་ཡིད་ཆེས་ཤིང་། །ཞི་བ་ཉིད་ནི་མི་ཤེས་འགྱུར། །ཕྲ་མོའི་རྣལ་འབྱོར་གཙོ་སྤངས་ཏེ། །ལོག་
པའི་རྣལ་འབྱོར་ཀུན་དུ་སྟེན། །སྟོན་པ་པོ་ཡི་སྦྱོར་སྨྲ་ཞིང་། །ཕྲ་མོ་ཞེས་བྱ་དེ་ཉིད་ནི། །མ་འོངས་དུས་ན་སྤོང་འགྱུར་བ། །དེ་ཉིད་དེ་ནི་ངེས་པར་བྱེད། །དེ་ནས་རྡོ་རྗེ་འཛིན་སྨྲ་བའི། །ལུང་བསྟན་པ་ནི་གསན་པ་དང་། །དེ་བཞིན་
གཤེགས་པ་ཀུན་བདག་པོ། །ཆོས་དབྱིངས་ངོ་བོ་ཉིད་ཅེས་བྱའི། །ཏིང་ངེ་འཛིན་དེ་ཀུན་ནས་ནི། །སྙོམས་པར་ཞུགས་པ་ཉིད་དུ་མཛད། །དཔལ་ལྡན་སྙོམས་པར་ཞུགས་མཛད་ནས། །གསང་སྔགས་འདི་ནི་བཀའ་སྩལ་ཏོ། །
སྐུ་གསུང་ཐུགས་ནི་རྡོ་རྗེར་བཤད། །ཁྱད་པར་དུ་ནི་བྱིན་རློབ་པ། །གཉིས་མེད་རྡོ་རྗེ་གསུམ་སྦྱོར་བས། །དེ་ནི་ཡང་དག་བཤད་པར་བྱ། །ཨོཾ་ནི་དང་པོར་ཤེས་པར་བྱ། །དྷརྨ་ཞེས་བྱ་གཉིས་པའོ། །དྷཱ་ཏུ་ཞེས་བྱ་གསུམ་པར་

88-1-267b

བཤད། །སྭ་བྷཱ་བོར་གྲགས་བཞི་པའོ། །ཨཱད་མ་ཀཿནི་ལྔ་པ་ཡིན། །ཨ་ཧྃ་དུ་གྱུར་དྲུག་པར་འདོད། །སྔགས་འདི་བརྗོད་ནས་དེ་འོག་ཏུ། །བསྒོམ་པ་བདག་ཉིད་ཅན་གྱིས་བསྒོམ། །རིན་ཆེན་ཁ་དོག་སྣ་ལྔ་པ། །ཡུངས་
ཀར་གྱི་ནི་འབྲུ་ཚད་ཙམ། །ཉམས་དགའ་རི་རབ་རྩེ་མོ་རུ། །རྣལ་འབྱོར་པ་ཡི་རྟག་པར་བསྒོམ། །རིན་ཆེན་མི་གཡོར་གྱུར་ནས་སྤྲོ། །མི་གཡོར་མ་གྱུར་སྤྲོ་མི་བྱ། །སངས་རྒྱས་འབར་བའི་འོད་འདྲ་བ། །མཆོག་རབ་སྤྲིན་རྣམས་
སྤྲོ་བར་བྱ། །འཁོར་ལོ་རྡོ་རྗེ་སྤྲིན་ཆེན་དང་། །པད་མ་རལ་གྲི་མཚོན་ཆ་མཆོག །བྱང་ཆུབ་སེམས་དཔའ་སྤྲིན་ཆེན་རྣམས། །སྤྲོ་བའི་བདག་ཉིད་ཅན་གྱིས་སྤྲོ། །ཕྲ་མོ་དཀྱིལ་འཁོར་དབུས་གནས་པར། །རྡོ་རྗེ་དཀྱིལ་
འཁོར་བསྒོམ་པར་བྱ། །བཟླས་དང་བསྒོམ་པའི་སྦྱོར་བ་ཡང་། །པད་མའི་དཀྱིལ་འཁོར་དག་ཏུ་བསྒོམ། །རིན་ཆེན་ལྟ་བུའི་དཀྱིལ་འཁོར་དུ། །དངོས་ལ་བརྩོན་པས་རིན་ཆེན་བསྒོམ། །དཀྱིལ་འཁོར་སྦྱོར་བ་ལས་བྱུང་བ། །
ནམ་མཁའི་དཀྱིལ་དུ་བྲི་བར་བྱ། །འདི་དག་སངས་རྒྱས་རབ་མཆོག་གི། ཕྲ་མོ་རྡོ་རྗེ་གསུམ་བསྒྲུབ་པའོ། །རྡོ་རྗེ་དཀྱིལ་འཁོར་ལས་བྱུང་བ། །ཐམས་ཅད་མཁྱེན་པའི་ཚུལ་ཐོབ་པའོ། །དགོངས་པ་གསང་བ་ཞེས་པ་ཡི། །
ལུང་སྟོན་དམ་པ་འདི་ལ་ནི། །གང་གིས་སེམས་ནི་བཟོད་གྱུར་པ། །དེ་ནི་དེ་བཞིན་བྱེད་པ་ཡིན། །དེ་བཞིན་གཤེགས་པ་ཀུན་གྱི་གསང་། །རྡོ་རྗེ་ཕྲ་མོ་དེ་ཉིད་ལས། །འདི་ནི་རྡོ་རྗེ་བཀོད་པའི་མཆོག །ལེའུ་གསུམ་པ་ཉིད་
ཡིན་ནོ།། །། དེ་ནས་བཅོམ་ལྡན་འདས་ཐམས་ཅད། །གཉིས་སུ་མེད་པར་གྱུར་ནས་ནི། །སླར་ཡང་རྡོ་རྗེ་གསུམ་བདག་ལ། །བསྟོད་པས་དེ་རྣམས་གསོལ་བ་འདེབས། །དེ་བཞིན་གཤེགས་
པ་ཐམས་ཅད་ཀྱིས། །ཞི་བ་གནས་རྣམས་མཆོག་གྱུར་པ། །ཆོས་ཀུན་གཅིག་ཏུ་བདག་མེད་པ། །དཀྱིལ་འཁོར་མཆོག་འདི་བཤད་དུ་གསོལ། །ཡོངས་སུ་རྫོགས་པར་ཡང་དག་བརྒྱན། །མཚན་རྣམས་ཀུན་གྱིས་

88-1-268a

མཚན་པའོ། །ཀུན་ཏུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །ཡེ་ཤེས་སྤྱོད་པའི་དོན་ལས་བྱུང་། །ཞི་བའི་ཆོས་ནི་སྦྱོང་བ་པོ། །དངོས་མཆོག་དཀྱིལ་འཁོར་བཤད་དུ་གསོལ། །རང་བཞིན་
གྱིས་ནི་དྲི་མེད་དག །སེམས་ནི་ཀུན་དུ་བཟང་པོ་ཉིད། །སེམས་ཅན་ཀུན་གཅིག་ཆེ་བའི་མཆོག །དཀྱིལ་འཁོར་སྙིང་པོ་བཤད་དུ་གསོལ། །དེ་ནས་སྟོན་པ་བཅོམ་ལྡན་འདས། །ཁམས་གཅིག་ཁམས་ནི་གསུམ་པ་པོ། །འཇིག་
རྟེན་གསུམ་མཆོག་རྡོ་རྗེ་མཆོག །འཇིག་རྟེན་གསུམ་གྱི་སྟོན་པ་པོ། །ཉམས་དགའ་དེ་བཞིན་གཤེགས་པའི་གནས། །དེ་བཞིན་གཤེགས་པ་ཀུན་དག་ལ། །ཐུགས་དེ་དཀྱིལ་འཁོར་འདྲ་བ་སྟེ། །དཀྱིལ་འཁོར་དམ་པ་
བཀའ་སྩལ་ཏོ། །དེ་ནས་སེམས་ཀྱི་དཀྱིལ་འཁོར་མཆོག །རྡོ་རྗེ་ཡེ་ཤེས་རབ་འདྲ་བ། །སྐུ་དང་གསུང་དང་ཐུགས་རྣམས་ཀྱི། །དཀྱིལ་འཁོར་རབ་ཏུ་བཤད་པར་བྱའོ། །འདི་ནི་གསང་བའི་བདག་ཉིད་མཆོག །ལེགས་
བསྒྲིལ་དེ་བཞིན་ཉིད་བསྟན་པའོ། །སྣ་ཚོགས་ལུང་གི་མཚན་མ་ནི། །ཚད་མ་བཟང་པོར་དེ་བཤད་དོ། །ཀུན་རྫོབ་དང་ནི་དོན་དམ་དག །གཉིས་སུ་མེད་པ་མཛེས་པ་ཡིན། །ཤེས་རབ་འདི་ནི་ཐིག་ཡིན་ཏེ། །ཐབས་ནི་དེ་ཡི་རྗེས་
འཇུག་པའོ། །ཤེས་རབ་ཐབས་ཀྱི་ཐིག་གཅིག་གིས། །ཆོས་དང་ལོངས་སྤྱོད་རྫོགས་མཆོག་ནི། །སེམས་ཀྱི་དཀྱིལ་འཁོར་ཐིག་གདབ་སྟེ། །རྟེན་འབྲེལ་ཡན་ལག་བཅུ་གཉིས་པ། །འཕགས་པའི་བདེན་བཞི་ངོས་བཞི་སྟེ། །
ཚངས་པའི་གནས་བཞི་གྲྭ་བཞི་ཡིན། །བསྡུ་བའི་དངོས་གྲགས་སྒོ་ཡིན་ཏེ། །རེ་རེའང་བཞི་བཞི་མིང་ཅན་ནོ། །ཆོས་ཀྱི་དེ་ཉིད་དོན་གྱི་བརྡ། །འཁོར་ལོ་ནང་གི་དཀྱིལ་འཁོར་རོ། །མི་ཕྱེད་ཡེ་ཤེས་མཚན་མ་དེ། །རྡོ་རྗེ་ཨིན་
དྲ་ནཱི་ལ་རྒྱ། །རྣམ་པ་ལྔ་ཡིས་རབ་བྱེ་བའི། །རྩེ་མོ་འཁོར་བ་འཇིག་བྱེད་པའོ། །ཤར་ནས་མེ་ལོང་ངོ་བོ་ནི། །འཁོར་ལོ་འབར་བའི་འོད་ཀྱིས་བརྒྱན། །ལྷོ་རུ་ཀུན་མཉམ་ཡེ་ཤེས་ཡིན། །གཅིག་གི་མིང་ཅན་རིན་པོ་ཆེ། 

88-1-268b

།ནུབ་ཏུ་སོ་སོར་རྟོག་པད་མ། །པད་མ་རཱ་གའི་འོད་འདྲ་བ། །བྱང་དུ་གོང་མའི་སེམས་གང་ཡིན། །འགྲོ་བའི་རྣམ་རྟོག་འཇོམས་བྱེད་པ། །བྱ་བ་སྒྲུབ་པ་རལ་གྲིར་འགྱུར། །འོད་འཕྲོ་འབར་བ་འདྲ་བའི་མདོག །ཤར་ལྷོ་བྱམས་
པའང་སྤྱན་ཡིན་ཏེ། །སྤྲིན་སྔོན་དང་ནི་མཉམ་པའི་འོད། །ལྷོ་ནུབ་སྙིང་རྗེ་ཞེས་བྱ་བ། །མཱ་མ་ཀཱི་ནི་རིགས་རྡོ་རྗེ། །ནུབ་བྱང་པད་མ་ཞེས་བྱ་བ། །དགའ་བ་ལེགས་པར་གནས་པ་བཞིན། །བྱང་ཤར་ཨུད་པལ་ལྟར་
སྣང་བའི། །བཏང་སྙོམས་བཅས་པ་སྔོན་པོ་འདྲ། །དེ་བཞིན་ཤར་སྒོར་སྦྱིན་པ་ནི། །ཐོ་བ་མདངས་ལྡན་འོད་དང་བཅས། །དེ་བཞིན་སྙན་སྨྲ་ཞེས་གྲགས་པ། །དབྱིག་པ་འོད་བཟང་རྡོ་རྗེ་འབར། །ནུབ་ཏུ་དོན་སྤྱོད་ཅེས་བྱ་བ། །
རྟ་མགྲིན་གྱི་ནི་པད་མའོ། །དོན་མཐུན་པ་ནི་རྡོ་རྗེ་སྟེ། །རྡོ་རྗེ་འཁྱིལ་པའི་རྡོ་རྗེ་ཅན། །ཕྱག་རྒྱ་དགོད་པའི་མཚན་ཉིད་དེ། །འདི་ནི་ལེགས་པར་བཤད་པ་ཡིན། །ཇི་ལྟར་དབྱིབས་ཀྱིས་མཆོད་པ་ནི། །རྣམ་གསུམ་བསྒོམ་པས་
འགྱུར་བ་ཡིན། །དང་པོར་ཆེན་པོ་ཡོད་པ་ཡི། །ཕྱག་རྒྱའི་དཀྱིལ་འཁོར་ཡིན་པར་བཤད། །དེ་ལྟར་མཁའ་དང་མཚུངས་གྱུར་དང་། །ཤེས་ནས་འགྲོ་ལ་ཕན་པར་འགྱུར། །རྡོ་རྗེ་གསུམ་དང་ལྷན་ཅིག་འབྱུང་། །དེ་ཚེ་ཟླ་ཟེར་ཕྲེང་
བ་ཡི། །སྐད་ཅིག་ལ་སོགས་དུས་དབྱེ་བས། །ལོ་གྲངས་བཅུ་དྲུག་པ་ཡི་མིང་། །མ་སྐྱེས་པར་འབྱུང་ཞི་བ་ནི། །བུད་མེད་ཅེས་ནི་ངེས་པར་བཤད། །ཞི་བའི་ཆོས་དང་རྗེས་དྲན་པ། །མདངས་བཟངས་འོད་ནི་ཡིན་པར་གསུངས། །
རྟེན་འབྲེལ་བག་ཆགས་དྲི་ཡིན་ཏེ། །ཡེ་ཤེས་ཁ་བྱེ་མེ་ཏོག་གོ། །དངོས་པོ་མེད་པ་རིགས་ཡིན་ཏེ། །ཀུན་མཁྱེན་ཡེ་ཤེས་དབུས་ཉིད་དོ། །ཆོས་དབྱིངས་ཉིད་ཀྱི་བུད་མེད་ནི། །ཤེས་རབ་འདི་འདྲས་མཉེས་པར་བྱ། །ནང་ན་མ་
ཡིན་ཕྱི་མ་ཡིན། །གཉི་གར་མ་ཡིན་གཞན་ནས་མིན། །གནས་མེད་གནས་པའི་རྣལ་འབྱོར་གྱུར། །དེ་བས་མཱ་མ་ཀཱིར་བཤད་དོ། །དེ་ཡི་ངོ་བོ་ཉིད་གཅིག་པ། །བྱིན་གྱིས་བརླབས་པས་དེ་བཤད་དོ། །ནམ་མཁའ་དང་ནི་

88-1-269a

གཅིག་ཏུ་མཚུངས། །སངས་རྒྱས་ཞི་བའི་གནས་སུ་འགྱུར། །དེ་བས་ཡུལ་དུ་རྣམ་བརྟགས་པ། །བསྡུ་བ་དག་ནི་བཤང་བ་ཡིན། །ཡེ་ཤེས་དབང་པོ་སྟོང་པ་གཅི། །རྣམ་དག་ཆོས་ཉིད་ཁུ་བ་ཡིན། །ཐམས་
ཅད་མཁྱེན་པའི་ཡེ་ཤེས་ཁྲག །རང་བཞིན་ཆོས་སུ་ཡོངས་བརྟགས་པ། །དེ་ཉིད་ལྷ་རྣམས་ཞེས་བྱ་སྟེ། །དངོས་མེད་པ་ནི་དབུལ་བ་ཡི། །དེ་བྱས་སངས་རྒྱས་སྲས་པོ་རྣམས། །ཁྱད་པར་དུ་ནི་མཉེས་པར་འགྱུར། །གང་
ཡང་འཇིག་རྟེན་པས་བརྟགས་པ། །དེ་རྣམས་ཇི་སྐད་བཤད་པ་ཉིད། །མི་ཕྱེད་རྡོ་རྗེ་གསུམ་བསྒོམས་པ། །སར་པ་ཉིད་དུ་བཀལ་ལེགས་དང་། །ཤིན་དུ་ཚད་ལྡན་མཛེས་པ་ཡི། །ཐིག་གིས་མཁས་པས་ཐིག་གདབ་བོ། །བློ་ལྡན་
དཀྱིལ་འཁོར་བརྟག་བྱ་བ། །ཁྲུ་ནི་བཅུ་གཉིས་ཚད་ཙམ་ལ། །ངོས་བཞི་དང་ནི་གྲྭ་བཞིར་ལྡན། །རྟ་བབས་ཀྱིས་ནི་མཛེས་པར་བྱ། །དེ་ཡི་དབུས་སུ་འཁོར་ལོ་ནི། །དགོངས་པས་དང་པོ་བཤད་པ་སྟེ། །དེ་ལས་བཟློག་པའི་ཚུལ་
གྱིས་ནི། །འདི་ན་འཇིག་རྟེན་པ་རྣམས་རྟོག །གང་ཞིག་འཇིག་རྟེན་འདས་ལ་གནས། །དེ་ནི་གཟུངས་ཀྱིས་དབང་བསྐུར་བ། །དངོས་མེད་པ་ནི་འཛིན་པ་དག །ཡིད་ནི་རྟག་ཏུ་མཁའ་དང་མཚུངས། །དམ་པ་འཇིག་རྟེན་ཤིན་དུ་འདས། །
འཁོར་བ་དང་ནི་གཅིག་ཤོས་སྤངས། །ལེན་པ་མ་ཡིན་གཏོང་བ་མིན། །མེད་པ་མ་ཡིན་གནས་མ་ཡིན། །བློ་ལྡན་ཀུན་དུ་འདི་ཤེས་པ། །རྣལ་འབྱོར་ཐམས་ཅད་རིག་པ་མཆོག །ཐུགས་ཀྱི་དཀྱིལ་འཁོར་ལེའུ་འདི་ནི། །ངེས་པའི་
རྣལ་འབྱོར་པ་ཞེས་བཤད། །དགོངས་པ་ལུང་བསྟན་ཡིད་འོང་ལ། །གང་ཞིག་ཡིད་ནི་བཟོད་གྱུར་ན། །དེ་རྣམས་ཤེས་རབ་ཐབས་དག་ནི། །ཇི་ལྟར་གནས་པ་དེ་ལྟར་བྱེད། །གསང་བའི་དགོངས་པ་ལུང་བསྟན་ལས། །དེ་ལས་
ཐུགས་ཀྱི་དཀྱིལ་འཁོར་གྱི། །ལེའུ་སྟེ་བཞི་པ་ཉིད་ཡིན་ནོ།། །། དེ་ནས་དེ་བཞིན་གཤེགས་པ་མཆོག །རྡོ་རྗེ་གསུང་གཙོ་འགྲོ་བའི་བླ། །སླར་ཡང་རྡོ་རྗེ་འཛིན་པ་ལ། །སྔགས་སྤྱོད་དོན་གྱི་དེ་ཉིད་

88-1-269b

ཞུས། །སྔགས་ཀྱི་བརྟུལ་ཞུགས་སྤྱོད་པ་གཅིག །ཁྱད་པར་དུ་ནི་བསྲུང་བསླབ་པ། །དེ་རྣམས་ཀྱི་ནི་དགོངས་པའི་གསུང་། །སྤྱོད་པ་བཅོམ་ལྡན་བཤད་དུ་གསོལ། །དེ་ནས་བདག་པོ་དེ་བཞིན་གཤེགས། །རྡོ་རྗེ་འཛིན་པ་དག་གི་ཚིག །
གསན་ནས་འགྲོ་བའི་དོན་གཅིག་པུ། །གསུངས་པའི་དོན་ཅན་བཀའ་སྩལ་ཏོ། །མི་རྟོག་དོན་ལས་ཡང་དག་བྱུང་། །ཞེ་སྡང་ལ་འཇུག་མཚན་ཉིད་ཡིན། །དངོས་མེད་ལ་གནས་གཏི་མུག་སྟེ། །འདོད་ཆགས་འདོད་ཆགས་ལས་
བྱུང་བ། །འདོད་ཆགས་ལྡན་པའི་མིང་ཅན་ཡིན། །ཐེག་པ་མཆོག་ནི་བླ་མེད་པ། །འདོད་ཆགས་ཞེ་སྡང་གཏི་མུག་སྟེ། །འདི་དག་རིགས་སུ་ཡང་དག་བཤད། །དངོས་གྲུབ་དེ་ནི་འདི་བསྒྲུབ་པོ། །རིགས་ངན་མྱུར་བར་ཤེས་པར་བྱ། །
སྨྱིག་མཁན་དག་ནི་དལ་བ་ཡིན། །མཚམས་མེད་བྱེད་པ་གཉི་ག་སྟེ། །གསོད་པ་དོན་གཉེར་སེམས་པ་པོ། །ཐེག་པ་ཆེན་པོ་བླ་མེད་པའི། །ཐེག་པ་མཆོག་འདི་འགྲུབ་པར་འགྱུར། །སེམས་ཅན་སྡིག་ཆེན་བྱས་པ་དང་། །
གཞན་ཡང་མཚམས་མེད་བྱེད་པ་པོ། །གང་ཡང་སློབ་དཔོན་སྨོད་པ་ཡིས། །བསྒྲུབས་ཀྱང་གྲུབ་པར་མི་འགྱུར་རོ། །འདི་ཉིད་དད་པས་མྱུར་དུ་ནི། །ཞེ་སྡང་དག་ལ་གནས་པས་གནས། །གང་གིས་ཕུང་སོགས་དངོས་མེད་
པར། །ཞི་གནས་ལས་བྱུང་སེམས་ཀྱིས་བྱས། །དེ་ནི་སྲོག་གཅོད་བྱེད་པ་སྟེ། །ཐེག་པ་མཆོག་ལ་གནས་པ་ཡིན། །ནང་དང་དེ་བཞིན་ཕྱི་རོལ་དག །རྟེན་འབྱུང་གཉིས་སུ་སྟོན་པ་ནི། །དེ་ནི་བརྫུན་སྨྲ་དགའ་བ་སྟེ། །
གནས་མེད་ལ་གནས་རྣལ་འབྱོར་པའོ། །རྫོགས་སངས་རྒྱས་ཀྱི་ཡེ་ཤེས་གང་། །དེ་ནི་རྫས་སུ་ཤེས་བྱ་སྟེ། །དེ་འཕྲོག་ངང་ཚུལ་གང་ཡིན་པ། །གཞན་གྱི་ནོར་ལ་ཆགས་པར་འདོད། །གང་ཞིག་དེ་ཉིད་དངོས་
གཅིག་པ། །དེ་བཞིན་ཉིད་ལ་རྟོགས་སྦྱོར་བ། །སེམས་ཅན་དེ་དེ་འདོད་ལ་དགའ། །བསྒྲུབ་པ་མཆོག་ལ་དམ་པར་འགྱུར། །དེ་ཡི་སྟོང་ཉིད་གཏི་མུག་ལ། །ཡུལ་ནི་བཤང་བ་ཞེས་གྲགས་ཏེ། །དབང་པོ་གཅི་བ་ཞེས་

88-1-270a

བྱ་ལ། །དེ་དག་ཞི་བ་ཟ་བ་ཡིན། །ཐེག་པ་ཆེན་པོ་ཆོས་མཆོག་འདིར། །དེ་དག་བསྒྲུབ་པའི་སྣོད་དུ་འགྱུར། །དེ་དག་ཚེ་བརྫུན་འདོད་པ་དང་། །བཤང་གཅི་ཟས་སུ་བྱེད་པ་པོ། །ཤེས་རབ་ཕ་རོལ་ཕྱིན་ཤེས་རབ། །
ཆོས་ཀྱི་སྐུ་ནི་མ་གཅིག་པུ། །གཉིས་མེད་དེ་བཞིན་ཉིད་སྦྱོར་བ། །དངོས་མེད་ཅེས་བྱ་འདོད་སྤྱོད་པ། །ལོངས་སྤྱོད་རྫོགས་དང་མཉམ་གང་ཡིན། །དེ་ཉིད་སྲིང་མོ་ཡིན་པར་འདོད། །རང་ལྷའི་རྣལ་འབྱོར་ལྡན་པ་ཡི། །
གསང་སྔགས་ལུས་ཀྱིས་མཉེས་པར་བྱ། །བཤང་གཅི་ཟས་སུ་བྱེད་པ་ཡི། །སྤྲུལ་སྐུའི་གཟུགས་ཅན་བུ་མོ་དེ། །སྒྲུབ་པ་པོས་ནི་བསྒོམ་པར་བྱ། །མ་དང་སྲིང་མོ་བུ་མོ་ནི། །འདི་འདྲ་རྣལ་འབྱོར་པས་མཉེས་བྱས། །
ཐེག་པ་མཆོག་གི་ཆོས་ཉིད་ལ། །དངོས་གྲུབ་རྒྱ་ཆེན་དེས་ཐོབ་པོ། །ཇི་ལྟར་མི་རྟོག་ནམ་མཁའ་ནི། །ཀུན་དུ་ཁྱབ་པར་གནས་གྱུར་པ། །འདི་ནི་སྒོམ་པ་ཞེས་བཤད་དེ། །ཏིང་འཛིན་བསམ་ཁྱབ་ཅེས་བྱ་བ། །དེ་ཉིད་
འཇིག་རྟེན་པར་བྱུང་བ། །རྟོག་པ་དགའ་བའི་མིང་ཅན་ནོ། །སངས་རྒྱས་ཡུམ་གྱི་ཡེ་ཤེས་ལ། །འདོད་སྤྱོད་གོས་པར་མི་འགྱུར་ཏེ། །རྣམ་པར་མི་རྟོག་སྦྱོར་གཅིག་གིས། །མྱུར་དུ་སངས་རྒྱས་དེས་ཐོབ་འགྱུར། །དེ་ནས་
བཅོམ་ལྡན་འདས་གསུང་ནི། །སྒྲིབ་ཀུན་སེལ་བ་ལ་སོགས་པའི། །བྱང་ཆུབ་སེམས་དཔའ་སེམས་དཔའ་ཆེས། །ཐོས་ནས་ངོ་མཚར་རྨད་དུ་གྱུར། །འདི་ནི་བདག་པོ་བཅོམ་ལྡན་འདས། །དེ་བཞིན་གཤེགས་
པ་ཀུན་གྱི་བདག །ཅི་ཡི་སླད་དུ་ཚིག་ངན་པ། །དེ་བཞིན་གཤེགས་འཁོར་ནང་དུ་གསུང་། །འདོད་ཆགས་བྲལ་དང་ཆགས་བཅས་དང་། །གཏི་མུག་བྲལ་བ་རྨོངས་བཅས་དང་། །ཞེ་སྡང་བྲལ་བ་སྡང་
བཅས་པའི། །རིགས་ཀྱི་དངོས་གྲུབ་སྟོན་མཛད་ཅིང་། །གང་གཞན་སྡིག་པའི་ཉེས་པ་དང་། །འཚེ་བ་ལ་སོགས་ཡོངས་སྤངས་པ། །འདིར་ནི་དེ་བྱེད་སེམས་ཅན་རྣམས། །སྣོད་ཡིན་ཞེས་ནི་ཐུབ་གསུང་ངམ། །

88-1-270b

དེ་ནས་མགོན་པོ་ཐུགས་རྗེ་ཅན། །སེམས་ཅན་ཀུན་ལ་ཕན་དགྱེས་པས། །དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ལ་གསུངས་པ། །འདི་ནི་ས་ཁམས་དང་མཉམ་པ། །སེམས་ཅན་ཀུན་
འཛིན་གཅིག་པུ་པ། །ཆུ་ཁམས་རྟོག་དང་བྲལ་བ་པོ། །སྣ་ཚོགས་གསལ་བར་འགྱུར་བ་ཡིན། །བདག་པོ་མེ་ཡི་གཟུགས་ཅན་ཏེ། །ཐམས་ཅད་ཟ་བར་ཉེ་བར་སྦྱོར། །དེ་བཞིན་ཕྱི་ནང་བདག་ཉིད་མཆོག །འགྲོ་ལ་
གོས་པའི་དྲི་གཅིག་པུ། །བཅོམ་ལྡན་སྣ་ཚོགས་ནམ་མཁའ་མཚུངས། །ཐམས་ཅད་སྣང་ཞིང་ཟབ་པ་པོ། །དེ་ཉིད་བདག་ཉིད་བདག་ཡིན་པར། །བསྒོམས་ན་རྐང་གཉིས་མཆོག་ཏུ་འགྱུར། །སྙིང་པོ་ཞེས་བྱ་སངས་རྒྱས་
ཀྱི། །ཆོས་ཉིད་དག་པ་འདི་ཡིན་ཞིང་། །སྔགས་ཀྱི་སྤྱོད་དོན་སྤྱོད་རྣམས་ཀྱི། །བྱང་ཆུབ་སྤྱོད་པའི་མཆོག་འདི་ཡིན། །དེ་ནས་བརྗོད་མི་ལང་ཞེས་པ། །བརྗོད་མི་ལང་བ་ཉིད་གྱུར་པ། །སངས་རྒྱས་ཞིང་རྡུལ་གྲངས་མཉམ་དེ། །
སྒྲིབ་པ་ཐམས་ཅད་སེལ་ལ་སོགས། །བྱང་ཆུབ་སེམས་དཔའ་སེམས་དཔའ་ཆེ། །ཀུན་ནས་འཇིགས་ཤིང་སྐྲག་གྱུར་ནས། །འཁོར་གྱི་དཀྱིལ་འཁོར་དེ་ཐམས་ཅད། །གཅིག་ཏུ་བརྒྱལ་བ་ཉིད་གྱུར་ཏོ། །དེ་ནས་གསང་དབང་
རྡོ་རྗེ་གསུང་། །གཉིས་མེད་དེ་བཞིན་གཤེགས་ཀུན་གྱིས། །བྱང་ཆུབ་སེམས་དཔའ་བརྒྱལ་བ་རུ། །གཟིགས་ནས་གཙོ་ལ་འདི་སྐད་གསོལ། །མགོན་པོ་སྒྲིབ་ཀུན་སེལ་ལ་སོགས། །བྱང་ཆུབ་སེམས་དཔའ་སེམས་དཔའ་ཆེ། །
རང་བཞིན་ཆོས་ཉིད་ཇི་ལྟ་བར། །འདི་རྣམས་བསླང་བར་མཛད་དུ་གསོལ། །མི་གཡོ་བ་ནི་གསང་བ་སྟེ། །ཞི་བ་གཅིག་པུ་བདེ་བའི་མཆོག །རྫོགས་པའི་བྱང་ཆུབ་ཐོབ་བྱེད་པ། །འདི་ནི་དགོངས་པས་གསུངས་པ་ཡིན། །
དངོས་པོ་མེད་ཅིང་འཁྲུག་པ་མེད། །ཡིད་འོང་རྡོ་རྗེ་ཚིག་གཅིག་པུ། །འགྲོ་བའི་བསམ་པའི་དབྱེ་བ་ཡིས། །བྱེ་བྲག་མང་པོར་གྱུར་པ་ཡིན། །ནམ་མཁའ་མཐའ་ཡས་སྦྱོར་བ་ཡིས། །གཟུགས་ལ་སོགས་པ་མཐའ་ཡས་ཏེ། །

88-1-271a

དེ་ཡང་དེ་བཞིན་གཤེགས་མཆོག་དང་། །བྱང་ཆུབ་སེམས་དཔའ་ཉིད་དུ་གྱུར། །དེ་ལས་སྤྲོ་ཞིང་བསྡུ་བ་དང་། །ཞི་བ་ཉིད་ལས་རབ་སྦྱོར་བས། །ཡེ་ཤེས་ལུས་ཅན་ཡེ་ཤེས་ཅན། །བརྒྱལ་ལོ་ཞེས་ནི་ཤེས་
པ་ནི། །ཡན་ལག་དབྱེ་བ་གང་དང་གང་། །འགྲོ་བ་ཞེས་ནི་གྲགས་བདག་པ། །དེ་དེ་རང་ལྷའི་སྦྱོར་བ་ལས། །དཀྱིལ་འཁོར་མཆོག་ནི་འབྱུང་བར་འགྱུར། །དཀྱིལ་འཁོར་རང་ལུས་གང་ཡིན་པ། །དེ་ཉིད་བསྡུས་པ་འདི་ལྟ་བུ། །
འདི་ནི་འཇིག་ཚོགས་ལུས་རྟོག་ལ། །བྱང་ཆུབ་སེམས་དཔའ་བརྒྱལ་བར་གྱུར། །དེས་ནི་བདེན་འདི་མ་ཤེས་པས། །དབྱངས་བཅས་རྒྱལ་ལ་བསྐུལ་བ་ནི། །བྱང་ཆུབ་སེམས་དཔའ་སེམས་དཔའ་ཆེ། །བརྒྱལ་བ་
ཞེས་ནི་བཤད་པ་ཡིན། །དེ་ནས་གསུང་བ་རྡོ་རྗེ་གསུམ། །དགོངས་པའི་ཚིག་གིས་བཤད་པ་དག །རྡོ་རྗེ་འཛིན་པའི་ཚིག་གསན་ནས། །ཏིང་ངེ་འཛིན་ནི་མངོན་དུ་མཛད། །གཉིས་སུ་མེད་པར་མཉམ་རྡོ་རྗེ། །འགྲོ་ལ་
གཟིགས་པ་ཞེས་བྱ་བའི། །འདི་ཉིད་གསུམ་ཡུལ་འཇིག་པ་པོ། །ཏིང་ངེ་འཛིན་ལ་སྙོམས་པར་ཞུགས། །མགོན་པོ་སྙོམས་པར་ཞུགས་པ་ཡིས། །འོད་གང་ཆེན་པོར་གྱུར་པ་ཡིན། །བྱང་ཆུབ་སེམས་དཔའ་ངེས་
རེག་པས། །རང་གི་སྟན་ལ་གནས་པར་གྱུར། །དེ་ནས་དེ་བཞིན་གཤེགས་པ་ཀུན། །ངོ་མཚར་རྨད་དུ་གྱུར་སྤྱན་དང་། །དགྱེས་ཤིང་མགུ་བ་སྐྱེས་གྱུར་ནས། །ཆོས་ཀྱི་དབྱངས་ནི་འདི་སྐད་གསུངས། །ཨེ་མའོ་ཆོས་
ཨེ་མའོ་ཆོས། །ཨེ་མའོ་ཆོས་ཀྱི་དོན་བྱུང་བ། །བདག་མེད་ཆོས་ནི་ཡང་དག་དག །ཆོས་ཀྱི་རྒྱལ་པོ་ཕྱག་འཚལ་ལོ། །རྡོ་རྗེ་གསུང་གཅིག་དག་པའི་དོན། །དྲི་མེད་མཁའ་དང་མཉམ་པའོ། །མི་འགྱུར་དོན་ལས་ཡང་
དག་བྱུང་། །རྡོ་རྗེ་སྐུ་ལ་ཕྱག་འཚལ་ལོ། །ཐུབ་མཆོག་གཅིག་པུ་དེ་བཞིན་གཤེགས། །དུས་གསུམ་དག་གི་ལམ་དུ་བྱུང་། །རྡོ་རྗེ་དབྱིངས་གཅིག་རྫོགས་ལོངས་སྤྱོད། །ནམ་མཁའི་ལམ་གཅིག་ཕྱག་འཚལ་ལོ། །སྐུ་

88-1-271b

གསུང་ཐུགས་ནི་ནམ་མཁའ་སྟེ། །སྤྱོད་པའི་མཆོག་སྟེ་ཆོས་གཅིག་ལྡན། །དེ་ཉིད་གསུམ་སྟོན་སྣ་ཚོགས་པ། །སྤྱོད་པའི་གནས་ལ་ཕྱག་འཚལ་ལོ། །དགོངས་པ་ལུང་བསྟན་ལ་གནས་ནས། །གང་ཞིག་སྤྱོད་མཆོག་འདི་
སྟོན་པ། །གསང་བ་ཡང་དག་སྲུང་བ་དག །དེ་ནི་ཅི་དགའ་བར་ཡང་བྱེད། །དེ་བཞིན་གཤེགས་པ་ཐམས་ཅད་ཀྱི། །དམ་ཚིག་གསུམ་གྱི་རྡོ་རྗེ་མཆོག །སྔགས་རྣམས་ཀུན་གྱི་དམ་པ་ཡི། །སྤྱོད་པའི་ལེའུ་ལྔ་པ་ཡིན།། །། 
དེ་ནས་དཔལ་ཆེན་མི་བསྐྱོད་པ། །སྐུ་གསུང་ཐུགས་ཀྱི་གསང་བ་ཅན། །ཏིང་ངེ་འཛིན་ལ་སྙོམས་ཞུགས་ནས། །ཐུགས་བྱིན་བརླབ་པ་ཞེས་བྱ་བའི། །གསང་སྔགས་འདི་ནི་གསུངས་པ་ཡིན། །ཨོཾ་ཞེས་བྱ་བ་
དང་པོར་ཡིན། །སརྦ་ཏ་ཐཱ་ག་ཏ་གཉིས། །ཙིཏྟ་གསུམ་པར་ཡོངས་སུ་བརྟག །བཛྲ་ལྔ་པ་ཡི་གོང་མར་ལྡན། །སྭ་བྷཱ་བཱཏྨ་ཀཿལྔ་པ། །ཨ་ཧྃ་དུས་ཀྱི་མིང་ཅན་ཡིན། །སྐུ་དྲུག་གསུམ་པའི་མིང་ཅན་ནོ། །དེ་ནས་དཔལ་
ལྡན་རྣམ་སྣང་མཛད། །རྡུལ་ཕྲན་རྡོ་རྗེ་ཞེས་བྱ་ཡི། །ཏིང་ངེ་འཛིན་ལ་སྙོམས་ཞུགས་ནས། །སྐུ་ནི་བྱིན་གྱིས་བརླབ་པ་གསུང་། །ཨོཾ་ཞེས་བྱ་བ་ཚངས་པར་བཤད། །སརྦ་ཏ་ཐཱ་ག་ཏ་གཉིས། །ཀཱ་ཡ་ཆགས་ཐོགས་དབང་
ཕྱུག་སྟེ། །བཛྲ་རིག་བྱེད་ཡིན་པར་བསྒྲགས། །སྭ་བྷཱ་བཱཏྨ་ཀཿའདོད་ལྷ། །ཨ་ཧྃ་སྐེམ་བྱེད་ཅེས་བརྗོད་དེ། །དགོངས་པ་ཡིས་ནི་ཡང་དག་བརྟགས། །ཤེས་རབ་དབྱེ་བས་དབྱེ་བར་བྱ། །དེ་ནས་ཚེ་དཔག་མེད་ཅེས་པའི། །
ཀུན་ཏུ་མི་གཉིས་རྡོ་རྗེ་ཅན། །ཏིང་ངེ་འཛིན་ལ་སྙོམས་ཞུགས་ནས། །གསུང་ནི་བྱིན་གྱིས་རློབ་པ་གསུངས། །ཨོཾ་ནི་དང་པོར་བསྒྲགས་པ་ཡིན། །སརྦ་ཏ་ཐཱ་ག་ཏ་གཉིས། །ཝཱཀ་ཅེས་བྱ་བ་གསུམ་པ་ཡིན། །བཛྲ་དུས་
ཀྱི་མིང་དུ་འགྱུར། །སྭ་བྷཱ་བཏྨ་ཀཿལྔ་པ། །ཨ་ཧྃ་ཞེས་པ་དྲུག་པ་སྟེ། །གསུམ་པོ་འདི་དག་བཤད་པ་རྣམས། །རེ་རེ་ཞིང་དྲུག་གསུམ་དུ་བཤད། །ཐུགས་དང་སྐུ་དང་དེ་བཞིན་གསུང་། །རིམ་ནི་རིམ་པ་མིན་པས་

88-1-272a

གསུངས། །བདག་པོ་ལས་ནི་གཅིག་པུ་ལས། །རྡོ་རྗེ་གསུམ་ཞེས་བྱ་བ་འབྱུང་། །ཡོན་ཏན་ཆོས་འདི་རྡོ་རྗེ་གསུང་། །དེ་ཉིད་གསུམ་གྱི་དམ་ཚིག་མཆོག །དེ་བས་འདི་ནི་བསྒོམ་པ་མཆོག །གཡེལ་བ་མེད་པར་རྫོགས་པར་བྱ། །འདི་
བཤད་པ་ཡི་བློ་ལྡན་པ། །རབ་མཆོག་རྡོ་རྗེ་གསུམ་བྱུང་བས། །བསྒོམ་པའི་བདག་ཉིད་ཅན་གྱུར་ཅིང་། །སྔགས་ཀྱི་མཚན་ཉིད་མཚན་མར་བྱ། །དེ་ནས་དཀོན་མཆོག་དཔལ་འདི་ཡང་། །སྒྲོན་མ་རྡོ་རྗེ་ཞེས་བྱ་བའི། །ཏིང་ངེ་འཛིན་ལ་སྙོམས་
ཞུགས་ཏེ། །དེ་ནས་གསང་སྔགས་འདི་གསུངས་སོ། །ཨོཾ་ནི་ཟུང་གི་དང་པོར་ལྡན། །སརྦ་ཏ་ཐཱ་ག་ཏ་ཟུང་། །དེ་བཞིན་ཉིད་ནི་ཡེ་ཤེས་ཚོགས། །ཐམས་ཅད་མེ་ལོང་མིང་ཅན་ནོ། །ཨ་ནུ་རཱ་ག་སྐྱེ་མེད་དེ། །དེ་ནི་གསུམ་པ་ཡིན་པར་གསུངས། །རྐྱེན་
དང་ཉན་ཐོས་ཀྱིས་བཤིག་དཀའི། །བཛྲ་ཡང་ནི་བཞི་པར་གྱུར། །དངོས་མེད་བདག་ཉིད་ཅན་ཡེ་ཤེས། །སྭ་བྷཱ་བཱཏྨ་ཀཿཞེས་བཤད། །ཡེ་ཤེས་ལྔ་པོ་ཉིད་ཀྱི་མིང་། །ཆོས་ཀྱི་དབྱིངས་ཀྱི་ངོ་བོ་ཉིད། །ཨ་ཧྃ་སོ་སོ་རྫོགས་ལོངས་སྤྱོད། །དངོས་
པོ་མེད་པའི་རང་བཞིན་ཅན། །བདེ་བ་ཆེན་པོའི་མིང་གྱུར་པ། །མཚོན་པ་དྲུག་པའི་མིང་ཅན་ནོ། །དངོས་མེད་གནས་པའི་བདག་ཉིད་ཅན། །དེ་ཡི་རྗེས་སུ་མཉེས་བྱའི་མཆོག །དེ་ལྟའི་ཆགས་པས་དེ་བཞིན་གཤེགས། །མགོན་པོ་ཐམས་ཅད་
མཉེས་པར་བྱ། །དེ་ནས་དཔལ་ཆེན་གདོན་མི་ཟ། །དོན་ཡོད་རྡོ་རྗེ་ཞེས་བྱ་བའི། །ཏིང་ངེ་འཛིན་ལ་སྙོམས་ཞུགས་ཏེ། །དེས་ནི་གསང་སྔགས་འདི་གསུངས་སོ། །ཨོཾ་ཞེས་བྱ་བ་དང་པོར་ལྡན། །སརྦ་ཏ་ཐཱ་ག་ཏ་གཉིས། །པཱུ་ཛ་རྣམ་པར་ཐར་
པའི་མིང་། །བཛྲ་སེམས་ནི་རྣམ་བསྒོམ་པ། །སྭ་བྷཱ་བཱཏྨ་ཀཿཞེས་བཤད། །ཨ་ཧྃ་ཕ་རོལ་ཕྱིན་ཞེས་བྱ། །ལྔ་པོ་དྲུག་དང་གསུམ་དུ་བཤད། །གཟུགས་དང་སྒྲ་དང་དྲི་དང་རོ། །རེག་བྱ་དང་ནི་ཆོས་ཀྱི་དབྱིངས། །དེ་དག་དངོས་མེད་གྱུར་བྱས་པ། །
དེ་ནི་སངས་རྒྱས་མཆོད་མཆོག་ཡིན། །མིག་སོགས་ཤེས་ལས་ཡང་དག་བྱུང་། །མངོན་ཤེས་ལྔ་ཡིས་ཉེ་བར་མཛེས། །མཆོད་པ་ལྔ་བཤད་འདི་རྣམས་ཀྱིས། །མྱུར་དུ་སངས་རྒྱས་ཉིད་ཐོབ་འགྱུར། །དེ་ནས་དཔལ་ལྡན་རྡོ་རྗེ་འཆང་། །

88-1-272b

སོ་སོར་བྱང་ཆུབ་སྟོན་མཛད་པ། །རྡོ་རྗེ་གསུམ་རིག་གསང་དབང་པོ། །ཐུབ་པ་ཆེན་པོས་ཡང་གསུངས་པ། །སྐུ་གསུང་ཐུགས་ལ་དམིགས་པ་ལ། །གང་ཚེ་ཡིད་ནི་མགུ་གྱུར་པ། །དེ་ཉིད་གསུམ་ལ་ཉེར་སྦྱོར་བ། །དངོས་གྲུབ་རབ་
མཆོག་དེས་ཐོབ་འགྱུར། །བདག་མེད་པར་ནི་སེམས་དམིགས་ཤིང་། །ལུས་དང་ངག་ཀྱང་རྣམ་པར་བསྒོམ། །མཁའ་དང་མཉམ་པའི་གནས་བསྒོམ་ཞིང་། །སྦྱོར་བ་རྣམ་གསུམ་རྫོགས་པར་བྱ། །རྡོ་རྗེ་དེ་ཉིད་གསུམ་དམིགས་ན། །
ཤིན་ཏུ་ཕྲ་བའང་ཡོད་མ་ཡིན། །སྔགས་ཀྱི་རང་བཞིན་སྦྱོར་བ་ཡིས། །བསྒོམ་པ་མེད་ཅིང་བྱང་ཆུབ་མེད། །རྡོ་རྗེ་གསུམ་གཅིག་མཚན་ཉིད་དུ། །མདོར་ན་རྣམ་པར་བརྟགས་ནས་སུ། །སྔགས་ལ་སྦྱོར་བའི་ཏིང་ངེ་འཛིན། །གནས་
ལ་གནས་མེད་བསྒོམ་པར་བྱ། །དེ་ནས་དེ་བཞིན་གཤེགས་དབང་པོའང་། །དེ་བཞིན་གཤེགས་པ་ཀུན་གྱིས་མཆོད། །ཀུན་མཁྱེན་སངས་རྒྱས་ཀུན་མཆོག་གིས། །བསྒོམ་པའི་མཆོག་འདི་བཀའ་སྩལ་ཏོ། །ནམ་མཁའི་དབྱིངས་
ཀྱི་དབུས་གནས་པར། །ཟླ་བའི་དཀྱིལ་འཁོར་བསྒོམ་པར་བྱ། །སངས་རྒྱས་གཟུགས་ནི་རྣམ་བསྒོམས་ནས། །ཕྲ་མོའི་རྣལ་འབྱོར་བརྩམ་པར་བྱ། །ཡུངས་ཀར་གྱི་ནི་འབྲུ་ཚད་ཙམ། །སྣ་ཡི་རྩེ་མོའི་བདག་ཉིད་ཅན། །རྒྱུ་དང་མི་རྒྱུར་ཡང་
དག་ལྡན། །དེ་རུ་གནས་པར་མཁས་པས་བསམ། །བློ་ལྡན་ཡེ་ཤེས་ཀྱིས་བརྟགས་པའི། །གསང་བའི་ཡེ་ཤེས་གནས་བསྒོམ་མོ། །གསང་བ་མཆོག་ཅེས་བཤད་པ་སྟེ། །དེ་ཉིད་གསུམ་ནི་དམ་ཚིག་མཆོག །ནམ་མཁའི་དབྱིངས་
ཀྱི་དབུས་གནས་པར། །ཉི་མ་ཞེས་བྱའི་དཀྱིལ་འཁོར་བསྒོམ། །སངས་རྒྱས་སྐུ་ནི་རྣམ་བསྒོམས་ཏེ། །དེ་ཡི་སྟེང་དུ་གནས་གཞག་གོ། །དབང་ཕྱུག་ཆེན་པོ་སྐེམ་བྱེད་དེ། །གཞི་ཕྱེད་ནམ་མཁས་མཚོན་པ་དག །བདུད་རྩི་ཞེས་ནི་
བཏགས་པ་གང་། །དེ་ནི་ཧཱུྃ་ཞེས་བྱ་བར་འགྱུར། །ནམ་མཁའི་དབྱིངས་ཀྱི་དབུས་གནས་པར། །འཁོར་ལོ་དཀྱིལ་འཁོར་ཡིད་འོང་བསྒོམ། །སྤྱན་གྱི་གཟུགས་སུ་ཡང་དག་སྦྱོར། །རྡོ་རྗེ་པད་མོ་གཉིས་བསྒོམ་པའོ། །ནམ་མཁའི་དབྱིངས་

88-1-273a

ཀྱི་དབུས་གནས་པར། །རིན་ཆེན་དཀྱིལ་འཁོར་བསྒོམ་པར་བྱ། །དང་པོའི་སྦྱོར་བ་ནན་ཏན་གྱིས། །དེ་ཡི་སྟེང་དུ་རྣམ་པར་བསྒོམ། །ནམ་མཁའི་དབྱིངས་ཀྱི་དབུས་གནས་པར། །འོད་ཀྱི་དཀྱིལ་འཁོར་འདི་ཉིད་བསྒོམ། །
སངས་རྒྱས་ཞི་བའི་གནས་འགོད་པ། །འཁོར་རྣམས་ཀྱིས་ནི་ཀུན་ནས་བསྐོར། །ཨུཏ་པལ་མཐོན་ཀའི་མདོག་འདྲ་བ། །རྩེ་མོ་ལྔ་པ་འོད་པོ་ཆེ། །ནས་ཀྱི་འབྲུ་ཙམ་ནན་ཏན་གྱིས། །རི་རབ་རྩེ་མོར་རྣམ་པར་བསམ། །ཙ་ན་ཀ་ཡི་
འབྲུ་ཚད་ཙམ། །འདབ་མ་བརྒྱད་པ་གེ་སར་བཅས། །སྣ་ཡི་རྩེ་མོ་རི་རབ་རྩེ། །བྱང་ཆུབ་འདོད་པས་འདི་བསྒོམ་བྱ། །འཁོར་ལོ་ལ་སོགས་བསྒོམ་པ་ནི། །དེ་ཡི་ཁྱད་པར་དག་ཏུ་བརྟགས། །ཡིད་འོང་དངོས་གྲུབ་ཀུན་གྱི་གནས། །
བྱང་ཆུབ་གནས་མཆོག་བླ་མེད་པའོ། །སངས་རྒྱས་ཡང་དག་བྱང་ཆུབ་བཞུགས། །མདོར་ན་དེ་ནི་སྤྲོ་བར་བྱ། །གང་ཚེ་ཆོས་ནི་ལེགས་མཚན་པ། །རྡོ་རྗེ་གཅིག་ནི་བསྒོམ་པར་བྱ། །དེ་ནས་དེ་བཞིན་གཤེགས་དབང་པོ། །དག་པ་ཆོས་
རྣམས་ཀུན་གྱི་མཆོག །འགྲོ་ཀུན་དོན་དུ་སྟོན་པ་པོ། །གསུང་བས་མཆོག་ནི་བཀའ་སྩལ་ཏོ། །སྐད་ཅིག་ཐང་ཅིག་ཡུད་ཙམ་དང་། །ཟླ་ཕྱེད་ཟླ་བ་ལོ་ཡི་དུས། །བསྐལ་པ་གྲངས་མེད་གསུམ་པོ་ནི། །སྐད་ཅིག་གཅིག་ཏུ་
མཉམ་པར་བཤད། །ཟླ་བ་དྲུག་བཤད་དེ་ཉིད་ཡིན། །དངོས་མེད་རྫོགས་པར་ལོངས་སྤྱོད་པའོ། །སྐད་ཅིག་གཅིག་ཏུ་བསྔགས་པ་སྟེ། །དུས་གསུམ་ལས་འདས་ཡིན་པར་དགོངས། །གཟུགས་དང་སྒྲ་དང་རོར་ལྡན་པ། །རྣལ་
འབྱོར་པས་ནི་ཟླ་དྲུག་བསྒོམ། །མཆོད་ཆེན་དེ་ནི་བྱས་ནས་སུ། །གསང་བའི་དེ་ཉིད་རྣམ་པར་བསྒོམ། །ཡུལ་དང་དབང་པོ་སེམས་དཔའ་ནི། །བཤང་གཅི་ཟས་སུ་བྱེད་པ་པོ། །བྱས་ན་དེ་འདྲའི་དངོས་གྲུབ་ནི། །བཟའ་བ་རྣམ་
རྟོག་མེད་པའོ། །དེ་ཉིད་འདི་ནི་བླ་མེད་པ། །བྱང་ཆུབ་སེམས་གཅིག་ལས་བྱུང་བའོ། །རྟོག་མེད་འདུས་ནི་མ་བྱས་ཤིང་། །མི་རྟོག་དོན་ནི་འགྲུབ་པར་འགྱུར། །མ་ནི་མཱ་མ་ཀཱིར་བཤད་དེ། །ས་ནི་མངོན་པར་བྱང་ཆུབ་པའོ། །

88-1-273b

བསམ་གཏན་དེ་ནི་དགའ་སྤྱོད་པ། །ཤ་ཞེས་བྱ་བར་དེ་བཤད་དོ། །ནམ་མཁའ་མཐའ་ཡས་རྣལ་འབྱོར་ནི། །ཤ་ཆེན་དེ་ནི་ཡིན་པར་བཤད། །གསང་བ་པ་ཡི་གོ་འཕང་མཆོག །རྡོ་རྗེ་གསུམ་ནི་མྱུར་དུ་འགྲུབ། །དམ་ཚིག་ཆེན་
པོ་གླང་ཆེན་རྟ། །དེ་བཞིན་ཁྱི་ལ་སོགས་པའི་ཤ ། ཕུང་པོ་ལ་སོགས་རིགས་དབྱེ་བས། །གང་གསུངས་མཉམ་པའི་གྲངས་ཀྱིས་སོ། །གང་ཞིག་རྣལ་འབྱོར་གཉིས་མེད་ཟས། །བསམ་གཏན་དགའ་བའི་མིད་གཅིག་པུ། །
འཇིག་རྟེན་རྒྱང་པན་འཇིག་རྟེན་པ། །བཟའ་བའི་རང་གི་ངོ་བོར་གྱུར། །དགེ་བའི་བཤེས་གཉེན་རྟག་པ་དང་། །དེ་བཞིན་དྲོད་གཤེར་ལས་སྐྱེས་པ། །འཇིག་རྟེན་འདས་དང་འཇིག་རྟེན་པའི། །འདི་དག་ཟས་སུ་ཀུན་དུ་བཤད། །
དེ་ནས་རྡོ་རྗེ་གསུམ་དགོངས་པ། །བཅོམ་ལྡན་འདས་ལས་ཐོས་པ་དང་། །དེ་བཞིན་གཤེགས་པ་ཀུན་བདག་པོ། །ལག་ན་རྡོ་རྗེས་ཚིག་གསོལ་པ། །ཉན་ཐོས་རྣམས་ཀྱི་དམ་ཚིག་ཀྱང་། །ཕྲ་མོའི་རྣལ་འབྱོར་སྟོན་མཛད་
ཅིང་། །མགོན་ཁྱོད་འཇིག་རྟེན་པ་དང་ནི། །འཇིག་རྟེན་འདས་པ་དག་ཀྱང་གསུངས། །ཆུ་དང་འོ་མ་གཅིག་འགྱུར་བཞིན། །ཁྱོད་ནི་ཆོས་རྣམས་སྟོན་པར་མཛད། །འཇིག་རྟེན་འགའ་ལས་ཡང་དག་པ། །ངང་པས་འོ་མ་ཇི་བཞིན་
ལེན། །ཇི་ལྟར་སྐོམ་པས་གདུངས་པ་ཡི། །སྐྱེས་བུ་ལ་ལ་དེ་བསྲེས་འཐུང་། །དེ་བཞིན་འཇིག་རྟེན་ཤིན་ཏུ་འདས། །ཆོས་ཀྱི་བདུད་རྩི་དེ་རྣམས་འཐུང་། །དགོངས་པས་སྔགས་ཀྱི་དེ་ཉིད་དུ། །གང་ཞིག་གསུམ་དུ་གསུངས་པ་
འདི། །ཇི་ལྟ་ཇི་ལྟར་འཇིག་རྟེན་སོགས། །མགོན་པོ་གསལ་བར་བཤད་དུ་གསོལ། །དེ་ནས་དེ་བཞིན་གཤེགས་མཆོག་གིས། །གྲགས་ལྡན་ལག་ན་རྡོ་རྗེ་ལ། །བུ་ཁྱོད་ལེགས་སོ་ཆེར་ལེགས་ཏེ། །བྱེ་བྲག་གསུམ་ཁྱོད་
ལ་བཤད་བྱ། །རྐྱེན་དང་ཉན་ཐོས་ཞེས་གྲགས་དང་། །དེ་བཞིན་མདོ་སྡེ་ལ་སྤྱོད་རྣམས། །འདི་དག་འཇིག་རྟེན་པ་རྣམས་ཏེ། །བྱ་བ་སྦྱོར་བའི་བྱ་བར་གནས། །རྣལ་འབྱོར་གྲུབ་ནས་འཇིག་རྟེན་གནས། །འཇིག་རྟེན་འདས་པར་

88-1-274a

གྱུར་པ་ཡིན། །དེ་ནི་ཏིང་འཛིན་རྣལ་འབྱོར་ཡང་། །དེ་དང་འདྲ་བར་བྱེད་མ་ཡིན། །གང་ཡང་འཇིག་རྟེན་ཤིན་དུ་འདས། །རྣམ་པར་མི་རྟོག་འཇིགས་མེད་པ། །དེ་ནི་དེ་བཞིན་ཉིད་དངོས་གཅིག །འཁོར་བ་དང་ནི་
གཅིག་ཤོས་སྤངས། །བརྟུལ་ཞུགས་བཟང་པོའི་རྣལ་འབྱོར་འདིས། །སངས་རྒྱས་རྣམས་ནི་མཉེས་འགྱུར་ཞིང་། །བློ་ལྡན་བྱང་ཆུབ་སེམས་རྣམས་ཀྱིས། །བྱང་ཆུབ་མྱུར་དུ་འཐོབ་པར་འགྱུར། །འདོད་ཁམས་ཀྱི་
ནི་དབང་ཕྱུག་དང་། །རྣལ་འབྱོར་གོ་འཕང་འཐོབ་པར་འགྱུར། །གཟི་ལྡན་སྟོབས་ཀྱིས་ཕྱུག་པ་དང་། །མདངས་བཟང་མཐོང་ན་དགའ་བ་དང་། །མཐོང་ངམ་ཚིག་གིས་བསྐུལ་བ་ཡིས། །འཇིག་རྟེན་འདི་དག་དབང་དུ་བྱེད། །གསང་
བ་འདི་ནི་མཆོག་ཡིན་ཏེ། །སངས་རྒྱས་བྱང་ཆུབ་དམ་པ་ཡིན། །དེ་ཉིད་སྔགས་ཀྱི་གསང་བ་འདི། །རྡོ་རྗེ་གསུམ་ལས་འདས་པའི་མཆོག །དགོངས་པ་ལུང་བསྟན་ཡིད་འོང་ལ། །སྐྱེས་བུ་གང་ཞིག་གནས་གྱུར་པ། །གསང་
བ་ཡང་དག་སྲུང་བ་པོ། །དེ་རྣམས་ཅི་དགར་བྱེད་པར་འགྱུར། །དེ་བཞིན་གཤེགས་ཀུན་དམ་པ་སྟེ། །དམ་ཚིག་ལས་ནི་དམ་ཚིག་མཆོག །རྡོ་རྗེ་གསུམ་གྱིས་བྱིན་བརླབ་པའི། །ལེའུ་དྲུག་པ་ཡིན་པར་བཤད།། །། 
དེ་ནས་རྡོ་རྗེ་གསུམ་གསང་དབང་། །དམ་ཚིག་ཆེན་པོ་དེ་ཉིད་གཅིག །ཏིང་འཛིན་གསང་སྔགས་སྤྱོད་པའི་མཆོག །མངོན་རྫོགས་བྱང་ཆུབ་འདི་གསུངས་སོ། །དེ་ཉིད་དམ་ཚིག་བཞི་པོ་གང་། །འདོད་པ་ཐམས་ཅད་ཅེས་དེ་བཤད། །
དེ་རྣམས་ལོངས་སྤྱོད་ལྡན་པ་ཡིས། །ཅི་འདོད་པར་ནི་བསྟེན་པར་བྱ། །རང་གི་ལྷར་ནི་བདག་སྦྱོར་བས། །བདག་དང་གཞན་ནི་མཆོད་པར་བྱ། །དེ་ནི་འཇིག་རྟེན་མཆོད་འགྱུར་བ། །འཇིག་རྟེན་འདས་པ་ཞི་བ་ཉིད། །དཀའ་ཐུབ་མྱུར་བ་
དེ་ཡིན་ལ། །སྡོམ་པ་དམ་པ་ཡིན་པར་འདོད། །མི་ཟད་པ་ནི་གཉིས་ག་སྟེ། །འདོད་པའི་ལོངས་སྤྱོད་ཐམས་ཅད་ཀྱང་། །གཟུགས་སོགས་ལྷ་རྣམས་ཡིན་པར་འདོད། །དེ་དག་བསྒོམས་པའི་སྦྱོར་བ་ཡིས། །སྒྲུབ་པ་པོ་རྣམས་མྱུར་དུ་

88-1-274b

འགྲུབ། །ཐ་དད་ཡི་གེ་སློང་མོ་ཡིན། །དེ་འདོན་པ་ནི་ཟ་བ་སྟེ། །གང་ཞིག་ཟློས་ལ་དགའ་བ་དེ། །དེ་དག་སློང་མོ་ཟ་བར་འདོད། །དཀའ་ཐུབ་དག་ནི་མི་བྱ་ཞིང་། །སྡོམ་པ་མི་བཟད་ཉིད་ཀྱང་མིན། །འདོད་གསུམ་དེ་ཉིད་ལོངས་སྤྱོད་
ཅིང་། །སྔགས་ཀྱི་དེ་ཉིད་མ་ཉམས་བཟླས། །རྡོ་རྗེ་གསུམ་དབྱེ་བདེ་གནས་ན། །སྔགས་རིག་བྱང་ཆུབ་འཐོབ་པར་འགྱུར། །གཞན་དུ་དུས་མིན་འཆི་བ་དང་། །ཤི་ནས་དམྱལ་བར་འགྲོ་བར་འགྱུར། །སངས་རྒྱས་བྱང་ཆུབ་སེམས་
དཔའ་དང་། །གསང་སྔགས་སྤྱོད་པའི་མཆོག་རྣམས་གང་། །མི་འགྱུར་ཆོས་ནི་བརྙེས་པ་ཡང་། །རྫོགས་པའི་སངས་རྒྱས་རྐང་གཉིས་མཆོག །ཀུན་མཁྱེན་ཡེ་ཤེས་ཆགས་ལྡན་པས། །འདོད་པའི་ཡོན་ཏན་ལྔ་རྣམས་བསྟེན། །བྱང་
ཆུབ་སེམས་དཔའ་མཉེས་བྱ་ཞིང་། །བྱང་ཆུབ་ཕ་རོལ་ཕྱིན་ཆགས་བྱ། །དེ་ལྟར་གཟུགས་ལ་གསུམ་ཤེས་ནས། །མཁས་པ་ཡིས་ནི་མཆོད་པར་བྱ། །དེ་ཉིད་གཙོ་བོ་བཅོམ་ལྡན་འདས། །སྣ་ཚོགས་རྣམ་པར་སྣང་མཛད་ཆེ། །སྒྲ་
ལ་རྣམ་གསུམ་ཤེས་བྱས་ནས། །ལྷ་རྣམས་ལ་ནི་དབུལ་བར་བྱ། །འདི་ནི་བཅོམ་ལྡན་སྣ་ཚོགས་པ། །སངས་རྒྱས་རིན་ཆེན་འབྱུང་གནས་གཙོ། །དྲི་ལ་རྣམ་གསུམ་ཤེས་བྱས་ནས། །ལྷ་རྣམས་ལ་ནི་དབུལ་བར་བྱ། །དེ་ཉིད་
བཅོམ་ལྡན་སྣ་ཚོགས་པ། །འདོད་ཆགས་ཆོས་ནི་འཛིན་པའི་གཙོ། །རོ་ལ་རྣམ་གསུམ་ཤེས་བྱས་ནས། །ལྷ་རྣམས་ལ་ནི་དབུལ་བར་བྱ། །དེ་ཉིད་དོན་ཡོད་རྡོ་རྗེ་གྲགས། །སྣ་ཚོགས་གཙོ་བོ་བཅོམ་ལྡན་འདས། །རེག་ལ་རྣམ་
གསུམ་ཤེས་བྱས་ནས། །རང་གི་རིགས་ལ་དབུལ་བར་བྱ། །དེ་ཉིད་བཅོམ་ལྡན་རྡོ་རྗེ་ཅན། །མི་བསྐྱོད་མེ་ལོང་གཟུགས་ཅན་ནོ། །ནང་དང་དེ་བཞིན་ཕྱི་རོལ་དང་། །གཉི་ག་རྗེས་སུ་མི་དམིགས་པ། །གཟུགས་ལ་སོགས་གསུམ་
དེ་ཡིན་ཏེ། །ལྷ་རྣམས་ལ་ནི་དབུལ་བར་བྱ། །གཟུགས་སྒྲ་རོ་ལ་སོགས་པ་ལ། །སེམས་ནི་རྟག་ཏུ་སྦྱར་བར་བྱ། །གསང་བ་བསྡུས་པར་གྱུར་པ་འདི། །སྙིང་པོ་སངས་རྒྱས་ཀུན་བསྐྱེད་དེ། །མཁས་པས་གཟུགས་

88-1-275a

སྒྲ་ལ་སོགས་པ། །ལྷ་ཉིད་དུ་ནི་རྟག་ཏུ་བསྒོམ། །དེ་བཞིན་རིགས་སུ་བསྒོམ་པ་ནི། །བསྒོམ་པས་དེར་ནི་བསྒོམ་པར་བྱ། །ནམ་མཁའི་རྡོ་རྗེ་སྦྱོར་བ་ནི། །སངས་རྒྱས་རྗེས་སུ་དྲན་པར་བཤད། །སངས་རྒྱས་རྗེས་དྲན་
སྦྱོར་བས་ཀྱང་། །ཆོས་ནི་རྗེས་སུ་དྲན་པ་བསྒོམ། །རྡོ་རྗེ་གསུམ་བསྒོམ་རྣལ་འབྱོར་པས། །རྡོ་རྗེ་རྗེས་དྲན་བསྒོམ་པའོ། །རིགས་དབྱེ་ཇི་སྐད་བཤད་པས་ཀྱང་། །ཆོས་དང་ལོངས་སྤྱོད་སྤྲུལ་སྐུར་བྱུང་། །རིགས་ནི་རྗེས་དྲན་སྦྱོར་
གྱུར་པ། །དེ་བཞིན་ཁྲོ་བོ་རྗེས་དྲན་པའོ། །དེ་ཉིད་གསུམ་ཡོངས་གྱུར་པ་གཅིག །རྡོ་རྗེ་གསུམ་ཉིད་མེད་ཆོས་ཉིད། །ལྷ་རྣམས་རྗེས་དྲན་སྦྱོར་བ་སྟེ། །དེ་བསྒོམ་བྱང་ཆུབ་འཐོབ་པར་འགྱུར། །བཞི་པོ་དག་ནི་རེ་རེ་བཞི། །ཇི་ལྟ་ཇི་
ལྟར་མགུ་བཅས་སོགས། །དེ་ཉིད་ལོ་ཡི་གྲངས་ཡིན་ཏེ། །བཅུ་དྲུག་པར་ནི་ཡོངས་སུ་བརྟག །སངས་རྒྱས་ཀུན་གྱིས་བསྟེན་པ་ཡི། །བུད་མེད་ལོ་གྲངས་བཅུ་དྲུག་པ། །གཟུགས་བཟང་ཕྲ་དང་མཆོད་པ་ནི། །དབེན་པ་
ཞེས་བྱ་བརྩམ་པར་བྱ། །བྱིན་གྱིས་བརླབས་ནས་ཡིད་འོང་བ། །ཁྱད་པར་གསུམ་ཞེས་བྱ་བ་ཡིས། །དེ་བཞིན་གཤེགས་པ་བཙུན་མོ་ཆེ། །སྤྱན་སོགས་ཉིད་ནི་བསྒོམ་པར་བྱ། །བསྒྲུབ་བྱ་དེ་ཉིད་ཡང་དག་སྦྱོར། །དབང་
པོ་གཉིས་ནི་མཉམ་སྦྱོར་བའི། །དང་པོར་སྦྱོར་བ་འདི་བསྒོམས་ན། །སངས་རྒྱས་དངོས་གྲུབ་ཐོབ་པར་འགྱུར། །ཡི་གེ་ཧཱུྃ་དང་དེ་བཞིན་ཨོ། །ཕཊ་ཀྱང་དེར་ནི་བསྒོམ་པར་བྱ། །དེ་ཉིད་གསུམ་ཚུལ་གསུམ་བདག་ཉིད། །ཅི་རིགས་
པར་ནི་རྣམ་པར་སྤྲོ། །འོད་ཟེར་རྣམ་པ་ལྔས་ཁྱབ་པའི། །རྡོ་རྗེ་པད་མ་འདི་མཆོག་སྟེ། །གསང་དང་སྙིང་ག་སྣ་རྩེ་རུ། །རྣལ་འབྱོར་པས་ནི་འདི་བསྒོམ་བྱ། །འབར་བཅས་ཟླ་འོད་བཞིན་དཀར་བར། །ཤེས་རབ་དེ་ནི་རྟག་ཏུ་བསྒོམ། །
གང་ཕྱིར་ཡིད་ནི་དགར་གྱུར་པས། །དེ་བས་དེ་ནང་ཡིད་འོང་བའོ། །གནས་མེད་གནས་པར་ལེགས་སྦྱོར་བས། །བཞི་མཚུངས་གཅིག་ཏུ་སྦྱོར་བ་རིག །སངས་རྒྱས་རྗེས་དྲན་སྦྱོར་ལ་སོགས། །བྱང་ཆུབ་འདོད་པས་བསྒོམ་པར་

88-1-275b

བྱ། །ཉམས་དགའ་སངས་རྒྱས་ཀུན་གྱིས་བསྟན། །བྷ་ག་ཞི་བ་གཅིག་པུའི་མིང་། །རང་གི་དེ་ཉིད་གཉིས་མེད་བྱུང་། །རྡོ་རྗེ་དེ་བདག་ཉིད་དུ་སྦྱོར། །སངས་རྒྱས་རྗེས་དྲན་སྦྱོར་བ་སྟེ། །བྷ་ག་ལིང་ག་ཡིན་པར་བསྒྲགས། །གཞུག་
པ་གཉིས་མེད་སྦྱོར་བ་སྟེ། །སངས་རྒྱས་གཟུགས་སུ་བསྒོམ་པའོ། །དེ་ལས་བློ་ལྡན་གྱིས་སྤྲོ་བ། །བ་སྤུའི་བུ་གའི་རྩེ་མོར་གནས། །མཉམ་པ་མེད་པས་ཁྱད་པར་དུ། །སངས་རྒྱས་སྤྲིན་རྣམས་དེར་སྤྲོའོ། །ཆོས་རྗེས་དྲན་པའི་
སྦྱོར་བ་ཡང་། །རྡོ་རྗེ་ཆོས་ཀྱི་རབ་སྦྱོར་བས། །རྡོ་རྗེ་པད་མ་ཡང་དག་སྦྱར། །བྷ་གའི་ལིང་གར་བརྟག་པའོ། །དེ་ནས་བ་སྤུའི་བུ་ག་ལས། །འབད་པས་ཆོས་ཀྱི་སྤྲིན་རྣམས་སྤྲོ། །དེ་ཉིད་བསམ་ཀུན་རྫོགས་བྱེད་པའི། །འདི་ནི་ཆོས་ཀྱི་
བདག་པོ་ཡིན། །རྡོ་རྗེ་རྗེས་སུ་དྲན་པ་བསྒོམ། །དངོས་མེད་གཅིག་པུ་ལ་སྦྱོར་བ། །སྟོང་ལ་རྡོ་རྗེ་རབ་སྦྱོར་འགྱུར། །བྷ་ག་ལིང་ག་ཞེས་བཤད་དོ། །དེ་ནས་བ་སྤུའི་བུ་ག་ནས། །རྡོ་རྗེ་སྤྲིན་རྣམས་ཀུན་དུ་སྤྲོ། །རྡོ་རྗེ་བྱང་ཆུབ་སེམས་
བསྒོམ་ཉིད། །མྱུར་དུ་དངོས་གྲུབ་འཐོབ་པར་འགྱུར། །རིགས་རྗེས་དྲན་པའི་སྦྱོར་བ་ཡིས། །མཁས་པས་སྟོང་ཉིད་རྡོ་རྗེ་ལས། །དེ་བཞིན་རྣལ་འབྱོར་པས་སྤྲོས་ན། །རིགས་ཀྱི་དངོས་གྲུབ་ཐོབ་པར་འགྱུར། །ཁྲོ་བོ་རྗེས་དྲན་
སྦྱོར་བ་ལའང་། །སྟོང་དང་རྡོ་རྗེ་གཉིས་ལྡན་པའི། །ཁྲོ་བོའི་བ་སྤུའི་བུ་ག་ནས། །ཁྲོ་བོའི་སྤྲིན་རྣམས་སྤྲོ་བར་བྱ། །དེ་ནས་དཔལ་ལྡན་རྡོ་རྗེ་འཛིན། །ཁྱབ་བདག་རྣམ་སྣང་མཛད་ཆེན་ལ། །རྗེས་དྲན་སྦྱོར་བའི་དགོངས་པ་ནི། །ཐུབ་
པ་ཆེ་ལ་སླར་ཞུས་པ། །ཐུབ་ཁྱོད་ཀྱིས་ནི་གང་གསུངས་པ། །བྷ་གའི་ལིང་གའི་སྦྱོར་བ་ནི། །འཇིག་རྟེན་འདས་པའི་སྦྱོར་འདི་ལས། །སངས་རྒྱས་ལ་སོགས་སྤྲོ་གྱུར་པ། །ཚུལ་འདི་མ་འོངས་སྐྱེ་བོ་ལ། །ཕྱི་དུས་ཀུན་རྨོངས་
བསྐྱེད་པ་སྟེ། །བདེ་གཤེགས་རྣམས་ཀྱི་བདག་པོས་ནི། །ཅི་ཕྱིར་གསུངས་ཞེས་དེ་རྣམས་སྨྲ། །འགྲོ་བས་ནམ་མཁའ་མཚན་མ་ཅན། །རྟེན་འབྱུང་ཁྱོད་ཉིད་མི་ཤེས་ཤིང་། །དེ་རྣམས་ཤིན་དུ་རྨོངས་དབྱེ་བས། །ཇི་བཞིན་པར་ནི་

88-1-276a

རྟོག་པར་བྱེད། །མགོན་ཁྱོད་བདེ་བ་ཆེན་པོ་སྟེ། །སངས་རྒྱས་ཀུན་གྱི་སྟོན་གཅིག་པུ། །སྐུ་མེད་སྲིད་གསུམ་བདག་ཉིད་ཅན། །དགོངས་པ་གཉིས་ཀའི་མཚན་དང་ལྡན། །དེ་བས་ཁྱོད་ནི་ཆོས་ཀུན་གྱི། །ཡོན་ཏན་
གསུམ་བདག་དེ་ཉིད་གསུམ། །དགོངས་པ་བྱ་བ་དྲི་མེད་གསུམ། །སངས་རྒྱས་ཀྱི་ནི་བདུད་རྩི་འབྱུང་། །ཁྱོད་འདིར་བྷ་ག་ཁྱབ་འཇུག་སྟེ། །ལིང་ག་དྲག་པོའི་མིང་ཅན་ཉིད། །ཁྱོད་ནི་ས་བོན་ཚངས་ལ་བརྟག །ཁྱོད་ནི་རྟེན་འབྱུང་
འགྲོ་བ་འབྱུང་། །དུས་གསུམ་ལས་འདས་རྣལ་འབྱོར་ཆེ། །དུས་དང་རྩིས་སུ་གྱུར་པ་ཉིད། །ཤེས་དང་ཤེས་བྱ་རྣམ་པར་གྲོལ། །དེ་བས་ཁྱོད་ནི་འགྲོ་བའི་བླ། །དེ་ནས་རྡོ་རྗེ་འཛིན་པ་ཡིས། །དེ་ལ་སོགས་པའི་ཚིག་གསན་ནས། །
དམ་ཚིག་རྗེས་སུ་དྲན་བསྒོམ་པ། །བཅོམ་ལྡན་འདས་ནི་སྟོན་པར་མཛད། །རང་གི་རྡོ་རྗེ་པད་མར་ལྡན། །དབང་པོ་གཉིས་ནི་རབ་སྦྱོར་ལས། །རང་གི་ཁུ་བའི་ཐིགས་སྐྱེས་པའི། །སངས་རྒྱས་རྡོ་རྗེ་སེམས་དཔའ་བསྒོམ། །དཀྱིལ་
འཁོར་རྗེས་སུ་དྲན་བདག་ཉིད། །དབང་པོ་གཉིས་ཉིད་སྦྱོར་བ་ལས། །རང་གི་ཚངས་པ་རྟག་དྲངས་ཏེ། །རྣལ་འབྱོར་པས་ནི་དཀྱིལ་འཁོར་བྱ། །སྐུ་རྗེས་དྲན་པའི་སྦྱོར་བ་ཡང་། །སངས་རྒྱས་རྣམས་ཀྱི་ཕུང་པོ་ལྔ། །སངས་རྒྱས་དེ་ཉིད་
སོགས་བརྟག་པ། །བདག་ཀྱང་དེ་དང་འདྲ་བར་རིག །གསུང་རྗེས་དྲན་པའི་སྦྱོར་བ་ལྔ། །རྡོ་རྗེ་ཆོས་གསུང་ཕུན་སུམ་ཚོགས། །དེ་ཡི་གསུང་ཅི་འདྲ་བར་འགྱུར། །བདག་ཀྱང་དེ་དང་འདྲར་ཆོས་འཛིན། །ཐུགས་རྗེས་དྲན་པའི་སྦྱོར་བ་གང་། །
རྡོ་རྗེ་འཛིན་པའི་ཐུགས་དང་ནི། །ཀུན་དུ་བཟང་པོའི་ཐུགས་གང་ཡིན། །བདག་ཀྱང་དེ་དང་འདྲ་བར་འགྱུར། །སེམས་ཅན་རྗེས་དྲན་སྦྱོར་བ་གང་། །སེམས་ཅན་རྗེས་དྲན་རྡོ་རྗེ་ཉིད། །སྤྱོད་པ་མཁའ་མཚུངས་ཇི་བཞིན་དུ། །བདག་ཀྱང་
དེ་དང་འདྲ་བར་འགྱུར། །སྔགས་སྐུ་རྡོ་རྗེ་གསུམ་ཞེས་པ། །དེ་སྦྱོར་དྲན་པ་བསྒོམ་པ་ནི། །རྡོ་རྗེ་སྔགས་ཀྱི་སྐུ་གང་ཡིན། །གསུང་དང་སྐུ་ནི་རྣམ་སྒོམ་པ། །དེ་ཉིད་གསུམ་མཉམ་གཅིག་པ་ཉིད། །རྟག་ཏུ་གསུམ་འདས་གྱུར་པ་ཡི། །

88-1-276b

སྔགས་འཛིན་མཆོག་ནི་ཅི་འདྲ་བ། །བདག་ཀྱང་དེ་དང་འདྲ་བར་འགྱུར། །དམ་ཚིག་རྗེས་དྲན་རྣམས་ཀྱིས་ནི། །དེ་བས་ཚངས་པ་ཤིན་ཏུ་དབྱུང་། །དངོས་མེད་གཅིག་ཏུ་སྦྱོར་བ་ཡིས། །མཁས་པས་ཆོ་ག་བཞིན་དུ་བཏུད། །དེ་བཞིན་
གཤེགས་མཆོག་ཆེ་བ་ནི། །དངོས་མེད་ཅེས་བྱ་བསད་པ་སྟེ། །བློ་དང་ལྡན་པས་འདི་བསད་ན། །དངོས་གྲུབ་སྔགས་མཆོག་འཐོབ་པར་འགྱུར། །ཤེས་རབ་དམ་ཚིག་སྦྱོར་གྱུར་པ། །རྗེས་སུ་དྲན་པ་ཞེས་བཤད་དོ། །ཕ་རོལ་ཕྱིན་པ་
ཞེས་གྲགས་པ། །ཡོད་མེད་གཉིས་དང་བྲལ་བའོ། །ཐམས་ཅད་རང་བཞིན་དྲི་མ་མེད། །མ་སྐྱེས་པ་དང་ཟད་པ་མེད། །བྱང་ཆུབ་མེད་ཅིང་མངོན་རྟོགས་མེད། །ཁམས་མེད་འབྱུང་བའང་མེད་པའོ། །མ་སྐྱེས་རྗེས་སུ་སྦྱོར་བ་གང་། །
དེར་ནི་ཅི་ཡང་བརྗོད་མིན་ཞིང་། །མ་སྐྱེས་མིང་ནི་གཅིག་པུ་བ། །དྲན་པ་དེ་ནི་ཡིན་པར་བཤད། །ཇི་ལྟར་ནམ་མཁའ་འོད་གསལ་བ། །མཚན་མ་མེད་ཅིང་འགྱུར་བ་མེད། །རང་བཞིན་མཁའ་དང་འདྲར་གྱུར་ཅིང་། །གཉིས་མེད་གཉིས་
སུ་ཡོད་མིན་ཞིང་། །ཡན་ལག་བཅུ་གཉིས་སྦྱོར་གཅིག་གང་། །ཞེ་སྡང་རྫོགས་ལོངས་སྤྱོད་པའི་མིང་། །སངས་རྒྱས་ཀུན་གྱིས་བསྟེན་གྱུར་ཅིང་། །དེ་ནི་རིགས་རྗེས་དྲན་ཞེས་བྱ། །རྟེན་འབྱུང་ལས་སྐྱེས་རྫོགས་སངས་ཏེ། །བུད་
མེད་ལོ་གྲངས་བཅུ་གཉིས་པ། །བརྟན་པའི་སེམས་ནི་ཐོབ་པ་ལས། །རང་གི་ཁུ་བས་མཆོད་པར་བྱ། །དངོས་མེད་བདག་ཉིད་དག་པ་གང་། །དེ་ནི་དག་པར་བཤད་པ་ཡིན། །དེ་ཉིད་ཀྱིས་ནི་མཆོད་པར་བསྔགས། །ཤེས་རབ་
ཕ་རོལ་ཕྱིན་པས་འགྲོ། །འདི་ཡིས་ལུས་ལ་མཆོད་པ་དང་། །ཁྱད་པར་དུ་ནི་དེ་བཞིན་གཤེགས། །རྡོ་རྗེ་འཛིན་བཤད་དེ་བཞིན་ཐུགས། །ཆོས་འཛིན་པ་ཡི་སྐུ་གསུང་ཐུགས། །སྐུ་གསུང་ཐུགས་ནི་ཡང་དག་གྲུབ། །ཚེ་འདི་ཉིད་
ལ་ཐོབ་པར་འགྱུར། །གང་བཤད་རིགས་ནི་དམན་བཤད་པ། །དེ་ལའང་ཚུལ་དེ་གྲུབ་པར་འགྱུར། །དེ་ཉིད་མཆོད་པར་བཤད་པ་ཉིད། །དེ་བཞིན་སོ་སོར་རབ་ཏུ་བརྟག །མི་ཕྱེད་རྡོ་རྗེའི་སྦྱོར་བ་ཡང་། །གསུང་གི་དབང་

88-1-277a

བསྐུར་བ་ཉིད་གསལ། །དགོངས་པ་ལུང་བསྟན་ལ་གནས་ནས། །གང་ཞིག་སེམས་ནི་མ་རྨོངས་པ། །མཁའ་ལ་གནས་པའི་ཉི་མ་བཞིན། །དེ་ནི་ཅི་དགར་སྤྱོད་པར་བྱེད། །དེ་བཞིན་གཤེགས་པ་ཐམས་ཅད་ཀྱི། །
རྡོ་རྗེ་གསུམ་གྱི་གསང་བ་སྟེ། །སྔགས་སྤྱོད་པ་ཡི་མཆོག་གྱུར་པ། །ལེའུ་བདུན་པ་རབ་ཏུ་བསྟན།། །།  དེ་ནས་དཔལ་ལྡན་དེ་བཞིན་གཤེགས། །དཀོན་མཆོག་དཔལ་ནི་འོད་ཆེན་པོ། །དེ་བཞིན་
གཤེགས་པ་ཐམས་ཅད་ཀྱི། །བླ་མ་རྡོ་རྗེ་གསུམ་གྱི་བདག །མགོན་པོ་རྡོ་རྗེ་འཛིན་ཆེན་པོ། །དབང་ཕྱུག་དབང་ཕྱུག་དམ་པ་དང་། །སངས་རྒྱས་ཀུན་གྱི་སྟོན་པ་ལ། །བསྟོད་པ་འདི་ཡིས་གསོལ་བ་བཏབ། །ནམ་མཁའི་སྤྱོད་
པ་རྡོ་རྗེ་མཆོག །རྡོ་རྗེ་སེམས་དཔའ་ཐུབ་པ་ཆེ། །ཐེག་པ་ཆེན་པོ་རྣམ་སྣང་བ། །ཀུན་ཏུ་བཟང་པོ་བརྟུལ་ཞུགས་བཟང་། །དངོས་ཀུན་དངོས་པོ་གཅིག་པའི་མཆོག །རིགས་མཆོག་ཐམས་ཅད་ཡང་དག་འབྱུང་། །རྒྱལ་བའི་དམ་
པའི་མཆོད་པའི་མཆོག །མཆོད་པ་ཀུན་མཆོག་བཤད་དུ་གསོལ། །འདོད་ཆགས་ཆེན་པོ་ཞེ་སྡང་ཆེ། །གཏི་མུག་ཆེན་པོ་བློ་གྲོས་ཆེ། །ཐེག་པ་གསུམ་པོ་རབ་སྟོན་ཅིང་། །རྡོ་རྗེ་ཐེག་པ་སྟོན་པ་པོ། །ནམ་མཁའ་གཅིག་པུ་དངོས་
པོའི་མཆོག །ཡེ་ཤེས་རྒྱ་མཚོ་བླ་མ་ཆེ། །རྡོ་རྗེ་གསུམ་པོ་ཆགས་མེད་པ། །རྒྱལ་གནས་མཆོད་པ་བཤད་དུ་གསོལ། །རྡོ་རྗེ་གསུམ་པོ་ལམ་གྱི་མཆོག །ཐར་ལམ་གཅིག་པུ་སྟོན་པ་པོ། །སངས་རྒྱས་སྐལ་མཆོག་ཤིན་དུ་
དག །མི་མཆོག་མཆོད་པ་བཤད་དུ་གསོལ། །དངོས་པོ་ཀུན་གཅིག་ཤིན་དུ་དག །བྱང་ཆུབ་སེམས་ནི་རྒྱ་མཚོ་ཆེ། །ཆོས་ཀྱི་འཁོར་ལོ་གཅིག་བསྐོར་བ། །རྟེན་འབྲེལ་ཡེ་ཤེས་ལས་བྱུང་བ། །རྡོ་རྗེ་གསུམ་གཅིག་རྣམ་དག་
དོན། །སྣ་ཚོགས་སངས་རྒྱས་བྱ་བ་མཛད། །བདག་མེད་ཆོས་ནི་ཤིན་དུ་དག །ཕྱག་འཚལ་རྡོ་རྗེ་ཐེག་པ་ལའོ། །དེ་ནས་དེ་བཞིན་གཤེགས་བདག་པོ། །ཐམས་ཅད་ནམ་མཁའ་མི་འགྱུར་ཆེ། །ཐམས་ཅད་དབང་བསྐུར་ཀུན་

88-1-277b

དབང་པོ། །ཀུན་དོན་རིན་ཆེན་མཆོག་འཛིན་པ། །ན་ཆུང་མིག་ཡངས་བཙལ་ནས་ནི། །གཟུགས་དང་ན་ཚོད་རྣམས་ཀྱིས་བརྒྱན། །ལོ་གྲངས་ཉི་ཤུ་ལྔ་ལོན་པ། །རྙེད་ནས་མི་ཡི་སྐྱེ་གནས་བརྟག །རྣམ་པར་དབེན་ནམ་གཙང་བ་ཡི། །
ས་ཕྱོགས་སུ་ནི་རྒྱལ་བདག་ཉིད། །ཞི་བ་ཞི་བའི་གནས་ཡིད་འོང་། །བཤང་གཅི་ཆུ་ཡིས་བྱུགས་ནས་ནི། །སངས་རྒྱས་བྱང་ཆུབ་རབ་སྟེར་བའོ། །རྟག་ཏུ་མཆོད་པ་ཉིད་བྱའོ། །དེ་བཞིན་གཤེགས་པ་མཆོད་པ་ཡི། །ཕུང་པོ་
ཞེས་བྱ་སྣ་ཚོགས་སྐྱེས། །རྡོ་རྗེ་གསུམ་པོ་མི་ཕྱེད་ཁམས། །རྒྱལ་བ་ཞེས་ནི་བྱ་བར་བཤད། །ཀུན་མཁྱེན་ཡེ་ཤེས་ལང་ཚོ་སྟེ། །ལེན་པ་མི་གསལ་ལ་སྦྱོར་ལ། །དེ་ཉིད་ན་ཆུང་ཡིན་པར་བརྟག །འཇིག་རྟེན་པ་རྣམས་
འཐོབ་བྱེད་རྒྱ། །འགྲོ་བའི་དོན་ནི་རབ་གྲུབ་པ། །གང་ཞིག་དངོས་མེད་ཅེས་བཤད་པ། །མཐའ་སྐྱེས་བཞིན་དུ་བརྟག་པ་ཡིན། །གཙང་བ་རྣམ་དག་སེམས་ཡིན་ཏེ། །རྣམ་པར་དབེན་པ་དངོས་མེད་པ། །ས་ནི་སྤྱན་ཞེས་བྱ་བ་
ཡིན། །ས་ཕྱོགས་རྒྱལ་བ་འབྱུང་བ་ཡིན། །ཞི་བ་སྣ་ཚོགས་ངེས་འབྱུང་བ། །ཞི་བའི་གནས་ནི་མྱུར་ལ་སོགས། །བཤང་གཅི་ཡུལ་དང་དབང་པོར་གྲགས། །ཆུ་ནི་ཤེས་རབ་ལ་སོགས་དྲུག །འདི་དག་གིས་གང་བྱུགས་
གྱུར་པ། །རྫོགས་ལོངས་སྤྱོད་པའི་འདོད་འབྱུང་བ། །དེ་རྟག་རྒྱལ་བའི་ཆོས་བཤད་པ། །དགོངས་པ་སྦྱོར་བ་ཆོས་ཉིད་དོ། །མཆོད་པའི་ཡན་ལག་གཉིས་པ་ཡི། །བཀོད་པའི་ཡན་ལག་མཚན་ཉིད་བཤད། །འཇིག་རྟེན་ཤིན་
ཏུ་འདས་སྤྱི་བོ། །འཇིག་རྟེན་འདས་པའི་སྙིང་ག་རུ། །རྐང་པའི་བར་དང་ལྟེ་བ་དང་། །རྐེད་པ་གསང་བ་འཇིག་རྟེན་པ། །རྒྱལ་སྲས་རྣམས་ཀྱི་བཀོད་པ་ནི། །རིགས་ནི་ལྔ་པོ་བྱ་བ་ཡིན། །ནམ་མཁའི་ཁམས་ཀྱི་དབུས་གནས་པར། །
ཡེ་ཤེས་རྒྱ་མཚོ་རྣམ་པར་བསྒོམ། །བདག་ཉིད་ཟླ་བའི་ནང་གནས་པར། །བརྟུལ་ཞུགས་ཅན་གྱིས་སྙིང་གར་བསྒོམ། །ཆུ་དེ་སྦྱོར་བར་གྱུར་པ་ནི། །མཱ་མ་ཀཱིར་ནི་ཡོངས་སུ་བརྟག །ཞི་བ་རྡོ་རྗེ་འཛིན་འདོད་པས། །བསྡུ་བ་

88-1-278a

དེ་ཡང་རབ་ཏུ་བྱ། །རིན་ཆེན་རང་བཞིན་མཆོད་རྟེན་ནི། །འོད་ཟེར་སྣ་ཚོགས་རྣམས་ཀྱིས་བརྒྱན། །ཡེ་ཤེས་རྒྱ་མཚོ་དུས་གསུམ་པ། །གནས་དེ་རུ་ནི་བསམ་བྱ་བ། །བློ་ལྡན་པ་སྤུའི་བུ་ག་ལས། །ཇི་ལྟ་ཇི་ལྟར་སྤྲོ་བར་
བྱ། །རྣལ་འབྱོར་རྣལ་འབྱོར་མཆོག་གཞོལ་བས། །མཆོད་པའི་སྤྲིན་ནི་དེས་སྤྲོ་བྱ། །གོས་དཀར་པད་མར་ཡང་དག་དགོད། །རྣམ་ལྔ་གཅིག་ལ་རྣལ་འབྱོར་མ། །མེ་ཡི་སྦྱོར་བ་བཤད་པ་ནི། །དེ་ཡང་མི་གསལ་ཞི་ལ་
གནས། །སྒྲོལ་མར་ཨུད་པལ་ཉིད་གྱུར་པ། །རླུང་སྟེ་སྦྱོར་བ་ལྔ་པའོ། །འཇུག་དང་གནས་དང་སྐྱེ་བ་དང་། །དེ་བཞིན་ལྡང་བའི་མིང་ཅན་ནོ། །དེ་ཉིད་རྣམ་པ་གསུམ་བྱས་པས། །རྡོ་རྗེ་གསུམ་གྱི་དམ་ཚིག་གནས། །དེ་ནས་བློ་
ལྡན་གྱིས་དབུལ་བ། །ལྷ་རྣམས་ཀྱི་ཡང་དངོས་མེད་ཉིད། །དེ་ནས་དེ་བཞིན་གཤེགས་པ་མཆོག །ཁྱབ་བདག་རྣམ་སྣང་ཆེན་པོ་ལས། །མེ་ཏོག་དགོངས་པ་ཐོས་ནས་ནི། །རྡོ་རྗེ་ཅན་གྱིས་ཐུབ་ཆེན་ཞུས། །མེ་དང་རླུང་དང་
དབང་ཆེན་དང་། །ཆུ་རུ་ཡོངས་སུ་བརྟགས་པ་ཡིན། །རེ་རེའང་དང་པོ་སྦྱོར་ཞེས་བྱ། །མེ་ཏོག་དེ་ལྔ་གསུམ་དུ་བཤད། །བྱ་རྒོད་མེ་ཏོག་ཟ་བ་དང་། །བུང་བ་ཤ་ཟ་ཞེས་ཟེར་ཞིང་། །མེ་ཏོག་འདི་ཡི་དགོངས་པ་ནི། །མ་འོངས་
སྐྱེ་བོས་མི་ཤེས་སོ། །མ་རྟོགས་པས་ནི་དེ་རྣམས་ཀྱི། །དངོས་གྲུབ་རིང་དུ་གནས་པར་འགྱུར། །འདི་ལྟར་བདག་ནི་སྐལ་མིན་ཞེས། །སྨྲ་ཞིང་དེ་རྣམས་བདག་ཉིད་སྨོད། །དེ་ལྟར་བདག་ཉིད་སྨད་པས་ན། །སངས་རྒྱས་ཐམས་
ཅད་སྨད་པར་འགྱུར། །སངས་རྒྱས་ཐམས་ཅད་སྨད་གྱུར་པས། །མི་ལས་འདས་ནས་གཞན་དུ་འགྲོ། །གཙོ་བོ་སངས་རྒྱས་ནང་ན་མིན། །ཕྱི་རོལ་ན་མིན་གཉིས་གར་མིན། །ཚོགས་པ་ལས་ཀྱང་མ་ཡིན་ཏེ། །རྐྱེན་གྱིས་འགྲོ་
བ་དག་ལ་གནས། །དེ་བཞིན་དེ་བཞིན་གཤེགས་སངས་རྒྱས། །ལུས་ལ་གསང་སྔགས་འདི་ཉིད་ལས། །གསང་སྔགས་འགྲུབ་པར་དཀའ་བའི་རྒྱུས། །དེས་ནི་བདག་དང་དེ་དག་སྨོད། །དེ་རྣམས་རྗེས་སུ་གཟུང་བའི་ཕྱིར། །

88-1-278b

དགོངས་པ་དེ་ནི་བཤད་དུ་གསོལ། །རང་གི་ངོ་བོ་མ་འཚལ་ན། །མཁས་པ་དག་ནི་ཉམས་པར་འགྱུར། །དེ་ནས་བཅོམ་ལྡན་སྣ་ཚོགས་པས། །གསང་བའི་བདག་པོ་ལ་གསུངས་པ། །ཉིན་དང་མཚན་མོའི་དབྱེ་བ་ཡིས། །མེ་ཏོག་
དོན་ནི་བཤད་པར་བྱ། །པད་མ་ཨུཏ་པལ་ཉིན་མོར་བཤད། །ཛཱ་ཏི་མཚན་མོ་ཡིན་ཞེས་བཤད། །ལྔ་ཡི་བདག་ཉིད་གསུམ་དང་གཅིག །གཉིས་ལྔ་གཅིག་དང་གསུམ་དུ་འགྱུར། །དེ་ཡི་ཐབས་ནི་ཉིན་མོར་བཤད། །མཚན་མོ་ཤེས་
རབ་ཅེས་བཤད་དོ། །ཉིན་དང་མཚན་མོའི་དབྱེ་བ་ཡིས། །མཇུག་ཏུ་འབྱུང་བ་ཉིད་དུ་འགྱུར། །དེ་གཉིས་དབུས་ཀྱི་སྦྱོར་བ་གང་། །དགོངས་པས་ཡོངས་སུ་བརྟགས་པ་ཡིན། །དེ་ནི་སངས་རྒྱས་སྙིང་པོར་འགྱུར། །དེ་བས་ལྷ་ཚོགས་
ཀྱིས་དེ་མིན། །རྣལ་འབྱོར་པ་དང་སྔགས་པ་རྣམས། །དགོངས་པའི་ཆོས་ལ་རབ་བརྩོན་བྱ། །དགོངས་པ་བྱིན་རླབས་རྒྱུ་ཡིས་ནི། །དེ་རྣམས་ཀྱིས་ནི་འགྲུབ་པར་འགྱུར། །གང་ཞིག་རླུང་ནི་བཅུར་གྲགས་པ། །དེ་ནི་པད་མ་ཨུད་ཨུ་
པལ་མིང་། །དེ་ཉིད་ཅེས་གྲགས་རྡོ་རྗེ་གསུམ། །ཛཱ་ཏི་གཅིག་པུ་གསུམ་དུ་འདོད། །ཀ་རྞི་ཀ་དང་མ་ལི་ཀ ། ཡུཀ་ཏི་ཀ་ར་བཱི་ར་ནི། །གོ་རིམས་བཞིན་དུ་སྤྱན་སོགས་ཏེ། །ས་ལ་སོགས་པར་འདིར་སྦྱར་རོ། །དངོས་མེད་གོ་
འཕང་ལ་བཀོད་པས། །ལྷ་རྣམས་ཀྱི་ནི་སྐུར་སྦྱོར་བས། །གཅིག་ཏུ་སངས་རྒྱས་ཀུན་མཉེས་པའི། །མཆོད་པ་ཆེན་པོར་དེ་འགྱུར་རོ། །ལྔ་པོའི་བདག་ཉིད་ཡང་དག་བཞག །ལྔ་བཅུ་དག་ནི་གཉིས་འགྱུར་བྱ། །དེ་ཉིད་
གསུམ་སྦྱོར་འཁོར་ལོ་ནི། །དཔག་ཚད་བརྒྱ་ཡི་དཀྱིལ་འཁོར་རོ། །དེར་ནི་མཁས་པས་རྟག་པར་ནི། །རིགས་རྣམས་རབ་ཏུ་དགོད་པར་བྱ། །པད་མ་འཁོར་ལོ་རྡོ་རྗེ་དང་། །དེ་བཞིན་ཨུཏ་པལ་རྟག་ཏུ་བསྒོམ། །དཔག་ཚད་བཞི་
པོ་སྦྱོར་གཅིག་པ། །དཔག་ཚད་བརྒྱ་ཁྱོན་དེ་ཉིད་གསུམ། །བྱམས་པ་ལ་སོགས་གྲུ་བཞིར་གྱུར། །མཛེས་པ་ཕུང་པོས་བརྒྱན་པ་ཡིན། །གྲུ་བཞི་དེ་ནི་རིགས་སུ་གྱུར། །ཞི་བ་སྦྱོར་བ་གཅིག་མིང་ཅན། །མཆོད་རྟེན་ཡེ་ཤེས་

88-1-279a

སེམས་རང་བཞིན། །གསལ་ཞིང་རང་བཞིན་དྲི་མ་མེད། །རིགས་རྣམས་མཆོད་ཕྱིར་དེ་ཉིད་ནི། །ཤེས་རབ་ཅན་གྱིས་གནས་བསྒོམ་མོ། །མངོན་ཤེས་ལྔ་ཡི་གནས་འདོད་རྣམས། །དེ་ཡི་མཆོད་པ་རྒྱ་མཚོ་གསལ། །རིན་
ཆེན་ཡེ་ཤེས་སྤྲོ་བདག་ཉིད། །གོས་ནི་བསྡུ་བ་ཞེས་བྱའོ། །མཆོད་པ་མཆོག་རྣམས་དེ་དག་གིས། །བྱང་ཆུབ་འདོད་པས་མཆོད་པར་བྱ། །ཤེས་རབ་ཅན་གྱིས་མཆོད་མཆོག་ལས། །ལྷ་རྣམས་རྟག་ཏུ་མཉེས་པར་བྱ། །སྦྱོར་
གཅིག་དེ་ལས་ཡང་དག་བྱུང་། །རིན་ཆེན་འབྱུང་གནས་ན་ཆུང་ཡིན། །དགའ་མགུ་ཡང་དག་ལྡན་པ་ཡི། །དངོས་གྲུབ་ཤིན་ཏུ་གྲུབ་པའི་ཕྱིར། །ང་རྒྱལ་ལ་སོགས་བདུན་ཞེས་བྱ། །རིན་ཆེན་ཐམས་ཅད་དབུལ་བར་བྱ། །
ཆོས་དང་རྫོགས་ལོངས་སྤྱོད་ལས་བྱུང་། །རིན་ཆེན་བདུན་གྱི་ནོར་དེ་ནི། །དེས་བཀང་བ་ཡི་ཞིང་འདི་ནི། །ཤེས་རབ་ཐབས་གཅིག་ལས་བྱུང་བའི། །དངོས་གྲུབ་འདོད་པས་སྦྱིན་པའི་ཕྱིར། །ཞིང་དེ་ཉིན་རེ་དབུལ་བར་ནི། །
ནམ་མཁའ་མཐའ་ཡས་རྣལ་འབྱོར་པའི། །སྦྱིན་པའི་ཕ་རོལ་ཕྱིན་འདིར་འགྱུར། །སངས་རྒྱས་དཀྱིལ་འཁོར་དབུས་སུ་དེ། །ཕྱག་རྒྱའི་བདག་པོར་མཉམ་གཞག་སྟེ། །འདོད་ཆགས་བློ་ལྡན་སངས་རྒྱས་ལ། །རེག་པར་ཡང་
དག་སྦྱོར་བ་དབུལ། །ནམ་མཁའི་དབྱིངས་ཀྱི་དབུས་གནས་པར། །བཀོད་པའི་དཀྱིལ་འཁོར་དམ་པ་བསྒོམ། །བདག་ཉིད་དེ་བཞིན་གཤེགས་པའི་སྐུ། །ཡུལ་དང་དབང་པོ་སུན་འབྱིན་པ། །དངོས་མེད་གཅིག་པར་ཡང་དག་
འབྱུང་། །ཡུལ་དང་དབང་པོ་ཞེས་བྱ་བའི། །བཤང་གཅི་ཇི་ལྟ་ཇི་ལྟ་བར། །དེ་ཉིད་མཆོད་པ་རྣམས་ཀྱིས་མཆོད། །སྐལ་བཟང་ཞིང་ནི་མཛེས་པ་ཡི། །བུད་མེད་གཟུགས་བཟང་རྙེད་པ་དང་། །གསང་སྔགས་ཡི་གེའི་གནས་
འབྱུང་བས། །རྣལ་འབྱོར་མ་དེ་བྱིན་བརླབས་ལ། །བྱས་ནས་གཉིས་མེད་སྦྱོར་གཅིག་པུ། །རང་གི་ལུས་ཀྱི་ནང་དུ་གཞུག །སྤྱན་སོགས་ཇི་ལྟ་ཇི་ལྟ་བར། །བྱིན་གྱིས་བརླབས་པའི་གནས་བཀོད་དེ། །མིག་བཟང་དག་པའི་

88-1-279b

བྱ་བ་ཡི། །རང་བྱུང་ཁུ་བ་བླངས་ནས་མཆོད། །གང་ཞིག་དེ་ལྟར་རྟོགས་པ་དེ། །བླངས་པས་རྡོ་རྗེ་འཆང་བར་འགྱུར། །ས་ལ་སོགས་པའི་དཀྱིལ་འཁོར་གང་། །སྤྱན་ལ་སོགས་པར་རབ་བརྟགས་པ། །དེ་ནི་འཇུག་སོགས་
སྦྱོར་བ་ཡང་། །དེ་ནི་ཁུ་བ་ཟ་བར་འགྱུར། །འདི་ནི་སྔགས་རྣམས་ཐམས་ཅད་ཀྱི། །སྐུ་གསུང་ཐུགས་ཀྱི་མཆོད་པ་སྟེ། །རྡོ་རྗེ་ཡེ་ཤེས་ཅན་གསང་གི། གསང་སྔགས་དངོས་གྲུབ་བྱེད་པའི་མཆོག །རིན་ཆེན་ཀུན་གྱི་
འབྱུང་གནས་མཆོག །དགོངས་པ་ལུང་བསྟན་ལ་གནས་ནས། །གང་ཞིག་སེམས་ནི་བཟོད་གྱུར་པ། །དེ་ནི་ཇི་བཞིན་ཉིད་དུའང་བྱེད། །དེ་བཞིན་གཤེགས་པ་ཐམས་ཅད་ཀྱི། །རྡོ་རྗེ་གསུང་གི་གསང་བ་ལས། །བཤང་
གཅིའི་དམ་ཚིག་ཅེས་བྱ་བའི། །ལེའུ་བརྒྱད་པ་ཡིན་པར་བཤད།། །། དེ་ནས་དེ་བཞིན་གཤེགས་མཆོག་གཙོ། །ཐམས་ཅད་ནམ་མཁའ་མི་འགྱུར་ཆེ། །སངས་རྒྱས་དབང་བསྐུར་
སྤྱོད་པའི་མཆོག །གཟུགས་དོན་དབང་ཕྱུག་དམ་པ་ཡིན། །རྡོ་རྗེ་གསུམ་ཉིད་ལོངས་སྤྱོད་པ། །རྡོ་རྗེ་མི་ཕྱེད་གསུམ་དཀྱིལ་འཁོར། །སངས་རྒྱས་ཡེ་ཤེས་སྦྱོར་གཅིག་པའོ། །གསང་བ་ཉམས་ནི་དགའ་བར་བཤད། །
ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་བསྒྲུབ་པར་བྱ། །རྡོ་རྗེ་རྩེ་གཅིག་རྡོ་རྗེ་ཡང་། །བསྒོམ་པའི་བདག་ཉིད་ཅན་གྱིས་བསྒོམ། །འོད་འཕྲོ་མང་པོ་འབར་བ་དང་། །འོད་ཟེར་སྣ་ལྔས་རབ་ཏུ་
གང་། །དུས་གསུམ་སངས་རྒྱས་ཡང་དག་བྱུང་། །བསྒོམས་ལ་རྡོ་རྗེས་ཕྱེ་མར་བརླག །རྡོ་རྗེ་གསུམ་གཅིག་ལོངས་སྤྱོད་ནི། །རྡོ་རྗེས་ཕྱེར་བརླགས་མེད་གྱུར་པའི། །ཐུགས་ཀྱི་དངོས་གྲུབ་བྱེད་བསམ་གཏན། །བསྒོམས་ན་
མྱུར་དུ་ཐོབ་པར་འགྱུར། །རྡོ་རྗེ་མཆོག་ཅེས་བྱ་བ་ཡི། །རྡོ་རྗེ་གསང་བ་འདི་ལྟ་བུ། །རྡོ་རྗེས་རྡོ་རྗེ་འཛིན་པ་ནི། །སེམས་ཅན་ཐམས་ཅད་བསད་ན་ནི། །དེ་ནི་མྱུར་བར་མི་བསྐྱོད་པའི། །རྒྱལ་བའི་སྲས་སུ་སྐྱེ་བར་འགྱུར། །ཞེ་སྡང་

88-1-280a

རིགས་ཆེན་དེ་ཉིད་ནི། །ཞིང་དེ་འགེངས་པར་བྱེད་པར་འགྱུར། །དེ་ནས་དགོངས་པ་ཆོས་གཅིག་པུ། །གཙོ་བོ་ཀུན་མཁྱེན་ཐམས་ཅད་རིག །དམ་ཚིག་དེ་ཉིད་གསུངས་པ་ཡི། །མགོན་ལ་ཕྱག་ན་རྡོ་རྗེས་གསོལ། །འདི་ལྟར་དངོས་མེད་
མཆོག་གྱུར་པ། །ཁྱོད་ནི་ཆོས་རྣམས་སྟོན་མཛད་པ། །འཇིག་རྟེན་པ་དང་འགལ་ཚིག་གིས། །མགོན་ཁྱོད་ཅི་ཕྱིར་སྟོན་པར་མཛད། །གང་ཞིག་དེ་བཞིན་ཉིད་དངོས་གཅིག །དུས་གསུམ་འབྱུང་བའི་སངས་རྒྱས་རྣམས། །ཆོས་སྐུ་གཅིག་པུ་ལས་
འཁྲུངས་པ། །ཇི་ལྟར་རྡོ་རྗེས་ཕྱེ་མར་བརླག །དེ་ནི་ཕྱེར་བརླགས་གྱུར་པ་ལས། །ཇི་ལྟར་ཡང་དག་སེམས་འགྲུབ་འགྱུར། །ཆོས་སྐུ་གཅིག་པུ་ལས་བྱུང་ལས། །ལྷག་པ་ཞེས་བྱ་གྱུར་ནས་སུ། །དུས་གསུམ་འབྱུང་བའི་སངས་རྒྱས་
རྣམས། །ཕྱེ་མར་བརླགས་པར་ཇི་ལྟར་ནུས། །ཕྱེར་བརླག་བྱེད་པས་དངོས་མེད་པས། །ཕྱེ་མ་ཉིད་ཀྱང་ཁྱད་པར་དུ། །སངས་རྒྱས་སྔགས་དོན་རྣལ་འབྱོར་པ། །ནུས་པ་བསམ་མི་ཁྱབ་ལྡན་ལ། །དེ་འདྲ་བར་ནི་ཕྱེར་བརླག་པར། །
སྔགས་པ་གཞན་གྱིས་མི་ནུས་སོ། །སེམས་ཅན་གྱིས་ནི་སེམས་ཅན་བཞིན། །སངས་རྒྱས་སངས་རྒྱས་ཕྱེར་བརླགས་པས། །འདི་གཉིས་ཁྱད་པར་མེད་དོ་ཞེས། །མ་འོངས་སྐྱེ་བོ་སྨྲ་བར་འགྱུར། །སངས་རྒྱས་གཅིག་པུ་མཐར་
ཐུག་པ། །མིན་ཞེས་མི་རྣམས་ངེས་སྨྲ་ཞིང་། །གང་ཞིག་སངས་རྒྱས་ཀྱིས་གསུངས་བཞིན། །རབ་ཏུ་སྤོང་བར་བྱེད་པར་འགྱུར། །ཐེག་བཟང་བསྒྲུབས་ན་འཚང་རྒྱ་བ། །དགོངས་པའི་བུམ་པ་བཟང་པོ་མཆོག །དེ་ནི་བཅོམ་ལྡན་
མྱུར་སྦྱོར་བས། །མི་སྐྱོད་ཞིང་དུ་སྐྱེ་འགྱུར་རམ། །སེམས་ཅན་འཁོར་བར་འཁོར་གྱུར་པ། །དེ་ཚེ་ཞེ་སྡང་ཆེ་སྐྱེ་འམ། །སྙིང་རྗེས་གསད་པར་བྱའོ་ཞེས། །སྔགས་པ་རྣམས་ནི་དེ་མི་སྤོང་། །འདས་ཚེ་སྟོན་པར་གྱུར་པ་དང་། །
ད་ལྟར་རྗེས་སུ་སྟོན་མཛད་དང་། །མཉེས་བྱ་མ་འོངས་སངས་རྒྱས་རྣམས། །སངས་རྒྱས་བྱང་ཆུབ་སྩོལ་བའོ། །མི་བསྐྱོད་གཟུགས་ཅན་རྡོ་རྗེ་ཡིས། །དེ་རྣམས་ཇི་ལྟར་གཞོམ་པར་བགྱི། །དེ་ཉིད་སྣ་ཚོགས་དོན་ལྡན་ཚིགས། །

88-1-280b

དེ་རྣམས་ཀྱིས་ནི་ཇི་ལྟར་རྟོགས། །གང་ཞིག་ཤེས་པས་རྒྱལ་སྲས་རྣམས། །དགོངས་པའི་དོན་ལ་རྟོག་མེད་འགྱུར། །མ་འོངས་སྐྱེ་བོའི་དོན་དུ་ནི། །དེ་ཉིད་བཅོམ་ལྡན་བཤད་དུ་གསོལ། །དེ་ནས་རྡོ་རྗེ་འཛིན་སྨྲ་བའི། །འགྲོ་ལ་ཕན་པའི་
ཚིག་གསན་ནས། །དེ་ནས་གཙོ་བོ་རྡོ་རྗེ་འཆང་། །ཁྱབ་བདག་གིས་ནི་སླར་གསུངས་པ། །ལེགས་སོ་བུ་ཁྱོད་ཆེར་ལེགས་ཏེ། །ཀུན་དུ་བཟང་པོ་ཁྱོད་ལེགས་སོ། །དགོངས་པས་བཤད་པའི་དོན་དུ་ནི། །ཁྱོད་ཀྱིས་ང་ལ་གང་དྲིས་པ། །
གསུངས་དོན་ཇི་ལྟ་ཇི་ལྟ་བར། །དེ་ནི་ང་ཡིས་བཤད་པར་བྱ། །ཕུང་སོགས་ཡན་ལག་གང་གྱུར་པ། །སངས་རྒྱས་སེམས་ཅན་རབ་བརྟན་ཞིང་། །སྔགས་དང་ཕྱག་རྒྱའི་སྦྱོར་བ་ཡང་། །དབྱེ་བ་སྣ་ཚོགས་རབ་ཏུ་བསྟན། །འཁོར་
བ་མི་བསྐྱོད་མིང་ཅན་ཏེ། །དེ་སྔགས་རྡོ་རྗེ་ཞེས་བྱ་བ། །མི་གསལ་རྡོ་རྗེ་ཞེས་བཤད་དེ། །དངོས་མེད་གཅིག་པུ་རྡོ་རྗེ་ཉིད། །དེས་བཤིག་པ་ནི་བསད་པ་སྟེ། །སངས་རྒྱས་སེམས་ཅན་ཁྱད་པར་དུ། །སྣ་ནི་ཚོགས་ཀྱི་དབང་
པོ་ཡི། །ཁ་ནི་རང་བཞིན་ཉིད་དུ་གཡོ། །རྣལ་འབྱོར་པ་ཡི་ལག་གྱུར་པ། །འགྲོ་བ་རླུང་གི་མིང་ཅན་ནོ། །མི་བསྐྱོད་རྡོ་རྗེའི་སྤྱོད་པ་ཉིད། །ལག་ཏུ་རྡོ་རྗེ་བཞག་ནས་ནི། །དེ་ཚེ་མྱུར་ལ་སོགས་བྱ་བ། །ཀླུ་ཡི་
རང་བཞིན་སྣ་ཚོགས་ཉིད། །ཕུང་སོགས་བརྟགས་པའི་སངས་རྒྱས་རྣམས། །སྐུ་གསུང་ཐུགས་ལས་ཡང་དག་བྱུང་། །དེ་ཡི་ཡན་ལག་ཕུང་པོར་བཤད། །དེ་ནི་ཕྱེར་གྱུར་བསད་པ་ཡིན། །
འདི་ནི་ཞེ་སྡང་རིགས་ཡིད་འོང་། །མི་བསྐྱོད་ཡེ་ཤེས་རྡོ་རྗེ་ཉིད། །དེ་བཞིན་སྐྱེ་བ་དམ་པ་ཡིན། །དངོས་གྲུབ་ཆེན་པོ་དེས་ཐོབ་འགྱུར། །དེ་ནས་དཔལ་ལྡན་བདེ་ཆེན་པོ། །ཡེ་ཤེས་
ཐར་པ་རབ་སྒྲུབ་པ། །རང་བཞིན་དག་གིས་གོས་མེད་པ། །བྱང་ཆུབ་སྤྱོད་པ་རབ་བསྒྲུབས་པས། །ཕྱག་ན་རྡོ་རྗེ་འོད་ཆེན་པོ། །གསང་བ་གསུམ་གྱི་གཙོ་བོ་ལ། །བོས་ནས་ཡང་དག་རྫོགས་སངས་རྒྱས། །སྒྲུབ་

88-1-281a

པའི་དམ་ཚིག་དེ་ཉིད་གསུངས། །ནམ་མཁའི་དབྱིངས་ཀྱི་དབུས་གནས་པར། །རྡོ་རྗེ་དཀྱིལ་འཁོར་དམ་པ་ལ། །རྣམ་པར་སྣང་མཛད་བསྒོམ་བྱ་ཞིང་། །སངས་རྒྱས་ཐམས་ཅད་རྣམ་པར་བསྒོམ། །རིན་ཆེན་
ཀུན་གྱི་སྦྱོར་བ་ཡིས། །རྡོ་རྗེ་གཟུགས་ནི་རྣམ་པར་བསྒོམ། །རྡོ་རྗེ་གསུམ་མཉམ་སྦྱོར་བ་ཡིས། །རྫས་རྣམས་ཐམས་ཅད་དབྲོག་པར་བྱ། །ཤེས་དང་དབང་པོ་ལྡོག་པར་འགྱུར། །རྣམ་སྨིན་དངོས་པོ་མེད་པ་ཡི། །
དེ་ཉིད་འཕྲོག་པའི་རྡོ་རྗེ་དང་། །སངས་རྒྱས་ཐམས་ཅད་རབ་བསྒྲུབ་པའི། །རིན་ཆེན་རྡོ་རྗེ་མཆོག་སྦྱོར་བ། །རྒྱལ་བའི་སྲས་སུ་འགྱུར་བ་དང་། །ནོར་གྱི་རྒྱ་མཚོས་གང་བ་ཡི། །ཡིད་བཞིན་ནོར་བུ་འདྲ་བར་འགྱུར། །འདི་ནི་
གཏི་མུག་རིགས་དེ་ཉིད། །དམ་ཚིག་ཡིན་པར་ཡོངས་སུ་བསྒྲགས། །རིགས་ཀུན་རྒྱ་མཚོ་ཤེས་བྱ་སྟེ། །དེ་ལས་ཐུབ་པའི་སྐྱེས་མཆོག་འགྱུར། །དེ་ནས་བདག་པོ་བཅོམ་ལྡན་འདས། །འདོད་ཆགས་ཐར་པར་རབ་
འཇུག་པ། །གསང་བ་དག་པ་གནས་མེད་པ། །དཀྱིལ་འཁོར་མཆོག་ནི་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །རིན་ཆེན་དཀྱིལ་འཁོར་བསྒོམ་པར་བྱ། །དཔག་མེད་ཆོས་ནི་རྣམ་བསྒོམས་ཏེ། །
སངས་རྒྱས་ཀུན་གྱིས་རབ་ཏུ་དགང་། །བུད་མེད་ལྟ་བུར་སྦྱོར་བ་ཡང་། །ཏིང་ངེ་འཛིན་གྱི་སྦྱོར་བ་ཡིས། །ཐམས་ཅད་དེ་རུ་བསྒོམ་པར་བྱ། །འདི་ནི་རྡོ་རྗེ་ཚུལ་མཆོག་ཡིན། །དངོས་མེད་བསམ་པའི་སྦྱོར་བ་ཡིས། །གསལ་
མི་གསལ་ལ་ཡང་དག་སྦྱོར། །ཆོས་དང་རྫོགས་ལོངས་སྤྱོད་སྦྱོར་བ། །གསང་སྔགས་ཀྱིས་སྤྲུལ་དབང་པོ་གཉིས། །སྦྱོར་བ་བཞི་ཡི་སྦྱོར་བ་ཡིས། །དབང་པོ་གཉིས་ནི་རབ་སྦྱོར་བའི། །སྙོམས་ཞུགས་སྦྱོར་བ་དེ་ཡིས་ནི། །
དེ་དག་ཐམས་ཅད་ཉེ་བར་སྤྱོད། །སྐུ་གསུམ་མི་ཕྱེད་སྔགས་རྣམས་ཀྱི། །འདི་ནི་བསྒོམ་པ་མཆོག་དེ་ཡིན། །དེ་ཉིད་དམ་ཚིག་སྦྱོར་བ་འདི། །འདོད་ཆགས་རིགས་གཅིག་བསྒོམ་པའོ། །འདི་ནི་སངས་རྒྱས་ཐམས་ཅད་ཀྱི། །

88-1-281b

འདོད་ཆགས་ཆེན་པོའི་ཚུལ་མཆོག་སྟེ། །སྔགས་པ་རྣམས་ཀྱིས་ཉིན་རེ་ཞིང་། །རབ་ཏུ་འབད་པས་བསྒོམ་པར་བྱ། །དེ་ནས་གསང་དབང་རྡོ་རྗེ་གསུམ། །རྡོ་རྗེ་སྔགས་དོན་སྒྲུབ་པ་པོ། །བདག་མེད་ཡེ་ཤེས་ལས་བྱུང་བས། །
གསུང་ནི་འདི་སྐད་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་བསྒོམ་པར་བྱ། །དོན་ཡོད་རྡོ་རྗེ་རྣམ་བསྒོམས་ཏེ། །སངས་རྒྱས་ཐམས་ཅད་བསྒོམ་པར་བྱ། །རྡོ་རྗེ་ཚིག་གི་བརྫུན་
སྨྲ་བ། །རྒྱལ་བ་ཐམས་ཅད་སླུ་བ་སྟེ། །འདི་ནི་སངས་རྒྱས་ཐམས་ཅད་ཀྱི། །ནམ་མཁའི་གསུང་ནི་དྲི་མེད་པའོ། །གང་ཞིག་བརྫུན་དུ་སྨྲ་བཤད་པ། །བརྫུན་དེ་ཉིད་ནི་དམ་པ་སྟེ། །དཔའ་བོ་གང་ཞིག་སྒོམ་བྱེད་པ། །དེ་ནི་རྒྱལ་
བའི་མཆོག་ཏུ་འགྱུར། །གསང་བའི་ཡེ་ཤེས་དམ་པ་སྟེ། །སངས་རྒྱས་དངོས་གྲུབ་བྱེད་པའི་མཆོག །དམ་ཚིག་འགུགས་པར་གང་གྱུར་པའི། །རིགས་ཀྱི་དམ་ཚིག་ལ་འཇུག་པའོ། །ཀུན་དུ་ཀུན་ནས་འབད་པ་ཡི། །ཇི་བཞིན་
དོན་དུ་འདྲ་བྱས་ཏེ། །སོ་སོར་རྟོག་པའི་སྦྱོར་བ་ཡིས། །དེ་ནི་དངོས་གྲུབ་རྒྱ་ཆེན་ཐོབ། །དེ་ནས་བཅོམ་ལྡན་སྣ་ཚོགས་པ། །མི་ཕྱེད་རྡོ་རྗེ་གསུམ་རྒྱལ་བདག །རྡོ་རྗེའི་དངོས་གྲུབ་རབ་སྟོན་པས། །གསུང་ནི་འདི་སྐད་བཀའ་སྩལ་ཏོ། །
ནམ་མཁའི་དབྱིངས་ཀྱི་དབུས་གནས་པར། །དེར་ནི་དཀྱིལ་འཁོར་བསྒོམ་པར་བྱ། །སངས་རྒྱས་སྐུ་རུ་རབ་བརྟགས་པའི། དམ་ཚིག་དེ་ནི་ཡང་དག་བཤད། །དཀོན་མཆོག་དཔལ་ནི་རབ་བསྒོམས་ཏེ། །གཟུགས་རྣམས་ཀུན་
གྱིས་ས་འདི་གང་། །ཕུང་པོ་ལ་སོགས་གྲངས་མཉམ་པའི། །སངས་རྒྱས་ཀུན་གྱིས་ཐམས་ཅད་དུ། །རྩུབ་པའི་ངག་ལ་སོགས་པ་ནི། །ས་རྣམས་དམན་པ་ཞེས་བྱ་བའི། །བསྒོམས་ན་དངོས་གྲུབ་ཐོབ་འགྱུར་ཞེས། །
བཅོམ་ལྡན་ཐུབ་པས་དེ་སྐད་གསུངས། །དེ་བཞིན་གཤེགས་པ་ཀུན་བཀོད་པ། །སྣ་ཚོགས་གཟུགས་ཅན་འོད་པོ་ཆེ། །བསམ་པས་དཔལ་ལྡན་གཅིག་པུ་ཉིད། །དཔག་ཏུ་མེད་པར་གྱུར་པ་ཡིན། །དེ་ནས་གང་ཞིག་

88-1-282a

དམ་ཚིག་སོགས། །ཆོས་དབྱིངས་རྡོ་རྗེ་གསུམ་ཉིད་ནི། །དེ་བཞིན་གཤེགས་པ་ཐམས་ཅད་ཀྱིས། །དམ་ཚིག་རྡོ་རྗེ་དཔལ་ལ་སོགས། །བྱང་ཆུབ་སེམས་དཔའ་སེམས་དཔའ་ཆེ། །ངོ་མཚར་རྨད་དུ་གྱུར་ནས་ནི། །ཚིག་
ལམ་རྡོ་རྗེ་ཞེས་བྱ་འདི། །དེ་ནི་དེ་རྣམས་རྗོད་པར་བྱེད། །ཅི་འདི་མགོན་པོ་བཅོམ་ལྡན་འདས། །དེ་བཞིན་གཤེགས་པ་ཀུན་གྱི་བདག །གང་ཞིག་ཁམས་གསུམ་ལས་འདས་ཤིང་། །འཇིག་རྟེན་ཐམས་ཅད་ལས་འདས་པ། །
དེ་བཞིན་གཤེགས་པ་ཀུན་མཆོག་དང་། །བྱང་ཆུབ་སེམས་དཔའི་ཚོགས་ཆེན་གྱི། །འཁོར་གྱི་དཀྱིལ་འཁོར་དབུས་སུ་ནི། །ངོ་མཚར་ཆེ་བའི་ཚིག་གི་ལམ། །གཙོ་བོས་ཡང་དག་རྡོ་རྗེའི་ཚིག །དགོངས་པས་ཅི་སླད་གང་
གསུངས་ཞེས། །བརྗོད་ཀྱིས་མི་ལང་བ་ཡི་ཡང་། །བརྗོད་མི་ལང་བ་རྣམས་ཀྱིས་གསོལ། །དེ་ནས་དེ་བཞིན་གཤེགས་ཀུན་གྱིས། །བརྗོད་ཀྱིས་མི་ལང་བ་ཡི་ཡང་། །བརྗོད་ཀྱིས་མི་ལང་གྲངས་ཀྱིས་ནི། །རི་རབ་རྡུལ་
ཕྲན་དང་མཉམ་པའི། །དེ་བཞིན་གཤེགས་པ་ཐམས་ཅད་དང་། །དམ་ཚིག་རྡོ་རྗེ་དཔལ་སོགས་པའི། །བྱང་ཆུབ་སེམས་དཔའ་སེམས་ཆེན་ལ། །དངོས་མེད་ལས་བྱུང་གསལ་བ་གསུངས། །དམན་དང་སྨད་པའི་འདུ་
ཤེས་ནི། །རྒྱལ་བའི་སྲས་རྣམས་མ་སྐྱེད་ཅིག །ཅི་ཕྱིར་ཞེ་ན་དེ་བཞིན་གཤེགས། །འབྱུང་བ་གང་འདི་སྤྱོད་མཆོག་ཡིན། །འདི་ལྟར་སྔགས་ཀྱི་སྤྱོད་མཆོག་འདི། །རྣམ་པར་དག་ཡིན་རིགས་ཀྱི་བུ། །སངས་རྒྱས་མཉམ་
མེད་འབྱུང་འགྱུར་འདི། །གསང་བའི་སྔགས་དོན་སྤྱོད་པ་ཉིད། །འདི་ལྟར་དཔེར་ན་རིགས་ཀྱི་བུ། །ནམ་མཁའ་ཀུན་དུ་སོང་བ་སྟེ། །ཆོས་རྣམས་ཀུན་ཀྱང་དེར་རྟོགས་ཤིང་། །རབ་དབྱེའི་སྦྱོར་བར་གྱུར་པ་ཉིད། །འདོད་པའི་
ཁམས་ན་མི་གནས་ཤིང་། །དེ་ནི་གཟུགས་ཀྱི་ཁམས་མི་གནས། །དེ་བཞིན་གཟུགས་མེད་ཁམས་ནའང་མིན། །འབྱུང་བ་བཞི་ལ་དེ་མི་གནས། །རིགས་ཀྱི་བུ་ཆོས་ཐམས་ཅད་ཀྱང་། །དེ་ལྟར་དོན་གྱི་དབང་མཁྱེན་ནས། །

88-1-282b

དགོངས་པའི་དབང་གིས་རྒྱལ་བ་རྣམས། །དེ་བཞིན་གཤེགས་རྣམས་དགོངས་ཉིད་ཀྱིས། །ཆོས་རྣམས་སྟོན་པར་མཛད་པ་ཡིན། །དེ་བཞིན་དུ་ནི་ཁྱེད་རྣམས་ཀྱིས། །མདོར་ན་ཁོང་དུ་ཆུད་པར་བྱ། །ཡང་དག་བྱང་ཆུབ་དོན་
རྣམས་ཀྱིས། །ནམ་མཁའི་ངེས་ཚིག་སྦྱོར་བས་ནི། །དེ་བཞིན་གཤེགས་པའི་སྦྱོར་བྱུང་བའི། །དམ་ཚིག་རྗེས་སུ་རིག་པར་བྱ། །འདི་ལྟར་དཔེར་ན་རིགས་ཀྱི་བུ། །གཙུབ་ཤིང་གཙུབ་སྟན་བཅས་པ་དང་། །སྐྱེས་བུའི་
ལག་པ་བསྐྱོད་པ་ཡི། །རྐྱེན་ལས་དུ་བ་འབྱུང་བར་འགྱུར། །དེ་ནས་མེ་ཡང་འབྱུང་མོད་ཀྱི། །གཙུབ་ཤིང་ལ་སོགས་རེ་རེ་ནས། །འདི་ལྟར་སོ་སོར་བརྟགས་ན་གོ། མེ་དེ་གང་ནའང་མི་གནས་སོ། །བྲག་ཆ་དང་ནི་གཟུགས་
བརྙན་དང་། །སྒྱུ་མ་དང་ནི་སྨིག་རྒྱུ་དང་། །དེ་བཞིན་ཆུ་ཟླ་རྨི་ལམ་སྟེ། །ཆོས་རྣམས་ཐམས་ཅད་དེ་དང་འདྲ། །མགོན་པོ་པི་བང་སྒྲ་ལྟ་བུ། །རྐྱེན་དོན་ལས་ཚིག་ཡང་དག་བྱུང་། །དེ་བཞིན་འགྲོ་འོང་གནས་པ་རྣམས། །ཅུང་ཟད་
ཙམ་ཡང་ཡོད་མ་ཡིན། །གནས་མེད་གནས་པའི་སྦྱོར་བ་ཡིས། །གནས་པ་ནམ་མཁའི་མཚན་ཉིད་ཡིན། །དེས་ན་ཁྱེད་ཀྱིས་རྡོ་རྗེ་ཡི། །དམ་ཚིག་རྗེས་སུ་རིག་པར་བྱ། །དེ་ལྟར་ཆོས་རྣམས་དངོས་མེད་ཅེས། །གསང་བའི་
དེ་ཉིད་དོན་མཁས་པས། །རྣམ་པར་སྨིན་པ་ལྡོག་བྱའི་ཕྱིར། །ཕུང་པོ་དེ་བཞིན་གཤེགས་པར་ཤེས། །དེ་ནས་བྱང་ཆུབ་སེམས་དཔའ་རྣམས། །ངོ་མཚར་རྨད་དུ་གྱུར་ནས་ནི། །དམ་པ་ཡིས་ནི་མིག་གདངས་ཏེ། །ཚིག་ནི་འདི་
སྐད་ཅེས་གསོལ་ཏོ། །ཆོས་འདི་ངོ་མཚར་རྨད་བྱུང་སྟེ། །ནམ་མཁའ་དང་ནི་མཚུངས་པ་ཡི། །མི་རྟོག་རྣམ་པར་དག་པ་ཡང་། །ཀུན་རྫོབ་ཏུ་ནི་བཤད་པར་མཛད། །དམ་ཚིག་ཆེན་པོ་ཡང་དག་གནས། །དགོངས་པ་ལུང་སྟོན་
མཆོག་ལ་ནི། །གང་ཞིག་ཡིད་འོང་བཟོད་གྱུར་པ། །དེ་ནི་དེ་བཞིན་སྤྱོད་པ་ཡིན། །མཆོག་དུ་དག་པའི་དེ་ཉིད་དོན། །གསང་བ་ཆེན་པོ་ཞེས་བྱ་བ། །དམ་ཚིག་ཚུལ་ནི་ཡང་དག་བཤད། །ལེའུ་དགུ་པ་རྫོགས་པ་ཡིན།། །།

88-1-283a

དེ་ནས་དེ་བཞིན་གཤེགས་པ་ཀུན། །རྡོ་རྗེ་གསུམ་འབྱུང་བཅོམ་ལྡན་འདས། །སླར་ཡང་དགོངས་པ་འདུས་ནས་ནི། །བླ་མ་ཆེན་པོ་བཅོམ་ལྡན་འདས། །དམ་ཚིག་རྡོ་རྗེ་དེ་ཉིད་གནས། །མངོན་
པར་བྱང་ཆུབ་དེད་དཔོན་ཉིད། །སྐུ་དང་གསུང་ཐུགས་གཙང་གཙོ་ལ། །བཏུད་དེ་དེ་བཞིན་གཤེགས་པས་གསོལ། །སྙིང་པོ་སྔགས་ནི་ཀུན་བསྡུས་པ། །གསང་བ་ཡང་དག་རྡོ་རྗེ་གསུམ། །དངོས་གྲུབ་ཆེན་པོའི་ཚུལ་གྱི་མཆོག །
དེ་ཉིད་བཅོམ་ལྡན་བཤད་དུ་གསོལ། །དེ་བཞིན་གཤེགས་པ་ཀུན་ཡེ་ཤེས། །སྐུ་གསུང་ཐུགས་ཀྱི་དངོས་གྲུབ་གསོལ། །གསུང་གཅིག་དུ་མའི་རྣམ་པར་རྟོག །ཡང་དག་བསྡུས་དོན་དེ་བཞིན་གཤེགས། །དེ་ནས་བདག་པོ་
བཅོམ་ལྡན་འདས། །ཉོན་མོངས་ཀུན་གྱི་རྒྱ་མཚོ་གཙོ། །འབར་བ་དྲག་པོ་སྤྱན་ཡངས་པས། །གསུང་ནི་འདི་སྐད་བཀའ་སྩལ་ཏོ། །སྐུ་ལ་སོགས་པའི་རྡོ་རྗེ་གསུམ། །སྐུ་དང་གསུང་ཐུགས་བསྒོམ་པ་ནི། །མཉམ་ཞིང་རྣམ་པར་
མི་རྟོག་པ། །དམིགས་པ་མེད་ཅིང་གནས་མེད་པའོ། །དེ་ནས་མགོན་པོ་བཅོམ་ལྡན་འདས། །རང་བཞིན་དག་པའི་དེ་བཞིན་གཤེགས། །ཕ་རོལ་ཕྱིན་པ་སྔགས་ཚུལ་གྱི། །རྡོ་རྗེ་ཞེས་བྱའི་ཏིང་འཛིན་ལ། །དཔའ་བོ་ཆེན་པོ་སྙོམས་
ཞུགས་ཏེ། །དེ་བཞིན་གཤེགས་ཀུན་ལ་གསུངས་པ། །གང་ཕྱིར་སངས་རྒྱས་བཅོམ་ལྡན་འདས། །དེ་བཞིན་གཤེགས་པ་ཀུན་འདི་ན། །མགོན་པོ་མི་བསྐྱོད་ལ་སོགས་པའི། །དེ་བཞིན་གཤེགས་པ་དུ་མ་དང་། །རིག་པ་བྱེ་
བ་ཁྲག་ཁྲིག་ནི། །བརྒྱ་སྟོང་དུ་མ་ཞེས་བྱ་དང་། །སེམས་ཅན་དོན་བྱ་ལ་རོལ་དང་། །མཆོག་ནི་དེ་རྣམས་སྟོན་པར་མཛད། །ཕྱོགས་བཅུའི་འཇིག་རྟེན་ཁམས་མཆོག་ཏུ། །འདོད་པའི་ཡོན་ཏན་ལྔར་ལྡན་པས། །རོལ་ཅིང་དགྱེས་
པར་གྱུར་པ་དང་། །ཡོངས་སུ་སྤྱོད་པ་ཡོད་ཀྱང་ནི། །སྔགས་སྤྱོད་པ་ལ་བརྩོན་རྣམས་ལ། །ཀྱེ་མ་དཔའ་བོ་དེ་བཞིན་གཤེགས། །རང་གཙོ་གསང་སྔགས་སྤྱོད་ཚུལ་མཆོག །ཆོས་བདག་མེད་པའི་རང་བཞིན་ཅན། །འདི་དག་

88-1-283b

རྫོགས་པར་གྱུར་སྙམ་ནས། །སྤྱན་རས་ཀྱིས་ནི་འཚོ་མི་མཛད། །དེ་ལྟར་རྣམ་པར་དཔྱད་པའི་དོན། །གསང་སྔགས་བརྟུལ་ཞུགས་སྤྱོད་རྣམས་ལ། །ཡང་དག་པར་ནི་བྱིན་བརླབས་ཕྱིར། །དེ་ནི་སྟོན་པར་མཛད་འདི་ཡིན། །དེ་ནས་
དེ་བཞིན་གཤེགས་པ་མཆོག །ཐུབ་ལ་ཕྱག་ན་རྡོ་རྗེས་གསོལ། །མགོན་པོ་དེ་བཞིན་གཤེགས་དེ་རྣམས། །སོ་སོ་སྐྱེ་བོར་གྱུར་པ་ལ། །དངོས་པོ་མེད་ཅིང་དམིགས་སུ་མེད། །ནམ་མཁའི་ཁམས་དང་མཉམ་གྱུར་ནས། །འདོད་
པའི་ཡོན་ཏན་ལྔར་ལྡན་ནས། །ཇི་ལྟར་དེ་རྣམས་རོལ་པར་མཛད། །དེ་རྣམས་ཕྱོགས་བཅུའི་འཇིག་རྟེན་དུ། །ངེས་པར་གྱུར་པའི་འཁོར་རྣམས་དང་། །སེམས་ཅན་དོན་གྱི་བྱ་བ་ཀུན། །འདོད་པས་སྟོན་པར་མཛད་པ་ཡིན། །
མགོན་པོ་འདོད་པའི་ཡོན་ཏན་རྣམས། །སྦྱིན་སོགས་དྲུག་ཅེས་བྱ་བར་འབྱུང་། །ཐམས་ཅད་དག་ཀྱང་དེ་ཉིད་འགྱུར། །ཕ་རོལ་ཕྱིན་པར་མཉམ་བཞག་ཉིད། །དེ་ལྟར་ཕ་རོལ་ཕྱིན་འབྱུང་བའི། །འདོད་པའི་ཡོན་ཏན་ལྔ་དང་
ལྡན། །འགྲོ་བའི་དོན་གྱི་བྱ་བ་ཡང་། །འདོད་པ་ལྔ་པོ་འདི་ཡིས་མཛད། །འདི་རྣམས་ཀྱིས་ནི་མགོན་པོ་འདི། །མི་བསྐྱོད་ལ་སོགས་རྒྱལ་བ་རྣམས། །རོལ་ཅིང་དགྱེས་པར་མཛད་པ་དང་། །འགྲོ་བའི་དོན་ཀྱང་མཛད་གྱུར་
ཅིང་། །འཇིག་རྟེན་པ་དང་འགལ་བྱ་རྣམས། །དེ་ཡང་དེ་བཞིན་མཛད་གྱུར་པ། །དག་པ་རྡོ་རྗེའི་ཚིག་མཆོག་འདི། །དེ་རྣམས་ཀྱིས་ནི་རྟོགས་པར་འགྱུར། །ཕྱག་བྱར་འོས་པའི་རིག་པ་ནི། །ངེས་པར་ལྡན་པ་ངེས་པར་འདོད། །ཡོད་
མེད་ལ་སོགས་བྱེད་པ་ནི། །གཉིས་འགྱུར་མཚན་མ་ཅན་དུ་འགྱུར། །ཕྱོགས་བཅུ་ལམ་དུ་ཆོས་གསུངས་པ། །གང་ཞིག་འཇིག་རྟེན་ཕུང་པོ་ལྔ། །ཁམས་ལ་སོགས་པར་མཚོན་པ་གང་། །གཟུགས་སོགས་ཞེས་བྱའི་མིང་
ཅན་ཡིན། །འདི་ནི་ཡན་ལག་ཐམས་ཅད་ནི། །བྱ་བ་ཉན་ཐོས་ཐེག་པའོ། །དེ་ཉིད་རྐྱེན་གྱི་ཐེག་པ་སྟེ། །ཚིག་དེ་སྟོན་པར་མཛད་པ་འདི། །གང་ཞིག་རྡོ་རྗེ་ཐེག་པར་གནས། །དེ་བཞིན་ཇི་བཞིན་སྒྲ་རུ་འཛིན། །ཤེས་

88-1-284a

རབ་ཕ་རོལ་ཕྱིན་པ་ལ། །ངེས་པར་འབྱུང་བའི་ཚུལ་གསུམ་པོ། །ཆོས་སྐུ་ངོ་བོ་ལ་སོགས་པ། །མཁའ་དབྱིངས་མཐའ་ཡས་རྣལ་འབྱོར་པ། །གནས་མེད་གནས་པར་སྦྱོར་བ་ཡིས། །འགྲོ་བའི་སྙིང་དུ་རྣམ་
རོལ་པ། །ཞི་བ་གཅིག་ལ་གནས་པའི་མགོན། །འཁོར་བ་དང་ནི་གཅིག་ཤོས་སྤངས། །སྔགས་ལས་ཡང་དག་འབྱུང་བ་དེ། །མི་བསྐྱོད་ལ་སོགས་པར་བརྟགས་རྣམས། །དངོས་མེད་གནས་ལ་གནས་པས་ན། །
སྒྲུབ་པ་པོ་རྣམས་གཟིགས་མི་འགྱུར། །གསང་སྔགས་རྐྱེན་གྱི་སྦྱོར་བ་ཡིས། །དེ་ནི་རྫོགས་ལོངས་སྤྱོད་གཟིགས་འགྱུར། །བཅོམ་ལྡན་གསང་བ་གསུངས་པ་འདི། །དོན་དེ་འཚལ་བར་མ་གྱུར་པས། །རྣམ་རྟོག་དུ་མའི་ཀུན་
རྟོག་ལས། །ཆོས་ཉིད་དེ་ཡིས་ཤེས་མི་འགྱུར། །ཇི་སྐད་གསུངས་པ་མི་ཤེས་པས། །ཕྱི་དུས་སྐྱེ་བོ་ལ་ལ་སྨྲ། །འཇིག་རྟེན་པ་རྣམས་དྲང་བྱའི་ཕྱིར། །གསང་བར་གྱུར་པ་བསྟན་དུ་གསོལ། །དེ་ནས་བཅོམ་ལྡན་སྣ་ཚོགས་
པས། །ལག་ན་རྡོ་རྗེ་གྲགས་པ་ཆེ། །དགོངས་པའི་དོན་ནི་རྟོགས་གྱུར་པ། །བུ་ཁྱོད་ཤེས་རབ་ཆེན་པོ་ལེགས། །གང་ཞིག་ཤེས་པས་མ་འོངས་པའི། །སྐྱེ་བོ་རྣམ་པར་མི་རྟོག་འགྱུར། །ཚིག་གཅིག་ལ་ཡང་སྣ་ཚོགས་དོན། །
ཡང་དག་བསྡུས་ནས་ཁྱོད་ཀྱིས་བཤད། །དེ་ནས་དམ་པ་བཅོམ་ལྡན་འདས། །བླ་མ་ཀུན་མཁྱེན་ཐམས་ཅད་རིག །སྐྱེས་བུ་དམ་པ་དེ་དག་ལ། །སྤྱན་རས་ཀྱིས་ནི་འཚོ་བྱའི་ཕྱིར། །རྡོ་རྗེ་གསུམ་གྱི་གསང་བ་འདི། །དེ་བཞིན་
གཤེགས་པ་ཀུན་གྱི་མཆོག །སྐུ་གསུང་ཐུགས་ཀྱི་རྡོ་རྗེ་ཡི། །གསང་བ་ཡི་ནི་མཆོག་གི་གནས། །སྙིང་པོ་སྔགས་རྣམས་ཐམས་ཅད་ཀྱི། །བསྐུལ་བ་གཅིག་པུ་ཞེས་བྱ་བ། །དེ་བཞིན་གཤེགས་ཀུན་གསང་གཅིག་པུ། །
མཆོག་ལས་མཆོག་ཏུ་གསུངས་གྱུར་པ། །སྐུ་གསུང་ཐུགས་ཀྱི་ཡང་དག་རྟོགས། །དམ་ཚིག་ལ་ནི་དམིགས་པ་དང་། །རྡོ་རྗེ་འཛིན་པའི་སྐུ་གསུང་ཐུགས། །དམ་ཚིག་ལ་ནི་དམིགས་པ་དང་། །ཆོས་འཛིན་པ་ཡི་སྐུ་གསུང་

88-1-284b

ཐུགས། །དམ་ཚིག་ལ་དམིགས་དེ་བཞིན་ནོ། །ཉིད་སྐུ་གསུང་ཐུགས་རྡོ་རྗེ་ལས། །ཚིག་ལ་ངེས་པར་བརྗོད་པ་ནི། །དེ་ཉིད་སྔགས་སུ་ཡང་དག་བསྡུས། །སྣ་ཚོགས་གསུང་བ་གཟུགས་གཅིག་པུ། །ཡི་གེ་ཧཱུྃ་ནི་གཅིག་
གསུངས་ལ། །དེ་ནས་ཡི་གེ་ཨོཾ་གསུངས་ཏེ། །དེ་བཞིན་མགོན་པོས་ཡི་གེ་ཨཱཿ། །སྭཱ་ནི་དེ་བཞིན་བཞི་པ་ཡིན། །ཧཱ་ཡང་འདོད་ལྷར་གྱུར་པ་སྟེ། །དེ་ནི་འདི་ལྟར་སངས་རྒྱས་ལྔ། །ཧཱུྃ་ཨོཾ་ཨཱཿསྭཱ་དེ་བཞིན་ཧཱ། །འདི་ནི་
གསུངས་པ་ཙམ་གྱིས་ནི། །སངས་རྒྱས་སྲས་དང་བཅས་པ་ཀུན། །རབ་ཏུ་འདར་ཞིང་བརྒྱལ་བར་གྱུར། །དེ་རྣམས་གཉིས་མེད་སྦྱོར་ལ་གནས། །རྡོ་རྗེ་སེམས་དཔའ་རྗེས་སུ་དྲན། །ཞི་བའི་སྦྱོར་བར་ཆོས་གཅིག་པའི། །
རྣམ་པར་མི་རྟོག་ཆོས་གཅིག་སྐྱེས། །དེ་ནས་བཅོམ་ལྡན་འདས་དེ་ཡང་། །དེ་བཞིན་གཤེགས་ཀུན་བདག་པོ་ཡིས། །དེ་ཡི་བྱིན་བརླབ་སྦྱོར་དོན་དུ། །དམ་ཚིག་འདི་དག་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་
གནས་པར། །དཀྱིལ་འཁོར་བཀོད་པ་ཞེས་བྱ་བ། །རེ་རེའང་གསུམ་གྱི་སྦྱོར་བ་ཡིས། །བསྒོམ་པའི་སྦྱོར་བ་བསྒོམ་པར་བྱ། །བྱེ་བྲག་གསུམ་པོ་གཅིག་བརྟགས་པའང་། །བཀོད་པ་མི་གསལ་བ་ཉིད་དོ། །ཟླ་བའི་
དབུས་གནས་ཡི་གེ་ཧཱུྃ། །རང་གི་གཟུགས་གཅིག་རབ་ཏུ་བརྟག །རྡོ་རྗེ་འོད་ཟེར་རབ་འབར་བ། །རྣམ་པར་འཕྲོ་བ་བསམ་པར་བྱ། །སངས་རྒྱས་རྣམས་ཀྱི་སྐུ་གསུང་ཐུགས། །སྙིང་ལ་དེ་ཡིས་རྣམ་བསྒོམས་ནས། །
དཔལ་ལྡན་དེ་ཉིད་སྐད་ཅིག་དེར། །རྡོ་རྗེ་གསུམ་གྱི་རྡོ་རྗེ་འཛིན། །རྡོ་རྗེ་སེམས་དཔའ་དབང་ཆེན་གཙོ། །འདི་ནི་ཀུན་མཆོག་ཆེན་པོར་སྐྱེ། །རང་གི་སྔགས་ཀྱིས་བསྐྱེད་བྱ་བ། །སྔགས་ཀྱི་ཆོ་ག་དམ་པའོ། །སྙིང་པོ་རང་གི་
རྡོ་རྗེ་སྔགས། །རྡོ་རྗེ་བསྡུས་པ་ཞེས་བཤད་དོ། །རང་སྔགས་ཚུལ་ལས་བྱུང་བའོ། །སྐྱེས་བུའི་གཟུགས་སུ་བསྒོམ་པར་བྱ། །སྦྱོར་བ་བཞི་པོ་སྦྱོར་གཅིག་པུས། །གནས་བཞི་དག་ཏུ་དེ་དགོད་དོ། །ཁ་དོག་གསུམ་

88-1-285a

པོ་ཞལ་གསུམ་ལྟའི། །དེ་ཉིད་གསུམ་གཅིག་རྣམ་བསྒོམ་ཞེས། །བཅོམ་ལྡན་འདས་མཆོག་ནམ་མཁའ་ནི། །རྡོ་རྗེ་དམ་ཚིག་གཙོ་བོས་གསུངས། །དེ་ནས་དེ་བཞིན་གཤེགས་པ་མཆོག །ཞི་བའི་
བདག་ཉིད་ཐུབ་པ་ཆེ། །གཙོ་ལ་ཕྱག་ན་རྡོ་རྗེ་ཡིས། །གསང་བ་འདི་ནི་སླར་ཞུས་པ། །ཧཱུྃ་ཨོཾ་ཨཱཿདང་སྭཱ་ཧཱ་ཞེས། །དེ་ནས་འདི་ནི་གསུངས་གྱུར་པས། །སངས་རྒྱས་སྲས་དང་བཅས་པ་ཀུན། །དེ་ནས་རབ་འདར་
བརྒྱལ་གྱུར་ཅིང་། །རྡོ་རྗེ་སེམས་དཔའ་རྗེས་དྲན་པ། །ཐུབ་ཆེན་དེ་འདིར་ཇི་ལྟ་བུར། །མགོན་པོ་དེ་ནི་ཕྱི་དུས་ན། །ཇི་སྐད་གསུངས་པ་མི་རྟོགས་ལ། །གཅིག་པུ་མཁའ་མཉམ་སངས་རྒྱས་དང་། །བྱང་ཆུབ་སེམས་
དཔའ་མཐུ་ཆེན་རྣམས། །རབ་ཏུ་འདར་ཞིང་བརྒྱལ་གྱུར་ཅེས། །བྱིས་པ་རྣམས་ཀྱིས་མི་རྟོགས་སོ། །ལན་བརྒྱ་སྟོང་དང་བྱེ་བ་ཡི། །གྲངས་དག་ཏུ་ནི་སྟོན་མཛད་ཅིང་། །སྟོན་པ་སྣ་ཚོགས་སྟོན་མཛད་ཀྱང་། །འདར་ཞིང་
བརྒྱལ་བར་དེ་མ་གྱུར། །མ་འོངས་དུས་ནའང་འབྱུང་འགྱུར་བ། །མི་མཁས་པ་ཡི་ང་རྒྱལ་ཅན། །བླ་མའི་ལུང་ནི་བླངས་ནས་སུ། །རྟགས་ནི་རང་ཉིད་འཛིན་པར་བྱེད། །དེ་ནི་སྔགས་དོན་གསུངས་པ་ཡི། །མཚན་ཉིད་
གསང་འདི་མི་ཤེས་པར། །སྔགས་དོན་དེ་ཉིད་མཁས་པ་ཡི། །གཞན་རྣམས་ལ་ནི་མི་སྙན་སྒྲོགས། །འཁྲུལ་པ་ཅུང་ཟད་ཙམ་མཐོང་ན། །བཞད་གད་དག་ནི་བྱེད་པར་འགྱུར། །རེག་ན་དུག་དང་མཚུངས་པ་ཡི། །མི་དེ་
ཞི་བར་མི་འགྱུར་རོ། །གང་ཞིག་ཡིད་ནི་རིན་ཆེན་འདྲའི། །འགྲོ་ལ་ཕན་པའི་སྔགས་པ་རྣམས། །འདི་ནི་མ་འོངས་དུས་སུ་ཡང་། །དངོས་གྲུབ་མཆོག་ནི་ཐོབ་པར་འགྱུར། །དེ་རྣམས་ཡང་དག་བསྡུ་བའི་ཕྱིར། །སྐད་ཅིག་
རྗེས་གསུང་གྲུབ་དོན་དུ། །སྦྱོར་བར་དགོངས་པའི་བསམ་པ་ཅན། བཅོམ་ལྡན་འདི་ནི་བཤད་དུ་གསོལ། །དེ་ནས་སྟོན་པ་བཅོམ་ལྡན་འདས། །འགྲོ་ཕན་ཕྱག་ན་རྡོ་རྗེ་ལ། །དེ་ལྟར་སྦྱོར་བ་ཡང་དག་སྦྱོར། །བསྒོམ་པའི་

88-1-285b

དངོས་པོ་རྟོག་བྱེད་པ། །དབང་པོ་ཉི་མ་ཐུབ་པ་ཉིད། །གང་ཞིག་ཕྱོགས་བཅུར་གནས་པ་རྣམས། །སྲས་བཅས་སངས་རྒྱས་ཞེས་བྱ་བའི། །དེ་བཞིན་གཤེགས་པ་ཐམས་ཅད་གྱུར། །ཕུང་པོ་ལ་སོགས་གྲངས་
མཉམ་པའི། །ལུས་ལས་སྐྱེས་ཏེ་ཡོད་པ་འདི། །སྟོང་པའི་རྐྱེན་དུ་སྦྱོར་བ་ལས། །སངས་རྒྱས་སྲས་དང་བཅས་འགྱུར་འདོད། །སྔགས་དེ་སྔགས་པ་སངས་རྒྱས་དེ། །བདག་ཉིད་དེ་སྲས་ཡང་དག་སྦྱོར། །ཞི་སོགས་
མཉམ་པའི་སྦྱོར་བ་ལས། །ཞི་བའི་བདེ་བ་དེ་ནས་བརྩམ། །བདག་ཉིད་རང་བཞིན་གྱིས་དག་ཅིང་། །རང་བཞིན་དྲི་མ་མེད་བྱས་ལ། །དལ་དང་མྱུར་དང་གནས་པ་ཡི། །སྣ་ཚོགས་དེ་གཅིག་དག་ལ་བཞུགས། །ཡིད་དམན་
རིམ་ལ་སོགས་པས་ཀྱང་། །སྦྱོར་བ་དེ་ཉིད་དག་ལ་གནས། །དེ་ནས་དབང་པོ་མེད་གྱུར་པ། །གང་ཚེ་ཞི་བའི་བདེ་གཅིག་པུ། །རང་བཞིན་དག་པའི་སྦྱོར་བ་སྟེ། །དེ་ཡི་ཆོས་ནི་ལྟ་བ་པོ། །དེ་ནས་རྫོགས་ལོངས་སྤྱོད་པའི་སྔགས། །
སངས་རྒྱས་ཐམས་ཅད་འཇམ་ལས་བྱུང་། །གང་ཕྱིར་དང་ནི་ཟློ་གྱུར་པ། །ཡི་གེ་ཧཱུྃ་གི་གསང་སྔགས་ལྔ། །དེ་ཚེ་སྙིང་ལས་རབ་འདར་ཞིང་། །དབང་པོ་ཐམས་ཅད་བརྒྱལ་བར་འགྱུར། །གང་ཡང་ཕུང་སོགས་ཡན་ལག་ནི། །སྲས་
བཅས་སངས་རྒྱས་ཐམས་ཅད་དེ། །དེ་ཉིད་ཀྱི་ནི་གྲངས་མཉམ་པའི། །རྣལ་འབྱོར་པ་ཡི་ལུས་རབ་འདར། །ཉེ་བར་མཚོན་སོགས་ཚིག་རྣམས་ནི། །ཕུང་པོ་ལ་སོགས་བཤད་པ་གང་། །སངས་རྒྱས་སྲས་བཅས་པར་གྱུར་ཏེ། །
དེས་ནི་བརྒྱལ་ཞིང་འདར་བར་འགྱུར། །དེ་གཉིས་ལ་ནི་སྙོམས་འཇུག་པ། །སངས་རྒྱས་ཐམས་ཅད་སྲས་དང་བཅས། །རྡོ་རྗེ་སེམས་དཔའ་ཉིད་དྲན་ཏེ། །དེ་སྔགས་བདག་ཉིད་དངོས་ལས་བྱུང་། །དེ་འདིར་མཆོག་ཏུ་བཤད་
པ་ཡིན། །རྡོ་རྗེ་གསང་བ་རྨད་བྱུང་བ། །ཕྲ་མོའི་སྙིང་གང་དབུས་གནས་པ། །དཀྱིལ་འཁོར་རྣམ་པར་བསམ་པའོ། །དེ་ཡི་དབུས་གནས་ཞི་བ་ཡི། །གོ་འཕང་མཆོག་ནི་བསམ་པར་བྱ། །དེ་ཧཱུྃ་ཞེས་བྱའི་འོད་པོ་ཆེ། །དེ་ཡོངས་

88-1-286a

གྱུར་པའི་རྡོ་རྗེ་ནི། །འདི་ནི་མཆོག་གྱུར་རྩེ་ལྔ་པ། །རྣལ་འབྱོར་པ་ཡིས་རྟག་ཏུ་བསྒོམ། །རྡོ་རྗེ་ལྕགས་ཀྱུའི་སྦྱོར་བ་ཡིས། །རྡོ་རྗེ་གསུམ་ནི་བསམ་པར་བྱ། །དེ་ཡི་སྙིང་གར་བསྡམས་ནས་ནི། །ལྷ་རྣམས་རབ་ཏུ་བསྐུལ་
བར་བྱ། །འདི་ནི་སངས་རྒྱས་ཐམས་ཅད་ཀྱི། །རྡོ་རྗེ་ཐམས་ཅད་རབ་བསྒྲུབ་པའོ། །འཁོར་ལོ་པད་མའི་རིགས་སོགས་པའང་། །རོལ་མོ་འདི་ནི་དམ་པ་སྟེ། །རྡོ་རྗེ་ལྕགས་ཀྱུ་རྣམ་བསྒོམས་ནས། །སྙིང་ག་རུ་ནི་བསྐུལ་བར་
འགྱུར། །རྡོ་རྗེ་ཡི་ནི་ཚུལ་མཆོག་འདི། །ཞག་བདུན་བར་དུ་བྱས་ནས་ནི། །ཡེ་ཤེས་རྡོ་རྗེ་ཅན་གྱི་གསང་། །རྡོ་རྗེ་གསུམ་པོ་ཡང་དག་བསྒྲུབ། །ཕུང་པོ་ལ་སོགས་སངས་རྒྱས་གང་། །དེ་ནི་དངོས་པོ་མེད་ལྟ་བ། །དེ་ཉིད་
མཆོག་གི་གསང་སྔགས་ཀྱིས། །སྐྲག་པ་རྣམ་སྨིན་མཐོང་བ་ལ། །སྐྲག་པ་མི་རྣམས་འདི་དག་སྟེ། །གསང་སྔགས་གཉིས་མེད་སྦྱོར་གཅིག་བྱུང་། །མཐོང་བས་སྐྲག་སྟེ་མཆོག་སྟེར་ཅིང་། །འདི་དག་
འདི་ཉིད་བརྟགས་པ་ཡིན། །ཞི་བ་གཅིག་པུའི་སྦྱོར་བ་ལས། །སྔགས་ལུས་རྫོགས་པ་ཉིད་གྱུར་ནས། །ཡིད་ལ་མགུ་ཞིང་དགའ་གྱུར་པའི། །དངོས་གྲུབ་རྒྱ་ཆེན་སྟེར་བར་འགྱུར། །ཕུང་པོ་ལ་བརྟགས་སངས་
རྒྱས་དང་། །དེ་བཞིན་བྱང་ཆུབ་སེམས་དཔའ་རྣམས། །སྔགས་ཀྱི་སྦྱོར་བའི་དོན་བསྒྲུབ་པས། །རྨོངས་པས་འདའ་བ་བྱས་ནས་ནི། །དེ་ཡི་སྲོག་ནི་དེར་ཟད་འགྱུར། །ཞི་བ་ཉིད་ཀྱི་སྦྱོར་གཅིག་ལས། །འདི་ནི་
འཇིག་རྟེན་འདས་པ་མཆོག །དེ་ལས་བཟློག་པ་འཇིག་རྟེན་པའོ། །དེ་ནས་བདག་པོ་བཅོམ་ལྡན་འདས། །འཇིག་རྟེན་གསུམ་གཙོ་སྟོན་པ་པོ། །འཇིག་རྟེན་གསུམ་མཆོག་རྡོ་རྗེ་གཙོས། །གསུང་ནི་འདི་སྐད་
བཀའ་སྩལ་ཏོ། །གང་ཞིག་སྔགས་ཀྱི་སྐྱེས་བུར་བཤད། །རྡོ་རྗེ་གསུམ་གྱི་ཡེ་ཤེས་གཟུགས། །དེ་ནི་དབང་པོ་གཉིས་སྦྱོར་བའི། །གཅིག་པར་བསྒོམ་པ་རྟག་ཏུ་བྱེད། །བདག་དམྱིགས་སེམས་ཅན་ཡོད་མིན་པའི། །

88-1-286b

སྔགས་ཀྱི་དབང་པོ་རྣམ་བསྒོམ་པ། །དབང་པོ་གཉིས་སྦྱོར་བཟང་པོ་སྟེ། །དངོས་པོ་ཐམས་ཅད་རྣམ་བརྟགས་པའོ། །འདི་ནི་སངས་རྒྱས་ཐམས་ཅད་ཀྱི། །སྔགས་ཀྱི་དམ་ཚིག་མཆོག་བསྒོམ་པའོ། །རང་གཟུགས་རྡོ་རྗེ་
ཡང་དག་སྦྱོར། །རིག་མ་དབང་ཕྱུག་བདག་ཀྱང་བསྒོམ། །གཉིས་མེད་གཉིས་སུ་མེད་ཆགས་པ། །ལྟ་བ་དམ་ཚིག་དཀྱིལ་འཁོར་རོ། །གསང་བ་ཞེས་བྱ་དེར་སྦྱར་བ། །དེ་ཉིད་མཉམ་པའི་བདག་ཉིད་དོ། །དེ་ནས་སྟོན་
པ་བཅོམ་ལྡན་འདས། །ཐམས་ཅད་དབང་བསྐུར་དམ་པ་ནི། །མི་ཕྱེད་རྡོ་རྗེ་གསུམ་གྲུབ་པ། །གསང་བའི་དགོངས་པ་བཀའ་སྩལ་ཏོ། །ནམ་མཁའ་མཐའ་ཡས་སྦྱོར་བ་ཡིས། །ཕུང་པོ་བདག་ཉིད་མི་དམིགས་པ། །
ཆོས་ཀྱི་དབྱིངས་ལ་སོགས་པའི་རིམ། །བུད་མེད་དེ་ནི་རྒྱ་ཆེན་འགྱུར། །རབ་ཏུ་སྦྱོར་བ་འདི་ཡིས་ནི། །འགྲོ་བའི་བུད་མེད་ཅེས་བྱ་བ། །གསང་སྔགས་དེ་ཉིད་དོན་གསང་ཉིད། །དེ་ནི་གསང་བས་ཉེ་བར་སྤྱོད། །དེར་ནི་ཡིད་འོང་
སངས་རྒྱས་རྣམས། །བྱེ་བ་གྲངས་མེད་རྡོ་རྗེ་འཛིན། །སྔགས་རིག་དམ་པ་སྤྲོ་འོ་ཞེས། །དེར་ནི་བཅོམ་ལྡན་གཙོ་བོས་གསུངས། །བྱང་ཆུབ་སེམས་དཔའི་དམ་ཚིག་ནི། །སྟོན་པ་འདིར་ནི་བླ་མ་ཆེར། །འཇིག་རྟེན་པ་ལ་འདིར་
བཤད་དེ། །འཇིག་རྟེན་འདས་པ་ཟློག་པའོ། །ནམ་མཁའ་ལྟ་བུའི་བྱང་ཆུབ་ནི། །འདི་ཡིས་ཤིན་དུ་ཐོབ་པར་འགྱུར། །བྱང་ཆུབ་སེམས་ཀྱི་ཡོན་ཏན་མཚོ། །རྡོ་རྗེ་སེམས་དཔའ་མཆོག་དེས་འཐོབ། །དགོངས་པ་ལུང་བསྟན་
གསང་བ་ལ། །གང་ཞིག་སེམས་ནི་དད་གྱུར་པ། །གསང་བ་འབད་དེ་ཡང་དག་བསྲུང་། །དེ་ནི་རྟག་ཏུ་ལེགས་པར་བྱེད། །རྡོ་རྗེ་གསུམ་གྱི་གསང་བ་ལས། །དེ་བཞིན་གཤེགས་པ་ཀུན་གྱི་ཡང་། །དེ་ཉིད་བསྐུལ་བ་ཞེས་བྱ་བ། །
ལེའུ་བཅུ་པ་ཡིན་པར་བཤད།། །། དེ་ནས་སྟོན་པ་བཅོམ་ལྡན་འདས། །རྡོ་རྗེ་གསུམ་མཆོག་མཆོག་གསོལ་པ། །དེ་བཞིན་གཤེགས་པ་ཀུན་མཆོག་གཅིག །ཉི་ཤུ་རྩ་ལྔ་མཆོག་ཅེས་

88-1-287a

བྱའི། །ཏིང་ངེ་འཛིན་ལ་སྙོམས་ཞུགས་ནས། །དེ་བཞིན་གཤེགས་ཀུན་རྡོ་རྗེ་ཡི། །སྔགས་རིག་སྐྱེས་བུ་ཞེས་བྱ་བའི། །ལེའུ་འདི་ནི་བཀའ་སྩལ་ཏོ། །སྔགས་མཆོག་དེ་ནི་ཕྱག་རྒྱ་ཆེ། །རྡོ་རྗེ་གསུམ་གྱི་ཡེ་ཤེས་བསྒོམ། །
རྟོགས་དང་བྲི་བ་འཐོབ་པའི་ཕྱིར། །རྡོ་རྗེ་ཡེ་ཤེས་དག་གིས་ཀྱང་། །ཚངས་པ་ལ་སོགས་ཡང་དག་བཤད། །ཡེ་ཤེས་སྙིང་པོ་དམ་པ་སྟེ། །རྡོ་རྗེ་གསུམ་སོགས་བཤད་གྱུར་པ། །སྐུ་ཡི་རྡོ་རྗེ་འཐོབ་བྱེད་པའོ། །ཨ་དང་ཟུང་
ནི་གསུང་རྡོ་རྗེ། །བྱང་ཆུབ་བདག་མེད་འཐོབ་བྱེད་པའོ། །ཧཱུྃ་ནི་རྡོ་རྗེ་གསུམ་མཐའ་ཉིད། །སྐུ་གསུང་ཐུགས་ནི་འཐོབ་བྱེད་པའོ། །དེ་ནི་འཇུག་སོགས་གནས་ཉིད་དང་། །ལྡང་བ་དག་ཏུ་རབ་ཏུ་བཤད། །ཉི་ཤུ་ལྔ་སོགས་མིང་
ཅན་གྱི། །སྐྱེས་བུའི་གཟུགས་སུ་འདི་འགྱུར་རོ། །དེ་བས་རེ་རེའང་གསུམ་ཉིད་དེ། །རྡོ་རྗེ་གསང་སྔགས་ཉིད་དུ་འགྱུར། །བརྗོད་མེད་ས་བོན་བརྒྱད་པ་ལས། །དེ་ནི་ནམ་མཁའ་ལས་བརྒྱར་འགྱུར། །བརྒྱ་ཕྱེད་རླུང་ནི་གཅིག་པུ་ལ། །
དེ་ལས་ངེས་པར་ཉི་ཤུ་ལྔ། །སྐྱེས་བུ་ཉིད་དུ་བྱུང་བ་ན། །མགྲིན་བཅུ་ཞེས་བྱའི་མིང་ཅན་དང་། །སྒྲ་སྒྲོགས་གསོད་པའི་དགའ་བྱེད་འགྱུར། །དེ་ནས་ཚངས་པ་གཅིག་ཉིད་གྱུར། །ཚངས་པ་ཁྱབ་འཇུག་དྲག་པོ་སྟེ། །འཇུག་པ་
ལ་སོགས་རིམ་དུ་བཤད། །འདི་དག་བསྙེངས་མེད་དེ་གཅིག་པུ། །དེ་ནི་ཞི་བ་དངོས་མེད་ཉིད། །དེ་ལས་ཀྱང་ནི་ཡང་དག་འབྱུང་། །ལོངས་སྤྱོད་རྫོགས་སྐུ་དམ་པའོ། །དེ་ནས་སྔགས་གཅིག་སྤྲུལ་པ་ལས། །འགྲོ་བའི་དོན་
གྱི་བྱ་བར་འགྱུར། །མཚམས་དང་སྐྱེ་མཆེད་ནོར་ལྷའོ། །ཟླ་བ་ཟུང་གཅིག་རིག་བྱེད་དེ། །དེ་ལ་སོགས་པའི་གྲངས་གྱུར་རྣམས། །དེ་ནི་རིག་པའི་སྐྱེས་བུར་གནས། །འདི་རྣམས་ལས་གཅིག་བཟུང་ནས་ནི། །སངས་རྒྱས་རོལ་
མོ་བསྟན་པར་བྱ། །རྡོ་རྗེ་སེམས་དཔའ་དེ་ཉིད་འདི། །ནམ་མཁའ་རྡོ་རྗེ་དབུས་སུ་བསམ། །དཀྱིལ་འཁོར་བརྒྱན་པ་ཞེས་བཤད་པ། །ཡི་གེ་ཧཱུྃ་ནི་དེས་བསམ་མོ། །རྡོ་རྗེ་སྤྲིན་ནི་སྤྲོ་བསྐྱེད་པའི། །དེ་བཞིན་གཤེགས་པ་དྲུག་

88-1-287b

གི་སྐུ། །དེ་དབུས་གནས་པའི་རྣལ་འབྱོར་པར། །བསྒོམ་པའི་བདག་ཉིད་ཅན་གྱིས་བསྒོམ། །སྔགས་རྣམས་ཀུན་གྱི་གཙུག་ཏོར་ནི། །སྔགས་ཀྱི་སྐྱེས་བུ་གསང་བ་པ། །གཅིག་པུ་ཉིད་ནི་བདག་པོར་གྱུར། །སྔགས་སྤྱོད་དོན་
ནི་སྒྲུབ་པ་པོ། །ཆོས་འཁོར་ལོ་གཅིག་འཁོར་ལོ་མཆོག །རྒྱལ་དང་རྨད་བྱུང་ཆེ་གཙུག་ཏོར། །ལུས་དང་རྣམ་པར་རྒྱལ་དེ་བཞིན། །བྱ་བ་མཆོག་ཏུ་ཡང་དག་བཤད། །སྦྱོར་དང་བྱ་བ་གཉིས་མེད་བཞིན། །སྦྱོར་བ་འབའ་
ཤིག་ཉིད་ལ་འདི། །བྷྲུྃ་ནི་གཙུག་ཏོར་ཡིན་པར་བསྟན། །ཡེ་ཤེས་རྡོ་རྗེ་སྙིང་པོ་འདི། །དུས་སྦྱོར་གཅིག་གི་མིང་ཅན་ནོ། །ནམ་མཁའི་ཁམས་དང་མཉམ་ཉིད་ལྡན། །སྔགས་ཀྱི་སྐྱེས་བུ་དངོས་གྲུབ་སྩོལ། །རྡོ་རྗེའི་དཀྱིལ་
འཁོར་དབུས་གནས་པར། །ཨོཾ་ཞེས་བྱ་བ་དེ་རུ་བསྒོམ། །ཕྲ་མོའི་དཀྱིལ་འཁོར་དབུས་གནས་པར། །ཡི་གེ་ཨཱཿནི་རྣམ་པར་བསྒོམ། །ཆོས་ཀྱི་དཀྱིལ་འཁོར་སྦྱོར་བ་ལའང་། །ཡི་གེ་ཧཱུྃ་ནི་དེ་རུ་བསྒོམ། །ཡི་གེ་བྲུྃ་
ནི་གནས་མིང་ཅན། །རྡོ་རྗེ་གསུམ་འབྱུང་བསྒོམ་པར་བྱ། །གསང་བའི་དམ་ཚིག་འདི་ཉིད་དེ། །རྡོ་རྗེ་གསུམ་འབྱུང་བཀའ་སྩལ་ཏོ། །སྙིང་པོ་དུས་གསུམ་སངས་རྒྱས་ཀྱི། །རྡོ་རྗེ་གསུམ་ནི་མཉེས་བྱེད་མཆོག །སྐུ་དང་
གསུང་ཐུགས་ཐོག་མ་མཐའ། །ཨོཾ་ཨཱཿཧཱུཾ་གི་གྲངས་དང་མཉམ། །སངས་རྒྱས་སྐུ་མཆོག་གསུང་གི་ལམ། །ཐུགས་ཀྱི་ཡེ་ཤེས་འཇིངས་སུ་བྱ། །རང་ཉིད་འདོན་པ་ཉིད་དུ་ནི། །རེ་རེ་ཞིང་ནི་ཡང་དག་བཤད། །སྔགས་ཀྱི་
སྐྱེས་བུའི་སྦྱོར་བ་ཡང་། །རྒྱུ་ཡི་བདག་ཉིད་མིང་ཅན་ཡིན། །བྱང་ཆུབ་ཚུལ་མཆོག་འདི་ཡིན་ཏེ། །སངས་རྒྱས་བྱང་ཆུབ་རབ་བསྒྲུབ་པའོ། །རྡོ་རྗེ་ཡེ་ཤེས་སྤྲུལ་པ་སྟེ། །སངས་རྒྱས་འབྲས་བུ་ཐོབ་བྱེད་པའོ། །སྔགས་
ཀྱི་རིག་པ་ཞེས་བསྒྲགས་པ། །འདི་ནི་སངས་རྒྱས་སྐྱེས་བུ་ཡིན། །རྡོ་རྗེ་གསུམ་མཉམ་མི་ཕྱེད་པ། །རྫོགས་པ་ལ་སོགས་བསྒོམ་པ་ཡི། །དེ་བཞིན་གཤེགས་ཀུན་རྡོ་རྗེ་ནི། །གསུམ་པོ་ཡེ་ཤེས་རྡོ་རྗེ་སྩོལ། །བྱིན་

88-1-288a

བརླབས་དཔལ་ཆེན་ཞེས་བྱ་བའི། །དམ་ཚིག་ཏིང་འཛིན་གྱུར་པ་ཡིན། །རྣམ་པར་དབེན་དང་ཅི་རིགས་པའི། །སྟན་དག་ལ་ནི་སྦྱོར་བ་བཞི། །རིག་པའི་སྐྱེས་བུར་ཡང་དག་སྦྱོར། །བརྟུལ་ཞུགས་ཅན་གྱིས་
ཀུན་དུ་བརྩམ། །ཐབས་དང་ཤེས་རབ་ཉི་ཟླ་ཕྱེད། །ཐུན་གཅིག་ཏུ་ནི་རབ་ཏུ་བརྟག །དེ་ཡི་ཕྱེད་ཉིད་ཟླ་ཕྱེད་ཀྱིས། །རྡོ་རྗེ་གསུམ་ནི་ངེས་པར་འགྲུབ། །འཇིག་རྟེན་འདས་པའི་རང་བཞིན་ཉིད། །འཇིག་རྟེན་པའི་ཡང་ཕྱིན་
ཅི་ལོག །རྡོ་རྗེ་གསུམ་སྦྱོར་སྩོལ་དངོས་གྲུབ། །གྲུབ་པར་འགྱུར་བར་ཐེ་ཚོམ་མེད། །ནམ་མཁའི་རྡོ་རྗེ་དབུས་གནས་པར། །ཕྲ་མོའི་དཀྱིལ་འཁོར་བསམ་པར་བྱ། །རང་གི་སྔགས་ཀྱི་དམ་ཚིག་དུས། །བསྐྱོད་པ་ཡི་
གེ་ཨོཾ་བསྒོམ་བྱ། །སྦྱོར་བ་བཞི་ཡི་གཏན་ཚིགས་གང་། །སྙིང་པོར་ཡོངས་སུ་བརྟགས་པ་ཡིན། །སྣ་རྩེ་དང་ནི་རྩ་བ་ཉིད། །སྤྱི་བོ་མཐའ་ནི་དགའ་ལྡན་གནས། །གཅིག་དང་གསུམ་གྱི་དངོས་པོར་འགྱུར། །དག་པའི་
གནས་ཀྱི་གྲོང་ཁྱེར་བ། །ཕྱེད་པོས་གསུམ་གྱི་མིང་ཅན་ནི། །རིགས་ཀྱི་དབྱེ་བ་རྡོ་རྗེ་གསུམ། །སྣ་ཡི་རྩེ་མོ་སྦྱོར་བ་ཡིས། །རྡོ་རྗེ་གསུམ་སྦྱོར་བརྟུལ་ཞུགས་ཅན། །མཱ་མ་ཀཱི་དང་གོས་དཀར་མོ། །སྒྲོལ་མ་གཏོགས་པ་
སངས་རྒྱས་སྤྱན། །འོད་ཟེར་ལྔ་ཡི་སྤྲིན་ཆེན་པོ། །རྣམ་པར་སྣང་མཛད་གཉིས་མེད་གནས། །རྡོ་རྗེ་རྣམ་སྣང་དེ་ལས་ནི། །དངོས་གྲུབ་རྒྱ་ཆེན་གསོལ་བར་འགྱུར། །སངས་རྒྱས་སྐུ་ཡི་འོད་འདྲ་བ། །སྐད་ཅིག་དེར་འགྲུབ་
རྣལ་འབྱོར་པ། །ཡེ་ཤེས་ལྔ་པོ་བསྟེན་ནས་ནི། །རྡོ་རྗེ་བསྐལ་པ་གསུམ་དུ་གནས། །ཡེ་ཤེས་འདས་དང་མ་འོངས་དང་། །ད་ལྟར་བྱུང་བ་རྡོ་རྗེ་གསུམ། །དེ་འདིར་བསྐལ་པར་བརྟགས་གྱུར་པ། །གྲངས་མེད་ཅེས་བྱ་དེ་ཉིད་དོ། །
སྐུ་ཡི་གསང་བ་དེ་ཉིད་འདི། །འཇིག་རྟེན་འདས་པའི་རིམ་པར་གསུངས། །ཞི་བའི་བདེ་ལས་ཤེས་བྱ་བ། །རང་མྱོང་སྦྱོར་བ་གཅིག་ལས་དེ། །སྐུ་ཡི་གསང་བ་མཆོག་འདི་ནི། །དེ་བཞིན་གཤེགས་པ་ཀུན་གྱིས་གསུངས། །རྡོ་རྗེ་

88-1-288b

འོད་ཟེར་བཀོད་པ་ཡི། །ཏིང་འཛིན་ཡང་དག་བཀའ་སྩལ་ཏོ། །ཨ་དང་ཨུ་ནི་ལྐོག་ཁའི་དབུས། །རྐན་གྱི་སྟེང་གི་མིང་ཅན་ནོ། །ཨི་དང་ཙ་ནི་ལག་གཡོན་ཉིད། །ཨུ་དང་མུ་ནི་གཡས་པར་བརྟག །ར་ཛུ་འདི་ནི་གསང་
བར་དགོད། །ལྀ་ཏི་རྐང་པ་གཅིག་ཤོས་ལ། །དཀྱིལ་འཁོར་གཅིག་ནི་དེ་ཉིད་དོ། །དཀྱིལ་འཁོར་ལྔ་ལས་རྒྱལ་གྱུར་པ། །ཧ་ནི་ལུས་སྐྱེས་གཙུག་ཏོར་དང་། །གཅོད་ནི་གསུམ་པོ་གཅོད་པ་ཅན། །ཡོན་ཏན་བཞི་ཡི་
བཞི་པོ་དེ། །ལྔ་པོའི་ལྔ་པར་དེ་འགྱུར་རོ། །ནམ་མཁའི་རྡོ་རྗེ་གཅིག་ཕྱེད་སྦྱོར། །དེ་ནི་འོད་ཟེར་ལྔར་འགྱུར་རོ། །རིག་པ་ཆེན་པོ་དེ་ཉིད་འདི། །ཆ་ཞེས་བྱ་བར་དེ་ཡོངས་བསྒྲགས། །དུས་ཅན་བདག་ཉིད་སྦྱོར་དབང་པོ། །
དེ་ཡི་རང་སྦྱོར་གཟུགས་ཅན་གཅིག །ཨ་ནི་ཐབས་འགྱུར་སྦྱོར་བ་ནི། །དབང་པོ་གཉིས་པོ་གཅིག་ཏུའོ། །ནམ་མཁའི་རྡོ་རྗེ་དབུས་གནས་པར། །ཆོས་ཀྱི་དཀྱིལ་འཁོར་མཆོག་བསམ་པ། །རང་སྔགས་སྐྱེས་བུ་བསམས་
ནས་ནི། །ཨ་ནི་ངག་གི་ལམ་དུ་བཞག །ཁ་དོག་ལྔ་ཡི་ཀུན་ནས་ནི། །བརྒྱན་པའི་རྡོ་རྗེ་ཆེན་པོ་དག །འཇིག་རྟེན་དབང་ཕྱུག་མཆོག་བསྒོམ་པས། །དམ་ཚིག་ཡེ་ཤེས་བསྒོམ་པར་བྱ། །གསུང་གི་དམ་ཚིག་སྤྲོས་པར་བཤད། །
ཁྱབ་བདག་མི་ཟད་རྟག་པ་སྟེ། །ཐོག་མཐའ་མེད་པའི་མཐར་ཐུག་པ། །ཞི་བ་མྱ་ངན་འདས་ཞེས་བྱ། །ཆོས་ཀྱི་གསུང་ལས་རྣལ་འབྱོར་དབང་། །རྡོ་རྗེ་ཆོས་དང་འདྲ་བར་འགྱུར། །ཡེ་ཤེས་ལྔ་ལྡན་བསྟེན་ན་ནི། །རྡོ་རྗེ་གསུམ་གྱི་
བསྐལ་པར་གནས། །གསུང་གི་གསང་བ་འདི་ཉིད་ནི། །དེ་བཞིན་གཤེགས་པ་ཀུན་གྱིས་གསུངས། །དམ་ཚིག་འབྱུང་བ་ཞེས་བྱ་བ། །ཏིང་ངེ་འཛིན་དུ་ཡོངས་སུ་བསྒྲགས། །ནམ་མཁའ་རྡོ་རྗེ་དབུས་གནས་མཆོག །རྡོ་རྗེའི་
དཀྱིལ་འཁོར་དམ་པ་ནི། །དེ་ནི་རང་སྔགས་སྐྱེས་བུ་དམ། །ཧཱུྃ་ནི་སེམས་ལ་གནས་རྫོགས་བྱ། །དམ་ཚིག་ཆེན་པོ་དེ་ཉིད་ཅན། །ཁ་དོག་རྣམ་ལྔ་བསྒོམ་པར་བྱ། །རྡོ་རྗེ་ཀུན་དང་རྒྱལ་བའི་གནས། །ཡེ་ཤེས་རྡོ་རྗེ་དག་གིས་བྱ། །

88-1-289a

སྟོན་པ་རྡོ་རྗེའི་ཐུགས་འདྲ་བ། །ཡང་དག་ཡེ་ཤེས་ཡོན་ཏན་མཚོ། །ཡེ་ཤེས་ལྔ་ལྡན་བསྟེན་ན་ནི། །རྡོ་རྗེ་བསྐལ་པ་གསུམ་དུ་གནས། །ལྐོག་མ་རྐན་དང་དེ་ནས་མཆུ། །སྤྱི་བོ་ས་ཡི་མིང་ཅན་ཏེ། །རྡོ་རྗེ་
གསུམ་ཐུགས་གསང་བ་གཅིག །དེ་ནི་ཧྃ་ལ་ཞུགས་པ་ཡིན། །དེ་བཞིན་གཤེགས་ཀུན་ཡེ་ཤེས་ནི། །དམ་ཚིག་རྡོ་རྗེ་ཞེས་བྱ་བ། །རྡོ་རྗེ་ཡེ་ཤེས་གཅིག་ལས་བྱུང་། །ཏིང་འཛིན་གསང་བར་བཤད་པ་ཡིན། །ཡེ་
ཤེས་དཀྱིལ་འཁོར་དབུས་གནས་པར། །རྡོ་རྗེ་ཆེན་པོར་བསམས་ནས་ནི། །ལུས་ཀུན་ལ་ནི་ཁྃ་དམིགས་ན། །རྡོ་རྗེ་ཡེ་ཤེས་སྐྱེ་བར་འགྱུར། །དངོས་པོ་མེད་དོན་གསལ་བྱེད་པ། །ཁ་ཉིད་ཀྱིས་ནི་ཐམས་ཅད་བཤད། །རླུང་
གི་རྐྱེན་དང་ཀུན་སྦྱོར་ལས། །ཁྃ་དུའང་འགྲོ་བར་གྱུར་པ་ཡིན། །སངས་རྒྱས་བྱང་ཆུབ་སེམས་དཔའ་ཡིས། །ཡང་དང་ཡང་དུ་མཆོད་པ་དང་། །རྡོ་རྗེ་གསུམ་གྱི་དམ་ཚིག་གནས། །གཉིས་མེད་ལྷུན་གྱི་ངོ་བོ་ཉིད། །སངས་
རྒྱས་དེ་བཞིན་ཉིད་སྦྱོར་བ། །སོ་སོ་རུ་ནི་ཡང་དག་གནས། །ནམ་མཁའི་རྡོ་རྗེ་དམ་ཚིག་ཆེ། །ཆོས་རྣམས་དེས་ནི་མི་གཟིགས་སོ། །སངས་རྒྱས་ཀུན་ནི་གཉིས་མེད་དང་། །མི་སྣང་འདི་ཡི་དམ་ཚིག་ཡིན། །དངོས་པོ་མེད་
པའི་གནས་ཐོབ་ན། །སངས་རྒྱས་ཀྱིས་ཀྱང་མི་གཟིགས་སོ། །སྐུ་གསུང་ཐུགས་ལས་ཡང་དག་བྱུང་། །མི་སྣང་རྡོ་རྗེ་གསུམ་འདི་ཡིན། །དེ་ཡི་བཀོད་ཕྲེང་ཞེས་བྱ་བ། །ཏིང་ངེ་འཛིན་ནི་ཡང་དག་གསུངས། །མ་འདྲེས་
པ་ཡི་ཆོས་བདག་ཉིད། །སྐུ་དང་ལྡན་པའི་འོད་པོ་ཆེ། །རྡོ་རྗེ་དཀྱིལ་འཁོར་དབུས་གནས་པའི། །རང་སྔགས་སྐྱེས་བུར་བསམ་པར་བྱ། །ཧྃ་ནི་རྡོ་རྗེ་བཞིར་བཤད་པ། །སྙིང་ག་རུ་ནི་ཡང་མཛེས་པ། །རྟག་ཏུ་སྦྱོར་
བས་གཞུག་པ་ནི། །འོད་ཟེར་རྣམ་པར་བསྒོམ་པར་བྱ། །སྐུ་གསུང་ཐུགས་ཀྱི་ལོངས་སྤྱོད་ནི། །འཇམ་པའི་དམ་ཚིག་རྡོ་རྗེ་ཅན། །ས་བཅུར་རབ་ཏུ་གནས་ན་ནི། །དགོངས་དོན་དེ་ཚེ་ཀུན་དུ་བྱུང་། །ཡེ་ཤེས་ཉིད་ནི་

88-1-289b

ཟླ་བ་འདི། །བྱང་ཆུབ་སེམས་དཔའ་རྡོ་རྗེ་ཅན། །སྣང་བ་ཅན་ཞེས་བྱ་བ་ཡི། །ཏིང་ངེ་འཛིན་ནི་ཡང་དག་བཤད། །ནམ་མཁའི་དབྱིངས་ཀྱི་དབུས་གནས་པར། །ཐླྷཱྀྃནི་འབར་བའི་འོད་བཟང་བ། །མཚོན་ཆ་མཆོག་ནི་རྡོ་རྗེ་
ཡིས། །རྡོ་རྗེ་སྐུ་དང་འདྲ་བར་འགྱུར། །འདི་ནི་རྡོ་རྗེ་མཁའ་འདྲ་སྦྱོར། །དམ་ཚིག་བཀོད་པའི་གནས་གྱུར་པ། །ཏིང་འཛིན་དམ་ཚིག་མི་སྣང་བའི། །ཐླྷཱྀྃ་ནི་ཡང་དག་འབྱུང་བ་བཤད། །སངས་རྒྱས་མངོན་པར་ཤེས་གནས་
པ། །དམ་ཚིག་ཏུ་ནི་ཡང་དག་བཤད། །མངོན་ཤེས་ལྔ་དང་འདྲ་བ་འདི། །དེ་ནི་སྐྱེས་བུ་མཆོག་ཏུ་འགྱུར། །སངས་རྒྱས་མངོན་ཤེས་མཆོག་སྒྲུབ་པ། །འདི་ནི་དམ་པ་ཡིན་པར་བཤད། །དེ་ཡི་དངོས་གྲུབ་ཐམས་ཅད་ཀྱི། །
དངོས་གྲུབ་ཆེན་པོ་བསྒྲུབ་པའི་མཆོག །ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་དམ་པ་བསམ། །སངས་རྒྱས་དགོངས་པའི་མཆོག་བསྒོམས་ལ། །ཡི་གེ་ཨོཾ་ནི་བསྒོམ་པར་བྱ། །རྡོ་རྗེ་
གསུམ་གྱི་གསང་བ་འདི། །ཡི་གེ་ཨོཾ་ནི་མི་ཟད་གཙོ། །འདི་ནི་མི་ཕྱེད་སྦྱོར་བ་ཡིས། །བསྒོམས་པས་མི་བསྐྱོད་འདྲ་བར་འགྱུར། །མི་བསྐྱོད་པ་ཡི་དམ་ཚིག་མཆོག །དེ་སྐུ་བྱང་ཆུབ་རྡོ་རྗེ་ཅན། །ཏིང་ངེ་འཛིན་དུ་ཡང་དག་
བཤད། །དེ་ནི་སྐྱེས་བུ་དམ་པ་ཡིན། །མི་བསྐྱོད་མཚུངས་པའི་སྐུ་དང་ནི། །གསུང་ཐུགས་རྩེ་གཅིག་འཛིན་པ་ལས། །འཇིག་རྟེན་ཁམས་ནི་ཐམས་ཅད་དུ། །རྡོ་རྗེ་ཅན་གྱིས་མཆོད་པར་འགྱུར། །ནམ་མཁའི་དབྱིངས་ཀྱི་
དབུས་གནས་པར། །སངས་རྒྱས་དཀྱིལ་འཁོར་བརྒྱན་པ་བསམ། །ནམ་མཁའི་རྡོ་རྗེ་རབ་བསྒོམས་ཏེ། །དེ་ནས་རྡོ་རྗེ་རྣམ་པར་བསྒོམ། །རྡོ་རྗེ་དམ་ཚིག་གསུམ་བསྒོམས་པས། །དཀོན་མཆོག་དཔལ་དང་འོད་འདྲ་ཞིང་། །
དཀོན་མཆོག་གསུམ་དཔལ་མཚུངས་པ་ཡི། །བཅོམ་ལྡན་དཀོན་མཆོག་དཔལ་འདྲ་ཞིང་། །སྐུ་གསུང་ཐུགས་སྦྱོར་རྡོ་རྗེ་ཡིས། །ཡེ་ཤེས་གསང་བའི་གནས་སུ་འགྱུར། །ཏིང་འཛིན་དཔག་མེད་ལས་བྱུང་བ། །རྡོ་རྗེ་

88-1-290a

ཡེ་ཤེས་འཛིན་དེ་འགྱུར། །ལོངས་སྤྱོད་དམ་ཚིག་ཅེས་བྱ་བ། །རིན་ཆེན་རྡོ་རྗེ་གཅིག་ཏུ་འབྱུང་། །དེ་ཉིད་གསུམ་གསང་དགོངས་པ་ལས། །རིན་ཆེན་རྡོ་རྗེ་དེ་གནས་འགྱུར། །ནམ་མཁའི་དབྱིངས་ཀྱི་དབུས་
གནས་པར། །སངས་རྒྱས་དཀྱིལ་འཁོར་བསམ་པར་བྱ། །འཇིག་རྟེན་དབང་ཕྱུག་རབ་བསྒོམས་ལ། །དེར་ནི་ཆོས་ཀྱི་ཨོཾ་བསྒོམ་མོ། །ཆོས་ཀྱི་ཨོཾ་ནི་དེ་ཚེ་ཡང་། །རྡོ་རྗེ་གསུམ་མཉམ་སྦྱོར་བ་ཡིས། །རྡོ་རྗེ་དཔག་མེད་
འདྲ་བ་ནི། །བཅོམ་ལྡན་དཔག་མེད་རྡོ་རྗེ་ཅན། །ལུས་དང་ངག་སེམས་རྡོ་རྗེ་ཡིས། །དཔག་མེད་ཚེ་དང་འདྲ་བར་འགྱུར། །ཐེག་པ་ཆེན་པོ་ལམ་གྱི་མཆོག །འགྲོ་བའི་དོན་ནི་རབ་སྒྲུབ་པ། །ཡེ་ཤེས་རྒྱ་མཚོ་དཔལ་དང་
ལྡན། །འགྲོ་དོན་གཅིག་ཏུ་འབྱུང་བར་འགྱུར། །དོན་ཡོད་པ་ཡི་དམ་ཚིག་མཆོག །སེམས་ཅན་དོན་ནི་སྒྲུབ་གྱུར་པ། །འོད་ཟེར་ཡེ་ཤེས་མཆོག་ཅེས་བྱའི། །ཏིང་ངེ་འཛིན་དུ་ཡང་དག་བཤད། །སེམས་ཅན་ཁམས་ནི་
མ་ལུས་པའི། །ལོངས་སྤྱོད་ཀུན་དུ་འགྱུར་བ་ཡི། །ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་དམ་པ་བསམ། །དེ་ནི་རྣམ་སྣང་རྡོ་རྗེར་བཤད། །འོད་ཟེར་དེར་ནི་རབ་ཏུ་བསྒོམ། །རྣམ་པར་རྒྱལ་བའི་
ཡི་གེ་ཨོཾ། །འོད་ཆེན་དེར་ནི་རབ་ཏུ་བསྒོམ། །དེ་ནས་འདི་ནི་རྡོ་རྗེ་གསུམ། །རྣམ་པར་སྣང་མཛད་འདྲ་བར་འགྱུར། །དེ་ནི་བཅོམ་ལྡན་མགོན་པོས་བཤད། །རྣམ་སྣང་རྡོ་རྗེ་ཅན་དེ་ཡིན། །རྡོ་རྗེ་གསུམ་གཉིས་མེད་སྦྱོར་ལས། །རྣམ་པར་
སྣང་མཛད་འདྲ་བའི་འོད། །དེ་ཉིད་ཡེ་ཤེས་རྫོགས་བྱང་ཆུབ། །རྡོ་རྗེ་སྐུ་གསུམ་སྒྲུབ་པ་པོ། །སྐུ་དང་གསུང་ཐུགས་རྫོགས་བྱང་ཆུབ། །དེ་ལ་དམིགས་པའི་རྡོ་རྗེ་ཅན། །ཏིང་འཛིན་ཞི་བ་ཉིད་སྦྱོར་བ། །འགྲོ་བའི་དོན་
ནི་རབ་བསྒྲུབ་པའོ། །ཚིག་གཅིག་ལ་ནི་སྣ་ཚོགས་དོན། །སྔགས་ཀྱི་དེ་ཉིད་གསལ་གྱུར་པའོ། །དེ་ནས་དེ་བཞིན་གཤེགས་མཆོག་ལ། །དེ་ནས་གསང་བའི་བདག་པོ་ནི། །གསང་དགོངས་རྡོ་རྗེ་ཞེས་བྱ་

88-1-290b

བ། །ཐུབ་པ་ཆེ་ལ་སླར་ཡང་ཞུས། །ཨོཾ་ཨཱཿཧཱུཾ་ནི་གསུམ་ལ་སོགས། །བྷཱུྃ་སོགས་ཐོག་མར་གནས་པ་ཡིས། །སྐུ་གསུང་ཐུགས་ཀྱི་རྡོ་རྗེ་ཅན། །སྔགས་ཀྱི་སྐྱེས་བུར་དེ་འགྱུར་རོ། །ཨོཾ་ནི་རྣམ་སྣང་རྡོ་རྗེར་འགྱུར། །ཨཱྃཿནི་
འཇིག་རྟེན་དབང་ཕྱུག་གཙོ། །ཧཱུྃ་ནི་རྡོ་རྗེ་སེམས་དཔར་བཤད། །སྐྱེས་བུ་རྡོ་རྗེ་ཅན་དུ་འགྱུར། །བྷཱུྃ་ནི་གནས་ཀྱི་མཆོག་ཏུ་འགྱུར། །ཁྃ་ནི་ངེས་པར་མི་སྣང་བ། །ཧྃ་ནི་འཇམ་དཔལ་ཡང་དག་བཤད། །ཀྵྃ་ནི་རྡོ་རྗེ་བཀོད་ཅེས་བྱ། །རྡོ་རྗེ་
སེམས་དཔའ་རིན་པོ་ཆེ། །འཇིག་རྟེན་དབང་ཕྱུག་དངོས་གྲུབ་སྩོལ། །དེ་བཞིན་མགོན་པོ་རྣམ་སྣང་མཛད། །ཨོཾ་ལ་སོགས་པ་ཨཱ་ལས་སྐྱེས། །ཨོཾ་ཨཱཿཧཱུཾ་ནི་དེ་ཉིད་གསུམ། །རྣམ་སྣང་རྡོ་རྗེ་ཅན་གྱུར་པ། །སྐུ་གསུང་ཐུགས་ཀྱི་
རྡོ་རྗེ་གྲགས། །ཤིན་ཏུ་རྣམ་པར་ངེས་པར་བཤད། །གསང་སྔགས་དཀྱིལ་འཁོར་རྣལ་འབྱོར་པ། །ལྔ་པ་བཅོ་ལྔར་ཡང་དག་བཤད། །ཁྲག་གི་སྦྱོར་བ་ལས་བྱུང་བ། །གསང་སྔགས་སྐྱེས་བུ་ཞེས་བྱ་བ། །གསང་སྔགས་
ཆེན་པོའི་སྦྱོར་བ་ཡང་། །ཏིང་འཛིན་སྐྱེས་བུ་དམ་པ་ཡིན། །སྣ་ཚོགས་སྔགས་དོན་དེ་ཉིད་འགྱུར། །ཕྱག་རྒྱ་གཅིག་པར་དཀྱིལ་འཁོར་ཏེ། །དེ་དག་གསང་བར་བཤད་པ་ནི། །དགོངས་པ་གཅིག་ལས་ཡང་དག་འབྱུང་། །
དགའ་བ་གཅིག་ཅིང་དགའ་བའི་མིང་། །དེ་དག་ཇི་ལྟར་རྟོགས་པར་འགྱུར། །མགོན་པོ་རྐྱེན་དང་བྲལ་བའི་མི། །པི་བང་སྒྲ་ནི་མཆིས་མ་ལགས། །དེ་བཞིན་ཕྱག་རྒྱ་མེད་པར་ནི། །གསང་སྔགས་དངོས་
གྲུབ་མི་འབྱུང་ངོ་། །བརྡ་གསུམ་གྱི་ནི་དེ་ཉིད་འདི། །གང་གི་དོན་དུ་རབ་གསུངས་པ། །ལག་པའི་སྦྱོར་བས་རབ་བསྒྲུབ་པའི། །ཕྱག་རྒྱ་ཇི་ལྟར་གནས་པར་མཛད། །སྔགས་དང་ཕྱག་རྒྱ་སྦྱོར་བ་
ནི། །ཕྱག་རྒྱ་གཅིག་པུའི་སྦྱོར་བ་དང་། །གསང་སྔགས་གཅིག་པུས་མི་འགྲུབ་ཅེས། །ཁྱོད་ནི་ཆོས་རྣམས་སྟོན་པར་མཛད། །འདི་ནི་སྔགས་སྦྱོར་གཅིག་པུ་ལས། །ཕྱག་རྒྱ་བསྟན་པར་མ་

88-1-291a

མཛད་ན། །གསང་སྔགས་གཅིག་སྐྱེས་དངོས་གྲུབ་ནི། །འཇིག་རྟེན་པ་རྣམས་ཇི་ལྟར་བསྒྲུབ། །སྔགས་ལ་དམིགས་པའི་སྦྱོར་གྱུར་དང་། །ལྷ་རྣམས་ཀྱི་ཡང་སྦྱོར་ལས་བྱུང་། །འགྲོ་བའི་དོན་ནི་རབ་བསྒྲུབ་པ། །
ཡིད་བཞིན་ནོར་བུ་ལྟ་བུར་འགྱུར། །འཇིག་རྟེན་འདས་པ་ཞེས་བྱ་དང་། །ཡང་ན་ཤིན་དུ་འཇིག་རྟེན་འདས། །མགོན་པོ་འཇིག་རྟེན་པ་རྣམས་ཀྱི། །ཇི་ལྟར་འགྲོ་ལ་དེ་ཕན་འགྱུར། །སྤྱན་དྲང་བ་དང་གཤེགས་སུ་
གསོལ། །འདིར་ནི་ཇི་ལྟར་ལེགས་པར་བརྗོད། །གང་གིས་འདིར་ནི་དངོས་གྲུབ་འགྲུབ། །ལྷ་རྣམས་མངོན་ཕྱོགས་ཇི་ལྟ་བུ། །འདི་དག་མ་འོངས་སྐྱེ་བོ་ཡིས། །གང་ཞིག་ཤེས་ན་ཡང་དག་པར། །ངེས་པར་རྣམ་རྟོག་
མེད་འགྱུར་བ། །མི་ཡི་སྐྱེས་བུ་འདི་དག་གསུངས། །དེ་ནས་མགོན་པོ་བཅོམ་ལྡན་འདས། །དགོངས་པའི་གསང་བ་དམ་པ་སྟེ། །ཕྱག་རྒྱའི་ངེས་པ་འཇིག་རྟེན་པའི། །ཕྱག་ན་རྡོ་རྗེ་ལ་གསུངས་སོ། །རྣམ་རྟོག་སྣ་ཚོགས་
ལྕགས་ཞེས་བྱ། །ཉེས་པ་གསུམ་ཚོགས་བདག་ཉིད་ལས། །གསང་སྔགས་སྐྱེས་བུའི་སྦྱོར་བ་ཡིས། །དེ་ནི་མི་མཆོག་དག་ཏུ་འགྱུར། །གསེར་འགྱུར་རྩི་ཡི་རྣམ་པ་ཡིས། །ལྕགས་ནི་གསེར་དུ་བྱེད་པ་ཡིན། །དེ་བཞིན་
སྔགས་ཀྱི་དེ་ཉིད་ཀྱིས། །མི་ནི་བདེར་གཤེགས་བྱེད་པ་ཡིན། །ངེས་བྱས་སྦྱོར་བའི་གསང་སྔགས་ནི། །ཞི་བདེ་དངོས་གྲུབ་སྟེར་བར་འགྱུར། །ཕྱག་རྒྱ་མེད་པའི་སྔགས་གཅིག་པུས། །སྔགས་ཀྱི་སྐྱེས་བུར་འགྱུར་བ་ཡིན། །
དངོས་མེད་པ་ལས་ཡང་དག་སྐྱེ། །སྔགས་ཀྱི་སྐྱེས་བུ་འབྱུང་བ་སྟེ། །འདི་ནི་ཕྱག་རྒྱ་ཆེན་པོ་སྟེ། །འགྲོ་བའི་དོན་ནི་རབ་སྒྲུབ་པའོ། །སྤྱན་དྲང་བར་ནི་བཞུགས་པ་ཡིས། །མྱུར་བ་ཡིས་ནི་གཤེགས་སུ་གསོལ། །
གནས་པ་ཡིས་ནི་དེ་བསྒྲུབ་པའོ། །ཡིད་རྟོན་དངོས་གྲུབ་དམ་པ་ཡིན། །དེ་ནི་སྐྱེས་བུའི་སྦྱོར་བ་ཡིས། །ཕྱག་རྒྱ་ཆེ་དང་གཅིག་བསྒྲུབ་ལས། །མྱུར་བ་ལ་སོགས་གསུམ་ལྡན་པ། །དེ་ནི་ཕྱག་རྒྱ་ཡིན་པར་བཤད། །

88-1-291b

འབད་དེ་བླ་མས་སློབ་མ་ཡི། །རྣ་བའི་དྲུང་དུ་བཤད་པར་བྱ། །མྱུར་བ་དང་ནི་འཇུག་པ་དང་། །གནས་པའི་རྗེས་སུ་སྦྱོར་བ་རྣམས། །སྤྱན་དྲང་བ་དང་གཤེགས་སུ་གསོལ། །འདི་དག་ཕྱག་རྒྱར་ཡང་དག་གྱུར། །སྒྲུབ་པ་ལ་ནི་
མྱུར་ལ་སོགས། །ཅི་རིགས་པ་ནི་ངེས་པར་སྦྱར། །ཕུང་པོ་ལ་སོགས་ཆོས་རྣམས་ཀུན། །སྟོང་ཞིང་རྟེན་འབྲེལ་ལས་བྱུང་བ། །མཐོང་ཞིང་དེ་བཞིན་སྦྱོར་བ་ལས། །ཆོས་ཀྱི་སྐུར་ནི་དེ་གནས་འགྱུར། །འདིར་ནི་གསང་སྔགས་
སྦྱོར་འགྱུར་མེད། །ཕྱག་རྒྱའང་ཆོས་སྐུ་འདི་ཉིད་ཡིན། །དེ་ལྟ་ན་ཡང་འགྲོ་བའི་དོན། །ཡིད་བཞིན་ནོར་བུ་ལྟ་བུར་བྱེད། །འོན་ཏེ་རྡོ་རྗེ་འཛིན་གང་ཞིག །སྦྱོར་བ་གསུམ་དང་ལྡན་པའི་མི། །སྤྱན་དྲང་བ་དང་གཤེགས་སུ་
གསོལ། །དེ་བཞིན་དུ་ནི་གནས་གྱུར་པའོ། །ཉེ་བའི་ཚིག་ནི་སྤྱན་དྲང་བ། །རིང་ནས་ལག་པར་རབ་ཏུ་སྦྱོར། །དེ་བཞིན་གསང་སྔགས་དེ་ཉིད་ཀྱང་། །གཉིས་ག་ལ་ནི་ཡང་དག་སྦྱོར། །རིགས་ཀྱི་དབྱེ་བ་སྦྱོར་བ་ཡིས། །ཕྱག་
རྒྱ་བུད་མེད་ཡིན་པར་བཤད། །སེམས་ཀྱི་རྐྱེན་སྦྱོར་བདག་ཉིད་ནི། །འཇིག་རྟེན་པར་ནི་རབ་ཏུ་བརྟག །རང་གི་མཚན་མར་ཡང་དག་སྦྱོར། །རིགས་ཀྱི་དབྱེ་བའི་སྦྱོར་བ་ཡིས། །ཕྱག་རྒྱས་ས་གསུམ་ལ་གནས་པ། །ས་འོག་
ཀླུ་ཡི་བུ་མོ་ཡང་། །བརྟུལ་ཞུགས་ཅན་གྱི་སེམས་ཀྱིས་དགུག །གཞུག་པའི་རིམ་པ་ཉིད་དང་ནི། །དེ་རྣམས་གནས་པའི་སྦྱོར་བ་ཉིད། །དངོས་མེད་དེ་ཉིད་གཅིག་པུ་ཡིས། །འགྲོ་བ་ཐམས་ཅད་དགུག་པར་བྱ། །གཞན་ཡང་
གསང་བ་པོ་ཡི་མཆོག །སེམས་ཀྱི་རྒྱན་ནི་ཉིད་ལྟོས་དང་། །དངོས་མེད་བྱང་ཆུབ་འཐོབ་པ་ལ། །གསང་སྔགས་མེད་ཅིང་ཕྱག་རྒྱ་མེད། །འཇིག་རྟེན་ན་ནི་རྟོག་ཅི་སྙེད། །དུས་གསུམ་དུ་ནི་ཀུན་འབྱུང་བ། །དེ་ནི་དངོས་མེད་སེམས་
གཅིག་ལས། །རྣལ་འབྱོར་པས་ནི་སྐད་ཅིག་རྟོགས། །བྱང་ཆུབ་ཀུན་རྫོབ་མ་ཡིན་ལ། །དེ་ལས་གཞན་དུའང་རྙེད་མི་འགྱུར། །གཉི་ག་ལས་མིན་གཞན་ལས་མིན། །མུན་པའི་སྒྲོན་མ་མཚུངས་པར་འགྱུར། །སེམས་ཅན་

88-1-292a

བསམ་པའི་དབང་གིས་སྔགས། །གསང་བ་འདི་ནི་རབ་སྟོན་ཏེ། །དེ་ནི་སྒྲུབ་དང་བསྒྲུབ་བྱ་དང་། །རྣམ་པར་མི་རྟོག་བརྟགས་པའོ། །སེམས་ཅན་ཀུན་གྱི་ལོངས་སྤྱོད་དུ། །སྔགས་ཀྱི་སྐྱེས་བུ་རབ་ཏུ་གནས། །ནམ་མཁའ་
མཉམ་པའི་སྦྱོར་བ་ནི། །རྣམ་པར་དབེན་པར་རབ་ཏུ་བརྟག །གསལ་དང་མི་གསལ་ཡང་དག་ལྡན། །ཀླུང་དང་འབབ་ཆུ་ལ་སོགས་ཡིན། །མྱ་ངན་འདས་པ་གནས་སྦྱོར་བ། །དུར་ཁྲོད་ལ་སོགས་པ་ཡི་མིང་། །
འདི་ནི་སྔགས་རིག་མཆོག་རྣམས་ཀྱི། །བསམ་གཏན་བསྡུས་ལས་སྤྱོད་པའོ། །འཇིག་རྟེན་འདས་པ་དེ་ཉིད་འདིར། །འཇིག་རྟེན་པ་ནི་བཟློག་པའོ། །མི་བསྐྱོད་ཡེ་ཤེས་ལ་སོགས་པ། །རྡོ་རྗེ་ནམ་མཁའི་དཀྱིལ་
དུ་བསམ། །མངོན་ཤེས་ལྔ་ཡི་སྦྱོར་བ་ཡིས། །སངས་རྒྱས་མཆོག་གི་གནས་སུ་བསྒོམས། །རྡོ་རྗེ་མངོན་ཤེས་རྡོ་རྗེ་ཆེ། །དམ་ཚིག་མཆོག་ཏུ་བཀའ་སྩལ་ཏོ། །རྡོ་རྗེ་ཆེན་པོ་རབ་མཛེས་པ། །རྩེ་ལྔ་པ་ལ་དེ་བཞིན་
འཁོར། །རང་བཞིན་ལྔ་རུ་སྦྱོར་བ་ཡིས། །མངོན་ཤེས་ལྔ་པོར་འགྱུར་བ་ཡིན། །མངོན་ཤེས་ལྔ་ཡི་ཏིང་འཛིན་ལ། །གནས་ནས་བླ་ན་མེད་པ་བརྟག །གཙོ་བོ་མེ་སྟག་མང་པོ་འཁྲུག །རང་སྔགས་འཁོར་ལོ་བསྒོམ་
པར་བྱ། །རྡོ་རྗེ་ལ་ནི་རབ་དགོད་པས། །རྡོ་རྗེ་མངོན་ཤེས་སྐྱེ་བར་འགྱུར། །ནམ་མཁའི་རྡོ་རྗེ་དབུས་གནས་པར། །འཁོར་ལོ་རྡོ་རྗེ་འབར་འོད་འདྲ། །སངས་རྒྱས་འཇུག་པར་རབ་བསྒོམས་ན། །སངས་རྒྱས་མཆོག་
དང་འདྲ་བར་འགྱུར། །སངས་རྒྱས་དཀྱིལ་འཁོར་དབུས་གནས་པར། །ལུས་ལ་རྣམ་པར་སྣང་མཛད་གཞག །སྙིང་གར་ཡི་གེ་ཨོཾ་བསམས་ན། །སྔགས་ལ་མངོན་ཤེས་བསྒོམ་པར་འགྱུར། །འགོག་པ་རྡོ་རྗེ་གྱུར་པའི་
སེམས། །ནམ་ཞིག་བདག་ཉིད་བདག་ལས་སྐྱེས། །སངས་རྒྱས་ཀུན་མཆོག་འབྱུང་བ་ཡི། །དཔལ་ལྡན་ཡིད་བཞིན་ནོར་བུར་འགྱུར། །སངས་རྒྱས་དཀྱིལ་འཁོར་དབུས་གནས་པར། །དེར་ནི་མི་བསྐྱོད་རབ་ཏུ་བསྒོམ། །
88-1-292b

ཧཱུྃ་ནི་སྙིང་གའི་ཟླ་གནས་པར། །བསམས་ལ་སེམས་ནི་དེ་རུ་བཞག །སངས་རྒྱས་དཀྱིལ་འཁོར་དབུས་གནས་པར། །ཚེ་དཔག་མེད་པ་རབ་ཏུ་སྦྱོར། །ཨ་ནི་སྙིང་གའི་ཐིག་ལེར་གནས། །བསམས་ལ་རྡོ་རྗེའི་ཡང་དག་བཞག །
འདི་ནི་དགོངས་པའི་མཆོག་གི་མཆོག །རྡོ་རྗེ་མི་ཕྱེད་གསུམ་སྦྱོར་སྐྱེས། །འགོག་པའི་དམ་ཚིག་ཡེ་ཤེས་ཏེ། །སངས་རྒྱས་དངོས་གྲུབ་ཆེར་འབྱུང་བའོ། །ནམ་མཁའི་རྡོ་རྗེ་དབུས་གནས་པར། །སངས་རྒྱས་དཀྱིལ་འཁོར་
བསྒོམ་པར་བྱ། །སྐུ་གསུང་ཐུགས་ཀྱི་ཡི་གེ་ཨོཾ། །བསམས་ན་བསྐལ་པ་གཅིག་ཏུ་གནས། །ནམ་མཁའི་རྡོ་རྗེ་དབུས་གནས་པར། །སངས་རྒྱས་དཀྱིལ་འཁོར་བསྒོམ་པར་བྱ། །ལུས་དང་ངག་སེམས་ཡི་གེ་ཨཱཿ། །
བསམས་ན་བསྐལ་པ་དག་ཏུ་གནས། །མཁའ་དབྱིངས་རྡོ་རྗེ་དབུས་གནས་པར། །རྡོ་རྗེའི་དཀྱིལ་འཁོར་བསྒོམ་པར་ནི། །ལུས་དང་ངག་སེམས་ཡི་གེ་ཧཱུྃ། །བསམས་ན་དེ་ནི་བསྐལ་པར་གནས། །བཅོམ་ལྡན་
བདག་པོ་རྡོ་རྗེ་གསུམ། །དམ་ཚིག་རྟོགས་པས་དེ་སྐད་གསུངས། །དགུ་མཐའ་ཅན་གྱི་ཡི་གེ་འདི། །སྔགས་ཀྱི་སྐྱེས་བུ་མཆོག་ཏུ་འགྱུར། །བརྗོད་དུ་མེད་ཅིང་མིང་མེད་ལ། །ཤེས་དང་ཤེས་བྱ་རྣམ་སྤངས་པའང་། །
ཀུན་རྫོབ་ལ་ནི་ལེགས་གནས་ནས། །ཚིག་གི་སྔགས་སུ་འདི་བརྗོད་དོ། །རྡོ་རྗེ་གསུམ་གྱི་རྡོ་རྗེ་ཅན། །རྣལ་འབྱོར་འདིར་འགྱུར་ཕྱིན་ཅད་ནི། །གང་ཞིག་ཀློག་གམ་སེམས་ཀྱང་རུང་། །རྡོ་རྗེ་ཡེ་ཤེས་ལྟ་བུར་འགྱུར། །ཇི་ལྟར་
གསང་བའི་རྒྱལ་དབང་པོ། །དགོངས་པ་ལུང་སྟོན་འདི་གྱུར་པ། །སངས་རྒྱས་ཀུན་གྱིས་དེ་ལུང་བསྟན། །ཁྱད་པར་དུ་ཡང་བྱིན་གྱིས་རློབ། །ཀློག་ཅིང་སྒོམ་དང་ལྡན་པར་ནི། །བྲིས་ནས་གང་དུ་འཇོག་གྱུར་པ། །དེ་ནི་སངས་རྒྱས་
ཐམས་ཅད་ཀྱི། །རིགས་སྐྱེས་རྒྱལ་བའི་སྲས་སུ་འགྱུར། །ཁམས་གསུམ་ཐམས་ཅད་བཅོམ་ནས་ནི། །མྱུར་བར་དེ་བཞིན་གཤེགས་འགྱུར་ཞིང་། །འཁོར་ལོས་སྒྱུར་བའི་བུ་བཞིན་དུ། །བྱང་ཆུབ་མྱུར་དུ་དེས་འཐོབ་བོ། །བསམ་

88-1-293a

གསུམ་སྐུ་དང་གསུང་ཐུགས་ཀྱི། །སྔགས་པའི་ཡན་ལག་གྱུར་པ་ནི། །སངས་རྒྱས་འདུས་ལ་བརྟེན་པ་ཡིས། །དེ་ནི་དངོས་པོ་མེད་པར་འཇོམས། །དངོས་མེད་གཅིག་ཏུ་རྫོགས་ལོངས་སྤྱོད། །ཕུང་སོགས་ཡན་ལག་དོན་
ལས་བྱུང་། །བདེ་གཤེགས་སེམས་ཅན་སྤངས་པ་ནི། །སྔགས་པ་སྔགས་ལས་གྱུར་པ་ཡིན། །ཇི་ལྟར་ནམ་མཁའ་རང་མཚན་ཉིད། །སྐད་ཅིག་ཀྱང་ནི་འདོར་མི་བྱ། །དེ་བཞིན་སངས་རྒྱས་ཐམས་ཅད་ཀྱང་། །རིགས་ལས་
སྐྱེས་པ་བྱིན་གྱིས་རློབ། །དགོངས་ལ་ལུང་སྟོན་ལ་གནས་ནས། །གསང་བའི་རིན་ཆེན་ཡང་དག་བསྲུང་། །མིག་གཟུགས་རང་གི་ངོ་བོ་ཉིད། །སྤྱོད་པ་ཅི་དགའ་བྱེད་པར་འགྱུར། །དེ་བཞིན་གཤེགས་ཀུན་ཡེ་ཤེས་ནི། །གསང་བའི་
དགོངས་པའི་མིང་ཅན་ཏེ། །སྐུ་དང་གསུང་ཐུགས་གསང་བ་དང་། །གསང་སྔགས་དམ་ཚིག་དེ་ཉིད་བྱུང་། །དེ་ནི་རིག་པ་སྐྱེས་བུ་མཆོག །བཅུ་གཅིག་པར་ནི་ཡང་དག་བཤད། ། རས་ནི་བྲིས་དང་མཚུངས་པར་འབྱུང་། །འཐོབ་པའི་ཕྱིར་
ནི་ལེའུར་གྱུར། །དེ་ནས་དཔལ་ལྡན་རྣམ་སྣང་མཛད། །སྐྱེད་པ་ཡེ་ཤེས་བླ་མ་གཙོ། །དེ་ཉིད་དམ་ཚིག་མཆོག་གྱུར་པ། །རྡོ་རྗེ་གསུང་གིས་བཀའ་སྩལ་ཏོ། །མཁའ་དང་མཚུངས་ཤིང་མི་རྟོག་ལ། །རང་བཞིན་གྱིས་ནི་དམ་ཆོས་ཅན། །
དངོས་མེད་ཤིན་དུ་དྲི་མེད་ལ། །དམ་ཚིག་གཅིག་ཏུ་གྱུར་ཀྱང་ནི། །གར་དང་གླུ་དང་རོལ་མོ་དང་། །དགོད་དང་སྟེག་པས་རབ་མཛེས་པས། །འཇིག་རྟེན་སངས་རྒྱས་གར་མཁན་གྱིས། །རོལ་མོ་འདི་དག་རབ་ཏུ་བསྒོམ། །གཞོན་ནུས་བསྒྲུབས་པའི་སེམས་
ཅན་ནི། །ཇི་ལྟ་ཇི་ལྟར་སྟོན་པ་བཞིན། །གར་སོགས་རྩེད་མོས་བྱང་ཆུབ་ནི། །མྱུར་དུ་དེ་ཉིད་ལས་འཐོབ་འགྱུར། །འདོད་པའི་ཡོན་ཏན་ལྔར་ལྡན་པ། །དེ་ཡི་མིང་ནི་ཡིད་ལྡན་པ། །དཀོན་མཆོག་གསུམ་ལ་སྐྱབས་སུ་གནས། །ལྷུན་གྱིས་གྲུབ་པའི་སངས་
རྒྱས་འགྱུར། །སེམས་ཅན་གང་འདི་མཐོང་བ་དང་། །ཐོས་ཤིང་རིག་པར་གྱུར་པ་ནི། །དེ་ནི་ཨུ་དུམ་ཝཱ་ར་ཡི། །མེ་ཏོག་འདྲ་བར་གྱུར་པ་ཡིན། །སེམས་ཅན་ཀུན་གྱི་གཙོ་བོ་འདི། །གསུང་གི་རྡོ་རྗེ་ཆོས་ཉིད་སྐྱེས། །

88-1-293b

གཅིག་དང་དུ་མ་ལས་གྲོལ་བ། །རྟེན་འབྱུང་གསལ་བར་བྱེད་པ་ཡིན། །དེ་ནས་གསང་བའི་བདག་མཆོག་དེ། །ཆོས་ཀྱི་དེ་ཉིད་རབ་སྟོན་པ། །ཐུབ་ཆེན་རྣམ་པར་སྣང་མཛད་ལ། །ཐལ་མོ་སྦྱར་བ་བྱས་ནས་ཞུས། །མགོན་པོ་དེ་ཉིད་
བསྡུས་པ་ལས། །རོལ་མོ་འདིར་ནི་གྱུར་པ་དང་། །འཇིག་རྟེན་པ་དེ་གར་བྱེད་པ། །གསུངས་ཏེ་མ་འོངས་སྐྱེ་བོ་ནི། །ཆོས་དབྱིངས་དེ་ནི་གར་མིན་ན། །གཙོ་བོ་ཇི་ལྟར་གར་བགྱིད་ལགས། །རྨོངས་པའི་འཇིག་རྟེན་རྒྱང་པན་གར། །
གསང་མཐོན་མྱོས་པས་བསྐུལ་བ་ཡིན། །ཆོས་དབྱིངས་དེ་ནི་གླུ་མིན་ན། །གཙོ་བོ་ཇི་ལྟར་གླུ་ལེན་འགྱུར། །རྨོངས་པའི་འཇིག་རྟེན་རྒྱང་པན་གླུ། །གསང་མཐོན་མྱོས་པས་བསྐུལ་བ་ལགས། །ཆོས་དབྱིངས་
དེ་ནི་རོལ་མོ་མིན། །གཙོ་བོ་ཇི་ལྟར་རོལ་མོར་འགྱུར། །འཇིག་རྟེན་རྒྱང་པན་རྨོངས་རོལ་མོ། །གསང་མཐོན་མྱོས་པས་བསྐུལ་བ་ལགས། །ཆོས་དབྱིངས་དེ་རྒོད་མ་ལགས་ན། །གཙོ་བོ་ཇི་ལྟར་རྒོད་པར་འགྱུར། །
རྨོངས་པའི་འཇིག་རྟེན་རྒྱང་པན་རྒོད། །གསང་མཐོན་མྱོས་པས་བསྐུལ་བ་ལགས། །ཆོས་དབྱིངས་དེ་སྒེག་མ་ལགས་ན། །གཙོ་བོ་ཇི་ལྟར་སྒེག་པར་འགྱུར། །རྨོངས་པའི་འཇིག་རྟེན་རྒྱང་པན་སྒེག །གསང་
མཐོན་མྱོས་པས་བསྐུལ་བ་ལགས། །དེ་ལྟར་རྣམ་པ་མང་པོ་ལ། །གཞན་རྣམས་ཀྱང་ནི་སྦྱོར་བྱེད་ཅིང་། །བཟའ་དང་མིན་ལས་སྦྱོར་བ་ཡིས། །རྣལ་འབྱོར་པ་ནི་བདག་ཡིན་སྙམ། །རྡོ་རྗེ་ཡི་ནི་ཚིག་མཆོག་འདི། །
ཡོད་མེད་རབ་ཏུ་ཞི་བ་ཉིད། །དེ་ཡི་རང་བཞིན་གཅིག་སྦྱོར་བདག །ཡང་དག་མཆོག་བསྡུས་དེ་ཉིད་མཆོག །དེ་ནས་དེ་ཉིད་ཡང་དག་གཟུང་། །རྣལ་འབྱོར་རིགས་མཆོག་རྣལ་འབྱོར་པ། །དེ་ཉིད་གསུམ་མཉམ་ཉིད་སྦྱོར་བ། །
སངས་རྒྱས་ཀྱི་ནི་རོལ་མོ་སྟོན། །སྣ་ཚོགས་ཚུལ་གྱིས་རྣམ་དགོད་པས། །ནོར་ཅན་མིང་ནི་ཉམས་ལ་སོགས། །གཅིག་པུའང་དཔག་མེད་དངོས་བཤད་པའི། །གར་གྱིས་སྐྱེ་དགུ་དགའ་བར་བྱེད། །རྫོགས་པའི་བྱང་

88-1-294a

ཆུབ་སོགས་དངོས་གྲུབ། །སྣ་ཚོགས་ཁྱེད་ཀྱིས་གསུངས་པ་རྣམས། །སེམས་ཞི་བ་ཡི་རྣལ་འབྱོར་པ། །དེ་རྣམས་ལྷུན་གྱིས་གྲུབ་པར་འགྱུར། །མགོན་པོ་ཤེས་རབ་འདི་སྲིད་དུ། །ཐབས་ཀྱིས་མཆིལ་པར་ཉེ་
བར་སྦྱོར། །སྔགས་ཀྱི་གཟན་གྱི་སྦྱོར་བ་ཡིས། །ཁྱེད་ནི་འཇིག་རྟེན་པ་རྣམས་འཛིན། །བཤད་དུ་ཟིན་ཀྱང་མི་རིག་པ། །དགོངས་པའི་གསང་བ་དམ་པ་ནི། །གཞན་རྣམས་ལ་ནི་སྟོན་མཛད་པ། །ངོ་བོ་ཉིད་ནི་གཞན་མིན་
པའོ། །ཕྱི་རོལ་སྔགས་དོན་དངོས་གྲུབ་ནི། །དེ་ཉིད་དུ་ནི་ཚོལ་མོད་ཀྱི། །འགལ་བའི་རྗེས་འཇུག་ཆོས་ཉིད་ཅན། །དེར་ཡང་འགྲུབ་པར་འགྱུར་མ་ཡིན། །དེ་རྣམས་གསང་བ་མི་སྲུང་ཞིང་། །སྲེད་པ་ཡིས་ནི་སྟེན་པར་བྱེད། །བཅོམ་
ལྡན་འདས་གསུང་གསང་བ་ནི། །གསང་མཆོག་ཚིག་གིས་སྒྲོགས་པར་བྱེད། །ཁྱོད་བཀའ་ལས་འདས་དམན་པ་རྣམས། །སྔགས་ཀྱི་ནུས་པ་རྣམ་སྤངས་པ། །འཇིག་རྟེན་པ་རྣམས་སྡང་འགྱུར་ཞིང་། །དེ་རྣམས་འགྲུབ་
པར་འགྱུར་མ་ཡིན། །སྲེད་པའམ་དད་པ་དག་གིས་ཀྱང་། །རྐྱེན་དང་དེ་བཞིན་ཉན་ཐོས་རྣམས། །གསང་བ་ལ་ནི་སྨིག་རྒྱུ་བཞིན། །རིགས་སྐྱེས་གཞན་ཡང་ལྟུང་བར་འགྱུར། །མགོན་པོ་དེ་ནི་དེར་གནས་ཤིང་། །ཉམས་ཤིང་
བློ་གྲོས་དམན་པར་གནས། །དེ་ནས་ཚིག་མིན་གྱུར་པར་འབྱུང་། །ཚིག་གི་བདུད་རྩི་སྦྱོར་བ་ལས། །ཆོས་ཀྱི་ཚུལ་འདི་ཐོས་པ་དང་། །ཕྱི་ནས་འཇིགས་ཤིང་སྐྲག་པར་འགྱུར། །བྱང་ཆུབ་སེམས་དཔའ་ལྷུང་འགྱུར་བར། །བདག་ཉིད་ཆེ་དེ་
བྱེད་པར་འགྱུར། །དེ་བཞིན་བྱང་ཆུབ་འགྱུར་བ་དང་། །སྔགས་པ་རྣམས་ཀྱང་གསང་བ་ལགས། །ཤེས་རབ་ཕ་རོལ་ཕྱིན་སྦྱོར་བ། །གསང་བ་མདོ་སྡེ་རྣམ་སྨྲ་བ། །གདོང་གཡོགས་པ་ཡི་སྦྱོར་བ་ཡིས། །དེ་ཚེ་ཚིག་གིས་རིག་སྐྱེས་པ། །
གསང་སྔགས་ལ་སོགས་ཆོས་རྣམས་ལ། །དད་པ་རྣམས་ནི་སྐྱེད་མི་བྱེད། །ལོག་པས་མཁས་པའི་ང་རྒྱལ་ནི། །བྱིས་པ་ཕྱི་ནས་བྱེད་པར་འགྱུར། །ཨ་ཡི་དོག་པའི་རས་འདི་ནི། །སྦྱོར་བཤེས་རྣམས་ཀྱི་འདི་མ་ཡིན། །དེ་རྣམས་དད་

88-1-294b

པས་རྗེས་འཇུག་པ། །གཏམ་དག་ཀྱང་ནི་བྱེད་པར་འགྱུར། །སྒྱུ་ནི་གཡོ་ཡི་ཚུལ་གྱིས་ན། །རྒྱལ་པོ་རྣམས་ནི་སླུ་བར་བྱེད། །སྟེང་དུ་གཡོགས་པ་དག་གིས་ནི། །བརྒྱད་གཉིས་པ་ཡི་ཚུལ་དུ་བྱེད། །དེ་ནི་མི་སྐྱེས་པ་ཡི་བདག །རས་ཀྱི་
རྒྱུ་མེད་པ་ཉིད་ནི། །ཨ་ཡི་དོག་རས་ཉིད་རྒྱལ་པོའི། །ཡང་དག་དངོས་གྲུབ་བྱེད་པའི་མཆོག །དམ་པའི་སྐྱེ་བ་ཉིད་མཐོང་ན། །དེ་ནི་ལོངས་སྤྱོད་ལམ་སྐྱེད་མིན། །དེ་བས་སྐྱེ་བོ་མེད་གཅིག་པུ། །བྱ་བའི་སེམས་ནི་
རབ་ཏུ་འཇུག །དེར་ནི་མཆེ་བ་ཅན་མིང་འགྲོ། །དེ་ལ་བཙལ་བ་འབའ་ཞིག་ཡིན། །རྒྱལ་པོ་དངོས་གྲུབ་ཆེན་པོའི་རས། །བར་ཆད་ཤིན་ཏུ་མང་པོ་པ། །བྱ་བ་དེ་ནི་རྣམ་པར་འཇོམས། །སྒྲིབ་པ་མེད་པའི་རྣལ་འབྱོར་ཅན། །དེས་ནི་ཚིག་
དེ་ཐོས་པ་དང་། །རྒྱལ་པོའི་བར་དུ་ཡིད་དགའ་ཞིང་། །དངོས་གྲུབ་ཆེན་པོའི་རིགས་མཆོག་ལས། །སུ་ཞིག་བདག་ནི་ཟློག་པར་བྱེད། །རས་ཀྱི་བར་ཆད་བྱེད་པ་དག །དེ་ལ་ཆད་པས་གཅད་པར་བྱ། །འདི་ལ་འཇིགས་པའི་སེམས་འོང་ལ། །
སྐྱེ་བོ་མེད་པར་ཁྱེད་ཀྱིས་ནི། །རྒྱལ་རིགས་དག་གམ་རིགས་བཟངས་སམ། །གང་ཞིག་མི་སྲུན་རིགས་ཅན་རྣམས། །དོག་པ་མེད་པ་རས་འཇིག་པ། །དེ་དག་ཐམས་ཅད་བརླག་པར་བྱ། །དེ་ནས་རྒྱལ་པོ་སྦྱིན་པ་ནི། །རྒྱུད་ཀྱི་སློབ་
དཔོན་བདག་ཉིད་ཆེ། །རིན་ཆེན་རིན་ཐང་མེད་ལྔ་སོགས། །བདེ་བ་ཀུན་གྱི་འབྲས་བུའོ། །འདི་ཡིས་གདོང་ནི་གཡོགས་ནས་སུ། །རྒྱལ་པོ་འབྲས་བུ་ལོངས་སྤྱོད་ཅིག །ཨ་ཡི་དོག་པ་རས་དེ་བྱིན། །ཇི་ལྟར་སྐྱེ་བཞིན་རྒྱལ་པོ་བྱས། །
རིན་ཆེན་རིན་ཐང་མེད་བླངས་རྣམས། །འདི་ནི་ཇི་ལྟར་གཞག་ནས་སུ། །དེ་ནས་དེ་ནི་མི་སྣང་བ། །རྒྱུན་ཅན་གྱིས་ནི་དེ་ཚེ་བྱས། །དེ་ལ་སོགས་པའི་སྣ་ཚོགས་ཚིག །རིགས་སྐྱེས་པ་ལ་དེ་རྣམས་སྨྲ། །རང་ཉིད་འཇིགས་ཤིང་གཞན་
རྣམས་ཀྱང་། །སྐྲག་པར་བྱེད་ཅིང་ཐེ་ཚོམ་མེད། །དེ་ནས་དེ་བཞིན་གཤེགས་བདག་པོ། །འབྱིན་པ་སྟོན་པ་མངའ་བདག་གཙོ། །ཕྱག་ན་རྡོ་རྗེ་གོ་བྱེད་པ། །སྙན་པའི་གསུང་གིས་བཀའ་སྩལ་པ། །རྡོ་རྗེ་

88-1-295a

རྡོ་རྗེ་ཆེན་པོ་ལེགས། །རྡོ་རྗེ་ཐལ་མོས་སྟོན་པར་བྱེད། །རྡོ་རྗེ་འདི་ནི་ཞུས་གྱུར་པ། །དེ་ཉིད་བསྡུས་པ་དམ་པའོ། །རྡོ་རྗེ་ཐལ་མོ་དེ་ཉིད་འདི། །ལུང་བསྟན་བྱ་ཡིས་དེ་ཉོན་ཅིག །དེ་ཉིད་གསུམ་དུ་གྱུར་པ་དེ། །རྡོ་རྗེ་ཐལ་
མོར་ཡོངས་སུ་བརྟག །དེ་ཉིད་གསུམ་ནི་ལྷ་གསུམ་སྟེ། །ཚངས་དང་ཁྱབ་འཇུག་དབང་ཕྱུག་ཆེ། །དེ་རུ་ང་ནི་ལྷ་གསུམ་འགྱུར། །ཨོཾ་ཨཱཿཧཱུཾ་དང་གྲངས་མཉམ་པའི། །གསང་སྔགས་འཇུག་པ་ཐམས་ཅད་ནི། །སྣ་ཚོགས་
ལུས་ཅན་གཅིག་མིང་ཅན། །ཞི་བ་ཉིད་ནི་གང་དུ་སྟོན། །དེར་ནི་ང་ཡང་གནས་པ་ཡིན། །དཔལ་ཡོན་དེ་ལ་བཞིན་མི་སྡུག །དེ་ཡི་སྐྱེས་བུ་མིང་ལྡན་མིང་། །དེ་རྣམས་ལག་པའི་དབུས་ནས་ནི། །ཐིམ་སོགས་ཇི་བཞིན་གྲངས་སུ་
བཤད། །ལག་པ་གཡོན་ནི་དྲག་པོར་གྱུར། །གཡས་པ་དེ་བཞིན་ཁྱབ་འཇུག་སྟེ། །གཉིས་པ་སྦྱོར་བར་ཚངས་པ་ཡིན། །དེ་བས་ཡོན་ཏན་གསུམ་བདག་དང་། །རིག་དང་མཆོད་སྦྱིན་སྙན་ཚིག་སྟེ། །རིག་བྱེད་དེར་གྱུར་
གསུམ་དུ་བཤད། །སྲིད་སྲུང་ཞི་བ་ང་ཡིན་ཏེ། །མཐར་ནི་འགྲོ་བ་གནས་པ་ཡིན། །ལག་པ་གཉིས་པ་འདི་དག་ནི། །བཞི་པོའི་ཕྱེད་ཕྱེད་རྣམ་བརྒྱད་པ། །ཕྱེད་པོའི་ཚམ་གྱི་ཧཱུྃ་མཆོག་ནི། །རབ་ཏུ་ཞི་བར་རབ་ཏུ་བསྒྲགས། །
ཉི་མ་ཟླ་བ་མི་རྣམས་དེར། །སོ་སོར་ཡོངས་སུ་བསྒྲགས་པ་ཡིན། །ཡི་གེ་ཕྱེད་ཙམ་མཆོག་གྱུར་པ། །ཤིས་པ་ཞི་བ་སྐྱོན་མེད་པ། །ཡོན་ཏན་ཨོཾ་དང་ཡི་གེ་ཕྱེད། །ཨོཾ་ཞེས་གསལ་བར་བརྗོད་པ་ཡིན། །སྣ་ཡི་རྩེ་
མོར་ཡང་དག་ལྡན། །གཙུག་མཐའ་དང་ནི་ལག་པ་གནས། །ཉི་མ་ཟླ་བའི་སྦྱོར་བ་ལས། །ཡེ་ཤེས་མེ་ནི་ངེས་པར་སྐྱེ། །ལྕེ་དང་རྐན་གྱི་མཚན་མ་ནི། །སྦྱོར་ལས་ཐར་བར་དེ་བཤད་དེ། །ཨ། འོག་ཏུ་ཨ་དང་ཡང་དག་
ལྡན། །དེ་སྟེང་ཡི་གེ་ཨ་ཉིད་དེ། །ཐད་ཀ་རུ་ནི་མ་བཤད་དེ། །ཁྱོད་ནི་ཡི་གེ་ཕྱེད་ཞིབ་ཉིད། །ཡི་གེ་ཨོཾ་ནི་ཚངས་པ་སྟེ། །ཨཱཿནི་ཁྱབ་འཇུག་ཡིན་པར་བཤད། །ཧཱུྃ་ནི་རླུང་དུ་གྱུར་པ་ཡིན། །དེ་ཉིད་དྲག་པོ་ཞེས་བྱའོ། །ཞི་བའི་ཕྱེད་ཕྱེད་

88-1-295b

ཞེས་བྱ་བ། །དེར་ནི་བདག་ཡོངས་བསྒྲགས་པ་ཡིན། །གནས་དང་འཕོ་དང་སྐྱེ་བ་དང་། །གཞན་གྱི་ལུས་ལས་ཡང་དག་འཕོ། །ཡེ་ཤེས་རང་ཉིད་མེད་ཡིན་ཏེ། །ཁྱབ་པར་འཛིན་པ་དེ་བཞིན་ནོ། །རལ་གྲི་ལ་སོགས་དངོས་གྲུབ་དེར། །བྱང་ཆུབ་ཕྱི་
རོལ་ཉིད་འགྲུབ་འགྱུར། །གཉིས་པོ་འདི་དག་གནས་པ་ཡི། །རྣམ་དག་འདི་དག་རབ་ཏུ་བརྟག །ཚངས་པ་ལ་སོགས་པ་རྣམས་དེར། །མ་འོངས་པ་རྣམས་སྒོམ་པར་འགྱུར། །དེ་ནི་མཐོ་རིས་སོགས་འགག་པས། །དེ་བཞིན་འགྱུར་བ་
སེལ་བ་ཡིན། །རྣལ་འབྱོར་པ་རྣམས་སྲོག་སྤངས་ནས། །གཉིས་སྤྱད་པར་ནི་རྣམ་པར་གནས། །ཤིན་དུ་སྦྱོར་གཅིག་གྱུར་སོང་བས། །འཇུག་འགྱུར་བ་ནི་དྲག་པོ་ཡིན། །ནམ་མཁའ་དགག་པའི་སྦྱོར་བ་ཡང་། །ཚངས་པར་གཞོལ་
བའི་བདག་ཉིད་ཅན། །མངལ་གྱི་གཟུགས་གྱུར་ཁྱབ་འཇུག་སྟེ། །དེ་ཡི་དབུས་ན་དབུས་བཟུང་བ། །སྤུ་ཡི་ཆ་ནི་སྟོང་ལས་གཅིག །ཞི་དེ་རྣམ་པར་མི་རྟོག་ཉིད། །ཐར་པ་གཅིག་པུར་དེ་སྟོན་བྱ། །ཐར་པའི་ངོ་བོ་ཉིད་མ་ཡིན། །དེ་ལྟ་བས་ན་
འདི་ལོག་བྱ། །ཞི་བ་ཉིད་ནི་སྒྲོགས་པའོ། །སྟོན་པ་དེ་རྣམས་ཕྱེ་ནས་ནི། །ཞི་བའི་ཆོས་རྣམས་སྨྲ་བར་འགྱུར། །ཐབས་ཆེན་དེ་བཞིན་ཤེས་རབ་དག །འདི་འདྲ་མཐོང་བར་མི་འགྱུར་རོ། །ཚངས་ལ་སོགས་པའི་ལྷ་རྣམས་ཀུན། །ཁྱོད་ཀྱི་ཐལ་
མོ་དག་ལ་གནས། །དེ་རྣམས་ཕྱག་རྒྱ་སྟོན་བྱེད་ཅིང་། །སྔགས་ནི་བྱེ་བ་མཐའ་ཡས་པ། །འདི་ཉིད་དུ་ནི་ཉི་ཟླ་དང་། །སྦྱིན་བསྲེག་ལས་ཅན་མེ་དང་ནི། །ལོ་དང་ཟླ་བའི་སྦྱོར་བ་དང་། །རྟག་ཏུ་འཆར་དང་འཕེལ་འགྲིབ་དང་། །དེ་ཉིད་
གསུམ་གྱི་སྦྱོར་སྐྱེས་འདི། །དེ་ཉིད་གཅིག་པུ་རྣམ་པར་གནས། །ཞི་བ་ཉིད་ཀྱི་སྦྱོར་ཆོས་ལ། །དེ་ཡང་གཅིག་དང་དུ་མ་སྤངས། །ཁྱེད་ཀྱི་ཐལ་མོ་ལས་བྱུང་བ། །དེ་བས་དེ་ནི་འདའ་མི་བྱ། །དེ་བཞིན་གཤེགས་ཀུན་སྤངས་འགྱུར་
བས། །དེ་ནི་སྤོང་བར་མི་བྱ་ཞིང་། །འདི་དག་དངོས་མེད་ལ་ལྟོས་པས། །རྣལ་འབྱོར་པ་ནི་མཆོག་ཏུ་འདོད། །གཞན་དུ་རྣམ་རྟོག་ཉིད་ལས་ནི། །དངོས་གྲུབ་འབྲས་བུའི་སྣོད་མི་འགྱུར། །དེ་བས་ཐལ་མོ་

88-1-296a

སྦྱར་བ་འདི། །སེམས་ཅན་རྗེས་བཟུང་དམ་པ་ཡིན། །མ་བཟུང་བ་ཡི་སེམས་ཅན་རྣམས། །བསྡུ་བའི་དོན་དུ་ཁྱོད་ཀྱིས་བྱ། །སྨད་བྱ་འོན་པ་ལྐུགས་པ་དང་། །དེ་བཞིན་ལོང་བར་གྱུར་པ་དང་། །གང་ཞིག་འཕྱེ་བོ་ལ་སོགས་
གྱུར། །དེ་རྣམས་ལ་ནི་ཕན་ཕྱིར་བྱ། །དེ་ལ་སོགས་པ་མདོར་བསྡུས་པ། །དེ་ནི་ཁྱེད་ཀྱི་ཐལ་མོར་གནས། །དེ་ནི་འཇིག་རྟེན་འདས་གཙོར་གྱུར། །དེ་ཉིད་བསྡུས་པའི་རྒྱུ་ཅན་ནོ། །དེ་ནི་ནང་མིན་ཕྱི་མ་ཡིན། །གཉིས་མིན་གཞན་གྱི་རྒྱུ་ལས་མིན། །
ཕྱག་རྒྱ་ཚོགས་པ་ལས་སྐྱེས་མིན། །འཇིག་རྟེན་རྐྱེན་ལས་བྱུང་བ་མིན། །རྡོ་རྗེ་ཐལ་མོ་བསྡོམས་པས་ན། །མིང་ནི་རྡོ་རྗེ་ཐལ་མོར་གྱུར། །སེམས་ཅན་རྣམས་ཀྱིས་རྟོགས་དཀའ་བའི། །སྙིང་པོ་རྟོགས་པར་བྱ་བའི་མཆོག །ཕྱག་རྒྱ་འདི་ལྟ་
བུ་འདི་ཡིན། །ཕྱི་ནང་གཉིས་ཀྱི་མིང་ཅན་ནོ། །མི་བསྐྱོད་རིན་ཆེན་དཔག་མེད་དེ། །དངོས་གྲུབ་རྣམ་སྣང་དེ་བཞིན་གཤེགས། །འདི་དག་ལག་པ་གཡས་པ་ཡི། །མཐེའུ་ཆུང་ལ་སོགས་རྣམས་ལ་གནས། །གཉིས་པོར་གཅིག་འགྱུར་དགེ་
འདུན་ཏེ། །དེ་འདི་སྐྱབས་ནི་གསུམ་ཡིན་ཏེ། །སངས་རྒྱས་ཆོས་དང་དགེ་འདུན་རྣམས། །གཅིག་དང་གསུམ་དུ་བརྟགས་པ་ཡིན། །ཕན་ཚུན་བཅིངས་པའི་རྡོ་རྗེ་ཉིད། །ཤེས་རབ་ཐབས་ཀྱི་གནས་མཐོང་ཡིན། །ཐལ་མོ་བཅིངས་
པ་ཙམ་གྱིས་ཀྱང་། །སངས་རྒྱས་ཐམས་ཅད་ཉིད་ཐོབ་འགྱུར། །སྐྱབས་གསུམ་དང་ནི་དེ་ཉིད་གསུམ། །རྡོ་རྗེ་གསུམ་དང་རྣམ་ཐར་གསུམ། །ཞལ་གསུམ་མདོག་གསུམ་སྤྱན་གསུམ་དང་། །ལྷ་གསུམ་དང་ནི་ཁམས་
གསུམ་དང་། །དུས་གསུམ་དམ་ཚིག་མཆོག་གསུམ་དང་། །ཚུལ་གསུམ་དཀྱིལ་འཁོར་གསུམ་དུ་འགྱུར། །སྦྱོར་བ་གསུམ་དང་ལམ་གསུམ་སྟེ། །ཇི་སྲིད་རྟོགས་པའི་འདོད་པ་རྣམས། །དེ་ནི་ཐལ་མོར་སྦྱོར་འདི་ཡིན། །
འདོད་ནོར་ཡོན་ཏན་གསུམ་གྱི་མཆོག །རིམ་དང་བསླབ་པ་སྟེར་བ་དག །མ་འོངས་སྐྱེ་བོས་འཐོབ་པར་འགྱུར། །དེ་ཉིད་དུ་ནི་དེར་འགྱུར་ན། །གཅིག་དང་དུ་མ་རྣམ་པར་སྤངས། །ཆོས་བཤད་བཤད་པ་དངོས་མེད་པ། །འགྲོ་བ་རྐྱེན་

88-1-296b

གྱིས་ཡང་དག་སྡུད། །འདི་ནི་མཁར་ལྟར་རང་བཞིན་གཅིག །གནས་མེད་གནས་པ་ཞེས་བྱ་བ། །བསྡུ་བར་བྱས་པར་གྱུར་པས་ཀྱང་། །སྐུ་གསུམ་དོན་གྱི་ཆོས་ཉིད་དོ། །འདི་ནི་ཐོག་མཐའ་མེད་པ་སྟེ། །དངོས་པོ་མེད་ཅིང་གནས་
མེད་པ། །མཐའ་མེད་ཟད་པ་མེད་པར་འགྱུར། །སྐུ་གསུམ་དག་ནི་རྐྱེན་ལས་ནི། །རྣམ་པའི་འཇུག་པའི་ཡེ་ཤེས་ཏེ། །དེ་ལས་སངས་རྒྱས་སྙིང་པོར་གྱུར། །ཧཱུྃ་གིས་སེམས་ཅན་ཡང་དག་འབྱིན། །སངས་རྒྱས་སྐུར་ནི་རབ་ཏུ་
བརྟག །ཨཾ་ནི་ཐམས་ཅད་སྡུད་པ་སྟེ། །ཨཱཿནི་གནས་པ་སོར་འགྱུར་རོ། །གཅིག་པུ་རྣམ་གསུམ་དེ་བཞིན་ལྟ། །གསལ་དང་མི་གསལ་སྦྱོར་བ་ནི། །རྟེན་འབྲེལ་ཆོས་ཉིད་འདི་ཡིན་ཏེ། །དེ་ཉིད་ཀྱི་ནི་སྔགས་བཤད་པའོ། །
ཟློས་དང་བསམ་གཏན་རྣམ་བྲལ་བར། །དེ་ཡི་ལྷུན་གྲུབ་འབྲས་བུ་སྟེར། །རང་བཞིན་གྲུབ་པ་འདི་ཡིན་ཏེ། །འདོད་པའི་བཟླས་པར་དེ་བཤད་དོ། །རྣལ་འབྱོར་པ་ལ་དེ་གསལ་ཏེ། །བྱིས་རྣམས་དེ་ལ་ཕྱིན་ཅི་ལོག །རྐྱེན་ལས་བྱུང་བ་དེ་
ཉིད་གསུམ། །དངོས་པོ་མེད་པར་དེ་བཤད་དོ། །དེ་ཉིད་བསྡུས་པ་བཤད་པ་ནི། །ཡིད་མིན་པ་ཡི་བཟླས་པར་གྱུར། །ཡིད་རྟོན་གཅིག་ནི་མདོར་བསྡུས་ལས། །རིངས་དང་དལ་དང་གནས་པ་རྣམས། །ཞི་བའི་ཆོས་ཉིད་ལ་སྐྱེ་སྟེ། །
ནམ་མཁའི་དབྱིངས་དང་མཉམ་པར་ཐིམ། །དངོས་པོ་མེད་པའི་དེ་ཉིད་འདི། །རྟེན་འབྱུང་ཆོས་ཤེས་བྱ་བ་ཡིན། །ལོངས་སྤྱོད་རྫོགས་པའི་བསྡུས་དེ་གྱུར། །སྤྲུལ་པ་བསམ་མི་ཁྱབ་ཅེས་དབེན། །སྡུད་པ་པོར་ནི་གང་གྱུར་པ། །
དེ་ཡང་ཕུལ་དུ་གྱུར་པའི་མིང་། །རྡོ་རྗེ་ལ་སོགས་ཡང་དག་སྦྱར། །སེམས་ཅན་རྣམས་ནི་དེ་སྦྱོར་བྱེད། །དམ་ཚིག་ལ་སོགས་སྔོན་དེ་ནི། །དེ་ཉིད་ཀྱིས་ནི་རྡོ་རྗེར་སྦྱར། །
སེམས་ཅན་དགོངས་པའི་སྦྱོར་བ་ཡིས། །དེ་ཡི་ཆོས་རྣམས་སྟོན་པར་བྱེད། །རྣམ་པ་དགུ་པོ་ཐོག་མཐའ་ཅན། །སྡུས་པ་པོ་རྣམས་བྱས་པ་ཡིན། །གསང་སྔགས་དེ་ཉིད་གནས་དགོད་པས། །

88-1-297a

སེམས་ཅན་རྣམས་ནི་དེར་འཇོག་སྟེ། །གསོལ་བ་འདེབས་དང་ཕྱག་འཚལ་དང་། །འཇིག་རྟེན་རྣམས་ལ་གསོལ་བྱ་དང་། །རྫོགས་སངས་རྒྱས་རྣམས་མཉེས་བྱེད་དེ། །ཁྱོད་ཀྱི་ཐལ་མོར་གནས་པ་ཡིན། །གང་ཞིག་སེམས་
ཅན་སངས་རྒྱས་གྱུར། །དེ་བཞིན་གཉིས་མེད་ཆོས་ཉིད་ཅན། །གནས་མེད་གནས་པའི་སྦྱོར་བ་ཡིས། །ཐམས་ཅད་སངས་རྒྱས་རྣམས་གནས་སོ། །སྣ་ཚོགས་མཚོན་པ་དེ་ཉིད་དོ། །མཐོང་བ་གསལ་བྱེད་ཐལ་མོ་ཡིན། །
དེ་བས་དེ་རྣམས་མགུ་གྱུར་པ། །ཆོས་ཀྱི་དེ་ཉིད་རྐྱེན་ལས་སོ། །རྒྱུ་མེད་རང་གི་དེ་ཉིད་འདི། །ཁྱེད་ཀྱི་ཕྱག་རྒྱའི་སྦྱོར་ལས་བྱུང་། །གང་ཞིག་ཤེས་པས་འདོད་འགྲུབ་པའི། །དངོས་གྲུབ་དེས་ནི་ཐོབ་པར་གྱུར། །ཨ་ཉིད་དེར་ནི་མི་
གསལ་བའི། །རྒྱུ་ལས་སྦྱོར་བར་གྱུར་པ་ཡིན། །དོག་པར་དེ་ནི་ཡོངས་བཤད་དེ། །དངོས་པོ་མེད་པར་རས་ཀྱི་མིང་། །འཕགས་པ་གཤིན་རྗེ་གཤེད་བསྒོམས་ལ། །གཞོན་ནུའི་གཟུགས་སུའང་བསྒོམ་པར་བྱ། །དོག་པ་དེ་ཡི་རས་དོན་ལས། །
མི་སྣང་བ་ལ་སོགས་གྲུབ་ཅིང་། །ཡིད་བཞིན་ནོར་བུ་འདྲ་བའི་མཆོག །འགྲོ་བའི་དོན་གཅིག་ཡང་དག་བྱུང་། །ཨ་ཡི་དོག་རས་མཚོན་པས་ནི། །འཇིག་རྟེན་པ་ལ་དགོངས་པས་བཤད། །འདི་ནི་ཆོས་དང་རྫོགས་ལོངས་སྤྱོད། །སྤྲུལ་
པས་དེ་ནི་གསུམ་དུ་འགྱུར། །བྱིས་པ་རྟོག་པར་བྱ་བའི་ཕྱིར། །དེ་ནི་རྣམ་པ་ལྔར་ཡང་འགྱུར། །ཐ་མལ་བྱིས་པའི་ཆོས་རྣམས་གང་། །རྣམ་ལྔ་གཅིག་པའི་རྣལ་འབྱོར་པ། །དེ་ཡང་ཤིན་དུ་ལྡན་སེམས་ཅན། །སེམས་ཅན་སོགས་
ལ་རྣམ་པར་གནས། །རྟག་པ་ལྟར་ནི་སོ་སོར་སྣང་། །འགྲོ་བ་དུས་གསུམ་མཚན་ཉིད་གཅིག །སྐྱེ་བ་མེད་ལས་སྐྱེས་པས་ན། །གཅིག་དང་དུ་མ་རྣམ་སྤངས་པའོ། །ཤེས་འདོད་དེ་ཚེ་སྔགས་པ་ནི། །འགྲོ་བ་བྱིས་པ་དེ་ཚེ་སྤྱོད། །
དེ་ནས་གསང་སྔགས་གྲུབ་འགྱུར་བ། །རྣམ་པར་མི་རྟོག་གཅིག་ཤོས་ཉིད། །ཡ་ཡི་སྡེ་སོགས་གནས་བྱས་ཏེ། །སྔགས་ནི་ན་རི་བྲི་བར་བྱ། །རང་གི་སྡེ་བཅས་གནས་དག་ནི། །ཡི་གེ་ཨ་བཞིན་སྔོན་འགྲོ་བ། །སོ་སོ་

88-1-297b

གཞན་པའི་བཞི་པ་ནི། །ཨི་ཨུ་དང་ནི་རིང་པོར་བཅས། །ཨ་ཨཻ་ཨཽ་ཨུ་ཡ་སྟེ་མཐའ། །བཞི་པོ་དང་བཅས་ཟླུམ་པོར་བྲི། །བསམ་གྱིས་མི་ཁྱབ་སྦྱོར་ལྡན་པའི། །འགྲོ་བ་མཉམ་བཞག་བསྐྱེད་པ་ཡིན། །འདི་དག་རང་སྐྱེས་གནས་
གཟུགས་ཀྱི། །ཆུ་ཡི་ཡི་གེར་ཞུགས་པར་འགྱུར། །དེ་ནས་གཞོན་ནུའི་གཟུགས་ཉིད་ཀྱང་། །རྣམ་པར་བསྒོམས་པས་སྐྱེ་བར་འགྱུར། །ཆ་བཅས་དབང་གནས་སྔགས་པ་ནི། །བླ་མེད་དངོས་གྲུབ་ཐོབ་པར་འགྱུར། །ནཱ་
ག་ཡི་ནི་གྲངས་བཞིན་དུ། །སྐུད་སོགས་སྦྱོར་ལ་གང་གནས་པ། །ཉི་ཤུ་ཡི་ནི་སྔོན་མ་ཡང་། །དེ་ནི་རས་ཏེ་བཞི་པའང་ཡིན། །སྔོན་མེད་ཆ་ལུགས་གཟུགས་ཀྱིས་ནི། །ཁམས་གསུམ་དག་ནི་ལྟ་བར་འདོད། །འགྲོ་བའི་
དོན་ནི་བྱེད་གྱུར་པའམ། །མཉམ་ཉིད་ཡེ་ཤེས་དེ་ཉིད་ལས། །ཡོན་ཏན་གསུམ་ནི་བརྡ་བྱས་པ། །ཡོན་ཏན་མེད་པའི་ཡོན་ཏན་མིང་། །གཞོན་ནུའི་སྤྱོད་པའི་ལུས་ཀྱི་མིང་། །ལྟ་བ་འདི་ནི་བ་ར་སྐྱེས། །དེ་ནི་སྒོ་གླེགས་མཐའ་
ཡིན་ཏེ། །ཨི་ཨུ་དང་ནི་རིང་པོར་བཅས། །ཡི་གེ་གསུམ་བཅས་ཐིག་ལེར་ལྡན། །ཚེག་དྲག་མཐའ་ཡི་རིང་སྡེ་ཅན། །ཡི་གེ་ཨ་ནི་ཡིག་སྦྱོར་བའང་། །བཅུ་གཅིག་པར་ཡང་གྱུར་པ་ཡིན། །དེ་ཉིད་རིང་པོ་རིང་བའི་མཐས། །
བཅུ་གཉིས་པ་ཡི་གྲངས་སུ་འགྱུར། །དེ་ཉིད་ཡི་གེ་ཨུར་སྦྱོར་ལས། །ཡི་གེ་ཨོཾ་ཞེས་བརྗོད་པ་ཡིན། །སྔ་མའི་རི་མོའི་སྦྱོར་བ་ཡིན། །མིང་ནི་བཅུ་བཞི་པར་འགྱུར་རོ། །ཅི་སྟེ་ཨ་ལས་སྔགས་པས་ནི། །ཨ་ཉིད་དུ་ནི་
བལྟ་བར་བྱ། །དེ་བཞིན་ཨ་ཡི་སྦྱོར་བ་ལས། །ཡི་གེ་ཨི་ནི་ཅི་འདོད་པར། །ཇི་བཞིན་གྲངས་ཀྱིས་ཡང་དག་བལྟ། །རེ་རེའང་ཨ་ཡི་སྦྱོར་བས་བསྒོ། །ཨི་རི་ལི་ཨུའི་ཚོགས་ལས་ཀྱང་། །སྔགས་པ་ཡ་ར་ལ་ཝའི་
གཟུགས། །ལྐོག་མ་མཁའ་དང་བར་དང་ནི། །རྐན་དང་སྤྱི་བོར་གང་གནས་པ། །གང་ཚེ་ཨཱ་ཀའི་སྡེ་གྲངས་ལས། །ཨ་ཡི་ཁ་ཡི་བརྒྱབ་ན་གནས། །ཨི་ཚེན་ཕྲག་པ་ལག་པ་དང་། །ཚིགས་རྣམས་ལ་ནི་དེ་

88-1-298a

བཞིན་ནོ། །དཔུང་པ་དང་ནི་ལག་པ་དང་། །ལག་པ་གཡོན་པར་རབ་ཏུ་བརྟག །དཔྱི་དང་བརླ་དང་བྱིན་པ་དང་། །རྐང་པ་གཡས་གཡོན་དེ་བཞིན་ནོ། །གཟུགས་དེ་ཡི་ནི་གྲངས་མཉམ་པས། །ཏ་ཚན་ཤིན་དུ་
དངོས་གྲུབ་སྟེར། །ཨུ་ཚན་དེ་བཞིན་དབུས་དང་ནི། །ལག་པ་རུ་ནི་ཡོངས་སུ་བཤད། །རྐང་པ་ཡང་ནི་རི་ཏིའི་ཚན། །འདས་པའི་ཚུལ་དུ་བཞུགས་པ་ཡིན། །དེ་བཞིན་ཉིད་ཀྱི་སྦྱོར་ལྡན་པའི། །སྔགས་པ་རྣམས་
ཀྱིས་ཤིན་དུ་མཐོང་། །ལྷུན་གྱིས་གྲུབ་པའི་དངོས་གྲུབ་པ། །མེ་ཏོག་གིས་མཛེས་ཕྲེང་བ་བཞིན། །རང་རྒྱུད་ཀྱིས་ནི་ནང་ཉིད་དུ། །ལྷ་མཆོག་དག་ནི་བྱ་བ་ཡིན། །དགོངས་པ་ལ་སོགས་རྣམ་པ་ཀུན། །དེ་ཉིད་ལས་ནི་བདག་
འགྲུབ་འགྱུར། །ཚ་བའི་གཞི་བཞི་སྟེ་སྦྱོར་བས། །མཁས་པ་ཡིས་ནི་སྒོ་རྣམས་བྱ། །ཀ་ཙ་ན་ཏ་པ་ཚན་ཡང་། །དབུས་དང་ཤར་ལས་སོགས་སྔོན་འགྲོ། །འགྲོ་ལ་ཕན་པའི་འདོད་པ་ཡང་། །མ་སྤེལ་བར་ནི་མཐོང་བ་ཡིན། །
ཐམས་ཅད་ཀྱང་ནི་རྫོགས་ཡི་གེ། །ཡི་གེ་ཧ་ཡིས་མཆོད་པར་བྱ། །སྣ་ཚོགས་པ་ནི་འབྱིན་བྱེད་ཅིང་། །འགྲོ་བ་དུས་གསུམ་གཅིག་པའི་དངོས། །ཡི་གེ་ཨ་ནི་ལུས་སུ་བྱ། །ལྷག་མ་རྣམ་པ་དང་བཅས་པ། །མཚམས་མེད་ལྔ་
ཡི་སྦྱོར་བ་ལས། །སྔགས་པ་འགྲོ་བ་ཕན་པར་སྟོན། །ཤ་ཐོག་མཐར་གནས་སྔགས་ལས་སྐྱེ། །དབང་བསྐུར་གསུམ་པོ་སྤྱི་ལས་སྐྱེ། །གཟུགས་མེད་རྟོགས་པའི་ཆོས་རྣམས་ནི། །སྐད་ཅིག་གཅིག་གིས་ངེས་སྦྱོར་གྱུར། །
དེ་ཚེ་དཀྱིལ་འཁོར་མེད་བྱས་པ། །འཇིག་རྟེན་པ་ཡི་ཆོས་དགར་འགྱུར། །ཨ་ཀུ་ཧ་གནས་བྱང་ཕྱོགས་གནས། །ཡོད་པ་ཉིད་ཀྱང་དུས་གསུམ་འདས། །གང་དང་གང་ནས་བྱུང་བ་ཡི། །གསང་སྔགས་བསམ་གྱིས་མི་ཁྱབ་
གསུངས། །དེ་དང་དེ་ནི་བཞུགས་གྱུར་པ། །རང་གི་མཚན་མ་གཅིག་ཤོས་ཉིད། །གཟུགས་མེད་འདི་ལ་གནས་ཡོད་པ། །ཆ་ནི་གསུམ་ཞེས་བྱ་བར་འགྱུར། །སྟེང་འོག་ཕྱོགས་ཀྱི་ཆ་རྣམས་སུ། །དངོས་མེད་པ་ནི་རྣམ་པར་གནས། །

88-1-298b

དངོས་པོ་གཅིག་གྱུར་མཐོང་བ་དང་། །འགྲོ་བཅས་ཚངས་པ་འགྲོ་བདག་ཉིད། །ཚངས་པའི་གནས་པ་བཞི་པོ་ལས། །སྨོན་ལམ་ལ་སོགས་བསྒོམ་བྱ་བའོ། །འགྲོ་དོན་གཏོགས་འདོད་པ་ཡི་ཡོན་ཏན་གྱུར་བདག་ལ། །དགྱེས་པའི་བདེ་མཆོག་
དགའ་བའི་འདོད་པ་མཛོད། །སྔོན་ཆད་མཛད་པའི་སྨོན་ལམ་རབ་མཆོག་དགོངས་ནས་ནི། །ཐུབ་པ་རྡོ་རྗེའི་ཚིག་མཆོག་རྣམ་པར་དབྱེ་བར་གསོལ། །ནོར་བུ་རིན་ཆེན་དག་གིས་རྣམ་བརྒྱན་སྐུ་ཡི་མཆོག །འགྲོ་བའི་དོན་བྱེད་སྲིང་མོ་བདག་
ལ་བརྟེན་པར་མཛད། །ལྷག་པའི་སྙིང་རྗེ་ལས་བྱུང་རབ་མཆོག་ལྡན་པའི་སྐུ། །བདག་ནི་ཡོངས་སུ་བཟུང་ལ་ཆོས་རྣམས་དོན་ཡོད་མཛོད། །སྲིང་མོས་ཀྱང་ནི་ཁྱད་པར་དུ། །དེ་ལྟར་བསྐུལ་བ་ཙམ་གྱིས་ནི། །དེ་ནས་ཡོངས་སུ་འཛིན་མཛད་དེ། །
རིག་པའི་པད་མ་དཔལ་དུ་མཛད། །ཤིན་དུ་སྙན་ཅིང་ཡིད་འོང་དབྱངས་ཀྱིས་ནི། །ཕན་པས་མྱུར་དུ་འགྲོ་བ་གཉིས་མེད་འདིར་སྣོད་གྱུར། །བླ་མ་བདག་ནི་གལ་ཏེ་གསོན་པར་མཆིས་བཞེད་ན། །དགའ་བ་ལས་བྱུང་ཆོས་དགའ་བདག་ལ་དགྱེས་
པར་མཛོད། །འགྲོ་བ་དང་ནི་འོང་དང་གནས་པ་ཙམ་འདི་ནི། །ནམ་ཡང་ལྟོས་པར་གྱུར་པ་དག་གི་མངའ་བ་ལགས། །ཀུན་དུ་སོང་བའི་བདག་ཉིད་ཅན་གྱི་དམ་ཚིག་སྟོན། །འདོད་པའི་ཡོན་ཏན་རྣམས་དང་ཁྱེད་བདག་འདོད་པ་མཛོད། །དགོངས་
པའི་ཡེ་ཤེས་རྡོ་རྗེ་ཡིས། །སངས་རྒྱས་ཡོན་ཏན་གཅིག་ལ་བཞུགས། །བཟླས་བརྗོད་སྦྱིན་བསྲེག་དེ་བཞིན་ཁྲུས། །དཀྱིལ་འཁོར་ཡོངས་སུ་བརྟགས་པ་མཛད། །འདོད་པ་མེད་ཅིང་ཆགས་ལ་ཞི། །དེ་ཡང་དོན་དམ་དག་གྱུར་ཡིན། །
སྤྱོད་དུས་དེ་བཞིན་སྔགས་པ་ནི། །བཟླས་བརྗོད་དངོས་པོ་མེད་པ་ཡིན། །བསྙེངས་པ་ཡང་ནི་ཡིད་བཟང་ལྡན། །མདའ་དང་རིག་བྱེད་ཡོན་ཏན་དང་། །ཟུང་དང་ཟླ་དཀྱིལ་རྣལ་འབྱོར་པ། །དབྱངས་ཀྱི་ཡི་གེ་གཞག་པར་བྱ། །ཧ་ཡི་སྡེ་ཚན་ཀ་
སྡེ་དང་། །བཅུ་གཉིས་ཕྱེད་ཕྱེད་དག་ཏུ་སྦྱར། །གཤིན་རྗེའི་གཤེད་ཀྱི་གཟུགས་འདི་ནི། །ཉི་མའི་དཀྱིལ་འཁོར་དག་ལ་དགོད། །དེ་ནས་སྔགས་པ་མདུན་འདུག་སྟེ། །དགོངས་པའི་དོན་གྱིས་བརྟག་པར་བྱ། །ཕུང་པོ་ཁམས་ལ་

88-1-299a

སོགས་བལྟ་བ། །བརྡ་ལས་ཇི་ལྟར་ལུས་ཡིན་བཞིན། །མ་བྱིན་ལེན་པ་བྱང་ཆུབ་སེམས། །ཀུན་རྫོབ་བསྟན་པ་རྫུན་སྨྲ་བ། །ཕུང་པོ་སྲོག་ཆགས་གྱུར་པ་སྟེ། །ཚངས་པའི་གནས་བཞི་བུད་མེད་ཡིན། །མི་སྦྱིན་ཚིག་
དང་རྐང་པ་སྟེ། །དེ་བཞིན་རྟེན་པ་ཉིད་ཀྱང་ནི། །དུས་གསུམ་སྦྱོར་བ་གཅིག་པུ་རུ། །སྔགས་པ་ཡིས་ནི་དེ་བྱའོ། །བཤང་བ་ཞེས་ནི་ཡུལ་ལ་བཤད། །ཅིག་པ་ཞེས་ནི་དབང་པོ་ཡིན། །དེ་དག་ཟ་བར་བཤད་པ་ནི། །མ་སྐྱེས་གཅིག་པུར་
མཐོང་བའོ། །ཁྲག་གི་པགས་པར་ཡང་དག་བཤད། །ས་བོན་ལུས་ཤེས་བྱ་བ་ཡིན། །རྐང་ནི་སེམས་ཀྱི་ཀུན་རྟོག་པ། །ཟ་བ་དངོས་མེད་གྱུར་པའོ། །སྨོན་ལམ་དབང་གིས་འདི་རྣམས་ནི། །བི་མུ་ར་ཤུ་པ་ས་འདི། །ལྷ་རྣམས་
སྦྱོར་བའི་ཆོས་ཉིད་དུ། །བདུད་རྩི་ཞེས་ནི་བརྗོད་པ་ཡིན། །དགོངས་པ་ཡིས་ནི་བཤད་པ་ལ། །བྱིས་པ་རྣམས་ནི་ཡི་གེར་རྟོག །རྡོ་རྗེ་ཐེག་ལ་གནས་ཁྱོད་ཀྱང་། །ཆོས་ཉིད་དེ་ཡང་མི་ཤེས་སོ། །རྟོག་པ་ཀུན་ལས་
རྣམ་འདས་པས། །ཆོས་ཀྱི་དབྱིངས་ཏེ་མཁའ་དང་མཚུངས། །དེ་འདྲ་འཇིག་རྟེན་རྒྱང་པན་པ། །མཐོན་པོའི་གསང་གིས་རྟོག་པར་བྱེད། །ཡི་གེ་གང་གིས་མི་གང་ཞིག །འགྲོ་ལ་གསལ་བར་རྟོག་བྱེད་པ། །འགྲོ་དོན་གཅིག་
པའི་སྦྱོར་བ་ལས། །དེ་ཉིད་ཀྱི་ནི་དེ་ཉིད་མཐོང་། །གང་ཞིག་རྣམ་སྨིན་སྨིན་པ་ཡི། །སེམས་ནི་དངོས་གྲུབ་ལ་གཞོལ་བ། །རྫོགས་ལོངས་སྤྱོད་པའི་སྐུར་སྦྱོར་ལས། །དངོས་པོ་མེད་པ་ཉིད་དུ་བྱུང་། །བདག་ཉིད་བསམ་གྱིས་མི་ཁྱབ་
གཟུགས། །ཀུན་རྫོབ་དོན་གྱི་གཉེན་པོར་འབྱུང་། །སྤྲུལ་པའི་ལུས་ལས་སྔགས་པས་ནི། །སྒྱུ་མ་བཞིན་དུ་སྟོན་པར་བྱེད། །གསང་བའི་དངོས་པོ་དེ་ཉིད་འདི། །འཇམ་དཔལ་ཡེ་ཤེས་དམ་པའོ། །རྡོ་རྗེ་གསུམ་གནས་སྦྱོར་བ་ཡིས། །
བསྒོམ་པའི་བདག་ཉིད་ཅན་གྱིས་བསྒོམ། །ནམ་མཁར་རྟོགས་པའི་རྣལ་འབྱོར་ལ། །ཕུང་པོ་དགོན་པ་ཆེན་པོར་འདོད། །གནས་མེད་གནས་པའི་སྦྱོར་བ་ཡིས། །དེ་བཞིན་ཉིད་གནས་ས་ཕྱོགས་ཡིན། །ལོངས་སྤྱོད་རྫོགས་པའི་དཔག་

88-1-299b

བསམ་ཤིང་། །དངོས་གྲུབ་སྣ་ཚོགས་མེ་ཏོག་ལྡན། །སྤྲུལ་པའི་འབྲས་བུ་ཤིན་ཏུ་མཛེས། །ཡང་དག་རྫོགས་པའི་བྱང་ཆུབ་རི། །དངོས་མེད་དབེན་པ་ཉམས་དགའ་བ། །རྡོ་རྗེ་ཞེས་བྱ་དེས་བསྒྲུབ་བྱ། །ཕུང་སོགས་ཡན་ལག་
ཐམས་ཅད་དེ། །སངས་རྒྱས་འབྱུང་བ་དངོས་གྲུབ་གྱུར། །སྔགས་འདོན་པར་ནི་གང་གྱུར་པ། །བསྡུས་པ་སྔགས་ནི་གཅིག་པུ་པ། །ལུས་སོགས་རྡོ་རྗེ་གསུམ་ལ་ནི། །རྡོ་རྗེ་འཇམ་པ་བསྒོམ་པར་བྱ། །ལུས་ལ་སོགས་པ་
རྡོ་རྗེ་གསུམ། །དེ་ཉིད་གསུམ་ནས་སྤྲོ་བར་བྱ། །རྡོ་རྗེ་གསུམ་དང་ལུས་སྦྱོར་ལས། །འཇམ་པའི་རྡོ་རྗེ་འདྲ་བར་འགྱུར། །ནམ་མཁའ་མཐའ་ཡས་ཡང་དག་རྟོག །སེམས་སྦྱོར་བ་ནི་དཔག་ཚད་ཡིན། །ལྔ་བཅུ་
གཉིས་གྱུར་གང་ཡིན་པ། །བརྒྱ་བརྒྱ་པ་ནས་མངོན་ཕྱོགས་ལ། །ཅི་རིགས་གཅིག་པའི་ཡང་དག་རྟོགས། །སྣ་ཚོགས་རྡོ་རྗེ་འབར་གཅིག་སྩོལ། །དཔག་ཚད་བརྒྱ་ཡི་ཁྱོན་ཙམ་དུ། །འབར་བའི་རྡོ་རྗེ་སྣང་བ་ཡིས། །ས་ལ་སོགས་པ་
བརྒྱན་པ་ནི། །དེ་ནི་སྣང་བ་ཞེས་བཤད་དོ། །ཚངས་པ་དབང་པོ་ལ་སོགས་ལྷ། །དད་པས་དེ་ལ་ཕྱག་ཀྱང་བྱེད། །འདི་ནི་མི་སྣང་བྱེད་པ་སྟེ། །ཏིང་འཛིན་འཇམ་པའི་རྡོ་རྗེ་ཉིད། །རྣམ་པར་སྨིན་པ་ལྡོག་གྱུར་ཅིང་། །ཇི་སྐད་གསུངས་པ་འགྲུབ་པར་
འགྱུར། །ཕུང་པོ་ལ་སོགས་གྲངས་མཉམ་པར། །མི་བསྐྱོད་ལ་སོགས་རབ་ཏུ་བརྟག །བཤང་གཅི་སྦྱངས་ལས་དེ་གྱུར་པ། །གང་ཞིག་དམ་ཚིག་ཅེས་བྱའོ། །དམ་ཚིག་ཅེས་བྱ་དེ་དག་མཆོག །མི་ཕྱེད་རྡོ་རྗེ་གསུམ་འབྱུང་བས། །དཀོན་
མཆོག་གསུམ་ནི་མཉམ་བྱས་ཏེ། །བདག་མེད་པ་ཡང་བསྒོམ་པར་བྱ། །དཀོན་མཆོག་གསུམ་ནི་ལྕགས་གསུམ་ཡིན། །བདག་མེད་ཅེས་བྱ་ཁ་ཡིན་ཏེ། །གང་འདི་རྣམ་རྟོག་གཅིག་ཉིད་དུ། །བཅུག་པ་རིལ་བུ་ཡིན་པར་འདོད། །སངས་རྒྱས་
རྣམས་ཀྱིས་མི་བྱེད་པའི། །སྒོམ་པ་སེམས་ཀྱི་དམ་པའོ། །དེ་ལྟར་དེ་ཉིད་ཤེས་བསྒོམས་ན། །སྐད་ཅིག་གིས་རྣམ་རྡོ་རྗེར་འགྱུར། །འཁོར་ལོ་འོད་འཕྲོ་མཚུངས་པར་གྱུར། །རང་གི་སྔགས་ཀྱིས་རྣམ་སྒོམས་ནས། །སངས་རྒྱས་ཀུན་གྱི་གནས་བསྒོམས་

88-1-300a

ན། །སངས་རྒྱས་འདྲ་བར་འགྱུར་བར་བཤད། །སུམ་བཅུ་རྩ་དྲུག་གནས་སྦྱོར་བའི། །རི་རབ་ཀྱི་ནི་རྡུལ་ཕྲན་རྣམས། །དེ་སྙེད་དེ་ཡི་རྗེས་འབྲང་རྣམས། །དམ་ཚིག་རྡོ་རྗེ་ཞེས་བྱ་བའོ། །གནས་ནི་ལྷ་ཡི་སྦྱོར་བ་སྟེ། །སྣ་ནི་
རི་རབ་ཅེས་བྱའོ། །བདག་ཉིད་ཆེན་པོ་སུམ་བཅུ་བདུན། །ནམ་མཁར་སྤྲོ་བ་བསམ་མི་ཁྱབ། །འཇམ་པའི་རྡོ་རྗེ་བདག་པོ་སྟེ། །འདི་དག་འཁོར་དུ་གྱུར་པ་ཡིན། །འཇིག་རྟེན་པ་ཡི་རང་ངོ་བོ། །ཕྱི་ཡི་རི་རབ་བརྟག་པ་ཡིན། །དམ་
ཚིག་རྡོ་རྗེ་ཞེས་བྱ་བའི། །འཁོར་ལོའི་ཏིང་ངེ་འཛིན་ཅེས་བྱ། །འཁོར་ལོ་དངོས་གྲུབ་རྙེད་སླ་བ། །སྐད་ཅིག་སྦྱོར་བས་བསྒྲུབ་པའོ། །རྡོ་རྗེ་ཆེན་པོ་རང་སྔགས་ཀྱིས། །དཀྱིལ་འཁོར་དབུས་སུ་རབ་བསྒོམས་ན། །རྡོ་རྗེ་ཀུན་
གྱི་གནས་མཆོག་སྟེ། །ཐུགས་ཀྱི་རྡོ་རྗེ་འདྲ་བར་འགྱུར། །རི་རབ་སུམ་བཅུ་རྩ་དྲུག་གི། རྡུལ་ཕྲན་ཇི་སྙེད་ཡོད་པ་ཡི། །དེ་སྙེད་བུད་མེད་དེ་ཡི་ནི། །གསུམ་འགྱུར་གནས་སུ་འགྱུར་བ་ཡིན། །ཁམས་གསུམ་གྱི་ནི་རྡོ་རྗེ་ཆེ། །
དྲུག་པོ་ཡིས་ནི་ཕྱག་བྱས་འགྱུར། །རྡོ་རྗེ་དམ་ཚིག་ཅེས་བྱ་བའི། །ཏིང་འཛིན་འདི་ནི་ཡང་དག་བཤད། །པད་མ་ཆེན་པོ་འདབ་བརྒྱད་པ། །རང་སྔགས་རྡོ་རྗེ་ལས་བྱུང་བ། །ཆོས་རྣམས་ཀུན་གྱི་གནས་བསྒོམས་ན། །རྡོ་རྗེ་ཆོས་
དང་འདྲ་བར་འགྱུར། །སུམ་བཅུ་རྩ་དྲུག་གནས་སྦྱོར་བའི། །རི་རབ་རྡུལ་ཕྲན་གྲངས་སྙེད་ཀྱི། །སངས་རྒྱས་རྡོ་རྗེ་མཆོག་གི་ནི། །དཀྱིལ་འཁོར་ལ་བདག་བདག་ཉིད་འཇོག །གོས་མེད་མཉམ་ཉིད་ཡེ་ཤེས་ཀྱི། །རྡོ་རྗེ་པད་མོ་གྲུབ་
བཅས་སྦྱིན། །སོ་སོར་རྟོག་པ་ཞེས་བྱ་བའི། །ཏིང་ངེ་འཛིན་ནི་ཡང་དག་བཤད། །ཤིན་དུ་གྲངས་མེད་བསྐལ་པར་ནི། །གྲངས་ཀྱི་མིང་གིས་གནས་པར་ནི། །གནས་ཤིང་སྒོམ་པར་བྱེད་པ་ཡིན། །དེ་ཡི་ཡེ་ཤེས་ལྔར་ལྡན་པ། །
སངས་རྒྱས་ཀུན་གྱི་དགོངས་པ་ནི། །འཇིག་རྟེན་ཕན་ཕྱིར་གསུངས་པ་རྣམས། །ཕྱོགས་བཅུའི་སངས་རྒྱས་མཐའ་ཡས་པའི། །ཡོན་ཏན་གསུམ་ནི་ཡོངས་སུ་བསྟེན། །འོད་ཟེར་ལྔ་ཡི་མདོག་འདྲ་བའི། །རང་སྔགས་ལས་

88-1-300b

བྱུང་རལ་གྲི་ནི། །བློ་ལྡན་ལག་པ་དེ་བཞག་ན། །རྡོ་རྗེ་རིག་པ་འཛིན་པར་འགྱུར། །རང་གི་སྔགས་ཀྱི་ཁོང་ཆུད་འདི། །ཧོ་ཧོ་ཧཱུྃ་དེ་ཁམས་གསུམ་པ། །པད་མ་སྤངས་པའི་ཚངས་པ་ཆེར། །རྣལ་འབྱོར་པ་དེ་འགྱུར་བ་ཡིན། །ཁམས་གསུམ་
ཀུན་གྱིས་ཆེར་མཆོད་ཅིང་། །ཚངས་པ་ལྷ་མིན་ཕྱག་བྱས་པ། །སྟོང་གསུམ་མི་ཡི་མཆོག་གཅིག་པུ། །དཔག་ཆེན་པོ་ཡི་ཚངས་པར་འགྱུར། །ཐུགས་ཀྱི་རྡོ་རྗེ་མཆོག་བསྒོམས་པས། །དངོས་གྲུབ་ཇི་ལྟར་འདོད་པ་དག །སྐུ་གསུང་
ཐུགས་ཀྱི་རྡོ་རྗེ་ལས། །དེ་ནི་དེ་མ་ཐག་ཏུ་འཐོབ། །རང་གི་རྡོ་རྗེ་ཏིང་འཛིན་འདི། །དངོས་མེད་གཅིག་པུ་ཡང་དག་བྱུང་། །བྱང་གྲོལ་ལ་ཡང་དེ་མི་གནས། །རལ་གྲི་ཁ་དང་འདྲ་བར་འགྱུར། །ཨོཾ་ནི་རིལ་བུ་ཙ་ན་ཀའི། །འབྲུ་ཚད་ཙམ་དུ་
བསམས་ནས་ནི། །དབུས་སུ་རང་གི་ལྷ་ཡི་གཟུགས། །བསམས་ཏེ་ཁར་བཅུག་རྣམ་བསྒོམས་ན། །བྱང་ཆུབ་ཡེ་ཤེས་འོད་པོ་ཆེར། །བློ་ལྡན་དེ་མ་ཐག་དེ་འགྱུར། །འཛམ་བུའི་ཆུ་བོའི་གསེར་མདོག་གམ། །ཉི་མ་འཆར་བའི་
མདོག་འདྲ་བའི། །ཙ་ན་ཀ་ཡི་འབྲུ་ཚོད་ཙམ། །ཡི་གེའི་དམ་པ་ཨཱཿབསམ་མོ། །དེ་ཡི་དབུས་སུ་ལྷ་ཡི་གཟུགས། །ཁར་བཅུག་ནས་ནི་རྣམ་བསྒོམས་ན། །བྱང་ཆུབ་ཡེ་ཤེས་འོད་པོ་ཆེ། །དེ་ནི་དེ་མ་ཐག་ཏུ་འགྱུར། །ནམ་མཁའི་དབུས་
ན་གནས་པ་ཡི། །ཙ་ན་ཀ་ཡི་འབྲུ་ཚོད་ཙམ། །ཡི་གེ་ཧཱུྃ་ནི་རྣམ་བསམས་ཏེ། །དབུས་སུ་རང་གི་ལྷ་བསམས་ན། །ཁར་བཅུག་ནས་ནི་རྣམ་བསམས་ན། །རྡོ་རྗེ་སེམས་དཔའ་འོད་པོ་ཆེ། །དཔལ་ལྡན་དེ་མ་ཐག་ཏུ་འགྱུར། །འཛམ་བུའི་
ཆུ་བོའི་གསེར་མདོག་དང་། །ཉི་མ་འཆར་ཀའི་མདོག་འདྲ་བའི། །རྣམ་པར་སྣང་མཛད་མཁའ་དབྱིངས་ཀྱི། །དཀྱིལ་འཁོར་དབུས་སུ་རབ་བསྒོམས་ལ། །ལག་ཏུ་འཁོར་ལོ་རྣམ་བསྒོམས་ན། །འཁོར་ལོའི་རིག་པ་འཛིན་པར་འགྱུར། །
རྡོ་རྗེའི་སྐུ་མདོག་སྦྱོར་བ་ཡང་། །འདི་ནི་ཡེ་ཤེས་མཆོག་སྒྲུབ་པའོ། །འཁོར་ལོ་ཆེན་པོའི་རིགས་བསྒོམས་ཏེ། །ཡེ་ཤེས་རྡོ་རྗེ་དག་གིས་བྱ། །འཛམ་བུའི་ཆུ་བོའི་གསེར་མདོག་གམ། །ཉི་མ་འཆར་ཀའི་འོད་འདྲ་བའི། །ནམ་མཁའི་

88-1-301a

དབྱིངས་ཀྱི་དབུས་གནས་པར། །རྡོ་རྗེ་མི་ཕྱེད་རབ་བསྒོམས་ཏེ། །ལག་ཏུ་རྡོ་རྗེ་བསྒོམས་ན་ནི། །རྡོ་རྗེའི་རིག་པ་འཛིན་པར་འགྱུར། །རྡོ་རྗེ་མཆོག་གི་བསྒྲུབ་པ་འདི། །རྡོ་རྗེ་སྐུ་ཡི་སྦྱོར་བ་ལས། །རྡོ་རྗེ་རིགས་ཀྱི་མཆོག་
བསྒོམ་པ། །ཡེ་ཤེས་རྡོ་རྗེ་དག་གིས་བྱ། །ནམ་མཁའ་ཁམས་ཀྱི་དབུས་གནས་པར། །རིན་ཆེན་ལ་ནི་རིན་ཆེན་བསྒོམ། །དེ་ཉིད་ལག་ཏུ་ལེགས་བཞག་ན། །རིན་ཆེན་རིག་པ་འཛིན་པར་འགྱུར། །རིན་ཆེན་མཆོག་གི་བསྒྲུབ་པ་འདི། །རིན་
ཆེན་སྐུ་ཡི་སྦྱོར་བ་ལས། །རིན་ཆེན་རིགས་ཀྱི་མཆོག་བསྒོམ་པ། །ཡེ་ཤེས་རྡོ་རྗེ་དག་གིས་བྱ། །ནམ་མཁའི་དབྱིངས་ཀྱི་དབུས་གནས་པར། །ཚེ་དཔག་མེད་པ་རབ་བསྒོམས་ལ། །ལག་ཏུ་པད་མ་བསྒོམས་ན་ནི། །པད་མའི་རིག་
པ་འཛིན་པར་འགྱུར། །པད་མ་མཆོག་གི་བསྒྲུབ་པ་འདི། །པད་མའི་སྐུར་ནི་སྦྱོར་བ་ལས། །པད་མའི་རིགས་ཆེན་བསྒོམས་པ་ནི། །ཡེ་ཤེས་རྡོ་རྗེ་དག་གིས་བྱ། །ནམ་མཁའི་དབྱིངས་ཀྱི་དབུས་གནས་པར། །དོན་ཡོད་མཆོག་ནི་རབ་
བསྒོམས་ལ། །ལག་ཏུ་རལ་གྲི་རབ་བསྒོམས་ན། །རལ་གྲིའི་རིག་པ་འཛིན་པར་འགྱུར། །དམ་ཚིག་མཆོག་ནི་འདི་བསྒྲུབ་པ། །སྐུ་ཡི་དམ་ཚིག་སྦྱོར་བ་ལས། །དམ་ཚིག་རྡོ་རྗེ་རིགས་བསྒོམས་པ། །ཡེ་ཤེས་རྡོ་རྗེ་དག་གིས་
བྱ། །བསྒྲུབ་བྱ་རྡོ་རྗེའི་དབྱེ་བ་ཡིས། །མདུང་ཐུང་རྡོ་རྗེ་ལྕགས་ཀྱུ་སོགས། །སྐུ་གསུང་ཐུགས་ཀྱི་བསྒྲུབ་པ་ཡིས། །བསམ་གཏན་ཉིད་ཀྱིས་བསྒྲུབ་པར་འགྱུར། །དམ་ཚིག་ཆེན་པོ་འབྱུང་བ་ཡི། །དམ་ཚིག་དངོས་གྲུབ་ཅེས་
བྱ་བའི། །མི་ཕྱེད་རྡོ་རྗེ་གསུམ་དབང་ཕྱུག །སྣ་ཚོགས་བཅོམ་ལྡན་འདས་ཀྱིས་གསུངས། །སྡུག་བསྔལ་དང་ནི་ཀུན་འབྱུང་ཉིད། །འགོག་དང་ལམ་ནི་བཞི་པོ་ནི། །ལམ་གྱི་བཞི་མདོར་ཡང་དག་བཤད། །བསྒྲུབ་པ་པོ་ནི་
གནས་མིང་ཅན། །ཤིང་གཅིག་དྲུང་དུ་ཡང་དག་རྟོག །ཆོས་དང་རྫོགས་ལོངས་སྤྱོད་མིང་ཅན། །སྣ་ཚོགས་མཚན་གཅིག་ཡང་དག་དགོད། །མཚན་མ་རྐྱེན་གྱི་གཟུགས་ཅན་ནོ། །འབྱིན་དང་རྔུབ་པ་ཉིད་དང་ནི། །གནས་

88-1-301b

པ་ཡིས་ནི་ཉེར་མཛེས་པ། །ཡིད་རྟོན་པ་ཡི་མཉམ་སྦྱོར་ལ། །རབ་ཏུ་ཞི་བའི་ཞི་གནས་སུ། །དུས་གསུམ་རྟོག་པ་གཅིག་ལས་འདས། །རྡོ་རྗེ་ལྕགས་ཀྱུ་ཁྱད་པར་དུ། །སྒྲུབ་པ་པོ་ནི་རྟག་ཏུ་བསྒྲུབ། །སྦྱོར་གསུམ་སྔགས་
ཀྱི་སྐྱེས་བུ་ནི། །སྦྱོར་གསུམ་རྡོ་རྗེ་ཅན་བསམ་པ། །སྐུ་གསུང་ཐུགས་ཀྱི་ལྕགས་ཀྱུའོ། །སངས་རྒྱས་ཡེ་ཤེས་བློ་ཅན་གྱི། །མི་གསལ་གསལ་བར་ཡང་དག་ལྡན། །དེ་བཞིན་ཉིད་ཀྱི་ངོ་བོ་ལས། །འགྲོ་བ་ཐམས་ཅད་དགུག་
པར་བྱ། །རླུང་གི་དཀྱིལ་འཁོར་མཆོག་གནས་པ། །སངས་རྒྱས་དགུག་པ་དམ་པ་ཡིན། །གནས་མེད་གནས་པའི་སྦྱོར་བ་ཡིས། །དེ་ཉིད་སྔགས་དོན་རྣལ་འབྱོར་པས། །འགྲོ་བ་འདོད་པའི་ལོངས་སྤྱོད་ཀྱང་། །མི་གསལ་
སྦྱོར་བས་སྦྱོར་བར་བྱེད། །གང་ཡང་དམ་ཚིག་ཕྱོགས་རྣམས་ནི། །མཁའ་དབྱིངས་དབྱེ་བས་གནས་པ་རྣམས། །དེ་ཉིད་རྡོ་རྗེ་བཀུག་ནས་ནི། །སྔགས་རིག་པས་ནི་སྤྱད་པར་བྱ། །ནམ་མཁའི་ཁམས་ནི་དགུག་པ་འདི། །དམ་
ཚིག་ཆེན་པོ་རྡོ་རྗེ་ཅན། །སྔགས་ཀྱི་དེ་ཉིད་གཅིག་སྦྱོར་ལས། །ལྕགས་ཀྱུ་དེ་རྣམས་འགྲུབ་པར་འགྱུར། །དམ་ཚིག་རྣམས་ནི་དགུག་པའི་མཆོག །རྒྱལ་གནས་ལྕགས་ཀྱུ་བསམས་ནས་ནི། །རྣམ་པར་སྣང་མཛད་
འཁོར་ལོ་ཆེ། །རྡོ་རྗེ་པད་མ་ལ་སོགས་བྱ། །མེ་ལོང་ལྟ་བུའི་སྔགས་པས་ནི། །སངས་རྒྱས་སྐུ་ནི་རྣམ་པར་བསྒོམ། །ལག་ཏུ་སྐུ་དང་གསུང་ཐུགས་ཀྱི། །ལྕགས་ཀྱུ་ལ་སོགས་རབ་ཏུ་བསྒོམ། །དེ་ནི་སྦྱོར་བ་འདི་ཉིད་
ཀྱིས། །དེ་ཉིད་ལས་ནི་ལྷ་རྣམས་དགོད། །དེ་ནི་དེ་མ་ཐག་ཏུ་ཡང་། །དངོས་གྲུབ་ཀུན་སྟེར་ལས་བྱེད་འགྱུར། །སྐུ་དང་གསུང་ཐུགས་ཐམས་ཅད་ནི། །མཚན་ཉིད་གཅིག་པར་བསྒོམ་པར་བྱ། །ལྕེ་ཡི་རྡོ་རྗེ་སྦྱོར་
བ་ཡིས། །གསུང་གི་རྡོ་རྗེ་དེ་མཉམ་བསྒོམ། །བརྟུལ་ཞུགས་ཅན་གྱིས་ཕྱི་ནང་གཉིས། །གསང་བའི་རྡོ་རྗེ་མཆོག་མཆོད་དོ། །དངོས་མེད་དམ་ཚིག་སྦྱོར་བ་ཡིས། །ཇི་ལྟ་ཇི་ལྟར་རབ་བསྒྲུབ་པ། །དམ་ཚིག་གསུམ་གྱི་རྣལ་

88-1-302a

འབྱོར་པའི། །དེ་ནི་ཡང་དག་ཡིན་པར་བཤད། །གསང་བའི་སྙིང་པོ་བསྡུས་པ་ཡི། །དངོས་གྲུབ་ཀུན་གྱི་མཆོག་ཏུ་འདོད། །བཅོམ་ལྡན་དམ་ཚིག་ཆེན་པོ་ཡི། །རྣལ་འབྱོར་པས་ནི་དེ་སྐད་གསུངས། །དེ་ནས་
ཕྱག་ན་རྡོ་རྗེ་ནི། །གོ་བྱེད་གསང་བ་ཡང་དག་གསུངས། །གང་ཞིག་ཤེས་ན་རྣལ་འབྱོར་པའི། །མཉམ་བཞག་མཆོག་ནི་ཐོབ་འགྱུར་བའི། །གསང་དབང་དེ་ཉིད་དམ་པ་ཡི། །དེ་ནི་དེ་ཡིས་ཡང་དག་བཤད། །རྣལ་
འབྱོར་ཆེན་པོ་གཅིག་བདག་ཉིད། །ནམ་མཁའ་དང་ནི་མཉམ་པའི་གནས། །བྱས་ན་དམ་ཚིག་ཡང་དག་པ། །ཤ་ཆེན་ལ་ནི་ཡང་དག་སྦྱར། །དངོས་མེད་པ་ཡི་ཤ་ཆེན་གྱི། །དམ་ཚིག་མཆོག་ལ་གནས་ནས་
ནི། །བློ་ལྡན་བདག་ཉིད་སྒོམ་པ་ནི། །རྡོ་རྗེ་དངོས་གྲུབ་ལོངས་སྤྱོད་སྟེར། །རྫོགས་ལོངས་སྤྱོད་ཡུལ་བཤང་བ་ཡིན། །དེ་ཉིད་ཡེ་ཤེས་དབང་པོ་གཅིག །དམ་ཚིག་འདི་དག་ཉིད་ཀྱིས་ནི། །རིག་པ་འཛིན་པའི་གཙོ་
བོར་འགྱུར། །ལོངས་སྤྱོད་རྫོགས་ཕུང་ལས་བྱུང་བ། །གླང་པོའི་ཤར་ནི་དེ་རབ་བརྟག །དམ་ཚིག་གཅིག་ཏུ་ལེགས་སྦྱོར་ལས། །མངོན་ཤེས་ལྔ་དག་ཐོབ་པར་འགྱུར། །དབང་པོ་གཉིས་ནི་རྟ་ཤ་སྟེ། །དངོས་
མེད་དེ་ཉིད་ལས་སྦྱོར་ལས། །དམ་ཚིག་གཅིག་ཏུ་ལེགས་སྦྱོར་ན། །མི་སྣང་གནས་ཀྱི་མཆོག་ཏུ་འགྱུར། །ཕུང་སོགས་ཡན་ལག་གང་གྱུར་པ། །དངོས་མེད་དེ་ནི་ཁྱི་ཤ་ཡིན། །དམ་ཚིག་གཅིག་ཏུ་ཡང་
དག་སྦྱོར། །དངོས་གྲུབ་ཐམས་ཅད་རབ་བསྒྲུབ་པའོ། །རྫོགས་སངས་རྒྱས་སྤྱན་བ་ལང་ཤ ། ཁྲོ་བོའི་རྒྱལ་པོ་འགྲུབ་པར་འགྱུར། །དམ་ཚིག་གཅིག་ཏུ་ཡང་དག་སྦྱོར། །རྡོ་རྗེ་དགུག་པའི་དམ་པའོ། །
འདི་ནི་འཇིག་རྟེན་པར་གྱུར་ལས། །དགོངས་པས་གཅིག་ཤོས་བཟློག་པ་ཡིན། །ཤ་ཆེན་དང་ནི་བཤང་གཅི་དང་། །གླང་པོ་རྟ་ཁྱི་བ་ལང་དག །མི་རྟོག་གཅིག་པའི་སྒྲུབ་པ་ཡིས། །དམ་ཚིག་གཅིག་

88-1-302b

ཏུ་དེ་འགྲུབ་འགྱུར། །བསྟན་པས་འདི་ནི་སྒྲུབ་པ་ནི། །སྔགས་ཀྱི་ལོངས་སྤྱོད་རྣལ་འབྱོར་པ། །རྡོ་རྗེ་སྦྱོར་བའི་གསང་བ་ཡིས། །སྒྲུབ་པ་འདི་དང་ལྡན་པར་འགྱུར། །དེ་ནི་སངས་རྒྱས་བྱིན་བརླབ་ཅིང་། །རྣམ་
ཀུན་རྡོ་རྗེ་ཅན་གསུམ་དང་། །སྙིང་གར་ཡེ་ཤེས་དམ་ཚིག་དང་། །དབུ་རྒྱན་ལ་ནི་རྡོ་རྗེ་འཛིན། །སངས་རྒྱས་ཐམས་ཅད་ཚིམ་འགྱུར་བའི། །འདི་ནི་དམ་ཚིག་སྡོམ་པའོ། །དངོས་གྲུབ་ཐམས་ཅད་སྟེར་བའི་མཆོག །དམ་ཚིག་མཆོག་འདིས་
རབ་ཏུ་བྱ། །དམ་ཚིག་ཀུན་གྱི་དམ་པ་སྟེ། །རྡོ་རྗེ་ཟས་ཀྱི་ཏིང་འཛིན་ཏོ། །དེ་ནས་འགྲོ་ལ་ཕན་པའི་མགོན། །གཙོ་བོ་རྣམ་སྣང་ཆེན་པོ་ལ། །གསང་བའི་དགོངས་པ་དམ་པ་ནི། །རྡོ་རྗེ་འཛིན་པས་སླར་ཡང་ཞུས། །གང་ཞིག་སྤྱི་བོར་བརྟགས་
པ་ནི། །གཅིག་པུ་ཉིད་དུ་གྱུར་པ་དེས། །རི་རབ་སུམ་བཅུ་རྩ་དྲུག་ཏུ། །མུ་སྟེགས་རྣམས་ཀྱིས་འཚལ་མི་འགྱུར། །རང་གི་བསྟན་བཅོས་བརྡ་ཡིས་ནི། །ཕྱི་རོལ་པ་དེ་རྣམ་རྟོག་ལ། །ཏིང་འཛིན་བརྟགས་པ་འདི་དག་ཀྱང་། །འདི་ལ་རང་གི་
ངོ་བོ་མེད། །ཚངས་སྒོ་མཛོད་ཀྱི་རྒྱུད་ལས་ནི། །རི་རབ་གཅིག་དང་བཅས་པར་བཤད། །བྱིས་པ་མཆོག་ནི་རྨོངས་བྱེད་པ། །གསུང་འདི་སྐྱེ་བོ་ལྟུང་བར་འགྱུར། །དེ་ནས་བཅོམ་ལྡན་བདག་པོ་འདིས། །རྡོ་རྗེ་ཅན་ལ་སླར་གསུངས་པ། །
ལེགས་སོ་རྡོ་རྗེ་ལེགས་པ་ཆེ། །སྐྱེས་བུ་དམ་པ་ཁྱོད་ལེགས་པ། །རྐྱེན་དང་ཉན་ཐོས་ཐེག་པ་དང་། །འདིར་ནི་ང་ཡིས་གསལ་བཤད་པ། །སངས་རྒྱས་ཀྱིས་བཤད་ཡེ་ཤེས་དག །ཐེག་པ་ཆེན་པོ་མི་མཐོང་ངོ་། །ཚད་ཡོད་པ་
དང་ཡོངས་ཆད་པའི། །རང་གི་ལུས་ལ་གང་བཤད་དེ། །ཡེ་ཤེས་དེ་རྣམས་དྲི་མེད་འདོད། །ཁྲོན་པའི་རུས་སྦལ་ཞེས་བྱའོ། །ནམ་མཁའ་དང་ནི་མཉམ་ཡེ་ཤེས། །རྡོ་རྗེ་ཐེག་པ་བླ་མེད་པ། །མཆོག་སྦྱིན་ང་ནི་ཁྱེད་བཞིན་དུ། །
རྒྱ་ཆེན་དེ་ཡིས་མི་མཐོང་ངོ་། །རྡོ་རྗེ་ཐེག་པ་རྒྱ་མཚོ་སྟེ། །དེ་ཡིས་ཡང་དག་མ་མཐོང་བས། །རང་གི་ལུང་ནི་ཚད་མ་ཡིས། །གཞན་ཡོད་པ་ནི་མིན་ཞེས་སྨྲ། །ཐེག་པ་ཆེན་ལ་གསང་བ་རྣམས། །སྲང་ལ་བཅལ་ཏེ་དེ་སྨྲ་བ། །

88-1-303a

དེ་རྣམས་སྔོན་བཞིན་གསལ་མིན་ཞེས། །ང་ཡི་ཚིག་ལས་བལྟས་ཏེ་སྨྲ། །དེ་ཉིད་རྗེས་སུ་གཟུང་བའི་ཕྱིར། །རྫོགས་སངས་རྒྱས་པ་བསྒོམ་པ་རྣམས། །གང་གིས་ཤེས་ན་རྟོག་མེད་འགྱུར། །གསང་
བ་དགོངས་པས་གསུངས་པ་ཡིན། །སྔགས་ཀྱི་དེ་ཉིད་དོན་བྱང་ཆུབ། །སྣ་ཚོགས་དངོས་གྲུབ་འབྲས་བུ་སྟེ། །དགོངས་ན་ཇི་ལྟ་ཇི་ལྟ་བར། །དེ་ནི་ང་ཡིས་ཡང་དག་བཤད། །དམ་ཚིག་རྡོ་རྗེ་ལྕེ་ལ་ནི། །རྡོ་རྗེ་ཅན་གྱིས་ཧཱུྃ་
བསམས་ཏེ། །རྣལ་འབྱོར་པས་ནི་བདུད་རྩི་ལྔ། །ཟོས་ན་རྡོ་རྗེ་གསུམ་ཐོབ་འགྱུར། །ཨཱཿདང་ཨོཾ་གྱི་གསང་བ་དག །འདི་ནི་རྡོ་རྗེ་གསུམ་མཆོག་སྟེ། །འདི་ལྟ་བུ་ཡི་སྦྱོར་བ་ཡིས། །རྡོ་རྗེ་སེམས་དཔའི་འོད་ཆེན་འགྱུར། །འདི་ནི་རྡོ་རྗེ་
འི་བདུད་རྩི་ཡི། །ཕྲེང་འགྱུར་དམ་ཚིག་རྡོ་རྗེར་བཤད། །རྡོ་རྗེ་སེམས་དཔའ་ཡང་དག་འབྱུང་། །ཏིང་ངེ་འཛིན་ནི་བཤད་པ་ཡིན། །རྡོ་རྗེ་གསུམ་གྱི་དམ་ཚིག་མཆོག །སྐུ་གསུང་རྡོ་རྗེ་ཅན་དུ་འགྱུར། །དེ་ཉིད་སེམས་ཅན་ཐམས་ཅད་
ཀྱི། །ཡིད་བཞིན་ནོར་བུའི་རྒྱ་མཚོ་ཆེ། །འཇིག་རྟེན་ཁམས་ནི་ཐམས་ཅད་དུ། །སངས་རྒྱས་སྐུ་དང་འདྲ་བར་འགྱུར། །རྡོ་རྗེ་དམ་ཚིག་དངོས་གྲུབ་མཆོག །རྡོ་རྗེ་བདག་ཉིད་དེ་སྣང་བྱེད། །གང་གཱའི་ཀླུང་གི་བྱེ་མ་སྙེད། །སངས་
རྒྱས་ཞིང་ནི་ཐམས་ཅད་དུ། །གྲུབ་ནས་འདི་ནི་དེར་སྦྱོར་བའི། །རིག་པ་འཛིན་པར་དེ་འགྱུར་རོ། །སྐུ་ཡི་རྡོ་རྗེ་བསྒོམ་བདག་ཉིད། །གྲུབ་མཆོག་དམ་ཚིག་ལ་གནས་པ། །མི་སྣང་གྱུར་པ་ཀུན་གྱི་མཆོག །སྟོང་ཁམས་དག་ནི་
སྣང་བར་བྱེད། །ལྷ་ཡི་བུ་མོ་མཆོག་ཕྲོགས་ནས། །སངས་རྒྱས་རྣལ་འབྱོར་མ་ལེགས་སྦྱོར། །གང་གཱའི་བྱེ་སྙེད་ཅེས་བྱ་བའི། །རྫོགས་པའི་སངས་རྒྱས་མ་ལུས་ཀུན། །དཔེ་དེ་དང་ནི་གྲངས་གཅིག་པ། །སངས་རྒྱས་དུས་གསུམ་
རྣམ་སྤངས་པ། །ལག་ཏུ་སྐྱུ་རུ་ར་བཞག་བཞིན། །རྡོ་རྗེ་མིག་གིས་དེ་མཐོང་འགྱུར། །སངས་རྒྱས་ཞིང་ནི་གང་དག་ཏུ། །སྒྲ་གྲག་པ་ནི་ཇི་སྙེད་པ། །རྣ་བ་ལ་གནས་མ་ནོར་བར། །སྐད་ཅིག་གིས་ནི་དེ་ཀུན་ཐོས། །གང་གཱའི་བྱེ་སྙེད་ཞིང་དག་

88-1-303b

ན། །སྐུ་ལ་སོགས་པ་གསུམ་གྱིས་མཚན། །སེམས་ཞེས་བཤད་པའི་སྟོན་པ་མཆོག །སེམས་ཅན་རྣམས་ཀྱི་དེ་ཉིད་རིག །བསྐལ་པ་གངྒཱའི་བྱེ་སྙེད་དུ། །སངས་རྒྱས་རྡོ་རྗེའི་མཆོག་གིས་འགེངས། །རྡོ་རྗེ་བསམ་མི་ཁྱབ་སྔོན་
འགྲོ། །རང་གི་རྣ་བ་སེམས་བཅས་པས། །གང་གཱའི་བྱེ་མའི་མིང་ཅན་གྱི། །གནས་ཀྱི་དངོས་གྲུབ་བཤད་པ་ཡིན། །སངས་རྒྱས་རྣམས་ཀྱི་མངོན་ཤེས་ནས། །འདི་ནི་ཡང་དག་བཀའ་སྩལ་ཏོ། །མངོན་ཤེས་དྲུག་ནི་དོན་གྲུབ་པའི། །
དེ་ནི་སངས་རྒྱས་འདྲ་བར་འགྱུར། །གང་གཱའི་ཀླུང་གི་བྱེ་སྙེད་ཀྱི། །འཁོར་རྣམས་ཀྱིས་ནི་རབ་མཛེས་པས། །སྐུ་སོགས་རྡོ་རྗེ་གསུམ་འདི་ནི། །འཇིག་རྟེན་ཁམས་རྣམས་ཀུན་དུ་སྤྱོད། །ཡིད་རྟོན་བདེ་གཅིག་བསྟེན་པ་སྟེ། །དེ་ཉིད་
གསུམ་མཉམ་གཉིས་སྤྱོད་དུ། །བསྟེན་ཏེ་དམ་ཚིག་གཅིག་གྱུར་པ། །ཡེ་ཤེས་ཉེ་བར་སྒྲུབ་པའོ། །ཡིད་རྟོན་མཉམ་པའི་སྦྱོར་བ་ལས། །སྒྲུབ་པ་ཡི་ནི་དམ་ཚིག་འགྱུར། །འབྲས་བུ་མངོན་སུམ་བྱས་སྦྱོར་བ། །སྒྲུབ་པ་ཆེན་པོ་བཞི་པའོ། །
རྐྱེན་དང་ཉན་ཐོས་མདོ་སྡེ་པ། །འདི་དང་ལྡན་པ་རབ་ཏུ་བསྔགས། །སེམས་ལ་དམིགས་དང་འདིར་སྦྱོར་བ། །སྐད་ཅིག་གིས་ཀྱང་དེ་འགྲུབ་འགྱུར། །བསྙེན་པའི་དམ་ཚིག་སྦྱོར་གཅིག་དང་། །ཉེ་བར་བསྒྲུབ་
པར་གང་གྱུར་དང་། །སྒྲུབ་པའི་དམ་ཚིག་ཉིད་དང་ནི། །སྒྲུབ་པ་ཆེན་པོ་བཞི་པ་ཡིན། །འདི་ལ་ཡང་དག་འཇུག་འགྱུར་བ། །ཇི་ལྟ་ཇི་ལྟར་འཇིག་རྟེན་སོགས། །ས་དང་ཤིང་གི་རིན་ཆེན་སོགས། །ལྷ་ཉིད་དུ་ནི་རབ་ཏུ་བརྟག །ཆོས་ཀྱི་དབྱེ་བས་
ཤེས་པར་བྱ། །རྡོ་རྗེ་ཡེ་ཤེས་སྒྲུབ་པ་པོ། །བསྟེན་པའི་དམ་ཚིག་ཡང་དག་སྦྱོར། །བྱང་ཆུབ་མཆོག་ནི་རྣམ་པར་སྒོམ། །གཟུགས་དང་སྒྲ་དང་དེ་བཞིན་དྲི། །རོ་དང་རེག་བྱ་ཆོས་རྣམས་ལ། །དངོས་གྲུབ་མཆོག་ནི་རྣམ་དཔྱད་པ། །དེ་ནི་ཉེ་བར་སྒྲུབ་པར་འགྱུར། །སྔགས་
པ་གང་ཡིན་བསྒོམ་ནས་ནི། །བསྐུལ་བར་སྒྲུབ་པར་བྱེད་པ་ཡིན། །རང་སྔགས་རྡོ་རྗེ་ཅན་གྱི་གཟུགས། །དེ་ནི་སྒྲུབ་པ་ཆེན་པོར་འདོད། །བསྙེན་པ་རྡོ་རྗེ་བདུད་རྩི་གང་། །སྔགས་པས་ཀུན་དུ་བརྟག་པར་བྱ། །དངོས་གྲུབ་འདོད་པས་གནས་པ་ནི། །དབུ་རྒྱན་ལ་ནི་མཆོག་གང་བསམ། །

88-1-304a

འདི་ནི་སྔགས་རྣམས་ཐམས་ཅད་ཀྱི། །དེ་ཉིད་གསུམ་གསང་ཡང་དག་འབྱུང་། །སྔགས་ཀྱི་དེ་ཉིད་དོན་གཉེར་བའི། །སྒྲུབ་པ་པོས་ནི་དབེན་པ་བསྟེན། །སྣ་ཚོགས་ལུང་གི་ཡང་དག་རྟོག །སྔགས་ནི་དགོན་པ་ཆེན་པོར་འདོད། །
དེ་ཡི་དཔག་བསམ་ཤིང་ལོངས་སྤྱོད། །ས་ཕྱོགས་ཞེས་ནི་ཡོངས་སུ་བསྒྲགས། །མཁའ་དང་མཉམ་པའི་སྦྱོར་བ་ནི། །རྣམ་པར་དབེན་པ་ཆེན་པོར་བཤད། །རི་བོར་རྫོགས་པའི་སངས་རྒྱས་དང་། །དེ་རིགས་དངོས་མེད་ལས་
བྱུང་བའོ། །འདི་འདྲའི་དབེན་པའི་མཚོན་པ་རུ། །དེར་ནི་འོད་ཆེན་རྣམས་གནས་ཏེ། །གནས་མེད་པ་ཡི་སྦྱོར་བ་ཡིས། །རྟག་ཏུ་དངོས་གྲུབ་འཐོབ་པར་འགྱུར། །བཅོམ་ལྡན་རྡོ་རྗེ་སྒྲུབ་པ་ནི། །ཆེན་པོས་དེ་སྐད་བཀའ་སྩལ་ཏོ། །
དགོན་པ་ཆེན་པོའི་ས་ཕྱོགས་སོགས། །འཇིག་རྟེན་པ་རྣམས་སྨྲ་བ་གསལ། །བསྙེན་པ་སྐུ་ཡི་བརྟུལ་ཞུགས་མཆོག །བློ་དང་ལྡན་པས་རྡོ་རྗེ་བཞིས། །རྡོ་རྗེ་གསུམ་གཉིས་མེད་སྦྱོར་བས། །བསྒོམས་ན་དངོས་གྲུབ་ཐོབ་
པར་འགྱུར། །མེ་ལོང་ཞེས་བྱ་དགོན་པ་ཆེ། །རིན་ཆེན་ཞེས་བྱ་དབེན་པའོ། །ཆེན་པོ་ཞེས་བྱ་འོད་དཔག་མེད། །དོན་ཡོད་པར་ནི་རིང་པོར་ཡིན། །ཆུ་ངོགས་དག་པའི་ཆོས་ཀྱི་ཆ། །གནས་ལྔ་དག་ཏུ་རབ་ཏུ་བརྟག །ཇི་སྲིད་དོན་
ནི་སྦྱོར་བ་བཞིས། །ཡི་གེ་ཨོཾ་ནི་སྡོམ་པར་འགྱུར། །ཇི་ལྟར་ནམ་མཁའི་མཚན་ཉིད་གཅིག །རང་གི་མཚན་ཉིད་འདོར་མི་བྱེད། །དེ་བཞིན་དེ་ཉིད་གསུམ་བཞིའི་ཕྱེད། །ཡི་གེ་ཨོཾ་གཅིག་སྡོམ་པའོ། །གནས་མེད་གནས་པ་ཞེས་བྱ་བའི། །
ཨོཾ་གཅིག་གིས་ནི་འགྲོ་ལ་ཁྱབ། །དེ་ཉིད་མི་གསལ་སྦྱོར་དབང་པོ། །གཙོ་བོ་རང་ཉིད་བཟློག་པ་ཡིན། །ལ་ལ་གླང་པོ་སྤངས་ནས་ནི། །རྗེས་ལ་དབྱིབས་ནི་ཚོལ་བར་བྱེད། །དེ་བཞིན་མ་འོངས་སྔགས་པ་ནི། །ཨོཾ་ལས་སྡོམ་པ་གཞན་དུ་འདོད། །
གཅིག་གཉིས་གསུམ་དང་བཞི་དང་ལྔ། །དུས་ཐུབ་དེ་བཞིན་ནོར་ཅན་དང་། །ཕན་ཚུན་སྦྱོར་ནས་བརྗོད་པ་ལས། །བསམ་མི་ཁྱབ་པའི་གྲངས་སུ་འགྱུར། །བཅོམ་ལྡན་གཅིག་ཀྱང་དུ་མ་སྟེ། །ཚིག་ཏུ་བརྗོད་པ་རྣམ་པར་སྤངས། །བརྡ་ཙམ་དུ་ནི་ཨོཾ་ཞེས་བྱ། །དངོས་མེད་སྦྱོར་བའི་

88-1-304b

ཆོས་ཉིད་ཡིན། །ཆོས་དང་ལོངས་སྤྱོད་སྤྲུལ་པ་སྟེ། །སྐུ་གསུམ་དུ་མ་ཡང་དག་བཤད། །གསུམ་པོ་ཡང་དག་འཛིན་པས་ནི། །དེས་ན་ཨོཾ་ནི་སྡོམ་པ་ཡིན། །དང་པོ་གཅིག་པུ་མི་བསྐྱོད་དགོད། །དེ་ཉིད་སྡོམ་པར་གྱུར་པ་ཡིན། །
བརྡ་རུ་བརྗོད་པ་སྣ་ཚོགས་པ། །བསམས་ནས་སྡོམ་པ་ཀུན་དུ་བཤད། །མི་ཕྱེད་ནམ་མཁའི་སྦྱོར་བ་ཡིན། །བསམ་དང་གདོན་དང་རྣམ་པར་བྲལ། །རྟེན་འབྲེལ་རིག་ལས་ཡང་དག་འབྱུང་། །རྗེས་བཅས་ཞེས་བྱ་དེ་བསྒོམ་བྱ། །
རྟག་ཏུ་འབྱུང་བའི་ཡེ་ཤེས་ཞིག །མིག་ལ་སོགས་པ་བདུན་བརྒྱ་ལ། །གཡས་དང་གཅིག་ཤོས་ཟླ་ཕྱེད་དེ། །ཤེས་རབ་ཐབས་ཀྱང་སྒྲུབ་པའོ། །འདི་དག་ཟུང་གྱུར་ཟླ་བ་སྟེ། །རྡོ་རྗེ་མིང་ཅན་ཕྱེད་དང་གཉིས། །དེ་ནི་སྦྱོར་བ་འདི་ཉིད་
ཀྱིས། །དངོས་གྲུབ་མྱུར་དུ་འཐོབ་པར་འགྱུར། །ཞག་ནི་མི་ཐུབ་ཟླ་ཕྱེད་དང་། །ཟླ་གཅིག་ཟླ་བ་ཕྱེད་གཉིས་མིན། །འཇིག་རྟེན་པ་ཡི་ཞག་དབྱེ་བས། །རྒྱ་ཆེར་ངས་ནི་བཤད་པ་ཡིན། །གསང་བ་མཆོག་ལས་བྱུང་བ་ནི། །ཟླ་བ་ཕྱེད་ཀྱིས་
སྒྲུབ་པར་གསུངས། །དེ་ཉིད་ཉེ་བར་འགྱུར་བཤད་པའི། །སྡོམ་པའི་ཡུལ་ནི་དམ་པ་ཡིན། །གང་ཚེ་ཤེས་རབ་ཐབས་ཡེ་ཤེས། །དེ་བཞིན་ཉིད་ཤེས་ལས་བྱུང་བ། །སངས་རྒྱས་སྐུ་འཛིན་དཔལ་དང་ལྡན། །རྡོ་རྗེ་མི་ཕྱེད་འོད་པོ་
ཆེ། །བྱང་ཆུབ་སྐད་ཅིག་གིས་སྦྱོར་བ། །རྡོ་རྗེ་སྐུ་ནི་བྱེད་པར་འགྱུར། །སྲོག་ལ་སོགས་དང་གྲངས་མཉམ་པའི། །བདག་མེད་ཕྱོགས་བཞུགས་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །རྡོ་རྗེ་བྱིན་བརླབས་མཛད་
པར་འགྱུར། །འདས་དང་མ་འོངས་སངས་རྒྱས་དང་། །གང་ཞིག་ཕྱོགས་བཅུར་བཞུགས་པ་རྣམས། །ཆོས་སྐུ་མཆོག་གི་རྣལ་འབྱོར་པ། །སངས་རྒྱས་དེ་རྣམས་བྱིན་གྱིས་རློབ། །འདས་པ་རྣམས་ནི་ཆོས་སྐུ་ཡིས། །བསམ་མི་ཁྱབ་པའི་
ཕྱོགས་ན་བཞུགས། །སྔགས་མཆོག་བསམ་གྱིས་མི་ཁྱབ་པས། །མ་འོངས་རྣམས་ཀྱིས་བྱིན་གྱིས་རློབ། །སངས་རྒྱས་གསུམ་ལ་དབྱེ་བ་ནི། །ཅུང་ཟད་ཙམ་ཡང་ཡོད་མ་ཡིན། །འོན་ཀྱང་དངོས་མེད་ལས་བྱུང་བའི། །སྔགས་པ་རྣམས་ལ་བྱིན་གྱིས་རློབ། །

88-1-305a

ཕྱོགས་བཅུར་བཞུགས་པའི་སངས་རྒྱས་རྣམས། །མི་ཕྱེད་རྡོ་རྗེ་གསུམ་བསྒོམས་ལ། །སྐུ་ནི་ཇི་ལྟ་བར་འཚམ་པ། །དེ་ལྟར་བྱིན་གྱིས་རློབ་པར་མཛད། །རིག་དང་མ་རིག་ཡང་དག་ལྡན། །སྲོག་ལ་སོགས་
ཏེ་བཅུ་གཉིས་བཤད། །དུས་ཀྱི་ཉིས་འགྱུར་ལམ་ལ་སོགས། །དེ་ཉིད་ཟླ་བ་ལ་སོགས་འགྱུར། །ཟླ་བ་ལ་སོགས་གྲངས་མཉམ་པས། །ཉི་མ་བཅུ་གཉིས་མིང་ཅན་ཡིན། །ཁྱབ་འཇུག་དེ་ཉིད་དབྱེ་བ་ཡིས། །ལམ་རྩོམ་
པ་ནི་བརྟགས་པ་ཡིས། །དེ་ཉིད་དུ་ནི་སྒྲུབ་པ་མཆོག །སྡོམ་པ་ཡུལ་ཞེས་བཤད་པ་ཡིན། །སྔགས་དང་དངོས་མེད་དེ་བྱེད་པ། །མགལ་མེ་འཁོར་ལོ་བསྐོར་དང་མཚུངས། །རྟོག་པ་ལས་བྱུང་དེ་འདི་ནི། །དངོས་མེད་
པ་ནི་བསྒོམ་པས་སོ། །མ་འོངས་པ་ཡི་སྐྱེ་བོ་ནི། །ལྷ་ཡི་གཟུགས་ལ་འདུད་པར་བྱེད། །མིག་དང་དེ་བཞིན་རྣ་བ་སྣ། །ལྕེ་དང་དེ་བཞིན་ལུས་ངག་དང་། །པགས་པ་རྐང་པར་ཡང་དག་ལྡན། །འཛིན་པ་དག་ནི་མི་ནུས་
པ། །ལྟ་དང་ཉན་དང་དྲི་དང་རོ། །རེག་བྱ་རྣམས་ནི་དངོས་མེད་པ། །རང་བཞིན་སེམས་མེད་གྱུར་པ་ཡི། །འཇིམ་གཟུགས་སངས་རྒྱས་སྐུ་ཅན་ཏེ། །འོན་ཀྱང་འགྲོ་བའི་བླ་མའི་སྐུ། །སངས་རྒྱས་བྱིན་གྱི་བྱིན་རླབས་ཀྱིས། །དེ་བཞིན་
སྔགས་སྦྱོར་བདག་ཉིད་ཅན། །དངོས་མེད་རྡོ་རྗེའི་སྐུ་ཉིད་ཡིན། །ཤིང་དང་ས་དང་རིན་ཆེན་སོགས། །རང་གི་ལྷ་ཡི་གཟུགས་བྱས་ལ། །རང་གི་ཆོས་ནི་སྤངས་ནས་སུ། །ཚིག་གི་ལམ་དེ་སྟོན་པར་བྱེད། །སྐུ་གསུང་ཐུགས་དང་ལྡན་
པ་མཆོག །ཆོ་འཕྲུལ་དེ་འདྲ་ག་ལས་བྱུང་། །དེ་ནས་དད་སོགས་ཡང་དག་པས། །སླར་ཡང་དེ་ལ་གསོལ་འདེབས་ཀྱང་། །གསོལ་བ་འདེབས་པ་ཙམ་གྱིས་ནི། །དེ་དང་འདྲ་བར་ག་ལ་འགྱུར། །ཕྱི་རོལ་ཆོས་ལ་གང་ཞིག་དགའ། །ལྷ་
རྣམས་ཐམས་ཅད་སྤོང་བ་ཡིན། །དེ་ལྟར་སྐུ་ལས་སྐུ་བྱུང་བ། །དཔལ་ལྡན་ཆོས་འདིའང་གསུམ་གྱི་ལམ། །བྱིན་རླབས་པ་དག་ལོངས་སྤྱོད་ན། །གསུང་གི་རྡོ་རྗེ་ཅན་དུ་བྱེད། །འདས་དང་མ་འོངས་སངས་རྒྱས་རྣམས། །ཕྱོགས་

88-1-305b

བཅུ་ན་ནི་གང་བཞུགས་པ། །བྱུང་དང་འབྱུང་འགྱུར་དེ་རྣམས་ནི། །མི་ཕྱེད་གསུམ་གྱི་ལམ་དུ་འགྱུར། །ཡིད་རྟོན་བདེ་བ་ཞི་བདག་ཉིད། །དེ་བཞིན་ཉིད་ཤེས་ལམ་བྱུང་བ། །ཡི་གེ་གཅིག་ནི་གསུམ་དྲུག་འདི། །རང་ཉིད་འགྲོ་བའི་ཁར་
བརྗོད་དོ། །དེ་ཡི་བྱིན་གྱིས་བརླབ་པའི་གནས། །རྡོ་རྗེ་མི་ཕྱེད་རྡོ་རྗེ་ཅན། །གང་གཞན་སངས་རྒྱས་ཀྱིས་གསུངས་དང་། །འགྲོ་བའི་སྒྲར་ནི་འདི་གྱུར་ཏེ། །དུས་གསུམ་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་
རྣལ་འབྱོར། །གསུང་གི་རྡོ་རྗེ་མི་ཕྱེད་པ། །རྡོ་རྗེ་ཅན་མཆོག་དེ་བྱིན་རློབ། །འཇུག་པ་གནས་པའི་སྦྱོར་བ་དང་། །ལྡང་བ་དང་ནི་ཡང་དག་ལྡན། །གསུང་གི་རྡོ་རྗེ་དངོས་མེད་པ། །དེ་ནི་སངས་རྒྱས་བྱིན་གྱིས་རློབ། །ཇི་ལྟར་
འཁོར་ལོས་སྒྱུར་རྒྱལ་ནི། །ཚིག་གི་ལམ་གྱིས་ལས་བྱེད་འཇུག །གསུང་བྱིན་བརླབས་པས་སྔགས་པ་ནི། །དེ་བཞིན་དོན་ཡོད་ཉིད་དུ་བྱེད། །དེར་ནི་ཡང་དག་བཤད་པ་འདི། །སྒྲུབ་པ་ཆེན་པོ་ཞེས་བྱའོ། །སངས་རྒྱས་
དེ་རྣམས་བྱིན་རློབ་པ། །སྡོམ་པ་ཡུལ་གྱི་དམ་པའོ། །རྡོ་རྗེ་ཐུགས་ནི་འཛིན་རྒྱལ་པོ། །དེ་ནི་བདག་ལ་བྱིན་རློབ་མཛད། །མི་ཕྱེད་རྡོ་རྗེ་གསུམ་སྦྱོར་བས། །ནམ་མཁའི་ཁམས་དང་མཉམ་པའི་གནས། །གང་ཞིག་
བྱུང་འབྱུང་འབྱུང་འགྱུར་བའི། །ཕྱོགས་བཅུར་བཞུགས་པའི་སངས་རྒྱས་རྣམས། །དེ་ཡི་བྱིན་གྱིས་རླབ་པའི་གནས། །ལམ་གསུམ་ལས་ནི་བྱུང་བ་མཛད། །སྐུ་ཡིས་སྟོན་པར་མཛད་པ་མཆོག །རང་སངས་རྒྱས་ནི་
བསྒོམ་པ་ཡིན། །མདོ་སྡེ་པ་དང་ཉན་ཐོས་ཀྱིའང་། །སྨྲ་བ་སྒྲུབ་པ་པོར་གྱུར་ཡིན། །སེམས་ནི་རྣལ་འབྱོར་ལྡན་མཆོག་གི། འགྲོ་བའི་དོན་ནི་རབ་སྒྲུབ་པའོ། །འགྲོ་འོང་གནས་དང་བྲལ་བ་ནི། །རྡོ་དང་ས་ནི་དབྱིག་བྱེད་པ། །ལུས་
ལ་སོགས་པ་མཚོན་པ་ཡིས། །འོན་ཀྱང་དེ་ནི་གསུང་དུ་འགྱུར། །སེམས་དང་ལུས་དང་མི་ལྡན་པའི། །དེ་བཞིན་ཉིད་ནི་འགྲོ་དོན་ཅན། །སྐུ་གསུང་ཐུགས་ཀྱི་རྡོ་རྗེ་གཅིག །གྱུར་ཀྱང་སོ་སོར་བསྟན་པ་ཡིན། །སངས་རྒྱས་རྡོ་རྗེ་

88-1-306a

ཆོས་དག་གམ། །དེ་བཞིན་རྡོ་རྗེ་སེམས་དཔའང་རུང་། །སྐུ་གསུང་ཐུགས་ཀྱི་སངས་རྒྱས་སོགས། །རྡོ་རྗེ་གསུམ་པོ་མི་ཕྱེད་བརྟག །དེ་འདས་རྨོངས་པའི་བདག་ཉིད་ཅན། །སོ་སོར་རྟོག་པ་འགག་པར་འགྱུར། །སྐུ་ལ་སོགས་
པའི་གྲངས་མཉམ་པ། །སངས་རྒྱས་ཀྱང་ནི་གང་རྟོག་གྱུར། །སྟོང་པ་ཉིད་དུ་སྦྱོར་བ་ཡང་། །དེ་ནི་གསལ་བར་ཐེ་ཚོམ་མེད། །སྣ་ཚོགས་སྦྱོར་གྱུར་སྔགས་རྣམས་ནི། །གང་ཞིག་སྟོང་པར་མངོན་དུ་བྱེད། །འདས་པ་དག་ནི་དེ་ཐམས་ཅད། །རྨོངས་པའི་
བདག་ཉིད་དེ་འགས་འགྱུར། །ཉན་ཐོས་རང་སངས་རྒྱས་རྣམས་ཀྱི། །བྱང་ཆུབ་བསྡུས་ནས་བཤད་པ་ཡིན། །འཇིག་རྟེན་པ་ཡི་གང་བཤད་པ། །མདོར་བསྡུས་པ་ནི་འདི་ཡིན་ནོ། །སངས་རྒྱས་ཡང་ན་རྡོ་རྗེ་ཆོས། །ཡང་ན་རྡོ་རྗེ་སེམས་དཔའང་རུང་། །
རྨོངས་པས་འདི་ལས་འདས་ན་ནི། །དེ་ནི་འགས་པར་ཐེ་ཚོམ་མེད། །དགོང་པ་ལུང་བསྟན་ལ་གནས་ནས། །གསང་བ་དམ་པ་ཡང་དག་བསྲུངས། །ལྷུན་གྱིས་གྲུབ་པའི་སྦྱོར་བ་ཡིས། །དངོས་གྲུབ་མཆོག་ནི་བསྒྲུབ་པར་བྱ། །སྐུ་ལ་སོགས་
པའི་གསང་བ་མཆོག །རྡོ་རྗེ་སྦྱོར་བ་ཞེས་བྱ་བའི། །དམ་ཚིག་བསྒྲུབ་པའི་མཆོག་བསྟན་པའི། །ལེའུ་བཅུ་གཉིས་གསུངས་པ་ཡིན། །དགོངས་པ་ལུང་བསྟན་པ་ཞེས་བྱ་བའི་བརྒྱུད་རྫོགས་སྷོ།། །། རྒྱ་གར་གྱི་མཁན་པོ་དྷརྨ་ཤྲཱི་བྷ་དྲ་དང་། 
ཞུ་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ། །ཐང་ཆེན་པོ་དང་རྒྱལ་མཚན་རེད་མོ་ཡིས། འདི་ཡི་ཞུས་ཆེན་ལེགས་པར་བགྱིས་པའོ། །སྟག་ལུང་བརྒྱུད་འབུམ་དང་བསྟུན་པའི་ཞུ་དག་གྲུབ། །
༄༅༅། །རྒྱ་གར་སྐད་དུ།  བཛྲ་ཛྙཱ་ན་ས་མུཙྪ་ཡ་ནཱ་མ་ཏནྟྲ།  བོད་སྐད་དུ།  ཡེ་ཤེས་རྡོ་རྗེ་ཀུན་ལས་བཏུས་པ་ཞེས་བྱ་བའི་རྒྱུད། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཇི་སྐད་དུ། 
བཅོམ་ལྡན་འདས་ཀྱིས་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས་ཇི་ལྟ་བ་བཞིན་དུ་གསུངས་པའོ། །བྱམས་པ་ལ་སོགས་པ་བྱང་ཆུབ་སེམས་དཔའ་དྲུག་སྟོང་གིས་བཅོམ་ལྡན་འདས་ལ་ཞུས་པ། བཅོམ་

88-1-306b

ལྡན་འདས་མ་རིགས་པ་དང་། སེམས་ལས་བྱུང་བ་དང་། སེམས་ཞེས་བགྱི་བ་ཅི་ལགས། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེས་བཀའ་སྩལ་པ། རིགས་ཀྱི་བུ་ཉོན་ཅིག །
ཡེ་ཤེས་གསུམ་རྡོ་རྗེ་ལས་ཡང་དག་པར་བྱུང་བ་དེའི་ཕྱིར་ཡེ་ཤེས་གསུམ་རྡོ་རྗེའི་རང་བཞིན་ནོ། །བྱམས་པས་གསོལ་པ། བཅོམ་ལྡན་འདས་ཡེ་ཤེས་གསུམ་རྡོ་རྗེའི་ངོ་བོ་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། 
ཡང་དག་པའི་མཐའ་ཟབ་པ། འགག་པ་མེད་པ། སྐྱེ་བ་མེད་པ་དེའི་རྐྱེན་གྱིས་མ་རིག་པ་སྟེ། མ་རིག་པ་ཞེས་བྱ་བ་དང་སྣང་བ་ཉེ་བར་ཐོབ་པ་དང་སྟོང་པ་ཆེན་པོའོ། །དེ་ཡང་རྟོགས་པར་དཀའ་བའོ། །འོན་ཀྱང་སྣང་བ་དང་བཅས་པར་བརྗོད་པར་
བྱའོ། །མ་རིག་པའི་རྐྱེན་གྱིས་སེམས་ལས་བྱུང་བ་སྟེ། དེ་ནི་སྣང་བ་མཆེད་པ་དང་ཤིན་དུ་སྟོང་པ་ཞེས་གསུངས་སོ། །སེམས་ལས་བྱུང་བའི་རྐྱེན་གྱིས་སེམས་ཏེ། དེ་ནི་སྣང་བ་དང་སྟོང་པ་སྟེ། སེམས་དང་སེམས་ལས་བྱུང་བ་དང་། མ་རིག་
པའི་རང་བཞིན་བདག་མེད་པའོ། །གསུམ་པོ་དེ་དང་དེ་འོད་གསལ་བ་ལས་བྱུང་བས་རྡོ་རྗེའི་རང་བཞིན་ནོ། །དེ་ནས་བྱམས་པ་ལ་སོགས་པ་བྱང་ཆུབ་སེམས་དཔའ་དེ་དག་ཐམས་ཅད་ངོ་མཚར་དུ་གྱུར་པས་ཅང་མི་སྨྲ་བར་གྱུར་ཏོ། །དེ་ནས་བཅོམ་ལྡན་
འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེས། བྱང་ཆུབ་སེམས་དཔའ་ཆེན་པོ་དེ་རྣམས་ཅང་མི་སྨྲ་བར་འདུག་པ་མཐོང་ནས་བཀའ་སྩལ་པ། རིགས་ཀྱི་བུ་ཅིའི་ཕྱིར་ཅང་མི་སྨྲ་བར་གྱུར་པས་འདུག །དེ་ནས་
བྱང་ཆུབ་སེམས་དཔའ་ཆེན་པོ་དེ་རྣམས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ཏེ་གཏུགས་ནས་གཞན་ཡང་ཞུས་པ། ཨེ་མའོ་སྟོན་པ་རྟོག་པར་དཀའ་བ་རྣམ་པར་ཤེས་པ་གསུམ་གྱི་དབྱེ་བ་མཆོག་ཏུ་ཟབ་པ་བཅོམ་ལྡན་
འདས་བཤད་དུ་གསོལ། བདེ་བར་གཤེགས་པ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། གང་འོད་གསལ་བ་ལས་བྱུང་བ་རྣམ་པར་ཤེས་པ་དེ་ཉིད་སེམས་དང་ཡིད་དང་རྣམ་པར་ཤེས་པ་ཞེས་བྱ་ལ། 

88-1-307a

དེ་ནི་ཆོས་ཐམས་ཅད་ཀྱི་རྩ་བ་སྟེ། ཀུན་ནས་ཉོན་མོངས་པ་དང་རྣམ་པར་བྱང་བའི་བདག་ཉིད་དེ་ལས་རྟོག་པ་གཉིས་སུ་གྱུར་ཏེ་བདག་དང་གཞན་དག་ཏུའོ། །རྣམ་པར་ཤེས་པ་དེའི་བཞོན་པ་རླུང་ངོ་། །རླུང་ལས་མེའོ། །མེ་ལས་
ཆུའོ། །ཆུ་ལས་སའོ། དེ་རྣམས་ལས་ཕུང་པོ་ལྔ་དང་། སྐྱེ་མཆེད་དྲུག་དང་ཡུལ་ལྔ་སྟེ། དེ་དག་ཐམས་ཅད་ནི་རྣམ་པར་ཤེས་པ་རླུང་དང་འདྲེས་པའོ། །དེ་ནས་རྣམ་པར་ཤེས་པ་གསུམ་གྱི་རང་བཞིན་གྱི་སྣང་བ་རབ་ཏུ་གསལ་
བར་སྤྱོད་པ་རྗེས་སུ་མྱོང་བར་བྱེད་དེ། སྣང་བའི་རྒྱུས་རང་བཞིན་རྣམས་ཡང་དག་པར་འབྱུང་ངོ་། །དེ་ལ་འོད་གསལ་བ་གནས་མེད་པ། འགག་པ་མེད་པ། སྐྱེ་བ་མེད་པ། དོན་དམ་པའི་བདེན་པ། ཡང་དག་པའི་མཐའ་སྟེ། 
དེ་ལས་བྱུང་བའི་མུན་པའི་སྣང་བ་ནི་མ་རིག་པའོ། །དེའི་རང་བཞིན་ལྟ་བ་དང་འཁྲུལ་པ་དང་རྣམ་པར་གཡེང་བ་དང་བརྗེད་ངས་པ་དང་ལེ་ལོ་དང་མི་སྨྲ་བ་དང་མི་གསལ་བའོ། །མ་རིག་པ་སེམས་ལས་བྱུང་བ་སྟེ། ཉི་མའི་
སྣང་བ་ལྟ་བུ་དང་། ཤིན་ཏུ་གསལ་བའི་སྨྱིག་རྒྱུ་ལྟ་བུའོ། །དེའི་རང་བཞིན་འདོད་ཆགས་དང་དགའ་བ་དང་མཆོག་ཏུ་དགའ་བ་དང་དྲག་པོ་ལ་སོགས་པ་དང་། ཀུན་རྫོབ་ཏུ་མངོན་སུམ་དུ་སྐྱེས་པའི་གཟུགས་དང་ལྷའི་
ཚོགས་དང་མཚན་མ་དང་རྡོ་རྗེའི་བརྡའོ། །སེམས་ལས་བྱུང་བ་ལས་སེམས་ཏེ། ཟླ་བའི་སྣང་བ་དང་ཤིན་ཏུ་གསལ་བའི་ཆུའི་ཟླ་བ་ལྟ་བུའོ། །རང་བཞིན་ནི་འདོད་ཆགས་དང་བྲལ་བ་ལ་སོགས་པའོ། །ཀུན་རྫོབ་ཏུ་ནི་
མངོན་སུམ་གྱི། བུད་མེད་དང་བྷ་ག་དང་པདྨ་དང་ལྷ་མོའི་ཚོགས་ཀྱི་བརྡའོ། །རྡོ་རྗེ་དང་པདྨ་ཡང་དག་པར་སྦྱོར་བ་ལས་ཤེས་རབ་ཀྱི་ཡེ་ཤེས་བྱུང་བ་ལས་རང་གི་རྡོ་རྗེའི་འབད་པ་ལས་མེའོ། །མེ་ལས་ཆུ་སྟེ། ནུར་ནུར་པོའི་རྣམ་པ་དང་། 
དེ་ལས་མེར་མེར་པོ་དང་ནར་ནར་པོ་དང་གོར་གོར་པོ་དག་གོ། དེ་ནས་འདོད་ཆགས་དང་བྲལ་བའི་སྣང་བ་ལ་ཁྲག་གི་གོང་བུ་མཁྲང་གྱུར་རྣམས་སོ། །དེ་ཁུ་བ་དང་ཁྲག་དག་གིས་བསྐྱེད་པའོ། །དེ་ནས་དབང་པོ་གཉིས་མཉམ་པར་སྦྱར་

88-1-307b

བ་ལས་འདོད་ཆགས་སོ། །འདོད་ཆགས་ལས་འདོད་ཆགས་དང་བྲལ་བ་དང་། བར་མའི་འདོད་ཆགས་རབ་ཏུ་ཤེས་པར་བྱ་སྟེ། དེའི་ཕྱིར་ལུས་ཏེ། ལུས་ལས་བྱུང་བའི་སྐྱིལ་དཀྲུང་བཅིང་བ་ལ་སོགས་པ་དང་། གསུང་གི་
ཕྱག་རྒྱའི་ཐབས་སུ་གྱུར་པ། ཨཱ་ལི་ཀཱ་ལི་ལས་ཡང་དག་པར་བྱུང་བའི་སྔགས་དང་། སེམས་ཀྱི་ཕྱག་རྒྱའི་ཐབས་སུ་གྱུར་པ་ས་བོན་དང་མཚན་མ་ལས་ལྷར་དམིགས་པའོ། །གཟུགས་ལ་སོགས་པའི་ཡུལ་
ནི་དབང་པོ་གཉིས་སྙོམས་པར་ཞུགས་པའི་ཐབས་སུ་གྱུར་པའོ། །རྡོ་རྗེ་དང་པདྨ་ཡང་དག་པར་སྦྱོར་བ་ནི་སེམས་དང་སེམས་ལས་བྱུང་བ་དག་གི་ཐབས་སུ་གྱུར་པའོ། །སེམས་དང་སེམས་ལས་བྱུང་བ་མཉམ་
པར་སྦྱར་བ་ནི་བདེ་བ་ཆེན་པོའི་ཏིང་ངེ་འཛིན་གྱི་ཐབས་སུ་གྱུར་པའོ། །དེ་སྒྱུ་མའི་དཔེས་ཉེ་བར་མཚོན་པ་སྟེ། དེའི་ཕྱིར་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པ་རྣམས་ནི་སྒྱུ་མ་
ལྟ་བུ་དང་ཆུ་ཟླ་དང་མིག་ཡོར་དང་སྨིག་རྒྱུ་དང་རྨི་ལམ་དང་སྒྲ་བརྙན་དང་དྲི་ཟའི་གྲོང་ཁྱེར་དང་མིག་འཕྲུལ་དང་དབང་པོའི་གཞུ་དང་གློག་དང་ཆུ་བུར་དང་། མེ་ལོང་གི་གཟུགས་བརྙན་ལྟ་བུ་སྟེ། སྒྱུ་མའི་དཔེ་བཅུ་གཉིས་
ཀྱིས་བདེ་བ་ཆེན་པོའི་ཏིང་ངེ་འཛིན་ཉེ་བར་མཚོན་པར་བྱེད་པ་ཡིན་ནོ། །ཇི་ལྟར་འོ་མ་བསྲུབས་པ་ལས་མར་དང་། ཇི་ལྟར་ཏིལ་ལས་ཏིལ་མར་ཏེ། དེ་བཞིན་དུ་རྡོ་རྗེས་ནི་ཐབས་ཀྱི་ཡེ་ཤེས་ཉེ་བར་མཚོན་པའི་
ཕྱིར་དང་། པདྨས་ནི་ཤེས་རབ་ཀྱི་ཡེ་ཤེས་ཉེ་བར་མཚོན་པའི་ཕྱིར་རོ། །ཇི་ལྟར་འོ་མ་དང་ཏིལ་དག་ཡང་དག་པར་མངོན་པར་འདུས་བྱས་པ་མེད་པར་ཏིལ་མར་མི་འབྱུང་བ་དེ་བཞིན་དུ། སྔགས་དང་ཕྱག་རྒྱ་མངོན་པར་
འདུས་བྱས་པའི་རྡོ་རྗེ་དང་པདྨ་མཉམ་པར་སྦྱར་བ་མེད་པར་རྣམ་པར་ཤེས་པ་གསུམ་ཉེ་བར་མཚོན་པར་མི་ནུས་སོ། །གང་གིས་བྷ་ག་དང་ལིང་ག་ཡང་དག་པར་སྦྱོར་བར་མི་ནུས་པ་དེས་ནི་བདེ་བ་ཆེན་པོའི་ཏིང་ངེ་འཛིན་མི་རྙེད་དོ། །

88-1-308a

བདེ་བ་ཆེན་པོའི་ཏིང་ངེ་འཛིན་འབའ་ཞིག་ལ་ལྷག་པར་མོས་པ་ཙམ་གྱིས་ནི་ལས་དང་པོ་པའི་ས་ལ་གནས་པར་འགྱུར་ཏེ། ཕྱིར་མི་ལྡོག་པ་ལ་ཡང་སློབ་པར་འགྱུར་རོ། །གང་རྡོ་རྗེ་དང་པད་མ་མཉམ་པར་
སྦྱོར་བའི་བདེ་བས་རང་བཞིན་སྣང་བ་ཡང་དག་པར་ཉེ་བར་མཚོན་པར་བྱེད་པ་དེ་ནི་བདེ་བ་ཆེན་པོའི་གོ་འཕང་ལ་རབ་ཏུ་གནས་པར་འགྱུར་རོ། །འདི་ནི་སྦས་པའི་བཤད་པའོ། །བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ཀྱིས་གསོལ་པ། བཅོམ་ལྡན་འདས་སྤྱིའི་དོན་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། ཉན་ཐོས་ལ་སོགས་པ་འདོད་ཆགས་དང་བྲལ་བའི་ཆོས་སྤྱོད་པ། རྣམ་པར་རྟོག་པའི་བག་ཆགས་
ལས་མ་གྲོལ་བ་རྣམས་རྣལ་འབྱོར་ཆེན་པོའི་རྒྱུད་དག་ཏུ་བཙུན་མོའི་བྷ་ག་ལ་བཞུགས་ཞེས་བྱ་བ་ལ་སོགས་པ། འདོད་ཆགས་ཀྱི་ཆོས་གསལ་བར་བྱེད་པ་ངོ་མཚར་ཅན་གྱི་རྡོ་རྗེའི་ཚིག་ཐོས་ནས་སྨོད་པར་བྱེད་པ་དེ་
རྣམས་དང་མི་འགལ་བའི་སྒོ་ནས་བཤད་པ་དེ་ནི་སྤྱིའི་དོན་དུ་བཤད་པ་གསུངས་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་གསོལ་པ། བཅོམ་ལྡན་འདས་འདོད་ཆགས་ལ་སྤྱོད་པའི་ཆོས་
ཀྱི་ཚུལ་དུ་མཐར་ཐུག་པ་བཤད་པ་ཇི་ལྟར་ལགས། དེ་ནས་བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་རྣམས་ལེགས་སོ། །ལེགས་སོ། །བྱང་ཆུབ་སེམས་དཔའ་ཆེན་པོ་སྙིང་རྗེ་མཆོག་དང་
ལྡན་པ་རྣམས་ཉོན་ཅིག །མཐའ་ནི་མུ་སྟེ། འོད་གསལ་བ་ཡང་དག་པའི་ཚུལ་ཞེས་བྱ་བ་མཐར་ཐུག་པའོ། །བྱང་ཆུབ་སེམས་དཔའ་སེམས་དཔའ་ཆེན་པོས་གསོལ་པ། བཅོམ་ལྡན་འདས་ཐབས་གང་གིས་མཐར་
ཐུག་པ་ཐོབ་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཕུང་པོ་དང་ཁམས་དང་སྐྱེ་མཆེད་ལ་སོགས་པའི་མཐའ་སྟོང་པ་གསུམ་མོ། །སྟོང་པ་གསུམ་གྱི་མཐའ་འོད་གསལ་བའོ། །བྱང་ཆུབ་སེམས་དཔའ་ཆེན་པོ་རྣམས་

88-1-308b

ཀྱིས་གསོལ་པ། བཅོམ་ལྡན་འདས་སྟོང་པ་གསུམ་འོད་གསལ་བའི་མཐར་ཇི་ལྟར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་མེས་ཤིང་བསྲེགས་ཏེ་ཐལ་བར་བྱེད་པ་དེ་བཞིན་དུ་འོད་གསལ་
བར་ཤེས་རབ་ཀྱི་ཡེ་ཤེས་ཡུན་རིང་པོས་རྣམ་པར་སྦྱོང་བར་བྱེད་དོ། །ཇི་ལྟར་ཏ་ལའི་ལོ་མ་ཐལ་བར་བྱེད་པ་དེ་བཞིན་དུ་ཐབས་ཀྱི་ཡེ་ཤེས་རྣམ་པར་སྦྱོང་བར་བྱེད་དོ། །ཇི་ལྟར་རས་བལ་གྱི་འདབ་མ་བསྲེགས་པ་དེ་བཞིན་དུ་
སྣང་བ་ཐོབ་པའི་ཡེ་ཤེས་མཆོག་ཏུ་མྱུར་བས་རྣམ་པར་སྦྱོང་བར་བྱེད་དོ། །དེ་བས་ན་རིམ་པ་འདིས་ཤིང་ཏ་ལའི་ལོ་མ་དང་། རས་བལ་གྱི་འདབ་མ་ཐལ་བར་འགྱུར་བ་དེ་བཞིན་དུ་སྟོང་པ་དང་། ཤིན་དུ་སྟོང་པ་དང་སྟོང་པ་ཆེན་པོ་
རྣམས་མཐར་འོད་གསལ་བར་འགྱུར་རོ། །འདི་ནི་མཐར་ཐུག་པའི་བཤད་པ་གསུངས་པའོ། །བྱམས་པས་གསོལ་པ། བཅོམ་ལྡན་འདས་རྣལ་འབྱོར་གྱི་རྒྱུད་དུ་དེ་བཞིན་གཤེགས་པ་ཐམས་ཅད་ཀྱི་མཐའ་དྲུག་གིས་བཤད་པ་ཇི་
ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། དགོངས་པས་བཤད་པ་དང་། དགོངས་པ་མ་ཡིན་པས་བཤད་པ་དང་། དྲང་བའི་དོན་དང་ངེས་པའི་དོན་དང་སྒྲ་ཇི་བཞིན་པ་དང་སྒྲ་ཇི་བཞིན་པ་མ་ཡིན་པ་རྣམས་སོ། །བྱམས་པས་གསོལ་པ། 
བཅོམ་ལྡན་འདས་ཐུགས་བརྩེ་བ་ཉེ་བར་གཞག་སྟེ་ཚིག་རེ་རེའི་བཤད་པ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། གང་མཐར་ཐུག་པར་བཤད་པ་དེ་ཉིད་དགོངས་པས་བཤད་པ་སྟེ། འདི་ལྟ་སྟེ། འདོད་ཆགས་མ་
ཡིན་པ་དང་འདོད་ཆགས་དང་བྲལ་བ་མ་ཡིན་པ་དང་། བར་མ་ཉེ་བར་མི་དམིགས་པ་ཞེས་བྱ་བ་ལ་སོགས་པ་རྡོ་རྗེའི་ཚིག་རྣམས་ནི་དགོངས་པས་བཤད་པའོ། །ལུས་དང་ངག་དང་ཡིད་མེད་པ་དང་བདག་མེད་པ་དང་ཐམས་ཅད་སྟོང་པ་དང་། 
དག་པ་དང་འོད་གསལ་བ་ཞེས་བྱ་བ་ལ་སོགས་པ་རྡོ་རྗེའི་ཚིག་ནི་དགོངས་པ་མ་ཡིན་པས་བཤད་པའོ། །ག་བུར་དང་ཁྲག་ཆེན་པོ་དང་ཙན་དན་དམར་པོ་དང་རྡོ་རྗེ་དང་པད་མ་དང་ཕྱག་རྒྱ་ཞེས་བྱ་བ་ལ་སོགས་པ་རྡོ་རྗེའི་ཚིག་རྣམས་ནི་དྲང་

88-1-309a

བའི་དོན་ཏེ། ག་བུར་ནི་ཁུ་བ་དང་ཁྲག་ཆེན་པོ་ནི་ཟླ་མཚན་གྱི་ཁྲག་དང་ཙན་དན་དམར་པོའི་ཁུ་བ་དང་བསྲེས་པ་ནི་ཙན་དན་དམར་པོའོ། །རྡོ་རྗེ་ནི་མཚན་མ་སྟེ་ཐབས་སོ། །པད་མ་ནི་བྷ་ག་སྟེ་ཤེས་རབ་དང་
ཕྱག་རྒྱ་དང་བཙུན་མོ་ཞེས་བྱ་བ་ལ་སོགས་པ་རྡོ་རྗེའི་ཚིག་རྣམས་ནི་ངེས་པའི་དོན་ཏོ། །གཉིས་ཀ་དང་སྤྱོད་པ་དང་བྱ་བའི་རྒྱུད་རྣམས་སུ་དོན་གསལ་བར་གསུངས་པ་འདི་ལྟ་སྟེ། དཀྱིལ་འཁོར་དང་མཆོད་སྦྱིན་དང་གཏོར་མ་དང་
སྨན་དང་ཞི་བ་ལ་སོགས་པའི་ལས་ཀྱི་ཚོགས་རྣམས་དང་། དེ་བཞིན་དུ་འཇིག་རྟེན་པའི་དངོས་གྲུབ་ཆེན་པོ་བརྒྱད་གསུངས་པ་རྣམས་ནི། སྒྲ་ཇི་བཞིན་པ་སྟེ་དེ་ནི་ཡི་གེའི་དོན་གྱི་བཤད་པའོ། །ཀོ་ཏྲཱ་ཁྱ་ཀོ་ཏྲཱ་བ་ཀོ་ཏྲཱཿ 
ཀོ་ཏྲཱ་པཤྩ། ཀོ་ཏི་རཱ་གཱ། ཀོ་ལ་ཁྱ། ཀོ་ལ་བ། ཀོ་ལ་ཀོ་ལ་པཤྩ།  ཀོ་ལསྟ་ཐ། འདིས་དབང་པོ་དང་ཡུལ་གསུངས་ཏེ། དེ་ལྟ་བུ་ལ་སོགས་པ་རྡོ་རྗེའི་ཚིག་རྣམས་ནི་སྒྲ་ཇི་བཞིན་པ་མ་ཡིན་པས་བཤད་པའོ། །བྱང་ཆུབ་སེམས་
དཔའ་སེམས་དཔའ་ཆེན་པོས་གསོལ་པ། བཅོམ་ལྡན་འདས་རྣལ་འབྱོར་ཆེན་པོའི་རྒྱུད་དང་གཉིས་ཀའི་རྒྱུད་དང་། སྤྱོད་པའི་རྒྱུད་དང་བྱ་བའི་རྒྱུད་དང་རྟོག་པའི་རྒྱུད་རྣམས་ཀྱི་ཚད་ཇི་ལྟར་ལགས། བཅོམ་ལྡན་འདས་ཀྱིས་བཀའ་
སྩལ་པ། རྣལ་འབྱོར་ཆེན་པོའི་རྒྱུད་ཀྱི་མིང་སྟོང་ཕྲག་བཅུ་གཉིས་ཞེས་བྱ་སྟེ། རྒྱུས་པར་ཕྱེ་ན་གྲངས་མེད་དོ། །གཉིས་ཀའི་རྒྱུད་སྟོང་ཕྲག་དྲུག་གོ། སྤྱོད་པའི་རྒྱུད་སྟོང་ཕྲག་བརྒྱད་དོ། །བྱ་བའི་རྒྱུད་སྟོང་ཕྲག་བཞིའོ། །
རྟོག་པའི་རྒྱུད་སྟོང་ཕྲག་བཞིའོ། །དེ་དག་ནི་སྟོང་ཕྲག་སུམ་བཅུ་རྩ་བཞི་སྟེ། རྒྱུད་དང་རྟོག་པའི་མིང་གི་མཐའ་མའི་ཡི་གེ་ཇི་སྙེད་པ་ནི། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྴ། 
འདི་དག་ནི་མིང་གི་ཡི་གེའི་མཐའ་མ་རྣམས་སོ། །བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་པ། བཅོམ་ལྡན་འདས་དེ་རྣམས་ཀྱི་བྱེད་པ་དང་ཆོ་ག་དང་བསྒྲུབ་བྱ་དང་སྒྲུབ་པ་དེ་གང་ལགས། བཅོམ་ལྡན་འདས་ཀྱིས་བཀའ་

88-1-309b

སྩལ་པ། དོན་དམ་པའི་བདེན་པ་ལས་བདག་བྱིན་གྱིས་བརླབ་པའི་རིམ་གྱིས་ལངས་ཏེ་འདོད་ཆགས་ལས་བྱུང་བའི་བྱང་ཆུབ་ཀྱི་གནས་པ་རབ་ཏུ་བསྟན་པའི་ཕྱིར་བཙུན་མོའི་འཁོར་གྱི་དབུས་སུ་འཁོར་ལོས་སྒྱུར་བའི་
གཟུགས་ཀྱི་བདེ་བ་ཆེན་པོའི་ཏིང་ངེ་འཛིན་གྱིས་བཙུན་མོའི་བྷ་ག་ལ་ཡང་དག་པར་བཞུགས་ཏེ། འཇིག་རྟེན་གྱི་སྤྱོད་པ་དང་འགལ་བ་རྨད་དུ་བྱུང་བའི་རྡོ་རྗེའི་ཚིག་གི་མཐའ་དྲུག་གང་གིས་རབ་ཏུ་དཔྱད་དེ་བསྒྲུབ་པར་བྱེད་པ་ནི་
རྣལ་འབྱོར་ཆེན་པོའི་རྒྱུད་ལ་བཞུགས་སོ། །རིག་པའི་ལྷ་མོ་རྣམས་དང་ལྷན་ཅིག་དཀྱིལ་འཁོར་གྱི་འཁོར་ལོ་ལ་དགོད་པ་དང་། དེ་ལས་བྱུང་བའི་བྱེད་པ་དང་ལས་དང་སྒྲུབ་པ་ལ་སོགས་པ་དེ་ཁོ་ན་ཉིད་རྣམ་པ་བཅུ་རབ་ཏུ་
དཔྱད་དེ་སྒྲུབ་པར་བྱེད་པ་ནི་གཉིས་ཀའི་རྒྱུད་ལ་བཞུགས་སོ། །ལས་ཀྱི་བྱ་བ་སྣ་ཚོགས་ཕྱག་རྒྱ་ཆེན་པོ་བྱ་བའི་རྒྱུད་ཀྱི་ཕྱག་རྒྱ་དམིགས་པའི་མཚན་ཉིད་རབ་ཏུ་དཔྱད་པས་བསྒྲུབ་པར་བྱ་བ་དང་། སྒྲུབ་པར་བྱེད་པ་ནི་སྤྱོད་པའི་
རྒྱུད་ལ་བཞུགས་སོ། །འཇིགས་པར་དམིགས་ཤིང་ཤིན་དུ་གཙང་སྦྲ་བྱེད་པ་དང་། ཡེ་ཤེས་སེམས་དཔའི་བདེ་བ་དམ་པ་མེད་པ་དང་། བདག་ཉིད་ལྷའི་བསྙེམས་པ་མེད་པ་དང་། རྨད་དུ་བྱུང་བའི་སྤྱོད་ཡུལ་མ་ཡིན་པ་དང་། 
སྐྱོན་གྱི་རྒྱུའི་རྟོག་པས་རབ་ཏུ་དཔྱོད་པས་སྒྲུབ་པར་བྱེད་པ་ནི་བྱ་བའི་རྒྱུད་ལ་བཞུགས་སོ། །སྔགས་དང་སྨན་དང་སྦྱིན་སྲེག་དང་། ཕྱེ་མ་དང་མིག་སྨན་དང་རྐང་མགྱོགས་ལ་སོགས་པ་དངོས་གྲུབ་ཆེན་པོ་བརྒྱད་རབ་ཏུ་དཔྱད་
པ་སྒྲུབ་པར་བྱེད་པ་ནི་རྟོག་པའི་བརྒྱུད་ལ་བཞུགས་སོ། །བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་པ། བཅོམ་ལྡན་འདས་རྒྱན་རྣམ་པ་བདུན་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། གླེང་
བསླང་བ་རྣམ་པ་ལྔ་དང་མཐའ་དྲུག་གིས་བཤད་པ་དང་། རིགས་པ་རྣམ་པ་བཞི་དང་། བཤད་པ་རྣམ་པ་བཞི་དང་དབྱེ་བ་རྣམ་པ་གཉིས་དང་། གང་ཟག་རྣམ་པ་ལྔའི་སློབ་མ་བརྟག་པ་དང་བདེན་པ་རྣམ་པ་གཉིས་ཀྱི་དགོངས་

88-1-310a

པ་རྣམས་སོ། །གླེང་བསླང་བ་རྣམ་པ་ལྔ་ནི་འདི་ལྟ་སྟེ། མིང་དང་གང་གི་དོན་དུ་བྱས་པ་དང་བྱེད་པ་པོ་དང་ཚད་དང་དགོས་པ་རྣམས་སོ། །མཐའ་དྲུག་ཏུ་བཤད་པ་ནི་འདི་ལྟ་སྟེ། དགོངས་པས་བཤད་པ་དང་དགོངས་པ་
མ་ཡིན་པས་བཤད་པ་དང་དྲང་བའི་དོན་དང་ངེས་པའི་དོན་དང་སྒྲ་ཇི་བཞིན་པ་དང་སྒྲ་ཇི་བཞིན་པ་མ་ཡིན་པ་རྣམས་སོ། །རིགས་པ་རྣམ་པ་བཞི་ནི་རྒྱུད་དང་གླེང་གཞི་དང་ངེས་ཚིག་དང་རྒྱུ་རྣམས་སོ། །བཤད་པ་རྣམ་པ་བཞི་ནི་ཡི་
གེའི་དོན་དང་སྤྱིའི་དོན་དང་སྦས་པ་དང་མཐར་ཐུག་པ་རྣམས་སོ། །དབྱེ་བ་རྣམ་པ་གཉིས་ནི་འདི་ལྟ་སྟེ། ཚོགས་ལ་བཤད་པ་དང་སློབ་མ་ལ་བཤད་པའོ། །གང་ཟག་རྣམ་པ་ལྔའི་སློབ་མ་བརྟག་པ་ནི་འདི་ལྟ་སྟེ། རིན་པོ་ཆེ་དང་ཙན་
དན་དང་པད་མ་དང་པད་མ་དཀར་པོ་དང་ཨུཏྤ་ལ་རྣམས་སོ། །བདེན་པ་རྣམ་པ་གཉིས་ཀྱི་དགོངས་པ་ནི་འདི་ལྟ་སྟེ། ཀུན་རྫོབ་ཀྱི་བདེན་པ་དང་དོན་དམ་པའི་བདེན་པའོ། །རིགས་ཀྱི་བུ་ཀུན་རྫོབ་ནི་མི་བརྟན་པ་དང་གཡོ་བའོ། །དེའི་བདེན་
པ་ནི་ཆུ་ཟླ་ལྟ་བུའོ། །དོན་དམ་པའི་བདེན་པ་ནི་སྟོང་པ་ཆེན་པོ་བཅྭ་བརྒྱད་དོ། །དེའི་མཐའ་ནི་གནས་སོ། །བྱང་ཆུབ་སེམས་དཔའ་རྣམས་ཀྱིས་གསོལ་པ། །དོན་དམ་པའི་བདེན་པ་ལ་རབ་ཏུ་གནས་པའི་རྣལ་འབྱོར་ཆེན་པོ་བས་
ལས་ཀྱི་རྒྱལ་པོ་མཆོག་གི་ཏིང་ངེ་འཛིན་ལ་བརྟེན་ནས་སེམས་ཅན་གྱི་དོན་ཇི་ལྟར་རབ་ཏུ་སྤྱོད་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། ཇི་སྲིད་དུ་ཞི་བ་ལ་སོགས་པའི་ལས་ཀྱིས་སེམས་ཅན་གྱི་དོན་མི་བྱེད་པ་དེ་
སྲིད་དུ་ཡང་དག་པའི་མཐའ་ལ་རབ་ཏུ་གནས་པར་འགྱུར་རོ། །གང་དུ་སེམས་ཅན་གྱི་དོན་བྱ་བར་མཐོང་བ་དེའི་ཚེ་བདག་བྱིན་གྱིས་བརླབ་པའི་རིམ་པས་ཡང་དག་པའི་མཐའ་ལས་ལངས་ཏེ་སེམས་ཅན་གྱི་དོན་བྱས་ནས་
ཡང་དག་པའི་མཐའ་ཉིད་དུ་འཇུག་པར་བྱེད་དོ། །དེ་ནས་བྱམས་པ་ལ་སོགས་པ་བྱང་ཆུབ་སེམས་དཔའ་ཆེན་པོ་རྣམས་དགའ་ཞིང་མགུ་ལ་ཡི་རངས་ཏེ་དགའ་བ་དང་ཡིད་བདེ་བ་སྐྱེས་ནས་ཅང་མི་སྨྲ་བར་གྱུར་ཏོ། །

88-1-310b

ཡེ་ཤེས་རྡོ་རྗེ་ཀུན་ལས་བཏུས་པ་ཞེས་བྱ་བ་རྣལ་འབྱོར་ཆེན་པོའི་རྒྱུད་ལས་བདེ་བ་ཆེན་པོའི་ལེའུ་སྟེ་རིམ་པར་ཕྱེ་བ་གཉིས་པའོ། །རྫོགས་སྷོ།། །། རྒྱ་གར་གྱི་མཁན་པོ་ཛྙཱ་ན་ཀ་རའི་ཞལ་སྔ་ནས་དང་། ཞུ་ཆེན་
གྱི་ལོ་ཙྖ་བ་ཁུ་སྟོན་དངོས་གྲུབ་ཀྱིས་བསྒྱུར། སླད་ནས་བླ་མ་དེ་ཉིད་དང་། དགེ་སློང་ཚུལ་ཁྲིམས་རྒྱལ་བས་ཞུས་ཤིང་གཏན་ལ་ཕབ་པ། །ཡེ་ཤེས་རྡོ་རྗེ་ཀུན་ལས་བཏུས། །རྣལ་འབྱོར་ཆེན་པོའི་གསལ་བྱེད་
ཡིན། །ཡེ་ཤེས་རང་བཞིན་འཁོར་བ་དང་། །མྱ་ངན་འདས་པའི་ངོ་བོའོ། །དེ་གཉིས་དབྱེར་མེད་རྡོ་རྗེ་སྟེ། །ཀུན་འདིར་འདུས་པས་ཀུན་ལས་བཏུས། །དེ་སྟོན་པ་ལ་དེར་བཏགས་ནས། །གཞུང་ལའང་མིང་དོན་འཚམ་པ་ཡིན།། །།
ལན་གཉིས་ཞུས། ། ༄༅། །རྒྱ་གར་སྐད་དུ།  ཙ་ཏུ་དེ་བཱི་པ་རི་པྲཱིཙྪཱ། བོད་སྐད་དུ།  ལྷ་མོ་བཞིས་ཡོངས་སུ་ཞུས་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །
ལྷ་མོ་བཞི་དང་མཉམ་ལྡན་ཞིང་། །སངས་རྒྱས་གཟུགས་ཀྱིས་ཉེར་བརྒྱན་པ། །ཤིན་དུ་དགའ་བའི་སྦྱོར་ཆེན་ལ། །རྡོ་རྗེ་སེམས་དཔའ་ཆེར་བཞུགས་ཏེ། །འོད་ཟེར་འཆང་ཞིང་འཁྲིགས་པ་ཡི། །
གསང་ཆེན་ཆོས་ཀྱི་འབྱུང་གནས་ལ། །བྱང་ཆུབ་སེམས་ནི་འཕྲོས་ནས་སུ། །ཆོས་ཀྱི་དབྱིངས་ནས་ཞུ་མཛད་དོ། །ཞུ་བའི་དངོས་པོ་དེ་མཐོང་ནས། །ལྷ་མོ་སྤྱན་མས་ཡོངས་ཞུས་པ། །
བཅོམ་ལྡན་རྡོ་རྗེ་སེམས་དཔའ་ལ། །ཚིག་འདི་དག་ནི་གསོལ་བ་སྟེ། །ཆོས་ཀྱི་དབྱིངས་རྣམས་འཕྲོ་བ་ནི། །གང་ལས་སྐྱེ་བར་འགྱུར་བ་ལགས། །དང་པོ་ཇི་ལྟར་འོང་བ་ཡིན། །དེ་བཞིན་ཕྱིར་
འགྲོ་ཇི་ལྟར་ལགས། །ཡན་ལག་མེད་པ་གང་དེ་ནི། །		། །		། །		། །		། །		། །		། །		། །

88-1-311a

ཡན་ལག་དང་བཅས་འགྱུར་ནས་སུ། །ལུས་དངོས་འགྱུར་བ་ཇི་ལྟར་ལགས། །མིག་དང་རྣ་བ་སྣ་དང་ནི། །དེ་བཞིན་ལྕེ་དང་ལུས་དང་ཡིད། །དབང་པོ་ཕུང་པོའི་དངོས་རྣམས་དང་། །ཁམས་རྣམས་སུ་ནི་འཇུག་པ་ཡང་། །མ་རིག་བག་ཆགས་
སྲེད་པ་ཡིས། །བཅིངས་པའི་ཉོན་མོངས་འདོད་ཆགས་སོགས། །རྣམ་པར་ཤེས་པ་སྣ་ཚོགས་པ། །ཇི་ལྟར་དངོས་སུ་འདུས་པ་ལགས། །དངོས་པོ་མེད་པ་བསྒོམས་པའི་གཟུགས། །གཟུགས་སོགས་སྤྱོད་ཡུལ་མཚན་ཉིད་རྣམས། །རང་བཞིན་
མེད་ཅིང་དམིགས་མེད་ལ། །དམིགས་པ་དང་བཅས་ཇི་ལྟར་ལགས། །དེ་དག་ངོ་མཚར་ཆེན་པོ་ནི། །བདག་གི་ཐེ་ཚོམ་ལྷས་བཀའ་སྩོལ། །དེ་ལྟར་ཞུས་མ་ཐག་ཏུ་ནི། །བཅོམ་ལྡན་རྡོ་རྗེ་སེམས་དཔས་གསུངས། །ཤེས་རབ་ཟབ་པ་ཟད་མེད་ནི། །
ཉོན་ཅིག་སྤྱན་མ་བཤད་པར་བྱ། །དཔྱད་དུ་མེད་ཅིང་ཤེས་བྱ་མིན། །དེ་བཞིན་དཔྱད་མཁན་གྱིས་ཤེས་དཀའ། །སངས་རྒྱས་ཀུན་གྱི་གསང་ཆེན་ནི། །ནམ་མཁའ་ནམ་མཁའི་སྤྱོད་ཡུལ་ལོ། །མི་ཤེས་མུན་པས་བསྒྲིབས་པས་ན། །ཉན་ཐོས་
རྣམས་ཀྱིས་ཤེས་པ་མིན། །སྤྱོད་ཡུལ་བག་ཆགས་ཤེས་མཁན་ནི། །རང་སངས་རྒྱས་སུ་སྤྲུལ་པ་སྟེ། །དེ་དག་ཀུན་གྱིས་ཀྱང་མི་ཤེས། །ཤེས་མེད་སོ་སོའི་སྐྱེ་གནས་དང་། །མ་འོངས་པ་དང་འདས་པ་དང་། །ད་ལྟར་བྱུང་བའི་དུས་གསུམ་ལ། །
བྱོལ་སོང་བག་ཆགས་ལས་བྱུང་བའི། །དུད་འགྲོ་ཡི་དགས་སྐྱེ་བ་རྣམས། །དེ་ཀུན་གྱིས་ཀྱང་མི་ཤེས་ཏེ། །སངས་རྒྱས་སྤྱོད་ཡུལ་གསང་ཆེན་ནོ། །སྙིང་པོ་ཤིན་ཏུ་སྙིང་པོའི་མཆོག །གང་དེ་ཀུན་བདག་ལ་གནས་པའི། །སངས་རྒྱས་ཀུན་
གྱི་གསང་ཆེན་ནི། །ལྷ་མོ་ཁྱོད་ལ་བཤད་པར་བྱ། །བྱང་ཆུབ་སེམས་དག་འོད་གསལ་བ། །ཟླ་བ་ཤེལ་དང་མཉམ་པའི་འོད། །དེ་ཉིད་ཡེ་ཤེས་ལྔ་ཡི་དངོས། །ཡུངས་ཀར་ཆེ་བའི་ཚད་ཙམ་མོ། །དེ་ཡི་དབུས་སུ་བཞུགས་པའི་ལྷ། །མི་གསལ་གསལ་བའི་
གཟུགས་ཅན་ཏེ། །ཕྱེད་ཚད་ཙམ་གྱི་ཕྲ་མོའི་མཆོག །ཡིད་ཀྱི་དངོས་པོའི་ཐིག་ལེའི་གཟུགས། །རྟག་ཏུ་སྙིང་གི་དབུས་གནས་པ། །འོད་ཟེར་ཆེན་པོ་འབར་བ་ཅན། །ཇི་སྙེད་དགུ་པའི་བར་དུ་ནི། །དཔྲལ་བར་ལ་གནས་རྐང་མཐིལ་བར། །ཐིག་ལེ་དེ་ཁོ་ནར་

88-1-311b

བསྡུས་ཏེ། །ལྟེ་བའི་དབུས་སུ་རྣམ་པར་གནས། །ཆ་ཤས་ལྔ་པ་ཙམ་ཡིན་ཏེ། །བཅུ་གཉིས་ཀྱི་ནི་ཐ་མ་ལ། །ཆ་ཤས་དྲུག་གིས་མཚན་པ་ཉིད། །ང་རོ་ཐིག་ལེས་བརྒྱན་བྱེད་པ། །རྡོ་རྗེ་ཁོང་ནས་ཕྱུང་ནས་སུ། །ས་བོན་སྐྱེ་གནས་དབུས་བཞག་སྟེ། །
ཆོས་ཀྱི་དབྱིངས་ནི་ཞུ་བར་བྱེད། །དེ་ནི་རིམ་པར་སྐྱེད་བྱེད་ན། །སྒོ་དགུ་ལ་ནི་ཀུན་དུ་འགྲོ། །ཁྱབ་ཅིང་ཁྱབ་གནས་འགྲོ་ཀུན་ལ། །མི་གཡོ་ལ་སོགས་གཡོ་དང་བཅས། །ཚངས་སོགས་ལྷ་དང་ལྷ་མིན་གྱི། །གཞི་ནི་དེ་ལས་གྱུར་པ་
འོ། །གང་ལས་གཙོ་བོར་སྐྱེད་བྱེད་པ། །ས་དང་ནམ་མཁའ་དེ་ཞེས་གསུངས། །ཇི་སྲིད་ལུས་ལ་གནས་པའི་བར། །དེ་ཡིས་ལས་དང་ལས་མིན་བྱེད། །དགེ་དང་མི་དགེ་བསམ་པ་ཡང་། །བྱ་བའི་ལས་ཀུན་བྱེད་པ་ཡིན། །སྦྱོར་བ་རྟག་ཏུ་
དེ་གསུངས་ཏེ། །མཆོད་པ་བསྒོམ་པར་གསུངས་པ་ཡིན། །གང་ཚེ་ལས་ཀྱི་ལུས་ཞིག་ན། །དེ་ཚེ་དེ་ཡི་རང་མཐུ་ཡིས། །དེ་འདྲའི་ལུས་སུ་དེ་འགྱུར་ཏེ། །གང་གིས་གཡོ་དང་མི་གཡོ་ཁྱབ། །ནམ་མཁའ་མཉམ་པ་ཉིད་འདྲ་བ། །
དེ་ནི་གནས་པར་ཤེས་པར་བྱ། །བཅུ་ཡི་གཉིས་མཐའ་ཚིག་གི་དོན། །གང་གིས་རྟག་ཏུ་བསྒོམ་བྱས་ན། །དེས་ནི་དངོས་གྲུབ་རྒྱས་པ་ཡིས། །རྡོ་རྗེ་འཛིན་པར་བདག་ཉིད་འགྱུར། །སོ་དང་མཆུ་དང་རྐན་དང་ལྕེ། །མགུལ་གནས་གང་ལ་ཡོད་པ་ནི། །
གང་ལ་དེ་ནི་ཡིག་འབྲུ་ཉིད། །དེ་ནི་ཟད་དང་གནས་ཕྱིར་རོ། །བརྗོད་པ་མེད་ཅིང་ཐེ་ཚོམ་པ། །སྒྲ་ཡིག་རྣམ་པར་སྤངས་པ་ནི། །རང་གི་ཕྱི་ནང་དེ་བཞིན་ཉིད། །བྱང་ཆུབ་སེམས་ནི་འདིར་གསུངས་སོ། །ལྷ་མོ་བཞིས་ཡོངས་སུ་ཞུས་པ་ལས་ལྷ་མོ་
སྤྱན་མས་ཡོངས་སུ་ཞུས་པའི་ལེའུ་སྟེ་དང་པོའོ།། །། དེ་ནས་ལྷ་མོ་མཱ་མ་ཀཱིས། །རྡོ་རྗེ་ཅན་ལ་འདི་ཞུས་ཏེ། །བྱང་ཆུབ་སེམས་ཀྱི་རིམ་པ་ཡི། །ཁ་སྙིང་ལྟེ་བ་གསང་བ་ལ། །འགྲོ་དང་ཕྱིར་འོང་བསྟན་པ་ནི། །
རྡོ་རྗེ་ཆེན་པོས་བཀའ་སྩལ་འཚལ། །ཆ་ཤས་རྣམ་པ་དུ་ཞིག་གསུངས། །གནས་ཀྱི་རྣམ་པ་བསྒྱུར་བ་དུ། །ཁ་དོག་རྣམ་པ་དུ་ཞིག་གསུངས། །དེ་བཞིན་གདན་ཡང་ཇི་ལྟར་འཚལ། །རྡོ་རྗེ་ཅན་གྱིས་བཀའ་སྩལ་པ། །ཆ་ཤས་བཞི་དང་མཉམ་ལྡན་ཞིང་། །པདྨ་བཞི་ལ་ཡང་དག་གནས། །

88-1-312a

སྙིང་གའི་པད་མ་ལ་གནས་ནག །ཁ་ཡི་པད་མ་ལ་གནས་དཀར། །ང་རོ་ལྟེ་བའི་པད་མར་གནས། །གསང་བའི་པད་མ་ང་རོ་མཐའ། །སྟབས་ཀྱི་མཐའ་རུ་འགྲོ་བྱེད་པས། །ཐིག་ལེའི་སྦྱོར་བར་རབ་ཏུ་གནས། །བསྣོམ་བྱེད་
པ་དང་ཐོས་བྱེད་པ། །དེ་ཚེ་མཐོང་བྱེད་ཟ་བྱེད་པ། །རེག་པར་བྱེད་ཀྱང་དེ་ཁོ་ནས། །བདེ་དང་སྡུག་བསྔལ་ཚོར་བྱེད་པའོ། །གང་ལས་བཞད་བྱེད་བཟའ་བྱེད་པ། །དེ་བཞིན་ཆོ་ངེ་དང་ངུ་བ། །བྱེད་པ་གཅོད་པ་དེ་ཁོ་ནས། །ཆོ་ག་རྣམ་པ་མང་པོ་ཤེས། །རྒྱལ་པོ་
དོན་ཡང་བྱེད་པར་འགྱུར། །དབང་ཕྱུག་དོན་ཡང་བྱེད་པར་འགྱུར། །བྲམ་ཟེ་རྒྱལ་པོ་རྗེའུ་རིགས་དང་། །དམངས་རིགས་སྨད་པའི་རིགས་རྣམས་དང་། །བུད་མེད་དུ་མ་སྤྲུལ་པར་བྱེད། །དུད་འགྲོ་ཡི་དགས་སྐྱེ་བ་དང་། །གཟུགས་ཅན་རྣམས་དང་གཟུགས་མེད་
དང་། །དེ་བཞིན་འདོད་པའི་སྲིད་རྣམས་ལས། །འབྱུང་བ་ཐམས་ཅད་སྐྱེད་བྱེད་མ། །དེ་ཉིད་ཁོ་ན་རྫུ་འཕྲུལ་གནས། །མོ་གཟུགས་དང་ནི་ཕོ་ཡི་གཟུགས། །བདེ་བ་ཆེན་པོ་གོ་འཕང་གནས། །དེ་ལྟར་དེ་བཞིན་ཉིད་ཤེས་པ། །དམ་པའི་ཡིག་འབྲུ་ཤེས་པ་
གང་། །དེས་ནི་གསང་ཆེན་ཤེས་པ་སྟེ། །གང་དེས་བདག་ཉིད་ཀུན་གནས་པ། །ཁ་དོག་མེད་ཅིང་ཁ་དོག་དམར། །ཁ་དོག་དཀར་དང་སེར་བ་ཡི། །ཐིག་ལེའི་གཟུགས་སུ་བསྒྱུར་བ་འདི། །འགྲོ་དང་ཕྱིར་འོང་རྣམ་པར་བསྟན། །གང་དེ་རིག་པ་རྫུ་འཕྲུལ་
ཆེ། །མཐའ་ཡས་བཅས་པ་སྣ་ཚོགས་གཟུགས། །སྐྱེ་དང་བསྡུས་དང་འཇིག་པ་ལ། །ཐིག་ལེའི་གཟུགས་སུ་རབ་གནས་སོ། །གང་གི་བརྒྱད་ཁྲི་རྩ་བཞིའི་ཆོས། །སྟོང་ཕྲག་བརྒྱ་རུ་ཤེས་ན་ཡང་། །དེ་ཡིས་དེ་ཉིད་མི་ཤེས་ཏེ། །དེ་དག་ཀུན་
ཀྱང་འབྲས་མེད་དོ། །བཅུ་གཉིས་ལྔ་ཡི་ལྔ་པ་ཡང་། །བརྒྱད་ཀྱི་མཐའ་རུ་འབྱུང་བ་འདུས། །སྒྲ་ཡིག་དང་པོ་ཡི་གེ་ཨ། །ལྔ་པ་ཡིས་ནི་ཡང་དག་བརྒྱན། །སྙིང་རྗེ་ཆེན་པོ་ལས་བྱུང་བ། །ཁ་མར་བལྟས་པའི་དྲུག་པས་བཏགས། །གདོད་མ་མཐའ་མ་
མེད་པའི་ལྷ། །དེ་ནི་སྤྱི་བོར་བསྟན་པ་ཡིན། །དེ་དག་གསང་ཆེན་དམ་པ་ཡིན། །ལྷ་མོ་བདག་གིས་རབ་བསྟན་ཏོ། །ལྷ་མོ་བཞིས་ཡོངས་སུ་ཞུས་པ་ལས་ལྷ་མོ་མཱ་མ་ཀཱིས་ཞུས་པ་སྟེ་ལེའུ་གཉིས་པའོ།། །། དེ་ནས་ལྷ་མོ་གོས་དཀར་མོས། །ཡན་ལག་

88-1-312b

ཀུན་གྱིས་བཏུད་ནས་སུ། །ཐལ་མོ་སྙིང་གར་སྦྱར་བྱས་ཏེ། །རྡོ་རྗེ་སེམས་དཔའ་ལ་གསོལ་པ། །ཆོས་ཀྱི་དབྱིངས་ཀྱི་བསྡུ་བ་དང་། །སྐུ་གསུང་ཐུགས་ཀྱི་རྡོ་རྗེ་ཡི། །རང་བཞིན་ཉིད་ནི་ཇི་ལྟར་ལགས། །ལྷ་ཡི་དབང་ཕྱུག་ཁྱོད་ལ་ཞུ། །
གང་གིས་འོད་ཀྱི་གོང་བུར་བསྡུ། །རྡོ་རྗེ་སེམས་དཔའ་ཇི་ལྟར་ལགས། །གསུངས་ཤིག་དེ་ཉིད་ཡིག་འབྲུའི་ཚིག །འདུས་པ་གསུངས་པ་ཇི་ལྟར་ལགས། །ཆུ་ཁམས་དང་ནི་མེ་ཡི་ཁམས། །ཇི་ལྟར་རོ་ནི་མཉམ་པོར་འགྱུར། །མ་ལས་སྐྱེ་བ་གསུམ་
ཙམ་དང་། །དེ་བཞིན་ཕ་ལས་སྐྱེ་བ་གསུམ། །དེ་དག་དྲུག་སོགས་གོང་བུ་ལས། །ཇི་ལྟར་མི་རྣམས་སྐྱེ་བ་ལགས། །སངས་རྒྱས་གཟུགས་ནི་བདག་མི་འཚལ། །ཐུབ་པ་ཆེན་པོས་བཀའ་སྩལ་མཛོད། །རྡོ་རྗེ་ཅན་གྱིས་བཀའ་སྩལ་པ། །གསང་བ་ཤིན་དུ་
གསང་གྱུར་པ། །ཉོན་ཅིག་ལྷ་མོ་བཤད་པར་བྱ། །སྐྱེ་གནས་དབུས་སུ་རྩ་གཉིས་ནི། །གཡོན་དང་དེ་བཞིན་གཡས་པ་སྟེ། །གཡོན་དུ་བྱང་ཆུབ་སེམས་ཞེས་བྱ། །གཡས་སུ་དེ་བཞིན་རཀ་ཏའོ། །དེ་གཉིས་ཕྲད་ནས་གཅིག་འགྱུར་བ། །ཆོས་ཀྱི་དབྱིངས་
ནི་འདུས་པ་ཡིན། །མུན་པ་སྐུ་སྟེ་རྡུལ་གསུང་གཟུགས། །ཐུགས་ཀྱི་རང་བཞིན་སྙིང་སྟོབས་ཏེ། །རྡུལ་ནི་རཀྟ་བྱང་ཆུབ་སེམས། །མུན་པ་དེ་བཞིན་སྐྱེད་པ་ཡིན། །རྡོ་རྗེ་པད་མ་མཉམ་སྦྱར་ནས། །རང་བཞིན་མཉམ་པའི་རོར་འགྱུར་རོ། །དྲི་ཆེན་ཆུ་དང་
ཤེལ་མེ་ཏོག །དེ་བཞིན་ལྔ་པ་བྱང་ཆུབ་སེམས། །བདུད་རྩི་ལྔ་དངོས་གོང་བུར་བསྡུས། །དེ་ལས་རྡོ་རྗེ་འདིར་གསུངས་སོ། །ཆ་ཤས་གཉིས་པ་དང་ལྡན་པ། །དེ་བཞིན་དགུ་པ་ཡང་ཡིན་ནོ། །དེ་སྐད་གསུངས་པ་དེ་ལ་ནི། །སུམ་བཅུ་དང་ནི་བཅུ་དང་ནི། །
དེ་བཞིན་ལྔ་པའི་ས་བོན་ཏེ། །ཆ་ཤས་གཉིས་པ་ལྔ་ཡིས་ནི། །དྲུག་གིས་བཏགས་པ་དེས་བྱུང་བ། །དེ་ནི་ཐིག་ལེར་གསུངས་པའོ། །ཆོས་ཀྱི་དབྱིངས་ཀྱི་ཡིག་འབྲུ་བྲུྃ། །སྐྱེ་གནས་པདྨ་ལ་གནས་པ། །དེ་ཉིད་ས་བོན་སྭཱ་ཧཱ་མཐའ། །
འདུས་པ་ལ་ནི་ཤེས་པར་བྱ། །ཆུ་ཁམས་ཕ་ལས་སྐྱེ་ཞེས་བྱ། །མེ་ཡི་ཁམས་ནི་མ་ལས་སྐྱེས། །ཤ་དང་ཁྲག་དང་པགས་པ་ཡང་། །མ་ལས་སྐྱེས་པ་ཞེས་བཤད་དོ། །ཚིལ་དང་

88-1-313a

རྐང་དང་ཁུ་བ་ནི། །ཕ་ལས་སྐྱེས་ཞེས་བཤད་པ་ཡིན། །གོང་བུར་ཡང་དག་འདུས་པ་ནི། །དེ་དག་ཙམ་དུ་བཤད་པ་ཡིན། །གཟུགས་དང་ཚོར་བ་འདུ་ཤེས་དང་། །དེ་བཞིན་འདུ་བྱེད་རྣམ་ཤེས་རྣམས། །སངས་རྒྱས་དངོས་
པོ་ལྔ་ཡི་གཟུགས། །ཕུང་པོ་ཞེས་བྱར་བཤད་པའོ། །ལྷ་མོ་བཞིས་ཡོངས་སུ་ཞུས་པ་ལས་ལྷ་མོ་ན་བཟའ་དཀར་མོས་ཞུས་པ་སྟེ་ལེའུ་གསུམ་པའོ།། །།  དེ་ནས་བཞད་པའི་ཞལ་འགྱུར་ཏེ། །ལྷ་མོ་སྒྲོལ་མ་བཅོམ་ལྡན་མས། །
རྡོ་རྗེ་སེམས་དཔའ་ལ་ཞུས་པ། །ཆོས་ཀྱི་དབྱིངས་ཀྱི་སྒྲུབ་པ་ནི། །གསུངས་ཤིག་རྡོ་རྗེ་ཅན་ཆེན་པོ། །རྫས་རྣམས་སྒྲུབ་པར་བཀའ་སྩལ་འཚལ། །དེ་བཞིན་རིག་པའི་སྔགས་རྣམས་ཀྱང་། །དཀྱིལ་འཁོར་རྣམས་ནི་བརྟག་པ་
དང་། །སྦྱིན་སྲེག་སོ་སོར་བྱ་བ་དང་། །དེ་བཞིན་མཆོད་པའི་ཆོ་ག་ཡང་། །ཁྱད་པར་དུ་ཡང་བཀའ་སྩལ་འཚལ། །དེ་ལྟར་ལྷ་མོས་ཞུས་མ་ཐག །རྡོ་རྗེ་སེམས་དཔས་བཀའ་སྩལ་པ། །ཆོས་ཀྱི་དབྱིངས་ཀྱི་སྒྲུབ་ཐབས་ནི། །
ཉོན་ཅིག་ལྷ་མོ་བཤད་པར་བྱ། །གཟུགས་དང་སྒྲ་དང་དྲི་དང་ནི། །དེ་བཞིན་རོ་དང་རེག་ལ་སོགས། །ཁམས་བཅྭ་བརྒྱད་པོ་དེ་དག་ཀྱང་། །ཆོས་ཀྱི་དབྱིངས་ཞེས་བྱ་བའོ། །དེ་དག་ཉིད་ལས་བྱུང་བ་ནི། །བྱང་ཆུབ་སེམས་ཞེས་ཤེས་
པར་བྱ། །བྱང་ཆུབ་སེམས་ལས་གོང་བུ་སྐྱེ། །གོང་བུ་ལས་ཀྱང་ཡིད་སྐྱེད་དོ། །ཡིད་ལས་ནམ་མཁའི་ཁམས་ཀྱང་ནི། །ཁམས་རྣམས་དང་ནི་སྐྱེ་མཆེད་རྣམས། །དབང་པོ་ཕུང་པོ་འབྱུང་བ་རྣམས། །དེ་ལྟར་དབྱིངས་
སུ་བསྡུས་པ་སྟེ། །བསྡུ་བ་དེ་ནི་བསྟན་བྱས་པ། །ཆོས་ཀྱི་དབྱིངས་ཀྱི་སྒྲུབ་པ་ཡིན། །དེ་བས་ནན་ཏན་ཐམས་ཅད་ཀྱིས། །སྒྲུབ་པ་ཡང་དག་སྤྱད་པར་བྱ། །ཇི་ལྟར་ཀལ་པ་ཞེས་དངོས་ཀྱིས། །བསྒྲུབ་པར་བྱ་བ་རབ་ཏུ་བརྟག །
ཆོས་དབྱིངས་སྒྲུབ་པ་བཤད་ནས་སུ། །རྫས་བརྒྱད་ཡན་ལག་སྒྲུབ་པ་བཤད། །རི་ལུ་མིག་སྨན་དངོས་གྲུབ་དང་། །ས་འོག་རལ་གྲིའི་དངོས་གྲུབ་དང་། །ནམ་མཁར་འཕུར་དང་མིག་སྨན་དང་། །འཆི་བ་མེད་དང་ནད་འཇོམས་དང་། །

88-1-313b

མི་དང་གླང་པོ་ཆེ་དང་རྟ། །གླང་དང་ཁྱི་དང་བོང་བུ་དང་། །རྔ་མོ་མ་ཧེ་སྤྱང་ཀི་རྣམས། །ཆ་ནི་མཉམ་པོར་བྱ་བའོ། །མཐེ་བོང་ཚིགས་ཚད་ཙམ་དུ་ནི། །ཤིན་དུ་མཉམ་པར་བཞག་ནས་སྦྱར། །དྲི་ཆེན་ཆུ་དང་རཀྟ་དང་། །བྱང་ཆུབ་སེམས་
ནས་ཚད་ཙམ་ནི། །སྔགས་བཟླས་ནས་ནི་སྦྱར་བྱས་ཏེ། །བྱིན་གྱིས་བརླབས་ཀྱང་བྱ་བའོ། །ཕྱག་འཚལ་དང་ནི་ཡི་གེ་ཨཱཿ། །དབུས་སུ་དེ་བཞིན་ཧཱུྃ་བྱས་ཏེ། །འབར་བའི་ཧཱུྃ་ཡིག་འབར་བྱེད་པ། །དགུ་པོ་དེ་ནི་རབ་ཏུ་བསྒྲུབ། །ལན་ནི་ཉི་ཤུ་
རྩ་གཅིག་ཏུ། །བསྔགས་བཟླས་ནས་ནི་ཕྱེ་མར་བཏག །ཡུངས་ཀར་ལྔ་ཡི་ཚད་ཙམ་དུ། །ལྔ་དང་ལྔ་ནི་འབྱོར་བར་བྱ། །ཚེས་བརྒྱད་དང་ནི་བཅུ་བཞི་ལ། །རི་ལུ་རྣམས་ནི་བྱས་ནས་སུ། །པད་མའི་སྣོད་ལ་བཞག་བྱས་ཏེ། །
སྟོང་ཕྲག་བརྒྱར་ནི་བཟླ་བར་བྱ། །མཚམས་བཞི་ལ་ནི་བསྒོམ་བྱས་ནས། །ཉིན་དང་མཚན་དུ་བཟའ་བར་བྱ། །དེ་ནས་བསྐལ་པའི་མཐའ་བར་ཡང་། །དངོས་གྲུབ་རྒྱས་པར་འགྲོ་བ་སྟེ། །གཟི་བརྗིད་མདངས་དང་སྟོབས་
བརྩོན་འགྲུས། །ལྔ་པ་ལ་ནི་སྨོན་ལམ་ཡང་། །མངོན་པར་ཤེས་པ་ལྔ་ཐོབ་པ། །རི་ལུ་ཆེན་པོ་ཟོས་ཕྱིར་རོ། །རྫས་ཀྱི་སྒྲུབ་པ་རྣམས་རྫོགས་ནས། །རིགས་པའི་སྔགས་རྣམས་བདག་ལ་སྩོལ། །ཡི་གེ་ཨ་དང་
བྃ་ཡིག་དང་། །ལྃ་ཡིག་དབུས་སུ་ཡང་དག་གནས། །དང་པོའི་མདོག་ནི་དམར་པོ་སྟེ། །གཉིས་པ་ཡི་ནི་མདོག་དཀར་བ། །གསུམ་པ་ཁ་དོག་སེར་བ་རྣམས། །བྷ་གའི་དབུས་སུ་བསྒོམ་པར་བྱ། །འཁོར་
ལོ་ལྟར་ནི་བསྐོར་བ་ནི། །ཉིན་ཕྱེད་དང་ནི་མཚན་ཕྱེད་ལ། །རིག་པ་དེ་ནི་རབ་འབྱོར་ན། །དེ་ནི་སྐད་ཅིག་ཁོ་ནར་འགྲུབ། །ལྷ་མོ་ལྷ་མིན་བུ་མོ་དང་། །མི་ཡི་བུ་མོ་རྣམ་པ་བཞི། །ས་ཡི་དཀྱིལ་
འཁོར་ཀུན་དུ་ནི། །སྔགས་ཀྱིས་བཀུག་ནས་སྤྱད་པར་བྱ། །བསྒོམ་པ་དེ་བཞིན་རིག་པའི་སྔགས། །བདག་གིས་བཤད་པ་ཟིན་བྱས་ཏེ། །དཀྱིལ་འཁོར་རྣམས་ནི་

88-1-314a

བཤད་པར་བྱ། །དགའ་མ་སེམས་ཀྱིས་རྩེ་གཅིག་ཉོན། །དཀྱིལ་འཁོར་ལུས་ཤེས་གསུངས་པ་སྟེ། །དཀྱིལ་འཁོར་བྷ་གར་བསྟན་པ་ཡིན། །དཀྱིལ་འཁོར་བྱང་ཆུབ་སེམས་དང་ནི། །དཀྱིལ་འཁོར་གསུམ་དུ་བཏགས་པ་ཡིན། །བཏགས་པ་རྣམས་ཀྱང་
འདུས་པ་སྟེ། །གང་དུ་གཙོ་བོ་སྐྱེད་པར་བྱེད། །ཕུང་པོ་རྣམས་ནི་སངས་རྒྱས་གསུངས། །འབྱུང་བ་རིག་མར་བཏགས་པའོ། །ཆག་པ་ལྕགས་ཀྱུ་ཁོ་ན་སྟེ། །ཞགས་པ་པད་མར་ཆུད་བྱེད་པ། །ཁ་ཕྲད་པ་ནི་སྒྲགས་ཡིན་པར། །སྒྲ་བསྒྲགས་པ་ནི་དྲིལ་བུར་བཤད། །
སྤོས་ནི་དྲི་ཆེན་ཞེས་གསུངས་ཏེ། །མེ་ཏོག་རཀ་ཏ་ཞེས་འདོད་དོ། །མར་མེ་ཤ་རྣམས་ཁོ་ན་ཡིན། །དྲི་ནི་བྱང་ཆུབ་སེམས་ཞེས་འདོད། །སྒེག་མོ་ལིངྒར་བསྟན་པ་སྟེ། །ཕྲེང་བ་བྷ་ག་ཁོ་ན་ཡིན། །དབྱངས་མ་དབུགས་སུ་བསྟན་པ་དང་། །གར་མཁན་མ་ནི་
རྣལ་འབྱོར་ཏེ། །བཅོམ་ལྡན་འདས་ཀྱིས་བཟང་པོར་གསུངས། །དེ་རྟོགས་པ་ནི་སྐལ་བཟང་ཡིན། །རྟོགས་པ་དེ་རྣམས་བྱམས་པ་སོགས། །དེ་ལྟར་ནང་གི་བདག་ཉིད་གསུངས། །དཀྱིལ་འཁོར་གཞན་ནི་སྔོན་བཤད་ཟིན། །སྦྱིན་སྲེག་ལས་ནི་བཤད་
པར་བྱ། །ཉོན་ཅིག་སྦྱིན་སྲེག་རྣམ་པ་བཞི། །སྦྱིན་སྲེག་ཕྱི་དང་ནང་གསུངས་ཏེ། །ཕྱི་ནི་སྔོན་དུ་བསྟན་པ་ཡིན། །ཉོན་ཅིག་ཁྱོད་ཀྱིས་ནང་གི་ནི། །པད་མ་བཞི་རྣམས་འབྱོར་པ་ནི། །ལུས་ཀྱི་དབུས་སུ་ཉེ་བར་གནས། །མེ་དང་དེ་བཞིན་རླུང་དང་ནི། །
དབང་ཆེན་དང་ནི་ཆུ་དེ་བཞིན། །རླུང་གིས་མེ་ནི་འབར་བྱས་ཏེ། །ཆུ་ཡི་ཡོངས་སུ་སྨིན་པར་བྱེད། །དབང་ཆེན་དཀྱིལ་འཁོར་ལས་བྱུང་བ། །གང་དུ་མེ་ནི་བསྐྱོད་པའོ། །ར་ཡིག་མངོན་སྤྱོད་ཡི་གེ་སྟེ། །ཡ་ཡིག་དབང་གི་ལས་ཁོ་ན། །ལ་ཡིག་
རྒྱས་པར་འགྱུར་བ་སྟེ། །བ་ཡིག་ཞི་བ་ཞེས་གསུངས་སོ། །གང་ཞིག་ཟས་དང་བཏུང་བ་ནི། །དེ་དག་ཐམས་ཅད་ཆུ་ལ་སྟེ། །པད་མར་ཀྵཿཡིག་ཁ་མར་ལྟ། །སྙིང་གི་པད་མར་བཙུད་པར་བྱ། །ལྟེ་བའི་པད་མར་འགྲོ་ཕྱི་རོལ། །
ཁ་སྦྱོར་ཚུལ་གྱི་སྦྱོར་བ་ཡིས། །གསང་བའི་པད་མར་འགྲོ་མ་ཐག །ཐལ་བར་མཐའ་རུ་རྣམ་པར་བསྟོན། །དེ་ལྟར་སྦྱིན་བསྲེག་བདག་བཤད་པ། །ཉིན་དང་ཉིན་དུ་བྱ་བ་སྟེ། །རྟག་པར་རྒྱུན་དུ་ཟས་ཟོས་ན། །ཚེ་འདི་ཁོ་ནར་འགྲུབ་

88-1-314b

པར་འགྱུར། །རྒས་པ་མེད་ཅིང་ནད་ཀྱང་མེད། །འཆི་བ་མེད་ཅིང་འབྲས་རྣམས་མེད། །དེ་ནི་གློ་བུར་འཆི་བ་མེད། །འཚེ་བ་ཐམས་ཅད་ཟད་འགྱུར་ཞིང་། །རྨི་ལམ་ངན་ཡང་ཞི་བར་འགྱུར། །བཟང་པོ་
བསྐལ་པར་གསོན་པ་སྟེ། །སེམས་ཅན་ཐམས་ཅད་དགའ་བར་སྨྲ། །མཐོང་བ་ཙམ་གྱིས་སྐུལ་བྱེད་དོ། །སྦྱིན་བསྲེག་ལས་རྣམས་བཤད་བྱས་ནས། །ལྷ་མོ་མཆོད་པ་བསྟན་པར་བྱ། །
དྲི་དང་ཕྲེང་སོགས་གོས་རྣམས་དང་། །སྤོས་མེ་ཟས་དང་ལྷ་བཤོས་ཀྱིས། །དབང་པོ་གཉིས་ནི་རབ་འབྱོར་ནས། །བདག་ལ་མཆོད་པ་རྣམས་ནི་བྱ། །བདག་ནི་ཐམས་ཅད་སངས་རྒྱས་
ཉིད། །སངས་རྒྱས་ཀུན་གྱི་གནས་ཡིན་ཏེ། །དེ་བས་ནན་ཏན་ཐམས་ཅད་ཀྱིས། །རྣལ་འབྱོར་བས་ནི་རྟག་ཏུ་མཆོད། །གང་ཞིག་འགའ་ཡང་བྱ་བའི་ལས། །རྣལ་འབྱོར་པ་ཡིས་
མཆོད་པར་བསྒོམ། །ཟས་དང་བཏུང་བ་དེ་བཞིན་གོས། །དེ་བཞིན་དྲི་དང་ཕྲེང་ཁོང་ནས། །རིག་མ་བཞི་ཡིས་རྣམ་བརྒྱན་པའི། །བདག་ནི་ལྷ་
ཉིད་བསམ་པར་བྱ། །དེ་ལྟར་བཤད་ནས་རྡོ་རྗེ་དེ། །ཅང་མི་གསུང་བར་དངོས་པོར་བཞུགས། །དེ་ནས་ལྷ་མོ་བཞི་རྣམས་ཀྱིས། །ཕྱག་གིས་ཐལ་མོ་སྦྱར་གྱུར་ཏེ། །རབ་ཏུ་ཞལ་ནི་
རྣམ་བཞད་ནས། །རབ་ཏུ་དང་བའི་སེམས་ཀྱིས་ནི། །རྣམ་པར་མི་རྟོག་པ་ཐོབ་སྟེ། །ཅང་མི་གསུང་བར་བཞུགས་གྱུར་ཏོ། །ལྷ་མོ་བཞིས་ཡོངས་སུ་ཞུས་པ་ལས་ལྷ་མོ་སྒྲོན་མས་ཞུས་པའི་ལེའུ་སྟེ་བཞི་པའོ།། །།ཐམས་
ཅད་ཀྱི་གསང་བའི་མཆོག་དམ་པ་གསང་ཆེན་ཞེས་བྱ་བའི་རྒྱུད་ལྷ་མོ་བཞིས་ཡོངས་སུ་ཞུས་པ་དཔལ་ཨོ་ཌྱནེ་གྱི་ཡུལ་ནས་བྱུང་བ་རྣལ་འབྱོར་མ་ཆེན་མོའི་དེ་ཁོ་ན་ཉིད་རྫོགས་སྷོ།། །། རྒྱ་གར་གྱི་མཁན་པོ་སྨྲྀ་ཏི་ཛྙཱ་ན་ཀཱིར་ཏི་

88-1-315a

ཉིད་ཀྱིས་བསྒྱུར་ཅིང་ཞུས་ཏེ་བཤད་ནས་གཏན་ལ་ཕབ་པའོ། །སྟག་ལུང་རྒྱུད་འབུམ་བསྟུན་པའི་མཚལ་བ་བཀའ་འགྱུར་ལས་ཞུས་དག་གྲུབ། མངྒ་ལྃ། ། ༄༅། །རྒྱ་གར་སྐད་དུ།  ཤྲཱི་བཛྲ་ཧྲཱི་ད་
ཡ་ཨ་ལཾ་ཀཱ་ར་ཏནྟྲ་ནཱ་མ།   བོད་སྐད་དུ།  དཔལ་རྡོ་རྗེ་སྙིང་པོ་རྒྱན་གྱི་རྒྱུད་ཅེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་། 
གསུང་དང་། ཐུགས་ཀྱི་སྙིང་པོ་བུད་མེད་བཅུའི་དཀྱིལ་ན་ཆ་ཤས་ལྔ་པའི་ཚུལ་དུ་བཞུགས་སོ། །བརྗོད་དུ་མེད་པའི་ཡང་བརྗོད་དུ་མེད་པའི་འཁོར་རྡོ་རྗེ་དང་པད་མར་སྦྱོར་བ་ལ་བཞུགས་པ་འདི་ལྟ་སྟེ། དམ་ཚིག་ཡོངས་སུ་སྤྱོད་པ་ཞེས་བྱ་བའི་རྡོ་རྗེ་
མཁའ་འགྲོ་དང་། ཡེ་ཤེས་ཀྱི་ལུས་ཡོངས་སུ་འགྲུབ་པ་ཞེས་བྱ་བའི་རྡོ་རྗེ་མཁའ་འགྲོ་དང་། སྒྲ་བརྙན་ལྟ་བུའི་རྡོ་རྗེའི་གསུང་འབྱུང་བ་ཞེས་བྱ་བའི་རྡོ་རྗེ་མཁའ་འགྲོ་དང་། གཞན་གྱིས་ཤེས་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང་། རྩེ་གཅིག་
འདྲིས་པ་ཞེས་བྱ་བའི་རྡོ་རྗེ་མཁའ་འགྲོ་དང་། གཞན་ལས་འཕགས་པ་ཞེས་བྱ་བའི་རྡོ་རྗེ་མཁའ་འགྲོ་དང་། རྟེན་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང་། རླན་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང་། སྨིན་པར་བྱེད་པ་ཞེས་བྱ་བའི་རྡོ་རྗེ་
མཁའ་འགྲོ་དང་། སྐྱོད་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང་། གོ་འབྱེད་པར་བྱེད་པ་ཞེས་བྱ་བའི་རྡོ་རྗེ་མཁའ་འགྲོ་དང་། ཧ་ར་ནུ་བུར་ལ་སོགས་པས་མཛེས་པ་ཞེས་བྱ་བའི་རྡོ་རྗེ་མཁའ་འགྲོ་དང་། གཱི་ཏ་མགྲིན་ལ་སོགས་པའི་གླུ་མཁན་མ་ཞེས་
བྱ་བའི་རྡོ་རྗེ་མཁའ་འགྲོ་དང་། སྦྲུལ་གྱི་སྙིང་པོ་ལ་སོགས་པའི་དྲི་ལྡན་མ་ཞེས་བྱ་བའི་རྡོ་རྗེ་མཁའ་འགྲོ་དང་། ཚོད་མ་སྣ་ཚོགས་ཟ་བའི་རོ་ལྡན་མ་ཞེས་བྱ་བའི་རྡོ་རྗེ་མཁའ་འགྲོ་དང་། རྩེན་པ་སྣ་ཚོགས་ཀྱིས་འབྱུང་མཁན་མ་ཞེས་བྱ་བའི་
རྡོ་རྗེ་མཁའ་འགྲོ་དང་། གསུམ་རིག་པར་བྱེད་པ་དངོས་མེད་མ་ཞེས་བྱ་བའི་རྡོ་རྗེ་མཁའ་འགྲོ་མ་ལ་སོགས་པ་རི་རབ་ཀྱི་རྡུལ་དང་མཉམ་པའི་རྡོ་རྗེ་མཁའ་འགྲོ་ཐམས་ཅད་དང་། རྡོ་རྗེ་མཁའ་འགྲོ་ཆེན་མོ་ནམ་མཁའི་དབྱིངས་དང་མཉམ་པ་འདི་ལྟ་སྟེ། གཟུགྶ་

88-1-315b

མཚན་ཉིད་ཞུ་བ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་དང་། ཚོར་བའི་མཚན་ཉིད་སིམ་པ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་དང་། འདུ་ཤེས་ཀྱི་མཚན་ཉིད་ནུབ་པ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་དང་། འདུ་བྱེད་ཀྱི་མཚན་ཉིད་ལ་
རྟོག་པ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་དང་། རྣམ་པར་ཤེས་པའི་མཚན་ཉིད་བསྡུས་པ་ཞེས་བྱ་བའི་རྡོ་རྗེ་མཁའ་འགྲོ་ཆེན་པོ་ལ་སོགས་པ་ནམ་མཁའི་དབྱིངས་དང་མཉམ་པ་རྣམས་ཀྱིས་སངས་རྒྱས་ཀྱི་ཞིང་འདི་ཏིལ་གྱི་གང་བུ་ལྟ་བུར་
གང་བར་སྣང་ངོ་། །དེ་ནས་རྡོ་རྗེ་མཁའ་འགྲོ་དེ་དག་ཐམས་ཅད་གཅིག་ཏུ་འདུས་ནས་མཁའ་འགྲོ་ཆེན་པོ་རྡོ་རྗེ་འཛིན་པ་ཆེན་པོ་ལ་མཆོད་པའི་སྤྲིན་སྤྲོས་པ་དུ་མ་ཡིད་ལས་བྱུང་བ་ལྷ་དང་མིའི་མཆོད་པ་ལས་ཁྱད་པར་དུ་འཕགས་པས་མཆོད་
ནས་ཕྱག་འཚལ་ཏེ། འདི་སྐད་ཅེས་གསོལ་ཏོ། །དེ་བཞིན་གཤེགས་རྣམས་ཐམས་ཅད་ཀྱི། །གསང་གསུམ་བསྡུས་པའི་སྤྱོད་པའི་མཆོག །རྡོ་རྗེ་སྙིང་པོའི་རྒྱན་གྱི་རྒྱུད། །འདྲེན་པ་མཆོག་གིས་བཤད་དུ་
གསོལ། །དེ་ནས་རྡོ་རྗེ་ཆེན་པོས་གསོལ་བ་བཏབ་པའི་ཚིག་གསན་ནས་མཁའ་འགྲོ་ཐམས་ཅད་ལ་རྣམ་པར་བལྟས་ཏེ་ཅང་མི་གསུང་བར་བཞུགས་སོ། །དེ་ནས་བྱང་ཆུབ་སེམས་དཔའི་རྡོ་རྗེ་མཁའ་འགྲོ་དེ་དག་
ཐམས་ཅད་ཀྱིས་ཀྱང་། འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་གི་ཡོན་ཏན་ཁྱད་པར་དུ་འཕགས་པའི་རྡོ་རྗེ་མཁའ་འགྲོ་ཆེན་པོ་ལ་སོགས་པའི་
འཁོར་དུ་འཆད་དུ་མི་བཞེད་པ་དེ་བདག་ཅག་ལ་མི་དགྱེས་སུ་མ་མཛད་

88-1-316a

ཅིག །དེ་ནས་དེ་བཞིན་གཤེགས་པའི་བདག་པོ་རྡོ་རྗེ་འཛིན་པ་ཆེན་པོས་འཁོར་གྱི་དཀྱིལ་འཁོར་ལ་རྣམ་པར་བལྟས་ཏེ་ཚིགས་སུ་བཅད་པ་གསུངས་པ། སེམས་དཔའ་ཆེན་པོས་ཞུས་པ་ལེགས། །ས་འོག་
མ་ཡི་སངས་རྒྱས་ཀྱང་། །འདི་ཡི་གཞུང་གིས་སེམས་རྨོངས་ན། །སེམས་དཔའ་གཞན་ནི་སྨོས་ཅི་དགོས། །སངས་རྒྱས་ཆོས་ཉིད་དག་པ་འདི། །བྱིས་པ་རྣམས་ཀྱིས་མི་རྟོགས་ཕྱིར། །བྱིན་གྱིས་བརླབས་ནས་འཆད་པ་ནི། །སྟོན་
པ་རྣམས་ཀྱི་ཆོས་ཉིད་དོ། །དེ་ནས་རྡོ་རྗེ་མཁའ་འགྲོ་དེ་དག་ཐམས་ཅད་རབ་ཏུ་དགའ་ནས་ཡང་མཆོད་པའི་ཚོགས་ཀྱིས་མཆོད་དེ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ལེགས་སོ་ལེགས་སོ། །དེ་བཞིན་
གཤེགས་པ་ཐམས་ཅད་ཀྱི་དབང་ཕྱུག་གིས་བདག་གིས་བདག་ཅག་བྱིན་གྱིས་བརླབ་པ་མཛད་དུ་གསོལ། དེ་བཞིན་གཤེགས་པ་ཐམས་ཅད་ཀྱི་གསང་བ་ཐུན་མོང་མ་ཡིན་པ་བསྟན་ཅིང་རྣམ་པ་ཐམས་ཅད་ཀྱི་དབང་ཕྱུག་གིས་
བདག་ཅག་བྱིན་གྱིས་བརླབ་པར་མཛད་དུ་གསོལ། དེ་ནས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་གིས་རྡོ་རྗེ་མཁའ་འགྲོ་དེ་དག་གིས་གསོལ་བ་བཏབ་པ་མཁྱེན་ནས་སེམས་དཔའ་ཐམས་ཅད་བྱིན་གྱིས་རློབ་པ་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་བསྡུས་པ་ཞེས་བྱ་བའི་སྙིང་པོ་འདི་རང་གི་ཐུགས་ལས་ཕྱུང་ངོ་། །ཨོཾ་ཨཱཿཧཱུྃ་ས་མ་ཡ་བཛྲ། 
དེ་ནས་ཕྱུང་མ་ཐག་ཏུ་དེའི་འོད་ཟེར་གྱིས་རྡོ་རྗེ་མཁའ་འགྲོའི་འཁོར་དེ་དག་ཐམས་ཅད་བསྡུས་ནས་རང་གི་སྙིང་གར་བཙུད་ནས་བུད་མེད་ཀྱི་དཀྱིལ་ན་ཐམས་ཅད་བརྒྱལ་བ་ལྟར་གནས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་དབང་
ཕྱུག་གིས་དེ་བསླང་བའི་ཕྱིར་མཁའ་འགྲོ་ཐམས་ཅད་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་དེ་དག་དྲན་པ་སླར་ཐོབ་ཅིང་ཇི་ལྟ་བ་བཞིན་དུ་གནས་སོ། །དེ་ནས་དེ་བཞིན་གཤེགས་

88-1-316b

པ་ཐམས་ཅད་ཀྱི་དབང་ཕྱུག་གིས་འཁོར་ལོ་རྣམ་པར་དགོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། སྙོམས་པར་ཞུགས་མ་ཐག་ཏུ་རྡོ་རྗེ་མཁའ་འགྲོ་དེ་དག་ཐམས་ཅད་རང་རང་གི་གནས་ཇི་ལྟ་བ་བཞིན་དུ་འཁོད་པར་
གྱུར་ཏོ། །དེའི་ཚེ་བཅོམ་ལྡན་འདས་རྡོ་རྗེ་འཛིན་པ་ཆེན་པོའི་བྱིན་གྱིས་བརླབས་ཀྱིས་ནམ་མཁའི་དབྱིངས་ན་གནས་པ་ཇི་སྙེད་པ་དེ་དག་ཐམས་ཅད་ཀྱང་བདེ་བ་དང་ཡིད་བདེ་བ་མྱོང་བར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་
ཐམས་ཅད་ཀྱི་དབང་ཕྱུག་གིས་རྡོ་རྗེ་སྙིང་པོ་རྒྱན་གྱི་རྒྱུད་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སེམས་ཅན་གྱི་ཁམས་ཐམས་ཅད་མཉམ་པ་ཉིད་དུ་དམིགས་ཏེ། དབུགས་རྔུབ་པར་མི་མཛད། དབྱུང་བར་མི་མཛད། 
ལུས་འགྱུར་བར་ཡང་མི་མཛད། ལུས་གནས་པར་ཡང་མི་མཛད། དུས་གསུམ་གྱི་དེ་བཞིན་གཤེགས་པ་ཐམས་ཅད་ལ་མི་གཟིགས་མི་དགོངས་ཉེ་བར་མི་འཇིག་གོ། ཐབས་དང་ཤེས་རབ་སྟོང་པར་ཡང་མི་མཛད། ཤིན་དུ་འགལ་
བ་ཅན་ཡང་དག་པར་འཛུད་པར་མི་མཛད། མཐོ་རིས་ལ་ཡང་མི་འཇོག །མ་དད་པ་རྣམས་དད་པར་ཡང་མི་མཛད། མ་དུལ་བ་རྣམས་དུལ་བར་ཡང་མི་མཛད། ཉེ་བར་འཚེ་བ་ཞི་བར་ཡང་མི་མཛད། མ་འགགས་པ་རྣམས་འགག་པར་ཡང་
མི་མཛད། མ་བསྐུལ་བ་རྣམས་བསྐུལ་བར་ཡང་མི་མཛད། མ་རྒྱས་པ་རྣམས་རྒྱས་པར་ཡང་མི་མཛད། རྣམ་པར་རྨོངས་པ་རྣམས་རྨོངས་པ་སེལ་བར་ཡང་མི་མཛད། དགའ་བར་གྱུར་པ་རྣམས་མི་དགའ་བར་ཡང་མི་མཛད། མི་དགའ་
རྣམས་དགའ་བར་ཡང་མི་མཛད། མ་ཁྲོས་པ་རྣམས་ཁྲོས་པར་ཡང་མི་མཛད། མི་སྡུག་པ་རྣམས་སྡུག་པར་ཡང་མི་མཛད། དྲག་པོ་མ་རུངས་པ་ཆེན་པོ་དང་། གཏུམ་པོ་ཆེན་པོ་དང་། ལྷ་དང་ལྷ་མ་ཡིན་དང་ལོག་འདྲེན་དང་གདུག་པ་ཆེན་པོ་
དང་ཡི་དགས་དང་ཤ་ཟ་དང་གནོད་སྦྱིན་དང་སྲིན་པོ་དང་ཤིན་དུ་གདུག་པའི་དུག་ཆེན་པོ་དང་ཚ་བའི་གདོན་དང་ནད་དང་སྦྲུལ་དང་སེམས་ཅན་ཐམས་ཅད་ལ་འཚེ་བར་བྱེད་པ་རྣམས་ཉེ་བར་ཞི་བར་ཡང་མི་མཛད་དོ། །རྣམ་པར་དུལ་བར་ཡང་

88-1-317a

མི་མཛད་དོ། །དེ་ནས་བཅོམ་ལྡན་འདས་ཏིང་ངེ་འཛིན་དེ་ལས་བཞེངས་ཏེ་བརྗིད་པ་དང་བཅས་པར་གར་མཛད་ཅིང་ཞལ་འཛུམ་པ་དང་འདོར་བ་དང་བསྐུམ་པ་དང་། འགྱེད་པ་དང་སྤྱན་མཛེས་པས་སྨིན་རིངས་བསྐྱོད་ཅིང་བསྒྱུར་བ་
དང་། པད་མའི་ཕྱག་གི་སོར་མོ་གཡས་གཡོན་གར་གྱི་ཕྲེང་བའི་ཚུལ་གྱིས་སའི་ངོས་ལ་ཞབས་འཕེན་ཞིང་སྒྱུར་བ་དང་། འདོར་ཞིང་བསྐུལ་བ་དང་འཇོག་ཅིང་འདེགས་པའི་རྣམ་པར་གནོན་པས་ནམ་མཁའི་དབྱིངས་འདི་ཐམས་ཅད་ཀུན་
དུ་ཁྱབ་པར་མཛད་དེ། རླུང་གི་ཁམས་ཆེན་པོར་ཀུན་དུ་ཁྱབ་པར་མཛད། དེ་ལ་ཁྱབ་ནས་མེའི་ཁམས་ཆེན་པོར་ཀུན་དུ་ཁྱབ་པར་མཛད་དེ། དེ་ནས་ཆུའི་ཁམས་ཆེན་པོར་ཀུན་དུ་ཁྱབ་པར་མཛད། དེ་ནས་སའི་ཁམས་ཆེན་པོར་ཀུན་དུ་ཁྱབ་
པར་མཛད་དོ། །དེ་ཡང་ཀུན་དུ་ཁྱབ་ནས་བཅོམ་ལྡན་འདས་བྱང་ཆུབ་ཀྱི་སེམས་ལ་ཀུན་དུ་ཁྱབ་པར་མཛད་དོ། །རི་དང་སེམས་ཅན་ཐམས་ཅད་དང་། །སྣ་ཚོགས་ཕྲ་བ་སྦོམ་པོ་དང་། །བུད་མེད་གཞོན་ནུ་རྒན་པོ་དང་། །སྐྱེས་པ་དང་ནི་
མ་ནིང་དང་། །ལྷ་དང་ཀླུ་དང་གནོད་སྦྱིན་དང་། །གདོན་དང་སྐར་མ་གཤིན་རྗེ་དང་། །ཆུ་བདག་བརྒྱ་བྱིན་ལ་སོགས་དང་། །འབྱུང་དང་འབྱུང་འགྱུར་ཐམས་ཅད་ལ། །བཅོམ་ལྡན་འདས་ནི་བདེ་ཆེན་པོ། །ཀུན་དུ་བཟང་པོ་རྡོ་རྗེ་འཛིན། །ཀུན་དུ་
ཁྱབ་པར་བྱས་ཏེ་གནས། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རྡོ་རྗེ་མཁའ་འགྲོ་བྱིན་གྱིས་བརློབ་པའི་ལེའུ་སྟེ་དང་པོའོ།། །། དེ་ནས་གཞན་ཡང་བཤད་བྱ་བ། །ལས་ཀྱི་མཆོག་རྣམས་འགྲུབ་བྱེད་པའི། །
གསང་སྔགས་རྣམས་ནི་བཤད་པར་བྱ། །རྩེ་གཅིག་སེམས་ཀྱིས་མཉན་པར་བྱའོ། །ཨོཾ་ཨ་ཀཱ་རོ་མུ་ཁྃ་སརྦ་དྷརྨཱ་ཎཱྃ་ཨཱདྱཱ་ནུཏྤནྣ་ཏྭཱ་ཊ། གཏོར་མའི་སྔགས་སོ། །ཨ་ཨཱ། ཨཱི་ཨི། ཨཱུ་ཨུ། ཨེ་ཨཻ། ཨོ་ཨཽ། 
ཨྃ་ཨཿ བུད་མེད་དོ། །རཱི་རི། ལཱི་ལི། མ་ནིང་ངོ་། །ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། སྐྱེས་པའི་འོ། །ཡ་ར་ལ་ཝ་འབྱུང་བའི་འོ། །ཥ་ཤ་ས་ཧ། འཇིགས་པ་ལ་སོགས་པའོ། 

88-1-317b

ཀྴཿཆོས་ཀྱི་དབྱིངས་ཀྱིས་ས་བོན་ནོ། །བཛྲ་དྷྲཱིག་ཧཱུྃ། ཛཱི་ན་ཛཱི་ག་བྷཱུྃ་། རཏྣ་དྷྲཱིག་ཨྃ། ཨཱ་རོ་ལིཀ་ཛྲཱིཾ།  པྲཛྙཱ་དྷྲཱིག་ཁྃ། མཁའ་འགྲོ་ཆེན་པོ་ལྔའི་འོ། །དྭེ་ཥ་ར་ཏི་མཱྃ། མོ་ཧ་ར་ཏི་ལཱྃ། རཱ་གར་ཏི་བཱྃ། བཛྲ་རཱ་ཏེ་ཏཱྃ། རྡོ་རྗེ་མཁའ་འགྲོ་བརྟེན་པར་
བྱེད་པ་ལ་སོགས་པའི་འོ། །ཀྵི་ཏི་གརྦྷ་ཀྴི། བཛྲ་པཱ་ཎི་ཛྲིྃ། ག་གན་གརྦྷཱ་ཁྃ། ལོ་ཀི་ཤྭ་ར་གྃ ནི་བ་ར་ཎ་བིཥྐམྦི་ན་ཀྃ། ས་མནྟ་བྷ་དྲ་སྃ། རྡོ་རྗེ་མཁའ་འགྲོ་དམ་ཚིག་སྤྱོད་པ་ལ་སོགས་པའིའོ། །རཱུ་པ་བཛྲ་ཛཿ ཤབྡ་བཛྲ་
ཧཱུྃ། གེནྡྷ་བཛྲ་བྃ། ར་ས་བཛྲ་ཧོཿ། སྤཪྴ་བཛྲ་ཁེ། དྷརྨ་དྷཱ་ཏུ་བཛྲ་རམ། རྡོ་རྗེ་མཁའ་འགྲོ་མཛེས་པར་བྱེད་པ་ལ་སོགས་པའིའོ། །ཡ་མཱནྟ་ཀྲིཏ། བཛྲ་པྲཛྙཱནྟ་ཀྲིཏ། པད་མཱནྟ་ཀྲིཏ། བིགྷནྟ་ཀྲིཏ། ཊྲཀྐི་རཱ་ཛ། ནཱི་ལ་དནྡྲ། མ་ཧཱ་བ་ལ། 
ཨ་ཙ་ལེ་ཀ་ཎ་ཧཱུྃ། སུྃ་བྷ་ཧཱུྃ། ཙཀྲ་བརྟིན་ནི་ཧཱུྃ་བྷྲཱུྃ། རྡོ་རྗེ་མཁའ་འགྲོ་གཤིན་རྗེའི་གཤེད་ལ་སོགས་པའིའོ། །ཝ་རི་ཛི་ན་བྷྲཱུྃ། ཏེ་ཛོ་སྐནྷ་བྷྲཱུྃ། མནྟྲ་ཙཀྲ་བྷྲཱུྃ། བར་དྷ་ན་བྷྲཱུྃ། བི་ས་ར་ཎ་བྷྲཱུྃ། བར་ཇ་ན་བྷྲཱུྃ། ཀ་རོ་བྷ་བ་བྷྲཱུྃ། 
རྡོ་རྗེ་མཁའ་འགྲོ་གཙུག་ཏོར་རྒྱལ་བ་ལ་སོགས་པའིའོ། །ཧཱུྃ་ཧྲིཿཁ་རྡོ་རྗེ་མཁའ་འགྲོའིའོ། །ཨོཾ་མེ་དི་ནེ་བཛྲི་བྷ་བ་བཛྲ་བྷ་བ་ནན་ཧཱུྃ། སའི་འོ། །ཨོཾ་བཛྲ་པྲ་ཀཱ་ར་ཎ་ཧཱུྃ་བྃ་ཧཱུྃ། ར་བའིའོ། །ཨོཾ་བཛྲ་པཉྫ་ར་ཧཱུྃ་ཡྃ་ཧཱུྃ། 
དྲ་བའི་འོ། །ཨོཾ་བཛྲ་བི་ཏཱ་ན་ཧཱུྃ་ཁྃ་ཧཱུྃ། གུར་གྱིའོ། །ཨོཾ་བཛྲ་ཤ་ར་ཛ་ལ་ཏྲཱྃ་སྃ་ཏྲཱྃ། མདའིའོ། །ཨོཾ་བཛྲ་ཛྭཱ་ལཱ་ན་ལཱ་ཀ་ཧཱུྃ་ཧཱུྃ་ཧཱུྃ། འོད་ཀྱིའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྟོང་པ་ཉིད་ཀྱི་སྔགས་སོ། །ཨོཾ་དྷརྨ་
དྷཱ་ཏུ་སྭ་བྷཱ་བ་ཨཱཊྨ་ཀོ྅ཧྃ། ཆོས་ཀྱི་དབྱིངས་ཀྱི་སྔགས་སོ། །ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཀྩིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧྃ། སྐུ་ལ་སོགས་པ་བྱིན་གྱིས་བརླབས་པའིའོ། །བཛྲ་ས་མ་ཡ་སཱུ་ཏྲྃ་མཱ་ཏི་ཀྲ་མ་ཧཱུྃ། ཐིག་གདབ་པའོ། །
བཛྲ་ཙི་ཏྲ་ས་མ་ཡ་ཧཱུྃ། ཚོན་དགྱེ་བའིའོ། །ཧཱུྃ་ཧ་ཨཱ་ཛྷེེ།  དབབ་པའིའོ། །བཛྲ་ཀཱི་ལ་ཡ་མུངྒ་ར་ཨཱ་ཀོ་ཊ་ཡ་ཧཱུྃ་ཕཊ། ཕུར་བུས་བརྡུང་བའིའོ། །དེ་ལ་སོགས་པའི་མཐའ་ཡས་པ། །འཇིག་རྟེན་གསུམ་དུ་

88-1-318a

རྙེད་དཀའ་བའི། །སྔགས་ཀྱི་ཚོགས་རྣམས་ཇི་སྙེད་པ། །དེ་ཀུན་སྔོན་དུ་རྒྱས་པ་རུ། །གསང་བ་དང་ནི་འཇིགས་བྱེད་དང་། །བདེ་མཆོག་སོགས་ལ་ང་ཡིས་ནི། །ལས་དང་བཅས་པར་རབ་བཤད་པ། །རྣལ་འབྱོར་རྟོགས་
པས་ཤེས་བྱའོ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་སྔགས་ཀྱི་ལེའུ་སྟེ་གཉིས་པའོ།། །།   དེ་ནས་མཁའ་འགྲོ་གྲོང་ཁྱེར་མཆོག །དཀྱིལ་འཁོར་འཇིགས་པ་བྲི་
བར་བྱ། །ལས་ཀྱི་ཆོ་ག་ཤེས་པ་ཡིས། །ཅི་རིགས་པར་ནི་ལས་རྣམས་བྱ། །ཉི་ཤུ་རྩ་ལྔའི་སྲུང་བུ་ནི། །སེམས་མེད་ལས་བྱུང་བྱས་ནས་སུ། །བྱིན་རླབས་མི་བསྐྱོད་རྟག་པ་རུ། །བྱས་ཏེ་ཐིག་ནི་གདབ་པའོ། །གྲུ་བཞི་པ་
ལ་སྒོ་བཞི་པ། །ཏྭ་ར་ཎ་བཞིས་བརྒྱན་པ་སྟེ། །དར་དང་མེ་ཏོག་ཕྲེང་བས་ཀླུབས། །སྲད་བུ་བཞི་དང་རབ་ལྡན་པ། །ཟུར་གྱི་ཆ་ནི་ཐམས་ཅད་དུ། །ཟླ་བ་རིན་ཆེན་རྡོ་རྗེ་དགོད། །ལས་ཀྱི་བྱེ་བྲག་ཤེས་པ་ཡིས། །བློ་དང་ལྡན་པས་ཕྱག་
རྒྱ་དགོད། །ཨིནྡྲ་ནཱི་ལ་ལྟ་བུ་ཡི། །འཇིགས་བྱེད་རྡོ་རྗེ་དབུས་སུ་བྲི། །ཤར་དུ་རྩིབས་བརྒྱད་འཁོར་ལོ་དཀར། །ལྷོ་རུ་རིན་ཆེན་ཟུར་དགུ་ལྗང་། །ནུབ་ཏུ་འདབ་བརྒྱད་པད་མ་དམར། །བྱང་དུ་རལ་གྲི་སྔོན་པོ་བྲི། །མེ་ཡི་མཚམས་
སུ་འཁོར་ལོ་སྔོན། །བདེན་བྲལ་ཨུཏྤལ་དམར་པོ་དང་། །རླུང་གི་མཚམས་སུ་པད་མ་དམར། །དབང་ལྡན་ཨུཏྤལ་སེར་པོ་སྟེ། །རྡོ་རྗེ་ཐོ་བ་ཤར་གྱི་སྒོ། །ལྷོ་ཡི་སྒོ་རུ་རྡོ་རྗེ་དབྱུག །པད་མའི་སྡོང་བུ་ནུབ་ཀྱི་སྒོ། །བྱང་སྒོ་རྡོ་རྗེ་ཁ་
བྱེ་བ། །སྦྱོར་བ་ལྡན་པས་དགོད་པར་བྱ། །རྣམ་པ་ཉི་ཤུ་རྩ་ལྔར་ནི། །ཚོན་རྩི་དག་ཀྱང་བསྒོམ་བྱ་སྟེ། །རྡུལ་ཚོན་ལྔ་ལ་སོགས་པ་རྣམས། །རིམ་པ་བཞིན་དུ་གདབ་པར་བྱ། །དེ་ནས་བུམ་པ་གཟུང་བྱ་བ། །རྩ་བ་ནག་ནོག་མེད་པ་
ཡི། །ཞབས་བརྟན་མགྲིན་རིང་མཆུ་འཕྱང་བ། །ལྷ་ཡི་གྲངས་ཙམ་སྟ་གོན་གནས། །མགུལ་པར་རས་ཀྱིས་ཡང་དག་དཀྲིས། །ལྡུམ་བུ་ཡིས་ནི་ཁ་མཛེས་པ། །རིན་ཆེན་སྨན་འབྲུ་སྣ་ལྔ་དང་། །སྤོས་ཆུ་ཡིས་ནི་རབ་བཀང་ནས། །བུམ་

88-1-318b

པ་མངོན་པར་བསྔགས་པར་བྱ། །རྣམ་རྒྱལ་བུམ་པ་དཀྱིལ་འཁོར་གྱི། །བདག་པོ་ལྷ་མོ་རྣམས་ཀྱི་བཞི། །ལྷ་རྣམས་ཀྱི་ནི་བུམ་པ་བཞི། །སྒོ་ཡི་ཕྱོགས་ཀྱི་བུམ་པ་ནི། །ལས་ཀུན་བྱེད་པས་བཟླས་བྱས་ཏེ། །ཀུ་ཤའི་ཆུན་པོས་སེམས་
ཅན་ཆེ། །འཇུག་པ་ཀུན་ལ་གཏོར་བར་བྱ། །ཡོན་དང་གཏོར་མ་མཆོད་ཕུལ་ནས། །དེ་དག་ཕྱི་གྲྭར་རབ་བཀོད་དེ། །གཡས་སུ་རྒྱལ་བ་སྤྱན་དྲང་ངོ་། །དེ་ནས་ལྷ་རྣམས་རབ་གནས་པའི། །བསམ་པའི་སྦྱོར་བས་བསམ་བྱ་སྟེ། །ཕྱག་རྒྱ་
བྲལ་བའི་སྦྱོར་བ་ནི། །ལུས་ཅན་བྱིན་གྱིས་མི་རློབ་པས། །བུ་མོ་གཟུགས་བཟང་ལང་ཚོས་བརྒྱན། །དབང་ཐོབ་ལུས་རྒྱས་ཐོབ་པ་མོ། །གཡོན་མ་རྒྱན་གྱིས་རབ་བརྒྱན་ཏེ། །དེ་ཡིས་འཁོར་ལོ་སྤྲུལ་པར་བྱ། །དེ་ལ་མར་མེ་བརྒྱ་
སོགས་པའི། །མཆོད་པ་ཕུལ་ནས་བསྟོད་བྱ་སྟེ། །བཤང་གཅི་ཁུ་བ་ཁྲག་རྣམས་ནི། །དུང་ཆེན་པོ་རུ་བཞག་བྱས་ཏེ། །ལྷ་རྣམས་ལ་ནི་དབུལ་བར་བྱ། །དེ་ནས་མཁའ་འགྲོ་གྲོང་མཆོག་ཏུ། །སློབ་མ་རྣམས་ནི་གཞུག་བྱ་སྟེ། །རྡོ་རྗེ་
ཡེ་ཤེས་རབ་ཐོབ་པའི། །དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་དཀྱིལ་འཁོར་དམ་པ་འདིར། །བདག་གིས་སློབ་མ་གཞུག་པར་བྱ། །དེ་ནས་སློབ་མ་དེ་ཡིས་ཀྱང་། །མེ་ཏོག་སྔགས་འདིས་གཏོར་བའོ། །ཨོཾ་པྲ་ཏཱེཙྪ་
བཛྲ་ཧོཿ །དེ་ནས་ཚིག་འདིས་གདོང་གཡོགས་དགྲོལ། །དེ་རིང་དད་པའི་ཤུགས་ཀྱིས་ནི། །དཀྱིལ་འཁོར་དེང་འདིར་བལྟ་བར་བྱ། །སངས་རྒྱས་རིགས་སུ་ཁྱོད་སྐྱེས་སོ། །སྔགས་དང་ཕྱག་རྒྱས་ཁྱོད་བྱིན་བརླབ། །དངོས་གྲུབ་ཐམས་
ཅད་ཕུན་སུམ་ཚོགས། །དམ་ཚིག་མཆོག་ཏུ་འགྲུབ་པར་བྱེད། །རྡོ་རྗེ་པད་མོ་རོལ་པའི་མཆོག །སྔགས་ཀྱི་བདག་ཉིད་ཤེས་པར་བྱ། །པཱ་ཤ་བཛྲ། གང་དག་མེ་ཏོག་གསང་བ་སྟེ། །དེ་དེ་དེ་ཡི་ལྷ་ཡང་དག །དེ་ཡི་སྦྱོར་བ་རབ་སྦྱིན་ཏེ། །
དེ་ཡི་ནན་ཏན་དུ་བསྒྲུབ་བོ། །དུང་ཆེན་བདུད་རྩི་ལྔ་བླུད་དེ། །དམྱལ་བའི་ཆུ་འདིས་ཁྱོད་ལ་ནི། །དམ་ཚིག་འདས་ན་བསྲེག་པར་བྱེད། །དམ་ཚིག་བསྲུངས་ན་དངོས་གྲུབ་པའི། །འཐུང་ཤིག་རྡོ་རྗེ་བདུད་རྩི་ཆུ། །བཛྲ་ཨུདྐ་ཐ། དེ་ནས་

88-1-319a

སངས་རྒྱས་ཐམས་ཅད་ཀྱི། །དམ་ཚིག་དང་ནི་སྡོམ་པ་རྣམས། །བླ་མས་སློབ་མ་སྡིག་བྲལ་ལ། །ཅི་ལྟ་བ་བཞིན་བསྒྲགས་པར་བྱ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རི་མོའི་དཀྱིལ་འཁོར་གྱི་ལེའུ་སྟེ་གསུམ་
པའོ།། །།  དེ་ནས་གཞན་ཡང་བཤད་བྱ་བ། །དབང་བསྐུར་བ་ཡི་ཆོ་གའི་མཆོག །གང་གིས་ལེགས་པར་བྱེད་འགྱུར་ན། །དེ་ནི་སངས་རྒྱས་ཉིད་དུ་
འགྲུབ། །སློབ་དཔོན་མཚན་ཉིད་ཐམས་ཅད་ལྡན། །ཡང་དག་ཤེས་ཤིང་རྒྱུད་ཤེས་པ། །དེ་ཉིད་བཅུ་ལ་སོགས་པ་ཡི། །གསང་རིག་ཆོ་ག་ཤེས་པ་པོས། །བསྒྲིམས་ཏེ་སློབ་མ་ཡང་དག་གཟུང་། །བླ་མ་ལ་གུས་དད་པའོ། །
དགེ་བསྒོམ་ལྷ་རྣམས་མཆོད་བྱེད་པ། །གཏོང་ཕོད་ཡོན་ཏན་ལྡན་པའོ། །དེ་ནས་སློབ་མ་དེ་ཡིས་ཀྱང་། །ལངས་ཏེ་ཞབས་ལ་མགོས་གཏུགས་ནས། །རྒྱལ་པོ་དབང་ཕྱུག་བདེ་དམ་པ། །གོས་དང་རྒྱན་གྱིས་ལེགས་པར་བགོས། །
སྟེང་དུ་བླ་རེ་བྲེ་བར་བྱ། །གདུགས་དང་རྒྱལ་མཚན་བ་དན་དང་། །ལྷམ་དང་ཚངས་པའི་སྐུད་པ་དང་། །གདུ་བུ་དག་དང་སྐ་རགས་དང་། །བཀྲ་ཤིས་ཚིགས་བཅད་སྣ་ཚོགས་ཀྱིས། །སློབ་མ་སྡིག་དང་བྲལ་བ་ལ། །སློབ་དཔོན་
གྱིས་ནི་དབང་བསྐུར་རོ། །དང་པོ་རྣམ་རྒྱལ་བུམ་པ་དང་། །དེ་ནས་ལྷ་མོ་བཞི་རྣམས་དང་། །ལྷ་རྣམས་ཀུན་གྱི་བཞི་པོ་ཡིས། །བཀྲ་ཤིས་ཚིགས་བཅད་གླུ་སྒྲ་དང་། །རྡོ་རྗེ་དྲིལ་བུ་བསིལ་བ་ཡིས། །སྐྱོབ་པའི་དཀྱིལ་འཁོར་
མངོན་སུམ་དུ། །ཏིལ་གྱི་གང་བུ་བཞིན་གང་བའི། །རྒྱལ་བས་བུམ་པ་བཟུང་ནས་ནི། །དེ་ཉིད་ལ་ནི་དབང་བསྐུར་བར། །དཀྱིལ་འཁོར་དེ་ཉིད་རིག་པར་བསམ། །དེ་ལྟ་བུ་ནི་བསམ་ནས་ཀྱང་། །ཆོས་ཀྱི་མཚན་ཉིད་བསྟན་
པར་བྱ། །དེ་ནས་ཡིད་འོང་བུ་མོ་ནི། །ལེགས་པར་གོམས་པ་དབང་ཐོབ་པ། །རྒྱན་གྱིས་རབ་བརྒྱན་རབ་མཛེས་པ། །བཙལ་ཏེ་བླ་མ་ལ་ཕུལ་ནས། །དེ་ནས་རྒྱལ་དབང་སློབ་མ་དེ། །ནང་གི་སྦས་པ་བཏུས་པ་ཡི། །གསང་

88-1-319b

བ་མཉམ་པར་འཇུག་པ་ཡི། །སྦྱོར་དང་ལྡན་པས་དབང་བསྐུར་བྱ། །རྡོ་རྗེ་པད་མོ་ལས་དྲང་བ། །སྦོམ་པོ་མཐའ་ལྟག་རྩེ་སྦྱར་ནས། །རྐན་དུ་རྡོ་རྗེ་བཞག་པར་བྱ། །ཀྱེ་མའོ་བདེ་བ་བདེ་བ་ཆེ། །ཀྱེ་མའོ་དམ་ཚིག་བདེ་བརྗོད་ཅིང་། །
ཀྱེ་མའོ་བདེ་བ་བླང་བར་བྱའོ། །འདི་ནི་གསང་བ་ཞེས་བྱ་བའི། །དེ་དབང་བསྐུར་བའི་ཐབས་མཆོག་གོ། ཡང་ན་ཤིན་དུ་དད་ལྡན་པ། །གཟུགས་བཟང་སྒྲུབ་ལ་དགའ་བ་དང་། །སྦྱོར་གོམས་བླ་མ་ལ་ནི་དབུལ། །བླ་མས་
བྱིན་བརླབས་ལྷ་མོ་དང་། །སྒྲུབ་པ་དེ་ལ་སྦྱིན་པར་བྱ། །དེ་ཡིས་བླངས་ནས་བརྩོན་པའི་ཚོགས། །ཅི་སྐད་གསུངས་བཞིན་རབ་བྱས་ནས། །རང་གི་ལྷ་དང་སངས་རྒྱས་དང་། །བྱང་ཆུབ་སེམས་དཔའི་ཚོགས་རྣམས་ཀུན། །
མཉེས་བྱེད་ཆོ་གས་སེམས་བརྟགས་ཏེ། །མངོན་སུམ་བདེ་བ་རང་འབྱུང་བ། །གཞན་གྱིས་གང་དུ་བསྒྲག་མི་ནུས། །གོ་བའི་ཡུལ་དེ་བདེ་བ་ཆེ། །བླ་མ་དེ་ལ་དབུལ་བར་བྱ། །བླ་མ་གཞན་ལ་དེ་བཞིན་དུ། །ཅི་དགའ་བར་ནི་
ཡོན་ཡང་དབུལ། །སློབ་དཔོན་ཅུང་ཟད་ཅི་འདོད་པ། །ཡིད་ལ་བསམས་པ་དབུལ་བར་བྱ། །དམ་ཚིག་འདའ་བས་འཇིགས་པའི་ཕྱིར། །བསྒྲིམས་ཏེ་དེ་བཞིན་དབུལ་བར་བྱ། །སློབ་དཔོན་གྱི་ནི་ཡུལ་གྱི་མཆོག །རིགས་
ཀྱི་ཁྱད་པར་གྱིས་ནི་ལྔ། །བུམ་པའི་དབང་སོགས་དབྱེ་བ་ཡིས། །ཡང་ན་གསུམ་དུ་འགྱུར་བ་ཡིན། །རང་གི་མ་དང་སེང་གེ་གདན། །ཡོན་གྱི་མཆོག་སྟེ་སངས་རྒྱས་རིགས། །གསེར་དང་གླང་པོ་རིན་ཆེན་དང་། །སྲིང་མོ་བླ་
མ་ལ་དབུལ་བ། །རྡོ་རྗེ་སེམས་དཔའི་རིགས་ཡིན་ཏེ། །ཡོན་དེ་ཡོན་གྱི་མཆོག་ཡིན་ནོ། །ཤིང་རྟ་རྟ་ནི་ཤིན་དུ་བརྒྱན། །རང་གི་ཆུང་མ་དབུལ་བྱ་སྟེ། །རིན་ཆེན་སྣ་ཚོགས་རྣམ་དག་པ། །ཡོན་དེ་རིན་པོ་ཆེ་ཡི་རིགས། །
མུ་ཏིག་ཕྲེང་བ་ཤིན་དུ་མཛེས། །བུ་མོ་རིན་ཆེན་འདྲ་བ་ཡིས། །བརྒྱན་ཏེ་བླ་མ་ལ་དབུལ་བ། །ཡོན་དེ་པད་མའི་རིགས་ཡིན་ནོ། །རྒྱལ་པོ་དང་ནི་དབང་ཕྱུག་དང་། །ཆུང་མ་འཕྲུལ་གྱི་བཞོན་པ་སོགས། །གླང་པོ་རྟ་ནི་ཤིན་

88-1-320a

དུ་བརྒྱན། །དེ་བཞིན་གཤེགས་པ་ཀུན་གྱི་རྗེ། །ནན་ཏན་བླ་མ་དབུལ་བྱ་བ། །སྣ་ཚོགས་རྡོ་རྗེའི་རིགས་ཡིན་ནོ། །དེ་རྣམས་བཞི་དང་འགྱུར་བ་དང་། །མི་འགྱུར་བ་ཡི་བྱེ་བྲག་གིས། །གསུམ་དུ་ཤེས་བྱ་བླ་
མ་ལ། །བློ་ལྡན་རྡོ་རྗེ་སློབ་མ་ཡིས། །ཅི་སྟེ་བདེ་བ་ཀུན་འདོད་ན། །དད་མོས་སེམས་ཀྱིས་དབུལ་བར་བྱ། །ཡིད་ལ་གང་བསམས་མ་ཕུལ་ལམ། །ཁས་བླངས་དེ་ནི་མ་ཕུལ་ན། །ཡི་དགས་དམྱལ་བ་རྣམ་གཉིས་སུ། །
ངེས་པར་སྐྱེས་ཏེ་བརླག་པར་འགྱུར། །དེ་བས་དེ་རྣམས་རབ་ཕུལ་ནས། །གསོལ་བ་དག་ནི་རབ་ཏུ་གདབ། །རྡོ་རྗེ་དཀྱིལ་འཁོར་ཆེན་པོ་ཡི། །དཀྱིལ་འཁོར་དུ་ནི་བདག་ཞུགས་སོ། །སྦྱོར་བའི་དཀྱིལ་འཁོར་ཆེན་པོ་ཡི། །དཀྱིལ་འཁོར་
དུ་ནི་བདག་ཞུགས་སོ། །སྦྱོར་བའི་དཀྱིལ་འཁོར་ཆེན་པོ་ཡི། །དཀྱིལ་འཁོར་བདག་གིས་དི་རིང་མཐོང་། །གསང་བའི་དཀྱིལ་འཁོར་ཆེན་པོ་ཡི། །དཀྱིལ་འཁོར་དུ་ནི་བདག་དབང་བསྐུར། །དེ་ནས་བླ་མ་དེ་ཡིས་ཀྱང་། །དེ་ལ་དབང་
བསྐུར་སྦྱིན་བྱ་སྟེ། །དྲི་དང་མེ་ཏོག་ཕྲེང་བས་བརྒྱན། །བསྒྲིམས་ཏེ་ཡང་དག་བརྟག་པར་བྱ། །དང་པོ་ལ་ནི་བུམ་པའི་དབང་། །གཉིས་པ་ལ་ནི་གསང་བའི་དབང་། །གསུམ་པ་ཤེས་རབ་ཡེ་ཤེས་ཏེ། །བཞི་པ་དེ་ཡི་ཡེ་ཤེས་ཏེ། །
བླ་མ་ལས་ནི་ཐོབ་པའོ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་ཕན་ཡོན་དང་བཅས་པར་དབང་བསྐུར་བའི་ལེའུ་སྟེ་བཞི་པའོ།། །།   གང་གི་ཐབས་ཀྱིས་རིགས་ལྔའི་དོན། །རང་གི་
དོན་གྱུར་ཀུན་དུ་བཟང་། །འདི་དག་གཞན་ལ་རབ་བདེའི་ཕྱིར། །རྡོ་རྗེ་སེམས་དཔའི་སྒྲུབ་ཐབས་བཤད། །ཡིད་འོང་དབེན་པའི་ས་ཕྱོགས་སུ། །ཅི་བདེར་གནས་ལ་ནམ་མཁའ་ཀུན། །སེམས་ཀྱིས་ཁྱབ་པར་བྱས་ནས་སུ། །
རྣལ་བརྟགས་ཨེ་མའོ་འཇིག་རྟེན་ཀུན། །སྡུག་བསྔལ་ཆོས་ཀྱིས་ཀུན་ནས་གཙེས། །བྱང་ཆུབ་སེམས་ཉམས་སེམས་ཅན་རྣམས། །ཀུན་ལས་འབྱུང་ཞེས་དམ་བཅས་པའི། །སྔགས་པས་སྤྱི་བོར་བཞག་པ་ནི། །ཨཱཿ

88-1-320b

སེམས་ཀྱི་རྡུལ་ཕྲན་ཆ་དྲུག་རྣམས། །ཕྱོགས་བཅུ་དག་དུ་ཕྱེ་ནས་སུ། །ཆོས་ཀྱི་དོན་རྣམས་དེས་བསལ་ནས། །ཤིན་དུ་དྲི་མེད་སེམས་དག་པ། །འདས་དང་མ་འོངས་པ་ཡི་སེམས། །ད་ལྟར་ཡང་ནི་དམིགས་སུ་མེད། །
གཉིས་མེད་དེ་ལ་གཉིས་མེད་མེད། །ནམ་མཁའ་ཞེས་པའང་གནས་པ་མེད། །དེ་ལྟར་ཀུན་དུ་བརྟགས་ནས་སུ། །འགྲོ་བ་ཐམས་ཅད་ཤིན་དུ་སྟོང་། །དྲི་མེད་རྣལ་འབྱོར་ཉིད་ཀྱི་ཡིན། །དངོས་པོ་མེད་པར་རང་སེམས་བསམ། །
འགྲོ་བ་འདི་ནི་དེ་ལྟ་བུའི། །དངོས་པོ་གང་དག་ཡོད་མིན་ན། །སྡུག་བསྔལ་སྣ་ཚོགས་གང་དག་ལགས། །སེམས་ཉམས་སེམས་ཅན་འབྱུང་བར་བསྒོམ། །འོན་ཀྱང་སྔོན་གྱི་སྨོན་ལམ་ཤུགས། །དབྱངས་ཡིག་སྤེལ་བའི་
གླུ་ལྡན་བྱ། །རིན་ཆེན་སེམས་ནི་རྨུགས་པ་ལ། །བདེ་གཤེགས་རྣམས་ཀྱིས་བསྐུལ་བར་སྣང་། །ཤཱུ་ནྱ་ཏཱ་ཏི་ཡོག་པཱ་དྃ་སྭཱ་ཧཱ། པྲ་བྷ་བཱ་ཨཱ་ཀཱ་ཤཏ་མཱ་པ་ག་ཏ་ས་མ་ཡ་ཨུ་པ་ཏ་པ་ཡན་ཏི་སུ་ག་ཏ་སུ་ག་ཏི་ག་ཏི་ཤྲཱི་བཛྲ་སྭཱ་ཧཱ། 
པཱུ་པུ་སྟྃ་ཧྃ། རྣམ་རྟོག་ཀུན་སྤངས་དྲི་མེད་པའི། །རྣམ་པར་མི་རྟོག་སྒོམ་པའི་སེམས། །སྔགས་ཀྱི་དེ་ཉིད་བསྐྱོད་བྱས་ལ། །ཧཱུྃ་ཞེས་པ་ཡི་གཟུགས་སུ་བརྟག །ཏིང་ངེ་འཛིན་གྱིས་དབང་འགྱུར་ན། །གང་ཕྱིར་དེ་ནི་བསྒོམ་
པས་ཐོབ། །དམ་པ་ནམ་མཁའི་དབྱིངས་ལ་གནས། །བྱང་ཆུབ་སེམས་ཚོགས་དེར་བཅས་ལ། །རྣལ་འབྱོར་ཡིད་ཀྱིས་ཀུན་བསམས་ནས། །རྒྱས་པར་རྣམ་པར་བརྟག་པར་བྱ། །ཡི་གེ་བྷྲུྃ་གྱིས་ལྷ་ཡི་གནས། །རྡོ་རྗེ་རིན་ཆེན་
གྱིས་ནི་བརྒྱན། །སྒོ་ཁྱུད་རྟ་བབས་ཀ་བ་དག །དར་གྱི་ཕྲེང་བས་རྣམ་པར་ཀླུབས། །གྲུ་བཞི་པ་ལ་སྒོ་བཞི་པ། །དྲིལ་བུའི་དྲ་བ་དག་གིས་བརྒྱན། །རྟག་པར་དོ་ཤལ་མེ་ལོང་དང་། །མེ་ཏོག་ཕྲེང་བས་རྒྱན་རྣམས་བྲེས། །དེ་ཡི་
དབུས་སུ་སེང་གེའི་གདན། །སེང་གེ་བརྒྱད་ཀྱིས་རྣམ་པར་བརྒྱན། །སྨོན་ལམ་དབང་གིས་དེ་དག་ཀུན། །བྱང་ཆུབ་སེམས་དཔའ་མཐུ་བོ་ཆེ། །ཤར་ཕྱོགས་བ་གླང་ཤིན་དུ་རྒྱས། །ལྷོ་ཕྱོགས་རྟ་ཡི་གདན་བཟངས་ཏེ། །

88-1-321a

ནུབ་ཕྱོགས་སུ་ནི་རྨ་བྱ་བཤད། །དེ་བཞིན་བྱང་ཕྱོགས་ནམ་མཁའ་ལྡིང་། །མི་བསྐྱོད་ཁྲོ་བོ་བབས་པ་ནི། །མཐིང་ག་དཀར་པོ་དམར་པོའི་ཞལ། །རྡོ་རྗེ་ཕྱག་རྒྱ་ཐུགས་ཀ་ན། །མཐིང་ག་ཁ་དོག་གསལ་ལ་བཟང་། །གཡས་ན་
རིན་ཆེན་འཁོར་ལོ་སྟེ། །རལ་གྲི་པད་མ་གཡོན་པ་ན། །འཇིག་རྟེན་ཁམས་ནི་ཀུན་འཁྲུག་པའོ། །བརྟུལ་ཞུགས་ཅན་གྱིས་ཞལ་གསུམ་བསམ། །དང་པོ་ཡི་ནི་སྟོང་པ་ཉིད། །གཉིས་པ་དེ་བཞིན་མཚན་མ་མེད། །གསུམ་པ་སྨོན་པ་
མེད་པ་ཡི། །ཞལ་དུ་མཁས་པས་རིག་པར་བྱ། །ཕྱག་དྲུག་རྟག་ཏུ་འབར་བར་བསྒོམས། །མཚོན་ཆ་སྣ་ཚོགས་རྣམས་དང་ལྡན། །པད་མ་ལ་ནི་མཉམ་གཞག་ནས། །ཡེ་ཤེས་ཕྱག་རྒྱ་སྙིང་ག་ནང་། །དབུས་ཀྱི་གནས་སུ་བསམ་
པ་ནི། །རྡོ་རྗེ་སྐྱིལ་མོ་ཀྲུང་དུ་གནས། །ཤར་གྱི་གནས་སུ་བསམ་པ་ནི། །སྔགས་པ་རྣམ་སྣང་ཐུབ་པ་སྟེ། །དཀར་དང་མཐིང་ག་དམར་བའི་ཞལ། །འཁོར་ལོ་ཕྱག་རྒྱ་སྙིང་ག་ན། །རྡོ་རྗེ་འབར་སོགས་འོད་གསལ་བ། །རིན་ཆེན་
རྡོ་རྗེ་གཡས་པ་ན། །རལ་གྲི་པད་མ་གཡོན་པ་ན། །རྣལ་འབྱོར་ཅན་གྱིས་རྟག་པར་བསམ། །ཐོར་ཚུགས་དབུ་རྒྱན་དག་གིས་བརྒྱན། །རིན་ཆེན་མགོན་པོ་ལྷོ་ཕྱོགས་ན། །སེར་དང་མཐིང་ག་དཀར་བའི་ཞལ། །རིན་ཆེན་
ཕྱག་རྒྱ་སྙིང་ག་ནས། །མ་རྒད་ལྟ་བུར་སྣང་བའོ། །གཡས་ན་འཁོར་ལོ་རལ་གྲི་སྟེ། །རྡོ་རྗེ་པད་མ་གཡོན་ནའོ། །རྟག་པར་རྣལ་འབྱོར་པས་བསམ་པ། །རིན་ཆེན་ཆར་དུ་འབེབས་པའོ། །ནུབ་ཕྱོགས་གནས་སུ་
དགོད་བྱ་བ། །སྣང་བ་མཐའ་ཡས་བསམ་པ་ནི། །དམར་དང་མཐིང་ག་དཀར་བའི་ཞལ། །པད་མ་རཱ་གའི་མདོག་ལྟ་བུ། །པད་མའི་ཕྱག་རྒྱ་སྙིང་ག་ན། །རྡོ་རྗེ་རིན་ཆེན་གཡས་པ་ན། །འཁོར་ལོ་རལ་གྲི་གཡོན་པ་ན། །
པད་མ་ལ་ནི་མཉམ་གཞག་བསམ། །བྱང་ཕྱོགས་གནས་སུ་དོན་གྲུབ་ནི། །ལྗང་གུ་མཐིང་ག་དཀར་བའི་ཞལ། །རལ་གྲི་ཕྱག་རྒྱ་སྙིང་ག་ན། །འབར་བའི་ཕྲེང་བས་མཉམ་པའིའོ། །པད་མ་རྡོ་རྗེ་གཡས་པ་ན། །འཁོར་ལོ་

88-1-321b

རིན་ཆེན་གཡོན་པ་ན། །ཟླ་བའི་དཀྱིལ་འཁོར་དབུས་གནས་པ། །བྱང་གི་གནས་སུ་བསམ་པར་བྱ། །སྔགས་པས་ཕྱག་དྲུག་བསམ་པ་ནི། །སྤྱན་དེ་ཞལ་གསུམ་དཀར་མོ་ཡི། །རྣམ་པར་སྣང་མཛད་ཕྱག་རྒྱ་བཞིན། །དེ་ཡི་དོན་དུ་རྣམ་པར་
བསྒོམ། །མཱ་མ་ཀཱི་ཡང་བསམ་པ་ནི། །ཨུཏྤལ་དང་ནི་བསམ་བ། །ཞལ་གསུམ་ཕྱག་དྲུག་ཆགས་པ་སྟེ། །མི་བསྐྱོད་ཕྱག་རྒྱ་མཆོག་འཛིན་པའོ། །ཆགས་པས་ཆགས་པ་རིགས་ཀྱི་སྔགས། །ཞལ་གསུམ་ཕྱག་
དྲུག་དགེ་བ་སྟེ། །སྦྱོར་བའི་ས་ནི་དཀར་མོ་བསམ། །པད་མ་རཱ་གའི་ཕྱག་རྒྱའོ། །སྒྲོལ་མ་ཁ་དོག་སེར་མོ་སྟེ། །འཁྲིལ་བག་རྒྱན་གྱིས་རབ་ཏུ་བརྒྱན། །ཞལ་གསུམ་ཕྱག་དྲུག་རབ་ཏུ་བསམ། །ཐོགས་མེད་རྒྱལ་པོའི་ཕྱག་རྒྱའོ། །
སྒོ་བཞི་སྒོ་སྲུངས་དགོད་བྱ་བ། །སྒོ་རྣམས་སུ་ནི་ཁྲོ་བོ་བསམ། །ཁྲོ་བོ་ཆེན་པོ་གཤིན་རྗེའི་གཤེད། །གཞན་གྱིས་མི་ཐུབ་དེ་བཞིན་ཏེ། །ཐུབ་པར་དཀའ་བ་རྟ་མགྲིན་དང་། །ཁྲོ་བོ་བདུད་རྩི་འཁྱིལ་པ་བསམ། །དེ་དག་ཀུན་
ཀྱང་ཞལ་གསུམ་པ། །དྲག་ཅིང་དྲག་པོར་གནོན་པའོ། །མཐིང་ག་སེར་པོ་དེ་བཞིན་དམར། །ལྗང་གུ་དག་ནི་ཁ་དོག་ཏུའོ། །མཚོན་ཆ་སྣ་ཚོགས་འཛིན་པ་སྟེ། །ཐོད་པའི་ཕྲེང་ཐོགས་དེ་བཞིན་ནོ། །གདོན་
རྣམས་ཐམས་ཅད་སྐྲག་བྱེད་པ། །གནོད་སྦྱིན་སྲིན་པོ་འཕྲ་མེན་མ། །མ་ཧེ་སེང་གེ་སྟག་རྣམས་དང་། །བ་ལང་ཞོན་པ་རྣམས་བཞིའོ། །རྣམ་པར་འགྱུར་བའི་ཁྲོ་གཉེར་ཅན། །ཁྲོ་བོ་སྤྱན་ནི་ཀུན་ནས་བསྡུས། །
སྔགས་འདི་རྣམས་ཀྱིས་བསམ་པ་ནི། །གཤིན་རྗེའི་གཤེད་ལ་སོགས་པའོ། །སྔགས་ཀྱི་དེ་ཉིད་རྗེས་འཐུན་པར། །སྔགས་པའི་དཀྱིལ་འཁོར་བསྒྲུབས་ནས་སུ། །
ས་ཡི་སྙིང་པོ་ལ་སོགས་པ། །སེམས་དཔའ་རྣམས་ནི་དེར་གནས་བསམ། །ལུས་དང་ངག་དང་སེམས་དེ་ཉིད། །ཧཱུྃ་ཞེས་བྱ་བའི་ཡི་གེ་མཆོག །

88-1-322a

སེམས་ནི་དེ་རུ་ཞུགས་པར་བསམ། །མི་བསྐྱོད་པ་ནི་བདག་ཉིད་ཆེ། །དབང་པོའི་ལམ་དུ་བྱུང་ནས་སུ། །དང་བའི་དཀྱིལ་འཁོར་གྱིས་ནི་བརྒྱན། །བདག་ཉིད་གཅིག་ཅིང་གཅིག་འགྱུར་བ། །སྐད་ཅིག་གིས་
ནི་བརྟག་པར་བྱ། །ཁྱོད་ནི་རྡོ་རྗེ་སེམས་ཞེས་བྱ། །དེ་ལ་སོགས་པས་བསྟོད་པར་བྱེད། །དེ་ནས་རྣམ་སྣང་མཛད་ལ་སོགས། །རང་གི་སྙིང་གར་རབ་ཏུ་བཟུང་། །གཟུངས་རྣམས་ཀྱི་ནི་རང་བཞིན་དུ། །རྣམ་པར་སྣང་མཛད་
ཐུབ་པ་བཞུགས། །ཚོར་བ་རིན་ཆེན་མགོན་པོ་ཡིན། །མཐའ་ཡས་འོད་ནི་འདུ་ཤེས་སུའོ། །འདུ་བྱེད་ཀུན་དུ་གདོན་མི་ཟ། །མི་བསྐྱོད་པ་ནི་ཕུང་པོ་ལྔར། །དེ་བཞིན་གཤེགས་པ་ལྔ་རྣམས་ནི། །སྔགས་འདི་རྣམས་ཀྱིས་
བཞུགས་པར་བསམ། །ས་ཡི་ཁམས་ཀྱི་རང་བཞིན་དུ། །དེ་ནས་སྤྱན་ནི་བཞུགས་བྱ་སྟེ། །རྣལ་འབྱོར་ཡིད་ཀྱིས་བསམ་པ་ནི། །དེ་ཡང་སྤྲོ་བར་གནས་པར་བསམ། །མཱ་མ་ཀཱི་ཡང་ཆུ་ཡི་ཁམས། །བརླན་ཞིང་ཁྲག་ནི་རྒྱུ་
བའི་ཕྱིར། །རྣལ་འབྱོར་པས་ནི་ཡིད་ཀྱིས་བསམ། །དེ་ཡི་ལུས་ནི་རྒྱས་པར་འགྱུར། །མེ་ཡི་ཁམས་ཀྱི་རང་བཞིན་དུ། །གོས་དཀར་མོ་ཡང་གཞུག་པར་བྱ། །ཀུན་དུ་ཁྱབ་པར་བཞུགས་པ་ཡི། །འོད་རྣམས་སུ་ནི་དེར་
འགྱུར་རོ། །སྒྲོལ་མ་རླུང་གི་རང་བཞིན་དུ། །ཞུགས་པར་དེ་ནི་བསམ་པར་བྱ། །རླུང་ནི་རྣམ་པ་ལྔ་རུ་འགྱུར། །དེ་བཞིན་ཡིད་མགྱོགས་རྫུ་འཕྲུལ་འགྲུབ། །རྡོ་རྗེ་དབྱིངས་ཀྱི་དབང་ཕྱུག་མ། །ནམ་མཁའི་རང་བཞིན་དག་ཏུ་
འཇུག །དེ་ལུས་ཁོང་སྟོང་ཉིད་ལ་ནི། །རང་སེམས་ཡོན་ཏན་བསྒོམ་པའི་སེམས། །ནམ་མཁའི་དབྱིངས་ཀྱི་རྣལ་འབྱོར་གྱིས། །སངས་རྒྱས་སྒྱུ་མའི་སྦྱོར་བས་སུ། །དག་པའི་བདག་ཉིད་ཅི་འདོད་པར། །དེ་ནས་
རི་རབ་ཕུལ་ནས་འགྲོ། །ས་ཡི་སྙིང་པོ་བདག་ཉིད་ཆེ། །སངས་རྒྱས་སྤྱན་ནི་བདག་ཉིད་དེ། །མིག་གི་ཕྱོགས་སུ་ཞུགས་ནས་ནི། །འཕྲུལ་གྱི་མིག་ཏུ་རྟག་ཏུ་འགྱུར། །ཕྱག་ན་རྡོ་རྗེ་བདག་ཉིད་ཆེ། །རྣ་བའི་རྣམ་ཤེས་

88-1-322b

སྦྱོར་བས་ན། །སྒྲ་རྣམས་ཐམས་ཅད་ཤེས་པ་དེ། །རྣ་བའི་རྣམ་ཤེས་དེ་བཞིན་འགྱུར། །ནམ་མཁའི་སྙིང་པོ་བདག་ཉིད་ཆེ། །སྣ་ཡི་རྣམ་ཤེས་སྦྱོར་བས་ན། །སངས་རྒྱས་ཤངས་ནི་བདག་ཉིད་ཤེས། །དེ་ཡང་དེ་ཡི་
ངོ་བོར་འགྱུར། །འཇིག་རྟེན་དབང་པོར་རབ་ཆགས་པ། །རྡོ་རྗེ་ལྕེ་ཡི་སྦྱོར་བས་སུ། །རོ་ཡི་དངོས་པོ་མྱོང་བ་དེས། །སྐད་ཅིག་གཅིག་ལ་དེ་རུ་འགྱུར། །བློ་ལྡན་སྒྲིབ་པ་ཐམས་ཅད་ནི། །རྣམ་པར་སེལ་བའི་མིང་དང་ལྡན། །
ཉོན་མོངས་ཐམས་ཅད་རྣམ་པར་སེལ། །ཉེ་བའི་ཉོན་མོངས་པ་ཡང་འཇིག །མེ་ལོང་གི་ནི་རྣམ་པ་ལྟར། །རྟེན་པའི་ཚུལ་གྱིས་འབྱུང་བ་ནི། །གཟུགས་བརྙན་གྱི་ནི་སྦྱོར་བས་སུ། །སྐད་ཅིག་གིས་ནི་དེ་རུ་འགྱུར། །
བཅོམ་ལྡན་རྡོ་རྗེ་སེམས་དཔའ་ལ། །རྣམ་པ་བཅུ་དང་དྲུག་ཏུ་ཡང་། །སྦྱོར་བ་དེ་ནི་བྱིན་བརླབས་ནས། །སྔགས་པས་དེ་ནི་སེམས་ལ་གཞུག །ཁྲོ་བོ་ལྕགས་ཀྱུ་དཔུང་པ་ཡིས། །ཞགས་པ་ལྟ་བུ་གཉིས་པའོ། །
ལུ་གུ་རྒྱུད་ཀྱི་ཁ་སྤྲད་གསུམ། །རྒྱལ་མཚན་གཞུག་པར་ཁྱབ་པར་བཞག །དེ་ལྟར་དོན་རྣམས་རབ་ཏུ་ཞུགས། །སངས་རྒྱས་ཀུན་གྱི་ངོ་བོར་བདག །རྡོ་རྗེ་ཕྱག་རྒྱ་དང་ལྡན་པ། །གཡོན་པ་དྲིལ་བསྣམས་སྟ་ཟུར་བརྟེན། །
རྡོ་རྗེ་སེམས་དཔའ་དེ་གནས་འགྱུར། །རྣལ་འབྱོར་ཆེན་པོ་དཀར་བའི་གཟུགས། །དཀར་དང་མཐིང་ག་དམར་པོའི་དབུ། །སྟོང་ཉིད་ལ་སོགས་བདག་སྦྱོར་བ། །རྡོ་རྗེ་སེམས་དཔའ་ཞེས་སུ་སྨྲ། །རྡོ་རྗེ་ཕྱག་རྒྱ་རྗེས་
སུ་ཆགས་པ་ལ། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་བ་ཨཱཏྨ་ཀོ྅ཧྃ། །སངས་རྒྱས་མཆོད་པ་ལ། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧྃ། རང་གི་དཀྱིལ་འཁོར་སྔ་མ་བཞིན། །མདུན་དུ་བསམས་
ནས་ནམ་མཁའ་ལ། །ཁྱབ་པའི་སྦྱོར་བས་གཅིག་བྱས་ཏེ། །དཀྱིལ་འཁོར་སྔ་མ་བཞིན་བསམས་བཟླས། །བཅོམ་ལྡན་མི་མཉམ་གཞུག་ཅིང་བཞུགས། །རྡོ་རྗེ་ཕྱག་རྒྱ་ཐུགས་ཀར་བསྣམས། །གཡས་པར་འཁོར་

88-1-323a

ལོ་རིན་པོ་ཆེ། །པད་མ་རལ་གྲི་གཡོན་པའོ། །དེ་ཉིད་གསུམ་གྱི་ཚུལ་གྱིས་ན། །ཅི་ཙམ་ནུས་པར་བཟླས་པར་བྱ། །སྐྱོ་ན་ཡིད་ཀྱིས་དྲངས་ནས་ནི། །དེ་དག་ཐམས་ཅད་སྙིང་གར་གཞུག །མཉམ་པ་ཉིད་
ཀྱི་གནས་འདུག་ན། །ལུས་ཀྱིས་ཇི་ཙམ་བསྐྱོད་པ་དང་། །ཚིག་ཏུ་རབ་ཏུ་འཕྲོ་བའི་རྣམས། །དེ་དག་སྔགས་དང་ཕྱག་རྒྱར་འགྱུར། །རྟག་ཏུ་བསྒོམ་པའི་སྦྱོར་བས་ནི། །དེ་ལ་སེམས་དཔའི་གཞན་མ་ཡིན། །རྣལ་
འབྱོར་ངོ་བོ་གཟུགས་ཅན་ལ། །ལྷ་མོ་རྣམས་ཀྱང་དེ་ལ་འཛིན། །དབང་པོ་ལམ་དུ་གང་གྱུར་པ། །དེ་དང་དེ་ཡི་ངོ་བོ་དག །ཤིན་དུ་མཉམ་གཞག་སྦྱོར་བས་སུ། །བདག་ཉིད་ལྷག་པའི་ལྷར་བྱའོ། །དཔལ་རྡོ་རྗེ་སྙིང་པོ་
རྒྱན་གྱི་རྒྱུད་ལས་ལྷའི་ལེའུ་སྟེ་ལྔ་པའོ།། །། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་སྐུ་དང་གསུང་དང་ཐུགས་
རྡོ་རྗེའི་དེ་བཞིན་གཤེགས་པ་ལ་དེ་བཞིན་གཤེགས་པ་ཐམས་ཅད་དང་། །བྱང་ཆུབ་སེམས་དཔའ་ཐམས་ཅད་ཀྱིས་ཚིག་མཐུན་པར་སྒྲ་དབྱངས་གཅིག་གིས་གསོལ་བ་བཏབ་པ། བཅོམ་ལྡན་དེ་བཞིན་གཤེགས་ཀུན་
གྱི། །ཡེ་ཤེས་གཅེས་པ་དྲི་མེད་པ། །བྱང་ཆུབ་སེམས་ནི་རིན་པོ་ཆེ། །བླ་ན་མེད་པ་བཤད་དུ་གསོལ། །དེ་ནས་བཅོམ་ལྡན་འདས་ལ་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པར་ཐུགས་སུ་ཆུད་ནས་
བྱང་ཆུབ་སེམས་དཔའ་རྣམས་ལ་འདི་སྐད་ཅེས་བཀའ་སྩལ་ཏོ། །སེམས་ནི་ལུས་ཀྱི་རྣམ་པ་ཡིན་ལ། ལུས་ཀྱང་སེམས་ཀྱི་རྣམ་པ་ཡིན་ཞིང་སེམས་ཀྱང་ཚིག་གིས་རབ་ཏུ་བརྗོད་པ་ཡིན་ནོ། །དེ་ནས་བྱང་ཆུབ་
སེམས་དཔའ་དེ་དག་གིས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་སྦྱོར་བ་ཐོབ་ནས་ཆེད་དུ་བརྗོད་པ་འདི་ཆེད་དུ་བརྗོད་དོ། །ཀྱེ་མ་ཀུན་དུ་བཟང་པོ་འདི། །སྐུ་གསུང་ཐུགས་ཀྱི་རྡོ་རྗེ་ཅན། །ཆོས་

88-1-323b

རྣམས་སྐྱེ་བ་མེད་པ་སྟེ། །གཡོ་བ་མེད་ཅིང་གནས་པ་མེད། །རྟོག་པའི་དྲི་མ་སྤངས་པ་ཡིན། །བསྐྱེད་པར་བྱ་ཞེས་རབ་ཏུ་གསུངས། །དེ་ནས་བཅོམ་ལྡན་འདས་མི་འཁྲུགས་པ་དེ་བཞིན་གཤེགས་པ་གསུང་སྤྲོས་པའི་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་འདི་དག་མ་སྐྱེས་ཏེ། །ཆོས་ཅན་མེད་ཅིང་ཆོས་ཉིད་མེད། །ནམ་མཁའ་བཞིན་དུ་དམིགས་མེད་པའི། །བྱང་ཆུབ་སེམས་
ནི་བརྟན་པ་ཡིན། །བཅོམ་ལྡན་འདས་དེ་བཞིན་གཤེགས་པ་རྡོ་རྗེ་མི་འཁྲུགས་པས་གསུང་ངོ་། །དེ་ནས་བཅོམ་ལྡན་འདས་དེ་བཞིན་གཤེགས་པ་རིན་ཆེན་འབྱུང་གནས་ཀྱིས་དེ་བཞིན་གཤེགས་པ་ཐམས་ཅད་དམིགས་སུ་
མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་འདི་དག་དངོས་མེད་དེ། །ཆོས་ཀྱི་མཚན་ཉིད་སྤངས་པ་ཡིན། །བདག་མེད་ཆོས་ལས་ལེགས་བྱུང་བའི། །བྱང་
ཆུབ་སེམས་ནི་བསྟན་པ་ཡིན། །ཞེས་བཅོམ་ལྡན་འདས་རིན་ཆེན་ཏོག་གིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་ཀྱིས་རྡོ་རྗེ་མེ་ལྕེ་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་སྐྱེ་བ་མེད་པ་སྟེ། །དངོས་པོ་ངོ་བོ་ཡོད་མིན་པས། །ནམ་མཁའི་གོ་འཕང་འཐོབ་བོ་ཞེས། །དངོས་རྣམས་རབ་ཏུ་བརྗོད་པ་ཡིན། །ཞེས་བཅོམ་ལྡན་འདས་
འོད་དཔག་མེད་ཀྱིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དོན་ཡོད་གྲུབ་ཀྱིས་དེ་བཞིན་གཤེགས་པ་ཐམས་ཅད་ཀྱི་བླ་མའི་ཡང་བླ་མའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་
ཀྱི་སེམས་འདི་གསུངས་སོ། །ཆོས་རྣམས་རང་བཞིན་འོད་གསལ་བ། །གཟོད་ནས་དག་ཅིང་རྙོག་པ་མེད། །སེམས་ཅན་མེད་ཅིང་སྲོག་ཀྱང་མེད། །སངས་རྒྱས་ཉིད་དང་བྱང་ཆུབ་མེད། །རྨི་ལམ་སྒྱུ་མ་ལྟར་སྣང་བའི། །བྱང་

88-1-324a

ཆུབ་སེམས་ནི་བརྟན་པ་ཡིན། །ཞེས་བཅོམ་ལྡན་འདས་དོན་ཡོད་གྲུབ་ཀྱིས་གསུངས་སོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པ་དེ་བཞིན་གཤེགས་པ་ཐམས་ཅད་
ཀྱི་སྐུ་དང་གསུང་དང་ཐུགས་རྡོ་རྗེ་དེ་བཞིན་གཤེགས་པའི་བྱང་ཆུབ་ཀྱི་སེམས་རྣམ་པར་དག་པ་ཐོབ་ནས་ངོ་མཚར་སྐྱེས་པར་གྱུར་ཏེ་ཆེད་དུ་བརྗོད་པ་འདི་ཆེད་དུ་བརྗོད་དོ། །ཀྱེ་མའོ་སངས་རྒྱས་ཀྱེ་མའོ་དག །ཀྱེ་མའོ་ཆོས་ནི་
བསྟན་པ་རྣམས། །བདག་མེད་ཆོས་ལས་ལེགས་བྱུང་བ། །བྱང་ཆུབ་སེམས་ཁྱོད་ཕྱག་འཚལ་ལོ། །བྱང་ཆུབ་སེམས་ཀྱི་བསྒོམ་པ་ཡི། །མི་གཡོ་ཡི་གེ་ལས་བྱུང་ཞིང་། །རྨི་ལམ་ལ་སོགས་མ་སྐྱེས་པ། །བྱང་ཆུབ་
སེམས་ཁྱོད་ཕྱག་འཚལ་ལོ། །གནས་དང་སྟན་ནི་རྣམ་བསམས་ཏེ། །སེམས་དཔའི་སྐྱིལ་མོ་ཀྲུང་བཅས་ནས། །དང་པོར་རང་བཞིན་དག་གོ་ཞེས། །དག་པའི་ཆོས་ཀྱི་ཚུལ་ལ་གནས། །ཡིད་ཀྱིས་ཧཱུྃ་བྱས་རྡོ་རྗེ་ཅན། །
རྡོ་རྗེ་སེམས་མས་བྱིན་གྱིས་བརླབས། །རིན་ཆེན་ལུས་སུ་ང་རྒྱལ་བྱ། །ལག་པ་བསྟོད་དེ་བསྐོར་བ་ན། །ལྕགས་ཀྱུ་ཡིས་ནི་སྤྱན་ཡང་དྲང་། །བྱོན་ནས་དྲང་པོར་ཕྱོགས་བཅིང་སྟེ། །དམ་ཚིག་མཆོག་ཀྱང་
དབུལ་བར་བྱ། །གདན་རྣམས་སོ་སོར་ཕུལ་ནས་སུ། །མཆོད་ཡོན་འབུལ་བའི་སྦྱོར་བ་བྱ། །དབང་བསྐུར་མཚོན་ཆ་གོ་ཆ་སོགས། །སིལ་སྙན་མཆོད་སོགས་ངོ་བོ་བྱ། །རྣམ་པ་ཀུན་གྱིས་མཉེས་བྱ་བ། །རྣལ་
འབྱོར་བདག་ཉིད་ཅན་གྱི་བདག །རྣལ་འབྱོར་རྣམ་གསུམ་ཤེས་བྱ་སྟེ། །བྱིན་གྱིས་བརླབས་དང་ཡོངས་བརྟགས་དང་། །གཟུགས་ཉིད་ཡོངས་སུ་རྫོགས་པ་དག །རྣལ་འབྱོར་ཡིན་ཞེས་སངས་རྒྱས་གསུངས། །
སྔགས་ཀྱི་བྱིན་བརླབས་ང་རྒྱལ་བསྐྱེད། །རྣལ་འབྱོར་བྱིན་བརླབས་ཡིན་པར་གསུངས། །བྱང་ཆུབ་སེམས་ནི་དག་པ་དང་། །གསང་སྔགས་ས་བོན་སྐྱེ་བ་ཆེ། །ཕྱག་རྒྱ་ཚོགས་སུ་བརྟག་པ་ཡི། །རིམ་གྱིས་གཟུགས་

88-1-324b

ཀྱིས་རྫོགས་བྱ་བ། །དེ་ནི་བརྟགས་པས་བརྗོད་པ་སྟེ། །རྣལ་འབྱོར་ཆོ་ག་ཡིན་པར་གསུངས། །བསྡུ་དང་སྤྲོ་བར་བྱ་བ་ལས། །རྣམ་པའི་མཆོག་ཀུན་ལྡན་པ་དང་། །སྐད་ཅིག་ཡེ་ཤེས་ཀྱིས་རྫོགས་པ། །རྫོགས་པའི་རྣལ་
འབྱོར་ཞེས་བརྗོད་དོ། །དང་པོར་དམ་ཚིག་བྱིན་བརླབས་པར། །རྣལ་འབྱོར་རིག་པ་དག་གིས་བརྟག །རབ་ཏུ་རྫོགས་པར་བྱ་བ་དག །འདི་ནི་རྣལ་འབྱོར་ཆོ་གར་བཤད། །ཉོན་མོངས་དྲི་མར་བཅས་པའི་སེམས། །བྱང་ཆུབ་
སེམས་ཀྱིས་དག་བྱ་སྟེ། །དེ་ནི་རང་བཞིན་དག་པའོ་ཞེས། །བརྗོད་ཅིང་ཐལ་མོ་གསུམ་གྱིས་སྦྱར། །དག་གྱུར་དེ་ནས་བློ་ཡིས་ནི། །སེམས་ལ་སོ་སོར་བཏག་པར་བྱ། །སེམས་ལ་སོ་སོར་བརྟགས་ནས་ཀྱང་། །ཕྱི་རོལ་རང་
བཞིན་སྟོང་པར་བྱ། །སེམས་ཙམ་ལ་ནི་གནས་ནས་སུ། །བྱང་ཆུབ་ཚོགས་ཀྱི་བག་ཆགས་དེས། །བསྒོམ་པར་བྱ་བའི་ངོ་བོ་དག །ཟླ་བའི་གཟུགས་སུ་རྣམ་པར་བརྟག །དག་པའི་པད་མ་ལ་གནས་པ། །ཨོཾ་གྱི་མྱུ་གུས་བསྐྲུན་
པ་ཡི། །ཡན་ལག་ཀུན་གྱི་མཚན་ཉིད་གཟུགས། །རྡོ་རྗེ་སྐུ་ནི་བསྒོམ་པར་བྱ། །ཨཱཿཞེས་བྱ་བའི་སྤྲོས་མེད་གསུང་། །སེམས་ནི་ཧཱུྃ་ཞེས་བྱ་བར་སྤྲུལ། །ཡི་གེ་གསུམ་གྱིས་བྱིན་བརླབས་ལུས། །སྙིང་ལ་གནས་པ་ཟླ་བའི་
གཟུགས། །དེ་ལ་རང་གི་ཡི་གེ་ནི། །མདོག་གཟུགས་འོད་ནི་བྱེད་བསམས་ཏེ། །ང་རྒྱལ་བསྐྱེད་ནས་དེ་ལ་ནི། །རྡོ་རྗེའི་བདག་ཉིད་བདག་ཉིད་བརྗོད། །རྒྱན་ཀུན་ཡོངས་སུ་རྫོགས་པ་དང་། །འོད་ཀྱི་དཀྱིལ་འཁོར་གྱིས་བརྒྱན་པ། །
ཆ་ཤས་ཀྱི་ནི་དྲ་བ་ཅན། །ཡེ་ཤེས་སེམས་དཔའ་རྫོགས་པར་བརྟག །དེ་འོག་ལག་པའི་ཕྱག་རྒྱ་ཡིས། །གོ་ཆ་མཚོན་ཆ་ལ་སོགས་བྱ། །རྫོགས་སངས་རྒྱས་ལྔ་དབང་བསྐུར་ཏེ། །ཅོད་པན་ཕྲེང་བ་རྣམས་ཀྱིས་ཀླུབས། །དེ་ནས་དེ་
འོག་སངས་རྒྱས་ཀྱི། །སྤྲུལ་པ་མཛད་པའི་སྒྱུ་མ་འཕྲོ། །ཡན་ལག་བཞི་པ་དཔུང་ལྡན་པའི། །ཕྱོགས་བཅུར་ཁྲོ་བོ་བཅུ་དག་དང་། །བསྙེམས་མ་དང་ནི་ཏོག་ལྡན་མ། །མཚོན་ཆ་མ་དང་རྩེད་མོ་ཅན། །སྒྱུ་མའི་ཆ་བྱད་རྣམ་པའོ། །

88-1-325a

རྣམ་པར་འཕྲུལ་པ་བྱིན་གྱིས་བརླབ། །ཀུན་ལ་ཁྱབ་པར་བྱེད་པ་ཡི། །སྣ་ཚོགས་དབུས་སུ་གཞག་ནས་ནི། །དེ་ཉིད་ཆེན་པོ་བདག་ཉིད་ལྔས། །ཕྱོགས་བཞི་འཁོར་ལ་ཁྱབ་བྱ་སྟེ། །དགའ་བས་དགའ་བྱེད་བཞི་ཡང་སྤྲོ། །
ཏིང་འཛིན་ཀུན་གྱི་དགའ་བ་ལ། །འོས་པར་བྱེད་པའི་སྔགས་པ་ཡི། །འཁོར་ལོ་དང་ནི་རྡོ་རྗེའི་གཟུགས། །པད་མའི་གཟུགས་ལ་དེ་དག་ནི། །འཁོར་ལོ་ཀུན་ལ་པད་མ་ཡི། །ངོ་བོ་ཡིས་ནི་རོལ་པ་དང་། །ཨེ་ཞེས་བྱ་བ་འཕྲོ་བ་ལས། །
མདོག་ལྡན་བདག་ཉིད་གཟུགས་སུ་བྱ། །མཛེས་པའི་རྒྱན་རྣམས་ཀུན་ལྡན་པའི། །ཉིད་ཀྱི་གདན་ལ་བཞུགས་པར་བལྟ། །སྒེག་དང་གླུ་དང་གར་རྣམས་དང་། །རྒྱལ་མཚན་ལ་སོགས་ཚོན་དགྱེ་དང་། །སིལ་སྙན་མཆོད་པའི་
རྣམ་པ་ནི། །སྣ་ཚོགས་རྣམས་ཀྱིས་མཆོད་པ་བྱ། །རྣམ་པ་ཀུན་དང་ལྡན་པར་ནི། །བདག་ཉིད་ཀྱི་ནི་ལུས་བསྒོམས་ནས། །མྱུར་ཆེས་བྱ་བ་བུལ་བ་དང་། །མི་གསལ་གུག་སྐྱེད་ཉམས་པ་དང་། །རྟོག་པ་ངན་པ་རྣམ་པར་
སྤངས། །དེ་ནས་གསང་སྔགས་བཟླས་བརྗོད་བྱ། །བཟླས་པས་སྐྱོ་ན་ལག་གཡས་ཀྱིས། །བསྒྲིམས་ནས་རྡོ་རྗེ་གསོར་ནས་སུ། །གཡོན་པས་དྲིལ་བུ་ལ་བསིལ་ཞིང་། །རྡོ་རྗེ་གླུ་ཚུལ་སྣ་ཚོགས་དང་། །བ་དན་ཚུལ་དུ་བྱས་པས་
མཆོད། །བཟླས་པ་ཡིས་ནི་འཇུག་བརྟུལ་ནས། །གཤེགས་སུ་གསོལ་དང་རང་ཉིད་འགྲུབ། །ལུས་དང་ངག་དང་སེམས་བསྒོམས་ཏེ། །བརྟན་པོར་ཅི་བདེར་འགྲོ་བར་བྱ། །བར་ཆད་དུ་ནི་གྱུར་ན་ཡང་། །ཡི་གེ་བརྒྱ་པས་བྱིན་གྱིས་བརླབ། །
དེ་ལྟར་བསྒོམ་པས་བསྒོམ་བྱེད་པ། །རྡོ་རྗེ་ཐེག་པས་རབ་རྫོགས་པའི། །བྱང་ཆུབ་དེ་ནི་མྱུར་ཐོབ་ནས། །ཟླ་ཉི་དཀྱིལ་འཁོར་ལྟ་བུར་སྣང་། །སྣ་ཚོགས་ལས་ཀྱི་ཐོག་འདྲེན་ཅིང་། །རིན་ཆེན་རྒྱལ་མཚན་རབ་དགའ་བྱེད། །རྒྱལ་བྱེད་པད་
མའི་གདུང་བརྒྱུད་ཅན། །གནས་ཆེན་འཇིག་རྟེན་དབང་ཕྱུག་འགྱུར། །དཔལ་ལྡན་རིག་སྔགས་ཀུན་གྱི་གཙོ། །དགའ་ཆེན་འདོད་དགུར་ལྕགས་ཀྱུར་འགྱུར། །སྒྱུ་མ་བཞི་བ་ཀུན་ཤེས་ཤིང་། །དྲེགས་པ་འཇོམས་བྱེད་ཁྲོ་བར་འགྱུར། །
88-1-325b

དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་བྱང་ཆུབ་ཀྱི་སེམས་བསྒོམ་པའི་ཡེ་ཤེས་བསྒྲུབ་པའི་ལེའུ་སྟེ་དྲུག་པའོ།། །། སྦྱིན་སྲེག་དེ་ཉིད་ལ་གནས་པའི། །མེ་ནི་ལྷ་ཡི་ཞལ་ཡིན་
པས། །སྣ་ཚོགས་ལས་རྣམས་གྲུབ་བྱེད་པའི། །སྦྱིན་བསྲེག་ལས་ནི་རབ་ཏུ་བཤད། །སྦྱིན་བསྲེག་གིས་ནི་ལྷ་རྣམས་ཚིམ། །ཚིམ་པར་གྱུར་ནས་དངོས་གྲུབ་སྟེར། །གསང་སྔགས་ལྷག་ཆད་གང་ཡིན་པ། །ཐམས་ཅད་སྦྱིན་སྲེག་
དག་གིས་བསྐོངས། །དེ་ཕྱིར་སྐུ་གསུམ་ཆོས་མཆོག་གིས། །སྦྱིན་སྲེག་རབ་ཏུ་བསྔགས་པར་མཛད། །ཙུབ་ཤིང་ལས་ནི་བྱུང་བའི་མེ། །དགེ་བ་ཡི་ནི་ལས་རྣམས་བྱེད། །གདོལ་པའམ་དུར་ཁྲོད་བྱུང་བ་ཡི། །མེ་ནི་ལས་རྣམས་རབ་
ཏུ་བསྒྲུབ། །ཐབ་ཁུང་ཟླུམ་པོ་གྲུ་བཞི་དང་། །ཟླ་གམ་དང་ནི་ཟུར་གསུམ་དང་། །དཀྱིལ་འཁོར་གྱི་ནི་ཁ་ཁྱེར་ལ། །རྡོ་རྗེ་མཚན་མ་དག་གིས་བརྒྱན། །སྦྱིན་སྲེག་དེ་ཉིད་ཚུལ་རིག་པས། །ཐབ་ཁུང་རྣམས་ཀྱི་དབུས་སུ་ནི། །པད་མའི་སྟེང་
གནས་གཙུག་ཏོར་དང་། །རྡོ་རྗེ་རིན་ཆེན་པད་མ་བཞག །ཇི་ལྟར་དམིགས་པས་གདུགས་ནས་སུ། །ལག་གཉིས་པུས་མོའི་བར་བཞག་སྟེ། །དགང་གཟར་མར་གྱིས་བཀང་ནས་ནི། །བླུགས་གཟར་བཀང་སྟེ་དེ་བཞིན་བསྲེག །སྦྱིན་
སྲེག་ལ་དགོས་གཡས་སུ་བཞག །གཡོན་དུ་ཆུ་ཡི་སྣོད་དགོད་དོ། །ལས་ཀུན་བྱེད་པས་བཟླས་ནས་སུ། །བསང་གཏོར་དང་ནི་འཐོར་འཐུང་བྱ། །ཀུ་ཤ་རྩེ་མོ་རྣོན་པོ་ཡིས། །ཐབ་ཁུང་ཁོར་ཡུག་བསྐོར་བར་བྱ། །མེ་ནི་འབར་བར་ཤེས་
པ་དང་། །གཡས་པ་མི་འཇིགས་ཐོབ་སྤྱོད་ཅིང་། །གསང་སྔགས་འདིས་ནི་ཆོ་ག་བཞིན། །མེ་ཡི་ལྷ་ནི་སྤྱན་དྲང་ངོ་། །ཚུར་སྤྱོན་ཚུར་སྤྱོན་འབྱུང་པོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །བསྲེག་བླུགས་ཞལ་ཟས་བཞེས་ནས་ཀྱང་། །
འདི་ཉིད་དུ་ནི་བཞུགས་སུ་གསོལ། །ཨོཾ་ཨགྣ་ཡེ་ཨཱ་དི་བྱ་ཨཱ་བཱི་ཤེ་ཨཱ་བཱི་ཤེ་མ་ཧཱ་ཤྲི་ཡེ་ཧཱ་བྱ་ཀཱ་བྱ་བཱ་ཧ་ནཱ་ཡ་སྭཱ་ཧཱ། ཕྱག་གཡོན་རྡོ་རྗེ་བསང་གཏོར་ཏེ། །མཆོད་ཡོན་མཆོད་པ་རྣམ་ལྔ་དབུལ། །མེ་ཡི་ཕྱོགས་ནས་བོད་པ་ནི། །

88-1-326a

གསུས་པོ་ཆེ་ལ་མིག་གསུམ་པ། །གདོང་བཞི་པ་ལ་ལག་བཞིར་ལྡན། །མདོག་དམར་རལ་པའི་ཐོར་ཚུགས་ཅན། །མེ་ཡི་དཀྱིལ་འཁོར་ལ་གནས་ཤིང་། །ལས་ཀྱི་འོད་ཟེར་རྣམས་ཀྱིས་བརྒྱན། །ལག་པ་
དང་པོ་མཆོག་སྦྱིན་ལ། །གཉིས་པ་ན་ནི་སྔགས་ནོར་ཕྲེང་། །གཡོན་པ་རིལ་བ་སྤྱི་བླུགས་ཏེ། །གཉིས་པ་ན་ནི་བེ་ཅོན་ཉིད། །མདོག་དམར་རྒྱན་ནི་མེད་པ་ལ། །དྲང་སྲོང་རྣམས་ཀྱིས་ཡོངས་བསྐོར་བ། །འདི་ལྟའི་གཟུགས་
ནི་བསམས་ནས་ཀྱང་། །ཐབ་ཀྱི་དབུས་སུ་བཞུགས་སུ་གསོལ། །དེ་ལ་སྦྱིན་སྲེག་ལ་དགོས་པ། །ཀུན་ལ་ལན་གསུམ་བསྲེག་བླུགས་དབུལ། །དེ་ནས་འཐོར་འཐུང་བྱས་ནས་སུ། །འབར་བའི་རྣམ་པར་བསྒྱུར་བར་
བྱ། །རིམ་པ་འདི་ཡི་ཚུལ་གྱིས་ནི། །མཁས་པས་ལྷ་རྣམས་ཚིམ་པར་བྱ། །ལེགས་པར་ཚིམ་བྱས་བཟོད་གསོལ་ཏེ། །འདོད་པའི་དངོས་གྲུབ་གསོལ་བ་གདབ། །བུམ་པ་རྒྱལ་མཚན་རྡོ་རྗེ་གདུགས། །པད་མའི་ལྕགས་ཀྱུའི་
རྣམ་པ་དང་། །མེ་ལྕེ་མདོག་དཀར་སྣང་བ་དང་། །འཁྱིལ་པའི་མཚན་མས་མཁས་པས་བརྟག །དེས་ནི་མྱུར་དུ་འབྱུང་འགྱུར་བ། །བསྒོམ་དང་བཟླས་ལ་འབད་པར་བྱ། །ཞི་དང་རྒྱས་དང་དབང་ལ་ནི། །ཨོཾ་ཞེས་པ་དང་སྭཱ་ཧཱ་མཐར། །
དབྱངས་ཀྱི་རྒྱུད་ནི་བསྲིང་བ་ནི། །བར་ཆད་མེད་པའི་དབྱངས་ཀྱིས་སྦྱར། །ཞི་བའི་སེམས་ནི་ཞི་བ་ལ། །འབྱོར་པས་རྒྱས་པ་མངོན་པར་སྤེལ། །དྲེགས་བདེ་སྟབས་ཚུལ་བཅས་པ་དང་། །དབང་དུ་གྱུར་པས་དབང་དུ་བྱའོ། །དྲག་ཤུལ་
སྤྱོད་ཚུལ་ལ་གནས་པ། །ཧཱུྃ་ཞེས་པ་དང་ཕཊ་དང་བཅས། །ལུས་ནི་མེ་ལྕེ་འབར་བ་དང་། །འཇིག་རྟེན་གསུམ་པོ་བཟར་བསམས་ནས། །བསྐུལ་བའི་ཚིག་དང་སྤེལ་བ་ཡི། །གསང་སྔགས་ཡི་གེ་ངེས་པར་སྦྱོར། །སྔགས་གྲུབ་
ཆོ་ག་ཤེས་པ་ཡིས། །སྦྱིན་སྲེག་ཆོ་ག་ཐམས་ཅད་ལ། །སྣ་ཚོགས་ལས་དང་ལྡན་པ་ཡི། །ཡང་དག་ཡིན་པ་མཆོད་པར་བྱ། །སྦྱིན་སྲེག་དེ་ཉིད་ལ་བསྐུལ་ཞིང་། །དང་པོར་དགང་བླུགས་བསྲེག་ཅིང་དབུལ། །ཕྱི་ནི་རིམ་བཞིན་

88-1-326b

རྣམ་པར་སྤེལ། །ཞི་དང་རྒྱས་དང་དབང་རྣམས་ལ། །དགེ་བའི་རྫས་རྣམས་སྦྱིན་སྲེག་བྱ། །བཤང་གཅི་ཁྲག་རྐང་རུས་པ་དང་། །ཤ་ཆེན་དག་ཀྱང་སྦྱིན་སྲེག་བྱ། །ཅི་སྟེ་ཡེ་ཤེས་སེམས་དཔའི་ཞལ། །མི་གཙང་བ་ཡིས་
བཀང་ན་ཀོ། །ཅི་ལྟར་སྡིག་པ་སྐྱེ་མི་འགྱུར། །གལ་ཏེ་སྡིག་འགྱུར་འབྲས་བུ་གང་། །སེམས་ཅན་མི་ཤེས་པས་རྨོངས་པ། །ཐབས་དང་ཤེས་རབ་རྣམ་སྤངས་ཤིང་། །ཕྱི་རོལ་དངོས་ལ་མངོན་ཞེན་པ། །རྣམ་རྟོག་དྲ་བས་བླུགས་བྱས་
གང་། །དེ་དག་གིས་ནི་དགེ་སྡིག་གི། །ཕུང་པོ་གཉིས་སུ་རྣམ་པར་བརྟགས། །ཆོས་འདི་རང་བཞིན་གྱིས་དག་སྟེ། །སྐྱེ་བ་མེད་ཅིང་གནས་མེད་ཀྱང་། །སེམས་ཅན་ཤེས་པ་སྤེལ་བའི་ཕྱིར། །སངས་རྒྱས་རྣམས་ཀྱིས་ཐབས་སུ་
བསྟན། །དམ་པའི་དོན་དུ་དགེ་སྤངས་ནས། །བསོད་ནམས་མིན་པ་ཅི་ཞིག་སྨོས། །དཔེར་ན་མི་གང་ཆུ་ཀླུང་གི། །ཕ་རོལ་འགྲོ་བའི་སེམས་ཅན་དག །རྩྭ་དང་ཤིང་ལ་སོགས་བསྡུས་ནས། །ཆུ་ལ་རྒལ་བའི་གཟིངས་བྱས་ཏེ། །དེ་ལ་
འཇུག་སྟེ་ལེགས་བརྒལ་ནས། །བོར་ཏེ་བདེ་བར་འགྲོ་བ་ལྟར། །དེ་བཞིན་འཁོར་བའི་ཕ་རོལ་གྱི། །ཆོས་ཀྱི་ལམ་ནི་བསྐྱེད་བྱས་ཀྱང་། །ཆོས་དང་ཆོས་མིན་རྣམ་སྤངས་ནས། །བྱང་ཆུབ་བདེ་བ་ཐོབ་པ་ནི། །དེ་ཕྱིར་རྣམ་རྟོག་རྣམ་སྤངས་
ལ། །ཟབ་མོ་ཡི་ནི་ཆོས་སྤེལ་ཏེ། །དེ་བཞིན་གཤེགས་པས་གསུངས་རྣམས་ལ། །སྔགས་རིག་རྣམ་རྟོག་མ་བྱེད་ཅིག །རྣམ་རྟོག་རྨོངས་པ་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་པས། །ནམ་མཁའ་ལྟ་བུར་དྲི་མེད་
པའི། །རྣམ་པར་མི་རྟོག་ཏིང་འཛིན་གནས། །དབང་པོ་གཉིས་ནི་མཉམ་སྦྱར་ཏེ། །ལུས་དང་ངག་དང་སེམས་བསྡུས་ནས། །ངའོ་སྙམ་པས་གཟི་བསྐྱེད་ལུས། །རྣམ་པ་ཀུན་གྱིས་རྣམ་བརྒྱན་ན། །རྣལ་འབྱོར་ལྡན་པས་ཚེ་འདི་ལ། །ཡེ་
ཤེས་རྫོགས་པ་ཉིད་དུ་འགྱུར། །ལས་ལས་བྱུང་བར་བསྟན་པ་ཡི། །སྐྱེས་པ་བུད་མེད་གཟུགས་མང་ལ། །མཉེས་པ་ཉིད་དུ་མི་བྱ་འདི། །རྡོ་རྗེ་ལུས་ཅན་དམ་ཚིག་ཡིན། །ངན་རྟོག་བཟང་རྟོག་དྲ་བ་ཡི། །སེམས་ཀྱིས་

88-1-327a

སེམས་ཅན་རྣམས་ལ་ནི། །སྣ་ཚོགས་གདུང་བས་སུན་མི་འབྱུང་། །རྡོ་རྗེ་དང་ལྡན་དམ་ཚིག་ཡིན། །སྲེད་པས་བསྐྱེད་རྩུབ་ཕྲ་མ་ཡི། །ཚིག་དག་རྣམ་པར་མི་སྨྲ་ཞིང་། །མཉན་ན་བདེ་བ་བྱེད་པ་འདི། །རྡོ་རྗེ་ངག་ཅན་
དམ་ཚིག་ཡིན། །རྣམ་པར་སྣང་མཛད་ཆེན་འཁྲུག་མཆོག །ཤ་ཡི་ཁམས་ལ་གནས་པ་ཡིན། །རྐང་ལ་མི་འཁྲུག་རྒྱས་པ་སྟེ། །ཁྲག་ལ་རིན་ཆེན་འབྱུང་བ་གཙོ། །སེམས་ཅན་རྣམས་ཀྱི་རུས་ཕུང་གི། །རུས་གོང་ལ་ནི་འོད་
དཔག་མེད། །རྩ་ཡི་ཚོགས་རྣམས་རྣམ་འབྲེལ་ལ། །ཐུབ་པ་སྐྱེས་མཆོག་དོན་ཡོད་ལ། །དམ་ཚིག་ཤེས་པ་རྣམས་ལ་ནི། །གསང་ཆེན་པ་ཡིས་བསྟན་པ་འདི། །བློ་ལྡན་རྡོ་རྗེ་རྣམས་ཀྱིས་ནི། །རྟག་ཏུ་བརྟེན་ཅིང་བསྒོམ་པར་
བྱ། །འདོད་ཆགས་དེ་བཞིན་གཏི་མུག་རྨོངས། །སྲེད་དང་འདུ་བྱེད་རྣམ་སེལ་བའི། །ཆོས་ནི་རྣམ་པ་ལྔ་པོ་འདི། །ཐུབ་པ་སྐྱེས་མཆོག་རྣམས་ཀྱིས་གསུངས། །བཤང་གཅི་ཁུ་ཆུ་མཆིལ་མ་ཁྲག །འཛག་པ་འབྱུང་བ་བཞིས་
བསྡུས་པ། །བསྒོམ་པའི་བློ་གྲོས་རྟོགས་པ་ཡིས། །དམ་ཚིག་བརྟན་པར་བྱ་བ་སྟེ། །རྟག་ཏུ་བཟའ་ཞིང་སྦྱིན་པར་བྱ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་སྦྱིན་སྲེག་གི་ལེའུ་སྟེ་བདུན་པའོ།། །། 
དེ་ནས་གཞན་ཡང་བཤད་བྱ་བ། །འགྲོ་བ་མི་ཤེས་མུན་བསལ་ཕྱིར། །ཡེ་ཤེས་ཉི་མ་ཤར་བ་ལས། །ཀེག་བུ་མུན་པ་བསལ་ཚུལ་གསུངས། །གཤིན་རྗེའི་གཤེད་ལ་སོགས་པ་ཡི། །
མདོག་དང་ཕྱག་མཚན་ལ་སོགས་པ། །དེ་ཀུན་སྔོན་དུ་རྒྱས་པ་རུ། །བྱེ་བྲག་གིས་ནི་རྒྱས་པར་བསྟན། །དེ་ནི་ལས་ཀྱི་ཁྱད་པར་གྱི། །དབང་དུ་བྱས་པ་ཁྲོ་བོའི་ཚོགས། །གཞན་དུ་མ་གསུངས་གང་ཡིན་པ། །དེ་དག་འདི་རུ་བཤད་
པར་བྱ། །བྲུྃ་གྱི་ཡེ་ཤེས་ལས་བྱུང་བ། །གཙུག་ཏོར་གཟི་བརྗིད་ཕུང་པོ་སྟེ། །ཞལ་གསུམ་སེར་པོ་མདངས་དང་ལྡན། །ཕྱག་དྲུག་ཉི་མ་ལ་སོགས་པ། །འཛིན་ཅིང་སྐྱིལ་མོ་ཀྲུང་བཅས་པ། །རལ་པའི་གཙུག་ཏོར་གྱིས་

88-1-327b

བརྒྱན་ཅིང་། །འཇིག་རྟེན་ཁམས་ཀུན་འཁྲུག་བྱེད་པའི། །གཟུགས་ཀྱི་འཕྲོས་པས་ནམ་མཁའ་གང་། །རིག་མས་སྐུ་ལ་རབ་འཁྱུད་པས། །ཆགས་ཕྱིར་སྤྲོ་བའི་རྩོལ་བ་ཅན། །འདི་འདྲ་སྒོམ་པར་བྱེད་པ་ལ། །བགེགས་ཀྱིས་
གནོད་པ་ཡོང་མི་གོས། །སྐྱོན་མེད་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཡང་ནི་བྲུྃ་གྱི་ཡེ་ཤེས་ལས། །བྱུང་བ་སྔགས་ཀྱི་འཁོར་ལོ་ཅན། །ཞལ་གསུམ་གསེར་འདྲ་མདངས་པོ་ཆེ། །ཕྱག་དྲུག་འཁོར་ལོ་ལ་སོགས་པ། །
རོལ་པའི་གཙུག་ཏོར་གྱིས་བརྒྱན་པ། །འཛིན་ཅིང་སྟག་གི་སྨད་གཡོགས་ཏེ། །ཐོད་པའི་ཕྲེང་བས་སྐུ་ལ་བརྒྱན། །རིག་མ་དང་ལྡན་ཆགས་པ་པོ། །འཇོལ་སྒེག་ཉམས་ཀྱི་སྦྱོར་བ་མཛད། །འདི་བསྒོམ་སྤྲོ་བར་བྱེད་པ་ལ། །
ཉིན་དང་མཚན་དུ་རྡོ་རྗེ་སེམས། །འཁོར་བཅས་གནས་སུ་བྱོན་ནས་སུ། །རྟག་ཏུ་བསྲུང་བ་ཉིད་དུ་བྱེད། །བཀའ་བཞིན་བྱེད་པས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དེ་བཞིན་བྲུྃ་གྱི་ཡེ་ཤེས་ལས། །བྱུང་བའི་ཁྲོ་བོ་གཙུག་
ཏོར་རྒྱལ། །ཞལ་གསུམ་སེར་པོ་མདངས་དང་ལྡན། །ཕྱག་དྲུག་ལྕགས་ཀྱུ་ལ་སོགས་པ། །འཛིན་ཅིང་སྦྲུལ་གྱིས་ཡང་དག་བརྒྱན། །འོག་ཏུ་བགེགས་ཀྱི་གཙོ་མནན་ནས། །གད་མོའི་སྒྲས་ནི་འདེབས་པར་བྱེད། །རལ་
པའི་གཙུག་ཏོར་གྱིས་བརྒྱན་པ། །ཁྲོ་བོ་འདི་འདྲ་སྒོམ་བྱེད་པའི། །རྣལ་འབྱོར་གང་ལ་སངས་རྒྱས་ཀྱི། །སྤྲུལ་པའི་བགེགས་ཀྱང་རླག་བྱེད་ན། །གཞན་མ་རྣམས་ནི་སྨོས་ཅི་དགོས། །སྙིང་འགུགས་པ་རྡོ་རྗེ་ཞེས་བྱ་བའི་ཏིང་
ངེ་འཛིན་ཏོ། །བྲུྃ་ལས་ཡང་ནི་བྱུང་བ་ཡི། །གཙུག་ཏོར་དམ་ཚིག་སྤྱོད་པན་ཅན། །ཞལ་གསུམ་གསེར་ཞུན་མདངས་ལྡན་པ། །ཕྱག་དྲུག་ཀ་པཱ་ལ་སོགས་པ། །འཛིན་ཅིང་སྣ་ཚོགས་རབ་ཏུ་འབར། །རལ་པའི་གཙུག་ཏོར་གྱིས་
བརྒྱན་པ། །ཞབས་རྣམས་བསྒྱུར་ཞིང་རྣམ་པར་འཕེན། །སྤྲོ་དང་བསྡུ་བའི་བློ་གྲོས་ཅན། །འདི་འདྲ་གང་ཞིག་བསྒོམ་པ་ལ། །བི་ནཱ་ཡ་ཀ་ལ་སོགས་པའི། །བགེགས་ཀྱིས་སྐབས་ནི་མི་རྙེད་ཕྱིར། །ཇི་བཞིན་རབ་ཏུ་

88-1-328a

བསྒོམ་པར་བྱ། །གཞན་གྱིས་མི་ཐུབ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བྲུྃ་གྱི་ཡི་གེ་ལས་ཀྱང་བྱུང་། །མིང་གི་གཙུག་ཏོར་རྣམ་པར་འཐོར། །ཞལ་གསུམ་གསེར་ནི་བཙོ་མ་འདྲ། །ཕྱག་དྲུག་ཏྲི་ཤུ་
ལ་སོགས་པ། །འཛིན་ཅིང་སྲོག་སོང་སྟེང་ན་གནས། །རོལ་པའི་སྟོབས་ཀྱིས་བགེགས་མཆུ་བཅིངས། །རལ་པའི་གཙུག་ཏོར་གྱིས་བརྒྱན་པ། །སངས་རྒྱས་སྤྲིན་ནི་སྤྲོ་བའོ། །གང་ཞིག་དེ་འདྲ་སྒོམ་བྱེད་པའི། །རྣལ་འབྱོར་དེ་ཡིས་
གོ་ཆ་བགོས། །བསྲ་བའི་ངང་ཚུལ་ཅན་ཡིན་པས། །བགེགས་ལུས་གང་གིས་མི་གཡོའོ། །བགེགས་ལས་རྒྱལ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བྲུྃ་གྱི་ཡེ་ཤེས་མཐུ་ལས་བྱུང་། །གཙུག་ཏོར་རྣམ་པར་འཇོམས་པའི་མཆོག །
ཞལ་གསུམ་གསེར་འདྲའི་ཉི་འོད་མཚུངས། །ཕྱག་དྲུག་རྡོ་རྗེ་ལ་སོགས་པ། །འཛིན་ཅིང་ཚེམས་ཀྱིས་སྒྲོས་མནན་ཏེ། །ཆགས་ལྡན་རིག་མས་འཁྱུད་པའོ། །རལ་པའི་གཙུག་ཏོར་གྱིས་བརྒྱན་པ། །ཁྲག་ཅན་ལྗགས་ཀྱང་འདྲིལ་བ་
སྟེ། །བླ་མེད་བྱང་ཆུབ་ཐོབ་འདོད་པ། །འདི་འདྲ་སྒོམ་པར་བྱེད་པ་ལ། །བསྐལ་པ་བརྒྱད་ཅུའི་བར་དུ་ཡང་། །བགེགས་ཀྱི་གནོད་པ་ཡོང་མི་འོང་། །བགེགས་ཀྱི་སྟོང་པ་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཡང་ནི་བྲུྃ་གྱི་
ཡེ་ཤེས་ལས། །ཡང་དག་བྱུང་བའི་སྐབས་དཀར་པོ། །ཞལ་གསུམ་གསེར་ཞུན་ལྟ་བུར་གནས། །ཕྱག་དྲུག་གདུགས་ལ་སོགས་འཛིན་ཅིང་། །སྐྱབས་མེད་ཕོངས་པའི་སྐྱབས་མཛད་ཅིང་། །མ་ནིང་རྣམས་དང་ཟ་མ་ལ། །བུ་ནི་སྦྱིན་པར་
བྱེད་པ་པོ། །རལ་པའི་གཙུག་ཏོར་གྱིས་བརྒྱན་པ། །རིག་མ་དང་ལྡན་སྐུ་ཆེན་འདི། །རྣལ་འབྱོར་གང་གིས་སྒོམ་བྱེད་ཅིང་། །བཟླས་པ་རྩེ་གཅིག་ཏུ་བྱེད་ན། །བགེགས་ཀྱི་གནོད་པས་དེ་མི་རྫི། །རིན་ཆེན་གྱི་སྐྱབས་རྡོ་རྗེ་ཞེས་བྱ་བའི་ཏིང་ངེ་
འཛིན་ཏོ། །རྣལ་འབྱོར་ཁྱད་པར་ཅན་གྱིས་ནི། །འདི་རྣམས་བྱང་ཆུབ་བསྲུང་བའི་ཕྱིར། །འཁོར་ལོ་གཙོ་བོར་རབ་བསྒོམས་ན། །ནང་གི་བགེགས་ཀྱིས་ཡོང་མི་ཚུགས། །བྱང་ཆུབ་སྙིང་པོ་དོན་གཉེར་བས། །འདི་འདྲའི་འཁོར་ལོ་ཅན་

88-1-328b

བསྒོམས་ན། །བསྒྲིམས་ནས་རྣལ་འབྱོར་བསྒོམས་པ་ཡིས། །རིང་པོར་མི་ཐོགས་འདོད་པ་འཐོབ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་བྱང་ཆུབ་ཀྱི་སྙིང་པོའི་རྒྱན་གཙུག་ཏོར་འབྱུང་བའི་ལེའུ་སྟེ་བརྒྱད་པའོ།། །།   
དེ་ནས་ཡང་རྡོ་རྗེ་མཁའ་འགྲོ་མ་ཐམས་ཅད་འདུས་ནས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་རྡོ་རྗེ་འཛིན་པ་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །འདི་ཡི་དཔལ་ནི་གང་ཞིག་ལགས། །རྡོ་རྗེ་དང་ནི་
སྙིང་པོ་དང་། །དེ་བཞིན་རྒྱན་གྱི་དོན་ནི་ཅི། །ཀྱེ་ཧོ་མཆོག་དེ་བསྟན་དུ་གསོལ། །དེ་ནས་དེ་བཞིན་གཤེགས་པ་ཐམས་ཅད་ཀྱི་དབང་ཕྱུག་རྡོ་རྗེ་འཛིན་པས་དེ་དག་ལ་འདི་སྐད་ཅེས་བཀའ་སྩལ་ཏོ། །འདི་ནི་ཐུན་མོང་མ་ཡིན་པའི། །གསང་བའི་
རྒྱུད་དུ་རབ་སྦས་པ། །ཇི་བཞིན་གནས་པའི་དེ་ཁོ་ན། །ཡང་དག་བསྟན་གྱིས་རྩེ་གཅིག་ཉོན། །ལུས་ངག་ཡིད་གསུམ་བདེ་དམ་པས། །ལྷ་མོ་ལས་ནི་བསྐྱོད་བྱ་སྟེ། །བྱང་ཆུབ་ཆེན་པོ་བདེ་བ་ཡིས། །ཚུལ་བཞིན་དུ་ནི་སྔགས་པས་བྱ། །
བསྐུལ་བའི་སྙིང་པོས་འདི་སྨྲ་སྟེ། །ཛྫ་ཞེས་སྐད་ཅིག་སྐད་ཅིག་ཏུ། །རང་གི་གནས་ན་གནས་པ་ཡིན། །དེ་ཉིད་ལྷ་ཉིད་བསྐྱེད་པར་བྱ། །བཅུ་དྲུག་ཆ་དང་ཡང་དག་ལྡན། །ཟླ་བ་གསང་བའི་ཐིག་ལེ་ལ། །མེ་ཏོག་དང་ནི་འདྲ་བ་ཉིད། །རླུང་
གིས་ཕུལ་བས་བསྐྱོད་པར་བྱ། །དེ་བཞིན་བསྐྱོད་པས་བསྒྲུབ་པར་བྱ། །དེ་བཞིན་དུ་ཡང་བསྐུལ་བྱ་བ། །རྒྱུད་ཀྱི་ཕྲེང་ནི་འོད་གསལ་བཞིན། །སྟེང་དང་མདུན་དུ་རྩ་གཉིས་ལས། །བཅུ་དྲུག་གནས་སུ་ཡང་དག་གནས། །དེ་ལས་སྙིང་དབུས་
རབ་ཞུགས་ཏེ། །རླུང་གི་སྦྱོར་བས་ཕུལ་བྱས་པས། །སྟེང་དང་མདོག་རབ་མཛེས་རྫོགས་སྐུ། །བདག་གི་དཔལ་དུ་ཤེས་པར་བྱ། །དེ་ལས་བྱུང་བའི་དངོས་གྲུབ་ཆེ། །ནོར་བུ་ལ་གནས་རྟོག་བྲལ་བ། །ཐིག་ལེ་ཡིག་མེད་བསྡུས་པའི་སྐུ། །ལྷན་
ཅིག་སྐྱེས་པར་ཤེས་པར་བྱ། །དེ་ལ་དེ་ཡི་གཟུགས་ཀྱི་སྐུ། །ནམ་མཁའི་ཁམས་ཀུན་གང་བ་ཡི། །བྲལ་བའི་ཤེས་པས་དོན་བྱེད་པ། །གཞན་གྱི་དཔལ་དུ་ཤེས་པར་བྱ། །དེ་རྣམས་རྒྱུ་ལས་བྱུང་བ་ཡི། །ཡེ་ཤེས་ཤེས་རབ་ཤིན་

88-1-329a

དུ་གསང་། །གསང་བ་རྣམ་པར་འགྲུབ་པ་ཡི། །རྡོ་རྗེ་སྙིང་པོའི་རྒྱན་ཞེས་བྱ། །ལྷ་མོ་ལས་བྱུང་བདེ་དང་ལྡན། །འཇའ་ཚོན་ལྟར་གསལ་རྒྱུད་དག་པ། །སྣང་བའི་སྐུ་དེ་མི་ཤིགས་པ། །རྡོ་རྗེ་ང་ཡིས་ཡང་དག་བསྒྲགས། །
སྣང་ཞིང་སྲིད་པའི་ཆོས་རྣམས་ཀུན། །བསྡུས་ཕྱིར་བརྩེགས་པའི་སྐུ་དམ་པ། །རྟོག་བྲལ་རྒྱུད་དུ་སིམ་གནས་པ། །འབྱུང་ཕྱིར་སྙིང་པོ་ཞེས་སུ་བསྒྲགས། །དག་དང་མ་དག་ཐམས་ཅད་ལ། །འཁོར་བ་ཇི་སྲིད་བར་སྣང་བ། །གཉིས་
ཀ་མཛེས་པར་བྱེད་པས་ན། །རྒྱན་དུ་ཡང་དག་བསྒྲགས་པ་ཡི། །དཔལ་དང་རྡོ་རྗེ་སྙིང་པོ་དང་། །རྒྱན་ཞེས་བྱ་བ་བཞི་པོ་ནི། །འབྲེལ་ཅིང་གྲུབ་པར་བྱེད་པའི་ཕྱིར། །རྒྱུད་ཅེས་བྱ་བར་བཤད་པའོ། །ཆོས་ཀྱི་ཕུང་པོ་བརྒྱད་ཁྲི་དང་། །
བཞི་སྟོང་གི་ནི་གྲངས་སྙེད་ཀྱི། །མཚན་གྱི་དོན་ནི་འདི་དོན་དུ། །ཡང་དག་འདུས་པར་ངས་བཤད་དོ། །གཞན་དུ་དོན་ནི་མ་བསྒྲགས་པ། །བླ་མ་ལ་ནི་གུས་པ་ཡི། །སློབ་མ་ལ་ནི་མ་རྟོགས་པའི། །རྒྱུད་གཞན་དག་ཏུ་སྦས་པའོ། །
དོན་འདི་ཡང་དག་མ་ཤེས་ན། །ཇི་སྙེད་དོན་ནི་བསམ་ཡས་པ། །ཤེས་ཀྱང་དེ་ཡི་འབྲས་བུ་མེད། །དེ་འདོད་མཉེས་བྱས་ཡང་དག་བླང་། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་ཡེ་ཤེས་གསུམ་གྱི་མཚན་འབྱུང་བ་ཞེས་བྱ་བའི་ལེའུ་
སྟེ་དགུ་པའོ།། །། རྟག་པར་མི་ཕྱོགས་སྨྲ་བ་དང་། །བླ་མ་སྨོད་བྱེད་བརྩོན་པ་ལ། །དམ་ཚིག་ཕྱིར་ནི་ཡོངས་བསྒྲལ་བྱ། །དེ་ཡི་ཤ་ཁྲག་ཀླད་པ་རྣམས། །དྲངས་ཏེ་ཆོས་
ཀྱི་སྟོན་མོ་བྱ། །དེ་ལྟར་མ་བྱས་སྡུག་བསྔལ་ཚོགས། །གཏི་མུག་ཅན་དེས་ཐོབ་པར་འགྱུར། །ནད་ཐམས་ཅད་དང་ཁྲོས་ཆེན་དང་། །འཇིགས་དང་ཉེ་བར་འཚེ་བ་ཡི། །བསྐལ་པ་གྲངས་མེད་བྱེ་བ་རུ། །སྡུག་བསྔལ་ཆེན་པོར་རབ་སྙེད་ཅིང་། །
འོ་དོད་འབོད་པས་སྦྲུལ་གྱི་བརྒྱན། །བསྟིར་མེད་ཆེན་པོར་རྟག་པར་འགྲོ། །དེ་བས་ལས་འདིས་རྒྱས་གདབ་པོ། །བདག་ཉིད་རྡོ་རྗེ་མཁའ་འགྲོ་ཡི། །ཁྲོ་བོ་གཟུགས་ཅན་ཉིད་གྱུར་ནས། །ཨུཏྤལ་མཐིང་ག་འདྲ་བ་ཡི། །ཞལ་

88-1-329b

གསུམ་པ་ལ་ཕྱག་དྲུག་པ། །རྡོ་རྗེ་ཏྲི་ཤུལ་ཕུར་བུ་དང་། །ཐོད་པ་གྲི་གུག་འཁོར་ལོ་འཛིན། །མི་སྡུག་ཁྲོས་པ་ལྕེ་ལྔ་པ། །བསམས་ནས་དེ་འོག་ནམ་མཁའ་ལ། །བསྒྲུབ་བྱ་རྒྱས་པར་དམིགས་ནས་སུ། །རྡོ་རྗེ་ཕུར་པ་ལ་
སོགས་པ། །སེམས་ཅན་དཀྱིལ་འཁོར་གནས་པ་ལ། །སྒྲུབ་པོས་དེ་ཡི་ཉེས་པ་བསྒོ། །དེ་ནས་ཕྱག་མཚན་ཏྲི་ཤཱུལ་དང་། །ཕུར་བུ་དྲག་པོ་མཆོག་དག་གིས། །མགོ་དང་སྙིང་ག་ལྟེ་བ་དང་། །རྐང་པ་གཉིས་དང་ལག་པ་ཡི། །གནས་
ལྔ་རབ་ཏུ་ཕུག་བྱ་སྟེ། །ལྕེ་ལྔའི་འོད་ཟེར་ལྔ་པོ་ཡིས། །སྲིན་བུ་འཛའ་ལུ་ཀ་བཞིན་དུ། །ཁྲག་ཀུན་སྔགས་ཀྱིས་དྲངས་ནས་སུ། །ཐོད་པར་ཕབ་ནས་བཏུང་བར་བྱ། །དེ་བཞིན་ཤ་རྣམས་ཡང་བསྡུས་ནས། །བཟའ་བ་རུ་ནི་རབ་ཏུ་
བརྟག །རུས་པ་རྣམས་ཀྱང་འཚོས་བྱས་ནས། །ཤེས་པ་རྡོ་རྗེ་པད་མར་སྦྱར། །འདི་ནི་དོན་སྒྲུབ་རབ་བྱེད་པས། །ཟླ་བ་ཕྱེད་ནི་ཚུན་ཆད་ཀྱིས། །རྡོ་རྗེ་འཛིན་པ་ཆེན་པོ་ཡང་། །འཆི་བར་འགྱུར་བར་གདོན་མི་ཟ། །རྡོ་རྗེ་གསང་བ་འདི་
ལྟ་བུ། །བསྒྲུབ་བྱ་ལེགས་པར་བསྒྲུབ་བྱས་ནས། །ལས་ངན་དག་གིས་དེ་མི་འཁོལ། །སངས་རྒྱས་སུ་ནི་སྐྱེ་བར་འགྱུར། །རྣལ་འབྱོར་དེ་ཡང་དེ་ཡི་མཐུས། །ཁྲོ་བོ་མཁའ་འགྲོ་ཞེས་འགྱུར་ཏེ། །ཁམས་གསུམ་བསད་དང་གསོ་བ་
དང་། །སེམས་ཀྱི་རྡོ་རྗེ་བརྟན་བྱས་ནས། །སྐད་ཅིག་ཙམ་དུ་བྱེད་པར་འགྱུར། །གསལ་བར་ནུས་པ་གདོན་མི་ཟ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རྡོ་རྗེ་མཁའ་འགྲོ་ཁྲོ་བོའི་སྦྱོར་བས་དགྲ་བསད་པའི་ལེའུ་སྟེ་བཅུ་པའོ།། །། 
དེ་ནས་གཞན་ཡང་བཤད་བྱ་བ། །འདོད་ཆགས་ཐབས་ཆེན་པོ་ཡི་རྒྱུད། །གང་གིས་ལེགས་པར་ཤེས་ན་ནི། །ཚེ་འདིས་དངོས་གྲུབ་སྦྱིན་པར་བཤད། །གསང་བ་འདུས་པ་སྟོང་ཕྲག་གཅིག །རྡོ་རྗེ་
ཕྲེང་བ་འབུམ་ཕྲག་གསུམ། །དགོངས་པ་ལུང་སྟོན་སྟོང་ཕྲག་བཞི། །ལྷ་མོ་བཞིས་ཞུས་བརྒྱ་བདུན་བཅུ། །ཨུདྟར་ཏནྟྲ་ཉིས་བརྒྱ་བརྒྱད། །དེ་ཡི་ཉེ་བར་བཤད་པའི་རྒྱུད། །དམ་ཚིག་ཆེན་པོ་ལྔ་བཅུ་ལྔ། །རྡོ་རྗེ་ལྔ་འདུས་

88-1-330a

སྟོང་ཕྲག་གཅིག །ཀུན་ལས་འདུས་པ་འབུམ་ཕྲག་གཅིག །མཉམ་ཉིད་རྣམ་རྒྱལ་ཉིས་རྒྱ་བཅུ། །ཟླ་གསང་ཐིག་ལེ་སྟོང་ཕྲག་བདུན། །རྡོ་རྗེ་ས་འོག་རྒྱ་ཉི་ཤུ། །ཅོད་པན་རྡོ་རྗེ་བདུན་རྒྱ་ལྔ། །ཁྲོ་ཟླ་ཐིག་
ལེ་འབུམ་ཕྲག་ལྔ། །རྡོ་རྗེ་རྣམ་རྒྱལ་རྒྱ་དགུ་བརྒྱ། །མཉམ་ཉིད་གསང་བ་སྟོང་ཕྲག་ལྔ། །རྡོ་རྗེ་གསང་མཛེས་སྟོང་ཕྲག་བདུན། །ནོར་བུ་གསང་ཐིག་འབུམ་འཕྲག་བཅུ། །སྣང་མཛད་རྫུ་འཕྲུལ་སྟོང་དང་རྒྱ། །
རྡོ་རྗེ་གསང་རྒྱན་སྟོང་ཕྲག་གཅིག །རྡོ་རྗེ་ཐོད་པ་ཉིས་རྒྱ་རྒྱ། །དེ་ཉིད་རྒྱ་སྟོང་རྒྱ་སྟོང་བདུན། །དམ་ཚིག་མངོན་བརྒྱན་སྟོང་ཕྲག་གསུམ། །འཇམ་དཔལ་དཔའ་བོ་འབུམ་ཕྲག་གཅིག །གསང་ཆེན་འདུས་པ་བརྒྱ་ལྔ་བཅུ། །རིན་
ཆེན་སྡོང་པོ་དགུ་བརྒྱ་བདུན། །དུས་ཀྱི་ཐིག་ལེ་བརྒྱ་བརྒྱད་བཅུ། །ལྷ་མོ་བསྟན་ཆོས་ལྔ་བརྒྱ་བདུན། །འདི་རྣམས་དགོངས་པའི་བྱེ་བྲག་གིས། །ང་ཡིས་ཡང་དག་བསྟན་པར་བྱ། །འདི་ནི་གཉིས་གཉིས་འཁྱུད་པ་ཡིས། །
རྒྱུད་ཀྱི་དབྱེ་བ་བསྟན་པའོ། །དེ་བཞིན་དུ་ནི་ཡན་ལག་བཅངས། །རྒོད་དང་བལྟས་པས་ཤེས་པར་བྱ། །དེ་བཞིན་ཞེ་སྡང་གཏི་མུག་གིས། །རྒྱུད་རྣམས་ཀུན་ཀྱང་ཤེས་པར་བྱ། །མཁའ་འགྲོ་མ་ཡི་རྒྱུད་ཀུན་
ཡང་། །འདི་ཡི་རིམ་པས་ཤེས་པར་བྱ། །ཕྱི་ནང་དབྱེ་བར་ཤེས་པ་ཡིས། །རྒྱུད་ཀྱི་དབྱེ་བ་ཤེས་པར་བྱ། །ནང་དུ་བསྟན་པའི་བླ་མ་ལས། །ཡང་དག་བླངས་ཏེ་བསྒྲུབ་པར་བྱ། །ཅི་བཞིན་གནས་པ་ལ་དགོངས་ཏེ། །
བདེ་བར་གཤེགས་པས་རྒྱུད་ཀུན་བསྟན། །རྡོ་རྗེ་སྙིང་པོའི་བརྒྱན་གྱི་རྒྱུད། །འདིའི་རྒྱུད་ནི་མཁའ་འགྲོ་ཕ། །རྒྱུད་རྣམས་ཀུན་གྱིས་ཕྱི་མོ་སྟེ། །གཞན་དུ་མ་བསྒྲགས་དོན་གང་ཞིག །འདི་རུ་ཡང་དག་བསྟན་པ་ཏེ། །རྣལ་འབྱོར་
གང་ཞིག་ལེན་པ་འམ། །སྒོམ་པར་བྱེད་དམ་འཆད་པ་འམ། །ཀློག་པར་བྱེད་པ་རྣལ་འབྱོར་ཆེ། །དེ་ཡང་དེ་དང་འདྲ་བར་འགྱུར། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རྒྱུད་ཐམས་ཅད་དབྱེ་བའི་ལེའུ་སྟེ་བཅུ་གཅིག་པའོ།། །།

88-1-330b

དེ་ནས་གཞན་ཡང་བཤད་བྱ་བ། །སྣ་ཚོགས་མདོ་དང་རྒྱུད་རྣམས་ཀྱིས། །འདི་རུ་དེས་ཀྱང་ཡོངས་རྫོགས་བྱེད། །ཚུལ་ཁྲིམས་ཀྱིས་ནི་བསླབ་པ་གསུམ། །དགེ་བའི་ཆོས་ནི་སྡུད་པ་དང་། །སྡོམ་པ་
ཉི་ཤུ་ལ་སོགས་དང་། །སེམས་ཅན་དོན་བྱེད་པའི་ཚུལ་ཁྲིམས། །བྱང་ཆུབ་སེམས་དཔའ་རབ་སྦྱིན་པ། །ལུས་ངག་ཡིད་གསུམ་རབ་བྱུང་བའི། །སྡོམ་པ་དེས་ཀྱང་མཁའ་འགྲོ་ཡི། །རྒྱུད་རྣམས་ཡང་དག་
སྦྱོར་བར་བྱེད། །ཟླ་བ་སྨྱུང་དང་གཙང་སྦྲ་བསྡམ། །གྲོང་དང་གནག་ལྷས་ཐང་ལའམ། །ལུས་དང་ངག་དང་ཡིད་ཀྱིས་ནི། །གནོད་པ་དག་ནི་ཡོང་མི་བྱེད། །དེ་བཞིན་གཤེགས་པའི་སྡོམ་པ་མཆོག །
བླ་ན་མེད་པའི་བྱང་ཆུབ་སེམས། །འགྲོ་བའི་དོན་བྱེད་བྱང་ཆུབ་སེམས། །བྱང་ཆུབ་སེམས་ནི་རབ་ཏུ་བཟུང་། །རྡོ་རྗེ་མི་སྐྱོད་རིགས་ཆེན་པོ། །རྡོ་རྗེ་ཆེ་དང་དྲིལ་བུ་དང་། །སློབ་
དཔོན་ཡང་ནི་བཟུང་བྱས་ལ། །དེ་ཡི་ཡོན་ཏན་ཐོབ་པར་བྱེད། །རིན་ཆེན་ཏོག་གི་རིགས་མཐོན་པོ། །ཉིན་དང་མཚན་མོ་ལན་གསུམ་དུ། །ཟང་ཟིང་མི་འཇིག་ཆོས་དང་བྱམས། །
བྱིན་པས་དེའི་ཡོན་ཏན་ཐོབ། །པད་མོ་སྣང་བའི་རིགས་དག་ལ། །ཕྱི་དང་ནང་དང་གསང་བ་ཡི། །དམ་ཚིག་རབ་ཏུ་བཟུང་བ་ཡིས། །བླ་མེད་བྱང་ཆུབ་ཐོབ་པར་བྱེད། །
རྔ་སྒྲ་ལས་ཀྱི་རིགས་མང་པོ། །དམ་ཚིག་དང་ནི་སྡོམ་པར་ལྡན། །སྙེན་བཀུར་མཆོད་པ་སེམས་ཅན་དོན། །བྱས་པས་དེའི་ཡོན་ཏན་ཐོབ། །སྲོག་མི་གཅོད་ཅིང་གཡེངས་མི་བྱ། །
མ་བྱིན་མི་ལེན་རྫུན་མི་སྨྲ། །ཕྲ་དང་ཀྱལ་ཚིག་རྩུབ་པོ་དང་། །སྨྲ་བ་མི་བྱ་བརྣབ་སེམས་དང་། །གནོད་སེམས་ལོག་པར་ལྟ་བ་རྣམས། །ནམ་ཡང་བྱ་བ་མ་ཡིན་ནོ། །དཀོན་མཆོག་

88-1-331a

གསུམ་ནི་ཡོང་མི་སྤང་། །ལྷ་དང་བླ་མ་དེ་བཞིན་ནོ། །ཉེས་པ་ཀུན་གྱི་རྩ་བའི་ཕྱིར། །ཆང་ཡང་རྣམ་པར་སྤང་བར་བྱ། །ཕྱག་རྒྱ་བཞོན་པ་མཚོན་ཆ་སོགས། །མཚན་མ་འམ་ནི་ལྷ་ཡི་གྲིབ། །འགོམ་དང་བཟའ་བར་
མི་བྱ་བ། །དེ་ལ་སོགས་པ་མཐའ་ཡས་པའི། །སྡོམ་པ་གང་དེ་གསུངས་པ་རྣམས། །འདི་རུ་དང་པོའི་ལས་ཅན་ལ། །དེ་ཡིས་ཡང་དག་འཇུག་པར་བྱེད། །ཐུན་མོང་མ་ཡིན་ཕས་ཕམ་པ། །བཅུ་བཞིར་གྲགས་པ་གང་འདི་ནི། །སྔགས་
པས་དོན་ཀུན་འགྲུབ་བྱེད་པས། །སྤང་ཞིང་དོར་བར་མི་བྱའོ། །སློབ་དཔོན་སྙིང་ནས་སྨོད་པ་དང་། །བདེ་གཤེགས་བཀའ་ལས་འདའ་བྱེད་དང་། །ཞེ་སྡང་གིས་ནི་མཆེད་སུན་འབྱིན། །བྱམས་སེམས་མེད་པར་སེམས་ཅན་སྤངས། །བྱང་ཆུབ་
སེམས་ཆེན་འདོར་བ་དང་། །བདག་གཞན་གྲུབ་པའི་མཐའ་སྨོད་བྱེད། །སྣོད་མི་རུང་ལ་གསང་བ་བསྟན། །རྒྱལ་བའི་བདག་ཉིད་ཕུང་པོ་སྨོད། །དག་པའི་ཆོས་ལ་སོམ་ཉི་བྱེད། །གསུམ་ལྡན་ཁྲོ་ལ་བྱམས་ལྡན་ཏེ། །སྟོང་པ་ཐལ་བྱུང་
ལ་རྟོག་པ། །དད་ལྡན་སེམས་ནི་སུན་འབྱིན་བྱེད། །དམ་ཚིག་དང་ལྡན་རྩེ་མི་བྱེད། །ཤེས་ལྡན་བུད་མེད་སྨོད་པར་བྱེད། །སྔགས་པས་དེ་དག་ཡོངས་སྤངས་ནས། །ངེས་པར་དངོས་གྲུབ་ཐོབ་པར་བྱེད། །དེ་ལ་སྔགས་པ་ཡོང་འདས་ནས། །
ངེས་པར་བདུད་དང་ཕྲད་པར་འགྱུར། །ནད་དང་སྡུག་བསྔལ་འཕེལ་འགྱུར་ཏེ། །བསྟིར་མེད་སྤྱིའུ་ཚུགས་དམྱལ་བར་འགྲོ། །སྦོམ་པོ་ལྟུང་བྱེད་ཉེས་དམིགས་ཀྱང་། །དེ་དང་འདྲ་བར་ཤེས་པར་བྱ། །དམ་ཚིག་མི་ལྡན་རིག་མར་བསྟེན། །
ཚོགས་ཀྱི་འཁོར་ལོར་རྩོད་པར་བྱེད། །གསང་བའི་ཆོས་ནི་སྟོན་པ་དང་། །དད་ལྡན་རྣམས་ལ་གཞན་དུ་སྟོན། །ཉན་ཐོས་ནང་དུ་ཡུན་རིང་གནས། །སྣོད་མི་རུང་ལ་གསང་བ་བསྟན། །ཁ་ན་མ་ཐོ་སྦོམ་འགྱུར་ཏེ། །སྔགས་པ་དེ་
ཡི་དམ་སྡོམ་ཟད། །ཟད་པས་འགྲུབ་པར་ཡོང་མི་འགྱུར། །དེ་བས་ཉིན་རེ་ལན་གསུམ་དུ། །ཁ་ཏོན་གྱིས་ཀྱང་བཀླག་པར་བྱ། །དཀྱིལ་འཁོར་མཐོང་དང་ཞུགས་པ་དང་། །དབང་བསྐུར་བ་ལ་སོགས་ཚུལ་གྱི། །

88-1-331b

རྡོ་རྗེ་མཁའ་འགྲོ་ཐོབ་པ་གཞན། །བྱང་ཆུབ་སེམས་དང་ཉན་ཐོས་དང་། །བྱ་དང་གཉིས་ཀ་རྣལ་འབྱོར་རྒྱུད། །དགོངས་གསུངས་རྣམས་ཀྱིས་དེ་ལྟ་མིན། །དེ་ལྟ་བས་ན་སྡོམ་པའི་མཆོག །ང་ཡིས་ཡང་དག་
བསྟན་པར་བྱ། །དྲི་ཆེན་དྲི་ཆུ་རཀྟ་དང་། །ཤེས་དང་བྱང་ཆུབ་སེམས་རྣམས་ནི། །བཟའ་བའི་སྦྱོར་བས་ཡང་དག་བཟའ། །ལྟོ་ཡི་ཡེ་ཤེས་མིས་སྦྱངས་ཕྱིར། །ཕྱི་རོལ་ཟས་ལས་ཁྱད་པར་འགྱུར། །དེ་བཞིན་གླང་
ཆེན་རྟ་ཤ་དང་། །བ་ལང་ཁྱི་ཤ་ཤ་ཆེན་རྣམས། །ཡེ་ཤེས་ལྔ་ཡི་ངོ་བོའི་ཕྱིར། །དགའ་བའི་སེམས་ཀྱིས་བཟའ་བར་བྱ། །དེ་བཞིན་སེམས་ཅན་བསད་པར་བྱ། །མ་བྱིན་པར་ཡང་བླང་བར་བྱའོ། །བུད་མེད་
ཐམས་ཅད་འདོད་པ་སྤྱོད། །བརྫུན་ཚིག་དག་ཀྱང་སྨྲ་བར་བྱ། །དེ་ལྟར་བྱས་པས་སངས་རྒྱས་དང་། །བྱང་ཆུབ་སེམས་དཔའ་མཉེས་པར་འགྱུར། །སེམས་ཅན་རྣམས་ཀྱང་ཚིམ་ཞིང་དགའ། །དེ་བཞིན་རྣལ་འབྱོར་སྙིང་པོ་
ཡིས། །སངས་རྒྱས་དང་ནི་བྱང་ཆུབ་སེམས། །རང་འདྲེན་ཉན་ཐོས་སྐུ་གཟུགས་སོགས། །རང་ཉིད་དག་པ་གསུམ་སྦྱོར་བས། །ཕྱག་བྱས་ན་ནི་མི་རུང་འགྱུར། །ཀུན་དུ་རྡོ་རྗེ་སེམས་དཔའ་ཡི། །ལུས་ངག་ཡིད་ཀྱི་དཀྱིལ་
འཁོར་ལས། །རང་ཉིད་བསམ་གཏན་གསུམ་སྦྱོར་པོས། །དབྱེར་མེད་བློ་ཡིས་མི་བྱའོ། །དཀྱིལ་འཁོར་དག་ཀྱང་མི་བྲིའོ། །གླེགས་བམ་དག་ཀྱང་མི་ཀླག་གོ། མཆོད་རྟེན་ལས་ཀྱང་ཡོང་མི་བྱ། །ལག་པའི་ཕྱག་རྒྱ་
རྣམས་ཀྱང་སྤང་། །ཉིན་རེ་ཞིང་ནི་དུས་བཞི་རུ། །བུ་མོ་ལེགས་པར་གོམས་པ་ལས། །ག་བུར་ཙན་དན་ཁས་བླངས་ཏེ། །ཆོ་ག་བཞིན་དུ་ལུས་འཁོར་མཆོད། །རོལ་མོའི་ཐབས་ནི་སྣ་ཚོགས་པ། །
ང་ཡི་རྒྱུད་ལས་རབ་བསྟན་པས། །བཅུ་དྲུག་ཐིག་ལེ་ངལ་སོ་ལས། །སྔགས་ཀྱི་སྙིང་པོ་བཏག་པར་བྱ། །བླ་མ་དམ་པ་ཐུགས་རྗེ་ཆེས། །ཡང་དག་བསྟན་པ་ལ་དམིགས་པས། །ཕྱིན་ཅི་ལོག་ཁུར་ཡོངས་

88-1-332a

འདོར་ཏེ། །རྡོ་རྗེ་འཛིན་པ་ང་འདྲར་འགྱུར། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་དམ་ཚིག་དང་སྡོམ་པ་དབྱེ་བའི་ལེའུ་སྟེ་བཅུ་གཉིས་པའོ།། །།   
དེ་ནས་རོ་ལངས་ཆེན་མོ་ཡི། །སྒྲུབ་པ་ཡང་དག་བཤད་པར་བྱ། །སྒྲུབ་པོས་ལེགས་པར་ཤེས་གྱུར་ན། །དངོས་གྲུབ་ཐོབ་པར་འགྱུར་བའོ། །ནག་པོ་ཡི་ནི་ཚེས་བརྒྱད་དང་། །ཡང་ན་བཅུ་བཞི་གང་ཡང་རུང་། །ཤིང་གཅིག་
དུར་ཁྲོད་མ་མོ་འམ། །ཡང་ན་མི་མེད་གྲོང་བར་དུ། །སྔོན་དུ་སྒྲུབ་པའི་བདག་ཉིད་ཅན། །ལས་ཀུན་འགྲུབ་པར་བྱེད་པར་སྒྲུབ། །མདའ་མཁན་མ་དང་སྨེ་ཤ་ཅན། །གདོལ་པ་མོ་དང་གར་མཁན་སོགས། །མདུན་གྱི་སོ་ལ་ལྷག་
ཡོད་པ། །བྱད་དང་མདངས་ལྡན་རྨ་མེད་མ། །ལོ་ནི་སུམ་བཅུ་རྩ་གཉིས་བསྔགས། །ཡང་ན་ཉི་ཤུ་རྩ་ལྔའོ། །ཡང་ན་ཆུ་དང་དང་པོར་སྐྱེས། །སྦྱངས་ནས་ཤི་བ་མ་སྦགས་པ། །ཡང་དག་བླངས་ཏེ་ཕ་བོང་སྟེང་། །གཞན་ཡང་བུ་མོ་
སྐྲ་བཟུང་སྟེ། །ལྷ་བཞད་དང་ནི་དབང་པོ་ལག །དཀར་པོ་དང་ནི་རི་སྒྲ་དང་། །གྲུ་གནོན་ཆུ་ཡིས་བཀྲུ་བར་བྱ། །དེ་ནས་ཙན་དན་དཀར་པོ་ཡིས། །བུ་མོ་ལུས་བྱུགས་རྒྱན་དང་གོས། །ཡང་དག་བརྒྱན་ཏེ་མདུན་བཞག་ནས། །
དཀྱིལ་འཁོར་འཇིགས་པ་བྲི་བྱ་སྟེ། །རྩ་སོགས་གསང་སྔགས་རབ་ཏུ་བཟླ། །འབྱུང་པོའི་གཏོར་མ་ཡང་བྱིན་ཏེ། །ཤ་ན་ནག་པོ་མདངས་དང་ལྡན། །མྱོས་བྱེད་བསྲེགས་པ་རོ་ཡི་ཁར། །མཚན་གཅིག་ཐོག་ཐག་སྦྱིན་སྲེག་
བྱ། །དེ་ནས་ཐོ་རས་དུས་སུ་ཡང་། །ཁྲག་ཆེན་ཕྱོགས་བཞིར་གཏོར་བྱས་ནས། །མར་ཁུ་ཆེན་པོ་རོ་ལ་བསྐུ། །དེ་ནས་རོ་དེ་ལངས་གྱུར་ཏེ། །ཁྲོ་དང་ལྡན་པའི་ཨག་ཙར་གྱིས། །ས་གསུམ་མོ་ཡི་སྒྲས་འགྱེངས་བྱེད། །དེ་ཚེ་
སྒྲུབ་པོ་སྐྲག་མི་བྱ། །མཱ་མ་ཀཱི་ཡི་སྦྱོར་བ་སོགས། །བསྲུང་བའི་འཁོར་ལོས་སྲུང་བར་བྱ། །སྐྲག་ན་དེ་མ་ཐག་ཏུ་གསོད། །དེ་ཚེ་བསྲུང་བ་བསྲུང་བྱས་ནས། །བདག་ཉིད་ལངས་ཏེ་དེ་ཡི་མགོར། །ཡུངས་ཀར་གྱིས་ནི་བརྡེག་པར་

88-1-332b

བྱ། །དེ་ནས་དེ་ནི་བབས་གྱུར་ཏེ། །སྒྲུབ་པ་པོ་ཡི་མདུན་གནས་ནས། །བཀའ་ནོད་འདི་སྐད་སྨྲ་བར་བྱེད། །སེམས་ཅན་ཆེན་པོ་ཁྱོད་ཅི་འདོད། །བདག་ལ་ཡང་དག་བཀའ་སྩོལ་ཅིག །རལ་གྲི་མིག་སྨན་ས་འོག་གམ། །
རྐང་མགྱོགས་དེ་བཞིན་བཅུད་ཀྱིས་ལེན། །མི་སྣང་འགུགས་པ་ལས་གང་དག །བདག་གིས་གཅིག་ཅིག་སྦྱར་བར་བྱ། །དེ་ནས་སྒྲུབ་པོ་དེ་ཡིས་ཀྱང་། །གང་འདོད་སྨྲས་ནས་ཅང་ཏེའུ་བརྡུང་། །དེ་ནས་རོ་ལངས་ཁ་
དེ་ནས། །དུ་བ་འཐུལ་ཞིང་མེ་འབར་བ། །དེ་ནས་སྦྲུལ་ནག་ལྟ་བུ་རུ། །རོ་ཡི་ཁ་ནས་འབྱུང་བར་བྱེད། །དེ་དེ་སྒྲུབ་པོས་ཁ་ཡིས་བླང་། །བྱུང་སྟེ་གསེར་གྱི་རལ་གྲིར་འགྱུར། །དེ་ཐོགས་ཚངས་པའི་འཇིག་རྟེན་ཁམས། །
སྟེང་དུ་ངེས་པར་འགྲོ་བར་བྱེད། །དེ་བཞིན་ཀུན་དུ་འགྲོ་བར་བྱེད། །དེ་བཞིན་རྫས་ཀུན་གང་ལ་བསྟན། །ཐམས་ཅད་གསེར་འགྱུར་རྩི་ལྟ་བུ། །དེ་བཞིན་ཐབས་སྒྲུབ་དེ་བྱ་ན། །རོ་ནི་སྔ་མཁོ་བཞིན་འགྱུར་ཏེ། །
དེ་ཡིས་སྦྱིན་སྲེག་རབ་བྱས་ནས། །དཀྱིལ་འཁོར་ཡང་དག་ཚིམ་པར་བྱ། །དེ་བས་འདི་ནི་སྒྲུབ་པའི་མཆོག །དོན་ཀུན་ཡང་དག་འགྲུབ་བྱེད་པ། །ལས་ཐམས་ཅད་ཀྱི་གཙོ་བོ་སྟེ། །བཅོམ་ལྡན་རྡོ་རྗེ་སེམས་དཔས་
གསུངས། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་རོ་ལངས་ཆེན་མོའི་ལེའུ་སྟེ་བཅུ་གསུམ་པའོ།། །། ད་ནི་ང་ཡིས་
སྒྲུབ་པོ་ཡི། །དངོས་གྲུབ་སློབ་དཔོན་ལས་བྱུང་ཕྱིར། །རྒྱུད་རྣམས་ཀུན་ལས་གསུངས་པ་ཡི། །སློབ་དཔོན་བསྐུར་བའི་ཆོ་ག་བཤད། །སློབ་དཔོན་མེད་པར་གྱུར་ན་ནི། །དངོས་གྲུབ་ཐོབ་པར་མི་འགྱུར་བས། །
སློབ་དཔོན་གྲངས་དང་མཚན་ཉིད་ནི། །ཡིད་གཅིག་བསྡུས་ལ་མཉན་པར་གྱིས། །དམ་སྡོམ་གྱི་ནི་སྣོད་གཙང་ལ། །སློབ་དཔོན་མཚན་ཉིད་ཡོངས་རྫོགས་པར། །བྱེད་ཅིང་དང་པོ་ལས་འཇུག་པར། །བྱེད་པ་རྒྱུ་ཡི་སློབ་དཔོན་ནོ། །

88-1-333a

རི་བོང་འཛིན་པ་སྐུལ་བྱེད་ཅིང་། །དེ་ཡི་སྒྲུབ་པོ་ཞིང་དག་ཅིང་། །ཡེ་ཤེས་སྒྱུ་མའི་སྣོད་རུང་བྱེད། །རྐྱེན་གྱི་སློབ་དཔོན་ཆེན་པོའོ། །ལྷན་ཅིག་ཉན་པར་གང་གྱུར་པ། །དེ་ལས་དགའ་བ་ཡང་དག་ཐོབ། །
ཐོབ་པས་ཡང་དག་རབ་མཐར་ཕྱིན། །ལྷན་ཅིག་བྱེད་པའི་སློབ་དཔོན་ནི། །མི་འགྱུར་བྱམས་ལྡན་ཤེས་རབ་ཅན། །སྔགས་རྒྱུད་སྦྱོར་ཤེས་དཀྱིལ་འཁོར་མཁས། །དེ་ཉིད་བཅུ་ཤེས་ཐེག་ཆེན་དགའ། །གསང་བ་ཟུངས་ཐུབ་
སློབ་དཔོན་ཡིན། །མིག་བཟང་ཡ་སོ་བཅུ་དྲུག་པ། །ཁུ་འཕྲིག་རྟོག་པ་ཡང་དག་སྤངས། །བླ་མ་དགའ་བ་དད་མོས་ཅན། །ཤིན་དུ་རྒྱན་གྱིས་རབ་བརྒྱན་པ། །དད་ལྡན་སྦྱོར་བ་ལ་གོམས་པ། །གཟུགས་བཟང་
འདོད་ཆགས་ཀྱིས་མྱོས་བྱེད། །ཤིན་དུ་དུལ་བ་ཁྱད་པར་ཅན། །བསྐུར་བའི་གནས་སུ་ཡང་དག་བླངས། །དགེ་དང་བསྒོམ་པ་ལ་དགའ་བ། །རྟག་ཏུ་བླ་མ་ལ་གུས་པའི། །སློབ་མས་བླ་མ་འདི་ལྟར་བལྟ། །བླ་མ་
སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང་། །དེ་བཞིན་གཤེགས་པ་རིན་ཆེན་འབྱུང་། །དེ་ནི་ཡེ་ཤེས་རྒྱ་མཚོ་ཆེ། །ཡིད་བཞིན་ནོར་བུ་རིན་ཆེན་སྦྱིན། །དེ་ཡི་ཡོན་ཏན་ཐམས་ཅད་གཟུང་། །སྐྱོན་ཀུན་
སེམས་ཀྱིས་ཀྱང་མི་བསམ། །ཡོན་ཏན་བཟུང་ནས་དངོས་གྲུབ་འཐོབ། །སྐྱོན་གྱིས་དངོས་གྲུབ་ཉམས་པར་བྱེད། །མཆོད་རྟེན་བཤིག་དང་སྡིག་འདྲའི་ཕྱིར། །དེ་ཡི་གྲིབ་མའང་མི་འགོམ་སྟེ། །སྟན་དང་ལྷམ་དང་བཞོན་
པ་དང་། །འགོམ་པར་བྱ་བ་སྨོས་ཅི་དགོས། །རྒྱུ་བ་དང་ནི་མི་རྒྱུ་བའི། །མཆོག་ཀུན་དེ་ཡིས་སྤངས་པར་འགྱུར། །སློབ་དཔོན་སྨོད་པར་བྱེད་པ་དེ། །རྨི་ལམ་དུ་ཡང་མཐོང་མི་བྱ། །དེ་ནི་བགེགས་དང་ལོག་འདྲེན་འཛིན། །
རིམས་དང་སྤྱུག་དང་གཤིན་རྗེས་འཛིན། །འཆི་བར་རབ་ཏུ་འགྱུར་བ་སྟེ། །ངན་པ་གཏུམ་པོ་བླུན་ཆེན་ཏེ། །ཕྱོགས་བཞི་དག་ཏུ་སོང་གྱུར་ཡང་། །བློ་ལྡན་རྣམས་ཀྱིས་མི་བསྲུང་བར། །མདུང་ལ་སོགས་པའི་མཚོན་

88-1-333b

ཆ་ཡིས། །ཁ་ན་མ་ཐོ་བྱེད་པ་བསད། །མདོ་སོགས་བསྟན་པའི་དམྱལ་བ་རུ། །སློབ་དཔོན་སྨོད་པར་བྱེད་པ་དེ། །གནས་པར་འགྱུར་བར་ང་ཡིས་བསྟན། །དེ་བས་བླ་མའི་ཞབས་དྲུང་དུ། །བག་མ་བཞིན་དུ་ངོ་ཚ་བསྲུང་། །
གློ་དང་རྒོད་དང་ལུད་པ་སོགས། །ཁ་ལ་ལག་པས་བཀབ་ནས་སུ། །ཤིན་དུ་འཇམ་པར་སྨྲ་བར་བྱ། །མགོ་ཐོད་བཅིང་དང་མཚོན་བྱུག་པ། །བླ་མའི་དྲུང་དུ་མི་བྱའོ། །བྲོ་བརྡུང་བ་དང་བརྐམ་ཚིག་དག །ཐོས་པའི་ཡུལ་ནས་མི་བྱའོ། །
མདུན་འགྲོ་བ་དང་རྐང་པ་བརྐྱང་། །ཡང་དག་ཉིད་དུ་མི་བྱའོ། །ལས་ནི་གང་དག་བྱེད་པ་འམ། །མཉན་པ་ལ་སོགས་འདོད་པ་ལ། །གཟུང་ཕྱིར་ཐལ་མོ་མ་བཤིག་པར། །གནས་ནས་ལངས་ཏེ་མཐོང་ཡུལ་དུ། །རྒྱབ་ཀྱིས་ཕྱོགས་པར་མི་བྱ་
སྟེ། །མཚན་མོ་དང་ནི་ཆུ་བརྒལ་དང་། །གཅོང་རོང་དག་ཏུ་གནས་གྱུར་ན། །བཀའ་ལུང་གཉེར་དུ་དགུམ་པའི་ཕྱིར། །མདུན་དུ་འགྲོ་བ་ཉེས་མི་འགྱུར། །དེ་བས་ཐབས་ནི་ཐམས་ཅད་ཀྱིས། །རྡོ་རྗེ་འཛིན་པ་བླ་མ་མཆོག །རྗེས་སུ་མཐུན་པས་
མཉེས་པར་བྱ། །དེ་མཉེས་སངས་རྒྱས་ཐམས་ཅད་མཉེས། །གང་གིས་སློབ་དཔོན་ཡང་དག་སྨད། །དེ་ཡིས་རྒྱུད་ཀུན་བསྒྲུབ་པའི་མཆོག །གཉིད་དང་འདུ་འཛི་རྣམ་སྤངས་ཏེ། །བསྐལ་པ་སྟོང་དུ་ལེགས་བསྒྲུབས་ཀྱང་། །དམྱལ་སོགས་
སྒྲུབ་པར་བྱེད་པའོ། །དེ་ཕྱིར་ཀུན་གྱིས་རབ་བསྒྲིམས་ཏེ། །བསམ་པ་འབྲས་བུ་སྨིན་བྱེད་པའི། །སངས་རྒྱས་འབྲས་བུ་འདོད་པ་ཡིས། །སེམས་ཅན་དད་དང་ལྡན་པས་མཆོད། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་བླ་མ་བཀུར་བའི་
ལེའུ་སྟེ་བཅུ་བཞི་པའོ།། །།   རྡོ་རྗེ་པད་མོ་སྦྱོར་བ་ལས། །ཡང་དག་ཡེ་ཤེས་སྐྱེ་འགྱུར་བས། །སྒྱུ་མའི་མཆོག་ནི་བུད་མེད་དེ། །དེ་ཡི་མིང་དང་མཚན་ཉིད་བསྟན། །ཧ་སྟི་ནི་དང་ཤངྐི་ནི། །ཀ་མ་ལ་དང་ཙི་ཏྲ་ན། །ཐམས་
ཅད་རིགས་ནི་བཞིར་འགྱུར་ཏེ། །ཧ་སྟི་རཀྟ་རི་ཆེ་བ། །སྦོམ་མོ་འདོད་ཆགས་ཡང་དག་ཆེ། །པད་ཡངས་ཁ་ནས་ཤ་རུལ་བྲོ། །དཀར་འཆང་མཐའ་ཕྲ་གོ་སྦོམ་བྱེད། །ཤངྐ་རཀྟ་རོ་སྐྱུར་བ། །རྐེད་ཕྲ་སྣ་ལེགས་ཅུང་ཟད་ཁྲོ། །ཁ་ནས་དུད་བྲོ་འགྲོས་དལ་

88-1-334a

ལེགས། །དཀར་འཆང་དཔལ་གྱི་འབྲས་བུ་འདྲ། །ཀ་མའི་རཀྟའི་རོ་མངར་ཞིང་། །ཤངྐི་རཀྟ་རོ་སྐྱུར་བ། །ཕྲ་སྦོམ་རན་པ་དམར་མོ་སྟེ། །འདོད་ཆགས་མིག་ནི་མི་འཛུམས་ལྟ། །དཀར་འཆང་ཨ་རི་ཤ་འདྲ་བ། །ཙིཏྟ་རཀྟ་རོ་
མངར་ཞིང་། །ཐུན་རུན་ཁྲོ་བག་དང་བཅས་པ། །ཆགས་མིན་ལྟ་བྱེད་ངོ་གནག་པ། །དཀར་འཆང་གཡས་གཡོན་དགྱེ་བ་སྟེ། །འདི་རྣམས་ཡང་དག་ཕྲད་གྱུར་ན། །སྒྲུབ་པ་པོ་ལ་ཚེ་འདི་རུ། །དངོས་གྲུབ་ཡང་དག་སྟེར་བ་སྟེ། །དེ་བས་འདི་
རྣམས་འབད་པས་བཙལ། །ཡང་དག་རྙེད་ནས་གང་རུང་དུ། །བ་ལང་བཟའ་ནི་མདའ་ཡི་ནང་། །བཏུང་བས་ཤེལ་ཁམ་རྣམ་པར་འཕེལ། །དེ་ནི་ཐབས་ཀྱིས་སྟེར་བ་ཡིས། །ཡང་དག་ཏུ་ནི་རང་བཞིན་བརྟག །རང་བཞིན་ནམ་མཁའ་ལྟ་
བུ་སྟེ། །དངོས་པོ་ཐམས་ཅད་ཟད་པ་སྟེ། །རྣམ་པར་རྟོག་པ་ཐམས་ཅད་དང་། །བྲལ་བའི་དགའ་བ་ཡང་དག་ཟབ། །བསམ་མེད་ཟད་མེད་ཕྲ་མོ་སྟེ། །དམ་པ་ཞི་བ་རྣམ་དག་པ། །འཆི་མེད་རྡོ་རྗེ་བདུད་རྩི་བརྗོད། །གང་གི་དབུས་སུ་འདབ་
བརྒྱད་པ། །སྙིང་པོ་ལྔ་ཡིས་ཡང་དག་བརྒྱན། །དེ་དབུས་དེ་གནས་ཆ་ནས་ལྔ། །ཆ་གཉིས་པ་ནི་བརྒྱད་མཐར་དབྱུང་། །སུམ་བཅུ་བཅུ་པ་ལྔ་ཡི་ནི། །ཆ་གཉིས་ལྔ་པ་དྲུག་པ་ཡི། །ཐིག་ལེ་རུ་ནི་གཞུག་པ་སྟེ། །སྐྱེས་བུ་གང་
གིས་དེ་ལ་ནི། །མིག་གི་འོད་ཟེར་གྱིས་བལྟ་བ། །དེ་ལ་ཅི་བཞིན་གནས་པ་ཡི། །ཡེ་ཤེས་སྐྱེ་བར་ཐེ་ཚོམ་མེད། །ནམ་ཞིག་འགོག་པའི་སེམས་གྱུར་ན། །སངས་རྒྱས་ཀུན་གྱི་མཆོག་འཛིན་པ། །དཔལ་ལྡན་མཁའ་འགྲོ་འདྲ་བར་
འགྱུར། །དེ་རིང་ཕན་ཆད་བུ་ཁྱོད་ནི། །དཀྱིལ་འཁོར་ཡང་དག་འདྲི་བ་དང་། །སྒྲུབ་པོ་རྒྱུད་ལ་སྦྱོར་བ་ཡི། །སློབ་དཔོན་ཆེན་པོ་ཉིད་དུ་འགྱུར། །འདི་ནི་སངས་རྒྱས་ཀུན་གྱིས་ཀྱང་། །དབང་བསྐུར་བར་ནི་རབ་བསྔགས་ཏེ། །ཐམས་ཅད་
སྔགས་ནི་སྒྲུབ་འགྱུར་ཏེ། །ལས་མཆོག་ཁྱད་པར་ཅན་ཡང་འགྲུབ། །བུ་མོ་འདི་ནི་ཁྱོད་དང་མཐུན། །སེམས་ཅན་ཁྱོད་ཀྱིས་འདོད་པ་གྱིས། །ཡིད་དུ་འོང་བའི་རིག་མ་འདི། །བདེ་གཤེགས་ཀུན་གྱིས་ཁྱོད་སྤྱོད་གནས། །སྟོང་པ་ལ་ནི་

88-1-334b

སེམས་སྦྱོར་ན། །ཁྱོད་ནི་ཡང་དག་དམ་པར་འགྱུར། །འདི་ནི་བདེ་གཤེགས་བདེ་མཛད་པ། །ཁྱོད་ནི་འདི་ལས་རབ་བྱུང་ངོ་། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་དམིགས་པ་དང་བཅས་པའི་ཤེས་རབ་ཀྱི་མཚན་ཉིད་བརྟག་པའི་ལེའུ་
སྟེ་བཅྭ་ལྔ་པའོ།། །།  དེ་ནས་ཡང་ནི་བཤད་བྱ་བ། །དངོས་ཀུན་ཆོ་ག་ཤེས་མེད་ན། །སྒྲུབ་པོ་དངོས་གྲུབ་འབྱུང་མི་འགྱུར། །དེ་ཕྱིར་འདིར་ནི་བརྟུལ་ཞུགས་བསྟན། །སྦྱོར་བའི་རྩོལ་བ་ཐམས་ཅད་ནི། །དེ་ཉིད་
རིག་པས་སྤང་བར་བྱ། །རྡོ་རྗེ་སེམས་དང་ངེས་འདུག་པ། །སྤངས་ནས་གཞན་དུ་མི་བྱའོ། །དག་པ་དེ་ཉིད་ལ་གནས་པས། །སྦྱོར་བ་རྣམས་ཀྱང་མི་བྱ་སྟེ། །བདག་མེད་གནས་པའི་སྦྱོར་བ་ཡིས། །ཅི་སྲིད་བར་དུ་སོ་སོར་བརྟག །དངོས་
མེད་གོ་འཕང་ལ་གནས་དང་། །ཐབས་བཟངས་དག་དང་ལྡན་པ་ཡིས། །རྒྱུད་ལས་གང་ཅི་འབྱུང་བ་རྣམས། །མ་བརྟགས་པས་ནི་འབྱུང་བར་འགྱུར། །སྒོམ་པའི་སྦྱོར་བའི་སྟོབས་ཀྱིས་ནི། །དངོས་གྲུབ་མཚན་ཉིད་གང་ཡང་རུང་། །
དེ་ཀུན་སྐད་ཅིག་ཙམ་ལ་ནི། །རང་ཉིད་གནས་པར་གྱུར་པ་ཡིན། །དེ་བས་དགེ་སློང་དངོས་གནས་དང་། །དེ་བཞིན་རྟོག་གེ་རྒན་པོ་དང་། །རང་གི་བུ་དང་རྒྱལ་པོ་ལ། །དེ་ཉིད་ཡང་དག་བཤད་མི་བྱ། །ཇི་ལྟར་མར་མེ་བུམ་ནང་གནས། །ཕ་
རོལ་དུ་ནི་འོད་མི་གསལ། །བུམ་པ་དེ་ཉིད་ཆག་གྱུར་ན། །དེ་འོག་མར་མེ་གསལ་བར་འགྱུར། །དེ་བཞིན་རང་ལུས་བུམ་པ་ཉིད། །བླ་མའི་ཁ་ཡིས་ལེགས་བཅག་ནས། །དེ་ཉིད་མར་མེ་ཉིད་ལྟ་བུ། །སྦྱོར་བའི་དེ་ཉིད་སྟོན་པ་ཡིན། །
སྦྱོར་བ་དེ་ཉིད་ལ་གནས་ན། །གང་ཚེ་བསྟན་པ་མི་རྟག་ལ། །གནས་ཤིང་འཇིག་རྟེན་པ་སྤངས་ཏེ། །སྤྱོད་པ་ཐམས་ཅད་བྱས་ན་ནི། །དེ་ལ་དེ་ཚེ་སངས་རྒྱས་གཟིགས། །ཀུན་དུ་ཐེ་ཚོམ་གཅོད་པ་ཡིས། །རིགས་པས་བྱིས་པ་བཞིན་
དུ་སྤྱད། །གང་ཚེ་ཆགས་མེད་རྣལ་འབྱོར་པ། །དེ་ཚེ་ཕུན་སུམ་ཚོགས་འཕེལ་འགྱུར། །སྡིག་པ་མ་ལུས་ལྡན་པ་དང་། །གཏི་མུག་སྒྲིབ་པ་རབ་གནས་པ། །སྨྱོན་པའི་རྣལ་འབྱོར་སྦྱོར་བ་ཡིས། །ཟླ་དྲུག་གིས་ནི་དོན་ཡོད་གྲུབ། །རང་ཉིད་

88-1-335a

སངས་རྒྱས་ཀུན་མཐོང་ཞིང་། །འདོད་པ་ཀུན་གྱིས་རབ་ཏུ་འགེངས། །ཟད་མེད་གཞོམ་དུ་མེད་པ་དང་། །དང་བའི་སྐུ་ཚེ་འབྱུང་བར་འགྱུར། །བླ་ན་མེད་པའི་བྱང་ཆུབ་མཆོག །འབད་པ་མེད་པར་ཡང་དག་འཐོབ། །
འདོད་པ་ཀུན་གྱི་དགའ་མོས་རྣམས། །འབད་བྲལ་བས་ནི་འགྲུབ་པར་འགྱུར། །འགྲོ་དང་འདུག་དང་གནས་པ་ན། །མཆོག་ཏུ་ཟབ་པའི་གནས་ལ་བརྟག །འོད་གསལ་ཡེ་ཤེས་ལམ་མཁན་པ། །མཚན་ཉིད་རྟོག་པའི་
རྣལ་འབྱོར་པའི། །བསམ་གཏན་སྦྱོར་བ་འདི་ཡིས་ནི། །སེམས་ཀྱི་རིན་ཆེན་བརྟན་པར་འགྱུར། །སངས་རྒྱས་བྱང་ཆུབ་རབ་ཞུགས་པ། །བྱིན་གྱིས་བརླབ་པའང་མཛད་པར་འགྱུར། །དེ་ལྟར་གྱུར་པས་ཞུགས་ནས་ཀྱང་། །
ཇི་སྲིད་སེམས་ནི་མི་སྐྱོ་བར། །མཉམ་གཞག་ཡིད་ནི་བཟང་པོ་ཡིས། །དེ་ལ་འབད་པས་བསྒོམ་པར་བྱ། །དེ་འོག་ལ་ནི་ཅི་དགའ་བའི། །སྤྱད་པ་ཡིས་ནི་གཅིག་བྱས་ན། །ཅུང་ཟད་སྤྱན་ཕྱེ་བ་ཡི་མཚན། །བྱང་ཆུབ་རྒྱ་ཆེན་
འཐོབ་པར་འགྱུར། །རྒོད་དམ་སྨྲ་འམ་འདུག་པ་འམ། །ལ་ལར་རབ་ཏུ་གར་བྱེད་པར། །ཇི་སྲིད་སྐྱོ་བར་མི་འགྱུར་བར། །བསྒོམ་པའི་སེམས་ལ་ཞེན་པར་བྱ། །དེ་ལྟའི་དམ་ཚིག་ལྡན་གྱུར་ཅིང་། །རྣམ་པར་མི་རྟོག་སྔགས་པ་
ཡིས། །དུས་ཀྱི་ངེས་པས་ཡོངས་སྤངས་ནས། །བླ་མེད་བྱང་ཆུབ་འཐོབ་པར་འགྱུར། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་ལས་ཤེས་བྱེད་ཀུན་དུ་སྤྱོད་པའི་ལེའུ་སྟེ་བཅུ་དྲུག་པའོ།། །།    དེ་ནས་མཁའ་འགྲོ་
དེ་དག་ཐམས་ཅད་གཅིག་ཏུ་འདུས་ནས་བཅོམ་ལྡན་འདས་རྡོ་རྗེ་འཛིན་པ་ལ་ཚིགས་སུ་བཅད་པས་བསྟོད་པ། སངས་རྒྱས་ཀུན་གྱི་རང་བཞིན་ལས། །བྱུང་བའི་ལྷ་སྟེ་ཁྱོད་མཆོག་པས། །སེམས་དཔའ་ཀུན་གྱི་ཕྱག་རྒྱ་ཆེ། །
མཁའ་འགྲོ་ཆེན་པོ་ཕྱག་འཚལ་ལོ། །གཏི་མུག་ཐམས་ཅད་འོད་གསལ་བ། །མཁའ་འགྲོ་སངས་རྒྱས་ཆེན་པོ་སྟེ། །གཟུགས་སྣང་ཆོས་ནི་རྣམ་དག་པ། །བདེ་གཤེགས་མཁའ་འགྲོ་ཁྱོད་ཕྱག་འཚལ། །ང་རྒྱལ་ཐམས་ཅད་འོད་

88-1-335b

གསལ་བ། །མཁའ་འགྲོ་རེ་འདོད་སྐོང་བ་སྟེ། །སིམ་སོགས་ཆོས་ནི་རྣམ་དག་པ། །རིན་ཆེན་མཁའ་འགྲོ་ཁྱོད་ཕྱག་འཚལ། །འདོད་ཆགས་ཐམས་ཅད་འོད་གསལ་བ། །སྐྱོན་གྱིས་གོས་མེད་མཁའ་འགྲོ་ཆེ། །མཚན་མར་འཛིན་པ་
རྣམ་དག་པ། །པད་མ་མཁའ་འགྲོ་ཁྱོད་ཕྱག་འཚལ། །ཕྲག་དོག་ཆོས་ནི་འོད་གསལ་བ། །མཁའ་འགྲོ་སྣ་ཚོགས་ལས་བྱེད་པ། །མངོན་པར་འདུ་བྱེད་ཆོས་ཀུན་དག །སྣ་ཚོགས་མཁའ་འགྲོ་ཕྱག་འཚལ་བསྟོད། །མཚན་མཆོག་འདི་ཡིས་
ཁྱོད་བསྟོད་པས། །གང་ཟག་དེ་ཡང་བསོད་ནམས་ཚོགས། །ཡེ་ཤེས་ཚོགས་ཆེན་ཡོངས་རྫོགས་ནས། །སངས་རྒྱས་འགྱུར་བར་ཐེ་ཚོམ་མེད། །དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོས་ཀུན་དུ་བཟང་པོའི་བདེ་བ་ཆེན་པོ་ནམ་
མཁའི་དབྱིངས་ཐམས་ཅད་དུ་ཁྱབ་པའི་བདག་ཉིད་ཆེན་པོས། དེ་བཞིན་གཤེགས་པ་ཐམས་ཅད་ཀྱི་སྙིང་པོ་མི་ཤིགས་པའི་ཟླ་བ་སྐུལ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རང་གི་ཐུགས་ཀའི་
མི་ཤིགས་པའི་ཐིག་ལེ་ལས་ཤིན་དུ་དགྱེས་པ་ཆེན་པོ་ཞེས་བྱ་བའི་འོད་ཟེར་གྱི་ཚོགས་ཕྱུང་སྟེ། དེ་བཞིན་གཤེགས་པ་ཐམས་ཅད་ཀྱི་གསང་བའི་སྙིང་པོ་ཟླ་བའི་ཐིག་ལེའི་དབུས་སུ་རྒྱས་པར་བྱས་ཏེ། ནམ་མཁའི་
དབྱིངས་ཐམས་ཅད་དུ་ཡང་སྣང་བར་བྱས་ནས་སྟེང་འོག་ཏུ་ཡང་བཞུགས་ཏེ། མ་ལུས་ཤིང་ལུས་པ་མེད་པའི་རི་དང་། སེམས་ཅན་ཐམས་ཅད་ལ་གསལ་བར་བྱས་ནས་ཤིན་དུ་དགྱེས་པ་ཆེན་པོའི་བདེ་བས་མཉེས་པར་བྱས་ཏེ་སླར་ལོག་
ནས་བཅོམ་ལྡན་འདས་ཤིན་དུ་དགྱེས་པ་ཆེན་པོའི་བདེ་བའི་བདག་པོའི་སྙིང་པོའི་མཆོག་གི། ཟླ་བའི་ཐིག་ལེའི་དབུས་ན་བདེ་བར་ཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་འོད་ཟེར་གྱི་ཚོགས་ཀྱི་ཕྲེང་བ་
མཆོག་ཏུ་བདེ་བར་གྱུར་པའི་སྙིང་པོ་དེས་བསྐུལ་བ་ན་གར་མཛད་ཅིང་རང་རང་གི་ཏིང་ངེ་འཛིན་དུ་དམིགས་ནས་བཅོམ་ལྡན་འདས་དཔལ་ཀུན་དུ་བཟང་པོའི་ཐུགས་ཀའི་ཟླ་བའི་ཐིག་ལེའི་དབུས་སུ་གསང་བའི་དགྱེས་པ་ཆེན་པོའི་བདེ་བར་

88-1-336a

གཅིག་ཏུ་བསྡུས་པར་གྱུར་ཏེ། རང་རང་གི་སྐུ་བུད་མེད་ཀྱི་ཚུལ་དུ་བསྐྱེད་ནས་བཅོམ་ལྡན་འདས་ཀྱི་ཐུགས་ཀ་ནས་མངོན་པར་བྱུང་བར་གྱུར་ཏོ། །དེ་ནས་མཁའ་འགྲོའི་ཚོགས་དེ་དག་ཐམས་ཅད་རབ་ཏུ་དགའ་ནས་
ཅ་ཅོའི་སྒྲ་ཡང་དག་པར་འབྱིན་ཅིང་དབྱངས་ཆེན་པོ་བརྗོད་པར་གྱུར་ཏོ། །ཀྱེ་མའོ་རྡོ་རྗེ་སེམས་དཔའ་ཡི། །རྡོ་རྗེ་ཤིན་དུ་དགྱེས་ཆེན་པོ། །ཀྱེ་མའོ་སྣ་ཚོགས་ཐབས་ནི་བདེ་བྱེད་ཆེ། །སྣ་ཚོགས་ཡེ་ཤེས་བདེ་བ་ཆེ། །ཀྱེ་མའོ་ཀུན་དུ་
བཟང་པོ་ཡི། །དགེ་བའི་ཡེ་ཤེས་བདེ་བྱེད་ཆེ། །གང་བདེའི་ཕྱིར་ནི་རིག་མ་ཡི། །པད་མ་ལ་ནི་གནས་པར་མཛོད། །ཀྱེ་མའོ་རིག་པ་ཤིན་དུ་ཟབ། །ཤེས་རབ་ཕ་རོལ་ཕྱིན་མ་འདི། །སེམས་ཅན་ཀུན་ལ་ཤེས་རབ་ཀྱི། །
མུན་པ་ཐིབ་པོ་སེལ་བར་མཛད། །ཀྱེ་མའོ་ཐམས་ཅད་ངོ་མཚར་ཆེ། །མཁའ་འགྲོ་འདྲ་བར་གར་མཛད་ཅིང་། །རྣམ་པར་སྣང་མཛད་མྱང་བ་དང་། །མཉེ་བ་དང་ནི་འཕྲོག་པ་མཆོག །ཀྱེ་མའོ་ཤིན་དུ་རབ་ཏུ་དགྱེས། །སྐལ་
ལྡན་སྐལ་སྤྱོད་པ་དང་ནི། །སྣ་ཚོགས་སྐལ་བས་བདེ་བྱེད་ཆེ། །སྣ་ཚོགས་རྡོ་རྗེ་ཤིན་དུ་མཛེས། །དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཆང་ཆེན་པོས་ཏིང་ངེ་འཛིན་ལས་བཞེངས་ཏེ་འཁོར་གྱི་དཀྱིལ་འཁོར་ལ་
རྣམ་པར་བལྟས་ཏེ་འདི་སྐད་ཅེས་བཀའ་སྩལ་ཏོ། །ཨཱ་ལི་དང་ནི་ཀཱ་ལི་དང་། །དེ་བྱུང་ཟླ་བ་རྣམ་པ་གཉིས། །མེ་ལོང་ལྟ་བུའི་ཡེ་ཤེས་ཏེ། །གཅིག་ཏུ་གྱུར་པ་མཉམ་ཉིད་དོ། །ས་བོན་མཚན་མར་གྱུར་པ་ནི། །སོ་སོར་རྟོག་པར་
ངས་བཤད་དོ། །དེ་བྱུང་སངས་རྒྱས་ཐམས་ཅད་ཀྱིས། །འགྲོ་དོན་བྱེད་པ་བྱ་ནན་ཏན། །གཟུགས་བརྙན་རྫོགས་པ་ཆོས་དབྱིངས་ཏེ། །ལྷ་ཡི་དབང་པོ་སངས་རྒྱས་བསྐྱེད། །དེ་ལ་བར་མས་ཁུ་བས་བསྐྱེད། །བསྐུར་བས་རང་གི་
ལྷར་བསྐྱེད་ནས། །བྱིན་གྱིས་བརླབ་པ་བྱ་བ་ནི། །རྒྱུད་རྣམས་ཀྱི་ནི་ཐུན་མོང་ངོ་། །གསང་དང་གསང་ཆེན་ཤིན་དུ་གསང་། །རྣལ་འབྱོར་རྣལ་འབྱོར་ཆེན་པོ་དང་། །རྗེས་སུ་རྣལ་འབྱོར་ཞེས་བྱ་དང་། །སྟོང་པ་དང་ནི་ཤིན་དུ་སྟོང་། །

88-1-336b

ཆེན་པོ་སྟོང་པ་ཞེས་བྱ་དང་། །དགའ་དང་དགའ་བ་བར་མ་དང་། །དགའ་བྲལ་གྱི་ནི་དགའ་བ་རྣམས། །རྒྱུད་རྣམས་ཀུན་གྱི་སྤྱི་བོའོ། །ཕྱིར་བཟློག་གཉིས་ཀྱི་ཆོ་ག་དང་། །གསང་དང་ཤེས་རབ་ཡེ་ཤེས་དང་། །ཁ་སྦྱོར་འབྱེད་པའི་
ཆོ་ག་དང་། །གཏོར་མ་རྡོ་རྗེའི་བཟླས་པ་དང་། །དྲག་ཤུལ་སྒྲུབ་པའི་ཆོ་ག་དང་། །རབ་ཏུ་གནས་དང་དཀྱིལ་འཁོར་སྒྲུབ། །གསང་བའི་དེ་ཉིད་བཅུ་ཡིན་ནོ། །དཀྱིལ་འཁོར་ཏིང་འཛིན་ཕྱག་རྒྱ་དང་། །སྟང་སྟབས་འདུག་སྟངས་བཟླས་
བརྗོད་དང་། །སྦྱིན་སྲེག་མཆོད་པ་ལས་སྦྱོར་དང་། །སླར་སྡུད་པ་ཡི་རྣམ་པ་ནི། །ཕྱི་ཡི་དེ་ཉིད་བཅུ་ཡིན་ནོ། །ཡང་དག་དེ་ཉིད་དངོས་པོ་མི་ཤེས་པར། །གསང་སྔགས་སྨྲ་བ་པོ་ཡིན་ཞེས་བརྗོད་པ། །དེ་དག་མངོན་པའི་ང་རྒྱལ་
གསང་སྔགས་ཆོ་ག་འཆད། །དེ་ནི་དམ་ཉམས་འདི་དང་ཕ་རོལ་བརླག །ཉམས་པས་བདུད་ཀྱིས་བཟུང་ནས་ཤི་ནས་དམྱལ་བར་འགྲོ། །སེམས་ཅན་རྣམས་ལ་རབ་བརྟེན་ཏོ། །བྱང་ཆུབ་དམ་པ་ཐོབ་འགྱུར་བ། །སེམས་ཅན་
སླུ་བར་མི་བྱ་སྟེ། །བདེ་གཤེགས་ལས་ལ་སེམས་ཅན་སྦྱར། །གང་ཞིག་སྦྱོར་འདི་མི་བརྩོན་པས། །རྐང་ལག་མིག་སོགས་སྦྱིན་པ་དང་། །དཀའ་ཐུབ་ཅི་འདྲ་སྤྱད་བྱས་ཀྱང་། །བདུད་རྩི་རོ་ཐོབ་མི་ནུས་སོ། །རྣལ་འབྱོར་
གཅིག་གཅིག་ཤེས་བྱས་ནས། །དབེན་པར་སོང་སྟེ་རབ་འབད་ན། །སྡིག་དག་ཚེ་འདིར་སངས་རྒྱས་འགྲུབ། །ཆོས་བདག་མེད་པར་རབ་བསྒོམས་པས། །ཐམས་ཅད་མཁྱེན་པ་ཁོང་དུ་ཆུད། །ཐབས་ཤེས་གཉིས་ཀྱི་འཇོ་སྒེག་
གིས། །གསང་བ་ལྔ་ཡི་བདག་ཉིད་མཆོད། །དངོས་པོ་ཐམས་ཅད་དངོས་མེད་པར། །བཞི་བཅུའི་དོན་ནི་རྟོགས་པ་དང་། །རྡོ་རྗེ་པད་མའི་དབང་བསྐུར་བས། །བདུད་རྩི་ཡིས་ནི་དགའ་བར་བྱེད། །གསང་བར་བྱ་བའི་ཆོས་གསང་བས། །
གསང་ཞིང་སྦས་ཏེ་སྤྱད་པར་བྱ། །འདོད་པའི་ཡོན་ཏན་ལྔ་ལས་ནི། །རྣལ་འབྱོར་སེམས་པས་སྤྱད་བྱ་ཞིང་། །དེ་བཞིན་བཟའ་དང་བཏུང་བྱས་ནས། །སེམས་ཅན་ཐམས་ཅད་དབང་དུ་བྱེད། །འདི་ལ་ཁྲུས་དང་གཙང་

88-1-337a

སྦྲ་མེད་དེ་མཆོད་ཕྱིར་ཐོགས་པའང་མེད། །དཀྱིལ་འཁོར་སྦྱིན་སྲེག་མེད་དེ་དུས་དང་གཟའ་ཚེས་མེད། །གཏོར་མ་ལ་སོགས་བྱ་བ་མེད་དེ་མཆོག་གི་རབ་མཆོག་དང་པོའོ།། །།རྡོ་རྗེ་སེམས་དཔའི་སྒྲུབ་པ་
ཡང་དག་འདི་ཉིད་ཡིན་ཏེ་བརྩོན་པར་བྱ། །དེ་ནས་མཁའ་འགྲོ་དེ་དག་ཐམས་ཅད་རབ་ཏུ་དགའ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོ་ལ་ལེགས་སོ་ཞེས་གསོལ་ཏེ། ལེགས་སོ་ལེགས་སོ་བདེ་བྱེད་ཆེ། །ལེགས་
སོ་ལེགས་སོ་ཡེ་ཤེས་ཆེ། །ལེགས་སོ་ལེགས་སོ་བདེ་བ་ཆེ། །ལེགས་སོ་ལེགས་སོ་སྣ་ཚོགས་ཆེ། །ལེགས་སོ་ལེགས་སོ་ཤེས་རབ་ཆེ། །ལེགས་སོ་ལེགས་སོ་དགྱེས་པ་ཆེ། །དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོས་ཐུགས་
རྗེ་ཆེན་པོའི་ཐུགས་རང་གི་ཐུགས་ཡང་དག་པ་ལ་དམིགས་ནས་ཅང་མི་གསུང་བར་བཞུགས་སོ། །དཔལ་རྡོ་རྗེ་སྙིང་པོ་རྒྱན་གྱི་རྒྱུད་རྣལ་འབྱོར་ཆེན་པོའི་དེ་ཁོ་ན་ཉིད་ངེས་པ་ཞེས་བྱ་བ། 
དཔལ་ཨུ་ཊྱཱན་གསང་བའི་དགོན་པ་ནས་བྱུང་བ་རྫོགས་སྷོ།། །། རྒྱ་གར་གྱི་མཁན་པོ་ཀ་མ་ལ་གུཔ་ཏ་དང་། བོད་ཀྱི་ལོ་ཙྪ་བ་ཆེན་པོ་མངའ་བདག་
ལྷ་ཡེ་ཤེས་རྒྱལ་མཚན་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། སྟག་ལུང་རྒྱུད་འབུམ་དང་བསྟུན་པའི་ཞུ་དག་གྲུབ།། །།

88-1-337b

༄༅། །རྒྱ་གར་སྐད་དུ།  ཤྲཱི་ཛྙཱན་བཛྲ་ས་མུཙྩ་ཡ།  བོད་སྐད་དུ།  དཔལ་ཡེ་ཤེས་རྡོ་རྗེ་ཀུན་ལས་བསྡུས་པ། དཔལ་འཇམ་པའི་རྡོ་རྗེ་ལ་ཕྱག་འཚལ་ལོ། །འདི་སྐད་བདག་གིས་
ཐོས་པ་ཡི། །དུས་གཅིག་ཚེ་ན་བཅོམ་ལྡན་འདས། །དེ་བཞིན་གཤེགས་པ་ཐམས་ཅད་ཀྱི། །གསང་བའི་དབྱིངས་སུ་བདག་ཉིད་ཀྱིས། །ཡེ་ཤེས་ངོ་བོར་བཞུགས་གྱུར་པས། །སངས་རྒྱས་ཀུན་གྱི་སྐུ་གསུང་
ཐུགས། །རོ་མཉམ་དམ་ཚིག་རྡོ་རྗེ་ཉིད། །མི་ཕྱེད་ཏིང་འཛིན་སྙོམས་ཞུགས་སོ། །དེ་ནས་བྱང་ཆུབ་སེམས་དཔའ་ནི། །སེམས་དཔའ་ཆེན་པོ་བྱམས་པ་སོགས། །རྣམས་ཀྱིས་ཞུས་ཤིང་གསོལ་བཏབ་ནི། །དེ་ནས་
བཅོམ་ལྡན་འདས་ལ་ཞུས། །མ་རིག་པ་དང་སེམས་བྱུང་དང་། །སེམས་ཞེས་བགྱི་བ་ཇི་ལྟར་ལགས། །དེ་སྐད་ཅེས་ནི་གསོལ་པ་དང་། །བཅོམ་ལྡན་དེ་བཞིན་གཤེགས་ཀུན་གྱི། །སྐུ་གསུང་ཐུགས་ཉིད་
རྡོ་རྗེ་ཡི། །བདག་ཉིད་ཅན་གྱིས་བཀའ་སྩལ་པ། །རིགས་ཀྱི་བུ་རྣམས་ལེགས་ཉོན་ཅིག །ཡེ་ཤེས་གསུམ་ནི་རྡོ་རྗེ་ལས། །བྱང་སེམས་རྡོ་རྗེ་དེ་བཞིན་ཉིད། །ཡང་དག་འབྱུང་བ་དེ་ཡི་ཕྱིར། །ཡེ་ཤེས་རྡོ་རྗེའི་རང་
བཞིན་ནི། །དེ་ཡི་དོན་ནི་འདི་ལྟ་སྟེ། །ཡེ་ཤེས་གསུམ་ནི་དག་པའི་སེམས་སྣང་བ་གསུམ་གྱི་འབྱུང་གནས་རྡོ་རྗེ་ལས་མི་ཕྱེད་པ་རླུང་རིག་ཐ་མི་དད་དུ་གནས་པ་ཉིད་དེ། བྱང་ཆུབ་སེམས་ནི་ཀུན་རྫོབ་དོན་དམ་དབྱེར་མེད་པ་སྟེ། རྡོ་རྗེ་
དེ་བཞིན་ཉིད་ནི་གདོད་མ་ནས་ལྷུན་གྱིས་གྲུབ་པའི་ཆོས་ཉིད་ལས་ཡང་དག་པར་འབྱུང་བ་ནི། ཆོས་ཐམས་ཅད་ཀྱི་ངོ་བོ་བདེ་ཆེན། སངས་རྒྱས་ཀྱི་སྐུ་གསུང་ཐུགས་རྡོ་རྗེ་ལས་འབྱུང་ཞིང་འཇུག་ལ་གནས་པ་དེའི་ཕྱིར་ན། འཁོར་
འདས་ཀྱི་ཆོས་ཐམས་ཅད་ཡེ་ཤེས་རྡོ་རྗེ་རླུང་སེམས་དབྱེར་མེད་ཐོགས་པ་མེད་པས་ཁྱབ་ཅིང་དབང་བྱེད་པ་ཉིད་དོ། །དེ་བཞིན་གཤེགས་པ་ཀུན་གྱི་དགོངས་པ་ནི། །དབྱིངས་དང་ཡེ་ཤེས་གཉིས་སུ་མེད་པ་ཉིད། །མངོན་པར་བྱང་

88-1-338a

ཆུབ་ཉིད་ལས་རབ་འབྱུང་བ། །རླུང་རིག་དབྱེར་མེད་པ་ལས་དུས་ཀུན་ཏུ། །སྣང་བ་གསུམ་དུ་ཤར་བ་འགག་པ་མེད། །དེ་ཉིད་ལྷན་ཅིག་སྐྱེས་པར་རབ་རྟོགས་བྱ། །ཡང་དག་དོན་ནི་ཟབ་པ་སྟེ། །རྡོ་རྗེའི་ངོ་བོར་ཡང་དག་
བཤད་ཀྱི་དོན་ལ་ནི། །གསང་བ་ཡང་དག་བྱང་ཆུབ་སེམས། །རླུང་སེམས་དབྱེར་མེད་ཆོས་ཉིད་ལས། །ཟབ་པ་མི་འགྱུར་རང་རིག་ནི། །སྤྲོས་མེད་འགག་པ་མེད་ཅིང་ཞི། །སྐྱེ་མེད་མཉམ་ཉིད་ངང་ལས་ནི། །རྟོགས་པ་མེད་ཀྱང་རྒྱུ་རྐྱེན་
ལས། །ཤེས་པ་མ་རིག་དེ་ཉིད་ནི། །འབྱུང་གནས་ཐོག་མ་མཐའ་མ་མེད། །དེ་ལས་ལྷན་སྐྱེས་མ་རིག་པ། །ཉེ་བར་ཐོབ་པ་དངོས་མེད་པ། །བདག་མེད་ཐམས་ཅད་སྙིང་པོ་ལས། །སྣང་མེད་པ་ལས་མ་འགགས་པས། །རིམ་པ་མ་ཡིན་
འཆར་བ་ཡང་། །ཟབ་པ་སྟོང་ཆེན་པོར་འབྱུང་བའི། །མ་རིག་པ་ལས་རྐྱེན་སྣང་བ། །སྣང་བ་ཐོབ་པ་མི་རྟོག་པ། །དེ་ལས་རང་བཞིན་སེམས་ལས་བྱུང་། །དེ་ལས་སྣང་བ་མཆེད་པ་སྟེ། །ཤིན་ཏུ་གསལ་ཞིང་སྟོང་པ་ཆེ། །སེམས་
ལས་འབྱུང་བའི་རྒྱན་དག་ནི། །རྒྱུ་དང་མིག་ཡུལ་དབང་པོ་དང་། །མཚུངས་པའི་དེ་མ་ཐག་པ་ལས། །སེམས་ཞེས་བྱ་བ་འབྱུང་བ་སྟེ། །དེ་ནི་སྣང་བའི་དོན་དང་ནི། །སྟོང་པ་ཉིད་དུ་གསུངས་པ་ཡིན། །སེམས་ནི་དོན་ལ་གནས་པ་སྟེ། །
སེམས་བྱུང་བྱེ་བྲག་རྣམ་པར་སྟོན། །མ་རིག་དེ་ཉིད་ཆོས་ཉིད་དེ། །ཆོས་ཉིད་བདག་ཉིད་མི་གནས་པས། །སྣང་དང་སྟོང་པ་དེ་དག་ནི། །གསུམ་གསུམ་སྤྲོས་པ་མེད་འབྱུང་བ། །འོད་གསལ་ངང་ལས་འབྱུང་བ་སྟེ། །གསལ་བདེ་སྟོང་
པ་དབྱེར་མེད་པས། །རྡོ་རྗེ་བྱང་སེམས་ངོ་བོར་བསྟན། །ཅེས་པས་བསྟན་ཏེ། དེ་ནས་བྱམས་པ་ལ་སོགས་པ་བྱང་ཆུབ་སེམས་དཔའ་དེ་དག་དེའི་དུས་ལ་ཤིན་ཏུ་ངོ་མཚར་ཅན་དུ་ངོ་མཚར་སྐྱེས་ཏེ་ཅང་མི་སྨྲ་བར་གྱུར་ཏོ། །དེ་ནས་བཅོམ་ལྡན་
འདས་དེ་བཞིན་གཤེགས་པ་ཐམས་ཅད་ཀྱི། སྐུ་དང་གསུང་དང་ཐུགས་རྡོ་རྗེའི་བདག་ཉིད་ཅན་གྱི། བྱང་ཆུབ་སེམས་དཔའ་དེ་རྣམས་ཅང་མི་སྨྲ་བར་གྱུར་པ་གཟིགས་ནས་བཀའ་སྩལ་པ། ཅིའི་ཕྱིར་ཅང་མི་སྨྲ་བར་འདུག །དེ་ནས་བྱང་

88-1-338b

ཆུབ་སེམས་དཔའ་ཆེན་པོ་རྣམས་ཀྱིས། བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ཏེ། མགོ་བོས་གཏུགས་ཏེ་གཞན་ཡང་ཞུས་པ། ཨེ་མ་ཧོ་སྟོན་པ་རྡོ་རྗེ་འཛིན། །རྟོགས་པར་དཀའ་བའི་རྣམ་ཤེས་ནི། །གསུམ་གྱི་
དབྱེ་བ་མཆོག་ཟབ་པ། །བཅོམ་ལྡན་འདས་ཀྱིས་བཤད་དུ་གསོལ། །བདེ་བར་གཤེགས་པས་གསུང་དུ་གསོལ། །དེ་སྐད་ཅེས་ནི་ཞུས་པ་དང་། །བཅོམ་ལྡན་འདས་ཀྱིས་བཀའ་སྩལ་པ། །གང་དག་འོད་གསལ་ལས་བྱུང་དེ་ཉིད་ནི། །
སེམས་དང་ཡིད་དང་རྣམ་པར་ཤེས་པ་ཞེས། །ཆོས་རྣམས་ཀུན་གྱི་རྩ་བར་གྱུར་པ་སྟེ། །ཀུན་ཉོན་མོངས་དང་རྣམ་པར་བྱང་བ་ཡི། །བདག་ཉིད་དེ་ལས་རྟོགས་པ་གཉིས་རིག་བྱེད། །རྣམ་ཤེས་དེ་ཡི་བཞོན་པ་རླུང་ཡིན་ཏེ། །རླུང་
ལས་མེ་དང་མེ་ལས་ཆུ་འབྱུང་ཞིང་། །ཆུ་ལས་ས་ཡང་རབ་ཏུ་འབྱུང་བར་བཤད། །དེ་རྣམས་འདུས་ལས་ཕུང་པོ་ལྔ་ཉིད་དང་། །སྐྱེ་མཆེད་དྲུག་དང་ཡུལ་ལྔར་སྣང་བ་གང་། །དེ་དག་རྟེན་ཅིང་འབྲེལ་པར་འབྱུང་བ་སྟེ། །རླུང་དང་རྣམ་ཤེས་
ཉེ་བར་འདྲེས་པའོ། །དེ་ནས་རྣམ་པར་ཤེས་པ་གསུམ་གྱིས་ནི། །རང་བཞིན་གྱི་ནི་སྣང་བར་རབ་གསལ་བར། །སྤྱོད་པ་རྗེས་སུ་མྱོང་བར་བྱེད་པའོ། །སྣང་བའི་རྒྱུ་འབྲས་ཀྱིས་ནི་རང་བཞིན་རྣམས། །ཡང་དག་པར་ཡང་རབ་ཏུ་འབྱུང་བ་
དང་། །རྨི་ལམ་སྒྱུ་མ་ལྟར་ནི་སྣང་བའོ། །དེ་ཡང་འོད་གསལ་གནས་པ་མེད་པ་དང་། །འགག་པ་དང་ནི་སྐྱེ་བ་མེད་པ་སྟེ། །དོན་དམ་བདེན་པ་ཡང་དག་པ་ཡི་མཐའ། །དེ་ལས་འབྱུང་བ་མུན་པའི་སྣང་བ་ནི། །འགོག་པ་མ་རིག་པ་ཞེས་བྱ་བར་
བསྟན། །དེ་ཡི་རང་བཞིན་སྣང་བ་དང་། །འཁྲུལ་དང་རྣམ་པར་གཡེང་བ་དང་། །དྲན་པ་མེད་དང་ལེ་ལོ་དང་། །མི་སྨྲ་བ་དང་མི་གསལ་བའོ། །མ་རིག་པ་ཡང་སེམས་ལས་བྱུང་བ་སྟེ། །ངོ་བོ་ཆོས་ཉིད་རྣམ་པར་མི་རྟོག་པ། །མར་མེ་ལྟར་
འབར་སྣང་བ་ཉེར་ཐོབ་ལས། །རླུང་གི་ཁམས་ཉིད་ཕྲ་བར་འཇུག་པས་ནི། །མ་ནིང་ལྟར་ནི་ཤེས་དང་མི་གསལ་བའོ། །ཉི་མའི་སྣང་བ་ལྟ་བུར་བསྟན་པ་དང་། །ཤིན་ཏུ་གསལ་བའི་སྨིག་རྒྱུ་ལྟ་བུ་སྟེ། །དེ་ཡི་རང་བཞིན་ཆགས་

88-1-339a

དང་དགའ་བ་དང་། །མཆོག་ཏུ་དགའ་དང་དྲག་པོ་ལ་སོགས་པའོ། །ཀུན་རྫོབ་ཏུ་ནི་མངོན་སུམ་གྱིས་བསྟན་དང་། །སྐྱེས་པའི་གཟུགས་དང་ཡབ་ལྷའི་ཚོགས་དག་དང་། །མཚན་མ་རྡོ་རྗེ་ཞེས་ནི་རང་བརྟགས་པའོ། །སེམས་
ལས་སེམས་ཞེས་བཤད་པ་ཡིན། །ཟླ་བའི་སྣང་དང་ཤིན་ཏུ་གསལ་བ་སྟེ། །ཆུ་ཡི་ཟླ་བ་ལྟ་བུར་བསྟན་པའོ། །རང་བཞིན་ནི་འདོད་ཆགས་དང་བྲལ་བ་ལ་སོགས་པའོ། །ཀུན་རྫོབ་ཏུ་གསལ་བ་ལས། བུད་མེད་དང་། བྷ་ག་དང་། 
པདྨ་དང་ལྷ་མོའི་ཚོགས་ཀྱི་བརྡའོ། །འདིར་ཆོས་ཐམས་ཅད་ཀྱི་གནས་ལུགས་བསྟན་པར་བྱ་བའི་ཕྱིར། གང་དག་འོད་གསལ་ལས་བྱུང་དེ་ཉིད་ནི་ཆོས་ཉིད་རང་བཞིན་གྱིས་རྣམ་པར་དག་པ་འོད་གསལ་དབྱིངས་ལས། རིག་པ་རྟོག་མེད་
ཀྱི་ཤེས་པ་ཕྲ་བའི་རླུང་དང་ལྷན་ཅིག་ཏུ་འབྱུང་བས་ན། སེམས་ནི་ཀུན་གཞིའོ། །ཡིད་ཀྱི་རྣམ་པར་ཤེས་པ་ནི་སྤྲོ་བ་དང་བསྡུད་པར་བྱེད་པའོ། །རྣམ་པར་ཤེས་པ་ནི་ཚོགས་བརྒྱད་དང་ལྡན་པའོ། །ཆོས་རྣམས་ཀུན་གྱི་རྩ་བར་གྱུར་པ་ནི། 
བྱང་ཆུབ་ཀྱི་སེམས་མི་འགྱུར་བ་རྡོ་རྗེ་ནམ་མཁའ་མཉམ་པ་ཉིད་དོ། །ས་བོན་མ་དག་པ་ལས་འགྲོ་བ་འཁྲུལ་པ་ཀུན་ནས་ཉོན་མོངས་པར་སྣང་ལ། བག་ཆགས་དག་ལས་འཁྲུལ་པ་ལས་ལོག་པ། རྣམ་པར་བྱང་བ་ཉིད་དུ་ཡང་དག་
པར་སྣང་བའོ། །ཕྱི་རོལ་པས་བརྟགས་པའི་ཐ་སྙད་སྣ་ཚོགས་པ་བདག་ཏུ་བརྟགས་པ་དེ་ལས། རྟོག་པ་གཉིས་སུ་གྱུར་པ་སྟེ། གཟུང་འཛིན་དུ་འབྱུང་བའོ། །བདག་དང་གཞན་ནི་བདག་དང་བདག་གི་བར་འཛིན་པ་གཉིས་སུ་
བརྟགས་པས། དངོས་པོ་དང་མཚན་མར་འཛིན་པ། སེམས་སུ་རིག་པར་བྱེད་པ་ཉིད་དོ། །དེ་ལས་རྣམ་པར་ཤེས་པ་ཉིད་དུ་སྣང་། དེ་ཉིད་དུ་ཆོས་ཉིད་ཀྱི་རླུང་ལས། འོད་སྣང་རང་བྱུང་གི་སྣང་བར་ཤར་བའོ། །དེར་ལས་རླུང་ལས་ཀུན་དུ་
གཡོ་བས། ཆགས་པ་ལས་མེ་བྱུང་། བསྲུབ་པ་ལས་ཞེ་སྡང་གི་ཆུ་སྣང་། དྲོད་གཤེར་ལས་གཏི་མུག་གི་སའི་ཁམས་བསྐྱེད་ཅིང་། དེར་འབྱུང་བ་ལྔ་ལྷན་ཅིག་ཏུ་ཚོགས་ཤིང་འདུས་པ་ལས། རྩ་ཀུན་གཞིའི་རིག་པ་སྙིང་ག་ཙམ་དུ་བརྟེན་ཏེ། 

88-1-339b

དེ་ལས་གཟུང་འཛིན་དུ་འཁྲུལ་པ་ལས། དེ་རྣམས་འདུས་པ་ལས་ཕུང་པོ་ལྔ་དང་ནི་སྐྱེ་མཆེད་དྲུག་དང་ཡུལ་ལྔར་སྣང་བ་སྟེ། དེ་ཉིད་རླུང་དང་རྣམ་ཤེས་ཐ་དད་མེད་པར་ཉེ་བར་འདྲེས་པས། འགག་པ་མེད་པ་ཀུན་དུ་སྣང་བ་བརྟེན་ཅིང་འབྲེལ་པར་
འབྱུང་བ་ཉིད་དུའོ། །ཆོས་ཉིད་རྟོག་མེད་ཀྱི་ངང་ལས། རླུང་དང་ལྷན་ཅིག་ཏུ་འབྱུང་བས། སྲིད་པ་བར་དོར་ཡུལ་ལ་སྤྱོད་ཚུལ་ནི། དེ་ནས་རྣམ་པར་ཤེས་པ་གསུམ་གྱི་ནི། རྐྱེན་ལས་འཆར་བའི་སྣང་བ་དང་། སྣང་བ་མཆེད་པ་དང་། སྣང་བ་
ཐོབ་པ་སྟེ། རྒྱུའི་རྐྱེན་དང་། དམིགས་པ་དང་། དབང་པོ་བདག་པོ་དང་། མཚུངས་པ་དེ་མ་ཐག་པ་ལས། མངོན་པར་འབྱུང་བ། རྟོག་པ་དང་ལྡན་པའི་རང་བཞིན་གྱི་སྣང་བ། རང་བཞིན་སུམ་བཅུ་རྩ་གསུམ་དང་། མཚན་ཉིད་བཞི་བཅུ་དང་
མ་རིག་པའི་སྐད་ཅིག་མ་བདུན་དུ་རབ་ཏུ་གསལ་བར་ཉིན་དང་མཚན་དུ་སྤྱོད་པས། རྗེས་སུ་ཉམས་སུ་མྱོང་བར་བྱེད་པ་མ་དག་པའི་དུས་སོ། །ཡང་རླུང་དལ་ཞིང་རིག་པ་ཅུང་ཟད་གནས་པའི་ཚེ། སྣང་བ་གསུམ་གྱི་རྒྱུ་འབྲས་ཐམས་ཅད་སྒྱུ་མ་
ལྟ་བུར་གྱུར་པས། རང་བཞིན་རྣམ་པ་ཐམས་ཅད་ཡེ་ཤེས་ཀྱི་ངང་དུ་རང་དག་རང་ཞི་རང་སར་གྲོལ་བས། ཡང་དག་པར་རབ་ཏུ་འབྱུང་བ། དེ་བཞིན་ཉིད་དུ་བདེ་བ། གསལ་བ། སྟོང་ཞིང་བདག་མེད་པའི་རྣམ་པར་མི་རྟོག་པའི་ཡེ་
ཤེས་འཆར་བས། བག་ཆགས་རྣམ་པར་དག་པའི་བར་དོར་རྨི་ལམ་གྱི་བར་དོར་ལུས་ངག་སྒྱུ་མ་ལྟར་ཀུན་དུ་སྣང་བའོ། །སྒྱུ་ལུས་ཀྱི་སྣང་བ་དེ་ཉིད་ཀུན་རྫོབ་ཀྱི་སྤྱོད་པ་དག་པར་བྱེད་པའི་ཕྱིར། དེ་ཡང་འོད་གསལ་བ་ལ་རབ་ཏུ་འཇུག་པས་
རིལ་པོར་འཛིན་པ་དང་། རྗེས་སུ་གཞིག་པའི་བསམ་གཏན་གྱིས་ལྷན་ཅིག་སྐྱེས་པའི་དྲི་མ་རྣམ་པར་དག་པའི་ཚེ། གང་ལ་ཡང་གནས་པ་མེད་པ་དང་། ཆོས་རྣམས་ཀུན་ལ་འགག་པ་མེད་པ་དང་། གནས་པ་མེད་ཅིང་། སྐྱེ་བ་མེད་པ་སྟེ། 
སྤྲོས་མེད་དོན་དམ་པའི་བདེན་པ་རབ་ཏུ་མི་གནས་པའི་དོན། ཡང་དག་པའི་མཐའ་སྣང་བ་མེད་པ་ཞེས་བྱའོ། །དེ་ཉིད་ལས་ནི་ལུགས་ལས་བཟློག་གྱུར་པའི། །མུན་པ་ལྟ་བུའི་སྣང་བ་ཕྲ་རླུང་ལས། །འགོག་པ་མ་རིག་པ་ཞེས་བྱ་བར་

88-1-340a

བསྟན། །དེའི་རང་བཞིན་སྣང་བ་འབྱུང་བ་དང་། །འཁྲུལ་དང་རྣམ་གཡེང་ཐེ་ཚོམ་དང་། །བརྗེད་ངས་པ་དང་ལེ་ལོ་དང་། །མི་སྨྲ་གྱུར་དང་སྐྱོ་གྱུར་པའོ། །མ་རིག་པ་ཡང་སེམས་ལས་བྱུང་བ་སྟེ། །སྣང་བ་
ཉེར་ཐོབ་མར་མེ་ལྟར་འབར་ལས། །ངོ་བོ་ཆོས་ཉིད་རྣམ་པར་མི་རྟོག་པ། །རླུང་གི་ཁམས་ཉིད་ཕྲ་བར་འཇུག་པས་ནི། །མ་ནིང་ལྟར་ནི་ཤེས་པ་མ་གཡོས་པའོ། །པདྨ་འདབ་བརྒྱད་ལྟེ་བར་ལྡན་པ་ལ། །སྟོང་པ་བཞི་བཅས་མ་ནིང་ཡི་
གེ་གནས། །ཧྲཱིཿནི་ཐིག་ལེ་ལྡན་པ་དབུས་སུ་དམིགས། །སྣང་བ་ཐོབ་པ་ཉིད་ཀྱི་དོན་འདིའོ། །སྣང་བ་མཆེད་པ་ཉི་མ་ལྟ་བུར་བསྟན། །ཤིན་ཏུ་གསལ་བ་སྨིག་རྒྱུ་ལྟ་བུ་སྟེ། །དེ་ཡི་རང་བཞིན་འདོད་ཆགས་དགའ་བ་དང་། །མཆོག་
ཏུ་དགའ་བ་དྲག་པོ་ལ་སོགས་པའོ། །ཀུན་རྫོབ་ཏུ་ནི་མངོན་སུམ་གྱིས་བསྟན་དང་། །སྐྱེས་པའི་གཟུགས་དང་ལྷ་ཡི་ཚོགས་དག་དང་། །མཚན་མ་རྡོ་རྗེ་ཞེས་ནི་རང་བརྟགས་པའོ། །པདྨ་དེ་ཉིད་ལྟེ་བར་ཉི་མའི་དལ། །དབུས་སུ་རྡོ་རྗེ་ཐིག་ལེ་
ལྡན་པ་ལ། །ཀཱ་ལི་གསལ་བྱེད་ཡི་གེ་སུམ་བཅུ་བདུན། །སྣང་བ་མཆེད་པ་དེ་ཉིད་གསལ་བའོ། །སེམས་ལས་བྱུང་བ་ལ་ནི་སེམས་ཞེས་བཤད། །ཟླ་བའི་སྣང་བ་རབ་ཏུ་གསལ་བ་སྟེ། །ཆུའི་ཟླ་བ་ལྟ་བུར་བསྟན་པའོ། །རང་བཞིན་
ཆགས་པ་དང་བྲལ་ལ་སོགས་པའོ། །ཀུན་རྫོབ་གསལ་བ་ལས་ནི་བུད་མེད་དང་། །བྷ་ག་པདྨ་ལྷ་མོའི་ཚོགས་ཀྱི་བརྡའོ། །སྔ་མ་ལྟར་ལས་ཟླ་དབུས་པདྨར་བཅས། །དབྱངས་ཡིག་ཕྱོགས་སུ་བརྐྱང་བ་འོད་འབར་བ། །མཚམས་
སུ་ཟུང་བཅས་བཅུ་གཉིས་རིམ་པར་དགོད། །གསང་སྔགས་འཁོར་ལོ་རིམ་པ་ཀུན་རྫོགས་བྱེད། །དམིགས་བཅས་བཟླས་པ་སེམས་གསུམ་སྒྱུ་མར་འཆར། །འོད་གསལ་ཡེ་ཤེས་ངང་ལས་ཟུང་འཇུག་པའོ། །སྣང་བ་མཆེད་
པ་བདེ་བ་སྟེ། །གཟུང་དུ་མེད་པས་ཆགས་ཞེན་བྲལ། །ཉི་མ་ལྟར་གསལ་ངང་གིས་བདེ། །འགྲོ་འོང་གནས་ཉིད་སྐད་ཅིག་མ། །མཚན་མ་བྲལ་བའི་ཏིང་ངེ་འཛིན། །གོ་འབྱེད་མུན་པ་འཇོམས་པའོ། །སྣང་བ་ཐོབ་པའི་ཡེ་ཤེས་

88-1-340b

སེམས། །རྣམ་པར་མི་རྟོག་བདག་ཉིད་ཅན། །མ་རིག་དེ་ཉིད་རྣམ་དག་པ། །མུན་པ་མེད་ཅིང་སྣང་བ་བྲལ། །སྒྲོན་མེ་ལྟར་འཆར་ལྷུན་གྲུབ་པ། །གཡོ་མེད་མི་གཡོ་རྣམ་དག་པའོ། །གནས་མེད་ཆོས་ཉིད་ངང་དུ་དག །སྟོང་དང་སྟོང་པ་
ཆེན་པོ་དང་། །ཤིན་ཏུ་སྟོང་པ་དངོས་མེད་པ། །ཐམས་ཅད་སྟོང་པ་ཟག་པ་མེད། །ཉེ་བར་ཐོབ་པ་སྣང་མེད་པ། །མཁའ་ལྟར་དག་པ་འོད་གསལ་བ། །མཉམ་མེད་གཉིས་མེད་ཕྱག་རྒྱ་ཆེ། །ལྷན་ཅིག་སྐྱེས་པ་ཆོས་ཀྱི་དབྱིངས། །ལྷག་
མཐོང་དམིགས་པ་ཀུན་ལས་འདས། །ཀུན་ཁྱབ་ཞི་བ་སྤྲོས་མེད་པ། །སྟོང་ཉིད་ངང་ལས་རྟོག་པ་དང་། །མི་རྟོག་མཐའ་ལས་འདས་པ་སྟེ། །ཆོས་ཉིད་ཟབ་དང་རྒྱ་ཆེ་བའི། །རྒྱ་མཚོ་ཆེན་པོ་རང་དངོས་ལ། །རྩྭ་ཤིང་གཡོ་
བཅས་སྣ་ཚོགས་པ། །སྟེང་དུ་ལྷུང་ཞིང་འགྲོ་འོང་ཉིད། །དུ་མས་ཁེབས་ཤིང་བསྐྱོད་གྱུར་ཀྱང་། །རྟོག་མེད་རང་བཞིན་གནས་མེད་པས། །རོ་གཅིག་འགྱུར་མེད་མཁའ་ལྟར་རོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་
ཏུ་བྱེད་པ་དང་པོའོ།། །། རྣལ་འབྱོར་ལུས་ཉིད་སྒྱུ་མ་རྨི་ལམ་ལྟར། །གནས་ལུས་ངེས་པར་འགྱུར་བ་དེ་ཉིད་ལས། །རྡོ་རྗེ་པདྨ་ཡང་དག་པར་སྦྱོར་བ་ཤེས་རབ་ཀྱི་ཡེ་ཤེས་རབ་ཏུ་འབྱུང་བ་ལས་རང་གི་
རྡོ་རྗེ་སྦྱོར་བ་ལས་མེའོ། །མེ་ལས་ཆུ། ཆུ་ལས་ནུར་ནུར་པོ་རྣམས་དང་། དེ་ནས་མེར་མེར་པོ་རྣམས་དང་། ནར་ནར་པོ་དང་། གོར་གོར་པོ་དག་གོ། དེ་ནས་འདོད་ཆགས་དང་བྲལ་བའི་སྣང་བ་ལས་ཏེ། ཁྲག་གི་གོང་བུ་ལས་མཁྲང་
འགྱུར་རྣམས་སོ། །ཁྱབ་འཇུག་རུསྦལ་གྱི་རྣམ་པ་ཅན་དེ་དག་ཕ་མའི་ཁུ་ཁྲག་དག་གིས་བསྐྱེད་པའོ། །དེ་ནས་དབང་པོ་གཉིས་མཉམ་པར་སྦྱོར་བའི་ཆགས་པ་ལས། འདོད་ཆགས་དང་བྲལ་བ་དང་། འདོད་ཆགས་དང་བྲལ་བ་བར་
མའི་ཆ་ལས་ཤེས་པར་བྱ་སྟེ། དེ་ལས་རྩ་རྣམས་ལུས་ལ་མངོན་པར་འབྱུང་བ། སྟོང་ཕྲག་བདུན་བཅུ་རྩ་གཉིས་ལ་སོགས་པ། ཀུན་འདར་མ་དང་། རོ་མ་དང་། བརྐྱང་མ་དང་། ལྟེ་བ་དང་། སྙིང་ག་དང་། མགྲིན་པ་དང་། སྤྱི་བོ་

88-1-341a

སྤྱི་བོ་དང་། གསང་བ་དང་། མཛོད་སྤུའི་འཁོར་ལོ་དག་དང་། ཡང་ན་སུམ་བཅུ་གཉིས་དང་། རྩ་ཁ་གསུམ་པ་དང་། རྩ་ལུ་གུ་རྒྱུད་དང་། རྩ་བའི་མིག་ལྟ་བུ་དང་། རྩ་བར་ཏ་ཀ་རིན་པོ་ཆེའི་ཕོ་བྲང་དང་། རྩ་རིག་པའི་གནས་དང་། 
གཞུ་ཆེན་གྱི་དབྱིབས་དང་། བདེ་སྐྱོང་ནོར་བུའི་འཁོར་ལོ་སྟེ། དབྱིབས་ཐ་དད་དུ་མ་ལས་ཡི་གེའི་རྣམ་པ་སོགས་སྲོག་ཏུ་གྱུར་པ་སྙིང་པོར་གནས་པ་ལས། ཁམས་གསུམ་པའི་འགྲོ་བའི་རྒྱུད་དཔག་ཏུ་མེད་པ་ལས་སྐྱོན་དང་ཡོན་ཏན་
མཐའ་དག་གི་རྟེན་ཅན་ཏེ། དེའི་ཕྱིར་ལུས་དང་ལུས་ལས་འབྱུང་བའི་དཀྱིལ་འཁོར་དུ་འཆར་བ་ལ་སོགས་པའི་ཕྱག་རྒྱ་དང་། གསུང་གི་བཟླས་པའི་ཕྱིར་ཕྱག་རྒྱ་དང་། བསྒོམ་པའི་ཕྱག་རྒྱ་གསུམ་དུ་གྱུར་པ་དང་། ཨཱ་ལི་ཀཱ་ལི་ལས་
ཡང་དག་པར་འབྱུང་བའི་སྔགས་དང་སེམས་ཀྱི་ཐབས་སུ་གྱུར་པ་ཤེས་རབ་དང་། མི་ཕྱེད་པས་བདེ་བ་ཆེན་པོ་ལྟར་དམིགས་པའོ། །ཡབ་ཡུམ་བསྲུབས་པའི་བདེ་བ་དེ་ཉིད་ལས། །གནས་སྐབས་དག་ལས་རིགས་ཀྱི་ཆ་ཐོབ་པ། །མངོན་པར་
བྱང་ཆུབ་ཡེ་ཤེས་ལྔར་འབྱུང་ལས། །ལུས་རྫོགས་འབྱུང་བས་བྱ་བ་བྱེད་འགྱུར་བའོ། །ཆོས་རྣམས་ཀུན་ནི་བདག་ཏུ་བསྒྲུབ་པ་དང་། །བདག་ནི་ལྷར་བསྒྲུབ་ལྷ་ཉིད་ཡེ་ཤེས་སོ། །གཟུགས་ལ་སོགས་པའི་ཡུལ་དབང་པོ་གཉིས་ཐབས་སུ་
གྱུར་པའོ། །རྡོ་རྗེ་དང་པདྨ་ཡང་དག་པར་སྦྱོར་བ་ནི། སེམས་དང་སེམས་ལས་འབྱུང་བ་དག་གི་ཐབས་སུ་གྱུར་པའོ། །སེམས་ལས་བྱུང་བ་མཉམ་པར་སྦྱོར་བའི་བདེ་བ་ཆེན་པོའི་ཏིང་ངེ་འཛིན་གྱིས་ཐབས་ཤེས་རབ་རོ་མཉམ་པར་
གྱུར་པའོ། །དེ་སྒྱུ་མ་ལྟ་བུའི་དཔེ་ཉེ་བར་མཚོན་ཏེ། དེ་ནས་དེ་བཞིན་གཤེགས་པ་གངྒཱའི་བྱེ་མ་སྙེད་ཀྱི་ཞིང་ཁམས་རྣམས། སྒྱུ་མ་ལྟ་བུ་དང་། ཆུ་ཟླ་དང་། མིག་ཡོར་དང་། སྨིག་རྒྱུ་དང་། རྨི་ལམ་དང་། སྒྲ་བརྙན་དང་། དྲི་ཟའི་གྲོང་
ཁྱེར་དང་། མིག་འཕྲུལ་དང་། དབང་པོའི་གཞུ་དང་། གློག་དང་། ཆུ་བུར་དང་། མེ་ལོང་ནང་གི་གཟུགས་བརྙན་ལྟ་བུ་སྟེ། སྒྱུ་མའི་དཔེ་བཅུ་གཉིས་ཀྱིས། བདེ་བ་ཆེན་པོའི་ཏིང་ངེ་འཛིན་ཉེ་བར་མཚོན་པའི་ཚུལ་ལོ། །རྡོ་རྗེ་ལུས་ཀྱི་རྩ་

88-1-341b

དང་རླུང་། །ཡི་གེ་ཐིག་ལེ་གནས་པ་དག །དབྱངས་དང་གསལ་བྱེད་ཚོགས་རྣམས་ལས། །ཐབས་དང་ཤེས་རབ་རོ་མཉམ་འཆར། །གསལ་དང་བདེ་བ་བརྟེན་པ་ཉིད། །མི་རྟོག་ཆོས་ཉིད་དང་ལས་ནི། །རླུང་དང་ཤེས་པ་མཉམ་དུ་
ཡང་། །འབྱུང་འཇུག་གནས་པ་ཉིད་ཡིན་ནོ། །ཆོས་ཉིད་སྣང་བ་ཀུན་གཞི་སྟེ། །རྣམ་ཤེས་མ་བཅོས་རང་གསལ་བ། །སྒྲིབ་མེད་རང་བྱུང་ཀུན་ཏུ་ནི། །གཡོ་བཅས་འགྱུར་མེད་ཀུན་ཏུ་ནི། །དེ་ཉིད་གནས་པ་རྟེན་གྱུར་པའོ། །རྣམ་པ་སེམས་
བྱུང་འཆར་བ་ཡང་། །དུ་མ་ཉིད་ནི་གོ་རིམས་དང་། །གོ་རིམས་མེད་པའི་རང་བཞིན་རྣམས། །རྟོག་པའི་འདུ་འཕྲོ་རྐྱེན་གྱིས་བསྒྱུར། །ཆགས་བྲལ་གསུམ་དུ་འབྱུང་བ་ཉིད། །ཡིད་ལ་བྱེད་པ་འགྲོ་འོང་དང་། །རིག་པ་རྒོད་པར་བྱེད་
དང་ཡིད་འབྱུང་བའོ། །མྱ་ངམ་གསུམ་ནི་མ་དད་པ། །ཞེ་སྡང་མེད་པས་ཞི་བར་གནས། །ཀུན་ཏུ་རྟོག་པ་ཁོང་ཁྲོ་བ། །འཇིགས་པ་ཙམ་མོ་འཚིག་པ་སྟེ། །རེག་པ་ཁྲེ་བོའི་སྤྱོད་པ་དང་། །འཁོན་དུ་འཛིན་ཉིད་འཇིགས་ཆེན་པོ། །
སྲེད་པ་ཆེ་འབྲིང་གསུམ་འབྱུང་བ། །ཉེར་ལེན་བཞི་སྟེ་འཆབ་པ་ཅན། །མི་དགེ་བཀྲེས་སྐོམ་གདུང་བ་པོ། །རིག་འཛིན་ཡིད་ལ་བྱེད་པ་བཞི། །རིག་པ་པོ་སྟེ་གནས་པ་ལས། །ཚོམ་པར་བྱེད་པ་ཚོར་བ་ནི། །རྣམ་པ་གསུམ་སྟེ་
སེམས་པའོ། །གཉིད་དང་འགྱོད་པ་རྟོག་དཔྱོད་པ། །ངོ་ཚ་ཤེས་དང་བག་ཡོད་པ། །རྣམ་པར་མི་འཚེ་སྙིང་རྗེ་དང་། །བརྩེ་བ་བྱམས་པ་གསུམ་གསུམ་དང་། །དོགས་དང་བསགས་པ་སེར་སྣ་དང་། །ཕྲག་དོག་རྟོག་པ་རང་བཞིན་ཏེ། །སྣང་བའི་ངང་དུ་
སྤྲོ་ཞིང་སྡུད། །ཆགས་པ་ཞེན་དང་དགའ་བ་དང་། །དགའ་ཞིང་ཤིན་ཏུ་དགའ་བ་སྟེ། །འདོད་ཆགས་རྟོགས་པར་འབྱུང་བའོ། །བདེ་བས་ཡི་རངས་གཏི་མུག་མེད། །རབ་ཏུ་མགུ་བ་ཤེས་རབ་དང་། །ངོ་མཚར་དགོད་པར་བྱེད་དང་ཚིམ། །འཁྱུད་པ་ཁ་སྤྲོད་
འཇིབ་པ་དང་། །རྟེན་པ་དེ་ཉིད་ཏིང་འཛིན་ཏེ། །བརྩོན་འགྲུས་བྱེད་དང་རྒྱལ་བ་དང་། །བྱ་དང་འཕྲོག་པ་ལས་གྱུར་ཡིན། །སྟོབས་ངོམ་རྒྱགས་པ་དྲེགས་བྱེད་དོ། །མོས་པས་སྤྲོ་བར་གྱུར་པ་སྟེ། །ལྷན་ཅིག་སྐྱེས་བདག་བཏང་སྙོམས་སོ། །ཐ་དད་མེད་པ་ཤིན་ཏུའོ། །

88-1-342a

དྲུག་པོ་རྣམ་སྒེག་ཞེ་འགྲས་བྱེད། །བག་ཡོད་པ་ཡི་དགེ་བ་སྟེ། །ཚིག་གསལ་བདེན་སྨྲ་དད་པ་དང་། །གཡོ་མེད་དྲན་པ་ལྡན་པ་ཅན། །མི་བདེན་པ་དང་དེ་བཞིན་ངེས། །ཤེས་བཞིན་མ་ཡིན་མ་ངེས་པ། །
ཉེ་བར་མི་ལེན་མ་ཆགས་སེམས། །སྦྱིན་བྱེད་བསྐུལ་བ་མདུན་པ་ཉིད། །དེ་བཞིན་དེས་དང་ངོ་ཚ་མེད། །དཔའ་བས་རྣམ་པར་འཚེ་བྱེད་པ། །བག་མེད་པ་དང་ཁྲེལ་མེད་པ། །ཤེས་བཞིན་བྲལ་བ་མ་ཡིན་པ། །གཡོ་སྒྱུ་སྟོན་པས་
མི་བསྲུན་དང་། །གྱ་གྱུར་བྱེད་པ་རྒོད་བག་ཅན། །འདི་དག་རྟོག་པ་འབྱུང་བ་སྟེ། །སྣང་བ་མཆེད་པའི་ཤེས་པ་ལས། །ཀུན་ཏུ་རྒྱུ་ཞིང་འཇུག་པར་བྱེད། །མཚན་ཉིད་འདི་དག་བསྟན་པའོ། །ཆགས་པ་བར་མའི་སྐད་ཅིག་མ། །
མ་རིག་པ་ཉིད་མིན་པ་ལྟར། །འཐིབས་ཤིང་སྣང་བ་མེད་པའོ། །བརྗེད་ངས་པ་དང་རྨུགས་པའོ། །འཁྲུལ་ཆེན་ལོག་པར་ལྟ་བ་ཅན། །བརྗོད་མེད་འགོག་པས་འཇུག་པ་ཟད། །སྐྱོ་ཞིང་ལེ་ལོ་སྙོམས་ལས་བྱེད། །ཐེ་ཚོམ་གྱུར་
པ་ཡིད་དཔྱོད་པ། །མ་ནིང་འབྱུང་བ་ཕྲ་བ་དང་། །རགས་པ་སྐྱེ་འགག་གནས་པ་ལས། །བག་ཆགས་དྲི་མའི་རྟོག་པ་ཀུན། །སྣང་བ་ཐོབ་པའི་དེ་ཉིད་དུ། །སྟོང་ཉིད་སྤྲོས་པ་བྲལ་གྱུར་པས། །རྣམ་པར་དག་པ་འོད་གསལ་བའོ། །
ནང་གི་རྣམ་པར་ཤེས་པ་དེ་ཉིད་ནི། །ལྷན་ཅིག་སྐྱེས་པའི་ཆོས་ཉིད་རྟོག་མེད་པ། །འོད་གསལ་ངོ་བོ་སྟོང་ཞིང་བདག་མེད་པ། །རླུང་གིས་བསྐྱོད་པས་མཚན་མའི་རྣམ་པར་བྱུང་། །དེ་ཡི་སྐད་ཅིག་རང་བཞིན་འབྱུང་འཇུག་པ། །མཚན་
མ་སྣང་བ་གསུམ་དུ་མངོན་པར་འབྱུང་། །དེ་བས་ན་འདི་དག་ངེས་པར་རྟོགས་པས་ཇི་ལྟར་འོ་མ་དང་། ཏིལ་དག་གིས་ཡང་དག་པའི་མངོན་པར་འདུ་བྱ་བ་མེད་པ་དང་། ཏིལ་མར་གྱི་འབྱུང་བ་དེ་བཞིན་དུ་སྔགས་དང་ཕྱག་རྒྱ་མངོན་
པར་འདུ་བྱ་བའི་རྡོ་རྗེ་དང་པདྨ་མཉམ་པར་སྦྱོར་བ་མེད་པར་རྣམ་པར་ཤེས་པ་གསུམ་ཉེ་བར་བརྟག་པར་མི་ནུས་སོ། །གང་དུ་རླུང་མེད་ན་ཀུན་གཞི་རྟེན་པ་མེད་པའོ། །གང་དུ་ཀུན་གཞིའི་རྟེན་པ་མེད་ན་རྣམ་པར་ཤེས་པར་མི་འགྱུར་

88-1-342b

རོ། །རྣམ་པར་ཤེས་པ་ཉིད་མེད་ན་གང་བྷ་ག་དང་ལིངྒ་ཡང་དག་པར་སྦྱོར་བར་ནུས་པ་མེད་དེ། དེས་ནི་བདེ་བ་ཆེན་པོའྀ་ཏིང་ངེ་འཛིན་མི་རྙེད་དོ། །ཇི་ལྟར་འོ་མ་བསྲུབས་པ་ལས་མར་དང་། ཇི་ལྟར་ཏིལ་མར་ཏེ། དེ་བཞིན་དུ་
རྡོ་རྗེ་ཐབས་ཀྱི་ཡེ་ཤེས་ཉེ་བར་བརྟག་པའི་ཕྱིར་དང་། པདྨ་ཤེས་རབ་ཀྱི་ཡེ་ཤེས་ཉེ་བར་བརྟག་པའི་ཕྱིར་རོ། །ཡུལ་འཇུག་པ་མེད་ཅིང་། དེ་ལ་སེམས་པ་མེད་པས། རྣམ་པར་ཤེས་པའི་བཞོན་པ་རླུང་མེད་དོ། །དེ་མེད་པས་
ཕྱི་རོལ་འབྱུང་བ་ཆེན་པོ་བཞི་དང་། ནང་ཁམས་དང་སྐྱེ་མཆེད་མེད་པར་འགྱུར་ཏེ། སྣང་བ་གསུམ་དུ་དམིགས་པ་ཡང་མི་འབྱུང་བས། ཡང་དག་པའི་མཐའ་ལ་རབ་ཏུ་འཇུག་པ་མེད་པ་ན། ཟུང་དུ་འཇུག་པར་མི་འགྱུར་རོ། །
བྱང་ཆུབ་སེམས་ཀྱི་ངོ་བོ་ཉིད། །བླ་མ་རྡོ་རྗེ་འཛིན་པ་ལ། །མོས་གུས་མཐར་ཕྱིན་གྱུར་པས་ནི། །ལམ་གྱི་རིམ་པ་ཀུན་རྫོགས་པ། །སྒྲིབ་དག་ཡོན་ཏན་ཐོབ་པ་སྟེ། །དབང་གི་རྒྱལ་བ་རྙེད་པ་བཞིན། །ལས་དང་དངོས་གྲུབ་
མ་ལུས་པ། །ཡེ་ཤེས་མི་ཟད་གནས་ཐོབ་བོ། །གང་རྣལ་འབྱོར་ལམ་གྱི་རིམ་པ་ཐམས་ཅད་གཅིག་ཅར་དུ་རྫོགས་པ་བདེ་བ་ཆེན་པོའི་ཏིང་ངེ་འཛིན་གྱིས་ལྷག་པར་མོས་པ་ཙམ་གྱིས། ལས་དང་པོ་པ་ལ་གནས་པར་
འགྱུར་ཏེ་ཕྱིར་མི་ལྡོག་པ་ལ་ཡང་གནས་པར་འགྱུར་རོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་གཉིས་པའོ།། །།  སྤྱི་དོན་མདོ་ལྟར་སྟོན་པ་བདག་མེད་པ། །ཨེ་ནི་ཆོས་ཏེ་བཾ་
ནི་གང་ཟག་གིས། །སྟོང་པ་ཞི་བ་དངོས་པོ་མེད་པ་ཉིད། །ཕུང་པོ་ཁམས་དང་སྐྱེ་མཆེད་ཐམས་ཅད་ཀུན། །རང་བཞིན་མེད་པའི་ཆོས་རྣམས་ཐམས་ཅད་བྲལ། །བླང་དོར་མེད་པའི་ཡེ་ཤེས་མཉམ་པ་ཉིད། །ཨེ་ནི་སྟོང་
ཉིད་སྤྲོས་དང་བྲལ་བ་ལས། །བཾ་ནི་ཐབས་མཆོག་སྙིང་རྗེ་ཆེན་པོར་བསྟན། །གཉིས་མེད་མཉམ་པ་བྱང་སེམས་རོ་གཅིག་པའོ། །རྣམ་ཐར་སྒོ་གསུམ་ཕ་རོལ་ཕྱིན་པ་དྲུག །ཚད་མེད་བཞི་དང་བསྡུ་བའི་དངོས་པོ་བཞི། །བྱང་ཆུབ་

88-1-343a

ཕྱོགས་ཆོས་སུམ་བཅུ་རྩ་བདུན་ཏེ། །སོ་སོ་ཡང་དག་རིག་དང་མ་འདྲེས་ཆོས། །སྟོབ་བཅུ་མི་འཇིགས་བཞི་དང་བསྲུང་བ་མེད། །མཁྱེན་པ་རྒྱས་པ་དེ་ཉིད་ཀུན་ཁྱབ་མཛད། །ཨེ་བཾ་བརྟན་གཡོ་སྣང་དང་སྟོང་པ་ལས། །
ཕུང་པོ་ཁམས་དང་སྐྱེ་མཆེད་ཐམས་ཅད་ནི། །ལྷ་ཡི་བདག་ཉིད་དཀྱིལ་འཁོར་དག་ཏུའོ། །ཡིག་དོན་སྒྲ་དང་ཐ་སྙད་དུ་མ་རྣམས། །བརྟགས་པ་མེད་དེ་སྣ་ཚོགས་རྐྱེན་གྱུར་ལས། །རྒྱུ་འབྲས་རབ་བྱེད་སྒྱུ་མར་སྣང་བ་ཀུན། །
འཇིག་རྟེན་རིགས་བྱེད་མཚོན་བྱེད་སྒྲ་ལྡན་པའོ། །འདོད་ཆགས་ཆོས་ཀྱི་སྦས་པ་ཞེས་བྱ་བ། །རྣལ་འབྱོར་ཐབས་དང་ཤེས་རབ་མཉམ་སྦྱོར་ལས། །སྣ་ཚོགས་དགའ་བ་དང་པོ་རྗེས་ཆགས་དང་། །རྣམ་པར་སྨིན་པ་མཆོག་ཏུ་བདེ་
བ་ཉིད། །མཚན་ཉིད་བྲལ་བ་སྐད་ཅིག་ལྷན་ཅིག་སྐྱེས། །བདེ་བ་མི་འགྱུར་ཡེ་ཤེས་ཕྱག་རྒྱ་ཆེ། །རྣམ་པར་ཉིད་པ་དགའ་བྲལ་རྗེས་ལའོ། །དེ་ཉིད་སྙིང་པོ་བླ་མེད་བྱང་ཆུབ་སེམས། །བདེ་སྟོང་དབྱེར་མེད་བྱང་ཆུབ་ཆེན་པོའོ། །ཀུན་
ད་བྱང་སེམས་ཡེ་ཤེས་མེས་སྦྱངས་པས། །ཟག་མེད་བདེ་བས་ལུས་སེམས་རྣམ་དག་པའོ། །འཇིག་རྟེན་ཀུན་དུ་བརྟན་པ་སྣ་ཚོགས་པ། །དེ་རྟེན་འབྱུང་བ་འདུས་པའི་རི་རབ་དང་། །གཞལ་མེད་ཁང་སོགས་དངོས་པོ་འཁྲུལ་ལས་
སྣང་། །བརྟེན་པ་འགྲོ་བརྒྱུད་ཁམས་གསུམ་སེམས་ཅན་ཀུན། །སྒྱུ་མ་ལྟ་བུར་སྐྱེ་ཞིང་འགག་པར་འགྱུར། །འཁོར་བ་ཡུལ་དང་དབང་པོ་རྟོག་པར་བྱུང་། །དེ་བཞིན་གཤེགས་པ་བྱིན་གྱིས་བརླབས་པ་ལས། །བཟློག་བྱེད་ཡང་དག་
ཀུན་རྫོབ་ལམ་བསྟན་པས། །དངོས་པོ་མཚན་མར་འཛིན་པ་ལས་ལོག་ནས། །རང་བཞིན་བདེན་དོན་རྟོགས་པས་བྱང་ཆུབ་ཐོབ། །འོད་གསལ་བ་ཡི་དེ་ཉིད་ནི། །ཤེས་པ་སྤྱི་ཡི་ཁྱད་པར་ལས། །དེ་ལས་སེམས་ནི་མ་བཅོས་པ། །
གནས་ལུགས་ཕྱོགས་སུ་མ་ལྷུང་བས། །དེ་ཡང་རྟོག་མེད་ཆོས་ཉིད་ཀྱི། །སྣང་བ་གསུམ་དུ་མངོན་པར་འབྱུང་། །ཡུལ་དང་ཡུལ་ཅན་གནས་སྐབས་ལས། །རྒྱ་མཚོ་རབ་ཏུ་དངས་པ་ལས། །དེ་ལས་རླུང་གིས་བསྐྱོད་གྱུར་པས། །རྦ་རླབས་

88-1-343b

འབྱུང་བ་ཇི་བཞིན་དུ། །རང་བཞིན་སེམས་བྱུང་རྟོག་ཚོགས་བྱུང་། །གནས་རྒྱུ་དུས་དང་རྐྱེན་དབང་གིས། །གནས་ན་འོད་གསལ་སྟོང་ཉིད་ལས། །རྒྱུ་ནི་རླུང་སེམས་དབྱེར་མེད་པས། །དུས་གསུམ་དུས་མེད་སྐད་ཅིག་མར། །ངོ་བོ་སྟོང་པ་
རླུང་གིས་བསྐྱོད། །རྐྱེན་ལས་མཚན་མའི་ཆོས་སུ་སྣང་། །གནས་སྒྲུབ་བྱེ་བྲག་ཐ་དད་པས། །རྣམ་ཤེས་དེ་ཉིད་འབུལ་བ་དང་། །མ་འཁྲུལ་པ་ལས་ཁྱད་པར་དུ། །དགེ་དང་མི་དགེ་སྣ་ཚོགས་ལས། །བདེ་སྡུག་ཉམས་སུ་མྱོང་གྱུར་
པས། །ལས་དང་ཉོན་མོངས་བག་ཆགས་ལས། །ལུས་ངག་ཡིད་ཀྱིས་སྤྱོད་པར་སྣང་། །མ་དག་དག་བྱེད་བླ་མ་ཡི། །གདམས་པས་ཀུན་ལས་གྲོལ་བར་འགྱུར། །བསོད་ནམས་བསོད་ནམས་མ་ཡིན་ལས། །རྒྱུ་འབྲས་སྣ་ཚོགས་
སྣང་བ་ཡང་། །ནམ་མཁའ་ལྟ་བུའི་ངང་ལས་ནི། །ནམ་མཁའ་ལྟ་བུའི་ཆོ་འཕྲུལ་བྱུང་། །དེ་ཉིད་སྐྱེ་མེད་རང་བཞིན་ལས། །འགག་པ་མེད་པར་གནས་པའོ། །རྟེན་ཅིང་འབྲེལ་པར་འབྱུང་བ་སྟེ། །དེ་ཉིད་བདག་མེད་ཆོས་ཉིད་ལས། །སྤྲོས་
མེད་དངོས་དང་དངོས་མེད་ཀྱི། །མ་འདྲེས་ཡོངས་རྫོགས་གནས་མེད་པའོ། །རྒྱར་ནི་གོ་རིམས་བཞིན་དུ་གནས་པ་ལ། །བསྡུད་བྱེད་གོ་རིམས་འཆོལ་བ་འཁོར་ལོ་བརྟན། །དམ་ཚིག་ཀུན་ལྡན་ཕྱག་རྒྱ་སྙིང་པོ་ཉིད། །ཀུན་དོར་འབྱུང་
ལྔ་ལྷ་མོ་རྡོ་རྗེ་དབྱིངས། །བདེ་ཆེན་རྡོ་རྗེ་གསང་བ་ཕུན་སུམ་ཚོགས། །དེ་ཉིད་མི་འགྱུར་འབྱུང་གནས་ཐིམ་གྱུར་གང་། །སྐད་ཅིག་རྒྱན་རྫོགས་བུམ་པ་གང་བ་ལྟར། །བདུད་རྩི་གཙུགཏོར་ཡེ་ཤེས་རྒྱལ་བར་གྱུར། །བརྗོད་བྱེད་
འབྲུ་གསུམ་བརྗོད་བྱ་བཛྲ་དྷྲྀག །བྱ་བ་རྫོགས་པའི་རྣམ་པར་སྐྱེ་བ་སྟེ། །སྣང་བ་ཐོབ་པ་ལྷན་ཅིག་ཏུ་གནས་པ་རབ་ཡུལ་ལྡན་པ་སྣང་བ་མཆེད་པ། རྟོག་ཅིང་བའི་བྱེ་བྲག་ལ་རིག་པ་འཇུག་པས་ཕྲད་པ་སྣང་བའོ། །བྱམས་
པས་གསོལ་པ། སྦས་པའི་དོན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་རྫོབ་བདེན་པས་སྦས་པ་ནི་གང་དུ་སྣོད་བཅུད་མ་ལུས་པ་སྣང་བ་སྒྱུ་མ་ལྟ་བུར་བདག་བྱིན་གྱིས་བརླབ་པ་རང་བཞིན་གྱིས་བདེན་པ་རྣམ་

88-1-344a

པར་དག་པའོ། །སེམས་སྣང་བ་གསུམ་གྱིས་སྦས་པ་ནི་གང་ཆོས་ཉིད་ལས་ཡང་དག་པར་འབྱུང་པ། ཐོབ་པ་དང་། མཆེད་པ་དང་། སྣང་བ་ནི་སེམས་ཡེ་ཤེས་ཀུན་ཏུ་རྣམ་པར་རྟོག་པ་མེད་པ་བཞིན་དུ་རང་བཞིན་དང་
བཅས་པར་འབྱུང་བའོ། །ཆོས་ཀྱིས་སྦས་པ་ནི་བདེ་བའི་དོན་གང་རྡོ་རྗེ་དང་པདྨ་མཉམ་པར་སྦྱར་བའི་བདེ་བས། རང་བཞིན་རྣམ་པར་དག་པའི་སྣང་བ་གསུམ་ཉེ་བར་མཚོན་པར་བྱེད་པ་དེ་ནི། བདེ་བ་ཆེན་པོའི་གོ་འཕང་རབ་ཏུ་
གནས་པར་འགྱུར་རོ། །འདི་ནི་སྦས་པའི་བཤད་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་གསོལ་པ། བཅོམ་ལྡན་འདས་སྤྱིའི་དོན་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། ཉན་
ཐོས་ལ་སོགས་པ་འདོད་ཆགས་དང་བྲལ་བའི་ཆོས་ལ་སྤྱོད་པ། རྣམ་པར་རྟོག་པའི་བག་ཆགས་ལས་མ་གྲོལ་བ། རྣལ་འབྱོར་ཆེན་པོའི་རྒྱུད་མཐའ་དག་ཏུ། རྡོ་རྗེ་བཙུན་མོའི་བྷ་ག་ལ་བཞུགས་ཞེས་བྱ་བ་ལ་སོགས་པའི་
འདོད་ཆགས་ཀྱི་ཆོས་གསལ་བར་བྱེད་པ་ངོ་མཚར་གྱི་རྡོ་རྗེའི་ཚིག་ཐོས་ནས་སྨོད་པར་བྱེད་པ་དེ་རྣམས་ལས་མི་འགལ་བའི་སྒོ་ནས་བཤད་པ་དེ་ནི་སྤྱིའི་དོན་དུ་གསུངས་པའོ། །བྱམས་པས་གསོལ་པ། ཡི་གེའི་
དོན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། གང་ཡང་ཨཱ་ལི་ཀཱ་ལི་སྒྲའི་དོན་ལ་བརྟེན་ནས་རྗོད་པར་བྱེད་པ། བརྗོད་པའི་མཐའི་བྱེད་པ། མཐའ་དང་བརྗོད་པ་རྐྱེན་རྣམས་ལས་རྣམ་པར་འབྱུང་བ། 
རབ་ཏུ་བྱེད་པ་དང་བཅས་པ་ཐ་སྙད་སྣ་ཚོགས་པ་ལ་བརྟེན་ནས་ཆ་ཤས་ཙམ་དུ་བསྟན་པའོ། །བྱམས་པས་གསོལ་པ། ཐུན་མོང་མ་ཡིན་པ་བླ་ན་མེད་པ་འདི་ལྟར་མཐར་ཐུག་པར་བཤད་པ་ཇི་ལྟར་བཤད་པ་ལགས། 
དེ་ནས་བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ལེགས་སོ། ཞེས་བྱ་བ་བྱིན་ནས། ལེགས་སོ་ལེགས་སོ། །བྱང་ཆུབ་སེམས་དཔའ་སྙིང་རྗེ་མཆོག་དང་ལྡན་པ་

88-1-344b

ཉོན་ཅིག །མཐའ་ནི་མུ་སྟེ། འོད་གསལ་བ་ཡང་དག་པའི་ཚུལ་ཞེས་བྱ་བ་མཐར་ཐུག་པའོ། །མཐའ་ལྡན་མཐའ་བཅས་གྲོལ་བ་ཡང་དག་མཐའ། །མཐའ་ཉིད་བཟློག་བྲལ་གྲུབ་མཐའ་ལས་འདས་པའོ། །
བྱང་ཆུབ་སེམས་དཔའ་ཆེན་པོས་གསོལ་པ་། བཅོམ་ལྡན་འདས་ཐབས་གང་གིས་མཐར་ཐུག་ཐོབ་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཕུང་པོ་དང་ཁམས་དང་སྐྱེ་མཆེད་ལ་སོགས་པའི་
མཐའ་སྣང་བ་གསུམ་ལས་སྟོང་པ་གསུམ་མོ། །དམིགས་པ་མེད་པ་སྒྱུ་མ་ལྟ་བུ་ལས་སྟོང་པ་གསུམ་གྱི་མཐའ་བདེ་སྟོང་འོད་གསལ་བའོ། །བྱང་ཆུབ་སེམས་དཔའ་ཆེན་པོས་གསོལ་པ། སྟོང་པ་གསུམ་འོད་གསལ་བའི་
མཐར་ཇི་ལྟར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་མེས་ཤིང་བསྲེགས་པ་སྟེ་འབར་བར་བྱེད་པ་དེ་བཞིན་དུ་འོད་གསལ་བར་ཤེས་རབ་ཀྱི་སྣང་བ་ཡེ་ཤེས་ཡུན་རིང་པོས་རྣམ་པར་སྦྱོང་བར་བྱེད་དོ། །
ཇི་ལྟར་ཏ་ལའི་ལོ་མ་ཡང་འབར་བར་བྱེད་པ་དེ་བཞིན་དུ་སྟེ་འོད་གསལ་བར་བྱེད་པ་དེ་བཞིན་དུ་ཐབས་ཀྱིས་ཡེ་ཤེས་ལ་མཆེད་པ་རྣམ་པར་སྦྱོང་བར་བྱེད་དོ། །ཇི་ལྟར་རས་བལ་གྱི་འདབ་མ་བསྲེགས་པ་དེ་བཞིན་དུ་སྣང་
ཐོབ་པའི་ཡེ་ཤེས་མཆོག་ཏུ་གྱུར་པས་རྣམ་པར་སྦྱོང་བར་བྱེད་དོ། །དེའི་ཕྱིར་ཤིང་ཏ་ལའི་ལོ་མ་དང་རས་བལ་གྱི་འདབ་མ་བསྲེགས་པས་འབར་ཞིང་ཐལ་བར་གྱུར་པ་དེ་བཞིན་དུ་སྟོང་པ་དང་། སྟོང་པ་ཆེན་པོ་དང་། ཤིན་ཏུ་
སྟོང་པ་དང་། ཐམས་ཅད་སྟོང་པ་རྣམས་སྣང་བ་ཉེ་བར་ཐོབ་པ་འོད་གསལ་བར་འགྱུར་རོ། །འོད་གསལ་དོན་དམ་བདེན་པ་ཉིད། །མཉམ་ཉིད་ཡེ་ཤེས་རྟོགས་པས་ནི། །དབྱིངས་ཀྱི་ངང་དུ་རྟོག་པའི་ཚོགས། །མ་དག་གཉེན་པོའི་བྱེད་པ་
དང་། །རྒྱུ་རྐྱེན་ཡུལ་སྤྱོད་དངོས་པོ་ཀུན། །རྟོག་མེད་རང་འབྱུང་མེ་འབར་བས། །ཤིང་གི་བྱེ་བྲག་སྣ་ཚོགས་དང་། །རས་བལ་ཕུང་པོ་དུ་མ་ཡང་། །ཚིག་ཅིང་དངོས་མེད་བྱེད་པ་ལྟར། །དེ་བཞིན་གཟུགས་འཛིན་མ་ལུས་པ། །ཆོས་ཀྱི་

88-1-345a

དབྱིངས་ཀྱི་གནས་ཉིད་དུ། །བསྲེགས་ཤིང་ཐིམ་གྱུར་མི་གནས་པའོ། །རྡོ་རྗེ་ལྟ་བུའི་ཏིང་འཛིན་གྱིས། །ཀུན་རྟོག་མ་ལུས་བཅོམ་གྱུར་པའི། །རྣམ་པར་དག་པའི་ཡེ་ཤེས་ཀྱི། །མཁྱེན་པ་བྱང་ཆུབ་སེམས་ཀྱི་རྒྱུན། །མི་
འགག་ཕྲིན་ལས་རྒྱུན་མི་འཆད། །མི་འགྱུར་སྟོང་ཉིད་བདེ་ཆེན་པོ། །ཟུང་འཇུག་རབ་ཏུ་མི་གནས་པ། །ཐོབ་ཏུ་མེད་ལས་ཀུན་དུ་འབྱུང་། །ལྷུན་གྲུབ་དེ་བཞིན་ཉིད་གནས་པའོ། །དེ་ཁོ་ན་ཉིད་ལས་རྟོག་པ་དང་མི་རྟོག་པ་རྣམ་པར་དག་པར་
གྱུར་པས། རང་བཞིན་སློབ་པ་དང་མི་སློབ་པའི་བྱེ་བྲག་གིས་རབ་ཏུ་མི་གནས་པའི་ངོ་བོར་འགྱུར་རོ། །འདི་ནི་མཐར་ཐུག་པའི་བཤད་པ་གསུངས་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་གསུམ་པའོ།། །། 
བྱམས་པས་གསོལ་པ། བཅོམ་ལྡན་འདས། རྣལ་འབྱོར་གྱི་རྒྱུད་དུ་དེ་བཞིན་གཤེགས་པ་ཐམས་ཅད་ཀྱིས་མཐའ་དྲུག་གིས་བཤད་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ་དགོངས་པས་བཤད་པ་དང་དགོངས་པ་
མ་ཡིན་པས་བཤད་པ་དང་། དྲང་བའི་དོན་དང་། ངེས་པའི་དོན་དང་། སྒྲ་ཇི་བཞིན་པ་དང་། སྒྲ་ཇི་བཞིན་མ་ཡིན་པ་རྣམས་སོ། །བྱམས་པས་གསོལ་པ། ཐུགས་བརྩེ་བ་ཉེ་བར་གཞག་ཅིང་། བཅོམ་ལྡན་འདས་ཚིག་རེ་རེའི་དབྱེ་བ་བསྟན་དུ་
གསོལ། བཅོམ་ལྡན་འདས་ཀྱིས་བཀའ་སྩལ་པ། མཐར་ཐུག་པས་བཤད་པ་དེ་ཉིད་དགོངས་པས་འཇིག་རྟེན་གྱི་སྤྱོད་པ་དང་འགལ་བ་རྨད་དུ་བྱུང་བ་བཤད་པ་ནི་འདི་ལྟ་སྟེ། འདོད་ཆགས་མ་ཡིན་པ་དང་། འདོད་ཆགས་དང་བྲལ་བ་ཡང་
མ་ཡིན་པ་དང་། བར་མ་དབུ་མ་ཉེ་བར་མི་དམིགས་པ་ཞེས་བྱ་བ་ལ་སོགས་པ་རྡོ་རྗེའི་ཚིག་རྣམས་ནི་དགོངས་པས་བཤད་པའོ། །བདེ་བ་ཟག་བཅས་མ་ཡིན་ཏེ། །ཟག་པ་མེད་པའི་བདེ་བ་ཉིད། །བདེ་བ་སྤངས་ཤིང་འབྲས་མེད་པས། །སྒྱུ་
མ་ལྟ་བུར་བྱུང་བ་སྟེ། །དེ་ཉིད་བདེ་བའི་ཡེ་ཤེས་ནི། །དབུ་མ་ཙམ་དུའང་མི་དམིགས་སོ། །གང་ཟག་དབང་པོ་དམན་པ་རྣམས། །སྐྲག་བྱེད་འགལ་བ་ལྟར་སྣང་ངོ་། །དབང་པོ་མཆོག་རྣམས་ཆོས་ལ་ནི། །སྔོན་ཆད་མ་བྱུང་ཆོས་ཐོས་

88-1-345b

པས། །ངོ་མཚར་ངེས་ཤེས་སྐྱེས་པ་ཡིས། །རྨད་དུ་གྱུར་པའི་ཏིང་འཛིན་ཐོབ། །རྣམ་པར་གྲོལ་ཐོབ་མཚན་ཉིད་དོ། །ཕྱི་རོལ་གསང་བར་སྨྲ་ལ་སོགས། །མ་དག་དག་པར་འདོད་པ་དང་། །མ་གྲོལ་གྲོལ་འདོད་དགག་པ་དང་། །རང་གར་
འཇུག་པ་དགག་པའི་ཕྱིར། །ཅུང་ཟད་འཇིག་རྟེན་བརྟགས་པ་ལས། །བཟློག་ཕྱིར་ཡེ་ཤེས་ཟབ་མོའི་དོན། །གནས་ལུགས་འཁྲུལ་པ་རྣམ་དག་སྟེ། །དེ་ཉིད་སྙིང་པོ་དགོངས་ཏེ་བཤད། །ལུས་དང་ངག་དང་ཡིད་མེད་པ་དང་། བདག་
མེད་པ་དང་། ཐམས་ཅད་སྟོང་པ་དང་། དག་པ་དང་། འོད་གསལ་བ་ཞེས་བྱ་བ་ལ་སོགས་པའི་རྡོ་རྗེའི་ཚིག་ནི་དགོངས་པ་མ་ཡིན་པས་བཤད་པའོ། །ཆོས་ཐམས་ཅད་ལ་དངོས་པོ་དང་མཚན་མར་འཛིན་པ་དང་། བདག་ཏུ་འཛིན་པ་ལ་དགོངས་
པ་མ་ཡིན་པའི་ཕྱིར་དགོངས་པ་མིན་ཏེ། ཆོས་ཐམས་ཅད་བདག་མེད་པར་སྟོན་ཅིང་སྤྲོས་མེད་དེ་བཞིན་ཉིད་ལས་སྟོང་པ་ཉིད་དུ་སྟེན་པ་དང་། ཆོས་ཐམས་ཅད་ནི་རང་བཞིན་གྱིས་རྣམ་པར་དག་པ་དང་། ལུས་མེད་པ་སྟེ་ཕུང་པོ་དང་ཁམས་
དང་སྐྱེ་མཆེད་མི་དམིགས་པ་དང་། བརྗོད་པ་ལས་འདས་པས་ངག་མེད་པ་དང་། ངོ་བོ་ཉིད་ཀྱིས་སྟོང་པའི་ཕྱིར་ཡིད་མེད་པ་ནི་དགོངས་མིན་དུ་བཤད་པའོ། །ག་པུར་དང་། ཁྲག་ཆེན་པོ་དང་། ཙནྡན་དམར་པོ་དང་རྡོ་རྗེ་དང་། པདྨ་དང་། ཡི་གེ་
དང་། ཕྱག་རྒྱ་ཞེས་བྱ་བ་ལ་སོགས་པ་རྡོ་རྗེའི་ཚིག་རྣམས་ནི་དྲང་བའི་དོན་ཏེ། ག་པུར་ནི་ཁུ་བ་དང་། ཁྲག་ཆེན་པོ་ནི་ཟླ་མཚན་གྱི་ཁྲག་དང་། ཙནྡན་དམར་པོའི་ཁུ་བ་དང་བསྲེས་པ་ནི་ཙནྡན་དམར་པོའི་ཁུ་བའོ། །རྡོ་རྗེ་དང་མཚན་མ་དང་། 
ཐབས་དང་། པདྨ་བྷ་ག་དང་། ཤེས་རབ་དང་། ཡི་གེ་དང་། ཕྱག་རྒྱ་དང་། བཙུན་མོ་རྣམས་དང་ཞེས་བྱ་བ་ལ་སོགས་པ་རྡོ་རྗེའི་ཚིག་རྣམས་ངེས་པའི་དོན་ནོ། །ག་པུར་ནི་དཀྱིལ་འཁོར་ཡིག་འབྲུ་དང་། ཁྲག་ཆེན་པོ་ཉི་མའི་དཀྱིལ་འཁོར་ཡིག་
འབྲུ་དང་། ཙནྡན་དམར་པོ་ནི་པདྨ་དམར་པོ་འདབ་བརྒྱད་ཡིག་འབྲུ་གསུམ་དང་བཅས་པ་དང་། རྡོ་རྗེའི་རྒྱུད་མཚན་མ་ཡབ་དང་། པདྨ་མཚན་མ་སྟེ་ཡུམ་དང་། ཡི་གེ་ནི་སྔགས་ཏེ་ས་བོན་དང་། ཕྱག་རྒྱ་ནི་ཕྱག་མཚན་ཏེ་སྐུ་ཡོངས་སུ་གྲུབ་པ་

88-1-346a

ཕྱག་རྒྱ་བཞི་ལྡན་ནོ། །ལྷའི་སྐུ་ཡོངས་སུ་རྫོགས་པ་ཡོངས་སུ་བརྟགས་པའི་ལྷ་རྣམས་འཁྲུལ་པ་བཟློག་པ་ཐ་མལ་པ་ལས་ནུས་པ་ཅུང་ཟད་ལྡན་པ་སྟེ་ཐུན་མོང་པའོ། །ཡང་རང་བཞིན་ཐ་མི་དད་པའི་དོན་
ལས་ག་པུར་ནི་ཁུ་བ་ཀ་པུར་ཤུ་ཀི་སྟེ་རྣམ་པ་ཀུན་དོར་ལས་བརྒྱུ་བ་དང་། ཁྲག་ཆེན་པོ་ནི་རང་འབྱུང་གི་ཁྲག་སྟེ་སིཧླ་རཀྟ་རྩ་རོ་མ་ནས་བརྒྱུ་བ་དང་། ཙནྡན་དམར་པོའི་ཁུ་བ་ནི་ཆོས་འབྱུང་ནང་དུ་འདྲེས་པ་ལས་ཡུམ་གྱི་པདྨའི་
ཁོངས་སུ་ཡོངས་སུ་འདྲེས་ལ་དབྱེར་མེད་པ་ལས་འགྲོ་བའི་ལུས་མངོན་པར་བྱང་ཆུབ་པའི་ཚུལ་དུ་ཡོངས་སུ་རྫོགས་པ་ཉིད་དོ། །པདྨ་བྷ་ག་སྟེ་ཤེས་རབ་ཀྱི་ཆ་དང་། རྡོ་རྗེ་ལིངྒ་སྟེ་ཐབས་ཀྱི་ཆ་དང་། ཟླ་ཉི་ནུབ་པའི་ལྡོག་པ་ཆ་
མཉམ་པར་གྱུར་པ་ལས་ཡི་གེ་སྟེ་ས་བོན་ཡོན་ཏན་གྲུབ་བྱེད། ཕྱག་རྒྱ་བཞི་ལྡན་གྱི་ཡབ་ཡུམ་རྡོ་རྗེ་བཙུན་མོ་རྣམས་ཆོས་འབྱུང་ལས་མངོན་པར་བདེ་བའི་དོན་ཡེ་ཤེས་ཡང་དག་པར་བསྟན་པ་ཐུན་མོང་མ་ཡིན་པའོ། །བྱམས་པས་
གསོལ་པ། དེ་དག་གི་དྲང་བའི་དོན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། གང་ཡང་ཨཱ་ལི་དང་ཀཱ་ལིའི་ཡི་གེ་སྣ་ཚོགས་སྒྲའི་དོན་གྱི་སྒོ་ནས་བརྗོད་པར་བྱེད་པའི་མཐའ་དང་བརྗོད་པར་བྱ་བའི་ཐུན་མོང་གི་ཆོས་དང་། 
ཐུན་མོང་མ་ཡིན་པའི་གསང་བ་བྱང་ཆུབ་སེམས་དཔའ་ཆེན་པོ་རྣམས་ལ་བླ་ན་མེད་པ་གསང་བ་ཆེན་པོའི་གཟུངས་སྔགས་དང་རིག་སྔགས་འདི་སྒྲའི་དེ་ཁོ་ན་ཉིད་ལ་བརྟེན་ནས་རབ་ཏུ་རྟོགས་པར་བྱ་བ་དང་། ཡང་གང་ཟག་རྟོག་གེ་པར་གྱུར་པ་
རྣམས་ལ་བསྟན་གྱི་བརྗོད་བྱེད་ཐུན་མོང་དུ་གྱུར་པ་མི་ཕྱེད་རྡོ་རྗེའི་ཡི་གེ་སྲོག་ཏུ་གྱུར་པ་ཆོས་ཀྱི་ཕུང་པོ་དུ་མ་ཡང་དེ་ཉིད་ལས་བྱུང་ཞིང་དེ་ཉིད་དུ་ཐིམ་པ་ནི་དྲང་བའི་དོན་དུ་བསྟན་པའོ། །དེ་དག་ལ་ཡང་ཕུང་པོ་ལྔ་དང་། རིགས་ལྔ་དང་། 
འབྱུང་བ་ལྔ་དང་ཡེ་ཤེས་ལྔ་རྣམ་པར་དག་པ། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དག་གོ། ཐུག་པ་ཕྱོགས་བཅས་འགྱུར་བ་ཉིད། །ཉི་ཟླ་

88-1-346b

ལུས་ཀྱི་གནས་ལས་སྐྱེས། །དབང་གི་དཀྱིལ་འཁོར་གཡོ་ལྡན་པ། །གནས་བཞི་པ་ལས་ཕྱོགས་གྱུར་པ། །ཆུ་བོས་བརྒྱད་བཅུ་རྩ་བཞི་སྟེ། །སྟོང་དང་བརྒྱད་བཅུ་དྷྲྀ་འོད་ཅན། །དེ་དག་ཆོས་ཀྱི་སྒོར་གྱུར་པ། །ཕུང་པོ་བླ་ན་
མེད་པར་འགྱུར། །གཉིས་ཀ་དང་བྱ་བའི་རྒྱུད་ལ་སོགས་པ་རྣམས་སུ་དོན་གསལ་བར་གསུངས་པ་ནི་སྒྲ་ཇི་བཞིན་པ་སྟེ། འདི་ལྟ་སྟེ་དཀྱིལ་འཁོར་དང་མཆོད་སྦྱིན་དང་། གཏོར་མ་དང་། སྨན་དང་། ཞི་བ་ལ་སོགས་པའི་ལས་
ཀྱི་ཚོགས་རྣམས་དང་། དེ་བཞིན་དུ་འཇིག་རྟེན་པའི་དངོས་གྲུབ་ཆེན་པོ་བརྒྱད་གསུངས་པ་རྣམས་ནི་སྒྲ་ཇི་བཞིན་པ་སྟེ་ཡི་གེའི་དོན་གྱིས་བཤད་པའོ། །དཀྱིལ་འཁོར་རྟོག་པའི་ཆོ་ག་སོགས། །སྤྱོད་པ་བསྙེན་བསྒྲུབ་འབྲས་ལྡན་པ། །
ཡན་ལག་དོན་རྒྱས་རྣམ་བཤད་པ། །ཇི་བཞིན་སྒྲ་ཞེས་བསྟན་པ་ཡིན། །ཀོ་ཊ་ཀྵ། ཀོ་ཊ་བྷ་ཎ། ཀོ་ཊ་ཝེ། ཀོ་ཊ་བྷ་ཤྭ་པ། ཀ་ཏི་ར་ཀ །ཀོ་ལ་ཁྱ། ཀོ་ལ་བ། ཀོ་ལ་བྷ་ཤྠ། ཀོ་ལ་སྟ་ཐཱ། ཀོ་ལ་བྷ་བྷི། འདིས་དབང་པོ་དང་ཡུལ་གསུངས་ཏེ། དེ་ལྟ་བུ་ལ་སོགས་
པ་རྡོ་རྗེའི་ཚིག་ནི་སྒྲ་ཇི་བཞིན་མ་ཡིན་པའི་སྒོ་ནས་སྦས་པའི་བཤད་པའོ། །དེ་བཞིན་གཤེགས་པའི་བརྡའི་གསང་བ་གང་། །ཀོ་ཊ་ཀྵ་སོགས་མཐའ་འགྲོས་བསྟན་པ་དང་། །བརྡ་སྤྱོད་གསང་བ་འཇིག་རྟེན་མ་གྲགས་པས། །ཇི་བཞིན་མ་ཡིན་སྒྲར་བསྟན་
པའོ། །བྱང་ཆུབ་སེམས་ཉིད་སྤྲོས་མེད་ལས། །མཐའ་བྲལ་རྣམ་པར་མི་རྟོག་པས། །དམིགས་མེད་ཕྱག་རྒྱ་ཆེན་པོ་སྟེ། །མི་གནས་ཟུང་འཇུག་བླ་ན་མེད། །རྡོ་རྗེ་རང་འབྱུང་ཏིང་ངེ་འཛིན། །དེ་བཞིན་གཤེགས་པའི་ངོ་བོ་ཉིད། །རྒྱལ་བས་ངེས་པའི་དོན་དུ་གསུངས། །
མཐའ་དྲུག་རྣམ་པར་དབྱེ་བ་གཏན་ལ་ཕབ་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཞི་པའོ།། །། བྱང་ཆུབ་སེམས་དཔའ་ཆེན་པོས་གསོལ་པ། བཅོམ་ལྡན་འདས་རྡོ་རྗེ་ཐེག་པ་ཆེན་པོའི་རྒྱུད་སྡེ་གང་
ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱུད་སྡེ་ནི་འདི་ལྟ་སྟེ་རྣལ་འབྱོར་བླ་ན་མེད་པའི་རྒྱུད་དང་གཉིས་ཀའི་རྒྱུད་དང་སྤྱོད་པའི་རྒྱུད་དང་། བྱ་བའི་རྒྱུད་དང་། རྟོག་པའི་རྒྱུད་དོ། །བྱམས་པས་གསོལ་པ། རྒྱུད་དེ་

88-1-347a

རྣམས་ཀྱི་ཚད་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། རྣལ་འབྱོར་བླ་ན་མེད་པའི་རྒྱུད་ནི་སྟོང་ཕྲག་བཅུ་གཉིས་ཏེ་རྒྱས་པར་ཕྱེ་ན་གྲངས་མེད་དོ། །རྣལ་འབྱོར་གྱི་རྒྱུད་ལ་སྟོང་ཕྲག་དྲུག་གོ། སྤྱོད་པའི་རྒྱུད་ལ་
སྟོང་ཕྲག་བརྒྱད་དོ། །བྱ་བའི་རྒྱུད་ལ་སྟོང་ཕྲག་བཞིའོ། །རྟོག་པ་དང་ཕྲ་མོའི་རྒྱུད་ལ་སྟོང་ཕྲག་བཞིའོ། །དེ་དག་སྟོང་ཕྲག་སུམ་བཅུ་རྩ་བཞི་སྟེ་རྒྱུད་དང་རྟོག་པའི་མིང་གི་མཐའ་མའི་ཡི་གེ་ཇི་སྙེད་པ་ནི། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། 
ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཀྵཿ ཨ་ཨཱ་ཨི་ཨཱི་ཨུ་ཨཱུ། རི་རཱི་ལི་ལཱི་ཨེ་ཨཻ་ཨོ་ཨཽ་ཨྃ་ཨཿ འདི་དག་ནི་མིང་གི་ཡི་གེའི་ཚོགས་རྣམས་སོ། །བྱང་ཆུབ་སེམས་དཔའ་ཆེན་པོས་གསོལ་པ། 
བཅོམ་ལྡན་འདས། དེ་རྣམས་ཀྱི་བྱེད་པའི་ཆོ་ག་དང་སྒྲུབ་པ་དེ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། དོན་དམ་པའི་བདེན་པ་ལས་རང་བྱིན་གྱིས་བརླབ་པའི་རིམས་ཀྱིས་ལངས་ཏེ་འདོད་ཆགས་ལས་བྱུང་བའི་བྱང་ཆུབ་ཀྱི་
གནས་རབ་ཏུ་བསྟན་པའི་ཕྱིར་བཙུན་མོའི་འཁོར་གྱི་དབུས་སུ་འཁོར་ལོས་སྒྱུར་བའི་གཟུགས་ཀྱིས་བདེ་བ་ཆེན་པོའི་ཏིང་ངེ་འཛིན་གྱིས་རྡོ་རྗེ་བཙུན་མོའི་བྷ་ག་ལ་ཡང་དག་པར་བཞུགས་ཏེ། འཇིག་རྟེན་གྱི་སྤྱོད་པ་དང་འགལ་བ་རྨད་དུ་བྱུང་བ་
རྡོ་རྗེའི་ཚིག་གི་མཐའ་དྲུག་དང་ཚུལ་བཞིའི་སྒོ་ནས་རབ་ཏུ་སྤྱོད་དེ་བསྒྲུབ་པར་བྱའོ། །ཞེས་རྣལ་འབྱོར་ཆེན་པོའི་རྒྱུད་དུ་གནས་སོ། །རིག་མ་དང་ལྷ་མོ་དང་ལྷན་ཅིག་ཏུ་དཀྱིལ་འཁོར་གྱི་འཁོར་ལ་དགོད་པར་བྱའོ། །དེ་ནས་ལས་བྱེད་པའི་
སྒྲུབ་པ་ལ་སོགས་པ་དེ་ཁོ་ན་ཉིད་རྣམ་པ་བཅུ་རབ་ཏུ་སྤྱོད་དེ་སྒྲུབ་པར་བྱེད་པ་རྣལ་འབྱོར་གྱི་རྒྱུད་ལ་བཞུགས་སོ། །ལས་ཀྱི་བྱ་བ་སྣ་ཚོགས་རྒྱ་ཆེན་པོ་བྱ་བའི་རྒྱུད་ཕྱག་རྒྱ་དམིགས་པའི་མཚན་ཉིད་རབ་ཏུ་སྤྱད་པ་སྒྲུབ་པར་བྱེད་པ་
ནི་སྤྱོད་པའི་རྒྱུད་ལ་བཞུགས་སོ། །འཁོར་བ་ལ་ཤིན་ཏུ་འཇིགས་པར་དམིགས་ཤིང་ཤིན་ཏུ་གཙང་སྦྲ་བྱེད་པ་དང་། ཡེ་ཤེས་སེམས་དཔའི་བདེ་བ་མེད་པ་དང་། བདག་ཉིད་ལྷའི་བསྙེམས་པ་མེད་པ་དང་། རྨད་དུ་བྱུང་བའི་སྤྱོད་ཡུལ་

88-1-347b

རང་རྐྱེན་གྱིས་རྒྱུའི་བར་སྤྱོད་པ་སྒྲུབ་པར་བྱེད་པ་ནི་བྱ་བའི་རྒྱུད་ལ་བཞུགས་སོ། །སྔགས་དང་སྨན་དང་སྦྱིན་སྲེག་དང་མིག་སྨན་དང་རྐང་མགྱོགས་ལ་སོགས་པ་དངོས་གྲུབ་ཆེན་པོ་བརྒྱད་རབ་ཏུ་སྤྱད་པ་སྒྲུབ་པར་བྱེད་པ་ཕྲ་མོ་དང་རྟོག་པའི་
རྒྱུད་ལ་བཞུགས་སོ། །གསང་ཆེན་རྒྱུད་ཀྱི་ངོ་བོ་དང་། །ངེས་ཚིག་སྒྲ་འཇུག་རྒྱུ་མཚན་དང་། །ཁྱད་པར་དབྱེ་ཐབས་དང་ལྡན་པ། །གཞུང་ཚད་དང་ནི་ལྡང་ཚད་དང་། །བརྗོད་བྱ་རྗོད་བྱེད་སྟོན་ཚུལ་ལོ། །སེམས་བསྐྱེད་སྔོན་འགྲོ་
མཚུངས་ལྡན་པས། །ཁྱད་པར་སྨིན་ལམ་བྱིན་རླབས་ལམ། །རྗེས་སྣང་འབྲེལ་པ་ཐུན་མོང་མིན། །བདེ་བ་ལམ་མྱུར་མཐོང་ཆོས་འགྱུར། །དེ་ཉིད་ཐབས་ཟབ་བླ་ན་མེད། །དཔལ་ལྡན་རྡོ་རྗེ་འཆང་ཆེན་གྱི། །སྐུ་གསུང་ཐུགས་
ལས་མི་ཕྱེད་པ། །བདེ་ཆེན་མཆོག་གི་སྙིང་པོ་ཉིད། །ངོ་བོ་ཡེ་ཤེས་དྲི་མེད་པའོ། །ཏནྟ་ཞེས་པ་རྒྱུད་ཡིན་ཏེ། །ཏེནྟ་ཤེས་པ་དངོས་ལ་རྒྱུན། །ཏྲ་ཡ་དུས་གསུམ་ཐོག་མེད་པས། །འདྲེན་པ་རྟོག་ཚོགས་འཇོམས་བྱེད་པའོ། །རྒྱུན་
ཆགས་འབྲེལ་པ་མ་ཚང་མེད། །རྒྱས་བྱེད་སེམས་ཅན་ཁམས་ལས་ནི། །བྱང་ཆུབ་སེམས་དཔའ་རྣལ་འབྱོར་པ། །སངས་རྒྱས་མཛད་པ་མཐའ་ཡས་པ། །བར་མི་བཅད་ཅིང་ཡེ་ཤེས་རྒྱུན། །ཕྲིན་ལས་མི་ཟད་འཁོར་ལོ་སྟེ། །རྒྱུད་ཅེས་
སྒྲར་བཏགས་དེ་ཉིད་དོ། །གླེང་གཞི་གླེང་སློང་གསང་ཆེན་ལ། །རྒྱས་བསྡུས་ངོ་བོ་མི་འགྱུར་བ། །འཇུག་གནས་མཐར་ཕྱིན་བླ་ན་མེད། །རྡོ་རྗེ་ཐེག་པའི་ལྡང་ཚད་དོ། །སྔོན་རྒྱུ་གདུང་བ་ཤས་ཆེ་ལ། །སྤོང་བར་མི་ནུས་འཇུག་ཕྱིར་ན། །དབང་
ཕྱུག་ཆེན་པོ་ལྟ་བུའོ། །ལམ་ལ་གནས་པ་རིམ་གཉིས་ཆོས། །ངོ་བོ་མི་འགྱུར་མཆོག་གསང་བ། །ས་ལམ་བགྲོད་པ་མཐར་ཕྱིན་པས། །བླ་མའི་ལམ་ནི་གཙོར་གྱུར་པ། །བླ་ན་མེད་པ་ཚེ་འདིས་ཐོབ། །རྒྱུ་དང་ཐབས་ལམ་འབྲས་བུ་
སྟེ། །གྲུབ་བྱེད་གསང་བ་རྩ་བའི་རྒྱུད། །སྙིང་པོ་མཆོག་ལས་རབ་འབྱམ་སྤྱོད། །གསལ་བྱེད་ཕྱི་མ་བདེ་བླག་འགྱུར། །དཀའ་བ་སྤྱོད་དང་ཁ་སྐོང་བྱེད། །ཐེ་ཚོམ་སེལ་ངེས་སྟེར་བ་དང་། །དུས་རྟགས་བློ་ལ་སྦྱར་བ་སྟེ། །སྣོད་

88-1-347c

རིག་སྐལ་བའི་ཁྱད་པར་བསྟན། །གསང་བ་ཆེན་པོ་སྤྱི་དང་བྱེ་བྲག་ཐམས་ཅད་དུ། །ཐ་དད་པ་དང་གཅིག་ཏུ་གནས་པ་ཏིང་འཛིན་དང་། །མཐར་ཐུག་རིམ་པ་དམ་ཚིག་སྐུ་གསུང་ཐུགས་དང་ནི། །སྡོམ་པའི་དེ་
ཉིད་ཀུན་ཏུ་ཁྱབ་པ་བྱང་ཆུབ་སེམས། །ཡང་དག་བདེ་བ་ཆེན་པོ་ཕྱག་རྒྱས་རྒྱས་བཏབ་པ། །ཡེ་ཤེས་ཚད་མེད་རྒྱ་ཆད་ཕྱོགས་སུ་ལྷུང་བ་མེད། །མཉམ་ཉིད་སྤྲོས་པ་མེད་པ་དག་པ་ཆེན་པོ་སྟེ། །སྒྲ་དང་སྒྲ་མིན་ལས་
འདས་རྒྱུད་ནི་བླ་མེད་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ལྔ་པའོ།། །། བྱམས་པས་གསོལ་པ། བཅོམ་ལྡན་འདས། སྦྱོར་བ་དང་པོའི་མཛད་པ་གང་ལགས། བཅོམ་ལྡན་འདས་ཀྱིས་བཀའ་སྩལ་
པ། དཔལ་བདེ་བ་ཆེན་པོ་མི་འགྱུར་བ་འོག་མིན་ཆོས་ཀྱི་དབྱིངས་དཀྱིལ་འཁོར་ཆེན་པོ་ཡོངས་སུ་དག་པ་ཚད་མེད་པའི་ཕོ་བྲང་དུ། དེ་བཞིན་གཤེགས་པ་བྱང་ཆུབ་ཀྱི་སེམས་རྡོ་རྗེས་དེ་བཞིན་གཤེགས་པ་ཐམས་ཅད་ཀྱི་འཁོར་གྱིས་
ཡོངས་སུ་བསྐོར་བའི་དབུས་སུ་བཞུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དཔག་ཏུ་མེད་པ་དང་། དེ་བཞིན་གཤེགས་པ་འདུས་པའི་གསང་བ་བླ་ན་མེད་པར་དབང་བསྐུར་བ། སྐུ་གསུང་ཐུགས་རྡོ་རྗེའི་སྙིང་པོ་གསང་
བ་ཆེན་པོ་ཡོངས་སུ་དག་ཅིང་ཡེ་ཤེས་ཡོངས་སུ་དག་པ་ཐོབ་པ་ནི། དཀྱིལ་འཁོར་མ་ལུས་པའི་ཡོན་ཏན་ཕྲིན་ལས་མི་ཟད་པ་རྒྱན་གྱི་འབྱུང་གནས་སུ་གྱུར་པ། སྤྲོ་བ་དང་བསྡུ་བར་མཛད་པ། སྤྲོས་པ་མེད་ཅིང་སྣང་བ་རྣམ་པར་དག་
པ་དེ་ཉིད་ལ་གནས་པ་ནི་སྦྱོར་བ་དང་པོ་ཞེས་བྱའོ། །བྱམས་པས་གསོལ་པ། དཀྱིལ་འཁོར་རྒྱལ་པོ་མཆོག་ཇི་ལྟར་དུ་སྟོན་པར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། །འདི་ཉིད་ཚད་མེད་དཀྱིལ་འཁོར་
དུ། །དེ་བཞིན་གཤེགས་པའི་སྐུ་གསུང་ཐུགས། །རྡོ་རྗེ་བླ་ན་མེད་པའི་མཆོག །རྟེན་དང་བརྟེན་པར་བཅས་པ་ཡི། །བདེ་གཤེགས་ཕོ་བྲང་སྙིང་པོ་ནི། །འདོད་པ་ཁམས་ཀྱི་འགྲོ་བ་རྣམས། །རི་རབ་ཆེན་པོའི་སྟེང་དུ་ནི། །ཁང་བུ་

88-1-347d

བརྩེགས་པ་ག་ལ་བར། །དབང་པོ་བརྒྱ་བྱིན་འཁོར་བཅས་པ། །ཉེ་དབང་སུམ་བཅུ་རྩ་གཉིས་སོགས། །རིན་ཆེན་རང་བྱུང་མཆོད་སྤྲིན་ལྡན། །དབང་བསྐུར་རིམ་པ་སྟོན་པར་མཛད། །དབང་ཕྱུག་ཨུད་མར་བཅས་པ་དང་། །
ཚངས་པ་ཁྱབ་འཇུག་གདོང་དྲུག་སོགས། །འདུལ་ཕྱིར་ཡུལ་དང་དབང་པོ་ནི། །གཉིས་མེད་མཉམ་པར་སྦྱོར་བ་ལས། །ལོངས་སྤྱོད་བདེ་བའི་སྤྱོད་པ་ཡིས། །རྣམ་པར་དག་པ་བྱ་བའི་ཕྱིར། །དཀྱིལ་འཁོར་དུ་ནི་འཇུག་པར་མཛད། །དེ་ནས་དག་
ཁམས་དེ་ཉིད་དུ། །དེ་བཞིན་ཉིད་ཀྱི་ངང་ལས་འདས་པ་ཡི། །བྱང་ཆུབ་སེམས་མཆོག་རྡོ་རྗེ་བླ་མེད་པ། །ཟིལ་གནོན་རྡོ་རྗེ་ཏིང་ངེ་འཛིན་ལ་ཞུགས། །དབྱིངས་དང་ཡེ་ཤེས་དབྱེར་མེད་མཉམ་ཉིད་དང་། །རྣལ་འབྱོར་བདེ་ཆེན་མངོན་པར་བྱང་ཆུབ་པ། །
ཉི་ཟླ་པདྨ་ཨཱ་ལི་ཀཱ་ལི་བཅས། །ཐུགས་གསུང་སྐུ་ཡི་རྡོ་རྗེ་དེ་ཉིད་ལས། །འོད་སྤྲོས་འཇིག་རྟེན་ཁམས་སུ་ཁྱབ་གྱུར་པས། །བརྟན་གཡོར་བཅས་པ་ཡོངས་སུ་དག་པར་གྱུར། །བྱིན་གྱིས་བརླབས་ཀྱི་སྣང་བའི་རྒྱུད་སྦྱངས་པས། །འགྲོ་བ་རྡོ་རྗེ་
སེམས་དཔའི་གོ་འཕང་བཀོད། །བདེ་བ་དང་ནི་ཡིད་བདེ་ཐོབ་གྱུར་ཏེ། །རྗེས་སུ་རྣལ་འབྱོར་ཡེ་ཤེས་རྒྱ་མཚོ་ལས། །མི་ཕྱེད་དབང་ཕྱུག་བྱང་ཆུབ་སེམས་ཀྱི་སྐུ། །ཡེ་ཤེས་འབྱུང་བ་རྡོ་རྗེའི་ཏིང་འཛིན་ལས། །བྱིན་གྱིས་བརླབས་པའི་ཆོ་འཕྲུལ་
བསྟན་པ་དང་། །སྔགས་ཀྱི་བྱིན་གྱིས་བརླབས་པ་དེ་ཉིད་མཆོག །དབང་བསྐུར་བ་ཡི་ཆོ་འཕྲུལ་བླ་ན་མེད། །གསང་བ་ལྷུན་གྲུབ་སྙིང་པོའི་ངང་ལ་སྟེ། །ཨོཾ་ཨཱཿཧཱུྃ་དང་སྭཱ་ཧཱ་འོད་འཕྲོ་བ། །འོད་ཟེར་གྱིས་ནི་ཕྱོགས་བཅུར་ཁྱབ་པར་མཛད། །ལཱཾ་མཱཾ་པཱཾ་ཏཱཾ་ཨཱཾ་
ལས་འབྱུང་བ་བཞི། །མཻཾ་ཐླྷཱེཾ་ཨོཾ་ཨོཾ་ཨོཾ་ཧཱུྃ་ཨོཾ་སྃ་ལས། །རྣམ་ཤེས་བརྒྱད་ཀྱི་རང་བཞིན་སེམས་དཔའ་ཆེ། །རཱུ་ཤ་ག་ར་སྤ་སྟེ་འདོད་ཡོན་ཉིད། །ཛཿཧཱུྃ་བྃ་ཧོཿཧཱུྃ་དྲུག་འོད་འབར་ལས། །མཐར་བྱེད་ཁྲོ་བོའི་རྒྱལ་པོ་ཡུམ་བཅས་བཅུ། །ཡན་ལག་ཚོགས་
གནས་ཕྱོགས་ཀྱི་གདོན་འཇོམས་པའོ། །ཤིན་ཏུ་རྣལ་འབྱོར་རྫུ་འཕྲུལ་ཆོ་འཕྲུལ་སྟོན། །དེ་ནས་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་སེམས་ཀྱི་རྡོ་རྗེ་འཆང་དེ་ཉིད། ཞལ་གསུམ་ཕྱག་དྲུག་བརྒྱན་བཅས་གཟིགས་པར་གྱུར། །མཚན་དཔེ་

88-1-348a

རྫོགས་པ་ཕྱག་རྒྱ་ལྡན་པར་སྣང་། །དེ་ཉིད་ཆོས་དབྱིངས་རྡོ་རྗེ་ཡུམ་བཅས་བཞི། །ཆོས་འབྱུང་ནས་བྱོན་ཐུགས་ཀའི་དབུས་མ་ནས། །དེ་བཞིན་གཤེགས་པ་དུ་མ་སྤྲོས་པ་ལས། །ཆེད་དུ་བརྗོད་པ་གསང་བ་དེ་ཉིད་གསུངས། །
ཀུན་རྫོབ་ཆོ་འཕྲུལ་མི་ཟད་འཁོར་ལོ་བསྟན། །དེ་རྗེས་འདོད་པ་ཁམས་པ་གདུལ་དོན་དུ། །རྡོ་རྗེ་སེམས་དཔའི་གཟུགས་ཀྱིས་དང་བའི་ཚུལ། །རྣམ་སྣང་མཛད་པ་རྡོ་རྗེ་འཛིན་སྐུ་ལས། །སྐུ་ཡི་ཆ་ཞུ་ལྷ་མོའི་ཚུལ་བསྟན་པ། །སྤྲོ་དང་བསྡུ་
བ་ཡེ་ཤེས་མངོན་རོལ་པའི། །སྤྱོད་པ་བདེ་ཆེན་དགྱེས་པར་བསྟན་པའོ། །དཔལ་ལྡན་མི་བསྐྱོད་རྡོ་རྗེའི་དཀྱིལ་འཁོར་མཆོག །རྡུལ་མེད་པ་ཉིད་གྲུ་བཞིར་བྱིན་བརླབས་པ། །དེ་ནས་དེ་བཞིན་གཤེགས་པའི་ཚོགས་དཔག་མེད། །
ཕྱོགས་དུས་ཀུན་ནས་ཁྱབ་ཅིང་ཡོངས་སུ་བསྐོར། །བྱང་ཆུབ་སེམས་ཉིད་རྡོ་རྗེ་དབུས་བཞུགས་སོ། །བཅོམ་ལྡན་རྣམ་སྣང་མཛད་པ་རིན་ཆེན་འབྱུང་། །འོད་དཔག་མེད་པ་གདོན་མི་ཟ་བ་ཉིད། །བདེར་གཤེགས་དཔག་མེད་
རྣམས་དང་ལྷན་ཅིག་ཏུ། །རང་སྣང་ཡེ་ཤེས་ཡུམ་དང་གཉིས་མེད་པ། །ཤིན་ཏུ་རྣལ་འབྱོར་རིམ་པ་ཡང་དག་པའོ། །སྐུ་གསུང་ཐུགས་ཀྱི་རྡོ་རྗེས་བྱིན་རླབས་པ། །དམ་ཚིག་པ་དང་ཡེ་ཤེས་སེམས་དཔའ་ཆེ། །ནུས་པ་བརྟན་དང་དབང་བསྐུར་
རྒྱས་གདབ་པའོ། །ཏིང་འཛིན་སེམས་དཔའ་ཐུགས་ཀར་ངེས་གནས་པ། །རྣལ་འབྱོར་ཆེན་པོ་ཡི་ནི་མགོན་པོ་མཆོག །རིག་པ་ཆེན་པོའི་སྐྱེས་བུ་དེ་བཞིན་གཤེགས། །ཐབས་དང་ཤེས་རབ་གཉིས་མེད་བཞུགས་པའོ། །དེ་བཞིན་
གཤེགས་པ་དཔག་མེད་འདུས་པའི་དུས། །འཁོར་གྱི་དཀྱིལ་འཁོར་དཔག་མེད་བརྗོད་མི་ལང་། །རྡོ་རྗེ་རིན་ཆེན་པདྨ་སྤྲིན་ཕྲེང་བའི། །མཆོད་པའི་ཚོགས་ཀྱིས་བར་སྣང་གང་བས་མཆོད། །རྡོ་རྗེ་འཆང་ཆེན་དེ་བཞིན་གཤེགས་པ་ལ། །
དེ་བཞིན་གཤེགས་དང་སེམས་དཔའ་ཐམས་ཅད་ཀྱིས། །ཐུན་མོང་དུ་ནི་གསོལ་བ་བཏབ་གྱུར་པ། །དེ་བཞིན་གཤེགས་པ་ཐམས་ཅད་ཀྱི། །འདུས་པ་གསང་བ་ལས་བྱུང་བ། །རྡོ་རྗེ་སྙིང་པོས་བསྡུས་པ་ཡི། །བཅོམ་ལྡན་སྙིང་པོ་

88-1-348b

བཤད་དུ་གསོལ། །ཞེས་ཞུས་ཤིང་གསོལ་བ་བཏབ་པར་གྱུར་ལ། དེ་ཚེ་རྡོ་རྗེ་འཆང་གིས་བཀའ་སྩལ་པ། །འདིར་ནི་ལེགས་ཅེས་གསང་བ་ངེས་པ་ལ། །སྤྲོ་བས་ཞུས་པ་གསང་ཆེན་བླ་མེད་ལ། །དེ་བཞིན་གཤེགས་པ་མཆོག་
གྱུར་ཐམས་ཅད་ཀྱང་། །ཐེ་ཚོམ་སྐྱེ་བར་གྱུར་པ་ཡིན་པས་ན། །སེམས་དཔའ་ཁྱེད་རྣམས་ཀུན་གྱིས་ཇི་ལྟར་རྟོགས། །བྱང་ཆུབ་སེམས་དཔའ་ཀུན་གྱིས་གསོལ་བ་ནི། །རྡོ་རྗེ་དམ་ཚིག་འབྱུང་བའི་ཚིག་གིས་ནི། །ཤིན་ཏུ་རྟོགས་
པར་དཀའ་བར་གྱུར་པ་ལ། །དེ་བཞིན་གཤེགས་པ་ཉིད་ཀྱི་མཐུ་སྟོབས་ཀྱིས། །སྐལ་བར་ལྡན་པ་རྗེས་སུ་འཛིན་པར་ནི། །ནུས་པ་མཆོག་ལྡན་ཕུན་སུམ་ཚོགས་པ་ཡི། །ཤིན་ཏུ་རབ་ཏུ་རྟོགས་པར་བྱིན་རླབས་ཤིང་། །དབང་
བསྐུར་མཛད་པས་མངོན་པར་རྟོགས་མཛད་གསོལ། །རྨད་དུ་བྱུང་བའི་ཡེ་ཤེས་ཆོ་འཕྲུལ་ཀུན། །ད་ལྟ་ཉིད་དུ་གསལ་བར་བསྟན་མཛད་གསོལ། །སྦྱོར་བ་དང་པོའི་རིམ་པའོ། །དཔལ་ལྡན་རྡོ་རྗེ་འཛིན་པ་ཡིས། །མངོན་རྫོགས་བྱང་
ཆུབ་རྡོ་རྗེ་ཡི། །ཏིང་ངེ་འཛིན་ལ་བཞུགས་ནས་ནི། །དང་པོའི་མགོན་པོ་ཉིད་ཀྱིས་ནི། །རིག་པ་ཆེན་པོའི་སྐྱེས་བུ་སྟེ། །ཆོས་དབྱིངས་རྡོ་རྗེ་མ་གཉིས་མེད། །དཀྱིལ་འཁོར་སྤྲོ་དང་སྡུད་པར་མཛད། །དཔལ་ལྡན་མི་བསྐྱོད་རྡོ་རྗེས་ནི། །
ཡེ་ཤེས་སྒྲོན་མ་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་པས། །བཛྲ་དྷྲྀཀ་ལས་ཕྱུང་གྱུར་ནི། །ཞལ་གསུམ་ཕྱག་ནི་དྲུག་པ་སྟེ། །ཨིནྡྲ་ནཱི་ལ་ཀུནྡ་ལྟར། །རཱ་ག་འབར་བའི་ཞལ་མངའ་བ། །གཡས་གཡོན་རྡོ་རྗེ་དྲིལ་བུ་འཛིན། །
པདྨ་འཁོར་ལོ་ནོར་བུ་དང་། །པདྨ་རལ་གྲི་གཡོན་དུ་སྟེ། །རྡོ་རྗེ་སྐྱིལ་དཀྲུང་རྒྱན་སྤྲས་པ། །དེ་ཉིད་སྐུ་ལས་འོད་ཟེར་ཚོགས། །སྤྲོས་ནས་ཀུན་ཏུ་བདེར་གཤེགས་ཀྱིས། །ཕྱོགས་བཅུའི་ཞིང་ཁམས་ཁྱབ་མཛད་ནས། །འགྲོ་སྦྱངས་
དག་པར་གྱུར་ནས་ནི། །སྨིན་བར་ནས་ཞུགས་ཐུགས་ཀར་ཐིམ། །དེ་ནི་དེ་མ་ཐག་ཏུ་ཡང་། །བཅོམ་ལྡན་ཞེ་སྡང་རྡོ་རྗེར་གྱུར། །རིན་ཆེན་སྣ་ཚོགས་སེང་གེའི་ཁྲི། །ཟླ་བ་ཉི་མའི་སྟེང་དུ་བཞུགས། །དཀྱིལ་འཁོར་ཆེན་པོའི་དབུས་

88-1-349a

གནས་པའོ། །དཀྱིལ་འཁོར་གཙོ་བོ་མངོན་པར་འབྱུང་བའི་ཏིང་ངེ་འཛིན་ཏོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་དྲུག་པའོ།། །། དཔལ་ལྡན་རྣམ་པར་སྣང་མཛད་ཀྱིས། །མངོན་པར་རྟོགས་པ་རྡོ་རྗེ་ཡི། །
ཏིང་ངེ་འཛིན་ལ་སྙོམས་ཞུགས་ཏེ། །ཞལ་གསུམ་ཕྱག་དྲུག་ཀུནྡའི་མདོག །འཁོར་ལོ་དྲིལ་བུ་ཡུམ་དང་རོལ། །རྡོ་རྗེ་ནོར་བུ་གཡས་པ་ལ། །གཡོན་པ་པདྨ་རལ་གྲི་འཛིན། །སྔོ་དང་དམར་དང་གཡས་དང་གཡོན། །གླང་ཆེན་ཁྲི་སྟེང་
པད་ཟླའི་སྟེང་། །རྒྱན་བཅས་སྐྱིལ་དཀྲུང་བཞུགས་པའོ། །བདེ་གཤེགས་རིན་ཆེན་འབྱུང་གནས་ཀྱིས། །བདག་མེད་རྡོ་རྗེ་ལ་བཞུགས་ཏེ། །རཧྣ་དྷྲིག་ཕྱུང་གསེར་གྱི་མདོག །ཡིད་བཞིན་ནོར་བུ་དྲིལ་བུ་དང་། །འཁོར་ལོ་པདྨ་
རལ་གྲི་ཅན། །དུང་དང་ཨུཏྤལ་མཚུངས་པ་ནི། །རིན་ཆེན་རྒྱན་སྤྲས་རྟ་མཆོག་སྟེ། །ཡུམ་བཅས་དཀྱིལ་དཀྲུང་བཞུགས་པའོ། །དཔལ་ལྡན་ཚེ་དཔག་མེད་པ་ནི། །འོད་ཟེར་འབར་བ་རྡོ་རྗེར་བཞུགས། །ཨ་རོ་ལིཀ་ཅེས་རཱ་གའི་
འོད། །སྔོ་དཀར་པདྨ་དྲིལ་བུ་དང་། །རྡོ་རྗེ་འཁོར་ལོ་རལ་གྲི་བཅས། །ཡུམ་བཅས་རྨ་བྱའི་ཁྲི་ལ་བཞུགས། །རིན་ཆེན་རྒྱན་ལྡན་འོད་འཕྲོ་བས། །མཉམ་པའི་དཀྱིལ་དཀྲུང་གིས་བཞུགས་པའོ། །བཅོམ་ལྡན་གདོན་མི་ཟ་བའི་
སྐུ། །ཟིལ་གནོན་རྡོ་རྗེ་ལ་བཞུགས་ཏེ། །པྲཛྙཱ་དྷྲྀ་ཀ་ལས་མརྐ་ཏ་མདོག །དཀར་དམར་རལ་གྲི་དྲིལ་བུས་འཁྱུད། །རྡོ་རྗེ་འཁོར་ལོ་ནོར་བུ་དང་། །པདྨ་རིན་ཆེན་རྒྱན་ལྡན་ཉིད། །ཡུམ་བཅས་ཤང་ཤང་ཁྲིར་བཞུགས་པ། །
རྡོ་རྗེ་དཀྱིལ་དཀྲུང་གིས་བཞུགས་པའོ། །དེ་བཞིན་གཤེགས་པའི་རིགས་ཀྱི་འཁོར་ལོ་མངོན་པར་འབྱུང་བའི་ཏིང་ངེ་འཛིན་ཏོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བདུན་པའོ།། །། དེ་བཞིན་གཤེགས་པ་ཐམས་
ཅད་ཀྱི། །རྡོ་རྗེ་བཙུན་མོ་སྤྱན་མ་ཡིས། །རྡོ་རྗེ་འཛིན་པ་ཐམས་ཅད་ཀུན། །མཉམ་བྱེད་དམ་ཚིག་ལ་བཞུགས་ཏེ། །མ་ཧཱ་ར་ཏི་ལས་བྱུང་བ། །དུང་མདོག་སྔོ་དང་དམར་བའི་ཞལ། །སྐུ་ཡི་རྡོ་རྗེ་དང་མཚུངས་པ། །པདྨ་ཟླ་ཉི་

88-1-349b

ཤར་ལྷོར་བཞུགས། །རྡོ་རྗེ་བཙུན་མོ་མཱ་མ་ཀཱིས། །སངས་རྒྱས་རྗེས་སུ་མཉེས་བྱེད་པའི། །ཏིང་ངེ་འཛིན་ལ་སྙོམས་ཞུགས་ནས། །དྭེ་ཥ་ར་ཏེ་ལས་བྱོན་པ། །ཐུགས་ཀྱི་རྡོ་རྗེ་མཚུངས་པ་ཉིད། །བཻ་དཱུར་དུང་དང་རཱ་གའི་ཞོལ། །རིན་
ཆེན་སྣ་ཚོགས་རྒྱན་སྤྲས་འགྱིང་། །པད་ཟླར་ལྷོ་ནུབ་གྲྭར་བཞུགས་སོ། །རྡོ་རྗེ་བཙུན་མོ་གོས་དཀར་གྱིས། །རྗེས་སུ་ཆགས་པ་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །རཱ་ག་ར་ཏི་ལས་བྱོན་པ། །གསུང་གི་རྡོ་རྗེ་
མཚུངས་པ་ཉིད། །བནྡྷུ་རི་ག་སྔོ་དང་དཀར། །སྒེག་ཅིང་རིན་ཆེན་རྒྱན་སྤྲས་པ། །པད་ཟླར་ནུབ་བྱང་གྲྭར་བཞུགས་པའོ། །རྡོ་རྗེ་བཙུན་མོ་སྒྲོལ་མ་ཡི། །གླུ་མ་རྡོ་རྗེ་ཞེས་བྱ་བའི། །ཏིང་ངེ་འཛིན་ལ་སྙོམས་ཞུགས་ཏེ། །བཛྲ་ར་ཏི་ལས་བྱུང་
སྒེག །མརྐ་ཏ་དུང་དང་བྷནྡུ་ཀ །ཕྲིན་ལས་རྡོ་རྗེ་དང་མཚུངས་པ། །རིན་ཆེན་རྒྱན་གྱིས་ལེགས་སྤྲས་པ། །པད་ཟླར་བྱང་ཤར་གྲྭར་བཞུགས་པའོ། །ལུས་ཀྱི་གནས་སུ་ལྟེ་བ་དང་། །སྙིང་ག་མགྲིན་པ་གསང་བ་དང་། །ལཱྃ་མྃ་པཱྃ་ཏཱྃ་ས་བོན་ཉིད། །
འབྱུང་བ་ནི་ལྷན་ཅིག་སྤྱོད་པ་ཡི། །ལྷ་མོ་ཡེ་ཤེས་བདེ་བར་རོལ། །དེ་ཉིད་མཉམ་པ་ཕྱག་རྒྱ་ཆེ། །ཡེ་ཤེས་མཉམ་པར་སྦྱོར་བ་ལྷ་མོའི་ཏིང་ངེ་འཛིན་ཏོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བརྒྱད་པའོ།། །། ལྷ་མོ་
གཟུགས་ཀྱི་རྡོ་རྗེ་མས། །དམ་ཚིག་མཆོག་གི་མཆོད་པ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །བཛྲ་རཱུ་པེ་ཞེས་སྔགས་ལས། །སྐུ་མཆོག་དཀར་མོ་མེ་ལོང་འཛིན། །རྡོ་རྗེ་སྤྱན་མ་དང་མཚུངས་པ། །རིན་ཆེན་རྒྱན་རྣམས་
ཀྱིས་མཛེས་སྤྲས། །མེ་ཡི་ཕྱོགས་ཀྱི་གྲྭར་བཞུགས་པའོ། །ལྷ་མོ་སྒྲ་ཡི་རྡོ་རྗེ་ལས། །ནམ་མཁའི་འོད་ཀྱི་སྤྲིན་རྡོ་རྗེ། །ཚིམ་བྱེད་ཏིང་འཛིན་ལ་བཞུགས་ཏེ། །བཛྲ་ཤབྡ་ལས་བྱོན་པ། །རྡོ་རྗེ་མཱ་མ་ཀཱི་དང་མཚུངས། །
ཨ་གཽ་རྒྱུད་མངས་སྦྲེང་མཛད་གླུ། །དབྱངས་ཀྱིས་ཀུན་དུ་མཆོད་བྱེད་པ། །བདེན་བྲལ་ཕྱོགས་ཀྱི་གྲྭར་བཞུགས་སོ། །ལྷ་མོ་དྲི་བྱུག་རྡོ་རྗེ་མས། །མངོན་པར་བྱང་ཆུབ་བདུན་སྟོན་པ། །དེ་ཉིད་རྡོ་རྗེའི་ཏིང་འཛིན་བཞུགས། །བཛྲ་

88-1-350a

གནྡྷེ་ལས་ཕྱུང་བ། །གོས་དཀར་ཡུམ་དང་མཚུངས་པ་སྟེ། །དུང་ཆོས་ལྷ་རྫས་མཆོག་འཛིན་པ། །རིན་ཆེན་རྒྱན་སྤྲས་འགྱིང་བག་ལྡན། །རིག་འཛིན་ཕྱོགས་ཀྱི་གྲྭར་བཞུགས་པའོ། །རྡོ་རྗེ་རོ་མཆོག་ལྷ་མོ་ནི། །དམ་
ཚིག་ཆེན་པོའི་མཆོད་པ་ནི། །ཀུན་མཆོད་ཏིང་འཛིན་ལ་བཞུགས་ཏེ། །བཛྲ་རཱ་སྱ་ལས་བྱུང་བ། །རིན་ཆེན་པད་སྣོད་བདུད་རྩི་ནི། །རོ་མཆོག་བཅུད་ལྡན་འཛིན་མཛད་པ། །སྒྲོལ་མ་དང་ནི་མཚུངས་པ་སྟེ། །དབང་ལྡན་ཕྱོགས་ཀྱི་གྲྭར་
བཞུགས་སོ། །རིག་མ་མཆོད་ལྷ་རྣམས་ཀྱིས་ནི། །མཆོད་སྤྲིན་རྒྱ་མཚོས་མཆོད་གྱུར་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་དགུ་པའོ།། །། བྱང་ཆུབ་སེམས་དཔའ་སའི་
སྙིང་ནི། །ཞི་བའི་དམ་ཚིག་མཆོག་གནས་ལས། །ཀྵི་ཏི་གརྦྷའི་སྔགས་ལས་བྱུང་། །མདོག་དཀར་འཁོར་ལོ་རྩིབས་བཅུ་འཛིན། །ཐོར་ཚུགས་ཅོད་པན་རྒྱན་གྱིས་སྤྲས། །ཤར་ཁྱམས་དཀྱིལ་དཀྲུང་དག་གིས་བཞུགས། །སེམས་
དཔའ་རྡོ་རྗེ་འཛིན་པ་ནི། །དངོས་དང་དངོས་མེད་དམ་ཚིག་སྟེ། །རོ་མཉམ་ཏིང་འཛིན་ལ་བཞུགས་པ། །བཛྲ་པཱ་ཎི་ཨྃ་ཞེས་ལས། །གསེར་མདོག་རྡོ་རྗེ་འབར་བ་འཛིན། །ལྷོ་ཕྱོགས་ཁྱམས་ལ་དཀྱིལ་དཀྲུང་བཞུགས། །བྱང་ཆུབ་
ནམ་མཁའི་སྙིང་པོ་ནི། །དམ་ཚིག་མཆོག་ལ་གཟིགས་པ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །ཨཱ་ཀཱ་ཤ་གརྦྷའི་སྔགས་ལས་བྱུང་། །གསེར་མདོག་མརྐ་ཏ་འཛིན་པ། །འགྱིང་བཅས་ལྷོ་ཕྱོགས་ཁྱམས་ལ་བཞུགས། །
སེམས་དཔའ་འཇིག་རྟེན་དབང་ཕྱུག་གིས། །གསུང་མཆོག་རྡོ་རྗེ་ཡེ་ཤེས་ཀྱི། །ཏིང་ངེ་འཛིན་ལ་སྙོམས་ཞུགས་ཏེ། །ལོ་ཀེ་ཤྭ་ར་བཛྲ་ལས། །བྱོན་པ་པདྨ་རཱ་གའི་འོད། །གཡོན་པའི་པདྨ་གཡས་པ་ཡིས། །འབྱེད་མཛད་ནུབ་
ཀྱི་ལྷ་ཁྱམས་བཞུགས། །བྱང་སེམས་མགོན་པོ་འཇམ་དབྱངས་ཀྱིས། །ནམ་མཁའི་རྡོ་རྗེ་ཚུལ་གཅིག་པའི། །ཏིང་ངེ་འཛིན་ལ་སྙོམས་ཞུགས་ཏེ། །གྷོ་ཥ་ནཱ་ཐ་ལས་བྱུང་བའི། །དམར་སེར་རིན་ཆེན་རྒྱན་སྤྲས་པའི། །ཨུཏྤལ་

88-1-350b

དམར་པོ་འཛིན་མཛད་པ། །གཡས་པས་འབྱེད་པར་མཛད་པ་ནི། །དཀྱིལ་དཀྲུང་ནུབ་ཀྱི་ཁྱམས་ལ་བཞུགས། །བྱང་སེམས་སྒྲིབ་པ་ཀུན་སེལ་གྱིས། །ཆོས་རྣམས་ཀུན་ལ་འཇུག་པའི་སྒོ། །རྡོ་རྗེ་ཞེས་པའི་ཏིང་འཛིན་
བཞུགས། །ནི་ཝ་ར་ནི་ལས་བྱུང་བའི། །མརྐ་ཏ་འོད་འཕྲོ་རལ་གྲི་ཅན། །རྒྱན་ལྡན་བྱང་གི་ཁྱམས་ལ་བཞུགས། །དཔལ་ལྡན་བྱམས་པའི་མགོན་པོས་ནི། །རྡོ་རྗེ་སྤྲོས་པའི་སྔགས་བཀོད་ཀྱི། །ཏིང་ངེ་འཛིན་ལ་སྙོམས་
ཞུགས་ཏེ། །མེ་ཏྲི་ནཱ་ཐ་ལས་བྱུང་བ། །དུང་མདོག་ཀླུ་ཤིང་སྤྱི་བླུགས་ཅན། །རིན་ཆེན་རྒྱན་གྱིས་སྤྲས་པ་སྟེ། །ཤར་གྱི་ཁྱམས་ལ་བཞུགས་མཛད་པའོ། །སེམས་དཔའ་ཀུན་དུ་བཟང་པོ་ནི། །ཞིང་ཁམས་ཀུན་ཁྱབ་
མཆོད་སྤྲིན་གྱི། །ཏིང་ངེ་འཛིན་ལ་སྙོམས་ཞུགས་ཏེ། །ས་མནྟ་བྷ་དྲ་ལས་ཕྱུང་བ། །ལྗང་མདོག་སྣ་ཚོགས་རྡོ་རྗེ་ཅན། །རིན་ཆེན་སྣ་ཚོགས་རྒྱན་སྤྲས་པ། །བྱང་ཕྱོགས་ཁྱམས་ལ་དཀྱིལ་དཀྲུང་བཞུགས། །པདྨ་ཉི་མའི་གདན་ལ་ནི། །
འགྱིང་བཅས་ཐོར་ཚུགས་རྒྱན་སྤྲས་པ། །ཀུན་ཀྱང་ཞལ་གསུམ་ཕྱག་དྲུག་སྟེ། །གཙོ་ལ་བསྣོལ་མའི་ཚུལ་གྱིས་གཟིགས། །མེཾ་ཐླྀྃ་ཨོཾ་ཨོཾ་ཨོཾ་དང་ནི། །ཧཱུྃ་ཨོཾ་སྃ་ཉིད་རྣམ་ཤེས་བརྒྱད། །རྣམ་པར་དག་པ་སེམས་དཔའོ། །
དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་པའོ།། །། ཚོགས་སློབ་གང་ཟག་སྒྲ་དོན་སྟོན། །བདེན་པ་གཉིས་སུ་ཡོངས་བསྡུས་པ། །ཁྱད་པར་རྣམ་པར་ངེས་འགྱུར་རོ། །དེ་ནས་
དཀྱིལ་འཁོར་སྒོ་བཞི་དང་། །ཕྱོགས་རྣམས་ཀུན་དུ་ཁྲོ་བོ་བཅུ། །འཇིགས་པའི་གཟུགས་ཅན་བགེགས་འཇོམས་མཛད། །ཞལ་གསུམ་ཕྱག་དྲུག་ལྡན་པའོ། །ཁྲོ་བོ་ཆེན་པོ་གཤིན་རྗེའི་གཤེད། །རྡོ་རྗེ་འཁོར་ལོ་འབར་བ་ཡི། །ཏིང་ངེ་
འཛིན་ལ་སྙོམས་ཞུགས་ཏེ། །ཡ་མཱནྟ་ཀྲྀཏ་ལས་ཕྱུང་བ། །མཐིང་ནག་གཡས་དཀར་གཡོན་དམར་ཞིང་། །རྡོ་རྗེ་ཐོ་བ་འཁོར་ལོ་དང་། །རལ་གྲི་ནོར་བུ་སྡིགས་མཛུབ་ཅན། །ཤར་སྒོར་དྲི་ཟའི་སྟེང་བཞུགས་པའོ། །ཁྲོ་རྒྱལ་ཤེས་

88-1-351a

ཤེས་རབ་མཐར་བྱེད་ཀྱིས། །མངོན་པར་བྱང་ཆུབ་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །པྲཛྙཱནྟ་ཀྲྀཏ་སྔགས་ལས་ཕྱུང་། །དུང་མདོག་སྔོ་དང་དམར་བའི་ཞལ། །བེ་ཅོན་དགྲ་སྟ་འཁོར་ལོ་དང་། །རལ་གྲི་ནོར་
བུ་པདྨ་འཛིན། །ལྷོ་སྒོར་གྲུལ་བུམ་གནོན་མཛད་པའོ། །ཁྲོ་བོའི་རྒྱལ་པོ་རྟ་མཆོག་གིས། །རྡོ་རྗེ་ཆགས་མེད་པདྨ་ནི། །ཡེ་ཤེས་འབྱུང་བའི་ཏིང་འཛིན་ལས། །པདྨ་དྷྲིཀ་ལས་ཕྱུང་བ་ནི། །བྷནྡུ་རི་ཀའི་མདོག་འདྲ་བ། །གཡས་
མཐིང་གཡོན་དཀར་འཇིགས་པར་བྱེད། །པདྨ་རྡོ་རྗེ་ཐོ་བ་དང་། །རལ་གྲི་འཁོར་ལོ་དགྲ་སྟ་ཅན། །ནུབ་སྒོར་ཀླུ་དབང་སྟེང་བཞུགས་པའོ། །ཁྲོ་རྒྱལ་བདུད་རྩི་འཁྱིལ་པ་ཡིས། །རྡོ་རྗེ་བྱིན་རླབས་སྙིང་པོའི་ཚུལ། །རྡོ་རྗེ་ཏིང་
འཛིན་ལ་ཞུགས་ཏེ། །བིགྷཱནྟ་ཀྲི་ལས་བྱུང་བ། །མརྐ་ཏ་དཀར་དང་དམར་བའི་ཞལ། །རྒྱ་གྲམ་འཁོར་ལོ་རལ་གྲི་དང་། །གཏུན་ཤིང་དགྲ་སྟ་བསྡིགས་འཛུབ་ཅན། །བྱང་སྒོར་གནོད་སྦྱིན་སྟེང་བཞུགས་སོ། །ཁྲོ་རྒྱལ་མི་གཡོ་
མགོན་པོ་ཡིས། །ཆོས་དབྱིངས་མི་ཟད་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །ཨཱརྱ་ཨ་ཙ་ལས་ཕྱུང་ཉིད། །བཻ་ཌཱུར་དཀར་དང་དམར་བའི་ཞལ། །རལ་གྲི་འཁོར་ལོ་དགྲ་སྟ་དང་། །པདྨ་ནོར་བུ་བསྡིགས་མཛུབ་
བོ། །མེ་ཕྱོགས་དྲང་སྲོང་གནོན་མཛད་པའོ། །ཁྲོ་བོ་འདོད་པའི་རྒྱལ་པོ་ཡིས། །བསམ་གཏན་ཐོགས་མེད་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །ཊཀྐི་རཱ་ཛའི་སྔགས་ལས་ཕྱུང་། །ཨིནྡྲ་ནཱི་ལ་ཀུནྡ་དམར། །ཕྱག་རྒྱ་བསྣོལ་
བའི་བསྡིགས་མཛུབ་ཅན། །ལྕགས་ཀྱུ་རལ་གྲི་ཨུཏྤ་ལ། །བསྡིགས་མཛུབ་ཞགས་པ་འཛིན་པ་སྟེ། །བདེན་བྲལ་སྟེང་དུ་བཞུགས་པའོ། །ཁྲོ་བོ་རྡོ་རྗེ་བེ་ཅོན་ཅན། །འཇིགས་མཛད་སྙིང་རྗེའི་ཏིང་ངེ་འཛིན། །ནཱི་ལ་དཎྜ་ལས་ཕྱུང་བ། །
ཆར་སྤྲིན་མདོག་འདྲ་དཀར་དམར་ཞལ། །དབྱུག་པ་རལ་གྲི་ནོར་བུ་དང་། །འཁོར་ལོ་པདྨ་བསྡིགས་མཛུབ་མཛད། །གཏུམ་པོ་མི་བཟད་མེ་དཔུང་ཀློང་། །རླུང་ལྷའི་གདན་ལ་བཞུགས་པའོ། །རྡོ་རྗེ་ཁྲོ་བོ་སྟོབས་པོ་ཆེ། །

88-1-351b

སྐུ་གསུམ་མི་ཕྱེད་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །མ་ཧཱ་བ་ལའི་སྔགས་ལས་ཕྱུང་། །ཨུཏྤལ་སྤྲིན་དཀར་བྱི་རུའི་ཞལ། །རྩེ་གསུམ་རྔ་ཡབ་རལ་གྲི་དང་། །འཁོར་ལོ་ནོར་བུ་བསྡིགས་མཛུབ་ཅན། །འབྱུང་པོའི་གདན་སྟེང་
བཞུགས་མཛད་པའོ། །ཁྲོ་རྒྱལ་རྡོ་རྗེ་གཙུག་ཏོར་ཅན། །རིག་པའི་སྟོབས་མཆོག་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །ཨུཥྞཱི་ཥ་བི་ཛའི་སྔགས་ལས་ཕྱུང་། །ནམཁའི་མདོག་ཅན་གཙུག་ཏོར་གྱི། །ཕྱག་རྒྱ་སྤྱི་བོར་བཅིངས་པ་སྟེ། །
རྡོ་རྗེ་རལ་གྲི་པདྨ་དང་། །བསྡིགས་མཛུབ་ཞགས་པ་འཁོར་ལོ་འཛིན། །རྣམ་འཚེ་འཇོམས་མཛད་ས་བདག་གནོན། །ལྷ་རྒྱལ་ཚངས་པ་གནོན་མཛད་པའོ། །རྡོ་རྗེ་གནོད་མཛེས་ཁྲོས་པའི་སྐུ། །རབ་ཏུ་འབྱུང་གནས་ཡེ་ཤེས་ཀྱི། །རྡོ་རྗེའི་
ཏིང་འཛིན་ལ་ཞུགས་ནས། །བརྟན་གཡོ་གདུག་པ་དུག་ཅན་གྱི། །དྲག་པོ་འཇོམས་མཛད་མཐིང་ནག་ཉིད། །སུམ་བྷ་རཱ་ཛའི་སྔགས་ལས་བྱུང་། །རྡོ་རྗེ་འཁོར་ལོ་རལ་གྲི་དང་། །ནོར་བུ་པདྨ་བསྡིགས་མཛུབ་མཛད། །རྣམ་འཚེ་ཞི་མཛད་
ས་བདག་གནོན། །ལུས་ཀྱི་གནས་སུ་ཁྲོ་བོ་རྣམས། །ས་བོན་ཕྱག་མཚན་རྩ་གནས་ལ། །གཡས་མཐིང་ཐོད་དབྱུགས་གཡོན་པར་ནི། །བེ་ཅོན་མགྲིན་པར་པདྨ་ཅན། །གསང་བར་སྣ་ཚོགས་རྡོ་རྗེ་འཁྱིལ། །ཛཿཧཱུྃ་བཾ་ཧོ་སྒོ་བཞི་བསྲུང་། །དྲུག་ལྡན་ཧཱུྃ་གིས་བརྒྱན་
པ་ནི། །ལྕགས་ཀྱུ་དཔུང་གཡས་རྩེ་གསུམ་གཡོན། །ལྷ་ངར་དབྱུག་པ་ཏྲི་ཤཱུ་ལ། །བོང་བུར་རྡོ་རྗེ་སྤྱི་གཙུག་ཏུ། །འཁོར་ལོ་གྱེའུ་འཕགས་གྱུར་པའོ། །ཁྲོ་རྒྱལ་ཐམས་ཅད་ཡུམ་དང་ལྡན། །རིན་ཆེན་ཀླུ་དབང་རྒྱན་གྱིས་སྤྲས། །དབུ་སྐྲ་གྱེན་བརྫེས་མེ་དཔུང་དབུས། །ཡན་ལག་རགས་ཤིང་
བརྗིད་པའི་སྐུ། །ཧ་ཧ་ཧཱུྃ་ཧཱུྃ་སྒྲ་སྒྲོགས་པས། །སྲིད་གསུམ་གཡོ་བར་མཛད་པ་པོ། །དངོས་པོ་མཚན་མར་འཛིན་པའི་གདོན། །ལོག་ལྟ་ཅན་རྣམས་འདུལ་མཛད་པ། །ཡབ་ཡུམ་གཉིས་མེད་སྦྱོར་བ་དགྱེས། །གསང་བ་བདེ་བ་ཆེན་པོ་ཡི། །
དཀྱིལ་འཁོར་ཡེ་ཤེས་སྙིང་པོ་བསྟན། །ལྷ་ཚོགས་མངོན་པར་འབྱུང་བའི་འཁོར་ལོའི་ཏིང་ངེ་འཛིན་ཏོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་གཅིག་པའོ།། །། ཟབ་པའི་རྒྱན་ལ་རྣམ་པར་དབྱེ་བ་གང་། །མཐའ་ལྡན་དང་ནི་བཤད་
88-1-352a

ཚུལ་དབྱེ་བ་ཡིས། །ནུས་པ་ཁྱད་པར་གྱུར་པ་རྒྱན་དང་ལྡན། །ས་ཡི་དབང་ཕྱུག་གསང་བའི་རྒྱན་བསྟན་པའོ། །རྒྱ་ཆེའི་རྒྱན་ལ་སྤྱི་དང་བྱེ་བྲག་ཅན། །རྒྱ་ཆེ་ལ་ནི་མཚོན་དོན་སྟོན་པ་དང་། །རིགས་ཅན་ལྔས་ནི་ངེས་པར་
འཇུག་གྱུར་པ། །གང་ཟག་དང་ནི་དངོས་གྲུབ་སྒྲུབ་པའི་གནས། །ལྔ་ཚད་གཟུགས་ཁམས་ཚད་མེད་ལྡན། །ཚུལ་ལྡན་སྟོན་པའི་མཚན་ཉིད་དང་། །རྒྱུད་དང་གླེང་གཞི་ངེས་པའི་ཚིག །རྒྱུ་ཡིས་མཐར་འབྱིན་སྤྱོད་པའོ། །ཆོས་ཀྱི་ཐ་
དད་པ་ཡི་རྒྱན། །ཚོགས་སློབ་གཉིས་དང་བདེན་གཉིས་སོ། །དེ་ནས་བྱང་ཆུབ་སེམས་དཔའ་ཆེན་པོ་བྱམས་པས་གསོལ་པ། དོན་དམ་པའི་བདེན་པ་ལ་གནས་པའི་རྣལ་འབྱོར་ཆེན་པོ་ལས་ཀྱི་རྒྱལ་པོ་མཆོག་གི་ཏིང་ངེ་
འཛིན་ལ་བརྟེན་ནས་སེམས་ཅན་གྱི་དོན་ཇི་ལྟར་རབ་ཏུ་སྤྱད་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཇི་སྲིད་དུ་ཞི་བ་ལ་སོགས་པའི་ལས་ཀྱི་སེམས་ཅན་གྱི་དོན་མི་བྱེད་པ་དེ་སྲིད་དུ་ཡང་དག་པའི་མཐའ་ལ་རབ་ཏུ་གནས་པར་འགྱུར་རོ། །
གང་དུ་སེམས་ཅན་ཐམས་ཅད་ཀྱི་དོན་བྱ་བར་མཐོང་བ་དེའི་ཚེ་ཡང་དག་པའི་མཐའ་ལས་ལངས་ཏེ་སེམས་ཅན་གྱི་དོན་བྱས་ནས་ཡང་དག་པའི་མཐའ་ཉིད་དུ་འཇུག་ཅིང་མི་གནས་པའི་མྱ་ངན་ལས་འདས་པ་མངོན་དུ་བྱེད་དོ། །གང་དུ་འགྲོ་བའི་དོན་འབྱུང་
བ། །དུས་ལ་བབ་པ་དེའི་ཚེ། །རྡོ་རྗེའི་སྤྱན་གྱིས་གཟིགས་པའི་ཚེ། །ཐོགས་པ་མེད་པར་ཕྲིན་ལས་ཀུན། །གདུལ་བྱའི་བསམ་པ་ཇི་ལྟ་བར། །ངེས་པ་ཉིད་དུ་འབྱུང་འགྱུར་བའོ། །ས་རླུང་བརྟན་པོ་ཐོབ་པ་དང་། །རླུང་གིས་རྣམ་པར་འདེགས་
བྱེད་པ། །ཐབས་དང་ཤེས་རབ་སྲོག་རྩོལ་ལ། །བརྟེན་པས་རྡོ་རྗེ་རྐང་མགྱོགས་འགྲུབ། །ཐ་མལ་ལུས་ངག་ཡིད་དག་ལ། །ལྷ་སྔགས་རླུང་སེམས་རྩེ་གཅིག་ལས། །བསམ་གཏན་ཡ་རླུང་མ་རླུང་གིས། །ཀུན་ཏུ་བསྒྱུར་བས་གསེར་འགྱུར་ཐོབ། །ལྷ་
བྱེད་སྒྱུ་མའི་རྣམ་ཤེས་ལས། །ཏིང་འཛིན་ཆུ་རླུང་གསལ་སྣང་གིས། །ལྐོག་ཏུ་གྱུར་པའི་རྫས་མཐོང་བ། །དེ་ཉིད་མིག་སྨན་རིལ་བུ་འགྲུབ། །རླུང་གི་དམིགས་པ་རྣོན་པོ་ཡི། །རྣལ་འབྱོར་པ་ཡི་མཚོན་ཆ་མཆོག །གར་བསྒྱུར་གཅོད་པར་བྱེད་པ་ཡི། །

88-1-352b

ཐོགས་མེད་རལ་གྲིའི་དངོས་གྲུབ་བོ། །རྟོག་མེད་ཐ་མལ་དབུགས་བྲལ་ལ། །ཞིང་སྐྱོང་ཆོ་འཕྲུལ་ཡུམ་གཞན་བཞུགས། །ཕོ་ཉ་སྔགས་ཀྱི་ནུས་པ་ལས། །གྲུབ་སྟེར་རོ་ལངས་གྲུབ་པ་འབྱུང་། །བདུད་རྩི་རང་ལུས་གནས་པ་ལས། །སྟོབས་
གྱུར་འབྱུང་བ་རོ་སྙོམས་པས། །སྨན་མཆོག་ཟིལ་ལྡན་རྙེད་པ་ལྟར། །བཅུད་ལེན་ཡོན་ཏན་ཁྱད་པར་འགྲུབ། །ནམ་མཁའི་རླུང་ལས་རྩ་གནས་དེར། །རླུང་སྒྲོམ་དག་བྱེད་སྤེད་ཤེས་པས། །གྲིབ་མ་མི་འབྱུང་བདེ་ཐོབ་པ། །མི་སྣང་བར་སྣང་བྱེད་
པ་ཉིད། །གསང་སྒོ་རྩ་ཡི་བུ་ག་ལས། །འདུས་པ་སྒྲོན་མེས་ཁམས་དགུ་ཡི། །དངས་རྙིགས་བྱེད་པས་ལྷ་མིན་གྱི། །བུག་རྙེད་ལ་ནི་ས་འོག་འགྲུབ། །དབང་དང་དགུག་དང་བསྐྲད་པ་དང་། །མནན་དང་རེངས་བྱེད་མངོན་སྤྱོད་དང་། །ཞི་དང་རྒྱས་པ་ཀླུས་
ལས་བྱེད། །བརྗོད་བྱ་དང་ནི་བརྗོད་བྱེད་དང་། །དཔེ་དང་མངོན་གྱུར་སྟོབས་དང་ནི། །ཆོས་དོན་ཁྱད་པར་གྱུར་པའི་ཕྱིར། །ནུས་ལྡན་གསང་བའི་རྒྱན་ཡིན་ནོ། །གནས་པ་དང་ནི་གསལ་རྫུ་འཕྲུལ། །ཡོན་ཏན་ཕྲིན་ལས་རྒྱན་རིམས་བཞིན། །དེ་ནི་
རྗོད་བྱེད་རྟག་པར་བརྒྱན། །དོན་གྱུར་དགོས་པ་བླ་ན་མེད། །དོན་གནས་བྱེད་དང་ཡེ་ཤེས་ཀྱི། །གསང་ཆེན་དོན་མཐོང་སྙིང་པོ་སྟེ། །རྒྱན་པས་དབྱེ་བསྡུ་བསྟན་པའོ། །དུག་ཞི་བ་དང་བསྲུང་བ་དང་། །རྒོལ་བའི་ནུས་འཇོམས་ཕྲིན་ལས་ཏེ། །རབ་འབྱམ་
ལས་ཚོགས་དུ་མ་བསྟན། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་གཉིས་པའོ།། །།   བྱང་ཆུབ་སེམས་དཔའ་ཆེན་པོ་བྱམས་པས་གསོལ་པ། བཅོམ་ལྡན་འདས་རྒྱན་རྣམ་པ་བདུན་ཇི་
ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། གླེང་བསླང་བ་རྣམ་པ་ལྔ་དང་། རིགས་པ་རྣམ་པ་བཞི་དང་། མཐའ་དྲུག་གིས་བཤད་པ་དང་། བཤད་ཚུལ་རྣམ་པ་བཞི་དང་། དབྱེ་བ་རྣམ་པ་གཉིས་དང་། གང་ཟག་རྣམ་པ་ལྔའི་
སྒོ་ནས་སློབ་མ་བརྟག་པ་དང་། བདེན་པ་གཉིས་ཀྱི་དགོངས་པའོ། །གླེང་བསླང་བ་རྣམ་པ་ལྔ་ནི་འདི་ལྟ་སྟེ། མཚན་དང་། གང་ཟག་དང་། བྱེད་པ་པོ་དང་། ཚད་དང་། དགོས་པ་རྣམས་སོ། །དང་པོ་གླེང་གཞི་གླེང་སློང་བསྟན་པ་ལས། །ཕུན་

88-1-353a

སུམ་ཚོགས་པ་ལྔ་དང་ལྡན་བསྡུས་པ། །གསེར་གྱི་འཁོར་ལོ་རིན་ཆེན་ཆོས་མཐུན་པ། །སྤྱི་བོའི་གནས་སུ་ཨེ་བྃ་རྡོ་རྗེ་བཞུགས། །སྟོན་པ་ཆགས་ཅན་འཁོར་དང་དེ་བཞིན་ཆོས། །ཡེ་ཤེས་དུས་ལྡན་ཚད་ལས་དགོས་པ་བསྒྲུབ། །
བྱང་སེམས་རྡོ་རྗེ་ཆོ་ག་དབང་བསྐུར་བ། །རྣམ་གྲངས་ལེའུ་གནས་ཚུལ་ལྔ་ལྡན་པ། །རིམ་གཉིས་རྒྱུད་གསུམ་དོན་གྱིས་ཕྱེ་བ་ཉིད། །བྱང་ཆུབ་ཕྱོགས་ལས་དུམ་བུ་དབྱེ་བར་གྱུར། །རྣལ་འབྱོར་བསྙེན་བསྒྲུབ་ཡན་ལག་མཆོག་དང་ནི། །
རྡོ་རྗེ་རྣམ་བཞི་ཡན་ལག་རིམ་པས་བསྡུས། །དགོས་པའི་ཁྱད་པར་ལས་དང་དངོས་གྲུབ་ལས། །གྲུབ་པ་བརྒྱད་དང་མཆོག་ལྡན་ཡང་དག་པའོ། །བདེ་ཆེན་འཁོར་ལོར་ཐིག་ལེ་གཙོར་གྱུར་པའི། །དགུ་བརྒྱ་ཕྲག་གཅིག་ཡེ་ཤེས་
རླུང་གྱུར་པ། །བཅུ་གཅིག་བཞི་ཆ་ཕྲག་ལྔའི་རྩ་གནས་སོ། །ལྔ་བཅུ་ཕྲག་གཉིས་ཨཱ་ལི་ཀཱ་ལི་སྟེ། །རྩིབས་སྟོང་ལྡན་པ་སྦས་པའི་འཁོར་ལོའོ། །སྤྱོད་པ་རིམ་ལྡན་རྗེས་སུ་གསང་བ་སྟེ། །རྨད་བྱུང་དཀྱིལ་འཁོར་སྙིང་པོ་བསྐུལ་བ་
དང་། །སྔགས་དང་ཡེ་ཤེས་སྐུ་བསྐྱེད་ཕྲིན་ལས་དག །རབ་འབྱམ་རིགས་འཛིན་ཡན་ལག་འབྲས་བུ་བསྟན། །སྔགས་དང་ནད་ལ་མཆོག་གཞོལ་རྣལ་འབྱོར་གྲུབ། །ལས་ཚེགས་ཚར་གཅོད་རྗེས་འཛིན་རྨི་ལམ་ཆོས། །རྣམ་དག་དཀྱིལ་
འཁོར་ལས་ཀྱི་ཕྲིན་ལས་ཚོགས། །དམ་ཚིག་སྡོམ་པ་རབ་རྫོགས་གཞུང་བསྡུས་བསྟན། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་གསུམ་པའོ།། །། སྙིང་ག་ཆོས་ཀྱི་འཁོར་ལོ་དེ་ཉིད་
དུ། །ལྷན་ཅིག་སྐྱེས་པའི་སྙིང་པོ་གསང་བ་གང་། །རྒྱལ་ཆེན་ཤཱཀྱའི་རིགས་རྒྱུད་དུས་ལྡན་མཆོག །དོན་གྱི་ཕོ་བྲང་དུ་འཁྲུངས་དབུགས་འབྱིན་པ། །བྱང་ཆུབ་གླེང་གཞི་ཨ་ཁྃ་བཱིར་ཧཱུྃ་ལས། །འཇུག་པ་ཆུ་སྒོ་ཡང་དག་ཐར་པའི་རྟེན། །
གཟིགས་ལས་རླུང་ཡུལ་ལས་འདས་ཀུན་འདར་མཐོང་། །གཤེགས་པ་ཡེ་ཤེས་ས་བོན་དྲུག་ཏུ་ནི། །ངེས་འབྱུང་རང་འབྱུང་གཉིས་སུ་མེད་པའི་རྟེན། །སྡོམ་ཞིང་འགོག་པས་ངེས་པ་སྙིང་པོར་བསྐུལ། །རྡོ་རྗེ་འཛིན་པ་མངོན་བྱེད་ཤེས་སྤྱོད་

88-1-353b

པ། །འཁོར་ལོ་བསྐོར་བསྟན་སྙིང་པོ་མཆོག་ཐོབ་པས། །ཐམས་ཅད་མཁྱེན་པ་བླ་ན་མེད་པར་གྱུར། །དེ་ནི་རྒྱུད་ཅེས་མངོན་པར་བྱང་ཆུབ་ལྔ། །ཕུང་པོ་དག་པ་ཁམས་གསང་རིགས་གཅིག་ཉིད། །གླེང་གཞི་ངེས་པ་དབང་སོགས་ལམ་
རྡོ་རྗེ། །རྒྱུ་ནི་སྤྱོད་པ་ཞི་དྲག་ཁྲོ་ཚོགས་འདྲེན། །གླེང་གཞི་དབྱེ་བ་ཚུལ་གཉིས་རྟོགས་པར་བྱ། །ཡིད་བཞིན་ནོར་བུ་ངོ་བོ་ཉིད་ལྡན་སྐུ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་བཞི་པའོ།། །། 
མགྲིན་པ་ལོངས་སྤྱོད་འཁོར་ལོར་གསུང་རྡོ་རྗེ། །མཐའ་ལྡན་དྲུག་ནི་གླང་ཆེན་སྟོབས་ལྡན་པ། །བརྗོད་བྱ་མིང་ཚིག་རབ་བྱེད་སྒྲ་ཚོགས་ལས། །ཟུང་གྱུར་རོ་དྲུག་ལོངས་སྤྱོད་དོན་ལྡན་བརྗོད། །འགྲོ་དྲུག་གནས་དོན་ངེས་པ་རྒྱན་དུ་གྱུར། །འཇིག་
རྟེན་གནས་དང་འཇིག་རྟེན་འདས་ལས་གྲོལ། །ཡངས་ཐོབ་རྣལ་འབྱོར་རྒྱུ་འབྲས་རྨི་ལམ་དང་། །མཚུངས་པ་སྒྱུ་མར་སྟོན་པ་དྲང་བའི་དོན། །གྲུབ་མཐའ་རིམ་ལྡན་གཟུངས་ལས་ཡོན་ཏན་ཚོགས། །ངོ་བོ་ཉིད་ཀྱིས་གྲོལ་བ་སྟོང་པ་ཉིད། །
རྣམ་པར་མི་རྟོག་སྐྱེ་མེད་དངོས་རྣམ་དག །སྤྲོས་བྲལ་དེ་བཞིན་ཉིད་ལས་ཀུན་དུ་སྟོན། །ཡེ་ཤེས་ཡོངས་སུ་དག་པ་ངེས་པའི་དོན། །དངོས་པོ་མཚན་མར་འཛིན་པའི་བློ་བཟློག་བྱེད། །ཡང་དག་གཉིས་མེད་ཡེ་ཤེས་ལམ་སྟོན་ཅིང་། །
དམན་པ་ཟིལ་གནོན་མཆོག་དོན་རྨད་གྱུར་པ། །དགོངས་བཤད་གསང་ཆེན་འབྱུང་གནས་དོན་ཀུན་བསྒྲུབ། །ཆོས་རྣམས་འབྱུང་བ་རྒྱ་མཚོ་ཆེན་པོ་ལས། །ཐུགས་རྗེའི་ཞགས་པས་འདྲེན་པ་བློ་གྲོས་མཆོག །ཚིག་དོན་སྤྲོ་བསྡུས་བྱང་
ཆུབ་གནས་ཐོབ་བྱེད། །ཡོན་ཏན་དགོངས་པ་མིན་པ་ཞེས་བརྗོད་དོ། །རྩ་རླུང་བྱང་སེམས་ཡི་གེ་གནས་དག་པ། །རོ་རྐྱང་སྲོག་རྩོལ་དྲང་ངེས་ཁྱད་པར་གསང་། །སྙིང་གར་འབྲུ་ལྔ་རྩ་བ་འབྲུ་ལྔ་ལྷུང་བ་དག །དགོངས་བཤད་དྲུག་ལྔ་
ཤེས་བྱེད་ལམ་སྦྱང་བའོ། །དགོངས་མིན་ཨཱ་ལི་གསུང་དབྱངས་ཡན་ལག་གནས། །དེ་ཉིད་ཆོས་རྣམས་བདག་མེད་སྒྲ་སྒྲོགས་པ། །ཨཱ་ལི་ཀཱ་ལི་དྲུག་ལྡན་མཚན་དཔེ་ནི། །ཇི་བཞིན་སྒྲ་ལས་རྒྱན་སྤྲས་བླ་ན་མེད། །ཇི་བཞིན་

88-1-354a

མིན་སྒྲ་བཅུ་གནས་རྡོ་རྗེའི་དབྱིངས། །གསང་བ་སྙིང་པོ་བསྡུས་པ་བརྡས་བཤད་ཉིད། །ཐོག་མ་བར་དང་མཐའ་མར་དགེ་བའི་ཆོས། །བླ་མེད་མི་ཟད་རྣམ་པ་ཐམས་ཅད་དུ། །རབ་འབྱམ་དོན་བསྒྲུབ་རྟོག་པ་ཕྲིན་ལས་ཚོགས། །
གྲུབ་སྟེང་གནས་ལས་ཇི་བཞིན་སྒྲར་འབྱུང་སྟོན། །ཕྱིར་མི་བཟློག་པ་བྲལ་དང་མཐའ་ལས་འདས། །ཁྱད་པར་བརྡ་ལས་ཟབ་པ་སྙིང་པོའི་དོན། །རྒྱལ་བའི་སྤྱོད་ཡུལ་ཐ་སྙད་ལས་གྲོལ་བ། །ཇི་བཞིན་མ་ཡིན་སྒྲ་ཞེས་རྣམ་པར་བསྒྲགས། །
དུས་གཞན་ལ་དགོངས་པ་ནི་དྲང་བའི་དོན་ཏོ། །གང་ཟག་གཞན་ལ་དགོངས་པ་ནི་དྲང་བའི་དོན་ཏོ། །མཉམ་པ་ཉིད་ལ་དགོངས་པ་ནི་ངེས་པའི་དོན་ཏོ། །དོན་གཞན་ལ་དགོངས་པ་ནི་ངེས་པའི་དོན་ཏོ། །གང་ཟག་གི་བསམ་པ་ལ་དགོངས་
པ་ནི་དགོངས་བཤད་དོ། །བསྒྱུར་བ་ལ་ལྡེམ་པོར་དགོངས་པ་ནི་དགོངས་བཤད་དོ། །གཉེན་པོ་ལ་ལྡེམ་པོར་དགོངས་པ་ནི་དགོངས་བཤད་དོ། །གཞུང་ལ་ལྡེམ་པོར་དགོངས་པ་ནི་སྒྲ་ཇི་བཞིན་མ་ཡིན་པའོ། །མཚན་ཉིད་ལ་ལྡེམ་པོར་དགོངས་པ་
ནི་སྒྲ་ཇི་བཞིན་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅྭོ་ལྔ་པའོ།། །།  ལྟེ་བ་སྤྲུལ་པའི་འཁོར་ལོར་གནས་པ་ནི། །རྣམ་པར་བཤད་པ་ཚུལ་བཞིན་ལྡན་པ་ནི། །མ་ནོར་ཕྱིན་ཅི་མ་ལོག་སྟོན་པ་སྟེ། །
འདི་ནི་རྡོ་རྗེ་བཙུན་མོའི་ཆོས་ཚུལ་མཚུངས། །ལྟེ་བའི་འཁོར་ལོ་སྒྲ་ལྡན་ཡིག་འབྲུ་བརྒྱད། །མདོ་ལས་ཨེ་བྃ་མ་ཡཱ་གསང་བ་ཉིད། །རྒྱུད་སྤྱི་བརྡ་དབྱིབས་སྒྲ་དང་རྒྱས་འདེབས་ཏེ། །ཀུན་རྫོབ་རང་གཞན་བདག་བྱིན་རླབ་པ་ལས། །རྨི་ལམ་སྒྱུ་
ལུས་མཚོན་པ་བར་དོ་སྦྱང་། །སེམས་གསུམ་སྟོང་ཉིད་ཡེ་ཤེས་སྦས་པ་ཉིད། །སྣང་བ་གསུམ་ལས་དྲང་བཞིན་དག་འོད་གསལ། །བདེ་བ་ལས་ནི་གཏུམ་མོ་འབར་འཛག་ལས། །ཕྱི་རོལ་གཉིས་མེད་གསང་བའི་སྙོམས་འཇུག་པ། །སྒྱུ་མའི་
རོལ་པ་བཙུན་མོ་ལྟ་བུར་བསྟན། །དང་པོ་ཡི་གེའི་དོན་ཏེ་སྤྱི་མིང་ཙམ། །སྨོས་པས་ཨཱ་ལི་ཀཱ་ལིས་རྐྱེན་སྦྱར་ནས། །རྣམ་པ་དུ་མའི་བྱེད་པ་སྒྲར་བཅས་པ། །ལས་རྣམ་ལུས་དང་ཡན་ལག་འབྲེལ་པས་མཚོན། །སྤྱི་དོན་གཉིས་ལས་མདོ་དོན་

88-1-354b

ཉན་རང་དང་། །བྱང་ཆུབ་སེམས་དཔའི་ལམ་མཆོག་ལ་དབང་སྟེ། །འཇུག་པ་རྣམ་ཐར་ལ་སོགས་དྲུག་ལྡན་པ། །ཆོས་རྣམས་ཡོངས་རྫོགས་མཁྱེན་བཅས་འདིར་སྟོན་བྱེད། །རྡོ་རྗེ་ཐེག་པ་སྤྱི་དོན་རྒྱུད་ཀུན་གྱི། །དགོངས་པ་བལྟ་བའི་
རྣལ་འབྱོར་གསང་སྟོན་པ། །རིག་སྔགས་གཟུངས་བཅས་གསང་སྔགས་དེ་ཉིད་ཀྱི། །འདུས་པར་འཇུག་པའི་རིམ་པ་ལམ་གྱུར་པའོ། །སྦས་པའི་དོན་ལས་སྙིང་པོ་གསང་བ་མཆོག །བླ་ན་མེད་པའི་འབྱུང་གནས་བཙུན་མོ་དང་། །ཕྱོགས་
མཚུངས་ཕྱི་ལྟར་རིན་ཆེན་རྒྱན་སྤྲས་བཞིན། །སྤྱི་དོན་གཉིས་ཀྱིས་ན་བཟའ་གོས་རིམ་ན། །སྦས་དོན་གསང་བ་བཙུན་མོའི་ལུས་ངག་ཡིད། །ལུས་ནི་སྒྱུ་མ་ཀུན་རྫོབ་རྨི་ལམ་ལྟར། །ངག་ནི་རླུང་སྔགས་གཉིས་མེད་སྦྱོར་བ་ལས། །
རྣམ་ཤེས་སེམས་ཉིད་སྣང་བ་གསུམ་སྦས་པ། །བདེ་བའི་ལམ་གྱིས་སྦས་པ་དགའ་བ་བཞི། །ཡེ་ཤེས་ཆེན་པོ་རོལ་པའི་གསང་བ་མཆོག །སྙིང་པོ་བདེ་ཆེན་ལྷན་ཅིག་སྐྱེས་པའོ། །ཡེ་ཤེས་འབྱུང་གནས་ཉིད་ནི་སྐད་ཅིག་བཞི། །
མཐར་ཐུག་དེ་ཁོ་ན་ཉིད་འོད་གསལ་བ། །དེ་ལ་བརྟེན་པས་ལམ་མྱུར་བགྲོད་པ་སྟེ། །རང་འབྱུང་ཞི་གནས་ལྷག་མཐོང་རོ་མཉམ་པ། །ཟུང་འཇུག་མི་འགྱུར་བྱང་ཆུབ་སེམས་རྡོ་རྗེ། །ལམ་མཐར་ཕྱིན་པ་ལྷུན་གྲུབ་ངོ་བོ་ཉིད། །བརྗོད་
འདས་རྒྱ་ཆེན་པོ་ཡང་དེ་ཉིད་དོ། །ཨེ་བྃ་ལས་ནི་ཕུན་ཚོགས་ལྔ་ལྡན་པ། །དཔེ་དོན་གྱུར་པ་སྒྲ་དང་རྟགས་ལས་ཤེས། །ཡི་གེ་བཞི་བཅུ་གསང་བ་གླེང་གཞི་ལས། །ཨེ་བྃ་གསང་བ་གླེང་བསླང་མདོ་རྒྱས་པ། །འཛམ་གླིང་གནས་སུ་
དཀྱིལ་འཁོར་སྣང་བ་བསྟན། །གསང་སྔགས་དབྱིབས་དང་བརྡ་སྔགས་དོན་སྦྱར་བ། །ཐུན་མོང་གྱུར་པ་ཐེ་ཚོམ་སེལ་བའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་དྲུག་པའོ།། །།  སྨིན་མཚམས་
མཛོད་སྤུའི་འཁོར་ལོ་མུ་ཁྱུད་ལས། །རྩ་ཡི་བྱེད་པ་རོ་རྐྱང་ཐབས་ཤེས་ལས། །སྲོག་རྩོལ་འབྱུང་འཇུག་བྱང་སེམས་སྤྲོ་བསྡུ་དང་། །སྒྲོ་འདོགས་གཅོད་པ་ཕྱི་དང་གསང་བའི་ཚུལ། །རྡོ་རྗེའི་ལུས་ཀྱི་གནས་ལུགས་ཁྱད་པར་ལས། །

88-1-355a

དམག་དཔོན་རལ་གྲི་ཐོགས་པ་ལྟ་བུ་སྟེ། །ཚོགས་སློབ་གཉིས་ལ་སྤྱི་དང་རང་མཚན་ཉིད། །སྤྲོས་དང་སྤྱོད་པ་དེ་ཉིད་སྣང་བ་ལམ། །རྣམ་ཤེས་ཡེ་ཤེས་དབང་པོ་སྒོ་འབྱེད་པ། །ཆོས་ལ་རབ་ཏུ་དབྱེ་བའི་སྒོ་ནས་
བསྟན། །གང་ཟག་རིགས་པ་དབྱེ་བ་གཉིས་སུ་ཤེས། །དབང་གིས་ཕྱེ་བ་ཁྱད་པར་ཆོས་ལ་ཡང་། །ཕྱི་ལས་གཞོལ་དང་གསང་བ་ནང་གནས་བྱེད། །དེ་ཉིད་ཁྱད་པར་དབྱེ་བ་དེ་ནི་མཚོན་པར་བྱ། །འཇིག་རྟེན་པ་རྣམས་ཁམས་
གསུམ་བསམ་གཏན་ཕྱིར་ལྡོག་ལམ། །འཇིག་རྟེན་ལས་འདས་ཕྱིར་མི་ལྡོག་པ་ཡང་དག་སྟོན། །ཡེ་ཤེས་ལས་ནི་བླ་མའི་ལམ་རྟེན་འདོན་རྫོགས་ཐོབ། །བྱིན་རླབས་ཆུ་རྒྱུན་གྱིས་ནི་བདེ་ཆེན་བླ་མེད་དོན། །རབ་གྲུབ་བདེ་བ་དཔེ་མེད་
མ་རྟོགས་ལོག་རྟོག་ཐེ་ཚོམ་སེལ། །སྒྲོ་འདོགས་སྐུར་འདེབས་བྲལ་བ་དྲི་མེད་གསང་བ་གྲུབ་པ་ཅན། །མཐར་ཐུག་སྙིང་པོ་རྫོགས་སངས་འབྲས་བུ་ལམ་གྱུར་སྤྱོད་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་
བདུན་པའོ།། །། གསང་བའི་འཁོར་ལོ་ལ་བརྟེན་རིགས་ལས་ནི། །འགྲོ་བ་བློ་རིགས་ལྔ་ལྡན་དབང་པོ་ནི། །རབ་དང་ཡང་རབ་དམན་པ་འབྲིང་རྣམས་ཏེ། །ཡན་ལག་རླུང་སྒོ་དབང་པོ་ལྔ་སྤྱོད་ཡུལ། །བདུད་རྩི་ལྔ་ལྡན་དེ་ཉིད་བློན་པོ་
སྟེ། །བྱང་སེམས་ཐིག་ལེ་བདེ་བའི་འབྱུང་གནས་སོ། །གསང་བ་བདེ་སྐྱོང་འཁོར་ལོ་དེ་ཉིད་ནི། །སྐལ་ཅན་བློ་ལྡན་འགྲོ་བའི་རྒྱུད་ཀྱིས་བསྡུས། །གང་ཟག་བློ་རིགས་དཔེ་དང་སྦྱར་བ་སྟེ། །སྣོད་ཀྱི་བྱེ་བྲག་ཆོས་མཐུན་མཚུངས་པ་སྟེ། །
རྒྱུད་ལ་འཇུག་པའི་དབང་པོའི་རིམ་པ་ནི། །ཐ་དད་ཆོས་ཅན་བློན་པོར་ཆོས་མཐུན་པ། །ཙནྡན་ལྟ་བུ་དབང་པོ་དམན་པའོ། །ཨུཏྤལ་ལྟ་བུ་ཐ་མར་གྱུར་པ་དང་། །པད་དཀར་སྐལ་ལྡན་འབྲིང་གྱུར་ཅུང་ཟད་དག །པད་དམར་དབང་པོ་རབ་
འགྱུར་བརྩོན་པ་ཆེ། །ཡང་རབ་རིན་ཆེན་ལྟ་བུ་བླ་ན་མེད། །རྩ་དང་བྱང་སེམས་ཡི་གེ་རླུང་དག་པ། །ངེས་པ་ཅན་དང་མ་ངེས་པར་འབྱུང་ལ། །སྦྱངས་པ་ཅན་དང་ཐོག་མ་མེད་ནས་ཀྱི། །རང་བཞིན་ཡོན་ཏན་གུས་པ་ཐོབ་གྱུར་པའོ། །

88-1-355b

ཙནྡན་ལྟ་བུ་ནི་ཉན་ཐོས་ཀྱི་རིགས་ཅན། ཨུཏྤལ་ལྟ་བུ་ནི་རང་རྒྱལ་བའོ། །པདྨ་དཀར་པོ་ནི་བྱང་ཆུབ་སེམས་དཔའ་རྣམས་སོ། །པད་དམར་ལྟ་བུ་ནི་གསང་སྔགས་ལ་འཇུག་པའོ། །རིན་ཆེན་ལྟ་བུ་ཡོན་ཏན་དང་ལྡན་པ་ནི། དཔལ་
རྡོ་རྗེ་འཆང་གི་རིགས་སོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅྭ་བརྒྱད་པའོ།། །། ཀུན་རྫོབ་ཀྱི་བདེན་པ་ནི་ཆུ་ཟླ་ལ་སོགས་པའོ། །དོན་དམ་པའི་བདེན་པ་ནི་སྟོང་པ་ཉིད་བཅྭ་བརྒྱད་དོ། །དེའི་
དོན་ནི་རྒྱ་མཚོར་གཟའ་སྐར་ཤར་བ་ལྟར་སྐད་ཅིག་ལ་འཆར་བའོ། །གཙུག་ཏོར་གནས་ལས་ཡོན་ཏན་ཀུན་མཐར་ཕྱིན། །རྡོ་རྗེ་གསུམ་གྱི་སྙིང་པོ་སྐུ་གསུམ་རྫོགས། །ཀུན་འདར་བྱང་ཆུབ་སེམས་ཀྱིས་བརྟན་གྱུར་པ། །སྒྲོ་འདོགས་གཅོད་
བྱེད་དམག་དཔོན་རལ་གྲི་འཛིན་པའོ། །དོན་དམ་ཀུན་རྫོབ་དབྱེར་མེད་རྟ་མཆོག་སྟེ། །དབུ་མ་ཟུང་འཇུག་རབ་ཏུ་མི་གནས་པ། །སྐུ་བཞི་ལྷུན་གྲུབ་ཡེ་ཤེས་རྫོགས་སངས་རྒྱས། །སྦྱང་གཞི་སྦྱོང་བྱེད་ལྡན་པར་རིམ་པ་ཉིད། །རྡོ་རྗེ་ལུས་
ཀྱི་རྩ་གནས་ཐམས་ཅད་ནི། །དབུ་མ་ལ་བརྟེན་ཆ་ཤས་ཕྲ་རགས་གང་། །མཚུངས་གྱུར་རྡོ་རྗེ་གསང་ཆེན་གྱུར་པ་གང་། །ལམ་གྱུར་བདེན་པ་གཉིས་ཀྱི་དེ་ཉིད་ནི། །ཐམས་ཅད་སྡུད་བྱེད་རིམ་པ་རབ་རྫོགས་ལ། །རྡོ་རྗེ་ལྟ་བུའི་ཏིང་འཛིན་
བྱང་ཆུབ་པས། །ཐོག་མ་བར་དང་མཐའ་མ་ཀུན་དུ་ཡང་། །དུས་དང་རྣམ་པ་ཐམས་ཅད་རྟེན་བྱེད་པ། །ཁྱབ་ཅིང་གནས་མེད་གནས་ནི་བསམ་མི་ཁྱབ། །རྒྱུ་འབྲས་འགག་མེད་རྟེན་ཅིང་འབྲེལ་འབྱུང་གི། །སྐུ་སོགས་དབང་ཕྱུག་ཡོན་ཏན་ཚད་
མེད་པ། །ནམ་མཁའ་ཁྱབ་པ་ཡང་དག་ཞིང་ཁམས་ཉིད། །ཟུང་འཇུག་གང་དུ་ཐིམ་པ་གནས་གར་འཇུག །རང་གི་ངོ་བོ་བྱང་སེམས་འགྱུར་མེད་པ། །གཉིས་མེད་རོ་མཉམ་གྱུར་པ་ལམ་དང་ནི། །བལྟ་ལ་སྤྱོད་པ་ཀུན་དུ་ཟུང་འཇུག་པ། །
ཐོགས་པ་མེད་པར་འབྱུང་བའི་དཔལ་དང་ལྡན། །ཡེ་ཤེས་བླ་མེད་དབང་ཕྱུག་བཅུ་གསུམ་ས། །མཐར་ཕྱིན་སྐད་ཅིག་བྱང་ཆུབ་དབྱིངས་ཡེ་ཤེས། །དབྱེར་མེད་བྱང་ཆུབ་ཆེན་པོ་མགོན་པོ་ཉིད། །བདེ་ཆེན་མཉམ་ཉིད་རང་འབྱུང་ཆེན་པོའོ། །དཔལ་ཡེ་

88-1-356a

ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་བཅུ་དགུ་པའོ།། །། ནང་སྟོང་པ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དང་། སྟོང་པ་ཉིད་སྟོང་པ་ཉིད་ནི་ཏིང་ངེ་འཛིན་གྱིས་བསྡུས་སོ། །ཆེན་པོ་སྟོང་པ་ཉིད་
དང་། དོན་དམ་པ་དང་། འདུས་བྱས་དང་། འདུས་མ་བྱས་ནི་བརྩོན་འགྲུས་ཀྱིས་སོ། །མཐའ་ལས་འདས་པ་དང་། ཐོག་མ་དང་ཐ་མ་མེད་པ་དང་། དོར་བ་མེད་པ་ནི་དགའ་བ་ཡང་དག་པས་སོ། །རང་བཞིན་སྟོང་པ་ཉིད་དང་། ཆོས་ཐམས་ཅད་སྟོང་པ་
ཉིད་ནི་ཤིན་ཏུ་སྦྱངས་པས་སོ། །རང་གི་མཚན་ཉིད་དང་། མི་དམིགས་པ་ནི། ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་གིས་སོ། །དངོས་པོ་མེད་པ་སྟོང་པ་ཉིད་དང་། ངོ་བོ་ཉིད་སྟོང་པ་ཉིད་ནི་དྲན་པ་ཡང་དག་པས་སོ། །དངོས་པོ་
མེད་པའི་ངོ་བོ་ཉིད་སྟོང་པ་ཉིད་ནི། བཏང་སྙོམས་ཡང་དག་པ་བྱང་ཆུབ་ཀྱི་ཡན་ལག་དང་ལྡན་པས་སོ། །སྐད་ཅིག་མ་སྟེ་ཆོས་ཉིད་བདེན་པའི་དོན་ཏོ། །དེ་ནས་བྱང་ཆུབ་སེམས་དཔའ་ནམ་མཁའི་སྙིང་པོས་གསོལ་པ། མགོན་པོ་བྱམས་པ་
ལ་ཅུང་ཟད་ཅིག་བཞེངས་ལ་བཟོད་པར་གསོལ་ནས། བཅོམ་ལྡན་འདས་ལ་ཞུས་པ། བདག་ཟབ་དོན་ཅུང་ཟད་ཅིག་ཞུ་བས། སྐབས་དབྱེ་བར་གསོལ་ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེའི་དུས་ལ་བབ་པར་
ཤེས་ན་ཅི་རིགས་པར་ཞུས་ཤིག །ངས་ལེགས་པར་བསྟན་པར་བྱའོ་ཞེས་གསུངས་སོ། །དེ་ནས་བྱང་ཆུབ་སེམས་དཔའ་ནམ་མཁའི་སྙིང་པོས་གསོལ་པ། གསང་བ་ཆེན་པོའི་རྒྱུད་འདི་ཡི། །དགོངས་པ་ཟབ་ཅིང་རྒྱ་ཆེ་བས། །གཏིང་དཔག་དཀའ་
བར་གྱུར་པས་ན། །ཟབ་དོན་སྙིང་པོ་གསུང་དུ་གསོལ། །ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། །ནམ་མཁའི་སྙིང་པོ་ཤིན་ཏུ་ལེགས། །གསང་ཆེན་དེ་ཉིད་གོང་འོག་ཏུ། །སྔ་ཕྱིའི་རིམ་པའི་ཁྱད་པར་ཀུན། །བཤད་ཀྱིས་གུས་
པས་ལེགས་པར་ཟུང་། །གསང་བའི་དེ་ཉིད་བླ་ན་མེད། །རྒྱུ་འབྲས་ཟབ་ཅིང་རྒྱ་ཆེ་བ། །ཐབས་དང་ཤེས་རབ་འདུས་པའི་རྒྱུད། །ཟུང་འཇུག་བདེ་ཆེན་བསྟན་པར་བྱ། །ཐོག་མ་བར་དང་མཐའ་དགེ་བ། །བྱང་ཆུབ་སེམས་མཆོག་བསྟན་པ་ཉིད། །

88-1-356b

གཞི་དང་དངོས་པོའི་ཁྱད་པར་དང་། །ལམ་བྱེད་ནུས་པ་ཕྲིན་ལ་སོགས། །འབྱུང་གནས་ཡེ་ཤེས་བསྟན་པ་ལ། །སྨོན་པ་དང་ནི་འཇུག་སེམས་བསྐྱེད། །དོན་དམ་བསྟན་པའི་བྱང་ཆུབ་སེམས། །ཡང་དག་དོན་གྱི་སེམས་བསྐྱེད་པ། །ཀུན་ཏུ་
བཟང་པོའི་ཏིང་འཛིན་ལས། །སྤྱི་བོར་པདྨ་ཟླ་ཉི་ལ། །འཁོར་ལོ་ཨོཾ་དཀར་འོད་འཕྲོ་བ། །མགྲིན་པར་པད་དམར་ཨཱཿའོད་འབར། །ཐུགས་ཀར་ཟླ་བ་རྡོ་རྗེ་ནི། །དཀར་པོ་རྩེ་ལྔ་འོད་འཕྲོ་བ། །དངུལ་ཆུའི་མདོག་འདྲའི་ཧཱུྃ་ཡེ་ཤེས། །ཀུན་
རྫོབ་དོན་དམ་བྱང་ཆུབ་སེམས། །དེ་ཉིད་ཏིང་འཛིན་གནས་པར་བྱ། །དཔྲལ་བར་རིན་ཆེན་ས་ཡིག་གསེར། །ལྟེ་བར་རལ་གྲི་ཧ་ལྗང་བ། །འོད་འཕྲོ་ཡེ་ཤེས་ལྔ་བདག་ཉིད། །འོད་འགྱེད་འགྲོ་བ་སྦྱངས་པ་ལས། །སླར་འདུས་རིགས་ཀྱི་བདག་
པོ་ནི། །རྡོ་རྗེ་བཻ་ཌཱུརྱ་ཡི་འོད། །ཐུགས་ཀར་རྡོ་རྗེ་ལ་ཐིམ་པས། །ཁྲོ་བོའི་རྡོ་རྗེ་ཁ་གྱེས་པས། །འདུས་པ་རྡོ་རྗེ་འཆང་ངོ་བོ། །བྱང་ཆུབ་སེམས་ཀྱི་རྡོ་རྗེ་ཉིད། །གཉིས་མེད་བདེ་བ་ཆེན་པོར་གནས། །རྟོགས་པ་བརྗོད་པས་བསྟན་
པར་འགྱུར། །རྣལ་འབྱོར་ཏིང་འཛིན་གནས་པ་ནི། །འཇིག་རྟེན་ལམ་ལ་གནས་པ་སྟེ། །ཕྱི་ལ་མཆོག་ཏུ་གཞོལ་བས་ནི། །འཇིག་རྟེན་ཆོས་བརྒྱད་རྟོག་པ་འདབ། །མ་སྤངས་ལྷ་ཡི་དམིགས་པ་ལས། །ཕྲ་མོ་རླུང་ལ་བསླབ་པ་
དང་། །རགས་པ་ཐིག་ལེ་བསྒོམ་པས་ནི། །ལས་ཆེན་ཐུན་མོང་དངོས་གྲུབ་ལ། །དམིགས་ཕྱིར་གནས་སྐབས་འབྲས་བུ་ཐོབ། །རིམ་གཉིས་ལྡན་པའི་ཏིང་འཛིན་ལས། །སྤྲོ་བསྡུ་རིགས་ཀྱི་རྣལ་འབྱོར་ལམ། །ས་བོན་ཐིག་ལེའི་དེ་
ཉིད་ལས། །ངོ་བོ་ཡེ་ཤེས་བདེ་ཆེན་འགྲུབ། །མཆོག་གྱུར་ནང་དོན་མངོན་དུ་བྱ། །རྣམ་པར་བཀོད་པའི་དཀྱིལ་འཁོར་དང་། །བྱང་ཆུབ་སེམས་དང་ལུས་གནས་པའི། །དཀྱིལ་འཁོར་བདེ་ཆེན་འབྱུང་གནས་ཉིད། །སེམས་ཀྱི་དཀྱིལ་
འཁོར་མཆོག་གྱུར་པ། །བུམ་པ་གསང་བ་ཤེས་རབ་དང་། །དེ་ཉིད་སྙིང་པོའི་དཀྱིལ་འཁོར་ཏེ། །ཡེ་ཤེས་མཆོག་ཏུ་དབང་བསྐུར་བའོ། །གསང་བའི་དེ་ཁོ་ན་ཉིད་ཡེ་ཤེས་ཀྱི་དཀྱིལ་འཁོར་ཆེན་པོར་བདེ་བ་ཆེན་པོ་ལྷུན་གྱིས་གྲུབ་པ་

88-1-357a

ལྷན་ཅིག་སྐྱེས་པ། སྐལ་བ་དང་ལྡན་པ་རྣམས་ལས། ཚད་མེད་པའི་དོན་དམ་པའི་ཡེ་ཤེས་ཀྱི་དབང་རྡོ་རྗེས་ཐོགས་པ་མེད་པར་ཀུན་དུ་དབང་བསྐུར་བའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་
རབ་ཏུ་བྱེད་པ་ཉི་ཤུ་པའོ།། །། དེ་བཞིན་གཤེགས་པའི་མཛད་པ་ཡི། །ཆོས་དོན་དེ་ཉིད་བླ་ན་མེད། །སྤྱོད་པའི་གསང་བ་མངོན་དུ་བྱུང་། །ཁྱད་པར་སྣོད་ལྡན་རྟོགས་གྱུར་པའོ། །དག་པའི་གནས་དང་འཁོར་འདུས་ལ། །ཅི་ཕྱིར་
ཚིག་ནི་འདི་ལྟ་བུ། །རིགས་པ་མ་ཡིན་ཅེས་པའི་དོན། །ཐེ་ཚོམ་གནས་སུ་གྱུར་པ་ལས། །ཕྱི་རོལ་གྱུར་དང་ཐུན་མོང་དང་། །ཇི་བཞིན་སྒྲ་དང་མ་ཡིན་དང་། །བསྟན་ལ་རང་དགར་འཇུག་པ་ཅན། །ཡིན་ནམ་སྙམ་དུ་རྟོག་པ་ལ། །
བཟློག་པ་དེ་བཞིན་གཤེགས་རྣམས་ཀྱིས། །ཕྱིན་ཅི་ལོག་ཏུ་གྱུར་ལས་བཟློག །ལན་གསུངས་སྒྲོ་འདོགས་བཅད་པའོ། །སེམས་ལ་དམིགས་པ་བདག་མེད་པ། །རྣམ་པར་དབེན་དོན་བསྟན་པ་ལས། །གསང་བ་བྱང་ཆུབ་རིམས་
ཀྱིས་དང་། །ཅིག་ཅར་རིམ་པ་ཉེར་བསྟན་པ། །དེ་ཉིད་ལམ་དུ་མངོན་པར་འབྱུང་། །སྤྱོད་དང་གྲོལ་བ་བླ་མེད་པ། །སྣ་ཚོགས་ཐབས་ཀྱིས་གདུལ་དོན་དུ། །སྒྱུ་མ་ལྟ་བུའི་སྤྱོད་པ་སྤྱོད། །རྣལ་འབྱོར་བརྟུལ་ཞུགས་མཆོག་འཛིན་
པའི། །ཀུན་འགྲོ་ཀུན་ལ་དབང་བསྐུར་བ། །མི་འཇིགས་དགྲ་ལས་རྒྱལ་བ་སྟེ། །རིག་པ་བརྟུལ་ཞུགས་སྤྱོད་བྱ་བ། །ཀུན་བཟང་མགོན་པོ་ཀུན་སྤྱོད་དོ། །སྤྲོས་པའི་སྤྱོད་པས་མཉམ་གཞག་དང་། །རྗེས་ཐོབ་གཉིས་མེད་ལམ་དུ་
བླང་། །ཕྱོགས་ལས་རྣམ་རྒྱལ་སྤྱོད་ཐོབ་ནས། །ཡེ་ཤེས་ཆེན་པོའི་སྤྱད་བྱ་བ། །ཟུང་འཇུག་བདེ་ཆེན་རོ་མཉམ་ལས། །མཐར་ཐུག་སྤང་བླང་མེད་པར་གྲོལ། །ཨ་བ་དྷཱུ་ཏཱིའི་སྤྱོད་པ་ལས། །སྤྲོས་བཅས་སྤྲོས་མེད་དག་དང་ནི། །
ཤིན་ཏུ་སྤྲོས་མེད་སྤྱོད་པ་སྤྱོད། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་ཉི་ཤུ་རྩ་གཅིག་པའོ།། །། སངས་རྒྱས་ཀུན་གྱི་བླ་མེད་པ། །གསང་བ་བྱང་ཆུབ་སེམས་དབང་བསྐུར། །དབང་པོ་རབ་དང་ཡང་རབ་དང་། །འབྲིང་གྱུར་

88-1-357b

མོས་པའི་དབང་བྱས་པས། །ཐམས་ཅད་མོས་སྤྱོད་ལམ་མཚན་པ། །གསང་ཆེན་མཆོག་གི་དོན་ལས་ནི། །ཡེ་ཤེས་ལམ་བསྟན་དེ་ཉིད་དོ། །དཀྱིལ་འཁོར་ཆེན་པོའི་ཚད་གྱུར་པ། །ཡེ་ཤེས་ཚད་མེད་རི་རབ་སྟེ། །སྤྱོད་ཡུལ་བླ་མེད་འདིར་བསྟན་པ། །
མཆོད་པའི་རོལ་པ་ལྷ་མོ་སྟེ། །པདྨ་སྣ་ཚོགས་བདེ་བས་མཆོད། །ཕྱོགས་བཅུ་དུས་གསུམ་རྒྱལ་བ་ཀུན། །གསང་ཆེན་ཐེག་པ་ལ་བརྟེན་ནས། །རྡོ་རྗེ་ཡེ་ཤེས་ཏིང་འཛིན་བརྙེས། །རྡོ་རྗེ་འཆང་གི་ངོ་བོར་ནི། །བདེ་ཆེན་མཉམ་པ་ཉིད་གྱུར་པས། །མི་ཕྱེད་ཡེ་ཤེས་
མངོན་སངས་རྒྱས། །རིགས་ལྡན་མཆོད་པ་བླ་ན་མེད་པ་སྟེ། །དྲན་པ་གཅིག་པ་ནས་ནི་ལུས་དབེན་པར། །རགས་པའི་ཏིང་འཛིན་སློབ་དུས་མཉམ་རྗེས་ལས། །ཡུལ་ལྔ་གཟུགས་ཀྱི་རྡོ་རྗེ་མ་ལ་སོགས། །ས་ཡི་སྙིང་པོ་ལ་སོགས་དབང་པོ་ལྔ། །ཡབ་
ཡུམ་ལྷར་བརྟེན་སློབ་པ་སྤྱོད་པ་སྟེ། །གཟུང་འཛིན་མ་སྤངས་སྤྲོས་པ་ལྡན་པའི་ཕྱིར། །སྤྲོས་བཅས་སྤྱོད་པ་ཞེས་ནི་གྲགས་པའོ། །མཆོད་ཡུལ་རིགས་ལྔ་རྣམ་སྣང་ལ་སོགས་པ། །མཆོད་རྫས་ཡུལ་ལྔ་ལྷ་དང་ལྷ་མོར་སྣང་། །མཆོད་བྱེད་སྤྲོས་བཅས་
སྤྱོད་པ་ལ་གནས་པ། །མཆོད་ཐབས་སོ་སོར་རིགས་ཀྱིས་མཆོད་པའོ། །རྟེན་སློབ་སྤྲོས་མེད་ངག་དབེན་སེམས་དབེན་ལྡན། །བདག་བྱིན་བརླབ་པས་ཏིང་འཛིན་ཕྲ་བ་ས། །སློབ་མ་མཉམ་རྗེས་ཐབས་དང་ཤེས་རབ་དག །གཉིས་མེད་རྟེན་པའི་
ལུས་སེམས་བརྟེན་སློབ་པ། །མཆོད་བྱ་རིགས་ཀྱི་བདག་པོ་ལྔ་སོགས་སོ། །མཆོད་དངོས་རྣམ་གསུམ་ཁྱད་པར་དག་ཏུའོ། །མཆོད་བྱེད་རྣལ་འབྱོར་གྱིས་ནི་ཐབས་བཅས་མཆོད། །རྟེན་སློབ་ཤིན་ཏུ་སྤྲོས་མེད་འོད་གསལ་ནས། །སྒྱུ་ལུས་
དག་པའི་བར་དུ་ཏིང་འཛིན་ནི། །ཤིན་ཏུ་ཕྲ་བ་སློབ་པ་མཉམ་རྗེས་ལ། །བསམས་པས་ཐབས་དང་ཤེས་རབ་དབང་པོ་དང་། །ཡུལ་ལྔ་གཉིས་མེད་རང་བཞིན་མེད་པར་བསླབ། །སྤྲོས་པ་རྣམ་པར་བྱེད་པ་དེ་ཡི་ཕྱིར། །ཤིན་ཏུ་སྤྲོས་
མེད་དེ་ལ་བྱེ་བྲག་ཏུ། །མཆོད་བྱའི་ཡུལ་ནི་ཡེ་ཤེས་སྐུ་འབྱུང་བ། །མཆོད་བྱེད་གང་ཟག་སྒྱུ་མར་གནས་པས་སོ། །དོན་ནི་སྣང་གསུམ་སྒྱུ་མར་ལྡན་པ་ལས། །མཆོད་དངོས་སྒྱུ་མའི་འདོད་ཡོན་ཉིད་ཡིན་ནོ། །མཆོད་པའི་ཐབས་ནི་བསམ་གཏན་

88-1-358a

གཉིས་ཀྱིས་ནི། །འོད་གསལ་ངང་དུ་ཐིམ་པ་དེ་ཉིད་དོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་ཉི་ཤུ་རྩ་གཉིས་པའོ།། །། རྗེས་དྲན་མདོར་བསྟན་དྲུག་གིས་ནི། །དབེན་པ་གསུམ་དང་སྒྱུ་ལུས་
དང་། །འོད་གསལ་སྔོན་འགྲོ་རྒྱུ་དག་ལས། །ཏིང་འཛིན་ལས་སྤྱོད་དེས་སྤྱོད་པའི། །སྙོམས་འཇུག་རིམ་པ་གཉིས་ལྡན་ལས། །དག་པའི་སྒྱུ་ལུས་རྫོགས་རིམ་གྱི། །རིགས་ལྔའི་གསང་བའི་སྤྱོད་པ་ལས། །སློབ་བཞིན་ཟུང་འཇུག་
ཡེ་ཤེས་འཐོབ། །བསྐྱེད་རིམ་པས་ནི་མཁའ་གསང་དག །བྱིན་བརླབས་སྙོམས་ཞུགས་སྤྱོད་པའོ། །རྗེས་སུ་དྲན་པ་བཅུ་དྲུག་གིས། །ལམ་དང་སྤྱོད་པ་བསྟན་པ་ལས། །དག་པའི་སྒྱུ་མ་ལ་གནས་ནས། །མཚན་མ་མེད་པའི་ཏིང་ངེ་འཛིན། །
རིགས་ལྔའི་དང་པོའི་སྦྱོར་བ་བསྟན། །སངས་རྒྱས་རྗེས་དྲན་ལ་སོགས་ལྔས། །སྒྱུ་དག་འོད་གསལ་ལུགས་བཟློག་ལས། །རྫོགས་པའི་རིམ་པ་བསྟན་པའོ། །སྣང་གསུམ་ངང་ལས་ལོངས་སྐུ་ནི། །རྡོ་རྗེ་འཆང་དུ་གནས་པ་ལས། །
ཡབ་ཡུམ་བདེ་བའི་ངང་ལས་ནི། །རྣམ་སྣང་མཛད་ཀྱི་སྤྲོ་བསྡུ་ཡིས། །སྤྲུལ་སྐུའི་སྤྲོས་ནས་བསྡུ་བར་བྱ། །རྗེས་དྲན་དྲུག་པས་ལྕེ་ཆུང་གི། །བདུད་རྩི་འབབ་བྱེད་བཅུད་ལེན་བསྟན། །བདུན་པས་བདག་ཉིད་ཡབ་ཡུམ་ལྡན། །མཚན་
མ་མེད་ལ་གནས་པ་ཡིས། །དཀྱིལ་འཁོར་རྒྱལ་པོ་མཆོག་གནས་པ། །བརྒྱད་པ་དགུ་པ་བཅུ་པ་ལས། །སྐུ་གསུང་ཐུགས་རྣམས་བྱིན་བརླབ་པ། །ལྷ་ཡི་རྣལ་འབྱོར་བསྟན་པའོ། །བཅུ་གཅིག་པ་དང་བཅུ་གཉིས་པས། །རྒྱུ་
དག་ལྷ་ཡི་སྐུ་གསུང་ཐུགས། །བྱིན་རླབས་བཞི་ཡི་བསྡུས་པ་ལ། །ཐམས་ཅད་ཡེ་ཤེས་དབྱིངས་འཇུག་པ། །ཕྱི་མར་མཆོག་ཐོབ་བསྟན་པའོ། །བཅུ་གསུམ་པ་ནི་བར་མ་དོར། །སངས་རྒྱས་ལམ་ནི་སྟོན་པའོ། །བཅུ་བཞི་པ་དང་
བཅྭ་ལྔ་པས། །ཕྱག་རྒྱ་ཆེན་པོ་གྲུབ་པ་སྟེ། །ཚེ་འདིར་འཚང་རྒྱའི་ལམ་སྟོན་བྱེད། །དེ་ལྟར་རྗེས་དྲན་བཅོ་ལྔ་པས། །ཏིང་ངེ་འཛིན་ནི་བསྟན་པའོ། །སྤྱོད་པ་རྗེས་དྲན་བཅུ་དྲུག་པས། །དཀྱིལ་འཁོར་ཏིང་འཛིན་བསྡུས་ནས་ནི། 

88-1-358b

སྤྱོད་པ་ལྷ་མོ་དགུ་འམ་ལྔ། །སྤྱོད་པ་མཐར་ཕྱིན་བྱེད་པའོ། །རྗེས་དྲན་བཅུ་དྲུག་གིས་ནི་འདིར། །མྱུར་བར་སྐྱོབ་པའི་ཁྱད་པར་ཡང་། །ཟབ་དང་རྒྱ་ཆེ་བསྟན་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་
བྱེད་པ་རྩ་གསུམ་པའོ།། །། འཇིག་རྟེན་འཇིག་རྟེན་འདས་པ་ཡི། །བདེར་གཤེགས་བྱང་ཆུབ་སེམས་དཔར་བཅས། །ཐེ་ཚོམ་གཅོད་མཛད་རྡོ་རྗེའི་ཚིག །ཡང་དག་དོན་ནི་སྟོན་པར་མཛད། །གསང་བ་ཡེ་ཤེས་
སྨིན་གྲོལ་གྱིས། །ཏིང་འཛིན་ཡེ་ཤེས་ཆོས་བསྟན་ཏོ། །དགོངས་ཏེ་གསུངས་པ་གང་ལ་གང་། །སྔོན་བྱུང་རྗེས་འཇུག་ལྡེམ་དགོངས་ཉིད། །གསལ་བ་གཞན་ལས་ཁྱད་པར་གྱུར། །དཀྱིལ་འཁོར་དབུས་དབྱུང་རིགས་བསྡུས་
པའི། །དེ་ཉིད་རྒྱལ་བ་བསླང་བར་མཛད། །གཅོད་བྱེད་རྡོ་རྗེ་བཟླས་པ་སྟེ། །མ་བྱིན་ལེན་པ་སེམས་དམིགས་ཀྱིས། །མི་ཚངས་སྤྱོད་པའི་འོད་གསལ་བ། །སྒྱུ་མས་བརྫུན་དུ་སྨྲ་བ་ཉིད། །ཟུང་འཇུག་རབ་ཏུ་མི་གནས་པས། །
ཚིག་རྩུབ་དངོས་འཛིན་ཟློག་པར་བྱེད་པའོ། །ལས་རླུང་ཅུང་ཟད་དུལ་བར་གྱུར་པ་ཡིས། །ཡེ་ཤེས་རླུང་གི་ནུས་པ་རྙེད་གྱུར་ནས། །ཏིང་འཛིན་གསལ་ཞིང་ཕྲ་རབ་འཇུག་པ་ཉིད། །ཀུན་དོར་ཏུ་ནི་སྲོག་རྩོལ་རབ་སིམ་གྱུར། །ལ་ལར་
ཐབས་དང་ཡེ་ཤེས་རབ་རླུང་། །དབུ་མར་གནས་པས་འབྱུང་འཇུག་གཡོ་མི་འགྱུར། །དེ་ལས་ཡེ་ཤེས་འོད་ཟེར་གློག་ལྟ་བུ། །ཀུན་ནས་འབྱུང་བ་དེ་ཉིད་ཐིག་ལེའི་དབུས། །དཀར་དམར་གོང་བུ་འདྲེས་པའི་བྱང་ཆུབ་སེམས། །
འབྱུང་བའི་སྒོ་དང་འཇུག་པའི་སྒོ་ཉིད་ནི། །མི་འཕོ་རི་བོང་འཛིན་པ་ཟླ་རྒྱས་པས། །སྣ་ཡི་བུ་ག་གཡས་གཡོན་རྣལ་འབྱོར་པའི། །གཅིག་ནས་འབྱུང་ཞིང་གཅིག་ཏུ་འཇུག་པ་ནི། །ཚིམ་བྱེད་བདེ་གནས་སྙིང་ག་ལྟེ་བར་ནི། །གནས་
པ་རྡོ་རྗེ་འཛིན་པའི་སྙིང་པོ་ནི། །བསྐུལ་བར་གྱུར་པའི་བདེ་གཤེགས་ཐམས་ཅད་ལ། །ཕྱོགས་བཅུར་མཆོད་ནས་དགྱེས་པར་གྱུར་པ་ལས། །བདུད་རྩི་སྤྱན་གྱི་མཛོད་སྤུ་ནས་ཕྱུང་སྟེ། །འཇུག་པ་རྣལ་འབྱོར་སྤྱི་གཙུག་འཁོར་ལོར་ཞུགས། །

88-1-359a

མགྲིན་པར་ལོངས་སྤྱོད་ཐུགས་ཀར་ཐིམ་གྱུར་པས། །བྱང་ཆུབ་ཆེན་པོ་ཨ་བ་དྷཱུ་ཏཱིར་གནས། །དེ་ཉིད་སྤྲོས་མེད་བདུད་རྩི་རབ་རྒྱས་པས། །གནས་བཅུར་ཁྱབ་པ་ཀུན་འདར་མི་ལྡོག་གྱུར། །བདེ་བ་ཆེན་པོའི་སྙིང་
པོ་བསྐུལ་བ་ནི། །སྐུ་གསུང་ཐུགས་ཀྱི་རྡོ་རྗེ་རོ་མཉམ་པས། །བྱང་སེམས་རྡོ་རྗེ་ཉིད་དུ་མཆོག་མངོན་འགྱུར། །རྒྱལ་སྲས་ཐམས་ཅད་རབ་ཏུ་དགྱེས་གྱུར་པས། །ཡེ་ཤེས་སྙིང་པོ་ནུས་པ་བརྟན་བྱེད་འགྱུར། །འདི་ནི་ཡེ་ཤེས་ཕོ་
ཉ་མཆོག་གིས་ནི། །སྐད་ཅིག་ཉིད་ལ་བྱང་ཆུབ་མངོན་དུ་བྱེད། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ཉི་ཤུ་རྩ་བཞི་པའོ།། །། ཡེ་ཤེས་མངོན་པར་འབྱུང་བ་ལས། །སྔགས་ཀྱིས་ལྷ་ཡི་སྐུ་བསྐྱེད་པ། །
མངོན་པར་བྱང་ཆུབ་རྣམ་ལྔ་ལས། །རྡོ་རྗེ་འཆང་ཉིད་གྲུབ་བྱེད་པའི། །བདེན་གཉིས་རྣམ་དག་རྒྱུ་འབྲས་ཏེ། །ཡོངས་སུ་དག་པའི་སྐུར་རྫོགས་བྱེད། །རིགས་ཀྱི་ལྷ་ཡི་རྣལ་འབྱོར་པ། །རིམ་པ་ཇི་བཞིན་རྫོགས་བྱེད་པ། །སྔགས་
ཀྱིས་བསྐྱེད་པའི་རྣལ་འབྱོར་རོ། །ཡེ་ཤེས་ཀྱིས་ནི་སྐུ་བསྐྱེད་པ། །རྡོ་རྗེ་འཆང་ཉིད་རྣལ་འབྱོར་པ། །སྒྱུ་མ་སྟོང་ཉིད་འཇུག་པ་སྟེ། །དངོས་པོས་མཐོང་བར་མི་འགྱུར་རོ། །ཁམས་གསུམ་བརྟན་གཡོ་བདག་ཉིད་བཅས། །རིལ་འཛིན་
རྗེས་གཞིག་ཏིང་འཛིན་གྱིས། །ཐམས་ཅད་འོད་གསལ་གནས་འཇུག་པ། །ཡེ་ཤེས་ཟུང་འཇུག་ཐོབ་འགྱུར་བའོ། །བྱང་ཆུབ་སེམས་དཔའི་ཏིང་འཛིན་གྱིས། །མངོན་ཤེས་སྒྲུབ་བྱེད་ས་བོན་བཅས། །དེ་ལས་ཡང་དག་རབ་
གྲུབ་འགྱུར། །དེ་བཞིན་གཤེགས་པ་ཐམས་ཅད་ཀྱི། །སྐུ་གསུང་ཐུགས་ཀྱི་ཕྲིན་ལས་སྟོབས། །མཚུངས་མེད་ཡོན་ཏན་རྒྱ་མཚོ་སྟེ། །མི་ཟད་རྒྱན་གྱི་འཁོར་ལོ་མཆོག །ཨཱ་ལི་བཅུ་གཉིས་དབྱངས་ལྡན་པ། །འབྱུང་བ་ལྔ་ཡི་
རླུང་གིས་ནི། །ལྷ་མོ་ལྔ་རུ་གྱུར་པ་ལ། །དབྱངས་ཀྱི་ཡན་ལག་དྲུག་བཅུར་བརྗོད། །ཀཱ་ལི་གསལ་བྱེད་ཡི་གེ་ནི། །ཌ་ཌྷ་ད་དྷ་ཡ་ལ་ཏ། །སུམ་བཅུ་རྩ་བཞི་དེ་སྙེད་ལས། །དྲུག་བཅས་བཞི་བཅུ་ཉིས་འགྱུར་ལས། །དཔེ་བྱད་བཟང་པོ་

88-1-359b

བརྒྱད་བཅུར་འགྱུར། །རང་བཞིན་དག་པས་གནས་འགྱུར་བའོ། །ཡང་ན་དབྱངས་ཡིག་ཉིས་འགྱུར་བཅས། །མཚན་མཆོག་སུམ་བཅུ་རྩ་གཉིས་པོ། །འགྲུབ་འགྱུར་རྒྱུ་རྐྱེན་ཉེར་ལེན་ལས། །རྒྱུ་འབྲས་མངོན་དུ་གསལ་བར་འབྱུང་། །
རྫོགས་སངས་རྒྱས་ཀུན་ཡོན་ཏན་ནི། །འཁོར་ལོས་སྒྱུར་ལས་ཁྱད་འཕགས་པ། །མཛོད་སྤུ་སྨིན་མཚམས་འོད་འབར་བ། །གསང་བ་སྦུབས་སུ་ནུབ་པ་དང་། །གཙུག་ཏོར་ལྟ་བས་མི་མངོན་པ། །འོད་ཟེར་དཀྱིལ་འཁོར་ཁྱབ་བྱེད་པ། །དབང་
གི་ནུས་པ་བརྟན་གྱུར་པས། །གཟུགས་སྐུའི་ཡོན་ཏན་རྒྱུ་འབྲས་ཀྱི། །བྱེད་ལས་སྟོབས་ལྡན་འབྱུང་འགྱུར་ཉིད། །གསང་སྔགས་ཟབ་དང་རྒྱ་ཆེ་བ། །མྱུར་བ་ཉིད་དུ་བྱིན་བརླབས་ཤིང་། །བདེ་བ་ལམ་བྱེད་ཚེ་འདི་དང་། །བར་དོར་ཡེ་
ཤེས་མངོན་དུ་བྱེད། །བླ་མ་ལས་ནི་གྲོལ་སྤྱོད་འཐོབ། །མངོན་སུམ་རྟེན་འབྲེལ་ཁྱད་པར་རོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་རྩ་ལྔ་པའོ།། །། དེ་ནས་རང་བཞིན་རྟོག་པ་ནི། །དཔེར་ན་རྒྱ་
མཚོ་ཆེན་པོ་ལ། །བྱ་ཡི་ཚོགས་རྣམས་རྒྱུ་བ་ཀུན། །འགྲོ་འོང་དུ་མ་བྱེད་གྱུར་ཀྱང་། །རྒྱ་མཚོ་གཡོ་བ་མེད་པ་བཞིན། །སྣང་བ་གསུམ་གྱི་ཡེ་ཤེས་ལ། །གོས་པ་མེད་ཅིང་རྟོག་པ་མེད། །རྩ་རྣམས་རྣམ་པར་དག་པས་ནི། །
གཏུམ་མོ་ཡེ་ཤེས་མེ་འབར་བའོ། །རླུང་ནི་སྲོག་རྩོལ་དག་པ་ན། །སྒྱུ་མ་སྨིག་རྒྱུ་ཆུ་ཟླར་འཆར། །ཐིག་ལེ་དག་པར་གྱུར་པ་ན། །འོད་གསལ་བདེ་བ་ཆེན་པོར་འཆར། །བག་ཆགས་རྟོག་པ་དག་པ་ལས། །རྨི་ལམ་སངས་རྒྱས་
ཞིང་ཁམས་མཐོང་། །ཡི་གེ་དག་ཅིང་ཁམས་དངས་པས། །མཁྱེན་པ་བརྐྱང་བས་རྣམ་གྲོལ་འཐོབ། །སེམས་གསུམ་ཞི་གནས་ཆ་དང་ནི། །སེམས་གསུམ་ལྷག་མཐོང་གང་ཡིན་པ། །རྣལ་འབྱོར་པ་ལ་ངེས་པར་འཆར། །རྟོག་པའི་རྦ་
རླབས་ངང་གིས་ཞི། །སྣང་བ་སྐྱེ་བ་མེད་པ་སྟེ། །སྣང་བ་ཐོབ་པ་འགག་པ་མེད། །སྣང་བ་མཆེད་པ་མི་གནས་ཤིང་། །གནས་པ་མེད་པས་མི་རྟག་པ། །ཉེར་ཐོབ་སྟོང་ཉིད་དོན་གནས་པའོ། །འོད་གསལ་ཆོས་ཉིད་དེ་བཞིན་ཉིད། །མཁའ་

88-1-360a

ལྟར་དག་པ་བདེ་བ་ཆེ། །མ་འགགས་དྲི་མ་མེད་ཞི་བ། །དོན་དམ་ཕྱག་རྒྱ་ཆེན་པོ་ཉིད། །ས་ལམ་ནུས་པ་ཀུན་རྫོགས་པ། །སློབ་པའི་ཟུང་འཇུག་སྙིང་པོ་ཉིད། །རྡོ་རྗེ་སྒོ་གསུམ་རྣམ་དག་པས། །མི་སློབ་ཟུང་འཇུག་མངོན་དུ་གྱུར། །
དེ་ཉིད་མཐར་ཕྱིན་བླ་མེད་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་ཉི་ཤུ་རྩ་དྲུག་པའོ།། །། དེ་ནས་དཔལ་ལྡན་རྡོ་རྗེ་འཆང་། །འཇམ་པའི་རྡོ་རྗེའི་ཏིང་འཛིན་གྱིས། །བསམ་གཏན་གཉིས་ཀྱིས་
ཡེ་ཤེས་འཇུག །དེ་ཡི་ཁྱད་པར་བཅས་པ་བསྟན། །རིག་པ་འཛིན་པ་ལྔ་གྲུབ་པ། །རྣལ་འབྱོར་དངོས་གྲུབ་ཐོབ་འགྱུར་བཤད། །འབྲུ་གསུམ་བདུད་རྩི་རིལ་བུ་ཡི། །ཡོན་ཏན་ནུས་པ་མྱུར་གྲུབ་བྱེད། །རྡོ་རྗེ་དགུག་པའི་ཕྲིན་ལས་དབང་། །དམ་
ཚིག་ཤ་ལྔའི་ཡོན་ཏན་ཚུལ། །དེ་ལས་དངོས་གྲུབ་དབང་ཕྱུག་འཐོབ། །མངོན་གྱུར་འབྲས་བུ་ཕྲིན་ལས་འགྲུབ། །དེ་ནི་བསྙེན་བསྒྲུབ་ཡན་ལག་བཞི། །རྡོ་རྗེ་རྣམ་བཞི་ལྷ་ཡི་སྐུ། །ལུས་དབེན་རྡོ་རྗེ་བཟླས་པ་དང་། །སྣང་གསུམ་སྒྱུ་
ལུས་འོད་གསལ་བ། །སོ་སོར་བསྡུས་པ་བསམ་གཏན་ལམ། །སྲོག་རྩོལ་འཛིན་པ་དེ་བཞིན་ཉིད། །རྗེས་དྲན་ཡན་ལག་ཏིང་འཛིན་སྟོབས། །ཟུང་འཇུག་རིམ་པ་བསྟན་པ་ལས། །རིགས་ཀྱི་ཆ་ལས་དེ་ཉིད་གནས། །རྒྱུ་རྐྱེན་ལམ་དང་
ནུས་འབྲལ་གང་། །མངོན་འགྱུར་ལྟ་སྟངས་སྤྱོད་ཡུལ་ཀུན། །རིམ་གྱིས་འཆར་དང་ཅིག་ཅར་བ། །དེ་ཉིད་ཐོད་རྒལ་རིམ་རྟོགས་བྱ། །ཚེ་འདིར་སངས་རྒྱས་ལམ་དང་ནི། །བར་དོར་དངོས་གྲུབ་འབྱུང་ལམ་དང་། །སྒོ་གསུམ་བྱིན་བརླབས་
རྡོ་རྗེ་ཡི། །སྨོན་ལམ་ཕྱི་དུས་འགྲུབ་པར་གྱུར། །བསམ་གཏན་གནས་པ་དབང་པོ་ཐབས། །ཡུལ་ཉིད་ཤེས་རབ་ཏིང་ངེ་འཛིན། །དབྱེར་མེད་སྦྱོར་བ་གསང་གནས་ཏེ། །དུས་གསུམ་ལས་འདས་རྟོག་པའོ། །རྣམ་ཤེས་དེ་ཉིད་
གསལ་བ་ལས། །མ་འགགས་ཡུལ་རྗེས་མི་འབྲང་ཞིང་། །མི་གཡོ་ཉོན་མོངས་ལས་དག་པ། །རྣམ་པར་སྤྱོད་པ་བྱེ་བྲག་གསལ། །རྣམ་པར་མི་རྟོག་དམིགས་མེད་པ། །མི་འཁྲུལ་ལུས་སེམས་ཐ་མི་དད། །ཚོར་བ་ལས་

88-1-360b

འདས་དགའ་བ་ཉིད། །འཕྲོ་བ་མེད་པས་སེམས་གནས་པའོ། །ཟུག་རྔུའི་རྡུལ་མང་རྣམ་འཚེ་དག །སྒོ་གསུམ་ངང་དུ་དུལ་ཞིང་ཞི། །བདེ་བ་ཟག་མེད་ཆོས་ཉིད་གནས། །འདུ་འབྲལ་མེད་པར་གྱུར་པས་སོ། །རབ་ཏུ་དུལ་
བ་རྣམ་ཤེས་ཚོགས། །དག་གྱུར་ཤེས་བྱ་ཆོས་ཀྱི་ཁམས། །ཟད་ཅིང་གཟུང་འཛིན་རྣམ་དག་པས། །སྟོང་ཉིད་ཡེ་ཤེས་རྩེ་གཅིག་པ། །རྣམ་པ་ཀུན་ཏུ་མི་ལྡོག་པས། །མཚན་མ་མེད་པ་བྱང་ཆུབ་པའོ། །སྣང་བ་ཐོབ་པ་སྟོང་པ་
ཉིད། །མཆོད་པ་སྟོང་ཆེན་གྱུར་པ་སྟེ། །སྣང་ཙམ་ཐམས་ཅད་སྟོང་པ་དང་། །ཉེར་ཐོབ་ཐམས་ཅད་སྟོང་པ་ཉིད། །དག་པ་རབ་གསལ་མཆོག་གྱུར་པས། །རོ་གཅིག་གྱུར་པ་ལུགས་འབྱུང་དང་། །ལུགས་བཟློག་རྟོག་ཚོགས་ཞི་བ་སྟེ། །
སངས་རྒྱས་ཀུན་དངོས་འཇིག་རྟེན་ལམ། །དེ་ཉིད་མཆོག་ཏུ་བསྟན་པ་ཡིན། །དེ་བཞིན་གཤེགས་ཀུན་བདག་ཉིད་ལས། །རྐྱེན་ལས་འབྱུང་བ་ལམ་གྱུར་པ། །རྣལ་འབྱོར་གསལ་དང་མི་རྟོག་པ། །བདེ་བའི་བྱེད་པ་ལྟ་སྟངས་
ལས། །ཀ་ར་ཎ་བཅིངས་ནུས་པས་ནི། །སྲིད་པ་གསུམ་པོ་གཡོ་མི་འགྱུར། །བིནྡྷུ་ཀུན་དོར་གནང་སྡོམ་ལས། །མི་འགྱུར་བརྟན་བྱེད་ཡོན་ཏན་ཐོབ། །ལུས་གནས་རྩ་ཡི་ཕོ་བྲང་ལས། །གཡས་པའི་ཉི་མ་རྩོལ་བ་སྟེ། །
གཡོན་པ་ཟླ་བ་སྲོག་བཅིང་བ། །འབྱུང་འཇུག་གནས་པ་ལམ་བསྟན་པའོ། །དབུ་མར་བྱང་སེམས་རྟེན་བྱེད་པ། །ཀུན་འདར་ངེས་གནས་འཕོ་མེད་བཟུང་། །མཚན་མར་མི་འགྱུར་མཆོག་གི་རྩ། །ལས་ཀྱི་རླུང་སྒོམ་བྱེ་བྲག་པ། །
འགོག་པས་མུན་པ་སྒྲ་གཅན་འཛིན། །གསང་བའི་སྣ་རྩེའི་སྟེང་འོག་ཏུ། །འབྱུང་བ་རྐྱེན་རླུང་སྣང་བ་གྲོགས། །སྒོ་ལྔ་བཟློག་ལས་གནས་པར་བྱ། །ཡེ་ཤེས་སྒྲོན་མེ་སྣང་བ་སྐྱེ། །རྣལ་འབྱོར་གང་ཞིག་མངོན་གྱུར་པས། །
རླུང་སེམས་རྣམ་དག་རྟགས་འཆར་བ། །ཡང་ན་འཕོ་ཚེ་ལམ་འཐོབ་འགྱུར། །དེ་ལས་རང་བཞིན་དག་པའི་ཚེ། །འོད་གསལ་ངང་ལས་སྤྲོ་བསྡུ་ཉིད། །དབུ་མའི་ལམ་ནས་འཇུག་པར་འགྱུར། །བདེ་བའི་ཐིག་ལེ་ཐབས་དང་ནི། །

88-1-361a

ཡེ་ཤེས་མེ་ནི་ཤེས་རབ་ཆེ། །གཉིས་མེད་དྷཱུ་ཏཱིའི་ནང་ཞུགས་པས། །བདུད་རྩི་མི་འཕོ་གསང་ལམ་གནས། །དེ་ཉིད་དུ་ནི་སྲོག་བརྟེན་ཅིང་། །འཛིན་པ་ཡེ་ཤེས་ལམ་གྱུར་པའོ། །དེ་ལས་གཏུམ་མོ་འབར་གྱུར་
ཞིང་། །ལས་རླུང་གྱེན་ལོག་ལྟེ་བར་ཕྱིན། །ཧོ་ལས་བདུད་རྩི་འབར་འཛག་གྱུར། །མགྲིན་པར་དགའ་བ་སྙིང་གར་ནི། །མཆོག་དགའ་ལྟེ་བར་ཁྱད་པར་ཅན། །གསང་བར་མི་ལྡོག་ལྷན་ཅིག་སྐྱེས། །མཆོག་ཏུ་མི་འགྱུར་འཐོབ་
པའོ། །དེ་ཉིད་ཡེ་ཤེས་རྗེས་དྲན་གཅེས། །ལུས་ངག་ཡིད་དང་ཡེ་ཤེས་ཞི། །ཕྱག་རྒྱའི་དེ་ཉིད་མངོན་གྱུར་པའོ། །ཤེས་པ་དག་ནི་རྣམ་དག་པ། །ལྟེ་བར་འདོད་ཆགས་རྟོག་པ་དག །སྙིང་གར་གཉིད་ཀྱི་རྟོག་པ་ཞི། །མགྲིན་པར་
རྨི་ལམ་ཤེས་པ་དག །དཔྲལ་བར་སད་པའི་ཤེས་པ་སྤངས། །ལས་རླུང་རྩ་ཡི་འཁོར་ལོ་ཡི། །ཐིག་ལེར་གནས་པ་རྟེན་དང་ནི། །བརྟེན་པ་བྱང་སེམས་མི་འགྱུར་ཐོབ། །ལས་ཀྱི་ཕུང་པོ་ལོག་གྱུར་ཅིང་། །མཉམ་པའི་བདེན་པ་ལ་
འཇུག་པ། །གཙུག་ཏོར་སྒོ་ནི་ཕྱེ་གྱུར་པས། །འབིགས་བྱེད་བརྟན་པའི་དོན་ཐོབ་པས། །ཡོན་ཏན་དཔག་མེད་མངོན་དུ་གྱུར། །ཐབས་དང་ཤེས་རབ་དབྱེར་མེད་པ། །དཔལ་ལྡན་རྡོ་རྗེ་འཆང་དུ་གྱུར། །དེ་ཉིད་ཡོན་ཏན་ཕྲིན་ལས་
ཚོགས། །རྟོག་མེད་ངང་ལས་ཀུན་དུ་འབྱུང་། །སྐད་ཅིག་མངོན་རྫོགས་ཟུང་འཇུག་པ། །ཏིང་ངེ་འཛིན་ཞེས་བརྗོད་པ་སྟེ། །གསང་ཆེན་གནས་འཐོབ་མངོན་སངས་རྒྱས། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་
བྱེད་པ་ཉི་ཤུ་རྩ་བདུན་པའོ།། །། དེ་ནས་ཡེ་ཤེས་ཀུན་མཁྱེན་པའི། །གསང་བ་རབ་འབྱམས་གྲུབ་པ་སྟེ། །འཇིག་རྟེན་འཇིག་རྟེན་འདས་པ་ཡི། །ཡང་དག་སྦྱོར་བའི་དོན་གྱིས་ནི། །ཐོགས་མེད་ནུས་པ་ལྡན་གྱུར་པ། །བདེན་
པ་གཉིས་བསྲེས་དོན་བསྟན་པའོ། །ཕྲིན་ལས་བཞི་ཡི་བྱེད་པ་ལས། །གྲུབ་ཚུལ་དེ་ཉིད་བསྟན་པའོ། །བཟླས་ཐབས་བཅུ་ཡིས་གྲུབ་པའི་དོན། །སྔགས་རྣམས་ཀུན་གྱི་དེ་ཉིད་ཀྱིས། །ལམ་རྫོགས་ས་རྣམས་མངོན་གྱུར་པས། །

88-1-361b

བདག་བྱིན་བརླབ་པར་གྱུར་པའོ། །ཚེ་འདི་ཉིད་དང་བར་དོར་ནི། །ཡེ་ཤེས་དངོས་གྲུབ་ཐོབ་པར་བཤད། །གོང་དུ་འཕོ་བའི་དོན་གྲུབ་བྱེད། །བཅུ་བདུན་ལྷ་ཡི་འཁོར་ལོ་ལས། །གྲུབ་པ་རབ་གསལ་བདེ་ཐོབ་པའོ། །མཚོན་བྱའི་
འབྲས་བུ་མངོན་གྲུབ་ན། །མཚོན་བྱེད་ནུས་པ་ཐོགས་མེད་འབྱུང་། །གསལ་བྱ་གསལ་བྱེད་རྒྱུ་འབྲས་དང་། །བསྐྱེད་བྱ་སྐྱེད་བྱེད་རྒྱུ་འབྲས་སོ། །ངོ་བོ་ཉིད་ཀྱི་རྒྱུ་འབྲས་ལས། །རྒྱུས་ནི་འབྲས་བུ་སྐྱེད་བྱེད་པས། །འབྲས་བུ་རྒྱུ་ལས་འབྱུང་
བས་ན། །ཕན་ཚུན་ལྟོས་པའི་རྒྱུ་འབྲས་སོ། །ངོ་བོ་གཅིག་པར་གྲུབ་འགྱུར་ཏེ། །རྒྱུ་འབྲས་རྣམ་པ་ཐ་དད་ཀྱང་། །རིགས་མཐུན་གནས་ཉིད་མཚུངས་འབྲལ་བས། །གྲུབ་སྡེ་གཅིག་པར་གྲུབ་པའོ། །རྒྱུ་འབྲས་མ་ལུས་རྟེན་འབྲེལ་
ཏེ། །དེ་ཉིད་ནམ་མཁའི་ངོ་བོ་ཉིད། །སྟོང་ཉིད་དངོས་པོ་སྣ་ཚོགས་པར། །གནས་ཀྱང་རོ་མཉམ་འགག་པ་མེད། །ཆོས་རྣམས་སྣང་བ་མ་ལུས་ལ། །ནམ་མཁའི་རང་བཞིན་ངང་ལས་འབྱུང་། །སྒྲིབ་ཕྱོགས་དང་ནི་སྣང་ཕྱོགས་དག །
སྐྱེ་འགག་དེ་ཉིད་དངོས་མེད་པས། །བདེན་གཉིས་ཐ་དད་གྱུར་པ་ན། །ཡེ་ཤེས་ལམ་ནི་དོན་མེད་འགྱུར། །གསལ་སྟོང་གཉིས་ནི་ཐ་དད་ན། །རྟག་ཆད་མཐར་ནི་ལྟུང་བར་འགྱུར། །དངོས་པོའི་གནས་ལུགས་ལ་བརྟེན་ནས། །དངོས་མེད་
ཡེ་ཤེས་འོད་གསལ་བ། །ཟབ་དང་རྒྱ་ཆེ་གཉིས་མེད་པ། །རྒྱུ་རྐྱེན་མ་ལུས་དག་བྱེད་པས། །བསམ་གཏན་ཏིང་འཛིན་མཐར་ཐུག་ནི། །རྡོ་རྗེ་ལྟ་བུའི་ངོ་བོ་ཉིད། །དངོས་པོ་ཐམས་ཅད་ཟློག་བྱེད་པ། །ཤིང་གི་ཚོགས་ལ་མེ་འབར་བས། །
བསྲེགས་ཏེ་དངོས་མེད་འགྱུར་བ་ལྟར། །མཐར་ནི་ཐམས་ཅད་སྟོང་ཉིད་དུ། །ཡེ་ཤེས་མེས་ནི་རྣམ་པར་སྦྱངས། །ནམ་མཁའ་ལྟ་བུའི་དབྱིངས་ལས་ནི། །ཡེ་ཤེས་ཕྲིན་ལས་འགག་མེད་འབྱུང་། །དཔལ་ཡེ་ཤེས་རྡོ་རྗེ་ཀུན་ལས་
བསྡུས་པ་ལས་རབ་ཏུ་བྱེད་པ་ཉི་ཤུ་རྩ་བརྒྱད་པའོ།། །། དེ་ནས་རྒྱལ་པོ་རྡོ་རྗེ་འཛིན། །དཔལ་ལྡན་ལུས་ཀྱི་རྣམ་ཤེས་དང་། །ཡེ་ཤེས་སྒྱུ་འཕྲུལ་ལ་སོགས་བསྟན། །ལྷ་མོ་བཞི་དང་ཁྲོ་བོ་བཅུ། །སྣ་ཚོགས་ཕྲིན་ལས་དུ་

88-1-362a

མ་མཆོག །འགྲོ་བ་འདུལ་བའི་དོན་དུའོ། །སྐུ་གསུང་ཐུགས་ཀྱི་རྡོ་རྗེ་ལས། །ཕྱི་ནང་དབྱེ་བ་རིམ་པ་ཡིས། །མ་གྲུབ་སྤོགས་པའི་ཆོ་ག་ནི། །ཕུར་གདབ་དེ་ཉིད་བསྟན་པའོ། །འདོད་པའི་ཁམས་ན་འགྲོ་བ་ཀུན། །
རྣམ་རྟོག་རླུང་གི་ར་བར་ཚུད། །བདག་འཛིན་མདུད་པས་བསྡམས་པ་ལ། །སྨིན་གྲོལ་ཡེ་ཤེས་ལམ་རྟོགས་པ། །བླ་མའི་ཞལ་ལས་ཤེས་པར་བྱ། །པདྨ་འདབ་བརྒྱད་བཀོད་པ་ལ། །སོ་བདུན་ཡི་གེ་ལ་དམིགས་པ། །བཅུ་
དྲུག་ཆ་དང་ལྡན་པའོ། །དྲོད་ནི་སྣང་བ་རྟོག་བྲལ་སེམས། །སྤངས་ཐོབ་ཡོན་ཏན་འབྱུང་བའི་གཞི། །རྩེ་མོ་མཆོད་པ་ནུས་པ་རྙེད། །འཇིགས་པ་ལས་གྲོལ་བརྟན་པར་འགྱུར། །བཟོད་པ་སྣང་བ་ཐོབ་པ་ཉིད། །རྟོག་པ་ཀུན་ལས་
རྣམ་པར་གྲོལ། །ཆོས་མཆོག་སྣང་བ་ཉེར་ཐོབ་ཉིད། །ཡེ་ཤེས་དེ་མ་ཐག་པ་ཆེ། །ཟིལ་གནོན་རྟེན་འབྲེལ་ཕྱོགས་ཆ་འཆར། །རིགས་པ་མངོན་གྱུར་རྟོག་པ་འདག །དེ་ཉིད་འཁོར་འདས་ཡོན་ཏན་ཐོབ། །གཟུང་འཛིན་ཆ་འདས་
ལམ་དུ་གྱུར། །རྒྱལ་བའི་དགོངས་པ་རྟོགས་པར་བྱ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ཉི་ཤུ་རྩ་དགུ་པའོ།། །། སྤྲོས་པ་མེད་པའི་སྤྱོད་པ་ཡེ་ཤེས་ཀྱི་གྲུབ་པའི་དོན་བསྟན་པའི་ཕྱིར། དབེན་
གནས་དབེན་པ་ཡོན་ཏན་ཀུན་དང་ལྡན་པ། ལུས་གནས་སེམས་ཀྱི་དུར་ཁྲོད་རབ་ཏུ་སྒྲུབ་པ་ཉིད་དུ་བྱ་བ་སྟེ། དངོས་འཛིན་རྣམ་པར་དག་པ་ཉིད་ཀྱིས་སོ། །སྨེ་ཤ་ཅན་ནི་རྟོག་མེད་མའི་ཤ་ལ་རོལ་པ་ཉིད་དེ། ཁྱད་པར་དུ་ཡེ་ཤེས་ཡང་
དག་པ་བསྒྲུབ་པ་སྟེ། དུས་རྟག་ཏུ་ཡེ་ཤེས་ཀྱི་ངང་ལས་མི་འདའ་བར་བསྒྲུབ་པའོ། །རིག་མ་ཤེས་རབ་ཡེ་ཤེས་ལས་སྐྱེས་མ། རྣམ་པ་ཉི་ཤུས་བྱང་ཆུབ་པ་སྟེ་བཅུ་ཕྲག་གཉིས་མ་ཉིད་དོ། །རྡོ་རྗེའི་དཀྱིལ་འཁོར་
བསྒོམ་པ་ནི། ཡེ་ཤེས་ཀྱི་སྐུ་བསྐྱེད་པ། འོད་གསལ་ལས་བྱུང་བའི་ལུས་རྟེན་དང་བརྟེན་པར་བཅས་པའི་དཀྱིལ་འཁོར་རྡོ་རྗེ་འཛིན་པ་ཆེན་པོའི་ཕོ་བྲང་དང་ལྡན་པའོ། །དེ་ཉིད་ཕུང་པོ་དང་ཁམས་དང་སྐྱེ་མཆེད་རྣམ་པར་དག་པ། དཔལ་

88-1-362b

རྡོ་རྗེ་འཆང་ཆེན་པོའི་དཀྱིལ་འཁོར་དུ་དམིགས་པའོ། །བཤང་གཅིའི་དམ་ཚིག་ནི་ཡུལ་དང་དབང་པོ་གཉིས་མེད་དུ་སྦྱར་བའོ། །ལ་སོགས་ནི་བདེ་བ་སྟོང་པ་ཉམས་སུ་མྱོང་བའི་ཟས་ཀྱིས་ཁྱད་པར་ཡུལ་ལ་སྤྱོད་པའོ། །དེ་རུ་ཆོ་ག་བཞིན་
དུ་ཞེས་པ་རྡོ་རྗེ་འཛིན་པ་ཡབ་ཡུམ་རོལ་པ་བདེ་ཆེན་མི་འགྱུར་བ་ཡོངས་སུ་གྲུབ་པའོ། །དེའི་དཀྱིལ་འཁོར་རྟེན་གཞལ་ཡས་ཁང་ཆོས་འབྱུང་དང་། འབྱུང་བ་རིམ་བརྩེགས་དང་བཅས་པ་རྟེན་དང་བརྟེན་པའི་ལྷ་ཚོགས་ཐམས་ཅད་
ཡེ་ཤེས་ལས་སྐྱེས་པ། ཡེ་ཤེས་ལས་བྱུང་བའི་མཚན་ཉིད་བདེ་སྟོང་རོ་མཉམ་དུ་འབྱུང་བའི་ངོ་བོ་ཉིད་ཡོངས་སུ་རྫོགས་པའོ། །རབ་ཏུ་བཟང་བས་ན་འོད་གསལ་བའི་ཡེ་ཤེས་ལས་སྐྱེས་པ། བཞིན་རབ་ཏུ་མཛེས་པ་ཡེ་ཤེས་ཀྱི་དབང་
པོ་དང་སྟོབས་ལས་བྱུང་བ་ཉིད་དོ། །རྒྱན་རྣམས་ནི་བྲལ་བ་དང་རྣམ་པར་སྨིན་པའི་ཆ་ལས་འཕགས་པའི་ནོར་ལས་ཡན་ལག་བདུན་ལྡན་ཡེ་ཤེས་ཀྱི་ཆེ་བས་ཡོངས་སུ་རྫོགས་པའོ། །དཀྱིལ་འཁོར་གྱི་དབུས་སུ་བཞག་པ་ནི། རྡོ་རྗེ་འཛིན་
པ་ཉིད་དང་། རེག་བྱ་རྡོ་རྗེ་མ་ཆོས་ཀྱི་དབྱིངས་ཀྱི་རྡོ་རྗེ་མར་གྱུར་པ་རྣམ་པར་བསྒོམ་ཞེས་པའོ། །དཀྱིལ་འཁོར་ལྔའི་འཁོར་ལོ་ནི། དེ་བཞིན་གཤེགས་པ་ལྔའི་དཀྱིལ་འཁོར། དཔྲལ་བ་མགྲིན་པ་ཐུགས་ཀ་ལྟེ་བ་གསང་བ་དང་བཅས་
པར་སངས་རྒྱས་ཀྱི་སྐུའི་མཚན་དཔེ་དང་། སྐུ་མདོག་ཕྱག་མཚན་རྒྱན་དང་ལྡན་པ། ཡེ་ཤེས་ལས་འབྱུང་བ་སྐད་ཅིག་གིས་སོ། །དེར་རྣལ་འབྱོར་གྱི་དབང་ཕྱུག་གསང་སྔགས་ཀྱི་རྣམ་པར་བསམ་པའི་འཁོར་ལོ་ཅན་གྱི་གསང་བ་
ཡེ་ཤེས་ཀྱི་བསྒྲུབ་པ་སྟེ། བདེ་སྟོང་གཉིས་སུ་མེད་པའི་ཕྱག་རྒྱ་ཆེན་པོར་ངོ་བོ་ཉིད་མི་འགྱུར་བའི་མཆོད་པའི་གནས། ཚད་མེད་པས་ཡང་དག་པར་མཆོད་པ། དམིགས་པ་རྣམ་པར་གྱུར་པའི་ཉམས་ཀྱི་ཏིང་ངེ་འཛིན་གྱིས་སོ། །
དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་སུམ་བཅུ་པའོ།། །། དེ་ཉིད་ལས་གསང་བ་བླ་ན་མེད་པའི་བསྒྲུབ་པ་བསྟན་པའི་ཕྱིར། སྐུ་གསུང་ཐུགས་ཀྱི་རྡོ་རྗེ་ཅན་ཞེས་པ་སྟེ། སྐུ་རྡོ་རྗེ་མི་འགྱུར་བ་གསུང་རྡོ་རྗེ་

88-1-363a

འགག་པ་མེད་པ། ཐུགས་རྡོ་རྗེ་རྣམ་པར་མི་རྟོག་པའི་ཡེ་ཤེས་ལ། དེ་ཉིད་དབྱེར་མི་ཕྱེད་པའི་དཀྱིལ་འཁོར། དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ལ་ཀུན་དུ་རྣམ་པར་སྣང་བར་མཛད་
པ། རྡོ་རྗེ་འཆང་ཆེན་པོ། སྐུའི་འོད་ཀྱི་སྣང་བ་ལས་སྤྲོ་བ་དང་བསྡུ་བར་མཛད་པའི་ཕྱིར་འོད་ཟེར་ཆེན་པོ་དང་རབ་ཏུ་ཆེན་པོ། སྤྲོ་བ་དང་བསྡུ་བ་བསམ་གྱིས་མི་ཁྱབ་པའི་ཡེ་ཤེས་ཀྱི་རོལ་པ་སྟོན་པའོ། །ཡང་དེ་ཉིད་དུ་རིག་མའི་རིགས་དག་པས། 
ཡེ་ཤེས་བསྒྲུབ་པ་ཕུན་སུམ་ཚོགས་པ་བསྟན་པའི་ཕྱིར། བྲམ་ཟེ་མ་ལ་སོགས་པ་སྟེ། རྡོ་རྗེ་རིགས་ཀྱི་སྨེ་ཤ་ཅན་ལྟ་བུའོ། །དེ་བཞིན་གཤེགས་པའི་རིགས་ལ་ནི། བཙོ་བླག་མཁན་ཏེ་དངོས་པོ་ཐམས་ཅད་ཡེ་ཤེས་སུ་སྒྱུར་བར་བྱེད་པའོ། །
ཡང་ན་བྲམ་ཟེ་ཞེས་པ་སྟེ། སྡིག་པའི་དྲི་མས་མ་གོས་པའོ། །རྒྱལ་རིགས་ནི་རིན་པོ་ཆེའི་རིགས་ལ་སྟེ། ཡེ་ཤེས་འབར་བའི་ཆེ་བ་དང་ལྡན་པའོ། །རྗེ་རིགས་ནི་པདྨ་ཅན་ལ་སྟེ་ཆགས་པ་མེད་པའོ། །རྡོ་རྗེ་ཆོས་ཀྱི་རིགས་ཆགས་པ་མེད་པ་
པདྨའི་འདམ་ལས་ཐོན་པ་ལྟ་བུར་བསྒྲུབ་པ་ཉིད་དོ། །ཡང་ན་གར་མཁན་གྱི་རིགས་ཀྱིས་ཀུན་ཏུ་སྒྱུར་བར་བྱེད་པས། འདི་ནི་ཡེ་ཤེས་བདེ་ཆེན་གསང་བ་ཡེ་ཤེས་མྱུར་དུ་ཐོབ་པར་བྱེད་པ་ཉིད་དོ། །ཡང་ན་པདྨའི་རིགས་ཀྱི་རིག་མ་ལྟ་བུའམ། 
གཏུམ་པ་མ་རྣམ་རྟོག་རྩད་ནས་གཅོད་པ་དག་གམ། ཁྱད་པར་དུ་རྡོ་རྗེ་སེམས་དཔའི་སྦྱོར་བ་ཡིས། ཞེ་སྡང་རྡོ་རྗེའི་འཁོར་ལོ་དང་ལྡན་པས། སྙིང་གའི་གནས་སུ་སྟོང་པ་དང་སྙིང་རྗེ་ཐ་མི་དད་པ། བྱང་ཆུབ་རྡོ་རྗེའི་སྦྱོར་བ་དང་ལྡན་པས། 
རིག་མ་ཨུཏྤལ་མཐིང་གའི་མདོག་འདྲ་བ། སེམས་དཔའ་ཨུཏྤལ་ལ་ཆུའི་དྲི་མས་མ་གོས་པ་དང་མཚུངས་པ། བཙོ་བླག་མཁན་ཐམས་ཅད་ཡེ་ཤེས་སུ་སྒྱུར་བར་བྱེད་པ་ཉིད་དེ། སངས་རྒྱས་ཀྱི་ཡེ་ཤེས་དང་མཚུངས་པ་དག་ནི། བརྟེན་
བསྒྲུབ་པ་མཉམ་རྗེས་གཉིས་སུ་མེད་པས་རབ་ཏུ་གྲུབ་པའི་དབང་ཕྱུག་འཐོབ་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་སུམ་བཅུ་སོ་གཅིག་པའོ།། །། ཡང་ཤིན་ཏུ་སྤྲོས་པ་མེད་པའི་རྣལ་

88-1-363b

འབྱོར་བསྟན་པ་ལས་ནི། དམ་པ་གཉིས་ཀྱི་སྦྱོར་བ་ནི། ཐབས་རླུང་གི་སྦྱོར་བ་དང་། ཤེས་རབ་རིག་པ་སྟོང་ཉིད་སྤྲོས་མེད་ལྷན་ཅིག་སྐྱེས་པ་རང་འབྱུང་རོ་མཉམ་བདེ་བ་ཆེན་པོའི་སྦྱོར་བས་ཡེ་ཤེས་ལ་རོལ་པ་གར་གྱི་ཉམས་ཀྱི་སྤྱོད་པ་ཐམས་
ཅད་འོད་གསལ་བའི་ངང་ལས། ཟུང་འཇུག་བདེ་བ་ཆེན་པོར་ཕྲིན་ལས་ཐམས་ཅད་བརྩམ་པར་བྱ་བའོ། །འདི་ནི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་སེམས་འདའ་བར་མི་བྱ་བས་འདའ་བར་དཀའ་བ་སྟེ་ད་ཕན་ཡོན་ནི་སྐུ་གསུང་ཐུགས་
གསང་བ་གསུམ་གྱི་ཡེ་ཤེས་དང་ལྡན་པ་དེ་ནི་སྐད་ཅིག་དེ་མ་ཐག་ཏུ་ཡང་། དཔལ་རྡོ་རྗེ་འཆང་བྱང་ཆུབ་སེམས་རྡོ་རྗེ་དང་ཕྲིན་ལས་ཐ་མི་དད་པ་འཐོབ་པར་འགྱུར་བའི་མཚན་ཉིད་ཀྱི་ཐ་ཚིག་གོ། རྡོ་རྗེ་ཉི་མ་ནུབ་པ་རྡོ་རྗེ་ནི། སྒྱུ་ལུས་དག་པ་ཐབས་
མི་ཕྱེད་པ། ཉི་མ་ནི་སྣང་བ་དང་སྣང་བ་མཆེད་པའི་ཆ་ལས་ནུབ་པ་སྣང་བ་ཐོབ་པ་ལས། ཁྱད་པར་དུ་རང་བཞིན་གྱི་རྟོག་པ་ཐམས་ཅད་རྩ་རོ་རྐྱང་གཉིས་རླུང་དང་ཤེས་པ་དབྱེར་མེད་དུ་བསྡུས་ནས། རྩ་དབུ་མ་ཡེ་ཤེས་ཀྱི་ངང་དུ། སྤང་བླང་
མེད་པར་ནུབ་པ་ཆེན་པོ་ཉིད་དེ། དེ་ཉིད་དུ་ནམ་མཁའ་རྣམ་པར་དག་པ་ལྟ་བུའི་བདེ་སྟོང་དབྱེར་མེད་འོད་གསལ་ཆེན་པོ་རབ་ཏུ་མི་གནས་པའི་ངང་དུ་གནས་པར་འགྱུར་བའོ། །དེ་ལས་སློབ་པའི་ཟུང་འཇུག་ཏུ་ལྡང་བས། སྐྱ་རེངས་ཤར་བ་ལྟ་བུ་སྟེ། 
མཁྱེན་པའི་ཡེ་ཤེས་དུས་གསུམ་ཕྱོགས་བཅུར་ཁྱབ་པའི་སྐད་ཅིག་མའི་ཁྱད་པར་ལ། རྣམ་པ་ཐམས་ཅད་མཁྱེན་པ་ཉིད་དུ་གྱུར་པའོ། །ཁྱད་པར་སྒྱུ་ལུས་རྣམ་པར་དག་པ་ཡེ་ཤེས་ཀྱི་རབ་ཏུ་བྱེད་པ་བསྟན་པའི་ཕྱིར། རྒྱལ་པོ་སེམས་
དཔའ་སྟེ། ཆོས་རྣམས་ཀུན་དང་མཚུངས་པར་ལྡན་པ་རྒྱལ་པོ་འཁོར་ལོས་སྒྱུར་བ་ནི། རིན་པོ་ཆེ་བདུན་དང་ལྡན་པ་སྟེ། གནས་སྐབས་སུ་འཕགས་པའི་ནོར་བདུན་གྱི་རྒྱན་གྱིས་སྤྲས་པ་ན། རྒྱུད་གསང་ཆེན་ལ་རྒྱན་བདུན་གྱིས་སྤྲས་པར་
གྱུར་པས། སྐུ་གསུམ་ཡན་ལག་བདུན་ལྡན་དུ་གྲུབ་པ་འདོད་དང་ཐར་པ་རབ་ཏུ་གྲུབ་པ་སྟེ། དབང་ཕྱུག་བརྒྱད་ལྡན། ཟུང་འཇུག་བླ་ན་མེད་པ་རབ་ཏུ་གྲུབ་པ་ཉིད་དོ། །དངོས་པོ་དང་མཚན་མར་འཛིན་པ་ཐམས་ཅད་རྣམ་པར་འཛིན་པ་རྣམ་

88-1-364a

པར་དག་པར་སྒྱུ་མ་རབ་ཏུ་མི་གནས་པར་བསྟན་པའི་དོན་དུ། དེ་ནི་རྡོ་རྗེ་ཆོས་ཀྱི་བདག་ཅེས་ཚད་མེད་པའི་བྱང་ཆུབ་སེམས་ལས་བྱུང་བའི་ཆོས་ཀྱི་དབང་ཕྱུག་ཆེན་པོ། ཕྱིར་མི་ལྡོག་པའི་གནས་ཐོབ་པ། དག་པའི་
ས་ལ་གནས་པར་འགྱུར་བ་ནི། ས་བཅུ་ལ་ནི་གནས་པར་འགྱུར་བ་སྟེ། སྣང་བ་གསུམ་པོ་རང་བཞིན་དང་བཅས་པ། ཐམས་ཅད་དག་པས་བདག་བྱིན་གྱིས་བརླབ་པའི་རིམ་པ་ཐོབ་པས། ལུས་ཀྱི་གནས་དང་ཉེ་བའི་གནས་ལ་
སོགས་པར་བགྲོད་པས། རྟེན་དང་བརྟེན་པ་རང་བྱིན་གྱིས་བརླབས་པར་འགྱུར་བའི་ཕྱིར། རྒྱལ་པོ་དཔུང་གི་དམ་ཚིག་འཛིན་ནི། ཐོགས་པ་མེད་པའི་ཡེ་ཤེས་ཀྱིས་ཕྲིན་ལས་ཡོན་ཏན་མི་ཟད་པ་སྟོབས་དང་མི་འཇིགས་པ་ལ་སོགས་པའི་
དབང་ཕྱུག་དམ་པ་བརྒྱད་ལ་སོགས་པ་མ་འདྲེས་པའི་ཆོས་སྤོབས་ལ་དབང་བསྒྱུར་བ། ཀུན་གྱི་མཆོག་ཚད་མེད་མངོན་དུ་གྱུར་པའོ། །མངོན་པར་བྱང་ཆུབ་རྣམ་གཉིས་ལས། །ཕྱི་ནང་གཉིས་སུ་དགོས་པས་བཤད། །ནང་གི་དུས་ཏེ་ཆོ་འཕྲུལ་
བསྟན། །བདུད་ལས་རྣམ་པར་རྒྱལ་བ་སྟེ། །རྡོ་རྗེ་སྒོ་གསུམ་སོ་སོར་དག །སློབ་པའི་ཕྱི་ཡི་མངོན་བྱང་ཆུབ། །ཐོ་རངས་མི་སློབ་ཟུང་འཇུག་སྟེ། །སྐུ་བཞི་གཅིག་ཏུ་འདུས་པ་སྟེ། །སྐད་ཅིག་ཡེ་ཤེས་རྣམ་གྲོལ་བའོ། །དཔལ་ཡེ་ཤེས་
རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་སུམ་བཅུ་སོ་གཉིས་པའོ།། །། དེ་ལས་མངོན་པར་བྱང་ཆུབ་པ་བདེ་བ་ཆེན་པོའི་དབང་ཕྱུག་བསྟན་པའི་ཕྱིར། རྡོ་རྗེ་རྣལ་འབྱོར་པས་རྡོ་རྗེ་ལུས་ཀྱི་ཁྱད་པར་ལ་བསྟན་ནས། རིག་མ་
མངོན་པར་འདུ་བྱ་བ་ལས། མཁའ་གསང་བྱིན་རླབས་དང་ལྡན་པས། ཐབས་དང་ཐབས་ལས་འབྱུང་བའི་རྡོ་རྗེ་ཆོས་འབྱུང་པདྨར་ནུབ་པས། ཤེས་རབ་ཟེ་འབྲུ་རྒྱས་པར་ཟླ་བ་དང་ཉི་མ་ངོ་མཉམ་པར་གྱུར་པས། སྣང་བ་དང་སྣང་བ་
མཆེད་པ་དང་སྣང་བ་ཐོབ་པ་དང་། ཉེ་བར་ཐོབ་པ་ནུབ་པ་ཅན་གྱི་ཡེ་ཤེས་ཀྱི་བསྒྲུབ་པ་ཀུན་ཏུ་བརྩམ་པའོ། །འོད་གསལ་བའི་ཡེ་ཤེས་ཐོག་མ་དང་མཐར་འབྱུང་བ་ཉིད་ཀྱིས་རང་བཞིན་རྣམས་ཀུན་འདར་དུ་ནུབ་ཅིང་རྣམ་པར་དག་

88-1-364b

པའོ། །སྐྱ་རེངས་འཆར་བའི་ཆ་ནི་མཁའ་སྣང་དག་པའི་ངང་དུ་ཡེ་ཤེས་འཇུག་པ་དང་བཟློག་པར་གྱུར་པས། སྟོང་པ་བཞི་ལས་འདས་པའི་ཏིང་ངེ་འཛིན་མཆོག་སྟེ། རྒྱུ་ཀུན་དུ་བྱང་ཆུབ་སེམས་འཕེལ་བ་ལས། རྐྱེན་རིག་
མའི་སྟོབས་ཀྱིས། རྩ་གནས་ཐམས་ཅད་དུ་ཐིག་ལེ་འཕེལ་ཞིང་རྒྱས་པ་ལས། དགའ་བའི་དུས་སུ་རྣམ་པ་སྣ་ཚོགས་པའི་སྐད་ཅིག་མ་དང་། མཆོག་དགའི་དུས་སུ་རྣམ་པར་སྨིན་པའི་ཁྱད་པར་གྱི་དགའ་བའི་དུས་སུ་རྣམ་
པར་ཉེད་པ་ཉིད་དོ། །སྐད་ཅིག་མ་གསུམ་ལས་འདས་པའི་དུས་དེ་མ་ཐག་པ་ལས། ལྷན་ཅིག་སྐྱེས་པའི་དགའ་བ་ལས་མཚན་ཉིད་བྲལ་བའི་སྐད་ཅིག་མ་མངོན་དུ་གྱུར་པ། བདེ་སྟོང་རོ་མཉམ་གྱི་ཡེ་ཤེས་ཕྱག་རྒྱ་ཆེན་པོ་
རབ་ཏུ་མི་གནས་པའི་དོན་ཟུང་འཇུག་ཆེན་པོ་ཐོབ་པར་གྱུར་པའོ། །དེ་ཉིད་ཡོངས་སུ་དག་པ་བླ་ན་མེད་པའི་ཆེ་བ་བསྟན་པ་ལ། རྒྱན་རྣམས་དོན་གྱི་རྒྱན་ཡེ་ཤེས་ཀྱི་ཆེ་བ་བསམ་མི་ཁྱབ་ཏུ་འཆར་ལ། རྣམ་གྲངས་ཡོན་ཏན་གྱི་ཆེ་བ་ཚད་
མེད་པར་འཆོར་བའོ། །རྣམ་པ་ཐམས་ཅད་དུ་རིམས་དང་ཅིག་ཅར་དུ་ཀུན་དུ་སྣང་བའོ། །མེ་ཏོག་ནི་གཟུགས་རྡོ་རྗེ་སྤོས་ནི་དྲི་རྡོ་རྗེ་མ་ལ་སོགས་ཀྱིས་སྒྲ་རྡོ་རྗེ། རོ་རྡོ་རྗེ་དང་། རེག་བྱ་རྡོ་རྗེ་མའི་རྣམ་པར་སྣང་བའོ། །རྡོ་རྗེ་སེམས་དཔའ་སྟེ། 
བྱང་ཆུབ་སེམས་རྡོ་རྗེའི་ཕྲིན་ལས། ཕུང་པོ་ཁམས་དང་སྐྱེ་མཆེད་ཐམས་ཅད་རྟེན་དང་བརྟེན་པར་གྱུར་པ། སྤྱི་གཙུག་ནས་རྐང་མཐིལ་གྱི་བར་དུ་བདེ་བ་ཚད་མེད་པ་སྐྱེས་པས། སྣང་སྲིད་ཐམས་ཅད་བདེ་བ་ཚད་མེད་པར་གྱུར་པ། 
ས་གསུམ་ཀུན་དུ་སྒྱུ་མའི་རོལ་པས་མི་ཟད་པའི་ཆོ་འཕྲུལ་དཔག་ཏུ་མེད་པ་སྐད་ཅིག་གཅིག་ལ་འཆར་བར་འགྱུར་བའོ། །དེའི་ཚེ་བསྟན་པ་སྐུ་གསུམ་མཆོག་ནི། བདེ་བ་ལོངས་སྐུ། གསལ་བ་སྤྲུལ་སྐུ། མི་རྟོག་པ་ཆོས་ཀྱི་སྐུ་སྟེ། དབྱེར་མེད་ངོ་བོ་ཉིད་
ལྷུན་གྲུབ་དེ་ལ། ཕྲིན་ལས་ཐོགས་པ་མེད་པར་འཆར་བས་རབ་ཏུ་བསྒོམ་པའོ། །དཔག་ཚད་བརྒྱའི་ནི། དེ་བཞིན་གཤེགས་པའི་ཞིང་ཁམས་ཚད་མེད་པའི་སྣང་བ་ཆེན་པོས་ཀུན་དུ་བྱས་པ་སྤྲོ་བསྡུའི་མཛད་པ་སྟོན་པའོ། །དེ་ལས་དབང་པོ་གཉིས་ཀྱི་སྦྱོར་བ་ནི། ཐབས་སྙིང་
རྗེ་ཆེན་པོ་བླ་ན་མེད་

88-1-365a

པ་ནི་ཤེས་རབ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་ཉིད་ཀྱི་ཏིང་ངེ་འཛིན་དབྱིངས་དང་ཡེ་ཤེས་དབྱེར་མེད་དུ་གྱུར་པའོ། །སངས་རྒྱས་ནི་སློབ་པ་ལས་འདས་པ་མི་སློབ་པའི་ཟུང་འཇུག་སྟེ། བྱང་ཆུབ་ནི་ཡང་དག་པའི་
ཡེ་ཤེས་ཐུགས་སུ་ཆུད་པའོ། །གནས་ཞི་བ་སྟེ་མཐའ་ཐམས་ཅད་དང་བྲལ་བ་གཉིས་མེད་ཟུང་འཇུག་ཆེན་པོ་མངོན་དུ་གྱུར་པས་ས་བཅུ་གསུམ་པའི་དབང་ཕྱུག་དམ་པའོ། །ཉེ་བར་བསྡུ་བ་ལ་གདམས་པ་སྟེ། རྡོ་རྗེ་ཅན་ནི་དག་པའི་སྒྱུ་ལུས་ལ་
གནས་པ་སྟེ། མི་སློབ་པའི་ཟུང་འཇུག་ལམ་ཐམས་ཅད་མཐར་ཕྱིན་པས་སྲོད་དུས་སུ་བདུད་བཅོམ་སྟེ། བྱང་ཆུབ་སེམས་དཔའ་རྡོ་རྗེ་སྙིང་པོའི་ནུས་པ་ཐོབ་པ། ཐོབ་པས་ཡེ་ཤེས་ཆེན་པོ་གསང་བའི་གནས་གྲུབ་པའོ། །ཐོ་རངས་ཤིན་
ཏུ་རྣམ་པར་དག་པའི་གྲུབ་པ། ཡེ་ཤེས་རབ་ཏུ་མི་གནས་པ། གཙུག་ཏོར་ཆེན་པོ་རབ་ཏུ་རྫོགས་པ་བདེ་བ་ཆེན་པོ་མི་ཤིགས་པ་བླ་ན་མེད་པ་ཐོབ་པའོ། །བཤང་གཅིའི་དམ་ཚིག་བཟའ་བ་ནི། དབྱིངས་ཀྱི་ངང་དུ་ཡེ་ཤེས་རོ་མཉམ་དུ་ཐིམ་པས་
དངོས་གྲུབ་མ་ཟད་པ་ཡེ་ཤེས་རྒྱ་མཚོ་རྣམ་པར་དག་པ། རྡོ་རྗེ་སྐུ་གསུང་ཐུགས་ཀྱི་གསང་བ་བྱང་ཆུབ་ཆེན་པོ་རབ་ཏུ་རྟོགས་པའི་སྐད་ཅིག་གཅིག་རྡོ་རྗེ་འཆང་དེ་བཞིན་གཤེགས་པ་མངོན་དུ་གྱུར་པའོ། །ཡང་དག་པར་གསུངས་པ་ཕྱིའི་མངོན་པར་
བྱང་ཆུབ་པ་སྟེ། དགོངས་པས་བཤད་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་སུམ་བཅུ་སོ་གསུམ་པའོ།། །། དེ་ལ་འདིར་ཆོས་ཐམས་ཅད་ནི་སྒྱུ་མ་དང་མཚུངས་པ། སྒྱུ་མ་ལྟ་བུར་སྤྱོད་ཅིང་འཇུག་པ་ཉིད། །སྒྱུ་མ་དེ་དག་
བྱིན་གྱིས་རླབས་པའི་རིམ་པ་ལས། །མ་དག་པ་ལས་རྣམ་དག་ལྷ་ཡི་སྐུ། །ལུས་ངག་ཡིད་གསུམ་སྒྱུ་མར་ལམ་དུ་འཆང་། །ཕུང་པོ་ཁམས་དང་སྐྱེ་མཆེད་འབྱུང་སོགས་རྣམས། །ཤེས་པ་གཉིས་ལ་དེ་ཉིད་ཡོངས་བསྡུས་ནས། །
གང་ཞིག་སྟོང་ཆེན་གཉིད་ལོག་གྱུར་པ་སྟེ། །རླུང་གི་བྱེད་པས་རྨི་ལམ་མཐོང་བར་འགྱུར། །རྨི་ལམ་ཡུལ་ལས་བྱེ་བྲག་འཁྲུག་པར་སྣང་། །ཀུན་དུ་རྟོག་པའི་རྒྱུ་འབྲས་རྨི་ལམ་རྟོག །གང་

88-1-365b

གིས་མཚན་དང་ཉིན་དུ་གཉིད་འཇུག་པས། །གཉིད་ལོག་སད་པ་ཐ་དད་གྱུར་པ་མིན། །ས་འཐུག་བསྒྲིབས་པས་རབ་ཏུ་རིང་གཉིད་ལོག །སྔར་བྱས་འབྲས་བུ་མ་སྨིན་ལས་རྣམས་ཀུན། །དེ་ནས་རླུང་གིས་ལས་རྣམས་འབྱུང་
འཇུག་འགྱུར། །སྔོན་ལས་སྨིན་པར་གྱུར་ན་རླུང་སེམས་དག །འཇིག་རྟེན་འཕོ་བ་གནས་གཞན་དག་ཏུ་འགྲོ། །ཇི་ལྟར་ཕྱོགས་བཅུར་བཞུགས་པའི་རྒྱལ་བ་རྣམས། །དེ་ཡི་སྐུ་ལ་རྐང་རུས་ཤ་ཁྲག་མེད། །སེམས་ཅན་དོན་དུ་ཁམས་ལ་
འཇུག་པར་མཛད། །སྤྲུལ་པ་སྒྱུ་མས་འགྲོ་དོན་མཛད་པ་བཞིན། །དེ་བཞིན་གཉིད་ལོག་སད་གྱུར་རིམ་པས་སེམས། །རྣམ་རྟོག་དྲ་བས་བཅིངས་པས་ཐ་དད་ཅན། །ཆོས་རྣམས་ལས་ནི་ཡོངས་སུ་མ་འདས་ཕྱིར། །བདེན་དང་བརྫུན་པ་གཅིག་
དང་དུ་མར་མིན། །ཕྱི་རོལ་དོན་དུ་གྱུར་པ་ཅི་ཡང་མེད། །དེ་ཕྱིར་རང་སེམས་སྟོང་ཉིད་ཆོ་འཕྲུལ་ཡིན། །སྒྱུ་མར་སྣང་བ་འཁྲུལ་པ་ལས་བཟློག་བྱ། །ཅིར་སྣང་མེད་བདག་རྟོགས་པར་བྱ། །རྨི་ལམ་དེ་ཉིད་རྟོག་མེད་རང་གསལ་བ། །
འབྱུང་བའི་གནས་ལ་ཁམས་འདུས་སྣང་བ་གང་། །སས་བརྟན་ཆུས་སྡུད་མེས་རྣོ་ངར་ཆགས་པ། །རླུང་གིས་ཡང་ཞིང་གཡོ་བྱེད་མི་བརྟན་པའོ། །ནམ་མཁའ་ལ་འདུས་ལུས་བདེ་ཉམས་བཟང་བ། །བདུད་རྩི་དག་ལས་ནུས་
པ་འབྱུང་བ་སྟེ། །གླ་རྩིས་ཞེ་སྡང་བཞི་མཉམ་གཏི་མུག་ཉིད། །ག་བུར་ཆགས་བྱེད་སི་ཧླས་ང་རྒྱལ་བསྐྱེད། །སྣ་ཚོགས་ལས་ཀྱིས་ཕྲག་དོག་འདུ་འཕྲོ་བྱེད། །ལམ་གྱུར་དམིགས་པས་ཡོན་ཏན་པ་རྣམ་འཆར། །སྔར་ཕྱུང་
བ་ལས་ཕྱིས་འབྱུང་རྟགས་སུ་འཆར། །ཡུལ་དུས་མཚན་མ་ངེས་པ་དྲན་པའི་བློ། །ཉམས་སྣང་བློ་ལས་མ་བཅོས་སྒྱུ་མར་སྣང་། །དེ་ཉིད་རོས་ཟིན་ཡེ་ཤེས་གྲོགས་ཡིན་ནོ། །རང་སྲོག་སྙིང་པོར་གྱུར་པ་སེམས་ཉིད་ལས། །ཆོས་
ཉིད་སེམས་ལུས་ཁམས་གསུམ་སྣང་བ་ལ། །གཞན་པ་མེད་ཅིང་རླུང་ལས་ཁམས་གསུམ་སྤྲུལ། །སྒྱུ་ལུས་རྨི་ལམ་རྨིས་པ་བཞིན་དུ་མཐོང་། །ཁམས་གསུམ་རླུང་རིག་བདག་ཉིད་དེ་བཞིན་ཉིད། །རྗེས་སུ་རྟོགས་པ་འབྲིང་གིས་ཆོས་རྣམས་

88-1-366a

ཀུན། །སྒྱུ་མ་རྨི་ལམ་ལྟ་བུར་འཆར་བ་དང་། །རབ་ཀྱི་ནམ་མཁའ་ལྟ་བུར་རྟོགས་པ་ནི། །འོད་གསལ་བ་ལ་བསམ་གཏན་ཏིང་འཛིན་ལྡན། །རྗེས་སུ་རྟོགས་པ་ཤིན་ཏུ་རབ་གྱུར་པས། །ཡིད་བཞིན་ནོར་བུ་ལྟ་བུར་རྟོགས་
པ་ཉིད། །ཟུང་འཇུག་མངོན་དུ་གྱུར་པའི་དོན་ཉིད་དེ། །ངོ་བོ་ཉིད་ལས་འབད་མེད་གཞན་དོན་དུ། །རྟོག་མེད་མི་གཡོ་ལྷུན་གྲུབ་གྱུར་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་སུམ་བཅུ་སོ་བཞི་པའོ།། །། 
དེ་བཞིན་གཤེགས་པ་ཐམས་ཅད་ཀྱི། །དཀྱིལ་འཁོར་ཐམས་ཅད་བསྡུས་པ་ཡི། །འཁོར་ལོ་འབྱུང་བ་བླ་མེད་པ། །གསང་ཆེན་དཀྱིལ་འཁོར་བསྟན་པའོ། །སྐུ་གསུང་ཐུགས་ཀྱི་རྡོ་རྗེ་ཡིས། །ཡབ་ཡུམ་རོལ་པ་གསང་བ་ཡི། །
འོག་མིན་གནས་ནས་འདིར་གཤེགས་པ། །བྱིན་རླབས་ཡེ་ཤེས་དབབ་པར་བྱེད། །འདི་ནི་རྡོ་རྗེ་ཆེན་པོ་ཡི། །དབང་བསྐུར་ཡེ་ཤེས་གསང་བ་སྟེ། །རྣལ་འབྱོར་ལུས་ཀྱི་གནས་རྣམས་སུ། །སྤྱི་བོ་ལྟེ་བ་དཔྲལ་བ་དང་། །མགྲིན་པ་
སྙིང་ག་གསང་བར་ནི། །བདེར་གཤེགས་རྡོ་རྗེ་ཆེན་པོ་ཡི། །ཡབ་ཡུམ་ཕྱི་ནང་གསང་བ་ལ། །གཉིས་མེད་རོལ་པས་དབང་བསྐུར་བ། །བདེ་ཆེན་ཡེ་ཤེས་མི་འགྱུར་བའི། །གསང་ཆེན་དབང་ནི་དྲི་མེད་པའོ། །གསང་བ་རྡོ་རྗེ་ཐེག་པ་
ཡི། །སྡོམ་པ་གསང་བ་རྒྱས་གདབ་པ། །རིག་པ་འཛིན་པའི་སྙིང་པོ་ནི། །ཡང་དག་སྡོམ་པ་བསྟན་པའོ། །རླུང་སེམས་འགྱུར་ལྡོག་དུས་གནད་འགྱུར་བ་ཉིད། །རླུང་སེམས་གཅིག་ཏུ་གནས་སམ་ཐ་དད་འགྱུར། །གལ་ཏེ་རླུང་སེམས་གཅིག་
ཏུ་མཚུངས་ལྡན་ན། །ཐོག་མར་སྔོན་དུ་འགྲོ་བ་གང་ཡིན་པ། །འགྲོ་འོང་རིམ་པ་བཞིན་དུ་བྱེད་འགྱུར་ན། །སྔོན་དུ་འགྲོ་བ་གང་ཡིན་དེ་རྗེས་སུ། །འབྲངས་ལས་གང་གང་བྱེད་པ་གང་དེ་སྙེད། །སོ་སོར་བྱེད་དམ་གཅིག་ཏུ་མཉམ་པར་བྱེད། །སོ་སོར་བྱེད་ན་
གཅིག་པའི་ཁྱད་པར་ཉམས། །གཅིག་ཏུ་བྱེད་ན་སྔ་ཕྱི་མེད་པར་འགྱུར། །རླུང་འགག་ན་ནི་རྟོག་པ་འགག་མི་འགག །གལ་ཏེ་རྟོག་པ་བཟློག་པར་གྱུར་པ་ན། །རླུང་གིས་ལས་ནི་ཇི་ལྟར་བྱེད་པར་གྱུར། །འབྱུང་བ་རླུང་དང་རང་བཞིན་རྟོག་པ་དག །

88-1-366b

མཉམ་དུ་འབྱུང་འཇུག་བྱེད་དམ་མི་བྱེད་བརྟག །སྲོག་སྟེ་རླུང་དང་རྣམ་ཤེས་གང་ཡིན་པ། །ཕྱི་རོལ་འབྱུང་བའི་རླུང་ནི་འགགས་པ་ན། །ལུས་ཅན་རྣམས་ཀྱི་སྲོག་ཀྱང་འགག་པར་འགྱུར། །ཕྱི་ཡི་རླུང་དང་ནང་གི་རླུང་དག་ལས། །གཅིག་འགག་པས་ན་ཕྱི་མ་འགག་
འགྱུར་རམ། །གཅིག་ནི་ལོག་ན་ཐམས་ཅད་ལོག་འགྱུར་གྲང་། །གཅིག་ནི་ལོག་ཀྱང་གསུམ་པོ་མི་ལྡོག་འགྱུར། །འདི་ཡི་དབྱེ་བ་ཁྱད་པར་རྟོགས་པར་བྱ། །རླུང་སེམས་འགྲོ་ལྡོག་གི་གནས་ལུགས་བསྟན་པའོ། །རྟག་ཏུ་མ་བྱིན་ལེན་པ་ནི། །ཡོན་ཏན་
ཡེ་ཤེས་ཕྲིན་ལས་ཀུན། །དུས་མེད་པར་ནི་ནུས་པས་བླང་། །རྣམ་རྟོག་ལྟུང་བྱེད་མ་ལུས་པ། །རང་བཞིན་ཤེས་པས་རྩ་བ་བཅད། །ཆོས་རྣམས་སྒྱུ་མ་རྨི་ལམ་ལྟར། །གསང་བ་བདེ་ཆེན་གྲུབ་པ་ལ། །རྨད་བྱུང་བདེ་ཆེན་འདོད་ཆགས་ཉིད། །ཤེས་པས་
རང་བཞིན་མེད་པར་སྨྲ། །རྡོ་རྗེ་འཛིན་པར་གནས་པར་སྤྱད། །བཟློག་པ་སྨན་ཉིད་ཡེ་ཤེས་ཆེ། །ལོག་པར་ལྟུང་བར་མི་འགྱུར་རོ། །སྡོམ་པ་ཐབས་དང་ཤེས་རབ་དག །གཉིས་མེད་ཕྱག་རྒྱ་ཆེན་པོར་ན། །དུས་ཀུན་ཏུ་ནི་དེ་ཉིད་སྡོམ། །སྡོམ་
པ་ཐམས་ཅད་ཀྱི་གསང་བ་ཟིལ་གནོན་རྡོ་རྗེ་ཞེས་བྱ་བའི་ཏིང་ངེ་འཛིན་སྤྱོད་པའི་བརྟུལ་ཞུགས་སོ། །རྡོ་རྗེའི་བདག་ཉིད་གསུམ་འདུས་ནས། །རྡོ་རྗེ་རྣལ་འབྱོར་པ་ཐིམ་འགྱུར། །དེ་གཉིས་སྐུ་གསུང་ཐུགས་རྡོ་རྗེ། །རྟོག་པའི་རྦ་རླབས་རབ་ཞི་བ། །
ཉེར་དཔྱད་ཡེ་ཤེས་སྒྱུ་མ་དག་པ་ལས། །ཡོངས་དག་རྣལ་འབྱོར་སྤྲོས་བཅས་དང་། །སྤྲོས་མེད་ལས་འདས་སྟོང་པ་ཉིད། །འོད་གསལ་ཤིན་ཏུ་སྤྲོས་མེད་ལས། །ཕྱག་རྒྱ་ཆེན་པོ་ཟུང་འཇུག་ཐོབ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། 
རབ་ཏུ་བྱེད་པ་སུམ་བཅུ་སོ་ལྔ་པའོ།། །།  འདི་ནི་སྔགས་རྣམས་ཐམས་ཅད་ཀྱི། །དེ་ཉིད་གསང་ཆེན་ཚུལ་མཆོག་སྟེ། །རྡོ་རྗེ་གསུམ་ལས་འཁོར་ལོ་འབྱུང་། །བྱང་ཆུབ་སངས་རྒྱས་གནས་འཇུག་པའོ། །དེ་ཁོ་ན་ཉིད་ལས་མངོན་རྟོགས། །བསམ་
གྱིས་མི་ཁྱབ་རྒྱན་གྱུར་པའོ། །བརྗོད་བྱ་དང་ནི་རྗོད་བྱེད་དང་། །དཔའ་དང་མངོན་གྱུར་སྟོབས་དང་ནི། །ཆོས་དོན་ཁྱབ་པར་གྱུར་པའི་ཕྱིར། །སྟོབས་ལྡན་ཁྱད་པར་རྒྱན་ཡིན་ནོ། །གནས་

88-1-367a

པ་དང་ནི་གསལ་རྫུ་འཕྲུལ། །ཡོན་ཏན་ཕྲིན་ལས་རྒྱན་རིམ་བཞིན། །དེ་ནི་བརྗོད་བྱེད་རྟག་ཏུ་རྒྱན། །དོན་གྱུར་དགོས་པ་བླ་ན་མེད། །དོན་གནས་བྱེད་པ་ཡེ་ཤེས་ཀྱི། །གསང་ཆེན་བདེ་མཐོང་ཁྱད་པར་ཏེ། །རྒྱན་ལས་དབྱེ་
བསྡུ་བསྟན་པའོ། །དེ་ནས་བདེར་གཤེགས་རྡོ་རྗེ་འཛིན། །འདུས་པའི་ཚོགས་ལ་རྗེས་བརྩེ་བས། །རྡོ་རྗེ་གསང་བ་གསུང་དག་པ། །ཡེ་ཤེས་རྡོ་རྗེས་འདིར་གསུངས་པ། །ཨེ་མའོ་སངས་རྒྱས་མ་ལུས་པའི། །ཆོས་ཀྱི་དབྱིངས་
ནི་ཡེ་ཤེས་ཆེ། །འོད་གསལ་རང་བཞིན་ཡོངས་སུ་དག །དྲི་མེད་ནམ་མཁའི་དབྱིངས་བཞིན་ནོ། །ཡེ་ཤེས་ངོ་བོ་ཉིད་འབྱུང་བ། །ཁམས་གསུམ་དག་ན་བྱང་ཆུབ་སྤྱོད། །འགྲོ་བ་ཀུན་ལ་བདེ་འབྱུང་བའི། །དགེ་བ་ཡོངས་སུ་དག་
གྱུར་བྱོས། །དག་པའི་ལུས་ནི་རྣམ་ཐར་གྱི། །སྒོ་གསུམ་གྲུབ་པ་སྐུ་རྡོ་རྗེ། །ངག་ནི་དག་པ་ཆོས་ཀྱི་ཚུལ། །སོ་སོར་ཡང་དག་རིག་པ་ཆེ། །གསུང་གི་དབྱངས་ནི་མི་ཕྱེད་འགྱུར། །རྣམ་ཤེས་དུས་གསུམ་དུས་མེད་དུ། །ཡེ་
ཤེས་བྱང་ཆུབ་ཆེན་པོར་འབྱུང་། །དབྱེར་མེད་བདེ་ཆེན་མི་གནས་པའོ། །དེ་ནས་སྒྲིབ་པ་ཐམས་ཅད་རྣམ་པར་སེལ་བ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ངོ་མཚར་དུ་གྱུར་རྨད་དུ་གྱུར་ཏེ། བཅོམ་ལྡན་
འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་འདི་ཅིའི་སླད་དུ་དེ་བཞིན་གཤེགས་པ་རྣམས་ཀྱི་འཁོར་གྱི་ནང་དུ། འདི་ལྟ་བུའི་ཚིག་ངན་པ་གསུང་ཞེས་གསོལ་ཏོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས། བྱང་
ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་རྣམས་ཐོང་། དེ་སྐད་ཅེས་མ་ཟེར་ཅིག་ཅེས་པ་ནས། འཇིགས་སྐྲག་དངངས་ནས་བརྒྱལ་བར་གྱུར་ཏོ་ཞེས་པ་དང་། དེ་དག་ལ་སླར་གསོལ་ཞེས་པའི་བར་གྱི་
དཔལ་རྡོ་རྗེ་འཆང་གི་བར་གྱིས་གསུངས་པ་ནི། བཞུགས་པ་ལ་ལྡེམ་པོར་དགོངས་པའི་ཐེ་ཚོམ་སེལ་བ་བསྟན་པའོ། །སྲོག་ཆགས་གསོད་ལ་དགའ་བ་ཞེས་པ་ནས། འདི་ནི་སངས་རྒྱས་འགྲུབ་པར་འགྱུར་གྱི་བར་གྱིས་གསུངས་པ་ནི། 

88-1-367b

འོད་ཀྱིས་རེག་པ་ཙམ་གྱིས། དེ་དག་རང་རང་གི་སྟན་ལ་གནས་པར་གྱུར་ཏོ་ཞེས་པས་བསྟན་ནོ། །འདི་ལྟ་བུ་ཡང་དག་པ་མ་ཡིན་པའི་ཚིག་གི་ལམ། རྡོ་རྗེའི་ཚིག་ཅིའི་སླད་དུ་གསུང་ཞེས་དྲིས་པ་དང་། དེ་བཞིན་གཤེགས་པ་རྣམས་
ཀྱིས་བཀའ་སྩལ་པ། རིགས་ཀྱི་བུ་རྣམས་འདུ་ཤེས་ངན་པ་དང་། དམན་པའི་འདུ་ཤེས་དེ་ལྟ་བུ་མ་སྐྱེད་ཅིག་ཅིའི་ཕྱིར་ཞེ་ན། རིགས་ཀྱི་བུ་འདི་ལྟ་སྟེ། སྔགས་ཀྱི་སྤྱོད་པའི་མཆོག་གོ། འདི་ལྟ་སྟེ་སྔགས་ཀྱི་སྤྱོད་པ་ནི་དེ་བཞིན་གཤེགས་པའི་
སྤྱོད་པའོ་ཞེས་པ་ནས། དམ་ཚིག་དེ་དག་རྗེས་སུ་རིག་པར་བྱའོ་ཞེས་པས། བསྒྱུར་བ་ལ་ལྡེམ་པོར་དགོངས་པའི་ཐེ་ཚོམ་སེལ་བའོ། །སྐུ་མི་འགྱུར་བ་མི་གནས་པ་མ་སྐྱེས་པ་ཞེས་པ་ལ་སོགས་པ་ནས། ཡང་དེ་ནས་འཕགས་པ་འཇམ་
དཔལ་ལ་སོགས་པས། དེ་བཞིན་གཤེགས་པ་རྣམས་ལ་ཞུས་པ་དང་། དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། ཁྱེད་རྣམས་ལྟ་ཅི་སྨོས་ཏེ། ངེད་སྒོ་གསུམ་རྡོ་རྗེའི་གསང་བ་མི་འགྱུར་བ་རྙེད་པ་ཡང་། སྐུ་དང་གསུང་དང་
ཐུགས་རྡོ་རྗེའི་བྱང་ཆུབ་མི་ཤིས་སོ་ཞེས་པ་དང་། དེ་ཅིའི་ཕྱིར་ཞེ་ན། སྐྱེ་བ་མེད་པའི་རྡོ་རྗེ་མངོན་པར་བྱང་ཆུབ་པའི་ངོ་བོ་ཉིད་མེད་པ་མི་འགྱུར་བ་ལས་བྱུང་བའོ། །ཞེས་ངོ་བོ་ཉིད་ཆོས་ཀྱི་མཚན་ཉིད་ལ་ལྡེམ་པོར་དགོངས་པའི་ཐེ་ཚོམ་
སེལ་བའོ། །དགོངས་པ་སྒྱིད་ལུག་པ་སྤང་བའི་ཕྱིར། རིགས་ཀྱི་བུ་སེམས་ཅན་ཆེན་པོའི་ཞེས་པ་ནས། རྡོ་རྗེའི་ཡེ་ཤེས་ཐོབ་པའོ་ཞེས་པས་བསྟན་པའོ། །བཅོམ་ལྡན་འདས་མར་མེ་མཛད་ཅེས་པ་ནས། སྐལ་བ་མེད་པའི་ཕྱིར་གྱི་བར་
གྱིས་གསང་སྔགས་རྡོ་རྗེ་ཐེག་པ་འབྱུང་བ་དཀོན་པ་ལ་གདམས་པའོ། །ཡང་ལམ་མ་ལུས་པ་ཡོངས་སུ་རྫོགས་ཤིང་། ཚེ་གཅིག་ལུས་གཅིག་གིས་སངས་རྒྱས་པ་བསྟན་པ་ནི། འོན་ཀྱང་ཞེས་པ་ནས། སངས་རྒྱས་ཞེས་བྱ་
བའི་གྲངས་སུ་འགྲོའོ་ཞེས་གསུངས་སོ། །དེ་ནས་བྱང་ཆུབ་སེམས་དཔའ་དེ་དག་གིས། གསུང་རྡོ་རྗེའི་ཡི་གེའི་ཚིག་འདི་ཐོས་ནས་རབ་ཏུ་ངུས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས། བྱང་ཆུབ་སེམས་དཔའ་

88-1-368a

དེ་དག་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་ཁྱེད་རྣམས་མ་ངུ་ཅིག །སྡུག་བསྔལ་གསུམ་བསྒོམ་པར་མ་བྱེད་ཅིག །བྱང་ཆུབ་སེམས་དཔའ་ཐམས་ཅད་ཀྱིས་གསོལ་པ། བཅོམ་ལྡན་འདས་གསང་བའི་
ཡི་གེའི་མིང་ཙམ་ཐོས་པའི་སྐལ་བ་ཡང་མ་མཆིས་ན། ཇི་ལྟར་མི་ངུ་བར་བགྱི། དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། དེ་སྐད་ཅེས་མ་ཟེར་ཅིག །གཉེན་པོ་ལ་ལྡེམ་པོར་དགོངས་པས་ན། སྒྱིད་ལུག་པ་སྤང་བའི་ཕྱིར་ཡི་གེ་ནི་
ཐུན་མོང་སྟེ། རིགས་ཀྱི་བུ་ཁྱེད་རྣམས་ཀྱིས་ཇི་ལྟར་མི་ཤེས་པ་དང་། མ་ཐོས་པ་དེ་བཞིན་དུ། ངེད་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱིས་ཀྱང་། རིགས་ཀྱི་བུ་གསང་བའི་ཡི་གེ་འདི་དག་མ་མཐོང་
མ་ཐོབ་ཅིང་། མངོན་པར་རྫོགས་པར་སངས་མ་རྒྱས་སོ། །དེ་ཅིའི་ཕྱིར་ཞེ་ན། གསང་བ་གསུམ་གྱི་ཡི་གེ་རྣམ་པར་དག་པའི་ཕྱིར་རོ་ཞེས་ཐེ་ཚོམ་བསལ་བའོ། །སྔགས་ཀྱི་སེམས་དཔའ་མི་བྱ་སྟེ། བྱས་ན་བྱང་ཆུབ་རྙེད་པར་དཀའ་ཞེས་པ་
ལ། ཞེན་པ་དང་མ་བྲལ་ན་འཆིང་བར་འགྱུར་ཞེས་པ་གང་ཟག་གཞན་ལ་དགོངས་པའོ། །མདོར་ན་ཕུང་པོ་ལྔ་རྣམས་ནི། སངས་རྒྱས་ལྔར་ནི་རབ་ཏུ་བསྒྲགས། །ཞེས་པ་ལ་སོགས་པ་དོན་གཞན་ལ་དགོངས་པའོ། །ཆོས་ཐམས་ཅད་ལ་
མཉམ་པ་ཉིད་མཐོང་ངམ་ཞེས་པ་མཉམ་པ་ཉིད་ལ་དགོངས་པའོ། །ཆོས་ཀྱི་རྣམ་གྲངས་འདི་ལ་སྐལ་བ་ཡོད་པའི་ཕྱིར་རོ་ཞེས་གསུངས་པས་ནི། དུས་གཞན་ལ་དགོངས་པའོ། །དགོངས་པ་ཉིད་ནི་ཕྱིར་མི་ལྡོག་པའི་དོན་ལ་དགོངས་པ་ནི་
ལྡེམ་པོར་དགོངས་པ་དག་གོ། །དགོངས་པ་སྤྱི་ནི་ཡང་དག་པར་དགོངས་པའོ། །དེ་བཞིན་གཤེགས་པ་ཐམས་ཅད་ཀྱི་དགོངས་པའི་ཁྱད་པར་བསྟན་པ་ཞེས་བྱ་བའི་ཏིང་ངེ་འཛིན་ཏོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་
ཏུ་བྱེད་པ་སུམ་བཅུ་སོ་དྲུག་པའོ།། །། བྱང་ཆུབ་སེམས་ཀྱི་ངོ་བོ་ཉིད། །བླ་མ་རྡོ་རྗེ་འཛིན་པ་ལ། །མོས་གུས་མཐར་ཕྱིན་གྱུར་པས་ནི། །ལམ་གྱི་རིམ་པ་ཀུན་རྫོགས་པས། །སྒྲིབ་དག་ཡོན་ཏན་ཐོབ་པ་སྟེ། །

88-1-368b

དབང་གི་རྒྱལ་པོ་རྙེད་པ་བཞིན། །ལས་དང་དངོས་གྲུབ་མ་ལུས་པ། །ཡེ་ཤེས་མི་ཟད་གནས་འཐོབ་པའོ། །དམ་ཚིག་དག་གི་འཁོར་ལོར་ནི། །དགའ་བ་ཆེན་པོས་རོལ་པ་ནི། །ལུས་ཀྱི་གནས་སུ་རྩ་གནས་པ། །འཁོར་ལོ་དྲུག་
གི་རྣམ་པ་ལ། །ཐིག་ལེ་ཡི་གེ་རླུང་དག་པ། །བདེ་གསང་སྟོང་ཉིད་ཡེ་ཤེས་ལས། །དབང་ཕྱུག་མཛོད་སྤུ་གཙུག་ཏོར་དུ། །གཉིས་མེད་མཉམ་པ་བདེ་ཆེན་དུ། །རབ་ཏུ་ཐིམ་པས་རྣམ་གྲོལ་ཉིད། །རྟེན་འབྲེལ་ཐམས་ཅད་མཁྱེན་
པར་འགྱུར། །ལས་རྒྱལ་མཆོག་གི་ཕྲིན་ལས་ནི། །དོན་དམ་སྟོང་ཉིད་ངང་ལས་ནི། །རྡོ་རྗེ་སེམས་དཔའི་སྐུར་གྱུར་ལས། །རྣམ་པར་སྣང་མཛད་སྐུར་བསྒྱུར་བ། །ཟླ་བའི་གདན་ལ་གནས་པ་ཡི། །སྤྱན་དང་གཉིས་མེད་སྦྱོར་
བ་ལས། །ཞི་བར་འདོད་རྣམས་ཐམས་ཅད་ཀྱི། །དེར་གནས་གནོད་པ་ཞི་བར་བྱེད། །རྒྱས་ལ་རིན་ཆེན་འབྱུང་གནས་དཔལ། །མཱ་མ་ཀཱི་དང་གཉིས་མེད་པས། །སྤྲོ་བསྡུས་རིན་ཆེན་ཆར་དབབ་བྱ། །དབང་ལ་འོད་དཔག་མེད་པ་
ཉིད། །གོས་དཀར་ཡུམ་དང་གཉིས་མེད་པས། །སྤྲོས་པས་དབང་དུ་བསྡུ་བར་བྱ། །མངོན་སྤྱོད་གདོན་མི་ཟ་བ་ཉིད། །པདྨ་ཉི་མ་ལ་གནས་པས། །སྒྲོལ་མ་དང་ནི་གཉིས་སུ་མེད། །སྤྲོ་བསྡུས་ཁྲོ་བོས་ལས་ལ་སྦྱར། །དེ་དག་
ལས་ཚོགས་ཐམས་ཅད་ཀུན། །སྒྱུ་མ་རྨི་ལམ་ལྟར་གསལ་བས། །བདག་བྱིན་བརླབ་པ་ཉིད་དུ་ལྟ། །སྒྱུ་མའི་དཔེ་བཅུ་གཉིས་ཀྱིས། བདེ་བ་ཆེན་པོའི་ཏིང་ངེ་འཛིན་ཉེ་བར་མཚོན་པར་འགྱུར་བ་ཡིན་ཏེ། དེ་ལྟར་ཕྱོགས་བཅུའི་
འཇིག་རྟེན་གྱི་ཁམས་ན། གནས་པའི་དེ་བཞིན་གཤེགས་པ་མ་ལུས་ཤིང་ལུས་པ་མེད་པ་ཀུན། འཁོར་བའི་རྒྱ་མཚོ་ཇི་སྲིད་གནས་པའི་བར་དུ། ཆོས་ཐམས་ཅད་ལ་དབང་སྒྱུར་བ། ཟབ་པ་དང་རྒྱ་ཆེ་བ་བླ་ན་མེད་པ་སྒྱུ་
མ་ལྟ་བུའི་ཏིང་ངེ་འཛིན་གྱིས་བཞུགས་ནས། འདོད་པའི་ཡོན་ཏན་དུ་མ་རྣམས་ཀྱིས་རོལ་པར་མཛད་ཅིང་། རབ་ཏུ་དགའ་བར་མཛད་པས། ཐམས་ཅད་མཁྱེན་པའི་ཡོན་ཏན། གསང་བ་བསམ་གྱིས་མི་ཁྱབ་པ་དང་ལྡན་པས། 

88-1-369a

བདག་ཇི་ལྟར་བཞེད་པ་ཙམ་གྱིས། སངས་རྒྱས་ཀྱི་ཞིང་ནས། སངས་རྒྱས་ཀྱི་ཞིང་ཁམས་དཔག་ཏུ་མེད་པར། མི་ཟད་པ་རྒྱན་གྱི་འཁོར་ལོས། ཕྲིན་ལས་ཐོགས་པ་མེད་པར་རབ་ཏུ་མངོན་པར་འབྱུང་བའོ། །དཔལ་ཡེ་
ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་སུམ་བཅུ་སོ་བདུན་པའོ།། །། ཨེ་མའོ་རྡོ་རྗེ་ནི་སྣང་བ། ཨེ་མའོ་རྡོ་རྗེ་ནི་མཆེད་པ། ཨེ་མའོ་རྡོ་རྗེ་ཡིན་པར་བཤད་པ་ནི་སྣང་བ་ཐོབ་པའི་ཡེ་ཤེས་སོ། །སྒྱུ་
རླུང་སེམས་སྒྱུ་མ་ཙམ་ལས་འབྱུང་བའི་གང་དུ་ཞེས་འོད་གསལ་བའི་ངང་དུའོ། །དེར་ནི་སྒྱུ་མ་རྨི་ལམ་ལྟ་བུའི་ལུས་མེད་སྣང་ཙམ། ངག་མེད་གྲག་ཙམ་སེམས་མེད་རྟོག་མེད་སྟོང་པ་ཉིད་དོ། །དེར་སྟོང་ཉིད་འོད་གསལ་བའི་ངང་
ལས། ལུས་ནི་རྣམ་པར་བསྒོམ་པ་སྒྱུ་ལུས་རྣམ་པར་དག་པའི་སྐད་ཅིག་གིས་འབྱུང་བའི་ཟུང་འཇུག་གི་སྐུ་ཐོབ་པར་གྱུར་པའོ། །ཟུང་འཇུག་སློབ་བཞིན་པ་ལ་གནས་པས་ནི། ལྷུན་གྱིས་གྲུབ་པའི་དབྱིངས་ཀྱི་དོན་ནམ་མཁའ་
འོད་གསལ་ལས་བྱུང་བའི་ཡེ་ཤེས་ཀྱི་ལྷ་མོ་རིག་མ་དང་། ཡང་དེ་ཉིད་དུ་ཐབས་སྙིང་རྗེ་ཆེན་པོ་དང་ལྡན་པའི། ཐབས་ཤེས་རབ་གཉིས་མེད་དུ་སྦྱོར་བས་མཉེས་པར་གྱུར་པའི་ངོ་བོ་ཉིད་དོ། །བདུད་འདུལ་བར་མཛད་པས། རིག་མ་
ནི་རྣམ་པ་སྒྱུ་མ་ལྟ་བུ་ལས་སྐྱེས་བུ་རྣལ་འབྱོར་པ་དགའ་བ་ཆེན་པོའི་རོལ་པ། ཡེ་ཤེས་མི་འགྱུར་བའི་རྡོ་རྗེ་སྟེ། ཤེས་རབ་པདྨ་ཆོས་ཀྱི་འབྱུང་གནས་དང་མཉམ་པར་སྦྱོར་བས་ནི། གང་ཞིག་འདི་དག་སྒོམ་པ་ཞེས། སྐུ་རྡོ་རྗེ་དག་པ་
དགའ་བའི་སྐད་ཅིག །གསུང་རྡོ་རྗེ་མཆོག་དགའི་སྐད་ཅིག །ཐུགས་རྡོ་རྗེ་དག་པ་དགའ་བྲལ་གྱི་སྐད་ཅིག་དང་གསུམ་ལས། རྡོ་རྗེ་སྐུ་གསུམ་གྱིས་མཚན་པ་ནི་སྐད་ཅིག་བཞི་ལ་ལྷན་ཅིག་སྐྱེས་པ་རོ་མཉམ་བདེ་བ་ཆེན་པོ་ངོ་
བོ་ཉིད་ཀྱི་སྐུ་མངོན་དུ་བྱེད་པ་སྟེ། ཁྱུ་མཆོག་བྱང་ཆུབ་སེམས་རྡོ་རྗེ་དེ་ནི་མཉེས་པར་གྱུར་པ། ཟུང་འཇུག་སློབ་བཞིན་པའི་བྱང་ཆུབ་སེམས་དཔའ་གྲགས་ཆེན་ས་བཅུ་པའི་ཏིང་ངེ་འཛིན་ཐོབ་པ་དང་མཉམ་པར་འགྱུར་ཏེ། 

88-1-369b

དུས་དག་པ་ཡེ་ཤེས་སྐད་ཅིག་བདུན་པ་ལ་གཟི་བརྗིད་ཆེ་བ་ནི། ཡེ་ཤེས་དབང་ཕྱུག་ནུས་པ་རྫོགས་པ་ཐོབ་པར་ཡན་ལག་བདུན་དང་ལྡན་པའི་སྐུ་གསུམ་མངོན་དུ་གྱུར་པས་ལོངས་སྤྱོད་རྫོགས་སྐུ། ཡེ་ཤེས་ཁ་སྦྱོར་དུ་གྱུར་
པ་བདེ་བ་ཆེན་པོ་དང་། སྙིང་རྗེ་ཆེན་པོས་འགྲོ་དོན་མངོན་པར་འབྱུང་བ། འགོག་པ་མེད་པའི་ཡེ་ཤེས་རྒྱུན་མི་འཆད་པའི་ཕྱག་རྒྱ་ཆེན་པོ་རང་བཞིན་གྱིས་རྣམ་པར་དག་པ་དབྱིངས་དང་ཡེ་ཤེས་དབྱེར་མེད་འཐོབ་པའོ། །སཔྟ་
ཞེས་བདུན་པའི་སྒྲ་སྟེ། དེས་ཡན་ལག་དང་ལྡན་པར་བརྗོད་པའོ། །དེ་ཉིད་ཀུན་དུ་འོང་ཞེས་དང་། །ཡེ་ཤེས་མཚོན་པའི་ས་ཐོབ་པ། །རྡོ་རྗེ་འཛིན་པའི་ས་ལ་གནས་པས་མངོན་པར་བྱང་ཆུབ་ཆེན་པོ་ཉིད། བདག་གི་ལུས་ངག་
སེམས་རྡོ་རྗེ། །མཉམ་རྗེས་གཉིས་སུ་མེད་པར་ནི། །འགྱུར་བ་མེད་དོན་རབ་རྟགས་དང་། །ཕྱག་རྒྱ་ཆེན་པོ་མངོན་གྲུབ་པའི། །གསང་བ་དབང་ཕྱུག་ཆོ་ག་ནི། །བྱང་ཆུབ་ཡེ་ཤེས་རྡོ་རྗེ་ཡི། །སྐུར་གྱུར་སྒོམ་པ་སྒྲིབ་
བྲལ་བའི། །ཟུང་འཇུག་བླ་ན་མེད་པ་ནི། །མཁྱེན་པ་རྒྱས་པས་རབ་མི་གནས། །རྟོག་མེད་སྣང་བ་མེད་པ་ཡི། །སྐད་ཅིག་ཉིད་ལ་ཡོན་ཏན་རྫོགས། །དེ་བཞིན་གཤེགས་པར་གྱུར་པ་ཡིས། །ཐམས་ཅད་མཁྱེན་པ་ཉིད་དུ་གནས། །
དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་སུམ་བཅུ་སོ་བརྒྱད་པའོ།། །། དེ་ནས་ནམ་མཁའི་དབྱིངས་འདི་ཐམས་ཅད་ནི། །དེ་བཞིན་གཤེགས་པ་ཀུན་གྱི་སྐུ་གསུང་ཐུགས། །དམ་ཚིག་ཆེན་པོ་རྡོ་རྗེ་
ཡེ་ཤེས་ཀྱི། །བྱང་ཆུབ་སེམས་ཀྱི་བདེ་བའི་རང་བཞིན་གྱིས། །དཀྱིལ་འཁོར་མ་ལུས་ཀུན་དུ་སྣང་བར་མཛད། །ས་གསུམ་ཀུན་དུ་ཁྱབ་ཅིང་ཡོངས་གང་བ། །བུམ་པ་རྡོ་རྗེ་མི་འགྱུར་ཆུས་གང་ལྟར། །ཡོངས་སུ་དག་པས་བྱིན་གྱིས་
བརླབས་པའོ། །དེ་ནས་རྡོ་རྗེ་ནམ་མཁའི་དབྱིངས་འདི་ཐམས་ཅད་ཀྱི། །གང་དུ་འགྲོ་བ་སྐུ་གསུམ་ལས་བྱུང་བ། །དེ་དག་རྣམས་ལ་རྡོ་རྗེའི་འོད་ཟེར་གྱི། །དཔལ་གྱིས་རེག་ནས་དབང་བསྐུར་གྱུར་ཐོབ་པས། །འགྲོ་ཀུན་བདེ་བར་

88-1-370a

གཤེགས་པ་དགྲ་བཅོམ་པ། །རྡོ་རྗེ་གསུམ་གྱི་ཡེ་ཤེས་རོ་མཉམ་ཐོབ། །དབྱེར་མེད་ཟུང་འཇུག་བླ་ན་མེད་པར་གྱུར། །ཡང་དག་པར་ནི་མངོན་པར་སངས་རྒྱས་པའོ། །ཆོས་ཀུན་སྙིང་པོ་ལམ་ལས་འདས་པས་
ན། །མཐར་ཕྱིན་གྱུར་པས་འབད་རྩོལ་ལས་ལས་གྲོལ། །ལྷན་ཅིག་སྐྱེས་པའི་ཡེ་ཤེས་རྣམ་དག་པ། །ཟུང་འཇུག་རབ་ཏུ་མི་གནས་གྱུར་པའོ། །དངོས་དང་དངོས་མེད་སྤངས་ཐོབ་བྲལ་བའི་ཕྱིར། །མཚན་མའི་ཆོས་
ལས་རྒྱུ་རྐྱེན་བྲལ་བའོ། །མཁྱེན་པའི་ཡེ་ཤེས་བདག་མེད་མཉམ་པ་ཉིད། །དམིགས་མེད་ངང་འབྱུང་འོད་གསལ་དེ་ཉིད་ལས། །རང་དག་དབྱིངས་དང་དབྱེར་མེད་རང་གྲོལ་བ། །ཕྲིན་ལས་ཡོངས་སུ་དག་པ་བླ་ན་མེད། །
ཡུལ་དང་ཡུལ་ཅན་བྱང་ཆུབ་ཐོབ་མེད་པ། །རྣམ་པར་མི་རྟོག་མཐའ་བྲལ་བརྗོད་དུ་མེད། །དེ་བཞིན་ཉིད་དག་བདེ་ཆེན་ལྷུན་གྲུབ་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་སུམ་བཅུ་སོ་དགུ་
པའོ།། །། དེ་བཞིན་གཤེགས་པ་དུས་གསུམ་དང་། །ཕྱོགས་བཅུ་ཀུན་དུ་ཞིང་ཁམས་རབ་འབྱམ་པ། །ཀུན་དུ་གཟིགས་ཤིང་ཀུན་མཁྱེན་པ། །མ་ལུས་ཡོངས་དག་ཏིང་ངེ་འཛིན། །ཐམས་
ཅད་མཁྱེན་པས་སྐད་ཅིག་ལས། །ནམ་མཁའ་ལྟར་ནི་རྟོག་མེད་པས། །གདུལ་བྱ་དུས་ལ་བབ་པ་ལ། །འབད་མེད་པར་ནི་སྐུ་གསུང་ཐུགས། །རྒྱུན་མི་འཆད་ཅིང་ཐོགས་མེད་དོན། །སྣང་མེད་ངང་ལས་འབྱུང་འགྱུར་བའོ། །
རྒྱུད་ཀྱིས་བསྡུས་དང་མ་བསྡུས་ལས། །རྡོ་རྗེ་ངོ་བོ་ཉིད་སྟོན་འགྱུར། །དེ་ལས་མངོན་པར་བྱང་ཆུབ་པ་བླ་ན་མེད་པ་ཡེ་ཤེས་ཀྱི་སྐུ་དེ་བཞིན་གཤེགས་པ་འཇུག་པ་དང་། གནས་པ་དང་། འབྱུང་བར་འགྱུར་བ་མཉམ་པ་ནི་ཆོས་ཉིད་དེ་བཞིན་
ཉིད་ལས་བྱང་ཆུབ་པ་སྟེ། རང་བཞིན་གྱིས་སྤྲོས་པ་མེད་པ་ལྷུན་གྲུབ་སྟོང་པ་ཉིད་དོ། །ཁྱབ་ཅིང་གསལ་བའི་ངོ་བོ་མངོན་པར་བྱང་ཆུབ་པ་ནི་དངོས་པོ་མེད་པའི་གསལ་བར་གྱུར་པའི་ཁྱབ་བདག་རྡོ་རྗེའོ། །མི་ཟད་པ་སྣང་བའི་

88-1-370b

ཡེ་ཤེས་མངོན་པར་བྱང་ཆུབ་པ་ནི་མི་མཚུངས་པ་མེད་པའི་སྣང་བ་འོད་གསལ་བའི་མཚན་ཉིད་རྟག་ཏུ་མི་འགྱུར་བའི་དེ་བཞིན་ཉིད་དོ། །སྒྱུ་འཕྲུལ་དྲ་བ་མངོན་པར་བྱང་ཆུབ་པ་ནི་ཀུན་ཏུ་འབྱུང་བ་ཐོགས་པ་མེད་པའི་དུས་དང་རྣམ་པ་ཐམས་
ཅད་དུ་འགག་པ་མེད་པའོ། །ཡོངས་སུ་དག་པ་ཆོས་ཀྱི་དབྱིངས་མངོན་པར་བྱང་ཆུབ་པ་ནི། ཐ་དད་པར་དམིགས་པ་མེད་པའི་ཡེ་ཤེས་ཀྱི་སྐུ་སངས་རྒྱས་ཐམས་ཅད་ཀྱི་བྱང་ཆུབ་ཀྱི་སེམས་དུས་གསུམ་ཐོག་མཐའ་ཀུན་དུ་དཀྱིལ་
འཁོར་ཆེན་པོ་གསང་བའི་བདེ་བ་ཆེན་པོ་སྐུ་གསུང་ཐུགས་རྡོ་རྗེ་དམ་ཚིག་གི་འཁོར་ལོས་ཞི་བ་དང་ཁྲོ་བོའི་སྐུ་སྣ་ཚོགས་སུ་སྣང་བའོ། །ལོངས་སྤྱོད་རྫོགས་པ་མཚན་དཔེ་ལྡན། །ཡབ་ཡུམ་བདེ་ཆེན་ངོ་བོ་ཉིད། །སྙིང་རྗེ་ཆེན་
པོ་ཚད་མེད་པས། །རྒྱུན་མི་འཆད་པར་བསམ་པ་དང་། །མཐུན་པར་འཇུག་པས་ཞི་མི་འགྱུར། །རང་བཞིན་མེད་པས་མི་འགྱུར་བའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་བཞི་བཅུ་པའོ།། །། 
དེ་ནས་དེ་བཞིན་གཤེགས་པའི་ཚོགས། །དཔག་མེད་འདུས་པ་ཐམས་ཅད་ཀྱི། །རྟག་ཏུ་དགའ་བའི་གཟུགས་ཅན་མཆོག །བཅོམ་ལྡན་རྡོ་རྗེ་འཆང་ཆེན་གྱི། །གསུང་དབྱངས་རྡོ་རྗེ་སྒྲ་སྒྲོགས་པ། །ཉེ་བ་ཉིད་དུ་ཐོས་པ་ཡིས། །
བདེ་བ་དང་ནི་ཡིད་བདེ་ཐོབ། །དེ་ཉིད་དུ་ནི་སྐད་ཅིག་ལ། །ཡང་དག་ཏིང་འཛིན་སྒོ་ཐོབ་ཅིང་། །རྨད་བྱུང་ཡེ་ཤེས་དབྱངས་ཀྱིས་བསྟོད། །ཆོས་ཀྱི་དབྱིངས་ལས་མ་གཡོས་ཀྱང་། །ཐུགས་རྗེ་ཚད་མེད་འགྲོ་སྐྱོབ་མཛད། །
བྱང་ཆུབ་ཡེ་ཤེས་གཙོ་ཆེན་པོ། །བདེ་ཆེན་དཔེ་བྲལ་ཕྱག་འཚལ་ལོ། །རྡོ་རྗེ་གསང་བ་མི་འགྱུར་བ། །མཆོག་ཏུ་གྱུར་པ་བདེ་ཆེན་པོ། །ཐབས་དང་ཤེས་རབ་གཉིས་མེད་པའི། །གར་གྱི་བདག་པོ་ཕྱག་འཚལ་
ལོ། །དྲག་པོ་མ་རུངས་ཐམས་ཅད་ཀུན། །གསུང་གི་ང་རོས་ཟིལ་གནོན་ཅིང་། །འཇིགས་བྱེད་བདུད་འདུལ་ཆེན་པོ་ཉིད། །རྒྱལ་བ་རྒྱ་མཚོ་ལ་ཕྱག་འཚལ། །ཆོས་རྣམས་མི་ཟད་མཛོད་ཐོབ་པས། །

88-1-371a

འགྲོ་བ་ཀུན་ལ་གཏེར་སྦྱིན་མཛད། །དབང་ཕྱུག་བླ་མེད་ཕྱག་རྒྱ་ཆེ། །ཅོད་པན་གཙུག་ཏོར་ཕྱག་འཚལ་ལོ། །འཇིག་རྟེན་དབང་བསྒྱུར་ས་གསུམ་པ། །དྲི་མེད་ནོར་བུ་ཆེན་པོ་
སྟེ། །མཚུངས་མེད་སྒྱུ་འཕྲུལ་རྒྱལ་པོ་ཆེ། །བྱང་ཆུབ་སྙིང་པོ་ཕྱག་འཚལ་ལོ། །ཞེས་དེ་བཞིན་གཤེགས་པ་ཐམས་ཅད་ཀྱིས། དཔལ་རྡོ་རྗེ་འཆང་ཆེན་པོ་ལ་ཡང་དག་པར་བསྟོད་པའོ། །དེ་ནས་
བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པ་དང་། བྱང་ཆུབ་སེམས་དཔའ་ནམ་མཁའི་སྙིང་པོ་ལ་སོགས་པ་དཔག་ཏུ་མེད་པ། དགའ་མགུ་ཡི་རངས་ཏེ། ཆོས་ཐམས་ཅད་མཉམ་པ་
ཉིད་དུ་རྟོགས་པས། ཅི་ཡང་མི་སྨྲ་བར་གྱུར་ཏོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་བཞི་བཅུ་རྩ་གཅིག་པའོ།། །།
སློབ་དཔོན་ཆེན་པོ་ཟླ་བ་གྲགས་པ་ལས་རིམ་པར་བརྒྱུད་པ། དཔལ་ནཱ་རོ་པའི་སློབ་མ། ཁ་ཆེའི་པཎྜི་ཏ་ཨཱ་ཀ་ར་སིདྡྷི་དང་། ལོ་ཙཱ་བ་དགེ་སློང་ཚུལ་ཁྲིམས་
རྒྱལ་བས་ཞུས་ཤིང་གཏན་ལ་ཕབ་པའོ། །རྒྱ་དཔེ་རྗེ་ཨ་ཏི་ཤ་ལ་ཡང་བཞུགས་པ་དང་མཐུན་པར་བྱུང་སྐད་དོ། །མངྒ་ལྃ།། །།