89-1-1a

༼ཆ༽ ༄༅། ༈ །གསང་སྔགས་རྒྱུད་འབུམ་གྱི་སྐོར་བཞུགས་སོ། །
(黃)  秘密經第六部

89-1-1b

༄༅༅། །སྟོང་ཕྲག་གི་ཚད་དུ་ཉི་མའི་དཀྱིལ་འཁོར་ཆེན་པོ་བྱིན་གྱིས་བརླབས་ནས། དེའི་དབུས་
སུ་གནས་པར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་སླར་ཡང་འདུས་པར་གྱུར་
ནས། དེ་བཞིན་གཤེགས་པ་ཐམས་ཅད་ཀྱི་རྗེ་བོ་ལ་གསོལ་བ་བཏབ་བོ། །རྡོ་རྗེ་ཆོས་ཕྱིར་ཁྱོད་ལེགས་སོ། །
རྡོ་རྗེའི་སྤྱན་ཕྱིར་ཁྱོད་ལེགས་སོ། །རྡོ་རྗེ་ཡེ་ཤེས་ཕྱིར་ཁྱོད་ལེགས། །སངས་རྒྱས་ཡེ་ཤེས་ཕྱིར་ཁྱོད་
ལེགས། །གོང་བཞིན་དུ་སྦྱར་རོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་
བཅོམ་ལྡན་འདས་རྡོ་རྗེ་འཆང་ཆེན་པོ་ལ་ཕྱག་འཚལ་ནས། འདི་སྐད་ཅེས་གསོལ་ཏོ། །སངས་རྒྱས་
ཀུན་ལ་ཕན་པར་མཛད། །སེམས་ཅན་མགོན་ལ་གསོལ་བ་ནི། །ཁྱབ་བདག་ཐེག་པ་ཆེན་པོའི་ཚུལ། །
ཐེག་པའི་མཆོག་ནི་བསྟན་དུ་གསོལ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་དེ་བཞིན་གཤེགས་པ་

89-1-2a

རྣམས་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་དེ་སྐད་མ་ཟེར་ཅིག །སྤྲོ་བ་མཆོག་གི་དེ་ཁོ་ན་ཉིད་ཀྱི་ཚུལ་ངེས་པར་བསྟན་པར་དེ་བཞིན་གཤེགས་
པ་ཐམས་ཅད་ཀྱིས་རབ་ཏུ་གསུངས་སོ། །ཅིའི་རྒྱུས་རྡོ་རྗེ་འཛིན་པ་རབ་ཏུ་གསུང་། བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་ཀྱི་དགོངས། དེ་ཉིད་ཀྱི་ཚེ་འཁོར་ཆེན་པོའི་དཀྱིལ་འཁོར་དུ་བྱམས་པ་ལ་སོགས་
པའི་བྱང་ཆུབ་སེམས་དཔའ་ཆེན་པོ་རྣམས་ཐེག་པ་ཆེན་པོ་མཆོག་གི་དོན་གྱི་ཚུལ་ཆེན་པོ་འདི་ཐོས་ནས། རྣམ་པ་སྟོང་དུ་རྣམ་པར་བརྙིལ་བར་གྱུར་ཏོ། །དེ་བཞིན་གཤེགས་པ་ཐམས་ཅད་ལ་གསོལ་པ། ཁྱོད་ཀྱིས་ཞི་
བར་བྱིན་བརླབས་པས། །སངས་རྒྱས་རྣམས་ཀྱིས་རྣམ་པ་ཅན། །ཁྱབ་བདག་དེ་ཉིད་རྡོ་རྗེ་ཅན། །བྱིན་བརླབས་མཉམ་པར་ཀུན་དུ་སྤྱོད། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སྤྱན་གདངས་ནས་དེ་བཞིན་གཤེགས་པ་ཐམས་
ཅད་ལ་ལེགས་སོ་བྱིན་ནས། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ཆེན་པོའི་འོད་ཟེར་གྱིས་བཀང་ནས། དེ་བཞིན་གཤེགས་པ་ཐམས་ཅད་ཀྱི་ཐུགས་ཡང་དག་པར་སྐུལ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་སོ། །སྙོམས་པར་ཞུགས་མ་ཐག་ཏུ་ཉི་མའི་དཀྱིལ་འཁོར་ཆེན་པོ་བཞི་རབ་ཏུ་བྱུང་བར་གྱུར་ཏེ། ཤར་གྱི་ཕྱོགས་སུ་མི་ཟད་པའི་གཟུགས་འཛིན་མ་ཞེས་བྱ་བའི་ཉི་མའི་དཀྱིལ་འཁོར་ཆེན་པོ་རབ་ཏུ་ཤིན་ཏུ་བྱུང་བར་གྱུར་
ཏོ། །ལྷོ་ཕྱོགས་ནས་རིན་པོ་ཆེ་ཡིད་བཞིན་གྱི་ནོར་བུའི་རྡོ་རྗེ་ཞེས་བྱ་བའི་ཉི་མའི་དཀྱིལ་འཁོར་ཆེན་པོ་རབ་ཏུ་ཤིན་དུ་བྱུང་བར་གྱུར་ཏོ། །ནུབ་ཕྱོགས་སུ་འཆི་མེད་རྡོ་རྗེ་ཞེས་བྱ་བའི་ཉི་མའི་དཀྱིལ་འཁོར་ཆེན་པོ་རབ་ཏུ་ཤིན་དུ་བྱུང་བར་གྱུར་
ཏོ། །བྱང་ཕྱོགས་སུ་དོན་ཡོད་པའི་དམ་ཚིག་གི་རྡོ་རྗེ་ཞེས་བྱ་བའི་ཉི་མའི་དཀྱིལ་འཁོར་ཆེན་པོ་རབ་ཏུ་ཤིན་དུ་བྱུང་བར་གྱུར་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་ཐམས་ཅད་ཀྱི་

89-1-2b

གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ཞེས་བྱ་བའི་རྟོག་པའི་རྒྱལ་པོ་ཆེན་པོ་སྟོན་ཏོ། །རྡོ་རྗེའི་སྤྱོད་པ་མངོན་པར་བརྩོན་པ་ཞེས་བྱ་བའི་དེ་བཞིན་གཤེགས་པ་ཐམས་ཅད་ཀྱང་བཅོམ་ལྡན་འདས་ཕྱག་ན་རྡོ་རྗེ་དེ་ཉིད་ཀྱི་ཕྱོགས་
བཅུ་རྣམས་སུ་དེ་བཞིན་ནོ། །དེ་བཞིན་དུ་ཡོན་ཏན་ཁྱད་པར་དུ་འཕགས་པའི་རྫུ་འཕྲུལ་དང་། དེ་བཞིན་དུ་ཡོན་ཏན་དང་ལྡན་པའི་འཁོར་གྱི་དཀྱིལ་འཁོར་དང་ཐབས་གཅིག་ཏུ་ཕྱོགས་བཅུར་བཞུགས་སོ། །འདི་ལྟ་སྟེ། ཡང་སྟོང་
གསུམ་གྱི་སྟོང་ཆེན་པོ་ཞེས་བྱ་བའི་འཇིག་རྟེན་གྱི་ཁམས་རྣམས་མཁའ་སྣང་གི་འོད་ཟེར་གྱིས་གཡོགས་པར་གྱུར་ཏོ། །ཉི་མའི་དཀྱིལ་འཁོར་ཐམས་ཅད་ཀྱི་འོད་ཟེར་གྱིས་ལྷན་ཅིག་པ་དང་འཐུན་པ་ཙམ་དུ་ཡང་མི་བཟོད་པའི་
འོད་ཟེར་དུ་བྱས་པ་དེ་ལྟ་ཁོ་ནར་དེ་བཞིན་གཤེགས་པ་ཐམས་ཅད་ཀྱི་འོད་རྡོ་རྗེ་སེམས་དཔའི་འོད་ཀྱིས་མོག་མོག་པོར་གྱུར་ནས་ཀུན་དུ་གནས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཕྱག་ན་རྡོ་རྗེ་ལ་བྱང་
ཆུབ་སེམས་དཔའ་དང་། དེ་བཞིན་གཤེགས་པ་ཐམས་ཅད་མཆོད་པའི་སྤྲིན་རྣམས་ཀྱིས་ཡང་དག་པར་མཆོད་དེ། ཀུན་དུ་བཟང་པོ་ཞེས་བྱ་བ་བསྐྱེད་དེ་ཅང་མི་གསུང་བའི་རྣམ་པར་གནས་པར་གྱུར་ཏོ། །དེ་ནས་ཀུན་དུ་བཟང་པོ་
རྡོ་རྗེ་འཆང་ཆེན་པོ་བྱང་ཆུབ་སེམས་དཔའ་ཐམས་ཅད་ཀྱི་རང་གི་ཐུགས་ལ་བཞག་ནས་ཡེ་ཤེས་ཀྱི་རིགས་དེ་བསྐྱེད་པ་གསང་ཆེན་དང་བཅས་པ་དེ་བཞིན་གཤེགས་པ་ཐམས་ཅད་ཀྱི་གསང་བ་གསལ་བར་བྱེད་པའི་རྒྱུ་རང་གི་ཏིང་ངེ་འཛིན་
ལ་སྙོམས་པར་ཞུགས་ཏེ། ཡེ་ཤེས་ཀྱི་རིགས་རང་གི་ཏིང་ངེ་འཛིན་སྟོན་ཏོ། །ལོགས་བཞི་པ་ལ་ཟུར་བཞི་པ། །རིན་ཆེན་བཞི་དང་ཡང་དག་ལྡན། །འོ་མ་ཞོ་ནི་ཀུན་བཀྲམ་པར། །བྱས་ནས་བསམ་གཏན་ཡང་དག་བརྩམ། །
དེ་ཡི་དབུས་སུ་པད་མ་ཆེ། །ཤེལ་དང་ཟླ་བ་མཉམ་པའི་འོད། །གསལ་བའི་དཀྱིལ་འཁོར་ཡང་དག་ལྡན། །དཀྱིལ་འཁོར་རྒྱུན་དུ་བསྒོམ་པར་བྱ། །འབར་བ་འདུས་པ་དེ་རྣམས་སུ། །སངས་རྒྱས་གཟུགས་ནི་རྣམ་པར་

89-1-3a

བསྒོམ། །ཀུན་ནས་ཡོངས་སུ་ཟླུམ་པོ་ནི། །ཁྲུ་ནི་ཉི་ཤུ་བསམ་པར་བྱ། །ཆོ་ག་ཤེས་པས་དེ་དབུས་སུ། །རང་གཟུགས་དགེ་བ་བསྒོམ་པར་བྱ། །བདག་དང་བདག་གིར་རྣམ་རྟོག་པ། །དོར་བའི་བསམ་གཏན་ཡང་
དག་བརྩམ། །ཡེ་ཤེས་རིགས་ཀྱི་ཆོ་ག་ཡིས། །གསང་སྔགས་སེམས་ལ་རྗེས་དྲན་བྱ། །ཨོཾ་སརྦ་ཏ་ཐཱ་ག་ཏཱ་ག་ཏ་ཛྙཱ་ན་ཀུ་ལ་སྭ་བྷཱ་བ་ཨཱཏྨ་ཀོ྅ཧྃ། འདིས་ཕྱག་རྒྱ་མཉམ་པར་འདུས་པས། སྡིག་པ་ཐམས་ཅད་ཡོངས་སུ་དོར་བར་བྱའོ། །
འོད་ཟེར་སྟོང་ཕྲག་བཅུ་པ་ནི། །དང་པོར་བསམ་ནས་དྲི་མེད་དབྱུང་། །ཡེ་ཤེས་རིགས་ཀྱི་ཆོ་ག་ཡིས། །རིག་པའི་རྒྱལ་པོ་རྣམ་པར་བསྒོམ། །འོད་དཀར་ཕྲ་མོ་འབར་བ་ནི། །དེང་ནི་ཀུན་དུ་རྣམ་པར་དགོད། །ཐམས་ཅད་དེ་ཉིད་དུ་བྱ་སྟེ། །
བསྒོམ་པར་བྱ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་དབང་བསྐུར་བ་འདི་གསུངས་སོ། །རང་ལུས་ཤིན་དུ་བརྟན་བྱས་ནས། །འོད་ཀྱི་ཚུལ་གྱི་ཆོ་ག་རྣམས། །སངས་རྒྱས་གཟུགས་ནི་འདུས་
པས་ནི། །མཚོན་པས་རྡོར་སེམས་བསྐྱེད་པས་སོ། །ཆོ་ག་ཤེས་པས་རབ་བརྩམས་ན། །དེ་ཡི་དངོས་གྲུབ་རྙེད་མི་དཀའ། །རང་གི་གཟུགས་ནི་མི་གཡོ་བར། །བྱས་ནས་རྡོར་སེམས་ཆོ་ག་རྣམས། །ཇི་སྲིད་ནམ་མཁའ་འགོངས་
གྱུར་པ། །ཆོ་ག་ཤེས་པས་སྤྲོ་བར་བྱ། །སངས་རྒྱས་གཟུགས་དང་རང་གཟུགས་ཤིང་། །བྱས་ནས་ཀུན་སྦྱོར་མཚན་ཉིད་ཀྱིས། །རྣལ་འབྱོར་བསམ་གཏན་དུས་སུ་ནི། །རྫོགས་བྱ་དེ་ལ་རབ་ཏུ་གཞུག །རང་གི་གཟུགས་དང་སངས་རྒྱས་གཟུགས། །
ཇི་ལྟར་གནས་ལྟར་བློ་དང་ལྡན། །ཇི་ལྟར་རིགས་པར་སྦྱོར་བ་ནི། །རྡོ་རྗེ་སེམས་དཔར་བསྒོམ་པར་བྱ། །དེ་བཞིན་གཤེགས་པ་ཀུན་གྱི་རྗེ། །བཅོམ་ལྡན་འདས་ཀྱིས་འདི་གསུངས་སོ། །འབར་བའི་ཕྲེང་བ་འཁྲུགས་པའི་འོད། །རང་
ལུས་བསྒོམ་བྱ་རྣལ་འབྱོར་པ། །དེ་ཉིད་རྡོ་རྗེའི་ཚུལ་གྱིས་ནི། །རྡོ་རྗེ་དབྱེར་མེད་དེ་བསྒོམ་མོ། །འོད་ལྔ་ཤིན་དུ་ཕྱུང་ནས་ནི། །བྱང་ཆུབ་སེམས་ནི་རྣམ་པར་བསྒོམ། །སྙིང་གར། །སངས་རྒྱས་ཀུན་ནི་མཆོད་པར་བྱ། །

89-1-3b

དེ་བཞིན་གཤེགས་པ་ཀུན་གྱི་རྗེ། །བཅོམ་ལྡན་འདས་ཀྱིས་འདི་གསུངས་སོ། །འབར་བའི་ཕྲེང་བ་འཁྲུགས་པའི་འོད། །དཀྱིལ་འཁོར་ལྔ་ནི་བསམ་པར་བྱ། །སངས་རྒྱས་གཟུགས་ནི་འདུས་པས་ནི། །བཀང་སྟེ་སྔགས་ནི་
བསྒོམས་པ་ལས། །སངས་རྒྱས་གཟུགས་བརྙན་ལྟར་བྱས་ནས། །སྒོམ་པའི་བདག་ཉིད་ཅན་བསྒོམ་བྱ། །རང་གི་གཟུགས་ནི་དེར་བསམ་བྱ། །རྟོག་པ་སྐྱེད་པའི་ཆོ་ག་ལས། །ཐུགས་ལ་བྱང་ཆུབ་སེམས་ཀྱང་ནི། །བསྒོམ་
བྱ་དེ་ལ་རྣལ་འབྱོར་སྐྱེས། །རྡོ་རྗེ་སེམས་དཔས་རྣམ་པར་བརྒྱན། །ཆོ་ག་ཤེས་པས་དབྱུང་བར་བྱ། །དེར་ཡང་རྡོ་རྗེ་སེམས་དཔའ་ལ། །སངས་རྒྱས་གཟུགས་ནི་རྣམ་བསྒོམ་བྱ། །ཆོ་ག་ཤེས་པས་སངས་རྒྱས་གཟུགས། །ཡི་གེ་
ཕྲ་མོ་རྣམ་པར་བསྒོམ། །ཡི་གེ་རྣམས་སུའང་ཐམས་ཅད་དུ། །སངས་རྒྱས་གཟུགས་ནི་རྣམ་བསྒོམ་བྱ། །དེ་རྣམས་དང་ནི་ཡི་གེ་གཉིས། །རང་གཟུགས་རྣམ་པར་རྣམ་བསྒོམ་ལས། །ཉི་མའི་དཀྱིལ་འཁོར་ཚུལ་གྱིས་ནི། །
མཁས་པས་རང་གཟུགས་བསྒོམ་པར་བྱ། །ཇི་སྲིད་ནམ་མཁའ་འགོངས་གྱུར་པ། །ཞིང་འདི་ཁྱབ་པར་གཡོག་པར་བྱ། །ཉི་མའི་དཀྱིལ་འཁོར་ཚུལ་གྱིས་ནི། །རྡོ་རྗེའི་རྣལ་འབྱོར་རྣམ་བསྒོམ་བྱ། །སྦྱོར་རྣམས་
སུ། །སངས་རྒྱས་གཟུགས་ནི་རྣམ་བསྒོམ་བྱ། །ཉི་མའི་དཀྱིལ་འཁོར་ཚུལ་གྱིས་ནི། །འཇིག་རྟེན་ཁམས་འདིར་སྤྲོ་བར་བྱ། །ཇི་སྲིད་ནམ་མཁའ་འགོངས་གྱུར་པའི། །ཞིང་འདི་ཁྱབ་པར་གཡོག་པར་བྱ། །ཟླ་བའི་དཀྱིལ་
འཁོར་ཚུལ་གྱིས་ནི། །ཉི་མའི་དཀྱིལ་འཁོར་བསྒོམ་པ་ལས། །ཉི་མའི་དཀྱིལ་འཁོར་ཚུལ་གྱིས་ནི། །སངས་རྒྱས་གཟུགས་ནི་རྣམ་བསྒོམ་པ། །སངས་རྒྱས་གཟུགས་ནི་རྣམ་བསྒོམས་པས། །ཟླ་བའི་དཀྱིལ་
འཁོར་རྣམ་བསྒོམ་པ། །ཟླ་བའི་དཀྱིལ་འཁོར་ཚུལ་གྱིས་ནི། །སངས་རྒྱས་གཟུགས་ནི་རྣམ་སྒོམ་པ། །ཆོས་ཀྱི་རྒྱལ། །པད་མའི་རྣལ་འབྱོར་ཆོ་ག་ཡིས། །བསྒོམ་པ་ཐམས་ཅད་བརྟག་པར་བྱ། །

89-1-4a

བསྒོམ་པ་ལ་སོགས་ཡོངས་འཛིན་ལས། །གཞན་དུ་མཆོད་བྱ་མིན་པ་ཉིད། །སངས་རྒྱས་གཟུགས་ནི་རྣམ་བསྒོམས་ནས། །ཤིན་དུ་བརྟན་པར་བརྟན་པའི་སེམས། །བྱང་ཆུབ་སེམས་ནི་ཡང་དག་བསྐྱེད། །
རྒྱུན་དུ་བདག་ཉིད་རྣམ་བསྒོམ་བྱ། །འདི་ནི་རྡོ་རྗེའི་ཚུལ་ཞི་བ། །རྣོན་པོ་གཞི་དང་མཉམ་པའི་འོད། །རྡོ་རྗེ་སེམས་དཔའ་རྣམ་བསྒོམས་པས། །ཆོ་ག་ཤེས་པས་དགང་བར་བྱ། །ཞེས་བཅོམ་ལྡན་འདས་ཀུན་དུ་བཟང་པོས་གསུངས་
སོ། །དེ་ནས་ཀུན་དུ་བཟང་པོ་རྡོ་རྗེ་འཆང་ཆེན་པོ་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ལས་ཕྱུང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ནམ་མཁའི་ཁམས་ཐམས་ཅད་བཀང་སྟེ། བྱང་ཆུབ་སེམས་དཔའ་
ཐམས་ཅད་མཆོད་པའི་སྤྲིན་རྣམས་ཀྱིས་ཡང་དག་པར་མཆོད་དེ། བཅོམ་ལྡན་འདས་རྡོ་རྗེ་འཆང་ཆེན་པོ་ལ་འདུད་པ་དང་ལྡན་པར་ཀུན་དུ་གནས་པར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་སླར་ཡང་འདུས་པར་གྱུར་
ནས་ཀུན་དུ་བཟང་པོ་བྱང་ཆུབ་སེམས་དཔའ་ཆེན་པོ་ལ། དེ་བཞིན་གཤེགས་པ་ཐམས་ཅད་མཆོད་པའི་སྤྲིན་ཆེན་པོ་རྣམས་ཀྱིས་ཡང་དག་པར་མཆོད་དེ་ཕྱག་འཚལ་ནས། བྱང་ཆུབ་ཀྱི་སེམས་རྡོ་རྗེ་ལ་རབ་ཏུ་ཞུགས་ནས། དེ་བཞིན་
གཤེགས་པ་ཐམས་ཅད་ཀྱི་འོད་ཟེར་ཀུན་དུ་གང་སྟེ། འོད་ཟེར་དེ་རྣམས་དེ་བཞིན་གཤེགས་པ་ཐམས་ཅད་ཀྱི་འབྱུང་གནས་ཡང་དག་པར་བསྐུལ་བར་གྱུར་ཏོ། །དེ་ནས་ཀུན་དུ་བཟང་པོ་རྡོ་རྗེ་འཆང་ཆེན་པོ་དེ་བཞིན་གཤེགས་པ་
ཐམས་ཅད་བརྟན་པར་མཛད་ནས། ཡེ་ཤེས་ཀྱི་རིགས་འདི་རྒྱས་པར་བྱེད་པའི་རྒྱུ་རང་གི་གཟུགས་རྣམ་པར་སྣང་མཛད་ཀྱི་གཟུགས་སུ་བྱིན་གྱིས་བརླབས་ནས། རང་གི་གཟུགས་ཀྱི་རྣམ་པའི་འོད་ཟེར་རྣམས་ཀྱིས་ཕྱུང་སྟེ་དེ་
གཤེགས་པ་ཐམས་ཅད་ཀྱི་དམ་ཚིག་གི་སྙིང་པོ་ཡེ་ཤེས་རིགས་ཀྱི་ཏིང་ངེ་འཛིན་གྱི་ལེའུ་གསུངས་སོ། །དེ་ཉིད་ཐམས་ཅད་བྱེད་བཞིན་པའི། །བསམ་གཏན་ཀུན་སྦྱོར་མཚན་ཉིད་ཀྱིས། །ཆོ་ག་ཤེས་པས་རབ་ཏུ་བརྩམ། །

89-1-4b

འདི་ནི་དེ་ཉིད་ཚུལ་དག་པའོ། །ཉི་མའི་དཀྱིལ་འཁོར་མཆོག་གྱུར་པ། །ཁྲུ་ནི་སྟོང་ཕྲག་བསམ་པར་བྱ། །ཟླ་བའི་དཀྱིལ་འཁོར་དབུས་གནས་པར། །ཝ་ཡིག་དེ་ལ་བསྒོམ་པར་བྱ། །ཀུན་ནས་ཡོངས་སུ་ཟླུམ་པོར་ནི། །མཐེ་ཆུང་
མཐོ་ཙམ་བསམ་པར་བྱ། །འབར་བ་དེ་ལ་ཆོ་ག་ཤེས། །སྣ་ཚོགས་ཁ་དོག་རྣམ་པར་བསྒོམ། །དེར་ནི་འབར་བ་ཡང་དག་སྐྱེས། །སངས་རྒྱས་གཟུགས་ནི་རྣམ་བསྒོམ་བྱ། །ཕྱོགས་རྣམས་ཀུན་ཏུ་ཨོཾ་ཡིག་ནི། །ཁ་དོག་སྣ་ཚོགས་
རྣམ་བསམ་བྱ། །རྣམ་སྣང་ལ་སོགས་རྣམ་བསྒོམ་པས། །ཆོ་ག་ཤེས་པས་བསྐྱེད་པར་བྱ། །ཉི་མའི་དཀྱིལ་འཁོར་དབུས་གནས་པར། །ཟླ་བའི་དཀྱིལ་འཁོར་བསྒོམ་པའོ། །བདག་ཉིད་དེ་ལ་བསམ་པ་ནི། །དགའ་བ་བསྐྱེད་པའི་ཆོ་ག་ལས། །སྙིང་གི་དབུས་སོན་ཕྲ་
མོ་ནི། །དྲི་མེད་ཟླ་བའི་དཀྱིལ་འཁོར་ལ། །སྔགས་ཡིག་ཕྲ་མོའི་གཟུགས་རྣམས་ཀྱིས། །དེ་དེ་སེམས་ལ་བསམ་པར་བྱ། །ཨོཾ་ཡིག་འོད་ཟེར་ཡང་དག་སྦྱོར། །འབར་བའི་ཕྲེང་བ་མཉམ་པའི་འོད། །སངས་རྒྱས་གཟུགས་སོགས་
མཚན་ཉིད་ཀྱིས། །ཆོ་ག་ཤེས་པས་དབྱུང་བར་བྱ། །སངས་རྒྱས་གཟུགས་རྣམས་ཐམས་ཅད་དུ། །ཟླ་བའི་དཀྱིལ་འཁོར་སྒོམ་པ་ནི། །སངས་རྒྱས་བསྐྱེད་པའི་ཆོ་ག་ལས། །རང་གི་གཟུགས་སུ་དེ་ལ་བྱའོ། །རྡོ་རྗེ་ཐུགས་སུ་
ཆོ་ག་ལས། །ཉི་མ་ལྔ་ནི་དགོད་བྱ་བ། །སྔགས་པས་ཟླ་བའི་དཀྱིལ་འཁོར་ཅན། །དཔྲལ་བ་རུ་ནི་རྣམ་པར་བསྒོམ། །འོད་ཟེར་འབར་བ་མཉམ་པའི་འོད། །སངས་རྒྱས་གཟུགས་སུ་རྣམ་པར་བསྒོམ། །འཇིག་རྟེན་ཁམས་
རྣམས་རིམ་པར་འདས། །སླར་ཡང་དེ་ལ་རབ་གཞུག་བྱ། །ཁྲུ་ཡི་ཚད་ལས་འདས་པ་ཡིས། །ཟླ་བའི་དཀྱིལ་འཁོར་བསྒོམ་པ་ནི། །རྡོ་རྗེ་སེམས་དཔའ་ཡང་དག་བསྐྱེད། །རང་གི་གཟུགས་ཉིད་བསྒོམ་པར་བྱ། །བཅོམ་
ལྡན་འདས་ཀུན་དུ་བཟང་པོས་དེ་སྐད་ཅེས་གསུངས་སོ། །ཡེ་ཤེས་ཀྱི་རིགས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ནོ། །ཉི་མའི་དཀྱིལ་འཁོར་དབུས་གནས་པར། །རང་གི་གཟུགས་ནི་བསྒོམ་བྱ་དགེ། །ཟུར་དུ་རྣམ་སྣང་

89-1-5a

གཞག་བྱ་སྟེ། །རྡོ་རྗེ་སེམས་དཔའ་རྣམ་བསྒོམ་བྱ། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །ཆོ་ག་ཤེས་པས་གཟུགས་བཅུ་དྲུག །ཁ་དོག་བཞིར་ནི་རྣམ་བསམ་བྱ། །སྙིང་ག་རྣམས་དང་
ཐམས་ཅད་དུ། །ལྷ་རྣམས་དེ་ལ་བསྒོམ་པར་བྱ། །ཞེས་བཅོམ་ལྡན་འདས་རྡོ་རྗེ་འཆང་གིས་གསུངས་སོ། །རང་གི་གཟུགས་ལ་བགེགས་འཇོམས་པར། །སེམས་ལ་བརྟན་པར་བསྒོམ་པར་བྱ། །ཧཱུྃ་ཡིག་དབུགས་ལས་
ཕྱུང་ནས་ནི། །འོད་ཟེར་རྣམ་པར་རབ་ཏུ་གཞུག་ཅེས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་གསུངས་སོ། །རང་གཟུགས་ལ་སོགས་མཚུངས་པའི་འོད། །ལྷ་རུ་སྐད་ཅིག་དེ་འགྱུར་རོ། །ཡི་གེ་རྣམས་
ཀྱི་ཚད་ཀྱིས་ནི། །ཝ་ཡི་གཟུགས་ནི་རྣམ་བསྒོམ་བྱ། །སྔགས་པས་དབུས་སུ་ཡི་གེ་ཉིད། །བྱིན་ནས་ལས་ནི་ཀུན་དུ་བརྩམ། །སྔགས་པས་དཔྲལ་བའི་སྟེང་ནས་ནི། །ཇི་སྲིད་ལྟེ་བ་ཞེས་པར་དྲན། །གཉིས་སུ་མེད་པ་
མཉམ་པ་ཉིད་རྣམ་པར་རྒྱལ་བའི་རྟོག་པ་ཆེན་པོ་ལས་རྣམ་པར་འགོད་པའི་ལེའུ་དང་པོ་རྫོགས་སྷོ།། །། ཤིང་རྟའི་འཁོར་ལོའི་ཚད་དུ་ནི། །པད་མ་ཆེན་པོ་རྣམ་བསྒོམ་བྱ། །ཉི་མའི་དཀྱིལ་འཁོར་དབུས་གནས་
པར། །པད་མའི་ཆུ་བ་དེ་རྣམ་བསྒོམ། །ལས་ཀྱི་རྡོ་རྗེ་ཡང་དག་བསྐྱེད། །རང་གཟུགས་དེ་ལ་བསྒོམ་པར་བྱ། །ལས་ཀྱི་རྡོ་རྗེ་རབ་བསྒོམས་པས། །རྡོ་རྗེ་སེམས་དཔའ་མཉམ་པར་འགྱུར། །ཞེས་བཅོམ་ལྡན་འདས་རྡོ་རྗེ་
སེམས་དཔས་གསུངས་སོ། །འོ་མ་དང་ཞོ་བྱས་ནས་ནི། །དབུས་སུ་པད་མ་རྣམ་པར་བསྒོམ། །རང་གཟུགས་སངས་རྒྱས་ལྟར་བྱས་ནས། །མཁས་པས་རང་གཟུགས་རྣམ་བསྒོམ་བྱ། །ནམ་མཁའི་ཁམས་ནི་ཀུན་བཀང་སྟེ། །
སླར་ཡང་དེ་ཉིད་སྦྱར་བྱ་སྟེ། །འོ་མ་དང་ཞོ་མཉམ་བྱས་ནས། །སྣ་ཚོགས་ཁ་དོག་མཉམ་པའི་འོད། །ཟླ་བའི་དཀྱིལ་འཁོར་ཚུལ་གྱིས་ནི། །ཉི་མའི་དཀྱིལ་འཁོར་བསྒོམ་པ་ནི། །རང་གཟུགས་སངས་རྒྱས་མཚུངས་པ་ནི། །

89-1-5b

ཆོ་ག་ཤེས་པས་དབྱུང་བར་བྱ། །རང་གི་གཟུགས་དང་ཐམས་ཅད་དུ། །ལྷ་ལ་སོགས་པ་རྣམ་སྒོམ་བྱེད། །ཁྲུ་གང་ཙམ་ལས་འདས་པར་ནི། །ཉི་མའི་དཀྱིལ་འཁོར་བསྒོམ་པ་ནི། །བགེགས་རྣམས་འཇོམས་པ་ལྟར་བྱས་ནས། །
འཇིག་རྟེན་ཁམས་སུ་འདི་སྤྲོ་བྱ། །རང་གི་ཕྱག་རྒྱ་སྙིང་ཀ་རུ། །བསམས་ནས་ཉི་མའི་དཀྱིལ་འཁོར་དབུས། །སངས་རྒྱས་རྣམ་པར་ཆོ་ག་ཤེས། །འོད་ཀྱི་དཀྱིལ་འཁོར་བསྒོམ་པར་བྱ། །དེ་དབུས་ཡི་གེ་བྱིན་ནས་ནི། །འཇིག་
རྟེན་ཁམས་ནི་འདི་སྤྲོ་བྱ། །གདུལ་བ་ལ་སོགས་ཅན་བྱས་ནས། །སླར་ཡང་དེ་ཉིད་ལ་སྦྱར་བྱ། །ཁྲུ་གང་ཙམ་ལས་འདས་པར་ནི། །ཟླ་བའི་དཀྱིལ་འཁོར་བསྒོམ་པར་བྱ། །རྡོ་རྗེ་རལ་གྲི་ཡང་དག་བསྐྱེད། །འཇིག་རྟེན་ཁམས་
ནི་ཡོངས་བགྲོད་བྱ། །པད་མ་དཀར་པོའི་འོད་འབར་ཏེ། །བྱང་ཆུབ་སེམས་ཀྱིས་རྣམ་པར་བརྒྱན། །དབུས་སུ་རང་གི་ལྷ་ཡི་གཟུགས། །གཞོགས་སུ་བཙུན་མོ་དགོད་པར་བྱ། །ཆོ་ག་ཤེས་པས་དེ་ལྟར་གཟུང་། །རང་གི་རྡོ་རྗེ་
དེ་ལ་གཞུག །འཇིག་རྟེན་ཁམས་ནི་ཐམས་ཅད་དུ། །སངས་རྒྱས་དེ་ཉིད་ཀྱིས་མཆོད་བྱ་ཞེས་བཅོམ་ལྡན་འདས་ཀུན་དུ་བཟང་པོས་གསུངས་སོ། །ཇི་སྲིད་ཡང་དག་ཐོབ་སྦྱོར་སྐྱེས། །སྔགས་པས་སླར་ནི་བསྡུ་བར་བྱ། །མཐོ་
གང་ཙམ་ལས་འདས་པར་ནི། །ཉི་མའི་དཀྱིལ་འཁོར་བསྒོམ་པ་ནི། །རང་གཟུགས་ཤིན་དུ་བརྟན་བྱས་ནས། །ལྷ་ལ་སོགས་པ་རྣམ་པར་བསྒོམ། །སྙིང་གར་སྔགས་ཀྱི་ཡིག་བྱིན་ནས། །སངས་རྒྱས་ཀུན་ནི་མཆོད་
པར་བྱ། །མཐོ་བདུན་ཙམ་ལས་འདས་པར་ནི། །དཀྱིལ་འཁོར་བཞི་ནི་སྒོམ་པར་བྱེད། །ལྷ་ཡི་གཟུགས་ཀྱི་དབུས་གནས་པར། །སྙིང་གར་དེ་ལ་བསྒོམ་པར་བྱ་ཞེས་བཅོམ་ལྡན་འདས་རྡོ་རྗེ་དམ་ཚིག་གིས་གསུངས་སོ། །
རང་གཟུགས་སྤྱན་ཞེས་བྱ་བར་ནི། །བྱས་ནས་སངས་རྒྱས་རྣམ་པར་བསྒོམ། །ཐུགས་ཀ་ཉིད་དང་ཐམས་ཅད་དུ། །མཁས་པས་རང་གཟུགས་བསྒོམ་པར་བྱ། །དེ་རུ་སྙིང་པོའི་ཚུལ་གྱིས་ནི། །སེམས་དཔའི་རྣལ་འབྱོར་རྣམ་

89-1-6a

པར་བསྒོམ། །རྒྱང་གྲགས་ཙམ་ལས་འདས་པར་ནི། །སངས་རྒྱས་གཟུགས་ནི་རྣམ་བསྒོམ་བྱ། །གཟུགས་ཀྱིས་ནམ་མཁའ་འགོངས་པར་ནི། །སྙིང་པོ་རྣམས་ལས་ཡང་དག་བསྐྱེད། །རྒྱང་གྲགས་ཙམ་ལས་འདས་
པར་ནི། །གསལ་བའི་དཀྱིལ་འཁོར་བསྒོམ་པ་ནི། །རང་གི་རྣལ་འབྱོར་ལེགས་བརྟན་བྱས། །སངས་རྒྱས་ཡང་དག་རྣལ་འབྱོར་བསྒོམ། །རྒྱང་གྲགས་ཙམ་ལས་འདས་པར་ནི། །བྱང་ཆུབ་སེམས་ནི་རྣམ་པར་བསྒོམ། །ལྷ་ནི་
ཡང་དག་བསྐྱེད་ནས་ནི། །སྔགས་ཀྱི་ཡི་གེ་རྣམ་པར་བསྒོམ། །མཐོ་གང་ཙམ་ལས་འདས་པར་ནི། །པད་མའི་ཚུལ་དུ་རྣམ་པར་བསྒོམ། །རང་ལུས་དྲི་མ་མེད་བྱས་ནས། །གསལ་བའི་དཀྱིལ་འཁོར་བསྒོམ་པའོ། །དེ་དབུས་
ལེགས་པར་བརྟན་བྱས་ནས། །རང་གཟུགས་དེང་ནས་དང་པོར་བསྒོམ། །འོད་དཀར་འབར་བའི་ཕྲེང་བ་སོགས། །པད་མ་ལྔ་པོ་རྣམ་བསྒོམ་བྱ། །དེ་ཡི་དབུས་སུ་རང་གཟུགས་དང་། །གཞོགས་སུ་བཙུན་མོ་དགོད་པར་བྱ། །རང་གི་
ཁུ་བ་དེང་སོགས་འབྱུང་། །ཆོ་ག་ཤེས་པས་སྤྲོ་བར་བྱ། །སངས་རྒྱས་གཟུགས་ཀྱིས་ནམ་མཁའི་ཁམས། །ཀུན་དུ་གང་བར་བསྒོམ་པ་ནི། །རང་གཟུགས་རལ་གྲི་ལྟར་བྱས་ནས། །ཀུན་གྱི་སྙིང་གར་དགོད་པར་བྱ། །རང་གཟུགས་
སངས་རྒྱས་ཡང་དག་སྦྱོར། །མཚན་ཉིད་ལ་སོགས་ཆོག་རིམ་གྱིས། །བྱང་ཆུབ་སེམས་དཔས་ནམ་མཁའི་ཁམས། །ཡང་དག་གང་བར་རྣམ་བསྒོམ་བྱ། །རང་གཟུགས་ཞགས་པ་ཡང་དག་སྦྱོར། །ཁྱབ་བདག་སངས་རྒྱས་གཟུགས་
དགོད་བྱ། །ཇི་སྲིད་ནམ་མཁའི་དཀྱིལ་འཁོར་དུ། །ཆོ་ག་ཤེས་པས་དགུག་པར་བྱ། །རང་གཟུགས་སངས་རྒྱས་ཡང་དག་སྦྱོར། །བྱང་ཆུབ་སེམས་སུ་རྣམ་བསྒོམ་མོ། །སྔགས་ཀྱི་ཡི་གེ་སོགས་སྦྱོར་གྱིས། །དེ་ཡི་རྣམ་པར་མྱུར་
བསྒོམ་བྱ། །བྱང་ཆུབ་སེམས་ནི་ཡང་དག་བསྐྱེད། །འོད་ཟེར་འབར་བས་རྣམ་པར་བརྒྱན། །རང་གཟུགས་སངས་རྒྱས་མཚུངས་པར་ནི། །ཆོ་ག་ཤེས་པས་དབྱུང་བར་བྱ། །རང་གཟུགས་དེ་ལ་གཟུགས་གནས་པར། །འབར་བའི་ཕྲེང་བ་

89-1-6b

མཉམ་པའི་འོད། །སྤྱན་ཞེས་བྱ་བ་ཡིད་དགའ་བ། །ཆོ་ག་ཤེས་པས་དབྱུང་བར་བྱ། །ཟླ་བའི་དཀྱིལ་འཁོར་དབུས་གནས་པར། །སྤྱན་ནི་སྙིང་གར་རྣམ་པར་དགོད། །ཆོ་ག་ཤེས་པས་འོད་རྣམ་པར། །རྡོ་རྗེ་སེམས་དཔའ་རབ་གཞུག་བྱ། །
ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །རང་གཟུགས་མྱུར་བའི་དཀྱིལ་འཁོར་དུ། །རྡོ་རྗེ་སེམས་དཔའ་ཡང་དག་བསྐྱེད། །ལྷ་ཡི་རྣམ་པར་ཡང་དག་སྦྱོར། །བསྒོམ་བྱ་བརྩོན་པ་གཞན་མིན་ནོ། །ཉི་མའི་དཀྱིལ་
འཁོར་དབུས་སུ་ནི། །རྡོ་རྗེ་སེམས་དཔར་ཡང་དག་བསྐྱེད། །ལྕགས་ཀྱུའི་རྣམ་པ་ཞགས་པ་སོགས། །བྱས་ནས་སློབ་མ་རབ་གཞུག་བྱ། །རྡོ་རྗེ་སེམས་དཔར་ཡང་དག་བསྐྱེད། །རང་གཟུགས་སྙིང་གར་རྣམ་དགོད་བྱ། །དགོད་པ་བྱས་
ནས་ལག་སོགས་ཀྱིས། །དེ་ནས་གྲངས་ནི་ཡང་དག་བརྩམ། །བཟླས་པ་སོགས་སམ་བཏུང་བྱ་བ། །བློ་ལྡན་དེས་ནི་དེ་བྱའོ། །སྒྲུབ་པོ་རྣམས་ཀྱི་རྣམ་བཟླས་བྱ། །གཞན་དུ་ཡང་དག་གྲུབ་མིན་ཉིད། །བཅོམ་ལྡན་འདས་དེ་བཞིན་གཤེགས་
པ་ཐམས་ཅད་ཀྱི་དམ་ཚིག་གིས་དེ་སྐད་ཅེས་གསུངས་སོ། །རང་གི་གཟུགས་ནི་ཡང་དག་བསྐྱེད། །དབུས་སུ་རང་གི་རིགས་སྒོམ་མོ། །མཐར་ཡང་དགྲ་དང་བགེགས་འཇོམས་པར། །སྙིང་པོ་དེ་རུ་བསྒོམ་པར་བྱ། །འདི་རྣམས་ཀྱི་
ནི་ཆོ་ག་ཡིས། །སྒོམ་པ་ལ་སོགས་ཆོ་གའི་རིམ། །ཉི་མའི་དཀྱིལ་འཁོར་ཚུལ་གྱིས་ནི། །རིག་པའི་རྒྱལ་པོ་རྣམ་བསྒོམ་བྱ། །འབར་བའི་ཕྲེང་བ་འཁྲུགས་འབར་བའི། །ཁྲོ་བོའི་གཟུགས་སུ་བསྒོམ་པར་བྱ། །ཁ་དོག་གང་དེ་ཁོ་ནར་
བརྗོད། །དེ་ཉིད་མཐར་ཐུག་དེ་ཉིད་བརྗོད། །དེ་ཉིད་དེ་ཡིས་བསམ་པར་བྱ། །གཞན་དུ་གྲུབ་པ་མིན་པ་ཉིད། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཀུན་དུ་བཟང་པོས་དེ་སྐད་ཅེས་གསུངས་སོ། །རང་
གཟུགས་དཀྱིལ་འཁོར་བྱས་ནས་ནི། །དབུས་སུ་འབར་བ་མཉམ་པའི་འོད། །འཇིག་རྟེན་ཁམས་རྣམས་ཐམས་ཅད་དུ། །དེ་ཉིད་ཤེས་པས་སྙིང་གར་དགོད། །དེ་ལ་བདག་ཉིད་ཡང་དག་བསྐྱེད། །དེ་ཡི་རང་བཞིན་

89-1-7a

དེར་བརྩམ་བྱ། །རང་གཟུགས་པད་མའི་དབུས་གནས་པར། །སྣང་བྱེད་ལ་སོགས་མཉམ་པའི་འོད། །སྙིང་གར་ཡི་གེ་བྱས་ནས་ཀྱང་། །རྡོ་རྗེ་སེམས་དཔའ་རྣམ་བསྒོམ་བྱ། །རྡོ་རྗེ་སེམས་དཔའ་འདུས་པ་ལ། །
སངས་རྒྱས་གཟུགས་སུ་རྣམ་བསྒོམ་བྱ། །རིག་པའི་ཚུལ་དུ་ཡང་དག་བསྐྱེད། །དངོས་གྲུབ་ཐམས་ཅད་ཀུན་ཐོབ་འགྱུར། །དེ་ཕྱིར་སྔགས་པས་ཁྱད་པར་གྱི། །རིག་པའི་ཚུལ་ནི་མཆོག་ཏུ་འགྱུར། །བཅོམ་ལྡན་འདས་དེ་བཞིན་གཤེགས་པ་
ཐམས་ཅད་ཀྱི་རྡོ་རྗེ་སེམས་དཔས་དེ་སྐད་ཅེས་གསུངས་སོ། །ཐམས་ཅད་དེ་ཉིད་བྱ་བ་ནི། །ཉི་མའི་དཀྱིལ་འཁོར་དབུས་སུ་ནི། །གཟུགས་ནི་རྣམ་སྣང་མཛད་བསམས་ནས། །སྙིང་གར་སྔགས་ནི་རྣམ་བསྒོམ་བྱ། །དེ་ཉིད་སྔགས་
སུ་རྗེས་སུ་དྲན། །རིག་པའི་ཚུལ་གྱི་ཆོ་ག་ལས། །སློབ་དཔོན་ཡིད་ནི་དགའ་བ་རུ། །ཆོ་ག་ཤེས་པས་དབྱུང་བར་བྱ། །སྙིང་ག་རྣམས་དང་ཐམས་ཅད་དུ། །ཟླ་བའི་དཀྱིལ་འཁོར་བསྒོམ་པའོ། །རང་གི་གཟུགས་ནི་ཡང་དག་
བསྐྱེད། །དེ་ལ་རལ་གྲི་ལ་སོགས་བསྒོམ། །ཆོ་ག་ཤེས་པས་ཡང་དག་བསྐྱེད། །འབར་བ་ལྔ་ནི་རྣམ་བསྒོམ་བྱ། །གཟུགས་དང་ཁ་དོག་རྣམ་པར་ཤེས། །འཇིག་རྟེན་ཁམས་སུ་འདི་སྤྲོ་བྱ། །བཅོམ་ལྡན་འདས་དེ་བཞིན་གཤེགས་པ་
ཐམས་ཅད་ཀྱི་སྤྱན་གྱིས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོ་ལས་ཡེ་ཤེས་རིགས་ཀྱི་ཏིང་ངེ་འཛིན་གྱི་ལེའུ་སྟེ་གཉིས་པའོ།། །།
དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཟླ་བའི་དཀྱིལ་འཁོར་ལ་གནས་ཏེ་རྣམ་པར་སྣང་མཛད་ཀྱི་གཟུགས་སུ་བྱིན་གྱིས་བརླབས་ནས་དེ་རྣམས་ཀྱང་དཀྱིལ་འཁོར་ཆེན་པོ་འདུས་པ་རྣམས་སུ་རང་གི་
གཟུགས་སུ་གཞག་གོ། བསྡུས་པའི་རིགས་ཀྱི་ཏིང་འཛིན་གྱིས། །ལེའུ་བཀའ་རྣམས་སྩལ་བར་མཛད། །འོ་མ་དང་ཞོར་བསམ་ནས་སུ། །འཕགས་པའི་དམ་ཚིག་བཞི་པོ་དང་། །དབུས་སུ་སྔགས་པས་ཨུད་པ་ལ། །བསྒོམ་བྱ་གཞན་

89-1-7b

དུ་མི་བསམ་མོ། །ཡེ་ཤེས་དཀྱིལ་འཁོར་ཡང་དག་སྦྱོར། །དེ་ཡི་སྟེང་དུ་རྣམ་བསྒོམ་བྱ། །ཁྲོ་བོའི་རྣམ་པ་ཡང་དག་བསྐྱེད། །འོད་ཟེར་ཡང་དག་སྦྱོར་བ་བསྒོམ། །དེར་ནི་འོད་ཟེར་འདུས་རྣམས་སུ། །རྡོ་རྗེ་སེམས་དཔའ་རྣམ་བསྒོམ་བྱ། །
ཆོ་ག་ཤེས་པས་དེར་རང་གཟུགས། །དབུས་སུ་ཡང་དག་གཞག་བསྒོམ་བྱ། །བཅོམ་ལྡན་འདས་དམ་ཚིག་རྡོ་རྗེས་དེ་སྐད་ཅེས་གསུངས་སོ། །ཨོཾ་སརྦ་ཏ་ཐཱ་ག་ཏ་ཛྙཱ་ན་སྭ་བྷཱ་བ་ཨཱད་མ་ཀོ྅ཧྃ། གསང་སྔགས་རྒྱལ་པོ་འདི་ཡིས་ནི། །རང་གི་
རྣམ་རྟོག་ཡོངས་དོར་བྱ། །རང་གཟུགས་ཧཱུྃ་ཡིག་ཅེས་བརྗོད་པ། །བྱས་ན་ཀུན་དུ་རྣམ་བསྒོམ་བྱ། །ཆོ་ག་ཤེས་པས་དེ་རྣམས་སུའང་། །ཧ་ཡིག་མཐར་ཐུག་རྣམ་བསམ་བྱ། །རང་གཟུགས་ལ་སོགས་མཚུངས་པའི་འོད། །ལྷ་
དེ་སྐད་ཅིག་དེ་ལ་འགྱུར། །གསལ་བའི་དཀྱིལ་འཁོར་ཡང་དག་སྦྱོར། །སྙིང་གར་དེ་ལ་རྣམ་བསམ་བྱ། །ཆོ་ག་ཤེས་པས་གསང་སྔགས་ཡིག །ཆོ་ག་མཐོང་བས་བསྒོམ་པར་བྱ། །བཅོམ་ལྡན་འདས་དམ་ཚིག་རྡོ་རྗེས་དེ་སྐད་ཅེས་གསུངས་
སོ། །གནས་ལྔར་ཡང་དག་སྦྱར་བྱ་བ། །རྩེ་མོ་ལྔ་རུ་རྣམ་བསྒོམ་བྱ། །སྔགས་ཀྱི་ཡི་གེ་ཐམས་ཅད་དུ། །རྡོ་རྗེ་སེམས་དཔའ་རྣམ་བསྒོམ་བྱ། །སངས་རྒྱས་གཟུགས་ནི་རྣམ་བསྒོམས་པས། །ཆོ་ག་ཤེས་པས་སྤྲོ་བར་བྱ། །བཅོམ་ལྡན་འདས་དེ་
བཞིན་གཤེགས་པ་ཐམས་ཅད་ཀྱི་སྲས་ཀྱི་གཙོ་བོས་དེ་སྐད་ཅེས་གསུངས་སོ། །རང་གཟུགས་སེམས་དཔའི་ཚུལ་གྱིས་ནི། །སེམས་དཔའི་མཚན་མར་བསྒོམ་པར་བྱ། །སངས་རྒྱས་ཞིང་རྣམས་ཀུན་དུ་ནི། །ཆོ་ག་ཤེས་པས་སྤྲོ་བར་
བྱ། །རང་གཟུགས་སེམས་དཔའི་ཚུལ་གྱིས་ནི། །ལྷ་ཡི་སྙིང་གར་བསྒོམ་པར་བྱ། །སངས་རྒྱས་གཟུགས་དེ་དབྱུང་བར་བྱ། །འཇིག་རྟེན་ཁམས་འདིར་སྤྲོ་བར་བྱ། །རང་གཟུགས་ཡེ་ཤེས་ཞེས་བརྗོད་པ། །འབར་བའི་ཕྲེང་བས་རྣམ་པར་
བརྒྱན། །བྱང་ཆུབ་སེམས་སུ་དེ་ཕྱུང་ནས། །འཇིག་རྟེན་ཁམས་སུ་འདི་སྤྲོ་བྱ། །རང་གི་གཟུགས་ཞེས་བརྗོད་པ་ནི། །འབར་བའི་ཕྲེང་བ་མཉམ་པའི་འོད། །རང་གི་གཟུགས་ཀྱི་འོད་ཟེར་གྱིས། །ཞིང་འདིར་ཁྱབ་པར་རྣམ་བསྒོམ་བྱ། །

89-1-8a

རང་གཟུགས་ལྕགས་ཀྱུར་དང་བྱས་ནས། །རང་གི་གཟུགས་ཀྱི་ལག་པར་དགོད། །ཆོ་ག་ཤེས་པས་བཀུག་ནས་ཀྱང་། །སངས་རྒྱས་གཟུགས་ལ་རབ་གཞུག་བྱ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྗེ་བོས་
དེ་སྐད་ཅེས་གསུངས་སོ། །རང་གཟུགས་གཟུགས་ཀྱི་ཚུལ་གྱིས་ནི། །གསང་སྔགས་ཡི་གེ་རྣམ་པར་བསྒོམ། །རྡོ་རྗེ་སེམས་དཔའ་རྣམ་བསྒོམས་པས། །ཆོ་ག་ཤེས་པས་སྤྲོ་བར་བྱ། །བྱང་ཆུབ་སེམས་སུ་རང་གཟུགས་ནི། །དེ་ཉིད་
བསྒོམས་པས་བསྒོམ་པར་བྱ། །བགེགས་ནི་སྔགས་ལ་ཡང་དག་བསྐྱེད། །འཇིག་རྟེན་ཁམས་སུའང་སྤྲོ་བར་བྱ། །མི་སྡུག་གཙིགས་ཤིང་འཇིགས་པ་ནི། །བགེགས་ཀྱི་དགྲ་དེ་དབྱུང་བར་བྱ། །བྱང་ཆུབ་སེམས་སུ་དེ་ཕྱུང་ནས། །འཇིག་རྟེན་
ཁམས་འདིར་སྤྲོ་བར་བྱ། །རང་གཟུགས་ཉི་མའི་དབུས་གནས་པར། །རྣོན་པོ་འབར་བས་རྣམ་པར་བརྒྱན། །ལས་ཀྱི་རྡོ་རྗེ་ཤིན་ཏུ་མཛེས། །ཆོ་ག་ཤེས་པས་དབྱུང་བར་བྱ། །དང་པོའི་རྣལ་འབྱོར་ཡང་དག་བསྐྱེད། །ཤིན་དུ་བརྟན་པ་བརྟན་པའི་སེམས། །
ཆོ་ག་ཉེ་བར་མཐོང་བ་ཡིས། །དང་པོའི་རྣལ་འབྱོར་ཡང་དག་བརྩམ། །རང་གཟུགས་ཨུཏྤ་ལར་བསམ་ནས། །སྣ་ཚོགས་འོད་ཟེར་མཉམ་པར་ལྡན། །ལྷ་ཡི་གཟུགས་སུ་ཡང་དག་སྦྱོར། །དེ་ཡི་སྟེང་དུ་རྣམ་བསྒོམ་བྱ། །ཇི་སྲིད་ནམ་མཁའི་
དཀྱིལ་འཁོར་དུ། །སྔགས་པས་འཇིག་རྟེན་གསུམ་དུ་སྤྲོ། །སངས་རྒྱས་གཟུགས་ནི་ཡང་དག་བསྐྱེད། །ཁ་དོག་དཀར་པོ་ཤིན་ཏུ་མཛེས། །ཟླ་བའི་དཀྱིལ་འཁོར་དབུས་གནས་པར། །ཡིད་དགའ་བ་ནི་བསྒོམ་པར་བྱ། །ཐོ་བའི་རྣམ་པ་ཡང་དག་
སྦྱོར། །ཆོ་གས་རྟག་ཏུ་བསྒོམ་པར་བྱ། །རྡོ་རྗེ་སེམས་དཔའ་སོགས་གསུངས་པས། །ཇི་ལྟར་རིགས་པར། །རང་གཟུགས་གསལ་བ་འབར་བའི་འོད། །མཱ་མ་ཀཱི་སོགས་རྣམ་བརྒྱན་པས། །རྡོ་རྗེ་སེམས་དཔའ་ཡང་དག་བསྐྱེད། །
འཇིག་རྟེན་ཁམས་སུ་ཡང་སྤྲོ་བྱ། །རྡོ་རྗེ་ཡེ་ཤེས་ཡང་དག་བསྐྱེད། །ཁྲོ་བོ་ཡང་དག་སྦྱོར་བསྒོམས་པས། །རང་གཟུགས་འབར་བ་མཚུངས་པ་ཡིས། །ཆོ་ག་ཤེས་པས་སྤྲོ་བར་བྱ། །ཉི་མའི་དཀྱིལ་འཁོར་དབུས་གནས་པར། །

89-1-8b

མཁས་པས་རང་གི་གཟུགས་བསྒོམ་བྱ། །རྩེ་མོ་ལྔ་ཡི་རྡོ་རྗེ་ཆེ། །འཇིག་རྟེན་ཁམས་སུ་ཡང་སྤྲོ་བྱ། །ཁྲོ་བོའི་གཟུགས་སུ་ཡང་དག་བསྐྱེད། །རང་གི་སྔགས་ཀྱི་ཡི་གེས་བརྒྱན། །སངས་རྒྱས་གཟུགས་སུ་རྣམ་བསྒོམ་བྱ། །ཆོ་ག་ཤེས་
པས་འཁོར་ལོ་ལྟའི། །འོད་ཟེར་ཚུལ་དུ་རྣམ་བསྒོམ་བྱ། །བཅོམ་ལྡན་འདས་རྡོ་རྗེའི་རང་བཞིན་གྱིས་དེ་སྐད་ཅེས་གསུངས་སོ། །རང་གཟུགས་འཁོར་ལོའི་ཚུལ་གྱིས་ནི། །འབར་བའི་ཕྲེང་བས་རྣམ་པར་བརྒྱན། །རང་གཟུགས་
སངས་རྒྱས་དང་མཚུངས་པ། །ཆོ་ག་ཤེས་པས་དབྱུང་བར་བྱ། །རང་གཟུགས་འཁོར་ལོའི་ཚུལ་གྱིས་ནི། །རལ་གྲིའི་འོད་ཟེར་གྱིས་བརྒྱན་པ། །འབར་བའི་ཕྲེང་བ་འཁྲུགས་གསལ་བ། །ཀུན་ནས་རྣམ་པར་འཕྲོ་བའོ། །པད་མ་
རང་སྙིང་དབུས་གནས་པར། །བྲམ་ཟེ་ཚངས་པ་རྣམ་པར་བརྒྱན། །བྱང་ཆུབ་སེམས་སུ་ཡང་དག་བསྐྱེད། །དེ་ལ་སྔགས་ཀྱི་ཡི་གེ་དགོད། །སྙིང་པོ་ཨུཏྤ་ལར་བསམས་ནས། །སྣ་ཚོགས་འོད་ཟེར་རྣམ་པར་བརྒྱན། །ཆོ་ག་ཤེས་པས་
བྱང་ཆུབ་སེམས། །བསམས་ནས་སྔགས་གསུམ་རྣམ་བསྒོམ་བྱ། །སྙིང་གའི་དབུས་སོན་ཕྲ་མོ་ནི། །ཨིན་དྲ་ནཱི་ལ་མཚུངས་པའི་འོད། །ཡེ་ཤེས་སྦྱོར་བ་ཀུན་བསྐྱེད་ནས། །སངས་རྒྱས་གཟུགས་སུ་བསྒོམ་པར་བྱ། །རང་གཟུགས་
ཕྲ་མོའི་དབུས་གནས་པར། །སྣ་ཚོགས་འབར་བ་མཉམ་པའི་འོད། །སྙིང་པོར་ཡི་གེ་བསམ་ནས་ནི། །རང་གཟུགས་དེ་ལ་བསྒོམ་པར་བྱ། །བཅོམ་ལྡན་འདས་རྡོ་རྗེ་ཡེ་ཤེས་ཀྱིས་དེ་སྐད་ཅེས་གསུངས་སོ། །ཁྲུ་གང་ཙམ་ལས་འདས་པ་ཡི། །
ཕྲ་མོའི་དཀྱིལ་འཁོར་བསྒོམ་པ་ནི། །རང་གཟུགས་ཡི་གེར་ཡང་བྱས་ནས། །རྡོ་རྗེ་འབར་བར་རྣམ་བསྒོམ་བྱ། །ཁྲུ་གང་ཙམ་ལས་འདས་པ་རུ། །ཡེ་ཤེས་དཀྱིལ་འཁོར་བསྒོམ་པ་ནི། །དབུས་སུ་གཟུགས་ནི་ཡང་དག་བསྐྱེད། །བསམས་
ནས་བཟླས་པ་བརྩམ་པར་བྱ། །ཁྲུ་གང་ཙམ་ལས་འདས་པར་ནི། །ཉི་མའི་དཀྱིལ་འཁོར་བསྒོམ་པ་ནི། །རྡོ་རྗེ་སེམས་དཔའ་ཡང་དག་བསྐྱེད། །བསམས་ནས་བཟླས་པ་བརྩམ་པར་བྱ། །ཁྲུ་གང་ཙམ་ལས་འདས་པ་རུ། །ཆོས་ཀྱི་དཀྱིལ་

89-1-9a

འཁོར་བསྒོམ་པ་ནི། །བགེགས་དགྲར་ཡང་དག་བསྐྱེད་བསམས་ནས། །བཟླས་པ་ཀུན་དུ་བརྩམ་པར་བྱ། །མཐོ་གང་ཙམ་ལས་འདས་པ་རུ། །ཡེ་ཤེས་དཀྱིལ་འཁོར་བསྒོམ་པ་ནི། །རྣམ་སྣང་མཛད་ཀྱི་གཟུགས་བསམས་ནས། །
འཇིག་རྟེན་ཁམས་སུ་འདི་སྤྲོ་བྱ། །མཐོ་གང་ཙམ་ལས་འདས་པ་རུ། །པད་མའི་དཀྱིལ་འཁོར་བསྒོམ་པ་ནི། །དབུས་སུ་གཟུགས་ནི་ཡང་དག་བསྐྱེད། །གཞོགས་སུ་སངས་རྒྱས་རྣམ་པར་བསྒོམ། །རྒྱང་གྲགས་ཙམ་ལས་འདས་པར་ནི། །ཕྲ་མོའི་
དཀྱིལ་འཁོར་བསྒོམ་པ་ནི། །དབུས་སུ་གཟུགས་ནི་ཡང་དག་བསྐྱེད། །འཇིག་རྟེན་ཁམས་འདིར་སྤྲོ་བར་བྱ། །བཅོམ་ལྡན་འདས་རྡོ་རྗེ་ཅན་གྱིས་དེ་སྐད་ཅེས་གསུངས་སོ། །རྒྱང་གྲགས་ཙམ་ལས་འདས་པར་ནི། །ཟླ་བའི་དཀྱིལ་འཁོར་
བསྒོམ་པ་ནི། །སངས་རྒྱས་གཟུགས་ནི་ཡང་དག་བསྐྱེད། །གཞོགས་སུ་བཙུན་མོ་དགོད་པར་བྱ། །བཙུན་མོ་རྣམས་ནི་ཐམས་ཅད་དུ། །འོད་ཟེར་ལྔ་ནི་རྣམ་བསྒོམ་བྱ། །མེ་ཏོག་ཡིད་དགའ་འདི་རྣམས་ཀྱིས། །ཆོ་ག་ཤེས་པས་མཆོད་པར་
བྱ། །འཕྲོག་བྱེད་དྲི་ཡི་སྤྲིན་ལ་སོགས། །བསམས་ནས་སངས་རྒྱས་མཆོད་པར་བྱ། །བཅོམ་ལྡན་འདས་རྡོ་རྗེའི་སྤྱན་གྱིས་དེ་སྐད་ཅེས་གསུངས་སོ། །ཆོ་ག་ཤེས་པས་བཙུན་མོ་ནི། །སེར་པོ་ལྟ་བུར་བསམས་ནས་ནི། །སངས་རྒྱས་སྲས་པོ་
འདུས་པ་ནི། །རྣལ་འབྱོར་བསྐྱེད་དེ་བསྒོམ་པར་བྱ། །དེ་དབྱུང་ཇི་ལྟ་བར་བཀོད་ལ། །རྡོ་རྗེ་སེམས་དཔའ་རྣམ་བསྒོམ་བྱ། །རྡོ་རྗེ་སེམས་དཔའ་ཡང་དག་བསྐྱེད། །རིགས་ཀྱི་དབྱེ་བ་བསྒོམ་པར་བྱ། །རྒྱང་གྲགས་ཙམ་ལས་འདས་པར་ནི། །
ཡེ་ཤེས་ཕྲ་མོ་རྣམ་པར་བསྒོམ། །རང་གཟུགས་གཟུགས་ཀྱི་ཚུལ་གྱིས་ནི། །དབུས་སུ་ཡང་དག་གཞག་བསྒོམ་བྱ། །ཆོ་ག་ཤེས་པས་རྡོ་རྗེའི་རྩེར། །རྣམ་པ་ལྔ་རུ་རྣམ་བསྒོམ་བྱ། །དཀར་པོ་ཡེ་ཤེས་རིགས་རབ་བརྗོད། །ནག་པོ་བསྡུས་པའི་
རིགས་སུ་དྲན། །དམར་པོ་པད་མའི་རིགས་ཤེས་བྱ། །སེར་པོ་འདོད་པའི་རིགས་སུ་དྲན། །མཛེས་པའི་གཟུགས་ནི་རབ་གསལ་བར། །རིག་ནས་སྣ་ཚོགས་རྒྱན་གྱིས་བརྒྱན། །པད་མ་རབ་ཏུ་རྒྱས་བྱས་ནས། །རང་གི་རྡོ་རྗེ་དེ་ལ་གཞུག །བཅོམ་

89-1-9b

ལྡན་འདས་རྡོ་རྗེ་སེམས་དཔས་དེ་སྐད་ཅེས་གསུངས་སོ། །དེ་ལྟར་བྱས་པས་གང་ལྡན་པ། །དེ་ལྡན་ཡེ་ཤེས་རྙེད་པར་དཀའ། །རང་གཟུགས་ཤིན་དུ་བརྟན་བྱས་ནས། །བསམ་གཏན་བརྩོན་པར་རབ་ཏུ་གཞུག །མཛེས་ལྡན་མ་དགའ་ལྟ་བ་
ན། །གཟུགས་དང་ལྡན་པར་དེ་འགྱུར་རོ། །བཙུན་མོ་མཐོང་བ་ཙམ་གྱིས་ནི། །འཐུང་འགྱུར་འདིར་ནི་ཐེ་ཚོམ་མེད། །རྡོ་རྗེ་སེམས་དཔས་ཞིང་འདིར་ནི། །ཡོངས་སུ་གང་བར་རྣམ་བསྒོམ་བྱ། །སངས་རྒྱས་གཟུགས་ནི་བརྟན་བྱས་ནས། །
རྡོ་རྗེས་རྣམ་པར་ལྟུང་བར་བྱ། །བཅོམ་ལྡན་འདས་རྡོ་རྗེ་གསུམ་དབྱེར་མི་ཕྱེད་པས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོ་ལས་རིགས་བསྡུས་པའི་ཏིང་ངེ་འཛིན་གྱི་ལེའུ་
གསུམ་པ་རྫོགས་སྷོ།། །། དེ་ནས་བཅོམ་ལྡན་འདས་ཕྱག་ན་རྡོ་རྗེས་ཆོས་ཀྱི་རིགས་ཀྱི་ཏིང་ངེ་འཛིན་གྱི་ལེའུ་བཀའ་སྩལ་ཏོ། །དཀྱིལ་འཁོར་ཆེན་པོའི་ཚུལ་དུ་ནི། །ཐམས་ཅད་དུ་ནི་དེ་ཉིད་བྱ། །ཆོས་ཀྱི་དཀྱིལ་འཁོར་རྣམ་
བསྒོམ་པ། །ཆོ་ག་ཤེས་པས་རབ་ཏུ་བརྩམ། །ཆོས་ཀྱི་ཀུན་སྦྱོར་མཚན་ཉིད་ཀྱིས། །རྣམ་པར་རྟོག་པ་ཡོངས་དོར་བྱ། །གསང་སྔགས་དབྱེ་བ་བརྗོད་ནས་ནི། །ཐམས་ཅད་རྣལ་འབྱོར་རྣམ་བསྒོམ་བྱ། །ཨོཾ་སརྦ་ཏ་ཐཱ་ག་ཏ་དྷརྨ་ཛྙཱ་ན་སྭ་བྷཱ་བ་ཨཱད་
མ་ཀོ྅ཧྃ། དམ་ཚིག་ཆེན་པོའི་རྣལ་འབྱོར་ཉིད། །ཆོ་ག་ཤེས་པས་ཡང་དག་བརྗོད། །དངོས་པོ་ཐམས་ཅད་ཡང་དག་བསྐྱེད། །དངོས་མེད་བསྒོམ་བྱ་མིན་པ་ཉིད། །བཅོམ་ལྡན་འདས་འཇིག་རྟེན་དབང་ཕྱུག་གིས་དེ་སྐད་ཅེས་གསུངས་སོ། །
བློ་གྲོས་ལྡན་པས་པད་མ་བསམ། །པད་མ་རཱ་གའི་དབང་མཚུངས་པ། །དཀྱིལ་འཁོར་དེ་ལ་བསམ་བྱ་བ། །གཟུགས་བརྙན་དབུས་སུ་རྣམ་བསྒོམ་བྱ། །རིག་པའི་རྒྱལ་པོ་ཡང་དག་བསྐྱེད། །འབར་བའི་ཕྲེང་བ་མཚུངས་པའི་འོད། །འབར་
བ་འདུས་པ་དེ་རྣམས་སུ། །འཇིག་རྟེན་དབང་ཕྱུག་རྣམ་བསྒོམ་བྱ། །བཅོམ་ལྡན་འདས་འཇིག་རྟེན་དབང་ཕྱུག་གིས་དེ་སྐད་ཅེས་གསུངས་སོ། །ནམ་མཁའི་ཁམས་ནི་ཀུན་དུ་དགང་། །སླར་ཡང་དེ་ཉིད་ལ་བསྡུ་བྱ། །རང་གི་གཟུགས་

89-1-10a

དང་ཟླ་དབུས་གནས། །སྣ་ཚོགས་ཁ་དོག་མཚུངས་པའི་འོད། །སྙིང་ག་རུ་ནི་རྣམ་བསྒོམས་ནས། །ལྕེ་ལ་གསང་སྔགས་བསྒོམ་པའོ། །རང་གཟུགས་དེ་ཡི་དབུས་གནས་པར། །སངས་རྒྱས་ཡེ་ཤེས་རྣམ་པར་
བརྒྱན། །འཇིག་རྟེན་དབང་ཕྱུག་ཡང་དག་བསྐྱེད། །འཇིག་རྟེན་ཁམས་འདིར་སྤྲོ་བར་བྱ། །རིག་པའི་རྒྱལ་པོ་ཡང་དག་བསྐྱེད། །པད་མའི་དཀྱིལ་འཁོར་དབུས་སུ་ནི། །འཇིག་རྟེན་དབང་ཕྱུག་རབ་བསྒོམས་ནས། །གཟུགས་ཀྱིས་ནམ་མཁའ་
འགེངས་པར་བྱེད། །ཆོས་ཀྱི་དཀྱིལ་འཁོར་དབུས་སུ་ནི། །འཇིག་རྟེན་དབང་ཕྱུག་རབ་བསྒོམས་ནས། །རྡོ་རྗེ་སེམས་དཔའ་ཡང་དག་བསྐྱེད། །འཇིག་རྟེན་ཁམས་སུ་འདི་སྤྲོ་བྱ། །བཅོམ་ལྡན་འདས་ཀུན་དུ་བཟང་པོས་དེ་སྐད་ཅེས་གསུངས་སོ། །
ཆོས་ཀྱི་དཀྱིལ་འཁོར་དབུས་སུ་ནི། །རྡོ་རྗེ་སེམས་དཔའ་ཡང་དག་བསྐྱེད། །ཇི་ལྟར་རིགས་པར་གནས་ལྔ་རུ། །ཁྱབ་བདག་འཇིག་རྟེན་དབང་ཕྱུག་དགོད། །བཅོམ་ལྡན་འདས་འཇིག་རྟེན་དབང་ཕྱུག་གིས་དེ་སྐད་ཅེས་གསུངས་སོ། །
སྙིང་གའི་དབུས་སོན་ཕྲ་མོ་ནི། །ཆོས་ཀྱི་དཀྱིལ་འཁོར་མཆོག་གྱུར་པ། །ཆོས་དེར་ཡང་དག་བསྐྱེད་ནས་སུ། །འཇིག་རྟེན་ཁམས་སུ་འདི་སྤྲོ་བྱ། །སྙིང་གའི་དབུས་སོན་ཕྲ་མོ་ནི། །ཆོས་ཀྱི་དཀྱིལ་འཁོར་དྲི་མེད་པ། །པད་མ་དེ་ལ་རྣམ་
བསྒོམས་ཤིང་། །སངས་རྒྱས་གཟུགས་ནི་རྣམ་བསྒོམས་ནས། །སངས་རྒྱས་གཟུགས་རྣམས་ཐམས་ཅད་དུ། །འཇིག་རྟེན་དབང་ཕྱུག་རྣམ་བསྒོམ་པའོ། །བཅོམ་ལྡན་འདས་ཆོས་འཆང་བས་དེ་སྐད་ཅེས་གསུངས་སོ། །སྙིང་གའི་
དབུས་སོན་ཕྲ་མོ་ནི། །ཆོས་ཀྱི་དཀྱིལ་འཁོར་མཆོག་གྱུར་པ། །སངས་རྒྱས་ལྔ་ནི་རྣམ་བསྒོམས་ནས། །དེར་ཡང་དེ་བཞིན་བསྒོམ་པར་བྱ། །ལྟེ་བའི་དབུས་སོན་ཕྲ་མོ་ནི། །ཆོས་ཀྱི་དཀྱིལ་འཁོར་མཆོག་གྱུར་པ། །རང་གཟུགས་ལ་
སོགས་རྣམ་བསྒོམས་པས། །ཆོ་ག་ཤེས་པས་བསྐྱེད་པར་བྱ། །མཐོ་གང་ཙམ་ལས་འདས་པར་ནི། །ཆོས་ཀྱི་དཀྱིལ་འཁོར་དབུས་སུ་ནི། །ཆོ་ག་ཤེས་པས་རིམ་པ་བཞིན། །འཇིག་རྟེན་ཁམས་སུ་མཆོད་པར་བྱེད། །བཅོམ་ལྡན་འདས་

89-1-10b

ཆོས་འཆང་བས་དེ་སྐད་ཅེས་གསུངས་སོ། །རྒྱང་གྲགས་ཙམ་ལས་འདས་པར་ནི། །ཆོས་ཀྱི་དཀྱིལ་འཁོར་བསྒོམ་པ་ནི། །འཇིག་རྟེན་དབང་རབ་བསྒོམས་པ་ཡིས། །རང་གི་གཟུགས་ནི་རྣམ་བསྒོམ་བྱ། །རྒྱང་གྲགས་ཙམ་ལས་འདས་པར་ནི། །
པདྨའི་དཀྱིལ་འཁོར་སྒོམ་པ་ནི། །གཞོགས་སུ་བཙུན་མོ་བྱས་ནས་སུ། །སངས་རྒྱས་གཟུགས་ནི་མཆོད་པར་བྱ། །གསལ་བའི་དཀྱིལ་འཁོར་ཚུལ་གྱིས་ནི། །ཆོས་ཀྱི་དཀྱིལ་འཁོར་བསྒོམ་པ་ནི། །འཇིག་རྟེན་ཁམས་ནི་ཀུན་ནས་སུ། །ཆོ་
ག་ཤེས་པས་མཆོད་པར་བྱ། །གསལ་བའི་དཀྱིལ་འཁོར་ཚུལ་གྱིས་ནི། །འཁོར་ལོའི་དཀྱིལ་འཁོར་སྒོམ་པ་སྟེ། །ཉི་མའི་དཀྱིལ་འཁོར་མཆོག་བྱས་ནས། །རང་གི་གཟུགས་ནི་དགོད་པར་བྱ། །སྔགས་པས་སྟེང་གི་རིམ་པར་ནི། །ཇི་སྲིད་
ནམ་མཁའ་འགོངས་པ་ཞེས། །པད་མ་རཱ་གའི་འོད་མཉམ་པའི། །པད་མ་ལྔ་ནི་རྣམ་བསྒོམས་ནས། །ཆོ་ག་ཤེས་པས་རང་གཟུགས་ནི། །དབུས་སུ་ཡང་དག་གནས་བསྒོམ་བྱ། །སངས་རྒྱས་གཟུགས་ནི་ཀུན་འབྱུང་བ། །ཤར་དུ་རྣམ་པར་
བསྒོམ་པར་བྱ། །ལྷོ་ནས་བསྡུས་པ་ཞེས་བྱས་ནས། །རྣལ་འབྱོར་ཡང་དག་བརྩམ་པར་བྱ། །ནུབ་ཏུ་ཆོས་འཆང་བྱས་ནས་ནི། །བྱང་དུ་འདོད་པ་འབྱུང་བའོ། །འཁོར་ལོ་ཡེ་ཤེས་རིགས་ཞེས་བརྗོད། །རལ་གྲི་ཆོས་ཀྱི་རིགས་ཞེས་དགོངས། །
རྡོ་རྗེ་བསྡུས་པའི་རིགས་སུ་གྲགས། །རྩེ་གསུམ་འདོད་པའི་རིགས་སུ་བཤད། །ནམ་མཁའི་ཁམས་ནི་ཀུན་གང་བར། །བྱས་ནས་ཁྱབ་བདག་ཆོས་འཆང་བ། །ལག་ཏུ་རལ་གྲི་ཡང་དག་བསྐྱེད། །རང་གཟུགས་ཀྱིས་ནི་གཞོམ་པར་བྱ། །
འདོད་མཆོད་ཀྱིས་ནི་འཇོམས་བྱས་ནས། །ཆོས་ཀྱི་དབྱིངས་ཀྱི་ཆོ་ག་རིག །ལག་ཏུ་མདུང་ནི་ཡང་དག་བསྐྱེད། །རང་གཟུགས་ཀྱིས་ནི་ཕྱེ་མར་བརླག །གསལ་བའི་དཀྱིལ་འཁོར་ཚུལ་གྱིས་ནི། །ཡེ་ཤེས་རིགས་ནི་ཟློག་པར་བྱེད། །ཡེ་
ཤེས་དཀྱིལ་འཁོར་ཚུལ་གྱིས་ནི། །བསྡུས་པའི་རིགས་ནི་རྣམ་ལྟུང་བྱེད། །ཆོས་ཀྱི་དཀྱིལ་འཁོར་ཚུལ་གྱིས་ནི། །ཆོས་ཀྱི་རིགས་ནི་ངེས་ལྟུང་བྱེད། །ཟླ་བའི་དཀྱིལ་འཁོར་ཚུལ་གྱིས་ནི། །ཆེན་པོའི་རིགས་ནི་ངེས་ལྟུང་བྱེད། །ཉི་མའི་

89-1-11a

དཀྱིལ་འཁོར་ཚུལ་གྱིས་ནི། །རིགས་ཀུན་ངེས་པར་ལྟུང་བར་བྱེད། །བཅོམ་ལྡན་འདས་རྡོ་རྗེ་འཆང་བས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པ་ཆེན་པོར་ཆོས་ཀྱི་དཀྱིལ་འཁོར་
གྱི་ཏིང་ངེ་འཛིན་ཏེ་ལེའུ་བཞི་པ་རྫོགས་སྷོ།། །། དེ་ནས་བཅོམ་ལྡན་འདས་ཕྱག་ན་རྡོ་རྗེས་དེ་བཞིན་གཤེགས་པ་དེ་རྣམས་ཐམས་ཅད་རང་གི་རྡོ་རྗེ་ཆེན་པོ་ལ་བཞག་ནས་ཡེ་ཤེས་ཀྱི་རིགས་ལ་སོགས་པ་ཅན་དེ་ལ། ཡེ་
ཤེས་ཀྱི་དཀྱིལ་འཁོར་ཆེན་པོའི་ཚུལ་གྱིས་རབ་ཏུ་བཅུག་ཅིང་བརྟན་པར་བྱས་ནས། དཀྱིལ་འཁོར་ཆེན་པོ་དེ་རྣམས་སུ་རང་གི་གཟུགས་ཀྱི་རྣམ་པས་ཀུན་དུ་གནས་པ་དང་། གཟུགས་ཆེན་པོ་ལྷ་ཆེན་པོའི་ལྷའི་རྣམ་པར་ཡང་དག་
པར་སྦྱར་ནས། འདོད་པའི་རིགས་ཀྱི་ཏིང་ངེ་འཛིན་འདི་གསུངས་སོ། །དཀྱིལ་འཁོར་ཆེན་པོའི་ཚུལ་ལས་ནི། །ཐམས་ཅད་དེ་བཞིན་ཁོ་ནར་བྱ། །ཆོ་ག་ཤེས་པས་རབ་བརྩམ་བྱ། །གཞན་དུ་བསྒོམ་བྱ་མིན་པ་ཉིད། །འདོད་པའི་
རིགས་ཀྱི་ཆོ་ག་ཡིས། །གསང་སྔགས་རིག་པ་རྗེས་དྲན་བྱ། །ཨོཾ་ཀཱ་མ་ཛྙཱ་ན་སྭ་བྷཱ་བ་ཨཱད་མ་ཀོ྅ཧྃ། ཇི་ལྟར་རིགས་པར་བརྗོད་ནས་ནི། །རྣལ་འབྱོར་འདི་ནི་ཡང་དག་བརྩམ། །ཀར་ནི་ཀཱ་ར་མཚུངས་པའི་འོད། །པད་མ་ཆེན་པོ་ཡང་དག་བསྐྱེད། །
དེ་ཉིད་དཀྱིལ་འཁོར་བྱས་ནས་ནི། །རང་གི་གཟུགས་ནི་དགོད་པར་བྱ། །འདོད་མཆོད་གཟུགས་ནི་ཀུན་བསྐྱེད་ནས། །འཇིག་རྟེན་ཁམས་སུ་འདི་སྤྲོ་བྱ། །རང་གཟུགས་འདོད་མཆོད་ཚུལ་གྱིས་ནི། །གཟུགས་ཀྱིས་ནམ་མཁའ་འགེངས་
པར་བྱེད། །སྣ་ཚོགས་འབར་བས་རྣམ་བརྒྱན་པའི། །ཚངས་པའི་གཟུགས་ནི་ཡང་དག་མནན། །འདོད་མཆོད་གཟུགས་ནི་ཀུན་བསྐྱེད་ནས། །འཇིག་རྟེན་ཁམས་སུ་འདི་སྤྲོ་བྱ། །ཆོ་ག་ཤེས་པས་རེ་རེ་བར། །གཟུགས་གསུམ་
རྣམ་པར་བསྒོམ་པར་བྱ། །བཅོམ་ལྡན་འདས་འདོད་པའི་མཆོད་པས་དེ་སྐད་ཅེས་གསུངས་སོ། །ཁྲུ་གང་ཙམ་ལས་འདས་པར་ནི། །པད་མ་ཆེན་པོ་རྣམ་བསྒོམ་པ། །ཚངས་པའི་གཟུགས་ཀྱིས་སྲིད་པ་འདིར། །ཆོ་ག་ཤེས་

89-1-11b

པས་སྤྲོ་བར་བྱ། །ཁྲུ་ནི་བརྒྱ་ཕྲག་འདས་པར་ནི། །པད་མ་ཆེན་པོ་རྣམ་བསྒོམ་བྱ། །འདོད་མཆོད་གཟུགས་ནི་ཡང་དག་དབྱུང་། །སངས་རྒྱས་དེ་ཉིད་ལ་བསྒོམ་བྱ། །ཁྲུ་ནི་བརྒྱད་བརྒྱ་འདས་པར་ནི། །པད་མ་ཆེན་པོ་རྣམ་བསྒོམ་བྱ། །
ཁྱབ་འཇུག་གཟུགས་ནི་ཡང་དག་བསྐྱེད། །སངས་རྒྱས་ལ་སོགས་དེར་བསྒོམ་བྱ། །སངས་རྒྱས་གཟུགས་ནི་ཡང་དག་བསྐྱེད། །ཚངས་པའི་གཟུགས་ཀྱིས་འདི་སྤྲོ་བྱ། །ཆོས་ཀྱི་གཟུགས་ནི་ཡང་དག་བསྐྱེད། །ཁྱབ་འཇུག་
གཟུགས་ཀྱིས་འདི་སྤྲོ་བྱ། །སེམས་དཔའི་གཟུགས་སུ་བརྟན་བྱས་ནས། །འདོད་མཆོད་མཚུངས་པའི་གཟུགས་རྣམས་ཀྱིས། །འཇིག་རྟེན་ཁམས་ནི་ཀུན་དུ་ཡང་། །ཆོ་ག་ཤེས་པས་སྤྲོ་བར་བྱ། །ཁྲུ་གང་ཙམ་ལས་འདས་པར་ནི། །
ཚངས་པའི་གཟུགས་ཀྱིས་རྣམ་བསྒོམ་པ། །སྙིང་ཀར་དེ་རྣམས་ཡང་དག་བསྐྱེད། །སངས་རྒྱས་གཟུགས་སུ་རྣམ་བསྒོམ་བྱ། །ཆོ་ག་ཤེས་པས་སངས་རྒྱས་གཟུགས། །གཟུགས་ལ་གཟུགས་སུ་རྣམ་བསྒོམ་བྱ། །བཅོམ་ལྡན་
འདས་འདོད་པའི་མཆོད་པས་དེ་སྐད་ཅེས་གསུངས་སོ། །ཁྲུ་གང་ཙམ་ལས་འདས་པར་ནི། །ཁྱབ་འཇུག་གཟུགས་ནི་རྣམ་སྒོམ་པ། །སྙིང་གར་དེ་རྣམས་ཀུན་བསྐྱེད་ནས། །སངས་རྒྱས་གཟུགས་སུ་རྣམ་བསྒོམ་བྱ། །སངས་རྒྱས་
གཟུགས་རྣམས་ཐམས་ཅད་དུ། །འདོད་པའི་མཆོད་པ་མཚུངས་པའི་གཟུགས། །སྒེག་པའི་རྒྱན་གྱིས་བརྒྱན་གྱུར་པས། །ཆོ་ག་ཤེས་པས་དབྱུང་བར་བྱ། །ཇི་སྲིད་གཟུགས་སུ་ཡང་དག་སྦྱོར། །དེ་སྲིད་དུ་ནི་བཙུན་མོར་འགྱུར། །
བཅོམ་ལྡན་འདས་འདོད་པའི་མཆོད་པས་དེ་སྐད་ཅེས་གསུངས་སོ། །རིགས་ཀྱི་དཀྱིལ་འཁོར་ཚུལ་གྱིས་ནི། །གཟུགས་སུ་བསྐྱེད་ནས་བསྒོམ་པར་བྱ། །ཆོ་ག་ཤེས་པས་དང་པོའི་སྦྱོར། །མཉམ་པར་གཞག་པས་བསྒོམ་པར་བྱ། །
ནམ་མཁའི་ཁམས་ནི་ཀུན་བཀང་བར། །མཁས་པས་དེ་ལྟར་བསམ་བྱས་ནས། །བརྗོད་པའི་རྣམ་པས་གསོལ་བ་བཏབ། །མཉམ་པར་བཞག་པས་དེ་ལྟུང་བྱ། །ཆོ་ག་ཤེས་པས་ལྷའི་རྣམ་པ། །སངས་རྒྱས་འོད་དང་མཉམ་པའི་

89-1-12a

གཟུགས། །ཇི་ལྟར་རིགས་པར་སྔགས་པས་སྦྱིན། །གཞན་དུ་གྲུབ་པར་མི་འགྱུར་རོ། །ཆོ་ག་ཤེས་པས་ལྷ་མོ་ལྟའི། །རང་གི་གཟུགས་ནི་རྣམ་བསྒོམ་བྱ། །གཞན་དུ་རྡོ་རྗེ་སེམས་དཔའ་རྣམས། །དཀར་སོགས་ཆོ་
ག་འབྱུང་བ་ཡི། །སྒེག་པའི་རྒྱན་གྱིས་བརྒྱན་གྱུར་པའི། །རང་གཟུགས་རྣོན་པོའི་ཚུལ་གྱིས་ནི། །ཆོ་ག་ཤེས་པས་ལྷ་མོ་དེར། །བྱས་ནས་མཚོན་བྱ་རྣམ་བསྒོམ་བྱ། །ཆོ་ག་ཤེས་པས་རྡོར་པད་མ། །ཀུན་སྦྱོར་ཆོ་ག་འབྱུང་བ་ཡིས། །
རིགས་ཀྱི་གཟུགས་ནི་ཀུན་བསྐྱེད་ནས། །རང་གི་ཁུ་བས་དེ་ནི་མཆོད། །རྒྱལ་བ་ཆུ་སྐྱེས་རིགས་ཀྱི་ལྷ། །གཞན་དུ་གྲུབ་པ་ཉིད་མི་འགྱུར། །ཕྱག་ན་རྡོ་རྗེའི་རིགས་བརྗོད་པའི། །ལྷ་ཉིད་གྲུབ་པ་ཉིད་མི་འགྱུར། །དང་པོ་དང་མཐར་
ཐམས་ཅད་དུ། །འདི་ནི་ཐུན་འཚམས་བཞི་རུ་བྱ། །རྒྱལ་བ་ཆུ་སྐྱེས་རྡོ་རྗེ་སྐྱེས། །གཞན་དུ་འགྲུབ་པ་མིན་པ་ཉིད། །མ་མོའི་གཟུགས་ནི་ཀུན་བསྐྱེད་ནས། །འོད་ཟེར་སྣ་ཚོགས་མཉམ་པའི་འོད། །རང་གཟུགས་འདོད་མཆོད་ཚུལ་གྱིས་ནི། །
ཁམས་གསུམ་པར་ཡང་སྤྲོ་བར་བྱ། །འདོད་པའི་མཆོད་པ་མཚུངས་པའི་གཟུགས། །སྲིང་མོ་བཞིར་ནི་ཡང་དག་སྦྱོར། །གཟུགས་ཀྱི་མཚན་ཉིད་ཚུལ་གྱིས་ནི། །མཉམ་པར་བཞག་པས་སྨྲ་བར་བྱ། །གེ་སར་སེར་པོ་དང་མཚུངས་པའི། །ཚངས་
པའི་གཟུགས་ནི་རྣམ་བསྒོམས་ནས། །ཆོ་ག་ཤེས་པས་སངས་རྒྱས་གཟུགས། །བྱས་ནས་དེ་ནི་རབ་བསྒོམ་བྱ། །བཅོམ་ལྡན་འདས་ཆོས་འཆང་བས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་
པའི་རྒྱལ་པོ་ཆེན་པོ་ལས། འདོད་པའི་རིགས་ཀྱི་ཏིང་ངེ་འཛིན་གྱི་ལེའུ་སྟེ་ལྔ་པ་རྫོགས་སོ།། །། དེ་ནས་བཅོམ་ལྡན་འདས་ཕྱག་ན་རྡོ་རྗེས། དེ་བཞིན་གཤེགས་པ་ཐམས་ཅད་རང་གི་དཀྱིལ་འཁོར་དུ་བཞག་ནས་རང་
གི་ཏིང་ངེ་འཛིན་ལ་སྙོམས་པར་ཞུགས་ཏེ། གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པ་ཆེན་པོར་དངོས་གྲུབ་ཐམས་ཅད་ཀྱི་དམ་ཚིག་གི་ཡེ་ཤེས་མཆོག་གི་ལེའུ་འདི་བཀའ་སྩལ་ཏོ། །བློ་ལྡན་འདོད་པ་ཐམས་ཅད་

89-1-12b

ལ། །རྣམ་རྟོག་བྱ་བ་མིན་པ་ཉིད། །སངས་རྒྱས་ཐམས་ཅད་འཇོམས་པ་ནི། །སེམས་ལ་སྨད་བྱ་མིན་པ་ཉིད། །དགའ་དང་རྩོད་པའི་མཚན་ཉིད་ཀྱིས། །སངས་རྒྱས་ཐམས་ཅད་བསླུ་བ་དང་། །གཞན་དུ་ང་ལ་ལྷའོ་ཞེས། །སེམས་ནི་བརྟན་བྱ་མིན་པ་
ཉིད། །སངས་རྒྱས་ཀུན་གྱི་རྫས་གང་ཡིན། །སྐྱེ་བ་མེད་པའི་ཡོན་ཏན་འབྱུང་། །སེམས་ནི་ཤིན་དུ་བརྟན་བྱས་ལ། །བཙུན་མོ་ལ་སོགས་རྣམ་པར་བསྒོམ། །འཇིག་རྟེན་གསུམ་པའི་དབང་ཕྱུག་མ། །རིག་མ་ཆེན་མོ་སྤྱན་མར་གྲགས། །དེ་ཡང་
བཙུན་མོར་བྱས་ནས་ཀྱང་། །ཀུན་དུ་ཉེ་བར་ལོངས་སྤྱད་དོ། །ཆོ་ག་ཤེས་པས་ཡེ་ཤེས་རིགས། །ལྷན་ཅིག་འཇོམས་པར་ཡང་དག་བརྩམ། །སྲོག་ཆགས་རྣམས་ཀྱི་དགེ་འཇོམས་པ། །བསྡུ་བའི་དོན་ནི་རྟག་ཏུ་བྱ། །ཆགས་ལ་ཆགས་པས་
སྦྱོར་བྱ་བ། །ཆོས་ཀྱི་རིགས་ལ་རྟག་ཏུ་བྱ། །འདོད་མཆོད་རིགས་ནི་མཚུངས་པ་ལ། །རྟག་ཏུ་བརྫུན་ཡང་སྨྲ་བར་བྱ། །ཀུན་ལ་རང་དེ་ལྟར་འདི་བྱ། །གཞན་དུ་གྲུབ་པ་མིན་པ་ཉིད། །སངས་རྒྱས་གཟུགས་ནི་རྣམ་བསྒོམས་ནས། །སྙིང་གར་དེ་ནི་
རྣམ་བསྒོམ་བྱ། །ཐམས་ཅད་དེ་བཞིན་ཁོ་ནར་བྱ། །གཞན་དུ་དེ་དག་མི་འགྱུར་རོ། །ཡེ་ཤེས་རིགས་ནི་རྣམ་འཇོམས་པས། །དགའ་ལྡན་རྣམས་སུ་ཉེ་བར་སྐྱེ། །ཆོས་ཀྱི་རིགས་ནི་རྣམ་བསྒོམས་པས། །བདེ་ལྡན་དུ་ནི་སྐྱེ་བར་འགྱུར། །ཆོས་
ཀྱི་རིགས་སོགས་དབྱེ་བ་ཡིས། །བསྡུས་པ་ཞེས་ནི་གྲགས་པར་འགྱུར། །འདོད་མཆོད་རིགས་ནི་འཇོམས་པ་ཡིས། །ཁམས་གསུམ་པ་ལ་སོགས་པར་འབྱུང་། །གནས་མེད་ལུས་དང་བྲལ་བ་ཡི། །ལུས་དང་ལྡན་པས་གནས་པར་འགྱུར། །
དེ་ཡི་གདོང་ནི་གཟི་རྒྱས་པར། །ཆོས་རྣམས་ཀུན་དུ་སྐྱེ་བར་འགྱུར། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྗེ་བོས་དེ་སྐད་ཅེས་གསུངས་སོ། །སེམས་ཅན་ཁམས་ཀྱི་མཐར་ཐུག་པར། །བདག་ནི་རྡོ་རྗེ་ལྟ་བུར་
བརྟན། །སྲིད་པ་སྒྲོལ་བར་ཡང་དག་སྦྱོར། །སངས་རྒྱས་བཀའ་ཡིས་དགོང་པར་བྱ། །ཡེ་ཤེས་དགེ་བ་ཀུན་འབྱུང་བ། །སངས་རྒྱས་ཆོས་ཚུལ་འདི་རྣམས་ཀྱིས། །སེམས་དཔའ་བསྡུས་པ་ཡང་དག་འབྱུང་། །གཞན་དུ་མཆོད་བྱ་མིན་པ་ཉིད། །

89-1-13a

ཤེས་རབ་ཕ་རོལ་ཕྱིན་པའི་ཐབས། །ཡེ་ཤེས་ཆེན་པོ་ཀུན་བཏུས་པས། །སེམས་ལ་རྟག་ཏུའང་སྦྱར་བར་བྱ། །ཆོས་བསྡུས་པ་ནི་ཐོབ་པར་འགྱུར། །བྱང་ཆུབ་སེམས་ནི་སེམས་ཆེན་པོ། །རྡོར་སོགས་མཚན་ཉིད་མིན་པ་
ཉིད། །དེ་བཞིན་དུ་ནི་ཡེ་ཤེས་ཀུན། །སྙིང་པོ་ཀུན་ལས་བཏུས་པ་འདི། །ཕ་རོལ་ཕྱིན་པ་བསྡུས་པ་འདིར། །སངས་རྒྱས་རྣམས་ཀྱི་བཙུན་མོར་བརྟན། །དེ་རྣམས་སངས་རྒྱས་ཐོབ་པར་འགྱུར། །ཀུན་སྦྱོར་
མཚན་ཉིད་དེ་རྣམས་ཀྱིས། །སྒྲ་དྲི་རོ་ལ་སོགས་པ་རྣམས། །ཇི་ལྟར་ནུས་པར་འབུལ་བར་བྱེད། །རང་གཟུགས་སངས་རྒྱས་ཚུལ་གྱིས་ནི། །དེ་ལ་དབུས་སུ་རྣམ་བསྒོམ་བྱ། །འོད་ཟེར་འབར་བ་འཁྲུགས་བྱས་ནས། །སྙིང་གར་དེ་རྣམས་
རབ་གཞུག་བྱ། །བཅོམ་ལྡན་འདས་ཆོས་འཆང་བས་དེ་སྐད་ཅེས་གསུངས་སོ། །བསྡུས་པ་ཞེས་རིགས་སུ་བརྗོད་པའི། །གར་མཁན་ཆེན་པོ་ཡང་དག་འབྱུང་། །དེ་ལ་ངོ་མཚར་གསོལ་བཏབ་པ། །དེ་ལ་འཇོམས་པར་བྱེད་པར་དགོངས། །
ཕྱག་རྒྱ་ཆེན་པོའི་གོ་འཕང་བརྗོད། །མི་རྣམས་རིགས་ནི་བཞི་པོ་ཡང་། །བྱས་ནས་དམ་ཚིག་ཚུལ་གྱིས་ནི། །མཉམ་པར་བཞག་པས་བསྒོམ་པར་བྱ། །སེམས་ནི་སེམས་ཅན་ཐམས་ཅད་ཀྱི། །རང་བཞིན་ཕུལ་བྱུང་ཆེན་པོ་སྟེ། །རྣམ་
རྟོག་དམ་ཚིག་ལ་གནས་པ། །སྐྱེ་བ་རྣམས་དང་དམན་པར་སྨྲ། །བསོད་ནམས་བསོད་ནམས་ཀྱིས་དེའི་ལུས། །གོས་པའམ་ཡང་ན་དེ་མིན་ཉིད། །དེ་ལྟར་ཤེས་ནས་ཅི་རིགས་པར། །གཞན་དུ་བསྒོམ་བྱ་མིན་པ་ཉིད། །པད་མ་ཨུཏྤལ་ལ་
སོགས་པ། །འདམ་སྐྱེས་ཡང་དག་བྱུང་མ་སྐྱེས། །སེམས་ལ་སོགས་པའི་མཚན་ཉིད་ཀྱང་། །དེ་ཉིད་ལ་ཀུན་ཤེས་པར་བྱ། །བྱང་ཆུབ་སེམས་ནི་བརྟན་བྱས་ནས། །སངས་རྒྱས་རྣམས་ཀྱང་ཡོངས་སུ་གཟུང་། །རྡོ་རྗེ་དེ་ཉིད་ལས་སྐྱེས་ཏེ། །
གཞན་དུ་འབྱུང་བ་མིན་པ་ཉིད། །སེམས་ཅན་གྱི་ནི་ས་རྣམས་ཀྱིས། །འགྲུབ་པར་འགྱུར་བར་གྲགས་པ་ཡིན། །དེ་བཞིན་གང་འདི་དག་པ་ཆེ། །ཡེ་ཤེས་ལྕགས་ཀྱུའི་ཚུལ་ཆེན་ནོ། །བཅོམ་ལྡན་འདས་ཀུན་དུ་བཟང་པོ་ཆེན་པོས་དེ་

89-1-13b

སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་དངོས་གྲུབ་ཐམས་ཅད་ཀྱི་དམ་ཚིག་གི་ཡེ་ཤེས་མཆོག་གི་ལེའུ་སྟེ་ལེའུ་དྲུག་པ་རྫོགས་སོ།། །། དེ་ནས་བཅོམ་ལྡན་
འདས་ཕྱག་ན་རྡོ་རྗེ་དེ་བཞིན་གཤེགས་པ་དེ་རྣམས་ཐམས་ཅད་ངེས་པར་བྱུང་ནས་ཀྱང་སེམས་དཔའ་ཆེན་པོའི་ཟླ་བའི་དཀྱིལ་འཁོར་བྱིན་གྱིས་བརླབས་པར་ཀུན་དུ་གནས་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཆེན་པོ་
ཀུན་དུ་བཟང་པོ་རྡོ་རྗེ་ཐམས་ཅད་ཀྱི་དམ་ཚིག་གི་ཡེ་ཤེས་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དང་པོའི་རྣལ་འབྱོར་དམ་ཚིག་ཐམས་ཅད་ཀྱི་དངོས་གྲུབ་ཀྱི་ཡེ་ཤེས་འདུ་བར་བྱེད་པ་བསྐྱེད་པ་དང་
བཅས་པའི་གསང་ཆེན་བཀའ་སྩལ་ཏོ། །སངས་རྒྱས་གཟུགས་སུ་ཡང་དག་བསྐྱེད། །འོད་ཟེར་སྣ་ཚོགས་མཚུངས་པའི་འོད། །འོད་ཟེར་སྙིང་པོ་སོགས་ཚུལ་གྱིས། །འཁོར་ལོ་དཀར་པོ་དང་མཚུངས་པ། །ཙ་ན་ཀ་ཡི་འབྲུ་ཚད་
ཀྱིས། །ཀུན་ནས་ཡོངས་སུ་ཟླུམ་པོ་རུ། །སྔགས་པའི་དཔྲལ་བའི་སྟེང་དུ་ནི། །མཉམ་པར་བཞག་པས་བསྒོམ་པར་བྱ། །ཆོ་ག་ཤེས་པས་ཟླ་བ་གཅིག །དེ་ཡིས་དེ་ལྟར་འདི་སྤྲོ་བྱ། །ནམ་མཁའ་ལ་སོགས་རབ་འབྱམ་དུ། །ཟླ་
གཉིས་ནང་དུ་རྒྱས་པར་བྱ། །ཛཱ་ཏིའི་མེ་ཏོག་སོགས་གཡོགས་པར། །དཀྱིལ་འཁོར་དེ་རུ་རྣམ་བསྒོམ་བྱ། །མཚན་མ་ཕུལ་བྱུང་བཅས་མཐོང་ནས། །མཚན་ཉིད་བརྗོད་པས་མཚོན་པར་བྱ། །འབར་བའི་ཕྲེང་བས་རྣམ་བརྒྱན་པའི། །
རྡོ་རྗེ་སེམས་དཔའ་རྣམ་བསྒོམས་ནས། །གང་དུ་དཀྱིལ་འཁོར་སོགས་ཚུལ་གྱིས། །ནས་ཙམ་དུ་ནི་བསྒོམ་པར་བྱ། །རྩེ་མོ་ལྔ་པའི་རྡོ་རྗེ་ཆེ། །སྣ་ཡི་རྩེར་ནི་རྣམ་བསྒོམ་བྱ། །ཨིན་དྲ་ནཱི་ལ་སོགས་ཚུལ་གྱིས། །དེ་ཡི་ཁ་
དོག་རྣམ་སྒོམ་མོ། །ཨུཏྤལ་ལ་སོགས་གཡོགས་པ་ལ། །དཀྱིལ་འཁོར་དེ་ལ་བསྒོམ་པར་བྱ། །ཀུན་དུ་དེ་ཉིད་བྱ་བ་ནི། །ཡེ་ཤེས་རིགས་ཀྱི་ཆོ་ག་ལས། །ཆོ་ག་ཤེས་པས་ཆོས་སེམས་དཔའ། །བསྐྱེད་ནས་བསྒོམ་པར་བྱ་བ་འདི། །

89-1-14a

ནམ་མཁའི་ཁམས་ནི་ཀུན་བཀང་བར། །བྱས་ནས་འོད་ཟེར་ཡང་དག་བསྡུ། །རྒྱ་ཤུག་ཚི་གུའི་ཚད་ཀྱིས་ནི། །པད་མ་ཡང་དག་སྦྱར་བསྒོམ་བྱ། །པད་མ་རཱ་གའི་འོད་མཚུངས་པའི། །འདབ་མ་བརྒྱད་པ་རྣམ་བསྒོམས་ནས། །
ཇི་ལྟར་རིགས་པར་སྙིང་གར་དེ། །བསྒོམ་བྱ་གཞན་དུ་མི་བསམ་མོ། །ཐོག་མ་བར་ནི་རྣམ་སྤངས་ནས། །སྒོམ་པ་དེ་ཡི་དགོངས་པའོ། །མེ་ཏོག་པད་མ་སོགས་གཡོགས་པར། །དེ་ཕྱོགས་སུ་ནི་རྣམ་བསྒོམ་བྱ། །ཆོ་ག་ཤེས་པས་འདོད་
མཆོད་པའི། །སེམས་དཔའ་འོད་མཚུངས་བསྒོམ་པར་བྱ། །འོད་ཟེར་འབར་བས་རྣམ་བརྒྱན་པའི། །རྩེ་གསུམ་ཤིན་དུ་བརྟན་བྱས་ནས། །ཆོ་ག་ཤེས་པས་ནས་ཙམ་དུ། །བསམས་ནས་ལྟེ་བར་བསྒོམ་པར་བྱ། །ཀར་ནི་ཀཱར་སོགས་
མེ་ཏོག་ཆེ། །སེར་པོ་འབར་བ་བསྒོམ་པར་བྱ། །བཅོམ་ལྡན་འདས་ཀུན་དུ་བཟང་པོས་དེ་སྐད་ཅེས་གསུངས་སོ། །ཀུན་དུ་རྣལ་འབྱོར་བཞི་རྣམས་སུ། །རྣམ་པ་བཞི་པོ་རྣམ་བསྒོམ་བྱ། །ཇི་སྲིད་ནམ་མཁའི་དཀྱིལ་འཁོར་དུ། །ཆོ་ག་ཤེས་པས་
སྤྲོ་བར་བྱ། །གང་ཡང་སྔགས་པས་ཟླ་གཉིས་སུ། །ཐུན་བཞིར་རྣམ་པར་བསྒོམ་པར་བྱ། །རྣམ་པར་དབེན་དང་ཡིད་འོང་དང་། །སྐྱེ་བོ་བྲལ་བར་བསྒོམ་པར་བྱ། །ཉ་དང་ཤ་སོགས་ཅན་བཟའ་ལ། །བརྟུལ་ཞུགས་ཅན་གྱིས་མར་སར་བཏུང་། །བསླུས་
པ་དང་ཡང་ས་ལ་འཇིགས། །དེ་ལྟར་གང་འདི་བརྟུལ་ཞུགས་ཅན། །ཆོ་ག་ཤེས་པས་སངས་རྒྱས་གཟུགས། །དངོས་ཉིད་དུ་དེ་ལྟ་བར་བྱེད། །རང་གཟུགས་རྣམ་ཤེས་བྱ་མིན་ཉིད། །སྒྲ་ནི་ཉན་པར་བྱེད་མིན་ཉིད། །རྣམ་པ་གཉིས་སུ་དེ་ཡི་
སེམས། །སྐྱེ་བ་མིན་ཞིང་ཡང་ཡང་མིན། །གང་ཞིག་ཁོ་ནར་བསྒོམ་པར་བྱ། །གཞན་དུ་དེ་དག་མི་འགྱུར་ཉིད། །གསལ་བའི་དཀྱིལ་འཁོར་སྦྱོར་ལ་སོགས། །བསྐྱེད་ནས་དེ་ལ་བསྒོམ་པར་བྱ། །བདག་པོའི་རྣལ་འབྱོར་ཀུན་བསྐྱེད་ནས། །མཉམ་
པར་བཞག་པས་བསྒོམ་པར་བྱ། །འབྲས་བུའི་ཆོས་སུ་སྐྱེ་འགྱུར་ཏེ། །གཞན་དུ་བསྐྱེད་པར་འགྱུར་མིན་ཉིད། །བཅོམ་ལྡན་འདས་བྱང་ཆུབ་ཀྱི་སེམས་ཀྱིས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་

89-1-14b

རྟོག་པའི་རྒྱལ་པོ་ཆེན་པོ་ལས། དང་པོའི་ཡེ་ཤེས་ཀུན་ལས་བཏུས་པའི་ལེའུ་སྟེ་བདུན་པའོ།། །། དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་དེ་རྣམས་ཐམས་ཅད་རང་གི་བ་སྤུའི་ཁུང་བུ་རྣམས་སུ་རབ་ཏུ་
བཅུག་ནས་དམ་ཚིག་ཐམས་ཅད་ཀྱི་ཡེ་ཤེས་འབྱུང་བ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་ཡང་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་དེ་རྣམས་ཐམས་
ཅད་རང་གི་གཟུགས་བུད་མེད་ཀྱི་གཟུགས་སུ་བྱིན་གྱིས་བརླབ་པ་ཁོ་ནར་བ་སྤུའི་ཁུང་བུ་རྣམས་ནས་མངོན་པར་བྱུང་བར་གྱུར་ཏོ། །དེ་ནས་བཙུན་མོ་དེ་རྣམས་ཐམས་ཅད་ཀྱིས་ཡེ་ཤེས་ཆེན་པོའི་རིན་པོ་ཆེ་དེ་ཡི་མཆོད་པ་ཐམས་ཅད་
ཀྱི་བཀོད་པས་ཡང་དག་པར་མཆོད་དེ། ནམ་མཁའི་ཁམས་ཐམས་ཅད་ཀུན་དུ་བཀང་ཞིང་སྣང་བར་བྱས་ནས་སྐུ་དང་གསུང་དང་ཐུགས་རྣམས་སུ་གནས་པར་གྱུར་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་བཙུན་མོ་ཐམས་ཅད་
ཀྱི་བྷ་ག་རྣམས་སུ་རང་གི་རྡོ་རྗེ་ཡང་དག་པར་སྦྱོར་བའི་རྣམ་པས་ཡང་དག་པར་སྦྱར་ནས། རང་གི་གཟུགས་དེའི་ཚད་དུ་བྱིན་གྱིས་རློབ་པར་བྱེད་པས་བྱིན་གྱིས་བརླབས་ནས་དེ་བཞིན་གཤེགས་པ་ཐམས་ཅད་ཀྱང་དེའི་ཚད་དེ་ཁོ་ན་བཞིན་
དུ་མཁས་པ་རྣམས་ཀྱིས་སྔ་མ་ཇི་ལྟ་བའི་ཕྱག་ན་རྡོ་རྗེ་རིགས་ཐམས་ཅད་དམ་ཚིག་གི་ཡེ་ཤེས་དེ་ཁོ་ན་ཉིད་བྱིན་གྱིས་རློབ་པ་ཞེས་བྱ་བའི་ཡེ་ཤེས་ཆེན་པོའི་དམ་ཚིག་བཀའ་སྩལ་ཏོ། །དཀྱིལ་འཁོར་བཞི་ཡི་ཚུལ་གྱིས་ནི། །དབུས་སུ་
སྔགས་སུ་རྣམ་བསྒོམ་བྱ། །སྙིང་གར་དཀྱིལ་འཁོར་བྱས་ནས་ནི། །རྡོ་རྗེ་སེམས་དཔའ་བསྒོམ་པར་བྱ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྗེ་བོས་དེ་སྐད་ཅེས་གསུངས་སོ། །དཀྱིལ་འཁོར་བཞི་ཡི་ཚུལ་
གྱིས་ནི། །རྣམ་སྣང་ལ་སོགས་རྣམ་བསྒོམ་པ། །དེ་ཉིད་ཀྱིས་ནི་ཀུན་བསྐྱེད་ནས། །དེ་ཉིད་མཆོད་པར་བྱེད་པར་འགྱུར། །དཀྱིལ་འཁོར་བཞི་ཡི་ཚུལ་གྱིས་ནི། །རྡོ་རྗེ་སེམས་དཔའ་བསམ་པར་བྱ། །སངས་རྒྱས་གཟུགས་ནི་

89-1-15a

ཡང་དག་བསྐྱེད། །དེ་ཡི་མཆོད་པ་བྱེད་པར་བཤད། །དཀྱིལ་འཁོར་བཞི་ཡི་ཚུལ་གྱིས་ནི། །རང་རིགས་ལ་སོགས་རྣམ་པར་བསྒོམ། །དབུས་སུ་གཟུགས་ནི་བརྟན་བྱས་ནས། །དེ་ཡི་མཆོད་པ་བྱེད་པར་བཤད། །སྣ་
ཚོགས་རྒྱན་གྱིས་བརྒྱན་པ་ཡི། །སྤྱན་ནི་ཡང་དག་བསྐྱེད་ནས་སུ། །གསལ་བའི་དཀྱིལ་འཁོར་ཚུལ་གྱིས་ནི། །དམངས་རིགས་དཀར་མོ་རྣམ་བསྒོམ་བྱ། །ཀུན་སྦྱོར་ལ་སོགས་མཚན་ཉིད་ཀྱིས། །སྣ་ཚོགས་རྒྱན་དང་ཡང་དག་ལྡན། །
ཨུཏྤལ་སྔོན་པོ་དང་མཚུངས་པའི། །མཱ་མ་ཀཱི་ནི་རྟག་བསྒོམ་བྱ། །མེ་ཏོག་ཆུན་སོགས་ཀྱིས་དོན་བཞིན། །ཇི་ལྟར་རིགས་པར་རྣམ་བརྒྱན་པ། །རིག་མ་ཆེན་མོ་དཀར་མོར་གྲགས། །ཁྲག་དང་མཚུངས་པར་བསམ་པར་བྱ། །
ཡིད་ཀྱི་ཀུན་སྦྱོར་ཕུན་ཚོགས་ཀྱིས། །བསྡུས་པ་ཡིས་ནི་རྣམ་པར་བརྒྱན། །ཨུཏྤལ་ན་མཚུངས་སྐལ་བཟང་མོ། །སྔགས་པས་རྟག་ཏུ་བསམ་པར་བྱ། །བཅོམ་ལྡན་འདས་ཀུན་དུ་བཟང་པོས་དེ་སྐད་ཅེས་གསུངས་སོ། །མར་སར་ལ་སོགས་
ཀུན་སྦྱོར་གྱིས། །ཡིད་དུ་འོང་བ་དེ་བསྒོམ་བྱ། །ཆང་ཉིད་ཡིད་ཀྱིས་སྦྱོར་བྱེད་པ། །གང་དེ་ཉིད་ནི་སྒོམ་བཞིན་དུ། །ཟླ་བའི་དཀྱིལ་འཁོར་དབུས་སུ་ནི། །རང་གི་སྔགས་ཀྱིས་ཡང་དག་བསྐྱེད། །སྐྲོད་པར་བྱེད་པས་ཆོ་ག་ཀུན། །འདི་ནི་
བསྐྱེད་ཅིང་བསྒོམ་པར་བྱ། །ལག་པས་མགྲིན་པ་ལ་སོགས་བཟུང་། །རྐང་པ་དེ་ལ་སྦྱར་བར་བྱ། །མེ་ཏོག་གཉིས་སོགས་མཚན་ཉིད་ཀྱིས། །རང་གི་རྡོ་རྗེ་གཞུག་བསམ་བྱ། །ཟླ་བའི་དཀྱིལ་འཁོར་ཡང་དག་སྦྱོར། །ཁུ་བ་དེ་ལ་ལྟུང་བར་
བྱ། །བཅོམ་ལྡན་འདས་རྡོ་རྗེ་འཆང་གིས་དེ་སྐད་ཅེས་གསུངས་སོ། །ནམ་མཁའི་ཁམས་ནི་ཀུན་བཀང་བར། །བྱས་ནས་དེ་ཉིད་ཀྱིས་བསྒོམ་བྱ། །མེ་ཏོག་བཞི་ལ་སོགས་ཚུལ་གྱིས། །དེ་ལ་མཆོད་པར་བྱེད་ཅེས་དགོངས། །ཉེར་སྤྱོད་
ལྔ་ཡི་མཆོད་པ་ཡིས། །མཆོད་བདག་ཀུན་སྦྱོར་ལས་མཆོད་བྱ། །དྲི་གཟུགས་རོ་དང་རེག་བྱ་ནི། །ཐམས་ཅད་དུ་དེ་ཉིད་ཀྱིས་སྦྱིན། །རྡོར་སེམས་རྣམས་ནི་བློ་ལྡན་གྱིས། །སངས་རྒྱས་ཀུན་གྱིས་བསྐྱེད་པ་དང་། །མཉེས་དང་མཆོད་པར་

89-1-15b

རབ་ཏུ་བརྗོད། །དགྱེས་པར་ཡང་ནི་བརྗོད་པ་ཡིན། །འདི་ཡིས་གསང་སྔགས་གྲུབ་པ་ནི། །སྒྲུབ་པ་པོ་རྣམས་རྣམ་རྒྱལ་འགྱུར། །གསལ་བྱེད་རྒྱས་པ་སྒྲུབ་དོན་དུ། །སངས་རྒྱས་ཉིད་སོགས་ཡང་དག་འཐོབ། །གལ་ཏེ་ཆོས་ཉིད་མི་འགྱུར་
བ། །འདི་ནི་སངས་རྒྱས་ཆོས་ཉིད་དོ། །སངས་རྒྱས་ཉིད་སོགས་ཡོངས་གཟུང་བ། །གཞན་དུ་ཐོབ་པར་མི་འགྱུར་རོ། །སེམས་ཀྱི་མི་དགེ་བྱ་མིན་ཉིད། །སྨད་པའི་ཀུན་སྤྱོད་བྱ་མིན་ཉིད། །འདི་ནི་སངས་རྒྱས་ཐམས་ཅད་ཀྱི། །ཆོས་ཉིད་མི་འགྱུར་ཀུན་ལས་བཏུས། །
གང་གཞན་བཙུན་མོ་རྣམས་ཉིད་ནི། །འདོད་པ་ཉེ་བར་ལོངས་སྤྱོད་པའོ། །ཉི་མའི་དཀྱིལ་འཁོར་སྦྱོར་བ་ནི། །ཇི་ལྟར་འོས་པར་མཆོད་བྱ་བ། །སྦྱིན་དང་ཚུལ་ཁྲིམས་དེ་བཞིན་བཟོད། །བརྩོན་འགྲུས་སུ་ཡང་བསྟན་པར་བརྗོད། །འདི་ནི་
སྔགས་པ་མཁས་པ་ཡིས། །ཆོ་གས་ལྷག་པར་གནས་པར་བྱ། །རང་གི་སྔགས་ནི་ཡང་དག་བརྗོད། །ཟླ་བ་ལྟ་བུར་སྦྱར་བར་བྱ། །དེར་ནི་རྡོ་རྗེ་ལ་བསྡུས་པས། །སླར་ཡང་སྔགས་པས་གཞུག་པར་བྱ། །གཞོགས་སུ་རིན་ཆེན་རྣམ་
བསྒོམ་པ། །ཟེའུ་འབྲུ་ཉིད་ལ་བྱ་བའོ། །དེ་རྣམས་ཁ་དོག་བསྡུས་པ་ཡིས། །རིགས་ཀྱི་དབྱེ་བ་རྟོགས་པར་བྱ། །རིགས་གསུམ་ལ་ཡང་ཐུན་མོང་དུ། །རྡོ་རྗེ་སེམས་དཔའི་ཡོན་ཏན་འབྱུང་། །དེ་ཡི་ཡི་གེ་ཡང་དག་བསྐྱེད། །གཞུག་ལ་
བསམ་གཏན་ལྷུར་ལེན་པ། །ལས་ཀྱི་དབྱེ་བ་སོགས་རྣམས་ཀྱིས། །བྱ་བའི་མཚན་ཉིད་དེ་རབ་གྲགས། །ཡེ་ཤེས་རིགས་ལ་ཨུཏྤལ་སྔོ། །བསྡུས་པ་ཤེས་པ་ལ་ཡང་གྲགས། །འདོད་མཆོད་རིགས་ལ་པད་མ་དང་། །ཆོས་ཀྱི་རིགས་
ལའང་དགོངས་པ་ཡིན། །ཆོ་ག་ཤེས་པས་ལོ་བཅུ་པའི། །བཙུན་མོ་ཡེ་ཤེས་རིགས་ལ་ཤེས། །བསྡུས་པ་ཞེས་ལ་བརྟག་བྱ་བ། །ཡོན་ཏན་མདངས་ལྡན་བཅུ་གཉིས་ལོ། །སྔགས་པས་རྟག་ཏུ་ཆོས་ཤེས་པར། །བཅུ་དྲུག་ལོ་མ་ཀུན་
ཏུ་བརྩམ། །ཀུན་དུ་འདོད་མཆོད་རིགས་ལ་ནི། །ཉི་ཤུའི་ལོ་ཅན་བསྟེན་པར་བྱ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་དཀྱིལ་འཁོར་གྱིས་དེ་སྐད་ཅེས་གསུངས་སོ། །ཇི་སྲིད་ཁུ་བ་ཡང་དག་བསྡུས། །བཅུ་

89-1-16a

གཉིས་ལོ་དང་ལྡན་པར་བྱ། །མདོར་ན་གང་གང་འདོད་གྱུར་པ། །སྣ་ཚོགས་རྒྱན་དང་ཡང་དག་ལྡན། །མེ་ཏོག་ཆུན་པོ་སོགས་བརྒྱན་པ། །ཇི་ལྟར་རིགས་པར་བྱ་བ་ཡིན། །རྣམ་པར་སྣང་མཛད་སོགས་བྱས་ནས། །
དེ་ནས་མཆོད་པ་ཡང་དག་བརྩམ། །རིགས་ཀྱི་དབྱེ་བས་ལས་རྣམས་ནི། །ཙན་དན་གུར་ཀུམ་རབ་ཏུ་བརྗོད། །བདེ་བར་བཞུགས་ཤིང་མཛེས་བྱས་པ། །དཀྱིལ་འཁོར་དེ་ཉིད་ཀྱིས་དེ་བྱ། །ཐམས་ཅད་བསྡུས་པ་དེ་བྱ་བ། །ཇི་ལྟར་དབྱེ་བ་མི་ཤེས་
ན། །གལ་ཏེ་དབྱེ་བ་དེ་ཡིས་ནི། །སངས་རྒྱས་ཀྱང་ནི་འགྲུབ་མི་འགྱུར། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱིས་དེ་སྐད་ཅེས་གསུངས་སོ། །མཚན་རྣམས་ཀུན་གྱིས་བརྒྱན་པ་ཡིས། །རྒྱན་དུ་བྱས་པའི་བུ་མོ་བདུན། །
བཅུ་དྲུག་ལོ་ཡི་རྣམ་པ་དེ། །ཇི་སྲིད་བཅྭ་བརྒྱད་ལོ་ལོན་པར། །ཤིན་དུ་རིང་མིན་ཐུང་བ་མིན། །ཕྲ་མིན་དམན་པར་སྐྱེས་པའང་མིན། །མཚུངས་མེད་གཞོན་ནུ་མ་བསྒྲུབ་བྱ། །གཞན་དུ་འགྲུབ་པར་མི་འགྱུར་རོ། །ཆོ་ག་ཤེས་པས་དེ་བཟུང་ལ། །
དེ་ཉིད་སྒྲུབ་ཐབས་ཀྱིས་བསྒྲུབ་བྱ། །འཛམ་བུའི་གླིང་དུ་དབྱངས་སོགས་ཀྱི། །མཚན་ཉིད་ཐམས་ཅད་ཀྱིས་བརྒྱན་པ། །བཅུ་དྲུག་བསྒྲུབས་ན་ཆོ་ག་ཤེས། །འགྲུབ་འགྱུར་འདིར་ནི་ཐེ་ཚོམ་མེད། །ཁྲུ་བཞི་པ་ཡི་དཀྱིལ་འཁོར་ནི། །བྲིས་
ནས་རྟག་ཏུ་བསྒྲུབ་པར་བྱ། །རིག་པའི་ཚུལ་གྱི་ཆོ་ག་ཡིས། །མཁས་པས་འབུམ་ཕྲག་ལྔ་རུ་བཟླས། །མར་མེ་ལ་སོགས་ཚད་ཀྱིས་ཏེ། །གཞན་དུ་བསྒྲུབ་བྱ་མིན་པ་ཉིད། །བཅོམ་ལྡན་འདས་སངས་རྒྱས་ཐམས་ཅད་ཀུན་དུ་སྣང་བས་དེ་
སྐད་ཅེས་གསུངས་སོ། །ཁྲུ་ཡི་ཚད་ཀྱི་དཀྱིལ་འཁོར་དུ། །རྡོ་རྗེ་སེམས་དཔའ་ཡང་དག་བསྐྱེད། །བདུད་རྩི་ཞེས་བྱའི་ཁྲོ་བོ་ཆེ། །བྱིན་ནས་ཡང་དག་ལས་རྣམས་བརྩམ། །ཆོ་ག་ཤེས་པས་དེ་རུ་ཡང་། །མཚན་མ་བཀོད་ནས་བསྒྲུབ་པར་བྱ། །
དྲི་དང་མེ་ཏོག་སོགས་མཆོད་པ། །བྱས་ནས་བསྒྲུབ་བྱ་གཞན་དུ་མིན། །མཚོ་དང་ཆུ་འགྲམ་ཡིད་འོང་དང་། །རི་བོ་དབེན་པ་རྣམས་སུ་ཡང་། །ཆོ་ག་ཤེས་པས་བསྡུས་པ་ཡིས། །རང་ཉིད་དཀྱིལ་འཁོར་བྲི་བར་བྱ། །རིན་ཆེན་ཀུན་གྱིས་

89-1-16b

མཆོད་པ་ནི། །རྡོ་རྗེ་སེམས་དཔའི་མཆོད་པ་སྟེ། །སྤྱན་རས་གཟིགས་ཀྱི་མགོན་པོ་ཡི། །མཆོད་པ་ཞེས་ནི་དེ་ལ་བཤད། །ཐུན་ཚོད་དང་པོ་ལས་འདས་པར། །གཉིས་པར་ཡང་དག་ཉེར་གནས་པས། །རྣལ་འབྱོར་པ་ཡིས་སྒྲུབ་པ་བསྒྲུབ། །དེ་ཁོ་
ཉིད་ཀྱང་འགྲུབ་པར་འགྱུར། །ཐུན་ཚོད་ཕྱེད་དུ་ཡང་དག་འབྱུང་། །ལྔ་ཡི་བར་མ་ཆད་རྣམས་སུའང་། །ཕྱག་ན་རྡོ་རྗེས་བྱིན་བརླབས་པས། །སྒྲུབ་པོ་རྟག་ཏུ་འགྲུབ་པར་འགྱུར། །རིགས་ཀྱི་བདག་པོ་ལྟར་གྱུར་ནས། །འཇིག་རྟེན་ཁམས་ནི་ཀུན་ཏུ་
ཡང་། །བཙུན་མོ་གྲངས་མེད་པོ་ཊི་ཡིས། །དངོས་གྲུབ་རྟོགས་ཕྱིར་རྣམ་པར་སྤྱོད། །དེ་ཡི་བྱ་བས་སངས་རྒྱས་ཉིད། །རི་རབ་ཀྱི་ནི་རྡུལ་ཕྲན་གྱི། །ཕྱག་ན་རྡོ་རྗེ་ཀུན་འབྱུང་བ། །སེམས་ཅན་རྣམས་ཀྱི་བྱེད་པ་ཡིན། །གཉིས་སུ་མེད་པ་མཉམ་
པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་དམ་ཚིག་ཐམས་ཅད་ཀྱི་སྒྲུབ་ཐབས་ཆེན་པོ་གསང་བའི་མཆོད་པའི་ལེའུ་སྟེ་བརྒྱད་པ་རྫོགས་སྷོ།། །། དེ་ནས་དེ་བཞིན་གཤེགས་པ་ཐམས་ཅད་སླར་ཡང་
ཡང་དག་འདུས་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་རྣམས་ཐམས་ཅད་ཀྱི་ཡེ་ཤེས་ཁོང་དུ་ཆུད་པ་ཞེས་བྱ་བའི་གསང་སྔགས་ཆེན་པོའི་དམ་ཚིག་སྒྲུབ་
པ་པོ་རྣམས་ཀྱིས་སེང་གེ་རྣམ་པར་རོལ་པའི་དམ་ཚིག་གི་ཡེ་ཤེས་བྱེད་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱ་བར་འགྱུར་བ་བསྟན་དུ་གསོལ། དེ་ནས་ཕྱག་ན་རྡོ་རྗེ་དེ་བཞིན་
གཤེགས་པ་ཐམས་ཅད་ཀྱི་བདག་པོས་དེ་བཞིན་གཤེགས་པ་དེ་རྣམས་ཀྱི་ཚིག་ཉེ་བར་གསན་ནས། རྡོ་རྗེ་དེ་རང་གི་སྙིང་གར་བཞག་སྟེ། དེ་བཞིན་གཤེགས་པ་དེ་རྣམས་ལ་གསུང་འདི་སྐད་ཅེས་བཀའ་སྩལ་ཏོ། །བཅོམ་ལྡན་
འདས་དེ་བཞིན་གཤེགས་པ་རྣམས་རྒྱུ་ཅིའི་ཕྱིར་དེ་སྐད་གསུང་། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གང་ངེས་པར་བསྟན་ནུས་པ་ནི་མེད་དོ། །ཡང་བཅོམ་ལྡན་འདས་དེ་བཞིན་གཤེགས་པ་འདི་ལ་ཡེ་

89-1-17a

ཤེས་ཀྱི་འོད་ཟེར་རྣམ་པ་སྟོང་དུ་རྣམ་པར་ཞིག་པར་གྱུར་ཏོ། །གཞན་དུ་ན་ག་ལ་འགྱུར་ཞེས་སོ། །དེ་བཞིན་དུ་ནི་དེ་ལྟ་བུ་བྱས་ནས་དེ་ཉིད་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་རྣམས་
ཐམས་ཅད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་དང་སྤྱི་བོར་ཟླ་བའི་དཀྱིལ་འཁོར་གྱི་སྟེང་དུ་རང་གི་གཟུགས་སུ་གནས་པར་བྱེད་དོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་ཡེ་ཤེས་ཀྱི་དམ་ཚིག་ཁོང་དུ་ཆུད་པ་
ཞེས་བྱ་བའི་གསང་སྔགས་ཀྱི་དམ་ཚིག་བཀའ་སྩལ་ཏོ། །གྲངས་མེད་འབྱུང་པོ་ཐམས་ཅད་ནི། །དེ་ཉིད་སྦྱར་བས་གསད་པར་བྱ། །སྐྱེ་བ་འདིར་ཉིད་སངས་རྒྱས་ཉིད། །ཐོབ་འགྱུར་འདི་ལ་ཐེ་ཚོམ་མེད། །སངས་རྒྱས་བྱེ་བ་ཡོངས་
རྫོགས་པ། །ཡེ་ཤེས་སྦྱོར་བས་གསད་པར་བྱ། །སྐྱེ་བ་འདིར་ཉིད་འགྲུབ་འགྱུར་ཏེ། །རྡོ་རྗེ་སེམས་དཔའ་ཐོབ་པར་འགྱུར། །པད་མ་ཆེན་པོའི་ཚད་ཀྱིས་ནི། །སེམས་ཅན་ཕུང་པོ་རྣམས་གཞོམ་བྱ། །ཆོས་ཀྱི་དེ་ཉིད་ཏིང་
འཛིན་གནས། །བཅོམ་པས་དངོས་གྲུབ་ཐོབ་པར་འགྱུར། །ཆོ་ག་ཤེས་པས་པད་མའི་ཚད། །འཇོམས་བྱེད་འདྲེན་པ་གསད་པར་བྱ། །འདོད་མཆོད་དེ་ཉིད་བསྒོམ་པ་ཡིས། །དེ་ཡིས་དངོས་གྲུབ་ཆེ་ཞེས་བྱ། །བཅོམ་ལྡན་འདས་
ངོ་བོ་ཉིད་དག་པས་དེ་སྐད་ཅེས་གསུངས་སོ། །ནམ་མཁའི་ཁམས་ནི་ཀུན་བཀང་བར། །མཚན་ཉིད་དེས་ནི་གསད་པར་བྱ། །དེ་ལྟར་ཡང་འདིར་སངས་རྒྱས་ཉིད། །སྐྱེ་བ་འདི་ཉིད་ཁོ་ན་ལ། །རྣམ་པ་སྣ་ཚོགས་མཐའ་དག་འཐོབ། །
སེམས་ཅན་སེམས་ནི་ཆོ་ག་ཡིས། །ཡང་དང་ཡང་དུ་སྦྱང་བར་བྱ། །གསོད་པའི་བདག་ཉིད་སོགས་འབྱུང་བ། །གཞན་དུ་འབྱོར་བར་མི་འགྱུར་ཉིད། །སེམས་ཅན་ཀུན་གྱི་སེམས་གང་ཡིན། །གསལ་བ་ཞི་བ་འོད་གསལ་བར། །སྣ་
ཚོགས་དངོས་པོས་མ་གོས་པར། །སེམས་སུ་བརྗོད་པའི་དེ་ཉིད་བསྒོམ། །ཆོ་ག་ཤེས་པས་སངས་རྒྱས་ཡུམ། །དེ་ཉིད་ཉེ་བར་ལོངས་སྤྱོད་བྱ། །གསང་སྔགས་དགེ་བ་འབྱུང་བ་ཀུན། །གཞན་དུ་གྲུབ་པ་ཉིད་མི་འགྱུར། །དེ་དེ་སྔགས་

89-1-17b

པ་མ་ལུས་པས། །མཆོག་གི་ཚོགས་ནི་ཡང་དག་དབྱུང་། །རྡོ་རྗེ་སེམས་དཔའ་དགེ་འབྱུང་བ། །གཞན་དུ་དགྱེས་པར་འགྱུར་མིན་ཉིད། །ཉེ་བར་ལོངས་སྤྱོད་བྱ་ཀུན་དུ། །ཉེ་བར་ལོངས་སྤྱོད་ཀུན་བརྩམ་བྱ། །གཞན་དུ་གལ་ཏེ་བདག་རྨོངས་
པས། །མནར་མེད་ལྟ་བུར་འཚེད་པར་འགྱུར། །ཐམས་ཅད་བདག་ཉིད་བཟའ་བར་བྱ། །ཆང་ངམ་གཞན་ཡང་རང་གིས་བཏུང་། །སངས་རྒྱས་ཀུན་གྱི་སྦྱིན་པར་འགྱུར། །མྱུར་དུ་འགྲུབ་པར་འགྱུར་བ་ཉིད། །ཤ་ཆེན་རྟག་ཏུ་བཟའ་
བར་བྱ། །ཏིལ་མར་ཡང་རུང་རང་བཏུང་བྱ། །ཆོ་ག་ཤེས་པས་བཤང་གཅིའང་རུང་། །བཟའ་བའི་བདག་ཉིད་ཅན་གྱིས་བཟའ། །རྨ་ཡི་སྒོ་ལས་བྱུང་བའང་མིན། །སངས་རྒྱས་སོགས་ལ་དབུལ་བར་བྱ། །མེ་ཏོག་དྲི་ཞིམ་སྤྲིན་ཆེན་པོ། །
བྱས་ནས་ཐམས་ཅད་དོན་ཇི་བཞིན། །སྔགས་པས་རྟག་ཏུ་སྨད་པ་ཡིས། །བཏུང་བ་ཉིད་ནི་འབྱུང་བར་བྱ། །འདི་ནི་སངས་རྒྱས་ཐམས་ཅད་ཀྱི། །ཡེ་ཤེས་བློ་ཡིས་དམ་ཚིག་བརྗོད། །བཅོམ་ལྡན་འདས་དེ་བཞིན་གཤེགས་པ་ཐམས་
ཅད་ཀྱི་རྗེས་སུ་གནང་བར་བྱེད་པས་དེ་སྐད་ཅེས་གསུངས་སོ། །སྔགས་པས་རྟག་ཏུ་དཀྱིལ་འཁོར་ནི། །བཤང་དང་གཅི་བས་སོ་སོ་རུ། །ཉལ་བར་བྱེད་པ་ལ་སོགས་སམ། །བསམ་པ་ཤིན་དུ་སྲ་བརྟན་བྱ། །བཤང་དང་གཅི་བས་
བཀང་བ་ཡི། །གྲུ་བཞི་ཀུན་དུ་བསྐྱེད་ནས་ནི། །རང་གཟུགས་དེ་ཡི་དབུས་སུ་ནི། །སྣ་རྩེར་ནས་ཀྱིས་དགང་བར་བྱ། །བཅོམ་ལྡན་སངས་རྒྱས་འབྱུང་བ་ནི། །དེས་ཆགས་བདག་པོ་དཀའ་བ་མིན། །གང་གཞན་གསུམ་པོ་བསྡུས་པ་
ཡིས། །འདིར་གཞན་སོ་སོར་གནས་དེ་མིན། །ཆོ་ག་ཤེས་པས་ཕྱིས་འདིར་ནི། །བྱ་སྟེ་གཞན་རྣམས་དང་སྦྱར་བྱ། །ཡེ་ཤེས་འཁོར་ལོས་བསྐུལ་བ་ཡིས། །དངོས་གྲུབ་ཡངས་པ་དེར་འགྲོ་འགྱུར། །རང་ངམ་གལ་ཏེ་གཞན་ཡང་
རུང་། །དེ་ཉིད་སྦྱོར་བར་མི་བྱེད་དོ། །ཇི་སྲིད་ནམ་མཁའ་ཀུན་འབྱུང་བ། །སངས་རྒྱས་ཉིད་ནི་ཐོབ་མི་བྱེད། །ང་ནི་མནར་མེད་ང་འཇིགས་རུང་། །ང་ནི་སྡུག་བསྔལ་ང་བདེ་བ། །ཞེ་སྡང་ང་ལ་དེ་བཞིན་རྨོངས། །ང་ནི་འདོད་ཆགས་སོ་སོར་

89-1-18a

གནས་ཞེས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཁོང་དུ་ཆུད་པར་བྱེད་པ་ཞེས་བྱ་བའི་མཆོག་ཏུ་གསང་ཆེན་གྱི་ལེའུ་སྟེ་
དགུ་པ་རྫོགས་སྷོ།། །། དེ་ནས་བཅོམ་ལྡན་འདས་ཕྱག་ན་རྡོ་རྗེ་སླར་ཡང་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཐོབ་པའི་འབྲས་བུ་དང་རྒྱུ་དག་གིས་རྡོ་རྗེ་སེམས་དཔའ་ཐམས་ཅད་ཀྱི་བཅུད་ཀྱི་དམ་ཚིག་གི་
གསང་ཆེན་བཀའ་སྩལ་པ། དགྲ་བཅོམ་ལ་ཕྱག་བྱ་མིན་ཉིད། །དགེ་སློང་ཡང་རུང་ཕྱག་བྱ་མིན། །སངས་རྒྱས་རྣམས་ཀྱི་སངས་རྒྱས་ཉིད། །ཐོབ་པ་ཕྱག་སྟེ་ཕྱག་བྱ་མིན། །རང་གཟུགས་སུ་ནི་རང་གཟུགས་ཀྱིས། །བསམས་ནས་དེ་ཉིད་
ཆོ་ག་ལས། །སྙིང་གར་རྡོ་རྗེ་སོགས་བྱས་ནས། །ཡང་དག་མཆོད་བྱར་དེ་སྦྱར་བྱ། །གལ་ཏེ་རྡོ་རྗེ་སེམས་དཔའང་རུང་། །ཁ་ཅིག་ཕྱིས་འདི་ལས་འགོངས་ན། །རང་གི་བྱང་ཆུབ་སེམས་སྨྲས་པས། །མགོ་བོ་ཚལ་པ་བདུན་དུ་འགས། །བྷ་གར་
ལིང་ག་རབ་བཞག་ནས། །གསང་སྔགས་ཡང་ནས་ཡང་དུ་བཟླས། །རྡོ་རྗེ་སེམས་དཔའ་ཡང་དག་བསྐྱེད། །རང་གཟུགས་ལ་ནི་བསྒོམ་པར་བྱ། །སངས་རྒྱས་སློབ་དཔོན་དེ་ཉིད་འདི། །རྟག་ཏུ་བསྲུང་བའི་ཁྱད་པར་ལས། །གཞན་དུ་
སློབ་དཔོན་རྣམས་ཀྱིས་ནི། །སངས་རྒྱས་ཉིད་ནི་ཐོབ་མི་འགྱུར། །རང་གི་གཟུགས་སུ་རྣམ་བསྒོམས་ནས། །དེ་ཉིད་ལས་ནི་ཕྲ་མོའི་གཟུགས། །བྱང་ཆུབ་སེམས་ནི་ཡང་དག་བསྐྱེད། །སློབ་དཔོན་སངས་རྒྱས་སུ་བསྒོམ་བྱ། །སྒྲུབ་པོ་
རྣམས་ཀྱི་ཡེ་ཤེས་འདི། །དེ་ཉིད་དམ་ཚིག་འབྱུང་བའོ། །དམ་ཚིག་ལ་སོགས་སྦྱོར་བ་འདིས། །སངས་རྒྱས་ཀྱིའང་འགྲུབ་མི་འགྱུར། །དམ་རྒྱ་ཤིན་དུ་རྣལ་འབྱོར་གྱིས། །རང་གི་སྙིང་གར་གཟུགས་བསྒོམ་བྱ། །དེ་ལ་རྡོ་རྗེ་ཡང་
དག་བསྐྱེད། །ཇི་སྲིད་འདོད་པས་བརྟན་པར་བྱ། །དུས་ལ་ལྟོས་པ་ལ་སོགས་ལྡན། །འདི་ནི་དམ་ཚིག་མཆོག་ཡིན་ནོ། །ཇི་སྲིད་དངོས་གྲུབ་བསྒྲུབ་བྱ་བ། །རྟག་ཏུ་དེ་ཡིས་བསྲུང་བར་བྱ། །བཅོམ་ལྡན་འདས་བྱང་ཆུབ་ཀྱི་སེམས་ཀྱིས་

89-1-18b

དེ་སྐད་ཅེས་གསུངས་སོ། །རང་གི་གཟུགས་ནི་ཡང་དག་བསྐྱེད། །རང་གཟུགས་ལ་སོགས་མཚན་ཉིད་ཀྱིས། །སྙིང་གར་བདུད་རྩིར་བརྗོད་པ་ནི། །དེ་ཡི་སྔགས་ནི་ཡང་དག་བརྩམ། །འདི་ཡང་དམ་ཚིག་ཡེ་ཤེས་ཏེ། །ཀུན་དུ་
དྲི་མ་བསལ་བ་ཉིད། །འདོད་པའི་དངོས་གྲུབ་བརྟན་པ་ནི། །བརྟུལ་ཞུགས་བརྩོན་པས་བསྲུང་བར་བྱ། །སངས་རྒྱས་ཐམས་ཅད་རྣམ་བསྒོམས་ནས། །བསྒྲུབ་བྱའི་རྣམ་པར་བསམ་པར་བྱ། །རྡོ་རྗེ་སེམས་དཔའ་ཡང་དག་བསྐྱེད། །
སྙིང་པོ་དེ་ལ་བསྒོམ་པར་བྱ། །ཆོ་ག་ཤེས་པས་འདི་རྟག་ཏུ། །དུས་གསུམ་དུ་ཡང་བསྒོམ་པར་བྱ། །གལ་ཏེ་གཞན་དུ་བཟླས་བྱས་སམ། །བསྒྲུབ་ན་དེ་ནི་མ་ཡིན་ཉིད། །རིག་མ་གཟུགས་དང་གཟུགས་སོགས་ཅན། །འབར་
བའི་ཕྲེང་བས་རྒྱན་བྱེད་པ། །སེམས་དཔའ་རིན་ཆེན་ཡང་དག་བསྐྱེད། །དེ་ཡི་ལག་ཏུའང་རྣམ་བསྒོམ་བྱ། །བསྡུས་པ་ཡིས་ནི་བསྒོམ་བཞིན་དུ། །ཇི་སྲིད་དངོས་གྲུབ་རབ་མཐོང་བྱེད། །གཞན་དུ་གལ་ཏེ་བདག་རྨོངས་ན། །
དེ་ཡི་སྦྱིན་པ་དེར་མི་འགྱུར། །ཤིན་དུ་རྣམ་བཀྲ་ཤིན་དྲི་མེད། །ཡེ་ཤེས་རིན་ཆེན་ཅོད་པན་དུ། །བཞག་ནས་སྒྲུབ་པ་ཡི་ནི་མཆོག །ས་སྟེངས་ལྷན་ཅིག་རྒྱུ་བར་བྱེད། །རྡོར་སེམས་བདག་ཉིད་དངོས་གྲུབ་ང་། །རྡོ་རྗེ་སེམས་དཔས་
བྱིན་གྱིས་བརླབས། །རྟག་ཏུ་རྡོ་རྗེ་ཡེ་ཤེས་ཆོས། །གོ་འཕང་དུ་ནི་བསྒྲལ་བར་བགྱི། །ཡེ་ཤེས་རྡོ་རྗེས་དངོས་གྲུབ་ང་། །བདུད་རྩི་ཞེས་སོགས་བྱིན་གྱིས་བརླབས། །ནམ་མཁའ་མཆོག་ཏུ་ཕྲ་བ་ཡི། །བཟང་པོ་ང་ནི་རྣམ་སྦྱོད་
བྱེད། །བཅོམ་ལྡན་འདས་རྡོ་རྗེ་འཆང་ཆེན་པོས་དེ་སྐད་ཅེས་གསུངས་སོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་དང་ཡེ་ཤེས་ཀྱི་གསང་སྔགས་ཡོངས་སུ་
དག་པའི་དེ་ཁོ་ན་ཉིད་བྱིན་གྱིས་རློབ་པ་ཞེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་དམ་ཚིག་བཀའ་སྩལ་ཏོ། །རྡོ་རྗེ་སེམས་དཔའ་སྐྱེ་སྒོམ་པ། །ཐུགས་ཀྱི་རྡོ་རྗེ་ཞེས་རབ་བརྗོད། །སེམས་ལ་དེ་ནི་བསྒོམས་ནས་ནི། །

89-1-19a

ཡེ་ཤེས་རྡོ་རྗེ་རབ་གཞུག་བྱ། །རྡོ་རྗེ་རང་བཞིན་དག་པའི་དོན། །གསུང་གི་རྡོ་རྗེར་ཡོངས་སུ་བརྟག །དག་པའི་ཡེ་ཤེས་རྣམ་བསྒོམས་པས། །སྐུ་གསུང་དག་པར་རྣམ་བསྒོམ་བྱ། །རྡོ་རྗེའི་བྱིན་རློབ་ཤིན་དུ་གསལ། །མི་ཕྱེད་རྡོ་རྗེའི་
སྐུ་ཉིད་དོ། །སངས་རྒྱས་སྐུ་ཡི་རང་བཞིན་ཉིད། །ཆོ་ག་ཤེས་པས་བྱིན་གྱིས་བརླབ། །རྡོ་རྗེ་འདི་ཡིས་བྱིན་བརླབས་པ། །འདི་ཡིས་བྱང་ཆུབ་ཐོབ་པར་བྱེད། །ཆོ་ག་ཤེས་པས་ཟླ་དྲུག་གིས། །སངས་རྒྱས་ཉིད་འདིར་ཐོབ་པར་གྱིས། །ཆགས་
སྐྱེས་ཆོས་ཀྱིས་མ་གོས་པའི། །རྡོ་རྗེ་དེ་རྣམས་ཐམས་ཅད་འབྱུང་། །དེ་ལྟར་དེ་ཉིད་ཆོག་བྱས་ནས། །དངོས་གྲུབ་ཐམས་ཅད་བསྡུས་པ་ཡིན། །དེ་ནས་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཀུན་དུ་སྤྱོད་པའི་དམ་
ཚིག་བཀའ་སྩལ་ཏོ། །མི་བསླུ་བ་ཡི་ཚུལ་གྱིས་ནི། །རྡོ་རྗེ་ཡེ་ཤེས་གསུམ་འབྱུང་བས། །དེ་ཀུན་ཉེ་བར་ལོངས་སྤྱོད་པ། །སངས་རྒྱས་ཀུན་སྤྱོད་ཉིད་དུ་འགྱུར། །ནམ་མཁའི་ཁམས་ནི་ཀུན་བཀང་བའི། །སངས་རྒྱས་རྣམས་ནི་
གལ་ཏེ་བཅོམ། །སྐྱེ་བ་འདིར་ཉིད་སངས་རྒྱས་ཉིད། །རྡོ་རྗེ་སློབ་དཔོན་བསྡུས་པའོ། །ཉི་མའི་དཀྱིལ་འཁོར་དབུས་སུ་ནི། །རྡོ་རྗེའི་གཟུགས་ནི་ཡང་དག་བསྐྱེད། །མཁའ་ཁམས་སངས་རྒྱས་གཟུགས་ཀྱིས་ནི། །ཡོངས་སུ་གང་བར་རྣམ་
བསྒོམ་བྱ། །སྙིང་གར་སྔགས་ནི་ཡང་དག་བསྐྱེད། །མཉམ་པར་བཞག་པས་བསྐུལ་བར་བྱ། །ཀུན་དུ་དགྱེས་པའི་དམ་ཚིག་གང་། །རྡོ་རྗེ་སློབ་དཔོན་རྟག་བསྒོམ་བྱ། །ཉི་མའི་དཀྱིལ་འཁོར་དབུས་གནས་པར། །རང་གི་སྔགས་ནི་ཡང་
དག་བསྐྱེད། །མཁའ་ཁམས་གཟུགས་ཀྱིས་ཡང་དག་བཀང་། །སྙིང་གར་ཐམས་ཅད་རྣམ་བསྒོམ་བྱ། །དེ་ཉིད་དེ་ནི་བྱེད་བཞིན་པས། །སངས་རྒྱས་བཀའ་ཉིད་གོ་འཕང་གནས། །ཟླ་བའི་དཀྱིལ་འཁོར་དབུས་གནས་པར། །
རང་གི་སྔགས་ནི་ཡང་དག་བསྐྱེད། །ཆོ་ག་ཤེས་པས་གཟུགས་རྣམ་པར། །གནས་ལྔ་རྣམས་སུ་བསྒོམ་པར་བྱ། །བྱང་ཆུབ་སེམས་ནི་ཡང་དག་བསྐྱེད། །དེ་ཀུན་བསྐུལ་བྱ་བརྟུལ་ཞུགས་ཅན། །ཆོས་ཀྱི་དཀྱིལ་འཁོར་དབུས་སུ་ནི། །

89-1-19b

རང་གི་སྔགས་ནི་ཡང་དག་བསྐྱེད། །ཅོད་པན་དུ་དེ་རྣམ་བསྒོམས་ནས། །མཆོད་པར་བྱ་ཞིང་བསྒོམ་པར་བྱ། །སངས་རྒྱས་སློབ་དཔོན་བདེ་ལྡན་གང་། །དེ་ཉིད་རྣལ་འབྱོར་པའི་བདེ་དེ། །ཀུན་དུ་སྐྲག་པ་ཀུན་སྤངས་པའི། །སྔགས་པ་སེང་གེ་
བཞིན་དུ་སྤྱོད། །སྐྱེ་བ་འདིར་ཉིད་སངས་རྒྱས་ཉིད། །སྐད་ཅིག་དེ་ལ་ངེས་སྦྱོར་བྱེད། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གིས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་
བའི་རྟོག་པའི་རྒྱལ་པོ་ཆེན་པོར་དམ་ཚིག་གི་ལེའུ་བཅུ་པའོ།། །། དེ་ནས་དེ་བཞིན་གཤེགས་པ་ཐམས་ཅད་བསྡུ་བས་བྱོན་ནས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་དང་ཡེ་ཤེས་ཀྱི་མཆོད་
པའི་སྤྲིན་གྱི་བཀོད་པས། བཅོམ་ལྡན་འདས་ཕྱག་ན་རྡོ་རྗེ་ལ་ཡང་དག་པར་མཆོད་དེ་འདི་སྐད་ཅེས་གསོལ་ཏོ། །དངོས་གྲུབ་ཐམས་ཅད་བྱེད་བསམ་གཏན། །བསམ་གཏན་དཀྱིལ་འཁོར་མཆོག་གྱུར་པ། །དཀྱིལ་འཁོར་ཆེན་པོ་
མཆོག་གྱུར་པ། །དེ་ཉིད་བཅོམ་ལྡན་བཤད་དུ་གསོལ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་ཀྱི་གསོལ་བ་འདེབས་པར་བྱེད་པའི་ཚིག་གསན་ནས། དེ་བཞིན་གཤེགས་པ་ཐམས་ཅད་ཀྱི་དམ་
ཚིག་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དམ་ཚིག་ཐམས་ཅད་ཀྱི་དངོས་གྲུབ་ཀྱི་ཡེ་ཤེས་ཀུན་དུ་སྤྱོད་པའི་ཕྱིར་དཀྱིལ་འཁོར་ཆེན་པོ་འདི་སྟོན་པར་མཛད་དོ། །དེ་ནས་ཡང་དག་བཤད་བྱ་བ། །
དཀྱིལ་འཁོར་ཆེན་པོ་དམ་པ་སྟེ། །རྡོ་རྗེ་ཡེ་ཤེས་ལྟ་བུ་སྟེ། །སངས་རྒྱས་བྱང་ཆུབ་རབ་གསལ་བྱེད། །འོ་མ་དང་ཞོར་བསམ་བྱ་ཞིང་། །པད་མ་ཕྲ་མོས་ཉེ་བར་མཛེས། །སྣ་ཚོགས་མེ་ཏོག་ཆུན་པོས་གང་། །རབ་ཏུ་འབད་
པས་བསྒོམ་པར་བྱ། །ལོགས་བཞི་པ་དང་ཟུར་བཞི་པར། །མཁས་པས་རབ་ཏུ་བརྟག་པར་གྱིས། །ཛམ་བུ་ནཱ་ད་ཡང་དག་བྱུང་། །དེ་ལ་དབུས་སུ་བསྒོམ་པར་བྱ། །ཁྲུ་ནི་བཅུ་དྲུག་ཏུ་བྱ་བ། །སངས་རྒྱས་སློབ་དཔོན་ཆོ་ག་

89-1-20a

གནས། །ཆོ་ག་ཤེས་པས་གྲྭ་རྣམས་སུ། །རྩེ་མོ་ལྔ་པ་རྣམ་བསྒོམ་བྱ། །ཇི་ལྟར་རིགས་པའི་གནས་ལྔ་རུ། །ཟླ་བ་ཡི་ནི་དཀྱིལ་འཁོར་བརྟག །དཀྱིལ་འཁོར་རྣམས་ནི་སྒོམ་བྱེད་པ། །ལག་པ་གཅིག་ཏུ་ཡང་དག་
བསྐྱེད། །ཇི་ལྟར་རིགས་པར་ཤར་གྱི་ནི། །མི་སྐྱོད་ཡོངས་སུ་བརྟག་པར་བྱ། །ཆོ་ག་ཤེས་པས་ལྷོ་ཡི་ནི། །དེང་ནི་རིན་ཆེན་དགོད་པར་བྱ། །ནུབ་ཀྱི་དཔག་མེད་ཅེས་བརྗོད་པ། །བྱང་དུ་དོན་ཡོད་གྲུབ་པའོ། །ཆོ་ག་ཤེས་པས་སེར་པོའི་མདོག །
དེ་ཉིད་སྒོམ་པས་བསྒོམ་པར་བྱ། །དབུས་སུ་ཁྱབ་བདག་རྣམ་སྣང་མཛད། །ཡང་དག་བསྐྱེད་ནས་བསྒོམ་པར་བྱ། །སློབ་མའི་རྣམ་པར་ཐམས་ཅད་དུ། །ཆོ་ག་ཤེས་པས་རྣམ་བསྒོམ་བྱ། །རིག་མ་ཆེན་མོ་སྤྱན་ལ་སོགས། །གྲྭ་རྣམས་ཉིད་དུ་
རྣམ་བསྒོམ་བྱ། །ཆོ་ག་ཤེས་པས་བདུད་རྩི་ཞེས། །སྒོ་རྣམས་ཀུན་དུ་བསྒོམ་པར་བྱ། །དེ་རྣམས་ཁ་དོག་བསྡུས་པ་ཡིས། །སོ་སོ་སོ་སོར་རྟོག་པར་བྱ། །དེ་རྣམས་ཀུན་གྱི་གཟུགས་རྣམས་སུ། །རྡོ་རྗེ་སེམས་དཔར་རྣམ་བསྒོམ་བྱ། །འོད་
ཟེར་ལྔ་པོ་ཡང་དག་བསྐྱེད། །འདོད་ཡོན་ལྔ་རྣམས་བསྡུས་པ་ཡིས། །ཁྱབ་བདག་ལ་ནི་དབུལ་བར་བྱ། །སངས་རྒྱས་སློབ་དཔོན་ཆོ་ག་ལས། །མཁའ་ཁམས་སངས་རྒྱས་ཀུན་གྱིས་ནི། །ཡོངས་སུ་གང་བར་རྣམ་བསྒོམ་བྱ། །དེས་ནི་ཁུ་
བ་ཐམས་ཅད་ཀྱིས། །མཆོད་པ་བསྒོམ་པར་གྲགས་པ་ཡིན། །དམ་ཚིག་ཐམས་ཅད་ཀྱི་དངོས་གྲུབ་ཅེས་བྱ་བ་བསམ་གཏན་གྱི་དཀྱིལ་འཁོར་རྫོགས་སྷོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་
གདོན་མི་ཟ་བའི་དམ་ཚིག་ཅེས་བྱ་བའི་བསམ་གཏན་གྱི་དཀྱིལ་འཁོར་གསུངས་པ། བློ་ལྡན་སངས་རྒྱས་སློབ་དཔོན་གྱིས། །དེ་བཞིན་ཉིད་དུ་ཐམས་ཅད་བྱ། །ཕྲ་མོའི་དཀྱིལ་འཁོར་ཚུལ་གྱིས་ནི། །ཐམས་ཅད་དེར་ནི་རྣམ་བསྒོམ་
བྱ། །ཤར་གྱི་ཆོས་རྣམས་ཀུན་གྱི་མཆོག །རྡོ་རྗེ་སེམས་དཔའ་དགོད་པར་བྱ། །སྔགས་པས་ལྷོ་རུ་རྟག་པ་ནི། །རྡོ་རྗེ་སེམས་དཔའ་དགོད་པར་བྱ། །ནུབ་དུ་ཡེ་ཤེས་རྫོགས་བྱང་ཆུབ། །སངས་རྒྱས་སློབ་དཔོན་དགོད་པར་བྱ། །བྱང་

89-1-20b

དུ་ཐམས་ཅད་ཀུན་སྐྲག་པ། །རྡོ་རྗེ་སེམས་དཔའ་དགོད་པར་བྱ། །དབུས་སུ་ཁམས་གསུམ་པ་མཉམ་པ། །རྡོ་རྗེ་གཟུགས་སུ་རྣམ་བསྒོམ་བྱ། །དཀར་པོའི་མདོག་ཏུ་རྣམ་བསྒོམས་ནས། །ནག་པོ་དབུས་སུ་བསྒོམ་པར་བྱ། །བཙུན་མོ་རྣམས་ནི་ཁ་
ཕྱེ་ནས། །དེ་ཉིད་ལ་ནི་རྡོ་རྗེ་གཞུག །རྡོ་རྗེ་སེམས་དཔའི་དབང་ཕྱུག་མ། །གནས་བཞི་རྣམས་སུ་འབད་པས་སོ། །ཇི་ལྟར་རིགས་པར་མདོག་ཀུན་དང་། །སངས་རྒྱས་གཟུགས་སུ་རྣམ་བསྒོམ་བྱ། །ཆོ་ག་ཤེས་པས་ཐམས་ཅད་དུ། །
ཁྲོ་བོའི་མཆོག་ནི་རྣམ་པར་བསམ། །སྔགས་པས་འདོད་ཡོན་ལྔ་རྣམས་ཀྱིས། །སྔགས་ཀྱི་མཆོད་པ་ཡང་དག་བརྩམ། །མཁའ་ཁམས་རྡོ་རྗེ་སེམས་དཔས་ནི། །ཡོངས་སུ་གང་བར་རྣམ་བསྒོམ་བྱ། །རྡོ་རྗེ་ཀུན་གྱི་ཁུ་སོགས་ཀྱིས། །
མཆོད་པ་རུ་ནི་རྣམ་བསམ་བྱ། །གདོན་མི་ཟ་བའི་དམ་ཚིག་ཅེས་བྱ་བ་བསམ་གཏན་གྱི་དཀྱིལ་འཁོར་རྫོགས་སྷོ།། །།དེ་ནས་ཕྱག་ན་རྡོ་རྗེས་སླར་ཡང་དེ་བཞིན་གཤེགས་པ་ཐམས་ཅད་ཀྱི་དམ་ཚིག་འབྱུང་བ་རྡོ་རྗེ་བྱིན་
གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། འདོད་ཆགས་ཆེན་པོའི་ཆོས་ཞེས་བྱ་བ་དེ་བཞིན་གཤེགས་པའི་དཀྱིལ་འཁོར་འདི་གསུངས་པ། ཆོས་ཀྱི་དཀྱིལ་འཁོར་ཚུལ་གྱིས་ནི། །ཐམས་ཅད་དེར་ནི་རྣམ་
བསམ་བྱ། །ཆོ་ག་ཤེས་པས་ཤར་གྱི་ནི། །ཆོས་འཆང་འབར་བ་དགོད་པར་བྱ། །ལྷོ་རུ་ཡེ་ཤེས་ཆོས་ནི་དེང་། །སྒོམ་པའི་བདག་ཉིད་ཅན་གྱིས་བསྒོམ། །ནུབ་ཏུ་པད་མ་ལོངས་སྤྱོད་པ། །བྱང་དུ་ཆོས་ཀྱི་དབྱིངས་ལས་སྐྱེས། །ཇི་ལྟར་རིགས་
པར་བསྒོམ་བྱས་ནས། །དབུས་སུ་ཆོས་ཀྱི་དབང་ཕྱུག་དགོད། །དཀར་པོའི་མདོག་ཏུ་རྣམ་བསྒོམས་ནས། །དབུས་སུ་དམར་པོ་རྣམ་པར་བསྒོམ། །ཆོ་གས་ཆོས་ཀྱི་དབང་ཕྱུག་མ། །གྲྭ་བཞི་རུ་ནི་བསྒོམ་པར་བྱ། །ཁྲོ་བོ་ཆེན་པོ་རྟ་ཞེས་
པ། །སྒོ་རྣམས་ཉིད་དུ་རྣམ་བསམ་བྱ། །ཆོས་ཀྱི་རྣལ་འབྱོར་ཐམས་ཅད་ལ། །འདོད་ཡོན་ལྔ་ཡིས་མཆོད་པར་བྱ། །རྡོ་རྗེ་སེམས་དཔའ་ཡང་དག་བསྐྱེད། །གཞོགས་སུ་རྣམ་པར་བསྒོམ་པར་བྱ། །ཁུ་བ་ཉིད་ཀྱིས་ནམ་མཁའི་ཁམས། །

89-1-21a

རིན་ཆེན་གང་བར་རྣམ་བསམ་བྱ། །ཇི་ལྟར་རིགས་པར་ཆོས་ཀྱི་སྐུ། །དེ་ཉིད་སྦྱོར་བས་མཆོད་པར་བྱ། །འདོད་ཆགས་ཀྱི་ཆོས་ཞེས་བྱ་བའི་བསམ་གཏན་ཆེན་པོའི་གསང་ཆེན་རྫོགས་སྷོ།། །།
དེ་ནས་ཕྱག་ན་རྡོ་རྗེས་སླར་ཡང་དམ་ཚིག་ཐམས་ཅད་འབྱུང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདོད་ཆགས་ཐམས་ཅད་ཀྱི་ཚུལ་ཞེས་བྱ་བའི་བསམ་གཏན་གྱི་དཀྱིལ་འཁོར་ཆེན་པོ་འདི་གསུངས་སོ། །
སྐུ་ཡི་དཀྱིལ་འཁོར་ཚུལ་གྱིས་ནི། །ཐམས་ཅད་དེར་ནི་རྣམ་བསམ་བྱ། །ཤར་དུ་དགྲ་རྣམས་ངེས་འཇོམས་པ། །སྣ་ཚོགས་མདོག་ཏུ་རྣམ་བསམ་བྱ། །ལྷོ་རུ་མེ་ཏོག་ཡང་དག་སྦྱོར། །ངོ་བོ་ཉིད་ཀྱིས་བསྒོམ་པར་བྱ། །ནུབ་ཏུ་ཡེ་
ཤེས་ཡང་དག་དག །ཞི་བའི་གཟུགས་ནི་རྣམ་བསམ་བྱ། །བྱང་དུ་རྣམ་རྒྱལ་ཞེས་བྱ་ཡང་། །བརྩོན་པའི་བསམ་པས་བསྒོམ་པར་བྱ། །དབུས་སུ་འདོད་མཆོད་ཡང་དག་སྦྱོར། །རང་གི་གཟུགས་ཀྱི་སྒོམ་པ་ལས། །ཆོ་གས་འདོད་པའི་
དབང་ཕྱུག་མར། །བསམ་བྱ་སེམས་པའི་བདག་ཉིད་ཅན། །ཆོ་ག་ཤེས་པས་པད་མའི་ཕྱག །གྲྭ་རྣམས་ཉིད་དུ་རྣམ་བསམ་བྱ། །འདོད་ཡོན་ཀུན་གྱིས་མཆོད་པ་ལ། །མཆོད་པར་བྱས་ནས་མཆོད་པར་བྱ། །རྡོ་རྗེ་སེམས་དཔའ་དེ་ཕྱུང་
ནས། །གཞོགས་སུ་རྣམ་པར་བསམ་པར་བྱ། །ཁུ་བ་འདོད་མཆོད་ཚུལ་གྱིས་ནི། །བསྐྱེད་ནས་ཁྱབ་བདག་མཆོད་པར་བྱ། །འདོད་པའི་སློབ་དཔོན་གྱིས་བརྟག་བྱ། །མཆོད་པ་ལ་སོགས་ཡོངས་སུ་གཟུང་། །འདོད་ཆགས་
ཐམས་ཅད་ཀྱི་དམ་ཚིག་བསམ་གཏན་གྱི་དཀྱིལ་འཁོར་ཆེན་པོ་རྫོགས་སྷོ།། །།འདི་ཉིད་ཀྱི་ནི་དཀྱིལ་འཁོར་དུ། །སངས་རྒྱས་སློབ་དཔོན་རྟག་ཏུ་བྱ། །ཐམས་ཅད་དུ་ཡང་དཀྱིལ་འཁོར་དུ། །རྡོ་རྗེའི་སློབ་དཔོན་གྱིས་
བསྒོམས་ནས། །འདོད་པའི་སློབ་དཔོན་ཇི་གསུངས་པས། །བྱའོ་དཀྱིལ་འཁོར་གཞན་དུ་མིན། །དེ་ནས་ཕྱག་ན་རྡོ་རྗེས་སླར་ཡང་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་གྱི་སྙིང་པོ་ཀུན་དུ་སྐུལ་བར་བྱེད་པའི་དེ་ཁོ་ན་ཉིད་བྱིན་

89-1-21b

གྱིས་རློབ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གཙུག་ཏོར་ཐམས་ཅད་ཀྱི་སྙིང་པོ་སྐུལ་བ་ཞེས་བྱ་བའི་བསམ་གཏན་གྱི་དཀྱིལ་འཁོར་འདི་གསུངས་སོ། །ཞོ་རུ་བྱས་པ་བསམས་ནས་ནི། །པད་མ་མཛེས་པ་
སོགས་བརྒྱན་པ། །ཤེལ་དེ་ཡི་ནི་དབུས་སུ་ནི། །ཐམས་ཅད་དུ་ནི་རྣམ་བསམ་བྱ། །ལོགས་བཞི་པ་ལ་གྲྭ་བཞི་པ། །སྒོ་བཞི་པར་ནི་རབ་ཏུ་བརྟག །ཆོས་ཀྱི་དཀྱིལ་འཁོར་རྣམ་པར་ནི། །དེ་ལ་དབུས་སུ་བསྒོམ་པར་བྱ། །སྔགས་
པ་ཆོ་ག་ཤེས་པས་དབུས། །འཁོར་ལོས་བསྒྱུར་བ་དགོད་པར་བྱ། །ཆོ་ག་ཤེས་པས་རྣམ་སྣང་མཛད། །ཤར་ཉིད་དུ་ནི་རྣམ་བསྒོམ་བྱ། །ཆོ་ག་ཤེས་པས་བྱང་དུ་ནི། །གྱེན་འཕགས་ཞེས་བྱ་རྣམ་བསྒོམ་བྱ། །ལྷོ་རུ་དཔག་མེད་ཞེས་
བྱ་ནི། །བསམ་པ་བརྟན་པས་བསྒོམ་པར་བྱ། །ཇི་ལྟར་རིགས་པར་ནུབ་ཏུ་ནི། །གཟི་བརྗིད་ཕུང་པོ་རྣམ་བསྒོམ་བྱ། །བཙུན་མོའི་རྣམ་པ་མཚུངས་པ་ཡི། །ཆོས་ཀྱི་གཟུགས་ནི་ཡང་དག་བསྐྱེད། །མཚན་མ་རྡོ་རྗེ་སོགས་མཚན་
ཉིད། །ཆོ་ག་ཡིས་ནི་དེ་རྣམས་སྦྱིན། །རིག་མ་ཆེན་མོ་སྤྱན་ལ་སོགས། །གྲྭ་རྣམས་ཀུན་དུ་བསམ་པར་བྱ། །གཞན་གྱིས་མི་ཐུབ་ཁྲོ་བོ་ཆེ། །སྒོ་དང་སྒོར་ནི་རྣམ་བསྒོམ་བྱ། །རྡོ་རྗེ་སེམས་དཔའ་ཡང་དག་དབྱུང་། །དེ་ཁོ་ཉིད་གང་སྦྱར་
བར་བྱ། །ཡེ་ཤེས་སྦྱོར་བས་ཐམས་ཅད་ལ། །འདོད་ཡོན་ལྔ་ཡིས་མཆོད་པར་བྱ། །ཁུ་བ་དེ་ལ་ཡང་དག་བསྐྱེད། །མཆོད་པར་བྱེད་པ་བསྐྱེད་པར་བཤད། །མཁའ་ཁམས་གཙུག་ཏོར་ཐམས་ཅད་ཀྱིས། །ཡོངས་སུ་གང་བར་
རྣམ་བསྒོམ་བྱ། །གཙུག་ཏོར་གྱི་སྙིང་པོ་ཀུན་དུ་བསྐུལ་བར་བྱེད་པའི་དཀྱིལ་འཁོར་རྫོགས་སྷོ།། །།དེ་ནས་ཕྱག་ན་རྡོ་རྗེས་སླར་ཡང་འདོད་པའི་ཁམས་ཐམས་ཅད་དུ་མཉམ་པར་འཇུག་པ་འབྱུང་བའི་རྡོ་རྗེ་
བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རིགས་ཐམས་ཅད་ཀྱི་ཐུན་མོང་གི་སེང་གེ་རྣམ་པར་རོལ་པ་ཞེས་བྱ་བའི་བསམ་གཏན་གྱི་དཀྱིལ་འཁོར་ཆེན་པོ་འདི་གསུངས་པ། ཆོ་ག་ཤེས་པས་སྣ་

89-1-22a

ཚོགས་མདོག །འོ་མ་དང་ཞོར་རྣམ་བསྒོམ་བྱ། །རིན་ཆེན་བཞི་ཡི་རང་བཞིན་དབུས། །རི་བོ་དེ་ལ་བསྒོམ་པར་བྱ། །ལོགས་བཞི་པ་ལ་གྲྭ་བཞི་པ། །སྒོ་བཞི་པར་ནི་རབ་ཏུ་བརྟག །པད་མ་ཨུཏྤལ་ཀུན་དུ་བཀྲམ། །
གཞོགས་རྣམས་སུ་ནི་རྣམ་པར་བསམ། །རིན་ཆེན་ཀུན་གྱི་གདན་དང་ནི། །རྟག་ཏུ་ཟླ་བའི་དཀྱིལ་འཁོར་ཉིད། །སངས་རྒྱས་སློབ་དཔོན་ཁྱད་པར་གྱིས། །བསམ་གཏན་བརྩོན་པས་སྦྱོར་བར་བྱ། །སྔགས་པས་ཉི་མའི་དཀྱིལ་འཁོར་
ཅན། །དེ་ཡི་དབུས་སུ་བསྒོམ་པར་བྱ། །མཐེ་ཆུང་མཐོ་ལས་འདས་པ་ལས། །སོར་བཞིའི་ངོས་དང་གྲྭ་རྣམས་སུ། །ངོས་རྣམས་སུ་ནི་རྟག་ཏུ་བྱ། །བདུད་རྩི་ཞེས་ནི་བསྒོམ་པར་བྱ། །འབར་བའི་ཕྲེང་བ་ལ་སོགས་གང་། །མི་སྡུག་
མཆོག་གཙིགས་འཇིགས་པར་བྱེད། །སྔགས་པ་ཟླ་བའི་དཀྱིལ་འཁོར་ཅན། །གནས་ལྔ་རྣམས་སུ་རྣམ་བསྒོམ་བྱ། །དབུས་སུ་རྡོ་རྗེ་རལ་གྲི་ནི། །ཤིན་དུ་རྣམ་འབྱེས་ཤིན་དུ་མཛེས། །འོད་ཟེར་འབར་བས་འཁྲུགས་ཤིང་འབར། །
པད་མ་རཱ་ག་དབང་པོ་མཚུངས། །འོད་དཀར་འབར་བའི་ཕྲེང་བ་གསལ། །ཁ་དོག་དཀར་པོ་ཤིན་དུ་མཛེས། །རལ་པའི་ཅོད་པན་ཀུན་རྫོགས་པ། །སྣ་ཚོགས་རྒྱན་གྱིས་བརྒྱན་གྱུར་པ། །སངས་རྒྱས་སློབ་དཔོན་ཆོ་ག་ཡིས། །ཤར་ཕྱོགས་སུ་ནི་
རྣམ་བསྒོམ་བྱ། །རྡོ་རྗེ་སེམས་དཔའ་ཡང་དག་བསྐྱེད། །སྣ་ཚོགས་རིན་ཆེན་རྣམ་བརྒྱན་པ། །འབར་བའི་ཕྲེང་བས་འཁྲུགས་ཤིང་འབར། །ཨུཏྤལ་སྔོན་པོ་དང་མཚུངས་པ། །ལྷོ་རུ་རྟག་ཏུ་སློབ་དཔོན་གྱིས། །བསྒོམ་བྱ་གཞན་དུ་མི་བསམ་མོ། །
ཆོས་ཀྱི་རྡོ་རྗེ་ཡང་དག་བསྐྱེད། །པད་མ་རཱ་ག་མཚུངས་པའི་འོད། །མེ་ཏོག་ཆུན་པོ་དམར་པོས་གང་། །ནུབ་ཕྱོགས་སུ་ནི་བསྒོམ་པར་བྱ། །འོད་ཟེར་འབར་བས་རྣམ་བརྒྱན་པའི། །འདོད་པའི་རྡོ་རྗེ་ཡང་དག་བསྐྱེད། །གསེར་དག་གི་ནི་ཡེ་ཤེས་
རྫོགས། །བྱང་དུ་ཡང་ནི་བསྒོམ་པར་བྱ། །གྲྭ་རུ་ལྷ་མོ་རི་དབང་ཕྱུག །ཇི་ལྟའི་གནས་སུ་རྣམ་བསམ་བྱ། །བུད་མེད་མཚན་ཉིད་ཡོངས་རྫོགས་པ། །མི་མོའི་རྒྱན་གྱིས་བརྒྱན་གྱུར་པ། །ཆགས་དང་ཆགས་བྲལ་སྐད་ཅིག་མ། །སྔགས་པས་

89-1-22b

ཡིད་འོང་བསྒོམ་པར་བྱ། །སྒོ་ཡི་ཕྱོགས་རྣམས་ཐམས་ཅད་དུ། །རིག་མ་གཞན་གྱིས་མི་ཐུབ་མ། །གཡས་བརྐྱང་ཞབས་ཀྱིས་མནན་པ་ཡི། །འཇིག་རྟེན་གསུམ་འཇིག་འཕྲོག་པ་མོ། །དེ་རྣམས་ཐམས་ཅད་རང་གཟུགས་སུ། །རྡོ་རྗེ་
སེམས་དཔའ་རྣམ་བསྒོམ་བྱ། །སངས་རྒྱས་སློབ་དཔོན་དེ་རྟག་ཏུ། །འདོད་ཡོན་ལྔ་ཡི་མཆོག་རྣམས་ཀྱིས། །འབུལ་བར་བྱེད་པ་རྟག་ཏུ་བྱ། །དེ་ལྟས་དགྱེས་འགྱུར་གཞན་དུ་མིན། །རང་གི་ཁུ་བ་ཡང་དག་བསྐྱེད། །མཆོད་པ་བསྐྱེད་པར་
བཤད་པ་ཡིན། །གཟུགས་བརྙན་དེས་ནི་ནམ་མཁའི་དབྱིངས། །ཡོངས་སུ་གང་བར་རྣམ་བསྒོམ་བྱ། །དཔག་བསམ་ལྗོན་ཤིང་རིན་ཆེན་ཆེ། །ཡིད་བཞིན་ནོར་བུ་ཤིན་དུ་མཛེས། །རིགས་ཀྱི་དབྱེ་བ་ཤེས་པ་ཡིས། །དེ་རྣམས་ཁ་དོག་རྣམ་
བསྒོམ་བྱ། །ཇི་སྐད་གསུངས་པའི་གཟུགས་དེས་ནི། །དབང་བསྐུར་བ་ནི་གཟུང་བར་བྱ། །ཆོ་ག་ཤེས་པས་དེ་ཡི་ཚེ། །བྱ་བ་བུམ་པ་བསམ་པར་བྱ། །སངས་རྒྱས་གཟུགས་སོགས་ཐམས་ཅད་ཀྱིས། །མཆོད་བཞིན་པར་ནི་རྣམ་པར་བསམ། །
ཡང་དག་སྦྱོར་བའི་མཚན་ཉིད་འདིས། །ཤིན་དུ་དབང་བསྐུར་མཉམ་པ་ཅན། །སྐྱེ་བ་འདིར་ཉིད་སངས་རྒྱས་ཉིད། །ཐོབ་སྟེ་འདིར་ནི་ཐེ་ཚོམ་མེད། །རང་སྔགས་ཁྲོ་བོ་མཚུངས་པ་ཡི། །ཕན་པའི་སྦྱིན་པ་སྦྱིན་པར་བྱེད། །དེ་ནི་དུས་ཡུན་མི་
རིང་བས། །དངོས་གྲུབ་སྐྱེ་བ་ལྟ་བུར་ཐོབ། །བློ་ལྡན་སངས་རྒྱས་སློབ་དཔོན་གྱིས། །རྟག་ཏུ་དེ་ཡི་དམ་ཚིག་ནི། །གང་ཁོ་ན་ཡི་རིགས་འབྱུང་བ། །འབད་པ་ཡིས་ནི་འདི་ལྟར་འོས། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པ་ཆེན་
ཆེན་པོར་བསམ་གཏན་ཆེན་པོའི་ལེའུ་སྟེ་བཅུ་གཅིག་པའོ།། །། དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་ནམ་མཁའི་ཁམས་ཐམས་ཅད་ཡེ་ཤེས་ཀྱི་སྣང་བས་ཡང་དག་པར་སྐུལ་བར་བྱེད་པ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ། དམ་ཚིག་ཆེན་པོའི་དེ་ཁོ་ན་ཉིད་བསྐྱེད་པར་བྱེད་པའི་སྔགས་འདི་གསུངས་པ། ཨོཾ་སརྦ་ཏ་ཐཱ་ག་ཏ་ཛྙཱ་ནོད་བྷཱ་བཱ་ཡ་སྭཱ་ཧཱ། སྔགས་འདི་གསུངས་མ་ཐག་ཏུ་སངས་རྒྱས་ཀྱི་ཞིང་གྲངས་མེད་པ་

89-1-23a

བརྗོད་དུ་མེད་པའི་ཡང་བརྗོད་དུ་མེད་པ་བརྒྱ་སྟོང་ཕྲག་གཡོས་ཤིང་རབ་ཏུ་གཡོས་སོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་ཀུན་ནས་ཀུན་དུ་སྣང་བའི་དམ་ཚིག་རྡོ་རྗེ་
བྱིན་གྱིས་རློབ་པ་ཞེས་བྱ་བའི་འདི་ལ་སྙོམས་པར་ཞུགས་ཏེ་སྔགས་འདི་གསུངས་སོ། །ཨོཾ་སྃ་གྲ་ཧ་ཛྙཱ་ནོདྦྷཱ་བཱ་ཡ་སྭཱ་ཧཱ། དེ་ཁོ་ན་ཉིད་ཀྱི་སྙིང་པོ་ཆེན་པོ་འདི་གསུངས་མ་ཐག་ཏུ། དེ་ནས་གང་ནམ་མཁའི་ཁམས་ཐམས་ཅད་འོད་ཟེར་འབར་
བ་ཆེན་པོས་ཀུན་དུ་སྣང་ཞིང་ཡང་དག་པར་མཐོང་བར་གྱུར་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་རང་བཞིན་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྔགས་འདི་གསུངས་སོ། །ཨོཾ་དྷརྨ་ཛྙཱ་ནོདྦྷཱ་བཱ་ཡ་
སྭཱ་ཧཱ། བཅོམ་ལྡན་འདས་ཀྱིས་འདི་གསུངས་མ་ཐག་ཏུ། སངས་རྒྱས་ཀྱི་ཞིང་གི་མཐར་ཐུག་པར་ཡེ་ཤེས་ཀྱི་རྗེས་སུ་འཐུན་པས་ཀུན་དུ་སྣང་བར་གྱུར་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་རང་བཞིན་གྱིས་དཔལ་ཀུན་
འབྱུང་བ་ཡང་དག་པར་འབྱུང་བ་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྔགས་འདི་གསུངས་སོ། །ཨོཾ་ཀཱ་མ་ཛྙཱ་ནོདྦྷཱ་བཱ་ཡ་སྭཱ་ཧཱ། དེ་བཞིན་ཉིད་དུ་ཀུན་ཤེས་ཕྱིར། །དེ་ཉིད་དུ་ནི་སྦྱར་བར་བྱ། །རང་གི་གཟུགས་
ཀྱིས་བཞག་ནས་ནི། །དེ་ཀུན་དེ་ལ་བསྒོམ་པར་བྱ། །བསྐྱེད་པ་ལ་སོགས་ཀུན་འབྱུང་བ། །རང་གི་སྔགས་ཉིད་ཀྱིས་ནི་བྱ། །མང་པོ་ཕན་ཚུན་ཡང་དག་སྦྱོར། །ཕྱག་རྒྱ་དེར་ནི་རྣམ་བསྒོམ་བྱ། །བློ་ལྡན་ཡེ་ཤེས་རིགས་ལ་ནི། །སོར་མོའི་རྣམ་
པ་སྦྱོར་བར་བཤད། །རྡོ་རྗེའི་རྣམ་པས་ཀུན་སྦྱར་ནས། །རིན་ཆེན་རྣམ་པས་སྦྱར་བར་བྱ། །པད་མའི་རྣམ་པས་ཀུན་སྦྱར་ནས། །འདི་ནི་ཆོས་ཀྱི་རིགས་སུ་བརྗོད། །རྩེ་གསུམ་རྣམ་པའི་དབྱེ་བ་ཡིས། །དེ་ཉིད་དུ་ནི་བཅིང་བར་བྱ། །བཅོམ་ལྡན་
འདས་བྱང་ཆུབ་ཀྱི་སེམས་ཀྱིས་དེ་སྐད་ཅེས་གསུངས་སོ། །བསམ་གཏན་གྱི་དཀྱིལ་འཁོར་ཞེས་བྱ་བ་སེམས་དཔའ་ཆེན་པོ་བསྐྱེད་པར་བྱེད་པའི་ལེའུ་བཅུ་གཉིས་པ་རྫོགས་སྷོ།། །། དེ་ནས་བཅོམ་ལྡན་འདས་ཕྱག་ན་

89-1-23b

རྡོ་རྗེས་སླར་ཡང་བསམ་པ་ཐམས་ཅད་ཡོངས་སུ་རྫོགས་པའི་དམ་ཚིག་འབྱུང་བ་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དམ་ཚིག་ཆེན་པོའི་དངོས་གྲུབ་ཀྱི་དཀྱིལ་འཁོར་ཆེན་པོ་འདི་གསུངས་སོ། །
དེ་ནས་ཡང་དག་རབ་བཤད་བྱ། །དཀྱིལ་འཁོར་ཆེན་པོ་དམ་པ་འདི། །རྡོ་རྗེ་ཡེ་ཤེས་ལྟ་བུས་ཏེ། །དངོས་གྲུབ་ཆེན་པོ་ཞེས་བཤད་དོ། །སར་པ་ལེགས་པར་བཀལ་བ་ཡི། །ཚད་དང་ལྡན་པ་མཛེས་པ་ཡི། །ཐིག་གིས་མཁས་པས་
ཅི་ནུས་ཀྱིས། །དཀྱིལ་འཁོར་ལ་ནི་ཐིག་གདབ་པོ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་བརྒྱན་པ་དང་། །ཐིག་བཞི་དང་ནི་ཡང་དག་ལྡན། །དར་དང་མེ་ཏོག་ཆུན་པོས་བརྒྱན། །གྲྭ་ཡི་ཆ་རྣམས་ཐམས་ཅད་དང་། །སྒོ་ཁྱུད་ཀྱི་
ནི་མཚམས་རྣམས་སུ། །རྡོ་རྗེ་རིན་ཆེན་གྱིས་སྤྲས་པར། །ཕྱི་ཡི་དཀྱིལ་འཁོར་ཐིག་གདབ་པོ། །རྟག་ཏུ་བསྡུས་པའི་ཆོ་ག་ཡིས། །རིམ་པ་གསུམ་ནི་བྱ་བ་ཡིན། །ཆོ་ག་ཤེས་པས་ཤར་དུ་ནི། །ཡེ་ཤེས་ཞེས་ནི་དགོད་པར་བྱ། །ལྷོར་ནི་
འབད་པས་བསྡུས་པ་ཞེས། །བརྗོད་པ་རྟག་ཏུ་བྱ་བའོ། །ཆོ་ག་ཡིས་ནི་བྱང་ཕྱོགས་སུ། །ཆོས་ཀྱི་རིགས་ནི་རྟག་ཏུ་བྱ། །སྔགས་པས་འདོད་པ་ཀུན་རིགས་ལ། །གསུམ་པ་རུ་ཡང་མཉམ་པར་བྲི། །ཤར་དུ་སངས་རྒྱས་བཅོམ་ལྡན་འདས། །
རྒྱལ་བའི་གཙུག་ཏོར་གདུགས་དཀར་དང་། །རིག་མ་ཆེན་མོ་སྤྱན་དང་ནི། །མཛོད་སྤུ་ཡང་ནི་ཉེ་བར་རོ། །རྡོ་རྗེ་འཆང་གི་ལྷོ་རུ་ནི། །བདུད་རྩི་ཞེས་དང་སྟོབས་པོ་ཆེ། །རྡོ་རྗེ་ཁུ་ཚུར་མཱ་མ་ཀཱི། །ཉེ་བ་ཉིད་དུ་གཞག་པར་བྱ། །བཅོམ་ལྡན་འདས་
ཀྱི་བྱང་དུ་ནི། །པད་མ་འཆང་བ་ཞི་བ་བསྐྱེད། །ཁྲོ་གཉེར་རིམ་པར་ལྡན་པ་དང་། །རིག་མ་ཆེན་མོ་དཀར་ཞེས་དང་། །ཁྲོ་གཉེར་ཅན་མའང་མཉམ་པར་བྲི། །ཆོ་ག་ཤེས་པས་དེ་དབུས་སུ། །རིག་མ་མི་ཐུབ་ཅན་མ་བྲི། །ཕྱག་རྒྱ་ཐམས་ཅད་
ཉིད་དུ་ནི། །རྩེ་མོ་ལྔ་པ་རྣམ་བསྒོམ་བྱ། །དཀྱིལ་འཁོར་གསུམ་པར་སློབ་དཔོན་གྱིས། །ཡ་དྲི་ཙྪ་ཡས་སཱུ་ཏྲཾ་བྲི་བར་བྱ། །སྒོ་རྣམས་ཐམས་ཅད་ཉིད་དུ་ནི། །རྡོ་རྗེ་ལྕགས་སྒྲོག་ལ་སོགས་བྲི། །ཇི་ལྟར་རིགས་པར་ཕྱོགས་ཀུན་དུ། །འཇིག་རྟེན་

89-1-24a

སྐྱོང་བ་དགོད་པར་བྱ། །ཤར་ཕྱོགས་དབང་པོ་ལྷ་རྒྱལ་དང་། །འདོད་པ་སྤྱོད་པའི་ལྷ་རྣམས་དང་། །གནས་གཙང་མ་ཡང་དགོད་པར་བྱ། །མེ་ཕྱོགས་ཀུན་དུ་མེ་ཡི་ལྷ། །དྲང་སྲོང་ཆེན་པོ་ལྔ་མངོན་ཤེས། །ལྷོ་ཕྱོགས་ཡི་
དགས་རྣམས་ཀྱི་བདག །གཤིན་རྗེ་དང་ནི་མ་མོ་བདུན། །བདེན་བྲལ་ཕྱོགས་སུ་ཡི་དགས་ཀྱི། །དབང་པོ་དང་ནི་འབྱུང་པོ་ཀུན། །ནུབ་ཀྱི་ཕྱོགས་སུ་ཀླུ་ཡི་བདག །ཆུ་ལྷ་དང་ནི་ཀླུ་རྣམས་ཀུན། །རླུང་གི་ཕྱོགས་སུ་རླུང་ལྷ་དང་། །རིག་པ་
འཛིན་པ་ཐམས་ཅད་དང་། །བྱང་གི་ཕྱོགས་སུ་གནོད་སྦྱིན་བདག །ལུས་ངན་དང་ནི་གནོད་སྦྱིན་ཀུན། །དབང་ལྡན་ཕྱོགས་སུ་དབང་ཕྱུག་ནི། །འབྱུང་པོ་ཀུན་གྱི་བདག་པོ་དང་། །ཇི་སྐད་གསུངས་པའི་ཆོ་ག་ཡིས། །བུམ་པ་དགོད་དང་གདན་
སོགས་བྱ། །ལྷ་རྣམས་ཀུན་གྱི་རྒྱལ་པོ་ནི། །དེར་ནི་དགོད་པར་བྱ་བ་ཡིན། །མཁས་པས་མེ་ཏོག་དྲི་སོགས་ཀྱིས། །མཆོད་པའི་ཆོ་ག་བྱས་ནས་ནི། །མཉེས་པའི་རིགས་པས་མཉེས་པར་བྱ། །དེ་ལྟར་རྒྱས་འགྱུར་གཞན་དུ་མིན། །འདིར་
ནི་སྔོན་མཐར་དེ་རྣམས་ཀྱི། །ཉ་དང་ཆང་སོགས་རབ་སྦྱིན་བྱ། །ཆོ་ག་ཤེས་པས་གསང་བའི་མཆོད། །སྒོ་བཞི་རྣམས་སུ་བརྟག་པར་བྱ། །ཁུ་བ་དེར་ནི་གཟུང་བྱས་ནས། །ཐམས་ཅད་དུ་ནི་དབུལ་བར་བྱ། །རིག་མའི་ཚུལ་གྱིས་ཆོ་ག་ཡིས། །
དེ་ནི་ཡང་ཡང་དགྱེས་པར་བྱ། །མཁས་པས་དགའ་བའི་རྣམ་པ་ཡིས། །ཐོག་མར་གཏོར་མ་སྦྱིན་པར་བྱ། །ཆོ་ག་ཤེས་པས་འཕྲོག་མ་ཡི། །གཉིས་པ་རུ་ནི་ཡང་དག་གཟུང་། །སྔགས་པས་ཁྱད་པར་གསུམ་པ་རུ། །སངས་རྒྱས་
རྣམས་ཀྱི་སྦྱིན་པར་བྱ། །དེ་ཉིད་བརྗོད་པ་དེ་ཡིས་ནི། །གང་གསུངས་སྦྱིན་བསྲེག་ལས་རྣམས་བྱ། །དེ་ཚེ་སློབ་མ་དབང་བསྐུར་བའི། །ལས་རྣམས་སོ་སོར་བསྒྲུབ་པར་བྱ། །དེ་གཞན་བསམ་པས་བུམ་པ་རུ། །རྡོ་རྗེ་སེམས་དཔའི་རབ་སྦྱོར་
གྱིས། །ལྷག་མའི་སངས་རྒྱས་ཞེས་བྱ་བར། །དེ་ཉིད་རིགས་པར་ཡང་དག་བསྐྱེད། །རྟག་ཏུ་སངས་རྒྱས་སློབ་དཔོན་གྱིས། །དེ་ཡི་ཚུལ་འདི་སྨྲ་བར་བྱ། །སངས་རྒྱས་ཀུན་གྱི་དམ་ཚིག་གང་། །ལམ་གསུམ་ལམ་ནི་འཇུག་བྱེད་པ། །

89-1-24b

དབང་བསྐུར་ཆེན་པོ་དེ་ཡི་ནི། །ནམ་མཁའ་ཇི་སྲིད་ཡང་དག་འབྱུང་། །ཁྱད་པར་དུ་ཡང་འདིར་སྨྲས་པ། །བདག་གི་ཡང་འདི་ཡང་དག་འབྱུང་། །རིན་ཆེན་ཡིད་བཞིན་ནོར་བསྟེན་ནས། །དེ་ཉིད་འབྱུང་བས་འདིར་དབང་བསྐུར། །གཞན་ཡང་གལ་
ཏེ་སེམས་ཅན་གང་། །མཐོང་བར་འགྱུར་ཞེས་བྱ་བ་ཉོན། །སྐྱེ་བ་བདུན་གྱི་ནང་དུ་ས། །ཐོབ་ཅིང་ཕྱག་འོས་མཆོག་ཏུ་འགྱུར། །སངས་རྒྱས་སློབ་དཔོན་གང་ཉིད་དུ། །ཡེ་ཤེས་རྒྱ་མཚོ་གནས་པར་འགྱུར། །ཐུབ་ཆེན་དེ་ཉིད་ཤེས་པ་གང་། །རྟག་ཏུ་
སངས་རྒྱས་མཆོད་པར་བྱེད། །སངས་རྒྱས་སློབ་དཔོན་ཇི་གསུངས་པ། །དེ་ཡིས་རང་གི་སློབ་མ་དེའི། །དམ་ཚིག་ལྔ་པོ་བྱིན་ནས་ནི། །རབ་ཏུ་འབད་པས་སྨྲ་བར་བྱ། །སངས་རྒྱས་ཀུན་གྱི་དམ་ཚིག་ཆེ། །དཀྱིལ་འཁོར་དེ་ཉིད་ཤེས་དཀྱིལ་འཁོར། །
སྒྲུབ་པོ་རྣམས་ཀྱིས་ཅི་འདྲ་དེར། །ཡིད་བཞིན་ནོར་བུ་ལྟ་བུར་བླང་། །དམ་ཚིག་ཆེན་པོའི་དཀྱིལ་འཁོར་རྫོགས་སྷོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེས་སླར་ཡང་དེ་བཞིན་གཤེགས་པ་ཐམས་ཅད་ཀྱི་ཐུགས་
སུ་བཞུགས་སོ། །དེ་ནས་བཅོམ་ལྡན་འདས་རྣམ་པར་སྣང་མཛད་ནམ་མཁའི་ཁམས་ཐམས་ཅད་དུ་སྤྲོ་བའི་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་བཅོམ་
ལྡན་འདས་དེ། བཅོམ་ལྡན་འདས་ཕྱག་ན་རྡོ་རྗེ་དེ་ཉིད་དེ་ནམ་མཁའི་ཁམས་ཐམས་ཅད་དུ་སེམས་ཀྱིས་གང་བར་བྱས་ནས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱིས་བཅོམ་ལྡན་འདས་རྣམ་པར་སྣང་མཛད་
ལ་རབ་ཏུ་སྩལ་ཏོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་དེ་བཞིན་གཤེགས་པ་ཐམས་ཅད་ཀྱི་དམ་ཚིག་བསྒྲུབ་པའི་མཆོག་ཅེས་བྱ་བ་རིག་མའི་ཚུལ་ལ་སོགས་པའི་ལས་ཅན་གསུངས་པ། ཁྲུ་ནི་སུམ་བཅུའི་
ཁྱོན་ཙམ་དུ། །ཀུན་ནས་ཡོངས་སུ་ཟླུམ་པོར་ནི། །ཨིན་དྲ་ནཱི་ལ་མཚུངས་པའི་འོད། །འོད་ཟེར་འབར་བ་དེ་ཕྱུང་ནས། །ནམ་མཁའ་རུ་ནི་འདི་བྱ་བ། །བསམ་གཏན་སྦྱོར་བས་བསམ་པར་བྱ། །འཛམ་བུའི་གླིང་ནི་ཐམས་ཅད་དུ། །འོ་མ་དང་ཞོས་

89-1-25a

ཀུན་དུ་འཁྲུགས། །ཤིང་རྟའི་འཁོར་ལོའི་ཚད་ཀྱིས་ནི། །པད་མས་གཡོགས་པར་རྣམ་བསྒོམ་བྱ། །ཁྲོ་བོ་ཆེན་པོ་གཤིན་རྗེ་གཤེད། །དྲག་ཏུ་དགོད་པ་ཆེན་པོ་སོགས། །རྟག་ཏུ་དེ་ཡི་དཀྱིལ་འཁོར་གྱི། །དེ་ཡི་གཟུགས་ནི་རྣམ་བསྒོམས་ནས། །ཁྲོ་
ཆེན་ཁྲོ་གཉེར་རིམ་པར་ལྡན། །འབར་བའི་ཕྲེང་བ་འཁྲུགས་པའི་འོད། །ཇི་ལྟར་རིགས་པར་ཀུན་བསྐྱེད་ནས། །སྒོམ་པར་བྱེད་པ་དེ་དེར་བཤད། །ཁྲོ་བོ་ཆེན་པོ་དབྱུག་པ་སྔོ། །འཇིག་རྟེན་གསུམ་འཇིག་འཕྲོག་བྱེད་པ། །སངས་རྒྱས་ཀུན་
གྱི་ཡེ་ཤེས་སུ། །འཇོམས་པ་པོ་ནི་རབ་ཏུ་གནས། །ཇི་སྐད་གསུངས་པའི་གཟུགས་གསུམ་གྱིས། །ནམ་མཁའི་ཁམས་ནི་ཀུན་དུ་གང་། །ཡི་གེའི་གཟུགས་ནི་ཀུན་བསྐྱེད་ནས། །བདག་ཉིད་སྙིང་གར་རྣམ་བསམ་བྱ། །སྙིང་གའི་
གཟུགས་ནི་དེ་རྣམས་སུ། །ལྷ་ཡི་རྣམ་པར་སྒོམ་པར་བྱེད། །སླར་ནི་སྔགས་པས་བསྡུ་བར་བྱ། །དེ་ཉིད་ལ་ནི་གཞུག་པར་བྱ། །ཆོ་ག་ཤེས་པས་བསྐལ་པའི་མེར། །བསམས་ནས་བསམ་གཏན་ཡང་དག་བརྩམ། །ཟླ་འོད་ལྟ་
བུར་འབར་བ་ནི། །བཙུན་མོ་རྟག་ཏུ་བསྒོམ་པར་བྱ། །ལྷ་ཉིད་ཡང་དག་བསྐྱེད་ནས་ནི། །དེ་ཡི་དབུས་སུ་རྣམ་བསྒོམ་བྱ། །རང་གཟུགས་སྙིང་གར་བསམས་ནས་ནི། །དེ་ཡི་དབུས་སུ་རྣམ་བསྒོམ་བྱ། །རང་གཟུགས་སྙིང་གར་བསམས་ནས་
ནི། །ཧ་ཡིག་ཏུ་ནི་རྣམ་བསྒོམ་བྱ། །འདི་དེ་སྔགས་རྣམས་ཐམས་ཅད་ཀྱི། །བསམ་པ་ཐམས་ཅད་ཡོངས་རྫོགས་བྱེད། །འདི་ནི་དང་པོའི་བསམ་གཏན་བརྗོད། །རབ་ཏུ་འབད་པས་བསྒོམ་པར་བྱ། །རྟག་ཏུ་རིགས་ཀྱི་བདག་པོ་ཡིས། །
བསྐལ་པར་བསྲེག་པར་རྣམ་བསྒོམས་ནས། །སྔགས་པས་དེ་ཡི་རྣམ་པ་དེར། །བསམ་གཏན་བརྩོན་པས་བསྒོམ་པར་བྱ། །སངས་རྒྱས་གཟུགས་ཀྱི་རབ་སྦྱོར་གྱིས། །ཟླ་བའི་དཀྱིལ་འཁོར་སྒོམ་པ་ནི། །རང་གི་གཟུགས་ཀྱིས་ཀུན་
བསྐྱེད་ནས། །བ་སྤུའི་ཁུང་བུར་འདི་སྤྲོ་བྱ། །ཇི་སྐད་གསུངས་པའི་གཟུགས་གསུམ་གྱིས། །ནམ་མཁའི་ཁམས་ནི་ཀུན་དུ་བཀང་། །འོད་ཟེར་ལྔ་ཡི་རབ་སྦྱོར་གྱིས། །རང་ལུས་སུ་ནི་རབ་གཞུག་བྱ། །རིག་མའི་རྒྱལ་མོ་སོགས་

89-1-25b

སྦྱོར་བས། །དེ་རྣམས་ཐམས་ཅད་ཡོངས་བརྟག་བྱ། །སངས་རྒྱས་ཀུན་གྱི་མཁའ་ཁམས་ནི། །ཡོངས་སུ་གང་བར་རྣམ་བསྒོམ་བྱ། །རང་ལུས་སུ་ནི་རྣམ་བསྒོམས་ནས། །ཐམས་ཅད་དེར་ནི་རབ་གཞུག་བྱ། །གཉིས་སུ་མེད་པ་
མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་རིག་མའི་ཚུལ་ལ་སོགས་པའི་ལས་ཅན་གྱི་ལེའུ་སྟེ་བཅུ་གསུམ་པ་རྫོགས་སྷོ།། །། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་
གསང་སྔགས་ཐམས་ཅད་ཀྱི་གསང་ཆེན་རིག་མའི་ཚུལ་གྱི་ལས་གསུངས་པ། ནམ་མཁའི་ཁམས་ཀྱི་དབུས་གནས་པར། །དཀྱིལ་འཁོར་ཆེན་པོ་མཆོག་གྱུར་པ། །དཔག་ཚད་ཀྱི་ནི་གྲངས་ཀྱི་ཁྱོན། །ཀུན་ནས་ཡོངས་སུ་ཟླུམ་
པོར་ནི། །གསལ་བ་གསལ་བར་མཚུངས་བསམས་ནས། །དབུས་སུ་བདག་ཉིད་རྣམ་བསམ་བྱ། །འབད་པས་གནས་ལྔ་རྣམས་སུ་ནི། །རྣམ་སྣང་མཛད་ཆེན་གཟུགས་བསམས་ནས། །ཉི་མའི་དཀྱིལ་འཁོར་དབུས་གནས་པར། །
དེ་རྣམས་ཐམས་ཅད་ཡོངས་བརྟག་བྱ། །སྙིང་གར་རྡོ་རྗེ་སེམས་དཔའ་ནི། །ཡང་དག་བསྐྱེད་ནས་རྣམ་བསྒོམ་བྱ། །ཆོ་ག་ཤེས་པས་ཉི་རྣམ་པར། །ནམ་མཁའི་ཁམས་ནི་གང་བར་བྱེད། །ལྷ་ལ་སོགས་པའི་སྦྱོར་བ་ཡིས། །སླར་
ཡང་དེ་ནི་རབ་གཞུག་བྱ། །དེ་ཉིད་ཚུལ་ནི་དགེ་བ་འདི། །རིགས་ཀྱི་དབྱེ་བས་རྟོགས་པར་བྱ། །གཞན་དུ་གསང་བའི་བསམ་གཏན་ནི། །རྣམ་པར་སྤངས་པས་འགྲུབ་མི་འགྱུར། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་
པའི་རྒྱལ་པོ་ཆེན་པོར་རིག་མའི་ལས་ཀྱི་ལེའུ་སྟེ་བཅུ་བཞི་པ་རྫོགས་སྷོ།། །། དེ་ནས་བཅོམ་ལྡན་འདས་རྣམ་པར་སྣང་མཛད་ལྷ་ཐམས་ཅད་ཀྱི་དེ་ཁོ་ན་ཉིད་ཀྱི་ཚུལ་བཟླས་པའི་ཆོ་ག་སྟོན་པར་མཛད་དོ། །ནམ་མཁར་
འཕྲུལ་ནི་སྟོན་པར་རམ། །གང་དུ་སེམས་ནི་རབ་དགྱེས་བྱེད། །དབང་ཆེན་དཀྱིལ་འཁོར་བསམས་ནས་ནི། །རང་གི་དཀྱིལ་འཁོར་མཆོད་བསྒོམ་བྱ། །མེ་ཏོག་བཟང་པོ་དེ་དབུས་སུ། །དེ་ཉིད་སྦྱོར་བས་བསྒོམ་པར་བྱ། །རང་གཟུགས་
89-1-26a

ཕྱག་རྒྱ་ཆེན་པོ་ནི། །བསྒོམ་བྱ་གཞན་དུ་བརྩོན་མི་བྱ། །སྙིང་གའི་དབུས་སོན་ཕྲ་མོ་ནི། །དྲི་མེད་ཡེ་ཤེས་དཀྱིལ་འཁོར་ནི། །གསལ་བ་འོད་དཀར་འབར་ལ་སོགས། །ཆུ་ཡི་རྣམ་པར་དགོད་པར་བྱ། །དེ་ལ་སྔགས་ཀྱི་
ཡི་གེའི་ཚིག །དང་པོ་གསང་བ་རྣམ་བསྒོམ་བྱ། །རྩེ་མོ་ལྔ་པ་རྣམ་བསྒོམས་ནས། །སླར་ཡང་དེ་ཉིད་ལ་སྦྱར་བྱ། །བློ་དང་ལྡན་པས་གནས་ལྔ་རུ། །གཟུགས་བརྙན་ཡང་ནི་ཡང་དག་བསྐྱེད། །དེ་ཉིད་ཡི་གེའི་ཚུལ་འཐུན་པས། །བསམ་
གཏན་འབྱུང་བ་བསྒོམ་པར་བྱ། །ཆོ་ག་ཤེས་པས་ཡིག་རྣམས་ཀྱི། །ཕྲེང་བ་བསྐྱེད་ནས་བསྒོམ་པར་བྱ། །ནས་ཀྱི་ཚད་འདི་ཐམས་ཅད་དུ། །བསམ་གཏན་འབྱུང་བ་བསྒོམ་པར་བྱ། །རབ་ཏུ་འབད་པས་འོག་དེར་ནི། །རྟག་ཏུ་ནམ་མཁའ་གང་བར་
བྱ། །དེ་ཉིད་སངས་རྒྱས་ཐམས་ཅད་ཀྱི། །གང་བ་དེ་ལ་གྲགས་པ་ཡིན། །ཡི་གེ་གཅིག་གི་གསང་སྔགས་ཀྱི། །རང་གཟུགས་རྣམ་པར་བསྒོམ་པར་བྱ། །རིགས་ཀྱི་བདག་པོ་འབྱུང་བ་ནི། །ཡི་གེ་གསུམ་གྱི་རྟག་ཤེས་བྱ། །ཡི་གེ་ལྔ་ལ་སོགས་
གཟུང་བས། །ཇི་སྲིད་ཡི་གེ་འབྱུང་བའོ། །འོད་དཀར་འབར་བའི་ཕྲེང་བ་སོགས། །འབར་བའི་ཕྲེང་བ་མཉམ་པའི་འོད། །རིགས་ཀྱི་དབྱེ་བས་ལས་རྣམས་ཀྱི། །ཐོག་མ་ཐ་མ་འདི་བྱའོ། །ཨུཏྤལ་སྔོན་པོའི་འདབ་རྣམ་པར། །ཨིན་དྲ་ནཱི་ལ་
མཚུངས་པའི་འོད། །འོད་ཟེར་འབར་འཁྲུགས་གཙོ་བོའི་ཡུམ། །ཡིད་ཀྱིས་བསམས་པས་འགྲུབ་པར་འགྱུར། །པད་མ་རཱ་ག་དབང་མདོག་འོད། །དམར་པོ་འབར་བ་མཚུངས་པའི་འོད། །འཇིག་རྟེན་ཁམས་ནི་ཀུན་ནས་སུ། །ཆོ་ག་ཤེས་པས་སྣང་བར་བྱ། །
གེ་སར་སེར་པོ་དང་མཚུངས་པ། །སེར་པོ་འོད་ཟེར་འབར་ལ་སོགས། །སྒོམ་པའི་གོ་འཕངས་ཀྱིས་བསྒོམ་བྱ། །ཐེ་ཚོམ་མེད་པར་བསྒྲུབ་པར་བྱ། །དེ་ཉིད་འབྱུང་བ་གང་གསུངས་པ། །རང་གཟུགས་ཡང་དག་བསྐྱེད་ནས་ནི། །སྙིང་གར་མེ་
ཏོག་བསམས་ནས་ནི། །དཀྱིལ་འཁོར་དེ་ལ་བསྒོམ་པར་བྱ། །ཆོ་ག་ཤེས་པས་དེའི་སྟེང་དུ། །སྙིང་པོ་ཕྱག་རྒྱ་རྣམ་བསྒོམ་བྱ། །ཇི་ལྟའི་གོ་འཕང་ཀུན་བསྐྱེད་ནས། །ཡེ་ཤེས་དེ་ཉིད་རྣམ་བསྒོམ་བྱ། །བྷ་གར་ཨ་ཡིག་ངེས་ཕྱུང་ནས། །

89-1-26b

སངས་རྒྱས་མཆོད་པ་ལ་སོགས་བྱ། །འཇིག་རྟེན་ཁམས་ནི་ཀུན་ནས་སུ། །ཆོ་ག་ཤེས་པས་སྤྲོ་བར་བྱ། །ཐོག་མ་བར་དང་ཐ་མར་ནི། །སླར་ཡང་བསྡུ་བར་བསམ་པར་བྱ། །ཟླ་འོད་ལྟ་བུར་ཡང་དག་སྦྱོར། །རང་ལུས་སུ་ཡང་བསྒོམ་པར་བྱ། །འདི་ནི་དེ་
ཉིད་ཚུལ་དགེ་བ། །རིགས་གསུམ་དུ་ཡང་རྟོགས་པར་བྱ། །བྱ་དང་བྱེད་པ་ཡང་དག་སྦྱོར། །སྒོམ་པ་དེ་ནི་འགྲུབ་པར་བྱེད། །སེམས་ཀྱི་ཀུན་སྦྱོར་མཚན་ཉིད་ཀྱིས། །གལ་ཏེ་ཆགས་ལ་ཆགས་པར་འགྱུར། །བསམ་གཏན་འདུས་ལ་རབ་ཞུགས་
ནས། །དེ་ལ་གཞུག་པར་བསྒོམ་པར་བྱ། །འདི་དེ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་སྒྲུབ་པ་པོ། །སྒྲུབ་པོ་རྣམས་ཀྱི་དེ་ཉིད་འདི། །དངོས་གྲུབ་བསྒྲུབ་ལ་དམ་ཚིག་མཆོག །སངས་རྒྱས་གཟུགས་སུ་རྣམ་བསྒོམས་ནས། །
རལ་པའི་ཅོད་པན་འཛིན་བཞིན་པ། །སངས་རྒྱས་སློབ་དཔོན་ཡང་དག་བསྐྱེད། །སྙིང་གར་དེ་ནི་དགོད་པར་བྱ། །རང་སྔགས་མཆོག་གི་ཕྱག་རྒྱ་ནི། །བསམས་ནས་དེ་ཡི་སྙིང་གར་དགོད། །འཐུང་དང་ཟ་བའི་དུས་རྣམས་སུ། །ཉེ་བར་
ལོངས་སྤྱོད་བྱེད་རྣམས་སུའང་། །དྲི་དང་གཟུགས་སོགས་བྱ་བ་རྣམས། །འདི་ནི་དེ་ཁོ་ན་ཉིད་བརྗོད། །ལྷ་སྦྱོར་སངས་རྒྱས་སློབ་དཔོན་གྱི། །རང་གི་བདེ་བ་རྟག་ཏུ་ནི། །ཆོ་ག་ཤེས་པས་དབུལ་བར་བྱ། །གཞན་དུ་འགྲུབ་པར་བྱེད་མིན་
ཉིད། །འདི་ནི་སྔགས་རྣམས་ཐམས་ཅད་ཀྱིས། །བསམ་པ་ཐམས་ཅད་ཡོངས་རྫོགས་བྱེད། །ཡེ་ཤེས་རྣམས་ནི་ཀུན་གྱི་གསང་། །སྔགས་ཀྱི་དངོས་གྲུབ་བྱེད་དེ་ཉིད། །རང་གཞན་སེམས་ཅན་ཐམས་ཅད་ཀྱི། །འཆི་བ་དེ་བཞིན་འཕྲོག་
པར་བྱེད། །དེ་བཞིན་རང་གཟུགས་བསམས་ལ་སོགས། །བསྟེན་དང་ཡོན་རྣམས་ཀུན་དང་ལྡན། །འདི་དེ་སངས་རྒྱས་ཐམས་ཅད་ཀྱི། །སངས་རྒྱས་ཡེ་ཤེས་རབ་བསྒྲུབ་པའོ། །རྡོ་རྗེ་སེམས་དཔའ་རབ་བསྒྲུབ་པས། །རྡོ་རྗེ་ཡེ་ཤེས་
སྤྲུལ་པའོ། །གནས་བཞི་རྣམས་ཀྱི་ཀུན་སྦྱོར་གྱིས། །ལྷ་ཡི་སྦྱོར་བ་མཚུངས་པ་ལ། །ཆོ་ག་ཤེས་པས་གཟུང་བར་བྱ། །རིག་པ་འཛིན་པར་དེ་བརྗོད་བྱ། །འདི་དེ་སངས་རྒྱས་ཐམས་ཅད་ཀྱི། །དེ་ཉིད་བྱ་བ་དྲི་མེད་བཟང་། །དེ་ཡི་སྔགས་ཀྱི་སྐུ་

89-1-27a

བྱེད་པ། །བསྡུས་པ་ཡིས་ནི་བསྒོམ་པར་བྱ། །ཐུན་བཞིར་བསམ་གཏན་འདི་ཉིད་ནི། །དེ་ཉིད་དམ་ཚིག་གར་མཁན་ནོ། །ཐམས་ཅད་དུ་ནི་རིགས་དབྱེ་བ། །བསྡུས་པ་ཡིས་ནི་བསྒོམ་པར་བྱ། །སངས་རྒྱས་གཟུགས་ནི་རྣམ་
བསྒོམས་ནས། །འཁོར་ལོ་དེ་ཡིས་རྣམ་བསྒོམ་བྱ། །རང་ལག་ཏུ་ནི་ཡང་དག་བསྐྱེད། །ཇི་སྲིད་སྲོག་དེ་གཏང་མི་བྱ། །རྡོར་སེམས་ལ་སོགས་སྒོམ་བྱེད་པ། །བསྡུས་པ་ཡིས་ནི་རིགས་གསུམ་དུ་འམ། །རྡོ་རྗེ་སེམས་དཔས་བྱིན་བརླབས་པས། །
སྒྲུབ་པོས་རྟག་ཏུ་བསྒྲུབ་པར་བྱ། །འདི་དེ་སངས་རྒྱས་ཐམས་ཅད་ཀྱི། །དངོས་གྲུབ་ཐམས་ཅད་རབ་སྒྲུབ་པའོ། །སྔགས་རྣམས་ཀུན་གྱི་མཉེས་པ་དང་། །དངོས་གྲུབ་དམ་ཚིག་སྟོན་པ་པོ། །དེ་ནས་བཅོམ་ལྡན་འདས་རྣམ་པར་སྣང་
མཛད་དེ་བཞིན་གཤེགས་པ་ཐམས་ཅད་ཀྱི་ཡིད་བཞིན་གྱི་ནོར་བུའི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་པ་ཐམས་ཅད་འབྱུང་བའི་རྡོ་རྗེ་ཞེས་བྱ་བའི་དཀྱིལ་འཁོར་འདི་སྟོན་པར་མཛད་དོ། །
དམ་ཚིག་དཀྱིལ་འཁོར་དུ་གསུངས་པ། །གང་དེ་ཐམས་ཅད་ཉིད་བྱ་དེ། །ཤར་དུ་རང་གི་ཕྱག་རྒྱ་ཡིས། །མི་བསྐྱོད་པ་ནི་དགོད་པར་བྱ། །ལྷོ་རུ་དེ་ལ་ཆོ་ག་ལས། །རིན་ཆེན་འབྱུང་ལྡན་བྲི་བར་བྱ། །ཆོ་ག་ཤེས་པས་ནུབ་ཏུ་ནི། །འོད་དཔག་
མེད་ནི་མཉམ་པར་བྲི། །ཆོ་ག་ཤེས་པས་བྱང་ཕྱོགས་སུ། །དོན་ཡོད་གྲུབ་པ་མཉམ་པར་བྲི། །དབུས་སུ་རྟག་ཏུ་བསྡུས་པ་ཡིས། །སངས་རྒྱས་སློབ་དཔོན་ཀུན་དུ་བྲི། །རྩེ་མོ་ལྔ་པའི་རྡོ་རྗེ་ཆེ། །འབར་བའི་ཕྲེང་བས་རྣམ་བརྒྱན་པ། །
རྣམ་ཀུན་སངས་རྒྱས་སློབ་དཔོན་གྱིས། །རབ་ཏུ་འབད་པས་བསྒྲུབ་པར་བྱ། །ཕྱག་རྒྱ་རྣམས་ནི་ཐམས་ཅད་དུ། །ཨུཏྤལ་སྔོན་པོ་མཚུངས་པའི་འོད། །རྩེ་མོ་བཅུ་གཅིག་ཆེན་པོ་ཡི། །རྡོ་རྗེའི་རྣམ་པར་ཀུན་དུ་བྲི། །ཟླ་བའི་
དཀྱིལ་འཁོར་དབུས་གནས་པར། །ཕྱག་རྒྱ་ཐམས་ཅད་ཀུན་དུ་བྲི། །མཁས་པས་ཕྱག་རྒྱ་ཆེན་པོ་ནི། །འཁོར་ལོས་སྒྱུར་བ་ཞེས་བཤད་དོ། །སྙིང་པོའི་དཀྱིལ་འཁོར་གྲྭ་རྣམས་སུ། །པད་མ་དང་ནི་ཨུཏྤལ་བྲི། །རིན་ཆེན་བཞི་ཡི་ཁ་དོག་ཏུ། །

89-1-27b

དེ་རྣམས་དབུས་སུ་མཉམ་པར་བྲི། །འདོད་པས་ལྷ་རྣམས་ཐམས་ཅད་ཀྱི། །ལྷ་གཞན་དེ་ནི་ཡང་དག་འབྱུང་། །སྒོ་རུ་བདུད་རྩི་འབྱུང་བ་དང་། །འཐུན་པ་རུ་ནི་མཉམ་པར་བྲི། །དཀར་པོ་ནག་པོ་དེ་བཞིན་དམར། །སེར་པོ་ལྗང་གུ་ཉིད་དང་ཡང་། །
རྟག་ཏུ་བསམ་གཏན་གདན་ལ་གནས། །དེ་ལ་དགོད་པར་བྱ་བ་ཡིན། །ཆོ་ག་ཤེས་པས་དེ་རེ་རེར། །འཇོམས་བྱེད་བདག་ཉིད་ཅན་གྱིས་གཞོམ། །དེ་ལ་རྟག་ཏུ་གསང་བའི་མཆོད། །སྒོ་བཞི་རུ་ནི་རབ་ཏུ་བརྩམ། །སློབ་མས་མ་དང་ཆུང་
མ་མཆོག །སྲིང་མོ་དང་ནི་བུ་མོ་བྲི། །ཆོ་ག་ཤེས་པས་ལོངས་སྤྱད་བྱ། །དཀྱིལ་འཁོར་དེ་ཡི་དབུས་སུ་ནི། །རྒྱལ་བྱེད་རྒྱལ་བའི་རིགས་དེ་ལ། །ཕྱག་རྒྱ་དགོད་པར་རབ་ཏུ་གྲགས། །ཛིཿརྡོ་རྗེ་ཆེན་པོའི་རིགས་མཆོག་ལ། །ཛཱ་ཡི་
རྣམ་པ་རྟག་ཏུ་བྱ། །ཛཿཕྱག་ན་པད་མའི་རིགས་བྱུང་ལ། །ཨཱཿཡིག་དག་ནི་རྟག་ཏུ་བྱ། །ཨཱཿའདོད་པའི་རིགས་ཀྱི་ཆོ་ག་ལས། །ཇི་ལྟར་རིག་པའི་ཨཿཡིག་གོ། ཨཿ། དེ་བཞིན་གཤེགས་པ་ཐམས་ཅད་འབྱུང་བའི་རྡོ་རྗེ་ཞེས་བྱ་
བའི་དཀྱིལ་འཁོར་ཆེན་པོ་རྫོགས་སྷོ།། །།དེ་ནས་བཅོམ་ལྡན་འདས་སྒྲུབ་པ་དང་ཉེ་བའི་སྒྲུབ་པ་སྟོན་པར་མཛད་དོ། །ཉ་ཆང་བཟའ་བའི་གསང་མཆོད་སོགས། །མངོན་དགྱེས་གྱུར་ནས་གང་དུ་སེམས། །
སེམས་ཅན་མི་ལྡན་གནས་པར་བྱེད། །དེ་ལ་དམ་ཚིག་ཆེན་པོ་ཡི། །རྣལ་འབྱོར་བརྩམ་པར་བྱ་བ་སྟེ། །དེ་ཡི་སངས་རྒྱས་སོགས་དངོས་གྲུབ། །ཟླ་བ་གཅིག་གིས་དེ་མཐར་ཕྱིན། །ཡེ་ཤེས་འཁོར་ལོས་བསྐུལ་བ་ཡིས། །དེ་ཚེ་དེ་
ནི་འགྲུབ་པར་འགྱུར། །ཐོག་མར་ཟླ་བ་གསུམ་དུ་ནི། །དང་པོའི་རྣལ་འབྱོར་བརྩམ་པར་བྱ། །ཕྱག་ན་རྡོ་རྗེའི་རིགས་འབྱུང་ལ། །འདིར་ནི་སྔགས་ཆེན་བསྒྲུབ་པར་བྱ། །དེ་ནས་བཅོམ་ལྡན་འདས་ཡེ་ཤེས་ཀྱི་རིགས་ལ་སོགས་པ་རྣམས་
ཀྱིས་དངོས་གྲུབ་ཀྱི་དམ་ཚིག་རིན་པོ་ཆེ་འཆིང་བར་བྱེད་པ་གསུངས་པ། རྣམ་པར་སྣང་མཛད་ཞེས་གཟུགས་སུ། །དེ་རུ་བདག་ཉིད་ཡང་དག་བསྐྱེད། །རང་སྔགས་ཙཀྲྃ་ཞེས་བརྗོད་ན། །འཁོར་ལོའི་རིག་པ་འཛིན་པར་འགྱུར། །རྣམ་པར་

89-1-28a

སྣང་མཛད་ཅེས་བཤད་པར། །དེར་ནི་བདག་ཉིད་ཡང་དག་བསྐྱེད། །རང་སྔགས་ཁ་ཊྒྃ་ཞེས་བརྗོད་ན། །རལ་གྲིའི་རིག་པ་འཛིན་པར་འགྱུར། །རང་ཉིད་རྣམ་པར་སྣང་མཛད་ཞེས། །དེར་ནི་བདག་ཉིད་ཡང་དག་བསྐྱེད། །རང་སྔགས་
པདྨྃ་ཞེས་བརྗོད་ན། །པད་མའི་རིག་པ་འཛིན་པར་འགྱུར། །རང་ཉིད་རྣམ་པར་སྣང་མཛད་ཞེས། །དེར་ནི་བདག་ཉིད་ཡང་དག་བསྐྱེད། །རང་སྔགས་ཏྲི་ཤཱུ་ལྂ་ཞེས་བརྗོད། །རྩེ་གསུམ་རིག་པ་འཛིན་པར་འགྱུར། །རྣམ་པར་སྣང་
མཛད་ཞེས་བཤད་པར། །དེར་ནི་བདག་ཉིད་ཡང་དག་བསྐྱེད། །རང་སྔགས་བཛྲྃ་ཞེས་བརྗོད་ན། །རྡོ་རྗེའི་རིག་པ་འཛིན་པར་འགྱུར། །རང་ཉིད་རྣམ་པར་སྣང་མཛད་ཞེས། །དེར་ནི་བདག་ཉིད་ཡང་དག་བསྐྱེད། །རང་སྔགས་ཨྃ་ཀུ་ཤྃ་བྱས་ན། །
ལྕགས་ཀྱུ་ཞེས་པར་མངོན་བརྗོད་འགྱུར། །རང་ཉིད་རྣམ་པར་སྣང་མཛད་ཞེས། །དེར་ནི་བདག་ཉིད་ཡང་དག་བསྐྱེད། །རང་སྔགས་པཱ་ཤྂ་ཞེས་བརྗོད་ན། །ཞགས་པའི་རིག་པ་འཛིན་པར་འགྱུར། །ཕྱག་རྒྱ་ཆེ་སོགས་མཚན་ཉིད་ཀྱིས། །
རང་གི་གཟུགས་ནི་ཡང་དག་བསྐྱེད། །དེ་ཉིད་ཡིད་བཞིན་ནོར་བུ་མཆོག །རིགས་གཞན་དབྱེ་བས་རྟོགས་པར་བྱ། །འདི་ནི་དམ་ཚིག་བསྒྲུབ་ཐབས་ཏེ། །སྒྲུབ་པ་པོ་ཡིས་བསྒྲུབ་པར་བྱ། །སྐྱེ་བ་འདིར་ནི་གྲུབ་པར་འགྱུར། །རང་སྔགས་
རིལ་བུའི་ཚུལ་གྱིས་ནི། །རང་ཉིད་བདག་པོ་རང་ཉིད་དུ། །ཁྲུ་གང་ཙམ་དུ་ཡང་དག་བསྐྱེད། །སངས་རྒྱས་ཀྱིས་ཀྱང་མཐོང་མི་འགྱུར། །ཆོ་ག་ཤེས་པས་གཞི་རྣམས་ཀྱིའང་། །དེ་ཉིད་སྦྱོར་བས་བསྒོམ་པར་བྱ། །གཟུགས་ཀྱི་དབུས་སུ་རྣམ་
བསྒོམས་ནས། །མྱུར་དུ་འགྲུབ་འགྱུར་གཞན་དུ་མིན། །གཟུགས་སུ་སྦྱོར་བའི་མཚན་ཉིད་ཀྱིས། །དེར་ནི་བདག་ཉིད་ཡང་དག་བསྐྱེད། །རང་སྔགས་ཨུཏྤ་ལྂ་བྱས་ནས། །ཡེ་ཤེས་རིག་པ་འཛིན་པར་འགྱུར། །ཟླ་བའི་དབུས་སུ་རྣམ་བསྒོམས་
ནས། །ནམ་མཁའི་སྟེང་དུ་ཡང་དག་བརྩམ། །སྙིང་གར་རྡོ་རྗེ་ཡང་དག་བསྐྱེད། །ཡེ་ཤེས་རིག་པ་འཛིན་པར་འགྱུར། །ཟླ་བའི་གཟུགས་ནི་ཡང་དག་བསྐྱེད། །རྡོ་རྗེ་རིན་ཆེན་རྣམ་བསྒོམ་བྱ། །ཇི་སྲིད་དག་པའི་བདག་ཉིད་འདོད། །དེ་སྲིད་

89-1-28b

མཁའ་ལ་འགྲོ་བར་འགྱུར། །ཟླ་བའི་གཟུགས་སུ་ཡང་དག་བསྐྱེད། །རྡོ་རྗེ་པད་མ་ལག་པར་དགོད། །པད་མའི་སྤྱན་ནི་བསྒོམ་པར་བྱ། །ས་བདུན་གྱི་ནི་དབང་ཕྱུག་འགྱུར། །ཟླ་བའི་གཟུགས་ནི་རྣམ་བསྒོམས་ནས། །འབར་བའི་ཕྲེང་བས་
འཁྲུགས་པའི་འོད། །སངས་རྒྱས་གཟུགས་ནི་ཀུན་བསྐྱེད་ནས། །སངས་རྒྱས་རིག་པ་འཛིན་པར་འགྱུར། །རྡོ་རྗེའི་གཟུགས་སུ་རྣམ་བསྒོམས་ནས། །སངས་རྒྱས་ལྔ་རུ་རྣམ་བསྒོམ་བྱ། །འོད་ཟེར་ལྔ་ཡིས་ཀུན་བཀང་ནས། །སངས་
རྒྱས་སྐུ་དང་མཚུངས་པར་འགྱུར། །བི་སྟ་ར་ཤཿཉི་མའི་གཟུགས་སུ་རྣམ་བསྒོམས་ནས། །ལས་ཀྱི་རྡོ་རྗེ་སྙིང་གར་དགོད། །རང་གི་སྔགས་ནི་ཡང་དག་བསྐྱེད། །རྡོ་རྗེའི་སྐུ་དང་མཉམ་པར་འགྱུར། །ཟླ་བའི་གཟུགས་ནི་རྣམ་བསྒོམས་
ནས། །བཛྲོ་ཧྃ་ཞེས་བསྒོམ་པར་བྱ། །སྙིང་གར་རྩེ་མོ་ལྔ་པ་འམ། །རྡོ་རྗེའི་སྐུ་དང་མཉམ་པར་འགྱུར། །ཟླ་བའི་གཟུགས་སུ་རབ་བསྒོམས་ནས། །རྡོ་རྗེ་འབར་བས་རྣམ་བརྒྱན་པ། །རྡོ་རྗེ་སེམས་དཔའ་རང་གི་གཟུགས། །སེམས་དཔའི་
གཟུགས་ནི་འཛིན་པར་འགྱུར། །ཟླ་བའི་གཟུགས་སུ་ཡང་དག་བསྐྱེད། །འཁོར་ལོ་འབར་བས་རྣམ་བརྒྱན་པ། །རང་གི་གཟུགས་ནི་སངས་རྒྱས་གཟུགས། །སངས་རྒྱས་གཟུགས་ནི་འཛིན་པར་འགྱུར། །ཟླ་བའི་གཟུགས་ནི་ཡང་
དག་བསྐྱེད། །པད་མ་འབར་བས་རྣམ་བརྒྱན་པ། །རང་གི་གཟུགས་ནི་ཆོས་ཀྱི་གཟུགས། །ཆོས་ཀྱི་གཟུགས་ནི་འཛིན་པར་འགྱུར། །ཟླ་བའི་གཟུགས་ནི་ཡང་དག་བསྐྱེད། །དཀར་པོ་འབར་བས་རྣམ་བརྒྱན་པ། །འདོད་པའི་མཆོད་པ་
རང་གི་གཟུགས། །འདོད་མཆོད་གཟུགས་ནི་འཛིན་པར་འགྱུར། །དང་པོར་ཡི་གེ་གཅིག་པ་སོགས། །རིག་པའི་རྒྱལ་པོ་སྟོབས་པོ་ཆེ། །རིགས་ཀྱི་བདག་པོའི་ཕྱག་རྒྱ་ཡིས། །རང་གི་ཕྱག་རྒྱ་སོགས་བསྒོམས་པས། །སྐུ་གསུང་ཐུགས་
ཀྱི་རྡོ་རྗེ་རུ། །མཆོག་ཏུ་ཕྲ་བའི་བདག་ཅན་བྱ། །དེ་ཉིད་དམ་ཚིག་དབུས་སུ་ནི། །རྡོ་རྗེའི་གཟུགས་ནི་སྒོམ་པའོ། །ཉི་མའི་གཟུགས་ནི་རྣམ་བསྒོམས་ནས། །མུ་དྲོ་ཧྃ་ཞེས་སྒོམ་པ་ནི། །སྙིང་གར་སྔགས་ཡིག་བྱས་ནས་ནི། །བསྐྱེད་

89-1-29a

དེ་འདིར་ནི་ཐེ་ཚོམ་མེད། །སྔགས་པས་ཉི་མའི་དཀྱིལ་འཁོར་ཅན། །བསམས་ནས་དབུས་སུ་གཟུགས་བསྒོམ་བྱ། །རྡོ་རྗེའི་གཟུགས་ནི་ཡང་དག་བསྐྱེད། །བསམ་གཏན་འབྱུང་བས་བསྐྱེད་པར་འགྱུར། །ཉེ་
སྒྲུབ་ཆོ་ག་བྱས་ནས་ནི། །དངོས་གྲུབ་མཆོག་ནི་བསྒྲུབ་པར་བྱ། །རྡོ་རྗེ་སེམས་དཔའི་ཆོ་ག་ལས། །དེ་ཡིས་འཇིག་རྟེན་གསུམ་སྒྲུབ་འགྱུར། །དང་པོར་རང་གནས་རི་གནས་སུ། །ཟླ་བ་དྲུག་ཏུ་བཟླས་བྱས་ནས། །སྒྲུབ་པ་པོ་ཡིས་
རྟག་ཏུ་བསྒྲུབ། །རྡོ་རྗེ་སེམས་དཔའ་ལྷག་པར་གནས། །ཇི་ལྟར་ཀླུ་མོ་ལྷའི་བུ་མོ། །མི་མོའམ་ཡང་ན་ལྷ་མིན་མོ། །ཇི་ལྟར་རིགས་པར་བཀུག་ནས་ནི། །གསང་བའི་མཆོད་པ་ཡང་དག་བརྩམ། །རྣམ་པར་དབེན་དང་ཡིད་འོང་དང་། །
ནགས་དང་དགོན་པ་རྣམས་སུ་ཡང་། །དེ་རུ་བཀུག་ནས་ཉེར་ལོངས་སྤྱོད། །འདོད་ཡོན་ལྔ་ཡི་མཆོག་རྣམས་ཀྱིས། །ཡེ་ཤེས་རྡོ་རྗེ་རབ་བསྐུལ་བས། །དམ་ཚིག་མཉན་པར་བྱ་བ་ཡིན། །རྡོ་རྗེ་སེམས་དཔའ་རང་ཉིད་ཀྱང་། །ཆོ་ག་
ཤེས་པས་དགུག་པར་བྱ། །རང་གི་ཕྱག་རྒྱ་དེ་རྣམས་གཟུགས། །རང་གི་བརྗོད་པ་དེ་རྣམས་སྔགས། །དེ་ཉིད་ཕྱག་རྒྱ་བཅིངས་ནས་ནི། །རང་གི་སྔགས་འདི་བཟླས་པར་བྱ། །མཚན་མོ་ཕྱེད་དུ་ཇི་ལྟར་བྱ། །ཉི་མའི་གུང་ལའང་
དེ་བཞིན་བརྗོད། །ལྕགས་ཀྱུའི་སྙིང་པོ་དེ་ཉིད་ཀྱིས། །དེ་རྣམས་རབ་ཏུ་བསྒྲུབ་པར་བྱ། །བསྐལ་པ་བསྲེག་པ་ལྟར་བསམས་ནས། །རྡོ་རྗེ་མཚུངས་པས། །སྙིང་པོས་ལྕགས་ཀྱུ་སྦྱར་བྱས་ནས། །བཀུག་ལ་དབང་དུ་བྱ་བ་ཡིན། །
ཁྲོ་བོ་ཆེན་པོ་གཤིན་རྗེ་གཤེད། །དེ་བཞིན་ཉིད་དུ་རྟ་མགྲིན་དང་། །རྡོ་རྗེའི་དབྱུག་དང་བཅོམ་ལྡན་འདས། །འཇིག་རྟེན་གསུམ་གྱི་བདག་པོར་བརྗོད། །ཁྲོ་བོ་ཆེན་པོ་མི་གཡོ་བ། །ཁྲོ་གཉེར་ཅན་ཡང་གང་ཞིག་འགྱུར། །ཁྲོ་བོ་ཆེན་པོ་སྟོབས་པོ་
ཆེ། །ཁམས་གསུམ་པ་ཡང་དབང་དུ་བྱེད། །བདུད་རྩི་ཞེས་བྱའི་ཁྲོ་བོ་ཆེ། །སྟོབས་ཆེན་ཕ་རོལ་གནོན་པ་པོ། །རྡོ་རྗེ་མི་ཕྱེད་གསུམ་གནས་པ། །སངས་རྒྱས་ཀྱང་ནི་སྐྲོད་པར་བྱེད། །རིག་མ་ཆེན་མོ་དྲི་སོགས་ནི། །བཅས་པའི་

89-1-29b

ཕྱག་རྡོར་སྟོབས་ཀྱིས་ནི། །རྡོ་རྗེ་སེམས་དཔའ་རང་ཉིད་ཀྱང་། །ཁམས་གསུམ་པ་ཡང་འབེབས་པར་བྱེད། །ཕོ་ཉ་ཆེན་པོ་རྡོར་སེམ་མོ། །རབ་གཏུམ་ལ་སོགས་རྡོ་རྗེ་ཅན། །ནམ་མཁའི་ཁམས་ཀུན་གང་བ་ཡི། །དུག་ནི་སྐད་ཅིག་
ལས་འཇོམས་བྱེད། །དེ་ནས་བཅོམ་ལྡན་འདས་རྣམ་པར་སྣང་མཛད་དམ་ཚིག་ཐམས་ཅད་རྣམ་པར་སྐྲོད་པར་བྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་གཤིན་རྗེ་མཐར་བྱེད་ཅེས་བྱ་བའི་རྡོ་རྗེའི་
སྔགས་འདི་གསུངས་སོ། །ན་མོ་བཛྲ་ཛྙཱ་ནཱ་ཡ། ས་མ་ཡ་ས་ཏྭཱ་ནཱྂ། ཀ་ར་ཀ་ར། ཀུ་རུ་ཀུ་རུ། མ་མ་ཀཱརྱྂ་བྷཉྫ་བྷཉྫ། སརྦ་བིགྷྣཱཾ་ད་ཧ་ད་ཧ། སརྦ་བི་ནཱ་ཡ་ཀཱྂ། མཱུརྡྷ་ཊ་ཀཛཱི་བི་ཏཱནྟ་ཀ་ར། མ་ཧཱ་བི་ཀྲྀ་ཏ། རཱུ་པི་ཎེ་པ་ཛ་པ་ཛ། སརྦ་
མ་ཧཱ་ག་ཎ་པ་ཏི། ཛཱི་བི་ཏཱནྟ་ཀ་ར་བནྡྷ་བནྡྷ། སརྦ་གྲ་ཧཱྃ། ཥ་ད་མུ་ཁ། ཥཌ་བྷུ་ཛ། ཥཊ་ཙ་ར་ཎཱ། རུ་དྲ་མཱ་ན་ཡ། བིཥྞུ་མ་ན་ཡ། བྲཧྨཱ་དྱཱྂ་སརྦ་དེ་བཱ་མཱ་ན་ཡ། མཱ་བི་ལམྦ་མ་བི་ལམྦ། ལ་ཧུ་ལ་ཧུ། མཎྜལ་མ་དྷྱེ། པྲ་བེ་ཤ་ཡ། ས་མ་ཡ། 
མ་ནུསྨ་ར། ཧཱུྂ་ཧཱུྂ་ཧཱུྂ་ཧཱུྂ་ཧཱུྂ་ཧཱུྂ་ཕཊ་སྭཱ་ཧཱ། དེ་ནས་འདི་ནི་གསུངས་པ་ཙམ་ལ་བཅོམ་ལྡན་འདས་རྣམ་པར་སྣང་མཛད་ཆེན་པོ་དེ་ཉིད་སྣ་ཚོགས་པའི་གཟུགས་འཛིན་པར་གྱུར་ནས། ནམ་མཁའི་ཁམས་ཐམས་ཅད་ཀྱི་རྡུལ་ཕྲ་མོ་དང་
མཉམ་པའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀའི་སྟེང་དུ་ཟླ་བའི་དཀྱིལ་འཁོར་དུ་གནས་པར་གྱུར་ཏོ། །རང་གི་གཟུགས་ཀྱིས་ནམ་མཁའི་ཁམས་ཀུན་དུ་བཀང་ནས། ཆེད་དུ་བརྗོད་པས་ཆེད་དུ་བརྗོད་པར་མཛད་དོ། །
ཨེ་མའོ་སྔགས་རྣམས་ཀུན་གྱིས་ནི། །རྡོ་རྗེ་མི་ཕྱེད་བླ་ན་མེད། །དེ་བཞིན་གཤེགས་པའི་རྡོ་རྗེ་གང་། །ས་ཡི་གོང་བུར་འགྱུར་བར་བྱེད། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་ངོ་བོ་ཉིད་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ནས་རྡོ་རྗེ་སྒྱུ་མར་བརྗོད་པ་ཞེས་བྱ་བའི་སྔགས་འདི་སྟོན་པར་མཛད་དོ། །ཨོཾ་བཛྲ་ཁུ་ར་བི་ཀྲི་ཏཱན་ན་ཧཱུྂ་ཕཊ། དེ་ནས་འདི་ནི་གསུངས་ཙམ་ལ། །བཅོམ་ལྡན་ཆོས་འཆང་དེ་ཉིད་ནི། །དེ་བཞིན་གཤེགས་ཀུན་

89-1-30a

ཀུན་སྐྲག་པའི། །ཆེད་དུ་བརྗོད་འདི་ཆེད་རྗོད་མཛད། །ཨེ་མ་ཧོ་སྔགས་རྣམས་ཐམས་ཅད་ཀྱི། །རྣམ་ཀུན་དེ་ཉིད་སྟོན་པ་པོ། །འཇོམས་བྱེད་རྡོ་རྗེ་རྒྱལ་མཚན་གྱིས། །སངས་རྒྱས་ཐམས་ཅད་གཞག་པར་གྱུར། །དེ་ནས་བཅོམ་
ལྡན་འདས་རྣམ་པར་སྣང་མཛད་ཆེན་པོ་ནམ་མཁའི་ཁམས་ཐམས་ཅད་ཀུན་དུ་སྣང་བར་བྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། སྔགས་ཆེན་པོ་འདི་སྟོན་པར་བྱེད་དོ། །ཨོཾ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ་
བི་དྷྭྂ་ས་ཡ་ཨུ་ཙྪུཥྨ་ཀྲོ་དྷ་ཧཱུྃ་ཕཊ། དེ་ནས་འདི་གསུངས་པ་ཙམ་ལ་བཅོམ་ལྡན་འདས་རྡོ་རྗེ་འཆང་དེ་ཉིད་ནམ་མཁའི་ཁམས་ཐམས་ཅད་ཀུན་དུ་སྣང་བར་བྱས་ནས། དེ་བཞིན་གཤེགས་པ་ཐམས་ཅད་ཀྱི་འཁོར་ལོའི་འོད་ཟེར་གྱིས་
ཀུན་དུ་བཀང་ནས་ཆེད་དུ་བརྗོད་པས་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱིས་ནི། །སྔགས་ཀྱི་ཚུལ་གྱི་བདག་ཉིད་ང་། །སངས་རྒྱས་ཀུན་གྱི་སངས་རྒྱས་ཉིད། །ཟླ་བ་དྲུག་གིས་ཐོབ་པར་འགྱུར། །དེ་ནས་བཅོམ་ལྡན་
འདས་སླར་ཡང་ནམ་མཁའི་ཁམས་ཐམས་ཅད་ཀྱི་ངོ་བོ་ཉིད་ཀྱི་ཚུལ་གསལ་བར་བྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་མི་གཡོ་བ་ཞེས་བྱ་བའི་སྔགས་འདི་གསུངས་སོ། །ན་མཿས་མན་ཏ་བཛྲཱ་ཎཱྃ་ཨ་ཙ་ལ་
ཀཱན་ཧེ་ཧེ་མོ་ཧ་ཡ་མོ་ཧ་ཡ། ཧ་ས་ཧ་ས། ཏིཥྛ་ཏིཥྛ། ཨཱ་བི་ཥ་ཨཱ་བི་ཥ། མ་ཧཱ་བ་ལ་མནྟུ་ཙ་ལ་དྷུ་ན་དྷུ་ན། ཏི་ན་ཏི་ན། ཁཱད་ཁཱད། བིགྷྣཱྂ་མཱ་ར་ཡ་མཱ་ར་ཡ། དུཥྚཱ་ན་བཀྵ་ཡ་བཀྵ་ཡ། སརྦཱཻ་ཀ་ར་ཀ་ར། ཀི་རི་ཀི་རི། མ་ཧཱ་བི་ཥ་མ་བཛྲཱ་སྥཱ་ཊ་ཡ་སྥཱ་ཊ་ཡ། ཧཱུྃ་
ཧཱུྃ་ཏྲི་བ་ལི་ཏ་རངྒཱ་ནརྟ་ཀཿཨཱྃ་ཧཱྃ་ཨཱྃ་ཧཱྃ་ཨཱྃ་ཧཱྃ། ཨ་ཙ་ལ་ཙ་ཊ། སྥཱ་ཊ་ཡ་སྥཱ་ཊ་ཡ་ཧཱུྂ་ཨ། ས་མནྟི་ཀ་ཏྲཱཊ། མ་ཧཱ་བ་ལ། སཱ་ཏ་ཡ། ཏྲཱྃ་ཧཱྂ་མཱྂ་ཤུདྷྱ་ཏུ་ལོ་ཀ་སྟུ་ཤྱསྟུ། བཛྲཱི་ན་མཿཙནྡ་པྲ་ཏི་ཧ་ཏ་བ་ལེ་བྷྱ་ཛྭཱ་ལ་ཡ་ཏྲཱཊ། ཨ་ས་ཧ། ན་མཿསྭཱ་ཧཱ། དེ་ནས་
མངག་གཞུག་གི་ཁྲོ་བོ་འདི་གསུངས་པ་ཙམ་ལ། བཅོམ་ལྡན་འདས་གཟུགས་སྣ་ཚོགས་འཆང་ཆེན་པོ་དེ་ཉིད་ཐམས་ཅད་ཡང་དག་པར་བསྐྱེད་ནས། དེ་བཞིན་གཤེགས་པ་ཐམས་ཅད་ཀྱི་སྙིང་པོའི་དཀྱིལ་འཁོར་དུ་ཆེད་དུ་བརྗོད་

89-1-30b

པ་འདི་ཆེད་དུ་བརྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱི་ནི། །དེ་ཉིད་འབྱུང་བ་བསྟན་པ་ང་། །རྡོ་རྗེ་མི་ཕྱེད་རང་བཞིན་གྱིས། །ཡེ་ཤེས་རྟོག་གིས་བསྐྱེད་པར་བྱེད། །དེ་ནས་བཅོམ་ལྡན་འདས་སླར་ཡང་དེ་བཞིན་གཤེགས་པ་ཐམས་ཅད་
ཀུན་དུ་སྐྲག་པར་བྱེད་པའི་རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་ཆེན་པོ་ཁྲོ་གཉེར་ཅན་ཞེས་བྱ་བའི་སྔགས་འདི་གསུངས་སོ། །ན་མོ་བྷ་ག་ཏྱཻ་བྷྲཱི་ཀུ་ཊྱཻ། ཨོྂ་བྷྲི་ཀུ་ཊྀ་ཏ་རངྒཱ་བི་ཛྱམྦྷི་ཏ་བཛྲ་མ་ཧཱ་བ་
ལ་ཧཱུྃ་ཕཊ། དེ་ནས་འདི་གསུངས་པ་ཙམ་ལ་འདོད་ཆགས་ཆེན་པོ་དེ་ཉིད་དེ་བཞིན་གཤེགས་པ་ཐམས་ཅད་ཀྱི་དེ་བཞིན་གཤེགས་པ་ཀུན་གྱི་ཆོས་ཀྱིས་ཀུན་དུ་སྣང་བ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་གནས་པ་ཆེད་དུ་བརྗོད་པ་
འདི་ཆེད་དུ་རྗོད་པར་མཛད་དོ། །ཨེ་མ་ཧོ་སྔགས་རྣམས་ཀུན་གྱི་ནི། །ཆོས་ཀྱི་འདོད་ཆགས་ཀུན་བསྡུས་པ། །རྡོ་རྗེ་ཡེ་ཤེས་ལྟ་བུ་སྟེ། །སྔགས་ཀྱི་དངོས་གྲུབ་ཅེས་བཤད་དོ། །དེ་ནས་བཅོམ་ལྡན་འདས་སླར་ཡང་ཀུན་ནས་སྤྲོ་བའི་
རྡོ་རྗེ་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་སྟོབས་པོ་ཆེ་ཞེས་བྱ་བའི་སྔགས་འདི་གསུངས་སོ། །ཨོཾ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ་བིདྷྭཾ་ས་ཡ་ཨུ་ཙྪུཥྨ་ཀྲོ་དྷ་ཧཱུྃ་ཕཊ། དེ་ནས་འདི་གསུངས་པ་ཙམ་
ལ་བཅོམ་ལྡན་འདས་གསང་བ་ཆེན་པོ་འཛིན་པ་དེ་བཞིན་གཤེགས་པ་ཐམས་ཅད་ཀྱི་གསང་བ་རྣམས་ཀྱིས་དེ་བཞིན་གཤེགས་པ་ཐམས་ཅད་ཀྱིས་གསུངས་པ་གང་ཡིན་པ་ཆེད་དུ་བརྗོད་པ་འདི་ཆེད་དུ་རྗོད་པར་མཛད་དོ། །ཨེ་མ་ཧོ་སྔགས་
རྣམས་ཀུན་གྱི་ནི། །རྡོ་རྗེའི་དབྱེ་བ་བླ་ན་མེད། །དེ་ཉིད་དམ་ཚིག་ཀུན་དུ་དག །རྡོ་རྗེ་ཡིད་བཞིན་ནོར་བུར་བཤད། །དེ་ནས་བཅོམ་ལྡན་འདས་སླར་ཡང་དེ་བཞིན་གཤེགས་པ་ཐམས་ཅད་མི་ཕྱེད་པའི་ངོ་བོ་ཉིད་ཀྱི་རྡོ་རྗེ་བྱིན་གྱིས་རློབ་པ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་བདུད་རྩི་ཐབ་སྦྱོར་དུ་བརྗོད་པ་ཞེས་བྱ་བའི་སྔགས་ཆེན་པོ་འདི་གསུངས་སོ། །ཨོཾ་ཁ་ཁ་ཁཱ་ཧི་ཁཱ་ཧི་ཏིཥྛ་ཏིཥྛ། བྷནྡྷ་བྷནྡྷ། གྲཱིཧྞ་གྲཱིཧྞ། ཧ་ན་ཧ་ན། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། 

89-1-31a

ཛྭ་ལ་ཛྭ་ལ། པྲ་ཛྭཱ་ལ་པྲ་ཛྭཱ་ལ། གྲ་ས་གྲ་ས། སརྦ་བིགྷྣ་བི་ནཱ་ཡ་ཀཱཾ། བིདྱཱ་དྷ་རེ། ཀེ་ལཱི་ཀི་ལ་ཛྭ་ལི་ཏ་ཧུ་ཏ་བ་ཧ་ཤི་ར་མ་ཧཱ། བྷཻ་ར་བེ་ནིརྒྷོ་ཥ། སཾ་ཙྪིནྡ་ཙྪིནྡ། མ་ཧཱ་བཛྲ་དྷཱ་ར། ཏིཥྛ་ཏིཥྛ། བནྡྷ་བནྡྷ། བདག་ཆེ་གེ་མོའི། 
བི་ནཱ་ཡ་ཀ་ཧྲྀ་ད་ཡཱཾ། སྥོ་ཊ་ཡ། གནྡྷརྦ། ཧྲི་ད་ཡཱཾ། སྥོ་ཊ་ཡ། ནཱ་ག་ཧྲི་ད་ཡཱཾ། སྥོ་ཊ་ཡ། ཡཀྵ་ཧྲྀ་ད་ཡཱྃ་སྥོ་ཊ་ཡ། བྲཧྨ་རཱཀྵ་སཾ། ཧྲྀ་ད་ཡཾ་སྥོ་ཊ་ཡ། སརྦ་གྲ་ཧ་ཧྲྀ་ད་ཡཱཾ་སྥོ་ཊ་ཡ། སརྦ་ཛྭ་ར་ཧྲྀ་ད་ཡཾ། སྥོ་ཊ་ཡ། སརྦ་ཙཱ་ཏུཪྠ་ཀ་ཧྲི་ད་ཡཾ་སྥོ་ཊ་
ཡ། ཧཱུཾ་ཀཱ་རེ་ཕཊ་ཕཊ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། བི་ཀུརྦ་བི་ཀུརྦ། ཨཱ་བི་ཤ་ཨཱ་བི་ཤ ། མ་ཧཱ་བཛྲ་དྷ་ར་ཨཱ་ཛྙཱ་པ་ཡ་ཏི་སྭཱ་ཧཱ། དེ་ནས་འདི་གསུངས་པ་ཙམ་ལ་བཅོམ་ལྡན་འདས་རྡོ་རྗེ་འཛིན་པ་ཉིད། དེ་བཞིན་གཤེགས་པ་
ཐམས་ཅད་ཀུན་དུ་དགྱེས་པ་ཆེད་དུ་བརྗོད་པ་འདི་ཆེད་དུ་རྗོད་པར་མཛད་དོ། །ཨེ་མ་ཧོ་སྔགས་རྣམས་ཀུན་གྱི་ནི། །དེ་ཉིད་རྡོ་རྗེ་བླ་ན་མེད། །དམ་ཚིག་ཐམས་ཅད་ཡང་དག་འབྱུང་། །དེ་ཉིད་མི་ཕྱེད་ཀུན་བསྡུས་པའོ། །དེ་ནས་
བཅོམ་ལྡན་འདས་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་གཱནྡྷ་རཱི་ཆེན་མོ་འདི་གསུངས་སོ། །ཨོཾ་ཨེ་ཧྱེ་ཧི་བྷ་ག་བ་ཏི་མ་ཧཱ་བཛྲ་གཱནྡྷ་རི་ཏྲ་ཡཱ་ནཱཾ་རཏྣ་ནཱཾ་ས་ཏྱེ་ན། ཨ་ཀཌྷྱ་ཨ་ཀཌྷྱ། བ་ལ་ཏེ་བཾ། མ་
ཧེ་ཤྭ་རྂ། ག་རུ་ཊཾ། བིཥྞུྂ་ཀུ་མཱ་རཾ། བྲཧྨཱ་ཎྃ། ཨིནྡྲཾ་ཙནྡྲྃ། ཨཱ་ཏི་ཏྱྃ། ཡ་མྃ། བ་རུ་ཎྃ། ཀུ་བེ་རྃ། དྷྲི་ཏ་རཱཥྚཾ། བི་རུ་ཌྷ་ཀཾ་བྀ་རཱུ་པཱ་ཀྵྃ། ཤངྐུ་ཀཪྞྞྃ། དྭི་ཀཪྞྞྃ། ཏྲི་ཀཪྞྞྃ། གོ་ཀཪྞྞྃ།  སྠཱུ་ལི་ཀཪྞྞྃ།  མ་ཧཱ་ཀཪྞྞྃ།  ནཱནྡི་ཀེ་ཤྭ་རཾ། བྷྲྀ་ཀི་རཱི་ཊིཾ། ནཱ་ཡ་ཀཾ། 
བི་ནཱ་ཡ་ཀཾ། པཱཉྩི་ཀཾ། ལོ་ཧ་ཀཾ། ཥཥྛི་དེ་ཝཱི། ཀོ་ཊ་གི་རིཾ། ཨོྂ་ཀཱ་རིཾ། དུརྒཾ། ཀཱ་ཏྱ་ཡི་ཎཱིཾ། ཙཎྜ་ཀཱ་ཏྱ་ཡི་ཎཱི། མ་ཧཱ་ཀཱ་ཏྱ་ཡ་ཎཱི། ཨཻ་ཤཱ་ནཱི། ནཻ་རི་ཏྱཱཾ། ཀཱ་ལཱི། མ་ཧཱ་ཀཱ་ལཱི། བཛྲ་ཀཱ་ལཱིྃ། ཡ་ཤྭི་ནཱིྂ། ས་ཀཱ་ལཱི། བྷ་ཏྲ་ཀཱ་ལཱི། ཨགྣེ་ཡཾ།  བ་ཡ་བྱཱཾ། ཧ་ལི་ཀཱ། བིརྟཾ། 
ཤཀྟི། ཤ་ཏཱ་ཀྵི། ཨིཎྡྲ་ཎཱིཾ། བཏྨཱ་ཎཱིཾ། ཀཽ་བེ་བཱི་མཱ་ཧེ་ཤྭ་རཱི། བཻཥྞ་བཱིྂ། སུ་བྷ་གཱཾ་ཙཱ་མུཎ་ཊཱཾ། རཽ་ཏྲི། བཱ་རཱ་ཧཱི། ཀཽ་བེ་རཱི། ཡེ་ཙཱ་ནྱེ། མ་མ་ཡེ་ན། ཏིཥ་ནྟི། ཏཱི་ནྱཱ་བརྟ། ཡིཥྱཱ་མི། ཤཱི་གྷྲཾ། གྲྀཧྣ་གྲྀཧྣ། ཧུ་ལུ་ཧུ་ལུ། ཙུ་ལུ་ཙུ་ལུ། 

89-1-31b

མུ་ལུ་མུ་ལུ། དྷ་མ་དྷ་མ། རངྒ་རངྒ། པཱུ་ར་ཡ་པཱུ་ར་ཡ། ཨཱ་བི་ཥ་ཨཱ་བི་ཥ།  བྷ་ག་བ་ཏི། མ་ཧཱ་བཛྲ་གཱནྡྷ་རི་སིདྡྷ་ཥྩཎ་ཊ། བཛྲ་པཱ་ཎེ། རཱཛྙཱ་པ་ཡ་ཏི། ཧྲཱིཿཧཿཧཿཧཿཧཿཧཱུཾ་ཕཊ་སྭཱ་ཧཱ། འདི་གསུངས་པ་ཙམ་ལ་དེ་བཞིན་གཤེགས་པ་
ཐམས་ཅད་རྡོ་རྗེ་ཆེན་པོའི་ཚུལ་གྱིས་བསྐོར་བར་གྱུར་ཏོ། །དེ་ནི་དེ་བཞིན་གཤེགས་པ་ཐམས་ཅད་ཀྱི་རིག་མ་དེ་སྒྲོགས་པར་བྱེད་པ་འདི་ཆེད་དུ་བརྗོད་པས་ཆེད་དུ་བརྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱི་ནི། །
ཀུན་གཞི་འབད་པར་བྱེད་པ་བདག །རྡོ་རྗེ་རྩེ་ཅན་གང་འདི་དྲན། །སངས་རྒྱས་ལ་སོགས་འབེབས་པར་འགྱུར། །དེ་ནས་བཅོམ་ལྡན་འདས་སླར་ཡང་ཞི་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་སེན་མོ་
ཞེས་བྱ་བའི་ཕོ་ཉ་མོ་ཆེན་མོ་འདི་གསུངས་སོ། །ཨོཾ་ཨེ་ཧྱེ་ཧི་བཛྲ་ན་ཁི། བཛྲ་མུ་ཁི། ཧ་ན་ཧ་ན། པ་ཙ་པ་ཙ། རངྒ་རངྒ་། ཨལྤ་ཨལྤ། ཨཱ་བི་ཥ་ཨཱ་བི་ཥ། ཧ་ཡ་གྲཱི་བ། པ་ཡ་ཏི། སྭཱ་ཧཱ། དེ་ནས་འདི་གསུངས་པ་ཙམ་ལ་ཇི་སྲིད་
དུ་དུག་ཆེན་པོ་དེ་རྣམས་ཐམས་ཅད་དེ་རབ་ཏུ་སྒོམས་པས་བཅོམ་པ་བཞིན་དུ་གྱུར་ཏོ། །དེ་ནས་རིག་མ་དེ་བཞིན་གཤེགས་པ་ཐམས་ཅད་ལ་རབ་ཏུ་བཏུད་ནས་ཆེད་དུ་བརྗོད་པ་འདི་ཆེད་དུ་རྗོད་པར་མཛད་དོ། །
ཨེ་མའོ་སྔགས་རྣམས་ཀུན་གྱི་ནི། །དུག་རྣམས་ཐམས་ཅད་སེལ་བ་བདག །ཕོ་ཉའི་མཆོག་གང་དེ་བརྟེན་ནས། །སངས་རྒྱས་ཐམས་ཅད་རྣམ་པར་སྦྱངས། །དེ་ནས་བཅོམ་ལྡན་འདས་སླར་ཡང་རྡོ་རྗེ་གསུམ་མི་ཕྱེད་
པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་གཞན་གྱིས་མི་ཐུབ་པ་ཞེས་བྱ་བའི་སྔགས་འདི་གསུངས་སོ། །ཨོྂ་ཛི་ན་རི་ཊི་ཊྂ་ཧཱུྂ་ཧཱུྂ་ཕཊ་ཕཊ་སྭཱ་ཧཱ། དེ་ནས་འདི་གསུངས་པ་ཙམ་ལ་བཅོམ་ལྡན་
འདས་རྣམ་པར་སྣང་མཛད་ཆེན་པོ་འདི་སེམས་ཅན་ཐམས་ཅད་ཀྱི་བདེ་བའི་ནོར་གྱིས་ཉེ་བར་བཀང་ནས་ཆེད་དུ་བརྗོད་པ་འདི་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱི་ནི། །བསྐྱེད་པ་ཡང་དག་འབྱུང་བ་

89-1-32a

བདག །སངས་རྒྱས་བྱང་ཆུབ་རབ་བསྒྲུབ་དོན། །བསྐལ་པའི་རྒྱ་མཚོར་བདག་གནས་སོ། །དེ་ནས་བཅོམ་ལྡན་འདས་སླར་ཡང་ཆོས་ཀྱི་དབྱིངས་སུ་སྤྲོ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ནས། རྡོ་རྗེ་རལ་པ་གཅིག་མ་ཞེས་བྱ་བའི་རིག་མའི་རྒྱལ་པོ་མཆོག་འདི་གསུངས་སོ། །ན་མཿསརྦ་ཏ་ཐཱ་ག་ཏེ་བྷྱཿ སརྦ་བིདྱཱ་ག་ཎེ་བྷྱཿ ཨོྂ་ཨེ་ཧྱེ་ཧི་བྷ་ག་ཝ་ཏི། ཡཀྵི་ཎཱི་ཡེ། མཱ་པེ་ཊི་ཨི་ཊི་ཕཌ་ཊེ་ཛོ་སུ་ར་པྲ་མ་
ཐ་ནི་ཨ་ཀ་ཛ་ཊི་ནི་རཀྟ་ས་ཧི་ཏ་དེ་བི་མ་བི་ཧེ་ཋ་ཡ་ནི། རི་བི་ཏི་རི་ཀ་རི། ཏ་ཡཱི་རི། ཀ་པཱ་ལ་ཙྪ་ཏྲ། པྲི་ཡེ་མ་ཧཱ་ཀ་པཱ་ལི། མ་ཧཱ་བ་ལ། མ་ཧཱ་ཙ་པ་ལེ། སིདྡྷི་སརྦ་ཨཪྠ། སཱ་དྷ་ཡ། སརྦ་སཏྭ་བིགྷྣ་པྲ་ཤ་མ་ནི་སྭཱ་ཧཱ། 
དེ་ནས་འདི་གསུངས་པ་ཙམ་གྱིས་བཅོམ་ལྡན་འདས་པད་མ་འཆང་བ་དེ་ཉིད་ནམ་མཁའི་ཁམས་ཐམས་ཅད་རྣམ་པར་སྤྲོས་ནས། དེ་བཞིན་གཤེགས་པ་ཐམས་ཅད་ཀྱི་ཅོད་པན་དུ་གནས་ནས་ཆེད་དུ་བརྗོད་པ་
འདི་ཆེད་དུ་རྗོད་པར་མཛད་དོ། །ཨེ་མའོ་སྔགས་རྣམས་ཀུན་གྱི་ནི། །སྔགས་ཀྱི་བདག་ཉིད་ཅན་འབྱུང་བ། །རྒྱལ་བ་ཀུན་གྱི་ཞི་གང་དེ། །རྣམ་པར་བསྒོམས་པས་མཆོད་པར་བྱེད། །དེ་ནས་བཅོམ་ལྡན་འདས་
འཁོར་ལོ་ཐམས་ཅད་ཀུན་དུ་སྐྲག་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། རྡོ་རྗེ་ཆེན་པོ་ཁྲོ་གཉེར་ཅན་འདི་གསུངས་སོ། །ཨོཾ་བྷ་ཡ་ནཱ་ཤ་ནི་ཏྲཱ་ས་ཡ་ཏྲཱ་ས་ཡ་བྷྲྀ་ཀུ་ཊི་ཏ་ཊི་བཻ་ཏ་ཊི་ཤྭེ་ཏེ་ཛ་ཊི་ནི་སྭཱ་ཧཱ། 
དེ་ནས་འདི་གསུངས་པ་ཙམ་ལ་བཅོམ་ལྡན་འདས་ཞི་བ་འཆང་བ་དེ་ཉིད་དེ་བཞིན་གཤེགས་པ་ཐམས་ཅད་ཡང་དག་པར་མཆོད་ནས་ཆེད་དུ་བརྗོད་པ་འདི་ཆེད་དུ་བརྗོད་པར་མཛད་དོ། །ཨེ་མའོ་སྔགས་རྣམས་
ཀུན་གྱི་ནི། །ཊ་གང་སངས་རྒྱས་ཡང་དག་འབྱུང་། །ཆོས་ཀྱི་ཡུམ་ནི་རབ་བསྒྲུབ་དོན། །འདི་ནི་བསྐྱེད་པར་གསུངས་པ་ཡིན། །དེ་ནས་བཅོམ་ལྡན་འདས་སླར་ཡང་ཡེ་ཤེས་འདུ་བར་བྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་

89-1-32b

ལ་སྙོམས་པར་ཞུགས་ནས། །རང་གི་རིགས་ཀྱི་སྙིང་པོ་འདི་གསུངས་སོ། །ཨོྂ་ཨཱ་རོ་ལིཀ །དེ་ནས་བཅོམ་ལྡན་འདས་སེམས་ཅན་ཐམས་ཅད་ཀྱི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། 
རིགས་ཀྱི་ཡུམ་འདི་གསུངས་སོ། །ཨོྂ་རུ་རུ་སྥུ་རུ་ཛྭ་ལ་ཏིཥྛ་སིདྡྷི་ལོ་ཙ་ནེ་སརྦ་ཨཪྠ་སཱ་དྷ་ནི་སྭཱ་ཧཱ། དེ་ནས་བཅོམ་ལྡན་འདས་སླར་ཡང་རང་གི་སྐུ་རྣམ་པར་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྔགས་འདི་
གསུངས་སོ། །ཨོཾ་ཤངྐ་རི་ཤཱནྟི་ཀུ་རེ་གྷུ་ཊ་གྷུ་ཊི་གྷུ་ཊི་ནི་གྷུ་ཊི་ནི་གྷཱ་ཏ་ཡ་གྷཱ་ཏ་ཡ། གྷ་ཊི་ནི་ཧཱུྃ་ཕཊ་སྭཱ་ཧཱ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་བསྐྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ནས་རང་གི་སྔགས་འདི་གསུངས་སོ། །ཨོཾ་སྭ་ཏེ་པཱཎྜ་ར་བཱ་སི་ནི་ཛ་ཊཱ་མ་ཀུ་ཊ་དྷཱ་རི་ཎི་སྭཱ་ཧཱ། དེ་ནས་བཅོམ་ལྡན་འདས་སངས་རྒྱས་རྣམ་པར་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རིག་པའི་རྒྱལ་པོ་འདི་གསུངས་
སོ། །ཨོཾ་དྷུཿདེ་ནས་བཅོམ་ལྡན་འདས་ཀྱིས་རིག་པའི་རྒྱལ་པོ་ལ་བཀའ་སྩལ་པ། ཨོཾ་སུམྦྷ་ནི་སུམྦྷ་ཧཱུྃ། གྲྀཧྣ་གྲྀཧྣ་ཧཱུྃ། གྲཱི་ཧྣཱ་པ་ཡ་གྲཱི་ཧྣཱ་པ་ཡ་ཧཱུྃ། ཨཱ་ན་ཡ་ཧོ། བྷ་ག་ཝཱཾ་བིདྱཱ་རཱ་ཛ་ཧཱུྃ་ཕཊ་སྭཱ་ཧཱ། དེ་ནས་བཅོམ་ལྡན་འདས་ཆོས་རྣམ་
པར་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྔགས་འདི་གསུངས་སོ། །ཨོཾ་ཨ་མྲྀ་ཏོདྦྷ་བོདྦྷ་བཱ་ཡ་སྭཱ་ཧཱ། དེ་ནས་བཅོམ་ལྡན་འདས་ཉོན་མོངས་པ་འཇོམས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ནས་ཉོན་མོངས་པ་ཟ་བའི་སྔགས་འདི་གསུངས་སོ། །ཨོཾ་ཀླེ་ཤཱ་ས་ནི་བི་ཛ་ཡེ་སྭཱ་ཧཱ། དེ་ནས་བཅོམ་ལྡན་འདས་དམ་ཚིག་ཆེན་པོའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆོས་ཀྱི་འཁོར་ལོའི་
གཙུག་ཏོར་འདི་གསུངས་སོ། །ཨོཾ་ཙྪིནྡ་ཙྪིནྡ། ཧ་ན་ཧ་ན། ད་ཧ་ད་ཧ། དཱིཔྟ་ཙཀྲ་ཧཱུྃ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གཟི་བརྗིད་ཀྱི་མཆོག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་

89-1-33a

གཟི་བརྗིད་ཕུང་པོ་འདི་གསུངས་སོ། །ཨོཾ་ཛྭ་ལ་ཛྭ་ལ། དྷ་ཀ་དྷ་ཀ །ད་ར་ད་ར། བི་ད་ར་བི་ད་ར། ཚིནྡ་ཚིནྡ། བྷིནྡ་བྷིནྡ། ཧཱུྃ་ཧཱུྃ་ཕཊ་སྭཱ་ཧཱ། དེ་ནས་བཅོམ་ལྡན་འདས་སླར་ཡང་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ནས། རྒྱལ་བའི་གཙུག་ཏོར་འདི་གསུངས་སོ། །ཨོཾ་ཛ་ཡོཥྞཱི་ཥ་ཛྭ་ལ་ཛྭ་ལ། བནྡ་བནྡ། ད་མ་ད་མ། ཧཱུྃ་ཧཱུྃ་ཧཱུྃ། ཧ་ཧ་ཧ་ན་ཧཱུྂ་ཕཊ། དེ་ནས་བཅོམ་ལྡན་འདས་དཀར་པོ་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ནས། གཙུག་ཏོར་གདུགས་དཀར་པོ་འདི་གསུངས་སོ། །ཨོྂ་མ་མ་མ་མ་ཧཱུྂ་ནིཿ དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། 
རིག་མ་ཆེན་མོའི་མཆོག་འདི་གསུངས་སོ། །ཨོཾ་ཏཱ་རེ་ཏུཏ་ཏཱ་རེ་ཏུ་རེ་སྭཱ་ཧཱ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ངེས་པར་སྒོམ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཁྲོ་བོ་གཟེགས་
མའི་སྔགས་ཆེན་པོ་འདི་གསུངས་སོ། །ཨོཾ་ཀ་ནི་དྷུ་ནི་ཧཱུྃ་ཕཊ། འཇིག་རྟེན་གསུམ་འགུགས་པར་བྱེད་པའི་སྔགས་ཤིན་དུ་མ་རུངས་པའི་ལས་ཏེ་ཇི་སྲིད་དུ་གདོན་གཞན་འབྱུང་བ་གང་ཡིན་པ་དེ་ཡང་དེ་ཁོ་ན་ཉིད་ཀྱི་རྣལ་འབྱོར་བསྒོམས་
པས་ལས་རྣམ་པ་གསུམ་བྱེད་དོ། །མི་གཡོ་ཞེས་བྱའི་ཁྲོ་བོ་ཆེ། །གཤིན་རྗེ་མཐར་བྱེད་གསུམ་འབྱུང་བ། །ཀུན་ནས་སངས་རྒྱས་ཞིང་རྣམས་སུ། །ཁམས་གསུམ་པ་ཡང་དེས་འཇོམས་བྱེད། །ཁྲོ་བོ་ཆེན་པོ་རྟ་མགྲིན་དང་། །
ཁྲོ་གཉེར་རིམ་པར་ལྡན་གྱུར་གང་། །རྡོ་རྗེ་སེམས་དཔའ་རང་ཉིད་ཀྱང་། །ཁྲོ་བོ་འདི་ཡིས་འཇོམས་པར་བྱེད། །སྟོབས་ཆེན་བདུད་རྩི་ཞེས་གྲགས་དག །མི་ཤེས་འཇིག་ཅིང་འཕྲོག་བྱེད་པ་ནམ་མཁའི་ཁམས་དང་མཚུངས་
པ་ཡང་། །ཐེ་ཚོམ་མེད་པར་འཇོམས་པར་བྱེད། །འབུམ་དུ་

89-1-33b

བཟླས་པའི་སྦྱོར་བ་ཡིས། །ཀུན་དུ་སོན་པར་བྱེད་པ་ཡིན། །བློ་ལྡན་སངས་རྒྱས་ཉིད་ཐོབ་པའང་། །འགུགས་པར་བྱེད་པར་ཐེ་ཚོམ་མེད། །ཁྲོ་གཉེར་ཙི་ཀ་ཊ་རིག་མ། །འཇིགས་པ་ཡང་ནི་འཇིགས་པར་བྱེད། །
ལྷ་མིན་ཆེན་པོ་སོགས་སྦྱོར་བས། །གཡུལ་དུ་སྦྱོར་བར་བྱེད་པ་ཡིན། །ཁྲོ་བོ་གཟེགས་མའི་མཆོག་རྩེར་སྐྱེས། །སྔགས་པས་འབུམ་ཕྲག་གཅིག་བཟླས་བྱ། །ཁྲོ་བའི་སེམས་ཀྱིས་སྦྱར་བྱས་ན། །ངེས་པར་སངས་
རྒྱས་ཀྱང་འཇིགས་བྱེད། །ལག་པར་དེ་ནི་ཡང་དག་བསྐྱེད། །མི་སྨྲ་དེར་སོན་བསམ་པ་ཡིས། །ཕ་རོལ་དཔུང་ནི་རེངས་པར་བྱེད། །བརྒྱ་བྱིན་གྱི་ཡང་ཐེ་ཚོམ་མེད། །གཟི་བརྗིད་ཕུང་པོ་བཟླས་ནས་ནི། །
འབུམ་ཕྲག་གསུམ་དུ་ལེགས་བསྐོར་ན། །བརྒྱ་བྱིན་སྡེ་ཡང་རེངས་པར་བྱེད། །འགའ་ཞིག་མིན་པར་འཇོམས་པར་བསྟན། །སྒྲོལ་མ་སྒྲོལ་ལེན་ཡང་དག་འབྱུང་། །འབར་བའི་ཡེ་ཤེས་དགེ་འབྱུང་
བར། །འོག་གི་སྦྱོར་བ་བསྒོམས་པ་ཡིས། །རྡོ་རྗེའི་སྡེ་ཡང་རེངས་པར་བྱེད། །དེ་ཡི་སྙིང་པོའི་མཆོག་སྐྱེས་གང་། །རིགས་དང་རིགས་དབང་རིག་པར་བྱེད། །དེ་དང་ཡང་ན་འདི་ཉིད་དུ། །སྦྱོར་བར་
བསམས་ནས་བསམ་གཏན་གྱི། །ཏིང་འཛིན་བསྒོམ་པས་སེར་པོའམ། །གཞན་དུ་དམར་པོར་ངེས་སྦྱར་བྱ། །བཅོམ་ལྡན་འདས་རྣམ་པར་སྣང་མཛད་ཀྱིས་དེ་སྐད་ཅེས་གསུངས་སོ། །
སྔགས་ཐམས་ཅད་ཀྱི་རྡོ་རྗེ་འབྱུང་བ་ཞེས་བྱ་བའི་ལེའུ་བཅྭ་ལྔ་པ་རྫོགས་སྷོ།། །། དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་སྔགས་ཐམས་ཅད་ཀུན་ལས། བཏུས་པའི་ལེའུ་གསུངས་
སོ། །ཞི་བ་རྒྱས་པ་སོགས་ལས་ལ། །རང་གཟུགས་རྣམ་པ་བསྒོམ་པ་ཡིས། །ཐུགས་ཀར་ཡེ་ཤེས་ཡང་དག་འབྱུང་། །ཅོད་པན་ཡེ་ཤེས་ཆོས་དབང་ཕྱུག །སངས་རྒྱས་གཟུགས་

89-1-34a

སུ་རྣམ་བསྒོམས་ནས། །རིན་ཆེན་སྣ་ཚོགས་མཚུངས་པའི་འོད། །རྣལ་འབྱོར་པས་བསྡུས་གོང་བུར་བྱ། །སངས་རྒྱས་གཟུགས་ནི་རྣམ་བསྒོམ་བྱ། །ཁྲོ་བོ་རྣམས་ཀྱི་སྟོན་པ་འདི། །རྡོ་རྗེ་འབྱུང་བ་སྒོམ་བྱེད་
པ། །དེ་ཡིས་ངོ་བོ་རྣམ་བསྒོམས་པས། །རིགས་དང་རིགས་སུ་འདི་བསྟན་ནོ། །རིགས་ཀྱི་དབང་ཕྱུག་རྣམ་བསྒོམས་ནས། །ཁ་དོག་ལྔ་པ་ལེགས་མཛེས་པར། །སྒོམ་པའི་གོ་འཕང་གིས་བསྒོམ་བྱ། །སླར་ཡང་རིགས་ཀྱི་
བདག་པོའི་སྔགས། །འདི་ཉིད་བསྒོམ་པར་བྱ་བ་སྟེ། །གཙུག་ཏོར་ཡང་ནི་རྣམ་བསྒོམ་བྱ། །འདི་ནི་སྔགས་རྣམས་ཐམས་ཅད་ཀྱི། །དགྱེས་དང་མགུ་བར་བྱེད་པར་བཤད། །དངོས་གྲུབ་ཐམས་ཅད་བྱེད་པར་འདོད། །རྡོ་རྗེ་ཡེ་ཤེས་སོགས་
རྫོགས་བྱེད། །རིག་མ་ལ་སོགས་ཐམས་ཅད་ཀྱིའང་། །རིག་པའི་རྒྱལ་པོ་རྣམ་འཇོམས་བྱེད། །ཕོ་ཉ་མོས་ཀྱང་ཐམས་ཅད་ཀྱི། །རྡོ་རྗེ་སེམས་དཔའ་རྣམ་བསྒོམ་པ། །འདོད་འགྱུར་སྔགས་རྣམས་ཐམས་ཅད་ཀྱི། །རང་གཟུགས་
རྣམ་པ་སྒོམ་པས་སོ། །འདི་ནི་སྔགས་རྣམས་ཐམས་ཅད་ཀྱི། །སྔགས་ཀྱི་དམ་ཚིག་འབྱུང་བ་སྟེ། །སངས་རྒྱས་ཀུན་གྱི་ཕན་འདོད་པས། །རྡོ་རྗེ་དཔའ་བོའི་མཆོག་གིས་གསུངས། །སྔགས་ཐམས་ཅད་ཀུན་ལས་བཏུས་པའི་
ལེའུ་བཅུ་དྲུག་པ་རྫོགས་སྷོ།། །། དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་སྐྲོད་པར་བྱེད་པའི་ལས་འདི་གསུངས་སོ། །སྐྲོད་པར་ལ་སོགས་བྱ་བ་ལ། །སངས་རྒྱས་དེ་ཉིད་ཡེ་
ཤེས་ཅན། །ཁྲོ་བོ་གསུམ་པོ་བསྡུས་པ་ཡི། །རྡོ་རྗེ་འབྱུང་བས་གྲགས་པ་ཉིད། །གཤིན་རྗེ་གཤེད་ནི་ཡེ་ཤེས་རིགས། །བསྡུས་པའི་དོན་ལ་མཆོག་རྩེར་སྐྱེས། །ཁྲོ་བོ་ཆེན་པོ་རྟ་མགྲིན་ནི། །ཆོས་ཀྱི་ཡེ་ཤེས་རིགས་
སུ་བཤད། །སྟོང་ཕྲག་གམ་ནི་བརྒྱ་ཡང་རུང་། །ཐེར་འབུམ་གཅིག་ཏུ་བཟླས་ནས་ནི། །རང་ཉིད་སངས་རྒྱས་ཤེས་པ་ཡང་། །ཆོ་ག་ཤེས་པས་སྐྲོད་པར་བྱེད། །ཐོད་པ་གསུམ་ལ་ཀུན་བཞག་ནས། །ལྷོ་ཡི་ཕྱོགས་ཀྱི་

89-1-34b

དུར་ཁྲོད་དུ། །འདོད་པ་འདི་ནི་ཡང་དག་བརྩམ། །རྡོ་དང་ཤིང་གི་སྦྱོར་བ་ཡིས། །དངོས་པོ་མེད་པས་ཡང་དག་བརྩམ། །རྡོ་དང་ཕུབ་མ་ཡང་དག་ལྡན། །བཟའ་དང་གསལ་བྱེད་རྣམ་པར་སྤངས། །ཁྲག་དང་ཕབས་སུ་ཡང་དག་ལྡན། །
ནིམ་པའི་འདབ་མས་བཟའ་བྱ་བ། །ཏ་ལའི་འདབ་མ་ལ་བྲི་བྱ། །སྔགས་པས་འཁྲུལ་འཁོར་སྨད་པར་བྱ། །ཚེར་མ་ཅན་གྱིས་བྲིས་ནས་ནི། །ནིམ་པའི་འདབ་མ་ཁར་བཅུག་ནས། །སྦྱོར་བའི་གནས་སུ་གཞག་པར་བྱ། །ལྷ་
ཆེན་པོ་ཡི་འོག་ཏུ་ནི། །དྲི་མ་མེད་པ་ཀུན་གཟུང་བྱ། །ཆོ་ག་ཤེས་པས་ལན་བདུན་དུ། །མངོན་པར་སྔགས་ཏེ་ཡང་དག་བརྩམ། །དགྲ་ཡི་སྒོ་འམ་ཡང་ན་གྲོང་། །གྲོང་ཁྱེར་རམ་ནི་ཀུན་འབྱུང་བའི། །གནས་འདི་རྣམས་སུ་ཕུང་པོ་ནི། །ཀུན་
ནས་སྐྲོད་པར་བྱེད་པ་ཡིན། །སྙིང་པོ་དེ་ལ་མདོར་བསྡུས་པས། །བྱ་བ་ཙོག་པུའི་སྟན་ལ་འདུག །དྲི་མ་མེད་པའི་གཟུགས་བྱས་ནས། །ཁྲོ་བོ་ཁྲོ་བོའི་མཆོག་འབྱུང་བ། །ཡོན་ཏན་སྟོང་ཕྲག་ཀྱང་བསྐྱེད་ནས། །རྟག་ཏུ་སངས་རྒྱས་ཀྱང་ཐོབ་
བྱེད། །ཉི་མ་བདུན་ནམ་སོ་སོར་བྱས། །གལ་ཏེ་འགའ་ཞིག་མི་འགྲོ་ན། །མགོ་བོ་ཚལ་པ་བདུན་དུ་འགས། །མི་ཕྱེད་རྡོ་རྗེ་རང་གིས་གསུངས། །དེ་བཞིན་གཤེགས་པ་ཐམས་ཅད་སྐྲོད་པའི་ལེའུ་སྟེ་བཅུ་བདུན་པ་རྫོགས་སྷོ།། །།
དེ་ནས་བཅོམ་ལྡན་འདས་ཀྱིས་རྣམ་པར་སྣང་མཛད་ཆེན་པོ་རྡོ་རྗེ་སེམས་དཔའ་མཉེས་པར་བྱེད་པའི་ལས་འདི་གསུངས་སོ། །སངས་རྒྱས་སློབ་དཔོན་འདབ་བཟང་ཉིད། །རྡོ་རྗེའི་དཀྱིལ་དཀྲུང་དུ་གནས་ཏེ། །བྱ་དཀའི་ཉེ་བར་
ལོངས་སྤྱོད་ཀྱིས། །གང་དེ་འཚོ་ཞིང་གནས་པར་བྱེད། །བརྗོད་པའི་ལྷག་མ་བསྟན་པར་བཤད། །འགྲོ་བ་དང་ནི་གར་ཉིད་དང་། །དེ་བཞིན་འབེལ་གཏམ་དུ་མི་འགྱུར། །མཐོན་པོ་མིན་ཉིད་སློབ་མ་ཡིས། །ཆོས་ཀྱི་དུས་སུའང་
སྡིག་པ་སོགས། །གནས་བྱ་གལ་ཏེ་རྨོངས་པ་དེ། །མནར་མེད་གནས་སུ་འཚེད་པར་འགྱུར། །སྔགས་ཙམ་གལ་ཏེ་ཚངས་པ་ལ། །ལག་པ་གཉིས་ཀྱིས་ཡང་དག་བརྩམ། །ཇི་སྲིད་ནམ་མཁའ་ཡང་དག་འབྱུང་། །

89-1-35a

མནར་མེད་གནས་སུ་འཚེད་པར་འགྱུར། །བུད་མེད་གསང་མིན་བརྗོད་བྱ་མིན། །གང་ཞིག་ལ་ལ་སློབ་དཔོན་ཆེད། །བདེ་དང་ལུས་སེམས་སྡུག་བསྔལ་བ། །སྦྱོར་བ་ཇི་སྲིད་འཚོ་ཡི་བར། །གལ་ཏེ་སློབ་
དཔོན་རྣམས་ཀྱི་བཀའ། །དགའ་བའི་སེམས་ཀྱིས་བྱས་གྱུར་ན། །དེ་ཚེ་བདག་ལ་སངས་རྒྱས་སོགས། །འགྲུབ་འགྱུར་འདིར་ནི་ཐེ་ཚོམ་མེད། །དེ་ལ་ཇི་སྲིད་འཚོ་ཡི་བར། །བརྡ་ཡིས་ཀུན་དུ་གནས་པར་བྱ། །དཀུ་རུ་བརྟེན་པའི་
ལག་པ་སོགས། །ཇི་སྲིད་འཚོ་བར་མི་བྱའོ། །དངོས་གྲུབ་འབྲས་བུ་དོན་གཉེར་བས། །སློབ་དཔོན་མིང་ནས་སྨོས་མི་བྱ། །ཇི་སྲིད་ནམ་མཁའ་ཡང་དག་འབྱུང་། །མནར་མེད་དམྱལ་བར་འཚེད་པར་འགྱུར། །དེ་བཞིན་གཤེགས་
པ་ཇི་ལྟ་བ་དེ་བཞིན་དུ་བྱའོ་ཞེས་སོ། །བཟའ་བ་ལ་ཡང་རང་སློབ་ཤེས། །སངས་རྒྱས་གཟུགས་སུ་རྣམ་བསྒོམ་བྱ། །དེ་ཡི་མིང་གི་ཡི་གེ་གང་། །ཇི་སྲིད་འཚོ་བར་བརྗོད་མི་བྱ། །སངས་རྒྱས་གྲངས་མེད་བསད་བྱས་ན། །སྡིག་པ་
འདི་ནི་ཁྱད་པར་འཕགས། །གང་ཚེ་ཁ་ཅིག་ཡོན་ཏན་འདིས། །བསྟོད་ན་བསོད་ནམས་ཡང་དག་འབྱུང་། །དེ་ཚེ་སློབ་དཔོན་རྟོག་མེད་པས། །གཞན་དུ་གལ་ཏེ་རྨོངས་པ་བདག །དེ་ཚེ་ངུ་འབོད་ངུ་འཚེད་འགྱུར། །གང་ཚེ་དེ་མེ་པ་
ཡཱ་ཏི། །གུས་པས་ཉན་སོགས་བསྙེན་པ་གང་། །དེ་ཚེ་སློབ་མ་སྔགས་ཞུ་དང་། །ཇི་ལྟར་ཁ་ཅིག་སློབ་དཔོན་རྣམས། །བདེ་བ་དངོས་སུ་མཐོང་བར་འགྱུར། །གང་ཞིག་ལ་ལ་སློབ་དཔོན་རྣམས། །བདག་ཉིད་ཐིག་ནག་འཚོད་
ཅིང་འཚེད། །དེ་དག་ངུ་འབོད་ངུ་འཚེད་འགྱུར། །སློབ་དཔོན་གང་ཞིག་ཚོལ་བྱེད་པ། །དེ་ནི་དེ་ལ་དབུལ་བར་བྱ། །གཞན་དུ་དངོས་གྲུབ་མེད་པ་ཉིད། །ཇི་སྲིད་སློབ་མའི་མ་བརྟག་སློབ་དཔོན་གྱི། །ཆུང་མའི་དོན་དུ་བསྒྲུབ་པར་བྱ། །ཡང་
ན་སྲིང་མོ་དེ་བྱིན་ནས། །འགྲུབ་འགྱུར་འདིར་ནི་ཐེ་ཚོམ་མེད། །སློབ་དཔོན་གང་ཞིག་སློབ་མའི་ཕྱིར། །ཕྱག་འཚལ་བ་ནི་བསྒྲུབ་པར་བྱ། །བསྐལ་པ་དྲུག་བཅུར་དེ་དམྱལ་བའི། །སྡུག་བསྔལ་མྱོང་བར་འཚེད་པར་འགྱུར། །དེ་ལྟར་

89-1-35b

ཡོན་ཏན་ཁྱད་འཕགས་ཀྱི། །ཟླ་བ་དྲུག་གིས་རབ་གསལ་བྱ། །གལ་ཏེ་གཞན་དུ་བདག་རྨོངས་ན། །མནར་མེད་ལྟ་བུར་འཚེད་པར་འགྱུར། །གང་ཉིད་སློབ་དཔོན་ཚོལ་བྱེད་པ། །དེ་ཉིད་སོ་སོར་བསྒྲུབ་པར་བྱ། །རྡོ་རྗེ་ཡེ་ཤེས་རབ་བསྐུལ་
བས། །དངོས་གྲུབ་ཡངས་པར་དེར་འགྲོ་འགྱུར། །ཡོན་ཏན་འདི་རྣམས་གང་གིས་འགས། །བསོད་ནམས་འབྱུང་བར་ཤེས་པར་བྱ། །སློབ་དཔོན་འདི་ཡི་རྒྱུད་ལ་སོགས། །དེ་ལྟ་བུ་སོགས་གསལ་བྱ་མིན། །དེ་ལྟར་བདག་ཉིད་དག་པ་ཐོབ། །
ཆོས་ཀྱི་དེ་ཉིད་ཆོ་གས་གནས། །དེ་ཡིས་སློབ་དཔོན་རབ་གསལ་བྱ། །མྱུར་དུ་འགྲུབ་འགྱུར་གཞན་དུ་མིན། །སངས་རྒྱས་གནས་ལ་གནས་པ་ཡིས། །གང་དེ་མགུ་ནས་རྡོར་སེམས་མཆོག །མྱུར་དུ་འགྲུབ་བྱེད་གཞན་དུ་མིན། །སངས་
རྒྱས་སངས་རྒྱས་ཉིད་ཐོབ་པ། །དེ་མགུ་བྱེད་པ་མཆོག་འབྱུང་འགྱུར། །དེ་ཡིས་འཇིག་རྟེན་གསུམ་འགྲུབ་སྟེ། །སངས་རྒྱས་ཡེ་ཤེས་རང་ཉིད་ཀྱང་། །དེ་བཞིན་གཤེགས་པའི་གསང་བ་རྡོ་རྗེ་སེམས་དཔའ་མཉེས་པར་བྱེད་
པའི་ལེའུ་སྟེ་བཅྭ་བརྒྱད་པ་རྫོགས་སྷོ།། །། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་སྔགས་ཐམས་ཅད་ཀྱི་ལེའུ་གསུངས་སོ། །སྐྱེད་མོས་ཚལ་དང་རྣམ་པར་དབེན། །ཆུ་ཀླུང་རབ་
ཏུ་འབབ་པ་དང་། །རི་དང་རྣམ་པར་བཀྲ་བ་རུ། །སྒྲུབ་པའི་གོ་འཕང་གིས་བསྒྲུབ་བྱ། །ཟླ་བ་གཅིག་གིས་འགྲུབ་པར་འགྱུར། །གལ་ཏེ་མིན་ན་དེ་འགྲུབ་མིན། །དབེན་དང་གཞན་པའི་ཡུལ་རྣམས་སུ། །སེམས་ནི་གང་དུ་རབ་དགྱེས་
བྱེད། །གསང་སྔགས་འབར་བས་བྱིན་བརླབས་པ། །དེ་ལ་སངས་རྒྱས་ཉིད་འགྲུབ་འགྱུར། །རྒྱ་མཚོ་དང་ནི་ཆུ་ཀླུང་ཆེ། །རི་བོ་ཆེན་པོའི་རྩེ་རྣམས་སུ། །ཡན་ལག་ཐ་དད་མིན་སྔགས་བཟླས། །ངེས་པར་ཟླ་བས་འགྲུབ་པར་
བྱེད། །སྐེ་ཚེ་དུག་དང་ཡང་དག་ལྡན། །ཏིག་ཏའི་ཤིང་གི་སྦྱིན་བསྲེག་གིས། །བསྙེན་པ་སོགས་ནི་དེ་བསྐྱེད་ནས། །གསང་སྔགས་སྒྲུབ་པ་ཀུན་སྤྱད་བྱ། །དེ་ལ་སྡོམ་པ་གཟུང་ནས་ནི། །ངེས་པར་འགྲུབ་བྱེད་གཞན་དུ་མིན། །གསང་

89-1-36a

སྔགས་ཆོ་ག་ཀུན་ཐོབ་ནས། །སྔགས་པས་བསྙེན་པ་འགྲུབ་པར་བྱེད། །དེ་ཕྱིར་སྔགས་པས་ཁྱད་པར་གྱི། །སྡོམ་པ་སོ་སོར་བསྒྲུབ་པར་བྱ། །གང་ཉིད་སྡོམ་པར་ཡང་དག་བརྗོད། །དེ་ཉིད་བརྟུལ་ཞུགས་ཅན་
གྱིས་བསྲུང་། །གཞན་དུ་ནམ་མཁའ་ཇི་སྲིད་པར། །མནར་མེད་དམྱལ་བར་ཀུན་ཏུ་འབྱུང་། །ཇི་སྲིད་འཚོ་བར་ཆོ་ག་བཞིན། །སློབ་དཔོན་སྡོམ་པ་སྲུང་བ་ལ། །དེ་ཡིས་སངས་རྒྱས་ཉིད་དུ་འགྲུབ། །སྣ་ཚོགས་འཛིན་པ་ཀུན་གཞི་ཡི། །
མཉམ་མེད་གསང་སྔགས་བཟླས་ནས་ནི། །སྒྲུབ་པའི་བདག་ཉིད་ཅན་གྱིས་བསྒྲུབ། །ཟླ་བ་གཅིག་གིས་འཇིག་རྟེན་གསུམ། །དེ་ཡིས་འགྲུབ་འགྱུར་ཐེ་ཚོམ་མེད། །རྣམ་ཤེས་ལས་ཀྱང་བྱུང་བའི་སྔགས། །འབུམ་ཕྲག་དྲུག་
ཏུ་བཟླས་ནས་ཀྱང་། །རྡོ་རྗེ་སེམས་དཔར་ཕྱག་བྱས་ནས། །ཟླ་བ་ཉ་ལ་དེ་འགྲུབ་འགྱུར། །སྔགས་དང་ཕྱག་རྒྱའི་རབ་དབྱེ་བས། །ངེས་པར་སངས་རྒྱས་ཀྱང་ཐོབ་བྱེད། །ཕྱག་རྒྱའི་དབྱེ་བ་རབ་བཀོད་པ། །ངེས་པར་ལྷ་རྣམས་སྤྱན་
དྲངས་མེད། །ངག་བདག་གང་ཉིད་ཚོལ་བྱེད་པ། །དེ་ཉིད་རྟག་ཏུ་འབད་བྱའོ། །མཁས་པས་རབ་མཆོག་སངས་རྒྱས་ལ། །སོགས་པའི་ཕྱག་རྒྱ་བཅིང་བྱས་ནས། །དེ་རྣམས་སྔགས་ནི་བཟླས་ནས་ནི། །རྟག་ཏུ་ངེས་པར་སྦྱིན་པར་
བྱ། །སྔགས་པས་རྒྱལ་པོའི་བུ་མོ་གང་། །གལ་ཏེ་སངས་རྒྱས་བུ་མོའང་རུང་། །བཟུང་ནས་ཉེ་བར་ལོངས་སྤྱད་བྱ། །ཇི་སྲིད་ཡིད་ནི་ཚིམ་པར་འགྱུར། །དུག་དང་སྐྱེ་ཚེ་ཡང་དག་ལྡན། །ཡུངས་ཀར་ཏིལ་མར་བསྲེས་པ་དང་། །རུས་པ་རྡོ་བར་
ཡང་དག་ལྡན། །མ་ཏི་ཏྃ་དེ་ཕྱེ་མར་བྱ། །བཤང་དང་གཅི་བ་རབ་བཅུག་ནས། །རྟུལ་ཞུགས་ཅན་གྱི་ཁྱད་པར་གྱིས། །ཟུར་གསུམ་མགྲིན་པའི་མེ་ལ་བསྲེག །ངེས་པར་མྱུར་དུ་འགྲུབ་པར་བྱེད། །ལྷ་སྦྱིན་ཞེས་ནི་བྱས་ནས་ནི། །
གང་གིས་འདི་ནི་རབ་གསལ་བྱེད། །གལ་ཏེ་འདིར་ནི་སངས་རྒྱས་རུང་། །གང་དེ་ཐལ་བར་བྱེད་པར་འགྱུར། །མཁས་པས་མཚན་མོ་ཕྱེད་ལ་ཡང་། །ཉི་མའི་གུང་ལ་སྦྱིན་བསྲེག་བྱ། །བསྐལ་པ་གཅིག་གི་བར་གྱི་ཡང་། །སྦྱིན་

89-1-36b

བྱེད་གཞན་དུ་ནམ་ཡང་མིན། །གལ་ཏེ་སངས་རྒྱས་སམ་འགའ་ཞིག །རྨོངས་པའི་སེམས་ཀྱིས་འདས་ན་ནི། །མགོ་བོ་ཚལ་པ་བདུན་དུ་འགས། །བྱང་ཆུབ་སེམས་ནི་རང་གིས་གསུངས། །རེངས་དང་འབེབས་པ་དང་པོར་གྲགས། །
གཉིས་པ་ས་ཞེས་བྱ་བར་བརྗོད། །གསུམ་པ་ལྷ་ཡི་མཆོག་ཡིན་ནོ། །བཞི་པ་འཕགས་པའི་ཡུལ་དུ་ཡང་། །ཕྱག་ན་རྡོ་རྗེར་གྲགས་པ་ཡིན། །སྙིང་པོ་ཀུན་གྱི་སྦྱོར་བ་ཡིས། །བྱ་བ་མྱུར་དུ་འགྲུབ་པར་བྱེད། །རེག་པ་སྣ་
ཚོགས་སོགས་དང་གནས། །སྐྱེད་མོས་ཚལ་དང་དགའ་སྟོན་ཆེ། །དཀྱིལ་འཁོར་དེ་ལ་བྱ་བ་ནི། །བདུག་པ་བྱིན་ནས་ཡང་དག་བརྩམ། །གལ་ཏེ་བརྒྱ་བྱིན་ནམ་ཚངས་པ། །སངས་རྒྱས་སམ་ཡང་བློ་གྲོས་ཆེ། །ཆོ་ག་
ཤེས་པས་ཞག་བདུན་གྱིས། །འཇོམས་འགྱུར་འདིར་ནི་ཐེ་ཚོམ་མེད། །ཆོ་ག་ཤེས་པས་ཁྲག་གིས་བྱུགས། །རང་ཉིད་རང་གི་ལུས་སུ་བྱ། །སྐྲ་གྲོལ་གཙུག་ཏོར་གྱུར་ནས་ནི། །མི་སྡུག་མཆེ་གཙིགས་འཇིགས་པར་བྱེད། །
དུར་ཁྲོད་ཁྱིམ་དུ་ཡང་དག་སྦྱོར། །རང་གིས་དེ་ཡི་མིང་བྲི་བྱ། །སྟོང་ཕྲག་གཅིག་ཏུ་བཟླས་ནས་ནི། །ངེས་པར་སངས་རྒྱས་ཀྱང་འཛིན་བྱེད། །ཆོ་ག་ཤེས་པས་གཤེར་བའི་གོས། །ཁྲོ་བོའི་སེམས་ཀྱིས་རབ་ཞུགས་ནས། །
ལིང་ག་རྐང་པས་མནན་ནས་ནི། །སངས་རྒྱས་ཀྱང་ནི་ངེས་པར་འཇོམས། །ཁྱབ་འཇུག་ལྷ་མིན་ལ་སོགས་ལྷ། །རྐང་པར་བྱས་ནས་བརྩམ་པར་བྱ། །ཆོ་ག་ཤེས་པས་ཉིན་བདུན་གྱིས། །ཁམས་གསུམ་པོ་ཡང་འཇོམས་པར་བྱེད། །
བཅོམ་ལྡན་འདས་རྣམ་པར་སྣང་མཛད་ཆེན་པོ་སྔགས་ཐམས་ཅད་འཆང་བས་དེ་སྐད་ཅེས་གསུངས་སོ། །གསང་བ་ཆེན་པོའི་ལེའུ་བཅུ་དགུ་པ་རྫོགས་སྷོ།། །། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་སྒྲུབ་
པ་པོ་ཐམས་ཅད་ཀྱི་སྡོམ་པའི་ལེའུ་གསུངས་སོ། །བཤང་དང་གཅི་བ་བཟའ་བར་བྱ། །སེམས་ཅན་ཀུན་ལ་བདེ་བ་སྦྱིན། །རྡོ་རྗེ་འཆང་རྒྱལ་དེ་ཉིད་ནི། །ཀུན་མཆོག་ས་ཡི་དབང་ཕྱུག་གོ། རྨ་དགུ་ལས་ནི་ཡང་དག་བྱུང་། །འགའ་ཞིག་

89-1-37a

ཏུ་ནི་བཟའ་བར་བྱ། །རྡོ་རྗེ་འཛིན་པ་ཀུན་གྱི་རྒྱལ། །ཀུན་མཆོག་ས་ཡི་དབང་ཕྱུག་གོ། འདོད་ཆགས་བཟའ་བར་བྱ་བ་ནི། །ཕན་དང་བདེ་བ་ཐམས་ཅད་སྦྱིན། །དེ་ནི་རྡོ་རྗེ་འཆང་རྒྱལ་པོ། །ཀུན་མཆོག་ས་ཡི་དབང་ཕྱུག་
གོ། ཞེ་སྡང་བཟའ་བར་བྱ་བ་ནི། །རྡོ་རྗེ་ཡེ་ཤེས་རབ་རྟོགས་བྱེད། །དེ་ཉིད་རྡོ་རྗེ་འཆང་རྒྱལ་པོ། །ཀུན་མཆོག་ས་ཡི་དབང་ཕྱུག་གོ། གཏི་མུག་བཟའ་བར་བྱ་བ་ནི། །ཡེ་ཤེས་ཐམས་ཅད་རྟོགས་པ་པོ། །དེ་ཉིད་ཞི་བ་འཛིན་རྒྱལ་པོ། །སངས་
རྒྱས་རྣམ་པར་སྣང་མཛད་གཞི། །བདེ་སྡུག་བཟའ་བར་བྱ་བ་ནི། །སློབ་དཔོན་ཇི་སྲིད་འཚོ་ཡི་བར། །དེ་ཉིད་ཞི་བ་འཛིན་རྒྱལ་པོ། །སངས་རྒྱས་རྣམ་པར་སྣང་མཛད་གཞི། །སློབ་དཔོན་ཇི་སྲིད་འཚོ་ཡི་བར། །ཆོས་དང་ཆོས་མིན་བཟའ་བར་བྱ། །
དེ་ཉིད་རྡོ་རྗེ་འཆང་རྒྱལ་པོ། །ཀུན་མཆོག་དེ་ཉིད་སྟོན་པ་པོ། །ཇི་སྲིད་འཚོ་བར་འགའ་ཞིག་ཏུ། །སེམས་ཅན་ཁམས་ནི་བཟའ་བར་བྱ། །དེ་ཉིད་རྡོ་རྗེ་འཛིན་རྒྱལ་པོ། །ཀུན་མཆོག་ས་ཡི་དབང་ཕྱུག་གོ། ཇི་སྲིད་འཚོ་བར་སྨད་པ་ཡི། །
བྱ་བ་ཐམས་ཅད་མི་བྱའོ། །དེ་ཉིད་རྡོ་རྗེ་འཆང་རྒྱལ་པོ། །ཀུན་མཆོག་ས་ཡི་དབང་ཕྱུག་གོ། དེ་ནས་དེ་བཞིན་གཤེགས་པ་རྣམས་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཆོས་ཉིད་དང་ཡི་གེ་ཐོས་ནས་ངོ་མཚར་
ཐོབ་ནས་རྡོ་རྗེ་འཆང་ཐམས་ཅད་ལ་འདི་སྐད་ཅེས་གསོལ་ཏོ། །རིགས་ཀྱི་བུ་འདི་ནི་ངོ་མཚར་ཏེ་གང་དུ་ཐམས་ཅད་མཁྱེན་པའི་ཡེ་ཤེས་ཀྱི་བདག་པོ་དེ་དག་གི་མིང་ཡང་ཤེས་པར་བྱ་བ་མ་ཡིན་ན། གཞན་ལྟ་ཅི་སྨོས་ཞེས་སོ། །དེ་ནས་
བཅོམ་ལྡན་འདས་ཕྱག་ན་རྡོ་རྗེ་བཅོམ་ལྡན་འདས་རྣམ་པར་སྣང་མཛད་ཆེན་པོའི་ཐུགས་ཀར་གནས་ནས་འདི་སྐད་ཅེས་གསུངས་སོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་སྔགས་
ཡིད་བཞིན་གྱི་ནོར་བུའི་ལེའུ་བསྟན་པར་བགྱིའོ། །དེ་བཞིན་གཤེགས་པ་ཐམས་ཅད་ཀྱིས་གསོལ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ནི་གཡོ་བར་བྱེད་པ་ཞེས་བྱ་བ་བསྟན་དུ་གསོལ། དེ་ནས་བཅོམ་ལྡན་

89-1-37b

འདས་རྡོ་རྗེ་འཆང་ཆེན་པོས་དེ་བཞིན་གཤེགས་པ་ཐམས་ཅད་ཀྱི་གནས་ལྔར་ཡིད་བཞིན་གྱི་ནོར་བུའི་སྔགས་ཀྱི་ཏིང་ངེ་འཛིན་གྱི་ལེའུ་འདི་གསུངས་སོ། །བྱིན་བརླབས་ལ་སོགས་སྔགས་སོགས་ཀྱིས། །དེ་ཉིད་སྣ་ཚོགས་རྣམ་
བསྒོམ་པ། །ཆོ་ག་ཤེས་པས་དེ་སྟེང་དུ། །ཡི་གེ་བཞི་ནི་རྣམ་བསྒོམ་པ། །བདག་ཉིད་དབུས་སུ་སོན་བྱས་ནས། །རང་གི་གཟུགས་སུ་གཟུགས་མཚོན་པ། །རང་སེམས་བྱང་ཆུབ་ཡང་དག་འབྱུང་། །ཆོ་ག་ཤེས་པས་ཀུན་དགང་བྱ། །
དེ་ཡིས་སངས་རྒྱས་ཉིད་འགྲུབ་འགྱུར། །སྒོམ་པ་འདི་ཉིད་རབ་སྒྲུབ་བྱེད། །ཟླ་བའི་དཀྱིལ་འཁོར་དབུས་གནས་པར། །ཤེལ་དང་ཟླ་བ་མཚུངས་པའི་འོད། །ཉི་མའི་དཀྱིལ་འཁོར་དབུས་སུ་ནི། །བཞི་ལྔའི་ཡི་གེ་
རྣམ་བསྒོམ་ནས། །ཡི་གེ་ལྔ་ནི་རྣམ་བསྒོམ་བྱ། །སྔགས་པས་ལུས་ཀྱི་དབུས་སོན་པར། །ཨོྂ་ཡིག་སེར་པོ་དང་མཚུངས་པ། །འོད་ཟེར་ལྔ་པོ་ཀུན་དུ་འཁྲུགས། །དེར་སོན་བདག་ཉིད་སྔགས་པས་སྒོམ། །
དབུས་སུ་ཧཱུྃ་ཡིག་ཡང་དག་སྦྱོར། །རང་གཟུགས་དགེ་བ་བསྒོམ་པར་བྱ། །འཛམ་བུ་ནཱ་ད་མཚུངས་པའི་འོད། །གཟུགས་བརྙན་ཚུལ་གྱིས་བསྐྱེད་ནས་ནི། །མཚན་ཉིད་ཐམས་ཅད་ཡོངས་རྫོགས་པ། །ཡིད་དུ་འོང་བ་
བསྒོམ་པར་གྱིས། །སངས་རྒྱས་གཟུགས་བརྙན་དེ་རྣམས་སུ། །འོད་ཟེར་ལྔ་ནི་རྣམ་བསྒོམ་བྱ། །རྣམ་སྣང་མཛད་གཟུགས་འོད་ཟེར་གྱིས། །ནམ་མཁའི་ཁམས་ནི་ཀུན་བཀང་བར། །བསམས་ནས་ཆོ་ག་ཤེས་པས་དེར། །
བསྡུས་ནས་དེ་ལ་ལྟུང་བར་བྱ། །ཟླ་བ་འཆར་བས་མཚན་པ་ཡི། །མཉམ་མེད་གཟུགས་ནི་བསྐྱེད་ནས་ནི། །གསལ་བའི་རལ་པ་འཆང་ཞི་བ། །ཅོད་པན་ལྔ་ནི་འཛིན་པ་པོ། །སྣ་ཚོགས་འོད་ཟེར་མཉམ་པའི་འོད། །སངས་
རྒྱས་གཟུགས་སུ་རྣམ་བསྒོམས་ནས། །དཀྱིལ་འཁོར་དུ་བཞུགས་བསམས་ནས་ནི། །དེ་ཡི་སྔགས་ནི་རྣམ་བསྒོམ་བྱ། །སངས་རྒྱས་གཟུགས་ནི་དེ་རྣམས་སུ། །རྡོ་རྗེ་སེམས་དཔའ་རྣམ་བསྒོམས་པས། །གཙུག་

89-1-38a

ཏོར་དེ་ཡི་བཟླས་པ་བྱ། །ཁྲོ་བོ་གང་གཞན་འབྱུང་བས་ཀྱང་། །རིགས་རྣམས་ཐམས་ཅད་ཉིད་ཀྱི་ཡང་། །བསྐྱེད་པའི་ཆོ་གར་འགྱུར་བ་ཡིན། །རྡོ་རྗེ་གསུམ་ཀུན་དུ་འབྱུང་བ་ཞེས་བྱ་བའི་ཏིང་ངེ་འཛིན་རྫོགས་སྷོ།། །།
དེ་ནས་བཅོམ་ལྡན་འདས་ཀྱིས་རྡོ་རྗེ་འཆང་ཆེན་པོ་རྡོ་རྗེ་གསུམ་གྱི་ཡེ་ཤེས་ཞེས་བྱ་བའི་ཏིང་ངེ་འཛིན་གསུངས་སོ། །ཆོ་ག་ཤེས་པས་དེ་ཐམས་ཅད། །ཨོཾ་ཡིག་དབུས་སུ་རྣམ་བསྒོམ་བྱ། །འབར་བའི་ཕྲེང་བས་
རྣམ་བརྒྱན་པའི། །ཧཱུྃ་ཡིག་མཐར་ནི་རྣམ་བསྒོམས་ནས། །དབུས་སུ་རྡོ་རྗེ་འཆང་བསམས་ནས། །ཨིནྡྲ་ནཱི་ལ་མཚུངས་པའི་འོད། །ཞི་བ་རལ་པའི་ཅོད་པན་འཆང་། །ཕྱག་ན་རྡོ་རྗེ་རྣམ་བསྒོམ་བྱ། །རྣམ་
པར་སྣང་མཛད་རྣམ་བསྒོམས་ནས། །འོད་ཟེར་སྣ་ཚོགས་མཚུངས་པའི་འོད། །བསམས་ནས་དེ་ཡི་ཐུགས་ཀ་རུ། །ཟླ་བར་སྔགས་ཀྱི་ཡི་གེ་བསྒོམ། །བཅོམ་ལྡན་འདས་རྡོ་རྗེ་སེམས་དཔའི་ཏིང་ངེ་འཛིན་
རྫོགས་སྷོ།། །།དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་བཅོམ་ལྡན་འདས་སྤྱན་རས་གཟིགས་དབང་ཕྱུག་གི་ཏིང་ངེ་འཛིན་འདི་གསུངས་སོ། །དེ་བཞིན་ཉིད་དུ་ཀུན་བྱས་ནས། །དབུས་སུ་ཧྃ་ཡིག་སྒོམ་
པ་ནི། །ངོས་སུ་རང་གི་གཟུགས་ལྟར་བྱས། །རྡོ་རྗེ་དམར་པོ་རྣམ་བསྒོམ་བྱ། །དབུས་སུ་ཆོས་འཆང་བསམས་ནས་ནི། །པད་མ་རཱ་གའི་དབང་མཚུངས་པ། །ཕྱག་ན་པད་མ་འདབ་བརྒྱད་པ། །དེ་ཡི་དབུས་སུ་རྣམ་བསྒོམ་པ། །
ཐུགས་ཀར་ཟླ་བའི་དཀྱིལ་འཁོར་ནི། །བསམས་ནས་སྔགས་ནི་རྣམ་བསྒོམ་བྱ། །བཅོམ་ལྡན་འདས་ཆོས་ཀྱི་དབང་ཕྱུག་གི་ཏིང་ངེ་འཛིན་གྱི་ཆོ་ག་རྫོགས་སྷོ།། །།ཆོ་ག་ཤེས་པས་གཟུགས་བྱས་ནས། །
ངོས་སུ་ཧྃ་ཡིག་ཡང་དག་སྦྱར། །དབུས་སུ་རང་གི་རྣམ་པ་བསྒོམ། །འཛམ་བུ་ནཱ་ད་མཚུངས་པའི་འོད། །འདོད་མཆོད་གཟུགས་ནི་བསྐྱེད་པར་བྱ། །ལག་ཏུ་མདུང་རྩེ་གསུམ་བསྒོམས་ནས། །དེ་ཡི་སྙིང་གར་

89-1-38b

དཀྱིལ་འཁོར་དགོད། །ཆོས་ཀྱི་དབང་ཕྱུག་གཟུགས་བསྒོམས་ནས། །ཕྱི་ནས་བྱ་བ་ཡང་དག་བརྩམ། །སྒྲོན་མ་འབྱུང་བ་ཞེས་བྱ་བ་བཅོམ་ལྡན་འདས་འདོད་པའི་མཆོད་པའི་ཏིང་ངེ་འཛིན་རྫོགས་སྷོ།། །།
ཡང་ན་བརྟུལ་ཞུགས་ཅན་གྱིས་ནི། །བསྡུ་བ་ཡི་སངས་རྒྱས་གཟུགས་བསྒོམ་བྱ། །གཙུག་ཏོར་སྔགས་དང་ཁྲོ་བོ་དང་། །རིག་པའི་རྒྱལ་པོ་རིགས་བཅས་པས། །ལས་རྣམས་ཐམས་ཅད་པ་ཡི་སྔགས། །གོ་རིམས་བཞིན་དུ་
དེ་བཟླས་བྱ། །དབུས་སུ་བདག་པོ་བསྒོམས་ནས་ནི། །ངོས་སུ་ལྷ་རྣམས་དགོད་པར་བྱ། །སྙིང་པོ་སྦྱོར་བ་དེ་རྣམས་སུ། །ཟླ་བའི་དཀྱིལ་འཁོར་བསྒོམ་པར་བྱ། །སྔགས་ཀྱི་ཡི་གེ་མཆོད་བསྒོམས་ནས། །དེ་ཡིས་རྣམ་པ་
རྣམ་བསྒོམས་པ། །ཐམས་ཅད་ཀྱི་ནི་ལག་པར་ནི། །རྡོ་རྗེ་འཁོར་ལོ་པད་མ་བསྒོམ། །མདུང་དང་ཡིད་བཞིན་ནོར་བུ་ཡང་། །བསྒོམས་ནས་མྱུར་དུ་སྒྲུབ་པར་བྱེད། །སྔགས་པས་རང་སྔགས་བཟླས་བྱ་སྟེ། །ཟླ་བའི་དཀྱིལ་འཁོར་
པ་ཡིས། །ངོས་སུ་ཟླ་བ་ཡང་དག་སྦྱོར། །དབུས་སུ་སེར་པོ་རྣམ་བསྒོམ་བྱ། །བསྡུས་ཏེ་གོང་བུའི་ཚུལ་གྱིས་ནི། །རང་གི་ལུས་ལ་དགོད་པར་བྱ། །སངས་རྒྱས་ཐམས་ཅད་རབ་བསྐུལ་བས། །འདི་ནི་རེངས་པར་བྱེད་པའི་
མཆོག །དུས་རྣམས་ཀུན་དུ་རྣམ་བསྒོམས་ནས། །ངེས་པར་བསྐལ་པར་དེ་གནས་འགྱུར། །ཆོ་ག་ཤེས་པས་མི་བསྐྱོད་སོགས། །ཉི་མའི་དཀྱིལ་འཁོར་ལ་དགོད་བྱ། །རིགས་ཀྱི་དབང་ཕྱུག་རྣམ་བསྒོམས་ནས། །
ཟླ་བའི་དཀྱིལ་འཁོར་དགོད་པ་ནི། །ཐོག་མ་ཐ་མར་བསམ་གཏན་འདི། །བཞི་ཡི་དབུས་སུ་བསམ་པར་བྱ། །དེ་ཡིས་སངས་རྒྱས་ཉིད་སྒྲུབ་ན། །ཡུན་མི་རིང་བར་སངས་རྒྱས་འགྱུར། །དེ་ཡི་རང་གི་སྔགས་ཀྱི་མཆོག །
ཕྱག་རྒྱ་ཤེས་ནས་སྒྲུབ་པ་པོ། །ཆོ་ག་ཤེས་པས་བསྐྱེད་པར་བྱ། །མྱུར་དུ་འགྲུབ་བྱེད་གཞན་དུ་མིན། །ཕྱག་རྒྱ་ཆེན་པོར་རབ་བསྒོམས་ནས། །ནམ་མཁའི་ལམ་གྱི་དབུས་ལས་ནི། །དབུས་སུ་ཉི་མ་དང་མཚུངས་པའི། །དཀྱིལ་

89-1-39a

འཁོར་དགེ་བ་བསྒོམ་པར་བྱ། །སྔགས་པས་དཀྱིལ་འཁོར་ལས་ངོས་སུ། །ཟླ་བའི་དཀྱིལ་འཁོར་བསྒོམ་པར་བྱ། །བདག་པོའི་གཟུགས་ནི་ཡང་དག་བསྐྱེད། །དེ་ཡིས་མི་གཡོ་བསྒོམ་པར་བྱ། །རིན་
ཆེན་བཞི་བྱུང་སྒོ་ང་རུ། །སྦྲང་རྩི་མར་གྱིས་རབ་ཏུ་དགང་། །སྔགས་ཀྱི་ཡི་གེ་རྣམ་བསྒོམས་ནས། །བསམ་པ་དེ་ཡིས་སྦྱིན་བསྲེག་བྱ། །དཀྱིལ་འཁོར་ལྔ་ཡི་ཚུལ་གྱིས་ནི། །དབུས་སུ་ཧཱུྂ་གི་ཡི་གེ་འགེངས། །འབར་
བའི་ཕྲེང་བ་འཐིབས་པ་ནི། །ཀུན་ནས་རྣམ་པར་འཕྲོ་བར་བྱེད། །དེ་ལ་གནས་པས་ལྷ་ཡི་གཟུགས། །ཚིམ་པའི་དམ་ཚིག་གསུམ་འབྱུང་བས། །ཆོ་ག་ཤེས་པས་གཙུག་ཏོར་གྱིས། །གཙུག་ཏོར་རྣམས་ནི་བསྒོམ་པར་བྱ། །
བདག་པོའི་སྔགས་ནི་ཡང་དག་བསྐྱེད། །མཉམ་པར་བཞག་པས་བསྒོམ་པར་བྱ། །ཀུན་ནས་སོར་མོ་བཅུ་གཉིས་པའི། །ཨུཏྤལ་ཆེན་པོ་འདབ་བརྒྱད་པ། །ཆོས་ཀྱི་དཀྱིལ་འཁོར་དབུས་གནས་པར། །དེ་ཉིད་ཀྱིས་ནི་
བསྒོམ་པར་བཤད། །རྩེ་མོ་ལྔ་པའི་རྡོ་རྗེ་ཆེ། །ཨུཏ་པལ་སྔོན་པོ་མཚུངས་པའི་འོད། །ཨཱ་ལི་བཅུ་དྲུག་ཡང་དག་ལྡན། །རྟག་ཏུ་བསྒོམ་བྱ་འགྲུབ་པར་འགྱུར། །སྔགས་པས་སོར་མོ་ཉི་ཤུ་པའི། །རྩེ་གསུམ་སེར་
པོ་དང་མཚུངས་པ། །ཆོ་ག་ཉིད་ཀྱིས་བསྒོམ་བྱས་ན། །འགྲུབ་འགྱུར་འདིར་ནི་ཐེ་ཚོམ་མེད། །པད་མ་ལས་ཀྱི་རྡོ་རྗེ་དང་། །ཡིད་བཞིན་ནོར་བུ་གསུམ་པ་ཅན། །བདག་པོའི་སྔགས་ནི་ཡང་དག་བསྐྱེད། །མྱུར་དུ་སྒྲུབ་
བྱེད་གཞན་དུ་མིན། །འཁོར་ལོ་དེ་བཞིན་པད་རྡོ་རྗེ། །བསམས་ནས་རྡོ་རྗེའི་ཆོ་ག་ལས། །སྒོམ་པའི་གོ་འཕང་གིས་བསྒྲུབ་བྱ། །གཞན་དུ་འདི་ནི་འགྲུབ་མི་འགྱུར། །རྡོ་རྗེ་ཆེན་པོ་མདུང་སོགས་བཅས། །འབར་བའི་ཕྲེང་
བ་མཚུངས་པའི་འོད། །ཀུན་གྱི་ལས་ཅན་གསང་སྔགས་ཀྱི། །རྗོད་པ་རྣམས་ཀྱིས་བརྗོད་བྱས་ནས། །རལ་གྲི་འབར་བས་འཁྲུགས་པའི་སེམས། །འཕྲོ་ཞིང་འཐིབས་པ་ཀུན་དུ་འཁྲུགས། །ཁྲུ་གང་ཙམ་དུ་ཡང་དག་

89-1-39b

བསྐྱེད། །ཁྲོ་བར་བྱེད་པའི་ཁྱད་པར་བྱ། །ཕོ་ཉ་མངག་གཞུག་སོགས་སྔགས་རྣམས། །རྡོ་རྗེའི་དཀྱིལ་འཁོར་བསྒོམ་པའོ། །ཉི་མའི་དཀྱིལ་འཁོར་སྦྱོར་བ་ལས། །སྒོམ་པས་མཆོག་ཏུ་མཐོང་བར་འགྱུར། །དབྱུག་པ་ཐོ་བ་དགྲ་སྟ་
དང་། །ཞགས་པ་པཊྚི་ས་བསྒོམ་པའི། །ཆོ་གས་བསྒོམ་པར་བྱས་ནས་ནི། །རྡོ་རྗེ་འཆང་རྣམས་མཉེས་པར་བྱེད། །འདི་དེ་སྔགས་རྣམས་ཐམས་ཅད་ཀྱི། །སྐུ་གསུང་ཐུགས་ཀྱི་བསྒོམ་པ་སྟེ། །རྡོ་རྗེ་ཡེ་ཤེས་ཅན་གྱིས་གསང་། །
ཡེ་ཤེས་དངོས་གྲུབ་ཅན་དུ་བརྗོད། །བཅོམ་ལྡན་འདས་རྡོ་རྗེ་སེམས་དཔས་དེ་སྐད་ཅེས་གསུངས་སོ། །གང་ཞིག་དངོས་གྲུབ་མཆོག་འདོད་ན། །ཆོ་ག་ཤེས་པས་སྦྱིན་བསྲེག་བྱ། །དེ་ཉིད་གསང་བའི་ཏིང་འཛིན་གནས། །རྣམ་
པ་སྣ་ཚོགས་སྦྱིན་བསྲེག་བརྩམ། །དཀྱིལ་འཁོར་བཞི་ཡི་སྦྱོར་བ་ལས། །རིགས་ཀྱི་ལས་ནི་སྒྲུབ་པར་བྱེད། །ཨོྂ་ཡིག་སྔགས་ཀྱི་དབྱེ་བ་ཡིས། །སྒོམ་པས་དངོས་གྲུབ་ཐོབ་པར་འགྱུར། །ཞི་བ་ཅན་ལ་དཀྱིལ་འཁོར་
ཟླུམ། །རྒྱས་པ་ཅན་ལ་ཟུར་བཞི་པ། །མངོན་སྤྱོད་ལ་ནི་གྲུ་གསུམ་མཆོག །དབང་བྱ་གཞུ་ཡི་རྣམ་པའོ། །ཞི་ལ་མེ་ཡི་དབུས་སོན་པར། །བདུད་རྩི་ལྟ་བུར་བསྒོམ་པར་བྱ། །དེ་ཉིད་ལ་ནི་ལྷ་ཡི་གཟུགས། །རང་གི་ཚུལ་
གྱིས་བསྒོམ་པར་བྱ། །བདག་ཉིད་བདག་པོའི་ཚུལ་གྱིས་ནི། །འདི་ནི་རྡོ་རྗེའི་ཚུལ་ལས་བྱུང་། །ཁ་ནི་རབ་ཏུ་གདངས་བྱས་ནས། །མེ་སྟག་འཐིབས་པས་འཁྲུགས་པ་ཡི། །སྔགས་པས་ལྕེ་ཡི་དབུས་སོན་པར། །ཧཱུྃ་ཡིག་
དེ་ཡིས་བསམ་པར་བྱ། །བཅོམ་ལྡན་འདས་སྦྱིན་བསྲེག་རྡོ་རྗེས་དེ་སྐད་ཅེས་གསུངས་སོ། །ཆོ་ག་ཤེས་པས་འོ་མ་སྦྲང་། །མར་ནི་ཞི་བའི་རིགས་ལ་སྤྱད། །མར་ཁུ་ཆེན་པོའི་བྱེ་བྲག་ལས། །ཡེ་ཤེས་རྡོ་རྗེའི་རིགས་
སུ་བརྗོད། །ཞི་ལ་རྡོ་རྗེ་སློབ་དཔོན་གྱི། །སྙིང་གའི་དབུས་སོན་རྣམ་བསྒོམ་བྱ། །ཡིད་བཞིན་ནོར་བུ་ལག་བསམས་ནས། །འདི་ནི་དག་པའི་ཚུལ་མཆོག་གོ། རྣམ་པར་སྣང་མཛད་གཟུགས་བརྙན་ཆེ། །པད་མའི་

89-1-40a

ཡོན་ཏན་འབྱུང་བ་ལ། །གཟུགས་ནི་འདོད་ཆགས་རིགས་མཆོག་གི། གཟུགས་ནི་འདོད་མཆོད་རྡོ་རྗེ་ཅན། །ལས་བཞིའི་རབ་ཏུ་དབྱེ་བ་ལས། །སྔགས་ཀྱི་ཡི་གེ་དགོད་བྱས་ནས། །བཅོམ་ལྡན་
འདས་གསང་བའི་སྦྱིན་སྲེག་རྡོ་རྗེ་འཆང་ཆེན་པོས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་དེ་བཞིན་གཤེགས་པ་ཐམས་ཅད་ཀྱི་སྔགས་ཡིད་
བཞིན་ནོར་བུའི་ལེའུ་སྟེ་ཉི་ཤུ་པ་རྫོགས་སོ།། །། དེ་ནས་བཅོམ་ལྡན་འདས་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་ཀྱི་སྟོབས་ཀྱི་སྔགས་ཀུན་ལས་བཏུས་པ་ཞེས་བྱ་བའི་སྙིང་
པོའི་ལེའུ་འདི་གསུངས་སོ། །སངས་རྒྱས་རྡོ་རྗེ་ཆོས་ཆེན་པོ། །འདོད་པའི་དམ་ཚིག་དགྱེས་པ་པོ། །སྔགས་རྣམས་ཐམས་ཅད་ཡང་དག་དམིགས། །དེ་ཡི་བསམ་གཏན་རབ་བསྐུལ་བྱ། །དམ་ཚིག་ཡེ་
ཤེས་སངས་རྒྱས་ཀུན། །རིགས་དམིགས་དཀྱིལ་འཁོར་ཚུལ་གྱིས་ནི། །གཟུགས་ནི་སངས་རྒྱས་མཚུངས་པའི་འོད། །ཨོྂ་ཡིག་ཡེ་ཤེས་དབྱེ་བ་ཡིས། །འདི་ནི་རྡོ་རྗེའི་ཚུལ་བསྟན་པའོ། །རལ་པའི་ཅོད་
པན་ལོངས་སྤྱོད་པ། །ཁ་དོག་དཀར་པོ་ཤིན་དུ་མཛེས། །ཕྱག་བཞི་པ་ལ་སྤྱན་ཡངས་པ། །མེ་སྟག་འཐིབས་པས་ཀུན་དུ་འཁྲུགས། །རྣལ་འབྱོར་མཆོད་ཕྱིར་ཐོགས་ལ་སོགས། །བརྒྱན་ཅིང་དཀྱིལ་འཁོར་
ལ་སོགས་པ། །ཅོད་པན་དུ་ནི་རྡོ་རྗེ་སེམས། །མཛེས་པའི་གཟུགས་ནི་རྒྱལ་བའི་གཞི། །དབང་པོ་གཉིས་ཀྱི་རབ་སྦྱོར་བས། །འདི་ནི་བསམ་གཏན་ཚུལ་མཆོག་གོ། སྐུ་ཡི་རྡོ་རྗེའི་སོགས་སྦྱོར་གྱིས། །
མངོན་ཤེས་ལྔ་ཡི་རབ་སྦྱོར་ལས། །རྐང་གཉིས་མཆོག་དེ་ཉིད་ཤེས་པས། །ཐོད་པ་ཅན་གྱི་གཙོ་བོར་བརྗོད། །སངས་རྒྱས་ཀུན་གྱི་འདི་ཡེ་ཤེས། །རིགས་ཞེས་བྱ་བའི་ཏིང་འཛིན་ནོ། །དེ་ནས་བཅོམ་ལྡན་

89-1-40b

འདས་ཕྱག་ན་རྡོ་རྗེ་རྡོ་རྗེ་འཛིན་པ་ཐམས་ཅད་ཀྱི་དམ་ཚིག་གི་དེ་ཁོ་ན་ཉིད་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་ཐམས་ཅད་ཀྱི་དམ་ཚིག་གི་སྙིང་པོ་འབྱུང་བ་རྡོ་རྗེ་ཞེས་བྱ་བ་འདི་གསུངས་
སོ། །རྡོ་རྗེའི་དཀྱིལ་འཁོར་ཚུལ་གྱིས་ནི། །དབུས་སུ་གཟུགས་ནི་རབ་བརྟག་བྱ། །ནག་པོ་ཤིན་དུ་རྣམ་འགྱུར་ཁྲོས། །མ་རུངས་ཞལ་ནི་རྣམ་པར་གདངས། །མེ་སྟག་འཐིབས་པོ་འབར་བ་སྟེ། །འཇིགས་པ་ཡང་ནི་འཇིགས་
པར་བྱེད། །ཕྱག་བཞི་པ་སྟེ་རབ་འབད་པས། །དབང་པོ་གཉིས་ཀྱིས་རབ་སྦྱོར་ལས། །འདི་ནི་རྡོ་རྗེའི་ཚུལ་བརྟན་པའོ། །རྡོ་རྗེ་ཐུགས་སོགས་ཡང་དག་གྲུབ། །རབ་ཏུ་གནས་པས་དེ་བསྒྲུབ་བྱ། །འདོད་ཆགས་རྡོ་རྗེ་
རབ་བསྐུལ་བས། །དངོས་གྲུབ་ཐམས་ཅད་བསྒྲུབ་པར་བྱ། །རྡོ་རྗེ་དམ་ཚིག་ཅེས་བྱ་བའི་ཏིང་ངེ་འཛིན་ནོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་ཆོས་ཐམས་ཅད་འཆང་བའི་དམ་ཚིག་བྱིན་གྱིས་རློབ་པ་ཞེས་
བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཆོས་འཆང་བའི་དཔལ་ཞེས་བྱ་བ་འདི་གསུངས་སོ། །ཆོས་ཀྱི་དཀྱིལ་འཁོར་སྦྱོར་བ་ལས། །དབུས་སུ་གཟུགས་ནི་རྣམ་བསྒོམ་བྱ། །དམར་པོ་འདོད་ཆགས་
འཛིན་པ་འབར། །སྣ་ཚོགས་རྒྱན་གྱིས་བརྒྱན་པ་ཡི། །ཕྱག་བཞི་པ་ལ་ཡིད་འོང་བར། །དབང་པོ་གཉིས་ཀྱི་རབ་སྦྱོར་བས། །དེ་ཡི་ཆོ་ག་བསྒོམ་པ་ནི། །འདི་ནི་འདོད་ཆགས་ཚུལ་བསྟན་པའོ། །གསུང་གི་
རྡོ་རྗེ་གཙོ་དངོས་གྲུབ། །རྡོ་རྗེ་ཆོས་རབ་སྦྱོར་སོགས་ཀྱིས། །སྙིང་རྗེའི་བདག་ཉིད་ཅན་གྱིས་སྒྲུབ། །སྒོམ་པ་ཡང་ནི་མྱུར་འགྲུབ་བྱེད། །ཆོས་འཆང་བའི་དམ་ཚིག་གི་དཔལ་ཞེས་བྱ་བའི་ཏིང་ངེ་འཛིན་ནོ། །དེ་
ནས་བཅོམ་ལྡན་འདས་ཕྱག་ན་རྡོ་རྗེ་དམ་ཚིག་གི་རྡོ་རྗེའི་རིགས་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེའི་རིགས་ཀྱི་དམ་ཚིག་གི་མཆོག་ཅེས་བྱ་བའི་ཏིང་ངེ་འཛིན་འདི་གསུངས་སོ། །འདོད་པའི་

89-1-41a

དཀྱིལ་འཁོར་བསམ་གཏན་གྱིས། །གཟུགས་ནི་དབུས་སུ་དགོད་པར་བྱ། །ཁྱབ་བདག་ཞི་བ་སེར་པོའི་མདོག །སྤྱན་གསུམ་བརྟུལ་ཞུགས་ཅན་གྱིས་བསྒོམ། །ཀུན་དུ་དག་པའི་ཤེལ་དང་མཚུངས། །མེ་
སྟག་ཚོགས་ནི་ཀུན་དུ་འཁྲུགས། །ཕྱག་བཞི་པར་ནི་ཆོ་ག་ཡིས། །བསྒོམ་བྱ་མྱུར་དུ་འགྲུབ་པར་བྱེད། །རྡོ་རྗེའི་མཐར་ཐུག་ནོར་དངོས་གྲུབ། །རབ་ཏུ་གནས་པས་དེ་བསྒྲུབ་བྱ། །འདི་དེ་སྔགས་རྣམས་ཐམས་ཅད་ཀྱི། །ཐར་
པའི་ཏིང་འཛིན་སྙིང་པོ་ཅན། །སྐུ་གསུང་ཐུགས་ཀྱི་བསྒོམ་པ་ནི། །རྡོ་རྗེ་སེམས་དཔས་སྤྲུལ་པ་ཡིན། །རྡོ་རྗེ་མདུང་གི་དམ་ཚིག་ཅེས་བྱ་བའི་ཏིང་ངེ་འཛིན་ནོ། །ཇི་སྲིད་གཟུགས་ནི་ཀུན་སྦྱོར་བ། །དེ་ལ་ལྷ་ཉིད་རབ་ཏུ་གྲགས། །
སླར་ཡང་འདི་ཡི་ཚུལ་གྱིས་ནི། །སྐྱེད་པར་བྱེད་པའི་ཆོ་གར་འགྱུར། །བཅོམ་ལྡན་འདས་རྡོ་རྗེ་སེམས་དཔས་དེ་སྐད་ཅེས་གསུངས་སོ། །རང་གི་སྔགས་ཡིག་དབྱེ་བས་སམ། །ཡང་ན་རིགས་ཀྱི་རིག་
པ་ཡིས། །རིགས་ཀྱི་བདག་པོའི་སྔགས་ཀྱིས་སམ། །བརྟུལ་ཞུགས་ཅན་གྱི་རིག་རྒྱལ་པོས། །ཐམས་ཅད་ལས་ཅན་སྔགས་ཀྱིས་དང་། །གཙུག་ཏོར་སྔགས་ཀྱིས་རྣམ་བསྒོམ་བྱ། །འདི་དེ་སྔགས་རྣམས་
ཐམས་ཅད་ཀྱི། །གསང་བའི་དེ་ཉིད་གསུངས་པ་ཡིན། །བཅོམ་ལྡན་འདས་ཕྱག་ན་རྡོ་རྗེས་དེ་སྐད་ཅེས་གསུངས་སོ། །ཞི་བའི་ལས་ཀྱི་རབ་དབྱེ་བས། །རིགས་ཀྱི་སྔགས་སུ་རབ་ཏུ་གྲགས། །རྒྱས་པ་ཅན་ལ་
རིགས་ཀྱི་སྔགས། །སྒོམ་པས་ངེས་པར་འགྲུབ་པར་བྱེད། །དབང་དུ་བྱ་བའི་ཆོ་ག་ལས། །རིག་པའི་རྒྱལ་པོས་བསྒོམ་པར་བྱ། །ཐམས་ཅད་ལས་ཅན་སྔགས་ཀྱིས་ནི། །མངོན་སྤྱོད་རྣམ་པར་སྒོམ་པར་བྱེད། །སྐྲོད་
པར་བྱེད་པའི་ཆོ་ག་ལས། །གཙུག་ཏོར་དུ་ནི་རྣམ་བསྒོམ་བྱ། །སྔགས་ཤེས་པས་ནི་ཕུར་གདབ་སོགས། །ཕོ་ཉ་ཕོ་ཉ་མོ་བསམ་བྱ། །བཅོམ་ལྡན་འདས་ཕྱག་ན་རྡོ་རྗེས་དེ་སྐད་ཅེས་གསུངས་སོ། །འོད་ཟེར་ལྔ་ཡི་

89-1-41b

ཚུལ་གྱིས་ནི། །རྟོག་པས་དེ་ལ་བསྒོམ་པར་བྱ། །གཞན་དུ་དངོས་གྲུབ་མེད་པ་ཉིད། །སྒོམ་པ་རྣམས་སུ་ཤེས་པར་བྱ། །རིགས་ཀྱི་ལས་ཀྱི་རབ་དབྱེ་བས། །དཀྱིལ་འཁོར་རྣམས་ཀྱི་རྣམ་བསྒོམ་པའོ། །སྔགས་
ཀྱི་ཡི་གེའི་རབ་དབྱེ་བས། །བསྒོམ་བྱ་དངོས་གྲུབ་ཐོབ་པར་འགྱུར། །སྙིང་གའི་དབུས་སོན་ཕྲ་མོ་ནི། །དཀྱིལ་འཁོར་རྣམས་ཀྱི་རྣམ་བསྒོམ་པ། །སྔགས་ཀྱི་ཡི་གེའི་རབ་དབྱེ་བས། །བསྒོམས་པས་དངོས་
གྲུབ་ཐོབ་པར་འགྱུར། །སྙིང་གའི་དབུས་སོན་ཕྲ་མོ་ནི། །དཀྱིལ་འཁོར་རྣམས་ཀྱི་རྣམ་བསྒོམ་པ། །སྟེང་དུ་བཀོད་པའི་དབྱེ་བ་ཡིས། །འདི་ནི་བསམ་གཏན་ཚུལ་མཆོག་གོ། དཀར་ནག་དམར་པོའི་སྦྱོར་བ་ལས། །བསམ་
གཏན་ཐམས་ཅད་དུ་བརྟག་བྱ། །གཞན་དུ་དངོས་གྲུབ་མེད་པ་ཉིད། །སྔགས་རྣམས་ཀུན་དུ་བཟླས་པར་བྱ། །ཧཱུྂ་ཡིག་ཨོྂ་ཡིག་དབྱེ་བ་ཡིས། །སྭཱ་ཧཱ་ཧཱུྂ་ཡིག་གཞན་གྱི་གཟུགས། །སྐྱེད་པའི་ཆོ་ག་བྱས་ནས་ནི། །
བསྙེན་པ་གང་ཞིག་ངེས་བསྒྲུབ་བྱ། །རིགས་གསུམ་ལ་ཡང་ཧཱུྂ་ཡིག་དང་། །ཨོྂ་ཡིག་ཡེ་ཤེས་རིགས་མཆོག་ཡིན། །སྔགས་ཀྱི་ཡི་གེ་ལ་སོགས་རྣམས། །དཔྲལ་བར་བཀོད་ནས་རྣམ་བསྒོམ་བྱ། །བཅོམ་ལྡན་
འདས་རྡོ་རྗེ་འཆང་གིས་དེ་སྐད་ཅེས་གསུངས་སོ། །ཐུན་བཞིའི་སྦྱོར་བ་ལ་སོགས་ཀྱིས། །རྡོ་རྗེ་ཅན་ལ་བདུད་རྩིའི་གཟུགས། །སྤྲོ་བ་དང་ནི་གནས་པར་བྱ། །འདི་ནི་དངོས་གྲུབ་ཚུལ་བསྟན་པའོ། །སྒྲུབ་
པར་རང་གི་ལྷ་ཡི་གཟུགས། །རྡོ་རྗེ་ཅན་ལ་བདུད་རྩིའི་གཟུགས། །ཉེ་བར་སྒྲུབ་པ་འདུས་པ་ལ། །འདི་ནི་དངོས་གྲུབ་ཚུལ་མཆོག་གོ། བདག་གི་སྒྲུབ་པའི་ལས་ཅན་ལ། །བདག་པོའི་གཟུགས་དང་ཡང་
དག་ལྡན། །བསྙེན་པའི་དུས་སུ་རབ་བསྒྲུབ་པ། །གཙུག་ཏོར་གཟུགས་དང་ཡང་དག་ལྡན། །མེ་སྟག་འཐིབས་པས་འཁྲུགས་པ་ཡི། །རང་ལྷའི་གཟུགས་དང་ཡང་དག་ལྡན། །རྡོ་རྗེ་ཕྲ་རབ་དབྱེ་

89-1-42a

བ་ཡིས། །དུས་གསུམ་སངས་རྒྱས་བཞུགས་པའོ། །གྲགས་པར་ལྡན་པའི་དངོས་གྲུབ་ཀུན། །འདི་ཉིད་ཀྱིས་ནི་བྱང་ཆུབ་ཐོབ། །དེ་ཡི་མཆོག་ཏུ་བསྒྲུབ་པར་བྱ། །དངོས་གྲུབ་ཆེན་པོའི་ཡོན་ཏན་འབྱུང་། །
བཅོམ་ལྡན་འདས་ཀུན་དུ་བཟང་པོ་རྡོ་རྗེ་འཆང་ཆེན་པོས་དེ་སྐད་ཅེས་གསུངས་སོ། །གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྟོག་པའི་རྒྱལ་པོ་ཆེན་པོར་སྔགས་ཐམས་ཅད་ཀུན་ལས་བཏུས་པ་ཞེས་
བྱ་བའི་ཏིང་ངེ་འཛིན་གྱི་ལེའུ་སྟེ་ཉི་ཤུ་རྩ་གཅིག་པ་རྫོགས་སྷོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་སླར་ཡང་འདུས་པར་གྱུར་ནས་ཕྱག་ན་རྡོ་རྗེ་བྱང་ཆུབ་སེམས་
དཔའ་དེ་བཞིན་གཤེགས་པ་ཐམས་ཅད་དགྱེས་པའི་རྡོ་རྗེའི་བཀོད་པས་ཡང་དག་པར་མཆོད་ནས། གསུང་གི་རྡོ་རྗེ་ཆོས་ཀྱི་གསུང་གི་ལམ་ངེས་པར་བསྐྱེད་པའི་རྡོ་རྗེའི་ཚུལ་འདི་སྟོན་པར་མཛད་དོ། །གསང་བ་དག་པ་དམིགས་པ་
མེད། །ཡེ་ཤེས་ཡོན་ཏན་ཀུན་གྱི་གཞི། །ཀུན་ནས་ཡེ་ཤེས་བདག་མེད་པ། །གསང་བའི་ཡེ་ཤེས་ཕྱག་འཚལ་བསྟོད། །གསང་བའི་དེ་ཉིད་དོན་དང་ལྡན། །མཆོག་གི་སྤྱོད་པ་རྒྱ་མཚོ་ཆེ། །ཀུན་ནས་འདོད་པ་ཡང་དག་
འབྱུང་། །རྡོ་རྗེ་ཡེ་ཤེས་ཕྱག་འཚལ་བསྟོད། །གཙོ་བོའི་ཡེ་ཤེས་ཇི་ལྟར་གནས། །རྡོ་རྗེ་མི་ཕྱེད་གསུམ་གནས་པ། །རིགས་ཀྱི་ཕ་རོལ་ཕྱིན་པ་ཐོབ། །བྱང་ཆུབ་སྤྱོད་ལ་ཕྱག་འཚལ་བསྟོད། །སེམས་ཅན་ཀུན་སྐྱེས་ཅན་
གྱི་མཆོག །སངས་རྒྱས་བྱང་ཆུབ་རབ་གཞུག་མཛད། །རང་བཞིན་དག་པ་དག་པའི་མཆོག །སེམས་ཅན་སྐྱོབ་ལ་ཕྱག་འཚལ་བསྟོད། །ཆོས་སྐུ་ཐར་པ་ཆེན་པོ་སྟེ། །ཡིད་བཞིན་ནོར་བུ་མཐོང་བ་ཆེ། །སེམས་ཅན་
ཀུན་དགྱེས་བྱེད་པ་པོ། །དག་པའི་སྤྱོད་ལ་ཕྱག་འཚལ་བསྟོད། །དེ་ནས་ཡང་ཡིད་བཞིན་གྱི་ནོར་བུའི་དམ་ཚིག་གི་རྡོ་རྗེ་ཞེས་བྱ་བའི་བྱང་ཆུབ་སེམས་དཔའ་ཕྱག་ན་རྡོ་རྗེ་བྱང་ཆུབ་སེམས་དཔའ་ལ་འདི་སྐད་ཅེས་

89-1-42b

གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་དེའི་མཐོང་བའི་ཆོས་ཀྱི་ཡོན་ཏན་གྱི་ཁྱད་པར་སོ་སོར་འདོད་པར་བྱ་བ་གང་ཅི་ལྟར་ལགས། དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་
པོས་བྱང་ཆུབ་སེམས་དཔའ་དེ་ལ་འདི་སྐད་ཅེས་བཀའ་སྩལ་ཏོ། །ཐེ་ཚོམ་མེད་པར་མཉམ་པར་ཤེས། །སངས་རྒྱས་ཆོས་སུ་འདོད་པར་བྱ། །ཐེ་ཚོམ་མེད་པར་འདུ་ཤེས་པ། །ཆོས་རྣམས་ཐམས་
ཅད་འདོད་པར་བྱ། །འདི་ལྟ་སྟེ། རིགས་ཀྱི་བུ་ཞེས་བྱ་བ་བྱང་ཆུབ་སེམས་དཔའི་ཆོས་ཀྱི་སྤྲིན་གྱི་ས་ལ་རབ་ཏུ་གནས་པ་སྟེ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྐུ་དང་། དེ་བཞིན་གཤེགས་པ་ཐམས་ཅད་ཀྱི་ལོངས་
སྤྱོད་རྫོགས་པའི་སྐུ་དང་། དེ་བཞིན་གཤེགས་པ་ཐམས་ཅད་ཀྱི་སྤྲུལ་པའི་སྐུ་རྣམས་སུ་རྣམ་པར་རྟོག་པ་མེད་ཅིང་ཐེ་ཚོམ་མེད་པ་དེ་བདག་གོ་ཞེས་ཆོས་ཐམས་ཅད་ཀྱང་ནམ་མཁར་མཐོང་བར་གྱུར་ཏོ། །རིགས་
ཀྱི་བུ་མདོར་བསྡུས་ན། བྱང་ཆུབ་སེམས་དཔའ་རྡོ་རྗེ་ཡེ་ཤེས་ཞེས་བརྗོད་པར་བྱའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ངོ་མཚར་དུ་གྱུར་ནས། བཅོམ་ལྡན་འདས་
དེ་བཞིན་གཤེགས་པ་ཐམས་ཅད་ཀྱི་སྐྱེས་བུའི་མཆོག་ལ་ཕྱག་བཙལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་སྔགས་ཀྱི་སྤྱད་པ་སྤྱོད་པར་བྱེད་པའི་བྱང་ཆུབ་སེམས་དཔའ་
འདི་དོན་དམ་པའི་གསང་བ་ལ་དད་པར་ཅི་ལྟར་འགྱུར། འདི་ལྟ་སྟེ། ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཅེས་བྱ་བ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་སུ་སངས་རྒྱས་བཅོམ་ལྡན་འདས་རྣམས་སུ་ཡང་དག་པར་བྱང་ཆུབ་ནས་མངོན་པར་རྫོགས་པར་འཚང་རྒྱ་བར་ཇི་ལྟར་འགྱུར། དེ་བཞིན་གཤེགས་པ་ཐམས་ཅད་ཀྱིས་བཀའ་

89-1-43a

སྩལ་པ། བཅོམ་ལྡན་འདས་དེ་བཞིན་གཤེགས་པ་གཅིག་པུ་མངོན་པར་རྫོགས་པར་འཚང་རྒྱ་བར་འགྱུར་རོ། །རྡོ་རྗེ་འཆང་བས་གསོལ་པ། ཇི་ལྟར་མངོན་པར་རྫོགས་པར་འཚང་རྒྱ་བར་འགྱུར། 
འདི་ལྟ་སྟེ། གཞན་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྡུལ་ཕྲ་རབ་ཀྱི་ཆ་ཤས་སུ་གྱུར་པའི་གཞིའི་སེམས་ཅན་རྣམས་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་བཞིན་དུ་བཅོམ་
ལྡན་འདས་དེ་བཞིན་གཤེགས་པ་ཐམས་ཅད་ཕྱག་ན་རྡོ་རྗེའི་ཚུལ་འདི་བལྟ་བར་བྱའོ། །དེ་ནས་བྱང་ཆུབ་སེམས་དཔའ་དེ་རྣམས་ཡ་མཚན་ཐོབ་ཅིང་དགའ་ཞིང་རབ་ཏུ་མགུ་བ་ཐོབ་ནས། དེ་ལྟ་བུའི་དབྱངས་འདི་གསུངས་སོ། །
ཨེ་མའོ་ཡེ་ཤེས་ཡེ་ཤེས་ཆེ། །རྡོ་རྗེ་ཆེན་པོ་རབ་ཏུ་མཐོང་། །རྨད་དུ་བྱུང་བའི་འཇིག་རྟེན་གྱིས། །ཡེ་ཤེས་མིག་ནི་རྣམ་སྦྱངས་པའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་
པོས་དེ་བཞིན་གཤེགས་པ་ཐམས་ཅད་དང་གཉིས་སུ་མེད་པ་མཉམ་པ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་སོ། །སྙོམས་པར་ཞུགས་མ་ཐག་ཏུ་བཅོམ་ལྡན་འདས་ཀྱིས་གང་གཱའི་
ཀླུང་གི་བྱེ་མ་དང་མཉམ་པའི་འོད་ཟེར་བྱེ་བ་ཁྲག་ཁྲིག་བརྒྱ་སྟོང་ཕྱུང་ནས་ཤར་དང་ལྷོ་ལ་སོགས་པའི། ཕྱོགས་མངོན་པར་བརྗོད་དུ་མེད་པའི་ཡང་བརྗོད་དུ་མེད་པའི་གང་གཱའི་ཀླུང་
གི་བྱེ་མ་སྙེད་ཀྱི་སངས་རྒྱས་ཀྱི་ཞིང་གི་རྡུལ་ཕྲ་རབ་དང་མཉམ་པའི་སྐུ་གསུམ་གྱི་ཡེ་ཤེས་ཀྱིས་གང་བར་མཛད་དོ། །དེ་ནས་དེ་བཞིན་གཤེགས་པ་དེ་རྣམས་བྱོན་ནས། བྱང་ཆུབ་
ཀྱི་སེམས་འདི་གསུངས་སོ། །བྱང་ཆུབ་རང་བཞིན་ཡང་དག་ཐོབ། །བྱང་ཆུབ་སེམས་དཔས་སྙིང་པོ་བྱིན། །ནམ་མཁའི་ཁམས་ལ་ལོངས་སྤྱོད་པའི། །རྡོ་རྗེ་བྱང་ཆུབ་

89-1-43b

རབ་ཏུ་གནས། །མཚན་ཉིད་མེད་པའི་ཆོས་རྣམས་ལ། །སྤྲོས་པ་དག་ནི་ཡོད་མ་ཡིན། །རྡོ་རྗེའི་རང་བཞིན་ཡེ་ཤེས་ཀྱིས། །ནམ་མཁའ་ལྟ་བུར་དྲི་མ་མེད་ཅེས་སོ། །དེ་ནས་བཅོམ་ལྡན་
འདས་ཕྱག་ན་རྡོ་རྗེ་ཏིང་ངེ་འཛིན་ལས་བཞེངས་ནས། རྡོ་རྗེ་ཆོས་ལ་བོས་པར་གྱུར་ཏོ། །སེམས་དཔའ་ཆེན་པོ་དམ་ཚིག་གང་ཡིན་པ་དེ་མཐོང་ངམ། བཅོམ་ལྡན་འདས་མཐོང་ལགས་སོ། །དེ་ནས་བཅོམ་ལྡན་
འདས་ཕྱག་ན་རྡོ་རྗེ་སྐྱེས་བུ་ཆེན་པོ་དེ་ཡི་སྐུ་དང་གསུང་དང་ཐུགས་ཀྱི་དབྱེ་བ་རིན་པོ་ཆེ་སྒྲོམ་བུ། ངེས་པར་རིག་ནས་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་རྣམས་རང་
གི་ཐུགས་སུ་ཞུགས་པར་མཛད་དོ། །དེ་ཇི་ལྟ་བ་བཞིན་དུ་བཅོམ་ལྡན་འདས། དེ་བཞིན་གཤེགས་པ་ཐམས་ཅད་ཀྱི་བདག་པོས་རང་གི་སྐུ་དང་གསུང་དང་ཐུགས་
ནམ་མཁའ་ལྟ་བུར་སྦྱོར་བས་ཡང་དག་པར་གནས་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཡོངས་སུ་དག་པའི་
ངོ་བོ་ཉིད་ཀྱི་རྡོ་རྗེ་ཞེས་བྱ་བའི་ལེའུ་ཉི་ཤུ་རྩ་གཉིས་པ་རྫོགས་སྷོ།། །།འཕགས་པ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་
ཞེས་བྱ་བའི་རྟོག་པའི་རྒྱལ་པོ་ཆེན་པོ་རྫོགས་སྷོ།། །།མཁན་ཆེན་ཐར་པ་ལོ་ཙཱ་བའི་ཕྱག་དཔེའི། གསེབ་
ནས་ཤོག་ཡར་ལྔ་བྱུང་བ་སྔར་བསྒྱུར་བ་ལས། ཕྱིས་ཉིད་སྟོད་སྨོན།    །།      །།

89-1-44a

ཐོའི་གཙུག་ལག་ཁང་ནས་རྒྱ་དཔེ་ལྷག་མ་རྣམས་རྙེད་ནས་བསྒྱུར་བར་རྩོམ་པ་ན། དཔལ་དུས་ཀྱི་འཁོར་ལོའི་ཕྱི་ནང་གཞན་གསུམ་གྱི་ཚུལ་ལ་མི་འཇིགས་པའི་སྤོབས་པ་ཐོབ་པའི་བླ་མ་ཡང་དག་པས། 
དགེ་བའི་བཤེས་གཉེན་ཆེན་པོ་ལེགས་པར་སྦྱར་བའི་སྐད་ཀྱི་བརྡ་སྤྲོད་པའི་ཚུལ་ལ་བློ་གྲོས་ཤིན་དུ་བྱང་བའི་འཇིག་རྟེན་གྱི་མིག་ཆོས་གྲགས་དཔལ་བཟང་པོའི་བཀས་བསྐུལ་ཞིང་སྦྱིན་བདག་མཛད་ནས། བུ་སྟོན་
གྱིས་བསྒྱུར་བའི་ཡི་གེ་པ་ནི་དགེ་སློང་རིན་ཆེན་རྒྱལ་མཚན་ནོ།། །།རྒྱུད་མིན་རྒྱུད་ལྟར་བཅོས་པ་ཡི། །ཆོས་མིན་སུན་དབྱུང་བྱ་ཕྱིར་དང་། །དམ་ཆོས་སྣང་བ་སྤེལ་བའི་ཕྱིར། །ཇི་ལྟར་ནུས་བཞིན་བསྒྱུར་བ་ལགས། །
འདི་དོན་འབྱེད་པའི་འགྲེལ་པ་དང་། །རྒྱ་དཔེའི་དཔེ་སྤང་མ་རྙེད་ཅིང་། །དོན་ཟབ་སྒྲ་ནི་རྟོགས་དཀའ་ལ། །སྂ་སྐྲྀ་ཏ་ལ་མ་བྱང་བས། །སྒྲ་དོན་ཇི་བཞིན་མ་འབྱོར་པའི། །ནོངས་དེ་མཁས་རྣམས་བཟོད་མཛད་ཅིང་། །
ཕྱིས་འབྱུང་སྐད་གཉིས་སྨྲ་རྣམས་ཀྱིས། །མ་དག་ཤེས་ན་བཅོས་པར་ཞུ། །རྒྱུད་ཆེན་འདི་ནི་བསྒྱུར་བ་ལས། །དགེ་བ་བདག་གིས་གང་ཐོབ་པ། །དེ་ཡིས་མཐའ་ཡས་འགྲོ་བ་ཀུན། །རྡོ་རྗེ་འཆང་ཆེན་ཉིད་གྱུར་ཅིག ། །། 
བཀྲ་ཤིས་པར་གྱུར་ཅིག །འདི་ལ་དབུ་ནས་ཤོག་ལྟོ་གཅིག་མ་ཚང་བས་རྙེད་ན་བསྒྱུར་བར་བྱའོ། །འདི་དང་ཐུན་མོང་མ་ཡིན་པའི་གསང་བ་གཅིག་ཏུ་འདོད་པ་ཡང་འཁྲུལ་བར་སྣང་ངོ་། །འདིས་འཁོར་བ་སྡུག་བསྔལ་
གྱི་རྒྱ་མཚོ་ཆེན་པོ་མྱུར་དུ་སྐེམས་པར་གྱུར་ཅིག །རྒྱུད་འདི་ལ་ཀུན་མཁྱེན་གཉིས་པ་བུ་སྟོན་ཞབས་ཀྱི་འགྱུར་མི་འདྲ་བ་གཉིས་འདུག་པ་ལས། འདི་ནི་འགྱུར་བདེ་བ་དེ་ཉིད་ལས་བྲིས་པ་ཡིན་ལ། རྒྱ་དཔེ་ཟུབས་
པའི་བར་སྐབས་ནས་ཚིགས་བཅད་རྐང་པ་རེ་རེ་གཉིས་གཉིས་ཙམ་གྱི་ཧོར་ཀོར་མ་ཚང་བ་རྣམས་སུ་རྒྱ་གྲམ་གྱིས་མཚན་མ་བཏབ་ཡོད་པས་ཤེས་པར་བྱའོ།། །།

89-1-44b

 ༄༅༅། །རྒྱ་གར་སྐད་དུ།  ཤྲཱི་སརྦ་ཏ་ཐཱ་ག་ཏ་གུ་ཧྱ་ཏན་ཏྲ་ཡོ་ག་མ་ཧཱ་རཱ་ཛ་ཨ་དྭ་ཡ་ས་མ་ཏཱ་བི་ཛ་ཡ་ནཱ་མ་བཛྲ་ཤྲཱི་ཝ་ར་མ་ཧཱ་ཀལྤ་ཨཱ་དི།  བོད་སྐད་དུ།  དཔལ་དེ་བཞིན་གཤེགས་པ་ཐམས་ཅད་ཀྱི་གསང་
བ་རྣལ་འབྱོར་ཆེན་པོ་རྣམ་པར་རྒྱལ་བ་ཞེས་བྱ་བ་མཉམ་པ་ཉིད་གཉིས་སུ་མེད་པའི་རྒྱུད་ཀྱི་རྒྱལ་པོ་རྡོ་རྗེ་དཔལ་མཆོག་ཆེན་པོ་བརྟག་པ་དང་པོའོ། ། དེ་བཞིན་གཤེགས་པ་ཐམས་ཅད་ཀྱི་བདག་ཉིད་དཔལ་རྡོ་རྗེ་
སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་ཡི། །དུས་གཅིག་ཚེ་ན་བཅོམ་ལྡན་འདས། །དེ་བཞིན་གཤེགས་པ་ཐམས་ཅད་ཀྱི། །སྐུ་དང་གསུང་དང་ཐུགས་རྡོ་རྗེ། །རྡོ་རྗེ་བཙུན་མོ་རྣམས་ཀྱི་ནི། །བྷ་ག་
ལ་ནི་སྙོམས་པར་ཞུགས། །གསང་བ་ལས་ཀྱང་ཆེས་གསང་བ། །གསང་བ་ཆེན་པོ་འདི་ལྟ་སྟེ། །དེ་ནས་སྟོན་པ་རྡོ་རྗེ་འཛིན། །དེ་བཞིན་གཤེགས་པ་ཀུན་གྱི་བདག །གསང་བ་པ་རྣམས་མ་ལུས་པའི། །སྐུ་དང་གསུངས་
དང་ཐུགས་རྡོ་རྗེ། །བྱང་ཆུབ་སེམས་ཀྱི་སྙིང་པོ་ཆེ། །ཆོས་ཀུན་མཉམ་པ་ཉིད་དགོངས་པའི། །མཉམ་ཉིད་གཉིས་སུ་མེད་པའི་གནས། །སྤྱོད་པ་མཉམ་པ་ཞེས་བྱ་བའི། །ཏིང་ངེ་འཛིན་ལ་སྙོམས་ཞུགས་ཏེ། །དེ་ཉིད་ངང་ལ་
གནས་པ་ཡིས། །འཁོར་གྱི་དཀྱིལ་འཁོར་དཔག་མེད་ལ། །གཟིགས་ཤིང་མི་ཕྱེད་རྡོ་རྗེ་ལས། །མ་གཡོས་ལྷམ་མེ་ལྷང་ངེར་གནས། །མི་འགྱུར་གསང་བ་འདུས་པའོ། །སངས་རྒྱས་བྱང་ཆུབ་སེམས་དཔའ་དང་། །རིག་པའི་
ལྷ་མོ་རྫུ་འཕྲུལ་ཅན། །སྣ་ཚོགས་འཁོར་རྣམས་འདུས་པ་སྟེ། །རྣལ་འབྱོར་དབང་ཕྱུག་ཚོགས་རྣམས་ལས། །བྱང་ཆུབ་སེམས་དཔའ་སེམས་དཔའ་ཆེ། །ཀུན་དུ་བཟང་པོས་གསོལ་བ་བཏབ། །རང་གི་སྟན་ལས་ལངས་
ནས་ནི། །བླ་གོས་ཕྲག་པར་གཟར་གྱུར་པས། །པུས་མོ་ས་ལ་བཙུགས་ནས་ནི། །ཐལ་མོ་སྦྱར་ཏེ་སྤྱིས་བཏུད་ནས། །གསང་བ་ཞེས་ནི་གང་ལ་བྱ། །ཆེས་གསང་བ་ནི་ཇི་ལྟ་བུ། །གསང་བ་ཆེན་པོ་ཇི་ལྟར་ལགས། །བཅོམ་ལྡན་

89-1-45a

འདས་ཀྱིས་གསུང་དུ་གསོལ། །དེ་ནས་སྟོན་པ་རྡོ་རྗེ་འཛིན། །འཁོར་རྣམས་ཀུན་ལ་རྗེས་བརྩེ་བས། །རྡོ་རྗེ་གསང་བ་ཀུན་བདག་ཉིད། །རྡོ་རྗེའི་གསུང་གིས་བཀའ་སྩལ་པ། །ཨེ་མའོ་སངས་རྒྱས་ཐམས་ཅད་
ཀྱི། །ཆོས་ཀྱི་དབྱིངས་ནི་སྣང་བ་ཆེ། །རང་བཞིན་འོད་གསལ་ཡོངས་སུ་དག །ནམ་མཁའི་དབྱིངས་བཞིན་དྲི་མ་མེད། །སྐུ་གསུང་ཐུགས་ཀྱི་རྡོ་རྗེ་ཡི། །རྒྱུ་དང་མི་རྒྱུའི་དངོས་བདག་ཉིད། །དཀྱིལ་འཁོར་བསྡུས་དང་སྤྲོས་པའི་
ཚུལ། །བསྐྱེད་དང་གནས་དང་སྡུད་པར་མཛད། །ཉན་ཐོས་རང་རྒྱལ་ལ་སོགས་ལས། །གསང་བ་བྱ་བ་སྤྱོད་པ་སྟེ། །ཕ་རོལ་ཕྱིན་པའི་མདོ་སྡེ་ལས། །གསང་བ་རྣལ་འབྱོར་རྒྱུད་དུ་གྲགས། །ཕྱི་ནང་གསང་བའི་རིམ་ཤེས་
པས། །གསང་ཆེན་རྣལ་འབྱོར་བླ་མེད་རྒྱུད། །ཐབས་དང་ཤེས་རབ་གཉིས་མེད་པ། །སྟོང་པ་སྙིང་རྗེ་དབྱེར་མེད་ཕྱིར། །བདེ་ཆེན་བྱང་ཆུབ་སེམས་མཆོག་གསང་། །དེ་ཉིད་དཔལ་ལྡན་འདུས་པ་སྟེ། །ཟབ་དང་རྒྱ་ཆེའི་སྙིང་
པོ་ཉིད། །སངས་རྒྱས་ཀུན་གྱི་སྐུ་གསུང་ཐུགས། །གཉིས་མེད་མཉམ་པ་རོ་གཅིག་པས། །ཕྱག་རྒྱ་ཆེན་པོའི་གནས་འདི་ནི། །ཐུན་མོང་མ་ཡིན་རྒྱལ་པོ་ཆེ། །དམ་ཚིག་སྤྱོད་པའི་གནས་འདི་ཡིན། །ལེགས་སོ་ལེགས་
སོ་སེམས་དཔའ་ཆེ། །ཀུན་དུ་བཟང་པོ་ལེགས་པར་ཉོན། །རྒྱུད་རྣམས་ཀུན་དུ་མ་བཤད་ཅིང་། །ཁྱད་པར་དངོས་གྲུབ་འབྱུང་བའི་གནས། །རིམ་པ་བླ་ན་མེད་པའི་ཆོས། །སྙིང་པོ་ཁྱོད་ལ་བསྟན་པར་བྱ། །ཨེ་མའོ་
སངས་རྒྱས་ཀུན་གྱི་གསང་། །དེ་བཞིན་གཤེགས་པ་ཐམས་ཅད་ཀྱི། །བྱང་ཆུབ་སེམས་མཆོག་བླ་ན་མེད། །རང་འབྱུང་ཡེ་ཤེས་བདེ་བའི་མཆོག །འདོད་ཆགས་ཅན་གྱི་སྐྱེས་བུ་རྣམས། །རབ་ཏུ་གདུལ་བའི་
དོན་ཆེད་དུ། །གསང་བའི་སྤྱོད་པ་མཆོག་གི་ཆོས། །གཞུང་ཉུང་རྟོགས་པར་སླ་བའི་དོན། །འདུས་པ་ཆེན་པོ་རྡོ་རྗེའི་ཚིག །རྟོགས་དཀའ་སངས་རྒྱས་སྤྱོད་ཡུལ་པས། །སྡོམ་པ་གསང་བ་རྒྱས་གདབ་ཕྱིར། །

89-1-45b

དྲི་མེད་ཡེ་ཤེས་འབྱུང་གནས་གཏེར། །ལྷན་ཅིག་སྐྱེས་པའི་ངོ་བོ་ཉིད། །དཔལ་ལྡན་སངས་རྒྱས་ཀུན་གྱི་བདག །རྡོ་རྗེ་འཆང་བ་ཆེན་པོའི་ཡུལ། །ཐབས་ལས་མ་ལུས་སངས་རྒྱས་འབྱུང་། །འདི་ཉིད་གསང་བའི་ཆོས་
ཉིད་ཅན། །སྐུ་ཡི་གསང་བ་མ་སྐྱེས་པ། །སེམས་ཅན་ལུས་དང་སྣང་བ་ཁྱབ། །གསུང་གི་གསང་བ་མ་འགགས་པས། །ཐམས་ཅད་སྒྲ་དང་དབྱེར་མི་ཕྱེད། །ཐུགས་ཀྱི་གསང་བ་སྐྱེ་བ་མེད། །ཕྱག་རྒྱ་ཆེན་པོ་ལམ་གྱི་མཆོག །
འཁོར་འདས་ཆོས་དང་རོ་གཅིག་པས། །སྦས་པ་གསང་བ་མི་ཤེས་རྣམས། །ལུས་དང་ངག་དང་སེམས་རྣམས་ནི། །དྲི་མས་ཁེབས་པའི་རང་བཞིན་གྱིས། །འགྲོ་བ་ལྔ་སོགས་དག་ཏུ་འཁོད། །གསང་བའི་ཡི་གེའི་དོན་མ་མཐོང་། །
ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཇི་སྲིད་ཡ་ར་ལ་ཧའི་བར། །ཀ་ཁ་ག་མཐའ་ན་ཛྷའི་མཐའ། །ད་དྷའི་མཐའ་དང་མ་མཐར་བཅས། །དེ་དེ་རྩ་བའི་ཡི་གེ་གསུམ། །
ཐོག་མཐའ་གསང་བ་ཨེ་དང་བྃ། །དུས་གསུམ་རྡོ་རྗེའི་ཡི་གེའི་གནས། །འབྱུང་དང་འབྱུང་ལས་གྷུར་སྒྲར་བཅས། །འདུས་པ་འདི་ནི་སྦས་པའོ། །རྣལ་འབྱོར་རྒྱུད་ཚུལ་སྣ་ཚོགས་རྣམས། །རྩ་བའི་དཀྱིལ་འཁོར་ངེས་པ་
ཡིས། །དུ་མ་ཉིད་དུ་དབང་བསྐུར་བས། །ཐབས་དང་ཤེས་རབ་སྤྱོད་པ་ཡི། །ཡེ་ཤེས་འབར་བའི་ཕུང་པོ་ཡིན། །ཐབས་དང་ཐབས་ལས་བྱུང་བ་ཡི། །ཁྱད་པར་རིམ་པ་གང་གིས་ནི། །མདོ་དོན་མངོན་པར་བསྡུས་པ་ཡིན། །
ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨྃ་ཨཿ། ཨ་ནི་སྐྱེ་བ་མེད་པའི་ཚུལ། །ཤེས་རབ་ཕ་རོལ་ཕྱིན་སྦྱོར་བ། །དབྱངས་ཀྱི་ཡི་གེ་ཐ་མའི་བར། །སྟོང་ཉིད་ནམ་མཁའི་ཆོས་རྣམས་ཀྱིས། །བདེ་བར་གཤེགས་པའི་
གསུང་རབ་མཆོག །སྙིང་པོའི་ཡན་ལག་དག་ཏུ་བཤད། །ཐུབ་པ་ཆེན་པོས་ཆོས་ཕུང་པོ། །བརྒྱད་ཁྲི་བཞི་སྟོང་གསུངས་པ་ལས། །དཔལ་ལྡན་འདུས་པའི་སྣོད་ཡིན་ཏེ། །དེ་བས་འདི་ནི་རྒྱུད་ཀྱི་རྩ། །སངས་རྒྱས་ཀུན་གྱི་སྐུ་གསུང་

89-1-46a

ཐུགས། །ཡོན་ཏན་ཕྲིན་ལས་རྡོ་རྗེ་སོགས། །རྣམ་པ་སྣ་ཚོགས་སྟོན་པ་ནི། །སྙིང་པོ་ཀུན་ལས་འདི་བསྡུས་ཡིན། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་གསང་བ་གསང་བ་འདུས་པ་དཔལ་
རྣལ་འབྱོར་ཆེན་པོའི་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་ཆོས་ཐམས་ཅད་མཉམ་པ་ཉིད་ལ་གནས་པའི་ལེའུ་སྟེ་དང་པོའོ།། །། དེ་ནས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཡང་དག་
པར་འདུས་ཏེ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་ཉིད་བྱང་ཆུབ་ཀྱི་སེམས་རྡོ་རྗེ་ལ་འདི་སྐད་ཅེས་གསོལ་ཏོ། །རྣལ་འབྱོར་དབང་ཕྱུག་མཆོག་རྣམས་ཀྱིས། །ངེས་པར་བགྲོད་པའི་ལམ་གྱུར་
པ། །རྡོ་རྗེའི་གསུང་གིས་བཀའ་སྩལ་དོན། །བསྒྲུབ་བྱ་སྒྲུབ་བྱེད་དོན་བཤད་གསོལ་ཅེས་གསོལ་བ་བཏབ་པས་རྡོ་རྗེ་འཛིན་པ་ཆེན་པོས་ཇི་ལྟ་བར་མཁྱེན་ཅིང་ཐུགས་སུ་ཆུད་ནས། བཅོམ་ལྡན་འདས་ཀྱིས་ཆོས་ཐམས་
ཅད་ཀྱི་སྒོ་ལ་འཇུག་པ་ངོ་བོ་ཉིད་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་བཞུགས་ནས་དེ་བཞིན་གཤེགས་པའི་འཁོར་འདུས་པ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །རང་བཞིན་དག་ཅིང་བདག་མེད་
པའི། །ཆོས་ཀྱི་དབྱིངས་ནི་སྤྲོས་དང་བྲལ། །སྣ་ཚོགས་སྒྱུ་མའི་ཆོ་འཕྲུལ་ནི། །རང་འབྱུང་དག་པར་འཆར་བ་ཡིན། །རྣལ་འབྱོར་རྣམས་ལ་དངོས་གྲུབ་ཀྱི། །འབྲས་བུ་ཉམས་སྣང་སྣ་ཚོགས་པའོ། །ཁམས་གསུམ་
སེམས་ཅན་ཐམས་ཅད་ལ། །ལས་དང་ཉོན་མོངས་སྡུག་བསྔལ་འབྱུང་། །དེ་བཞིན་གཤེགས་པ་ཐམས་ཅད་ལ། །ཐམས་ཅད་མཁྱེན་པའི་ཡེ་ཤེས་ཀྱི། །གསང་བ་བསམ་གྱིས་མི་ཁྱབ་པ། །ཕྲིན་ལས་དག་
པའི་སྟོབས་སུ་འཆར། །དེ་ཉིད་གཞན་དུ་མི་རྙེད་དེ། །ཤེས་རྒྱུད་གཅིག་གིས་བསྡུས་པའི་ཕྱིར། །འབྲེལ་པ་ཅན་དུ་བརྗོད་པར་བྱ། །ཁྱད་པར་ཆོས་ནི་བརྟག་དཀའ་བའོ། །སྟོང་གསུམ་ཞིང་འདི་སྤྲུལ་པ་ཡི། །

89-1-46b

དཀྱིལ་འཁོར་རྒྱ་ཆེ་འཇིག་རྟེན་ཁམས། །གསལ་བ་དྲི་མ་མེད་པ་སྟེ། །དག་པ་རང་འབྱུང་ངོ་བོ་ཉིད། །སྣ་ཚོགས་ཆོས་ཉིད་གཅིག་པ་ལས། །ཀུན་དུ་ཁྱབ་པ་དགའ་བའི་གཟུགས། །རང་བཞིན་སངས་རྒྱས་རྡོ་རྗེའི་སྐུ། །སྤྲོ་བསྡུའི་
སྤྲིན་གྱིས་ཀུན་དུ་ཁྱབ། །ཕྱོགས་བཅུ་འོད་ཀྱི་ཕྲེང་བ་ཡི། །སྣང་བས་རྒྱས་པ་འཕྲོ་ཞིང་འཁྲུགས། །གསལ་དང་གསལ་མིན་གཉིས་ལྡན་པའི། །རིན་ཆེན་པད་མའི་ཕྲེང་ལྡན་པས། །ཕྱོགས་རྣམས་ཀུན་དུ་དུས་གསུམ་གྱི། །
སངས་རྒྱས་རྣམས་ཀྱི་སྤྱོད་ཡུལ་ཆེ། །རིགས་ལྔར་འབྱུང་བ་རྣམས་དང་ནི། །ཕྱོགས་ཀྱི་དབྱེ་བས་གནས་པ་ཡི། །ལྷ་རྣམས་ཐམས་ཅད་འབྱུང་བ་ནི། །ཡང་དག་ཏིང་འཛིན་དབྱེ་བ་ཡིས། །ཞེ་སྡང་གཏི་མུག་འདོད་ཆགས་དང་། །
ཡིད་བཞིན་ནོར་བུའི་དམ་ཚིག་སྟེ། །རིགས་ལྔར་གྱུར་པ་འདི་དག་གིས། །འདོད་དང་ཐར་པ་རབ་བསྒྲུབས་པས། །དཀྱིལ་འཁོར་ཡོངས་སུ་རྫོགས་པར་འགྱུར། །དག་དང་མ་དག་གྱུར་པ་རྣམས། །འདིར་ནི་རིགས་ལ་གནས་
པ་སྟེ། །རགས་དང་ཕྲ་བའི་ཆ་བརྟེན་པས། །ལུས་སེམས་ཆོས་ནི་རབ་ཏུ་དབྱེ། །ལུས་ནི་ནམ་མཁའ་ལྟ་བུ་སྟེ། །སེམས་ནི་སྒྱུ་མའི་རྣམ་པར་འབྱུང་། །ངག་ནི་བྲག་ཆ་ལྟ་བུ་སྟེ། །དབྱེར་མེད་རྡོ་རྗེ་ལྷན་ཅིག་སྐྱེས། །རྟེན་
དང་བརྟེན་པ་དབྱེར་མེད་པས། །ཐམས་ཅད་ཆོས་ཉིད་སེམས་ལ་གནས། །སེམས་ཅན་སངས་རྒྱས་གཉིས་སུ་བཏགས། །སྣོད་བཅུད་སྣང་བའི་ཡུལ་རྣམས་དང་། །བརྟན་གཡོ་ཁམས་གསུམ་རང་རིག་པ། །སྲིད་
གསུམ་མ་ལུས་ཆོས་ཉིད་དེའི། །སྣང་བ་གཟུགས་དང་སྒྲ་ལ་སོགས། །དྲི་དང་རོ་དང་རེག་བྱ་དང་། །ཐམས་ཅད་ཆོས་ཉིད་བག་ཆགས་འབྱུང་། །རྒྱུ་ལས་འབྲས་བུ་བསྐྱེད་པའི་ཕྱིར། །གཅིག་ལས་དུ་མའི་ཆོས་ཀུན་ཤར། །
དུ་མ་ཉིད་དུ་དམིགས་མེད་དེ། །ཐམས་ཅད་སྟོང་ཕྱིར་མ་སྐྱེས་པའོ། །དེ་སྐད་ཅེས་གསུངས་པ་དང་། དེ་ནས་དེ་བཞིན་གཤེགས་པ་དེ་དག་ཐམས་ཅད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་

89-1-47a

ལ་སོགས་པ་རྣམས་རབ་ཏུ་དགའ་ཞིང་ཡི་རང་ཏེ། བདེ་བ་དང་ཡིད་བདེ་བ་བླ་ན་མེད་པ་ཐོབ་ནས་ལུས་ངག་ཡིད་གསུམ་སྐུ་གསུང་ཐུགས་རྡོ་རྗེ་ལ་རབ་ཏུ་གནས་པར་གྱུར་ནས་ཆེད་དུ་བརྗོད་པ་འདི་ཆེད་དུ་བརྗོད་དོ། །
ཨེ་མའོ་རང་ལུས་སྒྱུ་མར་གྲུབ་པ་དག །ནམ་མཁའ་ལྟ་བུར་སྐྱེ་བ་མེད། །དབང་པོའི་གཞུ་དང་མཚུངས་པ་ཉིད། །སྟོང་པ་ཉིད་ནི་རྡོ་རྗེའི་སྐུ། །ལུས་ནི་རང་བཞིན་མི་དམིགས་པས། །དག་པ་ཆེན་པོ་ཡེ་ཤེས་ལུས། །ངག་ནི་
བྲག་ཆའི་སྒྲ་དང་མཚུངས། །བརྗོད་པའི་དུས་ན་སྟོང་པ་སྟེ། །པི་ཝང་སྒྲ་བཞིན་རྟེན་འབྲེལ་གྱིས། །རང་གྲག་བརྗོད་པ་ཐ་སྙད་ཙམ། །སེམས་ནི་རང་འབྱུང་དག་པ་ལ། །ཡེ་ཤེས་ཆེན་པོ་རང་གནས་ཉིད། །རྒྱུ་རྐྱེན་ཚོགས་པ་
བྲལ་བ་ལས། །སྣང་བ་ཙམ་དུའང་མི་གནས་པའོ། །དེ་ནས་བཅོམ་ལྡན་འདས་དཔལ་རྡོ་རྗེ་འཛིན་པ་ཆེན་པོས་ཆོས་ཐམས་ཅད་ལ་ཟབ་པའི་ཚུལ་ལ་དམིགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། 
སྐུ་གསུང་ཐུགས་རྡོ་རྗེ་བླ་ན་མེད་པའི་དོན་བཀའ་སྩལ་པ། མ་སྐྱེས་མི་འགག་རོལ་པར་གང་འབྱུང་བ། །བྱང་ཆུབ་སེམས་ནི་དཔལ་ལྡན་རྡོ་རྗེ་འཆང་། །ཐབས་དང་ཤེས་རབ་གཉིས་མེད་སྟོན་པའི་སྐུ། །སྒྱུ་འཕྲུལ་རྒྱལ་པོ་བདེ་ཆེན་
འདི་ཉིད་དེ། །ཆོས་རྣམས་ཐམས་ཅད་རང་བཞིན་འོད་གསལ་བ། །མཚན་མ་མེད་ཅིང་མི་འགྱུར་འཇའ་ཚོན་ལྟར། །གཉིས་མེད་གཉིས་སུ་མེད་མིན་མཉམ་པའི་སྐུ། །ཤིན་དུ་དྲི་མེད་ནམ་མཁའི་ངོ་བོ་ཉིད། །
ཧཱུྃ་བཛྲ་དྷྲིཀ །བྷྲཱུྂ་ཛི་ན་ཛིཀ །ཏྲཱྂ་རཏ་ན་དྷྲིཀ །ཧྲཱིཿཨ་རོ་ལིཀ །ཁྂ་པྲཛྙཱ་དྷྲིཀ །ལྂ་དྭེ་ཥ་ར་ཏི། མྂ་མོ་ཧ་ར་ཏི། པྃ་རཱ་ག་ར་ཏི། ཏྃ་བཛྲ་ར་ཏི། ཡ་ཡ་མཱན་ཏ་ཀྲིཏ། མ་པྲ་ཛྙཱན་ཏ་ཀྲིཏ། ཏ་པད་མཱན་ཏ་ཀྲིཏ། ཀ་བིགྷན་
ཏ་ཀྲིཏ། རྡོ་རྗེ་རིན་ཆེན་པད་མ་དང་། །འཁོར་ལོ་བསྣམས་པའི་འོད་འཕྲོ་བ། །དཀྱིལ་འཁོར་རྫོགས་ཚུལ་ལྷ་རྣམས་ཀུན། །ཡབ་ཡུམ་བདེ་བ་ཉིད་དུ་བཞུགས། །དཔལ་རྣལ་འབྱོར་ཆེན་པོ་གཉིས་སུ་མེད་པའི་

89-1-47b

མཉམ་པ་ཉིད་རྣམ་པར་རྒྱལ་བ་ལས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་སྙིང་པོ་གསང་བ་གསང་བ་འདུས་པ་རྡོ་རྗེ་གསུམ་བསྟན་པའི་ལེའུ་སྟེ་གཉིས་པའོ།། །། དེ་ནས་ཡང་དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེ་དང་། གསུང་
རྡོ་རྗེ་དང་། ཐུགས་རྡོ་རྗེ་གཉིས་སུ་མེད་པའི་ཡེ་ཤེས་སྟོན་པར་མཛད་པའི་ཕྱིར་གསང་བའི་བདག་པོ་རྡོ་རྗེ་འཛིན་པ་ཉིད་ཀྱིས་ཆོས་ཐམས་ཅད་ལས་རྣམ་པར་རྟོག་པ་མེད་ཅིང་རྡུལ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འཁོར་
འདུས་པ་རྣམས་ལ་ཡང་དག་པའི་སྣང་བ་སྟོན་པར་མཛད་པའི་ཕྱིར་འདི་གསུངས་སོ། །ཆོས་རྣམས་མི་འགྱུར་ནམ་མཁའ་བཞིན། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་སེམས་དཔའ་དེ་བཞིན་གཤེགས། །བླ་མ་ཉིད་དུ་སྟོན་པར་མཛད། །སྔགས་ཀྱི་སྤྱོད་
པ་སྤྱོད་མཆོག་གིས། །གསང་བའི་ཚུལ་འདི་སྤྱད་པ་ན། །གང་སྤྱོད་དེ་ཡིས་ཡེ་ཤེས་འཐོབ། །ཚུལ་འདི་ཤིན་དུ་འདའ་དཀའ་བའོ། །མཁའ་དང་མཚུངས་པ་མཉམ་འགྱུར་བས། །རྣམ་པར་མི་རྟོག་ངོ་བོ་ཉིད། །ཆོས་རྣམས་རང་བཞིན་དག་པ་ལས། །ཡང་དག་སྐུ་
ནི་རབ་ཏུ་འབྱུང་། །ཨོཾ་སྭ་བྷཱ་བ་ཤུད་དྷཱཿསརྦ་དྷརྨཱཿསྭ་བྷཱ་བ་ཤུད་དྷོ྅ཧ+། ཨོཾ་ཡོ་ག་ཤུད་དྷཱཿསརྦ་དྷརྨཱཿཡོ་ག་ཤུད་དྷོ྅ཧྃ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏ་མ་ཀོ྅ཧྃ། དག་པའི་སྔགས་ཀྱི་སྒྲ་རྣམས་དང་། །སྔགས་དང་རླུང་དུ་སྦྱར་བ་ཉིད། །རང་བཞིན་དག་པའི་ཡེ་ཤེས་
ལྔ། །ཆོས་རྣམས་ཡི་གེ་སྟོང་པར་བརྗོད། །རྡོ་རྗེ་མི་བསྐྱོད་རྒྱལ་མཆོག་ནི། །ཞེ་སྡང་ཅན་གྱི་གདུལ་བྱ་ལ། །རྡོ་རྗེ་རིགས་ཀྱི་དཀྱིལ་འཁོར་གྱིས། །གཏུམ་ཞིང་གདུག་པ་ཐམས་ཅད་འདུལ། །དཀོན་མཆོག་དཔལ་གྱི་རྒྱ་ཆེན་གྱིས། །ང་རྒྱལ་ཅན་གྱི་གདུལ་བྱ་རྣམས། །
རིན་ཆེན་རིགས་ཀྱི་དཀྱིལ་འཁོར་གྱིས། །སེར་སྣས་འཇུངས་པ་ཐམས་ཅད་བཏུལ། །ཚེ་དཔག་མེད་ཀྱིས་འོད་བྱེད་ཀྱིས། །འདོད་ཆགས་ཀྱིས་ནི་བཅིངས་པ་རྣམས། །པད་མ་རིགས་ཀྱི་དཀྱིལ་འཁོར་གྱིས། །སྲེད་པ་ཅན་གྱི་གདུག་པ་བཏུལ། །
ཐོགས་མེད་གྲུབ་པའི་རྒྱལ་མཚན་གྱིས། །ཤིན་དུ་ཕྲག་དོག་ཆེ་རྣམས་ལ། །ལས་ཀྱི་རིགས་ཀྱི་དཀྱིལ་འཁོར་གྱིས། །སེམས་ཅན་མ་རུངས་ལས་ཅན་བཏུལ། །སངས་རྒྱས་དཀྱིལ་འཁོར་ཡངས་པས་ནི། །རྨོངས་དང་མ་

89-1-48a

རུངས་མཆེ་བ་ཅན། །དེ་བཞིན་གཤེགས་པའི་དཀྱིལ་འཁོར་མཆོག །གཏི་མུག་མུན་པར་ཚུད་རྣམས་བཏུལ། །དཀྱིལ་འཁོར་ལྔ་ཡི་སྦྱོར་བ་ཡིས། །དེ་ཉིད་རིགས་ནི་ལྔ་རུ་བཤད། །ཤིན་དུ་བསྡུས་པའི་སྦྱོར་
བས་ནི། །ཐུགས་ཀྱི་དཀྱིལ་འཁོར་ཡེ་ཤེས་མཆོག །ཁྲུ་ནི་བཅུ་གཉིས་ཚད་མཉམ་པ། །ངོས་བཞི་དག་ལ་མཉམ་པ་ཡིས། །བཅུ་གཉིས་ས་ནི་མངོན་རྫོགས་པས། །བཅུ་གསུམ་པ་ལ་གནས་པ་ཡིན། །གསུང་གི་
དཀྱིལ་འཁོར་བླ་ན་མེད། །ཁྲུ་ནི་ཉི་ཤུ་མཉམ་པ་སྟེ། །ངོས་རེ་ལ་ཡང་ལྔ་ལྔར་བརྗོད། །རླུང་བཅུ་སྔགས་བཅུར་གནས་པ་ནི། །བློ་གྲོས་ལྡན་པས་ཤེས་བྱ་སྟེ། །དེ་བརྗོད་པས་ནི་མཆོག་ཏུ་བརྗོད། །སྐུ་ཡི་དཀྱིལ་འཁོར་
ཁྲུ་བཅུ་དྲུག །ངོས་རེར་བཞི་བཞིར་ལྡན་པ་ལས། །བདེན་པ་བཅུ་དྲུག་རྟོགས་པ་ཡིས། །ཡེ་ཤེས་སྐད་ཅིག་དེ་སྙེད་དོ། །མི་བསྐྱོད་རྡོ་རྗེ་འཛིན་པ་དང་། །ཚེ་དཔག་མེད་པའི་སྣང་བ་དང་། །རྡོ་རྗེ་རྟག་པ་ཆེན་པོ་སྟེ། །
བསྡུས་པ་སྐུ་གསུང་ཐུགས་རྡོ་རྗེ། །ལུས་ངག་ཡིད་ནི་རྣམ་དག་ཕྱིར། །ཡང་དག་དོན་དུ་སྣང་བའོ། །གཅིག་ནས་གསུམ་དང་རིགས་ལྔ་སྟེ། །དགུ་དང་བཅུ་གསུམ་ཉི་ཤུ་ལྔ། །སུམ་བཅུ་རྩ་གཅིག་བར་དག་ཏུ། །རྩ་
བའི་དཀྱིལ་འཁོར་དག་ཏུ་འགྱུར། །རིགས་ལྔ་དག་ལས་འབྱུང་བ་ནི། །དེ་རེ་ཉི་ཤུར་དབྱེ་བ་ཡིས། །ཕྱི་དང་ནང་གི་བདག་ཉིད་ལས། །ཉི་ཤུ་རྩ་ལྔར་ཡང་དག་པས། །དམ་པའི་རིགས་ནི་བརྒྱ་རུ་འགྱུར། །དེ་བཞིན་གཤེགས་
ཚོགས་མཐའ་ཡས་པས། །འདུས་པ་ཆེན་པོ་འདིར་བརྗོད་བྱས། །རྣལ་འབྱོར་པ་རྣམས་ཤེས་པར་གྱིས། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་ངོ་བོ་སྙིང་པོ་གསང་བ་གསང་བ་འདུས་
པ་དཔལ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་རྣམ་པར་རྒྱལ་བ་ལས་གསང་བའི་དཀྱིལ་འཁོར་བླ་ན་མེད་པར་བསྟན་པའི་ལེའུ་སྟེ་གསུམ་པའོ།། །། དེ་ནས་རྒྱལ་པོ་རྡོ་རྗེ་འཛིན། །ཐམས་ཅད་ཆོས་ནི་

89-1-48b

སྟོན་པ་ལ། །གསང་བ་ཆེན་པོ་རྣམ་པར་རྒྱལ། །རྒྱུད་འདི་ཡང་དག་སྟོན་པར་མཛད། །རྡོ་རྗེ་དམ་ཚིག་གསུམ་གྲུབ་མཆོག །སྐུ་གསུམ་རྡོ་རྗེ་ཅན་དུ་འགྱུར། །ཕྱོགས་བཅུའི་སེམས་ཅན་ཐམས་ཅད་ཀྱི། །ཡིད་བཞིན་ནོར་བུ་རྒྱ་
མཚོར་གྱུར། །ཕུང་པོ་ལྔ་རྣམས་སངས་རྒྱས་སྐུ། །དེ་བཞིན་གཤེགས་པའི་བདག་ཉིད་ཅན། །སྲ་བ་ས་ཡི་ཁམས་ཡིན་ཏེ། །ཞུ་བ་ཆུ་ཡི་ཁམས་སུ་འདོད། །དྲོ་བ་མེ་ཡི་ཁམས་ཡིན་ཏེ། །རྒྱུ་བ་རླུང་དུ་རབ་ཏུ་བསྒྲགས། །
མི་ཤིགས་པ་ནི་ཐིག་ལེར་གསུངས། །བདེ་བ་ནམ་མཁའི་ཁམས་ཡིན་ནོ། །གཟུགས་ནི་ཐོགས་པར་བཅས་པ་སྟེ། །ཚོར་བ་རྣམ་པ་གསུམ་དུ་འགྱུར། །འདུ་ཤེས་དམིགས་པར་བཅས་པ་སྟེ། །འདུ་བྱེད་ལུས་ངག་
ཡིད་སྦྱོར་བ། །རྣམ་ཤེས་སྒྱུ་མས་དོན་སྒྲུབ་བྱེད། །རེག་པ་ལས་ནི་ས་ཡིན་ཏེ། །ལྷ་མོ་སྤྱན་དུ་ཤེས་པར་བྱ། །དྲོ་བ་མེ་རུ་རབ་ཏུ་གྲགས། །གོས་དཀར་མོར་ནི་ཤེས་པར་བྱ། །སྡུད་པར་བྱེད་པ་ཆུ་ཡིན་པས། །མཱ་མ་
ཀཱི་ཡི་ངོ་བོར་འགྱུར། །འགྲོ་བའི་བྱ་བ་བསྐྱོད་པ་རླུང་། །སྒྲོལ་མའི་ངོ་བོར་བརྗོད་པར་བྱ། །ཐིག་ལེ་སྣང་བྱེད་བདེ་སྐྱོང་མ། །བདེ་བ་རྡོ་རྗེ་རེག་བྱ་མ། །དེ་ཉིད་བདེ་ཆེན་ཡེ་ཤེས་ནི། །སྐད་ཅིག་ཙམ་དུ་ཉམས་མྱོང་བས། །ཕྲལ་
དུ་ཡིད་ཆེས་བྱེད་ཡིན་ཏེ། །ལོག་རྟོག་མ་ལུས་འཇོམས་པ་པོ། །དངོས་དང་དངོས་མེད་ལོག་རྟོག་དག །བགག་ནས་རྣམ་པར་མི་རྟོག་པས། །བསྐལ་པ་སྟོང་ཕྲག་དུ་མར་ཡང་། །གནས་ནས་ཡེ་ཤེས་སྦྱོར་བར་བྱེད། །
དེ་ཡང་ཅུང་ཟད་གོམས་བྱས་པས། །གོང་ནས་གོང་དུ་ཁྱད་པར་འགྲོ། །ཞེས་གསུངས་པ་དང་། འཁོར་འདུས་པ་དེ་དག་ཐམས་ཅད་ལ་རང་བཞིན་གྱིས་བྱིན་གྱིས་བརླབས་པས་ཡང་དག་པའི་ཡེ་ཤེས་ཁྱད་པར་དུ་
གྱུར་པ་བླ་ན་མེད་པ་ལས་མངོན་དུ་གྱུར་ཏེ། དེ་བཞིན་གཤེགས་པ་རྣམས་དང་། བྱང་ཆུབ་སེམས་དཔའ་ཆེན་པོ་རྣམས་ཀྱིས་ཆེད་དུ་བརྗོད་པ་འདི་ཆེད་དུ་བརྗོད་དོ། །གང་དང་གང་གིས་འཆིང་བ་རྣམས། །

89-1-49a

དེ་ཉིད་ཤེས་པས་གྲོལ་གྱུར་ཏེ། །འདི་ལ་ངེས་པར་འཁོར་བ་ཡི། །རྒྱ་མཚོའི་ནང་ནས་དྲི་མེད་འཐོབ། །སེམས་ཅན་རྣམས་ཀྱི་ཡེ་ཤེས་ཀྱིས། །རྒྱུད་ནི་ངེས་པར་གྲོལ་འགྱུར་བ། །ཁྱད་པར་ལས་ནི་རྟོགས་
པས་ན། །ཚེ་འདིར་སངས་རྒྱས་གནས་སུ་འགྲོ། །གང་དུ་ཡང་དག་བླ་མ་ཡི། །དྲིན་གྱི་ཡེ་ཤེས་ཡན་ལག་བདུན། །ཕྲ་བའི་ཡོན་ཏན་མངོན་དུ་བྱེད། །སྐུ་གསུམ་དབྱེར་མེད་ལ་ཕྱག་འཚལ། །འདི་ལྟར་གྱུར་པའི་
རྣལ་འབྱོར་པ། །ཚེ་འདིར་འབྲས་བུ་ཐོབ་པས་ན། །མི་རྟོག་ཏིང་འཛིན་ལ་གནས་པས། །དཔའ་བོ་རྣལ་འབྱོར་དབང་ཕྱུག་ཚོགས། །རིང་ན་བཞུགས་ཀྱང་གཟིགས་འགྱུར་ཏེ། །དོན་ཀུན་སྒྲུབ་པར་བྱེད་པའོ། །དགའ་དང་
དགའ་བྲལ་དག་གི་དབུས། །མཚན་ཉིད་དམིགས་པ་བརྟན་པར་གྱིས། །ཐུན་ནམ་ཟླ་ཕྱེད་ཟླ་བ་ལོ། །བསྐལ་པར་ཡེ་ཤེས་ཆེ་ལ་སྦྱོར། །མི་རྟོག་པ་ཡི་ཏིང་འཛིན་གྱིས། །སྒྲིབ་པ་རང་དག་ལྷུན་གྱིས་གྲུབ། །བདེ་བ་ཆེན་པོ་མངོན་
བྱས་པས། །སྟོབས་སོགས་ཡོན་ཏན་རྣམས་ཀྱིས་བརྒྱན། །དབང་པོ་གཉིས་ཀྱི་སྦྱོར་བ་ཡིས། །དངོས་པོ་ཐམས་ཅད་བརྟག་པར་བྱ། །དེ་ལས་བྱུང་བའི་ཐབས་བསྟན་པས། །བདེ་བའི་ཁྱད་པར་འབྱུང་བར་འགྱུར། །རྒྱུ་ཡི་ཡན་
ལག་བདུན་འབྱུང་བ། །བླ་མས་བརྟེན་པའི་རྟེན་འབྲེལ་གྱིས། །ཡེ་ཤེས་དབབ་པས་སྦས་པའི་ཚུལ། །ཡེ་ཤེས་མཐོང་བ་ལུས་དང་ངག །རྟགས་འཆར་སྒྲིབ་པ་རང་བདག་སྟེ། །བྱིན་གྱིས་བརླབས་ལས་འཆར་བ་ཡིན། །
བླ་མ་སློབ་མའི་ཁྱད་པར་དག །ཡེ་ཤེས་དབང་དང་ཅུང་ཟད་ཀྱིས། །ཡེ་ཤེས་མཐོང་བའི་སྤྱོད་ཡུལ་ཡིན། །ལོངས་སྤྱོད་རྫོགས་པའི་མཚན་དཔེ་ནི། །བློ་ལ་གསལ་བར་རང་ལུས་ལ། །མཚན་དང་དཔེ་བྱད་ལྡན་པར་བཞུགས། །
ཁ་སྦྱར་ཨེ་བྂ་རྣམ་པ་གཉིས། །ཐབས་དང་ཤེས་རབ་རྩ་ཡི་གནས། །བདེ་བ་ཆེན་པོ་ཐིག་ལེ་ཡིས། །འདུ་འབྲལ་མེད་པའི་ཡེ་ཤེས་ཅན། །སྙིང་རྗེ་ཆེན་པོ་ཚད་མེད་བདུད་རྩིའི་རྩ། །རྒྱུན་མི་འཆད་པར་བདེ་བའི་

89-1-49b

བྱང་སེམས་འབབ། །ཕྲིན་ལས་སྟོབས་ནི་གཞན་དོན་ཐོགས་པ་མེད། །དེ་དག་དོན་དུ་ཡང་དག་རང་བཞིན་མེད། །སྟོང་ཉིད་རྟོགས་པས་དངོས་ལ་ཆགས་མི་འགྱུར། །འདི་ནི་རྒྱུ་ཡི་དུས་ཞེས་བྱ་བ་སྟེ། །ལམ་གྱི་དུས་ནི་དབང་
གི་ཡེ་ཤེས་ཏེ། །མཚན་ལྡན་རིག་མ་ཡོངས་སུ་དག་པ་ལ། །ས་ཕྱོགས་གཙང་ཞིང་རབ་ཏུ་དབེན་པའམ། །རྒྱལ་ཉིད་སྐྱེས་གཞི་ཞི་བའི་གནས་རྣམས་སུ། །བཤང་གཅི་ཆུ་ལ་སོགས་པ་བྱུག་པ་འམ། །རྒྱལ་བ་མཆོད་
ཕྱིར་རྟག་པར་རབ་ཏུ་བྱ། །ནུ་མའི་དབུས་བར་སྤྱི་གཙུག་མཐའ་ཡི་བར། །ཆོ་ག་ཤེས་པས་ཡང་ན་རྐང་པའི་བར། །ལྟེ་བ་རྐེད་པ་གསང་བར་རྒྱལ་བའི་སྲས། །རིགས་ལྔ་རྣམས་ནི་རབ་ཏུ་དགོད་པར་བྱ། །རབ་ཏུ་
དགེ་བའི་ཆོས་ནི་དྲི་མ་མེད། །རྣམ་པར་མི་རྟོག་ཡེ་ཤེས་མཚུངས་མེད་པ། །ཐབས་དང་ཤེས་རབ་སྦྱོར་བ་འདི་ཡིས་ནི། །བདེ་ཆེན་མཆོག་ཏུ་དག་པ་འདིར་ཐོབ་བྱེད། །འབྲས་བུའི་ཡན་ལག་བདུན་ནི་ཐ་མར་བརྗོད། །རང་བྱིན་བརླབ་པའི་ལམ་
གྱིས་གང་ཐོབ་པ། །མཚུངས་མེད་འདྲེན་པ་བླ་མེད་ངོ་བོ་ཉིད། །ནུས་པ་བརྟན་དང་རྫོགས་པ་མངོན་གྱུར་པའོ། །རྡོ་རྗེ་གསུམ་པ་དེ་བཞིན་གཤེགས་པའི་གསང་། །གནས་ནི་གནས་ཀྱི་རྣམ་པར་བསྒོམ་པར་བྱ། །སྔགས་ཀྱི་མཚན་གྱིས་
ཤིན་དུ་མཚན་སྤྲས་པ། །ཆོ་ག་འདི་ཡིས་བསྒྲུབ་པ་ཉིད་ཏུ་བྱ། །འགྲུབ་པའི་འབྲས་བུ་ནུས་པ་བརྟན་པ་ཡིས། །ཚེ་འདིར་སྐད་ཅིག་གཅིག་གིས་རྫོགས་བྱང་ཆུབ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་
གསང་བ་གསང་བ་འདུས་པ་དཔལ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་ཕྱག་རྒྱ་ཆེན་པོ་སྒྲུབ་པའི་དོན་བསྟན་པའི་ལེའུ་སྟེ་བཞི་པའོ།། །། དེ་ནས་དེ་བཞིན་གཤེགས་པ་ཐམས་
ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་པོ་བྱང་ཆུབ་ཀྱི་སེམས་རྡོ་རྗེས་འཁོར་གྱི་དཀྱིལ་འཁོར་རྣམས་ལ་གཟིགས་ནས། དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དོན་

89-1-50a

གྱི་ཕྱིར་ཡང་དག་པར་སྣང་བའི་ཡེ་ཤེས་རྣམ་པར་སྤྲོ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་གསང་བ་འདི་ལྟ་བུ་གསུངས་སོ། །འཁོར་བ་དག་ལ་མི་གནས་པའི། །ཡེ་ཤེས་རྡོ་རྗེ་ཁྱོད་ཉོན་ཅིག །
དངོས་པོ་དངོས་མིན་དང་བྲལ་བ། །དངོས་པོ་གཉིས་ཀ་སྤོང་བ་ནི། །གཉིས་སུ་མེད་པའི་ཆོས་ཞེས་བྱ། །དག་དང་མ་དག་སྤང་བྱར་མེད། །གཟུགས་དང་སྟོང་པའི་བར་དུ་ཡང་། །དབུས་སུ་མཉམ་པར་གནས་པ་ཡིས། །གཙང་དང་མི་གཙང་དབུས་
སུ་ནི། །མ་འདྲེས་པ་དེ་མཉམ་པར་སྦྱོར། །རྟེན་དང་བརྟེན་ཅན་དབུས་སུ་ནི། །མཉམ་པ་ཉིད་ཀྱིས་རྒྱལ་བ་འབྱུང་། །ལུས་ནི་མཉམ་པར་གནས་པ་དང་། །ངག་དང་སེམས་ཀྱང་མཉམ་གྱུར་པས། །མཉམ་པར་ལྟ་བ་མཐོང་བ་རྣམས། །
ཡེ་ཤེས་མཉམ་པར་རྣམ་པར་རྒྱལ་བ་ཞེས་གསུངས་སོ། །ཀུན་དུ་བཟང་པོ་སེམས་དཔའ་ཆེས། །ཇི་ལྟར་མཉམ་པར་ལྟ་བ་དང་། །གཉིས་སུ་མེད་པའི་ཆོས་དག་ནི། །བདག་གིས་ཇི་ལྟར་འཚལ་བར་བགྱི། །བཅོམ་ལྡན་འདས་ཀྱིས་
བཀའ་སྩལ་པ། །ཡེ་ཤེས་རང་བཞིན་གཉིས་མེད་ཆོས། །དུ་མ་མ་ཡིན་གཅིག་མིན་ཏེ། །གསང་བའི་རིམ་པ་བླ་ན་མེད། །དང་པོ་ལས་ཀྱི་རྣལ་འབྱོར་གྱིས། །ལམ་གྱི་རིམ་པ་རབ་སྦྱོར་བས། །ཅིག་ཅར་འཇུག་པ་ཕྱག་རྒྱ་ཆེ། །ཟུང་དུ་འཇུག་
པའི་རིམ་པ་ཉིད། །བདེ་བ་ཆེན་པོར་རྟོགས་པར་བྱ། །ཆོས་རྣམས་ཡོངས་སུ་རྫོགས་པ་ནི། །བྱང་ཆུབ་ཕྱོགས་ཆོས་སུམ་བཅུ་བདུན། །ཏིང་འཛིན་རོ་མཉམ་རྡོ་རྗེ་ཡིས། །གསང་ཆེན་གཉིས་མེད་རྒྱལ་བ་འདིར། །གནས་པ་རྩ་དང་གཡོ་
བ་རླུང་། །མི་ཤིགས་ཐིག་ལེའི་ངོ་བོ་ཉིད། །རང་ལུས་རྡོ་རྗེའི་རང་བཞིན་ལ། །བདེ་བ་ཆེན་པོའི་ཡེ་ཤེས་ཀྱིས། །ས་ལམ་རྫོགས་ཚུལ་ལུགས་འབྱུང་དང་། །ལུགས་ལས་བཟློག་པ་རིམ་མིན་པས། །རྒྱུད་དུ་སྦས་པ་རྣམས་གསལ་བ། །དེ་
ཉིད་ངེས་པར་བསྟན་པ་ནི། །ཚེ་འདི་ཉིད་ལ་མངོན་སངས་རྒྱས། །ཅེས་གསུངས་པ་དང་། འཁོར་གྱི་དཀྱིལ་འཁོར་དེ་དག་ཤིན་དུ་རྨད་དུ་བྱུང་བའི་ཚུལ་ཟབ་མོ་ལ་ངོ་མཚར་སྐྱེས་ཏེ་སླར་གསོལ་པ། ཡེ་ཤེས་ཐོབ་པའི་ལུས་ཅན་དག །

89-1-50b

ཚེ་འདི་ཉིད་དུ་སངས་རྒྱས་པ། །འདི་ཉིད་རྣལ་འབྱོར་ཇི་ལྟ་བུ། །མི་གཙང་ལུས་ལས་ཇི་ལྟར་འགྱུར། །རྣམ་རྟོག་ངན་པའི་བག་ཆགས་ཀྱིས། །དྲི་མས་བསླད་པས་འདི་མ་མཆིས། །དེ་ནས་རྒྱལ་པོ་རྡོ་རྗེ་འཛིན། །རྡོ་རྗེ་འཆང་གིས་དེར་བསྟན་པ། །དྲི་
མ་བག་ཆགས་བཟློག་བྱའི་ཕྱིར། །ལམ་གཉིས་རང་གི་གསང་བའི་ཆོས། །འདིར་ནི་རྟོག་པ་ངན་པའི་ཚོགས། །རགས་པ་དང་ནི་ཕྲ་བའི་ཆོས། །རྣམ་རྟོག་བག་ཆགས་ཉེས་པ་ཡིས། །འགྲོ་བ་གསུམ་པོ་རྣམ་རྨོངས་ལ། །བློ་དང་ལྡན་
པས་ལེགས་བལྟས་ཏེ། །རྣལ་འབྱོར་རྒྱུད་ནི་སྦྱང་བར་བྱ། །བླ་མའི་མན་ངག་ལམ་གྱིས་ནི། །སློབ་མ་ཡོངས་སུ་སྨིན་བྱས་ཤིང་། །ཡེ་ཤེས་རྒྱུད་ལ་བསྐྱེད་པ་ཡིས། །གཅིག་ཆར་ལམ་གྱི་སྟོབས་ཀྱིས་ནི། །འདིར་ནི་ཡང་དག་རྫོགས་
སངས་རྒྱས། །གོམས་པ་ཆུང་བའི་སྟོབས་ཀྱིས་ནི། །ཡོན་ཏན་འཐུན་སྣང་མ་གྱུར་ཏེ། །དྲི་ངའི་ལུས་ནི་རྒྱལ་བའི་སྐུ། །སེམས་ནི་དྲི་མེད་པད་མ་ལར། །སྐྱོན་གྱི་འདམ་པས་མ་གོས་སོ། །ཇི་ལྟར་འདམ་པའི་ལུས་དག་ལས། །ཡེ་ཤེས་
ལུས་ནི་རང་དགར་འབྱུང་། །བསྐྱེད་པའི་རིམ་པའི་རྣལ་འབྱོར་ལམ། །རྫོགས་པས་གནས་ལུགས་མངོན་བྱས་ཏེ། །ཡེ་ཤེས་སྤྱོད་པས་རྣམ་སྦྱངས་པས། །ཤིན་ཏུ་དྲི་མེད་དག་པར་འགྱུར། །བྱང་ཆུབ་སེམས་ཀྱི་རང་བཞིན་ཏེ། །ཐབས་ཀྱི་མྱུ་གུ་
དག་གིས་ནི། །བན་དྷུ་ཀ་ནི་རྒྱས་པ་བཞིན། །སྦྲང་རྩི་བདུད་རྩིའི་གནས་ཡིན་ཏེ། །ཡོན་ཏན་དྲི་མེད་དེ་ཉིད་ཀྱི། །མེ་ཏོག་རྒྱས་པའི་ཆུ་སྐྱེས་པའོ། །རྡོ་རྗེ་ཐེག་པར་སྦས་པ་ཡི། །རྣལ་འབྱོར་མངོན་པར་སངས་རྒྱས་པ། །བདེན་གཉིས་ཟུང་འཇུག་
རྟོགས་པ་ལས། །སྤྲོས་བྲལ་མཐའ་དང་བྲལ་བའི་ཆོས། །སྒོམ་པའི་ལམ་ཞེས་ས་རྣམས་བསྒྲོད། །སྐད་ཅིག་ཡེ་ཤེས་འཆར་ཚུལ་ལ། །གོམ་པ་གོམས་པའི་ལམ་གྱུར་པས། །སྐུ་བཞིའི་གོ་འཕང་མངོན་དུ་བྱེད། །ཅེས་བཀའ་སྩལ་པ་དང་། 
བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། སའི་སྙིང་པོ་དང་། ཕྱག་ན་རྡོ་རྗེ་དང་། ནམ་མཁའི་སྙིང་པོ་དང་། འཇམ་པའི་དབྱངས་དང་། སྤྱན་རས་གཟིགས་དབང་ཕྱུག་དང་། སྒྲིབ་པ་ཐམས་ཅད་རྣམ་པར་སེལ་བ་དང་། ཀུན་དུ་བཟང་

89-1-51a

པོ་ལ་སོགས་པ་རྣམས་བདེ་བ་དང་ཡིད་བདེ་བ་དང་དང་བ་ཁྱད་པར་ཅན་ཐོབ་ནས་སྟན་ལས་ལངས་ཏེ། ཕྱག་དང་བསྐོར་བ་དུ་མ་བྱས་ཏེ་ཆེད་དུ་བརྗོད་པ་འདི་ཆེད་དུ་བརྗོད་དོ། །ཨེ་མའོ་རང་འབྱུང་རྒྱལ་བའི་གཞི། །རྡོ་རྗེ་
ཐེག་པ་གསང་བ་ལས། །ཕྱི་མའི་དུས་ན་གང་བྱུང་བའི། །རྣལ་འབྱོར་པ་རྣམས་དེ་བཞིན་གཤེགས། །ཤཱཀྱ་ཐུབ་པའི་བསྟན་པ་ལ། །སྙིགས་མ་ལྔ་ལྡན་དུས་དག་ཏུ། །རྡོ་རྗེའི་ཐེག་པ་གང་འཛིན་པ། །དེ་དག་སངས་རྒྱས་སྲས་ཉིད་འགྱུར། །རྡོ་རྗེ་
སྐུ་གསུང་ཐུགས་ལ་ངེས་གནས་པས། །བྱང་ཆུབ་སེམས་མཆོག་རྣམས་ལ་རྟག་མཆོད་བྱེད། །ཞེས་གསུངས་ཏེ། མེ་ཏོག་གི་ཆར་ཆེན་པོ་མངོན་པར་ཕབ་ནས་བཅོམ་ལྡན་འདས་ཀྱི་སྐུ་ལ་མངོན་པར་གཏོར་ཏོ། །རབ་ཏུ་གཏོར་ཏོ། །དེ་བཞིན་
གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་གསང་བ་གསང་བ་འདུས་པ་དཔལ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་ཕྱག་རྒྱ་ཆེན་པོ་ངེས་པར་འབྱེད་པ་ཞེས་བྱ་བའི་ལེའུ་སྟེ་ལྔ་
པའོ།། །། དེ་ནས་རྒྱལ་པོ་རྡོ་རྗེ་འཛིན། །ཐམས་ཅད་ནམ་མཁའ་མི་འགྱུར་ཆེ། །གསང་བ་འཛིན་པ་ཐམས་ཅད་ལ། །མཆོག་ནི་སྟོན་ཕྱིར་ཡང་དག་བཞུགས། །ཨེ་མའོ་གསང་བའི་གནས་ཀྱི་མཆོག །ཨེ་མའོ་སྙིང་
པོ་ཀུན་བསྡུས་པ། །ཨེ་མའོ་ཆོས་ཀྱི་གནས་ཞི་བ། །ཨེ་མའོ་རྡོ་རྗེ་རྣམ་པར་རྒྱལ། །སྟོན་ཀའི་ནམ་མཁའ་སྤྲིན་མེད་པ། །ཟླ་བའི་འོད་ཟེར་ཀུན་གསལ་ལྟར། །གཟུང་འཛིན་སྤངས་པའི་ཡེ་ཤེས་ནི། །བདག་གཞན་བཅས་པས་སྣང་
བའོ། །སྟོན་དུས་སྤྲིན་མེད་ནམ་མཁའ་ལ། །ཉི་མ་གསལ་བར་ཤར་བ་བཞིན། །ཐབས་ཀྱི་ཡེ་ཤེས་གཉིས་པ་ནི། །དོན་དང་སེམས་བཅས་སྣང་བར་བྱེད། །སྤྲིན་མེད་མཁའ་དང་མུན་ལྟ་བུ། །སྣང་བྱེད་ཡེ་ཤེས་གོམས་བྱེད་པས། །
རང་རིག་རྩལ་ལས་གྲུབ་པ་ཡི། །སྒྱུ་མའི་ལུས་ནི་ལེན་པར་བྱེད། །དེ་ཡང་ཡིད་ཀྱི་ལུས་ལྡན་པའི། །རྣལ་འབྱོར་པ་ཡིས་ཁམས་གསུམ་དུ། །བདག་དང་གཞན་གྱི་དོན་བྱས་ནས། །མཐར་ནི་རང་གནས་བདེ་བར་འགྲོ། །སྒྱུ་མའི་

89-1-51b

ལུས་ཙམ་ལ་བརྟེན་ལ། །རིལ་པོར་འཛིན་དང་རྗེས་ཞིག་གིས། །དངོས་པོ་ཐམས་ཅད་བཅོམ་ནས་ནི། །དེ་ནས་དག་པའི་ངང་དུ་གནས། །ཐོགས་པ་མེད་པའི་ཡེ་ཤེས་ཀྱིས། །སྣང་བ་ཐམས་ཅད་ནུབ་བྱས་ནས། །རང་འོད་རིག་མ་དབྱིངས་ཀྱི་ངང་། །
སྣང་བའི་ཡེ་ཤེས་ཁྱབ་པར་འགྱུར། །བདག་དང་གཞན་དུ་རྟོག་པ་ཡི། །རྣམ་རྟོག་དྲ་བ་བསལ་ནས་ནི། །བདག་མེད་དམིགས་པ་མེད་པ་རུ། །མཉམ་ཉིད་ཡེ་ཤེས་ཁྱབ་པར་བྱེད། །སྣང་བ་མེད་པའི་ཏིང་ངེ་འཛིན། །སྣང་བ་ཙམ་ཡང་འཛིན་མེད་
པར། །ཡང་དང་ཡང་དུ་དོན་དམ་པའི། །བདེན་པ་མངོན་དུ་བྱེད་པ་ཅན། །འཇའ་ཚོན་ལུས་ཀྱིས་འབད་མེད་པའི། །འདོད་པ་ཐམས་ཅད་ནམ་མཁའ་ལས། །འབད་མེད་པར་ནི་སྩོལ་འགྱུར་ཏེ། །བདག་དང་གཞན་རྣམས་བདེ་བར་འཚོ། །རྡོ་རྗེ་འོད་
ཀྱི་ལུས་བཟུང་ནས། །བདག་དང་གཞན་དོན་སྒྲུབ་འགྱུར་ལ། །དམིགས་པ་ཐམས་ཅད་ཟད་བྱེད་པས། །བགྲོད་མེད་གནས་སུ་བདེ་བར་འགྱུར། །རང་འོད་ཡེ་ཤེས་ལྡན་པའི་སྐུ། །འཇའ་ཚོན་བཞིན་དུ་མཐའ་མི་དམིགས། །སྟོང་པ་གསུམ་
ལ་འདས་པ་པོ། །ཐོགས་མེད་སྙིང་རྗེ་འབྱུང་བར་འགྱུར། །དང་པོ་ས་ནི་ཆུ་ལ་ཐིམ། །ཆུ་ཡང་མེ་ལ་ཐིམ་འགྱུར་ཏེ། །མེ་ནི་རླུང་ལ་ཐིམ་གྱུར་ནས། །རླུང་ཡང་རྣམ་པར་ཤེས་ལ་ཐིམ། །རྣམ་ཤེས་བཟུང་བ་དེ་ཉིད་ནི། །འོད་གསལ་བར་ཡང་འཇུག་
པར་འགྱུར། །དང་པོ་སྒྱུ་མ་ལྟ་བུ་ལ། །དང་པོ་སྨིག་རྒྱུ་དེ་ཉིད་ཀྱང་། །འོད་ཟེར་ལྔ་དང་ལྡན་པར་མཐོང་། །གཉིས་པར་ཟླ་བ་ལྟ་བུ་དང་། །གསུམ་པར་ཉི་མ་ལྟ་བུ་དང་། །བཞི་པར་མུན་པ་ལྟ་བུ་ལ། །ལྔ་པ་སྤྲིན་མེད་ནམ་མཁའ་ལས། །མི་རྟོག་
མཐའ་དབུས་མེད་པར་འཆར། །སྟོབས་དང་མི་འཇིགས་ལ་སོགས་པའི། །ཆེ་བའི་ཡོན་ཏན་རྣམས་བརྒྱན་པ། །བདེན་གཉིས་སྦྱོར་བ་ཟུང་འཇུག་སྐུ། །བདེ་བ་ཆེན་པོ་དེས་ཐོབ་འགྱུར། །མཁའ་འདྲ་ཆོས་སྐུ་སྟོང་པ་ལས། །རྟོག་
མེད་ཡེ་ཤེས་མཁའ་འདྲ་བ། །ཚོགས་དང་སྨོན་ལམ་སྟོབས་དག་གིས། །འབར་དང་བྲལ་བར་ལྷུན་གྱིས་གྲུབ། །ལོངས་སྤྱོད་རྫོགས་པའི་སྐུ་ལུས་ནི། །འབད་པ་མེད་པར་སྤྲུལ་པའི་སྐུ། །མཐའ་མེད་རྡུལ་བྲལ་ཇི་བཞིན་པས། །སེམས་
89-1-52a

ཅན་དོན་ཀུན་སྒྲུབ་པར་མཛད། །གང་དག་གང་གིས་འདུལ་གྱུར་པ། །དེ་དེ་བཞིན་དུ་སོ་སོར་སྣང་། །མོས་པའི་དབང་གིས་ཐ་དད་པར། །སེམས་ཅན་རྣམས་ནི་འདུལ་བར་འགྱུར། །ལྷུན་གྲུབ་བདེ་བ་ཆེན་པོའི་སྐུ། །རང་
སྣང་རིག་མས་ཉེར་བརྒྱན་པའི། །འོག་མིན་གནས་སུ་དུས་རྟག་ཏུ། །མཚན་དང་དཔེ་བྱད་འབར་བས་བཞུགས། །ཡིད་བཞིན་ནོར་བུའི་རྒྱལ་པོ་ལྟར། །འབད་མེད་བདག་དང་གཞན་གྱི་དོན། །ཆེ་བའི་ཡོན་ཏན་རྣམས་ཀྱིས་བརྒྱན། །
བདེ་བ་ཆེ་ལས་དེ་འབྱུང་འགྱུར། །རིམ་པ་ཐམས་ཅད་ཀུན་རྫོགས་པའི། །མཉམ་པ་ཉིད་དུ་གནས་སེམས་ཀྱིས། །ཁམས་གསུམ་པ་རྣམས་འཇིག་བྱེད་པ། །ཐམས་ཅད་ནམ་མཁའ་བཞིན་དུ་གནས། །དེ་བཞིན་གཤེགས་པ་ཐམས་ཅད་ཀྱི་
སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་དཔལ་རྣལ་འབྱོར་ཆེན་པོའི་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་ཏིང་ངེ་འཛིན་བླ་ན་མེད་པ་མཆོག་ཏུ་བསྟན་པ་ཞེས་བྱ་བའི་ལེའུ་སྟེ་དྲུག་པའོ།། །། 
དེ་ནས་རྒྱལ་པོ་རྡོ་རྗེ་འཛིན། །བྱང་ཆུབ་སེམས་ཀྱི་རྡོ་རྗེ་ཆེ། །དབྱེར་མེད་བདེ་བ་སྟོན་པ་པོས། །གསུང་ནི་འདི་སྐད་བཀའ་སྩལ་ཏོ། །མཉམ་ཉིད་ཡེ་ཤེས་སྟོང་པ་ཡིས། །བདག་ཉིད་གཟུགས་ནི་སྦྱང་བར་བྱ། །མཉམ་ཉིད་ཡེ་ཤེས་སྟོང་
པ་ཡིས། །བདག་ཉིད་གཟུགས་ནི་སྦྱང་བར་བྱ། །མཉམ་ཉིད་གནས་པས་ཐམས་ཅད་དུ། །ཡེ་ཤེས་ཅན་གྱིས་སྒོམ་གྱུར་པ། །འཇིགས་པ་ཀུན་ལས་ཐར་བར་འགྱུར། །གསང་བའི་ཡི་གེ་བདེར་གྱུར་པ། །དེ་བཞིན་གཤེགས་པའི་
གསང་ཆེན་ནི། །སེམས་ཅན་ཀུན་གྱི་ལུས་ལ་གནས། །དེ་ཉིད་ཡེ་ཤེས་སྣང་བ་པོ། །ཀོ་ཏ་ཀྵྱ། ཀོ་ཏ་ཝ། ཀོ་ཏ་ཀྵྱ་ཝ་དྷ། ཀོ་ཏ་བ་ཤ ། ཀུ་ཏི་དྷ་རི། ཀོ་ལ་ཀྵྱ། ཀོ་ལ་ཝ། རྐོ་ལ་ལོ་ཝ། ཀོ་ལ་ཝ་ཤུ། ཀོ་ལ་ཏཱཥྠ། གནས་བཅུ་
སངས་རྒྱས་ཀུན་གྱི་གསང་བ་ནི། །ཐབས་དང་ལམ་གྱི་ཁྱད་པར་སྐུ་གསུང་ཐུགས། །ལྟ་བ་སྒྲུབ་པ་སྤྱོད་ཚུལ་བླ་ན་མེད། །འབྲས་བུ་བྱང་ཆུབ་སེམས་ཀྱི་དབང་བསྒྱུར་བས། །སྟོབས་བཅུ་རྫོགས་པ་གང་ཡིན་རྣལ་འབྱོར་ཆེ། །སྙིང་པོ་

89-1-52b

འདི་ནི་རྒྱུད་རྣམས་ཀུན་དུ་སྦས། །དངོས་པོར་འཛིན་པའི་སེམས་ཅན་རྣམས། །དངོས་པོའི་རྣལ་འབྱོར་འཇིག་འགྱུར་བའི། །ཟླ་བའི་དཀྱིལ་འཁོར་དབུས་གནས་པར། །པད་མའི་གདན་དག་བསམ་པར་བྱ། །ནམ་མཁའི་དབྱིངས་ཀྱི་དབུས་གནས་
པར། །གསལ་བ་ལ་སོགས་དཀྱིལ་འཁོར་ཅན། །བླ་མ་རྡོ་རྗེ་འཛིན་པ་དག །རྒྱལ་པོ་རོལ་པས་བསམ་པར་བྱ། །ལུས་དང་ངག་དང་ཡིད་རྣམས་ལ། །ཡེ་ཤེས་ཆེན་པོའི་དངོས་གྲུབ་གསོལ། །འཁོར་ལོ་འདི་ལྟར་བསྒོམས་པ་ཡིས། །
ཤེས་རབ་འབར་བའི་ལུས་སུ་འགྱུར། །འོད་ཟེར་འབར་བ་མ་བུ་རུ། །དངོས་པོས་དངོས་པོ་བསྒོམ་པར་བྱ། །མཆོད་པའི་མཚན་ཉིད་ཡོངས་ལྡན་པར། །སྟོང་པ་ཉིད་དུ་མཉམ་གནས་པས། །གཉིས་སུ་མེད་པ་རྣམ་རྒྱལ་བ། །ལྷག་པའི་
ལྷ་ནི་བསྐྱེད་བྱ་སྟེ། །འཁོར་ལོ་འདི་ནི་བསྒོམ་པར་བྱ། །མཉམ་པར་བཞག་ནས་བསྒོམས་པ་ཡིས། །འགྲུབ་པར་འདི་ལ་ཐེ་ཚོམ་མེད། །མཉམ་མེད་སྔགས་ནི་བཟླས་ནས་སུ། །སྒྲུབ་པོ་བདག་ཉིད་ཅན་གྱིས་བསྒྲུབ། །ཟླ་བ་གཅིག་གྲངས་
སྔགས་ཀྱིས་ནི། །ཁམས་གསུམ་འགྲུབ་པར་ཐེ་ཙོམ་མེད། །རྣམ་ཤེས་ལས་ནི་སྔགས་འབྱུང་བ། །མཚན་ཉིད་དྲུག་ལྡན་བཟླས་ནས་ཀྱང་། །རྡོ་རྗེ་སེམས་དཔའ་ཕྱག་བྱས་ནས། །ཟླ་བ་ཉ་ལ་དེ་འགྲུབ་འགྱུར། །དེ་ལ་བརྟུལ་ཞུགས་
སྤྱད་པ་མེད། །སྔགས་མེད་བགྲང་ཕྲེང་འཛིན་པ་མེད། །གཟུང་དང་སྦྱང་བ་སྣ་ཚོགས་དག །གཅིག་ནས་གཅིག་ཏུ་ལྡོག་འགྱུར་ཏེ། །ཡ་ཡི་དོན་གྱིས་གང་ཡང་རུང་། །དངོས་གྲུབ་འདོད་པས་བྱ་བ་ནི། །ར་ལ་སོགས་པ་གསུམ་པོ་
ཉིད། །རིམ་པས་འགྲོ་དོན་ལ་འཇུག་བྱ། །མེ་དང་རླུང་དང་དབང་ཚོན་དང་། །ཆུ་སྟེ་སོ་སོའི་དཀྱིལ་འཁོར་དུ། །ཐུན་ནི་ཕྱེད་ཕྱེད་དུས་སུ་ནི། །ལས་ནི་གཉིས་གཉིས་གནས་པར་འགྱུར། །མཆོད་ལ་བརྩོན་པས་མཆོད་པར་འགྱུར། །
བཟླས་ལ་བརྩོན་པས་རྣམ་པར་དག །མེ་ལ་སྦྱིན་བསྲེག་བརྩོན་པས་འབྱོར། །བསམ་གཏན་བརྩོན་པས་ཐར་པ་ཐོབ། །སྔགས་པས་དེ་ལྟར་ཤེས་ནས་ནི། །བྱིས་པའི་ཚུལ་བཞིན་སྤྱད་པར་བྱ། །སྤྱོད་པའི་ཚུལ་ནི་བླ་མེད་པས། །ཡང་དག་ཡེ་

89-1-53a

ཤེས་རྒྱ་མཚོ་འཐོབ། །ཆོས་ཀྱི་རང་བཞིན་དག་པ་ནི། །རང་བཞིན་དག་ཅིང་ངོ་བོ་མེད། །དངོས་པོའི་རང་བཞིན་གང་མེད་དེ། །བྱང་ཆུབ་རྫོགས་པའི་རིམ་པ་བསྟན། །བྱང་ཆུབ་སེམས་དཔའ་ཀུན་དུ་བཟང་། །ཡེ་ཤེས་ལྡན་པས་ཞུས་
པའི་དོན། །དམ་ཚིག་དེ་ཉིད་སྟོན་པ་པོ། །ཐམས་ཅད་མཁྱེན་པས་འདི་སྐད་གསུངས། །སྐུ་གསུམ་མི་ཕྱེད་དཀྱིལ་འཁོར་དུ། །ཡིད་འོང་ཕྲེང་བ་ཀུན་བསྡུས་པ། །རྡོ་རྗེའི་བཟླས་པ་ཡེ་ཤེས་ཆེ། །བླ་ན་མེད་པའི་ཐབས་མཆོག་ལས། །རྡོ་རྗེ་སྐུ་ཡི་
བཟླས་པ་ཡིས། །སངས་རྒྱས་སྐུར་ནི་བྱིན་གྱིས་རློབ། །མཉམ་མེད་ཡེ་ཤེས་ཐོབ་པས་ན། །རྡོ་རྗེ་གསུང་གིས་ངག་བྱིན་རློབ། །ནམ་མཁའི་ངང་ལས་རང་བྱུང་བའི། །ཐུགས་ཀྱི་རྡོ་རྗེ་སེམས་ཉིད་ཀྱི། །གཉིས་མེད་ཡེ་ཤེས་རྟོགས་གྱུར་པས། །
ཟབ་དང་རྒྱ་ཆེའི་ཚུལ་གནས་པའོ། །འདིར་ནི་རྟོག་པ་རྣམ་སྤངས་ཏེ། །བརྟན་པ་དང་ནི་མྱུར་འགྲོ་ཉིད། །དེ་བཞིན་ཁྱི་དང་བ་ལང་དང་། །སྲོག་སོང་མི་སྟེ་བ་ལང་ཆེན་པོའི་ཤ ། སྣ་ཚོགས་ཤ་ཡི་སྦྱོར་བ་དང་། །ཁུ་བ་དང་ནི་རཀ་ཏར་བཅས། །མི་བསྐྱོད་པ་
དང་སྣང་མཛད་དང་། །གོ་རོ་ཙ་ན་སྙིང་ག་ནས། །གང་བྱུང་གྷི་ཏྂ་སྟོབས་ལྡན་པ། །སྒོ་དགུ་ལས་ནི་གང་བྱུང་དང་། །སྲོག་ཆགས་ཡན་ལག་ལུས་ལས་བྱུང་། །རྡོ་རྗེ་ཁ་སྦྱར་རྫས་བཅུ་དང་། །རྡོ་རྗེ་ཅན་གྱིས་མྱོས་བྱེད་ལྡན། །རིམ་པར་སྦྱར་བ་སྐྱེ་བདུན་ཤ །
གང་ལས་རྙེད་པ་སྟོབས་མཆོག་ལས། །རིལ་བུ་ཙ་ན་ཀ་ཡི་ཚད། །སྦྱར་ཏེ་ཟོས་པར་གྱུར་ན་ནི། །སངས་རྒྱས་བྱང་ཆུབ་སེམས་དཔའ་དང་། །རྡོ་རྗེ་ཅན་ཀུན་མཉེས་པར་བྱེད། །བྱང་ཆུབ་སེམས་དཔའ་གྲགས་ཆེན་རྣམས། །ཐུགས་རྗེས་དགོངས་ཏེ་
གཟིགས་འགྱུར་ཏེ། །གཙོ་བོ་གཟི་ཅན་མདངས་ལྡན་པ། །འཛམ་བུའི་ཆུ་བོ་འོད་འདྲར་འགྱུར། །མི་སྣང་བ་དང་བཅུད་ཀྱིས་ལེན། །རྐང་མགྱོགས་མིག་སྨན་ས་འོག་དང་། །རལ་གྲི་རོ་ལངས་བུམ་པ་དག །སྦྱོར་བ་འདི་ཡིས་འགྲུབ་པར་གསུངས། །
དངོས་གྲུབ་ཀུན་གསོལ་དམ་པ་ཡི། །ཡེ་ཤེས་རྒྱ་མཚོ་ངེས་འཐོབ་བོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་དཔལ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་

89-1-53b

རྒྱལ་བ་ལས་དངོས་གྲུབ་མཆོག་ཏུ་བསྟན་པ་ཞེས་བྱ་བའི་ལེའུ་སྟེ་བདུན་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་བྱང་ཆུབ་ཀྱི་སེམས་རྡོ་རྗེས་ཆོས་ཐམས་ཅད་ཞི་བའི་དམ་ཚིག་གི་
མཆོག་བླ་ན་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཅང་མི་གསུང་བར་བཞུགས་པ་ལ་དེ་བཞིན་གཤེགས་པ་རྡོ་རྗེ་རྣམ་པར་སྣང་མཛད་དང་། དེ་བཞིན་གཤེགས་པ་རྡོ་རྗེ་རིན་ཆེན་འབྱུང་གནས་དང་། དེ་བཞིན་
གཤེགས་པ་འོད་དཔག་ཏུ་མེད་པ་རྡོ་རྗེ་དང་། དེ་བཞིན་གཤེགས་པ་རྡོ་རྗེ་གདོན་མི་ཟ་བ་གྲུབ་པ་ལ་སོགས་ཐམས་ཅད་དང་། དེ་བཞིན་གཤེགས་པའི་འཁོར་འདུས་པ་ཆེན་པོ་རྣམས་ཀྱིས་གསོལ་བ་བཏབ་པ་ནི། སྐུ་གསུང་ཐུགས་
ཀྱི་རྡོ་རྗེ་ཉིད། །ཡེ་ཤེས་སྙིང་པོ་ནམ་མཁའི་དབྱིངས། །ཆོས་རྣམས་ཀུན་གྱི་སྣང་བ་པོ། །ཟབ་པ་དང་ནི་རྒྱ་ཆེ་བའི། །དཀྱིལ་འཁོར་ཆེན་པོ་བསྟན་དུ་གསོལ་ཞེས་གསོལ་པ་དང་། བཅོམ་ལྡན་འདས་དེ་ཉིད་ཀྱིས་ཡེ་ཤེས་ཀྱི་སྣང་བའི་
ཚུལ་ལས་བྱུང་བ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་བྱུང་བ་ནི་རྡོ་རྗེ་དཀྱིལ་འཁོར་ཡེ་ཤེས་ལས་གྲུབ་པ་ཀུན་དུ་སྣང་བར་བྱེད་པ་མཚུངས་པ་མེད་པའི་འོད་ཀྱིས་ཁྱབ་པ་བཀོད་པ་ཚད་མེད་པའི་ཕྲིན་ལས་ཡོན་ཏན་ཐམས་
ཅད་རབ་ཏུ་འབྱུང་བའི་གནས་རིན་པོ་ཆེ་སྣ་ཚོགས་འདུས་པ་ལས་རང་བྱུང་བ། གྲུ་བཞི་སྒོ་བཞི་པ། རྟ་བབས་རིམ་པ་དུ་མས་མཛེས་པ། རྡུལ་མེད་ཅིང་རྣམ་པར་དག་པའི་ཡེ་ཤེས་ལས་བྱུང་བ། སྒོ་ཕྱི་དང་ནང་གི་བདག་ཉིད་ཅན། 
ཕོ་བྲང་ནང་དུ་ནི་དྲི་མ་མེད་པའི་ཡེ་ཤེས་ཀྱི་དཀྱིལ་འཁོར་ལ་རྡོ་རྗེའི་ཀ་བས་བཏེག་པ། རྡོ་རྗེ་རིན་པོ་ཆེའི་གདུང་གིས་བཅད་པ། དཀྱིལ་འཁོར་ཉི་ཤུ་རྩ་ལྔ་རབ་ཏུ་གནས་པ། ཁྱམས་ཕྱི་མའི་བར་དུ་ནི་དཀྱིལ་འཁོར་དྲུག་དང་བར་
ཆད་སྲུང་བར་བྱེད་པ་འབྱུང་པོ་ཀུན་འདུལ་དང་། ཡེ་ཤེས་ཀྱི་འཁོར་ལོ་བསྐོར་བའི་དཀྱིལ་འཁོར་རོ། །མཚམས་བཞིར་ནི་འཇིག་རྟེན་སྐྱོང་བ་བཞིའི་དཀྱིལ་འཁོར་ཏེ་བར་བར་དུ་ནི་སངས་རྒྱས་སྟོང་མངོན་པར་བྱང་ཆུབ་པའི་ཚུལ་

89-1-54a

བླ་ན་མེད་པ་འཐོབ་པའོ། །རིན་པོ་ཆེ་སྣ་ཚོགས་དུ་མའི་དྲ་བ་དང་དྲ་བ་ཕྱེད་པ་འཕྱང་བ། ཡེ་ཤེས་ལྔའི་རྩིག་པས་འཁོར་ཡུག་ཏུ་ཀུན་དུ་འཁོར་བ། སྒོ་བཞི་གློ་འབུར་དུ་སྣང་བ། ཕྱི་ནང་མེད་པར་གསལ་བ། སོ་སོའི་བྱེ་བྲག་
གི་དཀྱིལ་འཁོར་ནི་རྒྱས་ཤིང་ཡངས་ལ་རྔ་མ་དང་མདའ་ཡབ་དག་གིས་མཛེས་པ། འདོད་པའི་ལྷ་མོ་རྣམས་ཀྱིས་ནི་བཀྲ་ཤིས་པའི་མཆོད་པ་དང་རོལ་མོ་སྣ་ཚོགས་ཀྱིས་ཁྱབ་པར་བྱེད་པར་ཀུན་རྒྱུ་ཞིང་གར་བྱེད་པས་མཆོད་པའོ། །
རི་དགས་དང་། ཆོས་ཀྱི་འཁོར་ལོ་དང་། གདུགས་དང་། བ་དན་དག་བསྒྲེང་བས་མཚན་པ། བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་ཡོངས་སུ་དག་པའི་བདག་ཉིད་དུ་སྣང་བ་སྟོན་པར་མཛད་དོ། །འོག་མིན་བདེ་བ་ཅན་གྱི་ཕོ་བྲང་
དག་པའི་སྤྱོད་ཡུལ་དུ་གྱུར་པ་དེ་ཉིད་དུ་དཔལ་རྡོ་རྗེ་འཆང་ཆེན་པོས་དཀྱིལ་འཁོར་ཆེན་པོ་མཉམ་པ་ཉིད་གཉིས་སུ་མེད་པ་རྣམ་པར་རྒྱལ་བའི་ཕོ་བྲང་རང་བྱུང་བར་གྱུར་ཏོ། །དེ་དག་གི་ནི་སྤྱི་དང་བྱེ་བྲག་ཏུ། །དཀྱིལ་འཁོར་སུམ་བཅུ་
རྩ་དྲུག་རབ་ཏུ་འབྱེད། །དཔལ་ལྡན་རྡོ་རྗེ་འཛིན་པ་ཆེན་པོ་དང་། །རྣམ་པར་སྣང་མཛད་རིན་ཆེན་འོད་འཕྲོ་དང་། །འོད་དཔག་མེད་པ་གདོན་མི་ཟ་བ་རྣམས། །ཕྱོགས་བཞི་དབུས་དང་རྣམ་པ་ལྔར་བཞུགས་སོ། །མཱ་མ་ཀཱི་དང་སྤྱན་མ་གོས་
དཀར་དང་། །སྒྲོལ་མ་རྣམས་ནི་མཚམས་ཀྱི་དཀྱིལ་འཁོར་རོ། །བྱམས་པ་ས་ཡི་སྙིང་པོ་ཤར་དུ་སྟེ། །ལྷོར་ནི་ལག་ན་རྡོ་རྗེ་མཁའ་སྙིང་པོ། །ནུབ་ཏུ་འཇམ་དབྱངས་འཕགས་པ་སྤྱན་རས་གཟིགས། །བྱང་དུ་སྒྲིབ་པ་རྣམ་སེལ་ཀུན་
དུ་བཟང་། །མཚམས་ཀྱི་གྲྭར་ནི་གཟུགས་སྒྲ་དྲི་རོ་བཞི། །ཕྱོགས་ཀྱི་སྒོ་སྐྱོང་ཁྲོ་རྒྱལ་ཆེན་པོ་བཞི། །ཕྱི་རོལ་མཚམས་བཞིར་མི་གཡོ་མགོན་པོ་དང་། །འདོད་པའི་རྒྱལ་པོ་སྟོབས་ཆེན་དབྱུག་སྔོན་ཅན། །སྟེང་ཕྱོགས་གཙུག་ཏོར་འཁོར་
ལོས་སྒྱུར་བ་དང་། །འོག་ཕྱོགས་གནོད་མཛེས་རྒྱལ་པོ་སྟེ། །ལྷོར་ནི་གསང་བའི་བདག་པོ་དང་། །བྱང་དུ་ཚངས་པ་ཆེན་པོའོ། །མཚམས་སུ་འཇིག་རྟེན་སྐྱོང་རྣམས་ནི། །ཤར་ལྷོར་ཡུལ་འཁོར་སྐྱོང་བ་ལ། །ལྷ་ཆེན་བརྒྱད་ཀྱིས་བསྐོར་

89-1-54b

བ་དང་། །ལྷོ་ནུབ་འཕགས་སྐྱེས་པོ་ལ་ཡང་གཟའ་ཆེན་བརྒྱད་བཅས་གནས་པའོ། །མིག་མི་བཟང་ནི་ནུབ་བྱང་དུ། །ཀླུ་ཆེན་བརྒྱད་ཀྱིས་བསྐོར་བའོ། །བྱང་ཤར་རྒྱལ་ཆེན་རྣམ་ཐོས་སྲས། །གནོད་སྦྱིན་ཆེན་པོ་བརྒྱད་ཅེས་པའོ། །ལྷ་
སྲིན་སྡེ་བརྒྱད་ཡོངས་ཀྱིས་ནི། །ཚངས་པའི་རྒྱལ་པོ་ཡོངས་སུ་བསྐོར། །གསང་བའི་བདག་པོ་ཆེན་པོ་ལ། །ལག་ན་རྡོ་རྗེ་དྲག་པོའི་ཚོགས། །བརྒྱད་ཅེས་འཇིག་རྟེན་གསུམ་འདུལ་ཏེ། །འདི་དག་རྣམ་པར་བཤད་པའོ། །
སངས་རྒྱས་སྟོང་ཕྲག་གཅིག་ནི་ཁྱམས་སུ་བཀོད་པ་དག །ཤར་ཕྱོགས་ཉིས་བརྒྱ་བཞི་བཅུ་རྩ་ལྔ་དང་། །མངོན་དགའི་ཞིང་ཁམས་ཤེལ་གྱི་འོད་དུ་འབར། །ལྷོ་ཕྱོགས་ཉིས་བརྒྱ་བཞི་བཅུ་རྩ་ལྔ་དང་། །རྡུལ་དང་བྲལ་བ་བཻ་
དཱུརྱ་ཡི་འོད། །ནུབ་ཕྱོགས་ཉིས་བརྒྱ་བཞི་བཅུ་རྩ་ལྔ་པོ། །བདེ་བ་ཅན་ཞེས་པད་མ་རཱ་གའི་འོད། །བྱང་ཕྱོགས་རྔ་སྒྲ་སྒྲོགས་པ་གསེར་གྱི་མདོག །ཉིས་བརྒྱ་བཞི་བཅུ་རྩ་ལྔར་ཡོད་པ་དག །ཉི་ཤུ་དག་ནི་རྣམ་པ་མཚོན་ཕྱིར་གནས། །
རིམ་པས་ཕྱོགས་སུ་གནས་པ་དག །རྒྱས་པའི་དབྱེ་བས་འདི་བཞུགས་པའོ། །དཀྱིལ་འཁོར་དམ་པ་བླ་མེད་གཞལ་ཡས་ཁང་། །རྟེན་དང་བརྟེན་པ་མཉམ་མེད་ཆོས་ཀྱི་དབྱིངས། །དཔལ་ལྡན་གསང་བ་འདུས་པ་རྣམ་གསལ་
བའི། །རྩ་བའི་ལྷ་ཚོགས་རྣམས་དང་སྤྲོས་པ་དག །འཇིག་རྟེན་འདས་པའི་སངས་རྒྱས་སྟོང་བཞུགས་ཤིང་། །འཇིག་རྟེན་མགོན་པོ་ལག་ན་རྡོ་རྗེ་དང་། །ཚངས་པ་མི་མཇེད་བདག་པོ་ལ་སོགས་ཏེ། །རྒྱུད་འདི་ལ་ནི་སྨིན་པར་བྱེད་པའི་
དབང་། །དཀྱིལ་འཁོར་ཆེན་པོ་ཁྲུ་ནི་བརྒྱད་བཅུ་བར། །ངོས་རེ་ཞིང་ནི་ཉི་ཤུར་མཉམ་པར་བརྗོད། །རྩ་བའི་དཀྱིལ་འཁོར་ལྷ་ཚོགས་སུམ་བཅུ་གཅིག །དེ་དག་རེ་རེ་ལ་ཡང་དེ་ཉིད་ཀྱིས། །རིམ་བཞིན་རྣམ་པར་འགྱུར་བའི་དཀྱིལ་
འཁོར་རོ། །ཐུབ་པའི་དབང་པོས་འདིར་ནི་གསལ་བར་བསྟན། །ལག་ན་རྡོ་རྗེའི་འཁོར་དང་རྡོ་རྗེ་ཡི། །དྲག་པོའི་རྣམ་པ་ཁྲོ་བོ་བརྒྱད་བཀོད་པའོ། །རྡོ་རྗེ་གཙུག་ཏོར་རྡོ་རྗེ་གནོད་སྦྱིན་དང་། །རྡོ་རྗེ་དྲག་པོ་རྡོ་རྗེ་སྟོབས་ཉིད་དེ། །རྡོ་རྗེ་རྣོན་པོ་

89-1-55a

རྡོ་རྗེ་བེ་ཅོན་རྡོ་རྗེ་མཆེ་བའོ། །རྡོ་རྗེ་འཇིགས་བྱེད་ཚོགས་ཀྱིས་བསྐོར་བའོ། །ཚངས་པའི་རྒྱལ་པོའི་འཁོར་དུ་བསྟན་པ་ནི། །ལྷ་ཡི་དབང་པོ་བརྒྱ་བྱིན་རྡོ་རྗེ་ཅན། །གནོད་སྦྱིན་རྒྱལ་པོ་རད་ན་ཀུ་བེ་ར། །ལྗོན་པ་རྟ་མགོ་གཙུག་
ན་རིན་ཆེན་བཅས། །ཐགས་བཟངས་རིས་དང་མཁའ་ལྡིང་རྒྱལ་པོ་དང་། །སྲིན་པོའི་རྒྱལ་པོ་དྲི་ཟར་བཅས་པའོ། །འདི་དག་གསལ་བར་ངེས་པར་མཚོན་པ་སྟེ། །སྙིང་པོ་བསྡུས་པའི་དཀྱིལ་འཁོར་འདི་ཉིད་དེ། །ཆོ་ག་ཕྲ་མོ་རིམ་པ་ཇི་
བཞིན་དུ། །མདོ་རྒྱུད་རྟོགས་པ་རྣམས་ལས་རྣམ་པར་རྒྱལ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་དཔལ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་
བའི་རྒྱུད་ལས་དཀྱིལ་འཁོར་ཆེན་པོ་གསང་བར་སྟོན་པའི་ལེའུ་སྟེ་བརྒྱད་པའོ།། །། དེ་ནས་བཅོམ་ལྡན་འདས་དཔལ་རྡོ་རྗེ་འཛིན་པས་དེ་བཞིན་གཤེགས་པ་རིགས་ལྔ་ལ་སོགས་པ་དེ་དག་ཐམས་ཅད་རང་གི་བ་སྤུའི་
བུ་གར་ཐིམ་པར་མཛད་ནས་དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་གཉིས་སུ་མེད་པའི་ཡེ་ཤེས་རྣམ་པར་རྒྱལ་བ་འབྱུང་བ་ཞེས་བྱ་བའི་བྱིན་གྱིས་བརླབས་པའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་
ཞུགས་མ་ཐག་ཏུ་བཅོམ་ལྡན་འདས་དཔལ་རྡོ་རྗེ་འཛིན་པ་ཆེན་པོས་དེ་བཞིན་གཤེགས་པའི་རང་གི་གཟུགས་རྣམས་བུད་མེད་ཀྱི་གཟུགས་སུ་བྱིན་གྱིས་བརླབས་ནས་དེ་ཉིད་ཀྱི་བ་སྤུའི་བུ་ག་རྣམས་ལས་འཐོན་པར་གྱུར་ཏོ། །དེའི་
ཕྱིར་བཙུན་མོ་ཐམས་ཅད་ཀྱི་ཡེ་ཤེས་རིན་པོ་ཆེའི་མཆོད་པ་ཐམས་ཅད་བཀོད་པས་དེ་བཞིན་གཤེགས་པ་རྣམས་ལ་ཡང་དག་པར་མཆོད་པ་ནི་ནམ་མཁའི་ཁམས་ཐམས་ཅད་གང་བར་བྱ་སྟེ། སླར་སྐུ་རྡོ་རྗེ་དང་། གསུང་རྡོ་རྗེ་དང་། ཐུགས་
རྡོ་རྗེ་རྣམས་ལ་གནས་པར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་མཉེས་པའི་ལྷ་མོ་དེ་དག་བདེ་བ་ཆེན་པོའི་ཀུན་དུ་སྤྱོད་པས་ཡང་དག་པར་མཆོད་པ་བྱེད་པར་གྱུར་པ་ནི་ལ་ལ་ནི་སངས་རྒྱས་སྤྱན་ལྟ་བུ་སའི་བདག་

89-1-55b

མོའོ། །ལ་ལ་ནི་མཱ་མ་ཀཱི་ལྟར་ཆུའི་བདག་མོ་ཉིད་དོ། །ལ་ལ་ནི་གོས་དཀར་མོ་ལྟར་མེའི་རྣམ་པའོ། །ལ་ལ་ནི་དམ་ཚིག་སྒྲོལ་མ་སྟེ་རླུང་གི་ཁམས་ལ་ཀུན་དུ་སྤྱོད་དོ། །དེ་བཞིན་དུ་གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྡོ་རྗེ་
ལྟ་བུ་སྟེ། དུས་དང་རྣམ་པ་ཐམས་ཅད་ཏུ་ཡང་དག་པར་མཆོད་པའི་རྒྱུན་གྱིས་མཆོད་པར་བྱེད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཛིན་པ་ཆེན་པོས་དེ་བཞིན་
གཤེགས་པ་ཐམས་ཅད་དང་། དཀྱིལ་འཁོར་གྱི་འཁོར་ལོ་ལ་གནས་པ་འདི་ཐམས་ཅད་ཀྱི་སྔགས་དང་། བླ་ན་མེད་པ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་ཨཱཿབཛྲ་དྷྲྀཀ་ཧཱུྃ་སྭཱ་ཧཱ། རྡོ་རྗེ་འཛིན་གྱི་སྔགས་
སོ། །ཨོཾ་ཨཱཿབཛྲ་སྤར་ཤེ་ཧཱུྃ་སྭཱ་ཧཱ། རིག་མ་བླ་ན་མེད་པའི་སྔགས་སོ། །ཨོཾ་ཨཱཿཛི་ན་ཛིཀ་ཧཱུྃ་སྭཱ་ཧཱ། ཨོཾ་ཨཱཿརཏ་ན་དྷྲྀཀ་ཧཱུྃ་སྭཱ་ཧཱ། ཨོཾ་ཨཱཿཨཱ་རོ་ལིཀ་ཧཱུྃ་སྭཱ་ཧཱ། ཨོཾ་ཨཱཿཔྲཛྙཱ་དྷྲྀཀ་ཧཱུྃ་སྭཱ་ཧཱ། རིགས་ཀྱི་བུ་དེ་བཞིན་གཤེགས་པའི་
སྔགས་སོ། །ཨོཾ་ཨཱཿདྭེ་ཥ་ར་ཏི་ཧཱུྃ་སྭཱ་ཧཱ། ཨོཾ་ཨཱཿམོ་ཧ་ར་ཏི་ཧཱུྃ་སྭཱ་ཧཱ། ཨོཾ་ཨཱཿརཱ་ག་ར་ཏི་ཧཱུྃ་སྭཱ་ཧཱ། ཨོཾ་ཨཱཿབཛྲ་ར་ཏི་ཧཱུྃ་སྭཱ་ཧཱ། ལྷ་མོ་སྤྱན་ལ་སོགས་པ་བཞིའི་སྔགས་སོ། །ཨོཾ་ཨཱཿབཛྲ་རཱུ་པེ་ཧཱུྃ་སྭཱ་ཧཱ། ཨོཾ་ཨཱཿབཛྲ་ཤཔྡ་ཧཱུྃ་སྭཱ་ཧཱ། 
ཨོཾ་ཨཱཿབཛྲ་གན་དྷེ་ཧཱུྃ་སྭཱ་ཧཱ། ཨོཾ་ཨཱཿབཛྲ་རཱ་སེ་ཧཱུྃ་སྭཱ་ཧཱ། གཟུགས་རྡོ་རྗེ་མ་ལ་སོགས་པའོ། །ཨོཾ་ཨཱཿབཛྲ་མི་ཏྲི་ནཱ་ཐ་ཤྲི་ཡེ་ཧཱུྃ་སྭཱ་ཧཱ། ཨོཾ་ཨཱཿཀྵི་ཏི་གརྦྷཱ་ཧཱུྃ་སྭཱ་ཧཱ། ཨོཾ་ཨཱཿབཛྲ་པཱ་ཎི་ཡེ་ཧཱུྃ་སྭཱ་ཧཱ། ཨོཾ་ཨཱཿཨཱ་ཀཱ་ཤ་གཏཻཾ་ཡ་
ཧཱུྃ་སྭཱ་ཧཱ། ཨོཾ་ཨཱཿཨཱརྱཱ་བ་ལོ་ཀི་ཏེ་ཤྭ་རཱ་ཡ་ཧཱུྃ་སྭཱ་ཧཱ། ཨོཾ་ཨཱཿམཉ་ཛུ་ཤྲཱི་གྷོ་ཥཱ་ཧཱུྃ་སྭཱ་ཧཱ། ཨོཾ་ཨཱཿསརྦ་ནི་བ་ར་ཎ་བིཥྐྂ་བི་ནེ་ཧཱུྂ་སྭཱ་ཧཱ། ཨོཾ་ཨཱཿས་མན་ཏ་བྷ་དྲ་ཡེ་ཧཱུྂ་སྭཱ་ཧཱ། སེམས་དཔའ་ཆེན་པོ་རྣམས་སོ། །ཨོཾ་ཨཱཿཡ་མཱན་ཏ་
ཀྲྀཏ་ཧཱུྃ་ཕཊ། ཨོཾ་ཨཱཿ་པྲཛྙཱན་ཏ་ཀྲྀཏ་ཧཱུྃ་ཕཊ། ཨོཾ་ཨཱཿཔད་མན་ཏ་ཀྲྀཏ་ཧཱུྃ་ཕཊ། ཨོཾ་ཨཱཿབིགྷྣཱན་ཏ་ཀྲྀཏ་ཧཱུྃ་ཕཊ། ཨོཾ་ཨཱཿཨཱརྱ་ཨ་ཙ་ལ་ཧཱུྃ་ཕཊ། ཨོཾ་ཨཱཿཊཀྐི་རཱ་ཛ་ཧཱུྃ་ཕཊ། ཨོཾ་ཨཱཿནཱི་ལཾ་དཎ་ཏ་ཧཱུྃ་ཕཊ། ཨོཾ་ཨཱཿམ་ཧཱ་བ་ལ་ཧཱུྃ་ཕཊ། །

89-1-56a

ཨོཾ་ཨཱཿཨུཥྞཱི་ཥ་ཙཀྲ་བརྟི་ཧཱུྃ་ཕཊ། ཨོཾ་ཨཱཿསུྃ་བྷ་རཱ་ཛ་ཧཱུྃ་ཕཊ་ཅེས་ཁྲོ་བོའི་རྒྱལ་པོ་བཅུའི་སྔགས་རབ་ཏུ་གསུངས་སོ། །སྔགས་འདི་རྣམས་ཀྱི་ནུས་པ་ནི། །ཐོགས་པ་མེད་པ་ཉིད་ཡིན་ཏེ། །འབྱིན་དང་སྡུད་པར་
བྱེད་པས་ན། །གསང་བའི་སྔགས་འདི་ལེགས་པར་སྦས་ཤེས་གསུངས་སོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏ་མ་ཀོ྅ཧྂ། གསལ་བ་སེམས་ཅན་ཀུན་གྱི་སེམས། །ཞི་བ་ཉིད་ནི་འོད་གསལ་བ། །དངོས་པོ་དུ་མས་མ་གོས་
པ། །དེ་ཉིད་ཞེས་བྱ་བདེ་བ་སྒོམ། །སངས་རྒྱས་སྐུ་ཡི་ཆོ་ག་ཤེས། །དེ་བཞིན་ཉིད་དུ་ཉེ་བར་སྤྱད། །གཞན་དུ་སྔགས་ལ་སོགས་པ་ཀུན། །དགེ་བ་འགྲུབ་པར་མི་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་གསང་སྔགས་
མངོན་པར་འབྱུང་བ་ཞེས་བྱ་བའི་ཏིང་ངེ་འཛིན་ཏོ། །དེ་ནས་རྒྱལ་པོ་རྡོ་རྗེ་འཛིན། །ཐུབ་པ་ཆེན་པོ་ལོངས་སྤྱོད་རྫོགས། །གསང་བའི་དབང་ནི་རབ་ཏུ་གསོལ། །གསུང་ནི་འདི་སྐད་བཀའ་སྩལ་ཏོ། །ཐམས་ཅད་ཆོས་ནི་སྟོན་པ་པོ། །
མཆོག་ཏུ་དགའ་བ་བདག་མེད་པ། །རྒྱལ་བས་སྔོན་དུས་བསྟན་པ་ནི། །སེམས་ཅན་མོས་པའི་དོན་དུ་བཤད། །བྱ་བ་སྤྱོད་པ་རྣལ་འབྱོར་མཆོག །རྟོག་པའི་རྣལ་འབྱོར་གསང་མཐའ་རུ། །ཕྱི་ནང་གསང་བའི་དབྱེ་བ་ཡིས། །
ངས་ནི་རིམ་པ་གསུམ་དུ་བཤད། །དམན་པ་མཆོག་དང་འབྲིང་རྣམས་ཏེ། །ཐ་མ་མོས་སྤྱོད་ཚུལ་དག་ཏུ། །ཐེག་པ་ཆེན་པོའི་ཚུལ་བསྟན་པ། །ཆོས་ཀྱི་འཁོར་ལོ་རབ་ཏུ་བསྐོར། །དེ་ནས་དེ་བཞིན་གཤེགས་པ་ཐམས་ཅད་
ཀྱི་ཚུལ་རྡོ་རྗེ་ཆོས་ཀྱི་འཁོར་ལོ་རབ་ཏུ་བསྐོར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཐམས་ཅད་བསྡུས་པའི་ཚུལ་གྱིས་གསང་བ་འདི་གསུངས་སོ། །ཐམས་ཅད་ལུས་ལ་གནས་པ་རྡོ་རྗེའི་སྐུ། །མི་ཆོད་
མི་ཤིགས་རང་བྱུང་ཕྲ་བའི་གནས། །རྟོག་པའི་རླུང་ཚོགས་འབྱུང་བའི་ངང་དུ་དག །རང་རིག་སེམས་ནི་གར་ཡང་གཡོ་མི་འགྱུར། །རྩ་ཡི་འཁོར་ལོ་བཅུ་ལ་གནས་འགྱུར་གང་། །རླུང་བཅུ་འོད་ཀྱི་སྣང་བ་ཁྱབ་བྱེད་ཅིང་། །

89-1-56b

མི་ཤིགས་ཐིག་ལེ་རབ་ཏུ་དང་བ་ཡི། །བདུད་རྩི་རབ་རྒྱས་སྣང་བ་ཁྱབ་བྱེད་པའོ། །ཡི་གེ་སྒྲ་ཡི་རྣམ་པ་གར་ཡོད་པར། །དྲན་པ་སྐྱེད་བྱེད་སྲོག་གི་རྩ་བར་འགྱུར། །ཀུན་ལ་ཁྱབ་བྱེད་སྙིང་པོ་ཡེ་ཤེས་རླུང་། །རྟེན་དང་བརྟེན་པ་མཉམ་
གནས་རིན་ཆེན་སེམས། །གསེར་དང་གསེར་འོད་རབ་འབར་མཐའ་ཡས་བཞིན། །ཇི་ལྟར་རྒྱ་མཚོ་རབ་དངས་རྒྱ་ཆེ་ལ། །ཟླ་ཟེར་འོད་ཀྱིས་ཁྱབ་ཅིང་སྣང་བ་དང་། །ཉི་ཤར་མདངས་ཀྱིས་སྔ་ཕྱི་མེད་པར་འབྱུང་། །རྟོག་པ་མེད་
ཅིང་མུན་པ་རང་སར་དག །བློ་ཡིས་སྣང་བ་རབ་ཏུ་རྒྱས་པར་གྱུར། །གང་དུ་ལུས་ཅན་རྣམས་ཀྱིས་ནི། །འབྱུང་དང་བྱུང་ལས་གྱུར་པ་ཡི། །དངོས་པོའི་སྣང་བ་བཅིངས་པས་ན། །ཡིད་ཀྱིས་ལུས་ནི་བརྟག་དཀའ་བས། །སངས་རྒྱས་
ཀུན་གྱི་དཀྱིལ་འཁོར་ནི། །དེ་ཉིད་ཤེས་པའི་དཀྱིལ་འཁོར་ཏེ། །འདི་ནི་བསྒྲུབ་པ་དེ་ཉིད་ཡིན། །ཡིད་བཞིན་ནོར་བུ་ལྟ་བུར་སྤྱད། །རྣམ་ཤེས་སྒྱུ་མའི་ཡེ་ཤེས་ལུས། །ཡོངས་སུ་རྫོགས་པ་རང་བྱུང་བ། །དེ་ཉིད་མི་ཤེས་
བྱིས་པ་རྣམས། །སླར་ཡང་འཁོར་བའི་གནས་པའོ། །ཇི་སྲིད་འོད་གསལ་གནས་ཀྱི་ནུས། །འབྱུང་བ་ཐིམ་འགྱུར་རྟོག་པས་སྟོང་། །དེ་སྲིད་སྒྱུ་མ་ཕྲ་བའི་ལུས། །རླུང་དང་རྣམ་ཤེས་ལྡན་པས་ནི། །འབྱུང་དང་འཇུག་
དང་གནས་པར་བྱེད། །གཟུགས་ནི་དངོས་པོར་མ་གྲུབ་པས། །ཐོགས་མེད་རྒྱུ་ཞིང་མཚུངས་པར་ལྡན། །འོན་ཀྱང་བྱིན་བརླབ་ནུས་པ་དང་། །སྐུ་གསུང་ཐུགས་ཀྱི་རྡོ་རྗེ་ལས། །བཙུན་མོའི་བྷ་ག་དེར་མི་འཇུག །ཆོས་དང་ཆོས་མིན་ལྡན་པར་འགྲོ། །རང་ལུས་
ལུས་བྱུང་ཡེ་ཤེས་མེ། །ཐམས་ཅད་ཀུན་ནས་འབར་བ་ནི། །མེ་འོད་འབར་བ་མཉམ་པའི་འོད། །ཡེ་ཤེས་འཁོར་ལོ་བསྒོམས་ནས་ནི། །འོག་ནས་སྟེང་དུ་བློ་ཡིས་ནི། །རབ་ཏུ་དམིགས་པས་ཁ་བ་འབབ། །ཐམས་ཅད་དུ་ནི་ཚིག་པར་བསམ། །
ཕྱི་ནང་གསང་བའི་ཡེ་ཤེས་འོད། །ཉོན་མོངས་ཐམས་ཅད་རབ་བསྲེག་པ། །སངས་རྒྱས་ཉིད་དུ་འབྲས་བུ་སྨིན། །མཉམ་ཉིད་ཡེ་ཤེས་བསྐྱེད་པ་ནི། །བདག་ཉིད་ནམ་མཁའི་ངོ་བོར་འགྱུར། །རྒྱུ་དང་འབྲས་བུའི་དབྱེ་བ་ཡིས། །ཐབས་དང་ཐབས་

89-1-57a

ལྡན་བྱང་ཆུབ་སེམས། །དུ་མ་ཉིད་དུ་མི་དམིགས་ཤིང་། །རྣལ་འབྱོར་དངོས་པོ་ལྡོག་པར་འགྱུར། །རྣལ་འབྱོར་ཞེས་བྱ་རྫོགས་ལྡན་དུས། །རྗེས་སུ་རྣལ་འབྱོར་གསུམ་ལྡན་ཏེ། །ཤིན་ཏུ་རྣལ་འབྱོར་གཉིས་ལྡན་ཉིད། །རྩོད་
ལྡན་དུས་ནི་རྣལ་འབྱོར་ཆེ། །ཡོན་ཏན་ཐམས་ཅད་རྫོགས་པ་དང་། །རྫུས་ཏེ་སྐྱེས་པ་དང་པོའི་མི། །འོད་ཀྱི་ལུས་ཙམ་གནས་པ་དག །ལྷ་ཡི་བདུད་རྩི་སྤྱོད་པའོ། །དེ་དག་ལུས་དེ་སྤངས་ནས་ནི། །ཤིན་དུ་ཕྲ་བའི་ཁམས་ཞུགས་ཤིང་། །སྒྱུ་
མའི་ལུས་སུ་གནས་གྱུར་པས། །སྲིད་པ་མངོན་པར་ལེན་པར་འདོད། །བག་ཆགས་དྲི་མས་ཀུན་བསླང་བའི། །འདོད་པ་ལོག་པ་མཐོང་བ་ཡིས། །ཆགས་པའི་ཡིད་ཀྱིས་ལུས་ལ་འཇུག །ཚོར་བ་རྣམ་གསུམ་མྱོང་བ་ཡིན། །ས་ཞག་རོ་
དང་ཟས་གཞན་གྱིས། །ལུས་ཉིད་རགས་པ་ཉེར་ཐོབ་པས། །དང་པོའི་དངོས་པོ་ལོག་གྱུར་ཏེ། །བུ་ག་དགུ་ལྡན་དྲི་ངའི་ལུས། །ཉོན་མོངས་ཀྱིས་ནི་དཀྲུགས་གྱུར་ཏེ། །བསོད་ནམས་སྟོབས་ཉམས་དམན་སར་ལྷུང་། །རྫུས་ཏེ་སྐྱེས་དང་དྲོད་གཤེར་
དང་། །སྒོ་ང་ལས་བྱུང་མངལ་ལས་སྐྱེས། །འདི་དག་རིམ་པ་རྣལ་འབྱོར་ཅན། །སྙིགས་མའི་དུས་སུ་རབ་ཏུ་འབྱུང་། །ཇི་སྲིད་པད་མའི་སེམས་ཅན་གྱི། །ལུས་ནི་ཤིན་དུ་ཕྲ་བ་སྟེ། །རྣམ་ཤེས་ལུས་བྱུང་སྒྱུ་མར་གནས། །རིགས་དང་ལྡན་པས་
དུས་གསུམ་ཤེས། །སྟོབས་ལྡན་དེ་ལ་རྟོག་པ་ཡོད། །རང་ཉིད་སྒྱུ་མར་མ་ཤེས་པས། །དངོས་འཛིན་བདུད་ཀྱིས་གླགས་རྙེད་འགྱུར། །འདི་དག་རྒྱུན་ལས་བཟློག་པ་ན། །སྲིད་པ་ཉེ་བར་ལེན་མི་བྱེད། །སྐད་ཅིག་གསུམ་གྱིས་ཡེ་ཤེས་
ཐོབ། །འཆི་མེད་བདེ་བའི་གནས་ཐོབ་སྟེ། །དག་པའི་སྐུས་ནི་འགྲོ་དོན་འབྱུང་ཞེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་གསང་བ་གསང་བ་འདུས་པ་དཔལ་རྣལ་འབྱོར་ཆེན་པོའི་གཉིས་
སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་མཆོད་པ་དང་གསང་སྔགས་མངོན་པར་འབྱུང་བ་རྡོ་རྗེ་སྒྱུ་འཕྲུལ་སྟོན་པ་ཞེས་བྱ་བའི་ལེའུ་སྟེ་དགུ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་

89-1-57b

ཐམས་ཅད་བཅོམ་ལྡན་འདས་བྱང་ཆུབ་ཀྱི་སེམས་རྡོ་རྗེ་འཛིན་པ་ཆེན་པོའི་གསང་བ་ཆེན་པོའི་ཡེ་ཤེས་བླ་ན་མེད་པའི་ངང་ལས་རབ་ཏུ་དགྱེས་པར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་
ཐུགས་རྡོ་རྗེ་དེ་བཞིན་གཤེགས་པ་དེ་བཞིན་གཤེགས་པ་ཐམས་ཅད་ཀྱི་མངོན་པར་རྫོགས་པར་བྱང་ཆུབ་པའི་ཚུལ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་མེད་པས་སྒོམ་
པ་མེད། །བསྒོམ་པར་བྱ་བ་བསྒོམ་བྱ་མིན། །དེ་ལྟར་དངོས་པོ་དངོས་མེད་པས། །སྒོམ་པ་དམིགས་པ་མེད་པའོ་ཞེས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་དེ་བཞིན་གཤེགས་པས་གསུངས་
སོ་དེ་ནས་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱི་མངོན་པར་རྟོགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་
པོ་ཐམས་ཅད་དང་བྲལ་བ། །ཕུང་པོ་ཁམས་དང་སྐྱེ་མཆེད་དང་། །གཟུང་དང་འཛིན་པ་རྣམ་སྤངས་པ། །ཆོས་བདག་མེད་པ་མཉམ་ཉིད་པས། །རང་སེམས་གདོད་ནས་མ་སྐྱེས་པ། །སྟོང་པ་ཉིད་ཀྱི་རང་བཞིན་ནོ་ཞེས་བཅོམ་ལྡན་འདས་དེ་བཞིན་
གཤེགས་པ་རྣམ་པར་སྣང་མཛད་ཀྱིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་མི་བསྐྱོད་པ་དེ་བཞིན་གཤེགས་པ་ཐམས་ཅད་ཀྱི་མི་ཟད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །དངོས་པོ་འདི་དག་མ་སྐྱེས་པས། །ཆོས་དང་ཆོས་ཉིད་མེད་པ་སྟེ། །ནམ་མཁའ་ལྟ་བུར་བདག་མེད་པས། །བྱང་ཆུབ་ཚུལ་འདི་བསྟན་པའོ་ཞེས་བཅོམ་ལྡན་འདས་དེ་བཞིན་གཤེགས་པ་མི་བསྐྱོད་པས་
གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་རིན་ཆེན་དཔལ་དེ་བཞིན་གཤེགས་པ་ཐམས་ཅད་ཀྱི་བདག་མེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་

89-1-58a

གསུངས་སོ། །ཆོས་རྣམས་ཐམས་ཅད་དངོས་མེད་ཅིང་། །ཆོས་ཀྱི་མཚན་ཉིད་རྣམ་པར་སྤངས། །བདག་མེད་ཆོས་ལས་ཀུན་དུ་བྱུང་། །བྱང་ཆུབ་ཚུལ་འདི་བསྟན་པའོ་ཞེས་བཅོམ་ལྡན་འདས་དེ་བཞིན་གཤེགས་པ་རིན་
ཆེན་དཔལ་གྱིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཚེ་དཔག་ཏུ་མེད་པ་འོད་ཟེར་འབར་བ་རྡོ་རྗེ་སྒྲོན་མ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མ་སྐྱེས་པ་ཡི་ཆོས་
རྣམས་ལ། །ངོ་བོ་མེད་དེ་སྒོམ་པའང་མེད། །ནམ་མཁའ་གནས་སུ་སྦྱོར་བ་ཡིས། །དེ་ལྟར་དངོས་པོར་རབ་ཏུ་གྲགས་ཤེས་བཅོམ་ལྡན་འདས་དེ་བཞིན་གཤེགས་པ་ཚེ་དཔག་ཏུ་མེད་པས་གསུངས་སོ། །དེ་ནས་བཅོམ་ལྡན་འདས་དེ་བཞིན་
གཤེགས་པ་རྔ་སྒྲའི་རྒྱལ་པོ་གདོན་མི་ཟ་བ་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་རང་བཞིན་འོད་གསལ་
བ། །གདོད་ནས་དག་པ་ནམ་མཁའ་བཞིན། །བྱང་ཆུབ་མེད་ཅིང་མངོན་རྟོགས་མེད། །བྱང་ཆུབ་ཚུལ་འདི་བརྟན་པའོ། །ཞེས་བཅོམ་ལྡན་འདས་དེ་བཞིན་གཤེགས་པ་གྲུབ་པ་གདོན་མི་ཟ་བས་གསུངས་སོ། །དེ་ནས་རྡོ་རྗེ་འཛིན་པ་ཐམས་ཅད་
ཀྱི་བཙུན་མོ་སྤྱན་མས་རྡོ་རྗེ་འཛིན་པ་ཐམས་ཅད་མཉེས་པར་བྱེད་པའི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྲིད་མེད་མྱ་ངན་འདས་མེད་པ། །འདི་ནི་རྡོ་རྗེ་བདེ་ཆེན་པོ། །སྒོམ་པ་མེད་ཅིང་བསྒོམ་པའང་མེད། །
དགོས་པ་མཆོག་ཏུ་བསྒྲུབས་པས་བདེ། །ཞེས་གསུངས་སོ། །རྡོ་རྗེ་བཙུན་མོ་མཱ་མ་ཀཱིས་སངས་རྒྱས་ཐམས་ཅད་རྗེས་སུ་མཉེས་པར་བྱེད་པའི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྟོང་ཞིང་སྣང་མེད་གནས་
ཀྱི་མཆོག །རྨི་ལམ་སྒྱུ་མའི་རང་བཞིན་ཅན། །སེམས་ཀྱི་རང་བཞིན་སྒོམ་པ་སྟེ། །ཇི་སྲིད་དུ་ཡང་མེད་པའོ་ཞེས་གསུངས་སོ། །རྡོ་རྗེ་བཙུན་མོ་གོས་དཀར་མོས་སངས་རྒྱས་ཐམས་ཅད་རྗེས་སུ་ཆགས་པར་བྱེད་པ་རྡོ་རྗེ་ཞེས་བྱ་བའི་ཏིང་

89-1-58b

ངེ་འཛིན་ལ་སྙོམས་པར་ཞུགས་ཏེ། དབྱངས་དང་ཡི་གེ་རྣམ་བྲལ་ཏེ། །དེ་ནི་སེམས་དང་ཐིག་ལེ་མིན། །འདི་ནི་དམ་པའི་བདེ་ཆེན་ཏེ། །དབྲི་ཞིང་བསྣན་པ་ཡོད་མ་ཡིན་ཞེས་གསུངས་སོ། །རྡོ་རྗེ་བཙུན་མོ་སྒྲོལ་མས་སངས་རྒྱས་ཐམས་ཅད་ཀྱི་སྐུ་
གསུང་ཐུགས་མི་སླུ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཆོས་རྣམས་གཟུགས་བརྙན་རང་བཞིན་ཏེ། །དེ་བཞིན་བསྒོམ་བྱའི་དངོས་གང་ཡང་། །སྟོང་ཞིང་སྣང་མེད་གནས་མཆོག་སྟེ། །དེ་ཚེ་སྡིག་དང་བསོད་ནམས་
དག་ཅེས་གསུངས་སོ། །དེ་ནས་ལྷ་མོ་གཟུགས་རྡོ་རྗེ་དམ་ཚིག་མཆོག་གིས་མཆོད་པ་བླ་ན་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དཔེར་ན་ཆུ་དང་ཟླ་བ་ནི། །བདེན་མིན་བརྫུན་པའང་མ་ཡིན་པ། །དེ་བཞིན་དཀྱིལ་
འཁོར་འཁོར་ལོ་འདི། །དང་ཞིང་གསལ་བའི་རང་བཞིན་ནོ། །ཞེས་གསུངས་སོ། །ལྷ་མོ་སྒྲ་རྡོ་རྗེ་ནམ་མཁའི་འོད་ཀྱི་སྤྲིན་རྡོ་རྗེས་ཚིམ་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྟོང་ཞིང་སྣང་མེད་གནས་གྱུར་པ། །
རྨི་ལམ་སྒྱུ་མའི་རང་བཞིན་ཏེ། །སེམས་ཀྱི་ངོ་བོ་སྒོམ་པ་སྟེ། །ཇི་སྲིད་ཡང་དག་བདག་མེད་པའོ་ཞེས་གསུངས་སོ། །ལྷ་མོ་དྲི་རྡོ་རྗེ་ཁོ་ན་ཉིད་མངོན་པར་བྱང་ཆུབ་པ་ཀུན་དུ་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ། བདེ་བ་ཆེན་པོས་འགྲོ་ཁྱབ་པ། །བདེ་བ་སྤངས་ན་རིགས་པ་མེད། །བདེ་བ་འབར་བས་སྲིད་པ་འཆིང་། །བདེ་བ་སུས་ཀྱང་བཟློག་མི་ནུས་ཞེས་གསུངས་སོ། །ལྷ་མོ་རོ་རྡོ་རྗེ་དམ་ཚིག་ཆེན་པོས་མཆོད་པ་ཀུན་དུ་རྒྱས་པ་ཞེས་
བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཆོས་རྣམས་བདེན་པ་མ་ཡིན་ཞིང་། །བརྫུན་པའང་མ་ཡིན་པ་ཡི་དོན། །བླང་དང་དོར་བར་བྱར་མེད་པ། །དེ་ཉིད་ཡེ་ཤེས་མཆོག་ཏུ་བསྟན་ཞེས་གསུངས་སོ། །དེ་ནས་བྱང་ཆུབ་སེམས་
དཔའ་སེམས་དཔའ་ཆེན་པོ་རྒྱལ་བའི་རྡོ་རྗེ་སྤྲོ་བའི་སྤྲིན་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བསམ་གཏན་མེད་ཅིང་དངོས་པོ་མེད། །སྔགས་མེད་ལྷ་ཡང་མེད་པ་ཉིད། །རྡོ་རྗེ་སེམས་དཔའ་རང་བྱུང་བ། །

89-1-59a

བྱང་ཆུབ་ཚུལ་འདི་བསྟན་པའོ། ཞེས་གསུངས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྐུ་རྡོ་རྗེ་ཞི་བའི་དམ་ཚིག་མཆོག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཡེ་ཤེས་ལྔ་ཡི་རབ་
སྦྱོར་བས། །བསོད་ནམས་མེད་ཅིང་སྡིག་པའང་མེད། །བྱང་ཆུབ་སེམས་འདི་བསྟན་པ་ཉིད། །དུ་མ་ཉིད་དུ་མི་དམིགས་སོ། །ཞེས་གསུངས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཐུགས་རྡོ་རྗེ་དངོས་པོ་དང་དངོས་
པོ་མེད་པའི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྔགས་མེད་བཟླས་པའང་མེད་པ་སྟེ་ཆོས་ཀྱི་དབྱིངས་ཀྱི་རང་བཞིན་གྱིས། །འགྲོ་བ་གསུམ་ཀུན་ཡོད་པ་སྟེ། །སྒོམ་པ་མེད་ཅིང་མངོན་
རྟོགས་མེད་ཅེས་གསུངས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་ནམ་མཁའི་སྙིང་པོ་ཏིང་ངེ་འཛིན་རྡོ་རྗེ་དམ་ཚིག་ལ་གཟིགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཀུན་རྫོབ་
ཏུ་ནི་འཇིག་རྟེན་ཡོད། །དཔྱད་པས་འཇིག་རྟེན་གང་ནའང་མེད། །རྟག་ཏུ་འཇིག་རྟེན་ལྡན་པར་འཇུག །དག་པ་དང་ནི་གནས་དག་པའོ། །ཞེས་གསུངས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གསུང་
རྡོ་རྗེ་ཡེ་ཤེས་མཆོག་རྡོ་རྗེ་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྐྱེ་བ་མེད་ཅིང་དམིགས་པ་མེད། །མི་ཕྱེད་ནམ་མཁའི་འབྱུང་གནས་ཏེ། །ཟབ་ཅིང་རྒྱ་ཆེའི་རང་བཞིན་ཅན། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་བྱང་ཆུབ་སེམས་དཔའ་ཆེན་པོ་ནམ་མཁའི་རྡོ་རྗེ་ཆོས་ཐམས་ཅད་ཀྱི་ཚུལ་གཅིག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། །དོན་དམ་ཀུན་རྫོབ་རྟེན་འབྲེལ་ཙམ། །
ཡང་དག་ཏུ་ན་གནས་པ་མེད། །ཆོས་རྣམས་དག་པ་ཡེ་ཤེས་ཆེ། །གནས་མེད་དམིགས་པ་མེད་པའོ་ཞེས་གསུངས་སོ། །བྱང་ཆུབ་སེམས་དཔའ་ཆེན་པོ་དམ་ཚིག་རྡོ་རྗེ་ཆོས་ཐམས་ཅད་ལ་འཇུག་པའི་སྒོ་ཞེས་

89-1-59b

བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྒྱུ་དང་འབྲས་བུ་དག་པའི་ཆོས། །འགྲོ་ཞིང་ལྡོག་པའི་ཁྱད་པར་གྱིས། །རྟོག་པ་ཡང་དག་མི་དམིགས་པས། །སྤྲོས་མེད་གོས་པ་མེད་པའོ་ཞེས་གསུངས་སོ། །བྱང་ཆུབ་སེམས་དཔའ་ཆེན་པོ་
ཆོས་ཀྱི་དབྱིངས་ཐམས་ཅད་དང་མཉམ་པ་རྡོ་རྗེ་མི་ཟད་པ་སྒྱུ་མར་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཆོས་དབྱིངས་ཡེ་ཤེས་ཁྱབ་པའི་སྐུ། །རྟོག་པ་མེད་ཅིང་དྲི་མ་མེད། །ཀུན་དུ་འབྱུང་ཞིང་དུས་གསུམ་དུ། །
ཕྲ་ཞིང་བདག་མེད་ཚུལ་མཆོག་གོ་ཞེས་གསུངས་སོ། །དེ་ནས་ཁྲོ་བོ་གཤིན་རྗེ་གཤེད། །རྡོ་རྗེ་འཁོར་ལོའི་ཏིང་ངེ་འཛིན། །ཐམས་ཅད་ཆོས་ཉིད་དག་པ་ལས། །མི་རྟོག་ནམ་མཁའ་དྲི་མ་མེད། །སྣང་བ་སྣ་ཚོགས་རང་གྲོལ་བ། །
སེམས་ཀྱི་མཚན་ཉིད་རྟག་ཏུ་མེད་ཅེས་གསུངས་སོ། །གཞན་གྱིས་མི་ཐུབ་རྡོ་རྗེ་ཡིས། །མངོན་པར་བྱང་ཆུབ་ལ་ཞུགས་ཏེ། །སྒྱུ་མར་སྣང་བ་རྨི་ལམ་ཚུལ། །རྟོག་དང་ནམ་མཁའ་དབྱེར་མེད་མཚན། །འདུ་འབྲལ་མེད་པའི་ཡེ་ཤེས་
མཆོག །ཕྱག་རྒྱ་ཆེན་པོ་ཡང་དག་པའོ་ཞེས་གསུངས་སོ། །ཁྲོ་བོ་པད་མའི་དམ་ཚིག་མཆོག །རིན་ཆེན་འབྱུང་གནས་ལ་བརྟེན་ཏེ། །ཆགས་པ་མེད་པའི་ཚུལ་མཆོག་གིས། །སྐྱེ་མེད་རྟེན་འབྲེལ་རང་དག་པ། །ཆུ་རླབས་གཡོ་བ་
རང་བཞིན་མེད། །གནས་པ་མེད་དེ་སྟོན་པ་པོ་ཞེས་གསུངས་སོ། །ཁྲོ་བོ་བདུད་རྩི་འཁྱིལ་པ་དེས། །བྱིན་གྱིས་རློབ་པའི་ཡེ་ཤེས་ཚུལ། །འགྲོ་རྣམས་བྱང་ཆུབ་སེམས་རང་བཞིན། །ཁམས་རྣམས་སྟོབས་སུ་གྱུར་པ་དག །
དག་པ་བདེ་བའི་འབྱུང་གནས་ཏེ། །ཡེ་ཤེས་བརྟེན་པ་དེ་ལས་འབྱུང་ཞེས་གསུངས་སོ། །ཁྲོ་བོའི་རྒྱལ་པོ་མི་གཡོ་མགོན། །མཁའ་དབྱིངས་ཏིང་འཛིན་ལ་ཞུགས་ཏེ། །རྟོག་པ་ཐམས་ཅད་དག་པའི་དབྱིངས། །ཆོས་རྣམས་ཐམས་ཅད་
རྐྱེན་ལ་བརྟེན། །རང་འབྱུང་ཡེ་ཤེས་ཐོབ་བྱེད་པ། །གནས་པ་མེད་པ་ཉིད་དུ་འགྱུར་ཞེས་གསུངས་སོ། །ཁྲོ་བོ་ཊཀྐི་རཱ་ཛ་རྒྱལ། །བསམ་གཏན་རྡོ་རྗེས་རྟེན་པ་ཉིད། །ཡང་དག་ཡེ་ཤེས་དགའ་བས་བརྒྱན། །ལུས་དང་ལུས་མེད་བརྟན་

89-1-60a

པ་མེད། །ཡེ་ཤེས་ལུས་ནི་དྲི་མ་མེད། །རྟོག་པ་མེད་ཅིང་འགག་པ་མེད་ཅེས་གསུངས་སོ། །ཁྲོ་བོ་རྡོ་རྗེ་དབྱུག་པ་འཛིན། །འཇིགས་པར་མཛད་པ་ཁྲོས་པའི་སྐུ། །སྙིང་རྗེ་ཆེན་པོས་གདུག་པ་འདུལ། །ཡེ་ཤེས་ཆེན་
པོ་འབྱུང་བའི་རྒྱུ། །བྱམས་པའི་ཐུགས་ཀྱིས་ཁྱབ་པ་པོ། །སེམས་ཅན་མགོན་པོ་དག་པའོ་ཞེས་གསུངས་སོ། །གཙུག་ཏོར་དམ་ཚིག་ཁྲོ་བོ་ནི། །རིག་པའི་སྟོབས་མཆོག་ལ་གནས་པས། །བཀའ་ཡི་འཁོར་ལོ་རྒྱས་པ་པོ། །
བསྟན་པའི་དོན་ནི་ཐོབ་པ་སྟེ། །ཉོན་མོངས་ཟད་བྱེད་ཡེ་ཤེས་མཆོག །གནས་པ་མེད་པས་སྟོན་པར་མཛད་ཅེས་གསུངས་སོ། །རྡོ་རྗེ་གནོད་མཛེས་ཁྲོ་བོ་ཆེ། །རབ་ཏུ་འབྱུང་གནས་ལ་བརྟེན་ནས། །ཡང་དག་སྟོབས་ནི་དག་པ་ཆེ། །
ཆོས་ཀྱི་འབྱུང་གནས་འགག་པ་མེད། །རོལ་པའི་སྒྱུ་མ་སྟོན་པར་བྱེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །རྡོ་རྗེ་ཁྲོ་བོ་སྟོབས་པོ་ཆེ། །སྐུ་གསུམ་མི་ཕྱེད་ལ་གནས་པས། །རྟོག་པས་མི་ཤིགས་བདུད་རྣམས་
འཇོམས། །ཀུན་དུ་སྤྱོད་པ་ཀུན་དུ་སྤྱད། །ལོག་རྟོག་ཐམས་ཅད་གནས་སུ་དག །ཡེ་ཤེས་འབྱུང་གནས་ཆེན་པོའོ་ཞེས་གསུངས་སོ། །བྱང་ཆུབ་ཀྱི་སེམས་རབ་ཏུ་བརྟན་པ་ཡེ་ཤེས་ཀྱི་རོལ་པ་སྣ་ཚོགས་སུ་སྟོན་པ་རང་འབྱུང་
བའི་རྒྱུད་རབ་ཏུ་གསལ་བ་ཞེས་བྱ་བ་འདི་ཉིད་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་སྙིང་པོ་གསང་བ་གསང་བ་འདུས་པ་དཔལ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་
བའི་རྒྱུད་ལས་གསང་བ་ཆེན་པོའི་བྱང་ཆུབ་ཀྱི་སེམས་རབ་ཏུ་འབྱུང་བ་སྟོན་པ་ཞེས་བྱ་བའི་ལེའུ་སྟེ་བཅུ་པའོ།། །། དེ་ནས་དེ་བཞིན་གཤེགས་པ་ཐམས་ཅད་ཡང་དག་པར་འདུས་ནས་སངས་རྒྱས་དང་
བྱང་ཆུབ་སེམས་དཔའ་ཐམས་ཅད་དང་། ལྷ་མི་རྣམས་དང་། རིག་པའི་རྒྱལ་པོ་དང་། ཁྲོ་བོའི་ཚོགས་ཐམས་ཅད་ལ་ཡང་དག་པར་བསྟོད་པ། མི་བསྐྱོད་པ་ནི་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་

89-1-60b

དཀྱིལ་འཁོར་གསུམ། །གསང་བའི་དབྱངས་ལ་ཕྱག་འཚལ་ལོ། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་བ་ཆེ། །རང་བཞིན་འོད་གསལ་མཆོག་གི་སྐུ། །རྟག་པའི་རྡོ་རྗེ་ཕྱག་འཚལ་ལོ། །རིན་ཆེན་རྒྱལ་པོ་རབ་ཏུ་ཟབ། །
རྡོ་རྗེ་ནམ་མཁའ་དྲི་མ་མེད། །མཉམ་མེད་དག་པ་མཆོག་གི་མཆོག །རྡོ་རྗེ་སྐུ་ལ་ཕྱག་འཚལ་ལོ། །རྡོ་རྗེ་བདུད་རྩི་རྒྱལ་པོ་ཆེ། །འདོད་ཆགས་ཕ་རོལ་ཕྱིན་པ་ཐོབ། །ཡེ་ཤེས་དག་པས་ཡང་དག་འབྱུང་། །རྡོ་རྗེ་གསུང་ལ་ཕྱག་འཚལ་
ལོ། །དོན་གྲུབ་རྡོ་རྗེ་རྫོགས་སངས་རྒྱས། །བསམ་པ་ཐམས་ཅད་ཡོངས་རྫོགས་པ། །གོས་པ་མེད་པའི་ཡེ་ཤེས་ཅན། །རྡོ་རྗེ་སེམས་དཔའ་ཕྱག་འཚལ་ལོ། །མོ་ཧ་ར་ཏིའི་སྔགས་ལས་སྐྱེས། །ས་ཡི་ཁམས་ནི་རྣམ་དག་
ཅིང་། །དེ་བཞིན་གཤེགས་པའི་ཡུམ་གྱུར་པ། །ལྷ་མོ་སྤྱན་ལ་ཕྱག་འཚལ་ལོ། །དྭེ་ཥ་ར་ཏིའི་སྔགས་ལས་སྐྱེས། །ཆུ་ཡི་ཁམས་ནི་རྣམ་དག་པ། །རྡོ་རྗེ་རིགས་ཀྱི་ཡུམ་གྱུར་ཅིང་། །མཱ་མ་ཀཱི་ལ་ཕྱག་འཚལ་ལོ། །རཱ་ག་ར་ཏིའི་སྔགས་
ལས་བྱུང་། །མེ་ཡི་ཁམས་ནི་རྣམ་དག་ཅིང་། །པད་མའི་རིགས་ཀྱི་ཡུམ་གྱུར་པ། །གོས་དཀར་ལྷ་མོ་ཕྱག་འཚལ་ལོ། །བཛྲ་ར་ཏྀའི་སྔགས་ལས་སྐྱེས། །རླུང་གི་ཁམས་ནི་རྣམ་དག་པ། །ལས་ཀྱི་རིགས་ཀྱི་ཡུམ་གྱུར་པ། །སྣ་
ཚོགས་སྒྲོལ་མ་ཕྱག་འཚལ་ལོ། །བྱང་ཆུབ་སེམས་དཔའ་སེམས་ཆེན་པོ། །རྩ་རྒྱུས་ཁམས་ནི་དག་པའི་སྐུ། །ཉོན་མོངས་རྣམ་དག་བྱམས་པ་ནི། །རྒྱལ་བའི་རྡོ་རྗེ་ཕྱག་འཚལ་ལོ། །བྱང་ཆུབ་སེམས་དཔའ་སེམས་ཆེན་
པོ། །མིག་གི་སྐྱེ་མཆེད་སྦྱོང་མཛད་ཅིང་། །ས་ཡི་སྙིང་པོ་དེ་བཞིན་གཤེགས། །སྐུ་ཡི་རྡོ་རྗེ་ཕྱག་འཚལ་ལོ། །བྱང་ཆུབ་སེམས་དཔའ་ཆེན་པོ་ནི། །རྣ་བའི་སྐྱེ་མཆེད་རྣམ་དག་པ། །ཕྱག་ན་རྡོ་རྗེ་མཐུ་སྟོབས་ཅན། །ཐུགས་ཀྱི་
རྡོ་རྗེ་ཕྱག་འཚལ་ལོ། །བྱང་ཆུབ་སེམས་དཔའ་ཆེན་པོ་ནི། །སྣ་ཡི་སྐྱེ་མཆེད་སྦྱོང་གྱུར་པའི། །ནམ་མཁའི་སྙིང་པོའི་མཆོག་གྱུར་པ། །ཏིང་འཛིན་རྡོ་རྗེ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེ། །ལྕེ་ཡི་སྐྱེ་

89-1-61a

མཆེད་དག་བྱེད་པ། །འཇིག་རྟེན་དབང་ཕྱུག་བླ་ན་མེད། །གསུང་གི་རྡོ་རྗེ་ཕྱག་འཚལ་ལོ། །བྱང་ཆུབ་སེམས་དཔའ་ཞི་བ་ཆེ། །ཡིད་ཀྱི་སྐྱེ་མཆེད་རྣམ་དག་ཅིང་། །དག་པའི་སེམས་མཆོག་འཇམ་དབྱངས་སྐུ། །ནམ་མཁའི་
རྡོ་རྗེ་ཕྱག་འཚལ་ལོ། །བྱང་ཆུབ་སེམས་དཔའ་ཐེག་པ་ཆེ། །ལུས་ཀྱི་སྐྱེ་མཆེད་དག་པ་པོ། །སྒྲིབ་པ་ཐམས་ཅད་རྣམ་སེལ་མཛད། །དམ་ཚིག་རྡོ་རྗེ་ཕྱག་འཚལ་ལོ། །བྱང་ཆུབ་སེམས་དཔའ་རྒྱལ་དབང་པོ། །འགྲོ་བའི་སེམས་རྒྱུད་སྦྱོང་མཛད་པ། །
ཀུན་དུ་བཟང་པོ་ཡེ་ཤེས་རོལ། །ཆོས་དབྱིངས་རྡོ་རྗེ་ཕྱག་འཚལ་ལོ། །རྡོ་རྗེ་གཟུགས་ནི་ཡིད་དུ་འོང་། །སྣང་སྟོང་ཀུན་དུ་རོལ་པ་ཡིས། །ཆོས་རྣམས་སྒྱུ་མའི་ཆོ་འཕྲུལ་སྟོན། །གཟུགས་ཀྱི་ལྷ་མོ་ཕྱག་འཚལ་ལོ། །རྡོ་རྗེའི་སྒྲ་ནི་ཡིད་དུ་འོང་། །སྒྲ་
དང་སྒྲ་མིན་ལས་གྲོལ་བ། །སྟོང་ཉིད་རང་སྒྲ་འབྱུང་བ་པོ། །སྒྲ་ཡི་ལྷ་མོ་ཕྱག་འཚལ་ལོ། །རྡོ་རྗེའི་དྲི་ནི་ཡིད་འོང་མཆོག །སངས་རྒྱས་ཐུགས་མཆོད་བདེ་བ་ཆེ། །ལོག་པ་སད་པར་བྱེད་པ་པོ། །དྲི་ཡི་ལྷ་མོ་ཕྱག་འཚལ་ལོ། །རྡོ་རྗེ་རོ་ནི་
དགའ་བའི་སྐུ། །དྲི་མེད་བདུད་རྩི་འཐོབ་བྱེད་ཅིང་། །དཀྱིལ་འཁོར་མ་ལུས་མཆོད་བྱེད་པ། །རོ་ཡི་ལྷ་མོ་ཕྱག་འཚལ་ལོ། །ཡ་མཱན་ཏ་ཀྲིཏ་སྔགས་ལས་སྐྱེས། །སྐུ་ཡི་གསང་བ་ཁྲོ་བོ་ཆེ། །དབང་པོ་མནན་ཅིང་ཤར་ཕྱོགས་བཞུགས། །གཤིན་རྗེ་
གཤེད་ལ་ཕྱག་འཚལ་ལོ། །པྲཛྙཱན་ཏ་ཀྲིཏ་སྔགས་ལས་སྐྱེས། །ཐུགས་ལས་སྐྱེས་པའི་ཁྲོ་རྒྱལ་ནི། །གཤིན་རྗེ་མནན་ཅིང་ལྷོ་ཕྱོགས་བཞུགས། །རྣམ་པར་རྒྱལ་ལ་ཕྱག་འཚལ་ལོ། །པད་མཱན་ཏ་ཀྲིཏ་སྔགས་ལས་སྐྱེས། །གསུང་མཆོག་
པད་མ་རང་འབྱུང་བ། །ཆུ་བདག་མནན་ཅིང་ནུབ་ཕྱོགས་བཞུགས། །གསུང་མཆོག་རྒྱལ་ལ་ཕྱག་འཚལ་བསྟོད། །བིགྷྣཱན་ཏ་ཀྲིཏ་སྔགས་ལས་སྐྱེས། །ཕྲིན་ལས་སྣ་ཚོགས་མཛད་པ་པོ། །གནོད་སྦྱིན་མནན་ཅིང་བྱང་ཕྱོགས་བཞུགས། །
བདུད་རྩི་འཁྱིལ་ལ་ཕྱག་འཚལ་བསྟོད། །རྣམ་པར་རྟོག་པས་མི་གཡོ་ཞིང་། །ཡེ་ཤེས་གསང་བའི་དོན་ལྡན་པའི། །ཁྲོ་རྒྱལ་བྱིན་ཟའི་སྟེང་བཞུགས་པ། །མི་གཡོ་མགོན་ལ་ཕྱག་འཚལ་ལོ། །བརྟུལ་ཞུགས་ཆེན་པོ་མི་བཟད་པས། །

89-1-61b

ལོག་འདྲེན་དཔུང་རྣམས་འཇོམས་མཛད་པ། །ཁྲོ་རྒྱལ་བདེན་བྲལ་སྟེང་ན་བཞུགས། །འདོད་པའི་རྒྱལ་པོ་ཕྱག་འཚལ་ལོ། །གཏུམ་པོ་སྲིད་གསུམ་འཇོམས་མཛད་ཅིང་། །སྙིང་རྗེའི་སྟོབས་དང་ལྡན་པའི་སྐུ། །རླུང་བདག་སྟེང་གནས་ཁྲོ་བོ་ཆེ། །
དབྱུག་སྔོན་ཅན་ལ་ཕྱག་འཚལ་ལོ། །དུས་གསུམ་བདེ་གཤེགས་ཐམས་ཅད་ཀྱི། །ཡེ་ཤེས་མཆོག་གིས་དབང་བསྐུར་བ། །ཁྲོ་རྒྱལ་དབང་ལྡན་སྟེང་བཞུགས་པ། །སྟོབས་པོ་ཆེ་ལ་ཕྱག་འཚལ་ལོ། །དུག་གསུམ་རྟོག་པ་དག་བྱས་ཤིང་། །
སྣ་ཚོགས་སྒྱུ་མར་གར་མཛད་པ། །ཚངས་པའི་སྟེང་བཞུགས་ལྷ་ཡི་གཙོ། །འཁོར་ལོས་སྒྱུར་ལ་ཕྱག་འཚལ་ལོ། །བྱང་ཆུབ་སེམས་ཀྱི་རང་བཞིན་སྐུ། །སྤྲོས་མེད་དེ་བཞིན་ཉིད་ལས་བྱུང་། །ཀཱ་ལ་ཀྲོ་དྷ་གནོན་མཛད་པ། །ཁྲོ་རྒྱལ་གནོད་
མཛེས་ཕྱག་འཚལ་ལོ། །བྱང་ཆུབ་སེམས་ལས་རང་བྱུང་བ། །སངས་རྒྱས་ཀུན་གྱི་དེ་བཞིན་ཉིད། །སྒྱུ་མ་དག་ལ་སྤྲོས་མེད་སྐུ། །འོད་གསལ་བདེ་བའི་བསམ་གཏན་ཉིད། །དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ཕྱག་རྒྱ་
ལས། །རླུང་སྔགས་ལས་བྱུང་རང་དག་ཅིང་། །ཐམས་ཅད་ཆོས་ནི་ཡོངས་རྫོགས་པར། །སྣང་བ་ཡེ་ཤེས་རང་བཞིན་ཚོགས། །སྤྲོ་དང་བསྡུ་བ་ཉིད་གྱུར་པ། །ཟུང་འཇུག་ཏིང་འཛིན་ལ་འཇུག་གང་། །དབྱེ་བས་ཡེ་ཤེས་དག་པའི་གནས། །མཆོད་
པས་ཡང་དག་ཐོབ་པར་འགྱུར། །དེ་ཉིད་བླ་མའི་སྐུ་ཉིད་དོ། །ཞེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་གསང་བ་གསང་བ་འདུས་པ་དཔལ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་
ཉིད་རྣམ་པར་རྒྱལ་བའི་རྒྱུད་ལས་གསང་བ་ཆེན་པོ་རབ་ཏུ་རྒྱས་པའི་མཆོད་ཅིང་བསྟོད་པའི་ལེའུ་སྟེ་བཅུ་གཅིག་པའོ།། །། རྡོ་རྗེ་མི་འགྱུར་བ་ཞེས་བྱ་བའི་བརྟག་པའི་རྒྱལ་པོ་དང་པོ་རྫོགས་སྷོ།།  །།དེ་ནས་བཅོམ་
ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་ཀྱི་བཀོད་པ་དུ་མར་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་

89-1-62a

པར་ཞུགས་ཏེ། དེ་ནས་དེ་བཞིན་གཤེགས་པ་བྱང་ཆུབ་ཀྱི་སེམས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ། དེ་བཞིན་གཤེགས་པ་དུ་མའི་རིགས་ཀྱི་དཀྱིལ་འཁོར་ཆེན་པོ་གསང་བ་བླ་ན་མེད་པའི་རྡོ་རྗེ་མངོན་
པར་རྫོགས་པའི་ཚུལ་མི་ཟད་པ་རྡོ་རྗེ་འགྲོ་བ་སེམས་ཅན་ཐམས་ཅད་ཀྱི་དོན་དུ་སེམས་ཅན་ནམ་མཁའི་མཐས་ཀླས་པར་གྱུར་པའི་ཁམས་བརྗོད་དུ་མེད་པའི་གནས་ཀྱི་ཆོས་ཉིད་དང་གཉིས་སུ་མེད་པ་མཉམ་པ་ཉིད་དུ་རབ་ཏུ་སྟོན་པ། རབ་
འབྱམ་ཆོས་ཀྱི་དབྱིངས་ཀྱི་དཀྱིལ་འཁོར་ཆེན་པོ་ཚད་དང་རྒྱ་ཡོངས་སུ་ཆད་པ་མེད་པ་བསམ་གྱིས་མི་ཁྱབ་པའི་གནས་ཀྱི་ཞིང་ཁམས། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པའི་གནས་འགྱུར་བ་མེད་པར་གསང་བའི་
འབྲུག་སྒྲ་སྒྲོགས་པའི་སྤྱོད་ཡུལ། རྣལ་འབྱོར་གྱི་དབང་ཕྱུག་བྱེ་བ་ཕྲག་བརྒྱད་བཅུ་མངོན་པར་བསྔགས་པ་དང་། རྣལ་འབྱོར་མ་སྐུལ་བྱེད་མ་དང་། འོད་ཟེར་ཅན་དང་། རལ་པ་གཅིག་མ་དང་། རི་ཁྲོད་ལོ་མ་ཅན་དང་། ཀུ་རུ་ཀུལླེ་དང་། རྡོ་རྗེ་
དབྱངས་ཅན་མ་དང་། དྲི་མ་མེད་པའི་རྣམ་པར་རྒྱལ་མའི་གཙུག་ཏོར་དང་། གཙུག་ཏོར་མི་ཟད་པ་བསྔགས་པ་རྡོ་རྗེ་དང་། གཙུག་ཏོར་གདུགས་དཀར་མོ་ཅན་རྡོ་རྗེ་ལ་སོགས་པ་རི་རབ་སུམ་བཅུ་རྩ་དྲུག་གི་རྡུལ་དང་མཉམ་པའི་རྣལ་
འབྱོར་མའི་ཚོགས་རྣམས་དང་ལྷན་ཅིག་ཏུ། གསང་བའི་སྤྱོད་པ་རྨད་དུ་བྱུང་བ་ཡེ་ཤེས་བདེ་བ་ཆེན་པོའི་རོལ་པ་ལ་ཡོངས་སུ་སྤྱོད་དེ། དེ་དག་ཀྱང་སངས་རྒྱས་དང་བྱང་ཆུབ་སེམས་དཔའ་རྣམས་དང་ལྷན་ཅིག་ཏུ་བདེ་བའི་རོས་
ཁྱབ་པར་བྱེད་ཅིང་རང་རང་གི་རིགས་ཀྱི་བདག་པོ་མཆོད་པར་བྱེད་དོ། །དེ་བཞིན་གཤེགས་པ་བསྐལ་པ་གང་གཱའི་ཀླུང་གི་བྱེ་མ་སྙེད་ཁྲག་ཁྲིག་ཕྲག་འབུམ་གྱི་བར་གྱི་སྐུ་གསུང་ཐུགས་རྡོ་རྗེའི་གསང་བ་འདུས་པ་དཔལ་མཆོག་ཆེན་པོ་
སྙིང་པོའི་དཀྱིལ་འཁོར་འདི་རྟོགས་པར་བྱེད་པ་སྟེ། དེ་བཞིན་གཤེགས་པ་སྟོང་བྱང་ཆུབ་ཀྱི་སེམས་རྡོ་རྗེའི་ཐུགས་ཀ་ནས་འོད་ཟེར་གྱི་རྩེ་མོ་དུ་མ་ལས་ཕྱུང་སྟེ་གསང་བ་ཆེན་པོའི་ཆོས་གནས་ཀྱི་དོན་མངོན་པར་བརྗོད་པ་རྒྱ་མཚོ་དང་མཚུངས་པ་

89-1-62b

སྟོན་པར་བྱེད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ལོག་པར་དད་སེལ་གྱིས་དེ་བཞིན་གཤེགས་པ་རྣམས་ཀྱི་ཡེ་ཤེས་ལ་འཇུག་པའི་སྒོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་
སོ། །ཆོས་རྣམས་ཐམས་ཅད་དམིགས་མེད་པར། །སྒྱུ་མ་ལྟ་བུར་བསྟན་པ་གང་། །གསང་བའི་ཡེ་ཤེས་རང་འབྱུང་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་གསེར་ཐུབ་ཀྱིས་
རྣམ་པར་ཐར་པའི་རྡོ་རྗེ་བསམ་གྱིས་མི་ཁྱབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་བསམ་གྱིས་མི་ཁྱབ་པས། །བཅིངས་པ་མེད་ཅིང་གྲོལ་བ་མེད། །ཐམས་ཅད་
རྣམ་པར་དག་པའི་དབྱིངས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འོད་སྲུང་གིས་རྡོ་རྗེ་མི་ཟད་པ་བྱམས་པ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ནས་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་རྨི་ལམ་མཚུངས་པ་ལས། །ནམ་མཁའ་ལྟ་བུར་བདག་མེད་པས། །དམིགས་པ་རྣམས་ལས་ཡོངས་གྲོལ་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་
ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པས་སྒྱུ་མ་ལྟ་བུ་དམིགས་པ་མེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་བཞིན་གྱིས་ནི་དག་པའི་བདག །སྲིད་
གསུམ་མིག་འཕྲུལ་མཚུངས་མེད་པར། །སྟོང་པ་ཉིད་ནི་དག་པའི་དངོས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བྱམས་པས་གསང་བའི་ཡི་གེ་རྣམ་པར་དག་པའི་ཚུལ་
རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །གང་དུ་ཆོས་དང་ཆོས་ཉིད་མེད། །ཐམས་ཅད་རྣམ་པར་མི་རྟོག་པས། །བརྗོད་པ་ཀུན་ལས་འདས་པ་སྟེ། །བྱང་ཆུབ་ཚུལ་འདི་བསྟན་

89-1-63a

པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སེང་གེས་ཡེ་ཤེས་སྡོང་པོས་བརྒྱན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདི་ལ་རྟོག་
པར་གྱུར་པ་མེད། །ཆོས་རྣམས་ཐམས་ཅད་མ་སྐྱེས་པ་དངོས་པོ་ཉིད་དུ་རྣམ་པར་གྲོལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རབ་རྩལ་གྱིས། དྲི་མ་མེད་པའི་སྙིང་
པོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གསང་བ་བྱང་ཆུབ་སེམས་ཀྱི་གསང་། །ཆོས་ཀུན་སྙིང་པོ་རྡོ་རྗེའི་སྐུ། །ལྷུན་གྱིས་གྲུབ་པ་ཡེ་ཤེས་དབྱིངས། །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་མེ་ཏོག་ཀུན་ནས་གསལ་བའི་སྙིང་པོས་ཡེ་ཤེས་རྡོ་རྗེ་འབར་བ་མི་ཟད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །རྣམ་པར་མི་འགྱུར་སྣང་བ་མེད། །དག་པའི་ངོ་བོ་རོ་མཉམ་པ། །ཕུང་པོ་ལྔ་ལྡན་ཉིད་ཀྱི་ངང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་
མེ་ཏོག་གཉིས་པ་ཀུན་དུ་སྣང་བའི་འོད་ཀྱིས་སངས་རྒྱས་ཐམས་ཅད་ཀྱི་འོད་ཟེར་བསྐུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་རང་གི་སེམས་རྟོགས་བྱ། །དེ་ཉིད་ཆོས་ཀུན་
རྩ་བ་སྟེ། །སྙིང་པོ་འདི་ཉིད་སྦས་པར་གནས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྤྱན་ལེགས་སྣང་བས་རང་དག་པར་སྟོན་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གསང་བ་གང་འགྱུར་དབྱིངས་ཉིད་ལ། །ཡེ་ཤེས་རྒྱལ་བ་ཀུན་གྱི་ཐུགས། །དམ་པ་འདི་ནི་འདུས་པར་གསུངས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་

89-1-63b

བཅོམ་ལྡན་འདས་དེ་བཞིན་གཤེགས་པ་འགྲོ་བའི་དེད་དཔོན་རྒྱལ་པོས་འགྲོ་བ་སེམས་ཅན་ཐམས་ཅད་ཡང་དག་པར་སྒྲོལ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཇི་
ལྟར་པད་མོ་ཆུ་ཀླུང་ལས། །རབ་ཏུ་སྐྱེ་བ་ཟིལ་འཕྲོ་བ། །དེ་ཉིད་སྡོང་བུ་འདིར་རྟོགས་བྱ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ལག་ཆེན་རྒྱལ་པོས་འགྲོ་བ་ཐམས་
ཅད་ཡང་དག་པར་འདུལ་བའི་ཏིང་ངེ་འཛིན་མི་ཟད་པའི་ཚུལ་ཞེས་བྱ་བ་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཉམ་མེད་ནམ་མཁའ་ཡངས་པ་ནི། །ཀུན་ལ་གནས་ཤིང་མི་འགྱུར་བ། །དྲི་མ་མེད་ཅིང་འབར་
བའི་འོད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྟོབས་མི་ཟད་པའི་དཔལ་གྱི་རི་རབ་བརྩེགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །གང་དུ་མི་ཕྱེད་རྡོ་རྗེ་ནི། །སྟོང་ཉིད་བྱང་ཆུབ་སེམས་རྡོ་རྗེ། །སྙིང་རྗེའི་སྙིང་པོ་དྲན་པར་བརྗོད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་
རྒྱུ་སྐར་རྒྱལ་པོས་དྲན་པའི་སྙིང་པོ་རིན་པོ་ཆེའི་སྣང་བའི་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདིར་ནི་ཆོས་རྣམས་སྟོང་པ་ཉིད། །ཆུ་དང་ཟླ་བ་མཚུངས་པ་སྟེ། །སྒྱུ་
མ་ཉིད་དུ་འགག་མེད་འཆར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྩི་སྨན་མི་ཟད་པའི་ཡེ་ཤེས་སྟོབས་ཀྱི་རྒྱལ་པོས་ཕུན་སུམ་ཚོགས་པའི་རྡོ་རྗེ་ཞེས་བྱ་བའི་ཏིང་
ཏིང་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་སྣང་ལ་རང་བཞིན་མེད། །སྟོང་པ་མཁའ་དང་མཚུངས་པ་སྟེ། །རོལ་པ་རང་འབྱུང་མཉམ་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་

89-1-64a

གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྙན་པའི་ཏོག་ཆེན་པོས་འོད་མི་ཟད་པའི་འབྱུང་གནས་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་ཉིད་རྒྱལ་བའི་
འབྱུང་གནས་ཏེ། །རྟོག་པའི་དྲ་བ་རྣམ་གཅོད་པ། །རང་ལས་འཆར་གྱི་གཞན་ལས་མིན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འོད་ཆེན་པོ་མི་ཟད་པའི་དཔལ་
གྱིས་ཟླ་བ་ཀུན་དུ་སྟོན་པར་འགྱུར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འགྲོ་ཀུན་བརྟན་དང་གཡོ་བ་ཡི། །དངོས་པོ་མཉམ་ཉིད་རྫོགས་སངས་རྒྱས། །གཅིག་དང་དུ་
མར་དམིགས་སུ་མེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྣམ་པར་གྲོལ་བའི་ཕུང་པོས་ཡེ་ཤེས་ཀྱི་སྤྲིན་རྣམ་པར་བཀོད་པ་འབྱུང་བའི་རྡོ་རྗེ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཉམ་པ་ཉིད་ལ་ཀུན་རྟོག་བྲལ། །དུས་གསུམ་མཁྱེན་པ་དུས་མི་དམིགས། །ཡང་དག་ཉིད་དུ་ཀུན་གྲོལ་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་
སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འོད་ཀྱི་རྒྱལ་པོ་མི་ཟད་པའི་སྣང་བས་ཆོས་ཐམས་ཅད་ཡང་དག་པར་ཁྱབ་པ་མི་འགྱུར་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
སོ། །སྣང་བ་རྣམ་བྲལ་མུན་པ་མེད། །གང་དུ་རྟོག་ལས་རྣམ་གྲོལ་ཞིང་། །གྲོལ་བའི་རྒྱུ་ནི་བདེན་པས་སྟོང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཉི་མའི་སྙིང་
པོས་ཀུན་དུ་ཁྱབ་པར་བྱེད་པ་ཞེས་བྱ་བའི་བྱང་ཆུབ་ཀྱི་སྙིང་པོ་རྡོ་རྗེའི་རྩེ་མོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འབྱུང་དང་འབྱུང་ལས་གྱུར་པ་གང་། །དེ་ཉིད་སྲོག་ཆགས་

89-1-64b

སྲོག་གྱུར་པ། །སེམས་ཅན་བྱང་ཆུབ་སྙིང་པོ་ཅན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཟླ་བའི་འོད་འཕྲོ་བའི་རྒྱལ་མཚན་གྱིས་སྙིང་པོ་ཀུན་དུ་རྣམ་པར་
རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བདུད་ཀྱི་ཚོགས་ཀུན་ཡང་། །རང་གི་སེམས་ལས་བྱུང་བས་ན། །ཕྱི་རོལ་ཉེ་བར་དམིགས་སུ་མེད། །བྱང་ཆུབ་ཚུལ་
འདི་བསྟན་པའོ་ཞེས་གསུངས་སོ། །དེ་ནས་འདོད་པ་ན་སྤྱོད་པའི་ལྷའི་བུ་ལ་འདི་ལྟ་སྟེ། ས་བླའི་ལྷ་དང་། རྒྱལ་ཆེན་རིས་བཞིའི་ལྷ་དང་། སུམ་བཅུ་རྩ་གསུམ་གྱི་ལྷ་དང་། འཕྲུལ་དགའི་ལྷ་དང་། འཐབ་བྲལ་གྱི་ལྷ་དང་། 
གཞན་འཕྲུལ་དབང་བྱེད་ཀྱི་ལྷ་དང་། དགའ་ལྡན་གྱི་ལྷ་དང་། གཟུགས་ན་སྤྱོད་པའི་འོག་མིན་གྱི་ལྷའི་བར་གྱི་མེ་ཏོག་གི་རྣམ་པ་ལ་འདི་ལྟ་སྟེ། པད་མ་དང་། ཨུཏ་པ་ལ་དང་། ཀུ་མུ་ཏ་དང་། པུན་དྷ་རི་ཀ་དང་། པད་མ་གེ་སར་དང་། 
ཛིམ་པ་ཀ་དང་། ན་ཏི་ཀེ་ས་ར་དང་། མཉ་ཛུ་ཤ་ཀ་དང་། མཉ་ཛུ་ཤ་ཀ་ཆེན་པོ་དང་། མན་དཱ་ར་བ་དང་། མན་དཱ་ར་བ་ཆེན་པོ་ལ་སོགས་པ་སྟེ། འདབ་མ་ལྔ་པ་དང་། བདུན་པ་དང་། བརྒྱད་པ་དང་། བཅུ་པ་ནས་འདབ་མ་
སྟོང་དང་ལྡན་པའི་བར་དུ་མེ་ཏོག་གིས་མངོན་པར་གཏོར། རབ་ཏུ་གཏོར། མངོན་པར་རབ་ཏུ་གཏོར་ཅིང་ལྷའི་བུ་དང་ལྷའི་བུ་མོ་རྣམས་མངོན་པར་རབ་ཏུ་དགའ་བའི་ཡིད་ཀྱིས་ཡོངས་སུ་མཆོད་པར་བྱེད་དོ། །ཀུན་དུ་མཆོད་པར་བྱེད་
དོ། །ལེགས་པར་རབ་ཏུ་མཆོད་ཅིང་ལྷའི་དབྱངས་ཀྱིས་ལེགས་སོ་ཞེས་བརྗོད་པར་བྱེད་དོ། །དེ་ནས་ལྷ་མ་སྲིན་སྡེ་བརྒྱད་ཀྱིས་མཆོད་པ་ལ་འོང་སྐད་ལྷའི་རྒྱལ་པོ་མི་མཇེད་ཀྱི་བདག་པོ་ཚངས་པ་དང་། ལྷའི་དབང་པོ་
བརྒྱ་བྱིན་དང་། ལྷ་མ་ཡིན་གྱི་རྒྱལ་པོ་སྟོབས་བཟངས་ལྡན་དང་། སྲིན་པོའི་རྒྱལ་པོ་ལང་ཀ་མགྲིན་བཅུ་དང་། མི་འམ་ཅིའི་རྒྱལ་པོ་ལྗོན་པ་རྟ་མགོ་ཅན་གྱི་བུ་མོ་ཡིད་འཕྲོག་མ་དང་བཅས་པ་དང་། གནོད་སྦྱིན་གྱི་རྒྱལ་

89-1-65a

པོ་རཏ་ན་ཀུ་བེ་ར་དང་། ཀླུའི་རྒྱལ་པོ་གཙུག་ན་ནོར་བུ་འཁོར་དང་བཅས་པ་དང་། ནམ་མཁའ་ལྡིང་གི་རྒྱལ་པོ་གསེར་ལུས་སྟོབས་ལྡན་དང་། དྲི་ཟའི་རྒྱལ་པོ་ཟུར་ཕུད་ལྔ་པ་འཁོར་དང་བཅས་པ་དང་། 
རྒྱལ་པོ་ཆེན་པོ་བཞི་འཁོར་དང་བཅས་པས་སོ་སོ་ནས་མཆོད་ཅིང་བཅོམ་ལྡན་འདས་དེ་བཞིན་གཤེགས་པ་བྱང་ཆུབ་ཀྱི་སེམས་རྡོ་རྗེ་ལ་མགོ་བོས་ཕྱག་བྱས་ཤིང་ལན་བརྒྱ་སྟོང་དུ་མར་བསྐོར་བ་བྱས་
ཤིང་ནམ་མཁའ་ལས་སོང་སྟེ་མི་སྣང་བར་གྱུར་ནས། སྐད་ཅིག་ཙམ་གྱིས་སོ་སོའི་གཞལ་ཡས་ཁང་དུ་སྟན་ལ་གནས་པར་གྱུར་ཏོ། །དེ་ནས་ས་གསུམ་དུ་ཁྱབ་པའི་འོད་ཀྱི་སྣང་བ་ཆེན་པོ་མི་ཟད་པ་བྱུང་སྟེ། སེམས་
ཅན་ཐམས་ཅད་བདེ་བ་དང་རེག་པར་གནས་པས་ཁྱབ་པར་བྱས་ཏེ་སླར་ལོག་ནས་བདག་ཉིད་ཀྱི་སྐུ་ལུས་ཀྱི་བ་སྤུའི་བུ་གར་མངོན་པར་ཞུགས་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་
དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོའི་རྒྱུད་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ཞེས་བྱ་བ་ལས་འདུས་པ་ཆེན་པོ་གསང་བའི་མཆོད་པ་ཐོག་མར་བསྟན་པ་སྟེ་ལེའུ་བཅུ་
གཉིས་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་འོད་བཟངས་ཀྱིས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འཁོར་ལོའི་སྙིང་པོ་རྡོ་རྗེ་ཀུན་དུ་ཁྱབ་པར་བསྐོར་བ་ཞེས་བྱ་བའི་ཏིང་
ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གཉིས་མེད་ཡེ་ཤེས་རང་བཞིན་ཅན། །ཡེ་ཤེས་སྣང་བ་མི་ཟད་པའི། །འོད་གསལ་བརྗོད་དུ་མེད་པ་ཡི། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་མྱ་ངན་མེད་པའི་སྙིང་པོས་དེ་བཞིན་གཤེགས་པ་ཐམས་ཅད་ཀྱི་པད་མོ་རིན་པོ་ཆེ་འབྱུང་བའི་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་

89-1-65b

སེམས་འདི་གསུངས་སོ། །ཐམས་ཅད་བྱང་ཆུབ་དམ་པའི་གཞི། །ལུགས་འབྱུང་ཆོས་ཀྱི་རང་བཞིན་དབྱིངས། །ལུགས་ཟློག་གསང་བ་ཉེར་བསྟན་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་
བཞིན་གཤེགས་པ་སྐར་རྒྱལ་དབང་པོས་དེ་བཞིན་གཤེགས་པ་ཐམས་ཅད་ཀྱི་རྒྱ་མཚོ་ཆེན་པོ་ཡེ་ཤེས་ཀྱི་འབྱུང་གནས་ཤེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣང་བ་མེད་ཅིང་དཔེ་
མེད་པ། །མཚོན་པ་ཙམ་གྱིས་རྟོགས་དཀའ་བ། །འཛུབ་ཀྱིས་ཟླ་མཚོན་བཞིན་དུ་སྣང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རབ་རྩལ་ཟླ་བའི་འོད་ཀྱིས་དེ་བཞིན་གཤེགས་
པ་ཐམས་ཅད་ཀྱི་སྒྲོན་མ་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དྲི་མེད་མྱུ་གུ་བསྐྱེད་པ་ཡི། །ས་བོན་འདིས་ནི་ཀུན་ཁྱབ་པ། །ཆོས་དབྱིངས་མངོན་པར་བྱང་ཆུབ་པ། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ནོར་བུའི་ཕྲེང་བ་འཛིན་གྱིས་དེ་བཞིན་གཤེགས་པ་ཐམས་ཅད་ཀྱི་དོན་ལ་རབ་ཏུ་སྒྲུབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣང་བ་འདི་ནི་རགས་པའི་ལམ། །མཆེད་པ་འདི་ནི་ཕྲ་བ་སྟེ། །ཐོབ་པ་མཆོག་ཏུ་གྱུར་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་
དེ་བཞིན་གཤེགས་པ་ཡོན་ཏན་འབྱུང་གནས་འོད་ཀྱིས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་འོད་ཟེར་རབ་ཏུ་སྐུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
སྟོང་པ་དངོས་པོ་ཡུལ་གྱིས་བྲལ། །ལུས་ཀྱིས་སྟོང་པ་རྟེན་འབྲེལ་འབྱུང་། །ཤིན་དུ་སྟོང་པ་ཕྱི་ནང་མེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དོན་ཡོད་པར་གཟིགས་

89-1-66a

པས་དེ་བཞིན་གཤེགས་པ་ཐམས་ཅད་ཀྱི་སྒྱུ་མའི་སྤྲུལ་པ་དུ་མར་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུ་འཐུན་གང་ཡིན་བྱེད་པ་སྟེ། །འབྲས་བུ་དབང་
སྒྱུར་རྣམ་པར་སྨིན། །དྲི་མ་མེད་པ་ལྷན་ཅིག་སྐྱེས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་མར་མེ་སྣང་བའི་འོད་མི་གཡོ་བས་དེ་བཞིན་གཤེགས་པ་ཐམས་ཅད་
ཀྱི་འོད་ཟེར་གྱི་སྤྲིན་འཕྲོ་བ་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུ་རྐྱེན་ཉེ་བར་ལེན་པ་དང་། །ལྷན་ཅིག་བྱེད་པའི་སྤྱོད་པ་ཅན། །མཚན་ཉིད་མེད་པའི་ངོ་བོ་ཡི། །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་མཐུ་དཔུང་ཡང་དག་ལྡན་གྱིས་དེ་བཞིན་གཤེགས་པ་ཐམས་ཅད་ཀྱི་སྟོབས་ཀྱི་རྣམ་པར་འཕྲུལ་པ་སྟོན་པ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་དུ་བརྟགས་པའི་རྣམ་པ་ཅན། །དེ་ཡི་དྲི་མ་རྣམ་སྦྱངས་ཏེ། །འཇུག་པ་དང་ནི་ལྡོག་པ་ཡིས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་
བཅོམ་ལྡན་འདས་དེ་བཞིན་གཤེགས་པ་སྨན་པའི་རྒྱལ་པོས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀུན་དུ་སྣང་བ་དམ་པའི་རྒྱན་གྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཁམས་འདི་
གཞན་གྱི་དབང་དུ་བརྗོད། །སྤྱི་དང་ཁྱད་པར་དབྱེ་བ་མེད། །སྐྱེ་བ་མེད་ཕྱིར་བརྗོད་པར་བྱ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དེས་པ་ཆེན་པོས་དེ་བཞིན་གཤེགས་པ་
ཐམས་ཅད་ཀྱི་སྟོབས་ཀྱི་སྙིང་པོ་གློག་གི་འོད་ཟེར་གྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་ཉིད་ཡོངས་སུ་གྲུབ་པ་ལས། །ངོ་བོ་བདེན་པར་འགྱུར་བ་མེད། །ཕ་རོལ་ཕྱིན་པའི་ཚུལ་མཆོག་

89-1-66b

སྟེ་བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྨིན་མཚམས་ཀྱི་མཛོད་སྤུ་རབ་ཏུ་རྒྱས་པའི་དཔལ་གྱིས་དེ་བཞིན་གཤེགས་པ་ཐམས་ཅད་ཀྱི་རྒྱན་ཡོངས་སུ་དག་པ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཇིག་རྟེན་པས་ནི་ཀུན་དུ་སྟོན། །འདས་པའི་ཡེ་ཤེས་དག་པའི་ལམ། །མི་འགྱུར་བ་ནི་ཕྱག་རྒྱ་ཆེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །
དེ་ནས་བཅོམ་ལྡན་འདས་དེ་བཞིན་གཤེགས་པ་བརྟན་ལྡན་དབང་པོས་དེ་བཞིན་གཤེགས་པ་ཐམས་ཅད་ཀྱི་ལྗོན་ཤིང་རྒྱས་པའི་བསིལ་གྲིབ་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
འདོད་ཁམས་སྒྲ་དང་དངོས་པོས་སྟོང་། །གཟུགས་ཀྱི་ཁམས་ནི་ལུས་ཀྱིས་སྟོང་། །གཟུགས་མེད་ཁམས་ནི་ཡིད་ཀྱིས་ཏེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ལྷའི་དཔལ་
གྱིས་དེ་བཞིན་གཤེགས་པ་ཐམས་ཅད་ཀྱི་བྱམས་པ་ཆེན་པོའི་གདུགས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པ་ཀུན་དུ་འབྱུང་བ་དག །ཡེ་ཤེས་རིག་ལ་རྣམ་དབྱེ་བས། །དམན་
པ་མཆོག་དང་བར་མ་སྟེ། །རིགས་ནི་ཆོས་ཀྱི་དབྱིངས་ལ་གནས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་གདུལ་དཀའ་བ་པོས་དེ་བཞིན་གཤེགས་པ་ཐམས་ཅད་ཀྱི་སྙིང་རྗེ་
ཆེན་པོའི་གྲུ་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐམས་ཅད་ཆོས་ཉིད་གཅིག་པའི་ཕྱིར། །འདི་ནི་ཐེག་མཆོག་ཡངས་པའི་ལམ། །གྲུབ་པ་ཀུན་དུ་སྤྱོད་པ་ཉིད། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཡོན་ཏན་གྱི་རྒྱལ་མཚན་གྱིས་དེ་བཞིན་གཤེགས་པ་ཐམས་ཅད་ཀྱི་དགའ་བ་ཆེན་པོ་ཡང་དག་པའི་ཏིང་ངེ་འཛིན་ལ་སྙོམས་པར་ཞུགས་ཏེ་

89-1-67a

བྱང་ཆུབ་ཀྱི་སེམས་འདི་གསུངས་སོ། །ཆོས་སྐུ་དེ་བཞིན་ཉིད་ཡིན་ཏེ། །ལོངས་སྤྱོད་རྫོགས་སྐུ་བདེ་ཆེན་བརྗོད། །སྤྲུལ་སྐུ་སྣ་ཚོགས་འགྲོ་དོན་བྱེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་
བཞིན་གཤེགས་པ་སྒྲ་ཅན་ཡེ་ཤེས་ཀྱི་སྙིང་པོས་དེ་བཞིན་གཤེགས་པ་ཐམས་ཅད་ཀྱི་བཏང་སྙོམས་ཚད་མེད་པ་རྣམ་པར་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐུ་
གསུམ་གཅིག་ཏུ་བསྡུས་པ་ནི། །ཐ་དད་རྟོག་པ་སྤང་བའི་ཕྱིར། །སྙིང་པོ་ཡེ་ཤེས་གྱུར་པ་སྟེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཚོགས་ཅན་འོད་ཀྱིས་དེ་བཞིན་
གཤེགས་པ་ཐམས་ཅད་ཀྱི་བུམ་པ་བཟང་པོ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གསང་བ་བླ་མེད་ཁྱད་པར་བ། །ཟུང་འཇུག་འབྲས་བུ་རབ་གྱུར་པས། །རིམ་གཉིས་གཅིག་ཏུ་སྦྱོར་བ་
ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཚངས་པའི་དབྱངས་ཀྱིས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཁང་བཟངས་བཀོད་པ་ལྟ་བུའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྙིང་པོ་ཀུན་དུ་བསྐུལ་པ་ནི། །ཡེ་ཤེས་སྒྱུ་མའི་རྣམ་འཕྲུལ་པས། །མྱུར་དུ་མངོན་པར་འཚང་རྒྱའི་ལམ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་
ལྡན་འདས་དེ་བཞིན་གཤེགས་པ་ཚིག་བསྟན་གྱིས་དེ་བཞིན་གཤེགས་པ་ཐམས་ཅད་ཀྱི་དྲན་པ་ཡང་དག་པར་སྐུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བྱང་ཆུབ་སེམས་
ཀྱི་ཡི་གེ་གསུམ། །སྤྲོ་དང་བསྡུ་བ་མི་བྱེད་པས། །བསྐུལ་བ་ཕྲིན་ལས་སྤྱོད་པ་མིན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །སངས་རྒྱས་ཀུན་གྱི་དཀྱིལ་འཁོར་ནི། །དེ་ཉིད་ཤེས་པའི་གནས་ཡིན་ཏེ། །འདི་ནི་སྒྲུབ་པའི་དེ་ཉིད་

89-1-67b

ཡིན། །ཡིད་བཞིན་ནོར་བུ་ལྟ་བུར་སྤྱོད། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ཞེས་བྱ་བ་ལས་དེ་བཞིན་གཤེགས་
པའི་ཀུན་དུ་སྤྱོད་པའི་སྣང་བ་སྟོན་པ་ཞེས་བྱ་བའི་ལེའུ་སྟེ་བཅུ་གསུམ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་མི་འགྱིང་བ་དཔལ་གྱི་སྡེས་དེ་བཞིན་གཤེགས་པ་ཐམས་ཅད་ཀྱི་གླང་པོའི་སྟོབས་
མཆོག་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བརྟན་པ་དང་ནི་གཡོ་བ་ཡི། །སྲོག་ནི་རླུང་ལ་བརྟེན་པ་ཡིན། །ཁྱབ་ཅིང་སྙིང་པོར་ལྡན་པ་སྟེ། །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འོད་མཛད་མི་འཁྲུགས་པས་དེ་བཞིན་གཤེགས་པ་ཐམས་ཅད་ཀྱི་ཞིང་ཁམས་རབ་ཏུ་སྣང་བའི་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །སངས་རྒྱས་བྱང་ཆུབ་སེམས་དཔའ་དང་། །རིག་མ་ལྷ་མོ་ཁྲོ་ཚོགས་བཅས། །ཐུགས་ཀ་ནས་ནི་བསྐུལ་བ་ཤིས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་
བཞིན་གཤེགས་པ་ལྷུན་ཆེན་འབར་བའི་འོད་ཀྱིས་དེ་བཞིན་གཤེགས་པ་ཐམས་ཅད་ཀྱི་རྣམ་པར་གྲོལ་བའི་ཡེ་ཤེས་ཀྱི་ཕུང་པོའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་གྲོལ་
སྙིང་པོ་དུ་མའི་ཕུང་པོ་དག །བཅིངས་པ་མེད་ཅིང་རྣམ་པར་འཐོར་མེད་པ། །ཚུལ་འདི་ཐམས་ཅད་རྒྱུ་དང་འབྲས་བུར་འབྱུང་། །བྱང་ཆུབ་ཚུལ་འདི་ངེས་པར་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་
གཤེགས་པ་རྡོ་རྗེའི་སྙིང་པོ་རབ་ཏུ་འཇོམས་པས་དེ་བཞིན་གཤེགས་པ་ཐམས་ཅད་ཀྱི་མཚན་བཟང་པོ་ཡོངས་སུ་རྒྱས་པར་འབྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
89-1-68a

སོ། །སངས་རྒྱས་རྣམས་ནི་ཡེ་ཤེས་སྐུ། །བཀྲ་ཤིས་དགེ་བའི་མཚན་གྱིས་སྤྲས། །དེ་ཉིད་ཀུན་གྱི་རྣམ་པར་སྟོང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་
སྡོམ་པ་རབ་ལྡན་དགྱེས་པས་སངས་རྒྱས་ཐམས་ཅད་ཀྱི་དཔེ་བྱད་ཡོངས་སུ་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །སྡོམ་པ་ཐམས་ཅད་སྙིང་པོ་ནི། །འདིར་ནི་ཐབས་དང་ཤེས་
རབ་ཉིད། །གཉིས་མེད་དེ་བཞིན་གཤེགས་པ་ཡི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་མི་བསྙེམས་པས། སངས་རྒྱས་ཐམས་ཅད་ཀྱི་འགྲོ་བ་འདུལ་བ་ཞེས་བྱ་བའི་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །སྲིད་གསུམ་བརྟན་དང་གཡོ་བ་ཡི། །དངོས་པོ་མི་དམིགས་སྣང་མེད་པ། །ཆོས་ཉིད་མཉམ་པ་ཉིད་གྱུར་ཕྱིར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་
རིན་ཆེན་དཔལ་གྱིས་སངས་རྒྱས་ཐམས་ཅད་ཀྱི་ལམ་དུ་གྱུར་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་རྟེན་ཅིང་འབྲེལ་འབྱུང་བ། །དེ་ཉིད་རོ་མཉམ་གཅིག་པའི་བདག །
རྒྱུ་དང་འབྲས་བུར་བསྟན་པ་ཡིན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་པད་མའི་སྤྱན་རྒྱས་པ་ཞེས་བྱ་བའི་སངས་རྒྱས་དུ་མའི་རྗེས་སུ་འགྲོ་བ་སྟོན་པ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །སྤྱན་ལྔ་ཡེ་ཤེས་སྤྱོད་ཡུལ་དུ། །གཉིས་སྣང་ཐམས་ཅད་ནུབ་ནས་ནི། །ཟུང་འཇུག་ཡེ་ཤེས་མི་གནས་པ། །བྱང་ཆུབ་ཚུལ་འདི་བསྟན་པའོ། །
ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྟོབས་ཀྱི་སྡེས་དེ་བཞིན་གཤེགས་པ་ཐམས་ཅད་ཀྱི་བདུད་ཀྱི་དཔུང་རབ་ཏུ་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་ཚུལ་

89-1-68b

སེམས་འདི་གསུངས་སོ། །སྐྱེ་བ་མེད་ཅིང་གནས་མེད་པ། །རང་འབྱུང་རང་བཞིན་རང་གནས་པ། །གཉུག་མ་རྒྱུན་ཆད་མེད་པའི་ངང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་
པ་མེ་ཏོག་འོད་ཟེར་གྱིས་སངས་རྒྱས་ཐམས་ཅད་ཀྱི་འབར་བའི་སྤྲིན་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཡེ་ཤེས་འོད་ཟེར་གྱིས། །སྙིང་གི་པད་མོ་སད་མཛད་
པ། །དེ་ཉིད་མི་འགྱུར་བདེ་བ་ཐོབ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དཔལ་ཡེ་ཤེས་དགྱེས་པར་སྤྱོད་པས་སངས་རྒྱས་ཐམས་ཅད་ཀྱི་གཙུག་ཏོར་མངོན་པར་རྒྱས་པ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཁམས་གསུམ་མ་ལུས་སངས་རྒྱས་ཞིང་། །དབྱེར་མེད་ཡེ་ཤེས་རྒྱས་པའི་ཐུགས། །འགྲོ་བའི་མཚན་མ་དམིགས་སུ་མེད། །
བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་གཟི་བརྗིད་ཆེན་པོ་དང་ལྡན་པས་སངས་རྒྱས་ཐམས་ཅད་ཀྱི་དཔའ་བར་འགྲོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །ཚོགས་དྲུག་རང་སྣང་རྟོག་པ་མེད། །རྣམ་ཤེས་བརྟགས་པ་རྣམ་བྲལ་བ། །གཟུང་འཛིན་ཀུན་ལས་རྣམ་གྲོལ་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་
དེ་བཞིན་གཤེགས་པ་ཚངས་པ་སྣང་བས་སངས་རྒྱས་ཐམས་ཅད་ཀྱི་ཡུལ་ལ་འཇུག་པ་ཀུན་ནས་སྒོའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དོན་དམ་རྣམ་པར་མི་དམིགས་པ། །
ཡོད་མེད་མཐའ་ལས་འདས་པ་སྟེ། །གཟིགས་བྱར་མེད་ཅིང་རྟག་ཏུ་སྟོང་། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་

89-1-69a

གཤེགས་པ་སྣང་བ་མི་ཟད་པས་བདེ་བས་བརྒྱན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣང་ལ་རང་བཞིན་མ་གྲུབ་པས། །མི་རྟག་གཡོ་བ་དངོས་ལ་
ནི། །བདེན་པ་དམིགས་སུ་མེད་པ་སྟེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཀླུའི་སྦྱིན་པས་སངས་རྒྱས་ཐམས་ཅད་ཀྱི་སྙིང་རྗེས་བསྙེལ་བ་མེད་པ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ནི་དྲི་མར་བཅས་པ་དག །བག་ཆགས་རྟོགས་པས་རབ་དཀྲུགས་པ། །ས་ལེར་བཞག་པས་རང་དངས་འགྱུར། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བརྟན་པར་གཤེགས་པས་འགྲོ་བའི་བློ་རང་ཆགས་པ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་འབྱུང་
ཡེ་ཤེས་ནམ་མཁའ་ནི། །ཐ་སྙད་རྣམས་ལས་ཡོངས་གྲོལ་བ། །འཆར་བ་མེད་ཅིང་ནུབ་པ་མེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དོན་ཡོད་མཐོང་བས་
སངས་རྒྱས་ཐམས་ཅད་ཀྱི་ཡེ་ཤེས་རབ་ཏུ་རྒྱས་པའི་ཉི་མའི་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དད་དང་ལྡན་པའི་སྐྱེ་བོ་ནི། །ཤེས་རབ་སྣང་བ་
རབ་བསྐུལ་ནི། །མུན་པ་ལ་ནི་སྣང་བ་བཞིན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་སྦྱིན་པས་སངས་རྒྱས་ཐམས་ཅད་ཀྱི་རི་རབ་བརྩེགས་པ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་རྟོག་དྲི་མ་སྤངས་ཞིང་གསལ་བ་ཡི། །ཀུན་ནས་ཀུན་དུ་འཇུག་པའི་ཡི་དག་ཀྱང་། །རྒྱུན་ལས་བཟློག་ན་རང་བཞིན་མེད་པར་འགྲོ། །

89-1-69b

ངེས་པར་གསང་བ་བྱང་ཆུབ་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བཟང་སྐྱོང་གིས་འགྲོ་བ་ཐམས་ཅད་ཀྱི་མུན་པ་སེལ་བའི་སྒྲོན་མ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །རྣམ་པར་མི་དམིགས་མཚན་མ་མེད། །བསམ་གཏན་ཏིང་འཛིན་གནས་མེད་པར། །མཉམ་རྗེས་མི་དམིགས་གྲོལ་བའི་མཐའ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །
དེ་ནས་བཅོམ་ལྡན་འདས་དེ་བཞིན་གཤེགས་པ་དགའ་བོས་སངས་རྒྱས་ཐམས་ཅད་ཀྱི་ཟབ་མོའི་སྤྱོད་ཡུལ་ལ་འཇུག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
འཁོར་བའི་གནས་ནི་སྒྱུ་མ་སྟེ། །སྒྱུ་མ་ཙམ་དུའང་མི་གནས་པ། །ཡེ་ཤེས་མངོན་པར་འབྱུང་བས་ན། །ངོ་བོ་ཉིད་ཀྱི་ཚུལ་བསྟན་པའོ་ཞེས་གསུངས་སོ། །སྐུ་གསུང་ཐུགས་ཀྱི་རྡོ་རྗེ་ལས། །དུས་གསུམ་སངས་རྒྱས་གང་འདས་དང་། །
མ་བྱོན་ད་ལྟར་བཞུགས་པ་དག །ཕྱོགས་བཅུ་ཆོས་ཀྱི་དབྱིངས་བཅས་པར། །དཔག་མེད་དུག་ལྔའི་རྟོགས་ཚོགས་ལྡན། །སྐྱེ་བོ་ཤིན་དུ་གཏུམ་པ་དང་། །ཆགས་དང་སེར་སྣས་འཇུངས་པ་དང་། །རྨོངས་དང་མ་རུངས་ལས་བརྩོན་
རྣམས། །རྒྱུད་ལྔའི་འཁོར་བའི་འཁོར་ལོ་ལས། །སྒྲོལ་མཛད་དཀྱིལ་འཁོར་ཆེན་པོ་ལྔ། །རྒྱུན་མི་འཆད་པར་དོན་སྤྱོད་ཅིང་། །སྣ་ཚོགས་ཐབས་ཀྱིས་འདུལ་མཛད་པ། །དེ་དང་དེ་ཡི་སྐུར་བསྟན་ནས། །རིས་འཐུན་ལམ་དུ་སྟོན་
མཛད་དེ། །ཐམས་ཅད་དབྱེར་མེད་དག་པར་འགྱུར། །འདི་ཉིད་བསྡུས་པའི་བདུད་རྩི་སྟེ། །རྡོ་རྗེ་ཕྲེང་བར་འགྱུར་བ་དང་། །དགོངས་པ་ལུང་སྟོན་གསང་བའི་རྒྱུད། །ཡེ་ཤེས་རྡོ་རྗེ་བསྡུས་པ་ནི། །ཁྱད་པར་སྟོན་པ་འཕགས་པའི་ཆོས། །
བཞིས་བསྡུས་ལྷ་མོའི་གསང་ཆེན་དང་། །ཐུན་མོང་མ་ཡིན་སྟོན་པ་ཡི། །གསང་བ་བླ་མེད་རྒྱུད་འདིར་ངེས། །སངས་རྒྱས་ཐམས་ཅད་ཀྱི་དཀྱིལ་འཁོར་བསྟན་པ་མཆོག་གི་གསང་བ་ཞེས་བྱ་བའི་ཏིང་ངེ་འཛིན་ཏོ། ། དེ་

89-1-70a

བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ཞེས་བྱ་བ་ལས་སངས་རྒྱས་ཐམས་ཅད་ཀྱི་
གསང་བ་བསྟན་པ་མི་ཕྱེད་པའི་ལེའུ་སྟེ་བཅུ་བཞི་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་འཆི་མེད་བདུད་རྩི་རྒྱལ་པོས་དེ་བཞིན་གཤེགས་པ་ཐམས་ཅད་ཀྱི་སྐུ་བདུད་རྩི་འབར་བ་རྒྱས་པ་ཞེས་
བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཁོར་འདས་ཆོས་རྣམས་ཐམས་ཅད་ཀུན། །རང་གི་སེམས་ལས་གཞན་མེད་དེ། །སྣང་ཞིང་གསལ་བར་གྱུར་པ་ཉིད། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སེང་གེ་རྒྱལ་མཚན་གྱིས་སངས་རྒྱས་ཐམས་ཅད་ཀྱི་མཛད་པ་རྣམ་པར་སྤྲོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་
ཆུབ་ཀྱི་སེམས་འདི་གསུངས་སོ། །འདིར་ནི་རང་རིག་ཉམས་མྱོང་ལྟར། །གལ་ཏེ་སེམས་ཉིད་མ་ཡིན་ན། །འབྲེལ་པ་མེད་ཕྱིར་སྣང་མེད་འགྱུར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་
དེ་བཞིན་གཤེགས་པ་རྒྱལ་བས་སངས་རྒྱས་ཐམས་ཅད་ཀྱི་བཀོད་པ་ཀུན་དུ་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་ཉིད་དང་ནི་སེམས་ཉིད་དག །གང་དུ་རྟོག་པས་དཔྱད་
གྱུར་ཀྱང་། །གཅིག་དང་དུ་མར་མི་དམིགས་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཆོས་ཀྱི་རྒྱལ་པོས་སངས་རྒྱས་ཐམས་ཅད་ཀྱི་མཁྱེན་པ་མི་ཟད་པའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྤྱོད་ཡུལ་ཤིན་དུ་ཟབ་པས་ན། །རང་སེམས་བྱང་ཆུབ་སྙིང་པོ་ཅན། །གདོད་ནས་དག་པ་དེ་ཉིད་དེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་

89-1-70b

བཅོམ་ལྡན་འདས་དེ་བཞིན་གཤེགས་པ་མཆོག་ཏུ་དགའ་བའི་རྒྱལ་པོས་སངས་རྒྱས་ཀྱི་གདུལ་བྱ་སྣ་ཚོགས་ཀྱི་ཡུལ་ལ་འཇུག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཟབ་དང་
རྒྱ་ཆེན་དབྱེར་མེད་པས། །སྣང་སྟོང་ཐ་དད་མེད་པར་འདྲེས། །སངས་རྒྱས་ཞེས་ནི་དེ་ལ་གསུངས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་མིའི་ཁ་ལོ་སྒྱུར་བས་སངས་རྒྱས་
ཐམས་ཅད་ཀྱི་ཡེ་ཤེས་ཀྱི་རྒྱལ་མཚན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དྲི་བཅས་རང་རིག་ལྟོས་མེད་ཕྱིར། །རང་འབྱུང་ཡེ་ཤེས་དེ་ཉིད་དེ། །རིག་པའི་ཕྱིར་ན་གསལ་བ་ཉིད། །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྱེས་པར་གཤེགས་པས་སངས་རྒྱས་ཀྱི་ཟབ་པའི་སྤྱོད་ཡུལ་ལ་འཇུག་པའི་སྒོ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་རིག་ཡིན་ཕྱིར་མི་རྟོག་པ། །རྐྱེན་སྐྱེས་གཞན་དབང་ཡིན་པའི་ཕྱིར། །མི་རྟོག་རྟོག་པ་བྱེད་མེད་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་
བཞིན་གཤེགས་པ་ཆུ་ལྷའི་ལྷས་དྲི་མ་མེད་པའི་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ཉིད་རྣམ་པར་མི་རྟོག་པས། །གསལ་ལ་རྟོག་མེད་ཡེ་ཤེས་ཉིད། །ཐམས་ཅད་མཁྱེན་
པའི་སྤྱོད་ཡུལ་ཅན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཡོན་ཏན་ལག་གིས་སངས་རྒྱས་ཐམས་ཅད་ཀྱི་བདུད་ཀྱི་བ་དན་རྣམ་པར་གནོན་པ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་རིག་འོད་གསལ་ནམ་མཁའ་འདི། །གདོད་ནས་མ་བཅོས་པར་རྟོགས་གང་། །སངས་རྒྱས་གཞན་དུ་བཙལ་མི་དགོས། །བྱང་ཆུབ་ཚུལ་འདི་བསྟན་པའོ་ཞེས་གསུངས་

89-1-71a

སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྤོས་ཀྱི་ལག་པས་སངས་རྒྱས་ཐམས་ཅད་ཀྱི་སེང་གེ་རྣམ་པར་བསྒྱིངས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །བློ་བུར་དྲི་མ་བྱུང་གྱུར་ཀྱང་། །རང་བཞིན་དག་པའི་ངོ་བོ་ལ། །གོས་དང་མ་གོས་མེད་པར་གསལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྣམ་པར་མཁྱེན་པས་སངས་རྒྱས་
ཐམས་ཅད་ཀྱི་གླང་པོའི་རྩལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡོད་མེད་གཉིས་ཀ་ལས་འདས་པས། །ཕན་ཚུན་ལྟོས་པ་མ་གྲུབ་ཕྱིར། །ཚུ་རོལ་མ་གྲུབ་ཕ་རོལ་བཞིན། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འབྲུག་སྒྲའི་རྒྱལ་པོས་སངས་རྒྱས་ཐམས་ཅད་ཀྱི་ཀུན་ནས་སྣང་བ་ཏོག་གི་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །ཡོད་མེད་ཐ་དད་མ་གྲུབ་སྟེ། །གཉིས་ཙམ་དུ་ཡང་མེད་པའི་ཕྱིར། །རྣམ་པར་བརྗོད་མེད་དམིགས་པ་བྲལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་
ལེགས་པའི་སེང་གེས་སྲིད་གསུམ་ཐམས་ཅད་ལྷང་ངེར་གནས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཨེ་མ་ཧོ་སེམས་ཉིད་དྲི་མེད་ཀྱིས། །རྣམ་འཕྲུལ་གཟུགས་སྐུས་བསྡུས་
པ་ཡི། །ཞིང་ཁམས་རྣམ་པར་དག་པར་སྣང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཡིད་བཟངས་ཀྱིས་ཆོས་ཐམས་ཅད་སྒྲ་བརྙན་ལྟ་བུར་སྣང་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཀྱིལ་འཁོར་རྣམ་འཕྲུལ་སྣ་ཚོགས་པ། །ངོ་མཚར་བ་ཡི་རྣམ་འཕྲུལ་དག །ནམ་མཁའི་མཐས་ཀླས་ཁྱབ་པར་འགྱུར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །

89-1-71b

དེ་ནས་བཅོམ་ལྡན་འདས་དེ་བཞིན་གཤེགས་པ་དྲི་མ་མེད་པའི་འོད་ཀྱིས་སངས་རྒྱས་ཐམས་ཅད་ཀྱི་ཡེ་ཤེས་རྣམ་པར་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །གང་ཞིག་སྒྲུབ་པ་གང་བསྒྲུབ་ལ། །དེ་སྒྲུབ་པ་ལ་གནས་མེད་མེད། །བསྒྲུབ་པར་བྱ་བ་སྒྲུབ་མ་ཡིན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་ཡང་
བཅོམ་ལྡན་འདས་དེ་བཞིན་གཤེགས་པ་ཟླ་བའི་སྙིང་པོས་སངས་རྒྱས་ཐམས་ཅད་ཀྱི་རིན་པོ་ཆེའི་འོད་ཟེར་རབ་ཏུ་བསྐུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །གསང་བ་མི་ཟད་ཆོས་ཀྱི་དབྱིངས། །ཡེ་ཤེས་རྡོ་རྗེ་རོལ་པར་བསྟན། །བླ་མེད་གནས་ནི་ཚུལ་ཐོབ་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །
དེ་ནས་བཅོམ་ལྡན་འདས་དེ་བཞིན་གཤེགས་པ་གྲགས་ཆེན་གྱིས་པད་མའི་སྙིང་པོ་ཀུན་དུ་རྒྱས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཁོར་བའི་
འདམ་ལས་སྐྱེས་པ་ཡི། །རང་སེམས་པད་མའི་སྡོང་བུ་ནི། །ཟིལ་པར་ལྡན་པ་དྲི་མ་མེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་
གཙུག་ན་ནོར་བུས་སངས་རྒྱས་ཐམས་ཅད་ཀྱི་རྫུ་འཕྲུལ་རབ་ཏུ་སྤྲོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་ནས་ཀུན་དུ་སངས་རྒྱས་ཀྱི། །ཞིང་
འདིའི་སྙིང་པོ་དད་པ་སྟེ། །མོས་དང་བརྩོན་འགྲུས་སྟོབས་དེ་བཞིན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་དྲག་ཤུལ་ཅན་

89-1-72a

ཞེས་བྱ་བའི་ཟབ་པའི་སྙིང་པོ་གཞལ་མེད་ཁང་རྣམ་པ་དུ་མར་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ས་འདི་ཀུན་གྱི་
བརྟེན་པ་བཞིན། །བྱང་ཆུབ་སེམས་ལ་ཀུན་བརྟེན་ཀྱང་། །གནས་པ་མེད་ཅིང་འགྲོ་འོང་མེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་
སེང་གེའི་སྟོབས་དེ་བཞིན་གཤེགས་པ་ཐམས་ཅད་ཀྱི་མཛད་པ་མཐའ་ཡས་པར་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ནམ་མཁའ་
ཀུན་དུ་གནས་མེད་པ། །དེ་བཞིན་རྟོག་བྲལ་དྲི་མེད་སེམས། །སངས་རྒྱས་ཀུན་གྱི་ཐུགས་ཡིན་ཏེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །ཤེས་བཞིན་སྨོན་ལམ་དབང་གིས་ནི། །མངལ་
འབྱུང་རིམ་པ་གང་ཡིན་དང་། །ཞིང་དང་ཞིང་དུ་སོ་སོར་ཡང་། །དེ་བཞིན་གཤེགས་པ་ཐམས་ཅད་ནི། །འདིར་ནི་ཡང་དག་བརྟུལ་ཞུགས་འཛིན། །གཞོན་ནུའི་རོལ་པ་ཐམས་ཅད་དང་། །དེ་བཞིན་བཟོ་
གནས་ཡང་དག་བསྟན། །ཐམས་ཅད་རྡོ་རྗེའི་རང་བཞིན་ལས། །རྣལ་འབྱོར་པས་ནི་རྟག་ཏུ་སྤྲོས། །འདིར་ནི་སྔོན་ཆད་མ་བྱུང་མེད། །སྔོན་གནས་པ་ནི་སྦྱར་མི་བྱ། །དེ་བཞིན་གཤེགས་ཀུན་མཛད་
པ་ནི། །ཐམས་ཅད་རྡོ་རྗེའི་དངོས་གཞི་ལ། །དུས་གསུམ་ལམ་གྱི་མཐར་ཐུག་པས། །ཐམས་ཅད་འདི་བཞིན་བལྟ་བར་བྱ། །དུས་གསུམ་གྱི་སངས་རྒྱས་ཐམས་ཅད་ཀྱི་གསང་བ་སྐུ་གསུང་
ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོའི་རྒྱུད་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ཞེས་བྱ་བ་ལས་དེ་བཞིན་གཤེགས་པ་ཐམས་ཅད་ཀྱི་རྣམ་པར་རོལ་པ་སྟོན་

89-1-72b

པའི་ལེའུ་སྟེ་བཅྭ་ལྔ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ལྗོན་པ་དྲི་མ་མེད་པ་དེ་བཞིན་གཤེགས་པ་ཐམས་ཅད་ཀྱི་སྟོབས་བཅུ་མངོན་པར་འབྱུང་བ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་མི་རྟོག་མི་དམིགས་པ། །རང་འབྱུང་ལྷན་ཅིག་སྐྱེས་པ་ཡིས། །སྙིང་པོ་སྒྱུ་མའི་སྣང་བ་ཉིད། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྣམ་པར་རྒྱལ་བ་ཅན་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཀུན་དུ་བསྐུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡང་དག་ཀུན་རྫོབ་དག་པ་ལ། །བརྟན་གཡོར་བཅས་པའི་སྣང་བ་ནི། །རང་བཞིན་མེད་པ་ཉིད་དུ་སྣང་། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཤེས་རབ་རྣམ་པར་བརྩེགས་པ་སངས་རྒྱས་ཐམས་ཅད་ཀྱི་སྙིང་པོ་ཡང་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་ཐམས་ཅད་སེམས་ཡིན་ཏེ། །སེམས་ཉིད་སྒྱུ་མའི་རྣམ་པ་དངོས། །དེ་ཉིད་ཀུན་རྫོབ་སྟོང་ཉིད་དོ། །བྱང་ཆུབ་ཚུལ་འདི་བསྟན་པའོ་
ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ལེགས་པའི་གནས་སངས་རྒྱས་ཐམས་ཅད་ཀྱི་ཡེ་ཤེས་སྒྱུ་མར་སྟོན་པའི་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣ་ཚོགས་སྒྱུ་མ་འཁོར་འདས་དག །སེམས་ཉིད་དག་དང་མ་དག་པའི། །སྣང་བ་བག་ཆགས་ཁྱད་པར་ཉིད། །བྱང་ཆུབ་ཚུལ་འདི་བསྟན་

89-1-73a

པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བློ་གྲོས་རྒྱ་མཚོས་སངས་རྒྱས་ཐམས་ཅད་ཀྱི་སྤྱོད་པའི་རོལ་པ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡིད་བཞིན་ནོར་བུ་རང་ལས་རྙེད། །དེ་ཉིད་སངས་རྒྱས་ཀུན་གྱི་གསང་། །བླ་མ་སངས་རྒྱས་དྲིན་གྱིས་རྙེད། །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཡན་ལག་སྐྱེས་པ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་རིན་པོ་ཆེའི་འབྱུང་གནས་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་གྲོལ་བའི་ཡེ་ཤེས་ལ། །ཡོད་མེད་མཐའ་ལས་འདས་པ་སྟེ། །མི་རྟོག་ཡེ་ཤེས་ཀུན་རྫོབ་ཉིད། །བྱང་ཆུབ་ཚུལ་
འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བློ་མཐའ་ཡས་པ་སངས་རྒྱས་ཀྱི་ཞིང་མི་འཇིགས་པ་བཞི་འབྱུང་བའི་ཡེ་ཤེས་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཨེ་མ་ཧོ་སྐུ་གསུམ་འདུལ་བའི་ཞིང་། །མ་ལུས་ལུས་པ་མེད་པ་རྣམས། །ཐམས་ཅད་བྱང་ཆུབ་སེམས་ཀྱི་རྒྱན། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་གཟུགས་དམ་པས་བཀྲ་ཤིས་དགའ་བས་བརྒྱན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །ཨེ་མ་ཧོ་སྟོང་གསུམ་མ་ལུས་རྒྱལ་བའི་ཞིང་། །རྡོ་རྗེ་སེམས་དཔའི་སྐུ་ལ་རྫོགས། །ཐམས་ཅད་བ་སྤུའི་ཚོགས་ལས་ཀྱང་། །སྤྲོས་ནས་བྱང་ཆུབ་

89-1-73b

སེམས་གསུངས་སོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་མཁྱེན་ལྡན་སངས་རྒྱས་ཐམས་ཅད་ཀྱི་དགྱེས་པ་ཆེན་པོས་ཡོངས་སུ་སྤྱོད་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །ཨེ་མ་ཧོ་སངས་རྒྱས་ཐམས་ཅད་ཀྱིས། །གསང་བ་བདེ་ཆེན་བྱང་ཆུབ་སེམས། །དེ་བཞིན་གཤེགས་པའི་ཚུལ་མཆོག་སྟེ། །སྙིང་པོའི་ཚུལ་འདི་བསྟན་པའོ། །ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་
གཤེགས་པ་འོད་ཟེར་སྟོབས་སངས་རྒྱས་ཐམས་ཅད་ཀྱི་འོད་ཟེར་མཐའ་ཡས་པ་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་སངས་རྒྱས་ཐམས་ཅད་ཀྱི་གསང་ཆེན་གྱི་ཚུལ་འདི་གསུངས་སོ། །ཨེ་མ་ཧོ་སངས་རྒྱས་ཀུན་
གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་ཙམ་ཉིད་ནའང་སྐྱེ་བ་མེད། །གསང་བའི་ཚུལ་ཆེན་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བརྟུལ་ཞུགས་བརྟན་པ་སངས་རྒྱས་ཐམས་ཅད་ཀྱི་
འགྲོ་བ་མ་ལུས་པའི་དབྱིངས་ལ་ཡང་དག་པར་དབང་བསྐུར་བའི་ཚུལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཨེ་མ་ཧོ་སངས་རྒྱས་ཀུན་གྱི་གསང་། །གནས་པ་མེད་ལས་གནས་པའི་
ཆོས། །གནས་ཙམ་ཉིད་ན་གནས་པ་མེད། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བཀྲ་ཤིས་འབྱུང་བས་སངས་རྒྱས་ཐམས་ཅད་ཀྱི་རྡོ་རྗེ་ནམ་མཁའ་དྲི་མ་མེད་པའི་འོད་
ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཨེ་མ་ཧོ་རྫོགས་སངས་རྒྱས་ཀྱི་གསང་། །དམིགས་པ་མེད་ལས་ཐམས་ཅད་དམིགས། །དམིགས་ཙམ་ཉིད་ན་དམིགས་པ་མེད། །བྱང་
ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བདེ་བའི་ཏོག་སངས་རྒྱས་ཐམས་ཅད་ཀྱི་སྲིད་པའི་ཆུ་ཀླུང་སྐེམས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་

89-1-74a

ཀྱི་སེམས་འདི་གསུངས་སོ། །ཨེ་མ་ཧོ་ངོ་མཚར་རྨད་ཀྱི་ཆོས། །འགྲོ་འོང་མེད་ལས་འགྲོ་དང་འོང་། །འགྲོ་ཉིད་ནའང་འགྲོ་བ་མེད། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་
གཤེགས་པ་པད་མའི་སྙིང་པོ་དེ་བཞིན་གཤེགས་པ་ཐམས་ཅད་ཀྱི་ནམ་མཁའ་རྡུལ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཨེ་མ་ཧོ་རྟོག་པ་རང་འབྱུང་བ། །རྟོག་ཙམ་ཉིད་ནའང་རྟོག་མི་གནས། །ཐ་དད་མེད་པའི་
ཚུལ་མཆོག་གིས། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྲེད་མེད་ཀྱི་བུས་རྒྱལ་བ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་རོལ་པ་ལྡིང་བ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བཅིངས་པ་མེད་ཅིང་གྲོལ་དུའང་མེད། །ལྷན་ཅིག་སྐྱེས་པ་རྣམ་གྲོལ་བ། །ཡེ་ཤེས་བརྗོད་པ་དང་བྲལ་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་
ལྡན་འདས་དེ་བཞིན་གཤེགས་པ་ལག་བཟངས་སངས་རྒྱས་ཐམས་ཅད་ཀྱི་ཡིད་བཞིན་གྱི་ནོར་བུའི་རྩེ་མོའི་རྒྱལ་མཚན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་ཀུན་བརྗོད་ཏུ་
མེད་པ་སྟེ། །གསང་བ་ཟབ་པའི་གནས་ཉིད་ལ། །བརྗོད་ཙམ་ཉིད་ན་བརྗོད་དུ་མེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཡེ་ཤེས་འབྱུང་གནས་སངས་རྒྱས་ཐམས་ཅད་ཀྱི་ཡེ་ཤེས་འཁོར་ལོས་
སྒྱུར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དོན་དམ་རྟོག་པའི་ཡུལ་མིན་ཕྱིར། །ཆོས་སྐུ་ཡེ་ཤེས་ངོ་བོ་ཉིད། །རང་རིག་ཡེ་ཤེས་སྒྱུ་མའི་དངོས། །བྱང་ཆུབ་ཚུལ་འདི་བསྟན་པའོ་
ཞེས་གསུངས་སོ། །དེ་ནས་བཅོམ་ལྡན་འདས་ཡོན་ཏན་བདེ་སྤྲོས་སངས་རྒྱས་ཐམས་ཅད་ཀྱི་ཡེ་ཤེས་རྔ་སྒྲ་ཀུན་དུ་སྒྲོགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱལ་པོ་དཔུང་

89-1-74b

བཅས་ཡན་ལག་ལྡན། །ཕ་རོལ་རྒོལ་བ་བཟློག་པ་བཞིན། །ཡེ་ཤེས་རྒྱལ་པོ་སྟོབས་ཆེན་ལྡན། །དྲི་མེད་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཚངས་པས་བྱིན་སངས་རྒྱས་ཐམས་ཅད་ཀྱི་ཆོས་ཀྱི་གཎ་ཌི་ཕྱོགས་བཅུར་
སྒྲོགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐེག་པ་སྣ་ཚོགས་དྲང་བའི་ཕྱིར། །ལམ་འདི་རིམ་པར་བསྟན་པ་ཡིན། །གསང་བའི་ཐེག་པ་གཅིག་པ་ཉིད། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རིན་ཆེན་འབྱུང་གནས་སངས་རྒྱས་ཐམས་ཅད་ཀྱི་ཆོས་ཀྱི་དུང་འབུད་པ་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །ཨེ་མ་ཧོ་རྨད་དུ་བྱུང་བའི་ཆོས། །གསང་ཆེན་ཐེག་པ་མཆོག་གཅིག་པུ། །མ་ལུས་དུས་གསུམ་རྒྱལ་བའི་ལམ། །སངས་རྒྱས་ཀུན་གྱི་ཐུགས་རྗེའི་སྤྱན། །གཟིགས་པའི་ཚུལ་འདི་བསྟན་པའོ་ཞེས་གསུངས་སོ། །དེ་
ནས་ཡང་བཅོམ་ལྡན་འདས་དཔལ་རྡོ་རྗེ་འཛིན་པ་དེ་བཞིན་གཤེགས་པ་ཐམས་ཅད་ཀྱི་གནས་དང་། སྤྱོད་ཡུལ་དང་། ཟབ་པ་དང་། རྒྱ་ཆེ་བའི་དེ་ཁོ་ན་ཉིད་ཆོས་ཉིད་ནམ་མཁའ་ཡོངས་སུ་དག་པའི་རང་བཞིན་ལས་ཏིང་ངེ་འཛིན་བསམ་གྱིས་མི་
ཁྱབ་པ་ལ་དགོངས་ནས་ཅང་མི་གསུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་ཐལ་མོ་སྦྱར་ཏེ་ཕྱོགས་གཅིག་ཏུ་བྱང་ཆུབ་
སེམས་དཔའ་སེམས་དཔའ་ཆེན་པོ་ཁྲི་ཕྲག་དགུ་བཅུ་རྩ་དགུ་སྙེད་ཀྱི་བྱང་ཆུབ་སེམས་དཔའི་ཚོགས་ལ་སྨྲས་པ། གང་དུ་དཔལ་རྡོ་རྗེ་འཛིན་པས་གསུངས་པའི་ཆོས་ཐམས་ཅད་ནི་རྟེན་ཅིང་འབྲེལ་པར་འབྱུང་བའི་ཆོས་
ཡིན་ཏེ། རྟེན་ཅིང་འབྲེལ་པར་འབྱུང་བ་གང་ཡིན་པ་ནི་རང་བཞིན་མེད་པའོ། །རྟེན་འབྲེལ་ལས་སྐྱེས་པའི་ཆོས་ཐམས་ཅད་ནི་མ་སྐྱེས་པ། མ་འགགས་པ། དམིགས་སུ་མེད་པ་སྟེ་གནས་པ་མེད་ཅིང་རང་བཞིན་མེད་པ་སྟོང་

89-1-75a

པ་ཉིད་དེ། དེ་ཡང་དངོས་པོ་བར་དངོས་པོ་མེད་པ་གཉིས་སུ་དབྱེར་མེད་པ་སྟེ། མཉམ་པ་ཉིད་ཁོང་དུ་ཆུད་པ་ནི་བྱང་ཆུབ་སེམས་དཔའ་ཆེན་པོ་ཞེས་བྱའོ་ཞེས་སྨྲས་པ་དང་། བྱང་ཆུབ་སེམས་དཔའི་ཚོགས་འདུས་པ་དེ་དག་
ཐམས་ཅད་ཀྱི་སེམས་ཀྱི་རྟོག་པ་ཡོངས་སུ་ཆོད་ནས་ལེགས་སོ་ལེགས་སོ་ཞེས་བརྗོད་ནས་ཅང་མི་སྨྲ་བར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་
གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་ཐུན་མོང་མ་ཡིན་པའི་གསང་བ་རབ་ཏུ་བསྟན་པའི་ལེའུ་སྟེ་བཅུ་དྲུག་པའོ།། །། དེ་ནས་བཅོམ་ལྡན་འདས་ལྷའི་མེ་ཏོག་དེ་བཞིན་གཤེགས་པ་ཐམས་ཅད་ཀྱི་
ཚངས་པའི་གནས་བཞི་ཡོངས་སུ་དག་པར་དམིགས་པ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བྱང་ཆུབ་སེམས་ཀྱི་ཆུ་རྒྱུན་གྱིས། །རང་སེམས་དྲི་མ་བཀྲུ་བར་བྱ། །
དག་པའི་ཐུགས་ནི་ཡེ་ཤེས་ཆེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དོན་ལེགས་སེམས་དཔའི་དེ་བཞིན་གཤེགས་པ་ཕ་རོལ་ཏུ་ཕྱིན་པའི་ཚུལ་དག་པའི་གསང་བ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕ་རོལ་ཕྱིན་ནམ་དག་པའི་གནས། །བརྟུལ་ཞུགས་སྤྱོད་པའི་ཐུན་མོང་ཡུལ། །སྙིང་པོ་དགྱེས་པའི་རྩ་བ་སྟེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །
དེ་ནས་བཅོམ་ལྡན་འདས་ཆོས་ཀྱི་འབྱུང་གནས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྤྲིན་སྤྲོ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གསང་བ་ཆོས་ཉིད་དག་
པ་ཉིད། །ཕྱག་རྒྱ་ཆེན་པོའི་ཚུལ་མཆོག་གིས། །འགྲོ་བའི་བློ་ཡིས་མུན་སེལ་བ། །ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་བློ་གྲགས་པའི་དཔལ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་

89-1-75b

གློག་གི་འོད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕྱི་དང་ནང་དུ་དངོས་པོའི་ཆོས། །དུ་མ་ཉིད་དུ་མི་རྟོག་སྟེ། །ཐམས་ཅད་བརྟེན་པའི་ཚུལ་འབྱུང་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་
བཅོམ་ལྡན་འདས་སྤོབས་པ་བརྩེགས་པ་སངས་རྒྱས་ཐམས་ཅད་ཀྱི་ཡེ་ཤེས་མངོན་པར་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་བཞིན་རྟོག་པའི་ཚོགས་འབྱུང་བ། །རྣམ་པར་བརྟགས་པ་རང་བྱུང་གང་། །
སེམས་གསུམ་སྣང་བའི་ངང་དུ་དག །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་རྡོ་རྗེ་རྒྱལ་མཚན་སངས་རྒྱས་ཐམས་ཅད་ཀྱི་མངོན་པར་རྟོགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །གསང་བ་རབ་ཏུ་འཛིན་པ་ཡིས། །རྣལ་འབྱོར་པ་ནི་བྱང་ཆུབ་མཆོག །སྤྲོས་བཅས་སྤྲོས་མེད་ཚུལ་དག་གིས། །གསང་བ་སྤྱོད་པའི་ཚུལ་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཕན་པར་བཞེད་པ་རྡོ་རྗེས་སངས་རྒྱས་ཐམས་ཅད་ཀྱི་སྙིང་པོ་
ཁྱབ་པའི་ཡེ་ཤེས་ཀུན་དུ་འཕྲུལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདིར་ནི་གང་དུ་རྣམ་ཤེས་དང་། །ཡེ་ཤེས་གཉིས་སུ་མེད་པ་སྟེ། །ཀུན་གཞི་རྟོག་པ་མེད་པར་གསལ། །བྱང་ཆུབ་རྟེན་འབྲེལ་
ཚུལ་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་རྣམ་པར་རོལ་པར་ལྡན་པའི་སྙིང་པོས་སངས་རྒྱས་ཐམས་ཅད་ཀྱི་ཡེ་ཤེས་ནམ་མཁའི་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །ཇི་སྲིད་ནམ་མཁའ་སྟོང་བ་མིན། །རང་སེམས་སྟོང་ཉིད་ནམ་མཁའ་ལས། །རྟོགས་པའི་ཡེ་ཤེས་སྟོང་ཉིད་དེ། །ཀུན་སྟོན་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་མུན་པ་དང་བྲལ་བའི་རྡོ་རྗེ་སངས་རྒྱས་ཐམས་ཅད་ཀྱི་ཡེ་
ཤེས་རྡོ་རྗེའི་དྲ་བས་ཡོངས་སུ་འབྲེལ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་པོ་མེད་ཅིང་རང་སྟོང་པ། །བདེ་ཆེན་ཕྱི་ནང་དམིགས་མེད་པ། །རོ་གཅིག་ཡེ་ཤེས་སྒྱུ་མར་སྣང་། །ཞེན་མེད་ཚུལ་འདི་བསྟན་པའོ་ཞེས་གསུངས་
89-1-76a

སོ། །དེ་ནས་བཅོམ་ལྡན་འདས་ཆོས་ཀྱི་སྙིང་པོ་དག་པ་རྡོ་རྗེ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་དམིགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་
ཟག་དང་ནི་ཆོས་དག་ལ། །བདག་མེད་རྟོགས་ཕྱིར་སེམས་དཔའ་ཆེ། །ས་ལ་གནས་དང་རིགས་ཀྱི་དང་། །ལེགས་སྤྱོད་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཚེ་སྦྱིན་དཔལ་སངས་རྒྱས་ཐམས་ཅད་ཀྱི་རིན་པོ་
ཆེའི་གཏེར་གྱི་བུམ་པ་བཟང་པོའི་བརྒྱན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཆོས་དོན་སྙིང་པོ་ནི། །རྒྱུ་དང་འབྲས་བུར་འབྱུང་བ་ཡི། །ཟབ་མོ་གཏེར་འདྲ་རང་ལས་རྙེད། །གསང་
བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ནོར་བུའི་འབྱུང་གནས་རྒྱལ་པོ་སངས་རྒྱས་ཐམས་ཅད་ཀྱི་རིན་པོ་ཆེའི་རྒྱན་དུ་མར་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །རྣལ་འབྱོར་དབང་ཕྱུག་དུ་མ་ཡིས། །གསང་བའི་སྤྱོད་པའི་ཚུལ་ཀུན་ལ། །རང་གཞན་ཁྱད་པར་དོན་འབྱུང་བས། །སྤྱོད་པའི་ཚུལ་མཆོག་ལྡན་པ་སྟེ། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་སྐྱེ་དབང་
མཚུངས་པ་སངས་རྒྱས་ཐམས་ཅད་ཀྱི་རང་འབྱུང་བ་སྣྲེལ་ཞི་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རབ་རིབ་མེད་པའི་ཚུལ་ཅན་གྱིས། །དྲང་སྲོང་སྐྱོབ་པའི་སྤྱོད་གནས་ཏེ། །ཐུབ་པ་མངོན་
པར་ངེས་འབྱུང་བའི། །ཡོན་ཏན་ཚུལ་འདི་བསྟན་པའོ་ཞེས་གསུངས་སོ། །དེ་ནས་ཡང་བཅོམ་ལྡན་འདས་སྟོབས་ཀྱིས་གཤེགས་པ་སངས་རྒྱས་ཐམས་ཅད་ཀྱི་མངོན་པར་འབྱུང་བ་ཐོབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐོག་མ་མེད་ཅིང་ཐ་མ་མེད། །དབུས་སུ་འབྱུང་བ་ཡང་དག་སྤངས། །ཡེ་ཤེས་ཉེ་བར་བརྒྱན་པ་གང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་བློ་གནས་

89-1-76b

དེ་བཞིན་གཤེགས་པ་ཐམས་ཅད་ཀྱི་རྣམ་པར་རོལ་པ་ཀུན་དུ་བཟང་པོ་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རི་བོ་སྣ་ཚོགས་འདུས་པ་ལ། །རི་རྒྱལ་བརྟན་པར་འགྱུར་བ་གང་། །རྟོག་
མེད་ལྷུན་པོའི་གནས་སུ་སྤྲོ། །དེ་ཉིད་བྱང་ཆུབ་ཚུལ་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་གདུགས་མཛེས་པ་རྡོ་རྗེ་སངས་རྒྱས་ཐམས་ཅད་ཀྱི་བྱང་ཆུབ་ཀྱི་སྙིང་པོར་བསྐུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཡེ་ཤེས་ནམ་མཁའི་དབྱིངས། །ཀུན་དུ་རྟོག་མེད་ལྷམ་མེར་གནས། །དེ་ཉིད་རབ་ཏུ་མི་གནས་པ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་བཅོམ་ལྡན་
འདས་གཙོ་བོ་མཆོག་སངས་རྒྱས་ཐམས་ཅད་ཀྱི་དབང་ཕྱུག་སྤྱོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཤིང་དབང་དྲུང་ནི་རྡོ་རྗེ་ཅན། །མི་འགྱུར་ཡེ་ཤེས་ཨེ་དང་བྃ། །པད་མ་བྷ་
གའི་དབྱིངས་ཅན་ཏེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཤིན་དུ་འཕགས་པའི་དཔལ་སངས་རྒྱས་ཐམས་ཅད་ཀྱི་ཚུལ་གཅིག་པའི་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །དེ་བཞིན་གཤེགས་པ་ཀུན་གྱི་གནས། །རྫོགས་སངས་རྒྱས་ཀྱི་ཡུལ་གྱུར་པ། །ཆོས་ཀུན་བདག་མེད་མཉམ་པ་ཉིད། །ཟབ་མོའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་
དཔལ་སེང་གེའི་སྒྲས་དེ་བཞིན་གཤེགས་པ་ཐམས་ཅད་ཀྱི་མཛད་པ་བརྗོད་དུ་མེད་པའི་ཡང་བརྗོད་དུ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བདག་གཞན་ཐ་དད་མེད། །
བྱམས་པ་ཆེན་པོའི་སྣང་བ་ཡིས། །མི་ཕྱེད་ཆོས་ནི་དོན་གྲུབ་རྒྱུ། །སེམས་ཀྱི་སྤྱོད་ཚུལ་འདི་བསྟན་ནོ་ཞེས་གསུངས་སོ། །དེ་ནས་བཅོམ་ལྡན་འདས་རྣམ་པར་གྲོལ་ལྡན་དཔལ་སངས་རྒྱས་ཐམས་ཅད་ཀྱི་ཞིང་དུ་མར་མེ་ཏོག་རྒྱས་པ་

89-1-77a

ཆེར་སྤྲོ་བའི་རྒྱུན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡང་དག་ཡེ་ཤེས་བཟང་པོ་ཉིད། །རྫུ་འཕྲུལ་འབྱུང་བའི་བློ་ཡི་ནོར། །བདུད་རྩིའི་སྙིང་པོ་རང་ལས་རྙེད། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །སངས་རྒྱས་ཡེ་ཤེས་ལྷུན་གྲུབ་པས། །འདི་ཉིད་རྟོག་མེད་རབ་གསལ་བ། །བསམ་པའི་དངོས་པོ་འཇུག་མི་འགྱུར། །སེམས་ཀྱི་ཀུན་རྟོག་རབ་ཞི་བའོ་ཞེས་གསུངས་སོ། །དེ་བཞིན་གཤེགས་
ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ཞེས་བྱ་བ་ལས་རབ་ཏུ་མི་གནས་པའི་ཡེ་ཤེས་བསྟན་པའི་ལེའུ་སྟེ་བཅུ་བདུན་པའོ།། །། 
དེ་ནས་བཅོམ་ལྡན་འདས་ཀླུའི་འོད་དེ་བཞིན་གཤེགས་པ་ཐམས་ཅད་ཀྱིས་གདུག་པ་ཅན་མ་ལུས་པ་འདུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཤིན་དུ་རྒྱལ་བ་དྲི་མ་མེད། །
སེམས་ཀྱི་གླང་པོ་བཅིང་མི་བྱ། །རང་གྲོལ་གསལ་བ་དག་པའི་ལམ། །རྒྱལ་བས་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་སྤོས་ཀྱི་དབང་ཕྱུག་རྒྱལ་པོ་སངས་རྒྱས་ཐམས་ཅད་ཀྱི་དགྱེས་པ་བསྐྱེད་པ་སྣང་
བའི་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་བསམ་གྱིས་མི་ཁྱབ་སྟེ། །ཆོས་ཀྱི་ཕུང་པོ་དེ་སྙེད་ལས། །རྟོག་པའི་ཡེ་ཤེས་གྱུར་པ་ན། །ཚུལ་འདི་གཅིག་ཏུ་
བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་མེ་ཏོག་གི་རི་བོ་སངས་རྒྱས་ཐམས་ཅད་ཀྱི་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པར་ངེས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །ཐོག་མ་བར་དང་ཐ་མར་ཡང་། །བྱང་ཆུབ་མཆོག་ཏུ་གནས་པ་ཉིད། །ངེས་པ་བསྐྱེད་པ་འབྱུང་བ་ཡིན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཀླུ་དགའ་ཡེ་ཤེས་

89-1-77b

འོད་སངས་རྒྱས་ཐམས་ཅད་ཀྱི་གླང་པོ་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདེ་གཤེགས་ཡེ་ཤེས་གདུང་རྒྱུད་ནི། །བྱང་ཆུབ་སེམས་དཔའ་རྣམས་ཀྱིས་འཛིན། །འབྱུང་པོ་
དུ་མ་ལམ་ལ་འཛུད། །ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཤིན་དུ་གྲགས་པས་སངས་རྒྱས་ཐམས་ཅད་ཀྱི་ཁྱུ་མཆོག་རླབས་པོ་ཆེའི་རྩལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །རང་སེམས་རྒྱལ་པོ་རང་འབྱུང་གནས། །ཤར་ནུབ་མེད་པའི་ཉི་མ་ལས། །རྟོག་མེད་ཅིར་ཡང་གསལ་བ་ཉིད། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་
འདས་སྟོབས་ཀྱི་ལྷ་སངས་རྒྱས་ཐམས་ཅད་ཀྱིས་མངོན་པར་དབང་བསྐུར་བའི་གསང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཐུན་མོང་མ་ཡིན་པའི་བྱང་ཆུབ་ཀྱི་སེམས་འདི་གསུངས་སོ། །དེ་བཞིན་ཉིད་ཀྱིས་དབང་
བསྐུར་བ། །ཐོབ་པའི་ཁྱད་པར་སེམས་ལས་བྱུང་། །འདི་ནི་དུས་གསུམ་ཀུན་དུ་འབྱུང་། །བྱང་ཆུབ་ཟབ་པའི་ཚུལ་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཕྲེང་ལྡན་ཡོན་ཏན་དཔལ་སངས་རྒྱས་ཐམས་ཅད་ཀྱི་
ཡོན་ཏན་དཔལ་རིན་པོ་ཆེའི་ཕྲེང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཀྱིལ་འཁོར་དུ་མ་གསལ་བ་ཡི། །ཡོན་ཏན་རིན་ཆེན་ཚོགས་སྤྲོ་བ། །ཕྱི་དང་ནང་དུ་རྣམ་ཕྱེ་བས། །ཡེ་
ཤེས་ཟབ་པའི་ཚུལ་བརྗོད་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཀླུའི་ལག་སངས་རྒྱས་ཐམས་ཅད་ཀྱི་མཆོད་པའི་གནས་ཀྱིས་བརྒྱན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །འདིར་ནི་སྣང་བ་བླ་མེད་པ། །རྒྱུན་དུ་རང་སེམས་ཆོས་ཀྱི་ཀློང་། །རྒྱུན་མི་འཆད་པ་ཆོས་ཀྱི་སྐུ། །སྙིང་པོའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་སྤྱན་བརྒྱན་པའི་ཞལ་སངས་རྒྱས་

89-1-78a

ཐམས་ཅད་ཀྱི་དེ་བཞིན་ཉིད་ཀྱི་ཏིང་ངེ་འཛིན་དག་པ་ཞེས་བྱ་བ་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དེ་བཞིན་ཉིད་འདི་མི་རྟོག་པ། །གསལ་བ་བརྗོད་བྲལ་ཐམས་ཅད་མཁྱེན། །འོད་གསལ་སྙིང་པོ་ཡེ་ཤེས་
སྐུ། །སྤྲོས་པ་མེད་པའི་ཚུལ་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ལེགས་པར་སྦྱངས་པའི་བློ་སངས་རྒྱས་ཐམས་ཅད་ཀྱི་སོ་སོར་མ་འདྲེས་པ་དྲི་མ་མེད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །ཁྱབ་དང་རྡོ་རྗེ་སྐུ་ཉིད་དང་། །མི་འགྱུར་དུས་ནི་ཐམས་ཅད་དུ། །བརྟན་པ་མེད་པར་རང་འབྱུང་གནས། །བླ་མེད་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཟིལ་གནོན་རྡོ་རྗེས་སངས་རྒྱས་
ཐམས་ཅད་ཀྱི་མཁྱེན་པའི་ཐབས་ལ་མཁས་པའི་ཡེ་ཤེས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཟབ་དང་རྒྱ་ཆེ་གཉིས་མེད་པ། །སྤྱོད་ཡུལ་ཐབས་ལ་མཁས་པ་ཡིས། །རྣམ་པར་གྲོལ་
བའི་འབྲས་ཐོབ་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཡེ་ཤེས་ལ་རོལ་པ་སངས་རྒྱས་ཐམས་ཅད་ཀྱི་བྱང་ཆུབ་བདེ་བའི་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །གསང་བ་རོ་གཅིག་རྡོ་རྗེ་འཆང་། །གསང་བ་གསུམ་ན་སྐུ་གསུང་ཐུགས། །དེ་ཉིད་ལྔར་ནི་རབ་བསྒྲགས་པ། །དམ་པའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་མཐའ་ཡས་པའི་སྤྱན་སངས་
རྒྱས་ཐམས་ཅད་ཀྱི་གསང་བ་རྣམ་པར་དབེན་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལུས་དང་ངག་དང་ཡིད་རྣམས་ནི། །རྡོ་རྗེ་གསུམ་དུ་རྣམ་དག་པས། །སངས་རྒྱས་རྣམས་ཀྱི་སྐུ་
གསུང་ཐུགས། །རྡོ་རྗེའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་བདེན་པར་གསུངས་པས་སངས་རྒྱས་ཐམས་ཅད་ཀྱི་སྙིང་པོ་འོད་ཀྱི་དྲ་བར་འཆར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་

89-1-78b

སེམས་འདི་གསུངས་སོ། །སངས་རྒྱས་སྐུ་ནི་ཀུན་ཁྱབ་པས། །དེ་ཉིད་སྐུ་ལ་རབ་སྣང་བ། །ཞིང་ཁམས་རྡུལ་ཕྲན་སྐུར་འདུས་པ། །མི་ཟད་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཉི་མའི་འོད་སངས་རྒྱས་ཐམས་
ཅད་ཀྱི་ཡེ་ཤེས་དག་པ་ཡོངས་སུ་འཛིན་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་གསུང་ནི་ཀུན་སྒྲོག་པ། །དེ་ནས་གསུང་དུ་རབ་བརྗོད་པ། །སྣ་ཚོགས་སྒྲ་ནི་གསུང་གྱུར་པ། །
དེ་ནི་གསུང་གཅིག་ཚུལ་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ངེས་པའི་བློ་སངས་རྒྱས་ཐམས་ཅད་ཀྱི་ཐུགས་གནས་པ་མེད་པའི་ཡེ་ཤེས་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཐུགས་ནི་བསམ་མི་ཁྱབ། །ཡེ་ཤེས་མཁྱེན་པ་གཅིག་པའི་ཐུགས། །དྲི་མེད་མཉམ་པ་ཉིད་གང་ཡིན། །རྟོག་མེད་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་
འདས་མཐའ་ཡས་གཟུགས་སངས་རྒྱས་ཐམས་ཅད་ཀྱི་སྙིང་པོ་ཡེ་ཤེས་རྡོ་རྗེ་མཆོག་ཏུ་བསྟན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཉམ་ཉིད་གནས་པས་བླང་དོར་མེད། །དུས་
གསུམ་ཐ་དད་གཟིགས་པ་མེད། །སྐད་ཅིག་ཡེ་ཤེས་བདེ་བའི་དངོས། །ཆོས་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་འོད་མི་ཟད་པས་སངས་རྒྱས་ཐམས་ཅད་ཀྱིས་ཕས་ཀྱི་རྒོལ་བ་ཟློག་པར་མཛད་པ་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དཔའ་བོ་སེང་གེའི་ལྟ་སྟངས་ཀྱིས། །མུ་སྟེགས་བདུད་ཚོགས་ལས་རྒྱལ་བའི། །ཚད་མེད་སྙིང་རྗེས་བསྐུལ་བར་བྱ། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་རིན་ཆེན་རྟོག་གིས་ཆོས་ཐམས་ཅད་ཀྱི་རྗེས་སུ་འགྲོ་བའི་སྒོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྡོ་རྗེ་འབར་

89-1-79a

བ་འོད་འཕྲོ་བ། །ཡེ་ཤེས་ཟླ་བ་ལ་གནས་པ། །བྱང་ཆུབ་སེམས་ནི་འཛིན་པ་ཡིས། །དྲི་མེད་ཆུ་རྒྱུན་ཚུལ་བསྟན་པའོ་ཞེས་གསུངས་སོ། །དེ་ནས་སངས་རྒྱས་ཐེ་ཚོམ་རྣམ་པར་སྤངས་པས་སངས་རྒྱས་
ཐམས་ཅད་ཀྱི་མེ་ཏོག་གི་སྙེ་མ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གཅིག་ཏུ་མཆོག་གནས་མི་འགྱུར་བ། །ཚིག་དོན་དབྱེ་བ་དམ་པའི་ཆོས། །བསྟན་པའི་སྙིང་པོ་བླ་མེད་ལམ། །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དུས་གསུམ་རྒྱལ་བ་མ་ལུས་ལ། །རབ་འབྱམ་མཆོད་པའི་སྤྲིན་གྱིས་ནི། །ཀུན་དུ་ཁྱབ་ཅིང་སྟོན་པ་པོ། །འདི་ནི་ཡེ་ཤེས་ཀུན་གྱི་གཏེར། །དེ་བཞིན་གཤེགས་པ་ཐམས་ཅད་ཀྱི་སྐུ་
གསུང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས། འབྱུང་འཇུག་གནས་པར་དག་པ་ཀུན་དུ་ཡེ་ཤེས་སྟོན་པའི་ལེའུ་སྟེ་བཅྭ་བརྒྱད་པའོ།། །། དེ་ནས་བཅོམ་
ལྡན་འདས་དེ་བཞིན་གཤེགས་པ་འཇིག་རྟེན་ལས་འདས་པ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྣང་བ་ཞེས་བྱ་བའི། ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཚན་རྣམས་
རྫོགས་པ་ཡེ་ཤེས་སྐུ། །དངོས་པོ་མེད་ཅིང་སྣང་བའི་དངོས། །རྟོག་པ་མེད་པ་མི་གནས་པ། །ཁྱད་པར་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དོན་ཡོད་རྣམ་པར་མཐོང་བ་སངས་རྒྱས་ཐམས་ཅད་ཀྱི་སྐྱེ་བའི་
ཆོ་འཕྲུལ་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་གྲོལ་བ་ཞི་བའི་ལམ། །བཅིང་མེད་ཡེ་ཤེས་བཀོད་མའི་ཆུ། །དམ་ཚིག་གསང་བ་སྡོམ་པ་ལས། །གསང་བའི་ཚུལ་
འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྟོགས་པ་མཛད་པ་སངས་རྒྱས་ཐམས་ཅད་ཀྱིས་མངོན་པར་བྱང་ཆུབ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་

89-1-79b

འདི་གསུངས་སོ། །རྟོག་མེད་འབྲས་བུ་དག་པའི་ངང་། །ཆོས་རྣམས་སྟོང་ཉིད་སྙིང་རྗེར་གཅིག །ཐ་དད་སྤངས་པ་ལམ་གྱི་མཆོག །ཟབ་པའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་མེ་ཏོག་རྒྱལ་མཚན་
ཐམས་ཅད་ཀྱི་རྫུ་འཕྲུལ་མངོན་པར་འབྱུང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །བླ་མའི་བྱིན་བརླབས་བདུད་རྩི་ལས། །འཐུང་བ་ཡེ་ཤེས་བཅུད་ཀྱིས་རྒྱས། །ཚེ་འདིར་གྲུབ་པ་
མཆོག་སྟེར་བ། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་རི་དབང་གི་རྒྱལ་པོ་སངས་རྒྱས་ཐམས་ཅད་ཀྱི་ཀུན་བརྗོད་པའི་ཆོ་འཕྲུལ་སྟོན་པའི་ཏིང་ངེ་འཛིན་ལ་སྙོམས་པར་
ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །དམ་ཚིག་འདི་ནི་རྨད་པོ་ཆེ། །དུས་གསུམ་འབྱུང་བ་རྟག་པ་གང་། །ཐམས་ཅད་བདག་ཉིད་བདེ་བར་གཤེགས། །སྙིང་པོའི་ཚུལ་འདི་བསྟན་པའོ་ཞེས་གསུངས་སོ། །
དེ་ནས་བཅོམ་ལྡན་འདས་དེ་བཞིན་གཤེགས་པ་གཟི་བརྗིད་ཆེན་པོས་སངས་རྒྱས་ཐམས་ཅད་ཀྱི་ཚུལ་གཅིག་པ་སྤྱོད་པའི་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
རྣམ་པ་ཀུན་དུ་སྡོམ་པ་གང་། །རིགས་ཀྱི་གནས་སུ་གང་བྱུང་བར། །སྐུ་གསུང་ཐུགས་ནི་ཡེ་ཤེས་ཅན། །དྲན་པ་མ་ལུས་ཚུལ་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དོན་མཛད་གཟིགས་པའི་
སངས་རྒྱས་ཐམས་ཅད་ཀྱི་ཁམས་མ་ལུས་པ་ལ་བྱིན་གྱིས་བརློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐམས་ཅད་ཡེ་ཤེས་གཅིག་པར་སྡོམ། །དེ་ཉིད་འགྱུར་མེད་ཟག་པ་བྲལ། །སྙིང་པོ་
རོལ་པ་རང་བྱུང་བ། །སངས་རྒྱས་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་མཁྱེན་པ་གྲགས་པ་མཐའ་ཡས་སངས་རྒྱས་ཐམས་ཅད་ཀྱི་ཆོས་ཉིད་ཀྱི་མེ་ལོང་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་

89-1-80a

ཀྱི་སེམས་འདི་གསུངས་སོ། །དྲི་མེད་ཡེ་ཤེས་སྒྱུ་མའི་ངང་། །ཕུང་པོ་ལ་སོགས་རྟོག་བྲལ་བ། །འདི་ནི་ཀུན་རྫོབ་རྣམ་ཐར་སྒོ། །རྡོ་རྗེ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་སྒྲ་གཅན་ལྷས་དེ་
བཞིན་གཤེགས་པ་ཐམས་ཅད་ཀྱི་ཀུན་ནས་ཡེ་ཤེས་ཀྱི་སྒོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལས་དང་ལས་ཀྱི་འབྲས་བུ་ནི། །ཀུན་ནས་དཀྲིས་པ་སྣ་ཚོགས་པ། །སྟོང་ཉིད་
ཡེ་ཤེས་མེས་བསྲེག་པ། །རྡོ་རྗེའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རི་བོའི་རྒྱལ་མཚན་གྱིས་འཁོར་བ་སྣ་ཚོགས་པའི་མུན་པ་སེལ་བ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་གྲོལ་བ་བདེ་བ་ཡི། །འཇིག་རྟེན་ལྷ་ལས་འདས་ནས་ནི། །སྣང་བ་མེད་པའི་དབྱིངས་སུ་འགྲོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་
ལྡན་འདས་རིན་ཆེན་སྙིང་པོས་སྲིད་པ་ཐམས་ཅད་དབུགས་འབྱིན་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འགྲོ་བའི་མཚན་མའི་དངོས་པོ་རྣམས། །སྲིད་གསུམ་རང་བཞིན་
མེད་མཐོང་བས། །ཡེ་ཤེས་འོད་གསལ་མི་ཕྱེད་པའི། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཤིན་དུ་མཐོར་གཤེགས་ཀྱིས་སངས་རྒྱས་ཐམས་ཅད་ཀྱི་ཆོས་ཉིད་གཅིག་པའི་ལམ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣང་བ་དང་ནི་མུན་པ་དག །རྟོག་པའི་ཆོས་ཉིད་གཟིགས་མེད་ཕྱིར། །ཐ་དད་སྣང་བ་ནུབ་པའི་དངོས། །ཡེ་ཤེས་ཚུལ་འདི་བསྟན་པའོ་ཞེས་གསུངས་
སོ། །དེ་ནས་བཅོམ་ལྡན་འདས་སྐར་རྒྱལ་སངས་རྒྱས་ཐམས་ཅད་ཀྱི་འཁོར་ལོ་བསྐོར་བ་ཆོས་ཀྱི་ལམ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདི་ནི་སྒྲིབ་པ་མེད་པའི་ལམ། །

89-1-80b

སྡུག་པ་རབ་ཞི་བརྩེ་བ་ཅན། །བྱང་ཆུབ་སེམས་ཀྱི་སྙིང་པོ་ཉིད། །དྲི་མེད་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་གཙུག་རིངས་སངས་རྒྱས་ཐམས་ཅད་ཀྱི་སྙིང་པོ་མིག་འཕྲུལ་སྟོན་པ་ཞེས་བྱ་བའི་ཏིང་
ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐམས་ཅད་ཡེ་ཤེས་སྣང་བའི་དངོས། །སེམས་ཅན་རྟོག་པ་ཡུལ་མེད་ཕྱིར། །གཉིས་སྣང་མ་ལུས་བཅོམ་ནས་ནི། །གཉིས་མེད་ཚུལ་འདི་བསྟན་པའོ་
ཞེས་གསུངས་སོ། །དེ་ནས་བཅོམ་ལྡན་འདས་རིན་ཆེན་གྲགས་པ་སངས་རྒྱས་ཐམས་ཅད་ཀྱི་ཡེ་ཤེས་དབྱིངས་སུ་གཅིག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣོད་
བཅུད་མ་ལུས་རིན་ཆེན་གཞི། །ལྷ་མིའི་སྣང་བ་སྟོན་པ་ཆེ། །ཐུབ་པ་འགྲོ་བའི་དོན་སྤྱོད་པའི། །ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཉི་ཟླའི་སྙིང་པོས་སངས་རྒྱས་ཐམས་ཅད་ཀྱི་ཡེ་
ཤེས་འཕོ་བ་མེད་པར་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལུས་ལ་འཕོ་བའི་ཡེ་ཤེས་གང་། །རྣམ་པར་ཤེས་པའི་གཟུགས་བརྟེན་ནས། །གཅིག་པུ་མི་འགྱུར་
དངོས་མེད་སེམས། །རྡོ་རྗེའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཉི་མའི་འོད་ལྡན་སངས་རྒྱས་ཐམས་ཅད་ཀྱི་དཀྱིལ་འཁོར་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །དང་པོའི་ལུས་ནི་ལྷ་ཡི་དངོས། །ལུས་དབེན་སྣང་བ་རྟེན་འབྲེལ་ཏེ། །སེམས་ཉིད་ཡེ་ཤེས་སྟོང་ཉིད་དེ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་ཡང་བཅོམ་ལྡན་འདས་སྐར་མཁན་སངས་
རྒྱས་ཐམས་ཅད་ཀྱི་རྡོ་རྗེའི་སྣང་བ་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདི་ནི་ཀུན་རྟོག་ཡེ་ཤེས་ཆེ། །བདེ་བ་ཆོས་ཀྱི་དབྱིངས་ཉིད་ལས། །ཟུག་རྔུ་བྲལ་བ་བྱང་

89-1-81a

ཆུབ་སེམས། །རྡོ་རྗེའི་ཚུལ་འདི་བསྟན་པའོ། །ཞེས་གསུངས་སོ། །དེ་ནས་བཅོམ་ལྡན་འདས་སེང་གེའི་རྟོག་སངས་རྒྱས་ཐམས་ཅད་ཀྱི་སྟོབས་མི་ཟད་པའི་ཡེ་ཤེས་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་གཉིས་མེད་མཉམ་པའི་དངོས། །འབར་བའི་ཕྲེང་བ་འཁྲིགས་པའི་འོད། །མི་ཟད་ཕུན་སུམ་ཚོགས་པའི་གཞི། །དབྱེར་མེད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་
བཅོམ་ལྡན་འདས་དུས་མཁྱེན་རྒྱལ་པོས་སངས་རྒྱས་ཐམས་ཅད་ཀྱི་ཕུན་སུམ་ཚོགས་པ་བླ་ན་མེད་པའི་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདག་གཞན་དབྱེར་
མེད་བྱང་ཆུབ་སེམས། །བདེ་བ་ཆེན་པོ་སེམས་ལ་རྙེད། །ངལ་སོའི་གནས་ནི་བླ་ན་མེད། །དབྱེར་མེད་ཚུལ་འདི་བསྟན་པའོ། །ཞེས་གསུངས་སོ། །དེ་བཞིན་གཤེགས་པ་རྣམས་ཀྱིས་ནི། །སྐུ་གསུང་ཐུགས་ནི་གཅིག་སྦྱོར་བ། །བྱང་
ཆུབ་སེམས་དཔའ་ཆེ་རྣམས་ཀྱིས། །རྗེས་སུ་བསྔགས་པ་བརྗོད་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་
པར་རྒྱལ་བ་ཞེས་བྱ་བ་ལས་སངས་རྒྱས་ཐམས་ཅད་ཀྱི་དགོངས་པ་ཉེ་བར་བསྟན་པ་ཞེས་བྱ་བའི་ལེའུ་སྟེ་བཅུ་དགུ་པའོ།། །། དེ་ནས་ཡང་བཅོམ་ལྡན་འདས་དཔལ་གྱི་སྙིང་པོ་དེ་བཞིན་གཤེགས་པ་ཐམས་ཅད་
ཀྱི་ཡེ་ཤེས་རྣམ་པར་རོལ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་སྲོག་དང་སྙིང་པོ་མེད། །གནས་པ་མེད་ཅིང་ཀུན་འབྱུང་བ། །བར་མ་དོ་ཡི་རྣམ་ཤེས་ལྟར། །
འབྱུང་བའི་ཚུལ་འདི་བསྟན་པའོ། །ཞེས་གསུངས་སོ། །དེ་ནས་བཅོམ་ལྡན་འདས་སྲིད་མཐའ་གཟིགས་པས་སངས་རྒྱས་ཐམས་ཅད་ཀྱི་སྙིང་པོ་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་

89-1-81b

གསུངས་སོ། །དབང་པོ་ཡུལ་ལ་རྣམ་སྤྲོ་བ། །དེ་ཉིད་བཟློག་སྟེ་སེམས་གནས་པ། །ལམ་དུ་བྱེད་པའི་ངོ་བོ་ཉིད། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་ཡང་བཅོམ་ལྡན་འདས་གློག་གི་འོད་སངས་རྒྱས་ཐམས་
ཅད་ཀྱི་བསྲུང་བ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱལ་བ་ཡེ་ཤེས་འོད་ཀྱིས་ནི། །རྟོག་པའི་དྲི་མ་རྣམ་སེལ་བ། །དེ་ཉིད་རྣམ་གྲོལ་བསྟན་པ་གང་། །གཉིས་མེད་
ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་གསེར་གྱི་རི་བོས་སངས་རྒྱས་ཐམས་ཅད་ཀྱི་འོད་མཆོག་མ་ལུས་པ་རྣམ་པར་འབྱེད་པའི་ཡེ་ཤེས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །དྲི་མེད་ལྷུན་གྲུབ་ཡེ་ཤེས་རང་འབྱུང་བ། །འོད་གསལ་ཆོས་དབྱིངས་སྙིང་པོ་བླ་ན་མེད། །ཆོས་ཉིད་ཆོས་ཅན་དབྱེར་མེད་བདེ་བ་ཆེ། །མཉམ་ཉིད་གནས་པ་ཚུལ་འདི་བསྟན་པའོ་ཞེས་གསུངས་སོ། །
དེ་ནས་བཅོམ་ལྡན་འདས་དེ་བཞིན་གཤེགས་པས་སེང་གེས་བྱིན་པ་སངས་རྒྱས་ཐམས་ཅད་ཀྱི་ཕུན་སུམ་ཚོགས་པའི་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
མཉམ་ཉིད་མཉམ་པའི་ངོ་བོ་ཉིད། །དག་པའི་ས་ཡི་དབང་ཕྱུག་གར། །རྫོགས་པའི་གཙུག་ཏོར་དམ་ཚིག་ཆེ། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་གཞན་གྱིས་མི་ཐུབ་པའི་རྒྱལ་བས་རྒྱལ་
མཚན་སངས་རྒྱས་ཐམས་ཅད་ཀྱི་བསམ་གྱིས་མི་ཁྱབ་པའི་ཡེ་ཤེས་ལ་འཇུག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །རྒྱལ་བ་རྒྱལ་མཚོ་ཀུན་གྱི་རང་བཞིན་ཐུགས། །དུས་
གསུམ་སངས་རྒྱས་སྐྱེ་མེད་ངོ་བོར་མཉམ། །རྣལ་འབྱོར་རང་སེམས་གཅིག་པུར་གཉིས་སུ་མེད། །ཁྱད་པར་མེད་པའི་ཚུལ་འདི་བསྟན་པའོ། །ཞེས་གསུངས་སོ། །དེ་ནས་སངས་རྒྱས་མཆོག་དགའ་གྲགས་པས་སངས་རྒྱས་

89-1-82a

ཐམས་ཅད་ཀྱི་ཡེ་ཤེས་མཆོག་ཏུ་གསང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྙིང་པོ་སྒྱུ་མའི་རང་བཞིན་ཉིད། །ཆོས་ཉིད་ཡོངས་སུ་དག་པ་གང་། །སངས་རྒྱས་ངོ་བོ་
ཉིད་ཀྱིས་འགྲུབ། །འདི་ནི་བྱང་ཆུབ་ཚུལ་བསྟན་པའོ། །ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་བརྩོན་འགྲུས་བསྟན་པ་སངས་རྒྱས་ཀྱི་ཡེ་ཤེས་ལ་སྤྱོད་པ་མཐའ་ཡས་པ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་གསང་བ་གཉིས་པོ་ནི། །ཕྱོགས་བཅུའི་ཞིང་ཁམས་རང་ལ་གནས། །རང་ཉིད་རྟོག་མེད་ཡེ་ཤེས་སྐུ། །འདི་ནི་བྱང་ཆུབ་ཚུལ་བསྟན་པའོ། །ཞེས་གསུངས་
སོ། །དེ་ནས་བཅོམ་ལྡན་འདས་གྲགས་པ་རྫོགས་པས་སངས་རྒྱས་ཐམས་ཅད་ཀྱི་གདུལ་བྱའི་སྣང་བ་ངེས་པར་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །ལུས་མེད་དབང་པོའི་ཕུག་གནས་
ཤིང་། །རིང་དུ་འགྲོ་ཞིང་གཅིག་པུར་རྒྱུ། །གདུལ་བར་དཀའ་བའི་སེམས་འདུལ་བྱེད། །འདི་ནི་བྱང་ཆུབ་ཚུལ་བསྟན་པའོ། །ཞེས་གསུངས་སོ། །དེ་ནས་བཅོམ་ལྡན་འདས་བསྙེམས་པ་དང་བྲལ་བས་འདུལ་བ་སྣ་ཚོགས་པའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བློ་ལྡན་ས་གསུམ་འགྲུབ་པའི་གཞི། །ཡོན་ཏན་འབྱུང་གནས་རིན་ཆེན་སེམས། །བསམ་པའི་དགོས་འདོད་སྐོང་བྱེད་ལ། །ཁྱད་པར་ཚུལ་འདི་བསྟན་པའོ་ཞེས་གསུངས་སོ། །དེ་
ནས་བཅོམ་ལྡན་འདས་མཆོད་འོས་ལྷས་སངས་རྒྱས་ཐམས་ཅད་ཀྱི་རྗེས་སུ་འགྲོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཁྱབ་བདག་དཔལ་ལྡན་རྡོ་རྗེའི་སྐུ། །འདི་ཉིད་ལུས་ནི་དྲི་
མ་མེད། །ཆོས་ཅན་མ་གྲུབ་རང་སར་དག །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་མ་སྒྲོལ་མ་ཆེན་པོ་ཞེས་བྱ་བས་སངས་རྒྱས་ཐམས་ཅད་ཀྱི་རྣམ་པར་མི་གཡོ་བའི་བཀོད་པ་ཞེས་བྱ་བའི་ཏིང་

89-1-82b

ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕུང་པོ་ལ་སོགས་དངོས་མེད་པ། །གང་ཟག་བདག་མེད་སྟོང་པ་ཉིད། །ཆོས་ལ་དམིགས་པ་རྟོག་པ་བྲལ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་
སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འཇིག་རྟེན་འོད་སངས་རྒྱས་ཐམས་ཅད་ཀྱི་བྱང་ཆུབ་སྙིང་པོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རིལ་པོར་འཛིན་པ་བསྡུ་
བ་དང་། །རྗེས་སུ་གཞིག་པ་སྤྲོ་བ་ཉིད། །གཉིས་མེད་བསམ་གཏན་ལ་གནས་པ། །གཅིག་པུ་བྱེད་པའི་ཚུལ་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་སྤོས་དྲི་ཞིམ་པས་སངས་རྒྱས་ཐམས་ཅད་ཀྱི་ཆོས་ཉིད་བདེ་བ་ཆེན་
པོའི་ཚུལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡེ་ཤེས་བདེ་བ་ཆེན་པོའི་ངང་། །རྟག་ཏུ་བཞུགས་པའི་ངོ་བོ་ཉིད། །རང་འབྱུང་འགྱུར་མེད་སྙིང་པོ་ཆེ། །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །དེ་ནས་བཅོམ་ལྡན་འདས་ཡོན་ཏན་མཆོག་འཛིན་སངས་རྒྱས་ཐམས་ཅད་ཀྱི་དགོངས་པ་འདུས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དྲི་མེད་
སྒྱུ་མའི་ཆོས་ཉིད་ནི། །ཡོད་མེད་ཐ་དད་ལས་འདས་པ། །སྣང་ལ་རང་བཞིན་མེད་པ་ཉིད། །འགག་མེད་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་མུན་པ་དང་རྣམ་པར་བྲལ་བས་འགྲོ་བ་ཐམས་ཅད་ཀྱི་བློའི་
མུན་པ་སེལ་བ་ཡེ་ཤེས་ཀྱི་རོལ་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདི་ཉིད་རང་བཞིན་མི་དམིགས་པས་ཡོངས་སུ་དག་པར་ཤེས་པར་བྱ། །ཟུང་འཇུག་དེ་བཞིན་ཉིད་ལས་ནི། །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་སེང་གེའི་འགྲམ་པ་དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་རྟོག་མེད་དབྱིངས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་

89-1-83a

ཀྱི་སེམས་འདི་གསུངས་སོ། །མཉམ་པ་ཉིད་ལས་གང་འབྱུང་བའི། །བདེ་ཆེན་རང་འབྱུང་རང་ཉིད་ནི། །མི་ཟད་རྒྱན་གྱི་འཁོར་ལོ་སྟེ། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་རིན་ཆེན་གྲགས་པས་སངས་རྒྱས་ཐམས་ཅད་ཀྱི་
གཉིས་མེད་མཉམ་པ་རང་བྱུང་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གསང་བ་རང་བྱུང་བརྟན་གཡོ་བཅས། །ཐམས་ཅད་རང་ཉིད་དཀྱིལ་འཁོར་དང་། །བདེ་ཆེན་ཟབ་པའི་ཚུལ་རྡོ་རྗེ། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་སྐྱོན་རབ་ཞི་བས་སངས་རྒྱས་ཐམས་ཅད་ཀྱི་ཡེ་ཤེས་སྒྲོན་མེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟག་ཏུ་དམིགས་པར་བཅས་
པ་ཡི། །ཕྱག་རྒྱ་ཆེན་པོ་དངོས་མེད་དེ། །དངོས་མེད་ངོ་བོ་ཉིད་དུ་དག །རིན་ཆེན་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་བདུད་རྩི་འཆང་བས་སངས་རྒྱས་ཐམས་ཅད་ཀྱི་མིག་འཕྲུལ་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཀུན་གྱི་དགོངས་པ་ནི། །སྟོང་ཉིད་སྙིང་རྗེ་དབྱེར་མེད་པ། །བྱང་ཆུབ་སེམས་ཀྱི་ངོ་བོར་གཅིག །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་བྱང་ཆུབ་སེམས་
དཔའ་ཆེ། །ཀུན་དུ་བཟང་པོས་སླར་གསོལ་པ། །དྲི་མེད་མཉམ་པ་ཡེ་ཤེས་སྐུ། །སངས་རྒྱས་ཐམས་ཅད་བདག་ཉིད་དེ། །གནས་དང་སྟོན་པ་རང་བྱུང་བ། །ཆེ་བའི་བདག་ཉིད་སླད་གནས་པ། །དཔལ་མཆོག་གསང་བ་འདི་ཉིད་དུ། །སྐལ་ལྡན་རྒྱལ་
བ་བླ་ན་མེད་ཅེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་ཐུགས་ཀྱི་གསང་བ་གསང་བ་འདུས་པ་སངས་རྒྱས་ཐམས་ཅད་ཀྱི་དཀྱིལ་འཁོར་རང་བྱུང་དུ་བསྟན་པའི་བདག་ཉིད་རྣལ་འབྱོར་ཆེན་པོ་གཉིས་སུ་མེད་པ་
མཉམ་པ་ཉིད་རྣམ་པར་རྒྱལ་བ་ལས་ལེའུ་ཉི་ཤུ་པའོ།། །། དེ་ནས་ཕྱོགས་བཅུའི་སངས་རྒྱས་བཅོམ་ལྡན་འདས། །དེ་བཞིན་གཤེགས་པའི་ཚོགས་བཅས་དཔག་མེད་དང་། །རྣལ་འབྱོར་དབང་ཕྱུག་བྱང་ཆུབ་སེམས་དཔའི་ཚོགས། །རིགས་དང་

89-1-83b

ལྷ་མོར་བཅས་པ་དཔག་མེད་དང་། །ཁྲོ་བོའི་རྒྱལ་པོ་དུ་མར་བཅས་པ་དག །གསང་བའི་དཀྱིལ་འཁོར་གཅིག་ཏུ་འདུས་བྱས་ནས། །བཅོམ་ལྡན་དེ་བཞིན་གཤེགས་པ་ཀུན་གྱི་གཙོ། །བྱང་ཆུབ་སེམས་ཀྱི་རྡོ་རྗེའི་བདག་པོ་ལ། །ཚོགས་པ་འདུས་པ་བརྗོད་ཀྱིས་མི་
ལང་བའི། །འཁོར་གྱི་དཀྱིལ་འཁོར་རྣམས་ཀྱིས་དཔག་མེད་ལྡན། །མཆོད་པའི་རིམ་པ་ཕྱི་ནང་གསང་བ་དང་། །དེ་ཁོ་ན་ཉིད་རྣམ་པ་མཐའ་ཡས་པས། །ཡེ་ཤེས་རྒྱལ་བ་མི་ཟད་དམ་ཚིག་གི། །རིན་ཆེན་སྤྲིན་གྱིས་ཡང་དག་པར་མཆོད་དེ། །མགོ་བོས་ཕྱག་འཚལ་
ནས་ནི་འདི་སྐད་གསོལ། །ཕྱོགས་བཅུ་དུས་གསུམ་དེ་བཞིན་གཤེགས་པའི་ཚོགས། །མ་ལུས་འདུས་པ་ཀུན་གྱི་གསང་བའི་དོན། །ཐོག་མ་དབུས་མཐར་གནས་པ་ཡེ་ཤེས་ཆེ། །གསང་བ་རྡོ་རྗེ་སྙིང་པོ་ལྷན་ཅིག་སྐྱེས། །བརྗོད་བྱ་བླ་མེད་གྱུར་
པས་འདུས་པའི་ཆོས། །སྙིང་པོའི་འབྲས་བུ་ཀུན་གྱི་རྩ་བ་གང་། །ཐབས་དང་བསྟན་པ་དེ་ཡི་ཁྱད་པར་མང་། །བཅོམ་ལྡན་དྲི་མེད་གསང་བ་བཤད་དུ་གསོལ། །དེ་ནས་བཅོམ་ལྡན་དེ་བཞིན་གཤེགས། །དཔལ་ལྡན་བྱང་ཆུབ་སེམས་རྡོ་རྗེས། །དེ་བཞིན་གཤེགས་
པའི་ཚོགས་རྣམས་ལ། །གསང་བ་བྱང་ཆུབ་བཀའ་སྩལ་ཏོ། །ཕུན་སུམ་ཚོགས་པའི་འཁོར་རྣམས་ལ། །རབ་ཏུ་གཟིགས་ནས་དགྱེས་གྱུར་པས། །བཅོམ་ལྡན་དེ་བཞིན་གཤེགས་པ་རྣམས། །གནས་འདི་ཞུས་པ་ཤིན་དུ་ལེགས། །ལེགས་སོ་ལེགས་སོ་སེམས་དཔའ་
ཆེ། །ཟབ་ཅིང་རྒྱ་ཆེ་མཆོག་གི་ཡུལ། །འོན་ཀྱང་འདིར་ནི་བདེ་གཤེགས་ཀྱང་། །ཐེ་ཚོམ་འཇུག་པའི་གནས་ཡིན་ན། །དེ་ལས་གཞན་པར་གྱུར་པ་ཡི། །བྱང་ཆུབ་སེམས་དཔར་གྱུར་པའི་ཚོགས། །དེ་ལས་སྤྱོད་ཡུལ་ལྟ་ཅི་སྨོས། །དེ་ནས་བཅོམ་ལྡན་འདས་ཐམས་
ཅད། །མཆོག་དོན་ངོ་མཚར་སྤྱོད་པ་དང་། །ཐུན་མོང་གནས་ལ་དམད་གྱུར་པ། །ཟབ་པ་དང་ནི་རྒྱ་ཆེ་ལ། །ཐེ་ཚོམ་ཐམས་ཅད་གཅོད་མཛད་པ། །དཀྱིལ་འཁོར་ས་ཡི་བདག་པོ་ལ། །འདི་སྐད་ཅེས་ནི་ཞུས་པར་འགྱུར། །གནས་དང་དུས་དང་ཕྱག་རྒྱ་དང་། །འདུས་པ་ཁྱད་པར་གྱུར་
པ་ལའང་། །གསང་བ་དབྱིངས་ཀྱི་དཀྱིལ་འཁོར་དུ། །ཚད་མེད་ཡེ་ཤེས་ཞིང་ཁམས་ཀྱི། །སྣང་བ་རབ་ཏུ་རྒྱས་པ་ལ། །རྒྱུ་ཐབས་ཁྱད་པར་གྱུར་པ་ཡི། །གསང་ཆེན་སྐུ་གསུང་ཐུགས་ཀྱི་གསང་། །དེ་ཉིད་འདུས་པ་འདི་མཆོག་ཏུ། །སྟོན་པ་འཕྲོ་བར་མ་གྱུར་པ། །དེ་སྲིད་དུ་ནི་ཀུན་

89-1-84a

མཁྱེན་གྱིས། །ལྷན་ཅིག་སྐྱེས་པའི་འདུས་པ་ལས། །ལུས་ངག་ཡིད་ནི་བྱིན་བརླབ་ཅིང་། །ཁྱད་པར་མཆོག་དབང་བསྐུར་མཛད་དེ། །ཕྱི་ནང་གསང་བའི་རིམ་ཕྱེ་བ། །བུམ་པ་དང་ནི་གསང་བ་དང་། །ཤེས་རབ་ཡེ་ཤེས་དེ་
བཞིན་དུ། །རབ་ཏུ་བསྐུར་བས་སྨིན་བྱས་ནས། །དེ་བཞིན་གཤེགས་པ་ཐམས་ཅད་ཀྱི། །གསང་བ་བྱང་ཆུབ་སེམས་རྡོ་རྗེ། །རྟོགས་དཀའ་མི་ཕྱེད་དམ་ཚིག་གིས། །གང་ཕྱིར་དགོངས་ཏེ་བཤད་པ་དང་། །དགོངས་མིན་དྲང་བའི་དོན་
གྱུར་དང་། །ངེས་དོན་ཇི་བཞིན་པ་དང་ནི། །ཇི་བཞིན་མ་ཡིན་རྣམ་ཕྱེ་བས། །ཡི་གེའི་དོན་དང་སྤྱི་ཡི་དོན། །སྦས་པ་གསུམ་དང་མཐར་ཐུག་གཉིས། །དང་པོ་གཅིག་དང་ཚུལ་གཉིས་ལྡན། །དཔག་མེད་རྡོ་རྗེའི་ཚིག་གི་རྒྱ། །ངེས་ཕྱིར་རབ་ཏུ་
སྟོན་པ་ཉིད། །འཇུག་བྱ་དེ་དག་ལུས་ངག་ཡིད། །རིམ་པ་གཉིས་ཀྱི་བདེ་བ་དང་། །ཡིད་བདེ་རབ་ཏུ་མྱོང་བགྱིད་པ། །ཐབས་ཟབ་རྒྱ་ཆེ་མྱུར་བའི་ལམ། །ཡན་ལག་དམ་ཚིག་ལྡན་པ་ཡི། །ཐོབ་བྱ་ཐོབ་བྱེད་ཁྱད་པར་པའོ། །དེ་བཞིན་གཤེགས་
པ་ཐམས་ཅད་ཀྱི། །མཁྱེན་པའི་ཡེ་ཤེས་བླ་མེད་པ། །མངོན་པའི་ཡེ་ཤེས་བླ་ན་མེད། །མངོན་པར་བྱང་ཆུབ་གནས་གྱུར་པའི། །འབྲས་བུ་ཡང་དག་ཐོབ་གྱུར་ནས། །གསང་བའི་རྒྱུད་མཆོག་བསྟན་དུ་གསོལ། །དེ་ལྟར་གསོལ་བ་བཏབ་གྱུར་པས། །དེ་ནས་བླ་མེད་
བཅོམ་ལྡན་འདས། །དེ་བཞིན་གཤེགས་ཀུན་གཙོ་བོ་ཡིས། །གསང་བ་བྱང་ཆུབ་སེམས་རྡོ་རྗེ། །དེ་བཞིན་གཤེགས་པ་དུ་མ་རྣམས། །སྟོང་པ་ཉིད་དུ་འཇུག་པ་ཡི། །དཔག་མེད་ཟིལ་གནོན་རྡོ་རྗེ་ཞེས། །ཏིང་ངེ་འཛིན་ལ་སྙོམས་
པར་ཞུགས། །དེ་ནས་གསང་བའི་བདག་པོ་དེ། །འོད་གསལ་དྲི་མེད་དབྱིངས་ཉིད་ལ། །ཡེ་ཤེས་འཇུག་པའི་ངོ་བོ་ཡིས། །དབྱེར་མེད་གནས་པར་གྱུར་མ་ཐག །རྡོ་རྗེའི་ལུས་ཀྱི་རྩ་གནས་ནི། །སྟོང་ཕྲག་བདུན་བཅུ་ལ་སོགས་པ། །རྩ་ཡི་
བུ་ག་ཁོང་སྟོང་དག །ཐིག་ལེ་ཞུ་བའི་གཟུགས་ཀྱིས་ནི། །བྱང་ཆུབ་རྡོ་རྗེའི་རྣམ་པར་ནི། །ཞུ་ཞིང་ཡང་དག་གནས་པར་གྱུར། །དེ་ཉིད་ཆོས་སྐུའི་ངོ་བོ་ཉིད། །བདེ་དང་སྟོང་པ་དབྱེར་མེད་པ། །སྙིང་རྗེ་ཚད་མེད་རྣམ་པ་ལས། །དེ་ནས་

89-1-84b

བཅོམ་ལྡན་འདས་དེ་ཉིད། །དེ་བཞིན་གཤེགས་པ་ཐམས་ཅད་ཀྱི། །སྐུ་དང་གསུང་དང་ཐུགས་རྡོ་རྗེ། །རྣམ་པར་དབེན་དོན་ཉིད་ཏུ་གནས། །སྒྱུ་མ་སྦྱོང་བའི་དམ་ཚིག་དང་། །མངོན་པར་བྱང་ཆུབ་འོད་གསལ་བའི། །སྟོང་ཉིད་རྡོ་རྗེ་རྫོགས་
པ་ཡི། །ཏིང་ངེ་འཛིན་ལ་སྙོམས་ཞུགས་ནས། །རིག་པ་ཐབས་དང་ཤེས་རབ་དག །དབྱེར་མེད་བདེ་བ་ཆེན་པོའི་སྐུ། །སྐྱེས་བུའི་རྣམ་པར་གྱུར་པ་དག །གནས་པའི་ངང་ལས་ལྡང་བ་སྟེ། །ཕུང་པོ་ཁམས་དང་སྐྱེ་མཆེད་དང་། །ཡུལ་
དང་དངོས་པོ་རྣམ་དག་པའི། །སྐུ་གསུང་ཐུགས་ནི་བྱིན་བརླབས་པ། །ཡེ་ཤེས་ཆེན་པོའི་ངང་གནས་པ། །རྡོ་རྗེ་སེམས་དཔའ་རྒྱལ་པོ་ཆེ། །ཞལ་གཅིག་པ་ལ་ཕྱག་གཉིས་པ། །སྟོན་ཀའི་འདམ་བུའི་མདོག་འདྲ་བ། །སྤྲིན་དཀར་དག་
པའི་ཚུལ་ཅན་ཉིད། །དེ་མ་ཐག་ཏུ་སྣང་བར་མཛད། །བྱིན་གྱིས་བརླབས་པའི་རྗེས་ཞུགས་པ། །མཚན་དང་དཔེ་བྱད་འབར་བ་དང་། །རང་འབྱུང་ཡེ་ཤེས་ལྷག་པའི་ལྷ། །ཐམས་ཅད་བདག་པོ་རྡོ་རྗེ་འཛིན། །ཞལ་གསུམ་པ་ལ་
ཕྱག་དྲུག་པ། །སྣ་ཚོགས་རིན་ཆེན་གྱིས་བརྒྱན་ཅིང་། །ཨིན་དྲ་ནཱི་ལ་འབར་བ་དང་། །དང་པོ་མགོན་པོ་རྣམ་པར་སྤྲུལ། །དུང་དང་ཀུན་ད་ལྟར་དཀར་བ། །རྡོ་རྗེ་སེམས་དཔའ་དེ་བཞིན་གཤེགས། །དཀྱིལ་འཁོར་གནས་པའི་རང་
བཞིན་གྱིས། །རྣམ་པ་གསལ་བ་ཉིད་དུ་གཟིགས། །དེ་ནས་སངས་རྒྱས་རྡོ་རྗེ་འཛིན། །རྣམ་པར་སྣང་མཛད་ཆེན་པོ་ཉིད། །དེ་བཞིན་གཤེགས་པ་ཐམས་ཅད་ཀྱི། །འདོད་ཆགས་ཀྱིས་འདུལ་འགྲོ་གཟིགས་ནས། །འདོད་ཆགས་
གསང་བའི་ཚུལ་ཞེས་པའི། །ཏིང་ངེ་འཛིན་ལ་སྙོམས་ཞུགས་ནས། །དེ་བཞིན་གཤེགས་པའི་དཀྱིལ་འཁོར་གྱི། །བཀོད་པ་རབ་ཏུ་མི་ཟད་པ། །དེ་དག་ཐམས་ཅད་བསྡུས་ནས་ནི། །ཉིད་ཀྱི་སྐུ་ལ་ཐིམ་པར་མཛད། །དེ་
ནས་འདུས་པའི་ལྷ་ཚོགས་ཀྱིས། །དབྱེར་མེད་གནས་པའི་ངང་ལས་ནི། །རྡོ་རྗེ་འཛིན་པ་གསང་བའི་བདག །ཡོངས་སུ་མཉེས་པའི་དོན་དུ་ནི། །ཉིད་ཀྱི་སྐུ་ལས་སྤྲོས་པ་ཡི། །བ་སྤུའི་བུ་གའི་འོད་ཟེར་གྱི། །རྩེ་མོ་

89-1-85a

རྣམས་ལས་སྤྲོས་གྱུར་པ། །འཇིག་རྟེན་ཁམས་ནི་ཐམས་ཅད་དུ། །སངས་རྒྱས་སྤྱན་དང་མཱ་མ་ཀཱི། །གོས་དཀར་མོ་དང་སྒྲོལ་མ་དང་། །གཟུགས་དང་སྒྲ་དང་དྲི་དང་རོ། །རེག་བྱ་རྡོ་རྗེར་གྱུར་པ་ཡིས། །ས་དང་ཆུ་དང་མེ་དང་
རླུང་། །ཚད་མེད་ཡུལ་དང་སྤྱོད་པ་ཡིས། །ཆགས་པ་ཆེན་པོས་རྗེས་ཆགས་ནས། །བདེ་བའི་རོལ་པ་སྟོན་པར་མཛད། །རྣམ་པར་སྣང་མཛད་ཡེ་ཤེས་ཆེ། །དེ་ཉིད་མེ་ལོང་སོགས་བདག་ཉིད། །གསང་བ་འཛིན་པ་ཐུབ་པའི་རྒྱལ། །
རྡོ་རྗེ་མི་བསྐྱོད་རྒྱལ་པོ་ཉིད། །གསང་བ་འཛིན་པ་མ་ལུས་པའི། །སྐུ་དང་གསུང་དང་ཐུགས་ཀྱི་རྒྱལ། །སྙིང་པོ་རྡོ་རྗེ་ཡེ་ཤེས་སོ། །དེ་ཉིད་རྡོ་རྗེ་བཙུན་མོ་རྣམས། །གཅིག་ཏུ་གྱུར་པའི་མཁའ་དབྱིངས་ནི། །དམ་ཚིག་ཆེན་པོའི་
མཁའ་དབྱིངས་ནི། །དམ་ཚིག་ཆེན་པོའི་མཁའ་དབྱིངས་ཏེ། །རྙོག་པ་མེད་ཅིང་རྡུལ་མེད་པའི། །དཀྱིལ་འཁོར་གྲུ་བཞིར་བྱིན་བརླབས་པ། །ཕྱོགས་མཚམས་མཉམ་པར་ལྡན་པ་ལ། །གྲུབ་པའི་གནས་བརྒྱད་ཡོངས་བསྐོར་
བ། །ཞིང་ཁམས་ཡོངས་སུ་དག་པ་ཡི། །འཛམ་གླིང་པད་མའི་ལྟེ་བ་ལ། །སྣ་ཚོགས་མི་ཤིགས་ཨེ་དང་བྃ། །གསལ་བ་དེ་ཡི་ངོ་བོ་ཉིད། །སྣ་ཚོགས་གཟུགས་ཀྱི་ཀུན་དུ་རྒྱས། །སངས་རྒྱས་སྤྲིན་གྱིས་ཀུན་དུ་ཁྱབ། །འོད་
ཟེར་འཕྲོ་བ་མང་པོ་འཁྲུག །གསལ་བ་ལ་སོགས་དཀྱིལ་འཁོར་ལྡན། །དེ་བཞིན་གཤེགས་པ་ཀུན་གྱི་གནས། །དེ་ནས་སངས་རྒྱས་ཀུན་གྱི་བདག །གསང་བ་རབ་ཏུ་འཛིན་པ་པོ། །དཀྱིལ་འཁོར་ཉི་ཤུ་རྩ་ལྔ་པ། །སུམ་
བཅུ་གསུམ་པར་ལྡན་པ་ཡིས། །ཕོ་བྲང་ཡངས་པའི་གཞལ་ཡས་དེར། །དེ་བཞིན་གཤེགས་པ་སྟོང་དང་ནི། །གཉིས་དང་བྱང་ཆུབ་སེམས་དཔར་བཅས། །ཕྱི་རོལ་འཇིག་རྟེན་སྐྱོང་བ་བཞི། །སྣ་ཚོགས་དཀྱིལ་འཁོར་ཆེན་པོ་ཡི། །
དབུས་སུ་ཡང་དག་བཞུགས་གྱུར་པའོ། །དེ་ནས་དེ་བཞིན་གཤེགས་པའི་ཚོགས། །མི་བསྐྱོད་པ་དང་དཀོན་མཆོག་དཔལ། །ཚེ་དཔག་མེད་དང་གདོན་མི་ཟ། །དཔལ་ལྡན་རྣམ་པར་སྣང་མཛད་སོགས། །དེ་བཞིན་གཤེགས་པ་

89-1-85b

ཐུབ་པའི་རྒྱལ། །དེ་ཉིད་སྐུ་གསུང་ཐུགས་ཡེ་ཤེས། །ཕྲིན་ལས་ལྡན་པར་བཞུགས་པའོ། །དེ་ནས་རང་བཞིན་དག་པ་ཡི། །ཆོས་ཀྱི་དབྱིངས་ན་གནས་གྱུར་པ། །དབྱིངས་དང་ཡེ་ཤེས་དབྱེར་མེད་པའི། །སེམས་ཅན་ཁམས་ཀྱི་སྣོད་
བཅུད་དང་། །ཡུལ་དང་དབང་པོ་ཐམས་ཅད་ཀུན། །རྡོ་རྗེ་སེམས་དཔས་བྱིན་བརླབས་ཤིང་། །དབང་བསྐུར་སྔགས་དང་ཕྱག་རྒྱ་དང་། །ཡེ་ཤེས་ཀྱི་ནི་དབང་བསྒྱུར་བས། །དེ་དག་ཐོབ་པའི་ཁྱད་པར་ནི། །ཐ་མ་འབྲིང་དང་མཆོག་
རྣམས་ལ། །བདེ་བ་དང་ནི་ཡིད་བདེ་བས། །གསང་བ་ཡེ་ཤེས་སྤྱོད་ཡུལ་ཐོབ། །དེ་ལས་སྤྲུལ་པའི་སྐུ་བྱུང་བ། །བཅོམ་ལྡན་དེ་ཉིད་ཐུགས་ཀ་ནས། །སྤྲུལ་པའི་དཀྱིལ་འཁོར་དཔག་མེད་པ། །བྱེ་བ་གྲངས་མེད་དཀྱེ་ནས་
ནི། །གདུལ་བྱ་གདུལ་ཕྱིར་དབང་བསྐུར་ཞིང་། །སྤྱི་དང་ཁྱད་པར་གྱིས་འདུལ་འགྱུར། །དེ་ནས་སངས་རྒྱས་ཚོགས་དག་གིས། །བསྐུལ་བས་ཆེད་དུ་བརྗོད་པ་གསུངས། །ཨེ་མ་ཧོ་སངས་རྒྱས་ཀུན་གྱི་གསང་། །བྱང་ཆུབ་
སེམས་ནི་རང་བྱུང་བ། །དེ་བཞིན་གཤེགས་པ་ཐམས་ཅད་ཀྱིས། །རབ་ཏུ་རྟོག་མེད་མི་གནས་པའོ། །དེ་ནས་བཅོམ་ལྡན་དེ་བཞིན་གཤེགས། །སྐུ་བཞི་ཡེ་ཤེས་རོ་གཅིག་པས། །མཛད་པ་ཐམས་ཅད་རྫོགས་བྱེད་
པ། །རབ་འབྱམ་ཆོ་འཕྲུལ་སྟོན་པའོ། །དཀྱིལ་འཁོར་གྱི་འཁོར་ལོ་ངེས་པར་སྤྲུལ་པས་རྒྱུད་ངེས་པར་བསྟན་པ་ཞེས་བྱ་བའི་ཏིང་ངེ་འཛིན་ཏོ། །ཕྱི་རོལ་ཡུལ་སྣང་རྫས་སུ་འདོད། །གཡག་རྔ་ནེའུ་སིང་ལྟ་བུ་
ལ། །བར་དུ་སྣང་མུན་ཤོང་བ་ཙམ། །སེམས་ལས་ཐ་དད་པར་གནས་པ། །སྐད་ཅིག་མི་རྟག་པར་འདོད་པས། །ཡུལ་སེམས་ཐ་དད་བྱེ་བྲག་སྨྲ། །ཕྱི་རོལ་ཡུལ་དག་ཕྲ་བ་རྣམས། །འདུས་ནས་རིགས་པ་འབྱུང་
བ་ལྟར། །ཡུལ་དུས་རྣམ་པར་ངེས་པ་ལས། །རིགས་པ་འདྲ་བའི་རྣམ་པར་བཞག །ཡུལ་དགག་པ་ཡི་ཐ་མ་དང་། །ཤེས་པ་སྐྱེ་བའི་ཐོག་མ་རུ། །ཕྲད་པར་འདོད་པ་གྲུབ་པའི་མཐའ། །མདོ་སྡེ་པ་ཡི་དགོངས་

89-1-86a

པ་སྨྲ། །ཆོས་རྣམས་ཐམས་ཅད་རང་གི་སེམས། །རྣམ་པར་རིག་ཙམ་སྐད་ཅིག་མ། །རང་གསལ་རྒྱུན་གནས་སྤྲོས་བྲལ་འདོད། །རང་རིག་སྐད་ཅིག་གསལ་བ་དང་། །མི་གསལ་སྣ་ཚོགས་རྟོག་བྲལ་དུ། །
རྣམ་མེད་རྣལ་འབྱོར་སྤྱོད་པ་སྨྲ། །དངོས་རྣམས་སྟོང་པ་སྒྱུ་མ་བཞིན། །སྣང་ཡང་བདག་ལས་རང་སྟོང་པ། །སེམས་ཀྱི་རྟོག་པ་རྣམ་བཟློག་སྟེ། །མཁའ་དབྱིངས་དྲི་མེད་རྟོག་རྒྱུན་འཆད། །འདི་ལྟར་སྲིད་པ་ཞི་བ་ལས། །རྣམ་
གྲོལ་སྟོང་ཉིད་སྙིང་རྗེ་དང་། །དབྱེར་མེད་བྱང་ཆུབ་སེམས་ཀྱི་མཆོག །ཟུང་འཇུག་རབ་ཏུ་མི་གནས་པ། །དཔལ་ལྡན་འདུས་འདིར་གྲུབ་མཐའ་ཀུན། །བློ་ཡི་རིམ་པས་འདིར་འདུས་ཏེ། །དེ་བས་འདིར་ནི་ཆོས་ཀུན་གྱི། །སྙིང་པོ་འདུས་
པའི་རྩ་བར་གསུངས། །གསང་བ་བླ་ན་མེད་པའི་དོན། །ཡེ་ཤེས་རྣམ་གསུམ་རིམ་འཇུག་ཅིང་། །སྒྲོན་མེ་འོད་གསལ་སྣང་བ་ལས། །ཟུང་འཇུག་རྡོ་རྗེ་མི་ཕྱེད་པ། །ལྷ་ཡི་འཁོར་ལོ་སྤྲུལ་ནས་ནི། །དབྱེར་མེད་མི་གཡོ་ཏིང་ངེ་
འཛིན། །མཆོག་ནི་དྲི་མེད་རང་སྣང་ལས། །གཉིས་མེད་ངང་དུ་རབ་ཞུགས་པའོ། །བྱང་ཆུབ་སེམས་ཀྱི་ངང་ཉིད་ལས། །རྟག་ཏུ་འོད་གསལ་བར་གནས་ཀྱང་། །འགྲོ་བའི་དོན་ལས་མི་འདའ་བས། །དམ་ཚིག་འབྱུང་བའི་
ཏིང་ངེ་འཛིན། །བྱང་ཆུབ་སེམས་ཀྱི་ཟ་མ་ཏོག །བདེ་བ་ཅན་ནི་མི་ཤིགས་པ། །རིན་ཆེན་འབྱུང་བའི་ཏིང་ངེ་འཛིན། །བདེ་བ་ཆེན་པོའི་བྱང་ཆུབ་སེམས། །འགྲོ་བ་ཀུན་ལ་སྟེར་བ་ནི། །མ་ཆགས་པ་ཡི་ཡེ་ཤེས་ཀྱིས། །
འདོད་ཆགས་འབྱུང་བའི་ཏིང་ངེ་འཛིན། །རྣམ་པ་སྣ་ཚོགས་སྒྱུ་མ་ལས། །གདོན་མི་ཟ་བ་གནས་མེད་པ། །འོད་གསལ་འབྲས་བུ་མངོན་ཕྱོགས་པ། །དམ་ཚིག་འབྱུང་བའི་ཏིང་ངེ་འཛིན། །ཟག་པ་མེད་པའི་དགའ་བ་ཡིས། །
ཡེ་ཤེས་ཆེན་པོའི་རོས་ཁྱབ་པས། །རྡོ་རྗེ་འཛིན་པ་མཉེས་གྱུར་པའི། །དམ་ཚིག་བླ་མེད་ཏིང་ངེ་འཛིན། །ཡང་དག་ཡེ་ཤེས་ནོར་བུ་ལྟར། །རིན་ཆེན་འོད་འཕྲོ་སྤྲིན་ཚོགས་ཀྱིས། །སངས་རྒྱས་ཐམས་ཅད་རྗེས་སུ་

89-1-86b

ཡང་། །མཉེས་བྱེད་རྡོ་རྗེ་ཏིང་ངེ་འཛིན། །ཟག་པ་བསྡུས་བྱས་བདེ་བ་ལས། །བཅུ་དྲུག་འགྱུར་གྱིས་ཁྱད་འཕགས་པ། །འདོད་ཆགས་རྗེས་སུ་འཛིན་བྱེད་པ། །ཆགས་པར་བྱེད་པའི་ཏིང་ངེ་འཛིན། །སྐུ་གསུང་ཐུགས་ཉིད་
རྡོ་རྗེ་ལས། །མི་ཕྱེད་འོད་གསལ་བར་ཐིམ་ལ། །སྒྱུ་མ་སླུ་བ་རྡོ་རྗེ་ཉིད། །སྣང་བ་ཐིམ་པས་ཏིང་ངེ་འཛིན། །ཡེ་ཤེས་མེ་ལོང་ལྟ་བུ་ལས། །སྲིད་གསུམ་སྣང་བར་མཛད་པ་སྟེ། །སྣང་མཛད་རྡོ་རྗེ་འཁོར་ལོ་ནི། །མི་ཟད་སྐུ་
ཡི་ཏིང་ངེ་འཛིན། །སྣང་བ་གསུམ་ལས་འདས་པ་ཡི། །རང་བཞིན་མངོན་པར་བྱང་ཆུབ་པ། །རྣམ་པར་དག་པ་རྡོ་རྗེ་ཡི། །འོད་གསལ་བ་ཡི་ཏིང་ངེ་འཛིན། །སྲིད་ཞི་མཉམ་ཉིད་མཉམ་པའི་སྐུ། །ཆོས་རྣམས་གཉིས་
མེད་རོ་གཅིག་པས། །རིན་པོ་ཆེ་ལྟར་འབྱུང་བའི་གནས། །ཡོན་ཏན་གཏེར་གྱུར་ཏིང་ངེ་འཛིན། །ཕྱོགས་བཅུ་དུས་གསུམ་སངས་རྒྱས་ཀྱི། །གང་ལས་འོད་གསལ་ཆོས་ཀྱི་སྐུ། །མངོན་པར་བྱང་ཆུབ་པ་ཡི་ཚུལ། །མི་
ཕྱེད་རྡོ་རྗེའི་ཏིང་ངེ་འཛིན། །བླ་མེད་མངོན་པར་བྱང་ཆུབ་པ། །གསང་བ་ལྷན་ཅིག་སྐྱེས་པ་ཡི། །ཡེ་ཤེས་རྡོ་རྗེའི་ཏིང་ངེ་འཛིན། །རྟོགས་པའི་ཡེ་ཤེས་མཆོག་ཏུ་འགྱུར། །ཆོས་ཉིད་མི་ཟད་དབྱིངས་ཀྱི་ངང་། །སྣང་སྟོང་ཐ་དད་
མེད་པ་སྟེ། །རོ་གཅིག་འདུ་འབྲལ་མེད་པ་ཉིད། །སྟོང་དང་སྙིང་རྗེའི་ཏིང་ངེ་འཛིན། །ཆོས་རྣམས་ཐམས་ཅད་བདག་མེད་པས། །ཀུན་དུ་སྟོང་ཞིང་མ་བཅོས་པ། །ལྷུན་གྲུབ་རྡོ་རྗེའི་ངང་གནས་པ། །ཕྱག་རྒྱ་ཆེན་པོའི་ཏིང་ངེ་
འཛིན། །རྣམ་པར་མི་རྟོག་ཡེ་ཤེས་ཀྱི། །འོད་ཆེན་རྣམ་པར་སྣང་བར་བྱེད། །འོད་གསལ་འབར་བ་རྡོ་རྗེ་ཡིས། །ཚེ་དཔག་མེད་པའི་ཏིང་ངེ་འཛིན། །སྣང་བའི་དངོས་པོ་སྣ་ཚོགས་པ། །སྒྱུ་མ་རྐྱེན་སྐྱེས་ཟིལ་གནོན་
པ། །རྡོ་རྗེ་འོད་གསལ་ཏིང་ངེ་འཛིན། །དམིགས་པ་མེད་པའི་སྙིང་རྗེ་ཅན་ཞེས་གསུངས་སོ། །དེ་ནས་དེ་བཞིན་གཤེགས་པའི་ཚོགས་དེ་དག་དང་། བྱང་ཆུབ་སེམས་དཔའ་དེ་དག་རབ་ཏུ་དགའ་བས་ཁྱབ་ཅིང་དགྱེས་

89-1-87a

པ་ཆེན་པོ་ཡོངས་སུ་སྤྱོད་པར་འགྱུར་རོ། །དེ་ནས་གསང་བ་གསུམ་གྱི་དངོས། །རྡོ་རྗེ་འཛིན་པས་འདི་གསུངས་སོ། །དཀའ་ཐུབ་སྡོམ་པ་མི་ཟད་པས། །ལུས་སྐམས་གྱུར་ཅིང་སྡུག་བསྔལ་གྱུར། །སྡུག་བསྔལ་གྱི་ནི་
སེམས་དབྱིངས་ཏེ། །དེ་ལ་དངོས་གྲུབ་གཞན་དུ་གྱུར། །བརྗོད་པ་ཐམས་ཅད་ཡི་གེ་སྟེ། །ཀུན་གྱི་རྩ་བ་ཨ་ལས་བྱུང་། །དེ་ལས་ཆོས་ཀྱི་ཕུང་པོ་ནི། །བརྒྱད་ཁྲི་བཞི་སྟོང་དག་ཏུ་སྣང་། །དབྱངས་དང་གསལ་བྱེད་ངག་ཡིན་ཏེ། །ངག་ནི་རླུང་
གི་རྩ་བ་ཅན། །སྒྲར་སྣང་ཙམ་ཉིད་ཀུན་རྫོབ་སྟེ། །ཐིམ་པ་དོན་དམ་བརྗོད་པའོ། །ཡང་གནས་འདི་ལ་སངས་རྒྱས་ཀུན་གྱི་རང་བཞིན་ནི་འདོད་པའི་ཡོན་ཏན་ལྔའི་ཡུལ་ལ་རང་གི་བསོད་ནམས་དང་ཡེ་ཤེས་གཉིས་སུ་མེད་པར་
སྤྱད་པ་སྤྱོད་པར་བྱེད་དེ། རང་རིག་པའི་ཡེ་ཤེས་སྒྱུ་མ་དང་མཚུངས་པས་སྤྱད་པ་སྤྱོད་པར་བྱེད་དོ། །འདི་ལྟར་ཆོས་རྣམས་ཐམས་ཅད་གཟུགས་བརྙན་དང་། སྤྲུལ་པ་དང་། སྒྲ་བརྙན་དང་། བྲག་ཆ་དང་། དྲི་ཟའི་གྲོང་ཁྱེར་དང་། ཆུ་ཟླ་
དང་། སྨིག་རྒྱུ་དང་། རྨི་ལམ་དང་། དབང་པོའི་གཞུ་དང་། སྤྲིན་དང་། མིག་གཡོར་དང་། གློག་དང་། ཆུའི་ཆུ་བུར་དང་། སྒྱུ་མའི་རྣམ་པར་བལྟ་སྟེ། དེ་ལྟ་ན་ཡང་དོན་དམ་པ་ནི་རྣམ་པར་དམིགས་སུ་མེད་དོ། །ཆོས་ཐམས་ཅད་ནི་རང་
བཞིན་མེད་པའི་ཕྱིར་རྟེན་འབྲེལ་ཚོགས་པའི་སྣང་བ་དགག་ཏུ་མེད་དོ། །དེ་ཡང་དག་པར་བདེན་པས་སྟོང་པའི་ཕྱིར་རོ། །དེ་སྐད་ཅེས་བཀའ་སྩལ་པ་དང་། སངས་རྒྱས་དང་བྱང་ཆུབ་སེམས་དཔའི་ཚོགས་འདུས་པ་རྣམས་ཀྱིས་
མངོན་པར་དགའ་བའི་ཡིད་ཀྱིས་དཔལ་རྡོ་རྗེ་འཛིན་པ་ཆེན་པོ་ལ་ལེགས་སོ་ལེགས་སོ། །གསང་བའི་གནས་ཀྱི་སྤྱོད་པ་ངོ་མཚར་ཞིང་རྨད་དུ་རབ་ཏུ་བྱུང་བ་རབ་ཏུ་བསྟན་པ་གསང་བའི་སྤྱོད་ཡུལ་ལ་དགོངས་ཏེ་རང་རང་གི་སྟན་
ལ་གནས་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་རྣམ་པར་རྒྱལ་བའི་རྒྱུད་ལས་དམན་པའི་སྤྱོད་པ་ལས་རིང་ཞིང་ལམ་བདེ་

89-1-87b

བ་ཆེན་པོས་ཡེ་ཤེས་ལ་རོལ་པ་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ།། །། རྡོ་རྗེ་འཛིན་པ་ཀུན་གྱི་གསང་། །གསང་བ་གསུམ་དུ་གནས་པ་གང་། །བྱང་ཆུབ་སེམས་དཔའ་རྣམས་ཀྱི་ངོར། །གསང་བ་རབ་ཏུ་གྱུར་
པ་གསུངས། །གསང་བའི་ཡི་གེ་རྟོགས་དཀའ་བ། །མ་འོངས་སྐྱེ་བོ་གདུལ་སླད་དུ། །དཀྱིལ་འཁོར་ལྷ་རྣམས་ཐམས་ཅད་ཀྱི། །ཕྱི་ནང་སྦས་པ་རིམ་པས་བསྟན། །ཨེ་ཡི་རྣམ་པས་ལྷ་མོ་སྤྱན། །བྃ་གི་རྣམ་པ་བདག་མར་བརྗོད། །མ་
ནི་ལྷ་མོ་གོས་དཀར་མོ། །ཡ་ཡི་རྣམ་པ་སྒྲོལ་མར་བརྗོད། །ཤཱུ་ནི་བྱང་ཆུབ་སེམས་རྡོ་རྗེ། །ཏཱྃ་ནི་ཤེས་རབ་ཕ་རོལ་ཕྱིན། །མེ་ལོང་ཡེ་ཤེས་ཨེ་ཞེས་བརྗོད། །ཀ་ནི་མྀ་བསྐྱོད་རྡོ་རྗེ་སྟེ། །སྨྱིན་ཞེས་དོན་ཡོད་གྲུབ་པ་ཉིད། །རིན་ཆེན་
འབྱུང་བ་ས་ཞེས་བྱ། །འོད་དཔག་མེད་པ་མ་ཞེས་བརྗོད། །རྟག་པའི་རྡོ་རྗེ་ཡེ་ཞེས་པའོ། །བྷ་ནི་དྲི་ཡི་རྡོ་རྗེ་མའོ། །ཡི་གེ་ག་ནི་རོ་རྡོ་རྗེ། །བཱན་ནི་གཟུགས་ཀྱི་རྡོ་རྗེ་མའོ། །ས་ཡི་རྣམ་པ་རེག་རྡོ་རྗེ། །རྦ་ནི་སྒྲ་ཡི་རྡོ་རྗེ་མ། །ཏ་ནི་ཆོས་
དབྱིངས་རྡོ་རྗེ་ཡི། །ཐཱ་ནི་སྒྲིབ་པ་རྣམ་པར་སེལ། །ག་ནི་འཇིག་རྟེན་དབང་ཕྱུག་བརྗོད། །ཡི་གེ་ཏ་ནི་ས་སྙིང་པོའོ། །ཀཱ་ནི་ནམ་མཁའི་སྙིང་པོ་སྟེ། །ཡ་ནི་ཕྱག་ན་རྡོ་རྗེར་གནས། །བཱཀ་ནི་ཀུན་དུ་བཟང་པོའོ། །ཙིཏ་ནི་བྱམས་པར་བརྗོད་པར་
བྱ། །ཏ་ནི་འདོད་པའི་རྒྱལ་པོ་སྟེ། །ཧྲི་ད་ཡ་ནི་སྙིང་པོ་ཉིད། །བ་ནི་དབྱུག་སྔོན་ཅན་དུ་གྲགས། །ཛྲ་ནི་སྟོབས་ཆེན་འབར་བ་སྟེ། །ཡོ་ནི་མི་གཡོ་གཏུམ་པོའོ། །ཤིད་ནི་བྱ་བ་ནན་ཏན་ཏེ། །བྷ་ནི་གནོད་མཛེས་རྒྱལ་པོའོ། །གེ་ནི་གཙུག་ཏོར་
འཁོར་ལོས་སྒྱུར། །ཤཱུ་ནི་བགེགས་མཐར་བྱེད་པ་སྟེ། །བི་ནི་ཤེས་རབ་མཐར་བྱེད་དོ། །ཛ་ནི་གཤིན་རྗེ་མཐར་བྱེད་དེ། །ཧ་ནི་མཐར་བྱེད་པད་མ་འཛིན། །ར་ནི་སོ་སོར་རྟོག་པ་ཉིད། །ཐབས་དང་ཤེས་རབ་མཉམ་སྦྱོར་བ། །ཕུང་
པོ་ལྔ་ནི་སངས་རྒྱས་ལྔ། །འབྱུང་བཞི་ལྷ་མོ་བཞི་རུ་བརྗོད། །ཡུལ་ལྔ་འདོད་ཡོན་ལྷ་མོ་ལྔ། །རྣམ་ཤེས་བརྒྱད་ནི་བྱང་ཆུབ་སེམས། །ལུས་ཚིག་ལ་གནས་ཁྲོ་རྒྱལ་བཅུ། །བསྡུས་པ་ཡེ་ཤེས་ལྔར་སྦྱོར་བ། །བདེ་བ་ཆེན་པོའི་ཡེ་

89-1-88a

ཤེས་ནི། །དཔལ་ལྡན་རྡོ་རྗེ་འཆང་གི་དངོས། །མིག་དང་མི་ཡིས་གནས་པ་ལས། །དེ་ཉིད་ཀྱིས་ནི་སྦྱར་བ་ཡིས། །དེ་ལས་གྱུར་པའི་གྲངས་རྣམས་ཀྱི། །དཀྱིལ་འཁོར་དེ་སྙེད་རྣམས་སུ་འགྱུར། །ཕྱོགས་དང་གདེངས་ཀ་གདོང་པ་
དང་། །རིས་བྱེད་རིགས་ཀྱིས་ཕྱེ་བ་གང་། །རྩ་བའི་དཀྱིལ་འཁོར་གྱུར་པ་སྟེ། །གཞན་དུ་འཕྲོས་པའི་དཀྱིལ་འཁོར་ཡིན། །ཀ་ནས་བཟུང་སྟེ་རིམ་བཞིན་དུ། །དེ་བཞིན་ཧ་ཡི་བར་དག་ཏུ། །དེ་དག་སྣ་ཚོགས་རྒྱུར་གྱུར་པ། །སྟོང་ཕྲག་སུམ་བཅུའི་
བདག་ཉིད་དོ། །ཐབས་དང་ཤེས་རབ་ངོ་བོ་ཉིད། །སྟོང་ཕྲག་སུམ་བཅུ་རྩ་བཞིར་འགྱུར། །རྩ་བའི་རྒྱུད་དང་བཤད་པ་དང་། །ཆ་འཐུན་ཡན་ལག་རྒྱུད་གྱུར་པས། །དེ་དག་སྡེ་དང་བཅས་པ་ཡིས། །གསང་ཆེན་རྒྱུད་སྡེར་བརྗོད་པར་བྱ། །རྣལ་
འབྱོར་རྒྱུད་ནི་ཐམས་ཅད་དུ། །ལྷ་འདི་རྣམས་ནི་ཐོག་མར་བཞུགས། །འདིས་ནི་རྒྱུད་རྣམས་གསང་ཆེན་ཀུན། །རྣལ་འབྱོར་རྒྱུད་ཅེས་རྒྱས་བཏབ་པའོ། །མདོ་སྡེ་རྣམས་ལ་གནས་སོགས་པ། །ཐུན་མོང་དབྱེ་བས་ཕྱེ་བ་ཉིད། །ཡི་གེ་
བཞི་ནི་ཐུན་མོང་དུ། །བསྡུས་པས་ཆོས་ཀྱི་བདག་ཉིད་ཅན། །མདོ་ཀུན་ཡུལ་དུ་གྱུར་པའོ། །གསང་བའི་གནས་ཀྱི་མཚན་ཉིད་ནི། །ཉན་ཐོས་རང་རྒྱལ་ལ་སོགས་པས། །རྣམ་པ་ཀུན་དུ་མ་བཤད་དེ། །འདི་སྐད་བདག་ཅེས་དང་པོར་བརྗོད། །
དུས་གཅིག་དུས་གསུམ་སྐད་ཅིག་སྟེ། །སྟོན་པ་རང་འབྱུང་ཆེ་བའི་སྐུ། །དེ་བཞིན་གཤེགས་པ་བདེ་བར་གཤེགས། །དེ་བཞིན་དུ་ནི་རྟག་གཤེགས་ལ། །སྐུ་གསུང་ཐུགས་ཀྱི་རྡོ་རྗེ་ཞེས། །པད་མའི་མིང་ཅན་བཙུན་མོའི་གནས། །དེར་ནི་མངོན་
པར་བཞུགས་པར་མཛད། །བཙུན་མོ་རྡོ་རྗེ་སེམས་དཔའ་དང་། །རིན་ཆེན་ཆོས་དང་བཅས་པ་ཡི། །རྡོ་རྗེ་ལས་ཀྱི་སེམས་མར་བརྗོད། །དེ་དག་ཀུན་གྱི་བདེ་བའི་གནས། །བསྐྱེད་དང་སྡུད་པར་མཛད་པ་པོ། །ཐམས་ཅད་ནམ་མཁའི་མཚན་
ཉིད་ཅན། །ཕུང་པོ་ཁམས་དང་སྐྱེ་མཆེད་དང་། །ཡུལ་རྣམས་ཐམས་ཅད་རྟེན་པའི་གཞི། །ཡང་དག་བཙུན་མོའི་བྷ་ག་དེར། །ཕྱོགས་བཅུ་དུས་གསུམ་སངས་རྒྱས་རྣམས། །མངོན་པར་རབ་ཏུ་ཞུགས་མཛད་དེ། །སྤྲོ་དང་བསྡུ་བའི་ངོ་

89-1-88b

བོ་ཉིད། །རབ་ཏུ་མི་གནས་དབྱེར་མེད་བཞུགས། །མདོ་དང་གསང་བར་སྤྱོད་པའི་ཚུལ། །དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ཕྱིར། །གསང་སྔགས་ཐེག་པ་ཁྱད་པར་འཕགས། །
གསང་བ་བྱ་བ་སྤྱོད་པའི་རྒྱུད། །ཤིན་དུ་ཆེས་གསང་རྣལ་འབྱོར་རྒྱུད། །རྣལ་འབྱོར་བླ་མེད་གསང་ཆེན་ནོ། །འདི་ནི་སྐུ་གསུང་ཐུགས་གསང་བ། །མཚན་དང་དཔེ་བྱད་རྣམས་དང་ནི། །རྗོད་བྱེད་རང་གི་མཚན་ཉིད་དེ། །ཕུང་པོ་
ཁམས་དང་སྐྱེ་མཆེད་སོགས། །གསང་བའི་དཀྱིལ་འཁོར་ལ་ཞུགས་པ། །རྟེན་དང་བརྟེན་པར་བཅས་པ་ནི། །མཁས་པ་རྣམས་ལ་བསྔགས་པ་ཡིན། །རྨོངས་པ་དེ་ལྟར་འདོད་པ་རྣམས། །སྐྱེ་དང་འཇིག་དང་གནས་པ་དང་། །
རྒྱུད་གཞན་རྣམས་ལ་ངེས་བསྟན་པ། །རྟག་ཏུ་རྟེན་འབྲེལ་ཚུལ་དེ་བརྗོད། །འབྲས་བུ་རྒྱུས་ནི་རྒྱས་བཏབ་ཅིང་། །རྒྱུ་ལ་འབྲས་བུས་རྒྱས་གདབ་པར། །བསམ་གྱི་གཞལ་དུ་དངོས་གྲུབ་ནི། །བསྐལ་པ་བྱེ་བར་ཡང་མི་འགྱུར། །རྒྱུད་
ཀུན་ལ་ནི་གསང་ཆེན་གྱི། །སྙིང་པོ་ཕྱག་རྒྱས་རྒྱས་གདབ་ཕྱིར། །དེ་ཉིད་གསང་བ་ཡང་དག་པར། །མི་ཕྱེད་པར་ནི་བསྟན་པ་ཡིན། །སེམས་ཅན་ཀུན་གྱི་ལུས་གནས་པ། །སྐུ་ཡི་གསང་བ་རྟག་པ་ཉིད། །སེམས་ཅན་ཀུན་
གྱི་ངག་ལ་ནི། །གསུང་གི་གསང་བ་རང་བྱུང་དུ། །སེམས་ཅན་ཀུན་གྱི་སྙིང་ལ་ནི། །ཐུགས་ཀྱི་གསང་བ་སྙིང་པོ་བཞུགས། །དེ་ཉིད་སྙིང་པོ་གསུམ་ལྡན་པ། །བདེ་གཤེགས་སྙིང་པོ་འཇུག་པ་ཉིད། །སེམས་ཅན་སངས་རྒྱས་སྒྲས་
བཏགས་སོ། །སྐུ་ཡི་དངོས་གྲུབ་སྣང་བའི་དངོས། །མི་ཟད་སྤྲུལ་པས་འགྲོ་དོན་སྤྱོད། །གསུང་གི་དངོས་གྲུབ་བྲག་ཆ་ལྟར། །བརྗོད་པ་དུ་མའི་སྒྲ་རུ་སྟོན། །ཐུགས་ཀྱི་དངོས་གྲུབ་རྟོག་པའི་ཚོགས། །ཡེ་ཤེས་བདེ་ཆེན་བསམ་
མི་ཁྱབ། །ཏིང་འཛིན་སེམས་ཀྱི་སྤྱོད་པ་ནི། །སྟོང་ཉིད་ཡེ་ཤེས་དངོས་གྲུབ་བོ། །དེ་ཉིད་བྱང་ཆུབ་སེམས་རྡོ་རྗེ། །བླ་མ་ཉིད་དུ་བསྡུས་པ་ཡིན། །འདོད་ཆགས་ཞེ་སྡང་གཏི་མུག་གསུམ། །འཛིན་པས་དུག་ཏུ་འགྱུར་བ་ཡིན། །

89-1-89a

དུག་ཉིད་ཉེ་བར་ཞི་གྱུར་ན། །དག་པས་དུག་མེད་བྱས་པ་ཡིན། །བདུད་རྩི་རིམ་གྱིས་བསྟེན་ན་ནི། །བདུད་རྩི་ཉིད་དུ་ངེས་འགྱུར་ཡིན། །དེ་ཉིད་ངོ་བོ་ཡོངས་ཤེས་པས། །རྒྱུད་འདིར་ལམ་དུ་གྱུར་པ་ཡིན། །སྔགས་འདུན་
ཐབས་དང་ཤེས་རབ་སྟེ། །དབྱེར་མེད་དེ་བཞིན་གཤེགས་པའི་ཐུགས། །ཤེས་རབ་བྷ་གའི་བརྡར་བརྟགས་པས། །དབྱངས་སུ་བརྗོད་པ་གསང་བའི་ཚུལ། །ཨཱ་ལི་བཅུ་གཉིས་རྟེན་འབྲེལ་ཏེ། །མ་རིག་ལ་སོགས་འགག་པར་
བསྟན། །རོ་ཧི་ཏ་ལ་སོགས་པ་དང་། །ཁྱིམ་ནི་བཅུ་གཉིས་རླུང་དག་སྟེ། །དུས་སྦྱོར་བ་དང་མཚུངས་པས་ན། །ལུགས་འབྱུང་དེ་ཉིད་ལུགས་བཟློག་པར། །དེ་ཉིད་ཡང་དག་རིམ་པས་བསྟན། །ཀཱ་ལི་སུམ་བཅུ་རྩ་བཞི་པོ། །
ཐབས་ཀྱི་ཡི་གེ་ཕ་ཞེས་བརྗོད། །མི་གཙང་རྫས་ནི་སུམ་བཅུ་བཞི། །དག་པ་བྱང་སེམས་རང་བཞིན་ཏེ། །ཁམས་ནི་རང་བཞིན་གྱིས་དག་པའི། །དེ་དག་དག་པས་ཡེ་ཤེས་ཆེ། །དག་པའི་དུས་ནི་དཔེ་བྱད་དག །ཉིས་འགྱུར་དག་
གིས་བསྟན་པ་སྟེ། །ཐབས་དང་ཤེས་རབ་ཕྲག་གཉིས་བསྟན། །ཨཱ་ལི་ཤེས་རབ་མ་ནིང་བཅས། །འདི་དག་མཚན་མཆོག་སུམ་བཅུ་གཉིས། །ཆ་གཉིས་རབ་ཏུ་དབྱེ་བ་ཡིས། །སེམས་ཅན་ཀུན་གྱི་ལུས་གནས་པ། །
ཀླ་ཞེས་བྱ་བ་ཆུ་ཡིན་ཏེ། །སླ་ཞེས་བྱ་བ་ས་ཡིན་ནོ། །ལླ་ཞེས་བྱ་བ་མེ་ཡིན་ཏེ། །ཤླ་ཞེས་བྱ་བ་རླུང་ཡིན་ཏེ། །འབྱུང་བཞིའི་དབྱེ་བ་མ་ནིང་སྟེ། །ཡེ་ཤེས་དག་པ་ཆེན་པོ་ཉིད། །ཡང་དག་ལམ་གསལ་ཕྱོགས་ཙམ་དང་། །མི་
གསལ་བ་ཉིད་རྒྱུད་ལས་འབྱུང་། །རྐྱེན་ཉིད་ཚོགས་གཉིས་རྫོགས་བྱེད་པ། །བསོད་ནམས་བླ་མེད་འབྲས་བུར་འགྱུར། །གཞི་ནི་ཁོང་ན་གནས་པའི་དོན། །སེམས་ཅན་ཀུན་གྱི་ལུས་ལ་གནས། །དེ་ཡོད་པས་ན་འགྲོ་ཀུན་ཀྱང་། །
ཡེ་ཤེས་སྙིང་པོ་ཅན་གྱུར་པས། །དེ་བཞིན་གཤེགས་པའི་རྒྱུ་རུ་བཤད། །མ་ནིང་ཡེ་ཤེས་དག་པ་ཉིད། །གཉིས་མེད་ཡེ་ཤེས་འབར་བ་ཡི། །ཨཱ་ལི་སྣང་བ་ཐབས་ཀྱི་ཆ། །མཆེད་པ་ཀ་སོགས་ཤེས་རབ་ཆ། །མ་ནིང་ཐོབ་

89-1-89b

པ་གཉིས་མེད་པའོ། །སྦྱོར་བ་དོན་གྱི་ཡི་གེ་བཞི། །སྦས་པའི་ཚུལ་དུ་བསྟན་པའོ། །ཆ་ནི་སྟོང་པ་ཚེག་དྲག་དང་། །ཐིག་ལེས་བརྒྱན་པ་བདེ་བ་ཆེ། །དཔལ་ལྡན་རྡོ་རྗེ་སེམས་དཔའ་ལ། །ཀུན་དུ་བཟང་པོ་སེམས་དཔའ་
ཆེས། །གསང་བ་ཟབ་དང་རྒྱ་ཆེ་བའོ། །ལྷག་པའི་གསང་ཆེན་རྒྱུད་ཀྱི་དོན། །བྱང་ཆུབ་སེམས་དཔའ་གྲགས་ཆེན་རྣམས། །ཁྱད་པར་ངེས་ཤེས་བསྐྱེད་དོན་དུ། །དཔལ་ལྡན་འདུས་པ་ངེས་གསལ་བའི། །བླ་མེད་
དགོངས་རྒྱུད་བཤད་དུ་གསོལ། །དེ་ནས་གསང་བ་འཛིན་པ་པོ། །རྡོ་རྗེ་འཆང་བ་ཚུལ་འདི་དག །རྣལ་འབྱོར་རྒྱུད་ཀྱི་སྦས་པའི་དོན། །གསང་བ་རིན་ཆེན་སྙིང་པོ་གསུངས། །གསང་ཆེན་གླིང་གཞིའི་ཁྱད་པར་དང་། །རིམ་པ་
གླེང་སློང་གྱུར་པ་དང་། །གསང་བར་བྱ་བའི་གཞི་གང་དང་། །གསང་བའི་དམ་ཚིག་ངེས་པ་དང་། །གསང་བ་བསྒྲུབ་པའི་ཆོ་ག་དང་། །འཇུག་པའི་རྣལ་འབྱོར་ཇི་ལྟར་བསྟན། །གསང་ཆེན་རྣམ་བཤད་ཐབས་དང་ནི། །དེ་ཉིད་དང་
འབྲེལ་བརྗོད་བྱ་གང་། །རྗོད་བྱེད་ཐུན་མོང་བསྟན་པའི་ཚུལ། །ལམ་ལ་འཇུག་པའི་དབྱེ་བ་དང་། །གསང་བ་གྲུབ་པའི་འབྲས་བུ་དང་། །གསང་བ་ལྷག་པའི་ལམ་དང་ནི། །གསང་བ་མཆོག་གི་སྤྱོད་པ་དང་། །གསང་ཆེན་རྣམ་པར་
བསྡུ་བའི་དོན། །མི་འགྱུར་རྐྱེན་གྱིས་ལྡོག་བྱ་དང་། །དགག་སྒྲུབ་གསང་ཆེན་འབྱུང་བའི་ཚུལ། །ཕྱོགས་དང་ཐུབ་པའི་རྣམ་དབྱེ་བའི། །གསང་བ་འདི་དག་གནས་ཤེས་བྱ། །འདི་ཉིད་འཇུག་པའི་ཚུལ་ཤེས་ནས། །གྲུབ་པ་
སྒྲུབ་པའི་ཚུལ་སྤྱོད་དོ། །གསང་བ་རྣམ་པར་དག་པ་ཡེ་ཤེས་ཀྱི་ཏིང་ངེ་འཛིན་བསྟན་པ་ཞེས་བྱའོ། །དེ་ནས་རྒྱལ་པོ་རྡོ་རྗེ་འཛིན། །དང་པོའི་མགོན་པོ་བཅོམ་ལྡན་འདས། །དཔལ་མཆོག་གསང་བ་འཛིན་པ་ཡིས། །འདུས་
པའི་འཁོར་ལ་བཀའ་སྩལ་པ། །གསང་བ་ཟབ་པའི་རྒྱུད་འདི་རུ། །སྤྱོད་པའི་ཚུལ་འདི་ཤེས་པར་བྱ། །དང་པོའི་ས་ནི་པད་མ་ལྟར། །གེ་སར་ཁ་དབྱེའི་འོད་འབར་བའོ། །གཉིས་པ་ཆུ་རྒྱུན་ལྟ་བུ་སྟེ། །དྲི་མ་སྦྱོང་ཞིང་

89-1-90a

འབྱེད་པར་འགྱུར། །གསུམ་པ་རབ་ཏུ་གསལ་བ་ཡི། །འགྲོ་བའི་སྣང་བ་ཡེ་ཤེས་སྒྲོན། །བཞི་པ་ཡེ་ཤེས་འོད་འཕྲོ་བ། །ཉི་མའི་སྙིང་པོ་ལྟར་འཆར་པའོ། །ལྔ་པ་ཟླ་བའི་དཀྱིལ་འཁོར་ལྟར། །འཛག་དང་སྨྱིན་ཅིང་
སྡུད་པས་སྦྱོར། །དྲུག་པ་སྒྱུ་མའི་གཟུགས་བརྙན་ལྟར། །ཆོས་རྣམས་རང་བཞིན་ཤེས་པའོ། །བདུན་པ་ལྟ་ངན་ཕྱོགས་ལས་ནི། །རྒྱལ་འགྱུར་སེང་གེའི་རྒྱལ་པོ་བཞིན། །རི་བོ་མཆོག་ལྟར་ཏིང་འཛིན་རྒྱལ། །ཇི་སྲིད་རླུང་ནི་མི་
རྒྱུ་དང་། །སྣང་བ་མི་གཡོ་བར་གྱུར་པས། །བདག་གི་དངོས་པོར་རབ་ཏུ་བརྟག །ཐབས་ལྡན་བྱང་ཆུབ་སེམས་མཆོག་གིས། །དོན་མཛད་འཁོར་ལོས་སྒྱུར་བའི་སྟོབས། །ལེགས་ཐོབ་ཕྱིར་མི་ལྡོག་པའི་ལམ། །སེམས་དཔའ་
ཆེན་པོ་བླ་མ་ཉིད། །ཇི་སྲིད་སྤྲིན་ནི་སྣ་ཚོགས་པ། །ཁ་དོག་དབྱིབས་ནི་ཐ་དད་པ། །མཁའ་དབྱིངས་དག་ཏུ་འབྱུང་འགྱུར་ཞིང་། །དེང་ཉིད་དུ་ནི་ལྡོག་པར་འགྱུར། །དེ་བཞིན་རང་བཞིན་ཐམས་ཅད་ཀྱང་། །སྣང་བ་གསུམ་གྱི་རྒྱུན་
ཆད་དངོས། །མ་ལུས་ཡུལ་ལ་ཞུགས་ནས་ནི། །དེ་ཉིད་དུ་ནི་རང་ཐིམ་འགྱུར། །སྣང་བ་གསུམ་པོ་དག་པའི་ལམ། །རིན་ཆེན་སྤྲིན་གྱིས་འགྲོ་དོན་དུ། །བསམ་པའི་ཚུལ་གྱིས་ཆར་པ་འབེབས། །འདོད་ཆགས་རྣམ་
པར་དག་པའི་དངོས། །དེ་ཉིད་བྱང་ཆུབ་སེམས་དཔའི་ཡུལ། །འདི་ལྟར་ཞེ་སྡང་རྣམ་པར་དག །དེ་ཉིད་བྱང་ཆུབ་སེམས་དཔའི་གནས། །གང་དུ་གཏི་མུག་དག་པའི་ངང་། །དེ་ནི་བྱང་ཆུབ་སེམས་དཔའ་ཡི། །སྣང་བ་དག་
པའི་ཡུལ་གྱུར་པ། །ཐམས་ཅད་འོད་གསལ་ངང་གནས་པའོ། །སངས་རྒྱས་ཐམས་ཅད་མངོན་འདུས་པའི། །འོད་ཟེར་སྣང་བ་བསམ་གཏན་མེས། །དྲི་མ་མ་ལུས་སྦྱངས་གྱུར་པས། །མངོན་པར་བྱང་ཆུབ་དག་པའོ། །ཡེ་
ཤེས་ཆེན་པོའི་དྲི་མ་མེད། །སྣང་བ་མེད་ཅིང་དངོས་མེད་པའི། །མ་འདྲེས་འོད་ཀྱི་སྣང་བ་འགྱེད། །པད་མོ་རིན་ཆེན་གེ་སར་ལས། །ནོར་བུ་སྣ་ཚོགས་སྡོང་པོས་བརྒྱན། །མ་རིག་མུན་སེལ་ཆུ་བོའི་རྒྱུན། །ཐབས་དང་ཤེས་

89-1-90b

རབ་དབྱེར་མེད་པ། །བདེ་ཆེན་ས་ནི་བཅུ་གཉིས་པ། །ནམ་མཁའ་ལྟ་བུར་བདག་མེད་པས། །རབ་ཏུ་མི་གནས་དངོས་མེད་པའོ། །ཟུང་འཇུག་ཆེན་པོ་དག་པའི་སྐུ། །ཐམས་ཅད་མཁྱེན་པ་རྟོག་མེད་པའི། །སྐུ་གསུམ་རྡོ་རྗེར་
གཅིག་པའི་བདག །སར་གྱུར་པ་ནི་བཅུ་གསུམ་པ། །བཙུན་མོའི་བྷ་ག་བདེ་ཅན་དུ། །རང་འབྱུང་འགྱུར་བ་མེད་པར་བཞུགས། །འཕགས་ལམ་ཡན་ལག་བརྒྱད་པ་གང་། །དབང་ཕྱུག་བརྒྱད་ནི་དག་པའི་དངོས། །སྒོམ་
པའི་ལམ་ནི་འདི་ཉིད་དུ། །ལམ་གྱི་ཁྱད་པར་བསྟན་པའོ། །མཐོང་ལམ་ཡན་ལག་བདུན་ལྡན་པ། །སྐུ་གསུམ་རྟོགས་ཕྱིར་ཡན་ལག་བརྗོད། །ཚོགས་ལམ་དང་པོ་དག་ལ་ནི། །དྲན་པ་ཉེ་བར་གཞག་པ་གང་། །
སྨྱིན་བྱེད་དབང་གིས་གཞི་བཟུང་བས། །བུམ་དབང་ལུས་ནི་ལྷ་རུ་སྟེ། །གསང་དབང་ཚོར་བ་བདེ་བ་ཉིད། །གསུམ་པ་ཆོས་ནི་ཡེ་ཤེས་དྲན། །བཞི་པ་སེམས་ནི་འོད་གསལ་དུ། །དྲན་པ་ཉེ་བར་གཞག་ཕྱིར་བརྗོད། །
ཚོགས་ལམ་བར་པ་ཉིད་ལ་ནི། །ཏིང་འཛིན་མ་སྐྱེས་བསྐྱེད་པ་དང་། །སྐྱེས་པ་བརྟན་ཕྱིར་བོགས་དབྱུང་དང་། །ཡང་དག་སྤོང་བ་བཞི་པོ་དག །དེ་ཉིད་གོམས་པར་བྱེད་པ་ལ། །དགག་དང་བསྒྲུབ་པའི་ཕྱོགས་གྱུར་པ། །
སྤངས་ཐོབ་རིམ་པར་ལྡན་པར་བརྗོད། །ཚོགས་ལམ་ཆེན་པོར་གྱུར་པ་དག །རྫུ་འཕྲུལ་རྐང་པ་བཞིར་ངེས་པ། །ཆུ་རླུང་རྡོ་རྗེ་མགོན་པོ་ཡི། །མཱ་མ་ཀཱི་ཡི་རྫུ་འཕྲུལ་གྱིས། །སྙིང་གའི་གནས་སུ་ཡང་དག་ལྡན། །མེ་
རླུང་པད་མ་མགོན་པོ་ཡི། །གོས་དཀར་མོ་ཡི་རྫུ་འཕྲུལ་གྱིས། །གྱེན་རྒྱུ་མགྲིན་པར་བརྗོད་པར་བྱ། །ས་རླུང་རིན་ཆེན་མགོན་པོ་ཡི། །སངས་རྒྱས་སྤྱན་མའི་རྫུ་འཕྲུལ་གྱིས། །ཐུར་སེལ་གསང་བར་བརྗོད་པ་
ཉིད། །རླུང་གི་དཀྱིལ་འཁོར་ལྟེ་བར་ནི། །ལས་ཀྱི་མགོན་པོའི་རིགས་དག་པའི། །ལྷ་མོ་སྒྲོལ་མའི་རྫུ་འཕྲུལ་གྱིས། །མེ་དང་མཉམ་པའི་ལས་ཤེས་བྱ། །རེ་རེའང་ལྷ་མོ་བཞི་བཞི་སྟེ། །དཀྱིལ་འཁོར་བཞི་དང་ལྡན་པ་

89-1-91a

ཡི། །ལམ་དུ་རྫུ་འཕྲུལ་སྟོབས་ཀྱིས་བརྗོད། །གནད་ནི་རྣམ་པ་བཞི་དག་སྟེ། །ལུས་དང་དུས་དང་ཡུལ་དང་ནི། །རླུང་གི་གནད་དུ་ཤེས་པར་བྱ། །དང་པོའི་ཡེ་ཤེས་བླ་ན་མེད། །པད་མ་ལྟར་གསལ་རབ་འབར་
བ། །ས་ནི་ཐོག་མར་མངོན་པར་བདེ། །རྒྱུ་ལམ་ཡན་ལག་བདུན་ལྡན་པ། །འཇུག་གནས་རྒྱུ་ལམ་རང་བཞིན་བཅས། །དབང་གིས་འཇུག་དང་རང་བྱིན་བརླབ། །ཕྱི་ནང་གསང་བ་མཆོག་ཏུ་གྱུར། །འབྲུ་གསུམ་ཨེ་བྃ་མ་ཡར་
བཅས། །འབྲས་བུ་སྙིང་པོ་ཕྱག་རྒྱ་ཆེ། །རང་བཞིན་མེད་པ་དག་པའི་དབྱིངས། །འོད་གསལ་མངོན་པར་བྱང་ཆུབ་པ། །ཚད་མེད་སྙིང་རྗེ་བསྡུ་དངོས་ཀྱིས། །ངེས་པར་རབ་གང་མི་དམིགས་པའོ། །སེམས་ཅན་སྣ་ཚོགས་
འདུལ་དོན་དུ། །སངས་རྒྱས་རྣམས་ནི་ཡང་དང་ཡང་། །སེམས་བསྐྱེད་གྱུར་པས་ལམ་སྦྱངས་ཏེ། །མཛད་པ་དུ་མའི་ཆོ་འཕྲུལ་རྣམས། །རྒྱུན་མི་འཆད་ཕྱིར་སེམས་བསྐྱེད་པའོ། །དྲི་མེད་སེམས་ནི་རྣམ་ཀུན་དུ། །རང་རིག་
ཡེ་ཤེས་ཐོག་མེད་པས། །འགག་པ་མེད་ཅིང་སྐྱེ་མེད་ཀྱང་། །སེམས་ཅན་དོན་དུ་འཁོར་ཞིང་ལྡིང་། །བྱང་ཆུབ་སེམས་ནི་མི་ཟད་པ། །དེ་ཕྱིར་ཕྲིན་ལས་རྒྱུན་མི་འཆད། །རྣམ་པར་མི་རྟོག་མི་དམིགས་པས། །ཀུན་
མཁྱེན་ཡེ་ཤེས་ནམ་མཁའི་དབྱིངས། །གདུལ་བྱའི་ཁམས་དང་འཐུན་པར་འཇུག །སངས་རྒྱས་རྣམས་ཀྱི་སྒྱུ་འཕྲུལ་གར། །དེ་ནི་སྤྲུལ་པའི་སྐུ་ཞེས་བརྗོད། །རྒྱལ་བ་ལོངས་སྤྱོད་རྫོགས་པའི་སྐུ། །ཡོན་ཏན་
དུ་མས་རབ་བརྒྱན་ཅིང་། །མཚན་དང་དཔེ་བྱད་འབར་བ་དང་། །ཡེ་ཤེས་སྐུས་ནི་གཞན་དོན་ཕྱིར། །སྣང་བའི་འོད་འབྱེད་དག་པའི་དོན། །རྟག་ཏུ་བདེ་བ་ཅན་དུ་བཞུགས། །བདེ་བ་ཆེན་པོ་དབྱེར་མེད་ཅིང་། །ཐབས་དང་ཤེས་རབ་མི་
ཕྱེད་པའི། །རྣལ་འབྱོར་དབང་ཕྱུག་བཅོམ་ལྡན་འདས། །ཁ་སྦྱར་སྦྱོར་བ་གསང་བ་ཆེ། །རྡོ་རྗེ་པད་མ་མཉམ་སྦྱོར་བ། །མེ་ཏོག་དང་ནི་དེ་ཡི་དྲི། །དབྱེར་མེད་རྟེན་དང་བརྟེན་པར་གནས། །མཆོག་ཏུ་དག་པ་བདག་མེད་པ། །སྐུ་

89-1-91b

གསུམ་ཐ་དད་བསྟན་པ་ནི། །གདུལ་བྱའི་དབང་ལ་གྱུར་པ་ཡིན། །ཁྱད་པར་ཡན་ལག་ངེས་པར་ནི། །སྐུ་གསུམ་གཅིག་ཏུ་བསྡུས་པའི་དོན། །སངས་རྒྱས་རྣམས་ཀྱི་གསང་ཆེན་མཆོག །འབྲས་བུ་རྡོ་རྗེའི་ཐེག་པ་ཞེས། །
ཐམས་ཅད་མཁྱེན་པས་བཤད་པ་ཡིན། །སྦྱོར་བའི་ལམ་ལས་ཡན་ལག་བཅུ། །རླུང་གི་གནས་སུ་བརྗོད་པར་བྱ། །རྩ་བའི་རླུང་ལྔ་དབང་པོ་ལྔ། །སྟོབས་ལྔ་དེ་ཡི་ཁྱད་པར་ཏེ། ཡན་ལག་རླུང་གི་གནས་པ་ཡིན། །སྔ་མའི་
གོ་རིམ་ལ་ལྟོས་ནས། །ཁྱད་པར་གོང་དུ་འཕེལ་བ་སྟེན། །དད་པ་ལ་སོགས་ཆོས་རྣམས་ཡིན། །འབྲས་བུའི་དུས་སུ་སངས་རྒྱས་ཀྱི། །གསང་བ་ཡེ་ཤེས་སྟོབས་བཅུར་ནི། །གནས་དང་གནས་མིན་མཁྱེན་པ་སོགས། །ཁྱད་
པར་ཐོབ་པ་བསྟན་པའོ། །མཐར་ཕྱིན་ལམ་ནི་རྣམ་གཉིས་ཏེ། །སློབ་པའི་ཟུང་འཇུག་དང་པོ་ཡིན། །རང་རང་རིག་ཏུ་བཅས་པ་ཡི། །ཐ་དད་མེད་པའི་བདེ་བའི་ལམ། །རང་བཞིན་དག་པ་གཟུགས་ཀྱི་སྐུ། །བློ་བུར་དྲི་མ་རྣམ་
བསལ་བ། །མཉམ་རྗེས་ཁྱད་པར་གང་གྱུར་པ། །རྟོག་པ་སྦྱང་བ་སེམས་མངོན་གྱུར། །འདིར་ནི་ངོ་བོ་ཉིད་མེད་པ། །དེ་ཉིད་ཆོས་རྣམས་ཆོས་ཉིད་དེ། །དེ་ནི་ཡང་དག་མི་སླུ་བ། །དེ་རྟོགས་
སངས་རྒྱས་ཡིན་ཞེས་བརྗོད། །དུས་གསུམ་རྒྱལ་བའི་ཡེ་ཤེས་ལམ། །སངས་རྒྱས་སྙིང་པོ་བྱང་ཆུབ་སེམས། །སྟོང་ཉིད་སེང་གེའི་ང་རོ་ཡིས། །ལོག་པར་ལྟ་བའི་ཚོགས་སྐྲག་མཛད། །དེ་ལས་སྣང་བ་མེད་པའི་དབྱིངས། །
སྐུ་གསུམ་ཡོངས་སུ་འབྱུང་དང་པོ། །མི་སློབ་ཟུང་འཇུག་གཉིས་པ་སྟེ། །དབྱེར་མེད་རིག་མའི་སྐྱེས་བུར་བཅས། །རྒྱས་བཏབ་དྲུག་ལྡན་བདེ་བ་ཆེ། །ལྷན་ཅིག་སྐྱེས་པའི་རོལ་པར་འཆར། །ངོ་བོ་ཉིད་ཀྱིས་དག་པ་སྟེ། །
སེམས་ཉིད་འོད་གསལ་སྙིང་པོ་ཉིད། །ཆོས་སྐུ་དྲི་མ་མེད་པ་ལས། །ལུས་སྦྱངས་ཡེ་ཤེས་རོ་གཅིག་པ། །རྡུལ་བྲལ་ཅིང་གྲོལ་མེད་པ་ཉིད། །ཏིང་འཛིན་མཉམ་ཉིད་ཐ་དད་མེད། །བྱང་ཆུབ་མཆོག་ཅེས་བསྟན་པ་ཡིན། །འོད་

89-1-92a

གསལ་དེ་ཉིད་དུས་ཀུན་དུ། །ཆོས་ཉིད་དང་ནི་བསམ་གཏན་དང་། །ལམ་དུ་བྱེད་པའི་ཏིང་འཛིན་ལས། །བརྒྱལ་དང་གཉིད་དང་སྙོམས་འཇུག་སྟེ། །ཐམས་ཅད་དུ་ནི་འགྱུར་བ་མེད། །རང་གིས་འཕྲོག་ཅིང་རང་གིས་སྟེར། །ས་བོན་རྐྱེན་
དང་ཕྲད་པ་བཞིན། །མྱུ་གུ་རྟེན་འབྲེལ་ཚོགས་ལས་འབྱུང་། །རྡོ་རྗེ་འཛིན་པ་ཐམས་ཅད་ཀྱི་ས་དང་ལམ་རྣམ་པར་ངེས་པས་བསྟན་པ་ཞེས་བྱ་བའི་ཏིང་ངེ་འཛིན་ཏོ། །འདི་ནི་གསང་བ་ཐམས་ཅད་ཀྱི། །ཡི་གེ་གནས་ཀྱི་སྟོན་པ་པོ། །ཤྲཱི་གཉིས་མེད་ཡེ་
ཤེས་མཆོག་གྲུབ་པ། །བདེ་ལེགས་ཀུན་གྱི་གཞིར་གྱུར་པའི། །དཔལ་ལྡན་རྣམ་པར་ཐར་པའི་སྒོ། །ཤེས་རབ་སྙིང་རྗེ་དབྱེར་མེད་པའོ། །གསང་བའི་སྙིང་པོ་བླ་ན་མེད། །མཐར་ཐུག་ཆོས་རྣམས་རབ་འཇུག་པ། །སྒྱུ་མའི་རོལ་པ་བསམ་མི་
ཁྱབ། །བྱང་ཆུབ་སེམས་ལས་ཀུན་དུ་འབྱུང་། །བདེ་བ་མཆོག་ལས་མཆོག་གྲུབ་པ། །འཁོར་འདས་སྤང་ཐོབ་མེད་པ་ཉིད། །སྲིད་ཞི་མཉམ་པ་ཉིད་རྟོག་པ། །བྱང་ཆུབ་སེམས་ཀྱི་སྤྱོད་ཡུལ་ཅན། །རྒྱལ་བ་རྣམས་ཀྱིས་བསྟན་པའི་ལམ། །བདེ་དོན་
སྤྲོས་མེད་ངང་དུ་འདུས། །ཁམས་གསུམ་རླུང་ལས་སྤྲུལ་པ་ནི། །རྣམ་པར་ཤེས་པ་ཡུལ་ལ་འཇུག །དེ་ལས་བདག་དང་གཞན་དུ་རྟོག །རྟེན་བཅས་རང་སྟོང་གཡོ་བ་ཡིན། །འདིར་ནི་རླུང་སེམས་འདྲེས་པ་ལས། །སྣང་བ་གསུམ་གྱི་རང་
བཞིན་འཆར། །རྣལ་འབྱོར་རྒྱུད་ཀྱིས་བདག་དང་གཞན། །ཐ་དད་མི་རྟོག་སྤྱད་པ་བྱ། །ཀུན་གྱི་བླ་མར་གྱུར་པ་ནི། །མཆོག་གི་ཕྱག་རྒྱ་ཆེན་པོའི་གནས། །ཀུན་རྫོབ་སྣང་བ་སྣ་ཚོགས་པ། །ངོ་བོ་ཉིད་ཀྱིས་རང་སྟོང་པ། །གནས་གསུམ་
ཚུལ་ནི་རྒྱུད་གཞན་ལས། །སྙིང་པོ་འོད་གསལ་མངོན་བྱང་ཆུབ། །སྒྱུ་མ་ལྟ་བུའི་ཡུལ་ལས་གཞན། །ཏིང་འཛིན་ངེས་པར་འདིར་བསྟན་པའོ། །དུས་གསུམ་སངས་རྒྱས་ཐམས་ཅད་ཀྱིས། །གསང་ཆེན་རྒྱལ་པོ་ཟུང་འཇུག་ལམ། །
སྐུ་གསུམ་དབྱེར་མེད་ནམ་མཁའི་ངང་། །ཡེ་ཤེས་ཐ་སྙད་ལས་འདས་པའོ། །ཡོན་ཏན་རྫོགས་ཤིང་ཀུན་དབང་སྒྱུར། །མཆོག་ལྡན་རྒྱལ་པོ་མཛེས་ཤིང་འབར། །ཟབ་དང་རྒྱ་ཆེ་གཉིས་སུ་མེད། །རང་གཞན་གཉིས་མེད་ཆེན་པོ་

89-1-92b

ཡིན། །རྩ་བའི་རྒྱུད་ཀྱི་དགོངས་པ་ནི། །ཡང་དག་ཉིད་དུ་རྣམ་བཤད་པ། །ལྷ་མོ་རྣམས་དང་སྐྱེས་བུ་ཡི། །གསང་བའི་རྒྱུད་འདིར་གཉིས་མེད་བརྗོད། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་
འདུས་པ་ལས་གཉིས་སུ་མེད་པར་སྟོན་པ་མཉམ་པ་ཉིད་རྣམ་པར་རྒྱལ་བ་ཞེས་བྱ་བ་ལས་དེ་བཞིན་གཤེགས་པ་ཐམས་ཅད་ཀྱི་གསང་ཆེན་གྱི་གནས་ངེས་པར་བསྟན་པ་མཆོག་ཏུ་མི་འགྱུར་བའི་ཡེ་ཤེས་གཏན་ལ་ཕབ་པ་ཞེས་
བྱ་བའི་ལེའུ་སྟེ་ཉེར་གཉིས་པའོ།། །། བརྟག་པ་གཉིས་པ་རྣམ་པར་ངེས་པ་གསལ་བ་ཞེས་བྱ་བ་སྟེ་གསང་བའི་དཔལ་མཆོག་ཆེན་པོ་ཡེ་ཤེས་ཀྱི་དེ་ཁོ་ན་ཉིད་རབ་ཏུ་བརྗོད་པའོ། །དེ་ནས་རྒྱལ་པོ་རྡོ་རྗེ་འཛིན། །སྐུ་གསུམ་
མཆོག་ཏུ་བརྟག་པ་ཉིད། །མི་འགྱུར་རྡོ་རྗེ་གསུམ་གྱི་ངང་། །བརྟན་ཞིང་མཆོག་ཏུ་བཟང་པོ་ཆེ། །སྙིང་པོ་བྱང་ཆུབ་བླ་མེད་པས། །གསང་བ་དམ་པ་བཀའ་སྩལ་ཏོ། །གསང་བ་ཆེན་པོའི་དཀྱིལ་འཁོར་དུ། །རྣམ་པ་གསལ་ཞིང་དག་པའི་སྐུ། །
བསྡུས་པའི་ཕོ་བྲང་རྒྱ་ཆེ་བས། །མི་བསྐྱོད་རྡོ་རྗེ་སེམས་དཔའ་དག །གཅིག་ཏུ་གཙོ་བོར་གྱུར་པའོ། །ཁྱབ་པར་སྣང་མཛད་དཀོན་མཆོག་དཔལ། །འོད་དཔག་མེད་དང་གདོན་མི་ཟ། །རིགས་ཀྱི་དབྱེ་བ་ལྔ་རུ་བརྗོད། །སྤྱན་དང་མཱ་མ་ཀཱི་
མཆོག་དང་། །གོས་དཀར་མོ་དང་སྒྲོལ་བྱེད་མ། །མཚམས་ཀྱི་དཀྱིལ་འཁོར་གནས་པ་ཡི། །གཟུགས་སྒྲ་དྲི་རོ་ལྷ་མོ་བཞི། །བར་ཁྱམས་གནས་པ་གྲྭ་བཞིར་དགོད། །བྱམས་པ་ས་ཡི་སྙིང་པོ་དང་། །ཕྱག་ན་རྡོ་རྗེ་མཁའ་སྙིང་པོ། །འཇིག་
རྟེན་དབང་ཕྱུག་འཇམ་པའི་དབྱངས། །སྒྲིབ་སེལ་ཀུན་དུ་བཟང་པོ་སྟེ། །སེམས་དཔའ་བརྒྱད་ནི་ལྷ་ཁྱམས་ལ། །ཁྲོ་རྒྱལ་བཞི་དང་ལྡན་པས་ན། །ཉི་ཤུ་རྩ་ལྔ་ནང་དུ་དགོད། །ཕྱི་ཁྱམས་དག་ལ་ཁྲོ་རྒྱལ་དྲུག །དེ་ལྟར་སུམ་ཅུ་རྩ་གཅིག་
གིས། །རྩ་བའི་དཀྱིལ་འཁོར་བསྡུས་པ་ཡིན། །ཕྱག་ན་རྡོ་རྗེའི་དབང་བསྐུར་བ། །ཚངས་པ་ཆོས་ཀྱི་འཁོར་ལོ་སྟེ། །སུམ་བཅུ་གསུམ་པར་གནས་པའོ། །སངས་རྒྱས་ཐམས་ཅད་ཀྱིས་དབང་བསྐུར་བ་མཉམ་པ་ཉིད་ཡེ་ཤེས་སྟོན་པ་

89-1-93a

ཞེས་བྱ་བའི་ཏིང་ངེ་འཛིན་ཉིད་དུ་མངོན་པར་བརྗོད་པའོ། །དེ་ནས་དེ་བཞིན་གཤེགས་པ་མིའི་ཟླ་བ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་མི་དམིགས་པའི་ཡེ་ཤེས་འབྱུང་བ་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་དུ་མར་སྣང་བའི་དངོས། །ལྗོན་ཤིང་འབྲས་བུ་ལྡན་པ་བཞིན། །ཕྲ་བའི་དབྱེ་བ་ཤེས་པར་བྱ། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་བཅོམ་ལྡན་འདས་ཤིན་དུ་གཟིགས་པ་དེ་བཞིན་གཤེགས་པ་ཐམས་ཅད་ཀྱི་གསང་བའི་སྤྱོད་ཚུལ་ཀུན་དུ་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
གནས་མེད་གནས་པའི་མཁའ་ལྟ་བུར། །མི་རྟོག་རང་བྱུང་འོད་གསལ་བ། །དོན་དམ་དམིགས་མེད་ངོ་བོ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་
འབར་བས་རབ་ཏུ་བརྒྱན་པ་ཞེས་བྱ་བ་སངས་རྒྱས་ཐམས་ཅད་ཀྱི་གསང་བ་དག་པར་སྡོམ་པའི་ངོ་བོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཆོས་རྣམས་དངོས་
མེད་ཅིང་། །ངོ་བོ་ཉིད་དག་ཡེ་ཤེས་སྐུ། །བདེན་པ་འདིས་ནི་ཁྱབ་པར་བྱེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ནོར་བུའི་འོད་ཀྱི་རྒྱལ་པོ་སངས་རྒྱས་ཐམས་ཅད་ཀྱི་མཉམ་པ་ཉིད་
ཡེ་ཤེས་གཅིག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཁོར་བ་སྐྱུག་བྲོ་རྨོངས་པ་ཅན། །རབ་རིབ་ལྡན་པའི་རྟོག་པ་ཉིད། །དེ་བཞིན་གཤེགས་པའི་ཡེ་ཤེས་མཆོག །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རི་རབ་བརྩེགས་པའི་རྩེ་མོ་རྡོ་རྗེ་སངས་རྒྱས་ཐམས་ཅད་ཀྱི་ཡེ་ཤེས་རྒྱ་མཚོ་ལྟར་མི་ཕྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་

89-1-93b

ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཔག་མེད་ཡེ་ཤེས་རྒྱལ་མཚན་ཏོག །ཡིད་བཞིན་ནོར་བུའི་སྙིང་པོ་ལས། །རང་བཞིན་བདེ་ཆེན་གནས་མཆོག་འགྲུབ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་
དེ་བཞིན་གཤེགས་པ་རིན་ཆེན་ལྷའི་ལྷ་སངས་རྒྱས་ཐམས་ཅད་ཀྱི་གཟི་བརྗིད་མཐའ་ཡས་པའི་འོད་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱལ་བ་མ་ལུས་
ཀུན་གྱི་གསང་། །ཡེ་ཤེས་རོལ་པ་བདེ་བ་ཆེ། །ཐ་དད་སྤངས་པའི་ཏིང་ངེ་འཛིན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དོན་གནས་གཟིགས་པ་དག་པའི་དབྱིངས་ཀུན་ནས་སྤྲིན་
གྱི་སྣང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བླ་ན་མེད་པའི་བྱང་ཆུབ་སེམས། །ཚད་མེད་བདེ་བའི་ཆར་འབེབས་པ། །རང་འབྱུང་ཡེ་ཤེས་རྒྱལ་པོ་ཉིད། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བསམ་པ་རྫོགས་པ་དཔལ་རྒྱལ་པོ་བདེན་པ་གཉིས་སུ་མེད་པའི་ངོ་བོ་ཀུན་ཏུ་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །འདི་ནི་རྒྱལ་བ་མ་ལུས་པའི། །ཡེ་ཤེས་སྐུ་སྟེ་སྐྱོན་མེད་པ། །བསམ་པ་བློ་ཡི་ཡུལ་ལས་སྣང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མྱ་ངན་མེད་
པའི་དཔལ་རྡོ་རྗེ་སངས་རྒྱས་ཐམས་ཅད་ཀྱི་སྙིང་པོ་ཡང་དག་པར་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་སྣང་ཡེ་ཤེས་ཅིར་མི་རྟོག །ནམ་མཁའི་
དྲི་མེད་མཐའ་ཁྱབ་སྟོང་། །རྣམ་རྟོག་ཡེ་ཤེས་མེ་འབར་སྐུ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཀུན་དུ་རྟོག་པ་ཐམས་ཅད་དང་བྲལ་བ་རྡོ་རྗེ་དབྱིངས་སངས་རྒྱས་ཐམས་ཅད་

89-1-94a

ཀྱི་ཞིང་ཁམས་རིན་པོ་ཆེའི་སྤྲིན་ཀུན་དུ་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དྲི་མ་མེད་པ་དག་པའི་ཞིང་། །པད་མོ་རྒྱས་པ་སྣང་བའི་དབྱིངས། །རིན་ཆེན་
འོད་འཕྲོ་མི་ཟད་དང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྲ་བའི་དབང་ཕྱུག་སངས་རྒྱས་ཐམས་ཅད་ཀྱི་རོལ་པ་སྟོན་པའི་དཔལ་རྡོ་རྗེ་སངས་རྒྱས་ཐམས་ཅད་ཀྱི་ཀུན་ནས་འོད་
ཀྱི་ཕྲེང་བ་དམ་པའི་དཀྱིལ་འཁོར་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཀྱིལ་འཁོར་ཐམས་ཅད་སེམས་སུ་གཅིག །དེ་ཉིད་ཡེ་ཤེས་དག་པའི་ངང་། །དབྱེར་
མེད་རྟག་པའི་ཚུལ་མཆོག་སྟེ། །བདེ་གཤེགས་གསང་བ་འབྱུང་བའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མེ་ཏོག་སྤྱན་ཡངས་སངས་རྒྱས་ཐམས་ཅད་ཀྱི་མངའ་དབང་དམ་པ་རྣམ་པར་འཕྲུལ་བ་དྲི་མ་མེད་པའི་
དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱལ་བ་ཀུན་གྱི་ཡེ་ཤེས་དབྱིངས། །གསང་བ་འགྲོ་སྙིང་རྣམ་དག་པས། །བླང་དོར་མེད་པའི་བདེ་བ་ཐོབ། །བྱང་ཆུབ་ཚུལ་འདི་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པ་རྡོ་རྗེ་རྣམ་པར་དབྱེས་པའི་སྐུའི་དཔལ་སངས་རྒྱས་ཐམས་ཅད་ཀྱི་དབྱངས་ཀུན་དུ་སྒྲོགས་པའི་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །གཟུང་འཛིན་རྟོག་པའི་དབའ་རླབས་ཀུན། །དབུ་མར་གཅིག་ཏུ་ཐིམ་གྱུར་པས། །ཡེ་ཤེས་རྒྱས་པའི་སྙིང་པོ་དབྱེ། བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དྲི་མ་མེད་པ་
ཆོས་ཀྱི་འོད་ཟེར་འབྱུང་བ་རྡོ་རྗེ་སངས་རྒྱས་ཐམས་ཅད་ཀྱི་སྙིང་པོའི་ཡེ་ཤེས་འབྱུང་བ་དམ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་དུ་སེང་གེའི་རྩལ་གྱིས་ནི། །ཟིལ་གྱིས་

89-1-94b

གནོན་པ་རྡོ་རྗེ་ཞེས། །ཡོངས་སུ་བསྡུ་བའི་ཏིང་ངེ་འཛིན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་གསལ་བའི་ཡོན་ཏན་འབྱུང་བ་རྡོ་རྗེ་སངས་རྒྱས་ཐམས་ཅད་ཀྱི་དགྱེས་པའི་ཡོན་ཏན་
དུ་མ་སྟོན་པ་མི་གནས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་ནས་སྣང་བ་མེད་པའི་ངང་། །རྟོག་པས་བསྐྱོད་པར་མི་འགྱུར་བ། །མཉམ་ཉིད་ཡེ་ཤེས་ལྷང་ངེ་བཞུགས། །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཟླ་བའི་ཞལ་མངའ་བ་རྡོ་རྗེ་སངས་རྒྱས་ཐམས་ཅད་ཀྱི་སྒྱུ་མའི་རོལ་པ་སྣ་ཚོགས་སུ་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །འབྱུང་བ་རྣམས་དང་སྲོག་བཅས་དང་། །མི་ཟད་རྩ་ལྕུག་མ་ལུས་ཀུན། །དེ་བཞིན་ཉིད་ལས་སྣང་བ་ཡིན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཀུན་
ཏུ་འོད་མི་ཟད་པའི་རིན་ཆེན་སངས་རྒྱས་ཐམས་ཅད་ཀྱིས་འགྲོ་བའི་མིག་རྣམ་པར་སྦྱོང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ལུས་ཅན་ཐམས་ཅད་ལ། །གདུལ་
བྱ་དུས་ལ་བབ་གྱུར་ན། །ནམ་མཁའ་ལས་ཀྱང་སྒྲ་བྱུང་ནས། །ཆོས་ཀྱི་འབྱུང་གནས་དེར་སྟོན་མཛད་ཅེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་དཀོན་པའི་ཏོག་རང་འབྱུང་དུ་འཆར་བའི་ཡེ་ཤེས་རོལ་བ་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདི་ནི་རང་འབྱུང་སྟོན་པ་པོ། །ཡེ་ཤེས་འཇུག་པ་འབད་མེད་པར། །ཐོབ་བྱ་བྱང་ཆུབ་སེམས་དཔའ་རྣམས། །རང་རིག་རང་ལས་རྙེད་པར་
འགྱུར་ཞེས་གསུངས་སོ། །དེ་ནས་དེ་བཞིན་གཤེགས་པ་བླ་མ་ཕན་པར་གྲགས་པ་སངས་རྒྱས་ཐམས་ཅད་ཀྱི་སྐུ་ཀུན་དུ་སྟོན་ཅིང་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་

89-1-95a

གསུངས་སོ། །དུས་གསུམ་པ་ཡི་སངས་རྒྱས་རྣམས། །དཀྱིལ་འཁོར་བསྡུས་པའི་འཁོར་ལོ་དག །གདུལ་བྱའི་བློ་ཡིས་མཐོང་བར་བྱེད། །དེ་ཉིད་བསམ་པའི་ཚུལ་གྱིས་འབྱུང་ཞེས་གསུངས་སོ། །སངས་རྒྱས་བྱང་ཆུབ་རྡོ་རྗེ་
འཛིན། །ཚེ་འདིས་འགྲུབ་གྱི་གཞན་དུ་མིན། །ལུས་ངག་ཡིད་ནི་ལེགས་གནས་པ། །མེད་པར་འགྲུབ་པར་མི་འགྱུར་གསུངས། །གསུང་གཅིག་རྡོ་རྗེ་འཛིན་པ་ཆེ། །ཐུབ་པ་ཆེན་པོ་རྣམ་པར་རྒྱལ། །གཉིས་མེད་མཉམ་པའི་རྒྱལ་པོ་ཆེ། །
འདོད་པའི་ལོངས་སྤྱོད་རྒྱུན་མི་འཆད། །འདི་མེད་རོལ་པ་རྒྱུ་མེད་འགྱུར། །ཇི་ལྟར་འདོད་པ་ཉེར་བསྟེན་པ། །ཞེན་མེད་ཡེ་ཤེས་ལོངས་སྤྱོད་པ། །བདེ་བར་བསྟན་པས་སངས་རྒྱས་འཐོབ་ཅེས་གསུངས་ཏེ། ཡང་དག་པའི་ལོངས་སྤྱོད་པའི་
ཏིང་ངེ་འཛིན་ཏོ། །དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་ཤིན་དུ་བདེ་བ་
ཆེན་པོའི་གནས་མངོན་པར་སྟོན་པའི་ལེའུ་སྟེ་ཉེར་གསུམ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བ་མི་ཟད་པའི་ཡེ་ཤེས་རབ་ཏུ་འབྱེད་པ་
རྡོ་རྗེ་སངས་རྒྱས་ཐམས་ཅད་ཀྱི་ནམ་མཁའི་གནས་མི་འགྱུར་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་དམིགས་པ་ཀུན་བྲལ་བའི། །སྙིང་རྗེ་ཆེན་པོའི་འོད་ཟེར་
གྱིས། །ཡུལ་རྣམས་སྒྱུ་མར་སྤྱད་པར་བྱ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་ཟེར་དཔག་མེད་གཟི་བརྗིད་མཚུངས་པ་མེད་པའི་རྒྱལ་པོ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་
སྙིང་པོ་གསང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་སྟོང་ཉིད་ཆོས་ཀྱི་སྐུ། །དེ་ཉིད་སྙིང་རྗེ་དབྱེར་མི་ཕྱེད། །འབྲས་བུ་སྙིང་པོ་བྱང་ཆུབ་སེམས། །ཡེ་ཤེས་ཚུལ་འདི་

89-1-95b

བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དུས་མཁྱེན་དཔལ་སངས་རྒྱས་ཐམས་ཅད་ཀྱིས་གདུགས་ཁྱབ་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འགྲོ་
བ་མ་ལུས་ཀུན་གྱི་སྙིང་། །མི་ཤིགས་ཡེ་ཤེས་གཅིག་པུར་བཞུགས། །འགྲོ་འོང་མེད་ཅིང་ཁྱབ་པར་འབྱུང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་སྟོབས་མཆོག་སེང་གེའི་
སྐུ་ཅན་སངས་རྒྱས་ཐམས་ཅད་ཀྱིས་འགྲོ་བ་ཀུན་ལ་རང་བཞིན་གྱིས་དབང་བསྐུར་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ངོ་བོ་ཉིད་ཀྱིས་དུས་གསུམ་དུ། །ཕྱོགས་བཅུའི་
སེམས་ཅན་མ་ལུས་ལ། །རྒྱལ་བ་ཀུན་གྱིས་དབང་བསྐུར་མཛད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྣམ་པར་སྦྱངས་པའི་མཁས་པའི་བློ་ཅན་སངས་རྒྱས་ཐམས་ཅད་ཀྱིས་
ཁམས་གསུམ་ཆོས་ཀྱི་རྒྱལ་པོར་དབང་བསྐུར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཁམས་གསུམ་སྐྱེ་འགྱུར་ལུས་ཅན་གྱི། །ལུས་ངག་སེམས་ནི་མི་དམིགས་པར། །
བྱང་ཆུབ་སྙིང་པོར་དབང་བསྐུར་མཛད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱལ་བར་དཀའ་བའི་བློ་ཅན་སངས་རྒྱས་ཐམས་ཅད་ཀྱིས་འགྲོ་བ་རྣམས་ལ་ཡང་དག་པར་རྟོགས་པའི་
དབང་བསྐུར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཀུན་གྱི་ཡེ་ཤེས་དབང་། །རྟག་ཅིང་ཁྱབ་པའི་ཚུལ་དུ་བསྐུར། །དེ་ཉིད་རྣམ་དག་དབང་བསྐུར་མཆོག །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་ཕུང་པོ་མི་ཟད་པ་སངས་རྒྱས་རྣམས་ཀྱི་ཡེ་ཤེས་ཀྱི་འཚོ་བ་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་

89-1-96a

ཀྱི་སེམས་འདི་གསུངས་སོ། །གླང་ཆེན་མྱོས་འདྲའི་སྤྱོད་སྤངས་ནས། །བར་སྣང་བྱ་བཞིན་རྗེས་ཆགས་མེད། །ཐམས་ཅད་དུས་སུ་སྙོམས་པར་སྤྱད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་
དེ་བཞིན་གཤེགས་པ་ཏོག་གི་ཟླ་བ་སངས་རྒྱས་ཐམས་ཅད་ཀྱི་བསོད་སྙོམས་སྤྱོད་པ་དྲན་པར་བྱ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་གྲོང་ཁྱེར་རྒྱུ་བ་སོགས། །སྣ་ཚོགས་
སྤྱོད་ལམ་བག་ཡོད་པས། །དྲན་པས་མ་ཡེངས་གཞན་དོན་ཕྱིར། །བྱང་ཆུབ་ཚུལ་འདི་སྤྱད་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཐུ་ཆེན་ཐོབ་སངས་རྒྱས་ཐམས་ཅད་ཀྱི་སྤྱོད་ལམ་རྣམ་པར་དག་པའི་དཔལ་ཞེས་
བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་འགྲོ་དང་འཆག་པ་དང་། །ཉལ་དང་ཟས་ཀྱི་དུས་ལ་སོགས། །བྱང་ཆུབ་སེམས་ཀྱི་ངང་ལས་ནི། །མ་ཡེངས་ཚུལ་བཞིན་སྤྱད་པར་བྱ་ཞེས་
གསུངས་སོ། །དེ་ནས་དེ་བཞིན་གཤེགས་པ་མཐུ་སྟོབས་མཐའ་ཡས་པ་རྡོ་རྗེ་སངས་རྒྱས་ཐམས་ཅད་ཀྱི་ཀུན་དུ་སྤྱོད་པ་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཚུལ་
བཞིན་མ་ཡིན་རྣམ་སྤངས་ནས། །བག་མེད་གནས་ལས་བཟློག་པར་བྱ། །འདི་ནི་ཡེ་ཤེས་བདུད་རྩི་ཡིན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཟླ་བ་རྣམ་པར་དག་པའི་དཔལ་སངས་
རྒྱས་ཐམས་ཅད་ཀྱི་སྤྱོད་པ་དག་པའི་སྣང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ལུས་སེམས་བདེ་གནས་ཤིང་། །ལྡོག་པ་མེད་པའི་བརྩོན་འགྲུས་ཀྱིས། །དཀར་
པོའི་ཆོས་ལ་སྤྱོད་པར་བྱ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་དོན་ཐམས་ཅད་གཟིགས་པ་རྡོ་རྗེ་སངས་རྒྱས་ཐམས་ཅད་ཀྱི་ལྟ་བ་རྣམ་པར་དག་པའི་གནས་རྡོ་རྗེ་ཞེས་བྱ་བའི་

89-1-96b

ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་རྒྱུ་དང་འབྲས་བུའི་ཆོས། །ཆུད་མི་ཟ་བ་ངེས་འབྱུང་ཕྱིར། །ཤིན་དུ་དག་ཚེ་སྡུག་བསྔལ་འགྱུར། །དེ་ཉིད་ཕྲ་བ་རྟོགས་པར་དཀའ། །ཞེས་གསུངས་
སོ། །དེ་ནས་དེ་བཞིན་གཤེགས་པ་མཐུ་སྟོབས་མཐའ་ཡས་རྡོ་རྗེ་སངས་རྒྱས་ཐམས་ཅད་ཀྱི་ཀུན་དུ་སྤྱོད་པ་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཚུལ་བཞིན་མ་ཡིན་
རྣམ་སྤངས་ནས། །བག་མེད་གནས་ལས་བཟློག་པར་བྱ། །འདི་ནི་ཡེ་ཤེས་བདུད་རྩི་ཡིན། །བྱང་ཆུབ་ཚུལ་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་དཔའ་བོ་ཆེན་པོ་རྡོ་རྗེ་སངས་རྒྱས་
ཐམས་ཅད་ཀྱི་ངེས་པའི་ལྟ་བ་ཡང་དག་པ་དྲན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དག་པའི་འབྲས་བུ་བདེ་བ་སྟེ། །མ་དག་པ་ལས་སྲིད་པར་ལྟུང་། །རྣམ་པར་ངེས་པས་
ཡེ་ཤེས་ཆེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འབྱོར་ལྡན་སངས་རྒྱས་ཐམས་ཅད་ཀྱི་ངེས་པའི་ལམ་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་རྣམས་ཀྱི་ངེས་འབྱུང་ལམ། །དེ་ནི་ཐར་བའི་རྒྱལ་མཚན་ཏེ། །རང་སེམས་དག་པ་ཚུལ་ཁྲིམས་མཆོག །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་བསོད་ནམས་རབ་རྒྱས་སངས་རྒྱས་ཐམས་ཅད་ཀྱི་བསོད་ནམས་མི་ཟད་པའི་གཏེར་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བླ་ན་མེད་
པའི་ནོར་བུ་ནི། །ཞེན་མེད་ཡེ་ཤེས་རྒྱ་མཚོ་ཆེ། །ཀུན་དུ་ལོངས་སྤྱོད་རང་ལས་འབྱུང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་འབར་བའི་འོད་སངས་རྒྱས་ཐམས་ཅད་ཀྱིས་འགྲོ་

89-1-97a

བ་སྐྱོབ་པ་དཔལ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བྱང་ཆུབ་ཡེ་ཤེས་ནམ་མཁའ་ལྟར། །བདག་མེད་ཕུང་པོ་ལ་སོགས་སྟོང་། །སྟོང་ཉིད་སྒྱུ་མས་སྙིང་རྗེར་གནས། །དེ་ཉིད་
ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྙིང་པོ་ཐུགས་ཡང་སངས་རྒྱས་ཐམས་ཅད་ཀྱི་གནས་པ་མེད་པའི་ཚུལ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
སངས་རྒྱས་ཐུགས་ནི་ཆོས་ཀྱི་དབྱིངས། །འགྱུར་བ་མེད་ཅིང་ཀུན་རྟོག་བྲལ། །མི་གཡོ་མཚན་མ་མེད་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལེགས་སྐྱེས་སངས་རྒྱས་ཐམས་ཅད་ཀྱིས་འགྲོ་
བའི་གདུང་བ་སེལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མི་ཤེས་ཉོན་མོངས་ནད་ཀྱིས་གཟེར། །དེ་སེལ་དམ་པའི་བདུད་རྩི་བསྟན། །བླ་མེད་ཐུགས་རྗེའི་སྨན་གྱིས་གསོ། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལྷ་ཆེན་པོ་ནོར་འཛིན་སངས་རྒྱས་ཐམས་ཅད་ཀྱི་ཡེ་ཤེས་རོལ་པ་འབྱུང་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
འཕགས་པ་རྣམས་ཀྱིས་སྦྱངས་པའི་ལམ། །ནང་ལས་བྱུང་གི་ཕྱི་ལས་མིན། །དེ་ཉིད་འབྲས་བུ་མཆོག་ལས་སྐྱེས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡིད་གཉིས་སྤོང་སངས་རྒྱས་
ཐམས་ཅད་ཀྱི་གསང་སྔགས་ཀྱི་ཚུལ་བྱིན་གྱིས་རློབས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདིར་ནི་ཁྱད་པར་བྱིན་རློབ་ཅིང་། །དཔག་མེད་བདེ་བར་གཤེགས་པ་ཡིས། །
དུས་དྲུག་ཏུ་ནི་བྱིན་རློབ་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །གཉིས་མེད་ཡེ་ཤེས་དག་པ་ལས། །ཅི་སྟེ་མིན་ན་ལྡོག་པ་ལྟར། །དེ་བས་སྡུག་བསྔལ་བརྒྱུད་མ་ལས། །མཐར་ཕྱིན་སྔགས་ཀྱིས་བྱིན་བརླབས་པའི། །

89-1-97b

མཁས་པ་དག་ནི་ཡེ་ཤེས་སྤྱོད། །ཇི་ལྟར་ཆུ་ཡི་ཐིགས་པ་ནི། །རྒྱ་མཚོར་བབ་ན་ལན་ཚྭར་གྱུར། །ལན་ཚྭ་འོ་མའི་མཚོར་ཞུགས་པས། །དེ་ཉིད་སླར་ཡང་བདུད་རྩིར་འགྱུར། །དག་པས་དུག་མེད་བྱས་ནས་ནི། །ཡེ་ཤེས་བདུད་རྩི་ལོངས་སྤྱོད་པའོ། །
རྡོ་རྗེ་བདུད་རྩི་འབྱུང་བ་ཞེས་བྱ་བའི་ཏིང་ངེ་འཛིན་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་སངས་རྒྱས་
ཀུན་གྱི་ཡེ་ཤེས་ཀྱི་བདུད་རྩི་བསྟན་པའི་ལེའུ་སྟེ་ཉེར་བཞི་པའོ།། །། དེ་ནས་ཡང་བཅོམ་ལྡན་འདས་དེ་བཞིན་གཤེགས་པའི་ཏིང་ངེ་འཛིན་དཔག་མེད་སྟོབས་སངས་རྒྱས་ཐམས་ཅད་ཀྱི་བྱིན་གྱིས་རློབ་པ་རྡོ་རྗེ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐུ་གསུང་ཐུགས་ཀྱི་རྡོ་རྗེ་ཡི། །བདག་པོ་དེ་ཉིད་ཀུན་འདུས་པ། །རིག་པའི་རྒྱལ་པོས་བྱིན་གྱིས་རློབ། །བྱང་ཆུབ་ཚུལ་འདི་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་མཆོག་ཏུ་སྲིད་པ་སངས་རྒྱས་ཐམས་ཅད་ཀྱི་བླ་ན་མེད་པའི་སྙིང་པོ་ཞེས་བྱ་བའི་སངས་རྒྱས་ཐམས་ཅད་ཀྱི་འབྱུང་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །རྒྱལ་བ་ཀུན་གྱི་དགོངས་པ་རྣམས། །སོ་སོའི་རིག་པའི་རྩལ་གྱིས་ནི། །སྙིང་པོ་གཅིག་པར་ཤེས་པར་བྱ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བཅོམ་པ་མེད་པ་སངས་རྒྱས་
ཐམས་ཅད་ཀྱི་རྔ་སྒྲའི་དབྱངས་ཀྱིས་འགྲོ་བ་བསྐུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཞིང་ཁམས་སྦྱོང་བ་དང་། །གང་དུ་འགྲོ་བ་འདུལ་བ་དག །ནམ་མཁའི་དབྱིངས་
ཀྱིས་ཀུན་དུ་བརྡུང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མི་གནས་པ་སངས་རྒྱས་ཐམས་ཅད་ཀྱི་ཆོས་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་

89-1-98a

སེམས་འདི་གསུངས་སོ། །ཆོས་རྣམས་རང་བྱུང་སྟོང་ཉིད་སྒྲ། །གདུལ་བྱ་མོས་པའི་སྣང་བ་ལ། །སངས་རྒྱས་རྣམས་ཀྱིས་ཀུན་དུ་བསྒྲགས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་བདེ་གནས་དབང་པོ་སངས་རྒྱས་ཐམས་ཅད་ཀྱི་ཟབ་པའི་གནས་མི་ཕྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་ཟག་མེད་འོད་གསལ་བ། །སྐྱེ་
བ་མེད་ཅིང་ཤིན་དུ་ཕྲ། །མཚན་ཉིད་དངོས་པོས་སྟོང་པའི་ཆོས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚོགས་ཅན་གཙོ་བོ་སངས་རྒྱས་ཐམས་ཅད་ཀྱི་ཏིང་ངེ་འཛིན་མི་ཟད་པ་འབྱུང་བ་
རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣ་ཚོགས་སེམས་ཅན་སེམས་རྒྱུད་ནི། །ངོ་བོ་ཉིད་ཀྱིས་རང་སྟོང་པས། །མི་ཕྱེད་ཡེ་ཤེས་གནས་པ་པོ། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འགྲོ་བའི་འོད་ཟེར་སངས་རྒྱས་ཐམས་ཅད་ཀྱི་འོད་ཟེར་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
ཀུན་དུ་མ་སྨིན་སྨིན་བྱེད་དང་། །སྨིན་པ་གྲོལ་ཕྱིར་འབད་པ་སྟེ། །ཡེ་ཤེས་སྤྱོད་པ་བྱང་ཆུབ་ཆེ། །གསང་བ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཕལ་ཆེན་རྒྱལ་བ་ཀུན་དུ་རྟོག་པ་ངེས་པར་སེལ་
བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་པོ་མི་རྟག་སྐད་ཅིག་མ། །དེ་ཉིད་སླུ་བའི་ཆོས་ཅན་ཕྱིར། །འཛིན་པ་མེད་པའི་གནས་ཤེས་བྱ། །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་མཐའ་ཡས་སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྒོ་ལ་འཇུག་པ་རྡོ་རྗེ་ཞེས་བྱ་བའི་སངས་རྒྱས་ཐམས་ཅད་ཀྱི་གནས་ཀྱི་ཏིང་ངེ་འཛིན་རྣམ་པར་སྦྱོང་

89-1-98b

བ་ཞེས་བྱ་བ་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ངོ་བོ་ཉིད་ཀྱི་དག་པའི་དངོས། །དབུ་མ་ཡེ་ཤེས་རྟོག་བྲལ་བས། །མཐའ་ལས་འདས་པ་ཟུང་དུ་འཇུག །གསང་བ་གཉིས་མེད་ཚུལ་བསྟན་པའོ་ཞེས་གསུངས་
སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དོན་གྱི་བློ་གྲོས་སངས་རྒྱས་ཐམས་ཅད་ཀྱི་གསང་བ་ཡེ་ཤེས་བསམ་གྱིས་མི་ཁྱབ་པའི་གནས་ལ་འཇུག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །ཆོས་རྣམས་ཐམས་ཅད་སྐྱེ་བ་མེད། །ཆོས་གང་འགག་པར་འགྱུར་བ་མེད། །རྣམ་པར་རྟོག་པ་རབ་ཞི་བ། །དེ་ཉིད་བྱང་ཆུབ་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བླ་
མེད་སྨན་པའི་རྒྱལ་པོ་སངས་རྒྱས་ཐམས་ཅད་ཀྱི་ཡེ་ཤེས་རྟོག་པའི་དྲ་བ་གཅོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐོག་མ་ཐ་མ་མེད་པའི་བདག །རྟོག་པ་མེད་ཅིང་
དམིགས་མེད་པས། །མཐའ་ཡས་དྲི་མ་མེད་པའི་སྐུ། །སྙིང་པོ་བྱང་ཆུབ་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྲིད་པའི་གདུལ་དཀའ་བ་སྤངས་པ་ཞེས་བྱ་བ་སངས་རྒྱས་ཐམས་ཅད་ཀྱི་ཡེ་ཤེས་
འབྲུག་སྒྲའི་དབྱངས་སྒྲོགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྙིང་པོ་རྡོ་རྗེ་སྟོང་ཉིད་དང་། །དབྱེར་མེད་ལྷན་ཅིག་སྐྱེས་པའི་བདག །རྟོག་པ་མེད་ཅིང་དམིགས་
མེད་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དག་པའི་སྟོབས་རིམས་ནད་མེད་པ་སངས་རྒྱས་ཐམས་ཅད་ཀྱི་སེང་གེའི་སྒྲ་བསྒྲགས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ནད་རྣམས་བྱ་བའི་གཞི། །ལས་དང་ཉོན་མོངས་རྟོག་ལས་སྤྱད། །དེ་ཉིད་གནས་ལས་དག་པར་བྱ། །ཐམས་ཅད་ཡེ་ཤེས་སྤྱོད་པས་སྦྱོང་ཞེས་གསུངས་

89-1-99a

སོ། །དེ་ནས་དེ་བཞིན་གཤེགས་པ་ལེགས་པར་སྣང་བའི་དཔལ་སངས་རྒྱས་ཀྱི་ཡེ་ཤེས་ཀྱི་ལྗོན་ཤིང་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་
རྒྱས་ཀུན་གྱི་སྡོམ་པ་མཆོག །གསང་བ་ཟབ་དང་རྒྱ་ཆེའི་དབྱིངས། །སྤང་བླང་མེད་པར་གྲོལ་བ་ཉིད། །གཉུག་མ་བྱང་ཆུབ་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གྲགས་པས་བྱིན་སངས་རྒྱས་ཐམས་ཅད་ཀྱི་
ཡེ་ཤེས་ཀྱི་སྙིང་པོ་དོན་སྒྱུ་འཕྲུལ་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྒྱུ་འཕྲུལ་ཆེན་པོ་ལྷག་པའི་ལྷ། །གཅིག་ལས་དུ་མར་སྣང་བྱེད་ཅིང་། །དེ་ཉིད་དུ་མར་ཡོངས་
སྤྲུལ་པ། །སྒྱུ་འཕྲུལ་བྱང་ཆུབ་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མེ་ཏོག་སྦྱིན་སངས་རྒྱས་ཐམས་ཅད་ཀྱི་བསམ་གཏན་འཛིན་པ་རྡོ་རྗེ་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །འབྱུང་བ་རྣམས་དང་ཁམས་གསུམ་དང་། །རྣམ་ཤེས་ཡེ་ཤེས་ཁམས་འདུས་པ། །རྟེན་དང་བརྟེན་པ་སྦྱང་བར་བྱ། །གསང་བ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་སྐྱེས་བུས་བྱིན་སངས་རྒྱས་ཐམས་ཅད་ཀྱི་ཡེ་ཤེས་ཀྱི་ཉི་མའི་སྣང་བ་ཀུན་དུ་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྲིད་པ་དག་པས་སྣང་
བ་དག །རང་ལུས་དག་པས་རྣམ་ཤེས་དག །ཡེ་ཤེས་སྤྱོད་པས་རྣམ་པར་སྦྱང་། །འདི་ནི་རྡོ་རྗེའི་ཚུལ་མཆོག་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་རྡོ་རྗེ་སྡེ་སངས་རྒྱས་ཐམས་ཅད་ཀྱི་ཚུལ་ཟླ་བའི་སྣང་བ་ཞེས་
བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་རྨི་ལམ་དག་པར་ནི། །རྡོ་རྗེ་བློ་ཡིས་རྣམ་པར་སྦྱང་། །དེ་ཉིད་ཡེ་ཤེས་རྒྱལ་བ་ཡིས། །བདུད་ལས་རྣམ་པར་རྒྱལ་བར་བྱ་ཞེས་གསུངས་

89-1-99b

སོ། །དེ་ནས་དེ་བཞིན་གཤེགས་པ་རྡོ་རྗེ་ཕལ་ཆེར་སྦྱིན་སངས་རྒྱས་ཐམས་ཅད་ཀྱི་གསང་བ་པད་མོ་རྣམ་པར་རོལ་པའི་འོད་ཟེར་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
ཞིང་ཁམས་ཀུན་གྱི་སྣང་བའི་གནས། །རིན་ཆེན་འོད་ཀྱིས་རྣམ་པར་སྤྲས། །སྒྱུ་མ་ཙམ་དུ་སྟོན་པ་ཉིད། །སྙིང་པོ་ཡེ་ཤེས་གཞིར་གྱུར་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཞི་བའི་བློ་གྲོས་སངས་རྒྱས་ཐམས་ཅད་
ཀྱི་ཞིང་མ་ལུས་པར་བཀོད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱལ་བ་རྒྱ་མཚོ་སྤྲིན་ཚོགས་ལས། །དུས་གསུམ་ཀུན་ཏུ་དགེ་བ་ཡི། །ཞིང་ཁམས་ཡེ་ཤེས་འོད་ཀྱི་
སྐུ། །ཆོས་རྣམས་སེམས་ཀྱི་སྣང་ལས་འབྱུང་ཞེས་གསུངས་སོ། །དེ་ནས་རྒྱལ་པོ་རྡོ་རྗེ་འཛིན། །གསང་བའི་དབང་ཕྱུག་བཅོམ་ལྡན་གྱིས། །ཡེ་ཤེས་སྤྱོད་པས་བསྒྲུབ་པ་ཡི། །ལྷན་ཅིག་སྤྱོད་པ་བཀའ་སྩལ་ཏོ། །ཇི་ལྟར་མི་
གནས་ནམ་མཁའ་ནི། །ཁྱབ་ཅིང་མཚན་ཉིད་མེད་པ་ཉིད། །དོན་དམ་དེ་ཉིད་དམིགས་མེད་དེ། །བརྗོད་པ་སྤངས་པ་སྟོང་པ་ཆེ། །མི་ཤིགས་གསང་བ་བླ་ན་མེད། །ཀུན་དུ་བཟང་པོ་ཞེས་གྲགས་པ། །རྣལ་འབྱོར་དབང་ཕྱུག་
ཕྱག་རྒྱ་ཆེ། །ཡེ་ཤེས་རྟག་པས་ཆོས་ཀྱི་སྐུ། །མེ་ལོང་ནང་གི་གཟུགས་བརྙན་གང་། །རྣམ་པ་གསལ་བར་འཆར་བ་ལྟར། །ཇི་ལྟར་སངས་རྒྱས་ཡེ་ཤེས་ནི། །སྣང་བ་མེ་ལོང་ལྟ་བུར་བརྗོད། །དེ་བཞིན་གཤེགས་པ་ཐམས་ཅད་
ཀྱི། །ཡེ་ཤེས་རང་རིག་གཞན་རིག་པ། །ཐ་དད་མེད་པར་ཐུགས་ཆུད་པས། །དེ་ཉིད་མཉམ་ཉིད་ཡེ་ཤེས་བརྗོད། །གདོད་ནས་དག་ཅིང་སྐྱེ་བ་མེད། །རང་བཞིན་གྱིས་ནི་འོད་གསལ་བ། །ཕན་ཚུན་ཁྱབ་པའི་ཡེ་ཤེས་ལ། །སོ་སོར་རྟོག་
པ་ཞེས་བརྗོད་དོ། །ཀུན་ནས་མ་ལུས་སངས་རྒྱས་ཀྱི། །མཛད་པ་སྣ་ཚོགས་ལ་སྤྱོད་པས། །བདེ་བར་གཤེགས་གནས་ཅིག་མཛད་པས། །ཁྱབ་པ་ནན་ཏན་ཡེ་ཤེས་བརྗོད། །གང་ཚེ་ཉོན་མོངས་ཤེས་བྱའི་སྒྲིབ། །ཐམས་

89-1-100a

ཅད་ལས་གྲོལ་དེ་ཡི་ཚེ། །རྣལ་འབྱོར་མཆོག་ཐོབ་རྡོ་རྗེ་འཛིན། །ཤིན་དུ་རྣམ་དག་ཡེ་ཤེས་བརྗོད། །མཆོག་གྱུར་རྒྱལ་བའི་འབྱུང་གནས་ནི། །ཆོས་རྣམས་ངོ་བོ་ཉིད་མེད་པས། །རབ་ཏུ་མི་གནས་ཡེ་ཤེས་གཞི། །དམ་ཚིག་
ཤིན་དུ་འདའ་དཀའ་བའོ། །རང་བྱུང་དྲི་མ་མེད་པ་ནི། །རྟོག་པ་ཐམས་ཅད་ཡང་དག་སྤངས། །དངོས་དང་དངོས་མེད་རང་བཞིན་གྱིས། །གཉིས་ཀྱི་བག་ཆགས་འཆིང་བ་ཉིད། །མི་རྟོག་པ་ཡི་རང་བཞིན་གྱིས། །བསམ་མི་ཁྱབ་པ་ཉིད་ཀྱིས་གཅོད། །
རྟོག་པའི་དྲི་མའི་དྲ་བ་ཡིས། །རིན་ཆེན་སེམས་ནི་དྲི་མར་བྱས། །གཉིས་སུ་མེད་པའི་ཡེ་ཤེས་ཉིད། །དྲི་མ་བྲལ་ཕྱིར་སངས་རྒྱས་བརྗོད། །ཅེས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་སོགས་པ་རྣམས་ཀྱིས་
གསང་ཆེན་གྱི་གནས་ཡོངས་སུ་བརྗོད་པ་ལ་རབ་ཏུ་དགའ་བའི་དོན་ཆེད་དུ་བརྗོད་དོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་
པ་མཉམ་པ་ཉིད་རྣམ་པར་རྒྱལ་བ་ཞེས་བྱ་བ་ལས་སངས་རྒྱས་ཐམས་ཅད་ཀྱི་ཡེ་ཤེས་མངོན་པར་རོལ་པ་བསྟན་པའི་ལེའུ་སྟེ་ཉེར་ལྔ་པའོ།། །། དེ་ནས་རྒྱལ་པོ་རྡོ་རྗེ་འཛིན། །ཐམས་ཅད་སྟོང་པ་མི་འགྱུར་ཆེ། །ཡེ་ཤེས་དམ་པ་སྟོན་
པ་པོས། །ཀུན་དུ་གསང་བ་བཀའ་སྩལ་ཏོ། །དམ་ཆོས་སྙིང་པོ་བཅུད་ལས་བྱུང་། །སངས་རྒྱས་མཆོད་པ་བླ་མེད་པ། །བྱང་ཆུབ་སེམས་དཔའི་རྣམ་པར་འཕྲུལ། །ཤེས་རབ་ཐབས་ནི་ཚུལ་ཐོབ་བྱེད། །ཇི་ལྟར་གདུལ་བྱའི་ཆོས་རྣམས་
དང་། །འདོད་ཡོན་ཀུན་ལ་སངས་རྒྱས་རྣམས། །ཐམས་ཅད་ལོངས་སྤྱོད་ཚུལ་གཅིག་པས། །ལོངས་སྤྱོད་རྫོགས་སྐུ་ཞེས་བཤད་དོ། །མཚན་རྣམས་ཀུན་དང་ཡང་དག་ལྡན། །སྣ་ཚོགས་སྐུ་སྟེ་མཚན་ཉིད་མེད། །སངས་རྒྱས་
རྣམས་ཀྱིས་སྤྲུལ་པས་ན། །སྤྲུལ་པའི་སྐུ་ཞེས་འདིར་བཤད་ཡིན། །ཕྱག་རྒྱ་ཆེན་པོ་རབ་བསྒྲུབ་ཕྱིར། །ཤེས་ནས་རྣལ་འབྱོར་དབང་ཕྱུག་སྒོམ། །ཀུན་རྟོག་ཐམས་ཅད་རྣམ་སྤངས་པས། །རྒྱལ་བ་ཆོས་སྐུ་ཡེ་ཤེས་ཉིད། །བླ་

89-1-100b

མའི་བྱིན་བརླབས་སྐད་ཅིག་གིས། །ཡེ་ཤེས་མི་ཟད་རྒྱ་མཚོ་ནི། །ཚེ་འདི་ཉིད་ལ་འགྲུབ་པར་འགྱུར། །མི་ཕྱེད་རྡོ་རྗེ་དབང་ཕྱུག་ཉིད། །གཉིས་མེད་མཉམ་པར་རོ་གཅིག་པས། །རྡོ་རྗེ་འཆང་ཆེན་རང་བྱུང་དུ། །གྲུབ་པ་བདེ་ཆེན་ངོ་བོ་ཉིད། །ཐོབ་
མེད་ཐོབ་པས་གཅིག་ཅར་གྲོལ། །སྤངས་ཐོབ་མེད་པ་མཉམ་ཉིད་ཆེ། །དེ་ནས་དེ་བཞིན་གཤེགས་པ་སྤོས་ཀྱི་གླང་པོའི་དཔལ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་གནས་འབྱུང་བ་རྡོ་རྗེ་སངས་རྒྱས་ཐམས་ཅད་ཀྱི་ཟབ་པའི་རྡོ་རྗེ་ཡེ་ཤེས་སྒྲོན་མ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདིར་ནི་ཆོས་རྣམས་ཐམས་ཅད་ཀྱི། །སྙིང་པོ་ཡེ་ཤེས་བདེ་ཆེན་པོ། །བྱང་ཆུབ་སྟེན་ཅིང་འབྲེལ་འབྱུང་བའི། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་སྟོབས་མི་ཟད་པ་སྲེད་མེད་ཀྱི་བུ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་དབྱངས་ཀུན་དུ་བསྐུལ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །བདག་མེད་དངོས་པོ་
མེད་པ་རུ། །མ་སྐྱེས་ཟག་པ་མེད་པའི་ངང་། །སྤྲོས་པ་ཀུན་ལས་རྣམ་གྲོལ་བའི། །ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འགྲོ་བ་སྐྱོབ་དབུལ་པོ་ངེས་པ་སངས་རྒྱས་ཐམས་ཅད་ཀྱི་གླང་པོའི་
རྩལ་ཐོག་པ་མེད་པ་རྡོ་རྗེ་སངས་རྒྱས་ཐམས་ཅད་ཀྱི་འབྱུང་གནས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྡོ་རྗེ་སེམས་དཔའ་རང་ཉིད་དེ། །རང་སེམས་ཟླ་བ་ཀུན་ད་ལྟར། །ས་
བོན་གནས་ཏེ་རྒྱུ་ཡི་ཆ། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མི་ཚུགས་པ་ཡེ་ཤེས་མཚུངས་པ་མེད་པའི་འོད་སངས་རྒྱས་ཐམས་ཅད་ཀྱི་ཟབ་པའི་མཛོད་རྡོ་རྗེ་དབྱིངས་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཀུན་གྱི་རྡོ་རྗེའི་ཐུགས། །རབ་ཏུ་མི་གནས་བརྗོད་མེད་པ། །བྱང་ཆུབ་སེམས་སུ་གཅིག་པས་ན། །ཐམས་ཅད་དབྱེར་མེད་དག་པར་བརྗོད། །

89-1-101a

ཅེས་གསུངས་སོ། །དེ་ནས་དེ་བཞིན་གཤེགས་པ་ཉི་ཟླ་སངས་རྒྱས་ཐམས་ཅད་ཀྱི་རིན་པོ་ཆེའི་ནོར་བུའི་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་པོ་ཀུན་གྱི་བདག་
ཉིད་གང་། །སྟོང་གསུམ་འཇིག་རྟེན་རང་གི་ལུས། །ཕྱི་ནང་གཉིས་མེད་ཡེ་ཤེས་ཆེ། །གསང་བ་ཟབ་པའི་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐམས་ཅད་ཏོག་གི་འོད་ཟེར་སངས་རྒྱས་ཐམས་
ཅད་ཀྱི་སྙིང་པོ་འོད་ཟེར་ཀུན་ནས་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འགྲོ་བ་སྐྱོབ་པའི་དོན་དུ་ནི། །སྣ་ཚོགས་གཟུགས་ཅན་ཆོ་འཕྲུལ་གྱིས། །གདུལ་བྱ་ཡེ་ཤེས་ལམ་
ལ་བཀོད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཆོག་གི་མཆོད་པའི་དཔལ་སངས་རྒྱས་ཐམས་ཅད་ཀྱི་ཡེ་ཤེས་མཁའ་ལྡིང་རོལ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བྱམས་པའི་འོད་ཀྱིས་ནི། །འགྲོ་བ་ཀུན་ལ་ཁྱབ་པར་བྱ། །དེས་ནི་དཔག་མེད་གཞན་དོན་དུ། །མཚུངས་མེད་ཡེ་ཤེས་གནས་ཐོབ་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་དཔལ་གྱི་སྙིང་པོ་སྦས་པ་སངས་རྒྱས་ཐམས་ཅད་ཀྱིས་བདུད་ཐམས་ཅད་རྣམ་པར་འཇིག་པར་མཛད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བྱམས་པས་བདུད་དཔུང་འཇོམས་མཛད་
ཅིང་། །སྙིང་རྗེ་གཡུལ་ལས་རྒྱལ་བར་འགྱུར། །བྱང་ཆུབ་སེམས་ཀྱིས་ཕྱིར་མི་ལྡོག །ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་ཏོག་སངས་རྒྱས་ཐམས་ཅད་ཀྱི་གསང་བ་ཡེ་ཤེས་རྡོ་རྗེའི་
སྟོབས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རིན་ཆེན་འབར་བ་གློག་གི་འོད། །དྲི་མེད་ཆུ་ཤེལ་ཟེར་འབབ་པས། །ཐ་མལ་ལུས་ནི་རྒྱལ་བར་བསྒྱུར། །དེ་ཉིད་ཚུལ་འདི་བསྟན་པའོ། །

89-1-101b

ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་དོན་གྲུབ་སངས་རྒྱས་ཐམས་ཅད་ཀྱི་མཛད་པ་རིགས་སྣ་ཚོགས་སུ་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་
ལྷ་མོ་བྱེ་བ་དང་། །བྱང་ཆུབ་སེམས་དཔའ་ཁྲག་ཁྲིག་ཚོགས། །དེ་བཞིན་གཤེགས་པའི་རིགས་བརྒྱ་དང་། །བདེ་གཤེགས་སྟོང་སོགས་ཚུལ་འདིར་བསྟན་ཞེས་གསུངས་སོ། །དེ་ནས་དེ་བཞིན་གཤེགས་པ་རི་རབ་ལྷུན་པོ་བརྩེགས་པ་
སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྙིང་པོ་སྒྱུ་མའི་རོལ་པ་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་རྒྱུ་དང་འབྲས་བུའི་ཆོས། །ངོ་བོ་ཉིད་དག་རང་བྱུང་བ། །བདག་
མེད་ཡེ་ཤེས་གནས་མེད་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གདུལ་དཀའ་འདུལ་བ་སངས་རྒྱས་ཐམས་ཅད་ཀྱི་གནས་ལ་སྤྱོད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །མཆོག་ཏུ་ས་ཡི་མཐར་ཐུག་པ། །བཅུ་གསུམ་ཡེ་ཤེས་རྡོ་རྗེ་འཛིན། །བདེ་བའི་འབྱུང་གནས་བླ་ན་མེད། །གསང་བ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་པད་མོའི་འོད་
ཟེར་རྣམ་པར་རོལ་པ་རྡོ་རྗེ་སངས་རྒྱས་ཐམས་ཅད་ཀྱི་གནས་མི་ཟད་པ་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་མཉམ་ཉིད་ཡེ་ཤེས་དང་། །འགྲོ་བའི་བླ་མ་ཆོས་དོན་གྱིས། །
ཚད་མེད་ཐུགས་རྗེས་ཡོངས་སུ་བསྡུ། །དེ་ཉིད་མི་རྟོག་གསང་བའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགྲ་བཅོམ་གྲགས་པའི་འོད་ཟེར་སངས་རྒྱས་ཐམས་ཅད་ཀྱི་ཀུན་ནས་ཆོས་ཀྱི་སྒྲ་འབྱུང་བ་རྡོ་རྗེ་ཞེས་བྱ་བའི་ཏིང་
ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བསྡུད་ཅིང་སྤྲོ་བ་དང་། །མཚན་བཅས་དམིགས་པ་མེད་པ་རུ། །ཡེ་ཤེས་རྒྱལ་ལ་ཕྱག་རྒྱས་བཏབ། །འདི་ནི་དག་པའི་དོན་སྟོན་པའོ་ཞེས་གསུངས་སོ། །

89-1-102a

དེ་ནས་དེ་བཞིན་གཤེགས་པ་ཡེ་ཤེས་གྲོགས་རྡོ་རྗེ་སངས་རྒྱས་ཐམས་ཅད་ཀྱི་གསང་བ་ངེས་པར་རྟོགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཀུན་གྱིས་
ནམ་མཁའི་ཁམས། །ཡོངས་སུ་གང་བ་ཏིལ་འབྲུ་བཞིན། །སེམས་ཅན་སྨིན་ཅིང་གྲོལ་བྱེད་པས། །ཡེ་ཤེས་མངོན་པར་བསྡུས་པ་ཡིན། །ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་ཉོན་མོངས་པ་སངས་རྒྱས་ཐམས་ཅད་ཀྱི་འཕྲོ་
བའི་སྤྲིན་བཀོད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་དངོས་དང་དངོས་མེད་པས། །མི་ཕྱེད་ཡེ་ཤེས་བདེ་བ་ཆེ། །སྣ་ཚོགས་འདུ་འབྲལ་མེད་པའི་ངང་། །ཡེ་ཤེས་ཕྱག་རྒྱ་ཆེན་པོར་
བསྟན་ཞེས་གསུངས་སོ། །དེ་ནས་དེ་བཞིན་གཤེགས་པ་འདམ་བུའི་འོད་སངས་རྒྱས་ཐམས་ཅད་ཀྱི་ཡེ་ཤེས་མངོན་པར་བྱང་ཆུབ་པའི་རྒྱལ་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
ནམ་མཁའི་ཁམས་ཀྱི་སྤྱོད་ཡུལ་བས། །རང་བཞིན་གྱིས་ནི་མི་དམིགས་བཞིན། །དོན་དམ་ཐོབ་ཏུ་མེད་པའི་དོན། །གཞི་མེད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྤོས་བཟང་རྡོ་རྗེ་སངས་རྒྱས་ཐམས་ཅད་
ཀྱི་སྙིང་པོའི་འོད་ཟེར་ཀུན་ནས་རྒྱས་པས་ལྟ་ངན་སྐྲག་པར་བྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཚན་ཉིད་དང་ནི་མཚན་གཞི་མེད། །གང་དུ་རོ་མཉམ་ཟུང་འཇུག་
པས། །དབྱེར་མེད་རྟོགས་པ་རྒྱལ་པོ་ཆེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡུལ་འཁོར་རངས་པ་རྡོ་རྗེ་སངས་རྒྱས་ཐམས་ཅད་ཀྱི་གཤེགས་པ་དང་བྱོན་པ་རྗེས་སུ་འགྲོ་བ་སྟོན་པ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མི་གཡོ་འགྱུར་བ་མེད་པ་ལས། །དེ་བཞིན་ཉིད་དུ་བསྟན་པ་ཡིས། །འཇུག་ཅིང་འབྱུང་བ་གསང་བ་ཆེ། །སྙིང་པོ་ཡེ་ཤེས་ཚུལ་བསྟན་པའོ་ཞེས་

89-1-102b

གསུངས་སོ། །དེ་ནས་དེ་བཞིན་གཤེགས་པ་བདེ་གྲགས་དཔལ་སངས་རྒྱས་ཐམས་ཅད་ཀྱི་དངོས་གྲུབ་གནས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་གྲུབ་སྙིང་པོ་བདུད་རྩིའི་བཅུད། །གྲུབ་པའི་
བླ་མའི་གདམས་པ་ལས། །ཐོབ་འགྱུར་དེ་བས་གཞན་དུ་མིན། །གསང་བ་ཚུལ་འདི་བསྟན་པའོ་ཞེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི། །མཛད་པའི་སྣ་ཚོགས་གདུལ་དོན་དུ། །ཕྱོགས་བཅུའི་ཞིང་ཁམས་མ་ལུས་པར། །
ཕྱི་ནང་གསང་བའི་ཚུལ་དག་གིས། །ཐེག་པ་མཆོག་ཏུ་ཡོངས་གྲགས་པའི། །རྡོ་རྗེ་ཐེག་པའི་ལམ་གྱུར་འདི། །རྒྱལ་བ་རྒྱ་མཚོ་མ་ལུས་པའི། །ཐུགས་ཀྱི་སྙིང་པོ་གསང་བ་ཡིན། །སྐུ་དང་གསུང་གི་རྡོ་རྗེ་འདིར། །སྙིང་པོ་ཀུན་དུ་འདུས་པའི་ཕྱིར། །
རྣལ་འབྱོར་པས་ནི་རྟག་ཏུ་སྤྲོས། །འདིར་ནི་སྔོན་ཆད་བསྟན་པའང་མེད། །མ་འོངས་པ་ནའང་འབྱུང་བར་དཀའ། །དེ་བས་གསང་ཆེན་རྙེད་དཀའ་བས། །སངས་རྒྱས་རྣམས་ནི་འཇིག་རྟེན་དུ། །འབྱུང་བར་འགྱུར་རམ་མ་བྱོན་ཡང་། །གསང་
བའི་ཡི་གེ་རྣམ་དག་པ། །འཕེལ་འགྲིབ་སྤངས་པས་གནས་པ་ཡིན། །སངས་རྒྱས་ཀུན་གྱི་གསང་བའི་གནས། །གསང་ཆེན་རང་འབྱུང་མཉམ་པ་ཉིད། །དཔལ་མཆོག་འདི་ནི་བསྡུས་པའི་ཚུལ། །ཡེ་ཤེས་ཆེན་པོའི་ཚུལ་བསྟན་པའོ་
ཞེས་དེ་བཞིན་གཤེགས་པ་རྡོ་རྗེ་སེམས་དཔའ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་གསང་བ་འཇིག་རྟེན་དུ་འབྱུང་བར་དཀའ་བར་གདམས་ཤིང་བསྟན་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་
ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་སངས་རྒྱས་ཐམས་ཅད་ཀྱི་མཛད་པ་བསྟན་པའི་ལེའུ་སྟེ་ཉེར་དྲུག་པའོ།། །། དེ་ནས་དེ་བཞིན་གཤེགས་པ་
སྲིད་མཐའ་གཟིགས་སངས་རྒྱས་ཐམས་ཅད་ཀྱིས་སྲིད་པའི་ཆུ་ཀླུང་སྐེམས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདིར་ནི་སྲིད་པའི་དྲ་བ་དག །རྣམ་པར་གཅོད་ཅིང་ཡེ་ཤེས་

89-1-103a

མེས། །སྡུག་བསྔལ་གནས་འདི་བསྲེག་པར་བྱ། །དེ་ཉིད་བདེ་བ་ཀུན་གྱི་གནས་ཞེས་གསུངས་སོ། །དེ་ནས་དེ་བཞིན་གཤེགས་པ་ཟླ་བ་སྒྲ་ཅན་སངས་རྒྱས་ཐམས་ཅད་ཀྱི་འཁོར་བའི་རི་བོ་འཇོམས་པར་བྱེད་པ་རྡོ་རྗེ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟོག་པ་སྣ་ཚོགས་ལས་བཅས་པ། །གཡེང་བས་སྡུག་བསྔལ་ཕུང་པོར་གྱུར། །དེ་བསལ་ཡེ་ཤེས་བྱང་ཆུབ་སེམས། །བླང་དོར་མེད་པའི་ངང་དུ་གནས་ཞེས་
གསུངས་སོ། །དེ་ནས་དེ་བཞིན་གཤེགས་པ་རིན་ཆེན་ཟླ་བ་སངས་རྒྱས་ཐམས་ཅད་ཀྱི་ཕྱག་རྒྱའི་གནས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་དུ་ཕྱག་རྒྱས་རྒྱས་
བཏབ་པས། །མི་ཕྱེད་ཡེ་ཤེས་བདག་ཉིད་གྱུར། །དེ་ཉིད་ཕྱག་རྒྱ་བཞི་ལྡན་པས། །ཐམས་ཅད་སྡོམ་པར་ཤེས་པར་བྱ་ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱལ་མཚན་སེང་གེའི་རྒྱལ་པོ་སངས་རྒྱས་ཐམས་ཅད་ཀྱི་ཆོས་
ཀྱི་རྒྱལ་མཚན་བསྒྲེང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་རྒྱུད་སྣ་ཚོགས་ཆོས་ཉིད་གཅིག་པར་གྱུར། །དེ་ཉིད་ངང་ལ་དག་པའི་རྒྱལ་མཚན་མཆོག །དབྱེར་
མེད་བྱང་ཆུབ་སེམས་ཀྱི་སྣང་བ་ལས། །གསང་བ་བླ་མེད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བསམ་གཏན་དགྱེས་སངས་རྒྱས་ཐམས་ཅད་ཀྱི་ཡེ་ཤེས་ཀྱི་རྡོ་རྗེ་རྣམ་རྟོག་གི་རི་བོ་འཇོམས་པ་
རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་རྟོག་ལས་རྣམས་བྱུང་བ། །དེ་ཉིད་འཇོམས་པའི་རྡོ་རྗེ་ནི། །སྟོང་ཉིད་བདེ་ཆེན་བྱང་ཆུབ་སེམས། །དེ་ཉིད་ཡེ་ཤེས་ཚུལ་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྫོགས་ལྡན་སངས་རྒྱས་ཐམས་ཅད་ཀྱི་གྲུབ་པ་རྡོ་རྗེ་གསང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བྱམས་པའི་

89-1-103b

ཏིང་འཛིན་གྱིས། །འགྲོ་བ་འདུལ་བའི་དོན་གང་སྤྱོད། །སྣ་ཚོགས་ངོ་བོ་ཉིད་མེད་པས། །དེ་ཉིད་མི་དམིགས་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྣམ་པར་རོལ་པ་སངས་རྒྱས་ཐམས་ཅད་ཀྱི་སྙིང་པོ་ཡེ་ཤེས་
ལ་རོལ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྒྱུ་མའི་དངོས་པོ་སྣང་མེད་པ། །རྟེན་ཅིང་འབྲེལ་བར་འབྱུང་བའི་དོན། །གནས་མེད་བདེན་གཉིས་དབྱེར་མེད་པ། །བྱང་ཆུབ་ཚུལ་
འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་རིན་པོ་ཆེ་མངའ་བ་སངས་རྒྱས་ཐམས་ཅད་ཀྱི་བཀོད་པ་མི་འགྱུར་བ་དབྱངས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །སངས་རྒྱས་ཀུན་གྱི་གསང་བ་དབྱིངས། །ཐོས་བསམ་བསྒོམ་པས་རྟོགས་དཀའ་བ། །གསང་བའི་ཡེ་ཤེས་དག་པ་ཆེ། །དྲི་མེད་ཚུལ་འདི་བསྟན་པའི་ཞེས་གསུངས་སོ། །དེ་ནས་དེ་བཞིན་གཤེགས་པ་དགྲ་བཅོམ་
གྲགས་པ་སངས་རྒྱས་ཐམས་ཅད་ཀྱི་ཚུལ་གསང་བ་རྡོ་རྗེ་དམིགས་སུ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་དག་འོད་གསལ་དྲི་མ་མེད། །མ་སྐྱེས་ནམ་མཁའི་
བདག་ཉིད་ཀྱིས། །སྒྱུ་མ་དངོས་ལས་རྣམ་གྲོལ་བྱེད། །དེ་ཉིད་ཚུལ་འདི་བཤད་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་པད་མའི་འོད་ཟེར་སྣང་བའི་ངོས་སངས་རྒྱས་ཐམས་ཅད་ཀྱི་ཡེ་ཤེས་ཀྱི་གླུའི་དབྱངས་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ནམ་མཁའི་དབྱིངས་ཀྱི་བདག་ཉིད་ཅན། །འདུས་བྱས་རྟོག་ལས་རྣམ་གྲོལ་བ། །འདུས་མ་བྱས་པ་རྡོ་རྗེའི་ངང་། །དེ་ཉིད་དག་པའི་ཚུལ་
བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་མཛོད་སྤུ་ལྡན་པ་རྡོ་རྗེ་སངས་རྒྱས་ཐམས་ཅད་ཀྱི་ཡེ་ཤེས་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་

89-1-104a

གསུངས་སོ། །སངས་རྒྱས་ཀུན་གྱི་སྡོམ་པ་ནི། །ཐབས་དང་ཤེས་རབ་དབྱེར་མེད་པ། །དུས་གསུམ་དེ་བཞིན་གཤེགས་པའི་ཐུགས། །འདུ་འབྲལ་མེད་པའི་ཚུལ་བསྟན་པའོ་ཞེས་གསུངས་སོ། །དེ་ནས་
དེ་བཞིན་གཤེགས་པ་སྤོབས་པ་གྲགས་པ་སངས་རྒྱས་ཐམས་ཅད་ཀྱི་དངོས་གྲུབ་གདུལ་བྱ་ལ་སྟེར་བར་མཛད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདིར་
ནི་སོ་སོ་རང་རིག་པ། །ཡེ་ཤེས་རྒྱུན་ཆད་མེད་པའི་ལམ། །དེ་ཉིད་ལམ་དུ་བསྒོམ་པའི་མཆོག །བསམ་གཏན་ཡེ་ཤེས་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྡོ་རྗེ་ནོར་བུ་སངས་རྒྱས་
ཐམས་ཅད་ཀྱི་ན་བཟའ་མི་ཟད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ནོར་བུའི་སྙིང་པོ་བསམ་འཕེལ་བཞིན། །རྟོག་མེད་བསམ་པ་རྫོགས་བྱེད་པ། །རང་
བྱུང་ཆོས་ཀྱི་སྒྲ་སྟོན་པས། །མི་གནས་ཡེ་ཤེས་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚེ་དཔག་ཏུ་མེད་པ་རྡོ་རྗེ་སངས་རྒྱས་ཐམས་ཅད་ཀྱི་ཁྱུ་མཆོག་རྡོ་རྗེའི་རྩལ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྲིད་དང་ཞི་བར་མི་གནས་པ། །རྡོ་རྗེ་གསུམ་མཆོག་དམ་པའི་དབྱིངས། །སྐུ་གསུམ་ལམ་གྱི་ཡེ་ཤེས་བཅས། །ས་གསུམ་དག་པའི་དབང་ཕྱུག་ཐོབ་ཅེས་གསུངས་སོ། །
དེ་ནས་དེ་བཞིན་གཤེགས་པ་ནོར་བུ་བཀོད་པའི་དཔལ་སངས་རྒྱས་ཐམས་ཅད་ཀྱི་རིན་པོ་ཆེ་སྣ་ཚོགས་པའི་མདངས་བཀོད་པ་རྡོ་རྗེ་སངས་རྒྱས་ཐམས་ཅད་ཀྱི་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །རྗེས་སུ་དྲན་པའི་གནས་ནི་མཐོང་བའི་ལམ། །ཡེ་ཤེས་སྐད་ཅིག་དགའ་བ་བཅུ་དྲུག་ལས། །ཕྱི་ནང་གནས་པས་འོད་གསལ་དོན་རྟོགས་པ། །སྟོང་ཉིད་རང་འབྱུང་རྣམ་དག་ཚུལ་བསྟན་པའོ་ཞེས་གསུངས་སོ། །

89-1-104b

དེ་ནས་དེ་བཞིན་གཤེགས་པ་དབང་ཆེན་སེང་གེའི་ང་རོ་སངས་རྒྱས་ཐམས་ཅད་ཀྱི་མཆོད་པའི་རྒྱ་མཚོ་མཆོད་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣ་ཚོགས་སྣང་བ་དུ་མར་འཆར་བ་ཉིད། །
ཡུལ་ནི་སྒྱུ་མ་དངོས་པོ་གདོད་ནས་དག །དག་པའི་ངོ་བོ་ཆོས་དབྱིངས་ནམ་མཁའ་ཆེ། །སེམས་སྣང་རོལ་པ་གསང་བ་འདིར་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་འབྱུང་གནས་སངས་རྒྱས་ཐམས་ཅད་ཀྱི་གསང་
བ་རྨད་དུ་བྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མ་བཙལ་མ་སྤངས་ངང་གིས་དག་པའི་སྐུ། །རྙེད་པར་མི་འགྱུར་རབ་འབྱམས་བདེ་བ་ཆེ། །བགྲོད་པ་གཅིག་པའི་ལམ་ནི་ལྷུན་གྲུབ་པ། །བྱང་ཆུབ་སེམས་
ཆེན་གསང་བ་ཐེག་པའི་མཆོག་ཅེས་གསུངས་སོ། །དེ་ནས་དེ་བཞིན་གཤེགས་པ་ལྷུན་པོ་གྲགས་སངས་རྒྱས་ཐམས་ཅད་ཀྱི་གསང་བ་མཚན་རབ་འབར་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
བདེ་བར་གཤེགས་པའི་མཚན་དང་དཔེ་བྱད་རྣམས། །སེམས་ཅན་ཀུན་གྱི་ལུས་ལ་ངེས་པར་བཞུགས། །དབྲི་བསྣན་མེད་པར་འཆར་བས་གསལ་བར་བྱེད། །དེ་ཉིད་སྦས་པའི་དོན་དུ་ཚུལ་འདི་བསྟན་ཞེས་གསུངས་སོ། །དེ་ནས་དེ་བཞིན་
གཤེགས་པ་འོད་ཟེར་བཅུ་པ་སངས་རྒྱས་ཐམས་ཅད་ཀྱི་སྙིང་པོ་གཞལ་ཡས་ཁང་ཉེ་བར་བརྒྱན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཀྱིལ་འཁོར་འཁོར་ལོའི་གཞལ་ཡས་ཁང་། །ཚད་མེད་
བཀོད་པས་རབ་སྤྲས་པ། །རྒྱན་རྣམས་བྱེ་བྲག་མཐའ་ཡས་ཚོགས། །སྣང་བ་དེ་ཉིད་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མ་དམོད་པ་སངས་རྒྱས་ཐམས་ཅད་ཀྱི་སྙིང་པོ་ཡང་དག་པར་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །སྒྱུ་མའི་ཆོས་རྣམས་མཁའ་ལྟ་བུར། །དག་པའི་ཡེ་ཤེས་རང་སྲོག་གོ། །སྙིང་གི་པད་མ་སད་པར་བྱ། །དེ་ལས་ཡེ་ཤེས་བློ་རྒྱས་པའོ་ཞེས་གསུངས་སོ། །དེ་ནས་དེ་དག་ཀུན་གྱི་གསང་། །ཡེ་ཤེས་དམ་པ་མཆོག་གྲུབ་པ། །གསང་ཆེན་

89-1-104c

ཡེ་ཤེས་ལམ་འདི་ཡིས། །འདོད་དང་ཐར་པ་རབ་སྒྲུབ་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་
ཉིད་རྣམ་པར་རྒྱལ་བ་ལས་གསང་བ་ཆེན་པོའི་ཡེ་ཤེས་ཀྱི་དོན་གཏན་ལ་ཕབ་པའི་ལེའུ་སྟེ་ཉེར་བདུན་པའོ།། །། དེ་ནས་དེ་བཞིན་གཤེགས་པ་གླང་པོའི་འགྲོས་སངས་རྒྱས་ཐམས་ཅད་ཀྱི་བླ་ན་མེད་པའི་ཡེ་ཤེས་ལ་
དམིགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡེ་ཤེས་མཆོག་ཏུ་གསང་བ་གང་། །དེ་ཉིད་བསྡུས་པར་གྱུར་པ་སྟེ། །རྟོག་པའི་དྲ་བ་གཅོད་མཛད་ཡིན། །
དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡིད་འཐད་དཔལ་སངས་རྒྱས་ཐམས་ཅད་ཀྱི་འོད་ཟེར་ཀུན་ནས་རྒྱས་པའི་འབྱུང་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །གང་དུ་སངས་རྒྱས་འོད་ཟེར་སྣང་བས་ཁྱབ། །དེ་ཉིད་འདོམ་གང་འོད་ནི་དབའ་རླབས་གཉིས། །གཉིས་མེད་གཅིག་ཏུ་དག་པས་དབུ་མ་ཉིད། །དབྱེར་མེད་ཡེ་ཤེས་ཚུལ་འདི་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་ཟླ་བ་སངས་རྒྱས་ཐམས་ཅད་ཀྱི་བྱང་ཆུབ་ཀྱི་ཤིང་མཆོག་ལ་དམིགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །རིན་ཆེན་བརྟན་པའི་ལྗོན་པའི་ཤིང་། །དེ་ཉིད་བྱང་ཆུབ་སེམས་ལས་བྱུང་། །སྐྱེས་པ་སེམས་བསྐྱེད་རྟེན་གྱུར་པས། །རང་བྱུང་ཚུལ་འདི་བསྟན་པའོ། 
ཞེས་གསུངས་སོ། །དེ་ནས་དེ་བཞིན་གཤེགས་པ་ཞི་བ་སངས་རྒྱས་ཐམས་ཅད་ཀྱི་ཉན་ཐོས་ཆེན་པོ་རྣམས་ཀྱིས་དཔག་པར་དཀའ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །

89-1-104d

ཟབ་པ་ཤིན་ཏུ་ཞི་བའི་གནས། །རྡུལ་མེད་རྙོག་པ་མེད་པའི་ཐུགས། །བསམ་གཏན་རྡོ་རྗེ་ཚད་མེད་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རབ་གསལ་རྒྱལ་པོ་
སངས་རྒྱས་ཐམས་ཅད་ཀྱི་ཉན་ཐོས་དགྲ་བཅོམ་པ་ཆེན་པོ་རྣམས་ཀྱིས་བརྟག་པར་དཀའ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། ། གནས་པ་མེད་པའི་གནས་
གྱུར་པ། །ཁྱུ་མཆོག་ཆེན་པོ་བྱང་ཆུབ་སེམས། །རང་གཞན་མི་ཕྱེད་མི་དམིགས་པས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་ཁ་ལོ་སྒྱུར་བ་སངས་རྒྱས་ཐམས་ཅད་
ཀྱི་གནས་རྒྱུན་ཏུ་ཞུགས་པ་རྣམས་ཀྱིས་དམིགས་སུ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཁོར་བའི་རྒྱུན་འདི་མྱ་ངན་འདས། །དེ་ཉིད་སྤང་དུ་མེད་
པས་ན། །ཡེ་ཤེས་ཤེས་རབ་རབ་གནས་པས། །དག་པ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགེ་བའི་དབང་ཕྱུག་སངས་རྒྱས་ཐམས་ཅད་ཀྱི་ཡེ་ཤེས་ཕྱིར་མི་འོང་བ་རྣམས་
ཀྱིས་རྟོགས་པར་དཀའ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་ཕྱིར་ལྡོག་པ་མེད་པའི་སེམས། །འདི་ནི་ཡེ་ཤེས་ཆེན་པོའི་ངང་། །བླ་ན་མེད་པ་སྙིང་པོའི་སྐུ། །དེ་བཞིན་
ཉིད་ཀྱི་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཙུག་ན་རིན་པོ་ཆེའི་འོད་སངས་རྒྱས་ཐམས་ཅད་ཀྱི་ལན་ཅིག་ཕྱིར་འོང་བ་རྣམས་ཀྱིས་དམིགས་སུ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །ཁམས་གསུམ་སྣང་བ་སེམས་ཡིན་ཕྱིར། །སེམས་དེ་སྟོང་ཉིད་རྒྱུ་མེད་པས། །གང་དུ་དྲི་མེད་གཞན་དོན་འབྱུང་། །འདི་ནི་ཚུལ་ཆེན་གསང་བ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་སྙེམས་བྲལ་སངས་རྒྱས་ཐམས་ཅད་ཀྱི་ཟག་པ་ཟད་པ་རྣམས་ཀྱིས་

89-1-105a

དམིགས་སུ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གང་དུ་ཟག་མེད་འབྱུང་བ་མེད། །ཁམས་དང་དབང་པོ་ཡུལ་མེད་པར། །ཤིན་དུ་དྲི་མེད་ནམ་མཁའ་བཞིན། །བྱང་
ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་སྙིང་པོའི་དཔལ་སངས་རྒྱས་ཐམས་ཅད་ཀྱི་གསང་བ་རང་རྒྱལ་བ་ཐམས་ཅད་ཀྱིས་དམིགས་སུ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ། བྱང་ཆུབ་ཀྱི་སེམས་འདི་གསུངས་སོ། །གང་དུ་ལུས་ཀྱི་ཀུན་དུ་སྤྱོད་པ་ཡི། །རྫུ་འཕྲུལ་སྣང་བ་བསྟན་ནས་འདུལ་བྱེད་པ། །རང་འབྱུང་བསམ་གཏན་ཐོབ་སྟེ་ལྟོས་མེད་པ། །གསང་བ་འདིར་གནས་ཡེ་ཤེས་ཚུལ་བསྟན་པའོ་ཞེས་གསུངས་སོ། །
དེ་ནས་དེ་བཞིན་གཤེགས་པ་ཟླ་བའི་ཞལ་སངས་རྒྱས་ཐམས་ཅད་ཀྱི་གསང་བ་ཚངས་པས་དམིགས་སུ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཐོག་མ་མེད་ཅིང་མཐའ་མེད་
པས། །སྲིད་རྩེར་མི་གནས་དབང་ཕྱུག་ཆེ། །དངོས་པོ་མེད་ཅིང་རྟག་པ་ཆེ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དྲི་མ་མེད་པར་གྲགས་པའི་རྒྱལ་པོ་སངས་རྒྱས་ཐམས་ཅད་ཀྱི་གནས་བརྒྱ་བྱིན་གྱིས་
དམིགས་སུ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་མ་འཁྲུག་རྟོག་པ་མེད། །ཡེ་ཤེས་རྒྱལ་བ་ཀུན་གྱི་ཡུལ། །གཟུགས་སོགས་ཡུལ་ནི་རྟོག་ཏུ་མེད། །ཐམས་ཅད་དག་པའི་ཚུལ་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པ་ཞི་བའི་གཟི་བརྗིད་སངས་རྒྱས་ཐམས་ཅད་ཀྱི་སྤྱོད་ཡུལ་ལྷ་དྲག་པོས་དམིགས་སུ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཉོན་མོངས་
འཆིང་བ་དག་པ་ཡི། །སྲེད་ལེན་རྐྱེན་གྲོལ་ལོག་པས་ན། །དམིགས་མེད་ཡེ་ཤེས་གསང་བ་ཉིད། །ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་དགའ་བའི་རྟོག་སངས་རྒྱས་ཐམས་ཅད་ཀྱི་གསང་བ་ཁྱབ་འཇུག་

89-1-105b

གིས་དམིགས་སུ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གང་ནས་གང་དུ་ཁྱབ་བྱ་ངོ་བོས་སྟོང་། །ཐམས་ཅད་བདག་མེད་སྟོང་པ་ཞི་བའི་ཕྱིར། །སེམས་ཅན་ཁམས་མེད་འཇུག་
པར་མི་གནས་པས། །ཡེ་ཤེས་ཆེན་པོའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྒྲ་གཅན་ལྷའི་རྒྱལ་པོ་སངས་རྒྱས་ཐམས་ཅད་ཀྱི་ཡེ་ཤེས་གསང་བ་ལྷ་མ་ཡིན་རྣམས་ཀྱི་དམིགས་སུ་མེད་པའི་ཏིང་ངེ་འཛིན་ལ་
སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གང་དུ་ས་འོག་ས་སྟེང་དང་། །ས་བླ་རྣམས་སུ་བསྟན་པ་ཡི། །དངོས་གྲུབ་བདུད་རྩི་ཐོབ་བྱེད་པས། །གསང་བ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དཔལ་ན་
ཚོད་བཟང་པོ་སངས་རྒྱས་ཐམས་ཅད་ཀྱི་ཡེ་ཤེས་གསང་བ་ཀླུ་རྣམས་ཀྱིས་དམིགས་སུ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་རྣམས་ཀྱི་ཡེ་ཤེས་སྐུ། །དུག་མེད་གདུག་པ་རྣམ་
བྲལ་བས། །སྐྱོན་མེད་གཙང་བའི་རང་བཞིན་ཅན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལྷ་དགའི་རྒྱལ་པོ་སངས་རྒྱས་ཐམས་ཅད་ཀྱི་དགོངས་པ་མངོན་པར་རོལ་པ་སྲིན་མོ་རྣམས་ཀྱིས་དམིགས་སུ་མེད་པ་རྡོ་རྗེ་སངས་རྒྱས་
ཐམས་ཅད་ཀྱི་ཡེ་ཤེས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །བདག་མེད་མཉམ་པ་ཉིད་ཐོབ་པས། །གྲུབ་པ་མེད་པའི་གནས་ལ་ནི། །འཆི་མེད་ཡེ་ཤེས་ཚུལ་མཆོག་གིས། །གསང་བ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་རིན་ཆེན་ཕུང་པོ་སངས་རྒྱས་ཐམས་ཅད་ཀྱིས་སྦས་པ་ཡེ་ཤེས་ནམ་མཁའི་བུ་མོ་རྣམས་ཀྱིས་དམིགས་སུ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གང་དུ་མཁའ་ལ་སྤྱོད་འགྲོ་བའི། །གྱ་གྱུར་སྤྱོད་པའི་ཡེ་ཤེས་ཅན། །
དེ་ཉིད་དེ་ཞེས་རྣམ་བརྟགས་པས། །གསང་བ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཛེས་པར་གཤེགས་པ་སངས་རྒྱས་ཐམས་ཅད་ཀྱི་ཡེ་ཤེས་གནོད་སྦྱིན་རྣམས་ཀྱིས་རྟོགས་པར་དཀའ་བ་ཐམས་ཅད་ཀྱི་གནས་པ་རྡོ་རྗེའི་ཏིང་ངེ་འཛིན་ལ་སྙོམས་
པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །
89-1-106a

རིན་ཆེན་གཏེར་འཆང་མཛོད་པོ་ཆེ། །ནོར་གྱི་རྒྱ་མཚོ་མཐའ་ཡས་པས། །དེ་ཉིད་ས་དབང་བདེ་གཤེགས་རྒྱལ། །གསང་བ་དམ་པ་བཀའ་སྩལ་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སེང་གེའི་གནས་པའི་དཔལ་
སངས་རྒྱས་ཐམས་ཅད་ཀྱིས་སྦས་པ་འཇིག་རྟེན་པ་ཐམས་ཅད་དང་འཇིག་རྟེན་ལས་འདས་པ་ཐམས་ཅད་ཀྱི་སྐྱེ་དགུའི་ཆོས་ལས་དབེན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་
གསུངས་སོ། །སྐྱེས་བུ་ཆེན་པོ་ཐམས་ཅད་ཀྱི། །ཡེ་ཤེས་གནས་ནི་མཉམ་མེད་པས། །རང་གཞན་མི་ཕྱེད་བྱང་ཆུབ་ཆེ། །སེམས་དཔའ་ཚུལ་འདི་བསྟན་པའོ་ཞེས་གསུངས་སོ། །གང་དུ་འགྲོ་ལ་གནས་གྱུར་པའི། །
གསང་ཆེན་འདིར་ནི་གནས་གྱུར་ན། །གང་ལའང་དྲི་མར་མི་འགྱུར་ཞིང་། །དགག་པར་བྱ་བ་ཅི་ཡང་མེད། །ལས་རྣམས་ཐམས་ཅད་བྱས་ཀྱང་ནི། །རང་བྱུང་སྐུར་ནི་རྣམ་པར་གྲོལ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་
ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་དག་པའི་སྐྱེས་བུ་བསྟན་པའི་ལེའུ་སྟེ་ཉེར་བརྒྱད་པའོ།། །། དེ་ནས་ཡང་བཅོམ་ལྡན་འདས་དེ་བཞིན་
གཤེགས་པ་ཤིན་ཏུ་མཐོར་གཤེགས་སངས་རྒྱས་ཐམས་ཅད་ཀྱི་ཡེ་ཤེས་ཀྱི་མཆོད་རྟེན་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །དྲི་མེད་ཡེ་ཤེས་དག་
པའི་གནས། །རིན་ཆེན་ཕུང་པོ་གསལ་བ་ཡི། །དང་ཞིང་ཡིད་འཕྲོག་འབྱུང་བའི་གཞི། །ས་ལེ་སྒྲིབ་མེད་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྣམ་པར་སྐྱེ་བའི་དབང་པོ་སངས་རྒྱས་
ཐམས་ཅད་ཀྱི་ཡེ་ཤེས་རྡོ་རྗེ་མངོན་པར་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །མངོན་པར་འབྱུང་བ་འཕགས་པའི་ལམ། །ཉེས་པ་སྤངས་པའི་ཚུལ་མཆོག་གིས། །

89-1-106b

རྣམ་པར་མཐོར་གཤེགས་འོག་མིན་ཏེ། །ཟབ་པ་བརྗོད་མེད་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བློ་གྲོས་བཟང་པོ་མཐོང་བ་སངས་རྒྱས་ཐམས་ཅད་ཀྱི་ཡེ་ཤེས་རྒྱལ་བའི་གནས་ཤེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །དངོས་པོ་ཀུན་གྱི་རང་བཞིན་མཆོག །ཆོས་ཀུན་མཉམ་དང་མི་མཉམ་པ། །ཀུན་མཁྱེན་ཀུན་འགྲོ་ཐམས་ཅད་པ། །དྲི་མེད་ཚུལ་
འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དཔལ་འཇིག་རྟེན་འོད་སངས་རྒྱས་ཐམས་ཅད་ཀྱི་མཉམ་པ་ཉིད་གནས་པ་གཅིག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། 
བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་ཀུན་གྱི་རང་བཞིན་འཛིན། །མི་གནས་མྱ་ངན་འདས་པ་པོ། །མཉམ་ཉིད་འགྲོ་བའི་དོན་མཛད་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །
དེ་ནས་དེ་བཞིན་གཤེགས་པ་རིན་ཆེན་གཟི་བརྗིད་སངས་རྒྱས་ཐམས་ཅད་ཀྱི་ཀུན་རྟོག་པ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གཅིག་དང་
དུ་མའི་རང་བཞིན་གནས། །ཆེར་མི་གཡོ་བ་རང་བཞིན་མེད། །རྩོལ་མེད་འབྱུང་བ་དག་པ་ཡི། །གསང་བ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྐལ་ལྡན་ཤིང་རྟ་ཆེན་པོ་
སངས་རྒྱས་ཐམས་ཅད་ཀྱི་དཔེ་བྱེད་ལས་འདས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །བཅོམ་ལྡན་སོ་སོ་རང་རིག་པ། །གཙོ་བོ་དཔེ་བྲལ་ཡེ་ཤེས་ཏེ། །
བདག་པོ་ཀུན་འགྲོ་ཀུན་ཁྱབ་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཀུན་དུ་རྒྱལ་བ་བཟང་པོ་སངས་རྒྱས་ཐམས་ཅད་ཀྱི་དངོས་པོ་མི་དམིགས་པ་རྡོ་རྗེ་སངས་རྒྱས་

89-1-107a

ཐམས་ཅད་ཀྱི་འབྱུང་གནས་ཤེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །བྱེད་པ་པོ་དང་འཕྲོག་པའང་མེད། །འདི་ནི་དཔལ་ལྡན་རང་བྱུང་སེམས། །དངོས་
པོ་གསལ་དང་མི་གསལ་མཛད། །ཡེ་ཤེས་སྣང་བའི་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགའ་བ་བཀོད་པ་སངས་རྒྱས་ཐམས་ཅད་ཀྱི་ཡེ་ཤེས་ཆེན་པོ་བླ་ན་མེད་པ་བདེ་བའི་ཏིང་ངེ་
འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གཉིས་མེད་གཉིས་ལས་གྲོལ་བ་ཡི། །ཡེ་ཤེས་རང་ལས་སྐྱེ་བར་འགྱུར། །དེ་ཉིད་མངོན་རྒྱུ་སྤོང་བྱེད་པས། །བྱང་ཆུབ་ཚུལ་འདི་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པ་གདེགས་པར་མཛད་པའི་དཔལ་སངས་རྒྱས་ཐམས་ཅད་སྣང་བ་ཡང་དག་པ་རྡོ་རྗེ་གཉིས་སུ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་
སེམས་འདི་གསུངས་སོ། །དངོས་པོ་མེད་པ་སྒོམ་པ་མིན། །དངོས་པོར་ཡང་དག་བསྒོམ་དུ་མེད། །གང་དུ་རོ་མཉམ་མཆོག་གི་དངོས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྤོས་ཀྱི་
གླང་པོ་སངས་རྒྱས་ཐམས་ཅད་ཀྱི་མི་གནས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །སེམས་ཅན་ཀུན་གྱི་བསམ་པ་འདི། །འཇིགས་པ་མེད་པའི་ངང་གནས་ན། །
བསམ་གྱིས་མི་ཁྱབ་གཉིས་མེད་གནས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བློ་གྲོས་འོད་འཕྲོའི་དཔལ་སངས་རྒྱས་ཐམས་ཅད་ཀྱི་ཡེ་ཤེས་བློ་གྲོས་མི་ཟད་པ་རྡོ་རྗེ་ཞེས་བྱ་བ་
འི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཤེས་རབ་མཁའ་ལ་རྣམ་པར་གནས། །སྙིང་རྗེས་སད་པའི་མདའ་ཡིས་ནི། །བདེ་བ་ཆེན་པོའི་རྣམ་པར་འབིགས། །བྱང་ཆུབ་ཚུལ་འདི་བསྟན་པའོ་ཞེས་

89-1-107b

གསུངས་སོ། །དེ་ནས་དེ་བཞིན་གཤེགས་པ་རི་བོའི་རྒྱལ་མཚན་རྣམ་པར་གྲོལ་བའི་དཔལ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །སེམས་དང་ཤེས་རབ་ཏིང་ངེ་འཛིན། །
རྣམ་གྲོལ་མཐའ་ལ་མི་གནས་པའོ། །དགོས་པ་ཀུན་གྱི་འཆིང་བ་བྲལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་སྤོས་བཟངས་སངས་རྒྱས་ཐམས་ཅད་ཀྱི་ཡེ་ཤེས་ཀྱི་རྡོ་རྗེ་མི་
ཟད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གཉིས་མེད་བདེ་བ་མཆོག་ཏུ་ཞི། །མཁའ་མཉམ་རྟོག་པ་ལས་གྲོལ་བ། །གཉིས་མེད་རྣམ་དག་ཆོས་ཀྱི་དབྱིངས། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་བསྟན་སངས་རྒྱས་ཐམས་ཅད་ཀྱི་བསམ་གྱིས་མི་ཁྱབ་པའི་དབྱིངས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་
གསུངས་སོ། །ཆོས་ཉིད་བསམ་གྱིས་མི་ཁྱབ་པའི། །རྣལ་འབྱོར་དབང་ཕྱུག་གནས་པ་ཆེ། །བརྟན་གཡོ་དག་པའི་ཚུལ་མཆོག་གིས། །དབྱེར་མེད་ཚུལ་འདི་དག་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་དྲག་
ཤུལ་ཅན་སངས་རྒྱས་ཐམས་ཅད་ཀྱི་བདུད་དཔུང་ཐམས་ཅད་ཕམ་པར་མཛད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །རྟོག་པ་ངན་པས་བརྟགས་པ་ཡི། །ཕྱི་རོལ་ཡུལ་
ནི་རྫས་སྟོང་པས། །ཐབས་དང་ཤེས་རབ་རྣམ་དག་ཉིད། །ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ཀྱི་ནོར་བུ་སངས་རྒྱས་ཐམས་ཅད་ཀྱི་ཡེ་ཤེས་དྲ་བ་གཅོད་པ་རྡོ་རྗེ་ཞེས་
བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །བདེ་བ་ཆེན་པོ་གཅིག་ཉིད་ཀྱི། །ནང་དུ་སྣོད་བཅུད་དངོས་པོའི་ཆོས། །ཀུན་རྫོབ་བདེན་པས་སྟོང་པའི་ཕྱིར། །འདུས་པ་

89-1-108a

དེར་གནས་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བཟང་པོས་བྱིན་པས་སངས་རྒྱས་ཐམས་ཅད་ཀྱི་འཁོར་བའི་འདམ་རྫབ་སྐེམས་པར་བྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གང་དུ་གཉིས་མེད་ངང་གནས་པ། །རང་བཞིན་བརྟག་ཚོགས་རབ་ཞི་བས། །སྣང་གསུམ་ཡེ་ཤེས་དག་གྱུར་པའི། །བྱང་ཆུབ་ཚུལ་འདི་བསྟན་པའོ། །ཞེས་གསུངས་
སོ། །དེ་ནས་དེ་བཞིན་གཤེགས་པ་ཟླ་བའི་བླ་མ་སངས་རྒྱས་སྲིད་པའི་ཚང་ཚིང་འཇོམས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཕྱི་རོལ་ང་རྒྱལ་ལོག་བཅོམ་སྟེ། །ཡེ་ཤེས་
གཅིག་པུ་བདག་དག་པས། །རང་བྱུང་བསམ་པ་རྣམ་པར་དག །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚངས་པའི་དབྱངས་སངས་རྒྱས་ཐམས་ཅད་ཀྱིས་ལོག་རྟོག་འཇོམས་པའི་རི་བོ་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཀུན་ཏུ་རྟོག་པ་རབ་སྤངས་ནས། །འདོད་ཆགས་ཆགས་བྲལ་ཡེ་ཤེས་ལས། །དབུ་མར་དམིགས་པར་མི་འགྱུར་ཏེ། གསང་བ་ཚུལ་འདི་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སེང་གེའི་ཟླ་བ་སངས་རྒྱས་ཐམས་ཅད་ཀྱི་འབྱུང་གནས་ཐམས་ཅད་མཁྱེན་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་
སོ། །རང་རིག་ནས་ནི་བྱང་ཆུབ་འགྱུར། །འདིར་ཉིད་ཐ་དད་རྟོག་མིན་ཞིང་། །གཟུགས་དང་རྣམ་ཐར་སྒོ་ཐིམ་པས། །ཆོས་རྒྱུན་ཐོབ་ཕྱིར་བསྟན་པའོ་ཞེས་གསུངས་སོ། །འགྲོ་བ་རྣམས་ཀྱི་བདེ་བ་རྟགས་དང་བཅས་འབྱུང་བ། །
གང་ཡིན་མཚན་མ་སྤངས་པར་གྱུར་པའི་ཕྱིར། །རང་བྱུང་ངོ་བོ་ཡེ་ཤེས་བདག་ཉིད་དེ། །རྟོགས་པས་སྟོང་པའི་བདེ་བ་མི་ཟད་ཡིན། །རླུང་གི་རྟོག་པའི་རྗེས་སུ་འཇུག་པ་ན། །བདེ་བ་རང་སེམས་ངོ་བོ་དམ་པས་ནི། །ཚིམ་འགྱུར་དེ་

89-1-108b

ལས་གཞན་དུ་གཡོ་མི་འགྱུར། །ཐབས་དང་ཤེས་རབ་བདག་ཉིད་གནས་པ་ཡིན། །སངས་རྒྱས་ཐམས་ཅད་ཀྱིས་དམ་པའི་མཛོད་ཆེན་པོ་ཞེས་བྱ་བའི་ཏིང་ངེ་འཛིན་ལ་བསྟན་པའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་
དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས། སངས་རྒྱས་ཐམས་ཅད་ཀྱི་བདེ་བ་མི་འགྱུར་བའི་དོན་བསྟན་པའི་ལེའུ་སྟེ་ཉེར་དགུ་པའོ།། །། 
དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚུངས་པ་མེད་པའི་དཔལ་སངས་རྒྱས་ཐམས་ཅད་ཀྱི་སྙིང་པོ་གསང་བ་དྲི་མ་མེད་པ་རྡོ་རྗེ་སངས་རྒྱས་ཐམས་ཅད་རྗེས་སུ་དྲན་པ་རྡོ་རྗེ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །དེ་བཞིན་གཤེགས་ཀུན་འདུས་པ་ཡི། །སངས་རྒྱས་སྤྲོ་བསྡུའི་འཁོར་ལོ་ཡིས། །རྩེ་མོར་གྱུར་པའི་ཕྱག་རྒྱ་ཡིས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་
དེ་བཞིན་གཤེགས་པ་ལེགས་པར་སྐྱེས་པའི་དཔལ་སངས་རྒྱས་ཐམས་ཅད་ཀྱི་ཡེ་ཤེས་གསང་བ་ཆོས་རྡོ་རྗེ་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །རང་བྱུང་ཡེ་ཤེས་ཞི་བའི་
དངོས། །དག་པ་རྣམ་དབེན་མངོན་པར་འབྱུང་། །ཕུན་སུམ་ཚོགས་པ་ལམ་གྱུར་གནས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་དཔེ་མེད་པའི་ཚོགས་སངས་རྒྱས་ཐམས་ཅད་ཀྱི་གསང་བ་
རིགས་རྡོ་རྗེ་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གང་དུ་ལྷ་དང་ལྷ་མོ་དང་། །བྱང་ཆུབ་སེམས་དཔའ་དཔག་མེད་པ། །ཡེ་ཤེས་ལས་སྐྱེས་མཚུངས་མེད་པ། །བྱང་ཆུབ་
ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་གྲགས་པའི་བཤེས་གཉེན་སངས་རྒྱས་ཐམས་ཅད་ཀྱི་རྡོ་རྗེའི་རིགས་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་

89-1-109a

གསུངས་སོ། །གདུག་པ་ཅན་རྣམས་གདུལ་བྱའི་ཕྱིར། །སྙིང་རྗེས་གཏུམ་པའི་ང་རོ་ཡིས། །ཚར་གཅད་པ་ཉིད་བླ་མེད་བསྒྲལ། །དེ་ཉིད་གསང་བའི་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་བདེན་
པའི་རྒྱལ་པོ་སངས་རྒྱས་ཐམས་ཅད་ཀྱི་དེ་བཞིན་གཤེགས་པའི་རིགས་རྡོ་རྗེ་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ལྷ་དང་ལྷ་མིན་ལྟོ་འཕྱེ་དང་། །
གྲུལ་བུམ་ལ་སོགས་སྣ་ཚོགས་པས། །བསྟོད་ཅིང་མཆོད་པའི་ཡེ་ཤེས་གནས། །རིན་ཆེན་འཁོར་ལོ་བརྗོད་པ་ཡིན། །ཞེས་གསུངས་སོ། །དེ་ནས་དེ་བཞིན་གཤེགས་པ་དཀའ་ཐུབ་ཆེན་པོ་སངས་རྒྱས་ཐམས་ཅད་
ཀྱི་ཡེ་ཤེས་རིན་པོ་ཆེའི་ནོར་བུ་རྗེས་སུ་དྲན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །དེ་ནས་ཡེ་ཤེས་ནོར་བུ་ནི། །སྣ་ཚོགས་འདོད་པ་དོན་བྱེད་པ། །དཔག་མེད་
ཡོན་ཏན་འབྱུང་བའི་དབྱིངས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ལྷུན་པོའི་འོད་ཟེར་སངས་རྒྱས་ཐམས་ཅད་ཀྱི་པད་མའི་ཕྲེང་བ་རྗེས་སུ་དྲན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གང་དུ་འདམ་སྐྱེས་མེ་ཏོག་དང་། །ཆུ་སྐྱེས་པད་མ་གསལ་བ་ཡང་། །འབར་བ་ཁ་ཕྱེ་འོད་ཁྱབ་པས། །དག་པ་ཡེ་ཤེས་ཚུལ་བསྟན་པའོ། །ཞེས་གསུངས་སོ། །དེ་ནས་དེ་
བཞིན་གཤེགས་པ་ཡོན་ཏན་བརྩེགས་པ་སངས་རྒྱས་ཐམས་ཅད་ཀྱི་ལས་ཀྱི་རལ་གྲི་རྗེས་སུ་དྲན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གང་དུ་རྟོག་པ་གཅོད་པ་དག །
རྣམ་པར་བདུད་ཚོགས་རབ་འཇོམས་པས། །ཡེ་ཤེས་མེ་འོད་རྒྱས་པ་ཡིས། །ཀུན་དུ་རྒྱས་པའི་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་མཆོད་པར་གྲགས་པ་སངས་རྒྱས་ཐམས་ཅད་ཀྱི་སྣ་ཚོགས་

89-1-109b

འདུལ་བ་རྡོ་རྗེ་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །བདེ་གཤེགས་རྒྱལ་བ་རྒྱ་མཚོའི་དྲུང་། །གསང་བ་མི་ཟད་མཆོད་པའི་གཞི། །དེ་ཉིད་ཀུན་དུ་ཁྱབ་བྱེད་པས། །
གསང་བ་དག་པའི་མཆོད་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ཀྱི་གྲགས་པ་སངས་རྒྱས་ཐམས་ཅད་ཀྱི་སྐུ་རྡོ་རྗེ་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་
གསུངས་སོ། །གང་དུ་དེ་བཞིན་གཤེགས་པ་ཡི། །སྐུ་ཡི་འདུལ་བ་མཐའ་ཡས་པ། །སྣ་ཚོགས་ཞིང་ཁམས་སྤྱོད་མཛད་པ། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་གསང་བ་སྦྱིན་པ་
འོད་སངས་རྒྱས་ཐམས་ཅད་ཀྱི་གསུང་རྡོ་རྗེ་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །འདིར་ནི་བརྗོད་པ་ཀུན་གྱི་གཞི། །ཐབས་དང་ཤེས་རབ་སྒྲ་རྣམས་ལས། །སྣ་ཚོགས་
སྐད་དུ་ཆོས་སྟོན་པ། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་གློག་འབྱིན་སངས་རྒྱས་ཐམས་ཅད་ཀྱི་ཐུགས་རྡོ་རྗེ་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་
འདི་གསུངས་སོ། །དག་པར་བྱེད་པ་ཁྲུས་ཡིན་ཏེ། །སྒྲིབ་པ་འཕྱག་བྱེད་སྤྱོད་ལམ་དུ། །ཐལ་སྦྱར་འདུད་པས་བག་ཡོད་ལམ། །དྲན་ལྡན་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་བདེན་པར་གསུང་བ་སངས་རྒྱས་ཐམས་ཅད་
ཀྱི་ཡོན་ཏན་རྡོ་རྗེ་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །རིན་ཆེན་སྣ་བདུན་རང་བྱུང་བའི། །ཡོན་ཏན་སྒྱུ་རྩལ་སྣ་ཚོགས་པ། །ཐམས་ཅད་བསམ་པའི་སྟོབས་ཡིན་པས། །
དེ་ཉིད་གསང་བའི་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་མཚོ་བྱེད་གསུང་བ་སངས་རྒྱས་ཐམས་ཅད་ཀྱི་ཕྲིན་ལས་རྡོ་རྗེ་རྗེས་སུ་དྲན་པ་སངས་རྒྱས་ཐམས་ཅད་ཀྱི་སྟོབས་བཟང་བའི་ཏིང་ངེ་འཛིན་ལ་སྙོམས་

89-1-110a

པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གང་དུ་སྣ་ཚོགས་དབང་པོའི་རིམ། །དེ་ཉིད་ཐབས་ཚུལ་ཐ་དད་པས། །ལྡོག་པའི་དབྱེ་བ་དུ་མར་བསྟན། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །
དེ་ནས་དེ་བཞིན་གཤེགས་པ་ན་ཚོད་བཟང་པོ་སངས་རྒྱས་ཐམས་ཅད་ཀྱི་ཏིང་ངེ་འཛིན་གྱི་སྒོ་མཐའ་ཡས་པ་ལ་འཇུག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །རིགས་ཅན་
སྣ་ཚོགས་དུ་མའི་སྣང་བ་ལ། །ཡེ་ཤེས་རང་འབྱུང་འགག་པ་མེད་པར་ནི། །ཐུགས་རྗེ་ཆེན་པོ་མི་ཟད་སྟོབས་ལ་འབྱུང་། །སངས་རྒྱས་ཀུན་གྱི་ཕྲིན་ལས་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ལེགས་པའི་
ཚོགས་ཅན་སངས་རྒྱས་ཐམས་ཅད་ཀྱི་ཁྲོ་བོ་རྗེས་སུ་དྲན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གང་དུ་གདུག་པ་འདུལ་བྱེད་པ། །འབྱུང་པོ་མ་ལུས་ཚར་གཅད་ཅིང་། །རྗེས་སུ་
གཟུངས་ཕྱིར་ཁྲོ་བར་བསྟན། །དེ་ཉིད་ཐུགས་རྗེའི་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རྣམ་པར་ངེས་པའི་བློ་གྲོས་སངས་རྒྱས་ཐམས་ཅད་ཀྱི་སེམས་ཅན་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གང་དུ་དམིགས་པས་འཇུག་མེད་པར། །སྣ་ཚོགས་ཁམས་གསུམ་སྐྱེ་གནས་པ། །མི་གཡོ་ངང་ལས་སྣང་མེད་པར། །ཆོས་དབྱིངས་གཅིག་པར་ཚུལ་བསྟན་པའོ། །
ཞེས་གསུངས་སོ། །དེ་ནས་དེ་བཞིན་གཤེགས་པ་སྲིད་མཐའ་ནོར་བུའི་སྤོས་སངས་རྒྱས་ཐམས་ཅད་ཀྱི་མ་སྐྱེས་པ་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །
གང་གི་སྐྱེ་བས་བསྡུས་པའི་དངོས། །སྟོང་ཉིད་གཅིག་ཏུ་མ་སྐྱེས་པས། །སྐྱེ་བ་མེད་པའི་ཚུལ་ཅན་ཏེ། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱལ་བ་དགྱེས་པ་སངས་རྒྱས་ཐམས་

89-1-110b

ཅད་ཀྱི་རིག་པ་རྡོ་རྗེ་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ངོ་མཚར་སྣ་ཚོགས་འཕྲུལ་བ་ཡི། །གཟོ་ཡི་གནས་དང་གསོ་སྦྱང་སོགས། །མཁྱེན་པས་
ཐབས་ལ་མཁས་པར་བྱ། །དེ་ཉིད་ཡེ་ཤེས་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་སེང་གེའི་འོད་ཟེར་སངས་རྒྱས་ཐམས་ཅད་ཀྱི་སྣང་བ་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །བློ་སྣང་ཡུལ་དང་དབང་པོ་ཡིས། །དུ་མའི་དངོས་པོ་སྣང་བ་ལ། །ལྡོག་པ་དང་ནི་རྗེས་སུ་འགྲོ། །དེ་ཉིད་གསང་བའི་ཚུལ་བསྟན་པའོ། །ཞེས་གསུངས་སོ། །ལུས་གནས་ཆ་ཤས་
མེད་པར་རྟོགས། །ངེས་འབྱུང་དེ་བཞིན་ཆ་ཤས་མེད། །ཆ་ཤས་ཅན་དང་ཆ་མེད་པ། །ཤེས་ནས་འདིར་གྲོལ་ཐེ་ཚོམ་མེད། །དངོས་པོ་ཐམས་ཅད་མཉམ་པ་སྟེ། །མྱུར་དུ་འཇུག་པ་དཀའ་བ་ཉིད། །དཔེ་དང་གཏན་ཚིགས་རྣམ་པར་སྤངས། །
རང་བཞིན་གྱིས་ནི་འོད་གསལ་ཞིང་། །གཉུག་མ་འདིར་ནི་སྣང་བ་སྟེ། །སྤྱོད་པའི་ཡུལ་ལས་འདས་པ་ཡིན། །རྩོད་མེད་ཞི་བ་མཚོན་བྱ་མེད། །ངེས་པའི་ཆོས་ཀྱི་དབྱིངས་ལ་གནས། །སྐལ་བ་མེད་ཅིང་རྒྱུ་བ་མེད། །ཤིན་ཏུ་སྟོང་ཞིང་
རྡུལ་མེད་པས། །སྒྲ་ལས་འདས་ཤིང་ཡོན་ཏན་སྤངས། །དངོས་པོ་ཀུན་གྱི་རང་བཞིན་ཅན། །ཡེ་ཤེས་ཀྱི་སྣང་བ་རྒྱས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་
གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་འགྲོ་བ་འདུལ་བ་ཞེས་བྱ་བའི་ལེའུ་སྟེ་སུམ་བཅུ་པའོ།། །། དེ་ནས་དེ་བཞིན་གཤེགས་པ་རྣམ་པར་སྣང་མཛད་
སངས་རྒྱས་ཐམས་ཅད་ཀྱི་སྦྱིན་པའི་ཕ་རོལ་དུ་ཕྱིན་པ་མི་ཟད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གང་དུ་དངོས་པོ་རྣམ་དག་པས། །ཡུལ་རྣམས་སྒྱུ་མའི་

89-1-111a

མཚན་ཉིད་ཅན། །དུས་གསུམ་ཅིག་པར་བསྡུས་པ་ཡིས། །ཐམས་ཅད་མཁྱེན་པར་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་གྲགས་པའི་མཆོག་སངས་རྒྱས་ཐམས་ཅད་ཀྱི་
ཚུལ་ཁྲིམས་ཀྱི་ཕ་རོལ་དུ་ཕྱིན་པ་མི་ཟད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །རྣམ་པར་སྦྱོང་བའི་ཚུལ་ལས་ནི། །ཚུལ་བཞིན་མ་ཡིན་རྣམ་གཅད་ཅིང་། །དབེན་པ་ཉོན་
མོངས་ལས་ལྡོག་གང་། །ཚུལ་འདི་གསང་བ་ཐོབ་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་རབ་ཞུགས་སངས་རྒྱས་ཐམས་ཅད་ཀྱི་བཟོད་པའི་ཕ་རོལ་ཏུ་ཕྱིན་པ་མི་ཟད་པ་རྡོ་རྗེ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ལུས་ངག་ཡིད་ཀྱི་ལས་རྣམས་ལ། །བྱང་ཆུབ་སེམས་དཔའ་གཞན་དོན་དུ། །དཔག་མེད་དཀའ་སྤྱད་ཁུར་བྱེད་པ། །ཡེ་ཤེས་བཟོད་པ་ཆེན་པོ་ཡིན་ཞེས་
གསུངས་སོ། །དེ་ནས་དེ་བཞིན་གཤེགས་པ་ཐུབ་པ་ནོར་བུའི་ཟླ་བ་སངས་རྒྱས་ཐམས་ཅད་ཀྱི་བརྩོན་འགྲུས་མི་ཟད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཕྱིར་མི་ལྡོག་
པར་གཞན་དོན་དུ། །བྱང་ཆུབ་སེམས་ཀྱི་བརྩོན་པ་ཡིས། །ཚད་མེད་དབུགས་འབྱིན་ཆེན་པོ་ཉིད། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་དྲག་ཤུལ་འོད་ཟེར་སངས་རྒྱས་ཐམས་ཅད་ཀྱི་བསམ་
གཏན་རྡོ་རྗེ་མི་ཟད་པ་རྡོ་རྗེ་ཞེས་བྱ་བའི་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །འཇིག་རྟེན་བསམ་གཏན་བཞི་གནས་ཤིང་། །ཡེ་ཤེས་བསམ་གཏན་མཆོག་སྤྱོད་པས། །ཕྱི་ནང་རྩོལ་མེད་ངང་ལས་ནི། །བྱང་ཆུབ་
སེམས་ཀྱི་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་བརྟུལ་ཞུགས་སངས་རྒྱས་ཐམས་ཅད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་རྡོ་རྗེ་མི་ཟད་པ་སངས་རྒྱས་ཐམས་ཅད་ཀྱི་གནས་ཀྱི་ཏིང་ངེ་འཛིན་

89-1-111b

ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་རང་བཞིན་འོད་གསལ་བ། །སྙིང་པོ་བྱང་ཆུབ་མཆོག་སེམས་ལས། །ཐ་དད་རྒྱས་ཐེབས་གཅིག་པའི་སྐུ། །ཡེ་ཤེས་དེ་ཉིད་ཚུལ་བསྟན་
པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་འགྲོ་བས་ཀུན་དུ་མཆོད་པ་སངས་རྒྱས་ཐམས་ཅད་ཀྱི་ཐབས་ཀྱི་ཕ་རོལ་དུ་ཕྱིན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་
འདི་གསུངས་སོ། །ཀུན་དུ་དྲི་མེད་དགེ་བ་ནི། །རྟེན་འབྲེལ་སྣ་ཚོགས་སྤྱོད་པའི་ངང་། །རྐྱེན་ལས་འབྱུང་བ་བླ་ན་མེད། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ནོར་བུའི་ཚོགས་འཆང་བ་
སངས་རྒྱས་ཐམས་ཅད་ཀྱི་སྟོབས་ཀྱི་ཕ་རོལ་དུ་ཕྱིན་པ་རྡོ་རྗེ་མི་ཟད་པ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །བདུད་ཚོགས་རྣམས་ལས་རྣམ་རྒྱལ་བ། །དེ་ཉིད་
ཡེ་ཤེས་རླུང་ལས་ནི། །ཟག་མེད་ཞི་བས་མཆོག་ཏུ་བདེ། །གཉིས་མེད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་འཇིག་རྟེན་བླ་མ་སངས་རྒྱས་ཐམས་ཅད་ཀྱི་སྨོན་ལམ་གྱི་ཕ་རོལ་ཏུ་ཕྱིན་པ་རྡོ་རྗེ་མི་ཟད་
པ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཞིང་ཁམས་རྣམ་དག་རྣམས་དང་མ་དག་དང་། །གདུལ་དཀའི་སེམས་ཅན་རྣམས་ཕྱིར་འདུལ་བར་ནི། །བུང་བ་མེ་ཏོག་བཞིན་དུ་
རབ་འཇུག་པ། །བྱང་ཆུབ་སེམས་དཔའ་འབྱུང་བའི་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་གླང་ཆེན་སེང་གེ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་ཕ་རོལ་དུ་ཕྱིན་པ་རྡོ་རྗེ་མི་ཟད་པའི་ཏིང་ངེ་འཛིན་ལ་སྙོམས་པར་
ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཡེ་ཤེས་གང་དུ་འདུ་བ་ཡི། །ཡེ་ཤེས་མངོན་པར་འབྱུང་བ་གང་། །དེ་ཉིད་ཆགས་མེད་རྣམ་དག་པས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཟླ་བ་སངས་རྒྱས་

89-1-112a

ཐམས་ཅད་ཀྱི་སྙིང་པོ་དབང་ཕྱུག་གི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཀུན་དུ་རྒྱས་པའི་གནས་བསྟན་པ། །རྣམ་པར་འཕྲུལ་བའི་དབང་ཕྱུག་གིས། །ལྷུན་
གྲུབ་ཕྱག་རྒྱས་རབ་རྒྱས་པས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་འོད་ཟེར་སངས་རྒྱས་ཐམས་ཅད་ཀྱི་སྤོང་བའི་རྡོ་རྗེ་མཆོག་ཅེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །རྣམ་པར་སྤྱོད་པ་སྣ་ཚོགས་ལ། །བདེ་བར་གཤེགས་པ་མཚུངས་མེད་སྤྱོད། །འདི་ནི་སྔགས་ཀྱི་སྤྱོད་མཆོག་སྟེ། །དེ་ཉིད་གསང་བའི་ཚུལ་ཐོབ་པའོ། །ཞེས་གསུངས་སོ། །དེ་ནས་
དེ་བཞིན་གཤེགས་པ་སྒྲ་གཅན་བྲལ་བ་སངས་རྒྱས་ཐམས་ཅད་ཀྱི་དཔལ་གྱི་བེའུ་རབ་ཏུ་རྒྱས་པར་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །འདི་ནི་དཔལ་གྱི་སྟོབས་མཆོག་
སྟེ། །དྲི་མེད་ཆུ་སྐྱེས་ཡོངས་འཛིན་པ། །ཕྲ་བ་གེ་སར་མཆོག་ཐོབ་པས། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་རྒྱ་མཚོ་སངས་རྒྱས་ཐམས་ཅད་ཀྱི་རྡུལ་མེད་པའི་གནས་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །རྣམ་པ་ཀུན་དུ་དྲི་མ་མེད། །བསྐྱོད་པ་མེད་ཅིང་འཛིན་བྲལ་བས། །ཆོས་ཉིད་ངང་དུ་རོ་མཉམ་པ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །
དེ་ནས་དེ་བཞིན་གཤེགས་པ་འོད་ཟེར་མངའ་དབང་སངས་རྒྱས་ཐམས་ཅད་ཀྱི་ཡེ་ཤེས་འབྲུག་སྒྲ་དབྱངས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་ཀུན་གྱི་སྣང་བ་ནི། །
རྟོགས་དཀའ་བདག་མེད་མཚན་མ་མེད། །བྱམས་པའི་རང་བཞིན་གཞན་ཕན་བརྩོན། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རབ་ཏུ་ཞི་བའི་སྟོབས་སངས་རྒྱས་ཐམས་ཅད་ཀྱི་ཀུན་དུ་

89-1-112b

འཇམ་དབྱངས་ཀ་ལ་པིང་ཀའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཚངས་པའི་དབྱངས་ལྡན་གསུང་གི་གནས། །ཡན་ལག་དྲུག་བཅུ་ཐོག་མེད་དུ། །འགྱུར་བའི་
བརྗོད་པ་ལས་སྐྱེས་པའི། །སྐད་དུ་ཡེ་ཤེས་ཚུལ་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་འཇིག་རྟེན་བཟང་པོ་སངས་རྒྱས་ཐམས་ཅད་ཀྱི་ཐུགས་རྡོ་རྗེ་དགྱེས་པའི་མཆོག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །མཉམ་པར་མ་བཞག་སྟོང་པ་ཡིས། །རྟག་ཏུ་མཉམ་པའི་ཚུལ་གནས་ནས། །འགྱུར་མེད་སྣ་ཚོགས་ཁྱབ་བྱེད་པ། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་
གཤེགས་པ་མྱ་ངན་མེད་པའི་དཔལ་སངས་རྒྱས་ཐམས་ཅད་ཀྱི་འཁོར་བའི་ཆུ་ཀླུང་སྐེམས་པར་བྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །སྲིད་པ་འདི་ཉིད་སྤང་མེད་པར། །
མི་གནས་མཉམ་པའི་ངང་ལས་ནི། །བདག་མེད་སེང་གེའི་སྒྲ་སྒྲོགས་པ། །དེ་ཉིད་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་རླུང་ཤུགས་བཅུ་པ་སངས་རྒྱས་ཐམས་ཅད་ཀྱི་ཕྱིར་མི་ལྡོག་པའི་འཇུག་པ་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །སྐྱེ་གནས་འབྱུང་ལས་གྱུར་པ་ལ། །འདོད་པའི་སྣང་བ་འགྲོ་ཞིང་ལྡིང་། །དེ་ཉིད་སེམས་ཅན་གནས་མཐོང་ཕྱིར། །བྱང་ཆུབ་ཚུལ་འདི་བསྟན་པ་
འོ། །ཞེས་གསུངས་སོ། །དེ་ནས་དེ་བཞིན་གཤེགས་པ་སྟོབས་ལ་དགྱེས་པའི་དཔལ་སངས་རྒྱས་ཐམས་ཅད་ཀྱི་ལྷ་ཀླུ་ཐམས་ཅད་ཀྱིས་མཆོད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་
སོ། །གང་དུ་མཆོད་ཕྱིར་ཡེ་ཤེས་ཀྱི། །ཆགས་མེད་ཀུན་ཏུ་བཟང་པོ་ཡི། །བདེན་པའི་བྱིན་བརླབས་ཐོགས་མེད་པས། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་

89-1-113a

གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་རྣལ་འབྱོར་ཆེན་པོའི་འདུལ་བ་དོན་ཡོད་པའི་མཆོག་བསྟན་པའི་ལེའུ་སྟེ་སུམ་བཅུ་གཅིག་པའོ།། །། དེ་ནས་རྒྱལ་
པོ་རྡོ་རྗེ་འཛིན། །རྡོ་རྗེ་གསང་བ་གསུམ་གྱི་མཐར། །རྡོ་རྗེ་བཀོད་པ་སྙིང་པོ་ཆེ། །གསང་བ་དམ་པ་བཀའ་སྩལ་པ། །སངས་རྒྱས་ཐམས་ཅད་གཅིག་བསྡུས་པའི། །ཡེ་ཤེས་སྣང་བ་བསྟན་པའོ། །རང་ལུས་ལྷར་གསལ་བྱང་ཆུབ་
སེམས། །གང་དུ་སྲོག་དབུས་བཞུགས་པ་ན། །ཨཱ་ལི་ཀཱ་ལི་མཉམ་སྦྱོར་བས། །མན་ངག་གིས་ནི་རླུང་བསྡུས་ཏེ། །དེ་ཚེ་བཟླས་པ་བརྟན་གྱུར་པས། །དེ་ཉིད་ཡེ་ཤེས་མཆོག་ཐོབ་འགྱུར། །མི་གཡོ་མི་རྟོག་ཕྲ་བའི་སེམས། །མི་མངོན་གསལ་
མིན་དབུ་མར་བཞུགས། །དེ་ཉིད་རྣལ་འབྱོར་མཆོག་ཅེས་བྱ། །སྟོང་པ་ཉིད་དང་མཉམ་སྦྱོར་བས། །དེ་ཉིད་མངོན་པར་བྱང་ཆུབ་པའོ། །དེ་ཉིད་གསལ་བས་བདེ་བ་ནི། །སྒྱུ་མ་གོམས་པས་འཆང་བར་འགྱུར། །ཇི་སྲིད་སྒྱུ་མ་ལ་གསལ་བ། །དེ་སྲིད་
གོམས་པས་འཇུག་པར་བྱ། །རབ་ཏུ་གསལ་བའི་གནས་ཐོབ་པས། །རང་དགེའི་ཡེ་ཤེས་ཐོབ་པར་འགྱུར། །དེ་ཉིད་ཡེ་ཤེས་བདེ་ཆེན་པོ། །ཐིག་ལེའི་གཟུགས་ཅན་གཅིག་པུ་ཉིད། །སྙིང་དབུས་མི་ཤིགས་སེམས་གཅིག་བདག །དེ་ཉིད་ཡེ་ཤེས་
རང་སྟོང་པ། །སྒྱུ་མར་ངོ་བོ་ཉིད་ཀྱིས་གསལ། །གཉིས་མེད་ཡེ་ཤེས་རྣལ་འབྱོར་པས། །ཡེ་ཤེས་འབྱུང་བའི་རྡོ་རྗེའི་བློས། །མཁས་པས་མཐོང་བས་བརྟག་པར་བྱ། །ཐོག་མཐའ་མེད་པའི་ཡེ་ཤེས་ནི། །མ་བྱུང་བཅོས་མིན་ལྷན་
ཅིག་སྐྱེས། །རང་རིག་གནས་ནི་འདིར་ཐོབ་པའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་གསང་བ་ཆེན་པོ་ལ་དམིགས་པ་ཞེས་བྱ་བའི་ཏིང་ངེ་འཛིན་ཏོ། །དེ་ནས་དེ་བཞིན་གཤེགས་པ་མཐུ་དཔལ་སྙིང་པོ་སངས་
རྒྱས་ཐམས་ཅད་ཀྱི་གསང་བ་སེང་གེའི་སྒྲ་སྒྲོགས་པ། རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཡེ་ཤེས་ས་གཞི་ལས། །སྣ་ཚོགས་མྱུ་གུ་བསྐྱེད་པའི་རྒྱུ། །

89-1-113b

རྟེན་འབྲེལ་ཚོགས་ཕྱིར་ཐོབ་པ་ཉིད། །ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཐུ་སྟོབས་དཔལ་སངས་རྒྱས་ཐམས་ཅད་ཀྱི་གསང་བའི་རྒྱལ་པོ་རྡོ་རྗེ་སངས་རྒྱས་ཐམས་ཅད་ཀྱི་མཉེས་
པར་བྱེད་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདོད་པའི་ལོངས་སྤྱོད་སྣ་ཚོགས་པ། །རིན་ཆེན་བདུན་དང་ཉེ་བདུན་གྱིས། །བརྒྱན་ཞིང་མཆོད་པས་བདེ་དེ་ཐོབ། །དེ་ཉིད་ཚུལ་
འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཐུ་ཆེན་པོ་སངས་རྒྱས་ཐམས་ཅད་ཀྱི་འབྱུང་གནས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
ལུས་ཀྱང་སེམས་ལ་མི་གནས་ཏེ། །སེམས་ཀྱང་ངག་ལ་མི་གནས་ཏེ། །ཀུན་དུ་གནས་མེད་མཁའ་ལྟ་བུར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་སྙིང་པོ་སངས་རྒྱས་
ཐམས་ཅད་ཀྱི་སྣ་ཚོགས་མཆོད་པའི་བཀྲ་ཤིས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཆོག་སྩོལ་བཀྲ་ཤིས་རྒྱུན་དུ་ནི། །དུས་གསུམ་སངས་རྒྱས་ཐམས་
ཅད་ཀྱིས་སྐྱེས་བུ་དེ་ལ་སྩོལ་བ་སྟེར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བདེན་པར་སྤྱོད་པ་སངས་རྒྱས་ཐམས་ཅད་ཀྱིས་བསིལ་བའི་ཆར་འབེབས་པའི་རྡོ་རྗེ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་འདོད་ཆགས་ལ་སོགས་པས། །ཟིལ་གནོན་དེ་ལས་ཐར་བ་ཡི། །ཆར་པས་ཟུག་རྔུ་སེལ་བྱེད་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་དགེ་བའི་མཆོག་སངས་རྒྱས་ཐམས་ཅད་ཀྱི་ངོ་བོ་ཉིད་སྐུ་རྡོ་རྗེ་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཞིང་ཁམས་ཀུན་ལ་ཁྱབ་

89-1-114a

གྱུར་པའི། །ལུས་ཅན་ཀུན་ལ་རྣམ་པར་སྣང་། །དེ་ཉིད་རྡོ་རྗེའི་སྐུར་གྱུར་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱལ་པོའི་དཔལ་སངས་རྒྱས་ཐམས་ཅད་ཀྱི་ངོ་བོ་ཉིད་
གསུང་རྡོ་རྗེ་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྟོང་གསུམ་ཁམས་སུ་གྲགས་བྱེད་པ། །གླིང་ཀུན་སྐད་ཅིག་དབྱངས་ཀྱིས་སྟོན། །དུ་མར་དེ་ཉིད་སྟོན་པ་པོ། །བྱང་
ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྐར་རྒྱལ་སངས་རྒྱས་ཐམས་ཅད་ཀྱི་ཐུགས་རྡོ་རྗེ་ངོ་བོ་ཉིད་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །གང་དུ་འཁོར་ལོས་སྒྱུར་བ་ཡི། །ཆོས་ཀྱི་འཁོར་ལོས་དབང་བསྐུར་བཞིན། །འགྲོ་ཀུན་ཡེ་ཤེས་དབང་བསྐུར་བའི། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་ཟེར་ཆེན་པོ་སངས་
རྒྱས་ཐམས་ཅད་ཀྱི་དེ་བཞིན་ཉིད་བསྒྱུར་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདས་དང་མ་འོངས་ད་ལྟར་གང་། །ཆོས་ཉིད་མཉམ་པའི་དེ་བཞིན་ཉིད། །མཚུངས་
མེད་ད་ལྟར་འདིར་རྟོགས་ན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གློག་གི་རྩེ་མོ་སངས་རྒྱས་ཐམས་ཅད་ཀྱི་ཀུན་དུ་འཕྲུལ་པའི་སྤྱོད་པ་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཔག་མེད་སྒྱུ་མའི་ཆོ་འཕྲུལ་གྱིས། །མ་དག་དག་པར་གང་བསྒྱུར་བ། །ཐམས་ཅད་བློ་གྲོས་བཟང་པོ་ཐོབ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །
དེ་ནས་དེ་བཞིན་གཤེགས་པ་ཡོན་ཏན་རྒྱ་ཆེན་སངས་རྒྱས་ཐམས་ཅད་ཀྱི་རིན་པོ་ཆེའི་རྒྱལ་མཚན་བསྒྲེང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདུད་

89-1-114b

ཀྱི་འཆིང་བ་ལས་འདས་ཕྱིར། །ཆོས་ཀྱི་རྒྱལ་མཚན་ཆེན་པོ་ཡིས། །ཁམས་གསུམ་ཀུན་ལ་ཁྱབ་པར་བྱ། །དེ་ཉིད་གསང་བ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་པོ་ཆེའི་འོད་སངས་རྒྱས་
ཐམས་ཅད་ཀྱི་འཇིག་རྟེན་སྣང་བར་བྱེད་པ་རེ་རེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འོད་གསལ་ཤིན་དུ་རྣམ་དག་པ། །དངོས་པོ་མ་སྤངས་ཡེ་ཤེས་ཆེ། །ཆོས་
དབྱིངས་ཀློང་ན་བདེ་བར་གནས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་དཔལ་གྱི་འོད་སངས་རྒྱས་ཐམས་ཅད་ཀྱི་ཐུགས་རྗེའི་གདུགས་ཀྱིས་ཁྱབ་པར་བྱེད་པ་རྡོ་རྗེ་ཞེས་
བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐྱེ་བས་བསྡུས་པའི་སེམས་ཅན་རྣམས། །སྐྱོབ་ཕྱིར་ཚད་མེད་གདུགས་ཀྱིས་ནི། །ཀུན་ནས་ཀུན་དུ་ཁྱབ་པར་བྱེད། །བྱང་ཆུབ་ཚུལ་
འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བདུད་འདུལ་བར་མཛད་པ་སངས་རྒྱས་ཐམས་ཅད་ཀྱིས་བདུད་མ་ལུས་པ་འཇོམས་པ་རྡོ་རྗེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །ལོག་ལྟ་མ་ལུས་མུན་པའི་གཞི། །སངས་རྒྱས་ཡེ་ཤེས་སྒྲོན་མེ་ཡིས། །སྐད་ཅིག་གཅིག་ལ་སེལ་མཛད་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་གོ་ཆ་བགོས་པ་སངས་རྒྱས་ཐམས་ཅད་ཀྱི་རྡོ་རྗེ་མཆོག་ཏུ་སྲ་བ་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡན་ལག་བཞི་ལྡན་མཚོན་ཆ་མཆོག །དེ་ཉིད་བསྲུང་
བ་བླ་ན་མེད། །ཕ་རོལ་རྒོལ་བ་བཟློག་པ་པོ་ཞེས་གསུངས་སོ། །དེ་ནས་དེ་བཞིན་གཤེགས་པ་སེང་གེའི་ཕྱག་སངས་རྒྱས་ཐམས་ཅད་ཀྱི་ཁ་ལོ་སྒྱུར་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་

89-1-115a

ཀྱི་སེམས་འདི་གསུངས་སོ། །ཕྱག་རྒྱ་སྣ་ཚོགས་ཐབས་རོལ་པ། །འབར་ཕྲེང་དུ་མའི་སྤྲོ་བ་ཅན། །མི་ཟད་ཡེ་ཤེས་བྱང་ཆུབ་སེམས། །སྟོང་ཉིད་དེ་ཉིད་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་མེ་ཏོག་བཟང་པོ་སངས་རྒྱས་ཐམས་ཅད་ཀྱི་ཆོས་ཀྱི་དུང་བླ་ན་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕྱོགས་བཅུའི་ཞིང་ཁམས་མཐའ་ཡས་པར། །རབ་སྟོན་དམ་
པའི་ཆོས་ཀྱི་སྒྲ། །རྣམ་པ་ཀུན་དུ་གྲགས་པའི་དབྱངས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་ཐོན་པོ་སངས་རྒྱས་ཐམས་ཅད་ཀྱི་དམ་པ་ཆོས་ཀྱི་གཎ་ཌི་རབ་ཏུ་བརྡུངས་པ་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཆོས་ཀྱི་དོན་སྟོན་པ། །ཚད་མེད་བསྡུ་དངོས་བཞི་དག་གིས། །སྡུད་ཅིང་གྲོལ་བྱེད་ཐེག་པའི་མཆོག །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་རྒྱ་མཚོའི་ས་འཛིན་སངས་རྒྱས་ཐམས་ཅད་ཀྱི་དམ་པའི་ཆོས་ཀྱི་རྔ་བོ་ཆེ་སྒྲོག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟོག་པ་
མེད་པ་རིན་ཆེན་རྔ། །བདེ་གཤེགས་གསུངས་ནི་བསྟན་པའི་ཕྱིར། །རྟག་ཏུ་སྐུལ་བའི་སྒྲ་འབྱུང་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དོན་གྱི་བློ་མངའ་བ་སངས་རྒྱས་ཐམས་ཅད་ཀྱི་ཆོས་
ཀྱི་འཁོར་ལོ་རབ་ཏུ་བསྐོར་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གདུལ་བྱའི་བསམ་པ་མཁྱེན་ནས་ནི། །རྟོག་མེད་ཡེ་ཤེས་ཁམས་འཇུག་པས། །ཆོས་ཀྱི་འཁོར་ལོ་བསྟན་
པ་ནི། །བྱང་ཆུབ་ཚུལ་མཆོག་བསྟན་པ་ཡིན་ཞེས་གསུངས་སོ། །བྱང་ཆུབ་སེམས་དཔའི་ཚོགས་ཆེན་གྱིས། །རིག་པའི་ལྷ་མོ་སྣ་ཚོགས་དང་། །ཐབས་གཅིག་རོལ་པ་བསྟན་མཛད་དེ། །གསང་བ་གསུངས་པའི་དོན་བརྗོད་དོ། །ཇི་ལྟར་ཕྱི་རོལ་དེ་བཞིན་ནང་། །དངོས་པོ་ཅི་

89-1-115b

བཞིན་རང་རིག་ལའང་། །རྒྱུ་འབྲས་བྱེ་བྲག་ཐ་དད་པ། །མ་འདྲེས་ཡེ་ཤེས་ཚུལ་དུ་གནས། །ནང་གནས་ཇི་བཞིན་ཕྱི་རོལ་འབྱུང་། །བར་མ་གསང་བ་མཆོག་སྤྱོད་པ། །རྨད་དུ་བྱུང་བ་ཆེན་པོ་སྟེ། །ངོ་བོ་ཉིད་ཀྱི་ཡེ་ཤེས་གང་། །དེ་ཉིད་རྟོགས་པའི་
རྣལ་འབྱོར་པ། །དེ་ཡི་རྗེས་སུ་འབྲང་བར་བྱེད། །དེ་ཉིད་གཉིས་སུ་མེད་པ་ཡི། །རྣལ་འབྱོར་གསང་བ་བདེ་བ་ཆེ། །རྒྱལ་བ་ཀུན་གྱི་འབྱུང་གནས་ཡིན། །བསྐྲད་དང་གསད་དང་དབྱེ་བ་དང་། །མངོན་སྤྱོད་ཀྱི་ནི་ལས་རྣམས་ནི། །ཐབས་གཞན་མེད་
པར་གྱུར་པ་ལ། །ཐོག་མ་དབུས་དང་མཐའ་རྣམས་སུ། །གང་གིས་སྙིང་རྗེ་མ་ཉམས་ལ། །དེ་ཉིད་དེ་ཡིས་བྱེད་པར་འགྱུར། །གཞན་དུ་བསྟན་པའི་དོན་ལས་དམན། །ཉེ་བར་འགྲུབ་པར་དཀའ་བར་གསུངས། །དེ་ཉིད་གསང་བའི་སྤྱོད་
ཡུལ་མིན། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་སངས་རྒྱས་ཐམས་ཅད་ཀྱི་ཡེ་
ཤེས་འཇུག་པའི་ཏིང་ངེ་འཛིན་བསྟན་པའི་ལེའུ་སྟེ་སོ་གཉིས་པའོ།། །། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་འདུས་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་
ཀྱི་སྐུ་དང་གསུང་དང་ཐུགས་ཀྱི་བདག་པོ་ཆེན་པོ་བྱང་ཆུབ་ཀྱི་སེམས་རྡོ་རྗེ་ལ་མཆོད་པའི་སྤྲིན་དུ་མས་མཆོད་ཅིང་ཕྱག་འཚལ་ནས་འདི་སྐད་ཅེས་གསོལ་ཏོ། །དེ་བཞིན་གཤེགས་པ་ཐམས་ཅད་ཀྱི། །གསང་
བ་བསྡུས་པའི་དགོངས་རྒྱུད་དེ། །མི་ཕྱེད་ཡེ་ཤེས་མཆོག་སྒྲུབ་པ། །བཅོམ་ལྡན་སྙིང་པོ་བཤད་དུ་གསོལ། །ཞེས་ཞུས་ཤིང་གསོལ་བ་བཏབ་པ་དང་། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་
དང་གསུང་དང་ཐུགས་ཀྱི་རྡོ་རྗེའི་བདག་པོས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པར་མཁྱེན་ཅིང་བྱང་ཆུབ་སེམས་དཔའི་ཚོགས་འདུས་པ་ཆེན་པོ་དེ་དག་གི་སེམས་ཀྱི་ཀུན་དུ་རྟོག་པ་ཡང་

89-1-116a

ཐུགས་ཀྱིས་མཁྱེན་ནས་བྱང་ཆུབ་སེམས་དཔའ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །གང་དུ་ཡང་འདི་ལྟར་ལྷན་ཅིག་གཡོ་བ་དང་ལྡན་པས་དབང་པོ་སྒོ་ལྔའི་རྗེས་སུ་མངོན་པར་འགྲོ་ལ་
སྣང་བ་དབང་པོ་དོན་དང་ཕྲད་པར་གྱུར་པ་མཆེད་པ་གསལ་བ་ལས་དབང་པོས་དངོས་པོར་དམིགས་པ་ཐོབ་པ་དང་ལྡན་པའོ། །གལ་ཏེ་སེམས་དེ་ཉིད་དངོས་པོའི་རང་བཞིན་དུ་མ་གྱུར་ན་དེ་ལྟ་ནའང་འདི་དག་སེམས་ཉིད་ཡིན་
པས་རྣམ་པ་ཐམས་ཅད་དུ་ཕྱི་རོལ་གྱི་དོན་སྐྱེ་བ་ཡོད་པ་མ་ཡིན་ཏེ་འདི་ལྟར་མ་ལུས་པའི་རང་བཞིན་འདི་དག་བརྟགས་པས་སྟོང་པའི་སེམས་ཉིད་དེ། སྐྱེ་བ་དང་འགག་པ་དང་བྲལ་ཞིང་རང་བཞིན་གྱིས་དག་པ་གཉིས་སུ་
མེད་པའི་ཡེ་ཤེས་ཀྱི་རྣམ་པར་ཡོངས་སུ་གསལ་བའོ། །ཆོས་རྣམས་ཐམས་ཅད་སེམས་ཡིན་ཏེ། །ལུས་དང་སེམས་ནི་དབྱེར་མེད་དེ། །རྟེན་དང་བརྟེན་པ་འཇུག་ལྡོག་གིས། །ཀུན་གྱི་གནས་སུ་ཤེས་པར་བྱ། །མཁའ་དབྱིངས་
རྡོ་རྗེ་སྟོང་ཉིད་དེ། །དབུས་གནས་མངོན་པར་བྱང་ཆུབ་བརྗོད། །དེ་ཉིད་མེ་ལོང་ཡེ་ཤེས་ལྡན། །ཟླ་བའི་དཀྱིལ་འཁོར་རབ་ཏུ་བརྟག །ཉི་མ་མཉམ་ཉིད་ཡེ་ཤེས་ཏེ། །བདུན་དང་ལྡན་པའི་དབུས་ཉིད་ཏུའོ། །སྔགས་ནི་དབུས་སུ་གནས་
གྱུར་གང་། །ས་བོན་སོ་སོར་རྟོག་པ་སྟེ། །མངོན་པར་བྱང་ཆུབ་པ་ཉིད་དོ། །རྡོ་རྗེ་ལ་སོགས་གང་གནས་པ། །སངས་རྒྱས་དཀྱིལ་འཁོར་བསྒོམ་པར་བྱ། །ཡོངས་སུ་རྫོགས་པའི་སྐུ་གསུང་ཐུགས། །ཞལ་གསུམ་རྩ་གསུམ་བརྗོད་
པར་བྱ། །སྐུ་གསུམ་ལུས་ངག་ཡིད་ཡིན་ཏེ། །དེ་ཉིད་མངོན་པར་བྱང་ཆུབ་བརྗོད། །རྣམ་པར་འཕྲོ་བར་བསམ་བྱ་སྟེ། །རྡོ་རྗེ་འཁོར་ལོ་པད་མ་དང་། །ནོར་བུ་རལ་གྲི་འབར་བ་ལས། །འགྲོ་དྲུག་རྟོག་པ་གཅོད་ཕྱིར་ཏེ། །ཡེ་ཤེས་
དྲུག་པའི་བདག་ཉིད་ཅན། །ཐབས་དང་ཤེས་རབ་མཉམ་སྦྱོར་བས། །བླ་མེད་མངོན་པར་བྱང་ཆུབ་བརྗོད། །ལུས་ངག་ཡིད་ནི་བྱང་ཆུབ་པ། །གསང་བ་དངོས་པོའི་དོན་ཡིན་ཏེ། །ལུས་ནི་བྱང་ཆུབ་རྣམ་ལྔ་དང་། །རྩ་དང་བྱང་ཆུབ་

89-1-116b

སེམས་དང་ནི། །མི་གཙང་རྫས་དང་རྣམ་རྟོག་གིས། །ལུས་ཀྱི་ཆོས་ནི་གནས་པ་ཡིན། །ངག་ནི་འབྱུང་བ་ལྔ་དག་དང་། །ཡི་གེ་སྒྲ་དང་སྔགས་རྣམས་ཏེ། །བརྗོད་པ་དང་ནི་དབྱངས་རྣམས་ཀྱིས། །ངག་གི་ཆོས་ནི་བསྡུས་པ་ཡིན། །སེམས་
ནི་ཡེ་ཤེས་ལྔ་དག་དང་། །ཐིག་ལེ་བདེ་བ་ཉིད་དང་ནི། །སྣང་བ་གསུམ་དང་མི་རྟོག་པས། །སེམས་ཀྱི་ཆོས་ནི་གནས་པ་ཡིན། །སྣ་ཚོགས་གཟུགས་ཅན་སེམས་ཀྱི་དངོས། །སྲིད་གསུམ་ཆོས་དང་ཆོས་མིན་དང་། །ས་འོག་ས་སྟེང་ས་
བླ་བ། །སྐྱེ་གནས་འབྱུང་བ་བརྟན་གཡོར་བཅས། །སེམས་ཉིད་ལུས་ནི་ནམ་མཁའི་ཁམས། །གཞི་དང་རྟེན་དང་ཁྱབ་བྱེད་པའོ། །མི་གསལ་ཕྲ་ཞིང་བརྟག་དཀའ་བས། །རྣམ་པར་ཤེས་པའི་སྣང་བ་ལ། །སྣང་བ་མངོན་པར་ཐོབ་པ་ལས། །བག་
ཆགས་ས་བོན་ཡུལ་རྣམས་ཀྱིས། །ཐམས་ཅད་རང་ལས་འབྱུང་བ་ཉིད། །མི་གནས་ཡེ་ཤེས་ལུས་ལ་གནས། །ཡེ་ཤེས་ལུས་ནི་འགག་མེད་དེ། །དངོས་མེད་སྟོང་པར་མི་འགྱུར་ཏེ། །ལུས་མེད་ལུས་ནི་རོ་མཉམ་པ། །ལུས་ལ་ཐོག་མ་
དམིགས་སུ་མེད། །ཐ་མ་འགག་པ་མེད་པ་སྟེ། །གསང་བ་གསུམ་དུ་རྣམ་སྦས་པས། །དེ་བཞིན་གཤེགས་པའི་ཡེ་ཤེས་སྐུ། །འདི་ནི་འཁོར་འདས་ཀུན་གྱི་རྩ། །ཉམས་དང་མྱོང་བ་དབྱེར་མེད་དེ། །ཞི་གནས་ལྷག་མཐོང་གཟུགས་
ཅན་ཡིན། །བདེ་དང་གསལ་བ་མི་རྟོག་པས། །སྣང་བ་གསུམ་གྱི་རྣམ་པ་སྟེ། །དེ་ཉིད་ཞེན་པས་འཆིང་བས་ན། །སྲིད་པ་གསུམ་ནི་རྟག་པའི་དངོས། །ཕྲ་བའི་ལུས་ངག་ཡིད་གསུམ་ལ། །གསང་བའི་སྐུ་གསུང་ཐུགས་ཡེ་ཤེས། །
རྡོ་རྗེ་གསུམ་དུ་གསང་བ་ཉིད། །གསང་བ་བསམ་གྱིས་མི་ཁྱབ་པ། །འགྲོ་ཀུན་བདེ་གཤེགས་རང་བཞིན་ཅན། །ལུས་ནི་སྣ་ཚོགས་མི་བཟད་པས། །སྐུ་ཡི་གསང་བ་བསམ་མི་ཁྱབ། །དུ་མའི་གཟུགས་ཀྱིས་སྟོན་པར་བྱེད། །འགྲོ་བ་ཆོས་
ལམ་དཔལ་ལྡན་པས། །ངག་གི་བརྗོད་པ་མཐའ་ཡས་པ། །གསུང་གི་གསང་བ་བསམ་མི་ཁྱབ། །སྒྲ་དབྱངས་སོ་སོའི་སྐད་དུ་སྒྲོགས། །སེམས་ཅན་སངས་རྒྱས་སྙིང་པོ་ཅན། །སེམས་ནི་དྲན་རྟོག་དཔག་མེད་པས། །ཐུགས་ཀྱི་

89-1-117a

གསང་བ་བསམ་མི་ཁྱབ། །སེམས་ཅན་སྐུ་གསུང་དབྱེར་མེད་པས། །ལུས་ངག་ཡིད་གསུམ་མི་ཕྱེད་པ། །རྡོ་རྗེ་གསུམ་དུ་རྟག་གནས་པས། །དེ་ཕྱིར་རྒྱལ་བའི་ཡེ་ཤེས་སྐུ། །དབྱེར་མེད་བསམ་གྱིས་མི་ཁྱབ་པའོ། །
གསང་བ་བསམ་གྱིས་མི་ཁྱབ་པ་བརྗོད་དུ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དེ་ནས་བྱང་ཆུབ་སེམས་དཔའ་ཆེ། །ཀུན་དུ་བཟང་པོས་ལེགས་ཞུས་པ། །རྣལ་འབྱོར་རྒྱུད་འདིར་གསུངས་པ་ཡི། །རླུང་གི་དབྱེ་དུས་མཚན་ཉིད་དང་། །སྤྲོ་
བསྡུ་རིམ་པ་རྒྱུ་ཚུལ་དང་། །ཁྱད་པར་གསང་བ་བཤད་ཏུ་གསོལ། །དེ་ནས་རྒྱལ་པོ་རྡོ་རྗེ་འཆང་། །གསང་བའི་དབྱིངས་ནས་བཀའ་སྩལ་པ། །ཨ་ཨཱ། ཨི་ཨཱི། ཨུ་ཨཱུ། ཨེ་ཨཻ། ཨོ་ཨཽ། ཨཾ་ཨཿ། དེ་ནས་གཞན་ཡང་རབ་བཤད་པ། །དེ་ལ་
རླུང་གི་མཚན་ཉིད་ནི། །ས་དང་ཆུ་དང་མེ་དང་རླུང་། །འབྱུང་བ་བཞི་ཡི་བྱེ་བྲག་གིས། །མགོན་པོ་རྡོ་རྗེ་རེ་རེ་ལའང་། །སྤྱན་ལ་སོགས་པའི་ལྷ་མོ་ནི། །རེ་རེ་ལ་ཡང་བཞི་བཞི་སྟེ། །དཀྱིལ་འཁོར་བཞི་རུ་མངོན་པར་བརྗོད། །ཞི་རྒྱས་དབང་དང་མངོན་
སྤྱོད་རྣམས། །མཁས་པས་ཤེས་ནས་སྤྱད་པར་བྱ། །རླུང་གི་བྱེ་བྲག་བསྟན་པ་ནི། །ཐོ་རངས་ཁྱབ་གནས་དུས་ཡིན་ཏེ། །སྤྱི་བོའི་གནས་ལས་ཀུན་ཁྱབ་པས། །ཡི་གེ་ཨ་རུ་མངོན་པར་བརྗོད། །དེ་ནི་སྐུ་ཡི་བཟླས་པའོ། །ནམ་ནངས་ཐུར་སེལ་
དུས་ཡིན་ཏེ། །གསང་བའི་གནས་སུ་འབྱུང་བས་ན། །ཨཱ་ཞེས་བརྗོད་པ་དབྱངས་ཡིན་ནོ། །རྡོ་རྗེ་གསུང་གི་བཟླས་པར་བརྗོད། །ཉི་མ་ཤར་བ་མཉམ་གནས་རླུང་། །ལྟེ་བའི་གནས་སུ་བརྗོད་པ་ཡི། །ཨི་ཞེས་སྒྲ་ཙམ་དུ་བརྗོད་པས། །རྡོ་རྗེ་
ཡོན་ཏན་བཟླས་པ་སྟེ། །ཅུང་ཟད་དྲོས་པས་དྲོད་ཡིན་ཏེ། །སྙིང་གའི་གནས་སུ་མི་ཤིགས་པས། །ཡི་གེ་ཨཱི་རུ་མངོན་པར་ནི། །རྡོ་རྗེ་ཐུགས་ཀྱི་བཟླས་པ་སྟེ། །ཕྱེད་དུས་གྱེན་དུ་རྒྱུ་བ་ཉིད། །མགྲིན་པའི་གནས་ལས་བསྐྱེད་པས་ན། །ཨུ་
ཞེས་ཐུང་རྒྱུ་ངག་ཏུ་གྱུར། །རྡོ་རྗེ་ཐོགས་མེད་བཟླས་པར་བཤད། །ཕྱེད་ཡོལ་དུས་སུ་རྒྱུ་བའི་རླུང་། །མིག་ལ་གནས་པའི་རྣམ་པ་ཡིས། །ཨཱུ་ཞེས་རབ་ཏུ་བརྗོད་པ་ཉིད། །རྡོ་རྗེ་འདོད་ཆགས་བཟླས་པར་བརྗོད། །དགོངས་ཀ་རབ་ཏུ་རྒྱུ་བ་ཉིད། །རྣ་བ་

89-1-117b

ལ་ནི་རབ་གནས་པ། །ཨེ་ཞེས་ཀུན་གྱི་བརྡ་རུ་བརྗོད། །མཚན་མོའི་ཆ་ལ་རྣམ་པར་རྒྱུ། །སྣ་ཡི་རྣམ་ཤེས་ལྡན་པ་སྟེ། །ཨཻ་ཞེས་གསང་བ་སེར་སྣ་འཛིན། །རྡོ་རྗེ་གཏི་མུག་བཟླས་པར་བརྗོད། །སྲོད་ལ་ཤིན་དུ་རྒྱུ་བ་སྟེ། །ལྕེ་ལ་མངོན་པར་
དབང་བས་ན། །ཨོ་ཞེས་སྣ་ཚོགས་སྒྲ་བརྗོད་པ། །འགོག་པ་ཁྲོ་བོའི་བཟླས་པར་བརྗོད། །ནམ་ཕྱེད་ཡང་དག་རབ་རྒྱུ་བ། །བ་སྤུའི་ཚིགས་ཀུན་ཁྱབ་པས་ན། །ཨཽ་ཞེས་ཚིག་ཏུ་སྨྲ་བར་སྟོན། །འདི་ནི་དམ་ཚིག་བཟླས་པར་གསུངས། །
སྲོག་རྩོལ་དབུ་མར་འཇུག་པ་ནི། །ཨྂ་ཞེས་བདེ་བར་ལྡན་པ་སྟེ། །རྩ་གཉིས་གཟུང་འཛིན་རླུང་འགགས་པས། །ཨཿཞེས་སྟོང་པའི་སྒོ་ཡིན་ནོ། །གུང་གཉིས་རྩ་བའི་རྩ་ཡིན་ཏེ། །གཞན་དུ་ཡན་ལག་ཉིད་དུ་འགྱུར། །ཨཱ་ལི་བཅུ་གཉིས་
དག་དང་འདྲེས། །དེ་དག་དབྱེ་བ་རིམ་པ་ཡང་། །བླ་མའི་ཁ་ལས་རྟོགས་པར་འགྱུར། །རླུང་གི་བྱེ་བྲག་བཤད་པ་ནི། །ཚེས་གཅིག་སྔ་དྲོ་ཟླ་བ་སྟེ། །སྟོང་པའི་སྲོད་ལ་ཉི་མ་རྒྱུ། །ཚེས་བརྒྱད་ཐོ་རངས་རླུང་ཉིད་དེ། །ཉི་ཤུ་གཉིས་ལ་ཆ་བསྙམས་
པས། །དེ་ཡི་གྲངས་ནི་བསྟན་པ་ལ། །ཆུ་ནི་ཉིས་བརྒྱ་ཉི་ཤུ་ལྔ། །ས་དང་མེ་དང་རླུང་དག་ལའང་། །དེ་ཉིད་བཞིན་དུ་མཉམ་པར་འབྱུང་། །དབྱུག་གུ་གཉིས་ལ་ཆུ་ཚོད་གཅིག །དེ་ལ་བཞི་བརྒྱ་ལྔ་བཅུ་ཡིན། །ཆུ་ཚོད་གཉིས་ལ་འཕོ་བ་
གཅིག །དེ་ལ་དགུ་བརྒྱ་ཕྲག་གཅིག་སྟེ། །འཕོ་བ་གཉིས་ལ་ཐུན་གཅིག་སྟེ། །དེ་ལ་སྟོང་དང་བརྒྱད་བརྒྱའོ། །ཐུན་ནི་རྣམ་པ་བཅུ་གཉིས་ཡིན། །དེ་ལ་ཉི་ཁྲི་ཆིག་སྟོང་སྟེ། །སྤྱིར་སྡོམ་ཉིན་ཞག་གཅིག་ལ་ནི། །འཕོ་བ་ཉི་ཤུ་རྩ་བཞི་ཡིན། །
ཁྲི་ཕྲག་གཉིས་དང་སྟོང་དང་ནི། །དྲུག་བརྒྱ་འབྱུང་བར་རྒྱུ་བ་ཡིན། །ཆུ་ཚོད་སུམ་བཅུ་གཉིས་ལ་ནི། །དབྱུག་གུ་དྲུག་བཅུ་རྩ་བཞི་ཡིན། །དེ་དག་འབྱུང་བ་འཛིན་པ་ནི། །ཆུ་སོགས་ཉི་ཤུ་རྩ་བཞི་རྒྱུ། །ཞི་བའི་ལས་ནི་ཉི་ཤུ་བཞི། །ས་ནི་ཉི་
ཤུ་རྩ་བཞི་ལས། །དེ་ཡི་དུས་སུ་རྒྱས་པའི་ལས། །གཉིས་པའང་དེ་དང་མཉམ་པ་ལ། །དབང་དང་དྲག་པོའི་ལས་ལ་ཤིས། །རླུང་གི་རིམ་པ་དེ་དག་ཀྱང་། །ལུགས་འབྱུང་དང་ནི་ལུགས་བཟློག་པ། །དགྲ་ཟུན་དུ་ནི་རྒྱུ་བ་དང་། །མ་དང་བུ་རུ་

89-1-118a

རྒྱུ་བ་དང་། །རང་ཐོག་ཏུ་ནི་རང་རྒྱུ་དང་། །གཞན་ཐོག་ཏུ་ནི་གཞན་རྒྱུ་དང་། །ཕོ་མོ་ཕྲད་པར་འབྱུང་བ་དང་། །མ་ནིང་དག་ཏུ་འབྱུང་བ་དང་། །སྣོལ་མར་རྒྱུ་དང་རྐྱང་པ་སྟེ། །དེ་དག་དོན་ནི་གསལ་རྙེད་འགྱུར། །ས་དང་ཆུ་རུ་ཕྲད་པ་སོགས། །དེ་བཞིན་
གཞན་ལའང་སྦྱར་བར་བྱ། །གསལ་དང་མི་གསལ་རྣམ་པ་ཡིས། །དེ་ཡི་བྱེ་བྲག་ཤེས་པར་བྱ། །ཕྲིན་ལས་བཞི་ཡི་བྱེ་བྲག་གིས། །ཆུ་ཡི་རླུང་སྟེ་ངོས་གཟུང་བ། །ཕྱོགས་དང་དབྱིབས་དང་མདོག་རྣམས་དང་། །རིང་ཐུང་རྒྱུ་བ་ཕྱི་ནང་གིས། །ལྷ་མོ་
བཞི་དང་། །དལ་དང་རྩུབ་དང་སྦོམ་པ་དང་། །ཤིན་དུ་དྲག་པ་རྣམ་པ་བཞི། །ཆུ་ཡི་མཚན་ཉིད་འཛིན་པའི་དུས། །ཞི་བའི་ལས་ནི་བྱ་བར་བཤད། །ས་དང་མེ་དང་རླུང་དང་གསུམ། །གོང་མ་དག་གིས་བསྒྲེ་བར་བྱ། །སྤྱིར་ནི་རླུང་གི་
རྣམ་པ་ནི། །འབྱུང་བ་དྲག་པོའི་རང་བཞིན་ཡིན། །འཇུག་པ་དབང་དང་རྒྱས་པ་སྟེ། །གནས་པ་ཤིན་དུ་ཞི་བ་ཡིན། །ཐམས་ཅད་རླུང་གིས་བྱེད་པས་ན། །སྡིག་པ་མི་དགེ་ངན་སོང་ལྟུང་། །འཆི་དུས་འོག་སྒོ་གཉིས་ནས་ལྟུང་། །འཕོ་བས་འབྲས་
བུ་ངན་འགྲོ་ཡིན། །དགེ་བཅུ་སྤྱོད་པ་རླུང་གི་ལས། །མཐོ་རིས་ཐར་པ་རྣམས་ལ་ནི། །བགྲོད་པ་རླུང་གིས་བྱེད་པ་སྟེ། །ཚངས་པའི་སྒོ་ནས་མཁའ་སྤྱོད་དུ། །འཕོ་བར་འགྱུར་རོ་སེམས་དཔའ་ཆེ། །རླུང་འཁྲུགས་པས་ནི་ལས་རྣམས་འཁྲུགས། །
ཞིང་སོགས་འཁྲུགས་པས་ལས་མི་འགྲུབ། །རོ་སྙོམས་པས་ནི་ནད་མེད་ཅིང་། །ཡོན་ཏན་ཕུན་སུམ་ཚོགས་པ་འབྱུང་། །དབུ་མ་ལེགས་པའི་ལམ་བཟང་པོས། །ཕྱག་རྒྱ་ཆེན་པོའི་གནས་ཐོབ་ནས། །སྐུ་བཞི་ཡེ་ཤེས་ལྔ་འབྱུང་བ། །
དཔལ་ལྡན་རྡོ་རྗེ་འཛིན་པ་འགྲུབ། །རིག་འཛིན་མོས་པར་སྤྱོད་པ་སྟེ། །དང་པོ་ལས་ཀྱི་ས་ཞེས་པ། །འདོད་ཁམས་གནས་པའི་གཞི་ཡིན་ཏེ། །དེ་ཕྱིར་ལས་རྣམས་རླུང་གིས་བྱེད་ཅེས་དཔལ་རྡོ་རྗེ་འཆང་གིས་སྤྱོད་པའི་གནས་གྲོལ་
བའི་དོན་དུ་རབ་ཏུ་གསུངས་སོ། །སྲོག་དང་རྩོལ་བ་རབ་འཇུག་པས། །གཡས་གཡོན་རྒྱུ་དང་ཁོང་ནས་འབྱུང་། །ཐབས་དང་ཤེས་རབ་ཆ་དག་གིས། །གསང་བ་འདིར་ནི་བརྗོད་པ་ཡིན། །ཟླ་བ་དང་ནི་ཉི་མ་ཡི། །རབ་ཏུ་དབྱེ་བ་བསྟན་པར་

89-1-118b

བྱ། །གཡོན་དང་གཡས་སུ་རབ་སྦྱོར་བས། །རིམ་པ་ཇི་བཞིན་རབ་ཏུ་རྒྱུ། །གཡོན་གྱི་མགྲིན་པ་ནས་བརྩམས་ཏེ། །ལྟེ་བའི་དཀྱིལ་འཁོར་མཐར་གྱུར་པས། །ཟླ་བའི་རྩ་ནི་འོག་ཏུ་བལྟ། །ཤེལ་དང་ཨཱ་ལི་རབ་འབབ་པ། །གཡས་སུའང་ལྟེ་བ་
ནས་བརྩམས་ཏེ། །མགྲིན་པའི་རྩར་ནི་གྱེན་བསྐྱོད་པ། །ཉི་མའི་རྩ་ནི་གྱེན་དུ་བལྟ། །དམར་དང་ཀཱ་ལི་འབྱུང་ཞིང་འབབ། །འབྱུང་བྱེད་སྣ་ཡི་བུ་ག་ནས། །རྒྱུ་བ་རྩ་ཡི་མཚན་ཉིད་ཅན། །འཇུག་པ་གཡོན་ནས་མཐུར་དུ་འགྲོ། །འབྱུང་བ་གཡས་
རྩ་གྱེན་དུ་བསྐྱོད། །ཇི་སྲིད་ཉི་མ་ཤར་བ་ནས། །ནུབ་ཀྱི་བར་ལ་ཉིན་མོའི་ཆ། །ཇི་སྲིད་ནུབ་པ་ཉིད་གྱུར་པས། །ནམ་ནངས་བར་དུ་མཚན་མོའི་ཆ། །མཚམས་ལས་བར་མར་གྱུར་པ་དང་། །ཉིན་མཚན་གཉིས་ལ་ཞག་གཅིག་སྟེ། །དེ་ལས་དུས་བཞིར་གནས་པ་ཡིན། །
དེ་ལས་ཉིན་དང་མཚན་མོ་ཡིས། །ཐུན་ཚོད་བརྒྱད་ཏུ་འགྱུར་བ་ཡིན། །ཡན་ལག་བཅུ་དྲུག་དག་ཡིན་ཏེ། །ཐུན་ནི་ཕྱེད་ཕྱེད་དག་ཏུ་རླུང་། །སྣ་ཡི་བུ་གར་ཡང་དག་རྒྱུ། །ཡར་ངོའི་ཚེས་གཅིག་ནས་བཟུང་ནས། །ཉིན་ཞག་གསུམ་དུ་ཐུན་
ཕྱེད་ལ། །ཟླ་བའི་རླུང་ནི་རབ་རྒྱུ་བ། །དེ་ནས་གཞན་གསུམ་ཉི་མའི་རླུང་། །འདིས་ནི་གོ་རིམས་ཇི་སྲིད་དུ། །ཡར་ཚེས་བཅྭ་ལྔའི་བར་དུའོ། །མར་ངོའི་ཚེས་གཅིག་ནས་བཟུང་སྟེ། །ཉིན་ཞག་གསུམ་དུ་སྔ་དྲོའི་ཆ། །གྲགས་པ་ཉི་མའི་རླུང་
རྒྱུ་བའོ། །དེ་བཞིན་ཚེས་ནི་བཅྭ་ལྔའི་བར། །ཐུན་རེ་ཡི་ནི་བཞི་པ་རྣམས། །ཆུ་ཚོད་དུ་ནི་བརྗོད་པ་ན། །ཉིན་ཞག་གཅིག་གི་དུས་ཀྱི་ཆ། །སུམ་བཅུ་རྩ་གཉིས་བརྗོད་པར་བྱ། །དེ་ལས་བསྒྲེས་པའི་དབྱུག་གུ་ནི། །དྲུག་བཅུ་རྩ་བཞིའི་གྲངས་ཀྱིས་
ནི། །ཕྱེད་ཕྱེད་བསྟན་པས་དབྱུག་གུ་ཡིན། །སྣ་རྩེའི་རླུང་གི་རྒྱུ་བ་དག །འབྱུང་དང་འཇུག་དང་གནས་པ་ལས། །དབུགས་གཅིག་ཏུ་ནི་བརྗོད་པ་ཡིན། །དེ་ཉིད་རླུང་གི་སྦྱོར་ཤེས་པས། །དབུགས་དྲུག་སྲོག་ཏུ་ཤེས་པར་བྱ། །སྲོག་ནི་ལྔ་བཅུ་
ཐམ་པ་དང་། །དབུགས་གསུམ་རྐང་པ་དེ་དང་ལྡན། །ཉི་མ་བྱང་དུ་རྒྱུ་དུས་ཀྱི། །ཉི་མ་དང་པོའི་དབྱུག་གུ་ཡིན། །ཉི་མ་ལྷོར་ནི་འབྱུང་དུས་ཀྱི། །མཚན་མོ་ཡང་ནི་དེ་བཞིན་འགྱུར། །དབྱུག་གུ་རེ་རེ་འཕེལ་འགྲིབ་ནི། །དུས་ཀྱི་དབྱེ་བས་ཤེས་

89-1-119a

པར་བྱ། །དབུགས་ནི་དྲག་པོ་བཞི་ཆར་བཅས། །འཕོ་བ་སོ་སོའི་འཕེལ་འགྲིབ་ཡིན། །དབུགས་ཀྱི་སུམ་ཆ་དེའི་བཞི་ཆའི། །དྲུག་ཆས་ཉི་མ་རེ་རེར་འགྱུར། །ཐུན་ནི་ཕྱེད་ཕྱེད་རྒྱུ་བ་ལས། །ཕྱིན་ཅི་ལོག་ཏུ་འཕོས་གྱུར་ན། །རྩོད་པ་
ལ་སོགས་ངེས་འགྱུར་བས། །མཁས་པས་འདི་དག་ཡང་དག་བརྟག །ཉི་མ་བདུན་གྱི་བར་དག་ཏུ། །ཕྱིན་ཅི་ལོག་ཏུ་རྒྱུ་བ་ནི། །དེ་ཚེ་རྩོད་པ་ཆེན་པོར་འགྱུར། །ཟླ་ཕྱེད་བར་དུ་ལོག་རྒྱུ་ན། །ནད་ཆེན་པོ་ནི་ཡང་དག་འབྱུང་། །ཟླ་བ་གཅིག་ཏུ་ལོག་རྒྱུ་ན། །སྙིང་
བརྩེའི་གཉེན་ཕྱོགས་བརླག་པར་འགྱུར། །ཕྱེད་དང་གཉིས་སུ་ལོག་རྒྱུ་ཅན། །ཐུན་མོང་དུས་སུ་ཤེས་པར་བྱ། །གཞན་ཡང་ཁྱད་པར་བཤད་བྱ་བ། །མཉམ་པོ་དྲུག་ཏུ་ཉི་མ་སོང་། །གང་ཚེ་སྐྱེས་པ་ཉི་མ་ཟླ། །དེ་ཚེ་རྒྱས་པ་ཞེས་བྱའི་དུས། །འཆི་
བར་ངེས་པའི་དུས་ཡིན་ནོ། །དང་པོ་དུས་སྦྱོར་གང་ཤེས་པ། །གང་ཞིག་གཞན་ཡང་བདུན་དེའི་ཕྱིར། །དེས་ནི་ཉི་མ་མཉམ་བདུན་སོང་། །མཉམ་པོ་དྲུག་ཅེས་བྱ་བར་བཤད། །ཉི་མའི་ལམ་ནི་ཐམས་ཅད་དུ། །རླུང་ནི་རྟག་ཏུ་རྒྱུ་བ་དག །རྒྱུན་མི་
འཆད་པར་ཡང་དང་ཡང་། །མཁས་པས་དུས་ནི་མཚོན་པར་བྱ། །དུས་ཀྱི་སྐད་ཅིག་གང་ལ་རླུང་། །བསྒྲོད་པ་བཞིན་དུ་འཇུག་གྱུར་ན། །དེ་ཡི་འཕོ་བ་རྫོགས་འགྱུར་ཚེ། །སྲོག་ནི་གཏང་བར་ཐེ་ཙོམ་མེད། །འདིར་ནི་འཆི་བདག་གཞོམ་འདོད་པས། །ཉིན་ཞག་གཅིག་གི་ཆུ་
ཚོད་ཀྱི། །བརྒྱད་ཆ་རེ་རེའི་བར་དག་ཏུ། །སྲོག་དང་རྩོལ་བ་བསྡམས་ནས་ནི། །རྩ་གཉིས་ནས་ནི་འབྱུང་བ་དང་། །འཇུག་པ་དབུ་མར་ལམ་གྱུར་པ། །སྦར་དང་སྲེག་དང་བཞུ་བ་དང་། །ཤིན་དུ་འབར་བའི་དུས་དག་ཏུ། །ལོ་དྲུག་བར་དུ་
གནས་བྱས་ན། །འཆི་བདག་འཇོམས་པ་ཐེ་ཙོམ་མེད། །གཡས་ནས་ཆུ་ཚོད་བཞི་དག་དང་། །དེ་བཞིན་གཡོན་ནས་ཆུ་ཚོད་བཞི། །དབུ་མར་ཤིན་དུ་བསྡམས་བྱས་ལ། །བདུད་ལས་རྣམ་པར་རྒྱལ་བ་ཐོབ། །རྡོ་རྗེ་གསང་བ་འཆི་
བདག་འཇོམས་པ་དང་བདུད་ལས་རྣམ་པར་རྒྱལ་བར་བྱེད་པའི་ཏིང་ངེ་འཛིན་ཏོ། །དེ་ནས་གསང་བའི་བདག་པོ་ཡིས། །འདུས་པའི་འཁོར་ལ་བཀའ་སྩལ་པ། །སྤྱི་དང་ཁྱད་པར་ཚུལ་གྱིས་ནི། །ངོ་བོ་རླུང་གི་ཆོས་རྣམས་ཀུན། །རྣམ་

89-1-119b

ཕྱེ་རིམ་པ་ཤེས་པར་བྱ། །སེམས་དཔའ་ཆེན་པོ་འདི་ཤེས་བྱོས། །འདི་དག་རྒྱས་པར་ཕྱེ་བ་ནི། །རྒྱས་པར་གྱུར་པ་ཁྲི་ཕྲག་བཅུ། །ཉོན་མོངས་ཕུང་པོ་དེ་སྙེད་དང་། །རླུང་དང་མཉམ་པར་འགག་པ་ལས། །ཆོས་ཀྱི་ཕུང་པོ་དེ་སྙེད་ཐོབ། །ས་རེ་
ཐོབ་ཅིང་རླུང་འགགས་པས། །བཅུ་པའི་ས་ལ་གནས་པའི་ཚེ། །དམ་ཚིག་མངོན་དུ་གྱུར་པས་ན། །ཉོན་མོངས་ཐམས་ཅད་སྤངས་པ་ཡིན། །ས་བརྒྱད་པར་ནི་གྱུར་པའི་ཚེ། །ཉོན་མོངས་ཕུང་པོ་རགས་པ་ནི། །ཁྲི་ཕྲག་བརྒྱད་པོས་
སྤངས་པ་ན། །ཕྱིར་མི་ལྡོག་པ་ཞེས་བརྗོད་དོ། །ལྷག་མ་དྲུག་བརྒྱ་སྟོང་ཕྲག་གཅིག །སྔ་མའི་གནས་སུ་རང་དག་སྟེ། །ལས་ཀྱི་རླུང་རྣམས་དག་པ་ཡིན། །ཁྲི་ཕྲག་གཉིས་ནི་ཟག་མེད་རླུང་། །ས་བཅུ་པ་ལ་ཕྱིན་དུས་སུ། །གྲངས་
འབུམ་གྱི་ནི་རྣམ་པ་ཉིད། །དམ་ཚིག་དག་ཏུ་བསྟན་པའོ། །ཆོས་ཕུང་བརྒྱད་ཁྲི་བཞི་སྟོང་ནི། །ས་བཅུ་པོ་ལ་གནས་པ་ཡིས། །ཆོས་ཀྱི་སྤྲིན་དུ་གྱུར་པ་ཡིན། །ཕྲིན་ལས་རིགས་ལྔའི་བཟླས་པ་ཡིས། །ས་ལྔ་པ་ནི་མངོན་དུ་བྱེད། །
ཁྲོ་བོ་དམ་ཚིག་བཟླས་པ་ཡིས། །དྲུག་པ་མངོན་དུ་གྱུར་པ་ཐོབ། །དུས་གསུམ་དག་པའི་བཟླས་པས་ནི། །ལེགས་པའི་བློ་གྲོས་ཐོབ་པར་བྱེད། །དམ་ཚིག་མི་འདའ་བཟླས་པས་ནི། །ས་བཅུ་མངོན་དུ་གྱུར་པ་སྟེ། །རྒྱལ་བའི་རླུང་
ལས་འཕོས་པས་ནི། །བསམ་མི་ཁྱབ་དུ་གྱུར་པ་སྟེ། །ཟག་པར་བཅས་པའི་རླུང་དག་ནི། །རགས་པར་གནས་པ་དེ་སྙེད་ཡིན། །ཕྲ་བར་གྱུར་པའི་རྟོག་པ་ནི། །ཁྲི་ཕྲག་བརྒྱད་ལས་འདས་ནས་ནི། །སྟོང་ཕྲག་བཞི་བཅུ་འདས་པས་ནི། །
སྤང་བྱ་དེ་སྙེད་དང་རྟོག་པ། །བག་ལ་ཉལ་བ་སྤོང་བ་ཡི། །ཟག་མེད་རླུང་ནི་ཁྲི་ཕྲག་གཉིས། །ཡེ་ཤེས་དམ་ཚིག་མངོན་འབྱུང་བ། །འབུམ་དུ་བརྗོད་པས་བསྡུས་པའོ། །ཁྲི་ཕྲག་གཉིས་དང་སྟོང་ཕྲག་གཅིག །ལྷག་པ་དྲུག་
བརྒྱར་བཅས་པ་གང་། །ལས་ཀྱི་རླུང་དུ་བརྗོད་པར་བྱ། །དེ་ཡང་བསྡུས་པས་ཐུན་གྲངས་ལ། །དུས་སྦྱོར་ཆེན་པོ་བཅུ་གཉིས་ཏེ། །དཀྱིལ་འཁོར་ཉི་ཤུ་རྩ་བཞི་ཡིན། །རོ་ཧི་ཏ་དང་མོ་ཧི་ཏ། །བྷ་དྲ་པྲི་ཥ་བྷ་ཤ་པ། །ཀུར་མ་མ་ཀ་ར་རཎ་ཌ། །

89-1-120a

མི་ཀི་ར་དང་བི་དྲི་ཀ །བྱཱ་ཀུ་ལི་དང་སྭ་པ་ན། །ཀཱ་མ་ན་རུ་བརྗོད་པར་བྱ། །འབྱུང་དང་འཇུག་དང་གནས་པ་དག །གཅིག་ཏུ་གྱུར་པ་དབུགས་ཡིན་ཏེ། །དབུགས་དྲུག་ཆུ་སྲང་གཅིག་ཡིན་ཏེ། །ཆུ་སྲང་སུམ་བཅུ་དབྱུག་གུ་ཕྱེད། །
དབུགས་དྲུག་གིས་ནི་དབྱུག་གུ་ཕྱེད། །དབྱུག་གུ་གཉིས་ལ་ཆུ་ཚོད་གཅིག །ཆུ་ཚོད་སུམ་བཅུ་རྩ་གཉིས་ལས། །ཐུན་ནི་རྣམ་པ་བརྒྱད་དུ་ཕྲི། །འཕོ་བའི་ཚུལ་ནི་བཅུ་དྲུག་གོ། །དབྱུག་གུ་དག་པའི་གནས་ཡིན་པས། །དྲུག་བཅུ་རྩ་བཞིར་
གནས་པའོ། །སྤྱིར་ན་སེམས་ཅན་ཁམས་ལ་ནི། །རྟོག་པ་བསམ་གྱིས་མི་ཁྱབ་པ། །དེ་སྙེད་ཡོད་ཕྱིར་ཤེས་པ་དེས། །རླུང་ཡང་བསམ་གྱིས་མི་ཁྱབ་བོ། །དེ་ཡང་བསྡུས་པའི་དོན་དུ་ནི། །ཉོན་མོངས་བརྒྱད་ཁྲི་བཞི་སྟོང་པས། །
རྣམ་པར་དབྱེ་བ་མཁས་པ་ཡིས། །ཟག་བཅས་རླུང་ནི་ཁྲི་ཕྲག་བརྒྱད། །ལྷག་པ་སྟོང་ཕྲག་བཞི་ལས་ནི། །ཟག་པ་མེད་པའི་རླུང་གྱུར་པ། །ཁྲི་ཕྲག་གཉིས་ཀྱིས་དག་པ་ཡིན། །རླུང་རགས་པས་ནི་རྟོག་པའི་ཚོགས། །དེ་དང་མཚུངས་
པར་འཇུག་པ་ཡིན། །རྟོག་པ་བག་ལ་ཉལ་གྱུར་པས། །རླུང་ནི་ཕྲ་བར་གྱུར་པ་སྟེ། །ཕྲ་རགས་རྟོག་པ་དག་པས་ནི། །རླུང་ནི་ཤིན་དུ་ཕྲ་བར་འགྱུར། །རྣམ་རྟོག་དང་ནི་རླུང་གཉིས་གང་། །མཚུངས་པར་མཉམ་པར་འབྱུང་འཇུག་ལས། །
རླུང་གི་འཇུག་པ་འབྱུང་མེད་པར། །རྟོག་པ་འབྱུང་བར་མི་འགྱུར་བས། །དེ་ཕྱིར་ལས་ཀྱི་རླུང་དག་ནི། །ཁྲི་ཕྲག་གཉིས་དང་སྟོང་དག་དང་། །དྲུག་བརྒྱ་དག་ཏུ་ཤེས་པར་བྱ། །ཡི་གེའི་དབྱེ་བའི་གནས་ཀྱིས་ནི། །རང་བཞིན་མངོན་པར་
འབྱུང་བ་ཡིན། །ཡི་གེ་དང་ནི་རང་བཞིན་གཉིས། །གནས་དང་རྟེན་དུ་ཤེས་པར་བྱ། །ཡི་གེ་དག་པས་རྟོག་པ་དག །རྟོག་པ་འོད་གསལ་གནས་སུ་སྤྱོད། །ཡི་གེ་རྣམ་པ་ལུས་གནས་པས། །དྲུག་གསུམ་རང་བཞིན་བརྒྱ་དྲུག་བཅུ། །
ཉིན་མཚན་སྦྱོར་བས་འབྱུང་བས་ན། །ལུས་གནས་ཡི་གེ་བརྒྱ་དང་ནི། །དྲུག་བཅུ་གནས་ལས་འབྱུང་ཞིང་འཇུག །དེ་ཕྱིར་གསང་བའི་ཡི་གེ་ཡིས། །ཐམས་ཅད་ཟ་ཞིང་ལྡིང་བར་འགྱུར། །ནམ་མཁའ་མཐའ་མེད་རྟག་པའི་

89-1-120b

དོན། །སེམས་ཅན་ཀུན་གྱི་གནས་ཆེན་པོ། །དཔལ་གྱིས་འབྱོར་པ་བླ་མེད་རྒྱལ། །བསམ་པ་ཐམས་ཅད་རྫོགས་བྱེད་པའོ། །ཨཱ་ལི་བཅུ་དྲུག་ཕྲག་གཉིས་ལས། །ཞེ་སྡང་ལས་གྱུར་རྟོག་པ་འབྱུང་། །དེ་ཡི་རྩ་བ་ཐིག་ལེར་བཅས། །སུམ་
བཅུ་གསུམ་དུ་གྱུར་པ་ཡིན། །ཀཱ་ལི་སུམ་བཅུ་རྩ་བཞི་དང་། །ཡ་ར་ལ་ཝ་ད་དྷ་སྟེ། །བཞི་བཅུ་མངོན་པར་གནས་པས་ན། །འདོད་ཆགས་རྟོག་པ་དེ་སྙེད་ཡིན། །ཟུང་གྱུར་དྲུག་ལྡན་ཐིག་ལེར་བཅས། །མཚན་མ་བདུན་གྱིས་མཚོན་པའི་ཕྱིར། །དབུས་མ་
ལ་བརྟེན་གཏི་མུག་པའི། །རང་བཞིན་མ་རིག་གྱུར་པའོ། །སྔ་མ་གཡས་རྩ་ལ་བརྟེན་པ། །སྐྱེས་པ་རྡོ་རྗེར་བཅས་གྱུར་བརྗོད། །གོང་དུ་གཡོན་རྩ་ལས་འབྱུང་བ། །བུད་མེད་པད་མའི་མཚན་མས་བརྗོད། །རྩ་ཡི་བྱེད་པ་མི་འདྲ་སྟེ། །ཁམས་
དང་རྣམ་ཤེས་འདུ་བ་ཡི། །རྟེན་དུ་གྱུར་ཕྱིར་རྩ་ཡིན་ཏེ། །རྣམ་པར་བཟློག་ན་གཉིས་སུ་འགྱུར། །ཐི་ལེ་འཕོ་འགྱུར་ཕྱི་རོལ་བཞིན། །ཟླ་བ་ལུས་ལ་འཕོ་བ་སྟེ། །ཚེས་གཅིག་ལ་སོགས་རྐང་གཡོན་ནས། །ཐེ་བོ་སོགས་འཕེལ་སྤྱི་བོར་གནས། །
དེ་ནས་གཡས་ཀྱི་ཆ་ལ་ནི། །ཟླ་བ་རིམ་གྱིས་འགྲིབ་པར་འགྱུར། །འཕེལ་དང་འགྲིབ་པའི་ཁྱད་པར་གྱིས། །བཅྭ་ལྔ་བྱང་ཆུབ་སེམས་སྐྱེད་བྱེད། །དཀར་ཕྱོགས་ནག་པོ་རིམ་ཤེས་བྱ། །སྤྱོད་པའི་ཚུལ་ནི་དེ་བདེར་སྤྱད། །གནམ་སྟོང་ཉི་མ་
གསང་བར་ཏེ། །ཟླ་བ་ཉ་གང་ཚེས་ཀྱིས་རྒྱས། །ཁྱད་པར་སྒྲ་གཅན་རིམ་ཤེས་བྱ། །བླ་ན་མེད་པ་རགས་པ་དང་ཕྲ་བའི་གནས་འཇུག་ལྡོག་བསྟན་པ་ཞེས་བྱ་བའི་ཏིང་ངེ་འཛིན་ཏོ། །དེ་ནས་གསང་བ་རབ་ཏུ་འཛིན་པ་པོས། །ཁྱད་པར་སེམས་
གསུམ་རིམ་པ་བཀའ་སྩལ་ཏེ། །སྣང་བ་ཞེས་བྱ་རྣམ་པར་མི་རྟོག་པ། །གསལ་བའི་ཆ་སྟེ་གཟུང་རྟོག་སྤངས་པ་ལས། །འབྱུང་བ་མི་མངོན་རླུང་དང་བཅས་པ་གང་། །ལྷང་ངེར་གནས་པ་སྐད་ཅིག་དང་པོ་ཡིན། །མཆེད་པའི་སྣང་བ་
རབ་ཏུ་མི་རྟོག་སྟེ། །ཆེས་གསལ་བ་ལས་འཛིན་རྟོག་མ་ཞུགས་པ། །ཡེ་ཤེས་ཕྲ་བ་རླུང་ལྡན་མི་སྣང་བ། །ལྷན་ནེ་གནས་པ་སྐད་ཅིག་གཉིས་པ་ཡིན། །ཐོབ་པའི་ཆ་ནི་ཤིན་དུ་མི་རྟོག་པ། །གསལ་བ་ཙམ་དུའང་མི་གནས་ཤིན་དུ་ཕྲ། །རླུང་

89-1-121a

སེམས་མི་ཕྱེད་གསལ་བར་འཆར་བ་མིན། །ལྷམ་མེ་གནས་པ་སྐད་ཅིག་གསུམ་པ་ཡིན། །ཉེ་བར་ཐོབ་པ་དྲི་མ་མེད་པ་སྟེ། །རང་བྱུང་རང་གསལ་བདེ་བ་དམིགས་སུ་མེད། །ཕྲ་རགས་རབ་གསལ་ཏིང་ངེ་འཛིན་དུ་གནས། །སྐད་
ཅིག་བཞི་པ་མི་འགྱུར་ཁྱབ་བྱེད་ཡིན། །འོད་གསལ་བ་ནི་བསམ་གཏན་ཟག་པ་མེད། །རྡུལ་མེད་ས་བོན་མེད་པས་མི་གཡོ་བ། །ལྷན་ཅིག་གནས་པ་ཆོས་སྐུའི་སྙིང་པོ་ནི། །ལྷུན་གྲུབ་བྱང་ཆུབ་སེམས་ཀྱི་ངོ་བོ་ཉིད། །སྒྱུ་མ་འདི་ཉིད་ཡོད་མེད་
ལས་འདས་ཤིང་། །དབུ་མ་ཙམ་དུའང་མི་གནས་ཀུན་རྫོབ་སྟེ། །ཆོས་རྣམས་ཐམས་ཅད་སྒྱུ་མའི་སྣང་བ་ལས། །འགག་པ་མེད་པའི་རོལ་པ་རང་བྱུང་བའོ། །ཟུང་འཇུག་བདེ་བ་ཆེན་པོའི་མཚན་ཉིད་ཅན། །ཆོས་དབྱིངས་ཆོས་ཉིད་དབྱེར་མེད་དག་པའི་
སྐུ། །ཐ་དད་རྣམ་བྲལ་མི་ཕྱེད་ཡེ་ཤེས་ཏེ། །གསང་བ་ཆེན་པོའི་ལམ་ལས་འདིར་རྟོགས་བྱ། །ཐུན་མོངས་དབང་ཕྱུག་དང་ནི་རྟགས་བཅས་པ། །དབང་ཕྱུག་བརྒྱད་ལྡན་འཆར་བ་འདི་ཉིད་དོ། །ཕྲ་ཞིང་ཡང་ལ་ཕྲ་བར་ནུབ་པ་དང་། །སྤྱོད་པར་ནུས་དང་
བདག་ཉིད་ཆེན་པོ་དང་། །དགའ་མགུར་བྱེད་ཅིང་ཐམས་ཅད་དབང་དུ་འགྱུར། །ཅི་འདོད་བྱེད་དང་དབང་ཕྱུག་དོན་དུ་འཆར། །སྐུ་ཡི་དབང་ཕྱུག་གསུང་གི་དབང་ཕྱུག་དང་། །ཐུགས་ཀྱི་དབང་ཕྱུག་དེ་ཉིད་ཕྲིན་ལས་དང་། །རྫུ་འཕྲུལ་ཀུན་དུ་འགྲོ་བའི་
དབང་ཕྱུག་དང་། །གང་འདོད་བསྐྱེད་དང་ཁྱད་པར་དོན་བརྒྱད་དོ། །ཕུང་པོ་ཁམས་དང་སྐྱེ་མཆེད་བསྡུས་པ་ཡི། །ལྔ་པོའི་དབྱེ་བ་ལྔ་རུ་བྱས་པ་ལ། །དེ་བཞིན་གཤེགས་པ་སོ་སོར་བྱིན་གྱིས་རླབས། །འཁོར་བའི་ལས་རྣམས་དག་
ནི་རྣམ་དག་པས། །དེ་བཞིན་དབང་པོའི་ཕྱི་རོལ་ཡུལ་བཅས་ལྔ། །རེ་རེ་ཞིང་ཡང་བདེ་གཤེགས་ལྔ་རྣམས་ཀྱི། །དེ་ལ་རང་རང་རྟག་ཏུ་བྱིན་གྱིས་རློབ། །ཡེ་ཤེས་ལྔ་དང་གསུམ་དུ་གནས་པས་ཡང་དག་བསྡུས་ཤེས་གསུངས་ཏེ། 
གསང་བ་ཟབ་པའི་ཚུལ་བསྟན་པ་རྡོ་རྗེ་མི་ཕྱེད་པའི་ཡེ་ཤེས་ཀྱི་འབྱུང་གནས་སུ་གྱུར་པ་སྟེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་

89-1-121b

མཉམ་པ་ཉིད་རྣམ་པར་རྒྱལ་བ་ལས་མཉམ་པ་ཉིད་འབྱུང་བར་བསྟན་པར་གྱུར་པ་ཞེས་བྱ་བའི་ལེའུ་སྟེ་སོ་གཉིས་པའོ།། །། རྟག་པ་གསུམ་པ་རྡོ་རྗེ་གསང་བ་ཡེ་ཤེས་འབྱུང་བའི་རྒྱལ་པོ་ཞེས་བྱ་བ་རབ་ཏུ་གསང་བའོ། །
དེ་ནས་བཅོམ་ལྡན་བདེ་གཤེགས་ཀུན། །གསང་ཆེན་ཡེ་ཤེས་རྡོ་རྗེ་འཛིན། །སེམས་ཅན་དོན་དུ་ཡང་དག་འབྱུང་། །བློ་ལྡན་བྱང་ཆུབ་སེམས་དཔའ་ཡིས། །དོན་ཀུན་ཐུབ་པ་རྡོ་རྗེ་འཛིན། །རྒྱལ་བ་དེ་ལ་བཏུད་བྱས་ཏེ། །གསང་བ་དམ་ཚིག་
མཁྱེན་པ་ལ། །མཆོད་ཅིང་བསྟོད་པས་གསང་ཆེན་གྱི། །རྡོ་རྗེ་དབྱངས་ནི་བཤད་པ་ཡིན། །ཨེ་མ་ཚུལ་བཟང་སངས་རྒྱས་པ། །དེ་ཉིད་རིགས་བརྒྱ་བསྡུས་པའི་སྐུ། །དེ་ཉིད་ཚུལ་མཆོག་བྱང་ཆུབ་པ། །རིགས་ཀྱི་སངས་རྒྱས་ལྔར་
བསྡུས་པ། །བྱང་ཆུབ་སྙིང་པོ་ཚུལ་ཞི་བ། །གསང་བ་རིགས་གསུམ་བླ་ན་མེད། །གསང་བའི་ཚུལ་ནི་གཅིག་པ་ཉིད། །རྒྱས་གདབ་རྡོ་རྗེ་སེམས་དཔའ་ཉིད། །ཡེ་ཤེས་རིམ་པ་ཉིད་དུ་བསྟན། །མ་སྐྱེས་པ་ཡི་རང་བཞིན་ལས། །ཁྱད་པར་
ངོ་བོ་རང་བྱུང་བ། །ཡང་དག་རྣམ་པར་མི་རྟོག་པས། །བླ་མེད་མངོན་པར་འབྱུང་བར་གྲགས། །ནམ་མཁའི་དབྱིངས་ཀྱི་དབུས་གནས་པར། །དཔལ་ལྡན་ཆོས་ཀྱི་རང་བཞིན་སྐུ། །རྟོག་པའི་དྲི་མ་འགག་བྱེད་པས། །སྐུ་གསུམ་ཡེ་
ཤེས་དཀྱིལ་འཁོར་དུ། །ཕྲ་བའི་རྣམ་པར་གཞུག་པར་བྱ། །དེ་ཉིད་རྣམ་ཤེས་འཕོ་བའི་དངོས། །གདན་བཅས་ས་བོན་ཐིམ་པར་བྱ། །སངས་རྒྱས་ཀུན་གྱི་བར་སྣང་ཁམས། །ཁྱབ་ཅིང་བཞུགས་པར་རབ་བསྒོམ་པ། །ཡི་གེ་གསང་
བ་རང་སྔགས་ལ། །ཐེམ་པ་གཅིག་ཏུ་བསྡུ་བར་བྱ། །ཐུགས་ཀྱི་ངོ་བོར་བསམ་པར་བྱ། །ཐམས་ཅད་སྒྱུ་མའི་སྦྱོར་བ་ཡིས། །དངོས་ཀུན་རང་བཞིན་མཚུངས་པར་བལྟ། །སངས་རྒྱས་ཐམས་ཅད་སེམས་སུ་ཡང་། །སླར་ཡང་
བསྒོམས་ནས་དེ་རབ་བསྡུ། །གསང་བ་གཅིག་ཏུ་དབང་བྱ་ཡི། །འཕོ་བ་སྐུ་གསུམ་རིམ་པར་འབྱུང་། །ཆོས་དབྱིངས་མཉམ་པའི་ཏིང་ངེ་འཛིན། །མི་ཤིགས་འོད་ཀྱི་གོང་བུ་ལས། །ནཱ་ད་ཙམ་དུ་སྣང་བ་གང་། །མི་འགག་རང་བཞིན་དག་

89-1-122a

པར་གནས། །གསང་བ་རྡོ་རྗེའི་རིན་ཆེན་གྱི། །རབ་སྣང་བྱེད་པའི་ཏིང་འཛིན་བཤད། །དེ་ནས་དེ་བཞིན་གཤེགས་པ་ཡོན་ཏན་མཐའ་ཡས་བསགས་པའི་རྒྱལ་པོ་སངས་རྒྱས་ཐམས་ཅད་ཀྱི་ཡེ་ཤེས་མངོན་པར་རོལ་
པ་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་བདག་མེད་པ་ཡི་དངོས། །གཉུག་མ་དབྱེར་མེད་སྟོང་ཉིད་དང་། །ཟད་པ་མེད་ཅིང་འཕེལ་མེད་པ། །བྱང་
ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཡོན་ཏན་འབར་བའི་ཚོགས་ཅན་སངས་རྒྱས་ཐམས་ཅད་ཀྱི་དྲི་མ་མེད་པའི་མེ་འོད་རིན་པོ་ཆེ་མངའ་བ་སངས་རྒྱས་
ཐམས་ཅད་ཀྱི་པད་མོ་རྣམ་པར་རོལ་པའི་འབྱུང་གནས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་ཐམས་ཅད་མ་སྐྱེས་པ། །སྐྱེ་མེད་སྙིང་གི་པད་མ་
མ་ལ། །ས་བོན་རྫོགས་པའི་སྙིང་པོ་གང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་རིན་ཆེན་འབར་བའི་ཕུང་པོ་སངས་རྒྱས་ཐམས་ཅད་ཀྱི་རང་བྱུང་གི་རྒྱལ་པོ་རྡོ་རྗེ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཟླ་བའི་སྙིང་པོ་འོད་འཕྲོ་བ། །ཆུ་རྒྱུན་འབབ་པའི་ཟེར་ལྡན་གྱིས། །བསམ་པའི་ཡེ་ཤེས་རྒྱུན་གྱིས་ནི། །ཐོགས་མེད་ཡེ་ཤེས་ཚུལ་བསྟན་པའོ། །
ཞེས་གསུངས་སོ། །དེ་ནས་བཅོམ་ལྡན་འདས་སྲིད་པ་ལས་རྒལ་བ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་རྒྱ་མཚོ་ལ་རོལ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
སྣ་ཚོགས་དངོས་པོའི་ཆོས་ཉིད་ནི། །སྤྲོས་པ་མེད་ཕྱིར་སྣང་མེད་པས། །ཐེག་པ་མཆོག་གི་ཆོས་ཉིད་ཀྱིས། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྲིད་པ་ལྡན་པ་སངས་རྒྱས་

89-1-122b

ཐམས་ཅད་ཀྱི་ཡེ་ཤེས་རྡོ་རྗེ་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟེན་ཅིང་འབྲེལ་བར་འབྱུང་བའི་དངོས། །རྟག་དང་ཆད་པ་ལས་གྲོལ་ཞིང་། །ཡང་དག་དོན་མཐོང་རང་
གྲོལ་གནས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དབྱངས་སྙན་པར་སྒྲོགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དྲི་
མ་མེད་པའི་ཆོས་ཉིད་ནི། །གདོད་ནས་དག་པ་དེ་བཞིན་གཤེགས། །སྙིང་པོ་ཡེ་ཤེས་བྱང་ཆུབ་པས། །གསང་བའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚངས་པའི་མེ་ཏོག་སངས་རྒྱས་
ཐམས་ཅད་ཀྱི་ཡེ་ཤེས་སེང་གེའི་རྩལ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གསང་བ་ཆོས་ཀྱི་དབྱིངས་ཉིད་ལས། །ཐུབ་པ་དོན་ཀུན་རྡོ་རྗེ་འཛིན། །མཆོད་དེ་རྡོ་རྗེ་
དབྱིངས་འདིར་གསུངས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚོགས་ཆེན་གཙོ་བོ་སངས་རྒྱས་ཐམས་ཅད་ཀྱིས་གནས་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གཉིས་སུ་མེད་པས་འདུ་འབྲལ་མེད། །རྣམ་པར་གྲོལ་བའི་ཕུང་པོ་ཅན། །བདེ་ཆེན་སྐུ་སྟེ་སྐྱོན་མེད་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་སེང་གེའི་སྟོབས་སངས་རྒྱས་ཐམས་ཅད་ཀྱི་ཕུང་པོ་ལྔ་དག་པའི་སྟོབས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཇི་སྲིད་འགྲོ་བའི་བྱ་བ་དག །འདུས་པ་ལས་
ནི་སྐྱེ་བཞིན་པ། །དེ་ཡང་ཡུལ་ལས་རབ་ཏུ་འབྱུང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཁྱིམ་བདག་དྲག་ཤུལ་ཅན་གྱིས་བྱིན་པ་སངས་རྒྱས་ཐམས་ཅད་ཀྱི་ཁྲངས་ཆེན་

89-1-123a

པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དེ་ཉིད་མཉམ་པ་མེད་པ་ཡི། །རྡོ་རྗེ་ཟླ་བ་འདུས་ལས་འབྱུང་། །ཐ་དད་དམིགས་པ་རབ་ཞི་བས། །དེ་ཉིད་ཚུལ་འདི་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ཀྱི་དབང་ཕྱུག་རྒྱལ་པོ་སངས་རྒྱས་ཐམས་ཅད་ཀྱི་ཡེ་ཤེས་སྐྱོབ་པ་བླ་ན་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །ཡེ་ཤེས་འབྱུང་གནས་ས་ཆེན་ལྟར། །དེ་ཉིད་བདེན་མཐོང་ཆོས་ཀྱི་སྤྱན། །ཤེས་རབ་ཟབ་མོའི་སྤྱོད་ཡུལ་གང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་མཐའ་ཡས་པའི་
འོད་སངས་རྒྱས་ཐམས་ཅད་ཀྱི་ཞིང་ཁམས་ཡོངས་སུ་དག་པར་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཁྱེན་པ་དག་པ་ཆོས་ཀྱི་དབྱིངས། །རྣམ་པ་ཀུན་ཏུ་རང་
བྱུང་བས། །འགྲོ་བའི་བསམ་པ་རྫོགས་མཛད་པ། །ཐུབ་པ་ཡེ་ཤེས་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་ཟེར་ཆེན་པོས་ཁྱབ་པར་མཛད་པ་སངས་རྒྱས་ཐམས་ཅད་ཀྱི་ཐོགས་པ་མེད་པའི་
གནས་པ་སྤྱོད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཟིལ་གནོན་ཆོས་ནི་གསང་བ་ཆེ། །མི་ཟད་རྒྱན་གྱི་སྒྲུབ་པའི་གཞི། །དེ་ཉིད་ངེས་པ་སྟོབས་གྱུར་པས། །དེ་ཉིད་
ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་གྲགས་པའི་དཔལ་སངས་རྒྱས་ཐམས་ཅད་ཀྱི་མཛད་པ་སྣ་ཚོགས་སྟོན་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །འཇིག་རྟེན་ཁམས་ནི་སྣ་ཚོགས་སུ། །འགྲོ་བ་འདུལ་བའི་ཐབས་ཀྱི་ཕྱིར། །རྣམ་རོལ་ཡེ་ཤེས་སྤྱོད་པ་ཡིས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་

89-1-123b

པ་ཚོགས་ཅན་གསལ་བའི་སྙིང་པོ་སངས་རྒྱས་ཐམས་ཅད་ཀྱི་མི་འགག་པ་རོལ་པའི་སྒྲ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཞིང་ཁམས་བྱེ་བ་མཐའ་ཡས་པར། །མི་
འགྱུར་རྡོ་རྗེའི་དབྱིངས་གཅིག་གིས། །ཐ་དད་དུ་མར་ཁྱབ་བྱེད་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གྲགས་པ་མཐའ་ཡས་ཆེན་པོ་སངས་རྒྱས་ཐམས་ཅད་ཀྱི་རྣམ་པར་མི་རྟོག་པ་
རྡོ་རྗེའི་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟོག་པ་སྣ་ཚོགས་བསྡུས་པ་ཡི། །ཡེ་ཤེས་གཅིག་གིས་གནས་པ་ལས། །ཐ་དད་ཏིང་འཛིན་དག་པའི་ངང་། །དེ་ཉིད་ཚུལ་
འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དོན་ཡོད་འོད་ཟེར་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ཡུལ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །སངས་རྒྱས་ཀུན་གྱི་སྐུ་གསུང་ཐུགས། །ཡེ་ཤེས་རྡོ་རྗེ་རོ་གཅིག་པར། །ལན་ཚྭ་ཆུ་བཞིན་སྤྱོད་པ་ནི། །སྐལ་བཟང་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལྷའི་དྲང་སྲོང་སྐྱོབ་པ་སངས་རྒྱས་
ཐམས་ཅད་ཀྱི་དྲི་མ་མེད་པའི་རྡོ་རྗེ་སྐྱོབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལྷ་དང་མི་ཡི་སྟོན་པ་གང་། །རྐང་གཉིས་ཐམས་ཅད་མཁྱེན་པ་སྟེ། །མ་འོངས་བླ་མའི་
གཟུགས་ཀྱིས་གནས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྐྱེ་བའི་དབང་པོ་སངས་རྒྱས་ཐམས་ཅད་ཀྱི་རྫུ་འཕྲུལ་མི་ཟད་པ་རྡོ་རྗེ་སངས་རྒྱས་ཐམས་ཅད་བསྐུལ་བ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བརྟན་གཡོ་མ་ལུས་སྣང་བའི་གཞི། །དེ་ཉིད་ཀུན་དུ་བསྒྱུར་བ་པོ། །དེ་ཉིད་དེ་བཞིན་གཤེགས་པས་སྤྲུལ། །བྱང་ཆུབ་ཚུལ་འདི་བསྟན་པའོ་ཞེས་

89-1-124a

གསུངས་སོ། །དེ་ནས་དེ་བཞིན་གཤེགས་པ་དགེ་འདུན་བརྟན་པའི་བློ་སངས་རྒྱས་ཐམས་ཅད་ཀྱི་ཀླུ་དབང་གནོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
གདུག་པ་མ་ལུས་གདོན་བྱུང་བ། །དེ་ཉིད་རྟོག་པའི་དྲ་བ་ལས། །ཀུན་བྱུང་དག་པར་འདུལ་བྱེད་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །གསང་བའི་རྒྱལ་པོ་བཅོམ་ལྡན་གྱིས། །དེ་ཉིད་བྱང་ཆུབ་སེམས་དཔའ་ལ། །རབ་ཏུ་
བསྐུལ་ཏེ་བསྟན་པ་གང་། །རབ་ཏུ་ཉོན་ཅིག་རྡོ་རྗེ་འཛིན། །དཀྱིལ་འཁོར་གང་དུ་བསྒྲུབ་པ་ཡི། །གསང་བ་མངོན་པར་བྱང་ཆུབ་པ། །རྒྱུ་དང་རྟགས་དང་གོ་ཆ་དང་། །རྣམ་པ་ལྔར་ནི་བསྟན་པ་སྟེ། །འཇུག་པ་སྦྱོར་བའི་རིམ་པ་ཡིས། །
དམིགས་པ་བསྡུས་པ་ཉིད་ཡིན་ནོ། །རླུང་དང་སྔགས་དང་སྒྲ་ལས་ནི། །རྡོ་རྗེ་བཟླས་པའི་རིམ་པའོ། །གང་དུ་སེམས་ཀྱི་སྣང་བ་ལས། །རབ་དབེན་རིམ་པ་གཉིས་པར་བརྗོད། །རྨི་ལམ་སྒྱུ་མའི་ཆོས་ཅན་ལས། །བདག་བྱིན་བརླབ་
པའི་རིམ་པར་གྱུར། །བསམ་གཏན་སྦྱོར་དང་འོད་གསལ་བ། །མངོན་པར་བྱང་ཆུབ་རིམ་པ་ཉིད། །དེ་ལས་གཉིས་མེད་དེ་བཞིན་ཉིད། །རིམ་པ་ལྔ་པ་ཟུང་འཇུག་ལམ། །ལུས་སེམས་ངག་གི་ཆོས་བསྡུས་པས། །ཚུལ་གསུམ་
མངོན་པར་བྱང་ཆུབ་པ། །དེ་ཉིད་ཡེ་ཤེས་ལྔ་དག་ཏུ། །རིགས་ཀྱི་དབྱེ་བས་བསྟན་པ་ཡིན། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་
སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་ཆོས་ཀྱི་ཚུལ་བསྡུ་བ་མངོན་པར་བྱང་ཆུབ་པའི་ལེའུ་སྟེ་སོ་བཞི་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཕྱོགས་བཟང་རྟོག་སྐྱེས་བུ་ཁ་ལོ་
སྒྱུར་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐབས་དང་བསམ་པ་གང་གང་གིས། །ལུས་འདི་སྤྱོད་པས་སྒྱུར་བས་ན། །སེམས་ནི་ཏིང་ངེ་འཛིན་གྱིས་ཏེ། །བྱང་ཆུབ་

89-1-124b

ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡུལ་འཁོར་མེ་ཏོག་སངས་རྒྱས་ཐམས་ཅད་ཀྱི་ཀུ་ཤའི་རྩེ་མོ་ལྟར་ཕྲ་མོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །སངས་རྒྱས་ཀུན་གྱི་རོལ་པ་ཡི། །བསམ་གྱིས་མི་ཁྱབ་ཡེ་ཤེས་སྐུ། །རང་རིག་ཉིད་ལས་ཐ་དད་མེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ཀྱི་བློ་གྲོས་སངས་རྒྱས་
ཐམས་ཅད་ཀྱི་བཀོད་མའི་ཆུ་འཛིན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདེ་གཤེགས་གདུང་ནི་རྒྱས་པ་གང་། །ཐུགས་རྗེ་དག་པའི་སྟོབས་ཡིན་ཏེ། །འགྲོ་བ་གསོ་
བའི་ཚུལ་གྱིས་ནི། །བྱང་ཆུབ་ཡེ་ཤེས་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རླུང་གི་ཤུགས་འཆང་བ་ལྟར་གཤེགས་པ་སངས་རྒྱས་ཐམས་ཅད་ཀྱི་སྨན་པའི་རྒྱལ་པོ་འབྱུང་བ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འགྲོ་བ་ཀུན་གྱི་འཁོར་བ་ཡི། །ནད་སེལ་ཐབས་མཆོག་བྱམས་པའི་དཔལ། །བརྩེ་སེམས་ཚད་མེད་སྲུང་བ་པོ། །ཟབ་པའི་ཚུལ་འདི་བསྟན་པའོ་ཞེས་གསུངས་སོ། །
དེ་ནས་དེ་བཞིན་གཤེགས་པ་ལེགས་བསམ་གྲགས་པ་སངས་རྒྱས་ཐམས་ཅད་ཀྱི་བློའི་དྲི་མ་སེལ་བར་བྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་བཞིན་རྟོག་པའི་
དྲི་མ་རྣམས། །གཟུང་འཛིན་ཆོས་ཀྱིས་བསྡུས་པའི་དངོས། །དབུ་མའི་ངང་དུ་རང་དག་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྣང་ལྡན་སངས་རྒྱས་ཐམས་ཅད་ཀྱི་ཡེ་ཤེས་ཆུ་བོའི་
རླབས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཀུན་གྱི་ཆོས་ཀྱི་ལམ། །ཚུལ་གཅིག་ཐེག་པ་གཅིག་པ་ཉིད། །བྱང་ཆུབ་ཆེན་པོ་བླ་ན་མེད། །བྱང་ཆུབ་ཚུལ་

89-1-125a

སེམས་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལྷའི་ཚོགས་ཆེན་པོ་སངས་རྒྱས་ཐམས་ཅད་ཀྱི་གཞལ་མེད་ཀྱི་གནས་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །ཐམས་ཅད་རང་བཞིན་སྟོང་པའི་དབྱིངས། །གཞི་མེད་རྩ་བྲལ་འདུས་མ་བྱས། །བརྗོད་མེད་ནམ་མཁའི་ངོ་བོ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་
འགྲིབ་པ་མེད་པར་བསྲུང་བ་སངས་རྒྱས་ཐམས་ཅད་ཀྱི་ཚུལ་རིན་པོ་ཆེའི་ཟོམ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་དང་ཆོས་ཉིད་མེད་པ་སྟེ། །ཕ་རོལ་ཕྱིན་པ་
མཉམ་པ་ཉིད། །སྣང་བ་མེད་ཅིང་རྣམ་པ་མེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དོན་གྱི་བློ་གྲོས་སངས་རྒྱས་ཐམས་ཅད་ཀྱི་བློ་གྲོས་སྣང་བ་བཀོད་པ་རྡོ་རྗེ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཇིག་རྟེན་མུན་པ་སེལ་མཛད་ཅིང་། །ས་གསུམ་གསལ་བར་བྱེད་པ་ཡི། །གློག་གི་འོད་ཀྱིས་འཆར་བ་པོ། །བྱང་ཆུབ་ཚུལ་འདི་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པ་བསྙེངས་མེད་སངས་རྒྱས་ཐམས་ཅད་ཀྱི་ཕེག་རྡོབ་པའི་སྒྲ་སྙན་ལྟ་བུར་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཆོས་ཀྱི་དོན་
འབྱུང་བ། །བླ་ན་མེད་པ་བྱང་ཆུབ་སེམས། །ཡེ་ཤེས་རྒྱུ་དང་འབྲས་བུར་སྟོན། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གྲོགས་བརྟན་སངས་རྒྱས་ཐམས་ཅད་ཀྱི་འགྲོ་བའི་མིག་སྟོན་
པ་རྡོ་རྗེ་སངས་རྒྱས་ཐམས་ཅད་ཀྱི་གནས་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ཅན་བསམ་པའི་དབང་གིས་ནི། །ལམ་གྱི་རིམ་པ་ཐམས་ཅད་

89-1-125b

པར། །འདམ་བཟངས་ཆུ་ཡི་བདུད་རྩི་ལྟར། །སྐལ་བཟངས་དེ་ཉིད་ཚུལ་ཤེས་བྱོས། །ཞེས་གསུངས་སོ། །དེ་ནས་དེ་བཞིན་གཤེགས་པ་འོད་གནས་མཚུངས་སངས་རྒྱས་ཐམས་ཅད་ཀྱི་གཞོན་ནུའི་ཟླ་བ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་ཀྱི་ཚུལ་ནི་ཞི་བ་ཉིད། །བཅུ་དྲུག་ཡེ་ཤེས་བརྒྱན་པ་ཉིད། །སྐད་ཅིག་བདེན་པ་བྱང་ཆུབ་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་ནོར་བུའི་ཞལ་སངས་རྒྱས་ཐམས་ཅད་ཀྱི་འོད་ཟེར་ཀུན་ནས་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་བྱེ་བ་ཁྲག་ཁྲིག་གིས། །ཀུན་དུ་དབང་བསྐུར་གྱུར་པ་ཡི། །
སྐལ་བ་ཅན་ནི་ཀུན་ཏུ་བཟང་། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐར་པའི་གཟི་བརྗིད་སངས་རྒྱས་ཐམས་ཅད་ཀྱི་ཀུན་ནས་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་རྟོག་པས་བརྟགས་པ་ཡི། །སྣང་བ་འདི་ནི་སྒྱུ་མ་ཙམ། །དེ་ཉིད་ལས་དང་བག་ཆགས་བྲལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ངོས་
བཟངས་སངས་རྒྱས་ཐམས་ཅད་ཀྱི་རྡུལ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མི་ཤིགས་རྡོ་རྗེའི་སྐུ་ཉིད་ནི། །རྣམ་པ་དུ་མས་སྤུངས་པ་གང་། །ཕྲ་རབ་དབྱེར་མེད་དག་པའི་
རྒྱལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བློ་བཟངས་སངས་རྒྱས་ཐམས་ཅད་ཀྱི་དཔའ་བོ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །ཀུན་ཏུ་ཡེ་ཤེས་རྒྱལ་བ་ཡི། །དྲོད་དང་རྟགས་ལས་འདས་པའི་ཆོས། །བསྒོམ་བྱ་མེད་ཅིང་དམིགས་མེད་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཀུན་དུ་གཟི་བརྗིད་སྣང་

89-1-126a

བ་སངས་རྒྱས་ཐམས་ཅད་ཀྱི་ཏིང་ངེ་འཛིན་སྣང་བ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བྱང་ཆུབ་སེམས་དཔའི་སྤྱོད་ཡུལ་གང་། །དེ་ཉིད་ས་བཅུའི་དབང་ཕྱུག་སྟེ། །བདག་
མེད་ཆོས་ལས་རང་བྱུང་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འཕགས་པ་ཆེན་པོ་མཆོག་གི་ཡེ་ཤེས་སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྤྲིན་འབྱུང་བ་རྡོ་རྗེ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དགོས་འདོད་ཐམས་ཅད་ཆར་བཞིན་དུ། །རང་སེམས་ནོར་བུའི་རྒྱལ་པོས་འགྲུབ། །འདི་ཉིད་རིན་ཆེན་མཛོད་ཆེན་པོ། །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚངས་པར་གནས་པ་སངས་རྒྱས་ཐམས་ཅད་ཀྱི་བསྐུལ་བ་ཚད་མེད་པ་བླ་མའི་སྙིང་པོ་རྡོ་རྗེ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་འབྱུང་གནས་ཀྱི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཀོན་མཆོག་གསུམ་གྱི་དཔལ་ལྡན་པས། །རང་རིག་ཡེ་ཤེས་གཅིག་ལ་རྫོགས། །རྒྱུན་དུ་བདེ་བ་སྟེར་བྱེད་པས། །དེ་ཉིད་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་བདེན་པར་སྟོན་པ་ཡང་དག་པའི་གནས་བློ་གྲོས་བསམ་གྱིས་མི་ཁྱབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བགྲོད་
མེད་ལམ་ནི་གཅིག་པའི་ཆོས། །ཡེ་ཤེས་མིག་གི་ཡུལ་གྱུར་པས། །མཐར་ཐུག་སྙིང་པོ་བྱང་ཆུབ་མཆོག །རྒྱལ་བའི་ཚུལ་འདི་བསྟན་པའོ་ཞེས་གསུངས་སོ། །འདིར་ནི་གསང་བའི་བཀའ་སྤྱོད་པའི། །བྱང་ཆུབ་
སེམས་དཔའ་ཆེན་པོ་ཡི། །དམ་ཚིག་ཡེ་ཤེས་བསྟན་པ་ལ། །གསང་བ་འཛིན་པ་རབ་སྟོན་ཅིང་། །འདིར་ནི་སངས་རྒྱས་བསྟན་པ་ལ། །ཐེག་ཆེན་ཆོས་ལ་རབ་ཞུགས་ཀྱང་། །དེ་དོན་གསལ་བར་མི་ཤེས་པས། །གསང་

89-1-126b

བའི་ཚུལ་འདི་རྟོགས་དཀའ་སྟེ། །བརྡའ་དང་དགོངས་པས་བཤད་པ་དང་། །ཇི་བཞིན་པ་དང་མིན་དྲང་དོན། །དངོས་པོའི་ཆོས་ལ་མི་སྤྱོད་པར། །སྒྲ་དང་ཡི་གེའི་རྗེས་འབྲང་བའི། །ཕྱི་རོལ་བསྟན་བཅོས་ལ་དགའ་ཞིང་། །ཚིག་དོན་བདུད་རྩིའི་རྒྱབ་
ཀྱིས་ཕྱོགས། །དེ་ལ་དངོས་གྲུབ་རྙེད་དཀའ་སྟེ། །གསང་བ་འཛིན་པ་སྤོང་བར་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་
རྣམ་པར་རྒྱལ་བ་ལས་ཡོངས་སུ་དག་པའི་གནས་རྡོ་རྗེའི་ལེའུ་སྟེ་སོ་ལྔ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་བློ་བཟངས་སངས་རྒྱས་ཐམས་ཅད་ཀྱི་གློག་གི་ཕྲེང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟེན་འབྲེལ་ཡང་དག་འབྱུང་བ་ལས། །ཀུན་རྫོབ་ཉིད་ཀྱི་ཆོས་ཉིད་ནི། །དབྱེར་མེད་དོན་དམ་རྣམ་པར་དབེན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་སྟོབས་སྦྱིན་པ་སངས་རྒྱས་ཐམས་ཅད་ཀྱི་རིན་ཆེན་སྒྲོན་མེ་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་པོ་འདི་དག་མ་སྐྱེས་པས། །དེ་ཉིད་དངོས་པོར་
མི་གནས་ཤིང་། །རང་བཞིན་འོད་གསལ་རྟག་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སེང་གེའི་སྟོབས་སངས་རྒྱས་ཐམས་ཅད་ཀྱི་རི་དགས་ཀུན་དུ་རྒྱུ་བ་རྡོ་རྗེ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྡོ་རྗེ་ལམ་དུ་རབ་ཞུགས་ནས། །ནོར་བུ་དྲི་མེད་ཟླ་བ་ཡི། །སྐྱོན་གྱིས་མ་གོས་ཡེ་ཤེས་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་མེ་ཏོག་གི་ཏོག་སངས་རྒྱས་ཐམས་ཅད་ཀྱི་རྟོག་པའི་དབའ་རླབས་གཡོ་བ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྡོ་རྗེ་གསང་བ་བླ་ན་མེད། །

89-1-127a

མཉམ་སྦྱོར་བདེ་བ་དྲི་མ་མེད། །མི་འཛག་མྱ་ངན་འདས་པར་འགྱུར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་འབྱུང་གནས་སངས་རྒྱས་ཐམས་ཅད་ཀྱི་རླུང་གི་ཤུགས་
ཀྱིས་བསྐྱོད་པ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་དུ་མངོན་པར་མི་གནས་པ། །གཉིས་མེད་ཡེ་ཤེས་ཆོས་ཀྱི་རྒྱལ། །རྣམ་པར་མི་རྟོག་ཆགས་མེད་པས། །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མེ་ཏོག་སྟེར་མཛད་སངས་རྒྱས་ཐམས་ཅད་ཀྱི་རྔ་སྒྲའི་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །སྣང་སྲིད་མ་ལུས་བཅོམ་ལྡན་འདས། །ཐམས་ཅད་སྟོང་པ་ཉིད་ལས་སྐྱེས། །དེ་ཉིད་ཡེ་ཤེས་རྒྱུ་འབྲས་ཅན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་སྙིང་པོ་སངས་
རྒྱས་ཐམས་ཅད་ཀྱི་ཚིམ་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྟོང་ཉིད་ནམ་མཁའི་ངོ་བོ་ཉིད། །སེམས་ཉིད་མཉམ་པར་མཚུངས་པས་ན། །མི་འགག་གོ་
འབྱེད་ཁྱབ་གྱུར་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་གྲགས་པ་སངས་རྒྱས་ཐམས་ཅད་ཀྱི་སྐྱེ་དགུའི་བདག་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །སྟོང་ཉིད་དངོས་པོ་མ་ཡིན་ཏེ། །དངོས་མིན་གྱུར་པའང་སྟོང་པ་མིན། །ངོ་བོ་ཉིད་ནི་རྣམ་དག་པ། །སྟོང་ཉིད་ཡེ་ཤེས་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གྲགས་
པ་ཆེན་པོ་རྨད་དུ་བྱུང་བ་སངས་རྒྱས་ཀྱི་གདུལ་བྱ་སྨིན་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འབྱུང་བ་བཞི་དག་ནམ་མཁར་གནས། །དེ་ཉིད་གང་ལའང་མི་གནས་ཏེ། །

89-1-127b

སེམས་ཅན་སངས་རྒྱས་ལ་བརྟེན་པ། །སངས་རྒྱས་མི་གནས་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མི་ཚུགས་པ་ཐུབ་པ་ཆེན་པོ་སངས་རྒྱས་ཐམས་ཅད་ཀྱི་རྔ་སྒྲའི་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །གཟོད་ནས་མ་སྐྱེས་དག་པ་ཉིད། །སྲིད་ཞི་མཉམ་ཉིད་རྫོགས་སངས་རྒྱས། །འགྲོ་འོང་རྣམ་བྲལ་ཚུལ་ཐོབ་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བསྙེངས་མེད་སངས་རྒྱས་ཐམས་ཅད་ཀྱི་
དཔག་བསམ་གྱི་ཤིང་ལྟ་བུར་བསྐྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ས་བོན་མྱུ་གུ་དང་། །སྡོང་བུ་འདབ་མ་འབྲས་བུའི་བར། །ཚུལ་བརྒྱད་འགྱུར་བའི་བྱེ་བྲག་གིས། །རྟེན་འབྲེལ་དེ་ཉིད་
ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཉི་མའི་འོད་སངས་རྒྱས་ཐམས་ཅད་ཀྱི་ལྗོན་པའི་ཤིང་ཆེན་པོ་ལྟར་རྒྱས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འགྲོ་སྙིང་རྣམ་རྟོག་
ཞེས་བྱ་གང་། །རང་རིག་བྱང་ཆུབ་སྙིང་པོའི་གནས། །དེ་ལས་ཡོན་ཏན་བརྗོད་མི་ལང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚངས་པར་གཤེགས་པ་སངས་རྒྱས་ཐམས་ཅད་ཀྱི་ལྷའི་སིལ་སྙན་འབྱུང་བ་རྡོ་རྗེ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མི་རྟག་བདག་མེད་ཞི་བ་ཡིས། །འདུ་ཤེས་སེམས་པ་སྔོན་རྒྱུ་ལས། །བག་ཆགས་སྤངས་པས་གནས་ཐོབ་གྱུར། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་ལྷའི་མཐུ་རྩལ་སངས་རྒྱས་ཐམས་ཅད་ཀྱི་སྒྲ་བུང་བ་ལྟ་བུར་ལྡིང་བའི་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་རིག་བྱེད་ལས་འདས་ཤིང་། །
དེ་སྤངས་བསམ་པའི་ལྡོག་པ་ཡིས། །དབྱེ་བས་ཐ་དད་ཤེས་པར་བྱ། །འདི་ནི་སྙིང་པོའི་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་ལ་དགྱེས་པ་སངས་རྒྱས་ཐམས་ཅད་ཀྱི་དཔལ་ཞིང་

89-1-128a

ཁམས་བཀོད་པ་ཕྲེང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཀུན་གྱི་ཞིང་ཁམས་གང་། །སྣང་མཛད་རྒྱལ་པོའི་འོད་ཀྱི་སྐུས། །རྟེན་མཛད་ཡེ་ཤེས་
སྣང་བ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་ལྷ་བདེན་སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྣང་བ་བཻ་དཱུརྱར་སྟོན་པའི་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །འགྱུར་བ་མེད་པའི་རིན་པོ་ཆེ། །གཅིག་ཏུ་སྒྱུར་བར་བྱེད་པ་ཅན། །ནོར་བུ་རྟོག་པའི་བློ་བྲལ་བ། །ངེས་པར་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ནོར་
བུའི་སྙིང་པོ་སངས་རྒྱས་ཐམས་ཅད་ཀྱི་མུན་པ་དམག་རུམ་སེལ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཁོར་བའི་མུན་པ་སེལ་བ་ཡི། །བྱིན་བརླབས་འོད་
ཀྱི་སྒྲོན་མ་ཡིས། །སྣང་བ་སྟོན་ཅིང་འཇོམས་པ་གང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དཔལ་ཡེ་ཤེས་ཀྱི་སྙིང་པོ་སངས་རྒྱས་ཐམས་ཅད་ཀྱི་རྟོག་པའི་རྒྱལ་པོ་དག་པ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྙིང་པོར་གྱུར་པ་རང་སྲོག་ལས། །མི་ཤིགས་གོ་འཕང་གནས་སྤྱོད་པ། །དེ་ཉིད་རླུང་སེམས་དབྱེར་མེད་པས། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་ཐུབ་པ་བཅིངས་པ་མེད་པ་རྡོ་རྗེ་སངས་རྒྱས་ཐམས་ཅད་ཀྱི་སྤྲོ་བ་དཔག་མེད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་
དབྱིངས་ཡེ་ཤེས་སྤྱོད་ཡུལ་བས། །མི་གནས་མི་དམིགས་མཉམ་པ་ཉིད། །ཚད་མེད་རང་བྱུང་མི་རྟོག་ཕྱིར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བརྟུལ་ཞུགས་བརྟན་སངས་རྒྱས་

89-1-128b

ཐམས་ཅད་ཀྱི་མཛད་པ་མི་ཟད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ངེས་འབྱུང་རྣམ་པར་མི་གནས་པ། །འཁོར་བ་དག་པའི་སེམས་གནས་པ། །དེ་ཉིད་ཡེ་ཤེས་ཚུལ་
གསུམ་གྱུར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །གང་དུ་སྔོན་བྱུང་སངས་རྒྱས་དང་། །མ་འོངས་བྱོན་གྱུར་དེ་བཞིན་གཤེགས། །ད་ལྟར་ཕྱོགས་བཅུའི་སངས་རྒྱས་རྣམས། །གསང་བ་འདི་ལས་ཡང་དག་འབྱུང་། །
སེམས་ཀྱི་བསླབ་པ་ལ་ཕྱོགས་ཤིང་། །ཟབ་པ་རིག་པ་འཛིན་པ་དང་། །དེ་ཉིད་མདོ་སྡེར་གང་བསྟན་པ། །ཕྱི་ནང་གཉིས་སུ་བསྟན་པ་ཡིན། །གསང་བ་བླ་ན་མེད་པའི་དོན། །སྙིང་པོའི་དོན་རྣམས་སྟོན་བྱེད་པ། །འབྲས་བུ་རྟོགས་
པའི་ཡེ་ཤེས་ནི། །ཚེ་འདི་ཉིད་ལ་མངོན་གྱུར་པས། །ཐབས་ཀྱི་ཁྱད་པར་གྱུར་པ་སྟེ། །རྡོ་རྗེ་ཐེག་པ་ཞེས་བརྗོད་དོ། །ཞེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་
བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་གསང་བ་བླ་ན་མེད་པའི་དོན་ཡོངས་སུ་སྐྱོང་བའི་ལེའུ་སྟེ་སུམ་བཅུ་དྲུག་པའོ།། །། དེ་ནས་རྒྱལ་པོ་རྡོ་རྗེ་འཛིན། །ཡེ་ཤེས་
དོན་ཀུན་འཛིན་མཛད་པ། །དུས་གསུམ་བདག་པོ་དཔལ་ལྡན་པས། །གསང་བ་ཡེ་ཤེས་སྤྱོད་པ་གསུངས། །གཉིས་མེད་མཉམ་པ་མི་འགྱུར་བ། །དུས་གསུམ་རྟག་ཏུ་རང་བྱུང་ཉིད། །སྐྱེ་བ་མེད་པ་ལས་སྤྲུལ་ཞིང་། །མ་སྐྱེས་
རང་བཞིན་བརྗོད་དུ་མེད། །སངས་རྒྱས་ཀུན་གྱི་ཆོས་རྣམས་ནི། །ནམ་མཁའ་དང་ནི་མཉམ་གྱུར་པ། །རྣམ་པར་མི་རྟོག་ཡེ་ཤེས་ལས། །སྒྱུ་མ་ཙམ་དུ་བསྟན་པ་ཡིན། །རྒྱུ་དང་ལམ་དང་འབྲས་བུར་ནི། །གནས་པ་བརྗོད་བྱ་
དོན་གྱི་ཆོས། །དེ་ཉིད་ངེས་པར་དོན་སྟོན་པས། །རྗོད་བྱེད་སྒྲ་ཡི་ཕྱོགས་སུ་བཤད། །གསང་ཆེན་ཐེག་པ་སྙིང་པོའི་དོན། །རྒྱལ་པོ་ཆེ་བ་རང་ལ་གནས། །མཆོག་ཏུ་བརྟག་པ་འདུས་པ་སྟེ། །བདེན་གཉིས་ཟུང་འཇུག་སྟོན་

89-1-129a

པའོ། །དེ་ནས་དེ་བཞིན་གཤེགས་པ་གཟིགས་པ་ལྷའི་དབང་ཕྱུག་སངས་རྒྱས་ཐམས་ཅད་ཀྱི་ཡེ་ཤེས་རྡོ་རྗེ་ལྟ་བུ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །དེ་ཉིད་གསང་བའི་ཡེ་ཤེས་ཆེ། །སྙིང་པོ་ཕྱག་རྒྱ་ཆེན་པོའི་ངང་། །ཟབ་དང་རྒྱ་ཆེའི་ཚུལ་གནས་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚངས་དབུ་སྒྱུ་མ་ལྟ་བུ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱལ་བ་ཀུན་འདུས་རིག་པའི་ངང་། །རྡོ་རྗེ་འཛིན་པའི་ས་གནས་པས། །སྐུ་བཞི་ཡེ་ཤེས་མཆོག་རྟག་པས། །དྲི་མེད་འདུལ་བའི་ཚུལ་
མཆོག་གོ་ཞེས་གསུངས་སོ། །དེ་ནས་དེ་བཞིན་གཤེགས་པ་དལ་གྱིས་བཞུད་པ་སངས་རྒྱས་ཐམས་ཅད་ཀྱི་སེང་གེ་རྣམ་པར་བསྒྱིངས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །དེ་བཞིན་གཤེགས་པའི་བྱང་ཆུབ་སེམས། །འབད་པ་མེད་པར་འབྱུང་བ་ནི། །ཆོས་རྣམས་དབྱེར་མེད་གཅིག་པའི་སྐུ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་
བརྟུལ་ཞུགས་དཀའ་ཐུབ་སངས་རྒྱས་ཐམས་ཅད་ཀྱི་དཔའ་བར་འགྲོ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཐོང་ཆོས་དོན་ཡོད་སྙིང་པོ་ནི། །འབྲས་བུ་གྲུབ་པའི་རྐྱེན་འབྱུང་བ། །
དེ་ཉིད་སད་བྱེད་རྣམ་པར་ཐར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་ཟེར་ཕུང་པོ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྐམ་སར་གནས་པ་རྡོ་རྗེ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ཅན་རྣམས་ཀྱི་བསམ་པ་ཡི། །སྤྱོད་ཡུལ་སྣ་ཚོགས་འབྱུང་བ་ན། །ཐར་པའི་ལམ་ལ་སྤྱད་པར་བྱ། །བྱང་ཆུབ་ཚུལ་འདི་བསྟན་པའོ། །

89-1-129b

ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་ཆེན་པོ་སངས་རྒྱས་ཐམས་ཅད་ཀྱི་བདེན་པ་དག་པ་རྡོ་རྗེ་སངས་རྒྱས་ཐམས་ཅད་ཀྱི་སྟོབས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བསམ་གཏན་སྦྱོར་བ་སྒྱུ་མ་ཡིས། །
ཉེ་བར་འགྲུབ་པ་ཡང་དག་པའི། །གསང་མཐའ་ཚུལ་འདི་ངེས་བསྟན་ཡིན། །དེ་ཉིད་སྤྱོད་པ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཙམ་པ་ཀའི་མདོག་ཅན་སངས་རྒྱས་ཐམས་ཅད་ཀྱི་དྲང་སྲོང་
སྐྱོབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བསོད་ནམས་མཐར་ཐུག་སྟོབས་ཆེན་པོ། །དགེ་བའི་རྩ་བ་བརྟན་ལས་འབྱུང་། །འབྲས་བུ་བཞིས་ནི་ཐུབ་པའི་
རྒྱན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགའ་མཛད་སངས་རྒྱས་ཐམས་ཅད་ཀྱི་ཡེ་ཤེས་ཀྱི་རྣམ་པར་ཐར་པའི་སྒོ་བསྟན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དེ་ཉིད་སྟོང་ཉིད་མཚན་མ་མེད། །སྨོན་པ་མེད་པ་བྱང་ཆུབ་གཞི། །རྣམ་ཐར་ཡེ་ཤེས་འབྲས་ཐོབ་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་ཚོགས་ཅན་བཟང་པོ་སངས་རྒྱས་ཐམས་ཅད་ཀྱི་སྒྱུ་མ་ལྟ་བུར་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་གང་སྐྱེ་བ་མེད་པ་དང་། །
འགག་པ་མེད་པར་འབྱུང་བ་དང་། །བླ་མེད་གསང་བའི་དོན་བསྟན་པས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དབང་པོའི་རྒྱལ་མཚན་སངས་རྒྱས་ཐམས་ཅད་ཀྱི་སྨིག་རྒྱུ་ལྟ་
བུར་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་གཟུགས་བརྙན་རྨི་ལམ་དང་། །སྤྲུལ་པ་མཚུངས་པར་སྟོན་པ་གང་། །དེ་ཉིད་རང་བཞིན་

89-1-130a

འབྱུང་བའི་དངོས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགྱེས་པ་ཆེན་པོ་སངས་རྒྱས་ཐམས་ཅད་ཀྱི་ཆོས་ཐམས་ཅད་རྨི་ལམ་སྒྱུ་མ་ལྟ་བུར་སྟོན་པ་རྡོ་རྗེ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་རྨི་ལམ་གཟུགས་སྣང་ལྟར། །བག་ཆགས་སྣང་བ་རང་དག་པར། །དྲི་མ་སྦྱང་ཕྱིར་བསྟན་པ་དག །དེ་ཉིད་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་སྣང་བའི་མེ་ཏོག་སངས་རྒྱས་ཐམས་ཅད་ཀྱི་ཆུ་ཟླ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གཅིག་གིས་དུ་མར་ཁྱབ་པ་ཡི། །ངོ་བོ་རང་
སྟོང་ཐིག་ལེ་གཅིག །ཞེན་མེད་ཕྱག་རྒྱ་འབྱུང་བ་ཡི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚོགས་ཅན་འོད་སངས་རྒྱས་ཐམས་ཅད་ཀྱི་དྲི་ཟའི་གྲོང་ཁྱེར་ལྟ་བུར་འཆར་བ་རྡོ་རྗེ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཇིག་རྟེན་འདས་དང་འཇིག་རྟེན་པའི། །དག་པའི་ཡེ་ཤེས་ཡང་དག་པ། །བཅིངས་པ་མེད་ཅིང་གྲོལ་བའང་མེད། །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྐྲུན་པར་མཛད་པ་སངས་རྒྱས་ཐམས་ཅད་ཀྱི་སྤྲུལ་པ་ལྟ་བུར་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
གང་དུ་སངས་རྒྱས་རྣམས་དང་ནི། །ཉན་ཐོས་རང་རྒྱལ་བྱང་ཆུབ་སེམས། །དེ་སྤྲུལ་དམན་པར་མོས་པ་འདུལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མདངས་འགྲོ་དཔལ་སངས་རྒྱས་
ཐམས་ཅད་ཀྱི་ཆུའི་ཆུ་བུར་ལྟ་བུར་མཁྱེན་པ་བླ་ན་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ལན་ཚྭ་རྒྱ་མཚོར་ཐིམ་པ་ལྟར། །དབའ་རླབས་ཞི་བའི་རང་བཞིན་

89-1-130b

གྱིས། །ཐོབ་མེད་ཡེ་ཤེས་སྦྱོར་དོན་འགྲོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་དོན་ལེགས་དེས་སངས་རྒྱས་ཐམས་ཅད་ཀྱི་མིག་ཡོར་སྟོང་པའི་དངོས་པོ་རྡོ་རྗེ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་སད་པས་སད་བྱེད་པ། །ཀུན་ནས་ལྡང་བ་ཞི་བ་ཡི། །བསྙེངས་མེད་དོན་གསལ་བྱང་ཆུབ་པ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་
དེ་བཞིན་གཤེགས་པ་ཁྱུ་མཆོག་ཚད་མེད་སངས་རྒྱས་ཐམས་ཅད་ཀྱི་མེ་ལོང་ནང་གི་གཟུགས་བརྙན་ལྟ་བུར་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྲིད་ལས་
གྲོལ་ཞིང་བདེ་ཐོབ་དང་། །མཆོག་དོན་གནས་པ་དག་པའི་གནས། །བྱང་ཆུབ་ཚུལ་དག་འཁོར་ལོ་ཡིས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལག་བཟངས་སངས་རྒྱས་ཐམས་ཅད་
ཀྱིས་དབང་པོའི་གཞུ་དང་མཚུངས་པར་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བསྟན་པ་འདི་ནི་བྱང་ཆུབ་ལམ། །དེ་ཉིད་སྙིང་པོ་སྡོམ་པ་ཉིད། །བསླབ་པ་
ཡོངས་དག་འཇའ་ཚོན་ལྟར། །ངེས་པའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་ཟེར་ཆེན་པོ་སངས་རྒྱས་ཐམས་ཅད་ཀྱི་གློག་གི་འོད་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐུབ་པའི་རྫུ་འཕྲུལ་ཆེན་པོ་ནི། །གློག་ལྟར་འབྱུང་བའི་ཡིད་ཀྱིས་ནི། །ཀུན་དུ་ཕྲིན་ལས་བྱ་བ་ལས། །འཇུག་པའི་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་བསམ་པས་བྱིན་སངས་རྒྱས་ཐམས་ཅད་ཀྱི་སྤྲིན་འཕྲོ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་དུས་གསུམ་
89-1-131a

ཐམས་ཅད་དུ། །དྲི་མེད་རྟག་པར་འབྱུང་བའི་གཞི། །ལེགས་མཆོད་བསམ་པའི་རྒྱུན་འབབ་སྟེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་གསང་བའི་རྒྱལ་པོ་ཆེ། །འབྲས་བུ་སྟོན་པའི་ལམ་བྱུང་བ། །མི་ཕྱེད་ཡེ་ཤེས་མངའ་བདག་འཆང་། །ཟབ་དང་
རྒྱ་ཆེའི་ཚུལ་བསྟན་པའོ། །དེ་ཉིད་དཀྱིལ་འཁོར་འཁོར་ལོའི་ཆེ། །རྒྱུ་དང་མི་རྒྱུའི་དངོས་པོ་ཀུན། །ཁྱབ་བདག་རྡོ་རྗེ་སེམས་དཔའ་ཡིས། །གཟོད་ནས་དག་པའི་ཡེ་ཤེས་གནས། །ཐབས་གཞན་གྱིས་ནི་སངས་རྒྱས་མེད། །གསང་ཆེན་བདེ་བའི་གོ་འཕང་ཅན་ཞེས་གསུངས་
སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་ཐེག་པའི་ལམ་རྣམ་པར་དག་པའི་གནས་བསྟན་པའི་ལེའུ་སྟེ་སུམ་བཅུ་རྩ་བདུན་པའོ།། །། 
དེ་ནས་བཅོམ་ལྡན་འདས་དེ་བཞིན་གཤེགས་པ་བསོད་ནམས་རྒྱལ་པོའི་འོད་སངས་རྒྱས་ཐམས་ཅད་ཀྱི་དུལ་བའི་སྟོབས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟོག་པའི་དྲ་བ་བསལ་བ་ཡི། །ཡེ་
ཤེས་རྣམ་ཐར་དག་པ་ཡི། །གསལ་བ་ཡོངས་དག་རྗེས་འགྲོ་བས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་དབྱངས་སངས་རྒྱས་ཐམས་ཅད་ཀྱི་རྡོ་རྗེ་དབྱིངས་འབྱུང་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །གསང་བ་ཆོས་འབྱུང་ཡངས་པ་ཡི། །དག་པ་དྲི་མེད་གནས་ཀྱི་ཆ། །ཆ་དང་ཆ་མིན་རྣམ་སྤངས་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྡོ་རྗེའི་སྡེ་སངས་རྒྱས་ཐམས་ཅད་ཀྱི་
ནམ་མཁའ་དག་པའི་གནས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་དང་དངོས་མེད་ལས་གྲོལ་ཞིང་། །འབར་བ་ཐིག་ལེ་ནཱ་ད་བྲལ། །ཡེ་ཤེས་སྐུ་སྟེ་རྣམ་དག་
པས། །གསང་བ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་འབྱོར་ལྡན་འོད་ཀྱི་རྒྱལ་པོ་སངས་རྒྱས་ཐམས་ཅད་ཀྱི་སྤྱོད་པའི་གནས་རྡོ་རྗེ་རྒྱ་མཚོ་ཞེས་བྱ་བའི་ཏིང་ངེ་འཛིན་ལ་སྙོམས་པར་

89-1-131b

ཞུགས་དེ་བྱང་ཆུབ་ཀྱི་སེམས་འདི་གསུངས་སོ། །ཕྱོགས་བཅུ་ཀུན་དུ་སྣང་བ་ཡི། །འོད་ཟེར་འཕྲོ་བས་འཁྲུགས་པ་ཡི། །ལྷ་མོ་གར་གྱིས་མཆོད་བྱེད་པའི། །གསང་བ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་སེང་གེའི་སྟོབས་སངས་རྒྱས་ཐམས་ཅད་ཀྱི་མཚན་དང་དཔེ་བྱད་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལྷ་དང་མི་རྣམས་ཀུན་ལ་ཡང་། །དེ་
ཉིད་ཡེ་ཤེས་སྐལ་བ་ཅན། །བཟང་པོ་སྲིད་གསུམ་སྤྱད་པར་བྱ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དྲི་མ་མེད་པའི་སྤྱན་སངས་རྒྱས་ཐམས་ཅད་ཀྱི་བདེ་བའི་གཞལ་མེད་དག་པ་
རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་ཀུན་དུ་མི་ཕྱེད་པའི། །ཐ་དད་བློ་ནི་རྣམ་སྤངས་ནས། །ཡང་དག་ཡེ་ཤེས་སྣང་བ་ཅན། །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་སྲུང་སངས་རྒྱས་ཐམས་ཅད་ཀྱི་བཀྲ་ཤིས་གདུགས་ལྟ་བུ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གླིང་རྣམས་
ཀུན་གྱི་སེམས་ཅན་ཁམས། །བྱམས་པའི་གདུགས་ཀྱིས་ཁྱབ་བྱེད་པ། །མཐའ་སྐོར་བགྲང་མི་ལང་བར་སྟོན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བློ་གསལ་སངས་རྒྱས་ཐམས་ཅད་
ཀྱི་ཉའི་ལྟོ་ལྟ་བུ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བསམ་མི་ཁྱབ་པའི་ཆོས་ཀྱི་གནས། །འདྲེན་པ་བདུད་རྩི་སྤྱན་ཡངས་པས། །ཐུགས་རྗེས་རྒྱུན་ཆད་མེད་པར་གཟིགས། །
དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་འགྲོས་སངས་རྒྱས་ཐམས་ཅད་ཀྱི་པད་མ་ལྟ་བུར་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་

89-1-132a

གསུངས་སོ། །སངས་རྒྱས་རྣམས་ཀྱི་བདེན་པའི་མཐུས། །དྲང་པོར་སྨྲ་བའི་ལྗགས་དབང་པོ། །གེ་སར་དམར་པོ་ལྟར་སྟོན་པས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་
བརྗིད་དྲག་ཤུལ་ཅན་སངས་རྒྱས་ཐམས་ཅད་ཀྱི་དུང་ལྟ་བུར་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཚད་མེད་ཐུགས་ཀྱི་གཏེར་ཆེན་པོ། །རྣམ་པར་དཀར་བའི་ཆོས་ཕྱོགས་
ཀྱིས། །བར་མཚམས་མེད་པར་གནས་ཐོབ་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་ཟེར་ཆེན་པོ་སངས་རྒྱས་ཐམས་ཅད་ཀྱི་བུམ་པ་ལྟ་བུ་རྡོ་རྗེ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདུད་ལས་རྣམ་པར་རྒྱལ་བ་ཡི། །བུམ་པ་ཆེན་པོས་དོན་བྱེད་པ། །ཐོག་མ་མེད་པའི་བྱང་ཆུབ་སེམས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །
དེ་ནས་དེ་བཞིན་གཤེགས་པ་ཉི་མའི་འོད་སངས་རྒྱས་ཐམས་ཅད་ཀྱི་དཔལ་གྱི་བེའུ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཚངས་དང་བརྒྱ་བྱིན་དང་། །
འཇིག་རྟེན་སྐྱོང་བར་བཅས་པ་ཡི། །མཆོད་ཅིང་རྡོ་རྗེའི་དབང་ཕྱུག་སྐུ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དྲི་མ་མེད་པའི་འོད་སངས་རྒྱས་ཐམས་ཅད་ཀྱི་རིན་པོ་ཆེའི་རྒྱལ་
མཚན་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལྷ་སྲིན་སྡེ་བརྒྱད་མ་ལུས་པའི། །ཀུན་གྱི་གཙུག་གི་ནོར་བུ་ལྟར། །མི་ནུབ་དམ་པའི་གཙོ་བོ་ཡིས། །དེ་ཉིད་ཚུལ་འདི་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་རྣམ་པར་མཛེས་པ་སངས་རྒྱས་ཐམས་ཅད་ཀྱི་ཞབས་དང་ཕྱག་གི་མཐིལ་འཁོར་ལོའི་མཚན་གྱིས་བརྒྱན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་

89-1-132b

ཏེ་བྱང་ཆུབ་ཀྱི་སེམས་འདི་གསུངས་སོ། །ཐུབ་པས་འགྲོ་བའི་ངན་སོང་རྒྱུན། །ཡོངས་སུ་གཅོད་ཅིང་སྦྱོང་མཛད་པས། །རྣམ་པར་གནོན་པའི་མཆོག་མངའ་བའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་དཔའ་བོ་ཁེངས་མེད་སངས་རྒྱས་ཐམས་ཅད་ཀྱི་སྦྱིན་པའི་སྒོ་ནས་འགྲོ་བ་བསྡུ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདིར་ནི་འགྲོ་བ་འདུལ་དོན་དུ། །ལུས་སྲོག་
ཟས་དང་ལོངས་སྤྱོད་ཀྱིས། །ཀུན་ལ་ཆགས་མེད་ཚུལ་དུ་བསྐྱང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྡོ་རྗེ་སྦྲང་རྩིའི་ཞལ་མངའ་བ་སངས་རྒྱས་ཐམས་ཅད་ཀྱི་སྙན་པར་སྨྲ་བའི་དཔལ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐབས་དང་འབྲེལ་བའི་དོན་འགྱུར་བས། །ཅུང་ཟད་ཡང་དག་དོན་སྦྱོར་བའི། །ཕན་པ་སྟེར་བའི་བྱང་ཆུབ་ཀྱིས་དེ་ཉིད་ཚུལ་འདི་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པ་ཟླ་འོད་དཔལ་སངས་རྒྱས་ཐམས་ཅད་ཀྱི་དོན་འཐུན་པ་རྡོ་རྗེ་སངས་རྒྱས་ཐམས་ཅད་ཀྱི་འདུལ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །མཐོང་ན་མི་མཐུན་མེད་པ་ཡི། །དཔལ་གྱི་ཞིང་དུ་བགྲོད་པའི་ལམ། །ཡང་དག་དོན་ལ་སྦྱོར་བྱེད་པས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གློག་འབྱིན་སངས་
རྒྱས་ཐམས་ཅད་ཀྱི་དོན་སྤྱོད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྨད་དུ་བྱུང་བའི་ཁྱད་པར་གྱིས། །གཙོ་བོར་གཞན་དོན་སེམས་པ་གང་། །ཀུན་སྣང་དཔེ་མེད་
མཁས་པ་པོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རབ་ཏུ་ཞི་བར་གཤེགས་པ་སངས་རྒྱས་ཐམས་ཅད་ཀྱི་མི་གནས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་

89-1-133a

པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རི་རབ་རིན་ཆེན་ལྷུན་པོ་ལྟར། །བརྗིད་ཅིང་དཔའ་བའི་ཐུབ་པའི་སྐུས། །སྤྲུལ་པ་དངོས་པོར་མི་གནས་པ། །དེ་ཉིད་བྱང་ཆུབ་ཚུལ་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་འཁྲུག་པ་མི་མངའ་བ་སངས་རྒྱས་ཐམས་ཅད་ཀྱི་མཉམ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཐོག་མ་མི་དམིགས་
ཤིང་། །ཐ་མ་མེད་པའི་ཡེ་ཤེས་ལས། །རྣམ་པར་དབེན་དོན་དག་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་གསང་བ་འཛིན་པ་པོས། །མ་འོངས་བྱང་ཆུབ་དོན་གྱི་ཕྱིར། །དཔལ་ལྡན་བླ་མ་རྡོ་རྗེ་འཛིན། །
སྐུ་གསུམ་སྙིང་པོ་བསྡུས་པའི་བདག །འགྲོ་དོན་སྤྱོད་ཕྱིར་འབྱུང་བ་སྟེ། །སྟོབས་ཆེན་སྣ་ཚོགས་ནགས་ཁྲོད་དུ། །ཐུབ་པ་དཔལ་གྱི་རྒྱལ་པོ་སྟེ། །ཤཱཀྱའི་དགེ་སློང་ལི་ཙ་བཱི། །གཞོན་ནུ་འཕགས་པའི་བློ་ཅན་གྱིས། །རིམ་དང་ཅིག་
ཆར་རྒྱས་པར་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་གསང་བ་དག་པ་མཆོག་གི་
ལེའུ་སྟེ་སུམ་བཅུ་རྩ་བརྒྱད་པའོ།། །། དེ་ནས་དེ་བཞིན་གཤེགས་པ་དགྲ་བཅོམ་པ་གྲགས་པ་སངས་རྒྱས་ཐམས་ཅད་ཀྱི་སྟོབས་ཀྱི་འཁོར་ལོས་སྒྱུར་བ་རྡོ་རྗེ་འཁོར་ལོ་རིན་པོ་ཆེ་རྡོ་རྗེ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྟོང་ཁམས་ཁ་ལོ་སྒྱུར་བྱེད་པ། །ཆོས་ཀྱི་རྒྱལ་པོ་དགེ་བའི་སྟོབས། །དཔུང་ཆེན་ཐབས་ལ་མཁས་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་ཆོས་ཀྱི་ཡོན་ཏན་སངས་རྒྱས་ཐམས་ཅད་ཀྱི་ཡིད་བཞིན་གྱི་ནོར་བུ་རིན་པོ་ཆེ་དབང་གི་རྒྱལ་པོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་

89-1-133b

སོ། །རང་སེམས་དག་པའི་ནོར་བུ་ནི། །ཡོན་ཏན་དུ་མ་འབྱུང་བའི་གཞི། །མི་ཟད་དགེ་བ་རྫོགས་ལས་འབྱུང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཞིང་བཟང་པོ་མཚུངས་
མེད་སངས་རྒྱས་ཐམས་ཅད་ཀྱི་ཆོས་འཛིན་པའི་བཙུན་མོ་རིན་པོ་ཆེ་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཤེས་རབ་ཕ་རོལ་ཕྱིན་སྦྱོར་བ། །མཉམ་མེད་བླ་མ་
མཆོག་དགྱེས་པའི། །ཚུལ་འདི་དྲི་མེད་འོད་དུ་འགྱུར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བཀོད་པའི་རྒྱལ་པོ་སངས་རྒྱས་ཐམས་ཅད་ཀྱི་རྡོ་རྗེ་རབ་རིབ་སེལ་བ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདམ་སྐྱེས་པད་མ་མདངས་ཐོན་ལྟར། །རང་རིག་གསལ་བའི་ཡེ་ཤེས་ཉིད། །སྐྱོན་གྱིས་མ་གོས་ཕྲ་བ་ཉིད། །ཡེ་ཤེས་ཚུལ་འདི་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་མངོན་པར་འཕགས་པ་སངས་རྒྱས་ཐམས་ཅད་ཀྱི་སྣང་བར་བྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དྲི་མེད་ཨུད་པལ་འབར་
བ་ལ། །རྙོག་པའི་དྲི་མས་མ་གོས་ལྟར། །རང་གྲོལ་བྱུང་བའི་ཡེ་ཤེས་མཚུངས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྦྱིན་བྱེད་འོད་འཕྲོ་སངས་རྒྱས་ཐམས་ཅད་ཀྱི་སྒྲོན་མེ་
ལྟ་བུ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཉམ་ཉིད་མི་འགྱུར་སྣང་བ་བྲལ། །ཐོབ་མེད་ཐོབ་བྲལ་འགྲོ་འོང་མེད། །དབྲི་བ་དང་ནི་གང་མེད་པའི། །ཡེ་ཤེས་ཚུལ་འདི་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་པད་མོའི་དཔལ་སངས་རྒྱས་ཐམས་ཅད་ཀྱིས་ནམ་མཁའ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །

89-1-134a

ཆོས་རྣམས་ནམ་མཁའི་མཚན་ཉིད་ལས། །འགྱུར་བ་མེད་ཅིང་འཕོ་བ་མེད། །རྣམ་པ་ཀུན་དུ་མཁའ་དབྱིངས་ཀློང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་བཀོད་
པའི་རྒྱལ་པོ་སངས་རྒྱས་ཐམས་ཅད་ཀྱི་ཀུན་དུ་སོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐྱེ་བ་མེད་ལས་གང་སྐྱེས་པ། །དེ་ནི་མ་སྐྱེས་སྦྱོར་བའི་དངོས། །ཚད་
མེད་ཏིང་འཛིན་སྦྱོར་བ་པོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཤིན་དུ་བཟང་པོ་སངས་རྒྱས་ཐམས་ཅད་ཀྱི་ཡེ་ཤེས་ཀུན་དུ་རོལ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་འགག་པ་བྲལ་བ་ཡི། །ཆོས་ཉིད་རང་བྱུང་ལྷུན་གྱིས་གྲུབ། །དེ་ནི་འགག་པ་མེད་པའི་དངོས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་
པོ་ཆེའི་མཆོག་སངས་རྒྱས་ཐམས་ཅད་ཀྱི་རྡུལ་དང་བྲལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དེ་བཞིན་ཉིད་ལས་དབེན་པ་ཡི། །དོན་དམ་དམིགས་པའི་ཡུལ་
མིན་ཕྱིར། །འདྲེས་པ་རྡུལ་ཙམ་མེད་པ་ལས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུགས་ཤིན་དུ་ཞུགས་པ་སངས་རྒྱས་ཐམས་ཅད་ཀྱི་རི་བོ་གནོན་པ་རྡོ་རྗེ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གནས་པ་མེད་པ་གནས་པའི་མཆོག །མཆོག་གྱུར་རང་བྱུང་མཁའ་ལ་ལྡིང་། །ཐུགས་སྟོབས་ཆོས་ཀུན་འབྲས་བུ་ཆེ། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྣང་བ་མི་ཟད་པ་སངས་རྒྱས་ཐམས་ཅད་ཀྱི་རི་རབ་ལྷུན་པོའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །

89-1-134b

སངས་རྒྱས་ཀུན་གྱི་ནམ་མཁའི་ཁམས། །ཡོངས་སུ་གང་བའི་ཆོས་ཅན་མ། །ཏིལ་གྱི་འབྲུ་བཞིན་རྒྱས་པ་ཡི། །སངས་རྒྱས་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱ་མཚོ་སྦྱིན་སངས་རྒྱས་
ཐམས་ཅད་ཀྱིས་བདུད་དང་བདུད་ཀྱི་རིས་ཐམས་ཅད་འཇོམས་པར་བྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདུད་དང་ལོག་འདྲེན་མ་ལུས་རྣམས། །བྱམས་པའི་ཡེ་
ཤེས་ཆེན་པོ་ཡིས། །ལོག་རྟོག་མ་ལུས་ཞི་མཛད་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚངས་པའི་ཏོག་སངས་རྒྱས་ཐམས་ཅད་ཀྱི་སྣ་ཚོགས་དག་པའི་དཔལ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གྲགས་པའི་རྒྱལ་མཚན་དཔལ་བེའུ། །འབར་བ་འོད་འཕྲོ་ཉི་མའི་དབུས། །དྲ་བ་རིན་ཆེན་ནོར་བུ་སྟེ། །ཡེ་ཤེས་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་ཟླ་བའི་གཟུགས་སངས་རྒྱས་ཐམས་ཅད་ཀྱི་གཞལ་མེད་ཀྱི་གནས་དག་པ་སངས་རྒྱས་ཐམས་ཅད་ཀྱི་གནས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །དཔེ་མེད་ཡེ་ཤེས་དག་པའི་གནས། །བཀོད་པ་མཛེས་སྤྲས་རྣམ་བརྒྱན་པའི། །རང་གཞན་དཀྱིལ་འཁོར་སྣང་བ་འབྱུང་། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་ཐུབ་པ་འོད་འཕྲོ་བ་སངས་རྒྱས་ཐམས་ཅད་ཀྱི་འབྱུང་གནས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་འགྲོ་དབང་ཕྱུག་རྡུལ་བྲལ་བ། །དེ་ཉིད་བྱང་ཆུབ་དམ་པའི་
ཡུལ། །བཏང་སྙོམས་དག་པ་བླ་མེད་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་བྱང་ཆུབ་སེམས་དཔའ་དྲི་མེད་རྒྱལ་པོ་སངས་རྒྱས་ཐམས་ཅད་ཀྱི་འདྲེན་པ་མཆོག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་

89-1-135a

སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལྟ་བས་མི་ངོམས་ཆོག་མི་ཤེས། །རིག་པ་དང་ནི་ཞབས་མངའ་བ། །ངན་འགྲོའི་སྲིད་པ་ལེགས་སྐྱོབ་པའི། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་གྲགས་པ་སངས་རྒྱས་ཐམས་ཅད་ཀྱི་ཡོངས་སུ་དག་པར་བསྔོ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
ཡུལ་དང་དངོས་པོ་བྱེད་པ་པོ། །རྣམ་པར་མི་དམིགས་སྟོང་པ་ཉིད། །འཁོར་གསུམ་ཡོངས་སུ་དག་པ་སྟེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཀུན་དུ་རྒྱལ་བ་སངས་རྒྱས་ཐམས་
ཅད་ཀྱི་འགྲོ་བའི་སྡེ་དཔོན་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐར་པའི་ལམ་ན་ཐེག་པ་ཆེ། །གསང་བ་དམ་པ་ཆོས་འཁོར་ལོ། །རྣམ་པ་བཅུ་གཉིས་ཡོངས་བསྐོར་
བ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་འོད་སངས་རྒྱས་ཐམས་ཅད་ཀྱི་རྣམ་པར་རྟོག་པའི་དབའ་རླབས་གནོན་པ་རྡོ་རྗེ། སངས་རྒྱས་ཐམས་ཅད་ཀྱི་ཡེ་ཤེས་རྡོ་རྗེ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཔག་མེད་ཡེ་ཤེས་ཕྲ་བ་ཡིས། །དངོས་པོར་འཛིན་པའི་བྱིས་པ་རྣམས། །སྐྲག་ནས་ལམ་མཆོག་དགོད་མཛད་པ། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །ཡེ་ཤེས་བླ་མེད་གནས་ཐོབ་པས། །གཙང་མའི་གནས་མཆོག་ལེགས་གནས་པས། །བཅོམ་ལྡན་འོག་མིན་དེར་རྟག་བཞུགས། །ཀུན་དུ་སྤྱད་པའི་ས་ཕྱོགས་སོ། །དེ་བཞིན་གཤེགས་པ་
ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་དག་པ་དེ་བཞིན་ཉིད་ཀྱི་ཆོ་ག་སྟོན་པའི་ལེའུ་སྟེ་སུམ་བཅུ་དགུ་པའོ།། །།

89-1-135b

དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་འཛིན་པ་དེ་བཞིན་གཤེགས་པས་དེ་བཞིན་གཤེགས་པ་ཐམས་ཅད་ལ་འདི་སྐད་ཅེས་གསུངས་སོ། །བཅོམ་ལྡན་འདས་དེ་བཞིན་
གཤེགས་པ་ཐམས་ཅད། དཔེར་ན་ནམ་མཁའ་གང་དུ་ཡང་། །མཚན་ཅན་ཀུན་ལ་མི་གནས་ཏེ། །དེ་ཉིད་ཁྱབ་ཅིང་བདག་མེད་པས། །མི་ལྡན་པ་ཡང་མ་ཡིན་ཏེ། །ནམ་མཁའི་ཆོས་ཉིད་དེ་ལ་ནི། །ཀུན་ཏུ་རྟོག་པ་ཡོད་མིན་ཏེ། །
རྟོག་ཅིང་རྗེས་སུ་སྤྱོད་པ་ཡི། །བདག་དང་གཞན་དུ་རྟོག་མི་བྱེད། །དེ་བཞིན་ཆོས་རྣམས་ཐམས་ཅད་ཀུན། །རྨི་ལམ་ལྟ་བུར་སྣང་བ་སྟེ། །རྗེས་སུ་འགྲོ་དང་ལྡོག་པ་བྲལ། །དེ་བཞིན་གཤེགས་པའི་གཟུགས་བརྙན་བཞིན། །
རྨི་ལམ་དམ་ཚིག་ལས་བྱུང་བ། །དེ་ཉིད་སྒྱུ་མར་གྱུར་པ་དང་། །ཁྱད་པར་ཅུང་ཟད་ཡོད་མིན་ཏེ། །རྨི་ལམ་དང་ནི་དངོས་སྣང་གཉིས། །ཁྱད་པར་ཅུང་ཟད་ཡོད་མིན་ཏེ། །གཞན་དུ་དེ་ཉིད་རྟོགས་པར་བྱ། །རླུང་དང་བཅས་
པ་འཕོ་བའི་གནས། །འགྲོ་བ་ཀུན་གྱི་མགྲིན་པར་སྐྱེས། །ཡི་གེ་ཨོཾ་བཅས་གནས་པ་ཉིད། །ཨ་ནུ་ཏ་ར་བརྗོད་པ་གང་། །གཟུང་ཞིང་བསྒྱུར་དང་སྤེལ་བ་དང་། །སྒྱུ་མར་དྲན་དང་རྒྱས་གདབ་པས། །རྨིས་པ་བསམ་གཏན་ལམ་
དུ་འགྱུར། །ཀྱེ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་རྨི་ལམ་དེ་ནི་བདག་གིས་ཁམས་གསུམ་དུ་རྨི་ལམ་མཐོང་བར་བྱའོ་སྙམ་དུའང་མི་སེམས་སོ། །སྐྱེས་བུ་དེ་ཡང་བདག་གིས་རྨི་ལམ་གྱི་
ཆོས་མཐོང་ངོ་སྙམ་དུའང་སེམས་པ་མེད་དེ། དེ་བས་ན་ཁམས་གསུམ་དུ་སྣང་བའི་བྱ་བ་དེ་རྣམས་ཀྱང་། །བག་ཆགས་གཟུགས་སུ་སྣང་བའི་ཕྱིར། །རྨི་ལམ་ལྟ་བུར་བསྟན་པ་ཡིན། །འཁྲུལ་པ་དེ་ཉིད་རྒྱུ་མེད་
པས། །རྨི་ལམ་ཉིད་དང་མཚུངས་པར་བསྟན། །སྔ་མ་མི་གནས་རང་གྲོལ་ཏེ། །ཕྱི་མ་འབྱུང་བ་མི་འགག་ཕྱིར། །རྨི་ལམ་ལས་ནི་འབྱུང་བར་བཤད། །དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་

89-1-136a

ཕྱོགས་བཅུའི་འཇིག་རྟེན་གྱི་ཁམས་ཀྱི་སངས་རྒྱས་དང་བྱང་ཆུབ་སེམས་དཔའ་ཇི་སྙེད་པ་རྣམས་དང་། སེམས་ཅན་ཇི་སྙེད་པ་དེ་དག་ཐམས་ཅད་ཀྱང་རྨི་ལམ་ལ་བདག་མེད་པ་རྡོ་རྗེ་
ཡང་དག་པར་བདེན་པས་སྟོང་པའི་གནས་སུ་རྟོགས་པར་བྱའོ། །དེ་ནས་དེ་བཞིན་གཤེགས་པ་སྒྲ་རྣམ་པར་བསྒྲགས་པ་སངས་རྒྱས་ཐམས་ཅད་ཀྱི་ཡེ་ཤེས་གསང་བ་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་རྣམ་པར་དག་པས་ནི། །ཁམས་དང་དབང་པོ་མཐའ་ཡས་དང་། །བསམ་པའི་དྲི་མ་རང་དག་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་
བཅོམ་ལྡན་འདས་དེ་བཞིན་གཤེགས་པ་ཟླ་བ་རྒྱས་པའི་ཞལ་མངའ་བ་སངས་རྒྱས་ཐམས་ཅད་ཀྱི་ཡེ་ཤེས་རྟག་པར་བརྩེ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
སེམས་ཅན་ཐ་མ་འབྲིང་དང་ནི། །མཆོག་རྣམས་བདུད་རྩི་ཐོབ་བྱའི་ཕྱིར། །ལྷག་པར་སྤྲོ་བ་བསྐྱེད་པ་གང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་པད་མའི་འོད་ཟེར་སངས་རྒྱས་ཐམས་
ཅད་ཀྱི་ཀླུ་དབང་འདུད་པའི་རྒྱལ་པོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཚེ་དང་གཟུགས་དང་ལོངས་སྤྱོད་ཀྱིས། །གླིང་གསུམ་གནས་ལས་མངོན་འབྱུང་བ། །
ལས་དང་སྤྱོད་པ་རྟོག་པ་ལས། །བཟློག་དང་ཡེ་ཤེས་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བརྟུལ་ཞུགས་བཟང་པོ་སངས་རྒྱས་ཐམས་ཅད་ཀྱི་རྫུ་འཕྲུལ་རྨད་དུ་བྱུང་བ་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཇིག་རྟེན་ཁམས་ནི་དུ་མ་ཡི། །གླིང་རྣམས་ཀུན་དུ་འཇུག་བྱེད་པ། །ཆོ་འཕྲུལ་བསམ་མི་ཁྱབ་པ་ནི། །འབྱུང་བ་ཚུལ་འདི་བསྟན་

89-1-136b

པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྒྲོན་མའི་རྒྱལ་པོ་སངས་རྒྱས་ཐམས་ཅད་ཀྱི་རྙོག་པ་སེལ་ཅིང་བསིལ་བ་ཙན་དན་ལྟར་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །གང་དུ་སྐྱེ་དང་འཆི་བ་དང་། །ནད་དང་རྒས་དང་རྒུད་ལས་གྲོལ། །ཆུ་བོ་ཆེ་ལས་སྒྲོལ་བ་པོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གློག་གི་རྟོག་སངས་རྒྱས་ཐམས་
ཅད་ཀྱི་སྤྲོས་པ་ཚད་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གཏོང་བ་སྤྲོ་དང་སྨྲ་བ་དང་། །མཚུངས་པ་རྒྱན་ལས་འབྱུང་བ་གང་། །དེ་ཉིད་དད་པའི་སེམས་གྲོལ་བས། །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་ཟེར་རྒྱལ་པོ་སངས་རྒྱས་ཐམས་ཅད་ཀྱི་འོད་མཚུངས་པ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །འདི་ཡི་འོད་ཟེར་གང་སྤྲོས་པར། །ཏིང་འཛིན་བསྐྱེད་དང་དད་པ་ཐོབ། །བདེ་བ་སྐྱེད་ལ་སྡུག་བསྔལ་ཞི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྐར་མ་
ཅན་སངས་རྒྱས་ཐམས་ཅད་ཀྱིས་མ་རིག་པ་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དུས་གསུམ་སངས་རྒྱས་ཐམས་ཅད་ཀྱིས། །བྱང་ཆུབ་སེམས་གཅིག་
དག་པ་ལས། །གཞན་དུ་ཡེ་ཤེས་མ་རྙེད་པས། །བཙལ་དུ་མེད་པའི་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གྲགས་པ་རྫོགས་ལྡན་སངས་རྒྱས་ཐམས་ཅད་ཀྱིས་འདུ་བྱེད་རྣམ་པར་དག་པ་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་སངས་རྒྱས་ཞིང་དག་པ། །དེ་སྙེད་བྱང་ཆུབ་སེམས་དཔའི་ཚོགས། །ཉན་ཐོས་རང་རྒྱལ་འཕགས་པའི་ཚོགས། །རྣམ་

89-1-137a

དག་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་པད་མའི་སྙིང་པོ་སངས་རྒྱས་ཐམས་ཅད་ཀྱི་མིང་དང་གཟུགས་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བསམ་པ་དུག་མེད་པ། །ཕུན་སུམ་ཚོགས་པའི་གཞི་ཅན་ཏེ། །ཟླ་བ་ཚེས་པའི་ངོ་བཞིན་ཏེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དཔལ་
རྒྱལ་མཛེས་སངས་རྒྱས་ཐམས་ཅད་ཀྱི་སྐྱེ་མཆེད་དྲུག་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལོངས་སྤྱོད་གཙང་བའི་བསྒྲུབས་པ་དང་། །ལུས་དང་
ཡན་ལག་དངོས་པོ་ཡི། །རྡུལ་ཕྲན་གྱུར་པ་ལེགས་ཕུལ་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྙོག་པ་མེད་པའི་དོན་སངས་རྒྱས་ཐམས་ཅད་ཀྱིས་རྣམ་པར་ཤེས་པའི་ཆོས་
རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དེ་བཞིན་ཉིད་ཀྱི་སྤྱོད་ཡུལ་ནི། །བསོད་ནམས་ཚོགས་ནི་སྒྱུ་མ་སྟེ། །ཡེ་ཤེས་ཚོགས་ནི་ནམ་མཁའ་ལྟར། །བྱང་
ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དྲག་ཤུལ་སྡེ་ཅན་སངས་རྒྱས་ཐམས་ཅད་ཀྱི་རེག་པ་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །ཡན་ལག་བཞི་ལྡན་དཔུང་ཚོགས་བཅས། །བླ་མེད་རྣལ་འབྱོར་པ་ཡི་གནས། །ཞིང་དང་བསམ་པ་དག་པ་ཡིས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་བསོད་ནམས་གཟི་བརྗིད་སངས་རྒྱས་ཐམས་ཅད་ཀྱི་ཚོར་བ་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྒྱུ་མ་ལྟ་བུའི་སྦྱོར་བ་ཡིས། །འགྲོ་བ་ཀུན་

89-1-137b

ལ་སྙོམས་པ་གང་། །བརྟུལ་ཞུགས་ཁྱད་པར་བསྟན་པ་སྟེ། །ཚུལ་འདི་བྱང་ཆུབ་སྙིང་པོ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་མཐུ་རྩལ་མངའ་བ་སངས་རྒྱས་ཐམས་ཅད་ཀྱི་སྲེད་པ་རྣམ་པར་དག་པ་སངས་
རྒྱས་ཐམས་ཅད་ཀྱི་དཔལ་དགྱེས་པས་ཁྱབ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱལ་བ་རྒྱ་མཚོ་མ་ལུས་པའི། །ཡེ་ཤེས་སྤྱོད་པ་རྣམ་དག་པ། །ཞིང་ཁམས་
འགྱུར་མེད་རང་སྣང་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐོགས་མེད་དཔལ་སངས་རྒྱས་ཐམས་ཅད་ཀྱི་ལེན་པ་རྣམ་པར་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་གཱ་ཀླུང་གི་བྱེ་མ་སྙེད། །དཔག་ཏུ་མེད་པའི་སངས་རྒྱས་གང་། །ཞིང་ཁམས་གཅིག་པར་ཡོངས་སུ་དག །དེ་ཉིད་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་ལྷའི་སྒྲ་ཅན་སངས་རྒྱས་ཀྱི་སྲིད་པ་རྣམ་པར་དག་པ་སངས་རྒྱས་ཐམས་ཅད་ཀྱི་དམིགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །ཕྱོགས་བཅུ་རྣམ་པ་ཐམས་ཅད་དུ། །གང་ཞུགས་བདེ་བར་གཤེགས་པའི་ཚོགས། །མཛད་པ་གཅིག་པའི་རྣམ་ཐར་གྱིས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་
ཡེ་ཤེས་ཕུང་པོ་སངས་རྒྱས་ཐམས་ཅད་ཀྱི་སྐྱེ་བ་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་མ་བྱོན་འབྱུང་བ་དང་། །འདས་དང་ད་ལྟར་བཞུགས་
པ་ཡི། །སངས་རྒྱས་ཁམས་རྒྱུད་གཅིག་པའི་ངང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཁ་ལོ་སྒྱུར་བ་སངས་རྒྱས་ཐམས་ཅད་ཀྱི་རྒ་ཤི་རྣམ་པར་དག་པ་རྡོ་རྗེ་ཞེས་བྱ་བའི་ཏིང་

89-1-138a

ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་ཀུན་རྟོག་པ་ཞི་བ་ཡི། །ཟབ་པ་དང་ནི་རྒྱ་ཆེའི་བདག །མདོ་དང་རྒྱུད་དང་རྟོག་པ་ལས། །བྱང་ཆུབ་སེམས་འདི་བསྟན་པ་ཡིན་ཞེས་གསུངས་
སོ། །དེ་ནས་དེ་བཞིན་གཤེགས་པ་སྐྱེ་དབང་མཚུངས་པ་སངས་རྒྱས་ཐམས་ཅད་ཀྱི་རྟེན་འབྲེལ་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ཅན་སྨིན་པར་བྱེད་པ་
དང་། །སངས་རྒྱས་ཞིང་སྦྱོང་ཕྲིན་ལས་དག །དེ་ཉིད་མཚུངས་པ་གཅིག་པའི་སྐུ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་འཛིན་པ་དེ་བཞིན་གཤེགས་པ་ཐམས་ཅད་ཀྱི་བདག་
པོས་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་དེ་དག་ཐམས་ཅད་ལ་འདི་སྐད་ཅེས་གསུངས་སོ། །བསམ་གཏན་གནས་སུ་བདེ་བའི་སྟན་ལ་ནི། །གནས་ནས་དུས་གསུམ་བཞུགས་པའི་སངས་རྒྱས་
རྣམས། །དམིགས་ཏེ་སྣ་ཚོགས་མཆོད་པའི་སྤྲིན་འཁྲིགས་པ། །དང་པོར་སྤྲོ་ཚོགས་བློ་ལྡན་གྱིས་བྱ་ཞིང་། །དགེ་བ་རྣམས་ནི་འཕེལ་བར་བྱ་བའི་ཕྱིར། །སྡིག་པ་ཐམས་ཅད་བཤགས་པ་ལ་སོགས་བྱ། །གང་ཞིག་ཐོག་
མེད་སྲིད་པའི་ཆུ་ཀླུང་དུ། །མ་ལུས་ཀུན་རྟོག་གིས་བསྐྱེད་རྙོག་པ་རྣམས། །ཐུགས་རྗེ་ཆེ་ལྡན་སྤྱན་སྔར་དེ་དག་ནི། །རིམ་བཞིན་ཆོ་གས་ཐམས་ཅད་བཤགས་པར་བགྱི། །རྫོགས་སངས་རྒྱས་དང་བྱང་ཆུབ་སེམས་དཔའ་དང་། །
འཕགས་པའི་ཚོགས་ཀྱིས་དགེ་བ་མཛད་རྣམས་ལ། །དེ་དག་ཀུན་ལ་རྗེས་སུ་ཡི་རང་ཞིང་། །བྱང་ཆུབ་བླ་མེད་གནས་སུ་བསྔོ་བར་བགྱི། །སེམས་ཀྱི་རོལ་པ་རི་མེད་ཟླ་འདྲེས་བསྒྲུབས། །སྙིང་རྗེ་དམ་པ་མི་ཟད་པ་ཡི་ཐབས། །
རང་གི་ཡིད་ལ་གནས་པར་གྱུར་པ་ཡི། །བདེ་གཤེགས་རྣམས་ལ་རྟག་ཏུ་སྐྱབས་སུ་མཆི། །རྟོག་པ་མ་ལུས་པ་ལས་ངེས་གྲོལ་ཞིང་། །སེམས་དཔའ་དམ་པ་རྣམས་ཀྱི་ཕུན་ཚོགས་གཞི། །དངོས་རྣམས་མ་ལུས་ཡེ་

89-1-138b

ཤེས་ངོ་བོ་ཉིད། །དམ་པའི་ཆོས་ལ་རྟག་ཏུ་སྐྱབས་སུ་མཆི། །འཆིང་བ་མཐའ་དག་གནས་ལས་གྲོལ་འགྱུར་ཞིང་། །སྙིང་རྗེ་མཆོག་གིས་བསྒྲུབ་པའི་དཔལ་དང་ལྡན། །རབ་དགའ་ལ་སོགས་ས་ལ་ངེས་བཞུགས་པའི། །
བརྟུལ་ཞུགས་དབང་པོའི་ཚོགས་ལ་བདག་སྐྱབས་མཆི། །བསམ་དང་རྣམ་པར་སྨིན་པ་དག་གྱུར་པས། །སྒྲིབ་པ་ཀུན་གྱི་བག་ཆགས་ཡང་དག་དོན། །ལྷག་པར་མོས་པས་རྣམ་པར་བརྒྱན་པ་ཡི། །སེམས་ནི་དམ་
པ་བྱང་ཆུབ་མཆོག་ཏུ་བསྐྱེད། །རྒྱལ་བ་སྲས་བཅས་ཀུན་གྱི་ལམ་གཅིག་པོ། །སྦྱིན་པ་ལ་སོགས་དཀར་པོའི་ཡོན་ཏན་བཅུ། །རྫོགས་སངས་རྒྱས་བདག་མ་ལུས་ངོ་བོའི་བློས། །ཡང་དག་ཏུ་ནི་རྣམ་པར་གནས་པར་
བགྱི། །སྙིང་རྗེས་འཇིག་རྟེན་སེམས་ཅན་མ་ལུས་པ། །ལྟ་བས་བཅིངས་པ་དུ་མ་དམིགས་ནས་ནི། །ཡང་དག་བྱང་ཆུབ་སེམས་ནི་མཉམ་མེད་པ། །སྔགས་པས་རིག་པ་འདི་ནི་བསམ་པར་བྱ། །ངོ་བོ་ཉིད་དང་བྲལ་
ཕྱིར་སྟོང་པ་སྟེ། །དེ་བཞིན་རྒྱུ་དང་བྲལ་བས་མཚན་མ་མེད། །རྟོག་པ་རྣམས་དང་བྲལ་ཕྱིར་དངོས་པོ་ནི། །མ་ལུས་སྨོན་པ་ལས་ནི་ངེས་པར་གྲོལ། །ཐ་དད་དམིགས་པའི་འདུ་ཤེས་ལོག་པ་ཡི། །དྲི་མའི་དྲ་བ་རྣམས་ནི་
ལེགས་བསལ་ནས། །རྟོག་པ་མ་ལུས་ཡེ་ཤེས་རྒྱལ་བ་ཡི། །སྣང་སྟོང་དྲི་མེད་ངང་ལས་འདི་དོན་བརྗོད། །ཨོཾ་སྭ་བྷཱ་བ་ཤུད་དྷཱཿསརྦ་དྷརྨཱཿ སྭ་བྷཱ་བ་ཤུད་དྷོ྅ཧྃ། ཨོཾ་བཛྲ་སྭ་བྷཱ་བ་ཤུད་དྷཱཿསརྦ་དྷརྨཱཿསྭ་བྷཱ་བ་ཤུད་དྷོ྅ཧྃ། 
ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏ་མ་ཀོ྅ཧྃ། དེ་ལྟར་མ་ལུས་འདོད་པ་སྤངས་པ་ཡིས། །བདག་ཉིད་དམ་ནི་གཞན་དག་རང་རིག་ཉིད། །གཟུགས་ནི་ལྷར་གྱུར་པ་ལ་ཡང་དག་མཆོད། །དམ་ཚིག་འདི་ནི་བདེ་གཤེགས་
རྣམས་ཀྱིས་གནང་། །རྗེས་སུ་འཐུན་པར་འགྲོ་བའི་དོན་རྣམས་དང་། །མ་ལུས་རྒྱལ་བ་མཆོད་པར་ཡོངས་སུ་བརྟགས། །ལུས་ལ་སོགས་པའི་ལས་རྣམས་དེ་དང་ནི། །རྟག་ཏུ་ལེགས་པར་མཉམ་པར་གཞག་བྱ་། །རྣམ་

89-1-139a

པ་འདི་འདྲའི་སེམས་དང་ལུས་དང་ནི། །ངག་གི་ལས་རྣམས་ཅི་ཡང་རུང་བ་དག །ཕྱག་རྒྱ་དང་ནི་སྔགས་ཀྱི་རྣམ་པ་རུ། །རྫོགས་པའི་སངས་རྒྱས་ཀུན་གྱིས་དེ་གསུངས་སོ། །དེ་བས་ལུས་སོགས་དགེ་དང་མི་དགེ་བའི། །
རྣམ་པའི་ལས་རྣམས་སེམས་ཀྱི་དབང་ལས་གསུངས། །དེ་ལྟར་རྟོག་པ་མ་ལུས་སྤངས་པ་ཡི། །སེམས་ནི་ནག་པོའི་ལས་སུ་ག་ལ་འགྱུར། །དངོས་པོ་གཅིག་ལའང་རྣམ་པ་སྣ་ཚོགས་པའི། །ཀུན་དུ་རྟོག་པས་བསགས་པའི་རྣམ་
པ་ལས། །སྡུག་བསྔལ་བདེ་དང་གྲོལ་བ་སྐྱེད་བྱེད་པའི། །ལས་ཀྱི་ཁྱད་པར་མང་པོ་འབྱུང་བར་འགྱུར། །འདིར་ནི་རབ་ཏུ་མི་གནས་ཡེ་ཤེས་སྐུ། །འཁོར་བ་དག་ཅིང་རྣམ་པར་གྲོལ་བའི་ཐུགས། །བྱམས་མགོན་རྡོ་རྗེ་དེ་ཡང་དེ་ལྟར་སྣང་། །
ཚུལ་འདི་རྟོགས་དཀའ་ཕན་པ་སྒྲུབ་པ་ཡིན་ཞེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་
རྒྱལ་བ་ལས་སངས་རྒྱས་ཐམས་ཅད་ཀྱི་ངོ་བོ་ཉིད་ཀྱི་དོན་འབྱུང་བ་རྡོ་རྗེའི་ལེའུ་སྟེ་བཞི་བཅུ་པའོ།། །། དེ་ནས་དེ་བཞིན་གཤེགས་པ་མེ་ཏོག་གི་དཔལ་སངས་རྒྱས་ཐམས་ཅད་ཀྱི་སྐུ་གསུམ་སྟོན་པ་སྣང་
བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དབང་ཕྱུག་ཆེན་པོ་ཡེ་ཤེས་ཀྱི། །འབྱུང་བ་སྐུ་ནི་འབྱུང་ལས་གྱུར། །རྟེན་འབྲེལ་སྣང་བ་གསལ་བར་འཆར། །བྱང་ཆུབ་ཚུལ་
འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྒྲ་ཅན་འཛིན་རྒྱལ་བ་སངས་རྒྱས་ཐམས་ཅད་ཀྱི་འོད་ཟེར་ཕྲེང་བ་འཁྲིགས་པ་ལྟར་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣ་ཚོགས་འོད་ནི་བཀྱེ་བ་ཡང་། །རང་རིག་བསམ་གཏན་ལས་བྱུང་བ། །བྱང་ཆུབ་དོན་གྱི་རྒྱུ་ཆེན་པོར། །དོན་འབྱུང་ཚུལ་འདི་བསྟན་པའོ་ཞེས་གསུངས་སོ། །དེ་ནས་

89-1-139b

དེ་བཞིན་གཤེགས་པ་རྩི་སྨན་རྒྱལ་པོ་སངས་རྒྱས་ཐམས་ཅད་ཀྱི་ཀུན་ནས་འོད་ཟེར་དོན་ཆེན་བྱེད་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་སྐུ་ཡི་ཚུལ་གྱུར་པ། །རྡོ་རྗེ་སྐྱིལ་
དཀྲུང་གནས་པ་ཡི། །སྣ་ཚོགས་རིན་ཆེན་བརྒྱན་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱུ་སྐར་རྒྱལ་པོ་སངས་རྒྱས་ཐམས་ཅད་ཀྱི་དམིགས་པ་དག་པ་རྡོ་རྗེ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གསུང་གི་དབྱངས་སྙན་མ་ལུས་པ། །བརྗོད་པ་འགག་མེད་རང་བྱུང་བས། །འདི་ཉིད་གསང་བ་དོན་བསྡུད་པའི། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བླ་མེད་སྨན་པའི་རྒྱལ་པོ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་མཆོད་རྟེན་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །དབྱིངས་དང་ཡེ་ཤེས་ཚུལ་གཅིག་ཏུ། །མི་གནས་ལྡོག་པ་མེད་པ་ཡི། །བྱང་ཆུབ་སེམས་ཀྱི་ངང་གནས་པས། །བླ་མེད་ཡེ་ཤེས་ཚུལ་བསྟན་པའོ་ཞེས་གསུངས་སོ། །དེ་ནས་
དེ་བཞིན་གཤེགས་པ་བསོད་ནམས་གླང་པོ་ཡེ་ཤེས་ཐོགས་པ་མེད་པ་རྡོ་རྗེ་སངས་རྒྱས་ཐམས་ཅད་ཀྱི་ཚུལ་ལ་གནས་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐུ་གསུང་ཐུགས་
ནི་རྡོ་རྗེའི་ངང་། །རོ་མཉམ་ཡེ་ཤེས་མཚུངས་མེད་པ། །གཅིག་དང་དུ་མ་ལས་གྲོལ་ཕྱིར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྟོག་པ་གཅོད་པར་མཛད་པའི་སངས་རྒྱས་
ཐམས་ཅད་ཀྱི་ཚེ་ལ་དབང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དེ་བཞིན་གཤེགས་པ་ཀུན་འདུས་པའི། །ཡོན་ཏན་ཚད་མེད་ཕྲེང་བ་ཅན་དཔག་མེད་

89-1-140a

རིན་ཆེན་གཏེར་འཆང་མཛད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྣམ་པར་གྲགས་པའི་རྒྱལ་པོ་སངས་རྒྱས་ཀུན་གྱི་ལས་ལ་དབང་བ་རྡོ་རྗེ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཀར་ནག་ལས་ནི་རང་དག་བཏགས་པ་ཙམ། །སྣང་ཙམ་རྒྱུ་འབྲས་འདིས་ནི་ཁྱད་པར་ཕྱེ། །སྙིང་པོ་དོན་སྤྱོད་བསམ་གཏན་པ་ཡི་ཡུལ། །མཆོག་གྱུར་
དོན་ནི་འབྱུང་བའི་ས་ཞེས་གསུངས་སོ། །དེ་ནས་དེ་བཞིན་གཤེགས་པ་ཉི་མའི་འོད་ཟེར་སངས་རྒྱས་ཐམས་ཅད་ཀྱི་སེམས་ལ་དབང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །དྲན་པའི་སྟོབས་ནི་མཉམ་བཞག་པ། །ཤེས་ལྡན་རྒྱལ་པོ་བག་ཡོད་ཀྱིས། །དཔའ་བོ་འགྲོ་བའི་དོན་ལ་སྤྱད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་
ཀྱི་མཛོད་སངས་རྒྱས་ཐམས་ཅད་ཀྱི་ལོངས་སྤྱོད་ལ་དབང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འོ་མའི་རྒྱ་མཚོ་ཆེན་པོ་ལས། །བསྲུབས་པས་བདུད་
རྩིའི་ཞུན་མ་ནི། །འཆི་མེད་འགྲོ་བ་ཚིམ་བྱེད་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ཀྱི་མཛོད་སངས་རྒྱས་ཐམས་ཅད་ཀྱི་ཤེས་རབ་ལ་དབང་བ་རྡོ་རྗེ་ཞེས་བྱ་བའི་ཏིང་
ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྲིད་པའི་འཇིག་རྟེན་ཐམས་ཅད་དུ། །གང་དང་གང་དུ་སྐྱེས་པ་རྣམས། །སེམས་ཅན་འདུལ་བའི་ཐབས་ཚུལ་གྱིས། །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བློ་གྲོས་བཟང་པོ་སངས་རྒྱས་ཐམས་ཅད་ཀྱི་རྫུ་འཕྲུལ་ལ་དབང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །

89-1-140b

ཞིང་ཁམས་ཀུན་དུ་ས་གཡོ་ཞིང་། །འོད་དང་སྒྲ་དང་མེ་ཏོག་ཆར། །དད་ལྡན་ཚུལ་དང་ལྷན་ཅིག་ཏུ། །དགོངས་པ་ཡེ་ཤེས་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་དབང་མཚུངས་སངས་རྒྱས་
ཐམས་ཅད་ཀྱི་མོས་པ་སྒྱུར་བ་ལ་དབང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དྲན་དང་འདུན་དང་མོས་པ་དང་། །ཡེ་ཤེས་ཐོགས་མེད་དབང་ཕྱུག་ཅེས། །རྟོག་པ་ཡོང་
བྲལ་མི་ཕྱེད་པ། །དྲི་མེད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་རྡོ་རྗེའི་སྡེ་སངས་རྒྱས་ཐམས་ཅད་ཀྱི་སྨོན་ལམ་ལ་དབང་བ་སངས་རྒྱས་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཞིང་ཁམས་གཅིག་ནས་གཅིག་ཏུ་བགྲོད་པ་དང་། །འཇུག་པར་སྒྱུར་བའི་ཚུལ་ནི་མི་ཟད་པ། །བླ་མེད་འཕེན་པ་རྣམ་དག་ཁྱད་པར་འཕགས། །ཡེ་ཤེས་དྲི་མེད་ཚུལ་འདི་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པ་ཤེས་རབ་བརྩེགས་སངས་རྒྱས་ཐམས་ཅད་ཀྱི་ཡེ་ཤེས་ལ་དབང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡེ་ཡེ་
ཤེས་ཀུན། །འདུ་བ་རྒྱ་མཚོའི་ཆུ་བྲན་བཞིན། །བསྡུད་པ་ཡོངས་སུ་དག་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལེགས་པར་གནས་པ་སངས་རྒྱས་
ཐམས་ཅད་ཀྱི་ཆོས་ལ་དབང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདེན་པ་བཞི་དང་གཉིས་དག་གིས། །ཡོངས་སུ་བསྡུད་པ་བཅུ་གཉིས་དང་། །བཅུ་དྲུག་རྣམ་དབྱེ་
ཆོས་འབྱུང་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བློ་དབྱངས་སངས་རྒྱས་ཐམས་ཅད་ཀྱི་ཡེ་ཤེས་མངོན་པར་འཕགས་པའི་རྒྱལ་པོ་རྡོ་རྗེའི་ཏིང་ངེ་འཛིན་ལ་སྙོམས་

89-1-141a

པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་སྦྱངས་པའི་ཡོན་ཏན་ནི། །བཅུ་གཉིས་དེ་བཞིན་གཤེགས་པ་ཡི། །སྦྱོར་ཚུལ་ཡེ་ཤེས་གསང་བ་ཡིན། །དེ་ཉིད་ཚུལ་འདི་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་ཚངས་པའི་དབྱངས་སངས་རྒྱས་ཐམས་ཅད་ཀྱི་ཚངས་པར་སྤྱོད་པ་ཚད་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བརྟུལ་ཞུགས་སྡོམ་པས་བདེ་
ཐོབ་སྟེ། །ཚུལ་ཁྲིམས་ཀྱིས་ནི་ཏིང་འཛིན་དང་། །བསམ་གཏན་ཤེས་རབ་ཡོངས་གྲོལ་སྐྱེ། །དེ་ཉིད་བྱང་ཆུབ་དགྲ་བཅོམ་འགྱུར་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་མཆོག་སངས་རྒྱས་ཐམས་ཅད་
ཀྱི་གནས་གོས་པ་མེད་པའི་ཚུལ་རྡོ་རྗེ་སངས་རྒྱས་ཐམས་ཅད་ཀྱི་ཐིམ་པ་རྡོ་རྗེ་སྟོན་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལན་ཚྭ་ཆུ་ལ་ཐིམ་པ་ལྟར། །འདྲེས་པས་སོ་སོ་དམིགས་
པ་བྲལ། །གཅིག་ཏུ་བྱེད་པའི་བསམ་གཏན་མཆོག །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འབྲུག་སྒྲའི་དབྱངས་སངས་རྒྱས་ཐམས་ཅད་ཀྱི་གཤེགས་པ་དང་བཞུད་པ་དམིགས་པ་མེད་
པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུན་ཆད་མེད་པའི་བྱང་ཆུབ་སེམས། །དེ་ཉིད་འགྲོ་འོང་བྲལ་བའི་སེམས། །ཆུ་ལ་ཆུ་བཞག་གནས་པ་ལས། །བྱང་ཆུབ་ཚུལ་
འདི་བསྟན་པའོ་ཞེས་གསུངས་སོ། །དེ་ནས་འདི་ནི་གསུངས་ཙམ་གྱིས། །སྐུ་གསུམ་དབྱེར་མེད་རྡོ་རྗེ་ཅན། །མཉེས་པའི་སྤྱན་ནི་གདངས་ནས་སུ། །རྡོ་རྗེ་ཐུགས་ནི་རྗེས་སུ་དྲན། །སྤྲོས་པའི་སྤྱོད་པ་ལ་གནས་པ། །མཚན་
མེད་སྤྲོས་པ་མེད་པ་ཡི། །རྡོ་རྗེ་གླུ་ཡིས་ཡོངས་བསྐུལ་བའི། །ལྷ་མོའི་ཚོགས་དང་ལྷན་ཅིག་རོལ། །སེམས་དཔའ་གསུམ་དང་ལྡན་པ་ཡི། །སྦྱོར་བ་རང་གཟུགས་རྒྱུ་འཐུན་པ། །དཀྱིལ་འཁོར་དབུས་སུ་གནས་པ་ཡི། །

89-1-141b

གཙོ་བོ་སངས་རྒྱས་བདག་པོའི་སྐུ། །རིག་མ་མངོན་པར་བསྔགས་པས་ནི། །གནས་བཞི་རྣམས་སུ་ལྷ་མོ་བཞི། །རྟག་ཏུ་སྦྱོར་བས་བསྒོམ་པར་བྱ། །རྒྱན་རྣམས་ཐམས་ཅད་ཡོངས་སུ་རྫོགས། །མཚན་གྱིས་མཚན་པའི་སྤྱན་
ལ་སོགས། །པད་མོ་རྡོ་རྗེ་མཉམ་སྦྱར་བའི། །གསང་སྔགས་རབ་ཏུ་བསམ་པ་ཉིད། །འོད་ཟེར་ལྔ་ནི་འབར་བ་ཡི། །སྦྱོར་བ་རྡོ་རྗེ་འཛིན་གྱིས་བསམ། །རང་ལུས་ངག་སེམས་རྡོ་རྗེ་ལ། །བདེ་བ་ཕབ་པས་བདེ་ཐོབ་འགྱུར། །བསྲུབ་དང་སྲུབ་
པའི་ཚུལ་གྱིས་ནི། །ཡེ་ཤེས་ཡང་དག་བསྐྱེད་པ་ཡི། །འབྱུང་གནས་དབུ་མའི་རྩེ་རུ་གཟུང་། །རྣམ་པར་བཟློག་ཅིང་དྲངས་པ་ཡིས། །རླུང་དང་རྣམ་ཤེས་བདེ་ཆེན་དུ། །རོ་གཅིག་རྟོག་པ་ནུབ་པ་ཡི། །ཁྱབ་པས་རླུང་དང་
དབྱེར་མེད་པར། །གནས་སོགས་རྣམས་སུ་རྒྱས་བྱེད་པའི། །ཀུན་དུ་འཕེལ་བའི་སྟོབས་རྒྱས་པའི། །དབང་བསྐུར་དམ་པ་གནས་པར་བྱེད། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་
བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ཞེས་བྱ་བའི་རྒྱུད་ལས་སངས་རྒྱས་ཐམས་ཅད་ཀྱི་འདུས་པ་ཆེན་པོའི་ལེའུ་སྟེ་ཞེ་གཅིག་པའོ།། །། དེ་ནས་བཅོམ་
ལྡན་འདས་དེ་བཞིན་གཤེགས་པ་མངོན་པར་ཤེས་པའི་རྩེ་མོ་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །ཆོས་རྣམས་ཐམས་ཅད་མཚན་ཉིད་ནི། །ངོ་བོ་ཉིད་མེད་སྤྲོས་ལས་དབེན། །མཉམ་པ་ཉིད་ལ་རྟོག་མི་མངའ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཏོག་གི་འོད་སངས་
རྒྱས་ཐམས་ཅད་ཀྱི་མཚུངས་པ་མེད་པའི་འདྲེན་པ་གཅིག་པུ་པ་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་པོའི་ཆོས་ལས་འདས་པ་གང་། །དངོས་

89-1-142a

མེད་ནམ་མཁའ་དག་པ་ཡི། །ཡེ་ཤེས་འདི་ནི་རྨད་པོ་ཆེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མི་འདྲེན་དགེ་བ་སངས་རྒྱས་ཐམས་ཅད་ཀྱི་ཕྱི་སྟོང་པ་ཉིད་ཅེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བརྟགས་པ་རྟོག་པ་རབ་ཞི་བ། །ཡུལ་སྣང་རྣམ་རིག་མ་གྲུབ་པས། །ལུགས་འབྱུང་དག་པའི་ནམ་མཁའ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་ཚངས་པའི་དཔལ་སངས་རྒྱས་ཐམས་ཅད་ཀྱི་ནང་སྟོང་པ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕྱི་ནང་ཐ་དད་མི་གནས་པ། །སེམས་དེ་གང་དུའང་གནས་མེད་
དེ། །མདོར་ན་དངོས་མེད་རང་བཞིན་ཅན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྐྱེས་མཆོག་སངས་རྒྱས་ཐམས་ཅད་ཀྱི་ཕྱི་ནང་སྟོང་པ་ཉིད་ཀྱི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་
ཆུབ་ཀྱི་སེམས་འདི་གསུངས་སོ། །ཡང་དག་བསྡུས་པའི་ཆོས་ཅན་ལ། །མ་གྲུབ་པ་ཡི་ངང་ལ་གནས། །དེ་ཉིད་ལྷུན་གྱིས་གྲུབ་པ་སྟེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྤྱན་སྟུག་སངས་
རྒྱས་ཐམས་ཅད་ཀྱི་སྟོང་པ་ཉིད་སྟོང་པ་ཉིད་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟེན་འབྲེལ་ཙམ་དུའང་མི་གནས་པ། །རང་བྱུང་བདག་མེད་སྟོང་པ་ཉིད། །གཉིས་སུ་མེད་པའི་འོད་གསལ་བ། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཀླུས་སྦྱིན་སངས་རྒྱས་ཐམས་ཅད་ཀྱི་ཆེན་པོ་སྟོང་པ་ཉིད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡེ་
ཤེས་སྒྲོན་མེ་འབར་བ་ནི། །མི་ཟད་དུ་མ་རོ་གཅིག་པའི། །དྲན་པས་སྟོང་པ་བདེ་བ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བདེན་པའི་ཏོག་སངས་རྒྱས་ཐམས་ཅད་ཀྱི་དོན་དམ་པ་

89-1-142b

སྟོང་པ་ཉིད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བསྒོམ་དུ་མེད་པའི་དངོས། །བསྒོམ་པ་ཙམ་དུ་འཛིན་མེད་དེ། །མཐའ་ལས་གྲོལ་བ་མི་གནས་པ། །གསང་བ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་དཔལ་བརྒྱན་པ་སངས་རྒྱས་ཐམས་ཅད་ཀྱི་འདུས་བྱས་སྟོང་པ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་རིག་ལས་ནི་བྱང་ཆུབ་
འགྱུར། །རྟོག་པས་སྟོང་པའི་ཆོས་ཉིད་ལས། །མཉམ་རྗེས་ལྷག་མཐོང་སྤྱོད་པ་ཅན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཞུམ་པ་མེད་པའི་སྟོབས་སངས་རྒྱས་ཐམས་ཅད་ཀྱི་འདུས་མ་
བྱས་སྟོང་པ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཞི་གནས་ཏིང་འཛིན་གྱི། །མི་གཡོ་བ་ལས་འདས་པ་ཉིད། །ལུང་དུ་བསྟན་པའི་ཕྱོགས་ལས་ནི། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་འོད་འཕྲོ་སངས་རྒྱས་ཐམས་ཅད་ཀྱི་མཐའ་ལས་འདས་པ་སྟོང་པ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །བརྗོད་པས་བརྟགས་པ་རང་སྟོང་པ། །ལུང་མ་བསྟན་ལས་འདས་པའི་དངོས། །མི་ཕྱེད་བརྗོད་བྲལ་ཡེ་ཤེས་ཆེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་
དབྱངས་བྱིན་སངས་རྒྱས་ཐམས་ཅད་ཀྱི་ཐོག་མ་དང་ཐ་མ་མེད་པའི་སྟོང་པ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བྱང་ཆུབ་སེམས་ལ་རྒྱུ་མེད་ཕྱིར་ཐོག་མཐའ་
སྟོང་པ་ཆོས་ཀྱི་དབྱིངས། །ཡེ་ཤེས་ལུགས་ལས་བཟློག་པར་འཆར། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སེང་གེ་སངས་རྒྱས་ཐམས་ཅད་ཀྱི་དོར་བ་མེད་པ་སྟོང་པ་ཉིད་རྡོ་རྗེ་ཞེས་བྱ་

89-1-143a

བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་གང་སྤང་བར་བྱ་བ་དང་། །བརྟེན་བྱ་ཐ་དད་མེད་པར་ནི། །ལེན་པ་མེད་པར་རང་གྲོལ་དུ། །དེ་ཉིད་ཚུལ་འདི་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་འོད་ཟེར་སྣ་ཚོགས་སངས་རྒྱས་ཐམས་ཅད་ཀྱི་རང་བཞིན་སྟོང་པ་ཉིད་ཅེས་བྱ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གདོད་ནས་ཞི་བའི་
ཆོས་ཉིད་ལ། །མ་སྐྱེས་སྐྱེ་མེད་དག་པའི་སེམས། །འོད་གསལ་ལྷན་ཅིག་སྐྱེས་པའི་བདག །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་དཔའ་བོ་ཆེན་པོ་སངས་རྒྱས་ཐམས་ཅད་ཀྱི་ཆོས་
ཐམས་ཅད་སྟོང་པ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་ཀུན་བདག་མེད་པ་ཡི་མཆོག །ཀུན་དུ་བཟང་པོ་བདེ་བ་ཆེ། །མི་ཟད་ལྷུན་གྱིས་གྲུབ་པའི་དོན། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་པད་མའི་གནས་དཔལ་ཕུང་པོ་སངས་རྒྱས་ཐམས་ཅད་ཀྱི་རང་གི་མཚན་ཉིད་སྟོང་པ་ཉིད་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །འོང་བ་མེད་ཅིང་འགྲོ་བ་མེད། །ཉི་ཚེའི་སྟོང་ཉིད་ལས་འདས་ཤིང་། །རྣམ་པའི་མཆོག་རྣམས་ཀུན་ལྡན་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མེ་ཏོག་རྒྱས་པ་སངས་རྒྱས་
ཐམས་ཅད་ཀྱི་མི་དམིགས་པ་སྟོང་པ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདས་དང་མ་འོངས་ད་ལྟར་གྱི། །དུས་གསུམ་རྗེས་སུ་མི་དམིགས་པས། །ཐོག་མེད་ཡེ་ཤེས་
བསྟན་པ་ཉིད། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཐུ་རྩལ་སྟོབས་སངས་རྒྱས་ཐམས་ཅད་ཀྱི་དངོས་པོ་མེད་པ་སྟོང་པ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་

89-1-143b

ཆུབ་ཀྱི་སེམས་འདི་གསུངས་སོ། །དངོས་པོ་རྟག་པའི་ཆོས་ཉིད་མེད། །མི་རྟག་འཕོ་བའི་མཚན་ཉིད་ཅན། །སྟོང་ཉིད་ནམ་མཁའི་ཆོས་ཉིད་དེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བསོད་ནམས་ཕུང་
པོ་སངས་རྒྱས་ཐམས་ཅད་ཀྱི་ངོ་བོ་ཉིད་སྟོང་པ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལྟ་བ་མ་ཡིན་མི་གནས་པ། །ཀུན་གཞི་དག་པའི་སྙིང་པོ་ཉིད། །ཟབ་ཅིང་ཕྲ་བ་རྟེན་གྱུར་
པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟུགས་མཆོག་རྒྱལ་པོ་སངས་རྒྱས་ཐམས་ཅད་ཀྱི་དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །འཁོར་འདས་གཟུང་འཛིན་སྣོད་བཅུད་རྣམས། །ཐམས་ཅད་བདག་མེད་ངོ་བོ་ཉིད། །སྟོང་པ་ཉིད་དུའང་མི་གནས་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །སྟོང་པ་ཉིད་དུ་མི་བསམ་ཞིང་། །
སྟོང་མིན་བར་ཡང་བསྒོམ་པ་མིན། །དེ་ཉིད་བྱང་ཆུབ་དམ་པའི་གཞི། །བྱང་ཆུབ་སེམས་ཞེས་བརྗོད་པ་ཡིན། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་
པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་སངས་རྒྱས་ཐམས་ཅད་ཀྱི་རབ་ཏུ་མི་གནས་པའི་དོན་བསྟན་པའི་ལེའུ་སྟེ་བཞི་བཅུ་གཉིས་པའོ།། །། དེ་ནས་རྒྱལ་པོ་རྡོ་རྗེ་འཛིན། །
དཀྱིལ་འཁོར་ཀུན་གྱི་འཁོར་ལོའི་གཙོས། །ཚངས་དབྱངས་རྡོ་རྗེའི་ང་རོ་ཡིས། །ཆོས་འབྱུང་རོལ་པ་སྟོན་པར་མཛད། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐར་མཁན་ཐམས་
ཅད་ཀྱི་བདག་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལམ་ཚོལ་ལམ་གྱི་ལྟ་བ་ལས། །རྣམ་པར་བཟློག་པ་བླ་ན་མེད། །ཆོས་རྒྱ་བཞི་ལྡན་རྣལ་མི་ལམ། །

89-1-144a

ཟབ་པ་ཞི་བ་དོན་སྤྱོད་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཟླ་བའི་སྒྲོན་མེ་འབར་བ་སངས་རྒྱས་ཐམས་ཅད་ཀྱི་གསོ་བ་པོ་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །ས་བོན་དང་ནི་མྱུ་གུའི་བར། །རིམ་གྱིས་བསྐྱེད་པ་ཡོངས་དག་པ། །དེ་ཉིད་འབྲས་བུ་རོ་འབྱིན་པའི། །ཐབས་ཚུལ་འདི་ནི་དག་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་
ཕུང་པོ་སངས་རྒྱས་ཐམས་ཅད་ཀྱི་སྲོག་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་དག་ཞི་བའི་ཆོས་ཉིད་ནི། །བཏགས་པའི་གནས་ལས་
རྣམ་གྲོལ་བ། །ཡེ་ཤེས་རྒྱལ་བ་ཀུན་ཁྱབ་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བྱང་ཆུབ་རྒྱལ་པོ་སངས་རྒྱས་ཐམས་ཅད་ཀྱི་སེམས་ཅན་རྣམ་པར་དག་པ་རྡོ་རྗེ་སངས་རྒྱས་
ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མངལ་ལས་སྐྱེ་དང་སྒོང་ང་དང་། །རྫུས་ཏེ་སྐྱེས་དང་དྲོད་གཤེར་ལས། །སྐྱེ་བའི་སེམས་ཅན་མ་དམིགས་པས། །སེམས་ཅན་སྤྱོད་པ་
མི་དམིགས་སོ། ཞེས་གསུངས་སོ། །དེ་ནས་དེ་བཞིན་གཤེགས་པ་མི་ཟད་པའི་ཡེ་ཤེས་སངས་རྒྱས་ཐམས་ཅད་ཀྱི་སྐྱེ་བ་པོ་རྣམ་པར་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །འགྲོ་དྲུག་ལ་སོགས་ཁམས་གསུམ་པའི། །སེམས་ཅན་རྣམ་ཤེས་རང་ཉིད་ལས། །རང་འཁྲུལ་ལོག་ཤེས་ཀྱིས་བཅིངས་པ། །དེ་གྲོལ་བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་མངོན་པར་རྟོགས་པའི་སྤྱན་སངས་རྒྱས་ཐམས་ཅད་ཀྱི་གསོ་བ་སྐྱེས་བུ་རྣམ་པར་དག་པ་རྡོ་རྗེ་སངས་རྒྱས་ཐམས་ཅད་ཀྱི་གནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །

89-1-144b

བཏགས་པའི་ཡིད་སྤྱོད་མ་ཞུགས་པའི། །སྣང་ལས་མ་ངེས་གྲོལ་འགྱུར་ཞིང་། །སྒྲིབ་མེད་རང་གསལ་མཐོང་བ་ནི། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡན་ལག་རྒྱས་པ་སངས་རྒྱས་
ཐམས་ཅད་ཀྱི་གང་ཟག་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡུལ་རྐྱེན་རྫས་ལས་གྲོལ་བ་ཡི། །ཐེ་ཙོམ་རྣམ་བྲལ་སྒྲོ་འདོགས་ཆོད། །རིགས་མེད་ཕྱིར་
ན་ཡེ་ཤེས་ཆེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡུལ་འཁོར་ཤེས་རབ་མཆོག་སངས་རྒྱས་ཐམས་ཅད་ཀྱི་ཤེད་བུ་རྣམ་པར་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཁམས་རྒྱུད་དག་པའི་ས་གནས་པས། །ས་རྣམས་བགྲོད་པ་གོ་འཕང་མཆོག །རྩེ་གཅིག་རང་བྱུང་རང་གྲོལ་བས། །བྱང་ཆུབ་ཚུལ་འདི་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་གཟི་བརྗིད་ཚིམ་མཛད་སངས་རྒྱས་ཐམས་ཅད་ཀྱི་ཤེད་ལས་སྐྱེས་རྣམ་པར་དག་པ་སངས་རྒྱས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱལ་བ་
རྒྱ་མཚོའི་སྐུ་གསུང་ཐུགས། །དག་པ་ཡེ་ཤེས་བདག་མེད་པ། །གཉིས་མེད་མཉམ་པ་རྣམ་རྒྱལ་བས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཤེས་རབ་བྱིན་པ་སངས་རྒྱས་ཐམས་
ཅད་ཀྱི་བྱེད་པ་པོ་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐོས་བསམ་སྒོམ་པའི་ཡུལ་མིན་ཞིང་། །གསང་བའི་ཤེས་རབ་རལ་གྲིས་ནི། །ལོག་ལྟ་
ཕུང་པོ་གཅོད་པར་བྱེད། །ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འཇམ་དབྱངས་སངས་རྒྱས་ཐམས་ཅད་ཀྱི་བྱེད་པ་པོ་རྣམ་པར་དག་པ་རྡོ་རྗེ་སངས་རྒྱས་ཐམས་ཅད་ཀྱི་གནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་

89-1-145a

བྱང་ཆུབ་ཀྱི་སེམས་འདི་གསུངས་སོ། །སྤྱི་དང་བྱེ་བྲག་བླ་མེད་གནས། །ཡང་དག་ཡེ་ཤེས་རྣམ་གྲོལ་བས། །ཟག་མེད་ཚུལ་ནི་ཞི་བ་ལས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་ཆགས་མེད་མཛོད་སངས་རྒྱས་ཐམས་ཅད་ཀྱི་ཚོར་བ་པོ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཀུན་གྱི་སྤྱོད་ཡུལ་ནི། །དེ་བཞིན་ཉིད་ལ་
ལེགས་གནས་པས། །སྣ་ཚོགས་ཀུན་སྤྱོད་མི་དམིགས་ཏེ། །དེ་ཉིད་ཡེ་ཤེས་ཆེན་པོར་བསྟན་ཞེས་གསུངས་སོ། །དེ་ནས་དེ་བཞིན་གཤེགས་པ་གཙོ་བོས་བྱིན་སངས་རྒྱས་ཐམས་ཅད་ཀྱི་ཤེས་པ་པོ་རྣམ་པར་དག་པ་རྡོ་རྗེ་ཞེས་
བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཇི་ལྟར་འདོད་པ་རང་གྲོལ་དུ། །སྦྲུལ་མདུད་ལྟ་བུར་བཅིངས་ལས་འདའ། །དེ་ཉིད་ཡེ་ཤེས་ཚུལ་བསྟན་པ། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་གཙོ་བོ་ཡེ་ཤེས་མཐོང་བ་པོ་རྣམ་པར་དག་པ་རྡོ་རྗེ་སངས་རྒྱས་ཐམས་ཅད་ཀྱི་གནས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྟོབས་ལྡན་
སྐྱེས་བུ་མཆོག་གིས་ནི། །གང་དུ་རྩལ་གྱི་རྟེན་མཐོང་བས། །ཤུགས་ཀྱིས་འགྲོ་བ་མདའ་བཞིན་ནོ། །ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཐུ་རྩལ་སངས་རྒྱས་ཐམས་ཅད་ཀྱི་
སློང་བ་པོ་རྣམ་པར་དག་པ་སངས་རྒྱས་ཐམས་ཅད་ཀྱི་གནས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་སྤོང་བ་སོར་ཞུགས་ཤིང་། །རང་བཞིན་དག་པའི་ངོ་བོ་ཉིད། །ཡོངས་སུ་
ཤེས་ན་རྣམ་གྲོལ་གྱིས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་འཕྲོ་ཅན་སངས་རྒྱས་ཐམས་ཅད་ཀྱི་འཇིག་རྟེན་དག་པ་རྡོ་རྗེ་སངས་རྒྱས་ཐམས་ཅད་ཀྱི་གནས་ཀྱི་ཏིང་ངེ་འཛིན་ལ་

89-1-145b

སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དབང་པོའི་གནས་ལས་ལྷག་པའི་སྟོབས། །སྟོང་གསུམ་ཆོས་ཀྱི་དཔལ་ལྡན་པས། །ཡེ་ཤེས་ཆར་འབེབས་སྟོན་པ་པོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །
དེ་ནས་དེ་བཞིན་གཤེགས་པ་དབང་པོ་ཤུགས་འཆང་སངས་རྒྱས་ཐམས་ཅད་ཀྱི་ཕྲིན་ལས་སྣ་ཚོགས་སྟོན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གསང་བའི་ཡེ་ཤེས་བསམ་
མི་ཁྱབ། །ནམ་མཁའི་གཟུགས་སུ་ཡོངས་བཞུགས་པ། །འདུས་པ་བླ་མེད་དགྱེས་པར་རོལ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྐར་རྒྱལ་སྐུའི་ཏིང་ངེ་འཛིན་རྡོ་རྗེའི་གསང་བ་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བཅོམ་ལྡན་འཇིག་རྟེན་མགོན་པོ་ཡི། །གཙུག་ཏོར་ཚད་མེད་གཞལ་མེད་པ། །ནམ་མཁའི་གནས་ཀྱི་སྤྱོད་ཡུལ་ཏེ། །དེ་ཉིད་གསང་བ་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་འོད་བཟང་པོ་སངས་རྒྱས་ཐམས་ཅད་ཀྱི་གསུང་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡན་ལག་དྲུག་བཅུའི་དབྱངས་ཀྱིས་ནི། །ཡིད་
འཕྲོག་དཔག་མེད་རྡོ་རྗེའི་གསུང་། །སེམས་ཅན་སྣ་ཚོགས་དེར་སྟོན་པ། །བསམ་གྱིས་མི་ཁྱབ་སྤྱོད་ཡུལ་ལོ་ཞེས་གསུངས་སོ། །དེ་ནས་དེ་བཞིན་གཤེགས་པ་གྲགས་པས་བྱིན་པ་སངས་རྒྱས་ཐམས་ཅད་ཀྱི་
ཐུགས་ཀྱི་གསང་བའི་གནས་རྡོ་རྗེའི་གནས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ཀྱི་གསང་བ་དག་པ་སྟེ། །སེམས་ཀྱི་ལས་ནི་ཡོངས་དག་པས། །སེམས་
ཅན་ཁམས་དང་མཐུན་པར་འཇུག །བསམ་གྱིས་མི་ཁྱབ་བསྟན་པའོ་ཞེས་གསུངས་སོ། །དེ་ནས་གསང་བ་འཛིན་པ་པོས། །ཐུབ་པ་དོན་གྱི་ཡེ་ཤེས་ཅན། །སྐུ་བཞི་ཡེ་ཤེས་རབ་རྫོགས་པའི། །དེ་བཞིན་ཉིད་འདི་གསུང་

89-1-146a

བར་མཛད། །གང་དུ་གསང་བ་ལས་ཀྱང་ཆེས་གསང་བའི་གསང་བ་ཆེན་པོ་འདི་འཛིན་པའི་རྣལ་འབྱོར་གྱི་དབང་ཕྱུག་དུ་མ་འབྱུང་བ་རྣམས་ནི་ཡེ་ཤེས་དགྱེས་པ་ཆེན་པོས་ཁྱབ་ཅིང་གཉིས་སུ་མེད་པའི་མཉམ་པ་ཉིད་
བདུད་ལས་རྣམ་པར་རྒྱལ་བའི་ཏིང་ངེ་འཛིན་ཐོབ་ལ། དེས་ཆོས་ཐམས་ཅད་ཡོངས་སུ་དག་ཅིང་ཕྱིན་ཅི་མ་ལོག་པར་ཁོང་དུ་ཆུད་པས་གནས་པར་བྱེད་དོ། །འཇིག་རྟེན་གྱི་ལྷ་ཆེན་པོ་ཚངས་པ་དང་། བརྒྱ་བྱིན་དང་། ཁྱབ་འཇུག་དང་། དབང་
ཕྱུག་ཆེན་པོ་དང་། གུ་ལང་དང་། དྲག་པོའི་རིགས་སུ་གྱུར་པ་རྣམས་ཀྱིས་ཀྱང་ཡང་དག་པར་ཆོས་འདི་ལ་བསྲུང་བའི་ཕྱིར་དེ་འཛིན་པ་དག་ལ་མཆོད་ཅིང་རྟེན་པར་བྱེད་དོ། །འདི་ནི་རྒྱུན་དུ་ཞུགས་པའི་འབྲས་བུས་འབྱུང་གནས་སོ། །ཕྱིར་མི་འོང་
བ་རྣམས་ཀྱི་འབྱུང་གནས་སོ། །ལན་ཅིག་ཕྱིར་འོང་བ་རྣམས་ཀྱི་འབྱུང་གནས་སོ། །དགྲ་བཅོམ་པ་རྣམས་ཀྱི་འབྱུང་གནས་སོ། །འཕགས་པ་རང་རྒྱལ་བ་ལ་གནས་པ་རྣམས་ཀྱི་འབྱུང་གནས་སོ། །བྱང་ཆུབ་སེམས་དཔའི་འབྱུང་
གནས་སོ། །བྱང་ཆུབ་སེམས་དཔའ་ཆེན་པོ་ཕྱིར་མི་ལྡོག་པ་རྣམས་ཀྱི་འབྱུང་གནས་སོ། །དེ་བཞིན་གཤེགས་པ་རྣམས་ཀྱི་འབྱུང་གནས་ཡིན་པར་རིག་པར་བྱའོ། །རྣལ་འབྱོར་གྱི་དབང་ཕྱུག་ཆེན་པོ་ཐམས་ཅད་ཀྱི་འབྱུང་
གནས་བླ་ན་མེད་པར་རིག་པར་བྱའོ། །དཔལ་རྡོ་རྗེ་འཛིན་པ་ཆེན་པོ་དཀྱིལ་འཁོར་ཐམས་ཅད་ཀྱི་འབྱུང་གནས་སུ་གྱུར་པ་ཡང་འདི་ལས་བྱུང་བར་རིག་པར་བྱའོ། །དེ་ཅིའི་ཕྱིར་ཞེ་ན། །འདི་ནི་གསང་བ་ཆེན་པོ་ཡེ་ཤེས་ཀུན་དུ་འབྱུང་
བའི་གཞི་གཅིག་པར་གནས་པ་ཉིད་དོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་གསང་
བ་ཡོངས་སུ་མི་ཟད་པའི་འབྱུང་གནས་སུ་བསྟན་པའི་ལེའུ་སྟེ་བཞི་བཅུ་གསུམ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་དེ་བཞིན་གཤེགས་

89-1-146b

པ་ཆོས་ཀྱི་དབྱིངས་ཀྱི་ངོ་བོ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཐོག་མར་བྱུང་བ་དང་། བར་དུ་ད་ལྟར་གྱི་དཀྱིལ་འཁོར་གྱི་འཁོར་ལོ་ལ་གནས་པའི་དོན་དང་། ཐ་མར་ཕྱི་མའི་དུས་ན་ངེས་པར་འབྱུང་
བའི་གསང་ཆེན་ངེས་པར་འཕོ་བའི་ཚུལ་གྱི་རྣམ་གྲངས་དུ་མ་ང་ཡིས་བཤད་པར་བྱ་ཡིས། འདས་པ་དང་མ་འོངས་པ་དང་ད་ལྟར་བྱུང་བའི་གནས་དང་དུས་དང་ཆོས་ཀྱི་གསང་བ་འཛིན་པ་དུ་མ་འབྱུང་བ་ངེས་པར་ཟུང་ཅིག །
འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུངས་རབ་ལ། །འགྲོ་བའི་ཚུལ་ནི་སྔོན་འབྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་དུ་སྲོག་གཅོད་བརྩོན་པར་འགྱུར། །
བསྐལ་པ་དྲུག་འཛིན་ཞེས་བྱ་ལ། །སངས་རྒྱས་ཟླ་བ་མི་འཁྲུགས་པས། །ཐམས་ཅད་ཞེ་སྡང་ཅན་གྱུར་ལ། །སྲོག་གཅོད་པ་ལ་བརྩམས་པ་ཡི། །དམ་ཆོས་དགོངས་ཏེ་བཤད་པ་ལ། །སློབ་དཔོན་ཆོས་ཀྱི་འཁོར་ལོ་
དང་། །དགེ་སློང་ནག་པོ་གཏུམ་ཞེས་པ། །ཇི་བཞིན་སྒྲ་རུ་རྣམ་སྤྱད་པས། །ནག་པོ་བདུད་ཀྱི་ཤ་ཟར་གྱུར། །ཆུང་མ་ཉི་ཤུའི་ཚོགས་བཅས་པས། །ཐམས་ཅད་དམྱལ་བའི་སྲུངས་མར་སྐྱེས། །དེ་ལྟར་རྡོ་རྗེ་ཅན་གཟིགས་ཏེ། །
སངས་རྒྱས་གར་མཁན་གར་མཛད་པས། །མི་བསྐྱོད་རྡོ་རྗེ་ཅན་གྱིས་ནི། །ཞེ་སྡང་རིགས་ཅན་འདུལ་བར་མཛད། །སྲོག་ཆགས་གསད་པར་གྱིས་ཞེས་པ། །ཁམས་གསུམ་སྒྱུ་མའི་རང་བཞིན་དུ། །འཁོར་བའི་རྣམ་རྟོག་
བསད་ན་ནི། །དེ་ནི་མི་བསྐྱོད་ཞིང་དུ་སྐྱེ། །རྡོ་རྗེ་ཅན་གྱི་སྡོམ་པ་ལས། །ཞེ་སྡང་རིགས་ཀྱི་དམ་ཚིག་ཡིན། །འདས་པའི་དུས་ན་སྔོན་བྱུང་བའི། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་
ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །རྣམ་པར་ཤེས་པ་གཏི་མུག་པས། །མ་བྱིན་ལེན་ལ་བརྩོན་པར་འགྱུར། །བསྐལ་པ་གཟུང་དཀའ་ཞེས་བྱ་ལ། །དེ་བཞིན་གཤེགས་པ་སྟོབས་ཀྱི་མཆོག །

89-1-147a

སེང་གེ་འོད་ཀྱི་རྒྱལ་པོ་ལ། །བསྟན་པའི་དམ་ཚིག་གནས་པའི་ཚེ། །ཐམས་ཅད་གཏི་མུག་ཤེས་ཆེ་ལ། །གཞན་གྱི་ནོར་འཕྲོག་སྤྱོད་པར་འགྱུར། །དེ་དག་ལྡེམ་པོར་དགོངས་པ་ལ། །སློབ་དཔོན་སེང་གེ་ཟླ་བ་ཡིས། །དགེ་སློང་བཟོད་
པ་ཅན་ཞེས་པས། །ཇི་བཞིན་སྒྲ་རུ་རྣམ་སྤྱད་པས་དྲག་པོ་མུན་པ་ཅན་ཞེས་པའི། །ཆུང་མ་ཉི་ཤུའི་ཚོགས་བཅས་པས། །ཐམས་ཅད་དུད་འགྲོའི་གནས་སུ་སྐྱེས། །དེ་ལྟར་རྡོ་རྗེ་ཅན་གཟིགས་ཏེ། །སངས་རྒྱས་གར་མཁན་གར་མཛད་
པས། །སངས་རྒྱས་རྡོ་རྗེ་འཛིན་གྱིས་ནི། །གཏི་མུག་རིགས་ཅན་འདུལ་བར་མཛད། །ཁྱོད་ཀྱིས་མ་བྱིན་ལོང་ཞེས་པ། །ཆོས་རྣམས་རྨི་ལམ་ལྟ་བུ་ལས། །འཕགས་པའི་ནོར་རྣམས་བླངས་ནས་ནི། །སྟུག་པོ་བཀོད་པའི་ཞིང་དུ་སྐྱེ། །དེ་
བཞིན་གཤེགས་པའི་སྡོམ་པ་ལས། །གཏི་མུག་རིགས་ཀྱི་དམ་ཚིག་ཡིན། །འདས་པའི་དུས་ན་སྔོན་བྱུང་བའི། །བདག་ཉིད་ཆེན་པོ་རྟག་པའི་གནས། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་
སེམས་ཅན་ཐམས་ཅད་ནི། །ཤིན་དུ་གཡེམ་ལ་སྲེད་པ་ཡིས། །མི་ཚངས་སྤྱོད་ལ་འཇུག་པར་གྱུར། །བསྐལ་པ་བཅུད་ལྡན་ཞེས་བྱ་ལ། །པད་མོ་འོད་འཕྲོ་མི་བཟད་ཞེས། དེ་བཞིན་གཤེགས་པའི་བསྟན་པ་ནི། །ཐམས་ཅད་འདོད་ཆགས་
སྤྱོད་གྱུར་ལ། །ལོག་པར་ཤིན་ཏུ་གཡེམ་པར་སྤྱོད། །འདོད་ཆགས་ཀྱིས་ནི་ཐར་ཐོབ་ཅེས། །དེ་ལྟར་དགོངས་ཏེ་གསུངས་པ་ལ། །སློབ་དཔོན་པད་མོ་དཔལ་ཞེས་པས། །དགེ་སློང་རྒྱལ་བ་མཆོག་ཅེས་ལ། །རྗེས་སུ་བསྟན་དང་གདམས་པ་
ལས། །སྐྱེ་བ་དེ་ཡི་འོག་ཏུ་ནི། །དྲག་བྱེད་མཐའ་ལ་གནས་པ་ནི། །ཆུང་མ་ཉི་ཤུའི་ཚོགས་བཅས་པ། །ཐམས་ཅད་ཡི་དགས་གནས་སུ་སྐྱེས། །དེ་ལྟར་རྡོ་རྗེ་ཅན་གཟིགས་ཏེ། །སངས་རྒྱས་གར་མཁན་གར་མཛད་པས། །ཆོས་འཛིན་པ་ཡི་
གསུང་རྡོ་རྗེས། །འདོད་ཆགས་རིགས་ཅན་འདུལ་བར་མཛད། །གཞན་གྱི་བུད་མེད་སྤྱོད་ཅེས་པ། །ཆོས་རྣམས་མིག་འཕྲུལ་མཚུངས་པ་ལ། །དེ་བཞིན་གཤེགས་པའི་བཙུན་མོ་རྣམས། །ཡེ་ཤེས་བདེ་བར་རོལ་པར་བྱ། །ཤེས་རབ་བུད་མེད་

89-1-147b

སྤྱད་ན་ནི། །བདེ་བ་ཅན་གྱི་ཞིང་དུ་འགྲོ། །ཆོས་འཛིན་པ་ཡི་སྡོམ་པ་ལས། །འདོད་ཆགས་རྡོ་རྗེའི་དམ་ཚིག་ཡིན། །འདས་པའི་དུས་ན་སྔོན་བྱུང་བའི། །བདག་ཉིད་ཆེན་པོ་རྟོག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་
ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །ཤིན་དུ་ལེ་ལོའི་དབང་གྱུར་ཅིང་། །བརྫུན་དུ་སྨྲ་བ་དགའ་བར་འགྱུར། །བསྐལ་པ་གཟི་ཆེན་སྣང་བའི་དུས། །བདེ་གཤེགས་རྔ་སྒྲའི་རྒྱལ་པོ་ཞེས། །སངས་རྒྱས་དེ་ཡི་བསྟན་པ་ལ། །འགྲོ་
རྣམས་ཤིན་དུ་ཕྲག་དོག་ཅན། །དེ་ལ་བརྫུན་ཚིག་གིས་གྲོལ་ཞེས། །རྒྱལ་བས་དགོངས་ཏེ་བསྟན་པ་ལ། །སློབ་དཔོན་རྟ་མཆོག་ཅེས་བྱ་བས། །དགེ་བསྙེན་ཟླ་བ་ཞེས་བྱ་ལ། །གསུང་རབ་དོན་རྗེས་བསྟན་པ་ལས། །ཤིན་དུ་འཁྲུལ་པས་
གནས་པར་འགྱུར། །ཇི་བཞིན་སྒྲ་རུ་རྣམ་སྐྱེད་པས། །དྲག་བྱེད་འཁྲུལ་པ་ཅན་ཞེས་པ། །ཆུང་མ་ཉི་ཤུའི་ཚོགས་དང་བཅས། །ཐམས་ཅད་དབང་སྒྱུར་བདུད་ཀྱི་ལྷ། །གཞན་འཕྲུལ་དབང་བྱེད་གནས་སུ་སྐྱེས། །དེ་ལྟར་རྡོ་རྗེ་ཅན་གཟིགས་
ཏེ། །སངས་རྒྱས་གར་མཁན་གར་མཛད་པས། །གདོན་མི་ཟ་བའི་ཕྲིན་ལས་ཀྱིས། །ཕྲག་དོག་རིགས་ཅན་འདུལ་བར་མཛད། །ཁྱོད་ཀྱིས་བརྫུན་དུ་སྨྲོས་ཤེས་པ། །ཆོས་རྣམས་དྲི་ཟའི་གྲོང་ཁྱེར་ལས། །ཐམས་ཅད་བརྫུན་པ་སླུ་བའི་
ཚིག །སྒྱུ་མ་ལྟ་བུར་བསྒྲགས་ནས་ཀྱང་། །ཀུན་རྫོབ་སྤྱོད་པའི་གནས་བསྟན་པ། །འབྲུག་སྒྲ་ཅན་གྱི་ཞིང་དུ་འགྲོ། །ལས་ཀྱི་རིགས་ཀྱི་སྡོམ་པ་ལས། །ཕྲག་དོག་རྡོ་རྗེའི་དམ་ཚིག་བསྟན། །འདས་པའི་དུས་ན་སྔོན་བྱུང་བའི། །བདག་
ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུངས་རབ་ལ། །འགྲོ་བའི་ཚུལ་ནི་སྔོན་བྱུང་བའོ། །དེ་ཚེ་སེམས་ཅན་ཐམས་ཅད་ནི། །ཤིན་དུ་ང་རྒྱལ་ཆེར་སྤྱོད་ཅིང་། །ཚིག་རྩུབ་དག་གིས་སྤྱོད་པར་གྱུར། །བསྐལ་པ་མི་
གནས་པ་ཞེས་ལ། །བདེ་གཤེགས་དཀོན་མཆོག་དཔལ་ཞེས་པའི། །བསྟན་པ་དེ་ལ་གནས་པའི་ཚེ། །ཕལ་ཆེར་ང་རྒྱལ་གྱིས་ནོན་ཅིང་། །ངག་མ་བསྡམས་པས་གནས་པར་གྱུར། །རྩུབ་པའི་ཚིག་རྣམས་སྨྲས་པ་ཡིས། །

89-1-148a

དེས་ནི་ཐར་པ་ཐོབ་ཅེས་པ། །རྒྱལ་བ་དགོངས་ཏེ་གསུངས་པ་ལ། །སློབ་དཔོན་ཉི་མའི་དཔལ་ཞེས་པས། །དགེ་སློང་འབྱོར་པ་ཅན་ཞེས་ལ། །བཀའ་ཡི་དགོངས་པ་བསྟན་པ་ལས། །གསང་བའི་དོན་ལ་རྣལ་འཁྲུལ་བས། །
དྲག་བྱེད་འཇུངས་པ་ཅན་ཞེས་པ། །ཆུང་མ་ཉི་ཤུའི་ཚོགས་བཅས་པ། །ཐམས་ཅད་ལྷ་མིན་སྲིན་པོའི་གནས། །རི་རབ་སུལ་ལ་གནས་པ་སྐྱེས། །དེ་ལྟར་རྡོ་རྗེ་ཅན་གཟིགས་ཏེ། །སངས་རྒྱས་གར་མཁན་གར་མཛད་པས། །
ཡོན་ཏན་རིན་ཆེན་འོད་འཕྲོ་བས། །ང་རྒྱལ་རིགས་ཅན་འདུལ་བར་མཛད། །སྔ་ཕྱིའི་ཆོས་ནི་བདེན་མཐོང་བས། །འཁྲུལ་པའི་སྤྱོད་ལས་ལོག་པ་སྟེ། །རྩུབ་པའི་ཆོས་རྣམས་སྨྲས་པ་ཡིས། །ཡེ་ཤེས་ཐོབ་འགྱུར་ཞེས་པ་ལ། །དངོས་
པོར་འཛིན་པ་སྐྲག་བྱེད་པའི། །ཡང་དག་ཀུན་རྫོབ་ཆོས་ཉིད་ཀྱིས། །རང་བཞིན་མེད་པར་བསྟན་པ་ཡིས། །དེ་དག་སྤྱོད་པ་དོན་ལྡན་པ། །རྡུལ་དང་བྲལ་བའི་ཞིང་དུ་འགྲོ། །རིན་ཆེན་རིགས་ཀྱི་སྡོམ་པ་ཡིན། །འདས་པའི་དུས་ན་སྔོན་
བྱུང་བའི། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་ནི་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །དུག་ལྔའི་རྟོག་པ་རྒྱས་པར་འགྱུར། །བསྐལ་པ་རྒྱན་བཟངས་ཞེས་
བྱ་ལ། །བདེ་གཤེགས་དཔལ་ལྡན་དྲི་མེད་པ། །ཡེ་ཤེས་བཟང་པོའི་བསྟན་པ་ལ། །ཐམས་ཅད་ཉོན་མོངས་ལྔ་སྤྱོད་པ། །དུག་ལྔའི་རྟོག་པ་རགས་པར་གྱུར། །ཉོན་མོངས་མ་སྤངས་འཚང་རྒྱ་ཞེས། །རྒྱལ་བས་དགོངས་ཏེ་
གསུངས་པ་ལ། །སློབ་དཔོན་ཀུན་དུ་བཟང་པོ་ཡིས། །དགེ་སློང་གྲོལ་བའི་རྒྱལ་མཚན་ཞེས། །དེ་བཞིན་གཤེགས་པའི་གསུངས་རབ་ལ། །ལོག་པར་སྤྱད་པའི་རྣམ་སྨིན་གྱིས། །སྒྲ་སྒྲོགས་སྡེ་ཅན་ཞེས་བྱ་བ། །ཆུང་མ་
ཉི་ཤུའི་ཚོགས་དང་བཅས། །མི་ཡི་གནས་སུ་སྲིན་པོར་སྐྱེས། །ལང་ཀ་པུ་རིའི་རྒྱལ་པོར་གྱུར། །དེ་ལྟར་རྡོ་རྗེ་ཅན་གཟིགས་ཏེ། །སངས་རྒྱས་གར་མཁན་གར་མཛད་པས། །གསང་ཆེན་རྡོ་རྗེ་འཛིན་པ་ཡིས། །དུག་ལྔའི་

89-1-148b

རང་བཞིན་གྱིས་བསྡུས་བརྟུལ། །ཉོན་མོངས་མ་སྤངས་ལམ་འགྱུར་ཞེས། །ཆགས་སྡང་རང་བཞིན་ཤེས་ནས་ཀྱང་། །དུག་གསུམ་ཡེ་ཤེས་གྱུར་པ་ནི། །གསང་བ་རྡོ་རྗེ་ཐེག་པའི་ལམ། །རྡོ་རྗེ་སེམས་དཔའི་ཞིང་དུ་སྐྱེ། །བླ་ན་མེད་པའི་སྡོམ་
པ་ལས། །རྡོ་རྗེ་འཛིན་པའི་དམ་ཚིག་ཡིན། །དུག་ལྔའི་རྟོག་པ་གདུལ་བ་ནི། །ཞེ་སྡང་ཅན་ལ་ཁྱབ་འཇུག་དང་། །གཏི་མུག་ཅན་ལ་ཚངས་པ་དང་། །འདོད་ཆགས་དབང་ཕྱུག་ཆེན་པོ་དང་། །ཕྲག་དོག་དགའ་རབ་དབང་ཕྱུག་དང་། །ང་རྒྱལ་ཅན་
ནི་བརྒྱ་བྱིན་གྱི། །རིགས་དང་འཐུན་པའི་ཆར་བསྒྱུར་ནས། །སེམས་ཅན་ལོག་པའི་ལམ་དུ་བཙུད། །རང་གི་སྤྱོད་ཡུལ་མི་འདའི་ཕྱིར། །དེ་ལ་བར་ཆད་སྣ་ཚོགས་པས། །བདུད་ཀྱི་དཀྱིལ་འཁོར་མངོན་པར་སྤྲུལ། །དེ་ལྟར་རྡོ་རྗེ་
ཅན་གཟིགས་ཏེ། །སངས་རྒྱས་གར་མཁན་གར་མཛད་པས། །ལྷ་རྣམས་གདུལ་བར་མཛད་ནས་ནི། །གསང་བའི་ཡེ་ཤེས་སྟོན་པར་བྱེད། །དེ་ལྟར་གདུལ་བྱ་གང་དང་གང་གི་དོན་དུ་དགོངས་ཏེ་གསུངས་པ་རྣམ་པར་ངེས་པ་ཐུན་མོང་མ་
ཡིན་པའི་གསང་བ་ཞེས་བྱ་བའི་ཏིང་ངེ་འཛིན་རབ་ཏུ་གསང་བ་ངེས་པའོ། །དེ་ནས་བཅོམ་ལྡན་འདས་རྡོ་རྗེ་འཛིན་པས་འདུས་པའི་འཁོར་རྣམས་ལ་བཀའ་སྩལ་པ། །གནས་ཕུན་སུམ་ཚོགས་པ་ནི་གསང་བ་མཆོག་ཏུ་མི་འགྱུར་
བ་རྡོ་རྗེ་བཙུན་མོའི་བྷ་ག་ཞེས་བྱ་བ་འཛམ་བུའི་གླིང་གྲུ་གསུམ་ཆོས་ཀྱི་འབྱུང་གནས་སོ། །འདི་ནི་མི་མཇེད་ཀྱི་འཇིག་རྟེན་གྱི་ཞིང་ཁམས་ཀྱི་སྙིང་པོར་གྱུར་པའོ། །དུས་ཕུན་སུམ་ཚོགས་པ་སྟེ། དུས་རྣམས་ཀྱི་སྙིགས་མ་ལ་བབ་པ་ཐོག་
མ་དང་དབུས་དང་ཐ་མ་རྣམ་པར་དག་པ་སྟེ་གསང་བ་བསམ་གྱིས་མི་ཁྱབ་པའི་ཚུལ་ལོ། །འཆད་པ་པོ་ནི་སྟོན་པ་སྟེ། འདིར་དཔལ་ལྡན་རྡོ་རྗེ་འཛིན་པ་རིགས་ཐམས་ཅད་ཀྱི་བདག་པོ་ཉིད་ཕུན་སུམ་ཚོགས་པའི་ཡེ་ཤེས་ཀྱི་རང་
བཞིན་རྣམ་པ་ཐམས་ཅད་མཁྱེན་ཅིང་གཟིགས་པས་འཇུག་པ་མཉམ་པ་ཉིད་རབ་ཏུ་མི་གནས་པའི་ངོ་བོར་གྱུར་པ་ཉིད་དོ། །དེ་དག་ཀྱང་ཆོས་ཉིད་དང་གཉིས་སུ་མེད་པ་ནམ་མཁའི་ཁམས་ཀྱིས་ཁྱབ་པའི་སངས་རྒྱས་ཀྱི་

89-1-149a

ཡེ་ཤེས་ཀྱི་སྤྱོད་ཡུལ་རབ་ཏུ་མི་ཟད་པའི་དོན་ལ་རབ་ཏུ་དགོངས་པ་དག་གོ། །དེ་ནས་གཞན་ཡང་ཐམས་ཅད་མཁྱེན་པའི་འཁོར་ཕུན་སུམ་ཚོགས་པ་བཤད་པར་བྱའོ། །འདི་ལྟ་སྟེ་འཕགས་པ་འཇམ་དཔལ་ཡེ་ཤེས་
སེམས་དཔའ་ནི་རྒྱལ་པོ་ཟས་གཙང་མར་གྱུར་ཏོ། །འཇིག་རྟེན་གྱི་དབང་ཕྱུག་དབྱངས་ནི་ལྷ་མོ་ཆེན་མོ་སྒྱུ་འཕྲུལ་ཞེས་བྱ་བར་གྱུར་ཏོ། །ལྷ་མོ་དཔལ་གྱི་ལུ་གུ་རྒྱུད་མ་ནི་གྲགས་འཛིན་མར་གྱུར་ཏོ། །རྡོ་རྗེ་སེམས་དཔའ་ནི་སྒྲ་ཅན་འཛིན་
ཏོ། །བྱང་ཆུབ་སེམས་དཔའ་སྒྲིབ་པ་ཀུན་ཏུ་གཅོད་པ་ནི་ཤཱ་རིའི་བུར་གྱུར་པའོ། །ཀུན་དུ་བཟང་པོ་ནི་གནས་བརྟན་ཀུན་དགའ་བོར་གྱུར་ཏོ། །ཀུན་དུ་བཟང་པོ་རྣམ་པར་རོལ་པའི་སྐུ་ཅན་ནི་མཽད་གལ་གྱི་བུར་གྱུར་པའོ། །ལྷའི་དབང་པོ་བརྒྱ་བྱིན་
ནི་གནས་བརྟན་ལྷ་སྦྱིན་ནོ། །ཚངས་པ་ཆེན་པོ་ནི་བྱང་ཆུབ་སེམས་དཔའི་སྣང་བའི་འོད་དུ་གྱུར་པའོ། །དཔལ་རྣམ་པར་སྣང་མཛད་ཆེན་པོ་ནི་ཡང་དག་པར་རྫོགས་པའི་སངས་རྒྱས་རྒྱལ་བ་ཤཱཀྱ་ཐུབ་པ་ཉིད་དུ་གྱུར་ཏོ། །དེ་ལྟར་མདོ་དང་ཐུན་མོང་
དུ་སྤྱོད་པའི་དོན་དུ་གསུངས་སོ། །འདིར་ནི་གསང་བ་ཐུན་མོང་མ་ཡིན་པའི་དོན་དུ་སོ་སོར་ཕྱེ་ནས་གསལ་བར་བཤད་པར་བྱའོ། །འདི་ལྟ་སྟེ་ད་ལྟར་ཕྱོགས་བཅུའི་དེ་བཞིན་གཤེགས་པ་དང་བྱང་ཆུབ་སེམས་དཔའ་རྣམས་དཀྱིལ་
འཁོར་གསང་བ་སྤྱིའི་དོན་དུ་བསྟན་ཏེ། །གསང་བའི་བདག་པོ་ཕྱག་ན་རྡོ་རྗེ་ནི་ཕྱག་ན་རྡོ་རྗེ་རྩེ་ལྔ་པ་འཛིན་པ་ཅན་གྱི་ཀུན་དགའ་བོར་གྱུར་ཏོ། །ཀུན་དུ་བཟང་པོ་ནི་མཽད་གལ་གྱི་བུའོ། །སྒྲིབ་པ་ཐམས་ཅད་རྣམ་པར་སེལ་བ་ནི་ཀུན་
ཤེས་ཀཽ་ཌི་ནྱར་གྱུར་ཏོ། །བློ་གྲོས་མི་ཟད་པ་ནི་ཤཱ་རིའི་བུའོ། །སྤྱན་རས་གཟིགས་དབང་ཕྱུག་ནི་འོད་བསྲུང་ངོ་། །སའི་སྙིང་པོ་ནི་མ་འགགས་པའོ། །བྱམས་པ་ནི་ཉེ་བའི་འཁོར་རོ། །ནམ་མཁའི་སྙིང་པོ་ནི་གནས་བརྟན་ཆེན་པོ་རབ་
འབྱོར་དུ་གྱུར་ཏོ། །གཟུགས་རྡོ་རྗེ་མ་ནི་སྐྱེ་དགུའི་བདག་མོའོ། །སྒྲ་རྡོ་རྗེ་མ་ནི་དབྱངས་ལྡན་མའོ། །དྲི་རྡོ་རྗེ་མ་ནི་རིགས་ལྡན་མའོ། །རོ་རྡོ་རྗེ་ནི་དགའ་མོ་དང་དགའ་སྟོབས་མའོ། །རེག་བྱ་རྡོ་རྗེ་ནི་ས་འཚོ་མར་གྱུར་ཏོ། །སངས་རྒྱས་སྤྱན་མ་ནི་སའི་

89-1-149b

ལྷ་མོར་གྱུར་ཏོ། །མཱ་མ་ཀཱི་ནི་འོད་མཆོག་མར་གྱུར་ཏོ། །གོས་དཀར་མོ་ནི་པད་མ་གྲགས་མཆོག་མའོ། །སྒྲོལ་མ་ནི་སྣ་ཚོགས་འོད་འཆང་མར་གྱུར་ཏོ། །དེ་བཞིན་གཤེགས་པ་མི་བསྐྱོད་པ་ནི་སངས་རྒྱས་མི་འཁྲུགས་པ་སྨན་གྱི་བླ་དྲི་མ་མེད་
པ་བཻ་དཱུརྱའི་འོད་དུ་གྱུར་ཏོ། །རྣམ་པར་སྣང་བྱེད་དེ་བཞིན་གཤེགས་པ་ནི་སངས་རྒྱས་སྟོབས་མཆོག་སེང་གེ་ཐུགས་རྗེས་འོད་ཀྱི་སྣང་བ་མི་ཟད་པར་གྱུར་ཏོ། །འོད་དཔག་ཏུ་མེད་པ་ནི་དེ་བཞིན་གཤེགས་པ་པད་མའི་འོད་འཕྲོ་མི་ཟད་པར་གྱུར་ཏོ། །
གདོན་མི་ཟ་བ་གྲུབ་པ་ནི་དེ་བཞིན་གཤེགས་པ་རྔ་སྒྲའི་རྒྱལ་པོ་ཞེས་བྱ་བར་གྱུར་ཏོ། །རིན་ཆེན་འབྱུང་ལྡན་ནི་དེ་བཞིན་གཤེགས་པ་དཀོན་མཆོག་དཔལ་རིན་ཆེན་འོད་འཕྲོ་བ་ཞེས་བྱ་བར་གྱུར་ཏོ། །བཅོམ་ལྡན་འདས་དཔལ་རྡོ་རྗེ་སེམས་དཔའ་
ནི་དེ་བཞིན་གཤེགས་པ་དཔལ་ཡེ་ཤེས་ཀུན་དུ་བཟང་པོ་ཞེས་བྱ་བར་གྱུར་ཏེ། དེ་ནི་གཞན་ཡིན་པར་མི་བལྟ་སྟེ་ད་ལྟར་ང་ཉིད་ཡིན་ནོ། །གཞན་ཡང་རབ་ཏུ་བཤད་པར་བྱ་སྟེ། ཁྲོ་བོའི་རྒྱལ་པོ་བཅུ་རྣམས་ལ་འདི་ལྟ་སྟེ། དཔལ་
གཤིན་རྗེ་མཐར་བྱེད་ནི་དེ་བཞིན་གཤེགས་པ་རིན་ཆེན་འབྱུང་གནས་སུ་གྱུར། །བགེགས་མཐར་བྱེད་ནི་དེ་བཞིན་གཤེགས་པ་རྒྱལ་བའི་དབང་པོ་ཞེས་བྱ་བར་གྱུར། །དཔལ་རྟ་མགྲིན་ནི་རིན་ཆེན་འོད་འཕྲོ་ཞེས་བྱ་བར་གྱུར། ཤེས་རབ་
མཐར་བྱེད་ནི་སངས་རྒྱས་མྱ་ངན་མེད་པའི་དཔལ་ཞེས་བྱ་བར་གྱུར། ཁྲོ་བོ་མི་གཡོ་བ་ནི་པད་མོ་དམ་པའི་དཔལ་ཞེས་བྱ་བར་གྱུར། ཁྲོ་བོ་འདོད་པའི་རྒྱལ་པོ་ནི་སངས་རྒྱས་ཉི་མའི་དཀྱིལ་འཁོར་སྣང་བའི་དཔལ་ཞེས་བྱ་བར་གྱུར། དབྱུག་
སྔོན་ཅན་ནི་དེ་བཞིན་གཤེགས་པ་གདུགས་དམ་པར་གྱུར། ཁྲོ་བོ་སྟོབས་པོ་ཆེ་ནི་དེ་བཞིན་གཤེགས་པ་ཏིང་ངེ་འཛིན་གྱི་རྒྱལ་པོ་གླང་པོ་དམ་པའི་དཔལ་ཞེས་བྱ་བར་གྱུར། ཁྲོ་བོ་གནོད་མཛེས་རྒྱལ་པོ་ནི་སངས་རྒྱས་པད་
མོ་དམ་པའི་དཔལ་ཞེས་བྱ་བར་གྱུར། ཁྲོ་བོ་གཙུག་ཏོར་འཁོར་ལོས་སྒྱུར་བ་ནི་དེ་བཞིན་གཤེགས་པ་དགའ་བ་དམ་པའི་དཔལ་ཞེས་བྱ་བར་གྱུར་ཏོ། །བསྐལ་པ་བཟང་པོའི་སངས་རྒྱས་སྟོང་འཇིག་རྟེན་དུ་མངོན་པར་འབྱུང་

89-1-150a

བ་ལ་འདི་ལྟ་སྟེ། དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་ཀྱི་ཕྱག་རྒྱ་དང་གསང་བ་འཛིན་པ་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྙིང་པོ་དང་། བྱང་ཆུབ་སེམས་དཔའ་ཆེན་
པོ་རྡོ་རྗེ་ཆོས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བའི་འོད་དང་། གསུམ་གྱི་སྐུ་གསུང་ཐུགས་ཀྱི་ཡེ་ཤེས་ཀྱི་གསང་བ་འཛིན་པའི་གནས་ཀྱི་སྤྱོད་ཡུལ་གྱིས་སྤྱད་པ་སྤྱོད་པ་ཉིད་དོ། །དེ་བཞིན་གཤེགས་པ་བརྒྱད་
བྱང་ཆུབ་ཀྱི་ཤིང་བརྒྱད་དང་བཅས་པ་ལས་མངོན་པར་བྱང་ཆུབ་པ་འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་རྡོ་རྗེ་འཛིན་པའི་ངོ་བོ་ཉིད་དུ་གནས་ཏེ། དེ་བཞིན་གཤེགས་
པ་སྣ་ཚོགས་བདག་ཉིད་དུ་གཅིག་པའི་སྐུའོ། །དེ་བཞིན་གཤེགས་པ་རྣམ་པར་གཟིགས་པ་ཏ་ལའི་ཤིང་གི་དྲུང་དུའོ། །དེ་བཞིན་གཤེགས་པ་རིན་ཆེན་གཙུག་ཏོར་ཅན་ནི་མྱ་ངན་མེད་པའི་ཤིང་གི་དྲུང་དུའོ། །དེ་བཞིན་གཤེགས་པ་མར་
མེ་ཅན་ནི་ཙཱུ་ཏའི་ཤིང་གི་དྲུང་དུའོ། །དེ་བཞིན་གཤེགས་པ་ལོག་པར་དད་སེལ་ནི་བྷ་ཏ་པའི་ཤིང་གི་དྲུང་དུའོ། །དེ་བཞིན་གཤེགས་པ་གསེར་ཐུབ་ནི་ཀ་ར་ཙ་པའི་ཤིང་གི་དྲུང་དུའོ། །དེ་བཞིན་གཤེགས་པ་འོད་བསྲུང་ནི་པར་ཀ་ཏི་པའི་ཤིང་གི་
དྲུང་དུའོ། །དེ་བཞིན་གཤེགས་པ་ཤཱཀྱ་ཐུབ་པ་ནི་པར་ཏི་པའི་ཤིང་གི་དྲུང་དུའོ། །དེ་བཞིན་གཤེགས་པ་བྱམས་པ་ནི་ནཱ་ག་ཀེ་ས་རའི་ཤིང་གི་དྲུང་དུའོ། །དེ་ལྟར་དེ་བཞིན་གཤེགས་པ་རྣམས་ཀྱིས་དུས་གསུམ་དུ་འབྱུང་བའི་སངས་རྒྱས་
ཐམས་ཅད་ཀྱི་དཀྱིལ་འཁོར་དུ་ཕྱོགས་བརྒྱད་ཀྱི་ཞིང་ཁམས་ན་བཞུགས་ཤིང་ཡོངས་སུ་སྐྱོང་བར་མཛད་དེ། གང་དུ་རྡོ་རྗེ་ཐེག་པ་ལ་གནས་པའི་རྣལ་འབྱོར་པ་རྣམས་ལ་དེ་བཞིན་གཤེགས་པ་དེ་དག་གིས་ཡོངས་སུ་
གཟིགས་ཤིང་བྱིན་གྱིས་རློབ་པར་སྟོན་པ་ཡིན་ནོ་ཞེས་གསུངས་སོ། །དེ་ནས་ཡང་དེ་བཞིན་གཤེགས་པ་ཐམས་ཅད་ཀྱི་གསང་བའི་བདག་པོས་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་རྣམས་ལ་

89-1-150b

བཀའ་སྩལ་པ། འདིར་དེ་བཞིན་གཤེགས་པ་ཀུན་དུ་འབྱུང་བའི་གནས་རྡོ་རྗེའི་ཏིང་ངེ་འཛིན་ཁོང་དུ་ཆུད་པར་གྱིས་ཤིག །དེ་ཡང་གང་ཞེ་ན། གང་དུ་དེ་བཞིན་གཤེགས་པ་རྣམས་ཏིང་ངེ་འཛིན་གང་དུ་བྱོན་པའམ་འཇུག་པར་
མཛད་པ་དང་གང་ནས་གཤེགས་པ་དང་། གང་དུ་གནས་པའི་དོན་གྱིས་རྣམ་པར་འཕྲུལ་པའི་མཛད་པ་ཤེས་པར་གྱིས་ཤིག །གང་དུ་འདི་ནི་མངོན་བསྟན་པས། །སངས་རྒྱས་འཇིག་རྟེན་འབྱུང་བ་དག །མངོན་པར་བྱང་ཆུབ་
གནས་ཉིད་ལས། །འབྱུང་དང་འཇུག་པར་གནས་པ་དང་། །ཕྲིན་ལས་མཛད་པ་དུ་མར་སྟོན། །དགའ་ལྡན་གནས་ནས་འཕོ་ཚུལ་དང་། །ལྷུམས་སུ་འཇུག་དང་སྐུ་བལྟམས་དང་། །གཞོན་ནུ་རོལ་དང་ཁབ་གནས་དང་། །སྐྱེད་མོས་
ཚལ་བྱོན་གནས་གཟིགས་ཏེ། །མངོན་པར་འབྱུང་དང་གཤེགས་མཛད་ཅིང་། །དཀའ་སྐྱེད་མཛད་དང་བཞེངས་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་བཅོམ་མངོན་པར་བྱང་ཆུབ་པ། །ཆོས་ཀྱི་འཁོར་ལོ་སྐོར་
མཛད་དེ། །འདི་ནི་དུས་རྣམས་ཀུན་དུ་ཡང་། །ཐོག་མར་ཐུན་མོང་ལམ་བསྟན་ཅིང་། །རབ་ཏུ་དགེ་བ་མཚན་མ་མེད། །ཐ་མར་ཐེ་ཚོམ་སེལ་བ་ཡི། །བྱང་ཆུབ་སེམས་ཀྱི་སྤྱོད་ཡུལ་དང་། །རྣམ་པར་ངེས་པ་ཕྲ་བར་བསྟན། །
སངས་རྒྱས་མ་ལུས་འདི་དག་ཉིད། །ཞི་བར་འཇུག་པ་སྟོན་པ་དག །བླ་ན་མེད་པའི་སྤྱོད་ཡུལ་ལོ། །སྐུ་གསུང་ཐུགས་ཉིད་རྡོ་རྗེ་ཡིས། །སེམས་ཀྱི་རོལ་མོ་ལས་བྱུང་བ། །སྒྱུ་འཕྲུལ་ཆེན་པོ་སྟོན་པ་ཡིས། །མཛད་པ་ཕྱི་ནང་
གསང་བ་སྟེ། །དགའ་ལྡན་ཕོ་བྲང་རང་ལུས་ཀྱི། །བདེ་ཆེན་སྤྱི་བོར་གནས་པ་ཉིད། །དམ་པ་འབིགས་བྱེད་གཞོན་ནུའི་གནས། །རྡོ་རྗེ་སྔགས་ཀྱི་དེ་ཉིད་ལས། །ཏིང་འཛིན་མཉམ་པར་གྱུར་པ་ནི། །ཇི་ལྟར་སྐར་མདའ་འཕོ་
བ་ལྟར། །བྱང་ཆུབ་སེམས་ཀྱི་གླང་པོ་ནི། །མཆེ་བ་དྲུག་ལྡན་དུ་གྱུར་པ། །སྙིང་རྗེས་ཆགས་པའི་སེམས་ཀྱིས་ནི། །རྩ་ཡི་ཕོ་བྲང་ཁ་སྦྱར་དུ། །བྱང་ཆུབ་སེམས་ནི་ཞུགས་པར་གྱུར། །དེར་གནས་ལྷུམས་སུ་འཇུག་པ་

89-1-151a

ཉིད། །རྡོ་རྗེ་འཛིན་པ་བདག་ཉིད་འཇུག །ཐབས་དང་ཤེས་རབ་ནུས་ཐོབ་པས། །གཡས་རྩ་ནས་ནི་འབྱུང་གྱུར་པ། །བལྟམ་པའི་མཛད་པ་ཞེས་བརྗོད་དོ། །བདེ་བའི་ནུས་པ་འཕེལ་བ་ལས། །རྒལ་ཚིགས་ཉི་ཤུ་རྩ་
བརྒྱད་ཀྱི། །པད་མ་ཡི་གེས་བགྲོད་པ་དག །གོམ་པ་བོར་བའི་དུས་ཡིན་ནོ། །རླུང་སེམས་འགྲོ་ལྡོག་གང་གྱུར་པ། །འཁོར་དང་མྱང་འདས་བསྐྱེད་པ་ནི། །བྲམ་ཟེ་མཚན་མཁན་དྲང་སྲོང་གིས། །ལུང་བསྟན་བརྗོད་པ་དེ་ཡིན་ནོ། །
དེ་ལྟར་མཉམ་པར་བཞག་པ་ལས། །རྗེས་ཐོབ་ཡུལ་ལ་སྤྱོད་གྱུར་པ། །སྤྲོས་བཅས་སྤྲོས་མེད་རྣམ་དབྱེ་བས། །འདོད་པའི་ཡོན་ཏན་རྣམ་ལྔ་ལ། །གཞོན་ནུ་རོལ་པའི་སྤྱོད་པ་ཡིས། །ལུས་ཀྱི་གནས་སོགས་ཀུན་དུ་རོལ། །དབྱངས་
དང་གསལ་བྱེད་གྱུར་པ་ཡི། །རྩ་ཡི་འཁོར་ལོའི་ཡི་གེ་རྣམས། །ཕོ་མོ་མ་ནིང་དབྱེ་བ་ཡིས། །ཡི་གེའི་གནས་ལ་མཁས་པ་ཡིན། །རྩ་དང་རླུང་དང་ཐིག་ལེ་དག །འཕོ་ཚུལ་གྲངས་དང་དབྱེ་བསྡུ་ཡི། །རྒྱུ་ཚུལ་སྤྲོ་བསྡུ་གང་གྱུར་པ། །
རྩིས་ཀྱི་གནས་ལ་མཁས་པའོ། །ས་ཆུ་མེ་རླུང་ནུས་པ་ཡི། །གླང་པོ་བརྐྱལ་དང་འགེགས་པ་དང་། །ལྤགས་པ་རིམ་པ་བདུན་གྱུར་ལ། །ཤིང་སོགས་རིམ་པར་གནས་གྱུར་པ། །རླུང་གི་གཞུ་ལ་མེ་མདའ་ཡིས། །འཕང་བ་ཆུ་
རྒྱུན་འབབ་པ་ཡིན། །དང་པོར་ཤེས་རབ་ལས་ཐོབ་པ། །བྱང་སེམས་དམར་པོ་གསང་གནས་སུ། །དབང་བྱས་བཙུན་མོ་ཁབ་གནས་ཤིང་། །འབྱུང་བཞིའི་རླུང་རྣམས་བཙུན་མོའོ། །སྨིན་མཚམས་ཀྱི་ནི་མདུད་པ་
དེར། །ཐིག་ལེ་ཕྲ་བ་བརྟན་པ་ནི། །སྟེང་དུ་ཉི་ཟླ་གཟས་ཟིན་པ། །སྒྲ་ཅན་འཛིན་དུ་བརྗོད་པ་ཡིན། །ལྟེ་བ་སྤྲུལ་པའི་འཁོར་ལོ་ཡི། །ཕྱོགས་བཞིར་སྐྱེད་ཚལ་གཟིགས་པ་ནི། །ཟག་བཅས་རྩ་རླུང་ཐིག་ལེ་ཡིས། །
སྲིད་པ་བསྐྱེད་པ་གང་ཡིན་པའོ། །ཟག་མེད་བདེ་བ་ཐོབ་འདོད་པས། །དེ་ཡི་ཚུལ་ལ་འཇུག་པ་ནི། །རླུང་གི་རྟ་དང་བཅས་པ་ཡིས། །དབུ་མའི་མཐོངས་ལས་བྱུང་ནས་ནི། །བྱང་ཆུབ་སེམས་ཀྱི་མཆོད་རྟེན་དག །འཁོར་བའི་

89-1-151b

དྲ་བ་བཅད་ནས་ནི། །ཆུ་བོ་འདུས་པའི་འགྲམ་ཉིད་དུ། །ཡེ་ཤེས་མངོན་དུ་བྱེད་འདོད་པས། །བཙན་ཐབས་སུ་ནི་འགོག་པ་དང་། །ལུས་ངག་གཅུང་ལ་བོར་བ་ཡིས། །ཟུག་དང་དཀའ་ཐུབ་སྤྱད་པ་ནི། །མཉམ་རྗེས་གཉིས་སུ་
མེད་པ་ཡིས། །རྩེ་གཅིག་ཏིང་འཛིན་གནས་པའོ། །ཨཿཐུང་གསོས་ཤིང་རྒྱུན་ཕབ་པས། །འོ་མའི་བདུད་རྩི་གསོལ་བ་ཡིན། །གང་བ་བྱང་ཆུབ་ཤིང་དྲུང་དུ། །རྡོ་རྗེ་སྐྱིལ་དཀྲུང་གྱུར་པ་ཡིས། །རྟགས་དང་ཡོན་ཏན་འཐོབ་བྱེད་
ཅིང་། །སྣང་བ་གསུམ་ནི་ཐིམ་པའི་ཚེ། །ཟླ་བ་ཉི་མ་མུན་པ་ཡི། །རྟོག་པའི་དྲ་བ་གང་ཡིན་པ། །བདུད་བཏུལ་བ་ནི་སྲོད་ཀྱི་དུས། །རྣམ་རྟོག་ཡེ་ཤེས་ཐིམ་གྱུར་པ། །ཉེ་བར་ཐོབ་པའི་སྐད་ཅིག་ལ། །སྐད་ཅིག་ཁྱད་པར་ལྔ་པ་
ལ། །ཐོ་རངས་སྐྱ་རིང་ཤར་བའི་དུས། །ནམ་མཁའ་སྤྲིན་མེད་ལྟ་བུ་ཡི། །ཉམས་ཀྱི་ཤེས་པ་འོད་གསལ་བ། །ཁྱད་པར་མངོན་པར་བྱང་ཆུབ་པའི། །ཡང་དག་སངས་རྒྱས་ཐོབ་པ་ཡིན། །འཁོར་ལོ་བཞིར་ནི་བདུད་བཅོམ་པས། །
བཅོམ་ལྡན་འདས་ཞེས་བརྗོད་པ་ཡིན། །མགྲིན་པར་ཟག་བཅས་རླུང་འགགས་པས། །ཀླུ་ཡི་གནས་སུ་ཞུགས་པ་སྟེ། །ཚངས་པ་སྤྱི་བོ་ནས་འཕོ་ཞིང་། །ས་རླུང་ཐིག་ལེ་དང་བཅས་པས། །གསེར་གྱི་འཁོར་ལོ་ལྡན་པ་
ཡིན། །ཐམས་ཅད་དབང་དུ་གྱུར་པ་ནི། །ཁམས་གསུམ་པོ་ནི་མ་ལུས་དང་། །འགྲོ་དྲུག་སེམས་ཅན་ཐམས་ཅད་ཀྱིས། །ཚངས་པ་ལྷ་དང་བཅས་པ་དང་། །ལྷ་སྲིན་སྡེ་བརྒྱད་མ་ལུས་པས། །ཆོས་ཀྱི་འཁོར་ལོ་བསྐུལ་བ་ཡིན། །སྒྲོལ་
རྒྱུའི་ཚལ་ནི་མཛོད་སྤུ་སྟེ། །ཚོང་དཔོན་གཉིས་ནི་རྩ་གཉིས་ཏེ། །ལམ་གྱུར་སྟོབས་དང་ལྡན་པའོ། །ལྔ་སྡེ་བཟང་པོ་ཞེས་བྱ་བ། །དུག་ལྔ་བསྐྱེད་པའི་རྩ་དང་རླུང་། །བདེན་བཞི་ཆོས་ཀྱི་འཁོར་ལོ་ནི། །སྤྲུལ་པའི་གནས་སུ་གསུངས་
པ་སྟེ། །བཱ་ར་ན་སི་ཞེས་བྱ་ཡི། །ཐོག་མར་ཆགས་པའི་གནས་ཡིན་ནོ། །ཆོ་འཕྲུལ་བསྟན་པ་ཞེས་བྱ་བ། །མུ་སྟེགས་གདུལ་བའི་དོན་དུ་སྟེ། །དཔའ་སྐོང་ཀུན་བརྗོད་རྫུ་འཕྲུལ་དང་། །བྱིན་གྱིས་རློབ་པའི་ཆོ་འཕྲུལ་གྱིས། །

89-1-152a

ལོག་པར་ལྟ་བ་འཇོམས་པར་མཛད། །མཚན་མ་མེད་པའི་ཆོས་གསུངས་པ། །སྙིང་གའི་གནས་སུ་བསྟན་པ་སྟེ། །རྒྱལ་པོའི་ཁབ་དང་བྱ་རྒོད་སྤུངས། །གནས་ཀྱི་ཁྱད་པར་ཐེག་པ་ཆེ། །ཁྱད་པར་འཁོར་རྣམས་
བསྟན་པ་ལ། །ཟབ་ཅིང་རྒྱ་ཆེ་བསྟན་པ་ཡིན། །སྤྱི་བོ་མགྲིན་པ་སྨིན་མཚམས་དང་། །གསང་བ་ལ་སོགས་ཐམས་ཅད་དུ། །དོན་དམ་ངོ་བོ་ཉིད་ཀྱི་ཆོས། །ཐམས་ཅད་དེ་བཞིན་ཉིད་དོན་གསུངས། །གནས་གཞན་རྣམས་སུ་ཐུབ་པ་ཡིས། །
ཆོས་རྣམས་ཐམས་ཅད་གསུངས་པ་ཡིན། །འཇིག་རྟེན་འཇིག་རྟེན་འདས་པ་ཡིས། །མཛད་པ་སྣ་ཚོགས་གང་བསྟན་ནས། །སྲོག་རྩོལ་དེ་བཞིན་ཉིད་ཐིམ་ཞིང་། །ཐམས་ཅད་མངོན་དུ་གྱུར་པ་ཡི། །སྐུ་བཞི་ངོ་བོ་ཉིད་སྐུར་ཐིམ། །བདེ་
ཆེན་རང་བྱུང་དྲི་མེད་པའི། །དག་པའི་ཞིང་ཁམས་རབ་མི་གནས། །རྟོག་མེད་ཡེ་ཤེས་ནམ་མཁའ་བཞིན། །གང་དུ་མི་མཇེད་འཇིག་རྟེན་གྱི། །འདོད་ཁམས་དབང་ཕྱུག་གནས་འདིར་ནི། །དེ་བཞིན་གཤེགས་པ་སྔོན་བྱུང་བ། །
དཔག་མེད་བསྐལ་པ་འདས་པའི་དུས། །ཐུབ་པ་ཆེན་པོ་མར་མེ་མཛད། །ང་ནི་བྲམ་ཟེར་གྱུར་པ་ཡིས། །སེམས་བསྐྱེད་ཞུས་ཚེ་བསྟེན་པ་ན། །མངོན་པར་ལུང་བསྟན་ཐོབ་པར་གྱུར། །དེ་ཉིད་འཇིག་རྟེན་བཞུགས་པའི་ཚེའང་། །
གསང་བའི་གནས་འདི་མ་གསུངས་ཤིང་། །དེ་ཡི་གོང་རོལ་སྔར་འདས་ཚེ། །སངས་རྒྱས་ཐུབ་ཆེན་མཆོག་ཉིད་དང་། །རིན་ཆེན་གཙུག་ཏོར་ཅན་དང་ནི། །རྣམ་པར་གཟིགས་ལ་སོགས་པས་ཀྱང་། །གསང་ཆེན་འདི་ནི་མ་གསུངས་
ཤིང་། །ལོག་པར་དད་སེལ་གསེར་ཐུབ་དང་། །རྒྱལ་བ་འོད་བསྲུངས་དག་གིས་ཀྱང་། །གསང་བ་འདི་དག་མ་གསུངས་ཏེ། །དེ་ཉིད་སྟོན་པའི་དོན་དུ་ནི། །གསང་ཆེན་གནས་ཀྱི་དོན་འདི་དག །དེ་དུས་སེམས་ཅན་ཐམས་ཅད་
ལ། །གང་དུ་མངོན་པར་སྤྱོད་པ་དང་། །ཐུན་མོང་བསླབ་པའི་ཚུལ་བསྟན་ཅིང་། །འདི་ཉིད་གསུངས་པར་མ་གྱུར་ཏོ། །གང་དུ་མ་འོངས་དུས་ན་ཡང་། །བྱམས་པ་ལ་སོགས་རྒྱལ་བ་ཡི། །བསྐལ་བཟང་སངས་རྒྱས་དུ་

89-1-152b

མས་ཀྱང་། །འདི་དག་ལྷ་མིའི་མངོན་སུམ་དུ། །གསང་བ་སྟོན་པར་མི་འགྱུར་རོ། །ད་ལྟར་ཕྱོགས་བཅུའི་འཇིག་རྟེན་གྱི། །འགྲོ་དྲུག་སེམས་ཅན་སྣ་ཚོགས་ལ། །སྙིགས་མར་གྱུར་པའི་དུས་ཀྱི་ཚེ། །དབང་པོ་རྣོ་ཞིང་དོན་སྤྱོད་
པས། །དུས་ལ་བབ་པར་ཤེས་པར་བྱ། །འདི་ཉིད་ཉེ་བར་འབྱུང་བ་ཡང་། །གླིང་འདི་ཉིད་ལས་གཞན་དུ་མིན། །གང་ཡང་འོག་མིན་ཞིང་ཁམས་ནི། །ཡེ་ཤེས་སྣང་བ་རྒྱས་པའི་ཕྱིར། །རྡོ་རྗེ་འཆང་ཆེན་བཅོམ་ལྡན་གྱིས། །རྒྱུན་མི་
འཆད་ཅིང་ཁྱབ་པ་དང་། །རྟག་ཅིང་འགྱུར་མེད་མཆོག་གིས་ནི། །གསང་ཆེན་འདི་ནི་ཀུན་དུ་སྟོན། །གང་ཡང་འདས་དང་མ་བྱོན་དང་། །ད་ལྟར་འབྱུང་བ་མ་ལུས་པ། །གསང་ཆེན་མཆོག་འདིས་མ་བགྲོད་པར། །བྱང་ཆུབ་ཐོབ་པར་
མི་འགྱུར་ཏེ། །འདི་ནི་མཐར་ཐུག་གནས་ཡིན་པས། །དེ་ལས་གཞན་པའི་སྤྱོད་ཡུལ་མིན། །འདི་ཉིད་གནས་པའི་ཏིང་འཛིན་ལས། །སྐད་ཅིག་གིས་ནི་སངས་རྒྱས་འཐོབ། །འདི་ཉིད་དཀྱིལ་འཁོར་འཁོར་ལོའི་རིམ། །ཕྱོགས་མཚམས་
བརྒྱད་ཏུ་སྣང་བ་ཡི། །དུར་ཁྲོད་གནས་བརྒྱད་སྤྲུལ་པ་ལ། །ཕྱི་ནང་གནས་ཀྱི་དབྱེ་བ་ཡིས། །ཕྱོགས་སྐྱོང་བ་དང་ཞིང་སྐྱོང་ལ། །མཛད་པ་རྟགས་ཀྱི་ཕྱག་རྒྱ་དང་། །གྲུབ་པ་རྟགས་ཀྱི་ཕྱག་རྒྱ་སྟེ། །སྙིང་པོ་ཡེ་ཤེས་ཕྱག་རྒྱ་དང་། །ཕྲིན་
ལས་རོལ་པའི་ཕྱག་རྒྱའོ། །འཇིག་རྟེན་པ་རྣམས་གདུལ་བའི་ཕྱིར། །དཔལ་རྡོ་རྗེ་འཛིན་པ་ཆེན་པོས་ཡེ་ཤེས་ཀུན་དུ་རྒྱས་པས་ཕྱག་རྒྱས་རྟགས་མཚོན་པས་བསྟན་པ་ཞེས་བྱ་བའི་ཏིང་ངེ་འཛིན་ཏོ། །མཛད་པའི་ཕྱག་རྒྱས་
རྒྱས་གདབ་ཕྱིར། །ཞི་བའི་དོན་དུ་ཕྱོགས་སྐྱོང་གྱུར། །དེ་ཡི་རྟགས་ནི་འཁོར་དང་བཅས། །ཡུམ་དང་རིན་ཆེན་རྒྱན་གྱིས་སྤྲས། །གྲུབ་པའི་རྟགས་ཀྱི་རྒྱས་གདབ་ཕྱིར། །ཞིང་སྐྱོང་བརྒྱད་དུ་ཁྲོ་བོའི་ཚུལ། །ལྗོན་པའི་ཤིང་ལ་བརྟེན་
ནས་གནས། །ཞི་བའི་ཚུལ་གྱིས་རྒྱས་གདབ་ཕྱིར། །དེ་ཡི་ཞོན་པའི་གདོང་བརྙན་བྱུང་། །ཕྲིན་ལས་ཕྱག་རྒྱས་རྒྱས་གདབ་ཕྱིར། །ཚར་གཅད་རྗེས་འཛིན་ལས་རྣམས་མཛད། །རྡོ་རྗེ་དབྱུག་ཏོ་ཞགས་པ་དང་། །བེ་ཅོན་

89-1-153a

བགྲང་ཕྲེང་རལ་གྲི་དང་། །བ་དན་ཏྲི་ཤཱུལ་འཛིན་པར་མཛད། །སྙིང་པོ་ཡེ་ཤེས་ཕྱག་རྒྱ་ཡིས། །རྒྱས་གདབ་ཕྱིར་ནི་གཞལ་ཡས་ཀྱི། །ཕྱོགས་མཚམས་བརྒྱད་དུ་བཀོད་པ་ཡིན། །རོལ་པའི་ཕྱག་རྒྱ་སྤྱོད་པའི་ཕྱིར། །
དུར་ཁྲོད་བརྒྱད་དུ་གནས་པ་སྟེ། །ལྷ་དབང་བཅས་དང་མ་མོ་དང་། །ཀླུ་དང་གནོད་སྦྱིན་ཚོགས་རྣམས་དང་། །འབྱུང་པོའི་ཚོགས་དང་དྲང་སྲོང་དང་། །ཤ་ཟ་རྣམས་དང་རིག་འཛིན་ཚོགས། །སྡེ་ཚན་བརྒྱད་ཀྱིས་བསྐོར་བ་ཡིན། །ཞིང་སྐྱོང་
དྲག་པོའི་ལས་བྱེད་ཕྱིར། །ཕྱག་ན་གྲི་གུག་ཐོད་པ་བསྣམས། །ཤིན་དུ་འཇིགས་པ་གཏུམ་པའི་གཟུགས། །ཤིང་བརྒྱད་ནང་ནས་ལུས་ཕྱེད་ཐོན། །ལུས་ཀྱི་ཕྱག་རྒྱ་སྦས་པ་ཡིན། །དེ་ཡང་སོ་སོའི་ཡུམ་དག་ནི། །ཤིང་གི་རྩ་བར་
གནས་པ་སྟེ། །ཞལ་ཟས་སྟོབས་པའི་ཚུལ་དུ་གནས། །གླང་པོ་མ་ཧེ་ཆུ་སྲིན་དང་། །རྟ་མཆོག་ཕྱོགས་གཅིག་གནས་པ་ཡིན། །ར་དང་རོ་ལངས་རི་དགས་དང་། །ཁྱུ་མཆོག་བཞི་ནི་མཚམས་སུ་གནས། །སྟེང་ཕྱོགས་ཚངས་
པ་ངང་པ་ཞོན། །འོག་ཕྱོགས་ས་བདག་རུས་སྦལ་ཞོན། །ལྷ་དང་ལྷ་མོར་མཚུངས་པ་སྟེ། །འདི་དག་རང་བཞིན་གྱིས་གནས་ཡིན། །ཆགས་པ་དང་ཁྲོ་བོའི་སྐུས་འཇིག་རྟེན་པ་དང་འཇིག་རྟེན་ལས་འདས་པའི་རྣམ་པར་འཕྲུལ་པ་
བསྟན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དེ་ནས་རྒྱལ་པོ་རྡོ་རྗེ་འཛིན། །དེ་ཉིད་ཀུན་དུ་སྤྲུལ་མཛད་པས། །རྡོ་རྗེ་སེམས་དཔའི་གཟུགས་སྦས་ནས། །ཞི་བའི་སྐུས་ནི་མི་འདུལ་བའི། །སེམས་ཅན་གདུག་པ་གདུལ་བའི་
ཕྱིར། །རང་རིག་ཡེ་ཤེས་བྱང་ཆུབ་སེམས། །དྲག་པོ་ཁྲོ་བོའི་སྐུར་བསྟན་པས། །ཁྲོ་བོ་ཞེས་ནི་རྣམ་པར་བརྗོད། །གང་དུ་རྗེས་སུ་འཛིན་པ་ནི། །རྣམ་པར་བསྒྱུར་ཏེ་ཞི་བས་ན། །སླར་ཡང་ཞི་བ་དེ་བཞིན་གཤེགས། །
ཆོས་ཉིད་མཉམ་པར་འབྱུང་བའོ། །འདི་དག་གསང་བ་རྡོ་རྗེ་འཛིན། །སེམས་ཅན་དོན་དུ་ཐབས་སྟོན་མཛད། །ཤཱཀྱ་ཐུབ་པ་བཅོམ་ལྡན་འདས། །བདག་ཉིད་ཆེན་པོའི་བྱིན་བརླབས་ལས། །རྔ་བོ་ཆེ་དང་གཎ་ཌ་དང་། །

89-1-153b

ཆོས་ཀྱི་དུང་ལས་གྲགས་པ་དང་། །སྣ་ཚོགས་རོལ་མོའི་སྒྲ་ལས་ནི། །གང་ཞིག་དམ་ཆོས་སྒྲ་བྱུང་བ། །འཕགས་པ་ཉན་ཐོས་རྣམས་དང་ནི། །བྱང་ཆུབ་སེམས་དཔའི་ཚོགས་ཀྱིས་ཀྱང་། །ཆོས་ཀྱི་འགྲོ་བ་གང་
ཡིན་དང་། །དུས་དེར་བརྒྱུད་པའི་ཆོས་བསྟན་པ། །དེ་སྙེད་བདེ་གཤེགས་རྒྱལ་བ་ཡི། །དངོས་ཀྱི་བྱིན་བརླབ་རིག་པར་བྱ། །སྟོན་པའི་ཞལ་གྱི་དཀྱིལ་འཁོར་ནི། །མི་གནས་མ་འོངས་དུས་ཀྱི་ཚེ། །དོན་བྱེད་སྟོན་པ་འབྱུང་
བ་ནི། །བླ་མེད་བཀའ་ཡི་དགོངས་པ་དག །ཡང་དག་ངེས་པར་བཀྲོལ་ནས་ཀྱང་། །གང་དུ་དམ་པའི་ཆོས་སྒྲ་ཡིས། །འགྲོ་བ་སྨིན་པར་བྱེད་པ་ནི། །དེ་དུས་ང་ཉིད་དེར་བསྟན་པས། །བསྟན་བཅོས་ཤིན་དུ་རྒྱས་པར་འགྱུར་ཞེས་
གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་དེ་བཞིན་གཤེགས་པའི་གནས་
གསང་བ་ཆེན་པོ་ཐུན་མོང་མ་ཡིན་པ་ཞེས་བྱ་བའི་ལེའུ་སྟེ་བཞི་བཅུ་བཞི་པའོ།། །། གསང་བ་ཐུན་མོང་མ་ཡིན་པ་རྣལ་འབྱོར་ཆེན་པོའི་རྒྱུད་ཀྱི་བརྟག་པ་བཞི་པ་ལས་རྡོ་རྗེ་དཔལ་མཆོག་
ཆེན་པོ་གསང་བའི་དོན་གྱི་རྒྱལ་པོའོ། །དེ་ནས་རྒྱལ་པོ་རྡོ་རྗེ་འཛིན། །རྡོ་རྗེ་སྐྱེ་བོ་འོད་ཆེན་པོ། །འདོད་དང་ཐར་པ་རྡོ་རྗེ་འཛིན། །ཡེ་ཤེས་གསང་བ་བཀའ་སྩལ་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་
ཡང་འདུས་པར་གྱུར་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་དེ་བཞིན་གཤེགས་པ་ལ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་དམ་ཚིག་གིས་
གསོལ་བ་བཏབ་པ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་རིན་པོ་ཆེའི་ཡེ་ཤེས་ཀྱི་ནོར་བུ་ཆེན་པོ་དུ་མའི་ཚོགས་ཀྱིས་ཡང་དག་པར་མཆོད་པར་བྱས་སོ། །མཆོད་པར་བྱས་ནས་ཀྱང་སངས་རྒྱས་ཐམས་ཅད་ཀྱིས་

89-1-154a

མདུན་དུ་བདར་ཞིང་འདུག་སྟེ་གསང་ཆེན་གྱི་དོན་ལ་ཕྱོགས་གཅིག་ཏུ་ཞུགས་ཏེ་ཡོངས་སུ་སྤྱོད་པར་གྱུར་ཏོ། །དེ་ལ་འདི་ནི་གསང་ཆེན་གྱི། །སྐུ་གསུམ་བླ་མེད་ཕྱག་རྒྱ་ཆེ། །དུས་གསུམ་རྒྱལ་བ་མ་ལུས་
པའི། །ཆོས་རྣམས་འདུས་པའི་མཆོག་ཡིན་ཏེ། །འདི་ནི་ཁྱད་པར་དུས་འབྱུང་བའི། །དམ་ཚིག་མཆོག་ཏུ་བརྟག་པ་ཡིན། །དེ་ནས་བཅོམ་ལྡན་འདས་དེ་བཞིན་གཤེགས་པ་གཟུགས་བཟང་པོ་སངས་རྒྱས་ཐམས་ཅད་ཀྱི་
ཡེ་ཤེས་རྡོ་རྗེ་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཔལ་ལྡན་སངས་རྒྱས་སྐུས་ཁྱབ་པ། །སྐུ་ཡི་རྫུ་འཕྲུལ་མཐའ་ཡས་པ། །ཇི་སྙེད་སྐུ་ཡི་རྣམ་པ་
མངའ། །གསང་བ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱལ་པོ་དོན་གྲུབ་སངས་རྒྱས་ཐམས་ཅད་ཀྱི་མོས་པ་སྣ་ཚོགས་མཁྱེན་པའི་སྟོབས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །དེ་བཞིན་གཤེགས་པའི་གསུང་གི་གནས། །གསུང་གཅིག་གནས་ལས་གྱུར་མེད་ཀྱི། །མོས་པ་དུ་མས་སོ་སོར་ཐོས། །བྱང་ཆུབ་ཚུལ་འདི་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་སེང་གེའི་སྡེ་སངས་རྒྱས་ཐམས་ཅད་ཀྱི་བསམ་གཏན་དང་ཏིང་ངེ་འཛིན་མཁྱེན་པའི་སྟོབས་རྡོ་རྗེ་སངས་རྒྱས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །དེ་བཞིན་གཤེགས་པའི་ཐུགས་དག་ལ། །ཡེ་ཤེས་སྣ་ཚོགས་ཏིང་འཛིན་ལས། །མི་འགྱུར་ནམ་མཁའི་ངང་བཞུགས་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་ནོར་བུའི་ལྷ་སངས་རྒྱས་ཐམས་ཅད་ཀྱི་བསམ་གྱིས་མི་ཁྱབ་པའི་སྙོམས་པར་འཇུག་པ་མཁྱེན་པའི་སྟོབས་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །

89-1-154b

བསྐལ་པ་གང་གཱའི་བྱེ་སྙེད་དུ། །སེམས་ཀྱི་རྒྱུན་ནི་མི་འགག་ཕྱིར། །ཏིང་འཛིན་བསམ་གྱིས་མི་ཁྱབ་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གྲགས་པ་སངས་རྒྱས་ཐམས་
ཅད་ཀྱི་ཀུན་ནས་ཉོན་མོངས་པ་དང་རྣམ་པར་བྱང་བ་མཁྱེན་པའི་སྟོབས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བྱེ་བ་ཕྲག་ནི་བརྒྱ་ཡི་བར། །
ཐུབ་པའི་ཞིང་ཁམས་བདག་པོ་ནི། །ཀུན་དུ་བཟང་པོའི་སྤྱོད་ལས་བྱུང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱལ་བ་སངས་རྒྱས་ཐམས་ཅད་ཀྱི་ལས་དང་ལས་ཀྱི་རྣམ་པར་
སྨིན་པ་མཁྱེན་པའི་སྟོབས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་རྒྱུ་དང་འབྲས་བུ་ཡི། །སྣང་བ་མི་འགག་སྟོང་པ་ཉིད། །དེ་ཉིད་རང་བཞིན་གྱིས་དག་བརྗོད། །བྱང་
ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱ་ཆེན་སྙིང་པོ་སངས་རྒྱས་ཐམས་ཅད་ཀྱི་ཐམས་ཅད་དུ་སོན་པའི་ལམ་མཁྱེན་པའི་སྟོབས་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཔེར་ན་ནམ་མཁའི་ཁམས་འདི་ནི། །ཐམས་ཅད་རྗེས་སུ་སོང་གྱུར་ཀྱང་། །སེམས་པ་མི་ལྡན་དེ་བཞིན་ཏེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །
དེ་ནས་དེ་བཞིན་གཤེགས་པ་བསོད་ནམས་འོད་ཟེར་སངས་རྒྱས་ཐམས་ཅད་ཀྱི་སྔོན་གྱི་གནས་མ་ལུས་པར་མཁྱེན་པའི་སྟོབས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
འདིར་ནི་སེམས་ཅན་ཁམས་མཐའ་ཡས། །དེ་ཡི་ཆོས་ཉིད་རྗེས་འགྲོ་བ། །རྟོག་པ་མི་མངའ་དེ་ཉིད་དོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བཟང་པོ་ཡོན་ཏན་སངས་རྒྱས་

89-1-155a

ཐམས་ཅད་ཀྱི་འཆི་འཕོ་བ་དང་སྐྱེ་བ་མཁྱེན་པའི་སྟོབས་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདིར་ནི་རྒྱལ་བའི་སྐུ་ཉིད་ཀྱང་། །
སྤྲོས་མེད་དེ་བཞིན་ཉིད་དག་པའི། །རྗེས་འགྲོ་རྟོག་པ་མེད་པ་ཉིད། །སྤྲོས་པ་མེད་པའི་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྨྲ་འདོན་དཔལ་སངས་རྒྱས་ཐམས་ཅད་ཀྱི་ཟག་པ་ཟད་པ་
མཁྱེན་པའི་སྟོབས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡོངས་སུ་དག་པའི་སྣང་བ་གང་། །མཉམ་པ་ཉིད་ཀྱི་ངང་ལས་ནི། །སྤང་བླང་དབྲི་བསྣན་མེད་པར་གྲོལ། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྒྲོན་མེའི་རྒྱལ་པོ་སངས་རྒྱས་ཐམས་ཅད་ཀྱི་སྟོབས་བཅུ་ཡོངས་སུ་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །ཆོས་སྐུ་ཡེ་ཤེས་རྒྱ་མཚོ་ལས། །ཆུ་རླུང་ནམ་མཁར་དག་པ་གང་། །གཟུགས་སྐུའི་རྟོགས་པ་མཁའ་ལ་གནས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་ཡེ་ཤེས་བརྩེགས་སངས་རྒྱས་ཐམས་ཅད་ཀྱི་ཤའི་སྤྱན་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐོགས་པ་མེད་པ་རྡོ་རྗེ་ཡི། །ཕ་ལམ་ལྟར་ནི་ཕྲིན་ལས་དག །
སྟོབས་བཟངས་ཀྱིས་ནི་ཡུལ་དུ་གྱུར། །སྣང་མེད་རྣལ་འབྱོར་པ་ཡི་གནས་ཞེས་གསུངས་སོ། །དེ་ནས་དེ་བཞིན་གཤེགས་པ་ལྷ་མཆོག་སངས་རྒྱས་ཐམས་ཅད་ཀྱི་ལྷའི་སྤྱན་རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདོད་པ་དང་ནི་གཟུགས་དག་ནི། །ལྷ་ཡི་སྤྱོད་ཡུལ་གཙང་མའི་གནས། །འཇིག་རྟེན་ཁམས་ཀུན་སྣང་བར་བྱེད། །བྱང་ཆུབ་ཚུལ་འདི་བསྟན་

89-1-155b

པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སའི་བདག་པོ་སངས་རྒྱས་ཐམས་ཅད་ཀྱི་ཆོས་ཀྱི་སྤྱན་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐམས་ཅད་
མཁྱེན་པའི་ཡེ་ཤེས་ལས། །དབྱེར་མེད་བདེན་པ་གཉིས་དག་པ། །རྣམ་པར་འབྱེད་པའི་ངོ་བོ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྣམ་པར་གྲོལ་བརྙེས་སངས་རྒྱས་
ཐམས་ཅད་ཀྱི་བྱང་ཆུབ་པའི་སྤྱན་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་རྟོག་པ་མི་མངའ་བ། །ཆོས་ཀྱི་གཏེར་དང་ལྡན་པ་ལས། །རྗེས་སུ་དྲན་པའི་སྤྱན་
གྱིས་ནི། །དུས་གསུམ་ཤེས་བྱ་མི་གཟིགས་མེད་ཅེས་གསུངས་སོ། །དེ་ནས་དེ་བཞིན་གཤེགས་པ་གཙུག་གི་གསེར་སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྤྱན་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་
ཆུབ་ཀྱི་སེམས་འདི་གསུངས་སོ། །དུས་གསུམ་མཉམ་ཉིད་རྣམ་དག་པས། །དུས་ཀྱི་འདུ་ཤེས་འཇུག་མེད་པ། །སྐད་ཅིག་ཡེ་ཤེས་སྤྱོད་ཡུལ་ནི། །སྣང་བ་མེད་པའི་ཚུལ་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་སྒྲ་ཅན་སངས་རྒྱས་ཐམས་ཅད་ཀྱི་སྤྱན་ལྔ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་གཟིགས་པའི་ཡུལ་མེད་པས། །
བློ་སྣང་བཏགས་པའི་ཚུལ་མ་གྲུབ། །དེ་སྣང་གདུལ་བྱའི་དོན་སྤྱོད་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་དཀའ་སངས་རྒྱས་ཐམས་ཅད་ཀྱི་ཕྱིར་མི་ལྡོག་པའི་
ལམ་བསྟན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡེ་ཤེས་གཞལ་དུ་མེད་པ་ཉིད། །མི་གནས་རྣམ་པར་མི་གནས་པས། །ནམ་མཁའ་ལྟ་བུར་

89-1-156a

མི་རྟོག་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་གསལ་སངས་རྒྱས་ཐམས་ཅད་ཀྱི་མི་ཟད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདུ་ཤེས་དང་ནི་སེམས་པ་དང་། །ལྟ་བ་ཕྱིན་ཅི་ལོག་སྤངས་ནས། །ཡེ་ཤེས་མངོན་པར་བྱང་ཆུབ་པ། །གསང་བ་ཚུལ་འདི་བསྟན་པའོ་ཞེས་གསུངས་སོ། །དེ་ནས་
དེ་བཞིན་གཤེགས་པ་ཟླ་བའི་འོད་ཟེར་སངས་རྒྱས་ཐམས་ཅད་ཀྱི་མི་གནས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ། །བྱང་ཆུབ་ཀྱི་སེམས་འདི་གསུངས་སོ། །ཡེ་ཤེས་ཟག་པ་མེད་པའི་དབྱིངས། །རང་བྱུང་
བསམ་གྱིས་མི་ཁྱབ་པ། །ནམ་མཁའི་ཁམས་ལྟར་རྟེན་མེད་པས། །དམིགས་མེད་ཡེ་ཤེས་ཚུལ་བསྟན་པའོ་ཞེས་གསུངས་སོ། །དེ་ནས་གསང་བ་འཛིན་པ་ལ། །
མཆོད་པ་གནས་ཀྱི་དོན་འདི་གསུངས། །མེ་ཏོག་རིགས་ནི་ལྷ་མོའི་ཆ། །དེ་ཉིད་ཡེ་ཤེས་དབྱིངས་བསྟན་པའོ་མཁས་པས་ཨུད་པ་ལ་དག་ནི། །འབྱུང་བ་ལྔ་ཡི་རྣམ་པ་སྟེ། །པད་མ་རྣམ་པ་ལྔ་ཉིད་ནི། །འདོད་
ཡོན་ལྔ་ཡི་བྱེ་བྲག་སྟེ། །ཛཱ་ཏི་རྣམ་གསུམ་ཞེས་བྱ་བ། །སྐུ་གསུང་ཐུགས་ཀྱི་ལྷ་མོ་སྟེ། །ཀར་ནི་ཀ་ར་ཆུ་ཡི་ལྷ། །མ་ལི་ཀ་ནི་མེ་ཡི་ལྷ། །ཡུ་ཏི་ཀ་ནི་ས་ཡི་ལྷ། །ཀ་ར་བཱི་ར་རླུང་གི་ལྷ། །ལྷ་མོ་འདོད་
པའི་དབང་ཕྱུག་སྟེ། །གཟུགས་དང་སྒྲ་དང་དྲི་རྡོ་རྗེ། །རོ་དང་རེག་བྱ་རྡོ་རྗེ་མ། །སྤྱན་དང་མཱ་མ་ཀཱི་དང་ནི། །གོས་དཀར་མོ་དང་སྒྲོལ་མ་སྟེ། །ལྷ་མོ་དགུ་ཡི་རོལ་པ་གང་། །གསང་བ་ལྷ་མོ་ཡེ་ཤེས་མཆོད། །
མེ་ཏོག་ཉི་ཤུ་རྩ་ལྔ་ཡི། །རྣམ་པ་གསལ་བ་བསྟན་པའོ། །གནའ་མའི་མེ་ཏོག་པད་མ་དང་། །ཏ་མ་ལ་དང་ཙམ་པ་ཀ །ཀུ་མུ་ཏ་དང་ན་ག་གེ་སར། །ན་བ་མ་ལི་ད་མ་ན། པུན་ཏ་རི་ཀ་ད་མ་ན། །མནྡ་ར་བ་པྲི་ཡང་ཀུ། །སེ་ཕ་

89-1-156b

ལི་ཀ་སུ་ན་ཀ །བིལ་བའི་མེ་ཏོག་ཀ་ཐ་ར། །ས་ལི་ཀི་ལ་ཀུ་ཛ་ཏ། །ཨ་སན་ཀེ་ཏ་ཤ་འབྲས་བུ། །ཁརྫུ་རི་ཀ་བཀྐུ་ལ། །རག་ཀུ་ཏ་དང་ཨ་ཤོ་ཀ །ཀར་ཀུ་ཊོ་ཌ་པུན་དྷ་སྟེ། །མེ་ཏོག་ཇི་བཞིན་བདུག་སྤོས་དང་། །ཞལ་ཟས་
བྱེ་བྲག་ཤེས་པར་བྱ། །དཔལ་དེ་བཞིན་གཤེགས་པ་ཐམས་ཅད་ཀྱི་གསང་བ་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་གསང་
བའི་ལྷ་མོའི་མཆོད་པ་བསྟན་པའི་ལེའུ་སྟེ་བཞི་བཅུ་ལྔ་པའོ།། །། དེ་ནས་དེ་བཞིན་གཤེགས་པ་གསེར་གྱི་འོད་སངས་རྒྱས་ཐམས་ཅད་ཀྱི་ཆོས་ཐམས་ཅད་ལ་འཇུག་པའི་རྡོ་རྗེའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་སྐུ་ངོ་བོ་ཉིད་ཀྱིས་ནི། །སྤྲོས་པ་མེད་ཅིང་མཚན་ཉིད་མེད། །རྟོག་བྲལ་བྱང་ཆུབ་སེམས་ཀྱི་ངང་། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་ལེགས་བྱིན་དཔལ་སངས་རྒྱས་ཐམས་ཅད་ཀྱི་ཡི་གེ་རྣམ་པར་དག་པའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་ཀུན་མཚན་ཉིད་རྣམ་བྲལ་བས། །
དེ་ཕྱིར་ཉོན་མོངས་མེད་ཅེས་བཤད། །རྟོག་པ་སྣ་ཚོགས་དག་པས་ན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལྷའི་ཡོན་ཏན་དབང་པོ་སངས་རྒྱས་ཐམས་ཅད་ཀྱི་འོད་ཟེར་གྱི་
སྙིང་པོ་ཀུན་དུ་འབྱུང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་དབྱིངས་ཚད་མེད་སྟོང་ཉིད་པས། །སངས་རྒྱས་སྐུ་ཡང་དེ་རྗེས་འགྲོ། །ཡེ་ཤེས་ལུས་སུ་ཡང་དག་
བཞུགས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ཀྱི་གདུགས་ཚད་མེད་པ་སངས་རྒྱས་ཐམས་ཅད་ཀྱི་ཆོས་རྡོ་རྗེའི་རྟོགས་པ་རྡོ་རྗེའི་ཏིང་ངེ་འཛིན་ལ་སྙོམས་པར་

89-1-157a

ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱལ་བའི་གསུང་ནི་ཆོས་དབྱིངས་ཀྱི། །ནམ་མཁའི་གནས་དང་མཚུངས་པར་ཡང་། །རྡོ་རྗེའི་གསུང་དུ་སྟོན་པ་པོས། །བྱང་ཆུབ་ཚུལ་འདི་བསྟན་པའོ། 
ཞེས་གསུངས་སོ། །དེ་ནས་དེ་བཞིན་གཤེགས་པ་བསོད་ནམས་ལག་སངས་རྒྱས་ཐམས་ཅད་ཀྱི་ཡེ་ཤེས་རོལ་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་བཞིན་གྱིས་ནི་
དག་པའི་བདག །བདེ་གཤེགས་ཐུགས་ནི་རྗེས་འགྲོ་བྲལ། །རྡོ་རྗེ་ཐུགས་ཏེ་མི་བཟད་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆགས་པ་མེད་པ་སངས་རྒྱས་ཐམས་ཅད་ཀྱི་རྟ་
བདུན་དཔལ་རྡོ་རྗེའི་ཟེར་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕྱི་དང་ནང་དུ་རྟོག་མེད་པའི། །དབུས་ན་ཡེ་ཤེས་མི་ཤིགས་པ། །གསང་བ་རོལ་པར་ཡང་དག་འབྱུང་། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་གྱ་ནོམ་པ་སངས་རྒྱས་ཐམས་ཅད་ཀྱི་ཟླ་བའི་སྙིང་པོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
ཉེར་འགྲོ་ཉེར་སྤྱོད་མི་གནས་པ། །ཁམས་གསུམ་བསྐྱེད་དང་སྡུད་བྲལ་བའི། །བྱང་ཆུབ་མཆོག་ཏུ་སྟོན་པ་པོ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བློ་གྲོས་ཕྲ་བ་སངས་རྒྱས་
ཐམས་ཅད་ཀྱི་རྟེན་པའི་གླིང་རྡོ་རྗེ་སངས་རྒྱས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཁྲུལ་པ་དག་ཅིང་དྲི་མ་སྤངས། །སྣ་ཚོགས་སྤྱོད་པ་ལས་གྲོལ་ཞིང་། །ཕྱི་རོལ་རྣམ་
རྟོག་སྤངས་པ་ཡི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་མི་ཟད་པ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་འབྲུག་སྒྲའི་ཏིང་ངེ་འཛིན་ལ་སྙོམས་པར་

89-1-157b

ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སོ་སོར་སྣང་བ་དུ་མ་དང་། །གོང་དུ་གཅིག་པའི་དངོས་གང་ཡིན། །དེ་ཉིད་ཡོངས་སུ་བསྡུས་པས་ན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་རྩི་སྨན་རྒྱལ་པོ་སངས་རྒྱས་ཐམས་ཅད་ཀྱི་པད་མའི་རྩ་བའི་སྣལ་མ་ལྟ་བུར་ཕྲ་བ་སྟོན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཚོགས་དྲུག་
སྣང་བ་མ་འགགས་པ། །སེམས་དང་ཡིད་དང་རྣམ་ཤེས་ལས། །སྙིང་གི་ཆུ་སྐྱེས་སད་བྱེད་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྣམ་པར་གྲོལ་བའི་ཏོག་སངས་
རྒྱས་ཐམས་ཅད་ཀྱི་མི་གཡོ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུན་མི་འཆད་པའི་སྦྱོར་བ་ཡིས། །དལ་ཞིང་དལ་བའི་གནས་ལས་སྐྱེས། །ཞི་བ་གཡོ་མེད་ཉིད་
དུ་འཇུག །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་ཀྱི་མཛོད་སངས་རྒྱས་ཐམས་ཅད་ཀྱི་ལྷའི་མིག་གི་མངོན་པར་ཤེས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །མི་ཕྱེད་ཕྱེ་བའི་དངོས་པོ་ཉིད། །གཡེང་བ་བྲལ་བའི་བསམ་གཏན་ལ། །མཆོག་ཏུ་གྲུབ་པ་མཐོང་བྱེད་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་ཡེ་ཤེས་རྒྱལ་པོ་སངས་རྒྱས་ཐམས་ཅད་ཀྱི་ལྷའི་རྣ་བའི་མངོན་པར་ཤེས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་བརྩེ་བ་ཆེན་
པོ་ཡིས། །གཅིག་དང་དུ་མར་མི་གནས་པར། །སྒྲ་བརྙན་ལྟ་བུར་སྟོན་པར་མཛད། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འཇིགས་མཛད་སངས་རྒྱས་ཐམས་ཅད་ཀྱི་གཞན་གྱི་
89-1-158a

སེམས་ཤེས་པའི་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཇིག་རྟེན་ཁམས་ཀྱི་སེམས་ཅན་རྣམས། །བསྐལ་པ་གང་གཱའི་བྱེ་མ་
གནས། །དེ་ཡི་རྒྱུ་དང་གནས་ཤེས་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆུ་བོ་སྤོང་སངས་རྒྱས་ཐམས་ཅད་ཀྱི་འཆི་འཕོ་བ་དང་སྐྱེ་བ་ཤེས་པའི་མངོན་པར་ཤེས་པ་
རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཡུལ་དང་ཡུལ་རྣམས་ཀྱི། །དབྱེ་བ་ཤེས་པས་ཡེ་ཤེས་མཐའ། །སྣ་ཚོགས་རིགས་ཀྱི་རྒྱུ་ངེས་
པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐོགས་མེད་གྲགས་སངས་རྒྱས་ཐམས་ཅད་ཀྱི་མཁྱེན་པ་སྔོན་གྱི་གནས་ཤེས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །གནས་ཀྱི་གཏན་ཚིགས་རགས་པ་དང་། །ཕྲ་བ་མ་ལུས་པ་ཡི་གཞི། །ཞག་གསུམ་ལོན་པ་བཞིན་ཤེས་ཕྱིར། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་བདེན་པའི་ཕུང་པོ་སངས་རྒྱས་ཐམས་ཅད་ཀྱི་ཟག་པ་ཟད་པའི་མངོན་པར་ཤེས་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྲིད་པའི་རྒྱུན་ནི་
རྣམ་བཅད་ཅིང་། །སྤོང་བ་དག་པའི་ཚུལ་གནས་པ། །སྤང་དུ་མེད་པའི་ངང་དུ་གྲོལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དབྱངས་སྙན་པ་སངས་རྒྱས་ཐམས་ཅད་ཀྱི་མངོན་པར་ཤེས་
པ་དྲུག་དག་པའི་རྡོ་རྗེའི་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུ་འཐུན་གོམས་པའི་དབང་གིས་ནི། །དེ་ཡི་འབྲས་བུ་འགྲུབ་པར་བྱེད། །དེ་ཡི་རྩ་བ་

89-1-158b

མ་སྐྱེས་ཕྱིར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རི་དབང་
མཚུངས་པ་སངས་རྒྱས་ཐམས་ཅད་ཀྱི་རྙོག་པ་སེལ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟོག་པ་ཀུན་དང་ཁམས་དང་ནི། །སྐྱེ་བ་ལས་ནི་ཡོངས་གྲོལ་བས། །
བྲལ་བའི་འབྲས་བུ་དག་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་བརྩེགས་སངས་རྒྱས་ཐམས་ཅད་ཀྱི་རྣམ་པར་དག་པ་དང་རྟགས་རྣམ་པར་དག་པ་རྡོ་རྗེ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དབང་དུ་གྱུར་པས་དངོས་པོ་ལས། །ལྡོག་པ་མེད་པའི་འབྲས་བུ་གང་། །ཐོབ་པ་རྣམ་པར་དག་པའི་གནས། །བྱང་ཆུབ་ཚུལ་འདི་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པའི་ཚོགས། །ནམ་མཁའི་ཁམས་ཀྱི་དབུས་གནས་པར། །རྟེན་དང་བརྟེན་པར་བཅས་པ་ཡི། །དཀྱིལ་འཁོར་ཕོ་བྲང་ལས་རྫོགས་པ། །གང་དུ་དབུས་སུ་ལེགས་གནས་པ། །
སྙིང་པོར་གྱུར་པ་གཙོ་བོ་སྟེ། །གཞན་རྣམས་ལེན་ཅིང་འཛིན་པར་བརྗོད། །རྫུས་ཏེ་སྐྱེས་དང་མངལ་ལས་སྐྱེས། །སྒོང་ང་ལས་བྱུང་དྲོད་གཤེར་སྐྱེས། །འདི་དག་དག་པའི་ལྷར་གྱུར་པས། །དཀྱིལ་འཁོར་གྲོང་ཁྱེར་དེ་དང་
མཚུངས། །གནས་མེད་ཡེ་ཤེས་ཚུལ་བསྟན་པ། །རྡོ་རྗེ་རྣམ་པ་བཞི་དག་དང་། །ཆོ་ག་གསུམ་དང་མངོན་པར་ནི། །བྱང་ཆུབ་རྣམ་པ་ལྔར་གསུངས་པ། །གལ་ཏེ་སྐད་ཅིག་དྲན་རྫོགས་གྱུར། །ཐམས་ཅད་རིགས་ཀྱི་དབྱེ་
བ་ཡིས། །རྒྱས་པའི་དཀྱིལ་འཁོར་ཆེན་པོར་བསྟན། །རིགས་ནི་དབྱེ་དང་བསྡུ་བ་ཡིས། །བྱེ་བྲག་མཁས་པས་ཤེས་པར་བྱ། །འབྱུང་བ་ལྔ་ཉིད་སངས་རྒྱས་ལྔར། །མི་ཡི་ལུས་ནི་བརྟག་བྱ་སྟེ། །དངོས་དེ་ངེས་པར་བསྒོམས་

89-1-159a

པ་ཡིས། །རང་སེམས་མཐུ་ཡིས་སངས་རྒྱས་འགྱུར། །ཕྱི་རོལ་འགྲོ་བ་མི་མཛེས་པ། །སློབ་པའི་འགྲོ་བའི་སླར་ལྡོག་ཡིན། །མི་སློབ་པ་ཡང་མ་ལུས་ཡིན། །བདེ་གཤེགས་གསུམ་དུ་རྣམ་པར་གཤེགས། །
གཞན་དུ་རྣམ་པར་འཁྲུལ་འགྱུར་བས། །བླ་མའི་བཀའ་ལས་ལེགས་པར་བླང་། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་
པ་ཉིད་རྣམ་པར་རྒྱལ་བའི་རྒྱུད་ལས་སངས་རྒྱས་ཐམས་ཅད་ཀྱི་ཡེ་ཤེས་དྲི་མ་མེད་པ་གནས་པའི་ལེའུ་སྟེ་བཞི་བཅུ་དྲུག་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐར་པ་སྦྱིན་སངས་རྒྱས་
ཐམས་ཅད་ཀྱི་ཐུགས་རྗེའི་ཁྱུ་མཆོག་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ས་བོན་ལས་ནི་མྱུ་གུ་བཞིན། །བསྐྱེད་པའི་ཚུལ་བྱུང་རྣམ་དག་པ། །ཡེ་ཤེས་དེ་ཉིད་ཚུལ་བསྟན་པའོ། །
ཞེས་གསུངས་སོ། །དེ་ནས་དེ་བཞིན་གཤེགས་པ་ལེགས་མཛད་སངས་རྒྱས་ཐམས་ཅད་ཀྱི་དགའ་བ་དག་པ་ཚད་མེད་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །ཐོབ་མེད་ཐོབ་པ་སྟོང་ཉིད་སྐུ། །བྱང་ཆུབ་དང་སེམས་གཅིག་ཏུ་བཤད། །དག་པས་རྟོག་པ་དག་པར་འགྱུར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རབ་ཏུ་ཞི་བའི་སྐུ་
སངས་རྒྱས་ཐམས་ཅད་ཀྱི་བཏང་སྙོམས་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཁྱབ་པའི་སྐུ་ཡི་ཕྲིན་ལས་དང་། །འཇམ་དབྱངས་གསུང་གི་དབྱངས་གང་དང་། །སྐྱེ་མེད་
རོ་གཅིག་ཡེ་ཤེས་ཐུགས། །དག་པ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡིད་དུ་འོང་བའི་གསུང་དབྱངས་ཐམས་ཅད་ཀྱི་གནས་རྡོ་རྗེ་རྒྱལ་པོ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ་

89-1-159b

བྱང་ཆུབ་ཀྱི་སེམས་འདི་གསུངས་སོ། །སྟོང་གསུམ་ཞིང་ཁམས་སྣོད་བཅུད་ཀུན། །མ་ལུས་སངས་རྒྱས་ཉིད་ཀྱི་ངང་། །སྙིང་པོ་ཆོས་ཀྱི་དོན་བྱུང་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་བློ་དབྱངས་དཔལ་བྱང་ཆུབ་དོན་སྟོན་པའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བས་མཐའ་དབེན་པ་ནགས་ཚལ་དུ། །གཅིག་པུ་རི་དགས་ཀུན་གནས་པས། །
བསམ་གཏན་རྣམ་ཐར་སྒོ་གསུམ་གྱི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆུ་ཟླ་སངས་རྒྱས་ཐམས་ཅད་ཀྱི་རྒྱུན་གྱི་གནས་པ་རྡོ་རྗེ་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐྱེ་བོ་ཀུན་གྱི་མཆོད་པའི་གནས། །དྲང་སྲོང་དྲི་མེད་སྤྱན་མངའ་བ། །བག་ཡོད་པ་ནི་རྟེན་གནས་ཡིན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་འགྲོ་བས་མཆོད་པ་སངས་རྒྱས་ཐམས་ཅད་ཀྱི་བསྟན་པའི་ཚུལ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བཀུར་སྟི་རིམ་གྲོའི་གནས་གྱུར་པ། །དྲན་པ་མི་
བརྗེད་གནས་བསྟན་པ། །ཐུབ་པ་བློ་གྲོས་བཟང་པོ་སྟེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སེང་གེའི་ལོགས་སངས་རྒྱས་ཐམས་ཅད་ཀྱི་དྲི་མ་མེད་པའི་རྣམ་པར་གྲོལ་བ་རྡོ་རྗེའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཆོས་ཉིད་དག་པ་ལས། །བསྒྲིབས་པ་མེད་ཅིང་འབད་མེད་པ། །རེ་དོགས་རྣམ་པར་བྲལ་བ་ཡི། །བྱང་ཆུབ་ཚུལ་འདི་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ཀྱི་མཐུ་རྩལ་སངས་རྒྱས་ཐམས་ཅད་ཀྱི་འབྱུང་པོའི་གདོན་ཐམས་ཅད་དག་པར་བྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་

89-1-160a

འདི་གསུངས་སོ། །གང་དུ་མཁའ་ལ་རྒྱུ་བའི་གདོན་གྱི་རིགས། །ཐམས་ཅད་ཚད་མེད་ཐུགས་རྗེའི་ཆུ་རྒྱུན་གྱིས། །ཚིམ་པར་བྱེད་པ་བྱང་ཆུབ་སེམས་དཔའ་ཆེ། །དེ་ཉིད་བླ་མེད་བྱང་ཆུབ་སེམས་སུ་བརྗོད། །ཅེས་
གསུངས་སོ། །དེ་ནས་དེ་བཞིན་གཤེགས་པ་སྐལ་བ་བཟང་པོ་སངས་རྒྱས་ཐམས་ཅད་ཀྱི་བྱིན་གྱིས་བརླབས་པའི་ཆོ་འཕྲུལ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐུ་དང་
གསུང་དང་ཐུགས་ཀྱིས་ནི། །བྱིན་བརླབས་ཡེ་ཤེས་རྒྱ་མཚོ་ཡི། །མཚུངས་མེད་བདེ་བར་སྒྱུར་བ་སྟེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མི་འཁྲུགས་པའི་མདོག་
སངས་རྒྱས་ཐམས་ཅད་ཀྱི་དབང་བསྐུར་བའི་ཆོ་འཕྲུལ་བསྟན་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཔལ་ལྡན་ཕྱོགས་བཅུའི་རྒྱལ་བ་ཡིས། །སྲས་པོ་གཅིག་
པར་དབང་བསྐུར་བ། །ཚིམ་བྱེད་ཡེ་ཤེས་མཆོག་དབང་པོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་རྒྱལ་པོ་སངས་རྒྱས་ཐམས་ཅད་ཀྱི་ཀུན་དུ་བརྗོད་པའི་ཆོ་འཕྲུལ་བསྟན་
པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣ་ཚོགས་ཆོས་ཀྱི་སྒྲ་འབྱུང་བའི། །སིལ་སྙན་བྲག་ཆའི་སྒྲ་མཚུངས་པའི། །རྒྱུན་ཆད་མེད་པར་རབ་སྟོན་པ། །དེ་ཉིད་དོན་དམ་ཆོས་རྒྱུན་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྟོགས་མཛད་སངས་རྒྱས་ཐམས་ཅད་ཀྱི་རྫུ་འཕྲུལ་གྱི་ཆོ་འཕྲུལ་བསྟན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །སྐུ་ཡི་རོལ་པ་མི་ཟད་པ། །ཕྱོགས་བཅུ་ནམ་མཁའི་ཁམས་ཁྱབ་པར། །རྡོ་རྗེ་རྫུ་འཕྲུལ་མཆོག་གིས་འགེངས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྤྱན་ལེགས་

89-1-160b

སངས་རྒྱས་ཐམས་ཅད་ཀྱིས་བདུད་དཔའ་སྐོང་བའི་ཆོ་འཕྲུལ་བསྟན་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདུད་དང་ནག་པོའི་ཕྱོགས་གྱུར་ལ། །སྐྲག་པར་བྱེད་པས་ཚར་གཅོད་པའི། །ཆོ་འཕྲུལ་
བཅུ་དྲུག་བསྟན་པ་གང་། །དེ་ཉིད་བྱང་ཆུབ་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དོན་ལ་གནས་པའི་བློ་མངའ་བ་སངས་རྒྱས་ཐམས་ཅད་ཀྱི་ཆོས་སོ་སོ་ཡང་དག་པར་རིག་པ་རྡོ་རྗེའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་མདོ་ཡི་སྡེ་ལ་སོགས། །བཅུ་གཉིས་ཚུལ་དང་ལྡན་པ་བཞི། །བསླབ་པ་གསུམ་གྱི་དབྱེ་བ་ཡིས། །ཆོས་ཀྱི་དེ་ཉིད་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྣང་
བའི་འོད་ཟེར་སངས་རྒྱས་ཐམས་ཅད་ཀྱི་དོན་སོ་སོར་ཡང་དག་པར་རིག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡུལ་སྣང་སེམས་ཀྱི་ལྡོག་པ་དང་། །ཆོས་རྣམས་ངོ་བོ་ཉིད་ཤེས་ན། །
དག་པའི་ས་ལ་གནས་པར་འགྱུར། །དེ་ཉིད་བྱང་ཆུབ་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྤོས་ཀྱི་གཟི་བརྗིད་སངས་རྒྱས་ཐམས་ཅད་ཀྱི་ངེས་པའི་ཚིག་སོ་སོར་ཡང་དག་པར་རིག་པ་རྡོ་རྗེ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡི་གེའི་གནས་དང་རྐྱེན་དག་དང་། །འབྱུང་བའི་ཚུལ་དང་སྡེ་ཚན་གྱི། །རྣམ་དབྱེ་མཁས་པས་དཔྱད་པར་བྱ། །དེ་ཉིད་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་ཀུན་དུ་དགའ་བར་མཛད་པ་སངས་རྒྱས་ཐམས་ཅད་ཀྱི་སྤོབས་པ་སོ་སོ་ཡང་དག་པར་རིག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །ཀུན་དུ་ཐོགས་པ་མེད་པ་ཡི། །སེང་གེའི་ང་རོ་སྒྲོགས་བྱེད་ཅིང་། །དཔལ་གྱི་གནས་ལས་ཀུན་དུ་རྒྱལ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་

89-1-161a

དོན་ཡོད་པར་གཤེགས་པ་སངས་རྒྱས་ཐམས་ཅད་ཀྱི་སོ་སོ་ཡང་དག་པར་རིག་པ་བཞི་རྣམ་པར་དག་པའི་གནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དེ་དག་མི་དམིགས་
མཉམ་པ་ཉིད། །སྟོང་ཉིད་ཡེ་ཤེས་མཚུངས་པ་མེད། །རང་བཞིན་དག་པས་སྣང་བ་གང་། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཁྲོ་བ་བཅོམ་པ་སངས་རྒྱས་ཐམས་ཅད་ཀྱི་ཕྲིན་ལས་
རྡོ་རྗེ་དག་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་པོ་དང་ནི་མཚན་མ་ཡི། །རྣམ་པར་རྟོག་པ་དག་པའི་ཕྱིར། །དངོས་པོར་མི་གནས་གཞན་སྣང་ལ། །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །དག་པ་འདི་ནི་གསུངས་ཙམ་གྱིས། །ཡེ་ཤེས་ཅན་རྣམས་རྒྱལ་བར་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསུང་བ་གསུང་བ་འདུས་པ་རྣལ་འབྱོར་ཆེན་པོ་གཉིས་སུ་
མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་ལྷག་པའི་ཡེ་ཤེས་འབྱུང་བར་བསྟན་པའི་ལེའུ་སྟེ་བཞི་བཅུ་བདུན་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་གཟུགས་མཆོག་སངས་རྒྱས་
ཐམས་ཅད་ཀྱི་བར་དུ་གཅོད་པའི་ཕྱོགས་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བདག་འཛིན་ཉོན་མོངས་མེད། །ངར་འཛིན་ཞི་བའི་ཆོས་ཅན་ལ། །
བདུད་ཀྱིས་གླགས་རྙེད་མི་འགྱུར་བའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལེགས་གཤེགས་སངས་རྒྱས་ཐམས་ཅད་ཀྱི་ལྷའི་གདོན་དག་པ་རྡོ་རྗེའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་དམིགས་མེད་ཐུགས་རྗེ་ཡིས། །བྱམས་པའི་ཡེ་ཤེས་ལ་འཇུག་པ། །བླ་ན་མེད་པའི་དོན་བསྟན་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་

89-1-161b

སོ། །དེ་ནས་དེ་བཞིན་གཤེགས་པ་རབ་ཏུ་སྦྱིན་པར་གྲགས་པ་སངས་རྒྱས་ཐམས་ཅད་ཀྱི་ཀླུའི་གདོན་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དམིགས་
པ་ཀུན་དང་བྲལ་བའི་སེམས། །ནམ་མཁའི་ངང་ལས་འཇའ་ཚོན་ལྟར། །དེ་ཉིད་ཐོགས་མེད་ཡེ་ཤེས་ཀྱིས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་གཙང་སངས་རྒྱས་ཐམས་
ཅད་ཀྱི་དྲི་ཟའི་གདོན་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣ་ཚོགས་རོལ་མོའི་ཆ་དང་ནི། །སིལ་སྙན་རྣམས་ལས་སྒྲ་བྱུང་བ། །སྟོན་པའི་ཆོས་ཀྱི་ཚིག་
གྲགས་པ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལྷའི་ཉི་མ་སངས་རྒྱས་ཐམས་ཅད་ཀྱི་ལྷ་མ་ཡིན་གྱི་གདོན་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །འདི་ནི་རྣམ་པར་གཙང་བ་ཡི། །དྲི་མ་རྣམ་སྤངས་བདེ་བའི་ལམ། །ཡེ་ཤེས་ཕྱག་རྒྱས་བརྒྱན་པ་ཡི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་
དེ་བཞིན་གཤེགས་པ་ཤེས་རབ་སྦྱིན་སངས་རྒྱས་ཐམས་ཅད་ཀྱི་ནམ་མཁའ་ལྡིང་གི་གདོན་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ནམ་མཁའི་གནས་ཀྱི་
སྤྱོད་ཡུལ་བ། །འདི་ནི་རྣམ་དག་བྱང་ཆུབ་ལམ། །རྣམ་གྲོལ་རང་རིག་བདེ་བ་ཆེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཉམ་པར་བཞག་པའི་བདག་ཉིད་སངས་
རྒྱས་ཐམས་ཅད་ཀྱི་མི་འམ་ཅིའི་གདོན་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དེ་ནས་དེ་བཞིན་གཤེགས་པ་ཆེ། །གསུང་བ་འཛིན་

89-1-162a

པ་མཚུངས་མེད་པ། །རྒྱལ་བ་རིགས་ཀྱི་བདག་པོའི་དཔལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་མདངས་སངས་རྒྱས་ཐམས་ཅད་ཀྱི་ལྟོ་འཕྱེ་ཆེན་པོའི་
གདོན་དག་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ས་ལ་གནས་པའི་འགྲོ་བ་ཀུན། །དག་པ་ཆོས་ཀྱི་དབྱིངས་གནས་པའི། །ཤིང་རྟ་ཆེན་པོའི་འཁོར་ལོ་བཞིན། །བཞི་
དྲུག་ལྡན་པས་བགྲོད་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱལ་རིགས་ཆེན་པོ་སངས་རྒྱས་ཐམས་ཅད་ཀྱི་གནོད་སྦྱིན་གྱི་གདོན་རྣམ་པར་དག་པ་སངས་རྒྱས་ཐམས་ཅད་ཀྱི་རྡོ་རྗེའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཚུངས་པ་མེད་པ་ཆོས་ཀྱི་དོན། །སྤྲོས་པ་མེད་པ་དེ་བཞིན་གཤེགས། །འབྲས་བུར་ལྡན་པའི་གནས་འདི་ལས། །བྱང་ཆུབ་ཚུལ་འདི་བསྟན་པའོ་
གསུངས་སོ། །དེ་ནས་དེ་བཞིན་གཤེགས་པ་སྐལ་ལྡན་ཤིང་རྟ་ལྟོ་འཕྱེ་ཆེན་པོའི་གདོན་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
གནས་པ་མེད་པ་དྲི་གསུམ་སྤངས། །ཐུབ་པ་རྒྱལ་བ་སྤྱན་རྡོ་རྗེ། །བློ་གྲོས་མི་ཟད་ཡེ་ཤེས་ཏེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དཔལ་མཆོག་གི་ཀ་ན་ཀ་སངས་
རྒྱས་ཐམས་ཅད་ཀྱི་ཡི་དགས་ཀྱི་གདོན་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐྱེ་བ་མེད་ཅིང་འབྱུང་བའང་མེད། །གྲུབ་པ་མེད་པའི་
ཆོས་ཉིད་ལས། །ཀུན་དུ་སྣང་བ་མི་སླུ་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྣམ་པར་གྲོལ་བའི་གཙུག་སངས་རྒྱས་ཐམས་ཅད་ཀྱི་སྲུལ་པོའི་གདོན་དག་པ་རྡོ་རྗེའི་

89-1-162b

སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མི་འཇིགས་པ་ཡི་དངོས་པོ་ལས། །ཟག་མེད་དངོས་གྲུབ་འབྱུང་བ་ཡི། །དབེན་པ་རྣམ་པར་མི་རྟོག་པ། །
ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ལྡན་དཔལ་སངས་རྒྱས་ཐམས་ཅད་ཀྱི་ལུས་སྲུལ་པོ་གདོན་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །དེ་ནས་དེ་བཞིན་གཤེགས་པའི་རྒྱལ། །ཐུབ་པ་བྱང་ཆུབ་ཤིང་དྲུང་དུ། །བདུད་དཔུང་སྡེ་རྣམས་རབ་འཇོམས་པའི། །ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་སྤོས་གནས་སངས་རྒྱས་ཐམས་ཅད་ཀྱི་སྐེམ་བྱེད་ཀྱི་གདོན་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྨྲ་བའི་སེང་གེ་བླ་ན་
མེད། །གླང་པོ་ཆེན་པོ་ཐོགས་པ་མེད། །ཕ་རོལ་འཇོམས་པ་གྱད་བཞིན་ཏེ། །དེ་ཡི་ནོར་བུའི་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དྲེགས་པ་སྤངས་སངས་རྒྱས་ཐམས་ཅད་ཀྱི་སྨྱོ་བྱེད་ཀྱི་
གདོན་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་སྣ་ཚོགས་ཆོ་འཕྲུལ་ཚོགས། །སེམས་ཅན་མོས་པའི་སྣང་བ་ལ། །དུ་མ་ཉིད་དུ་བསྟན་གྱུར་པ། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་ཀྱི་མཛོད་སངས་རྒྱས་ཐམས་ཅད་ཀྱི་བརྗེད་བྱེད་ཀྱི་གདོན་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །འཐུན་སྣང་གང་ཟག་མོས་ཡུལ་ཏེ། །དེ་བས་ཡང་དག་སངས་རྒྱས་ལ། །ཀུན་རྟོག་མི་མངའ་ལྷམ་མེ་བཞུགས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་

89-1-163a

ཚངས་པར་གཤེགས་པ་སངས་རྒྱས་ཀྱི་གྲིབ་གནོན་གྱི་གདོན་དག་པ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡང་དག་རྫོགས་པའི་སངས་
རྒྱས་ལ། །འབད་དང་རྩོལ་བའི་རྟོག་མི་མངའ། །མཐའ་ཡས་བྱང་ཆུབ་སེམས་ཀྱི་ངང་། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཙན་དན་སངས་རྒྱས་ཐམས་ཅད་ཀྱི་ཤ་
ཟའི་གདོན་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐ་དད་རྟོག་པ་ཡོངས་མི་མངའ། །རང་རིག་ཡེ་ཤེས་འགྲོ་འོང་མེད། །ཐམས་ཅད་གྲུབ་མཐའི་འདོད་
པས་བརྟགས། །དེ་ཉིད་ཡེ་ཤེས་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མྱ་ངན་མེད་བདུད་ཀྱི་དཔུང་ལས་རྒྱལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །མ་ཆགས་ཐོགས་མེད་རྡོ་རྗེ་ཡི། །ཆར་སྤྲིན་མདོག་འདྲའི་རྟོག་སྤངས་ནས། །ཚད་མེད་བྱམས་པ་ཆེན་པོ་ཡིས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སེང་
གེའི་འོད་ཟེར་སངས་རྒྱས་ཐམས་ཅད་ཀྱི་དམིགས་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡང་དག་བྱང་ཆུབ་ཐབས་ལྡན་པ། །གང་ཚེ་སྒྱུ་མ་ལྟ་བུའི་དངོས། །དེ་ཉིད་རང་བཞིན་
སྟོང་ཉིད་གྲུབ། །མཐའ་མེད་ཡེ་ཤེས་ཚུལ་བསྟན་པའོ་ཞེས་གསུངས་སོ། །འདིར་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་དག་གསང་བའི་སྤྱོད་པས་གནས་ཤིང་གསང་བ་བླ་མེད་ཀྱི་ཏིང་ངེ་འཛིན་ལ་ཉེ་བར་གནས་པས་
ནི་ཉན་ཐོས་དང་། རང་རྒྱལ་དང་། བྱང་ཆུབ་སེམས་དཔའ་དང་། བྱང་ཆུབ་སེམས་དཔའ་སེམས་དཔའ་ཆེན་པོའི་ཡོངས་སུ་སྤྱོད་པ་ཐམས་ཅད་ཀྱང་ཡོངས་སུ་རྫོགས་པར་སྤྱོད་པར་བྱེད་དོ། །གསང་བ་འཛིན་པར་

89-1-163b

བྱེད་པའི་བྱང་ཆུབ་སེམས་དཔའ་དེས་སངས་རྒྱས་ཀྱི་ཡོན་ཏན་དང་། ཏིང་ངེ་འཛིན་དང་། གཟུངས་ཀྱི་སྒོ་དང་། རྣམ་པར་ཐར་པ་མ་ལུས་པ་ཡང་ཚེ་འདི་ཉིད་དང་ཡོངས་སུ་རྫོགས་ཤིང་ཀུན་དུ་སྤྱད་པས་སྤྱོད་པར་བྱེད་ན་འཇིག་རྟེན་
དང་འཇིག་རྟེན་ལས་འདས་པའི་ཡོན་ཏན་དང་ཡེ་ཤེས་གཞན་དག་ལྟ་སྨོས་ཀྱང་ཅི་དགོས། དེ་ལ་འཇིག་རྟེན་པའི་ལྷ་ཐམས་ཅད་ཀྱིས་སྲུང་བར་བྱེད། འཇིག་རྟེན་ལས་འདས་པའི་ལྷ་ཐམས་ཅད་ཀྱིས་ཀྱང་སྲུང་ཞིང་སྐྱོབ་
པ་དང་སྦ་བ་དང་ཡོངས་སུ་སྲུང་བར་བྱེད་དོ། །གསང་བའི་རྒྱུད་འདི་གང་གིས་འཛིན་པ་དང་། འཆང་བ་དང་། ཀློག་པ་དང་། ཉན་པ་དང་། ཕན་ཚུན་འདྲི་བར་བྱེད་པ་དང་། སེམས་པ་ན་ལྷ་དང་། ཀླུ་དང་། གཟའ་དང་། རྒྱུ་
སྐར་ཐམས་ཅད་ཀྱི་གདོན་གྱིས་ཀྱང་བར་ཆད་མི་བྱེད་དེ། བསྲུང་ཞིང་ཡོངས་སུ་མཆོད་པར་བྱེད་དོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་
གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་སྲུང་བ་ཡོངས་སུ་དག་པ་དང་བར་ཆད་མེད་པའི་དོན་བསྟན་པའི་ལེའུ་སྟེ་བཞི་བཅུ་བརྒྱད་པའོ།། །། དེ་ནས་བཅོམ་ལྡན་འདས་དེ་བཞིན་
གཤེགས་པ་ཡུལ་འཁོར་ཏོག་སངས་རྒྱས་ཐམས་ཅད་ཀྱི་རྒྱལ་པོ་ཆེན་པོ་བཞིའི་རིས་ཀྱི་གདོན་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཕགས་པ་རྣམས་
ཀྱི་ཡེ་ཤེས་གང་། །ཕྱིན་ཅི་ལོག་དང་རྣམ་བྲལ་བ། །དེ་ཉིད་སྐྱེ་འགག་བྲལ་བ་ལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་པད་མའི་སྙིང་པོ་སངས་རྒྱས་ཐམས་ཅད་ཀྱི་ཀླུ་
ཆེན་པོ་བརྒྱད་དག་པ་རྡོ་རྗེའི་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཇིག་རྟེན་འདས་པའི་ཡེ་ཤེས་ནི། །གསང་བ་མཆོག་གི་དོན་གནས་པ། །དམིགས་

89-1-164a

པ་ལས་འདས་བྱང་ཆུབ་སེམས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་དག་པ་ལྷ་ཆེན་པོ་བརྒྱད་དག་པའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །གཟུང་འཛིན་བཏགས་པའི་དབང་གིས་ནི། །མཐར་གྱུར་དེ་ཉིད་ལམ་གྱུར་པ། །བཏགས་པའི་དྲི་མ་དག་པར་བྱ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་ལྷའི་འོད་ཟེར་སངས་རྒྱས་ཐམས་ཅད་ཀྱི་གཟའ་ཆེན་པོ་བརྒྱད་ཀྱི་གདོན་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་རྐྱེན་ལས་
བསྐྱེད་པ་ཡི། །རྣམ་པ་ཕན་ཚུན་ལྟོས་ལས་བྱུང་། །གཞན་དབང་དག་པའི་ཡེ་ཤེས་ནི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡུལ་འཁོར་ཏོག་སངས་རྒྱས་ཐམས་ཅད་ཀྱི་
རྒྱུ་སྐར་གྱི་གདོན་མ་ལུས་པ་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཕྱིན་ཅི་མ་ལོག་པའི། །གནས་ཚུལ་ཡོངས་སུ་རྫོགས་གྲུབ་པ། །
དེ་བཞིན་ཉིད་དང་ཡེ་ཤེས་དོན། །མི་འགྱུར་དེ་བཞིན་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་པད་མའི་གེ་སར་སངས་རྒྱས་ཐམས་ཅད་ཀྱི་ལྷ་མ་སྲིན་སྡེ་བརྒྱད་ཀྱི་རིས་ཀྱི་གདོན་ཐམས་ཅད་
རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་དག་པའི་མཚན་ཉིད་ཅན། །རང་བཞིན་སྒྱུ་མར་སྣང་བ་གང་། །ངོ་བོ་ལྷུན་གྲུབ་དབྱེར་མེད་ལས། །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་དཔག་མེད་སངས་རྒྱས་ཐམས་ཅད་ཀྱི་ཕྱོགས་སྐྱོང་བ་བཅུའི་གནོད་པའི་གདོན་ཡོངས་སུ་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་

89-1-164b

ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་ཀུན་གྱི་ངོ་བོ་ཉིད། །མ་ནོར་མངོན་པར་ཐུགས་ཆུད་པས། །སྐྱོབ་པ་ཐུགས་རྗེའི་ངོ་བོ་ལས། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་ལྷའི་འོད་ཟེར་སངས་རྒྱས་ཐམས་ཅད་ཀྱི་རཱ་ཧུ་ལ་རྣམ་པར་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །བག་ཆགས་དག་པའི་རྒྱུད་ལས་ནི། །མ་རིག་པ་དང་བྲལ་གྱུར་པས། །བདག་སྐྱེས་དག་པར་གནས་པར་བྱ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཤེས་
རབ་མེ་ཏོག་སངས་རྒྱས་ཐམས་ཅད་ཀྱི་བྷི་སྣུ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཁམས་རྒྱུད་རྣམ་པར་བྱང་བ་ལས། །ཕྱིར་མི་ལྡོག་པར་གྱུར་པ་ན། །རང་
རིག་བདུད་ལས་གྲོལ་བར་འགྱུར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཁས་པའི་དཔལ་སངས་རྒྱས་ཐམས་ཅད་ཀྱི་དྲང་སྲོང་ཐམས་ཅད་རྣམ་པར་དག་པ་རྡོ་རྗེའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་གདོན་རྣམས་འབྱུང་བའི་ཚེ། །རགས་པ་འོག་ལ་བརྟེན་ནས་ཏེ། །ཕྲ་བའི་སྒོ་ནི་སྟེང་ནས་འཇུག །དག་པ་ཡེ་ཤེས་ཚུལ་གནས་བྱ་ཞེས་གསུངས་
སོ། །དེ་ནས་དེ་བཞིན་གཤེགས་པ་ཡེ་ཤེས་འབྱོར་ལྡན་སངས་རྒྱས་ཐམས་ཅད་ཀྱི་ཁྱབ་འཇུག་གི་གདོན་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བྱེད་
པ་འཇིགས་པའི་ཚུལ་སྤངས་ཏེ། །ཞེ་སྡང་དག་པའི་བྱང་ཆུབ་ལས། །སྟོབས་ཆེན་ཕ་རོལ་གནོན་བྱེད་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚངས་པའི་དབྱངས་

89-1-165a

སངས་རྒྱས་ཐམས་ཅད་ཀྱི་དབང་ཕྱུག་ཆེན་པོའི་གདོན་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་དྲག་པོ་འཇིགས་པར་སྟོན། །དུས་
མཚན་བཅས་པ་འདོད་ཆགས་བདག །འདི་ཉིད་ཉོན་མོངས་ཚུལ་དག་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཕྱག་ན་རིན་ཆེན་སངས་རྒྱས་ཐམས་ཅད་ཀྱི་ཚངས་པ་
དག་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཇིག་རྟེན་སྲིད་པ་གནས་པ་ཡི། །དག་པ་བཞི་ལས་སྤྲུལ་འདོད་པ། །ཐོག་མ་ཐ་མ་མེད་པའི་བདག །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དབང་ལྡན་སངས་རྒྱས་ཐམས་ཅད་ཀྱི་འཇིག་རྟེན་གསུམ་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །གང་དུ་ཆགས་དང་འཇིག་པ་དང་། །གནས་དང་སྟོང་པའི་རིམ་པ་འདིའི། །དག་པ་གཙང་མའི་ཞིང་དུ་སྨོན། །ཚུལ་འདི་སངས་རྒྱས་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་རྫོགས་པར་གསུངས་པ་སངས་རྒྱས་ཐམས་ཅད་ཀྱི་ས་འོག་དང་ས་སྟེངས་དང་ས་བླ་བ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མུན་པ་དང་ནི་སྣང་བ་ཡི། །
བསྟན་པ་གཉིས་ལ་རང་རྒྱལ་དང་། །སངས་རྒྱས་འབྱུང་བའི་ཚུལ་མཆོག་གི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཆོག་གསུང་དཔལ་སངས་རྒྱས་ཐམས་ཅད་
ཀྱི་ཁམས་གསུམ་པ་ལས་འདས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐོག་མ་དང་ནི་ཐ་མ་ཡི། །འཕེལ་དང་འགྲིབ་པའི་ཆ་ལས་ནི། །འཁོར་ལོས་སྒྱུར་བའི་རྒྱལ་པོ་

89-1-165b

ནི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཆོད་འོས་སངས་རྒྱས་ཐམས་ཅད་ཀྱི་སྲིད་པ་གསུམ་ལས་འདས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །སྙིགས་མ་ལྔ་འབྱུང་དུས་ཀྱི་ཚེ། །དུས་ལ་བབ་པའི་བསྐལ་པ་ལ། །རྒྱལ་བ་འཇིག་རྟེན་འབྱུང་བ་སྟེ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྐར་རྒྱལ་
སངས་རྒྱས་ཐམས་ཅད་ཀྱི་དུས་གསུམ་ལས་འདས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བགྲང་བ་ལས་འདས་པའི། །རྡུལ་སྙེད་འཇིག་རྟེན་ཐམས་ཅད་དུ། །
དུས་གསུམ་དག་པའི་ཡེ་ཤེས་ཀྱི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་ཉི་མ་སངས་རྒྱས་ཐམས་ཅད་ཀྱི་ཕྱོགས་བཅུ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བལྟས་པས་མཐོང་མེད་ཡུལ་མེད་པ། །ཕྱོགས་ལས་རྣམ་པར་རྒྱལ་བ་ཡི། །ཕ་རོལ་ཕྱིན་པ་མཚུངས་མེད་པའི། །བྱང་ཆུབ་ཚུལ་འདི་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པ་འཁོར་བའི་འདམ་རྫབ་ལས་རྒལ་བ་རྡོ་རྗེ་རྣམ་པ་ཐམས་ཅད་ལས་འདས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
སྤྲོས་པ་ཀུན་ལས་འདས་ནས་ནི། །བླ་མེད་ཐེག་པ་རབ་འབྱུང་བ། །ཚུལ་འདི་ཉེ་བར་སྤྱད་པ་ན། །བྱང་ཆུབ་སེམས་འདི་བསྟན་པ་ཡིན། །ཞེས་གསུངས་སོ། །དེ་ནས་འདོད་པ་ན་སྤྱོད་པ་དང་། གཟུགས་ན་སྤྱོད་པའི་
ལྷའི་བུ་རྣམས་ཀྱིས་གསང་བ་ཉེ་བར་བསྟན་པ་ལ་མཆོད་པར་བྱེད་དེ། ལྷའི་གོས་དག་འཐོར་ཞིང་ལྷའི་སིལ་སྙན་དུ་མས་ཀྱང་རབ་ཏུ་དཀྲོལ་ཏེ། ལྷའི་མེ་ཏོག་པད་མ་དང་། པད་མ་ཆེན་པོ་དང་། ཨུད་པ་ལ་དང་། 

89-1-166a

ཨུད་པལ་ཆེན་པོའི་ཚོགས་ཐམས་ཅད་ཀྱིས་ཀྱང་གཏོར་ཏོ། །མངོན་པར་གཏོར་ཏོ། །མངོན་པར་རབ་ཏུ་གཏོར་ཏོ། །ཞིང་ཁམས་དེ་དག་ཏུ་ཁྱབ་པའི་ལྷ་རྫས་ཀྱི་ཙན་དན་ཕྱེ་མས་གཏོར་ཞིང་དྲི་ཞིམ་པོས་ཡོངས་སུ་ཁྱབ་པར་གྱུར་ཏོ། །དེ་དག་ཀྱང་འདི་
ལྟ་སྟེ། ས་བླའི་ལྷ་དང་། རྒྱལ་ཆེན་རིགས་བཞིའི་ལྷ་དང་། སུམ་བཅུ་རྩ་གསུམ་གྱི་ལྷ་དང་། འཐབ་བྲལ་གྱི་ལྷ་དང་། དགའ་ལྡན་གྱི་ལྷ་དང་། འཕྲུལ་དགའི་ལྷ་དང་། གཞན་འཕྲུལ་དབང་བྱེད་ཀྱི་ལྷའི་བར་དང་། ཚངས་
རིས་ཀྱི་ལྷ་དང་། ཚངས་པ་མདུན་ན་འདོན་གྱི་ལྷ་དང་། ཚངས་པ་ཆེན་པོའི་ལྷ་དང་། འོད་ཆུང་གི་ལྷ་དང་། ཚད་མེད་འོད་ཀྱི་ལྷ་དང་། འོད་གསལ་གྱི་ལྷ་དང་། དགེ་བའི་ལྷ་དང་། དགེ་ཆུང་གི་ལྷ་དང་། ཚད་མེད་དགེ་བའི་ལྷ་དང་། 
དགེ་རྒྱས་ཀྱི་ལྷ་དང་། སྤྲིན་མེད་འོད་ཀྱི་ལྷ་དང་། བསོད་ནམས་སྐྱེས་ཀྱི་ལྷ་རྣམས་དང་། འབྲས་བུ་ཆེ་བའི་ལྷ་རྣམས་དང་། མི་ཆེ་བའི་ལྷ་རྣམས་དང་། མི་གདུང་བའི་ལྷ་རྣམས་དང་། གྱ་ནོམ་སྣང་བའི་ལྷ་རྣམས་དང་། 
ཤིན་དུ་མཐོང་བའི་ལྷ་རྣམས་ཀྱི་བར་ཏེ། འོག་མིན་གྱི་ལྷའི་ཚོགས་དུ་མ་དང་བཅས་པ་རྣམས་ཀྱིས་གསང་བ་ཆེན་པོ་བླ་ན་མེད་པའི་དོན་རབ་ཏུ་བསྟན་པ་ལ་མཆོད་དོ། །རབ་ཏུ་མཆོད་དོ། །ཀུན་དུ་མཆོད་དོ། །ཡང་དག་པར་
མཆོད་ཅིང་མེ་ཏོག་གི་ཆར་ཕབ་པར་གྱུར་ཏོ། །རོལ་མོའི་སྒྲ་སྣ་ཚོགས་རབ་ཏུ་སྒྲོགས་པར་གྱུར་ཏོ། །རིན་པོ་ཆེ་སྣ་ཚོགས་ཀྱི་ཆར་ཕབ་པ་ལ་འདི་ལྟ་སྟེ། རིན་པོ་ཆེ་ཨན་ད་རྙིལ་དང་། མ་རྒད་དང་། ཀེ་ཀེ་རུ་དང་། ཀེ་ཀེ་
རུ་ཆེན་པོ་དང་། སྤུག་དང་། རྡོའི་སྙིང་པོ་དང་། མན་ཤེལ་དང་། བཻ་དཱུརྱ་དང་། མུ་ཏིག་དང་། མུ་མེན་དང་། མུ་ས་ལ་གརྦྷ་དང་། རིན་པོ་ཆེའི་རྒྱལ་བ་བསམ་འཕེལ་གྱི་བར་དུ་གཏོར་ཞིང་ཡོངས་སུ་བྱུར་བུར་རབ་ཏུ་གང་
བར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་གནོད་ལ་ཡོངས་སུ་དག་

89-1-166b

ཅིང་ཀུན་དུ་མཆོད་པའི་ལེའུ་སྟེ་བཞི་བཅུ་དགུ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་ཡེ་ཤེས་བརྙེས་པ་སངས་རྒྱས་
ཐམས་ཅད་ཀྱི་ལྷའི་བུའི་བདུད་འཇོམས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཚན་ཉིད་མེད་པའི་ཆོས་རྣམས་ལ། །ཕྱི་རོལ་དངོས་པོ་དག་པ་ལ། །ཡང་དག་ཡེ་
ཤེས་སྒྱུར་བ་པོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་གྲུབ་པའི་རྒྱལ་པོ་སངས་རྒྱས་ཐམས་ཅད་ཀྱི་ཉོན་མོངས་པའི་བདུད་བཅོམ་པ་རྡོ་རྗེའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཉོན་མོངས་རྣམ་རྟོག་གློ་བུར་པ། །དེ་ཉིད་མ་རིག་བག་ཆགས་དག །རྩ་བ་བྲལ་བས་དེས་བཅོམ་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་
དེ་བཞིན་གཤེགས་པ་རྨ་བྱའི་སྟོབས་སངས་རྒྱས་ཐམས་ཅད་ཀྱི་ཕུང་པོའི་བདུད་བཅོམ་པའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྒྱུ་མ་ལྟ་བུའི་རྣམ་པ་ལས། །རྨི་ལམ་
ཚུལ་ལྟར་མ་འགགས་པ། །གང་དུ་དག་པ་བདག་མེད་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཆོད་སྦྱིན་སངས་རྒྱས་ཐམས་ཅད་ཀྱི་འཆི་བདག་གི་བདུད་བཅོམ་པ་
རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་དག་པ་ཡེ་ཤེས་སྐུ། །འགྲོ་འོང་མེད་ཅིང་དབྲི་བསྣན་མེད། །གང་དུ་འདུ་འབྲལ་མེད་པའི་དོན། །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཕན་པར་བཞེད་པ་སངས་རྒྱས་ཐམས་ཅད་ཀྱི་བདུད་བཅོམ་ཞིང་ལེགས་པའི་ཡོན་ཏན་དང་ལྡན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་

89-1-167a

འདི་གསུངས་སོ། །དཔལ་དང་གྲགས་དང་ཡེ་ཤེས་དང་། །དབང་ཕྱུག་དང་ནི་གཟུགས་བཟང་གིས། །བརྩོན་འགྲུས་ཕུན་སུམ་ཚོགས་པ་སྟེ། །དྲུག་པོ་འདིས་ནི་ལྡན་པར་གསུངས་ཞེས་གསུངས་སོ། །དེ་ནས་དེ་
བཞིན་གཤེགས་པ་ཡེ་ཤེས་ལྡན་པ་ཡེ་ཤེས་ལྔ་དག་པའི་དབྱིངས་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཆོས་ཀྱི་དབྱིངས་དང་ནི། །མེ་ལོང་མཉམ་
ཉིད་སོ་སོར་རྟོག །བྱ་བ་གྲུབ་པ་ཉིད་དང་ནི། །ལྔ་པོ་འདི་ནི་ཡེ་ཤེས་བརྗོད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གྲགས་པའི་རྒྱལ་པོ་སངས་རྒྱས་ཐམས་ཅད་ཀྱི་གཤེགས་པ་
དང་བྱོན་པ་རྗེས་སུ་རྟོགས་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་གཤེགས་ཤིང་གང་དུ་བྱོན། །གང་དུ་གནས་པ་རྡོ་རྗེའི་ངང་། །ཟག་
མེད་དཔལ་ལྡན་དེ་བཞིན་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་ཟེར་གྱི་དྲ་བ་སངས་རྒྱས་ཐམས་ཅད་ཀྱི་དཀར་པོ་རྣམ་པར་དག་པའི་ས་རྣམ་པར་དག་པ་རྡོ་རྗེ་སངས་རྒྱས་
ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་སོ་སོའི་སྐྱེ་བོ་ཡི། །ཐ་མལ་མོས་པས་ལམ་འཇུག་པ། །དགེ་བའི་དོན་མཐོང་ཉན་ཐོས་ལམ། །བྱང་ཆུབ་ཚུལ་འདི་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པ་རྣམ་པར་འཇོམས་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་རིགས་ཀྱིས་རྣམ་པར་དག་པ་རྡོ་རྗེ་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
རྣམ་པར་དཀར་བའི་དོན་ལྡན་པས། །བདག་མེད་བཟོད་པ་མཉམ་པ་ཉིད། །ཆོས་གང་ལྷག་པར་དད་པ་ན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བཻ་དཱུརྱའི་སྙིང་པོ་སངས་རྒྱས་

89-1-167b

ཐམས་ཅད་ཀྱི་བརྒྱད་པའི་ས་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཆོས་ཀྱི་དོན་རྙེད་པ། །ཐོག་མའི་འབྲས་བུ་མངོན་གྱུར་པ། །དེ་ཉིད་འཕགས་པའི་ཚུལ་
བསྟན་པའི། །བླ་མེད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མེ་ཏོག་ལྷའི་རྒྱལ་པོ་སངས་རྒྱས་ཐམས་ཅད་ཀྱི་མཐོང་བའི་ས་རྣམ་པར་བྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་གང་མཐོང་བའི་ཆོས་ཉིད་ལ། །སྒྲིབ་པ་མེད་པར་རང་གསལ་བ། །དོན་དང་འཐུན་པར་སྤྱོད་པ་ལས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །
དེ་ནས་དེ་བཞིན་གཤེགས་པ་ཟླ་བ་དྲ་བའི་འོད་སངས་རྒྱས་ཐམས་ཅད་ཀྱི་བསྲབས་པའི་ས་རྣམ་པར་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དུག་ཉིད་
དག་པར་བྱས་པ་ཡི། །དུག་མེད་གནས་ནི་ཕྲ་གནས་པ། །བྲལ་བ་བག་ལ་ཉལ་བ་ཞི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགའ་བའི་འོད་སངས་རྒྱས་ཐམས་ཅད་ཀྱི་འདོད་
ཆགས་དང་བྲལ་བའི་ས་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཆགས་མེད་ཡེ་ཤེས་མཆོག །རགས་པ་དག་པ་སྤངས་པའི་དོན། །དམན་པ་ལས་ནི་
ཕྱིར་འོང་བས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་ཀུན་མཆོག་འོད་སངས་རྒྱས་ཐམས་ཅད་ཀྱི་བྱས་པ་རྟོགས་པའི་ས་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བྱ་བ་བྱས་པ་བསྟན་པའི་དོན། །བྱེད་པ་བྱས་པ་ཁུར་བོར་ཏེ། །རྟག་ཆད་ལས་གྲོལ་བྱང་ཆུབ་ལམ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་

89-1-168a

གཤེགས་པ་རིན་ཆེན་དཔལ་སངས་རྒྱས་ཐམས་ཅད་ཀྱི་བསྲུང་བའི་ས་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཉམས་པ་མེད་པའི་ཚུལ་ཁྲིམས་ལས། །
རྣམ་པར་རྟོག་པས་མི་ཕྱེད་པ། །དྲི་མེད་དགྲ་བཅོམ་དོན་ཐོབ་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྐྱེས་བུ་ཟླ་བ་ཅན་སངས་རྒྱས་ཐམས་ཅད་ཀྱི་འཕགས་པ་ཉན་ཐོས་ཀྱི་ས་
དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདག་མེད་དོན་ལྡན་དངོས་མེད་པ། །སྤྱི་དང་བྱེ་བྲག་མཚུངས་མེད་པས། །འབྲས་བུ་གྲོལ་བ་ཐོབ་པ་ཉིད། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྒྲ་ཅན་སངས་རྒྱས་ཐམས་ཅད་ཀྱི་རང་སངས་རྒྱས་པའི་གནས་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །སྤྱོད་པ་རྨད་བྱུང་རྒྱལ་བའི་སྐུས། །འདུལ་མེད་ཞིང་དུ་རྫུ་འཕྲུལ་བས། །རྟོག་པ་དེ་ལས་སྤྱོད་པར་བཅས། །རང་རྒྱལ་གཉིས་པོའི་ཚུལ་དུ་བརྗོད་ཅེས་གསུངས་སོ། །དེ་ནས་དེ་བཞིན་གཤེགས་པ་བདུད་རྩིའི་འོད་སངས་རྒྱས་
ཐམས་ཅད་ཀྱི་ཡེ་ཤེས་ཇི་ལྟ་བ་མཁྱེན་པ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐོགས་མེད་ཁྱབ་པར་སྤྱོད་པས་ན། །མ་འདྲེས་དུས་གསུམ་མཉམ་པ་ཉིད། །
མཁྱེན་པའི་ཕྱོགས་བྲལ་དག་པ་སྟེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འཇིག་རྟེན་སངས་རྒྱས་ཐམས་ཅད་ཀྱི་ཡེ་ཤེས་ཇི་སྙེད་པ་མཁྱེན་པ་དག་པ་རྡོ་རྗེའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཉག་གཅིག་སྤྱོད་ཡུལ་དུ། །མངོན་དུ་མ་གྱུར་མེད་པས་ན། །ཐམས་ཅད་ཡོངས་སུ་རྫོགས་པའི་དཔལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །

89-1-168b

དེ་ནས་དེ་བཞིན་གཤེགས་པ་སྐར་མའི་འོད་སངས་རྒྱས་ཐམས་ཅད་ཀྱི་ཡེ་ཤེས་རྣམ་པ་ཐམས་ཅད་མཁྱེན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་དུ་རྟོག་པས་མ་བརྟགས་
པ། །དྲན་པས་ཡིད་ལ་བྱེད་པ་བྲལ། །རབ་ཏུ་མི་གནས་པ་ཡི་ཡོད། །དམིགས་པ་མེད་པའི་བདག་ཉིད་ཅན། །གང་དུ་དམིགས་མེད་སྐྱེ་བ་མེད། །རྟེན་འབྲེལ་དག་པ་རང་བྱུང་བ། །ལྷུན་གྲུབ་ངང་ལས་མ་གཡོས་པའི། །བྱང་
ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་འདི་ནི་གསུངས་ཙམ་གྱིས། །རིགས་ཀྱི་དེ་བཞིན་གཤེགས་པའི་ཚོགས། །སྣ་ཚོགས་མཆོད་ཅིང་བསྟོད་བྱས་ན། །ཡེ་ཤེས་མཆོག་གི་གཉེན་གྱིས་གསུངས། །དེ་བཞིན་
གཤེགས་པ་རིགས་བརྒྱ་ཡིས། །རེ་རེས་བརྒྱ་ཕྲག་བཅུ་ཡི་བར། །དེ་ལྟར་སྟོང་ཕྲག་བརྒྱ་དག་གིས། །འབུམ་དུ་བཟླས་པ་ཡིན་པར་བརྗོད། །བདག་ཉིད་མི་བསྐྱོད་པར་བྱས་ཏེ། །རྡོ་རྗེ་རིགས་ཀྱི་དཀྱིལ་འཁོར་པ། །སངས་རྒྱས་
ལྔ་དང་ཡུམ་བཞི་དང་། །སེམས་དཔའ་དྲུག་དང་ལྷ་མོ་ལྔ། །ཁྲོ་བོའི་རྒྱལ་པོ་ལྔས་བསྡུས་ཏེ། །ཉི་ཤུ་པ་ཡི་བདག་ཉིད་ཀྱིས། །གསལ་བའི་དཀྱིལ་འཁོར་དབུས་གནས་པར། །རྡོ་རྗེ་འབར་བ་རབ་བསྒོམས་ཏེ། །དེ་ལས་སྤྲོ་དང་
བསྡུ་བྱས་པའི། །བཟླས་པ་སྟོང་ཕྲག་ཉི་ཤུ་པས། །ཞེ་སྡང་རྡོ་རྗེའི་བསམ་གཏན་བསྡུས། །དེ་ལྟར་འཁོར་ལོ་ནོར་བུ་དང་། །པད་མ་རལ་གྲིའི་བར་དུ་ཡང་། །རེ་རེའི་སྔགས་ཀྱི་དོན་བསྒོམ་པ། །གསལ་བའི་དཀྱིལ་འཁོར་དབུས་
གནས་ཏེ། །སྤྲོ་བ་དང་ནི་བསྡུ་བ་ཡིས། །གཏི་མུག་ང་རྒྱལ་འདོད་ཆགས་དང་། །ཕྲག་དོག་དག་པའི་དཀྱིལ་འཁོར་ལས། །རིགས་ནི་བཞི་པོ་ཀུན་ལ་ཡང་། །སྟོང་ཕྲག་ཉི་ཤུ་ཕྲག་བཞི་ཡིས། །ཁྲི་ཕྲག་བཅུར་ནི་བཟླས་བྱས་
པས། །བསྙེན་པ་ཉེ་བར་བསྒྲུབ་པ་ཡི། །བཟླས་པ་གསང་སྔགས་ཚུལ་བསྟན་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་

89-1-169a

པ་ཉིད་རྣམ་པར་རྒྱལ་བའི་རྒྱུད་ལས་གསང་ཆེན་ཐུན་མོང་མ་ཡིན་པའི་རབ་ཏུ་བྱེད་པ་བསྟན་པའི་ལེའུ་སྟེ་ལྔ་བཅུ་པའོ།། །། དེ་ནས་དེ་བཞིན་གཤེགས་པ་ཞི་བའི་སྟོབས་སངས་རྒྱས་ཐམས་ཅད་ཀྱི་རྡོ་རྗེ་
རིན་པོ་ཆེ་རབ་ཏུ་སྣང་བར་བྱེད་པའི་རྒྱལ་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱལ་བའི་བྱང་ཆུབ་འོད་པོ་ཆེ། །རྟག་ཏུ་ཆོས་རྒྱལ་ཐོབ་པའི་དོན། །
རང་རིག་མི་གནས་ནམ་མཁའ་བཞིན། །བྱང་ཆུབ་ཚུལ་འདི་བསྟན་པའོ། །ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་རྒྱ་མཚོ་སངས་རྒྱས་ཐམས་ཅད་ཀྱི་ཚད་མེད་པའི་ཞིང་ཡོངས་སུ་སྦྱོང་བ་རྡོ་རྗེའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་མངོན་པར་སངས་རྒྱས་ཀྱང་། །རྒྱུ་མེད་རྐྱེན་གྲོལ་བྱང་ཆུབ་སེམས། །འདི་ཉིད་འགག་པར་འགྱུར་མེད་དེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །
དེ་ནས་དེ་བཞིན་གཤེགས་པ་རིའི་དབང་པོའི་རྒྱལ་པོ་སངས་རྒྱས་ཐམས་ཅད་ཀྱི་རྒྱུན་མི་འཆད་པར་ཡེ་ཤེས་འབྱུང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡེ་ཤེས་མངོན་པར་
མི་གནས་པས། །ནམ་མཁའ་མཉམ་པའི་ཆོས་ཀྱི་དབྱིངས། །རྗེས་འགྲོ་མཚུངས་པ་ཐ་མ་མེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རབ་ཏུ་ཞི་བ་སངས་རྒྱས་ཐམས་ཅད་
མི་གཡོ་བ་རྡོ་རྗེར་འཆར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་དག་པ་ཐར་པའི་ཚུལ། །རྒྱུད་འདི་བསྟན་པ་མེད་པའི་ངང་། །ཀུན་དུ་གསང་བ་མི་འཁྲུགས་
པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་མཐའ་ཡས་སྟོབས་སངས་རྒྱས་ཐམས་ཅད་ཀྱི་ཐེར་ཟུག་དང་བྲལ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་

89-1-169b

ཏེ་བྱང་ཆུབ་ཀྱི་སེམས་འདི་གསུངས་སོ། །ངོ་བོ་ཉིད་ནི་གནས་མེད་པ། །སྒྱུ་མར་སྣང་བ་ཀུན་རྫོབ་ཏུ། །སྲིད་ཞི་མཉམ་པ་ཉིད་བསྟན་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལྷའི་
དབང་པོ་ཐུབ་པ་སངས་རྒྱས་ཐམས་ཅད་ཀྱིས་ཞི་བར་མི་གནས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཤེས་རབ་ཀྱི་ནི་རང་བཞིན་ཤེས། །ཡེ་ཤེས་ཀྱི་ནི་
ཤེས་བྱ་མཁྱེན། །གཉིས་མེད་ཤེས་རབ་ཡེ་ཤེས་དག །འདྲེས་པས་རྟོགས་པར་བྱ་བ་ཉིད་ཅེས་གསུངས་སོ། །དེ་ནས་དེ་བཞིན་གཤེགས་པ་དབྱངས་སྙན་པ་སངས་རྒྱས་ཐམས་ཅད་ཀྱི་བདག་མེད་པའི་གནས་རྗེས་སུ་
རྟོགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་སེམས་སྟོང་ཉིད་དག་པ་ནི། །མཐར་ཐུག་དོན་དམ་མ་ཡིན་ཏེ། །ཆོས་སྐུ་རང་བཞིན་འོད་གསལ་བ། །བྱང་
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ངོས་བཟངས་སངས་རྒྱས་ཐམས་ཅད་ཀྱི་ཆོས་ཐམས་ཅད་ཀྱི་རྗེས་སུ་འགྲོ་ལྡོག་ངེས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་སྐུ་དོན་དམ་ལ་མི་གནས། །ཅི་ཡང་མ་ཡིན་དོན་དམ་ལ། །བྱེད་པ་སྤོངས་པས་འབྲས་བུའང་མེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་དོན་ལ་གནས་པ་སངས་རྒྱས་ཐམས་ཅད་ཀྱི་ཆོས་ཐམས་ཅད་དེ་བཞིན་ཉིད་དུ་སྟོན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་རིག་སྐད་ཅིག་འགག་མེད་པའི། །
སྔ་མ་ཕྱི་མ་ལ་ལྟོས་ཕྱིར། །རྒྱུན་ཆད་མི་འགྱུར་ལྟོས་མེད་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་གཟི་བརྗིད་སངས་རྒྱས་ཐམས་ཅད་ཀྱི་ཡོངས་སུ་ཐིམ་པ་

89-1-170a

རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདས་པའི་སེམས་ནི་རང་གྲོལ་བ། །མ་འོངས་པ་ནི་མ་ཐོབ་ཅིང་། །ད་ལྟར་གནས་མེད་མཚན་ཉིད་ཅན། །བྱང་ཆུབ་ཚུལ་
འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཁྱེན་ལྡན་ཟླ་མེད་སངས་རྒྱས་ཐམས་ཅད་ཀྱི་ཡེ་ཤེས་རྣམ་པར་གྲོལ་བའི་དཔལ་གྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །ཇི་ལྟར་ནམ་མཁའ་རྣམ་དག་བཞིན། །ཐེག་པ་འདི་ནི་མཁའ་འདྲ་སྟེ། །སྤོང་བ་མེད་པའི་ཉེར་ཞི་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ང་རོ་དཔག་མེད་སངས་
རྒྱས་ཐམས་ཅད་ཀྱི་ཀུན་རྫོབ་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གྲུབ་པ་མེད་པའི་སྣང་བ་ཙམ། །རྟེན་འབྲེལ་ཙམ་དུའང་གང་སྐྱེས་པ། །ཆོས་རྣམས་དབང་པོའི་གཞུ་
མཚུངས་པར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཤིན་དུ་ཐུགས་བཞུགས་པ་སངས་རྒྱས་ཐམས་ཅད་ཀྱི་བཀོད་པའི་རྣམ་པར་ཐར་པ་ལ་འཇུག་པ་རྡོ་རྗེའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱལ་བ་བླ་མེད་བྱང་ཆུབ་པའི། །འདི་ཡོད་པས་ནི་འདི་འབྱུང་ལ། །འདི་མེད་པས་ན་འདི་མི་འབྱུང་། །བསྟན་པ་དེ་ཉིད་ཚུལ་བསྟན་པའོ་ཞེས་གསུངས་སོ། །དེ་ནས་
དེ་བཞིན་གཤེགས་པ་དོན་དགོངས་གཏི་མུག་བྲལ་བ་སངས་རྒྱས་ཐམས་ཅད་ཀྱི་མཚུངས་པ་མེད་པའི་ཐེག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུ་མེད་རྒྱུ་ནོར་མ་ཚངས་དང་། །
ལོག་པའི་དོན་དང་ངན་པ་སྤངས། །ཚོགས་པ་གཅིག་པར་མ་གྲུབ་ལ། །འབྱུང་བ་མེད་ཕྱིར་རྟེན་འབྲེལ་བསྟན་ཞེས་གསུངས་སོ། །དེ་ནས་དེ་བཞིན་གཤེགས་པ་དབྱངས་ཀྱི་ཡན་ལག་སངས་རྒྱས་ཐམས་ཅད་ཀྱི་རྣམ་པར་

89-1-170b

རོལ་པའི་ཡེ་ཤེས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུ་ལས་སྐྱེས་ཤིང་རྐྱེན་གྱིས་བསྐྱེད། །གཞི་ལ་གནས་ཤིང་འབྲས་བུར་གྲུབ། །སྲིད་ཞི་མཚུངས་ཕྱིར་བསྟན་པ་ཡིན། །བྱང་
ཆུབ་དེ་ཉིད་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཁྱད་པར་དུ་འཕགས་པ་ཐུབ་པ་སངས་རྒྱས་ཐམས་ཅད་ཀྱི་ཡེ་ཤེས་མངོན་པར་འབྱུང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །བརྟགས་ན་དབེན་ཞིང་དོན་བྱེད་ནུས། །འཐུན་པར་སྣང་ལ་རྐྱེན་ལས་བསྐྱེད། །ཀུན་རྫོབ་ཆོས་ཀུན་མཚན་ཉིད་དེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་མཆོག་ཏུ་མཛེས་པར་གཤེགས་པ་སངས་རྒྱས་ཐམས་ཅད་ཀྱི་རྣམ་པ་ལས་བྲལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡུལ་དང་དབང་པོ་བདག་པོའི་རྐྱེན། །དེ་མ་ཐག་
པའི་མཚུངས་མེད་པ། །རང་བཞིན་བྱུང་བའི་སྐད་ཅིག་ལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཞི་བའི་དོན་སངས་རྒྱས་ཐམས་ཅད་ཀྱི་རང་གི་ངོ་བོ་དག་པ་རྡོ་རྗེའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ངོ་བོ་འབྲལ་མེད་ཆོས་ཀྱི་སྐུ། །མི་འཆད་འབྱུང་བ་ལོངས་སྤྱོད་རྫོགས། །རང་གི་མཚན་ཉིད་བདེ་བ་ཆེ། །དབྱེར་མེད་ཚུལ་འདི་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་ཞི་བའི་དོན་སངས་རྒྱས་ཐམས་ཅད་ཀྱི་གྲུབ་པ་རྡོ་རྗེའི་ཚུལ་གྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མིང་དང་ངེས་ཚིག་ངོ་བོ་གང་། །མཚན་ཉིད་དབྱེ་
བའི་དོན་གྱིས་ན། །རྒྱུ་འབྲས་ཆོས་ལས་རྒྱལ་བ་འབྱུང་། །ཚད་མེད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྐྱོན་མེད་སངས་རྒྱས་ཐམས་ཅད་ཀྱི་སྤངས་པ་མེད་ཅིང་ཐོབ་པ་མེད་པ་རྡོ་རྗེའི་

89-1-171a

ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བསྐལ་པ་བྱེ་བར་ཡང་། །སྤོང་བར་ཞུགས་ཤིང་སྤྱད་པ་ལས། །བྱང་ཆུབ་རིང་སོང་འགྱུར་བ་མེད། །མཉམ་པ་
ཉིད་ཀྱི་རང་གྲོལ་འགྱུར་ཞེས་གསུངས་སོ། །དེ་ནས་དེ་བཞིན་གཤེགས་པ་བློ་དབྱངས་དགེ་བ་སངས་རྒྱས་ཐམས་ཅད་ཀྱི་ཕྱིན་ཅི་མ་ལོག་པའི་དོན་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །སྐྱེ་བ་མེད་པས་ཆོས་ཀྱི་སྐུ། །འགག་པ་མེད་པས་ལོངས་སྤྱོད་རྫོགས། །གནས་པ་མེད་པས་སྤྲུལ་པའི་སྐུ། །དབྱེར་མེད་ཚུལ་འདི་བསྟན་པའོ་ཞེས་གསུངས་སོ། །དེ་ནས་འདི་ནི་གསུངས་ཙམ་གྱིས། །རིག་
པའི་རྒྱལ་པོ་རྡོ་རྗེ་ཅན། །ཡེ་ཤེས་བླ་ན་མེད་པའི་ཆོས། །བསྟན་པ་ངེས་པར་ལེགས་པའི་གནས། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་སངས་རྒྱས་ཐམས་ཅད་ཀྱི་
རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་རབ་ཏུ་མི་གནས་པའི་དོན་བསྟན་པའི་ལེའུ་སྟེ་ལྔ་བཅུ་གཅིག་པའོ།། །། དེ་ནས་དེ་བཞིན་གཤེགས་པ་པད་མའི་མཛོད་
སངས་རྒྱས་ཐམས་ཅད་ཀྱི་དུས་ཀྱིས་གྲོལ་བ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དུས་གསུམ་དུས་མེད་སྟོན་པ་པོ། །ཚད་མེད་ཡེ་ཤེས་སྟོབས་ཆེན་པོ། །སྲིད་
ཞིར་མི་གནས་བདེ་བར་གཤེགས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་ཟེར་བཟང་པོ་སངས་རྒྱས་ཐམས་ཅད་ཀྱི་དུས་མི་དམིགས་པར་གྲོལ་བ་རྣམ་པར་དག་པ་རྡོ་རྗེའི་ཏིང་
ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བསྐལ་པ་གྲངས་དང་གྲངས་མེད་ལས། །འདས་པ་ཡེ་ཤེས་སྐད་ཅིག་མ། །བསམ་གྱིས་མི་ཁྱབ་དོན་འཆར་འགྱུར། །དེ་ཉིད་ཚུལ་འདི་བསྟན་པའོ་ཞེས་

89-1-171b

གསུངས་སོ། །དེ་ནས་དེ་བཞིན་གཤེགས་པ་སྤོབས་པའི་ཏོག་སངས་རྒྱས་ཐམས་ཅད་ཀྱི་ཤེས་རབ་ཀྱིས་རྣམ་པར་གྲོལ་བ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གསང་བའི་
ཆོས་ཀྱི་ཚིག་གཅིག་གིས། །གྲོལ་བ་ཡེ་ཤེས་ཐོབ་པ་ནི། །ང་ཡི་ཆོས་རྣམས་དེས་མཐོང་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་ལམ་བཟང་པོ་སངས་རྒྱས་ཐམས་ཅད་
ཀྱི་གཉིས་ཀའི་ཆ་ལས་གྲོལ་བ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཉོན་མོངས་ཤེས་བྱའི་ཕྱོགས་དག་དང་། །ལས་ལས་གྲོལ་བ་འཕགས་པའི་ཆོས། །དེ་ཉིད་
ངེས་པ་བླ་ན་མེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚོགས་བཟང་པོ་གྲོལ་བ་སངས་རྒྱས་ཐམས་ཅད་ཀྱི་གནས་དེ་བཞིན་སྣང་བའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཆོས་དང་དགེ་འདུན་ཏེ། །གསུམ་ལ་ངེས་པར་སྐྱབས་སོང་ན། །དག་པ་ཡེ་ཤེས་སྤྱོད་པ་ཡི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་སྙེངས་དང་བྲལ་བ་རྡོ་རྗེ་སངས་རྒྱས་ཐམས་ཅད་ཀྱི་སངས་རྒྱས་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ལ་ནི་སྐྱབས་སོང་བ། །མ་འོངས་པ་ན་
སངས་རྒྱས་ཀྱི། །ལྟ་བའི་མི་ངོམས་སྐུ་མཐོང་ཞིང་། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་བརྗེད་པ་མེད་པ་སངས་རྒྱས་ཐམས་ཅད་ཀྱི་ཆོས་རྗེས་སུ་དྲན་པ་རྡོ་རྗེའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དམ་པའི་ཆོས་ལ་སྐྱོབས་འགྲོ་བ། །མ་འོངས་པ་ན་རྒྱལ་བ་ལ། །དམ་པའི་ཆོས་སྒྲ་ཐོས་ནས་ནི། །བྱང་ཆུབ་ཚུལ་འདི་ཐོབ་བྱེད་པའོ་ཞེས་གསུངས་སོ། །

89-1-172a

དེ་ནས་དེ་བཞིན་གཤེགས་པ་སྤོབས་པའི་སྤྱན་སངས་རྒྱས་ཐམས་ཅད་ཀྱི་འཕགས་པའི་ཚོགས་རྗེས་སུ་དྲན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཕགས་
པའི་དགེ་འདུན་སྐྱབས་སོང་གང་། །མ་འོངས་པ་ན་ཉན་ཐོས་དང་། །བྱང་ཆུབ་སེམས་དཔའི་ཚོགས་རྣམས་དང་། །ལྷན་ཅིག་སྤྱོད་པ་སྟོན་པར་འགྱུར་ཞེས་གསུངས་སོ། །དེ་ནས་དེ་བཞིན་གཤེགས་པ་བློའི་མཆོག་ཐུབ་པ་སངས་
རྒྱས་ཐམས་ཅད་ཀྱི་བསྟན་པ་གཅིག་ཏུ་སྟོན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱལ་བའི་རིན་ཆེན་རྣམ་གསུམ་པོ། །དབང་ཕྱུག་ཚོགས་པས་མཐར་ཐུག་དུས། །གཅིག་པུ་
ཉིད་དུ་ཐུགས་ལ་བཞུགས། །དེ་ཉིད་བྱང་ཆུབ་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་ཟླ་བ་སངས་རྒྱས་ཐམས་ཅད་ཀྱི་ཆོས་ཀྱི་རྗེས་སུ་འཐུན་པའི་ཕྱོགས་ལ་ཞུགས་པ་རྣམ་པར་དག་པ་རྡོ་རྗེའི་ཏིང་
ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐུ་གསུམ་རང་ལས་ལྷན་ཅིག་སྐྱེས། །དེ་ཉིད་ལྷུན་གྱིས་གྲུབ་པའི་གནས། །ཡེ་ཤེས་སྤྱོད་པ་གནས་འདི་ཉིད། །སྟོན་པའི་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་རིན་ཆེན་ཟླ་བ་སངས་རྒྱས་ཐམས་ཅད་ཀྱི་རྗེས་སུ་འཐུན་པའི་སྤྱོད་པའི་ཆོས་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
འཕགས་པའི་བདེན་པ་བཞི་པོ་དང་། །བཅུ་གཉིས་དག་པ་བདག་མེད་པ། །འབྱུང་གནས་སྒྲ་ཚུལ་སྐྱོབ་པའི་ཆོས། །དེ་ཉིད་ཕུན་སུམ་ཚོགས་པར་གསུངས་ཞེས་གསུངས་སོ། །དེ་ནས་དེ་བཞིན་གཤེགས་པ་སྙེངས་པ་མེད་
པ་སངས་རྒྱས་ཐམས་ཅད་ཀྱི་རྗེས་སུ་འཐུན་པའི་ཆོས་ལ་སྤྱོད་པ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕྱིར་མི་ལྡོག་པའི་བྱང་ཆུབ་སེམས། །བླ་མེད་

89-1-172b

སེམས་དཔའ་ཆེན་པོ་ནི། །དོན་དམ་བསྟན་པའི་མཆོག་བརྙེས་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟིགས་པ་ཆེན་པོ་སངས་རྒྱས་ཐམས་ཅད་ཀྱི་འཐུན་པར་ཞུགས་
པ་རྡོ་རྗེ་རྣམ་པར་དག་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་ཉིད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའ་རིག་པ་རྣམས། །རང་ལས་འབྱུང་བར་འགྱུར་བའི་ཕྱིར། །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚངས་པའི་དབྱངས་སངས་རྒྱས་ཐམས་ཅད་ཀྱི་དྲང་པོར་ཞུགས་པའི་སྤྱོད་པའི་ཡན་ལག་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བསམ་གཏན་ཡན་ལག་ལྔས་གནས་ཤིང་། །རྣམ་པར་འགོག་པས་མི་གཡོ་བ། །བདེ་ཆེན་མཉམ་ཉིད་གནས་པའི་ཚུལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་དབྱངས་བཟང་པོ་སངས་རྒྱས་ཐམས་ཅད་ཀྱི་རིགས་པས་ཞུགས་པ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དམ་པའི་ཡུལ་
ལ་འཇུག་པ་ན། །མགོན་པོ་བདག་ཉིད་ཆེན་པོའི་ངང་། །ཚངས་པའི་གནས་ཀྱི་དམིགས་ལས་གྲོལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཤེས་རབ་ཆེན་པོའི་བཞོན་པ་སངས་
རྒྱས་ཐམས་ཅད་ཀྱི་ལེགས་པར་ཞུགས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཚུལ་ཆེན་ཐབས་ལྡན་དྲི་མ་མེད། །ཡན་ལག་འབྱུང་བ་ཆོས་དག་པ། །སོ་སོར་མ་ཡིན་
མཁའ་དབྱིངས་ཀློང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བློ་གྲོས་མཚུངས་མེད་སངས་རྒྱས་ཐམས་ཅད་ཡང་དག་པའི་ལམ་ལ་ཞུགས་པ་རྣམ་པར་དག་པ་རྡོ་རྗེའི་ཏིང་ངེ་

89-1-173a

འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་མངོན་པར་མཁྱེན་པ་ལ། །རློམ་སེམས་མེད་པའི་བདག་ཉིད་དུ། །གཅིག་པ་བཀག་པའི་རྒྱུན་ལས་ནི། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྒྱལ་པོ་རྡོ་རྗེ་མཁྲེགས་པ་སངས་རྒྱས་ཐམས་ཅད་ཀྱིས་ལམ་ཡན་ལག་བརྒྱད་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །ཡན་ལག་འདི་དག་ལྡན་པས་ན། །ངེས་པར་འཇུག་པ་མི་ལྡོག་པ། །སེམས་དཔའ་ཆེན་པོ་དགེ་བའི་མཐུ། །གསང་བ་དེ་ཉིད་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བྱང་ཆུབ་བློ་གྲོས་
སངས་རྒྱས་ཐམས་ཅད་ཀྱི་ཚད་མེད་པ་རྡོ་རྗེའི་གནས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བྱམས་དང་སྙིང་རྗེ་དགའ་བ་དང་། །བཏང་སྙོམས་བདག་མེད་མཉམ་པའི་དངོས། །
ཚད་མེད་ཆུ་བོའི་རླབས་ལས་ནི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལྗོན་ཤིང་བཟང་པོ་སངས་རྒྱས་ཐམས་ཅད་ཀྱི་སྐྱོབ་པ་མཚུངས་པ་མེད་པའི་རྡོ་རྗེའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སཱ་ལ་ཆེན་པོའི་ཤིང་ལྟར་ན། །འདབ་རྒྱས་རྒྱལ་བ་རྒྱུན་མི་འཆད། །རེ་རེའི་དོན་དུའང་དུ་མར་བཞུགས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་
ནས་འདི་ནི་གསུངས་ཙམ་གྱིས། །རྒྱུན་དུ་ཆོས་སྤྱོད་སྐལ་བ་ཅན། །ཡེ་ཤེས་དམ་པའི་གནས་ཐོབ་པས། །ཡན་ལག་བཅུ་པ་བསྟན་པ་ཡིན། །ཕྱག་འཚལ་བསྐོར་བ་ཡི་གེར་འདྲི། །སྦྱིན་དང་མཆོད་པ་ཁ་ཏོན་དང་། །ཉན་དང་
འཆད་པ་དེ་བསམ་ཞིང་། །ཏིང་འཛིན་ལྡན་པས་སྤྱད་པར་བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་

89-1-173b

རྒྱལ་བའི་རྒྱུད་ལས་སྡེ་སྣོད་ཀྱི་ཚུལ་ཡོངས་སུ་དག་པར་སྤྱོད་པའི་ལེའུ་སྟེ་ལྔ་བཅུ་གཉིས་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་གདངས་སྙན་པ་སངས་རྒྱས་ཐམས་ཅད་ཀྱི་འཁྲུལ་པ་མེད་ཅིང་འདྲེས་
པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་དུ་ཐུན་མོང་ཡུལ་མིན་ཞིང་། །ཁྱད་པར་གྱུར་པ་ཐུབ་པ་ཡི། །ཕྲིན་ལས་དག་པ་ཚད་མེད་པའི། །བྱང་ཆུབ་སེམས་འདི་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བསོད་ནམས་སྟོབས་སངས་རྒྱས་ཐམས་ཅད་ཀྱི་ཅ་ཅོ་མེད་པའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རགས་པ་
དང་ནི་ཕྲ་བ་ཡི། །ཀུན་ནས་ལྡང་བ་དག་པ་ཡིས། །དཀྲུགས་པས་འཁྲུག་པ་མི་མངའ་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཐུའི་དཔལ་སངས་རྒྱས་ཐམས་ཅད་ཀྱི་
བསྙེལ་བ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ཅན་དོན་ལ་དུས་ཀུན་དུ། །བསྐྱེད་དང་དབྲི་བ་མེད་པར་ནི། །རྒྱུན་ཆད་མེད་པས་འཇུག་པ་དག །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འཕགས་པ་དགྱེས་པ་སངས་རྒྱས་ཐམས་ཅད་ཀྱི་ཡེ་ཤེས་མཉམ་པར་མ་བཞག་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །མཉམ་པར་མ་བཞག་སྤྱོད་པ་ནའང་། །རྟག་ཏུ་དྲི་མེད་གནས་པས་ན། །བཏང་སྙོམས་ཙམ་དུའང་མི་གནས་ཏེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་
དེ་བཞིན་གཤེགས་པ་མཐུ་སྟོབས་སངས་རྒྱས་ཐམས་ཅད་ཀྱི་ཐ་དད་དུ་གཟིགས་པ་མི་མངའ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མ་སྤངས་མི་གནས་

89-1-174a

མཉམ་ཉིད་དེ། །བླང་དོར་མེད་པའི་ཡེ་ཤེས་ཅན། །སངས་རྒྱས་ཆོས་ཉིད་དག་པས་ན། །བྱང་ཆུབ་ཚུལ་འདི་དག་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དྲང་སྲོང་སྐར་མ་ལ་དགྱེས་པ་
སངས་རྒྱས་ཐམས་ཅད་ཀྱི་སོ་སོར་མ་བཏགས་པའི་བཏང་སྙོམས་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡོངས་སུ་སྦྱང་དང་བརྟག་པ་དང་། །གསལ་དང་དབྱེ་བ་
འབྱུང་བ་ལས། །ཁྱད་པར་བཏང་སྙོམས་མེད་པ་སྟེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྤྲིན་གྱི་སྒྲོན་མེ་སངས་རྒྱས་ཐམས་ཅད་ཀྱི་འདུན་པ་ཉམས་པ་མེད་པ་སངས་
རྒྱས་ཀྱི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དུས་རྣམས་ཕྱོགས་བཅུར་རྒྱལ་བ་ཡིས། །སྤྲོ་བ་བྱང་ཆུབ་སྙིང་པོའི་དོན། །སངས་རྒྱས་གདུང་ལས་གཞན་མི་རྟོག །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྤྱན་མཛེས་མངའ་བའི་ཞལ་སངས་རྒྱས་ཐམས་ཅད་ཀྱི་བརྩོན་འགྲུས་ཉམས་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །སེམས་ཅན་གཅིག་གི་དོན་དུ་ཡང་། །བསྐལ་པ་གང་གཱའི་བྱེ་སྙེད་དུ། །རྡུལ་ཕྲན་གྲངས་འདས་རྩོམ་པ་ཆེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་
དེ་བཞིན་གཤེགས་པ་ཡེ་ཤེས་བཟང་ལྡན་སངས་རྒྱས་ཐམས་ཅད་ཀྱི་དྲན་པ་ཉམས་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཔྱད་པ་མི་དམིགས་མ་འདྲེས་
པར། །ཡོངས་སུ་དག་པའི་མཁྱེན་པ་ཅན། །སྔ་མ་ལ་སོགས་རྟག་མེད་ཕྱིར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འབྱོར་པར་ལྡན་པ་སངས་རྒྱས་ཐམས་ཅད་ཀྱི་ཏིང་ངེ་འཛིན་

89-1-174b

ཉམས་པ་མེད་པ་སངས་རྒྱས་ཐམས་ཅད་ཀྱི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཏིང་འཛིན་དུ་མ་གཅིག་སྡུད་ཅིང་། །གཅིག་ལས་དུ་མར་སྤྲོ་བ་ཡང་། །དེ་དག་སྙོམས་
པར་འཇུག་པ་ཡི། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་བཟང་པོའི་ཕུང་པོ་སངས་རྒྱས་ཐམས་ཅད་ཀྱི་ཤེས་རབ་ཉམས་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཁྱེན་པ་རིག་པ་དུ་མ་ལས། །འགོག་པ་མེད་པར་གཟོ་ཡི་གནས། །བླ་མེད་མི་བཟད་ཚུལ་ཐོབ་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །
དེ་ནས་དེ་བཞིན་གཤེགས་པ་དཔལ་གསལ་བ་སངས་རྒྱས་ཐམས་ཅད་ཀྱི་རྣམ་པར་གྲོལ་བ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡེ་ཤེས་སྟོང་ཉིད་མེ་ཆེན་
གྱིས། །འཁོར་བའི་དྲི་མ་མ་ལུས་པ། །ཆོས་དབྱིངས་ངང་དུ་སྲེག་མཛད་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ཀྱི་རྒྱལ་མཚན་སངས་རྒྱས་ཐམས་ཅད་ཀྱི་
ལུས་ཀྱི་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དུས་རྣམས་ཀུན་དུ་ཐོགས་མེད་པར། །ལྷན་
ཅིག་སྐྱེས་པའི་ཡེ་ཤེས་ལས། །འབྱུང་ཞིང་འཇུག་དང་གནས་པར་མཛད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་རོལ་པ་སངས་རྒྱས་ཐམས་ཅད་ཀྱི་ངག་
གི་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཞིང་ཁམས་མ་ལུས་ཐམས་ཅད་དུ། །ཁྱབ་བྱེད་སྙིང་པོ་རྡོ་རྗེ་ལ། །

89-1-175a

འཇུག་གནས་ལྡང་བ་དབྱངས་བརྗོད་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ནམ་མཁའི་དཔལ་སངས་རྒྱས་ཐམས་ཅད་ཀྱི་ཡིད་ཀྱི་ལས་ཐམས་ཅད་ཡེ་ཤེས་སྔོན་དུ་
འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཁའ་དབྱིངས་ཆོས་ཉིད་རྣམ་དག་དང་། །རྣམ་རྟོག་འགྲོ་འོང་མི་གནས་པས། །རང་བཞིན་དག་པའི་མཚན་
ཉིད་ནི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཆོད་སྦྱིན་ང་རོ་སངས་རྒྱས་ཐམས་ཅད་ཀྱི་འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བས་འཇུག་པ་རྡོ་རྗེའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བརྟན་གཡོ་བཅས་པ་ཡི། །དངོས་པོ་དེ་བཞིན་གཤེགས་པ་ཡི། །ཕུན་སུམ་ཚོགས་པ་ཐོགས་མེད་པས། །བྱང་ཆུབ་ཚུལ་འདི་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་རྣམ་པར་བཀོད་པའི་ང་རོ་སངས་རྒྱས་ཐམས་ཅད་ཀྱི་མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་དང་ལྡན་པའི་འཇུག་པ་རྡོ་རྗེའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཇིག་རྟེན་ཁམས་ཀྱི་རྡུལ་ཕྲན་དང་། །སེམས་ཅན་སྤྱོད་པ་སྣ་ཚོགས་དང་། །དཔལ་ལྡན་བདེ་གཤེགས་མཛད་པ་དག །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་ཟེར་ཡོན་ཏན་གཟི་བརྗིད་སངས་རྒྱས་ཐམས་ཅད་ཀྱི་ད་ལྟར་བའི་དུས་ལ་མ་ཆགས་མ་ཐོགས་པའི་ཡེ་ཤེས་དང་ལྡན་པས་འཇུག་པ་རྡོ་རྗེའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟོག་མེད་མེ་ལོང་གཟུགས་ལྟ་བུ། །གསལ་བ་འཛིན་པ་བྲལ་བ་ཡི། །རིམ་དང་ཅིག་ཅར་འབད་མེད་པར། །བྱང་ཆུབ་ཚུལ་འདི་བསྟན་པའོ་ཞེས་གསུངས་

89-1-175b

སོ། །དེ་ནས་དེ་བཞིན་གཤེགས་པ་དྲང་སྲོང་དབང་པོ་སངས་རྒྱས་ཐམས་ཅད་ཀྱི་ཡོངས་སུ་མ་འདྲེས་པའི་ཆོས་བཅྭ་བརྒྱད་རྣམ་པར་དག་པ་རྡོ་རྗེ་སངས་རྒྱས་ཐམས་ཅད་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །འདི་དག་མ་ལུས་སངས་རྒྱས་ཀྱི། །སྐུ་གསུང་ཐུགས་ཀྱི་རྡོ་རྗེའི་བདག །གསང་བ་འཛིན་པ་སྙིང་པོར་གྱུར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བློ་དང་
ལྡན་པ་སངས་རྒྱས་ཐམས་ཅད་ཀྱི་འཁྲུག་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐ་སྙད་རྣམས་ལས་འདས་པ་ཡི། །བདེན་པར་མ་གྲུབ་སྒྱུ་མའི་ཆོས། །དག་
པའི་ངོ་བོ་ཉིད་འབྱུང་བ། །བྱང་ཆུབ་ཚུལ་འདི་བསྟན་པ་ཡིན་ཞེས་གསུངས་སོ། །གང་དུ་མདོ་དོན་སྤྱོད་པ་ཡི། །བྱང་ཆུབ་མཆོག་ཏུ་སེམས་བསྐྱེད་པ། །དེང་ནས་བརྩམས་ཏེ་རྫོགས་སངས་རྒྱས། །བར་དུ་བསོད་ནམས་
ཡེ་ཤེས་ཀྱི། །གྲངས་མེད་དུ་མའི་ལམ་བགྲོད་དེ། །གང་དུ་ས་བཅུར་གནས་པ་ཡིས། །སྤྲུལ་པ་དུ་མ་སྟོན་པར་བྱེད། །ལྷ་དང་མི་ཡི་འཇིག་རྟེན་དུ། །ཇི་ལྟར་མངོན་པར་སངས་རྒྱས་ནས། །ཆོས་ཀྱི་འཁོར་ལོ་རབ་ཏུ་བསྐོར། །
སྤྲུལ་པ་སྒྱུ་མའི་ཆོ་འཕྲུལ་གྱིས། །སྣ་ཚོགས་གཟུགས་སུ་སྟོན་པར་བྱེད། །དངོས་དང་སྤྲུལ་དང་བྱིན་བརླབས་དང་། །ཆོ་འཕྲུལ་ངོ་མཚར་བསྐྱེད་པ་དག །གདུལ་བྱའི་དོན་དང་བྱེ་བྲག་པ། །སྤྱི་དང་དངོས་དང་དངོས་མེད་དང་། །
བརྟན་དང་གཡོ་བའི་དངོས་གང་དང་། །སྲོག་དང་སྲོག་མ་ཡིན་པར་འགྲོ། །གཟུགས་དང་སྒྲ་དང་ཡི་གེ་དང་། །རྩྭ་ལྕུག་འཁྲིལ་ཤིང་ལ་སོགས་པ། །དུ་མའི་རྣམ་པར་སྟོན་བྱེད་འགྱུར། །ཡེ་ཤེས་འོག་མིན་སྟུག་པོར་ནི། །
འདོད་ཆགས་ཆེན་པོའི་ཏིང་འཛིན་གྱིས། །རྣམ་པར་སྣང་མཛད་བྱང་ཆུབ་མཆོག །འཁོར་ལོས་སྒྱུར་བའི་རྒྱལ་པོ་ཆེ། །དང་པོའི་འོག་མིན་ཆོས་ཀྱི་དབྱིངས། །རང་བྱུང་ནམ་མཁའ་དག་པའི་ཞིང་། །བསམ་གྱིས་

89-1-176a

མི་ཁྱབ་སྤྱོད་ཡུལ་ལོ། །དེ་ཉིད་མངོན་པར་བྱང་ཆུབ་པ། །འོག་མིན་གཉིས་པ་ཡེ་ཤེས་ཡུལ། །རྣམ་པར་སྣང་མཛད་གངས་ཆེན་མཚོ། །དེ་བཞིན་གཤེགས་པའི་ཡུལ་གྱུར་ཏོ། །གཉིས་པ་འོད་གསལ་ལྷུན་གྱིས་
གྲུབ། །འོག་མིན་ཟག་པ་མེད་པའི་ཡུལ། །བདེ་ཆེན་རྒྱལ་བ་གཙུག་ཏོར་གནས། །བྱང་ཆུབ་མཆོག་དང་རབ་བཅིངས་པས། །བྱང་ཆུབ་སེམས་དཔའ་སྤྱོད་ཡུལ་ཅན། །སེམས་དཔའ་ཆེན་པོ་གསུམ་པའོ། །ཡང་དག་
ལམ་ནི་ལྔ་ལྡན་པ། །གསང་བ་འཛིན་པ་གོམས་པའི་ལམ། །རྣལ་འབྱོར་དབང་ཕྱུག་ཕྱག་རྒྱ་ཆེ། །དབང་གི་རྒྱལ་པོ་ཡོན་ཏན་གཏེར། །སྐད་ཅིག་གཅིག་ལ་གོམས་བྱེད་ཅིང་། །ཤིན་དུ་སྒྲིམ་ཞིང་བརྩོན་ལྡན་གྱིས། །རང་
བྱུང་ཐམས་ཅད་མཁྱེན་པ་ཡི། །ནོར་བུ་རིན་ཆེན་ལྟ་བུར་ནི། །འགྲོ་བའི་དགོས་འདོད་སྐོང་བྱེད་པས། །ཐམས་ཅད་རྡོ་རྗེ་གསུམ་དུ་ནི། །ལྷག་པའི་མཆོག་གིས་དབང་བསྐུར་ཏེ། །དུས་གསུམ་ཕྱོགས་བཅུའི་
སངས་རྒྱས་དང་། །བྱང་ཆུབ་སེམས་དཔའ་རིག་མར་བཅས། །ལྷ་མོའི་ཚོགས་དང་བཅས་པ་ཡིས། །ཁྲོ་བོའི་རྒྱལ་པོ་དུ་མ་ཡིས། །དབང་བསྐུར་གྱུར་པས་གསང་བའི་རིམ། །
སྦས་པའི་ཚུལ་གྱིས་འཚང་རྒྱར་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་
ལས་སངས་རྒྱས་ཐམས་ཅད་ཀྱི་སྐུ་གསུམ་གྱི་ཞིང་ཁམས་བསྟན་པའི་སྤྱོད་ཡུལ་བླ་ན་མེད་པའི་ལེའུ་སྟེ་ལྔ་བཅུ་གསུམ་པའོ།། །། དེ་ནས་དེ་བཞིན་གཤེགས་པ་སྤོབས་པའི་མཆོག་འདུས་པ་སངས་
རྒྱས་ཐམས་ཅད་ཀྱི་རྣམ་པར་མི་འགྱུར་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕུན་སུམ་ཚོགས་པའི་འབྱུང་གནས་གང་། །རྣལ་འབྱོར་ཆོས་ཀྱི་རྒྱས་གདབ་པས། །ཁམས་

89-1-176b

གསུམ་ཡེ་ཤེས་གཅིག་པར་སྒྱུར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་སྦྱིན་སངས་རྒྱས་ཀྱི་ཆོས་ཐམས་ཅད་ལ་མངོན་པར་རྫོགས་པ་བྱང་ཆུབ་པ་ལ་མི་འཇིགས་པ་
རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་ཅན་མ་ལུས་རྒྱ་མཚོ་ཀུན། །རང་ལག་སྐྱུ་རུ་ར་བཞག་བཞིན། །རྣམ་པར་ཐོ་འཚམ་ལས་རྒལ་བའི། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་བཟང་པོ་སངས་རྒྱས་ཐམས་ཅད་ཀྱི་ཟག་པ་མ་ལུས་པར་མཁྱེན་པ་མི་འཇིགས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་
ཆུབ་ཀྱི་སེམས་འདི་གསུངས་སོ། །ཡེ་ཤེས་རྡོ་རྗེའི་སྟོབས་ཀྱིས་ནི། །འཇིག་ཚོགས་སྲིད་པ་བཅོམ་ནས་ནི། །མི་ལྡོག་བྱང་ཆུབ་ཆེན་པོ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་ཟླ་བའི་ཞལ་སངས་རྒྱས་ཐམས་ཅད་ཀྱི་བར་དུ་གཅོད་པའི་ཆོས་རྣམ་པ་གཞན་དུ་མི་འགྱུར་བར་ངེས་པའི་ལུང་བསྟན་པ་ལ་མི་འཇིགས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །བདུད་ལས་བྱུང་བའི་རྟགས་དང་བརྡ། །མཚན་མའི་གནས་ཀྱི་གཏན་ཚིགས་ལས། །བདུད་ལས་རྣམ་རྒྱལ་ལུང་བསྟན་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་ཤིན་དུ་གཟིགས་པ་སངས་རྒྱས་ཐམས་ཅད་ཀྱི་ཕུན་སུམ་ཚོགས་པ་ཐམས་ཅད་ཚིམ་པར་འགྱུར་བའི་ལམ་ངེས་པར་དེ་ཁོ་ན་ཉིད་དུ་འགྱུར་བ་ལ་མི་འཇིགས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་འབྱུང་སྡུག་བསྔལ་སྤོང་བྱེད་པ། །ལམ་དང་འགོག་པའི་བདེན་པ་ལ། །དེ་ཉིད་ངེས་པར་འབྱུང་བསྟན་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་

89-1-177a

དེ་བཞིན་གཤེགས་པ་རྡུལ་དང་བྲལ་བ་སངས་རྒྱས་ཐམས་ཅད་ཀྱི་མི་འཇིགས་པ་བཞི་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྟོན་པས་
ཁྱུ་མཆོག་རླབས་ཆེན་གནས། །བླ་མེད་སེང་གེའི་སྒྲ་སྒྲོགས་པ། །ཡང་དག་ཆོས་ཀྱི་འཁོར་ལོ་ཡི། །བྱང་ཆུབ་དེ་ཉིད་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་ཚོགས་སངས་རྒྱས་
ཐམས་ཅད་ཀྱི་རྐང་གཉིས་གཙོ་བོར་གྱུར་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཁའ་ལ་རྒྱུ་བའི་བྱ་དག་ནི། །འདབ་མ་མི་ལྡན་འཕུར་ནུས་མེད། །དེ་ལ་ཟུང་
འཇུག་དོན་ལྡན་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཏོག་དང་ལྡན་པ་སངས་རྒྱས་ཐམས་ཅད་ཀྱི་དགོངས་པ་གཅིག་ཏུ་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་བསླབ་པའི་སྡོམ་པ་ལ། །གཞི་དང་རྒྱུ་ལམ་འབྲས་བུ་དག །མ་ཉམས་ས་བོན་མྱུ་གུ་བཞིན། །བྱང་ཆུབ་ཚུལ་འདི་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་བསོད་ནམས་རྒྱལ་མཚན་སངས་རྒྱས་ཐམས་ཅད་ཀྱི་སྐྱེས་བུ་ཁྱུ་མཆོག་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ནམ་མཁའ་དག་པའི་གནས་
མཚུངས་པར། །ཡུལ་དང་ཡུལ་ཅན་དག་པ་ལས། །དབྱིངས་དང་ཡེ་ཤེས་དབྱེར་མེད་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡུལ་འཁོར་སྤོབས་པ་སངས་རྒྱས་ཐམས་ཅད་
ཀྱི་ཀུན་དུ་སྤྱོད་པ་དག་པ་རྡོ་རྗེ་སངས་རྒྱས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཆོས་ཅན་ཆོས་ཉིད་མེད། །ཀུན་རྫོབ་བློ་ཡི་སྤྱོད་ཡུལ་ཏེ། །ཆོས་ཀུན་སྒྱུ་མ་ཙམ་

89-1-177b

དུ་གནས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་རབ་སྦྱིན་སངས་རྒྱས་ཐམས་ཅད་ཀྱི་ཕྱིན་ཅི་མ་ལོག་པའི་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་
ཆུབ་ཀྱི་སེམས་འདི་གསུངས་སོ། །ཤེས་དང་ཤེས་བྱ་ཀུན་གྱི་ནི། །སྤྱོད་ཡུལ་བློ་ཡི་སྣང་བ་ལས། །རྟེན་དང་བརྟེན་མེད་ངོ་བོ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཟླ་བ་རྒྱས་
པ་སངས་རྒྱས་ཐམས་ཅད་ཀྱི་མི་ཟད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དག་པའི་ཆོས་སྐུ་སྐྱེ་མེད་པ། །དྲི་མ་བྲལ་བ་དེ་འོད་གསལ། །མཐའ་ལས་གྲོལ་
བའི་ངོ་བོ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སེང་གེའི་སྟོབས་སངས་རྒྱས་ཐམས་ཅད་ཀྱི་མི་གནས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །སྲིད་པའི་དྲ་བ་གཅོད་པ་ཡི། །རྣམ་པར་ཞི་བའི་སེམས་སྤངས་ཏེ། །མགོན་པོ་ཡེ་ཤེས་གཅིག་པར་འབྱུང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་དབང་སྒྱུར་རྒྱལ་པོ་སངས་རྒྱས་ཐམས་ཅད་ཀྱི་ཡེ་ཤེས་འབྱུང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མ་འགགས་གོས་པ་མེད་པ་དང་། །མ་འདྲེས་ཐབས་ཀྱི་ཕ་རོལ་
སོན། །གསལ་བ་བློ་ལ་འཆར་བ་གང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བདུད་རྩི་གསལ་བ་སངས་རྒྱས་ཐམས་ཅད་ཀྱི་རྒྱན་བཀོད་པ་སྣང་བ་རྡོ་རྗེའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུན་ཆད་མེད་པའི་བྱང་ཆུབ་སེམས། །ཐམས་ཅད་དེ་ལས་སྐྱེས་པའི་དངོས། །ཕྲ་མོ་རྐྱེན་བྱུང་དག་པའི་དོན། །བྱང་ཆུབ་ཚུལ་འདི་བསྟན་པའོ་ཞེས་

89-1-178a

གསུངས་སོ། །དེ་ནས་དེ་བཞིན་གཤེགས་པ་བསམ་གཏན་སྙོམས་པས་སངས་རྒྱས་ཐམས་ཅད་ཀྱི་ཕྲིན་ལས་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
རང་བཞིན་གྱིས་ནི་རྣམ་པར་དག །ཁམས་རྒྱུད་ཡུལ་དང་དབང་པོ་དག །རབ་ཏུ་དག་པར་རྫོགས་པ་ནི། །བྱང་ཆུབ་སེམས་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འཁྲུག་པ་མེད་པ་
སངས་རྒྱས་ཐམས་ཅད་ཀྱི་ཆོས་འབྱུང་རོལ་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གནས་དག་བར་ཆད་མེད་པའི་ལམ། །ཆོས་རྒྱལ་ཞིང་ཁམས་ཡོངས་སུ་
དག །མི་ལྡོག་ཏིང་འཛིན་ཟད་མི་ཤེས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དྲི་མ་མེད་པ་སངས་རྒྱས་ཐམས་ཅད་ཀྱི་ཡོན་ཏན་མངོན་པར་དག་པ་རྡོ་རྗེའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་སྨིན་པ་བསོད་ནམས་སྟོབས། །བྲལ་བ་ཡེ་ཤེས་སྤྱོད་ཡུལ་བ། །ཁྱད་པར་རྣམ་པར་མི་རྟོག་ལས། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་ཕྱོགས་མ་བསླད་པ་སངས་རྒྱས་ཐམས་ཅད་ཀྱི་ཐབས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ཅན་མོས་པ་སྣ་
ཚོགས་ལ། །ཡེ་ཤེས་སྤྱོད་པའི་སྒྱུ་འཕྲུལ་གྱིས། །བསྟན་པ་བསམ་གྱིས་མི་ཁྱབ་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་མཛེས་པའི་རྒྱལ་པོ་སངས་རྒྱས་
ཐམས་ཅད་ཀྱི་ཡེ་ཤེས་ཀྱི་ཕྲེང་བ་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཁོར་བའི་རྒྱ་མཚོ་མ་སྟོངས་པར། །ཡེ་ཤེས་འཁོར་ལོ་བསྐོར་བ་ཡི། །སངས་
89-1-178b

རྒྱས་རྣམས་ཀྱི་ཐུགས་རྗེས་སྟོན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་འདི་ནི་གསུངས་ཙམ་གྱིས། །སངས་རྒྱས་བྱང་ཆུབ་སེམས་དཔའ་རྣམས། །རིག་པའི་རྒྱལ་པོ་རྗེས་དྲན་པས། །གསང་
བ་དམ་པ་བསྟན་པ་ཡིན། །དང་པོ་དབང་གི་དུས་ཡིན་ཏེ། །མངོན་པར་རྟོགས་པ་དང་པོའོ། །ཡེ་ཤེས་མཐོང་བའི་དང་པོ་ལས། །སྦྱོར་བ་རྣམ་པ་གསུམ་དུ་འགྱུར། །ལུས་དང་ངག་དང་སེམས་དམིགས་པས། །རིག་
པ་གཅིག་གི་ངང་ཉིད་ལས། །སྔགས་ཀྱི་རིམ་པ་རྡོ་རྗེ་ལྟར། །ཡུལ་སེམས་རླུང་ནི་མི་ཕྱེད་པས། །གཅིག་ཏུ་གྱུར་པའི་རིམ་པ་ལས། །སེམས་ལ་དམིགས་པ་ཡེ་ཤེས་ཆེ། །རླུང་སེམས་འགྲོ་ལྡོག་གཅིག་པས་
ན། །ངེས་པ་རྣམ་པར་དབེན་དོན་བསྟན། །ཕྱི་རོལ་ཡུལ་སྣང་སྒྱུ་མར་འཆར། །རང་རིག་འོད་གསལ་མངོན་བྱང་ཆུབ། །ཐམས་ཅད་བདེ་ཆེན་ཡེ་ཤེས་སུ། །ཡང་དག་རྫོགས་པས་རྫོགས་པའི་རིམ། །བསམ་གཏན་
བསྡུས་པའི་རིམ་པ་ཡིས། །རིལ་བར་འཛིན་པ་རྗེས་གཞིག་པ། །གཅིག་ཏུ་བྱེད་པ་གསང་བ་ཡིས། །ཟུང་འཇུག་ཡེ་ཤེས་ཐོབ་པར་འགྱུར། །དངོས་པོ་མེད་པ་བསྒོམ་པ་དངོས། །བསྒོམ་པར་བྱ་བ་བསྒོམ་པ་མིན། །དེ་བས་
དངོས་པོ་དངོས་མེད་པས། །བསྒོམ་པ་དམིགས་སུ་མེད་པའོ། །གང་དུ་ལུས་སེམས་ཀུན་རྫོབ་བཅས། །དོན་དམ་རྣམ་དག་ཟུང་འཇུག་སྟེ། །གང་དུ་དམིགས་པས་བསྡུས་པ་ནི། །བརྩོན་འགྲུས་ལྡན་པས་རབ་འཇུག་
ཡིན། །རིམ་གྱིས་མངོན་འདོད་ལེ་ལོ་ཅན། །གཡེང་བ་ཐམས་ཅད་སྤངས་ནས་ནི། །བྱང་ཆུབ་སེམས་དཔའ་ཚེ་འདི་ལ། །རྣལ་འབྱོར་བརྩོན་པས་རབ་བསྐུལ་བས། །ཟླ་དྲུག་གོམས་པའི་སྦྱོར་བ་ཡིས། །ཡེ་ཤེས་
མངོན་དུ་བྱེད་པ་འམ། །ཞག་བདུན་གྱིས་ནི་གཟི་ཆེ་ཡི། །རྣལ་འབྱོར་ཡེ་ཤེས་མཆོག་སྦྱོར་བས། །རིམ་པ་རྫོགས་པར་གནས་པའི་ལམ། །སྐད་ཅིག་ཞག་དང་ལོ་ཡི་དུས། །དུས་ནི་ཐུང་ངུའི་འགྲུབ་པར་འགྱུར། །

89-1-179a

བསྐྱེད་པའི་ཚུལ་འདི་དང་པོར་བསྟན། །མཐར་ཕྱིན་བརྟན་པར་གྱུར་པ་ཡིས། །གཉིས་པ་རྫོགས་པའི་རྣལ་འབྱོར་ཏེ། །རིམ་གཉིས་མཉམ་པར་སྦྱོར་བ་ཡིས། །རྣལ་འབྱོར་པ་ཡི་སྐུ་གསུང་ཐུགས། །རིམ་གཉིས་བླ་
ན་མེད་པ་ལས། །གསང་གསུམ་རྡོ་རྗེ་ཐོབ་པར་འགྲུབ། །འདིར་ནི་ཡི་གེའི་དབྱེ་བ་ཡིས། །སྒྲ་ལས་ཁྱད་པར་དོན་རྩོལ་བ། །རྐྱེན་དང་བྱེད་པ་སྟོན་པ་ཡི། །སྔགས་ནི་གསང་བར་བརྗོད་པ་ཡིན། །དེ་བཞིན་གཤེགས་པ་ཐམས་ཅད་
ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་སངས་རྒྱས་ཐམས་ཅད་ཀྱི་གསང་བ་ཡོངས་སུ་རྫོགས་པའི་རྒྱུད་ཀྱི་དོན་བསྟན་པའི་ལེའུ་
སྟེ་ལྔ་བཅུ་བཞི་པའོ།། །། དེ་ནས་རྒྱལ་པོ་རྡོ་རྗེ་འཛིན། །ཐུབ་པ་ཆེན་པོས་བཀའ་སྩལ་པ། །སྐུ་དང་གསུང་དང་ཐུགས་རྡོ་རྗེ། །གསང་གསུམ་རྡོ་རྗེ་འཆང་བའི་བདག །སྒྱུ་མའི་སྣང་བ་ལས་འདས་ཏེ། །རྡོ་རྗེ་གསང་བའི་
ངོ་བོ་ཉིད། །མངོན་པར་བྱང་ཆུབ་མཚན་ཉིད་ཅན། །ཡེ་ཤེས་དམིགས་མེད་ངོ་བོ་ཉིད། །འདུས་པ་གསང་བ་གནས་མེད་པ། །ཡི་གེའི་ཚིག་ནི་དམིགས་མེད་པས། །དེ་ཉིད་བརྗོད་པས་རྣམ་པར་དབེན། །དགོངས་པས་ཅང་ནི་མི་གསུང་
བཞུགས། །གསང་བའི་སྐུ་མཆོག་དྲི་མ་མེད། །གཞོན་ནུས་དབང་ཕྱུག་འདིར་རྟོག་གོ། །ཡེ་ཤེས་སྐུ་ནི་མི་འགྱུར་ཞིང་། །མ་སྐྱེས་སྐྱེ་མེད་མཆོག་གི་ཡུལ། །རྡོ་རྗེ་གསུང་ནི་འགག་པ་མེད། །མཚན་མ་མེད་ཅིང་དྲི་མ་མེད། །འོད་
གསལ་ནམ་མཁའ་ཞེས་བྱ་བ། །དེ་ཉིད་ལས་བྱུང་དེར་སྟོན་པ། །ཐམས་ཅད་དམིགས་མེད་རྟོགས་སུ་མེད། །ཡང་དག་སྣང་བ་ཀུན་རྫོབ་སྟེ། །ལེགས་པར་བཟུང་ཡང་མ་སྐྱེས་ཤིང་། །སྒྱུ་མ་ཙམ་དུའང་དམིགས་སུ་མེད། །ལོག་
པར་ཟིན་ལས་ལྡོག་པར་འགྱུར། །དེ་ནས་འཇམ་པའི་དབྱངས་ལ་སོགས། །ཐམས་ཅད་ཀྱིས་ནི་འདི་སྐད་གསོལ། །རྡོ་རྗེའི་ཚིག་གི་ཡུལ་མིན་པ། །ཀུན་དུ་འབྱུང་བའི་དྲི་མ་ལས། །ཕྱིན་ཅི་ལོག་ལས་རྣམ་པར་འདས། །དེ་ཉིད་

89-1-179b

བརྗོད་དང་བྲལ་བས་ན། །རྣམ་པར་དབེན་པ་སྤྲོས་དང་བྲལ། །ཐ་དད་གཅིག་ཏུ་བརྟག་མི་བྱ། །དེ་ཉིད་ཅི་ཡི་སླད་དུ་ནི། །སངས་རྒྱས་ཀུན་གྱི་གསང་བ་ནི། །བྱང་ཆུབ་སེམས་སུ་གྱུར་པ་ཉིད། །སྐྱེ་མེད་ཙམ་དུའང་མི་གནས་ལ། །སྒྱུ་མའི་
དབྱིངས་ཉིད་ལས་འདས་ཤིང་། །ངོ་བོ་ཉིད་ནི་རང་བྱུང་བ། །ཡང་དག་སྤྱོད་པར་གྱུར་པ་གང་། །དེ་བཞིན་ཉིད་དུ་གཤེགས་གྱུར་ཅིང་། །ཡེ་ཤེས་འཇུག་པས་གཤེགས་པར་མཛད། །ལྡོག་
པའི་ཁྱད་པར་རྗེས་སུ་འགྲོ། །དེ་ཉིད་གང་གི་སླད་དུ་ན། །འཇིག་རྟེན་དབང་པོ་ལ་སོགས་པས། །བྱང་ཆུབ་སེམས་དཔའ་རྣམས་ཀྱིས་ནི། །ངོ་བོ་ཉིད་ནི་མ་དམིགས་ཤིང་། །ཡེ་ཤེས་འཇུག་པ་མེད་པས་ན། །སླར་ཞིང་ཡང་དག་
ཡུལ་འདི་ལ། །འདི་སྙམ་དུ་ནི་རྟོག་གྱུར་ཏེ། །བདག་ཅག་སྟོན་པ་དེ་བཞིན་གཤེགས། །འདི་ཉིད་སངས་རྒྱས་ཐམས་ཅད་ཀྱི། །དེ་ཉིད་གསང་བ་ཆོས་དག་པ། །ཡུལ་དུས་མ་བྲལ་བརྗོད་བྲལ་བ། །རྟོགས་དཀའ་བརྟག་པར་དཀའ་བ་
ཉིད། །རིག་ནའང་མི་རིག་པ་ཡི་ཆོས། །གསང་བའི་ཡི་གེའི་རྣམ་པར་དབེན། །ཐོག་མ་ཐ་མ་མེད་པའི་བདག །ཇི་ལྟར་རྟོག་ཅིང་སྟོན་པར་བྱེད། །དེ་ལྟར་སེམས་པར་གྱུར་པས་ན། །བསམ་པ་དེ་དག་རབ་ཤེས་པས། །གསུང་
ནི་འདི་སྐད་བཀའ་སྩལ་ཏོ། །གསང་བ་མི་འགྱུར་རྡོ་རྗེའི་བདག །འདིར་ནི་དེ་བཞིན་གཤེགས་ཀུན་ཡང་། །དེ་ཉིད་གཟིགས་པ་མེད་པས་ན། །བླ་མེད་བྱང་ཆུབ་མི་ཤེས་སོ། །ཕྲ་ཞིང་བདག་མེད་སྟོང་བས་ན། །བྱང་ཆུབ་
སེམས་དཔའ་ལྟ་ཅི་སྨོས། །དེ་ཉིད་ཅི་ཡི་ཕྱིར་ཞེ་ན། །སྒྱུ་མ་སྐྱེ་བ་མེད་པས་ན། །རྡོ་རྗེ་མངོན་པར་བྱང་ཆུབ་པ། །ངོ་བོ་མེད་ཅིང་གནས་མེད་པ། །མི་འགྱུར་ལྷུན་གྱིས་གྲུབ་པ་ལས། །གཉིས་མེད་སྣང་བའི་ཡེ་ཤེས་
འབྱུང་། །དེ་ལྟར་ཤིན་དུ་རྟོགས་དཀའ་ཞིང་། །ཀུན་དང་ཐུན་མོང་མ་གྱུར་པས། །མོས་དང་རིག་པར་ལྡན་པ་ཡི། །སེམས་ཅན་རྣམས་ཀྱིས་ཇི་ལྟར་འགྱུར། །རིགས་ཀྱི་བུ་ཞེས་སྐལ་བར་ལྡན། །སེམས་ཅན་ཆེན་པོའི་

89-1-180a

རིགས་ཅན་གྱིས། །བླ་མེད་མངོན་པར་བྱང་ཆུབ་པ། །སྙིང་པོ་མཆོག་ལ་གནས་པ་ཡིས། །ཚེ་འདིར་རྡོ་རྗེར་སངས་རྒྱས་སྟེ། །དེ་ཉིད་སྐུ་གསུམ་དབྱེར་མི་ཕྱེད། །རྡོ་རྗེ་ཆོས་ཉིད་དག་པའི་ཕྱིར། །སྐུ་གསུང་ཐུགས་ཀྱི་
གསང་བ་ཆེ། །ཡེ་ཤེས་རྡོ་རྗེའི་གནས་ཐོབ་འགྱུར། །དབྱངས་དང་གསལ་བྱེད་སྦས་པའི་དོན། །ཐིག་ལེ་སྲོག་གི་རྣམ་པ་ནི། །སྙིང་གའི་དབུས་སུ་མི་ཤིགས་པ། །གསལ་བ་ཟླ་བའི་གཟུགས་བརྙན་ལ། །སེམས་ཀྱི་རྟེན་དུ་གྱུར་
པར་བརྗོད། །རྟེན་འདི་གཟུགས་བརྙན་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཆོས་སྐུ་གཉིས་སུ་མེད་པའི་ཐུགས། །ལོངས་སྤྱོད་རྫོགས་པའི་གསུང་རྡོ་རྗེ། །སྤྲུལ་སྐུ་ཡོངས་རྫོགས་གྲུབ་པའི་འབྲས། །དབྱེར་མེད་
རྡོ་རྗེ་བདེ་བ་ཆེ། །ལུས་ངག་སེམས་ནི་སྐུ་གསུམ་དུ། །འབྱུང་ཞིང་འཇུག་པར་མཛད་པ་གང་། །སྐུ་བཞིའི་ངོ་བོ་རྡོ་རྗེ་འཆང་། །དེ་ཉིད་བླ་མར་གསུངས་པས་ན། །གནས་པ་རྡོ་རྗེ་སེམས་དཔའི་སྐུ། །གང་དུའང་མི་གནས་མཉམ་
པ་ཉིད། །དེ་བཞིན་གཤེགས་པ་ཐམས་ཅད་ཀྱི། །སྐུ་གསུང་ཐུགས་ཀྱི་གསང་བ་ནི། །བདེན་གཉིས་ཡང་དག་རབ་སྦྱོར་བ། །རྒྱུ་དང་འབྲས་བུའི་ཁྱད་པར་གྱིས། །རིགས་གཅིག་ཐ་དད་མེད་པར་སྡོམ། །རྡོ་རྗེ་འཆང་ཆེན་ཉིད་དུ་ངེས། །
སྐུ་གསུང་ཐུགས་ཀྱི་སྦྱོར་བ་ཡིས། །བླ་མེད་འབྱུང་བའི་ལུས་ཅན་ལ། །བདུད་རྣམས་འཇོམས་པར་མཛད་པ་གང་། །འཁོར་ལོའི་སྦྱོར་བ་བྱང་ཆུབ་རིམ། །ཡོངས་སུ་རྫོགས་པར་གྱུར་པ་ཡི། །ཆོ་ག་ལེགས་པར་བྱས་
ན་ནི། །མཁའ་དབྱིངས་རྡོ་རྗེའི་མཐར་ཀླས་པར། །ཕུར་བུ་འདེབས་པར་གདོན་མི་ཟ། །འདི་ནི་སྔགས་རྣམས་ཐམས་ཅད་ཀྱི། །ཕུར་འདེབས་དེ་ཉིད་ལས་བྱུང་བ། །སྐུ་གསུང་ཐུགས་ཀྱི་མཆོག་སྦྱིན་པའི། །སྔགས་
ཀྱི་དེ་ཉིད་དོན་བསྡུས་པའོ། །བསྐྱེད་པའི་རིམ་པ་གནས་པ་ཡི། །རབ་ཏུ་དགའ་བ་ནས་བརྩམས་ཏེ། །མངོན་དུ་གྱུར་པའི་བར་དུ་བགྲོད། །རིང་དུ་སོང་བ་བདུན་པ་ནས། །མི་གཡོ་བ་ཡི་བར་དག་ཏུ། །སྦྱོར་བ་གསུམ་གྱིས་

89-1-180b

ངེས་པར་སྦྱངས། །ལས་ལ་སྦྱོར་བས་བརྒྱད་པའོ། །སྣང་བ་གསུམ་ལ་ཞུགས་པ་དག །ས་བཅུ་ལ་ནི་ངེས་གནས་པ། །རང་བཞིན་བརྒྱད་དང་དྲུག་བཅུ་པོ། །འོད་གསལ་བ་ལ་ཐིམ་གྱུར་པས། །སྦྱང་བྱ་སྦྱོང་བྱེད་གཉིས་ལ་ནི། །བཅུ་
གཅིག་བཅུ་གཉིས་བདེ་གཤེགས་པ། །དེང་གནས་བདེ་བ་ཆེན་པོ་ཡི། །བཅུ་གསུམ་རྡོ་རྗེ་འཛིན་ལ་གནས། །ཀོ་ཊ་ཀྵྱ་ཞེས་གྱེན་དུ་རྒྱུ་བའི་རླུང་། །དང་པོའི་དབང་པོ་མི་ཕྱེད་གྱུར་པ་སྟེ། །ཚེ་ལ་དབང་བ་སྟོབས་བཅུའི་མཆོག་
གྱུར་གང་། །གནས་དང་གནས་མ་ཡིན་པ་མཁྱེན་པར་བརྗོད། །ཀོ་ཊ་ཝ་ཀྵྱ་ཐུར་དུ་སེལ་བ་ཉིད། །བརྩོན་འགྲུས་དབང་པོ་རྩོམ་པའི་མཆོག་ཡིན་ཏེ། །བྱང་ཆུབ་སེམས་ལས་དབང་བ་ལྷ་ཡི་གཙོ། །མོས་པ་སྣ་ཚོགས་
མཁྱེན་པའི་སྟོབས་ཞེས་བརྗོད། །ཀོ་ཊ་བ་དྷ་མེ་དང་མཉམ་གནས་པ། །ཆོས་ཀུན་རྩ་བ་སྙིང་པོ་སྲོག་ཡིན་ཏེ། །མི་བརྗེད་དྲན་པའི་དབང་པོ་སེམས་ལ་དབང་། །བསམ་གཏན་ཉིད་དང་ཏིང་འཛིན་མཁྱེན་སྟོབས་གྱུར། །ཀོ་ཊ་བ་ཤ་སྲོག་
འཛིན་རླུང་གྱུར་པས། །མཉམ་བཞག་ཏིང་འཛིན་དབང་པོ་དང་ལོངས་སྤྱོད། །རྣམ་པར་ཐར་པ་བསམ་གྱིས་མི་ཁྱབ་དང་། །སྙོམས་པར་འཇུག་པ་མཁྱེན་པའི་སྟོབས་ཞེས་བརྗོད། །ཀུ་ཏི་ད་ར་ཁྱབ་བྱེད་རླུང་དུ་གྱུར། །ཆོས་རྣམས་འབྱེད་
པ་ཤེས་རབ་དབང་པོ་སྟེ། །སྐྱེ་བ་ལ་དབང་ཀུན་ནས་ཉོན་མོངས་དང་། །རྣམ་པར་བྱང་བ་མཁྱེན་པའི་སྟོབས་ཞེས་བརྗོད། །ཀོ་ལཊ་ཀྵྱ་འདི་ནི་རྒྱུ་བའི་རླུང་། །སྤྱོད་ཡུལ་དད་པའི་སྟོབས་དང་ལྡན་པ་ལས། །རྫུ་འཕྲུལ་བ་དང་ལས་ཀྱི་
འཇུག་པ་དང་། །ལས་ཀྱི་རྣམ་པར་སྨིན་པ་མཁྱེན་པའི་སྟོབས། །ཀོ་ལ་བྷྱ་ཞེས་རབ་ཏུ་རྒྱུ་བ་སྟེ། །རྒྱུན་ཆད་མེད་པ་བརྩོན་འགྲུས་སྟོབས་མཆོག་གྱུར། །མོས་པ་ལ་དབང་འབྱུང་འཇུག་ཕྲིན་ལས་ལ། །ཐམས་ཅད་ཉིད་དུ་སོན་
པའི་ལས་མཁྱེན་སྟོབས། །ཀོ་ལ་ལོ་བྷ་མངོན་པར་རྒྱུ་བ་ཉིད། །གཟུངས་འགྱུར་དྲན་པའི་སྟོབས་ལས་རྡོ་རྗེ་ཆེ། །ཞིང་ཁམས་སྤྱོད་པའི་སྨོན་ལམ་གནས་མཁས་པ། །སྔོན་གྱི་གནས་རྣམས་མ་ལུས་མཁྱེན་པར་བརྗོད། །ཀོ་ཊ་བྷི་

89-1-181a

ཞེས་ཁྱད་པར་རབ་རྒྱུ་བ། །དྲི་མེད་ཏིང་འཛིན་སྟོབས་ནི་རྩལ་ལྡན་པ། །ཡེ་ཤེས་ལ་དབང་ཕུན་སུམ་ཚོགས་པའི་ཡུལ། །འཆི་འཕོ་བ་དང་སྐྱེ་བའི་གནས་སྟོབས་གྱུར། །ཀོ་ལ་ཏ་ཐཱ་ན་ཞེས་ཀུན་དུ་རྒྱུ། །ཤེས་རབ་སྟོབས་
ལྡན་ཆོས་ལ་དབང་བ་གང་། །ཟག་པ་ཟད་པ་མཁྱེན་པའི་སྟོབས་ཡིན་ནོ། །འདི་དག་གནས་ཞེས་མཉམ་བཞག་སྤྱོད་པ་ཅན། །ཉེ་བའི་གནས་ཞེས་མཉམ་ལོངས་སྤྱོད་པའི་ཡུལ། །ཞིང་ནི་དབང་པོ་ལྔ་ཡི་ཡུལ་ཉིད་དེ། །ཉེ་ཞིང་འདོད་ཡོན་
རྡོ་རྗེའི་སྤྱོད་ཡུལ་གང་། །ཚན་དྷོ་དཀྱིལ་འཁོར་རང་ལ་རྫོགས་པའི་གནས། །ཉེ་ཚན་བརྟན་གཡོ་དཀྱིལ་འཁོར་འཁོར་ལོ་ཡི། །འདུས་བྱས་བྱང་ཆུབ་སེམས་ཀྱི་རྡོ་རྗེར་འགྱུར། །ཉེར་འདུ་ཚད་མེད་བཞི་ལྡན་རང་བྱུང་བ། །དུར་ཁྲོད་བདེ་
ཆེན་ལྷན་ཅིག་རོལ་པ་ཆེ། །ཉེ་བའི་དུར་ཁྲོད་ཡེ་ཤེས་རྒྱས་པར་འགྱུར། །གནས་བཅུ་འདི་དག་གསང་འཛིན་ང་ཡི་ཡུལ། །ས་བཅུའི་དབང་ཕྱུག་ཕྱག་རྒྱ་ཆེན་པོའི་ངང་། །གཅིག་དང་དུ་མར་དམིགས་མེད་བདེ་བ་ཆེ། །ཆོས་དང་ཆོས་
ལས་བྱུང་བའི་ཡུལ་མི་དམིགས། །ཀོ་ཊ་ཀྵྱ་ཀོ་ཊ་ཝ་ཀྵྱ་ཀོ་ཊ་ཝྱ་དྷ་ཀོ་ཊ་བ་ཤ ༑ཀུ་ཏི་ད་ར༑ ཀོ་ལ་ཊ་ཀྵྱ༑ ཀོ་ལོ་བྷྱ༑ ཀོ་ལ་ལོ་བྷ༑ ཀོ་ཊ་བྷི༑ ཀོ་ལ་ཏ་ཐཱ་ན། བཅོམ་ལྡན་མགོན་པོ་རྡོ་རྗེ་འཛིན། །ཁྱོད་ནི་གླང་པོ་ལྟ་བ་ཆེ། །ཁྱོད་ནི་བཟང་པོའི་རྒྱན་དང་
ལྡན། །ཁྱོད་ནི་རྣམ་པར་གནོན་པ་ཡིན། །ཁྱོད་ནི་རིན་ཆེན་འབྱུང་གནས་གཙོ། །ཁྱོད་ནི་བདེན་པའི་འདྲེན་པ་ཡིན། །ཁྱོད་ནི་གཟུགས་སྡུག་ཡིད་འཕྲོག་ཡིན། །ཁྱོད་ནི་འཇོམས་པ་ཅིར་ཡང་སྣང་། །ཁྱོད་ནི་མེ་ལྕེའི་ཕྲེང་བ་ཅན། །ཁྱོད་ནི་གནས་
ལ་སྐྱོ་བ་མེད། །ཁྱོད་ནི་ཡིད་བཞིན་ནོར་བུ་སྟེ། །ཁྱོད་ཀྱི་སྐུ་ནི་མཛེས་པར་བསྟན། །རྒྱ་མཚོ་བླ་ན་མེད་པ་སྟེ། །བསྟོད་པའི་མཆོག་ཏུ་གྱུར་པའོ། །རྡོ་རྗེ་ངེས་པར་སྟོན་པའི་གསང་བ་གཅིག་ཏུ་བསྡུས་པ་བླ་ན་མེད་པ་རྡོ་རྗེ་ཞེས་བྱ་བའི་ཏིང་ངེ་
འཛིན་ཏོ། །གང་ལས་བླ་མེད་དཀྱིལ་འཁོར་རབ་གསལ་བ། །རྒྱུད་རྣམས་མ་ལུས་པ་ལ་ཁྱབ་པ་དང་། །ཆོས་ཀུན་ལ་ནི་འདི་ཡིས་རྒྱས་བཏབ་པས། །འདུས་པ་རྩ་བར་གསུངས་པ་དོན་བསྟན་པའོ། །སྙིང་པོའི་འོད་ཟེར་དཔག་མེད་ལས་

89-1-181b

སྤྲུལ་པའི། །ཐུབ་པས་རབ་རིབ་ཀུན་དུ་ངེས་བསལ་ནས། །མ་ལུས་སེམས་ཅན་སངས་རྒྱས་རྫོགས་བྱས་ཏེ། །གསང་སྔགས་རིག་པའི་ནང་དུ་ཆུད་པར་བྱ། །གཟུགས་ལ་སོགས་པའི་རྣམ་པ་མ་གཏོགས་པའི། །འཛིན་པ་དེ་ནི་དངོས་སུ་
མཐོང་མི་འགྱུར། །བཟུང་བ་དག་ཀྱང་ཅུང་ཟད་ཡོད་མིན་ལ། །གཞན་པའི་དྲ་བ་ཡིས་ཀྱང་མཐོང་དུ་མེད། །འཁྲུལ་པའི་ཤེས་རབ་བྱ་བ་གང་ཡང་མེད། །ཡོངས་སུ་འཛིན་པ་ཡོད་པར་མ་མཐོང་སྟེ། །ཅིག་ཅར་སྐྱེ་བཞིན་པ་ནི་གཟུགས་
མཆོག་ཡིན། །འདི་དག་འཛིན་པ་པོ་ནི་ཡོད་པ་མིན། །དཀར་དམར་ལ་སོགས་གང་ཞིག་མཐོང་བ་རྣམས། །དེ་ཉིད་དུས་གཞན་དག་ཏུ་མཐོང་མི་འགྱུར། །འདི་དག་གཅིག་ལ་གཅིག་གིས་འགལ་སྣང་ཕྱིར། །རྟག་ཏུ་འཕྲུལ་པའི་
ཤེས་པ་དག་དང་མཚུངས། །ཐོག་མཐའ་ལ་སོགས་བྱེ་བྲག་སྣང་བས་ན། །གཟུགས་ལ་སོགས་པ་འདི་དག་གཅིག་མ་ཡིན། །རྡུལ་ཕྲན་རྣམས་ཀྱང་སྣང་བ་མ་ཡིན་པས། །དུ་མའི་གཟུགས་སུ་མིན་པའང་དེ་དང་འདྲ། །རྡུལ་ཕྲན་
ཆ་ཤས་མེད་པ་ཉིད་ཀྱང་ནི། །ཕྲ་རབ་དུ་མ་འདུས་པར་མ་གྲུབ་པས། །དབང་ཆེན་དཀྱིལ་འཁོར་ལ་སོགས་པ་ཡི་གཟུགས། །བསགས་པ་འགའ་ཡང་འདིར་ནི་མེད་པར་འགྱུར། །དེ་བས་འཛིན་པ་པོ་ལ་སོགས་བྲལ་བས། །རང་རྒྱུད་ལ་
སོགས་བཏགས་པའི་ངོ་བོ་ཉིད། །བརྟན་དང་གཡོ་བའི་དངོས་རྣམས་མ་ལུས་གང་། །དྲི་ཟའི་གྲོང་ཁྱེར་དག་དང་མཚུངས་པ་ཡིན། །བདག་དང་བདག་གི་རྣམ་རྟོག་རྒྱུན་གྱིས་ནི། །ངོ་བོ་དག་གིས་དེ་ནི་འཁོར་བ་སྟེ། །དག་པ་ཕྱིན་ཅི་ལོག་
དང་བྲལ་བ་ཡི། །ངོ་བོ་ཙམ་ནི་རྣམ་པར་བརྟགས་གྱུར་པ། །སྲིད་དང་ཞི་བ་ཡི་ནི་མཚན་ཉིད་འདིར། །ཆོས་ཉིད་ཀྱིས་ནི་དབྱེ་བ་གང་ཡང་མེད། །གང་ཕྱིར་གཟུང་བ་ལ་སོགས་རྣམ་པ་དང་། །བྲལ་བར་ཐམས་ཅད་དུ་ནི་རྟག་ཏུ་བསྒྲུབ། །
སོ་སོར་སྣང་བ་རང་བཞིན་ཀུན་རྟོག་ལས། །ཐམས་ཅད་ཀྱང་ནི་ཅི་ཡང་ཡོད་མ་ཡིན། །ཆོས་རྣམས་སེམས་ལས་གཞན་པ་ཡོད་མིན་པས། །བདག་དང་བདག་གིར་བཏགས་པ་མ་གྲུབ་པས། །གང་ཞིག་གཟུགས་ལས་སོ་

89-1-182a

སོར་ཞུགས་གྱུར་པ། །དེ་ཡི་བདག་ཉིད་གང་ཡིན་དེ་ཉིད་གཟུགས། །དེ་བས་ཐམས་ཅད་ཁྱད་པར་མེད་པའི་བློས། །དངོས་པོ་ཐམས་ཅད་ཁྱད་པར་མེད་པར་བརྟག །སྣང་བར་གྱུར་པའི་ཡུལ་རྣམས་གང་ཡིན་དང་། །
གང་ཞིག་རྟོག་པའི་གནས་སུ་གྱུར་པ་རྣམས། །དེ་དེ་གཉིས་སུ་སྦྱོར་དང་བྲལ་བས་ན། །དེས་ན་རྣམ་པར་དབྱེ་བ་དུ་མས་མིན། །བཅོམ་ལྡན་འདས་རྡོ་རྗེ་འཛིན་པས་དབྱངས་ཀྱི་བརྗོད་པ་རྣམ་པར་དག་པ་རྡོ་རྗེའི་ཚུལ་ལས་འབྱུང་
བའི་གནས་འདི་ཡང་གསུངས་སོ། །དང་པོ་ཨ་ནས་བརྩམས་ནས་ཨཿཡི་མཐར། །བཅུ་གཉིས་དབྱངས་ནི་གསུང་རབ་ཡན་ལག་གྱུར། །ཨ་གང་མདོ་ཙམ་གྱི་ནི་སྤྱི་ཡི་དོན། །རྣམ་པར་བསྡུས་ནས་སྟོན་པ་མདོ་ཡི་སྡེ། །
ཨཱ་ཆོས་རྣམས་ཐམས་ཅད་སྤྱི་དང་བྱེ་བྲག་གི། །རྣམ་པ་ཡི་གེ་ཐ་སྙད་གསལ་བར་གྱུར། །དེ་ནི་ཚིགས་སུ་བཅད་པར་རྗོད་བྱེད་པ། །རྒྱས་པར་དབྱེ་བ་དབྱངས་ཀྱིས་བསྙད་པའི་སྡེ། །ཨི་ཆོས་རྣམས་རྒྱུ་རྐྱེན་འབྲས་བུ་དངོས་
པོ་རྣམས། །ཕྱིན་ཅི་མ་ལོག་ཡང་དག་སྟོན་བྱེད་པ། །མ་འོངས་པ་ན་འདི་ལས་འདི་འབྱུང་བ། །ཐམས་ཅད་སྟོན་པ་ལུང་དུ་སྟོན་པའི་སྡེ། །ཨཱི་རྩ་ཡན་ལག་འབྲེལ་བར་བཅས་པའི་ཚིག །ཚིགས་སུ་བཅད་པར་སྟོན་པ་
འདི་ཡང་སྡེ། །ཨུ་ཞུ་བ་པོ་དང་གནས་དང་དུས་དག་གི། །ཡི་རངས་དགའ་བས་རྒྱས་པས་ཆེད་བརྗོད་སྡེ། །ཨཱུ་ད་ལྟར་གནས་དང་མ་འོངས་འབྱུང་བ་དང་། །རང་བཞིན་བཅས་པ་སྟོན་པ་གླེང་གཞིའི་སྡེ། །ཨེ་བདག་དང་གདུལ་
བྱ་གཞན་དང་གཞན་དག་གིས། །སྐྱེ་བ་སྔོན་དང་ཚེ་རབས་ཐམས་ཅད་དུ། །གནས་དང་གནས་ཀྱི་གཏན་ཚིགས་སྤྱོད་པ་ཡི། །འདི་ལྟར་འབྱུང་བའི་སྡེ་ཞེས་བསྟན་པའོ། །ཨཻ་བྱང་ཆུབ་སེམས་དཔའི་སྤྱོད་པ་སྣ་ཚོགས་ལས་
ཀུན་དུ་དོན་སྤྱོད་བཞིས་བསྡུས་སྐྱེས་རབས་ཏེ། །ཨོ་ལམ་དང་འབྲས་བུ་ཟབ་དང་རྒྱ་ཆེ་ལས། །མ་རྒྱས་སྤྲོས་པ་ཤིན་དུ་རྒྱས་པའི་སྡེ། །ཨཽ་སངས་རྒྱས་རྣམས་དང་བྱང་ཆུབ་སེམས་དཔའ་དང་། །འཕགས་པ་རྣམས་ཀྱི་ཁྱད་

89-1-182b

པར་གྱུར་པ་ཡི། །ལྟ་སྤྱོད་ཆོས་ཀྱིས་འདུལ་བ་ལམ་སྟོན་པ། །རྨད་དུ་བྱུང་བའི་སྡེ་ཞེས་བསྟན་པ་ཡིན། །ཨྃ་ཆོས་ཀྱི་གནས་ལུགས་གཉིས་སུ་མེད་པ་ཉིད། །ངེས་པར་འབྱེད་པ་གཏན་ལ་ཕབ་པའི་སྡེ། །ཨཿགསང་བའི་སྤྱོད་
ཡུལ་ཕ་རོལ་ཕྱིན་པ་ཡི། །བདེན་གཉིས་དབྱེར་མེད་སྟོན་པ་མཆོག་གི་སྡེ། །བདེ་བར་གཤེགས་པ་ཐམས་ཅད་ཀྱི་གསུང་རབ་ཡན་ལག་བཅུ་གཉིས་རྣམ་པར་དག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཀ་ལ་ཀུཊ་ཏ ཀ་ཞེས་པ་
ནི་འབྱུང་བའི་སྒོ་ཡིན་ཏེ། །ལ་ཞེས་བྱ་བ་གང་ཡང་བླང་དོར་གཉིས། །ཀུ་ནི་གདུག་པ་ཅན་གང་ཕྱོགས་གནས་པ། །ཊ་ཏ་ཞེས་གནོད་རབ་ཏུ་ཞི་བར་བྱེད། །ཕྱོགས་བཅུ་ཀུན་དུ་ཡང་དག་པ་དང་ནི། །ཡང་དག་མ་ཡིན་འཇིག་རྟེན་
འཇིག་རྟེན་འདས། །དངོས་པོར་འཛིན་པའི་གདོན་ནི་ཕྱི་ནང་གང་། །གནས་པ་འདི་ནི་ས་གསུམ་ཀུན་དུ་སྤྱོད། །གསང་བར་བྱ་བ་ཕྱོགས་བཅས་ཕྱོགས་མེད་པ། །ཁྲོ་རྒྱལ་ཡུམ་བཅས་རོལ་པས་རབ་ཏུ་འཇོམས། །དངོས་པོར་འཛིན་
པའི་གདོན་བཅུ་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །གསང་བའི་ཚུལ་ནི་སྤྱི་དང་ཁྱད་པར་ཏེ། །མཆོག་ཏུ་གསང་བ་ཆེན་པོའི་ཚུལ་གྱིས་ནི། །མངོན་པར་བྱང་ཆུབ་ལྔས་གྲུབ་དང་པོ་སྟེ། །ཐབས་དང་ཤེས་
རབ་གཅིག་བསྡུས་གླེང་གཞིར་བརྗོད། །རིག་པའི་དབང་དང་དཀྱིལ་འཁོར་ངེས་བྱས་པ། །འབྲས་བུ་ཉེ་འགྲུས་སྤྱོད་པའི་ཚུལ་བསྟན་པའོ། །མི་རུ་འཁྲུངས་པ་དང་པོའི་ཚུལ་ངེས་སྡེ། །རབ་ཏུ་བྱུང་བ་ངེས་པ་གཉིས་པའི་ཚུལ། །
འདུལ་བའི་སྡོམ་པ་ངེས་པ་གསུམ་བརྗོད་པས། །ཟབ་མོའི་ཏིང་འཛིན་བསྟན་པ་ཚུལ་བཞི་པ། །ཕྱི་ནང་གསང་བའི་སྤྱོད་པ་ཐུབ་པ་ཡི། །དེ་ཉིད་བླ་ན་མེད་པ་བསྟན་པ་ཡིན། །ཁ་སྦྱོར་ལས་བྱུང་གཟུགས་ནི་དེ་སོང་ཡིད་བསྒོམས་
ན། །གསོ་བར་དཀའ་བའི་ནད་ཚོགས་ཐམས་ཅད་འཕྲོག་བྱེད་ཅིང་། །འོ་མའི་རྒྱུན་ནི་བབ་པས་ཐུགས་ནི་མཉེས་མཛད་པའི། །འཆི་བའི་དུས་ལ་བབ་པ་དྲག་པོ་ཀུན་ཀྱང་རབ་ཏུ་འཇོམས། །འཆི་བདག་འཇོམས་པར་བྱེད་པ་

89-1-183a

རྡོ་རྗེ་ཞེས་བྱ་བའི་ཏིང་ངེ་འཛིན་ལ་གནས་པར་གྱུར་ཏོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་པོ་རྡོ་རྗེ་འཛིན་པ་དཀྱིལ་འཁོར་ཆེན་པོ་རབ་ཏུ་སྡུད་པ་དང་སྤྲོ་བའི་
ཚུལ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་རྡོ་རྗེ་མཚུངས་པ་མེད་པ། བརྟག་ཏུ་མེད་པ། བལྟར་མེད་པ། དཔྱད་དུ་མེད་པ། ལྡན་པ་མེད་པ། མི་ལྡན་པ་མེད་པ། སྣང་བ་མེད་པ། དཔེ་མེད་པའི་རང་བཞིན་
ལ་ཡོངས་སུ་གནས་སོ། །དེ་ནས་དེ་བཞིན་གཤེགས་པ་ཐམས་ཅད་འདི་སྐད་ཅེས་གསུངས་སོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་འདི་ལྟ་སྟེ། ལུས་དང་། ངག་དང་། སེམས་དང་། ཆོས་ཐམས་ཅད་
དང་། རྡོ་རྗེའི་གནས་ཀྱི་དམ་ཚིག་ནི་ཐམས་ཅད་ཀྱི་རྗེས་སུ་སོང་བ་ངོ་བོ་ཉིད་གཅིག་པའི་ཕྱིར་འདི་ལྟ་སྟེ་སེམས་ཀྱི་ངོ་བོ་ཉིད་དོ། །ལུས་དང་ངག་དང་སེམས་ཀྱི་ཁམས་གང་ཡིན་པ་དང་། ནམ་མཁའི་ཁམས་དེ་དག་ཀྱང་
གཉིས་སུ་མེད་དེ་གཉིས་སུ་བྱར་མེད་སོ་སོ་མ་ཡིན་ཐ་མི་དད་དེ། དབྱེར་མི་ཕྱེད་པ་རྡོ་རྗེའི་གནས་ཡིན་པའི་ཕྱིར་རོ། །འདིར་ནི་ཡང་དག་བསྡུས་པར་གྱུར་པ་ཡི། །རིགས་ཀྱི་དཀྱིལ་འཁོར་བླ་མེད་བསྟན་པ་ཡི། །སྙིང་པོ་ཡོངས་
སུ་བསྡུས་པ་རྡོ་རྗེ་འཆང་། །དེ་ཉིད་དཀྱིལ་འཁོར་ཚུལ་ནི་བསྟན་པ་ཡིན། །དལ་འབྱོར་འདི་ནི་ཤིན་ཏུ་གཡོ་འགྱུར་ཞིང་། །འཇིག་རྟེན་སྐྱེ་བོ་དམ་པ་ཕྲད་རྙེད་དཀའ། །དེ་བས་ཐབས་དང་ཤེས་རབ་ལ་གཞོལ་བའི། །ཡིད་ལ་
བྱེད་པ་མཆོག་དེ་བསྒྲུབ་པར་བྱ། །དེ་ལ་ཐོག་མར་རེ་ཤིག་བསྟན་པ་ཡི། །སངས་རྒྱས་ཐེག་པ་བསམ་པ་རིག་འཇུག་སྟེ། །རྡོ་རྗེ་འཛིན་པ་སྙིང་རྗེའི་སྟོབས་ཀྱིས་ནི། །བྱང་ཆུབ་མཆོག་ཏུ་སེམས་ནི་བསྐྱེད་པ་དང་། །
གཏོང་བ་ལ་སོགས་ཡོན་ཏན་རྣམས་ཀྱིས་བརྒྱན། །ཟབ་མོའི་ཚུལ་དག་ལ་ནི་རབ་ཏུ་མོས། །དཔལ་ལྡན་འདུས་པར་དཀྱིལ་འཁོར་ཆེན་པོ་ནི། །རང་ཉིད་དབང་བསྐུར་ཕུན་སུམ་ཚོགས་ལྡན་པའི། །ཆོ་ག་རིམ་བཞིན་རྗེས་

89-1-183b

གནང་ཐོབ་པ་ཡི། །བློ་དང་ལྡན་པས་གསང་སྔགས་བསྙེན་པར་བྱ། །ལ་ལར་དྲི་མེད་ཆུ་ནི་ཕུན་ཚོགས་ཤིང་། །འབྲས་ལྡན་ལྗོན་ཤིང་མཛེས་པས་རྣམ་བརྒྱན་པའི། །རི་བོའི་ཚང་ཚིང་གནས་སུ་བཅོམ་ལྡན་འདས། །
དཔལ་ལྡན་རྡོ་རྗེ་འཛིན་པ་བསྒྲུབ་པར་བྱོས། །དང་པོར་ཐོ་རངས་སྙིང་གར་ཟླ་དབུས་སུ། །འོད་ཟེར་རབ་འཕྲོ་དྲི་མེད་ཡི་གེ་ཧཱུྂ། །དཔལ་མཆོག་དེ་ཉིད་རྣམ་དགོད་བརྩེར་ལྡན་པའི། །ཁ་གདོང་ལ་སོགས་ཤིན་དུ་དག་པར་བྱ། །
ཙན་དན་དྲི་ཞིམ་བྱུག་པས་ལེགས་བྱུགས་ཤིང་། །བཟང་པོའི་མེ་ཏོག་སིལ་མ་གཏོར་ནས་ཀྱང་། །སྟོང་ཉིད་ཡེ་ཤེས་མཆོག་གི་ས་ཡི་ཆར། །རིམ་གྱིས་བསྐྱེད་པ་རྫོགས་ཚུལ་ལྡང་བ་ནི། །དེ་འོག་ཧཱུྂ་ཡྃ་རྃ་བྃ་ལྃ་བཅས་ཧཱུྂ། །
རྡོ་རྗེའི་ས་གཞི་དཀྱིལ་འཁོར་ཁ་དོག་དང་། །དབྱིབས་དང་མཚན་མའི་བྱེ་བྲག་འབྱུང་བ་ནི། །ཤིན་ཏུ་གསལ་ཞིང་དག་པར་རྣམ་པར་བསམ། །ཀུན་བཟང་ལས་བྱུང་བསམ་པར་བྱ་བ་ནི། །སྟོན་ཀའི་ཟླ་བ་ལྟ་བུར་རབ་དཀར་བ། །
མཐའ་ཡས་ཕྱོགས་གནས་སྣ་ཚོགས་འོད་དང་ལྡན། །གྲུ་གསུམ་གྱེན་དུ་གནས་པའི་ངོ་བོ་ནི། །ནམ་མཁའ་རང་གི་ངོ་བོ་རང་རིག་པ། །ཆོས་ཀྱི་འབྱུང་གནས་བྷ་གའི་པད་མ་ཉིད། །དེ་ཡི་དབུས་སུ་རིག་འཛིན་དབང་པོ་
དང་། །བྱིན་ཟ་གཞོན་ནུ་བདག་མོའི་རང་བཞིན་ཅན། །སོ་སོའི་བྱེ་བྲག་གཞི་ཡི་ཁྱད་པར་བསམ། །དེ་སྟེང་རི་ཡི་རྒྱལ་པོ་ལྷུན་གྲུབ་པ། །གྲུ་བཞི་ཟུར་ལྡན་མཛེས་པའི་བ་གམ་བཅས། །རིན་ཆེན་བཞིས་སྐྱེས་ཕྱོགས་ཀྱི་
འོད་ཀྱིས་ཁྱབ། །གཏེར་མཆོག་ཡོན་ཏན་རྒྱས་པའི་བདག་ཉིད་གནས། །དེ་སྟེང་པད་མ་སྣ་ཚོགས་རྡོ་རྗེས་མཛེས། །དེ་དབུས་ཧཱུྂ་ལས་བྱུང་བའི་འཁོར་ལོ་ནི། །རྩིབས་བཅུ་གསེར་གྱི་རང་བཞིན་མུ་ཁྱུད་ལྡན། །དེར་ནི་
བདག་ཉིད་དབུས་སུ་གནས་པ་ཡི། །དཔལ་ལྡན་ཞེ་སྡང་རྡོ་རྗེར་གནས་ནས་ནི། །དེ་ཡི་ཐུགས་ཀར་ཉི་མའི་དཀྱིལ་འཁོར་ལ། །གནས་པའི་ཡི་གེ་ཧཱུྂ་ལས་སྤྲོས་པ་ཡི། །རྂ་བཅུ་ལས་ནི་ཉི་མའི་དཀྱིལ་འཁོར་དང་། །

89-1-184a

དེ་སྟེང་ཧཱུྂ་བཅུ་རབ་འཕྲོས་ཁྲོ་བོ་བཅུ། །ཞལ་ཕྱིར་གཟིགས་ནས་ཕྱོགས་བཅུའི་གདོན་ལ་ཡང་། །གཙོ་བོའི་བཀའ་བསྒོའི་དོན་དུ་ཕུར་བུ་ཡིས། །ལུས་ངག་ཡིད་ལ་བརྡབས་དང་བརྡུངས་པར་གྱུར། །
འདི་ནི་བགེགས་ཀུན་འདའ་བར་མི་ནུས་པའི། །བསྲུང་བ་ཆེན་པོ་ཡོངས་སུ་བསྡུས་པ་ཡིན། །རྡོ་རྗེའི་ས་གཞིར་དྲ་བ་གུར་དང་ནི། །པད་མ་འཁོར་ལོ་རྡོ་རྗེའི་བླ་རེ་དང་། །ཕྱོགས་བཅུར་མེ་དོང་འབར་བ་རྒྱས་པ་ཡིན། །མེ་
འོད་འབར་བས་ཀུན་ནས་འཁྲིགས་པ་གང་། །རྡོ་རྗེ་ཕུར་བུ་བཅུ་ཕྲག་གསུམ་དག་གིས། །རྡོ་རྗེའི་ཐོ་བ་འབར་བས་བརྡུངས་པ་ཡིན། །འདི་ནི་བསྲུང་བའི་དཀྱིལ་འཁོར་ཚད་མེད་པ། །བར་ཆད་ལས་རྒྱལ་བདུད་རྣམས་
འཇོམས་པ་ཡིན། །སྐད་ཅིག་དེ་ལས་རང་ཉིད་མི་དམིགས་པར། །ཡོངས་སུ་བསྡུས་ཏེ་བྷྲུྃ་ལས་བྱུང་བ་ཡི། །རྣམ་པར་སྣང་མཛད་རྒྱལ་བའི་སྐུ་ལྟ་བུ། །ཐུབ་དབང་འོད་ཀྱི་དཀྱིལ་འཁོར་སྣ་ཚོགས་པའི། །ཟེར་གྱིས་ཕྱོགས་
མཚམས་མ་ལུས་ཀུན་དུ་ཁྱབ། །མི་མཉམ་བདག་མེད་དེ་ཕྱིར་ཟུར་བཞི་མཉམ། །དྲན་དང་དབང་པོ་མཆོག་བཞི་སྒོ་རྣམས་ཡིན། །བསམ་གཏན་བཞི་པོ་དག་ནི་རྟ་བབས་དང་། །ཏིང་འཛིན་ཁ་ཁྱེར་གྱིས་ནི་ཀུན་ནས་
བསྐོར། །ཁ་ཁྱེར་མདའ་ཡབ་རྟེན་པའི་མཆོད་པའི་རྟེན། །དམ་པ་འཛིན་པ་གཟུངས་ཀྱི་ཚོགས་རྣམས་ཡིན། །སྣ་ཚོགས་རྒྱན་རྣམས་ཀུན་གྱིས་རྣམ་སྤྲས་པ། །གང་ཕྱིར་འགྲོ་བའི་བསམ་པ་ཀུན་རྫོགས་པའི། །
རླུང་གིས་བསྐྱོད་པའི་བ་དན་ཕྲེང་བ་དང་། །དྲིལ་བུ་སྒྲ་སྒྲོགས་ཕྱོགས་བཅུ་ཀུན་ཁྱབ་པ། །གང་ཕྱིར་དམ་ཆོས་གསུང་རབ་ཡན་ལག་དགུ། །གདུལ་བྱ་ཐམས་ཅད་ལ་ནི་བསྐྱོད་པའོ། །རླུང་གིས་བསྐྱོད་པའི་བ་དན་ཕྲེང་
བ་དང་། །མེ་ལོང་དྲ་བ་དྲ་ཕྱེད་མེ་ཏོག་གི། །ཕྲེང་བ་སྣ་ཚོགས་ཀྱིས་བརྒྱན་མཉམ་པ་མེད། །ཡེ་ཤེས་མེ་ལོང་དྲི་མེད་བྱང་ཆུབ་ཀྱི། །ཡན་ལག་དྲི་ནི་མེ་ཏོག་ཕུན་སུམ་ཚོགས། །ཀ་བ་བཟང་པོ་བརྒྱད་ཀྱིས་ཉེར་མཛེས་

89-1-184b

པ། །རྣམ་ཐར་བརྒྱད་པོ་རྣམ་པར་དག་པ་ཡིན། །རྡོ་རྗེའི་གདུང་དང་ཡང་དག་ལྡན་པ་ནི། །རི་མིག་ཕོ་བྲང་དབུས་ཀྱི་མཚན་ཉིད་དེ། །རྡོ་རྗེ་འདོད་ཡོན་སྣམ་བུས་ཡོངས་འཁོར་བ། །གྲུ་ཆད་རིམ་གཉིས་ལྷ་སྣམ་ནང་སྐོར་ཡངས། །པཉ་ཙ་
རེ་ག་ཡེ་ཤེས་ལྔ་ལྡན་པའི། །རྡོ་རྗེའི་རྩིག་པ་མ་འདྲེས་གསལ་བ་ལས། །ཕྱི་ནང་མེད་པར་ཤེལ་སྒོང་དངས་པ་ལྟར། །དག་ཅིང་དྲི་མེད་ཡེ་ཤེས་ཕོ་བྲང་སྟེ། །རིན་ཆེན་ཕ་གུ་སྣ་ཚོགས་འཕྲས་སྤྲས་ཤིང་། །དྲ་བ་དྲ་བ་ཕྱེད་པའི་
དོ་ཤལ་ཅན། །རྟ་བབ་ཆོས་ཀྱི་འཁོར་ལོ་རི་དགས་བཅས། །བྱམས་སོགས་ཚད་མེད་གདུགས་ཀྱིས་ཁྱབ་པ་ཡི། །རྩེ་མོ་རིན་ཆེན་བུམ་པས་བསྡུས་པ་ཉིད། །ཐེག་མཆོག་གཅིག་ཏུ་ངེས་པར་བསྡུས་པ་སྟེ། །ཚད་མེད་
མུ་ཏིག་རྡོ་རྗེའི་ར་བ་དང་། །མེ་འོད་ཕྲེང་བ་འཁྲིགས་པའི་རང་བཞིན་ཅན། །ཆུ་སྐྱེས་གེ་སར་དུ་མའི་རྣམ་པ་ཅན། །རིགས་ཀྱི་ཡེ་ཤེས་བླ་མེད་བརྒྱན་པ་ཡི། །རྡོ་རྗེ་ཐེག་ཆོས་འཁོར་ལོ་རབ་བསྐོར་བའོ། །བླ་མེད་མཐའ་ཡས་
འདོད་ཡོན་རིག་མ་ཡི། །ལྷ་མོ་བཅུ་དྲུག་དག་གིས་ཡོངས་སུ་བསྐོར། །སྟོང་ཉིད་ཤེས་རབ་རང་བཞིན་ངོ་བོ་ཡིས། །གཟུགས་སོགས་ཡུལ་རྣམས་རྣམ་དག་ཕ་རོལ་ཕྱིན། །རྗེས་སུ་དྲན་པས་མཆོད་པས་ཉེར་བརྒྱན་པ། །ཆོས་དབྱིངས་
རྣམ་པར་དག་པའི་རྒྱུ་འཐུན་ཡིན། །སྣ་ཚོགས་པད་མའི་ཟེའུ་འབྲུར་ལེགས་གནས་པའི། །ཉི་ཟླའི་མགོན་བཅས་ལྷ་ཡི་གནས་རྣམས་དང་། །རིན་ཆེན་མ་ལུས་པ་ཡིས་རྣམ་སྤྲས་པའི། །གཞལ་ཡས་ཁང་པ་དེ་ལྟར་
བསམ་པར་བྱ། །དེ་ཡི་དབུས་སུ་རྡོ་རྗེ་འཛིན་པ་ནི། །དཀྱིལ་འཁོར་ལྷ་ཚོགས་འབྱུང་བ་ཐམས་ཅད་ཀྱང་། །སྐད་ཅིག་གཅིག་ལས་སྐྱེས་པའི་བདག་ཉིད་དེ། །དཔལ་ལྡན་གསང་བའི་རྒྱལ་པོ་རྡོ་རྗེ་འཛིན། །རང་འོད་བཅས་
པའི་རིག་མས་འཁྱུད་པ་ནི། །ཞལ་གསུམ་ཕྱག་དྲུག་དུང་དང་ཀུན་ད་ལྟར། །རིན་ཆེན་དུ་མས་སྤྲས་པའི་སྐུ་མཆོག་ཅན། །རྣམ་པར་སྣང་མཛད་ཤར་དུ་རྣམ་པར་གནས། །དཀོན་མཆོག་དཔལ་ལྷོ་འོད་དཔག་ནུབ་དུ་གནས། །

89-1-185a

གདོན་མི་ཟ་བ་བྱང་གི་ཕྱོགས་སུའོ། །ཤར་ལྷོའི་གྲྭར་ནི་ལྷ་མོ་སྤྱན་མ་དང་། །ལྷོ་ནུབ་གྲྭར་ནི་མཱ་མ་ཀཱི་མཆོག་དང་། །ནུབ་བྱང་གྲྭར་ནི་ལྷ་མོ་གོས་དཀར་མོ། །བྱང་ཤར་གྲར་ནི་ལྷ་མོ་སྒྲོལ་མ་སྟེ། །ཤར་ལྷོར་གཟུགས་
དང་ལྷོ་ནུབ་སྒྲ་རྡོ་རྗེ། །ནུབ་བྱང་དུ་ནི་དྲི་ཡི་ལྷ་མོ་དང་། །བྱང་ཤར་མཚམས་སུ་རོ་ཡི་ལྷ་མོ་དག །མཁས་པས་རིམ་པ་བཞིན་དུ་བསམ་པར་བྱ། །བྱམས་པའི་མགོན་པོ་ས་ཡི་སྙིང་པོ་དག །ཤར་གྱི་སྣམ་བུ་དག་ལ་ལེགས་པར་
དགོད། །གསང་བ་འཛིན་དང་ནམ་མཁའི་སྙིང་པོ་ནི། །ལྷོ་ཡི་སྣམ་བུར་གནས་པའི་སེམས་དཔའོ། །འཇིག་རྟེན་དབང་ཕྱུག་དང་ནི་འཇམ་པའི་དབྱངས། །ནུབ་ཏུ་རྣལ་འབྱོར་མཁས་པས་བསམ་པར་བྱ། །སྒྲིབ་པ་ཐམས་ཅད་
རྣམ་པར་སེལ་བ་དང་། །ཀུན་དུ་བཟང་པོ་བྱང་གི་སྣམ་བུར་དགོད། །གཤིན་རྗེ་གཤེད་པོ་ཤར་སྒོར་གནས་པར་བྱ། །གཞན་གྱིས་མི་ཐུབ་ལྷོ་ཡི་སྒོ་དྲུང་གནས། །རྟ་མགྲིན་རྒྱལ་པོ་ནུབ་ཀྱི་སྒོ་དྲུང་དགོད། །བདུད་རྩི་འཁྱིལ་པ་བྱང་
སྒོར་འབྱུང་བ་སྟེ། །ཤར་ལྷོ་མཚམས་སུ་མི་གཡོ་མགོན་པོ་དང་། །འདོད་པའི་རྒྱལ་པོ་ལྷོ་ནུབ་གྲྭར་དགོད་ཅིང་། །བྱང་ཤར་དུ་ནི་དབྱུག་པ་སྔོན་པོ་ཅན། །སྟེང་ཕྱོགས་གཙུག་ཏོར་འཁོར་ལོས་བསྒྱུར་བ་སྟེ། །འོག་ཕྱོགས་གནོད་
མཛེས་རྒྱལ་པོ་རྣམ་པར་བསམ། །དེ་ལྟར་རྣམ་པར་བསམས་པའི་དཀྱིལ་འཁོར་ལ། །ཐམས་ཅད་ཞལ་གསུམ་ཕྱག་ནི་དྲུག་པ་སྟེ། །རྣམ་པ་མ་ལུས་གསལ་བའི་རྒྱན་དང་ལྡན། །རིན་ཆེན་འོད་འཕྲོ་ནོར་བུའི་སྙིང་པོར་
བཅས། །ཇི་བཞིན་བལྟས་ཏེ་དེ་ཡི་གཙོ་བོ་ཡི། །ཐུགས་ཀའི་ཟླ་གནས་མཆོག་གི་ས་བོན་ལས། །འོད་ཟེར་དུ་མའི་རྣམ་པ་རབ་སྤྲོས་པས། །ཕྱོགས་བཅུའི་སངས་རྒྱས་བླ་མར་བཅས་པ་དང་། །རིག་མ་ལྷ་མོའི་མཆོད་
པ་ཁྲོ་བོར་བཅས། །བྱང་ཆུབ་སེམས་དཔའི་ཚོགས་རྣམས་མ་ལུས་པ། །བར་སྣང་ཞིང་ཁམས་རབ་ཏུ་ཁེངས་གྱུར་ལ། །སྡིག་པ་བཤགས་སོགས་མཆོད་པ་རྒྱ་མཚོ་དབུལ། །སྐྱབས་སུ་འགྲོ་ཞིང་བཟོད་པར་

89-1-185b

གསོལ་ནས་ཀྱང་། །གཤེགས་སུ་གསོལ་བ་བསོད་ནམས་ཚོགས་རབ་བསགས། །དེ་ནས་ཕྱི་དང་ནང་གི་དངོས་པོ་རྣམས། །མ་ལུས་སྟོང་པ་ཉིད་དུ་ངས་བསམས་ཏེ། །ཐམས་ཅད་ཡེ་ཤེས་ཆོས་ཉིད་དག་པའི་ངང་། །བྲག་
ཆ་ལྟ་བུའི་སྒྱུ་མའི་སྒྲས་བརྗོད་དོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏ་མ་ཀོ྅ཧྃ། ཆོས་ཉིད་ནཱ་ད་ཙམ་དུ་བསྡུས་པའི་དངོས། །དེ་ཉིད་རྟོག་མེད་སེམས་ཀྱི་སྣང་བའི་ངང་། །གསང་སྔགས་དེ་ཉིད་སྐུར་ནི་ལྡང་བའི་ཕྱིར། །སྟོང་པ་
ཙམ་དུ་གནས་པ་ཆོས་ཉིད་ལས། །རང་བྱུང་རྟ་བདུན་རྒྱལ་པོ་རྣམ་པར་བསམ། །བཅུ་དྲུག་ཆ་དང་དེ་ཚོགས་ལས་བྱུང་བའི། །ཟླ་བའི་དཀྱིལ་འཁོར་དག་གི་དབུས་ཉིད་དུ། །འོད་ཟེར་དཔག་ཏུ་མེད་པའི་ཚོགས་ལྡན་པ། །དབུས་
མའི་གདན་ལ་ཡི་གེ་གསུམ་གྱི་ནི། །ཆོ་གས་པད་མ་ཉི་མའི་ལྡན་པ་དག །དཔལ་མཆོག་དང་པོའི་སྙིང་པོ་ལས་བྱུང་བའི། །རྡོ་རྗེ་འབར་བ་ནོར་བུའི་སྙིང་པོ་ལྟར། །རྒྱུ་དང་མི་རྒྱུའི་དངོས་པོ་མ་ལུས་པ། །དཔག་མེད་ཐུབ་
པའི་ཚོགས་རྣམས་འོད་འཕྲོ་བ། །ཕྱོགས་སྒོ་མཐའ་ཡས་ཁྱབ་པར་རབ་བསྒྲུབ་པ། །དེ་ཉིད་ཡེ་ཤེས་ངང་ལས་རང་བྱུང་བ། །ཤིན་དུ་རྣམ་པར་དག་པའི་ངང་དུ་བལྟ། །ཨོཾ་དྷརྨ་དྷཱ་ཏུ་སྭ་བྷཱ་བ་ཨཱཏ་མ་ཀོ྅ཧྃ། དེ་བཞིན་ཉིད་
ཀྱི་ཡེ་ཤེས་འབྱུང་བའོ། །དང་པོ་མགོན་པོའི་སྙིང་པོ་བསྒོམས་ནས་ནི། །ང་རྒྱལ་དེ་ལྡན་མཐའ་ཡས་སྤྲུལ་པ་ཡིས། །འགྲོ་བའི་མཆོག་དང་ཐུན་མོང་དོན་བྱས་ཤིང་། །ཡི་གེ་གསུམ་དང་གང་དུ་ཟླ་བར་བཅས། །དེ་ལས་
འོད་འཕྲོས་རྡོ་རྗེ་སྙིང་པོར་བཅས། །ཐུབ་མཆོག་ཕྲ་རབ་བསྒྲུབ་མཚུངས་མེད་པ་ཡི། །ཀུན་ད་ཟླ་བ་ལྟར་དཀར་མདངས་ལྡན་པའི། །བཅོམ་ལྡན་དང་པོའི་མགོན་པོ་ཞེས་བྱ་བ། །གཡས་དང་གཡོན་གྱི་ཞལ་ནི་སྔོ་དང་
དམར། །ཞལ་གསུམ་ཕྱག་དྲུག་མཛེས་པའི་རྒྱན་དང་ལྡན། །སྣ་ཚོགས་རིན་ཆེན་རྒྱན་ལྡན་ཕྱག་གཉིས་ཀྱིས། །རིག་མ་འཁྱུད་ཅིང་རྡོ་རྗེ་དྲིལ་བུ་འཛིན། །འཁོར་ལོ་བར་མ་ཐ་མ་པད་མ་ནི། །གཡས་པའི་ཕྱག་གིས་

89-1-186a

བསྣམས་པར་མཛད་པའོ། །ནོར་བུ་རིན་ཆེན་རལ་གྲི་འབར་བ་ནི། །གཡོན་པའི་ཕྱག་ན་བསྣམས་པ་ཟུང་གིས་མཛེས། །ཁམས་གསུམ་ཁོངས་ནི་རྣམ་པར་བརྒྱན་པ་ཡི། །ཐུབ་པའི་སྤྲིན་ཚོགས་དུ་མ་རྣམ་པར་འགྱེད། །
རྣམ་པར་ཐར་པའི་སྒོ་གསུམ་རྣམ་དག་པས། །ཐབས་དང་ཤེས་རབ་བདག་ཉིད་སྙིང་རྗེའི་མཆོག །མ་ལུས་འགྲོ་བའི་དེ་ཉིད་གཅིག་པུ་ཉིད། །རྒྱལ་བ་སྐྱེད་བྱེད་ཉིད་ཀྱི་སྐུ་རུ་བསམ། །མཆོག་ཏུ་རྗེས་ཆགས་དཔག་མེད་ཕུན་ཚོགས་
པས། །འདུལ་བའི་འཇིག་རྟེན་མ་ལུས་དམིགས་ནས་ནི། །དགའ་བའི་སྒྱུ་མའི་སྒྲས་ནི་དེ་དག་དང་། །རྒྱལ་བའི་ཚོགས་རྣམས་མ་ལུས་བཞུགས་པར་བྱ། །དེར་ནི་སྤྱན་ལ་སོགས་པའི་ལྷ་མོ་དང་། །གཟུགས་སོགས་མ་
ལུས་ཡུལ་གྱི་རང་བཞིན་དུ། །བྱུང་ནས་རིག་པ་དེ་དག་ཐམས་ཅད་ནི། །རང་གི་རིག་པའི་ནང་དུ་ཆུད་པར་བྱ། །དེ་ཡི་པད་མའི་ལྟེ་བའི་ནང་དུ་ནི། །རྣམ་སྣང་ལ་སོགས་རྒྱལ་བའི་ཚོགས་བཅུག་པས། །ཟླ་བ་ཞུ་བའི་གཟུགས་
སུ་གྱུར་པ་དང་། །དེས་ན་དེ་རྣམས་དེ་འོག་དབང་བསྐུར་བྱ། །ཕྱོགས་བཅུའི་སངས་རྒྱས་རིག་མ་སྲས་བཅས་དང་། །ལྷ་མོ་ཁྲོ་བོའི་བསྲུང་བར་བཅས་པ་དག །ཡི་གེ་གསུམ་གྱི་གཟུགས་སུ་ཐིམ་ནས་ནི། །དེ་ཉིད་ཆ་དང་
བཅས་པ་ཧོ་དང་ཧ། །ནཱ་དར་བཅས་པ་འདྲེས་པ་སེམས་ཀྱི་སྐུ། །སྙིང་གའི་ཆུ་སྐྱེས་ལ་ནི་གནས་པར་བྱ། །གང་དུ་རིག་མ་བདག་ཉིད་བཅས་པ་ཡི། །ལུས་ལ་དཀྱིལ་འཁོར་རིམ་པ་འདིར་དབྱེ་བྱ། །གཤིན་རྗེ་གཤེད་དང་
གཞན་གྱིས་མི་ཐུབ་དང་། །རྟ་མགྲིན་རྒྱལ་པོ་བདུད་རྩི་འཁྱིལ་པར་བཅས། །མི་གཡོ་འདོད་རྒྱལ་དབྱུག་པ་སྔོན་པོ་ཅན། །སྟོབས་པོ་ཆེ་དག་ཕྱོགས་མཚམས་ཁྲོ་བོ་རྣམས། །གནོད་མཛེས་གཙུག་ཏོར་འཁོར་
ལོས་སྒྱུར་བའི་བར། །རིམ་བཞིན་ཛཿཧཱུྃ་བྃ་ཧོཿཧཱུྃ་དྲུག་བཅས། །ལག་གཡས་མགུལ་པ་དེ་བཞིན་གཡོན་པའི་མགུལ། །ཁ་དང་གསང་གནས་མཐའ་དང་བཅས་པ་དང་། །དཔུང་གཡས་ཚིགས་པ་གཡོན་བཅས་དེ་དག་

89-1-186b

དང་། །པུས་མོ་གཡས་དང་གཡོན་དང་རྐང་པའི་མཐིལ། །སྤྱི་གཙུག་དག་ཏུ་ངེས་པར་དགོད་པར་བྱ། །བྱམས་པ་དང་ནི་ས་ཡི་སྙིང་པོ་དང་། །ཕྱག་ན་རྡོ་རྗེ་ནམ་མཁའི་སྙིང་པོ་དང་། །འཇམ་པའི་དབྱངས་དང་སྤྱན་རས་གཟིགས་
དབང་སྟེ། །སྒྲིབ་པ་རྣམ་སེལ་ཀུན་དུ་བཟང་པོ་དག །རིམ་པས་མཻ་ཐཱི་ཧཱུྃ་དང་ཨ་དང་ནི། །ཨ་དང་ཧྲཱིཿདང་ཨཱྃ་དང་སྂ་རྣམས་ནི། །རྩ་རྣམས་ལྟེ་བ་དང་ནི་མིག་དག་དང་། །རྣ་བ་དང་ནི་སྣ་དང་ལྕེ་དང་རྣམ་ཤེས་རྟེན། །མཚན་མ་
དང་ནི་ཚིག་ལ་ཁྱབ་པར་གནས། །རབ་ཏུ་བསམ་པ་ཡི་གེ་རྣམ་དག་བསྟན། །ལྃ་མྃ་པྃ་ཏྃ་ལྷ་མོ་རིམ་བཞིན་དུ། །སྤྱན་དང་མཱ་མ་ཀཱི་དང་གོས་དཀར་མོ། །སྒྲོལ་མ་རྣམས་ནི་ཁམས་བཞིའི་ངོ་བོར་བརྟག །ཨོཾ་ཨཱཿ
ཧཱུྃ་དང་སྭཱ་ཧཱ་རིམ་བཞིན་དུ། །སྤྱི་བོ་མགྲིན་པ་སྙིང་ག་ལྟེ་བ་དང་། །གསང་གནས་རྣམ་ལ་རིགས་ཀྱི་སངས་རྒྱས་ལྔ། །ཕུང་པོ་ལྔ་ཡི་ངོ་བོ་དག་པར་བཞུགས། །དེ་ལྟར་ཕྲ་བའི་སྒོ་ནས་ཡོངས་རྫོགས་པའི། །ལྷ་
ཡི་འཁོར་ལོ་ལུས་ལ་བསྐྱེད་པ་ཡིན། །རང་ཉིད་བཅོམ་ལྡན་སྐུ་ཡི་བ་སྤུ་ལས། །འོད་འཕྲོས་རྩེ་མོ་ལས་ནི་རང་བྱུང་བ། །སྤྱན་དང་མཱ་མ་ཀཱི་མཆོག་ན་བཟའ་དཀར། །རྒྱན་སྤྲས་རིག་མ་ཕྱོགས་སུ་རྣམ་པར་བསམ། །
ཨོཾ་ཨཱཿཧཱུྃ་ཞེས་བྱ་བའི་ཡི་གེ་ནི། །འདི་བཅས་ཧ་ཧོ་སྤེལ་བར་རིམ་པ་བཞིན། །པད་མའི་ནང་དུ་བཞུགས་པ་མཉམ་མེད་པ། །ཤེས་རབ་ཆགས་པས་ཞུ་བར་བྱས་པར་བསམ། །དེ་ཡི་མཐུ་ཡིས་དེ་དག་གཉིས་ཀ་
ཡང་། །ཟླ་བ་ཞུ་བར་གྱུར་པར་མཐོང་བ་དང་། །ལྷ་མོ་སྤྱན་ལ་སོགས་པ་དེ་དག་གིས། །གླུ་ཡི་སྒྲ་ཡིས་བསྐུལ་བར་གྱུར་པར་བསམ། །དེ་ལྟར་གླུ་ཡི་ང་རོ་གྱུར་པ་ན། །ཆོས་ཀུན་སྒྱུ་མ་ལྟ་བུར་ཡང་དག་རིག །སྣང་
བའི་འོད་ཟེར་གྱི་ནི་དཀྱིལ་འཁོར་ཅན། །གསང་སྔགས་རང་ཉིད་ལུས་སུ་ཡོངས་གྱུར་ནས། །དེ་ཡི་འོད་ཟེར་མ་ལུས་པ་རྣམས་ཀྱིས། །རང་ལྷ་དང་མཚུངས་སྤྲུལ་པའི་ཐུབ་དབང་པོ། །དཔག་ཏུ་མེད་པ་ཡིད་ཀྱིས་

89-1-187a

བསྡུས་པ་ལས། །དཔལ་ལྡན་འདུས་པའི་གཙོ་བོ་རྡོ་རྗེ་འཛིན། །ཞལ་གསུམ་ཕྱག་དྲུག་རྒྱལ་བའི་བདག་པོ་ནི། །ཨུད་པལ་སྔོན་པོ་མཐོན་མཐིང་མདོག་འདྲ་ལ། །གཡས་དཀར་གཡོན་དམར་ཀུན་ད་
བྱི་རུའི་མདོག །གཡས་གཡོན་དང་པོ་རྡོ་རྗེ་དྲིལ་བུ་འཛིན། །གཡས་གཉིས་འཁོར་ལོ་ནོར་བུ་འོད་ལྡན་དང་། །གཡོན་གཉིས་པད་མ་སྡོང་བུ་རལ་གྲི་བསྣམས། །རིན་ཆེན་དབུ་རྒྱན་རྣ་ཆ་གདུ་བུ་དང་། །དཔུང་རྒྱན་དོ་ཤལ་སྣ་
ཚོགས་རྒྱན་དང་ལྡན། །ཡིད་བཞིན་ནོར་བུ་གཙུག་ཏོར་དབུས་མཚན་པ། །ལྷ་ཡི་ན་བཟའ་སྟོད་གཡོགས་ཤམ་ཐབས་བཅས། །ཉི་ཟླ་པད་མའི་དབུས་སུ་གསལ་བར་བསམ། །མ་ལུས་འོད་ཀྱི་འོད་འཕྲོ་འབར་བ་དང་། །
ཐུབ་པའི་དབང་པོ་སྤྲོ་བས་རྣམ་བརྒྱན་ཅིང་། །སྐྱོབ་པ་ནམ་མཁའ་ཡོངས་ཁྱབ་ཞིང་ཁམས་ཡིན། །དངོས་རྣམས་ཐམས་ཅད་གཟུང་དང་འཛིན་པ་དང་། །བྲལ་བ་དངོས་པོ་མེད་པ་ཉིད་དུ་ཤེས། །རྣམ་བྱང་གཅིག་ཏུ་མངོན་
པར་ཞེན་པ་ནི། །མེད་པར་བྱིན་གྱིས་བརླབས་པ་འདི་ཉིད་བྱ། །ཨོཾ་དྷརྨ་དྷཱ་ཏུ་སྭ་བྷཱ་བ་ཨཱཏ་མ་ཀོ྅ཧྂ། དེ་འོག་རང་རིག་ས་བོན་འོད་རྣམས་ཀྱིས། །རང་གི་མིག་སོགས་གཏི་མུག་རྡོ་རྗེ་སོགས། །ཇི་བཞིན་བཀང་ནས་རང་སྙིང་དྲི་མེད་
ཟླ་བ་ཡི། །རྡོ་རྗེ་ལྟེ་བའི་དབུས་གནས་ཧཱུྂ་ཡིག་སྟེ། །ཐུགས་ཀྱི་རྡོ་རྗེ་དེ་བཞིན་མགྲིན་པ་དང་། །མགོ་བོར་གནས་པ་པད་མ་འཁོར་ལོ་ཡི། །ཨཱཿདང་ཨོཾ་ནི་གསུང་གི་རྡོ་རྗེ་དང་། །སྐུ་ཡི་རྡོ་རྗེ་ཉིད་དུ་བསམ་པར་བྱ། །དེ་ཡི་
ཐུགས་ཀའི་འོད་ཀྱི་ཚོགས་རྣམས་དང་། །ཤེས་རབ་དམ་པ་འདུས་པའི་འོད་རྣམས་ཀྱིས། །ཀུན་ནས་རྒྱལ་བའི་དབང་པོ་མཆོད་ནས་ནི། །ཐུགས་ཀྱི་རྡོ་རྗེ་ལ་སོགས་བྱིན་གྱིས་བརླབ། །ནམ་མཁའ་ལྟ་བུའི་ངོ་བོར་རྡོ་རྗེ་
གསུམ། །མཚན་ཉིད་དག་དང་བྲལ་བར་དམིགས་ནས་ནི། །ཕྱོགས་ཚོགས་ཀུན་ན་བཞུགས་པའི་ཐུབ་པའི་ཚོགས། །སྙིང་པོའི་འོད་ཟེར་རྣམས་ཀྱིས་ཡང་དག་བསྐུལ། །ཐུབ་པ་མཆོག་གི་འོད་ཟེར་ལས་བྱུང་བའི། །

89-1-187b

རིག་པའི་ཚོགས་རྣམས་བུམ་པ་ཕྱག་བསྣམས་ཏེ། །ཡེ་ཤེས་ཆུ་ཡིས་མངོན་པར་དབང་བསྐུར་བས། །རང་རིགས་གཙོ་བོས་ཅོད་པན་རྒྱས་བཏབ་གྱུར། །དེ་ལས་བདག་ཉིད་དམ་ཚིག་སེམས་དཔའ་ཡི། །ཐུགས་ཀར་ཟླ་
བར་གནས་པའི་ཡེ་ཤེས་སེམས། །རང་འདྲ་མཚུངས་པའི་རྡོ་རྗེ་སེམས་དཔའ་བསམ། །དེ་ཡི་ཐུགས་ཀར་གསལ་བའི་དཀྱིལ་འཁོར་ལ། །ཏིང་འཛིན་སེམས་དཔའ་རྡོ་རྗེ་ས་བོན་བཅས། །ཁྱད་པར་གསང་བ་དམ་པ་
དང་པོར་གནས། །དེ་བཞིན་རང་གི་ལྷ་འདྲ་རང་སྔགས་ཀྱིས། །སྤྲུལ་པའི་རིག་མ་ཉིད་ནི་ཡང་དག་བལྟ། །སྐྱེ་མཆེད་བྱིན་གྱིས་བརླབ་ཅིང་ཡི་གེ་གསུམ། །རྣམ་པར་དགོད་པ་ལུས་ནི་འོད་དང་ལྡན། །ལེགས་པར་བསླབས་
པའི་ཕྱག་རྒྱ་དེ་ཉིད་ཀྱི། །ལུས་ལ་ལྷ་ཡི་ས་བོན་བཀོད་ནས་ནི། །མཉམ་པར་བཞག་ནས་བྱིན་གྱིས་བརླབ་པ་ཉིད། །ཡང་དག་ཡེ་ཤེས་ཕྱག་རྒྱས་རྒྱས་བཏབ་ལྡན། །དེ་ཉིད་ཤེས་པས་སྤྱི་བོ་མགྲིན་པ་དང་། །སྙིང་གའི་
གནས་དང་ལྟེ་བ་གསང་བ་ལ། །ཨོཾ་ཨཱཿཧཱུྃ་དང་སྭཱ་ཧཱའི་ས་བོན་རྣམས། །སྐུ་གསུང་ཐུགས་དང་ཡོན་ཏན་ཕྲིན་ལས་ཚོགས། །ལྔ་པོ་རྣམས་ཀྱིས་ཤིན་དུ་བྱིན་བརླབས་ཏེ། །འོད་ཀྱི་ཕྲེང་བ་དམ་པས་འགྲོ་ཀུན་ཁྱབ། །
དེ་ཡི་འབྱུང་བ་དག་ལ་ལྷ་མོ་བཞི། །སྤྱན་མ་ལ་སོགས་རིམ་པས་ཡང་དག་དགོད། །དེ་ཡི་གཟུགས་དང་སྒྲ་དང་དྲི་དང་ནི། །རོ་དང་རེག་བྱ་རྡོ་རྗེའི་ངོ་བོ་ཉིད། །ཉེ་བའི་སྤྱན་སོགས་ལྷ་མོ་བཞི་དང་བཅས། །སེམས་
མ་བརྒྱད་ཀྱི་རྣམ་པར་ཡོངས་སུ་བསམ། །བདེ་བ་ཆེན་པོར་སྙོམས་པར་ཞུགས་པའོ། །རྡོ་རྗེ་རོ་ལངས་མ་དང་རྣམ་པར་རྒྱལ་བ་མ། །རྡོ་རྗེ་ཁྲོ་གཉེར་མ་དང་རལ་གཅིག་མ། །བདེ་བར་གཤེགས་ཡུམ་རྡོ་རྗེ་མ་
དང་ནི། །སྣ་ཚོགས་རིན་ཆེན་སྣ་ཚོགས་པད་མར་བཅས། །སྣ་ཚོགས་ལས་མ་ནམ་མཁའི་རྡོ་རྗེ་མ། །ས་འཛིན་རྡོ་རྗེ་མ་དང་བཅས་པ་ཡི། །རོལ་པའི་ཁྲོ་མོ་བདེ་བས་རྒྱས་པར་དགོད། །འདིར་ནི་གཉིས་སུ་

89-1-188a

མེད་པར་འདུས་བྱས་པ། །དགའ་བས་ཡོངས་སུ་རྒྱས་པའི་ཏིང་འཛིན་ཅན། །ཨོཾ་གྱིས་ཡེ་ཤེས་འོད་ཟེར་ལྡན་པར་གྱུར། །ཨཱཿཡིས་སྣ་ཚོགས་པད་མ་ལྟེ་བར་བཅས། །ཧཱུྂ་གི་རྡོ་རྗེ་ལས་བྱུང་དྲི་མེད་
པ། །ཡིད་ཚུལ་དམ་པའི་ཆུ་སྐྱེས་ལ་གནས་པའི། །ཤེས་རབ་དམ་པའི་རྒྱུ་འཐུན་ངོ་བོ་ཉིད། །ཐབས་དང་བཅས་པར་འབྱུང་བ་རང་གི་ལུས། །དེ་ཡི་བདེ་གཤེགས་རྗེས་སུ་མཉེས་བྱ་ཞེས། །སྔགས་ལ་དགའ་བ་ཀུན་དུ་
བརྩམ་པར་བྱ། །ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭ་བྷཱ་བ་ཨཱཏ་མ་ཀོ྅ཧྃ། ཐུགས་ཀར་ཟླ་བའི་དཀྱིལ་འཁོར་གནས་པ་ཡི། །ལྷ་དང་སྔགས་དང་བཅས་ལས་བྱུང་རྣམས་ཀྱིས། །མ་ལུས་སངས་རྒྱས་སོགས་རྣམས་བཅུག་
ནས་ནི། །རང་གི་སྙིང་པོ་ལས་བྱུང་མ་ལུས་པའི། །རང་གི་དཀྱིལ་འཁོར་ས་ཡི་གཟུགས་བསམ་ལ། །ཆོ་ག་འདི་ཡིས་སེམས་ནི་བརྟན་པོར་ལྡན། །འཇིག་རྟེན་རྣམས་ལ་ཕན་ཕྱིར་ཡང་དག་དབྱུང་། །ཡེ་ཤེས་བླ་མེད་དམ་པའི་
མཆོད་པ་བརྩམ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏ་མ་ཀོ྅ཧྃ། པད་མའི་གནས་སུ་རིན་ཆེན་དཀྱིལ་འཁོར་པའི། །རྣམ་པ་དུ་མ་རྫོགས་པའི་དཔལ་དང་ལྡན། །དེར་ནི་སོ་སོར་མངོན་པར་བྱང་ཆུབ་པའི། །ཡེ་ཤེས་ལས་བྱུང་
རྡོ་རྗེ་མི་བསྐྱོད་པ། །བྷ་གའི་གཞལ་ཡས་ལས་ནི་རང་བྱུང་བ། །རྣམ་པ་ཡོངས་སུ་རྫོགས་པར་དབྱུང་བར་བྱ། །བཛྲ་དྷྲཱིཀ་ཅེས་གསང་སྔགས་ལས་བྱུང་བ། །ཐུགས་ཀྱི་རྡོ་རྗེ་མགོན་པོ་ཐུབ་པ་ནི། །སྐྱེ་བོའི་དོན་མཛད་དམ་པ་ཡང་དག་
བསྐུལ། །མཐིང་ཤུན་གསལ་བ་ཡེ་ཤེས་རྒྱལ་པོའི་འོད། །ནོར་བུ་སྔོན་པོའི་འོད་འདྲར་ཡང་དག་འབར། །གཡས་དང་གཡོན་པའི་ཞལ་ནས་དཀར་དང་དམར། །དམ་པ་དང་པོ་ལྟ་བུའི་ཕྱག་དང་ལྡན། །དང་པོ་གཉིས་ཀྱིས་ཡུམ་
ལ་འཁྱུད་པ་དང་། །རྡོ་རྗེ་དྲིལ་བུ་འཛིན་པར་མཛད་པའོ། །བར་མ་གཉིས་ཀྱིས་འཁོར་ལོ་ནོར་བུ་དང་། །ཐ་མས་པད་མ་རལ་གྲི་ལེགས་བསྣམས་པའོ། །རིན་ཆེན་དུ་མའི་རྒྱན་རྣམས་ཡོངས་རྫོགས་པས། །ཚད་མེད་ནོར་བུ་

89-1-188b

སྣ་ཚོགས་ཀྱིས་སྤྲས་ཡིན། །དབུ་མའི་ལམ་ནས་གྱེན་དུ་བརྒྱུད་ནས་ནི། །ཐུགས་ཀ་ནས་ནི་བྱོན་ཏེ་ལེགས་བལྟམས་ནས། །ཕྱོགས་བཅུར་གཟིགས་ཤིང་འོད་ཟེར་གྲངས་མེད་ལས། །ཞིང་ཁམས་མཐའ་ཡས་ཁྱབ་པར་ལེགས་སྤྲོ་བའི། །
ཐུབ་པ་མཆོག་གིས་གདུལ་བྱའི་དོན་དུ་ནི། །སངས་རྒྱས་མཛད་པ་ཆོས་ཀྱི་འཁོར་ལོ་བསྐོར། །སེམས་ཅན་ཚོགས་རྣམས་མ་ལུས་གོ་འཕང་བཀོད། །ཞེ་སྡང་རྡོ་རྗེའི་སྐུ་མཆོག་ཐོབ་བྱས་ཏེ། །ཁ་དོག་དཔག་ཏུ་མེད་པའི་
འོད་ཚོགས་ལས། །བློ་དང་ལྡན་པས་ལེགས་བསྡུས་བདག་ཉིད་ལ། །དངོས་པོ་ཐམས་ཅད་ཀྱིས་ནི་ཞུགས་པར་བྱ། །སྐད་ཅིག་དེ་ལ་བདག་ཉིད་ཡོངས་བསྒྱུར་ཏེ། །སླར་ཡང་བཅོམ་ལྡན་ཞེ་སྡང་རྡོ་རྗེ་ནི། །རིན་ཆེན་ཨིན་དྲ་ནཱི་ལའི་
ཁ་དོག་ལྟར། །མཐིང་ནག་ཅུང་ཟད་ཁྲོས་པའི་བདག་ཉིད་ཅན། །རྡོ་རྗེ་སྐྱིལ་དཀྲུང་དག་གིས་ལེགས་བཞུགས་པའོ། །མི་འཇིགས་སེང་གེའི་ཁྲི་ལ་གནས་མཛད་ཡིན། །ཛི་ན་ཛིཀ་སྔགས་ལས་ནི་རང་བྱུང་བའི། །རྣམ་སྣང་མཛད་ཅེས་བྱ་
བ་སྐུ་རྡོ་རྗེ། །སྟོན་ཀའི་སྤྲིན་དཀར་དག་པ་ལྟ་བུའི་མདོག །ཞལ་གསུམ་ཕྱག་དྲུག་སྣ་ཚོགས་རྒྱན་གྱིས་མཛེས། །གཡས་མཐིང་གཡོན་དམར་རྩ་བ་སྐུ་དང་མཚུངས། །དང་པོ་གཉིས་ཀྱིས་འཁོར་ལོ་དྲིལ་བུ་འཛིན། །རིག་
མ་ཡེ་ཤེས་ལེགས་པར་འཁྱུད་པའོ། །བར་མ་གཉིས་ཀྱིས་རྡོ་རྗེ་རིན་ཆེན་དང་། །ཐ་མས་པད་དཀར་རལ་གྲི་ལེགས་བསྣམས་པའོ། །དེ་ཉིད་ཐུགས་ཀ་ནས་ནི་ཕྱུང་ནས་ནི། །མཛད་པ་སྤྱོད་དེ་གཏི་མུག་ཅན་སྦྱངས་ནས། །སྟོབས་
མཆོག་གླང་པོའི་གདན་ཁྲིའི་སྟེང་དུ་ནི། །ཤར་གྱི་པད་མ་ཟླ་བའི་དབུས་སུ་བསམ། །རཏ་ན་དྷྲཱིཀ་སྔགས་ལས་ནི་རང་བྱུང་བའི། །དཀོན་མཆོག་དཔལ་ཞེས་བྱ་བ་རིན་ཆེན་སྐུ། །འཛམ་བུའི་ཆུ་བོ་གསེར་གྱི་འོད་དང་མཚུངས། །ཞལ་
གསུམ་ཕྱག་དྲུག་ནོར་བུའི་ཚོགས་ཀྱིས་བརྒྱན། །གཡས་སྔོ་གཡོན་དཀར་གཞོན་ནུ་རིན་ཆེན་ཏོག །དང་པོའི་གཡས་གཡོན་ཕྱག་གིས་ལག་བསྣོལ་ཏེ། །ཡིད་བཞིན་ནོར་བུ་དྲིལ་བུ་ལེགས་པ་འཛིན། །བར་མས་འཁོར་

89-1-189a

ལོ་དང་ནི་རྡོ་རྗེ་དང་། །ཐ་མས་གསེར་གྱི་མེ་ཏོག་རལ་གྲི་འཆང་། །དེ་ཉིད་འོད་ཟེར་ཕུང་པོ་དང་བཅས་པ། །ཕྱུང་སྟེ་གཡས་ལོགས་ངོགས་སུ་བཏོན་ནས་ཀྱང་། །མཛད་པ་སྤྱོད་དེ་ང་རྒྱལ་ཅན་དོན་བྱས། །སླར་ལོག་རྫུ་འཕྲུལ་
རྟ་ཡི་ཁྲི་ལ་བཞུགས། །པད་མ་ཟླ་བའི་གདན་ལ་ལྷོར་གནས་པའོ། །ཨཱ་རོ་ལིཀ་སྔགས་ལས་ནི་རབ་བྱུང་བའི། །འོད་དཔག་མེད་པ་གསུང་གི་རྡོ་རྗེ་ནི། །པད་མ་རཱ་ག་ལྟ་བུའི་མདངས་དང་ལྡན། །ཞལ་གསུམ་པ་ལ་ཕྱག་
དྲུག་ངེས་བྱུང་བའི། །གཡས་ནག་གཡོན་དཀར་རྩ་བ་སྐུ་དང་མཚུངས། །དང་པོ་གཉིས་ཀྱིས་པད་མ་དྲིལ་བུ་དང་། །བར་པས་རྡོ་རྗེ་རིན་ཆེན་སྙེ་མ་ཅན། །ཐ་མས་འཁོར་ལོ་རལ་གྲི་འཛིན་མཛད་པ། །རིན་ཆེན་དུ་མས་སྤྲས་པའི་
བདག་ཉིད་ཆེ། །ཐུགས་ཀ་ནས་ཕྱུང་སྤྲོ་བསྡུས་འགྲོ་བའི་དོན། །འདོད་ཆགས་ཅན་གྱི་དོན་བྱས་སླར་འདུས་པས། །མཛེས་པ་རྨ་བྱའི་ཁྲི་ལ་ནུབ་ཕྱོགས་བཞུགས། པྲཛྙཱ་དྷྲིཀ་ཅེས་གསང་སྔགས་ལས་ཕྱུང་བ། །གདོན་མི་ཟ་
བ་ཕྲིན་ལས་རྡོ་རྗེ་ནི། །རིན་ཆེན་མརྒད་ལྗང་གུའི་མདོག་འཆང་བ། །ཞལ་གསུམ་ཕྱག་དྲུག་སྣ་ཚོགས་ནོར་བུས་སྤྲས། །གཡས་དཀར་གཡོན་མཐིང་རྩ་བ་སྐུ་དང་མཚུངས། །དང་པོ་གཉིས་ཀྱིས་རལ་གྲི་དྲིལ་བུ་བསྣོལ། །བར་པས་སྣ་ཚོགས་རྡོ་རྗེ་པད་མ་སྔོ། །
ཐ་མས་འཁོར་ལོ་ནོར་བུ་འོད་འཕྲོ་བསྣམས། །དེ་ཉིད་ཐུགས་ཀ་ནས་ནི་ལེགས་བྱོན་ནས། །མཛད་པ་སྤྱད་དེ་ཕྲག་དོན་ཅན་དོན་བྱས། །འདབ་བཟངས་མཁའ་ལྡིང་ཁྲི་ལ་ལེགས་བཞུགས་པ། །བྱང་ཕྱོགས་པད་མ་ཉི་མའི་དབུས་བཞུགས་པའོ། །འདི་དག་དབུས་དང་ཕྱོགས་
བཞིའི་ལེའུ་ཙི་ཡི། །རྣམ་པ་དག་ལ་ལེགས་པར་རབ་བཞུགས་པའོ། །དེ་དག་མཚམས་ཀྱི་གྲྭ་བཞིར་འབྱུང་བ་ནི། །རིགས་ཀྱི་ལྷ་མོ་བཞི་ནི་ལེགས་གནས་པའོ། །རལ་པའི་ཅོད་པན་མཛེས་དང་སྣ་ཚོགས་པའི། །རིན་ཆེན་མཆོག་གི་འོད་ཟེར་འབར་བས་བརྒྱན། །རིག་པའི་མགོན་པོ་དང་
བཅས་འབྱུང་བའི་སྐུ། །ཐམས་ཅད་པད་མ་ཉི་ཟླ་དག་གནས་བསམ། །མ་ཧཱ་ར་ཏི་ཞེས་བྱ་ལྷ་མོ་སྤྱན། །ཟླ་བའི་དཀྱིལ་འཁོར་རྫོགས་པ་ལ་གནས་པ། །མཆོག་ཏུ་སྒེག་ཅིང་སྐུ་ཡི་རྡོ་རྗེ་འདྲ། །མེ་ཡི་ཕྱོགས་ཉིད་དུ་ནི་བསམ་པར་བྱ། །དྭེ་ཏཱ་ར་ཏི་ཞེས་བྱ་དགའ་བ་ཆེ། །ཡིད་འོང་མཆོག་སྩོལ་མཱ་མ་ཀཱི་ཞེས་པ། །ཞལ་

89-1-189b

མཛེས་ཕྱག་རྒྱ་ཐུགས་ཀྱི་རྡོ་རྗེ་འདྲ། །རྣམ་པར་སྒེག་པ་བདེན་བྲལ་མཚམས་སུ་བསམ། །རཱ་ག་ར་ཏི་ཞེས་བྱ་ཡུམ་མཆོག་ནི། །དྲི་མེད་རིན་ཆེན་འོད་ཀྱི་ཕྲེང་བ་ཡིས། །ཕྱོགས་ཀྱི་ཚོགས་ཁེབ་རང་གི་ངོ་བོ་ནི། །རླུང་དུ་གསུང་གི་རྡོ་རྗེ་
མཚུངས་པར་བསམ། །བཛྲ་ར་ཏིས་རབ་བསྐུལ་སྒྲོལ་མ་ནི། །རྡོ་རྗེ་དགའ་མ་ཡོན་ཏན་མཐའ་ཡས་པ། །དྲི་མེད་སྐུ་ནི་དོན་ཡོད་རྡོ་རྗེ་ལྟར། །དབང་ལྡན་ཕྱོགས་སུ་ངེས་པར་བཞུགས་མཛད་པའོ། །སངས་རྒྱས་ཡུམ་གྱུར་
འདི་དག་རྣམས་ཀྱི་ནི། །དང་པོ་གཡས་མཐར་ཨུཏ་པལ་དཀར་པོ་དང་། །གཉིས་པའི་གཡས་མཐར་ཨུཏ་པལ་སྔོ་དང་ལྡན། །གསུམ་པའི་ཐ་མ་གཡོན་པར་ཨུད་པལ་དམར། །གཡས་པའི་ཕྱག་གིས་འབྱེད་མཛད་བསྣོལ་
མ་ཉིད། །བཞི་པའི་གཡས་མཐར་ཨུཏ་པལ་དཀར་པོའོ། །གཟུགས་ཀྱི་རྡོ་རྗེ་ལྷ་མོ་སྤྱན་མཚུངས་པ། །རྩ་བའི་ཕྱག་གིས་མེ་ལོང་འཛིན་མཛད་པ། །དེ་ཉིད་མཆོད་བྱེད་ལྷ་མོ་རྒྱན་རྣམས་རྫོགས། །མེ་ཡི་གྲུ་ཆད་དག་
ལ་གནས་པར་བསམ། །སྒྲ་ཡི་རྡོ་རྗེ་ལྷ་མོ་བདེན་བྲལ་དུ། །དང་པོ་གཉིས་རྒྱུད་མངས་སྦྲེང་མཛད་པ་ནི། །ཀུན་དུ་མཆོད་བྱེད་མཛེས་པའི་གར་ལྡན་པ། །མཱ་མ་ཀཱི་དང་མཚུངས་པ་དགོད་པར་བྱ། །རྡོ་རྗེ་དྲི་ཡི་ལྷ་མོ་
རླུང་ལྷའི་ཕྱོགས། །དང་པོས་ལྷ་རྫས་དྲི་མཆོག་དུང་ཕོར་འཛིན། །ཁྱད་པར་འཕགས་པའི་ཡོན་ཏན་རྒྱན་སྤྲས་པ། །ནམ་བཟའ་དཀར་མོ་དང་མཚུངས་རྣམ་པར་བསམ། །རྡོ་རྗེ་རོ་ཡི་ལྷ་མོ་སྒྲོལ་མར་མཚུངས། །རིན་
ཆེན་པད་སྣོད་ལེགས་བཀང་བཏུང་བ་འཛིན། །འདི་ཉིད་རོལ་པའི་ཡེ་ཤེས་གཟུངས་མ་ལྷ། །དབང་ལྡན་ཕྱོགས་ཀྱི་གྲྭར་ནི་ལེགས་བཞུགས་པའོ། །རེག་བྱ་རྡོ་རྗེ་ལྷ་མོ་ཡེ་ཤེས་ཡུམ། །གསང་བ་དབྱིངས་ཕྱུག་མ་ནི་
དབུས་གནས་པའོ། །པད་མ་ཟླ་ཉི་དག་ལ་ལེགས་གནས་པ། །བྱམས་པའི་མགོན་པོ་སྤྲིན་དཀར་དག་པའི་འོད། །ཀླུ་ཤིང་མེ་ཏོག་འབྲས་ལྡན་ལེགས་འཛིན་པ། །རིན་ཆེན་རྒྱན་ལྡན་རོལ་པའི་སེམས་དཔའོ། །

89-1-190a

ས་ཡི་སྙིང་པོ་དུང་དང་མཚུངས་པར་མཛེས། །འཁོར་ལོ་འཛིན་པ་དར་དཔྱངས་ཅོད་པན་ལྡན། །རྣམ་པར་འགྱིང་བག་ལྡན་པས་བཞུགས་པ་ནི། །ཤར་གྱི་ལྷ་སྣམ་དག་ལ་དཀྱིལ་དཀྲུང་གནས། །གསང་བའི་
བདག་པོ་རྡོ་རྗེ་འཛིན་པ་ནི། །གུར་གུམ་བཟང་པོའི་མདོག་ལྟར་དམར་སེར་ལ། །ཕྱག་ན་རིན་ཆེན་རྡོ་རྗེ་འབར་བ་འཛིན། །སྣ་ཚོགས་རྒྱན་བཅས་ཀུན་ནས་འོད་འབར་བའོ། །ནམ་མཁའི་སྙིང་པོ་གསེར་གྱི་འོད་མངའ་བ། །མ་
རྒད་ཏ་ནི་ཆ་དགུ་པ་འཛིན་ཅིང་། །ལེགས་པར་གཙོ་ལ་བལྟ་བ་སེམས་དཔའ་ཆེ། །ལྷོ་ཡི་ལྷ་སྣམ་དག་ལ་དགོད་པར་བྱ། །འཇིག་རྟེན་དབང་ཕྱུག་སྤྱན་རས་གཟིགས་དབང་ནི། །བན་དྷུ་རི་ཀའི་མེ་ཏོག་ལྟར་མཛེས་པ། །
གཡོན་པའི་པད་མ་ངེས་པར་གཡས་པས་འབྱེད། །སེམས་དཔའི་དཀྱིལ་དཀྲུང་དག་གིས་བཞུགས་པའོ། །འཇམ་པའི་དབྱངས་ནི་དམར་སེར་དངས་པ་ལ། །ཨུཏ་པལ་དམར་པོ་སྡོང་པོར་བཅས་འཛིན་པ། །གཡས་པས་ཁ་
འབྱེད་ཕྱག་རྒྱ་ལྡན་པ་སྟེ། །ནུབ་ཀྱི་ལྷ་སྣམ་དག་ལ་བཞུགས་པར་བསམ། །སྒྲིབ་པ་ཐམས་ཅད་རྣམ་པར་སེལ་བ་ནི། །མ་རྒད་ལྗང་གུའི་མདོག་དང་མཚུངས་པ་སྟེ། །ཕྱག་ན་རལ་གྲི་འབར་བ་དང་པོར་འཛིན། །རིན་
ཆེན་སྣ་ཚོགས་རྒྱན་གྱིས་བརྒྱན་པར་བསམ། །བྱང་ཆུབ་སེམས་དཔའ་ཀུན་དུ་བཟང་པོ་ནི། །དུར་བའི་ལོ་མའི་ཁ་དོག་མཚུངས་པ་ཉིད། །སྣ་ཚོགས་རྡོ་རྗེ་འཛིན་པ་འགྱིང་བག་ཅན། །བྱང་ཕྱོགས་ལྷ་ཁྱམས་དག་ལ་བཞུགས་
པར་བསམ། །འདི་དག་སོ་སོའི་གཙོ་བོའི་སྐུ་མཚུངས་ཏེ། །ཞལ་གསུམ་ཕྱག་དྲུག་ངེས་པ་གསལ་བར་བརྗོད། །རྣམ་ཤེས་ཚོགས་བརྒྱད་རྟོགས་པ་སྦྱངས་ནས་ནི། །སླར་འདུས་སོ་སོར་གསལ་བར་གྱུར་པར་བསམ། །
ཡ་མཱན་ཏ་ཀྲིད་ཅེས་བྱ་གཤིན་རྗེ་གཤེད། །མཐའ་ཡས་འཇིགས་འོད་ཕྱོགས་ཀུན་ཁྱབ་དང་ལྡན། །དུས་མཐའི་མི་བཟད་སྦྱིན་གྱི་དཀྱིལ་འཁོར་མདོག །ཐུགས་ཀྱི་རྒྱལ་པོ་དག་དང་སྐུ་མཚུངས་པ། །དྲག་པོ་རིགས་

89-1-190b

ཀྱི་འོད་ཟེར་དཔག་མེད་འཕྲོ། །གཤིན་རྗེ་མཐར་བྱེད་ཤིན་དུ་གདུག་པ་ཡི། །སྦྲུལ་གྱིས་ལུས་ཀྱི་ཡན་ལག་རྣམ་བརྒྱན་པ། །དཔལ་ལྡན་ཤར་གྱི་སྒོར་ནི་བསམ་པར་བྱ། །པྲཛྙཱན་ཏ་ཀྲིད་ཅེས་བྱ་བླ་མེད་འོད། །དྲག་ཅིང་ཕྱག་སོགས་
སྐུ་ཡི་རྡོ་རྗེ་འདྲ། །གཞན་གྱིས་མི་ཐུབ་ཅེས་བྱ་གཏུམ་པོ་ནི། །ལྷོ་ཡི་ཕྱོགས་ཀྱི་སྒོ་རུ་བསམ་པར་བྱ། །པད་མཱན་ཏ་ཀྲིད་ཅེས་བྱ་ནུབ་ཕྱོགས་ཀྱི། །འཁོར་ལོའི་འོད་ཀྱིས་མངོན་པར་ཁེབས་བྱེད་པ། །འོད་མདངས་འཇིགས་དུས་
མེ་འདྲ་འཇིགས་པར་ལྡན། །ཕྱག་ལས་སོགས་པ་གསུང་གི་རྡོ་རྗེ་འདྲ། །གདུག་པ་མ་ལུས་རྣམ་གནོན་འཇིགས་པའི་ཞལ། །ཐུབ་དབང་ཧ་ཧ་ཞེས་ནི་བཞད་པ་ཡིས། །རི་བོར་བཅས་པ་སྒྱེལ་བས་སྐྲག་མཛད་པ། །རྟ་
མགྲིན་དེ་བཞིན་ནུབ་ཀྱི་ཕྱོགས་སུ་བསམ། །བིགྷྣཱན་ཏ་ཀྲིད་ཅེས་བྱ་དཔའ་བོ་ནི། །དུས་མཐའི་མེ་ལྟར་དྲག་པ་བདུད་རྩི་འཁྱིལ། །འཕགས་པའི་ཞལ་ཕྱག་ཕྲིན་ལས་རྡོ་རྗེ་མཚུངས། །དེ་བཞིན་བྱང་གི་སྒོར་ནི་བསམ་
པར་བྱ། །རྡོ་རྗེ་ཐོ་བ་དབྱུག་པ་པད་མ་དང་། །རྡོ་རྗེ་གཏུན་ཤིང་ཁྱད་པར་འདི་དག་འཛིན། །ཐམས་ཅད་རིགས་ཀྱི་གཙོ་བོས་དབུ་བརྒྱན་པའི། །ཅོད་པན་ཡེ་ཤེས་རྒྱས་གདབ་བསྟན་པ་ཡིན། །འདི་དག་ཁྲོ་བོ་མངོན་པར་
འབྱུང་བ་དག །གསང་སྔགས་ལས་བྱུང་ཅོད་པན་ལྷར་བཅས་པ། །ཞལ་གསུམ་ཕྱག་དྲུག་འཇིགས་པའི་ཆ་བྱད་སྟོན། །མེ་དཔུང་ཀློང་དཀྱིལ་འབར་བར་རབ་ཏུ་བཞུགས། །མེ་ཡི་མཚམས་སུ་ཁྲོ་རྒྱལ་མི་གཡོ་
བ། །ཨིན་དྲ་ནཱི་ལའི་མདོག་མཚུངས་གཙིགས་པའི་ཞལ། །གཡས་ཞི་དཀར་བ་གཡོན་དམར་བཞད་པ་ལས། །དབུས་ངམ་མཆེ་བ་རྣམ་པར་གཙིགས་པའི་སྐུ། །དང་པོ་རལ་གྲི་སྡིགས་མཛུབ་ཞགས་པ་འཛིན། །བར་
མས་འཁོར་ལོ་པད་མ་འཛིན་པ་ཉིད། །ཐ་མས་དགྲ་སྟ་ནོར་བུ་བསྣམས་པ་སྟེ། །པད་མ་ཉི་མར་གཡོན་བརྐྱང་ཞབས་ཀྱིས་བཞུགས། །བདེན་བྲལ་དུ་ནི་འདོད་པའི་རྒྱལ་པོ་སྟེ། །ཤིན་དུ་དྲག་པོ་བཻ་དཱུརྱའི་མདོག །

89-1-191a

དང་པོས་སྡིགས་མཛུབ་བསྣོལ་མ་མཐེའུ་ཆུང་སྦྲེལ། །རྡོ་རྗེའི་ལྕགས་ཀྱུ་ཞགས་པ་འཛིན་པ་དང་། །རལ་གྲི་ཨུཏ་པལ་དམར་པོ་ཐ་མར་འཛིན། །འཇིགས་རུང་གསུས་ཆེ་པད་ཉིའི་གདན་ལ་བཞུགས། །
རིགས་འཛིན་དུ་ནི་ཁྲོ་བོ་དབྱུག་སྔོན་ཅན། །ཆར་སྤྲིན་སྔོན་པོ་ལྟ་བུའི་ཁ་དོག་འཆང་། །དང་པོས་དབྱུག་པ་སྡིགས་མཛུབ་མེ་དཔུང་འཕྲོ། །བར་མས་རལ་གྲི་ནོར་བུ་ལེགས་འཆང་བ། །ཐ་མས་འཁོར་ལོ་པད་མ་
ལེགས་བསྣམས་པ། །གཏུམ་པོ་འཇིགས་པ་སེལ་མཛད་དེར་བཞུགས་ཡིན། །འབྱུང་པོ་འཇིགས་མཛད་རྡོ་རྗེ་སྟོབས་པོ་ཆེ། །མེ་ཏོག་ཨུཏ་པལ་སྔོན་པོའི་འོད་མཚུངས་པ། །དང་པོ་རྔ་ཡབ་རྡོ་རྗེ་སྡིགས་མཛུབ་
དང་། །བར་པས་རལ་གྲི་ཞགས་པ་འཛིན་པའོ། །ཐ་མས་འཁོར་ལོ་ནོར་བུ་འབར་བ་སྟེ། །གདོན་འཇོམས་སྒེག་པོ་པད་མ་ཉི་མར་གནས། །སྟེང་ཕྱོགས་ཤར་སྒོའི་རྩ་བར་འབྱུང་བ་ཡི། །ཁྲོ་བོ་གཙུག་ཏོར་འཁོར་
ལོས་སྒྱུར་བ་ནི། །མཁའ་འདྲ་སྔོ་བསངས་གཙུག་ཏོར་ཕྱག་རྒྱ་ནི། །སྤྱི་བོར་དང་པོའི་ཕྱག་གིས་བཅིངས་པ་སྟེ། །བར་མ་རྡོ་རྗེ་དང་ནི་པད་མ་འཛིན། །ཐ་མ་རལ་གྲི་སྡིགས་མཛུབ་མཛད་པའོ། །རྣམ་འཚེ་
འཇོམས་མཛད་གཡོན་བརྐྱང་གནས་པ་ཡིས། །ཚངས་གནས་དེར་ནི་པད་ཉིའི་གདན་ལ་བཞུགས། །འོག་ཕྱོགས་ནུབ་སྒོའི་རྩ་བར་བཞུགས་པ་ཡི། །རྒྱུ་དང་མི་རྒྱུ་བ་ཡི་གདུག་པའི་དུག །ཀ་ལ་ཀུ་ཊ་འཇོམས་
པ་གནོད་མཛེས་ནི། །མཐིང་ཤུན་བཟང་པོའི་མདོག་དང་མཚུངས་པ་ཡི། །དང་པོས་རྡོ་རྗེ་སྡིགས་མཛུབ་ཞགས་པ་ཅན། །བར་པས་འཁོར་ལོ་པད་མ་ཐ་མས་ཀྱང་། །རལ་གྲི་དང་ནི་ནོར་བུ་རིན་ཆེན་འཛིན། །ས་བདག་
མ་ལུས་གནོད་མཛེས་རྡོ་རྗེ་བཞུགས། །ཁྲོ་བོ་བཅུ་པོ་ཀུན་གྱི་རྣམ་པ་ནི། །སྤྱན་གསུམ་སྡང་མིག་ཕྱོགས་བཅུར་གཟིགས་པ་དང་། །ཐུང་ཞིང་སྦོམ་ལ་གསུས་འཕྱང་སྦྲུལ་བརྒྱད་ཀྱིས། །རབ་ཏུ་བརྒྱན་ཅིང་དབུ་སྐྲ་

89-1-191b

གྱེན་དུ་བརྫེས། །ཞལ་གསུམ་ཕྱག་དྲུག་དཔའ་བའི་ཉམས་དང་ལྡན། །སྨིན་མ་གྱེན་བསྐྱོད་ཨག་ཙོམ་གྱེན་དུ་འཁྱིལ། །སྣ་ཚོགས་ནོར་བུའི་རྒྱན་བཅས་སྟག་ཤམ་ཅན། །མཆེ་གཙིགས་ཞལ་ནི་བཞད་ཅིང་སྒྲ་སྒྲོགས་པ། །
ཧ་ཧ་ཞེས་བརྗོད་མི་བཟད་གད་རྒྱངས་མངའ། །བཀའ་བསྒོ་རྫོགས་བྱེད་མ་ལུས་བགེགས་འཇོམས་མཛད། །གཡོན་བརྐྱང་གཡས་བསྐུམ་པད་མ་ཉི་མར་གནས། །དེ་ལྟར་སུམ་ཅུ་རྩ་གཉིས་དཀྱིལ་འཁོར་པའི། །ལྷ་རྣམས་
ཕྱག་རྒྱ་བཞི་ལྡན་བསྐྱེད་ནས་ནི། །སྐུ་བཞི་དབྱེར་མེད་ཡེ་ཤེས་ངང་དུ་བལྟ། །འདི་ནི་སངས་རྒྱས་ཐམས་ཅད་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་
གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་གསང་བ་ཆེན་པོའི་དཀྱིལ་འཁོར་རབ་ཏུ་སྟོན་པ་རྡོ་རྗེའི་ལེའུ་སྟེ་ལྔ་བཅུ་
རྩ་ལྔ་པའོ། །བརྟག་པ་ལྔ་པ་དྲི་མ་མེད་པའི་ཡེ་ཤེས་བྱིན་གྱིས་བརླབ་པ་ཞེས་བྱ་བ་བརྟག་པའི་རྒྱལ་པོའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་འདུས་པར་གྱུར་ནས་
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་པོ་དེ་བཞིན་གཤེགས་པ་ལ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་དམ་ཚིག་གིས་
ཡང་དག་པར་གསོལ་བ་བཏབ་པ་ནི། །གསང་བ་འཛིན་པ་མ་ལུས་པའི། །སྐུ་གསུམ་ཆོས་ཀྱི་དབྱིངས་འབྱུང་བའི། །འཇིག་རྟེན་འཇིག་རྟེན་འདས་པ་ཡི། །དམ་པའི་སྙིང་པོ་མཆོག་སྩོལ་མཛོད། །ཅེས་གསོལ་
བ་བཏབ་ནས་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་ཀུན་དུ་བཟང་པོས་དེ་བཞིན་གཤེགས་པའི་ཚོགས་ཆེན་པོར་དཀྱིལ་འཁོར་ཐམས་ཅད་ཀྱི་བདག་པོ་དང་བཅས་པ་ལ་སྣ་

89-1-192a

ཚོགས་མཆོད་པའི་སྤྲིན་ནམ་མཁའ་དང་མཉམ་པས་ཞིང་ཁམས་མ་ལུས་པ་ཀུན་ནས་ཁྱབ་པར་བྱས་ཏེ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྤྲིན་གྱི་རིན་པོ་ཆེ་འབར་བ་དུ་མས་བརྒྱན་
པས་རྣམ་པ་མ་འདྲེས་པའི་ཚོགས་ཀྱིས་ཀུན་ནས་སྣང་བར་གྱུར་པ་ནི་འདི་ལྟ་སྟེ། རིན་པོ་ཆེ་དུ་མ་ལས་བྱུང་བའི་གདུགས་རིན་པོ་ཆེ་དང་། བ་དན་རིན་པོ་ཆེ་དང་། རིན་པོ་ཆེའི་རྒྱལ་མཚན་དང་། ནོར་བུའི་རྒྱལ་པོ་ལས་
བྱུང་བའི་ལྷའི་བླ་རེ་རིན་པོ་ཆེ་དང་། རིན་པོ་ཆེ་དུ་མའི་རྒྱུ་ལས་བྱུང་བའི་དར་འཕེན་དུ་མའི་ཚོགས་དང་། སྣ་ཚོགས་རིན་པོ་ཆེའི་གོས་ལས་བྱུང་བའི་བ་དན་རྒྱུད་རིངས་དུ་མའི་ཚོགས་དང་། སྣ་ཚོགས་འཕྱང་བ་དང་། སྣ་
ཚོགས་ཆུན་འཕྱང་བསྐྱོད་པ་ལས་དྲིལ་བུ་གཡེར་ཁའི་སྒྲ་སྒྲོགས་པའི་བ་དན་གྱི་ཚོགས་དཔག་ཏུ་མེད་པ་དང་ལྷའི་རོལ་མོའི་ཚོགས་དུ་མས་ཡང་དག་པར་མཆོད་པར་བྱས་སོ། །གཞལ་ཡས་ཁང་རིན་
པོ་ཆེས་སྤྲས་པ་ནི་རིན་པོ་ཆེ་མུ་ཏིག་གི་དྲ་བ་དང་དྲ་བ་ཕྱེད་པས་བཻ་དཱུརྱའི་གཞི་ཡོངས་སུ་བཀོད་པ་དང་། རིན་པོ་ཆེ་གསེར་གྱི་ཕ་གུ་སྣ་ཚོགས་པའི་འཕྲ་དུ་མས་བཀོད་པ་ནི་ཁ་བད་ཀྱི་ཚུལ་དུ་བརྒྱན་པར་
གྱུར་ཏོ། །བ་ཀུ་ལའི་གསེར་གྱི་སྐར་ཁུང་གིས་བརྒྱན་པ་དང་། ཕྱི་རོལ་དང་ནང་དུ་ཡང་འདོད་པའི་ཡོན་ཏན་གྱི་ལྷ་མོ་རིན་པོ་ཆེ་པད་མ་རཱ་གའི་སྟེགས་བུ་ལ་འཁོད་ཅིང་ཀུན་ནས་ཡོངས་སུ་མཆོད་པར་བྱེད་དོ། །
རིན་པོ་ཆེ་སྣ་ཚོགས་བཀོད་པའི་ཁ་བད་ན་མདའ་ཡབ་ཀྱིས་མཛེས་པར་ཡོངས་སུ་བརྒྱན་པར་གྱུར་ཏོ། །ཡོངས་སུ་མཆོད་ཅིང་རྒྱས་པར་བྱེད་པ་ཉིད་དོ། །དེ་ནས་དེ་བཞིན་གཤེགས་པ་ཞལ་བཟངས་སངས་རྒྱས་
ཐམས་ཅད་ཀྱི་གླུའི་སྒྲོན་མེ་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕུན་སུམ་ཚོགས་པའི་ཡེ་ཤེས་ལམ། །མཉམ་པ་ཉིད་དུ་གནས་པ་ལ། །

89-1-192b

རྣམ་པར་ཞི་བ་མི་གནས་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཤུགས་གནས་རྡོ་རྗེས་སངས་རྒྱས་ཐམས་ཅད་ཀྱི་བདེན་པ་མཐོང་བ་རྡོ་རྗེའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡོངས་སུ་དག་པའི་སྒོ་དང་ནི། །མཐའ་དབུས་དག་པ་རྡོ་རྗེའི་དབྱིངས། །མཚུངས་པར་ལྡན་པ་དག་པ་སྟེ། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་ལྡན་པས་སངས་རྒྱས་ཐམས་ཅད་ཀྱིས་ཀུན་དུ་གཟིགས་པ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
སེམས་ཀྱིས་སེམས་ནི་མི་མཐོང་ཞིང་། །སངས་རྒྱས་རྣམས་ཀྱིས་དོན་དམ་ཆེ། །རྣམ་པར་གཟིགས་པ་མེད་གྱུར་ཕྱིར། །བྱང་ཆུབ་སེམས་འདི་གསུངས་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་
བསྲུང་བའི་དབང་པོས་སངས་རྒྱས་ཐམས་ཅད་ཀྱི་ཤིན་དུ་རྣམ་པར་དག་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཤེས་རབ་རྣམ་པར་དག་པ་ཡི། །
སྣང་བ་ཆེན་པོའི་ཡེ་ཤེས་མེ། །མ་ལུས་སྟོང་ཉིད་རང་བྱུང་ལས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་ཆེན་པོ་སངས་རྒྱས་ཐམས་ཅད་ཀྱི་མཚུངས་པ་
མེད་པའི་ཡེ་ཤེས་ཀྱི་རྡོ་རྗེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་ནམ་མཁའི་ངོ་བོ་ཉིད། །རྣམ་པར་ཤེས་པ་སྐྱེ་མེད་དེ། །སྐྱེ་བ་ཙམ་དུ་བགྱིད་
མ་ལགས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བློ་གྲོས་རྒྱ་མཚོས་སངས་རྒྱས་ཐམས་ཅད་ཀྱི་ཡེ་ཤེས་མངོན་པར་རོལ་པ་རྡོ་རྗེའི་ཏིང་ངེ་འཛིན་ལ་སྙོམས་པར་

89-1-193a

ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་ཡེ་ཤེས་སྒྱུ་མ་ལས། །རྣམ་པའི་དྲ་བ་དག་པའི་ཕྱིར། །དཔེ་བྲལ་བདེ་བའི་ས་གཅིག་པུ། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་བདུད་རྩིའི་དཔལ་གྱིས་སངས་རྒྱས་ཐམས་ཅད་ཀྱི་ཡིད་ལས་མ་བྱུང་བ་རྡོ་རྗེ་རྣམ་པར་དག་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུ་རྐྱེན་
ཡུལ་དག་མི་དམིགས་པས། །རྡོ་རྗེ་དག་དང་མ་དག་མེད། །སྤྲོས་མེད་ཚུལ་ནི་རྙོག་པ་བྲལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ཀྱི་སྟོབས་ཀྱིས་སངས་རྒྱས་ཐམས་ཅད་
ཀྱི་ཟིལ་གནོན་དཔེ་མེད་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཔག་མེད་ཡོངས་སུ་བསྡུ་བའི་གནས། །ཟག་མེད་རྨི་ལམ་གནས་མེད་པ། །ཐམས་ཅད་བྱེད་པ་པོ་མེད་ཕྱིར། །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཆོད་པར་ལྡན་པས་སངས་རྒྱས་ཐམས་ཅད་ཀྱི་མངོན་པར་བསྒྲུབས་པའི་ཚུལ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །ཐ་སྙད་གདགས་པ་བྲལ་བའི་ཕྱིར། །དངོས་མེད་ངོ་བོས་སྟོང་པས་ན། །ཡེ་ཤེས་ཙམ་ལ་དམིགས་མེད་དེ། །མངོན་པར་མི་གནས་ཚུལ་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་མེ་ཏོག་འོད་ཀྱིས་སངས་རྒྱས་ཐམས་ཅད་ཀྱི་མཚན་ཉིད་གནས་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དབེན་ཞིང་རྣམ་དག་དེ་བཞིན་
ཉིད། །ཆོས་དབྱིངས་ཡེ་ཤེས་རྡོ་རྗེ་ལས། །འགྱུར་བ་མེད་པའི་ངང་ལ་བཞུགས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཁམས་གསུམ་མཆོད་གནས་ཀྱིས་སངས་རྒྱས་

89-1-193b

ཐམས་ཅད་ཀྱི་གསང་བ་མི་ཟད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལུས་དང་ངག་དང་ཡིད་ཀྱི་ལས། །རྣམ་པར་ཟད་མེད་འགྱུར་བ་ལྟར། །སངས་རྒྱས་ཡེ་ཤེས་
དེ་བཞིན་ཏེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྒྲ་ཅན་ཉི་མའི་སྙིང་པོ་སངས་རྒྱས་ཐམས་ཅད་ཀྱི་འཇིགས་པ་མེད་པའི་ཚུལ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བདག་མེད་ལས་བྱུང་བའི། །དམ་ཆོས་སེང་གེའི་སྒྲ་སྒྲོགས་པས། །འཛིན་པའི་རྟོག་པ་དེངས་པར་བྱེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་
དེ་བཞིན་གཤེགས་པ་ལྷ་ཡིས་མཆོད་དཔས་སངས་རྒྱས་ཐམས་ཅད་ཀྱི་མི་འགྱུར་བའི་གདན་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་རྡོ་རྗེའི་རླུང་གིས་ནི། །
རིན་མེད་དབང་ཆེན་རྡུལ་ཕྲན་དག །རྡོ་རྗེ་ཡེ་ཤེས་འགྱུར་མེད་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐར་པའི་རྒྱལ་མཚན་གྱིས་སངས་རྒྱས་ཐམས་ཅད་ཀྱི་དབྱངས་ཀུན་
ནས་སྣང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདེན་པར་སྨྲ་བའི་གསུང་གིས་ནི། །ཐོགས་མེད་རྡོ་རྗེ་དབྱངས་གཅིག་གིས། །སྟོང་གསུམ་ཀུན་དུ་སྒྲོག་པར་
བྱེད་བྱང་ཆུབ་ཐབས་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགེ་བའི་ཚུལ་གཙུག་གིས་སངས་རྒྱས་ཐམས་ཅད་ཀྱི་རྗེས་སུ་ཐོབ་པར་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་མོས་པས་འཇུག་པའི་སེམས་ཅན་ལ། །མི་རྟག་སྡུག་བསྔལ་སྟོང་པ་ཞི་བ་དང་། །བདག་མེད་ཡེ་ཤེས་སྟོང་ཉིད་སྟོན་པར་བྱེད། །འདི་ནི་ཡེ་ཤེས་དག་

89-1-194a

པའི་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བདུད་རྩི་འོད་ཀྱིས་སངས་རྒྱས་ཐམས་ཅད་ཀྱི་ཆོས་ཉིད་མཉམ་པའི་སྐུའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །མངོན་པར་བསྒྲུབ་པ་འཕགས་པའི་ཆོས། །དེ་ཉིད་མཚན་མ་རྟོག་བྲལ་བ། །སྤོང་བ་མེད་ཅིང་ལྷུན་གྱིས་གྲུབ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་
དཔལ་ཐུབ་པའི་རྡོ་རྗེས་སངས་རྒྱས་ཐམས་ཅད་ཀྱི་མི་གནས་པ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕྱག་རྒྱ་ཆེན་པོ་མཆོག་ཆེན་པོ། །དུས་གསུམ་མི་མཉམ་ཆོས་
ཀྱི་སྐུ། །དོན་དམ་རབ་ཏུ་མི་གནས་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དཔལ་བརྟན་པ་བཟང་པོས་སངས་རྒྱས་ཐམས་ཅད་ཀྱི་ཡེ་ཤེས་འབྱུང་བ་སྒྱུ་མའི་རྣམ་པར་སྟོན་པ་རྡོ་རྗེའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྒྱུ་མ་དོན་དམ་པར་མི་གནས། །སྒྱུ་མའི་ཚོགས་གཉིས་འབད་མེད་པས། །དེ་ཉིད་ངང་དུ་ཐོབ་ཅིང་གྲོལ། །བྱང་ཆུབ་ཚུལ་འདི་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་ཕུང་པོས་སངས་རྒྱས་ཐམས་ཅད་ཀྱི་ཡེ་ཤེས་བརྗོད་དུ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་
བཞིན་རྟོག་པ་དག་པའི་ངང་། །དེ་ཉིད་སྤང་བླང་ལས་གྲོལ་ཕྱིར། །འོད་གསལ་ངང་དུ་སྨྲར་མེད་དོན། །བྱང་ཆུབ་ཚུལ་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་མཛེས་པར་གཤེགས་པ་
སངས་རྒྱས་ཐམས་ཅད་ཀྱི་རྒྱན་མངོན་པར་བསྟན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལྐོག་གྱུར་གནས་པའི་རྟེན་དག་ཅིང་། །ཚད་མེད་བཞི་ལས་འཆར་བ་

89-1-194b

གང་། །དེ་བཞིན་གཤེགས་པས་ཡོངས་སུ་མཁྱེན། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ལྟར་དེ་བཞིན་གཤེགས་པས་གསུངས་པ་ཡི། །སྙིང་པོ་མངོན་པར་བྱང་ཆུབ་པ། །སྟོང་ཉིད་ཡེ་ཤེས་ནམ་མཁའ་ལྟར། །
ཆོས་སྐུ་རང་བྱུང་མཉམ་པ་ཉིད། །འགོག་པ་མེད་ཕྱིར་སྣང་བ་པོ། །འོད་གསལ་སྙིང་པོ་འབྲས་འབྱུང་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་གསང་བ་གསང་བ་འདུས་པ་
སངས་རྒྱས་ཐམས་ཅད་ཀྱི་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་དབྱིངས་དང་ཡེ་ཤེས་བསམ་གྱིས་མི་ཁྱབ་པའི་དོན་གྱི་ལེའུ་སྟེ་ལྔ་བཅུ་དྲུག་པའོ།། །། 
དེ་ནས་དེ་བཞིན་གཤེགས་པ་ཉི་མ་ལྟར་གཤེགས་པ་ཐམས་ཅད་ཀྱི་ལུས་དྲན་པ་ཉེ་བར་གཞག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལུས་ཀྱིས་ལུས་ཀྱི་རྗེས་
ལྟ་ཞིང་། །དེ་ཉིད་རང་བཞིན་མེད་པར་ཡང་། །ཆ་ཤས་མེད་པའི་རྣམ་པ་ཅན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དག་པའི་འོད་ཀྱིས་སངས་རྒྱས་ཐམས་ཅད་ཀྱི་ཚོར་བ་དྲན་པ་
ཉེ་བར་གཞག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བདེ་སྡུག་བཏང་སྙོམས་ཀྱི། །ཚོར་བ་རང་བཞིན་མེད་པར་ནི། །དག་པ་རྐྱེན་བྲལ་ཆོས་ཉིད་དེ། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་གཙུག་ཏོར་གྱིས་སངས་རྒྱས་ཐམས་ཅད་ཀྱི་ཆོས་དྲན་པ་ཉེ་བར་གཞག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །ཡུལ་དང་ཡུལ་ཅན་མི་དམིགས་ཤིང་། །འདུ་ཤེས་འདུ་བྱེད་རྣམ་དག་པ། །རང་ལས་བྱུང་བའི་གནས་མེད་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དཔལ་རྫོགས་

89-1-195a

པས་སངས་རྒྱས་ཐམས་ཅད་ཀྱི་སེམས་དྲན་པ་ཉེ་བར་གཞག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཟབ་ཅིང་ཕྲ་བ་རྟག་མེད་པ། །རྟེན་བྱེད་རྣམ་
ཤེས་ས་བོན་ཚུལ། །རྟོག་པ་མེད་པར་གནས་པ་ནི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སེང་གེའི་སྟོབས་ཀྱིས་སངས་རྒྱས་ཐམས་ཅད་ཀྱི་འདུན་པའི་རྫུ་འཕྲུལ་གྱི་རྐང་པ་
རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདི་དག་ལམ་ལ་ངེས་པར་ཞུགས་པ་ཡི། །བླ་ན་མེད་པའི་འདུན་པ་མི་ཕྱེད་པས། །གོང་དུ་བགྲོད་པར་བྱེད་པའི་མཆོག་འདི་ནི། །
ཚོགས་པ་འདི་ནི་བྱང་ཆུབ་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གྱེན་དུ་འཕགས་པས་སངས་རྒྱས་ཐམས་ཅད་ཀྱི་བརྩོན་འགྲུས་ཀྱི་རྫུ་འཕྲུལ་གྱི་རྐང་པ་རྡོ་རྗེའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཀར་པོའི་ཕྱོགས་རྒྱུན་རབ་འཕེལ་ཞིང་། །དགེ་བའི་རྩ་བ་མི་ཟད་པ། །ཡང་དག་ཡེ་ཤེས་རྩོམ་པའི་ཚུལ། །བྱང་ཆུབ་དག་པའི་ཚུལ་བསྟན་པའོ་ཞེས་གསུངས་སོ། །
དེ་ནས་དེ་བཞིན་གཤེགས་པ་མེ་ཏོག་བྱིན་གྱིས་སངས་རྒྱས་ཐམས་ཅད་ཀྱི་སྤྱོད་པའི་རྫུ་འཕྲུལ་གྱི་རྐང་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུན་ཆད་མེད་
པའི་བསམ་གཏན་གནས། །ཡེངས་མེད་ཚུལ་ལ་གནས་གྱུར་ཅིང་། །བདེན་དོན་སྤྱོད་པ་རྣམ་པར་འཛིན། །རྣམ་པར་སད་བྱེད་རྟེན་གྱུར་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་འོད་དགྱེས་སངས་རྒྱས་ཐམས་ཅད་ཀྱི་སེམས་ཀྱི་རྫུ་འཕྲུལ་གྱི་རྐང་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཁྱད་པར་གྱིས་ནི་བསམ་གཏན་ལ། །

89-1-195b

སེམས་ནི་ཡེ་ཤེས་ངང་གྱུར་པས། །མཚན་མས་སྟོང་པའི་རིགས་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་པད་མའི་དཔལ་གྱིས་སངས་རྒྱས་ཐམས་ཅད་ཀྱི་དགེ་
བའི་ཆོས་མ་སྐྱེས་པ་བསྐྱེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དགེ་བའི་བག་ལ་ཉལ་གྱུར་པ། །རྣམ་པར་སད་བྱེད་རྟེན་གྱུར་པས། །བདག་ཉིད་ཐར་པ་ཐོབ་
པའི་ཆོས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་དགྱེས་ཀྱིས་སངས་རྒྱས་ཐམས་ཅད་ཀྱི་དགེ་བའི་ཆོས་སྐྱེས་པ་རྣམ་པར་དག་པར་བསྲུང་བ་རྡོ་རྗེའི་ཏིང་
ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡང་དག་ངེས་པར་གནས་པ་ཡི། །དག་པའི་དགེ་བ་ཕྱོགས་མེད་པ། །བརྟན་ཞིང་ཕྱིར་མི་ལྡོག་པར་ནི། །གནས་པ་བྱང་ཆུབ་ཚུལ་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བཀོད་པ་མཛེས་པས་སངས་རྒྱས་ཐམས་ཅད་ཀྱི་མི་དགེ་བའི་ཆོས་སྐྱེས་པ་རྣམས་སྤོང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །སྡིག་ཏོར་གྱུར་པའི་ཕུང་པོ་དག །ལོག་པའི་ལམ་རྣམས་ངེས་སྤོང་བ། །ཚུལ་ཁྲིམས་ངོ་བོ་བསྟན་པའི་མཐུ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་གཏི་མུག་མེད་པར་གཤེགས་པས་སངས་རྒྱས་ཐམས་ཅད་ཀྱི་མི་དགེ་བའི་ཆོས་མ་སྐྱེས་པ་རྣམས་མི་སྐྱེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདི་
དག་དངོས་པོ་མི་དམིགས་པས། །ཡོངས་སུ་དག་པས་རྩ་བ་བྲལ། །ལྡོག་པ་མེད་པའི་ཚུལ་གནས་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བླ་ན་

89-1-196a

མེད་པས་སངས་རྒྱས་ཐམས་ཅད་ཀྱི་དད་པའི་དབང་པོ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུ་དང་འབྲས་བུས་བསྡུས་པ་ཡི། །དངོས་པོ་
ཞིང་དག་རྣམ་དག་པས། །ཕྲ་རབ་བརྟེན་པ་འདོད་པ་དག །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཏོག་གི་རྒྱལ་མཚན་གྱིས་སངས་རྒྱས་ཐམས་ཅད་ཀྱི་བརྩོན་འགྲུས་ཀྱི་
དབང་པོ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དགེ་བ་དང་ནི་ལྷག་པར་སྤྲོ་བའི་ཆོས། །ཕ་རོལ་ཕྱིན་པ་དྲུག་ལ་སྤྱོད་པ་སྟེ། །སྒྱུ་མའི་ཡེ་ཤེས་འདིས་ནི་སྤྲོ་བ་
གང་། །བྱང་ཆུབ་ཚུལ་འདི་ངེས་པར་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བདེ་བར་དགོངས་པས་སངས་རྒྱས་ཐམས་ཅད་ཀྱི་དྲན་པའི་དབང་པོ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །མི་བརྗེད་གཟུངས་སུ་གྱུར་པ་ནི། །བདེ་བ་བསྟན་པའི་ངང་འབྱུང་བ། །ལྷུང་བ་བག་མེད་གནས་སྤོང་བས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་དྲི་མ་མེད་པའི་རྒྱལ་པོས་སངས་རྒྱས་ཐམས་ཅད་ཀྱི་ཏིང་ངེ་འཛིན་གྱི་དབང་པོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཉམ་པར་
བཞག་དང་རྗེས་ཐོབ་ལ། །སྒྱུ་མ་ཁམས་གསུམ་ལམ་སྣང་བ། །དབེན་པས་དེ་ཉིད་ཐོབ་པས་སོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོ་ག་མཁྱེན་པས་སངས་
རྒྱས་ཐམས་ཅད་ཀྱི་ཤེས་རབ་ཀྱི་དབང་པོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཁོར་དང་མྱ་ངན་འདས་པ་ཡི། །སྤྱི་དང་རང་གི་མཚན་ཉིད་རྣམས། །

89-1-196b

ངོ་བོ་ཉིད་དག་རབ་སྟོན་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དག་པའི་རྒྱ་མཚོས་སངས་རྒྱས་ཐམས་ཅད་ཀྱི་རྣམ་པར་གྲོལ་བ་རྡོ་རྗེའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་དབེན་དོན་ཀུན་ཤེས་པས། །བསམ་གཏན་བདེ་ལ་མ་ཞེན་ཅིང་། །ཁྱད་པར་བྱང་ཆུབ་སེམས་དཔའ་ཆོས། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་རིན་ཆེན་མངའ་བས་སངས་རྒྱས་ཐམས་ཅད་ཀྱི་རྣམ་པར་གྲོལ་བ་དགྱེས་པའི་ཚུལ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
དང་དུ་བླང་བ་རློམ་སེམས་མེད། །གང་དུ་ཆོས་དབྱིངས་ངང་འཇུག་པ། །གཅིག་དང་དུ་མར་དམིགས་པས་གྲོལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྟོག་པ་མི་
མངའ་བས་སངས་རྒྱས་ཐམས་ཅད་ཀྱི་རྣམ་པར་གྲོལ་བ་གཉིས་སུ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བྲལ་བ་མེད་ཅིང་མི་ཤིགས་པ། །འཁྲུག་མེད་
བྱེ་བྲག་མ་སྤངས་ནས། །འདྲེན་པ་ཆོས་ཀྱི་གཏེར་གྱུར་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །འདི་ནི་གཞལ་ཡས་ཁང་མིན་ཡུལ་ནི་དབང་པོ་མིན་ཅིང་འབྱུང་སོགས་མིན། །གཟུགས་ལ་སོགས་པ་
མ་ཡིན་སྲོག་གནས་མིན་ཞིང་མིར་གྱུར་འདི་ནི་རྒྱལ་བ་སྟེ། །འཁོར་ལོའི་གཙོ་ཡི་ཆོས་ཉིད་ཡིན་ཏེ་དེས་ནི་དཀྱིལ་འཁོར་དུ་མར་སྤྲུལ། །ཁམས་གསུམ་འདི་ན་སྣ་ཚོགས་འཁོར་ལོར་ཤེས་ན་སེམས་ནི་ཅི་སྟེ་
འཁྲུལ་བར་བྱེད། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་རིགས་ཀྱི་དཀྱིལ་

89-1-197a

འཁོར་འབྱུང་གནས་རྡོ་རྗེ་ཞེས་བྱ་བའི་ལེའུ་སྟེ་ལྔ་བཅུ་བདུན་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་སྐྱེ་བོ་དགའ་བར་མཛད་པས་སངས་རྒྱས་ཐམས་ཅད་ཀྱི་
དད་པའི་སྟོབས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གཞན་རྐྱེན་ན་བས་མི་རྫི་བའི། །ཡེ་ཤེས་མངོན་པར་འཕེལ་བས་ན། །མཆོག་ཏུ་རྟེན་འབྲེལ་ཡིད་ཆེས་ཡིན། །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྨ་བྱའི་ང་རོས་སངས་རྒྱས་ཐམས་ཅད་ཀྱི་བརྩོན་འགྲུས་ཀྱི་སྟོབས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །གང་དུ་སེམས་བསྐྱེད་གཞན་དོན་དུ། །དགེ་བའི་རྩ་བ་བསྐྲུན་པ་ལས། །ལེ་ལོ་རྣམ་པར་སྤངས་པ་ཅན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མ་
ཞུམ་པས་སངས་རྒྱས་ཐམས་ཅད་ཀྱི་དྲན་པའི་སྟོབས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡང་དག་སྤྲོ་བ་ཚད་མེད་པ། །རྒྱུན་དུ་ཆོས་རྒྱུན་གཟུངས་ཐོབ་པས། །རྟག་
ཏུ་དགེ་བས་དུས་མཐའ་གང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྲེད་པའི་དྲི་མ་སྤངས་པས་སངས་རྒྱས་ཐམས་ཅད་ཀྱི་ཏིང་ངེ་འཛིན་གྱི་སྟོབས་རྡོ་རྗེའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་གཡེངས་པའི་དྲི་མ་བྲལ། །འཁྲིག་པ་བྲལ་བའི་བདེ་བ་རྒྱས། །གཞན་དུ་དགའ་བ་ཚད་མེད་པས། །དེ་ཉིད་གསང་བའི་
ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྤྱོད་པའི་ལམ་གྱིས་སངས་རྒྱས་ཐམས་ཅད་ཀྱི་ཤེས་རབ་ཀྱི་སྟོབས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་

89-1-197b

སེམས་འདི་གསུངས་སོ། །གང་དུ་ཤེས་རབ་འཆལ་སྤངས་ནས། །རབ་ཏུ་བྱེད་པ་ཐོགས་མེད་པ། །སྟོང་ཉིད་ཡེ་ཤེས་ཐུགས་རྗེའི་བདག་བྱང་ཆུབ་སེམས་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལྷ་ཐམས་ཅད་ཀྱིས་སྙན་པར་བསྒྲགས་པས་སངས་རྒྱས་ཐམས་
ཅད་ཀྱི་ཏིང་ངེ་འཛིན་ཡང་དག་པ་བྱང་ཆུབ་ཀྱི་ཡན་ལག་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །རྣམ་པ་ཀུན་དུ་ཁྱབ་པ་ཡི། །རང་རིག་ཡེ་ཤེས་འདུ་འབྲལ་མེད། །ཁྱད་
པར་མངོན་པར་རྟོགས་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་པོ་ཆེའི་སྟོབས་ཀྱིས་སངས་རྒྱས་ཐམས་ཅད་ཀྱི་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་
རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕྱིན་ཅི་མ་ལོག་ཁྱད་པར་ལ། །རང་གི་ལུས་དང་ལོངས་སྤྱོད་ཚོགས། །སེམས་ཅན་ཀུན་ལ་སྟེར་བས་ན། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཕྱག་ན་པད་མས་སངས་རྒྱས་ཐམས་ཅད་ཀྱི་དགའ་བ་ཡང་དག་བྱང་ཆུབ་ཀྱི་ཡན་ལག་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །ལྐོག་ཏུ་གྱུར་པ་ལས་འདས་ཤིང་། །གཞོན་ནུའི་བདེ་བ་རྟོག་བྲལ་བས། །ཟག་མེད་བདེ་བས་རྒྱས་གྱུར་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་དཔལ་རྡོ་རྗེ་འཛིན་པས་སངས་རྒྱས་ཐམས་ཅད་ཀྱི་ཤིན་དུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཉམས་པ་མེད་ཅིང་
འཕེལ་བའི་ཆོས། །བདེ་བ་དང་ནི་དགྱེས་སྤྱོད་པ། །ལྡང་བ་དང་ཡང་ཟོ་བདོག་བདེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགྲ་ལས་རྣམ་པར་རྒྱལ་བས་སངས་རྒྱས་
89-1-198a

ཐམས་ཅད་ཀྱི་ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟེན་འབྲེལ་ལུགས་འབྱུང་ལུགས་
བཟློག་པའི། །སྤྱི་དང་རང་གི་མཚན་ཉིད་ལས། །ཆོས་ཀུན་རྣམ་པར་འབྱེད་པ་ཡི། །རབ་ཏུ་མི་གནས་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འབྱོར་ལྡན་གྲགས་པས་སངས་རྒྱས་
ཐམས་ཅད་ཀྱི་དྲན་པ་ཡང་དག་བྱང་ཆུབ་ཀྱི་ཡན་ལག་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡེ་ཤེས་གོ་ཆ་དང་ལྡན་ཞིང་། །གོང་ནས་གོང་དུ་འཕེལ་བྱེད་པ། །དེ་ཉིད་འཕེལ་བར་གྱུར་པ་ནི། །
བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡུལ་འཁོར་བཟང་པོས་སངས་རྒྱས་ཐམས་ཅད་ཀྱི་བཏང་སྙོམས་ཡང་དག་བྱང་ཆུབ་ཀྱི་ཡན་ལག་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །མཁའ་དང་མཉམ་པའི་སེམས་ཅན་ལ། །ཕྱོགས་རིས་མེད་པར་ཁྱབ་པ་ཡི། །གཉིས་མེད་མཉམ་པར་གནས་པ་པོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་མེ་ཏོག་འོད་ཀྱིས་སངས་རྒྱས་ཐམས་ཅད་ཀྱི་ཡང་དག་པའི་ལྟ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕྱིན་ཅི་མ་ལོག་ཡེ་ཤེས་ནི། །མངོན་སུམ་དག་
པའི་ངོ་བོར་གྱུར། །ལྷག་པའི་སྡོམ་འཕེལ་འགྱུར་བ་ནི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སེང་གེའི་ང་རོས་སངས་རྒྱས་ཐམས་ཅད་ཀྱི་ཡང་དག་པའི་རྟོག་པ་རྡོ་རྗེའི་ཏིང་
ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་དཔའ་རྟོགས་པས་མི་ཕྱེད་པས། །ཀུན་སློང་ངན་པ་རྣམ་རྟོག་སྟེ། །བྱང་ཆུབ་སེམས་ཀྱི་རྗེས་འགྲོ་བས། །བསྒོམ་པར་བྱ་བའི་ཚུལ་འདི་

89-1-198b

བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཟླ་བ་ལྟར་ཤར་བས་སངས་རྒྱས་ཐམས་ཅད་ཀྱི་ཡང་དག་པའི་ངག་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མ་འདྲེས་དྲི་
མ་མེད་པ་ཡི། །རང་གི་ཡེ་ཤེས་དེར་སྟོན་མཛད། །རྣམ་པར་དག་པས་ཚུལ་བསྟན་པ། །བྱང་ཆུབ་དེ་ཉིད་བཤད་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་འཛིན་པའི་མཆོག་གིས་སངས་རྒྱས་ཐམས་
ཅད་ཀྱི་ཡང་དག་པའི་ལས་ཀྱི་མཐའ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདག་ཉིད་བྱང་ཆུབ་ཆེན་པོ་རུ། །རིང་བའི་ཆོས་དག་མངོན་གྱུར་པས། །ཕྱིར་མི་ལྡོག་པའི་སེམས་
ཐོབ་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མི་གཡོ་བས་སངས་རྒྱས་ཐམས་ཅད་ཀྱི་ཡང་དག་པའི་འཚོ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །ལུས་ངག་ཡིད་གསུམ་གཞན་དོན་དུ། །ངེས་པར་སྔོ་བ་བླ་ན་མེད། །ཡང་དག་དོན་ལ་རྒྱུན་སྤྱོད་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་ཕན་པ་དང་ལྡན་པར་གཤེགས་པས་སངས་རྒྱས་ཐམས་ཅད་ཀྱི་ཡང་དག་པར་རྩོལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཤིན་དུ་ངེས་པར་གཞན་གྱི་དོན། །
དངོས་དང་བརྒྱུད་པས་མཛད་པ་པོ། །རོ་མཉམ་ཡེ་ཤེས་རོལ་པ་ནི། །བྱང་ཆུབ་ཚུལ་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་བསོད་ནམས་སྟོབས་ཀྱིས་སངས་རྒྱས་ཐམས་ཅད་
ཀྱི་ཡང་དག་པའི་དྲན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐུགས་རྗེས་ཁྱད་པར་ཡུལ་གྱུར་པ། །བདེ་བ་ཉམས་པ་མེད་པ་དང་། །བསྟན་པ་སྙིང་པོ་འདྲེན་པ་པོ། །

89-1-199a

བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྒྲོན་མའི་རྒྱལ་པོས་སངས་རྒྱས་ཐམས་ཅད་ཀྱི་ཡང་དག་པའི་ཏིང་ངེ་འཛིན་རྡོ་རྗེའི་མཆོག་ཏུ་
དག་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕྲ་རགས་རྟོག་པ་མ་ལུས་པ། །ཆོས་ཀྱི་དབྱིངས་སུ་ནུབ་ནས་ནི། །ཟུང་འཇུག་ཆོས་སྤྱོད་ངང་གནས་པས། །བྱང་ཆུབ་ཚུལ་འདི་
བསྟན་པའོ་ཞེས་གསུངས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོའི་ཡེ་ཤེས་ཀྱི་སྣང་བ་མི་ཟད་པས་དུས་གསུམ་དུ་རྒྱུན་མི་འཆད་ཅིང་ཕྱོགས་བཅུ་ཀུན་དུ་ཁྱབ་པའི་དཀྱིལ་འཁོར་
གྱི་འཁོར་ལོ་མ་ལུས་ཤིང་ལུས་པ་མེད་པའི་གནས་ཀྱི་དབང་ཕྱུག་དམ་པས་སྟོན་པར་བྱེད་དོ། །དེ་ཉིད་དེ་བཞིན་གཤེགས་པ་ཐམས་ཅད་ལ་དགྱེས་པའི་མཆོག་སྩོལ་བས་དྲི་མ་མེད་པར་སྤྱོད་ལ། །འཕགས་པ་ཐམས་
ཅད་ལ་མཆོད་པ་དང་། སེམས་ཅན་ཐམས་ཅད་ཡོངས་སུ་སྨིན་པའི་ལམ་མཚུངས་པ་མེད་པར་ཚད་མེད་པའི་འོད་ཟེར་དུ་མས་སྣང་བ་དང་ཡོངས་སུ་དག་པར་བྱེད་པ་ཉིད་དེ། །འདིར་གསང་བ་ཆེན་པོའི་ཚུལ་ལ་ཕྱིན་ཅི་མ་
ལོག་པས་གནས་ཤིང་བྱང་ཆུབ་ཀྱི་སེམས་རྡོ་རྗེ་ལས་ངེས་པར་ཐོབ་པ་སྟོན་པ་ནི་སངས་རྒྱས་ཐམས་ཅད་ཀྱི་སྟོན་པ་ཡིན། བླ་མ་ཡིན། བཀུར་གནས་ཡིན། དེ་བཞིན་གཤེགས་པ་ཐམས་ཅད་ཀྱི་འབྱུང་གནས་ཡིན་
ཡེ་ཤེས་མི་ཟད་པའི་གཏེར་ཡིན། མཚུངས་པ་མེད་པའི་རྒྱ་མཚོ་ཡིན། ཡོན་ཏན་དྲི་མ་མེད་པའི་གླིང་ཡིན། གཟི་བརྗིད་མི་ཟད་པའི་ཉི་མ་ཡིན། རིན་ཆེན་དུ་མའི་རྒྱལ་མཚན་ཡིན། མི་ཤེས་པའི་རབ་རིབ་སེལ་བའི་ཟླ་བ་
ཡིན། མུན་པ་ལ་གནས་པའི་སྒྲོན་མེ་ལྟ་བུ་ཡིན། ནད་ཐམས་ཅད་ཞི་བར་ནུས་པའི་སྨན་པའི་རྒྱལ་པོ་ཆེན་པོ་ཡིན། སྲིད་པ་ལས་སྒྲོལ་བར་བྱེད་པའི་གྲུ་ཆེན་པོ་ཡིན། དགོས་འདོད་དུ་མའི་གཞི་རིན་པོ་ཆེ་

89-1-199b

བསམ་འཕེལ་ཡིན། ཕུན་སུམ་ཚོགས་པ་དུ་མའི་ལྗོན་ཤིང་ཆེན་པོ་ཚད་མེད་པས་སྐྱོབ་པ་ཉིད་དེ་བྱང་ཆུབ་ཀྱི་སེམས་རྡོ་རྗེས་རྒྱུད་རྒྱས་པར་བྱེད་པའི་བླ་མ་ནི་བྱང་ཆུབ་ཀྱི་སེམས་རྡོ་རྗེ་དང་ཐ་དད་མེད་ཅིང་དབྱེར་མེད་པ་ཉིད་དོ། །
འདིས་ནི་རིམ་པ་ངེས་པར་སྟོན་པ་ནི་འདི་ལྟ་སྟེ། ཆོས་ཐམས་ཅད་ཀྱི་ལམ་མ་ལུས་པ་རྫོགས་པར་བྱེད་པ་འདི་ཉིད་དེ་དཀར་པོ་རྣམ་པར་མཐོང་བའི་ས་དང་། རིགས་ཀྱི་ས་དང་། བརྒྱད་པའི་ས་དང་། སྲབས་པའི་ས་དང་། 
མཐོང་བའི་ས་དང་། འདོད་ཆགས་དང་བྲལ་བའི་ས་དང་། བྱས་པ་རྟོགས་པའི་ས་དང་། བསྲུང་བའི་ས་ཐམས་ཅད་ཡོངས་སུ་རྫོགས་པར་བྱེད་དོ། །མོས་པར་སྤྱོད་པ་དང་། འཇུག་པའི་སྒོ་ལ་སྤྱོད་པ་དང་། ལམ་གནས་པ་
ལ་སྤྱོད་པ་རྫོགས་པར་བྱེད་དོ། །རབ་ཏུ་དགའ་བ་དང་དྲི་མ་མེད་པ་དང་། འོད་འཕྲོ་བ་དང་། འོད་བྱེད་པ་དང་། སྦྱང་དཀའ་བ་དང་། མངོན་དུ་གྱུར་པ་དང་། རིང་དུ་སོང་བ་དང་། མི་གཡོ་བ་དང་། ལེགས་པའི་བློ་གྲོས་དང་། ཆོས་ཀྱི་
སྤྲིན་གྱི་བར་དུ་ཡེ་ཤེས་ཡོངས་སུ་རྫོགས་པར་བྱེད་དོ། །དཔེ་མེད་པའི་ས་དང་། ཡེ་ཤེས་ཆེན་པོའི་ས་དང་། དཔལ་རྡོ་རྗེ་འཛིན་པའི་བར་དུ་མ་ལུས་པའི་ཡེ་ཤེས་ཐམས་ཅད་ཡོངས་སུ་རྫོགས་པར་བྱེད་པ་ཉིད་དེ། མངོན་
པར་འབྱུང་བ་རོལ་པའི་གསང་བ་བསམ་གྱིས་མི་ཁྱབ་པའི་སྤྱོད་ཡུལ་སྟོན་པ་ཉིད་དོ། །དེ་ཕྱིར་ཀུན་ནས་ཀུན་དུ་ངེས་པར་བླ་མ་ལ་མཆོད་ཅིང་བརྟེན་པར་བྱ་བ་ལ་འབད་པ་ཉིད་དོ། །འདི་དག་གིས་ཀྱང་ལུས་གཅིག་
གིས་ཡེ་ཤེས་དུ་མ་ཡོངས་སུ་སྡུད་པར་བྱེད་པའི་ཕྱིར་ཚེ་གཅིག་གིས་མངོན་དུ་བྱེད་པར་འགྱུར་རོ། །ཞེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་
པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་གསང་བ་བླ་ན་མེད་པའི་ལམ་ཡོངས་སུ་རྫོགས་པར་སྟོན་པའི་ལེའུ་སྟེ་ལྔ་བཅུ་བརྒྱད་པའོ།། །། དེ་ནས་དེ་བཞིན་

89-1-200a

གཤེགས་པ་དབྱངས་ཀྱིས་བསྐུལ་བས་སངས་རྒྱས་ཐམས་ཅད་ཀྱི་ཡེ་ཤེས་རིན་པོ་ཆེའི་མཛོད་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གསུང་བ་
འཛིན་པ་མ་ལུས་པ། །ཡེ་ཤེས་ཆུ་དང་འོ་མ་བཞིན། །སྔ་ཕྱི་གཅིག་ཏུ་འདྲེས་པ་ཡི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཽ་ཏ་མ་ཡེ་ཤེས་མངོན་པར་
རོལ་པས་སངས་རྒྱས་ཐམས་ཅད་ཀྱི་རྡོ་རྗེའི་སྤྲིན་གྱི་འོད་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་འབྱུང་བའི་ཡེ་ཤེས་ཀྱིས། །སྐུ་ཡི་རྡོ་རྗེའི་རོལ་པ་
གང་། །མ་སྐྱེས་དེ་བཞིན་ཉིད་སྦྱོར་བས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མདངས་སྟོབས་ཀྱིས་སངས་རྒྱས་ཐམས་ཅད་ཀྱི་རྡོ་རྗེ་ཡེ་ཤེས་ཀྱི་ཆུ་བོ་འབྱུང་བ་རྡོ་
རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བརྗོད་པ་ཐ་སྙད་བྲལ་བ་ཡི། །གསུང་གི་རྡོ་རྗེའི་དབང་ཕྱུག་གང་། །སྐྱེ་མེད་ངོ་བོ་ཉིད་སྟོན་པས། །བྱང་ཆུབ་ཚུལ་འདི་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པ་བློ་གནས་པའི་རང་བཞིན་གྱིས་སངས་རྒྱས་ཐམས་ཅད་ཀྱི་ཡེ་ཤེས་ཀྱི་རྡོ་རྗེས་ལོག་ལྟའི་རི་བོ་འཇོམས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་
ཆུབ་ཀྱི་སེམས་འདི་གསུངས་སོ། །རྣམ་པར་རྟོག་ལས་གྲོལ་བ་ཡི། །ཡེ་ཤེས་ཕུང་པོའི་རང་བཞིན་ཅན། །མཉམ་ཉིད་བྱང་ཆུབ་མི་ཕྱེད་པས། །ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་ཟླ་བ་བཟང་པོས་སངས་རྒྱས་ཐམས་ཅད་ཀྱི་རྡོ་རྗེ་ཡེ་ཤེས་ཀྱི་སྤྱོད་པ་ཀུན་དུ་རོལ་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཟབ་མོའི་གནས་ལ་བསམ་

89-1-200b

གཏན་གང་། །བྱང་ཆུབ་སེམས་དཔའི་ཚོགས་ཆེན་གྱིས། །ཤིན་དུ་དགྱེས་པར་སྤྱོད་པ་ནི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བྱང་ཆུབ་མེ་ཏོག་གིས་སངས་རྒྱས་ཐམས་
ཅད་ཀྱི་འབྱུང་བར་སྟོན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གནས་ལུགས་དེ་བཞིན་ཉིད་སྟོང་པས། །རྒྱུ་དང་རྐྱེན་ལས་རྣམ་གྲོལ་ཉིད། །མ་འགགས་ཐ་སྙད་
རྙོག་པ་མེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བཀྲ་ཤིས་སྙིང་པོས་སངས་རྒྱས་ཐམས་ཅད་ཀྱི་ཚད་མེད་ཡེ་ཤེས་སྟོན་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟོགས་པར་བྱ་བའི་དོན་དམ་ནི། །རྟེན་འབྲེལ་མཚན་ཉིད་སྟོན་པ་ལས། །སྟོང་ཉིད་ཡེ་ཤེས་ཆོས་ཀྱི་སྐུ། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་ལེགས་སྟོབས་ཀྱིས་སངས་རྒྱས་ཐམས་ཅད་ཀྱི་དམིགས་པ་རབ་ཏུ་ཞི་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དམིགས་སུ་མེད་པའི་དོན་
དམ་ནི། །བསམ་པ་ཤེས་བརྗོད་ཡུལ་འདས་པ། །དམིགས་པ་ཀུན་ལས་འདས་པ་སྟེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་གཟི་བརྗིད་ཀྱིས། སངས་རྒྱས་
ཐམས་ཅད་ཀྱི་འཛམ་བུའི་ཆུ་བོའི་འོད་ཟིལ་གནོན་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཇིག་རྟེན་སྲིད་པའི་བརྟེན་པ་དང་། །གཡོ་བའི་སྣ་ཚོགས་གང་
འབྱུང་བ། །དཔག་མེད་འདི་ཡིས་གནོན་པ་པོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྟོབས་ཀྱི་རྩལ་གྱིས་སངས་རྒྱས་ཐམས་ཅད་ཀྱི་བསྐལ་པ་འཁོར་བའི་

89-1-201a

མུན་པ་སེལ་བྱེད་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདག་དང་བདག་གིར་འཛིན་པ་ཡི། །བློ་ཡི་མུན་པ་མ་ལུས་པ། །ཡེ་ཤེས་སྣང་བས་འཇོམས་པར་
མཛད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགེ་བའི་སྒྲོན་མེས་སངས་རྒྱས་ཐམས་ཅད་ཀྱི་འགྲོ་བའི་དོན་མཛད་སྒྲོན་མེ་འབར་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འོད་གསལ་ཤེས་རབ་མེ་འབར་བས། །ཉོན་མོངས་མ་ལུས་ཁྱོད་ཀྱིས་བསྲེགས། །ཟག་པའི་དྲི་མ་སེལ་མཛད་པ། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་མཐུ་རྩལ་སྟོན་པས་སངས་རྒྱས་ཐམས་ཅད་ཀྱི་ཐོགས་མེད་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདུད་སྡེ་ཤིན་ཏུ་མི་
ཟད་པ། །ཐམས་ཅད་འདུལ་མཛད་དཔའ་བོ་ཆེ། །སྟོབས་ཆེན་འཇིག་རྟེན་གསུམ་ལས་རྒྱལ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལྷ་སྒྲ་ཐུབ་པས་སངས་རྒྱས་
ཐམས་ཅད་ཀྱི་གདུལ་དཀའ་མ་ལུས་པ་འདུལ་བར་མཛད་པ་རྡོ་རྗེ་སངས་རྒྱས་ཐམས་ཅད་ཀྱི་སྟོབས་མཆོག་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བྱམས་པའི་ཏིང་འཛིན་
གྱིས། །སྙིང་རྗེའི་ཡུལ་གྱུར་གཟིགས་ནས་ནི། །ཕ་རོལ་རྟོག་པ་རྩད་གཅོད་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རབ་ཏུ་ཞི་བས་སངས་རྒྱས་ཐམས་ཅད་ཀྱི་ལྷག་
པར་གནས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཚུངས་མེད་སྟོན་པ་གཅིག་པ་དང་། །དུ་མ་ལས་ནི་ཡོངས་གྲོལ་ཞིང་། །ཀུན་རྫོབ་ཐ་སྙད་ཟད་བྱེད་པ། །བྱང་ཆུབ་

89-1-201b

ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཉི་མའི་ཞལ་གྱིས་སངས་རྒྱས་ཐམས་ཅད་ཀྱི་ཀུན་ནས་དག་པའི་ཀློང་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །ཀུན་ནས་སངས་རྒྱས་མ་ལུས་པའི། །བསྟན་པ་གཞན་དོན་ཕྱིར་འབྱུང་བ། །ཐུབ་པ་བརྡལ་བ་ཆེན་པོར་འབྱུང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
ཐར་པ་ཐར་པའི་བརྟུལ་ཞུགས་ཀུན་ནས་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བཅུ་གཉིས་སྤྱོད་པའི་ཚུལ་གྱིས་ནི། །ཡོན་ཏན་སྡུད་པའི་ཚུལ་
འཆང་བ། །དམིགས་མེད་ཀུན་རྫོབ་དག་པ་ཆེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚུལ་ཁྲིམས་དྲི་མེད་འོད་ཀྱིས་སངས་རྒྱས་ཐམས་ཅད་ཀྱི་ཞལ་བཟངས་རྒྱས་པ་རྡོ་རྗེའི་ཏིང་
ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་ནས་ཞལ་གྱི་སྣང་བའི་སྒོ། །དཔག་མེད་ཞལ་དང་ཕྱག་རྒྱ་དག །དུ་མར་སྣང་བའི་སྟོན་པ་པོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་བརྟུལ་ཞུགས་གནས་ཀྱིས་སངས་རྒྱས་ཐམས་ཅད་ཀྱི་ཚུལ་ཟབ་པར་སྟོན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དྲང་སྲོང་སྤྱོད་པ་
གཙང་མའི་གནས། །རི་སུལ་གནས་ལ་བརྟེན་པ་ཡི། །ཆོག་ཤེས་བག་ཡོད་སྙེངས་བྲལ་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྡུལ་མེད་པས་སངས་རྒྱས་ཀྱི་སྣང་
མེད་འོད་ཀྱི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཞི་བ་སྤྲོས་བྲལ་མཁའ་ལྟ་བུ། །མཐའ་དབུས་མེད་པའི་ངོ་བོ་ཉིད། །གོ་འབྱེད་ཡེ་ཤེས་ལྷུན་གྱིས་གྲུབ། །བྱང་ཆུབ་

89-1-202a

ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྙིང་པོ་འཕགས་ཀྱིས་སངས་རྒྱས་ཐམས་ཅད་ཀྱི་མངོན་པར་རྟོགས་པ་བསམ་གྱིས་མི་ཁྱབ་པ་རྡོ་རྗེའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་མི་རྟོག་རང་བྱུང་བ། །སྣང་ལ་རང་བཞིན་མེད་པ་ནི། །མ་གྲུབ་གྲུབ་པའི་ལམ་གྱུར་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །སེམས་བསྐྱེད་
ངེས་པ་དང་པོ་སྟེ། །ཚོགས་བསགས་པ་ནི་ཟུང་འབྲེལ་འབྱུང་། །ཚད་མེད་དྲོད་ལ་སོགས་པར་འགྱུར། །སྟོང་ཉིད་ཡེ་ཤེས་མཐོང་བ་ཉིད། །དང་པོར་རྡོ་རྗེ་སེམས་དཔའ་ནས། །དཀྱིལ་འཁོར་ཡོངས་རྫོགས་གོམས་བྱེད་
པས། །བསྡུ་བ་ཡོངས་སུ་དག་པ་ཉིད། །བླ་ན་མེད་པའི་ཚུལ་ཉིད་དོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་སངས་རྒྱས་ཐམས་ཅད་ཀྱི་རྣལ་འབྱོར་
ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་ཡེ་ཤེས་ངེས་པར་བྱེད་པ་གནས་གཏན་ལ་དབབ་པའི་དོན་གྱི་ལེའུ་སྟེ་ལྔ་བཅུ་དགུ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་མིག་སྨན་རྒྱལ་པོས་
སངས་རྒྱས་ཐམས་ཅད་ཀྱི་སྙིང་པོ་ཡོན་ཏན་ཐམས་ཅད་ཀྱི་འབྱུང་གནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྟོང་པའི་མཚན་ཉིད་མཚོན་པ་ལས། །ཆུ་ཤིང་
སྙེ་མའི་བདུད་རྩི་བཞིན། །སྙིང་པོ་མེད་པའི་སྙིང་པོར་གྱུར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འཕེལ་བར་མཛད་པས་སངས་རྒྱས་ཐམས་ཅད་ཀྱི་ཀུན་ཏུ་
རོལ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་ཤེས་ཡེ་ཤེས་གཟུགས་ཅན་ནི། །མཚན་མ་མེད་པའི་རྣམ་པ་ཅན། །དྲི་མེད་ས་བོན་འབྱུང་

89-1-202b

གནས་ལས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྤོས་ཀྱི་འོད་སངས་རྒྱས་ཐམས་ཅད་ཀྱི་ཡེ་ཤེས་མངོན་པར་རྟོགས་པའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །འདི་ནི་རྫོགས་པའི་བྱང་ཆུབ་ལམ། །འོད་ཟེར་ཀུན་དུ་འབར་བཅས་པས། །ནཱ་ད་འཛིན་མེད་གཉུག་མར་གྲོལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་
ནས་དེ་བཞིན་གཤེགས་པ་དུས་མཁྱེན་འོད་སངས་རྒྱས་ཐམས་ཅད་ཀྱི་ཙན་དན་གྱི་དྲི་རྒྱལ་པོ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྔོན་དུ་འགྲོ་བ་ཡིད་ཡིན་
ཏེ། །ཡིད་ཀྱི་འཇུག་པའི་རང་བཞིན་རྣམས། །དག་པ་གསང་བ་ཆེན་པོ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དྲན་པའི་དབང་པོ་སངས་རྒྱས་ཐམས་ཅད་ཀྱི་
ཐོགས་མེད་སྤྱོད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མི་གཡོ་འགོག་པའི་ལམ་སྤངས་ཤིང་། །མ་རིག་རྡུལ་དང་བྲལ་བ་ཡིན། །སྙིང་གི་པད་མ་སད་བྱེད་པ། །བྱང་
ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐོགས་པ་མེད་པའི་རྒྱལ་མཚན་སངས་རྒྱས་ཐམས་ཅད་ཀྱི་ཡེ་ཤེས་ཡང་དག་པར་སྡུད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་
ཏེ་བྱང་ཆུབ་ཀྱི་སེམས་འདི་གསུངས་སོ། །མཚན་མ་མེད་པའི་སྐུ་གཅིག་པུ། །ཉོན་མོངས་བྲལ་བའི་ཕྱག་རྒྱ་ཆེ། །དོགས་པ་མེད་པར་རྟེན་ཅིང་འབྱུང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་བྱང་ཆུབ་མཆོག་བགྲོད་རྡོ་རྗེ་སངས་རྒྱས་ཐམས་ཅད་ཀྱི་དོན་ཕུན་སུམ་ཚོགས་པ་འབྱུང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མི་རྟག་སྡུག་བསྔལ་

89-1-203a

བདག་མེད་དང་། །ཞི་བའི་ཚུལ་གྱིས་ཐབས་མཁས་པས། །སེམས་ཅན་ཇི་སྲིད་སྐྱོ་བསྐྱེད་པའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྤྱོད་པ་གསལ་བ་
སངས་རྒྱས་ཐམས་ཅད་ཀྱི་མཆོག་ཏུ་སྤྲུལ་པ་ངོ་བོ་ཉིད་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་འཇིག་རྟེན་མ་ལུས་པའི། །སེམས་ཅན་ཁམས་དང་བསམ་པ་
དང་། །བག་ལ་ཉལ་བ་མཁྱེན་པས་ནི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་དགྱེས་པས་སངས་རྒྱས་ཐམས་ཅད་ཀྱི་ཡུལ་དམིགས་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཚད་མེད་ཐུགས་རྗེའི་དབང་གྱུར་པས། །སྣ་ཚོགས་འདུལ་བའི་ཚུལ་ཅན་གྱིས། །ཆོས་ཀྱི་དབྱིངས་དང་ཚུལ་གཅིག་པར། །འགྲོ་དོན་དེ་ཉིད་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་ཆོས་ཀྱི་དབང་ཕྱུག་སངས་རྒྱས་ཐམས་ཅད་ཀྱི་དེ་ཁོ་ན་ཉིད་ཀྱི་རྣམ་པར་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐུབ་པའི་སེམས་
ཅན་ཐམས་ཅད་ཀུན། །མ་ལུས་ཟད་མེད་དབྱིངས་ཉིད་དུ། །མ་གྱུར་དེ་སྲིད་བཞུགས་མཛད་ཅིང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལྷ་ཐམས་ཅད་པའི་རྒྱལ་བ་
སངས་རྒྱས་ཐམས་ཅད་ཀྱི་ཆོས་ཉིད་གཅིག་པའི་ཚུལ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འགྲོ་བ་གཅིག་ཀྱང་མ་ལུས་པར། །ཡེ་ཤེས་དབྱིངས་སུ་མ་གྱུར་
ཚེ། །མྱ་ངན་འདའ་བ་སྟོན་མི་མཛད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བཤེས་གཉེན་ཆེན་པོས་སངས་རྒྱས་ཐམས་ཅད་ཀྱི་ཡེ་ཤེས་བསོད་ནམས་གཞལ་

89-1-203b

དུ་མེད་པའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་དང་གཞན་དང་བདག་དང་ནི། །བདག་གིར་འཛིན་པའི་གཉིས་སྣང་ཞིང་། །གཉིས་མེད་མཉམ་པར་རབ་སྦྱོར་བས། །བྱང་
ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བཟང་པོའི་བཤེས་གཉེན་སངས་རྒྱས་ཐམས་ཅད་ཀྱི་དཔག་མེད་བདེ་བའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །གང་དུ་ཕན་པ་འབྱུང་བའི་གནས། །རང་བཞིན་འོད་གསལ་འགྱུར་མེད་པས། །གཅིག་ལས་དུ་མར་སྤྲུལ་པ་དག །བྱང་ཆུབ་ངང་ལས་སྤྲུལ་པ་ཡིན་ཞེས་གསུངས་སོ། །དེ་ནས་དེ་བཞིན་
གཤེགས་པ་རབ་ཏུ་ཞི་བའི་སྟོབས་སངས་རྒྱས་ཐམས་ཅད་ཀྱི་འགྲོ་དྲུག་འདུལ་བའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ཅན་མ་ལུས་སྲོག་གྱུར་
པ། །སྙིང་པོ་བདུད་རྩི་བྱང་ཆུབ་སེམས། །འཕོ་བ་མེད་པར་རང་འདིར་རྒྱལ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བདུད་རྩིའི་བདག་པོས་སངས་རྒྱས་ཐམས་ཅད་
ཀྱི་རྒྱལ་བ་འགྲོ་བ་སྐྱོབ་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡང་དག་ཚད་མེད་བཞི་ལྡན་པས། །རྒྱུ་དང་ལམ་དང་ཡུལ་གྱིས་ནི། །དམིགས་བཅས་
དམིགས་མེད་རིམ་པ་དག །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལྷུན་པོའི་འོད་སངས་རྒྱས་ཐམས་ཅད་ཀྱི་མཛེས་པ་བླ་ན་མེད་པ་རྡོ་རྗེའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདུས་མ་བྱས་ཤིང་རྣམ་དབྱེ་མེད། །ཆོས་ཉིད་ངོ་བོ་ཉིད་འབྱུང་བ། །དག་པའི་ཕྱིར་ན་འོད་གསལ་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །

89-1-204a

དེ་ནས་དེ་བཞིན་གཤེགས་པ་འཕགས་པས་བསྟོད་པ་དྲི་མ་མེད་པ་ཡོངས་སུ་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ཉིད་ཉོན་མོངས་ཅན་མིན་པ། །བློ་བུར་དྲི་མ་རླུང་ལས་བྱུང་། །དེས་བླངས་
འཛིན་པས་རྣམ་འཁྲུལ་ཏེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྣང་ལྡན་སངས་རྒྱས་ཐམས་ཅད་ཀྱི་ལྷན་ཅིག་ཏུ་འབྱུང་བ་ཡེ་ཤེས་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་
སོ། །ཆོས་ཉིད་ངང་ལ་རང་གནས་པའི། །རླུང་ནི་ཕྲ་བར་འཇུག་བྱེད་ཅིང་། །དག་པ་ཡེ་ཤེས་ཚུལ་དུ་འཇུག །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་འབར་བས་སངས་རྒྱས་ཐམས་ཅད་ཀྱི་དག་པ་ཆེན་པོ་རྡོ་རྗེའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཐའ་གཉིས་ལས་ནི་རྣམ་པར་གནས། །སྒྲིབ་གཉིས་སྙོམས་པར་འཇུག་བཅས་པ། །ལྷན་ཅིག་འབྱུང་བ་མི་གནས་པས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་
ནས་དེ་བཞིན་གཤེགས་པ་སྣང་བ་གཟིགས་སངས་རྒྱས་ཐམས་ཅད་ཀྱི་རྒྱལ་བ་ཡེ་ཤེས་གསང་བའི་མཛོད་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡེ་ཤེས་རྒྱ་མཚོའི་ངང་ཉིད་ལས། །དབའ་རླབས་
སྣ་ཚོགས་ཆོ་འཕྲུལ་སྟོན། །འདི་ཉིད་ཡོན་ཏན་འབྱུང་བའི་གཞི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །རྟོག་མེད་ཡེ་ཤེས་དབྱིངས་གྱུར་པ། །ནམ་མཁའི་ཀུན་དུ་རྟོག་བྲལ་བས། །རླུང་སེམས་མཉམ་པར་གྱུར་པས་ན། །མཚུངས་
མེད་ནོར་བུའི་གཏེར་མཆོག་འགྱུར། །ཆོས་ཉིད་ངང་དུ་བཞུགས་པ་དག །ཐུན་མོང་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་
སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་སངས་རྒྱས་ཐམས་ཅད་ཀྱི་ནོར་བུའི་ཏོག་གི་རྒྱལ་པོའི་ངོ་བོའི་ལེའུ་སྟེ་དྲུག་བཅུ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ལེགས་སྤྱོད་རྣམ་པར་སྨིན་པའི་

89-1-204b

རྒྱལ་པོ་སངས་རྒྱས་ཐམས་ཅད་ཀྱི་ཆ་མེད་ཕྱོགས་ཆས་སྟོད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་བྱུང་ཡེ་ཤེས་གནས་མེད་རྒྱལ། །མཐའ་དབུས་ལས་གྲོལ་
དེ་བཞིན་ཉིད། །སངས་རྒྱས་ཉིད་ཀྱིས་མི་གཟིགས་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལེགས་དགྱེས་རྡོ་རྗེ་སངས་རྒྱས་ཐམས་ཅད་ཀྱི་དགོངས་པ་གཅིག་ཏུ་
འགྱུར་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མི་གཉིས་ཐ་དད་མེད་པའི་ཆོས། །གསང་བ་ངོ་བོ་ཉིད་དག་པར། །སྐྱེ་བ་མེད་ལ་ཆོས་འབྱུང་བ། །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མྱ་ངན་བྲལ་སངས་རྒྱས་ཐམས་ཅད་ཀྱི་རབ་ཏུ་ཉམས་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་
པར་དམིགས་པ་རྟོག་བྲལ་ཏེ། །ཀུན་ནས་ཟག་མེད་འཕེལ་མེད་པས། །ཡོན་ཏན་རྒྱལ་བས་བསྡུས་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་འོད་སངས་
རྒྱས་ཐམས་ཅད་ཀྱི་ཡེ་ཤེས་ཡང་དག་པར་འདུ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདིར་ནི་མི་རྟོག་ཡེ་ཤེས་ཉིད། །མཉམ་བཞག་རྗེས་ཐོབ་རྩོལ་བྲལ་ནས། །
གཉིས་མི་གཟིགས་པས་རབ་ཏུ་སྐྱེ། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྤྱོད་པ་དང་ལྡན་པ་རྡོ་རྗེ་སངས་རྒྱས་ཐམས་ཅད་ཀྱིས་ཡིད་ལ་མི་བྱེད་པ་རྡོ་རྗེའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡིད་ལ་བྱེད་པ་མཚན་མར་བྱུང་། །དེ་ཉིད་དངོས་མེད་རྟོག་བྲལ་བས། །ཡིད་ལ་མི་བྱེད་བདེ་བ་ཆེ། །རང་བྱུང་ཚུལ་འདི་བསྟན་པའོ་ཞེས་

89-1-205a

གསུངས་སོ། །དེ་ནས་དེ་བཞིན་གཤེགས་པ་བསོད་ནམས་སྟོབས་སངས་རྒྱས་ཐམས་ཅད་ཀྱི་ཀུན་ནས་འབྲེལ་པ་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །གང་དུ་བདག་ཉིད་གཅིག་པ་དང་། །རྒྱུ་འབྲས་ཐབས་དང་ཐབས་བྱུང་དང་། །དེ་ལས་བྱུང་བའི་ཚུལ་མེད་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་
ཡོན་ཏན་རྒྱ་མཚོ་སངས་རྒྱས་ཐམས་ཅད་ཀྱི་ཡང་དག་ཡེ་ཤེས་དྲ་བ་འཛིན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་པོར་འཛིན་པ་དག་བྱེད་ཅིང་། །དངོས་མེད་ཕྲ་བར་འབྱུང་
བ་ནི། །མི་སླུ་འབྱུང་བ་དགྲ་བཅོམ་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྨད་དུ་བྱུང་བ་སངས་རྒྱས་ཐམས་ཅད་ཀྱིས་དངོས་པོའི་ཆོས་ཉིད་དག་པ་རྡོ་རྗེའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གཅིག་དང་དུ་མ་ལས་གྲོལ་བ། །གཉིས་མེད་མཐོང་བས་ཡོངས་སུ་བསྒོམ། །དེ་ཉིད་རྒྱུན་ཆད་མེད་གྱུར་པས། །རྟེན་ཅིང་འབྲེལ་འབྱུང་
དོན་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ང་རྒྱལ་སྤོང་སངས་རྒྱས་ཐམས་ཅད་ཀྱི་ཡེ་ཤེས་མི་ཟད་པའི་གནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །འདི་ནི་ཡོངས་སུ་དག་པའི་ལམ། །བར་ཆད་མེད་པར་མཐའ་ཕྱིན་པར། །རྣམ་ཤེས་ཕུང་པོའི་ཡེ་ཤེས་འབྱུང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་
བདུད་རླག་པར་མཛད་པ་བདུད་འདུལ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་དང་དངོས་མེད་ལས་གྲོལ་ཞིང་། །སེམས་དང་སེམས་ལས་བྱུང་བ་ཡི། །

89-1-205b

འདུ་བྱེད་དག་པའི་སེམས་པ་གང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆགས་པ་ཐམས་ཅད་ལས་ཡང་དག་པར་རྒལ་བའི་སྟོབས་སངས་རྒྱས་ཐམས་ཅད་ཀྱི་ཕྱི་ནང་
དུ་གནས་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྒྱུ་མའི་རྣམ་པ་ལྟ་བུས་ཀྱང་། །བདེ་དང་སྡུག་བསྔལ་ཀུན་བྱེད་དེ། །རྒྱུ་འབྲས་བྱེད་པས་སོ་སོར་སྨིན། །དེ་
བས་བྱང་ཆུབ་སེམས་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མི་ཕྱེད་པའི་བློ་མངའ་བ་སངས་རྒྱས་ཐམས་ཅད་ཀྱི་རྡོ་རྗེའི་སྐུ་སྟོན་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །སྣང་སྟོང་ཐ་དད་མེད་པ་ཡི། །ངོ་བོ་རོ་མཉམ་སྒྱུ་མའི་དངོས། །དུས་གསུམ་དངོས་ལས་འདས་པའི་ཆོས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་རྒྱ་མཚོའི་དཔལ་སངས་རྒྱས་ཐམས་ཅད་ཀྱི་དཔའ་བོའི་འཁོར་ལོ་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །བདེན་པ་བརྫུན་པ་ལས་འདས་ཤིང་། །
དངོས་སྟོང་དྲི་ཟའི་གྲོང་མཚུངས་དང་། །བྱེད་པ་སྤངས་པའི་ཚུལ་འདི་ནི། །དེ་ཉིད་ཡེ་ཤེས་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དག་ཅིང་དགའ་བར་མཛད་པ་སངས་རྒྱས་ཐམས་ཅད་ཀྱི་ཡེ་
ཤེས་གྲུབ་པ་མེད་པའི་ཆོས་ཀྱི་ཚུལ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐྱེ་བ་འདི་ནི་མ་སྐྱེས་པས། །རང་རིག་བདག་ཉིད་ཇི་ལྟར་བསྐྱེད། །དངོས་མེད་
གནས་ལས་གྲོལ་བྱའི་ཕྱིར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཚོགས་ཅན་བླ་མེད་སངས་རྒྱས་ཐམས་ཅད་ཀྱི་བདུད་རྩིའི་ཕྲེང་བ་དག་པ་རྡོ་རྗེའི་ཏིང་ངེ་འཛིན་

89-1-206a

ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །མོས་པ་དམན་པའི་སེམས་ཅན་ལ། །ཉན་ཐོས་རང་རྒྱལ་ལ་སོགས་པ། །རྫས་སུ་གྲུབ་འདོད་དེ་བྲལ་ཆོས། །སྟོང་ཉིད་ཙམ་དུའང་བསྟན་
པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་གྲོལ་བའི་རྒྱལ་པོ་སངས་རྒྱས་ཐམས་ཅད་ཀྱི་སྤྲོས་པ་མེད་པའི་ཚུལ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐོབ་པ་མེད་ཅིང་
འབྲེལ་མེད་པ། །བྱེ་བྲག་མདོ་སྡེའི་རིགས་ལས་འདས། །སེམས་ཙམ་དུ་ཡང་བཤད་པས་ན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགའ་བའི་འོད་སངས་རྒྱས་ཐམས་ཅད་
ཀྱི་དོན་ཡོངས་སུ་སྡུད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདྲེན་པའི་ཐར་ལམ་གསང་བ་ནི། །སྐྱོན་མེད་ཤིན་ཏུ་ཡོངས་གསལ་བར། །ཐུབ་པ་ཉི་མ་བདེ་བའི་
ལམ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བྱང་ཆུབ་རྒྱལ་མཚན་སངས་རྒྱས་ཐམས་ཅད་ཀྱི་རིན་པོ་ཆེའི་རི་རབ་ཀྱི་ཟོམ་ལ་གནས་པའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རིང་གནས་ས་གསུམ་གནས་པ་ཡི། །ཡེ་ཤེས་དཔག་མེད་ནོར་བུ་ཡིས། །བློ་ཡི་གཏེར་དང་མཚུངས་པར་འགྱུར། །བྱང་ཆུབ་ཚུལ་འདི་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་རིན་ཆེན་སངས་རྒྱས་ཐམས་ཅད་ཀྱི་ཕྲིན་ལས་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གང་དུ་
བྱང་ཆུབ་མཆོག་གནས་པ། །རྒྱལ་བ་བྱེ་བ་ཁྲག་ཁྲིག་གིས། །བསྔགས་པས་ཡིད་འོང་ཚིག་གཅིག་ཏུ། །བྱང་ཆུབ་ཚུལ་འདི་ལེགས་བསྟན་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་

89-1-206b

ཤིན་ཏུ་བསིལ་བ་སངས་རྒྱས་ཐམས་ཅད་ཀྱིས་འགྲོ་བའི་སྨན་གྱི་སྙིང་པོ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དྲི་མེད་ཞི་བའི་ངོ་བོ་ཉིད། །རྣམ་པ་ཀུན་ཏུ་འགྲོ་བ་ཡི། །
དྲི་མ་སེལ་མཛད་སྨན་ཆེན་པོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །ཆོས་རྣམས་ཡིད་ལ་བྱེད་པ་ཀུན་བྲལ་བའི། །གཟུགས་ཅན་མ་ཡིན་དངོས་པོར་མ་གྲུབ་པ། །སྟོང་པ་གཅིག་
པུར་མི་གནས་མཉམ་པ་ཉིད། །ཆོས་ཉིད་བདག་མེད་འདི་ནི་རྟོགས་པར་བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་དཔལ་རྣལ་འབྱོར་ཆེན་པོ་
གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་དེ་བཞིན་ཉིད་ཡིད་ལ་བྱེད་པ་མེད་པར་སྟོན་པ་རྡོ་རྗེའི་ལེའུ་སྟེ་དྲུག་བཅུ་གཅིག་པའོ།། །། དེ་ནས་བཅོམ་ལྡན་
འདས་དེ་བཞིན་གཤེགས་པ་ཚངས་པ་རྒྱལ་བ་སངས་རྒྱས་ཐམས་ཅད་ཀྱི་རབ་ཏུ་ཞི་བ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཕྱི་རོལ་གྱི་ནི་ཕྱོགས་
མེད་ཅིང་། །སེམས་ལས་གྱུར་པ་མ་གཏོགས་པར་། །དངོས་པོ་གཞན་ཡོད་མ་ཡིན་ཏེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་དགྱེས་
སངས་རྒྱས་ཐམས་ཅད་ཀྱི་རྟོག་གེ་བའི་ཡུལ་ལས་འདས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ཉིད་དངོས་དང་དངོས་མེད་ཀྱི། །མཚན་མའི་ཆོས་ལས་ཡོངས་གྲོལ་བ། །རྣམ་
པར་ཐར་པའི་དོན་བསྟན་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རྫུ་འཕྲུལ་རྟོགས་སངས་རྒྱས་ཐམས་ཅད་ཀྱི་རྟོག་མེད་ཞི་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་དང་དེ་ཡི་ཆོས་ཉིད་དག །

89-1-207a

རྣམ་དག་སྣང་བ་སྡུད་པ་པོ། །བསམ་པ་དེ་ཡི་རྐྱེན་ཅན་ཞེས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྐྱེ་མེད་མཚུངས་པ་སངས་རྒྱས་ཐམས་ཅད་
རྣམ་རིག་ཙམ་དུའང་མི་གནས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ཀྱི་སྤྱོད་པའི་ཁྱད་པར་ལས། །འདས་པ་སྨོན་པ་མེད་པའི་ངང་། །མ་གྲུབ་
པ་ལ་གདགས་བྱ་མེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སའི་དབང་ཕྱུག་སངས་རྒྱས་ཐམས་ཅད་ཀྱི་བརྟག་པར་དཀའ་བ་རྡོ་རྗེའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ནི་དངོས་པོར་མ་མཆིས་ཏེ། །རྟོག་པ་མི་ལྡན་དབྱིངས་གནས་པ། །བྱང་ཆུབ་ཚུལ་འདི་ལེགས་བསྟན་པས། །ཟག་མེད་སྟོང་པ་ཉིད་གནས་པའོ། །
ཞེས་གསུངས་སོ། །དེ་ནས་དེ་བཞིན་གཤེགས་པ་ཉི་མ་དགྱེས་པ་སངས་རྒྱས་ཐམས་ཅད་ཀྱི་མཉམ་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
གང་དུ་སངས་རྒྱས་ཞི་བ་དང་། །འཁོར་བའི་སྡུག་བསྔལ་རྒྱ་མཚོ་དག །དོན་དམ་པ་ལ་འཛིན་མེད་ཕྱིར། །སྤང་བླང་མེད་པར་གྲོལ་བའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྒྲ་ཅན་ཟླ་བ་སངས་རྒྱས་
ཐམས་ཅད་ཀྱི་རྣམ་པར་དབེན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྒྲ་ཙམ་ཐོས་པའི་ཡུལ་ཡིན་གྱི། །རྟོགས་པར་བྱེད་པ་སྒྲ་མ་ཡིན། །མི་རྟག་དངོས་མེད་ལས་
གྲོལ་ཕྱིར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མེ་ཏོག་འོད་སངས་རྒྱས་ཐམས་ཅད་ཀྱི་མྱ་ངན་ལས་འདའ་བ་མ་ཡིན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་

89-1-207b

བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་སྐུ་ནི་འགྱུར་མེད་ཅིང་། །དེས་གསུངས་ཆོས་ནི་རྒྱས་པ་ལས། །འདྲེན་པ་ཡང་དག་བྱང་ཆུབ་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་སྨན་པའི་རྒྱལ་པོ་སངས་རྒྱས་ཐམས་ཅད་ཀྱི་རྟོགས་པར་དཀའ་བའི་གནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འགྲོ་བ་ཉོན་མོངས་ནད་ཀྱིས་ནི། །རྣམ་པར་གཟེར་ཞིང་
ཉེན་པ་ལ། །འཆི་མེད་བདུད་རྩི་སྟེར་མཛད་པ། །སྙིང་པོའི་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མདངས་མངའ་བ་སངས་རྒྱས་ཐམས་ཅད་ཀྱི་བདག་མེད་ཞི་བའི་ཚུལ་རྡོ་རྗེའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དྲི་མེད་པད་མའི་གདན་བཞུགས་ཤིང་། །མཉམ་པ་སེང་གེའི་ཁྲིར་གནས་ལས། །གཡོས་མེད་རྣམ་འཕྲུལ་དུ་མ་ལས། །བྱང་ཆུབ་ཚུལ་འདི་
བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་བསོད་ནམས་དགྱེས་པ་སངས་རྒྱས་ཐམས་ཅད་ཀྱི་རེག་ཏུ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །
དངོས་རྣམས་གང་ལའང་མི་གནས་པ། །བར་སྣང་རྒྱུ་བའི་བྱ་བཞིན་དུ། །རྟག་ཏུ་ཐུགས་རྗེས་རྗེས་འགྲོ་ཞིང་། །བྱང་ཆུབ་སེམས་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགེ་བའི་སྟོབས་
སངས་རྒྱས་ཐམས་ཅད་ཀྱི་མཚན་མ་མེད་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་དཀར་ཞིང་གཙང་བ་ཡི། །ཞེན་མེད་གཞན་དོན་དགེ་སྤྱད་པ། །ཟླ་བ་ཡར་གྱི་ངོ་
བཞིན་ཏེ། །བྱང་ཆུབ་ཚུལ་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་དབྱངས་སྙན་པས་སངས་རྒྱས་ཐམས་ཅད་ཀྱི་མཆོག་ཏུ་ཞི་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་

89-1-208a

ཀྱི་སེམས་འདི་གསུངས་སོ། །ཞིང་ཁམས་བྱེ་བ་ཕྲག་བརྒྱ་རུ། །མཛད་ཚུལ་མཐའ་ཡས་སྟོན་པ་ནི། །ཡེ་ཤེས་སྤྱད་པས་དོན་མཛད་པ། །བྱང་ཆུབ་ཚུལ་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་
ཆོས་ཀྱི་དབང་ཕྱུག་སངས་རྒྱས་ཐམས་ཅད་ཀྱི་ཤིན་དུ་ཞི་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དྲག་ཅིང་གདུག་པ་རྔམ་པ་ཡི། །ཚུལ་ནི་དག་པ་བདེ་བའི་ལམ། །བླ་མེད་དྲི་མེད་ཚུལ་
ཞི་བའི། །བྱང་ཆུབ་ཚུལ་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་ཚངས་པའི་དབྱངས་སངས་རྒྱས་ཐམས་ཅད་ཀྱི་གཅིག་དང་དུ་མ་ལས་ཡོངས་སུ་གྲོལ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཐ་སྙད་ལས་འདས་ཤིང་། །རྣམ་པར་མི་ཕྱེད་པ་ཡི་སེམས། །མཚོན་དུ་མེད་ལས་མཚོན་པ་ཉིད། །བྱང་ཆུབ་སེམས་འདི་བསྟན་པ་ཡིན་ཞེས་གསུངས་སོ། །
དེ་ནས་དེ་བཞིན་གཤེགས་པ་སྤྱོད་པ་བཟང་པོ་སངས་རྒྱས་ཐམས་ཅད་ཀྱི་སྒྲ་ལས་འདས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཨཱ་ལི་ཀཱ་ལི་ལས་བྱུང་བ། །དེ་ཉིད་
བརྟགས་པ་རྐྱེན་སྦྱོར་བས། །འབྱུང་གནས་མཚོན་པ་དོན་སྟོན་པས། །བྱང་ཆུབ་སེམས་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་འཁྲུལ་པ་མེད་པའི་བློས་སངས་རྒྱས་ཐམས་ཅད་ཀྱིས་
མཐོང་དུ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མ་རིག་པ་ལས་རྐྱེན་སྟོབས་ཀྱིས། །རླུང་གིས་བླངས་ནས་འཛིན་བྱེད་པར། །གློ་བུར་དྲི་མ་ཞེས་བྱ་གང་། །
སྟོང་པ་དེ་ཉིད་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དབྱངས་ཆེན་པོས་སངས་རྒྱས་ཐམས་ཅད་ཀྱི་སྤྱོད་པའི་གནས་ཐམས་ཅད་ལས་འདས་པ་རྡོ་རྗེའི་ཏིང་ངེ་འཛིན་ལ་སྙོམས་པར་

89-1-208b

ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དྲི་མ་རྣམས་ནི་རླུང་ལས་བྱུང་། །རྣམ་ཤེས་བདག་འཛིན་དྲ་བ་གང་། །མཚུངས་པར་དག་པ་མཆོག་གྱུར་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །
དེ་ནས་དེ་བཞིན་གཤེགས་པ་སྙན་པར་གྲགས་པ་སངས་རྒྱས་ཐམས་ཅད་ཀྱི་ཡེ་ཤེས་ཀྱི་འགྲོ་བ་སྐྱོབ་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་སེམས་
དང་རླུང་ལས་ནི། །རྣམ་འཕྲུལ་ས་གསུམ་ཁྱབ་འབྱུང་བ། །དྲི་མ་ཀུན་ནས་རླུང་ལ་བརྟེན། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །ཐབས་ཆེན་ཡང་དག་ལྡན་པ་ཡི། །རྣལ་འབྱོར་འཇིག་རྟེན་དོན་གྲུབ་
པ་སེམས་ཅན་ཀུན་གྱིས་དམད་པ་ཡི། །བྱ་བ་འདི་ལ་མི་བྱ་མེད། །ཤེས་རབ་ཐབས་དང་ལྡན་པ་ལ། །སྡིག་པར་གྲགས་པ་ཡོད་མིན་ཞེས། །རྡོ་རྗེ་སེམས་དཔའི་སྤྲུལ་པ་ལ། །རྡོ་རྗེ་ཅན་ནི་ཉིད་ཀྱིས་གསུངས། །
དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་སངས་རྒྱས་ཐམས་ཅད་ཀྱི་དཔལ་
མཆོག་ཆེན་པོ་དེ་ཁོ་ན་ཉིད་འབྱུང་བ་བསྟན་པའི་ལེའུ་སྟེ་དྲུག་བཅུ་གཉིས་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཏོག་ལྡན་སངས་རྒྱས་ཐམས་ཅད་ཀྱི་མི་འགྱུར་བ་
རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཤིན་དུ་གདུལ་དཀའ་དག་བྱེད་པ། །མ་ལུས་སྐྱེད་བྱེད་རང་བྱུང་སེམས། །གནས་པའི་ངོ་བོ་བྱང་ཆུབ་སེམས། །དེ་ཉིད་
ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་རྣམ་པར་གྲགས་པས་སངས་རྒྱས་ཐམས་ཅད་ཀྱི་དེ་བཞིན་ཉིད་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་

89-1-209a

ཀྱི་སེམས་འདི་གསུངས་སོ། །ཡེ་ཤེས་དེ་བཞིན་ཉིད་ལ་ནི། །མི་རྟོག་རབ་ཏུ་མི་གནས་པ། །རྒྱུས་སྟོང་ལམ་དང་འབྲས་དག་པའི། །བྱང་ཆུབ་དེ་ཉིད་ཚུལ་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་འགྲོ་བའི་དབང་ཕྱུག་སངས་རྒྱས་ཐམས་ཅད་ཀྱི་མགོན་པོ་དྲི་མ་མེད་པ་ཞེས་བྱ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་དུ་སོན་ཞིང་
དགེ་བ་ཡི། །དུ་མའི་ངོ་བོ་དག་པའི་གནས། །ཡེ་ཤེས་བསྲུང་བ་མེད་པའི་ཚུལ། །བྱང་ཆུབ་སེམས་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འགྲོ་བའི་དབང་ཕྱུག་སངས་རྒྱས་
ཐམས་ཅད་ཀྱི་དཔལ་ལྗོན་པ་འདུ་ཤེས་ཡོངས་སུ་དག་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པར་སྡུད་པའི་རླུང་དག་གིས། །འཕྲལ་དུ་བག་ཆགས་རྟོག་པ་གང་། །
སྦུར་མ་ལྟ་བུར་སྡུད་པའི་ཕྱིར། །དག་པ་དེ་ཉིད་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཏི་མུག་རབ་ཟད་རྡོ་རྗེས་སངས་རྒྱས་ཐམས་ཅད་ཀྱི་འདུས་མ་བྱས་པའི་ཆོས་ཉིད་རྡོ་རྗེའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་མཁྱེན་དབང་པོ་མཆོག་འབྱུང་བ། །དངོས་པོའི་ཆོས་ལས་འདས་པ་ཡི། །དྲི་མ་ཀུན་ནས་སྤངས་པ་དག །གསང་བ་དེ་ཉིད་ཚུལ་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་དཔག་ཏུ་མེད་པའི་ཡེ་ཤེས་ཅན་སངས་རྒྱས་ཐམས་ཅད་ཀྱི་བརྗོད་དུ་མེད་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདྲེན་པའི་
རྒྱལ་པོ་བླ་ན་མེད། །ཐབས་མཁས་ཐུགས་རྗེས་སྐྱོང་བ་པོ། །ཚད་མེད་བདེ་བའི་འབྱུང་གནས་ནི། །དེ་ཉིད་ཡེ་ཤེས་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཟླ་བ་བཟང་པོ་སངས་རྒྱས་ཐམས་ཅད་

89-1-209b

ཀྱི་བརྗོད་དུ་མེད་པའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །གདུང་བ་སེལ་བའི་སྨན་གྱི་མཆོག །གསང་བ་འཆི་མེད་ཡེ་ཤེས་ཆུ། །རང་གཞན་མཆོག་ཏུ་ཐོབ་
པ་ནི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྤོབས་པ་མཐའ་ཡས་ཏོག་སངས་རྒྱས་ཐམས་ཅད་ཀྱི་བརྟག་ཏུ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་
ཆུབ་ཀྱི་སེམས་འདི་གསུངས་སོ། །སངས་རྒྱས་ཡེ་ཤེས་ལྷུན་གྲུབ་པ། །དེ་བས་མི་རྟོག་པར་བཤད་དེ། །བསམ་པའི་བྱེད་པ་ཡོད་མིན་ཏེ། །མེད་པའི་སེམས་སུ་གྱུར་མ་ཡིན་ཞེས་གསུངས་སོ། །དེ་ནས་དེ་
བཞིན་གཤེགས་པ་བརྟུལ་ཞུགས་བསྟར་བ་སངས་རྒྱས་ཐམས་ཅད་ཀྱི་སྤྱོད་ཡུལ་ཀུན་ལས་འདས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་རྟོགས་པ་
འགག་མེད་པ། །མི་རྟོག་སྙིང་པོ་གསང་བའི་རྒྱན། །བདེ་ཆེན་བྱང་ཆུབ་དབང་པོའི་གནས། །སྤྱོད་ཡུལ་བསྐྱེད་པ་ཚུལ་གནས་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཆོད་པར་གནས་པས་སངས་
ས། རྒྱས་ཐམས་ཅད་ཀྱི་གཟོད་མ་ནས་སྟོང་པའི་གནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐུབ་པ་བདག་གཞན་མཉམ་ཉིད་དུ། །རྩལ་ལྡན་འཇིགས་པ་ཀུན་སྒྲོལ་
མཛད། །བསིལ་བས་ཚད་པ་ཀུན་སྐྱོབ་པ། །བྱང་ཆུབ་སེམས་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་མྱ་ངན་རྒྱལ་བས་སངས་རྒྱས་ཐམས་ཅད་ཀྱི་སེམས་པ་ཐམས་ཅད་དང་བྲལ་
བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་འདི་ཀུན་གྱི་རྩ་བ་སྟེ། །འཁོར་དང་མྱ་ངན་འདས་པ་ལ། །ལྗོན་པའི་ཤིང་ལྟར་འདབ་རྒྱས་པས། །དམིགས་མེད་

89-1-210a

ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགེ་བར་དགྱེས་པས་སངས་རྒྱས་ཐམས་ཅད་ཀྱི་རྣམ་པར་རྒྱལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །རྣམ་རྟོག་བདུད་ལས་རྣམ་རྒྱལ་བ། །མཆོག་ཏུ་དགྱེས་པ་རིན་ཆེན་མཉེས། །འཁོར་ལོ་ལྟ་བུའི་ཤུགས་འཆང་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་འགྲོ་བའི་བློ་གྲོས་ཀྱིས་སངས་རྒྱས་ཐམས་ཅད་ཀྱི་ཆོས་ཐམས་ཅད་ལ་ཐ་དད་མེད་པར་རྟོགས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཤིན་ཏུ་རྣམ་པར་དག་
པ་ཡི། །ཆོས་ལ་དབྱེ་བ་རྡུལ་ཙམ་མེད། །སོ་སོར་བརྟགས་པ་བློ་ཡི་ལམ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བདེ་བར་འགྲོ་བའི་དཔལ་སངས་རྒྱས་ཐམས་ཅད་ཀྱི་
ཀུན་དུ་རྒྱལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྫུ་འཕྲུལ་ཆེན་པོའི་རྫུ་འཕྲུལ་གྱིས། །རྨད་དུ་བྱུང་བའི་སྤྱོད་པ་དག །བྱེ་བ་དཔག་མེད་སྟོན་མཛད་པས། །བྱང་
ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཞལ་མཛེས་སངས་རྒྱས་ཐམས་ཅད་ཀྱི་དུས་གསུམ་ཀུན་དུ་ཁྱབ་པར་སྟོན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །མཛད་པ་དུ་མའི་སྤྱོད་ཡུལ་དུ། །སྣང་གྲགས་སྲིད་པ་རྟོག་གེ་བ། །ཐམས་ཅད་ཟིལ་གནོན་རྡོ་རྗེ་ཆེས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་
པ་ཨུཏ་པ་ལའི་འོད་སངས་རྒྱས་ཐམས་ཅད་ཀྱི་ཀུན་དུ་སྟོན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་མཁྱེན་ས་ནི་འཇིག་རྟེན་དུ། །ཨུ་དུམ་བར་བའི་མེ་ཏོག་

89-1-210b

བཞིན་དུ་མ་མ་ཡིན་གཅིག་པ་ཉིད། །དེ་བས་དམ་ཆོས་མཆོག་ཏུའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དུས་གནས་མེ་ཏོག་སངས་རྒྱས་ཐམས་ཅད་ཀྱི་དཔེ་དང་བྲལ་བ་རྡོ་རྗེའི་ཏིང་ངེ་འཛིན་ལ་སྙོམས་
པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་དམ་པའི་ཆོས་གནས་ཤིང་། །ཀུན་དུ་དགེ་བ་དག་པས་ན། །རྣམ་པར་འཚེ་བ་དུ་མ་འབྱུང་། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་
དེ་བཞིན་གཤེགས་པ་སྤོབས་པ་མཐའ་ཡས་ཏོག་སངས་རྒྱས་ཐམས་ཅད་ཀྱི་ཡེ་ཤེས་འབྲུག་སྒྲ་དབྱངས་ཀྱི་རྒྱལ་པོའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྲིད་གསུམ་
གནས་པའི་སེམས་ཅན་ལ། །དགེ་བ་ཡེ་ཤེས་ཚུལ་གནས་ཀྱང་། །ཐོབ་མེད་དམ་པའི་སྒྲ་སྒྲོག་བྱེད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་ཟེར་སངས་རྒྱས་ཐམས་
ཅད་ཀྱི་རྣམ་པར་བརྩེ་བ་སེང་གེའི་སྟོབས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆུ་ཀླུང་འབབ་ཆུ་རྣམས་དང་ནི། །རྒྱ་མཚོའི་ཆུ་ནི་ཐ་དད་པར། །སྣ་ཚོགས་
གཅིག་པར་རྒྱུན་འབབ་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དྲང་སྲོང་གསལ་བས་སངས་རྒྱས་ཐམས་ཅད་ཀྱི་དྲང་སྲོང་འདུལ་བ་རྡོ་རྗེའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལྷ་ཡི་དྲང་སྲོང་ཐམས་ཅད་ཀྱིས། །བསྟོད་ཅིང་བསྔགས་པར་གྱུར་པ་གང་། །བདེན་པའི་སྟོབས་ལས་བྱུང་བ་ཉིད། །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །འདི་ལྟར་དེ་བཞིན་གཤེགས་པས་བསྐལ་པ་གང་གཱའི་ཀླུང་གི་བྱེ་མ་སྙེད་ཁྲག་ཁྲིག་བརྗོད་ཀྱིས་མི་ལང་བ་བསམ་གྱིས་མི་ཁྱབ་པའི་སྤྱོད་ཡུལ་ལ་འདི་ལྟ་སྟེ། དེ་བཞིན་གཤེགས་

89-1-211a

པ་དེ་དག་གསང་བ་ཆེན་པོ་འདིའི་ངང་ལ་གནས་ཤིང་ཀུན་དུ་སྟོན་པ་དང་། ཏིང་ངེ་འཛིན་གྱི་སྒོ་དུ་མ་མངོན་པར་སྒྲུབ་པར་བྱེད་པ་སྟེ། འདས་པ་དང་མ་འོངས་པ་དང་ད་ལྟར་བྱུང་བའི་གནས་ངེས་པར་ལུང་
སྟོན་པ་ཉིད་དོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་གསང་བ་དག་པ་ཆེན་པོའི་ཚུལ་བསྟན་
པའི་ལེའུ་སྟེ་དྲུག་བཅུ་གསུམ་པའོ།། །། དེ་ནས་དེ་བཞིན་གཤེགས་པ་ཡོན་ཏན་བརྩོན་འགྲུས་སངས་རྒྱས་ཐམས་ཅད་ཀྱི་དབྱིངས་འབྱུང་བའི་སྙིང་པོའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །འཁོར་བའི་ཚང་ཚིང་ཐིབས་པོ་དག །མ་རིག་རྐྱེན་ཅན་རླུང་ལས་བྱུང་། །འཇིག་རྟེན་དྲ་བ་གཅད་པའི་ཕྱིར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་སྙིང་པོ་ཐུབ་པས་སངས་རྒྱས་ཐམས་ཅད་ཀྱི་ཟག་པ་མེད་པའི་ཆོས་ཉིད་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འདིར་ནི་ཀུན་དུ་ཁྱབ་པ་ཡི། །
རླུང་ལས་སྡུད་དང་སྤྲོ་བ་དང་། །སྨིན་དང་ཉམས་པར་བྱེད་པ་ཡི། །ཚུལ་འདིས་ཕྲ་བའི་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ལྷའི་བདག་པོས་སངས་རྒྱས་ཐམས་ཅད་ཀྱི་འབྱུང་
གནས་བདེ་བའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཟག་བཅས་རླུང་ལས་རྟོག་པ་སྟེ། །ཟག་མེད་ཡེ་ཤེས་ཆོས་ཉིད་རླུང་། །གཉིས་སུ་མེད་པའི་དབྱིངས་
གྱུར་པ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་མཐོན་པོས་སངས་རྒྱས་ཐམས་ཅད་ཀྱི་ཀུན་དུ་སྟོན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་

89-1-211b

ཀྱི་སེམས་འདི་གསུངས་སོ། །ངེས་འབྱུང་བླ་ན་མེད་པའི་ལམ། །ཡོངས་སུ་སྨིན་པའི་ལམ་རྫོགས་པ། །ཀུན་དུ་སྦྱོར་བ་སྤངས་པ་ཡི། །བྱང་ཆུབ་ཚུལ་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་
པ་གསལ་བའི་དཔལ་སངས་རྒྱས་ཐམས་ཅད་ཀྱི་རྣམ་པར་གྲོལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བསྟན་པའི་སྒོར་འཇུག་པ། །རྗེས་འབྲངས་
གཞུང་ལུགས་གཉིས་གསུངས་པ། །གང་ཟག་དང་ནི་ཆོས་ཡིན་ཏེ། །བྱང་ཆུབ་ཚུལ་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་སྐལ་ལྡན་ཤིང་རྟ་ཅན་སངས་རྒྱས་ཐམས་ཅད་ཀྱི་
རབ་ཏུ་ཞི་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་འཆིང་དང་གྲོལ་མེད་པར། །རླུང་ནི་རྣམ་པར་འཇུག་ལྡོག་པས། །བྱང་ཆུབ་མི་རྟོག་ཆོས་ཉིད་དེ། །བྱང་
ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བསོད་ནམས་བློ་གྲོས་སངས་རྒྱས་ཐམས་ཅད་ཀྱི་ཡོངས་སུ་རྫོགས་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །ལམ་བཟང་ཐེག་མཆོག་བླ་མེད་པའི། །ཡོན་ཏན་འཕེལ་བྱེད་བཟང་པོ་ཡི། །རྒྱལ་མཚན་གསང་བ་ཆེན་པོ་ཉིད། །བྱང་ཆུབ་ཚུལ་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་
པ་སྦྱིན་བྱེད་འོད་འཕྲོས་སངས་རྒྱས་ཐམས་ཅད་ཀྱི་རྣམ་པར་རྟོག་པ་ལས་རིང་དུ་འགྲོ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འགྲོ་བའི་བསམ་པའི་
ནོར་བུ་ནི། །ཡེ་ཤེས་རེ་བ་རྫོགས་བྱེད་པ། །ཕྱི་ནས་འབྱུང་མེད་རང་གནས་ཕྱིར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡོན་ཏན་མཐའ་ཡས་སངས་རྒྱས་ཐམས་

89-1-212a

ཅད་ཀྱི་རྡུལ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡང་དག་སྟོང་ཉིད་ནམས་མཁའ་སྟེ། །ཤེས་དང་ཤེས་བྱ་རྣམ་པར་སྤངས། །བློ་ཡི་བྱེད་པ་དང་
བྲལ་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཟི་བརྗིད་ཕུང་པོས་སངས་རྒྱས་ཐམས་ཅད་ཀྱི་རྙོག་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །སྣང་བ་མེད་ཅིང་ཀུན་བརྗོད་བྲལ། །གཉིས་མེད་དག་པའི་སྦྱོར་བ་ཡིས། །སྔགས་ཀྱི་དེ་ཉིད་རབ་གསལ་བ། །བྱང་ཆུབ་སེམས་འདི་བསྟན་པ་ཡིན་ཞེས་གསུངས་སོ། །དེ་ནས་
དེ་བཞིན་གཤེགས་པ་སེང་གེའི་སྟོབས་སངས་རྒྱས་ཐམས་ཅད་ཀྱི་གསལ་བ་ཆེན་པོ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དག་པ་མཁའ་དང་མཚུངས་པ་
ཉིད། །རྣམ་ཤེས་རླུང་དང་འདྲེས་པ་ཡིས། །རང་བཞིན་འོད་གསལ་དག་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མི་གཡོ་བས་སངས་རྒྱས་ཐམས་ཅད་ཀྱི་ཤིན་
ཏུ་གསལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དགེ་དང་མི་དགེའི་སྤྱོད་པ་དག །རླུང་ལས་བྱུང་ཕྱིར་འདི་དག་པས། །དྲི་མ་མ་ལུས་དག་པར་བྱེད། །བྱང་ཆུབ་
ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རབ་རྩལ་ཐུབ་པ་སངས་རྒྱས་ཐམས་ཅད་ཀྱི་རྣམ་པར་རྒྱལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །ཐོག་མ་ཐ་མ་མེད་ཞི་བ། །རྐྱེན་བྱུང་ལས་ཀྱི་རླུང་དག་པས། །ཡེ་ཤེས་ངང་དུ་ཞི་བ་སྟེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འོད་

89-1-212b

སྤྱོད་པ་རྡོ་རྗེ་སངས་རྒྱས་ཐམས་ཅད་ཀྱི་ཤིན་དུ་རྟུལ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དངོས་པོར་སྣང་བ་རྒྱུ་ལས་བྱུང་། །དེ་ཉིད་དངོས་མེད་རྐྱེན་བྲལ་བ། །
གཅིག་ཏུ་མཚན་ཉིད་མེད་པར་གནས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གླུ་དབྱངས་རྡོ་རྗེ་སངས་རྒྱས་ཐམས་ཅད་ཀྱི་དཔེ་མེད་པའི་ཚུལ་རྡོ་རྗེའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མི་ཕྱེད་རྡོ་རྗེ་མཚོན་དུ་མེད། །ངོ་བོ་ཉིད་དག་འཕྲལ་བྱུང་བའི། །དྲི་མས་གོས་པ་མེད་པ་ཉིད། །བྱང་ཆུབ་ཚུལ་འདི་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་འཁོར་ལོ་འཛིན་པས་སངས་རྒྱས་ཐམས་ཅད་ཀྱི་ཡོངས་སུ་དག་པའི་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་དུ་སྦྱོར་བ་
རླུང་ཉིད་དེ། །དེ་ཉིད་བྱ་བ་འཇུག་བྱེད་པ། །ཐམས་ཅད་རྡོ་རྗེའི་དངོས་པོ་རུ། །བརྟག་པ་ཡེ་ཤེས་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དབྱིག་གི་མཆོག་སངས་རྒྱས་ཐམས་ཅད་
ཀྱི་ཟབ་པ་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡང་དག་རབ་ཏུ་སྒྲུབ་པ་ཡི། །སྙིང་པོའི་དོན་དུ་བྱུང་བ་ནི། །འཕགས་ལམ་གསང་བ་འདི་
ཉིད་དེ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་འཇིག་རྟེན་དགའ་བས་སངས་རྒྱས་ཐམས་ཅད་ཀྱི་ཕྱག་རྒྱ་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །འཁོར་བའི་ཆུ་བོ་ཟློག་བྱེད་པ། །སྤྱི་ལས་ཁྱད་པར་སོ་སོར་འབྱུང་། །མངོན་པར་བརྩོན་པས་ཐར་པ་ཆེ། །བྱང་ཆུབ་ཚུལ་འདི་བསྟན་པའོ་ཞེས་

89-1-213a

གསུངས་སོ། །དེ་ནས་དེ་བཞིན་གཤེགས་པ་མཐའ་ཡས་གྲགས་པ་སངས་རྒྱས་ཐམས་ཅད་ཀྱི་སྐྱོབ་པ་ཚད་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ལས་ཀྱི་
སྒྲིབ་པ་རྒྱུན་ཆོད་པས། །འདི་ནི་བསམ་གཏན་མཆོག་ཏུ་གསུངས། །ལུས་ཅན་ཀུན་ལ་བྱིན་རློབ་མཛད། །བྱང་ཆུབ་སེམས་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྤྲིན་གྱི་ཏོག་སངས་རྒྱས་ཐམས་ཅད་ཀྱིས་
སྲིད་པར་ལྷུང་བ་ངེས་པར་འདོན་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བླང་དང་དོར་མེད་པའི། །བྱང་ཆུབ་སྐམ་སར་འཇོག་མཛད་པས། །ངན་སོང་སྦྱོང་བའི་རྒྱལ་པོ་ཉིད། །
དེ་ཉིད་བྱང་ཆུབ་ཚུལ་བསྟན་པའོ་ཞེས་གསུངས་སོ། །གང་དུ་ཕྱོགས་བཅུའི་འཇིག་རྟེན་གྱི་ཁམས་ཀྱི་སངས་རྒྱས་དང་བྱང་ཆུབ་སེམས་དཔའ་ཆེན་པོའི་ཚོགས་དང་བཅས་པའི་དཀྱིལ་འཁོར་དུ་གསང་བ་འདི་ཉེ་བར་ལྟ་ཞིང་
སེམས་པ་དང་། རྩེ་གཅིག་ཏུ་ཡིད་ལ་བྱེད་པ་དང་། ཐོས་ཤིང་འཛིན་པར་བྱེད་པ་འཛམ་བུའི་གླིང་འདིའི་ནང་དུ་གནས་པའི་གསང་བ་མཚུངས་པ་མེད་པའི་བློ་ཅན་དེ་ལ་ཀུན་ནས་ཀུན་དུ་མཁྱེན་ཅིང་གཟིགས་པར་བྱེད། ཆོས་
ཉིད་གཅིག་ཏུ་འཇུག་པས་ཉེ་བར་སྤྱོད་པར་བྱེད་དོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་
བའི་རྒྱུད་ལས་སངས་རྒྱས་ཐམས་ཅད་ཀྱི་མཉམ་པ་ཉིད་གཅིག་པར་སྟོན་པ་རྡོ་རྗེའི་ལེའུ་སྟེ་དྲུག་བཅུ་བཞི་པའོ།། །། དེ་ནས་དེ་བཞིན་གཤེགས་པ་ཤེས་རབ་འགྲོས་སངས་རྒྱས་ཐམས་ཅད་ཀྱི་གཉིས་
སུ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་ཀུན་དངོས་པོ་མེད་པ་ཡི། །དེ་བཞིན་ཉིད་ཀྱི་རང་བཞིན་དང་། །གཞན་མ་ཡིན་པའི་ཆོས་ཉིད་དེ། །བྱང་ཆུབ་སེམས་

89-1-213b

འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་སྤོས་བཟངས་སངས་རྒྱས་ཐམས་ཅད་ཀྱི་ཡེ་ཤེས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ངོ་བོ་ཉིད་ཀྱིས་ཡོངས་
དག་པས། །སྐུ་ནི་ནམ་མཁའི་ཁམས་མཚུངས་པ། །གཟི་བརྗིད་ཟིལ་གྱིས་མི་ནོན་པའི། །བྱང་ཆུབ་སེམས་ལས་འབྱུང་བ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་ནམ་མཁའི་དབྱིངས་སངས་རྒྱས་ཐམས་ཅད་ཀྱི་
དོན་གྱི་བློ་དང་བྲལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སོ་སོར་རྟོགས་པ་བྲལ་བ་ཡི། །དམིགས་མེད་བསྒོམ་དུ་མེད་པ་ཡི། །མཐར་ཐུག་ལམ་ལས་འདས་པ་
པོ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཐུབ་པ་ལྷ་སངས་རྒྱས་ཐམས་ཅད་ཀྱི་མཐོང་བ་སྤྱོད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་
འདི་གསུངས་སོ། །ཡང་དག་ཏུ་ནི་རྟོག་མེད་པའི། །དུས་གསུམ་དུས་མེད་མཚན་མ་གྲོལ། །གྲུབ་པ་རྡོ་རྗེ་དབྱིངས་གྱུར་པ། །བྱང་ཆུབ་སེམས་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་
ལྷའི་རྒྱལ་པོ་སངས་རྒྱས་ཐམས་ཅད་ཀྱི་ཀུན་ནས་བརྗོད་དུ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྣ་ཚོགས་དངོས་ལས་བྱུང་བ་ཡི། །མཆོག་དང་མཆོག་མ་ཡིན་པའི་
ཚུལ། །མཉམ་ཉིད་ཐ་དད་མེད་པའི་ཕྱིར། །བྱང་ཆུབ་སེམས་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་ནོར་བུ་གསལ་བ་སངས་རྒྱས་ཐམས་ཅད་ཀྱི་ཡང་དག་པར་སྒྲུབ་པ་མེད་པ་རྡོ་རྗེའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་བདེ་བའི་མཐར་སོན་པ། །མི་འགྱུར་གཡུང་དྲུང་དཔལ་འབྱུང་བ། །མཁྱེན་དུ་མེད་ཅིང་རྣམ་འབྱེད་བྲལ། །བྱང་ཆུབ་ཚུལ་འདི་བསྟན་པའོ། །

89-1-214a

ཞེས་གསུངས་སོ། །དེ་ནས་དེ་བཞིན་གཤེགས་པ་ནོར་བཟངས་སངས་རྒྱས་ཐམས་ཅད་ཀྱི་མི་ཟད་པའི་ཡེ་ཤེས་ཀྱི་ནོར་བུ་འབྱུང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་
སེམས་འདི་གསུངས་སོ། །ཁྱད་པར་ཡེ་ཤེས་རིན་ཆེན་བློ། །ཚད་མེད་དགེ་བའི་སྟོབས་འབྱུང་བ། །མི་གནས་བྱང་ཆུབ་རྒྱ་མཚོའི་གནས། །ཁྱད་པར་ཡེ་ཤེས་མཆོག་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་སྒྲོན་མ་རྒྱལ་པོ་སངས་རྒྱས་ཐམས་ཅད་ཀྱི་མཆོག་ཏུ་ཞི་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་རྟོག་བྲལ་བརྗོད་འདས་པ། །འགྲོ་བའི་མཚན་
མ་དག་པའི་དངོས། །ཚད་མེད་རྟོག་པ་རབ་ཞི་བ། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་ང་རོའི་དབྱངས་སངས་རྒྱས་ཐམས་ཅད་ཀྱི་སྣང་བ་དམིགས་མེད་རྡོ་རྗེའི་ཏིང་ངེ་འཛིན་
ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཡུལ་དང་དུས་དང་བསམ་པ་དང་། །རྣམ་པར་རིག་པ་ལས་འདས་ཤིང་། །རྣམ་པ་མ་ལུས་ནུབ་པའི་བདག །བྱང་ཆུབ་སེམས་འདི་བསྟན་པའོ་
ཞེས་གསུངས་སོ། །དེ་ནས་དེ་བཞིན་གཤེགས་པ་སྐྱེ་དབང་རྒྱལ་པོ་སངས་རྒྱས་ཐམས་ཅད་ཀྱི་རྟོག་མེད་རྡོ་རྗེའི་གནས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་དང་ཆོས་
ཉིད་མེད་པ་ཡི། །རྣམ་པར་རྟོག་དང་མི་རྟོག་མེད། །རྡོ་རྗེའི་རང་བཞིན་ཀུན་གྲོལ་བས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྒྲ་ཅན་སྦེད་སངས་རྒྱས་ཐམས་ཅད་ཀྱི་མངོན་པར་
བྱང་ཆུབ་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དབང་གི་རྒྱལ་པོ་བཻ་དཱུརྱ། །དེ་ཉིད་རིན་ཆེན་བསམ་འཕེལ་ཞེས། །བསམ་པའི་དོན་ཀུན་སྒྲུབ་བྱེད་མ། །བྱང་ཆུབ་ཚུལ་

89-1-214b

འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགེ་བའི་མཛད་པ་སངས་རྒྱས་ཐམས་ཅད་ཀྱི་དམིགས་མེད་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །དཔེ་མེད་བརྗོད་
འདས་བློ་ཡུལ་བྲལ། །ལྷན་ཅིག་སྐྱེས་པའི་ངོ་བོ་ཉིད། །གདོད་ནས་སྙིང་པོ་རྫོགས་སངས་རྒྱས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སེང་གེའི་བློ་གྲོས་སངས་རྒྱས་
ཐམས་ཅད་ཀྱི་ལྷུན་གྲུབ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རང་སེམས་འོད་གསལ་དག་པ་ལས། །འཕྲུལ་བྱུང་རྐྱེན་གྲོལ་ཆོས་ཉིད་དང་། །རྒྱུན་ཆད་མེད་པའི་ལམ་
གྱིས་རྒྱས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་རིན་ཆེན་གྲགས་པ་སངས་རྒྱས་ཐམས་ཅད་ཀྱི་བག་ཆགས་གཅོད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་
བྱང་ཆུབ་ཀྱི་སེམས་འདི་གསུངས་སོ། །རྣམ་པ་ཀུན་དུ་ཤེས་བྱ་དང་། །ཉོན་མོངས་ཉེ་བའི་ཀུན་ཉོན་མོངས། །མཁའ་ཡི་སྤྲིན་ཚོགས་དེངས་པ་ལྟར། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་དོན་མཛད་པ་སངས་རྒྱས་ཐམས་ཅད་ཀྱི་ཆོས་ཐམས་ཅད་ལ་དམིགས་པ་མེད་པའི་གནས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཀུན་
གྱིས་མཐོང་མེད་ལྟ་བ་བྲལ། །རྩ་བའི་རྟེན་མེད་སྟོང་ཉིད་དབྱིངས། །དོན་དམ་ཆོས་ཉིད་རྫོགས་སངས་རྒྱས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཛད་མཐའ་
གཟིགས་པ་སངས་རྒྱས་ཐམས་ཅད་ཀྱི་ཀུན་ནས་བྲལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྐུ་བཞི་ཡེ་ཤེས་ལྔ་ལྡན་པ། །དག་པའི་དེ་བཞིན་ཉིད་ལ་

89-1-215a

བརྟེན། །སྣང་ལ་ཞེན་མེད་རྫོགས་སངས་རྒྱས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྲིད་པའི་མེ་ཏོག་སངས་རྒྱས་ཐམས་ཅད་ཀྱི་རྟེན་ཅིང་འབྲེལ་
པར་འབྱུང་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མ་སྐྱེས་སྐྱེ་མེད་སྦྱོར་བ་ཡིས། །ཆོས་ཀུན་མངོན་གྱུར་བྱང་ཆུབ་ཀྱི། །རྣམ་པར་མི་རྟོག་དེ་བཞིན་ཉིད། །
ཁྱབ་པ་ནམ་མཁའ་ལྟར་སངས་རྒྱས་ཞེས་གསུངས་སོ། །དེ་ནས་དེ་བཞིན་གཤེགས་པ་མཛོད་སྤུ་ལྡན་སངས་རྒྱས་ཐམས་ཅད་ཀྱི་རྣམ་གྲོལ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱིས་
སེམས་འདི་གསུངས་སོ། །ཆོས་རྣམས་སེམས་སུ་བསྡུ་བ་དང་། །སེམས་ཀྱང་ལུས་ལ་བསྡུ་བ་དང་། །ལུས་ནི་ཡེ་ཤེས་ཉེར་སྦྱོར་བའི། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་
གཤེགས་པ་སྤོབས་པ་མཚུངས་མེད་རྒྱལ་པོ་སངས་རྒྱས་ཐམས་ཅད་ཀྱི་ཡེ་ཤེས་མངོན་པར་འཕྲུལ་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །མཐོང་ཆོས་
འབྲས་ལྡན་གཞན་གྱུར་དང་། །དེ་ལས་གཞན་པའི་རྒྱུ་ཚུལ་ལས། །སྐྱོབ་པ་འདྲེན་པ་བླ་མེད་གནས། །ཡེ་ཤེས་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡེ་ཤེས་རྣམ་
འབྱེད་ང་རོ་སངས་རྒྱས་ཐམས་ཅད་ཀྱི་སེང་གེ་རྣམ་པར་རྩེ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྟག་ཏུ་བྱང་ཆུབ་སེམས་ལས་ནི། །མི་གཡོ་འོད་གསལ་
ལྷུན་གྱིས་གྲུབ། །ཚད་མེད་ཡེ་ཤེས་མཁའ་ཁྱབ་ཐུགས། །དེ་ཉིད་ཚུལ་འདི་བསྟན་པའོ་ཞེས་གསུངས་སོ། །སངས་རྒྱས་ཐམས་ཅད་ཀྱི་རང་འབྱུང་གི་གནས་མཚུངས་པ་མེད་པ་རྡོ་རྗེའི་ཏིང་ངེ་འཛིན་ལ་

89-1-215b

སྙོམས་པར་ཞུགས་པ་བསམ་གྱིས་མི་ཁྱབ་པ་ཞེས་བྱ་བའི་ཏིང་ངེ་འཛིན་ཏོ། །དེ་ནས་དེ་བཞིན་གཤེགས་པ་སེང་གེའི་མཆེ་བས་སངས་རྒྱས་ཐམས་ཅད་ཀྱི་ཞིང་གི་ལྷུན་རྣམ་པར་ཕྱེ་བའི་ཡེ་ཤེས་རྡོ་རྗེའི་ཏིང་ངེ་
འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སེམས་ཅན་ལུས་སུ་དམིགས་མེད་ཀྱང་། །དེ་དག་སྐྱེ་བ་ཡོངས་གྲུབ་པར། །རང་གི་སྐུ་ནི་དེར་བྱིན་བརླབ། །བྱང་ཆུབ་ཚུལ་འདི་བསྟན་
པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་མཛེས་པར་གཤེགས་པ་སངས་རྒྱས་ཐམས་ཅད་ཀྱི་ཡེ་ཤེས་མངོན་པར་སྒྲུབ་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །སེམས་ཅན་མོས་པ་དུ་མ་ཡི། །ཚུལ་གཟིགས་ངག་དང་སྐུ་དག་ཀྱང་། །ཕྲ་དང་རགས་དང་ཡངས་དང་དོག །རྣམ་པར་དབྱེ་བ་སྟོན་པར་མཛད་ཅེས་གསུངས་སོ། །དེ་ནས་དེ་བཞིན་གཤེགས་པ་
བསོད་ནམས་སྒྲོན་མེ་སངས་རྒྱས་ཐམས་ཅད་ཀྱི་ཕྱོགས་ཀྱི་དྲ་བ་རྣམ་པར་ཚད་མེད་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ལས་དང་ཡེ་ཤེས་ལ། །འཇུག་པ་
ནམ་མཁའི་རང་བཞིན་ཅན། །ཕྱིར་མི་ལྡོག་པར་གྱུར་པས་ན། །བྱང་ཆུབ་སེམས་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བཀྲ་ཤིས་ལྡན་པས་སངས་རྒྱས་ཐམས་ཅད་ཀྱི་ཡང་དག་
པར་འཇུག་པ་མི་ཟད་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་ཀྱི་དབྱིངས་དང་དབྱེར་མེད་པའི། །བསམ་གྱིས་མི་ཁྱབ་ལ་གནས་པས། །བདེ་གཤེགས་སྤྱོད་
པ་གཅིག་ཉིད་ལ། །འཇུག་པ་ཡེ་ཤེས་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཡུལ་འཁོར་མྱ་ངན་མེད་པས་སངས་རྒྱས་ཐམས་ཅད་ཀྱི་རྣམ་པར་འཕྲུལ་པ་རྡོ་རྗེའི་ཏིང་ངེ་

89-1-216a

འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཏིང་འཛིན་གཅིག་ལ་མཉམ་བཞག་པས། །འཇིག་རྟེན་ཁམས་ནི་དུ་མ་རུ། །གྲངས་མེད་ཏིང་འཛིན་ལ་འཇུག་པ། །ཟད་མི་ཤེས་
པར་བསྟན་པ་ཡིན། ཞེས་གསུངས་སོ། །དེ་ནས་དེ་བཞིན་གཤེགས་པ་བློ་གྲོས་སེམས་པ་སངས་རྒྱས་ཐམས་ཅད་ཀྱི་དེ་བཞིན་ཉིད་རྣམ་པར་སྣང་བ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་
ཀྱི་སེམས་འདི་གསུངས་སོ། །མཐའ་དང་དབུས་མེད་དག་པ་ཡི། །ཞིང་དང་སེམས་ཅན་ཁམས་རྣམས་དང་། །ཆོས་རྣམས་མཉམ་ཉིད་ཡང་དག་པས། །བྱང་ཆུབ་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་
བཞིན་གཤེགས་པ་བློ་དང་ལྡན་པ་སངས་རྒྱས་ཐམས་ཅད་ཀྱི་མངོན་པར་འདུ་བྱ་བ་དང་བྲལ་བ་ཡེ་ཤེས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གང་དུ་ཆོས་རྣམས་འབྱེད་
མེད་པར། །མཉམ་ཉིད་སྤྱོད་པས་ཀུན་དུ་ཡང་། །སངས་རྒྱས་ཞིང་ནི་མཉམ་ཉིད་དེ། །ཕྲིན་ལས་མཉམ་ཉིད་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ཀྱི་སྒྲོན་མེ་སངས་རྒྱས་ཐམས་ཅད་
ཀྱི་རབ་ཏུ་ཕྱེ་བའི་དོན་གྱི་མཛོད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ནམ་མཁའི་ཁམས་ལྟར་ཆགས་མེད་པས། །མ་ཆགས་ཐོག་མཐའ་མེད་པར་ནི། །
སྐྱེ་འཆི་མེད་པའི་ལུས་སྟོན་ཅིང་། །ངག་དང་སེམས་ཀྱང་དེ་ལྟར་གསུངས་ཞེས་གསུངས་སོ། །དེ་ནས་དེ་བཞིན་གཤེགས་པ་སྤྱན་ལྡན་སངས་རྒྱས་ཐམས་ཅད་ཀྱི་རྣམ་པར་དག་པ་རྡོ་རྗེའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རབ་ཏུ་གནས་མེད་ཆོས་རྣམས་ནི། །རང་བཞིན་མེད་པའི་གཞི་ཡིན་ཏེ། །ཆོས་རབ་ཤིན་དུ་ཟབ་པ་སྟེ། །ཡོངས་སུ་རྫོགས་པར་བསྟན་པ་ཡིན་ཞེས་གསུངས་སོ། །དེ་

89-1-216b

ནས་དེ་བཞིན་གཤེགས་པ་ཤིན་དུ་གཟིགས་པ་སངས་རྒྱས་ཐམས་ཅད་ཀྱི་ཚད་མེད་མཚན་ཉིད་གཅིག་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྒྱུན་ཆད་མེད་ཅིང་ཐོགས་མེད་པ། །
སྒྲིབ་པ་མེད་ཅིང་འཕོ་བ་མེད། །ལྡན་དང་མི་ལྡན་མེད་པ་ཉིད། །འཛིན་མེད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་ཤུགས་ཀྱིས་དོར་བ་སངས་རྒྱས་ཐམས་ཅད་ཀྱི་སྨོན་ལམ་རྣམ་པར་དག་པ་རྡོ་རྗེའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གཞི་མེད་ཐ་དད་མེད་པ་དང་། །དམ་ཆོས་རྒྱ་མཚོ་ཚད་མེད་པས། །རྣམ་པར་སྤྲོས་པ་ཡང་མེད་དེ། །དག་པ་བྱང་ཆུབ་ཚུལ་བསྟན་པའོ་ཞེས་གསུངས་
སོ། །དེ་ནས་དེ་བཞིན་གཤེགས་པ་སྟོབས་ཆེན་སངས་རྒྱས་ཐམས་ཅད་ཀྱི་དབང་བསྐུར་བ་ཚད་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཉེར་ལེན་མེད་ཅིང་ཉེ་བར་མི་ལེན་
མེད། །རྗེས་འབྲང་མེད་ཅིང་རྗེས་སུ་ལྡོག་པའང་བྲལ། །ཐོབ་པ་མངོན་པར་ཆགས་པ་བྲལ་བ་གང་། །ཆོས་ཉིད་དེ་བཞིན་ཉིད་འདི་འདྲེས་པས་བསྟན་ཞེས་གསུངས་སོ། །དེ་ནས་དེ་བཞིན་གཤེགས་པ་ཤེས་རབ་མེ་ཏོག་སངས་རྒྱས་
ཐམས་ཅད་ཀྱི་རབ་ཏུ་གསང་བ་དབྱིངས་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གནས་མེད་རྒྱུན་གཅོད་བྲལ་བའི་ཆོས། །ཕྱིར་མི་ལྡོག་པས་འགྱུར་མེད་པ། །སྤྲུལ་ཞིང་གྲུབ་དང་
དབང་བྱེད་མེད། །གང་དུ་གཡོ་མེད་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་བརྟན་པའི་དབྱངས་སངས་རྒྱས་ཐམས་ཅད་ཀྱི་ཡེ་ཤེས་ཀྱི་དཀྱིལ་འཁོར་ཚད་དང་རྒྱ་ཡོངས་སུ་ཆད་པ་མེད་པ་རྡོ་རྗེའི་
ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཤིན་དུ་དང་ཞིང་དམིགས་མེད་པ། །འདྲེན་པ་མེད་ཅིང་ཕྱི་ནང་བྲལ། །གོལ་མེད་གཡང་ས་དག་པ་ཡི། །ནམ་མཁའི་དབྱིངས་མཚུངས་བསྟན་

89-1-217a

པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དོན་དང་ལྡན་པ་རྡོ་རྗེ་སངས་རྒྱས་ཐམས་ཅད་ཀྱི་ལེན་པ་མེད་ཅིང་དོར་བ་མེད་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་
གསུངས་སོ། །སྒྲ་དབྱངས་མི་ཟད་བརྗོད་མེད་པས། །རྡོ་རྗེའི་ཚིག་ལ་མི་གནས་པས། །ཡི་གེ་མེད་པར་རབ་ཤེས་པ། །ཡན་ལག་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དོན་གསུང་བ་སངས་
རྒྱས་ཐམས་ཅད་ཀྱི་མཚུངས་པ་མེད་པ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་རྣམ་དག་ཡེ་ཤེས་གང་། །དེ་ནི་དོན་དམ་མ་ཡིན་ཏེ། །སྤྱད་དང་རྒྱུ་དངོས་བསྐྱེད་པའི་
ཕྱིར། །དོན་དམ་གནས་མེད་ཚུལ་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགྱེས་པ་གསལ་བ་སངས་རྒྱས་ཐམས་ཅད་ཀྱི་གང་དུ་བསྒྲུབ་པ་མེད་པའི་རྒྱན་རྡོ་རྗེའི་ཏིང་ངེ་འཛིན་ལ་སྙོམས་པར་
ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །རྣམ་པའི་མཆོག་རྣམས་ཀུན་ལྡན་པའི། །བསམ་མི་ཁྱབ་པའི་བདག་ཉིད་ཀྱིས། །འདུལ་བ་ཚད་མེད་དག་པ་ལས། །བྱང་ཆུབ་སེམས་འདི་བསྟན་པ་ཡིན་ཞེས་
གསུངས་སོ། །དེ་ནས་དེ་བཞིན་གཤེགས་པ་སེང་གེའི་ཞལ་སངས་རྒྱས་ཐམས་ཅད་ཀྱི་དུས་གསུམ་མཉམ་པ་ཉིད་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཐོག་མ་ཐ་མ་
མེད་ཞི་བ། །ངོ་བོ་ཉིད་ཀྱིས་མི་རྟོག་ཅིང་། །སྐུ་གསུམ་རྡོ་རྗེའི་སྤྱོད་ཡུལ་ལས། །བྱང་ཆུབ་སེམས་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་གཙུག་ཕུད་སངས་རྒྱས་ཐམས་ཅད་ཀྱི་སྐུའི་
གསང་བ་མི་ཟད་པའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །ཆོས་དབྱིངས་ཟད་མེད་ཀུན་རྟོག་བྲལ། །དུ་མར་སྣང་ཞིང་མི་འགྱུར་བ། །ཡང་དག་ཡེ་ཤེས་སྤྱོད་ཡུལ་དུ། །

89-1-217b

དམིགས་མེད་ཚུལ་འདི་བསྟན་པའོ་ཞེས་གསུངས་སོ། །དེ་ནས་དེ་བཞིན་གཤེགས་པ་སྣང་བར་མཛད་པ་སངས་རྒྱས་ཐམས་ཅད་ཀྱི་གསུང་གི་གསང་བ་བསམ་གྱིས་མི་ཁྱབ་པ་མི་ཟད་པ་རྡོ་རྗེའི་ཏིང་ངེ་འཛིན་ལ་
སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སྒྲིབ་པ་བཀོད་པ་ཚད་མེད་པས། །དབྱངས་སྒྲ་དུ་མ་བརྗོད་མེད་པས། །མི་ཟད་ཐོག་མཐའ་རབ་ཞི་བ། །གསུང་གི་རྡོ་རྗེའི་ཚུལ་བསྟན་པའོ་ཞེས་
གསུངས་སོ། །དེ་ནས་དེ་བཞིན་གཤེགས་པ་ཆོས་ཀྱི་སེམས་པ་སངས་རྒྱས་ཐམས་ཅད་ཀྱི་རྣམ་པར་རྒྱལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །གསང་བ་འཛིན་པ་མ་ལུས་
པའི། །དབང་བསྐུར་མངོན་ཐོབ་རྡོ་རྗེ་ཅན། །མི་ཕྱེད་མི་ཟད་སྟོབས་གྱུར་པ། །བྱང་ཆུབ་སེམས་འདི་བསྟན་པ་ཡིན་ཞེས་གསུངས་སོ། །དེ་ནས་དེ་བཞིན་གཤེགས་པ་ཆོས་ཀྱི་བློ་གྲོས་སངས་རྒྱས་ཐམས་ཅད་ཀྱི་ཆོས་
ཀྱི་འཁོར་ལོ་ཡང་དག་པར་བསྐུལ་བ་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་ཏེ་བྱང་ཆུབ་ཀྱི་སེམས་འདི་གསུངས་སོ། །སངས་རྒྱས་བསྟན་པའི་དོན་བསྐུལ་བ། །ཚངས་པའི་གནས་ཀྱིས་ཁྱད་པར་དུ། །བསྐུལ་
བ་ཚད་མེད་བྱང་ཆུབ་སེམས། །དེ་ཉིད་ཡང་དག་བསྟན་པ་ཡིན་ཞེས་གསུངས་སོ། །དེ་ལྟར་དེ་ལ་མཚུངས་མེད་ལྷ་དང་མིས་མཆོད་པ། །ཡེ་ཤེས་ཕུང་པོ་རྣམ་མང་ཉེ་བར་སྒྲུབ་པར་མཛད། །རྒྱལ་བའི་ཆོས་སྒྲུབ་
ཕ་རོལ་མཐའ་ཡས་བཞུགས་མཛད་པ། །དེ་ལ་སྔོན་གྱི་བྱང་ཆུབ་སྤྱོད་པ་ཆར་མི་འགྲོ། །ཁྱུ་མཆོག་རྣམས་ཀྱིས་ཡེ་ཤེས་ས་མཆོག་འདི་ཐོབ་ནས། །ཕྱོགས་བཅུ་ཀུན་དུ་སྐད་ཅིག་གཅིག་གིས་རྒྱས་
འགེངས་པ། །ཡེ་ཤེས་ཞུགས་དང་ལྡན་ཞིང་མངོན་ཤེས་མཆོག་ཐོབ་པས། །རྒྱ་མཚོ་ཆེར་ཕྱིན་གྲུ་ཆེན་རླུང་གིས་བསྐྱོད་པ་བཞིན། །ཆེད་དུ་བསྐྱོད་སེམས་བྲལ་ཞིང་ཡེ་ཤེས་ཕྲིན་ལས་གནས། །ཞིང་ཁམས་

89-1-218a

ཀུན་དུ་གནས་པ་རྣམ་པར་སྤྱོད་པར་བྱེད། །ཁམས་རྣམས་བཞི་པོ་ཁ་དོག་ཐ་དད་ཡངས་པ་དང་། །ཕྲ་ཞིང་ཆེ་དང་རྣམ་པར་ཕྱེ་བ་ཡང་དག་འཇུག །སྟོང་གསུམ་ཤིན་དུ་ཕྲ་བ་ཀུན་ལ་འཇུག་བྱེད་དེ། །ཁམས་བཞི་འགྲོ་བའི་
ལུས་ཀུན་རྣམ་པར་ཕྱེ་བ་དང་། །རྒྱུད་དྲུག་རིན་ཆེན་རྣམ་པར་ཕྱེ་བའི་རྡུལ་ཕྲན་རྣམས། །རྣམ་པར་ཕྱེ་བའི་ཚད་མེད་འཇུག་བྱེད་པ། །སྨོན་ལམ་བྱིན་གྱིས་བདེ་གཤེགས་ཡང་དག་སྐུལ་བར་མཛད། །རྒྱལ་བ་རྣམས་ཀྱི་སྟོབས་མཆོག་དོན་
དྲན་མངོན་འདོད་པ། །ཡེ་ཤེས་ཡོན་ཏན་དབང་བསྐུར་སངས་རྒྱས་ཀུན་ལས་འཐོབ། །བརྒྱ་སྟོང་ཕྲག་བཅུའི་ཏིང་འཛིན་གྲངས་མེད་གང་ཡོད་པ། །སྤྱོད་ཡུལ་ཤེས་པ་ཚེ་འདི་ཉིད་ལ་ཐོབ་གྱུར་ནས། །དེ་ཡི་རྗེས་ལ་ཐམས་ཅད་
མཁྱེན་པར་དབང་བསྐུར་འཐོབ། །ཡུལ་ཡངས་ཏིང་འཛིན་དེ་དག་ཐོབ་པས་གཡོ་མི་མངའ། །གང་ཚེ་དེ་ཉིད་སངས་རྒྱས་མངོན་པར་དབང་བསྐུར་ཚེ། །པད་མོ་རྒྱ་ཆེན་རིན་ཆེན་ཀུན་སྤྲས་བརྒྱན་པ་འབྱུང་། །དེ་ཡི་འོད་ཟེར་ཁྲག་
ཁྲིག་མཐའ་ཡས་སྟོང་ཕྲག་ཅན། །ཕྱོགས་བཅུའི་འགྲོ་བའི་སྡུག་བསྔལ་རབ་ཞི་བྱེད། །ཆོས་རབ་དོན་དུ་རྒྱལ་སྲས་དབང་བསྐུར་ཐོབ་པར་མཁྱེན། །སངས་རྒྱས་མཛད་པ་རྒྱ་མཚོ་རྣམ་ཐར་ལས། །བདུད་རྩི་དྲི་མེད་ཡེ་ཤེས་མངོན་དགའ་
འཐོབ། །དེ་ནས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྤྱོད་པ་འདི་ཡང་དག་པར་གསུངས་པ་ན་འཇིག་རྟེན་གྱི་ཁམས་རྡོ་རྗེའི་དཔལ་རྒྱས་ཀྱིས་བརྒྱན་པ་ཞེས་བྱ་བ་དག་ནས་དེ་བཞིན་གཤེགས་པ་རྡོ་རྗེ་རྒྱལ་མཚན་ཞེས་
བྱ་བ་དག་ནི་དྲུང་ནས་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ཞེས་བྱ་བ་འདུག་པར་གྱུར་པ་དང་། །དེ་ནས་བྱང་ཆུབ་སེམས་དཔའ་ཆེན་པོ་རྣམ་པར་གྲོལ་བའི་ཟླ་བས་འདི་སྐད་ཅེས་སྨྲས་སོ། །དེ་ནས་
དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་དང་ལྟ་བ་མཚུངས་པ་མེད་པ་སྤྱོད་པ་ཟབ་པའི་སྙིང་པོ་འདི་གདུལ་བྱ་ལ་ཇི་ལྟར་འཇུག་པར་འགྱུར་གྲང་། བྱང་ཆུབ་སེམས་དཔའ་རྡོ་རྗེ་སྙིང་པོས་སྨྲས་པ། དེ་བཞིན་གཤེགས་པ་

89-1-218b

སྟོང་མངོན་པར་རྫོགས་པར་བྱང་ཆུབ་པའི་ཏིང་ངེ་འཛིན་གྱི་སྒོ་དུ་མ་དང་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ངོ་བོ་ཉིད་སྟོན་པ་དང་། སངས་རྒྱས་ཐམས་ཅད་ཀྱི་ཞིང་ཁམས་ཡོངས་སུ་སྦྱང་བ་དང་། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་
སྨིན་ཅིང་གྲོལ་བར་བྱ་བའི་ཕྱིར་དང་། །ཚད་མེད་པ་རྣམ་པར་ཐར་པ་བསམ་གྱིས་མི་ཁྱབ་པའི་ཕྱིར་ལུས་ཅན་ཡེ་ཤེས་ལྡན་པ་དག་ལ་ཀུན་དུ་འཇུག་པར་བྱེད་དོ། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་དེ་དག་ཐམས་ཅད་ཀྱིས་ཟབ་པ་བླ་ན་མེད་པ་
བརྗོད་དུ་མེད་པའི་གནས་ལས་རྒྱ་མཚོ་ལྟར་རྣམ་པར་གྲོལ་བ་སྟོན་པ་ཤིན་དུ་ངོ་མཚར་ཏེ་ལེགས་སོ་ལེགས་སོ་ཞེས་བྱ་བར་བརྗོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་སྤྱོད་པ་ཚད་མེད་པ་དང་ཏིང་ངེ་འཛིན་འབྱམ་
ཀླས་པ་རབ་ཏུ་བསྒྲུབ་པའི་དགོངས་པས་ཆོས་ཀྱི་དབྱིངས་དང་གཉིས་སུ་མེད་པར་ཀུན་ཏུ་རོལ་པ་སྟོན་པར་མཛད་དོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་
མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་སངས་རྒྱས་ཐམས་ཅད་ཀྱི་རྣམ་པར་འཕྲུལ་པ་རྨད་དུ་གྱུར་པ་སྟོན་པའི་ལེའུ་སྟེ་དྲུག་བཅུ་ལྔ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་སྟོང་འཇིག་རྟེན་གྱི་ཁམས་མི་
མཇེད་ཀྱི་ཞིང་དུ་མངོན་པར་རྫོགས་པར་བྱང་ཆུབ་པར་གྱུར་ཅིང་གསང་བ་ཆེན་པོའི་འོག་མིན་གྱི་གནས་སུ་འཇིག་རྟེན་གྱི་ཁམས་ཐམས་ཅད་ཀྱི་སྤྲོས་པ་ལས་འདས་ཤིང་བརྗོད་དུ་མེད་པའི་ཡང་བརྗོད་དུ་མེད་པ་སངས་རྒྱས་སྟོང་མངོན་པར་སངས་
རྒྱས་ནས་རེ་རེ་ཞིང་ལ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དང་། བླ་ན་མེད་པའི་འབུམ་ཕྲག་དཔག་ཏུ་མེད་པས་ཡོངས་སུ་བསྐོར་ཅིང་མདུན་དུ་བདར་ཏེ་གནས་པ་ལ་ཆོས་ཀྱི་འཁོར་ལོ་བསྐོར་བ་དང་བཅས་པ་རེ་རེ་ཞིང་ལ་ཡང་
བྱང་ཆུབ་སེམས་དཔའ་ཕྱག་ན་རྡོ་རྗེ་དང་། བྱང་ཆུབ་སེམས་དཔའ་ཚངས་པའི་རྒྱལ་པོ་དྲུང་ན་འཁོད་པ་ཡོངས་སུ་སྣང་བར་གྱུར་ཏོ། །དེ་དག་ཀྱང་བྱང་ཆུབ་ཀྱི་སྙིང་པོ་གསང་བ་བླ་ན་མེད་པའི་དཀྱིལ་འཁོར་གྱི་འཁོར་ལོ་དང་བཅས་པ་

89-1-219a

ཡོངས་སུ་སྣང་བ་ཆེན་པོས་ཁྱབ་པར་གྱུར་ཏེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པའི་འཇིག་རྟེན་དུ་དེ་བཞིན་གཤེགས་པ་དེ་དག་གིས་སྐུ་གསུང་ཐུགས་ཀྱི་གསང་བ་བསམ་གྱིས་མི་ཁྱབ་པས་འཇུག་པར་
བྱེད་ཅིང་བྱིན་གྱིས་རློབས་པར་བྱེད་ལ། ཡེ་ཤེས་ཡང་པའི་སྤྱན་གྱིས་ཆོས་ཀྱི་དབྱིངས་མི་ཟད་པ་རྡོ་རྗེའི་ཏིང་ངེ་འཛིན་ལ་རབ་ཏུ་གནས་པར་མཛད་དོ། །གསང་བ་འདི་རབ་ཏུ་བསྟན་པ་ན་དེའི་ཚེ་དེའི་དུས་ན་དེ་ནས་བྱང་ཆུབ་
སེམས་དཔའ་སངས་རྒྱས་ཀྱི་ཞིང་ཆེན་པོ་བཅུ་དྲུག་གི་སེམས་དཔའ་རྣམས་ཀྱི་དེ་བཞིན་གཤེགས་པའི་འོད་ཟེར་གྱི་སྙིང་པོ་སྒྲོན་མའི་ཏིང་ངེ་འཛིན་ལ་སོགས་པ་དུ་མ་ཐོབ་བོ། །བྱང་ཆུབ་སེམས་དཔའ་ཆེན་པོ་ཞིང་
བྱེ་བ་ཕྲག་བརྒྱད་ཀྱི་བྱང་ཆུབ་སེམས་དཔས་གནས་པས་ནི་ཡེ་ཤེས་རྒྱ་མཚོ་མཚུངས་པ་མེད་པ་ལ་སོགས་པའི་ཏིང་ངེ་འཛིན་དུ་མ་མངོན་པར་ཐོབ་བོ། །རྣལ་འབྱོར་གྱི་དབང་ཕྱུག་ཆེན་པོ་བྱེ་བ་ཕྲག་བརྒྱད་བཅུའི་གྲངས་
དེ་སྙེད་ཀྱང་གསང་བ་ཆེན་པོ་རྡོ་རྗེའི་ཚུལ་གྱི་ཏིང་ངེ་འཛིན་གྱི་ངང་ལས་སྐད་ཅིག་རེ་རེས་མངོན་པར་རྫོགས་པར་བྱང་ཆུབ་པ་ཐོབ་པར་གནས་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཀུན་དུ་བཟང་པོས་གསང་བ་ཉེ་བར་བསྡུ་
བའི་དོན་དུ་གསོལ་པར། སངས་རྒྱས་རྣམས་ཀྱི་གཟུགས་སྐུ་མཐའ་ཡས་པ། །རྒྱལ་བའི་སྙིང་པོ་ཡེ་ཤེས་སྐུ་གཅིག་ཏུ། །རྣམ་པར་ཕྱེད་པ་འོད་གསལ་བ་ཡི་གནས། །གསང་བ་ཆེན་པོའི་གནས་འདིར་མངོན་
སངས་རྒྱས། །གང་དུ་སེམས་ཉིད་བྱང་ཆུབ་མཆོག་གྱུར་པ། །འདྲེན་པ་ཆོས་ཀྱི་རྒྱལ་པོ་ཚུལ་འདི་ཡིན་ཞེས་སྨྲས་པ་དང་། སངས་རྒྱས་དང་བྱང་ཆུབ་སེམས་དཔའ་དེ་དག་མ་ལུས་པའི་ཐུགས་ཡི་རངས་ཤིང་། རབ་ཏུ་དགའ་
བས་རྒྱས་པར་གྱུར་ཏོ། །དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོས་བླ་ན་མེད་པའི་ཡོངས་སུ་འདུས་པའི་འཁོར་གྱི་དཀྱིལ་འཁོར་རྣམས་ལ་གཟིགས་ཏེ་བཀའ་སྩལ་པ། གསང་བ་ཆེན་པོ་བསྟན་པའི་དཀྱིལ་འཁོར་

89-1-219b

འཁོར་ལོ་འདི་ལྟ་སྟེ། ཐུན་མོང་དུ་གྱུར་པའི་བཀོད་པའི་དཀྱིལ་འཁོར་དང་། ཁྱད་པར་ཡོངས་སུ་རྫོགས་པའི་དཀྱིལ་འཁོར་དང་། མཆོག་ཏུ་གསང་བ་ཐབས་ཀྱི་དཀྱིལ་འཁོར་རོ། །ཡང་དེ་ཉིད་ལས་བྱུང་རྒྱ་ཆེར་སྟོན་པ་དང་། །ཟབ་
མོ་དང་ནི་བླ་མེད་ཚུལ་མཆོག་སྟེ། །ཕྱི་ནང་གསང་བ་དེ་ཉིད་ཡེ་ཤེས་ཀྱི། །དཀྱིལ་འཁོར་ཚད་མེད་འདིར་ནི་བསྟན་པ་ཡིན། །དེ་ལ་དེ་བཞིན་གཤེགས་པ་སྟོང་དག་གི། །སྐུ་ཡི་དཀྱིལ་འཁོར་སྤྲོ་དང་སྡུད་པ་དང་། །གསུང་གི་
དཀྱིལ་འཁོར་གསང་སྔགས་འབུམ་ཕྲག་སྟེ། །ཐུགས་ཀྱི་དཀྱིལ་འཁོར་ཡེ་ཤེས་ལྔར་བསྡུས་པའོ། །ཉི་ཤུ་རྩ་ལྔའི་རྣམ་དབྱེ་གསལ་བ་ཡིས། །དམ་པའི་རིགས་ནི་བརྒྱ་རུ་འགྱུར་བ་སྟེ། །དེ་ཉིད་དཀྱིལ་འཁོར་
མངོན་པར་ཕྱུང་བ་ཡིན། །རིགས་ཀྱི་དཀྱིལ་འཁོར་ལྔ་ཡི་དབྱེ་བ་ཡིས། །རྩ་བ་གསང་བའི་དཀྱིལ་འཁོར་གསུམ་དུ་བསྡུས། །མདོ་དོན་སྤྱོད་དང་ཐེག་པའི་དོན། །དེ་ཉིད་བསྡུས་པ་གཅིག་པ་སྡོམ་པ་ཆེ། །ཐ་དད་པ་དང་
འབྱུང་བ་ཉེ་བར་གྱུར་པ་ལས། །ལུས་དང་ཡུལ་དང་དབང་པོའི་སྤྱོད་ཡུལ་དུ། །གསང་བ་དུ་མ་ཉེ་བར་སྡུད་པའི་ཚུལ། །སྤྱི་དང་བྱེ་བྲག་དཀྱིལ་འཁོར་འདིར་གསུངས་སོ། །བཅོམ་ལྡན་རྣམ་པར་སྣང་མཛད་དཀྱིལ་འཁོར་དུ། །
རེག་བྱ་རྡོ་རྗེའི་དབུས་སུ་མངོན་གནས་ནས། །རྡོ་རྗེ་མི་བསྐྱོད་ཤར་གྱི་གནས་སུ་དགོད། །རྡོ་རྗེ་དཀྱིལ་དཀྲུང་གཉིས་མེད་སྦྱོར་བས་བཞུགས། །ལྷོར་ནི་དཀོན་མཆོག་དཔལ་ལོ། །ནུབ་དུ་འོད་དཔག་མེད་པའོ། །བྱང་དུ་དོན་ཡོད་
གྲུབ་པའོ། །ཤར་ལྷོའི་གྲྭར་ནི་ལྷ་མོ་སྤྱན་མའོ། །ལྷོ་ནུབ་ཏུ་ནི་མཱ་མ་ཀཱིའོ། ནུབ་བྱང་དུ་ནི་གོས་དཀར་མོའོ། །བྱང་ཤར་དུ་ནི་རྡོ་རྗེ་སྒྲོལ་མའོ། །དེ་ནི་ནང་གི་ཕོ་བྲང་ལ་གནས་པའོ། །དེའི་ཕྱི་ཁྱམས་ཀྱི་གྲྭ་བཞི་ལ་མེའི་
ཕྱོགས་སུ་གཟུགས་རྡོ་རྗེ་མའོ། །བདེན་བྲལ་དུ་ནི་སྒྲ་རྡོ་རྗེའོ། །རླུང་གི་ཕྱོགས་སུ་དྲི་རྡོ་རྗེའོ། །དབང་ལྡན་གྱི་ཕྱོགས་སུ་ནི་རོ་རྡོ་རྗེའོ། །ཤར་གྱི་སྣམ་བུ་ལ་བྱམས་པ་མགོན་པོ་དང་སའི་སྙིང་པོའོ། །ལྷོའི་སྣམ་བུ་ལ་

89-1-220a

ཕྱག་ན་རྡོ་རྗེ་དང་ནམ་མཁའི་སྙིང་པོའོ། །ནུབ་ཀྱི་སྣམ་བུ་ལ་འཇིག་རྟེན་དབང་ཕྱུག་དང་འཇམ་དབྱངས་རྡོ་རྗེའོ། །བྱང་གི་སྣམ་བུ་ལ་སྒྲིབ་པ་ཐམས་ཅད་རྣམ་པར་སེལ་བ་དང་ཀུན་དུ་བཟང་པོ་གནས་པའོ། །ཤར་
གྱི་སྒོར་ནི་གཤིན་རྗེ་མཐར་བྱེད་དོ། །ལྷོ་སྒོར་ནི་ཤེས་རབ་མཐར་བྱེད་དོ། །ནུབ་སྒོར་ནི་པད་མ་མཐར་བྱེད་དོ། །བྱང་སྒོར་ནི་བགེགས་མཐར་བྱེད་དོ། །ཤར་ལྷོ་མཚམས་ཀྱི་གྲྭར་ནི་མི་གཡོ་བའོ། །ལྷོ་ནུབ་ཏུ་འདོད་པའི་རྒྱལ་
པོའོ། །ནུབ་བྱང་དུ་ནི་དབྱུག་སྔོན་ཅན་ནོ། །བྱང་ཤར་མཚམས་སུ་ནི་སྟོབས་པོ་ཆེ་སྟེ་ཁྲོ་བོའི་རྒྱལ་པོ་ཉིད་དོ། །སྟེང་ཕྱོགས་ཤར་གྱི་སྒོ་དྲུང་དུ་གཙུག་ཏོར་འཁོར་ལོས་སྒྱུར་བའོ། །འོག་ཕྱོགས་ནུབ་ཀྱི་སྒོ་དྲུང་དུ་ནི་གནོད་
མཛེས་རྒྱལ་པོ་རྣམ་པར་དགོད་པར་བྱའོ། །དེ་ལྟར་དེ་བཞིན་གཤེགས་པའི་རིགས་ཀྱི་སྐུའི་དཀྱིལ་འཁོར་འབྱུང་བ་རྡོ་རྗེའི་ཏིང་ངེ་འཛིན་དུ་གསུངས་སོ། །བཅོམ་ལྡན་འོད་དཔག་མེད་པའི་དཀྱིལ་འཁོར་དུ། །རེག་བྱ་རྡོ་རྗེ་
དབུས་སུ་མངོན་གནས་ནས། །བཅོམ་ལྡན་མི་བསྐྱོད་ནུབ་ཏུ་གནས་པ་སྟེ། །བདེ་ཆེན་ཡེ་ཤེས་ཚུལ་མཆོག་ལེགས་པར་བཞུགས། །ཤར་དུ་ནི་རྣམ་པར་སྣང་མཛད་དོ། །ལྷོར་ནི་དཀོན་མཆོག་དཔལ་ལོ། །ནུབ་ཏུ་འོད་
དཔག་མེད་དོ། །བྱང་དུ་དོན་ཡོད་གྲུབ་པའོ། །ཤར་ལྷོའི་གྲྭར་ནི་ལྷ་མོ་སྤྱན་མའོ། །ལྷོ་ནུབ་ཏུ་ནི་མཱ་མ་ཀཱིའོ། །ནུབ་བྱང་དུ་ནི་གོས་དཀར་མོའོ། །བྱང་ཤར་དུ་ནི་སྒྲོལ་མའོ། །དེ་ནི་ནང་གི་ཕོ་བྲང་ལ་གནས་པའོ། །དེའི་ཕྱི་
ཁྱམས་ཀྱི་གྲྭ་བཞི་ལ་མེའི་ཕྱོགས་སུ་གཟུགས་རྡོ་རྗེ་མའོ། །བདེན་བྲལ་དུ་ནི་སྒྲ་རྡོ་རྗེའོ། །རླུང་གི་ཕྱོགས་སུ་དྲི་རྡོ་རྗེའོ། །དབང་ལྡན་གྱི་ཕྱོགས་སུ་རོ་རྡོ་རྗེའོ། །ཤར་གྱི་སྣམ་བུ་ལ་བྱམས་པ་མགོན་པོ་དང་སའི་
སྙིང་པོའོ། །ལྷོའི་སྣམ་བུ་ལ་ཕྱག་ན་རྡོ་རྗེ་དང་ནམ་མཁའི་སྙིང་པོའོ། །ནུབ་ཀྱི་སྣམ་བུ་ལ་འཇིག་རྟེན་དབང་ཕྱུག་དང་འཇམ་དཔལ་ལོ། །བྱང་གི་སྣམ་བུ་ལ་སྒྲིབ་པ་རྣམ་པར་སེལ་བ་དང་ཀུན་དུ་བཟང་པོའོ། །

89-1-220b

ཤར་སྒོར་ནི་གཤིན་རྗེ་མཐར་བྱེད་དོ། །ལྷོ་སྒོར་ནི་ཤེས་རབ་མཐར་བྱེད་དོ། །ནུབ་སྒོར་ནི་པད་མ་མཐར་བྱེད་དོ། །བྱང་སྒོར་ནི་བགེགས་མཐར་བྱེད་དོ། །ཤར་ལྷོ་མཚམས་སུ་ཁྲོ་རྒྱལ་མི་གཡོ་བའོ། །ལྷོ་ནུབ་དུ་ནི་འདོད་པའི་
རྒྱལ་པོའོ། །ནུབ་བྱང་དུ་ནི་དབྱུག་སྔོན་ཅན་ནོ། །བྱང་ཤར་དུ་ནི་སྟོབས་པོ་ཆེ་སྟེ། །དེ་ལྟར་གྱུར་པའི་ཁྲོ་བོ་རྣམས་སོ། །སྟེང་ཕྱོགས་སུ་ཤར་སྒོའི་རྩ་བར་གཙུག་ཏོར་འཁོར་ལོས་སྒྱུར་བའོ། །འོག་ཕྱོགས་ནུབ་སྒོའི་རྩ་བར་
གནོད་མཛེས་རྒྱལ་པོ་དགོད་པར་བྱའོ། །དེ་ལྟར་པད་མའི་རིགས་ཀྱི་གསུང་གི་དཀྱིལ་འཁོར་འབྱུང་བ་རྡོ་རྗེའི་ཏིང་ངེ་འཛིན་དུ་གསུངས་སོ། །བཅོམ་ལྡན་རིན་ཆེན་འབྱུང་ལྡན་དཀྱིལ་འཁོར་དུ། །རེག་བྱ་རྡོ་རྗེ་དབུས་སུ་
མངོན་གནས་ཏེ། །རྡོ་རྗེ་འཛིན་པ་ལྷོ་ཡི་ལེ་ཙེར་བཞུགས། །དེ་ཉིད་དཀོན་མཆོག་ལེགས་པར་གྱུར་པའོ། །ཤར་དུ་ནི་རྣམ་པར་སྣང་མཛད་དོ། །ནུབ་ཏུ་ནི་འོད་དཔག་མེད་དོ། །བྱང་དུ་ནི་གདོན་མི་ཟ་བ་ཉིད་དོ། །ཤར་
ལྷོར་ལྷ་མོ་སྤྱན་མ། ལྷོ་ནུབ་ཏུ་མཱ་མ་ཀཱི། །ནུབ་བྱང་དུ་གོས་དཀར་མོ། བྱང་ཤར་དུ་རྡོ་རྗེ་སྒྲོལ་མའོ། །དེ་ནས་ནང་གི་ཕོ་བྲང་ལ་གནས་པའོ། །དེའི་ཕྱི་ཁྱམས་ཀྱི་གྲྭ་བཞི་ལ་མེའི་མཚམས་སུ་གཟུགས་རྡོ་རྗེ་མ། བདེན་
བྲལ་དུ་སྒྲ་རྡོ་རྗེ། རླུང་དུ་དྲི་རྡོ་རྗེ། དབང་ལྡན་དུ་རོ་རྡོ་རྗེའོ། །ཤར་གྱི་སྣམ་བུ་ལ་བྱམས་པ་རྡོ་རྗེ་དང་སའི་སྙིང་པོ། ལྷོའི་སྣམ་བུ་ལ་ཕྱག་ན་རྡོ་རྗེ་དང་ནམ་མཁའི་སྙིང་པོ། ནུབ་ཀྱི་སྣམ་བུ་ལ་འཇིག་རྟེན་དབང་ཕྱུག་དང་
འཇམ་དབྱངས་དཔལ། བྱང་གི་སྣམ་བུ་ལ་སྒྲིབ་པ་རྣམ་པར་སེལ་བ་དང་ཀུན་དུ་བཟང་པོའོ། །ཤར་སྒོར་གཤིན་རྗེ་གཤེད་དོ། །ལྷོ་སྒོར་རྣམ་པར་རྒྱལ་བའོ། །ནུབ་སྒོར་རྟ་མགྲིན་ནོ། །བྱང་སྒོར་བདུད་རྩི་འཁྱིལ་པའོ། །
ཤར་ལྷོར་མི་གཡོ་བ། ལྷོ་ནུབ་ཏུ་འདོད་པའི་རྒྱལ་པོ། ནུབ་བྱང་སྟོབས་པོ་ཆེའོ། །ཤར་སྟོད་དུ་གཙུག་ཏོར་འཁོར་ལོས་སྒྱུར་བའོ། །ནུབ་སྨད་དུ་གནོད་མཛེས་རྒྱལ་པོ་སྟེ། ཁྲོ་བོའི་རྒྱལ་པོ་བཅུ་དང་ལྡན་བཅས་

89-1-221a

པར་འབྱུང་བའོ། །དེ་ལྟར་རིན་པོ་ཆེའི་རིགས་ཡོན་ཏན་གྱི་དཀྱིལ་འཁོར་འབྱུང་བ་རྡོ་རྗེའི་ཏིང་ངེ་འཛིན་འདི་གསུངས་སོ། །བཅོམ་ལྡན་གདོན་མི་ཟ་བའི་དཀྱིལ་འཁོར་དུ། །རེག་བྱ་རྡོ་རྗེ་དབུས་སུ་གཉིས་མེད་པར། །
རྡོ་རྗེ་འཛིན་ལ་བྱང་གི་ཕྱོགས་སུ་དགོད། །བདེ་བའི་སྟན་ལ་ལེགས་པར་བཞུགས་པའོ། །ཤར་དུ་རྣམ་པར་སྣང་མཛད་དོ། །ལྷོར་ནི་རིན་ཆེན་འབྱུང་བའོ། །ནུབ་དུ་འོད་དཔག་མེད་དོ། །བྱང་དུ་དོན་ཡོད་གྲུབ་པ། ཤར་ལྷོར་སྤྱན་མའོ། །
ལྷོ་ནུབ་ཏུ་མཱ་མ་ཀཱིའོ། །ནུབ་བྱང་དུ་གོས་དཀར་མོའོ། །བྱང་ཤར་མཚམས་ཀྱི་གྲྭར་ནི་ལྷ་མོ་སྒྲོལ་མའོ། །དེ་ནི་ནང་གི་ཕོ་བྲང་ལ་གནས་པའོ། །དེའི་ཕྱི་ཁྱམས་ཀྱི་གྲྭ་བཞི་ལ་མེའི་ཕྱོགས་སུ་གཟུགས་རྡོ་རྗེ་མའོ། །བདེན་བྲལ་དུ་སྒྲ་
རྡོ་རྗེའོ། །རླུང་གི་མཚམས་སུ་དྲི་རྡོ་རྗེའོ། །འབྱུང་པོའི་མཚམས་སུ་རོ་རྡོ་རྗེའོ། །ཤར་གྱི་སྣམ་བུ་ལ་བྱམས་པ་དང་སའི་སྙིང་པོའོ། །ལྷོའི་སྣམ་བུ་ལ་ཕྱག་ན་རྡོ་རྗེ་དང་ནམ་མཁའི་སྙིང་པོའོ། །ནུབ་ཀྱི་སྣམ་བུ་ལ་འཇིག་རྟེན་དབང་
ཕྱུག་དང་འཇམ་དབྱངས་དཔལ་ལོ། །བྱང་གི་སྣམ་བུ་ལ་སྒྲིབ་པ་རྣམ་པར་སེལ་བ་དང་། ཀུན་དུ་བཟང་པོའོ། །ཤར་སྒོར་ནི་གཤིན་རྗེ་གཤེད། ལྷོ་སྒོར་ཤེས་རབ་མཐར་བྱེད། ནུབ་སྒོར་པད་མ་མཐར་བྱེད། བྱང་སྒོར་བགེགས་
མཐར་བྱེད་པ་ཉིད་དོ། །ཤར་ལྷོར་ནི་མི་གཡོ་བའོ། །ལྷོ་ནུབ་དུ་ནི་འདོད་པའི་རྒྱལ་པོའོ། །ནུབ་བྱང་དུ་ནི་དབྱུག་སྔོན་ཅན་ནོ། །བྱང་ཤར་དུ་ནི་སྟོབས་པོ་ཆེའོ། །སྟེང་དུ་གཙུག་ཏོར་འཁོར་ལོས་སྒྱུར་བའོ། །འོག་ཏུ་ཁྲོ་བོ་གནོད་མཛེས་
རྒྱལ་པོ་གནས་པ་སྟེ། ཁྲོ་བོ་བཅུ་མངོན་པར་འབྱུང་བའོ། །དེ་ལྟར་ལས་ཀྱི་རིགས་ཕྲིན་ལས་ཀྱི་དཀྱིལ་འཁོར་འབྱུང་བ་རྡོ་རྗེའི་ཏིང་ངེ་འཛིན་འདི་གསུངས་སོ། །གང་དུ་ལྷ་མོ་སྤྱན་མ་གཙོར་གྱུར་པ། །དཀྱིལ་འཁོར་དེར་
ནི་རྡོ་རྗེ་འཛིན་པ་གཙོ། །རེག་བྱ་རྡོ་རྗེ་ཤར་ལྷོའི་གྲྭར་བཞུགས་པས། །དཀྱིལ་འཁོར་ངེས་པར་སྤྲུལ་པའི་ཚུལ་བསྟན་པའོ། །རྡོ་རྗེ་མཱ་མ་ཀཱི་ལས་གཙོར་གྱུར་པ། །རྡོ་རྗེ་འཛིན་པ་དེ་དང་གཉིས་མེད་དེ། །རེག་བྱ་རྡོ་རྗེ་ལྷོ་ནུབ་གྲྭར་

89-1-221b

གནས་ཏེ། །ལྷག་མ་གཞན་རྣམས་སྔོན་དང་མཚུངས་པའོ། །རྡོ་རྗེ་གོས་དཀར་མོ་དང་རྡོ་རྗེ་འཛིན། །གཉིས་སུ་མེད་པར་དབུས་སུ་བཞུགས་པ་སྟེ། །རེག་བྱ་རྡོ་རྗེ་ནུབ་བྱང་གྲྭར་བཞུགས་པས། །དཀྱིལ་འཁོར་འཁོར་ལོ་ངེས་པར་
སྤྲུལ་པའོ། །ལྷ་མོ་སྒྲོལ་མ་དང་ནི་རྡོ་རྗེ་འཛིན། །གཉིས་མེད་བདེ་བས་བཞུགས་པ་དེ་ཉིད་དེ། །རེག་བྱ་རྡོ་རྗེ་བྱང་ཤར་གྲྭར་བཞུགས་པ། །ཚད་མེད་ལྷ་མོ་བཞི་ཡི་དཀྱིལ་འཁོར་རོ། །གཟུགས་ཀྱི་རྡོ་རྗེ་དང་ནི་རྡོ་རྗེ་འཛིན། །གཉིས་
མེད་བཞུགས་པ་དབུས་ཀྱི་གཙོ་བོ་སྟེ། །རེག་བྱ་རྡོ་རྗེ་མེ་ཡི་ཕྱོགས་སུའོ། །སྒྲ་ཡི་རྡོ་རྗེ་དང་ནི་རྡོ་རྗེ་འཛིན། །གཉིས་མེད་བཞུགས་པ་དབུས་ཀྱི་གཙོ་བོར་གྱུར། །རེག་བྱ་རྡོ་རྗེ་སྲིན་པོའི་ཕྱོགས་སུའོ། །དྲི་ཡི་རྡོ་རྗེ་དང་ནི་
རྡོ་རྗེ་འཛིན། །གཉིས་མེད་དབུས་ཀྱི་གཙོ་བོར་གྱུར་པ་ནི། །རེག་བྱ་རྡོ་རྗེ་རིག་འཛིན་ཕྱོགས་སུའོ། །རོ་ཡི་རྡོ་རྗེ་དང་ནི་རྡོ་རྗེ་འཛིན། །དབུས་གནས་མཉམ་པར་སྦྱོར་བའི་ཚུལ་ཉིད་དོ། །རེག་བྱ་རྡོ་རྗེ་དབང་ལྡན་ཕྱོགས་གནས་
པའོ། །འདི་དག་མཆོད་བྱེད་ལྷ་མོ་བཞི་དག་གི། །དཀྱིལ་འཁོར་སོ་སོར་ངེས་པར་བསྟན་པ་ཡིན། །འདི་དག་རིགས་ནི་སོ་སོར་བསྟན་པ་ཡི། །དཀྱིལ་འཁོར་ཐ་དད་རིམ་པ་བསྟན་པའོ། །བྱམས་པའི་མགོན་པོ་གཙོ་བོར་གྱུར་
པ་ནི། །རྡོ་རྗེ་འཛིན་པ་ཤར་ཕྱོགས་དང་པོའི་སར། །འཕོ་བའི་རིམ་པ་བསྟན་པ་བླ་ན་མེད། །རེག་བྱ་རྡོ་རྗེ་དབུས་སུ་འཁྲིལ་པར་བཞུགས། །ས་ཡི་སྙིང་པོ་གཙོར་གྱུར་དཀྱིལ་འཁོར་ལ། །རྡོ་རྗེ་འཛིན་པ་དེར་གནས་འཕོ་
བ་སྟེ། །རེག་བྱ་རྡོ་རྗེའང་དབུས་སུ་གནས་པའོ། །ཕྱག་ན་རྡོ་རྗེ་རེག་བྱ་རྡོ་རྗེ་དང་། །གཉིས་མེད་དབུས་གནས་ཚུལ་འདི་བསྟན་པའོ། །རྡོ་རྗེ་འཛིན་པ་དང་པོའི་གནས་དེར་འཕོ། །རྡོ་རྗེ་དབང་ཕྱུག་རེག་བྱ་རྡོ་རྗེ་དང་། །གཉིས་
མེད་དབུས་གྱུར་གཙོ་བོ་འཕོ་བའི་ཚུལ། །རྡོ་རྗེ་འཛིན་པ་ནུབ་ཏུ་འཕོ་བ་མཛད། །འཇམ་དབྱངས་རྡོ་རྗེ་རེག་བྱ་རྡོ་རྗེ་དང་། །གཉིས་མེད་བདེ་ཆེན་ནུབ་ཏུ་གཙོ་བོ་བཞུགས། །སྒྲིབ་པ་རྣམ་སེལ་རེག་བྱ་རྡོ་རྗེ་དང་། །གཉིས་མེད་

89-1-222a

རྡོ་རྗེ་འཛིན་པ་བྱང་དུ་གནས། །ཀུན་དུ་བཟང་པོ་རེག་བྱ་རྡོ་རྗེ་དང་། །གཉིས་མེད་དབུས་བཞུགས་རྡོ་རྗེ་འཛིན་པ་ནི། །བྱང་ཕྱོགས་ལྷ་སྣམ་དག་ཏུ་བཞུགས་པར་མཛད། །འདི་དག་ཀུན་དུ་རིམ་པ་ཤེས་པར་
བྱ། །གཤིན་རྗེ་གཤེད་པོ་དང་ནི་རེག་རྡོ་རྗེ། །གཉིས་མེད་བཞུགས་པ་གཙོ་བོ་འཕོ་བར་བསྟན། །ཤེས་རབ་མཐར་བྱེད་དང་ནི་རེག་རྡོ་རྗེ། །དབུས་བཞུགས་རྡོ་རྗེ་འཛིན་པ་ལྷོར་གནས་པའོ། །རྟ་མགྲིན་དབང་དང་རེག་བྱ་རྡོ་རྗེ་
མ། །དབུས་བཞུགས་རྡོ་རྗེ་འཛིན་པ་ནུབ་སྒོར་བཞུགས། །བདུད་རྩི་འཁྱིལ་པ་དང་ནི་རེག་རྡོ་རྗེ། །དབུས་བཞུགས་རྡོ་རྗེ་འཛིན་པ་བྱང་སྒོར་གནས། །མི་གཡོ་མགོན་པོ་དང་ནི་རེག་རྡོ་རྗེ། །དབུས་བཞུགས་རྡོ་རྗེ་འཛིན་
པ་ཤར་ལྷོར་གནས། །འདོད་པའི་རྒྱལ་པོ་དང་ནི་རེག་རྡོ་རྗེ། །དབུས་བཞུགས་རྡོ་རྗེ་འཛིན་པ་ནུབ་བྱང་གནས། །དབྱུག་སྔོན་ཅན་དང་ལྷ་མོ་རེག་རྡོ་རྗེ། །དབུས་བཞུགས་རྡོ་རྗེ་འཛིན་པ་ནུབ་བྱང་དུའོ། །རྡོ་རྗེ་སྟོབས་པོ་
ཆེ་དང་རེག་བྱ་རྡོ་རྗེ། །དབུས་བཞུགས་རྡོ་རྗེ་འཛིན་པ་བྱང་ཤར་གནས། །གནོད་མཛེས་རྒྱལ་པོ་དང་ནི་རེག་རྡོ་རྗེ། །དབུས་གནས་རྡོ་རྗེ་འཛིན་པ་འོག་ཕྱོགས་སུ། །གཙུག་ཏོར་འཁོར་ལོས་སྒྱུར་བ་རེག་རྡོ་རྗེ། །དབུས་
འགྱུར་རྡོ་རྗེ་འཛིན་པ་སྟེང་དུ་དགོད། །འདི་དག་ཐམས་ཅད་ཞལ་གསུམ་ཕྱག་དྲུག་པ། །སུམ་བཅུ་རྩ་གཉིས་རྣལ་འབྱོར་མཁས་པས་དགོད། །རྡོ་རྗེའི་གདུང་དང་རྡོ་རྗེའི་ཀ་བ་ནི། །རིན་ཆེན་བུམ་པ་པད་མར་མཛེས་
བྱས་པ། །དུ་མས་བཏེག་པའི་ཚད་མེད་ཕྲེང་བ་ཅན། །རེ་རེ་ལ་ཡང་སྒོ་བཞི་རྟ་བབས་ལྡན། །དཀྱིལ་འཁོར་ཆེན་པོ་ཚད་མེད་སྒོ་བཞི་ལས། །ལྷོར་ནི་གསང་བའི་བདག་པོའི་དཀྱིལ་འཁོར་ལ། །དབུས་སུ་སྣ་
ཚོགས་བདེ་མ་དག་དང་ནི། །གཉིས་སུ་མེད་པར་སྦྱོར་བ་བསྟན་པའོ། །ཞལ་གསུམ་ཕྱག་དྲུག་རྡོ་རྗེ་དྲིལ་བུ་དང་། །ནོར་བུ་འཁོར་ལོ་པད་མ་རལ་གྲི་སྟེ། །ཤིན་དུ་མཚུངས་པ་རྡོ་རྗེ་གདེངས་པོ་སྟེ། །རྡོ་རྗེ་བེ་ཅོན་རྡོ་རྗེ་

89-1-222b

འབར་བ་དང་། །རྡོ་རྗེ་དྲག་པོ་བཞི་ཡང་གཙོ་བོར་མཚུངས། །སྒེག་མོ་ཕྲེང་མ་གླུ་མ་གར་མ་དང་། །མེ་ཏོག་བདུག་སྤོས་མར་མེ་དྲི་ཆབ་མ། །ཁྱམས་སུ་རྡོ་རྗེ་གཙུག་ཏོར་རྡོ་རྗེ་འཇིགས་བྱེད་དང་། །རྡོ་རྗེ་ཉི་མ་རྡོ་རྗེ་སྤྱན་
དང་ནི། །རྡོ་རྗེ་བ་དན་རྡོ་རྗེ་འཆིང་མཛད་དང་། །རྡོ་རྗེ་ནག་པོ་རྡོ་རྗེ་ལས་བཅས་པ། །ཕྱོགས་གནས་ཤིན་དུ་གསལ་བའི་དཀྱིལ་འཁོར་ལོ། །ཐུན་མོངས་ཁྲོ་རྒྱལ་བཅུས་ནི་ཡོངས་བསྐོར་བའོ། །ཚངས་པའི་རྒྱལ་
པོའི་དཀྱིལ་འཁོར་བྱང་དུ་སྟེ། །ལྷ་མོ་ཞི་བ་མོ་དང་གཉིས་མེད་པ། །ཞལ་གསུམ་ཕྱག་དྲུག་སེར་ཞིང་ཐལ་མོ་སྦྱར། །འཁོར་ལོ་སྡིགས་མཛུབ་རལ་གྲི་ནོར་བུ་སྟེ། །ཤར་དུ་བརྒྱ་བྱིན་ཁྱུང་མགོ་ལྷོ་རུ་ཡང་། །དབང་ཕྱུག་
ཤང་ཤང་གདོང་དང་ནུབ་དང་བྱང་། །ཁྱབ་འཇུག་སེང་མགོ་ཅན་དང་གླང་པོའི་མགོ། །ཕྱོགས་ཀྱི་བདག་པོ་དག་དང་མཚམས་བཞིར་ཡང་། །ཞི་བ་མོ་དང་དབང་མོ་དྲག་མོ་དང་། །ཙ་མུན་ཌིར་བཅས་རྒན་བྱེད་མ་དང་ནི། །གཏུམ་
པ་མ་དང་ཕྲེང་ལྡན་མེ་ཏོག་མ། །དེ་དག་དང་བཅས་ལྷ་སྲིན་སྡེ་བརྒྱད་དང་། །ཕྱོགས་སྐྱོང་བཅུ་ཡིས་ཡོངས་སུ་བསྐོར་བའོ། །ཁྱམས་ཀྱི་ཕྱི་རོལ་ཁོར་ཡུག་མཚམས་བཞི་ལ། །རྒྱལ་ཆེན་བཞི་བཅས་རོལ་པས་ཡོངས་
བསྐོར་བ། །བཀྲ་ཤིས་དང་ལྡན་པད་མའི་ཤིང་བཅས་པས། །འཇིག་རྟེན་འཇིག་རྟེན་འདས་པའི་ཐུན་མོང་གནས། །དཀྱིལ་འཁོར་རྒྱལ་པོ་མཆོག་ཏུ་བཤད་པ་ཡིན། །དེ་ལྟར་ཡོངས་སུ་རྫོགས་པའི་དཀྱིལ་འཁོར་ལ། །
དངོས་པོ་ཐམས་ཅད་ཀྱིས་ནི་བལྟས་ནས་ཀྱང་། །སྙིང་པོ་སྔགས་ཀྱི་འོད་ཟེར་ལྕགས་ཀྱུ་ཡིས། །དྲངས་ནས་བདེ་བར་གཤེགས་རྣམས་བསྒོམ་པར་བྱ། །ཤེས་རབ་ཐབས་ཀྱི་རང་བཞིན་དྲི་མེད་པའི། །ཏིང་འཛིན་
ལས་བྱུང་བུམ་པའི་བདེས་གང་བའི། །འཁོར་ལོ་བསམས་ནས་དེ་ནས་གཤིན་རྗེ་ཡིས། །མཐར་བྱེད་ཚོགས་བཅུས་བར་ཆད་བསྲུང་བར་བྱ། །རང་གི་སྙིང་པོ་མངོན་བཟླས་མཆོད་ཡོན་ནི། །ཙན་དན་བཟང་སོགས་

89-1-223a

མེ་ཏོག་གིས་མཛེས་དབུལ། །རང་ལ་ཇི་ལྟ་བཞིན་དུ་ཀུན་དབང་བསྐུར། །ཆོ་ག་འདི་ཡིས་ཐམས་ཅད་མཆོད་པར་བྱ། །པད་མའི་ནང་གི་ས་བོན་འོད་རྣམས་ཀྱིས། །གཟུགས་ལ་སོགས་པ་ཐམས་ཅད་དྲངས་ནས་ནི། །
ཡང་དག་བྱང་ཆུབ་ཡིད་ཀྱི་ངོ་བོ་ནི། །འོད་ཀྱི་དཀྱིལ་འཁོར་དག་ཏུ་བསྒོམ་པར་བྱ། །ཤེས་རབ་བ་སྤུ་རེ་རེ་ལས་སྤྲོས་པའི། །འོད་ཟེར་རྣམ་པ་སྣ་ཚོགས་རྒྱ་ཆེན་ཚོགས། །མ་ལུས་ནམ་མཁའི་ཁམས་ནི་ཀུན་དུ་ཁྱབ། །དེ་ལས་
བློ་དང་ལྡན་པས་རབ་ཏུ་སྤྲོ། །འོད་ཀྱི་སྒོ་ལས་ངེས་པར་འབྱུང་བ་ཡི། །ཡན་ལག་དྲི་མེད་རྒྱན་ཀུན་གྱིས་ལེགས་བརྒྱན། །མེ་ལོང་པི་ཝང་གླིང་བུ་རྫ་རྔ་དང་། །བཞད་མ་གླུ་མ་ཕྲེང་མ་གར་མ་དང་། །རྫ་རྔ་ཆེ་དང་མེ་ཏོག་བདུག་སྤོས་དང་། །
མར་མེ་དྲི་ཆབ་ཞལ་ཟས་སྣོད་འཛིན་དང་། །གོས་དང་ཆོས་འབྱུང་ལ་སོགས་འཛིན་པ་ཡི། །བཅུ་དྲུག་རིག་མ་ལྷ་མོ་རྣམ་སྒེག་ཅིང་། །རོལ་པའི་ལག་པས་ཀུན་དུ་སྒྱུར་བ་ནི། །འོད་ཀྱི་སྣང་བས་སྤྲུལ་པ་སྣ་ཚོགས་པའི། །
མཆོད་པའི་སྤྲིན་གྱི་དྲ་བས་ཁྱབ་པ་དང་། །དངོས་རྣམས་སྒྱུ་མ་ལྟ་བུར་སོ་སོར་ནི། །ཡང་དག་རིག་ཅིང་འཇིག་རྟེན་ལྟ་མཁས་པ། །རྟོག་པ་མ་ལུས་ཀུན་ལས་ངེས་གྲོལ་ཞིང་། །མཆོག་ཏུ་བདེ་བ་བསྐྱེད་པའི་རྒྱུར་གྱུར་
པ། །གཟུགས་ལ་སོགས་པ་ལྷ་མོ་རྣམས་དང་ནི། །དེ་བཞིན་ཕྱི་ཡི་དྲི་སོགས་ཐམས་ཅད་ཀྱིས། །རྒྱལ་བའི་དབང་པོ་རྣམས་ནི་ལེགས་མཆོད་ཅིང་། །ཐ་དད་རྣམ་པར་རྟོག་ལས་ངེས་གྲོལ་བའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་
བཛྲ་སྭ་བྷཱ་བ་ཨཱཏ་མ་ཀོ྅ཧཾ། སྒྲ་ཡི་ཡུལ་རྣམས་མ་ལུས་པ་རྣམས་ནི། །བྲག་ཆའི་སྒྲ་དང་མཚུངས་པར་ངེས་བརྟགས་ལ། །རང་ཡིད་ལྷག་པའི་ལྷ་རུ་གནས་པ་ལ། །ཆོས་རྣམས་བསྟོད་པའི་སྒྲ་ནི་སྒྲོགས་པར་བསམ། །འབར་
བའི་ཨོཾ་གྱིས་བྱིན་བརླབས་རླུང་དང་མེ། །དཀྱིལ་འཁོར་ལ་གནས་རབ་འབར་བདུད་རྩི་ལྔ། །དེ་ནས་ཡི་གེ་གསུམ་བཟླས་དཔག་མེད་པའི། །ཐུབ་པའི་དབང་པོའི་ནང་དུ་ཆུད་པར་བྱ། །ཡེ་ཤེས་བདུད་རྩིའི་ངོ་བོར་བསམས་

89-1-223b

ནས་ནི། །ཧཱུྃ་དགོད་རྡོ་རྗེའི་ལྕེ་ནི་བཟང་པོ་དང་། །སྙིང་གའི་ཟླ་བའི་དབུས་སུ་མ་ལུས་པའི། །རྒྱལ་བའི་འཁོར་ལོ་དེས་ནི་ཚིམ་པར་བྱ། །དད་དང་བརྩོན་འགྲུས་རྣམ་པར་དག་པ་དང་། །དེ་བཞིན་དྲན་དང་བསམ་གཏན་རྣམ་དག་པ། །སྒོ་
བཟང་སྲུང་བར་བྱེད་པའི་ངོ་བོ་ཉིད། །ཤེས་རབ་རྣམ་པར་མ་ལུས་ཡུལ་དུ་སྣང་། །མཚན་མ་མེད་པའི་དགའ་བ་རྣམ་དག་པ། །མ་ལུས་ལྷ་མོའི་ཚོགས་ཀྱི་ངོ་བོ་ཉིད། །དབང་པོའི་སྒོ་དང་བདག་དང་རྣམ་རྟོག་དང་། །འཇུག་
པའི་རྣམ་ཤེས་རྣམ་པར་དག་པ་ཡང་། །མེ་ལོང་ལ་སོགས་དྲི་མེད་ངོ་བོར་བསམ། །སངས་རྒྱས་ཐམས་ཅད་ཀྱི་ཡང་རང་བཞིན་ཏེ། །དེ་ཉིད་རྣམ་དག་རྣལ་འབྱོར་འཁོར་ལོའི་གཙོ། །དེ་ཡི་སེམས་ནི་རྣམ་པར་དག་པ་ཡིན། །གཟུགས་
ལ་སོགས་པ་མི་ཤེས་རྣམ་བྲལ་བས། །དྲི་མེད་ཕུང་པོ་ལ་སོགས་ངོ་བོར་གྲུབ། །སེར་སྣ་ལ་སོགས་དག་པར་གྱུར་པས་ནི། །ཕ་རོལ་ཕྱིན་པ་དཀར་པོའི་ཆོས་རང་བཞིན། །བདག་གཞན་རྣམ་རྟོག་མེད་པར་སྣང་བ་ནི། །འཆིང་
བ་མེད་པར་གྱུར་ཀྱང་གོ་རིམ་བཞིན། །ཟབ་པ་དང་ནི་རྒྱ་ཆེ་བ་ཡིས་ནི། །ཤེས་རབ་ཐབས་ཀྱི་བདག་ཉིད་ཅན་སེམས་ཡིན། །དམ་པའི་དོན་དུ་དབྱེ་བ་མེད་པ་དང་། །རྣམ་འབྱེད་མེད་ཅིང་ཅི་ཡང་མི་སྣང་སྟེ། །གང་དུ་གཞན་དུ་
འཛིན་པའི་རྣམ་ལྡོག་པ། །དེ་བཞིན་དབྱེ་བ་ལ་སོགས་རྟོག་བྲལ་ཡིན། །དེ་ལྟར་བརྟགས་ན་རང་སྙིང་དྲི་མེད་ལ། །ཟླ་བ་ལ་གནས་མཚན་མ་བསྒོམ་པར་བྱ། །གསང་སྔགས་དམ་པ་ཐིག་ལེའི་གཟུགས་སུ་ནི། །རང་ཡིད་
ཀྱིས་ནི་འོད་ཟེར་དང་བཅས་བསམ། །རང་སེམས་འོད་ཟེར་དྲི་མེད་ལས་འདས་པའོ། །སྐུ་གསུང་ཐུགས་ཀྱི་མཆོག་གྱུར་པ། །སླར་ཡང་དེ་ཉིད་དུ་ནི་ངེས་བཞུགས་ཤིང་། །ཡེ་ཤེས་བདུད་རྩི་འབར་བས་བསམ་
པར་བྱ། །ནང་གི་ལུས་དང་དེ་བཞིན་ཐམས་ཅད་ཀྱང་། །དེ་ཡིས་ཀུན་དུ་མཐར་ནི་སྣང་བྱས་ནས། །བ་སྤུ་རེ་རེའི་ཁོངས་ནས་བྱུང་བ་ཡི། །འོད་ཟེར་ཚོགས་ཀྱིས་ཀུན་དུ་དག་པར་བྱ། །ཡང་ན་མཚན་མ་ཕྲ་མོ་བསམ་

89-1-224a

པ་ནི། །འོད་ལྡན་སྣ་རྩེར་གནས་པ་ཐུབ་པ་ཡི། །འཁོར་ལོ་ནང་དུ་ཆུད་བྱས་སྙིང་རྗེ་ཡི། །ནང་གི་ཤེས་རབ་དམ་པ་ཉིན་མཚན་བསམ། །མཚན་མ་བརྟན་པོ་མཐོང་ན་སྤྲོ་བ་ཡི། །འོད་ཟེར་དེ་ཡི་སྤྲུལ་པའི་ཐུབ་དབང་དང་། །རྣམ་པ་སྣ་ཚོགས་པ་
ཡི་ཕྱག་མཚན་བསྣམས། །བློ་དང་ལྡན་པས་ཡང་དང་ཡང་དུ་སྤྲོ། །ཡང་ན་བཟླས་པ་རྩེ་གཅིག་སེམས་ཉིད་ནི། །དངོས་ཀུན་བདག་ཉིད་རང་གི་སེམས་དབང་པོ། །རང་གི་སྔགས་ནི་སྣ་ཚོགས་འོད་ལྡན་འབར། །དེ་ཉིད་བློ་དང་ལྡན་པས་བསྒོམ་པར་བྱ། །ཞེས་གསང་བ་
ཉེ་བར་བསྟན་པ་ལས་རྒྱལ་པོ་མཆོག་མངོན་པར་འབྱུང་བ་རྡོ་རྗེའི་ཏིང་ངེ་འཛིན་འདི་བསྟན་པའོ། །དེ་ནས་བྱང་ཆུབ་སེམས་དཔའ་ཀུན་དུ་བཟང་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱི་ཡེ་ཤེས་མངོན་པར་རོལ་པ་འབྱུང་བའི་
རྒྱལ་པོ་འདི་བསྟན་ཏོ། །སྐྱེས་བུ་ལ་ལ་བསོད་ནམས་ལྡན་གྱུར་པས། །གཏེར་གྱི་འབྱུང་གནས་ཆེན་པོ་རྙེད་གྱུར་པས། །བརྒྱན་པའི་གནས་ཀྱི་རྒྱན་དུ་རབ་སྦྱངས་ནས། །དེ་དག་ལུས་དང་འཐུན་པའི་རྒྱན་དུ་བྱེད། །དེ་ཉིད་མཁས་པས་ཆོས་ཀྱི་རྒྱན་ཐོབ་ནས། །
སེམས་དང་བློ་ཡངས་རྒྱ་མཚོར་གྱུར་བྱས་ཤིང་། །ཇི་ལྟར་སྔོན་ཐོས་ཆོས་རྣམས་རྟོགས་པར་བྱེད། །མི་མཐུན་ཚུལ་དུ་མོས་པ་ཚོལ་མི་བྱེད། །དེ་ལྟར་རྒྱན་གྱུར་ཤིན་དུ་འཐུན་པར་སྤྱོད། །རྣམ་པར་མི་བསྒོམ་ཆོས་ནི་གང་ཡང་མེད། །དེ་དག་ཆོས་རྣམས་ཇི་
བཞིན་རྒྱན་བྱེད་ཅིང་། །ཆོས་ཀུན་ཁོང་དུ་ཆུད་པས་མཛེས་པར་བྱེད། །མཁས་པ་རྣམ་དག་རིན་ཆེན་རྒྱན་གྱུར་པས། །རྒྱུད་འདིའི་གནས་ལ་ལེགས་པར་བརྒྱན་མཐོང་བས། །དགའ་བའི་སེམས་ཡིད་དང་བས་སྤྲོ་བ་བསྐྱེད། །ཆོས་ཀྱི་ཡིད་ལ་བདག་ཉིད་ཆེ་བ་
བརྩོན། །རྟེན་ཅིང་འབྲེལ་འབྱུང་ཆོས་ལ་རབ་ཏུ་འཇུག །ཆོས་རྣམས་མཉམ་པ་ཉིད་ལ་དེ་བརྩོན་ཏེ། །དཀྱིལ་འཁོར་རྣམ་པར་བསྒོམ་ལ་རྣམ་པར་བརྩོན། །རྒྱལ་བ་གཅིག་པུར་གནས་ཐོབ་མི་བྱེད་ཅིང་། །ཆོས་རྣམས་མི་མཉམ་མེད་པར་རབ་ཏུ་
སྤྱད། །དེ་ནི་བསམ་པ་མཐར་ཐུག་རབ་བརྟན་པས། །རྒྱལ་བའི་བྱང་ཆུབ་སྤྱོད་པའི་གནས་འདི་ཡིན། །རི་རབ་བཞིན་དུ་མི་གཡོ་བརྟན་པ་ཡིས། །དེ་ཡི་བསམ་པ་བྱང་ཆུབ་མཆོག་ལ་བརྟེན། །མཉམ་བཞག་སེམས་དང་ལྡན་པས་དེ་བརྩོན་ཏེ། །

89-1-224b

བསམ་གཏན་ཡེ་ཤེས་ཡིད་ཀྱིས་རབ་ཏུ་སྤྱོད། །བསྐལ་པ་སྟོང་དུ་སྤྱད་པ་སྤྱོད་བྱེད་ཀྱང་། །གསང་བ་འདི་དང་བྲལ་བར་མི་བྱེད་ཅིང་། །དེ་ཡི་བརྩོན་འགྲུས་འཇིག་པར་མི་འགྱུར་རོ། །གསང་ཆེན་ཐེག་པ་འདི་ནི་གང་རྙེད་པ། །མི་དེ་ཕྱིར་མི་ལྡོག་ལ་
གནས་པ་ཡིན། །སྲིད་པ་ལྟ་བ་མ་ལུས་གཅོད་བྱེད་པ། །སྐྱེས་བུ་དཔའ་བོ་ཉིད་ནི་འབྱུང་བར་འགྱུར། །འདི་དག་གསང་བ་ཡང་དག་དོན་འཇུག་སྟེ། །རྒྱལ་བའི་དགོངས་པ་མཐར་ཐུག་ངེས་རྟོགས་ཡིན། །ཆོས་ཉིད་ཞི་བའི་མཐར་ཐུག་ཐོབ་གྱུར་པས། །
དེ་ལ་མི་དགའི་ཡིད་བྱེད་གང་ཡང་མེད། །དཔེ་མེད་ཡེ་ཤེས་ཇི་སྐད་གསུངས་པ་ལྟར། །དེ་ཡིས་ཆོས་རྣམས་མཉམ་པ་ཉིད་དུ་བྱེད། །མི་མཉམ་ཚུལ་དུ་རྟོགས་པར་མི་བྱེད་ཅིང་། །ཡེ་ཤེས་མཉམ་ཉིད་ཡོངས་སུ་རྫོགས་པར་བསྒྲུབ། །དམ་ཚིག་
གནས་ལ་ངེས་པར་བརྩོན་པ་ཡིས། །ཉམས་པ་མེད་པར་སྡོམ་ལས་རྒྱུད་བསྡམས་ཏེ། །གསང་བའི་ཏིང་འཛིན་མཐའ་ཡས་སྒོ་ཐོབ་པས། །དེ་བཞིན་གཤེགས་པ་རྩ་བའི་རྒྱུད་དག་ཏུ། །གསུངས་པ་ཐུབ་པའི་དགོངས་པ་མ་ནོར་བར། །
དོན་གསལ་ཁོང་དུ་ཆུད་པ་རྒྱལ་བའི་སྲས། །ཚེ་འདིར་བླ་མེད་མངོན་པར་བྱང་ཆུབ་འཐོབ། །བྱང་ཆུབ་སེམས་དཔའ་རྣམས་ཀྱི་གསང་བ་བླ་ན་མེད་པའི་ཚུལ་ཡོངས་སུ་འབྱུང་བའི་ཏིང་ངེ་འཛིན་ཏོ། །དེ་ནས་བཅོམ་ལྡན་རྡོ་རྗེ་འཛིན་པ་ཡིས། །
སྤྱོད་ལམ་ཀུན་དུ་མཉམ་པའི་ཡིད་ཀྱིས་ནི། །སྲོག་དང་རྩོལ་བ་ཤིན་དུ་མ་བསྡམས་པ། །གསང་སྔགས་རྒྱལ་པོ་གསལ་བར་བརྗོད་པར་བྱ། །སྐུ་ལ་སོགས་པ་བཞིན་དུའང་བསམ་པ་ནི། །གཅིག་ཅར་སྤྲོ་བ་དག་ནི་ལེགས་པར་བྱ། །
ནམ་མཁའི་ཁམས་དང་མཉམ་པའི་སྐུ་སོགས་པའི། །འོད་ཀྱི་སྒོ་ཡི་སྣང་བས་ཡང་དག་གང་། །དེ་ནས་སྔ་མ་བཞིན་དུ་སྣ་ཚོགས་པའི། །མཆོད་པའི་སྤྲིན་གྱིས་ཀུན་དུ་བཀོད་པ་སྤྲོ། །ཡོངས་སུ་སྦས་པའི་རིག་མ་མཆོག་
རྣམས་ནི། །བདེ་ཆེན་བཅས་པས་གཞན་གྱི་དབང་མཐོང་ནས། །རྣམ་པར་སྒེག་པའི་ཐུབ་དབང་ཚོགས་རྣམས་ནི། །མཐར་ནི་རང་གི་ལུས་ལ་གཞུག་པར་བྱ། །རང་གི་སྙིང་པོ་དེ་ཉིད་ངེས་རྟོགས་པས། །སེམས་ཀྱི་སྤྱོད་པ་སྐྱོ་བས་ཞུགས་
89-1-225a

ཞུགས་གྱུར་ན། །རིག་མའི་ཚོགས་ཀྱིས་ཡེ་ཤེས་གླུ་བླངས་པས། །རབ་ཏུ་བསྐུལ་བས་ཡང་དག་མཆོད་པར་བྱ། །སེམས་ནི་བཟང་པོའི་ཆུ་རྒྱུན་སྲོག་དང་ནི། །རྩོལ་བ་འོད་ཀྱི་ལྕགས་ཀྱུས་དྲངས་ནས་ནི། །
ཇི་བཞིན་སྐུ་གསུང་ཐུགས་ཀྱི་རྡོ་རྗེ་སོགས། །བདུད་རྩི་དེས་དབབ་ཡེ་ཤེས་ཉམས་མི་བྱ། །དེ་ལྟར་ལན་རེ་ངལ་སོ་བྱས་ནས་ནི། །སྔར་བཤད་ཆོ་གས་བསྟོད་པ་དེ་ཉིད་ཤེས། །གསང་སྔགས་དམ་པ་ཉིན་མཚན་བཟླ་བ་ནི། །
སྔགས་ལས་ཀུན་དུ་ཆགས་པ་མེད་པར་བྱ། །མཆོད་ཅིང་བསྟོད་དང་གཤེགས་སུ་གསོལ་བ་ནི། །སྔགས་པས་རབ་ཏུ་འབད་དེ་རྣམ་བྱ་ཞིང་། །ཨོཾ་ལ་སོགས་ལ་འཁོར་ལོ་བསྡུས་ནས་ནི། །སྐུ་ལ་སོགས་པ་བརྟག་པ་དག་ཏུ་བྱ། །
དེ་ལྟར་དེ་ཉིད་མཐོང་ཞིང་རྣམ་གྲོལ་བས། །སེམས་ཅན་ཁམས་རྣམས་ཀུན་དུ་དམིགས་ནས་ནི། །སྙིང་རྗེས་འགྲོ་བ་ཀུན་ལ་ཕན་པའི་ཕྱིར། །སྨོན་ལམ་ཀུན་དུ་བཟང་པོ་ཉེ་བར་གནས། །ལྡང་ཞིང་དག་པའི་སེམས་པ་རང་
ལྷ་ཡི། །རྣམ་པའི་ང་རྒྱལ་ཡིད་ལ་བྱས་ནས་ནི། །ཀུན་དུ་སྣང་བར་བྱ་བའི་ཡུལ་རྣམས་ནི། །ཐམས་ཅད་སྔ་མ་བཞིན་དུ་ཡོངས་སུ་བསམ། །འདི་ནི་གསང་བའི་སྤྱོད་ཡུལ་བྱ་བ་སྟེ། །ལས་རྒྱལ་མཆོག་ཅེས་བྱ་བའི་ཏིང་འཛིན་
ཡིན། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ། གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་གསང་བའི་དཀྱིལ་འཁོར་ཆེན་པོ་
རོལ་པ་མངོན་པར་འབྱུང་བ་ཞེས་བྱ་བའི་ལེའུ་སྟེ་དྲུག་བཅུ་རྩ་དྲུག་པའོ།། །། བརྟག་པ་དྲུག་ལ་གསང་བ་ཡེ་ཤེས་རྡོ་རྗེ་བྱིན་གྱིས་རློབ་པའི་རྒྱལ་པོ་ཞེས་བྱའོ། །དེ་ནས་སྟོན་པ་རྡོ་རྗེ་འཛིན། །ནམ་མཁའ་ཡེ་ཤེས་
རྡོ་རྗེར་འབྱུང་། །བྱེད་སྐྱེད་དམ་པ་མཆོག་གི་གཙོ། །གསང་བའི་བཟླས་པ་འདིར་རབ་གསུངས། །ༀ་དྷ་ར་དྷ་ར། དྷཱ་ར་ཡ་དྷཱ་ར་ཡ། མར་ཏ་མརྟ་བཛྲ་དྷྲིཀ་ཕཊ་ཨ་ཧཱུྂ་སྭཱ་ཧཱ། ༀ་ཤཱ་ཤྭ་ཏ་ས་ནཱ་མ་ཤ་ཤ་ཨ་ཧྱེ་ཧི་ཛི་ན་ཛིཀ་ཨཱ་

89-1-225b

ཧཱུྃ་ཕཊ་སྭཱ་ཧཱ། ཨོཾ་ཨཱཿ བཛྲ་དྷརྨ་ས་མ་ཡ་སྟྭྃ་ཧུ་ལུ་ཧུ་ལུ་ཨཱ་རོ་ལིཀ་ཧཱུྃ་ཕཊ་སྭཱ་ཧཱ། ཨོཾ་ཨཱཿ བཛྲ་སཱུརྱ་ཌ་ཏ་དྷརྨ་ན་ས་མ་ཡ་སྟྭྃ། ཨ་ཧྂ་རཏ་ན་དྷྲི་ཀ་ཧཱུྃ་ཕཊ་སྭཱ་ཧཱ། ༀ་ཨཱཿ བཛྲ་ཕྲབ་ཕྲུབ་ཧྲིཿཧྲིཿ པྲཛྙཱ་དྷྲི་ཀ་ཧཱུྂ་ཕཊ་སྭཱ་ཧཱ། ༀ་རུ་རུ་
སྥུ་རུ་ཛྭ་ལ་ཏིཥྛ་སིད་དྷ་ལོ་ཙ་ན་སརྦ་ཨརྠ་སཱ་དྷ་ནི་སྭཱ་ཧཱ། ༀ་ཤང་ཀ་རེ་ཤཱན་ཏིང་ཀ་རེ་གྷ་ཊ་གྷུཊ་ཊ། གྷུཊ་ཊི་ནི་གྷུཊ་ཊི་ནི། གྷཱ་ཊ་ཡ་གྷཱ་ཊ་ཡ། གྷཊ་ཊི་ནི་སྭཱ་ཧཱ། ༀ་ཀ་ཊེ་ཀ་ཊེ་བི་ཀ་ཊེ་ནི་ཀ་ཊེ་ཀ་ཊཾ་ཀ་ཊེ་སྭཱ་ཧཱ། ༀ་མ་ཧཱ་སཽ་ཁྱ་ཏཱ་རེ་ཏུཏ་
ཏཱ་རེ་ཏུ་རེ་སྭཱ་ཧཱ། ༀ་ཨཱཿབཛྲ་སྤར་ཤེ་དྷརྨ་དྷཱ་ཏུ་ཨ་ནུད་པ་ད་ནི་གཱ་ཐྃ་བིདྱ་དྷ་ར་སྭཱ་ཧཱ། ༀ་ཨཱཿབཛྲ་རཱུ་པ་པཱུ་ཛ་མ་ཧཱ་སྃ་གྷར་བིདྱཱ་དྷ་ར་ཧཱུྃ་སྭཱ་ཧཱ། ༀ་ཨཱཿབཛྲ་ཤབྡ་མ་ཧཱ་པཱུ་ཛ་སྃ་བྷ་ར་ཛྙཱ་ན་བདྱཱ་དྷ་ར་ཧཱུྃ་སྭཱ་ཧཱ། ཨོཾ་ཨཱཿབཛྲ་ན་གདྷེ་མ་ཧཱ་ཛྙཱ་ན་སྃ་གྷར་བིདྱཱ་དྷ་ར་ཧཱུྃ་སྭཱ་ཧཱ། ༀ་ཨཱཿབཛྲ་ར་སེ་མ་ཧཱཿ 
ཛྙཱ་ན་སྃ་ཀ་ར་བིདྱཱ་དྷཱ་ར་ཧཱུྃ་སྭཱ་ཧཱ། ༀ་ཨཱཿབཛྲ་མཻ་ཏྲི་ནཱ་ཐ་ཛ་ཡ་བི་ཛ་ཡ་ཤུད་དྷ་བི་ཤུད་དྷེ་སིད་དྷ་ས་ཏྭ་བྷ་བ་ཧཱུྃ་སྭཱ་ཧཱ། ༀ་ཨཱཿབཛྲ་མ་ཧཱ་ཀྵི་ཏི་གརྦྷ་ཡ་ཛ་ཡ་བ་ཛི་ཡ་ཤུད་དྷི་བི་ཤུད་དྷེ་སིད་དྷ་སཏྭ་བྷ་བ་ཧཱུྂ་སྭཱ་ཧཱ། ཨོཾ་ཨཱཿབཛྲ་
མ་ཧཱ་བཛྲ་པཱ་ཎི་ཛ་ཡ་བི་ཛ་ཡ་ཤུད་དྷ་བི་ཤུད་དྷེ་སིད་དྷ་མ་ཧཱ་སིད་དྷ་ས་ཏྭ་བྷ་བ་ཧཱུྃ་ཧཱ། ཨོཾ་ཨཱཿབཛྲ་ཨཱ་ཀཱ་ཤ་གརྦྷ་ཡ་ཛ་ཡ་བི་ཛ་ཡ་ཤུད་དྷ་བི་ཤུད་དྷི་སིད་དྷ་མ་ཧཱ་སིད་དྷ་སཏྭ་བྷ་བ་ཧཱུཾྃ་ཕཊ་སྭཱ་ཧཱ། ཨོཾ་ཨཱཿབཛྲ་ཨཱརྱ་ཨཱ་བ་ལོ་ཀི་ཏེ་
ཤྭ་ར་ཡེ་ཛ་ཡ་བི་ཛ་ཡེ་ཤུད་དྷ་བི་ཤུད་དྷེ་སིད་དྷ་མ་ཧཱ་སིད་དྷ་ས་ཏྭ་བྷ་བ་ཧཱུྃ་ཕཊ་སྭཱ་ཧཱ། ༀ་ཨཱཿབཛྲ་མཉྫུ་ཤྲཱི་གྷོ་ཥ་ཛ་ཡ་བི་ཛ་ཡ་ཤུད་དྷ་བི་ཤུད་དྷི་སིད་དྷ་མ་ཧཱ་སིད་དྷ་སཏྭ་བྷ་བ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་སརྦ་
ནི་བ་ར་ཎ་བི་བི་ནེ་ཛ་ཡ་བི་ཛ་ཡ་ཤུད་དྷ་བི་ཤུད་དྷེ། སིད་དྷ་མ་ཧཱ་སིད་དྷ་སཏྭ་བྷ་བ་ཧཱུྃ་ཕཊ་སྭཱ་ཧཱ། ཨོཾ་ཨཱཿ བཛྲ་ས་མན་ཏ་བྷ་དྲ་ཡེ་ཛ་ཡ་བི་ཛ་ཡ་ཤུད་དྷ་བི་ཤུད་དྷེ་སིད་དྷ་མ་ཧཱ་སཏྭ་བྷ་ཝ་ཕཊ་སྭཱ་ཧཱ། ན་མཿས་མན་
ཏ་ཀཱ་ཡ་བཱ་ཀ་ཙི་ཏ་བཛྲཱ་ནཱྃམ། ཨོཾ་ཁ་ཁ་ཁཱ་ཧི་ཁཱ་ཧི་སརྦ་དུཥྚན་སཏྭ་ད་མ་ཀ །ཨ་སི་མུ་ཥ་ལ་པ་ར་ཤུ་པ་ཤ་ཧསྟ། ཙ་ཏུར་བྷུ་ཛ་ཙ་ཏུརྨུ་ཁ་ཥཊ་ཙ་ར་ཎ། ཨཱ་གཚྪ་ཨཱ་གཚྪ་སརྦ་དུཥྚ་སྲ་ན། ཨ་པ་ཧ་རི་ཎེ་མ་ཧཱ་བི་གྷྣཱ་གྷཱ་ཏ་

89-1-226a

ཀ་བི་ཀྲི་ཏེ་ཨཱ་ན་ན་སརྦ་བྷུ་ཏ་བྷ་ཡྃ་ཀ་ར། ཨཊྚ་ཊྚ། ཧཱ་ས་ནཱ་དྷི་ནི། བྱཱ་གྷྲ་ཙར་མ་ནི་བ་ས་ན། ཀུ་རུ་ཀུ་རུ། སརྦ་ཀརྨཱ་ནི་ཚིན་དྷ་ཚིན་དྷ། སརྦ་མཱན་ཏྲ་ན་བིན་དྷ་བིན་དྷ། བ་ར་མུ་དྲཱན། ཨཱ་ཀར་ཥ་ཡ་ཨཱ་ཀར་
ཥ་ཡ་སརྦ་བྷུ་ཏཱ་ན། མ་ཐ་མ་ཐ། ནིར་མ་ཐ་ནིར་མ་ཐ། སརྦ་དུན། པྲ་བི་ཤ་ཡ་པྲ་བི་ཤ་ཡ། མན་ཌ་ལ་མ་དྷྱེ་བཻ་ཤྭ་སྭཱ་ཧཱ། ཛི་བིན་ཏཱན་ཏ་ཀ་ར། ཀུ་རུ་ཀུ་རུ། མཱ་མ་ཀཱརྱྃ། ད་ཧ་ད་ཧ། པ་ཙ་པ་ཙ། མ་བི་ལྃ་བ་མཱ་བི་ལྃ་བ། 
ས་མ་ཡ་མ་ནུ་སྨ་ར། ཧཱུྃ་ཧཱུྃ། ཕཊ་ཕཊ། བི་སྥོ་ཊ་ཡ་བི་སྥོ་ཊ་ཡ། སརྦཱན་ནཱ་ཤ་ཡ། རི་པཱུན། ཀ་ར་ཀ་ར། བི་གྷྣ་ནྃ་སརྦ་ཨཱ་ཤཱ། ས་ར་པཱུ་ར་ཀ །ཧེ་ཧེ་བྷ་ག་བཱན། ཀིན་ཙི་ར་ཡ་སི། ན་མ་སརྦ་ཨརྠ་སཱ་དྷ་ཡ་མཱན་ཏ་ཀྲིད་
ཧཱུྃ་ཕཊ་སྭཱ་ཧཱ། ན་མཿས་མན་ཏ་ཀཱ་ཡ་བཱཀྩིཏྟ་བཛྲཱ་ཎཱྃ། ཨོཾ་ཨཱཿབཛྲ་པྲཛྙཱན་ཏ་ཀྲིད། ཀ་རོ་མ་ཧཱ་ཀ་རོ། ཙན་ཌ་ལ་ནི། ཌད་ཏ་ཀ་ར། བཛྲ་ཁཌྒ་ནི་ཀྲིནྷན། བཛྲ་ས་ར་གྷ་ན། ཙྩ་བི་ཧཱུྃ་ཛ་ཡ་བི་ཛ་ཡ་ཛི་ན་རི་ནི་ཏ། 
ཧཱུྃ་ཧཱུྃ། ཕཊ་ཕཊ་སྭཱ་ཧཱ། ནམཿ ས་མན་ཏ་ཀཱ་ཡ་བཱཀ་ཙིཏ་ཏ་བཛྲཱ་ཎཱྃ། ཨོཾ་པད་མ་ཀྲོ་དྷ་བཛྲ་པད་མཱན་ཏ་ཀྲིད། ཧཱུྃ་ཧཱུྃ་ཧཱུྃ། ཏ་རུ་ལ། བི་རུ་ལ། སརྦ་བི་ཥ་གྷཱ་ཏ་ཀ །ཛྭ་ལི་ཏ། བི་སྦུ་ལིང་ག ། ཨཊ་ཊ་ཧཱ་ས། ནཱ་དི་ནི། ཀེ་ཤ་
རི་ས་ཊ་ཏོ་པ་ཊད་ཀ་ར། བཛྲ་ཁུ་ར་ནིར་གྷཱ་ཏ་ན། ཙ་ལི་ཏ། བ་སུ་དྷཱ་ཏ་ལིན་ཤྭ་སམ་རུ་ཏོད་ཀྴིབ་ཏེ་དྷཱ་ར་ཎཱི་དྷཱ་ར་བྷི་ཥ་ན་ཨ་ཊ་ཊ་ཊ་ཊ་ཧཱ་ས། ཨ་པཱ་རི་མི་ཏ། བ་ལ་ས་རཱ་ཀྲ་མ། ཨཱརྱ་ག་ན་བྷཱི་ཏ། བྷུ་ཏ་ག་ན་ཨདྷྱུ་
ཥི་ཏ། བུད་དྷྱ་བུད་དྷྱ། ཧ་ཡ་གྲཱི་བ། ཁཱ་ད་ཁཱ་ད། པ་ར་མན་ཏྲཱན། ཚིན་དྷ་ཚིན་དྷ། སིད་དྷི་མ་མི། ཨཱི་ད་ཤ །ཨཱ་བེ་ཤ་ཡ། སརྦ་ཛྭ་ར་པི་ཤཱ་ཙཱ་ན། སརྦ་གྲ་ཧེ་ཥུ་ཨ་པྲ་ཏེ་ཧ་ཏོ་བྷཱ་བཱ། བཛྲ་དཾཥྚཱ་ཀིན་ཙི་རཱ་ཡ་སི། 
ཨི་དན་ཏུཥྚ། གྲ་ཧན་དུཥྚ་སརྦ་བཱ། དྷུ་ན་དྷུ་ན། མ་ཐ་མ་ཐ། མར་ད་མར་ད། པཱ་ཊ་ཡ་པཱ་ཊ་ཡ། མ་ཊ་མ་ཊ། བན་དྷ་བན་དྷ། བུད་དྷ་དྷརྨ་སཾ་གྷ། བུད་དྷ་ཛྙ་ན་ཏྃ་ཀརྨ་ཀུ་རུ་ཀུ་རུ། ཤཱི་གྷྲན་ཧ་ཡ་གྲཱི་བ་ཡ་ཕཊ། 

89-1-226b

བཛྲཱ་ཡ་ཕཊ། བཛྲ་གཱ་ཊ་ཡ། བཛྲ་ནེ་ཊ་ཡེ་ཕཊ། བཛྲ་དཾཥྚཱ་ཡ་ཕཊ། བཛྲ་ཁུ་རཱ་ཡ་ཕཊ། བཛྲ་ཁུ་ར་ནིར་གྷཱ་ཏ་ནཱ་ཡ་ཕཊ། པ་ར་མན་ཏྲ་བི་ནཱ་ཤ་ནཱ་ཡ་ཕཊ། སརྦ་ཏྲཻ་ལོ་ཀྱ་བྷ་ཡཾ་ཀ་རཱ་ཡ་ཕཊ། སརྦ་ཀརྨ་སུ་པྲ་ཏེ་ཧ་ཏཱ་ཡ་ཕཊ། བཛྲ་ཀུ་ལ་སན་ཏྲཱ་ས་
ནཱ་ཡ་ཕཊ། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ་སྭཱ་ཧཱ། ན་མ་ས་མན་ཏ་ཀཱ་ཡ་བཱཀ་ཙིཏ་ཏ་བཛྲཱ་ནཱཾ། ༀ་ན་མོ་བཛྲ་ཀྲོ་དྷཱ་ཡ། བིགྷཱན་ཏ་ཀྲིད། མ་ཧཱ་དཾཥྚོད་ཀ་ཊ་བྷཻ་ར་བྷཱ་ཡ། ཨ་སི་མུ་ཥ་ལ་པ་ར་ཤུ་པཱ་ཤ་ཧསྟཱ་ཡ། ༀ་ཨ་མྲི་ཏ་ཀུཎ་ཌ་ལཱི། ཁ་ཁ་ཁཱ་ཧི་
ཁཱ་ཧི། ཧུ་ལུ་ཧུ་ལུ། ཏིཥྛ་ཏིཥྛ། བན་དྷ་བན་དྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། གརྫ་ཡ་གརྫ་ཡ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣ་བི་ནཱ་ཡ་ཀཱན། མ་ཧཱ་ག་ཎ་པ་ཏི། ཛི་བི་ཏཱན་ཏ་ཀ་ར་ཧཱུྃ་ཧཱུྃ་ཕཊ་སྭཱ་ཧཱ། ན་མཿས་མན་ཏ་
ཀཱ་ཡ་བཱཀ་ཙིཏ་ཏ་བཛྲེ་ནཱྃ། ཨོཾ་ཨཱརྱ་ཨ་ཙ་ལ་ཀཱ་ན་ཙཎ་ཌ། ཀྲོ་དྷ་ཀ་བཛྲ། ཎ་ཊ་ཎ་ཊ། མཊྚ་མཊྚ། མོཊྚ་མོཊྚ། སཊྚ་སཊྚ། ཏཊྚ་ཏཊྚ། ཧ་ན་ཧ་ན། ད་ཧ་ད་ཧ། ཏིཥྛ་ཏིཥྛ། ཨཱ་བེ་ཤ་ཡ། ཨཱ་བེ་ཤ་ཡ། མ་ཧཱ་མཏ་ཏ་བ་ལ་
ཀ །དྷུ་ན་དྷུ་ན། ཏི་ནི་ཏི་ནི། ཁ་ད་ཁ་ད། བིགྷཱྃ་མ་ར་མ་ར། དུཥྚཱྃ། རཀྵ་རཀྵ། སརྦཱན་ཀུ་རུ་ཀུ་རུ། ཀི་རི་ཀི་རི། མ་ཧཱ་བི་ཤ་བཛྲ། སྥོ་ཊ་ཡ་སྥོ་ཊ་ཡ། ཧཱུྃ་ཧཱུྃ་ཧཱུྃ། ཏྲི་བ་ལཱི་ཏ། རཾ་ག་ནར་ཏ་ཀ །ཨྃ་ཨྃ་ཨྃ། ཧཱྃ་ཧཱྃ་ཧཱྃ། 
ཨ་ཙ་ལ་ཙེ་ཊ། སྥོ་ཊ་ཡ་སྥོ་ཊ་ཡ། ཧཱུྃ་ཧཱུྃ་ཨ་ས་མན་ཏི་ཀ །ཏྲཱ་ཊ་མ་ཧཱ་བ་ལ་ཤཱ་ཏ་ཡ། པ་ར་མན་ཏྲཱན། ཨཾ་ཨཾ་ཧཱཾ་ཧཱཾ། མྃ་ཤུད་དྷྱྃ་ཏུ་ལོ་ཀ །ཏུ་བཛྲཱྃ་ན་མོ་སྟུ་ཨ་པྲ་ཏེ་ཧ་ཏ་བ་ལེ་བྷྱཿ། ཛྭཱ་ལ་ཡད་ཏྲཱ་ཊ། ཨ་ས་ཧ་ན་ན་མ་
སྭཱ་ཧཱ། ན་མཿས་མན་ཏ་ཀཱ་ཡ་བཱཀ་ཙིཏ་ཏ་བཛྲཱ་ནཎཱཾ། ཨོཾ་ཊཀྐི་རཱ་ཛ་ཀྲོ་དྷ་ཀ་བཛྲ། མ་ཧཱ་བ་ལཾ་པ་ར་ཀྲ་མ། བྷ་ཡ་ཀ་ར། ཛ་ཡ་བི་ཛ་ཡ། ཀུ་ལིར་ཤེ་ཥེ་བཛྲ་ཡོ་ནིར། ཙིན་དྷ་ཙིན་དྷ། ཀར་ཁ་ཁར་ཀ །སརྦ་དུཥྚཱན་མཱ་ར་ཡ་མཱ་ར་ཡ། 
བིན་དྷ་བིན་དྷ། ཧ་ན་ཧ་ན། ད་ཧ་ད་ཧ། བི་སྥོ་ཊ་ཡ་བི་སྥོ་ཊ་ཡ། ནཱ་ཤ་ཡ་ནཱ་ཤ་ཡ། ཧཱུྃ་ཧཱུྃ་ཕཊ་ཕཊ་སྭཱ་ཧཱ། ན་མཿས་མན་ཏ་ཀཱ་ཡ་བཱཀ་ཙིཏ་ཏ་བཛྲཱ་ཎཱྃ། ཨོཾ་ཨེ་ཧྱེ་ཧི་བྷ་ག་བཱན། ནཱི་ལ་དཎ་ཌ་བཛྲ། ཏུ་རུ་ཏུ་རུ། ཧུ་ལུ་ཧུ་ལུ། ཧཱ་ཧཱ། གུ་ལུ་གུ་ལུ། 

89-1-227a

གུ་ལཱ་པ་ཡ་གུ་ལཱ་པ་ཡ། ཀྲ་མ་ཀྲ་མ་བྷ་ག་བཱན་བཱ་ཡུ་ཊེ་གེ་ན། བྷུ་ཏཱན་ཤཱི་གྷྲན། ད་ཧ་ད་ཧ། ད་ར་ད་ར། བ་ཧ་བ་ཧ། པ་ཙ་པ་ཙ། མ་ཐ་མ་ཐ། བཱ་ཏ་ཡ་བཱ་ཏ་ཡ། མ་ཊ་མ་ཊ། མོ་ཊཱོ་པ་ཡ་མོ་ཊཱ་པ་ཡ་སརྦ་ཀརྨཱ་ཎི། 
ཚིན་དྷ་ཚིན་དྷ། བྷཱཀྵ་ཡ་བྷཱཀྵ་ཡ། ཨསྠི་མི་དྃ་ཨ་སྱ། རུ་དྷི་ར་མཛྫ་མེ་ད་བ་ཤཱ་མཛྫ། རུ་དྷི་ར་པྲི་ཡ། ཨེ་ཧྱེ་ཧི་བྷ་ག་བཱན། སརྦ་བི་གྷྣཱ་ནི། སརྦ་བིདྱཱ་ནི། སརྦ་མན་ཏྲཱ་ཎི། སརྦམ་ཀརྨཱ་ཎི། ཀྲི་ཏྲི་མ་ཎི། ཥ་དཱི་ནི། སརྦ་གྲ་ཧཱན། ཧ་ན་
ཧ་ན། བྷཉྫ་བྷཉྫ། མརྡ་མརྡ། ཨེ་དྃ་མེ་ཀཱརྱྃ་སཱ་དྷཱ་ཡ། ཧཱུྃ་ནི་ལཱ་ཡ་ནི་ལཱ་ཡ། ནཱི་ལ་བཛྲ་དཎ་ཡ། ཏུ་རུ་ཏུ་རུ། བིན་བི་ནཱ་ཡ་ཀ །ནཱ་ཤ་ཡ་ནཱ་ཤ་ཡ། ཧུ་རུ་ཧུ་རུ། དཱིཔྟ་ཙཎ་ཌ་ཡེ། སརྦ་ཤ་ཏྲཱྃ་ནཱྃ་ཧྲི་ད་ཡཱ་ནི་པཱི་ཊ་ཡ། ཚིན་དྷ་ཚིན་དྷ། 
པ་ར་བིདྱཱ་ནཱ་མ། ཙྪེ་ད་ཀ་ཧཱུྃ་བིདྱཱ་ནཱ་མ་ཤིཥྚ་ཀ །ས་མ་ཡ་མ་ནུ་སྨ་ར། བཛྲ་དྷ་ར་པ་ཙ་ནྃ་ཙ། མར་མཱ་ནི་ནི་ཀྲིནྟ། ཧཱུྃ་ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཀུ་རུ་ཀུ་རུ། ཏུ་རུ་ཏུ་རུ། ཧུ་རུ་ཧུ་རུ། ཕཊ་ཕཊ། ཧཱུྃ་ཧཱུྃ་ཀྲི་ཏཱནྟཱ་ཡ། 
དེ་བ་རི་ཥི་བི་དྲཱ་བ་ཀཱ་ཡ། ཧ་ན་བཛྲ་དཎྜེ་ན་སྭཱ་ཧཱ། ན་མཿས་མན་ཏ་ཀཱ་ཡ་བཱ་ཀ་ཙིཏ་ཏ་བཛྲཱ་ཎཱྃ། ཨོཾ་ཤྲཱི་བཛྲ་ཀྲོ་དྷཱ་ཡ་བཛྲ། བ་ལ་མ་ཧཱ་ཕེ་ལྃ་བ་ལ། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། ཨུ་གྲ་ཤཱུལ་པཱ་ཎི། ཧཱུྃ་ཧཱུྃ་ཧཱུྃ། 
ཕཊ་ཕཊ་ཕཊ། ཨ་ར་ཙེ། བི་ར་ཙེ། ཛ་ཡ་བཱ་བ་ཏེ། ༀ་ཛྱོ་ཏིནྣི་རད། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། ནཱ་ག་ཨཥྚ་ཀན། སཔྟ་པཱ་ལ་ག་ཏྃ་བྷུ་ཛྃ། ཨོཾ་མ་ཧཱ་བ་ལཱ་ཡ། ནཱ་ག་བན་དྷ་བན་དྷ། སྟྃ་བྷ་ཡ་
སྟྃ་བྷ་ཡ། །བྷ་རི་ཤཱ་པ་ཏཱ་ཡ་སྭཱ་ཧཱ། ཨོཾ་སུཾ་བྷ་ནི་སུཾ་བྷ་ནི་ཧཱུྃ་ཧཱུྃ་ཕཊ། ༀ་གྲྀཧྣ་གྲྀཧྣ་ཧཱུྃ་ཧཱུྃ་ཕཊ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུྃ་ཧཱུྃ་ཕཊ། ཨཱ་ནཱ་ཡ་ཧོ་བྷ་ག་བཱན་བིདྱཱ་རཱ་ཛ་ཧཱུྃ་ཧཱུྃ་ཕཊ། ན་མཿས་མན་ཏ་ཀཱ་ཡ་
ཝ་ཀཱ་ཙིཏ་ཏ་བཛྲཱ་ཎཱྃ། ཨོཾ་ཨཱཿཨུཥྣཱི་ཥ་བཛྲ་ཙཀྲ་ཝརྟི་སརྦ་ལོ་ཀཱི་ཤྭ་ར། ལོ་ཀོཏ་ཏ་ར། ཡན་ཏྲ་མན་ཏྲ་ཏན་ཏྲ། ཙུརྣྞ་པྲ་ཡོ་གཱ་དི། མ་མ་ཀྲི་ཏེ་ཡེ་ན་ཀེ་ན་ཙིཏ་ཏཱ་ནི། ཀྲིཏ་ཏཱ་ནི། སརྦ་ནི་བིན་དྷ་བིན་དྷ། 

89-1-227b

ཚིན་དྷ་ཚིན་དྷ། ཀུ་རུ་ཀུ་རུ། མུ་རུ་མུ་རུ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཀཾ་བྷ་ཡ་ཀཾ་བྷ་ཡ། བི་དྷྭན་ས་ཡ་བི་དྷྭན་ས་ཡ། ཤ་ཏ་ས་ཧདུ་སྲཏ་བི་རྩཱུརྣ། ཨུཥྞཱི་ཥ་བི་ཛ་ཡ། ཙཀྲ་ཝརྟི། བྷྲཱུྃ་བྷྲཱུྃ་བྷྲཱུྃ། ཧཱུྃ་ཧཱུྃ་ཧཱུྃ། ཨ་མུ་ཀྃ་སརྦ་
ཤ་ཏྲཱུྃ་ནཱ་ཤ་ཡ། སྟྃ་བྷ་ཡ་སྟྃ་བྷ་ཡ། གདུག་པ་ཅན་ཐམས་ཅད་མཱ་ར་ཡ་རྦད་ཕཊ་སྭཱ་ཧཱ། ན་མ་སྟྲཻ་ཡ་དྷྭི་ཀཱ་ནཱྃ། ཏ་ཐཱ་ག་ཏཱ་ནཱྃ། ས་ཏྲ་ཨ་པྲ་ཏི་ཧ་ཏཱ་ཝ་པ་ཏི་དྷརྨ་ཏེ། བ་ལི་ནཱྃ། ཨོཾ་ཨ་ས་མ་ས་མ་སམ་མན་ཏ་ཏོ་ནན་ཏ་ཏཱ། 
ཝ་པ་ཏི་ཤཱ་ས་ནི། ཧ་ར་ཧ་ར། སྨ་ར་སྨ་ར་ཎི། བི་ག་ཏ། རཱ་ག་བུད་དྷ། ས་ར་ས་ར། ས་མ་བ་ལཱ། ཧ་ས་ཧ་ས། ཏྲ་ཡ་ཏྲ་ཡ། ག་ག་ན། མ་ཧཱ་བ་ར་ལཀྵ་ཎི། ཛྭ་ལ་ཛྭ་ལ་ན། སཱ་ག་རེ་སྭཱ་ཧཱ། དེ་ནས་འདི་ནི་གསུངས་ཙམ་
གྱིས། །བརྟན་གཡོ་ཁྱབ་པའི་དེ་བཞིན་གཤེགས། །རིགས་རྣམས་བརྒྱ་ཡི་བདག་ཉིད་འགྱུར། །དེ་ལས་ཡེ་ཤེས་ལྔ་བདག་ཉིད། །རྡོ་རྗེ་རིན་ཆེན་པད་མ་དང་། །སྣ་ཚོགས་
རྒྱལ་བ་ལྷ་ཡི་སྐུ། །ཕྱག་རྒྱ་བསྡུས་པ་ཉིད་དུ་གནས། །སྐུ་གསུང་ཐུགས་ཀྱི་རྡོ་རྗེ་ལས། །སྙིང་པོ་གསང་ཆེན་གཅིག་ཏུ་བསྡུས། །ཆོས་ལྔ་དག་གི་ཕུང་པོ་ཅན། །
བག་ཆགས་བཅས་པའི་ཉོན་མོངས་པ། །དེ་དག་རྣམ་པར་སྤྱོད་བྱེད་པ། །ཆོས་ཀྱི་སྒོ་ལས་གྱུར་པ་ཡི། །ཁྲི་ཕྲག་བརྒྱད་དང་སྟོང་ཕྲག་བཞི། །ཡི་གེ་དམ་
པ་སྟོན་པ་ཉིད། །ཏིང་འཛིན་ཡན་ལག་ལྔ་ལྡན་པའི། །མཉམ་ཉིད་དག་པའི་ཚོགས་སུ་བརྗོད། །ཇི་ལྟར་མཁའ་ལ་ཉི་ཤར་ཡང་། །དམུས་
ལོང་གིས་ནི་མཐོང་བ་མེད། །དེ་བཞིན་ལམ་གྱི་རྟགས་རྣམས་ཀྱང་། །བློ་གྲོས་ལྡན་པ་དེ་དག་ལས། །ཀུན་གྱིས་མཐོང་བའི་ཡུལ་

89-1-228a

མ་ཡིན། །རབ་རིབ་མེད་ན་དེ་མཐོང་འགྱུར། །བྱང་ཆུབ་སེམས་དཔའི་ལམ་རྟགས་གང་། །དེ་ཉིད་དག་པའི་སྤྱོད་ཡུལ་ཏེ། རང་གཞན་གཉིས་ཀས་མ་མཐོང་ཡང་། །དེ་ནི་མེད་པར་མི་འགྱུར་ཏེ། །ཞིང་ཁམས་དག་པ་རྣམས་སུ་འཆར། །
རྫུ་འཕྲུལ་སྦས་པའི་ཚུལ་དུ་གནས། །ཐབས་དང་ཤེས་རབ་གཉིས་མེད་མཉམ་སྦྱོར་རྣམ་རྒྱལ་ཐུགས་རྗེ་སྟོང་པ་རོལ་མཉམ་སྲིད་དང་ཞི་བའི་རྒྱ་མཚོ་ལས་བརྒལ་རབ་ཏུ་མི་གནས་བདེ་བ་ཆེ། །མཁའ་དང་མཚུངས་པས་འགྲོ་
འོང་རྣམ་བྲལ་དུས་གསུམ་ལས་འདས་དངོས་དང་དངོས་མེད་ཕྱོགས་ཆ་མཐའ་དང་དབུས་ལས་རྣམ་གྲོལ་དག་ཅིང་དྲི་མེད་རྣམ་པར་དབེན། །གསང་བ་ཆེན་པོ་མི་ཟད་དཔལ་ལྡན་འདུས་འདིར་རྟོགས་དཀའ་ཟབ་ཅིང་རྒྱ་ཆེ་དེ་བཞིན་
གཤེགས་ཀུན་མཐའ་ཡས་པས་ནི་ཡང་དག་དོན། །རྒྱལ་བ་ཐམས་ཅད་བླ་མེད་གནས་འདིར་བྱང་ཆུབ་དམ་པ་བདག་དང་གཞན་དོན་སྐུ་བཞི་རབ་རྫོགས་ཡེ་ཤེས་མངོན་གྱུར་གཏེར་མཛོད་གསང་ཆེན་དགའ་བའི་སྙིང་པོའོ། །དཀྱིལ་
འཁོར་འཁོར་ལོ་དུ་མ་རབ་ཏུ་འབྱེད་ཅིང་སྤྲོ་དང་བསྡུ་བའི་རྒྱུད་ཀུན་མ་ལུས་འདུས་པའི་བདག །རྒྱུ་དང་མི་རྒྱུ་ཀུན་ལ་རྣམ་པར་གཡོགས་ཏེ་བཞུགས་པའི་རྡོ་རྗེ་འཆང་ཆེན་བདག་ཉིད་དངོས། །ཆོས་རྣམས་དཔལ་ལྡན་བླ་མའི་ཞབས་
ལས་ཡང་དག་གསལ་བའི་རིམ་པ་ཀུན་ལྡན་མཆོག་སྤྱོད་ཡུལ། །བྱིན་བརླབས་དངོས་གྲུབ་རྒྱ་མཚོའི་ཆུ་ལས་སྐལ་ལྡན་འཐུངས་ཏེ་རྣལ་འབྱོར་དབང་ཕྱུག་ཚེ་འདིར་སྐད་ཅིག་དག་གིས་ཐོབ། །སློབ་དཔོན་ལས་ནི་དྲིན་ཐོབ་བླ་མེད་བརྟན་
པའི་བློ་ལྡན་དངོས་པོ་ཀུན། །གསལ་དག་ཤིན་དུ་ཕྲ་བ་མཆོག་ཞིའི་རང་བཞིན་སངས་རྒྱས་བདེ་བ་ཆེན་པོའི་གནས། །གཉིས་མེད་རྟོག་བྲལ་དཔེ་མེད་ཡེ་ཤེས་དེ་ཉིད་རྣལ་འབྱོར་པས་མཉམ་བཞག །བསོད་ནམས་མིན་གྲོལ་རང་བྱུང་དཔལ་
ལྡན་གཙོ་བོ་རྡོ་རྗེ་སེམས་དཔའ་འགྱུར། །སེམས་ནི་རབ་དང་ཕན་པའི་སེམས་ཀྱིས་རྡོ་རྗེ་ཉིད་དུ་གྱིས། །རང་གི་སྡོམ་པ་མི་ཟད་དེ་བཞིན་བསླབ་པ་རབ་བསྟེན་གྱིས། །དེ་རིང་ཚེགས་ཆུང་བདེ་བས་ཤིན་དུ་མྱུར་དུ་འགྲོ་བའི་སེམས་

89-1-228b

དཔའ་དང་། །རབ་ཏུ་མཉམ་ཞིང་མཚུངས་ལ་དཔེ་མེད་རྟག་པ་ཆེན་པོ་ཉིད་དུ་རྟོགས་པར་འགྱུར། །ཨོཾ་སརྦ་ཏ་ཐཱ་ག་ཏ་ཡོ་ག་ཙིཏ་ཏ་ཨུཏ་པ་ཏ་ཡཱ་མི་སུ་ར་ཏེ་ས་མ་ཡ་སྟྭྃ་ཞེས་བྱང་ཆུབ་མཆོག་ཏུ་སེམས་བསྐྱེད་པ་ནི་ཟླ་བ་ལ་རྡོ་རྗེ་རྩེ་ལྔ་པ་ལྟ་ཞིང་རྡོ་རྗེ་
བཞག་སྟེ། ཏིཥྛ་བཛྲ་ཡ་ཐཱ་སུ་ཁཾ་ཞེས་པས་འཁོར་ལོ་བསྐུར་བར་བྱའོ། །དེང་ཁྱོད་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་པར་འགྱུར་གྱིས། ཁྱེད་རྣམས་ཀྱིས་དེ་བཞིན་གཤེགས་པ་ཀུན་གྱི་སྐུ་གསུང་ཐུགས་རྡོ་རྗེ་མཆོག་ཏུ་
གསང་བ་ཆེན་པོའི་དཀྱིལ་འཁོར་འདིར་མ་ཞུགས་པ་རྣམས་ལ་སྨྲ་བར་མ་བྱེད་ཅིག །དད་པ་དང་མི་ལྡན་པ་རྣམས་ལ་ཡང་མ་ཡིན་ནོ། །ༀ་ཏིཥྛ་བཛྲ། དྲྀ་ཌྷོ་མེ་བྷ་བ། སཱ་སྭ་ཏོ་མེ་བྷ་བ། ཧྲི་ད་ཡམྨེ། ཨ་དྷི་ཏིཥྛ་སརྦ་སིདྡྷི་མ་མེ་པྲ་ཡཙྪ་ཧཱུྃ། 
ཧ་ཧ་ཧ་ཧ་ཧོཿ ཨ་ཁྃ་བཱི་ར་ཧཱུྃ། པྲ་ཏི་ཀུ་སུ་མ། པྲ་ཏཱིཙྪ། ཨཉྫ་ལི་ནཱ་ཐ་ཧོཿཞེས་པས་མེ་ཏོག་དོར་བར་བྱའོ། །ཨོཾ་ཤྲཱི་སརྦ་ཏ་ཐཱ་ག་ཏ་ཡ་མ་ཧཱ་སུ་ཁ་དྷྲིཀ་ཨ་བྷི་ཥ་ཀན་ཏཱ། བཛྲ་སཏྭ་ཨ་དྷི་ཛྙཱ་ན་ཨ་བྷི་ཥིཉྩ། ཨ་དྷི་པ་དྷི་ཏྭེ་ནོ་དྲྀ་ཌྷོ་བྷ་བ་ས་མ་ཡེ་ཧཱུྃ། 
ཨོཾ་བཛྲོཏྟ་ཀ་ཨ་བྷི་ཥིཉྩ་ཧཱུྃ། སཱུརྱ་ཏ་སྟྭྃམ་ཧྃ། ཨོཾ་ཤྲཱི་བཛྲ་དྷཱ་ཏུ་ཤཱན་ཏི་ཨ་བྷི་ཥིཉྩ་ཧཱུྃ། ཨོཾ་སརྦ་ཏ་ཐཱ་ག་ཏ་བུད་དྷ་ཨ་བྷ་ཥིཉྩ་ཧཱུྃ། ཨོཾ་བཛྲ་ཨ་བྷི་ཥིཉྩ་ཨཱཿༀ་བཛྲ་དྷརྨ་ཨ་བྷི་ཥིཉྩ་ཧྲཱིཿ། ཨོཾ་བཛྲ་ཀརྨ་ཨ་བྷི་ཥིཉྩ་ཁཾ། ཨོཾ་གྷ་གྷ། གྷཱ་ཏ་ཡ་གྷཱ་ཏ་ཡ། སརྦ་དུ་
ཥྚཱན་ཧཱུྃ་ཧཱུྃ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པྃ་ཧཱུྃ་ཧཱུྃ་ཕཊ། ཧཱུྃ་ཧཱུྃ་ཧཱུྃ་བཛྲ་དྷ་རོ་ཨཱ་ཛྙཱ་པ་ཡ་ཏི་སརྦ་བིགྷྣཱཾ་ཀཱ་ཡ་ཝཱ་ཀ་ཙིཏ་ཏ་བཛྲ་ཀཱི་ལ་ཡ་ཧཱུྃ་ཧཱུྃ་ཧཱུྃ་ཕཊ་ཕཊ། ༀ་ཨཱཿབཛྲ་མུད་ག་ར་བཛྲ་ཨཱ་ཀོ་ཊཱ་ཡ་ཧཱུྃ་ཧཱུྃ་ཕཊ། ཨོཾ་ན་མཿསརྦ་ཏ་ཐཱ་ག་ཏ་ཨཱཏ་
མ་ནྃ་ནིརྱཱ་ཏ་ན་པཱུ་ཛ་སྥཱ་ར་ཎ་ཀརྨ་བཛྲི་ཎི་ཧཱུྃ་ཨཱཿ ། ཨོཾ་ཨཱཿབཛྲ་པུཥྤེ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏ་ཨཱཏ་མ་ནྃ་ནིརྱཱ་ཏ་ན་པཱུ་ཛ་སྥཱ་ར་ཎ་ཀརྨ་བཛྲཱི་ཎི་ཛྫཿ ༀ་ཨཱཿབཛྲ་དྷཱུ་པེ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏ་ཨཱཏ་མ་ནྃ་ནིརྱཱ་ཏ་ན་ཨ་ནུ་
རཱ་ག་པཱུ་ཛ་སྥཱ་ར་ཎ་ཀརྨ་བཱན་ཧཱུྃ་ཧོཿ ། ཨོཾ་ཨཱཿབཛྲ་དཱི་པེ་ཧཱུཾཾ། ཨོཾ་ན་མཿསརྦ་ཏ་ཐཱ་ག་ཏ་ཨཱཏ་མ་ནྃ་ནིརྱཱ་ཏ་ན་སཱ་དྷུ་ཀ་ར་པཱུ་ཛ་སྥཱ་ར་ཎ་ཀརྨ་རུ་ཏྲི་ཨཱཿ ཨོཾ་ཨཱཿབཛྲ་གན་དྷེ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏ་ཀཱ་ཡ་ཨ་བྷི་ཥེ་ཀ་ཏ་ནེ་བྷྱོ་བཛྲ་མ་

89-1-229a

ཎི་ཨྃ། ཨོཾ་ཨཱཿབཛྲ་ནཻ་བི་དྱེ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏ་སཱུརྱ་བྷྱོ་བཛྲ་ཏེ་ཛོ་ཛྭ་ལ་ཧི། ཨོཾ་ཨཱཿབཛྲ་བྃ་ཤེ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏ་ཨ་ཤ་པ་རི་པུ་ར་ཙིན་ཏྱ་མ་ཎི་བྷཱ་ཛཱ་གྲ་བྷྱོ་ཧི་མྃ། ཨོཾ་ཨཱཿབཛྲ་མཱུ་རཉྫེ་ཧཱུྃ། ཨོཾ་ན་མཿསརྦ་ཏ་
ཐཱ་ག་ཏ་མ་ཧཱ་པྲཱི་ཏི་པྲ་མཱརྱ་ཀ་རེ་བྷྱོ་བཛྲ་ཧ་སྱཻ་ཧ། ཨོཾ་ཨཱཿབཛྲ་མུ་ཀུ་ཊེ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏ་ཨ་ནུ་རཱ་ག་ཏཱ་དྷརྨ་ཏ་ས་མཱ་དྷི་བི་སཱུ་ནོ་མི་མ་ཧཱ་དྷརྨཱ་སཱ་ཨ་ཀྲྀ་ཏི། ཨོཾ་ཨཱཿབཛྲ་ལཱ་སྱཻ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏ་པྲ་ཛྙཱ་པཱ་ར་མི་ཏཱ་ནི་ར་
ཧ་རེ་སཱུ་ནོ་མི་མ་ཧཱ་གྷོ་ཥ་བྷུ་གེ་དྷཱྃ། ཨོཾ་ཨཱཿབཛྲ་མཱ་ལཻ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏ་ཙཀྲ་ཨཀྵ་བྷ་ར་བ་དྷ་ཏི་སརྦ་པུ་ནན་ཏ་ན་ཡཻ་ཏཱུ་ནོ་མི་སརྦ་མཎྜ་ལེ་ཧཱུྃ། ཨོཾ་ཨཱཿབཛྲ་གཱི་ཏི་ཧཱུྃ། ཨོཾ་ན་མཿསརྦ་ཏ་ཐཱ་ག་ཏ་སན་ཏ་བྷ་ཤ་ཤུད་དྷ་སཾ་གཱི་ཏི་གྷ་ཡྃ་
སྟུ་ནོ་ནི་བཛྲེ་བཛྲེ་བྃ། ཨོཾ་ཨཱཿབཛྲ་ནྲྀ་ཏྱེ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏེ་དྷཱུ་པ་མེ་གྷ་སྥཱ་ར་ཎ་པཱུ་ཛ་ཀརྨ་ཀརྨ་ཨཱཿཨོཾ་ཨཱཿབཛྲ་ཨཱ་དར་ཤེ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏ་པུཥྤ་པྲ་ས་ར་སྥཱ་ར་ཎ་པཱུ་ཛ་ཀརྨ་ཀི་རི་ཀི་རི་མཱྃ། ཨོཾ་ཨཱཿབཛྲ་ར་སེ་ཧཱུྃ། ཨོཾ་ན་མཿ 
སརྦ་ཏ་ཐཱ་ག་ཏ་ཨ་མོ་གྷ་ཛྭ་ལ་སྥཱ་ར་ཎ་པཱུ་ཛཾ་ཀརྨ་བྷ་ར་བྷ་ར་མཱྃ། ཨོཾ་ཨཱཿབཛྲ་སྤཱར་ཤེ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏ་གྷཎྜ་པ་ས་མུ་དྲཱ་སྥཱ་ར་ཎ་པཱུ་ཛ་ཀརྨེ་ཀུ་རུ་ཀུ་རུ་མཱྃ། ཨོཾ་ཨཱཿབཛྲ་དྷརྨ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏེ་བྷྱཿ ཨོཾ་ས་མ་ཡ་པཱུ་ཛ་
སརྦ་ཀརྨ་ནིར་མ་ཏ་སྟྭྃ། ཨ་ན་ཡ་སྭཱ། ཨ་ཧོ་སུ་ཁྃ། སཱ་དྷུ་སཱ་དྷུ། སུ་བྃ་ཧ་ཏ་ཏྭཱྃ། རཱུ་པོ་ཏྱ་ཧྱེ་ཨརྠ་པྲ་བ་ཏི། ཧ་ཧཱ་ཧཱུྃ་ཧ། སརྦ་ཀ་རི་དུཿཁ་ཚེ་ད། བུད་དྷ་བོ་དྷི་པྲ་ཏི་ཤསྟ། སུ་བ་ཤིཏྟཱཾ། ཤ་ཏྲཱུྃ་བཀྵ། སརྦ་སིད་དྷི་མ་མ་ཧཱ་ར་ཏི། སུ་པོ་ཤོ་བྷ་ཤྲོ་སྟ་སཱུ་
ཁྱ་སརྦ་པཱུ་ཛ་པྲ་ཧད་ནི་ཕ་ལ་ག་མི་སུ་ཏ་ཛ་གྲི། སུ་གན་དྷ་གི། ཨ་ཡ་ཧེ་ཛ། ཨ་ཡ་ཧཱི་ཧཱུྃ་ཧཱུྃ་ཧོ། སྥོ་ཊ་བྃ་གྷཎ་ཌ་ཨ་ཨ། ཨ་ནྱོ་ནྱ་ཨ་ནུ་ག་ཏ་སརྦ་དྷརྨྨཱ། པ་རྂ་པ་ར་ཨ་ནུ་པྲ་བིཤྟ་སརྦ་དྷརྨཱ་ཨཱདྱཱན་ཏ་ཨ་ནུ་པྲ་ཏིཥྛ་སརྦ་དྷརྨཱ། ཨོཾ་སུ་སཱུ་ཕྲ་
ཏིཥྚ་ཏ་བཛྲ་སྭཱ་ཧཱ། ཨོཾ་སརྦ་བིར་པཱུ་ར་པཱུ་ར། སཱུ་ར་སཱུ་ར་ཨཱ་བཪྟ་ཡ་ཧོཿ། ན་མཿས་མན་ཏ་བྷ་དྲ་བུད་དྷཱ་ནཱྃ། ཨ་བིཤྨྱ་ཡེ་སྥཱ་ར་ཎ་ཧི་མྃ་ག་ག་ན་ཁྃ། དྷརྨ་དྷཱ་ཏུ་ཨཱ་ཀཱ་ཤ་ས་མན་ཏ། སརྦ་ཏ་ཐཱ་ག་ཏ་ཐཱ་ཨ་པ་རི་ཤོ་དྷ་ནི་མཎ་ཌ་

89-1-229b

ལི་མཱ་མ་པྲ་ནི་ཏེ། སུ་བྱ་དྷི་ཛྙཱ་ན་བ་ལེ་ན། སརྦ་ཏ་ཐཱ་ག་ཏ་བ་ལེནྟ། བན་དྷ་སསྠན་ན་བ་ལི་ན་ཙ་སྭཱ་ཧཱ། དེ་ནས་འདི་ནི་གསུངས་ཙམ་གྱིས། དེ་བཞིན་གཤེགས་པའི་ཚོགས་རྣམས་དང་། །རིག་པའི་ལྷ་མོ་དུ་མའི་ཚོགས། །ཁྲོ་
རྒྱལ་དུ་མར་བཅས་པ་ལ། །ཡེ་ཤེས་ཡོངས་སུ་དག་པ་ཡི། །གསང་བ་ཚད་མེད་རྒྱ་མཚོ་ཡི། །མཆོད་པ་མ་ལུས་ཚོགས་ཀྱིས་ནི། །ཀུན་དུ་བཟང་པོའི་ཚུལ་བསྟན་པ། །ནམ་མཁའི་ཁམས་ནི་མི་ཟད་པའི། །ཀུན་ནས་
ཀུན་དུ་སྤྲིན་གྱུར་པས། །རྣམ་དག་ཞིང་ཁམས་ཁེངས་གྱུར་པས། །འཇིག་རྟེན་ཁམས་ནི་མ་ལུས་པའི། །སངས་རྒྱས་མཆོད་ཅིང་སེམས་ཅན་དོན། །འཁོར་བ་སྟོངས་པར་མ་གྱུར་ཚེ། །བླ་མེད་མཆོད་པས་རྒྱས་པར་
འགྱུར། །དེ་ཉིད་ཏིང་འཛིན་བསྟན་པ་ཡིན། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་
ལས་གསང་སྔགས་དང་མཆོད་པ་བསྟན་པའི་ལེའུ་སྟེ་དྲུག་བཅུ་བདུན་པའོ།། །། དེ་ནས་བཅོམ་ལྡན་འདས་དཔལ་རྡོ་རྗེ་འཛིན་པ་ཆེན་པོ་སངས་རྒྱས་ཐམས་ཅད་ཀྱི་དབང་བསྐུར་བ་བླ་ན་མེད་པའི་
དཀྱིལ་འཁོར་ཐམས་ཅད་ཡང་དག་པར་སྟོན་པ་གསང་བ་ཚད་མེད་པ་མངོན་པར་འབྱུང་བ་འདི་རབ་ཏུ་གསུངས་སོ། །དེ་ནས་གསང་བ་རྡོ་རྗེ་འཛིན། །དཀྱིལ་འཁོར་དུ་མའི་བདག་ཉིད་ཅན། །བྱང་ཆུབ་མཆོག་ཏུ་གནས་པ་ཡི། །ཡེ་ཤེས་
དྲི་མེད་དྲ་བ་གསུངས། །འགྲོ་ཀུན་འཁོར་བའི་མུན་པ་ཡི། །ཉོན་མོངས་རྟོག་པ་གཞོམ་པ་དང་། །ཚེ་འདིར་མཆོག་དོན་ཐོབ་བྱའི་ཕྱིར། །དགྱེས་པ་ཆེན་པོ་འདིར་གཞུག་བྱ། །བྱང་ཆུབ་སེམས་དཔའ་ཆེ་རྣམས་ཀྱིས། །གསང་བའི་དོན་ལ་
གསོལ་པ་གང་། །ཡོན་ཏན་ཐམས་ཅད་འབྱུང་བའི་གནས། །ཐར་པའི་གྲོང་ཁྱེར་བསྟན་དུ་གསོལ། །དེ་སྐད་ལན་གསུམ་བརྗོད་པ་ཡི། །གཞན་དོན་ཚུལ་འདི་བསྟན་པ་སྟེ། །བསྙེན་པ་ཉེ་བར་སྒྲུབ་པ་དང་། །སྒྲུབ་པ་སྒྲུབ་པ་ཆེན་པོ་སྟེ། །

89-1-230a

རྣལ་འབྱོར་བཞིར་ནི་བརྗོད་པ་ཡིན། །དང་པོའི་མཚན་ཉིད་གསང་བ་དང་། །ཉེར་སྤྱད་ཆོ་ག་ཚུལ་བཞིན་ཏེ། །བྱང་ཆུབ་སེམས་ལས་རབ་བྱུང་བ། །གསང་བ་ཚུལ་འདི་བསྟན་པའོ། །གསང་བ་ཆོག་ངེས་བསྟན་པར་བྱ། །ས་བཙལ་
བ་དང་ས་བརྟག་པ། །ས་བསླང་ས་གཟུང་ས་གནས་པ། །སྦྱང་དང་དག་བྱེད་རིམ་པས་བྱ། །རི་བོའི་ངོགས་དང་དབེན་གནས་དང་། །ཚལ་དང་སྐྱེ་བོ་མེད་གནས་པ། །དུར་ཁྲོད་ཆུ་ངོགས་གླིང་དག་དང་། །བྱིན་བརླབ་ལྡན་སོགས་གནས་སུ་
ཤིས། །ཤར་དང་ལྷོ་དང་ནུབ་དང་བྱང་། །རིམ་པས་དུས་ཀྱི་དབྱེ་བ་ཡིས། །ཉམས་དགའ་བ་ཡི་ས་ཕྱོགས་སུ། །ཡེ་ཤེས་ལྡན་པས་ཉེ་བར་འགྲུབ། །སྣུམ་ཞིང་མཉམ་ལ་ཚྭ་སྒོ་མེད། །སྐྱོན་མེད་ཕྱོགས་ན་ཡིད་འོང་ཡིན། །རིང་དུ་
བརྐོས་ས་སླར་ཁེངས་ཤིང་། །ལྷག་པར་འཕེལ་ན་ཤིས་པར་གྲགས། །ཕྱེད་གྱུར་མཉམ་དང་བྲི་དང་མཐོ། །རིམ་ཤེས་ལྟོ་འཕྱེ་ཆེན་པོ་ཡི། །མདུན་ཕྱོགས་ལྟོ་བར་ཁ་བལྟས་བརྐོ། །ཡུལ་དེར་གནས་པའི་ལྷ་ཀླུ་དང་། །
གང་ཡང་རུང་བ་ས་ལྷ་མོ། །མཆོད་བསྟོད་གཏོར་མ་སྔོན་འགྲོ་བས། །ངེས་པར་གནང་བ་བྱིན་པར་བསམ། །ཁྲོ་བོ་ཆེན་པོ་དུ་མ་དང་། །ཡང་ན་བདུད་རྩི་འཁྱིལ་པ་ཡིས། །བསྲུང་ཞིང་བདག་ལ་མཆོག་སྩོལ་བར། །
བསམ་པ་ཡེ་ཤེས་རྣལ་འབྱོར་ཡིན། །དེ་རྗེས་ས་ཡི་ལྷ་མོ་དག །བདག་ལ་གནང་བ་བྱིན་ནས་ནི། །བར་སྣང་བཞུགས་པ་དེ་ཉིད་ཀྱང་། །ཤིན་དུ་དགྱེས་པས་བརྟན་པར་བཞུགས། །ཐུན་མོང་བ་དང་ཁྱད་པར་གྱིས། །
སྦྱང་བ་སྔོན་དུ་འགྲོ་བ་ཡིན། །དེ་ནས་དཀྱིལ་འཁོར་དབུས་ཉིད་དུ། །ཁྱད་པར་ཞི་བའི་སྦྱིན་སྲེག་བྱ། །བདག་ཉིད་ལྷ་ཡི་ང་རྒྱལ་གྱིས། །སྔགས་བརྗོད་རེག་པས་གནས་པར་གྱུར། །དེ་ནས་སྤྱན་
དྲང་མཆོད་བསྟོད་པ། །སྔོན་འགྲོ་གསོལ་བ་གདབ་པ་ནི། །དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །གསང་ཆེན་དཀྱིལ་

89-1-230b

འཁོར་བཤད་དུ་གསོལ། །མཚན་རྣམས་ཐམས་ཅད་ཡང་དག་རྫོགས། །མཚན་མིན་ཐམས་ཅད་ཡང་དག་སྤངས། །ཀུན་དུ་བཟང་པོ་སྐུ་ཡི་མཆོག །གསང་ཆེན་དཀྱིལ་འཁོར་བཤད་དུ་གསོལ། །
ཞི་བའི་མཆོག་ནི་ཆོས་ལས་བྱུང་། །སྤྱོད་པ་ཡེ་ཤེས་རྣམ་སྦྱངས་པ། །ཀུན་དུ་བཟང་པོ་གསུང་གི་མཆོག །གསང་ཆེན་དཀྱིལ་འཁོར་བཤད་དུ་གསོལ། །སེམས་ཅན་ཀུན་གྱི་སེམས་ཆེན་པོ། །
སྤྲོས་མེད་ཡེ་ཤེས་དག་པ་ཡི། །ཀུན་བཟང་ཐུགས་མཆོག་ཁ་ལོ་སྒྱུར། །དཀྱིལ་འཁོར་དམ་པ་བཤད་དུ་གསོལ། །དེ་སྐད་ཅེས་ནི་ཕྱོགས་བཞི་ནས། །གསོལ་བ་གདབ་ཅིང་ཕྱག་བྱས་ནས། །
མཐོང་བ་གཟིགས་ཕྱིར་ཁྲོ་བོ་ཡིས། །ཤིན་དུ་ལྟ་སྟངས་བགེགས་གཟིར་ཞིང་། །བརྟུལ་ཞུགས་དྲག་པོས་རྡོ་རྗེའི་གར། །རྡོ་རྗེ་སེམས་དཔའ་ཁྲོས་པས་བྱ། །དེ་ནས་བགེགས་ལ་བཀའ་བསྒོ་ཞིང་། །
རོལ་པའི་སྒྱུར་བས་བལྟ་བར་བྱ། །གསང་སྔགས་ཕྱག་རྒྱར་བཅས་པ་ཡིས། །སློབ་མའི་བགེགས་དབྱུང་བར་ཆད་བསལ། །སྦྱིན་སྲེག་གཏོར་མ་སྔོན་འགྲོ་བྱ། །ཁྲོ་བོའི་ཕུར་པས་གདབ་པ་དང་། །གཏོར་མས་
བགེགས་བསལ་ཆོ་ག་བསྟན། །དེ་ནས་བསྒྲུབ་པ་ལྷག་པར་གནས། །ས་ཡི་ལྷ་མོ་ལྷག་གནས་པ། །ཕྱག་རྒྱ་བཅས་ཤིང་མཆོད་གྱུར་པས། །བསྐྱེད་ཅིང་བསྟོད་པ་བརྩམ་པར་བྱ། ཨོཾ་སྐྱོབ་པ་སངས་རྒྱས་ཐམས་
ཅད་ཀྱི། །སྤྱོད་པའི་ཚུལ་དང་ཁྱད་པར་གྱིས། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དབང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །དཔའ་བོ་བྱང་ཆུབ་ཤིང་དྲུང་དུ། །མི་བཟད་བདུད་ཀྱི་སྡེ་བཅོམ་ལྟར། །དེ་བཞིན་
བདག་གིས་བདུད་ཀྱི་སྡེ། །ཕམ་པར་བྱ་ཕྱིར་བླ་མེད་པའི། །རྒྱལ་བ་གསང་ཆེན་དཀྱིལ་འཁོར་བྲི། །དེ་ལྟར་ལན་གསུམ་བརྗོད་པ་ཡིས། །དེར་ནི་ཐིམ་པར་རྣམ་པར་བསམ། །དེ་ནས་དཀྱིལ་འཁོར་དེ་ཉིད་ཀྱི། །ཀུན་དུ་

89-1-231a

བདུད་རྩི་ལྔ་དང་ནི། །མ་དཱ་ནྃ་གིས་ལེགས་པར་བྱུག །རྡོ་རྗེས་དྲི་ཡི་ཐིག་ལེ་བྱ། །ལྷ་གནས་གོ་རིམ་ཤེས་པར་བྱ། །མེ་ཏོག་སིལ་མས་གཏོར་བར་བྱ། །བསྐྱེད་ཅིང་བསྟིམ་དང་བཞུགས་པ་ལ། །སྤྱན་དྲང་དབང་
བསྐུར་མཆོད་པ་དང་། །བསྟོད་པ་ལ་སོགས་སྔོན་འགྲོ་བྱ། །ལྷ་ལ་གསོལ་བ་གདབ་པར་བྱ། །གནང་བ་བྱིན་ནས་བཞུགས་སུ་གསོལ། །རྡོ་རྗེ་བུམ་པའི་མཚན་ཉིད་ལྡན། །ཁྱད་པར་ལྡན་པ་རྩ་བ་ཡི། །ལྷ་གྲངས་དག་དང་མཉམ་
པའམ། །ཡང་ན་ཉི་ཤུ་རྩ་ལྔའི་བར། །ལས་བུམ་དང་ནི་བཀྲ་ཤིས་པའི། །བུམ་པ་དག་དང་ལྡན་པ་སྟེ། །འདི་དག་ཁ་རྒྱན་མགུལ་ཆིངས་ཅན། །སྙིང་པོ་ལྔ་དང་སྨན་ལྔ་དང་། །འབྲུ་ལྔ་སྤོས་ལྔ་རིན་ཆེན་ལྔ། །ཆུ་ཀླུང་ཆུ་བཅས་
ཁྱད་པར་ཏེ། །ཐ་དད་པ་དང་གཅིག་པ་ཡི། །ཏིང་ངེ་འཛིན་གྱིས་སྟ་གོན་བྱ། །ཁྱད་པར་བར་ཆད་བསྲུང་དོན་དུ། །བསྲུང་བའི་ཕུར་བུ་ཁྲོ་བོར་བསྐྱེད། །མཆོད་བསྟོད་གཉིས་མེད་ལྡན་བྱས་ལ། །གཏོར་མ་ལྡན་པས་བཀའ་
བསྒོ་བྱ། །དེ་ནས་སློབ་མ་འཇུག་པའི་རིམ། །སྤྲོ་བ་བསྐྱེད་དང་གནང་བ་སྦྱིན། །སྡོམ་པ་དབོག་དང་བསྲུང་བ་གདགས། །སོ་ཤིང་དོར་བར་བྱ་བ་དང་། །དེ་ལྟས་ལུང་བསྟན་ཀུ་ཤ་ལས། །སྔས་དང་སྟན་སྦྱིན་
གཟེངས་བསྟོད་ནས། །རྨི་ལམ་གདབ་ཕྱིར་ཉལ་དུ་གཞུག །སློབ་མས་མཎྜལ་མེ་ཏོག་བྱས། །ཁྲུས་བྱས་ཕྱག་བཙལ་མདུན་གནས་ལ། །ཁྱད་པར་སྤྲོ་བསྐྱེད་རྗེས་འཇུག་བྱ། །རིགས་ཀྱི་སྡོམ་པ་སྦྱིན་པར་བྱ། །བླང་
བ་བྱེ་བྲག་ཤེས་པར་བྱ། །རང་གི་ལུས་ཚད་མཉམ་པ་ཡི། །སུམ་སྒྲིལ་སྲད་བུ་བཙོས་པ་ཡིས། །གསང་སྔགས་བརྗོད་ཅིང་བཅིང་བར་བྱ། །སོ་ཤིང་ཚད་ལྡན་གཏད་བྱས་པ། །ལྷོ་ཕྱོགས་ངོགས་སུ་མཎྜལ་ལ། །ལྷུང་
བའི་རྗེས་སུ་བརྟག་པར་བྱ། །རྩྭ་མཆོག་བྱིན་པ་མི་སྨྲ་བར། །སེང་གེའི་སྟབས་ཀྱིས་ཉལ་བར་བྱ། །ནུབ་མོའི་རྨི་ལམ་ཅི་བྱུང་བ། །ཅི་བྱུང་ནང་པར་སྨྲ་བར་གྱིས། །ཁྱད་པར་གཟེང་བསྟོད་ཉལ་དུ་གཞུག །

89-1-231b

ནང་པར་རྨི་ལམ་ངན་གྱུར་གང་། །གསང་སྔགས་སྦྱིན་སྲེག་རིམ་པས་ཟློག །དེ་ནས་རྡོ་རྗེ་སློབ་དཔོན་དང་། །སྒོ་བཞིའི་ཕྱོགས་ཀྱི་རྣལ་འབྱོར་དང་། །ལས་ཀྱི་སྐྱེས་བུར་བཅས་པ་ཡིས། །མཆོད་བསྟོད་
ལྷ་ལ་གསོལ་བ་གདབ། །མ་ལུས་ཕྱོགས་བཅུར་བཞུགས་པ་ཡི། །དུས་གསུམ་སངས་རྒྱས་བདག་ལ་དགོངས། །རྡོ་རྗེ་འཛིན་པ་འདི་ཞེས་པས། །གསང་ཆེན་དཀྱིལ་འཁོར་འབྱུང་བ་ཡི། །
དེང་འདིར་སངས་རྒྱས་ཀུན་གཤེགས་ཤིག །དངོས་གྲུབ་མ་ལུས་བདག་ལ་གསོལ། །ཞེས་ནི་ལན་གསུམ་བརྗོད་པར་བྱ། །དེ་ནས་ལས་ཀྱི་ཆོ་ག་ནི། །སར་པ་ལེགས་པར་བཀལ་བ་
དང་། །ཚད་ལྡན་མཛེས་པའི་སྲད་བུ་ཡིས། །རང་འདོད་ལྷ་ཡི་གཟུགས་གནས་པས། །ཤེས་རབ་ཅན་གྱིས་ཐིག་གདབ་བྱ། །ཁྱད་པར་ཡེ་ཤེས་ལྡན་པས་ནི། །སློབ་དཔོན་
ཤར་ལྟ་སློབ་མ་ནུབ། །སློབ་དཔོན་ལྷོར་འདུག་སློབ་མ་བྱང་། །གཉིས་པ་ཡང་ནི་གདབ་པར་བྱ། །ཚངས་པའི་ཐིག་ནས་བརྩམས་ནས་ནི། །མཁས་པས་ཆ་ཤས་གདབ་པར་བྱ། །
མེ་ཡི་ཕྱོགས་སུ་གནས་པ་ཡིས། །བྱང་ལྟས་ཤར་གྱི་ཐིག་གདབ་བྱ། །རླུང་དུ་གནས་ཏེ་ལྷོར་བལྟས་པས། །ནུབ་ཀྱི་ཐིག་ནི་གདབ་པར་བྱ། །དེ་ཉིད་ནས་ནི་བྱང་ངོས་གདབ། །མེར་
གནས་ལྷོ་ཕྱོགས་ཐིག་བྱ་ཞིང་། །དེ་ནས་རླུང་གི་ཕྱོགས་སུ་བྱ། །བདེན་བྲལ་གནས་པས་དབང་ལྡན་པར། །ཚད་ལྡན་རིམ་པས་གདབ་པར་བྱ། །ཀུན་ནས་ཡོངས་སུ་ཟླུམ་པོ་ཡི། །
ཕོ་བྲང་ལེ་ཙེ་དགུ་པར་བྱ། །སོ་སོའི་ལྷ་ཁྱམས་དང་བཅས་པ། །སྒོ་བཞིས་ཀུན་ནས་བརྒྱན་པར་དགོད། །སྤྱི་ཁྱབ་ཕོ་བྲང་ནང་མ་ལ། །ལེང་ཙེ་ཉི་ཤུ་རྩ་ལྔ་པའི། །དཀྱིལ་འཁོར་སོ་སོར་ཤེས་

89-1-232a

པར་བྱ། །བར་ཁྱམས་ལ་ནི་དཀྱིལ་འཁོར་དྲུག །གསང་བའི་བདག་པོའི་དཀྱིལ་འཁོར་དང་། །ཚངས་པ་ཆེན་པོའི་ཕོ་བྲང་སྟེ། །སུམ་བཅུ་གསུམ་དུ་བྲི་བར་བྱ། །བར་བར་ཤར་དུ་རྡོ་རྗེ་དང་། །འཁོར་ལོ་སངས་རྒྱས་ཀུན་རང་
བཞིན། །ལྷོར་ནི་ནོར་བུ་རིན་ཆེན་འབར། །ནུབ་ཕྱོགས་པད་མ་ཨུད་པ་ལ། །བྱང་དུ་རལ་གྲི་རྒྱ་གྲམ་བཅས། །སྟོང་དག་གི་ནི་གནས་ཡིན་ནོ། །དེ་ནས་སྒོ་བཞི་རྟ་བབས་བཅས། །བཅུ་དྲུག་ཀ་བས་བཏེག་པ་ཡི། །གཟུགས་སྒྲ་དྲི་རོ་ལྷ་མོ་དང་། །
རིམ་པས་ཟུང་དུ་སྟེང་དུ་དགོད། །རུ་སྦལ་རྡོ་རྗེ་རྒྱ་གྲམ་བཅས། །རིན་ཆེན་པད་མ་ནོར་བུ་ཡིས། །སྤྲས་པ་བསྣོལ་མའི་སྟེགས་བྱེད་པ། །སྟེགས་བུ་དག་ལས་གླང་ཆེན་དང་། །ཤ་ར་བྷ་དང་པད་མ་ཡི། །ལྕུག་ཕྲན་ཡལ་གར་བཅས་པ་ཡི། །
བཀྲ་ཤིས་དང་ལ་ཟུང་གྱུར་པས། །མུ་ཏིག་ཆུན་འཕྱང་མཛེས་པས་བརྒྱན། །དེ་སྟེངས་རིན་ཆེན་བརྩེགས་པ་ལ། །བྱ་ཁྱུང་ལོགས་གནས་ཕྱིར་བལྟས་པའོ། །ཟུར་གཉིས་ཆུ་སྲིན་བསྣོལ་མ་དང་། །སེང་གེ་ཤང་ཤང་དེ་སྟེང་དུ། །རུ་རུ་
གཉིས་དང་ཆོས་འཁོར་ཆེ། །གདུགས་དང་བཅས་པས་ཀུན་ནས་བརྒྱན། །འདོད་ཡོན་པཉྩ་རེ་ག་དང་། །བ་ཀུ་ལ་ཡི་བརྩིག་པའི་གསེང་། །རིན་ཆེན་ཤར་བུ་སྣ་ཚོགས་དང་། །དྲ་བ་དྲ་བ་ཕྱེད་པས་བརྒྱན། །རིན་ཆེན་ཕ་གུ་བ་གམ་ཅན། །
རྩེ་མོར་མདའ་ཡབ་བཀོད་པ་ལ། །ཀྲ་མ་ཤཱིཪྵའི་ཕྲེང་བ་དག །ཡོངས་སུ་བཀོད་པ་མཛེས་པར་གྱུར། །ཚད་མེད་ཐར་པའི་གྲོང་ཁྱེར་གྱི། །མཚན་ཉིད་ཡོངས་སུ་རྫོགས་པར་བསམ། །དེ་ནས་རིན་ཆེན་རྣམ་ལྔ་སོགས། །ནོར་བུའི་
ཚོགས་ནི་དུ་མ་ཡིས། །བྱིན་གྱིས་བརླབ་ཅིང་ཚུལ་ཤེས་པས། །ཉི་ཤུ་རྩ་ལྔའི་ཚོན་གྱིས་བྱ། །ཁྱད་པར་སྒྲུབ་ཅིང་རྒྱན་བཀོད་པ། །མཆོད་པ་དུ་མས་ཡོངས་སུ་བསྐོར། །སྒྲུབ་པ་ཆེན་པོ་སླར་བསྟན་པ། །དཀྱིལ་འཁོར་
བསྒྲུབས་ནས་བདག་འཇུག་བྱ། །དེ་ནས་སློབ་མ་འཇུག་དོན་དུ། །ཡན་ལག་འདི་དག་ལྡན་པར་བྱ། །སྟོད་གཡོགས་སྨད་གཡོགས་གཏད་པ་དང་། །གསོལ་བ་གདབ་ཅིང་གདོང་གཡོགས་བཅིང་། །མེ་ཏོག་ཕྲེང་གཟུང་སེམས་

89-1-232b

བསྐྱེད་ཅིང་། །དོན་དྲི་ཁས་བླངས་ནང་དུ་གཞུག །ཚོགས་བསགས་མནའ་བསྒག་དམ་ཆུ་བླུད། །དམ་བསྒྲག་བཀའ་བསྒོ་ཡེ་ཤེས་དབབ། །མེ་ཏོག་དོར་རྗེས་མཐོང་བ་དྲི། །སྤྱི་གཙུག་མེ་ཏོག་ཕྲེང་བ་གདགས། །གདོང་གཡོགས་
བཀྲོལ་ནས་ལྷ་ངོ་བསྟན། །དཀྱིལ་འཁོར་རྣམ་དག་དོན་བསྟན་ཅིང་། །འདོད་ལྷ་ངོས་གཟུང་རིགས་ཤེས་བྱ། །འདི་དག་ཆོ་ག་རྟོགས་པར་བྱ། །རྒྱུ་དང་འབྲས་བུའི་ལམ་འཇུག་པས། །སེམས་བསྐྱེད་མཆོག་ཏུ་དམིགས་
ལྡན་ཞིང་། །ཚད་མེད་བློ་བསྐྱེད་བསླབ་པར་བྱ། །གསང་བར་ཡེ་ཤེས་རྡོ་རྗེར་བསླབ། །སྐུ་དང་གསུང་དང་ཐུགས་དང་ནི། །ཡེ་ཤེས་ཡོན་ཏན་ཕྲིན་ལས་ཀྱི། །བྱིན་གྱིས་བརླབ་པ་ལྔ་བྱ་སྟེ། །རྡོ་རྗེ་འཁོར་ལོ་པད་མ་དང་། །རིན་
ཆེན་རལ་གྲིའི་སྤྲོ་བསྡུ་དང་། །རིགས་ལྔ་ལྷ་མོ་ལྔར་བཅས་ལས། །གསང་བའི་དཀྱིལ་འཁོར་ཆེན་པོ་འདིར། །མ་ལུས་འདུས་པའི་ལྷ་ཚོགས་ཀུན། །ཡེ་ཤེས་ཆེན་པོའི་བྱིན་བརླབས་ཀྱིས། །དངོས་གྲུབ་སྐལ་བ་འབབ་
པར་མཛོད། །རྟགས་དང་བརྡ་དང་མཚན་མ་ཀུན། །རྣམ་པ་ཡོངས་སུ་ཤེས་པར་བྱ། །ཞི་བའམ་ནི་རྒྱས་པ་ཡི། །སྦྱིན་བསྲེག་ཉེ་བར་དབུལ་བར་བྱ། །ཐུན་མོང་དང་ནི་ཁྱད་པར་གྱི། །ཕྱག་བྱ་སློབ་མ་མདུན་གནས་ཏེ། །ལྷ་
སྲས་ཉིད་དུ་བསྐྱེད་བྱ་སྟེ། །ཤར་ནས་འཇུག་པའི་ཚུལ་གྱིས་ནི། །མེ་ཏོག་ཕྲེང་བ་དང་པོར་སྦྱིན། །མཎྜལ་མེ་ཏོག་སྔོན་འགྲོ་བས། །མདུན་གནས་དེ་ལ་དབང་བསྐུར་སྦྱིན། །བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་ཆེ་བའི་
བྱིན་བརླབས་པ། །བདག་ཅག་བསྐྱབ་པའི་དོན་གྱི་ཕྱིར། །གསང་བའི་སྙིང་པོ་དེང་བདག་གསོལ། །ལན་གསུམ་བར་དུ་གསོལ་བ་གདབ། །བླ་མེད་དབང་ནི་བསྐུར་མཛད་དེ། །རྡོ་རྗེ་གསང་ཆེན་དབང་བསྐུར་བ། །
ཁམས་གསུམ་ཀུན་གྱིས་ཕྱག་བྱས་པ། །གནས་ལས་བྱུང་བ་སྦྱིན་པར་བྱ། །དེ་ནས་གང་དུ་རྡོ་རྗེ་དཔལ་མཆོག་ཆེན་པོ་འདུས་པ་གསང་བའི་དཀྱིལ་འཁོར་ཆེན་པོར་དབང་ཡང་དག་པར་བསྐུར་བར་བྱ་སྟེ། དེ་བཞིན་

89-1-233a

གཤེགས་པ་སྟོང་མངོན་པར་འབྱུང་བ་དེ་དག་ཀྱང་ཡེ་ཤེས་ཀྱི་སྣང་བ་ལས་ཡང་དག་པར་འབྱུང་བའི་རྡོ་རྗེ་རིན་པོ་ཆེའི་སྡོང་པོ་དུ་མ་ལས་སྣ་ཚོགས་པའི་པད་མ་འབར་བ་དུ་མས་རྒྱས་པ་ཁ་ཕྱེ་བ་ལ་སེང་
གེའི་ཁྲི་དང་བཅས་པ་གསང་བ་འཛིན་པ་པོ་དང་། ལྷ་ཚངས་པ་ཡང་རེ་རེ་ཞིང་དུ་གནས་པ་ལས་འདི་ལྟ་སྟེ། རྡོ་རྗེའི་རིགས་ཉིས་བརྒྱ་ཕྲག་གཅིག་དང་། རིན་པོ་ཆེའི་རིགས་ཉིས་བརྒྱ་ཕྲག་གཅིག་དང་། པད་མའི་
རིགས་ཉིས་བརྒྱ་ཕྲག་གཅིག་དང་། ལས་ཀྱི་རིགས་ཉིས་བརྒྱ་ཕྲག་གཅིག་དང་། དེ་བཞིན་གཤེགས་པའི་རིགས་ཉིས་བརྒྱ་ཕྲག་གཅིག་སྟེ། འདི་རྣམས་དེ་བཞིན་གཤེགས་པ་རེ་རེའི་སྐུའི་བ་སྤུའི་བུ་ག་ལས་ཀྱང་འོད་
ཟེར་བྱེ་བ་ཕྲག་དུ་མ་བྱུང་སྟེ། དེ་རེ་རེ་ལས་ཀྱང་སྤྲུལ་པའི་སྐུ་དཔག་ཏུ་མེད་པ་འཕྲོས་ཏེ་འཇིག་རྟེན་གྱི་ཁམས་ཐམས་ཅད་དུ་སྣང་བ་ཆེན་པོས་ཁྱབ་པར་བྱས་ཤིང་མཛད་པ་མཐའ་ཡས་པའི་རོལ་པ་མངོན་པར་
འབྱུང་བར་མཛད་དོ། །ཐམས་ཅད་ཀྱང་བླ་ན་མེད་པའི་ཐེག་པ་ལ་འཛུད་པར་མཛད་དེ། མཆོག་ཏུ་སྐྱབས་སུ་འགྲོ་བ་སྟོན་ཅིང་འཇིག་རྟེན་པའི་ལྟ་བ་ལ་མངོན་པར་ཞེན་པ་དག་ལ་ནི་ཚངས་པ་དང་། ཁྱབ་འཇུག་དང་། དབང་
ཕྱུག་ཆེན་པོ་ལ་སོགས་པའི་གཟུགས་ཀྱིས་མངོན་པར་དབང་སྐུར་བར་བྱེད་དོ། །ཉན་ཐོས་ཀྱི་ཐེག་པ་ལ་མོས་པ་རྣམས་ལ་ནི་ཆོས་ཐམས་ཅད་བདེན་པ་བཞིའི་སྒོ་ནས་དབང་སྐུར་བར་བྱེད་དོ། །རང་རྒྱལ་བའི་ཐེག་པ་ལ་མོས་
པ་རྣམས་ལ་ནི་རྟེན་ཅིང་འབྲེལ་པ་བཅུ་གཉིས་ཀྱི་སྒོ་ནས་དབང་སྐུར་བར་བྱེད་དོ། །དེ་དག་གི་ལམ་དང་ལྟ་བ་དང་སྤྱོད་པ་ཡང་དག་པར་བསྟན་ཅིང་དེ་དག་གི་ཚུལ་གྱིས་འདུལ་བར་བྱེད་དོ། །གང་དུ་བྱང་ཆུབ་སེམས་དཔའི་
ཐེག་པ་ལ་མོས་པ་རྣམས་ལ་ནི་བྱང་ཆུབ་ཏུ་སེམས་བསྐྱེད་ཅིང་དེ་ཉིད་ཀྱིས་ཕ་རོལ་ཏུ་ཕྱིན་པ་དྲུག་ལ་སྤྱོད་དེ། སྦྱིན་པ་ཆེན་པོ་གཏོང་བའི་སྒོ་ནས་དབང་སྐུར་བར་བྱེད་དོ། །ཚུལ་ཁྲིམས་ཡོངས་སུ་མི་ཉམས་པའི་སྒོ་

89-1-233b

ནས་དབང་སྐུར་བར་བྱེད་དོ། །བཟོད་པ་ལ་གནས་པའི་སྒོ་ནས་དབང་སྐུར་བར་བྱེད་དོ། །བརྩོན་འགྲུས་རྒྱུན་མི་འཆད་པའི་སྒོ་ནས་དབང་སྐུར་བར་བྱེད་དོ། །བསམ་གཏན་གྱི་ཏིང་ངེ་འཛིན་ལ་མཉམ་པར་བཞག་པའི་སྒོ་ནས་
དབང་སྐུར་བར་བྱེད་དོ། །ཤེས་རབ་ཀྱི་ཕ་རོལ་དུ་ཕྱིན་པས་ཆོས་ཐམས་ཅད་ཀྱི་ངོ་བོ་ཉིད་ཤེས་པས་དབང་སྐུར་བར་བྱེད་དོ། །དེ་དག་ཀྱང་ཚད་མེད་གྲངས་མེད་པའི་ནམ་མཁའི་ཁམས་ལ་གནས་པའི་སེམས་ཅན་ཐམས་ཅད་
ལ་དེ་བཞིན་གཤེགས་པས་བྱང་ཆུབ་སེམས་དཔའ་རྣམས་ཀྱིས་ཆོས་སྟོན་ཅིང་དབང་སྐུར་བར་བྱེད་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་ཚད་མེད་པ་བཞིའི་སྒོ་ནས་ཆོས་སྟོན་ཅིང་
དམིགས་པ་ཐམས་ཅད་དང་བྲལ་བའི་ཚུལ་གྱིས་ཆོས་ཐམས་ཅད་ལ་དོན་དམ་པའི་བདེན་པ་རྣམ་པར་དག་པའི་ཚུལ་གྱིས་དབང་སྐུར་བར་བྱེད་དོ། །ཆོས་ཐམས་ཅད་ལ་མི་གནས་པའི་ཀུན་རྫོབ་ཀྱི་བདེན་པ་རྣམ་པར་
དག་པའི་ཚུལ་གྱིས་དབང་སྐུར་བར་བྱེད་དོ། །འདིར་ནི་རིན་པོ་ཆེའི་གཞལ་ཡས་ཁང་ཞིང་ཁམས་རྣམ་པར་དག་པར་དཔལ་ལོངས་སྤྱོད་རྫོགས་པའི་སྐུ་མངོན་པར་འབྱུང་བའི་སྒོ་ནས་དབང་སྐུར་བར་བྱེད་དོ། །
བླ་ན་མེད་པའི་སེམས་དཔའ་ཆེན་པོ་དཔག་ཏུ་མེད་པ་ལ་ནི་ཐབས་དང་སྟོབས་དང་ཡེ་ཤེས་དང་སྨོན་ལམ་རྣམ་པར་དག་པའི་ཚུལ་གྱིས་ཕྱིར་མི་ལྡོག་པའི་ལམ་ལས་བཅུའི་རྣམ་པར་དག་པའི་ཚུལ་རྡོ་རྗེ་ལྟ་བུའི་
ཏིང་ངེ་འཛིན་གྱིས་ཡོངས་སུ་དབང་སྐུར་བར་བྱེད་དོ། །གང་དེ་སངས་རྒྱས་ཀྱིས་མི་འདུལ་ཞིང་དུས་ལ་མ་བབ་པ་དེའི་ཚེ་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་དཔུང་ཆེན་པོ་བཞི་དང་བཅས་པ་
ཐམས་ཅད་ལ་དགེ་བ་བཅུའི་ལས་ཀྱི་ལམ་མངོན་པར་འབྱུང་བས་བསྟན་ཅིང་དབང་སྐུར་བར་བྱེད་དོ། །དེ་བཞིན་གཤེགས་པའི་རིགས་དེ་དག་ཀྱང་བསྡུས་པའི་ཚུལ་གྱིས་ཉི་ཤུ་རྩ་ལྔ་པོ་རེ་རེ་ལས་ཡང་ལྔ་ལྔར་

89-1-234a

རིགས་བརྒྱའི་སྒོ་ནས་དབང་སྐུར་བར་བྱེད་དོ། །རྣལ་འབྱོར་གྱི་དབང་ཕྱུག་ཆེན་པོ་རྣམས་ལ་ནི་སངས་རྒྱས་རིགས་ལྔའི་ཚུལ་གྱིས་རིན་པོ་ཆེའི་རྒྱན་ཐམས་ཅད་ཀྱིས་ཉེ་བར་བརྒྱན་པའི་སྣང་བས་རིག་
མ་དང་ལྷ་མོའི་ཚོགས་དུ་མས་འདོད་པའི་ལོངས་སྤྱོད་མི་ཟད་པ་ཡོངས་སུ་དག་པ་ལ་དགྱེས་པས་ཡོངས་སུ་སྤྱོད་པར་མཛད་ཅིང་ཁྲོ་བོའི་རྒྱལ་པོ་དུ་མ་དང་། བྱང་ཆུབ་སེམས་དཔའ་སོ་སོའི་རིགས་དང་བཅས་
པས་རིག་པ་དང་བརྟུལ་ཞུགས་བརྟན་པར་བྱེད་པ་དང་། ཆོས་ཀྱི་རྒྱལ་པོར་དབང་བསྐུར་བ་བླ་ན་མེད་པ་ཁྱད་པར་དུ་བསྟན་ཏོ། །དེ་བཞིན་གཤེགས་པའི་ཚོགས་འདུས་པ་ཆེན་པོ་བླ་ན་མེད་པ་ལ་རྡོ་རྗེ་བཙུན་མོའི་བྷ་
གའི་ནང་དུ་ཆུད་པར་གྱུར་པའི་དཀྱིལ་འཁོར་གྱི་འཁོར་ལོ་ཚད་མེད་པ་ཆོས་ཀྱི་ཕོ་བྲང་དམ་པར་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད་གསང་བ་ཡོངས་སུ་རྫོགས་པ་སྐུ་གསུང་
ཐུགས་ཡོན་ཏན་ཕྲིན་ལས་དུ་མས་བདག་ཉིད་དུ་དབང་བསྐུར་བར་མཛད་པའི་དཔལ་རྡོ་རྗེ་འཆང་ཆེན་པོས་ཕྱག་མཚན་དང་ཞལ་ལ་སོགས་པའི་རྣམ་པར་སྣང་བར་གྱུར་པ་ནི་འོད་ཟེར་དཔག་ཏུ་མེད་པ་བཀྱེ་བ་དེ་དག་
ཚུར་བསྡུས་པས་བཅོམ་ལྡན་འདས་ཉིད་ཀྱི་སྐུའི་དཀྱིལ་འཁོར་དང་། དེ་བཞིན་གཤེགས་པ་དེ་དག་སོ་སོའི་དཀྱིལ་འཁོར་གྱི་རྣམ་པར་སྣང་བར་བྱས་ཤིང་འོད་ཟེར་སྤྲོ་བ་དང་བསྡུ་བའི་རིམ་པས་སྙིང་པོའི་དཀྱིལ་འཁོར་
དུ་རིགས་ཀྱི་འཁོར་ལོ་ནམ་མཁའ་ལ་གསལ་བར་སྣང་བ་བཀོད་པའི་དཀྱིལ་འཁོར་དང་ཐ་དད་པ་མེད་པའི་སྦྱོར་བས་ཐམས་ཅད་གཉིས་སུ་མེད་པ་ཐབས་དང་ཤེས་རབ་ཀྱི་སྦྱོར་བས་བདེ་བ་ཆེན་པོའི་བདེ་བའི་སྒྱུ་མའི་
སྒྲས་བཀུག་པའི་ཞིང་ཁམས་ཡོངས་སུ་སྦྱངས་པའི་སྐུ་རྣམས་སོ་སོའི་སྤྱི་བོ་ནས་ཞུགས། རྩ་དབུ་མ་བརྒྱུད་དེ་ཡུམ་གྱི་པད་མར་བྱོན། དེ་ནས་གྱེན་དུ་གཤེགས་ཏེ་ནམ་མཁའི་ཁམས་མ་ལུས་པ་ཁེངས་པའི་

89-1-234b

ལྷ་ཚོགས་རྣམས་ཀྱིས་དབང་སྐུར་བར་བྱེད་དོ། །དེ་ཡང་བར་སྣང་གི་ཕྱོགས་མཚམས་ཁྱབ་པར་བྱས་ཏེ་སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་ཐམས་ཅད་ལ་གསང་བ་ཆེན་པོའི་དབང་སྐུར་བར་བྱེད་དོ། །
སངས་རྒྱས་སྤྱན་མའི་རྣམ་པ་ཡིས། །ས་ཡི་ཁམས་རྣམས་དབང་བསྐུར་ཏེ། །རྡོ་རྗེའི་ལུས་སུ་བྱིན་གྱིས་བརླབས། །མཱ་མ་ཀཱི་ཡི་བདག་ཉིད་ཀྱིས། །ཆུ་ཡི་ཁམས་ལ་དབང་བསྐུར་ཏེ། །རྡོ་རྗེ་དག་བྱེད་བྱིན་གྱིས་བརླབས། །
ལ་ལ་གོས་དཀར་མོར་སྣང་བས། །དྲོད་ཀྱི་ཁམས་ནི་དབང་བསྐུར་ཏེ། །རྡོ་རྗེའི་འོད་དཔུང་བྱིན་གྱིས་བརླབས། །ལྷ་མོ་སྒྲོལ་མའི་བདག་ཉིད་ཀྱིས། །གཡོ་བ་དབུགས་ལ་དབང་བསྐུར་ཏེ། །རྡོ་རྗེ་སྐྱོང་བྱེད་མར་བྱིན་
བརླབས། །ལྷ་མོ་གཟུགས་ཀྱི་རྡོ་རྗེ་མས། །སྣ་ཚོགས་གཟུགས་རྣམས་དབང་བསྐུར་བས། །སྣང་སྟོང་གཉིས་སུ་མེད་པར་བསྒྱུར། །ལྷ་མོ་སྒྲ་ཡི་རྡོ་རྗེ་མས། །སྣ་ཚོགས་སྒྲ་ཡིས་དབང་བསྐུར་བས། །གྲག་སྟོང་
གཉིས་སུ་མེད་པར་གྱུར། །དྲི་ཡི་རྡོ་རྗེ་ལྷ་མོ་ཡིས། །སྣ་ཚོགས་དྲི་ཡིས་དབང་བསྐུར་བས། །གསལ་སྟོང་གཉིས་སུ་མེད་པར་གྱུར། །ལྷ་མོ་རོ་ཡི་རྡོ་རྗེ་ཡིས། །སྣ་ཚོགས་བཅུད་ལེན་དབང་བསྐུར་བས། །མྱོང་སྟོང་
གཉིས་སུ་མེད་པར་གྱུར། །ལྷ་མོ་རེག་བྱ་རྡོ་རྗེ་མས། །འཁོར་འདས་རེག་བྱའི་དབང་བསྐུར་བས། །ལྷན་ཅིག་སྐྱེས་པའི་ཡེ་ཤེས་ལས། །བདེ་སྟོང་གཉིས་སུ་མེད་པར་གྱུར། །མིག་གི་རྣམ་ཤེས་ས་སྙིང་པོ། །རྣ་བའི་
རྣམ་ཤེས་གསང་འཛིན་པ། །སྣ་ལ་ནམ་མཁའི་སྙིང་པོ་དང་། །ལྕེ་ནི་འཇིག་རྟེན་དབང་ཕྱུག་སྟེ། །ལུས་ལ་སྒྲིབ་པ་རྣམ་པར་སེལ། །ཡིད་ལ་ཀུན་དུ་བཟང་པོས་སོ། །ཉོན་མོངས་ཅན་ཡིད་བྱམས་པ་སྟེ། །ཀུན་གཞི་འཇམ་
པའི་དབྱངས་ཀྱིས་ནི། །དེ་ལྟར་བྱིན་བརླབས་དབང་བསྐུར་ཏེ། །རྣམ་ཤེས་བརྒྱད་ནི་དག་ཕྱིར་རོ། །དངོས་པོར་འཛིན་པའི་རྟོག་པ་དག །འཇོམས་བྱེད་ཁྲོ་བོའི་རྒྱལ་པོ་བཅུས། །ཚིགས་ཚོགས་དག་པར་དབང་བསྐུར་རོ། །

89-1-235a

དེ་ལྟར་ཕྲིན་ལས་ཚུལ་གྱིས་ནི། །གསང་བ་བླ་ན་མེད་པར་གྱུར། །དེ་ནས་ཡང་བཅོམ་ལྡན་འདས་དཔལ་རྡོ་རྗེ་འཛིན་པ་ཆེན་པོས་ནི་སྲིད་པ་དང་ཞི་བ་མཉམ་པ་ཉིད་གཉིས་སུ་མེད་པ། ཐོག་མ་དང་བར་དང་ཐ་
མར་རྒྱུན་མི་འཆད་པ། ཆོས་ཐམས་ཅད་ལ་འདུ་འབྲལ་མེད་ཅིང་ཐ་དད་པར་རྟོག་པ་མེད་པ། །འགྲོ་བ་དང་འོང་བ་མེད་ཅིང་རང་བཞིན་གྱིས་འོད་གསལ་བ་རྣམ་པར་དག་པ། དབྱིངས་དང་ཡེ་ཤེས་ཟུང་དུ་འཇུག་
པ། མཉམ་པ་ཉིད་མི་གནས་པ་བདེ་བ་ཆེན་པོའི་ཚུལ་དུ་ཡང་དག་པའི་སྙིང་པོའི་གསང་བ་ཆེན་པོའི་དབང་བསྐུར་བར་གྱུར་ཏོ། །འདི་ལྟར་ཡང་དག་པ་དབང་བསྐུར་བ་འདི་བསྟན་པ་ན་སོ་སོའི་སྐྱེ་བོ་བྱེ་བ་ཁྲག་ཁྲིག་
འབུམ་ཕྲག་བཅུས་མངོན་པར་སངས་རྒྱས་པའི་དོན་ལ་གནས་པར་གྱུར་ཏོ། །བྱང་ཆུབ་སེམས་དཔའ་བསྐལ་པ་གང་གཱའི་ཀླུང་གི་བྱེ་མ་སྙེད་བཅུས་ཚེ་དེ་ཉིད་ལ་འཇིག་རྟེན་གྱི་ཁམས་འོག་མིན་དེ་ཉིད་དུ་མངོན་
པར་རྫོགས་པར་སངས་རྒྱས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བ་རྣམས་འཇིག་རྟེན་གྱི་ཁམས་བསམ་གྱིས་མི་ཁྱབ་པར་སྐུ་གསུམ་གྱི་རོལ་
མོ་མངོན་པར་སྟོན་ཅིང་མི་ཟད་པའི་ངང་ལས་ཡང་དག་པར་རྫོགས་པར་འཚང་རྒྱ་བ་དང་། འཛམ་བུའི་གླིང་བྱེ་བ་ཕྲག་བརྒྱའི་བར་དུ་ཡང་རྣལ་འབྱོར་གྱི་དབང་ཕྱུག་དུ་མའི་སྐུར་བསྟན་ནས་ཐོགས་པ་མེད་པར་དེ་བཞིན་
གཤེགས་པ་ཉིད་དུ་མངོན་པར་སྤྱོད་པར་མཛད་དོ། །དེ་ནས་གསང་བ་འཛིན་པ་པོས། །གསང་ཆེན་ཡེ་ཤེས་དབང་བསྐུར་བ། །མཉམ་ཉིད་བདེ་བ་ཆེན་པོ་ཡིས། །ཡེ་ཤེས་དྲི་མེད་དབང་བསྐུར་བའོ། །རྡོ་རྗེ་དང་ནི་དྲིལ་བུ་དང་། །
ཅོད་པན་ཉི་ཤུ་རྩ་ལྔ་ཡིས། །རིག་པའི་དབང་ནི་སྟོན་པར་མཛོད། །བླ་མ་རྡོ་རྗེ་འཛིན་པར་གྱུར། །དཔལ་ལྡན་རྡོ་རྗེ་སེམས་དཔའ་ཆེ། །དཀྱིལ་འཁོར་ཀུན་གྱི་གཙོར་གྱུར་པའི། །མྱི་བསྐྱོད་རང་བྱུང་བྱང་ཆུབ་སེམས། །

89-1-235b

རྡོ་རྗེ་རིགས་ཀྱི་དབང་བསྐུར་བའོ། །དཔལ་ལྡན་རྣམ་པར་སྣང་མཛད་འོད། །འཁོར་ལོ་འདུས་པའི་རྒྱལ་ཆེན་པོར། །རྡོ་རྗེ་རྟག་པ་ཡེ་ཤེས་ཅན། །དེ་བཞིན་གཤེགས་པས་དབང་བསྐུར་རོ། །དཔལ་ལྡན་ཡིད་བཞིན་གཏེར་འཆང་
བ། །དབང་ཕྱུག་ཆེན་པོ་ཆགས་པ་མེད། །རིན་ཆེན་འབྱུང་གནས་ནོར་བུ་འཛིན། །རིན་ཆེན་རིགས་ཀྱི་དབང་བསྐུར་རོ། །དཔལ་ལྡན་པད་མ་འབར་བའི་མདངས། །རབ་འབར་རྒྱལ་བའི་སྤྱན་འཆང་བ། །འོད་དཔག་མེད་པ་
ཐུབ་པ་ཆེ། །པད་མ་རིགས་ཀྱི་དབང་བསྐུར་རོ། །དཔལ་ལྡན་སངས་རྒྱས་ཕྲིན་ལས་སྐུ། །ཡེ་ཤེས་རྒྱལ་པོ་སྒྱུ་འཕྲུལ་ཆེ། །གདོན་མི་ཟ་བ་ཐོགས་པ་མེད། །ལས་ཀྱི་རིགས་ཀྱི་དབང་བསྐུར་རོ། །ཨོཾ་ན་མཿསརྦ་ཏ་ཐཱ་ག་ཏ་
ཨ་དྷི་ཏིཥྛ་བཛྲ་ཨ་བྷི་ཥིཉྩ་ས་མ་ཡ་ཤྲི་ཡེ་ཧཱུྃ། ཨོཾ་ན་མཿསརྦ་ཏ་ཐཱ་ག་ཏ་ཨ་དྷི་ཏིཥྛ་བཛྲ་བུད་དྷ་ཨ་བྷི་ཥིཉྩ་ས་མ་ཡ་ཤྲི་ཡེ་བྲུྃ། ཨོཾ་ན་མཿསརྦ་ཏ་ཐཱ་ག་ཏ་ཨ་དྷ་ཏིཥྛ་བཛྲ་རཏ་ན་ཨ་བྷི་ཥིཉྩ་ས་མ་ཡ་ཤྲི་ཡེ་ཨྂ། ཨོཾ་ན་མཿ 
སརྦ་ཏ་ཐཱ་ག་ཏ་ཨ་དྷི་ཏིཥྛ་བཛྲ་པད་མ་ཨ་བྷི་ཥིཉྩ་ས་མ་ཡ་ཤྲི་ཡེ་ཧྲཱིཿ ཨོཾ་ན་མཿསརྦ་ཏ་ཐཱ་ག་ཏ་ཨ་དྷི་ཏིཥྛ་བཛྲ་ཀརྨ་ཨ་བྷི་ཥིཉྩ་ས་མ་ཡ་ཤྲི་ཡེ་ཁྃ། དེ་ཡང་ཆུའི་དུས་སུ་ནི་མི་བསྐྱོད་པའི་བུམ་པའི་ཆུས་བཀྲུ་བར་
བྱེད་དོ། །རིན་ཆེན་གྱི་ནི་མེ་ཏོག་ཕྲེང་བ་རྣ་ལྟག་གཡས་པར་རོ། །པད་མ་ཡི་ནི་བུམ་པ་རྡོ་རྗེ་དང་བཅས་པའོ། །ལས་ཀྱི་ནི་རོལ་མོ་སྣ་ཚོགས་སྒྲོགས་པའོ། །དེ་བཞིན་གཤེགས་པ་ནི་བཀྲ་ཤིས་དུ་མའོ། །རིན་ཆེན་འབྱུང་
ལྡན་གྱིས་ནི་དབུ་རྒྱན་རྩེ་ལྔ་པ་ཉིད་དོ། །རྡོ་རྗེ་མི་བསྐྱོད་པ་ནི་བུམ་ཆུས་ཆར་དབབ་པའོ། །པད་མའི་ནི་རྡོ་རྗེ་བུམ་པའི་སྟེང་དུ་བཅས་པའོ། །ལས་ཀྱི་ནི་སྒྲ་སྒྲོགས་པའོ། །བརྟག་པའི་བཀྲ་ཤིས་བརྗོད་པ་ཉིད་དོ། །སྣང་
བ་མཐའ་ཡས་ཀྱི་ནི་རྡོ་རྗེ་འབར་བ་གཏད་པའོ། །རྡོ་རྗེའི་ནི་ཁྲུས་ཆར་རོ། །རིན་པོ་ཆེའི་ནི་མེ་ཏོག་རབ་ཏུ་གཏོར་བའོ། །ལས་ཀྱི་ནི་སྒྲ་བརྙན་གྱི་ཚོགས་སོ། །སངས་རྒྱས་ཀྱི་ནི་གསང་སྔགས་བརྗོད་པའོ། །དོན་ཡོད་གྲུབ་

89-1-236a

པ་ནི་དྲིལ་བུ་གཏད་པའོ། །རྡོ་རྗེའི་ནི་ཁྲུས་ཆར་རོ། །རིན་པོ་ཆེའི་ནི་མེ་ཏོག་ཆར་རོ། །པད་མས་ནི་རྡོ་རྗེ་དང་བཅས་པའི་ལོ་མས་སོ། །སངས་རྒྱས་ཀྱི་ནི་ཚིགས་སུ་བཅད་པ་བརྗོད་པའོ། །རྣམ་པར་སྣང་
མཛད་ཀྱི་ནི་གསང་མཚན་གདགས་པའོ། །རིན་ཆེན་གྱི་ནི་མེ་ཏོག་སྤྱི་བོར་རོ། །པད་མའི་རྡོ་རྗེ་མགོ་ཐོག་ཏུའོ། །ལས་ཀྱིས་ནི་དྲིལ་བུ་མགོ་ཐོག་ཏུའོ། །རྡོ་རྗེ་ནི་རྡོ་རྗེ་དྲིལ་བུ་བསྣོལ་བས་མགོ་ཐོག་བཞག་ཅིང་བུམ་ཆུས་གཏོར་
བ་ཉིད་དོ། །དེ་ལྟར་རིགས་ཀྱི་དབྱེ་བས་ཉི་ཤུ་རྩ་ལྔའི་བར་དུ་རབ་ཏུ་ཤེས་པར་བྱ་བ་ཉིད་དོ། །གསང་སྔགས་དང་རིག་སྔགས་དང་གཟུངས་སྔགས་ཀྱི་ལྷ་ཚོགས་རྣམས་ཀྱི་སྐུ་སྣ་ཚོགས་པ་ལྟ་བས་ནི་ཀུན་དུ་སྐུའི་དབང་ངོ་། །གསང་
སྔགས་དང་རིག་སྔགས་དང་གཟུངས་སྔགས་དུ་མའི་སྔགས་བརྗོད་པ་དང་སྒྲ་དུ་མས་ནི་ཀུན་དུ་གསུང་གི་དབང་ངོ་། །གསང་སྔགས་དང་རིག་སྔགས་དང་གཟུངས་སྔགས་ཀྱི་སྙིང་པོ་དང་ཏིང་ངེ་འཛིན་དུ་མས་ནི་ཀུན་དུ་ཐུགས་
ཀྱི་དབང་ངོ་། །ཆོས་ཀྱི་རྒྱལ་པོ་མངོན་པར་ཐོབ་པར་འདོད་པས་ནི་རྡོ་རྗེ་སློབ་དཔོན་གྱི་དབང་བསྐུར་བར་བྱའོ། །གསང་བའི་དམ་ཚིག་སྦྱིན་པར་བྱའོ། །སྤྱོད་པ་བརྩམ་པར་འདོད་པ་ལ་ནི་བརྟུལ་ཞུགས་ཀྱི་དབང་བསྐུར་བར་བྱའོ། །སེམས་
ཅན་ཀུན་ལ་ཕན་བྱའི་ཕྱིར། །འཇིག་རྟེན་ཁམས་ནི་སྟོང་དག་ཏུ་ཇི་ལྟར་ཐབས་ཀྱིས་འདུལ་གྱུར་པ། །ཆོས་ཀྱི་འཁོར་ལོ་རབ་ཏུ་བསྐོར། །གཞན་དག་དྲུག་དང་བླ་མ་ནི། །དགེ་སློང་རྡོ་རྗེ་འཛིན་པ་ཡིས། །ཆོས་གོས་རི་དགས་རྣ་བ་ལྟར། །
མར་མེ་མཛད་དཔལ་ཕྱག་རྒྱ་ལས། །གསང་བ་ཆེན་པོའི་ཚུལ་བསྟན་པས། །འདི་ལྟར་ང་ཡིས་ལུང་བསྟན་ཏེ། །ཐུབ་པ་དེ་བཞིན་གཤེགས་པའི་གཙོ། །རྐང་གཉིས་གཙོ་བོར་འབྱུང་བར་འགྱུར། །མི་འཇིགས་ཕྱག་རྒྱ་སྦྱིན་མཛད་དེ། །
དངོས་པོ་མཆོག་ཏུ་གྲུབ་པའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །དབང་མཆོག་ཐོབ་པ་ཙམ་གྱིས་ནི། །སློབ་མ་ཡོན་ཏན་བདག་པོར་གྱུར། །ཁམས་གསུམ་གྱི་ནི་རྒྱལ་སྲིད་ཆེ། །རྒྱལ་བའི་བདག་པོར་བསྟན་པ་དང་། །

89-1-236b

དེར་ནི་བདུད་ལས་རྣམ་རྒྱལ་ཞིང་། །གྲོང་ཁྱེར་མཆོག་ཏུ་ཞུགས་པ་ཡིས། །དེང་འདིར་སངས་རྒྱས་ཉིད་ཐོབ་པར། །ཁྱེད་རྣམས་ཐེ་ཚོམ་མེད་པ་ཡིན། །དེ་ནས་གསང་བའི་དཀྱིལ་འཁོར་དུ། །རིག་མ་རྣམ་པར་གཞུག་བྱ་ཞིང་། །བླ་
ན་མེད་པའི་བླ་མ་ལས། །བདུད་རྩི་དག་པའི་བློ་བླང་བྱ། །ཐབས་དང་ཤེས་རབ་སྦྱོར་བ་ཡིས། །བདེ་བའི་བྱང་ཆུབ་སེམས་ཀྱི་རྒྱུན། །རང་འབབ་ཡེ་ཤེས་བཅུད་ཀྱིས་ལེན། །འཆི་མེད་ཡེ་ཤེས་དབང་བསྐུར་བ། །ཇི་ལྟར་འདས་པའི་སངས་རྒྱས་
ཀྱིས། །བྱང་ཆུབ་སྲས་རྣམས་དབང་བསྐུར་ལྟར། །དེ་བཞིན་བྱང་ཆུབ་སེམས་བཟང་པོས། །བུ་ཁྱོད་དབང་ནི་བསྐུར་བར་བྱ། །དེ་ཉིད་ལོངས་སྤྱོད་རྩལ་སྦྱངས་ཏེ། །གསུང་གི་རྡོ་རྗེ་རབ་བསྒྲུབ་ཕྱིར། །རྟོག་མེད་བདེ་བའི་གནས་ལས་
སྐྱེས། །དྲི་མེད་གསང་བའི་དབང་བསྐུར་བའོ། །དེ་ནས་རིག་མའི་དབྱེ་བ་ནི། །ཉི་ཤུ་རྩ་ལྔའི་དབྱེ་བ་ཡིས། །གླང་པོ་ཅན་དང་རི་དགས་མ། །དུང་ཅན་མ་དང་སྣ་ཚོགས་ཅན། །པད་མ་ཅན་ནི་རིམ་ཤེས་པས། །ཕྱག་རྒྱའི་དབང་ནི་
ཐོབ་བྱེད་ཡིན། །ལས་ཀྱི་ཕྱག་རྒྱ་མ་ཤེས་རབ་མ་སྟེ། ལོ་བཅུ་གཉིས་མ་འམ། བརྒྱད་གཉིས་མ་འམ། བཅུ་གཉིས་གཉིས་མའི་རིམ་པ་སྟེ། དེ་ཡང་གནས་དང་ཉེ་བའི་གནས་ལ་སོགས་པར་སྐྱེས་པ་འམ། སྔོན་གྱི་སྨོན་
ལམ་རྣམ་པར་དག་པའི་སྟོབས་ལས་གྲུབ་ཅིང་ཡེ་ཤེས་ཀྱི་རྒྱུ་འཐུན་ལས་བྱུང་བ་འམ། དབུས་ཀྱི་ཡུལ་དུ་སྐྱེས་པ། དབང་པོ་ཚང་བ། ཡན་ལག་ཉིང་ལག་ཡོངས་སུ་རྫོགས་ཤིང་མཚན་དང་ལྡན་པ། དབང་བསྐུར་བ་ཐོབ་ཅིང་
སྔགས་དང་རྒྱུད་ཀྱི་སྦྱོར་བ་ཤེས་པ་ལས་ཨ་བ་དྷཱུ་ཏཱི་སྟོན་པ་འམ། སྟོན་པའི་ནུས་པ་དང་ལྡན་པའི་རྣལ་འབྱོར་མ་དེ་ལས་ཀུན་འདར་གྱི་སྣ་རྩེ་ལས་བསྐྱོད་པའི་བདེ་བ་ལས་དགའ་བ་དང་། མཆོག་དགའ་དང་དགའ་བྲལ་དང་། 
ལྷན་ཅིག་སྐྱེས་པའི་དགའ་བ་ལས་ཡེ་ཤེས་མངོན་སུམ་དུ་ཉམས་སུ་མྱོང་བ་སྐྱེད་ཅིང་། དེ་ལས་ཐོབ་པ་དེས་སྣང་གྲགས་བརྟན་གཡོ་མ་ལུས་པ་ལ་རྒྱས་བཏབ་པའི་ཡེ་ཤེས་རོ་གཅིག་པའི་ངང་དུ་རྟག་ཏུ་གནས་པར་བྱ། དེས་

89-1-237a

ནི་གསང་བའི་སྤྱོད་པ་ལ་གནས་ན་ཤིན་དུ་མྱུར་བ་ཉིད་དུ་རྡོ་རྗེ་སེམས་དཔའ་འགྲུབ་པར་བྱེད་དོ། །ཆོས་ཀྱི་ཕྱག་རྒྱ་ནི་འོད་ཀྱི་རིག་མ་ལས་བྱུང་བ་རང་སྣང་བའི་ལྷ་མོ་ལས་རྟོགས་པར་འགྱུར་རོ། །ཕྱག་རྒྱ་ཆེན་པོ་ནི་ལྷན་
ཅིག་སྐྱེས་པའི་ཡེ་ཤེས་བྱིན་བརླབས་བླ་མའི་བརྒྱུད་པ་ལས་ཐོབ་པར་བྱེད་དོ། །དམ་ཚིག་གི་ཕྱག་རྒྱ་ནི་ཐབས་དང་ཤེས་རབ་མི་ཕྱེད་པའི་ཡེ་ཤེས་ལས་འདའ་བ་མེད་པར་སྤྱོད་པ་སྟེ། གསང་བ་ཟབ་དང་རྒྱ་ཆེ་བའི། །ཡེ་ཤེས་
རབ་ཏུ་མི་གནས་པ། །ཞི་གནས་ལྷག་མཐོང་རོ་གཅིག་ཏུ། །བླ་མེད་གསང་ཆེན་དབང་བསྐུར་བའོ། །དེ་བཞིན་གཤེགས་པ་ཐམས་ཅད་ཀྱི། །སྲས་བཅས་འབྱུང་བའི་དཀྱིལ་འཁོར་དུ། །དཔལ་མཆོག་འདིར་ནི་གང་བསྟན་པ། །
རྡོ་རྗེ་འཛིན་པའི་སྤྱོད་ཡུལ་དུ། །རིགས་ཀྱི་དབྱེ་བ་བསྡུས་པའི་ལམ། །བསམ་མི་ཁྱབ་པའི་ཁྱད་པར་གང་། །བྱ་བ་སྤྱོད་པའི་ཚུལ་ཀུན་གྱི། །རྒྱུད་སྡེ་སྣ་ཚོགས་ལྷ་རྣམས་ཀྱི། །དབང་བསྐུར་རབ་ཏུ་ཐོབ་པས་ན། །གཉིས་སུ་
མེད་པའི་རྒྱལ་ཞེས་བརྗོད། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་དབང་
བསྐུར་བ་ཆེན་པོ་ཚད་མེད་པ་རྡོ་རྗེའི་ལེའུ་སྟེ་དྲུག་བཅུ་བརྒྱད་པའོ།། །། དེ་ནས་རྒྱལ་པོ་རྡོ་རྗེ་འཛིན། །གསང་བ་དག་པའི་ཚུལ་གནས་ཏེ། །ཕྲིན་ལས་སྣ་ཚོགས་སྦས་པ་ཡི། །དེ་ཉིད་རབ་ཏུ་བསྟན་པའོ། །འདི་
ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གསང་བའི་དབང་ཆེན་པོ་དེ་བཞིན་གཤེགས་པ་ཐམས་ཅད་ཀྱི་སྤྱོད་པའི་ཚུལ་ཡང་དག་པར་དབང་བསྐུར་བ་རྡོ་རྗེའི་ཏིང་ངེ་འཛིན་མི་ཕྱེད་པ་སྟེ། དཔལ་
གསང་བ་འདུས་པའི་དཀྱིལ་འཁོར་ཆེན་པོར་དབང་བསྐུར་བ་ལ་སྤྱོད་པ་དེ་དག་ནི་དེ་བཞིན་གཤེགས་པ་ཐམས་ཅད་ཀྱི་སྲས་ཐུ་བོར་གྱུར་པ་དང་། བྱང་ཆུབ་སེམས་དཔའ་སེམས་དཔའ་རྣམས་ཀྱིས་གྲོགས་

89-1-237b

ཚངས་པར་མཚུངས་པར་སྤྱོད་པར་བལྟ་སྟེ། ཁྲོ་བོའི་རྒྱལ་པོ་དུ་མས་ནི་ཡང་དག་པར་སྲུང་བར་བྱེད་དོ། །ལྷ་མོའི་ཚོགས་རྒྱ་མཚོས་ནི་ཀུན་ནས་དེ་ལ་ཡོངས་སུ་མཆོད་པར་བྱེད། ཚངས་པ་དང་། བརྒྱ་བྱིན་དང་། དབང་ཕྱུག་ཆེན་
པོ་དང་། ཁྱབ་འཇུག་དང་། གུ་ལང་ལ་སོགས་པ་དུ་མ་ལྷ་མ་སྲིན་སྡེ་བརྒྱད་དང་། རྒྱལ་པོ་ཆེན་པོ་བཞི་འཁོར་དང་བཅས་པ་དཔག་ཏུ་མེད་པ་དུ་མ་རྣམས་ཀྱིས་ཡོངས་སུ་བསྲུང་བ་དང་བསྐྱབ་པ་དང་མཆོད་པའི་རྟེན་དུ་བྱེད་ལ། 
དངོས་པོ་ཕུན་སུམ་ཚོགས་པ་སྒྲུབ་པར་བྱེད་དོ། །དེའི་ཕྱིར་དེའི་གནས་ཀྱི་སེམས་བསྐྱེད་པ་རྡོ་རྗེ་ལྟ་བུ་ཡིན་ཏེ། འདི་ཉིད་ནི་བྱང་ཆུབ་སེམས་དཔའ་ཀུན་དུ་བཟང་པོའི་དགེ་བའི་རྩ་བ་རྣམས་ཀྱིས་ཇི་ལྟ་བ་བཞིན་དུ་ཡང་དག་པར་
རྫོགས་པའི་བྱང་ཆུབ་ཀྱི་སྙིང་པོར་བླ་ན་མེད་པར་གནས་པ་ཀུན་དུ་བཟང་པོའི་སྤྱོད་པ་ཏིང་ངེ་འཛིན་གྱི་སྒོ་མཐའ་ཡས་པ་ལ་གནས་པ། དཀྱིལ་འཁོར་དུ་མའི་སྒོ་ནས་སེམས་ཅན་གྱི་བསམ་པ་རྫོགས་པར་བྱ་སྟེ། 
གདུལ་བྱའི་འགྲོ་བའི་ཚོགས་མ་ལུས་པ་རྣམས་ལ་སྤྱོད་པའི་རབ་ཏུ་དབྱེ་བའི་སྒོ་མང་པོ་ཚད་མེད་པ་བསྟན་པས་ཡང་དག་པར་མགུ་བར་བྱ་བ་དང་། ཡང་དག་པར་དགའ་བར་བྱ་བ་དང་། ཡང་དག་པར་དབུགས་
དབྱུང་བ་དང་། གཟེང་བསྟོད་པ་དང་། ལུང་བསྟན་པ་ཐོབ་པར་བྱེད་པས་འབྲས་བུའི་ལམ་ལས་མངོན་པར་དགའ་བས་རྒྱས་པར་བྱེད་པའོ། །རྣམ་པ་ཀུན་གྱི་མཆོག་ལྡན་པ། །རྡོ་རྗེ་སེམས་དཔའི་ངོ་བོར་བཞུགས། །
དཀྱིལ་འཁོར་ཀུན་གྱི་གཙོར་གྱུར་པས། །ཡང་དག་ཡེ་ཤེས་མཚན་ཉིད་ཅན། །གཉིས་མེད་མཉམ་པ་ཉིད་སྦྱོར་བས། །སྣ་ཚོགས་དུ་མ་ལས་འཕྲོ་བ། །འཇིག་རྟེན་ཁམས་ནི་མ་ལུས་པར། །དཔག་མེད་འོད་ཟེར་
ཚོགས་ལས་ནི། །དབང་བསྐུར་གྱུར་པའི་ལྷག་པའི་ལྷ། །འགྲོ་བ་ཀུན་གྱི་རང་བཞིན་གྱིས། །ལུས་ངག་ཡིད་ལ་གནས་ནས་ནི། །ཡེ་ཤེས་རྡོ་རྗེའི་རྒྱུན་ལས་ནི། །སྐུ་གསུང་ཐུགས་ཀྱི་རྡོ་རྗེ་ཡིས། །དབྱེར་མེད་

89-1-238a

ངོ་བོ་ཉིད་གཅིག་པ། །བདེ་བ་ཆེན་པོའི་ངང་བཞུགས་པས། །རྡོ་རྗེ་བཙུན་མོའི་བྷ་ག་ལས། །མཉམ་པར་སྦྱར་བའི་ཡན་ལག་གིས། །བདེ་དང་བདེ་ཆེན་ལྷན་ཅིག་སྐྱེས། །དཔལ་མཆོག་རང་བྱུང་ཕྱག་རྒྱ་ཆེ། །འདི་
ལས་བཅོམ་ལྡན་འདས་བདག་བྱེད། །སངས་རྒྱས་རོལ་པ་བསམ་མི་ཁྱབ། །ཡང་དག་དབང་ནི་སྐུར་བྱེད་པ། །དེ་ཉིད་བླ་མ་ཡིན་པར་བརྗོད། །འདིར་དབང་སྐུར་བའི་རྣལ་འབྱོར་པ། །སློབ་དཔོན་དེ་ལས་གཅེས་པ་ཡི། །སྲོག་
ནི་གཞན་དུ་ཡོད་མ་ཡིན། །རྡོ་རྗེ་བྱང་ཆུབ་སེམས་ཉིད་དང་། །ཐ་དད་མེད་ཕྱིར་བླ་མ་ནི། །རྒྱུན་དུ་མཆོད་ཅིང་བསྟེན་བྱར་གསུངས། །དངོས་པོ་ཐམས་ཅད་ཡོངས་སུ་ནི། །བླ་མ་ལ་ནི་ངེས་པར་དབུལ། །འདིས་ནི་དངོས་གྲུབ་མ་
ལུས་པའི། །འབྱུང་གནས་དེ་བཞིན་གཤེགས་པར་བསྟན། །དཔལ་ལྡན་དབུས་ཀྱི་གནས་གྱུར་པ། །འཁོར་ལོ་མཆོག་གི་འཁོར་ལོ་ཉིད། །བླ་མ་མཆོག་ལ་དུས་རྟག་ཏུ། །སྤྱི་བོས་བཏུད་དེ་ཕྱག་བྱར་འོས། །འདི་ནི་སྤྱོད་པ་
བསྟན་པ་ལ། །ཟབ་པ་ཡི་ནི་སྤྱོད་པ་དང་། །དེ་བཞིན་རྒྱ་ཆེ་བ་ཡི་ཚུལ། །གཉིས་མེད་བདེ་བ་ཆེན་པོ་ཡིས། །བརྟུལ་ཞུགས་ཚུལ་འདི་བསྟན་པའོ། །ལྷ་མོ་ཉི་ཤུའི་བདག་ཉིད་ཀྱིས། །འདོད་པའི་ཡོན་ཏན་ཀུན་རོལ་པ། །འདིར་ནི་
རྒྱ་ཆེར་གྱུར་པ་སྟེ། །སྟོང་ཆེན་རབ་ཏུ་འཇོམས་མ་དང་། །སོ་སོར་འབྲང་དང་རྨ་བྱ་ཆེ། །ཚལ་འཛིན་མ་དང་རྗེས་འཛིན་མ། །ཙུན་ད་དང་ནི་རལ་གཅིག་མ། །ནོར་རྒྱུན་མ་དང་རིན་ཆེན་སྒྲོན། །འོད་ཟེར་ཅན་དང་དུག་སེལ་མ། །
རི་ཁྲོད་ལོ་མ་ཅན་དང་ནི། །གཙུག་ཏོར་རྣམ་པར་རྒྱལ་མ་དང་། །མཐའ་ཡས་སྒོ་དང་རྡོ་རྗེ་ལྕགས་སྒྲོག་མ། །ཤེས་རབ་འཕེལ་བྱེད་ལས་སྒྲིབ་སེལ། །ཡེ་ཤེས་མི་ཟད་ཟ་མ་ཏོག །སངས་རྒྱས་ཆོས་ཀྱི་མཛོད་དང་ནི། །
ཀུ་རུ་ཀུལླེ་གདུགས་དཀར་མོ། །འདི་དག་གཟུངས་ཀྱི་ལྷ་མོར་བརྗོད། །ཟབ་པའི་སྤྱོད་ཚུལ་བླ་ན་མེད། །ལྷ་མོ་དགུ་དང་ལྷན་ཅིག་ཏུ། །གསང་བའི་ཡེ་ཤེས་རོལ་པ་ནི། །མགོན་པོ་ཀུན་དུ་སྤྱོད་པའོ། །གཉིས་མེད་ཡེ་ཤེས་

89-1-238b

བདེ་བ་ཆེ། །ལྷ་མོ་ལྔ་དང་བཅས་པ་ཡི། །ཚོགས་ཀྱི་དཀྱིལ་འཁོར་འདུས་པ་ནི། །མཉམ་བཞག་ཆེན་པོའི་སྤྱོད་པ་ཡིན། །འདི་དག་སྤྲོས་བཅས་སྤྱོད་པ་དང་། །སྤྲོས་མེད་ཡེ་ཤེས་ཚུལ་གྱུར་པ། །ཤིན་དུ་སྤྲོས་པ་མེད་པས་ནི། །
འདོད་དང་བསམ་པ་འཇུག་པ་དང་། །དུས་ཀྱི་ཁྱད་པར་རྣམ་དབྱེ་བས། །བྷུ་སུ་ཀུ་དང་ཀུན་དུ་བཟང་། །རིག་པའི་བརྟུལ་ཞུགས་སྤྱོད་པ་ཡིས། །ཉོན་མོངས་ཉེ་བའི་ཉོན་མོངས་དག །ཚར་བཅད་པ་དང་རྗེས་འཛིན་གྱི། །ཕྱོགས་
ལས་རྣམ་པར་རྒྱལ་བ་ཡི། །བརྟན་གཡོ་དབང་དུ་སྡུད་པའི་ཕྱིར། །བག་མེད་འཚེ་བ་རྣམ་སྤངས་པས། །ཐམས་ཅད་སྒྱུ་མའི་ཚུལ་སྦྱོར་བ། །སྟོང་ཉིད་ཡེ་ཤེས་ཤེས་རབ་མས། །ཁྱོགས་དང་བརླབས་དང་ཁྱུང་ལྡིང་དང་། །བཀལ་
བ་དང་ནི་བསྐྱོད་པ་ཡིས། །ཚངས་པར་སྤྱོད་དང་བདེ་བར་རོལ། །དེ་ནས་གསང་བའི་ཚུལ་གནས་མ། །རྫོགས་པར་རླུང་གི་རྣལ་འབྱོར་བསླབ། །རྣལ་འབྱོར་རྟག་ཏུ་མཉམ་བཞག་ལས། །འཇུག་པའི་རླུང་ནི་བགྲང་བྱ་ཞིང་། །ཇི་སྲིད་
འབུམ་གྱི་བར་དུ་ནི། །སྒྲ་དང་བྲལ་བར་རྟག་ཏུ་བཟླས། །སྒྲུབ་པོས་སྒྲ་དང་བྲལ་བར་ནི། །འབུམ་བཟླས་ཡོངས་སུ་རྫོགས་པ་ན། །འཆི་བདག་འཇོམས་པར་འགྱུར་བ་སྟེ། །ཡེ་ཤེས་ལྔ་ཡི་བར་དག་ཏུ། །འཆི་བ་བསླུས་
པར་ཐེ་ཚོམ་མེད། །རྟག་ཏུ་ནང་པར་ཐོ་རངས་དུས། །སྟོང་ཕྲག་གཅིག་ཏུ་ཆགས་མེད་པར། །དེ་ཉིད་རྡོ་རྗེ་བཟླས་བྱས་པས། །བར་དུ་གཅོད་ལས་བཟློགས་པས་ན། །དེ་ཕྱིར་རླུང་གི་རྣལ་འབྱོར་ལ། །ཀུན་དུ་མཉམ་བཞག་
གནས་པར་བྱ། །དེ་ཉིད་བུམ་པ་ཅན་བཅིངས་པས། །བདུད་ལས་རྣམ་པར་རྒྱལ་བ་འཐོབ། །དེ་ཉིད་རིག་པས་ལུས་ཀུན་ལས། །ལུས་ཀྱི་ཁོང་སྟོང་རྩ་སྦུབས་དག །རླུང་གིས་ངེས་པར་དག་བྱས་པས། །དེ་ཉིད་རྔུབ་པ་
དང་བཅས་པས། །ཁྱད་པར་འཇོམས་པ་རླུང་གི་ལས། །དབུ་མ་ཉིད་དུ་གནས་པ་ནི། །འབྱུང་བ་ཟག་པ་མེད་པ་དང་། །ཤིན་དུ་བདེ་བ་སྐྱེད་བྱེད་ཡིན། །རླུང་གིས་སེམས་ནི་སྐྱོན་མེད་པར། །རབ་ཞི་འབྱུང་བ་ལྡོག་པ་དག །

89-1-239a

གཅིག་ཏུ་གནས་པར་བྱེད་པའི་ལས། །འདི་ནི་རྣལ་འབྱོར་ལམ་དུ་གསུངས། །སྒོ་ལྔའི་རླུང་ནི་བསྡུ་བ་ཡང་། །དབང་པོ་ནང་དུ་ཟློག་པ་ལས། །ཕྱི་རོལ་ཉེ་བར་དམིགས་མི་འགྱུར། །འདི་ནི་ཡིད་ཀྱི་རླུང་ཟིན་པའོ། །
གཡོ་བཅས་རྣམས་ལ་རེངས་བྱེད་པ། །སྲོག་ནི་བརྟན་པའི་ཚུལ་གྱིས་སུ། །འགྱུར་བ་མེད་པར་གྱུར་པ་གང་། །སྣང་བའི་རླུང་ནི་བརྟན་པའོ། །བརྟན་པའི་ཡལ་ག་རླུང་གི་ལམ། །རབ་ཏུ་གཏོད་པའི་སྦྱོར་བ་ཡིས། །སྲོག་རྩོལ་
འབོག་པར་གྱུར་པ་ན། །གཡོ་མེད་བརྟན་པ་ནུས་པ་ཐོབ། །ཚད་དང་གྲངས་ལས་འདས་པ་ཡི། །མཉམ་མེད་ཀུན་འདར་མར་གནས་པས། །རྟོག་པ་མ་ལུས་ནུབ་པའི་ཚེ། །ཉོན་མོངས་བདུད་ལས་རྒྱལ་བ་ཉིད། །རྟོག་པ་ཀུན་ལས་མི་གཡོ་
བ། །དེ་ཉིད་ཡེ་ཤེས་རྒྱལ་བ་ཆེ། །དཀྱིལ་དཀྲུང་གཅིག་ལ་གནས་བྱས་ཏེ། །བྱང་ཆུབ་ཤིང་ལ་རྒྱབ་རྟེན་ནས། །མཉམ་བཞག་ཉེ་བར་བཅིངས་པ་ལ། །བསྡམས་གྲོལ་ཁྱད་མེད་གྱུར་པ་དང་། །ཁ་ཟས་གོས་ཀྱི་རྩོལ་མེད་པ། །ཕུང་
པོའི་བདུད་ལས་རྒྱལ་བ་ཡིན། །རླུང་ནི་རྒྱུ་བ་མི་ཚོར་དང་། །དབུ་མར་འབྱུང་བ་བརྟན་པ་ཡིས། །དངོས་རྣམས་སྒྱུ་མར་མཐོང་བ་ཡིས། །ལྷ་ཡི་བུ་ཡི་བདུད་ལས་རྒྱལ། །རང་རིག་ཡེ་ཤེས་ཀྱིས་དག་པ། །ཉོན་མོངས་དུག་གསུམ་
རླུང་དག་ལ། །ཚར་བཅད་པས་ནི་འཇིག་རྟེན་ལྷའི། །གཟུགས་དག་འགས་པར་བྱེད་པ་ཡིན། །རྗེས་གཟུང་བས་ནི་སླར་སྡུད་པ། །གཅིག་ཏུ་བྱེད་པ་འདི་ལས་འགྲུབ། །ནང་དུ་ཟླ་བའི་རླུང་བཟུང་ནས། །འཁྲུལ་འཁོར་དྲག་སྤྱོད་
གཏུམ་པ་ཅན། །ཨཱ་ལི་ལས་བྱུང་དག་པ་ལས། །ཟླ་བས་འཕོ་བར་མི་ནུས་སོ། །གསང་བ་བཟློག་པའི་ཏིང་འཛིན་ལས། །ཆུ་ཚོད་ལྔ་ཡི་བར་དག་ཏུ། །ཉི་མའི་རླུང་ལ་ཀཱ་ལི་ཡིས། །བཅིངས་པས་ཉི་མ་འཕོ་མི་འགྱུར། །གཟུང་
དང་འཛིན་པ་རྣམ་བྲལ་བར། །རགས་པ་སྒྲ་ཞེས་བཤད་པ་ཉིད། །ཕྲ་བ་སེམས་ཀྱི་རྣམ་པ་ལས། །རྣམ་རྟོག་རི་བོ་བཅོམ་པའི་ཕྱིར། །ཕྱི་རོལ་རི་བོ་འཇོམས་པ་དང་། །ཐལ་བར་ཡང་ནི་བྱེད་ནུས་པ། །བསམ་པ་ཕུན་སུམ་ཚོགས་

89-1-239b

པས་སོ། །དུག་གསུམ་ལས་ནི་རང་བཞིན་རྣམས། །ལོག་རྟོག་དྲི་མ་མ་ལུས་པ། །གཞོམ་བྱེད་མི་གཡོར་གནས་བྱས་ནས། །དཔུང་ཆེན་དེངས་པར་ཐེ་ཚོམ་མེད། །འཁོར་བའི་ཆོས་ཉིད་སྤངས་པ་ན། །དུག་ཉིད་བདུད་རྩིར་སྒྱུར་བ་དང་། །
རང་བྱུང་བདུད་རྩི་སྦྱངས་གྱུར་པས། །བཀྲེས་སྐོམ་མེད་པར་འགྱུར་བ་ཡིན། །བསམ་པ་རྣམ་པར་དག་གྱུར་ལ། །དུག་སྦྲུལ་འཚེ་བར་མི་འགྱུར་སྟེ། །དེ་ལས་གཞན་དུ་བཟློག་པ་ཡིས། །དུག་སྦྲུལ་གཞན་ལ་སྤོང་བར་བྱེད། །ཤིན་དུ་
ཁྲོས་པར་གྱུར་ནས་ཀྱང་། །ཀླུ་རྣམས་ལ་ནི་བཀའ་བསྒོ་བས། །ལོག་པར་ལྟ་བའི་རྒོལ་བ་ཀུན། །དུག་སྦྲུལ་ཆེན་པོས་ཟ་བར་འགྱུར། །གལ་ཏེ་དད་གྱུར་དེ་དག་ལ། །ཏིང་འཛིན་སྤོ་བའི་སྦྱོར་བ་ཡིས། །དུག་རྣམས་སྐད་ཅིག་གཅིག་གིས་སེལ། །
ཡེ་ཤེས་རླུང་ལས་གྱུར་པ་ཡི། །འཕོ་མེད་མི་ཆོད་རྡོ་རྗེ་ལས། །སེམས་ཅན་གདུག་པའི་སྲོག་ཆགས་ཆེ། །སྟག་སོགས་ཁ་ནི་འཆིང་བར་བྱེད། །གང་དུ་ཐབས་དང་ཤེས་རབ་ལས། །མཉམ་སྦྱོར་ཁུ་བའི་རྣམ་པ་ནི། །བཙུན་མོའི་བྷ་ག་དེ་ལས་ནི། །
བསྐྱིལ་དང་བཟློག་པའི་སྦྱོར་བ་ཡིས། །གང་གཱ་ལ་སོགས་ཆུ་བོ་རྣམས། །གང་ཞིག་བཟློག་སྟེ་འབབ་པར་གྱུར། །རྩ་གསུམ་ལས་ནི་བྱུང་བ་དང་། །རྩ་ཕྲན་གཞན་ལས་འབབ་པ་དག །གལ་ཏེ་བཟློག་པར་གྱུར་པ་དག །ཤིན་དུ་ཆུ་བོ་སྐེམས་
པར་བྱེད། །སྲིད་རྩེ་ལ་སོགས་འཇིག་རྟེན་པའི། །བསམ་གཏན་ཏིང་འཛིན་གནས་བྱས་ལ། །དེ་ཉིད་སྟོང་པར་བཅུག་ན་ནི། །ལྷ་ཆེན་དག་ཀྱང་འཇིག་འགྱུར་ལ། །གཞན་དུ་ཨརྫ་ཀ་བཞིན་བྱེད། །དེ་ཉིད་དུ་ནི་གསང་ཆེན་གྱི། །ཕྲིན་ལས་
ཕྲན་ཚེགས་བསྟན་པ་སྟེ། །རྒྱུད་ཀུན་དུ་ནི་མ་བསྟན་ཅིང་། །སྦས་པ་ལྐོག་ཏུ་གྱུར་པ་ཡིན། །གཟུང་འཛིན་རྩ་ལས་རླུང་འཇུག་པས། །འཁོར་བའི་སྲིད་པ་སྐྱེད་པར་མཛད། །ཡང་དག་ཀུན་འདར་ཉིད་གནས་ན། །རྣམ་གྲོལ་ཞི་བ་
མཆོག་ཐོབ་འགྱུར། །ལྟེ་བའི་གནས་སུ་སྲིད་ཞི་དག །སྣ་ཚོགས་འདུས་པར་འབྱུང་གནས་ཏེ། །རྩ་བཅིངས་ལྷ་ཡི་བུ་ཡི་བདུད། །འབྱུང་པོ་བྱེ་བ་ལ་སོགས་པ། །ཕྱི་རོལ་དུ་ནི་འདུལ་བར་མཛད། །སྐྱོན་དག་ཡོན་ཏན་གྱུར་

89-1-240a

པས་ན། །མཚོན་ཆའི་ཆར་ལ་སོགས་པ་ཡང་། །རིན་ཆེན་མེ་ཏོག་དག་ཏུ་འབབ། །སྡུག་བསྔལ་བདེ་བར་ཤར་བའོ། །སྙིང་གར་ཡང་དག་ཡོངས་གསོལ་བར། །མཚན་མའི་རྟོག་པ་ནུས་གྱུར་པས། །ཡིད་བཅིངས་པས་ནི་
ཕྱི་རོལ་དུ། །ཉོན་མོངས་དྲི་མས་མི་གོས་པ། །སྤངས་པ་རྣམ་དག་ལམ་གནས་པས། །ཉོན་མོངས་བདུད་ནི་བཅོམ་པའི་ཕྱིར། །མཉམ་པ་ཉིད་དུ་བཞུགས་པ་ལས། །རྣམ་པར་བསྐྱོད་པ་མི་མངའ་བའོ། །མགྲིན་པར་ལོངས་
སྤྱོད་ཡོངས་གྲུབ་པས། །རླུང་བཅིངས་པས་ནི་རོ་དྲུག་ལ། །ལོངས་སྤྱོད་བཀྲེས་རྒུད་མི་མངའ་བ། །གནོད་པ་སྣ་ཚོགས་ཟིལ་གནོན་ཅིང་། །ཡན་ལག་དྲུག་བཅུའི་དབྱངས་འབྱུང་ཞིང་། །ཕུང་པོའི་བདུད་ལས་རྒྱལ་བས་ནི། །མདངས་
དང་འོད་ཟེར་ལྷག་པར་འབྱིན། །རླུང་འབོག་ཟག་མེད་གནས་ཐོབ་པའོ། །སྤྱི་བོ་གཙུག་ཏོར་འབྱུང་གནས་དེར། །ཐིག་ལེ་འགྱུར་བ་མེད་བརྟན་པས། །འཆི་བདག་བདུད་ལས་རྒྱལ་བ་སྟེ། །དགེ་བ་ཡེ་ཤེས་དྲི་མེད་ལམ། །མཐར་ཕྱིན་རྣམ་
པར་རོལ་པ་ཡི། །གསང་བ་བསམ་གྱིས་མི་ཁྱབ་པ། །བཅིངས་པ་མེད་ཅིང་གྲོལ་མེད་ལ། །འགྱུར་བ་མེད་པར་བཞུགས་པའོ། །ཉི་ཁྲི་དང་ནི་ཆིག་སྟོང་དང་། །དྲུག་བརྒྱ་བཅས་པས་རླུང་དག་ན། །ཐམས་ཅད་དབུ་མར་ཐིམ་པ་
ནི། །མི་གནས་མྱ་ངན་འདས་པ་ཐོབ། །སྟེང་དང་འོག་ཏུ་རྒྱུ་བའི་རླུང་། །ཁ་སྦྱོར་དུ་ནི་གྱུར་པ་ལས། །སྦྱོར་བ་དེ་ལ་གོམས་བྱེད་ན། །དེས་ནི་འོད་གསལ་གོ་འཕང་གནས། །གང་གི་རྣལ་འབྱོར་སྤངས་པ་དང་། །རླུང་གི་རྣལ་འབྱོར་སྤོང་བྱེད་པ། །
དེས་ནི་བདེ་བ་མི་འཐོབ་ཅིང་། །སྐྱེས་བུ་ཐ་ཤལ་དེ་དག་བརླག །དུས་ཀུན་དུ་ནི་གཡོ་བ་ཡི། །རླུང་ལ་རྣམ་པར་གོམས་པས་ནི། །ལུས་སེམས་གནས་རྣམས་བྱིན་བརླབས་ཕྱིར། །ཀུན་དུ་སོན་པར་གྱུར་པའོ། །དེ་ལས་བདེ་དང་སྡུག་
བསྔལ་དང་། །མཐོ་རིས་ངན་སོང་གར་འཇུག་པ། །ལུས་ཀྱི་སྒོ་ནས་འཕོ་བ་ཉིད། །རང་དབང་དུ་ནི་འབྱུང་བར་བསྟན། །སྙིང་གའི་རྩ་ཡི་ཡན་ལག་ནི། །བརྒྱད་པོ་བཀྲ་ཤིས་ཡན་ལག་གྱུར། །དེ་ཉིད་ལྷ་མོ་ལུས་གནས་པས། །

89-1-240b

དཔལ་བེའུ་ལ་སོགས་མཛེས་པར་བྱེད། །མགྲིན་པའི་གནས་སུ་སྐྱེས་པ་ཡི། །རྩ་ཡི་ཡན་ལག་འབྱུང་བ་ལས། །རྡོ་རྗེ་རིན་ཆེན་པད་མ་དང་། །ལས་ཀྱི་རིགས་ལས་བྱུང་བ་ཡི། །སེམས་དཔའ་བཞི་བཞིར་ཡང་དག་འབྱུང་། །དེ་ཉིད་
རྣལ་འབྱོར་རྒྱུད་དུ་བསྟན། །ལྟེ་བར་མངོན་པར་འབྱུང་བ་ཡི། །རྩ་ཡི་ལྗོན་ཤིང་འདབ་རྒྱས་པ། །རྡོ་རྗེ་རིགས་ཀྱི་ཕོ་ཉ་མོ། །དྲུག་བཅུ་རྩ་བཞིར་འབྱུང་བའོ། །སྤྱི་བོའི་གནས་སུ་སྐྱེས་པ་ཡི། །ཚུལ་ནི་ཡང་དག་སུམ་བཅུ་གཉིས། །མཁའ་
འགྲོ་སུམ་བཅུ་རྩ་གཉིས་དག །ཡུལ་དང་ཡུལ་དུ་འབྱུང་བ་ཡིན། །ནང་དུ་དབུ་མའི་ཁོང་སྟོང་དུ། །དུ་བ་ལྟ་བུའི་སྣང་བ་འཆར། །དེ་ལས་རྣམ་པར་མངོན་གྱུར་པས། །གནོད་པ་སྲ་བའི་སྐྱོན་བྲལ་ཏེ། །བརྩིག་པ་དག་ལ་
མི་རྡུག་སྟེ། །བར་སྣང་བཞིན་དུ་ཐོགས་པ་མེད། །ནང་དུ་དབུ་མར་རང་བྱུང་བའི། །སྨིག་རྒྱུ་ལྟ་བུ་འཆར་བ་ནི། །བརྟན་པས་ལུས་ལ་དབང་ཐོབ་བྱེད། །ཆུ་ལ་ས་བཞིན་བྱ་བ་ལ། །ངེས་པ་ཉིད་དུ་མངོན་པར་འབྱུང་། །ཀུན་འདར་
མ་ཡི་སྟོང་པ་དེར། །འབྱུང་བ་མེ་ཡི་རང་བཞིན་ལས། །སྲིན་བུ་མེ་ཁྱེར་མཐོང་གྱུར་པ། །འབར་བ་དེ་ཉིད་བརྟན་པ་ལས། །བསྲེགས་ཀྱང་མི་འཚིག་གྲོགས་སུ་འཆར། །བརྒྱལ་བར་གྱུར་པའི་བདེ་བར་འགྱུར། །དབུ་མའི་ཁང་
པའི་མཐོངས་སུ་ནི། །མར་མེ་འབར་བ་གང་གིས་མཐོང་། །ཕྱི་ནང་རྟེན་འབྲེལ་འཛོམ་པ་ན། །སྣ་ཚོགས་རླུང་གི་སྟོབས་ཆེན་གྱིས། །བསྐྱོད་པར་མི་ནུས་ཕྲིན་ལས་ཏེ། །གལ་ཏེ་མྱུར་བར་ཡེ་ཤེས་འགྲོ། །གལ་ཏེ་ཨ་བ་
དྷཱུ་ཏཱིའི་ནང་། །གཞལ་ཡས་ཡེ་ཤེས་དག་པ་དེར། །ཐམས་ཅད་ནམ་མཁའ་ལྟ་བུ་ཡི། །སྟོང་པ་ཉིད་དུ་འཆར་བ་ལ། །ཡེ་ཤེས་སྤྲིན་མེད་ནམ་མཁའ་ལྟར། །ཆགས་མེད་མཁའ་ལ་ལྡིང་བར་འགྱུར། །བུ་ག་དགུ་ནས་རྒྱུ་བའི་རླུང་། །རྣལ་
འབྱོར་པས་ནི་མཉམ་ཟིན་པས། །བྱུང་བ་སྤངས་པས་གནས་པ་ཉིད། །དེ་ཚེ་དྲི་ཆེན་དྲི་ཆུ་དང་། །ངར་སྣབས་མི་འབྱུང་སྟོབས་སུ་འགྱུར། །སྐུ་ཡི་རྡོ་རྗེའི་རྟགས་ཡིན་ནོ། །གང་དུ་ལུས་ཀྱི་འབྱུང་བ་བཞི། །མེ་རླུང་

89-1-241a

མགྲིན་པར་བརྟན་གྱུར་པས། །དེ་ཉིད་དུ་ནི་སྤྲུལ་པ་དང་། །སྟོད་ལས་མེ་འབར་འོད་ཟེར་སྟོད། །དགུག་པའི་ལས་ཀྱིས་འགྲུབ་པ་ཡིན། །ཆུ་རླུང་སྙིང་གར་བརྟན་པ་ལས། །འབྱུང་བ་ཆུ་རུ་འབབ་བྱེད་ཅིང་། །ཀུན་དུ་སྡུད་པར་བྱེད་
པ་དང་། །ཞི་བ་སྨད་ནས་ཆུ་འབྲུབ་འཆར། །རླུང་གི་རླུང་ནི་ལྟེ་བ་རུ། །མཉམ་པར་ཟིན་ན་ཕྱི་རོལ་དུ། །དུ་མར་སྤྲུལ་པར་ནུས་པ་དང་། །རྡོ་རྗེ་རྐང་མགྱོགས་ཉིད་ཐོབ་བྱེད། །ས་ཡི་རླུང་ནི་གསང་གནས་སུ། །ཟིན་པ་དེ་ལ་རི་བོ་ལྟར། །
མི་གཡོ་དཀྱིལ་དཀྲུང་མི་ཕྱེད་ཅིང་། །གླང་པོ་ལྟ་བུའི་ནུས་པར་འགྱུར། །དེ་ཉིད་སྲོག་དང་རྩོལ་བ་རུ། །རབ་ཏུ་ཐིམ་ཕྱེད་རྡོ་རྗེ་ཡིན། །སྙིང་གི་རྩ་མདུད་གྲོལ་བ་ལས། །པད་མའི་འདབ་ལྟར་རྒྱས་པར་བྱེད། །སྨིན་མཚམས་
གནད་ཀྱི་སྒོ་ཕྱེ་ནས། །མཛོད་སྤུ་ཀུན་དུ་འབྱུང་བར་བྱེད། །འདིས་ནི་འགྲོ་བའི་ལུས་ཀུན་ལ། །འཇུག་པ་རྫུ་འཕྲུལ་ཆེར་སྟོན་ཏོ། །འཕེལ་བར་བྱེད་པའི་རླུང་གིས་ནི། །ཡོན་ཏན་རྒྱས་པའི་གཏེར་ཐོབ་པས། །བུམ་པ་བཟང་པོ་
གྲུབ་པའོ། །ཡོན་ཏན་དྲི་མ་མེད་པའི་རླུང་། །སྣ་ཚོགས་ལྷ་མོ་རོལ་པ་ཅན། །བཅུ་དྲུག་ཕྲག་ནི་བཞི་དག་ཏུ། །བརྒྱ་ཕྲག་གཉིས་དང་ཉི་ཤུ་ལྔ། །དེ་ལས་ཀུན་དུ་སྤྱོད་པ་ཡིས། །གནོད་སྦྱིན་མོ་ལ་སོགས་པ་འགྲུབ། །འདིར་ནི་བདུད་
རྩི་བཅུད་ལེན་དུ། །ཉམས་པ་མེད་པས་དབང་ཐོབ་པས། །མི་སྣང་བར་ནི་བྱེད་པ་ཡི། །རྡོ་རྗེ་བཅུད་ལེན་མཆོག་ཡིན་ནོ། །རྟོག་པའི་ཚོགས་ནི་བདེ་དོན་དུ། །མི་རྟོག་ཡེ་ཤེས་རྒྱལ་པོ་རུ། །བསྒྱུར་བ་རླུང་གིས་བྱེད་པ་ཅན། །གསེར་
འགྱུར་རྩི་ཡི་མཆོག་ཏུ་འགྱུར། །གང་དུ་དངོས་པོ་ཡོངས་བསྒྱུར་ནས། །བདེ་བ་ཆེན་པོར་སྤྱོད་པ་ཅན། །མི་རོ་ལུས་ལས་དངོས་གྲུབ་བརྟེན། །ཡེ་ཤེས་རོ་ལངས་དངོས་གྲུབ་ཡིན། །ཆོས་ཀུན་སྒྲིབ་མེད་རང་གསལ་དུ། །རྒྱུ་འབྲས་
མཚན་ཉིད་དོན་སྤྱོད་པས། །ས་འོག་གཏེར་མཐོང་ས་ལེ་བ། །དངས་པའི་ཏིང་འཛིན་ངང་ལས་བྱུང་། །ཏིང་འཛིན་ཡེ་ཤེས་ལོག་རྟོག་ལ། །རྣམ་གཅོད་རལ་གྲིའི་དངོས་གྲུབ་སྟེ། །གར་འདོད་དབང་ཕྱུག་གྲུབ་པའི་རྒྱལ། །འདིར་

89-1-241b

ནི་རླུང་སེམས་སྦྱངས་པས་འགྲུབ། །དཔག་ཚད་བྱེ་བའི་ཕ་རོལ་དུ། སྐད་ཅིག་གིས་ཕྱིན་ཉི་ཟེར་ཞོན། །དངོས་པོ་དུ་མའི་སྣང་བ་ལ། །སྒྱུ་མས་སྤྲུལ་པ་ཆེར་སྟོན་པས། །མཆིལ་ལྷམ་དངོས་གྲུབ་ཕྲ་མོ་ཡིན། །རགས་པ་མཆོག་ནི་
མཁའ་ལ་སྤྱོད། །གང་དུ་རིག་པ་འཛིན་པའི་གནས། །མཁའ་ལ་བརྟེན་པའི་ཕོ་བྲང་ལས། །དག་པའི་ཚུལ་གྱུར་ལུས་ཀྱིས་ནི། །ལོངས་སྤྱོད་རྫོགས་པའི་གཞལ་མེད་ལ། །ཁྱད་པར་མཁའ་སྤྱོད་ཞེས་བརྗོད་དོ། །ས་འོག་ལྷ་མིན་
ཕུག་སྟོང་ལས། །གང་དུ་བརྒྱུད་པ་རྙེད་ནས་ནི། །རི་རབ་ལ་ནི་མངོན་འཛེགས་ནས། །གནས་པ་ཐུན་མོང་མཁའ་སྤྱོད་དེ། །གཞན་དུ་རྣལ་འབྱོར་དབང་ཕྱུག་གི། །དཀྱིལ་དཀྲུང་རྡོ་རྗེར་སངས་རྒྱས་པ། །སྙིང་པོ་མི་འགྱུར་འབྱུང་
གནས་ཡིན། །གནས་གཞན་ལོངས་སྤྱོད་འཕགས་པའི་ཡུལ། །རི་རབ་ཞེས་བྱ་མི་ཡི་ལུས། །འབྱུང་བ་བཞིས་ནི་བསྡུས་པ་དག །རིན་ཆེན་སྣ་བཞིའི་རང་བཞིན་ཅན། །སུམ་བཅུ་རྩ་གཉིས་དཀྱིལ་འཁོར་བའི། །ལྷ་ཚོགས་
དག་ཏུ་གྱུར་པ་སྟེ། །དེ་ཡི་རྡུལ་ཕྲན་ལུས་ལས་བྱུང་། །དེ་ཉིད་རྟེན་དང་བརྟེན་པར་བཅས། །དེ་སྙེད་བཅས་པར་ཡང་དག་འབྱུང་། །དུར་ཁྲོད་བརྒྱད་དང་བཅས་པར་ནི། །འཁོར་ཡུག་འཇིག་རྟེན་སྤྲུལ་པ་དག །ངེས་པར་འབྱུང་
བ་བསྟན་པ་ཡིན། །དབུགས་རྒྱུ་ཞེས་བྱའི་རིག་པ་ནི། །དུར་ཁྲོད་དུ་ནི་མགོན་པོ་རོལ། །ཕྱི་ནང་སྤྱོད་པའི་དབྱེ་བ་ཡིས། །ལུས་ཀྱི་གནས་སུ་ཀུན་དུ་རོལ། །མར་མེའི་རྩེ་དང་རབ་འབར་བཅས། །ཆུ་བོའི་རྒྱུན་ནི་འབབ་པའོ། །
རྩ་ནི་རྒྱས་པ་ཞིང་སྐྱོང་ལ། །རླུང་བཅུ་ཕྱོགས་བཅུར་གནས་པ་ལས། །ཕྱོགས་མཚམས་དབྱེ་བས་ཕྱེ་བ་ཡིན། །ཤིང་ནི་རྡོ་རྗེ་ཅན་གྱི་རྩ། །དྲུང་ནི་སྤྲོས་པ་མེད་པ་སྟེ། །བྱང་ཆུབ་འོད་གསལ་ཞེས་བྱ་བ། །རྩ་ནི་དབུ་
མ་ཉིད་ལས་སྟེན། །རྟེན་དང་བརྟེན་པར་བཅས་པ་དང་། །སྲིད་ཞི་མཉམ་པར་སྤྱོད་པའོ། །འགྲོ་བ་ཀུན་ལ་ཁྱབ་པ་ཡི། །བླ་མེད་བྱང་ཆུབ་སེམས་ཀྱི་མཐུས། །ཞེ་སྡང་གི་ནི་གཉེན་པོ་ཆེས། །ཁྱབ་འཇུག་འདུལ་བར་

89-1-242a

མཛད་པའོ། །བདག་ཉིད་ཕུང་པོ་ཁམས་དང་ནི། །སྐྱེ་མཆེད་ལྷ་རུ་གསལ་བ་ལས། །འདོད་ཆགས་རྟོག་པ་དང་བྲལ་བའི། །དབང་ཕྱུག་ཆེན་པོ་འདུལ་བའོ། །ཐ་མལ་རྟོག་པ་དག་ནས་ནི། །ཞེན་མེད་སྐུ་རུ་གནས་
པ་ཡིས། །ཚངས་པའི་རྒྱལ་པོ་འདུལ་བྱེད་པ། །གཏི་མུག་དག་པའི་ངོ་བོ་ཉིད། །རྡོ་རྗེ་ར་བ་ལ་སོགས་པས། །བརྒྱ་བྱིན་ལ་སོགས་ཕྱོགས་སྐྱོང་བཅུ། །ངེས་པར་འདུལ་མཛད་བསྲུང་བ་ཆེ། །བཀའ་ཡི་འཁོར་ལོ་བསྟན་པ་ཡིན། །
ཚད་མེད་བཞི་ནི་གོམས་པ་ཡི། །ཡེ་ཤེས་མཐུ་ཡིས་སྐར་མདའ་གཏོང་། །འདི་ཡིས་དགའ་རབ་དབང་ཕྱུག་ནི། །ཕྲག་དོག་བཅོམ་པས་དེ་བཞིན་གཤེགས། །འཇིག་རྟེན་འཇིག་རྟེན་ལས་འདས་པ། །གསང་བ་འདིར་ནི་མངོན་བརྗོད་
པས། །འདིར་ནི་སྐྱེས་བུ་གང་འཇུག་པ། །བློ་གྲོས་ལྡན་པས་ཆོས་འབྱུང་བའི། །ཀུན་དུ་བཟང་པོ་ངེས་པར་ནི། །འགྲོ་བའི་དོན་དུ་བསྟན་པ་ཡིན། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་
བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་ལས་ཕྲན་ཚེགས་བསྟན་པ་དང་སྤྱོད་པ་བསྟན་པའི་ལེའུ་སྟེ་དྲུག་བཅུ་རྩ་དགུ་པའོ།། །། དེ་ནས་དཔལ་ལྡན་རྡོ་རྗེ་འཛིན། །
དེ་བཞིན་གཤེགས་པ་ཀུན་གྱིས་མཆོད། །སངས་རྒྱས་ཀུན་བདག་མཆོག་མཁྱེན་པས། །གསང་བའི་ཡེ་ཤེས་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །སངས་རྒྱས་དཀྱིལ་འཁོར་བསྒོམ་པར་བྱ། །
དཔག་ཚད་བརྒྱ་ཡི་ཁྱོན་ཙམ་དུ། །དཀྱིལ་འཁོར་འཁོར་ལོ་བསམ་པ་ཡིས། །དཀྱིལ་འཁོར་གྱི་ནི་ངོས་རེ་ཞིང་། །དཔག་ཚད་རེ་ལ་ཆ་ཆེན་ཏེ། །ཉི་ཤུ་རྩ་ལྔའི་དབྱེ་བ་ཡིས། །ལོགས་རེ་ལ་ནི་གནས་པ་སྟེ། །དཔལ་ལྡན་འདུས་
པའི་དཔལ་མཆོག་ལས། །རྣམ་པར་རྒྱལ་བའི་དཀྱིལ་འཁོར་ཆེ། །རྣམ་པར་མཁས་པས་རྟག་པར་ཡང་། །རིགས་རྣམས་རབ་ཏུ་དགོད་བྱ་བ། །སངས་རྒྱས་དང་ནི་ལྷ་མོ་དང་། །བྱང་ཆུབ་སེམས་དཔའི་དཀྱིལ་འཁོར་བ། །

89-1-242b

གཟུགས་ཀྱི་རྡོ་རྗེ་ལ་སོགས་དང་། །ཁྲོ་བོའི་རྒྱལ་པོ་བཞིར་བཅས་པའི། །སོ་སོའི་དབུ་མས་གྱུར་པ་ཡི། །འདུས་པའི་དཀྱིལ་འཁོར་དགོད་པར་བྱ། །རེ་རེ་ཞིང་དུ་རིགས་ཀྱི་བདག །གསང་བ་རིགས་ཀྱི་བདག་པོ་ཡིས། །
རྒྱས་གདབ་དཀྱིལ་འཁོར་ཁྱད་པར་བྱ། །ལྷ་རྣམས་ཁྱམས་ལ་དགོད་པ་ནི། །ཁྲོ་བོ་དྲུག་དང་བཅས་པ་ཡི། །དཀྱིལ་འཁོར་གཉིས་ལས་བསྡུས་པ་ཡི། །ཚངས་པ་དང་ནི་གསང་འཛིན་གྱིས། །དཀྱིལ་འཁོར་ཡང་དག་འབྱུང་
བས་ན། །སུམ་བཅུ་རྩ་གསུམ་བརྗོད་པའོ། །དེ་བཞིན་གཤེགས་པ་སྟོང་དག་ནི། །དབུས་སུ་ཉེ་བར་གཟིགས་པ་གང་། །རྡོ་རྗེ་རིན་ཆེན་པད་མ་དང་། །རལ་གྲི་འབར་བས་ཁྱབ་པ་དང་། །དེ་བཞིན་གཤེགས་པའི་འཁོར་ལོ་
ནི། །ཕྱོགས་བཞིར་ཁྱབ་པར་གནས་པ་སྟེ། །ཤིན་དུ་རྒྱ་ཆེའི་རྣམ་པ་ཡིས། །དཔག་ཚད་བྱེ་བའི་ཁྱོན་ཙམ་དུ། །གྲུ་བཞི་ཤིན་དུ་གསལ་བ་ཡི། །མཛེས་པ་རྟ་བབས་དང་ལྡན་པའི། །ཡོངས་སུ་རྫོགས་པའི་ཕོ་བྲང་ལས། །
མཆོད་རྟེན་རིན་ཆེན་སྣ་བཞི་པ། །འོད་ཟེར་ཕྲེང་བས་རྣམ་བརྒྱན་པ། །གསལ་ཞིང་རང་བཞིན་དྲི་མ་མེད། །དམ་པའི་རིགས་ནི་བརྒྱ་ལ་སོགས། །གསང་བ་རབ་ཏུ་མཆོད་པའི་ཕྱིར། །ཤེས་རབ་ཅན་གྱིས་གནས་སུ་བསམ། །
འདོད་པའི་ཡོན་ཏན་ལྔ་རྣམས་ཀྱིས། །དེ་ལ་མཆོད་པ་རྒྱ་མཚོ་དབུལ། །དེ་ཉིད་ཕྱི་ནང་གསང་བ་ཡི། །རིམ་པས་རབ་ཏུ་ཕྱེ་བ་ཡི། །ཕྱོགས་དང་དུས་ཀྱིས་གནས་པ་ཡི། །ལྷ་མོ་དྲུག་བརྒྱ་བདུན་བཅུ་དང་། །རྩ་ལྔ་ཡི་ནི་མཆོད་
པ་ཉིད། །ངེས་པར་བསྡུས་པས་ཉིས་འགྱུར་དུ། །རིན་ཆེན་ན་བཟའ་ལ་སོགས་པས། །བྱང་ཆུབ་འདོད་པས་རྟག་ཏུ་མཆོད། །ཡེ་ཤེས་རྒྱ་མཚོ་དུས་གསུམ་གྱི། །གནས་དེ་ཡིན་པར་རྣམ་པར་བསམ། །བདག་ནི་ཐུགས་
ཁའི་ས་བོན་ལས། །མཆོད་པའི་སྤྲིན་རྣམས་སྤྲོས་ནས་ནི། །ཉེ་བར་གསང་བའི་རིམ་པ་ཡིས། །མཆོད་པ་རྣམ་པ་ལྔ་རྣམས་ཀྱིས། །རྟག་ཏུ་ལུས་ཀྱི་ལྷ་རྣམས་མཆོད། །དེ་ནས་དེ་ཉིད་འདུས་པ་ཡི། །སྙིང་པོ་བསྐུལ་

89-1-243a

བ་བརྗོད་པར་བྱ། །གང་ཡང་ཕྱོགས་བཅུའི་འཇིག་རྟེན་གྱི། །ཁམས་ཀྱི་སངས་རྒྱས་ཐམས་ཅད་ཀུན། །སོ་སོའི་འཁོར་གྱི་དཀྱིལ་འཁོར་དུ། །དཔག་མེད་བྱེ་བ་ལ་གནས་ཏེ། །ཡེ་ཤེས་མངོན་པར་སྟོན་མཛད་ཀྱང་། །
མི་ཟད་ཁམས་ཀྱི་ཡེ་ཤེས་ལས། །འདོད་ཡོན་སྒྱུ་མར་རོལ་པ་ཡིས། །ཡོངས་སུ་སྤྱད་པ་སྤྱོད་བྱེད་པ། །དེ་ཉིད་རྣམ་པར་མི་རྟོག་པས། །བསྐུལ་བ་མེད་པས་མི་གཡོར་བཞུགས། །གང་དུ་གསང་བ་ལ་སྤྱོད་པའི། །རིག་འཛིན་མངོན་
པར་བརྩོན་གྱུར་ལ། །སྤྱན་རས་ཀྱིས་ནི་མི་གཟིགས་ཏེ། །གང་དུ་མངོན་པར་མི་འཚོ་ལ། །ཀྱེ་མ་རིགས་ཀྱི་བུ་འདི་དག །གསང་བ་དེ་བཞིན་གཤེགས་པ་ཡི། །གསང་ཆེན་སྤྱོད་པའི་ཚུལ་གནས་ལ། །ཡོངས་སུ་རྫོགས་པར་གྱུར་ཏོ་
ཞེས། །སྤྱོད་པ་མེད་ཕྱིར་རྒྱུ་འདི་རུ། །སྙིང་པོ་རབ་ཏུ་བསྐུལ་བར་བྱ། །གང་དུ་མི་མཇེད་ལ་སོགས་པ། །བྱེ་བ་ཕྲག་ནི་བརྒྱར་གནས་པའི། །སངས་རྒྱས་ཆོས་འཛིན་རྒྱལ་པོ་ནི། །སྤྲུལ་པའི་སྐུར་ནི་གྱུར་པ་ཡི། །སྐུ་གསུང་
ཐུགས་ཀྱི་དམ་ཚིག་ལ། །དམིགས་པ་ཚིག་གི་ལམ་བརྗོད་པས། །གསང་སྔགས་མཆོག་གི་སྙིང་པོ་ཡི། །སྙིང་པོ་རབ་ཏུ་གསང་བ་གསུངས། །གཟུགས་ཀྱི་ཁམས་ཉིད་ཨོཾ་དུ་བསྡུ། །འདོད་ཁམས་ཀྱི་ནི་ཨཱ་ལས་ཏེ། །
གཟུགས་མེད་ཧཱུྃ་དུ་བརྗོད་པར་བྱ། །ཁམས་གསུམ་བདག་ཉིད་གཅིག་པའི་ངང་། །མཆོག་གི་ཁྱད་པར་གསང་བ་ཡི། །སྙིང་པོ་བསྐུལ་བ་ཉིད་ཡིན་ནོ། །རྒྱལ་བ་དེ་བཞིན་གཤེགས་པ་ཡི། །དཀྱིལ་འཁོར་གསང་བའི་
འབྱུང་གནས་ཉིད། །སྐུ་གསུང་ཐུགས་ནི་རོ་གཅིག་ཏུ། །དམ་ཚིག་ལ་ནི་དམིགས་པར་གསུངས། །སྤྱོད་ཡུལ་བྱུང་བ་ཨོཾ་ཡིན་ཏེ། །དམིགས་པ་མེད་པ་ཨཱ་ཡིན་ནོ། །མི་ཤིགས་ཧཱུྃ་དུ་གྱུར་པའི་ཕྱིར། །ཐ་དད་
མེད་པའི་སྤྱོད་པའོ། །འདི་ནི་ལོངས་སྤྱོད་རྫོགས་སྐུ་ཡི། །སྙིང་པོ་མཆོག་ཏུ་བསྐུལ་བར་གསུངས། །གསང་བ་རིགས་ཀུན་བདག་པོ་ཡི། །རྡོ་རྗེ་འཛིན་པའི་རྒྱལ་པོ་ལ། །མི་གཡོ་གནས་མེད་རྟག་པ་ལས། །གཅིག་ཏུ་གྱུར་

89-1-243b

བྱེད་དོན་དུ་ནི། །གསང་བ་སྐུ་ཡི་ངོ་བོ་ཨོཾ་། །དྲི་མེད་འབྱུང་བ་སྐྱེ་མེད་ཨཱཿ། །རྟོག་མེད་སྟོང་ཉིད་ཡེ་ཤེས་ཧཱུྃ། །སྐུ་གསུང་ཐུགས་ཀྱི་རྡོ་རྗེ་ནི། །མི་ཕྱེད་གཅིག་གྱུར་ལམ་འདི་ལས། །རྒྱུན་མི་འཆད་དུ་བསྐུལ་གྱུར་ན། །
ཞག་བདུན་གྱིས་ནི་ཉེར་འགྲུབ་སྟེ། །དམ་པའི་རིགས་ནི་བརྒྱ་དག་གིས། །ཐུན་མོང་མ་ཡིན་གནས་པའོ། །ཡེ་ཤེས་ཡོངས་སུ་དག་པའི་གནས། །སྐུ་ཡི་སྙིང་པོ་རབ་ཏུ་བསྐུལ། །རང་གི་དཀྱིལ་འཁོར་བྱེ་བྲག་ཏུ། །
རང་གི་རྡོ་རྗེ་འཛིན་པ་ཡིས། །མ་འདྲེས་དག་པར་བསྐྱེད་པ་ལས། །རྣམ་པར་སྣང་བར་སྟོན་པའོ། །དེ་ཉིད་རིགས་ནི་ལྔ་དག་གི། །རྣལ་འབྱོར་ཡོངས་སུ་སྤྱོད་པ་ལས། །བླ་མེད་ཕྱག་རྒྱ་ཆེན་པོའི་གནས། །གསུང་གི་སྙིང་
པོ་བསྐུལ་གྱུར་པས། །ཚད་མེད་བྱང་ཆུབ་ངང་ལས་བསྐུལ། །འདི་ནི་དམ་ཚིག་ཆེན་པོ་ཡིན། །མཆོག་ཏུ་གསང་བ་བདག་མེད་པས། །ས་གསུམ་དུ་ནི་ཁྱབ་པ་ཡིས། །བདེ་བ་ལྷན་ཅིག་སྐྱེས་པར་བསྐུལ། །དེ་ཉིད་དབྱེར་
མེད་སྒྱུ་མའི་ལམ། །ཡི་གེ་མཆོག་གྱུར་གཅིག་པ་ལས། །རླུང་སེམས་གཉིས་སུ་མེད་པར་ནི། །ཐུགས་ཀྱི་སྙིང་པོ་མཆོག་ཏུ་བསྐུལ། །གང་དུ་ལྷག་པའི་ལྷར་གྱུར་ཅིང་། །རྡོ་རྗེ་འཛིན་པར་གནས་པ་ལས། །འོད་ཟེར་ལྕགས་
ཀྱུ་མ་འདྲེས་པ། །ཉི་ཤུ་རྩ་ལྔས་སྤྲོས་པ་ལས། །བསམ་གཏན་ཏིང་འཛིན་ཉེར་སྤྱོད་པ། །སྤྱི་བོ་ནས་ནི་བསྐུལ་བར་མཛད། །འདི་ཉིད་དྲི་མེད་དབྱངས་གྱུར་པ། །འོད་ཟེར་ཁ་དོག་ལྔ་དག་གིས། །གསུང་གི་སྒོ་ནས་བསྐུལ་བ་
གང་། །ཡེ་ཤེས་སྤྲིན་ནི་འཕྲོ་བྱེད་པའོ། །འདིར་ནི་རྣལ་འབྱོར་དབང་ཕྱུག་གིས། །སྐུ་གསུང་ཐུགས་ཀྱི་རྡོ་རྗེ་ལས། །ཁྱད་པར་ཐུགས་ལས་བསྐུལ་གྱུར་པ། །ས་གསུམ་དུ་ནི་ཁྱབ་བྱེད་ཡིན། །མི་ཕྱེད་རྡོ་རྗེ་སེམས་དཔའ་ནི། །
དངོས་གྲུབ་ཀུན་གྱི་གཏེར་གྱུར་ཕྱིན། །གྲུབ་པའི་རྡོ་རྗེ་འབར་བ་ཡིས། །ཐམས་ཅད་རོ་མཉམ་ངང་དུ་བསྐུལ། །གང་དུ་རྣལ་འབྱོར་མཆོག་འདོད་པས། །རྡོ་རྗེ་དང་ནི་བྷ་ག་དག །ཐབས་དང་ཤེས་རབ་ཚུལ་དག་ཏུ། །མཉམ་པར་

89-1-244a

སྦྱར་བའི་དབང་པོ་ཡིས། །སྙོམས་པར་ཞུགས་པའི་བདེ་ཐོབ་པ། །ཟླ་བ་དང་ནི་ཉི་མ་དག །རྩ་གཉིས་འདུས་པར་དབུ་མར་ནི། །གཅིག་ཏུ་གྱུར་པའི་དངོས་པོ་ཡིས། །སྲོག་རྩོལ་གཉིས་ཀྱི་རླུང་དག་དང་། །ཨེ་བྃ་ཁ་སྦྱོར་
སྦྱར་བ་གང་། །དེས་ནི་ཆོས་ཀུན་མ་ལུས་ལ། །ཡོངས་སུ་རྒྱས་གདབ་གྱུར་པ་ཡིན། །འདི་ནི་སངས་རྒྱས་ཐམས་ཅད་ཀྱི། །གསང་སྔགས་དམ་ཚིག་ཏིང་འཛིན་ཡིན། །རྡོ་རྗེ་འཛིན་པའི་དཀྱིལ་འཁོར་མ་ལུས་པའི་སྙིང་པོ་རབ་ཏུ་
བསྐུར་བ་བསྟན་པའི་ཏིང་ངེ་འཛིན་ཏོ། །དེ་ནས་རྒྱལ་པོ་རྡོ་རྗེ་འཛིན། །མི་ཕྱེད་ཡེ་ཤེས་རབ་བསྒྲུབ་པས། །འདུས་པའི་འཁོར་གྱི་དཀྱིལ་འཁོར་དུ། །ཡང་དག་ཡེ་ཤེས་འདི་གསུངས་སོ། །འདོད་ཁམས་དབང་ཕྱུག་འཇིག་རྟེན་
ན། །གོ་འཕང་ལ་ནི་བྱེད་འགྱུར་བ། །དབང་དང་དེ་བཞིན་དགུག་པ་དང་། །བསྐྲད་དང་གསད་པ་ཉིད་དང་ནི། །རྨུགས་བྱེད་རེངས་བྱེད་རྨོངས་བྱེད་པ། །ཚིག་འཕྲོག་བྱ་དང་བརྒྱལ་བ་དང་། །སྣ་ཚོགས་གཟུགས་སུ་སྒྱུར་བ་དང་། །གཞོགས་
སྐམས་བྱེད་དང་ནུས་མེད་དུ། །བྱེད་པ་ལས་ཀྱི་ཆོ་ག་ཡིན། །འདི་དག་ཉེར་འགྲུབ་ཚུལ་འདི་ནི། །རྒྱུ་དང་མཚན་མ་ཐབས་དང་ནི། །ལས་དང་སྤྱོད་ཚུལ་རིམ་པ་སྟེ། །ཕྱག་རྒྱ་རིག་སྔགས་འཁྲུལ་འཁོར་ཏེ། །ལྟས་དང་ངེས་པར་ཟློག་
པར་བྱེད། །རྣལ་འབྱོར་པས་ནི་གྲུབ་དཀྱིལ་འཁོར། །ཡེ་ཤེས་ཕྲིན་ལས་བསྟན་པའོ། །འདི་གྲུབ་པ་ཡི་ངེས་པ་ཡང་། །རྡོ་རྗེ་སློབ་དཔོན་དག་གིས་ནི། །རྗེས་སུ་གནང་བ་བྱིན་པ་དང་། །དབང་གི་དུས་སུ་ཕྲིན་ལས་ཀྱི། །རིག་པའི་
བརྟུལ་ཞུགས་ཐོབ་པས་འབྱུང་། །ལམ་དུ་ལྷག་པའི་ལྷ་ཡིས་ནི། །བརྟན་པས་བྱིན་གྱིས་བརླབ་པ་དང་། །རིག་སྔགས་ཕྲེང་བ་འཛིན་པ་ལས། །གྲངས་བཤད་པ་ལས་བདུན་འགྱུར་དུ། །བསྙེན་པ་ཉེ་བར་གྲུབ་པར་འགྱུར། །
ཁ་ཅིག་ཕྲན་ཚེགས་ལས་རྣམས་ལས། །བཞི་འགྱུར་བསམ་གཏན་ལྡན་པས་འགྲུབ། །རླུང་གི་ནུས་པ་བརྟན་པ་དང་། །ལྟ་སྟངས་ཐོགས་མེད་འབྱུང་བ་ཡི། །ཉེ་བར་འཚེ་བའི་གནོད་པ་དག །བལྟས་པ་ཙམ་གྱིས་ཞི་བ་ཡི། །

89-1-244b

རང་སེམས་གཉུག་མའི་ཤེས་པ་ལ། །དབང་ཐོབ་རྡོ་རྗེའི་སྟོབས་གྱུར་པས། །འབྱུང་བའི་སྐྱེ་མཆེད་ཟིལ་ནོན་ཕྱིར། །ལས་ཚོགས་ཐམས་ཅད་ངེས་པར་འགྲུབ། །བྱང་ཆུབ་སེམས་ནི་རྗེས་དྲན་ཞིང་། །ཕ་རོལ་གནོད་བྱེད་གྱུར་པ་ཡི། །
སྲིན་མོ་ཤ་ཟ་གཏུམ་མོ་དང་། །འབྱུང་པོ་དག་གིས་གནོད་པར་བཅས། །དེ་དག་ཀུན་ལ་དཔའ་བོ་ཡི། །རྡོ་རྗེ་སེམས་ཀྱིས་རབ་སྦྱར་ན། །གནོད་པར་ནུས་པ་མ་ཡིན་ཏེ། །མེ་དང་ཆུ་དང་གཅན་གཟན་དང་། །རྒྱལ་པོའི་ཆད་པ་མི་རྒོད་དང་། །
སེང་གེ་གླང་པོ་སྲིན་པོ་སྟེ། །འཇིགས་པ་བརྒྱད་སོགས་མི་འབྱུང་བྱེད། །སངས་རྒྱས་དཀྱིལ་འཁོར་རྡོ་རྗེ་ཅན། །ནམ་མཁའི་དབྱིངས་ཀྱི་དབུས་གནས་པའི། །ཁྲོ་བོའི་རྒྱལ་པོ་གཤིན་རྗེ་གཤེད། །ཞལ་གསུམ་ཕྱག་དྲུག་སྦྲུལ་
གྱིས་བརྒྱན། །སྐུ་མདོག་ནག་པོ་འབར་བའི་སྐུ། །རང་གི་ཡུམ་དང་གཉིས་མེད་པ། །རང་གི་འཁོར་ལོའི་དབུས་གནས་པས། །ཨོཾ་ཡ་མཱན་ཏ་ཀྲིཏ་ཧཱུྃ་ཧཱུྃ་ཕཊ་སྭཱ་ཧཱ། འདིས་ནི་རྡོ་རྗེ་ཅན་གྱི་བཀའ། །དཀྱིལ་འཁོར་ཀུན་གྱི་ལས་
རྣམས་ལ། །མ་ལུས་འགྲུབ་པར་བྱེད་པ་ཡི། །གསང་བ་ཉེ་བར་འགྲུབ་པ་ཡིན། །དེ་ནས་བཅོམ་ལྡན་དམ་ཚིག་ཆེ། །རྡོ་རྗེ་ཁྲོ་བོ་ཞེས་བྱ་བའི། །ཏིང་ངེ་འཛིན་ལ་སྙོམས་ཞུགས་ནས། །ཁྲོ་བོའི་ཚོགས་རྣམས་མ་ལུས་པ། །ཀུན་དུ་
སྐྲག་པར་བྱེད་པ་ཡི། །རྡོ་རྗེ་ཁྲོ་བོ་འཇིགས་བྱེད་པ། །ཉིད་ཀྱི་སྐུ་གསུང་ཐུགས་ལས་ཕྱུང་། །ཁྲོ་བོ་ཐོད་པའི་ཕྲེང་བ་ཅན། །ཁ་དོག་ནག་པོ་འཇིགས་ཆེན་པོ། །བདུད་དང་ལོག་འདྲེན་མ་རུངས་པ། །གང་གིས་གདུལ་དཀའ་འདུལ་
མཛད་པ། །མི་སྲིན་མ་ཧེའི་ཞལ་ཕྱུང་ཞིང་། །གཙིགས་པ་ཁྲག་འཛག་ཁ་དོག་དམར། །སྟེང་དུ་མངོན་པར་ཕྱུང་བ་དང་། །དབང་ཕྱུག་བརྒྱད་དང་ལྡན་པའི་སྐུ། །རིགས་ཀྱི་ཞལ་དྲུག་འབར་བ་མངའ། །བཅུ་དྲུག་ཞབས་ཀྱིས་
གཤིན་རྗེ་གནོན། །དེ་ཕྱིར་འཇིགས་བྱེད་ཆེན་པོར་བརྗོད། །ཚངས་པའི་རྒྱལ་པོ་གདུལ་དོན་དུ། །སུམ་བཅུ་རྩ་བཞིའི་ཕྱག་རྒྱ་ཅན། །དབང་ཕྱུག་དྲུག་པོ་གདུལ་བའི་ཕྱིར། །གསང་བ་གྱེན་དུ་བསྒྲེང་བའོ། །ཁྱབ་འཇུག་

89-1-245a

གདུལ་ཕྱིར་མ་ཧེའི་ཞལ། །སྣ་ཚོགས་རྒྱན་གྱིས་སྤྲས་པ་དང་། །རང་གི་འཁོར་ལོར་དབུས་བཞུགས་ཚེ། །ལྷ་མོ་རྡོ་རྗེ་བདེ་མ་དང་། །གཉིས་སུ་མེད་པར་གནས་པའོ། །དེ་ཉིད་ཞལ་གཅིག་ཕྱག་གཉིས་མ། །
གྲི་གུག་ཐོད་པ་འཛིན་པ་ཡིས། །ལྗོན་ཤིང་འཛེག་ལྟར་སྦྱོར་བར་མཛད། །གསང་སྔགས་རྒྱལ་པོ་འདི་ཡིས་ནི། །བསམ་གྱིས་མི་ཁྱབ་གསང་བ་འགྲུབ། །ༀ་ཧྲཱིཿཥྚཱཿཝི་ཀྲི་ཏཱ་ན་ན་ཧཱུྃ་ཧཱུྃ་ཕཊ་སྭཱ་ཧཱ། མེ་ཐབ་དང་ནི་དུར་
ཁྲོད་རས། །གསལ་ཤིང་བསྐྱོན་དང་རྡོ་རྗེ་ཡི། །ཐོ་བ་རྡོ་རྗེའི་སྦྱོར་བ་དང་། །རྡོ་རྗེ་དགྲ་སྟ་ཐོད་ཚལ་དང་། །རླུང་གིས་ཁྱེར་བའི་རས་དག་གིས། །འདུས་པར་དགུག་དང་ངེས་སྟེར་བ། །གསད་དང་རབ་ཏུ་བརྡུང་བ་དང་། །རྣམ་པར་མནན་
དང་ཤིན་ཏུ་གསད། །ཆུ་བོ་བཟློག་དང་རླུང་བཅིང་བ། །ལས་ཀྱི་སྦྱོར་བ་བསྟན་པ་ནི། །རྣལ་འབྱོར་པ་ཡིས་ཤེས་པར་བྱ། །དེ་ལས་གཞན་དུ་གྱུར་པ་ཡི། །ལས་ཀྱི་སྦྱོར་བ་སྣ་ཚོགས་པ། །འདིར་ནི་མི་འགྲུབ་གང་ཡང་མེད། །
དེ་ལྟར་ཚར་བཅད་ལས་མཛད་ཅིང་། །ཐུགས་རྗེས་ཉེ་བར་མི་གཏོང་ཕྱིར། །ཞི་བའི་ཞལ་ནི་སྤྱི་གཙུག་ནས། །ཀུན་ནས་ནོར་བུའི་སྙིང་པོར་མཛད། །རྡོ་རྗེ་ཁྲོ་བོ་རབ་ཏུ་འབར་བ་དཀྱིལ་འཁོར་འབྱུང་བ་རྡོ་རྗེའི་ཏིང་ངེ་འཛིན་
ལས་ཡང་དག་བསྟན་པའོ། །གནས་དང་ཉེ་བའི་གནས་དང་ནི། །ཞིང་དང་ཉེ་བའི་ཞིང་དག་དང་། །ཚན་དོ་ཉེ་བའི་ཚན་དོ་དང་། །འདུ་ས་ཉེ་བའི་འདུ་ས་དང་། །འཐུང་གཅོད་ཉེ་བའི་འཐུང་གཅོད་དང་། །དུར་ཁྲོད་ཉེ་བའི་དུར་ཁྲོད་དང་། །
ཕྱི་ནང་བསླབ་པའི་ཚུལ་དག་གིས། །ས་ནི་བཅུ་གཉིས་ཚུལ་དུ་བརྗོད། །གནས་ནི་སུམ་བཅུ་རྩ་གཉིས་སུ། །ཆོས་རྣམས་རྨི་ལམ་ཚུལ་འཆར་བ། །མི་སློབ་ཟུང་འཇུག་ཐོབ་བྱེད་ཕྱིར། །སྒྱུ་མ་ལྟ་བུའི་ཚུལ་དུ་འབྱུང་། །
དེ་ཉིད་རིམ་པ་ཤེས་པར་བྱ། །རྟེན་ཅིང་འབྲེལ་བར་འབྱུང་བ་ཡི། །ཡན་ལག་བཅུ་གཉིས་དག་གྱུར་པ། །ཚུལ་འདི་རྟོགས་པར་བསྟན་པའོ། །མིང་དང་གཟུགས་དང་སྐྱེ་མཆེད་དྲུག །རིག་པ་དག་པས་སྐུ་རྡོ་རྗེ། །ཚོར་བ་

89-1-245b

སྲེད་པ་ལེན་པ་དག །མི་དམིགས་གསུང་གི་རྡོ་རྗེར་དག །སྲིད་པ་སྐྱེ་བ་རྒ་ཤི་རྣམས། །རྡོ་རྗེ་ཐུགས་ཀྱིས་དག་བྱེད་པའོ། །མ་རིག་པ་དང་འདུ་བྱེད་དང་། །རྣམ་པར་ཤེས་པ་རྣམ་པ་གསུམ། །ཡེ་ཤེས་དག་པའི་ངོ་བོ་
ཉིད། །དབྱེར་མེད་རང་འབྱུང་ངོ་བོར་གྱུར། །རྟོག་པ་མེད་པར་བདེ་བའི་རོ། །སྣང་བ་ངོས་བཟུང་མེད་པ་ཡི། །གཉིས་མེད་བདེ་བའི་རྣམ་པར་སྣང་། །བཅོམ་ལྡན་ཡེ་ཤེས་སྐུ་གཅིག་ཏུ། །སངས་རྒྱས་བྱང་ཆུབ་རབ་སྒྲུབ་པ། །རྟེན་
ཅིང་འབྲེལ་པར་འབྱུང་བ་ཡི། །ཡེ་ཤེས་རྡོ་རྗེ་རང་བྱུང་བའི། །དེ་ཉིད་དང་ལས་སྤྲུལ་པ་སྟེ། །སངས་རྒྱས་ཆོས་ཉིད་དག་པ་འདི། །རྒྱུ་དང་འབྲས་བུའི་སྣང་བ་ལ། །མི་འགག་ལམ་ནི་མངོན་གྱུར་ཅིང་། །གསང་བ་རྫོགས་པའི་ལམ་
དག་པས། །ཡང་དག་ཡེ་ཤེས་འབྱུང་བར་གནས། །འདི་དག་སངས་རྒྱས་སྐྱེས་བུ་སྟེ། །སྔགས་ཀྱི་རིག་པ་ཞེས་བསྒྲགས་པ། །རྡོ་རྗེ་མི་ཕྱེད་གསུམ་བསྒོམས་པས། །དམ་ཚིག་དག་གིས་རྫོགས་གྱུར་པ། །གསང་བ་ཆེན་པོའི་
ལམ་གྱུར་ནི། །སྔགས་ཀྱི་རིམ་པ་ཡན་ལག་བཞིས། །ལམ་གྱི་སྤྱོད་པའི་ཚུལ་མཆོག་གིས། །ཚེ་གཅིག་གིས་ནི་བྱང་ཆུབ་འཐོབ། །གསང་བའི་པད་མར་ཉི་མ་འཁྱིལ། །མཛོད་སྤུའི་གནས་སུ་བདུད་རྩི་ཡི། །ཟླ་བ་སངས་རྒྱས་
ཀུན་གྱི་ཉ། །སྲིད་དང་མྱ་ངན་འདས་ལས་གྲོལ། །གང་དུ་རྡོ་རྗེའི་དཀྱིལ་འཁོར་ལས། །ཞི་བར་བྱེད་པའི་རྣལ་འབྱོར་ནི། །མཱ་མ་ཀཱི་དང་གཉིས་མེད་པས། །ཚད་མེད་བུམ་པ་བཟང་པོ་འཐོབ། །རིན་ཆེན་ནོར་བུའི་དཀྱིལ་འཁོར་
ལས། །རྣལ་འབྱོར་རྒྱས་པའི་འཕེལ་བྱེད་པ། །སངས་རྒྱས་སྤྱན་གྱི་སྦྱོར་བ་ཡིས། །དཔག་བསམ་ཤིང་ཆེན་རབ་གྲུབ་པའོ། །པད་མ་འབར་བའི་དཀྱིལ་འཁོར་ལས། །སྔགས་པས་ཆགས་མེད་དབང་སྡུད་པ། །གོས་
དཀར་ལྷ་མོ་ཡེ་ཤེས་ཆེ། །འདོད་འཇོའི་བ་ལྟར་རབ་གྲུབ་བྱེད། །རལ་གྲི་འབར་བའི་དཀྱིལ་འཁོར་ལས། །གང་དུ་སྣ་ཚོགས་ཕྲིན་ལས་སྤྱོད། །རྡོ་རྗེ་སྒྲོལ་མའི་ཁྱད་པར་ལས། །ཅང་ཤེས་རྟ་ཡི་སྟོབས་ཀྱིས་བགྲོད། །

89-1-246a

འཁོར་ལོ་འབར་བའི་དཀྱིལ་འཁོར་དུ། །ཡེ་ཤེས་དེ་བཞིན་གཤེགས་པའི་རླུང་། །ཆོས་ཀྱི་དབྱིངས་ཀྱི་དབང་ཕྱུག་མས། །བསམ་འཕེལ་ནོར་བུ་ཐོབ་བྱེད་པའོ། །རྒྱུ་བའི་རླུང་ནི་རབ་ཟིན་པས། །འཇིག་རྟེན་
གསུམ་པོ་ཀུན་གྱི་ནི། །གཟུགས་གསུམ་ཕྲ་རགས་མེད་པར་ནི། །བློ་ཡི་ཡུལ་དུ་མཐོང་བར་བྱེད། །རབ་ཏུ་རྒྱུ་བ་རབ་ཟིན་པས། །ཕྱོགས་བཅུ་ཀུན་དུ་ཁྱབ་གྱུར་པའི། །རྡོ་རྗེ་དྲི་ཡི་བྱེ་བྲག་ཀུན། །མ་ལུས་ཚོར་བར་གྱུར་པ་
ཡིན། །མངོན་པར་རྒྱུ་བ་ཟིན་པས་ན། །ས་གསུམ་པོ་ནི་གྲག་པ་ཡིན། །སྒྲ་ཡི་ཚོགས་རྣམས་ཇི་སྙེད་པ། །དེ་ཀུན་དྲུང་ན་གྲག་བཞིན་འབྱུང་། །ཤིན་དུ་རྒྱུ་བ་ཟིན་པ་ཡིས། །རྡོ་རྗེ་རོ་ཡི་བྱེ་བྲག་ཀུན། །མ་ལུས་ལུས་པ་མེད་
པ་དག །མྱོངས་འགྱུར་རྡོ་རྗེ་འཛིན་པ་ཀྱེ། །ཡང་དག་རབ་ཏུ་རྒྱུ་བ་ནི། །ཤིན་དུ་བརྟན་པ་ཐོབ་པ་ལས། །སྲིད་ཞི་རེག་བྱར་གྱུར་པ་དག །དེ་ཡིས་ངེས་པར་ཚོར་བར་འབྱུང་། །གང་དུ་རྡོ་རྗེ་བརྟན་པ་ལས། །མི་ཕྱེད་སྲོག་ནི་
གཅིག་གྱུར་པ། །དེ་སྙེད་སྙིང་ལས་འོད་འབྱུང་བའི། །བསིལ་ཟེར་རྟ་བདུན་ཆ་མཉམ་པས། །ཨཱ་ལི་ཀཱ་ལི་ལས་བྱུང་བ། །སྣ་ཚོགས་རྡོ་རྗེ་གར་བཅས་པའི། །ཐབས་དང་ཐབས་ལྡན་བསྐྱོད་པའི་རླུང་། །འདིས་ནི་མཁའ་ལ་
རབ་ལྡིང་འགྱུར། །ཉིན་དང་མཚན་མོའི་ཆ་ལས་ནི། །ཕྱག་རྒྱའི་ཤུ་ཏྲ་ལེན་བྱེད་པ། །གསང་བ་རྡོ་རྗེ་ནང་དུ་ནི། །བདེ་བ་སྐྱེས་པ་ཏིལ་འབྲུ་བཞིན། །དེ་ཉིད་ཡོངས་སུ་དག་པ་ནི། །ཀུན་འདར་མར་ནི་དེ་བཞིན་གཤེགས། །མཁའ་
དང་ཐིག་ལེ་སངས་རྒྱས་སྐུ། །རབ་ཏུ་མཐོང་བྱེད་རྣལ་འབྱོར་ཆེ། །བདེ་བ་ཉམས་པ་མེད་པ་ལས། །བཅུ་དྲུག་ཆ་ཡི་རིན་ཆེན་རྩེ། །རི་རབ་སྟེང་དུ་དབང་པོ་ནི། །ཐུར་བལྟས་སུམ་བཅུ་རྩ་གསུམ་པས། །རི་བོང་འཛིན་
ཕྱིར་མི་ལྡོག་པས། །དེ་ཉིད་ཟག་མེད་ཁང་བཟངས་ན། །བདེ་བ་ཆེན་པོར་གནས་གྱུར་པའོ། །ཁམས་རྣམས་ལས་ནི་གྱུར་པ་ཡི། །སྡུད་དང་འབར་དང་སྨིན་པ་དང་། །འདེགས་པ་བརྟན་བྱེད་འཕྲུལ་འཁོར་ལས། །ཟག་

89-1-246b

བཅས་རླུང་ནི་ལྡོག་པ་དང་། །ཟག་མེད་ཏིང་འཛིན་ཐོབ་པ་ལས། །སྦ་བ་སྦུབས་སུ་ནུབ་པ་དང་། །བརྟན་བྱེད་རྒྱུ་མཐུན་རྟགས་མཐོང་ཕྱིར། །འཇུག་ཅིང་ལྡོག་པ་མེད་པས་ན། །དབུ་ཡི་གཙུག་ཏོར་དེ་ནས་འབྱུང་། །རང་གི་
ངོ་བོའི་སྐུ་གསུང་ཐུགས། །ཡོན་ཏན་ཕྲིན་ལས་ཐམས་ཅད་ཀུན། །སངས་རྒྱས་སྟོང་དང་གཉིས་བཅས་པའི། །རྣམ་འཕྲུལ་ཡེ་ཤེས་ལས་བྱུང་བའོ། །དེ་སྐད་ཅེས་ནི་གསུངས་པ་དང་། །བྱང་ཆུབ་སེམས་དཔའ་ཆེན་པོ་
ནི། །ཀུན་དུ་བཟང་པོས་ལེགས་ཐོབ་པ། །གསང་བའི་དོན་ནི་འདི་ཞུས་ཡིན། །གང་དུ་སུམ་བཅུ་རྩ་གཉིས་ཀྱི། །གནས་སོགས་དབྱེ་བ་ས་ཡི་ཆ། །དེ་ཉིད་ཉེ་བར་བསྟན་པ་དང་། །སྒྱུ་མའི་དཔེ་ནི་བཅུ་གཉིས་ལས། །ཆོས་
ཉིད་ཇི་ལྟར་རྟོགས་པར་འགྱུར། །རོ་ཧི་ཏ་ལ་སོགས་པ་ཡི། །དུས་སྦྱོར་བཅུ་གཉིས་དག་ལས་ནི། །ཁྱད་པར་ཇི་སྐད་ཐོབ་པའི་ཚུལ། །འདིར་ནི་ཉེ་བར་བསྟན་དུ་གསོལ། །དེ་ཉིད་རྡོ་རྗེ་འཛིན་པ་ཡིས། །ཁྱད་པར་དོན་དུ་
བཀའ་སྩལ་པ། །གནས་ནི་པུ་ལི་ར་ཡར་བརྗོད། །དེ་བཞིན་ཛ་ལན་དྷ་ར་དང་། །ཨཽ་རྒྱན་ཨར་བུ་ཏ་ཉིད་དེ། །རབ་ཏུ་དགའ་བའི་སར་བརྗོད་པའོ། །བ་གླང་བདག་པོ་ཉེར་གནས་ཏེ། །ར་མེ་ཤྭ་རི་ཉིད་དང་ནི། །དེ་བ་ཀོ་ཚ་
མཱ་ལ་བ། །དྲི་མ་མེད་པའི་ས་རབ་གནས། །ཀཱ་མ་རཱུ་པ་ཨོ་ཊ་ནི། །ཞིང་དུ་བརྗོད་པ་ངེས་པ་ཡིན། །འོད་འཕྲོའི་ས་ནི་འདིར་ཐོབ་བྱེད། །ཏྲི་ཤ་ཀུ་ཎི་ཀོ་ས་ལ། །ཉེ་བའི་ཞིང་སྟེང་ས་བཞི་པ། །ཀ་ལིང་ཀ་དང་ལམ་པ་ཀ །
ཚན་དོ་ཧ་སྟེ་ས་ལྔ་པ། །ཀན་ཉྩི་ཧི་མ་ལ་ཡར་ནི། །ཉེ་བའི་ཚན་དོ་ས་དྲུག་པའོ། །པྲེ་ཏ་པུ་རི་ཁྱིམ་གྱི་ལྷ། །འདུས་པ་ཅན་ཏེ་ས་བདུན་པ། །སཽ་རཥྚ་གསེར་གླིང་སྟེ། །ཉེ་བའི་འདུས་པ་ས་བརྒྱད་པ། །ན་ག་ར་དང་སིན་དྷུ་སྟེ། །
དུར་ཕྲོད་ས་ནི་དགུ་པ་ཡིན། །མ་རོ་ཀུ་ལུ་ཐ་འདི་དག །ཉེ་བའི་དུར་ཁྲོད་ས་བཅུ་པ། །ཆོས་ཀྱི་སྤྲིན་དུ་མངོན་པར་བརྗོད། །ཀོང་ཁ་ན་དང་ཁ་བའི་རི། །ཙ་རི་ཏྲ་དང་ཀྂ་པོ་ཙེ། །འཐུང་གཅོད་ས་ནི་བཅུ་གཅིག་པ། །ཧ་རི་ཀེ་

89-1-247a

ལ་ཏྃ་བྷ་ལ། །ཙ་ར་སིང་ཧ་རི་ལྡན་པ། །ནི་རི་ཏི་པའི་གླིང་གྱུར་པ། །ཉེ་བའི་འཐུང་གཅོད་བརྗོད་པར་བྱ། །འདི་དག་ས་ནི་བཅུ་གཉིས་ཏེ། །ཁྱད་པར་འབིགས་བྱེད་གཞོན་ནུའི་གནས། །བཅུ་གསུམ་པ་ཡི་ས་བརྗོད་ལ། །
ཡོངས་སུ་གནས་པ་བདེ་བ་ཆེ། །ཁྱད་པར་གླིང་ནི་བཅུ་གཉིས་སུ། །གསང་བའི་རྒྱུད་རྣམས་བསྟན་པ་ནི། །ཀླ་ཀློའི་གླིང་ནི་བཅུ་གཉིས་སུ། །རྡོ་རྗེ་འཆང་གིས་བསྟན་པ་ཡིན། །ཐམས་ཅད་སྒྱུ་མའི་སྣང་བ་ལས། །ཡང་དག་
ཏུ་ནི་སྟོན་པར་བྱེད། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །རྒྱུ་དང་ལས་ལས་ཀུན་དུ་བྱུང་། །ངོ་བོ་མེད་ཅིང་གནས་མེད་པས། །དེ་ལྟར་ཆོས་རྣམས་ཤེས་གྱིས་ལ། །སེམས་ཅན་དོན་
ལ་བླ་མེད་བྱོས། །འོན་ཀྱང་སངས་རྒྱས་རིགས་སྐྱེ་བར། །འདིར་ནི་ཐེ་ཙོམ་ཡོད་མ་ཡིན། །ཆོས་རྣམས་སྤྲུལ་པ་ལྟ་བུ་སྟེ། །དེ་ཉིད་རྗེས་སུ་སྤྱད་པ་ན། །རྣམ་པ་ཀུན་དུ་ཞི་བ་ཡི། །ཚུལ་གནས་ལས་དང་མཉམ་པར་འབྱུང་། །
འདི་ཉིད་མཐར་རྟོགས་ཤིན་ཏུ་དབེན། །རྣམ་པར་མི་རྟོག་བྱེ་བྲག་ལས། །ཁྱད་པར་བྱིན་བརླབས་སྤྲུལ་པ་ཡིས། །དངོས་པོ་རྒྱས་འདེབས་གྱུར་པའོ། །ཆོས་རྣམས་སྒྲ་བརྙན་ལྟ་བུ་སྟེ། །བྲག་ཆ་ལྟ་བུར་རང་སྟོང་
ཞིང་། །ཕྱི་ནང་མེད་པའི་རང་བཞིན་གྱིས། །བརྗོད་དུ་མེད་པའི་སྒྲ་རྣམས་ལ། །རྣམ་དག་སྒྲ་མེད་སྒྲར་འཇུག་མེད། །ཆོས་རྣམས་རང་བཞིན་མེད་པའི་གནས། །མངོན་པར་སྟོན་པའི་ཚུལ་གནས་ཀྱང་། །དེ་ཉིད་སྒྲ་ལ་
གནས་པ་མིན། །ཆོས་རྣམས་དྲི་ཟའི་གྲོང་ཁྱེར་ལྟར། །ཕྱི་དང་ནང་དང་བར་དུ་ཡང་། །དངོས་པོ་མེད་དེ་ངེས་པར་སྣང་། །སྒྲོ་སྐུར་མེད་དེ་ཐ་སྙད་འདས། །ཆོས་ཉིད་མངོན་པར་བསྒྲུབ་དག་པས། །ཚད་མེད་བསླབ་པ་ནུས་མ་
ཡིན། །ཆོས་རྣམས་ཆུ་ཟླ་ལྟ་བུར་ནི། །སྣང་བ་ངོས་གཟུང་མེད་པའི་དངོས། །ཡང་དག་གྲུབ་པར་གནས་མེད་དེ། །དེ་ཉིད་ཁྱབ་པས་སྟོང་པའི་སར། །གཟུང་མེད་བཅིང་དང་གྲོལ་མེད་པས། །ཡང་དག་སྣང་བ་འདིར་

89-1-247b

མཚོན་རྣོ། །ཆོས་རྣམས་སྨིག་རྒྱུ་ལྟ་བུ་སྟེ། །གྲུབ་པ་མེད་པའི་དངོས་པོ་ལས། །དེ་ཉིད་ཆུར་མཐོང་འཁྲུལ་པའི་ལམ། །དེ་ལྟར་སྣ་ཚོགས་སྣང་བ་ཡང་། །གྲུབ་མེད་སྟོང་པའི་སྣང་བ་ལས། །གཞན་མེད་འཁྲུལ་བར་མ་
བྱེད་ཅིག །ཆོས་རྣམས་རྨི་ལམ་ལྟ་བུ་སྟེ། །རྨི་ལམ་དུ་ནི་འཇིག་རྟེན་དང་། །འཇིག་རྟེན་འདས་པ་མ་གྲུབ་སྟེ། །ཁམས་གསུམ་བརྟན་དང་གཡོ་བར་བཅས། །འཕོ་བ་མེད་ཅིང་སྐྱེ་བ་མེད། །ཀུན་ནས་ཉོན་མོངས་རྣམ་
བྱེད་མེད། །དེ་ཉིད་མེད་བཞིན་སྣང་བ་ཡང་། །འགག་པ་མེད་པར་འབྱུང་བའི་ཕྱིར། །རྣམ་དག་གནས་མེད་སྣང་བ་བྲལ། །དེ་ལྟར་ཆོས་ཀུན་རྨི་ལམ་དང་། །ངོ་བོ་ཉིད་གཅིག་ཤེས་བྱ་སྟེ། །རྨི་ལམ་གྱི་ནི་ཚུལ་དུ་ཡང་། །
ཀུན་ནས་སྤྱོད་པས་ཁྱབ་པར་བྱ། །དངོས་སྣང་མ་ལུས་ཆོས་ཁྱབ་པ། །ཐམས་ཅད་རྨི་ལམ་རི་མོ་ལྟར། །དངོས་མེད་སྣང་བ་རབ་ཤེས་བྱ། །རྨི་ལམ་གྱི་ངོ་བོ་ཉིད་ཀྱི་ཚུལ་དང་། རྨི་ལམ་ལ་མངོན་པར་ཆགས་པ་སྤོང་བ་
དང་། རྨི་ལམ་རབ་ཏུ་དབེན་པར་ཤེས་པ་དང་། རྨི་ལམ་གྱི་རང་བཞིན་ཤེས་པར་བྱ་བ་དང་། ཆོས་ཐམས་ཅད་ལ་རྨི་ལམ་ལྟ་བུར་བྱིན་གྱིས་རློབ་པ་དང་། ཆོས་ཐམས་ཅད་རྨི་ལམ་དང་ཐ་མི་དད་པར་འཆར་བའི་དོན་
དང་། ཆོས་ཐམས་ཅད་རྨི་ལམ་ལྟ་བུའི་འདུ་ཤེས་སྔོན་དུ་འགྲོ་བ་དང་། རྨི་ལམ་ཉིད་དུའང་རྣམ་པར་མི་རྟོག་ཅིང་མི་སྤྱོད་པ་དང་། རྨི་ལམ་གྱི་འཇིག་རྟེན་ཁོང་དུ་ཆུད་པ་ལྟ་བུར་རབ་ཏུ་རྟོགས་པར་བྱ་བ་ཉིད་དོ། །
དེ་ཉིད་བླ་མེད་ཚུལ་འདི་རྟོགས་པར་བྱ། །འདི་དག་རྨི་ལམ་ལྟ་བུར་ཁོང་ཆུད་ཅིང་། །ཆོས་ཀུན་སྲིད་པ་མ་ལུས་སྣང་བ་ཡང་། །རྨི་ལམ་ངོ་བོ་ཉིད་དུ་རབ་ཏུ་རྟོགས། །འདི་ནི་ཡུལ་དང་ཕྱོགས་ལ་མི་གནས་ཏེ། །རྨི་ལམ་
རབ་ཏུ་ཞི་ལ་དེ་དག་གཞོལ། །རང་བཞིན་མཁས་ཤིང་རྣམ་པར་རྟོག་མེད་ལྡན། །རྟོགས་པའི་ཡིད་ལྡན་སེམས་ལ་འགྱུར་བ་མེད། །ཀུན་དུ་རྨི་ལམ་ལྟ་བུར་ཤིན་དུ་སྤྱོད། །དུས་གསུམ་མ་ལུས་བག་ཆགས་གཟུགས་
89-1-248a

བརྙན་རྣམས། །ཤིན་དུ་ཉེར་འབྱུང་ལུས་འདས་སྦྱང་བར་བྱ། །རྨི་ལམ་སྒྱུ་མ་ལྟ་བུར་རབ་ཤེས་བྱ། །དེ་ལུས་ཤི་མེད་འགྱུར་མེད་སྐྱེ་བ་མེད། །ཕྱོགས་རྣམས་ཀུན་དུ་ཡོད་མིན་མེད་པའང་མིན། །ཁམས་གསུམ་
ཐམས་ཅད་རྨི་ལམ་ཚུལ་ལྟ་བུ། །འདི་ལ་རྣམ་པར་རྟོག་མེད་ཚུལ་བྱས་ཤིང་། །ཤིན་དུ་མཁས་དེའི་སེམས་ལ་བཅིངས་པ་མེད། །འགྲོ་ཀུན་རྨི་ལམ་རང་བཞིན་ཚུལ་འདྲ་ལ། །དེ་དག་མི་གནས་འཇིག་རྟེན་ལས་རབ་དབེན། །
རྟེན་མེད་མི་རྟོག་འཇིག་རྟེན་རྣམ་རྟོག་མེད། །རྨི་ལམ་ཆོས་རྟོགས་མཁས་པས་སྤྱོད་པ་བྱ། །རྨི་ལམ་འགྲོ་བ་རྣམ་པ་དུ་མ་སྣང་། །ཐ་དད་རྣམ་པ་གཞན་དང་གཞན་དག་ཏུ། །བྱེ་བྲག་རྣམ་མང་རྟོག་པ་ཡོངས་སུ་སྦྱང་། །དེ་ཉིད་
ཚུལ་གྱིས་རྣམ་པ་རབ་ཏུ་རྟོགས། །མཚན་ཉིད་རྣམ་འདས་སྐལ་བ་མཉམ་པ་ཉིད། །གཅིག་ལས་རྣམ་མང་དུ་མར་གང་སྣང་ལྟོས། །རྣམ་བཀོད་རྣམ་པར་འགྲོ་བ་རབ་ཏུ་ཤེས། །ཀུན་ལ་རྨི་ལམ་འདྲ་བའི་ཆོས་ཅན་དང་། །
ཞིང་རྣམས་རྨི་ལམ་ཆོས་རྣམས་རྨི་ལྟར་བྱེད། །ཀུན་ཉོན་མོངས་དང་རྣམ་བྱང་ཚུལ་འདི་ལ། །རབ་ཏུ་རྟོག་མེད་རྨི་ལམ་སྤྱོད་པ་ཡིས། །ཡང་དག་འགྲུབ་པར་འགྱུར་བའི་ལམ་ཡིན་ཏེ། །རྨི་ལམ་སྨོན་ལམ་རྣམ་པས་གནས་
མེད་པ། །དེ་ནི་ཆོས་རྣམས་ཀུན་ལ་མི་གནས་སོ། །ཚུལ་འདི་ལ་ནི་ཅུང་ཟད་བྱེད་གནས་མེད། །འཇིག་རྟེན་འདི་འདྲར་འབྱུང་བ་ཤེས་ཤིང་དག །ཚུལ་རྟོགས་འགྲོ་ཀུན་མི་འཇིགས་ཆོས་ལ་སྦྱོར། །འདིར་སྦྱོང་སྲིད་པ་ཀུན་
དུ་ཆུད་མི་ཟ། །རྨི་ལམ་བརྒྱུད་བཞིན་དེ་དག་རབ་ཏུ་ཤེས། །དེ་ཉིད་རྨི་ལམ་མཛད་པས་སངས་རྒྱས་ཞིང་། །ཡོངས་སུ་སྦྱངས་ཤིང་སེམས་ཅན་སྨིན་བྱེད་ལ། །རྣམ་ཐར་སྒོ་ཐོབ་ཆོས་ཀྱི་འཁོར་ལོ་ཡིས། །ཚད་མེད་ཡེ་
ཤེས་གཞལ་མེད་གནས་འདིར་འཐོབ། །ཆོས་ཐམས་ཅད་ལ་རྨི་ལམ་ཡང་དག་པའི་ཏིང་ངེ་འཛིན་མངོན་དུ་བསྟན་པ་སྟེ་མངོན་པར་འབྱུང་བའོ། །ཆོས་རྣམས་དབང་པོའི་གཞུ་ལྟ་བུར། །རང་བྱུང་དངོས་པོ་མེད་པ་ཡི། །

89-1-248b

འོད་སྣང་ལུས་ཀྱིས་སྤྲོས་པ་མེད། །བདེ་བ་ཞི་བའི་གནས་ཞེས་བྱ། །ཆོས་རྣམས་ནམ་མཁའི་སྤྲིན་བཞིན་དུ། །སྟོང་པའི་ངང་ནས་ཀུན་ནས་ལྡང་། །རླུང་ལས་ཡང་དག་འབྱུང་བའི་ཕྱིར། །ཉེར་ལེན་རང་སར་གྲོལ་བའི་གནས། །
ཆོས་རྣམས་བར་སྣང་གློག་བཞིན་དུ། །རང་རིག་ཡིད་ཀྱི་རྣམ་ཤེས་ཀྱིས། །ཀུན་དུ་ཁྱབ་པར་རྒྱུ་བ་ནི། །རྩ་བ་ལས་རླུང་དག་པར་བྱ། །ཆོས་ཀུན་ཆུ་ཡི་ཆུ་བུར་ནི། །རྒྱ་མཚོ་ལས་བྱུང་ཇི་བཞིན་པར། །ཆོས་ཉིད་སྣ་ཚོགས་རྒྱ་མཚོ་
ལས། །རྟོག་པའི་དྲ་བ་དག་པར་བྱ། །ཆོས་རྣམས་སྒྱུ་མ་ལྟ་བུར་འཆར་བ་ཡང་། །གང་དུ་རླུང་སེམས་གཅིག་ཏུ་མ་དག་ན། །འཁྲུལ་པ་སྒྱུ་མ་ལྟ་བུར་དངོས་ལ་ཞེན། །དེ་ཉིད་སྲིད་པ་ཀུན་དུ་སྟོན་པ་ཡིན། །དེ་ཉིད་དག་པས་
སྣང་བའི་མངོན་ཞེན་བྲལ། །རྟོག་པ་ལོག་པས་བརྟན་གཡོ་སྒྱུ་མར་འཆར། །དངོས་རྣམས་ཀུན་ལ་ཆགས་པ་མེད་པ་ནི། །རྣམ་པ་སྣ་ཚོགས་སྒྱུ་མའི་ཚུལ་ཤེས་ཕྱིར། །སྒྱུ་མ་རབ་ཞི་སྤྲོས་པ་མེད་པ་སྟེ། །གནས་མེད་ཆོས་
ཀྱི་དབྱིངས་ལ་དེ་གནས་བྱེད། །ཆོས་རྣམས་ཀུན་དང་སྒྱུ་མ་ཐ་དད་མེད། །དབྱེ་བ་རྡུལ་ཙམ་དུ་ནི་དམིགས་མི་འགྱུར། །རང་ལུས་སྒྱུ་མའི་རྣམ་པར་རབ་ཤེས་པས། །འགྲོ་ཀུན་སྐྱེས་པ་བུད་མེད་སྣ་ཚོགས་པ། །ཐམས་ཅད་
གཟུགས་ནི་སྒྱུ་མའི་སྣང་བ་ལས། །མཁས་པས་སུ་དག་དེ་ལས་གཞན་དུ་སྤྱོད། །དེ་ལྟར་སྒྱུ་མ་ཆགས་མེད་སྣ་ཚོགས་པའི། །གནས་ཀྱི་དབང་ཕྱུག་དེ་ལ་ཞེན་མི་བྱེད། །འཇིག་རྟེན་དངོས་དང་དངོས་མེད་གང་གནས་པ། །སྒྱུ་མའི་
ཚུལ་གྱིས་གནས་པ་མེད་པར་གནས། །སྒྱུ་མ་ཉིད་དུ་ཡང་དག་རབ་གྲོལ་བས། །དེ་བཞིན་ཉིད་ལ་མཉམ་པར་གཞག་པ་དང་། །རྗེས་ཐོབ་གཉིས་མེད་སྒོམ་དང་བསྒོམ་བྱ་བྲལ། །སེམས་མེད་དེ་ལ་སེམས་ལས་གཞན་པའི་ཆོས། །
འཇིག་རྟེན་ཐ་སྙད་ཙམ་དུའང་མི་བརྗོད་དེ། །ངོ་བོ་ཉིད་ཀྱིས་མ་སྐྱེས་སྒྱུ་མའི་སྐུ། །སྐྱེ་མེད་ནམ་མཁའི་སྒྱུ་མ་འདི་ལ་ལྟོས། །ཐམས་ཅད་སྟོང་ཉིད་གཟུགས་ཀྱི་གླང་པོ་དང་། །ཤིང་རྟ་མ་ཧེ་འཁོར་ལོས་སྒྱུར་རྒྱལ་གྱི། །

89-1-249a

རིན་ཆེན་བདུན་དང་དཔུང་ཆེན་ཐམས་ཅད་ཀུན། །སྒྱུ་མའི་གཟུགས་ཉིད་དེ་ཡི་འབྲས་བུ་ལས། །གང་དུ་འབྱུང་ཞིང་གང་དུའང་སོང་བ་མེད། །འགྲོ་འོང་གནས་སྒྱུ་རྒྱུ་འབྲས་སྒྱུ་མའི་ཆོས། །འདི་ནི་ལྗོན་ཤིང་རིན་
ཆེན་འབྲུ་འབབ་ཅིང་། །འཛམ་བུའི་ཆུ་བོས་ཤིང་གི་འབྲས་བུ་ཡང་། །མི་མཉམ་མཉམ་མེད་དུས་གསུམ་ཕྱོགས་བཅུ་པོ། །རྒྱལ་བའི་ཞིང་ཁམས་སྒྱུ་མའི་བཀོད་པས་སྦྱོང་། །སེམས་ཅན་སྒྱུ་མར་ཚོགས་གཉིས་
རབ་རྫོགས་པས། །འབྲས་བུ་སྐུ་བཞི་སྒྱུ་མའི་ཡེ་ཤེས་ཅན། །འདི་ལྟར་གང་ཤེས་འདི་ནི་མི་སྐྱེ་བའི། །ཆོས་ལ་བཟོད་པ་ཐོབ་པར་རིག་པར་བྱ། །ཕྱིར་མི་ལྡོག་པའི་ས་ལ་གནས་པའོ། །སྒྱུ་མ་ལྟ་བུའི་ཏིང་ངེ་འཛིན་
གྱིས་ཆོས་ཐམས་ཅད་ཡང་དག་པར་སྡུད་པ་ཞེས་བྱ་བའོ། །རོ་ཧི་ཏ་སྟེ་བརྒྱལ་བར་བྱེད། །མོ་ཧེ་ཏེ་ནི་ཡན་ལག་འབྱུང་། །བྷ་དྲ་བཀྲ་ཤིས་བྱེད་པའོ། །བྲེ་ཤ་པ་ནི་དགེ་བ་སྟེར། །བི་ཤ་པ་ནི་འདུས་པ་ལ། །ཀུརྨཱ་པ་ལ་འཚོ་བ་
སྐྱོང་། །མ་ཀ་ར་དྷནྡྷ་བ་ནི། །མི་ཕྱེད་དབང་པོ་འབྱུང་བའོ། །མ་སྐ་ར་ནི་དག་པར་བྱེད། །བི་ཏྲི་ཀ་ནི་རྣམ་པར་རྒྱལ། །བྷ་ཀུ་ལ་ནི་རྟེན་པ་སྟེ། །སྭཔྣ་ཞེས་པ་བྲ་བ་གང་། །ཀ་མ་ནི་ཞེས་རྒྱན་ཡིན་ཏེ། །འདི་དག་ལུས་ངག་ཡིད་དག་
ལ། །དཀར་ཕྱོགས་བདེ་བ་འཕེལ་བྱེད་ཡིན། །དེ་ལས་རྣམ་པར་བཟློག་པ་ནི། །ནག་ཕྱོགས་མ་རུངས་མངོན་བརྩོན་པ། །བར་མས་གཏི་མུག་རྨོངས་པར་གནས། །རྣལ་འབྱོར་པས་ནི་འདིར་ཤེས་པས། །ལས་རྣམས་ཐུན་
གྱིས་འདིར་དག་པས། །བཅུ་གཉིས་དག་ཏུ་བསྟན་པ་ཡིན། །ཁྱད་པར་བསྡུས་པའི་ཚུལ་ཤེས་པས། །རྒྱུ་དང་ཐབས་དང་ཁྱད་པར་གྱི། །བླ་མེད་ཡེ་ཤེས་ཚུལ་འདི་བསྟན། །འཁོར་བའི་རྒྱ་མཚོ་ཆེན་པོ་ལས། །དེ་ཉིད་རྣམ་
པར་འཁྲུལ་གྱུར་པས། །རྟེན་འབྲེལ་ཡན་ལག་བཅུ་གཉིས་སུ། །ལུགས་སུ་འབྱུང་བས་འཁོར་བ་ཡིན། །ཆོས་ཉིད་སྣ་ཚོགས་འཁོར་ལོར་ནི། །ལམ་དུ་སྤྱོད་པར་རིམ་ཤེས་བྱ། །ལོག་པས་ལྟ་དང་བརྟུལ་ཞུགས་འཛིན། །

89-1-249b

དེ་འབྲལ་གོལ་བས་ཐར་པ་མེད། །དམན་པས་མངོན་མཐོང་སྤྱོད་པ་ལས། །དཀར་པོའི་ཕྱོགས་གནས་སྐྱབས་གསུམ་ལས། །མོས་པས་ཉན་རང་ཞི་བའི་ལམ། །ངལ་བསོ་ཙམ་ལས་རྣམ་དག་མིན། །ཁྱད་པར་བྱང་ཆུབ་
སེམས་དཔའི་ལམ། །རྩ་བ་ས་བོན་བྱང་ཆུབ་སེམས། །དེ་ལས་རིན་ཆེན་ལྗོན་ཤིང་གི། །པད་སྡོང་ལོ་འདབ་མེ་ཏོག་རྒྱས། །འབྲས་བུ་བདེ་གཤེགས་ཡིད་བཞིན་ནོར། །དགོས་འདོད་དྲི་མ་མེད་པའི་གཏེར། །རྟེན་འབྲེལ་
ལུགས་བཟློག་ཆོས་འབྱུང་བའི། །ཟབ་དང་རྒྱ་ཆེའི་སྙིང་པོ་ནི། །གྲུབ་མཐའ་དུ་མ་རྟོགས་པའི་གནས། །དེ་ནི་ཡང་དག་གནས་མི་འཐོབ། །གསང་བ་རྡོ་རྗེ་ཐེག་པ་ལས། །རྒྱུད་སྡེའི་སྙིང་པོ་འདུས་པའི་དོན། །དུག་ལྔའི་
རྟོག་པ་སྦྱངས་གྱུར་པས། །དབང་དང་ལས་ཀྱི་རིམ་པ་ལས། །སྐུ་གསུམ་ས་ཡི་དབང་ཕྱུག་འཐོབ། །ཕྱི་ནང་སྤྱོད་པའི་དོན་གནས་ལ། །དམ་ཚིག་གནས་པའི་ཚུལ་བཞིན་སྤྱོད། །སྤྱི་དང་ཁྱད་པར་སྐུ་གསུམ་དང་། །
སྐུ་བཞི་ཡེ་ཤེས་རྫོགས་པའི་གནས། །མངོན་པར་བྱང་ཆུབ་ལྔ་དང་ནི། །དྲུག་པ་དང་པོའི་མགོན་པོ་ལས། །ཡེ་ཤེས་རྒྱ་མཚོ་སྤྲིན་འཕྲོ་བས། །རིགས་ནི་བརྒྱ་དང་སྟོང་དག་ཏུ། །སྤྲོས་དང་སྡུད་པ་གསང་ཆེན་གྱི། །
གཅིག་པ་མི་ཟད་སེམས་བསྐྱེད་པ། །བྱང་ཆུབ་སེམས་འདི་བསྟན་པ་ཡང་། །དཀྱིལ་འཁོར་སྙིང་པོར་འབྱུང་བ་ཡིན། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་
པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་ལས་སྙིང་པོ་མཆོག་ཏུ་བསྐུལ་བ་དང་ཡོངས་སུ་དག་པར་སྟོན་པའི་ལེའུ་སྟེ་བདུན་བཅུ་པའོ།། །། དེ་བཞིན་གཤེགས་པ་
ཐམས་ཅད་ཀྱི་སྐུ་དང་གསུང་དང་ཐུགས་ཀྱི་མཆོད་པ་གསང་བ་བླ་ན་མེད་པ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་རབ་ཏུ་ཕྱུང་ངོ་། །དབང་པོ་གཉིས་ཀྱི་སྦྱོར་བ་ཡིས། །བདག་གི་ཁུ་བ་ལ་སོགས་པས། །

89-1-250a

ཆོ་ག་བཞིན་དུ་ཀུན་མཆོད་ན། །སངས་རྒྱས་བྱང་ཆུབ་ཐོབ་པར་འགྱུར། །རིག་མ་གཟུགས་བཟང་མདངས་དང་ལྡན། །ལོ་གྲངས་བཅུ་དྲུག་ལོན་པ་ལ། །བྱིན་གྱིས་བརླབས་ཀྱི་གནས་གསུམ་གྱིས། །དབེན་
མཆོད་པ་རབ་ཏུ་བརྩམ། །དེ་བཞིན་གཤེགས་པའི་བཙུན་མོ་མཆོག །སྤྱན་ལ་སོགས་པར་བསྒོམ་པར་བྱ། །ཡི་གེ་ཧཱུྃ་དང་ཨོཾ་དག་དང་། །ཨཱཿདང་ཕཊ་ཀྱང་རབ་ཏུ་བསྒོམ། །འོད་ཟེར་སྣ་ལྔས་ཁྱབ་པ་ཡིས། །པད་མ་
རྡོ་རྗེ་རྩེ་གཅིག་པ། །འབར་བཅས་ཟླ་འོད་བཞིན་དུ་དགར། །ཡིད་དུ་འོང་བ་བསྒོམ་པར་བྱ། །དབང་པོ་གཉིས་ནི་མཉམ་སྦྱར་བས། །སངས་རྒྱས་དངོས་གྲུབ་ཐོབ་པར་འགྱུར། །བྷ་ག་ལ་ནི་ལིངྒ་གཞག །
སངས་རྒྱས་གཟུགས་ནི་རྣམ་བསམ་ནས། །བ་སྤུའི་བུ་ག་ཐམས་ཅད་ནས། །རང་རིགས་ལས་བྱུང་རབ་ཏུ་སྤྲོ། །འདི་ནི་བདེ་བ་མཆོག་གྱུར་པ། །གསང་བ་ཡེ་ཤེས་གྲུབ་པའི་གཙོ། །དཀྱིལ་འཁོར་འཁོར་ལོའི་ཚུལ་
དུ་བྱ། །རབ་ཏུ་དབེན་པའི་ས་ཕྱོགས་སུ། །དཀྱིལ་འཁོར་བདུད་རྩི་ལེགས་བྱུགས་པ། །ཤེས་རབ་ཡུམ་གྱི་བྷ་ག་ཡི། །དཀྱིལ་འཁོར་པད་མའི་དབྱིབས་གནས་པ། །ཁ་དོག་དམར་པོ་ཨེ་ཡི་དབྱིབས། །དེ་ལ་གསང་བའི་
ལྷ་ཚོགས་ཀྱི། །ཐིག་ལེ་དཀར་པོ་སུམ་བཅུ་གཅིག །བྃ་གྱི་རྣམ་པར་བརྗོད་པ་ཡིན། །དེར་འཇུག་ཆོ་ག་བརྟག་པ་ཡིས། །མཁས་པས་རིམ་པ་ཤེས་པར་བྱ། །བྲམ་ཟེ་རྒྱལ་རིགས་རྗེའུ་རིགས་དང་། །དམངས་རིགས་
གདོལ་པའི་རིགས་ཅན་ལས། །སྨེ་ཤ་ཅན་ནི་བཅུ་གཉིས་མ། །ལང་ཚོར་ལྡན་ཞིང་སྒེག་པ་དང་། །བཞིན་བཟངས་མིག་དཀྱུས་རིང་བ་ནི། །མཁས་པས་མཚན་ཉིད་ཡོངས་ཤེས་པས། །རིག་མ་ཡོངས་སུ་སྦྱངས་པ་གཞུག །
བླ་མ་ལ་ནི་དབུལ་བྱ་ཞིང་། །གང་དུ་མཎྜལ་མེ་ཏོག་དང་། །མཆོད་པ་ཡེ་ཤེས་སྔོན་བྱས་ཏེ། །བྷ་གའི་དཀྱིལ་འཁོར་དེ་ཉིད་དུ། །རྡོ་རྗེ་སློབ་དཔོན་གསང་བ་འཛིན། །མེ་ཏོག་བཅས་པའི་ལྷ་མོ་ལ། །མཉམ་པར་ཕྱག་བྱ་གསོལ་བ་གདབ། །

89-1-250b

མགོན་པོ་གསང་བ་འཛིན་པ་པོ། །སེམས་དཔའ་ཆེན་པོ་བདག་འཚལ་ལོ། །སངས་རྒྱས་ཀུན་གྱི་ཡེ་ཤེས་ཆེ། །ཐམས་ཅད་སྟོང་པ་བླ་ན་མེད། །མཚན་ཉིད་ཉམས་མྱོང་གཅིག་པ་ཉིད། །རྡོ་རྗེ་གསང་བས་བདག་ལ་གསོལ། །
ལས་དང་སྐྱེ་བ་ལས་གྲོལ་བའི། །ཚེ་འདིར་བྱང་ཆུབ་མཆོག་ཐོབ་ལ། །ཁྱོད་ཞབས་པད་མ་སྤངས་ནས་ནི། །གཙོ་བོ་གཞན་དུ་སྐྱབས་མ་མཆིས། །འགྲོ་བའི་དཔའ་བོ་ཐུབ་ཆེན་པོ། །དེ་བས་བློ་མཆོག་མཉེས་པར་མཛོད། །དེ་ལྟར་
གསོལ་བ་གདབ་པ་མཆོག །དམ་པ་དེས་ནི་ཐོབ་གྱུར་ནས། །དཔལ་ལྡན་བླ་མ་ཡོན་ཏན་མཚོས། །སྙིང་རྗེ་སློབ་མ་ལ་བསྐྱེད་དེ། །བཞིན་ནི་རབ་ཏུ་དང་གྱུར་ནས། །རང་གི་བརྩེ་བར་རབ་དགའ་ཞིང་། །གསང་བ་རྒྱུད་ལས་བདེ་
ཐོབ་པ། །བཟང་པོའི་དམ་ཚིག་དཀྱིལ་འཁོར་བསྟན། །དེ་ནས་སློབ་དཔོན་སྙོམས་ཞུགས་ནས། །ཀ་ལ་ཤ་འམ་དུང་ཆོས་སུ། །བྱང་ཆུབ་སེམས་ནི་རབ་དབྱུང་སྟེ། །ཨོཾ་ཨཱཿབཛྲ་དྷྲཱིག་ཧཱུྃ། བཟང་པོའི་ཕྲེང་བ་ཉེ་བར་སྦྱིན། །
དེ་ནས་སློབ་མ་དེ་ལ་ནི། །རྫོགས་སངས་རྒྱས་ཀྱིས་བྱིན་བརླབས་ཏེ། །རྒྱལ་བའི་ཕྱག་རྒྱར་བཅས་པ་ཡིས། །དམ་ཚིག་གསང་བ་སྦྱིན་གྱུར་པ། །རྡོ་རྗེ་ཅན་ནི་ཕྱེད་དུས་སུ། །དབང་བསྐུར་བ་ནི་སྦྱིན་པར་བྱ། །བཀྲ་ཤིས་སྒྲ་ནི་
བསྒྲགས་པ་དང་། །རོལ་མོའི་སྒྲ་སྐད་སྣ་ཚོགས་ཀྱིས། །དཀྱིལ་འཁོར་འཁོར་ལོའི་རྒྱལ་པོ་ཡིས། །ཁམས་གསུམ་རྡོ་རྗེས་དབང་བསྐུར་བ། །སློབ་མ་འདུད་ཅིང་ཐལ་སྦྱར་བ། །འདིར་ནི་རབ་ཏུ་བསྐུར་བ་ཡིས། །ཁྱད་
པར་ནང་དུ་ངེས་དབང་བསྐུར། །ཕྲེང་བ་ཆུ་དང་རྫོགས་སངས་རྒྱས། །རྡོ་རྗེ་དྲིལ་བུ་མིང་དང་ནི། །སློབ་དཔོན་དག་དང་གནང་བ་སྦྱིན། །དབུགས་དབྱུང་གཟེང་བསྟོད་ལུང་བསྟན་པས། །དབང་བསྐུར་རིམ་པ་འདི་སྦྱིན་བྱ། །
དེ་ནས་བདག་བྱིན་བརླབ་པའི་རིམ། །བཅུད་དུ་བྱ་བའི་ཐབས་བསྟན་པ། །ཀུན་རྫོབ་བདེན་པ་ཡང་དག་སྦྱིན། །བྱང་ཆུབ་སེམས་ཀྱི་དཀྱིལ་འཁོར་དུ། །ཁྱད་པར་བདེ་ཆེན་དབང་བསྐུར་བ། །རིག་མ་དག་པར་སྦྱངས་པ་དང་། །

89-1-251a

མཎྜལ་མེ་ཏོག་བཅས་པ་ཡིས། །དེ་ནས་གསོལ་བ་གདབ་པར་བྱ། །སླར་ཡང་བླ་མས་གསང་བ་བརྗོད། །ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གྱིས། །
གཙོ་བོས་བདག་ལ་བཀའ་དྲིན་སྩོལ། །ཁྱོད་ཞབས་པད་མ་སྤངས་ནས་ནི། །གཙོ་བོ་གཞན་ལ་སྐྱབས་མ་མཆིས། །འགྲོ་བའི་དཔའ་བོ་ཐུབ་ཆེན་གྱིས། །བདག་ལ་ངེས་པར་དབང་བསྐུར་ཅིག །དེ་ལྟར་ལན་གསུམ་བརྗོད་ནས་ནི། །
བླ་མ་ལ་ནི་བཀའ་སྩལ་ཞུ། །ལྷ་མོ་གཟུགས་བཟང་མདངས་ལྡན་པ། །ལོ་གྲངས་བཅུ་གཉིས་ལོན་རྙེད་ལ། །རིགས་ཀྱི་སྦྱོར་བས་རབ་བསྒོམས་ཏེ། །བདག་གི་ཁུ་བས་མཆོད་པར་བྱ། །རྡོ་རྗེ་སློབ་དཔོན་བློ་གྲོས་ཆེས། །དེ་ཡི་ལག་
པ་དེར་གཏད་དེ། །གཟུངས་མ་ཤིན་དུ་ཉམས་དགའ་འདི། །བསྟེན་བྱར་སངས་རྒྱས་རྣམས་ཀྱིས་བརྟགས། །རྡོ་རྗེ་པད་མ་རབ་སྦྱོར་བའི། །བདེ་བ་དམ་པ་ཡང་དག་མྱོང་། །བདེ་བ་དཔག་མེད་འབྱུང་བའི་གཞི། །ཡེ་ཤེས་ཆེན་པོ་འདིར་
རྟོགས་བྱ། །ཐབས་གཞན་གྱིས་ནི་སངས་མི་རྒྱ། །འདི་ལས་གཞན་པ་མཆོག་མེད་དེ། །འགྲོ་བ་གསུམ་པོ་དག་རིག་པར། །དགའ་བ་ཡང་དག་རྟོགས་པར་གྱིས། །དེ་བས་ནམ་ཡང་འདི་དང་ནི། །ཁྱེད་ཀྱིས་བྲལ་བར་མ་བྱེད་ཅིག །
འདི་དེ་སངས་རྒྱས་ཐམས་ཅད་དེ། །རིག་པའི་བརྟུལ་ཞུགས་བླ་ན་མེད། །རྨོངས་པ་གང་ཞིག་འདི་སྤོང་བ། །དེ་ལ་མཆོག་གི་དངོས་གྲུབ་མེད། །དེ་ནས་དྲི་ཞིམ་མེ་ཏོག་སྤྲས། །གཅེར་བུ་ཆུ་སྐྱེས་སྟོན་པར་མཛད། །བཤང་གཅི་ལ་སོགས་
ཟ་བ་དང་། །ཁྲག་དང་ཁུ་བ་དེ་བཞིན་ཤ ། རྟག་པར་བུད་མེད་མཆོག་གུས་པས། །བྷ་གའི་པད་མར་འོ་བྱེད་དང་། །ཇི་ལྟར་སྤྲོ་བར་བྱེད་དམ་ཅི། །ཇི་ལྟར་བདེ་བར་སྨྲོས་ཤིག་བུ། །དེ་ནི་ཉེ་བར་གཟུང་བྱ་བ། །བཤང་གཅིའི་བདུད་རྩི་བཟའ་
བྱ་བ། །བུད་མེད་རྟག་གུས་ཅིས་མི་བགྱིད། །གསང་བའི་པད་མར་འོ་བྱེད་པ། །ལྷ་མོ་བདག་ནི་ཅིས་མི་སྤྲོ། །དེ་ནི་ཉེ་བར་གསན་པ་ཡིས། །གསང་བའི་ཚིག་འདི་བརྗོད་པར་འགྱུར། །ཨེ་མ་ཧོ་བདག་གི་པད་མ་འདི། །བདེ་བ་ཐམས་

89-1-251b

ཅད་ཀྱི་ནི་གནས། །གང་ཞིག་ཆོ་ག་བཞིན་སྟེན་པ། །དེ་ཡི་མདུན་ན་བདག་གནས་ཏེ། །སངས་རྒྱས་བསྟེན་པ་ལ་སོགས་པ། །པད་མར་བྱ་བ་ཇི་བཞིན་གྱིས། །བདེ་ཆེན་རྒྱལ་པོར་རང་ཉིད་ནི། །འདི་ཉིད་དུ་ནི་རྟག་ཏུ་བཞུགས། །
བྷཉྫ་མོཀྵ་ཧོ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་བ་ཨཱད་མ་ཀོ྅ཧཾ། འདོད་ཆགས་བྲལ་བ་ལྟ་བུ་ཡི། །ཁམས་གསུམ་ན་ནི་སྡིག་མེད་དེ། །དེ་བས་འདོད་ལ་ཆགས་བྲལ་བར། །ཁྱོད་ཀྱིས་ནམ་ཡང་མ་བྱེད་ཅིག །བདེ་
ཆེན་རང་བྱུང་ཕྱག་རྒྱའི་དབུས། །རྡོ་རྗེ་དཀྱིལ་དཀྲུང་ལ་སེམས་ནི། །ནོར་བུའི་ནང་དུ་བརྟག་པར་བྱ། །རྒྱུ་འཐུན་ལ་སོགས་བདེ་བ་ལས། །ཡེ་ཤེས་སྐྱེ་བས་དེ་བཞིན་དུ། །དྲི་མ་མེད་པའི་དོན་དུ་ནི། །ཐོབ་པ་སྦྱོར་བ་ལས་བྱུང་བ། །བྷ་
གར་ལིངྒ་གཞག་བྱ་སྟེ། །བྱང་ཆུབ་སེམས་ནི་དབྱུང་མི་བྱ། །ཁམས་གསུམ་མ་ལུས་ཐམས་ཅད་ལས། །སངས་རྒྱས་གཟུགས་སུ་བསྒོམ་པར་བྱ། །མི་འགྱུར་མཆོག་ཏུ་བདེ་འཐོབ་པའོ། །ཚངས་སྤྱད་བརྟན་པས་གནས་པ་ནི། །
ཡོངས་སུ་སྡོམ་པ་རིག་པ་འཛིན། །རྣལ་འབྱོར་དབང་ཕྱུག་གར་མཁན་ཏེ། །སྡོམ་པ་བཅོམ་ལྡན་ཡང་དག་འཛིན། །འདིར་ནི་རིམ་པ་འདི་ཤེས་བྱ། །ཤ་ཆེན་དམ་ཚིག་མཆོག་གིས་ནི། །རྡོ་རྗེ་གསུམ་མཆོག་བསྒྲུབ་པར་བྱ། །རྡོ་རྗེའི་
རིགས་ལས་ངེས་བསྟན་པའི། །སྤྱད་བྱ་སྟོབས་ལྡན་མཆོག་འདི་ཡིན། །གྷོ། སངས་རྒྱས་རིགས་ནི་དག་པ་ཡི། །ལྷ་མོ་རྣམས་ཀྱིས་བྱིན་བརླབས་པ། །བ་གླང་ཤ་ཡི་རིགས་དག་པས། །རྡོ་རྗེ་དགུག་པའི་དམ་ཚིག་ཡིན། །ཀུ། ཟ་བྱེད་
འཐུང་ཞིང་ཀུན་དུ་རྒྱུ། །རིན་ཆེན་རིགས་ལ་ངེས་འབྱུང་བའི། །ཁྱི་ཤ་དག་གི་དམ་ཚིག་གིས། །དངོས་གྲུབ་ཐམས་ཅད་འགྲུབ་པར་འགྱུར། །དྷ། མྱུར་དུ་འགྲོ་ཞིང་ཤུགས་དང་ལྡན། །པད་མའི་རིགས་ཀྱིས་བྱིན་བརླབས་
པའི། །རྟ་ཤ་དག་གི་དམ་ཚིག་གིས། །མི་སྣང་བ་ཡི་བདག་པོར་འགྱུར། །ཧ། གཡུལ་དུ་དཔའ་ཞིང་མི་ལྡོག་པ། །ལས་ཀྱི་རིགས་ཀྱིས་བྱིན་བརླབས་པའི། །གླང་པོའི་ཤ་ཡི་དམ་ཚིག་གིས། །མངོན་ཤེས་ལྔ་དག་ཐོབ་འགྱུར་རོ། །མུ། 

89-1-252a

པད་མའི་རིགས་ཀྱིས་བྱིན་བརླབས་པའི། །རྟ་ཤ་དག་གི་དམ་ཚིག་གིས། །མི་སྣང་བ་ཡི་བདག་པོར་འགྱུར། །ཧ། གཡུལ་དུ་དཔའ་ཞིང་མི་ལྡོག་པ། །ལས་ཀྱི་རིགས་ཀྱིས་བྱིན་བརླབས་པའི། །གླང་པོའི་
ཤ་ཡི་དམ་ཚིག་གིས། །མངོན་ཤེས་ལྔ་དག་ཐོབ་འགྱུར་རོ། །མུ་ཕྱག་རྒྱ་ཆུ་ཡི་རྣམ་པ་ལས། །ཞེ་སྡང་དཔའ་བོ་རྡོ་རྗེ་འཛིན། །བཤང་གཅི་དམ་ཚིག་མཆོག་འདི་ནི། །རིག་པ་འཛིན་པའི་གཙོ་བོར་འགྱུར། །བྷི། བཞི་
མཉམ་ལུས་ལས་འབྱུང་བའི་གནས། །གཏི་མུག་འདྲེན་པ་འཁོར་ལོ་ཆེ། །རྣམ་སྣང་དམ་ཚིག་མཆོག་གིས་ནི། །ཡིད་བཞིན་ནོར་བུའི་དཔལ་ལྡན་འགྱུར། །མཿསྒོ་དགུ་ནས་བྱུང་རྒྱུངས་པ་དང་། །ཀླད་པ་རྐང་དུ་བཅས་པ་ལས། །
རིན་ཆེན་ང་རྒྱལ་འཛིན་པའི་སྐུས། །འདིས་ནི་པད་མའི་མདངས་ཅན་འགྱུར། །རཱ་ཛའི་བུ་གར་རང་བྱུང་བའི། །རཱ་ག་འབར་བའི་འོད་ཅན་ནི། །འདོད་ཆགས་ཆེན་པོའི་འབྱུང་གནས་ལས། །འཛམ་བུའི་ཆུ་བོའི་འོད་ལྟར་
འགྱུར། །ཤུ། ལུས་ཀུན་ལས་ནི་འབྱུང་བའི་རྒྱུ། །ཀུན་ད་ལྟ་བུའི་བྱང་ཆུབ་སེམས། །ལས་ཀྱི་ཕྲིན་ལས་རལ་གྲི་ཆེ། །ཕྲིན་ལས་སྣ་ཚོགས་དབང་ཐོབ་འགྱུར། །མྃ། ཀུན་དུ་མྱོས་བྱེད་བཅུད་བསྡུས་པའི། །སྙིང་པོ་འཆི་མེད་
རྟོག་མེད་པའི། །ཡེ་ཤེས་འབྱུང་གནས་ཁུ་བ་འདི། །རྣལ་འབྱོར་པ་ཡི་གྲོལ་བའི་རྒྱུ། །འཇིག་རྟེན་ཀུན་དུ་རྒྱལ་བྱེད་པ། །གསང་བ་དག་པའི་དམ་ཚིག་གནས། །ཧཱུྃ་བྷྲུྃ་ཏྲཱྃ་ཧྲཱིཿཁྃ་ལྃ་མྃ་པྃ་ཏྃ་ཨཱཿ སྒྲོན་མེ་ལྔ་ནི་རྣམ་
དག་པས། །ཡིད་བཞིན་ནོར་བུ་མཆོག་སྟེར་བྱེད། །དུག་ལྔ་བདུད་རྩིར་དག་པས་ནི། །ཡེ་ཤེས་ལྔ་ཐོབ་ཕྱིར་མི་ལྡོག །འཁོར་ལོ་འོད་འཕྲོ་མདངས་མཆོག་ཅན། །རང་གི་སྔགས་ཀྱིས་རབ་བསྒོམས་ནས། །སངས་རྒྱས་
ཐམས་ཅད་གཞུག་པར་བྱ། །འདིས་ནི་གསང་བ་འཛིན་པར་འགྱུར། །གསང་བ་ཤེས་རབ་ལ་བརྟེན་པའི། །སྦྱངས་པའི་ཡོན་ཏན་དག་པ་ནི། །རྣལ་འབྱོར་དབང་ཕྱུག་ཀུན་གྱི་གནས། །འདི་དག་རིམ་པས་སྦྱང་བར་བྱ། །

89-1-252b

ཇི་བཞིན་གཞི་ལ་སྤྱོད་པ་ལས། །དངོས་པོའི་གནས་ལུགས་ལམ་གྱུར་པའི། །ཐབས་དང་ཤེས་རབ་རོལ་པས་ནི། །འདོད་ཡོན་ལམ་དུ་བྱེད་པའོ། །གང་དུ་ཕྱག་དར་ཁྲོད་པ་ཡི། །གོས་འཆང་སྤྱོད་པ་ཀུ་སུ་ལུ། །བསྐུས་ཏེ་བོར་
བའི་སྨན་ཟ་བས། །འདིར་ནི་སྣ་ཚོགས་ཆོས་སུ་སྤྱད། །སྤྱོད་ལམ་ཀུན་དུ་འདྲིས་པ་ལས། །ཕྱིང་བུ་ཚལ་པ་ཙམ་འཛིན་པ། །འདི་ནི་ཕྱོགས་མེད་གོས་ཅན་ཏེ། །རྣམ་པ་ཐལ་བ་ཡིས་བྱུགས་ཡིན། །གང་དུ་ཆོས་གོས་གསུམ་
པ་ནི། །སྟོད་གཡོགས་གླང་པོའི་པགས་པ་དང་། །མི་ཡི་པགས་པ་ཉིད་ལ་རྟེན། །སྨད་དཀྲིས་སྟག་གི་ཀོ་བས་དཀྲིས། །ཕྱིས་མི་ལེན་པ་ལན་གཅིག་སྟེ། །སྤྲོས་པ་གཅོད་པར་བྱེད་པ་ཡིས། །བྱིན་གྱིས་མ་བརླབས་ཟས་
དང་གོས། །སྐད་ཅིག་ཙམ་དུ་སྟེན་མི་བྱེད། །རང་ཉིད་ལྷན་ཅིག་ཕྱག་རྒྱར་བཅས། །སྣོད་གཅིག་ཟ་བའི་གཙང་སྦྲ་ལས། །དུ་མར་འབྱུང་བ་མ་ཡིན་པ། །ཚོགས་ཀྱི་འཁོར་ལོ་གཅིག་ཏུ་གྲགས། །ལམ་གྱི་བཞི་མདོའམ་ཤིང་
གཅིག་དྲུངས། །གདུག་པ་མ་ལུས་གདུལ་དོན་དུ། །ཕྱག་རྒྱར་བཅས་པའམ་གཅིག་ཏུ་ཡང་། །བརྟུལ་ཞུགས་སྦྱོར་བས་གནས་པར་བྱེད། །ཆུ་གླིང་རི་སུལ་བླ་མགབ་མེད། །དེར་ནི་གཅེར་བུའི་རོལ་པ་ཡིས། །བདུད་རྩི་ཟ་ཞིང་རིག་
མ་དང་། །གཅིག་པར་གནས་པའི་སྤྱོད་པ་ཆེ། །ཁ་ཊྭཱཾ་ཊཱ་མ་རུར་བཅས་ཤིང་། །ཐོད་པའི་ཚལ་བུས་རྫས་ཁྱེར་ཏེ། །ཤིན་དུ་གསང་བས་སྤྱོད་པ་ནི། །བས་མཐར་གནས་པ་དབེན་པའོ། །དུར་ཁྲོད་རབ་སོན་དགེ་འདུན་སར། །
ཆོས་ཀུན་བདག་མེད་མི་རྟོག་པས། །རྟོག་པ་དོར་བས་གནས་པ་གང་། །དུར་ཁྲོད་པ་ཞེས་བརྗོད་པའོ། །ཐ་དད་མེད་པའི་ཏིང་འཛིན་གྱིས། །དུ་མའི་སྣང་བ་རོ་མཉམ་པས། །ཀུན་དུ་བསོད་ནམས་བྱེད་པ་དག །
རོ་སྙོམས་ཡེ་ཤེས་སྤྱོད་པ་ཡིན། །འདི་དག་ལྡན་པའི་རྣལ་འབྱོར་པ། །དགེ་སློང་ཆེན་པོར་ཤེས་པར་བྱ། །ཚངས་པར་སྤྱོད་པ་མི་ལྡོག་པས། །ཀུན་དུ་ཡེ་ཤེས་འབྲལ་མི་བྱེད། །འཇིག་རྟེན་སྒྱུ་མའི་སྣང་བ་ལས། །

89-1-253a

ཆགས་པ་མེད་པའི་དགྲ་བཅོམ་པ། །བྱང་ཆུབ་སེམས་དཔའི་ཚུལ་འཐོབ་པའོ། །གསང་བ་སྦྱངས་པའི་ཚུལ་འདི་ནི། །གཞན་དུ་རྟོགས་པར་མི་འགྱུར་བ། །རྡོ་རྗེ་འཛིན་པས་བསྟན་པ་ཡིན། །དེ་བཞིན་གཤེགས་
པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ། མཉམ་པ་ཉིད་རྣམ་པར་རྒྱལ་བ་ལས་མཆོག་ཏུ་གསང་བའི་དབང་དང་། སྤྱོད་པ་བསྟན་པའི་ལེའུ་སྟེ་
དོན་གཅིག་པའོ།། །། དེ་ནས་རྒྱལ་པོ་རྡོ་རྗེ་འཛིན། །ཆོས་རྣམས་ཐམས་ཅད་མི་འགྱུར་ཏེ། །ཐམས་ཅད་དབང་བསྐུར་ཡེ་ཤེས་མཆོག །ཡེ་ཤེས་དཀྱིལ་འཁོར་གསང་བ་བཤད། །ཞིང་འདིར་རིན་ཆེན་བདུན་དག་གིས། །
མཁས་པས་ཁྱབ་པར་ཡོངས་བཀང་སྟེ། །ཁྱད་པར་ཡེ་ཤེས་བདེ་དོན་དུ། །ཤེས་རབ་ལྡན་པས་བླ་མར་དབུལ། །དེ་མདུན་ཡན་ལག་རྣམ་དག་པས། །དཔེ་མེད་རོལ་པས་དབུལ་བར་བྱ། །ཁུ་བ་བྱུང་བས་རང་ལུས་ལས། །
དཀྱིལ་འཁོར་ལྷ་ཚོགས་སྤྲོ་བ་སྟེ། །རིགས་ཀྱི་ལྷ་རྣམས་ཆོ་ག་བཞིན། །ལུས་ལ་ཉེ་བར་དགོད་པའོ། །ཡེ་ཤེས་འབྲས་བུ་ཐོབ་འདོད་པས། །གཉིས་སུ་མེད་པར་བཏུང་བར་བྱ། །དེ་བཞིན་གཤེགས་པའི་འཁོར་ལོའི་ཚོགས། །
བསྡུ་བ་ཉིད་ཀྱིས་ཉེར་གསད་པ། །འདི་ནི་དངོས་གྲུབ་རྒྱ་མཚོ་ཡི། །བླ་མེད་འབྲས་བུ་ཐོབ་འགྱུར་བའོ། །མཁའ་དབྱིངས་རྡོ་རྗེ་སྟོང་པ་ཉིད། །དབུས་གནས་མངོན་པར་བྱང་ཆུབ་བརྗོད། །དེ་ཉིད་མེ་ལོང་ཡེ་ཤེས་ལྡན། །
ཟླ་བའི་དཀྱིལ་འཁོར་རབ་ཏུ་བརྟག །ཉི་མ་མཉམ་ཉིད་ཡེ་ཤེས་ཏེ། །བདུན་དང་ལྡན་པའི་དབུས་ཉིད་དོ། །སྔགས་ནི་དབུས་སུ་གནས་གྱུར་གང་། །ས་བོན་སོ་སོར་རྟོག་པ་སྟེ། །མངོན་པར་བྱང་ཆུབ་པ་ཉིད་དོ། །
རྡོ་རྗེ་ལ་སོགས་གང་གནས་པ། །སངས་རྒྱས་དཀྱིལ་འཁོར་བསྒོམ་པར་བྱ། །ཡོངས་སུ་རྫོགས་པའི་སྐུ་གསུང་ཐུགས། །ཞལ་གསུམ་རྩ་གསུམ་བརྗོད་པར་བྱ། །སྐུ་གསུམ་ལུས་ངག་ཡིད་ཡིན་ཏེ། །དེ་ཉིད་

89-1-253b

མངོན་པར་བྱང་ཆུབ་བརྗོད། །རྡོ་རྗེ་འཁོར་ལོ་པད་མ་དང་། །ནོར་བུ་རལ་གྲི་འབར་བ་ལས། །རྣམ་པར་འཕྲོ་བ་བསམ་པ་སྟེ། །བླ་མེད་ཡེ་ཤེས་བྱང་ཆུབ་བརྗོད། །སྤྲོ་དང་སྡུད་པར་བྱེད་པའོ། །རྣམ་པའི་མཆོག་ནི་
ཀུན་ལྡན་པ། །སྐད་ཅིག་གཅིག་ལ་རབ་རྫོགས་པ། །རྫོགས་པའི་རྣལ་འབྱོར་ཞེས་བརྗོད་དོ། །བྱང་ཆུབ་སེམས་ནི་དག་པ་དང་། །གསང་སྔགས་ས་བོན་བསྐྱེད་པ་ཅན། །ཕྱག་རྒྱའི་ཚོགས་སུ་བརྟགས་
པ་ཡིས། །རིམ་གྱིས་གཟུགས་ནི་རྫོགས་བྱེད་པ། །དེ་ནི་བསྐྱེད་པར་བརྗོད་པ་སྟེ། །རྣལ་འབྱོར་ཆོ་ག་ཡིན་པར་གསུངས། །དེ་ནས་གསང་བའི་དངོས་བསྡུས་པའི། །ཡེ་ཤེས་བསམ་གཏན་
གཉིས་ཀྱིས་ནི། །བདག་དང་བདག་གིར་འཛིན་པ་ཡི། །དངོས་པོ་སྲེག་བྱེད་ཡེ་ཤེས་མེད། །བསམ་གཏན་གཉིས་པོས་གཅིག་ཏུ་ཡང་། །སྟོང་ཉིད་ངང་དུ་གནས་བྱེད་པའོ། །རིལ་པོར་འཛིན་པའི་ཏིང་འཛིན་གྱིས། །གཟུང་བའི་རྟོག་
པ་སྤོང་བྱེད་ཅིང་། །ཤེས་རབ་ཟབ་མོའི་ངོ་བོ་ཉིད། །དེ་ཉིད་བསྡུ་བའི་ཚུལ་གྱིས་ནི། །སྒྱུ་མའི་ལུས་ཀྱི་སྣང་བ་ཉིད། །དངོས་པོའི་ཆོས་ཉིད་སྟོང་ཉིད་འཇུག །རྗེས་སུ་གཞིག་པས་ཏིང་ངེ་འཛིན། །འཛིན་པའི་རྟོག་པ་འཇོམས་བྱེད་པ། །
ཐབས་ཉིད་རྒྱ་ཆེའི་རང་བཞིན་ཅན། །དེ་ཉིད་སྤྲོས་པའི་ཚུལ་བསྟན་པས། །སྟོང་ཉིད་གཅིག་ཏུ་གནས་པ་ནི། །ཀུན་ཁྱབ་ཡེ་ཤེས་མཁའ་མཉམ་འགྲོ། །སྟོང་ཉིད་ཡེ་ཤེས་ཆེན་པོའི་མེས། །རང་བཞིན་རྟོག་པའི་གནས་ངན་ལེན། །
མངོན་རྒྱུ་བག་ཆགས་བཅས་པ་ཡི། །རང་བཞིན་བརྒྱ་དང་དྲུག་བཅུ་དང་། །ཐོག་མཐའ་མེད་པའི་བྱང་ཆུབ་སེམས། །རང་འབྱུང་ལྷན་ཅིག་སྐྱེས་པའི་ངང་། །དངོས་དང་དངོས་མིན་རྟོག་པའི་ཚོགས། །སྣང་བ་ཙམ་དུ་འཛིན་མེད་པར། །
སྟོང་ཉིད་འོད་གསལ་ནམ་མཁའ་ལ། །དབྱིངས་དང་ཡེ་ཤེས་དབྱེར་མེད་པས། །བདེ་བར་གཤེགས་པའི་ངང་དུ་འགྲོ། །དེ་ཉིད་ཀུན་ཁྱབ་ཀུན་གྱི་གནས། །བརྗོད་དུ་མེད་པའི་ཆོས་ཀྱི་སྐུ། །ཐམས་ཅད་འོད་གསལ་མངོན་བྱང་ཆུབ། །
དེ་ལྟར་མ་རྟོགས་མ་རིག་པས། །སྒྱུ་མ་ལྟ་བུའི་ཏིང་ངེ་འཛིན། །དེ་དག་རབ་ཏུ་མི་ཤེས་ཤིང་། །ཐོག་མེད་དུས་ཀྱི་ཉོན་མོངས་ཀྱི། །བག་ཆགས་རབ་ཏུ་བསགས་བྱེད་པ། །དེ་དག་སྔོན་གྱི་ལས་ཀྱིས་ནི། །སྐྱེ་དང་འཆི་བར་ཡང་དག་འབྱུང་། །

89-1-254a

རིག་པ་འོད་གསལ་དབྱིངས་གནས་ཀྱང་། །འགྱུ་བྱེད་རླུང་ལས་མ་རིག་བྱུང་། །དེ་ལས་སྣང་བ་དང་པོ་དང་། །མཆེད་པ་དག་དང་ཐོག་པ་དག །ལུགས་སུ་འབྱུང་བས་རྣམ་ཤེས་ལ། །རླུང་གི་སྤྱོད་པ་ཤིན་དུ་འཁྲུལ། །ང་དང་བདག་ཏུ་འཛིན་པ་ཉིད། །
ཡིད་ཀྱི་རྣམ་ཤེས་འགྱུར་བ་ཡི། །རླུང་ལས་ཀུན་དུ་འཁྲུལ་པའི་ལས། །འབྱུང་བ་དེ་ཉིད་ཁོ་ན་ལ། །མ་རིག་རྨོངས་པས་ལྟུང་བ་ནི། །བླ་མ་མེད་ཕྱིར་འཁྱམས་པའོ། །ཀུན་དུ་བརྟགས་པའི་མ་རིག་པ། །དངས་སྙིགས་གཉིས་སུ་རླུང་གིས་ཕྱེ། །དངས་མ་སྟོང་
ཉིད་ཡེ་ཤེས་སེམས། །ཀུན་གཞི་རང་བྱུང་ཆོས་ཉིད་གནས། །སྙིགས་མའི་སྣོད་བཅུད་ཁམས་གསུམ་དུ། །དུག་གསུམ་ངང་ལས་འབྱུང་བ་ནི། །སྲོག་འཛིན་རླུང་ལས་ཞེ་སྡང་སྐྱེས། །གྱེན་རྒྱུ་ལས་ནི་འདོད་ཆགས་བྱུང་། །གཏི་མུག་ཁྱབ་བྱེད་དུས་ཀུན་དུ། །
འབྲལ་བ་མེད་པས་གནས་པ་ཡིན། །དེ་ནས་མེ་དང་མཉམ་པ་ལས། །ཕྲག་དོག་འབྱུང་བར་གྱུར་པ་ཡིན། །ཐུར་སེལ་ལས་ནི་ང་རྒྱལ་དང་། །སེར་སྣ་མངོན་པར་བྱུང་བ་ཡིན། །རླུང་རྣམས་གང་ལས་འབྱུང་བ་ནི། །རིག་པ་ཀུན་དུ་རྟེན་གྱུར་པ། །ས་བོན་ཆ་ལས་
འབྱུང་བཞི་གནས། །དེ་ལས་རྩ་བའི་རླུང་དུ་བྱུང་། །ཕྱི་རོལ་འོད་ལྔའི་སྣང་བ་ལས། །ཞེན་པས་རྒྱུ་འབྲས་ལ་རྨོངས་ཤིང་། །མ་རིག་པས་ནི་དེ་དག་ལས། །རྟེན་འབྲེལ་བཅུ་གཉིས་ཚུལ་དུ་འཁོར། །དུག་གསུམ་ལས་ནི་རྩ་གསུམ་སྟེ། །ཆགས་སྡང་དབང་
གིས་ཕོ་མོར་བྱུང་། །དེ་ཕྱིར་སྔོན་གྱི་ལས་ཀྱིས་ནི། །སྐྱེ་བ་དང་ནི་འཆི་འཕོར་འགྱུར། །རབ་ཏུ་དངས་པ་རྣམ་པར་ཤེས། །འོད་གསལ་བྱང་ཆུབ་གནས་འདི་ཡིན། །ཅུང་ཟད་ཙམ་དུ་དངས་པ་ལ། །
བདེ་བ་ལས་ནི་འདོད་པར་གྱུར། །གསལ་བས་གཟུགས་ཁམས་ཀུན་དུ་སྐྱེ། །མི་རྟོག་པས་ནི་གཟུགས་མེད་དུ། །ངེས་པར་འཆར་བ་ཆོས་ཉིད་ཅན། །རྟེན་ཅིང་འབྲེལ་པར་འབྱུང་བ་ཡིན། །
ཁམས་ནི་སྙིགས་མར་གྱུར་པ་ལས། །ཀུན་དུ་འཕོ་ཞིང་རྒྱུ་བྱེད་པའི། །ནུས་པ་ཡོན་ཏན་ཅུང་ཟད་ཅན། །བསྐལ་པ་དང་པོའི་མི་ལྟར་འབྱུང་། །ཡུལ་གྱིས་འདོད་ཆགས་

89-1-254b

སད་པ་ལས། །ཚོགས་པ་མ་རྙེད་དེ་སྲིད་དུ། །བར་མ་དོ་ཡི་སྲིད་པར་གནས། །སྲིད་པར་ལྟུང་བའི་སེམས་ཅན་ནི། །བགྲོད་པས་འགྲོ་བ་ཇི་བཞིན་དུ། །ལས་ཀྱི་དྲ་བའི་ཞགས་པ་ཡིས། །
འགྲོ་བ་དྲུག་ཏུ་འཇོམས་པར་བྱེད། །དེ་ཉིད་རྒྱུ་རྐྱེན་སྔོན་འགྲོ་བས། །ཉེར་ལེན་འཇུག་པར་འདོད་པ་དང་། །རང་དབང་མེད་པར་འཇུག་པ་དང་། །སྐྱབས་གནས་ཚོལ་བའི་ཡིད་འགྲོ་བས། །
འཕེན་པ་སྟོབས་བྱུང་འཇུག་པར་འགྱུར། །གལ་ཏེ་མི་རུ་སྐྱེ་བ་ན། །ཕ་མའི་ཀུན་དུ་འཁྲིག་མཐོང་བས། །སྡུག་བསྔལ་ཉིད་ཀྱིས་གདུངས་གྱུར་ཏེ། །བཞོན་པར་བཅས་པའི་
མྱུར་འགྲོ་ལྟར། །རླུང་གི་བཞོན་པ་ལ་བརྟེན་ཏེ། །སྐད་ཅིག་ཐང་ཅིག་ཡུད་ཙམ་ལ། །ཤིན་དུ་མྱུར་བར་འོངས་གྱུར་པ། །དགའ་དང་བཅས་པའི་བསམ་པ་ཡིས། །བདེ་བའི་
ངང་དུ་སེམས་ཞེན་པས། །ཁ་ཡི་ལམ་ནས་ཐུར་དུ་འཇུག །ངན་འགྲོའི་གནས་ལ་ཕ་ཡི་ནི། །བཤང་བའི་ལམ་ནས་ཁང་བཟངས་སུ། །མཐོང་ནས་ཀུན་དུ་འཇུག་པར་འགྱུར། །
དུས་དེར་ཕ་མ་གཉིས་དང་ནི། །དུས་གཅིག་བདེ་བ་མྱོང་བྱས་པའི། །རྩ་ཕྲན་སྟོང་ཕྲག་བདུན་བཅུ་ལས། །རབ་བརྒྱུད་དེ་ཡི་སྐད་ཅིག་ལ། །ཨཱ་ལི་ཀཱ་ལིར་
ཞུགས་གྱུར་ཏེ། །མཆོག་ཏུ་དགའ་བ་ཡང་དག་འཐོབ། །ཁུ་བ་དང་ནི་ཁྲག་བཅས་པའི། །དབུས་སུ་བར་དོའི་ཤེས་པ་ནི། །འདུས་པ་ཐིག་ལེའི་གཟུགས་སུ་གནས། །
དང་པོའི་རྣམ་པ་ནུར་ནུར་པོ། །དེ་ལས་མེར་མེར་པོ་རུ་གྱུར། །ལྟར་ལྟར་པོ་དང་གོར་གོར་པོ། །རླུང་རྣམས་ཀྱིས་ནི་བསྐུལ་གྱུར་པས། །

89-1-255a

ཤ་ཡི་རྣམ་པ་མཁྲང་གྱུར་དུ། །ལྔ་པའི་དུས་སུ་རྐང་ལག་འགྱུ། །ཡན་ལག་ལྔ་ནི་དོད་གྱུར་པས། །བདུན་དུ་གྱུར་ཚེ་མཚན་མ་དང་། །སྐྲ་དང་སེན་མོ་བ་སྤུའི་
ཚོགས། །མཁྲང་བའི་ཆ་ཤས་རྫོགས་གྱུར་པའོ། །བརྒྱད་པའི་དུས་སུ་ཆེར་རྟགས་ཤིང་། །ཟླ་བ་དགུ་ན་ལུས་ཀུན་རྫོགས། །བཅུ་པ་ཡུལ་གྱི་རྩོལ་བ་བྱེད། །ནུར་ནུར་རང་བཞིན་མི་བསྐྱོད་པ། །
མེར་མེར་པོ་ནི་དཀོན་མཆོག་དཔལ། །ལྟར་ལྟར་པོ་ནི་འོད་དཔག་མེད། །གདོན་མི་ཟ་བ་གོར་གོར་པོ། །རྣམ་སྣང་མཁྲང་གྱུར་དག་ཏུ་བརྗོད། །གནས་སྐབས་འབྱུང་བ་ལྔ་ལྡན་པ། །
ཆུ་དང་རླན་གྱིས་སྡུད་པ་དང་། །དྲོད་དང་མེ་ཡིས་སྨིན་པར་བྱེད། །སས་ནི་བསྟན་དང་བསྐྱེད་པ་ལས། །རླུང་གིས་གཡོ་ཞིང་འཕེལ་བར་བྱེད། །ནམ་མཁའ་ཀུན་དུ་རྟེན་གྱུར་པའོ། །དྲི་ཆུ་ཁྲག་
ནི་འདུས་པ་ཡི། །དྲི་ཆུའི་ཆ་ནི་མི་བསྐྱོད་ཞུགས། །བཞི་མཉམ་རྣམ་པར་སྣང་མཛད་དེ། །ཁྲག་ནི་འདོད་ཆགས་མེད་པའི་ཆ། །ཤ་ནི་རིན་ཆེན་རྒྱལ་པོ་ཉིད། །ཁུ་བ་གདོན་མི་ཟ་བའི་ལུས། །
ཟླ་བ་མེ་ལོང་ཡེ་ཤེས་ཏེ། །ཉི་མ་མཉམ་པ་ཉིད་གྱུར་པ། །ས་བོན་རྣམ་པ་སོ་སོར་རྟོག །ཕྱག་མཚན་ལས་ནི་དེ་ཉིད་དེ། །ཐམས་ཅད་ཅིག་གྱུར་ནན་ཏན་བརྗོད། །ལུས་ཀྱིས་
གོང་བུ་བསྡུས་པ་ཡིས། །སྟོང་ཉིད་ཆོས་དབྱིངས་ཡེ་ཤེས་བརྗོད། །མངོན་པར་བྱང་ཆུབ་ལྔ་ཡིས་ནི། །བསྐྱེད་དང་གནས་དང་སྡུད་པར་མཛད། །དེ་ཉིད་ཡེ་ཤེས་ཡོངས་དག་པ། །སངས་རྒྱས་
ལྔ་ཡི་བྱང་ཆུབ་སེམས། །གསང་བ་མཆོག་ཏུ་བསྟན་པ་ཡིན། །སྐྱེ་གནས་དབུས་སུ་རྩ་གཉིས་ནི། །གཡས་དང་གཡོན་ན་དེ་བཞིན་གནས། །གཡོན་ནས་ཁུ་བ་དེ་བཞིན་ཏེ། །

89-1-255b

གཡས་ན་དེ་བཞིན་ཁྲག་ཡིན་ན། །དེ་དག་གཅིག་ཏུ་གྱུར་པ་ནི། །ཆོས་ཀྱི་དབྱིངས་ཀྱི་རང་བཞིན་ནོ། །ལས་ཀྱི་ས་བོན་དབང་ཐོབ་པས། །རླུང་གིས་ཡང་དག་བསྒྱུར་ནས་ནི། །ཆོས་ཀྱི་འབྱུང་
གནས་པད་མའི་སྣོད། །གདོང་ནི་ངེས་པར་ཕྱོགས་པར་གྱུར། །དཀུ་གཡས་སུ་ནི་བརྟེན་ནས་སུ། །ཙོག་པུར་མངོན་པར་ཕྱོགས་ཏེ་གནས། །དཀུ་གཡོན་ཡང་དག་བརྟེན་ནས་ནི། །
ཤེས་རབ་གཡས་སུ་མངོན་པར་ཕྱོགས། །ས་བོན་ལྷུང་བས་དུས་ཀྱིས་ནི། །མཁས་པས་དུས་ཀྱིས་སྐད་ཅིག་ལས། །ངེས་པར་བརྟག་པར་བྱ་བ་ཡིན། །གཡོན་ནས་རླུང་ནི་རྒྱུ་བ་ན། །ཐམས་ཅད་དུ་ནི་
སྐྱེས་བུར་བྱེད། །གཡས་ནས་ངེས་པར་རྒྱུ་བ་ནི། །ཀུན་དུ་བུ་མོར་འབྱུང་བ་ཡིན། །ཐབས་དང་ཤེས་རབ་ཆ་ལས་ནི། །བཟློག་པའི་གོ་རིམས་ཤེས་པར་བྱ། །གཉིས་ཀའི་དབུས་སུ་རྒྱུ་བས་ན། །
མ་ནིང་དང་ནི་ཟ་མར་འབྱུང་། །འདི་དག་འགྱུར་བ་ངོ་ཤེས་པས། །ཐོབ་པ་མཚན་ཉིད་བརྟག་པར་བྱ། །འདི་ལྟར་གསང་བའི་ལུས་འབྱུང་བ། །བསྐྱེད་དང་གནས་པ་འཇིག་ཚུལ་དུ། །འདིར་
ནི་རྒྱས་པར་བསྟན་པའོ། །དེ་ལྟར་བཅོམ་ལྡན་མགོན་གསུངས་ལ། །སངས་རྒྱས་བྱང་ཆུབ་སེམས་དཔའི་ཚོགས། །ཐམས་ཅད་དགྱེས་པ་བསྐྱེད་གྱུར་ཅིང་། །ཀུན་དུ་བཟང་པོའི་
ཚུལ་འདི་ཞུས། །མངོན་པར་བྱང་ཆུབ་ཡེ་ཤེས་ལས། །རིགས་ཀྱི་ཁྱད་པར་འབྱུང་བའི་དོན། །འགྲོ་བ་སངས་རྒྱས་རྣམ་པ་ཅན། །
ངོ་བོ་ཉིད་ཤེས་སྙིང་པོའི་གནས། །རྡོ་རྗེ་འཛིན་པས་གང་གསུངས་པ། །གཟུགས་དང་ཚོར་བ་འདུ་ཤེས་དང་། །འདུ་བྱེད་རྣམས་ནི་ཕུང་པོ་རུ། །རགས་དང་ཕྲ་དང་ཤིན་དུ་ཕྲ། །

89-1-256a

ལུས་འདི་དངོས་པོའི་ཚུལ་རྟོགས་པས། །ཕུང་པོར་ངེས་པར་སྐྱེས་པ་ཡིན། །སྲིད་པ་སྐྱེ་བའི་རིམ་ཤེས་པས། །རྫོགས་པའི་སངས་རྒྱས་ཐོབ་བྱའི་ཕྱིར། །འདི་ནི་རྣམ་པ་ཀུན་མཁྱེན་པའི། །ཡེ་
ཤེས་མཆོག་གི་གཉེན་གྱིས་གསུངས། །དེ་དག་སྒྲིབ་པ་རྣམ་སེལ་སོགས། །ཀུན་གྱིས་ཐོས་ཤིང་ཁོང་ཆུད་ལ། །ལེགས་སོ་ལེགས་སོ་ཞེས་བརྗོད་ཅིང་། །ངོ་མཚར་གྱུར་ཅིང་རྨད་བྱུང་བའི། །དགོངས་པ་ཅང་ནི་མི་གསུང་
བཞུགས། །འདི་དག་ཆོས་ཀུན་རབ་ཏུ་ཞི་ཞིང་གཉིས་མེད་པ། །ཕྱོགས་བཅུ་ཀུན་ནས་སྣང་བའི་རྒྱལ་བ་དེ་བཞིན་གཤེགས། །དུས་གསུམ་སེམས་ཅན་ཁམས་རྣམས་འདུལ་བའི་དབང་བསྐུར་བ། །ལམ་རྒྱུད་མ་
ལུས་གནས་ལས་གྲོལ་བྱེད་མཆོག་འདིར་རྒྱལ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་
རྒྱལ་བ་ལས་སངས་རྒྱས་ཐམས་ཅད་ཀྱིས་སེམས་ཅན་གྱི་ཁམས་བསྐྱེད་པ་དང་བསྡུ་བའི་དོན་བསྟན་པའི་ལེའུ་སྟེ་བདུན་བཅུ་གཉིས་པའོ།། །། དེ་ནས་རྒྱལ་པོ་རྡོ་རྗེ་འཛིན། །གསང་བ་
དཔལ་ལྡན་བྱང་ཆུབ་སེམས། །སྲིད་ཞི་མཉམ་པར་སྡུད་མཛད་པ། །འབར་བ་དྲག་པོས་ཚུལ་འདི་གསུངས། །དཔལ་ལྡན་ཡིད་བཞིན་ནོར་བུའི་གནས། །སྤྱོད་པ་སྦྱིན་པའི་ཚུལ་བསྟན་པ། །གསང་བ་
འགྲོ་བའི་དགོས་འདོད་སྐོང་། །ནོར་སྟེར་ལྕམ་དྲལ་འདིར་བསྟན་པའོ། །ཛཱྂཀྵྞཱིྂ། འཕགས་པ་ཡིད་བཞིན་ནོར་བུའི་མདོག །ཞལ་གསུམ་ཕྱག་དྲུག་གསེར་གྱི་མདོག །རིན་ཆེན་སྣ་ཚོགས་རྒྱན་སྤྲས་པ། །སྐུ་
མདོག་ལས་བྱུང་རིགས་འཕྲོ་བས། །དོན་གྲུབ་རྒྱལ་པོས་དབུ་བརྒྱན་པ། །གཡས་པ་སྔོ་ཞིང་གཡོན་དམར་བ། །དང་པོ་གཉིས་ཀྱིས་ནེའུ་ལེ་ཡི། །ཁ་ནས་སྐྱུག་བྱེད་ནོར་བུ་འཛིན། །གཡས་གཡོན་གཞན་གྱིས་

89-1-256b

རྒྱལ་མཚན་དང་། །བཱི་ཛ་པུ་རི་རིན་ཆེན་གྱི། །བཟང་པོའི་སྣོད་བཅས་འཛིན་པར་བསམ། །དེ་ལས་གསང་བ་བདུད་རྩིའི་ཆུ། །རྩ་ལམ་ལག་མཐིལ་བརྒྱུད་ནས་ནི། །དབུལ་བ་མཁས་པ་དག་གིས་བྱ། །ཉིན་རེ་ཞིང་དུ་མཆོད་
བྱས་ནས། །དེ་ལ་དངོས་གྲུབ་ངེས་སྟེར་བྱེད། །འཕགས་མ་ནོར་ལྡན་མ་བསྐྱེད་པ། །ཞལ་གསུམ་ཕྱག་དྲུག་གུར་ཀུམ་མདོག །གཡས་དཀར་གཡོན་དམར་ལྗང་སྤྱན་གསུམ། །དང་པོ་པི་ཙུ་ད་ལ་དང་། །གཡོན་པས་
འབྲུ་ཡི་སྙེ་མ་འཛིན། །ལྷག་མས་བུམ་པ་པད་མ་སྣོད། །ཡིད་བཞིན་ནོར་བུ་དཔལ་བེའུ་འཛིན། །འདི་ནི་རིན་ཆེན་སྣ་ཚོགས་པའི། །ཕྲེང་བ་འོད་འཕྲོ་བསམ་པར་བྱ། །དེ་ལས་སྤྲོ་དང་བསྡུ་བ་ནི། །གནོད་སྦྱིན་མོ་ནི་
རྣམ་མང་པོ། །ཟླ་བ་བཟང་དང་རབ་བཟང་མ། །བདེ་སྦྱིན་མ་དང་སྟོབས་ཆེན་མོ། །ལྷ་མོ་བཀྲ་ཤིས་སྦྱིན་པ་མོ། །དཔལ་སྦྱིན་མ་དང་དོན་གྲུབ་མ། །རབ་དགྱེས་བདེ་སྦྱིན་མི་འཁྲུག་མ། །ཡང་དག་རྒྱན་མ་འདི་རྣམས་
ཏེ། །འཁོར་ལོས་ཡོངས་སུ་ལེགས་བསྐོར་མ། །རིན་ཆེན་གཞལ་ཡས་ཁང་གནས་པའི། །ལྷ་མོ་རྣམས་ལ་དུས་གསུམ་དུ། །བསྲེག་སྤོས་དབུལ་ཞིང་ཕྲིན་ལས་གཞོལ། །འདི་ནི་གསང་བ་མ་ལུས་
པའི། །གནོད་སྦྱིན་མོ་ཡི་རྟོག་པར་གསུངས། །འདི་ལས་འདའ་བར་བྱེད་པ་ནི། །གསང་བ་ཚུལ་གནས་མ་ཡིན་ན། །དེ་ནས་བཅོམ་ལྡན་དེ་བཞིན་གཤེགས། །འཇིག་རྟེན་དབང་ཕྱུག་རྒྱལ་བ་ཡི། །གསུང་
གི་རྣམ་པར་འཕྲུལ་པ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །འདི་ཉིད་དེ་མ་ཐག་ཕྱུང་ནས། །ཡེ་ཤེས་དམ་པ་བཀའ་སྩལ་ཏོ། །ཧྲཱིཿཤིན་དུ་དབེན་ཞིང་རབ་ཏུ་ཉམས་དགའ་བར། །དཔལ་ལྡན་འཇིག་
རྟེན་དབང་ཕྱུག་བསྒོམ་པར་བྱ། །དེ་ཉིད་ནམ་མཁའི་དབྱིངས་ཀྱི་དབུས་གནས་པར། །གསལ་བའི་དཀྱིལ་འཁོར་རབ་ཏུ་བསྒོམ་པར་བྱ། །དེ་ཡི་དབུས་གནས་ས་བོན་དམར་པོར་འཕྲོ། །དེ་ལས་སྤྲོ་བསྡུའི་

89-1-257a

འོད་ཀྱི་སྣང་བ་ལས། །མ་ལུས་འགྲོ་ཚོགས་ལེགས་པར་སྦྱངས་ནས་ནི། །དག་པར་བྱེད་པའི་ས་བོན་ལ་ཞུགས་ཏེ། །པད་མ་གེ་སར་འོད་བཅས་ཡོངས་གྱུར་པས། །
སྐད་ཅིག་དེ་ལས་རྗེ་བཙུན་སྤྱན་རས་གཟིགས། །ཞལ་གསུམ་ཕྱག་དྲུག་པད་མ་རཱ་གའི་མདངས། །གཡས་པ་ཀུནྡ་ཨུཏྤལ་སྔོ་འདྲ་གཡོན། །རིན་ཆེན་སྣ་ཚོགས་རྒྱན་སྤྲས་ཐུགས་རྗེ་
ཅན། །དང་པོ་གཉིས་ཀྱིས་ཡེ་ཤེས་རིག་མ་ལ། །རྡོ་རྗེ་སེ་གོལ་སྦྱོར་བས་འཁྱུད་པར་མཛད། །བར་མས་པད་མ་སྡོང་བུ་ནོར་བུ་འཛིན། །ཐ་མས་རལ་
གྲི་འཁོར་ལོ་བསྣམས་པའོ། །དར་གྱི་ཅོད་པན་སྣ་ཚོགས་ཀྱིས་བརྒྱན་མཛེས། །དེ་ཡི་ཐུགས་ཀར་ཟླ་བ་ལ་གནས་པ། །
རང་སྲོག་ས་བོན་ཧྲཱིཿཡིག་རྣམ་པར་བསམ། །དེ་ཡི་འོད་ཟེར་མ་ལུས་ཚོགས་འཕྲོས་པས། །འགྲོ་བ་མ་ལུས་
དོན་ནི་ཕུན་ཚོགས་པའོ། །རྟོག་པའི་རྙོག་མ་མ་ལུས་སེལ་བྱེད་པ། །ཐུབ་པའི་དབང་པོ་ཕྱོགས་མཚམས་རབ་
འཕྲོས་པས་

89-1-257b

སྣ་ཚོགས་ནོར་བུ་འགྲོ་བའི་དོན་མཛད་ནས། །སླར་འདུས་རང་ལ་ཕྱུང་བའི་དཀྱིལ་འཁོར་པའི། །འཁོར་ལོའི་ལྷ་ཚོགས་དུ་མ་བསམ་
པར་བྱ། །རྡོ་རྗེ་ཆེན་པོའི་སྙིང་པོ་ཡི། །ཁ་དོག་དཀར་པོ་རྣམ་པར་བསམ། །ཧཱུྃ། འོད་ཀྱི་སྤྲིན་གྱིས་
ཤིན་ཏུ་འབར། །ཟླ་བའི་འོད་ཟེར་བཞིན་དུ་བསིལ། །གནས་བཞི་དག་ཏུ་སྦྱོར་བ་ཡི། །དེ་མ་ཐག་ཏུ་འབྱུང་
བར་བྱེད། །ལན་གསུམ་ལེགས་པར་སྒོམས་པས་ནི། །སྐྱུག་པ་དག་ཏུ་རྣམ་བསམས་ནས། །ནམ་མཁའ་གང་བའི་དུག་
ཀུན་ཡང་། །དེ་མ་ཐག་ཏུ་མེད་པར་བྱེད། །འདི་ནི་དངོས་ཀྱི་དུག་ཞི་བར་བྱེད་པའོ། །ཨཱཿའབྲས་དང་ཕོལ་མིག་འབྲུམ་བུ་དང་། །
གང་གཞན་ནད་དུ་བཤད་པ་རྣམས། །ཕྱག་ན་རྡོ་རྗེའི་བཀའ་བཞིན་དུ། །བསམ་པ་ཙམ་གྱིས་མེད་པར་
འགྱུར། །པད་མ་འབར་བ་འདབ་བརྒྱད་པ། །དེ་ཡི་དབུས་སུ་དུག་བསམ་ནས། །འོད་ཟེར་ལྔ་ནི་རྫོགས་པར་སྤྲོ། །
དུག་བསྡུ་བ་ནི་ཁ་དོག་ནག །བསྐུལ་བའི་ཞི་བྱེད་དཀར་པོ་ཡིན། །བསམ་གཏན་གནས་ནི་གསང་བ་གང་། །ཡེ་ཤེས་དྲི་མེད་གསང་

89-1-258a

ཆེན་ཡིན། །དེ་ལ་འདིས་ནི་ཉེ་བའི་དུག་ཐམས་ཅད་དྲང་བའི་སྙིང་པོའོ། །གང་དུ་ས་བདག་ཀླུ་ལས་གྱུར། །གནོད་
པ་ངན་པ་བྱུང་གྱུར་པ། །འདིས་ནི་སྐད་གཅིག་དག་གིས་ཀྱང་། །ངེས་པར་ཞི་བར་བྱེད་པ་ཡིན། །དཔལ་ལྡན་སེང་གེ་སྒྲ་སྦྱོར་
བས། །གདུག་པའི་འཚེ་བ་ཞི་བྱེད་པ། །པད་སྡོང་ཐོད་པ་བདུད་རྩི་བཅས། །དེ་ནི་མེ་ཏོག་རབ་བཀང་བ། །ཏྲི་ཤུྰལ་ས་གསུམ་གནས་
ལས་སྐྱོབས། །རྒྱལ་པོ་རོལ་པའི་ཚུལ་བསྟན་པའོ། །ཐུགས་རྗེས་དུག་སེལ་བར་མཛད་པ་རྡོ་རྗེའི་ཏིང་ངེ་འཛིན་ཏོ། །དེ་ནས་བཅོམ་ལྡན་འདས་
དམ་ཚིག་ཆེན་པོ་དེ་ཁོ་ན་ཉིད་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དམ་ཚིག་ཆེན་པོའི་རྡོ་རྗེ་གསུམ་གྱིས་
གསང་བ་གསང་བ་གསུམ་གྱིས་དམ་ཚིག་གིས་དེ་ཁོ་ན་ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་
ལས་ཕྱུངས་པའོ། །ན་མཿས་མནྟ་ཀཱ་ཡ་ཝཱཀྩིཏྟ་བཛྲཱ་ནཱྃ། ༀ་ཨཱཿཨུཥྣཱི་ཥ་བཛྲ། ཙཀྲ་བི། བི་ཙཱུར། ཨུཥྣཱིཿབི་ཛ་ཡ། 
ཙཀྲ་བིཿ བྷྲུྃ་བྷྲུྃ་བྷྲུྃ། ཧཱུྃ་ཧཱུྃ་ཧཱུྃ། ཨ་མུ་ཀྃ་མཱ་ར་ཡ་ཕཊཿ། །དེ་ནས་འདི་ནི་གསུངས་ཙམ་གྱིས། །རིག་པའི་རྒྱལ་པོ་རྗེས་སུ་དྲན། །

89-1-258b

སངས་རྒྱས་རྡོ་རྗེ་སྐུ་གསུམ་ལ། །རྡོ་རྗེ་སེམས་དཔའ་རྣམ་པར་བསྒོམས། །ཞགས་པ་རྡོ་རྗེ་ལྕགས་ཀྱུ་འཛིན། །
སངས་རྒྱས་འགུགས་པ་དམ་ཚིག་ཡིན། །སངས་རྒྱས་སྐུ་གསུམ་སྦྱོར་བ་ཡིན། །འཁོར་ལོ་ཆེན་པོའི་སྦྱོར་བ་ཡིས། །རྡོ་རྗེ་སེམས་དཔའ་རྒྱལ་
ཆེན་པོ། །རྟག་ཏུ་ངེས་པར་འགུགས་པར་འགྱུར། །འདི་ནི་ཡེ་ཤེས་མེ་སྦྱོར་བས། །སྤར་བའི་དངོས་གྲུབ་
གནས་ཐོབ་བྱེད། །རྡོ་རྗེ་མི་ཕྱེད་གསུམ་བསྒོམས་པས། །སྐུ་གསུང་ཐུགས་ཀྱི་རྡོ་རྗེ་ཆེ། །རྡོ་རྗེ་
ལྕགས་ཀྱུའི་འོད་ཟེར་གྱིས། །སྔགས་རྣམས་ཐམས་ཅད་འགུགས་པའི་མཆོག །རྡོ་རྗེ་ལས་བྱུང་ཐམས་ཅད་པ། །
རང་སྔགས་སྐྱེས་བུ་བསྒོམས་ནས་ནི། །རབ་ཏུ་མཛེས་མའི་མཆོག་རྣམས་ཀྱིས། །སྙིང་གར་རྡོ་རྗེ་འབར་
བར་སྦྱར། །རླུང་གི་དཀྱིལ་འཁོར་སྦྱོར་བ་ཡིས། །ངེས་པར་རྟག་ཏུ་འགུགས་པར་
འགྱུར། །སྐུ་གསུང་ཐུགས་ཀྱི་རྡོ་རྗེ་འམ། །རང་སྔགས་དོན་གྱི་ཡོན་ཏན་གྱིས། །གཙུག་ཏོར་འཁོར་ལོས་

89-1-258c

སྒྱུར་སྦྱོར་བས། །བཀའ་ཡི་འཁོར་ལོ་སྦྱར་བར་བྱ། །སྔགས་ཀུན་བསྲུང་ཕྱིར་ཡེ་ཤེས་མཆོག །རྡོ་རྗེ་ཅན་གྱིས་བྱ་བ་སྟེ། །འདི་ནི་རྡོ་རྗེ་མ་ལུས་པའི། །བྱང་ཆུབ་སྲུང་བའི་དོན་ཆེན་བྱ། །བཅོམ་ལྡན་
འདས་ཀྱི་སྐུ་ཡེ་ཤེས་རྡོ་རྗེས་དེ་སྐད་ཅེས་གསུངས་སོ། །ཉི་མའི་དཀྱིལ་དམ་པ་ནི། །ནམ་མཁའ་རྡོ་རྗེའི་དབུས་སུ་བསམ། །སངས་རྒྱས་གཟུགས་ནི་རབ་བསྒོམས་ལ། །རྡོ་རྗེ་རྟ་མགྲིན་དུ་བསྒོམ་པ། །ཁྲོ་བོའི་འོད་ཟེར་མང་པོ་དག །
ཐམས་ཅད་དུ་ནི་རྣམ་པར་འཕྲོ། །ཀླུ་རྣམས་མ་ལུས་ཞབས་ཀྱིས་མནན། །མཐོང་བ་དང་ནི་རེག་པ་དང་། །ཁ་རླངས་དུག་རྣམས་ཞི་བྱེད་པ། །ཀླུ་རྣམས་ཀྱིས་ནི་རྒྱན་དུ་བྱས། །ཁ་དོག་འབར་བ་དམར་བའི་སྐུ། །རྫོགས་སངས་དཔག་
མེད་དབུ་རྒྱན་ཅན། །བསམས་ན་རྡོ་རྗེ་ཅན་འདི་མཉེས། །འདི་ནི་ཡེ་ཤེས་རྡོ་རྗེ་ཅན། །ཁྲོ་བོ་ཀུན་གྱི་དམ་ཚིག་སྟེ། །གསང་བ་ཉེ་བར་བསྟན་པ་ཡིན། །དེ་ནས་རྡོ་རྗེ་འཛིན་པ་ཆེན་པོས་ཚེ་དཔག་ཏུ་མེད་པ་རྡོ་རྗེ་
འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་པད་མོ་འབྱུང་བའི་ཁྲོ་བོ་ཆེན་པོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་རབ་ཏུ་ཕྱུང་ངོ་། །ཨོཾ་ན་མཿས་མནྟ་ཀཱ་ཡ་བཱཀ་ཙིཏྟ་བཛྲཱ་ཎཱྃ། ཨོཾ་ཤྲཱི་བཛྲ་ཀྲོ་དྷ་པདྨཱནྟ་ཀྲི་
ཏ་ཧ་ཡ་གྷྲཱི་བ་ཧཱུྃ་ཧཱུྃ་ཧུ་ལུ་ཧུ་ལུ་ཧཱུྃ་ཕཊ། དེ་ནས་འདི་ནི་གསུངས་ཙམ་གྱིས། །ཆོས་ཀྱི་རྡོ་རྗེ་ཆེ་མཆོག་སྐྱེས། །དེ་ནས་འཇིགས་ཤིང་བརྒྱལ་བར་འགྱུར། །ཡེ་ཤེས་རྒྱལ་པོ་རྗེས་སུ་དྲན། །མཁའ་དབྱིངས་དུག་གིས་ཡོངས་གང་བ། །རྡོ་རྗེ་ཧ་ལ་ཧ་ལ་
འོད། །ཁྲོ་བོའི་རྒྱལ་པོ་བསྐུལ་བ་ཡིས། །དུག་རྣམས་སྐད་ཅིག་གིས་མེད་བྱེད། །རྡོ་རྗེ་རྟ་མཆོག་བསྐྱེད་པ་འབྱུང་བ་རྡོ་རྗེས་གསུངས་སོ། །ཉི་མའི་དཀྱིལ་འཁོར་དམ་པ་ནི། །ནམ་མཁའ་རྡོ་རྗེའི་དབུས་སུ་བསམ། །སངས་རྒྱས་གཟུགས་ནི་རབ་ཏུ་
བསྒོམས་ལ། །རྡོ་རྗེ་བདུད་རྩི་བཅུད་གྱུར་མཆོག །འབར་བའི་འོད་ཟེར་འཕྲོ་བ་ཅན། །རྡོ་རྗེ་སྤྲིན་ནི་ཀུན་དུ་འཁྲུགས། །ཁྲོས་ཤིང་ཁྲོ་བཅས་གནག་པ་དང་། །མཆེ་བ་རབ་ཏུ་རྣོ་བ་ནི། །རྔ་སྒྲའི་དམ་ཚིག་དབུ་བརྒྱན་པ། །བསྒོམས་ན་ཁྲོ་བོ་མཆོག་

89-1-258d

འདི་མཉེས། །འདི་ནི་ཁྲོ་བོ་ཐམས་ཅད་ཀྱིས། །འདའ་བར་དཀའ་བའི་དམ་ཚིག་ཡིན། །བཅོམ་ལྡན་འདས་སྐུ་རྡོ་རྗེའི་དམ་ཚིག་གི་འོད་ཟེར་སྟུག་པོའི་མཆོག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཁྲོ་བོ་མི་འཆི་
གསང་བ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེའི་དམ་ཚིག་འདི་རབ་ཏུ་ཕྱུང་ངོ་། །ཨོཾ་ཨཱཿཧཱུྃ། ཨོཾ་ཨཱཿབིགྷྣཱནྟ་ཀྲྀ་ཏ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྂ་ཕཊ། རྡོ་རྗེ་བདུད་རྩི་རྒྱལ་པོ་ཆེ། །རྡོ་རྗེ་ཕུར་བུ་རབ་ཏུ་བསྒོམ། །འབར་བ་མེ་སྟག་
འཕྲོ་བ་ཡིས། །ཕྱོགས་བཅུའི་དཀྱིལ་འཁོར་ལ་གདབ་བྱ། །རྡོ་རྗེ་བདུད་རྩི་འཁྱིལ་པ་ཡིས། །གདུག་ཅིང་ཁྲོ་བ་ཚར་གཅད་ལ། །སངས་རྒྱས་གཟུགས་ཀྱི་དངོས་གྱུར་པ། །རྡོ་རྗེའི་སྦྱོར་བས་བྱས་པ་ན། །སྤྱི་བོ་དང་ནི་
མགྲིན་པ་དང་། །སྙིང་ག་ནས་ནི་རྐང་པའི་བར། །རྡོ་རྗེ་ཕུར་བུས་རབ་ཏུ་བསྒོམ། །དམ་ཚིག་འདི་ལས་འདའ་མི་བྱ། །འདི་ནི་ཕུར་བུའི་རྣམ་པར་འཕྲུལ། །བསམ་གཏན་རྡོ་རྗེ་ཕུར་བུ་ཡིས། །སངས་རྒྱས་
དག་ཀྱང་ངེས་པར་འདེབས། །རྡོ་རྗེ་སེམས་དཔའ་རྒྱལ་པོ་ཆེ། །ཕུར་བུས་བཏབ་ན་མེད་པར་འགྱུར། །མི་ཡི་རུས་པའི་ཕུར་བུ་ནི། །རྡོ་རྗེ་སྐུ་ཡི་ཕུར་བུ་སྟེ། །གཏི་མུག་གནས་ལ་གདབ་པར་བྱ། །ཕོ་རླུང་དག་
པའི་གནས་གྱུར་པའོ། །སེང་ལྡེང་རྩ་ལི་ཕུར་བུ་ནི། །རྡོ་རྗེ་གསུང་གི་ཕུར་བུ་སྟེ། །འདོད་ཆགས་གནས་ལ་གདབ་བྱ་བ། །མོ་རླུང་དག་པའི་གནས་གྱུར་པའོ། །ལྕགས་ལས་བྱས་པའི་རྡོ་རྗེ་གཅེས། །རྡོ་རྗེ་ཐུགས་ཀྱི་ཕུར་པ་སྟེ། །མ་ནིང་
རླུང་ནི་གནས་གྱུར་བྱེད། །ཞེ་སྡང་གནས་ལ་ངེས་གདབ་ཡིན། །དངོས་པོ་ཐ་དད་འཛིན་པ་ཡི། །ཡེ་ཤེས་སྐུ་གསུམ་འཇིག་བྱེད་འགྱུར། །རྡོ་རྗེ་སེམས་དཔའ་མཉམ་བཞག་པ། །རྡོ་རྗེ་གསུམ་གྱི་སྐུ་ཡི་མཐར། །རིག་མའི་བྷ་གའི་དཀྱིལ་འཁོར་གནས་གྱུར་པ། །དེ་དག་གསལ་
བར་དམིགས་ནས་ནི། །ལྷ་རྣམས་གནད་ལ་དབབ་བྱ་བ། །བྱིན་རླབས་ཤིན་ཏུ་མྱུར་འདོད་པས། །འོད་འཕྲོ་འཁྲུག་ཅིང་མདངས་ལྡན་པའི། །གཟུགས་བརྙན་རྡོ་རྗེ་ཕུར་བུ་ཡི། །བྷ་ག་ལ་ནི་ངེས་གདབ་པ། །འདི་ཉིད་སྐུ་གསུང་ཐུགས་གྱུར་པའི། །རྡོ་རྗེ་ཕུར་བུའི་སྦྱོར་བ་ཅན། །སྐུ་གསུང་ཐུགས་གསུམ་ལྷ་

89-1-259a

བསྐྱེད་པ། །གནས་གང་དུ་ནི་སྙོམས་འཇུག་པས། །ཕུར་བུས་གདབ་པར་གྱུར་པ་ཡིན། །གསང་བའི་པད་མ་ཉམས་དགའ་བར། །རྡོ་རྗེ་ཕུར་བུ་ལིང་ག་ཡིས། །བྱང་ཆུབ་སེམས་ཀྱི་བདུད་རྩི་ཡིས། །བདུད་རྩི་འབབ་པས་ཕུར་གདབ་
ཡིན། །བསམ་གཏན་རྡོ་རྗེའི་སྦྱོར་བ་ཡིས། །རང་གི་ཕྱག་རྒྱའི་བྷ་གར་ནི། །བདེ་བས་ཕུར་བུ་ངེས་པར་འདེབས། །དེ་ཡི་དེ་མ་ཐག་ཏུ་ཡང་། །ཕུང་པོ་ཁམས་དང་སྐྱེ་མཆེད་དང་། །ལུས་ཀུན་ལ་ནི་གནས་གྱུར་པའི། །ལྷ་རྣམས་བདུད་རྩིའི་
ཆ་དག་ཏུ། །ངེས་པར་ཞུ་བས་དེ་ལས་བསྐུལ། །ཤིན་དུ་ཞུ་བར་གྱུར་པ་ལས། །བྱང་སེམས་བདེ་བའི་ཁུ་བ་དག །སྣང་བ་དཀྱིལ་འཁོར་བདག་ཉིད་དེ། །རྡོ་རྗེ་སེམས་དཔའ་རྒྱལ་པོ་ཆེ། །ཕུར་བུས་བཏབ་ན་ངེས་པར་འཆི། །སྐུ་གསུང་
ཐུགས་ཀྱི་རྡོ་རྗེ་གསུམ། །གསང་བའི་ཚུལ་ལ་གནས་པ་ཡིས། །རྩ་རླུང་བྱང་ཆུབ་སེམས་རྣམས་ནི། །བདེ་སྟོང་གཉིས་མེད་གྱུར་པས་ན། །འཆི་བ་ཞེས་ནི་བརྗོད་པ་ཡིན། །ཕྱི་རོལ་ནད་གདོན་ཉོན་མོངས་དག །བདུད་བཞི་
བཅོམ་པས་ལྡང་བར་འགྱུར། །གསང་བ་དམ་པ་བསྡུས་པ་ཡིས། །སྙིང་པོ་མཆོག་ཏུ་འབྱུང་བ་ཉིད། །རྡོ་རྗེ་ཕུར་བུ་བསྟན་པ་གདབ་པར་བྱ་བའི་ཏིང་ངེ་འཛིན་བསྟན་པའོ། །དེ་ནས་འདི་ནི་གསུངས་ཙམ་གྱིས། །འགྲོ་བའི་
གནོད་པ་ཞི་བྱེད་པ། །བཀའ་ཡི་འཁོར་ལོ་རྒྱས་པ་པོ། །དེ་ཉིད་ངང་ལ་གནས་པར་གྱུར། །བཅོམ་ལྡན་རྣམ་པར་སྣང་མཛད་དཔལ། །སྐུ་ཡི་རྣམ་པར་འཕྲུལ་པ་ནི། །ངེས་འབྱུང་རྡོ་རྗེའི་ཏིང་འཛིན་ལ། །སྙོམས་པར་ཞུགས་ཏེ་
ཚུལ་འདི་གསུངས། །འོད་འཕྲོ་འཁྲུག་ཅིང་མདངས་བཟང་བའི། །རྡོ་རྗེ་སེམས་དཔའ་མཉམ་བཞག་ནས། །རྡོ་རྗེ་གསུམ་གྱི་སྐུ་ཡི་མཐར། །གཟུགས་བརྙན་བསམས་ནས་སྦྱང་བར་བྱ། །སངས་རྒྱས་དཀྱིལ་འཁོར་མཆོག་དག་
ནི། །ནམ་མཁའི་དབྱིངས་ཀྱི་དབུས་བསམས་པ། །སྔགས་ཀྱི་རྡོ་རྗེ་རྣམ་པ་བཞི། །འདིས་ནི་རྡོ་རྗེ་གནས་གསུམ་བྱེད། །ཆོས་ཉིད་ཡེ་ཤེས་ངང་ལས་བསྡུས་པ་ཡིས། །སྟོང་ཉིད་བྱང་ཆུབ་སེམས་ཀྱི་ངང་ཉིད་ལས། །རང་བྱུང་རྟེན་དང་

89-1-259b

བརྟེན་པར་བཅས་པ་ཡི། །དཀྱིལ་འཁོར་གཙོ་བོ་སྤྲོ་དང་བསྡུས་བྱས་ལ། །ཧཱུྃ་དཔལ་ལྡན་འཇམ་པའི་རྡོ་རྗེ་ཞེས་བྱ་བ། །གུར་ཀུམ་བཟང་པོའི་མདོག་ཅན་དམར་སེར་ལ། །གཡས་དང་གཡོན་པའི་ཞལ་ནི་དཀར་དང་སྔོ། །སྣ་ཚོགས་རྒྱན་གྱིས་རྣམ་པར་
བརྒྱན་པ་ཡི། །ཕྱག་གཉིས་ཤེས་རབ་དམ་པ་འཁྱུད་པ་དང་། །མདངས་ལྡན་རལ་གྲི་དང་ནི་ཨུཏྤ་ལ། །ཤེས་རབ་མདའ་གཞུ་ལེགས་པར་འཛིན་པ་མཛད། །དེ་ཉིད་ཤིན་དུ་གསལ་བའི་སྐུ་རུ་བསྒོམ། །ཕྱོགས་བཅུའི་རྒྱལ་བ་ཀུན་གྱིས་བྱིན་བརླབས་པའི། །
ས་བོན་རྒྱས་གདབ་དེ་འདྲ་གཉིས་མེད་བསྟིམ། །ཡེ་ཤེས་དབང་བསྐུར་དམ་པས་རྒྱས་གདབ་བྱ། །མ་ལུས་རིགས་ཀྱི་འཁོར་ལོ་སྤྲོ་བ་ཡི། །ཚུལ་གནས་ཡེ་ཤེས་སྤྱོད་པ་གོ་འཕང་ཉིད། །ས་ཡི་སྙིང་པོ་ཕྱག་ན་རྡོ་རྗེ་དང་། །ནམ་མཁའི་སྙིང་པོ་འཇིག་རྟེན་དབང་
ཕྱུག་དང་། །སྒྲིབ་པ་ཐམས་ཅད་རྣམ་པར་སེལ་བར་བཅས། །དཔལ་ལྡན་ཀུན་དུ་བཟང་པོ་ཞེས་བྱ་བ། །དེ་དག་མིག་ལ་སོགས་པ་གྲངས་བཞིན་དུའོ། །གཟུགས་དང་སྒྲ་དང་དྲི་དང་རོ་དག་དང་། །རེག་བྱ་དང་ནི་ཆོས་དབྱིངས་རྡོ་རྗེ་དང་། །ས་དང་ཆུ་དང་
མེ་དང་རླུང་རྣམས་ནི། །ངོ་བོ་ཉིད་གྱུར་སྤྱན་ལ་སོགས་པར་གྲགས། །གཟུགས་དང་ཚོར་བ་དེ་བཞིན་འདུ་ཤེས་དང་། །འདུ་བྱེད་དང་ནི་རྣམ་པར་ཤེས་བཤད་པ། །རྣམ་པར་སྣང་མཛད་ལ་སོགས་བདེ་གཤེགས་ཏེ། །རྡོ་རྗེ་ས་བོན་གྱིས་ནི་
དབྱུང་བར་བྱ། །ཀྵཱི་ཛྲྃ་ཁྃ་གྃ་ཁྲཱྃ་སྂ་ཞེས་བཤད་པ། །འདི་དག་མིག་ལ་སོགས་པ་རྣམས་ཀྱི་ཡིན། །ཛཿཧཱུྃ་བྃ་ཧོཿཁྃ་རྃ་ཞེས་བཤད་པ། །དེ་དག་གཟུགས་ཀྱི་རྡོ་རྗེ་ལ་སོགས་པའོ། །ཞེས་བྱ་བཞིར་བཤད་པ། །དེ་དག་སྤྱན་ལ་
སོགས་པ་རྣམས་ཀྱི་ཡིན། །བྷྲུྃ་ཨྃ་ཛྲྃ་ཁྃ་ཧཱུྃ་ཞེས་བྱ་བ་དག །རིམ་པ་ཇི་བཞིན་རྟག་པ་ལ་སོགས་པའི། །རང་རང་གི་ནི་ངོ་བོ་རྣམ་དག་པ། །རིམ་བཞིན་སྐུ་ཡི་རྡོ་རྗེ་ལ་སོགས་གྱུར། །དཔལ་ལྡན་རྡོ་རྗེའི་
འཛིན་པ་ལྟ་བུར་ནི། །ཆོས་ཉིད་ཀྱིས་ནི་ཕན་ཚུན་ཁྱད་པར་མེད། །ཕྱིན་ཅི་ལོག་གི་རྟོག་པ་ལས་གྲོལ་བས། །བྱ་བ་མ་ལུས་པར་ནི་རྫོགས་པར་བྱ། །ཐུབ་པའི་འཁོར་ལོ་མ་ལུས་མཆོད་པར་བྱ། །

89-1-260a

མཆོག་འདི་དེ་དག་ཀུན་དུ་རབ་ཏུ་དབུལ། །ཟས་ལ་སྤྱོད་ཚེ་སྙིང་གའི་ཟླ་བ་ཡི། །འཁོར་ལོའི་གཙོ་བོ་རང་གི་གསང་སྔགས་ཀྱིས། །ཀུན་དུ་དམིགས་ཏེ་བྱང་ཆུབ་སེམས་ཀྱིས་ནི། །ངོ་བོ་ཉིད་གྱུར་འོད་དང་ལྡན་
པར་བསམ། །དངོས་པོ་དེ་དག་གསུམ་གྱིས་བཟླས་བྱ་སྟེ། །ཐམས་ཅད་མཉམ་པ་ཉིད་དུ་རྣམ་དག་པ། །དེ་ཉིད་སྐུ་ཡི་རྡོ་རྗེ་ལ་སོགས་པ། །ལྷ་རྣམས་ཀུན་དུ་ཚིམ་པ་ཉིད་དུ་བྱ། །ཕྱི་ཡི་སྦྱིན་སྲེག་ཆོ་ག་ཇི་ལྟ་བར། །ཡིད་ཀྱི་སྤྱོད་ཡུལ་སེམས་ཀྱིས་
བྱ་བ་སྟེ། །ཕུང་པོའི་བུད་ཤིང་རྣམ་པར་སྲེག་བྱེད་པ། །ཡེ་ཤེས་འབར་བ་བླ་ན་མེད་པར་བཤད། །དམ་ཚིག་ཉམས་ལ་སྙིང་གར་ཟླ་བ་ལ། །སྙིང་པོ་སྣ་ཚོགས་རྡོ་རྗེ་ཇི་བཞིན་བསམ། །དཔལ་ལྡན་དམ་ཚིག་རྡོ་རྗེ་རྣལ་འབྱོར་པས། །འགྲོ་བ་རང་བཞིན་གྱིས་
དག་རྣམ་བསམས་ལ། །སྣ་ཚོགས་པད་མའི་འདབ་མའི་དབུས་སུ་ནི། །སྔར་གྱི་རིམ་པས་དབང་བསྐུར་ཀུན་དུ་བླང་། །ཕྱི་རོལ་དག་ཏུ་ཁྲུས་ཀྱི་ཆོ་ག་ལ། །རིམ་འདིར་ཁྱད་པར་ཡང་དང་ཡང་བསམ་བྱ། །ཐུན་མཚམས་རྣམས་སྐུ་དེ་བཞིན་མཆོད་ལ་སོགས། །
སྔོན་དུ་འགྲོ་བའི་བཟླས་བརྗོད་བྱས་ནས་ནི། །སྙིང་གའི་འཁོར་ལོའི་ནང་དུ་ཆུད་པར་བྱ། །སྙིང་རྗེ་ཤེས་རབ་ལྡན་པས་དབྱིངས་སུ་ཉལ། །ལྡང་བའི་དུས་སུ་དམ་ཚིག་ལྷ་མོ་ཡི། །ཡང་དག་གླུ་ཡིས་དཔའ་བོ་ཡོངས་བསྐུལ་བའི། །ལྡང་བས་ཐུབ་པ་
བཟླས་བརྗོད་ལ་སོགས་པའི། །ཆོ་ག་སྔ་མ་བཞིན་དུ་བྱ་བ་ཡིན། །དངོས་གྲུབ་ཉེ་བའི་མཚན་མ་མཐོང་ནས་ནི། །དེ་ཉིད་གསུམ་བརྗོད་བྱས་ནས་རང་གི་སེམས། །སྔར་བཤད་དཀྱིལ་འཁོར་དག་ལ་གནས་ནས་ནི། །རང་འདོད་གོ་འཕང་རབ་
ཏུ་བསྒྲུབ་བྱ་ཡིན། །བགེགས་རྣམས་བདུད་རྩི་ཐབ་སྦྱོར་འཁོར་ལོ་ཡི། །བསྲུང་བ་བཀའ་ཡི་འཁོར་ལོ་རབ་སྦྱར་བྱ། །དེ་ཉིད་བདུད་ལས་རྣམ་པར་རྒྱལ་བྱེད་ཡིན། །དབང་བསྐུར་བྱས་པའི་འབད་པས་ངེས་པར་གཞོམ། །གང་ཞིག་དབུས་
སུ་གནས་པར་གྱུར་པ་ཡི། །འཁོར་ལོ་དེ་ཡང་དེ་ཡི་ཆོ་འཕྲུལ་འགྱུར། །ཐ་མལ་རྣམ་རྟོག་རྒྱུན་ལས་མ་གཏོགས་པར། །སྲིད་པའི་སྡུག་བསྔལ་ཡོད་པ་མ་ཡིན་ཏེ། །དེ་ནི་རྣམ་པར་འགོག་པར་འགྱུར་བའི་སེམས། །སེམས་ནི་མངོན་སུམ་བྱིན་

89-1-260b

བརླབས་ཀྱིས་མངོན་འགྱུར། །ཟབ་ཅིང་རྒྱ་ཆེ་བའི་བདག་ཉིད་ཅན། །དེར་ནི་ཀུན་རྟོག་གང་ཡིན་སྣང་མི་འགྱུར། །ཡང་དག་སེམས་ལས་ཐ་དད་མ་ཡིན་ཞིང་། །ཀུན་བརྟགས་མཚན་མ་སྔར་ནི་བསྒྲུབ་ལོག་པས། །སྲིད་པ་ལན་ཅིག་
ཙམ་དུ་ལྡང་མི་ནུས། །གང་དུ་ལྡོག་པ་མེད་པས་བགྲོད་ཕུལ་བྱུང་། །འདིར་ནི་མཐོང་བ་དང་ནི་བསླབས་འཕེལ་བས། །རྣམ་དག་རྟོག་པ་ཡང་དག་འགོག་པ་སྟེ། །ཐ་མལ་པ་ཡི་རང་གཟུགས་དངོས་པོ་ཡིས། །བདག་མེད་སྦྱིན་སོགས་མི་ཟད་
གཏེར་མི་འགྱུར། །འདིར་ནི་གནས་མེད་ཡེ་ཤེས་དགེ་བའི་ལམ། །འདིར་ནི་བདེན་ཡང་དེར་ནི་ལྡོག་མི་འགྱུར། །དེ་ལྟར་རྟོགས་ནས་སྙིང་རྗེར་ལྡན་པ་དག །ཡེ་ཤེས་བསམ་ཡས་སྐད་ཅིག་གིས་བསྒྲུབས་པ། །དཔལ་ལྡན་ཀུན་
དུ་བཟང་པོའི་ངོ་བོ་ཉིད། །མཁས་པས་གང་ཞིག་ངེས་པར་བསམ་མི་བྱེད། །གང་དུ་དཔལ་ལྡན་འདུས་པའི་ལམ་ལས་ནི། །རྣལ་འབྱོར་དབང་ཕྱུག་རྣམས་ཀྱིས་བགྲོད་པའི་དོན། །རྒྱལ་བ་རྒྱ་མཚོའི་ཡེ་ཤེས་དམ་པའི་གཞི། །
ཚད་མེད་བྱང་ཆུབ་རྒྱན་གྱུར་གསང་བའོ། །འདི་ནི་མཚུངས་མེད་དམ་པ་མཆོག་གི་གནས། །དུག་ལྔའི་རྟོག་པ་དེ་ཉིད་ངོ་བོ་ཉིད། །ཡོངས་སུ་ཤེས་པའི་ལམ་གྱུར་བསམ་མི་ཁྱབ། །འཕགས་པ་ཉན་ཐོས་དགྲ་བཅོམ་
ཟག་པ་ཟད། །དེ་ལ་ཐོག་མར་རྒྱུན་དུ་ཞུགས་པ་དང་། །ཕྱིར་མི་འོང་དང་ལན་ཅིག་ཕྱིར་ཞུགས་པ། །དེ་དག་འཁོར་བ་དག་པར་འདོད་པའི་ལམ། །རང་སངས་རྒྱས་ནི་འབྱུང་ཚུལ་གཉིས་སུ་གནས། །
སྨོན་ལམ་འབྲས་བུ་ཐོབ་པ་ངལ་བསོའི་ལམ། །བྱང་ཆུབ་སེམས་དཔའ་སེང་གེའི་རྒྱལ་པོ་ལྟར། །རི་དགས་ཕྲ་མོ་སྐྲག་བྱེད་འདིར་འབྱུང་བ། །ངང་པ་གླང་ཆེན་ཁྱུ་མཆོག་རྩལ་
གྱིས་ནི། །རི་དགས་སེང་གེ་ཤ་ར་ཎ་མཆོག་དང་། །མཁའ་ལྡིང་ག་རུ་ཌ་ལི་ལྡིང་གྱུར་པ། །འབྲུག་སྒྲ་སྒྲོགས་བྱེད་ཅང་ཤེས་རྟ་ཡི་རྩལ། །བྱ་ཁྱུང་ཆེན་པོ་ཤང་ཤང་རུ་རུ་སྟེ། །རི་བོང་དག་གིས་རང་སྤྱོད་ཤུགས་བསྟན་པའོ། །འཁོར་

89-1-261a

བའི་རྒྱ་མཚོར་ནོར་བུ་གནས་པའི་གཞི། །ཀླུ་དབང་རྣམས་དང་ཆུ་སྲིན་ཆེན་པོ་དང་། །ལྟོས་འགྲོ་ཟ་བྱེད་ཤིན་ཏུ་མི་བཟད་པས། །རུས་སྦལ་དུང་ལྟར་མ་འདྲེས་གནས་བྱས་པ། །དེ་ལས་མུ་ཏིག་ལ་སོགས་སྣ་ཚོགས་པ། །གང་དུ་ཡོན་ཏན་ལྡན་ཡང་བག་
མེད་གནས། །བག་ལ་ཉལ་བའི་ཕྱོགས་ནི་ཟློག་པ་གཉིས། །སྐབས་ལས་མ་བབ་ནུས་པ་འབྱུང་མི་ནུས། །ས་བོན་ཕྲ་མོ་ཀུན་ནས་ལྡང་བ་ན། །དུས་ལ་བབ་ཚེ་སླུ་བ་མེད་པར་འབྱུང་། །དེད་དཔོན་ཐབས་ལ་མཁས་པའི་གཟིངས་བཅས་པས། །ཐར་པ་
ཐོབ་བྱེད་ཡན་ལག་ཀུན་ལྡན་པས། །རིན་ཆེན་ནོར་བུས་དགོས་པ་རབ་སྒྲུབ་པ། །དཔལ་ལྡན་འདུས་པའི་རྒྱུད་དུ་ཤེས་པར་བྱ། །དབང་ཐོབ་བྱེད་པ་རྡོ་རྗེའི་ཐེག་པ་འདིར། །བུམ་པ་བཞི་ལྡན་ལམ་བགྲོད་རྡོ་རྗེ་དང་། །དཀྱིལ་འཁོར་ཆོས་འབྱུང་པད་མའི་
སྡོང་པོར་འབྱུང་། །ས་ལམ་ཁྱད་པར་རིགས་དང་ལྡན་པའི་ཆོས། །འཁོར་ལོས་སྒྱུར་རྒྱལ་རིན་ཆེན་བདུན་ལྡན་པའི། །གསང་བའི་མས་འཇུག་ཡས་བབས་ཚུལ་ཤེས་པས། །སྤྲེའུ་ཁྭ་ཏ་ཡི་ཚུལ་ལས་བསྟན་པ་ཡིན། །རྡོ་རྗེ་གསུམ་དང་ཟླ་བ་
ཉི་མ་དང་། །མུན་པ་དག་གིས་རྟོགས་པ་གང་ཡིན་པ། །མེ་ལོང་གཟུགས་བརྙན་རྡོ་རྗེ་སེམས་དཔའི་སྐུ། །ཡེ་ཤེས་འཇའ་ཚོན་ཆུ་ཡི་ཟླ་བར་སྟོན། །མེ་འོད་འབར་བས་ཀུན་ནས་སྣང་བ་ཆེ། །དེས་ཁྱབ་ཀུན་དུ་སྟོན་པ་དེ་བཞིན་གཤེགས། །
རིགས་ཀྱི་སྐུ་དང་ས་བོན་མཚན་མར་སྣང་། །དེ་ཉིད་སངས་རྒྱས་མཆོག་ཏུ་འབྱུང་བ་ལས། །དེ་དག་གནས་སྐབས་ཕྲིན་ལས་དངོས་གྲུབ་ཀུན། །དུ་མའི་མཐུ་སྟོབས་ཡོན་ཏན་དཔལ་དུ་འཆར། །དུ་བ་སྨིག་རྒྱུ་སྲིན་བུ་མེ་ཁྱེར་བ། །མར་
མེ་འབར་དང་མཁའ་སྣང་དག་པ་སྟེ། །སྣ་ཚོགས་རྟགས་དང་ཡོན་ཏན་མི་ཟད་པ། །གྲུབ་པ་སྤྱོད་པས་རྒྱུ་འབྲས་ཐ་དད་པ། །མ་འདྲེས་ཡོངས་སུ་དག་པ་དུས་མེད་པ། །བསྐལ་པ་གྲངས་མེད་སྐད་ཅིག་སྒྱུ་མ་ཡིས། །
གསུམ་གྱི་དུས་ལ་འདའ་བ་དབང་ཕྱུག་མཆོག །ཁ་སྦྱར་བདེ་ཆེན་སྐུ་ནི་རྡོ་རྗེ་འཆང་། །དཀྱིལ་འཁོར་བདག་པོ་དཔལ་ལྡན་བྱང་ཆུབ་སེམས། །དེས་ནི་དག་དང་མ་དག་ཞིང་ཁམས་སུ། །མཛད་པ་རྒྱ་མཚོ་སྤྲུལ་པའི་སྣང་བ་ཡང་། །

89-1-261b

བསམ་གྱིས་མི་ཁྱབ་ཡེ་ཤེས་རོལ་པར་སྟོན། །རྡོ་རྗེ་སེམས་དཔའ་དང་པོའི་མགོན་པོར་ནི། །སྤྲོས་མེད་བདེ་ཆེན་མི་འགྱུར་གཅིག་པ་ཉིད། །ལྷུན་གྱིས་གྲུབ་པའི་རང་བྱུང་ངང་ལ་བཞུགས། །ཞེས་གསུངས་པ་དང་། འདུས་པ་
རྣམས་ཀྱིས་དགྱེས་པས་ཡོངས་སུ་ཁྱབ་ཅིང་སེམས་ཀྱི་རྟོག་པ་ཡོངས་སུ་ཆོད་དེ་ཅང་མི་སྨྲ་བར་རང་རང་གི་སྟན་ལ་འདུག་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་
འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་སངས་རྒྱས་ཐམས་ཅད་ཀྱི་རྟེན་ཅིང་འབྲེལ་བར་འབྱུང་བ་ལ་གནས་པར་བསྟན་པའི་ལེའུ་སྟེ་བདུན་བཅུ་གསུམ་པའོ།། །། 
དེ་ནས་གསང་བ་རྡོ་རྗེ་འཛིན། །རྡོ་རྗེ་རྒྱལ་པོ་འཁོར་ལོའི་གཙོ། །བདག་མེད་ཡེ་ཤེས་རྒྱལ་པོ་ཆེ། །ཅི་ཡང་མི་གསུང་བཞུགས་པ་ལ། །རྡོ་རྗེ་དཔལ་མཆོག་ཆེན་པོ་ཡི། །སངས་རྒྱས་བྱང་ཆུབ་སེམས་དཔའ་ཆེ། །མ་ལུས་ཀུན་གྱིས་
བཀུར་བར་མཛད། །འདིར་ནི་སངས་རྒྱས་ཐམས་ཅད་ཀྱི། །གསང་བའི་གནས་ནི་དག་པ་ཉིད། །གསུངས་ཤིག་གསུངས་ཤིག་ཚུལ་ཆེན་པོ། །ཡིད་དང་ཡེ་ཤེས་སྤྱོད་པ་ལས། །དམ་ཚིག་མཆོག་འདི་བསྟན་དུ་གསོལ། །
དེ་ཉིད་ཉེ་བར་དགོངས་གྱུར་ནས། །གསུང་ནི་འདི་སྐད་བཀའ་སྩལ་ཏོ། །གསང་བའི་ཚུལ་ནི་རྒྱ་མཚོ་ལྟར། །ཟབ་ཅིང་རྒྱ་ཆེ་ཚུལ་བསྟན་ཏེ། །སྔགས་ཀྱི་སྤྱོད་པ་ཚད་མེད་ཅིང་། །སངས་རྒྱས་ཡེ་ཤེས་བསམ་མི་ཁྱབ། །
རིགས་ཀྱི་ཕྱི་རོལ་ཕྱག་རྒྱ་ཆེ། །འདི་ལས་གཞན་དུ་མ་རྟོག་ཅིག །རིགས་ཀྱི་བུ་རྣམས་མདོར་བསྡུ་ན། །འདི་ལྟར་སྔགས་ཀྱི་སྤྱོད་པ་ནི། །བཙུན་མོའི་འཁོར་གྱི་ནང་དག་ཏུ། །འདོད་ཡོན་མངོན་པར་རོལ་གྱུར་ཀྱང་། །
ཟག་མེད་བདེ་བ་ཆེན་པོ་ཡི། །ཡེ་ཤེས་ཀུན་དུ་སྤྱོད་པས་ན། །དེ་བཞིན་གཤེགས་པའི་སྤྱོད་པ་ཡིན། །དབའ་རླབས་མེད་པའི་རང་བཞིན་གྱིས། །རྟོག་མེད་ལྷན་ཅིག་སྐྱེས་པར་འཆར། །རིགས་ཀྱི་བུ་དག་འདི་ལྟ་སྟེ། །

89-1-262a

དཔེར་ན་ནམ་མཁའི་ཁམས་འདི་ནི། །ཀུན་གྱི་རྗེས་སུ་སོང་བ་སྟེ། །ཆོས་རྣམས་མ་ལུས་དཀྱིལ་འཁོར་དག །ནམ་མཁའི་ཁོངས་སུ་གཏོགས་པའོ། །དེ་བཞིན་ཆོས་རྣམས་མ་ལུས་པ། །དེ་དག་ངོ་བོ་ཉིད་དག་པས། །
ཁམས་གསུམ་ཀུན་དུ་མི་གནས་ཤིང་། །འབྱུང་བ་བཞི་ལ་གནས་མི་བྱེད། །གང་དུ་འགྲོ་འོང་རྣམ་བྲལ་བའོ། །རིགས་ཀྱི་བུ་དེ་དེས་བསྟེན་ན། །ངོ་བོ་ཉིད་ཀྱི་དག་པ་ཡི། །ཆོས་རྣམས་དེ་ལྟར་རྗེས་རིག་བྱ། །དེ་བཞིན་གཤེགས་པ་ཐམས་ཅད་ཀྱི། །
དོན་གྱི་དབང་ནི་བླ་ན་མེད། །འདི་ལྟར་མཁྱེན་པས་འཆང་མཛད་པའོ། །རིགས་ཀྱི་བུ་རྣམས་དེ་ལྟར་ན། །ནམ་མཁའི་ཚིག་ལྟར་ངེས་བརྗོད་པས། །དེ་བཞིན་གཤེགས་པ་ཚིག་དག་ཀྱང་། །དེ་དག་དེ་ལྟར་རྗེས་རིག་བྱ། །འདི་ནི་
གསང་བའི་གནས་ཡིན་ནོ། །ཆོས་ཅན་གཅིག་ལ་རྟོག་པ་ནི། །རྣམ་པ་སྣ་ཚོགས་སྣང་བ་ཡིན། །བདེ་སྡུག་འགྲོ་བར་འབྱུང་བ་རྣམས། །ལས་ཀྱི་ཁྱད་པར་གོམས་པའི་ཕྱིར། །དེ་ཕྱིར་དགེ་དང་མི་དགེའི་ལས། །ལུས་ལ་སོགས་
པའི་རྣམ་རྟོག་བྱུང་། །རྟོག་པ་ཐམས་ཅད་མེད་གྲོལ་མ། །དེར་རྟོག་པ་ལ་གནས་པ་མེད། །རྟོག་པ་ལས་ནི་ཡེ་ཤེས་མེད། །མ་རྟོགས་ཉེས་པས་ཡེ་ཤེས་འཇོམས། །མི་རྟོགས་པ་ལས་རྟོག་པ་རུ། །ལྡོག་པ་ནམ་ཡང་མི་
སྲིད་དོ། །གཞན་དུ་རྟོག་པའི་གཉེན་པོ་རུ། །ཡེ་ཤེས་བསམ་པ་མ་ཡིན་ཏེ། །སྤང་བྱ་གཉེན་པོ་གཉིས་མེད་པས། །གཉིས་མེད་མཉམ་པའི་ངང་ཉིད་དུ། །སྐྱེ་དང་འགག་པར་མི་འགྱུར་རོ། །དེ་ཉིད་བསམ་པ་རྫོགས་
པའི་ལམ། །ངེས་པར་འདི་ནི་རྟོགས་པ་རྟགས། །ངོ་བོ་རྒྱུ་ཚུལ་འབྱུང་བ་ཁམས། །ལས་དང་དབྱེ་བ་དེ་ཉིད་རླུང་། །འབྱུང་འཇུག་གནས་པ་རྣམ་པར་བརྟག །འབྲུ་གསུམ་སྔགས་ཀྱི་ངོ་བོ་ཉིད། །ཨཱ་ལི་ཀཱ་
ལི་སྦྱོར་དབུལ་བས། །བརྟག་པ་གྲངས་ལྡན་བཟླས་པ་ཉིད། །སྦྱོར་དང་བྱེད་པར་རྟགས་ལྡན་པ། །ངག་དབེན་རླུང་གི་རྣལ་འབྱོར་བརྟན། །རྒྱུ་དང་འབྲས་བུ་སྦྱོར་བ་གང་། །སྣང་བ་གསུམ་པོ་འཆར་ཚུལ་ཏེ། །དུས་དང་

89-1-262b

འབྱུང་འགྱུར་ཐབས་ཁྱད་པར། །དབྱེར་མེད་ཡེ་ཤེས་གནས་ཐོབ་པ། །སྤྱོད་པ་ཡེ་ཤེས་མངོན་དུ་བྱེད། །སློབ་དང་མི་སློབ་དེར་སྤྱོད་པའོ། །རང་བཞིན་ཤེས་པའི་ལམ་གྱུར་པ། །རྣམ་ཤེས་སྒྱུ་མར་མཚན་པའི་ཆོས། །ཁྱད་པར་ལས་
དང་སྤྱོད་པ་གང་། །དངོས་གྲུབ་ཐོབ་ཕྱིར་བདག་བྱིན་བརླབ། །ཕྱི་ནང་མངོན་པར་བྱང་ཆུབ་ཚུལ། །རྣལ་འབྱོར་ཐོབ་པའི་བསམ་གཏན་གནས། །འཇུག་དང་འབྱུང་བ་རྟགས་བཅས་པས། །སྤྱོད་ཚུལ་ཡེ་ཤེས་དེས་འཐོབ་བོ། །
ལྟ་དང་ཉམས་མྱོང་ལུས་དང་ངག །བསམ་གཏན་མཉམ་རྗེས་སྤྱོད་པ་དང་། །སློབ་དང་མི་སློབ་གཉིས་མེད་ཅིང་། །རབ་ཏུ་མི་གནས་ཟུང་དུ་འཇུག །ཇི་ལྟར་གསུངས་པའི་སྡོམ་ལྡན་པས། །ཇི་སྐད་ཐོབ་པ་མཉམ་པར་སྤྱོད། །
དམ་ཚིག་མེད་ལ་བློ་ལྡན་གྱིས། །གཞན་ལ་གསང་བ་འདུས་རིག་བྱ། །སྙིང་རྗེ་གནས་པ་ལས་བྱེད་པ། །སངས་རྒྱས་མཆོད་དང་འགྲོ་དོན་དག །མཐོང་ན་ལུས་དང་ངག་ལས་འབྱུང་། །ཕྱག་རྒྱ་སྔགས་ཀྱི་བདག་ཉིད་དོ། །
འདི་ནི་གསང་བ་ངེས་བསྟན་པ། །ཡན་ལག་ཀུན་བསྒོམས་ལས་འདས་ཤིང་། །རྟོག་པའི་ཚུལ་ནི་རྣམ་སྤངས་ནས། །གུག་བསྐྱེད་ཐིག་ལེ་ལས་འདས་པ། །འདིར་ནི་དཀྱིལ་འཁོར་མཆོག་ཡིན་ནོ། །སེམས་ཅན་
ཐམས་ཅད་འཇུག་པ་ནི། །རང་བཞིན་མེད་པའི་རང་བཞིན་སྤངས། །སེམས་ནི་སྐུལ་ཞིང་རྟོག་བྱས་པའི། །དཀྱིལ་འཁོར་དཀྱིལ་འཁོར་ལྟ་བུའོ། །ཡོད་དང་མེད་པ་གཉིས་ཀ་མཐའ་ཡིན་ཏེ། །དག་དང་མ་དག་གཉིས་ཀ་འདི་ཡང་
མཐའ། །དེ་བས་མཐའ་གཉིས་རྣམ་པར་སྤངས་ནས་ནི། །མཁས་པས་དབུས་ལའང་གནས་པར་མི་བྱེད་དོ། །གང་དུ་ཉན་རང་ཐེག་ལ་མི་བསླབ་ཅིང་། །བྱང་ཆུབ་སྤྱོད་པ་དེ་ལ་ངེས་བསླབས་ན། །བྱང་ཆུབ་སྤྱོད་པ་སྤྱད་པས་རྒྱལ་ཡོན་ཏན། །གླིང་བཞི་འདི་
ལས་རབ་བྱུང་ཆེན་པོར་འགྱུར། །ཆོས་ཐམས་ཅད་འགྲོ་བ་དང་འོང་བ་མེད་པའི་སྤྱོད་ཡུལ་ལ་གནས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དེ་ནས་རྡོ་རྗེ་འཛིན་པ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་དཀྱིལ་འཁོར་གྱི་ལྷའི་འཁོར་ལོ་

89-1-263a

སྤྲོ་བ་དང་སྡུད་པའི་བདག་ཉིད་ཅན་གྱིས་ས་བོན་ཡང་དག་པར་ཕྱུང་ངོ་། །འདི་ནི་སྔགས་རྣམས་ཐམས་ཅད་ཀྱི། །དབྱངས་དང་གསལ་བྱེད་སྦྱར་བ་ལས། །གང་དུ་ཕྲེང་བ་བཀོད་པར་བྱེད། །སྡེ་ཚན་དྲུག་པའི་གསུམ་པ་དང་། གསུམ་པ་
ཡི་ནི་གསུམ་པ་དང་། །མཐར་གནས་པ་ཡི་གཉིས་པ་སྦྱར། །ལྔ་པ་ཡི་ནི་བཞི་པ་ལ། །ཨནྟ་སྠ་ཡི་གཉིས་པ་སྦྱིན། །གཉིས་པའི་གསུམ་པས་མཐའ་བརྟེན་པ། །དབྱངས་ཀྱི་བཞི་པས་བརྒྱན་པར་བྱ། །ཨུཥྨ་ཡི་ནི་མཐར་གྱུར་པ། །གཉིས་
པའི་ཐིག་ལེ་བརྒྱན་པ་ཉིད། །དབྱངས་ཀྱི་དྲུག་པས་བརྒྱན་པ་ནི། །མི་བསྐྱོད་པའི་གསང་སྔགས་བརྗོད། །གསུམ་པ་ཡི་ནི་གསུམ་པ་ལ། །དབྱངས་ཡིག་བཞི་པ་དང་ལྡན་པ། །ལྔ་པ་ཡི་ནི་ལྔ་པ་སྦྱིན། །གསུམ་པ་ཡི་ནི་གསུམ་པ་ལ། །
ཨཱུཥྨ་ཎ་ཡི་མཐའ་མ་སྦྱར། །གཉིས་པའི་གསུམ་པས་མཐའ་བརྟེན་པ། །དབྱངས་ཡིག་གསུམ་པ་སྦྱིན་པར་བྱ། །དྲུག་པ་ཡི་ནི་བཞི་པ་ལ། །མཐར་གནས་པ་ཡི་གཉིས་པ་སྦྱར། །དབྱངས་ཀྱི་ལྔ་པ་སྦྱིན་པར་བྱ། །སྟེང་དུ་ཐིག་ལེ་ནཱ་དས་
བརྒྱན། །འདི་ནི་རྟག་པའི་སྙིང་པོ་བརྗོད། །ལྔ་པ་ཡི་ནི་དང་པོ་ལ། །མཐར་གནས་པ་ཡི་གཉིས་པར་སྦྱར། །སྟེང་དུ་དབྱངས་ཀྱི་བཅྭ་ལྔ་པས། །བརྒྱན་གྱུར་འདི་ནི་ས་བོན་ཡིན། །མཐར་གནས་པ་ཡི་གཉིས་པ་ལ། །ལྔ་པ་ཡི་ནི་གསུམ་
པས་བརྒྱན། །ལྔ་པའི་ལྔ་པ་ཐ་མ་སྦྱིན། །ལྔ་པ་ཡི་ནི་བཞི་པ་ལ། །ཨནྟ་སྠ་ཡི་གཉིས་པའོ། །གཉིས་པའི་གསུམ་པས་མཐའ་བརྟེན་པ། །དབྱངས་ཀྱི་བཞི་པས་བརྒྱན་པར་བྱ། །འདི་ནི་རིན་ཆེན་རྒྱལ་པོ་ཡི། །གསང་སྔགས་བསྡུས་
པའི་ཚུལ་དུ་བརྗོད། །དབྱངས་ཀྱི་དང་པོ་ཉིད་ལ་ཡང་། །ཨནྟ་སྠ་ཡི་གཉིས་པ་དང་། །དབྱངས་ཡིག་བཅུ་གསུམ་པ་སྦྱིན་བྱ། །དབྱངས་ཀྱི་བཅུ་པ་ཉིད་ལ་ནི། །གཉིས་པ་གསུམ་པས་མཐར་བརྟེན་པའོ། །ཨཱུཥྨ་ཎ་ནི་བཞི་པ་ལ། །དབྱངས་ཡིག་
བདུན་པས་སྟེང་དང་འོག །དབྱངས་ཀྱི་བཅྭ་ལྔ་པ་དང་སྦྱར། །འདི་ནི་འོད་དཔག་མེད་པ་ཡི། །གསང་བ་འཇིག་རྟེན་དག་པའོ། །གཉིས་པའི་གཉིས་པ་ཉིད་ལ་ནི། །དབྱངས་ཀྱི་ཐིག་ལེ་ནཱ་དས་བརྒྱན། །དྲུག་པ་ཡི་ནི་དང་པོ་ལ། །ཨནྟ་སྠ་ཡི་གཉིས་པ་སྦྱར། །

89-1-263b

གསུམ་པ་ཡི་ནི་གསུམ་པ་ལ། །གསུམ་པ་ཡི་ནི་ལྔ་པས་བརྒྱན། །ལྔ་པ་ཡི་ནི་བཞི་པ་ལ། །ཨནྟ་སྠ་ཡི་གཉིས་པའོ། །གཉིས་པའི་གསུམ་པས་མཐའ་བརྟེན་པ། །དབྱངས་ཀྱི་བཞི་པས་བརྒྱན་པར་བྱ། །གདོན་མི་ཟ་བའི་རྗེས་འགྲོ་
བའི། །གསང་བ་ལས་ཀྱི་རིགས་འབྱུང་བའོ། །མཐར་གནས་པ་ཡི་གསུམ་པ་ལ། །དབྱངས་ཀྱི་བཅྭ་ལྔ་པས་བརྒྱན་བྱ། །ལྔ་པ་ཡི་ནི་བཞི་པ་ལ། །དབྱངས་ཀྱི་བཅུ་གཉིས་པས་བརྒྱན་བྱ། །ཨུཤྨ་ཡི་ནི་དང་པོ་དང་། །ཨནྟ་སྠ་ཡི་གཉིས་
པ་ལས། །ལྔ་པའི་དང་པོ་ཉིད་དག་ལ། །ཨུཥྨ་ན་ཡི་གསུམ་པས་བརྒྱན། །དབྱངས་ཀྱི་གསུམ་པས་སྦྱིན་པར་བྱ། །དྲུག་པ་ཡི་ནི་ལྔ་པ་ལ། །དབྱངས་ཀྱི་བཅྭ་ལྔ་པ་དང་སྦྱར། །དྲུག་པ་ཡི་ནི་ལྔ་པ་ལ། །དབྱངས་ཀྱི་བཅུ་གསུམ་པ་སྦྱིན་བྱ། །
ཨུཤྨ་ན་ཡི་ཐ་མ་ལས། །མཐར་གནས་པ་ཡི་གཉིས་པ་དང་། །བཞི་བའི་དང་པོ་ཉིད་དག་ལ། །ཨུཥྨ་ན་ཡི་གཉིས་པོ་སྦྱིན། །དབྱངས་ཀྱི་གསུམ་པས་བརྒྱན་པར་བྱ། །དྲུག་པ་ཡི་ནི་དང་པོ་ལ། །གཉིས་པའི་ལྔ་པས་བརྒྱན་པར་བྱ། །
ཨནྟ་སྠ་ཡི་གཉིས་པ་ལ། །གཉིས་པ་ཡི་ནི་གསུམ་པས་དང་། །མཐར་གནས་པ་ཡི་གཉིས་པ་ལ། །ལྔ་པ་ཡི་ནི་དང་པོ་ལ། །ཨུཥྨ་ཡི་ནི་གཉིས་པ་སྦྱིན། །དབྱངས་ཀྱི་བཞི་པས་སྦྱིན་པར་བྱ། །ལྔ་པ་ཡི་ནི་དང་པོ་ལ། །གཉིས་པ་ཡི་ནི་
ལྔ་པས་བརྒྱན། །སྡེ་ཚན་དྲུག་པའི་གསུམ་པ་དང་། །གསུམ་པ་ཡི་ནི་གསུམ་པ་སྦྱིན། །མཐར་གནས་པ་ཡི་གཉིས་པ་སྦྱར། །ཨཎྟ་སྠ་ཡི་གཉིས་པ་ལས། །ལྔ་པ་ཡི་ནི་དང་པོ་ལ། །ཨུཥྨ་ན་ཡི་གསུམ་པ་སྦྱིན། །དབྱངས་ཀྱི་བཞི་པས་བརྒྱན་
པར་བྱ། །འདི་ནི་འབྱུང་བ་དག་པ་ཡི། །རིགས་ཀྱི་ཡུམ་བཞིའི་སྙིང་པོར་བརྗོད། །མཐར་གནས་པ་ཡི་དང་པོ་ལས། །དྲུག་པ་ཡི་ནི་ལྔ་པ་ལ། །བཞི་པ་ཡི་ནི་ལྔ་པ་དང་། །བཞི་པ་ཡི་ནི་དང་པོ་དང་། །གཉིས་པ་ཡི་ནི་དང་པོ་ལ། །མཐར་
གནས་པ་ཡི་གཉིས་པ་སྦྱར། །ལྔ་པའི་གསུམ་པ་བཅས་པ་ལ། །དབྱངས་ཀྱི་གསུམ་པ་སྦྱིན་པར་བྱ། །དྲུག་པ་ཡི་ནི་དང་པོ་ལ། །ཨནྟ་སྠ་ཡི་གཉིས་པ་སྦྱར། །ལྔ་པ་ཡི་ནི་གསུམ་པས་མཛེས། །གསུམ་

89-1-264a

པ་ཡི་ནི་བཞི་པར་ལྡན། །ལྔ་པ་ཡི་ནི་དང་པོ་ལ། །གཉིས་པ་ཡི་ནི་དང་པོ་ལ། །མཐར་གནས་པ་ཡི་གཉིས་པ་སྦྱར། །ལྔ་པ་གསུམ་པ་ལྡན་པ་ཉིད། །དབྱངས་ཀྱི་བཞི་པ་སྦྱིན་པར་བྱ། །དྲུག་པ་ཡི་ནི་དང་པོ་དང་། །ལྔ་པ་ཡི་ནི་
གསུམ་པ་སྦྱར། །དྲུག་པའི་ཐ་མ་གཟུང་བར་བྱ། །ལྔ་པ་ཡི་ནི་དང་པོ་ལ། །གཉིས་པ་ཡི་ནི་དང་པོ་ལ། །ཨནྟ་སྠ་ཡི་གཉིས་པ་སྦྱར། །ལྔ་པའི་གསུམ་པ་དང་ལྡན་པ། །དབྱངས་ཡིག་བཞི་པས་བརྒྱན་པར་བྱ། །དྲུག་པ་ཡི་ནི་བཞི་པ་ལ། །
གཉིས་པ་གསུམ་པ་སྦྱར་བ་དང་། །དབྱངས་ཀྱི་གསུམ་པ་སྟེང་ནས་སྦྱིན། །ལྔ་པ་ཡི་ནི་ལྔ་པ་ལ། །བཞི་པ་ཡི་ནི་ལྔ་པར་བཅས། །ལྔ་པ་ཡི་ནི་དང་པོ་ལ། །གཉིས་པའི་དང་པོ་དང་བཅས་པ། །མཐར་གནས་པ་ཡི་གཉིས་པ་དང་། །
བཞི་པའི་གསུམ་པ་དང་ལྡན་པར། །དབྱངས་ཡིག་བཞི་པ་ཐོག་མར་སྦྱར། །འདི་ནི་ཁྲོ་བོའི་རྒྱལ་པོ་བཞི། །བླ་མེད་རིགས་ཀྱི་སྒོ་བཞི་འབྱུང་། །གསང་སྔགས་འདི་ནི་གསུངས་ཙམ་གྱིས། །དཀྱིལ་འཁོར་མ་ལུས་རིག་པའི་གཙོ། །
རྩ་བར་གྱུར་པའི་དོན་ཤེས་པས། །ནུས་པ་སྔོན་དུ་འབྱིན་པར་བྱེད། །ཐམས་ཅད་རིགས་ཀྱི་བྱེ་བྲག་གིས། །སྔགས་ཀྱི་ཁྱད་པར་བསྟན་པ་ཡིན། །དབྱངས་ཡིག་བཅུ་བཞི་པ་ལ་ནི། །བཅྭ་ལྔ་པ་ཡིས་སྦྱར་བ་གང་། །འདི་ནི་སྐུ་ནི་གཟི་བརྗིད་མཆོག །
སྤྱན་འདྲེན་པ་རུ་གྱུར་པ་ཡིན། །སྡེ་ཚན་བརྒྱད་པའི་ཐ་མ་ལ། །དབྱངས་ཡིག་དྲུག་པ་སྦྱར་བར་བྱ། །སྡེ་ཚན་གཉིས་པའི་ཐ་མ་སྦྱིན། །འདི་ནི་སྡུད་ཅིང་གཤེགས་གསོལ་བ། །དབྱངས་ཡིག་དང་པོའི་རང་བཞིན་ཅན། །གནས་ཤིང་བཞུགས་པར་
བྱེད་པའོ། །མི་ཕྱེད་ཡེ་ཤེས་འབྱུང་བ་སྟེ། །ཁྱབ་ཅིང་དྲི་མ་མེད་པའོ། །བུ་མོ་ལོ་གྲངས་བཅུ་གཉིས་མའམ། །ཁྱེའུ་ལོ་གྲངས་བཅུ་གཉིས་པ། །མཚན་ཉིད་ཐམས་ཅད་ཡོངས་རྫོགས་པས། །བཟུང་ནས་དབབ་པ་རབ་ཏུ་བརྟག །རྫ་ཡི་
ཕྱེ་མ་སོ་མ་དག །སོ་སོ་ཡི་ནི་རྐང་འོག་ཏུ། །ཉི་ཟླ་གཉིས་སུ་བྲི་བར་བྱ། །དེ་ལས་ཁྲུས་བྱ་རྒྱན་བཏགས་ནས། །དེ་ནས་ལངས་པའི་སྐྱེས་བུ་འདིའང་། །ཐལ་མོ་སྙིང་གར་སྦྱར་བྱས་ཤིང་། །སྟེང་འོག་རླུང་ལ་བསླབ་པར་བྱ། །དེ་ཉིད་མི་

89-1-264b

ཡི་ཤ་དང་ནི། །བདུད་རྩི་སྦྱར་བ་བསྲེས་དེ་ཡང་། །གུ་གུལ་ནག་པོར་བཅས་པས་བདུག །དང་པོ་རྐང་པའི་མཐིལ་དག་ཏུ། །ཡྃ་ལས་རླུང་གི་དཀྱིལ་འཁོར་སྔོ། །བ་དན་གྱིས་ནི་མཚན་པ་བསམ། །མདོམས་བར་དུ་ནི་མེ་ཡིན་ནོ། །
ས་བོན་དཀྱིལ་འཁོར་འབར་བ་བསམ། །ལྟེ་བ་རབ་ལས་ཆུ་ཡི་གནས། །དཀར་པོ་ཟླུམ་པོ་དགོད་པར་བྱ། །དེ་སྟེང་ས་ཡི་དཀྱིལ་འཁོར་དང་། །ལྃ་ལས་བྱུང་བ་རྡོ་རྗེས་མཚན། །གྲུ་བཞི་མཛེས་པ་ཉིད་དུ་བསམ། །ལྟེ་བར་ཛྷཻཾ་དམར་སྐུལ་བར་བྱེད། །
འབར་བ་འོད་འཕྲོ་མི་ཟད་པའོ། །སྙིང་གར་ཧཱུྃ་མཐིང་འོད་འབར་དང་། །སྤྱི་བོར་ཧྃ་དཀར་བསིལ་བར་གྱུར། །མགྲིན་པར་ཨ་དམར་རིམ་པ་སྟེ། །དེ་དག་ཀུན་ལ་བླ་མ་ཡིས། །ཧཱུྃ་ཏྲྃ་ཨ་ཛྷེ་ཞེས་བྱ་བའི། །རིགས་སྔགས་རྡོ་རྗེ་བཟླས་པ་དང་། །
ལྷ་ཡི་ས་བོན་ཕྲེང་སྔགས་ཀྱིས། །རྡོ་རྗེ་སློབ་དཔོན་གྱིས་ཀྱང་བསམ། །ནམ་མཁའི་དབྱིངས་བཞིན་མི་རྟོག་ཅིང་། །རྟོག་པ་གཞན་དག་མ་གོས་པ། །རྡོ་རྗེ་སེམས་དཔའི་ལུས་གནས་སུ། །མི་བསྐྱོད་པ་དང་སྐུ་རྡོ་རྗེ། །ཆོས་འཛིན་པ་དག་
རང་གིས་བསམ། །རང་གི་ལྟེ་བའི་ཛྟེྂ་འོད་ལས། །འོད་ཟེར་དཔག་མེད་བྱུང་ནས་ནི། །ལྷ་གསུམ་པོ་ནི་བསྐུལ་བྱས་ཏེ། །དེ་ནས་ཁྱེའུ་ལུས་ཀྱི་ནི། །ཡི་གེ་ཛྟེེ་ལ་བསྐུལ་བར་བྱ། །དེ་ལས་རླུང་དང་བཅས་པའི་སྒྲ། །མྱུར་དུ་ཞུགས་ཏེ་རྐང་
མཐིལ་གྱིས། །རླུང་དང་བཅས་པའི་བ་དན་བསྐྱོད། །ཉི་ཟླས་ནམ་མཁར་བཏེག་ནས་ནི། །སུམ་མདོའི་མེ་སྦར་ཆུ་ཡང་ཁོལ། །སྙིང་གར་ས་གཡོས་འཁོར་བ་ལས། །ཡི་གེ་སྔ་མ་གསུམ་བསྐུལ་ཏེ། །འོད་ཀྱིས་ལུས་ཀྱི་ནང་ཁེངས་
ཤིང་། །སྣ་བུག་གཡས་ནས་བྱུང་ནས་ཀྱང་། །དེར་གནས་པ་ཡི་འགྲོ་ཀུན་གྱི། །སྣ་བུག་གཡོན་དུ་ཞུགས་བྱས་ཏེ། །ཀུན་ལ་འོད་འབར་འཁོར་བ་ཡིས། །ལུས་ནང་རབ་ཏུ་ཁེངས་པར་བསམ། །དེ་ནས་བདུད་རྩི་ལུས་ལ་གཏོར། །
རོལ་མོའི་སྒྲ་ནི་སྣ་ཚོགས་བྱ། །དེས་ནི་བསྐུལ་བར་ཐེ་ཙོམ་མེད། །གལ་ཏེ་ལུས་ངག་ཡིད་གསུམ་ལ། །རྟགས་རྣམས་ངེས་པར་མ་བྱུང་ན། །ལན་གསུམ་བར་དུ་བཟླས་པར་བྱ། །དེས་ནི་ངེས་པར་བསྐུལ་གྱུར་པའི། །

89-1-265a

འགུལ་བ་དང་ནི་བསྐྱོད་པ་སོགས། །མ་ལུས་སྔགས་ཀྱི་ཚིག་འབྱུང་སྟེ། །འདི་ཡིས་བསྐུལ་བ་མ་ལུས་པའི། །གསང་བ་རབ་ཏུ་གྱུར་པ་ཡིན། །དཀྱིལ་འཁོར་ཀུན་གྱི་གསང་བ་ཡི། །ཡེ་ཤེས་མཆོག་ཏུ་བརྟག་པའོ། །དེ་ནས་རྒྱལ་
པོ་རྡོ་རྗེ་འཛིན། །དེ་བཞིན་གཤེགས་པ་ཀུན་གྱི་བདག །སྐུ་གསུམ་གནས་ནི་ཡོངས་དག་པས། །རྡོ་རྗེ་གསུང་གིས་བཀའ་སྩལ་ཏོ། །དེ་བཞིན་གཤེགས་པ་ཐམས་ཅད་ཀྱི་ཀུན་རྟོག་དག་པར་བྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་རབ་ཏུ་བསྟན་
པའོ་གང་དུ་དུག་གསུམ་ཆ་ལས་ནི། །རྟོག་པའི་སྣང་བ་རྒྱས་པ་ལས། །རང་བཞིན་འབྱུང་བར་གྱུར་པ་དག །ཐབས་ཀྱི་རང་བཞིན་ཤེས་རབ་ཀྱི། །ཡི་གེས་དག་པར་བྱེད་པ་དང་། །ཤེས་རབ་རང་བཞིན་གྱུར་པ་ལ། །ཐབས་ཀྱི་ཡི་གེས་
དག་པར་བྱེད། །གང་དུ་འགྲོན་པར་གྱུར་པ་ལ། །ཐ་མི་དད་པའི་ཡི་གེ་ཡིས། །རྟོག་པ་མངོན་པར་སྦྱང་བ་སྟེ། །གཡས་རྩ་ལ་ནི་བརྟེན་ནས་ནི། །ཞེ་སྡང་རྟོག་པ་གཙོ་གྱུར་པ། །གཡོན་རྩ་ལ་ནི་བརྟེན་པ་ཡིས། །འདོད་ཆགས་རྟོག་པ་གཙོར་
བྱེད་འབྱུང་། །སྒྲ་ཅན་ལ་ནི་བརྟེན་ནས་ནི། །མ་རིག་པ་ནི་འབྱུང་ཞིང་འགྲོ། །གནས་པ་ལུས་ཀྱི་ཡི་གེ་ལས། །འཁོར་བ་སྐྱེད་བྱེད་རྟོག་པ་འབྱུང་། །དེ་ཉིད་རང་བཞིན་རྟོག་པ་ཡིས། །སྲོག་དང་རྩོལ་བ་ལ་སྦྱངས་ཏེ། །ཕོ་མོ་མ་ནིང་
རླུང་འདི་དག །ཅུང་ཟད་དུལ་བར་གྱུར་པ་ན། །ལམ་གྱི་ཆོས་འབྱུང་རྟག་འཆར་བྱེད། །རླུང་ཉིད་ཤིན་དུ་དག་པ་ཡིས། །ཡི་གེ་གསང་སྔགས་དག་གྱུར་པར། །རྟོག་པ་ཡེ་ཤེས་ཆེན་པོར་འཆར། །ཨ་ཞེས་བྱ་བ་མི་ཆགས་བྱེད། །
ཨཱ་ཞེས་བྱ་བས་བར་མར་གནས། །ཨི་ཞེས་བྱ་བ་ཆགས་ཆེན་ཏེ། །ཨཱི་ཞེས་བྱ་བ་གཡེང་བར་འགྱུར། །ཨུ་ཞེས་བྱ་བ་འཇུག་པའི་ཡིད། །ཨཱུ་ཞེས་མྱ་ངན་བསྐྱེད་འགྱུར་བས། །རི་ཞེས་མྱ་ངན་གྱིས་གདུང་བྱེད། །རཱྀ་ཞེས་མྱ་ངན་གྱིས་གནོན་
བྱེད། །ལྀ་ཞེས་ཅུང་ཟད་ཞི་བར་གནས། །ལཱྀ་ཞེས་ཀུན་དུ་རྟོག་པ་ཉིད། །ཨེ་ཞེས་འཇིགས་པ་ཙམ་གྱུར་པ། །ཨཻ་ཞེས་བར་མའི་འཇིགས་བཅས་པ། །ཨོ་ཞེས་འཇིགས་པ་ཆེན་པོ་ཡིན། །ཨཽ་ཞེས་སྲེད་པའི་ཞེན་པ་ཉིད། །ཨཾ་ཞེས་བར་མའི་

89-1-265b

སྲེད་ཞེས་བསྐྱེད། །ཨ་ཞེས་སྲེད་པ་ཆེན་པོ་ཡིན། །ཨ་ཞེས་ཉེར་ལེན་གཞིས་ཡིན་ཏེ། །ཨཱ་ཞེས་མི་དགེ་ལོག་ལྟ་ཅན། །ཨི་ཞེས་པ་ནི་བཀྲེས་པ་སྟེ། །ཨཱི་ཞེས་སྐོམ་པས་གདུངས་པ་ཡིན། །ཨུ་ཞེས་ཚོར་བའི་བྱེ་བྲག་མྱོང་། །ཨཱུ་ཞེས་
ཚོར་བའི་བར་མ་གནས། །རྀ་ཞེས་ཚོར་བ་ཆེན་པོ་དང་། །རཱྀ་ཞེས་རིག་པར་བྱེད་པ་པོ། །ལྀ་ཞེས་མི་འགྱུར་རིག་པ་འཛིན། །ལཱྀ་ཞེས་རིག་པའི་ཡིད་འཇུག་ཞི། །ཨེ་ཞེས་སོ་སོར་རྟོག་སྦྱོང་བ། །ཨཱཻ་ཞེས་ངོ་ཚས་བག་ཡོད་བྱེད། །ཨོ་ཞེས་
སྙིང་རྗེ་བར་སེམས་པ། །ཨཽ་ཞེས་བརྩེ་བ་བྱམས་པར་བཅས། །ཨཾ་ཞེས་བྱ་བར་དོག་པར་བྱེད། །ཨ་ཞེས་བསགས་པ་སྣ་ཚོགས་པ། །ཀྴ་ཞེས་ཕྲག་དོག་རྟོག་པ་སྟེ། །འདི་དག་རང་བཞིན་རྟག་བཅས་ཡིན། །ཀ་ཞེས་བྱ་བ་ཆགས་སེམས་
ཡིན། །ཁ་ཞེས་ཞེན་པར་འབྱུང་བ་དང་། །ག་ཞེས་དགའ་བའི་ཆགས་པ་ཅན། །གྷ་ཞེས་བར་མའི་དགའ་བ་ཅན། །ང་ཞེས་ཤིན་ཏུ་དགའ་བའི་དགེས། །ཙ་ཞེས་བདེ་བས་ཡི་རངས་ཏེ། །ཚ་ཞེས་རབ་ཏུ་མགུ་བས་རངས། །ཛ་ཞེས་བྱ་བ་ངོ་མཚར་སྐྱེས། །ཛཱ་ཞེས་བྱ་བ་དགོད་པར་བྱེད། །
ཉ་ཞེས་དེ་ཉིད་ཀྱིས་ཚིམ་ཡིན། །ཊ་ཞེས་འབྱུང་བར་འདོད་པ་ཡིན། །ཋ་ཞེས་འོ་བྱེད་པར་འདོད་པ། །ཌ་ཞེས་འཇིབ་པར་བྱེད་པ་ཡིན། །ཌྷ་ཞེས་བརྟན་པའི་སེམས་གནས་ཡིན། །ན་ཞེས་བརྩོན་འགྲུས་སྐྱེད་བྱེད་པ། །ཏ་ཞེས་ང་རྒྱལ་རྟོག་པ་ཡིན། །
ཐ་ཞེས་ལུས་ངག་བྱ་བ་བྱེད། །ད་ཞེས་འཕྲོགས་པ་བསྐྱོད་པ་ཡིན། །དྷ་ཞེས་སྟོབས་སྐྱེད་ཁྱད་པར་ལ། །ན་ཞེས་སེམས་སྤྲོ་དང་བ་བཅས། །པ་ཞེས་ཐ་དད་མེད་བདག་གྱུར། །ཕ་ཞེས་ཐ་དད་མེད་བཏང་སྙོམས། །བ་ཞེས་ཐ་དད་མེད་པའི་དངོས། །
བྷ་ཞེས་དྲག་པོའི་བདེ་བ་འདོད། །མ་ཞེས་སྒེག་པར་བྱེད་པའོ། །ཡ་ཞེས་རླུང་གིས་འགྲེས་བྱེད་པ། །ར་ཞེས་ཅུང་ཟད་འབར་བའི་དགེ། །ལ་ཞེས་གསལ་བའི་ཚིག་བརྗོད་པ། །ཝ་ཞེས་བདེན་སྨྲ་གཡོ་མེད་པ། །ཤ་ཞེས་བརྫུན་དུ་སྨྲ་བྱེད་པ། །
ཥ་ཞེས་དེ་བཞིན་ཉིད་དེས་བྱེད། །ས་ཞེས་ཉེ་བར་མི་འདོད་པ། །ཧ་ཞེས་སྦྱིན་པར་བྱེད་པ་ཡིན། །ཀྴ་ཞེས་ཀུན་ཏུ་བསྐུལ་འདོད་པ། །ཀླ་ཞེས་པ་ནི་དེ་བཞིན་དེས། །སླ་ཞེས་པ་ནི་དཔའ་བར་འདོད། །ལླ་ཞེས་བག་

89-1-266a

མེད་ཤེས་བཞིན་བྲལ། །ཤླ་ཞེས་གཡོ་སྒྱུ་སྟོན་པ་དང་། །དྷ་ཞེས་མི་སྲུན་པར་འབྱུང་ཞིང་། །ད་ཞེས་བྱས་གྱུར་འགྲོ་བར་བྱེད། །འདི་ནི་ཀུན་དུ་རྟོག་པར་འགྱུར། །ཨ་ཨཱ་ཞེས་པར་གྱུར་པ་གང་། །བར་མའི་ཆགས་གྱུར་
མ་རིག་ཆེ། །ཨི་ཨཱི་ཞེས་པ་བར་མ་སྟེ། །རྗེས་སུ་འཛིན་པ་མེད་པ་ལ། །ཨཱུ་ཨཱུ་ཞེས་པ་རྣམ་གནོན་པས། །འགྲུབ་པ་ཉིད་དུ་གནས་པ་ཡིན། །ཨེ་ཨཻ་ཞེས་པ་ཐོབ་པའི་ཆ། །འགོག་པ་ལ་ནི་འཇུག་པའོ། །ཨོ་ཨོ་ཞེས་པ་ཐ་མ་སྟེ། །
ཡིད་ནི་སྐྱོ་བར་གྱུར་པའོ། །ཨ་ཨཿབཅས་པ་འཐིབས་པ་ཉིད། །ལེ་ལོ་སྙོམས་ལས་གྱུར་པའོ། །རྀ་རཱྀ་ལྀ་ལཱྀ་འབྱུང་བ་ལས། །མི་ཕྱེད་ཐེ་ཙོམ་གྱུར་པ་སྟེ། །འདི་དག་ཕྲ་དང་རགས་པ་དང་། །བར་མའི་དབྱེ་བ་བསྟན་པ་ཡིན། །ཐོག་མ་དང་ནི་
ཐ་མ་དང་། །དབུས་སུ་འབྱུང་བའི་སྐད་ཅིག་མ། །སྐྱེ་དང་འགག་དང་གནས་པ་ལས། །རང་བཞིན་ཐ་མ་རྟོག་ལས་འབྱུང་། །དེ་ཉིད་འགྲོ་དང་འོང་བ་དང་། །གནས་པ་ཡི་ནི་རླུང་གི་ཆ། །ཐབས་དང་ཤེས་རབ་དབྱེ་བ་ཡི། །ཉིན་དང་མཚན་དུ་
འབྱུང་བ་ནི། །བརྒྱད་བཅུ་ཕྲག་གཉིས་ཉེ་བར་འབྱུང་། །ས་བོན་ཆ་དང་རྣམ་པར་སྨིན། །ཡུལ་གྱུར་རྐྱེན་འབྱུང་འདི་དག་ནི། །ཀུན་དུ་རྟོག་པ་ཆེན་པོ་སྟེ། །འདི་ལས་དགེ་དང་མི་དགེ་བྱུང་། །དེ་ལས་བག་ཆགས་ལས་བྱུང་བ། །
བདེ་འགྲོ་དང་ནི་ངན་འགྲོའི་རྒྱུན། །རྟེན་འབྲེལ་བཅུ་གཉིས་དག་གིས་འཁོར། །འདི་དག་ལུགས་ལས་བཟློག་གྱུར་ན། །རང་བྱུང་རྣལ་འབྱོར་པ་ནི་འགྱུར། །འདིར་ནི་ཚོགས་པ་ལས་སྐྱེ་བ། །རྟེན་འབྲེལ་ཙམ་དུ་འབྱུང་བ་ཡིན། །
རིགས་ཀྱི་བུ་དག་འདི་ལྟ་སྟེ། །དཔེར་ན་གཙུབ་ཤིང་གཙུབ་སྟན་དང་། །སྐྱེས་བུའི་ལག་པའི་རྩོལ་བ་ཡི། །རྐྱེན་གྱིས་རབ་ཏུ་བསྐུལ་གྱུར་ན། །དུ་བ་མེད་དང་འབར་བཅས་པ། །ཇི་བཞིན་བར་ནས་འབྱུང་མོད་ཀྱི། །ལེགས་པར་
བརྟགས་ཤིང་བཙལ་བ་ན། །མེ་དེ་གང་དུའང་མི་གནས་པ། །རིགས་ཀྱི་བུ་དག་དེ་ལྟར་ན། །དེ་བཞིན་གཤེགས་པའི་ཆོས་རྣམས་ཀྱིས། །བླ་མེད་རང་བཞིན་འདི་དག་ཀྱང་། །དམ་ཚིག་སྟོང་པ་ཉིད་

89-1-266b

གནས་པས། །ཆོས་རྣམས་རང་བཞིན་རྣམ་དག་པ། །འགྲོ་འོང་མེད་པར་རྗེས་རིག་བྱ། །དེ་ཉིད་འདི་ནི་བསྟན་པའོ་ཞེས་གསུངས་སོ། །དེ་ནས་བྱང་ཆུབ་སེམས་དཔའི་ཚོགས་དེ་དག་ཐམས་ཅད་ངོ་མཚར་དུ་གྱུར། རྨད་དུ་གྱུར་ནས་རྔམ་ཞིང་མིག་
གདངས་ཏེ་ཚིག་འདི་སྐད་ཅེས་སྨྲས་སོ། །རྨད་བྱུང་ཆེན་པོ་ཆོས་རྣམས་ནི། །ནམ་མཁའ་དང་ནི་མཚུངས་གྱུར་ཅིང་། །རྣམ་པར་མི་རྟོག་དག་པ་ལ། །ཀུན་རྫོབ་ཙམ་དུ་གསུངས་པ་མཚར། །དེ་བཞིན་གཤེགས་པ་ཐམས་ཅད་ཀྱི་སྐུ་དང་
གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་སངས་རྒྱས། ཐམས་ཅད་ཀྱི་རང་བཞིན་རྣམ་པར་དག་ཅིང་དོན་དམ་པའི་གནས་ཀྱི་དག་པ་ཆེན་པོ་དེ་ཁོ་ན་ཉིད་དུ་
བསྟན་པའི་ལེའུ་སྟེ་བདུན་བཅུ་རྩ་བཞི་པའོ།། །། དེ་ནས་རྒྱལ་པོ་རྡོ་རྗེ་འཛིན། །ཀུན་མཆོག་དབང་ཕྱུག་འཁོར་ལོའི་གཙོས། །རབ་ཏུ་བྱིན་བརླབས་སྣང་བ་ལས། །བཀའ་སྩལ་རྡོ་རྗེ་ཚིག་འདི་བསྟན། །དེ་ནས་དེ་བཞིན་གཤེགས་
པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གང་དུ་བྱིན་གྱིས་བརློབ་པ་འདི། ངེས་པར་གྱུར་པ་འདི་ཕྱུང་ངོ་། །གང་ཞིག་སྐྱེས་བུའི་སྤྱོད་ཡུལ་དུ། །དེ་བཞིན་གཤེགས་པའི་དཀྱིལ་འཁོར་མཆོག །གང་ཞིག་མཐོང་
ཞིང་གང་བབས་པའི། །ཡང་དག་ཡེ་ཤེས་རྟོག་པར་བྱ། །སྐུ་བབས་པས་ནི་འདའ་བར་བྱེད། །འཕར་ཞིང་གར་དང་ཕྱག་རྒྱ་འབྱུང་། །ཐུགས་ཀྱི་སྙིང་པོ་རབ་བསྐུལ་བ། །སྲོག་རྩོལ་འགོག་པས་འགྲུབ་པར་འགྱུར། །རིངས་པ་ཉིད་ཀྱང་
གསུམ་དུ་འགྱུར། །རྣམ་རྟོག་དང་ནི་ཡུལ་རྣམས་དང་། །འབྱུང་བ་འགག་ཅིང་བདེ་བར་འགྱུར། །སྨིག་རྒྱུ་ལ་སོགས་མཐོང་བར་འབྱུང་། །ལྷ་ཆེན་དག་ཀྱང་དབབ་པ་འབྱུང་། །ཚངས་པས་ལུས་ལ་བྱིན་བརླབས་ན། །
ཚངས་པའི་དབྱངས་ནི་སྟོན་པར་བྱེད། །བརྒྱ་བྱིན་གྱིས་ནི་རྡོ་རྗེ་འཛིན། །ལྐོག་ཏུ་གྱུར་པ་མཐོང་བར་བྱེད། །དྲག་པོ་བས་ནི་སྟོབས་རྙེད་ཅིང་། །རིག་བྱེད་དག་ནི་

89-1-267a

འདོན་པ་དང་། །ཨུ་མཱ་དེ་བཱི་ལ་སོགས་པས། །རྩེ་འཇོ་ཆགས་པ་སྐྱེ་བར་སྟོན། །ལྷ་ཆེན་དག་ནི་གང་བབས་པ། །འཁོར་ལོ་འཛིན་པའི་བརྡ་དག་དང་། །ས་འོག་ས་སྟེང་ས་བླའོ། །དབང་དུ་བྱེད་པ་སྟོན་པར་འགྱུར། །
འཕགས་ལམ་བཞི་ནི་བདེན་པ་བཞི། །ཆོས་རྣམས་རྟོགས་པ་སྟོན་པར་བྱེད། །ཉན་ཐོས་རང་རྒྱལ་རྣམས་ཀྱི་ནི། །གྲུབ་པའི་མཐའ་ནི་སྟོན་པ་དང་། །སྤྱད་པའི་ཡོན་ཏན་འབྱུང་བ་ལས། །སྡེ་བ་རྣམས་ཀྱང་སྤྱོད་པ་དང་། །བསེ་རུ་ལྟ་བུའི་
སྤྱོད་ཚུལ་ལོ། །ཐེག་པ་དམན་པར་ལྟུང་བའི་རྟགས། །བྱང་ཆུབ་སེམས་དཔའ་སྤྱོད་པ་གང་། །ཚད་མེད་བཞི་དང་དེ་ལ་སོགས། །ལུས་ངག་ཡིད་ཀྱིས་གང་བྱུང་བ། །སེམས་དཔའི་ལྟ་སྟངས་བྱེད་པ་ན། །བྱང་ཆུབ་སེམས་ཉིད་འགྲུབ་འགྱུར་
བ། །ངོ་བོ་ཉིད་མེད་ཚིག་བརྗོད་འགྱུར། །གྲུ་གང་དག་ཏུ་འཕགས་པ་ནི། །བསྐྱེད་པའི་རིམ་པ་བརྟན་པར་བྱེད། །ཁྲུ་དོ་བ་ནི་རྫོགས་པའི་རིམ། །ཁྲུ་བརྒྱད་ཀྱི་ནི་ཕྱིར་མི་ལྡོག །ལྔ་པས་ལམ་ལྔ་མཐར་ཕྱིན་པ། །ཚེ་གཅིག་འབྲས་བུ་ཐོབ་པར་འགྱུར། །
གསང་བ་གྲུབ་པ་དག་གིས་ནི། །འབད་པས་དབབ་པ་བརྟག་པར་བྱ། །རྡོ་རྗེ་སྐུ་ནི་བྱིན་བརླབས་ཤིང་། །གཟུགས་ཀྱི་ཕུང་པོ་བབས་གྱུར་པས། །རྣམ་པར་སྣང་མཛད་ཡེ་ཤེས་ནི། །གཏི་མུག་རིགས་ཀྱི་དམ་ཚིག་སྤྱོད། །རྡོ་རྗེ་གསུང་གིས་
བྱིན་བརླབས་ཤིང་། །འདུ་ཤེས་ཕུང་པོ་བབས་གྱུར་པས། །འོད་དཔག་མེད་པའི་ཡེ་ཤེས་ནི། །འདོད་ཆགས་རིགས་ཀྱི་དམ་ཚིག་སྤྱོད། །རྡོ་རྗེ་ཐུགས་ཀྱིས་བྱིན་བརླབས་ཤིང་། །རྣམ་ཤེས་ཕུང་པོ་དག་བྱེད་བབས། །མི་བསྐྱོད་པ་ཡི་ཡེ་ཤེས་ནི། །
ཞེ་སྡང་རིགས་ཀྱི་དམ་ཚིག་སྤྱོད། །རྡོ་རྗེ་ཡོན་ཏན་གྱིས་བྱིན་བརླབས། །ཚོར་བའི་ཕུང་པོས་བདག་བྱིན་བརླབས། །དཀོན་མཆོག་དཔལ་གྱི་ཡེ་ཤེས་ནི། །ང་རྒྱལ་རིགས་ཀྱི་དམ་ཚིག་སྤྱོད། །རྡོ་རྗེ་ཕྲིན་ལས་བྱིན་གྱིས་བརློབ། །འདུ་
བྱེད་ཕུང་པོ་བབས་གྱུར་པས། །གདོན་མི་ཟ་བའི་ཡེ་ཤེས་ནི། །ཕྲག་དོག་རིགས་ཀྱི་དམ་ཚིག་སྤྱོད། །སངས་རྒྱས་སྤྱན་ནི་བབས་གྱུར་ཅིང་། །ས་ཡི་ཁམས་ནི་བྱིན་བརླབས་ན། །དབང་ཆེན་རི་རབ་ལྟར་བརྟན་ཅིང་། །རྡོ་རྗེ་རྒྱས་པའི་ལས་འགྲུབ་འགྱུར། །

89-1-267b

མཱ་མ་ཀཱིས་ནི་བདག་རྒྱུད་ལ། །ཆུ་ཡི་ཁམས་ནི་བྱིན་བརླབས་ནི། །གདུང་བ་རྣམས་ལས་བསིལ་བྱེད་ཅིང་། །ལྷ་མོ་སྒྲོལ་རྣམས་འགྲུབ་པའོ། །ན་བཟའ་དཀར་མོ་བཅས་པ་ཡིས། །མེ་ཡི་ཁམས་ནི་བྱིན་རླབས་པས། །བག་ཆགས་དེ་ནི་
བསྲེག་བྱེད་ཅིང་། །རྡོ་རྗེ་དབང་དུ་སྡུད་པར་བྱེད། །ལྷ་མོ་སྒྲོལ་མའི་གཟི་བརྗིད་ཀྱིས། །རླུང་གི་ཁམས་ནི་བྱིན་བརླབས་པས། །ཐམས་ཅད་སྐྲོད་པའི་ལས་བྱེད་དེ། །རྡོ་རྗེ་མངོན་སྤྱོད་ཆེར་སྤྱོད་དོ། །ལྷ་མོ་གཟུགས་ཀྱི་རྡོ་རྗེ་མ། །སྨིག་རྒྱུ་ལྟ་བུར་
མཐོང་བར་བྱེད། །ལྷ་མོ་སྒྲ་ཡི་རྡོ་རྗེ་མ། །དུ་བ་ལྟ་བུར་འཆར་བར་བྱེད། །ལྷ་མོ་དྲི་ཡི་རྡོ་རྗེ་མ། །སྐར་མ་སྲིན་བུ་མེ་ཁྱེར་འཆར། །ལྷ་མོ་རོ་ཡི་རྡོ་རྗེ་མ། །མར་མེ་འབར་བ་ལྟར་གསལ་ཞིང་། །ལྷ་མོ་རེག་བྱ་རྡོ་རྗེ་མ། །ཐམས་ཅད་སྟོང་པའི་
ཆོས་ཉིད་ལ། །ནམ་མཁའ་ཁམས་ནི་བབས་གྱུར་པས། །བདེ་བ་ཆེན་པོའི་ཡེ་ཤེས་སྐྱེ། །དེ་ཡི་མིག་གི་རྣམ་ཤེས་ལ། །ས་ཡི་སྙིང་པོས་བྱིན་བརླབས་པས། །གཟུགས་ཀྱི་དངོས་པོ་སྣ་ཚོགས་དང་། །ལྐོག་ཏུ་གྱུར་པའི་རྫས་རྣམས་མཐོང་། །
དེ་ཡི་རྣ་བའི་རྣམ་ཤེས་ལ། །ལག་ན་རྡོ་རྗེས་བྱིན་བརླབས་པས། །ཕྲ་རགས་སྒྲ་རྣམས་ཐོས་པ་དང་། །ལུང་བསྟན་པ་ཡང་ཐོབ་པར་འགྱུར། །དེ་ཡི་སྣ་ཡི་རྣམ་ཤེས་ལ། །ནམ་མཁའི་སྙིང་པོས་བྱིན་བརླབས་པས། །སྣ་ཚོགས་དྲི་རྣམས་ཚོར་བ་དང་། །
སྣ་རྩེའི་འོད་ཟེར་ཚོགས་མཐོང་འགྱུར། །དེ་ཡི་ལྕེ་ཡི་རྣམ་ཤེས་ལ། །འཇིག་རྟེན་དབང་ཕྱུག་གིས་བྱིན་བརླབས། །ལྷ་ཡི་བདུད་རྩི་མྱོང་བྱེད་ཅིང་། །གསུང་དབྱངས་སྙན་པ་སྣ་ཚོགས་འབྱུང་། །དེ་ཡི་ལུས་ཀྱི་རྣམ་ཤེས་ལ། །སྒྲིབ་པ་སེལ་བས་
བྱིན་བརླབས་པས། །འཇིག་རྟེན་ཁམས་ནི་གསུམ་དག་གི། །རེག་བྱའི་ཁྱད་པར་མཆོག་རྣམས་ཐོབ། །དེ་ཡི་ཡིད་ཀྱི་རྣམ་ཤེས་ལ། །ཀུན་ཏུ་བཟང་པོས་བྱིན་བརླབས་པས། །དུས་གསུམ་ཤེས་པའི་ཡེ་ཤེས་ནི། །ཞག་གསུམ་ལོན་པ་བཞིན་དུ་དྲན། །དེ་ཡི་ཡིད་ལ་
ཁྱབ་བྱེད་པར། །བྱམས་པ་མགོན་པོས་བྱིན་བརླབས་པས། །ཉོན་མོངས་ཡེ་ཤེས་གྱུར་ནས་ཀྱང་། །རྟོག་པ་མེད་པར་འགྲོ་ཞིང་ལྡིང་། །དེ་ཡི་ཀུན་གཞིའི་རྣམ་ཤེས་ལ། །འཇམ་པའི་དབྱངས་ཀྱིས་བྱིན་བརླབས་པ། །ལུས་ཀྱི་ཆ་ཤས་གཡོ་འགྱུར་ཞིང་། །མཁའ་

89-1-268a

ལ་སྤྱོད་པ་ཉིད་དུ་འགྲོ། །སྐུ་ནི་སྣང་བ་སྒྱུར་བར་བྱེད། །གསུང་ནི་གྲག་པ་སྔགས་སུ་བརྗོད། །ཐུགས་ཀྱི་སྙིང་པོ་རབ་བསྐུལ་བས། །སྲོག་རྩོལ་བཟླས་པ་འགྲུབ་པར་འགྱུར། །ཁྲོ་བོའི་རྒྱལ་པོ་ཐམས་ཅད་ཀྱི། །དེ་ཉིད་བྱིན་གྱིས་བརླབས་
གྱུར་ན། །བར་ཆད་བདུད་དཔུང་མ་ལུས་འཇོམས། །བརྟན་པ་མཆོག་ཏུ་འབེབས་པར་བྱེད། །ཁྲོ་བོའི་རྒྱལ་པོ་བཅུ་རྣམས་ཀྱིས། །ལུས་ལ་ངེས་པར་བྱིན་བརླབས་ན། །ཕྱག་རྒྱ་བྱེད་ཅིང་སྡིགས་མཛུབ་བྱེད། །ཕྱོགས་སྐྱོང་བཅུ་པོ་འཇོམས་པར་བྱེད། །
གཡོན་བརྐྱང་གཡས་བརྐྱང་རྡོ་རྗེའི་གར། །རྡོ་རྗེའི་ས་གཞི་བསྒྱུར་བ་དང་། །ཧཱུྃ་ཕཊ་རྔམས་པའི་གད་མོ་ཡིས། །རླུང་བཅུ་དབང་དུ་སྒྱུར་བར་གནས། །ཁྲོ་བོ་དུ་མ་སྤྲོ་ཞིང་སྡུད། །ཡེ་ཤེས་ཐུགས་རྗེ་ཁྲོས་པ་ཡིས། །དངོས་
པོར་འཛིན་པའི་གདོན་རྣམས་འཇོམས། །ལུས་ཀྱི་ཆ་ཤས་འབེབས་པར་བྱེད། །རྡོ་རྗེའི་དཀྱིལ་འཁོར་དུ་བྱིན་གྱིས་བརླབས་པ་སོ་སོར་རབ་ཏུ་བསྟན་པའི་ཏིང་ངེ་འཛིན་ཏོ། །བཅོམ་ལྡན་རྡོ་རྗེ་མི་བསྐྱོད་པས། །གསང་བ་འདུས་པ་རྩ་བའི་རྒྱུད། །
སངས་རྒྱས་རྣམ་པར་སྣང་མཛད་ཀྱིས། །ཏ་ཐཱ་ས་གྲ་ཧ་ཡི་རྒྱུད། །སངས་རྒྱས་རིན་ཆེན་དཔལ་གྱིས་ནི། །སྒྱུ་འཕྲུལ་དྲ་བ་ཆེན་པོའི་རྒྱུད། །སངས་རྒྱས་འོད་དཔག་མེད་པ་ཡིས། །ཟླ་གསང་ཐིག་ལེའི་རྒྱུད་གསུངས་སོ། །སངས་རྒྱས་
ཐོགས་མེད་གྲུབ་པ་ཡིས། །དམ་ཚིག་གསུམ་བཀོད་རྒྱལ་པོ་བཤད། །སངས་རྒྱས་སྤྱན་མས་མཉམ་སྦྱོར་རྒྱུད། །མཱ་མ་ཀཱི་ནི་ཧེ་བཛྲ། །གོས་དཀར་མ་ནི་འཁོར་ལོ་སྡོམ། །སྒྲོལ་མ་སྒྱུ་འཕྲུལ་ཆེན་པོ་ཉིད། །དཔལ་ལྡན་རྡོ་རྗེ་དབྱིངས་ཕྱུག་མས། །
རྡོ་རྗེ་གདན་བཞི་གཙུག་ལག་རྒྱུད། །གཟུགས་ཀྱི་རྡོ་རྗེས་གསང་བའི་མཛོད། །སྒྲ་ཡི་རྡོ་རྗེའི་ལྷ་མོ་ཡིས། །བདེ་བ་དམ་པ་རྟོགས་སྐྱེད་གསུངས། །དྲི་ཡི་རྡོ་རྗེས་སངས་རྒྱས་ཐོད། །རོ་ཡི་རྡོ་རྗེའི་ལྷ་མོ་ཡིས། །རྡོ་རྗེ་བདུད་རྩིའི་རྒྱུད་མཆོག་གསུངས། །
བྱམས་པ་མགོན་པོས་རིག་མཆོག་དང་། །ས་ཡི་སྙིང་པོས་སྐུ་གསུང་ཐུགས། །རྡོ་རྗེ་གསང་བའི་རྒྱན་བཀོད་གསུངས། །གསང་བའི་བདག་པོས་དབང་བསྐུར་རྒྱུད། །ནམ་མཁའི་སྙིང་པོས་དཔལ་ལྡན་ནི། །གསང་བ་ཐིག་ལེའི་རྒྱུད་མཆོག་གསུངས། །

89-1-268b

འཇིག་རྟེན་དབང་ཕྱུག་མཆོག་གིས་ནི། །པུནྡ་རཱི་ཀ་དྲ་བ་ཅན། །འཇམ་དབྱངས་དཔའ་བོ་རྩ་བའི་རྒྱུད། །སྒྲིབ་པ་ཐམས་ཅད་རྣམ་སེལ་བས། །ཨ་མོ་གྷ་ཡི་རྒྱུད་བསྟན་པ། །ཀུན་ཏུ་བཟང་པོས་གསང་བའི་རྒྱུད། །བྱང་ཆུབ་སེམས་དཔའ་མཆོག་
གིས་གསུངས། །གཤིན་རྗེའི་གཤེད་པོས་དགྲ་ནག་པོ། །ཤེས་རབ་མཐར་བྱེད་ཁམས་གསུམ་རྒྱལ། །རྟ་མགྲིན་གསང་བ་མཆོག་ཏུ་རོལ། །བདུད་རྩི་འཁྱིལ་པས་རྡོ་རྗེ་སྒོ། །མི་གཡོ་མགོན་པོས་གསང་བའི་རྒྱུད། །འདོད་རྒྱལ་ཐབས་ཀྱི་
ཞགས་པ་ཕྲེང་། །དབྱུག་སྔོན་གདུག་པ་ཀུན་འདུལ་བ། །སྟོབས་པོ་ཆེ་ཡིས་སྒྲ་རྒྱལ་རྒྱུད། །སུྃ་བྷ་རཱ་ཛ་ས་རྡོ་རྗེས། །གཙུག་ཏོར་རྡོ་རྗེ་གཙུག་ཏོར་རྒྱུད། །ཁྲོ་བོའི་རྒྱལ་པོ་མཆོག་རྣམས་ཀྱིས། །རིམ་པར་གསུངས་པ་བསྟན་པའོ། །
རྩ་བའི་རྒྱུད་གྱུར་སུམ་བཅུ་གཉིས། །རེ་རེ་ལ་ཡང་ཕྱི་ནང་གསང་བ་བཅས། །ཁྱད་པར་ཕྱི་ཡི་འབུམ་ཕྲག་སུམ་བཅུ་དྲུག །ཡི་གེའི་དབྱེ་བ་སྟོང་ཕྲག་སུམ་བཅུ་བཞི། །བྱང་ཆུབ་སེམས་དཔའ་རིག་མར་བཅས། །ཁྲོ་བོའི་རྒྱལ་པོ་རྣམས་ཀྱིས་ངེས་པར་
གསུངས་པའོ། །འདི་དག་འགྲོ་བའི་དོན་སླད་དུ། །སྔོན་རྒྱུའི་ནུས་པ་རྟེན་ཅན་ལ། །དེ་ཉིད་ཁྲོ་ཆགས་སྐུ་རུ་སྟོན། །བག་ལ་ཉལ་དང་ཕྲ་བ་ཡི། །ཟག་པ་མེད་པའི་སྤྱོད་ཡུལ་ལ། །ཞི་བ་སྤྲོས་མེད་མཛད་པ་བྱེད། །ཞིང་ཁམས་བྱེ་བ་སྟོང་ཕྲག་ཏུ། །
མཛད་པ་རྣམ་པ་ཐ་དད་པས། །གཅིག་ལས་དུ་མ་རྣམ་པར་འཕྲུལ། །སེམས་ཅན་ཁམས་རྣམས་སྐྱེས་པ་དང་། །འབྱུང་བ་གནས་པའི་སྲིད་པ་རུ། །རྒྱུ་དང་རྐྱེན་ལས་གྲུབ་ཚུལ་དང་། །ཉོན་མོངས་ཁམས་དང་དབང་པོ་དང་། །
བག་ལ་ཉལ་སོགས་དྲི་མ་རྣམས། །ཁམས་གསུམ་བརྟན་དང་གཡོ་བ་ཡི། །རྒྱུ་འབྲས་ཕྲ་བའི་ཕྲ་བ་ལ། །ལག་མཐིལ་སྐྱུ་རུ་ར་བཞག་འདྲ། །རྡོ་རྗེའི་སྤྱན་དང་རྡོ་རྗེའི་སྙན། །རྡོ་རྗེའི་ཐུགས་དང་རྡོ་རྗེ་གནས། །རྡོ་རྗེ་སྤྱོད་པའི་རྫུ་འཕྲུལ་
རྣམས། །སངས་རྒྱས་མངོན་ཤེས་ལྔ་དོན་འགྲུབ། །ཡོངས་སུ་མ་དག་ཀླ་ཀློའི་གླིང་། །ཐ་དད་པར་ནི་ཉོན་མོངས་ཅན། །དེ་དག་ཤིན་ཏུ་དུལ་བར་མཛད། །དྲག་པོའི་ཉམས་ནི་གར་དགུ་རོལ། །དབང་ལ་ཆགས་ཚུལ་དྲུག་

89-1-269a

བཅུ་བཞི། །རྒྱས་ལ་ཁྱད་པར་བཅུ་དྲུག་སྟེ། །ཞི་བའི་ཚུལ་ནི་བཅུ་གཉིས་ཡིན། །སངས་རྒྱས་ཐམས་ཅད་ཀྱི་ནི་ཡང་། །གསང་བ་ཡོངས་སུ་རྫོགས་པ་ཉིད། །དཔལ་མཆོག་རྟོག་པ་བདུན་པ་སྟེ། །རྟོག་པ་དང་པོ་གླིང་སློང་བ། །གསང་བ་རྒྱས་པར་
བསྟན་པ་ཡིན། །རྟོག་པ་གཉིས་པ་རྡོ་རྗེའི་རིགས། །མཆོག་ཏུ་བརྟག་པ་ཆེན་པོ་ལས། །བརྗོད་བྱ་བརྗོད་བྱེད་ཚུལ་ལྡན་པ། །ཏིང་ངེ་འཛིན་དང་བཅས་པའོ། །རྟོག་པ་གསུས་པ་རིན་ཆེན་རིགས། །འོད་ཟེར་སྣང་བའི་ཡེ་ཤེས་ཆེ། །ཐ་དད་མེད་པ་ཆོས་
ཀྱི་དབྱིངས། །བྱང་ཆུབ་ཆེན་པོ་བརྗོད་པའོ། །རྟོག་པ་བཞི་པོ་པད་མའི་རིགས། །མ་ཆགས་བདེ་བ་འོད་འབར་བ། །སོ་སོའི་ཏིང་འཛིན་ལ་བཞུགས་ནས། །རྟོག་པའི་ཡེ་ཤེས་འཆར་བྱེད་པའོ་རྟོག་པ་ལྔ་བ་ལས་ཀྱི་རིགས། །སྣ་ཚོགས་དོན་ཀུན་
སྒྲུབ་བྱེད་པས། །ཤེས་རབ་རལ་གྲི་ཡོངས་གཅོད་པའི། །ཁྱད་པར་བསྒྲུབ་པ་བརྗོད་པའོ། །རྟོག་པ་དྲུག་པ་ཆོས་ཀྱི་དབྱིངས། །སངས་རྒྱས་དུ་མའི་དགོངས་པ་དག །གཅིག་ཏུ་ཡང་དག་བསྡུས་པ་ནི། །དེ་ཉིད་མཆོག་ཏུ་མི་འགྱུར་བའོ། །རྟོག་པ་
བདུན་པ་སྣང་བ་རྒྱས། །ཡེ་ཤེས་ལྔ་ནི་རབ་འབྱུང་བ། །འོད་ཟེར་སྣ་ཚོགས་ཚད་མེད་པ། །བཀོད་པ་མཐའ་ཡས་སྤྲིན་ཚོགས་པས། །རབ་ཏུ་འབར་བའི་འོད་མངའ་བ། །དཔག་མེད་ཚུལ་འདི་བསྟན་པའོ། །བཅོམ་ལྡན་རྡོ་རྗེ་འཛིན་པ་ནི། །གཡས་
དང་གཡོན་གྱིས་སྦྱར་བ་དང་། །གཡོན་བརྐྱང་དུ་ནི་ཉེར་སྦྱོར་རོ། །ཞལ་གསུམ་ཕྱག་དྲུག་རྣམ་པར་འབྱུང་། །ཁྲོ་བོ་སྐྱིལ་ཀྲུང་ལོངས་སྤྱོད་པས། །ཐམས་ཅད་མ་ལུས་བདུད་འཇོམས་མཛད། །རྟེན་ཅིང་འབྲེལ་ལས་འབྱུང་བ་ལས། །དངོས་
པོ་ཐམས་ཅད་རྣམ་པར་བརྟག །བླ་མ་སངས་རྒྱས་ཆོས་གྱུར་ཅིང་། །དགེ་འདུན་ཀྱང་ནི་འདི་ཉིད་དེ། །དེ་ཡི་དྲིན་གྱིས་ཤེས་འགྱུར་བ། །དེ་བས་དཀོན་མཆོག་གསུམ་བདག་ཡིན། །མི་ཤེས་
རབ་རིབ་ཀྱིས་ལྡོངས་ལ། །འདི་ནི་ལམ་རབ་སྟོན་བྱེད་ཡིན། །བདེ་བ་ཀུན་གྱི་མཆོག་གྱུར་དང་། །འདོད་པའི་དོན་ཀུན་སྟེར་བྱེད་ཡིན། །དེ་བས་དེ་དང་མཉམ་པ་ཡི། །མཆོད་བྱ་གཞན་ནི་བྱེད་མ་ཡིན། །དེ་བས་འབད་པ་ཐམས་ཅད་

89-1-269b

ཀྱིས། །བརྟུལ་ཞུགས་ལྡན་པས་བླ་མ་མཆོད། །དེ་མཉམ་འགྲོ་བ་འཇིག་རྟེན་ན། །ཁམས་གསུམ་ཀུན་ལས་མི་རྙེད་དེ། །རྡོ་རྗེ་སེམས་དཔའ་འཇིག་རྟེན་དུ། །ཕུན་སུམ་ཚོགས་པ་སྟོན་ཕྱིར་གསུངས། །རྣལ་འབྱོར་པ་འདི་ཅི་སྤྱོད་ཀྱང་། །
ཐམས་ཅད་དུ་ནི་སྨད་མི་བྱ། །རྟོག་པ་ཀུན་ལས་རྣམ་གྲོལ་ཕྱིར། །ཇི་ལྟར་འདོད་པས་བྱ་བ་མེད། །དེ་ནི་དངོས་ཀུན་ངོ་བོ་སྟེ། །ཁྱབ་བདག་སངས་རྒྱས་ཀུན་རང་བཞིན། །རང་བྱུང་ཇི་ལྟར་འདོད་པ་སྤྱད། །སེམས་ཅན་ཀུན་གྱི་སྙིང་ལ་
ཞུགས། །དེ་ཉིད་ཐམས་ཅད་བླ་ན་མེད། །འདི་ནི་རྣལ་འབྱོར་དབང་པོ་མཆོག །རྣལ་འབྱོར་སྐྱེས་བུར་བཤད་པ་སྟེ། །རྗེས་སུ་རྣལ་འབྱོར་རིགས་པ་མཆོག །གཉིས་འདུས་ཤིན་ཏུ་རྣལ་འབྱོར་ཏེ། །གཉིས་མེད་ཡེ་ཤེས་རྣལ་འབྱོར་
ཆེ། །རྣལ་འབྱོར་དེ་ནི་སངས་རྒྱས་འགྱུར། །ཡེ་ཤེས་རྒྱ་མཚོ་དམ་པ་ཉིད། །འོ་མའི་རྒྱ་མཚོ་བསྲུབས་པ་ལས། །མར་ནི་ཤིན་དུ་འདུ་བ་ལྟར། །དབའ་རླབས་འདུས་པས་སྟོབས་གྱུར་པ། །གཞན་ཡང་ཐམས་ཅད་སྐྱེ་འགྱུར་ཞིང་། །
འཇིག་རྟེན་འཇིག་རྟེན་འདས་པ་དང་། །བརྟན་དང་གཡོ་བའི་ཆོས་ཀུན་གྱིས། །སྲིད་གསུམ་བདག་པོ་རྣམ་པར་འཕྲུལ། །དེ་ལྟར་བདུད་རྩི་ལས་ནི་ལངས། །ཉན་ཐོས་རང་རྒྱལ་འབྱུང་བ་དང་། །བྱང་ཆུབ་སེམས་དཔའི་ས་ལས་ནི། །
ཁྱད་པར་འགྲོ་བ་གཅིག་པ་ཉིད། །རྡོ་རྗེ་འཛིན་པ་ས་དགེ་བ། །བཅུ་གསུམ་དུ་ཡང་རྣམ་བཤད་པ། །གྲུ་གསུམ་རྣམ་པར་འབྱུང་བ་ནི། །འདིར་ནི་ཆོས་ཀྱི་འབྱུང་གནས་བརྗོད། །མེ་ལོང་ནང་གི་གཟུགས་བརྙན་ནི། །ཇི་ལྟར་ཀུན་དུ་སྣང་
གྱུར་པ། །དེ་བཞིན་གཉིས་མེད་ཡེ་ཤེས་འདིར། །སངས་རྒྱས་བྱང་ཆུབ་བསམ་མི་ཁྱབ། །ནམ་མཁའ་ལྟ་བུའི་ཆོས་རྣམས་ལ། །རྣམ་པར་རྟོག་པའི་རྒྱན་གྱིས་བརྟགས། །རང་བྱུང་གཅིག་ཉིད་གཉིས་སུ་མེད། །སེམས་ཅན་བསམ་པའི་
དབང་གིས་ནི། །ལྟ་དང་གྲུབ་མཐའ་སྣ་ཚོགས་བསྟན། །ཐ་དད་ལྟ་བར་འཇིག་རྟེན་པ། །ཀུན་མཁྱེན་གཅིག་པུ་གཉིས་སུ་མེད། །གང་དུ་བདག་དང་ཕྱག་རྒྱ་དག །གཉིས་མེད་བདེ་བས་བརྒྱལ་གྱུར་ཚེ། །དེ་ཡི་བདེ་བས་ཀུན་

89-1-270a

ཁྱབ་བྱེད། །ཆོས་ཀུན་ངོ་བོ་གཅིག་པར་ནི། །ཡེ་ཤེས་འདུ་འབྲལ་མེད་པ་ཉིད། །རྣལ་འབྱོར་པ་ཡི་གསང་བ་ཡིན། །དགའ་བ་སྐྱེད་བྱེད་བཟང་པོ་སྟེ། །མ་ལུས་དོན་གྱི་འབྲས་རབ་སྟེར། །དངོས་པོའི་བདུད་རྩིས་ལུས་གང་
ཞིང་། །ནོར་བུ་རིན་ཆེན་སྟེན་པར་མཉམ། །ཡོན་ཏན་མཐའ་ཡས་འབྱུང་བའི་གཞི། །བདེ་བ་རྡོ་རྗེ་ཅན་གྱི་གནས། །ཉོན་མོངས་ཡེ་ཤེས་གནས་གྱུར་པས། །མྱུར་དུ་བགྲོད་པའི་གོ་འཕང་གིས། །རོ་མཉམ་མི་མཉམ་འཕེལ་བ་
ལས། །བདེ་བས་མ་ལུས་ས་གསུམ་པོ། །ཐམས་ཅད་ཚིམ་པར་བྱེད་པ་པོ། །གཉིས་མེད་ཡེ་ཤེས་རྒྱ་མཚོ་ལས། །འགྲོ་བའི་ནོར་བུ་སྟེར་བྱེད་པ། །དེད་དཔོན་ཆེན་པོ་འདིར་གནས་པ། །བླ་མའི་གཟུགས་སུ་གང་བྱུང་བ། །ང་ཉིད་
ཐུགས་རྗེ་དེར་ཞུགས་པ། །མི་ཡི་གཟུགས་སུ་ཉེར་བསྟན་པའོ། །དེ་ནས་འདི་ནི་གསུངས་ཙམ་གྱིས། །མི་ཕྱེད་རྣལ་འབྱོར་སྒྲུབ་པ་པོ། །བྱང་ཆུབ་སེམས་དཔའ་ཐམས་ཅད་ཀུན། །རབ་ཏུ་དགའ་ཞིང་ཡི་རངས་ཏེ། །དགྱེས་པས་ཡོངས་
སུ་ཁྱད་པར་འགྱུར། །དེ་ནི་གསང་བའི་ཆོས་ཅན་ཡིན། །རྡོ་རྗེའི་གདན་དུ་བཞུགས་ནས་ཀྱང་། །མཉམ་པའི་དཀྱིལ་དཀྲུང་ཚུལ་གནས་ནས། །ཉི་མ་སྣང་བ་མཆེད་པའི་ཆ། །གསལ་ལ་སྣང་བ་མཚན་མོའི་ཆ། །མཚམས་ལས་ཐོབ་པ་མུན་པར་བཅས། །
དུག་གསུམ་རང་བཞིན་ཀུན་རྣམས་ལས། །ངེས་འབྱུང་བསྙེན་པས་རྩ་གནས་ལས། །ཟག་བཅས་འབྱུང་བ་ཟློག་པར་བྱེད། །བསྒྲུབ་པས་ཡི་གེ་གསང་བ་ལས། །ཐོས་པས་སྒྲ་རྣམས་དབྱངས་དབྱུང་ཉིད། །ཉེར་སྒྲུབ་ཤིན་ཏུ་མི་ཤིག་པ། །ཁམས་ལས་
བདུད་རྩི་དངས་པར་གྱུར། །སྲོད་དུས་མུན་པའི་དམག་རུམ་དུ། །བདུད་བཅོམ་ལྷ་ཡི་བུ་ཡི་ཚོགས། །རྒོལ་བ་ངན་པ་ཟློག་གྱུར་ཅིང་། །དེ་ཉིད་ཀུན་དུ་བརྩམས་པའོ། །ཐོ་རངས་དུས་སུ་འདས་ཆ་ལས། །ཤིན་ཏུ་ཉེར་ཐོབ་རང་བྱུང་ལས། །བཅུ་དང་བརྒྱད་དུ་མཐར་སོན་
ཚེ། །སྐྱ་རེངས་ངེས་པར་འཆར་དུས་སུ། །མངོན་པར་བྱང་ཆུབ་ལེགས་མཐོང་བ། །འདི་ནི་མཆོག་ཏུ་འབྱུང་བ་ཉིད། །གསང་བ་ཡང་དག་རྫོགས་སངས་རྒྱས། །བསྒོམ་པ་མཆོག་གིས་བསྒྲུབ་འགྱུར་བའོ། །འདི་ནི་ཐབས་དང་ཤེས་རབ་དག །གཉིས་མེད་

89-1-270b

ཡེ་ཤེས་སྙོམས་འཇུག་པས། །དེ་ཡི་ཆོས་ཀྱི་འབྱུང་གནས་སུ། །བདེ་ཆེན་སྒྱུ་མའི་རོལ་པ་ཡིས། །ཀུན་དུ་དབང་བསྐུར་གྱུར་པར་ནི། །དངོས་གྲུབ་ཡེ་ཤེས་ཐོབ་བྱེད་ཡིན། །སྔ་མ་འཇིག་རྟེན་ལོག་རྟོག་དག །དགག་ཕྱིར་མི་རྟག་གཟུགས་སུ་
བརྟན། །དེ་ཉིད་ཡོངས་སུ་དག་པ་ཡིས། །རྒྱུན་མི་འཆད་པར་གནས་བསྒྱུར་བས། །གཞོན་ནུའི་ཚུལ་དུ་བསྟན་པ་སྟེ། །འགྲོ་ཀུན་རང་དབང་མེད་པ་སྟེ། །ཐམས་ཅད་མཁྱེན་པའི་སྤྱོད་ཡུལ་ལོ། །དེ་ལྟར་ཡེ་ཤེས་གནས་ཐོབ་པས། །སྐད་ཅིག་གིས་ནི་
སངས་རྒྱས་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ། མཉམ་པ་ཉིད་རྣམ་པར་རྒྱལ་བ་ལས་སངས་རྒྱས་ཐམས་ཅད་ཀྱི་དངོས་པོ་ཐམས་ཅད་
ཕྱིན་ཅི་མ་ལོག་པ་དག་པ་བསམ་པ་སྣ་ཚོགས་པའི་དོན་རབ་ཏུ་བསྒྲུབ་པའི་ལེའུ་སྟེ་བདུན་བཅུ་རྩ་ལྔ་པའོ།། །། དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཐམས་ཅད་མཁྱེན་པ་ཡེ་ཤེས་གསང་བའི་སྤྱོད་ཡུལ་ཕུན་སུམ་
ཚོགས་པ་བསམ་གྱིས་མི་ཁྱབ་པའི་སྤྱོད་ཡུལ་གདུལ་བྱའི་སྐྱེ་བོའི་བསམ་པ་ཇི་ལྟ་བ་བཞིན་དུ་ཡོངས་སུ་རྫོགས་པར་མཛད་པས་ཡོངས་སུ་སྟོན་པར་མཛད་དེ། དེ་བཞིན་གཤེགས་པ་ཐམས་ཅད་སླར་རབ་ཏུ་འདུད་ཅིང་མཆོད་པ་རྣམ་པ་
དུ་མས་ཡོངས་སུ་མཆོད་ལ་གསང་བའི་དོན་འདི་དག་རབ་ཏུ་ཞུས་སོ། །དེ་ནས་གསང་བ་འཛིན་པ་པོས། །མི་འགྱུར་བ་ནི་རྒྱས་པའི་ཚུལ། །མགོན་པོ་བྱང་ཆུབ་ཆེན་པོ་ནི། །ཟབ་དང་རྒྱ་ཆེའི་གནས་འདི་གསུངས། །དུས་གསུམ་
སངས་རྒྱས་ཕྱོགས་བཅུ་ཡི། །གནས་སོགས་ཞིང་ཁམས་མ་ལུས་པའི། །རྒྱལ་བ་འཁོར་དང་བཅས་པ་ནི། །ཏིལ་འབྲུ་ལྟ་བུ་གང་བ་ཡི། །མ་ལུས་རྒྱ་མཚོའི་དབུས་བཞུགས་ལ། །གསང་བ་དམ་པ་བཀའ་སྩལ་ཏོ། །
རྡོ་རྗེ་སེམས་དཔའ་རྒྱལ་པོ་ཆེ། །ཡང་དང་ཡང་དུ་བསྐུལ་བར་བྱ། །འདི་ནི་སྔགས་རྣམས་ཐམས་ཅད་ཀྱི། །དམ་ཚིག་མཆོག་ཏུ་བརྟག་པའོ། །དེ་ནས་བཅོམ་ལྡན་འདས་ནམ་མཁའ་ཀུན་དུ་རྣམ་པར་འཕྲུལ་བའི་ཡེ་ཤེས་རྡོ་རྗེ་

89-1-271a

ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་རལ་པ་གཅིག་མའི་དམ་ཚིག་ཆེན་པོའི། རྒྱལ་མོ་རྡོ་རྗེ་མཆོག་གི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་འདི་གསུངས་སོ། །ཨོཾ་
བཛྲ་ཨེ་ཀ་ཛ་ཊི་ཁུ་ལི་ནི་སྭཱ་ཧཱ། རྡོ་རྗེ་རལ་པ་གཅིག་མ་ཡི། །གསང་བ་ཡེ་ཤེས་རང་བྱུང་བས། །ཞལ་གསུམ་པ་ལ་ཕྱག་དྲུག་མ། །ཁ་དོག་མཐིང་ནག་འབར་མ་ཆེ། །གཡས་གཡོན་དཀར་དང་དམར་བའི་མདངས། །གྲི་གུག་ཐོད་པ་འཛིན་པར་
མཛད། །རྡོ་རྗེ་དང་ནི་ཐོད་དབྱུག་ནི། །གཡས་པའི་ཕྱག་དུ་བསྣམས་པར་བསྒོམ། །དྲིལ་བུ་རྡོ་རྗེའི་ཞགས་པ་ནི། །གཡོན་པའི་ཕྱག་ཏུ་བསྣམས་པར་བསྒོམ། །རིན་ཆེན་སྣ་ཚོགས་ཀྱིས་བརྒྱན་པ། །ཤིན་ཏུ་སྒེག་ཅིང་འགྱིང་བར་བསམ། །
འདི་ནི་ཀླུ་ཡི་བུ་མོ་རྣམས། །རབ་ཏུ་འགུགས་པའི་མཆོག་གྱུར་པ། །ས་གཡོ་བ་ཡི་དུས་སུ་ནི། །གསང་སྔགས་འདི་ནི་བརྗོད་པར་ཤེས། །དེ་ནས་འདི་ནི་གསུངས་ཙམ་གྱིས། །ཀླུ་ཡི་བུ་མོ་མཐུ་ཆེན་རྣམས། །ཚིག་པར་གྱུར་ཅིང་གོས་དང་
བྲལ། །སངས་རྒྱས་བྱང་ཆུབ་རྗེས་སུ་དྲན། །གསང་སྔགས་རིག་པ་འདི་ཡིས་ནི། །ཀླུ་རྣམས་འགུག་པའི་མཆོག་ཏུ་འགྱུར། །ཀླུ་ཡི་བུ་མོ་མིག་བཟངས་རྣམས། །བཀུག་ནས་ཉེ་བར་སྤྱད་པར་བྱ། །དེ་ནས་བཅོམ་ལྡན་འདས་ནམ་མཁའི་དམ་
ཚིག་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཆོས་ཆེན་པོའི་དམ་ཚིག་འདི་རྡོ་རྗེ་ཁྲོ་གཉེར་མ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་སརྦ་བྷ་ཡ་ནཱ་ཤ་ཡ་ཏྲ་ས་ནི་ཏྲ་ས་ཡ་ཏྲ་སེ་ཡཱ་བྷ་ཏ་རི་བྷྲི་ཀུ་ཊི་ཏི་དྷི་
བྷེ་རེ་ཏཱེ་ཥཱི་ཏཱ་ཤེ་ཏ་ཛ་ནི་ཎི་སྭཱ་ཧཱ། རྡོ་རྗེའི་ལྷ་མོ་ཁྲོ་གཉེར་ཅན། །སྐུ་མདོག་སྔོ་ལྗང་དངས་པ་ལ། །ཞལ་གསུམ་ཕྱག་དྲུག་སྤྱན་གསུམ་མ། །གཡས་དཀར་གཡོན་དམར་ཅུང་ཟད་ཁྲོས། །དང་པོ་གཉིས་ཀྱིས་བདེ་བར་ནི། །ཐུགས་ཀར་བསྣོལ་བས་
འཁོར་ལོ་དང་། །རིན་ཆེན་འབར་བ་འཛིན་པའོ། །རལ་གྲི་དང་ནི་རྩེ་གསུམ་པ། །གཡས་པས་ངེས་པར་འཛིན་པར་མཛད། །སྡིགས་མཛུབ་ཞགས་པ་བུམ་པ་ནི། །གཡོན་དུ་ངེས་པར་འཛིན་པའོ། །རིན་ཆེན་སྣ་ཚོགས་རྒྱན་གྱིས་བརྒྱན། །རྡོ་རྗེ་དཀྱིལ་

89-1-271b

ཀྲུང་བཞུགས་པར་བསམ། །སྐུ་ལ་འབར་བའི་འོད་འཕྲོ་བས། །གནོད་པ་མ་ལུས་ཞི་བྱེད་བསམ། །འདི་ནི་གསུངས་མ་ཐག་ཏུ་ཡང་། །རིག་པ་འཛིན་པའི་རྒྱལ་པོ་ཀུན། །རབ་ཏུ་འདར་བར་གྱུར་ནས་ནི། །ཡེ་ཤེས་རྒྱལ་པོ་རྗེས་སུ་དྲན། །རིག་པ་འཛིན་
པའི་ལྷ་མོ་མཆོག །གསེར་གྱི་རྣ་ཆ་གཡོན་པ་རྣམས། །སྔགས་ཀྱི་རིག་པ་འདི་དང་ནི། །དམ་ཚིག་ལ་སོགས་པས་བཀུག་བྱ། །གང་དུ་ཕྲིན་ལས་མ་ལུས་པ། །གསང་བ་མཆོག་ཏུ་བསྒྲུབ་པ་ནི། །འགོག་པའི་རྒྱལ་པོ་རྡོ་རྗེ་འཛིན། །ཡོངས་སུ་རྫོགས་པ་
མཛེས་མཆོག་གིས། །ཡེ་ཤེས་རྡོ་རྗེ་གསུམ་ལས་འབྱུང་། །ཀུན་ནས་དེ་མ་ཐག་ཏུ་འགྱུར། །དེ་ནས་བཅོམ་ལྡན་འདས་ཀུན་ནས་དབྱངས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་ཆེན་པོའི་བསྒོམ་པའི་དམ་ཚིག་འདི་ཉིད་
ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཙུྃ་ཨོཾ་མ་ཧཱ་བིདྱཱ་དྷ་ར་ཙ་ལི་ཙུ་ལི་ཙུནྡད་ལེ་ཛྙཱ་ན་བི་ཤུད་དྷ་སརྦ་དྷརྨཱ་བུ་སྭཱ་ཧཱ། ཉི་མའི་དཀྱིལ་འཁོར་དམ་པ་ནི། །ནམ་མཁའི་རྡོ་རྗེའི་དབུས་སུ་བསམ། །ཀུན་ནས་འབར་བའི་ཡེ་ཤེས་
སྤྱན། །སངས་རྒྱས་སྤྲིན་གྱི་ཆོ་ག་ཡིས། །རྡོ་རྗེ་གསུམ་གྱི་གནས་ཆེན་ནི། །ལུས་དང་ངག་དང་སེམས་ལ་དབབ། །ལྷ་མོ་སྐུལ་བྱེད་རྡོ་རྗེ་བསམ། །ཞལ་གསུམ་པ་ལ་ཕྱག་དྲུག་མ། །དང་པོ་གཉིས་ཀྱིས་རྡོ་རྗེ་དང་། །པད་མ་འབར་བ་བསྣམས་
པའོ། །རིན་ཆེན་ནོར་བུ་རྡོ་རྗེ་སྤྲིན། །ཟླ་བ་ཆུ་ཤེལ་འབར་བ་དང་། །ཕྱག་གཞན་རྣམས་ཀྱིས་འཛིན་པར་མཛད། །རྒྱན་རྣམས་ཐམས་ཅད་ཡོངས་རྫོགས་པ། །རྡོ་རྗེ་སེམས་དཔའ་རྒྱལ་པོ་ཆེ། །བསམས་ལ་སྔགས་ཀྱི་ཡི་གེ་དགོད། །ནད་རྣམས་མ་ལུས་ཞི་བྱེད་
པ། །གསང་བ་ཡེ་ཤེས་རྒྱ་མཚོ་ཉིད། །བདེ་བ་མཆོག་ཏུ་བསམ་པར་བྱ། །འདི་ན་ཞི་བའི་ལས་བསྒྲུབ་པ། །གསང་བ་ཉེ་བར་བསྡུས་པའོ། །རྡོ་རྗེའི་དམ་ཚིག་ཡེ་ཤེས་ཀྱི། །འོད་ཅེས་བྱ་བའི་ཏིང་འཛིན་ཏོ། །དེ་ནས་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་གཤེགས་
པ་དཔའ་བོ་རྡོ་རྗེ་དེ་བཞིན་གཤེགས་པས་རྡོ་རྗེ་བསམ་གཏན་གྱི་དམ་ཚིག་གི་མཆོག་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །བཱི། ཨོཾ་ཨ་བཛྲ་ཡཀྵ་གརྦྷ་ཡ་རཏྣ་དྷྲིཀ་ཕཊ་སྭཱ་ཧཱ། སངས་རྒྱས་དཀྱིལ་འཁོར་འོད་བཟང་པོ། །ནམ་མཁའ་དབྱིངས་

89-1-272a

ཀྱི་དབུས་སུ་བསམ། །རྡོ་རྗེ་སྐུ་གསུམ་སྦྱོར་བ་ཡིས། །སྐྱེད་པ་འདི་ནི་རྣམ་པར་བསམ། །ཞལ་གསུམ་པ་ལ་ཕྱག་དྲུག་པ། །མརྒད་ཏ་དང་ཆ་དགུ་པ། །འཁོར་ལོ་ཨུཏ་པལ་སྡོང་བུ་དང་། །རལ་གྲི་འབར་བ་བསྣམས་
པར་བསམ། །རྒྱན་རྣམས་ཐམས་ཅད་ཡོངས་རྫོགས་པ། །ཅུང་ཟད་སེར་པོ་རྡོ་རྗེ་འགྱིང་། །ཞི་བ་ཐོར་ཚུགས་དབུ་རྒྱན་ཅན། །དེ་བསམས་རྒྱས་པའི་ལས་ཀུན་ལ། །མྱུར་བ་ཉིད་དུ་གྲུབ་པར་བྱེད། །འདི་ནི་སྔགས་རྣམས་ཐམས་
ཅད་ཀྱི། །དམ་ཚིག་ཤིན་དུ་འདའ་དཀའ་བའོ། །རྡོ་རྗེ་དཔའ་བོའི་རླབས་ཀྱི་ཕྲེང་བ་ཞེས་བྱ་བའི་ཏིང་ངེ་འཛིན་ཏོ། །སྐུ་གསུང་ཐུགས་ཀྱི་རྡོ་རྗེ་ལས། །ལུས་དང་ངག་དང་སེམས་བསྒོམ་པ། །སྦྱོར་ཚུལ་ཉིད་ཀྱིས་བྱ་བ་སྟེ། །འདིས་ནི་
དངོས་གྲུབ་མྱུར་འཐོབ་བྱེད། །དམ་ཚིག་བསྐུལ་བ་བྱང་ཆུབ་སེམས། །འགྲོ་བའི་དོན་དུ་རབ་འཇུག་པ། །རྡོ་རྗེ་གསུམ་དབྱེར་མེད་གཟུགས་ཅན། །དེ་ཉིད་ལས་ཀྱི་ཕྱག་རྒྱར་བརྗོད། །དམ་ཚིག་སྟོང་པ་བདེ་བ་ཆེ། །འོད་ཟེར་སྤྲོ་
ཞིང་སྡུད་པར་མཛད། །འགྲོ་ལ་དངོས་གྲུབ་རྒྱུན་བྱེད་པས། །ཆོས་ཀྱི་ཕྱག་རྒྱ་ཡེ་ཤེས་ཆེ། །གསང་བ་དམ་ཚིག་བོད་པ་ནི། །སྲོག་གི་སྙིང་པོར་གྱུར་པ་ཡི། །ས་བོན་སྔགས་ལས་རབ་གྲུབ་པ། །དེ་ཉིད་ལས་ནི་འདའ་མི་བྱེད། །རྩ་
གསུམ་རླུང་གསུམ་སྐུ་གསུམ་ནི། །ཐིག་ལེ་སྔགས་ཀྱི་སྦྱོར་བས་ནི། །བཅིང་བ་རབ་གྲོལ་ཕྱག་རྒྱ་ཆེ། །དེ་ཉིད་སྐུ་གསུམ་དག་པའི་བདག །སྐུ་དང་གསུང་དང་ཐུགས་དང་ནི། །དབྱེར་མེད་རྡོ་རྗེའི་དམ་ཚིག་གནས། །དབང་བཞིའི་
ལམ་གྱི་དམ་ཚིག་ལས། །རང་གི་ངོ་བོའི་དམ་ཚིག་དང་། །སྤྱོད་པའི་ལམ་དང་ལྡན་པ་དང་། །ལོངས་སྤྱོད་ཡན་ལག་དམ་ཚིག་སྟེ། །གསང་བ་བསྲུང་བའི་གནས་དང་ནི། །དེ་ཉིད་བཟའ་བའི་དམ་ཚིག་སྟེ། །རྣམ་པ་རང་བཞིན་ངོ་བོ་
དང་། །མཚན་ཉིད་ལྡན་པས་དང་པོ་ཡིན། །སྣང་བ་རང་བཞིན་བདག་ཉིད་ཅན། །དབྱེར་མེད་སྦྱོར་བའི་ཚུལ་ལྡན་པ། །རིགས་སུ་དབྱེ་བ་ཁྱད་པར་གང་། །རིགས་སུ་སྒྲུབ་པ་ཐུན་མོང་ཚུལ། །འདི་དག་གསུམ་པའི་དོན་བསྟན་པའོ། །
89-1-272b

ལོངས་སྤྱོད་ཐོབ་བྱ་མི་གནས་ཚུལ། །འདི་ནི་དམ་ཚིག་དག་པར་བརྗོད། །འདིས་ནི་དམ་ཚིག་རྒྱ་མཚོ་ཡི། །སྔགས་ཀྱི་གསང་བ་བསྡུས་པའོ། །སེམས་ནི་རབ་ཏུ་དང་བས་རྩེ་གཅིག་རྡོ་རྗེ་ཉིད་དུ་གྱིས། །དམ་ཚིག་གསང་བ་མི་ཟད་རྒྱ་མཚོ་
རབ་བསྟེན་ན། །དེ་རིངས་ཚེགས་ཆུང་བདེ་བས་འགྲོ་བའི་རྡོ་རྗེ་སེམས་དཔའ་དང་། །རབ་ཏུ་མཉམ་ཉིད་རྟག་པ་ཉིད་དུ་མངོན་དུ་འགྱུར། །རྣལ་འབྱོར་ཐམས་ཅད་བཅོམ་ལྡན་འདས། །རྡོ་རྗེ་སེམས་དཔའ་དེ་བཞིན་གཤེགས། །མ་ལས་ཁམས་གསུམ་ས་
རྣམས་ཀུན། །དབང་ཕྱུག་དེ་ཡི་ལོངས་སྤྱོད་ཅིང་། །བདག་ཉིད་སངས་རྒྱས་ཐམས་ཅད་དེ། །རྒྱལ་སྲས་ཐམས་ཅད་བདག་ཉིད་ཡིན། །ཕུང་པོ་འདི་དག་སངས་རྒྱས་ཏེ། །རྫོགས་པའི་བྱང་ཆུབ་རྐྱེན་དུ་གྱུར། །གཉིས་མེད་དེ་བཞིན་ཉིད་སྦྱོར་བས། །དེ་ཉིད་
དེ་བཞིན་གཤེགས་པའི་མཆོག །མ་ལུས་སངས་རྒྱས་རྒྱུ་ཅན་ཏེ། །རྒྱལ་བ་རྒྱ་མཚོའི་འབྱུང་གནས་སེམས། །དཀྱིལ་འཁོར་སྤྲོ་དང་སྡུད་པའི་གནས། །བླ་ན་མེད་པ་ཚད་མེད་མཆོག །མཁས་བརྩོན་སྤྲོ་བའི་ལས་བདག་ཉིད། །ཤིན་དུ་རྨད་བྱུང་
ཡེ་ཤེས་ཅན། །བླ་ན་མེད་པའི་ཆེན་པོའོ། །སེམས་བསྐྱེད་སྨོན་དང་འཇུག་པ་དང་། །ཟབ་དང་རྒྱ་ཆེ་དབྱེར་མེད་པ། །མི་ལྡོག་པ་ཡི་མངོན་གྱུར་པས། །ཁྱད་པར་འཕགས་པ་ཐེག་པ་ཆེ། །འཇིག་རྟེན་འཇིག་རྟེན་ལས་འདས་པ། །དག་པ་དང་ནི་མ་དག་པའི། །ཡེ་
ཤེས་ཡེ་ཤེས་ཁྱད་པར་ཆེ། །བསམ་པ་ཟག་མེད་ཚུལ་ཐོབ་པའོ། །དེ་ནས་རྒྱལ་པོ་རྡོ་རྗེ་འཛིན། །བླ་མེད་ཡེ་ཤེས་འབྱུང་བའི་གནས། །གསང་བ་དག་པ་དཀྱིལ་འཁོར་གྱི། །ཡེ་ཤེས་དམ་པ་བཀའ་སྩལ་མཛད། །ཚོགས་ཀྱི་འཁོར་ལོའི་གནས་ཉིད་དང་། །དཔའ་
བོ་དང་ནི་དཔའ་མོ་དང་། །སྟོན་མོར་གྱུར་པ་ཉིད་དང་ཡང་། །སྣ་ཚོགས་སྟོན་མོའི་རིམ་ཤེས་པས། །ཐབས་དང་ཤེས་རབ་གསང་བ་ཡིས། །མཆོག་ཏུ་གྱུར་པ་འདིར་བརྗོད་ཡིན། །འདིར་ནི་ནམ་མཁའ་ལ་གནས་པའི་ཟླ་བའི་དཀྱིལ་འཁོར་གྱི་དབུས་སུ་ཡི་གེ་ཧཱུྃ་ལས་
བསྐྱེད་པའི་རྡོ་རྗེ་རྩེ་ལྔ་པའི་ལྟེ་བའི་ཆ་ལ་ཧཱུྃ་གནས་པ་ཉིད་དེ། འོག་ཏུ་ཡྃ་ལས་བསྐྱེད་པའི་རླུང་གི་དཀྱིལ་འཁོར་ཟླ་ཁམ་རྒྱལ་མཚན་སྔོ་ལྗང་གིས་མཚན་པའོ། །དེའི་སྟེང་དུ་རྃ་དམར་པོ་ལས་བྱུང་བའི་མེའི་དཀྱིལ་འཁོར་གྲུ་གསུམ་པ་འབར་བ་དུ་མས་མཚན་པ་རྣམ་

89-1-273a

པར་བསམ་པར་བྱ་སྟེ། དཀྱིལ་འཁོར་བའི་ལྷ་རྣམས་ཐམས་ཅད་ཐུན་མོང་དུ་བདུད་རྩི་མྱང་བར་བྱ་སྟེ། དེར་ཀྃ་ལས་བྱུང་བའི་ཐོད་པ་སྐྱ་བོ་གསུམ་གྱི་སྟེང་གི་བར་སྣང་གི་ཆར་ཨ་དཀར་པོ་ལས་བྱུང་བའི་པད་མའི་སྣོད་དུ་བལྟ་སྟེ། 
དེའི་ནང་དུ་བཀོད་པ་གུར་གུམ་དང་། །སྨན་དང་། ག་པུར་དང་། པད་མ་དང་། མེ་ཏོག་སྟེ། མུ་བི་ཤུ་ར་མ་སྟེ། བདུད་རྩི་ལྔའི་ཆ་འོག་ཏུ་གླང་པོ་ཆེ་དང་། རྟ་དང་། བ་གླང་དང་། ཁྱིའི་ཤ་དང་སྣ་ཚོགས་པའི་ཤ་སྟེ། ཧ་དྷ་གོ་ཀུ་ན་སྟེ་སོ་སོར་ཐབས་དང་ཤེས་རབ་ཀྱི་
བདག་ཉིད་དུ་སྒྱུར་བ་སྟེ། ཧཱུྃ་བྷྲུྃ་ཏྲཱྃ་ཧྲཱི་ཁྃ་སྟེང་གི་ཆའོ། །ཨྃ་ལཱྃ་མཱྃ་པཱྃ་ཏཱྃ་རྣམས་འོག་གི་ཆ་ལ་སྟེ་ཡང་ན་ཕྱོགས་དང་མཚམས་ཀྱི་ཆའོ། །དེ་དག་ཁ་དོག་སོ་སོར་གསལ་བར་མ་འདྲེས་པར་བལྟ་སྟེ། རྡོ་རྗེ་ལས་བྱུང་བའི་འོད་ཟེར་དཔག་ཏུ་མེད་པ་དང་། དེའི་
འོད་ཕྱིར་ལོག་པས་དེ་ཉིད་ཀྱི་ནང་དུ་ཐིམ་ནས་ཡི་གེ་གསུམ་མངོན་པར་བསྔགས་ཏེ། མེའི་དཀྱིལ་འཁོར་དེའི་འོད་འབར་བ་རྣམས་ཀྱིས་དེ་དག་ཞུ་བར་གྱུར་པ་དང་། དག་ཅིང་སྐྱོན་མེད་པར་བྱ་བ་དང་། དཔེ་མེད་པའི་རོ་མཆོག་རྡོ་རྗེའི་མཐུ་དང་ལྡན་
ཞིང་ཡོངས་སུ་སྨིན་པའི་བདག་ཉིད་དུ་མོས་པ་སྟེ། དེའི་སྟེང་དུ་ཡེ་ཤེས་དང་ལྡན་པའི་ཡི་གེ་ཨོཾ་དཀར་པོ་འབར་བ་དགོད་པར་བྱའོ། །དེའི་འོད་ཀྱིས་དེ་བཞིན་གཤེགས་པའི་ཚོགས་རྣམས་དེའི་ནང་དུ་ཡོངས་སུ་ཐིམ་ནས། ཨོཾ་ཨཱཿཧཱུཾ་ཅེས་བྱ་བའི་
སྔགས་ལས་འོད་སྤྲོ་བ་དང་བཅས་པས་མངོན་པར་བསྔགས་པ་འདི་ཉིད་འབྱུང་བ་དང་འཇུག་པ་དང་། གནས་པའི་ངོ་བོ་ཉིད་དུ་བཟླས་པར་བྱ་བ་དང་། རང་ཉིད་ཀྱི་རིག་མ་དང་གཉིས་སུ་མེད་པའི་སྦྱོར་བ་དང་ལྡན་པས་རང་གི་སྙིང་གར་དཀྱིལ་འཁོར་གྱི་
འཁོར་ལོ་གསལ་བར་དམིགས་ཏེ། སྦྱང་བ་དང་། སྤེལ་བ་དང་། ཡེ་ཤེས་ཀྱི་རང་བཞིན་དུ་གྱུར་པའི་བདུད་རྩི་ལས་བླངས་པའི་ཚུལ་དུ་ཡི་གེ་གསུམ་ཞུ་ཞིང་འདྲེན་པའི་འོད་ཟེར་དཔག་ཏུ་མེད་པ་འཕྲོས་པས་ཕྱོགས་བཅུའི་དེ་བཞིན་གཤེགས་
པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་འོད་ཟེར་གྱི་རྣམ་པར་བྱོན་ཏེ་དེ་དག་སྔ་མ་དང་ཚུལ་གཅིག་ཏུ་གྱུར་པར་བལྟའོ། །དེ་ནས་ཡང་བདག་གི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་པས་ཕྱོགས་

89-1-273b

བཅུའི་སངས་རྒྱས་དང་བྱང་ཆུབ་སེམས་དཔའ་རིག་མ་ལྷ་མོ་ཁྲོ་བོའི་ཚོགས་དུ་མའི་སྣང་བར་གྱུར་པ་བར་སྣང་རབ་ཏུ་གང་བའི་ཚོགས་ཐམས་ཅད་ཀྱི་དཀྱིལ་འཁོར་རྣམས་དང་བདག་དང་བཅས་པ་ཐམས་ཅད་ཀྱི་ལྗགས་
ལ་ཧཱུྃ་ལས་བྱུང་བའི་རྡོ་རྗེ་དཀར་པོ་ནས་ཀྱི་འབྲུ་ཙམ་པ་དེའི་ལྟེ་བ་ཧཱུྃ་དང་བཅས་པ་ལས་འོད་ཟེར་གྱི་སྦུ་གུས་དྲངས་ནས་བདུད་རྩི་གསོལ་བར་བྱའོ། །དེས་བདག་གི་ལུས་ཀྱི་ལྷ་དང་དཀྱིལ་འཁོར་མ་ལུས་པ་
ཡོངས་སུ་མཆོད་ཅིང་མཉེས་ཏེ་ཚིམ་པར་བལྟའོ། །འདིས་ནི་ཡེ་ཤེས་བདུད་རྩིའི་གནས། །བླ་མེད་ཁྱད་པར་འབྱུང་བ་ཉིད། །བདུད་རྩི་ཚིམ་བྱེད་མཆོག་གྱུར་པ། །བདེ་བ་ཆེན་པོས་གནས་པར་བྱ། །གང་ཞིག་བདུད་རྩིའི་
རྣམ་པ་རུ། །རབ་འབབ་སྤྱི་བོ་ནས་རྟག་ཏུ། །ལྕེ་དབང་གིས་ནི་དེ་བཏུང་བ། །དེ་ལས་རྒ་ཤི་འཇིག་བྱེད་འགྱུར། །པད་མའི་སྡོང་པོ་ལས་ཇི་ལྟར། །ནུས་པ་ཆུ་ནི་འདྲེན་པ་ལྟར། །བཅུད་རྣམས་ཉེ་བར་འཐུང་བྱས་པས། །སྟོབས་
འགྱུར་རྣལ་འབྱོར་འཚོ་བར་བྱེད། །གང་དུ་ནང་གི་བདག་ཉིད་དུས། །དེ་ནི་གསང་བ་བསྟན་པའོ། །ནང་གི་བདག་ཉིད་ཅན་དུས་འགྱུར། །དེ་ནས་ཡེ་ཤེས་ཕྲིན་ལས་འབྱུང་། །ཞེས་གསུངས་པ་དང་། བྱང་ཆུབ་སེམས་དཔའ་
ཕྱག་ན་རྡོ་རྗེས་གསོལ་པ། བཅོམ་ལྡན་འདས་ནང་གི་བདག་ཉིད་ཅན་གྱི་དུས་ཤེས་གང་ལ་བགྱི། བཅོམ་ལྡན་འདས་ཀྱིས་བཀའ་སྩལ་པ། གསང་བའི་བདག་པོ་ནང་གི་བདག་ཉིད་ཅན་གྱི་དུས་ཤེས་བྱ་བ་འདི་ནི་གསང་
བ་ཆེན་པོ་ཤིན་དུ་གསང་བ། ཤིན་དུ་ཕྲ་བའི་བྱང་ཆུབ་ཀྱི་སེམས་ཀྱིས་བྱིན་གྱིས་བརླབས་པ་ཡིན་ཏེ་དེ་ཉིད་རྣམ་པར་མི་རྟོག་པ། །ཆོས་ཉིད་ཡེ་ཤེས་ཆེས་ཕྲ་བས། །དེ་ཉིད་རྩ་ལས་རྒྱུ་བ་ཅན། །ཁོང་སྟོང་མེད་པའི་ངོ་བོ་ཉིད། །སེམས་ཅན་གྲོལ་བྱེད་
ཡེ་ཤེས་ཡིན། །གསང་སྔགས་རྣལ་འབྱོར་དངོས་གྲུབ་སྟེར། །ཞི་བ་དང་ནི་རྒྱས་པ་དང་། །དབང་དང་དགུག་པ་མངོན་སྤྱོད་ལ། །དྲག་པོ་འཆི་བྱེད་འཇོམས་པ་པོ། །ཡེ་ཤེས་མངོན་པར་གྲུབ་པ་སྟེ། །བཅོམ་ལྡན་དེ་ལ་ཞི་བ་གཅེས། །རང་རིག་དབྱིངས་

89-1-274a

སུ་དེ་བཞིན་གཤེགས། །མེ་ཏོག་དང་ནི་དྲི་བཞིན་དུ། །རྟེན་དང་བརྟེན་པར་དབྱེར་མེད་པ། །དངོས་མེད་ངོ་བོ་གཅིག་པའི་བདག །གཡོ་བ་མེད་པར་ཀུན་དུ་གནས། །དེ་ཉིད་འགྲོ་སྙིང་རྣམ་དག་པ། །ཡེ་ཤེས་ཕྲ་བའི་ཚུལ་
གནས་པ། །དམར་དང་ནག་དང་སེར་པོ་དང་། །དཀར་པོ་དེ་བཞིན་མདོར་བསྡུས་པ། །ཐུན་ཕྱེད་ཀྱི་ནི་དུས་དག་ཏུ། །ལུས་ལས་འགྲོ་དང་འོང་བ་དང་། །གནས་པས་གཡོ་བར་བྱེད་པ་ནི། །ཉི་ཤུ་རྩ་བཞི་རིམ་བཞིན་དུ། །ཉིན་དང་མཚན་དུ་མངོན་
པར་འབྱུང་། །དེ་ལས་སྲོག་དང་རྩོལ་བ་རུ། །ཐབས་དང་ཤེས་རབ་གཉིས་མེད་པས། །དབུ་མ་རུ་ནི་གནས་པ་ཡིན། །མི་གནས་དེ་ལས་རྟོག་པ་བྱུང་། །དགེ་དང་མི་དགེའི་ལས་རྣམས་ལས། །འཁོར་བ་མངོན་པར་སྒྲུབ་པ་ཡིན། །
རྟོག་པ་དག་ལས་རླུང་དག་སྟེ། །ཡེ་ཤེས་ཀྱིས་ནི་མྱ་ངན་འདས། །དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའི་ཚོགས་ཆེན་པོ་དེ་དག་དང་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་རབ་ཏུ་དགྱེས་ཤིང་ཚིམ་པར་གྱུར་ཏོ། །འདི་
ནི་ཐབས་ཀྱི་ཁྱད་པར་ལས་བྱུང་བ་རྡོ་རྗེ་གསང་བ་ཆེན་པོའི་ཏིང་ངེ་འཛིན་རབ་ཏུ་བསྟན་པ་འདི་ཉིད་དོ། །བདག་ཉིད་སེམས་དཔའ་གསུམ་བརྩེག་ཏུ། །གནས་པ་གསང་བ་འདི་འབྱུང་བའོ། །ཏིང་འཛིན་སེམས་དཔའི་ཆ་ལས་ནི། །འོད་ཟེར་དཔག་མེད་ཕྱུང་
ནས་ནི། །དེ་བཞིན་གཤེགས་པ་ཐམས་ཅད་ཀྱི། །དཀྱིལ་འཁོར་འཁོར་ལོ་གསལ་བ་ལས། །འགྲོ་བ་ཀུན་ལའང་ཐབས་ལྡན་པའི། །དྲི་མ་མེད་པའི་རང་བཞིན་གྱི། །ཏིང་ངེ་འཛིན་དངོས་ལས་བྱུང་བ། །བདེ་བ་ཆེན་པོའི་རང་བཞིན་གྱི། །དཀྱིལ་
འཁོར་འཁོར་ལོར་གྱུར་ནས་ཀྱང་། །དེ་ཉིད་དུ་ནི་ཐིམ་བྱེད་པའོ། །ཤིན་དུ་ཕྲ་མོར་གྱུར་ནས་ནི། །ཙ་ན་ཀ་ཡི་འབྲུ་ཙམ་གྱི། །ཐིག་ལེ་འབར་བའི་དབུས་ཉིད་དུ། །དཀྱིལ་འཁོར་ལྷར་བཅས་གྱུར་པ་དག །རྟེན་དང་བརྟེན་པར་བཅས་པ་ལས། །
བྱུང་བའི་འོད་ཟེར་དཔག་མེད་པས། །ངོ་བོ་ཉིད་ཀྱིས་གནས་པ་དང་། །དམ་ཚིག་དག་གིས་བསྐུལ་བ་ན། །དེ་དག་ལས་བྱུང་འོད་ཀྱིས་ནི། །ནང་དུ་མ་ལུས་གང་བྱས་ཏེ། །དེས་ནི་ཀུན་དུ་མཐའ་ཡས་པར། །བ་སྤུའི་བུ་ག་ལས་བྱུང་བའི། །སྣང་བ་ཆེན་

89-1-274b

པོ་དཔག་མེད་པས། །འཇིག་རྟེན་ཁམས་ཀུན་ཁྱབ་གྱུར་ཏེ། །སླར་ལོག་དེ་ཉིད་ལ་ཞུགས་གྱུར། །གཉིས་སུ་མེད་པའི་ཡེ་ཤེས་ཀྱི། །བདག་ཉིད་ཉེ་བར་བསྡུ་བའོ། །དེ་ཡང་དེ་བཞིན་གཤེགས་པ་རྣམས་དང་བཅས་པ་ཐིམ་པ་མངོན་དུ་གྱུར་པ་
ལས་རང་གི་རིག་མའི་ཆོས་འབྱུང་གི་པད་མའི་གེ་སར་དུ་གྱུར་པའི་ཟེའུ་འབྲུའི་སྣ་རྩེར་བྱང་ཆུབ་ཀྱི་སེམས་ལས་བསྐྱེད་པའི་ཧཱུྃ་ལས་གྱུར་པའི་རྡོ་རྗེ་རྩེ་ལྔ་པ་ནས་ཙམ་པའི་ལྟེ་བ་ལ་ཉི་མའི་གདན་དང་བཅས་པ་ལ་གནས་པའི་ཧཱུྃ་ལས་
འཕྲོ་བའི་རིན་པོ་ཆེ་ཤིན་དུ་ཕྲ་བར་གྱུར་པ་ཉུངས་འབྲུའི་ཚད་ཙམ་དུ་ཡེ་ཤེས་ལྔའི་རང་བཞིན་ཁ་དོག་ལྔ་དང་ལྡན་པའི་འོད་ཟེར་འཕྲོ་བ་དང་བཅས་པ་སྟེ། དེ་ལྟ་བུའི་ཡུངས་འབྲུ་རིན་པོ་ཆེ་དེ་དག་གི་དབུས་ན་རྟེན་དང་བརྟེན་པར་
བཅས་པའི་དཀྱིལ་འཁོར་ལྔ་སོ་སོར་བསམ་སྟེ། དེ་བཞིན་གཤེགས་པ་རིགས་ལྔ་སོ་སོའི་དཀྱིལ་འཁོར་བྱེ་བྲག་ཏུ་གྱུར་པ་དགོད་པར་བྱའོ། །དེ་ནས་སྤྲོ་བ་དང་བསྡུ་བ་ལ་དབང་ཐོབ་པར་བྱ་བ་སྟེ་ཅིག་ཅར་རམ། རིམས་ཀྱིས་ཡང་
དང་ཡང་དུ་བསམ་གཏན་ལ་རྣལ་འབྱོར་དུ་བྱའོ། །དེ་དག་ཀྱང་རྣམ་པ་གསལ་ན་ལྷའི་སྐུ་དང་། སྒྲའི་དེ་ཁོ་ན་ཉིད་ཡིག་འབྲུ་ལ་གནས་པ་དང་། ཐིག་ལེའི་ངོ་བོ་ཕྱག་མཚན་དུ་གསལ་བ་འོད་ཀྱི་གོང་བུ་དང་བཅས་པ་ཡིན་ནོ། །
འདི་ཉིད་སོ་སོར་རང་རིག་པའི་རང་བཞིན་བདེ་བ་ཆེན་པོ་འདུས་པའི་ཆ་ལས་ཡོངས་སུ་སྤྲུལ་པ་ཉིད་ལ་སྤྲོ་བ་དང་བསྡུ་བས་གནས་པར་བྱའོ། །དེ་ལས་བརྟན་པ་ཉིད་དུ་གྱུར་པ་ན་སྨིག་རྒྱུ་དང་དུ་བ་ལྟ་བུ་ལ་སོགས་པའི་རྟགས་
རྣམས་ངེས་པ་ཉིད་དུ་འབྱུང་བར་བྱེད་དོ། །དེ་ཉིད་ལ་བྱིང་བ་དང་རྒོད་པ་ལ་སོགས་པའི་སྐྱོན་དང་བྲལ་བའི་སྒོ་ནས་བསམ་གཏན་བྱའོ། །སོ་སོ་རང་གིས་རིག་གྱུར་པ། །ཡེ་ཤེས་ལྔ་ཡི་གཟུགས་གྱུར་པས། །བརྟན་དང་གཡོ་བའི་དངོས་
ཀུན་གྱི། །མ་ལུས་ཁྱབ་པའི་བྱིན་བརླབ་ཅིང་། །ཡུལ་དང་དབང་པོ་རྣམ་སྦྱངས་པས། །འཇུག་དང་འབྱུང་དང་གནས་པ་དང་། །བདེ་བ་ཆེན་པོར་གྱུར་པའོ། །གསང་བ་ཡེ་ཤེས་བསྡུས་པ་ལས། །ཡོངས་སུ་གསལ་བ་སྐྱོན་མེད་པ། །

89-1-275a

མྱུར་ཞིང་ཕན་ཚུན་མ་འདྲེས་པས། །སྒྲ་བཅས་ཕྲེང་སྔགས་བརྗོད་པར་བྱ། །འདི་ནི་གསང་བ་རྒྱལ་པོ་ཡི། །ལྷ་རྣམས་མཉེས་བྱེད་དངོས་གྲུབ་སྟེར་བའོ། །གསང་སྔགས་སྙིང་པོ་སྐུ་གསུམ་གྱི། །སྙིང་པོ་ཡི་གེའི་
ཚུལ་གནས་པ། །ཨཱ་ལི་ཀཱ་ལི་ཕྲེང་བ་ལས། །སྔགས་རྣམས་དབྱངས་དང་གསལ་བྱེད་ལས། །འབྱུང་ཞིང་འཇུག་པར་བྱེད་པ་ཡིན། །གནས་པ་ཡེ་ཤེས་ལམ་གྱུར་པ། །བདེ་གཤེགས་ཐུགས་ལས་མཉམ་གནས་པ། །ཚུལ་གཅིག་
པར་ནི་ལམ་གྱུར་པ། །འདི་ནི་གསང་བའི་མཚན་ཉིད་དོ། །ཞེས་གསུངས་སོ། །དེ་ནས་ཡང་བཅོམ་ལྡན་འདས་ཀྱིས་འདུས་པའི་འཁོར་ལ་བཀའ་སྩལ་པ། བཅོམ་ལྡན་འདས་དེ་བཞིན་གཤེགས་པ་འདི་ལྟ་སྟེ། གསང་
སྔགས་ལས་བྱུང་བའི་བྱང་ཆུབ་ཀྱི་སེམས་ནི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་སྐུ་སྤྲོ་བ་དང་། སྡུད་པ་དང་། རབ་ཏུ་བྱུང་བ་རྡོ་རྗེའི་གནས་བྱིང་བ་སྟེ། བྱང་ཆུབ་ཀྱི་སེམས་དེ་ཡང་ལུས་ལ་མི་གནས། ངག་ལ་མི་
གནས་སེམས་ལ་མི་གནས་སོ། །ཆོས་གང་ཁམས་གསུམ་ན་མི་གནས་པ་དེ་ལ་སྐྱེ་བ་མེད་དེ་འདི་ནི་ཡེ་ཤེས་འབྱུང་བ་རྡོ་རྗེའི་གནས་ཡིན་ནོ། །ཆོས་ཀུན་སྒྱུ་མ་རྨི་ལམ་ལྟར། །གསང་བའི་ཡེ་ཤེས་ཀུན་འབྱུང་བ། །
མི་རྟོག་རྣམ་པར་མི་དམིགས་པས། །ཟག་པ་མེད་པའི་ཚུལ་འབྱུང་འགྱུར། །དེ་ལས་ཀུན་ཏུ་དགེ་བ་ཡི། །རང་བཞིན་དག་པའི་འོད་གསལ་དབྱིངས། །སྤྲོས་མེད་མཁའ་ལ་ཀུན་ཁྱབ་པར། །རང་བྱུང་དྲི་མེད་ཚུལ་འདི་བསྟན་ཞེས་གསུངས་
སོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ལས་སངས་རྒྱས་ཐམས་ཅད་ཀྱི་དཀྱིལ་འཁོར་རབ་ཏུ་གསང་བ་བདུད་
རྩི་དག་པར་སྟོན་པ་རྒྱལ་པོའི་ལེའུ་སྟེ་བདུན་བཅུ་རྩ་དྲུག་པའོ།། །། དེ་ནས་དེ་བཞིན་གཤེགས་པའི་ཚོགས་འདུས་པ་ཆེན་པོ་ཐམས་ཅད་ཀྱིས་བཅོམ་ལྡན་འདས་གསང་བ་འཛིན་པའི་རྒྱལ་པོ་དེ་བཞིན་གཤེགས་

89-1-275b

པ་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་སྙིང་པོ་བླ་ན་མེད་པའི་དངོས་གྲུབ་ཇི་ལྟར་ཡང་དག་པར་འཇུག །གང་ན་གནས། དེ་
བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཛིན་པས་བཀའ་སྩལ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཐམས་ཅད་མཁྱེན་པ་དང་། ཁམས་གསུམ་ཇི་སྙེད་པ་དག་རང་གི་སྐུ་དང་གསུང་
དང་ཐུགས་ཀྱི་རྒྱུད་རྡོ་རྗེ་ལ་གནས་སོ་ཞེས་གསུངས་པ་དང་། དེ་བཞིན་གཤེགས་པ་ཐམས་ཅད་ཀྱིས་སླར་གསོལ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་དངོས་གྲུབ་དང་། 
ཁམས་གསུམ་ཐམས་ཅད་དང་། ཐམས་ཅད་མཁྱེན་པ་དང་། རང་གི་སྐུ་དང་། གསུང་དང་། ཐུགས་རྡོ་རྗེའི་སྙིང་པོ་གང་དུ་གནས། དེ་བཞིན་གཤེགས་པ་ཐམས་ཅད་ཀྱི་བདག་པོ་ཡེ་ཤེས་རྡོ་རྗེའི་སྙིང་པོས་བཀའ་སྩལ་པ། བཅོམ་
ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་དངོས་གྲུབ་ཐམས་ཅད་དང་། ཐམས་ཅད་མཁྱེན་པ་དང་། ཁམས་གསུམ་པ་ཐམས་ཅད་རང་གི་སྐུ་དང་གསུང་དང་ཐུགས་རྡོ་རྗེ་གསང་བ་སེམས་
ཀྱི་རྒྱུད་སྙིང་པོ་ཡེ་ཤེས་ནི་ནམ་མཁའ་ལ་གནས་པའོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་གསོལ་པ། ནམ་མཁའ་གང་ན་གནས། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེས་
གསུངས་པ། གང་ནའང་གནས་པ་མ་ཡིན་ནོ། །དེ་ནས་གཞན་ཡང་དངོས་གྲུབ་ཐོབ་པའི་གནས་དེ་བཞིན་གཤེགས་པ་ཐམས་ཅད་ཀྱི་བདག་པོས་བཀའ་སྩལ་པ། དེ་ལ་གསང་བ་ཆེན་པོའི་དངོས་གྲུབ་ཐམས་ཅད་ཐོབ་པར་བྱ་བའི་
ཕྱིར་དངོས་གྲུབ་ཐ་མལ་པ་གང་ཅི་ཡང་རུང་བ་ལ་འཚོལ་ཞིང་བསྟེན་པར་མི་བྱའོ། །དེ་ཅིའི་ཕྱིར་ཞེ་ན། འདི་ལྟ་སྟེ། འཇིག་རྟེན་པ་ལ་སོགས་པ་དག་གི་དངོས་གྲུབ་དང་། མངག་གཞུག་པ་དོན་དུ་གཉེར་བའི་དངོས་གྲུབ་

89-1-276a

དང་། བུམ་པ་བཟང་པོའི་དངོས་གྲུབ་དང་། ས་འོག་གི་དངོས་གྲུབ་དང་། རྒྱལ་སྲིད་ཀྱི་དངོས་གྲུབ་དང་། རྒྱས་པའི་དངོས་གྲུབ་དང་། དབང་དུ་བྱ་བའི་དངོས་གྲུབ་དང་། མངོན་སྤྱོད་ཀྱི་དངོས་གྲུབ་ལ་སོགས་པ་རྣམ་མང་དོན་དུ་གཉེར་བར་མི་བྱ་སྟེ། 
དེ་ཅིའི་ཕྱིར་ཞེ་ན། འདི་ལྟར་གསང་བ་ཆེན་པོ་བླ་ན་མེད་པའི་དོན་དུ་འཇིག་རྟེན་པའི་ལས་ཀྱི་དངོས་གྲུབ་ཕྲ་མོ་ལ་འདོད་པ་བསྐྱེད་པར་མི་བྱའོ། །རྣམ་པར་མི་རྟོག་པའི་ཡེ་ཤེས་ཀྱི་དངོས་གྲུབ་འབའ་ཞིག་ལ་སེམས་རྩེ་གཅིག་ཏུ་གནས་
པར་འགྱུར་བར་བྱའོ། །དེ་ནས་བཅོམ་ལྡན་འདས་རྡོ་རྗེ་འཛིན་པ་དེ་བཞིན་གཤེགས་པ་ཐམས་ཅད་ཀྱི་བདག་པོས་ལུས་ཀྱི་དངོས་གྲུབ་ཀྱི་དམ་ཚིག་འདི་ཉིད་ཀྱི། སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ལུས་ཀྱི་སྤྱོད་པ་མ་ལུས་པ། །
དེ་ཉིད་ཐམས་ཅད་ཡང་དག་པར། །སྐུ་ཡི་རྡོ་རྗེ་ལས་དབྱུང་བྱ། །དེ་ཉིད་མ་ལུས་དཀྱིལ་འཁོར་དུ། །སེམས་ཅན་ཁམས་རྣམས་ཐམས་ཅད་ལ། །དྲི་མེད་ཕྲེང་བས་སྦྱར་བའི་དངོས། །རྟག་པར་དུས་གསུམ་ཀུན་དུ་ཡང་། །སངས་རྒྱས་སྐུར་ནི་བྱེད་
པའོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཛིན་པས་གང་གི། དངོས་གྲུབ་ཀྱི་དམ་ཚིག་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །བརྗོད་པ་ཚིག་གི་ལམ་རྣམས་ལ། །གྲག་པ་སྒྲ་རྣམས་མ་ལུས་
པར། །ཁམས་གསུམ་རྡོ་རྗེའི་གནས་ལ་ནི། །དྲི་མེད་ཡེ་ཤེས་དཀྱིལ་འཁོར་དུ། །སོ་སོ་ཡང་དག་རིག་པ་ཡི། །ཚིག་གི་དངོས་གྲུབ་བླ་ན་མེད། །ཡིད་ཀྱི་སྔགས་ནི་སྡོམ་པ་པོ། །དམ་ཚིག་ཤིན་དུ་འདའ་དཀའོ། །དེ་ནས་དེ་བཞིན་གཤེགས་
པ་ཐམས་ཅད་ཀྱི་བདག་པོ་རྡོ་རྗེ་འཛིན་པས་སེམས་རྡོ་རྗེའི་དམ་ཚིག་དངོས་གྲུབ་འདི་ཉིད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེ་ལས་ཕྱུང་ངོ་། །ཡིད་ཀྱི་རྟོག་པ་མ་ལུས་པ། །རྡོ་རྗེའི་རང་བཞིན་ཐམས་ཅད་ཀུན། །བསྟན་པའི་སྙིང་པོ་གསང་
བ་ཆེ། །རྡོ་རྗེ་ཡེ་ཤེས་དག་པ་ནི། །མི་ཕྱེད་གསུམ་ལྡན་འོད་གསལ་བ། །རྡོ་རྗེ་བྱང་ཆུབ་མངོན་བྱུང་བ། །ཐམས་ཅད་སྟོང་ཉིད་སྟོན་པ་ལས། །དམ་ཚིག་བཤད་པ་འདི་ཡིན་ནོ། །ཀུན་དུ་རྡོ་རྗེ་སེམས་དཔའ་ཡི། །སྐུ་གསུང་ཐུགས་ཀྱི་

89-1-276b

དཀྱིལ་འཁོར་ལ། །སྔགས་སློབ་པས་ནི་བསམ་གཏན་བྱ། །བསམ་གཏན་རྡོ་རྗེ་གསུམ་སྦྱོར་བའོ། །བཅོམ་ལྡན་འདས་ཀུན་དུ་མཛེས་དགའ་ཀུན་དུ་རྡོ་རྗེ་སེམས་དཔས་དེ་སྐད་ཅེས་བཀའ་སྩལ་ཏོ། །དེ་ནས་དེ་བཞིན་གཤེགས་པའི་ཚོགས་འདུས་པ་
དེ་དག་ཐམས་ཅད་དང་བྱང་ཆུབ་སེམས་དཔའ་སེམས་དཔའ་ཆེན་པོ། དེ་དག་ཐམས་ཅད་ངོ་མཚར་དུ་གྱུར་རྨད་དུ་གྱུར་ནས། །ཨེ་མའོ་རྡོ་རྗེ་ཨེ་རྡོ་རྗེ། །ཨེ་མའོ་གསང་བ་ཆེ་བཤད་པ། །གང་དུ་ལུས་དང་ངག་སེམས་མེད། །དེ་རུ་གཟུགས་ནི་
རྣམ་པར་བསྒོམ། །རྡོ་རྗེ་ཆེན་པོའི་དབྱིངས་འབྱུང་བ། །དེ་ཉིད་ཡང་དག་སྟོན་པར་མཛད། །ཅེས་གསོལ་ཏོ། །དེ་ནས་སྟོན་པ་རྡོ་རྗེ་འཛིན། །སངས་རྒྱས་ཀུན་གྱི་ཕྱག་བྱས་ནས། །རྡོ་རྗེ་གསུམ་གྱི་མཆོག་ཆེན་པོ། །རྡོ་རྗེ་གསུམ་གྱི་མཆོག་དབང་
བསྒྱུར། །རིག་པའི་སྐྱེས་བུ་བསྒོམ་པ་ཡི། །དངོས་གྲུབ་ཀུན་ནས་བཤད་པ་མཛད། །རིགས་ཀྱི་དཀྱིལ་འཁོར་མ་ལུས་པ། །གསང་བ་ཟབ་དང་རྒྱ་ཆེའི་དབྱིངས། །ཐབས་དང་ཤེས་རབ་འཁོར་ལོའི་གཙོ། །དངོས་གྲུབ་འདིས་ནི་བསྡུས་པ་ཡིན། །
ཞེས་བཀའ་སྩལ་ཏོ། །དེ་ནས་དེ་བཞིན་གཤེགས་པའི་དཀྱིལ་འཁོར་དཔག་ཏུ་མེད་པ་རྣམས་ཀྱི་ཆེད་དུ་བརྗོད་པ་ཡང་དག་པར་བསྟན་པ། གང་དུ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་གསང་བ་མ་ལུས་པ་སྙིང་པོ་གཅིག་
ཏུ་ཡང་དག་པར་གསུངས་པ་སྟེ། འདི་ནི་བསོད་ནམས་ཐམས་ཅད་ཀྱི་འབྱུང་གནས། ཕུན་སུམ་ཚོགས་པའི་ཁྱད་པར་ཡིད་བཞིན་གྱི་ནོར་བུ། ཆོས་བླ་ན་མེད་པ་གསང་ཆེན་རྡོ་རྗེའི་ཐེག་པ། ཕྱིར་རྒོལ་བ་ཐམས་ཅད་
ཀྱིས་དགེ་བའི་རྩ་བ་མི་འཕྲོག་པ། སེམས་ཅན་ཐམས་ཅད་ཀྱི་བསམ་པ་ཡང་དག་པར་རྫོགས་པར་བྱེད་པ། ལམ་ཐམས་ཅད་ཀྱི་རྒྱལ་པོ་ལས། བདུད་ཀྱི་དཀྱིལ་འཁོར་ཐམས་ཅད་ཀྱིས་ཐུབ་པ་མེད་ཅིང་ཟིལ་གྱིས་མི་ནོན་པ་
བདུད་ཀྱི་རིགས་མ་ལུས་པའི་གནས་ཀྱི་དཀྱིལ་འཁོར་རབ་ཏུ་འཇོམས་པར་བྱེད་པ། ཀུན་དུ་རྒྱུ་བའི་ལོག་སྲེད་ཅན་རྣམས་ཀྱིས་གླགས་རྙེད་པར་མི་འགྱུར་བའི་ཡུལ། ཐ་སྙད། ཐམས་ཅད་

89-1-277a

ལས་རྣམ་པར་འདས་པ། དེ་བཞིན་གཤེགས་པ་ཐམས་ཅད་ཀྱི་བརྗོད་དུ་མེད་པའི་ཡང་བརྗོད་དུ་མེད་པའི་མཚུངས་པ་མེད་ཅིང་ཀུན་ལས་གོལ་བའི་དོན་ཏེ། གསང་བ་ཆེན་པོའི་ཚུལ་འདི་བསྟན་པའི་ཚེ། །སྤྱོད་པ་བླ་ན་མེད་པ་
འདི་ཐོས་པའོ། །ལྷ་དང་མི་དང་ལྷ་མིན་དབང་པོ་དང་། །ཚངས་བརྩེགས་རྣམ་གྲོལ་འབྲས་བུ་རབ་ཏུ་ཐོབ། །གཙང་མ་ལྷ་རྣམས་བྱ་བ་རབ་ཏུ་དགའ། །དབང་པོ་ཚངས་པ་བར་སྣང་མཁའ་ལ་གནས། །བདེ་བར་གཤེགས་ལ་ཤིན་དུ་མཆོད་
པར་བྱས། །བྱང་ཆུབ་སེམས་དཔའ་བྱེ་བ་མཐའ་ཡས་པ། །བར་སྣང་གནས་ཏེ་རབ་ཏུ་དགའ་གྱུར་ཅིང་། །ཆུ་ཡི་སྤྲིན་མེད་ཡིད་དུ་འོང་བ་དག །འགྲོ་བའི་དུག་སེལ་དྲི་ཞིམ་བདུག་པར་བྱེད། །ལྷ་ཡི་དབང་པོ་རབ་བསྒྱུར་རབ་དང་ཞི། །མཁའ་
ལས་ལྷ་འཁོར་ཁྲག་ཁྲིག་དཔག་མེད་དང་། །རིམ་གྲོར་བཅས་པས་གོས་རྣམས་འཐོར་བར་བྱེད། །ཡིད་འོང་གོས་བརྒྱ་དག་གིས་གཏོར་བར་གྱུར། །འདོད་པར་སྤྱོད་པའི་ལྷ་ཡི་བུ་མོ་དག །རི་རབ་སུམ་བཅུ་རྩ་དྲུག་རྡུལ་ཕྲན་གྱི། །གྲངས་
མཉམ་དག་གིས་དགྱེས་པའི་རོལ་མོས་མཆོད། །གཟུགས་ལ་སྤྱོད་པའི་ལྷ་ཡི་བུ་མང་པོ། །རི་རབ་སུམ་བཅུ་རྩ་དྲུག་རྡུལ་མཉམ་པས། །ཀུན་ནས་དེ་བཞིན་གཤེགས་པ་ལ་མཆོད་དེ། །རོལ་མོ་བརྡུང་བ་བྱེ་བ་ཁྲག་ཁྲིག་དག །རིག་
པ་འཛིན་པའི་འཁོར་ལོ་དཔག་ཏུ་མེད། །དེ་སྙེད་གསང་བ་འཛིན་པའི་རྗེས་འབྲང་ཞིང་། །བྱང་ཆུབ་སེམས་དཔའ་རྣམ་པར་འཕྲུལ་པ་སྟོན། །ཨེ་མ་སྒྲ་དབྱངས་ཡན་ལག་ཀུན་འབྱུང་བ། །ཀུན་དུ་བཟང་པོའི་རྣམ་འཕྲུལ་དུ་མར་ཤར། །ཞིང་
མཆོག་གཅིག་ན་བདེ་གཤེགས་བཞུགས་མཛད་པ། །ཞིང་རྣམས་དུ་མར་སྐུ་གཟུགས་རབ་ཏུ་བསྟན། །དེ་ཉིད་སངས་རྒྱས་སྟོང་ཕྲག་གཅིག་ཉིད་ལས། །སངས་རྒྱས་བྱེ་ཕྲག་སྟོང་ནི་གོང་དུ་བསྟན། །གསུང་གཅིག་གིས་ནི་རབ་ཏུ་
གང་བསྟན་པ། །བསམ་ཡས་གང་གཱའི་ཀླུང་གི་བྱེ་སྙེད་དུ། །ཚུལ་རྣམས་མི་ཟད་ཆོས་སྒྲ་སྒྲོགས་པར་མཛད། །དེ་སྙེད་གསང་བ་མཆོག་འདི་རྒྱས་པར་བཀང་། །གང་དུ་ཡེ་ཤེས་རྡོ་རྗེ་མི་འབྱུང་བའི། །ཏིང་འཛིན་གཅིག་པ་ངེས་པར་

89-1-277b

བཞུགས་ནས་ནི། །ཆོས་ཀྱི་དབྱིངས་ལས་འབྱུང་བ་དུ་མ་ཡི། །ཏིང་འཛིན་སྒོ་ནི་ནམ་མཁའ་ཁྱབ་པར་འབྱུང་། །སངས་རྒྱས་སྐུས་ནི་ཞིང་ཁམས་ཁྲག་ཁྲིག་དག །ཡིད་འོང་སྣ་ཚོགས་ཁྱབ་པའི་ཡེ་ཤེས་སྐུ། །ཆོས་དབྱིངས་རྒྱ་ཆེན་
ཡོངས་སུ་རྒྱས་པར་བཀང་། །བ་སྤུ་གཅིག་ལས་བདེ་ལྡན་འོད་བཀྱེ་བ། །འགྲོ་བའི་ཉོན་མོངས་ཡིད་འོང་ཞི་བར་སྤྲོ། །ཞིང་གི་རྡུལ་ཕྲན་ཟད་པར་ནུས་འགྱུར་གྱི། །འདི་དག་བགྲང་བར་ཤེས་པར་མི་ནུས་སོ། །འཁོར་ལོས་སྒྱུར་བའི་
དམ་པར་ལ་ལས་མཐོང་། །ལ་ལས་སངས་རྒྱས་མཚན་རབ་མངའ་བར་མཐོང་། །ལ་ལས་རིགས་དྲུག་ཐུབ་པ་སྤྲུལ་པར་མཐོང་། །ཞིང་རྣམས་ལ་ལར་སྤྱོད་པ་མཆོག་མཛད་ཅིང་། །དག་ཅིང་རྐང་གཉིས་ཞི་བ་དམ་པ་མཐོང་། །དགའ་
ལྡན་གནས་ན་མགོན་པོ་བཞུགས་པ་དང་། །རྒྱལ་ཚབ་བསྐོ་མཛད་ཉེ་བར་འཕོ་བ་བསྟན། །གཤེགས་དང་གཟིགས་པ་དེ་དག་རབ་ཏུ་བསྟན། །ཞིང་རྣམས་བྱེ་བར་ཡུམ་གྱི་ལྷུམས་འཇུག་དང་། །ཞིང་རྣམས་ཀུན་དུ་སྐྱེ་བ་
སྟོན་པ་ཉིད། །གཞོན་ནུ་རོལ་ཅིང་སྒྱུ་རྩལ་གནས་པས་མཁས། །ཕོ་བྲང་བཙུན་མོའི་ནང་ན་བཞུགས་པར་སྟོན། །འགྲོ་བའི་དོན་དུ་མགོན་པོ་ངེས་འབྱུང་ཞིང་། །དཀའ་ཐུབ་སྤྱད་ཅིང་དེ་ལས་ལྡང་བར་སྟོན། །མི་གཡོ་གོ་འཕང་
དུ་ནི་གནས་བྱས་ཤིང་། །བསམ་གཏན་བསྐུལ་བ་མཛད་དང་རྒྱལ་བ་ཐོབ། །རྒྱལ་བའི་དུས་ལས་བསླང་བ་འདི་དག་གིས། །གསང་བ་མངོན་པར་བྱང་ཆུབ་དེ་ཉིད་བསྟན། །བྱང་ཆུབ་སྙིང་པོ་རྡོ་རྗེ་གདན་དུ་གཤེགས། །དེ་ཉིད་བཅོམ་
ལྡན་མངོན་པར་སངས་རྒྱས་ལ། །ས་ཡི་ལྷ་མོ་དགྱེས་པས་ཁྱབ་བྱས་ཤིང་། །བདུད་སྡེ་བཅོམ་པས་མི་འགྱུར་མཆོག་གི་གནས། །གསང་བ་འོག་མིན་འདི་ནི་ཡེ་ཤེས་ཡུལ། །གཉིས་མེད་རྡོ་རྗེའི་གནས་སུ་རྫོགས་སངས་
རྒྱས། །ཆོས་ཀྱི་འཁོར་ལོ་ངེས་ལེགས་ལམ་བསྟན་པ། །མཚན་ཉིད་མེད་པའི་ཚུལ་དུ་གསང་བ་བསྟན། །རྒྱུད་སྡེ་ཡན་ལག་ཕྱི་ནང་གསང་བ་ཡི། །རྣམ་པ་གསུམ་དུ་ཆོས་ཀྱི་འཁོར་ལོ་བསྐོར། །དེ་ལྟར་དེ་བཞིན་

89-1-278a

གཤེགས་པས་ཚུལ་འདི་གསུངས། །སྟོང་པ་ཞི་བ་བདག་མེད་མཚན་ཉིད་བྲལ། །ཆོས་ཉིད་རང་བྱུང་མཁའ་དང་མཚུངས་པ་ལས། །རྒྱལ་བས་དོན་དམ་རབ་ཏུ་མི་གནས་པ། །ཆོས་ཉིད་སྟོང་ཉིད་དེ་བཞིན་ཉིད་དུ་ནི། །རྟེན་
ཅིང་འབྲེལ་བར་འབྱུང་བའི་ཆོས་རྣམས་ལ། །རྒྱུ་རྐྱེན་འབྲས་བུས་གྲུབ་པ་ཡང་དག་ལམ། །ཀུན་རྫོབ་སྤྱོད་ཡུལ་ཡིན་པར་རབ་ཏུ་བསྟན། །ཞིང་མང་མཐའ་ཡས་ཀུན་དུ་དེ་ཉིད་སྟོན། །སྒྱུ་མའི་མཁན་པོ་མཁས་པས་གང་
དུ་ནི། །འགྲོ་བའི་གཟུགས་བརྙན་དུ་མ་སྟོན་པ་བཞིན། །དེ་བཞིན་སྟོན་པ་ཡེ་ཤེས་མཆོག་མཁྱེན་པ། །ཀུན་དུ་འགྲོ་བའི་དོན་དུ་རབ་ཏུ་སྟོན། །ཐམས་ཅད་མ་ལུས་ཆོས་ཉིད་དེ་འདྲ་སྟེ། །མཚན་དང་མཚན་གཞི་མཉམ་པ་ཉིད་
ཀྱིས་འདྲ། །མཚན་ཉིད་མེད་པ་ཆོས་རྣམས་ཀུན་གྱི་མཆོག །བདེ་བར་གཤེགས་པའི་ལམ་འདི་ཐོབ་འདོད་པས། །རྟོག་དང་རྣམ་རྟོག་མ་ལུས་སྤང་མེད་པས། །གསང་ཆེན་ཚུལ་འདི་གང་གིས་སྤྱོད་པ་ནི། །དངོས་
དང་དངོས་མེད་མཉམ་ཉིད་ཤེས་པར་གྱིས། །གང་དུ་རྣལ་འབྱོར་གྱི་དབང་ཕྱུག་དུ་མའི་སྤྱོད་ཡུལ་གསང་བ་ཆེན་པོ་བསམ་གྱིས་མི་ཁྱབ་པའི་ཏིང་ངེ་འཛིན་མཚུངས་པ་མེད་པར་སྤྱོད་པ་འདི་ལ་འདི་ལྟ་སྟེ། གསང་
བ་ཆེན་པོ་བླ་ན་མེད་པའི་ཚུལ་འདི་ནི་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཆོས་ཐམས་ཅད་ཀྱི་དཀྱིལ་འཁོར་ཚད་མེད་པ་རབ་ཏུ་སྤྱོད་པ། གསང་བ་
ཆེན་པོ་ཆོས་ཀྱི་ཚུལ། ཆོས་ཀྱི་དབྱིངས་ལྟ་བ་པོ་མེད་པ། ཆོས་ཐམས་ཅད་ཤེས་པ་པོ་མེད་པར་ཡང་དག་པར་ངོ་བོ་ཉིད་ཀྱིས་སྟོང་པ་ཉིད་དུ་ཡང་དག་པར་ལྟ་སྟེ། ཡེ་ཤེས་ཀྱི་སྣང་བ་རབ་ཏུ་ཐོབ་པས་
ཆོས་ཐམས་ཅད་ལ་ལུས་མེད་པར་རབ་ཏུ་མཐོང་བ། ཆོས་ཉིད་དེ་བཞིན་ཉིད་ཀྱི་རྒྱ་མཚོ་ལ་མི་གནས་པའི་ཚུལ་བསྟན་པ་ཉིད་དོ། །སྲིད་པ་དང་ཞི་བའི་ཆོས་ཐམས་ཅད་རབ་ཏུ་ཞི་བ་ཉིད་ནམ་མཁའ་ལྟ་བུར་

89-1-278b

གནས་པ། འདུས་བྱས་ཀྱི་ཁམས་འདུས་མ་བྱས་སུ་མངོན་པར་སྤགས་པར་མི་བྱེད་ལ། འདུས་མ་བྱས་ཀྱི་ཁམས་འདུས་བྱས་སུ་སྒྲོ་བཏགས་པ་ཐམས་ཅད་ཀྱིས་རྣམ་པར་མི་རྟོག་པར་གནས་པ་སྟེ། འདི་ཉིད་
སངས་རྒྱས་རྣམས་ཀྱིས་བྱིན་བརླབ་པ། །བསོད་ནམས་ཡོངས་སུ་རྒྱས་པ་དག་པའི་ཞིང་། །སྣང་བའི་དཀྱིལ་འཁོར་དམ་པའི་འོད་ཟེར་ནི། །སྐྱེ་དགུ་ཀུན་གྱི་བློ་ཡི་འཆར་བྱེད་པ། །གང་དུ་སྐུ་གསུང་ཐུགས་ཀྱི་སྣང་
བ་ནི། །རྣམ་པར་གསལ་བ་སྒྲིབ་པ་མེད་པ་ཉིད། །ཆོས་རྣམས་ཀུན་ལ་ཡང་དག་རབ་འཇུག་ཅིང་། །ཆོས་ཀྱི་དབྱིངས་ལས་ཡེ་ཤེས་འབྲལ་མེད་པ། །ལུས་ངག་ཡིད་གནས་ཀུན་གྱི་རྗེས་འགྲོ་བའི། །སྐད་ཅིག་
ཉིད་ལ་བསམ་གྱིས་མི་ཁྱབ་པའི། །སྐད་ཅིག་ཐོག་མཐའ་མེད་པར་རབ་སྟོན་པ། །འདི་ནི་ཡེ་ཤེས་མི་ཟད་འབྱུང་གནས་ཀྱི། །ཚུལ་ལ་གནས་པ་གསང་བའི་སྤྱོད་ཚུལ་ལོ། །བརྟན་པས་ཀུན་དུ་རྟོག་པ་རབ་
ཞི་བ། །འདི་ནི་མི་གནས་གསང་བའི་སྤྱོད་ཡུལ་འཐོབ། །སེམས་ཅན་རྒྱུད་ནའང་མི་སྤྱོད་མ་ཡིན་ཏེ། །འདི་འདྲའི་ཡེ་ཤེས་དམ་པ་ཁོང་དུ་ཆུད། །དེ་ལ་ཀུན་དུ་རྟོག་དང་མི་རྟོག་མེད། །བློ་མཆོག་དེ་དང་འགྲོ་ཀུན་ཁ་ལོ་
སྒྱུར། །རྣམ་པར་སྨིན་པས་གོས་མེད་ནམ་མཁའ་བཞིན། །འཇིག་རྟེན་ཐམས་ཅད་རྒྱུ་དང་བཅས་པས་ན། །ཆོས་རྣམས་ཀུན་དུ་རྒྱུ་མེད་བསྟན་པ་མིན། །འདི་ཉིད་རབ་དང་འབྲིང་དང་ཐ་མ་ཡི། །ཕྱོགས་བཅུར་
ཡེ་ཤེས་བཞུགས་པའི་བྱང་ཆུབ་ཚུལ། །གསང་བ་དམ་པའི་སྤྱོད་ཡུལ་འདི་བསྟན་པའོ། །ཆོས་ཐམས་ཅད་ཀྱི་གནས་ཡེ་ཤེས་ཀྱི་ཡུལ་སངས་རྒྱས་ཐམས་ཅད་ཀྱི་རབ་འབྱམ་ཚད་མེད་པའི་རྡོ་རྗེ་བཙུན་མོའི་
བྷ་ག་ལས་མངོན་པར་འབྱུང་བ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་སྙིང་པོའི་དཀྱིལ་འཁོར་ལས། ཡང་དག་པའི་ཐུགས་རྗེ་ཆེན་པོའི་ངང་ལས་ཡེ་ཤེས་ཀྱི་སྤྲིན་རྡོ་རྗེས་

89-1-279a

ཀུན་དུ་ཁྱབ་པར་སྤྲོ་བ་དང་སྡུད་པའི་ཚུལ་གྱིས་གང་དུ་མི་གནས་ཤིང་རང་འབྱུང་ཆེན་པོའི་བྱང་ཆུབ་ཀྱི་སེམས་རྡོ་རྗེ། ཆོས་ཀྱི་དབྱིངས་ནམ་མཁའ་དང་མཉམ་པ་དབྱིངས་དང་ཡེ་ཤེས་དབྱེར་མེད་པར་ངོ་བོ་ཉིད་དམིགས་
སུ་མེད་པ་ཉིད་དུ་སྟོན་ཏོ། །དེ་ནས་དཔལ་རྡོ་རྗེ་འཛིན་པ་སངས་རྒྱས་ཐམས་ཅད་ཀྱི་འགྱུར་བ་མེད་པའི་ངོ་བོ་ཉིད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བྱང་ཆུབ་ཀྱི་སེམས་ཀྱི་གསང་བ་མི་ཟད་པའི་ཚུལ་འདི་
གསུངས་སོ། །གསང་བ་སྤྲོས་མེད་འགྱུར་བ་མེད་པའི་ངང་། །ཀུན་དུ་མ་སྐྱེས་སྐྱེ་མེད་དགའ་བའི་དབྱིངས། །བདེ་ཆེན་རོ་མཉམ་རྒྱལ་བ་ཀུན་གྱི་གནས། །ཆོས་ཀུན་རང་བཞིན་ཡོངས་སུ་མཉམ་པ་ཉིད། །མངོན་པར་ཆགས་མེད་
མི་གནས་ཡེ་ཤེས་ལས། །རློམ་སེམས་མེད་པའི་ཆོས་ཉིད་སྐྱེ་བ་མེད། །ཡེ་ཤེས་ཆོས་ཀྱི་སྒོ་ཡི་ཏིང་ངེ་འཛིན། །ནམ་མཁའི་ཆོས་ཉིད་འབྱམ་ཀླས་ཐོགས་མེད་པ། །བྱང་ཆུབ་སེམས་ལྡན་བདེ་གཤེགས་སྤྱོད་ཡུལ་ཅན། །རྡོ་རྗེ་ལྟ་
བུའི་གནས་ལས་བསྟན་པ་དང་། །ཕྱིར་མི་ལྡོག་པ་ཡེ་ཤེས་འབྱུང་གནས་ཉིད། །ཐམས་ཅད་མཁྱེན་པ་ཚད་མེད་འབྲས་བུའི་ཡུལ། །གྲངས་མེད་གཞལ་དུ་མེད་པའི་དོན་འབྱུང་བའོ། །འདི་དག་ཀྱང་ཇི་ལྟར་རྟོགས་པར་བྱ་བ་ཡིན་
ཞེ་ན། རྣམ་པར་འཕྲུལ་པའི་ས་ཁོང་དུ་ཆུད་པ། འཇིག་རྟེན་གྱི་ཁམས་ཐམས་ཅད་ཀྱི་རྗེས་སུ་སོང་ཞིང་རྗེས་སུ་ཆགས་པ་མེད་པར་སྤྱོད་པ། ཉོན་མོངས་པ་མེད་པའི་ཆོས་ཀྱི་ཚུལ་ལ་ཆོས་སུ་རྟོགས་པས་གནས་པ་མེད་པ་
སེམས་བསྐྱེད་པ་ཤིན་དུ་ཡངས་པས་རྣམ་པར་ཐར་པའི་སྒོ་དུ་མ་རབ་ཏུ་ཐོབ་པ། ཡེ་ཤེས་གཅིག་ནས་གཅིག་ཏུ་བརྒྱུད་པའི་རྒྱུད་ལ་མཁས་པ། དོན་གཅིག་ནས་གཅིག་ཏུ་བསྟན་པ་རབ་ཏུ་འཇུག་པ་བླ་ན་མེད་པའི་ཡེ་
ཤེས་དམ་པའི་སྤྱོད་ཡུལ་ཡིན་པར་རིག་པར་བྱའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་ཕྱག་ན་རྡོ་རྗེ་དེ་བཞིན་གཤེགས་པའི་བདག་པོ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསང་བ་ཆེན་པོའི་རྒྱུད་

89-1-279b

འདིར་གསང་བའི་ཡི་གེ་དེ་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དེ་བཞིན་གཤེགས་པ་ཐམས་ཅད་ཀྱི་གསང་བའི་དམ་ཚིག་གི་སྤྱོད་པའི་རྡོ་རྗེ་འདི་ལ་དད་ཅིང་བསྒོམ་པར་འགྱུར། དེ་སྐད་ཅེས་
གསོལ་པ་དང་། དེ་ནས་དེ་བཞིན་གཤེགས་པ་ཐམས་ཅད་ཀྱི་རྒྱལ་པོ་རྡོ་རྗེ་འཛིན་པས་དེ་དག་ལ་འདི་སྐད་ཅེས་གསུངས་སོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་གསང་བའི་ཡི་གེ་གསུམ་དང་ལྡན་ན། བྱང་ཆུབ་
སེམས་དཔའ་སེམས་དཔའ་ཆེན་པོ་དེ་དག་དེ་བཞིན་གཤེགས་པ་དེ་དག་གི་གསང་ཆེན་གྱི་སྤྱོད་པ་རྡོ་རྗེ་གང་ཡིན་པ་འདི་ལ་དད་ཅིང་བསྒོམ་པར་འགྱུར་རོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་གསོལ་པ། གསང་བའི་ཡི་གེ་
གང་ཞིག་ལགས། དཔལ་རྡོ་རྗེ་འཛིན་པས་བཀའ་སྩལ་པ། དེ་བཞིན་གཤེགས་པ་ཐམས་ཅད་ཀྱི་སྐུའི་གསང་བ་ཆེན་པོའི་རྡོ་རྗེ་དང་། དེ་བཞིན་གཤེགས་པ་ཐམས་ཅད་ཀྱི་གསུང་གི་གསང་བ་ཆེན་པོའི་རྡོ་རྗེ་དང་། དེ་བཞིན་
གཤེགས་པ་ཐམས་ཅད་ཀྱི་ཐུགས་ཀྱི་གསང་བ་ཆེན་པོའི་རྡོ་རྗེ་སྟེ། དེ་དག་ཉིད་དོ། །དེ་ནས་དེ་བཞིན་གཤེགས་པ་དེ་དག་ཐམས་ཅད་ཀྱིས་བཅོམ་ལྡན་འདས་དཔལ་རྡོ་རྗེ་འཛིན་པ་དེ་བཞིན་གཤེགས་པ་ཐམས་ཅད་
ཀྱི་བདག་པོ་ལ་ཕྱག་འཚལ་ཞིང་འདུད་ནས་ཅང་མི་གསུང་བར་གྱུར་ཏོ། །དེ་ནས་རྒྱལ་པོ་རྡོ་རྗེ་འཛིན། །ཀུན་མཆོག་ཡེ་ཤེས་སྟོན་མཛད་པས། །དེ་བཞིན་གཤེགས་པ་ཀུན་གྱི་གནས། །གསང་བ་དམ་པ་བཀའ་སྩལ་
ཏོ། །སངས་རྒྱས་ཀུན་གྱིས་མི་གསུངས་ཤིང་། །དོན་ཆེན་འབྲས་བུ་ལམ་གྱུར་པ། །དེ་བཞིན་གཤེགས་པ་གསང་བའི་རྒྱུད། །རྡོ་རྗེ་འཆང་གིས་སྦས་པ་ཉིད། །ཨུ་དུམ་བ་རའི་མེ་ཏོག་བཞིན། །འཇིག་རྟེན་དུ་
ནི་རྙེད་དཀའ་བ། །ཀུན་གྱི་རྩ་བར་གྱུར་པའི་མདོ། །གསང་བ་འདུས་པ་ཆེན་པོ་ཡིན། །དབྱིངས་གྱུར་ཁམས་གསུམ་གསང་བ་ཆེ། །

89-1-280a

དེ་ཉིད་བདེ་བར་འགྱུར་བསམས་པ། །རྡོ་རྗེ་གསུམ་གྱི་གནས་མཚན་པས། །ཏིང་འཛིན་རྡོ་རྗེ་ཁྱུ་མཆོག་དགྱེས། །ཐབས་དང་ཤེས་རབ་དབྱེར་མེད་པ། །འདི་ནི་གང་ཞིག་གནས་བྱེད་པ། །བྱང་ཆུབ་སེམས་དཔའི་
གྲགས་ཆེན་རྣམས། །ཞག་བདུན་གྱིས་ནི་ཕུན་ཚོགས་པའི། །སྐུ་གསུམ་དངོས་གྲུབ་འདིར་ཐོབ་འགྱུར། །བཅོམ་ལྡན་སྐུ་གསུང་ཐུགས་གསང་བ། །རྡོ་རྗེ་བསྡུས་པའི་དཀྱིལ་འཁོར་ལ། །དྲི་མེད་ཡེ་ཤེས་འབྱུང་བ་ཡི། །
ཁྱད་པར་མཆོག་འདི་ཕྱུང་བའོ། །སྐུ་གསུང་ཐུགས་ཀྱི་དམ་ཚིག་ནི། །ཕྱག་རྒྱ་ཆེན་པོའི་དོན་རྟོགས་པ། །ཆོ་ག་བཞིན་དུ་ཀུན་བསྒོམས་ན། །སྐད་ཅིག་གིས་ནི་སངས་རྒྱས་འཐོབ། །གསང་བའི་དོན་འདི་འབྱུང་དཀའ་བའི། །བླ་
མེད་བདེ་ཆེན་མི་འགྱུར་བ། །འདི་ནི་སྙིང་པོ་བསྡུས་པ་སྟེ། །གཞན་དུ་འབྱུང་བར་འགྱུར་བ་མིན། །འོན་ཀྱང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གསང་བ་འདུས་པ་ཆེན་པོ་འདི་ལ་སྐད་ཅིག་ཐང་ཅིག་ཡུད་
ཙམ་གྱིས་གནས་ན་སངས་རྒྱས་ཀྱི་བྱང་ཆུབ་རྫོགས་པར་བྱེད་དོ། །བསྐལ་པ་གང་གཱའི་ཀླུང་གི་བྱེ་མ་སྙེད་ཐམས་ཅད་དུ་བྱང་ཆུབ་སེམས་དཔའ་རྣམས་ཀྱིས་འབད་ཅིང་རྩོལ་ཀྱང་བྱང་ཆུབ་ཐོབ་པར་མི་འགྱུར་བ་དེ་དཔལ་
གསང་བ་འདུས་པ་ལ་དགའ་བའི་བྱང་ཆུབ་སེམས་དཔས་ཚེ་འདི་ཉིད་ལ་དེ་བཞིན་གཤེགས་པ་རྣམས་ཀྱི་སངས་རྒྱས་ཞེས་བྱ་བའི་གྲངས་སུ་འགྲོའོ། །དེ་དག་ཤིན་དུ་དཀོན་གྱུར་པ། །རྣམ་གྲངས་འདི་ན་བསྟན་པའི་
ཚེ། །དེ་ཚེ་བྱང་ཆུབ་སེམས་དཔའ་རྣམས། །ཤིན་དུ་གདུང་བས་ཆེར་ནོན་ཏེ། །གསང་ཆེན་བསྐལ་པ་ངན་གྱུར་ཅེས། །དུས་གཅིག་བསྟན་པ་ཉིད་གཅིག་དང་། །སྟོན་པ་གཅིག་ལས་གཞན་པ་ཡི། །སྤྱོད་ཡུལ་མ་གྱུར་
དེ་ཡི་ཚེ། །ཇི་ལྟར་ཐབས་འདི་སྟོན་བྱེད་འགྱུར། །མིང་ཙམ་དུ་ཡང་མི་ཐོས་ན། །གཞན་ཅི་སྨོས་ལྟ་ག་ལ་དགོས། །དེ་ཉིད་ཀུན་དུ་བསྒྲགས་གྱུར་པའོ། །དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། 

89-1-280b

དེ་སྐད་ཅེས་མ་ཟེར་ཅིག །ཡི་གེ་འདི་ཀུན་དང་ཐུན་མོང་སྟེ། རིགས་ཀྱི་བུ་ཁྱེད་རྣམས་ཀྱིས་ཇི་ལྟར་མི་ཤེས་པ་དང་། མ་ཐོབ་པ་དེ་བཞིན་དུ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་
ཐམས་ཅད་ཀྱི་གསང་བའི་ཡི་གེ་འདི་དག་མ་ཐོབ་ཅིང་མངོན་པར་རྫོགས་པར་སངས་རྒྱས་སོ། །དེ་ཅིའི་ཕྱིར་ཞེ་ན། གསང་བའི་ཡི་གེ་ནི་རྣམ་པར་དག་པའི་ཕྱིར་རོ། །དེ་ནས་བྱང་ཆུབ་སེམས་དཔའ་དེ་དག་ཐམས་
ཅད་ཅང་མི་སྨྲ་བར་གནས་པར་གྱུར་ཏོ། །དེ་ནས་རྡོ་རྗེ་འཛིན་པ་དེ་བཞིན་གཤེགས་པ་ཐམས་ཅད་ཀྱི་བདག་པོས་གསང་བའི་དབང་ཕྱུག་རྡོ་རྗེ་འཛིན་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་མཉམ་པ་ཉིད་
ལ་རྣམ་པར་དགོངས་ནས་ཅང་མི་གསུང་བར་གྱུར་ཏོ། །དེ་ནས་ཡང་བརྗོད་དུ་མེད་པའི་ཡང་བརྗོད་དུ་མེད་པའི་སངས་རྒྱས་ཀྱི་ཞིང་གི་རྡུལ་ཕྲ་རབ་དང་མཉམ་པའི་བྱང་ཆུབ་སེམས་དཔའ་ཆེན་པོ་རྣམས་ཀྱིས་དེ་བཞིན་
གཤེགས་པ་རྣམས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་འདི་ཅིའི་སླད་དུ་དེ་བཞིན་གཤེགས་པ་ཐམས་ཅད་དང་། བྱང་ཆུབ་
སེམས་དཔའི་འཁོར་གྱི་ནང་ན་ཅང་མི་གསུང་བར་བཞུགས། དེ་སྐད་ཅེས་གསོལ་པ་དང་། དེ་བཞིན་གཤེགས་པ་ཐམས་ཅད་ཀྱིས་བྱང་ཆུབ་སེམས་དཔའ་དེ་དག་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །
རིགས་ཀྱི་བདག་པོ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་བདག་པོ་འདི་ཅིའི་སླད་དུ་སྐུ་དང་གསུང་དང་ཐུགས་རྡོ་རྗེའི་ངོ་བོ་ཉིད་ལས་དམིགས་སུ་མེད་པའི་ཡི་གེའི་ཚོགས་ལ་
ངོ་བོ་ཉིད་མེད་པའི་ཡི་གེའི་ཚིག་བརྗོད་ནས་ཅང་མི་གསུང་བར་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་རྡོ་རྗེ་བཙུན་མོའི་བྷ་ག་ལ་

89-1-281a

སྙོམས་པར་ཞུགས་སོ། །དེ་ནས་ལྷ་མོ་བཞི་དག་གིས། །ཚད་མེད་ཡེ་ཤེས་དག་པའི་ས། །ཡང་དག་བསྐུལ་བ་མཛད་པ་ལས། །དེ་བཞིན་ཉིད་ལས་བཞེངས་པར་འགྱུར། །དཔག་མེད་རྡོ་རྗེའི་ཚུལ་མཆོག་ལས། །འདོད་
ཆགས་གནས་ལ་སྤྱོད་པ་ཡི། །ཏིང་ངེ་འཛིན་ལ་སྙོམས་ཞུགས་ན། །བཙུན་མོའི་ཚོགས་དང་ལྷན་ཅིག་སྐྱེས། །དམ་ཚིག་འཁོར་ལོར་གནས་པ་ཡིས། །འདོད་པའི་ལོངས་སྤྱོད་ཉེར་ལྡན་པས། །གཉིས་མེད་བྱང་ཆུབ་སེམས་
གནས་ཏེ། །དགྱེས་པ་ཡོངས་སུ་སྤྱོད་པ་མཛད། །དེ་ནས་རྡོ་རྗེའི་ལུས་ཀྱི་ནི། །རྩ་ཡི་ཁོང་སྟོང་ཐམས་ཅད་དུ། །བདེ་བར་གཤེགས་པ་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་དང་། །ཡོན་ཏན་ཕྲིན་ལས་དམ་ཚིག་གི། །
ཁུ་བ་བྱང་ཆུབ་སེམས་རྒྱུན་གྱིས། །ཀུན་དུ་ཁྱབ་པར་གྱུར་པ་ནི། །དཔེར་ན་བུམ་པ་ཆུས་གང་ལྟར། །ཤིན་དུ་བདེ་བས་རྒྱས་པར་གནས། །དེ་ཉིད་ཡེ་ཤེས་གྱུར་པའོ། །དེ་ནས་ཆོས་ཀྱི་དབྱིངས་གནས་པའི། །འགྲོ་བའི་
ཕུང་པོ་ཇི་སྙེད་ཀུན། །སྐུ་གསུམ་དམ་ཚིག་ལས་བྱུང་བ། །དེ་ལ་བདུད་རྩིའི་འོད་ཟེར་གྱིས། །གློག་གི་ཟེར་མ་ལྟར་འཕྲོ་བས། །ཤིན་དུ་བདེ་བར་རིག་ནས་ནི། །དེ་ནས་བརྩམས་ཏེ་སེམས་ཅན་ཁམས། །མ་
ལུས་ལུས་པ་མེད་པ་ལ། །རྡོ་རྗེ་དཔལ་གྱི་རེག་བྱུང་བས། །ཡང་དག་མཆོག་ཏུ་བྱིན་བརླབས་ཤིང་། །དེ་བཞིན་གཤེགས་པ་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་ཡིས། །ཡེ་ཤེས་དྲི་མེད་དབང་བསྐུར་ཅིང་། །
མ་ལུས་ཀུན་ཀྱང་ཀུན་དུ་བཟང་། །ཀུན་དུ་བཟང་པོའི་དཔལ་ཞེས་པར། །བླ་ན་མེད་པར་དབང་བསྐུར་ཏོ། །དེ་ལྟར་དབང་བསྐུར་ཙམ་གྱིས་ནི། །ཐམས་ཅད་དེ་བཞིན་གཤེགས་པའི་སྐུ། །དགྲ་བཅོམ་ཡང་དག་རྫོགས་སངས་རྒྱས། །
རྡོ་རྗེ་གསུམ་གྱི་ཡེ་ཤེས་ཅན། །བདེ་ཆེན་ངོ་བོ་ཉིད་སྐུར་གྱུར། །རྡོ་རྗེ་འཛིན་གྱིས་བཀའ་སྩལ་པ། །དུས་གསུམ་སངས་རྒྱས་ཐམས་ཅད་ཀྱི། །ཡེ་ཤེས་སྤྱོད་པ་མཐོང་གྱུར་པས། །ཆོས་ཉིད་མཉམ་པ་ཉིད་མཐོང་ངམ། །

89-1-281b

སླར་གསོལ་བ་ནི་མཐོང་ལགས་སོ། །ཡེ་ཤེས་སྤྱོད་པ་རྡོ་རྗེ་ཆེ། །བདེ་བར་གཤེགས་པ་མཐོང་ཞེས་གསོལ། །དེ་ལྟར་ཡང་དག་གྱུར་པའོ། །དེ་ལྟར་སངས་རྒྱས་ཐམས་ཅད་ཀུན། །རྡོ་རྗེ་བཙུན་མོའི་བྷ་ག་ལས། །མངོན་པར་
བྱུང་ནས་འདི་སྐད་གསོལ། །གང་དུ་འདོད་ཆགས་ཆེན་པོ་ཡི། །ཡི་གེའི་ཚོགས་ཀྱིས་སངས་རྒྱས་ཀྱི། །བྱང་ཆུབ་རྗེས་སུ་རྟོགས་གྱུར་གང་། །དེ་ནས་བཅོམ་ལྡན་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །དེ་
ནས་རིགས་ཀྱི་བདག་པོ་ཡིས། །གསང་བ་མཆོག་ཏུ་བཀའ་སྩལ་པ། །སངས་རྒྱས་བྱང་ཆུབ་སེམས་དཔའ་ཀུན། །དེ་སྐད་ཅེས་ནི་མ་ཟེར་ཅིག །དེ་ཉིད་ཅི་ཡི་ཕྱིར་ཞེ་ན། །ཆོས་རྣམས་ནམ་མཁའི་རྡོ་རྗེའི་གནས། །
དེ་ཉིད་མཚུངས་ཕྱིར་སྟོང་པ་ཉིད། །རབ་ཏུ་མི་གནས་བདག་ཉིད་ལས། །ཆོས་རྣམས་འོད་གསལ་དབྱིངས་གྱུར་པ། །དེ་ཉིད་ཡེ་ཤེས་འབྱུང་གནས་གྱུར། །དེ་ནས་བྱང་ཆུབ་སེམས་དཔའ་དེ་དག་དང་། དེ་བཞིན་
གཤེགས་པ་དེ་དག་ཐམས་ཅད་ཅང་མི་གསུང་བར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་རྣམ་པར་དག་
པའི་མཉམ་པ་ཉིད་སྤྱོད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས་ཀྱང་སངས་རྒྱས་དང་བྱང་ཆུབ་སེམས་དཔའ་དང་། རིག་མ་དང་ལྷ་མོ་དང་། ཁྲོ་བོའི་རྒྱལ་པོ་
དུ་མ་དང་བཅས་པའི་དཀྱིལ་འཁོར་གྱི་འཁོར་ལོ་ལ་བཞུགས་ནས་ཅང་མི་གསུང་བར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་འཛིན་པས་དེ་བཞིན་གཤེགས་པ་ཐམས་ཅད་དང་། བྱང་ཆུབ་
སེམས་དཔའ་སེམས་དཔའ་ཆེན་པོ་ཐམས་ཅད་ལ་བཀའ་སྩལ་པ། ཁྱེད་རྣམས་ཀྱིས་ཕྱོགས་བཅུ་མཐའ་ཡས་པའི་འཇིག་རྟེན་གྱི་ཁམས་ཐམས་ཅད་དུ་དེ་བཞིན་གཤེགས་པ་ཐམས་ཅད་ཀྱི་སྐུ་དང་

89-1-282a

གསུང་དང་ཐུགས་རྡོ་རྗེའི་གསང་བ་འདི་བགོ་བར་གྱིས་ཤིག །དེ་ཅིའི་ཕྱིར་ཞེ་ན། ཕྱོགས་བཅུ་ན་གནས་པ་མ་ལུས་ཤིང་ལུས་པ་མེད་པའི་བྱང་ཆུབ་སེམས་དཔའ་དེ་རྣམས་ཆོས་ཀྱི་རྣམ་གྲངས་འདི་ལ་སྐལ་
བ་ཡོད་པའི་ཕྱིར་རོ། །གཞན་ཡང་བྱང་ཆུབ་སེམས་དཔའ་རྡོ་རྗེ་སྙིང་པོ་ལ་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ཐམས་ཅད་ཀྱི་གསང་བའི་དམ་ཚིག་རྡོ་རྗེ་འདི་ཉིད་ཟུང་ཅིག །ཁྱོད་ཀྱང་དེ་བཞིན་གཤེགས་
པ་ཐམས་ཅད་ཀྱིས་རྡོ་རྗེ་སྙིང་པོ་དབང་ཕྱུག་གསང་བའི་རྒྱལ་པོ་ཞེས་བྱ་བར་དབང་བསྐུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྙིང་པོས་དེ་བཞིན་དུ་བགྱིའོ། །ཞེས་གསོལ་ནས་ཅང་མི་
སྨྲ་བར་གྱུར་ཏོ། །གསང་བའི་རྒྱལ་པོའི་སྐུ་གཅིག་ལས། །ཞིང་ཁམས་མ་ལུས་སྣང་མཛད་ཅིང་། །ཁམས་གསུམ་སྤྱོད་དང་སངས་རྒྱས་ཀྱི། །རྣམ་པ་དུ་མའི་སྐུར་བསྟན་མཛད། །དེ་བཞིན་གཤེགས་པའི་
སྐུ་རྡོ་རྗེ་རྣམ་པར་སྣང་མཛད་ཁམས་གསུམ་ཉིད་ཀྱི་ལུས་རྡོ་རྗེ་ལ་གནས་ཤིང་དེ་བཞིན་གཤེགས་པ་ཐམས་ཅད་ཀྱི་སྐུའི་ཡེ་ཤེས་མཉམ་པ་ཉིད་ལ་དགོངས་ནས་ཅང་མི་གསུང་བར་གྱུར་ཏོ། །གསང་བ་འཛིན་པའི་
གསུང་གཅིག་གིས། །འཇིག་རྟེན་ཁམས་ཀུན་ཁྱབ་གྱུར་ཅིང་། །ཆོས་ཀྱི་ཚུལ་ནི་མི་ཟད་ལས། །རྒྱུན་མི་འཆད་པའི་འཁོར་ལོ་བསྐོར། །དེ་ནས་དེ་བཞིན་གཤེགས་པ་གསུང་རྡོ་རྗེ་འདི་དཔག་ཏུ་མེད་པ་ཁམས་
གསུམ་པ་ཐམས་ཅད་ཀྱི་ངག་རྡོ་རྗེ་ལ་གནས་ཤིང་དེ་བཞིན་གཤེགས་པའི་གསུང་མཉམ་པ་ཉིད་ལ་གནས་ནས་ཅང་མི་གསུང་བར་གྱུར་ཏོ། །རྡོ་རྗེ་འཆང་གི་ཐུགས་ཀྱི་ནི། །ཏིང་འཛིན་གཅིག་ཏུ་མ་བཞག་ནས། །ཏིང་འཛིན་དུ་མའི་ཆོས་ཀྱི་
སྒོ། །ཆོས་ཀྱི་དབྱིངས་དང་མཉམ་པར་འགྱུར། །དེ་ནས་དེ་བཞིན་གཤེགས་པ་རྡོ་རྗེ་འཛིན་པའི་རྒྱལ་པོ་སངས་རྒྱས་ཐམས་ཅད་ཀྱི་སེམས་རྡོ་རྗེ་ལ་གནས་ཤིང་། དེ་བཞིན་གཤེགས་པ་ཐམས་ཅད་ཀྱི་

89-1-282b

ཐུགས་མཉམ་པ་ཉིད་ལ་དམིགས་ནས་ཅང་མི་གསུང་བར་གྱུར་ཏོ། །འདིར་སྣང་བ་ནི་གསུམ་སྟེ། སོ་སོའི་སྐྱེ་བོའི་སྣང་བ་དང་། བྱང་ཆུབ་སེམས་དཔའི་སྣང་བ་དང་། དེ་བཞིན་གཤེགས་པའི་སྣང་བའོ། །གསང་བ་ནི་གསུམ་
སྟེ། སྐུའི་གསང་བ་བསམ་གྱིས་མི་ཁྱབ་པ་དང་། །གསུང་གི་གསང་བ་བསམ་གྱིས་མི་ཁྱབ་པ་དང་། ཐུགས་ཀྱི་གསང་བ་བསམ་གྱིས་མི་ཁྱབ་པའོ། །ཐམས་ཅད་མཁྱེན་པ་ནི་གསུམ་སྟེ། སྐུ་རྡོ་རྗེ་ཐམས་ཅད་
མཁྱེན་པ་དང་། གསུང་རྡོ་རྗེ་ཐམས་ཅད་མཁྱེན་པ་དང་། ཐུགས་རྡོ་རྗེ་ཐམས་ཅད་མཁྱེན་པའོ། །མི་ཟད་པ་རྒྱན་གྱི་འཁོར་ལོ་ནི་གསུམ་སྟེ། སྐུ་མི་ཟད་པ་རྒྱན་གྱི་འཁོར་ལོ་དང་། གསུང་མི་ཟད་པ་རྒྱན་གྱི་འཁོར་
ལོ་དང་། ཐུགས་མི་ཟད་པ་རྒྱན་གྱི་འཁོར་ལོ་ཉིད་དོ། །རྒྱུད་ཀུན་སྙིང་པོ་བསྡུས་པ་ཡི། །ཕྱག་རྒྱ་ཆེན་པོའི་ངང་འབྱུང་བ། །གྲུབ་པ་རབ་ཏུ་མི་གནས་པས། །གསང་བའི་རྒྱལ་པོ་བསྟན་པ་ཡིན། །དེ་བཞིན་གཤེགས་
པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གསང་བ་འདུས་པ་ཆེན་པོ་བླ་ན་མེད་པ་མཆོག་ཏུ་མི་འགྱུར་བའི་གནས་རབ་ཏུ་རྒྱས་པ་ཆེན་པོ་བཅོམ་ལྡན་འདས་རྡོ་རྗེ་འཛིན་པ་ཆེན་པོས་དེ་སྐད་ཅེས་
བཀའ་སྩལ་ནས། གསང་བ་བརྗོད་ཏུ་མེད་པའི་གནས་ལ་དགོངས་ནས་ཅང་མི་གསུང་བར་གྱུར་ཏོ། །དེ་ནས་དེ་བཞིན་གཤེགས་པའི་ཚོགས་དཔག་ཏུ་མེད་པ་དེ་དག་དང་། བྱང་ཆུབ་སེམས་དཔའ་
སེམས་དཔའ་ཆེན་པོ་བརྗོད་དུ་མེད་པའི་ཚོགས་དང་བཅས་པ་ཐམས་ཅད་དང་། ལྷ་དང་མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་
གསུངས་པ་ལ་མངོན་པར་བསྟོད་དོ།། །།དུས་གསུམ་གྱི་དེ་བཞིན་གཤེགས་པ་ཕྱོགས་བཅུའི་གནས་ཀྱི་ཞིང་ཁམས་རྡུལ་ཕྲ་རབ་སྙེད་བཞུགས་ཤིང་འཚོ་སྐྱོང་

89-1-283a

བ་ཐམས་ཅད་ཀྱི་གསང་ཆེན། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོ་ལ་སོགས་པ་བསྐལ་པ་གང་གཱའི་ཀླུང་གི་བྱེ་མ་སྙེད་བརྗོད་ཀྱིས་མི་ལང་བའི་
ཡང་བརྗོད་ཀྱིས་མི་ལང་བ་རྣམས་ཀྱི་དགོངས་པ་རབ་ཏུ་གསང་བ། རྣལ་འབྱོར་གྱི་དབང་ཕྱུག་ཆེན་པོ་བསམ་གྱིས་མི་ཁྱབ་པ་ཐམས་ཅད་ཀྱི་ཤིན་དུ་གསང་བའི་གནས་ཀྱི་རྒྱལ་པོ། རྡོ་རྗེ་དཔལ་
མཆོག་ཆེན་པོ་ངེས་པར་བརྗོད་པ། སངས་རྒྱས་ཐམས་ཅད་ཀྱི་གསང་བ་ཐུན་མོང་མ་ཡིན་པའི་ཡེ་ཤེས་ཀྱི་འབྱུང་གནས། རྣལ་འབྱོར་ཆེན་པོ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བ་ཞེས་
བྱ་བ་མཆོག་ཏུ་དབང་བསྐུར་བར་བྱེད་པ། རྒྱུད་སྡེ་སྟོང་ཕྲག་སུམ་བཅུ་རྩ་བཞིའི་སྙིང་པོ། རིག་པ་འཛིན་པའི་སྡེ་སྣོད་རྒྱ་མཚོའི་གནས་ལས་མངོན་པར་བསྔགས་པ། རྟོག་པའི་རྒྱལ་པོ་བདུན་པ་
ཆོས་ཐམས་ཅད་ལ་བསམ་གྱིས་མི་ཁྱབ་པའི་དོན་བསྟན་པའི་ལེའུ་སྟེ་བདུན་བཅུ་རྩ་བདུན་པའོ།། །།དུ་ལ་ཀྵེ་ཏྲའི་གྲོང་ཁྱེར་ཆེན་པོར་རྒྱ་གར་གྱི་མཁན་པོ་དཔལ་ཡེ་ཤེས་སྙིང་པོ་དང་། བོད་ཀྱི་
ལོ་ཙྪ་་བ་མར་པ་ལྷོ་བྲག་པ་ཆོས་ཀྱི་བློ་གྲོས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།པཎ་ཊི་ཏ་མཁས་པ་ཆེན་པོ་སྨྲི་ཏི་ཛྙཱ་ན་ཀཱིརྟིས་རང་འགྱུར་བྱས་པ་ཅིག་ཀྱང་ཡོད་པར་གདའོ།། །།
ཨེ་མ་ཧོ་ཉི་ཟླ་ལྟར་གྲགས་དཔལ་ལྡན་འདུས་པའི་རྒྱུད། །གསང་བ་རྣལ་འབྱོར་དཔལ་མཆོག་ཆེན་པོ་འདིས། །ཤིན་དུ་གསལ་བར་སྟོན་པ་ངེས་པ་ཉིད། །མ་འོངས་དུས་སུ་རྣལ་འབྱོར་དབང་ཕྱུག་མཆོག །རྣམ་བཞིའི་འཁོར་
ལྡན་དབུས་སུ་འདི་གསལ་འགྱུར། །བསྟན་པའི་སྒྲོན་མེ་ཉིད་དུ་འབྱུང་བའི་ཕྱིར། །སྐལ་ལྡན་རྣམས་དང་རྒྱུད་འདི་འཕྲད་པར་ཤོག །རྒྱུད་འདི་ཨུ་རྒྱན་ནས་སློབ་དཔོན་ཆེན་པོ་ཌོམ་བི་ཧེ་རུ་ཀས་གདན་དྲངས་གསུང་ངོ་རྫོགས་སྷོ།། །།མྂ་ག་ལྂ་བྷ་བ་ཏུ།། །།

89-1-283b

༄༅༅། །རྒྱ་གར་སྐད་དུ།  ཨཱརྱ་ནཱི་ལཱམ་བ་ར་དྷ་ར་བཛྲ་པཱ་ཎི་རུ་དྲ་བི་ཏྲི་བི་ན་ཏན་ཏྲ་ནཱ་མ།  བོད་སྐད་དུ།  འཕགས་པ་ལག་ན་རྡོ་རྗེ་གོས་སྔོན་པོ་ཅན་དྲག་པོ་གསུམ་འདུལ་བ་ཞེས་བྱ་བའི་རྒྱུད། བཅོམ་ལྡན་འདས་འཇམ་
པའི་རྡོ་རྗེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་བདུད་རྣམ་པར་འཇོམས་པ་བདུད་ཀྱི་སྡེ་དང་ལྷན་ཅིག་ཏུ་འོག་མིན་གཞན་འཕྲུལ་དབང་བྱེད་ཀྱི་ཕོ་བྲང་ན་ཐབས་གཅིག་ཏུ་
བཞུགས་སོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་སངས་རྒྱས་གང་གཱའི་ཀླུང་གི་བྱེ་མ་སྙེད་ཀྱིས་རྗེས་སུ་གནང་བ་འདི་ལག་ན་རྡོ་རྗེས་ཟུང་ཅིག་ཏུ་ཅེས་བཀའ་སྩལ་ཏོ། །དེ་ནས་ཕྱག་ན་རྡོ་རྗེས་གསོལ་པ། གནོད་
སྦྱིན་བྱེ་བ་སྟོང་ཕྲག་བྱེ་བ་དཔག་ཏུ་མེད་པའི་ཚོགས་ཀྱིས་ཡོངས་སུ་བསྐོར་བ། མཆེ་བ་གཙིགས་པ་དང་འཚམ་པ། མིག་མེ་མདག་གི་ཕུང་པོ་འདྲ་བ། དབུགས་མེ་ལྕེ་ལྟར་འབར་བ། འཇིགས་པའི་ང་རོ་ཅན། པད་མ་དང་ཆུ་
ལྷས་ལག་པ་དང་དཔུང་པ་བརྒྱན་པ། ནོར་རྒྱས་དང་དུང་སྐྱོང་གིས་དབུ་ལ་བརྒྱན་པ། སྦྲུལ་རིན་པོ་ཆེ་འབར་བའི་ཅོད་པན་ཐོགས་པ། ཀླུ་དགའ་བོ་དང་ཉེ་དགའ་བོ་འབར་བས་སྙན་ཆ་བྱས་པ། རྐང་པས་སྦྲུལ་གདུག་པ་འབར་བ་མནན་
ཅིང་ཟ་བ། ཀླུའི་རྒྱལ་པོ་འདབ་བཟངས་སྐ་རགས་སུ་བཅིངས་པ། སྦྲུལ་ནག་པོ་སེ་རལ་ཁར་ཐོགས་པ། བཞིན་རྒྱས་པ་སྨྱིན་མ་ཁྲོ་གཉེར་དུ་བསྡུས་པ། ཡ་སོས་མ་མཆུ་མནན་པ། ལྕེ་གློག་ལྟར་འགྱུ་བ། གཤིན་རྗེའི་
ཆ་བྱད་ཅན། གསུས་པོ་ཆེ་སྦྲུལ་ཟ་བ། རྒྱ་མཚོའི་ཟབས་སུ་དཔག་ཚད་བརྒྱད་ཁྲི་བཞི་སྟོང་ཡོད་པས་རྐང་པའི་པུས་མོར་ཕྱིན་པ། དབང་པོ་དང་ཉི་མའི་སྟེང་ན་བཞུགས་པ། ལག་པ་བརྡབས་པའི་སྒྲས་འཇིགས་པར་བྱེད་པ། ཨ་
ལ་ལ་ཞེས་སྒྲ་བསྒྲགས་པས་སྐྲག་པར་བྱེད་པ། ཀླུ་ཐམས་ཅད་རླག་པར་བྱེད་པ། གད་རྒྱངས་ཆེན་པོ་དགོད་པས་ཀུན་དུ་འཁྲུག་པར་བྱེད་པ། གཤིན་རྗེའི་གཟུགས་ཅན་ཁམས་གསུམ་འཇིགས་པར་བྱེད་པ། ཀླུ་རྣམས་འདུལ་བར་

89-1-284a

བྱེད་པ་དེ་ལ་ཕྱག་འཚལ་ལོ་ཞེས་བྱང་ཆུབ་སེམས་དཔའ་ཕྱག་ན་རྡོ་རྗེས་བསྟོད་ནས་གསུང་དུ་གསོལ་ཞེས་སྨྲས་སོ། །དེ་ནས་ནམ་མཁའ་དེ་ཉིད་ལ་གཞལ་ཡས་ཁང་དང་། འཁོར་ལོ་ཆེན་པོའི་ཏིང་ངེ་འཛིན་དང་
ལྡན་པའི་དྲག་པོ་ཆེན་པོས་འཁོར་བསྡུས་ནས། ཕྱག་ན་རྡོ་རྗེ་དྲག་པོ་ཆེ། །རྡོ་རྗེ་ཁྲོ་བོ་དྲག་ཆེན་འཇོམས། །རྡོ་རྗེ་གཟི་བརྗིད་སྔགས་ཀྱི་གཙོ། །རྡོ་རྗེ་མི་ཐུབ་འཇིགས་བྱེད་ཆེ། །རྡོ་རྗེ་ཕྲིན་ལས་ཀུན་དོན་མཛད། །ཐབས་འདུལ་འཁོར་ལོ་ཆེ་
སྐུ་ལ། །འབྱུང་བ་ལྔ་ཡི་བདག་ཉིད་ཆེ། །མཛེས་ལྡན་འོད་ཟེར་ཅན་དང་ནི། །མདངས་ཅན་སྒྲ་དབྱངས་རླུང་འབྱིན་ཏེ། །སྐྱེད་བྱེད་ལས་ཀུན་སྒྲུབ་པ་ལ། །འགུགས་ཤིང་སྡུད་དང་སྡོམ་ཞི་མཛད། །མཐའ་བརྟུལ་ལས་རྣམས་སྒྲུབ་པ་ལ། །
ཐིག་ལེའི་རང་བཞིན་མི་ཤིགས་ལ། །ཁ་སྦྱོར་ཉི་ཟླའི་འཕྲོ་འདུ་ལས། །བགེགས་རིགས་སྟོང་ཕྲག་འཇོམས་མཛད་པ། །འཁོར་ལོའི་བདག་པོ་ཁྱོད་ལ་བསྟོད། །ས་བོན་རབ་ཏུ་འབར་བ་ཡིས། །ཐབས་དང་ཤེས་རབ་སྲེག་གསོ་
མཛད། །བདེ་ཆེན་རབ་ཏུ་གསོས་མཛད་ནས། །སྡུག་བསྔལ་ཉོན་མོངས་འཇོམས་ལ་འདུད། །ཨོཾ་ཨ་ཀཱ་རོ་མུ་ཁྃ་སརྦ་དྷརྨཱ་ཎྂ་ཨཱདྱཱ་ནུད་པན་ན་ཏྭད་ཨོཾ་ཨཱཿཧཱུྃ་ཞེས་བཅོམ་ལྡན་འདས་ཀྱིས་དཀྱིལ་འཁོར་གྱི་ལྷ་ལ་བསྟོད་ནས་
འཛུམ་པ་མཛད་དོ། །བྱང་ཆུབ་སེམས་དཔའ་ཕྱག་ན་རྡོ་རྗེ་ལ་ལེགས་སོ་ཞེས་བྱ་བ་བྱིན་ནས་འཁོར་རྣམས་སྤྲོས་ཏེ། དེ་ནས་ཕྱག་ན་རྡོ་རྗེས་བཅོམ་ལྡན་འདས་ལེགས་སོ་ལེགས་སོ། །དེའི་ཕྱིར་འདིའི་གསང་སྔགས་ལས་
ཐམས་ཅད་སྒྲུབ་པ་སྡིག་པ་ཐམས་ཅད་འཇོམས་པ། དྲག་པོ་གསུམ་འདུལ་བ་འདི་གསུང་དུ་གསོལ་ཞེས་བརྗོད་ནས་བསྐོར་བ་བྱས་ཏེ་སྤྱན་སྔར་འཁོར་རྣམས་དང་ལྷན་ཅིག་ཏུ་འདུག་གོ། །དེ་ནས་སངས་རྒྱས་
བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ཀྱིས་གསུངས་ཤིང་བྱིན་གྱིས་བརླབས་པའི་རིག་སྔགས་འདི་གདུག་པ་ཅན་རྣམས་འདུལ་བའི་དོན་དུ་བརྗོད་པར་བྱའོ། །ཏད་ཡ་ཐཱ། བྷོ་བྷོ་པཱན་ནཱ་ག་ཨ་དྷི་པ་ཏ་ཡེ། 

89-1-284b

ཨི་དན་ནཱི་ལཱམ་བ་ར་དྷ་ར་ཤ་རཱི་རྂ། བཛྲ་པཱ་ཎི་ཧྲྀ་ད་ཡྂ། ཡཿས་མ་ཏི། ཀྲ་མ་ཏི། ཨུཏ་སཱ་ད་ནྃ་བྷ་བི་ཤུདྷི། ཏདྱ་ཐཱ། བུད་དྷ་བུད་དྷ། བི་བུད་དྷ་བི་བུད་དྷ་མ་ཏི་པྲཱ་བ་ཏ། ཧ་ར་ཧ་ར། ནཱ་གཱ་ནཱཾ། པྲ་ཧ་ར་པྲ་ཧ་ར་སརྦ་ནཱ་གཱ་ནཱཾ། ཙྪིན་ད་ཙྪིན་ད། 
ནཱ་ག་ཧྲི་ད་ཡཱ་ནི། བྷིན་དྷ་བྷིན་དྷ་ནཱ་ག་མརྨཱ་ཎི། བི་ཤཱིཪྻནྟུ་ནཱ་གཱ་ཤ་རཱི་རྂ། བི་སྥོ་ཊ་ཡ་ནཱ་ག་ན་ཡ་ནཱ་ནི། ཏདྱ་ཐཱ་ཧཱུྃ་ཕཊ་ཎ་ག་བི་དཱ་ར། ནཱ་ཡ་ཕཊ། ནཱ་གོ་ཏ་སཱ་ད་ནཱ་ཡ་ཕཊ། ནཱི་ལཱམ་བ་ས་ནཱ་ཡ་ཕཊ། ཨ་པྲ་ཏི་ཧ་ཏ་བ་ལ་ཡང་
ཕཊ། པ་ར་ཀྲ་མཱ་ཡ་ཕཊ། ཀྲྀ་ཏཱན་ཏ་ཡ་ཕཊ། ཀྲྀ་ཏཱན་ཏ་རཱུ་པཱ་ཡ་ཕཊ། རོ་ཥ་ཎཱ་ཡ་ཕཊ། ཏྲཱ་ས་ནཱ་ཡ་ཕཊ། ཀུཤྨཎོ་ད་ཏྶཱ་ད་ནཱ་ཡ་ཕཊ། པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ། ཡཀྵ་ཨ་པསྨཱར་བི་ནཱ་ཤ་ག་རཱ་ཡ་ཕཊ། ཧ་ས་ཧ་ས། 
དྷ་ར་དྷ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བིགྷྣཱན་བི་གྷྣན་ཤ་ཀ་རཱ་ཡ་ཕཊ། སརྦ་ཤ་ཏྲཱུྃ་སྂ་གྷ་བི་ནཱ་ཤ་ཀ་རཱ་ཡ་ཕཊ། ནཱི་ལཱམ་བ་ར་དྷ་ར་བཛྲ་པཱ་ཎི་རཱཛྙཱ་པ་ཡ་ཏི་སྭཱ་ཧཱ། དེའི་ཆོ་ག་ནི་གནོད་སྦྱིན་གྱི་གདོན་གྱིས་ཟིན་
པ་ལ་ཆུ་ལ་སྔགས་བཏབ་སྟེ་གཏོར་ན་བཏང་བར་འགྱུར་རོ། །ཀླུ་ཟློག་པར་བྱེད་ན་སྨྱག་ཤད་ཀྱི་ལྕུག་མའམ། བལ་པོ་སེའུའི་ལྕུག་མས་བྱའོ། །ཡི་དགས་དང་རྗེད་བྱེད་རྣམས་ལ་ནི་སྐུད་པས་བྱའོ། །རིམས་ནད་མེད་པར་
བྱ་བ་དང་། གཞོགས་ཕྱེད་ན་བ་དང་། ཡི་ག་འཆུས་པ་ལ་ནི་སྐུད་པ་སྔོན་པོས་བྱའོ། །ནོར་འདོད་པ་ལ་ནི་ཞག་གཅིག་བསྙུང་བར་འདུག་སྟེ་སྤོས་ཀྱིས་བདུགས་ན་རྨི་ལམ་དུ་དགེ་བ་དང་མི་དགེ་བའི་དོན་ཐམས་ཅད་སྟོན་ནོ། །
མཆོད་རྟེན་སྐུ་གདུང་དང་ལྡན་པའི་དྲུང་དུ་མེ་ཏོག་སྔོན་པོ་ལ་སོགས་པས་མཆོད་ལ་སྔགས་སྟོང་བཟླས་ནས་གསོལ་བ་བཏབ་ན་གསེར་གྱི་དོང་ཚེ་བདུན་སྟོང་སྦྱིན་པར་བྱེད་དོ། །རྒྱས་བཏབ་པ་འགྲོལ་བར་འདོད་ན་ཐལ་
བས་བྱའོ། །སྒོ་ལྕགས་དབྱེ་བར་འདོད་ན་ཡུངས་ཀར་གྱིས་བྱའོ། །འཇིགས་པ་ཐམས་ཅད་ལས་བསྲུང་བ་ལ་ནི་རྩི་མར་རྙིང་པ་དང་ཐལ་བ་དང་ཡུངས་ཀར་གྱིས་བྱའོ། །ནད་ཀྱི་འཇིགས་པ་ཐམས་ཅད་ལ་ནི་སྐུད་པ་

89-1-285a

སྔོན་པོ་ལ་བསྲུང་བའི་མདུད་པ་བྱས་ཏེ་མགུལ་དུ་བཏགས་ན་སྲུང་བའི་མཆོག་ཏུ་འགྱུར་རོ། །བྱིས་པ་གདོན་གྱིས་ཉེན་པ་ཐམས་ཅད་ལ་ནི་ཚོན་སྣ་ལྔའི་སྐུད་པ་མགུལ་དུ་བཏགས་ན་བསྲུང་བའི་
མཆོག་ཏུ་འགྱུར་རོ། །ཆོམ་རྐུན་བཟློག་པར་འདོད་ན་སས་བྱའོ། །དུག་ལ་ནི་རྩྭ་ཀུ་ཤས་བྱབ་པར་བྱའོ། །བདག་བསྲུང་བ་ལ་ནི་ཡིད་ཀྱིས་སམ་ཆུས་བྱའོ། །གཞན་བསྲུང་བ་ལ་ནི་སྐུད་པ་སྔོན་པོས་བྱའོ། །ལས་དེ་དག་
ཐམས་ཅད་ལ་སྔགས་བརྗོད་པ་ནི་གཅིག་གམ། གསུམ་འམ། ལན་བཅུ་བཞིའམ། ཉི་ཤུ་རྩ་གཅིག་གམ། བརྒྱ་རྩ་བརྒྱད་བཟླས་ན་འགྲུབ་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་
དང་། བྱང་ཆུབ་སེམས་དཔའ་ཕྱག་ན་རྡོ་རྗེ་དང་། བདུད་དཔུང་དང་བཅས་པ་རྗེས་སུ་ཡི་རང་སྟེ་བསྟན་པ་ལ་འཁོད་དོ། །འཕགས་པ་ལག་ན་རྡོ་རྗེ་གོས་སྔོན་པོ་ཅན་དྲག་པོ་གསུམ་འདུལ་བ་ཞེས་བྱ་བའི་རྒྱུད་རྫོགས་སོ།། །།
བལ་པོའི་པཎ་ཌི་ཏ་དེ་ཝ་པུཎྱ་མ་ཏི་དང་། ལོ་ཙྪ་་བ་དགེ་སློང་ཆོས་ཀྱི་བཟང་པོས་བསྒྱུར་བའོ།། །། རྒྱ་གར་སྐད་དུ།  རཱུ་དྲ་ཏྲི་ཏན་ཏྲ་གུ་ཧྱ་བི་ཝ་རི་ཏྲི་བ་ནི་ཡ་ནཱ་མ།  བོད་སྐད་དུ།  གསང་བའི་རྒྱུད་རྣམས་ཀྱི་
རྣམ་པར་འབྱེད་པ་དྲག་པོ་གསུམ་འདུལ་ཞེས་བྱ་བ། འཇམ་པའི་རྡོ་རྗེ་ལ་ཕྱག་འཚལ་ལོ།  །དེ་ནས་ཕྱག་ན་རྡོ་རྗེ་ཡིས། །གསང་བའི་དོན་འདི་ཡང་དག་ཞུས། སྒྲུབ་དང་གནས་དང་མཚན་ཉིད་གང་། །རྫོགས་སངས་
རྒྱས་ཀྱིས་བཀའ་སྩལ་པ། །ཤེས་རབ་སྙིང་རྗེ་གསང་དབང་ལྡན། །ལྕགས་འདྲའི་རི་དང་བྱ་སྐྱིབས་དང་། །ནགས་ཚལ་འཐུག་དང་མཆོད་རྟེན་ནང་། །ཞལ་གསུམ་ཕྱག་དྲུག་འཇིགས་པ་ཆེ། །མཆེ་བ་གཙིགས་
པ་ནག་པོ་སྟེ། །དཀར་པོ་གཡས་ཏེ་ཁྲོས་པའི་མདོག །ཧཱུྃ་སྒྲོགས་མེ་ལྕེ་འབར་བའི་དབུགས། །དམར་སེར་གཡོན་ཏེ་བཞད་པའི་ཞལ། །སྤྱན་དམར་མེ་དཔུང་དང་འདྲ་བ། །ཟླ་བ་རྒྱས་པ་ལྟ་བུའི་ཞལ། །ནོར་

89-1-285b

རྒྱས་དུང་སྐྱོང་སེར་པོས་དབུ། །དགའ་བོ་ཉེ་དགའ་སྙན་ཆ་དམར། །དཔུང་པ་པད་མ་ཆུ་ལྷ་དཀར། །སེ་རལ་འདབ་བཟངས་རིགས་ལྡན་གནག །ཚམ་ངམ་རྡོ་རྗེ་བསྡིགས་མཛུབ་དང་། །ཐལ་མོས་བདུད་འཇོམས་
སྦྲུལ་ནག་འཛིན། །ཞལ་གསུམ་པ་སྟེ་འཇིགས་པ་ཆེ། །སྐུ་གསུམ་དག་གིས་རབ་ཏུ་མཚན། །ཕོ་ཉ་གསུམ་གྱིས་གདུག་པ་འདུལ། །ཀླུ་ཡི་གཉེན་པོ་གནོད་སྦྱིན་བདག །བདུད་འདུལ་ཚངས་པའི་ཕོ་ཉ་ནི། །ཟླ་བ་
ཉི་མ་དག་གི་སྟེང་། །གླང་ཆེན་ཀར་ཀ་གསེར་གྱི་གདན། །བརྒྱ་བྱིན་སེར་པོ་རྡོ་རྗེ་འཛིན། །ཚངས་པ་རལ་གྲི་པད་མ་འཛིན། །ཀླུ་འདུལ་སྦྲུལ་ནག་འཛིན་པའོ། །བདུད་འདུལ་དབང་པོ་ཉི་མའི་སྟེང་། །གནོད་སྦྱིན་ཟླ་དང་
སྟོབས་ཀྱི་སྟེང་། །ཀླུ་འདུལ་རི་སྟེང་རྒྱ་མཚོའི་ནང་། །སྦྲུལ་ནག་འཁྱིལ་པ་སྟོབས་ལྡན་ཏེ། །མཁའ་དང་རི་བོས་མནན་པའི་སྟེང་། །གསེར་མདོག་སྟོབས་གཉིས་གསེར་གྱི་གདན། །བརྒྱད་ཁྲིར་ཞབས་བཞག་
རི་རབ་མནན། །མེ་དཔུང་སྐུ་ལ་འཁྲུགས་པའི་འོད། །ཁམས་གསུམ་ཁྱབ་མཛད་ཁྲོ་བོ་འཕྲོ། །སངས་རྒྱས་འདུས་པའི་སྐུར་ཕྱག་འཚལ། །དེ་ནས་གསང་བའི་དཀྱིལ་འཁོར་ནི། །རྡོ་རྗེ་མེ་དཔུང་འོད་དང་ལྡན། །
དེ་ཉིད་མཁའ་དང་འབྱུང་བ་ལས། །དུར་ཁྲོད་བརྒྱད་དང་ལྡན་པའི་གནས། །བདག་པོའི་ས་བོན་ལས་བྱུང་བ། །ཟླ་ཉི་ཐོད་པ་རྡོ་རྗེ་ལས། །དྲག་པོའི་རྟགས་ལྡན་གཙོ་བོ་ཆེ། །མཛེས་ལྡན་སྐུ་ལ་ཡང་དག་
འཁྲིལ། །དྲག་ཆེན་འདུལ་མཛད་དྲི་ཟའི་གཙོ། །མདོག་དཀར་རྩེ་གསུམ་འབར་བ་འཛིན། །འོད་འཕྲོ་དཀར་མོ་སྐུ་ལ་འཁྲིལ། །འཇོམས་མཛད་སྤུ་གྲི་འབར་བ་འཛིན། །མགོན་པོ་གཟི་བརྗིད་གཤིན་རྗེའི་
བདག །མདོག་སེར་དབྱུག་ཐོས་གཤིན་རྗེ་འདུལ། །མདངས་ལྡན་སེར་མོ་སྐུ་ལ་འཁྲིལ། །འཇའ་འདྲ་བ་ཡི་ཟངས་གྲི་བསྣམས། །འབྲུག་སྒྲ་སྒྲོགས་པ་ཀླུ་ཡི་གཙོ། །མདོག་དམར་ཀླུ་འདུལ་སྦྲུལ་

89-1-286a

གྱི་ཞགས། །སྒྲ་ཡི་ལྷ་མོ་སྐུ་ལ་འཁྲིལ། །མདོག་དམར་གཅོད་པའི་སྟེའུ་བསྣམས། །ཕྲིན་ལས་ཁྲོ་བོ་གནོད་སྦྱིན་བདག །ལྗང་ནག་བེ་ཅོན་གནོད་སྦྱིན་འདུལ། །རླུང་འབྱིན་ལྗང་གུ་སྐུ་ལ་
འཁྲིལ། །འབར་བའི་འཁོར་ལོ་ཕྱག་ན་བསྣམས། །འགུགས་པ་ལྕགས་ཀྱུ་ལྕགས་ཀྱུ་སྟེ། །སྡུད་པ་ཞགས་པ་ཞགས་པའི་བདག །སྡོམ་པ་ལྕགས་སྒྲོག་ལྕགས་སྒྲོག་སྟེ། །ཞི་མཛད་དྲིལ་བུ་དྲིལ་བུ་ཞི། །
ཁ་སྦྱོར་བདེ་དང་ལོངས་སྤྱོད་དང་། །ཆོས་དང་སྤྲུལ་པའི་འཁོར་ལོ་ལ། །ས་བོན་རབ་ཏུ་འབར་བ་ཡིས། །ཐབས་དང་ཤེས་རབ་སྲེག་གསོ་མཛད། །ཉི་མ་ཟླ་བའི་འཕྲོ་འདུ་ལས། །ཐིག་ལེའི་རང་བཞིན་མི་ཤིགས་
ལ། །གསང་བའི་རྒྱུད་ཀྱི་རྣམ་པར་འབྱེད་པ། དྲག་པོ་གསུམ་འདུལ་ཞེས་བྱ་བ་ལས་ལེའུ་དང་པོའོ།། །། དེ་ནས་ཡང་དག་བཤད་བྱ་བ། །གསང་བའི་སྔགས་ནི་ཁྱོད་ཀྱིས་ཟུང་། །ལས་རྣམས་ཐམས་
ཅད་འགྲུབ་པ་དང་། །སྡིག་པ་དག་ནི་ཞི་བའི་ཕྱིར། །ཀླུ་དང་གནོད་སྦྱིན་བསྡིགས་པ་དང་། །བདུད་རྣམས་མ་ལུས་ཞི་བྱེད་པའི། །དུས་གསུམ་སངས་རྒྱས་བྱིན་བརླབས་པའི། །རྡོ་རྗེ་ཅན་གྱི་སྔགས་བཤད་བྱ། །
ཏདྱ་ཐཱ། བྷོ་བྷོ་པན་ནཱ་ག་ཨ་དྷི་པ་ཏ་ཡེ། ཨི་དན་ནཱི་ལཱམ་ཝ་ར་དྷ་ར་ཤ་རཱི་རམ། བཛྲ་པཱ་ཎི་ཧྲི་ད་ཡྃ། ཡཿས་མཱ་ཏི་ཀྲ་མ་ཐ་མཱ་ཀུ་ལོཏྶཱད་ནམ་བྷ་བི་ཥྱནྟི། ཏདྱ་ཐཱ། བུད་དྷ་བུད་དྷ། བི་བུད་དྷ་བི་བུད་དྷ། མ་ཏི་
ཀྲ་མ་ཐ། ཧ་ར་ཧ་ར་ནཱ་གཱ་ནཱན། པྲ་ཧ་ར་པྲ་ཧ་ར། ནཱ་གཱ་ནཱྀ། ཙྪིན་ད་ཙྪིན་ད་ནཱ་ག་ཧྲི་ད་ཡཱ་ནི། བྷིན་དྷ་བྷིན་དྷ་ནཱ་ག་མརྨཱ་ཎི་ཎི། བི་ཥཱི་རྱན་ཏུ་ནཱ་ག་ཤཱ་རཱི་རཱ་ཎི། བི་སྥོཊ་ཡ་ནཱ་ག་ན་ཡ་ནཱ་ནི། ཏདྱ་ཐཱ། ཧཱུྃ་ཕཊ། ནཱ་པ། བི་དཱ་ར་ཎཱ་ཡ་
ཧཱུྃ་ཕཊ། ནཱ་གོ་ཏ་སཱ་ད་ནཱ་ཡ་ཧཱུྃ་ཕཊ། ནཱི་ལྃ་བ་ས་ནཱ་ཡ་ཧཱུྃ་ཕཊ། ཨ་པྲ་ཏི་ཧ་ཏ་བ་ལ། པ་རཱ་ཀྲ་མཱ་ཡ་ཕཊ། ཀྲྀ་ཏཱན་ཏཱ་ཡ་ཕཊ། ཀྲྀ་ཏཱན་ཏ་རཱུ་པཱ་ཡ་ཕཊ། རོ་ཥ་ཎཱ་ཡ་ཕཊ། ཏྲཱ་ས་ནཱ་ཡ་ཕཊ། 

89-1-286b

ཀུ་ཤྨཱ་ཎྜོཏྶཱ་ད་ནཱ་ཡ་ཕཊ། པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ། ཡཀྵ་ཨ་པ་སྨཱ་ར་བི་ནཱ་ཤ་ཀ་རཱ་ཡ་ཕཊ། ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བི་གྷྣྃ། བི་ནཱ་ཤ་ཀ་རཱ་ཡ་ཕཊ། སརྦ་
ཤ་ཏྲཱུྃ་སྃ་གྷ་བི་ནཱ་ཤ་ཀ་རཱ་ཡ་ཕཊ། ནཱི་ལཱྃ་བ་ར་དྷ་ར་བཛྲ་པཱ་ཎི་རཱ་ཛྙཱ་པ་ཡ་ཏི་སྭཱ་ཧཱ་ཞེས་པ་ཕྲེང་བའི་གསང་བའི་སྔགས་སོ། །སངས་རྒྱས་གང་གཱའི་ཀླུང་གིས་གསུངས་པའི། རིག་སྔགས་འདིས་ནི་སྡིག་པ་
ཐམས་ཅད་འདག་པ། མ་རུངས་པ་ཐམས་ཅད་འཇོམས་པ། ལས་ཐམས་ཅད་འགྲུབ་པ་ཡིན་ཏེ་དེ་ཡང་རིག་པ་འཛིན་པས་སྒྲུབ་སྟེ། དམ་ཚིག་དང་ལྡན་པས་སོ། །དེ་ཡང་བླ་མ་ལ་གུས་ཤིང་ཡིད་དམ་དཀོན་
མཆོག་ལ་དད་ཅིང་། །བྱང་ཆུབ་སེམས་དང་སྡོམ་པ་དང་། །ལྷ་དང་སྔགས་ལ་གུས་པ་དང་། །རྒྱུན་ཏུ་རྣལ་འབྱོར་དང་ལྡན་ཏེ། །རྒྱུད་དོན་དོན་ལ་བརྩོན་ལྡན་ན། །ལས་རྣམས་ཐམས་ཅད་འགྲུབ་པའོ། །བྱང་ཆུབ་
སེམས་དཔའ་ཕྱག་ན་རྡོ་རྗེས་བཅོམ་ལྡན་འདས་ཀྱིས་བཀའ་བཞིན་མཛད་དེ་བཅོམ་ལྡན་འདས་ལ་ཞུས་པ། དམ་ཚིག་དག་ལས་འདས་ན་ལས་རྣམས་མི་འགྲུབ་ཅིང་། དག་པ་མེད་དང་དོན་མེད་དག་སྟེ་འབྲས་
བུ་གང་དུ་སྐྱེ་འགྱུར་ཞེས་ཞུས་པས། རྡོ་རྗེ་དམྱལ་བའི་ནང་དུ་མི་ཟད་པའི་འབྲས་བུར་འགྱུར་རོ། །བཅོམ་ལྡན་འདས་དེའི་ཚེའི་ཚད་ཇི་ཙམ་དུ་སྡུག་བསྔལ་ཉམས་སུ་མྱོང་བར་འགྱུར་ཞེས་ཞུས་པས། བྱང་
ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལེགས་སོ་ལེགས་སོ། །སྐྲག་པར་མ་བྱེད་ཅིག །འདིས་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་བཤིག་སྟེ་ཐུགས་དང་འགལ་བས་རྡོ་རྗེ་
གདན་ནམ་ཞིག་ཙམ་ན་ཐར་བར་འགྱུར་རོ། །བཅོམ་ལྡན་འདས་རྡོ་རྗེ་གདན་ནམ་འཇིག་པར་འགྱུར་ཞེས་ཞུས་པ་དང་། ནམ་མཁའི་ཁམས་ཀྱི་སེམས་ཅན་ཐམས་ཅད་སངས་རྒྱས་པའི་འབྲས་བུ་ཐོབ་

89-1-287a

སྟེ་རྡོ་རྗེ་གདན་འཇིག་སྟེ་ཐར་བར་འགྱུར་རོ། །བར་མ་དོ་དང་སྐྱེ་གནས་འཇིག་པ་དག་ཡོད་དོ། །དེའི་གསང་བའི་སྔགས་ནི་ཟླ་བའི་སྟེང་དུ་ཡི་གེ་ཨ་བཀོད་དེ། ཆོས་ཉིད་དག་པའི་སྔགས་བརྗོད་དོ། །
ན་མཿས་མན་ཏ་བཛྲཱ་ཎཱྃ་སརྦ་དྷརྨ་ཏཱ་བཛྲ་སཏྭ་ཧཱུྃ། ཞེས་ཕྱོགས་བཅུར་ཁ་བལྟས་ཏེ་རྡོ་རྗེ་ཐལ་མོ་སྦྱར་ཏེ་ཡེ་ཤེས་ཀྱི་འོད་ཀྱིས་གསོལ་བ་བཏབ་ལ། རྡོ་རྗེ་སེམས་དཔའི་སྐུར་མོས་པར་བྱའོ། །ཨོཾ་བཛྲ་སཏྭ་ཧཱུྃ་ཞེས་པ་འབུམ་
དུ་བརྗོད་ན་རྩ་བའི་དམ་ཚིག་ཉམས་པ་ཞི་བར་འགྱུར་རོ། །རྡོ་རྗེ་རྡོ་རྗེ་འཇིགས་བྱེད་ཆེ། །མེ་ལོང་མེ་ལོང་གསལ་བའི་སྐུ། །ཞལ་གསུམ་ཕྱག་དྲུག་འཇིགས་པ་ཆེ། །མཚོན་ཆ་འཛིན་ལ་ཕྱག་འཚལ་བསྟོད། །དེ་བཞིན་
གཤེགས་པ་དེ་བཞིན་གཤེགས། །ཆོས་དབྱིངས་ཆོས་དབྱིངས་རྣམ་པར་དག །ཞལ་གསུམ་ཕྱག་དྲུག་མཚོན་ཆ་འཛིན། །དེ་བཞིན་གཤེགས་ལ་ཕྱག་འཚལ་བསྟོད། །སོ་སོར་ཀུན་རྟོག་ཀུན་རྟོག་བྲལ། །པད་མ་
དྲི་མེད་པད་མའི་བདག །ཞལ་གསུམ་ཕྱག་དྲུག་རྟ་སྐད་སྒྲོགས། །ཞལ་གསུམ་ཕྱག་དྲུག་མཚོན་ཆ་འཛིན། །རྒྱ་མཚོ་སྐྱེས་སྐུ་ཕྱག་འཚལ་བསྟོད། །རིན་ཆེན་བཻ་དཱུར་གཟི་བརྗིད་འབར། །མཉམ་པ་མཉམ་ཉིད་
ཡེ་ཤེས་སྐུ། །ཞལ་གསུམ་ཕྱག་དྲུག་མཚོན་ཆ་འཛིན། །རིན་ཆེན་རྒྱ་མཚོ་ཕྱག་འཚལ་བསྟོད། །ལས་ཀྱི་སྐུ་སྟེ་ཕྲིན་ལས་མཛད། །བྱ་བ་བྱ་བ་སྒྲུབ་པའི་བདག །ཞལ་གསུམ་ཕྱག་དྲུག་མཚོན་ཆ་འཛིན། །ཕྲིན་
ལས་རྒྱ་མཚོར་ཕྱག་འཚལ་བསྟོད། །ཨོྂ་ཨཱ་ནན་ཏ་པ་ར་སྭཱ་ཧཱ། ཨོྂ་སུམ་བྷ་ནི་སུམ་བྷ་ཧཱུྃ ཨཱ་ཀར་ཥ་ཡ། བན་དྷ་ཡ་སྭཱ་ཧཱ། ཧ་གྲྀ་ཡ་བ་བན་དྷ་ཤོ་ཀ་སྭཱ་ཧཱ། ཨོྂ་ཨ་པ་རེ་ཨ་པ་རཱ་ཛཾ་ཏ་སྭཱ་ཧཱ། རོ་ཥ་ཎཱ་ཡ་བྷྱཿཕཊ། 
དེ་ནས་ལྷའི་གསང་སྔགས་བརྗོད་པར་བྱའོ། །ཨོྂ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུྃ་ཕཊ། མཱ་ར་ཡ་ཙིཏྟ་ཙིཏྟ་རྦད་རྦད། ཨོྂ་བཛྲ་ཀྲོ་དྷ་མ་ཧཱ་ཀཱ་ལཱ་ཡ་ཧཱུྃ་ཕཊ། ཙིཏྟ་ལ་ཀྲོ་དྷི་དུཉྫ། ཨོྂ་བཛྲ་ཀྲོ་དྷ་ནཱ་ག་ཧཱུྃ་ཕཊ། མཱ་ར་ཡ་རཀ་

89-1-287b

ཏ་རྔུབས་རྔུབས། ཨོྂ་བཛྲ་ཀྲོ་དྷ་ཨ་མྲྀ་ཏེ་ཧཱུྃ་ཕཊ། མཱ་ར་ཡ་སོད་སོད་རྦད། དེ་ནས་ལྷ་མ་སྲིན་སྡེ་བརྒྱད་ཀྱིས་རིག་པ་ཕུལ་བ། མ་ཧཱ་དེ་བ་མཱ་ར་ཡ་སོད་སོད། མ་ཧཱ་ཡཀྵ་ཨ་སུ་ར་མཱ་ར་ཡ་ཧ་ན་ཧ་ན། ནཱ་ག་རཱ་ཛ་མཱ་ར་ཡ་ཛཿ
ཛཿམ་ཧཱ་མ་ནི་མཱ་ར་ཡ་རྔུབས་རྔུབས། མ་ཧཱ་བྷྲུྃ་མཱ་ར་ཡ་ཏིཥྛ་ཏིཥྛ། མ་ཧཱ་ཡཀྵ་མཱ་ར་ཡ་བྷིན་ད་བྷིན་ད་ཁརྒ་མཱ་ར་ཡ་ཁོས་ཁོས། མ་ཧཱ་བྲཧྨ་དེ་བ་ཡེ་ཕཊ། མཱ་ར་ཎ་སོད་སོད། མཱ་ར་ཎ་བྱིང་བྱིང་། མཱ་ར་ཎ་མུགས་མུགས། མཱ་ར་
ཎ་ཧ་ལ་ཧ་ལ། མཱ་ར་ཎ་དྷུ་ན་དྷུ་ན། མཱ་ར་ཎ་མྱོས་མྱོས། མཱ་ར་ཎ་བྱིང་བྱིང་། ཐུམ་རི་ལི་ལི། ཐུམ་རི་ལི་ལི། ཛཿཛཿ། བུམ་པ་ལེགས་པར་ལྡན་པ་ཡིས། །སྨན་གསུམ་རྩི་སྨན་སྣ་ཚོགས་དང་། །ཁ་དི་ར་ཡི་ལོ་འདབ་བཅས། །
ལྕགས་ཀྱི་རྡོ་རྗེའི་ཁོང་བསེང་དུ། །གསང་བའི་སྔགས་ནི་བརྗོད་པར་བྱ། །གནམ་ལྕགས་མཆུ་ནི་སྟོང་པ་རུ། །སྤྲིན་བྲལ་སེར་བ་བཅད་པའི་ཕྱིར། །གསང་བའི་སྔགས་འདི་བརྗོད་པར་བྱའོ། །ཏདྱ་ཐཱ། ཨོྂ་ཊཱཀྐི་ཙ་ཏི་
གུ་ཧྱ་ལི། མི་ཥ་ཤ་གུ་གུ། ཤ་ཏི་བི་ཏི། ཧུ་ཡ་ཧུ་ཡ། པུ་རུ་ཏ་སྭཱ་ཧཱ། ཨོྂ་བཛྲ་པཱ་ཎི་བཛྲ་ཏཱ་ཀི་ནཱི་ནཱ་ག་ཧེ་ཧེ། ཧུ་ཡ་ཧུ་ཡ། ཧུ་ལུ་ཧུ་ལུ། པུ་རུ་ཏེ་པུ་རུ་ཏེ། སྭཱ་ཧཱ། ཨོྂ་མཉ་ཛུ་ཤྲཱི་ཡ་མཱན་ཏ་ཀ་ཨ་ཀཱ་པ་ར་ཧཱུྃ་ཕཊ། ཨོྂ་
མ་ཎི་པད་མེ་བེ་ཤ་པྲ་བེ་ཤ །མཱ་མ་རུ་ལུ་བེ་ཤ །ཁ་ཐུན་བྷྱོ། ཨོྂ་བྲཧྨ་སྭ་སྟི། པུཥྚི་སུ་ར་ཀཽ་ཤི་ཀ ། རུ་ཏྲ་ཨཱི་ཤྭ་ར་བིཥྞུ། ཨཱི་ཤ་ནི། ཀུ་མཱ་ར་ཤཾ་ཀ་ར། སྨ་ར་ཤ་ཏྲུྃ་སྭཱ་ཧཱ། ཨོྂ་ཀརྐོཊ་ཀུ་ལི་ཀ ། པད་མ་མ་ཧཱ་པད་
ཧཱ་མ། ཨ་ནན་ཏ། ཏཱཀྵ་ཀ ། བཱ་སུ་ཀི། ཤང་ཁ་པཱ་ལ་ནཱ་ག་རཱ་ཛ་སྭཱ་ཧཱ། ཨོྂ་ཨཱ་དི་ཏྱ། སཽ་མ་ཨྂ་གཱ་ར། བུ་དྷ་བྲྀ་ཧ་སྤ་ཏིཿ། ཤུ་ཀྲ་ས་ནཻཤྩ་ར། ཀ་ཏུ་སྭཱ་ཧཱ། ཨོྂ་ནཀྵ་ཏྲ་ཀཱར་ཏི་ཀ ། རོ་ཧི་ཎི། མྲྀ་ག་ཤི་རཿ། ཨརྡྲཿ
པུ་ནརྦ་སུཿ། སུ་ཥཿཨ་ཤླེ་ཥཿ། མ་གྷཱ་པུ་ར་བ་ཕ་ལ་གུ་ཎཱི་ཨུཏ་ཏར་ཕལ་གུ་ཎི་ཧསྟཱ་ཙིད་ཏྲཱ་སྭ་ཏི། བི་ཤཱ་ཁཱ་ཨ་ནུ་རཱ་དྷ། ཛྱེཥྛཱ་མཱུ་ལཾ་པུརྦཱ་ཥཱ་ཌྷཱ། ཨུཏྟ་རཱ་ཥཱ་ཌྷཱ། ཤྲ་ཝ་ཎཿཨ་བི་ཛི་ཏ། ཤ་ཏ་བྷི་ཥ། དྷ་ནིཥྛཿཔཱུར་

89-1-288a

ཝ་ཏྲ་པ་དཱ། ཨུཏྟ་ར་བྷ་ཏྲ་པ་དཱ། ར་བ་ཏཱི་ཨ་ཤྭི་ནཱི་བྷ་ར་ཎཱི་སྭཱ་ཧཱ། ཨོྂ་ཨིནྡྲཱ་ཡ། བ་རུ་ཎ། ཀུ་བེ་ར། ཨགྣི་རཱཀྵ་ས། བཱ་ཡ་བེ། ཨཱི་ཤཱ་ན་སཱུརྱ། ཙནྡྲ་ལོ་ཀ་པཱ་ལཱ་ཡ་སྭཱ་ཧཱ། ཨོྂ་བཻ་ཤྲ་བ་ཎཿ། དྲྀ་ཌྷ་
རཱཥྚ། བི་རཱུ་བཱཀྵ་ཌྷ་ཀ ། བི་རཱུ་པཱཀྵ་སྭཱ་ཧཱ། ཨོྂ་དེ་བ་ནཱ་ག་རཱ་ཛཱ་སུ་ར་གན་དྷར་ཝ་ཤྩ། ག་རུ་ཌ། ཀིནྣ་ར། མ་ཧོ་རཱ་ག །ཀུྃ་བྷཎྜ་སྭཱ་ཧཱ། ཧ་ར་ཧ་ར་ནཱ་ག་ཕུཿ། པྲ་ཧ་ར་པྲ་ཧ་ར་སརྦྦ་ནཱ་ག་ཕུཿ། ཙྪིན་ད་ཙྪིན་ད། ནཱ་ག་ཧྲི་ད་ཡཱ་
ནི་ཕུཿ། བྷིན་ད་བྷིན་ད་ནཱ་ག་མརྨ་ནི་ཕུཿ། བི་ཤཱིཪྻནྟུ་ནཱ་ག་ཤ་རཱི་རཱ་ཎི་ཕུཿ། བི་སྥོ་ཊ་ཡ་ནཱ་ག་ན་ཡ་ནཱ་ནི་ཕུཿ། ནཱ་ག་བི་དཱ་ར་ནཱ་ཡ་ཕུཿ། ནཱ་གོ་ཏྶཱ་ད་ནཱ་ཡ་ཕུཿསྭཱ་ཧཱ། ཡཀྵ་བི་དཱ་ར་ཎཱ་ཡ་ཧཱུྃ་ཕཊ། ཡཀྵ་ཀྲོ་དྷ་སཱ་ད་ནཱ་ཡ་
ཧཱུྃ་ཕཊ། ཡཀྵ་ནཱི་ལྃ་བ་ས་ནཱ་ཡ་ཕཊ་སྭཱ་ཧཱ། ཡཀྵ་ཨ་པྲ་ཏི་ཧ་ཏ་བ་ལཱ་ཡ་ཕཊ། ཡཀྵ་པ་ར་ཀྲ་མཱ་ཡ་ཕཊ། ཡཀྵ་ཀྲྀ་ཏཱན་ཏཱ་ཡ་ཕཊ། ཡཀྵ་ཀྲྀ་ཏཱན་ཏཱ་རཱུ་པཱ་ཡ་ཕཊ། ཡཀྵ་རོ་ཥ་ཎཱ་ཡ་ཕཊ། དེ་སྐད་ཅེས་བཀའ་སྩལ་
ནས་ཐམས་ཅད་དབང་དུ་འདུས་པར་གྱུར་ཏོ། །གསང་བའི་རྒྱུད་ཀྱི་རྣམ་པར་འབྱེད་པ་དྲག་པོ་གསུམ་འདུལ་ཞེས་བྱ་བ་ལས་གསང་བའི་སྔགས་ཀྱི་ལེའུ་སྟེ་གཉིས་པའོ།། །། དེ་ནས་ཆོ་ག་ཡང་དག་བཤད། །
མཎྜལ་མེ་ཏོག་བཅས་པའི་སྟེང་། །མཆོད་རྟེན་སྐུ་གདུང་ལྡན་པ་དང་། །བུམ་པ་སྔོན་པོ་མགུལ་ཆིངས་བཅས། །མཆོད་པ་རྣམ་ལྔ་དང་ལྡན་པས། །བསྒྲུབ་པོ་དག་ནི་བསྙུང་ལྡན་པས། །རྨི་ལྟས་རིམ་པ་གསལ་བ་
ཡིས། །ནད་པ་དག་ལ་ཡུངས་བསྔགས་སོ། །བཅོམ་ལྡན་མགོན་པོ་ཞལ་གསུམ་དམར། །ཕྱག་དྲུག་རྡོ་རྗེ་བསྡིགས་པ་གཡོན། །དྲག་པོའི་ཐལ་མོས་འཇིགས་པར་བྱེད། །ཐ་མ་སྦྲུལ་གདུག་རི་རབ་མནན། །འཁོར་དུ་
གནོད་སྦྱིན་ཆེན་པོ་སྟེ། །ཤ་ཟ་རབ་འཇིགས་རལ་པ་ཅན། །གདོང་སེར་སེང་གདོང་གནོད་སྦྱིན་མོ། །བོང་བུའི་རྣ་བ་རྣ་བ་འཕྱང་། །རལ་པ་གྱེན་འགྲེང་རལ་གྲི་སོ། །གནོད་སྦྱིན་འཁོར་ཏེ་ལྔ་བརྒྱར་བཅས། །ཡཀྵ་

89-1-288b

བི་དཱ་ར་ཎཱ་ཡ་ཧཱུྃ་ཕཊ། ཡཀྵ་ཀྲོ་དྷ་སཱ་ད་ནཱ་ཡ་ཧཱུྃ་ཕཊ། ཡཀྵ་ནཱི་ལཱྃ་བ་ས་ནཱ་ཡ་ཧཱུྃ་ཕཊ། ཡཀྵ་པྲ་ཏི་ཧ་ཏ་བཱ་ལཱ་ཡ་ཧཱུྃ་ཕཊ། ཡཀྵ་པ་རཱ་ཀྲ་མཱ་ཡ་ཕཊ། ཡཀྵ་ཀྲྀ་ཏཱན་ཏྭ་ཡ་ཕཊ། ཡཀྵ་ཀྲྀ་ཏཱན་ཏ་རཱུ་པཱ་ཡ་ཕཊ། ཡཀྵ་
རོ་ཥ་ཎ་ཡ་ཕཊ། ཞེས་བརྗོད་དེ་ཆུ་ལ་བསྔགས་ཤིང་གཏོར་ན་གནོད་སྦྱིན་གྱི་གདོན་ལས་ཐར་རོ། །མཆོད་རྟེན་སྐུ་གདུང་ལྡན་པའི་དྲུང་། །མཚོན་སྣ་ལྔ་དང་ལྡན་པ་ཡིས། །མཆོད་པ་ལྔ་དང་ལྡན་པས་མཆོད། །བསྒྲུབ་པོ་
དག་ནི་བསྙུང་ལྡན་པས། །རྨི་ལྟས་རིམ་པ་གསལ་བ་ཡིས། །ནད་པ་དག་ལ་མཚོན་སྣས་བཅིང་། །བཅོམ་ལྡན་མགོན་པོ་ཞལ་གསུམ་ལྡན། །ཕྱག་དྲུག་རྡོ་རྗེ་བསྡིགས་པ་གཡོན། །དྲག་པོའི་ཐལ་
མོས་འཇིགས་པར་བྱེད། །ཐ་མ་སྦྲུལ་གདུག་རི་རབ་མནན། །མཁའ་ལ་རྫུ་འཕྲུལ་དང་ལྡན་བདུད། །དགའ་རབ་དབང་ཕྱུག་ཐོད་ཕྲེང་ཅན། །བུམ་སྣ་སེན་དགུ་ཤ་ཟ་བདུད། །བཙུན་མོ་མེ་ཏོག་མཛེས་མ་དང་། །
འོད་ཟེར་འཕྲོག་དང་མདངས་འཕྲོག་མ། །གདོན་རིགས་སྟོང་ཕྲག་བརྒྱད་བཅུའི་འཁོར། །མ་ལུས་བཅས་པའི་སྔགས་འདི་ནི། །གནད་ལ་བོར་བའི་སྲོག་སྔགས་སོ། །པྲེ་ཏ་པི་ཤཱ་ཙ་བི་དྷཱ་ར་ཎཱ་ཡ་ཧཱུྃ་ཕཊ། པྲེ་ཏ་པི་
ཤཱ་ཙ་ཀྲོ་དྷ་སཱ་དྷ་ནཱ་ཡ་ཧཱུྃ་ཕཊ། པྲེ་ཏ་པི་ཤཱ་ཙ་ནཱི་ལྃ་ཝ་ས་ནཱ་ཡ་ཧཱུྃ་ཕཊ། པྲ་ཏ་པི་ཤཱ་ཙ་ཨ་པྲ་ཏི་ཧ་ད་བ་ལཱ་ཕཊ། པྲེ་ཏ་པི་ཤཱ་ཙ་པ་རཱ་ཀྲ་མ་ཡ་ཕཊ། པྲེ་ཏ་པི་ཤཱ་ཙ་ཀྲྀ་ཏཱནྟཱ་ཡ་ཕཊ། པྲེ་ཏ་པི་ཤཱ་ཙ་ཀྲྀ་ཏཱནྟ་རཱུ་པཱ་ཡ་
ཕཊ། པྲེ་ཏ་པི་ཤཱ་ཙ་རོ་ཥ་ཎཱ་ཡ་ཕཊ། ཉི་མ་ཟླ་བ་དག་གི་བར་དུ་རླུང་ལ་བསྐྱོན་ཏེ། མཚོན་སྣ་ལྔས་བཅིངས་ཏེ་བསྐྲད་པར་བྱའོ། །མཆོད་རྟེན་སྐུ་གདུང་ལྡན་པའི་དྲུང་། །མཎྜལ་མེ་ཏོག་བཅས་པའི་སྟེང་། །བསྙུང་
བས་ཁྱིའི་ཡི་ཤ་ལ་བསྒྲུབ། །རྨི་ལྟས་རིམ་པ་ལྡན་པས་བརྟག །བརྒྱད་ཁྲི་ཞབས་ནུབ་འཇིགས་པའི་ཆ། །གད་རྒྱངས་བཞད་མཛད་ཞལ་གསུམ་པ། །ནག་པོ་ཞབས་གདུག་གདུག་པ་འཛིན། །སྟོབས་ཆེན་རབ་

89-1-289a

ཏུ་གནོན་པ་པོ། །ཀླུ་ཆེན་མ་རུངས་གདུག་པ་ཅན། །ནོར་རྒྱས་དང་ནི་དུང་སྐྱོང་དང་། །དགའ་བོ་དང་ནི་འཇོག་པོ་དང་། །པད་མ་པད་མ་ཆེན་པོའོ། །སྟོབས་ཀྱི་རྒྱུ་དང་རིགས་ལྡན་རྣམས། །རྒྱ་མཚོ་དག་
ལ་གནས་པ་ཡི། །ཀླུ་དང་གཉན་དང་ས་བདག་གསུམ། །སྤྲུལ་པ་ལས་ལས་གྲུབ་པ་ཡི། །གླེན་པ་ང་རྒྱལ་རྫུ་འཕྲུལ་ཅན། །སྤྲུལ་པ་འབུམ་སྡེ་འཁོར་དང་བཅས། །མ་ལུས་པ་ཡི་སྔགས་འདི་ནི། །གནད་ལ་བོར་
བའི་རྩ་སྔགས་སོ། །ཧ་ར་ཧ་ར་ནཱ་ག་ཕུཿ། པྲ་ཧ་ར་དྲ་ཧ་ར་ནཱ་ག་ཕུཿ། ཙྪིནྡ་ཙྪིནྡ་ནཱ་ག་ཕུཿ། བྷིན་ད་བྷིན་ད་ནཱ་ག་ཕུཿ། བི་ཤཱིཪྻནྟུ་ནཱ་ག་ཤ་རཱི་རཱ་ཎི་ཕུཿ། བི་སྥོ་ཊ་ཡ་ནཱ་ག་ནཱ་ཡ་ནཱ་ནི་ཕུཿ། ནཱ་ག་བི་དཱ་ར་ཎ་ཡ་ཕུཿ། ནཱ་ག་ཀྲོ་དྷ་སཱ་ད་ནཱ་ཡ་
ཕུཿ  ག་སཱ་ནཱ་བལ་པོ་སེའུ་དག་དང་ནི། །སྨྱག་ཤད་དག་གི་ལྕུག་མས་བྱ་བ། །དེ་ནི་ཀླུ་བཟློག་པར་བྱེད་པའི་ཆོ་གའོ། །ནཱ་ག་དུ་ན་དུས། ནཱ་ག་ཤོ་ན་དུས། ཧི་ལི་ཧི་ལི་ནཱ་ག་དུས་དུས། ཀླུ་ཆེན་ནཱ་གའི་སྲོག་སྙིང་སྟེ། །
གནད་ལ་བོར་བའི་སྲོག་སྙིང་ངོ་། །ལྟོ་འཕྱེ་དག་གི་ཁ་ནས་ཁར། །བཅོམ་ལྡན་སྐུ་ནི་གསལ་བས་བཟླས། །དེ་ནས་རྡོ་རྗེ་འཛིན་ལ་བཀའ་སྩལ་པ། ལས་རྣམས་བཞི་ཡིས་ལས་རྣམས་འགྲུབ། །ས་གཞི་དག་
ནི་སོ་སོར་བརྟག །ཞི་བ་དཀར་ཟླུམ་པད་མ་ཅན། །རྒྱས་སེར་གྲུ་བཞི་འཁོར་ལོའོ། །དབང་དམར་ཟླ་གམ་ལྕགས་ཀྱུ་སྟེ། །དྲག་པོ་མཐིང་ནག་རྩེ་གསུམ་པའོ། །ཞི་བ་རྒྱས་པ་སོར་བཞི་དང་། །ཁྲུ་གང་ཁྲུ་
དོ་མཉམ་པའོ། །དབང་དང་དྲག་པོ་སོར་གསུམ་སྟེ། །ཁྲུ་གང་ཁྲུ་དོ་ཁྲུ་གསུམ་ཁྲུ། །འོ་མ་ཅན་དང་དྲི་ཞིམ་ཤིང་། །འབྲས་བུ་དང་བཅས་ཞི་རྒྱས་ཤིང་། །ཚེར་མ་དུར་ཁྲོད་ཤིང་དག་ནི། །ཁ་དོག་དམར་ནག་དབང་
དྲག་ལ། །ཀུ་ཤ་དག་ཀྱང་དགྲམ་བྱ་སྟེ། །ལས་ཀྱི་བུམ་པས་བསང་བར་བྱའོ། །ཞི་བ་ཞོ་དང་མར་དང་ནི། །འོ་མ་དྲི་ཞིམ་མེ་ཏོག་དཀར། །འབྲས་དང་ནས་དང་གྲོ་དང་ནི། །ཞོ་ཡི་ཆ་དང་བསྲེས་པ་དབུལ། །

89-1-289b

རྒྱས་པ་ཞོ་སྦགས་དཀར་གསུམ་སྟེ། །མངར་གསུམ་འབྲས་བུ་གསུམ་དག་སྟེ། །ཡམ་ཤིང་འོ་མ་ལོ་འདབ་བཅས། །ཏིལ་ནི་དཀར་པོ་ཤིས་པའོ། །ཁྭ་དང་འུག་པ་བྱ་རོག་བྲུན། །སྐེ་ཚེ་ནིམ་པ་ཡུངས་ཀར་དང་། །ཁྲག་གིས་སྦགས་པའི་རྫས་ཀུན་ཏེ། །ཡམ་ཤིང་
ཚེར་མ་མར་དག་དང་། །ཤ་དང་ཚིལ་དང་གཟུགས་བཅས་པ། །ཏིལ་ནི་ནག་པོ་ཤིས་པའོ། །ཤར་དུ་བལྟས་ན་ཞི་བ་སྟེ། །བྱང་དུ་བལྟས་ན་རྒྱས་པའོ། །ནུབ་ཏུ་བལྟས་ན་དབང་དུ་སྡུད། །ལྷོ་རུ་བལྟས་ཏེ་གསད་པར་བྱའོ། །སྦྱིན་བསྲེག་བྱས་པས་ལས་ཀུན་འགྲུབ། །གཡས་
བརྐྱང་དབང་གི་འདུག་པ་སྟེ། །གཡོན་བརྐྱང་པས་ནི་གསད་པའོ། །བུམ་པ་ཁ་དོག་སྔོན་པོ་སྟེ། །གནམ་ལྕགས་སོར་ནི་བཅུ་དྲུག་ཚད། །སྨན་ལྔ་འབྲུ་ལྔ་རིན་པོ་ཆེ། །འབྲས་གསུམ་འབྲུ་གསུམ་བཅས་པ་སྟེ། །དྲི་ཞིམ་ལོ་འདབ་བཅས་པའི་ཤིང་། །བ་ཡི་རྣམ་
ལྔ་ཁྲུ་དོའི་ཚད། །གྲུ་བཞི་ཁྲུ་གང་ཟླུམ་པོ་སྟེ། །སེང་ལྡེང་བཞི་ལས་བྱས་པ་ཡི། །ཕུར་པ་ཚོན་སྣ་དང་བཅས་པ། །དཀར་གསུམ་མངར་གསུམ་དང་བཅས་པའི། །གདེངས་ཀ་ཅན་ལ་དབུལ་བར་བྱའོ། །གྲུབ་པ་ཁྲུས་བྱ་བསྲུང་བྱའོ། །འབྲས་ཅན་བུ་རམ་ཧྭགས་དང་
ནི། །འབྲུ་ཡི་ཆན་དང་དྲི་ཞིམ་དང་། །དཀར་གསུམ་མངར་གསུམ་ཆུ་དག་དང་། །མདུན་དུ་བྱས་ཏེ་ཕྱོགས་རྣམས་སུ། །ཤ་དང་ཁྲག་དང་རུས་པ་དང་། ནས་དང་འབྲས་དང་གྲོ་ལ་སོགས། །ལ་ཕུག་སྒོག་པ་འབྲུ་ལ་སོགས། །ཆང་དང་བཅས་པ་མདུན་དུ་འབུལ། །ༀ་བྲཧྨ་ཨོཾ་
བིཥྞུ། ཨོྂ་རུ་དྲཱ་ཡ། ཨོྂ་ཀཱར་ཏི་ཀ་ཨོྂ་ག་ཎ་པ་ཏི་ཨོྂ་ཨིན་དྲཱ་ཡ། ཨོྂ་མ་ཧཱ་ཀཱ་ལ། ཨོྂ་མ་ཧཱ་བྲཧྨཱ་ཡ། བ་ལིན་ཏ་ཏ་ལེ། བ་ལིན་ཏ་ཏ་ལེ་སྭཱ་ཧཱ། སྟག་དང་ཁབ་ལེན་ཏི་ཙ་དང་། །མཎྜལ་གྲུ་གསུམ་སྟེང་དུ་གཞག །ནག་པོའི་ཐོད་པ་གྲི་གུག་ཅན། །བསྲུང་དང་ལྡན་པས་གསང་
སྔགས་བསྒྲུབ། །མ་ཧཱ་ཀཱ་ལ་མི་རཱུ་པ་ཎཱ། ཨོྂ་ཤྲཱི་གྲྀ་བོ་བེ་དེ་ཛཿཛཿཧ་ཧ། ས་མ་ཡ་གགས་སོལ། ལྕགས་ཀྱི་སྙིང་ཕྱུང་ཞེས་པས་ལྕགས་ལ་བྱའོ། །ནད་ཀྱི་སྲུང་བ་དག་ལ་ནི། །བྱང་ཆུབ་སེམས་དཔའི་སྐུར་གསལ་ལ། །སྙིང་གའི་ས་བོན་མེ་
འབར་བས། །ནད་ཀུན་མ་ལུས་བསྲེག་པར་བྱའོ། །ཨོྂ་བི་དུག་ལུམ་པྲ་ཏི་བཻ་རོ་སྭཱ་ཧཱ། འབྲུ་དང་སྨན་དང་ཁུར་བ་དང་། །རིན་པོ་ཆེ་དང་ཆང་དང་ཤ ། རྐང་དང་ལ་དུ་དཀར་གསུམ་དང་། །

89-1-290a

མངར་གསུམ་བཅས་པའི་གཏོར་མ་དང་། །ཆུ་ཡི་འགྲམ་འམ་རྒྱ་མཚོར་དབུལ། །མེ་ཏོག་བདུག་པ་བཅས་པར་དབུལ། །ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་སྃ་བྷ་ར་སྃ་བྷ་ར་ཧཱུྃ། གསང་བའི་རྒྱུད་ཀྱི་རྣམ་
པར་འབྱེད་པ། དྲག་པོ་གསུམ་འདུལ་ཞེས་བྱ་བ་ལས། ལས་བསྟན་པའི་ལེའུ་སྟེ་གསུམ་པའོ། །རྫོགས་སྷོ།། །། རྒྱ་གར་གྱི་མཁན་པོ་དེ་བ་པཱུརྞྞ་མ་ཏི་དང་། ལོ་ཙྪ་་བ་དགེ་སློང་ཆོས་ཀྱི་བཟང་པོས་བསྒྱུར་བའོ།། །།
༄༅། །རྒྱ་གར་སྐད་དུ།  བཛྲ་པཱ་ཎི་ནཱི་ལཱམ་བ་ར་བི་དྷི་བཛྲ་དཎྜ་ཏན་ཏྲ།  བོད་སྐད་དུ།  ལག་ན་རྡོ་རྗེ་གོས་སྔོན་པོ་ཅན་གྱི་ཆོ་ག་རྡོ་རྗེ་བེ་ཅོན་གྱི་རྒྱུད།  སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་
ལོ། །འདི་སྐད་བདག་གིས་ཐོས་པ་དུས་གཅིག་ན། གནོད་སྦྱིན་ཐམས་ཅད་ཡོངས་སུ་རྒྱུ་བ། ཤིན་དུ་དབེན་པ། ཤིན་དུ་ཡོངས་སུ་དག་པ་ན། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་ཞེས་
བྱ་བ། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ལས་ཀྱི་ཁྲོ་བོར་དབང་བསྐུར་བ། མཆེ་བ་གཙིགས་པ། ཡིད་ཁྲོས་པ་ལྟ་བུ། མིག་མེ་མདག་གི་ཕུང་པོ་འདྲ་བ། དབུགས་མེ་ལྕེ་ལྟར་འབར་བ། 
འཇིགས་པའི་ང་རོ་ཅན། ལག་པ་དང་རྐང་པ་ཀླུ་ནོར་རྒྱས་ཀྱི་བུས་བརྒྱན་པ། ཀླུ་ནག་པོ་སེ་རལ་ཁར་ཐོགས་པ། ཀླུ་དགའ་བོ་དང་ཉེ་དགའ་བོས་སྙན་བརྒྱན་པ། སྦྲུལ་འབར་བ་རིན་པོ་ཆེའི་ཅོད་པན་
ཐོགས་པ། སྦྲུལ་གདུག་པ་འབར་བ་ཟ་བ། བཞིན་རྒྱས་པ། སྨིན་མ་དཔྲལ་བར་བསྡུས་པ། ཡ་སོས་མ་མཆུ་མནན་པ། གཤིན་རྗེའི་ཆ་བྱད་ཅན། ལྕེ་གློག་ལྟར་འགྱུ་བ། སྦྲུལ་ཟ་བ། གསུས་པ་
ཆེ་བ། ལག་པ་བརྡབས་པའི་སྒྲས་འཇིགས་པར་བྱེད་པ། ཀླུའི་རྒྱལ་པོ་འདབ་བཟངས་སྐ་རགས་སུ་བཅིངས་པ། ཨ་ལ་ལ་ཞེས་སྒྲོག་པར་བྱེད་པ། རྒྱ་མཚོའི་ཟབས་སུ་དཔག་ཚད་བརྒྱད་ཁྲི་བཞི་སྟོང་

89-1-290b

ཡོད་པས་རྐང་པའི་པུས་མོར་ཕྱིན་པ། དབང་པོ་དང་ཉི་མ་ཕྲག་པ་ལ་རབ་ཏུ་ཁུར་བ། ཀླུ་ཐམས་ཅད་རླག་པར་བྱེད་པའི་གད་རྒྱངས་ཆེན་པོ་དགོད་པས་ཀུན་དུ་འཁྲུག་པར་བྱེད་པ། ཀླུ་ཐམས་ཅད་འཆིང་བར་
བྱེད་པ། འབྱུང་པོ་ཐམས་ཅད་འགུགས་ཤིང་འཆིང་བར་མཛད་པ། སྦྱོར་བ་ཐམས་ཅད་གཅོད་པར་མཛད་པ། སྦྱོར་བ་ཐམས་ཅད་ཟློག་པར་མཛད་པ། སྦྱོར་བ་ཐམས་ཅད་
གནོན་པར་མཛད་པ། ཡོན་ཏན་ཐམས་ཅད་མ་ལུས་པའི་བདག་ཉིད་དེ། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་། གནོད་སྦྱིན་མཐུ་བོ་ཆེ་ཐམས་ཅད་དང་། གནོད་སྦྱིན་
དྲག་པོ་ཐམས་ཅད་དང་། ལྷ་ཐམས་ཅད་དང་། ཀླུ་ཐམས་ཅད་དང་། དྲི་ཟ་ཐམས་ཅད་དང་། ལྷ་མ་ཡིན་ཐམས་ཅད་དང་། ནམ་མཁའ་ལྡིང་ཐམས་ཅད་དང་། མི་འམ་
ཅི་ཐམས་ཅད་དང་། ལྟོ་འཕྱེ་ཆེན་པོ་ཐམས་ཅད་དང་། འབྱུང་པོ་དང་། ཡི་དགས་དང་། བརྗེད་བྱེད་ལ་སོགས་པ་དང་ཐབས་གཅིག་ཏུ་བཞུགས་ཏེ། འདི་ལྟར་ཉི་མ་དང་། ཟླ་
བ་དང་། སྐར་མའི་ཚོགས་ལྟ་བུར་བཞུགས་སོ། །དེའི་ཚེ་ས་ཡང་ཆེར་གཡོས་སོ། །འབྲུག་གི་སྒྲ་ཡང་བྱུང་། ཉི་མ་དང་སྐར་མ་ཡང་མི་སྣང་བར་གྱུར་ཏོ། །དེ་ནས་འཕགས་པ་ལག་ན་རྡོ་རྗེ་གོས་སྔོན་
པོ་ཅན་ལ་འཁོར་ཐམས་ཅད་ཀྱིས་གསོལ་པ། གོས་སྔོན་པོ་ཅན་ཁྱོད་ཅི། བདེ་གཤེགས་ཀུན་གྱི་སྤྲུལ་པ་འམ། །གལ་ཏེ་བསྡུས་པའི་སྐུ་ཡིན་ནམ། །ལས་ཀྱི་ཁྲོ་བོར་དབང་སྐུར་རམ། །བདག་ཅག་འཁོར་དང་བཅས་
པ་རྣམས། །ཅི་ལྟ་བུ་ཡི་དུས་གསུམ་བཀའ་ཉན་ཏེ། །ལས་དང་བྱ་བ་ཐམས་ཅད་བཀའ་སྩལ་མཛོད། །དྲག་པོའི་ཏིང་འཛིན་བསྟན་དུ་གསོལ་ཞེས་གསུངས་སོ། །གླེང་གཞིའི་ལེའུ་སྟེ་དང་པོའོ།། །།  དེ་ནས་ལག་ན་རྡོ་རྗེ་དྲག་པོ་ཞེས་བྱ་བའི་ཏིང་ངེ་འཛིན་

89-1-291a

དུ་ཞུགས་ཏེ་འདི་སྐད་ཅེས་གསུངས་སོ། །ཕྱག་རྒྱ་གསང་སྔགས་མཐུ་སྦྱོར་ལས། །ཁྲོ་བོའི་རྒྱལ་པོ་བསམ་པར་བྱ། །ཁྲོ་བོ་རྡོ་རྗེའི་ཏིང་འཛིན་གྱིས། །བྱིན་བརླབས་ཡ་མཚན་སྣ་ཚོགས་ལྡན། །ཏིང་འཛིན་དེ་ལ་
དབང་ཐོབ་ནས། །ལས་རྣམས་སྒྲུབ་ལ་ཐོགས་པ་མེད། །ཞི་རྒྱས་དབང་དང་དྲག་པོ་དང་། །གསད་རྨོངས་སྣ་ཚོགས་ངེས་པར་འགྲུབ། །དེ་ཉིད་གྲུབ་པར་གདོན་མི་ཟ། །རང་གཞན་འཕགས་དང་བླ་མ་དང་། །ཤིན་དུ་བླ་མ་དམ་པ་
ཡང་། །མཆོད་ནས་དངོས་གྲུབ་མྱུར་དུ་འབྱུང་། །གལ་ཏེ་གཞན་ལ་ཕན་འདོགས་ན། །སྐུ་དེ་སྣ་ཚོགས་སྐུ་རུ་སྣང་། །སྣང་བའི་སྒྱུ་མའི་སྐུ་ཡིན་ཡང་། །གདུག་པ་འདུལ་ཕྱིར་རིགས་པར་སྣང་། །སྣ་ཚོགས་དེ་ཉིད་བསམ་བྲལ་བའི། །
དངོས་གཞི་ཡང་དག་ཐར་པ་གཅིག །ལེའུ་གཉིས་པའོ།། །།   གཞན་ཡང་གསང་སྔགས་སྦྱོར་བ་ནི། །ད་ཧ་བསྲེག་སོགས་གསང་སྔགས་ཀྱིས། །ཐོགས་མེད་ལས་རྣམས་གྲུབ་པ་ཡིན། །གཉིས་ཀྱི་འོག་མས་
གསུམ་པ་བརྒྱན། །ར་ཡི་མཐར་ནི་གསུམ་པའི་མཐའ། །དེ་ལ་གཉིས་ཀྱི་གང་ལྡན་པ། །ཟུང་དང་རབ་ཟུང་མིང་དང་ལྡན། །ཡང་མིང་སྐལ་ལྡན་བསམ་གཏན་ནི། །ལྕགས་ཀྱུའི་སྦྱོར་བ་རབ་ཏུ་བྱ། །ཨོཾ་བཛྲ་པཱ་ཎི་མ་ཧཱ་ཡཀྵ་ནཱི་ལཱམ་བ་ར་
ཧཱུྃ་ཕཊ། མཇུག་རྫོགས་གོང་དང་གསུམ་པའི་མཐའ། །ལན་གཉིས་གོང་བཞིན་བརྡེགས་སྔགས་ཤེས། །གསུམ་པའི་དང་པོ་གཉིས་པ་དང་། །དྲུག་པའི་དང་པོ་ཡི་གེ་ནི། །ལན་གཉིས་གོང་བཞིན་གཏོགས་བྱེད་སྔགས། །
གཉིས་ཀྱི་དང་པོ་ལྔ་དང་པོས། །དྲག་པོ་དགའ་བའི་ས་བོན་ལྡན། །ལན་གཉིས་ལྡན་གྱུར་ལས་གྲུབ་པ། །གོང་མ་བཞིན་དུ་མཆོད་བྱེད་དོ། །ལེའུ་གསུམ་པའོ།། །། དེ་ནས་འཕགས་པ་ལག་ན་རྡོ་རྗེ་གོས་སྔོན་པོ་
ཅན། སྣ་ཚོགས་མངོན་པར་འགྲུབ་པའི་ཏིང་ངེ་འཛིན་ལ་སྙོམས་པར་ཞུགས་ཏེ། འདི་སྐད་ཅེས་གསུངས་སོ། །ཨོཾ་བཛྲ་པཱ་ཎི་མ་ཧཱ་ཡཀྵ་ནཱི་ལཱམ་བ་ར་ད་ཧ་ནི་བཛྲ་ཧཱུྃ་ཕཊ། གང་ཞིག་ཏིང་འཛིན་རྣལ་འབྱོར་དེ། །ཉེས་

89-1-291b

པ་ཀུན་ལས་རབ་ཏུ་ཐར། །ལེགས་པའི་ཡོན་ཏན་ཐམས་ཅད་འཐོབ། །འབྲས་བུ་ཡང་དག་མངོན་པར་འགྲུབ། །སྔགས་ནི་གང་ཡིན་མིང་ཡིན་ཏེ། །གདུལ་བྱའི་མཐའ་དང་ལྡན་པ་ལ། །མཐའ་མ་ལས་སྔགས་མཐའ་དང་
ལྡན། །ལེའུ་བཞི་པའོ།། །།  དེ་ནས་གོས་སྔོན་པོ་ཅན་འཁོར་ལོ་མངོན་པར་འགྲུབ་པའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ། །འབྱུང་བཞིའི་སངས་རྒྱས་རབ་བསྒོམས་ནས། །སོ་
སོ་ལས་ཀྱིས་བསྒོམ་པ་ནི། །མེ་བརྒྱད་རླུང་གཉིས་ལྡན་པར་བསམ། །ཆུ་བརྒྱད་དངོས་པོ་ཉིད་ཡིན་ཏེ། །དེ་བཞིན་ས་བརྒྱད་ཧཱུྃ་འབྲས་ལྡན། །རླུང་བརྒྱད་མེ་གཉིས་ལྡན་པ་སྟེ། །འབྲས་བུ་རིམ་གྱིས་གནོད་སྦྱིན་གཙོ། །སྒྲུབ་པ་
སྔགས་བཞིན་མངོན་པར་འགྲུབ། །ཨེ་དང་སོ་སོའི་མཐའ་དང་ལྡན། །མེ་ལ་གོང་མས་མངོན་པར་འགྲུབ། །རྒྱུན་དུ་རྩ་བའི་གསང་སྔགས་བཟླས། །ལེའུ་ལྔ་པའོ།། །། དེ་ནས་འཕགས་པ་གོས་སྔོན་གྱིས། །ལས་
བཅུ་མངོན་པར་སྒྲུབ་པ་ཡི། །ཏིང་ངེ་འཛིན་ལ་སྙོམས་ཞུགས་ནས། །ལས་བཅུའི་སྦྱིན་བསྲེག་འདི་གསུངས་སོ། །ཞི་ལ་ཤཱན་ཏྀང་ཀུ་རུ་སྟེ། །རྒྱས་པ་པུཥྚིཾ་ཀུ་རུའོ། །དབང་ལ་ཝ་ཤང་ཀུ་རུའོ། །དྲག་པོ་མཱ་ར་གསུམ་པར་
ལྡན། །ཐབ་ཁུང་དབྱིབས་ནི་ལས་བཞི་སྟེ། །ཤིང་ནི་རིགས་དང་སྦྱར་བར་བྱ། །ཞི་ལ་དཀར་པོའི་ཤིང་རྣམས་ཏེ། །རྒྱས་ལ་གསེར་ཤིང་ལ་སོགས་པའོ། །དབང་ལ་སེང་ལྡེང་ཤིང་བསྲེགས་སྟེ། །དྲག་པོ་ཚེར་མ་ཅན་གྱི་ཤིང་། །
གཞན་ནི་ཙན་དན་ཤིང་ལས་བྱ། །ཐབས་ཁུང་འདབ་བརྒྱད་དབྱིབས་ཡིན་ཏེ། །བྀ་དྷྭན་ས་ཡ། ཨུཙྪ་ཊི་ནི། མོ་ཧ་ཡ་མོ་ཧ་ཡ། སྟམ་བྷ་ཡ་སྟམ་བྷ་ཡ། ཨུན་མ་ན་ཨུ་ན་མ་ན། ཨཱ་ཀར་ཥ་ཡ་ཨཱ་ཀར་ཥ་ཡ། བ་ཤིང་ཀ་
ར་བ་ཤིང་ཀ་ར། རཀྵ་ཡ་རཀྵ་ཡ། མོ་ཧ་བྷ་ཡ། སརྦ་ཀརྨ་ཀུ་རུ་ཧཱུྃ་ཕཊ། ལེའུ་དྲུག་པའོ།། །། དེ་ནས་དཔལ་ལྡན་རྡོ་རྗེ་འཛིན། །གདུལ་དཀའ་བ་ནི་འདུལ་བའི་མཆོག །གསང་བའི་བདག་པོ་གོས་སྔོན་ཅན། །

89-1-292a

དྲག་པོ་ཆེན་པོ་རབ་འབར་བའི། །ཏིང་ངེ་འཛིན་ལ་སྙོམས་ཞུགས་ནས། །འཁོར་གྱི་ཀླུ་ཚོགས་དབང་བསྡུས་ཏེ། །ཉེན་རྣམས་བཟློག་པའི་ཆོ་གར་གསུངས། །གནས་ཁང་རིམ་པ་གསུམ་དག་ལ། །ཕྱི་རོལ་
སྨེ་བསྲེགས་དབྲལ་བར་བྱ། །བར་དུ་ཕྱི་ནང་ཁྲུས་བྱས་ཏེ། །མཉེས་པའི་ལས་ཀྱང་ཅི་ནུས་བྱ། །ནང་དུ་བུམ་པའི་དབང་བསྐུར་བས། །ཉེན་རྣམས་བཟློག་ལ་ཐེ་ཚོམ་མེད། །ཀྱེ་ཧོ་ཉེན་རྣམས་འདུལ་བའི་མཆོག །ཨེ་མ་
གསང་ཆེན་དྲག་པོ་ཆེ། །ཨེ་མ་མ་རུངས་འཇིགས་པ་ཅན། །ཨེ་མ་གསང་སྔགས་རྣལ་འབྱོར་ཆེ། །ཕྱག་ན་རྡོ་རྗེ་ཁྱོད་ཕྱག་འཚལ། །ཕྱོགས་བྲལ་ཁྲོ་བོ་ཁྱོད་ཕྱག་འཚལ། །ལེའུ་བདུན་པའོ།། །། དེ་སྐད་ཅེས་གསུངས་
ནས་འཁོར་ཐམས་ཅད་དགའ་བའི་རྗེས་ལས། འདི་སྐད་ཅེས་བཀའ་སྩལ་ཏོ། །ཐམས་ཅད་ལྡན་པའི་གཏོར་མ་ལ། །རྃ་གྱིས་སྦྱངས་ནས་ཡྃ་གིས་བུས། །ཁྃ་གིས་བཀྲུས་ཏེ་དག་པ་ལ། །བྃ་ལས་བདུད་རྩི་ཆུ་རྒྱུན་
བསྐྱེད། །ཡྃ་རྃ་དབབ་པའི་སྦྱོར་བ་བྱ། །ཛཿཡིས་བཀུག་སྟེ་གཏོར་མ་བསྟིམ། །བསམ་གཏན་ལྷ་མོས་མཆོད་པ་འབུལ། །དེ་ནས་འཁོར་ལ་འདི་སྐད་བསྒོས། །ང་ནི་ཁྲོ་བོ་གོས་སྔོན་ཅན། །སངས་རྒྱས་ཐམས་
ཅད་འདུས་པའི་སྐུ། །སངས་རྒྱས་ཀུན་གྱིས་བྱིན་གྱིས་བརླབས། །དབང་བསྐུར་མཆོག་ཐོབ་ང་ཡི་སྐུ། །ཅི་སྟེ་ང་ཡི་དམ་འདས་ན། །གཏོར་མ་དུག་གི་རང་བཞིན་གྱིས། །ཁྱེད་རྣམས་ཐལ་བའི་རྡུལ་དུ་རློགས།།
གལ་ཏེ་དམ་ཚིག་མ་འདས་ན། །གཏོར་མ་ཡེ་ཤེས་བདུད་རྩི་ཡིས། །ཁྱེད་ཀྱི་སྒོ་གསུམ་སྒྲིབ་སྦྱངས་ནས། །ངེས་པར་ལེགས་པའི་ཡོན་ཏན་ཐོབ། །ཨོཾ་ཨ་ཀཱ་རོ་མུ་ཁྃ་སརྦ་དྷརྨཱ་ཎཱྃ་ཨཱདྱ་ནུད་པན་ན་ཏྭད་ཨོཾ་
ཨཱཿཧཱུྃ་སྭཱ་ཧཱ། ལེའུ་བརྒྱད་པའོ།། །། དེ་ནས་དཔལ་ལྡན་གོས་སྔོན་ཅན། །གདུལ་དཀའ་འདུལ་བའི་བདག་པོ་དེས། །བསམ་གཏན་འཁོར་ལོ་མེད་པ་ལ། །སྔགས་ཀྱི་ངེས་པ་བཤད་པར་བྱ། །

89-1-292b

ཏདྱ་ཐཱ། བྷོ་བྷོ་པན་ནཱ་ག་ཨ་དྷི་པ་ཏ་ཡེ། ཨི་དན་ནཱི་ལཱྃ་བ་ར་དྷ་ར་ཤ་རཱི་རྃ། བཛྲ་པཱ་ཎི་ཧྲྀ་ད་ཡཱ་ན། ཡཿས་མཱ་ཏི་ཀྲ་མ་ཐ། མཱ་ཀུ་ལ། ཨུད་སཱ་ད་ན། བྷ་བི་ཥྱྃ་ཏི། ལས་ཐམས་ཅད་པའི་སྔགས་སོ། །ལས་སོ་སོ་ལ་ཀླུ་
འདུལ་བའི་སྔགས། ཏདྱ་ཐཱ། བུད་དྷ་བུད་དྷ། བི་བུད་དྷ་བི་བུད་དྷ། མཱ་ཏི་ཀྲ་མ་ཐ། ཧ་ར་ཧ་ར་ནཱ་གཱ་ནཱྃ། པྲ་ཧ་ར་པྲ་ཧ་ར་ནཱ་གཱ་ནཱྃ། ཙྪིན་ད་ཙྪིན་ད། ནཱ་ག་ཧྲི་ད་ཡཱ་ནི། བྷིན་ད་བྷིན་ད་ནཱ་ག་མརྨཱ་ཎི་བི་ཤཱི་རྱན་ཏུ་ནཱ་ག་ཤ་རཱི་རཱ་ཎི། བི་
སྥོ་ཊ་ཡ་ནཱ་ག་ནཱ་ཡ་ནཱ་ནི། ཏདྱ་ཐཱ། ཧཱུྃ་ཕཊ། ནཱ་ག་བི་དཱ་ར་ཎཱ་ཡ་ཧཱུྃ་ཕཊ། ནཱ་ག་ཨུཏ་སཱ་ད་ནཱ་ཧཱུྃ་ཕཊ། ཡི་དགས་ཐམས་ཅད་བཟློག་པ་ནི། ནཱི་ལཱམ་བ་ས་ནཱ་ཡ་ཧཱུྃ་ཕཊ། ཨ་པྲ་ཏི་ཧ་ཏ་པ་ལ་པ་རཱ་ཀྲ་མཱ་ན་ཡ་ཕཊ། ཀྲི་ཏཱན་ཏཱ་
ཡཱ་ཕཊ་ཀྲི་ཏཱན་ཏ་རཱུ་པཱ་ཡ་ཕཊ། རོ་ཥཱ་ཎཱ་ཡ་ཕཊ། ཏྲཱ་ས་ནཱ་ཡ་ཕཊ། ཀུྂ་བྷཎ་ཌོཏ་སཱ་ད་ནཱ་ཡ་ཕཊ། གཤིན་རྗེ་བཟློག་པའོ། །པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ། ཡི་དགས་ཐམས་ཅད་བཟློག་པའོ། །ཡཀྵ་ཨ་པསྨཱ་ར་བི་ནཱ་ཤ་
ཀཱ་རཱ་ཡ་ཕཊ། གནོད་སྦྱིན་ལ་སོགས་པ་བཟློག་པའོ། །ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བིགྷྣ་བི་ནཱ་ཤ་ཀ་རཱ་ཡ་ཕཊ། བགེགས་ཐམས་ཅད་བཟློག་པའོ། །སརྦ་ཤ་ཏྲཱུྃ་སྃ་
གྷ་བི་ནཱ་ཤ་ཀ་རཱ་ཡ་ཕཊ། དགེ་འདུན་གྱི་དགྲ་འདུལ་བའོ། །ནཱི་ལཱམ་བ་ར་དྷ་ར་བཛྲ་པཱ་ཎི་རཱཛྙཱ་པ་ཡ་ཏི་སྭཱ་ཧཱ། རྡོ་རྗེ་བེ་ཅོན་དྲག་པོ་ཆེ། །རྡོ་རྗེ་འཇིགས་པ་སྔགས་ཀྱི་བདག །རྡོ་རྗེ་ཁྲོ་བོ་བགེགས་ཀྱི་གཤེད། །
རྡོ་རྗེ་མི་ཐུབ་འཇིགས་པ་ཆེ། །རྡོ་རྗེ་ལས་ཀུན་གྲུབ་པ་ཆེ། །རྡོ་རྗེ་ལས་རྣམས་ཀུན་མཛད་པ། །སྔགས་ཀྱི་བདག་པོ་ཁྱོད་ཕྱག་འཚལ། །སྔགས་ཀྱི་ངོ་བོ་ཁྱོད་ཕྱག་འཚལ། །ལེའུ་དགུ་པའོ།། །།  
དེ་ནས་ཀླུ་དགུག་པའི་སྔགས་བསྟན་ཏེ། རྡོ་རྗེ་ལྕགས་ཀྱུ་རླུང་གི་སྦྱོར་བས་འགྲུབ་པར་འགྱུར། །དེ་བཞིན་མེ་ཡིས་ཀྱང་ནི་འདུལ་བར་ནུས་པ་ཡིན། །དེ་ལྟར་ནུས་ཕྱིར་དགུག་པའི་སྔགས་ནི་བཤད་པར་

89-1-293a

བྱ། །ཨོཾ་བཛྲ་པཱ་ཎི་མ་ཧཱ་ཡཀྵ་ནཱི་ལཱམ་བ་ར་ནཱ་ག་ཧྲཱིཿ་གྲྀཧྞ་གྲྀཧྞ་ཧཱུྃ་ཕཊ། ཨཱ་ཀར་ཥ་ཡ་ཨཱ་ཀར་ཥ་ཡ་ཧཱུྃ་ཕཊ། བསམ་གཏན་དྲག་པོས་བཟླས་པ་བྱ། །བཟླས་པ་འདི་ལ་རབ་འབད་བྱ། །ཀླུ་རིགས་དུ་མ་ཐམས་
ཅད་ཀུན། །འགུགས་འགྱུར་འདི་ལས་གཞན་དུ་མིན། །ཇི་སྲྀད་འགུགས་པའི་ཏིང་འཛིན་གྱིས། །ཁུགས་པར་གྱུར་པའི་ཀླུ་རྣམས་ཀུན། །ཟངས་གཞོང་ནང་དུ་སྤྱན་དྲངས་ཏེ། །ཁྲོ་བོའི་ཆེ་བ་བརྗོད་ནས་ནི། །དམ་ཚིག་
བསྲེ་ཞིང་དུག་རྣམས་གཞོམ། །སྨན་གྱི་མཆོག་གིས་གསོས་ནས་ནི། །གང་གནོད་ཕྱོགས་སུ་གཤེགས་སུ་གསོལ། །ལེའུ་བཅུ་པའོ།། །།  དེ་ནས་གཞན་ཡང་བཤད་བྱ་སྟེ། །ཞི་བའི་ལས་ཀྱིས་མི་འདུལ་
བའི། །ཀླུ་གཟིར་དྲག་སྔགས་བསྟན་པར་བྱ། །ཨོཾ་བཛྲ་པཱ་ཎི་མ་ཧཱ་ཡཀྵ་ནཱི་ལཱམ་བ་ར་ནཱ་ག་ཧ་ན་ཧ་ན་ཧཱུྃ་ཕཊ། ནཱ་ག་ད་ཧ་ད་ཧ་ཧཱུྃ་ཕཊ། ནཱ་ག་སྥོ་ཊ་སྥོ་ཊ་ཧཱུྃ་ཕཊ། ནཱ་ག་བི་སྥོ་ཊ་ཡ་བི་སྥོ་ཊ་ཡ་ཧཱུྃ་ཕཊ། ནཱ་ག་གརྫ་གརྫ་ཧཱུྃ་ཕཊ། 
ནཱ་ག་བྷིན་ད་བྷིན་ད་ཧཱུྃ་ཕཊ། བསམ་གཏན་རྡོ་རྗེ་ཐོགས་པ་ཡིས། །གདུལ་བའི་སྟེང་ནས་གདབ་པར་བྱ། །འོག་ཏུ་མེ་ཡི་འཁོར་ལོ་བསམ། །མེ་ཕུང་ཆེན་པོའི་ཏིང་འཛིན་གྱིས། །མེ་འབར་ཀློང་ཆེན་དཀྱིལ་དུ་གཟིར། །
ཡུངས་ཀར་ཡུངས་ནག་སྐེ་ཚེ་ཡིས། །བརྡེག་ཅིང་ཁྲོ་བོའི་སྤྲུལ་པ་སྤྲོ། །ཁྲ་སྤྱང་ལ་སོགས་རྩ་ལྔའི་གསོབ། །གཅན་གཟན་སྣ་ཚོགས་མཆེ་སྡེར་དང་། །མཆུ་སྡེར་དབབ་ཅིང་སྤྲུལ་པ་སྤྲོ། །མྱུར་དུ་ཐར་བར་གདོན་མི་
ཟ། །ལེའུ་བཅུ་གཅིག་པའོ།། །། དེ་ནས་འཕགས་པ་གོས་སྔོན་ཅན་པོ་ཅན་གྱིས་ཉིད་ལ་ཉིད་ཀྱིས་མཆོད་པ་ཕུལ་བ། ཧཱུྃ་རྡོ་རྗེ་བདུག་པ་མ། བདག་ཉིད་དྲི་ཡིས་རྒྱས་མཛད་མ། །བཛྲ་དྷཱུ་པེ་པཱུ་ཛ་མེ་ཧཱུྃ། །ཧཱུྃ་རྡོ་རྗེ་མེ་ཏོག་
མ། བདག་ཉིད་ཡོངས་སུ་བཀྲ་མཛད་མ། །བཛྲ་པུཥྤེ་པཱུ་ཛ་མེ་ཧཱུྃ། ཧཱུྃ་རྡོ་རྗེ་དྲི་ཆབ་མ། བདག་ཉིད་དངོས་པོ་དག་མཛད་མ། ། བཛྲ་གན་དྷེ་པཱུ་ཛ་མེ་ཧཱུྃ། ཧཱུྃ་རྡོ་རྗེ་མར་མེ་མ། བདག་ཉིད་དཀྱིལ་འཁོར་གསལ་མཛད་མ། །

89-1-293b

བཛྲ་ཨཱ་ལོ་ཀེ་པཱུ་ཛ་མེ་ཧཱུྃ། ཇི་སྲིད་ཐམས་ཅད་མཆོད་པ་ཆེ། །ཇི་སྲིད་མཆོད་པ་བདེ་བ་ཆེ། །ཇི་སྲིད་མཆོད་པ་བླ་ན་མེད། །ཇི་སྲིད་མཆོད་པ་ཡང་དག་ཆེ། །ཨེ་མ་ཧོ། ལེའུ་བཅུ་གཉིས་པའོ།། །། དེ་ནས་གཞན་ཡང་
བཤད་བྱ་བ། །བཅོམ་ལྡན་གསང་བ་གོས་སྔོན་ཅན། །བསྡུ་བ་ཐབས་ཀྱི་ཏིང་འཛིན་གྱིས། །འཁོར་གྱི་ཀླུ་རྣམས་སྡུད་མཛད་ནས། །མེ་ཡི་འཁོར་ལོ་སྙོམས་ཞུགས་ཚེ། །གསད་པ་མེ་ཡི་སྔགས་བཟླས་པས། །
ཀླུ་རྣམས་མ་ལུས་ཚིག་པར་མཛད། །བྲལ་ནས་དཔག་ཚད་གནས་སུ་བྲོས། །སླར་བསྡུས་བདུད་རྩི་སྨན་གྱིས་གསོས། །ལས་བཅོལ་སོ་སོའི་གནས་སུ་འཁོད། །དེ་ནས་ཁམས་གསུམ་རྣམ་པར་རྒྱལ། །ཐལ་མོ་
སྦྱར་ནས་འདི་སྐད་གསོལ། །མེ་བརྒྱད་འཁོར་ལོའི་བདག་ཉིད་ཆེ། །རྟག་ཏུ་མེ་ཡི་ཏིང་འཛིན་ལ། །སྙོམས་ཞུགས་ཁྱོད་ནི་རྒྱལ་གྱུར་ཅིག །བདེ་བའི་རོལ་མོ་མེ་ཀློང་དུ། །བསྲེགས་མཛད་མེ་བརྒྱད་ཁྱོད་ཕྱག་འཚལ། །རང་བཞིན་རྣམ་དག་ཁྱོད་ཕྱག་འཚལ།།
དག་ཕྱག་ཆུ་ཡི་ངང་ལ་གནས་འདོད་ན། །ཆུ་བརྒྱད་ཏིང་འཛིན་ལ་གནས་ཏེ། །དེ་ཚེ་འཁོར་གྱིས་འདི་སྐད་བསྟོད། །ཆུ་བརྒྱད་འཁོར་ལོའི་བདག་ཉིད་ཆེ། །རྟག་པ་ཆུ་ཡི་དཀྱིལ་འཁོར་ཅན། །འབྱུང་བའི་གཙོ་བོ་ཆུ་ཡི་བདག །
ཆུ་བརྒྱད་མངའ་བདག་ཁྱོད་ཕྱག་འཚལ། །རླུང་བརྒྱད་ཏིང་འཛིན་ལ་གནས་ན། །འཐོར་ཞིང་འབུད་པའི་བདག་ཉིད་ཆེ། །རླུང་ཆེན་དྲག་པོ་རྩལ་ཤུགས་ལྡན། །རླུང་ལྷ་གོས་སྔོན་ཁྱོད་ཕྱག་འཚལ། །ས་ཡི་ཏིང་འཛིན་
ལ་གནས་ནས། །མི་གཡོ་བརྟན་པའི་ལས་མཛད་པ། །གསེར་ལྡན་རོལ་མོ་སྣ་ཚོགས་ལྡན། །ས་བརྒྱད་འཁོར་ལོ་ཁྱོད་ཕྱག་འཚལ། །ལེའུ་བཅུ་གསུམ་པའོ།། །།  དེ་ནས་དཔལ་ལྡན་གོས་སྔོན་ཅན། །ཕྲ་མོའི་
ཏིང་འཛིན་ལ་གནས་ནས། །འཁོར་གྱི་གནོད་སྦྱིན་མང་པོ་ཀུན། །ཤིན་ཏུ་ཡིད་དགའ་དད་པས་ཞུས། །ཕྲ་མོའི་ཐིག་ལེ་ཆེན་པོ་ཡིས། །ཅིར་སྣང་དངོས་པོ་གཅིག་ཏུ་འདུས། །དེ་ཉིད་མཐའ་འདས་རང་བཞིན་མེད། །དེ་ནས་

89-1-294a

དཔལ་ལྡན་གོས་སྔོན་ཅན། །འདོད་ཆགས་ཏིང་འཛིན་ལ་གནས་པས། །འཁོར་གྱི་གནོད་སྦྱིན་མང་པོ་ཀུན། །སྔངས་དང་དུས་དང་བརྒྱལ་བ་ལས། །བསླང་སྟེ་བླ་མེད་དོན་བསྟན་པས། །ཐམས་ཅད་
འདོད་ཆགས་མངོན་སངས་རྒྱས། །འཁོར་གྱི་སྐུ་ལ་མངོན་པར་བསྟོད། །ཀྱེ་ཧོ་གསང་བདག་གོས་སྔོན་ཅན། །བླ་མེད་རྫོགས་པའི་ཀློང་དཀྱིལ་ན། །འདོད་ཆགས་དག་པའི་བློ་ལྡན་པས། །མངོན་པར་སངས་རྒྱས་ཁྱོད་
ཕྱག་འཚལ། །ལེའུ་བཅུ་བཞི་པའོ།། །། དེ་ནས་འདུས་པའི་འཁོར་རྣམས་ཀྱིས། །འཁོར་གྱི་གཙོ་ལ་མངོན་པར་བསྟོད། །ལྕང་ལོ་ཅན་གྱི་ཕོ་བྲང་ནས། །གསང་བའི་བདག་པོ་གོས་སྔོན་ཅན། །ཡོན་ཏན་
ཐམས་ཅད་སྐུ་ལ་རྫོགས། །དངོས་མེད་དག་པ་ཁྱོད་ཕྱག་འཚལ། །འཁོར་གྱི་ཀླུ་ཚོགས་འདུལ་བའི་ཕྱིར། །ཀླུ་བརྒྱད་སྐུ་ལ་རབ་བརྒྱན་ནས། །ཀླུ་ཚོགས་ཞལ་དུ་གསོལ་
མཛད་པ། །ཀླུ་འདུལ་བྱམས་པ་ཁྱོད་ཕྱག་འཚལ། །སྣ་ཚོགས་དག་པའི་སྐུ་མངའ་ཞིང་། །རིགས་དྲུག་སྡེ་བརྒྱད་འདུལ་བར་མཛད། །སྐྱོན་གྱིས་མ་གོས་རང་སངས་རྒྱས། །ཐོགས་མེད་ཀུན་འདུལ་ཕྱག་འཚལ་བསྟོད། །
ཅི་ལྟར་བསམ་པའི་དངོས་པོ་ཀུན། །ཁྱོད་ལས་འབྱུང་བས་མི་ཟད་གཏེར། །སྣ་ཚོགས་ཡིད་བཞིན་འཕྲུལ་པོ་ཆེ། །ཡིད་བཞིན་ནོར་བུ་ཁྱོད་ཕྱག་འཚལ། །ནད་དང་རིམས་ཀྱི་གཤེད་པོ་མཛད། །ནོར་དང་ཟས་ཀྱི་
བདག་པོ་མཛད། །འཇིགས་པ་ཀུན་ལས་སྐྱོབ་པར་མཛད། །བླ་མེད་སྐྱོབ་མཛད་ཁྱོད་ཕྱག་འཚལ། །ཞེས་བསྟོད་ནས་རྗེས་སུ་ཡི་རང་ངོ་། །ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་ལ་སོགས་པ་ཡང་ཡིད་
དགའ་བའི་མཆོད་པས་ཁྱབ་པར་གྱུར་ཏོ། །མི་ལ་སོགས་པ་འཇིགས་པའི་ཉེན་དང་ལྡན་པ་ཐམས་ཅད་བདེ་བ་ལ་བཀོད་དོ། །ལེའུ་བཅྭོ་ལྔ་པའོ།། །།འཕགས་པ་ལག་ན་རྡོ་རྗེ་གོས་སྔོན་པོ་ཅན་གྱི་ཆོ་ག་རྡོ་རྗེ་བེ་ཅོན་གྱི་རྒྱུད་རྫོགས་སྷོ།། །།

89-1-294b

༄༅། །རྒྱ་གར་སྐད་དུ། ནཱི་ལཱམྦ་ར་དྷ་ར་བཛྲ་པཱ་ཎི་བཛྲ་ཕཱ་ཎ་ཀསྟནྟྲ་ཏྲཻ་ལོཀྱ་བི་ཛ་ཡ་ནཱ་མ། བོད་སྐད་དུ། ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་གདེངས་པའི་རྒྱུད་ཁམས་གསུམ་ལས་རྣམ་པར་རྒྱལ་བ་ཞེས་བྱ་བ། དཔལ་རྡོ་རྗེ་གཏུམ་པོ་ལ་ཕྱག་འཚལ་ལོ། །དེ་ནས་གསང་བའི་
བདག་པོ་འཁོར་དེ་དག་ལ་རྣམ་པར་གཟིགས་ནས་རང་ཉིད་མཁའ་དབྱིངས་རྣམ་པར་དག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་སྲིད་པ་གསུམ་ཡང་རྣམ་པར་གཡོས་སོ། །དེ་ནས་རང་ཉིད་སྐུ་
དང་གསུང་དང་ཐུགས་རྣམ་པར་དག་པའི་རྡོ་རྗེ་ལས་སྔགས་འདི་ཕྱུང་ངོ་། །ཨོཾ་ན་མོ་གསང་སྔགས་རྒྱལ་པོ་སྨྲས་ཙམ་གྱིས། །ས་སྟེང་ས་རྣམས་བརྒྱལ་བར་འགྱུར། །ཀླུ་རྣམས་ཀུན་ཏུ་སྐྲག་ནས་ནི། །གསང་བདག་ཉིད་ལ་ཕྱག་འཚལ་ལོ། །སྙིང་རྗེ་ལྡན་ཞིང་མོས་
པ་བརྟེན། །གུས་ཤིང་བྱང་ཆུབ་སེམས་ལྡན་པའི། །ཕྱོགས་སུ་འགྲོ་བས་ཡིད་གནས་པའི། །ལྷ་དང་བླ་མ་མཉམ་མཆོད་ཅིང་། །བརྩོན་འགྲུས་ཤེས་རབ་ཆེ་བ་དེས། །རང་ཉིད་དང་ནི་གཞན་དག་ཏུ། །བདེ་ཞིང་ཉམས་དགའི་རི་ཕུག་གམ། །ཚལ་ལམ་མཚོ་
འམ་ལྗོངས་རྣམས་སུ། །ས་ཡི་དཀྱིལ་འཁོར་རྣམ་དག་པར། །བྱས་ནས་དྲི་ཆུས་ལེགས་བྱུགས་ནས། །བདེ་བའི་སྟན་ལ་འདུག་བྱས་ཏེ། །གསང་བའི་བདག་པོ་བསྒྲུབ་པར་བྱ། །གཞན་དུ་རི་ཁྲོད་རྩུབ་པ་འམ། །དུར་ཁྲོད་ཡ་མའི་ཁང་པ་ཡང་། །འཁྲུག་
ཅིང་གཡེང་དང་བཅས་པ་དང་། །རྒྱལ་པོས་གཟུང་ཞིང་གཏུམ་མོ་རྒྱུ། །འཇིགས་པའི་ཕྱོགས་ནས་གང་དག་རྣམས། །རྒྱལ་བ་བསྒྲུབ་པའི་གནས་ཡིན་ནོ། །དུས་འདིར་བྱུང་བའི་བློ་ཞན་རྣམས། །འཇིག་རྟེན་འདི་ཡི་གཡེང་བ་དང་། །ཚོགས་པ་ཐམས་ཅད་
སྐྱེད་པར་བྱེད། །ཆགས་པའི་སྟོབས་ཀྱི་ཆོས་ཉིད་ནི། །ཡང་དག་མི་རྟོག་དེ་ནི་སྐྱོན། །སྤྲུལ་པའི་གླང་པོ་དང་མཚུངས་སོ། །སྟོང་ཉིད་སྤྲོས་མེད་རང་བཞིན་ལས། །སྒྱུ་མའི་སྐུ་ནི་ཡོངས་འབྱུང་ཞིང་། །དང་པོ་སྟོང་ཉིད་རྡོ་རྗེ་སྟེ། །གཉིས་པ་ལ་ནི་
ཡི་གེ་ཧཱུཾ། །གསུམ་པ་རྡོ་རྗེ་རྩེ་དགུ་པ། །བཞི་པ་བཅོམ་ལྡན་གསང་བའི་བདག །ལྔ་པ་ལྷ་ནི་ཡོངས་སུ་རྫོགས། །མེ་ལོང་དང་ནི་མཉམ་ཉིད་དང་། །ཆོས་དབྱིངས་ཡེ་ཤེས་ལས་གྲུབ་པའི། །སྐུ་ནི་ཡེ་ཤེས་བདག་ཉིད་དོ། །དེ་

89-1-295a

རྫོགས་ཡེ་ཤེས་ཆེན་པོའོ། །ཡེ་ཤེས་སྐུ་ལས་ཡེ་ཤེས་ཀྱིས། །སྤྲུལ་པའང་ཡེ་ཤེས་ཉིད་དུ་གནས། །འཁོར་བའི་ཉོན་མོངས་ལས་འདས་ནས། །མི་རྟོག་ཡེ་ཤེས་མེ་ཕུང་ལ། །གསང་བའི་
བདག་ཉིད་ལེགས་པར་བཞུགས། །རྣམ་གྲོལ་རྣམ་དག་གྲོལ་བའི་རྒྱུ། །སྔགས་དབྱིབས་ཆོས་བདག་དོན་རྣལ་འབྱོར། །སྐད་ཅིག་སྐད་ཅིག་ཡེ་ཤེས་ལས། །སྒྱུ་མ་ལྟ་བུའི་སྒྱུ་མའི་སྐུ། །སྒྱུ་མ་ཉིད་ལ་རྣམ་གྲོལ་ཚེ། །
ཀྱེ་ཀྱེ་ཧ་ཧ་དཔའ་བོ་ཆེ། །ཀླུ་ཡི་དགྲར་གྱུར་འཇིགས་བྱེད་པོས། །གསང་བའི་བདག་པོ་རྡོ་རྗེ་ཅན། །ཉོན་མོངས་ལས་རྒྱལ་འཇིགས་སུ་རུང་། །དབང་ཕྱུག་ཁམས་གསུམ་ལས་རྒྱལ་བའི། །དེ་བས་བརྩོན་ལྡན་གང་ཡིན་
དེས། །ཤིན་ཏུ་བསྒྲུབ་པས་བསྒྲུབ་པར་བྱ། །བརྟན་པའི་ཡིད་སོས་པར་བྱེད་པས། །རྒྱལ་བ་གསང་བའི་བདག་པོའོ། །དེ་ནས་གསང་བའི་བདག་པོ་ཉིད། །དངོས་གྲུབ་ངེས་པར་འབྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ནས་སྐུ་དང་གསུང་དང་ཐུགས་རྣམ་པར་དག་པའི་རྡོ་རྗེ་ལས་བྱུང་བ། ཨོཾ་བཛྲ་པཱ་ཎི་སརྦ་ཨ་སིད་དྷི་ཀུ་རུ་ཀུ་རུ་སྭཱ་ཧཱ། ལྷ་ཀླུ་མི་མིན་དྲི་ཟ་འམ། །ཡང་ན་མི་ཡི་བུ་མོ་ཡི། །དཔྲལ་བར་ཐིག་ལེ་
བྲིས་ནས་ནི། །ལག་ཏུ་ལྕགས་ཀྱུ་ཐོགས་ལ་གཞག །དཀྱིལ་འཁོར་གྲུ་བཞི་ལྷམ་པ་ལ། །བརྟེན་ནས་བུམ་པས་བསྒྲུབ་པར་བྱ། །རྣམ་པར་རྒྱལ་བའི་བུམ་པར་ནི། །སྨན་ལ་སོགས་པས་ལེགས་
བཀང་ནས། །རས་ཀྱིས་དཀྲིས་ལ་གཞག་པར་བྱ། །རྒྱུན་ཏུ་དེ་ལས་བསྒྲུབ་གྱུར་ན། །ཞི་དང་རྒྱས་སོགས་དངོས་གྲུབ་དང་། །གཞན་ཡང་དངོས་གྲུབ་འགྲུབ་པར་འགྱུར། །དེ་ནས་ཡང་གསང་བའི་བདག་པོ་མི་འགྱུར་
བར་བྱེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དུག་ཐམས་ཅད་ཞི་བར་བྱེད་པའི་སྔགས་འདི་ཉིད་ཀྱིས་སྐུ་དང་གསུང་དང་ཐུགས་རྡོ་རྗེ་ཡང་དག་པ་ལས་ངེས་པར་ཕྱུང་ངོ་། །ཨོཾ་ན་གུ་ན་

89-1-295b

གེ་པྲོ་ཏྃ་ག་མ་ནི། ཙ་ར་པོ་རྃ་ཡ་ར་བ་རཱ་ཧྱཻད་ཧ་རི་ནྃ་བྲྃ། རིན་ཆེན་སྣོད་དུ་ཆུ་བླུགས་ནས། །སྔགས་ཀྱི་རྒྱལ་པོ་འདི་ལ་ནི། །བརྒྱ་ནས་ཇི་སྲིད་སྟོང་གི་བར། །བརྗོད་ན་འགྲོ་བའི་དུག་ནད་སེལ། །གཞན་ཡང་
གསང་སྔགས་རྒྱལ་པོ་ནི། །གསང་བའི་བདག་པོའི་སྦྱོར་བ་དང་། །བཅས་པས་མིང་དུ་བརྗོད་བྱས་ནས། །སྒྲུབ་པས་ཅི་ཡང་འགྲུབ་པར་འགྱུར། །ཟླ་བ་སྤྱང་ཀིས་
བཟུང་དུས་སུ་དཔྲལ་བར་གོ་རོ་ཙ་ནས་ཐིག་ལེ་བྱས་ཏེ་ཁ་ཤར་ཕྱོགས་སུ་གྱུར་ནས་གསང་སྔགས་འདི་བརྗོད་ན་ཅི་འདོད་པ་དབང་དུ་བྱེད་དོ། །ཡང་ཟླ་བའམ་ཉི་མ་གཟས་བཟུང་བའི་ཚེ་ཀླུའི་གན་ནས་མི་ཁྲག་གིས་
ལུས་བྱུགས་ཏེ་སྔགས་འདི་བརྗོད་ན་ཀླུ་ཐམས་ཅད་དབང་དུ་འགྱུར་རོ། །འདི་ལ་ཐེ་ཚོམ་མེད་དོ། །གཞན་ཡང་སྦྱོར་བ་བཤད་པར་བྱ། །གུར་གུམ་དང་ནི་འགི་ཝང་གིས། །རྩིབས་བརྒྱད་པ་ཡི་འཁོར་ལོ་ལ། །དང་
པོའི་སྔགས་བཞི་དག་དང་ནི། །ཐ་མའི་སྔགས་རྣམས་བྲི་བར་བྱ། །མུ་ཁྱུད་གཉིས་ལ་རྩ་བ་ཡི། །གསང་སྔགས་རྒྱལ་པོ་རིམ་གྱིས་བྲི། །རིན་ཆེན་སྣོད་བཞག་མཆོད་བྱས་ནས། །གསང་སྔགས་སྟོང་
སོགས་བརྗོད་ནས་ནི། །རྒྱལ་མཚན་རྩེ་ལ་གདགས་པར་བྱ། །གཞན་གྱི་རིག་སྔགས་གཅོད་པར་བྱེད། །གལ་ཏེ་ཆར་པ་དབབ་པར་འདོད་ན་སའི་དཀྱིལ་འཁོར་གྲུ་བཞི་པར་བྱས་ཏེ། དབུས་སུ་པད་མ་འདབ་
མ་བརྒྱད་པ་བྲིས་ལ་དེའི་སྟེང་དུ་ཀླུའི་རྒྱལ་པོ་བརྒྱད་ཀྱི་གཟུགས་བྱས་ཏེ་གཞན་ལ་རང་ཉིད་ཁྲོ་བོའི་རྒྱལ་པོ་གོས་སྔོན་པོ་ཅན་དུ་བྱས་ཏེ། སྨན་སྣ་ཚོགས་དང་། འོ་མ་དང་འབྲས་ཆན་དང་། ཞོ་ལ་སོགས་པ་རྣམས་
དང་། ཀ་ར་དང་བུ་རམ་ལ་སོགས་པས་མཆོད་ནས་གོས་དཀར་པོ་བགོས་ཏེ་ཧཱུྃ་འབྲུག་གི་སྒྲ་ལྟ་བུ་བརྗོད་པས་མགོ་འདྲེན་པའི་གསང་སྔགས་ཀྱི་རྒྱལ་པོ་བརྗོད་པས་ཆར་འབེབས་པར་བྱེད་དོ། །གལ་ཏེ་

89-1-296a

མ་འབེབས་ན་ཀླུ་རྣམས་བསྡིགས་པའི་ཕྱིར། དཀྱིལ་འཁོར་དེའི་སྟེང་དུ་ཁྲག་སྣ་ཚོགས་དང་། དུག་ཤིང་ལ་སོགས་པས་སྦྱིན་བསྲེག་བྱའོ། །དེས་མྱུར་དུ་ཆར་འབེབས་པར་བྱེད་དོ། །གལ་ཏེ་ཆར་ཆེས་པ་
འམ་སེར་བ་གཅོད་པར་འདོད་པས་ཉེར་ཤིང་དང་དུག་ཀ་ད་བའི་རྩ་བ་ལ་ཡི་གེ་བྲིས་ཏེ། །དཀྱིལ་འཁོར་དཀར་པོའི་དབུས་སུ་བཙུགས་ལ་ཡུངས་ཀར་དང་ཐལ་བ་ལ་མང་དུ་བཟླས་པར་བྱའོ། །གལ་ཏེ་མི་འདོད་ན་
བསྔགས་པ་ཙམ་གྱིས་ཀྱང་ངེས་པར་འབྱུང་ངོ་། །རྟའི་ཁྲག་དང་དུག་སྣ་ཚོགས་ཀྱིས་བརྒྱལ་བ་ལས་སོས་པར་བྱེད་དོ། །རླུང་ཞི་བར་འདོད་ན་དབང་ཕྱུག་གི་གོས་ལ་ཙ་ཏ་པ་ལ་རི་རྩི་བས་སྔགས་བྲིས་ཏེ་དཀྱིལ་འཁོར་གྱི་སྟེང་
དུ་བཞག་ནས། སྔགས་ཀྱི་རྒྱལ་པོ་སྟོང་ལ་སོགས་པ་ཅི་ནུས་པ་བརྗོད་ནས་ཁང་པའི་སྟེང་དུ་བཞག་ན་རླུང་ཞི་བར་བྱེད་དོ། །གལ་ཏེ་ཡམས་ཞི་བར་འདོད་པས་གུར་གུམ་དང་། གི་ཝང་གི་རྩེ་མོ་བཅུ་གཉིས་པར་
བྲིས་ནས་དང་པོའི་སྔགས་རྣམས་དང་། ཐ་མའི་སྔགས་རྣམས་རྩིབས་ལ་བྲིས་ཏེ། མུ་ཁྱུད་ལ་སྔགས་ལྷག་མ་བྲིས་ཏེ་མེ་ཏོག་དང་འབྲས་བུ་སེར་པོ་ཐམས་ཅད་མཆོད་ཅིང་གསོལ་བ་བཏབ་ནས་གཙུག་ལག་གི་རྩེ་
མོ་འམ། དགེ་འདུན་གྱི་འདུ་བའི་སྒོ་གོང་ལ་བཏགས་ན་ཅི་འདོད་པ་འགྲུབ་ཅིང་ནད་ཡམས་ཐམས་ཅད་འཆད་པར་འགྱུར་རོ། །གལ་ཏེ་བུ་འདོད་པས་སེའུ་ཀྱ་དམར་པོའི་སྡོང་བུ་ལ་སྟེང་དུ་སྦྱིན་བསྲེག་བྱས་
ན་བུ་སྟེར་བར་ངེས་སོ། །གལ་ཏེ་གཏེར་འདོད་པས་སའམ། རིན་པོ་ཆེ་ལ་རྣམ་ཐོས་སྲས་ཀྱི་གཟུགས་ཁྲུ་གང་པ་བྱས་ནས་རིན་པོ་ཆེའམ་སྤང་ལེབ་ཀྱི་སྟེང་དུ་བཞག་ནས་མཆོད་པ་རྣམ་པ་སྣ་ཚོགས་
ཕུལ་ནས་གསོལ་བ་བཏབ་ན་ཞག་བདུན་ནས་རིན་པོ་ཆེ་སྟེར་བར་བྱེད་དོ། །གལ་ཏེ་ཤི་བར་དོགས་པས་དཀྱིལ་འཁོར་ཁྲུ་གང་ཟླུམ་པོ་སེར་པོར་བྱས་ནས་དབུས་སུ་བུམ་པ་ལེགས་པར་བཞག་

89-1-296b

པའི་ནང་དུ་སྨན་སྣ་ཚོགས་བླུགས་ནས་རས་དཀར་པོས་ཁ་བཀབ་པར་བྱས་ཏེ། གསང་སྔགས་ཀྱི་རྒྱལ་པོ་མང་དུ་བརྗོད་ནས་ཕྱིས་བུམ་པ་ལ་དངོས་གྲུབ་བླངས་ན་ཅི་འདོད་པ་འགྲུབ་བོ། །དེ་ལྟར་ཡང་ཡང་
བྱས་པས་ཚེའི་དངོས་གྲུབ་ཐོབ་པར་འགྱུར་རོ། །གལ་ཏེ་མཆོག་གྲུབ་པར་འདོད་པས་ས་འམ་རིན་པོ་ཆེ་ལ་ཕྱག་ན་རྡོ་རྗེ་ཞལ་གཅིག་ཕྱག་གཉིས་པ་གདན་པད་མ་དང་ཉི་མ་ལ་གནས་པར་བྱས་ནས་དེ་རིན་
པོ་ཆེའི་སྣོད་དུ་བཞག་ལ་མཎ་ཌལ་དཀར་པོ་ཁྲུ་གང་བ་བྱས་པའི་སྟེང་དུ་ཁྲིའུའི་སྟེང་དུ་བཞག་ལ་མེ་ཏོག་དང་གོས་དཀར་པོས་མཆོད་ཅིང་ཙན་དན་དཀར་པོའི་ཆུས་ཅི་ནུས་པར་མཆོད་པར་བྱེད་ཅིང་། ཡང་ཚེས་
བརྒྱད་དང་། བཅུ་བཞི་དང་། བཅྭ་ལྔ་དང་། གནམ་སྟོང་ལ་དེའི་དུས་སུ་སྨྱུང་བ་བྱས་ནས། ཕྱིས་ནི་བརྒྱད་སྟོང་གི་གྲངས་སུ་གསང་སྔགས་འདོན་པར་བྱེད་ཅིང་རང་ཉིད་ཀྱི་སྤྱི་བོར་ཡི་གེ་ཨོྂ་དཀར་པོ་འོད་དང་ལྡན་པས་
བདུད་རྩིའི་ཆུ་འབེབས་པར་བསམ་པས་ཁམས་གསུམ་པའི་ནད་ཐམས་ཅད་ཟད་པར་བསམ་ཞིང་སླར་རང་ཉིད་ལ་རིམས་ཀྱིས་ཞུ་བར་བྱེད་པ་ནི་རྒྱུད་ལས་གྲུབ་པའི་བསམ་གཏན་ཏེ། འདི་གོམས་
པས་གང་དང་གང་འདོད་པ་ཐམས་ཅད་འགྲུབ་ཅིང་ཁམས་གསུམ་གྱི་དབང་ཕྱུག་ཏུ་འགྱུར་རོ། །གསང་བའི་བདག་པོ་ང་ལས་ཉོན། །འཇིག་རྟེན་ཀུན་ལས་རྣམ་རྒྱལ་བའི། །སྐུ་ནི་སངས་རྒྱས་
ཀུན་བདག་ཉིད། །གང་གིས་བགོས་པར་གྱུར་པ་ལས། །ཅི་འདོད་རྙེད་པར་བྱེད་པ་མཆོག །གལ་ཏེ་རྟོག་མེད་དེ་བྲལ་ན། །ཡེ་ཤེས་ཉིད་ནི་བླ་ན་མེད། །རྒྱལ་བའི་སྟོབས་ཀྱིས་རྟོགས་པར་བྱེད། །ཉོན་མོངས་
ཀུན་ལས་རྒྱལ་བྱེད་ཅིང་། །ནད་རྣམས་ཐམས་ཅད་ཟད་བྱེད་ཅིང་། །གལ་ཏེ་ནད་མེད་ནད་བཅས་བྱེད། །དབང་དང་རེངས་དང་དགུག་པ་དང་། །བརྒྱལ་དང་གསད་དང་དབང་ཕྱུག་དང་། །ཞི་དང་བསྲུང་

89-1-297a

དང་དཔལ་བྱེད་དང་། །ཕྱིར་རྒྱོལ་བ་རྣམས་བརླག་པ་ཡི། །ཕྲ་མོ་འགྲུབ་པ་སྨོས་ཅི་དགོས། །འཇིག་རྟེན་ལས་གྲོལ་བདེ་བའི་ལུས། །རྒྱལ་བའི་གསུང་གིས་ལེགས་འཐོབ་བོ། །སྐུ་ནི་འདིར་བརྗོད་མེད་པས་ཏེ། །
སྤྱོད་ཚུལ་རྣམས་ལས་འདས་པའོ། །མིང་དང་ཚོགས་ལས་རྣམ་འདས་ན། །ཉེར་ཞི་སྤྲོས་ལས་ཤིན་དུ་འདས། །ཚིག་གི་ཡུལ་ནི་རྣམ་པར་བྲལ། །རྡོ་རྗེ་སྒོ་ལ་དེ་དག་ནི། །ཅི་བཞིན་དོན་ནི་ཤེས་འགྱུར་གྱི། །གཞན་དུ་
བསྐལ་པ་སྟོང་དུ་ཡང་། །ཅིས་ཀྱང་ཤེས་པར་ག་ལ་ནུས། །གལ་ཏེ་དམིགས་པ་ཟད་འདོད་པས། །མི་དམིགས་སྤྲོས་མེད་གང་ཞིག་ལ། །རང་གི་སེམས་ཉིད་གཞག་པར་བྱ། །དེ་ལ་ཐར་པས་གྲོལ་བའོ། །
གལ་ཏེ་དགའ་འགྱུར་ཡིད་ཡོད་ན། །དངོས་འདི་ཤེས་པས་ཅི་སྟེ་སྟོང་། །དེ་སྟོང་སྤྲོས་དང་བྲལ་བ་ལ། །ཤེས་པ་ཉིད་ནི་ཅི་ལ་བརྟེན། །གསང་སྔགས་དྲག་པོའི་སྦྱོར་བ་འདི། །དབང་བསྐུར་གནང་བ་མེད་པ་དང་། །ཚུལ་ངན་
ལང་ཚོ་ཕྲ་བ་དང་། །ང་རྒྱལ་དྲེགས་ཤིང་ཁེངས་པ་དང་། །ཐེག་པ་ཆེ་ལ་མ་མོས་ལ། །ཡི་གེ་ཙམ་ཡང་བསྟན་པ་མིན། །གལ་ཏེ་བརྒྱ་ལམ་རྨོངས་པ་འགས། །བསྟན་ན་རང་ཉིད་ཕུང་བར་བྱེད། །དེ་སྐད་དུ་ཁམས་གསུམ་
ལས་རྣམ་པར་རྒྱལ་བ་ཞེས་བྱ་བའི་འོད་ཟེར་དེ་སླར་རང་གི་ཐུགས་ཀར་བསྡུས་ནས་ཞལ་ཐམས་ཅད་ཞལ་ལ་ཐིམ་ཞིང་ཕྱག་ཐམས་ཅད་ཕྱག་ལ་ཐིམ་ནས། ཞལ་གཅིག་ཕྱག་གཉིས་པར་གྱུར་ཏེ། 
ཧཱུྃ་ཧཱུྃ་ཧཱུྃ་ཞེས་པའི་གླུ་བླངས་སོ། །འདི་ལ་ཅི་ལྟར་དམིགས་བྱས་བཞིན། །ལྷ་རྣམས་ཀུན་ལ་དམིགས་པར་འགྱུར། །གསང་སྔགས་འབུམ་དུ་བརྗོད་བྱས་ནས། །བསྙེན་པའི་དམ་པ་འདི་འགྲུབ་བོ། །འདས་དང་མ་འོངས་
འོངས་གྱུར་པའི། །སངས་རྒྱས་རྣམས་ཀྱིས་སྔགས་འདི་བཤད། །འདི་ནི་སངས་རྒྱས་ཀུན་གྱི་གསང་། །ཡེ་ཤེས་ཆེན་པོ་ཞེས་བརྗོད་དོ། །དེ་ནས་འཁོར་དེ་དག་ཐམས་ཅད་ནི་གཙོ་བོའི་ཐུགས་ཀར་ཐིམ་པར་

89-1-297b

གྱུར་ཏོ། །ཀྭའི་རྡོ་རྗེ་ཆེན་པོ་ནི། །ལག་ན་རྡོ་རྗེ་སྟོབས་པོ་ཆེ། །དུས་གསུམ་སངས་རྒྱས་ཐམས་ཅད་ཀྱི། །གསང་བའི་མཛོད་འཛིན་གྱུར་པའོ། །བཅོམ་ལྡན་འདས་ཕྱག་ན་རྡོ་རྗེ་གོས་སྔོན་པོ་ཅན་གྱི་རྡོ་རྗེ་གདེངས་པའི་རྒྱུད་
ལས་ཁམས་གསུམ་རྣམ་པར་རྒྱལ་བ་ཞེས་བྱ་བའི་ལེའུ་རྫོགས་སྷོ།། །། པཎ་ཌི་ཏ་ཨ་ཌ་ཡ་ཤྲཱི་མ་ཏི་ཞེས་བྱ་བ་དང་། བོད་ཀྱི་ལོ་ཙྪ་བ་བན་དྷེ་ཆོས་ཀྱི་དབང་ཕྱུག་གྲགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།
༄༅། །རྒྱ་གར་སྐད་དུ། ཤྲཱི་བཛྲ་ཙཎ་ཌ་ཙིཏ་ཏ་གུ་ཧྱ་ཏན་ཏྲ། བོད་སྐད་དུ། དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད། དཔལ་གཏུམ་པོ་ཕྱག་ན་རྡོ་རྗེ་ལ་ཕྱག་འཚལ་ལོ། །འདི་སྐད་བདག་
གིས་ཐོས་པ་དུས་གཅིག་ན། འོག་མིན་གྱི་གནས་ལྕང་ལོ་ཅན་གྱི་ཕོ་བྲང་ན་སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་ལ་གཟིགས་པའི་བདེ་བར་གཤེགས་པ་ཐམས་ཅད་ཆོས་ཀྱི་སྐུ་དང་། ལོངས་སྤྱོད་
རྫོགས་པའི་སྐུ་དང་། སྤྲུལ་པའི་སྐུ་དང་། རྡོ་རྗེའི་སྐུ་དང་། མངོན་པར་བྱང་ཆུབ་པའི་སྐུས་འགྲོ་བའི་དོན་མཛད་དོ། །བརྗོད་མེད་དོན་གྱི་གསུང་དང་། དགོངས་པ་བརྡའི་གསུང་དང་། ཚངས་པ་དབྱངས་ཀྱི་གསུང་དང་། དབྱེར་མི་ཕྱེད་པའི་
གསུང་དང་། རིག་པ་བྱིན་གྱིས་བརླབས་ཀྱི་གསུང་གིས་འགྲོ་བའི་དོན་མཛད་དོ། །ཆོས་ཀྱི་དབྱིངས་ཀྱི་ཐུགས་དང་། མེ་ལོངས་ལྟ་བུའི་ཐུགས་དང་། མཉམ་པ་ཉིད་ཀྱི་ཐུགས་དང་། སོ་སོར་ཀུན་རྟོག་གི་ཐུགས་དང་། 
བྱ་བ་གྲུབ་པའི་ཐུགས་ཀྱིས་འགྲོ་བའི་དོན་མཛད་དོ། །གནས་དང་། གདན་ཁྲི་དང་། འཁོར་དང་། འདུལ་བའི་ཞིང་དང་། སྐུ་འོད་ཟེར་བསམ་གྱིས་མི་ཁྱབ་པས་འགྲོ་བའི་དོན་མཛད་དོ། །ཞི་བ་དང་། རྒྱས་པ་དང་། དབང་དང་། 
དྲག་པོ་དང་། ལྷུན་གྱིས་གྲུབ་པའི་ཕྲིན་ལས་ཀྱིས་འགྲོ་བའི་དོན་མཛད་དོ། །དེའི་ཚེ་དེའི་དུས་ན། བཅོམ་ལྡན་འདས་རིགས་ལྔ་དང་། རིགས་གསུམ་ལ་སོགས་པའི་སངས་རྒྱས་ཀྱིས་སེམས་ཅན་འདུལ་

89-1-298a

བའི་དུས་ལ་བབ་པར་གཟིགས་ནས་མ་ཆགས་པའི་ཐུགས་རྗེས་རྣམ་པ་སྣ་ཚོགས་པའི་སྤྲུལ་པས་འགྲོ་བའི་དོན་མཛད་པའོ། །དེའི་ཚེ་ན་ལྷ་མ་སྲིན་ཤིན་དུ་དྲེགས་པ་དང་། 
དྲེགས་པའི་རུ་དྲཿ་ཞེན་ཆགས་ཀྱི་འདམ་ན་གནས་པ། ང་རྒྱལ་གྱི་རི་རབ་ལ་གནས་པ་ཕྲག་དོག་གི་རླུང་སེམས་ལ་འཚུབ་པ། གཏི་མུག་མུན་པའི་གཡུང་དྲུང་ན་གནས་པ། དེ་ལྟ་བུ་དག་འདུལ་བའི་དུས་ལ་བབ་པར་
གཟིགས་ནས་དེ་བཞིན་གཤེགས་པ་ཐམས་ཅད་ཐུགས་གཅིག་ཏུ་གྱུར་ཏེ། མི་གནས་པའི་ཡེ་ཤེས་ཆེན་པོ་ལས་རྡོ་རྗེའི་རིགས་དང་བུད་དྷའི་རིགས་དང་། རིན་པོ་ཆེའི་རིགས་དང་། པད་མའི་རིགས་དང་། 
ལས་ཀྱི་རིགས་སུ་གྱུར་ཏེ། སོ་སོའི་ཡུམ་དང་ཆས་ནས་བཞུགས་ཏེ་ཐུགས་འདུས་པའི་བྱིན་གྱིས་བརླབས་ལས་ཐམས་ཅད་ཀྱི་རིགས་ཀྱི་སངས་རྒྱས་སྐུ་བཻ་དཱུརྱའི་རང་བཞིན་ལྟར་སྔོ་བ། སྔོན་པོར་སྣང་
བ་སྔོ་བར་གྱུར་པ། རིན་པོ་ཆེ་ཨིནྡྲ་ནཱི་ལ་ལྗང་གུ་ལྟ་བུའི་ཁ་དོག་ཏུ་སྣང་བ། ལྕང་ལོ་ཅན་གྱི་ཆ་བྱད་ཕྱག་ན་རྡོ་རྗེ་བསྣམས་ནས་ཐུགས་ཀར་བརྟན་པ་བྱུང་ངོ་། །བྱུང་བར་གྱུར་ཏོ། །དེའི་མཐུ་དང་སྟོབས་
ཀྱིས་འཇིག་རྟེན་ན་གནས་པའི་དྲེགས་པ་ཅན་བརྟུལ་ཏེ། དམ་ལ་བཏགས་ནས་བྱང་ཆུབ་མཆོག་ཏུ་སེམས་བསྐྱེད་དོ། །དཔལ་རྡོ་རྗེ་གཏུམ་པོ་ཐམས་ཅད་གསང་བའི་རྒྱུད་ལས་གླེང་གཞིའི་ལེའུ་སྟེ་དང་པོའོ།། །།  
ཡང་དེའི་ཚེ་ན་ཉོན་མོངས་པ་ལ་གནས་པའི་སེམས་ཅན་ཞི་བས་མི་འདུལ་བར་གྱུར་པ་དག་གནས་པ་ལས་རིགས་ལྔའི་བཅོམ་ལྡན་འདས་རྣམས་ཀྱིས་གསང་བའི་བདག་པོ་ལ་བཀའ་བསྒོ་བ་སྟེ། 
ཀྱེ་གསང་སྔགས་དང་རིག་སྔགས་དང་གཟུངས་སྔགས་ཀུན་གྱི་བདག་པོ་ཞི་བས་མི་འདུལ་བའི་སེམས་ཅན་ལ་ཐམས་ཅད་ཁྲོས་པའི་ཚུལ་གྱིས་གདུལ་བར་གྱིས་ཤིག་ཅེས་བཀའ་སྩལ་ཏོ། །
89-1-298b

ཨོཾ་བཛྲ་པཱ་ཎི་ཀྲོ་དྷ་ཀྲྀ་དྷ་ཧཱུྃ་ཧཱུྃ་ཞེས་ཆེད་དུ་བརྗོད་པ་ལན་གསུམ་ལན་གསུམ་ཆེད་དུ་བརྗོད་པ་ལས་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་ཅན་མཆེ་བ་གཙིགས་ཤིང་འཚམ་པ་མིག་མེ་
མདག་གི་ཕུང་པོ་ལྟར་འབར་བ། དབུགས་དུར་ཁྲོད་ཀྱི་མེ་ལྕེ་ལྟར་འབར་བ། འཇིགས་པའི་ང་རོ་བསྐལ་པའི་དུས་མཐའ་ལྟར་སྒྲོགས་པ་ལག་པ་དང་རྐང་པ་ཀླུའི་རྒྱལ་པོ་ནོར་བུ་དང་ནོར་རྒྱས་
ཀྱི་བུས་བརྒྱན་པ། ཀླུའི་རྒྱལ་པོ་ནག་པོ་དང་ཉེ་གནག་ནག་པོས་སེ་རལ་ཁར་བརྒྱན་པ། ཀླུའི་རྒྱལ་པོ་དགའ་བོ་དང་ཉེ་དགའ་བོ་འབར་བས་རྣ་ཆ་བྱས་པ་སྦྲུལ་གདུག་པ་འབར་བ་ཟ་བ། བཞིན་
རྒྱས་པ། སྨིན་མ་སེར་ནག་དཔྲལ་བ་ལ་བསྡུས་པ། གཤིན་རྗེའི་ཆ་བྱད་ཅན། ལྕེ་གློག་ལྟར་འགྱུ་བ། གསུས་པོ་ཆེ་སྦྲུལ་ཟ་བ། ལག་པའི་ཐལ་མོ་བརྡབས་པའི་སྒྲས་འཇིགས་པར་བྱེད་པ། 
ཀླུའི་རྒྱལ་པོ་འདབ་བཟངས་སྐ་རགས་སུ་བཅིངས་པ། ཨ་ལ་ལ་ཞེས་འཇིགས་པར་བྱེད་པ། སྐྲག་པར་བྱེད་པ། རྒྱ་མཚོའི་ཟབས་སུ་དཔག་ཚད་བརྒྱད་ཁྲི་ཡོད་པ་རྐང་པའི་པུས་མོ་ཙམ་དུ་
ཕྱིན་པ། དབང་པོ་དང་ཉི་མ་ཕྲག་པ་ལ་ཁུར་བ། ཀླུ་ཐམས་ཅད་རླག་པར་བྱེད་པ། ཧ་ལའི་གད་རྒྱངས་ཆེན་པོ་དགོད་པས་ཀུན་དུ་འཁྲུག་པར་བྱེད་པ། ཁམས་གསུམ་འཇིགས་ཤིང་སྐྲག་པར་བྱེད་
པ། ཀླུ་རྣམས་འཆི་བར་བྱེད་པ་ཞིག་བྱུང་སྟེ། རང་གི་གཟུངས་སྔགས་འདི་ཆེད་དུ་བརྗོད་དོ། །ཏདྱ་ཐཱ། བྷོ་བྷོ་བ་ན་ནཱ་ག་ཨ་དྷི་པ་ཏ་ཡེ་ཨི་དན་ནཱི་ལཱམ་བ་ར་དྷ་ར་ཤ་རཱི་རྃམ། བཛྲ་པཱ་ཎི་ཧྲྀ་ད་ཡྂ། ཡཿས་
མཱ་ཏི་ཀྲ་མ་ཐ། མཱ་ཀུ་ལ་ཨུད་སཱ་ད་ནྂ་བྷ་བི་ཥྱྂ་ཏི། ཏདྱ་ཐཱ། བུད་དྷ་བུད་དྷ་བི་བུད་དྷ་བི་བུད་དྷ། མཱ་ཏི་ཀྲ་མ་ཐ། ཧ་ར་ཧ་ར་ནཱ་གཱ་ནཱྃ་པྲ་ཧ་ར་པྲ་ཧ་ར་ནཱ་གཱ་ནཱྃ།  ཙྪིྂ་ད་ཙྪིྂ་ད་ནཱ་ག་ཧྲྀ་ད་ཡཱ་ནི། བྷིན་ད་བྷིན་ད་ནཱ་གཱ་

89-1-299a

མརྨཱ་ཎི། བི་ཤཱིཪྻནྟུ་ནཱ་ག་ཤ་རཱི་རྃ། བི་སྥོ་ཊ་ཡ་ནཱ་ག་ན་ཡ་ནཱ་ནི། ཏདྱ་ཐཱ་ཧཱུྂ་ཕཊ། ནཱ་ག་བི་དཱ་ར་ཎཱ་ཡ་ཕཊ། ནཱ་གོ་ཏ་སཱ་ད་ནཱ་ཡ་ཕཊ། ནཱི་ལཱམ་བ་ས་ནཱ་ཡ་ཕཊ། ཨ་པྲ་ཏི་ཧ་ཏ་བ་ལ་པ་ར་ཀྲ་མཱ་ཡ་ཕཊ། ཀྲྀ་ཏཱ་ན་
ཏཱ་ཡ་ཕཊ། ཀྲྀ་ཏཱན་ཏ་རུ་པཱ་ཡ་ཕཊ། རོ་ཥ་ཎཱ་ཡ་ཕཊ། ཏྲཱ་ས་ནཱ་ཡ་ཕཊ། ཀུསྨཱྂ་ཌོཏྶཱ་ད་ནཱ་ཡ་ཕཊ། པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ། ཡཀྵ་ཨ་པསྨཱ་ར་བི་ནཱ་ཤ་ཀ་རཱ་ཡ་ཕཊ། ཧ་ས་ཧ་ས། དཱ་ར་དཱ་ར། མཱ་ར་
ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བིགྷྣ་བི་ནཱ་ཤ་ད་ཀ་རཱ་ཡ་ཕཊ། སརྦ་ཤ །ཏྲུྃ་སྃ་གྷ་བི་ནཱ་ཤ་ཀ་རཱ་ཡ་ཕཊ་ནཱི་ལཱྂ་བ་ར་དྷ་ར་བཛྲ་པཱ་ཎི་རཱ་ཛྙཱ་པ་ཡ་ཏི་སྭཱ་ཧཱ། དེ་སྐད་ཅེས་བཀའ་སྩལ་མ་ཐག་ཏུ་དྲེགས་པ་
ཅན་ཕལ་པ་དག་རི་མོ་བཞིན་གཡོ་བ་མེད་པར་གྱུར་ཏེ། བརྒྱལ་རབ་ཏུ་བརྒྱལ་བ་ལས་ཕྱིར་དྲན་པ་སངས་ནས་འདི་སྐད་ཅེས་གསོལ་ཏོ། །ཀྱེ་གསང་བའི་བདག་པོ་ཁྱོད་ནི་ཐུགས་རྗེའི་མངའ་བདག་
ཀུན་གྱི་མགོན་དང་སྐྱབས་སུ་གྱུར་པ་ལགས་ན་བདག་ཅག་གི་སྡུག་བསྔལ་འདི་ལས་ཐར་བར་མཛད་དུ་གསོལ་ཞེས་གསོལ་ཏོ། །དེ་ནས་དྲེགས་པ་ཅན་དེ་དག་དམ་ལ་བཏགས་ཏེ་དབང་བསྐུར་དམ་ཚིག་ཕོག་
ནས་བྱང་ཆུབ་ཏུ་སེམས་བསྐྱེད་དོ། །དཔལ་རྡོ་རྗེ་གཏུམ་པོ་ཐམས་ཅད་གསང་བའི་རྒྱུད་ལས་དྲེགས་པ་ཅན་ཕལ་པ་བཏུལ་བའི་ལེའུ་སྟེ་གཉིས་པའོ།། །། དེ་ནས་འཇིག་རྟེན་གྱི་དྲེགས་
པ་དག་ཤིན་དུ་ཡང་དྲེགས་པར་གྱུར་པ་དག་འདི་ལྟ་སྟེ་ཀླུ་རྒྱལ་རིགས་ཀྱི་རྒྱལ་པོ་རྒྱ་མཚོ་ཞེས་བྱ་བ་དང་། རྗེའུ་རིགས་ཀྱི་རྒྱལ་པོ་ཀུན་ནས་གདུགས་ཤེས་བྱ་བ་དང་། བྲམ་ཟེའི་རིགས་ཀྱི་རྒྱལ་པོ་ཆུ་ལྷ་
ཞེས་བྱ་བ་དང་། གདོལ་པའི་རྒྱལ་པོ་ཤུ་ལ་པུ་ཀ་ར་ཞེས་བྱ་བ་དང་། བདུད་ཀྱི་རྒྱལ་པོ་སྐོས་རྗེ་དྲང་དཀར་དང་། གཟའ་རྒོད་ཆེན་པོ་དང་། དཀར་པོ་དུང་གི་ཐོར་ཚུགས་ཅན་དང་། བཙན་གྱི་རྒྱལ་པོ་དམར་

89-1-299b

པོ་སྲོག་ལེན་དང་། གཤིན་རྗེའི་རྒྱལ་པོ་རྨིག་པ་དང་། མ་མོའི་རྒྱལ་མོ་མཁའ་དབྱིངས་ཀྱི་ཡུམ་དང་། གཤིན་རྗེའི་སྲིང་མོ་ཕུང་བྱེད་རེ་མ་ཏི་ལ་སོགས་པ་དང་། ཤིན་དུ་དྲེགས་པ་ཅན་གྱིས་འཇིག་རྟེན་
ཕུང་བར་བྱེད་པ་དག་མ་ཐུལ་བ་ལ་ལོངས་སྤྱོད་རྫོགས་པའི་སྐུ་ལྔས་ཀྱེ་གསང་བའི་བདག་པོ་དྲེགས་པ་ཕོ་མོ་དག་ཐུལ་བར་མ་གྱུར་ཏེ། ཐམས་ཅད་ཀྱི་ཐབས་ཀྱིས་དྲེགས་པ་ཉོན་མོངས་པ་གདུལ་བར་
བྱའོ་ཞེས་བཀའ་སྩལ་ཏོ། །དུས་གསུམ་གྱི་སངས་རྒྱས་ཐམས་ཅད་ཀྱང་གསང་བའི་བདག་པོ་ལ་འདི་སྐད་ཅེས་གསུངས་སོ། །འཇིག་རྟེན་གྱི་དྲེགས་པ་འདི་དག་འདོད་ཆགས་ལ་གནས་པས་སེམས་ཅན་
ལ་རྣམ་པར་འཚེའི། ཀུན་གྱི་ལུས་དང་སྲོག་མ་རུངས་པར་བྱེད་པས་ཁྱོད་ཀྱིས་ཐམས་ཅད་ཁྲོས་པའི་ཚུལ་གྱིས་ཐུལ་ཤིག་ཅེས་བསྒོའོ། །ཕྱོགས་བཅུའི་ཞིང་ཁམས་རྣམ་པར་དག་པ་ན་བཞུགས་པའི་སངས་རྒྱས་དང་། 
བྱང་ཆུབ་སེམས་དཔའ་དང་། རིགས་སོ་སོར་ཀུན་ནས་འདུས་པ་རྣམས་ཀྱང་གསུང་གཅིག་གི་ང་རོས་འདི་སྐད་ཅེས་གསུངས་སོ། །གསང་བའི་བདག་པོ་ཁྱོད་ཤིན་དུ་ཁྲོས་པའི་ཚུལ་སྟོན་ལ་མ་མཆིས་
པའི་སྟོབས་ཀྱིས་དྲེགས་པ་ཅན་འཐུལ་ཤིག་ཅེས་བཀའ་བསྒོའོ། །གཞན་ཡང་རིག་སྔགས་དང་། གསང་སྔགས་དང་། གཟུངས་སྔགས་ཀྱི་བདག་པོ་ཐམས་ཅད་འདུས་ཏེ། རིགས་ཀྱི་བདག་པོ་
དང་། རིགས་ཀྱི་ཡུམ་དང་། རིགས་ཀྱི་ཁྲོ་བོ་དང་། རིགས་ཀྱི་སྤྲུལ་པ་དང་། རིགས་ཀྱི་ཕོ་ཉ་མོ་ལ་སོགས་པ་ཐམས་ཅད་འདུས་ནས་མགྲིན་གཅིག་ཏུ་བཀའ་སྩལ་པ། གསང་བའི་བདག་པོ་གདུལ་བྱའི་
ཞིང་འདི་དག་ཞི་བའི་ཆ་བྱད་ཀྱིས་མི་འདུལ་བས་ཞེ་སྡང་དང་། གདུག་སེམས་སུ་བཅས་པ་ཉོན་མོངས་པ་རང་དགའ་མར་སྤྱོད་པ། འདོད་པའི་སྐོམ་གྱིས་གདུངས་པ་འདི་དག་ཁྱོད་ཀྱི་མཐུའི་སྟོབས་ཀྱིས་ཤིན་

89-1-300a

དུ་ཁྲོས་པའི་ཆ་བྱད་སྟོན་ལ་མ་འཕྱི་བར་མྱུར་བར་རབ་ཏུ་ཐུལ་ཤིག་ཅེས་བཀའ་བསྒོའོ། །དེ་ནས་སྐུ་མི་སྣང་བ་ཡེ་ཤེས་ཆེན་པོའི་ངང་ལ་བཞུགས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་
རྒྱུད་ལས་ཁྲོ་བོར་བཀའ་བསྒོ་བའི་ལེའུ་སྟེ་གསུམ་པའོ།། །། དེ་ནས་རིགས་ལྔ་ཡབ་ཡུམ་གཉིས་སུ་མེད་པའི་མཁའ་ལས་ཐུགས་རྗེས་ཁྲོས་པའི་ས་བོན་ཧཱུྂ་མཐིང་ནག་ཧ་ལ་ནག་པོའི་མདོག་ལྟ་
བུ་འོད་ཟེར་སྣ་ཚོགས་འབར་བ། རབ་ཏུ་འབར་བ། ཀུན་ཏུ་རབ་ཏུ་འབར་བ་དག་བྱུང་སྟེ། དེའི་བྱིན་གྱིས་བརླབས་ལས་ཐུགས་རྗེ་བྱིན་གྱིས་བརླབས་ལས་ཨེ་མཐིང་ནག་དང་། ཡྃ་སྔོ་སྐྱ་དང་། རྃ་ཁྃ་དམར་ནག་དང་། སུྃ་
སེར་ནག་དང་། རྃ་དམར་ནག་དང་། ཀེྂ་དཀར་སྐྱ་དང་། སྣ་ཚོགས་པའི་བྷྲཱུྃ་འཕྲོས་པར་གྱུར་ཏོ། །དེ་དག་གི་འཕྲོ་འདུ་ལས་གྲུ་གསུམ་མཐིང་ནག་ནམ་མཁའ་དང་། སྔོ་སྐྱ་རླུང་ཟླ་གམ་དང་། དམར་ནག་རག་ཏའི་རྒྱ་མཚོ་
དང་། སེར་ནག་ཞིང་ཆེན་ས་གཞི་དང་། དཀར་སྐྱ་ཀེང་རུས་རི་རབ་དང་། སྣ་ཚོགས་རིན་པོ་ཆེའི་གཞལ་ཡས་ཁང་མཐིང་ནག་རྡོ་རྗེ་རྒྱ་གྲམ་ལས་ལྷུན་གྱིས་གྲུབ་པའི་དཀྱིལ་འཁོར་དུ་གྱུར་ཏོ། །ཆོས་ཉིད་མི་འགྱུར་
ལྷུན་གྱིས་གྲུབ་པའི་ལྟེ་བ་མཐིང་ནག་ཟླུམ་པོ་ཕྲིན་ལས་རྣམ་པ་བཞིས་ལྷུན་གྱིས་གྲུབ་པའི་རྒྱ་གྲམ་གྱི་རྩེ་མོ་ཕྱོགས་བཅུར་འཕྲོ་བ། བར་མཚམས་རིན་པོ་ཆེ་སྣ་བཞི་ལས་ལྷུན་གྱིས་གྲུབ་པ། གྲུ་ཆད་རིན་པོ་ཆེ་ལྗང་གུར་སྣང་བ། སྒོ་བཞི་རིན་པོ་ཆེ་སྣ་བཞི་ཚད་
མེད་པ། བཞིའི་ཕྲིན་ལས་སུ་སྣང་བ་སྣ་ཚོགས་ཀྱི་རྒྱན་རང་བཞིན་དུ་སྣང་བ་རང་བྱུང་བར་གྱུར་ཏོ། །དེ་ནས་ཧཱུྃ་འཐིང་ནག་ཁྲོ་བོའི་ས་བོན་དེ་ལས་སྣ་ཚོགས་རྡོ་རྗེ་ཕྲ་མོའི་འོད་ཚ་ཚར་འཕྲོ་བ། རྡོ་རྗེ་ཕྲ་མོའི་འོད་ཟེར་ལས་རྡོ་རྗེ་
ལྕགས་ཀྱུ་ཕྲ་མོ་བསམ་གྱིས་མི་ཁྱབ་པས་འཇིག་རྟེན་གྱི་དྲེགས་པ་ཅན་ཀུན་དང་། སྲོག་ལ་རྔམ་པའི་སྲིན་པོ་ཕོ་མོ་སྣ་ཚོགས་པ་བཀུག་སྟེ། གཞལ་ཡས་ཁང་གི་ཕྱི་རོལ་དུ་ཤིང་རྩ་བ་ནས་བསྒྱེལ་བ་བཞིན་དུ་

89-1-300b

གྱུར་ཏེ་རི་མོ་བཞིན་གཡོ་བ་མེད་པར་གྱུར་ཏོ། །མཐུའི་བྱིན་གྱིས་བརླབས་ཀྱིས་འཁོར་ལོའི་ལྟེ་དབུས་སུ་རྡོ་བ་བསྐྱུར་བ་བཞིན་དུ་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱིས་ཀྱང་སྟི་ར་བྃ་ཞེས་བརྗོད་པས་སྲིན་པོ་ཕོ་མོ་
དྲན་པ་རྙེད་དེ་མདུན་དུ་གྱུར་ཏོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་གཞལ་ཡས་ཁང་ལྷུན་གྱིས་གྲུབ་པའི་ལེའུ་སྟེ་བཞི་པའོ།། །། དེ་ནས་ཐུགས་རྗེ་ཁྲོས་པའི་ཧཱུྃ་མཐིང་ནག་འོད་འབར་བ་ལས་
དེ་བཞིན་གཤེགས་པ་ཀུན་གསུང་གཅིག་གིས་ཨ་བྷཾ་རོ་ཥཱ་ཎ་ཧཱུྃ་ཞེས་གསུངས་པ་ལས་ཁྲོ་གཉེར་བསྡུས་ཤིང་ཞལ་བགྲད་པས་དུག་གསུམ་རྩད་ནས་གཅོད་པའི་མཆེ་བ་ཟུར་གསུམ་གཙིགས་པ། དེ་ལྟར་འབར་བའི་ཆ་བྱད་
དུ་སྣང་བ་ཞིག་བྱུང་སྟེ། འཇིག་རྟེན་གྱི་ཁམས་ཆེན་པོ་གསུམ་གཡོས། རབ་ཏུ་གཡོས། ཀུན་ཏུ་གཡོས། ཀུན་ཏུ་རབ་ཏུ་གཡོས་པར་གྱུར་ཏོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་འབར་བའི་ཁྲོ་
བོ་ཁྲོས་པའི་ཚུལ་དུ་བསྐྱེད་པའི་ལེའུ་སྟེ་ལྔ་པའོ།། །། དེའི་ཚེ་དེའི་དུས་ན། དུས་གསུམ་གྱི་ཐེག་པའི་བདག་པོ་ཐམས་ཅད་འདུས་ཏེ། ཡེ་ཤེས་ཀྱི་མཁའ་གསང་བའི་བུམ་པས་འབར་བའི་ཁྲོ་བོ་དེའི་
ལུས་ཀུན་བཀྲུས་ཏེ་ཡེ་ཤེས་ཀྱི་བུམ་པའི་ཆུ་རྒྱུན་གྱིས་དབང་བསྐུར་རོ། །དག་པར་འཁྲུ་བར་བྱེད་པའི་ཉེ་ཤིང་པ་དང་། སྒྲིབ་པ་སྦྱོང་ཞིང་ཀུན་དུ་སྐྱོབ་པར་བྱེད་པའི་ཕུར་མོའི་ཐལ་བ་དང་། ཆོས་ཉིད་ཀྱི་
རྩི་དང་། ཡེ་ཤེས་ཀྱི་བཅུད་མར་ལ་སོགས་པས་འགྲོ་བ་རྣམས་ཀྱི་ཚུལ་དང་ལྡན་པའི་ཕྱིར་དབང་བསྐུར་རོ། །ཡེ་ཤེས་ཀྱི་ཁྲོ་བོ་དེ་ལུས་སིམ་ཞིང་རྒྱས་ཏེ་བདེ་བ་སྐྱེས་པར་གྱུར་ཏོ། །དེ་ནས་རིགས་
ཐམས་ཅད་ཀྱི་བདག་པོ། སངས་རྒྱས་ལྔ་ཡུམ་དང་བཅས་པས་བདེ་བ་ལ་སྙོམས་པར་ཞུགས་ཏེ། གཉིས་སུ་མེད་པའི་མཁའ་ལས་ཡེ་ཤེས་ཀྱི་ཡིག་འབྲུ་ཀྵིྂ་མཐིང་ག་དང་། ཀྵིྂ་དཀར་མོ་དང་། ཀྵིྂ་སེར་

89-1-301a

པོ་དང་། ཀྵིཾ་དམར་པོ་དང་། ཀྵིཾ་ལྗང་གུ་དང་། ཀྵིཾ་སྣ་ཚོགས་ཀྱི་མདོག་ཏུ་སྣང་བ་དག་འཐོན་ཏེ། གསུང་གཅིག་གིས་བསྐྱེད་བསྐུལ་གྱི་སྔགས་བཀའ་སྩལ་པ། ཡྃ་ཁྃ་རྃ་བྷི་ཥ་ༀ་ཉི་མ་ས་སླ་ལ་ནན་ག་རུ་ཎ་ཙ་ལེ་ཙ་ལེ་
ཧཱུྃ་ཕཊ་ཅེས་གསུངས་པ་ལས་ཡེ་ཤེས་ལས་སྤྲུལ་པ་ཁྱུང་མཐིང་ག་དང་། དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། སོ་སོ་ནས་སྣ་ཚོགས་པ་འདུས་པའི་ཁྱུང་ལུས་དཀར་བ། གཤོག་པ་སྔོ་བ། རྭ་
ཡེ་ཤེས་སྤུ་གྲི་འབར་བ། གདུག་པ་ཅན་འདྲེན་ཅིང་ཟ་བ། འབར་བའི་ཁྲོ་བོའི་ཐུགས་རྗེ་ལ་གནས་པར་གྱུར་ཏོ། །ལུས་ཁ་དོག་ལྔ་ལ། མཆུ་གནམ་ལྕགས་ཀྱི་རྡོ་རྗེ་ལས་གྲུབ་པ། གཤོག་པ་ནམ་
མཁའི་མཐའ་མ་ཁེབས་པ། མིག་གསེར་ཞུན་མ་བཞིན་དུ་སྣང་བ། གདུག་པའི་སྦྲུལ་རིགས་བཞི་སོ་སོར་ཟ་བ་དག་སྤྱི་གཙུག་དང་། དཔྲལ་བ་དང་། རྣ་ལྟག་གཡས་གཡོན་དང་། དབུའི་ལྟག་
ཁུང་ལ་སོགས་པར་གནས་སོ། །རིགས་སོ་སོ་ཕྱག་མཚན་སོ་སོས་དབང་བསྐུར་ཏེ། དེ་བཞིན་གཤེགས་པའི་རིགས་ཀྱི་བདག་པོས་འཁོར་ལོ་སྤྱི་གཙུག་ཏུ་བྱིན་ཏེ། ༀ་སརྦ་ཏ་ཐཱ་ག་ཏ་ཀཱ་ཡ་
བཛྲ་སྭ་བྷཱ་བ་ཨཱཏ་མ་ཀོ྅ཧྃ་ཞེས་གསུང་ཞིང་འཁོར་ལོ་བྱིན་ནོ། །གསུང་རིགས་ཀྱི་བདག་པོས་ཀྱང་ཨཱཿསརྦ་ཏ་ཐཱ་ག་ཏ་བཱག་བཛྲ་སྭ་བྷཱ་བ་ཨཱཏ་མ་ཀོ྅་ཧཾ་ཞེས་གསུང་ཞིང་ཆོས་ཀྱི་འཁོར་ལོ་མགྲིན་
པར་གཞག་གོ། །ཐུགས་ཀྱི་རིགས་ཀྱི་བདག་པོས། ཧཱུཾ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷཱ་བ་ཨཱཏྨ་མ་ཀོ྅་ཧཾ་ཞེས་ཐུགས་ཀར་རྡོ་རྗེ་གཞག་གོ། །ཡོན་ཏན་གྱི་རིགས་ཀྱི་བདག་པོས་ཀྱང་། སྭཱ་སརྦ་ཏ་
ཐཱ་ག་ཏ་རཏ་ན་གུ་ཧྱ་ཨ་བྷ་ཥིཉྩནྟུ་མཱཾ། ཞེས་རྒྱ་གྲམ་དང་ལྟེ་བར་རིན་པོ་ཆེ་འབར་བ་གཞག་གོ། །ལས་ཀྱི་རིགས་ཀྱི་བདག་པོས་ཀྱང་ཧཱ་སརྦ་ཏ་ཐཱ་ག་ཏ་ཀརྨ་གུ་ཧྱ། ཨ་བྷི་ཥིཉྩནྟུ་མཱྂ་ཞེས་གསུང་ཞིང་

89-1-301b

གསང་གནས་སུ་རྒྱ་གྲམ་གཞག །ཡེ་ཤེས་ཀྱི་ཁྲོ་ཆུང་སྐུ་ཆུང་ལ་སྤྱན་ཆེ་བ་རྡོ་རྗེ་དང་བསྡིགས་མཛུབ་འཛིན་པ། དཀར་པོ་དང་། དམར་པོ་དང་། སེར་པོ་དང་། ལྗང་གུ་དང་། མཐིང་ག་ལ་སོགས་ཏེ་སྣ་ཚོགས་པའི་ཁྲོ་ཆུང་འཐོན་ནོ། །འཐོན་པར་
གྱུར་ཏོ། །དེ་དག་གི་བྱིན་གྱིས་བརླབས་ཀྱིས་ས་ཆེན་པོ་འདི་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་དུ་གཡོས། ཀུན་དུ་རབ་ཏུ་གཡོས་པར་གྱུར་ཏོ། །བསྲེག་པའི་བསྐལ་པའི་སྒྲ་ཙམ་ཡང་གྲག་པར་གྱུར་ཏོ། །དེ་དག་
ཚུར་འདུས་ཤིང་ནམ་མཁའ་ལ་བབ་ནས། འཁོར་ལོ་འབར་བའི་ལྟེ་དབུས་སུ་གནས་པ་ལས་དེ་བཞིན་གཤེགས་པ་ཐམས་ཅད་ཀྱི་གསུང་གཅིག་གིས་རོ་ཥཱ་ཎ་ཡཀྵ་གྲྀཧྞ་གྲྀཧྞ་ཕཊ་ཅེས་གསུངས་པ་ལས་ཡེ་ཤེས་ཀྱི་ཁྲོ་བོ་
སྐུ་དུག་ཧ་ལ་ནག་པོའི་མདོག་ལྟར་འཚེར་བ། ཡེ་ཤེས་རྔམ་པའི་སྤྱན་གསུམ་བསྐལ་པའི་གློག་ལྟར་འཁྱུག་ཅིང་གདུག་པ་ཉི་མའི་འོད་ཟེར་བཞིན་གང་ལ་བལྟས་པ་བརླག་ནུས་ཤིང་ཚ་བ། སྨྱིན་མ་རྔམ་པའི་གློག་དྲག་
པོ་བཞིན་སེར་ནག་ཏུ་འབར་བས་གཏི་མུག་དང་། ཉོན་མོངས་པའི་མུན་པ་སེལ་བར་བྱེད་པ། སྨ་ར་སེར་ནག་ལ་ཡེ་ཤེས་ཀྱི་མེ་འབར་བ། ཉོན་མོངས་པའི་བག་ཆགས་སྲེག་པ། ཉོན་མོངས་པ་གཏི་མུག་
འཇོམས་པར་བྱེད་པའི་གླང་པོ་ཆེའི་ཀོ་རློན་གསོལ་པ། ཉོན་མོངས་པའི་ཞེ་སྡང་འདུལ་བའི་རྟགས་སུ། གཅན་གཟན་གྱི་རྒྱལ་པོ་སྟག་གི་ཤམ་ཐབས་བགོས་པ། ཉོན་མོངས་པ་ཕྲག་དོག་འདུལ་བར་བྱེད་པའི་
གཟིག་གི་མགོ་བོས་བརྒྱན་པ། ཉོན་མོངས་པའི་འཁོར་བ་མ་སྤངས་པས་ཞིང་ཆེན་གྱི་གཡང་གཞི་གསོལ་བ། སྦྲུལ་དཀར་ཁྲས་དབུ་བརྒྱན་པ། སེར་ཁྲས་མགུར་ཆུ་བྱས་པ། དམར་ཁྲས་ཕྱག་གདུབ་བྱས་པ། ལྗང་
ནག་ཁྲས་ཞབས་གདུབ་བྱས་པ། དུག་གསུམ་ངང་གིས་མི་སྤོང་བར་ཉོན་མོངས་པའི་ཤ་ཁྲག་གསོལ་བ། སྐུ་དང་། གསུང་དང་། ཐུགས་དང་ལྡན་པའི་ཐོད་པ་སྐམ་པོ་དང་། རློན་པ་དང་། ནེ་ཕྲེང་གིས་སྐུ་ལ་བརྒྱན་པ། 

89-1-302a

ཆོས་ཉིད་སྐྱེ་བ་མེད་པའི་དོན་དང་། ལྡན་ཞིང་འཁོར་བ་ཁྲག་ཞག་དང་འདྲ་བ་ལ་ཐུགས་རྗེས་གཟིགས་པའི་ཕྱིར་ཞག་གི་ཟོ་རིས་ཀྱིས་སྐུ་ལ་བརྒྱན་པ། ཐེག་པ་ཆེན་པོའི་དབང་གིས་ཐམས་ཅད་འདུལ་བའི་ཕྱིར་
ཐལ་ཆེན་གྱི་ཚོམ་བུས་སྐུ་ལ་བརྒྱན་པ། ཆོས་ཉིད་སྐྱེ་བ་མེད་པའི་དོན་དང་ལྡན་ཞིང་ནོར་བུ་འབར་བས་ཆ་བྱད་དུ་སྣང་སྟེ། དབུ་སྐྲ་སྔོ་ནག་ལ་རལ་པའི་ཅོད་པན་གྱིས་བཅིངས་པ། ཞབས་གཡས་པ་བརྗིད་པའི་ཚུལ་གྱིས་
བསྐུམ་ནས་གནས་པ། ཞབས་གཡོན་པ་དྲག་པོའི་ཚུལ་གྱིས་བསྒྲད་ནས་གནས་པས་སྲོག་ལ་རྔམ་པའི་སྲིན་པོ་ཕོ་མོ་བརྫིས་པ། ཕྱག་གཡས་པ་ན་རྡོ་རྗེ་རྩེ་ལྔ་པ་བརྡེག་པའི་ཚུལ་དུ་འཛིན་པ། གཡོན་པ་ན་བསྡིགས་
པའི་མཛུབ་མོ་ཕྱར་བ་དག་ཏུ་སྣང་བ་ཞེས་རྒྱ་གྲམ་དང་། རལ་གྲི་འབར་བས་ཡན་ལག་བཞི་ལ་ལས་ཀྱི་བྱེད་པ་པོར་དབང་བསྐུར་རོ། །དམ་རྫས་བདུད་རྩི་རྣམ་པ་ལྔས་དབང་བསྐུར་ནས་ཕྲིན་ལས་ཐམས་ཅད་ཀྱི་བྱེད་པ་
པོར་དབང་བསྐུར་ཏེ། དེ་ཡང་གཉིས་སུ་མེད་པའི་རོལ་པས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་དེ་བཞིན་གཤེགས་པ་ཐམས་ཅད་ཀྱིས་འབར་བའི་ཁྲོ་བོ་ལ་དབང་བསྐུར་བའི་ལེའུ་སྟེ་དྲུག་པའོ།། །།   དེ་ནས་དཔལ་རྡོ་རྗེ་གཏུམ་པོ་ལག་ན་རྡོ་རྗེས་
སྡིགས་མཛུབ་ནི་བསྒྲེང་། རྡོ་རྗེ་ནི་སྤར་ནས་འབར་བའི་ཁྲོ་བོའི་ལྟ་བས་ཀུན་དུ་བལྟས་ཏེ། སྤྱན་ནི་བཟློག །ཞལ་ནི་བགྲད་ནས་ཞལ་ནས་རྔམ་པའི་སྒྲ་སྐད་ནི་ཧ་ཧ། ཧཱུྃ་ཧཱུྃ། ཨ་ལ་ལ། ཨྂ་ཨྂ། དྷི་དྷི། ཧོ་ཧོ། ཞེས་བྱིན་པའི་བརླབས་ལས་ཕྲག་པ་གཉིས་རབ་ཏུ་འབར་
ཏེ། རྡོ་རྗེ་ཁྲོ་བོ་དཀར་བ། རྣམ་པར་དཀར་བ་དག་མཐའ་ཡས་པ་འཐོན་ཏོ། །དཔྲལ་བ་རྣམ་པར་འབར་བ་ལས་ཁྲོ་བོ་མཐིང་ག་སྣ་ཚོགས་པ་འཐོན་ཏོ། །མགྲིན་པ་རབ་ཏུ་འབར་བ་ལས་ཁྲོ་བོ་དམར་པོ་རྣམ་པར་དམར་བ་དག་འཐོན་ཏོ། །ཐུགས་
ཀ་རབ་ཏུ་འབར་བ་ལས་རྡོ་རྗེ་ཁྲོ་བོ་ནག་པོ་རབ་ཏུ་འབར་བ་སྣ་ཚོགས་པ་འཐོན་ཏོ། །སྐུ་ལྟེ་བ་རབ་ཏུ་འབར་བ་ལས་རྡོ་རྗེ་ཁྲོ་བོ་ལྗང་གུ་རབ་ཏུ་འབར་བ་དག་འཐོན་ཏོ། །འབར་

89-1-302b

བའི་ཁྲོ་བོ་དེ་དག་ཀྱང་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་ལྟ་བུ་སྟེ། ཤིན་དུ་རྔམ་པ། ཤིན་དུ་འཇིགས་པ། དགོད་པའི་མདོག་ཏུ་སྣང་བ། ལོག་སྲེད་ཅན་དག་ལ་གཤེ་བའི་མདོག་ཏུ་སྣང་བ། ཐམས་ཅད་
ཐུགས་རྗེ་ཆེན་པོས་ཀུན་ལ་ཁྱབ་པ། ཐུགས་ཞི་བ་དང་། རྒྱས་པ་དང་། དབང་དང་། དྲག་པོ་དང་། ཕྲིན་ལས་བཞི་ཡིས་སྐུའི་དངོས་པོ་ཤིན་ཏུ་བསྒྱུར་ཏེ་འགྲོ་བའི་དོན་མཛད་དོ། །ཞལ་ནས་རྔམ་པའི་སྒྲ་སྒྲོགས་པ་
དེ་དག་ཀུན་ཀྱང་ཁྲོ་བོའི་སྟང་སྟབས་དང་། མཆོངས་པ་དང་། འགྱིང་བ་དང་། རྩེ་བ་དང་། སྤྱན་བགྲད་པ་དང་། མཆེ་བ་གཙིགས་པ་དང་། ཁྲོ་གཉེར་མི་བཟད་པ་གཙིགས་པ་ཤིན་དུ་མི་བཟད་པའི་ཁྲོ་བོར་སྤྲུལ་ཏེ། 
རྩི་མཆོག་གི་རྒྱལ་པོ་མ་གི་ཏའི་དྲིར་ལྡན་པས་གདུག་པ་ཅན་ཀུན་གྱི་སྙིང་རབ་ཏུ་རུལ་བར་བྱེད་པ་དེ་ལྟ་བུའི་འབར་བའི་ཁྲོ་བོ་དེ་དག་སྤྲུལ་རབ་ཏུ་སྤྲུལ་པར་གྱུར་ཏོ། །དེ་ནས་རྔམ་པའི་གསུང་གིས་དྲག་པོའི་སྔགས་བཀའ་
སྩལ་པ། ཨོྂ་བཛྲ་ཙཎྜ། ཨོྂ་བི་པུ་ལེ། ཨོཾ་བཛྲ་ཙཎྜ་པྲ་བ་ར་ནཱ་ག །ཨོྂ་བཛྲ་ཙཎྜ་མ་ཧཱ་ནཱ་ག་ཧྲྀ་ད་ཡ། ཨཱ་བར་ཏེ་ཛྭ་ལ་ཛྭ་ལ། སརྦ་ནཱ་ག་ཧྲྀ་ད་ཡཱ་ནི། ཨཱ་བར་ཏེ་ཛྭ་ལ། སརྦ་ནཱ་ག་ཧྲྀ་ད་ཡ་ན། ཀི་མི་ཀི་མི། ནཱ་ག་
ཀུ་ལ་ནཱི་བི་དྷྭཾ་ས་ནཱི། ཧ་ན་ཧ་ན། སརྦ་ནཱ་ག་དུཥྚཱྃ། ཧྲྀ་ད་ཡ་ནི། ད་ཧ་ད་ཧ། སརྦ་དུཥྚཱན་ནཱ་ག་བནྡྷ་ནི། པ་ཙ་པ་ཙ་པཱ་ཙ་ཡ་པཱ་ཙ་ཡ། སརྦ་དུཥྚཱྂ་ནཱ་གཱ་ནཱྃ། ཨ་ཀྲ་མ་ཨ་ཀྲ་མ། སུ་ཀྲ་མ་ས་ཀ་ར་བི་མ་ལི། བི་ཀྲ་མ། 
མ་ཧཱ་ནཱ་ག་ཏེ་ཛ་བ་རེ་སྭཱ་ཧཱ་ཞེས་པས་དེ་དག་ཐམས་ཅད་ཡུར་ཡུར་པོར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམ་པ་དྲུག་དུ་གཡོས། རབ་ཏུ་གཡོས། ཀུན་དུ་རབ་ཏུ་གཡོས་
པར་གྱུར་ཏོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་དབང་དུ་བསྡུས་པའི་ལེའུ་སྟེ་བདུན་པའོ།། །།  དེ་ནས་དྲེགས་པ་ཅན་དེ་དག་ཟིལ་གྱིས་གནོན་པའི་ཕྱིར་རྡོ་རྗེ་ནམ་མཁའ་ལ་གསོར་བས་

89-1-303a

དྲེགས་པ་ཅན་དེ་དག་ཤིང་ལོ་རླུང་གིས་བསྐྱོད་པ་བཞིན་ནོ། །དེ་ནས་རྔམ་པའི་གསུང་དང་། བརྗིད་པའི་སྐུ་ལས་འདི་སྐད་གསུངས་སོ། །ཁྲོ་བོའི་རྒྱལ་པོ་ང་ཉིད་ཀྱིས། །སྲིད་པ་གསུམ་ན་གནས་པ་ཡང་། །ཐམས་
ཅད་མ་ལུས་ཟིལ་གྱིས་གནོན། །རིགས་བཞི་ཀླུ་རྒྱལ་འཁོར་དང་བཅས། །གཟི་བྱིན་དྲག་པོས་གནོན་པར་བྱ། །ང་ནི་མཐུ་སྟོབས་བདག་པོ་སྟེ། །རྔམ་པའི་གསུང་དང་བརྗིད་པའི་སྐུ། །ཕྱག་རྒྱ་དྲག་པོས་ཟིལ་
གྱིས་གནོན་ཞེས་ཆེད་དུ་བརྗོད་པས་བརྗོད་ནས་བརྗིད་གནོན་གྱི་ཕྱག་རྒྱ་ཞེས་བྱ་བ་བཅས་ཏེ་ཕྱག་སོར་མོ་བསྣོལ་ཏེ་མཐེ་བོང་གཉིས་དང་མཐེ་ཆུང་གཉིས་སོ་སོར་རྩེ་སྤྲད་ནས་བརྐྱང་ངོ་། །ཕྱག་གི་མཐིལ་འཁོར་
ལོ་ཅན་ཡང་ཐུར་དུ་བསྟན་ཏེ་ཤིན་དུ་མི་བཟད་པའི་སྔགས་བཀའ་སྩལ་པ། ཨོཾ་བཛྲ་ཙཎ་ཌ་བཛྲ་པཱ་ཎི་ཧཱུྃ་ཧཱུྃ། ག་རུ་ཌ་པཀྵེ། ཧཱུྃ་ཧཱུྃ། ཛེཾ་མཱ་ལ་བ་རི་ཙི། ཙི་སྲི་ཙ་ཧཱུྃ་ཕཊ་ཅེས་ཆེད་དུ་བརྗོད་པས་ཆེད་དུ་བརྗོད་པས་
དྲེགས་པ་ཅན་དང་ཀླུ་ཐམས་ཅད་མྱོས་རབ་ཏུ་མྱོས་ནས་བཀའ་བཞིན་བགྱིའོ་ཞེས་གསོལ་ཏོ། །དེ་དག་ཐམས་ཅད་ཀྱང་མྱོས་པའི་ཆུ་དྲག་པོ་འཐུངས་པ་ལྟ་བུའམ། སྐྱེས་བུ་གཉིད་ཀྱིས་གདུངས་པ་ལྟ་བུ་སྟེ། 
དེ་དག་ཐམས་ཅད་ཀྱི་མགྲིན་གཅིག་ཏུ་གསོལ་པ། ཀྱེ་མ་གསང་བའི་བདག་པོ་བཅོམ་ལྡན་འདས། །རིག་སྔགས་བདག་པོ་ཁྲོ་བོའི་རྒྱལ། །ཁྱོད་ཀྱི་རིག་སྔགས་སྨོད་པ་ཡིས། །ཤིན་དུ་མི་ཟད་རབ་ཏུ་མྱོས། །
འབངས་སུ་མཆི་ཞིང་བཀའ་བཞིན་འཚལ། །ཐུགས་རྗེ་ཅན་གྱིས་བདག་ཅག་ལ། །རབ་ཏུ་དགོངས་ཤིག་འབངས་སུ་མཆི། །སླད་མ་རྣམས་ལ་འཚེ་མི་བགྱིད་ཅེས་དམ་བཅས་སོ། །དཔལ་རྡོ་རྗེ་གཏུམ་པོ་
ཐུགས་གསང་བའི་རྒྱུད་ལས་དྲེགས་པ་ཅན་ཟིལ་གྱིས་གནོན་པའི་ལེའུ་སྟེ་བརྒྱད་པའོ།། །།    དེ་ནས་སུམ་བཅུ་རྩ་གསུམ་གྱི་ལྷའི་སྡེ་དཔོན་ཆེན་པོ་བརྒྱ་བྱིན་ཞེས་བྱ་བ་ག་ལ་བ་དེར་འོངས་ཏེ་མཆོད་

89-1-303b

པའི་ཡོ་བྱད་རྣམ་པ་སྣ་ཚོགས་པས་མཆོད་ནས་རྡོ་རྗེ་ཁྲོ་བོ་དེ་ལ་འདི་སྐད་ཅེས་གསོལ་ཏོ། །ཀྱེ་ཁྲོ་བོའི་བདག་པོ་ཆེན་པོ་དྲེགས་པ་གདུག་པ་ཅན་འདི་དག་ནི་ཤིན་ཏུ་མ་རུངས་པར་གྱུར་ན། འདི་དག་བྲིད་ནས་བསྟན་པ་
གནས་པའི་ཐབས་ཀྱི་སྤྲོ་བ་མཛད་དུ་གསོལ་ཞེས་གསོལ་པ་ལས་ལྷའི་དབང་པོ་ཉོན་ཅིག །ཀླུ་རྣམས་ཀྱི་རྫས་རྣམས་རྫས་སྣ་ཚོགས་པ་བསགས་ལ། བདག་ཉིད་ཀྱི་ལུས་དག་ཅིང་གཙང་བར་བྱས་ལ་
ལོངས་མ་སྤྱད་པའི་རས་དཀར་པོ་བགོས་ཏེ། མངར་བ་དང་གསུར་བའི་དྲི་ཞིམ་པོ་དང་ལྡན་པའི་ཐིག་ལེས་ལུས་བྱུགས་ལ་བུ་རམ་དང་། ཤ་ཀ་ར་དང་། སྦྲང་རྩི་མུར་བར་བྱས་ལ་ཞག་བདུན་ནམ་
དགུའི་གོང་ནས་ཁ་ཟས་ངན་པ་སྤང་བར་བྱའོ། །ལུས་ཀྱི་རྣམ་པ་ལ་རྨ་བྱའི་སྒྲོ་ལྔ་བཙུགས་ཏེ། ཤེས་རབ་ཅན་གྱི་བྱ་བའོ། །ཀླུའི་སྨན་སྣ་ཚོགས་པ་དང་འཇམ་པའི་འབྲུ་བསྲེས་པའི་ཕྱེ་མ་མངར་
བའི་ཆུས་སྦྲུས་ཏེ་རི་ལུ་ཤ་རྟུག་གི་འབྲུ་ཙམ་བརྒྱ་རྩ་བརྒྱད་བྱའོ། །ཀླུ་སྨན་རྣམ་པ་ཐ་དད་པ་ཡང་བླུགས་ཏེ་དཀར་བ་ལ་སོགས་པ་དང་ལྡན་པར་བྱའོ། །དེ་ནས་ཐུགས་རྗེ་ཆེན་པོས་གཟིགས་ཏེ། ཀླུའི་རྒྱལ་པོ་
འཁོར་དང་བཅས། །དགའ་དང་གུས་པས་སྤྱན་འདྲེན་གྱིས། །རྩེ་ཞིང་གདུང་བས་ཚུར་ཤོག་ཤིག །དགའ་ཞིང་གུས་པས་མངན་མི་སེམས། །ཀུན་ཀྱང་བརྩེ་བས་ཚུར་ཤོག་ཤིག །ཅེས་བཀའ་སྩལ་པས་དེ་
དག་ཀུན་གྱི་དབང་པོ་ཀུན་ཀྱང་ཤིན་དུ་དངས་པར་གྱུར་ནས་ཤ་རིད་ལ་སྦྲང་མ་འདུས་པ་ལྟ་བུ་སྟེ། ཀུན་ཀྱང་དགའ་བའི་མདངས་དང་ཆས་ནས་གང་ན་བ་དེར་འཁོད་དོ། །སྔགས་བཀའ་སྩལ་པ། ནཱ་ག་རཱ་
ཛ་ས་མ་ཡ་སྭཱ་ཧཱ་ཞེས་བཀའ་སྩལ་པ། ཀུན་ཀྱང་ཚིམ་པར་གྱུར་ཏོ། །དེ་དག་ཀུན་གྱིས་ཀྱང་མགྲིན་གཅིག་གིས་དམ་ཚིག་གི་རིམ་པ་ཕུལ་བ། དཔའ་བོ་ཆེན་པོ་ཁྲོ་བོའི་བདག །ཁྱོད་ཀྱི་བཀའ་

89-1-304a

ལས་འདས་གྱུར་ན། །བདག་ཅག་རྣམས་ཀྱི་མགོ་ལུས་སྙིང་། །དུམ་བུར་གས་ནས་རུལ་བར་ཤོག །ཏདྱ་ཐཱ། ཨོཾ་ཙ་ཊཱ་ཙ་ཊཱ། བི་ཙི་ཊུ། ཤ་ཐ་ཤ་ཐ། སྭ་ཙ་ཏེ་སྭཱ་ཧཱ་ཞེས་གསོལ་ཏོ། །དཔལ་རྡོ་རྗེ་གཏུམ་པོ་ཐུགས་
གསང་བའི་རྒྱུད་ལས་གདུག་པ་ཅན་བཀའ་ལ་བཏགས་པའི་ལེའུ་སྟེ་དགུ་པའོ།། །། དེ་ནས་ཡང་དབང་པོ་ཆེན་པོས་གསོལ་པ། ཀྱེ་རྡོ་རྗེ་ཁྲོ་བོ་དག་དྲེགས་པ་ཅན་འདི་དག་ཤིན་དུ་མ་རུངས་པར་གྱུར་ན། ལ་ལ་ནི་
རུས་པ་ཆག་ཅིང་གྲུགས། ལ་ལ་དག་ནི་ཚེའི་འདུ་བྱེད་མཐའ་ལ་གཏུགས་སུ་ཉེ། ལ་ལ་དག་ནི་ནམ་མཁའ་ལྡིང་དབུའི་གཙུག་ཏོར་ན་གནས་པས་ལེན་པའི་སྡུག་བསྔལ་གྱིས་གཟིར། ལ་ལ་དག་ནི་ཁྲག་བསྐམས། 
ལ་ལ་དག་ནི་སེན་མོ་དང་ཡན་ལག་ཆག །ལ་ལ་དག་ནི་གཏི་མུག་གི་གཉིད་ལོག་པས་བྱང་ཆུབ་ཀྱི་སྙིང་པོ་མི་ཤེས། ལ་ལ་དག་ནི་རྩ་དང་རྒྱུས་པ་ཆད་དེ། ནད་རྣམ་པ་སྣ་ཚོགས་ཀྱིས་གདུངས། ལ་ལ་དག་ནི་
ལུས་ཀུན་ཚ་བའི་ནད་ཀྱིས་ཉམས་ཐག །ལ་ལ་དག་ནི་རྩེ་ཞིང་མིང་ཡང་མི་གྲག །ལ་ལ་དག་ནི་ཉོན་མོངས་པ་རྒྱས་ཏེ་སྔོན་སེམས་བསྐྱེད་པ་རྗེས་སུ་མི་དྲན། ལ་ལ་དག་ནི་སེམས་བསྐྱེད་པ་རྗེས་སུ་དྲན་
ཡང་དེ་བཞིན་གཤེགས་པའི་ཞལ་མི་མཐོང་། ལ་ལ་དག་ནི་ཡི་དགས་ཀྱི་ཁམས་ལྟ་བུ་སྟེ་ཁ་ཟས་ཀྱི་སྐལ་བ་དང་མི་ལྡན་ན་འདི་དག་གསོ་བའི་ཐབས་བཀའ་སྩལ་དུ་གསོལ་ཞེས་གསོལ་པ་ལས་ལྷའི་
དབང་པོ་དག་དབང་པོའི་ལག་པས་ནི་ལག་པ་ཆད་པ་སོས་པར་འགྱུར་རོ། །ཆུ་སྲིན་སྡེར་མོས་ནི་སེན་མོ་ཆག་པ་སོས་པར་འགྱུར་རོ། །ནཱ་ག་གེ་སར་གྱིས་ནི་བྱང་ཆུབ་ཀྱི་སེམས་བསྐྱེད་པ་རྗེས་སུ་དྲན་པར་
འགྱུར་རོ། །ནཱ་ག་པུས་པས་ནི་ཀླུའི་གནས་མེ་ཏོག་གི་ཚལ་དུ་འགྱུར་རོ། །གུ་གུལ་གྱི་དྲི་ཆེན་པོས་ནི་དེ་མ་ཡིན་པ་ཐམས་ཅད་བསྲེགས་ནས། ཀླུའི་སྣ་ལ་མནམས་པ་ཙམ་གྱིས་སྔོན་བྱང་ཆུབ་

89-1-304b

མཆོག་ཏུ་སེམས་བསྐྱེད་པ་དྲན་པར་འགྱུར་རོ། །འབྲས་ཀྱི་ཡོས་ཀྱིས་ནི་ཀླུའི་ནད་ཐམས་ཅད་འཚོ་བར་འགྱུར་རོ། །ཐང་ཀ་བྱ་རྒྱུས་སྤུ་ཤེལ་གྱིས་ནི་རྩ་རྒྱུས་ཆད་པ་སོས་པར་འགྱུར་རོ། །ག་པུར་གྱིས་ནི་རྩ་བའི་ནད་
སོས་ནས་ལུས་ཀྱི་བཅུད་ཀུན་ཚིམ་པར་བྱེད་དོ། །དར་ལེབ་རྒན་གྱིས་ནི་ག་རུ་ཌའི་འཇིགས་པ་ལས་སྐྱོབ་པར་བྱེད་དོ། །མེ་ཚན་དང་། བྱེ་ཚན་དང་། གཅེར་བུ་དང་། རྒྱལ་པོའི་ཆད་པ་དང་། ས་གཡོ་བ་དང་། 
གཞན་གྱི་རིག་སྔགས་ཀྱིས་གནས་འགུལ་བ་དང་ཕུར་བུས་འདེབས་པ་ལས་ཐར་བར་བྱེད་དོ། །མཚལ་གྱིས་ཁྲག་བསྐམས་པ་སོས་པར་བྱེད་དོ། །དུང་གིས་རུས་པ་ཆག་པ་སོས་པར་བྱེད་དོ། །རས་སྐུད་
དམར་པོས་ནི་སྲོག་འགག་པ་ཚངས་པའི་ཚེ་དང་ལྡན་པར་བྱེད་དོ། །དཀར་དང་མངར་གྱིས་ཞལ་ཟས་རོ་མཆོག་བརྒྱ་དང་ལྡན་པར་བྱེད་དོ། །དེ་དག་ཀུན་ཀྱང་རིན་པོ་ཆེའི་བུམ་པའམ། ཁམ་ཕོར་ལྟ་བུ་མཆུ་
ལྔ་པར་བླུགས་ནས་སྦས་ན་གང་ཉམས་པ་དེ་སོས་པར་འགྱུར་རོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་ཀླུ་གསོ་བའི་ལེའུ་སྟེ་བཅུ་པའོ།། །། དེ་ནས་ལྷའི་དབང་པོས་གསོལ་པ། 
ཀྱེ་རྡོ་རྗེ་ཁྲོ་བོ་ཆེན་པོ། འདི་དག་བསྡིགས་ན་ཇི་ལྟར་བསྡིགས། །གགས་དག་གཅད་པ་ཇི་ལྟ་བུ། །བརླག་པར་བྱ་བ་ཇི་ལྟ་བུ། །རྡོ་རྗེ་ཁྲོ་བོས་བཀའ་སྩལ་པ། །ཉོན་ཅིག་དབང་པོ་རྣམ་པར་རྒྱལ། །བསྡིགས་པར་
བྱ་བ་འདི་དག་གོ། །ཤིན་དུ་ཁྲོས་བཅས་མགོ་སྟོད་ལ། །མཁའ་ལྡིང་ག་རུར་སྤྲུལ་པར་བྱ། །རྡོ་རྗེ་ཁྲོ་བོ་འཆོལ་བ་གདོན། །ཕྱོགས་བཅུར་རྡོ་རྗེ་སྤྲོ་བར་བྱ་ཧཱུྃ་ཧཱུྃ་ཧཱུྃ། བཛྲ་ཙཎྜ་ཨྃ་ཨཱཿ ནཱ་ག་པྲ་ཐ་པྲ་ཐ། ཧཱུྃ་ནཱ་ག་
ནཱ་ཤ་ཡ་ཕཊ། ཅེས་བཀའ་སྩལ་པས་དྲེགས་པ་ཅན་དེ་དག་ལུས་ལ་གཅད་གཏུབས་ཀྱི་སྡུག་བསྔལ་བྱུང་གིས་དོགས་ཏེ། འཕྲལ་ཉིད་དུ་གདུག་པ་ཅན་དེ་དག་ཤིན་དུ་བྲེད་པར་གྱུར་ཏེ་བཀའ་བཞིན་དུ་

89-1-305a

ཉན་ནོ། །ཤིན་དུ་འཇིགས་དངངས་ནས་བཅོམ་ལྡན་འདས་ཐུགས་རྗེས་གཟིགས་སུ་གསོལ་ཞེས་བཀའ་ཉན་ནོ། །དེ་ནས་གགས་གཅད་པར་འདོད་ན་སྦྱིན་བསྲེག་བཞིན་ལས་བྱའོ། །གང་ན་བ་དེར་ཆ་བསྙམས་ལ། །
ནག་པོ་དྲི་དང་ལྡན་པར་བྱུག །ཟུར་གསུམ་སུམ་བརྩེགས་ཐུར་དུ་བརྐོ། །ཁ་ཁྱེར་ཐམས་ཅད་རྡོ་རྗེ་གནག །དབུས་སུ་གཞལ་ཡས་རྒྱ་གྲམ་བྲི། །སེ་སྐྱེར་གདུག་པའི་ཤིང་དག་ལ། །ཟུར་གསུམ་ཁྲུ་དོའི་ཚད་དུ་བརྩིག །ལོགས་
ལ་རཀྟའི་ཚར་ཚར་བཏང་། །ཚེར་ཅན་ནག་པོ་ཟུར་གསུམ་བཤག །བྲག་ནག་སྐྱེས་པའི་ཚེ་ནག་ཤུག །སོར་ནི་བདུན་བདུན་ཚད་དུ་བྱ། །མ་དུ་ཟུར་གསུམ་སོར་གསུམ་ཚད། །འབྲུ་ཆན་ནག་པོ་རཀྟར་སྦྱར། །མིང་བྱ་
སྦྱིན་སྲེག་རབ་ཏུ་སྦར། །བརྒྱ་རྩ་བརྒྱད་དེ་ཉི་ཤུ་གཅིག །དམིགས་པ་ཆེ་གེའི་ལིང་ག་ནི། །དྲི་མ་ཁུ་ཆུ་ཁྲག་དག་དང་། །སྐྲ་དང་རྐང་རྗེས་གོས་ལ་སོགས། །ཚོགས་པར་བསོགས་ལ་ཨ་མུ་ཀྂ ། དེ་ལ་ཛཿཧཱུྃ་བམ་ཧོཿས་
དགུག །ཡི་དགས་གང་གནས་མཚོན་པ་བླ། །སྦྲུལ་གདུག་དམིགས་པའི་གཟུགས་སུ་བྱ། །གནོན་པར་བྱེད་པ་མཚོན་བྱས་ཛཿ། །སྙིང་གར་བྲིས་ལ་གན་རྐྱལ་མདུན། །ཐུན་བྲབ་གདབ་སྔགས་བསྐོར་བཅས་དབུལ། །
མ་ར་ཡ་དང་བཅས་པའོ། །ནག་པོའི་ཆས་བགོ་རེ་སྟན་ས། །སྟོད་གཡོག་སྔོན་པོ་ཕུ་རུང་གནག །གཡང་གཞི་སྲིད་པའི་སྤྱི་བླུགས་བགོ། དགང་བླུགས་མཆོག་ཆེན་གཟར་བུས་བྱ། །ཁམ་སྐྱོང་ཟུར་གསུམ་རྫས་
རྣམས་བསག །མཆོད་སྦྱིན་ང་དང་མགོན་བྱེད་ལའོ། །མེ་ཡི་ལྷ་ཡང་ང་ཉིད་དོ། །མཱ་ར་ཡ་ཕཊ། སུམ་བྷ་ནི་སུམ་བྷ་ཧཱུྃ། སྦྱིན་བསྲེག་བྱས་པའི་ཐལ་བ་ལ། །ང་ཡི་གདོང་དུ་བསྒྲུབ་པར་བྱ། །ནང་དུ་དགྲ་བོའི་བརྡའ་ཡང་
གཞུག །ས་ཡང་སེང་ལྡེང་ཕུར་བུས་གཟུང་། །མཚམས་ཀྱང་སྣ་ལྔའི་ཚོན་གྱིས་དབྱེ། །དེ་ནས་དེ་ལ་དམིགས་པས་སོ། །ཨོཾ་བཛྲ་ཙཎྜ་སྭ་བྷཱ་བ་དྷརྨ་དྷཱ་ཏུ་ཨཱཿ། ཨོཾ་བཛྲ་རཏ་ན་པཉྩ་ཏྲཱྃ། ཨོཾ་བཛྲ་ཨ་མྲྀ་ཏ་པཱ་

89-1-305b

ཎི་སྭཱ་ཧཱ། ཨོཾ་བཛྲ་ཨཱ་གོ་ཊ་ཡ་མུད་ག་ར་བཛྲ་ཧ་ན་ཧ་ན་ཧཱུྃ། ཨོཾ་བཛྲ་ཙཎྜ་བཛྲ་བྷ་བ་ཡེ་སྭཱ་ཧཱ། ཨོཾ་བཛྲ་ཨ་ར་ཛེ་བི་ར་ཛེ་སྭཱ་ཧཱ། ཨོཾ་བཛྲ་ཨ་མྲྀ་ཏེ་ཨཱ་ཡུ་ཥེ་སྭཱ་ཧཱ། ཨོཾ་བཛྲ་ཙཎ་ཌ་མ་ཧཱ་རོ་ཥ་ཎ་ཧཱུྃ་ཕཊ། བྲུྃ་སྐ་ནི་སྐ། 
ཨོཾ་བཛྲ་དྷརྨ་ཏེ་སྭཱ་ཧཱ། ཨོཾ་བཛྲ་ཙཎ་ཌ་པྲ་མརྡ་ན་ཡེ་སྭཱ་ཧཱ། སྭཱ་དག་པ་ཆེན་པོ་བདེ་བའི་མཆོག །ཡེ་ཤེས་རྡོ་རྗེ་ཐོ་བས་བརྡུང་། །དེ་ལས་བྱིན་བརླབས་དེ་ལ་བླུགས། །ཡེ་ཤེས་ཐོ་བས་ཉོན་མོངས་བརྡུང་། །དམིགས་པ་ཛཿདམར་
དག་གིས་དགུག །མ་གཏུན་རྡོ་རྗེ་རྒྱ་གྲམ་ཉིད། །གནས་ཉིད་ལྷ་ཡི་གཞལ་ཡས་ཁང་། །ཐམས་ཅད་ལྷ་ཡི་ན་བཟའ་ལན། །དེར་གཞུག་བདུད་དང་ཉོན་མོངས་གནོན། །ང་ཉིད་དུ་ཡང་འགྱུར་བར་བསམ། །ཙཎ་ཌ་པུཥྤ་ཡེ་
སྭཱ་ཧཱ། །མཚན་དང་དཔེ་བྱད་རྒྱུན་མི་འཆད། །དང་པོར་སྦྱོར་བས་མཆོད་པར་བྱ། །བ་ཡིས་བཀྲུ་བྱ་སྤོས་ཀྱིས་བྱུག །ཤིན་དུ་གཙང་བ་དག་གིས་འཕྱི། ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་
ལས་དྲེགས་པ་ཅན་ཚར་གཅོད་པའི་ལེའུ་སྟེ་བཅུ་གཅིག་པའོ།། །།   དེ་ནས་ལྷའི་དབང་པོས་གསོལ་པ། ཀྱེ་མ་གནོད་འདུལ་ཁྲོ་བོའི་རྒྱལ། །དྲེགས་པ་བསྲུང་བའི་ཐབས་ནི་གང་། །བསྲུང་ཐབས་རྣམ་
པ་དུ་དང་ལྡན། །གནོད་འདུལ་ཆེན་པོ་བཀའ་སྩོལ་ཅིག །ཉོན་ཅིག་དབང་པོ་ཀུན་གྱི་བདག །སྔགས་རྫས་ཏིང་འཛིན་འདུས་པ་བཞི། །དངོས་ཏེ་དགོངས་པ་ཐམས་ཅད་བྱེད། །རྡོ་རྗེ་བྲག་དང་རིན་ཆེན་ཚུལ། །དུག་དང་མེ་
བཞིན་མཚོན་ཆ་འདྲ། །དུས་མིན་འཆི་ལས་རབ་ཏུ་བཟློག །སངས་རྒྱས་ཀུན་གྱི་མཐུ་དང་ལྡན། །དེ་འཆང་དངོས་གྲུབ་མཆོག་ཆེན་འཐོབ། །ངལ་དུ་ཀུན་དུ་ཞུགས་དང་མཚུངས། །སངས་རྒྱས་ཀུན་གྱི་སྲས་སུ་
དགོངས། །གང་ཞིག་གསང་སྔགས་འདི་འཆང་བ། །ཀུན་གྱི་ང་དང་འདྲ་བར་མཐོང་། །གང་ཞིག་གསང་སྔགས་འདི་འཆང་བ། །ང་ཉིད་རྒྱུན་དུ་དེ་ན་གནས། །འཇིག་རྟེན་དུ་ནི་བདེ་བ་འབྱུང་། །འདས་ནས་སངས་རྒྱས་ཀུན་དང་

89-1-306a

མཚུངས། །རྩིབས་བཅུ་དབུས་དང་བཅུ་གཅིག་ལ། །ཡིག་འབྲུ་ཁྱམས་བཅས་བརྡ་བྲིའོ། །ཆུ་འཁྱགས་དག་ལ་ཡུངས་དཀར་རོ། །གྲུ་ཆར་ལ་ནི་ས་ཞག་མོ། །གཞན་ལ་སྲད་བུ་སྔོན་པོ་ལ། །མདུད་
པ་རེ་ལ་རེ་རེའོ། །ཆུ་འམ་ཡིད་ནི་རང་ལའོ། །ཤ་རཱི་རྂ་དང་མི་གྷ་ཏ། །གསེར་དང་རྨ་བྱ་གྲུམ་པའི་སྤུ། །བལ་ཚོན་སྣ་ལྔའི་སྲད་བུ་ལ། །ཙཀྲ་བྲིས་ལ་མགུལ་དང་གཙུག །མོ་གཡོན་ཕོ་གཡས་བསྲུང་བར་བྱ། །ཆུས་ནི་
ཡམས་དང་དུག་ལས་ཐར། །མ་ས་དྲི་དང་རཀྟ་དང་། །ཁུ་བ་ཆུ་དག་སྦྱར་རམ་བཟའ། །སངས་རྒྱས་ལྔ་ཡི་དངོས་གྲུབ་སྟེ། །ཀུན་གྱིས་སྤྱད་པར་བྱ་བ་ཡིན། །མཛེ་དང་རླུང་གི་གནོད་པ་སེལ། །ཚེ་རིང་ལུས་ཀྱང་རྒྱས་པ་ཡང་། །བྱང་
ཆུབ་དཀར་དམར་མདངས་དང་ལྡན། །ཡམས་དང་མི་གཙང་དངོས་པོ་སེལ། །དྲི་ཡི་ཆུ་ཡི་ཡོན་ཏན་ནི། །ཀླད་རྐང་ཕོ་ལོག་གྲང་བ་སེལ། །ཤིན་དུ་ཟབ་སྟེ་གསང་བའི་མཆོག །སྐལ་ལྡན་རྟོགས་པ་རྣམས་ཀྱིས་སྤྱད་
པ་ལས། །སྐལ་མེད་བློ་དམན་རྣམས་ཀྱིས་ག་ལ་ཡིན། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་བསྲུང་བའི་འཁོར་ལོའི་ལེའུ་སྟེ་བཅུ་གཉིས་པའོ།། །། དེ་ནས་ལྷའི་
དབང་པོས་འདི་སྐད་ཅེས་གསོལ་ཏོ། །སླད་མའི་ཚེ། སླད་མའི་དུས་ན་སེམས་ཅན་གདུག་པ་ཅན་གྱི་དུག་བསལ་བའི་མཚན་ཉིད་དང་། ཞུགས་ས་བསྟན་དུ་གསོལ། ཉོན་ཅིག་དབང་པོ་ཆེན་པོ་ལེགས་པར་རབ་ཏུ་
ཡིད་ལ་ཟུང་ཤིག་མཚན་ཉིད་རྣམས་ནི་འདི་ལྟ་སྟེ། རུས་པ་ཤ་དང་པགས་པ་དང་། །རྩ་དང་ཁྲག་དང་ནང་གྲོལ་ལོ། །བཅུད་དང་ཆུས་ཏེ་ལུས་ཀྱི་སྟོབས། །ལུས་ཀྱི་རྩི་དང་མདོག་དང་དབྱིབས། །རེག་པ་ཆུ་དང་ཆུ་སེར་དང་། །ཀླད་
པ་ལྷ་བ་ལུས་ཀུན་ལ། །ཞུགས་ས་རྣམས་ནི་བཅོ་བརྒྱད་དེ། །འོན་ཀྱང་གཅིག་སོགས་གྲངས་ཀྱིས་བརྟག །རུས་པ་ལ་ཞུགས་པ་ནི་ལུས་སྐེམས་པ་དང་། ཟུག་གཟེར་ཆེ་བ་དང་། ན་ཐང་ངེ་བ་དང་། ཐིག་ལེར་

89-1-306b

ན་བའོ། །ཤ་ལ་ཞུགས་པ་ནི་ལུས་བེམས་སུ་འདུག་པ་དང་། ཡང་ན་ལྕི་སེ་འདུག་པ་དང་། མདོག་ནག་པ་དང་། དྲི་མ་ངན་པ་དང་། སྔར་འོང་བ་དང་ཤ་རོ་འབྱུང་བའོ། །པགས་པ་ལ་ཞུགས་པ་ནི་ཤ་འཁྲིག་པ་དང་མདོག་
སྐྱ་བའོ། །རྩ་ལ་ཞུགས་པ་ནི་ལུས་སྦྲིད་བེར་བ་དང་། རྟགས་ནི་དེ་ལས་བཟློག་དཀའ་བའོ། །སྦྲིད་ལུགས་དང་ནི་སྦྲིད་ལྕི་དང་། །ཚ་བ་འཛག་དང་ཚ་རབ་དང་། །ཚ་ཀེར་བ་དང་། ཚ་བྲེང་བ། །ལུས་ལ་སོགས་པ་
ཚ་ཐད་པ། །ཚ་པིར་བ་དང་ཡན་ལག་འབྲ། །ཁྲག་ལ་ཞུགས་པ་ནི། སྣ་ནས་ཁྲག་ཀྱང་སྐབས་སུ་འཛག །ཚ་བེར་བ་དང་ལྕི་ཡོར་བ། །གདོང་པ་རྟག་ཏུ་དམར་བ་དང་། །འོ་མའི་པྲིས་མ་ལྟར་འོང་ངོ་། །ནང་གྲོལ་
ལ་ཞུགས་པ་ནི། གློ་སྙིང་མི་བདེ་སྐྱུག་ཏིང་ངེ་། །སྙིང་འདར་སྙིང་ཡང་མི་དགའ་སྟེ། །དེ་ནི་བཟློག་པར་དཀའ་བའོ། །བཅུད་ལ་ཞུགས་པ་ལ་བཞི་སྟེ། །ས་བོན་མི་འབྱུང་མཚན་མི་ལྡང་། །ཁུ་བ་སྐྱོ་མའི་མདོག་ཏུ་
འོང་། །ཁུ་བ་དངས་སྙིགས་ཕྱེ་ནས་འོང་། །ཆུ་ལ་ཞུགས་པ་ནི་གསུམ་སྟེ། །སྦུགས་ཆུ་རྒྱ་སྐྱེགས་ཁུ་ལྟར་འོང་། །སྣ་ཆུ་རྟག་ཏུ་སྐྱ་བོར་འོང་། །མིག་གི་ཆུ་ཡང་རྟག་པར་འཛག །དུ་བ་སེར་བུ་བྱུང་ཙམ་གྱི། །གཞན་
པས་རབ་ཏུ་མྱུར་བར་འཛག །ལུས་ཀྱི་སྟོབས་ལ་ཞུགས་པ་ནི། །སྒྱིད་ལུག་པ་དང་སྐྱི་ཞུམ་པ། །ལུས་ཀྱི་རྒྱུ་བ་ཉལ་ཉལ་འོང་། །ལུས་ཀྱི་རྩི་ལ་ཞུགས་པ་ནི། །རྩི་ལ་སོགས་ཏེ་ལུས་ཀྱི་དྲི། །བྱའི་པགས་པ་
བཞིན་སང་གིས་འགྲོ། །མདོག་ལ་ཞུགས་པ་ནི། ལྕེ་ནི་བཙོད་ཀྱི་མདོག་བཞིན་འོང་། །དབྱིབས་ལ་ཞུགས་པ་ནི། ལུས་ཀྱང་གཉེར་ཆུང་དག་གིས་ཁེངས། །སོར་མོ་བྱི་བའི་མཇུག་མ་འདྲ། །རེག་པ་ལ་ཞུགས་པ་
ནི། སྣ་རྩེ་ལ་སོགས་ལག་རྩེ་རྣམས། །ཚ་ཡམ་ཚ་བེར་ལུས་གཙེ་བ། །གཡའ་བར་འོང་བ་དག་ཡིན་ནོ། །ཆུ་ལ་ཞུགས་པ་ནི། ཡན་ལག་རེངས་ཤིང་ན་བ་དང་། །ཤ་འབུར་བ་དང་གྲང་སིང་སིང་། །ཡན་

89-1-307a

ལག་ཚོགས་རྣམས་ཁོལ་བའོ། །ཆུ་སེར་ལ་ཞུགས་པ་ནི་ཆུ་སེར་ལ་ལྔ་སྟེ། ཟ་ཁོལ་ཀོ་ལ། ཟ་ནི་ཙག་ཙག །ཚ་ལྗིབས་ལྗིབས། ལུས་ལ་ཆུ་སྒངས་ཡོད་པའོ། །ཆུ་སྒངས་བྱུང་ནས་རིད་མི་ལུས། །ལུས་ལ་འབྲུམ་
རྗེས་སྲན་མ་འདྲའོ། །དེ་ནི་བཟློག་པར་སླ་བའོ། །ཀླད་པ་ལ་ཞུགས་པ་ནི་མགོ་བོ་ཕྱིང་ཕྱིང་སྐྲངས་པ་དང་། །འཐོམ་དང་བེམ་མེ་བ་དག་དང་། །སྐྲ་རྣམས་ནུལ་གྱིས་བྱི་ལ་སོགས། །ལྷ་བ་ལ་ཞུགས་པ་ནི། གདོང་པ་ཚ་ལམ་ལམ་འོང་བ་དང་། 
གྲང་སེར་སེར་འོང་བའོ། །དེ་ནི་བཟློག་པར་སླ་བའོ། །ལུས་རིང་གདོང་ཡང་ཐལ་སྐྱའི་མདོག །དེ་ནི་བཟློག་པར་དཀའ་བའོ། །ཤིན་དུ་ཁྲོ་བོའི་ཀླུ་རྣམས་ནི། །རྟག་དང་མི་ལྡན་ཐུགས་ཀྱི་འོད། །བཟློག་དཀའ་རྨ་ཚོགས་མི་འཚོ་
རྟགས་མི་ལྡན། །བཟློག་སླ་གཞན་ཡང་ཡན་ལག་ཕྲ་བ་དང་། །སྦོམ་དང་ཐུང་དང་རིངས་པ་ལ་སོགས་པ། །ཀླུའི་མཚན་ཉིད་དུ་ཤེས་པར་བྱའོ། །རྟག་ནི་དེ་དག་འགའ་ཞིག་ནི་ནད་ཞིག་གཞན་ལ་འང་ལས་འབྱུང་། །འགའ་ནི་
ཀླུའི་གདོན་མ་ཡིན། །ལས་ལས་འབྱུང་བ་དག་ཀྱང་ཡོད། །དེ་དག་གི་ནི་མཚན་ཉིད་ནི། །མཁས་པས་སོ་སོར་ཤེས་པར་བྱའོ། །ནད་གཞི་ལས་བྱུང་སྨན་སོགས་དང་། །འཕྲོད་པའི་ཟས་ནི་ཕན་པ་ཡིན། །
ནད་རྣམས་གཞན་མ་ཡུན་མི་རྟག །འདི་འདྲའི་མཚན་ཉིད་ཤེས་པར་བྱ། །ཤེས་ནས་མྱུར་དུ་བརྩོན་འགྲུས་ཀྱིས། །སྣ་ཚོགས་ཐབས་ལ་མ་རྨོངས་པས། །བཟློག་པའི་ལས་ལ་འབད་པར་བྱ། །
ཆུ་ཡི་ཐིགས་པ་ཕྲ་མོ་ཡིས། །དུས་སུ་བྱུང་བས་རྡོ་བ་འབིགས། །གདུག་པའི་དབང་ཅན་ཞ་རིད་ཡང་། །ལེ་ལོ་དང་བྲལ་རྩེ་གཅིག་སེམས། །རྒྱུན་དུ་ལྷ་བསྒོམ་བཟླས་བརྗོད་ཀྱིས། །གདུག་པའི་
ནད་ལས་ཐར་བར་ངེས། །རྩོལ་བ་ཆེ་ལ་སོམ་ཉིང་བྲལ། །གང་བསམས་དེ་ལས་མི་འགྲུབ་མེད། །འཁོར་བའི་ཕུང་པོ་སྲོག་བཅས་ལ། །མངོན་སུམ་ཉིད་དུ་མཐོང་འགྱུར་གྱིས། །བརྩོན་པ་དོར་བར་མི་བྱའོ། །

89-1-307b

ཞེས་དཔལ་གཏུམ་པོ་ཆེན་པོས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་མཚན་ཉིད་བརྟག་པའི་ལེའུ་སྟེ་བཅུ་གསུམ་པའོ།། །། དེ་ནས་ལྷའི་དབང་པོས་འདི་སྐད་ཅེས་གསོལ་ཏོ། །བཅོམ་
ལྡན་འདས་སླད་མའི་དུས་དག་ན། གདུག་པ་ཅན་གྱི་ཡི་དགས་རྣམས། །དུག་རྣམས་དབྱུང་ན་ཇི་ལྟར་དབྱུང་། །མཆོད་པའི་ལས་རྣམས་ཇི་ལྟར་བྱ། །ཆོས་ཀུན་བདག་པོས་བཀའ་སྩོལ་ཅིག་ཅེས་གསོལ་ཏོ། །བཀའ་སྩལ་པ། 
ལྷའི་དབང་པོ་ཉོན་ཅིག །མཆོད་པའི་ལས་དག་བྱེད་འདོད་ན། །གཉིས་དགོན་གཙུག་ལག་ཆུ་མིག་འགྲམ། །མཚེའུ་ལྟེང་ཀ་ཁྲོན་པའི་སྟེང་། །དབྱར་ཟླ་གསུམ་ལ་གནས་པར་བྱ། །དབྱིབས་ལེགས་
རིན་མཛེས་བྱི་དོར་བྱ། །བ་ཡི་རྣམ་ལྔ་སྤོས་དང་དྲི། །ཐིག་ལེ་ལྔ་དང་ལྡན་པར་བྱ། །དབུས་སུ་ཧཱུྃ་བྲི་གསལ་བར་བྱ། །ༀ་ཕཱ་ཕོ་ཕཻ་ཕོཾ་འདི་དག་བཞི་ལས་རྫོགས་པར་བསྐྱེད། ཀླུའི་རྒྱལ་པོ་རྒྱ་མཚོ་ནི། །
ལུས་དཀར་རིན་ཆེན་སྦྲུལ་མགོ་གསུམ། །ལག་ན་རིན་ཆེན་སྡོང་བུའོ། །ཀླུའི་རྒྱལ་པོ་ཀུན་ནས་གདུགས། །སྦྲུལ་མགོ་གཉིས་པ་ཁ་དོག་སེར། །རིན་ཆེན་འབར་བ་ལག་ནའོ། །ཆུ་ལྷ་མགོ་ལྔ་ཁ་དོག་དམར། །
ལག་ན་པད་མ་འབར་བའོ། །ཀླུ་རྒྱལ་ཤིང་ལ་པུ་ར་ཀ ། ལག་ན་སྤྲིན་ཕུང་ཁ་དོག་ལྗང་། །རྒྱལ་དང་རྗེ་དང་བྲམ་ཟེ་དམངས། །སོ་སོའི་རིགས་ཀྱི་རྒྱལ་པོ་སྟེ། །སྤྲ་ཚིལ་ཞ་ཉེ་བག་ཟན་ལ། །གཟུགས་སུ་
ཡང་ནི་མཛེས་པར་བྱ། །སེམས་ཅན་འཁོར་གྱིས་བསྐོར་བར་བྱ། །ཀླུ་སྨན་སྣ་ཚོགས་དཀར་དང་མངར། །ཚོགས་པར་བྱས་ལ་མཆོད་སྦྱིན་བྱ། །ཁམ་ཕོར་སླུ་གུ་མཆུ་ལྔ་པར། །བླུགས་ལ་ཁ་བཅད་
གནས་སུ་སྦ། །གསོ་བར་བྱ་བའི་ལས་ནི་རབ། །སྤྱན་དས་གདན་དང་ཕྱག་སྐྱབས་བསྟོད། །སྨོན་ལམ་ལ་སོགས་རྒྱ་ཆེར་བྱ། །བདེན་པ་བདར་ཞིང་བསྡིགས་པར་བྱ། །

89-1-308a

དུག་རྣམས་དབྱུང་བའི་ལས་དག་ནི། །རྃ་ཡྃ་ཁྃ་ལས་བྱུང་བ་ཡི། །འཁོར་ལོ་རྣམ་གསུམ་མེ་རླུང་ཆུ། །བསྲེག་གཏོར་བཀྲུ་བྱ་སྟོང་ཉིད་ཀྱིས། །འཁོར་ལོ་ཆེན་པོ་གནས་པར་བྱ། །ཧཱུྃ་ལས་གྱུར་པར་
ལྡན་པར་བྱ། །བཟང་སྐྱོབ་པ་དང་དོགས་ཉེས་དང་། །མཉམ་དང་ལྡན་པས་མཆོད་པ་བྱ། །དེ་ནས་དེ་བཞེངས་མཚན་ནས་བརྗོད། །ཉ་སྟོང་དུས་མཆོད་སྲིང་ཞུས་བསྐོར། །དེས་ནི་དོན་རྣམས་འགྲུབ་པར་འགྱུར། །དཔལ་རྡོ་རྗེ་
གཏུམ་པོ་ཐུགས་གསང་བའི་རྒྱུད་ལས་དུག་དབྱུང་ཞིང་མཆོད་པ་བསྟན་པའི་ལེའུ་སྟེ་བཅུ་བཞི་པའོ།། །། དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོས་བཀའ་སྩལ་པ། དུས་ངན་ཐ་མར་
གྱུར་པའི་ཚེ། །སྡིག་ལ་མི་འཛེམ་མི་དགེ་སྤྱོད། །མཚམས་མེད་བྱེད་ཅིང་ཆོས་དཀོར་འཇིག །མཛེ་དང་ཤུ་བ་གཡན་པ་དང་། །སྐམས་དང་ཞ་གྲུམ་གཞོགས་ཕྱེད་ན། །དེའི་ཚེ་ང་ཡི་བསྟན་པ་འབྱུང་། །ཉོན་ཅིག་
དབང་པོ་འཁོར་གྱི་མཆོག །ལོག་སྲེད་གདུལ་དཀའ་གདོལ་བ་ཅན། །ཞི་བས་མི་འདུལ་གང་ཟག་གི། །གཤེད་དུ་འཁོར་ལོ་འདི་བསྐོས་སོ། །ཀྲོ་དྷ་རཱ་ཛའི་གཟུགས་བཅས་ལ། །རྡོ་རྗེ་རྒྱ་གྲམ་མཐའ་སྐོར་རྡོ་རྗེའི་
རྭ། །བརྩོན་འགྲུས་བཞི་ལྡན་དབུས་དང་ལྔ་རུ་དེའོ། །དེ་ལས་རྒྱས་པ་དག་ཏུ་བསྐོར་འདོད་ན། །དེ་ལ་ཁྱད་པར་ཁྱམས་དང་ཡི་གེ་ནི། །བཅུ་གཅིག་ལྡན་བྱས་མཚོན་རེའི་མིང་རུས་གཅར། །ཁྱམས་གཅིག་
ཧཱུྃ་དང་མིང་རུས་མང་ན་སྦྲག །དབུས་ཁྱམས་སྔགས་བྲི་མང་ན་དེ་དང་སྦྲག །གཅིག་ལ་རྡོ་རྗེ་ཧཱུྂ་བར་མང་ན་གཅར། །རྐང་པ་མོས་མ་ཤིགས་ན་ཕོ་ཡི་ལས། །དེ་མ་བྱུང་ན་ཕོ་མོ་སྦྲག་པའི་ལས། །བསོད་ནམས་
ཅན་གྱི་སྐལ་བཟངས་མ་ཐུལ་ན། །སྲིད་པའི་སྟོང་བཟློག་འཁོར་ལོ་དཀྲུགས་ཏེ་བསྐོར། །རོ་རས་ལ་བྲི་བྱ་རོག་འུག་པའི་སྒྲོ། །སྨྱུ་གུ་བྱས་ལ་གདན་ནག་ཡིག་སྔོན་བྲི། །དྲི་རྒོད་ཤིང་བསྲེགས་བོང་ཁྲག་བོང་དུག་སྦྱར། །

89-1-308b

དབུས་དང་བརྩོན་ཁང་བཞི་པོར་ཧཱུྃ་བར་གཅད། །དགོད་པ་ཀུན་བྱེད་ལས་རྣམས་ཐམས་ཅད་ཀྱི། །སྔགས་འདི་ཕོ་དང་མོར་བྲི་བར་དུ་གསད། ༀ་བཛྲ་ཙན་ཌ་མ་ཧཱ་རོ་ཥ་ཎ་ཧཱུྃ་ཕཊ། ཕོ་དང་མོར་བསྐོར་རབས་ཆད་ཕོ་
མོར་གཞུག །དབུས་ཀྱི་ཧཱུྃ་བཏགས་སྲད་བུ་ཚངས་བུག་དབྱུང་། །ཡཀྵ་ཁ་ཕཊ་ཕྱོགས་བཞིར་གཞག་པར་བྱ། །རྡོ་རྗེ་རབ་ཏུ་ཧཱུྃ་བར་དེ་བར་བཞག །དུག་སྣ་ཁྲག་སྣས་གའུ་ནག་པོར་བྱུག །གུ་གུལ་རྒྱ་ཚིལ་
ཚིལ་ཆེན་ར་ལུག་རྨང་ཁ་ནི། །ཁུ་བ་ནག་པོས་བྱ་བར་རབ་ཏུ་ཤིས། །བོང་གྲི་ནག་པོའི་རྔོག་མ་དྲི་རྒོད་ཤི་སྐྲ་དང་། །ཡུགས་ས་མོ་ཡི་སྐྲ་ཤད་སྐུད་པས་དཀྲི། །ཡུགས་ས་མོ་ཡི་དོར་རྟས་དྲིལ་ལ་སྦ། །ཕོ་མོ་
ཐོད་པ་སྟེང་འོག་རྒྱ་གྲམ་བྲི། །རི་རབ་མནན་བྱས་མཐའ་གཉིས་དང་པོ་བཞི། །བང་རིམ་སྔགས་བྲིས་སྟེང་དུ་རྒྱ་གྲམ་དགབ། །རྒྱ་གྲམ་འོག་ཁུང་སྟེང་དུ་ཁྲུ་དོའི་ཚད། །བང་རིམ་བཞི་ལ་སྔགས་འདི་
སྐུ་གསུང་ཐུགས། །ང་ཡི་རི་རབ་དག་ཏུ་མཚོན་ཕྱིར་བྲི། །ཨོྂ་ལྂ་ཧཱུྃ་ལྃ་སྟྃ་གྷ་ནཱྃ། ༀ་བཛྲ་ཙཎ་ཌཱ་ནཱྂ་ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་དྲག་པོ་འཁོར་ལོའི་
ལེའུ་སྟེ་བཅྭ་ལྔ་པའོ།། །། དེའི་ཚེ་དེ་སྐད་ཅེས་བཀའ་སྩལ་པའི་མཐུས་འཇིག་རྟེན་གྱི་ཁམས་ཀྱང་གཡོས། རབ་ཏུ་གཡོས་སོ། །འཇིག་རྟེན་གྱི་ཁམས་ཐམས་ཅད་ལ་ལ་ནི། 
གཡས་སུ་འཁོར་བའི་ཚུལ་གྱིས་འཁྲུགས་སོ། །ལ་ལ་ནི་གཡོན་དུ་འཁོར་བའི་ཚུལ་གྱིས་འཁྲུགས་སོ། །ལ་ལ་ནི་བླ་འོག་དགྱེ་དགུའི་ཚུལ་གྱིས་འཁྲུགས་སོ། །ལ་ལ་ནི་མཐོ་དམན་དང་གྲུམ་
པའི་ཚུལ་གྱིས་འཁྲུགས་ཏེ་དེ་དག་ན་གནས་པའི་གདུག་པ་ཅན་ཐམས་ཅད་རབ་ཏུ་མྱོས་ནས། ཁ་ནས་ཁྲག་ངན་སྐྱུགས་པ་དག་ཀྱང་བསྐུས་ཏེ། ཐམས་ཅད་ཀྱང་ག་ན་བ་དེར་ཐད་དུ་འདུས་

89-1-309a

ནས་ཕྱག་འཚལ་སྟེ་མགྲིན་གཅིག་ཏུ་སྐད་ཀྱིས་འདི་སྐད་ཅེས་གསོལ་ཏོ། །ཀྱེ་མ་སྔ་མ་མ་མཐོང་ཁྲོ་བདག་འཇིགས་པའི་སྐུ། །རབ་ཏུ་དྲག་པ་ཡ་མཚན་ཨེ་མ་ཧོ། །ཐུགས་རྗེས་དགོངས་
ཤིག་བདག་ཅག་འབངས་སུ་མཆི། །དེ་ལས་འགལ་ན་དམྱལ་བར་ལྟུང་བར་ཤོག་ཅེས་གསོལ་ཞིང་འཁོད་དོ། །དེ་ནས་བདུད་ཀྱི་རྒྱལ་པོ་བསྐོས་ཀྱི་བདག་པོ་བདུད་བྱེ་བ་འབུམ་ཕྲག་དང་བཅས་པས་མགྲིན་གཅིག་
གིས་སྲོག་གི་སྙིང་པོ་ཕུལ་བ། བཅོམ་ལྡན་འདས་བདག་ཅག་གི་རིག་པ་འདི་བཞེས་སུ་གསོལ། ཨོཾ་ནག་པོ་ཏྲི་ཊ་ཏྲི་ཊ་ཏྲི་ལིང་ཏྲ་ཏ་ཧ་ཀེ་ཎ། བདག་ཅག་གི་རིག་པ་འདི་གང་ན་གནས་པ་དེར་བདུད་ཀྱིས་
འགལ་བར་མི་བགྱིད་དོ། །གང་ཡིད་ལ་དགོས་པ་དེ་གྲུབ་པར་བགྱིད་དོ། །ཕས་བྱད་སྔགས་དང་སྦྱོར་བ་བཏང་བ་ཡང་ཕྱིར་ལྡོག་གོ། །དེ་ནས་གཟའ་རྒོད་ཆེན་པོ་རཱ་ཧུ་ལ་འཁོར་གཟའ་འབུམ་ཕྲག་དང་
བཅས་པས་མགྲིན་གཅིག་གིས་རང་རྟགས་སྲོག་གི་སྙིང་པོ་ཕུལ་བ། ཤུ་ཤུ་རཀྵ་ཚལ་པ། ཀྲོ་དྷ་ཀྲོ་ལེ་ཤྭ་ར། རཱ་ཧུ་ལ། ཙ་ཏི་ཙ་ཏི། བདག་ཅག་གི་རིག་པ་འདི་གང་ན་གནས་པ་དེར་
གཟའ་རྣམས་ཀྱིས་འགལ་བར་མི་བགྱིད་དོ། །ཕས་གཏང་བ་ཡང་སླར་དེ་ཉིད་ལ་མཆིའོ། །འདི་འཛིན་པ་ལ་ཅི་འཚལ་བ་ཡང་སྩོལ་བར་བགྱིད་དོ། །དེ་ནས་དཀར་པོ་དུང་གི་ཐོར་ཚུགས་ཅན་
ལ་སོགས་པའི་རྒྱལ་པོ་འཁོར་འབུམ་ཕྲག་དང་བཅས་པ་ལྷགས་ནས་མགྲིན་གཅིག་གིས་རང་རྟགས་སྲོག་གི་སྙིང་པོ་ཕུལ་བ། བྲཧྨ་པུ་ཌིད་ཥ། ཨ་བ་ར་ཏ་རཱ་ཛ་དྷ་ན་རཀྵ་ཙི་ཏ་ཕྱུང་ཙི་ཏ་རཱ་ཛ་ཕྱུང་
རཱ་ཛ་ཙི་ཏ་གཏུབས། བདག་ཅག་གི་རིག་པ་འདི་གང་ན་མཆིས་པ་དེར་ཡུལ་འཁོར་དང་དཔག་ཚད་དུ་འགལ་བར་མི་བགྱིད་དོ། །ཕས་བཏང་བ་ཡང་དེ་ཉིད་ལ་སླར་མཆིའོ། །དེ་ནས་བཙན་

89-1-309b

དམར་པོ་སྲོག་ལེན་བཙན་འབུམ་ཕྲག་དུ་མ་དང་བཅས་པས་མགྲིན་གཅིག་གིས་རང་རྟགས་སྲོག་གི་སྙིང་པོ་ཕུལ་བ། ཨཱ་བི་ཤུ་རཱ་ཛ་ཏྲི་ལིཾ་བདག་ཅག་འཁོར་དང་བཅས་པ་རྣམས་འདི་ལས་འདའ་བར་མི་
བགྱིད་དོ། །ཕས་བཏང་བ་ཡང་དེ་ཉིད་ལ་སླར་མཆིའོ། །དེ་ནས་གཤིན་རྗེའི་རྒྱལ་པོ་སྨིགས་པ་ཞེས་བྱ་བ་འཁོར་དང་བཅས་པས་མགྲིན་གཅིག་ཏུ་རང་རྟགས་སྲོག་གི་སྙིང་པོ་ཕུལ་བ། ཡ་མ་རཱ་ཛ་ཡ་མ་ཙི་ནི་
བདག་གི་རིག་པ་སྤྱོད་པ་དེར་བདག་གི་གནོད་པ་མི་སྤོབས་ལགས་ཏེ། གནོད་པའི་རྒྱུན་སྤངས་ནས་ཕས་གཏང་མ་ཡང་སླར་དེ་ཉིད་ལ་མཆིའོ། །དེ་ནས་མ་མོའི་རྒྱལ་མོ་མཁའ་དབྱིངས་ཀྱི་
ཡུམ་ལྔ་དང་། བདུད་ཀྱི་གཤིན་རྗེའི་སྲིང་མོ་སྲིད་པའི་ཕུང་བྱེད་རེ་མ་ཏི་ལ་སོགས་པ། མ་མོའི་ཚོགས་དཔག་ཏུ་མེད་པ་དག་གིས་རང་རྟགས་སྲོག་གི་སྙིང་པོ་ཕུལ་བ། རག་མོ་མཱ་མཱ་རུ་ལུ་སྙིང་ཁ་
རཀྵ་ཛ་པཱ་ལ་མ་མ་བྷྱོ་བྷྱོ། །བདག་ཅག་གི་གསང་བའི་སྔགས་འདི་སྤྱོད་པ་དེར་བསྲུང་བ་དང་བསྐྱབ་པ་བགྱིད་དོ། །འཁོར་དང་བཅས་ཏེ་བཀའ་བཞིན་བགྱིད་དོ། །ཕས་གཏང་བ་ཡང་སླར་དེ་
ཉིད་ལ་མཆིའོ། །དེ་ནས་ཀླུ་འཁོར་དང་བཅས་པས་མགྲིན་གཅིག་ཏུ་རང་རྟགས་སྲོག་གི་སྙིང་པོ་ཕུལ་བ། ནཱ་གཱ་རཱ་ཛ་ནཱ་ག་ནི། གང་ན་རིག་སྔགས་ཀྱི་རྒྱལ་པོ་སྤྱོད་པ་དེར་བདག་གི་ཀླུའི་གནོད་པའི་རྒྱུན་སྤོང་
ངོ་། །ཕས་གཏང་བ་ཡང་སླར་དེ་ཉིད་ལ་མཆིའོ་ཞེས་སོ་སོ་ནས་རང་རྟགས་སྲོག་གི་སྙིང་པོ་ཕུལ་ཏེ་དམ་བཅས་སོ། །དེ་ནས་དབང་པོ་ཆེན་པོས། ཁྲོ་བོའི་བདག་པོ་དེ་ལ་འདི་སྐད་ཅེས་
གསོལ་ཏོ། །སྲིད་པ་དབང་ཅན་འདི་རྣམས་ཀུན། །འཁོར་ལོས་ཟློག་ན་ཇི་ལྟར་བཟློག །བཟློག་ཐབས་ཁྱད་པར་བཀའ་སྩལ་ཅིག །བཀའ་སྩལ་པ། ཉོན་ཅིག་ལྷའི་དབང་པོ་མཱ་ར་ཡའི་

89-1-310a

ཙཀྲ་དག་ལས་སོ་སོའི་སྔགས་འཁོར་བྲི། །བྱད་སྔགས་ཕྱིར་ཟློག་དམ་ཚིག་བཟློག་བཏགས་སོ། །མཆུ་གསུམ་སྙིང་ལྤགས་མེད་པའི་ཐོད་པ་དང་། །རོ་ཉེ་སྦལ་ཤུགས་ཕག་ཐོད་རྣམ་
གྲི་མོ། །དྲི་རྒོད་སྐྱུད་ག་ཐོད་ཆེན་ནང་དག་ཏུ། །རབ་ཏུ་དྲག་ཏུ་བསྐོར་བའི་འཁོར་ལོ་གཞུག །འོང་འགྲོ་འདྲུལ་སྲང་རྒྱ་གྲམ་ལམ་དག་ཏུ། །ཨེ་དོང་བྲུ་བྱས་རྒྱ་སོལ་མི་ཁྱི་ར། །རྟ་ཁྲག་རྨེ་ཁྲག་
ནག་པོས་སྦྱངས་ལ་བསྐུ། །དབུས་བཅུག་མཐའ་བསྐོར་མནན་པའི་ལས་དག་བྱ། །ཡང་ན་ཐུན་དུ་སྤགས་ལ་ཁྲོས་པས་འཕང་། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་
བའི་རྒྱུད་ལས་དྲེགས་པ་ཅན་སྲོག་གི་སྙིང་པོ་ཕུལ་བ་དང་། མངོན་སྤྱོད་དྲག་པོའི་ལས་ཀྱིས་བཟློག་པའི་ལེའུ་སྟེ་བཅུ་དྲུག་པའོ།། །།  དེ་ནས་ལྷའི་དབང་པོས་གསོལ་པ། ཀྱེ་བསྟན་
པ་འཇིག་པའི་དུས་དག་ན། །ཐུན་གྱིས་ཚར་གཅད་བསྟན་དུ་གསོལ། །བཀའ་སྩལ་པ། ལྷའི་དབང་པོ་ཉོན་ཅིག །རྫས་དང་སྔགས་བཅས་ཏིང་འཛིན་གསུམ། །ཁྲོས་པས་ཞེ་སྡང་བསྐྱེད་
པར་བྱ། །ཞེ་སྡང་དྲན་པས་གདུག་རྫས་བསག །ཡུངས་ཀར་ཡུངས་ནག་སྐེ་ཚེ་ཏིལ། །གཟེ་མ་སྐྱེར་པ་སེ་བའི་ཚེར། །ཐུན་སྔགས་འདི་བཟླས་བརྣགས་ལ་བྲབ། །ཨ་མུ་ཀམ་ནི་གཏོར་མ་འམ། །མཚན་ངན་ཀ་
པཱ་ལ་རུ་གཞུག །ཨོྂ་བཛྲ་ཙཎྜ་ཌ་མ་ཧཱ་རོ་ཥ་ཎ་ཧཱུྃ་ཕཊ། མཱ་ར་ཡ་ཐུན་ཕོབ། དབང་པོ་ལ་ཡཾ། སྲོག་ལ་ཡཾ། ཙིཏྟ་ལ་ཡཾ། གོ་རོ་ཙ་ན་ལ་ཡཾ། གཟས་པའི་མཚན་མོས་རྡོ་རྗེའི་ཐོག་ཏུ་དབབ། །གང་དམིགས་གཟས་
པའི་མཐུ་དང་རྫུ་འཕྲུལ་རྣམས། །བདག་ལ་བསྡུ་བྱས་རྟོག་པའི་བག་ཆགས་བཀྲུ། །སྔགས་འདིས་རོལ་ཅིག་བརྗོད་ཅིང་བྷ་ལིང་དགྲིལ། །ཨོཾ་བ་ལིཾ་ཏ། བ་ལིྃ་པཱུ་ཛ་ཨརྒྷཾ་པྲ་ཏཱིཙྪ་ཧོཿ། བཛྲ་ཀྲོ་དྷ་ཙཎ་ཌ། བ་ལིྂ་ཁཱ་

89-1-310b

ཧི་ཁཱ་ཧི། བཛྲ་ཀྲོ་དྷ་ཙཎ་ཌ་ཧ་ཧ་ཧ། ཧེ་ཧེ་ཧེ། བྷ་ཊཱ་སྭཱ་ཧཱ། སྦྲུལ་དང་སྦལ་པ་ཉ་དང་ཆུ་སྲིན་སྙིང་། །ཤ་ཆེན་ཁྲག་ཆེན་ལོངས་སྤྱོད་རྣམ་པ་ཀུན། །ཤེས་རབ་མཆོག་གི་ཕྱག་རྒྱ་ཆེར་བསམ་ལ། །ཡཾ་གཏོར་རཾ་བསྲེག་ཁཾ་བཀྲུས་
བདུད་རྩིར་བསྒྱུར། །ཨ་མྲྀ་ཏ་དག་སྔགས་འདིས་སྦྱང་བར་བྱ། །ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ། །བཛྲ་ཨ་མྲྀ་ཏ་ཧཱུྃ་ཧྲཱིཿཐཱ། ཨོྂ་མ་ཧཱ་རཀ་ཏ་ཛྭ་ལ་རཾ་ཁཾ། ཁཱ་ཧི་ཁཱ་ཧི། ཧཱུྃ་ཧཱུྃ་ཧཱུྃ། ཧཱ་ཧཱ་ཧཱ། ཕྱི་ནང་
གསང་བའི་མཆོད་པ་རྒྱ་མཚོའི་ཚོགས། །དངོས་སུ་འབྱོར་དང་ཡིད་ཀྱིས་སྤྲུལ་པ་ཀུན། །ཕྱོགས་བཅུའི་ཞིང་ཁམས་གང་བར་རབ་དམིགས་ལ། །སྐྱོ་མེད་དང་བས་ཉིན་མཚན་བརྩོན་པར་བྱ། །མི་དམིགས་མཉམ་
བཞག་ཡེ་ཤེས་རབ་ལྡན་པ། །སྐུ་གསུང་དུས་གསུམ་སངས་རྒྱས་ཐམས་ཅད་དང་། །སེམས་དཔའ་སེམས་མ་ཁྲོ་བོ་ཁྲོ་མོའི་ཚོགས། །མཆོད་པ་ཆེན་པོ་དེ་མཉེས་སྦྱིན་བྱའི་སེམས་ཅན་ཚིམ། །ཞེས་གསུངས་སོ། །
དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་ཐུན་དྲག་མཆོད་སྦྱིན་གྱི་ལེའུ་སྟེ་བཅུ་བདུན་པའོ།། །། དེ་ནས་ལྷའི་དབང་པོ་ལ་སོགས་ཏེ། རི་རབ་དང་བར་སྣང་ལ་སོགས་པ་ལ་གནས་པའི་ལྷ་ཐམས་ཅད་
ཀྱིས་ལྷ་རྫས་ཀྱི་མེ་ཏོག་དང་། ཕྲེང་བ་དང་། སྤོས་དང་། ཕྱེ་མ་དང་། ལྷའི་ན་བཟའ་དང་། ཞལ་ཟས་དང་། རྒྱན་སྣ་ཚོགས་པ་དང་། བདུག་སྤོས་དང་། སིལ་སྙན་དང་། བྱུག་པ་དང་། སྒྲ་སྣ་ཚོགས་པ་དང་། སྤོས་སྣ་
ཚོགས་པ་ཐོགས་ནས་ལྷགས་སོ། །འཇིག་རྟེན་པ་དེ་དག་ཀྱང་རང་རང་གི་མཆོད་པ་སྣ་ཚོགས་པ་ཐོགས་ནས་ལྷགས་ཏེ། ཞེ་ས་དང་གུས་པ་བྱས་ཏེ་ཐམས་ཅད་ཀྱང་མགྲིན་གཅིག་གི་ང་རོས་གསོལ་པ། ཁྲོ་
རྒྱལ་སྐུ་ལ་དྲི་མ་མི་མངའ་ཡང་། །དཀར་ཆབ་དངར་ཆབ་སྤོས་ཀྱི་ཆབ། །སྨན་ཆབ་བདུད་རྩིའི་ཆབ་ལ་སོགས། །ཁྱོད་ཀྱི་སྐུ་ལ་ཁྲུས་ཆབ་གསོལ། །ཨཱ་ཧ་ར་ཧཱུྃ། ག་པུར་བཟང་དྲུག་སྨན་གྱི་དྲི། །ཨ་ག་རུ་དང་

89-1-311a

དུ་རུ་སྐ། །གླ་རྩི་སྤོས་ཀྱི་དྲི་ལ་སོགས། །འགག་པ་མེད་པ་ཤངས་ལ་འབུལ། །དྷཱུ་པ་པཱུ་ཛ་མེ་གྷ་ཧཱུཾ། །རིན་ཆེན་ལྔ་ཡི་མེ་ཏོག་དང་། །ཆུ་ལས་སྐྱེས་དང་ཐང་ལས་སྐྱེས། །ཡིད་ཀྱིས་སྤྲུལ་པའི་མེ་ཏོག་རྣམས། །
རྡོ་རྗེ་འཛིན་གྱི་དབུ་ལ་འབུལ། །པུཥྤ་པཱུ་ཛ་མེ་གྷ་ཧཱུྃ། །འབྲུ་ཡི་མར་མེ་རྩི་ཡི་མར། །འདམ་བུ་སྣང་གསལ་རིན་ཆེན་སྒྲོན། །སྤོབས་པ་བཅུད་ལེན་སྒྲོན་མ་རྣམས། །ཁྲོ་བོ་གཏུམ་པོའི་སྤྱན་ལ་འབུལ། །ཨཱ་ལོ་ཀེ་
པཱུ་ཛ་མེ་གྷ་ཧཱུྃ། །རྣམ་ལྔའི་སྤོས་དང་སྨན་ལྔར་སྦྱར། །ར་ས་ཡ་དང་ཨ་མྲྀ་ཏ། །རྡོ་རྗེ་འཛིན་ལ་དྲི་མཆོག་འབུལ། །གན་དྷེ་པཱུ་ཛ་མེ་གྷ་ཧཱུྃ། །རོ་མཆོག་བརྒྱ་ལྡན་བདུད་རྩིའི་མཆོག །བདེ་བར་བཞེས་ཏེ་དགྱེས་པར་
དགོངས། །ཨ་མྲི་ཏཱ་བྷ་ར་ཧཱུྃ། །ཀུན་དུ་གྲགས་པའི་སྒྲ་རྣམས་མ་ལུས་དང་། །དམ་ཆོས་སྒྲ་སྒྲོགས་སིལ་སྙན་འབུལ། །སྥཱ་ར་ཎ་ཁཾ་ཞེས་མགྲིན་གཅིག་གིས་གསོལ་ནས་དེ་ཉིད་དུ་སྤྲོ་བའི་ཚུལ་གྱིས་
གནས་པར་གྱུར་ཏོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་དྲེགས་པའི་འཁོར་དག་གིས་སྲི་ཞུ་དང་གུས་པས་མཆོད་པའི་ལེའུ་སྟེ་བཅྭ་བརྒྱད་པའོ།། །།   དེ་ནས་རྡོ་རྗེ་ཁྲོ་བོ་དེས་དྲེགས་
པའི་འཁོར་དེ་དག་ལ་དམ་ཚིག་ཆེད་དུ་སྤྱད་པ་འདི་བཀའ་སྩལ་ཏོ། །མི་གནས་མཐའ་ལས་འདས་པ་སེམས་ཉིད་མཆོག །སྣ་ཚོགས་ཆོ་འཕྲུལ་འབྱུང་བས་ཀུན་གྱི་གཞི། །མ་བཅོས་རང་བཞིན་རྐྱེན་གྱིས་
བྱས་པ་མེད། །དེ་ལ་གནས་ན་རང་དམ་བསྲུངས་པ་ཡིན། །དེ་བཞིན་གྱུར་ཀྱང་འོད་འགྱེད་ཆེད་དུ་བླང་། །ནོར་བུ་འབར་བ་མ་མཐོང་སྟོན་པ་དང་། །ཐུགས་རྗེའི་བྱིན་གྱིས་བརླབས་ཀྱིས་གདུང་བའི་ནད་སེལ་བ། །བདུད་རྩི་
ལྟ་བུའི་ཚིག་གིས་ཚིམ་བྱེད་པ། །ཀུན་གཞིའི་ཡུལ་དུ་ནུས་པའི་དབང་འབོགས་ཤིང་། །ཐུགས་རྗེས་སྐྱོབ་པར་མཛད་པའི་མགོན་པོ་དེ། །དུས་གསུམ་སངས་རྒྱས་ཀུན་པས་གཉེན་པ་སྟེ། །སྙིང་བཞིན་སྐྱེ་མེད་

89-1-311b

རྨི་ལམ་ནང་དུ་བཀུར། །ངག་གི་རྡོ་རྗེ་ཆུ་བོའི་རྒྱུན་བཞིན་དྲང་། །སྐྱོ་མེད་ཉིན་མཚན་དུས་སུ་བརྩོན་པར་བྱ། །རྡོ་རྗེའི་ཕྲག་པར་མི་གསེང་བསྡམས་ལ་དྲང་། །བརྫུན་མེད་ཚིག་གིས་དམ་པ་དེ་ལ་བསྟོད། །བཤད་པའི་དབང་
རྣམས་རབ་ཏུ་མ་བསྟན་ན། །རྡོ་རྗེའི་ལྕེ་ལ་བདུད་རྩི་འཛག་གྱུར་ཀྱང་། །གཞན་ལ་ཟེར་ཐིགས་འགའ་ཡང་སྤྲོ་མི་བྱ། །གསང་འོས་གཉེར་གཏད་སྔགས་དང་མཚན་རྣམས་གསང་། །དུས་གསུམ་འགྱུར་མེད་
རྡོ་རྗེའི་སྐུ་མཆོད་དེ། །ན་དང་འཆི་སོགས་ལས་ཀྱི་རྣམ་སྨིན་གང་། །སྡུག་བསྔལ་མི་བཟད་ཉམ་ཐག་ཅི་བྱུང་ཡང་། །ལྷག་པར་དྲན་པ་བསྐྱེད་དེ་རྗེས་སུ་གཟུང་། །འགྲོ་ཉལ་འདུག་ཟ་སྤྱོད་ལམ་རྣམ་པ་བཞིར། །མི་
མཇེད་ཤེས་རབ་དག་གིས་རྗེས་སུ་བཟུང་། །སློབ་དཔོན་མཚང་དང་གསང་ཚིག་ཡི་དམ་ལྷ། །སྲོག་གི་ཕྱིར་ཡང་དེ་དག་མི་སྤོང་ངོ་། །བཞི་པ་དེ་བཞིན་དེ་ལ་དེ་མི་སེམས། །དྲན་པས་རྗེས་སུ་དེ་ལ་བཟུང་བར་བྱ། །
སྨིག་རྒྱུ་ཆུ་རྒྱུན་བརྟུལ་ཞུགས་བྱ་བ་བསྐྱེད། །དེ་ལས་འགལ་བའི་བརྟུལ་ཞུགས་རབ་ཏུ་སྤྱད། །རྡོལ་ཞིང་ཟག་འགྱུར་དུག་ཅན་དམད་པའི་སྣོད། །དེ་རུ་མུ་ཏིག་བདུད་རྩི་མི་བླུགས་ལྟར། །ཐབས་ཀྱི་སྤྱོད་པས་རྣམ་
དབྱེ་ཤེས་པར་བྱ། །དཔག་ཚད་ཀུན་དུ་ཉམས་པ་རྣམ་པར་སྤོང་། །དེ་དག་འགལ་ན་རྡོ་རྗེ་དམྱལ་བ་ཡི། །སྡུག་བསྔལ་ཆུ་བོ་རེག་ཅིང་བཟོད་དཀའ་བར། །དུས་གསུམ་རྣམས་དང་ང་ཡིས་བརྗོད་མི་ནུས། །གཞན་ནས་
གཞན་འཕང་ཐར་པའི་དུས་ཀྱང་མེད། །མ་ཉམས་བརྒལ་དཀར་འགྲོ་བར་གདོན་མི་ཟ། །ང་དང་དུས་གསུམ་ཀུན་ཀྱང་དེ་ལ་དགོངས། །གང་ལ་དམིགས་པའི་འབྲས་བུ་ཆུད་མི་ཟ། །ཕྱོགས་སྐྱོང་རྣམས་ཀྱིས་དམ་
སྐྱོང་དེ་ལ་བསྲུང་། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་ས་མ་ཡ་བཀོད་པའི་ལེའུ་སྟེ་བཅུ་དགུ་པའོ།། །། དེ་ནས་འཁོར་དེ་དག་ལ་ཆེད་དུ་བརྗོད་པ་འདི་བརྗོད་དོ། །

89-1-312a

ཉོན་ཅིག་འདུས་པའི་འཁོར་རྣམས་ཀུན། །དོན་དམ་དབྱེར་མེད་ཕྱོགས་ཆ་ཀུན་དང་བྲལ། །མི་ལེན་མི་གནས་མི་སྤོང་མི་འགོག་ཅིང་། །རང་བཞིན་གནས་པ་དེ་ལ་བཅོས་སུ་མེད། །རྟོག་པའི་གནས་མིན་ཕྲ་བའི་
སྤྱོད་ཡུལ་མིན། །དངོས་པོར་མི་གནས་མཚན་མ་ཀུན་དང་བྲལ། །སྒྲོ་དང་སྐུར་པས་དེ་ལ་དཔག་མི་དཔོགས། །སྟོང་པ་མ་ཡིན་ཐ་སྙད་དེ་ལས་འདས། །མི་གནས་མི་རྟོག་རྐྱེན་གྱིས་བསྐྱེད་པ་མེད། །དངོས་བྲལ་ཀུན་
གྱི་མཐའ་འདས་བརྗོད་དུ་མེད། །འདི་ཞེས་ངེས་པ་དེ་ལ་མཚོན་དུ་མེད། །དུས་གསུམ་བདག་པོ་སངས་རྒྱས་ཐམས་ཅད་ཀྱི། །ཡབ་ཡུམ་ཤུལ་དང་ཀུན་གྱི་དངོས་པོ་ཡིན། །སེམས་ཅན་འཇིག་རྟེན་
ཁམས་ཀྱི་རང་བཞིན་དང་། བུད་དྷ་འཇིག་རྟེན་ཁམས་ཀྱི་རང་བཞིན་ཀུན། །གཅིག་སྟེ་རྣམ་གྲངས་ཡོངས་ཀྱིས་དེ་ལས་མེད། །གང་ཡང་མ་འགགས་གཅིག་ཏུ་ངེས་པ་མེད། །ཐ་སྙད་བརྗོད་བྲལ་སངས་
རྒྱས་ཀུན་གྱི་དངོས། །དེ་ལྟར་གྲོལ་བ་རྣལ་འབྱོར་མཆོག་གི་ལམ། །ཕྲ་བའི་སྒོ་མོ་རྣམས་ཀྱིས་རྗེས་དཔག་དཀའ། །དེ་ལ་སྤྲོ་དང་བསྡུ་བའི་དབང་པོ་མེད། །གཟུགས་དང་ཁ་དོག་རྣམ་པ་གང་དུ་ཡང་། །དེ་ཉིད་
མ་གྲུབ་དེ་ལ་གཉེན་པོ་མེད། །འབྱུང་བ་ཆེན་པོ་ནམ་མཁའི་རང་བཞིན་ལ། །ཁུ་རླངས་འཇའ་ཚོན་ན་བུན་སྤྲིན་ལ་སོགས། །ཐན་དྲག་ལྷགས་རླུང་ལ་སོགས་གང་བྱུང་ཡང་། །ནམ་མཁའ་ཆེན་པོ་དེ་ལ་གཡོ་བ་
མེད། །དང་པོ་བྱུང་ཡང་དེ་ཡི་ངང་ལས་བྱུང་། །ཐ་མར་ཞི་ཡང་དེ་ཡི་ངང་དུ་ཞི། །དེ་དག་དེ་ཡི་ནང་དུ་འུབ་ཀྱིས་འཆུས། །ཡངས་སོ་ཆེའོ་ནམ་མཁའི་ཁོག་པར་གནས། །ཁམས་གསུམ་སེམས་ཅན་དུས་གསུམ་
སངས་རྒྱས་རྣམས། །དོན་དམ་ང་ཡི་རང་བཞིན་ང་ཉིད་ཡིན། །ཀུན་ཀྱང་དགེ་དང་སྡིག་སོགས་གང་བྱས་ཀྱང་། །རང་བྱུང་འཕྲུལ་ལྡན་དེ་ལ་འཕེལ་འགྲིབ་མེད། །རང་བྱུང་ཡེ་ཤེས་རྒྱུ་རྐྱེན་དངོས་པོ་མེད། །སེམས་

89-1-312b

ཅན་སངས་རྒྱས་གཉིས་ཤེས་རྟོག་གི་བུ། །དེ་ལ་དབྱེ་དང་མིང་དང་ཡིག་ཚོགས་མེད། །ཅེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་གཞི་བྱང་ཆུབ་སྙིང་པོའི་ལེའུ་སྟེ་ཉི་ཤུ་པའོ།། །།  
དེ་ནས་དྲེགས་པའི་འཁོར་དེ་དག་ངོ་མཚར་དུ་གྱུར་ནས་མགྲིན་གཅིག་གིས་འཛུམ་པའི་མདངས་ཀྱིས་མངོན་པར་བསྟོད་པ། ཨེ་མ་ཧོ་རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་འཛིན་པ་ཀུན་གྱི་རྒྱལ། །རྡོ་རྗེ་རྡོ་རྗེ་
འཛིན་པ་ཆེ། །རྡོ་རྗེ་སྐུ་སྟེ་ཆེ་བ་པོ། །མི་ཤེས་དྲི་མ་ཀུན་འཇོམས་པ། །སངས་རྒྱས་ཀུན་པས་སྔར་སངས་རྒྱས། །འགྲོ་བའི་མགོན་ལ་ཕྱག་འཚལ་བསྟོད། །རྡོ་རྗེ་ལུས་ཏེ་ལུས་ཀྱི་མཆོག །ལུས་རྣམས་ཐ་དད་
རྣམས་སྤྲུལ་ཅིང་། །ལུས་དམན་པ་དག་འཇིགས་པར་མཛད། །ལུས་ཀྱི་ངེས་དོན་གཏིང་དཔག་དཀའ། །རྡོ་རྗེ་སྐུ་ལ་ཕྱག་འཚལ་བསྟོད། །རྡོ་རྗེ་འབར་བ་ཆེར་འབར་བ། །འབར་བའི་འོད་ཀྱིས་སྡང་བ་འཇོམས། །
རྡོ་རྗེ་ཤུགས་ཏེ་ཤུགས་ཆེ་བ། །རྡོ་རྗེའི་མཚོན་ཆེན་ཕྱག་འཚལ་བསྟོད། །ཕྱག་ན་རྡོ་རྗེ་ཡེ་ཤེས་ཆེ། །ཞལ་གྱི་རྡོ་རྗེ་སྡང་བ་འབིགས། །རྡོ་རྗེ་མཆེ་བ་རྣོ་བ་ཆེ། །ཆེ་བ་རྒྱ་མཚོ་གསུང་ཆེན་བསྟོད། །རྡོ་རྗེ་
པད་མ་བྱང་ཆུབ་ཆེ། །ཐུགས་ཉིད་སངས་རྒྱས་རང་བྱུང་བ། །རྡོ་རྗེ་རྒྱ་ཆེ་ཐུགས་ཀྱི་མཆོག །རྡོ་རྗེ་རྣལ་འབྱོར་ཐུགས་ཆེན་བསྟོད། །འཇིགས་བྱེད་དྲག་པོ་ནག་པོ་ཆེ། །རྡོ་རྗེ་འཇིགས་བྱེད་སྡང་བྱེད་པ། །བསྒྲུབ་
དཀའ་བསྒྲུབ་ལེགས་ཡོན་ཏན་ཆེ། །ཡོན་ཏན་རྡོ་རྗེ་མཆོག་ལེགས་བསྟོད། །རྡོ་རྗེ་ཁྲོ་བོ་དྲག་པོ་ཆེ། །ཧ་ལ་ཧ་ལ་ནག་པོ་ཆེ། །རྟོག་པའི་དུས་ངན་རྣམ་པར་སྦྱོང་། །རྡོ་རྗེ་སེམས་དཔའ་ཕྱག་འཚལ་བསྟོད། །
ཅེས་མངོན་པར་བསྟོད་དོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་འཁོར་གྱིས་མངོན་པར་བསྟོད་པའི་ལེའུ་སྟེ་ཉི་ཤུ་རྩ་གཅིག་པའོ།། །།  དེ་ནས་ལྷའི་དབང་པོས་འདི་སྐད་ཅེས་གསོལ་

89-1-313a

ཏོ། །ཀྱཻ་རྡོ་རྗེ་ཁྲོ་བོ་ཁྱོད། །དུས་ངན་བསྟན་པ་མི་གནས་ཚེ། །འཇིག་རྟེན་ཁམས་སུ་ཆུ་འཁྱགས་དབབ་པའི་ཐབས་བཀའ་སྩལ་དུ་གསོལ། བཀའ་སྩལ་པ། ཉོན་ཅིག་དབང་པོ་ཆེན་པོ། འཇིག་རྟེན་ཕུང་བར་བྱ་ན་ནཱ་གའི་ཆུ་འཁྱགས་དབབ། །གསང་བའི་
ལས་རབ་འདི་ནི་རབ་ཏུ་གནག །ན་མོ་བུད་དྷཱ་ཡ། བཛྲ་ཙཎ་ཌ་མ་ཧཱ་རོ་ཥ་ཎ་ཧཱུྃ་ཕཊ། ཨོྂ་བཛྲ་ཙཎ་ཌ། ཀི་ལི་ཀི་ལི། ཙཎ་ཌ་མོ་ར་ཙི་ཎ། ཙཎ་ཌ་ཙཎ་ཌེ། ནཱ་ག་བྷན་དྷཱ་ཡ་ཕཊ་སྭཱ་ཧཱ། སོར་བརྒྱད་སེང་ལྡེང་ཕུར་བུ་གུ་གུལ་དང་། །ཚིལ་ཆེན་སྨེ་ཁྲག་བྱུག་ཅིང་བདུག་རྩ་
གཟེར་སྔགས་བཤམ། །གདགས་བཅྭ་ཐོག་མའི་གོང་ནས་གྲངས་མེད་བཟླས་པའི་མཆོག །ཀླུ་ཡི་གནས་སུ་བཏབ་ན་ཁྱུང་གིས་མི་ཐར་འཆིང་། །ཕྱོགས་བཏབ་ལྡོག་འགྱུར་ཞིང་བཏབ་འབུ་སྲིན་ཟ། །ལྡུམ་ར་རྟ་བྲེས་གནག་ར་ར་ལུག་གནས། །
བཏབ་ནས་མི་སྐྱེ་རི་སྙིལ་ཆུ་ཡང་ལྡོག །ཕལ་པའི་གྲོང་དང་རྒྱལ་པོའི་སྒོར་བཏབ་ན། །ཕལ་པའི་གྲོང་འཇིག་རྒྱལ་པོའི་འཁོར་གྱི་མི། །འབྱེར་ཞིང་ནད་ཀྱིས་ཐེབས་འགྱུར་ཕྱུང་ན་ཐར། །ནཱ་གའི་གནས་བཏབ་ཐམས་ཅད་འཆིང་བར་
འགྱུར། །ནག་པོ་གནས་སུ་སོང་ལ་ལས་འདི་བྱ། །བྱང་བལྟས་ཆུ་མིག་རྔོམ་དང་ངམས་སྐྱིབས་གནག །མགོ་ན་རྡོ་ནག་དྲེག་པ་ཆགས་པ་ཡོད། །གནས་དེར་ཨེ་ནག་འདོམ་བཞི་རྩེ་མོ་ལྷོ། །དཀར་ནག་རྡོ་བ་གླང་དམར་ར་སྒྱེད་བྱ། །སྐམ་པོ་དུམ་
བཞིར་ཕྱི་རོལ་ཁྲག་དུག་གནག །ར་ཁྱི་མི་ཡི་ཁྲག་བསྐོལ་བྱ་ཏིང་འཛིན་བསམ། །ག་རུའི་སྤྲུལ་པ་མང་པོ་ཤིན་དུ་གཅེས། །དཀར་ནག་དུད་པས་དྲན་བསྐྱེད་དབང་དུ་བསྡུ། །དེ་ནས་ཁྱུང་བསྐུལ་བ་ཞེས་བྱ་བ་འདི་གསུངས་སོ། །ཧྲཱིཿདཔག་
བསམ་ཤིང་ལས་བཞེངས་པའི་ག་རུ་ཌ། །ཡེ་ཤེས་གཤོག་པ་འབར་བ་གསེར་གྱི་མིག །རྡོ་རྗེའི་མཆུ་སྡེར་ཐོགས་མེད་ལྕགས་ཀྱུ་ཅན། །རི་རབ་རྩེ་ནས་རྒྱ་མཚོའི་གཏིང་དུ་སླེབ། །ཀླུ་རྒྱལ་གདན་དུ་འདིངས་ཤིང་ཀླུ་ཕྲུག་ཟ། །
ཀླུ་རྣམས་བཀའ་ལས་མ་འདའ་ཆུ་འཁྱགས་ཕོབ། །བརྗིད་གནོན་མན་ཏྲ་མུ་དྲས་ཟིལ་གྱིས་གནོན། །ནཱ་ག་རཱ་ཛ་ཕུཏྟ་ཕུཏྟ། སྟོང་བཟླས་གཤམས་སྦྲེལ་བནྡྷ་ཆུ་མིག་བརྡབ། །ཀླུ་གཟུགས་སྦྲུལ་

89-1-313b

མགོ་བདུན་སྔོན་སྒྱེད་ཁར་གཞག །མགོ་ལ་ཁྲག་བྱུང་འདི་ཉིད་རྩ་བརྒྱད་བཟླས། །ནཱ་ག་ནཱ་ག་ལ་ཁྲག་ནད་མགོ་ལ་ཕོབ། །ནཱ་ག་མགོ་ལ་ཁྲག་ཐུན་རྦད། །རྩ་བརྒྱད་བརྗོད་ཅིང་ཐབ་བྱ་ཁྲག་ལྷག་དང་། །ཐལ་
འཇིམ་བན་དྷ་ཆུ་མིག་ནང་དུ་བརྡབ། །ཐོག་དང་སེར་བ་ཇི་ལྟར་འདོད་བཞིན་འོང་། །ནཱ་གའི་གཟུགས་ནི་ནག་པོ་གེལ་ཆགས་ཆེ། །མིག་ནས་གློག་འགྱུ་ཁ་ནས་ཁྲག་སེར་འབབ། །དེ་ལྟར་བསམས་ན་ཀླུ་འཁྲུགས་
སེར་བ་འབེབས། །དཔལ་ལྡན་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་འཇིག་རྟེན་ཐོག་སེར་གྱི་ལེའུ་སྟེ་ཉི་ཤུ་རྩ་གཉིས་པའོ།། །། དེ་ནས་ཡང་ལྷའི་དབང་པོས་ཞུས་པ། མཐར་ཐུག་དྲག་པོའི་ལས་
ཀྱིས་ཇི་ལྟར་དབབ། །རྫས་དང་སྔགས་བཅས་དྲག་པོའི་སྦྱར་ཐབས་གང་། །སྦ་གནས་དུས་ཚོད་མཛེས་པ་གང་ལ་བགྱི། །བསྲུང་བའི་གོ་རིམས་བཅས་པ་ཇི་ལྟར་ལགས་ཤེས་ཞུས་པ་ལས། བཀའ་སྩལ་པ། 
ཉོན་ཅིག་སྐལ་ལྡན་ལྷ་ཡི་དབང་པོ་ཉོན། །རྫས་དང་སྔགས་བཅས་དྲག་པོའི་སྦྱོར་བ་འདིའོ། །མཛེ་ཤ་མཛེ་ཚིལ་ཐོད་པ་ཚིལ་ཆེན་དུད། །གཞོབ་རྣམས་བླུགས་ཏེ་སྤྲ་བའི་མེ་དང་སྤྲད། །ཡུགས་སའི་ཞལ་
དྲིལ་ཁར་ནག་བཅིང་བྱས་ལ། །ཆུ་མིག་འགྲམ་སར་སེང་ལྡེང་ཕུར་པ་གདབ། །སྟོན་ཟླ་ར་འབྲིང་གཟའ་རྒོད་རྒྱུ་དུས་གཏད། །སྐྱ་རེང་ཤར་དང་ཉི་ཕྱེད་ཉ་ལ་གཏད། །རྫས་མཆོག་མ་ཕྱུང་ཆུ་འཁྱགས་ཉིན་རེ་འབབ། །
དེ་ནས་ཀླུ་རྣམས་ཀུན་གྱི་གཉེན་པོ་རཀྟ་ཙ་མུཎྜི་ཞེས་བྱ་བ་འདིས་བསྐུལ་བཀའ་སྩལ་ཏོ། །ཧཱུྃ་སྐུ་ནི་གནམ་ལྕགས་འབར་བ་ལ། །དམར་སེར་མེ་ཡི་རལ་པ་ཅན། །ཁམས་གསུམ་སྲིད་གསུམ་ཁ་ན་
ཁྱེར། །སྲིད་པ་གསུམ་ནི་ལྟོ་ན་འཕྱོ། །ཡ་འགལ་གནམ་ལ་མ་འགལ་ས། །ཉི་མའི་སྨན་དང་སྤྱན་ནས་འཆར། །ཟླ་བའི་སྐྱིན་དང་ཞལ་ནས་འཆར། །རི་རབ་རྩེ་དགུ་ཕྱག་ན་བསྣམས། །མི་བཟད་འབར་མ་

89-1-314a

གཏུམ་ཆེན་མོ། །ཕྱག་ན་རྡོ་རྗེའི་བཀའ་ཉན་མ། །འདུལ་བའི་གཉེན་པོ་ཀླུ་འདུལ་མ། །ཐུགས་དམ་ཀླུ་ཡི་བན་དྷ་འདྲེན། །ཟས་སུ་ཀླུ་ཡི་ཤ་ལ་ཟ། །ཀླུ་ཡི་གནས་རིས་དབང་དུ་སྡུད། །སྔགས་
བཀའ་སྩལ་པ། ཨོཾ་ནཱ་ག་ཞུང་ཐུན། ཛྭ་ལ་ཛྭ་ལ། ཙྪིནྡ་ཙྪིནྡ། བྷནྡྷ་བྷནྡྷ། ཕཊ་ཕཊ་སྭཱ་ཧཱ། ལས་ཀྱི་གོ་ཆ་དྲུག་ནི་རབ་ཏུ་གཅེས། །ལོག་གནོན་གྱི་སྔགས་བཀའ་སྩལ་པ། ནཱ་ག་ལི་དུམྤ་ཡ་ས་
དོམ་དྷེ་བའ་ཀུ་རུ་ཧཱུྃ་ཧཱུྃ། ཛཿཛཿབྷྱོ་བྷྱོ། འཁོར་ལོ་ཚུལ་དུ་ལུས་ལའོ་ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ལས་མཐར་ཐུག་དྲག་པོའི་ལས་ཀྱི་ལེའུ་སྟེ་ཉི་ཤུ་རྩ་གསུམ་པའོ།། །། 
དེ་ནས་འཁོར་དེ་དག་གིས་ཞུས་པ། བཅོམ་ལྡན་ཉིད་ཀྱི་མཚམས་བཅད་ཇི་ལྟར་གཟུང་བར་བགྱི་ཞེས་གསོལ་པ་དང་། བཀའ་སྩལ་པ། འདུལ་བའི་ཚོགས་ཉོན་ཅིག །ངའི་རང་བཞིན་ནི་དུས་གསུམ་
གྱི་བདེ་བར་གཤེགས་པར་རྟོགས་པར་བྱོས་ཤིག །ངའི་རང་བཞིན་ནི་སྐྱེ་བ་མེད་པར་རྟོགས་པར་བྱོས་ཤིག །རང་འགག་མེད་རྟོགས་བྱོས་ངའི་རང་བཞིན་ནི་སྟོང་པ་ཉིད་དུ་རྟོགས་པར་བྱོས་ཤིག །ང་གང་ཡིན་པ་དེ་ནི་གསང་བའི་
བདག་པོའོ། །ང་གང་ཡིན་པ་དེ་ནི་རྡོ་རྗེ་སེམས་དཔར་རྟོགས་པར་བྱོས་ཤིག །ང་གང་ཡིན་པ་དེ་ནི་ཁམས་གསུམ་རྣམ་པར་རྒྱལ་བར་རྟོགས་པར་བྱོས་ཤིག །ང་གང་ཡིན་པ་དེ་ནི་གཏུམ་པོ་ཆེན་པོ་ཉིད་
དུ་རྟོགས་པར་བྱོས་ཤིག །ང་གང་ཡིན་པ་དེ་ནི་ཆོས་སོ། །ཆོས་ཀྱི་ཕུང་པོའོ་ཞེས་བཀའ་སྩལ་པས་དེ་བཞིན་གཤེགས་པ་ཐམས་ཅད་དགྱེས་ཤིང་དགའོ། །དཔལ་རྡོ་རྗེ་གཏུམ་པོ་ཐུགས་
གསང་བའི་རྒྱུད་ལས་ཡོངས་སུ་གཏད་པའི་ལེའུ་སྟེ་ཉི་ཤུ་རྩ་བཞི་པའོ།། །། རྒྱ་གར་གྱི་མཁན་པོ་ཨ་བ་ཡུ་ག་ཏའི་ཞལ་སྔ་ནས་ཞུས་ནས། བོད་ཀྱི་ལོ་ཙྪ་བ་ཆོས་ཀྱི་བརྩོན་འགྲུས་ཀྱིས་བསྒྱུར་བ་རྫོགས་སྷོ།། །།

89-1-314b

༄༅། །རྒྱ་གར་སྐད་དུ།  ཤྲཱི་བཛྲ་ཙཎྜ་ཙིཏྟ་གུ་ཧྱ་ཏནྟྲ་ཨུཏྟ་ར།  བོད་སྐད་དུ།  དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ། དཔལ་རྡོ་རྗེ་གཏུམ་པོ་ལ་ཕྱག་འཚལ་ལོ། །དེ་ནས་བརྒྱ་བྱིན་ལྷའི་
དབང་པོས་གསོལ་པ། ཀྱཻ་བཅོམ་ལྡན་འདས་ཉིད་ཀྱི་སྐུ་གསུང་ཐུགས་ཀྱི་གསང་བའི་བསྟན་པ་དམ་པའི་དབང་ཇི་ལྟ་བའི་གསང་བ་དམ་པ་མཛད་དུ་གསོལ། དེ་སྐད་ཅེས་གསོལ་པ་དང་། ཆོས་ཀྱི་དབྱིངས་རྣམ་པར་
དག་པའི་ངང་ལས་མ་ཧཱ་ཙཎྜ་ཀྲོ་དྷི་ཧཱུྃ་ཞེས་གསུངས་པས། གཡོན་དུ་ཁྲོ་མོ་གཏུམ་ཆེན་མོ། །མཐིང་ནག་ཆེན་མོ་འཇིགས་ཚུལ་ཅན། །དབུ་སྐྲ་ཁམ་པ་གྱེན་བརྫེས་མ། །སྤྱན་དམར་སྡང་མིག་བགྲད་པའི་ཚུལ། །
མཆེ་གཙིགས་ཁྲོ་གཉེར་སྤྱན་གཏུམ་མ། །ཕྱག་གཡས་དྲིལ་འཛིན་གཙོ་ལ་མཁྱུད། །གཡོན་པ་ཐོད་ཁྲག་གཙོ་ལ་སྟོབ། །ཞབས་གཉིས་གཙོ་ལ་དགྱེས་ཚུལ་འཁྲིལ། །ཧི་ཧི་དགྱེས་དང་ཧ་ལའི་སྒྲས། །ཐམས་
ཅད་གཡོ་ཞིང་རླག་པར་བྱེད། །དུར་ཁྲོད་རྒྱན་ལྡན་མེ་དཔུང་ནང་། །སྐུ་ལ་འཁྲིལ་བའི་ཚུལ་དུ་གཞུགས། །དེ་ནས་བཅོམ་ལྡན་དགྱེས་ཆེན་པོ། །དགྱེས་པའི་ཏིང་འཛིན་ལ་གནས་པས། །ཉིད་ཀྱི་མཁའ་ལ་ཧཱུྃ་ཨོཾ་
ལྡན། །ནོར་བུ་དང་ནི་རྡོ་རྗེར་ལྡན། །རྡོ་རྗེའི་རྩེ་མོའི་སྦུབ་མར་ཕཊ། །ཡུམ་གྱི་གསང་བར་པ་ཏྲ་ལྡན། །པད་མ་དང་ནི་ཟེ་འབྲུར་ལྡན། །མ་ལས་ཉི་མའི་དཀྱིལ་འཁོར་རོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་
ཕྱི་མ་ལས་ཡུམ་རྣམ་པར་འཕྲུལ་པ་དང་། མཁའ་གསང་རབ་ཏུ་ལྡན་པའི་ལེའུ་སྟེ་དང་པོའོ།། །། དེ་ནས་ལྷའི་དབང་པོས་གསོལ་པ། བཅོམ་ལྡན་འདས་བདེ་རྫོགས་གང་ལགས་བཤད་དུ་
གསོལ་ཞེས་ཞུས་པས་བཅོམ་ལྡན་འདས་བདེ་རྫོགས་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ནས་འཁོར་ལོ་བདེ་རྫོགས་ཞེས་བྱ་བ་བཀའ་སྩལ་པ། ཉོན་ཅིག་ལྷ་ཡི་དབང་པོ་མཆོག །བདེ་སྐྱོང་

89-1-315a

འཁོར་ལོ་སུམ་བཅུ་གཉིས། །དུང་དང་ཀུནྡ་ལྟ་བུར་གནས། །མི་ཤིགས་ཧཱུྃ་ནི་ཁ་འོག་བལྟས། །མགྲིན་ཆེན་ལོངས་སྤྱོད་འདབ་བཅུ་དྲུག །དབུས་ན་གསེར་ཞུན་ལྟ་བུ་མྃ། །ཡ་བ་ར་ལ་ཁ་དོག་བཞི། །ཕྱོགས་
བཞི་འདབ་མ་བཞི་ན་གནས། །ཆོས་ཀྱི་འཁོར་ལོ་འདབ་བརྒྱད་དེ། །ཧཱུྃ་མུྃ་དབུས་ཏེ་ཕྱོགས་མཚམས་ན། །ཨོཾ་ཀྲོ་དྷི་ཧ་། །སྤྲུལ་པའི་འཁོར་ལོ་དྲུག་ཅུ་བཞི། །དབུས་ན་ༀ་དཀར་དེ་བཞིན་དུའོ། །མེ་ཡི་
འཁོར་ལོ་དྲུག་གསུམ་རྃ། །རླུང་གི་གཞུ་འདྲ་བ་དན་ཅན། །ཛ་ཉ་ཕཊ་དང་རྃ་ལྡན་པའོ། །དབབ་དང་བསྐྱིལ་བའི་སྦྱོར་བ་ཡིས། །ཤིན་དུ་སྣོད་ལྡན་དམ་པ་ལ། །སྲིན་མཐིབ་ལྕེས་བླང་དབུགས་ཀྱིས་དྲང་། །བྱིན་བརླབས་
བྱས་པའི་ཤེས་རབ་མ། །རང་ལུས་ཐབས་ལྡན་གཏད་པ་དང་། །བདེ་བ་དང་ནི་བདེ་བ་ཆེ། །ཤིན་དུ་བདེ་ཆེན་བདེ་མཆོག་ཡིན། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་འཁོར་ལོ་བདེ་རྫོགས་ཀྱི་ལེའུ་སྟེ་
གཉིས་པའོ།། །། དེ་ནས་ལྷའི་དབང་པོས་གསོལ་པ། བཅོམ་ལྡན་འདས་སེམས་ཅན་དོན་དུ་བྱིན་བརླབས་མཐུ། །སྔགས་ཀྱི་མཐུ་རྣམས་བཀའ་སྩོལ་ཅིག །ཅེས་གསོལ་པས། ཉོན་ཅིག་ལྷའི་དབང་པོ་སྔོན་ཆད་
ང་ལ་དེ་བཞིན་གཤེགས་པ་ཐམས་ཅད་ཀྱིས་གསང་བའི་མཛོད་འཛིན་པར་དབང་བསྐུར་ཏེ། དེ་ལྟར་ངས་ཁྱོད་ལ་བཤད་པར་བྱའོ། །འདི་ནི་ཀླུ་ཐམས་ཅད་འཇོམས་པར་བྱེད་པའོ། །ཉི་མ་ས་སླ་ལ་ནྃ། ནཱ་ག་ཀུ་ན་
ཞི། ཙིཏྟ་མ་ལིང་ནྂ། ཟློར་བྱེར། ནཱ་ག་ཤིག །ནཱ་ག་བཟློག །ནཱ་ག་བྱེར། ནཱ་ག་ད་ཧ་ད་ཧ་མཱ་ར་ཡ་ཕཊ། ནཱ་ག་ཧ་ན་ཧ་ན། མཱ་ར་ཡ་ཕཊ། གསང་བ་གསང་བའི་མཛོད་འཛིན་པའི། །སྔགས་དེས་ཀླུ་རྣམས་བརླག་པར་བྱེད། །
རྫས་སུ་བསྟན་པ་འདི་ལྟ་སྟེ། །རྩ་བ་དང་ནི་སྐྱོབས་སུ་བཅས། །ལྕེ་པོག་ནག་པོ་རྒྱ་ཚིལ་དང་། །མགོ་གཉིས་ཨཱི་དྲ་མ་གྷ་དྷ། །སའི་དྲི་དང་རྣམ་ལྔའོ། །གདུག་པ་ཐམས་ཅད་འཇིལ་བར་བྱེད། །ཤུ་དག་ཚིལ་ཆེན་ར་

89-1-315b

གཞོབ་དང་། །དྲི་ཆེན་དྲི་ཆུ་རྨ་བྱའི་མདོངས། །བྱུག་དང་བདུག་པར་བྱ་བའོ། །མུ་ཟི་གླ་རྩི་དྲི་ཅན་དང་། །ཞུན་ཆེན་དྲི་ཆུ་སྦྱར་བ་རྣམས། །ལྟོར་བཏང་གདོན་རྣམས་རང་ཞིར་འགྱུར། །འདིར་ནི་རང་ཉིད་སྲུང་བར་བྱེད། །
ནཱ་ག་ཤ་ཏི་དུན་ཛི་པས། ནཱ་ག་ཙི་ཏ་ནྃ། ནཱ་ག་ནི་ར་རྦད། ཤཱན་ཏིང་ཤ་དུ་རྩུ་པས། ནཱ་ག་ཨོ་ར་ལིག་ཤམས། ནཱ་ག་དུན་དུན། གྱེན་གྱེན། ནཱ་ག་ཤྃ་ཏི། ཡ་ཡ། ཚུབས་ཚུབས་དུ་ཤ་རྦུད། དཔལ་རྡོ་རྗེ་གཏུམ་པོ་ཐུགས་
གསང་བའི་རྒྱུད་ཕྱི་མ་ལས་ཀླུ་ཐམས་ཅད་བརླག་པར་བྱེད་པའི་ལེའུ་སྟེ། གསུམ་པའོ།། །།  དེ་ནས་བཅོམ་ལྡན་འདས་འཇིག་རྟེན་གསུམ་རྣམ་པར་འཆིང་བར་བྱེད་པའི་ཏིང་ངེ་འཛིན་ལ་སྙོམས་པར་ཞུགས་ནས་
འཇིག་རྟེན་འཆིང་བྱེད་ཀྱི་སྔགས་གསུངས་པ། ༀ་ཨེ་ཀ་ཡ་མ། ཧེ་ཀ་ཡ་མ། ཧྲི་མ་ཡ་མ། སརྩ་ཙིཏྟ་གཟེར་ཐུམས་བི་གྷྣཱྃ། ཞེས་གསུངས་མ་ཐག་ཏུ་སྲིད་པའི་རྩེ་མོ་ནས་མནར་མེད་པ་ལ་ཐུག་པ་ཡིན་ཆད་
སེམས་རྣམ་པར་མྱོགས་ཏེ། ལུས་རི་མོ་བཞིན་གཡོ་བ་མེད་པར་བཅིངས་པར་གྱུར་ཏོ། །དེ་ནས་དཔུང་རྣམ་པར་བཟློག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དཔུང་བཟློག་བྱེད་ཀྱི་སྔགས་
གསུངས་པ་ༀ་ཨེ་ཀ་ཡ་མ་ཧེ་དུན་རཀྵ་ཧེ་དུན། ཧཱུྃ་ཛཿཧཱུྃ། ཡ་མ་ཙིཏྟ་ཤ་མ། ཤ་ཏྲཱུྃ་སྟྃ་བྷ་ཡ་ནྃ་དྷྲྀ་ཀ་རྦད། ཅེས་གསུངས་པས་འཇིག་རྟེན་གྱི་ཁམས་ཐམས་ཅད་འཁྲུགས་ཤིང་། དྲེགས་པ་ཅན་
ཐམས་ཅད་རྫ་མཁན་གྱི་འཁོར་ལོ་བསྐོར་བ་བཞིན་དུ་གྱུར་ཏེ། མྱོས་པར་གྱུར་ཏོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་འཇིག་རྟེན་བཅིང་བཟློག་གི་ལེའུ་སྟེ་བཞི་པའོ།། །། 
དེ་ནས་བཅོམ་ལྡན་འདས་ཁྱུང་རྣམ་པར་སྤྲོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་

89-1-315c

ནས་ཁྱུང་ལས་ལ་གཟུད་པ་ཞེས་བྱ་བའི་གསང་སྔགས་གསུངས་པ། གྲང་ཏི་ཏིག་ཏིག །གྲ་ཏ་བྲག་ཤི་ཏ་ཏ་ལེ་ཧེ་དུ་ཧཱུྃ་ཕཊ། དེ་ནས་ཡང་དགྲ་འབའ་ཞིག་པ་གསད་པ་ཐུན་མོང་མ་ཡིན་པའི་
ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་དྲག་པོ་ཐོག་འབབ་ཅེས་བྱ་བའི་སྔགས་གསུངས་པ། ༀ་མཱ་ར་ན་སོད་སོད། མཱ་ར་ན་བྱིང་བྱིང་། མཱ་ར་ན་རྨུགས་རྨུགས། མཱ་ར་ན་ཧ་ལ་ཧ་ལ། 
མཱ་ར་ན་དུན་དུན། མྱོགས་མྱོགས། བྱིང་བྱིང་། ཐུམ་རི་ལི་ལི་རྦད་ཛ་ཛ། ནཱ་ག་ལ་སོགས་ཤ་ཏྲཱུྃ་སྦྱར་ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་གསང་བ་
སྔགས་ཀྱི་ལེའུ་སྟེ་ལྔ་པའོ།། །། དེ་ནས་ཡང་ལྷའི་དབང་པོས་གསོལ་པ། ཀྱཻ་བཅོམ་ལྡན་འདས་གདུག་པ་ཅན་ཚར་བཅད་པའི་ལས་ཁྱད་པར་ཅན་བཀའ་སྩལ་དུ་གསོལ་ཞེས་གསོལ་པས། 
བཅོམ་ལྡན་འདས་ཁྱུང་སྒྲོལ་བྱེད་གསང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རབ་ཏུ་གསང་སྔགས་བཀའ་སྩལ་པ། ༀ་ཏདྱ་ཐཱ། ཨོྂ་ཊ་ཀི་ཙ་ཏི། གུརྱ་ལ། གྷྱུ་ལི་མི་ལི་ཤ་ཤ་གྷྱུ་གྷྱུ། ཤད་ཏི་བི་རི་ཏི། 
ཧཱུྃ་ཡ་ཧཱུྃ་ཡ། ཧཱུྃ་ཏུ་ཏི་སྭཱ་ཧཱ། འབྲས་དང་སོ་བ་ནས་ནག་དང་། །ཨ་རུ་ར་རྣམས་ཞིབ་བཏགས་ཏེ། །དགུ་དང་བཅུ་གཅིག་བསྒྲུབ་པར་བྱ། །མཁའ་ལྡིང་སྒོ་ང་སྔགས་ཀྱིས་བསྐོར། །འགྲམ་དུ་བཞག་
ལ་བསྒྲུབ་པར་བྱ། །མཱ་ར་ན་སོད། མཱ་ར་ན་བྱིང་བྱིང་། མཱ་ར་ན་མུགས་མུགས། མཱ་ར་ན་ཧ་ན་ཧ་ན། མཱ་ར་ན་དུན་དུན། ཧ་ལ་ཧ་ལ། མྱོས་མྱོས། བྱིང་བྱིང་། ཐུམ་རི་ལི་ལི་ཛ་ཛ། 
དེ་ནས་གཏོར་མ་དབུལ་བར་བྱ། །བ་ལིཾ་ཏ་ཁཱ་ཧི་ཁཱ་ཧི། གྲྀཧྞ་གྲྀཧྞ། མ་ཧཱ་རག་སི་པ་ཏོ། ས་མཱ་ཡ་སྭཱ་ཧཱ། གསོལ་བ་གདབ་ཅིང་ཕྲིན་ལས་བཅོལ། །གླ་རྩི་ཤིང་ཀུན་ཤ་ཆེན་དང་། །ལྕེ་པོག་

89-1-315d

ནག་པོ་ཤ་རི་ར། །བྱི་སྐུ་སྟག་གི་སྡེར་མོ་རྣམས། །རས་སུ་གཏུམས་ལ་ལུས་ལ་བཅང་། །ༀ་ཉི་མ་ས་སླ་ནཱཾ། གྷུ་ནི་ཞི་རྩི་ཏ་གྷུ་ལི་ནཱཾ། ཙི་ཏྲ་མུ་ཏྲ་ཟློག་བྱེར། ཙི་ཏ་གྷུ་ལི་ནཱཾ། ཡ་ཁྲ་
ན་ག་ཟློག །ནཱ་ག་ཤིག །ནཱ་ག་མགོ་ལ་ནཱཾ། ཧ་པ་ས་ཁྲེ། རྟག་ཏུ་སྟོམ་ཆངས་གཏོར་མས་མཆོད། །ཞི་བས་དུག་དབྱུང་བྱད་ཀྱང་དགྲོལ། །རྩ་བའི་དཀྱིལ་འཁོར་ཕྱོགས་བཞི་རུ། །ནཱ་གའི་
གཟུགས་བྲིས་དུག་ཅན་གཞག །ཚོན་སྐུད་སྦྲུལ་བསྒོམས་བཅིངས་པ་དེ། །སྤུ་གྲི་འབར་བས་གཏུབས་ཤིང་དབྱེ། །རི་རབ་ཆེན་པོའི་ཕྱོགས་བཞི་ན། །དུག་བཞི་ལས་སྐྱེས་རིགས་བཞིའི་ཀླུ། །
ས་ཆུ་མེ་རླུང་དུག་བཞིའི་བདག །བཅིངས་པ་དགྲོལ་ཅིང་དུག་དབྱུང་ཕྱིར། །དུག་ཐུབ་སྒྲོ་ལ་ཁྱུང་བསམ་ཕྱིར། །དུག་བྱབ་རང་རང་གནས་སུ་བཏང་། །བདེན་པ་བདར་ཞིང་ཏིང་འཛིན་གསར། །དཔལ་རྡོ་རྗེ་
གཏུམ་པོ་ཐུགས་གསང་བའི་རྒྱུད་ཕྱི་མ་ལས་རབ་ཏུ་གསང་བའི་ལེའུ་སྟེ་དྲུག་པའོ།། །།   དེ་ནས་བཅོམ་ལྡན་འདས་བདུད་རྩི་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བདུད་རྩི་མཆོག་བཀའ་
སྩལ་པ། རིན་ཆེན་བུམ་པ་ཚད་ལྡན་ལ། །དྲི་ཡི་རྒྱལ་པོ་ལ་སོགས་ལྔས། །བྱུགས་ལ་བོག་ནག་དུད་པས་བདུག །རྩི་ལྡན་འོ་མ་འབྲས་དང་ནས། །ཏིལ་དཀར་དང་ནི་ཨ་རུ་ར། །བ་རུ་ར་དང་སྐྱུ་རུ་ར། །མངར་གསུམ་ཀླུ་སྨན་
སྣ་ཚོགས་དང་། །ཙན་དན་ལ་སོགས་དྲི་སྦྱར་བའི། །ཆུ་བཀང་ལྕུག་མ་འོ་མ་ཅན། །ཁ་རྒྱན་བྱས་ཏེ་མགུལ་པ་ཡང་། །དར་རས་སྔོན་པོས་བཅིངས་བྱས་ལ། །མཎྜལ་གཙང་མའི་སྟེང་དུ་བཞག །ལྷ་ཡི་ང་རྒྱལ་ལྡན་པ་ཡིས། །
གྲི་ལྕགས་སྦུ་གུར་མཆུ་བཙུགས་ཏེ། །དབུགས་མ་ཤོར་བར་རབ་ཏུ་བསྣགས། །སེང་ལྡེང་ཕུར་པ་སོར་བརྒྱད་དང་། །སྔགས་ཀྱི་མདའ་མཆོག་ལ་ཡང་བསྣག །བུམ་པ་ལ་སྔགས་འབུམ་ཚར་རེ་བཏོན་ནས་སྙིང་རྗེའི་ཡུལ་ལ་བཀྲུ་ཁོང་དུ་བཏང་ན་གྲོལ་བར་འགྱུར་དཔལ་རྡོ་རྗེ་

89-1-316a

གཏུམ་པོ་ཐུགས་གསང་བའི་རྒྱུད་ཕྱི་མ་ལས་བདུད་རྩི་བུམ་ཁྲུས་ཀྱི་ལེའུ་སྟེ་བདུན་པའོ།། །།  དེ་ནས་ཡང་བདུད་རྩི་བུམ་པ་ཁྲོལ་བུ་ལ་བསྒྲུབ་པ་གསུངས་པ། ཉོན་ཅིག་ལྷ་ཡི་དབང་པོ་གཙོ། །ཏིང་འཛིན་གསང་
བར་སྒྲུབ་པ་ནི། །ཛཱ་ཏི་ཕ་ལ་ནས་སྔོན་མོ། །འབྲས་དང་སོ་བ་མ་གི་ཏ། །ཏིང་འཛིན་གཞུ་བཏུལ་བྱས་ཏེ་བསྒྲུབ། །དེ་ལ་རྟགས་བྱུང་ཕྱེ་མར་བསྒྲུབ། །བྱུགས་ནས་དྲི་ཆུས་སྐྱོ་མར་སྦྱར། །ཞུན་ཆེན་སྦྱར་ཏེ་ཁོང་དུ་གཏང་། །
བུམ་པའི་ཆུ་ལ་ལྕགས་སྦུགས་སྔགས། །མཆོད་དང་ཏིང་འཛིན་བརྩོན་པར་བྱ། །བུམ་ཆུས་ཁྲུས་བྱ་འདེ་གུས་བྱུག །སྐྱོ་མ་ཞུན་ཆེན་ཁོང་དུ་གཏང་། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་བུམ་པ་
ཁྲོལ་བུ་ཕྱེ་མ་དང་། འདེ་གུ་དང་། ཁོང་དུ་གཏང་བའི་ལེའུ་སྟེ་བརྒྱད་པའོ།། །། དེ་ནས་ཡང་ལྷའི་དབང་པོ་ལ་བཀའ་སྩལ་པ། ཉོན་ཅིག་ལྷ་ཡི་དབང་པོ། གདུག་པའི་དུག་ལ་རྣམ་མང་ཡང་། །བསྡུས་ན་
རྣམ་པ་གཉིས་ཡོད་དེ། །མངོན་སུམ་དུག་དང་རྐུ་དུག་སྟེ། །རྐུན་ཐབས་དུག་ནི་བཟློག་པར་དཀའ། །གདུག་ཅན་ཉོན་མོངས་གསུམ་ལྡན་ཏེ། །གཏི་མུག་ཆེ་བས་བྱོལ་སོང་རིགས། །འདོད་ཆགས་ཆེ་བས་
དབྲལ་བར་དཀའ། །ཤིན་དུ་ཞེ་སྡང་ཆེ་བས་ཀྱང་། །དུག་ནི་རྐུན་ཐབས་དག་ཏུ་གཏོང་། །དེ་ཕྱིར་སླར་ཡང་ལྡོག་པར་བྱེད། །ཕྲག་དོག་ཆེ་བས་རང་རྟེན་ལ། །གཞན་གྱིས་གཙེས་ན་གཞན་ལ་གནོད། །རྐུན་
ཐབས་དུག་གི་མཚན་ཉིད་ཀྱང་། །ཐབས་ཤིང་གདུག་པའི་དུག་གློད་ཀྱང་། །བར་བར་སྐབས་སུ་ལྡང་བར་བྱེད། །དེ་བཟློག་ཐབས་ནི་ཤིན་ཏུའང་དཀའ། །དེ་ཡི་བཟློག་ཐབས་དམ་པ་འདི། །ངས་བསྟན་པ་
ལ་ཐེ་ཚོམ་དུ། །གང་ཞིག་བྱེད་པར་གྱུར་པ་དེ། །ནམ་ཡང་གྲུབ་པར་མི་འགྱུར་ཏེ། །གྲུབ་ཀྱང་གཡེལ་བར་གྱུར་པ་ཡིན། །དེ་ནས་ལྷ་ཡི་དབང་པོ་དག །ཐེ་ཙོམ་མེད་པར་ངེས་པར་བྱོས། །ཙན་དན་

89-1-316b

དམར་པོས་གཙོར་བྱས་ཏེ། །ནཱ་ག་གེ་སར་མ་གི་ཏ། །རྒྱ་ཚིལ་རྒྱ་མཚོའི་ལྦུ་བ་དང་། །ཕག་རྒོད་དག་གི་ཤ་དག་སྟེ། །ཡང་ན་རྒྱ་ཚིལ་མ་གི་ཏ། །ཕག་རྒོད་ཤ་དང་སྦྱར་བྱས་ཏེ། །ལྕགས་སྣོད་ནང་དུ་ལྕགས་ཀྱིས་
ཕུར། །འབུམ་ཕྲག་གསུམ་དུ་བསྙེན་བྱས་ནས། །བསྒྲུབ་པས་དཀར་གསུམ་གཞན་མི་བསྟེན། །འོ་མ་སོལ་ཆུས་ལུས་བཀྲུས་ཏེ། །ཉ་ལ་གནས་དྲུག་ཐིག་ལེ་བྱ། །འཁུར་ཚོས་གཉིས་དང་དཔྲལ་
བ་དང་། །སྙིང་ག་རྐོག་མ་ལག་མཐིལ་གཉིས། །ཐིག་ལེ་མཚོན་གང་པ་རེ་བྱ། །ལྟེ་བ་པུས་མོ་གསང་གནས་སུ། །མ་གི་ཏ་ཉིད་འབའ་ཞིག་བྱུག །ཐིག་ལེ་རེ་ལ་ཉི་ཤུ་གཅིག །དེ་ལྟར་ལོ་གཅིག་བར་
དུ་བྱ། །གངས་རི་ལ་ནི་ཉི་མ་བཞིན། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་རྐུན་ཐབས་ཀྱི་དུག་བཟློག་པའི་ལེའུ་སྟེ་དགུ་པའོ།། །། དེ་ནས་ལྷའི་དབང་པོས་གསོལ་པ། ཀྱཻ་མ་
ཁྲོ་བདག་རྡོ་རྗེ་འཛིན། །གདུག་པའི་དུག་གི་མཚན་ཉིད་གང་། །ཟློག་དང་མི་ཟློག་ཇི་ལྟ་བུ། །ཁྲོ་བདག་ཆེན་པོས་བཤད་དུ་གསོལ། །ཞེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། །
དགའ་བས་ཉོན་ཅིག་ལྷ་ཡི་དབང་པོ་ཁྱོད། །བསྙེན་དང་བསྒྲུབ་པ་རྟགས་དང་གནོད་པ་རྟགས། །ལྕགས་ཟངས་མི་དང་གཅེར་བུ་བུམ་པ་ཐོགས། །བ་ལང་ཉ་ལྕིབས་ཟས་སུ་ཟ་བ་དང་། །མེ་ཆེན་འབར་དང་ཟམ་པ་
འཛུགས་པ་དང་། །སྐྱེ་ཤིང་འཛུགས་དང་ཉི་མ་ཤར་བ་དང་། །བཟང་བ་ཡི་ནི་རྟགས་སུ་ཤེས་པར་བྱ། །ཉི་མ་ནུབ་དང་ནམ་སྲོས་ཐུར་དུ་བབས། །བཙོན་དུ་བཟུང་ནས་མི་ཐེག་ཁུར་བསྐུར་དང་། །

89-1-317a

བསྒྲུབ་པོ་གཞན་ཡུལ་འགྲོ་བ་ངན་པའི་རྟགས། །ལུང་པ་དང་ནི་སྐམ་ནས་ཆུ་བྱུང་དང་། །ཉ་སྦྲུལ་ས་རླུང་གསོད་དང་འཚོད་པ་དང་། །རིད་དང་སྐེམས་པ་དེ་དག་ཁྲི་ལ་འདུག །
གཅེར་བུ་སྤྱི་བཅིངས་ཀྱིས་སེམས་ཅན་གསོལ་བ་མཐོང་། །འཇིགས་པའི་ཆུ་མིག་སྐམས་དང་རྟག་ཏུ་ནོར་བུ་རྒྱུད། །སྦལ་སྦྲུལ་ཟས་སུ་ཟ་དང་ཁྱི་སྤྱང་གསོད། །བཟང་བ་ཡི་ནི་ལྟས་སུ་
ཤེས་པར་བྱ། །ཆུ་ནང་ཆུད་དང་སྦལ་སྦྲུལ་ལུས་ལ་འཇུག །དེ་དག་ཕྱི་བཞིན་དུ་ནི་འབྲང་བྱེད་ཅིང་། །སྦྲང་བུ་མཆུ་རིང་ལ་སོགས་ལུས་ལ་ཟ། །བ་ལང་མ་ཧེའི་ཚོགས་ཀྱིས་བརྡུངས་ནས་འདེད་པ་དང་། །
ཁྱི་སྤྱང་ཚོགས་ཀྱིས་ཟུགས་དང་འདམ་དུ་ཚུད། །འབག་སེང་བུ་ཆུང་ལ་སོགས་སྟོན་པ་ངན། །གནོད་པའི་རྟགས་སུ་གཏིང་རིང་གྲོག་པོ་རུ། །མི་ཤོང་བཞིན་དུ་ཕྱིན་དང་སླར་མི་ཐར། །རི་བྲག་དོག་
མོ་ལུང་པ་ཕུག་རྡུགས་དང་། །ལྷ་ཁང་གནས་ཁང་ཧྲུལ་པོར་མི་ཤོང་བཞིན། །སྒོ་ལ་འཛུལ་ནས་སླར་ཡང་མི་ཐོན་དང་། །ཆུ་ངན་མཚོ་དང་ལུ་མ་ཉ་སྦྲུལ་སོགས། །ཕག་པ་བ་གླང་མ་ཧེ་
ལ་སོགས་ཏེ། །ཤིན་དུ་ཡིད་དུ་མི་འོང་གཟུགས་མང་སྟོན། །རི་གཟེར་མི་ཐར་ཅེ་སྤྱང་ཚོགས་ཀྱིས་འདེད། །དེ་དག་གནོད་རྟགས་ལུས་ཀྱི་ཉམས་མྱོང་ཡང་། །ནུལ་བ་དང་ནི་ཀུ་དང་
ཆང་ལ་དགའ། །ནད་དང་ཉམས་ལྕི་ཡན་ལག་ན། །ཤ་ནི་འགུལ་འཁྲིག་ཤུ་གཡན་ཤ་བཀྲ་དང་། །ངོ་ལྷོག་ཤ་རོ་སྐབས་སུ་ཟུག་གཟེར་ཆེ། །དེ་དག་གནོད་པའི་རྟགས་སུ་ཤེས་
པར་བྱ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་བསྙེན་སྒྲུབ་ཀྱི་ལྟས་དང་། གནོད་རྟགས་བསྟན་པའི་ལེའུ་སྟེ་བཅུ་པའོ།། །།

89-1-317b

དེ་ནས་ལྷའི་དབང་པོས་གསོལ་བ། ཀྱཻ་བཅོམ་ལྡན་འདས་སེམས་ཅན་གྱི་ལུས་ལ་གདུག་པའི་དུག་ལུས་ལ་སླེབ་པའི་མཚན་ཉིད་བཤད་དུ་གསོལ། དེ་སྐད་ཅེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། །
ཤ་མཐངས་བར་དུ་སླེབ་པའི་དུག །རྟག་ཏུ་སྙིང་ཡང་མི་དགའ་ཞིང་། །ཤ་རྩ་ཟ་ཞིང་འགུལ་དང་འཁྲིག །རྟག་ཏུ་འཕྲུག་སྙིང་འདོད་པ་དང་། །ཤ་ཡང་འོ་མའི་དཔྲིས་མ་བཞིན། །ཤ་
མདོག་མེ་ལྕེ་འདྲ་བའོ། །སྐབས་སུ་ཤ་མཐངས་བར་དག་ན། །ཆུ་གྲང་བླུག་པ་སྙམ་བྱེད་དང་། །ཤུ་བ་བལ་བལྡགས་ཤ་བཀྲ་འོང་། །གདུག་པ་དུག་གིས་ཤ་ལ་སླེབ་པ་ནི། །འཕྲིག་འགུལ་
ཤ་སྦྲིད་བེར་བ་ལྟར། །ཤ་ནི་གནག་ཅིང་དམར་ལ་བེམ། །དུ་བ་མིག་ཏུ་སོང་བ་བཞིན། །མིག་གི་ཐ་མ་ཆུ་ཡིས་གང་། །མིག་ཀྱང་ཟླུམ་ལ་སྨིན་མ་གྲུགས། །སྨིན་མ་བྱི་ཞིང་མིག་ཀྱང་
འགུལ། །སོར་མོ་རྣམས་ནི་བྱི་མཇུག་འདྲ། །རྩ་དང་ཆུ་ལ་ཞུགས་པ་ནི། །ལུས་ལ་དྲི་མ་ང་བ་འབྱུང་། །ཆུ་བུར་དང་ནི་ཆུ་རྒངས་དང་། །དེ་ནི་རྩ་ཡི་མེ་ཏོག་ཡིན། །ཆུ་སེར་མདོག་ནི་དུད་ཁུ་འདྲ། །
ཆུ་སེར་མདོག་ནི་སྐོ་རུལ་མནམ་པ་དང་། །ཀོ་བ་རུལ་པ་དྲི་མནམ་པའི། །ཆུ་སེར་དག་ནི་འབྱུང་བ་ཡིན། །རོ་སྟོད་མི་བདེ་བློ་ཡང་འདེགས། །སྤྱི་ཡི་མཚན་ཉིད་འདི་དག་དང་། །འབྱུང་བར་འགྱུར་བ་དག་
ཀྱང་ཡོད། །མེ་འོད་ཚ་བ་འདྲ་བ་འོང་། །ཚེར་མ་ཟུག་པ་འདྲ་བ་འོང་། །ལུས་པོ་ཚ་ལ་འབྲུམ་པ་འོང་། །ཀོར་ཚེ་ཤུ་བ་འབྱུང་བ་དང་། །རྨ་དང་སེར་ཀ་མི་འཚོ་བ། །ཀོར་ཚེ་ཚོར་བ་མེད་པར་འབྱུང་། །ན་ཚ་
མེད་པའི་ཤུ་བ་འབྱུང་། །ཚ་ལ་འཁུམས་པ་འབྱུང་བ་ཡོད། །ལུས་ཀྱི་ཉམས་སྟོབས་ཆུང་བར་འབྱུང་། །གླང་ཤུ་བ་དང་ཤ་བཀྲ་འབྱུང་། །ཤ་རོ་སྦལ་མིག་འདྲ་བ་འབྱུང་། །ཤ་སུལ་ཐམས་ཅད་འགུལ་

89-1-318a

འཕྲིག་འབྱུང་། །དུག་གིས་རུས་པར་སླེབ་གྱུར་ན། །ཕྱི་ཡི་ཤ་རྣམས་ཀུན་སྐམས་ཏེ། །མདོག་ནི་སྔོ་སྐྱ་ཤ་མདངས་འཆོར། །གོས་ཀྱི་མདངས་ཀྱང་འཆོར་བ་སྟེ། །དེ་ནི་ཐར་
བར་མི་འགྱུར་ཀྱང་། །སྔགས་དང་རྫས་དང་ཏིང་འཛིན་གྱིས། །ཚེ་རིང་སྐད་གསང་ལུས་ཀྱང་བདེ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་གདུག་པའི་དུག་
རུས་པ་ལ་སླེབ་པའི་མཚན་ཉིད་བསྟན་པའི་ལེའུ་སྟེ་བཅུ་གཅིག་པའོ།། །། དེ་ནས་ལྷའི་དབང་པོས་གསོལ་པ། ཀྱཻ་མ་བཅོམ་ལྡན་འདས་སླད་མའི་དུས་ཀྱི་འགྲོ་བ་ལ་ཕན་གདགས་
པའི་ཕྱིར་རྫས་ཀྱི་ཁྱད་པར་བཀའ་སྩལ་དུ་གསོལ་ཞེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། ཉོན་ཅིག་ལྷ་ཡི་དབང་པོ་གཙོ། །ཕྱི་མའི་དུས་ཀྱི་སེམས་ཅན་རྣམས། །གདུག་པའི་དུག་གིས་
ཉེན་པ་ན། །ཕན་པའི་སྦྱོར་བ་འདི་ལྟ་བུ། །ཀུན་ཀྱང་སྔགས་ཀྱིས་བསྒྲུབ་པར་བྱ། །མེ་འོད་འདྲ་ན་སྤྱང་དུག་བཏང་། །ཚེར་མ་ཟུག་བ་ལྟ་བུ་ལ། །ར་དུག་དང་ནི་རེ་ལྕག་གོ། ཚ་ལ་འབྲུམ་པ་བྱུང་བ་ན། །
བཙོད་དང་སྤང་སྤོས་བཏང་བར་བྱ། །ཤ་ནི་ཀོར་ཚེ་ཤུ་བ་ལ། །ར་ཐུག་སྲེ་དང་ལོང་རྟོལ་བཏང་། །རྨ་དང་སེར་ཀ་མི་འཚོ་ན། །ཁོང་དུ་བསྒྲུབ་པའི་མ་གི་ཏ། །དེ་ཉིད་དྲག་པོའི་སྔགས་ཀྱིས་གདུལ། །ཀོར་
ཚེ་ཚོར་བ་མེད་པ་ལ། །སྟག་ཤ་གསེར་གྱི་མེ་ཏོག་དང་། །རྒྱ་ཚ་སྦྱར་ཏེ་བཏང་བར་བྱ། །ཤ་བུ་ཐལ་བ་བདུད་རྩིས་གསོ། །ཡང་ན་མུ་ཟི་བ་བླ་ལྡོང་རོས་དང་། །དྲི་ཆུ་སྦྱར་ཏེ་བསྐུ་བར་བྱ། །ན་ཚ་མེད་པའི་
ཤུ་བ་ལ། །བོང་རིལ་ཏི་ཚ་མར་དཀར་བསྐུ། །ཚ་འཁུམས་ལྕེ་པོག་རྭ་རུ་གཞོབ། །ཚ་དང་ཞུན་ཆེན་སྦྱར་བར་བྱ། །ལུས་ཀྱི་ཉམས་སྟོབས་ཆུང་བ་ན། །བུམ་པའི་ཆུ་དང་མ་གི་ཏ། །སྦྱར་ཏེ་བཀྲུ་ཞིང་བཏུང་བར་བྱ། །

89-1-318b

དྲི་ཆུ་ཞུན་ཆེན་བཏང་བར་བྱ། །ཤ་བཀྲ་གུར་གུམ་ཕག་ཚིལ་ལོ། །གླང་ཤུ་འདྲ་བ་བྱུང་བ་ན། །གསེར་གྱི་མེ་ཏོག་མུ་ཟི་དང་། །སྔགས་ཀྱི་བྱ་བ་འབད་པར་བྱ། །ཤ་རོ་སྦལ་མིག་འབྱུང་བ་དང་། །ཤ་ཡི་སུལ་རྣམས་འགུལ་བ་ལ། །གླ་བ་མུ་ཟི་ལྕེ་པོག་གནག །ཤ་མཐངས་བར་གྱི་དུག་
རྣམས་ལ། །ས་ཡི་དྲི་དང་མ་གི་ཏ། །ཤུ་དག་ལྕེ་པོག་རུ་རྟ་དང་། །གུ་གུལ་ནག་པོ་དྲི་མ་དང་། །རོ་ཡི་རོ་དང་བཙན་དུག་དང་། །བྱི་ཀུ་ཅིག་སྐྱེས་མི་ཕག་བཅུད། །ཡང་ན་བཙན་དུག་ལྕེ་པོག་དང་། །ལྡོང་རོས་དང་ནི་ས་ཡི་དྲི། །ཞུན་ཆེན་དྲི་ཆུས་བསྡུས་ཏེ་བསྐུ། །
གུ་གུལ་ཤུ་དག་ཤིང་ཀུན་དང་། །གླ་རྩི་བཙན་དུག་རོ་ཡི་རོ། །རུས་ཆེན་བཏགས་ཏེ་ཞུན་གྱིས་བསྡུ། །རིལ་བུ་བྱས་ཏེ་བསྲེགས་ནས་ཀྱང་། །ཡང་དང་ཡང་དུ་སྣ་བུག་བདུག །དུག་ཆེན་ཀླུ་དང་དེ་ལས་གྲམ་པའི་གདོན། །སྐྱེ་དགུ་འཚེ་བྱེད་གདོན་རྣམས་གང་
ཡིན་ཡང་། །གདུག་པ་དུག་ཆེན་པོའི་དྲི་འདི་ཚོར་བ་ཡིས། །གདུག་པ་ཅན་རྣམས་ཀླད་པ་རབ་ཏུ་འགས། །ཉི་མའི་འོད་ཀྱིས་མུན་པ་ཇི་བཞིན་ནོ། །ཤ་ལ་ཞུགས་པའི་གདུག་པའི་དུག་རྣམས་ལ། །བྱུག་པའི་རྫས་རྣམས་ཕྱི་ནས་བྱུག །བདུག་པ་
ཅན་གྱིས་རྟག་ཏུ་བདུག །མ་གི་ཏ་དང་དྲི་ཆུ་གྲང་མོར་སྦྱར། །བཀྲ་ཞིང་ཁོང་དུ་གཏན་དུ་བཏང་བར་བྱ། །ནད་རྣམས་འབྱང་ཞིང་སྤུ་སྩོགས་བྱི་བ་སྐྱེ། །རྩ་དང་ཆུ་བ་དག་ལ་གནས་པའི་དུག །བྱུག་པ་བདུག་པ་ཆུ་བོའི་གཞུང་བཞིན་དུ། །ཁོང་དུ་བཏང་བའི་རྫས་
ནི་འདི་ལྟ་སྟེ། །མ་གི་ཏ་ནི་དྲི་ཡི་ཆུས་སྦྱངས་ཏེ། །ཨ་རུ་ར་དང་སྦྱར་བ་རྒྱུན་མི་བཅད། །རྩ་ཡི་གནས་སུ་ནད་རྣམས་དངས་སྙིགས་འབྱེད། །དངས་སྙིགས་ཕྱེད་པའི་ནད་ནི་ཕྱི་རུ་འབྱུང་། །གངས་ཀྱི་རི་ལ་ཉི་མ་ལྟ་བུའོ། །དུག་རྣམས་རུས་པ་དག་ལ་རྒྱས། །
ཁོང་དུ་བཏང་བའི་རྫས་ནི་རྒྱུན་དུ་བཏང་ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་གདུག་པའི་དུག་རྫས་ཀྱིས་གདུལ་བའི་ལེའུ་སྟེ་བཅུ་གཉིས་པའོ།། །། དེ་ནས་ཡང་ལྷའི་དབང་པོས་གསོལ་པ། ཀྱཻ་བཅོམ་ལྡན་
འདས་གདུག་པ་ཅན་ཤིན་དུ་ཡང་ཚར་གཅོད་པའི་ཐབས་བཀའ་སྩལ་དུ་གསོལ་ཞེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། ཉོན་ཅིག་དབང་པོ་ཆེན་པོའི་ལྷ། །གདུག་པ་ཤིན་དུ་ཚར་གཅད་ན། །བསྲེག་པའི་ལས་ལ་ཤིན་དུ་བརྩོན་པར་བྱ། །ཐབ་

89-1-319a

ཁུང་གྲུ་གསུམ་སོར་བརྒྱད་པ། །ཁྲག་དང་དུར་ཁྲོད་སོལ་བས་བྱུག །དཀྱིལ་དུ་རྡོ་རྗེ་རྩེ་གསུམ་བྲི། །ཟུར་དུ་མཆོད་རྟེན་གསུམ་གཞག་སྟེ། །དེ་སྟེང་དྲག་པོའི་སྣོད་བཞག་ལ། །ནང་དུ་གྲུ་གསུམ་རྩེ་མོ་ལྷོ། །གདུག་པའི་
ཤིང་ཡང་ཟུར་གསུམ་བརྩིག །དཀྱིལ་འཁོར་ཆེན་པོའི་ཤར་ལྷོར་བྱ། །ཤིང་ཤུན་དག་ལ་ཤ་ཏྲཱུྃ་ཡང་། །བརྒྱ་རྩ་བརྒྱད་བྱ་དུག་སྣ་དང་། །ཚ་བ་གསུམ་དང་བོང་བུའི་ཆུ། །རྔ་མོ་བྱ་རོག་བྲུན་ཡང་བསག །ལྷ་ཡི་ཏིང་འཛིན་མཆོད་
བསྔགས་ཀྱིས། །ཏིང་འཛིན་གསལ་ཏེ་ལྷ་ལ་འབུལ། །སྲེག་པའི་སྔགས་ནི་འདིས་བྱའོ། །སརྦ་བིགྷྣན་མ་ར་ཡ་ཛྭ་ལ་རྃ། །སྟོང་རྩ་བརྒྱད་དང་བརྒྱ་རྩ་བརྒྱད། །ལན་གྲངས་མང་དུ་བྱས་པ་ཡི། །ཐལ་བ་ཆུ་ཆེན་གཞུང་
ལ་བོར། །ཐབ་ཁུང་འོག་མའི་ཐལ་བ་ཡང་། །ཁྱི་ཡི་དྲི་ཆེན་ཚ་བ་གསུམ། །བསྲེས་ཏེ་ཤ་ཏྲཱུྃ་གཟུགས་བྱས་ལ། །ནཱ་ག་སྟཾ་བྷ་ནན་ཞེས་རྒྱ་གྲམ་དཀྱིལ་དུ་མནན་ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་
བའི་རྒྱུད་ཕྱི་མ་ལས་དྲེགས་པ་ཅན་ཤིན་དུ་ཚར་གཅད་པ་བསྲེག་པ་དྲག་པོའི་ལེའུ་སྟེ་བཅུ་གསུམ་པའོ།། །།   དེ་ནས་ཡང་ལྷའི་དབང་པོས་གསོལ་པ། ཀྱཻ་བཅོམ་ལྡན་འདས། གནོན་པའི་ལས་ནི་བགྱི་བ་ཡི། །
ཤིན་དུ་ཚར་གཅད་ཇི་ལྟར་བགྱི་ཞེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། །ལྷ་ཡི་དབང་པོ་ཆེན་པོ་ཉོན། །རུ་སྦལ་ཁོག་པ་ཁ་སྦྱར་དུ། །རྒྱ་མཚོའི་ལྦུ་བ་ཁྲེ་རྒོད་དང་། །ནཱ་ག་གེ་སར་ཅུ་གང་དང་། །
དཀར་གསུམ་ཤ་ཆེན་ཤ་རཱི་ར། །མ་གི་ཏ་ཡིས་གཙོ་བྱས་ཏེ། །རུ་རྟ་དང་སྦྱར་རོ་ཉེའི་ཤུབས། །རེ་བས་གཏུམས་ཏེ་སྔོན་དམར་དཀྲི། །སྔགས་ཀྱིས་མདའ་ལ་སུམ་སྟོང་བསྔགས། །ནཱ་ག་སྟམ་བྷ་ནན། བརྒྱད་
གསུམ་དབུས་མའི་ཟླ་ཟེར་ལ། །ནུབ་ཀྱི་རྒྱ་གྲམ་སུམ་མདོ་འམ། །ཡང་ན་གནོད་པའི་ས་ཕྱོགས་སུ། །ཤུག་པའི་ཕུར་པས་ཁྲུ་གང་བརྐོ། །དེར་བཅུག་གཡམ་པ་རྒྱ་གྲམ་ཅན། །དེ་སྟེང་གནོན་པའི་རི་

89-1-319b

རབ་གཞག །དེ་དག་བྱེད་ཚེ་དམན་ཟས་སྤང་། །ཁ་ཟས་དཀར་གསུམ་མངར་གྱིས་བྱ། །ཤ་རུལ་ཁྲག་རུལ་རྒྱ་ཚིལ་དང་། །སྔགས་མདའ་སྔགས་དང་ལྡན་པ་ཡིས། །རང་གནས་བརྟེན་པའི་བར་དུ་གཅད། །ཐོག་དྲག་ལྟ་བུར་
སྔགས་ལས་བྱ། །རྩ་གཅིག་བར་དུ་གནོད་མི་འགྱུར། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་ལས་ཕྱིར་མི་ལྡོག་པའི་གནོན་པའི་ལེའུ་སྟེ་བཅུ་བཞི་པའོ།། །།དེ་ནས་ལྷའི་དབང་པོས་ཡང་
གསོལ་པ། ཀྱཻ་བཅོམ་ལྡན་འདས་གདུག་པ་ཅན་དེ་དག་དེ་ཉིད་ཁོ་ནར་འགྲོ་བ་ལ་རྣམ་པར་འཚེ་འམ། དེ་གེ་གཞན་དང་གཞན་དག་གི་མཐུ་ཡང་གནོན་པར་འགྱུར། གལ་ཏེ་གཞན་དག་གི་མཐུས་ཀྱང་འགྲོ་བ་མ་རུངས་
པར་བྱེད་ན། དེ་ཇི་ལྟར་ཡོངས་སུ་གསལ་བར་བགྱི། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་དབང་པོ་ཆེན་པོ་ལྷ། །ཕྱི་མའི་དུས་ཀྱི་སེམས་ཅན་ལ། །གདུག་པའི་
དུག་གཅིག་ཞུགས་གྱུར་ན། །ཕོ་ཉ་འདི་དག་མ་རུངས་བྱེད། །བཙན་དང་རྒྱལ་པོ་འགོང་པོ་དང་། །དངོས་གྲུབ་འཚེ་བ་བྱེད་ཀུན་དུ། །དེ་དག་དེ་ཉིད་ཤེས་གྱུར་ན། །དེ་དག་རང་གཤེད་རང་གིས་བྱེད། །རཱ་ཛ་ཙིཏྟ་རྦད་
ནན། ཙ་ཧུར་ཐུམས་ཛཿམ་རཱ་ཡ་རྦད་ནན། ༀ་ཏྲི་ཙིཏྟ་རྦད་ནན། ཏྲི་ཙིཏྟ་རྦད་ནན། ཧབ་ཤཾ་ཏྲི་ཙིཏྟ་རྦད་ནན། རུ་ཏྲི་ཙིཏྟ་རྦད་ནན། རཱ་ཛ་ཏྲིག་ནན། ཙ་ཧུར་ཐུཾ་ཛ། མཱ་ར་ཡ་རྦད། སྡེ་བརྒྱད་སྤྱིར་གདུལ་བ་
ནི། ༀ་ཨཱཿཧཱུྃ་བཛྲ་སརྦ་དུ་ཤྚཱྂ་ཏྲིག་ནན། ཨེ་ཧུར་ཐུྃ་ཛཿམཱ་ར་ཡ་རྦད། གལ་ཏེ་རྒྱལ་པོ་གདུག་པ་དག །ཤིན་དུ་ཆེ་བར་གྱུར་པ་ན། །ཀུ་ཤ་རྩ་ལ་བརྒྱ་བྱིན་གཟུགས། །མཛེ་མོའི་སོག་པ་གཡས་པ་ལ། །ཁྲག་
ཆེན་གྱིས་བྲི་སྙིང་གར་སྩལ། །ཏྲི་བཛྲ་ཨ་ཀུ་ཤ་ཛཿ ལྕེ་པོག་གིས་བདུག་སྔོན་དམར་བཅིངས། །རྩ་བའི་དཀྱིལ་འཁོར་དབུས་དག་ཏུ། །གྲུ་གསུམ་ནག་པོར་བཅུག་བྱས་ལ། །ལྕགས་ཀྱུའི་ཕྱག་རྒྱ་བཅས་ལ་དགུག །ཏྲི་བཛྲ་

89-1-320a

ཏྲི་བཛྲ། ཡཀྵ་དུཥྚཱན་བཛྲ་ཨྃ་ཀུ་ཤ་ཛཿཀྲོ་དྷིང་། །ཀྲོ་ལ་ཤ །རཱ་ཛ་ཐ་མ་ནྃ། རཱ་ཛ་ཤ་ཏྲཱུྃ་མཱ་ར་ན་ཕཊ། རཱ་ཛ་ཨ་མུ་ཀཾ། བྷཀྵ་ནི་གྲཱི་ཧྞ་གྲཱི་ཧྞ། གྲཱི་ཧྞ་གྲཱི་ཧྞ་མཱ་ར་ཡ་ཕཊ། ཕུར་བ་གདབ་ཅིང་ལྕག་གིས་བྲབ། །དེ་ནས་བཀར་བའི་
འཁོར་ལོ་བཅའ། །རྩ་བའི་འཁོར་ལོའི་ལྟེ་བ་ལ། །ཀུ་ཤའི་གཟུགས་གཞག་ཕྱི་རྩིབས་ལ། །རེའུ་མིག་བཅུ་བཞི་ལྡན་པ་ལ། །རྩིབས་ལ་གཟུགས་བྲིས་བོང་ཁྲག་སྦྱར། །རེའུ་མིག་ཆ་ལ་བཀར་སྔགས་དགོད། །དུ་ཏྲི་པ་ཏྲི་
དཀོར་བ་ཁྃ་རྦད། །ཡ་ཏྲི་དཀོར་བ་ཁྃ་རྦད། །ཡུང་ཀར་ཁྲག་སྣ་དུག་སྣས་བྲབ། །ཡང་ན་ཆུ་བོའི་གཞུང་ལ་བསྐུར། །ཡང་ན་ཕུགས་རྡུགས་གྲོག་པོར་གནོན། །དེ་ཚེ་ཞིང་ལྕགས་དྲག་ཏུ་བསྣུན། །དཔལ་རྡོ་རྗེ་གཏུམ་པོ་ཐུགས་གསང་
བའི་རྒྱུད་ཕྱི་མ་ལས་དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མ་རྫོགས་སྷོ།། །། རྒྱ་གར་གྱི་སློབ་དཔོན་ཨ་བ་ཡུག་ཏི་དང་། བོད་ཀྱི་ལོ་ཙྪ་བ་བླ་བན་ཆོས་ཀྱི་བརྩོན་འགྲུས་ཀྱིས་ཞུས་ཏེ་བསྒྱུར་ཅིང་གཏན་ལ་ཕབ་
པའོ། ། ༄། །རྒྱ་གར་སྐད་དུ།  ཤྲཱི་བཛྲ་ཙཎྜ་ཙིཏྟ་གུ་ཧྱ་ཏནྟྲ་ཨུཏྟ་རོཏྟ་ར།  བོད་སྐད་དུ།  དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ། བཅོམ་ལྡན་འདས་དཔལ་རྡོ་རྗེ་གཏུམ་པོ་ལ་ཕྱག་འཚལ་ལོ། །དེ་ནས་འཁོར་དེ་ནི་
གནོད་སྦྱིན་ལག་ན་རྡོ་རྗེ་གཏུམ་པོ་ཞེས་བྱ་བ་འཁོད་པ་སྟན་ལས་ལངས་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་མིག་འཛུམ་དང་བཅས་པས་རང་གི་སྤྱོད་པ་ལས་ཤིན་དུ་སྤ་གོང་བར་བྱས་ཏེ། བཅོམ་ལྡན་འདས་ལ་འདི་
སྐད་ཅེས་གསོལ་ཏོ། །ཀྱཻ་བཅོམ་ལྡན་འདས་སླད་མའི་དུས་ན། གདུག་པ་ཅན་གྱི་སེམས་ཅན་ལ་རྣམ་པར་འཚེ་ཞིང་རྣམ་པ་གསུམ་གྱིས་སེམས་ཅན་མ་རུངས་པར་བགྱིད་དེ། རེག་པའི་དུག་གིས་ཀྱང་རབ་ཏུ་ཡང་གཟིར་བར་བགྱིད་
དོ། །ཁ་རླངས་ཀྱི་དུག་གིས་ནི་རབ་ཏུ་མྱོས་ཤིང་ཤིན་དུ་ཡང་ལྕི་བར་བགྱིད་དོ། །མཐོང་བའི་དུག་གིས་ནི་ཟ་ཞིང་འཕྲུག་ཅིང་ཚ་བར་བྱེད་དོ། །འཕྲོ་བ་ཁ་རླངས་ཀྱི་དུག་ཅན་དང་། རེག་པ་ལུས་ཀྱི་དུག་རྣམས་ཀྱི་གདུང་བ་བསལ་བའི་སླད་

89-1-320b

དུ་བཅོམ་ལྡན་འདས་ཀྱིས་བཤད་དུ་གསོལ་ཞེས་ཞུས་པས། བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་གནོད་སྦྱིན་གསང་བའི་བདག །དུག་གསུམ་དུག་གི་རྩ་བ་ཡང་། །དུག་གསུམ་ལས་ནི་བྱུང་བ་ཡིན། །རྩ་བའི་དུག་ལ་
རང་བཞིན་མེད། །དེ་ནི་དུག་གསོ་སྨན་གྱི་མཆོག །སྨན་ཉིད་རང་འབྱུང་གཞན་ལས་མིན། །དེ་ཉིད་རང་དང་གཞན་ལས་གྲོལ། །རྩ་བའི་དུག་ལ་རང་གྲོལ་ན། །དུག་གསུམ་ལ་སོགས་གཞན་དུ་མེད། །དུག་ལྔ་ལས་འཕྲོས་འབྱུང་
ལྔའི་དུག །ཀུན་རྫོབ་ཙམ་དུ་འབྱུང་བ་འཇོམས། །དེ་དག་རབ་ཏུ་གཞོམ་པའི་ཕྱིར། །རང་གཞན་རང་གྲོལ་བདུད་རྩི་ཡི། །རྩ་བའི་དུག་སོགས་འཇོམས་པར་བྱེད། །ལྷ་ཡི་སྐུ་དང་སྔགས་ཀྱི་མཐུ། །ཡེ་ཤེས་འབྱུང་བ་ཆེན་པོ་
ཡིས། །ལས་ཀྱི་འབྱུང་བ་འཇོམས་པར་བྱེད། །རྫས་ཀྱིས་ཀྱང་དེ་བཞིན་ནོ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་དུག་དང་དུག་འཇོམས་བྱེད་ཀྱི་ལེའུ་སྟེ་དང་པོའོ།། །། དེ་ནས་
གནོད་སྦྱིན་གཏུམ་པོས་འདི་སྐད་ཅེས་གསོལ་ཏོ། །ཀྱཻ་བཅོམ་ལྡན་འདས་དུག་ཆེན་པོ་དེ་དག་སྨིན་པ་ལ། གདོན་པའི་ལས་དག་གང་གིས་བགྱི། །ནན་ཏན་གྱིས་ནི་བཀའ་སྩོལ་ཅིག་ཅེས་གསོལ་པས། བཅོམ་ལྡན་འདས་ཀྱིས་བཀའ་
སྩལ་པ། བཛྲེ་སརྦ་ཥྚྃ་ཙིཏྟ་རྦད་ནན། མ་ཧཱ་ཀཱ་ལ་ཙིཏྟ་རྦད་ནན། སརྦ་ཤ་ཏྲཱུྃ་མཱ་ར་ཡ་རྦད་ནན། ཞག་གྲངས་ཉི་ཤུ་གཅིག་ཏུ་བྱ། །ནམ་ལངས་ཉི་མ་ཤར་ག་རུ། །སྟོང་ཚར་རེ་སྟེ་དེ་བཞིན་དུ། །སྲོད་དང་ཐོ་རངས་ནམ་གུང་ལ། །མེ་ཁྲག་གསུམ་དང་དུག་
སྣ་དང་། །དྲག་པོའི་རྫས་རྣམས་དག་གིས་བྲབ། །ནཱ་གའི་གཟུགས་བྱས་རྫ་ཡི་ནང་། །གཟུགས་ནང་ཕུཿལ་སྔགས་ཕྲེང་བསྐོར། །རྫ་ནང་ཐལ་ཆེན་འབྲུབ་ཁུང་དུའོ། །སྔགས་པར་རྩ་བའི་འཁོར་ལོ་ཡིས། །ཁ་ཆོད་སྨེ་གོས་ནག་པོ་དགབ། །
དེ་ནས་དྲག་པོའི་སྦྱིན་བསྲེག་བྱ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་གདུག་པ་སྲོག་གི་འཁོར་ལོའི་ལེའུ་སྟེ་གཉིས་པའོ།། །།   དེ་ནས་ཡང་གསུངས་པ། ནཱ་གའི་གཟུགས་ལ་རེག་ཆ་ནི། །

89-1-321a

སྔགས་ཀྱི་འབྲུ་བཞིན་སྔགས་བཀོད་དོ། །ཀླུ་རྒྱལ་བཞི་གཟུགས་མཐར་བཞག་ནས། །གདུག་པ་ལས་ཀྱི་འཁོར་ལོ་བསྐོར། །དང་པོའི་ཞི་བ་ཐ་མར་དྲག །དང་པོར་དྲག་ལ་ཐ་མར་ཞི། །ཐོག་མཐའ་གཉིས་ཀ་ཞི་དང་དྲག །ༀ་ནཱ་ག་རཱ་ཛ་སམ་། །ཨ་པ་ལཱ་ཡ་ཙིཏྟ་ཛྭ་
ལ་ཡ། ས་མ་ཡ་སྭཱ་ཧཱ། ཉི་ཤུ་གཅིག་གིས་མཐར་དབྱུང་ངོ་ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའ་ཕྱི་མའི་ལས་དམ་ཚིག་སྲོག་གི་འཁོར་ལོ་འཇམ་པ་དང་རྩུབ་པའི་སྔགས་ཀྱི་ལེའུ་སྟེ་གསུམ་པའོ།། །། 
དེ་ནས་ཡང་གནོད་སྦྱིན་གཏུམ་པོས་གསོལ་པ། ཀྱེ་བཅོམ་ལྡན་འདས་སླད་མའི་དུས་ན་བསྟན་པ་ལ་གནོད་པ་དང་གདུག་པ་ཅན་འདུལ་བ་ཐུན་མོང་གི་ལས་བཀའ་སྩལ་དུ་གསོལ་ཞེས་གསོལ་པས། བཅོམ་ལྡན་འདས་ཀྱིས་བཀའ་སྩལ་པ། ཐུན་
མོང་ཕྱི་རུ་གསད་འདོད་ན། །ཕྲིན་ལས་མི་འགྱུར་འཁོར་ལོ་བསྐོར། །འཁོར་ལོར་གཞུག་དང་གཟུགས་ལ་གདབ། །གསང་བའི་འཁོར་ལོ་ལྟོ་སྦྱར་དུ། །གང་དམིགས་གཟུགས་དེ་ཁྲག་ཏུ་བྲི། །སྙིང་གར་མིང་བྲི་ལྟེ་བ་ལ། །ཤྭ་རཱི་ར་ཏེ་མགོ་བོ་ལ། །བནྡྷ་
བནྡྷ་ཞེས་པ་དགོད། །ཡན་ལག་བཞི་པ་ཧ་ན་སྟེ། །མཱ་ར་ཡ། བརླ་གཉིས་དང་ནི་མཚན་མ་ལའོ། །དམིགས་པའི་ས་ནས་ཟག་པའི་རྫས། །བླངས་ཏེ་བོང་བུའི་ཆུས་སྦྲུས་ལ། །ཤ་ཏྲཱུྃ་གཟུགས་བྱ་ཡིག་འབྲུ་རྣམས། །གནས་སུ་བཀོད་དེ་སྔོན་
དམར་བཅིང་། །དུག་རྫས་གཏུམ་པའི་རྫས་ཀྱིས་གཏུམ། །བཙོན་ཁང་བསྐུར་ཏེ་ཐུན་རྣམས་དབབ། །ཟླ་བ་གཅིག་ཏུ་གནག་པར་བྱ། །བདུན་བདུན་བསྐོར་བྱ་བར་བར་དུ། །མཆོད་པའི་ལས་བྱ་མཚན་ཐུན་དབབ། །བསྲེག་དང་
གནོན་པས་མཐའ་བརྟུལ་བྱ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་ཕྲིན་ལས་མི་འགྱུར་བའི་འཁོར་ལོའི་ལེའུ་སྟེ་བཞི་པའོ།། །།  དེ་ནས་ཡང་གནོད་སྦྱིན་གཏུམ་པོས་གསོལ་པ། 
ཀྱཻ་བཅོམ་ལྡན་འདས་སླད་མའི་དུས་ན། གདུལ་དཀའ་བའི་གདོལ་པ་ཅན་རྣམས་ཀྱི་ལོ་ཏོག་འཇོམས་པའི་ཐབས་བཀའ་སྩལ་དུ་གསོལ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ལོ་ཏོག་འཇོམས་

89-1-321b

པའི་ལས་བྱས་ན། །ནཱ་ག་གཟིར་ཏེ་གཞོམ་པར་བྱ་ཞེས་སྟོབས་ཀྱི་ཡི་གེ་འབྲུ་བཞི་དང་། མི་འགྱུར་བའི་ཡི་གེ་འབྲུ་གསུམ་གསུངས་པ། ༀ་ཧཱུྃ་བཛྲ་མ་ཧཱ་བ་ལ་ཞེས་གཏུམ་པོ་སྟོབས་ཆེན་པོའི་སྔགས་གསུངས་སོ། །ནཱ་ག་ཙིཏྟ་རྦད་ནན། 
ཞེས་ཀླུའི་སྙིང་གཟིར་དྲུག་པ་གསུངས་སོ། །སརྦ་དུཥྚཱོ་ན། ཞེས་ཐམས་ཅད་དབང་དུ་སྡུད་པ་གསུངས་སོ། །ཕོབ་ཤར་ཤར་ཕོབ། ཅེས་ཆུ་འཁྱགས་ཀྱི་སྙིང་པོ་གསུངས་སོ། །གཅིག་ཏུ་དྲིལ་ཞིང་བརྡེག་པར་བྱ། །ནཱ་གའི་གཟུགས་
བཅས་སྔགས་བཀོད་ནས། །ཡུངས་ཀར་བརྡེག་ཅིང་ཕུར་བུས་གདབ། །མཛེ་ཐོད་ནང་དུ་ཀླུ་གཟུགས་གཞུག །ཁྲག་ཆེན་བཙན་དུག་གླ་བའི་ཁྲག །ཡུངས་ཀར་ཡུངས་ནག་སྔགས་ཤིང་བརྡེག །ཀླུ་གཟུགས་ནིམ་པའི་ཆུ་
ནས་དབྱུང་། །དང་པོ་ཆོ་འཕྲུལ་ཆེ་བར་འདོད། །ཉམ་ཐག་པ་ན་དབབ་ལས་བྱ། །གསད་ཅིང་རོ་རུ་འདུག་པ་ན། །དུས་ལས་ཡོལ་ཏེ་ཕེབས་མི་འགྱུར། །རྟགས་དང་ལྡན་པར་གྱུར་པ་ན། །བདག་ཉིད་ཏིང་འཛིན་ལྡན་པ་ཡིས། །དྲག་པོའི་
སྔགས་ཀྱིས་ཀླུ་གཟུགས་བཏུམ། །རྫས་དང་ཐོད་པ་ཆུ་མིག་མནན། །དྲག་པོ་རྒྱུ་བའི་དུས་དང་སྦྱར། །འཇིག་རྟེན་ལྡོག་པར་ཐེ་ཙོམ་མེད། །ཅེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཕྱི་མའི་ཕྱི་མ་ལས་ཆུ་
འཁྱགས་ལོ་ཏོག་འཇོམས་བྱེད་ཀྱི་ལེའུ་སྟེ་ལྔ་པའོ།། །།   དེ་ནས་དྲེགས་པ་ཅན་ཐམས་ཅད་ཤིན་དུ་ཡང་ཡི་རང་བར་གྱུར། ལྗོན་ཤིང་ལ་དུས་ཀྱི་རླུང་དྲག་པོས་བསྐྱོད་པ་བཞིན་འདར་བཞིན་དུ་འཁོད་དེ། བཀའ་བཞིན་དུ་བགྱིད་དོ་ཞེས་
འཛེར་ཅིང་སྤྱན་སྔ་ན་འཁོད་པ་ལས་གནོད་སྦྱིན་གཏུམ་པོས་གསོལ་པ། ཀྱེེ་བཅོམ་ལྡན་འདས་སླད་མའི་དུས་ཀྱི་བསྟན་པ་ལ་གནས་པའི་སླད་དུ་ལས་གནད་ལ་དབབ་ཏུ་གསོལ་ཞེས་གསོལ་པས། བཅོམ་ལྡན་འདས་ཀྱིས་
བཀའ་སྩལ་པ། བདུད་རྣམས་ལས་ལ་གཞུག་པ་ནི། །ཁ་རག་ནག་པོ་ཁྲ་མཱ་ཡ་ནྲྀ་མཱ་ར་ཛཱ་ནྲྀ་ཁུག་ཛཿ། བཙན་རྣམས་ལས་ལ་གཞུག་པ་ནི། །ཨཱ་བི་ཤུ་རཀྵ་ཚལ་པ་ཚལ་པ་ཨ་ནྲྀ་ཏྲི་ཛཿཛཿ། ཀླུ་བཙན་ལས་ལ་གཞུག་

89-1-322a

པ་ནི། །ནཱ་ག་རཱ་ཛ་ཤུ་ལ་ཨ། ཏྲི་ཛ་ཛ་མཱ་ར་ཡ་ནྲི་ལོ་སོད། རྒྱལ་པོ་ལས་ལ་གཞུག་པ་ནི། །ཏྲོ་ཏ་ནི་ཏྲོ་ཏ་ནི། པ་ཏྲ་པ་ཏྲ། ཤཱུ་ལ་ཤཱུ་ལ། དྷ་ཤ་གྲཱི་བ་མཱ་ར་ཡ་ནྲྀ་ཛཿཛཿརྦད། ཀླུ་རྣམས་ལས་ལ་གཞུག་པ་ནི། །ནཱ་
ག་གུར་ལིང་། སྙིང་ཁྲག་བམ་རུལ། ནཱ་ག་ར་ར་ཧེ་ས་ཏད་རྦད། པུ་དུ་མ་ཤི་ཁ་ལ་རཀྴ་རྦད། གཉན་ལས་ལ་གཞུག་པ་ནི་ཨུཏ་ཁ་ཁ་ད་ར་སིང་ག་རཀྵ་ཁ་ལ་ནི་དུན་མཱ་ར་ཎ་དུན་རྦད་ཛཿ། དེ་དག་གི་ཕྱག་བརྙན་
ལས་ལ་གཟུང་བ་ནི་ཛ་ལ་ཛ་ནྲྀ་ཧ་ན་ནྲྀ་མ་དུ་མ། སྙིང་ཁ་ལ་ནྲྀ་ཛཿཛཿ། ཛ་ནྲྀ་རྦད་པུ་ཁ་ལ་རཀྴ་རྦད། ལིང་ག་བྱད་གཞུག་རེ་བས་དྲིལ། །རྟ་ནག་ཐོད་པར་བཅུག་ནས་ཀྱང་། །ནུབ་ཀྱི་ཕྱོགས་ཀྱི་བྲག་ནག་རྩར། །མཐུན་པའི་
རྫས་དང་མིང་བྱང་སྦྲག །རྟ་ནག་ལུག་ནག་སྙིང་དག་དང་། །ལུག་ནག་མཐིང་ནག་དར་གྱིས་བརྒྱན། །རྟ་ནག་ཐོད་བཅུག་བྲག་རྩར་གཏད། །མཐུན་པའི་མིང་བྲིས་དུག་གིས་བྲབ། །མཐིང་ནག་དར་དྲིལ་མཛེ་ཐོད་གཞུག །བ་དམར་
རྟ་དམར་སྙིང་དུང་གཟུགས། །ཐོད་པར་བཤོས་ཆ་དམར་པོར་གཞུག །ཆུ་མིག་བྲག་གི་རྩ་བ་ན། །རྩེ་ན་བྲག་དམར་ཡོད་པར་གཏད། །མིང་རུས་བྲིས་ལ་ཟ་འོག་དྲིལ། །འཇོན་མེ་སྤྲེའུ་ཡི་ཀ་མགོ་ཅོ་རུ། །རྟ་དང་བྱ་དང་ལུག་དཀར་
སྙིང་། །སྤྱན་གཟིགས་དཀོར་འབྲུ་ཟ་འོག་དྲིལ། །ཐོད་པར་བཅུག་སྟེ་ལྷ་ཁང་གི། །ཐེམ་པའི་འོག་ཏུ་མནན་པར་བྱ། །ཤ་ཏྲཱུྃ་སྦལ་ནག་ལྟོ་བར་བྲི། །གླང་དམར་རྭ་རུར་བཅུག་ལ་དྲིལ། །རྩི་སྨན་འབྲུ་དང་རིན་པོ་ཆེ། །བ་དམར་
གླང་རུར་བླུག་ནས་ཀྱང་། །ནཱ་ག་གདུག་པའི་ལག་ཏུ་གཏད། །མཛོ་དྲེའི་ཐོད་པར་མིང་བྱང་གཞུག །ཆུ་རྟའི་གཟུགས་དང་རྟ་སྔོན་སྙིང་། །ཐོད་པར་བཅུག་སྟེ་རྒྱ་མཚོར་སྐྱུར། །ཙ་ར་དམར་པོའི་ཐོད་པ་རུ། །ཤ་ཏྲཱུྃ་མིང་གཟུགས་
དར་དམར་དྲིལ། །སྔོན་དམར་དོག་པས་དམ་དུ་བཅིང་། །བྱ་དམར་ར་དམར་སྙིང་དང་གཟུགས། །ཐོད་པར་བཤོས་ཆ་དམར་པོ་གཞུག །བྱང་ཕྱོགས་བྲག་དམར་རྩ་རུ་མནན། །རྣག་པའི་མིང་བྱང་བྲིས་ནས་ཀྱང་། །ཙེ་ར་སྔོན་མོའི་ཐོད་

89-1-322b

པར་གཞུག །མཛོ་ལྟོལ་བ་ལང་དྲེའུའི་ཡང་། །ཐོད་པར་བཅུག་སྟེ་ཆུ་འགྲམ་དང་། །ཤིང་གཅིག་རྩ་རུ་མནན་པར་བྱ། །ཏིང་འཛིན་སྔགས་དང་རྫས་རྣམས་ཀྱིས། །རང་གི་བྱ་བ་ནན་ཏན་བྱོས། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་
གསང་བའི་རྒྱུད་ཕྱི་མའི་ཕྱི་མ་ལས་བསྟན་པ་ལ་གནོད་པ་ཆམ་ལ་དབབ་པའི་ལེའུ་སྔགས་ཀྱི་ཕོང་བསྟན་པ་སྟེ་དྲུག་པའོ།། །། དེ་ནས་གནོད་སྦྱིན་གཏུམ་པོས་གསོལ་པ། ཀྱཻ་བཅོམ་ལྡན་འདས་སླད་མའི་དུས་ན་གདུག་
པ་ཅན་ཕྱག་བརྙན་བཅས་པའི་སྦྱོར་བའི་མཐུ་བཟློག་པའི་ཐབས་བཀའ་སྩལ་དུ་གསོལ། དེ་སྐད་ཅེས་གསོལ་པ་བཅོམ་ལྡན་འདས་ཀྱིས་བཀའ་སྩལ་པ། དེ་ནས་སྦྱོར་བའི་མཐུ་བཟློག་ན། །རང་ལུས་སྦས་ཏེ་དེ་དག་
གིས། །མིག་གི་འབྲས་བུ་གཅར་བར་བྱ། །རང་ལུས་སྦ་བར་བྱ་བ་ནི། །སྐྱེ་འགྲོ་མིག་གི་འབྲས་བུ་གཅར། །ནག་པོ་ཁ་ཏའི་འབྲས་བུ་དང་། །ཙ་ར་རོག་པོའི་འབྲས་བུ་གཉིས། །མིག་ལ་བསྐུས་ཏེ་ནོར་བུ་བཙལ། །རྙེད་ནས་ལུས་བཅང་
རི་ཁྲོད་འགྲིམ། །དེ་དག་རྙེད་པར་མ་གྱུར་ན། །གསེར་དང་དངུལ་རྡོ་ཞ་ཉེའི་རྡོ། །སྤྲ་ཚིལ་དང་ནི་ཨ་རུ་ར། །བ་རུ་ར་དང་པི་པི་ལིང་། །ཕོ་བ་རིས་རྣམས་ཆ་མཉམ་སྟེ། །བཞུ་སྟེ་རྫི་དང་རླངས་ལ་གཟབ། །དེ་དག་གཞན་གྱི་སྦྱོར་
བ་ཡིས། །བདག་གམ་གཞན་ལས་འཚེ་གྱུར་ན། །དྲེགས་པ་ཀུན་གྱི་འབྲས་བུ་གཅར། །ལྟོ་འཕྱེའི་ཤ་དང་སྦལ་འདྲའི་ཤ ། ས་ཆུ་དག་ན་གནས་པའི་མི། །གླང་མའི་སྒྲོན་ཤིང་འབྲས་བུ་དང་། །མེ་མ་བཏང་བའི་དུ་བ་དང་། །ཉག་
གཅིག་པོ་ཡི་དྲི་ཆེན་དང་། །སེམས་མ་ཆགས་པའི་ཤ་རྣམས་ཀུན། །ལེགས་པར་ནན་ཏན་བྱས་བཅས་ནས། །འཇིག་རྟེན་པ་ཡི་ལྷ་རྣམས་ཀྱི། །རྣམ་པར་དག་པས་མཐོང་མི་འགྱུར། །གདུག་པའི་ཀླུ་རྣམས་འགྲས་པའི་
གདོན། །དེ་དག་འབྲས་བུར་གཅར་བ་ནི། །ཕག་ཕོ་རོག་པོའི་དོན་སྙིང་ལྔ། །ལྕེ་པོག་ནག་པོའི་གསེར་ལུམ་དང་། །ཐར་ནུའི་ཐངས་ཉམས་རྙེད་གདུང་སྟེ། །ལུས་ལ་བཅངས་པར་གྱུར་པ་ན། །ཤ་མིག་རྣམ་

89-1-323a

པར་དག་པ་ཡི། །ཀླུ་ཆེན་བརྒྱད་ཀྱིས་བལྟས་གྱུར་ཀྱང་། །མཐོང་བར་འགྱུར་བ་མ་ཡིན་ནོ། །ཞེས་གསུངས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་རྒྱུད་ཀྱི་ཕྱི་མའི་ཕྱི་མ་ལས་ལུས་རྣམ་པར་སྦ་བའི་ལེའུ་སྟེ་
བདུན་པའོ།། །། དེ་ནས་ལྷ་ཡི་དབང་པོ་དང་། གནོད་སྦྱིན་གྱི་སྡེ་དཔོན་ལག་ན་རྡོ་རྗེ་གཏུམ་པོ་དང་། གནོད་སྦྱིན་གྱི་སྡེ་དཔོན་ལག་ན་རྡོ་རྗེ་གོས་སྔོན་པོ་ཅན་དང་། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་སྟོབས་པོ་ཆེ་དང་། གནོད་
སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གསང་བའི་བདག་པོ་དང་། དེ་དག་ལ་སོགས་པ་འདུས་པའི་ཚོགས་ཆེན་པོ་རྣམས་རབ་ཏུ་ཡིད་རངས་ཏེ། ལན་བརྒྱ་སྟོང་དུ་མར་མཆོད་ཅིང་བསྐོར་ནས་མངོན་པར་བསྟོད་དོ། །དེ་ནས་ལག་ན་རྡོ་རྗེ་
བཞི་ལ་བཀའ་སྩལ་པ། ལག་ན་རྡོ་རྗེ་བཞི་པོ་དང་། རྒྱུད་འདི་དག་གང་ན་གནས་པར་ཁྱེད་ཀྱང་རྗེས་སུ་འབྲངས་ལ་རྒྱུད་འདི་འཆད་པ་དུས་གསུམ་དུ་མཆོད་ཅིང་བཀུར་བར་གྱིས་ཤིག །དེའི་དགོས་པ་གང་ཅི་ཡང་རུང་བ་མ་
ལུས་པར་བསྒྲུབས་ཤིག །ཕྱི་མའི་དུས་ན་ཨོ་ཏྲེ་ཡུལ་དུ་རྒྱས་པར་འགྱུར་གྱིས་དེར་བསྲུང་བར་བྱོས་ཤིག་ཅེས་གསུངས་ནས་ཆོས་ཀྱི་དབྱིངས་རྣམ་པར་དག་པ་ལ་བཞུགས་སོ། །དཔལ་རྡོ་རྗེ་གཏུམ་པོ་ཐུགས་གསང་བའི་
རྒྱུད་ཕྱི་མའི་ཕྱི་མ་ལས་ཡོངས་སུ་གཏད་པའི་ལེའུ་སྟེ་བརྒྱད་པའོ། །དཔལ་རྡོ་རྗེ་གཏུམ་པོ་གསང་བའི་རྒྱུད་ཕྱི་མའི་ཕྱི་མ་རྫོགས་སྷོ།། །། རྒྱ་གར་གྱི་སློབ་དཔོན་ཨ་བ་ཡུག་ཏི་ལ་དང་། བོད་ཀྱི་ལོ་ཙྪ་བ་བླ་བན་
ཆོས་ཀྱི་བརྩོན་འགྲུས་ཀྱིས་ཞུས་ཏེ། བསྒྱུར་ཅིང་གཏན་ལ་ཕབ་པའོ། ། ༄༅། །དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །ཨོཾ་མུ་ཙི་ནི་སྭཱ་ཧཱ། མུ་ཁེ་སེ་སྭཱ་ཧཱ། 
མོ་ཧ་ནི་སྭཱ་ཧཱ། དན་ཏི་རི་སྭཱ་ཧཱ། ཆོ་ག་འདི་ཆུ་ཁྱོར་བ་གང་བཟླས་པ་བྱས་ཏེ། འཐུངས་ནས་སེམས་བཞིན་དུ་ཉལ་ན་ལག་ན་རྡོ་རྗེས་རྨི་ལམ་སྟོན་པར་འགྱུར་རོ། །རྨི་ལམ་མཐོང་བ་ཞེས་བྱ་བའི་གཟུངས་རྫོགས་སྷོ།། །།