90-1-1a

༼ཇ༽ ༄༅། ༈ །གསང་སྔགས་རྒྱུད་འབུམ་གྱི་སྐོར་བཞུགས་སོ། །
(黃)  秘密經第七部

90-1-1b

༄༅། །རྒྱ་གར་སྐད་དུ།  ནཱི་ལཱམྦ་ར་དྷ་ར་བཛྲ་པཱ་ཎི་ཡཀྵ་མ་ཧཱ་རཱུ་དྲ་བཛྲཱ་ན་ལ་ཛི་ཧྭ་
ཏནྟྲ་ནཱ་མ།  བོད་སྐད་དུ།  ཕྱག་ན་རྡོར་རྗེ་གོས་སྔོན་པོ་ཅན་གནོད་སྦྱིན་དྲག་པོ་ཆེན་པོ་རྡོ་རྗེ་མེ་
ལྕེའི་རྒྱུད་ཅེས་བྱ་བ། འཕགས་པ་ཕྱག་ན་རྡོ་རྗེ་ལ་ཕྱག་འཚལ་ལོ། །འདི་སྐད་བདག་
གིས་ཐོས་པ་དུས་གཅིག་ན། བཅོམ་ལྡན་འདས་ཐམས་ཅད་འབྱུང་བའི་ཡུམ་བཙུན་མོའི་
བྷ་ག་ལ་བཞུགས་ཏེ། དེ་ནས་གནོད་སྦྱིན་དྲག་པོ་བྱེ་བ་ཕྲག་བཅུ་དང་། སྟོང་གསུམ་གྱི་
སྟོང་ཆེན་པོའི་འཇིག་རྟེན་གྱི་ཁམས་ན་དྲག་ཅིང་གཏུམ་པའི་རིགས་ཇི་སྙེད་པ་ཐམས་ཅད་
དང་ཐབས་ཅིག་གོ། །དེ་ནས་བཅོམ་ལྡན་འདས་དྲག་པོའི་དཀྱིལ་མོ་དཀྲུང་བཅས་ནས་
གཡས་པ་ནམ་མཁའ་ལ་བསྒྲེང་། གཡོན་པ་ས་ལ་བགྲད་ནས་སྤྱན་བཟློག་པས་ཕྱོགས་བཅུར་

90-1-2a

གཟིགས་ཏེ། ཞལ་ནས་ཧཱུྃ་ཧ་ཞེས་པའི་སྒྲ་ཆེར་བྱུང་ངོ་། །དེ་ནས་འཁོར་ཐམས་ཅད་གཙོ་བོ་མི་སྣང་བས་ཡུན་རིང་དུ་བརྒྱལ་བར་གྱུར་ཏོ། །དེའི་སྐད་ཅིག་དེ་ཉིད་ལ། བཅོམ་
ལྡན་འདས་ཀྱི་སྤྱི་བོའི་གཙུག་ནས་སངས་རྒྱས་ཐམས་ཅད་ཀྱིས་གནང་བ། སྔགས་རྣམས་པ་གསུམ་གྱི་བདག་པོར་གྱུར་པ། ཕྱག་བརྙན་ལག་ན་རྡོ་རྗེ་ཞེས་བྱ་བ་ཁ་དོག་
སྔོན་པོ་ཆེར་གྲགས་པ། ཕྱག་གཡས་པ་ན་རྡོ་རྗེ་རྩེ་དགུ་པ་ཐོགས་པ། གཡོན་པ་ན་ནམ་མཁའ་ལྡིང་གི་རྒྱལ་པོ་དྲག་པོ་ཐོགས་པ་ཞིག་རྒྱ་མཚོ་ཆེན་པོར་
ཞུགས་སོ། །དེ་ནས་ནམ་མཁའ་ལྡིང་གི་གཤོག་པ་བསྐྱོད་པས་རྒྱ་མཚོར་ཞུགས་ཏེ། ཀླུའི་རྒྱལ་པོ་དགའ་བོ་དང་། འཇོག་པོས་རང་གི་བདག་པོའི་སྤྱི་བོར་
འདུད་དོ། །ཉེ་དགའ་བོ་དང་དུང་སྐྱོང་གིས་རྣ་ཆ་བྱས་སོ། །རིགས་ལྡན་གྱིས་མགུལ་རྒྱན་དུ་བྱས་སོ། །པད་མ་དང་པད་མ་ཆེན་པོས་ལག་གདུབ་ཏུ་བྱས་སོ། །
སྤྲིན་གྱི་ཤུགས་ཅན་གྱིས་སེ་རལ་ཁར་བཅིངས་སོ། །ཧུ་ལུ་ཧུ་ལུས་སྐ་རགས་སུ་བྱས་སོ། །འབྲུག་སྒྲ་དང་བདུད་འཇོམས་ཀྱིས་རྐང་གདུབ་ཏུ་བྱས་ཏེ། སླར་བདག་
པོའི་ལག་པ་གཡོན་པར་སོང་ངོ་། །དེ་ནས་གནོད་སྦྱིན་བྱེ་བ་ཕྲག་བཅུ་དང་། དྲག་པོའི་རིགས་རྣམས་བརྒྱལ་བ་ལས་སངས་ཏེ། ཕྱོགས་ཀུན་ཏུ་བལྟས་པ་ལས་ཕྱག་
བརྙན་ལག་ན་རྡོ་རྗེ་རྒྱ་མཚོའི་ནང་ན་འདུག་པ་མཐོང་ནས། རིངས་པར་ཀྱེ་མ་ཨ་ལ་ལ་བདག་ཅག་གི་གཙོ་བོ་ཉིད་བཞུགས་སོ། །ཞེས་བརྗོད་ནས་སོང་བ་ལས་ཕྱིན་ཏེ། 

90-1-2b

བལྟས་པས་ཆེར་དྲག་པ་སྐྲའམ་པ་གྱེན་དུ་འཕགས་པ། མིག་མེ་མདག་གི་ཕུང་པོ་ལྟར་འབར་བ། མཆེ་བ་གཙིགས་པ། ལྕེ་གློག་ལྟར་འགྱུ་བ། གསུས་པ་རྫིང་ལྟར་འཁྱིལ་བ། རྒྱ་མཚོའི་
ཟབ་སུ་དཔག་ཚད་བརྒྱད་ཁྲི་ཡོད་པ་རྐང་པའི་སྤུས་མོར་ཕྱིན་པ། ཀླུའི་རྒྱན་ཆ་བདུན་དང་ལྡན་པ། ལག་པ་གཡས་ན་རྡོ་རྗེ་རྩེ་དགུ་པ་ཐོགས་པ། གཡོན་ན་ནམ་མཁའ་ལྡིང་གི་རྒྱལ་པོ་དྲག་
པོ་ཐོགས་པ། སྐུ་བྱིན་པོ་ལ་དཔག་ཚད་ཉིས་འབུམ་དྲུག་ཁྲི་ཡོད་པ་བཞུགས་སོ། །དེ་ནས་གནོད་སྦྱིན་རྣམས་ཀྱིས་གསོལ་པ། གཙོ་བོ་ཁྱོད་ཀྱིས་བཅོམ་ལྡན་འདས་ལ་གསང་
བའི་དོན་དྲག་པོ་རྒྱས་པར་གསོན་ཅིག་དང་། བདག་ཅག་རྣམས་ཀྱིས་ཞུ་བར་མ་སྤོབས་ཀྱིས་ཞེས་གསོལ་ནས། ལག་ན་རྡོ་རྗེ་ལ་གོས་སྔོན་པོ་དར་ལ་བཻ་དུརྱ་ཞུན་མའི་ནང་དུ་
བཙོས་པ་ཞིག་བླ་གོས་སུ་གསོལ་ཏོ། །སྟག་གི་དཔགས་པ་དྲུག་སྟོང་གིས། ཤམ་ཐབས་སུ་བཅིངས་སོ། །དེ་ནས་ལག་ན་རྡོ་རྗེ་རིངས་པར་བཅོམ་ལྡན་འདས་ཀྱི་སྤྱན་སྔར་སོང་སྟེ་
ཞབས་ལ་སྤྱི་བོས་གཏུགས་ཏེ། མདུན་དུ་སྙིང་པོ་དང་ལྡན་པའི་དཀྱིལ་མོ་དཀྲུང་བཅས་ཏེ་འདུག་གོ། །དེ་ནས་བཅོམ་ལྡན་འདས་ཀྱིས་ནམ་མཁའ་དང་ས་གཞི་ལ་
གཟིགས་ནས། བར་སྣང་དུ་ཡང་སྤྱན་གྱིས་འཁོར་བར་གཟིགས་སོ། །དེ་ནས་ཁྃ་བྲུྃ་སྃ། ཞེས་བྱ་བའི་སྔགས་བརྗོད་དོ། །དེ་ནས་ལག་ན་རྡོ་རྗེ་
སྟན་ལས་ལངས་ནས། རྡོ་རྗེ་ཐལ་མོ་རང་གི་སྙིང་གར་སྦྱར་ཏེ། བཅོམ་ལྡན་འདས་ལ་འདི་སྐད་ཅེས། གསོལ་ཏོ། །ཀྱེ་མ་བཅོམ་ལྡན་འདས་ལ་

90-1-3a

གསང་བ་དྲག་པོའི་དོན་བདག་དང་སེམས་ཅན་ཐམས་ཅད་ལ་ཕན་པའི་ཕྱིར་ཞུ་ན། ཅི་བཅོམ་ལྡན་འདས་ཀྱིས་སྐབས་དབྱེ་བར་གནང་ངམ་ཞེས་གསོལ་པ་དང་། ཅི་ཡང་མི་གསུང་བར་བཅོམ་ལྡན་འདས་གདུག་པའི་ཚོགས་ངེས་པར་
འདུལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཞུགས་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་འཁོད་པའི་གདུག་པ་ཅན་ཐམས་ཅད་སྙིང་འདར་བར་གྱུར་ཏོ། །དེ་ནས་ཏིང་ངེ་འཛིན་དེ་ལས་བཞེངས་ནས། 
ལག་ན་རྡོ་རྗེ་ལ་གཟིགས་ཏེ་བྱེད་པ་གཡོན་པའི་ཆུ་ཤིང་སྙིང་པོ་ནས་དྲངས་ཏེ་བཀུག་པའོ། །བྱེད་པ་སྐྱེས་པའི་ཆུ་ཤིང་སྒྲ་དང་བཅས་པས་བརྐྱང་བ་བྱས་ཏེ་གནས་སོ། །དེ་ནས་ལག་ན་རྡོ་རྗེ་ཕྱག་རྒྱ་དེ་ཉིད་ཡང་དག་པར་རིག་སྟེ། ཚིག་
འདི་སྐད་ཅེས་བརྗོད་དེ། ཁྱེད་ལ་སོགས་པའི་འཁོར་དག་ས་ཕྱོགས་འདིར་མ་གནས་པར་ཕྱོགས་གཞན་དུ་དེངས་ཤིག ། གལ་ཏེ་མི་འགྲོ་ན་ཁྱེད་ལ་སོགས་པའི་སྙིང་འགས་པར་འགྱུར་རོ། །ཞེས་བརྗོད་པས་སྒྲ་གནས་ཀྱི་ཁུང་བུར་
སྒྲིབ་བྱེད་ཀྱི་ཚོགས་སོང་སྟེ། སྔ་མ་བཞིན་དུ་འཁོད་དོ། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་གླེང་གཞིའི་ལེའུ་སྟེ་དང་པོའོ།། །། དེ་ནས་ཕྱག་ན་རྡོ་རྗེ་ཡིས། །ཐུབ་པའི་སྐུ་ལ་འདི་སྐད་གསོལ། །གསང་བའི་
རྡོ་རྗེ་དྲག་པོའི་དོན། །རྒྱས་པར་བདག་ལ་བཤད་དུ་གསོལ། །གསང་བའི་བདག་པོ་ལེགས་པར་ཡང་། །ཉོན་ལ་ཡིད་ལ་ཟུང་ཤིག་ཁྱོད། །ང་ཡི་གསང་བ་གང་ཡིན་དང་། །རྡོ་རྗེ་དྲག་པོ་གང་ཡིན་པ། །ང་ལ་མཚན་ཉིད་གཞན་མེད་དེ། །
ཁྱོད་ཉིད་ཀྱི་ནི་རྒྱུད་དང་ཡང་། །ཁྱོད་ཀྱི་བྱ་བའི་ལས་བཤད་བྱ། །སྐྱེ་བ་བཞི་བསྡུས་སེམས་ཅན་རྣམས། །གདུག་པ་ཅན་གྱིས་གཙེས་གྱུར་པ། །ཐབས་སུ་ལྡན་པའི་བཟློག་པ་ཡི། །མཚན་མ་ངེས་པར་བཤད་པར་བྱ། །བ་ནི་རྣམ་པར་སྣང་
མཛད་དེ། །ཛ་ནི་མི་བསྐྱོད་ཐུབ་པའི་སྐུ། །ར་ནི་རིན་ཆེན་འབྱུང་ལྡན་སྐུ། །མེ་ལྕེ་ཡིག་འབྲུ་གསུམ་པོ་ལ། །དང་པོར་གཙོ་བོ་བཤད་བྱ་བ། །པཱ་ནི་རྡོ་རྗེ་འཇོམས་བྱེད་མ། །ཎ་ནི་པད་མ་འཇོམས་བྱེད་མ། །ཨི་ནི་ཀུན་འགྲོ་འཇོམ་

90-1-3b

བྱེད་མ། །འོག་བཏགས་གསུམ་པོ་མིང་མཐར་སྦྱར། །ཨེ་ནི་ཀུན་ཏུ་གོ་བྱེད་དེ། །ང་ནི་སྨིན་པར་བྱེད་པ་སྟེ། །པ་ནི་ཀུན་ནས་སྡུད་པ་ཡིན། །ས་ནི་ཡོངས་སུ་རྟེན་པའི་ལས། །ཡ་ནི་ཡང་དག་བསྐྱོད་པར་བཤད། །གོ་འབྱེད་གཉིས་པའི་
སྟེང་གནས་པའི། །སྣ་ལྡན་དག་ཏུ་ཤེས་པར་བྱ། །དེ་ལས་ངེས་པར་བྱུང་བས་ན། །ཀུན་སྣང་གང་ཡིན་དངོས་དང་སྦྱར། །བསམ་པའི་དངོས་ལ་འཇུག་རྣམས་ཀྱི། །ཡན་ལག་ཐབས་རྣམས་ཐམས་ཅད་དུ། །གོང་དུ་སྨོས་ནས་
བརྗོད་པ་ཡིན། །དོན་དུ་གསལ་བར་ཟློས་པ་ཡི། །ཚིག་ནི་རྒྱས་པར་བརྗོད་མི་དགོས། །ལས་ལས་གྲུབ་པའི་གཟུགས་རྣམས་ལ། །དྲག་པོ་ཡོངས་སུ་སྟོན་པ་དང་། །གནོད་སྦྱིན་བེ་ཅོན་ཐོགས་རྣམས་ལ། །གཙོ་བོའི་དོན་དུ་
བཤད་པས་ན། །ཚིག་ཏུ་ངེས་པར་ཡང་དག་བརྗོད། །ཁྱོད་ཀྱི་ལུང་འཆང་རབ་དགའ་བས། །དེ་ཉིད་རིགས་སུ་བྱུང་བ་སྟེ། །ཀུན་ཀྱང་དྲག་པོའི་ལས་ལ་དགའ། །སྣང་བ་དག་པར་མི་མཐོང་བཞིན། །དེ་ཉིད་ལ་ནི་ངེས་པར་བརྗོད། །
གོང་དུ་བསྟན་པ་གང་ཡིན་པ། །སོ་སོ་དག་ལ་གདོན་མི་ཟ། །སྦྱོར་བ་སྣ་ཚོགས་དེས་བསྒྲུབས་ན། །སྣང་བར་འབྱོར་པ་སྣ་ཚོགས་པ། །མངོན་དུ་རྒྱས་ཤིང་ངེས་པར་གསལ། །སྣང་བ་ཆེན་པོ་བདག་མེད་པར། །རྒྱུད་པས་
ཡོངས་སུ་གྲུབ་པ་ཡིན། །ཀུན་རྫོབ་གོང་མའི་ཚིག་ལྟ་བུ། །དངོས་པོ་བསྟེན་པ་ལྟ་བུར་མཐོང་། །དོན་དམ་འོག་མའི་སྒྲ་ལྟ་བུར། །ཉོན་མོངས་ཀུན་བསྲེགས་རང་བཞིན་གྱིས། །འོད་གསལ་བ་རུ་གནས་པ་མིན། །སྙིང་པོ་དོན་དམ་
ལ་འཇུག་པ། །ཕྱི་རིམ་ཀུན་རྫོབ་ལ་བརྟེན་བྱ། །དང་པོར་སངས་རྒྱས་མི་གནས་ཤིང་། །སྔ་མའི་བྱ་བ་སྦྱོར་བར་བརྩོན། །དབང་ཐོབ་པ་ལ་རློམ་སེམས་མེད། །བླ་མའི་མན་ངག་ངེས་པ་ལས། །བླ་མ་ཉིད་ལ་ཅི་ནུས་ཀྱིས། །
ཡང་དག་པར་ནི་མཆོད་པར་བྱ། །རྡོ་རྗེ་ངོ་བོ་ཀུན་འབྱུང་དང་། །གདུག་པ་ཐམས་ཅད་སྲེག་ཕྱིར་གང་། །དངོས་པོ་ལ་འཇུག་གོང་མའི་སྒྲ། །གོང་མའི་ཚིག་ཏུ་བརྗོད་པ་ཡིན། །ལག་ན་རྡོ་རྗེ་གོས་སྔོན་པོ་ཅན། །རྡོ་རྗེ་མེ་

90-1-4a

ལྕེའི་རྒྱུད་ལས། ངེས་ཚིག་གི་ལེའུ་སྟེ་གཉིས་པའོ།། །།   གོས་སྔོན་ལག་ན་རྡོ་རྗེ་ཡིས། །སངས་རྒྱས་མགོན་ལ་འདི་སྐད་གསོལ། །གང་ཞིག་བསྒྲུབ་པར་བྱ་བ་ཡི། །ཐབས་ཀྱི་དཀྱིལ་འཁོར་གསུང་དུ་གསོལ། །
རིག་པའི་རྒྱལ་པོས་བཀའ་སྩལ་པ། །ཡང་དག་དོན་དམ་དངོས་གྱུར་ན། །དཀྱིལ་འཁོར་ལྷ་གཟུགས་མེད་པ་སྟེ། །འགྲོ་བ་རྟོག་པ་ལ་གནས་པས། །དེ་ཡི་ཀུན་རྟོག་བསལ་བའི་ཕྱིར། །ལྷ་ཡི་སྦྱོར་བ་བཤད་པར་བྱ། །གང་ཞིག་མོས་
པས་བྱེད་པ་ཡིས། །ཁྲུ་གསུམ་དཀྱིལ་འཁོར་ཕྱོགས་བཞི་པ། །ནགས་སམ་དུར་ཁྲོད་ཁང་སྟོང་ངམ། །གཙུག་ལག་ཁང་ངམ་མཆོད་རྟེན་ནམ། །དེ་དག་གནས་སུ་ངེས་པར་བརྩམ། །དང་པོར་བསྙེན་པ་རབ་གནས་པས། །བུ་མོ་བཅུ་
དྲུག་སྟོན་མོ་བྱས། །བདག་གིས་ཞག་གསུམ་ཁྲུས་བྱ་ཞིང་། །སྤྱི་བོ་ལྐོག་མ་སྙིང་ག་རུ། །གསང་བ་གསུམ་གྱི་ཡི་གེ་བརྟག །རམས་སུ་བཙོས་པའི་གོས་ཉིད་ལ། །གུར་གུམ་ཐིག་ལེ་ངེས་བཏབ་སྟེ། །དེ་ཉིད་ལ་ནི་བསྐོན་པར་བྱ། །
ཟས་སུ་དཀར་གསུམ་སྦྱིན་བྱས་ཤིང་། །སྐྱེས་པ་དང་ནི་སྤྲད་མི་བྱ། །སྙིང་པོ་འདི་ཉིད་འབུམ་ཚད་དུ། །རང་གིས་བཟླས་པས་རིག་པ་འབྱིན། །དེ་ནས་བསྙེན་པ་རྫོགས་པ་ལས། །བུ་མོ་ཉིད་ལ་ཚིག་བརྗོད་དེ། །ཡི་གེ་རྣམ་ལྔ་ཉིད་དང་ཡང་། །རམས་དང་
མཐིང་ཤུན་ཀུན་འདུས་སུ། །རིན་ཐང་མི་བརྩི་ཉོར་བཅུག་སྟེ། །དེ་ཉིད་རིགས་མཐུན་ནང་བཏུམས་ལ། །གནས་གང་ཡིན་པར་བདག་ལ་གཏད། །དེ་ཡིས་ཞག་གསུམ་སྦྱོར་བ་ཡིས། །ཕྱག་རྒྱ་ངེས་པ་ཉིད་དང་ཡང་། །སྙིང་པོ་གོང་གི་སྦྱོར་བ་ཡིས། །
དྲི་ཆུ་བཏབ་ལ་གྲངས་ཚད་དུ། །ཕྱིན་པར་ཡང་དག་བཟླས་པར་བྱ། །དེ་ནས་སྐུད་པ་སྔོན་པོ་ནི། །བུ་མོས་ལེགས་པར་བཀལ་བ་ལ། །སྔགས་ཀྱིས་དག་བྱས་རབ་མཛེས་པས། །སྲད་བུ་དགུ་རུ་ངེས་པར་སྒྲིལ། །མེ་ཏོག་སྔོན་པོའི་
ནང་བཏུམས་ལ། །སེང་ལྡེང་ཕུར་པ་ལྔ་རྣམས་ཀྱིས། །སྲད་བུ་ཡོངས་སུ་བྲི་བར་བྱ། །རབ་ཏུ་ཚད་དུ་ངེས་པ་ཡིས། །ཕྱག་རྒྱ་མ་ལ་དག་བརྗོད་པས། །དེ་ཉིད་མཉམ་པར་གཞག་པ་ཡི། །དཀྱིལ་འཁོར་ལེགས་པར་བྱས་པ་ཡིན། །

90-1-4b

འཕང་དུ་ཁྲུ་གང་ཚད་བྱས་ཏེ། །དང་པོ་བྱང་ཤར་མཚམས་ཉིད་ནས། །ཀུན་རྟེན་ཁ་དོག་རིགས་མཐུན་བླང་། །ཡོངས་སུ་བསྡུས་བྱས་ངེས་པར་བྱ། །གཉིས་པ་གཉིས་པ་ཉིད་དུ་ངེས། །གསུམ་པ་གཅིག་གི་ཚད་དང་ལྡན། །དེ་ལྟར་
ཚད་དུ་ལྡན་པ་ལས། །ཤིན་ཏུ་མཉམ་པར་འཐས་པར་བྱ། །དེ་ཉིད་རྗེས་སུ་འཇུག་པ་ཡིས། །དང་པོའི་སྲད་བུ་གང་ཡིན་པས། །ཁ་དོག་སེར་པོའི་ཐིག་གདབ་བྱ། །དཀྱིལ་འཁོར་དགུ་རུ་ངེས་པ་ལས། །འབྲུ་དང་ས་དང་རིན་ཆེན་དང་། །ཕྱེ་མ་
ཉིད་དུ་བཏགས་པ་ཡིས། །དཀྱིལ་དུ་པད་མ་བཅུ་དྲུག་པ། །འདབ་མར་ལྡན་པར་བྲི་བར་བྱ། །ཤར་དང་ལྷོ་དང་ནུབ་བྱང་དང་། །མཚམས་རྣམས་སུ་ཡང་དེ་བཞིན་བྲི། །ལེ་ཚེའི་པད་མ་གང་ཡིན་པ། །སྣ་ཚོགས་པར་ནི་ཡང་དག་བཤད། །
མཚམས་རྣམས་སུ་ནི་མཆོད་པ་ཡི། །ལྷ་མོ་ཡོངས་སུ་དགོད་པར་བྱ། །སྒོ་བཞི་དག་ཏུ་ཁྲོ་མོ་བཞི། །སྦྱོར་བས་ཡང་དག་དགོད་པར་བྱ། །རིན་ཆེན་ཕ་གུ་འདོད་ཡོན་དང་། །དྲ་བ་དྲ་ཕྱེད་ཡང་དག་ལྡན། །ཏྭ་ར་ཎ་ནི་བཞིས་བརྒྱན་ཅིང་། །
སྣ་ཚོགས་རྡོ་རྗེ་གཞིར་གནས་ཡིན། །གདུགས་དང་རི་དགས་གང་ཡིན་པ། །རྒྱན་རྣམས་ཀུན་གྱིས་རྣམ་པར་སྒེག །སྔགས་པ་བྱང་ཆུབ་བློ་ལྡན་པས། །ཀེང་རུས་ཕྲེང་བ་ཉིད་དང་ཡང་། །སྦྲུལ་མགོའི་ཕྲེང་བས་རྣམ་པར་རྒྱན། །རྡོ་རྗེ་
སྣ་ཚོགས་རབ་འབར་བའི། །ཕྲེང་བའི་ཕྱི་རོལ་ལེགས་པར་བསྐོར། །ཟུར་བཞི་དག་ཏུ་བུམ་པ་བཞི། །རྒྱན་གྱིས་རྫོགས་པར་ཡང་དག་བྲི། །དེ་དཀྱིལ་ཕྱག་ན་རྡོ་རྗེ་ཉིད། །སྔ་མའི་ཚུལ་གྱིས་ཡོངས་སུ་གནས། །ཤར་དུ་
ཁམས་གསུམ་རྣམ་རྒྱལ་ཉིད། །ཡང་དག་པར་ནི་བྲི་བྱ་སྟེ། །ཁ་དོག་དམར་པོ་ཉིད་ལ་ཡང་། །དབུ་གསུམ་ཕྱག་ནི་དྲུག་པའི་དབྱིབས། །ཞབས་བཞི་བརྐྱང་བསྐུམ་ཚུལ་དུ་བཞུགས། །ཕོ་ནི་རྡོ་རྗེ་ངེས་པ་ལས། །མོ་ནི་དགྲ་སྟ་ཡང་དག་
ལྡན། །བར་མ་གཉིས་ཀྱིས་འཆིང་བྱེད་པ། །གོང་མོ་མཐེ་བོ་ངེས་མདུད་ནས། །གཞན་རྣམས་ཡོངས་སུ་བརྐྱང་པ་ཡིན། །དེ་ཉིད་སྙིང་པོ་གང་ཡིན་པ། །སྙིང་གར་ཡང་དག་བཟུང་བྱས་ནས། །དེ་འོག་ཕོ་ཡིས་ཞགས་པ་འཛིན། །མོ་ཡིས་རལ་གྲི་བཟུང་བྱས་པ། །

90-1-5a

དང་པོ་ཉིད་ལ་དགོད་པར་བྱ། །ལྷོ་རུ་ནག་པོ་ཆེན་པོ་ཉིད། །ཁ་དོག་དུད་སྤྲིན་ལྟ་བུ་ལ། །ཞལ་གཅིག་ཕྱག་ནི་གཉིས་པའི་དབྱིབས། །ཕོ་ཉིད་ཙན་དན་བེང་ཆེན་བསྣམས། །མོ་ནི་ཞགས་པ་ཡོངས་སུ་འཛིན། །ཁྲོ་ཞལ་གཟིགས་པ་མི་བཟད་པས། །
ཕྱོགས་བཅུ་རྣམས་སུ་རབ་ཏུ་གཟིགས། །དེ་ཉིད་མགོན་པོ་གང་ཡིན་པ། །ཕྱོགས་གཉིས་པར་ནི་རབ་ཏུ་དགོད། །ནུབ་ཕྱོགས་གསུམ་པར་དགོད་བྱ་བ། །ལུས་ངན་སྲས་པོ་སྟོབས་པོ་ཆེ། །ཁ་དོག་ལྗང་གུ་ཉིད་ལ་ཡང་། །ཆུང་ཟད་སྤྱན་ནི་རྒྱས་པ་ཉིད། །
ཞལ་གཅིག་ཕྱག་ནི་གཉིས་པ་ལ། །སྤྱི་བོར་རྡོ་རྗེ་རྨོག་གིས་བརྒྱན། །གཡས་པ་ཉིད་ལ་རྡོ་རྗེ་ཅན། །གཡོན་པ་ནེའུ་ལེའི་རྐྱལ་པ་འཛིན། །ཞབས་གཉིས་དྲང་པོར་རབ་གནས་ཏེ། །ཤར་ཕྱོགས་བལྟས་པས་ཡོངས་སུ་གནས། །བྱང་ཕྱོགས་བཞི་པར་
དགོད་བྱ་བ། །བདུད་རྩི་འཁྱིལ་བ་ཡོངས་སུ་གནས། །ཁ་དོག་སྔོན་པོ་དེ་ཉིད་ལ། །ཚམ་རྔམ་ཁྲོ་གཉེར་བརྗིད་པའི་ཞལ། །གཡས་བསྐུམ་གཡོན་བརྐྱང་སྟངས་སྟབས་ཚུལ། །ཕྱག་གཉིས་བྲང་དུ་རབ་བསྣོལ་ཏེ། །གཡོན་དུ་ངེས་པར་ཅུང་ཟད་
གཟིགས། །ལྷོར་བལྟས་ཡང་དག་དགོད་པར་བྱ། །བྱང་ཤར་རྡོ་རྗེ་གནོད་སྦྱིན་ཏེ། །ཁ་དོག་དམར་ནག་འཇིགས་པ་ལ། །གཡས་བརྐྱང་གཡོན་བསྐུམ་རབ་བཞུགས་ནས། །ཕྱག་གཡས་གྲི་གུག་རྣོན་པོ་འཕྱར། །གཡོན་པ་ཅང་ཏེའུ་དྲག་
པོ་རྡུང་། །གཙོ་བོ་ལ་བལྟས་དགོད་པར་བྱ། །ཤར་ལྷོ་རྡོ་རྗེ་རོ་ལངས་ཉིད། །ཁ་དོག་སྔོ་སྐྱ་རབ་འབར་ལ། །མི་བཟད་འབར་བ་འཇིགས་པའི་གཟུགས། །ཅུང་ཟད་གཡས་སུ་ངེས་པར་གཟིགས། །གཡས་བརྐྱང་གཡོན་བསྐུམ་
ཚུལ་གནས་ཏེ། །རྡོ་རྗེ་ལྕགས་སྒྲོག་རབ་བཟུང་ནས། །གུང་སྲིན་ལ་སོགས་གསུམ་པོ་རྣམས། །དམ་པོར་བཀུག་པས་ཡོངས་སུ་བསྡམས། །མཐེབ་འཛུབ་བཞི་རྣམས་རབ་བརྐྱང་སྟེ། །སྤྱི་བོར་ངེས་པར་བསྣོལ་བར་
བསྣམས། །ལྷོ་ནུབ་རྡོ་རྗེ་མཁའ་འགྲོ་སྟེ། །ཁ་དོག་དམར་སྐྱ་ཉིད་ལ་ཡང་། །ཤིན་ཏུ་མི་བཟད་འཇིགས་པའི་གཟུགས། །ཞབས་གཉིས་མཐིལ་སྦྱར་བཙུགས་པ་ལ། །ནམ་མཁའ་གྲུ་བཞི་པ་རུ་འདོད། །

90-1-5b

ལག་གཉིས་སྤྱི་བོ་ཐལ་སྦྱར་ནས། །མེ་ལྕེ་འབར་བ་ཡོངས་སུ་འཛིན། །ཐོད་པ་ལྔ་ཡིས་མགོ་བརྒྱན་པ། །གཙོ་བོ་ལ་བལྟས་དགོད་པར་བྱ། །ནུབ་བྱང་བཞི་པའི་མཚམས་སུ་ཡང་། །རྡོ་རྗེ་འཇིགས་བྱེད་ཞེས་བྱ་བ། །ཁ་དོག་
སྔོ་ནག་འཇིགས་པའི་གཟུགས། །ཞལ་གསུམ་ཕྱག་ནི་དྲུག་པ་ལ། །ཞབས་གཉིས་དག་དུ་རྣམ་པར་བཤད། །གཡས་གཡོན་དང་པོ་གླང་ཆེན་གྱི། །པགས་པ་ཡོངས་སུ་བརྐྱང་བ་འཛིན། །དེ་འོག་གཡས་པ་དགྲ་སྟ་ལ། །
གཡོན་པ་རྡོ་རྗེ་ཡང་དག་འཛིན། །གསུམ་པའི་གཡས་ན་ལྕགས་ཀྱུ་སྟེ། །གཡོན་ན་མི་མགོ་རློན་པ་བསྣམས། །བརྐྱང་བསྐུམ་ཚུལ་དུ་གནས་ནས་ཀྱང་། །གཙོ་བོ་ཉིད་ལ་ཁ་བལྟས་བཞུགས། །མཚམས་ཀྱི་གྲུ་ཚད་གང་ཡིན་
པར། །འོད་སྐྱེད་མ་དང་ཡིད་འཕྲོག་མ། །ཀུན་བཟང་མ་དང་གླུ་སྒྲ་ཅན། །རང་གི་ཕྱོགས་ཀྱི་ཁ་དོག་ལ། །ཤིན་ཏུ་ཞི་བས་ལྡེམ་བག་ཅན། །ཕྱག་གཡས་སུ་ནི་མེ་ཏོག་དང་། །དྲི་དང་ཞལ་ཟས་སྒྲ་བརྙན་རྣམས། །གར་གྱིས་
རོལ་པར་ཡང་དག་ལྡན། །ནུ་མ་ཅུང་ཟད་འབུར་བ་ལ། །དར་དག་དཀར་པོས་སྨད་གཡོགས་པས། །གཙོ་བོ་ལ་བལྟས་མཛེས་པའི་གཟུགས། །ཕྱི་ཡི་གྲྭ་རུ་དགོད་པར་བྱ། །སྒོ་རྣམས་སུ་ནི་སྒོ་སྐྱོང་ནི། །སྲོག་གཅོད་མ་དང་
དབུགས་རྔུབ་མ། །ཁྲག་མཐུང་མ་དང་ཤ་ཟ་མ། །ཞལ་གཅིག་ཕྱག་ནི་གཉིས་པ་ལ། །སྟག་དང་སེང་གེ་སྦྲུལ་དང་ཡང་། །དོམ་དུ་ཡང་དག་གནས་པ་སྟེ། །ཕྱག་གཡས་ཐོ་བ་རྐྱལ་པ་དང་། །ཧོམ་གཟར་གྲི་གུག་རྣོན་པོ་
བསྣམས། །གཡོན་པ་རྣམས་ནི་ཞགས་པ་ཉིད། །ཀུན་ཀྱང་འཇིགས་པར་ཡོངས་སུ་འཛིན། །རང་གི་ཕྱོགས་ཀྱི་ཁ་དོག་སྟེ། །ཀུན་ཀྱང་ནག་པོ་ཤིན་ཏུ་བསྲེག །གཡོན་བརྐྱང་གཡས་ནས་བསྐུམས་པ་ཉིད། །མཆེ་བ་
གཙིགས་ཤིང་རྔམ་པའི་སྐུ། །ཤིན་ཏུ་ཁྲོ་གཉེར་བརྗིད་པའི་ཞལ། །གར་སྟབས་ཀྱིས་རོལ་བདེ་ཆེན་གནས། །ཅུང་ཟད་གཡོན་དུ་གཟིགས་པ་ཡིས། །ཧ་ལ་ཧ་ལའི་སྒྲ་ཡང་སྒྲོགས། །གཞན་ཡང་ལྷ་རྣམས་དེ་དག་ཀུན། །ཐོད་པ་ལྔ་ཡིས་

90-1-6a

བརྒྱན་བྱས་ནས། །རྒྱན་ཆ་ལྔ་དང་ཡང་དག་ལྡན། །ཀུན་ཀྱང་སྟག་གི་པགས་པ་ཡིས། །སྨད་ནི་ཡོངས་སུ་དཀྲིས་པ་ཡིན། །དེ་སྟེངས་གདན་ནི་རབ་གནས་པ། །གཙོ་བོ་ཉིད་ལ་ཉི་ཟླ་ཡིས། །ཕྲག་པ་
ཉིད་ལ་འཁོར་བར་རྒྱུ། །ཚངས་པ་དབང་པོ་ལྷ་ཆེན་གཉིས། །ཞབས་ཀྱིས་ཡོངས་སུ་མནན་པ་ཡིན། །ཤར་གྱི་ལྷ་ཆེན་རྣམ་རྒྱལ་ཉིད། །ཀེང་རུས་སྟེང་ན་བཞུགས་པ་བཞིན། །གཞན་ཡང་དེ་ལྟར་གནས་པ་ཡིན། །ས་བོན་
ཡིན། །བོན་གནས་པ་གང་ཡིན་པ། །སྒྲ་དང་བཅས་པ་ཤེས་པར་བྱ། །དང་པོ་གཙོ་བོ་སྐྱེད་བྱེད་གང་། །ཧཱུྃ་ལས་ངེས་པར་རྫོགས་བྱ་ཞིང་། །གཞན་རྣམས་འདི་ལས་འབྱུང་བར་བསམ། །ཧཱུཾ་མྃ་བྃ་ཨྃ། ཡྃ་བྃ་ཌྃ་བྷྃ། པྲྂ་མྂ་སྃ་ཤྃ། པྲྃ་ཤྂ་རྃ་མྃ། དེ་དག་ལས་
བྱུང་སྔགས་པ་ཡིས། །འོད་དང་བཅས་པར་བདེ་གཤེགས་ཀྱི། །ཞལ་ནས་འབྱུང་བར་ཡང་དག་ལྡན། །དེ་ལས་རིགས་པ་གང་ཞིག་གི། །འབར་འཕྲོ་ངེས་པར་བསྐྱེད་པར་བྱ། །དང་པོ་ཀུན་ཀྱང་གཅིག་པ་ཡིས། །བྂ་ལས་གྱུར་པ་སྣ་ཚོགས་པ། །ཡང་དག་
པར་ནི་སྐྱེད་པར་བྱེད། །དེ་འོག་ཀྃ་ལས་རབ་བསྐྱེད་པས། །སྐམ་པོར་ཡོངས་སུ་བརྟག་པ་ཡིན། །དེ་དག་རབ་རྫོགས་སྔགས་པ་ཡིས། །སྐུ་རུ་ཡོངས་སུ་རྫོགས་བྱས་ལ། །བདག་གིས་རྣལ་འབྱོར་ཡང་དག་འགྲུབ། །དེ་ནས་སྔགས་པ་བློ་ལྡན་པས། །རིགས་སུ་
ངེས་པ་གང་ཡིན་པ། །ཐབས་འདི་ལ་ནི་འཇུག་པར་བྱ། །ཀུན་ལ་འཇུག་པར་གྱུར་པ་ཡི། །ཁྱབ་པའི་བདག་པོ་ཆེན་པོ་ནི། །རིགས་ཀྱི་གཙོ་བོས་སྤྱི་ལ་ཁྱབ། །མདུན་ནི་རྡོ་རྗེའི་རིགས་ཡིན་ཏེ། །ལྷ་མིན་ལ་སོགས་ངེས་པར་འཇིག །གཡས་པ་ཉིད་ན་གང་
གནས་པ། །རིན་ཆེན་རིགས་སུ་ངེས་པ་སྟེ། །ཤ་ཟ་ལ་སོགས་ངེས་པར་འཇིག །རྒྱབ་ན་གནས་པ་གང་ཡིན་པ། །པད་མའི་རིགས་སུ་ཡང་དག་ལྡན། །ནོར་ལ་སོགས་པ་གང་དགོད་པ། །རེ་བ་བཞིན་དུ་སྐོང་བར་བྱེད། །གཡོན་ན་ངེས་
པར་གནས་པ་གང་། །ལས་ཀྱི་རིགས་སུ་ངེས་པ་ལས། །ཀླུ་དང་གནོད་སྦྱིན་ལ་སོགས་པ། །མ་རུངས་པ་རྣམས་ཡོངས་སུ་འཇིག །གཞན་ཡང་ལྷག་མ་ཐམས་ཅད་ཀུན། །ཕོ་ཉའི་ཚུལ་དུ་ངེས་པར་གནས། །དང་པོ་ཉི་མ་ཤར་བ་ན། །

90-1-6b

ལས་ཀྱི་སྦྱོར་བ་སྣ་ཚོགས་པ། །སོ་སོ་དག་ལ་སྙིང་པོ་ཉིད། །གོང་དུ་བུྃ་ལས་རབ་རྫོགས་པའི། །བརྒྱ་རྩ་བརྒྱད་དག་ངེས་པར་བཟླས། །ཧཱུྃ་གི་སྒྲ་དང་རབ་ལྡན་པས། །བདག་ཉིད་ཁ་ནི་མེ་འབར་གསལ། །ཕྱག་རྒྱ་སྣང་བར་བཅས་བྱས་ཏེ། །
དེ་ཉིད་སྟངས་སྟབས་བསྐྱོད་པ་ཡིས། །གདུག་པ་ཐམས་ཅད་སྲེག་བྱེད་དང་། །བདེ་གཤེགས་མངོན་པར་དགྱེས་པར་བྱ། །རྡོ་རྗེ་དྲིལ་བུ་གཟུང་བྱས་ནས། །ཁྲོ་བོའི་ཆ་ལུགས་གང་ཡིན་པས། །ཕྱོགས་རྣམས་རྨོངས་པར་བྱེད་པ་ཡིན། །
ལྷ་མོའི་གཟུགས་འཆང་གང་ཡིན་པས། །གཞན་གྱི་སེམས་ཀྱང་འཕྲོག་པར་བྱེད། །རེ་མིག་རྣམས་ཀྱི་བར་གང་ཡིན། །མེ་ལྕེ་འབར་བ་ཡོངས་སུ་བྲི། །འཁོར་ལོའི་འོག་ཏུ་གནས་བྱ་བ། །ཆོས་འབྱུང་ཕྱག་རྒྱ་ངེས་པར་བྲི། །ཐབས་དང་
ཤེས་རབ་ལྡན་པ་ལ། །ཀུན་འབྱུང་ཡུམ་དུ་ངེས་པར་གསལ། །རྟེན་འབྲེལ་ཡང་དག་འབྱུང་བ་ཡིས། །ཀུན་རྫོབ་ལ་ནི་དོན་དམ་བརྟེན། །དོན་དམ་ཉིད་ལ་ཀུན་རྫོབ་ཀྱང་། །བརྟེན་པ་ཉིད་དུ་ཡང་དག་གནས། །དེ་བས་སྣང་བ་མི་
གསལ་བར། །ཆོས་འབྱུང་ཕྱག་རྒྱ་ངེས་པར་ཡང་། །རྒྱས་པ་ལ་སོགས་མ་ཡིན་གྱི། །དྲག་པོའི་དཀྱིལ་འཁོར་ཡིན་པ་དང་། །དེ་བཞིན་དབྱིབས་སུ་རང་གསལ་བ། །དྲན་དང་བཅས་པས་བྲི་བར་བྱ། །མཐུ་དང་ལྡན་པའི་
གང་ཟག་ལ། །སྟོབས་ནི་ཤིན་ཏུ་ངེས་པར་སྐྱེ། །དཀྱིལ་འཁོར་ལྷ་གཉིས་མངོན་བསྒྲུབས་པས། །ལུས་ལ་གཟི་བརྗིད་འཇུག་པའོ། །རྡོ་རྗེ་མེ་ལྕེའི་རྒྱུད་ལས་དཀྱིལ་འཁོར་དང་ལྷའི་ལེའུ་སྟེ་གསུམ་པའོ།། །། 
ལག་ན་རྡོ་རྗེ་གོས་སྔོན་གྱིས། །འཇིག་རྟེན་མགོན་ལ་འདི་སྐད་གསོལ། །དཀྱིལ་འཁོར་ལྷ་རྣམས་དགྱེས་བྱ་བ། །ཐབས་དེ་གང་ལགས་གསུང་དུ་གསོལ། །ནང་གི་བདག་ཉིད་ཅན་དང་ཡང་། །ཕྱི་ཡི་ཁྲུས་སོགས་
རབ་བྱས་ལ། །རབ་གསལ་ལ་སོགས་རྒྱུན་བཅད་ནས། །གང་ཡང་རུང་བའི་ལོ་ཉིད་ལ། །སྟོན་ཟླ་ར་བ་ནས་བརྩམས་ནས། །ལྷ་མིན་བླ་དང་མེ་ཏོག་གི། །དྲག་པོ་དང་པོ་དེ་ཉིད་ལ། །བདག་གིས་སྦྱོར་བ་ངེས་པར་

90-1-7a

བརྩམ། །དེ་ནས་དང་པོ་བདག་ལུས་ལ། །རྒྱན་ཆ་ལྔའི་རབ་བརྒྱན་ཏེ། །ལུས་ལ་གོས་དག་སྔོན་པོ་ཉིད། །བླ་གོས་སྨད་གཡོགས་ཡང་དག་བཅིངས། །སྤྱི་བོ་ལ་སོགས་གནས་ལྔ་རུ། །སྦྲུལ་གྱིས་
ཡོངས་སུ་བཅིངས་བར་བྱ། །རང་ཉིད་དཀྱིལ་འཁོར་ཤར་སྒོ་རུ། །འདུག་པས་སྦྱོར་བ་བརྩམ་པར་བྱ། །དེ་ནས་དང་པོ་བླ་རེ་གང་། །སྟེང་དུ་ངེས་པར་ཕུབ་བྱས་ལ། །ཟུར་བཞི་དག་ཏུ་བ་དན་བཞི། །སྔོན་པོས་ཡོངས་སུ་
སྤྱང་བར་བྱ། །བླ་རེ་དག་གི་དཀྱིལ་དག་ནས། །སྐུད་པ་ལ་རྒྱུས་མེ་ཏོག་གི། །ཕྲེང་བ་ཡོངས་སུ་སྤྱང་བར་བྱ། །དེ་ནས་སྔ་མའི་ཚུལ་གནས་ལ། །གོང་དུ་བསྟེན་པའི་གནས་རྣམས་སུ། །བདག་གི་ལས་འདི་ངེས་པར་བརྩམ། །
གཏོར་མའི་ལས་རྣམས་ཀུན་རྫོགས་དང་། །མཆོད་པ་རྣམ་པ་ལྔ་རྣམས་དང་། །སེང་ལྡེང་ཕུར་པ་སོར་བརྒྱད་ལ། །སྔགས་འདི་ཡིས་ནི་ཡང་དག་བསྔགས། །ཨོཾ་བཛྲ་ཀཱི་ལ་ཡ་སརྦ་བིགྷྣན་ཧ་ན་ཧ་ན་ཧཱུྃ་ཕཊ། ཨོཾ་བཛྲ་པཉྩ་ཛྙཱན་
ཤོ་དྷ་ཡ་སརྦ་ཙཀྵུ་ཀཱ་ར་ཡ་ཧཱུྃ། སྔགས་དེ་དག་གིས་ཕུར་བུ་དང་། །སྐུད་པ་ལྔ་ལ་ལན་གྲངས་ནི། །ཉི་ཤུ་རྩ་གཅིག་བཟླས་བྱས་ལ། །ཙན་དན་ལ་སོགས་དྲི་ལྔ་ཡིས། །གོས་པར་ཡང་དག་བཅང་བར་བྱ། །དེ་ནས་སྔགས་
པ་བློ་ལྡན་པས། །བདག་ཉིད་བསྲུང་བའི་འཁོར་ལོ་བརྩམ། །རང་གི་ཕྱི་རོལ་མཚམས་སུ་ནི། །མི་འགྱུར་ལས་ནི་བསིལ་ལྡན་བསྒོམ། །དེ་སྟེང་སྡུད་པའི་དངོས་པོ་གང་། །ཁ་དོག་ནག་པོ་ཡང་དག་བསམ། །དེ་ལས་
ཁྱབ་བྱེད་རིགས་ལྔ་པ། །ཡང་དག་པར་ནི་བསམ་པར་བྱ། །དེ་ནས་ཡོངས་སུ་རྫོགས་པ་ལས། །བདུད་རྩི་འཁྱིལ་པར་བདག་བསམ་སྟེ། །རྡོ་རྗེ་སྡིག་མཛུབ་ཕྱག་རྒྱ་ཡིས། །སྔགས་བཟླས་པས་ནི་བགེགས་བསྐྲད་ལ། །
རིགས་གཙོའི་རྩེ་མོ་དེ་ཉིད་ལ། །ཀྃ་ལས་ལུས་སྐྱོབ་བསམ་བྱ་སྟེ། །སྤྱི་བོར་གནས་པས་ཁྱབ་པར་བསམ། །དེ་ནས་གཏོར་མ་དེ་ཉིད་ལ། །བདུག་པ་ལ་སོགས་གང་ཡིན་དང་། །སྐྱེ་བ་བཞིས་བསྡུས་སེམས་ཅན་ལ། །

90-1-7b

ལས་ཀྱི་བར་ཆད་མི་འགྱུར་ཕྱིར། །བསམ་པར་རྫོགས་པར་རིང་ཐང་བྱ། །དེ་ནས་བདག་ཉིད་དད་པ་ཡིས། །མཆོད་པ་རྣམ་པ་ལྔ་རྣམས་ནི། །བསམ་པ་སྔགས་ཀྱིས་དབུལ་བར་བྱ། །གོང་མའི་སྟང་སྟབས་ལས་བྱ་བ། །
གཡས་པ་ངེས་པར་བསྐུམས་པ་ལས། །གཡོན་པ་ལེགས་པར་བརྐྱང་བྱས་ཏེ། །གཡས་པའི་ལག་པས་རྡོ་རྗེ་ཉིད། །ཕྱར་ནས་གཡོན་གྱི་བེ་ཅོན་དང་། །རྩེ་སྤྲད་སྤྱི་བོར་གནས་བྱས་ལ། །གཡོན་པའི་བེ་ཅོན་གཡས་
སྤོས་ལ། །གཡས་པ་རྡོ་རྗེ་གཡོན་པ་ཡི། །ལག་པས་བཟུང་ནས་སྙིང་གར་མནན། །བེ་ཅོན་ངེས་པར་བསྐོར་བ་ཡིས། །ཕྱོགས་བཞི་མཚམས་སུ་ངེས་པར་གདབ། །ཁ་ནས་ཧཱུྃ་གི་སྒྲ་འབར་ཞིང་། །སྣ་ཚོགས་རྡོ་རྗེ་
གར་ཐབས་ཀྱིས། །ལན་གསུམ་རབ་ཏུ་བསོར་བར་བྱ། །དེ་ནས་གདུག་པ་གང་ཡིན་པ། །ཕྱོགས་བཞི་དག་ཏུ་སོང་བ་ལས། །ས་ཕྱོགས་ངེས་པར་གཙང་བར་འགྱུར། །དེ་ནས་ཐིག་སོགས་གདབ་པ་ཡིས། །སྟ་གོན་ལེགས་
པར་གནས་པ་དང་། །རིམ་པ་བཞིན་དུ་དབང་བསྐུར་ལ། །རྨི་ལྟས་ངེས་པར་གདབ་པར་བྱ། །བཟང་ངན་ལྟས་དག་དབབ་པ་དང་། །བཟློག་དང་མི་བཟློག་བྱ་བ་གང་། །ཤེས་རབ་ཅན་གྱིས་གསལ་བར་བརྟག །སངས་རྒྱས་
དཀྱིལ་འཁོར་བཞེངས་བྱའི་ཕྱིར། །བདག་གིས་དྲག་པོ་དང་པོ་ལ། །ཕྱེ་མ་ལྔ་ལ་སྔགས་དག་དང་། །ཕྱག་རྒྱ་བཅས་པས་བྱིན་གྱིས་བརླབ། །དེ་ནས་སྣོད་དག་ཐོད་པ་ལ། །བྱས་པའི་རྡོ་རྗེ་ཕྱག་རྒྱས་གདབ། །ངེས་པར་
ལས་ཀྱི་སྦྱོར་བ་བཙམ། ཕྱོགས་སུ་ངེས་པར་བསྐོར་བ་ཡིན། །དབུགས་རྒྱུ་བ་ཡི་དངོས་པོ་གང་། །ཡི་གེ་མངོན་པར་གསལ་བ་ཡིས། །རྒྱུན་མི་འཆད་པར་བྲི་བར་བྱ། །སྐབས་ཀྱི་སྐད་ཅིག་ཤེས་པ་ཡིས། །རབ་ཏུ་ཁྲོ་
གཉེར་བསྟན་པར་བྱ། །དང་པོ་ནག་པོ་བྲི་བྱ་ཞིང་། །གཉིས་པ་དཀར་པོར་ངེས་པར་དགྱེ། །གསུམ་པ་ཉིད་ནི་སེར་པོ་སྟེ། །བཞི་པ་དམར་པོ་ཡང་དག་ལྡན། །ལྔ་པ་ལྗང་གུ་བྲི་བྱ་ཞིང་། །དྲུག་པ་ཁ་དོག་སྣ་ཚོགས་

90-1-8a

རྒྱས། །དཀྱིལ་འཁོར་ལས་རྣམས་རྫོགས་པ་དང་། །རྫས་སུ་ཡོངས་སུ་ལྡན་བྱས་ཏེ། །གྲུ་བཞི་དག་ཏུ་བྱང་ཤར་གྱི། །མཚམས་ནས་ས་གང་བུ་མོ་ཡིས། །བླངས་པ་ལས་བྱས་མཆོད་རྟེན་ནི། །སྔོན་པོ་བཞི་
དག་གཞག་པར་བྱ། །དེ་ཡི་བསྐོར་བའི་རྩེ་མོ་ལ། །གྲོང་གི་སྲད་བུ་བཏགས་བྱས་ཏེ། །མེ་ཏོག་སྔོན་པོའི་ཕྲེང་བ་ཡིས། །འཁོར་བར་ཡོངས་སུ་བརྒྱན་པར་བྱ། །བུམ་པ་སྔོན་པོ་བཅུ་བདུན་ཉིད། །མཐའ་མའི་
ཕྱོགས་སུ་ངེས་པར་གཞག །སྨན་དང་སྤོས་དང་སྙིང་པོ་དང་། །ལན་ཚྭ་རྩི་ཐོག་ལ་སོགས་པའི། །ལེགས་པར་བཀང་བས་གནས་པ་ཡིན། །རྒྱན་རྣམས་ཀུན་གྱིས་རབ་བརྒྱན་ནས། །ལུས་ལ་
མངོན་པར་ཕྱོགས་པར་བཞག །དེ་ནས་སྔགས་པ་བློ་ལྡན་པ། །གྲངས་དང་ངེས་པར་རབ་སྦྱར་ལ། །ཞལ་ཟས་ཟུར་མེད་ལེགས་པ་དང་། །དྲི་དང་སྣང་བ་གང་ཡིན་དང་། །བྱུག་པའི་དྲི་དང་ཚངས་སྐུད་དང་། །ཕྲེང་
བ་རལ་གྲི་བེ་ཅོན་རྣམས། །ཡང་དག་པ་རུ་དགོད་པར་བྱ། །གདུགས་དང་རྒྱལ་མཚན་བ་དན་དང་། །ཕྱོགས་སུ་ངེས་པར་ཡང་དག་གནས། །དེ་ནས་བདག་པོ་གང་ཞིག་གིས། །ན་བཟའ་དར་ཡུག་སྔོན་པོ་ལ། །གུར་གུམ་
ཐིག་ལེས་ལེགས་བྲིས་ལ། །དེ་ཉིད་ལ་ནི་དབུལ་བར་བྱ། །ཡོལ་བ་སྔོན་པོས་ཕྱོགས་བསྐོར་ལ། །ཕྱི་མ་རྣམས་ཀྱིས་སྣང་མི་བྱ། །གལ་ཏེ་སྣང་བར་གྱུར་པ་ན། །རང་གི་ལུས་ལས་མ་གཏོགས་པའི། །གཞན་རྣམས་བརླག་པར་
འགྱུར་བ་ཡིན། །དེ་བས་ལེགས་པར་བསྒྲིམས་པ་ཡིས། །ཕྱི་རོལ་གཞན་ལ་བསྟན་མི་བྱ། །གང་ཟག་གཅིག་པུར་གནས་པ་ཡིས། །ལས་ཀྱི་སྦྱོར་བ་འདི་བརྩམ་བྱ། །ཕྱག་དག་སྔོན་དུ་སོང་བ་ཡིས། །མཆོད་པའི་ལས་ལ་མངོན་
པར་གཞག །བདག་ཉིད་ལས་ཀྱི་ཕྱག་རྒྱར་གནས། །བསམ་པ་མངོན་དུ་གྱུར་པ་ཡིས། །ཀུན་གྱི་འབྲས་བུ་གང་ཡིན་པ། །བདག་གིས་གསལ་བར་རབ་ཏུ་བརྟག །སྔགས་དང་ཕྱག་རྒྱ་རབ་ལྡན་པའི། །མཆོད་པ་འདི་དག་ངེས་པ་ལས། །བགེགས་བསལ་ཡེ་

90-1-8b

ཤེས་རབ་དབབ་པའི། །རྣལ་འབྱོར་རྫོགས་པར་ཡང་དག་གནས། །རང་རང་རིགས་ཀྱི་ཕྱག་རྒྱ་ཡིས། །སྔགས་བཟླས་པ་ཡིས་དབུལ་བར་བྱ། །ཨོཾ་ན་མོ་ནཱི་ལཱྃ་བར་དྷ་ར་བཛྲ་པཱ་ཎི་མཎ་ཌ་ལ་དེ་བ་ཏཱ་ནཱྃ། པུ་པཱུ་ཛ་མེ་གྷ་ས་མུ་དྲཱ་སྥ་ར་ཎ་ས་མ་ཡེ་ཧཱུྃ། ཨོཾ་ན་མོ་
ནཱི་ལཱྃ་བ་ར་དྷ་ར་བཛྲ་པཱ་ཎི་མཎ་ཌ་ལ་དེ་བ་ཏཱ་ནཱྃ། དྷཱུ་པ་ནི་ར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱྃ་བ་ར་དྷ་ར་བཛྲ་པཱ་ཎི་མཎ་ཌ་ལ་དེ་བ་ཏཱ་ནྃ། ཨཱོྂ་ལོ་ཀེ་ནིར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱྃ་བ་ར་དྷ་ར་བཛྲ་པཱ་ཎི་མཎ་ཌ་ལ་དེ་བ་ཏཱ་ནཱྃ། གན་དྷ་ནིར་ཡཱ་ཏ་ཡཱ་མི་ཧཱུྃ། ཨོཾ་ནོ་མ་ཊཱི་ལཱ་བ་ར་
དྷ་ར་བཛྲ་པཱ་ཎི་མཎ་ཌ་ལ་དེ་བ་ཏཱ་ནཱྃ། ནཻ་ཝི་དྱེ་ནིར་ཡཱ་ཏ་ཡཱ་མི་ཧཱུྃ། ཨོྂ་ན་མོ་ནཱི་ལཱྃ་བ་ར་དྷ་ར་བཛྲ་པཱ་ཎི་མཎ་ཌ་ལ་དེ་བ་ཏཱ་ནཱྃ། ཤབ་ད་ནིར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱཾ་བ་ར་དྷ་ར་བཛྲ་པཱ་ཎི་མཎ་ཌ་ལ་དེ་བ་ཏཱ་ནཱྃ། ཙ་ནི་ཡཱ་ནིར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱྃ་བ་ར་
དྷ་ར་བཛྲ་པཱ་ཎི་མཎ་ཌ་ལ་དེ་བ་ཏཱ་ནཱྃ། ཏ་རི་ནིར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱཾ་བ་ར་དྷ་ར་བཛྲ་པཱ་ཎི་མཎ་ཌ་ལ་དེ་བ་ཏཱ་ནཱྃ། བཱ་ས་ན་ནིར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱཾ་བ་ར་དྷ་ར་བཛྲ་པཱ་ཎི་མཎ་ཌ་ལ་དེ་བ་ཏཱ་ནཱྃ། གན་དྷ་རི་ནིར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱྃ་བ་ར་
དྷ་ར་བཛྲ་པཱ་ཎི་མཎ་ཌ་ལ་དེ་བ་ཏཱ་ནཱྃ། སྤར་ཤ་ནིར་ཡཱ་ཏ་ཡཱ་མི་ཧཱུྃ། ཨོཾ་ན་མོ་ནཱི་ལཱཾ་བ་ར་དྷ་ར་བཛྲ་པཱ་ཎི་མཎ་ཌ་ལ་དེ་བ་ཏཱ་ནཱྃ། རཏྣ་སརྦ་བསྟུ་ནིར་ཡཱ་ཏ་ཡཱ་མི་ཧཱུྃ། དེ་ཡིས་སྔགས་ཀྱི་མཆོད་པ་ལས། །སྡིག་པ་བཤགས་པའི་སྔགས་གྱིས་སུ། །ཕྱག་རྒྱ་
ངེས་པར་རབ་བཅས་པ། །སྡིག་པ་བཤགས་པའི་སྨྲེ་སྔགས་ཀྱིས། །ལུས་ངག་ཡིད་གསུམ་བཏུད་པ་ཡིས། །ཡང་དག་པར་ནི་བཤགས་པར་བྱ། །བསོད་ནམས་རྗེས་སུ་ཡི་རང་དང་། །ཡོངས་སུ་བསྔོ་དང་སྐྱབས་འགྲོ་དང་། །སེམས་བསྐྱེད་པ་དང་
གནས་བཞི་དང་། །གོང་ཏུ་བསྟན་པའི་ཕྱག་རྒྱ་ཉིད། །སྐབས་འདི་དག་ཏུ་ཤེས་པར་བྱ། །དང་པོ་རྒྱུ་ལས་སྐྱེས་པ་ལས། །ཕྱི་ནས་དངོས་པོར་མི་གནས་ཤིང་། །རང་བཞིན་འོད་ནི་གསལ་བར་སྒོམ། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་
རྒྱུད་ལས་མཆོད་པའི་ལེའུ་སྟེ་བཞི་པའོ།། །།  དེ་ནས་ལག་ན་རྡོ་རྗེ་ཡིས། །གསང་བའི་མགོན་ལ་འདི་སྐད་གསོལ། །བསམ་པ་རབ་ཏུ་རྫོགས་པ་ཡི། །ནང་གི་རྣལ་འབྱོར་གསུང་དུ་གསོལ། །བདེ་གཤེགས་གསང་བས་བཀའ་སྩལ་པ། །

90-1-9a

གང་ཞིག་བསྒྲུབ་པར་བྱ་བ་ལ། །ཐབས་ཀྱི་དངོས་གྲུབ་འགྲུབ་པར་འགྱུར། །དང་པོ་ཤེས་རབ་ཅན་དག་གིས། །བདག་གིས་དངོས་པོར་སྣང་བ་ལས། །དེ་ཉིད་ངང་ལ་མཆོག་ཉིད་ཀྱིས། །འོད་ཟེར་བསིལ་ལྡན་ཡང་
དག་བསམ། །དེ་ལ་གང་དུ་གྱུར་པ་ནི། །དབུགས་རྒྱུ་འགུགས་པར་ངེས་པར་བསམ། །དེ་ལས་གསལ་ལྡན་རིགས་ལྔ་པ། །སྟོང་པའི་དཔེ་ལས་མངོན་སོང་བའི། །གཟུགས་བཟངས་མ་སོགས་རིགས་མ་ཡིས། །མི་འཆི་ལྔ་
ལྡན་དུས་འགྱུར་ལས། །འཛིན་པ་ཅན་ལ་སྦྱིན་པར་བསྒོམ། །དེ་ནས་སྔགས་འདིས་རབ་བསྔགས་ཏེ། །བདག་ཉིད་རིགས་སུ་ལྡན་པ་ཡིས། །བདག་པོས་ཕྱག་རྒྱ་ངེས་པར་གསལ། །ཨོཾ་ཨ་བྷི་ཤིཉ་ཙ་ཏུ་མཱྂ་བཛྲ་པཱ་ཎི་ཧཱུྃ། 
ཨ་ཧོ་ཨཱ་ཧ་རྃ་ཏ་ཐ་སྠི་ཏོ་ཡྃ་ཨ་ཧོ་མ་མ་པྲི་ཡང་ཏུ་ཏི་ཧཱུྃ། བདག་ཉིད་དངོས་པོ་ལ་བརྟེན་ནས། །མཚན་མར་མི་གནས་མ་སྐྱེས་པའི། །གདོད་ནས་གྲུབ་པ་བསམ་བྱ་སྟེ། །སངས་རྒྱས་དངོས་ལ་རབ་སྦྱོར་བས། །དང་པོར་དངོས་དག་
བསམ་བྱས་ནས། །བདག་ཉིད་གང་གི་གཟུགས་གནས་ལ། །སྟེང་དུ་མིག་འདྲའི་དངོས་པོ་བསྒོམ། །དེ་ལས་གོང་དུ་གྱུར་པ་ལས། །འཇིགས་བྱེད་རིགས་དགུ་ངེས་པར་བསམ། །མིག་འདྲའི་སྦུ་གུ་རབ་སྦྱར་བས། །སྙིང་པོའི་
སྟེང་དུ་གསལ་བར་སྣང་། །སྙིང་པོའི་སྟེང་དུ་ཆུ་བསྒྲུབས་པས། །ཡན་ལག་སྟོང་དང་ལྡན་པ་ཉིད། །སྤུན་ལ་ཕྱོགས་པར་ཁ་བལྟས་ནས། །བདག་ལས་གོང་དུ་གྱུར་པ་ཡི། །ཧཱུྃ་གཉིས་ལས་བསྒྲུབས་སྟེང་མ་ཡི། །ངེས་པར་གསལ་
བྱེད་སྦྱར་བ་ལས། །དངོས་པོའི་སྙིང་པོར་རབ་སོང་སྟེ། །དེ་ལས་མི་འཆི་འོད་ལྡན་པས། །འཇོམས་བྱེད་སྟེང་ན་རབ་གནས་པའི། །མིག་འདྲའི་ཡན་ལག་བརྒྱད་དང་ལྡན། །འཇོམས་བྱེད་མིག་འདྲ་གར་མར་སྦྱོར། །ཐབས་དང་ཤེས་
རབ་གསུམ་དུ་ངེས། །དངོས་པོ་གསུམ་ལས་རབ་བརྒྱུད་དེ། །སྙིང་པོའི་སྟེང་ན་རབ་གནས་པའི། །མིག་འདྲའི་སྟེང་དུ་ངེས་པར་སོང་། །རང་གི་གར་མའི་ཁྱོན་ཙམ་ལ། །སྐད་ཅིག་བྱེ་ཕྲག་བཅུ་དྲུག་པའི། །ཐབས་སུ་ཡོངས་སུ་རྫོགས་པ་སྟེ། །

90-1-9b

དང་པོ་དངོས་པོར་བརྟག་མི་བྱ། །རྫོགས་པ་ཉིད་ལ་མེ་འབར་བས། །རིམ་པ་དེ་ཉིད་མི་གནས་ཤིང་། །དངོས་པོའི་སྣང་བ་གང་ཡིན་པ། །མར་མེའི་རྩེ་མོ་ལྟ་བུ་ཡི། །ཕྱི་ནས་རང་བཞིན་འོད་གསལ་བའི། །དང་པོ་རབ་ཏུ་བརྟག་པར་བྱ། །
རིམ་པ་གསུམ་པ་རབ་རྫོགས་ཡིན། །སྟེང་དུ་པྂ་གཉིས་རབ་འབར་དང་། །ཧཱུྃ་ལས་སྐྱེས་པ་ཐུབ་པའི་སྐུ། །ཡང་དག་པ་རུ་བརྟག་བྱ་ཡིན། །འོག་ཀྱང་གོང་མའི་ས་བོན་ལས། །བསྐྱེད་པར་བྱ་བ་ཁོ་ན་ཡིན། །སེམས་དཔའ་
གཉིས་སུ་ངེས་པ་དང་། །འཁོར་ལོ་སྤྲོས་པས་ཆར་ལྟ་བུའི། །ལོ་ཏོག་ཤིན་ཏུ་སྨིན་བྱེད་པའི། །སྐྱོན་རྣམས་སྤངས་ནས་དེ་ཉིད་དུ། །སླར་ཡང་ངོ་བོས་ཡང་དག་གནས། །དེ་ལྟར་གསལ་བར་མ་འཁྲུལ་བར། །སྐྱོན་གྱིས་མ་གོས་
དྲི་མེད་དོ། །མཁའ་ལ་ཀུན་ཞེས་སེམས་ཀྱིས་སུ། །རྡོ་རྗེ་ལམ་དུ་རབ་ཞུགས་ནས། །ནོར་བུ་དྲི་མེད་ཟླ་བ་ཡི། །ལས་ལ་སྦྱོར་བ་སྣ་ཚོགས་པ། །མཉམ་པར་སྦྱར་བས་བདེ་བའི་མཆོག །མི་འཛག་གནས་དང་ལྡན་པར་འགྱུར། །
མཁས་པ་སངས་རྒྱས་བདེ་བས་བདེ། །ལུས་ལ་ཆགས་པར་མི་ལྟ་ཞིང་། །སེམས་ལ་ཆགས་པ་ཆེན་པོར་བསྐྱེད། །དེ་འདྲའི་སྤྱོད་པས་ཡོངས་བསྡུས་ནས། །གང་ཞིག་མྱ་ངན་འདས་པ་ལས། །མཆོག་འགྱུར་མི་གནས་མྱ་ངན་
འདས། །ས་ལ་མངོན་པར་མི་གནས་ཤིང་། །ཀུན་ཏུའང་མངོན་པར་མི་གནས་པས། །ཡེ་ཤེས་རྡོ་རྗེ་གོ་འཕང་ཉིད། །བརྒྱུད་པས་མངོན་དུ་བྱེད་པ་ལ། །འདི་ལ་རྫས་ལ་སོགས་པ་ཡི། །འདི་ཡི་དངོས་གྲུབ་གང་ཡིན་པས། །ངེས་
པར་འགྲུབ་པ་སྨོས་ཅི་དགོས། །ཤེས་རབ་ཅན་གྱི་ལས་འདི་ལས། །ཆགས་པ་ཆེན་པོར་ཡང་དག་བསྒྲུབ། །ལུས་ལ་མེ་འབར་ཆེན་པོ་ཡི། །སྙིང་པོ་འདི་ཉིད་བཟླས་པ་ལས། །རང་ཉིད་པད་མ་གསང་བ་ཡི། །དྲག་པོའི་རྟགས་སུ་
ངེས་པ་སྟེ། །དེ་བཞིན་རྟག་ཏུ་བསྒྲུབ་པར་བྱ། །སྔགས་བཟླས་ཆོ་ག་གསུམ་ལས་ནི། །ཁྱད་པར་ངེས་པར་དམིགས་བྱས་ལ། །བདག་ཉིད་ཐ་མལ་གཟུགས་ཀྱིས་གནས། །དེ་དག་ཕན་ཚུན་བརྒྱུད་པ་ཡིས། །ཟོ་ཆུན་བརྒྱུད་པ་བཞིན་དུ་

90-1-10a

བསམ། །དྲག་པོའི་བཟླས་པ་དེ་ཉིད་དང་། །རང་བཞིན་རྡོ་རྗེའི་བཟླས་པ་ཡིས། །རིགས་གསུམ་ཡོངས་སུ་བསྡུས་པ་ཡིན། །ཨོཾ་བྷོ་བྷོ་པཱན་ནཱ་ག་ཨ་དྷི་པ་ཏ་ཡེ། ཨི་དན་ནཱི་ལཱྂ་བ་ར་དྷ་ར་ཤ་རཱི་རྃ། བཛྲ་པཱ་ཎི་ཧྲི་ད་ཡྃ། ཡ། ས་མཱ་
ཏེ་ཀྲ་མ་ཐ་མཱ་ཀུ་ལ་ཨུད་སཱ་ད་ནཱྃ་བྷ་བི་ཥཾ་ཏེ་ཏདྱ་ཐཱ། བུད་དྷ་བུད་དྷ། བི་བུད་དྷ་བུདྡྷ། མ་ཏི་ཀྲ་མ་ཐཱ། ཧ་ར་ཧ་ར་ནཱ་གཱ་ནཱྃ། པྲ་ཧ་ར་པྲ་ཧ་ར་ནཱ་གཱ་ནཱྃ། ཙྪིན་ད་ཙྪིན་ད་ནཱ་ག་ཧྲི་ད་ཡཱ་ནི། བྷིན་ད་བྷིན་ད། ནཱ་ག་མརྨཱ་ཎི་བི་ཤཱིཪྻནྟུ་ནཱ་ག་ཤ་རཱི་རྃ། བི་སྥོ་ཊ་ཡ་ནཱ་ག་ནཱ་ཡ་ནཱ་ནི། 
ཏདྱ་ཐཱ་ཧཱུྃ་ཕཊ། ནཱ་ག་བི་དཱ་ར་ཎཱ་ཡ་ཧཱུྃ་ཕཊ་ནཱ་གོད་སཱ་ད་ནཱ་ཡ་ཧཱུྃ་ཕཊ། ནཱི་ལཱྃ་བ་ས་ནཱ་ཡ་ཧཱུྃ་ཕཊ། ཨ་པྲ་ཏེ་ཧ་ཏ་བ་ལ་པ་རཱ་ཀྲ་མ་ཡ་ཧཱུྃ་ཕཊ། ཀྲི་ཏཱན་ཏཱ་ཡ་ཧཱུྃ་ཕཊ། ཀྲི་ཏཱན་ཏ་རུ་པཱ་ཡ་ཧཱུྃ་ཕཊ། རོ་ཥ་ཎཱ་ཡ་ཧཱུྃ་ཕཊ། ཏྲཱ་ས་ནཱ་ཡ་ཧཱུྃ་ཕཊ། ཀུྃབྷཱཎ་ཌ་
ཨུད་སཱ་ད་ནཱ་ཡ་ཕཊ། པྲེ་ཏ་པི་ཤཱ་ཙི་བི་ནཱ་ཤ་ཀ་རཱ་ཡ་ཧཱུྃ་ཕཊ། ཡཀྵ་ཨ་པསྨཱ་བི་ནཱ་ཤྐ་རཱ་ཡ་ཕཊ། ཧ་ན་ཧ་ན་ཧཱུྃ་ཕཊ། ཧ་ས་ཧ་ས། ད་ར་ད་ར། མཱ་ར་ཡ་མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བིགྷྣ་བི་ནཱ་ཤ་ཀ་རཱ་ཡ་ཕཊ། སརྦ་ཤ་ཏྲཱུྃ་སྂ་གྷ་བི་ནཱ་ཤ་ཀ་རཱ་ཡ་
ཧཱུྃ་ཕཊ། ཨི་དན་ནཱི་ལཱྃ་བ་ར་དྷ་ར་བཛྲ་པཱ་ཎི་རཱ་ཛྙ་པ་ཡ་ཏི་སྭཱ་ཧཱ། ཨོཾ་དཾཥྚྲཱ་ཀ་རཱ་ལོ་ཀྲ་བྷཱི་ཥ་ཎ་ནཱི་ལཱྃ་བ་ར་དྷ་ར་བཛྲ་པཱ་ཎི་ཡེ་ནཱ་ག་ཨ་ལྃ་ཀཱ་ར་ས་པ་ཏ་ཀེ་ཏུ་བྱཱ་གྷྲ་ཙ་ར་མ་ནི་བྷཱ་ས་ནཱ་ཡཱ། བྷ་མ་ཀཱ་རཱ་ག་རུ་ཊ་ར་སི་ཏི། ཀྲོ་དྷ་མཱུར་ཏི་ན་ཏྲཻ་ལོ་ཀྱ་ད་ཧཱ་
ཡ། བྷྱ་མ་མན་ཏྲ་ཨ་ས་ན་རུ་དྲ་ཡ། ནཱ་ག་ཙ་ཏུར་མ་བྷཀྵཱ་ཡ་ཧཱུྃ་ཕཊ། ཨོཾ་མ་ཏྲཻ་ལོ་ཀྱ་བྷི་ཛཱ་ཡ་ཧཱུྃ་ཕཊ། ཨོཾ་མ་ཧཱ་ཀཱ་ལ་རོ་ཥ་ཎཱ་ཡ་ཧཱུྃ་ཕཊ། ཨོཾ་བཻ་ཤྲ་ར་མ་ནཱ་ཡ་ཧཱུྃ་ཕཊ། ཨོཾ་ཨ་མྲི་ཏ་ཀུཎ་ཌ་ལེ་ཧ་ན་ཧ་ན་ཧཱུྃ་ཕཊ། ཨོཾ་བཛྲ་ཡཀྵ་ཧཱུྃ་ཕཊ། ཨོཾ་
བཛྲ་ཡ་བཻ་ཏཱ་ལཱི་ནི་ཧཱུྃ་ཕཊ། ཨོཾ་བཛྲ་ཌཱ་ཀཱ་ཡ་ཧཱུྃ་ཕཊ། ཨོཾ་བཛྲ་བྷཻ་ར་བཱ་ཡ་ཧཱུྃ་ཕཊ། ཨོཾ་བཛྲ་པྲ་བྷོཏ་པ་དཱ་ཡ་ཧཱུྃ་ཕཊ། ཨོཾ་མ་ནོ་ཧ་ར་ཡ་ཧཱུྃ་ཕཊ། ཨོཾ་ས་མན་ཏ་བྷ་དྲྱེེ་ཧཱུྃ་ཕཊ། ཨོཾ་ཤབ་ད་གཱི་ཏྱཻ་ཧཱུྃ་ཕཊ། ཨོཾ་པྲ་ཎཱ་པ་ཏེ་ཏྱཻ་ཧཱུྃ་ཕཊ། ཨོཾ་ཤྭཱྃ་ས་ཏྱཻ་ཧཱུྃ་ཕཊ། 
ཨོཾ་ར་ག་ཏ་པྲཱ་ཡོ་ནི་ཧཱུྃ་ཕཊ། ཨོཾ་མཱན་ས་བྷཀྵི་ཎི་ཧཱུྃ་ཕཊ། ཨོཾ་ཙཎ་ཌ་མ་ཧ་རོ་ཥ་ཎ་སརྦ་སིད་དྷ་ཡ་ཧཱུྃ་ཕཊ། ཨོཾ་མ་ནི་དྷ་རི་བཛྲ་ཎི་ཧཱུྃ་ཕཊ། ཨོཾ་བཱ་སུ་རཏ་ན་བི་ཏ་ཧཱུྃ་ཕཊ། ཨོཾ་ཨ་མྲི་ཏ་སིད་དྷི་ཧཱུྃ་ཕཊ། ཨོཾ་སམ་ཤོ་དྷ་ཡ་བ་ར་བ་ར་ཧཱུྃ་ཕཊ། ཨོཾ་ཙ་པ་ཤ་ས་བ་ནི་ར་ཧཱུྃ་ཕཊཿ

90-1-10b

ཨོཾ་ཀུ་མཱ་ར་ཙ་ཤ་མ་ཎི་ཧཱུྃྃ་ཕཊ། དེ་ནས་ཕྱོགས་བཅུ་འཁྲུགས་པ་ལས། །ཡི་གེ་ངེས་པ་གང་ཡིན་པ། །བླ་མའི་མན་ངག་རབ་གསལ་བས། །གཅིག་ཏུ་བསྡུས་པས་བཟླས་པར་བྱ། །རང་བྱུང་སྔགས་པའི་བདག་ཉིད་ལ། །གྲངས་ཚད་
གཟུང་བ་གང་ཡིན་པ། །རིགས་ཀྱི་དབང་གིས་རྣམ་པར་བཤད། །ཀུན་ཏུ་སྣང་བ་གང་ཡིན་པ། །རིགས་སུ་བསྡུས་ནས་ངག་གི་ཡང་། །སྤྱོད་ཡུལ་མ་ཡིན་ཐ་མལ་གཉིད། །དྲག་པོའི་སྙིང་པོ་ཉིད་དང་ཡང་། །རང་བཞིན་རྡོ་རྗེ་བཟླས་པ་ཡིས། །
རིགས་གསུམ་ཡང་དག་བསྡུས་པ་ཡིན། །གོང་མའི་སྔགས་ལ་རབ་སྔགས་པ། །མཐའ་རུ་ཀུན་ལ་ཧཱུྃ་གིས་བརྒྱན། །དེ་མཐར་བསྐྲད་པའི་ཚིག་དག་གིས། །ཡོངས་སུ་བརྒྱན་པས་ངེས་པར་བཟླས། །གང་དང་གང་ལ་ལས་སྦྱོར་བ། །དེ་དང་དེ་ལས་
མན་ངག་གིས། །མངོན་པར་ཤེས་པའི་ཡང་དག་བཤད། །བཟླས་པ་ཕུན་སུམ་ཚོགས་ལྡན་པས། །རབ་འབྲིང་ཐ་མ་ལྡན་པ་ཡིས། །དང་པོ་སྦྱོར་བ་ངེས་པ་དང་། །མཐའ་མར་ལས་ལ་འཇུག་པ་ལ། །གྲངས་
དང་ཆ་རུ་རྣམ་པར་ལྡན། །སྤྱོད་ཡུལ་བསྡུས་པ་ངེས་གསལ་བ། །བདག་གིས་གང་ལ་བརྟག་པར་བྱ། །དང་པོར་སྲིད་ལ་ཆགས་པ་དང་། །བར་དུ་གང་ཞིག་གནས་པ་ཉིད། །ཐ་མར་འཇིག་པ་གང་ཡིན་པས། །སྔགས་རྣམས་ཐམས་
ཅད་རྒྱས་པར་གསུངས། །འབྱུང་བ་ལྔ་དང་རབ་ལྡན་ནས། །དེ་ལས་ཆོས་རྣམས་ཐམས་ཅད་ལས། །ཡོངས་སུ་འབྱུང་བའི་ཡང་དག་གནས། །དེ་དང་རབ་སྦྱོར་དང་པོའི་དོན། །འདི་ལས་གྲུབ་པར་གྱུར་པ་གང་། །ལས་རྣམས་སྣ་
ཚོགས་གང་ཡིན་པ། །གདོན་མི་ཟ་བར་ངེས་པ་ཡིན། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་ནང་དང་སྔགས་ཀྱི་ལེའུ་སྟེ་ལྔ་པའོ།། །།  ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །
སེམས་ཅན་སྨིན་པར་བྱ་བའི་ཕྱིར། །འཇུག་པའི་ཐབས་ཉིད་གསུང་དུ་གསོལ། །ཀུན་མཁྱེན་མགོན་པོས་བཀའ་སྩལ་པ། །དང་པོར་ས་བརྟག་ལ་སོགས་པ། །ངེས་པར་གོང་དུ་བསྟན་པ་ལྟར། །ལས་རྣམས་ངེས་པར་

90-1-11a

རྫོགས་པར་བྱ། །ས་ཕྱོགས་དབེན་པའི་ཁྱིམ་རྣམས་སུ། །བ་ཡི་རྣམ་ལྔ་ལ་སོགས་དང་། །རམ་དང་མཐིང་ཤུན་མདུན་དུ་ངེས་པར་སྦྱར། །ཐ་མའི་ཚད་དུ་རབ་སྦྱར་ལ། །གུར་གུམ་ཐིགས་ལེས་ཡང་དག་གདབ། །ཞལ་
ཟས་སྣ་ཚོགས་འབྱོར་ལྡན་པའི། །ཀུན་ཀྱང་ལྔ་ལྔར་ཡོངས་སུ་གནས། །ལས་རབ་མཆོག་གི་གཏོར་མ་ལ། །རྫས་རྣམས་ཕུན་སུམ་ཚོགས་པ་ཡིས། །སེམས་བསྐྱེད་པ་དང་སྐྱབས་འགྲོ་དང་། །གསང་བ་གསུམ་གྱི་གནས་
རྣམས་སུ། །དྲི་ཡི་ཐིག་ལེ་རྡོ་རྗེ་དང་། །བཅས་པའི་གུང་མོས་ཀུན་བསྐུས་ལ། །མི་འགྱུར་གསུམ་ལ་སྐུ་གསུམ་དུ། །སྔགས་འདི་དག་གིས་བྱིན་གྱིས་རློབས། །ཨོཾ་ཏྲི་མ་ཏ་བི་ཤོ་དྷ་ཡ་ཨཱ་ཧཱུྃ། །དེ་ནས་སོ་ཤིང་དག་ལ་ནི། །
སྔགས་འདིས་ཡོངས་སུ་དག་བྱས་ལ། །སློབ་མ་ལ་བྱིན་སོ་བཀྲུས་ཏེ། །མིག་བཀབ་བསམ་པ་དག་པ་ཡིས། །དེ་ཡི་སྟེང་དུ་བོར་བར་བྱ། །གང་དུ་ཁ་བལྟས་མེ་ཏོག་ཕྲེང་། །རིགས་དང་རྗེས་སུ་བསྟན་པ་ལས། །དེ་ཡི་དངོས་གྲུབ་
བརྗོད་པར་བྱ། །དེ་ནས་སྲུང་སྐུད་སྔོན་པོ་ལ། །སྔགས་ཀྱིས་དག་པར་བྱས་པ་ལས། །སྐྱེས་པ་གཡས་པ་བུད་མེད་གཡོན། །དཔུང་བ་དག་ལ་བཅིང་བར་བྱ། །བཀྲ་ཤིས་རྩྭ་ཡི་སྔས་དང་སྟན། །ལེགས་པར་བཅུག་པའི་མཚན་
མ་བརྟག །བཟང་ངན་ལྟས་སུ་བཅས་པ་དང་། །བཟློག་པར་བྱ་དང་བྱ་མི་དགོས། །ཤེས་རབ་ཅན་གྱིས་རྒྱུད་གཞན་ལས། །འབྱུང་བ་བཞིན་དུ་བརྟགས་ལར་བྱ། །དང་པོར་བསྙེན་པ་རབ་འབྲིང་དང་། །ཐ་མར་ཡོངས་སུ་བསྙེན་བྱས་ལ། །
དེ་འོག་སྔགས་པ་བློ་ལྡན་པས། །ཡང་དག་པར་ནི་སྦྱོར་བ་བརྩམ། །ཨོཾ་བཛྲ་ས་མ་ཡ་སིད་དྷི་ཨཱ། །ཨོཾ་སརྦ་རཀྵ་སརྦ་སིད་དྷ་ཨཱཿཧཱུཾ། རང་བཞིན་མི་གནས་དགོས་པ་ཡིས། །ཀུན་རྫོབ་དྲི་མ་སྦྱང་བར་བྱ། །དེ་ནས་སྣ་ཚོགས་
འབྱོར་པ་ལས། །གོང་དུ་སྨོས་པའི་དཀྱིལ་འཁོར་ཉིད། །ཡོངས་སུ་རྒྱས་པར་བྲི་བར་བྱ། །རྫས་རྣམས་ཕུན་སུམ་ཚོགས་པ་ལ། །མཆོད་པས་ཡང་དག་མཆོད་པར་བྱ། །དེ་ཉིད་གཟུགས་ལ་རབ་ཏུ་ཡང་། །གནས་པས་བདག་ཉིད་དེ་ཉིད་དུ། །

90-1-11b

ཡང་དག་པར་ནི་བསྐྱེད་པར་བྱ། །པད་མ་ཉིད་ལ་གོས་ལ་སོགས། །སྔོན་པོས་ཡང་དག་དཀྲིས་བྱས་ལ། །བདུད་རྩི་འཁྱིལ་པའི་སྔགས་ཀྱིས་སུ། །དྲི་ཆུས་གཏོར་ཞིང་གཞུག་པར་བྱ། །མདུན་དུ་ངེས་པར་གནས་པ་ལས། །ཆེ་ཆུང་
དེ་ཉིད་འབྱོར་པ་ཡིས། །ཡོན་ཉིད་ཁས་དག་ལེན་དུ་གཞུག །ཐལ་མོ་བདག་གིས་བཟུང་བྱས་ལ། །སེམས་བསྐྱེད་ལ་སོགས་རྒྱས་པར་བརྗོད། །སྣང་བ་སྣ་ཚོགས་ངེས་པ་ལས། །རིགས་ནི་རྗེས་སུ་གཟུང་བར་བྱ། །མེ་ཏོག་
སྔོན་པོའི་ཕྲེང་བ་ཡིས། །སྔགས་བརྗོད་པས་ནི་བོར་བར་བྱ། །དེ་ལྟར་ལྷ་ཚོགས་རབ་བསྟན་ནས། །བུམ་པའི་ཆུ་ཡིས་སློབ་མ་ལ། །དབང་སྐུར་སློབ་དཔོན་བདག་ཉིད་ཀྱིས། །བྱིན་པ་བུམ་པའི་དབང་ཡིན་ཏེ། །རགས་པ་རྣམ་པར་
དག་པར་འདོད། །དེ་ནས་ཕྱག་རྒྱ་བཅས་པ་ལས། །བྱང་ཆུབ་སེམས་ལྡན་མ་ཉམས་པས། །བདག་དང་གཞན་རྣམས་གང་རུང་བས། །བདེ་བ་མངོན་དུ་རབ་སྦྱར་ནས། །བསམ་པས་ཡང་དག་སྦྱར་བྱས་ཏེ། །ཐབས་དང་ཤེས་
རབ་ཕྱག་རྒྱ་ཡིས། །དེ་ཡི་ཁ་རུ་སྦྱིན་པར་བྱ། །དེ་དག་གསང་བའི་དབང་ཡིན་ཏེ། །དེ་འོག་རྣམ་པར་དག་པ་ཡིན། །དེ་ནས་བདག་ཉིད་དངོས་པོ་གང་། །བུ་མོ་མདོག་བཟང་སྔོན་མོ་ལ། །གར་དང་ལྡན་པའི་ཡང་བའི་བསྐྱོད། །
ཆོ་གས་ཡང་དག་བཟུང་བྱས་ལ། །ཐབས་གཉིས་རབ་ཏུ་བསྐྱོད་པ་ཡིས། །སྣ་ཚོགས་དངོས་པོ་སྣང་བ་ཡིས། །དེ་འོག་སོར་བཞི་གཞལ་བྱས་ནས། །ཤེས་རབ་གཉིས་ལ་མནན་པ་ཡིས། །བདེ་བ་དཔག་ཏུ་མེད་པ་
མྱོང་། །དེ་མྱོང་སྐད་ཅིག་རྫོགས་པ་ཡིས། །དཔེ་ལ་བལྟས་པ་ཡིན་པར་བསྟན། །དེ་ཡིས་ཤེས་རབ་ཡེ་ཤེས་ཀྱི། །དབང་ཉིད་མངོན་པར་རྫོགས་པར་འགྱུར། །དེ་རྫོགས་སེམས་ཉིད་དག་པ་དེ། །བཞི་པ་ཆོས་ཉིད་
མངོན་རྟོགས་དབང་། །མེད་པར་མངོན་པར་སྣང་བར་འགྱུར། །དེ་ཡིས་སྤྱི་ལ་ཁྱབ་གནས་ཏེ། །རང་ལ་ཡོད་བཞིན་ངེས་པར་སྤངས། །ཨོཾ་ཨཱ་ཁྃ་བཱི་ར་ཧཱུྃ། ཨོཾ་ཡ་ཐ་ཀུ་ལ་ཏ་ཐཱ་ཨ་ཧྃ། 

90-1-12a

སངས་རྒྱས་ཀུན་གྱི་ཕྱག་བརྙན་འབར། །དེ་ཉིད་དུ་ནི་སློབ་མ་འགྲུབ། །དར་ལ་སོགས་པ་སྔོན་པོ་ཡིས། །སློབ་མ་ཉིད་ལ་དབང་བསྐུར་ལ། །སྔགས་འདི་ཡིས་ནི་བྱིན་རླབས་ལ། །དང་པོ་གཉིས་སྦྱར་དར་བཟུང་
ནས། །སྔགས་ཀྱིས་ཡང་དག་བསྐོན་པར་བྱ། །མཁའ་ལྡིང་སྔོན་པོ་འདབ་རྒྱས་པ། །མགུལ་བ་དར་སྤྱངས་ལྡན་པ་ཡིས། །བུ་ཉིད་ལ་ནི་ངེས་པར་སྦྱིན། །དངོས་གྲུབ་སྣ་ཚོགས་འགྲུབ་པ་དང་། །གདོན་རྣམས་ཐམས་ཅད་
འཇོམས་པ་དང་། །བེ་ཅོན་སྔོན་པོ་དབྱིག་དང་ལྡན། །མེ་ཏོག་སྔོན་པོའི་ཕྲེང་བས་ཀྱང་། །དེ་ཉིད་ལ་ནི་བསྐོན་བྱས་ནས། །སྔགས་དང་ཕྱག་རྒྱ་འདིར་ལྡན་པའི། །བུ་ཉིད་ལ་ནི་སྦྱིན་པར་བྱ། །དང་པོ་གསུམ་པ་རབ་སྦྱར་བས། །སྤྱི་
བོའི་སྟེང་དུ་ངེས་བཟུང་སྟེ། །དེ་ནི་བྱེད་པ་པོ་ལ་བཞག །བདག་ཉིད་ཡན་ལག་རིགས་ངན་གྱིས། །དབུས་ཀྱི་གཡོན་པ་བགྲང་བྱས་ལ། །རིགས་ཚང་ཡན་ལག་བཅིངས་པ་ཡིས། །ཕྱིར་ཏེ་བྱེད་པ་པོ་ལ་བཞག །དེ་ཡི་སྟོད་ལ་
གནས་བྱ་བ། །ཚངས་པ་ཆེན་པོ་མཐོང་བྱེད་དང་། །མཆོད་པ་ཀུན་གྱིས་སྡུད་པ་ཡིས། །དར་དམར་རས་སམ་གང་རུང་བའི། །སྔགས་ཆུས་དག་བྱས་ལེགས་བཀབ་ནས། །བཞི་རུ་ངེས་པར་གཅིག་པ་ཡི། །དངོས་པོ་གང་དག་
གདགས་པར་བྱ། །ཕྱག་རྒྱ་འདའ་མིན་གྲགས་པར་ལྡན། །བྱིས་པས་སྔགས་བཟླས་ཡང་དག་ལྡན། །ཀུན་ལ་ཁྲོ་གཉེར་བརྗིད་པར་བལྟ། །ཨོཾ་ཨུ་ད་ར་སྃ་གྷ་བ་བྷུ་ཡ་ཧཱུྃ། ཨོཾ་ག་རུ་ཊ་སརྦ་ནཱ་ག་བྷ་ཀྵཱ་ཡ་ཧཱུྃ། ཨོཾ་བ་རྃ་དན་ཏ་ཀ་
སརྦ་སིད་དྷི་པྲཱ་པ་ཏ་ཧཱུྃ། ཨོཾ་ཨཱ་ཛྙོ་པ་ཡ་ཏི་ལོ་ཀ་པ་ཤི་ཀ་རཱ་ཡ་ཧཱུཾྃ།  དེ་ཡི་ལག་པ་སྒྲོམ་བྱས་ལ། །བདག་གིས་དྲག་པོའི་ལས་སྦྱོར་བ། །དེ་ཡི་སྒྲོམ་ནས་དྲངས་བྱས་ལ། །སྙིང་པོ་འདི་ཉིད་ངེས་པར་སྦྱིན། །ཨོཾ་ཙཎ་ཌ་མ་ཧཱ་རོ་ཥ་ཎ་བཛྲ་
པཱ་ནི་ད་ཧ་ད་ཧ། སརྦ་བིགྷ་ནྃ། ཧ་ན་ཧ་ན་སརྦ་ཨཪྠ་ཤཱི་གྷྲཾ་ཀུ་རུ་ཡེ་ཧཱུྃ། དེ་ནས་ལེགས་པའི་མཚན་མ་ལ། །ཆོས་ལ་དབང་སོགས་མི་གནས་ན། །འཇུག་པར་འགྱུར་བ་ག་ལ་སྲིད། །རྒྱུད་གཞན་ལ་ནི་སྤྱི་དབང་གནས། །དེ་ནས་ཀུན་ལ་

90-1-12b

འཇུག་པར་འགྱུར། །སྤྱི་ཉིད་དབང་ལ་མི་ལྟོས་པར། །དེ་ཉིད་ལ་ནི་རྟོག་པའི་མཆོག །འདི་ཡིས་འཇུག་པ་ཁོ་ན་ཡིན། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་དབང་གི་ལེའུ་སྟེ་དྲུག་པའོ།། །། དེ་ནས་ལག་ན་རྡོ་རྗེ་ཡིས། །གསང་བའི་
མགོན་ལ་འདི་སྐད་གསོལ། །ཐམས་ཅད་རྫོགས་པ་ཆེན་པོ་ཡིས། །རིམ་པའི་རྣལ་འབྱོར་གསུང་དུ་གསོལ། །བདེ་གཤེགས་གསང་བས་བཀའ་སྩལ་པ། །སྟེང་དང་འོག་གི་སྟེང་དུ་གཉིས། །དཀྱིལ་འཁོར་བཞི་ཡི་བདག་ཉིད་ནི། །ཐམས་ཅད་ཤེས་
རབ་དམ་པ་སྟེ། །ཡོན་ཏན་སྡུད་སོགས་ཚོགས་སྙིང་པོ། །ས་བོན་འབྲས་བུ་རྣམ་པ་ཡིས། །སྤར་དང་བསྒོམ་ལ་ལྟུང་བར་འགྲུབ། །རྣམ་པར་སྣང་མཛད་གནས་དག་ཏུ། །རྩ་གཉིས་གཉིས་ཀྱི་བདག་ཉིད་ཅན། །གློ་གཏད་རྩེ་ལ་ལྟུང་གྱུར་ནས། །
བདེ་དེ་གྱེན་དུ་བཟློག་པས་ནིས། །ཐམས་ཅད་གནས་སུ་གཅིག་ཏུ་འགྱུར། །སྣང་བ་མཐའ་ཡས་གནས་དག་ཏུ། །བརྒྱད་གཉིས་ཤེས་རབ་རི་མོར་བཅས། །དབུས་ཀྱི་བྱང་ཆུབ་ཐིག་ལེ་ལ། །གློ་གཏད་སྣང་མཛད་གནས་སུ་ཕྱིན། །དེ་ཡིས་སངས་རྒྱས་
ཐམས་ཅད་བཀུག །ཡིད་བཞིན་ནོར་བུ་དང་འདྲར་འགྱུར། །འོག་ནས་རང་གི་གནས་སུ་བསྡུ། །རྡོ་རྗེ་སེམས་དཔའི་གནས་དག་ཏུ། །བརྒྱད་དང་བཞི་ཡི་བདག་ཉིད་ཅན། །དང་པོ་ས་དང་འབྱུང་བ་ཡིས། །ངེས་པའི་རི་མོ་བསམ་པར་བྱ། །རང་གི་
ས་ནས་མཐའ་ཡས་བསྐུལ། །འདྲེས་པའི་བདེ་བའི་གནས་སུ་ཕྱིན། །ཐམས་ཅད་འདྲེས་པར་རང་གི་སར། །བདེ་དང་ལྡན་ནས་དེ་ཡིས་འགྲུབ། །སྤྲུལ་པའི་གནས་སུ་བཅུ་གསུམ་ལ། །གཉིས་པ་གཉིས་དང་ཡང་དག་ལྡན། །ཡི་གེ་
ཐིག་ལེ་བཅས་པ་ཡིས། །འགྲོ་རྣམས་བདེ་བའི་གནས་སུ་སྤྲོས། །སླར་འདུས་དེ་རུ་དངོས་གྲུབ་འགྱུར། །ཡང་ན་རྟག་ཆད་བྲལ་བ་ཡི། །དབུ་མ་ཆེན་པོའི་དབྱིངས་ཉིད་དུ། །ཡེ་ཤེས་ཕྲ་མོ་མར་གྱིས་སྤྲོས། །དབྱིངས་ལ་ཐུག་ནས་
མར་ལ་བྱུང་། །དེ་ཚེ་མི་གནས་བསམ་དང་བྲལ། །འདོད་ཆགས་དག་དང་ལྡན་གྱུར་ན། །གཅིག་ཤོས་ལེན་པའི་ཡོན་ཏན་ལྡན། །རྩེ་མོར་མ་དང་ཕཊ་ལྡན་པས། །ཙཎ་ཌ་ལེ་ཡི་དྲོད་བྱུང་ནས། །སེམས་དཔའ་ཡེ་ཤེས་རྩེ་ལ་ཟུང་། །དེ་ཡིས་

90-1-13a

ཡང་སྤྲུལ་གནས་སུ་བཀུག །སྙོམས་པར་ཞུགས་ཤིང་གཡོ་བའི་བཟློག །ཐ་མའི་ཡི་གེ་འགྲོ་འོང་ནི། །ཞུ་བའི་བསམ་པའི་བྱ་བར་གསུངས། །དེ་ནས་དེ་བསང་དངོས་གྲུབ་འགྱུར། །ཡང་ན་འོག་གི་ཐིག་ལེ་བཞི། །རླུང་དེ་སྤྲུལ་
པའི་འཁོར་ལོར་འདུས། །དྲོ་བར་བྱང་ཆུབ་སེམས་བཀུག་ནས། །རྩེ་ལ་ཕྱིན་ནས་ནུབ་བྱང་བསམ། །སླར་ལོག་ཕར་འགྲོ་ཡང་དང་ཡང་། །ཐ་མ་སྙོམས་པར་ཞུགས་གྲུབ་འགྱུར། །ཡང་ན་གནས་བཞི་གསུམ་པོ་དག །གང་ཡང་རུང་བས་
སྟེང་དུ་ཕྱིན། །སླར་ལོག་རྡོ་རྗེ་རྩེ་ལ་བཏོན། །ཚུར་ལོག་གནས་ནས་ལས་རྣམས་བྱས། །དེས་ནས་དངོས་གྲུབ་ཆེན་པོ་ཡང་། །རྡོ་རྗེ་བཞིན་དུ་འགྲུབ་པར་བསམ། །ཁམས་གསུམ་ཐམས་ཅད་དག་པ་དང་། །ཞིང་རྣམས་གཙང་མར་སྐྱེ་བར་
འགྱུར། །བསམ་གཏན་དེ་དང་ལྡན་པའི་ཚེ། །གཞན་པའི་ཡུལ་དུ་འགྲུབ་འགྱུར་སྤང་། །སྤང་པ་མ་ཡིན་བླང་བ་མིན། །སྙོམས་པ་དེ་ཡི་ངང་ལ་བཞག །གཟུགས་དང་སྒྲ་ལ་སོགས་པ་ཡི། །རང་གི་སེམས་གཡེང་འགྱུར་བའི་ཚེ། །བསྟན་པའི་
རང་བཞིན་མེད་པ་བསམ། །བར་དུ་སོ་སོའི་ཐིག་ལེ་བསམ། །ཐམས་ཅད་སྒྱུ་མ་ལྟ་བུར་བརྟག །དང་པོ་དང་པོའི་དུས་དག་ཏུ། །འདོད་པའི་ཡོན་ཏན་ལྷ་མོར་བསམ། །དེ་ནས་རྟོག་པ་ཞི་བར་འགྱུར། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་
མེ་ལྕེའི་རྒྱུད་ལས་ཐམས་ཅད་རྫོགས་པ་ཆེན་པོའི་རིམ་པ་རྣལ་འབྱོར་པའི་ལེའུ་སྟེ་བདུན་པའོ།། །། དེ་ནས་ལག་ན་རྡོ་རྗེ་ཡིས། །བཅོམ་ལྡན་མགོན་ལ་འདི་སྐད་གསོལ། །འཇིག་རྟེན་ཀུན་ལ་ཕན་གདགས་ཕྱིར། །གཏོར་མའི་རིམ་པ་
གསུང་དུ་གསོལ། །ཀུན་མཁྱེན་མགོན་གྱིས་བཀའ་སྩལ་པ། །རྣལ་འབྱོར་རྣམས་ལ་ཕན་གདགས་ཕྱིར། །བདག་གིས་གཏོར་མ་བཤད་པར་བྱ། །ཕན་གདགས་པ་དང་ཚར་གཅད་པ། །ཕན་པ་མཆོག་དང་ཐུན་མོང་ངོ་། །གསང་བ་
བླ་མེད་མཆོག་ཏུ་འདོད། །ཕྱི་ནང་ཐུན་མོང་ཤེས་པར་བྱ། །རྒྱས་དང་བསྡུས་དང་ཤིན་ཏུ་བསྡུས། །ཚར་གཅོད་པ་ཡང་ཤེས་པར་བྱ། །དགུག་དང་བསྐྲད་དང་གསད་པར་དང་། །གནན་དང་བསྲེག་པར་ཤེས་པར་བྱ། །རྒྱུན་དུས་ཆེན་པོའི་

90-1-13b

གསུམ་ཉིད་དང་། །ཆུང་ངུ་རྒྱུན་ནམ་དུས་ཆེན་གྱི། །བཅུ་གཉིས་བཞི་འམ་ཐ་མ་གཅིག །རྩ་བ་ལྔ་འམ་ཡན་ལག་ལྔ། །འབྲུ་དང་ཤིང་ཏོག་སྨན་རྣམས་དང་། །ཆ་འཐུན་འབུར་བ་ལ་སོགས་རྫས། །དེ་སྟེངས་དཀར་གསུམ་
ཀླུ་ལ་ཤིས། །ཁྲག་སྣ་སྙིང་སྣ་ཤ་སྣ་གསུམ། །དེ་སོགས་མཐུན་རྫས་ཚར་གཅད་པའི། །བསྐྱེད་རིམས་དང་ནི་ལྡན་པ་ཡིས། །བླ་ནས་བསྲུང་བ་བྱས་པ་ལས། །ཆོ་ག་གསུམ་དུ་བྱས་པ་འམ། །ཡང་ན་སྐད་ཅིག་ལྷར་བསྐྱེད་
ལ། །མཚན་དང་ལྡན་པའི་པད་མ་རུ། །རྫས་རྣམས་ཀུན་གྱིས་བཀང་ནས་ནི། །ཟླ་བ་རྡོ་རྗེ་ཧཱུྃ་གིས་མཚན། །མཐོ་གང་ལ་ནི་རི་བོང་ཅན། །དེ་ལ་བཅུ་དྲུག་བདུན་པའི་མཚན། །རྡོ་རྗེ་མཚན་ལྡན་པ་རུ་ནི། །སྡུད་སྤྱོད་
འཕྲོ་བའི་མཐིང་དམར་དཀར། །པད་འོད་ཡེ་ཤེས་ལྔ་ལྡན་གསུམ། །གྲུ་གསུམ་འོག་ནས་ཟླ་གམ་ཅན། །ཐུགས་ཀྱི་མཐིང་ནག་འཕྲོ་བ་ལས། །རྡོ་རྗེ་ལྟེ་བསྐུལ་མཐའ་གསུམ་བསྐྱོད། །དམར་པོ་འབར་བས་མཚན་ལྡན་ཁྲོལ། །
ཐུགས་ཀྱིས་བསྡུས་ཤིང་གསུང་གིས་སྦྱངས། །སྐུ་ལས་འཕྲོས་པའི་རི་འོད་བསྐུལ། །ཤེས་རབ་ཅན་ལས་འོད་ཟེར་འཕྲོས། །དེ་ཡིས་ཡབ་ཡུམ་བསྐུལ་ནས་ནི། །ཁ་དོག་དཀར་པོའི་བདུད་རྩི་འབབ། །དང་པོ་སྐུལ་བྱེད་འོད་
དུ་ཞུ། །ཁོང་སེང་གནས་པ་པད་མར་འབབ། །བབ་པའི་གཏིང་ལ་དེ་ཉིད་ལྟུང་། །ལན་གསུམ་བསྐོར་བས་འོག་མ་བཞིན། །བཞི་པའི་དང་པོ་གཉིས་པར་མཚན། །དེ་ནས་གདན་བསྐྱེད་འཁོར་བཅས་བཀུག །ཛི་བཾ་རྡོ་རྗེ་ཁོང་
སེང་གྱིས། བཞི་པའི་དང་པོ་གཉིས་པར་བསམ། །ཡང་ན་ཡུད་ཙམ་ལྷར་བསམས་ལ། །ཐུགས་ཀར་ཉི་མ་དེ་སྟེང་ཧཱུྃ། །འོད་ཀྱིས་ཆོས་འབྱུང་གྲུ་གསུམ་སྤྲུལ། །དེ་ཡི་ནང་དུ་པད་མ་ནི། །འདབ་བརྒྱད་དུར་
ཁྲོད་དེ་དབུས་སུ། །ཡྃ་ལས་རླུང་བྱུང་རྃ་ལས་མེ། །དེ་སྟེང་ཨ་ལས་ཀ་པཱ་ལ། །ནང་དུ་བདུད་རྩི་ཨོཾ་ཨཱཿཧཱུྃ། །དེ་སྟེང་ཟླ་བ་རྡོ་རྗེ་ཧཱུྃ། །ཟླ་ཨྃ་འོད་འཕྲོས་བདུད་རྩི་བཀུག །བསྡུས་དང་བཞུ་དང་བདུད་རྩིར་བསམ། །

90-1-14a

ཡི་གེ་གསུམ་དང་གོ་རིམ་བཞིན། །ཐུགས་ལས་འོད་འཕྲོས་རླུང་ལ་ཕོག །རླུང་གིས་མེ་སྦར་ཐོད་པ་བསྐོལ། །དེ་ཡི་རྐྱེན་གྱིས་བསྡུས་པ་དང་། །གཞུ་དང་མདུང་རྩེར་བསྡུས་པ་དང་། །ཡི་གེ་གསུམ་དང་
སྦྱར་ལ་དབུལ། །ཡང་ན་ལྷ་མོ་དཀར་མོ་ཡིས། །མཚན་ལྡན་དག་ནི་བཀང་ལ་མཆོད། །ཡང་ནི་སྐད་ཅིག་སླར་བསྐྱེད་ལ། །ཐུགས་ཀའི་ཧཱུྃ་གིས་བདུད་རྩི་སྦྱངས། །སླར་ཡང་ཡེ་ཤེས་བདུད་རྩི་བབ། །ཡུད་ཙམ་སྤྲུལ་
པས་ལྷ་ཡིས་གསོལ། །བསྟོད་ནས་གཤེགས་ཤིང་ལས་བཅོལ་ལོ། །རྒྱས་དང་བསྡུས་དང་ཤིན་ཏུ་བསྡུས། །ཁ་ཟས་སྤྱད་པ་བསྡུས་དང་འཐུན། །དེ་ལྟར་ཡི་གེ་བརྒྱ་པས་བཤགས། །ལག་ན་རྡོ་རྗེ་གོས་སྔོན་
པོ་ཅན་རྡོ་རྗེ་མེ་ལྕེའི་རྒྱུད་ལས་གཏོར་མའི་ཆོ་གའི་ལེའུ་སྟེ་བརྒྱད་པའོ།། །།   དེ་ནས་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །རྣལ་འབྱོར་ཐམས་ཅད་བཀྲ་ཤིས་དང་། །གནོད་པ་ཐམས་ཅད་
བསལ་བའི་ཕྱིར། །སྦྱིན་བསྲེག་ཆོ་ག་གསུང་དུ་གསོལ། །འཇིག་རྟེན་མགོན་གྱིས་བཀའ་སྩལ་པ། །གཞན་དག་དྲན་པ་བསྐྱེད་པ་དང་། །དངོས་གྲུབ་ལྡན་པ་ཐོབ་འདོད་པས། །མན་ངག་རིམ་པར་དྲན་པའི་ཕྱིར། །
རྣལ་འབྱོར་དོན་དུ་བཤད་པར་བྱ། །སྔོན་དུ་བསྙེན་པ་བྱས་པ་ཡིས། །བསྒྲུབ་པ་ཡི་ནི་དུས་དག་ཏུ། །སྦྱིན་བསྲེག་གིས་ནི་ལས་ཀུན་འགྲུབ། །ས་བརྟག་བསླང་ཞིང་སྦྱང་བ་དང་། །བྱིན་གྱིས་བརླབས་ཅིང་བསྲུང་བ་དང་། །
ས་གཞི་དཀར་པོར་རྒྱར་ཁྲུ་གང་། །ཟབས་སོར་བཅུ་གཉིས་ཟླུམ་པོར་བྱ། །དེ་དབུས་རྡོ་རྗེ་རྩེ་ལྔ་པ། །སོར་ནི་བརྒྱད་པ་དག་ཏུ་བྱས། །ཐབ་དེ་བ་ཡི་རྣམ་ལྔ་དང་། །ནང་ཀུན་དྲི་ནི་དཀར་པོར་བྱུག །དུས་གསུམ་
མེ་ཏོག་དཀར་པོར་གཏོར། །ཡཾ་ཤིང་ནིམ་པ་པ་ལ་ཤ ། ཨུ་དུམ་བཱ་ར་ཨ་མྲ་ལ། །སོགས་པ་བྱང་ཆུབ་ཤིང་དག་དང་། །འདབ་མ་ཅན་དང་འོ་མ་ཅན། །རླན་དང་བཅས་པ་མཉམ་བཅད་ལ། །རྩེ་མོའི་ཆ་ལས་

90-1-14b

བྱུང་བ་ཡི། །མཐོ་གང་ཙམ་ནི་འོ་མ་དང་། །མར་དང་སྦྲང་རྩི་ལ་སོགས་པ། །རྩེ་གཉིས་ལོ་མ་བཅས་པ་འབུལ། །རྙིང་རུལ་གས་དང་འབུས་ཟོས་པ། །སྲོགས་ཆགས་གནས་པ་སྤང་བར་བྱ། །ནས་དང་བྲ་ཡོས་
ཏིལ་དག་དང་། །འབྲས་ཆན་ཡུངས་དཀར་མར་དང་ཞོ། །མེ་ཏོག་ཐང་ཆུ་དྲི་ཞིམ་དང་། །ཅི་ཙམ་རྙེད་པ་འབུལ་བར་བྱའོ། །བུད་ཤིང་དག་གི་རྣམ་པ་ཡང་། །ཐབས་ལས་ཅུང་ཟད་དམའ་བར་ནི། །དགོན་པའི་བ་ཡི་
ལྕི་བས་བྱ། །དེ་ནས་སྔགས་པ་ལུས་བཀྲུས་ཏེ། །དྲི་ཞིམ་སྤོས་དང་བླ་བས་བྱུག །ཚད་མེད་བཞི་ཡི་སེམས་ལྡན་ཞིང་། །ཞི་བའི་རྒྱན་བཅས་དཀར་པོ་བགོས། །ལྷ་ཡི་རྣལ་འབྱོར་གསལ་བྱས་ལ། །སྲོད་དམ་སྔ་
དྲོའི་དུས་སུ་ནི། །ཤར་ཕྱོགས་སུ་ནི་ཁ་བལྟས་ལ། །ཞི་བའི་སེམས་ཀྱིས་ཞི་བ་བྱ། །མཆོད་ཡོན་འབྲུ་དང་བཅས་པ་ཡི། །དྲི་ཞིམ་པ་ཡི་ཆུས་བྱུག་ལ། །རང་གི་ལྷ་ཡི་སྙིང་པོ་བརྗོད། །ལས་ཐམས་ཅད་པའི་ཆུ་དང་ནི། །རྡོ་རྗེ་
གནོད་སྦྱིན་སྔགས་ཀྱིས་བསང་། །ལས་རྣམས་ཐམས་ཅད་བུམ་པ་དང་། །མཆོད་ཡོན་གཡོན་དུ་གཞག་པར་བྱ། །བུད་ཤིང་བསྲེག་རྫས་གཡས་སུ་བཞག །དེ་ནས་ཨོཾ་བཛྲ་ཡཀྵ་ཧཱུྃ། །ཞེས་པས་མེ་ནི་སྦར་བ་སྟེ། །རླུང་
ཡབ་ཀྱིས་ནི་མེ་སྦར་རོ། །ཨོཾ་ཛྭ་ལ་ཛྭ་ལ་ཧཱུྃ། དེ་ནི་མེ་སྦར་སྙིང་པོ་ཡིན། །དེ་ནས་ཧཱུྃ་གིས་ཐབ་བསྐྱེད་ལ། །དེ་དབུས་རྃ་ལས་གྲུ་གསུམ་མེ། །ཨོཾ་ལས་པད་མ་ལ་གནས་པ། །རྃ་ལས་བྱུང་བའི་མེ་ལྷ་ནི། །སྐུ་མདོག་
དཀར་པོ་རྒྱན་དང་ལྡན། །འབར་བའི་ཕྲེང་བས་རབ་ཏུ་བརྒྱན། །གསུས་ཁྱིམ་ཆེ་ལ་ཕྲེང་བ་གཡོན། །གྷན་དྷེ་འཛིན་པའི་རྡོ་རྗེ་མེ། །རང་ལྷའི་རྣལ་འབྱོར་དང་ལྡན་པས། །ཐུགས་ཀའི་ས་བོན་འོད་ཟེར་གྱིས། །མེ་ལྷ་ཡེ་
ཤེས་སེམས་དཔའ་བཀུག །བཀུག་ཅིང་དབང་དུ་བྱ་བའོ། །དེ་ནས་དབང་ནི་བསྐུར་བ་དང་། །སྐུ་གསུང་ཐུགས་བྱིན་བརླབ་པའོ། །དེ་ནས་མཆོད་ཡོན་ཕུལ་ནས་ནི། །མཆོད་པ་ལྔས་ནི་རབ་མཆོད་དོ། །སྒེག་མོ་ལ་སོགས་

90-1-15a

མཆོད་པས་མཆོད། །ཨོཾ་ཨགྣ་ཡེ་ཧབ་བྱ་ཀ་བྱ་བ་ཧ་ན་ཡེ་ཧ་བྱ་ཏི་ཡ་ན་ཡེ་སྭཱ་ཧཱ། ཞེས་པས་བསྲེག་རྫས་རྣམས་འབུལ་བྱ། །དེ་ནས་འབུལ་བའི་རིམ་པ་ནི། །འབར་བའི་མེ་ལ་ཡམ་ཤིང་སྟེ། །དེ་ནས་མར་དང་དེ་འོག་ཏིལ། །
དེ་ནས་འབྲས་ཆན་ལ་སོགས་པའོ། །དེ་ནས་བསྟོད་དེ་ལས་བཅོལ་ལོ། །དེ་ནས་མེ་ཡི་དབུས་རང་གིས། །ལྷག་པའི་ལྷ་ཉིད་རིམ་པ་བཞིན། །དབང་བསྐུར་བ་དང་བསམ་པར་བྱ། །སྐུ་གསུང་ཐུགས་སུ་བྱིན་གྱིས་བརླབས། །དེ་ཡང་
མཆོད་ཡོན་ཞབས་བསིལ་ཕུལ། །མཆོད་པ་རྣམ་པ་ལྔ་དག་དང་། །སྒེག་མོ་ལ་སོགས་པ་རྣམས་དབུལ། །དེ་ནས་ཕྱག་ན་རྡོ་རྗེ་ནི། །གོས་སྔོན་ལྕེ་ལ་ཧཱུྃ་བསམས་ལ། །ཨོཾ་ཙཎ་ཌ་མ་ཧཱ་རོ་ཥ་ཎ་ཧཱུྃ་ཕཊ། ཤཱན་ཏིཾ་ཀུ་རུ་སྭཱ་ཧཱ་ཞེས་
སྔ་མའི་རིམ་པ་བཞིན་དུ་བྱ། །བསྲེགས་རྫས་རེ་རེ་ལ་བདུན་བདུན། །ཡང་ན་གསུམ་གསུམ་འབུལ་བར་བྱ། །བཟླས་མཐར་སྦྱིན་བསྲེགས་བྱ་བར་གཅེས། །དེ་ལ་མར་གྱི་སྦྱིན་བསྲེགས་དབུལ། །ཡང་ན་མ་གྲུགས་ནས་དག་དང་། །
ཡུངས་དཀར་མར་དང་སྦྱར་ལ་དབུལ། །སོ་བ་མར་དང་ཡུངས་ཀར་ལ། །སོགས་པས་ལས་ཀྱི་སྒྲིབ་པ་སྦྱང་། །དེ་ཕྱིར་ཉི་ཤུ་རྩ་གཅིག་གམ། །ཡང་ན་རྒྱ་རྩ་བརྒྱད་དུ་དབུལ། །དེ་ནས་མཆོད་ཡོན་དང་འཐོར་འཐུང་ཕུལ་ལ་བསྟོད་པར་
བྱའོ། །ཨོཾ་ཡེ་ཤེས་ཆེན་པོའི་ཁྱད་པ་ལས། །སྤྲུལ་པ་ཕྱག་ན་རྡོ་རྗེ་སྟེ། །མཐོན་མཐིང་སྐུ་འདྲ་འོད་ཟེར་འབར། །བདུད་འདུལ་ཁྲོ་གཏུམ་བརྗིད་པའི་ཞལ། །ཕྱག་གཡས་རྡོ་རྗེ་རྩེ་ལྔ་བསྣམས། །དྲིལ་བུས་གཡོན་གྱི་
དཀུར་བརྟེན་འགྱིང་། །སྐུ་ནི་རྒྱན་དང་ན་བཟས་བརྒྱན། །ཕྱག་བརྙན་བྱེ་བའི་ཚོགས་ཀྱིས་བསྐོར། །དེ་ལ་བསྟོད་དེ་ཕྱག་འཚལ་ལོ། །དེ་ནས་ཡང་མེ་ལྷ་སྔ་མ་བཞིན་དུ་མཆོད་ལ་བསྟོད་དོ། །དྲག་པོ་མཎ་ཌལ་གྲུ་གསུམ་ལ། །ཁྲུ་གང་ཚད་
ལས་ཕྱེད་བརྐོས་ཏེ། །ལྷོ་ཕྱོགས་ཟུར་བསྟན་གསུམ་ནི་དོར། །བདུད་རྩི་ལ་སོགས་ནག་པོར་བྱ། །དེ་དབུས་རྡོ་རྗེ་སྟེང་སྤངས་ཏེ། །བར་དུ་མེ་རི་རྩེ་མོ་འཕགས། །བུད་ཤིང་གནག་ཅིང་གདུག་པའི་ཤིང་། །ཐབ་ཀྱི་ཚད་ལས་ཟོར་མཐོ་ཙམ། །

90-1-15b

ཡངས་ཤིང་དེ་འཐུན་བཅུ་གཉིས་ཚད། །མཆོད་རྫས་ནག་པོ་འབའ་ཞིག་གོ། །བསྲེག་རྫས་མར་ནག་རུས་ཁྲག་ཤ ། སྐྱེ་ཚེ་ཤང་ཚེ་ཡུངས་དཀར་དང་། །དེ་ལ་སོགས་པའི་མཐུ་རྫས་དང་། །དེ་རྣམས་རྫས་ལ་གཟུགས་བརྙན་བྱ། །མཆོད་རྫས་
གཡས་ལ་བསྲེགས་རྫས་གཡོན། །བྱིན་གྱིས་བརླབ་ཅིང་གཞག་པར་བྱ། །དགང་གཟར་བླུགས་གཟར་གཞན་དང་མཐུན། །ཡང་ན་ལག་པ་དག་གིས་བྱ། །དེ་གཉིས་རྡོ་རྗེ་དྲིལ་བུ་ཡང་། །མདུན་ཉིད་དུ་ནི་གཞག་པར་བྱ། །ལས་ཀྱི་
བུམ་པས་ཐམས་ཅད་བསང་། །དུས་ནི་ནམ་ཕྱེད་ཉིན་ཕྱེད་བྱ། །ནག་པོ་རྒྱན་གོན་ལྷོ་ཕྱོགས་བལྟ། །གཡོན་བརྐྱང་འདུག་སྟེ་དྲག་ཏུ་བཟླས། །མཆེ་བ་བརྩིགས་ཤིང་ཁྲོ་གཉེར་བསྡུས། །དང་པོ་བསྙེན་པ་སྔོན་སོང་བས། །མེ་པྲ་བརྟག་ཅིང་
བགེགས་བཟློག་བྱ། །བཟང་ན་དེ་ནི་བྱ་མི་དགོས། །ཐབ་བསང་བྱ་ཞིང་བསྐྱེད་པ་དང་། །ཆོ་ག་གསུམ་མམ་སྐད་ཅིག་མས། །མེ་ལྷ་ནག་པོ་ཁྲོས་པ་བསྐྱེད། །ཡེ་ཤེས་མེ་ལྷ་སྤྱན་དྲངས་བསྟིམ། །གཉིས་སུ་མེད་པར་རྒྱས་བཏབ་ལ། །མེ་ལྷའི་སྔགས་
མཆོད་བཏགས་ལ་དབུལ། །དེ་ནས་བསྲེག་རྫས་དབུལ་བར་བྱ། །དེ་དབུལ་བ་ཡི་མན་ངག་ཀྱང་། །ཁྲོ་བོ་བདག་གི་ཆོ་འཕྲུལ་གྱིས། །གཟུགས་བརྙན་བཀུག་སྟིམ་བཏུབས་ཏེ་དབུལ། །ཡང་ན་རྫས་མཆོག་མཉེས་པ་ལས། །འོད་ཟེར་ཁྲོ་
བོས་བཀུག་ཅིང་བསྲེག །མན་ངག་དེ་ལ་ནན་ཏན་བྱ། །ཨོཾ་བཛྲ་ཀྲོ་དྷ་ཨག་ན་ཡེ་ཆེ་གེ་མོ་མཱ་ར་ཡ་ཕཊ། སྟོང་ངམ་བརྒྱ་འམ་ཉི་ཤུ་རྩ་གཅིག་གོ། །ཡང་ན་བསོད་ནམས་རིམ་པ་ཡིས། །བརྒྱ་དང་སྟོང་དང་ཁྲི་རུ་བྱ། །དེ་ལྟར་བྱས་ན་ལས་ཀུན་
འགྲུབ། །ཐ་མར་དགང་བླུགས་བསྟོད་བྱའོ། །དེ་ཡི་ཐུགས་ཀར་གོས་སྔོན་བསྐྱེད། །ཡེ་ཤེས་སེམས་དཔའ་སྤྱན་དྲངས་བསྟིམ། །རྒྱས་བཏབ་མཆོད་པ་གོང་བཞིན་དབུལ། །དེ་ནས་བསྲེགས་སྔགས་གོང་བཞིན་དབུལ། །ཨོཾ་བཛྲ་ཀྲོ་དྷ་ནཱི་
ལཱྃ་བ་ར་དྷ་ར་བཛྲ་པཱ་ཎི་རཱ་ཛྙ་པ་ཡ་ཏི་ཆེ་གེ་མོ་མཱ་ར་ཡ་ཧཱུྃ་ཕཊ། གོང་ན་མན་ངག་ཤེས་པར་བྱ། །དགང་བླུགས་ཕུལ་ལ་བསྟོད་པར་བྱ། །ལྕང་ལོ་ཅན་གྱི་ཕོ་བྲང་ནས། །གསང་བའི་བདག་པོ་གོས་སྔོན་ཅན། །སངས་རྒྱས་ཀུན་གྱི་སྤྲུལ་པ་པོ། །

90-1-16a

དབང་བསྐུར་མཆོག་ལ་ཕྱག་འཚལ་བསྟོད། །གདུག་ཅིང་གཏུམ་ལ་བརྗིད་པའི་སྐུ། །སྣ་ཚོགས་ལས་རྣམས་མཛད་པ་པོ། །ཐོགས་མེད་ཡིད་བཞིན་ནོར་བུའི་ཚུལ། །རྡོ་རྗེ་སྐུ་ལ་ཕྱག་འཚལ་བསྟོད། །དངོས་པོ་
ཐམས་ཅད་རྣམ་དག་ཀྱང་། །སྨོན་ལམ་སྟོབས་ཀྱིས་བྱུང་བའི་གསུང་། །ཚིག་དང་བྲལ་བའི་སྣ་ཚོགས་སྒྲ། །རྡོ་རྗེ་ནོར་བུ་ཁྱོད་ལ་བསྟོད། །དཔལ་ལྡན་རྡོ་རྗེ་གོས་སྔོན་ཅན། །འཁོར་ལོ་འབར་བ་ཕྱག་ན་བསྣམས། །ལྷ་རྣམས་
ཐབས་གྱིས་འདུལ་བར་མཛད། །ལྷའི་རྒྱལ་པོ་ཁྱོད་ལ་བསྟོད། །དཔལ་ལྡན་ཆེན་པོ་གོས་སྔོན་ཅན། །བྱ་ཁྱུང་འབར་བ་ཕྱག་ན་བསྣམས། །ཀླུ་རྣམས་ཐབས་ཀྱིས་འདུལ་བར་མཛད། །ཀླུ་འདུལ་གོས་སྔོན་ཁྱོད་ལ་བསྟོད། །
དཔལ་ལྡན་ཆེན་པོ་གོས་སྔོན་ཅན། །དབྱུག་ཏོ་འབར་བ་ཕྱག་ན་བསྣམས། །གནོད་སྦྱིན་ཐམས་ཅད་འདུལ་མཛད་ལ། །གནོད་སྦྱིན་གཙོ་ལ་ཕྱག་འཚལ་བསྟོད། །དྲག་པོར་གྱུར་པ་འདུལ་བའི་ཕྱིར། །སྡིག་འཛུབ་
རྩེ་ལ་འོད་བྱུང་བས། །གདུག་པ་ཐམས་ཅད་ཀུན་འདུལ་བ། །ཐོགས་མེད་རྡོ་རྗེ་ཁྱོད་ལ་བསྟོད། །ཕྲིན་ལས་བཅོལ་ཞིང་གཤེགས་སུ་གསོལ། །ཏིང་འཛིན་བསྡུས་ཏེ་ལྟ་བ་གསོ། །རྫས་རྣམས་ཐམས་ཅད་
བསྡུས་ནས་ནི། །མེའི་ལྷ་ལ་དབུལ་ཞིང་བསྟོད། །ཡི་གེ་བརྒྱ་པས་ལྷག་ཆད་བཀང་། །ཏིང་འཛིན་བསྡུས་ཏེ་སྤྱོད་ལམ་བྱ། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་སྦྱིན་བསྲེགས་གི་ཆོ་གའི་ལེའུ་སྟེ་དགུ་པའོ།། །།
ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །གང་དག་ཀླུ་ཡིས་ཟིན་པ་ལ། །ཐབས་དེ་གང་ལགས་གསུང་དུ་གསོལ། །ཀུན་མཁྱེན་གཙོ་བོས་བཀའ་སྩལ་པ། །ང་ཡི་སྦྱོར་བ་འདི་ཉིད་ལ། །
བརྟེན་ནས་ཀླུ་རྣམས་གདུལ་བར་བྱ། །ནུབ་ཕྱོགས་དྲང་པོའི་ས་དག་ལ། །ཟབས་སུ་མི་གང་བརྐོས་བྱས་ལ། །དེ་སྟེངས་སྔར་ནི་བུ་མོ་གང་། །སྟོན་མོ་བཅུ་གཉིས་བྱས་པ་ཡི། །རིགས་ལྡན་ཁ་དོག་སྔོན་པོ་འམ། །

90-1-16b

རིགས་བཞི་ཡང་དག་ལྡན་པ་ཡིས། །འོ་མས་ཁྲུས་བྱས་ཐིག་ལེ་བྱུག །གོས་དག་དམར་པོ་བསྐོན་བྱས་ལ། །ཆོ་ག་རབ་འབྲིང་ཐ་མ་ཡི། །དབང་སྡུད་ཁ་ལ་མེ་འབར་བའི། །བུ་མོ་ལ་ནི་ཡོངས་སུ་བསྔགས། །
རྒྱན་ཆ་ལྔ་ཡིས་རྒྱན་བཏགས་ལ། །རྐང་པ་བརྒྱུད་མར་ལོང་བཏགས་ལ། །ལག་པ་བརྒྱུད་མར་དབང་བསྒྱུར་དུ། །ཡང་དག་གནས་པས་ཕྱག་རྒྱ་བཅས། །ཀླུ་ཡི་མིང་མཚན་གང་ཡིན་པའི། །དངོས་པོ་གང་
ལ་རབ་སྦྱར་ནས། །གཙོ་བོ་ཀུན་འབྱུང་མཆོག་ཉིད་ལས། །འཁོར་རྣམས་བརྒྱད་ཀྱིས་ངེས་པར་བསྐོར། །ནུབ་དུ་དངོས་པོ་རྟེན་བྱེད་པ། །གྲུ་བཞི་པ་དག་རབ་ཏུ་གདགས། །དེ་ཉིད་ས་རུ་བདག་ཐོབ་སྟེ། །དེ་སྟེང་
ཅི་ནུས་སྦྱོར་བ་བསྒྲུབ། །དེ་ཐོབ་རབ་ཏུ་བྲལ་བ་ལས། །དེ་ཡི་ཕྱོགས་སུ་མི་ལྟ་ཞིང་། །དྲག་པོ་ཆེན་པོའི་སྔགས་བཟླས་བྱ། །དེ་ཉིད་བདག་གིས་མཐོང་བ་ལས། །ལེགས་སོ་སྙམ་པའི་ཚིགས་བཅད་བརྗོད། །དེ་ནས་
ས་ཕྱོགས་རབ་དབེན་པར། །བདག་གིས་སྦྱོར་བ་ལེགས་བརྩམ་བྱ། །རྒྱར་ནི་ཁྲུ་དོ་ངེས་པ་ལས། །འཕང་དུ་ཆག་གང་རྣམ་པར་བྱ། །རམས་དང་འཐིང་ཤུན་དྲི་ཆུ་སོགས། །ཡོངས་སུ་སྦྱར་བ་བྱས་པ་དང་། །བ་ཡི་
རྣམ་ལྔ་ལ་སོགས་པས། །ཡོངས་སུ་བྱུག་པར་བྱས་པ་ལ། །སྣ་ཚོགས་པད་མ་བཅུ་དྲུག་པ། །སྙིང་པོ་ཟེ་མདབ་རྒྱས་པར་བྱ། །དེ་སྟེང་ཚད་ཆུང་ཆུ་སྐྱེས་ཉིད། །ཕྱོགས་རྣམས་ལ་ནི་རྣམ་པར་དགོད། །དེ་སྟེངས་
གནས་པ་གང་ཡིན་པ། །ལྷ་ཚོགས་གཟུགས་སུ་རྣམ་པར་དགོད། །ཕྱི་རོལ་འབར་བའི་ཕྲེང་བ་ཡིས། །ཡང་དག་པར་ནི་བསྐོར་བར་བྱ། །སྔོན་དུ་སོར་བརྐྱང་གང་བསྐོར་ནི། །མདོག་དམར་ཀུན་ནས་ཟླུམ་
པར་ཕྱེ། །དེ་སྟེངས་ཀླུ་རིགས་དྲུག་པོ་དང་། །ཉ་དང་སྦལ་པ་ལྕོང་མོ་དང་། །སྦྲུལ་དང་རྩངས་པ་ཆུ་སྲིན་དང་། །མི་དང་རུ་སྦལ་བ་ལང་དང་། །བྱི་ལ་ནོར་བུ་རྒྱ་འབུད་རྣམས། །གཙོ་བོའི་ཆ་ཡིས་བཟུང་བྱས་ནས། །

90-1-17a

ཤུལ་དུ་དྲག་པར་དྲངས་བྱས་ལ། །མ་ཏུ་ལུང་གའི་ཕྱེ་མ་ཡིས། །བཞི་གང་རིགས་ཐུན་དངོས་པོ་ནི། །རབ་ཏུ་གསལ་བར་བྱ་བ་ཡིན། །མཚན་མོ་དྲག་པོའི་གཏོར་མ་ལ། །སྣང་བ་བཞི་པར་ངེས་
པར་བྱ། །བཟླས་པའི་སྔགས་ནི་རབ་འབར་བས། །དྲག་པོའི་ཕྲེང་བ་བཟུངས་བྱས་ལ། །གུར་དག་སྔོན་པོས་ཕུབ་བྱས་ལ། །ཇི་སྲིད་དེ་ཉིད་མ་རྫོགས་པར། །བདག་གིས་བལྟ་བར་མི་བྱ་ཞིང་། །དྲག་པོ་ཉིད་ལ་མངོན་པར་བཟླས། །
དེ་ཡི་ཕྱི་རིམ་དག་ལ་ནི། །ཤིང་ཆེན་སྣ་ཚོགས་འབྱོར་པ་དང་། །སྔགས་བཟླས་སྲད་བུ་སྔོན་པོ་ཡིས། །དྲ་བར་འབྲེལ་པར་ཡོངས་སུ་བྲི། །ཕྱི་རིམ་གདུག་པའི་ཚེར་མ་ཡིས། །ཡོངས་སུ་འཁོར་བར་བསྐོར་བར་བྱ། །མཆོད་
པ་རྣམ་པ་ལྔ་དག་གིས། །དུས་གཉིས་དག་ཏུ་ངེས་པར་མཆོད། །སྙིང་པོ་ཡོངས་སུ་རྫོགས་པ་དང་། །མཁའ་ལྡིང་དྲག་པོའི་སྔགས་བཟླས་བྱ། །སྟེང་དུ་གདུག་པའི་ཚེར་མ་ཡིས། །ཡང་དག་པར་ནི་དགབ་པར་བྱ། །མཐའ་རུ་
ལྷ་ཚོགས་ཐམས་ཅད་ཀྱིས། །སྙིང་པོ་ཀུན་ལ་བརྒྱ་རྩ་བརྒྱད། །ཐིམ་པར་ཡོངས་སུ་བཟླས་པར་བྱ། །དེ་འོག་གྲངས་སུ་ངེས་པ་ཉིད། །རབ་འབྲིང་ཐ་མར་ཡང་དག་ལྡན། །བདག་ཉིད་གཙོ་བོའི་ཆ་ལུགས་སུ། །སྔགས་དང་ཕྱག་
རྒྱ་ཡང་དག་བསྒོ། །བཟླས་པའི་གྲངས་སུ་རྫོགས་བྱས་ལ། །ནད་པ་དེར་ནི་བཀུག་བྱས་ལ། །བྱང་ཕྱོགས་དག་ཏུ་གནས་པར་བྱ། །དངུལ་གྱི་རྫིང་བུ་ཉིད་དུ་ཡང་། །བྲང་གི་ས་བོན་དཀར་པོ་ཡིས། །ཡོངས་སུ་གང་བར་
བྱ་བ་ཡིན། །རྫོགས་པའི་སྒྲ་ལྡན་བཅུ་དྲུག་པས། །ལྕགས་ཀྱི་སྐམ་པ་ཀ་བི་ཙའི། །ཤིང་དག་སོར་ནི་བཅུ་གཉིས་པ། །ཡོངས་སུ་གཅད་པར་བྱ་བ་ལས། །སྔགས་ཀྱིས་མངོན་པར་བཟླས་བྱ་སྟེ། དེ་ཉིད་དག་ཏུ་སྦྱང་
བར་བྱ། །རྨ་བྱའི་མདོངས་ལ་རབ་བསྔགས་ནས། །པད་མའི་ཤིང་ལས་ཤིང་དང་ནིས། །མདངས་སུ་ཡང་དག་བསམ་པར་བྱ། །སེང་ལྡེང་ཕུར་པ་སོར་བཅུ་གཉིས། །ཁྲོ་བོའི་སྔགས་ཀྱིས་མངོན་པར་བསྔགས། །དེ་ནས་

90-1-17b

སྔགས་ཀྱིས་རབ་བསྔགས་ཏེ། །ནད་པ་ཉིད་ལ་བྱབ་བྱ་སྟེ། །རིགས་དྲུག་པོ་ལ་ངེས་པར་གདབ། །དེ་ནས་དེ་ཉིད་སྙིང་ག་ལ། །ཐིག་ལེ་དྲུག་ཏུ་ངེས་པར་བྲི། །དེ་སྟེང་རིགས་དྲུག་བསམ་བྱས་ལ། །གཡོན་ན་གནས་པའི་ང་
རྒྱལ་མཆོག །སྔགས་ཀྱིས་མངོན་པར་བསྐུལ་བྱས་པས། །དྲག་པོའི་ཤུགས་ཀྱིས་རབ་སོང་སྟེ། །རྔམ་པའི་ཞལ་དུ་ངེས་པར་བསྟབས། །དེ་ལྟར་བསམ་པ་རབ་བརྟན་པས། །ཡོངས་སུ་བསྒོམ་པར་བྱ་བ་ཡིན། །དེ་ཡིས་
དེ་ལ་གནོད་བྱེད་པ། །སྐད་ཅིག་ཙམ་ལས་མི་གནས་ཤིང་། །མྱུར་བར་སྐྲག་པར་ཕྱོགས་བཅུར་འབྲོས། །ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎ་ཌ་ལི་ནི་དཱ་ཏ་ཡཾ་པྲ་ཏི་ཧཱུྃ་ཕཊ། ཨོཾ་བན་དྷ་བན་དྷ་ནཱ་གཱ་ནཱྃ་ཕཊ། ཨོཾ་ག་རུ་ཌ་ག་རུ་ཌ་པུ་ཏྲ་བྷཀྵ་ནཱ་གཱ་
ནཱྃ་ཧཱུྃ་ཕཊ། ཨོཾ་ནཱི་ལཱྃ་བ་ས་ན་སརྦ་ཨ་ལ་ཀྲྀ་ཏྭ་མེ་བཛྲ་པཱ་ཎི་བྷ་བ་ཏེ་ཧཱུྃ་ཕཊ། ཨོཾ་བྷ་ཀྵ་མ་ག་ལེན་སརྦ་བྱ་དྷ་ཕེ་ཏ་ཡྃ་ཧཱུྃ་ཕཊ། ཨོཾ་བྷཀྵི་ཙ་བི་ཤ་ནཱ་ཡ་ཧཱུྃ་ཕཊ། ཨོཾ་སརྦ་ནཱ་གཱ་ནཱྃ་ཨཱ་ཀ་རཱ་ཡཱ་བི་ཤ་ཡཱ་མེ་ཏོ་ཤ་ཡཱ་ཧཱུྃ་ཕཊ། ཨོཾ་མ་ཧཱ་རཽ་ཏྲ་ག་རུ་ཌ་གཙྪ་
གྲྀཧྣ་གྲྀཧྣ་སརྦ་ནཱ་གཱ་ནཱྃ་ཕཊ། གོང་མའི་ཕུར་བ་གང་ཡིན་པས། །སྔགས་འདི་བརྗོད་པས་གཏབ་པར་པ། །ཨོཾ་བཛྲ་ཀཱི་ལཱ་ཡ། སརྦ་ནཱ་ག་བ་དྷྭིན་ས་ན་ཧཱུྃ་ཕཊ། བཞིན་ནི་རབ་ཏུ་འབར་བ་དང་། །ཞེ་སྡང་རྡོ་རྗེ་ཏིང་འཛིན་གྱིས། །འབྲུག་
སྒྲ་ལྡན་པས་ཡོངས་སུ་གཏུབ། །དེ་ནས་དྲག་པོའི་སྔགས་ཀྱིས་སུ། །མཚན་མ་ངེས་པར་གདབ་པར་བྱ། །དེ་ཉིད་དག་ལ་གང་བྱུང་བ། །དེ་ལ་ཤེས་རབ་ཅན་གྱིས་དཔྱད། །རྟགས་སུ་ལྡན་པ་གང་ཡིན་པ། །སྐུ་རྣམས་གཡོས་པ་ཉིད་དང་ནི། །
གང་གིས་གཟུགས་རྣམས་གཡོས་གྱུར་པ། །རྟགས་སུ་ངེས་པར་གྱུར་པ་ཡིན། །དེ་ཉིད་འདར་བ་གང་ཡིན་པ། །དེ་ཡང་རྟགས་སུ་ངེས་པ་ཡིན། །དང་པོ་རབ་ཏུ་འབྱོར་བ་ལ། །ནང་གི་བགེགས་ཉིད་བསལ་བ་ཡིས། །ཕྱི་ནས་
ཕྱི་ཡི་ནད་བསལ་བ། །སྨན་ལ་སོགས་པའི་སྦྱོར་བ་ཡིས། །མཁས་པས་ཕྱི་ཡི་ནད་བསལ་ཏེ། །བརྒྱ་ཀ་ལ་སོགས་ལྔ་རྣམས་དང་། །མར་ནག་ཉིད་ལ་ངེས་བཏབ་ལ། །ཞག་གྲངས་བདུན་དུ་མནན་པ་ཡིས། །ལྦུ་ཆུང་ལེགས་

90-1-18a

པར་ཁྱབ་པར་སྣང་། །སུག་པ་ལ་སོགས་སྤོང་སྦྱར་བས། །གོང་དུ་སྔགས་ཀྱི་བསྙེན་པར་གནས། །འོད་ཟེར་དཀར་པོ་ཡོངས་རྟོགས་པའི། །ཉི་མ་ཉིད་ལ་ཁྲུས་བྱས་ཏེ། །དྲི་མ་དག་པར་བསམས་པ་ལགས། །དྲུག་སྦྱང་
ངེས་པར་བསྐུལ་བར་བྱ། །དེ་འོག་མཆོག་གི་སྨན་ཉིད་གང་། །གྲགས་ལྡན་ཆེན་པོ་སྲང་གཅིག་ཉིད། །ལེགས་པར་བསྐོལ་བས་ཁ་ཉིད་དུ། །ཞག་དག་ངེས་པར་ཆགས་པར་འགྱུར། །དེ་ཉིད་ལུས་ལ་བསྐུ་བྱ་ཞིང་། །ཚིགས་མ་
ཞོ་གསུམ་བཟའ་བར་བྱ། །སྙིང་པོ་གསུམ་ལ་ཤར་བཙོས་ཏེ། །ཁུ་བ་ངེས་པར་བཏུང་བར་བྱ། །གནམ་སྒྲོ་ནག་པོ་ཟུར་གསུམ་པ། །རྩེ་མོ་ཤིན་ཏུ་རྣོ་བ་ལ། །རི་མོ་སྣ་ཚོགས་འདུག་འགྱུར་བ། །བརྒྱ་དག་ཤིན་ཏུ་འདུས་འགྱུར་དེ། །
བཅུ་དྲུག་ཆ་རུ་ངེས་པར་བསྐོལ། །དེ་ཡི་ལུས་ལ་བསྐུས་བྱས་ཏེ། །ཁ་རུ་ངེས་པར་བཏུང་བར་བྱ། །དེ་ཡིས་ཀུན་ཀྱང་སྐྱུར་འགྱུར་ཏེ། །ནད་ནི་ངེས་པར་ཕྱུང་བར་འགྱུར། །དྲི་ཞིམ་སྣ་ཚོགས་སྦྱར་བ་ཡི། །ཆང་དུ་ཞག་བཅུ་ངེས་
པར་སྤང་། །དེ་ནས་སྔོན་པོར་གྱུར་པ་དང་། །ལན་ཚྭ་ཕུལ་གང་དེས་བཏབ་སྟེ། །དེ་བཏབ་ཞག་བཞི་སྤང་བྱས་ནས། །བཅུ་བཞི་པ་ལ་ལོ་མར་ཉིད། །ཕུལ་དོ་དང་ནི་བསྲེས་བྱས་ལ། །ལྦུ་བ་དངས་པར་ཡང་དག་བསྐོལ། །དེ་ཡིས་ལུས་
ལ་བསྐུས་པ་ན། །སུམ་གཉིས་ཁ་རུ་ངེས་པར་བླུད། །སྦྱོར་བ་དེ་ལ་རབ་བརྟེན་ན། །གདོན་མི་ཟ་བར་འཚོ་བར་འགྱུར། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་ཀླུ་གདུག་མདངས་འཕྲོག་གི་གདོན་འདུལ་བའི་ལེའུ་སྟེ་བཅུ་པའོ།། །། 
དེ་ནས་ལག་ན་རྡོ་རྗེ་ཡིས། །འཇིག་རྟེན་མགོན་ལ་འདི་སྐད་གསོལ། །གང་ཞིག་ཚངས་པས་ཟིན་པ་ལ། །ཐབས་དེ་གང་ལགས་བསྟན་དུ་གསོལ། །མགོན་པོ་མཆོག་གིས་བཀའ་སྩལ་པ། །ཚངས་པ་སྲིན་པོའི་གདོན་
ཞེས་བྱ། །ཤིན་ཏུ་གདུལ་བར་དཀའ་བ་སྟེ། །དེ་ལ་དྲག་པོར་མ་བྱས་ན། །ཐ་མ་མལ་ཡིས་འགྲོ་བ་མིན། །བྲམ་ཟེ་སྔགས་པ་མི་བཟད་པས། །ཡང་ན་དྲག་པོའི་སྒྲ་ལྡན་པས། །སྟོན་མོ་བཅུ་བཞི་བྱས་པ་ལ། །

90-1-18b

ཞག་གསུམ་བར་དུ་དཀར་གསུམ་ཟས། །རྒྱུན་མི་འཆད་པར་སྦྱིན་པར་བྱ། །རིགས་བྱེད་སྔགས་སུ་ལྡན་པ་ཉིད། །དེ་ལ་བསླབ་པར་བྱ་བ་ཉིད། །ཚངས་པའི་སྐུད་པས་སྟོད་དཀྲིས་ལ། །གོས་དག་དཀར་པོས་
ཡོངས་སུ་བརྒྱན། །སྤྱི་བོར་ཐོར་ཚུགས་བཅིངས་བྱས་ལ། །ལག་གཡས་བཞི་པ་དེ་ཉིད་ལ། །བཀྲ་ཤིས་དངོས་པོས་ཡོངས་སུ་བསྡམ། །ཤར་ཕྱོགས་དག་དུ་སོང་བ་ལས། །ཤིང་ཆེན་རྩ་ནས་ཁྲུ་གང་ཉིད། །
འོག་ཏུ་བསྐོས་པས་ས་བླང་བྱ། །དེ་རྟེན་རས་ཡུག་དཀར་པོ་ཡིས། །ཐོབ་པས་ཕྱོགས་སུ་མི་བལྟ་ཞིང་། །ཤར་ཕྱོགས་ཁྲོ་བོའི་སྙིང་པོ་བཟླས། །དེ་ནས་དེ་ཉིད་མཐོང་བ་དང་། །ཧ་ལ་ཧ་ལའི་སྒྲ་ཡང་བརྗོད། །
བ་ཡི་རྣམ་ལྔ་ཉིད་དང་ནི། །རམས་དང་མཐིང་ཤུན་དྲི་ཆུ་ལ། །སྦྱར་བས་ཁྲུ་གང་མཐོ་གང་གི། །དཀྱིལ་འཁོར་ཟུར་ལྔར་ལྡན་པར་བྱ། །དཀྱིལ་གྱི་ལྟེ་བ་ཉིད་ལ་ནི། །ལྷ་ཡི་ཚོགས་རྣམས་ངེས་པར་དགོད། །
ཟུར་ལྔ་པ་དང་འདབ་འབྱར་དུ། །ཟུར་གསུམ་པ་དང་སོར་བརྒྱད་པས། །ཡོངས་སུ་ཟབས་སུ་བྲུ་བར་བྱ། །འོག་ཏུ་སྨན་གྱི་ཕྱེ་མ་ཡིས། །ལེགས་པར་བདལ་བར་བྱ་བ་ཡིན། །དེ་དང་དེ་ཉིད་གཟུགས་བྱས་ལ། །སྤྲ་ཚིལ་ལས་
སྦྱར་སོར་བཅུའི་ཚད། །དྲག་པོ་རིད་བར་གྱུར་པ་ལ། །ལག་གཉིས་སྦར་བ་གདིངས་པར་བྱ། །སྐྱེར་བའི་ཕུར་པ་སོར་བཞི་པས། །མཐའ་མ་ཡོངས་སུ་བསྐོར་བར་བྱ། །སྟེང་ཡང་ཕུར་པ་ཡུངས་ཀར་ལ། །སྔགས་བཟླས་
པ་ཡིས་ཡོངས་སུ་བསྣན། །གཏོར་མ་སྟོབས་རྣམས་སྐྱེད་བྱེད་དང་། །མཆོད་པ་ལྔ་ཡིས་དུས་གཉིས་སུ། །ཡང་དག་པར་ནི་མཆོད་པར་བྱ། །རང་ཉིད་སྔ་མའི་ཚུལ་གནས་ལ། །ཡིད་ཆེས་ཕྲེང་བ་རབ་བཟུང་ནས། །དྲག་པོའི་རིགས་ལ་རྩ་
བའི་སྔགས། །ཚད་དུ་ཕྱིན་པར་ཡོངས་སུ་བཟླས། །དེ་མཐའི་སྙིང་པོ་མ་ལུས་པ། །བརྒྱ་རྩ་བརྒྱད་དག་བཟླས་པར་བྱ། །དེ་ཡི་མཐའ་རུ་བཟླས་བྱ་བ། །དེ་ཡི་སྲོག་སྙིང་ངེས་པར་བཟླས། །སྐྱེར་པའི་ཚེར་མ་རབ་སྤངས་ལ། །

90-1-19a

དཀྱིལ་འཁོར་མཐའ་རུ་གནས་པར་བྱ། །དེ་ནས་མགུགས་པའི་བསྔགས་བཟླས་བྱ། །ཚད་དུ་ངེས་པར་ཐིམ་བྱས་ལ། །དེ་ཉིད་འོངས་པར་མ་གྱུར་ན། །གུ་གུལ་ནག་པོའི་དུད་པ་ཡིས། །དེ་བཀུག་སྔགས་ཀྱིས་མངོན་
པར་བཟླས། །ལྕགས་ཀྱུའི་ཕྱག་རྒྱ་བཅས་པ་ལས། །ཡོངས་སུ་དགུག་པར་བྱ་བ་ཡིན། །དེ་ནས་སྔགས་པས་ནད་པ་ཉིད། །མདུན་དུ་མངོན་པར་བཀུག་བྱས་ལ། །སྔགས་ཆུས་ངེས་པར་གཏོར་བར་བྱ། །དེ་ནས་བསྒྲུབ་བྱ་འོངས་
པ་ན། །གཟུགས་དེ་འགྱུར་བར་གྱུར་པ་འམ། །ཡང་ན་འགྱེལ་བར་གྱུར་པ་ཡིན། །དེ་ནས་བདག་གིས་བདེན་པ་དང་། །ཞི་བའི་ཚིག་གིས་གདབ་པར་བྱ། །གལ་ཏེ་སོང་བར་གྱུར་པ་ན། །བདག་གིས་སྙིང་ལས་ཆུང་ངུ་ཡིན། །
འོན་ཏེ་འགྲོ་བར་མི་འགྱུར་ན། །བདག་གིས་སྦྱོར་བ་འདི་བརྩམ་བྱ། །སྐུད་པ་རྣམ་ལྔར་ལྡན་པ་ལ། །ཁྲོ་བོའི་སྔགས་ཀྱིས་རབ་བསྔགས་ཏེ། །ཞགས་མིག་དམ་པོས་ནད་པ་བཅིངས། །ལྕགས་ཀྱུས་སྙིང་ནས་དྲངས་བྱས་ལ། །
གཡོན་དུ་རྡོ་རྗེ་བཟུང་བྱས་ནས། །གཡས་པས་ཡིད་ཆེས་བཟུང་བྱས་ཏེ། །ལུས་ངག་ཡིད་གསུམ་རབ་དྲག་པས། །སྔགས་ཚོགས་ཡོངས་སུ་བཟླས་པར་བྱ། །ཕྱག་རྒྱ་ལྔ་ཡིས་བསྡམས་བྱས་ལ། །དེ་ཉིད་ལྔ་ནི་
ཡོངས་སུ་དབབ། །དེ་ནས་སྐྱེར་པའི་བམ་པོ་ལ། །གུ་གུལ་ཆུ་ཡིས་བཏབ་བྱས་ཏེ། །ཕུང་བར་བྱ་ཕྱིར་དེ་ཉིད་བསྲེག །དུག་དང་ཕུར་བུ་སྐྱེ་ཚེ་དང་། །མདོག་བཟང་ཡུངས་ཀར་ཝ་ཏིའི་ཆུས། །ཡོངས་སུ་
སྔགས་བཟླས་བསྲེག་པར་བྱ། །གསུང་དེ་བདག་ཉིད་འབར་བ་ཡིས། །འཁོར་ལོ་ལ་ནི་ཡང་དག་མཆོད། །དེ་ནས་ལྕགས་གུར་ནག་པོ་ཡིས། །གསང་བའི་དོན་དུ་ཁ་གདབ་བྱ། །ཨོཾ་བྷུར་བྷུ་ཏ་སཱ་བུ་བས་སྭཱ་ཧཱ། 
ས་མ་ན་ཨ་ཀ་སེ་མེ་ཀར་ཏྃ། བྷུ་ཡུ་བྷུ་ཏ་བྲཧྨ་ནི་ཀ་ཡ་ཡྃ་ས་བ་ར་བྷུ་ཏ་སྭཱ་ཧཱ། ཨོཾ་ཏི་ལི་ཏི་ལ་བཛྲ་ཤ་ར་ཤ་ར་ཧཱུྃ་ཕཊ། ཨོཾ་བྲཧྨ་རཀྵ་གྷ་ཡ་ཧྲི་ད་ཡ་ཀ་ར་དི་ཙྪེ་དི་ཡ་ཕཊ། ཨོཾ་ཨཱ་ཀར་ཤ་ཡ་ཨཱ་ཀར་ཥ་ཡ་ག་ཏ་ཡ་ཧཱུྃ་ཕཊ། 

90-1-19b

ཨོཾ་ཨ་མྲྀ་ཏ་སིད་དྷ་ཧ་ར་ཧ་ར་བི་ཤོ་དྷ་ཡ་བྃ་ཧཱུྃ། ཨོཾ་བན་དྷ་ནཱྃ་དུ་ཥ་ག་ཡ་ཧཱུྃ། ཨོཾ་བཛྲ་ཀྵོ་བྷ་ཧཱུྃ། ཨོཾ་ཏ་ར་ཀྵོ་བྷ་ཧཱུྃ། ཨོཾ་ཨ་ཏྲ་ཀྵོ་བྷ་ཧཱུྃ། ཨོཾ་བྲཧྨ་ཨཀྵ་གྲ་ཧཱ་ཡ། ད་ཧ་ཡ་མཱ་ར་ཡཱ་ཙྪིན་ད་ཡ་ཨ་བི་ཙཱ་ར་ཡ་བཽ་ཥ་བ་དེ་ཕཊ་ཕཊ། 
དེས་བསྲེགས་བདག་གི་ལུས་ངག་ནི། །ཚིག་པས་དེ་ལ་འགྱོད་པས་ངག །བདག་གིས་ངེས་པར་བརྗོད་པར་བྱ། །དེ་ཡིས་དེ་ཉིད་ལུས་ལ་སོགས། །གདོན་དང་བྲལ་བ་ཞི་བར་འགྱུར། །དེ་ནས་ཐལ་བས་ནད་པ་ལ། །ལུས་ལ་བསྐུས་
ནས་བསྲུང་བ་ཡི། །འཁོར་ལོ་འདི་ལྟར་གདགས་པར་བྱ། །སྐུད་པ་སྔོན་པོ་གང་ཡིན་པ། །བུ་མོ་ཕྱུག་ཅིང་རིགས་བཟང་བ། །མཛེས་པ་བཅྭ་བརྒྱད་ལོན་པ་ལ། །དེ་ཡི་གོང་འོག་གཉིས་པ་ལ། །འཁལ་དུ་བཅུག་པས་འཇུར་བ་མེད། །
རྡུལ་གྱི་བར་ནི་བཏོན་བྱས་ནས། །ལྷས་མ་ལེགས་པར་བླང་པ་ཡིས། །བདེ་བའི་ལུས་ལ་ངེས་པར་གདགས། །དེས་ནི་སྐྱེ་བ་ཐམས་ཅད་དུ། །བསྲུང་བ་ལེགས་པར་གནས་པ་ཡིན། །ཁམས་གསུམ་རྣམ་རྒྱལ་འབར་བ་ཡི། །
བུམ་པ་བཟང་པོ་ཡོངས་སུ་བཅའ། །སྔགས་ཀྱིས་ཡོངས་སུ་བརྒྱན་པར་བྱ། །ཕུར་པ་རྡོ་རྗེ་ཞགས་པ་དང་། །ཐོ་བས་དབང་བསྐུར་རིམ་པར་བྱ། །དེ་ནས་མཆོད་པ་ལྔ་དག་གིས། །མཆོད་པ་ལུས་ལ་རྒྱས་པར་མཆོད། །ཡང་དག་
གྲུབ་པ་གང་ཡིན་པ། །ཕྱག་རྒྱ་བཅས་པས་སྔགས་པ་ཡིན། །སངས་རྒྱས་བྱང་ཆུབ་སེམས་དཔའ་དང་། །བླ་མ་རྡོ་རྗེ་འཛིན་པ་ལ། །གུས་པ་ཡིས་ནི་སངས་རྒྱས་བདེ། །མཆོད་པ་རབ་ཏུ་རྒྱས་པ་ལ། །སྔོན་དུ་བསྙེན་པས་ཡོངས་སུ་
བསྒྲུབ། །ཁམས་གསུམ་རྣམ་རྒྱལ་ཁྲོ་བོ་ལ། །བསྒྲུབ་པའི་ཐབས་ནི་ཡང་དག་བཤད། །གོང་གི་ཆ་བྱད་དེ་ཉིད་ལ། །དུར་ཁྲོད་དག་ཏུ་སོང་བྱས་ལ། །མི་ཡི་ཐལ་བ་གང་ཡིན་པས། །བདག་གི་ལུས་ལ་ཁྱབ་པར་བྱུག །གཡོན་དུ་
ཐོད་པ་ཐོགས་བྱས་ལ། །གཡས་སུ་རྡོ་རྗེ་ཐོགས་བྱས་ཏེ། །ཡིད་ཆེས་དཀར་པོའི་ཕྲེང་བ་ལ། །དྲག་པོའི་བཟླས་པ་མང་དུ་བྱ། །དེ་ཡི་ལོངས་སྤྱོད་བཟང་ཟ་ཞིང་། །སྟགས་གི་ལྤགས་པས་སྨད་དཀྲིས་བྱ། །དོན་དང་ལྡན་པའི་སྙིང་པོ་བསམ། །

90-1-20a

ཁྲག་གིས་ངོ་ཡང་བསྐུ་བྱས་ལ། །ནག་པོར་གཏོགས་པའི་འཕོ་བ་བརྒྱད། །སོག་པའི་མིང་ལ་ཞུགས་བྱས་ལ། །སྐར་མ་དག་ལ་ངེས་པར་བསྒོམ། །ཆང་འདུ་བ་ལ་གནས་བཅས་ལ། །ཤེས་རབ་ཟུང་དུ་ལྡན་པ་ཡིས། །སྐར་མ་
ཉིད་ལ་མཉམ་སྦྱར་ལ། །བརྒྱུད་པ་ཡིས་ནི་སྔགས་བཟླས་བྱ། །ཞག་གྲངས་བརྒྱ་རྩ་བརྒྱད་པ་ཡིས། །ཡང་དག་པ་རུ་བསྒྲུབ་པར་བྱ། །དེ་ནས་ཞག་གྲངས་ཐིམ་པར་བྱ། །མཐའ་རུ་མཚན་མོ་ཐོག་ཐག་པར། །སྔགས་དག་ངེས་པར་
བཟླས་པར་བྱ། །དེ་ནས་སྐེ་ཚེ་ཡུངས་ཀར་དང་། །ཁྲག་དང་སྦྲང་རྩི་སྦྱར་བ་ཡིས། །སྦྱིན་བསྲེག་སྟོང་དུ་ཐིམ་བྱས་ལ། །ཀ་ར་བི་རའི་ལྕུག་མ་ལ། །ཙན་དན་དཀར་པོའི་ཆུས་བསྐུས་ཏེ། །མེ་ཏོག་ཕྲེང་བ་བཏགས་པ་ཡིས། །ལག་པ་གཡས་
སུ་ཐོགས་བྱས་ཏེ། །ཡིད་ཆེས་སྤུ་ལ་ཐག་པ་ཡིས། །ཡང་དག་པ་རུ་བཀལ་ནས་ནི། །བདག་གི་སྤྱི་བོར་བཅིངས་བྱས་ཏེ། །དེ་ནས་གྲོང་ཁྱེར་རྒྱུས་པ་ན། །ཀུན་གྱིས་ཕྱག་བྱེད་མཆོད་པར་བྱེད། །འཇིག་རྟེན་ཀུན་གྱིས་ཕྱག་བྱེད་ཅིང་། །སྙིང་དུ་
སྡུག་པར་ངེས་པ་ཡིན། །མཁའ་འགྲོ་མ་སོགས་ཕྲ་མེན་མས། །བདག་ལ་ལུང་ཡང་ངེས་པར་སྟོན། །སྡུག་བསྔལ་རྟག་ཏུ་མི་འབྱུང་ཞིང་། །ལྷ་མིན་ལ་སོགས་གདུག་པ་ཡིས། །དེ་ཡི་ཕུང་པོར་མཐོང་བ་ཡིན། །བདག་ལ་སྡིགས་པ་མང་
པོ་འཇུག །དེ་ལ་འཇིགས་པ་བསྐྱེད་མི་བྱ། །བདག་ལ་གདུག་པ་སྣ་ཚོགས་པ། །གནོད་པ་སྣ་ཚོགས་བྱེད་པ་ན། །དེ་ལ་འཇིགས་པ་མི་བསྐྱེད་ཅིང་། །སེམས་དགའ་བ་ཡིས་ཡོངས་སུ་མཆོད། །ཨོཾ་ཀ་པཱ་ལ་དྷ་ར་སིད་དྷ་ཡེ། །
ཨོཾ་བྷཀྴ་སརྦ་ན་མཿས་ནཱྃ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཨོཾ་ཌཱ་ཀི་ནྱ་བ་ཤཱི་ཀ་རཱ་ཡཱ་སྭཱ་ཧཱ། ཨོཾ་སརྦ་ལོ་ཀ་བ་ཤཱི་ཀ་རཱ་ཡ་ཧཱུྃ། ཨོཾ་སརྦ་དུཥྚ་ཙི་ཏ་ཏ་ན་ས་ན་ཡ་ཕཊ། ཨོཾ་མ་ཧཱ་ཀཱ་ལ་ས་བ་ཡ་ཧཱུྃ་ཕཊ། ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་
རྒྱུད་ལས་ཚངས་པ་སྲིན་པོའི་གདོན་འདུལ་བའི་ལེའུ་སྟེ་བཅུ་གཅིག་པའོ།། །།  ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །གང་ཞིག་གཤིན་རྗེས་ཟིན་པ་ལ། །ཐབས་དེ་གང་གིས་

90-1-20b

བགྱི་བ་ལགས། །རིགས་པའི་རྒྱལ་པོས་བཀའ་སྩལ་པ། །གཤིན་རྗེ་བྲང་དམར་ཞེས་པའི་གདོན། །ཁ་དོག་སྔོན་པོ་ཉིད་ལ་ནི། །མཆེ་བཞི་དང་རབ་ལྡན་པའི། །གཡས་ན་ཐོད་དབྱུག་འཛིན་པ་ལ། །གཡོན་ན་མིའི་
མགོ་བོ་འཛིན། །དྲག་པོ་འཇིགས་སུ་རུང་བ་ཡིས། །གདོན་གྱིས་གང་དག་ཟིན་གྱུར་ན། །ཐབས་འདི་ཡང་དག་སྦྱོར་བར་བྱ། །རང་གི་སྦྱོར་བར་གཟུང་བྱས་ནས། །དྲག་པོའི་སྒྲ་ལྡན་ཉི་ཤུ་པ། །ཤིན་དུ་དཔའ་ཞིང་དད་པར་ལྡན། །
སྟོབས་ལྡན་གཏུམ་པའི་བདག་ཉིད་ཅན། །ཞག་དྲུག་བར་དུ་བསྙེན་བྱ་བ། །ཤ་ལྔ་ལ་སོགས་ཆང་བྱིན་ཏེ། །དེ་ལའང་སྔགས་ཀྱིས་བཏབ་བྱས་ནས། །ཤ་གོས་ཁྲ་བོས་ཡོངས་སུ་བསྐོན། །མེ་ཏོག་མཛེས་པས་བརྒྱན་བྱས་ལ། །སྔགས་
འདི་ཉིད་ནི་འབུམ་དུ་བཟླས། །དེ་ནས་དེ་ཡི་གཡས་ཉིད་དུ། །ཞགས་པ་ངེས་པར་བཀུར་བྱས་ལ། །གྷ་ས་གྷ་སའི་སྙིང་པོ་བརྗོད། །གཡོན་དུ་དངོས་པོ་ལྡུགས་བྱེད་པ། །ཡིད་ཆེན་ལ་ནི་རབ་ཏུ་བཅེམ། །ནག་པོར་གཏོགས་པའི་
གསུམ་པ་ལ། །སྐར་མ་ཉིད་ལ་རབ་བསྐུལ་ཏེ། །མཉམ་པའི་ས་ནི་བླང་བར་བྱ། །དེ་ཐོབ་སྔགས་པ་བློ་ལྡན་པས། །དཀྱིལ་འཁོར་ངེས་པར་བརྩིག་བྱ་སྟེ། །ཁྲུ་དོ་པ་ལ་ཟུར་དྲུག་པ། །འཕང་དུ་སོར་བཞི་རྣམ་པར་སྤྱད། །
དེ་ལ་རམ་དང་མཐིང་ཤུན་དང་། །བ་ཡི་རྣམ་ལྔས་བྱུག་པར་བྱ། །འཁོར་ལོ་བཅུ་དྲུག་ཡང་དག་བྲི། །མཐའ་མར་འབར་བའི་ཕྲེང་བ་ཡིས། །སྣ་ཚོགས་པར་ནི་བསྐོར་བར་བྱ། །དེ་ལ་ལྷ་སོགས་རབ་བཀོད་ལ། །བླ་རེ་སྔོན་པོས་
ཡོངས་སུ་དབུལ། །དེ་ལ་འདབ་འབྱོར་འཁོར་ལོ་ཉིད། །ཟླུམ་པོ་ངེས་པར་བརྐོ་བྱས་ལ། །ཁྲུ་གང་ཡོངས་སུ་བརྐོ་བར་བྱ། །འོག་ཏུ་དུག་གི་ཕྱེ་མ་ཡིས། །ཡང་དག་པར་ནི་གདིང་བར་བྱ། །གྲི་ལ་སོགས་པའི་མཚོན་གྱིས་ནི། །ཁ་རིམ་
ངེས་པར་བསྐོར་བར་བྱ། །བླ་ཕྱོགས་དར་གྱིས་ཕུབ་བྱས་ལ། །ནག་པོ་ཆེན་པོའི་སྙིང་པོ་ནི། །འབུམ་དུ་ཚང་བར་བཟླས་པར་བྱ། །བདག་ཉིད་སྔ་མའི་ཚུལ་གནས་ལ། །འབོར་གཉིས་རུས་པའི་ཕྲེང་བ་ཡིས། །དྲག་པོའི་རིགས་

90-1-21a

ལ་བཟུང་བྱས་ཏེ། །རྩ་བའི་སྔགས་སོགས་ཐིམ་པར་བཟླས། །མཆོད་པ་རྣམ་པ་ལྔ་དག་དང་། །ཤ་ཆེན་ལ་སོགས་གཏོར་མ་ཉིད། །གཉིས་སུ་ངེས་པར་དབུལ་གཏང་བྱ། །དེ་ཉིད་མགུགས་པའི་སྙིང་པོ་ཡིས། །
ཡང་དག་པ་རུ་དགུག་པར་བྱ། །རལ་གྲི་འབར་བ་གང་ཡིན་པས། །ཤར་ཕྱོགས་དག་ཏུ་ངེས་པར་གནས། །དེ་ལ་ནག་པོ་ཆེན་པོ་ཡི། །སྔགས་ཀྱིས་ཡོངས་སུ་བཟླས་པར་བྱ། །དེ་ཡི་སྲོག་སྙིང་གང་ཡིན་པ། །
མཐའ་རུ་སྦྱར་བའི་ཡང་དག་བཟླས། །དེ་ནས་དེ་ཡི་གཟུགས་བྱ་བ། །བག་ཟན་ཉིད་ལ་སོར་བཅུ་དྲུག །འཇིགས་པའི་གཟུགས་བྱས་རམས་ཀྱིས་སྐུ། །དེ་ཡི་ནང་དུ་དེ་ཉིད་ཀྱི། །མིང་དག་ངེས་པར་བྲི་བྱས་ལ། །ནང་དུ་ངེས་
པར་གཞུག་པར་བྱ། །ལྕག་ལས་བྱས་པའི་ཚེར་མ་ལ། །རྩེ་མོ་དུག་གིས་བསྐུ་བྱས་ཏེ། །དེ་ཡི་ཕྱོགས་སུ་དུག་དག་ནི། །ཡོངས་སུ་གཟུགས་པར་བྱ་བ་ནི། །དེ་ལ་སྔགས་ཀྱིས་སྔགས་བྱས་ལ། །དེ་སྟེང་དར་གྱིས་
ངེས་པར་གདིང་། །དེ་ལྟར་ཞག་གྲངས་སུམ་བཅུ་པར། །ཡོངས་སུ་བསྙེན་པར་བྱས་པ་ལས། །ནད་པའི་གོས་ལ་སོགས་པ་དང་། །ཁ་འཕྲོ་ལ་སོགས་བདག་གིས་རྣམས། །སྣོད་དུ་ཐམས་ཅད་བསོགས་བྱས་ཏེ། །སྔགས་
ཆེན་གྱིས་ནི་ཡང་དག་བསྔགས། །དེ་ནས་བསྙེན་པ་རྫོགས་པ་དང་། །ནད་པ་དངོས་པོ་བཀུག་བྱས་ལ། །ཐལ་མོ་ཡོངས་སུ་སྦྱར་བྱས་ཏེ། །སེམས་བསྐྱེད་པ་དང་སྐྱབས་འགྲོ་བྱ། །རྡོ་རྗེ་འབར་བའི་ལྕགས་ཀྱུ་ཡིས། །
དེ་ཡིས་སྙིང་ནས་དྲངས་བྱས་ལ། །ཨོཾ་བཛྲ་ཕཊ་ཀྱི་སྒྲ་ཡང་སྒྲགས། །ཞེ་སྡང་རྡོ་རྗེའི་ཏིང་འཛིན་གྱིས། །ཁྲོ་བོའི་གཟུགས་དང་དྲག་པོའི་སྒྲས། །གཡས་པར་ཕྲེང་བ་ཐོགས་བྱས་ལ། །གཡོན་པར་རལ་གྲི་རབ་འབར་གཟུང་། །ནག་པོ་
ཆེན་པོ་རབ་རྦད་ལ། །དེ་ཡི་ཕུང་པོ་འཇོམ་པར་བསམ། །དེ་ནས་སྔགས་པ་བློ་ལྡན་པས། །གཟུགས་བརྙན་མཚོན་གྱིས་གཟེར་བར་བྱ། །དེ་ནས་ཕྱི་རུ་ངེས་བཏོན་པས། །དང་པོར་རལ་གྲི་གང་ཡིན་པས། །སྐེ་ནི་ཡོངས་སུ་གཏུབ་པར་བྱ། །

90-1-21b

དེ་ལྟར་སྔགས་བཟླས་གཏུབས་པ་ཡིས། །ནད་པ་སྐད་ངན་འདོན་པར་བྱེད། །ཡོངས་སུ་གྲུབ་པའི་རྟགས་སུ་ནི། །ལྷ་རྣམས་ཕྱོགས་ཆར་གཡོ་བ་དང་། །དེ་ཡི་གཟུགས་བརྙན་གཡོ་བ་ཉིད། །གྲུབ་པའི་རྟགས་སུ་བསྟན་པ་ནི། །
དེ་ཡི་དུམ་བུ་གང་ཡིན་པ། །གཞན་གྱིས་སྦྱར་བར་གཏོར་མ་གཏང་། །དེ་ཡི་སྦྱོར་བ་གང་ཡིན་པས། །གཤིན་རྗེའི་གདོན་དང་ངེས་པར་བྲལ། །དེ་དང་བྲལ་བ་གང་ཡིན་པས། །བསྲུང་བའི་འཁོར་ལོ་ངེས་པར་བརྩམས། །
ཚོན་སྣ་ལྔ་ཡི་སྐུད་པ་ནི། །འཛཱ་ཏི་པ་ལའི་ནང་བཙོས་ཏེ། །རྡོ་རྗེ་འབར་བའི་སྔགས་བཏབ་སྟེ། །མདུད་པ་ཉི་ཤུ་གཅིག་བོར་ལ། །དེ་ཡི་སྐེར་ནི་གདག་པར་བྱ། །དེས་ནི་སྲུང་བ་མཆོག་ཡིན་ཏེ། །ཕྱི་ནས་བགེགས་མི་འཇུག་
པ་ཡིན། །ཨོཾ་ཕ་ར་ཕ་ར་ཡ་ཏ་ཧྃ་སྭཱ་ཧཱ། ཨོཾ་ཀྃ་ཤ་རི་བྷ་བ་པ་ཕཊ། ཨོཾ་གྷ་ས་གྷ་ས་བ་རུ་པ་ཧ་ཡ་ཧ་ཡ་སྃ་ཙ་ཧཱུྃ། ཨོཾ་མ་ཧཱ་ཀཱ་ལ་ཡ་མ་གྷ་ཧ་མཱ་ར་ཡ་ཧཱུྃ་ཕཊ། ཨོཾ་ཨ་ཀྴར་ཡ་ཨ་ཀྴར་ཡ། ཨོཾ་ཨཀྴར་ཡ། སརྦ་མ་ཡ་ན་ཧཱུྃ། ཨོཾ་ཡ་མ་དུ་དུ་ཧེ་ད་ཨ་ན་
ཨ་སརྦ་ཡ་མེ་ན་ཧ། ཨོཾ་ཤ་ཏ་ཏིཀྵྞ་རུ་པེ་ན་ཡ་མ་ཙྪིན་ད་ཙྪིན་ད་ཧཱུྃ་ཕཊ། ཡྃ་ཨོཾ་ཙཎ་ཌ་ཁད་ཁེ་ད་ཡ་མ་ཙྪིན་ད་ཀ་ར་ཡ་ཕཊ། ཨོཾ་ཛྭ་ལ་ཛྭ་ལ་ན་རོ་གི་རཀྵ་རཀྵ་སྭཱ་ཧཱ། དེ་ལྟར་འབྱུང་པོ་ངེས་བསལ་ན། །རྣལ་འབྱོར་པ་
ལ་གནོད་བྱེད་པའི། །དངོས་པོ་གང་དག་གསད་བྱའི་ཕྱིར། །ནག་པོ་ཆེན་པོ་འདི་བསྒྲུབ་བྱ། །ཤིན་ཏུ་བརྟགས་ལ་མངོན་པར་བསྒྲུབ། །ཕྲ་མོ་ཙམ་ལ་བྱ་བ་མིན། །བསྟན་པ་དངོས་སུ་འཇིག་ལ་སོགས། །སྙིང་རྗེ་ཆེན་པོས་སྦྱོར་བ་བརྩམ། །
དང་པོར་གཙུག་ལག་ཁང་ཆེན་ནམ། །མཆོད་རྟེན་ཁང་སྟོང་ཆེན་པོ་འམ། །རབ་ཏུ་བསྔགས་པ་དུར་ཁྲོད་མཆོག །བདག་གིས་ནག་པོ་ཆེན་པོ་ཡི། །གཟུགས་བརྙན་ལེགས་པར་བྲིས་པ་ཡི། །མཆོད་པ་སྣ་ཚོགས་
འབྱོར་པ་དང་། །རབ་གསལ་ལྔ་ཡི་དུད་པ་དང་། །མི་འཆི་ལྔ་ཡི་དུད་པ་ཡིས། །ཞག་བདུན་བར་དུ་བདུག་པར་བྱ། །དང་པོར་གཞི་མའི་དངོས་པོ་གང་། །ཡིད་ཆེས་ལྤགས་པ་ངེས་པ་ལས། །དེ་ལས་བྱུང་བ་གང་

90-1-22a

ཡིན་པ། །ཡང་དག་པ་རུ་བྲི་བར་བྱ། །དེ་ནས་གནས་གང་ཡིན་པ་རུ། །སྐར་མ་དག་ལ་ཡོངས་མཆོད་ལ། །རབ་གསལ་ལྔ་དང་མི་འཆི་ལྔ། །གཞན་ཡང་རབ་གསལ་སྣ་ཚོགས་པས། །ཡང་དག་པ་རུ་མཆོད་
པར་བྱ། །དཔའ་བོ་སྣ་ཚོགས་འབྱོར་པ་དང་། །མཆོད་པ་སྣ་ཚོགས་ཅི་འབྱོར་པས། །ཟླ་གསུམ་བར་དུ་མཆོད་བྱ་ཞིང་། །རང་ཉིད་ཆ་ལུགས་བསྒྱུར་བ་ཡིས། །ལུས་ལ་ཁྲག་གིས་རྣམ་པར་བསྐུ། །རླག་བྱེད་དངོས་པོ་གང་ཡིན་པ། །
འབར་བའི་དཀྱིལ་འཁོར་ཕྱོགས་ཀུན་ཏུ། །སྟོད་ཀྱི་ཚིགས་གཉིས་བཀུག་པ་ཡིས། །ཡོངས་སུ་བྲུ་བར་བྱ་བ་ཡིན། །དེ་ཡི་ནང་དུ་དངོས་པོ་གང་། །ཡང་དག་པར་ནི་བླུགས་བྱས་ལ། །མགོ་ཚོ་བ་དང་དྲེ་ར་ཤ ། དེ་གསུམ་ཡོངས་
སུ་བསྲེས་པ་ཡིས། །གང་ལ་དམིགས་པར་བྱ་བ་ཡི། །དངོས་པོ་གང་དག་དེར་བསམ་བྱ། །སྔགས་དང་ཕྱག་རྒྱ་སྦྱོར་ཤེས་པས། །གསལ་བར་བསྒོམས་པས་དབུལ་བར་བྱ། །གཏོར་མ་ཉིད་ལ་སྣ་ཚོགས་པའི། །དངོས་པོ་གང་དག་
བླུགས་བྱས་ལ། །མཚན་མོ་ཕྱེད་ནས་ཡོངས་སུ་གཏང་། །དེ་ཡི་ཐུགས་ཀ་ཉིད་ནས་ནི། །ཐུགས་ཡིད་སྡུས་པ་གང་དག་བསམ། །འདི་ཡི་སྟོད་ཀྱི་ཆ་གང་ལགས། །མི་འགྱུར་གནས་པ་གང་དག་བསམ། །དེ་གཉིས་དཀར་དང་གནག་པ་སྟེ། །འདི་ལ་
འབྲེལ་པར་གྱུར་པ་ཡིན། །དངོས་པོ་ནག་པོར་དེ་ཉིད་ལ། །དངོས་པོ་དཀར་པོ་གང་ཡིན་པ། །སྟོབས་བསྐྱེད་གསལ་བར་གནས་པར་བྱ། །དེ་ལྟར་སྐད་ཅིག་དུ་མ་ཡིས། །ཡོངས་སུ་གནས་པར་བྱས་པ་ལས། །བདག་ལ་ང་རྒྱལ་དྲག་པོ་བསྐྱེད། །
དེ་སྐྱེས་པ་ཡི་གྲུབ་པར་བསམ། །རྟགས་སུ་བྱ་བ་གང་ཡིན་པས། །དེ་ཉིད་དངོས་པོ་གཡོས་གྱུར་དང་། །དྲག་པོ་སྒྲ་ཡང་ཐོས་པ་དང་། །སེམས་ཅན་མ་རུངས་འཇིགས་པའི་གཟུགས། །མངོན་སུམ་དག་ཏུ་འོངས་གྱུར་ན། །ངེས་པ་ཉིད་དུ་
འགྲུབ་པ་ཡིན། །དེ་འགྲུབ་བསྒྲུབ་བྱ་གང་ཡིན་པ། །དེ་ཉིད་རྣམས་གསུམ་བསྲེགས་པ་ཡིན། །ཆག་གང་པ་ཡི་དབྱིབས་བྱས་ལ། །དེ་ཡི་དཀྱིལ་དུ་སྲོགས་སྙིང་གཞུག །དེ་ནས་ནག་པོ་ཆེན་པོ་ལ། །མ་ཉེས་པ་ཡི་ཚིག་བརྗོད་དེ། །

90-1-22b

ནག་པོ་ཆེན་པོ་ཉིད་ལ་བསྟབ། །དེ་ཡི་སྔགས་དག་བཟླས་པ་ཡིས། །རབ་གསལ་ལྔ་དང་མི་འཆི་ལྔ། །དཔའ་བོ་ལ་སོགས་ཐམས་ཅད་ཀྱིས། །ཡོངས་སུ་སྦྱར་བ་དེ་ཉིད་གསུམ། །དངོས་པོ་གང་ཉིད་ལ་སོགས་པ། །མཚོན་གྱིས་ཡོངས་སུ་
གཏུབ་པར་བྱ། །དེ་ནས་མེ་ཉིད་རབ་སྦྱར་བས། །སྔགས་དང་ཕྱག་རྒྱར་རབ་ལྡན་པས། །ལུས་ངག་ཡིད་ནི་དྲག་པོ་ཡིས། །ལས་ཀྱི་སྦྱོར་བ་ངེས་པར་སྤྱད། །ཨོཾ་མཱ་ཧཱ་ཀཱ་ལ་ར་ཡ་ར་སརྦ་ཤ་ཏྲུྃ་ནཱྃ་ཕཊ་ཕཊ་ཕཊ། ཨོཾ་མ་ཧཱ་ཀཱ་ལ་སརྦ་ཤ་ཏྲཱུྃ་ཙྪིན་ད་
ཡ་ཕཊ། ད་ས་དྃ་ར་ཕ་ར་ཧ་ཧ་ཧ་བྷ་སྭཱ་ཧཱ། དེ་ནས་སྔགས་པ་ཡོངས་རྟོགས་པས། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རང་སངས་རྒྱས་རྣམས་ལ། །གང་ཞིག་གནོད་པར་བྱེད་པ་ཡི། །གང་ཟག་རྣལ་འབྱོར་བསྒྲུབ་པ་ཡི། །
གོང་མའི་སེམས་ཀྱིས་ཡང་དག་སྦྱར། །དེ་ལ་བླ་མའི་མན་ངག་གིས། །ཡང་དག་པར་ནི་དབྱེ་བར་བྱ། །བླ་མ་ཉིད་ལ་ཅི་ནུས་པའི། །ཡོངས་སུ་མཆོད་པས་མན་ངག་དབྲལ། །འདིས་ནི་ངེས་པར་འགྲུབ་པས་ན། །ཡིད་ཆེས་པར་ནི་
ཡོངས་སུ་བསྒྲུབ། །ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་གཤིན་རྗེ་བྲང་དམར་གྱི་གདོན་འདུལ་བའི་ལེའུ་སྟེ་བཅུ་གཉིས་པའོ།། །།  ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །གང་ཞིག་
གནོད་སྦྱིན་གདོན་གྱིས་ཟིན། །དེ་ལ་ཐབས་གཉིས་གསུང་དུ་གསོལ། །གསང་བའི་མགོན་གྱིས་བཀའ་སྩལ་པ། །གནོད་སྦྱིན་གདོང་སེར་ཞེས་པའི་གདོན། །ཤིན་ཏུ་དྲག་པར་གྱུར་པ་ལས། །ཐབས་འདི་ཡང་དག་བརྩམ་པར་བྱ། །དྲག་
པོའི་སྒྲ་དང་རབ་ལྡན་པའི། །ཁ་དོག་སེར་བ་སུམ་བཅུའི་གཟུགས། །སྟོབས་དང་ལྡན་ཞིང་རབ་ཏུ་གུས། །ཟས་སུ་སྦྲང་རྩི་ཟར་བཅུག་ལ། །ཞག་བདུན་བར་དུ་ངེས་པར་བསྙེན། །གོས་དག་ལྗང་ཁུ་བསྐོན་བྱས་ལ། །སྔགས་འདི་དག་
གིས་ཡོངས་སུ་བསྔགས། །བདག་གིས་རབ་ཏུ་དང་བས་ནི། །སངས་རྒྱས་རྣམས་ལ་མཆོད་པས་མཆོད། །དེ་ནས་སུམ་བཅུ་པ་དག་ལ། །དངོས་པོ་བརྟེན་པར་བྱེད་པ་ཡི། །རས་སྩོགས་གོས་དྲས་བཙེམས་བྱས་ལ། །

90-1-23a

བྱང་ཕྱོགས་དག་གི་ཁང་སྟོང་དུ། །ཕྱིན་པས་ས་ཉིད་བླང་བར་བྱ། །ལུས་ངན་སྲས་པོས་རབ་བསྔགས་པ། །སྙིང་པོ་ཉིད་ཀྱང་གདོན་བྱ་ཞིང་། །དེ་ཐོབ་བྱང་ཕྱོགས་ཁྲོ་བོ་ཡི། །སྔགས་བཟླས་པ་ཡིས་ཕྱིར་མི་ལྟ། །
དེ་ནས་སྔགས་པ་བློ་ལྡན་པས། །དཀྱིལ་འཁོར་ཁྲུ་ནི་ཕྱེད་དང་དོ། །ཟུར་བཞི་པ་རུ་བྱས་པ་ལ། །རམས་དང་མཐིང་ཤུན་ཡུང་བ་དང་། །བ་ཡི་རྣམ་ལྔ་དྲི་ལྡན་པས། །འཕང་དུ་སོར་གཉིས་རྣམ་པར་ངེས། །ནང་ནས་རབ་ཏུ་ཟླུམ་བྱས་ལ། །
རྩན་དན་དཀར་པོའི་ཐིག་ལེ་ནི། །བཅུ་བདུན་ཡོངས་སུ་བྲི་བར་བྱ། །དེ་སྟེང་འཁོར་ལོའི་ལྷ་ཚོགས་གནས། །བླ་རེ་ལྗང་ཁུ་ཕུབ་བྱས་ལ། །དེ་ནས་འདབས་འབྱོར་དེ་ཉིད་ཀྱི། །དཀྱིལ་འཁོར་གྲུ་བཞི་པ་ཉིད་ལ། །རྒྱར་ནི་སོར་མོ་བཅུ་
གཉིས་ལ། །ཟབས་སུ་ཆག་གང་ངེས་པར་བྲུ། །ཁུ་བྱུག་དུག་དུ་བསྲེས་པ་ཡི། །དེ་ཡི་གཅལ་དུ་རྣམ་པར་དགྲམ། །མཆོད་པ་ལྔ་དང་གཏོར་མ་དང་། །ལས་ལ་སྦྱོར་སོགས་དཀར་པོ་ཉིད། །ཡོངས་སུ་གཏང་བར་བྱ་བ་ཡིན། །སྒྲ་སྐད་ཆེན་
པོའི་རུས་པ་ལ། །ཕྲེང་བ་བྱས་པས་དྲག་པོའི་རིགས། །དེ་ཉིད་ལ་ནི་བཟུང་བ་ཡིས། །རྩ་བའི་སྔགས་སོགས་འབར་བ་བཟླས། །དེ་དག་སྟེང་དུ་ཐིམ་འགྱུར་བས། །ལུས་ངན་སྲས་པོའི་སྔགས་བཟླས་པས། །དེ་ཡང་གོང་མའི་
ཚད་ཉིད་དུ། །ཕྱིན་པས་ཡོངས་སུ་བཟླས་པར་བྱ། །ཡིད་ཆེན་ཕུར་བུ་སོར་བཅུ་པ། །བཅུ་དྲུག་དག་གིས་དེ་ཉིད་ཀྱི། །ཁ་རུ་ཡོངས་སུ་བསྐོར་བར་བྱ། །བདག་ཉིད་སྔ་མའི་ཆ་ལུགས་ལ། །འབར་བ་བསྐྱོད་པས་ཕུར་བུ་བསྔགས། །
ཡུངས་ཀར་ཏིལ་གྱིས་རིགས་གཉིས་ལ། །བྱང་ཕྱོགས་ཁྲོ་བོའི་སྙིང་པོ་ཉིད། །བརྒྱ་རྩ་བརྒྱད་པས་ཡོངས་སུ་བསྔགས། །སྐུད་པ་སྔོན་པོ་ཉིད་ལ་ཡང་། །འབར་བ་ཆེན་པོའི་སྔགས་བཟླས་ནས། །དེ་ཡི་གཟུགས་ཉིད་ཡུང་བ་ཡིས། །
གྲོ་ག་དག་ལ་བྲིས་བྱས་ལ། །སྐུད་པ་དེ་ཡིས་རབ་བཅིངས་ལ། །ནང་དུ་ངེས་པར་གཞུག་པར་བྱ། །སྟེང་དུ་མེ་ལོང་ཉིད་ལ་ཡང་། །གུར་གུམ་ཁུ་བས་བྱུག་བྱས་ལ། །ངོ་བསྟན་ཁ་ནི་དགབ་པར་བྱ། །ཞག་བདུན་བར་དུ་བསྙེན་པ་ཡིས། །

90-1-23b

དེ་ཉིད་འགུགས་པའི་སྔགས་ཀྱང་བཟླས། །དེ་ནས་སྔགས་པས་སྦྱོར་བ་འདི། །ཡོངས་སུ་མ་ཉམས་ཡང་དག་བཟླས། །དེ་རྫོགས་ནད་པ་བཀུག་བྱས་ལ། །གུ་གུལ་ནག་པོའི་དུད་པ་དང་། །སྣ་ཉིད་དག་ཏུ་བདུག་པར་བྱ། །དེ་ནས་དེ་
ཉིད་འཕྲོས་པ་ན། །མི་བཟད་རབ་ཏུ་འབར་བ་ཡི། །སྡེར་མོ་ཡིས་ནི་དྲག་ཏུ་བཟུང་། །ཧཱུྃ་གི་ང་རྒྱལ་སྒྲ་དང་ལྡན། །ཞག་པ་སྔོན་པོ་གང་ཡིན་པས། །དེ་ཡི་སྐེ་ནས་བཟུང་བྱས་ལ། །མེ་ལོང་ཉིད་ལ་ངོ་བསྟན་བྱ། །གཡས་པ་
རྡོ་རྗེ་ལྡན་པ་ཡིས། །ཕྲེང་བས་སྔགས་ནི་ཡང་དག་བཟླས། །དེ་ནས་རབ་ཏུ་ལྡན་པ་ཡིས། །སྲོག་གི་སྙིང་པོ་ཡོངས་སུ་བཟླས། །བསམ་པ་ཡོངས་སུ་རྫོགས་པ་ཡིས། །དེ་ཉིད་ལ་ནི་ཡང་དག་དབབ། །དེ་ནས་རྣམ་པར་རབ་ལྡན་པས། །
སྔགས་ཆུ་ཡིས་ནི་ཁྲུས་བྱས་ལ། །ལུས་ངག་ཡིད་གསུམ་དྲག་པོ་ཡིས། །དངོས་པོ་ཡོངས་སུ་བཅིངས་བྱས་ལ། །ཁྲུ་གང་བརྐོས་པའི་ནང་དུ་གཞུག །ཕུར་བུར་སྟེང་དུ་གཟིར་བྱས་ལ། །ཕཊ་ཀྱི་སྔགས་ཀྱིས་ཡང་དག་མནན། །
དེས་ནི་གདོན་མི་ཟ་བར་ནི། །གནོད་སྦྱིན་གདོན་དང་ངེས་པར་བྲལ། །དེ་ནས་སྲུང་བའི་འཁོར་ལོ་ཉིད། །ཡོངས་སུ་བསྲུང་བ་བྱས་པ་ཡིས། །ཕྱི་ནས་གདོན་མི་འཇུག་པ་ཡིན། །ཨོཾ་མ་ཧཱ་བཻ་ཤྲ་མ་ཎ་ཡེ་ཀང་ཀཱ་ཡཀྵ་
བྷན་དྷ་ནཱྃ། ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎ་ཌ་ལི་ཧཱུྃ་ཕཊ། པ་ཙ་བོ་ཕུ་ཤ་ཡ་ཧ་ཧ་ན་ཧ་ན་ཡཀྵ་པ་ར་ཡ། ཨོཾ་ཨཱ་ཀར་ཥ་ཡ་ཨཱ་ཀར་ཥ་ཡ་སརྦ་ཡཀྵ་ནཱྃ་ཧཱུྃ་རྃ། ཤ་ཨོཾ་ཡཀྵ་ཧྲྀ་ད་མ་ཛ་མ་ཛ་སོ་པ་ལ་ཧཱུྃ། ཨོཾ་སརྦ་ར་ར་བི་ཤོ་
དྷ་ཡ་ཧཱུྃ་ཕཊ། ཨོཾ་ཧ་ཧ་ཧ་ཕཊ་ཕཊ་ཕཊ་ཧཱུྃ། སངས་རྒྱས་བྱང་ཆུབ་སེམས་དཔའ་དང་། །ལུས་ལ་སོགས་པའི་ཕན་གནོད་གཉིས། །ཡོངས་སུ་སྦྱང་བར་ཡང་དག་བཤད། །དེ་ཉིད་ལུས་ངན་སྲས་པོ་ལ། །གང་
བསྟབས་དེ་ཉིད་ངེས་པར་འཇིག །དེ་ཡི་སྦྱོར་བ་བྱ་བ་ནི། །ལུས་ངན་སྲས་པོའི་བསྒྲུབ་པ་བཤད། །དང་པོར་དེ་ཡི་གཟུགས་བྱ་བ། །རམས་དང་ཡུང་བ་རབ་སྦྱར་བས། །བ་དན་ནེའུ་ལེའི་རྐྱལ་པ་དང་། །སྐུ་གདོང་

90-1-24a

གཡས་ཕྱོགས་བཞག་བྱས་ལ། །གོང་མ་ལྟ་བུའི་གཟུགས་སུ་བྲི། །གཡས་གཡོན་གཉིས་སུ་དེ་ཉིད་ཀྱི། །ཡི་གེ་གཉིས་པོ་བྲི་བྱས་ལ། །དེ་མཐར་དྲག་པོའི་སྙིང་པོ་བྲི། །གསུམ་སྦྱར་དངོས་པོ་
འབིགས་བྱེད་པའི། །ཚིགས་གསུམ་དུ་ནི་ངེས་པ་ལས། །དར་དག་དམར་པོ་ཁ་ཚོན་གང་། །མེ་ཏོག་ཕྲེང་བས་ཡོངས་སུ་བརྒྱན། །རིན་ཆེན་སྣ་ལྔའི་ཕྱེ་མ་དང་། དྲིའི་ཕྱེ་མ་སྣ་ཚོགས་པ། །ཕུར་མ་བྱས་པས་གདགས་པར་
བྱ། །སྲོག་སྙིང་འོ་མས་བྲི་བྱས་ལ། །དེ་ཡི་མིང་རུས་ཁྲག་གིས་བྲི། །འབྲུ་དག་དཀར་པོའི་སྟེང་བཙུགས་པས། །དེ་ཉིད་ལ་ནི་ཆགས་པར་འགྱུར། །དཀྱིལ་འཁོར་ཁྲུ་གང་གྲུ་བཞི་པ། །འཕང་དུ་སོར་གཉིས་ངེས་པ་ལས། །གོང་དུ་
བསྟན་པའི་སྦྱོར་བ་ཡིས། །ཡོངས་སུ་བྱུགས་པར་བྱས་པ་ལས། །མཆོད་པ་ལྔ་ཡིས་རབ་མཆོད་ལ། །བདག་ཉིད་སྡོམ་པར་ཡང་དག་གནས། །ཟས་སུ་དཀར་གསུམ་བཟའ་བྱས་ཤིང་། །ཆང་ལ་སོགས་པ་བཏུང་མི་བྱ། །གཏོར་མ་ཆ་གཅིག་
བསྙེན་པར་གནས། །ཆ་གཉིས་ཉིན་མཚན་དུས་གཉིས་སུ། །བསམ་པའི་སྦྱོར་བས་ཡོངས་སུ་གཏང་། །དང་པོའི་གཏོར་མ་དེ་ཉིད་ལ། །ཡུངས་ཀར་ཉིད་ཀྱང་བླུགས་བྱས་ལ། །བཟླས་པས་གྲངས་སུ་ཐིམ་པར་བྱ། །དེ་ཡི་མིང་རུས་གང་
ཡིན་པས། །སྙིང་པོ་དག་ལ་རེ་རེ་ཞིང་། །ཡང་དག་པ་རུ་མཉེས་པར་བྱ། །རང་གིས་མ་ཉེས་གང་ཡིན་པས། །ཚིག་བཏོན་པ་ཡིས་དྲག་པོར་བོད། །ཤིན་ཏུ་གདུག་སེམས་རབ་འབར་བས། །དང་པོ་སྙིང་རྗེ་ཆེན་པོ་བསྐྱེད། །འདི་
ལ་རྟགས་ཀྱིས་སྦྱོར་བ་དང་། །བརླག་པར་བགྱི་བའི་བསྐུལ་མ་གདབ། །རིང་དུ་འཚོ་ན་སྙིང་རྗེ་སྤང་། །མྱུར་དུ་ཁྱོད་ཀྱིས་བསྒྲལ་དུ་གསོལ། །དེ་དག་ལ་སོགས་ཚིག་དག་གིས། །དེ་ལ་ཚིག་ཀྱང་དྲག་པོར་བརྗོད། །དེ་ནས་གནས་གང་ཡིན་
པར་ནི། །དང་པོའི་གཏོར་མ་བརྡབ་པར་བྱ། །དང་པོ་དང་ནི་བར་དག་དང་། །ཐ་མར་ཕྱོགས་སྐྱོང་བསྲུངས་མ་ལ། །འོ་དོད་བོད་པས་གཏོར་མ་གཏང་། །སྔགས་རྣམས་བླ་མའི་ལུང་ལས་ནི། །ཡོངས་སུ་ཤེས་པར་བྱ་བ་ནི། །ཨོཾ་བཻ་ཤྲ་བ་

90-1-24b

མ་ཎཱ་ཡེ་ཧཱུྃ། ཨཱ་མུ་ཏྃ་ཁ་ཏ་བ་ཏ་ས་ས་བ་རུ། དེ་ལས་ཡོངས་སུ་བྱུང་བས་ནི། །ཡང་དག་པ་རུ་ཤེས་པར་བྱ། །མཚན་མོ་མགྱོགས་པ་ཞེས་བྱ་བའི། །སྲོག་ཆགས་གང་དག་ཤི་བ་ཡི། །རུས་པ་ལ་ནི་སྔགས་བཟླས་ལ། །དེ་ཡི་
ཁང་རྩར་གཞུག་པར་བྱ། །དེ་ཡིས་ལྟས་ངན་སྣ་ཚོགས་པ། །ཡང་དག་པ་རུ་འབྱུང་བ་ཡིན། །གྲུབ་པའི་རྟགས་སུ་བསྟན་པ་ནི། །སྐྱེས་པ་མདའ་གཞུ་པ་དག་ནི། །ཡང་ཡང་རྨིས་པར་གྱུར་པ་ནི། །ངེས་པར་འགྲུབ་པར་ཡང་དག་བཤད། །
ལག་ན་རྡོ་རྗེ་གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་གནོད་སྦྱིན་གདོང་སེར་གྱི་གདོན་འདུལ་བའི་ལེའུ་སྟེ་བཅུ་གསུམ་པའོ།། །།  ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །གང་ཞིག་སྒྲུབ་པར་བྱེད་པ་
ལ། །བྲིས་སྐུ་ལ་སོགས་གླེགས་བམ་ཉིད། །ཚད་དེ་གང་གིས་བགྱི་བ་ལགས། །རིག་པའི་རྒྱལ་པོས་བཀའ་སྩལ་པ། །གང་ཞིག་སྒྲུབ་པར་བྱེད་པ་ཡིས། །བྲིས་སྐུ་གླེགས་བམ་སྦྱོར་བ་འདིས། །ཡང་དག་པར་ནི་བསྒྲུབ་པར་བྱ། །
དུར་ཁྲོད་ལ་སོགས་གང་ཡིན་པར། །རི་མོ་མཁན་ཉིད་རིམ་པ་བཞིན། །དབང་བསྐུར་བ་ནི་ཡང་དག་བྱ། །ཐ་ག་པ་ཡང་བསྙེན་བྱས་ལ། །དྲི་ཞིམ་པ་ཡིས་ཡོངས་སུ་བྱུག །སྟེང་འོག་གཉིས་ལ་མཐའ་གཉིས་གསུམ། །མཉམ་
པར་བཞག་པས་ཡང་དག་བརྟག །དམར་པོ་ལྔ་ཡིས་རབ་བྱུགས་ལ། །ས་བོན་ཡང་དག་ལྡན་པ་དང་། །དྲི་ཞིམ་རྣམ་པ་སྣ་ཚོགས་པ། །ཡོངས་སུ་བྱུག་པར་བྱ་བ་ཡིན། །ཚོན་རྩི་རྣམ་པ་སྣ་ཚོགས་པས། །ཡིད་ཆེས་སྔགས་ཀྱི་ཚོན་
རྩི་རྣམས། །མཉམ་པར་སྦྱར་བ་བྲི་བར་བྱ། །སྣོད་དག་ཐོད་པ་ཉིད་ལ་ནི། །པིར་ནི་མི་ཡི་སྐྲ་ཡིས་བྱ། །དུར་ཁྲོད་ཉིད་དམ་ཁང་སྟོང་ངམ། །གནས་དབེན་པར་ནི་ཡོངས་སུ་བྲི། །ལས་མཁན་སྔོན་པོའི་གོས་བགོས་ཏེ། །ཁྲག་གིས་གདོང་དག་བྱུགས་བྱས་ལ། །སྔགས་འདི་ཡིས་ནི་རྟག་ཏུ་
བཟླས། །ཨོཾ་ཙཎ་ཌ་མ་ཧཱ་རོ་ཥ་ཎ་ཀ་ར་ཡྃ། སརྦ་སཏྭཱ་ར་ཐ་ཧཱུྃ་ཧཱུྃ། གཏོར་མ་དྲག་པོ་གང་ཡིན་པ། །བྲི་བའི་དུས་སུ་གཞག་པར་བྱ། །ཟིན་ནས་དེ་ཉིད་གཏང་བར་བྱ། །དང་པོར་ཚོན་རྩི་ཐམས་ཅད་ལ། །རིན་ཆེན་སྣ་ལྔར་བྱིན་གྱིས་བརླབ། །རྡོ་རྗེ་རྩེ་གཅིག་ཕྱག་རྒྱ་ཡིས། །ཡང་དག་

90-1-25a

པ་རུ་བྲི་བྱ་སྟེ། །སྐྱེད་བྱེད་དང་ནི་ཡོན་བདག་གི། །བསམ་པས་ཡོངས་སུ་བྲི་བར་བྱ། །དཀྱིལ་དུ་པད་མ་བཅུ་དྲུག་ལ། །སྙིང་པོ་ཟེ་འབྲུ་ཡང་དག་ལྡན། །དཀྱིལ་དུ་གཙོ་བོ་འབར་བ་ཉིད། །གོང་མའི་གཟུགས་ཀྱིས་བྲི་བར་བྱ། །འཁོར་ལ་སོགས་པ་ཐམས་ཅད་ཀྱང་། །སྔ་མ་ལྟ་བུར་ཡང་དག་བྲིས། །
ཕྱི་རོལ་ཤིང་ལ་སོགས་པ་དང་། །དུར་ཁྲོད་བརྒྱད་ཀྱིས་རྣམ་པར་བརྒྱན། །འཇིགས་པར་བྱེད་པའི་རོ་ལངས་དང་། །ལྕེ་སྤྱང་དྲག་པོའི་སྒྲ་ཡང་སྒྲོགས། །དེ་ལྟར་རིམ་པ་ཇི་བཞིན་པས། །གོང་མ་ལྟ་བུས་ཡང་དག་བྲི། །དབང་བསྐུར་གནས་སྐབས་གང་ཡིན་པས། །མཚན་མའི་དཀྱིལ་འཁོར་
ཡོངས་སུ་བྲི། །དེ་ཡི་བར་དུ་མི་གཞན་ལ། །བྲིས་སྐུ་བསྟན་པར་མི་བྱའོ། །བརྒྱང་ཤིང་རུས་པ་ཉིད་ལ་ནི། །བྱས་པས་ཐང་ཀ་ཡོངས་སུ་བརྒྱངས། །གུར་དག་སྔོན་པོ་ཕུབ་བྱས་ལ། །མཁའ་ལ་ཡོངས་སུ་བསྟན་མི་བྱ། །གལ་ཏེ་
བསྟན་པར་བྱས་པ་ན། །དངོས་གྲུབ་འགྲུབ་པར་འགྱུར་བ་མེད། །དེ་བས་མཉམ་པར་བཞག་པ་ཡིས། །སྦྱོར་བ་ལེགས་པར་བརྩམ་པར་བྱ། །གླེགས་བམ་ངེས་པར་བྲི་བར་བྱ། །གྲོ་ག་དག་ལ་སོར་དག་ནི། །དཀྱུས་སུ་བཅུ་གཉིས་
ཞེང་དུ་བཞི། །དེ་ཡི་ཚད་དུ་བྱ་བ་ལ། །ཁྲག་དང་བདུད་རྩི་ལྔ་རྣམས་ཀྱིས། །ཡོངས་སུ་བྱུག་པར་བྱས་པ་ལ། །མེ་ལོང་ཨུར་གྱིས་མནན་བྱས་ཏེ། །མཐིང་ཤུན་ཉིད་ཀྱིས་ལེགས་པར་བྲི། །འདྲི་མཁན་སྦྱོར་བ་རབ་ལྡན་པས། །སྨྱུ་གུ་
ལྕགས་ལས་བྱས་པ་ཡི། །སྣོད་ནི་ཐོད་པར་ཡང་དག་ལྡན། །གཏོར་མ་ཡང་དག་བཤམས་བྱས་ལ། །ཧཱུྃ་གི་ངག་གིས་རྟགས་ཏུ་བརྗོད། །གོས་དག་སྔོན་པོ་བགོས་བྱས་ནས། །རྒྱན་ཆ་ལྔ་ཡིས་རྣམ་པར་བརྒྱན། །མི་གཞན་ལ་ནི་མི་བསྟན་
ཅིང་། །གླེགས་ཤིང་རུས་པའམ་གླང་ཆེན་གྱི། །བ་སོ་དག་ལ་ངེས་པར་བྱ། །ཐག་པ་བྲམ་ཟེ་མོ་ཡི་ནི། །སྐྲ་ཡིས་ཡོངས་སུ་བསྡམ་པར་བྱ། །ཡང་ན་ཡིད་ཆེས་ལྤགས་པ་ལ། །མཉེན་པར་བྱ་བས་ཡོངས་སུ་བསྡམ། །དེར་ནི་
ལག་གཡོན་སྟོད་ཀྱི་བར། །དེ་ཉིད་བདག་གི་ཡོངས་སུ་སྤ། །སངས་རྒྱས་ལྔ་ཡི་བདག་པོ་མཆོག །ངེས་པར་རྡོ་རྗེ་རྣོན་པོ་ཉིད། །སྡང་བ་ཐམས་ཅད་འདུལ་བྱེད་ཅིང་། །དངོས་སུ་དཔའ་བོ་རབ་འབར་བ། །ཆེན་པོ་ཡི་ནི་ཆེན་པོ་ཉིད། །

90-1-25b

ཀུན་ལ་མཁའ་འགྲོ་ཆེན་པོ་སྟེ། །སྐུ་ཆེན་རབ་དྲག་འཇིགས་པའི་གཟུགས། །མཁའ་ལྟར་མཉམ་ལ་ཕྱག་འཚལ་བསྟོད། །ལས་ལ་འཇུག་པར་སྣང་བ་ཉིད། །ཀུན་བསྡུས་པས་ནི་དེ་བརྗོད་བྱ། །ལག་ན་རྡོ་རྗེ་
གོས་སྔོན་པོ་ཅན་རྡོ་རྗེ་མེ་ལྕེའི་རྒྱུད་ལས་བྲིས་སྐུ་དང་གླེགས་བམ་གྱི་ལེའུ་སྟེ་བཅུ་བཞི་པའོ།། །། ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །གང་ཞིག་རྒྱུད་འདི་ལས་
སྦྱོར་བས། །ཐབས་ཀྱི་ཡན་ལག་སྣ་ཚོགས་པ། །ཡང་དག་རྒྱས་པར་གསུང་དུ་གསོལ། །བདེ་གཤེགས་མཆོག་གིས་བཀའ་སྩལ་པ། །དད་པའི་རང་བཞིན་ཅན་གྱི་མིས། །འདི་ཉིད་ལ་ནི་མངོན་པར་བསྒྲུབ། །
ཀླུ་གདུག་འབར་བས་ཟིན་པ་ནི། །ནུབ་མོ་ན་བར་གྱུར་པ་དང་། །ཡན་ལག་དྲག་པར་ན་བ་དང་། །སྨིན་མ་ལ་སོགས་བྱི་བ་དང་། །ལུས་ལ་ཤ་རོ་ཁོལ་བར་གནས། །ཚིགས་སུ་ན་ཞིང་ཆགས་པར་ལྡན། །སྙིང་མི་དགའ་དང་
དཀར་ལ་དགའ། །ཀླུ་ཡི་ནད་དུ་ཤེས་པར་བྱ། །བ་ལང་དམར་པོ་མཐོང་བ་དང་། །སྦལ་པ་ཉ་སོགས་མཚན་མོ་རྨི། །བུ་མོ་གཞོན་ནུ་མཐོང་བ་དང་། །སྐྱེས་པ་སྐྲ་སེར་རྨི་བ་དག །ཀླུ་ཡི་མཚན་སྨྲ་བསྟན་པ་
ཡིན། །ཁྲུས་ལ་དགའ་ཞིང་སྐུད་པ་འཁལ། །ཆང་ལ་ཡོངས་སུ་དད་ཆེ་བ། །ཚངས་པའི་ནད་དུ་ཤེས་པར་བྱ། །སྨྲ་ལོག་མང་དང་ལག་སྒྱུར་དང་། །ཐོ་རངས་ན་བ་གང་ཡིན་པ། །ཟས་མི་ཟ་དང་སྙིང་འཕར་
བ། །ཚངས་པའི་གདོན་དུ་རིགས་པར་བྱ། །རྐེད་པ་བརྐྱང་དང་ཉལ་ལ་དགའ། །སེན་མོ་བྱི་དོར་བྱེད་པ་དག །ཚངས་པའི་ནད་དུ་ཤེས་པར་བྱ། །ནུབ་མོ་སྦུར་བ་རྨི་བ་དང་། །སྤྲེའུ་བྱི་ལ་མཐོང་གྱུར་ན། །ཚངས་པའི་
མཚན་མར་བསྟན་པ་ཡིན། །མི་རྒན་རིབ་པ་མཐོང་བ་དང་། །ཤར་ཕྱོགས་རི་ལ་འཛེག་པ་དག །ཚངས་པའི་རྟགས་སུ་བསྟན་པ་ཡིན། །དབུགས་དགས་ནང་དུ་འདྲེན་པ་དང་། །གླལ་ཞིང་སྤྱི་བོར་ལག་པ་འདུད། །སྐྱུག་པར་བྱེད་ཅིང་ཤ་ལ་དགའ། །གཤིན་རྗེ་ཡི་ནི་གདོན་དུ་བསྟན། །

90-1-26a

རྐང་པ་ས་ལ་བརྡབ་པ་དང་། །མཁལ་སོགས་གཡས་པའམ་གཡོན་པ་ན། །གཤིན་རྗེའི་ནད་དུ་རིག་པར་བྱའོ། །ཚིག་པ་ཟ་དང་གཞན་ལ་རྒོལ། །མི་གཞན་ལ་ནི་མངོན་པར་སྡང་། །སྡུར་དག་རབ་ཏུ་མི་བདེ་དང་། །ཐག་པ་དག་
ལས་མདུད་པ་འདོར། །གཤིན་རྗེའི་གདོན་དུ་ཤེས་པར་བྱ། །གླང་དང་ཤ་བ་རྨིས་པ་དང་། །གོས་དག་སྔོན་པོ་ལུས་ལ་གྱོན། །གཤིན་རྗེ་ཡི་ནི་མཚན་མ་ཡིན། །ཤིང་ལ་འཛེགས་པས་ཕྱིར་ལྷུང་དང་། །གྲུ་ན་ཞུགས་པ་གང་རྨི་བ། །
དེ་ནི་གཤིན་རྗེའི་མཚན་མ་ཡིན། །མིག་རྩ་རྒོད་ཅིང་ལྦུ་བ་སྐྱུག །འཁུར་བ་འབུད་ཅིང་བྲང་ལ་རྡུང་། །གནོད་སྦྱིན་གདོན་དུ་ཤེས་པར་བྱ། །ཡང་ཡང་ལྡང་ཞིང་རྔམ་པ་རྒོད། །ཁ་ནས་ལྕེ་ནི་རྐྱོང་བ་དང་། །ལུས་ལ་བསྐུ་བྱུག་བྱེད་པ་ནི། །
གནོད་སྦྱིན་གདོན་དུ་ཤེས་པར་བྱའོ། །ལྟོ་བ་ན་ཞིང་ཟས་ལ་དགའ། །རྒྱབ་དུ་གཟེར་བ་གང་ཡིན་པ། །གནོད་སྦྱིན་ནད་དུ་ཤེས་པར་བྱ། །རྟ་སྔོན་དག་ལ་ཞོན་པ་དང་། །བོང་བུ་ལ་ཞོན་རྨི་བ་རྣམས། །གནོད་སྦྱིན་མཚན་
མ་ཡིན་པར་བཤད། །བྱ་རོག་ལག་པར་ཐོགས་པ་དང་། །ཐག་པས་ལུས་འཁྱུད་ཉལ་བར་རྨིས། །གནོད་སྦྱིན་མཚན་མར་རིག་པར་བྱའོ། །སྤོས་ཆུ་ལ་ནི་སྔགས་བཏབ་ནས། །བྱིན་ན་ལེན་པར་མི་བྱེད་པ། །ཚང་པའི་
གདོན་དུ་ཤེས་པར་བྱ། །ཡུངས་ཀར་ཉིད་ལ་རབ་བསྔགས་ནས། །ལག་པར་བྱིན་པས་མིག་མི་ལྟ། །གཤིན་རྗེའི་གདོན་དུ་ཤེས་པར་བྱ། །ཤ་ལ་སྔགས་ཀྱིས་རབ་བསྔགས་ནས། །ཁ་རུ་བྱིན་པས་སྣ་འགགས་པ། །དེ་ནི་
ཀླུ་གདོན་ངེས་པར་གསལ། །སྐུད་པ་སྔོན་པོ་ཉིད་ལ་ནི། །རབ་སྔགས་མདུད་པ་བདུན་བོར་བ། །མགུལ་དུ་བཅིངས་པས་སྐད་ངན་འདོན། །གནོད་སྦྱིན་གདོན་དུ་ཡིན་པར་བཤད། །ཆོམ་པོ་དག་ནི་ཕྲད་པ་ན། །སྦྱོར་བ་འདི་ཡིས་
ཡང་དག་སྦྱོར། །དུར་ཁྲོད་མི་གང་བསྲེགས་པ་ཡི། །སྣ་ཚོགས་ཐལ་བ་བླང་བྱས་ལ། །ཆང་དང་ངེས་པར་སྦྲུས་བྱས་ཏེ། །སྦྲུལ་གྱིས་ལྤགས་པས་གཏུམས་བྱས་ལ། །ཏིལ་གྱི་གང་བུ་གྲགས་པ་ལ། །འབུམ་དུ་ཡང་དག་བཟླས་བྱས་ཏེ། །

90-1-26b

བདག་ཉིད་གོས་ལ་ཡང་དག་གཏུམ། །དེ་ནས་དེ་དང་ཕྲད་པ་ན། །དྲག་པོ་ལས་ཀྱི་སྦྱོར་བ་ཡིས། །དེ་ཉིད་ལ་ནི་ཕོག་པར་གཏོར། །དེ་ཡིས་དེ་ལ་གཏོར་བ་ཡིས། །དེ་ནི་རེངས་དང་རྨོངས་པར་འགྱུར། །ཨོཾ་མ་ནུ་ཥ་དུཥྚ་སྟཾ་བྷ་ན་ཧཱུྃ། །
སྒྱུ་མ་དབང་དུ་སྡུད་བྱེད་ན། །སྦྱོར་བ་འདི་ཉིད་བརྩམ་པར་བྱ། །ངོས་འཇམ་རྡུལ་དང་ཟླ་བ་དང་། །བགེགས་ཀྱི་གཉེན་པོའི་ཁུ་བ་དང་། །སྒོག་ཆེན་ལས་ཀྱི་ཁུ་བས་སུ། །བྱེད་པ་གཉིས་ཀ་བར་སྦྲུས་ལ། །དེ་ལ་འཐུན་པ་ཉིད་ལ་ནི། །ཡོངས་
སུ་བསྐུལ་བས་སྦྱིན་པར་བྱ། །དེ་ནས་ངེས་པ་དུས་བཏབ་ལ། །ཁ་སྦྱོར་བ་ཡིས་ཡང་དག་བསྔགས། །ཨོཾ་ན་མ་ཀཱ་མ་དེ་བ་ཡ་ཡ་ཡ་ཀ་ཡ་ཀ་ཀཱ་ལ་སིཉྩ་བྷ་གྷ་བི་བར་ཏ་ན་སྭཱ་ཧཱ། ཨ་མུ་ཀཾ། འབུམ་དུ་དང་པོར་བསྙེན་པ་ཡིས། །
སྦྱོར་བ་ངེས་པར་སྤྱད་པར་བྱ། །ནོར་དག་བསྒྲུབ་པར་འདོད་པ་ན། །ནོར་འཛིན་ལྷ་མོ་ཡོངས་སུ་བྲི། །ཁ་དོག་སེར་པོ་ཉིད་ལ་ནི། །ཕྱག་བཞི་པར་ནི་བྲི་བར་བྱ། །ཞལ་གཅིག་ནུ་མ་འབུར་བ་ལ། །གཡས་ཀྱི་དང་པོ་ཏིང་འཛིན་པ། །
གཉིས་པ་འབྲས་ཀྱི་སྙེ་མ་འཛིན། །གཡོན་གྱི་དང་པོ་ཉིད་ན་ནི། །རིན་ཆེན་འབར་བ་ཡང་དག་བསྣམས། །གཉིས་པ་ནེ་ལའི་རྐྱལ་པ་བསྣམས། །དེ་ལྟ་བུ་ཡི་གཟུགས་བྱས་ལ། །སྣ་ཚོགས་དྲི་ཡིས་ཡང་དག་མཆོད། །
མཆོད་པ་རྣམ་པ་ལྔ་དག་དང་། །ནམ་བཟའ་དར་ལ་སོགས་པ་ཡིས། །ཡང་དག་པ་རུ་མཆོད་པར་བྱ། །ཞག་གྲངས་བརྒྱ་རྩ་བརྒྱད་པ་རུ། །ཡོངས་སུ་བསྙེན་པས་སྔགས་བཟླས་བྱ། །དེ་ནས་གྲུབ་པར་གྱུར་པའི་རྟགས། །དེ་
ཉིད་གཡོ་བར་གྱུར་པ་ཡིན། །དེ་གྲུབ་རྟེན་ནི་རྙེད་པར་ནི། །དེ་ཡིས་ལུང་ནི་སྟོན་པར་འགྱུར། །དེ་ནས་དབྱིག་ནི་མི་བཟད་པའི། །བདག་པོར་མི་དེ་ངེས་པར་འགྱུར། །མ་རུངས་པ་དག་སྨྱོར་གཞུག་ན། །སྦྱོར་བ་འདི་དག་ངེས་པར་
བརྩམ། །དེ་ཡིས་ཀུན་གྲགས་ཉིད་དང་ནི། །ཁུ་ཆེན་ས་ལ་སོགས་པ་ལ། །སྔགས་འདི་ཡིས་ནི་འབུམ་དུ་བཟླས། །དེ་ནས་བསྙེན་པ་ཡོངས་རྫོགས་པས། །ཡིད་ཆེན་དུང་ལ་སྦུ་གུ་ཅན། །སོར་བདུན་དག་ལ་དུག་བླུགས་ཏེ། །

90-1-27a

སྐུད་པ་སྔོན་པོའི་རབ་བཅིངས་ལ། །ནུབ་ཕྱོགས་དག་ཏུ་ངེས་པར་གདགས། །དེ་ནི་འབྱུང་བས་བསྐྱོད་པ་ན། །མི་དེ་ངེས་པར་སྨྱོ་བར་འགྱུར། །ཨོཾ་མ་ཧཱ་ཀཱ་ལ་ཡ་སྟཾ་བྷ་ཨུ་ན་མ་ཏ་ཡ། ཨ་མུ་ཀཾ་སཉྩ་ལ་སྭཱ་ཧཱ། 
མི་རྣམས་ངེས་པར་མི་གསལ་བས། །རྡོ་རྗེ་མོ་ནི་ཡོངས་སུ་བསྒྲུབ། །ས་ལ་ཕྱོགས་བཞི་མཚམས་བརྒྱད་དུ། །རེའུ་མིག་བཅུ་གཉིས་བྲིས་བྱས་ལ། །མ་རིག་ལ་སོགས་རྟགས་ཀྱི་ནི། །དངོས་པོ་ཡང་དག་འདྲི་བར་བྱ། །
དེ་ནས་སྔགས་པས་རབ་བསྔགས་ལ། །བསམ་པ་རབ་ཏུ་རྫོགས་བྱས་ལ། །དེ་ཉིད་དངོས་པོ་གང་ཡིན་པས། །བསམ་པ་སྦྱར་བས་མེ་ཏོག་བོར། །གང་དུ་བབ་པ་དེར་གནས་ལ། །ཤེས་རབ་ཅན་གྱིས་རྣམ་པར་དཔྱོད། །
བཟང་ངན་ལྟས་རྣམས་ཡོངས་སུ་བཤད། །རིག་པ་ལེགས་པར་སྦས་པ་ཡིས། །བ་ཡི་ལྕི་བས་རབ་བཏུམ་ལ། །དང་པོར་གཉིས་སུ་ཤེས་པར་བྱ། །རིང་དུ་བྱེ་བྲག་མེད་པ་ཡིས། །བཅོམ་ལྡན་སྔོན་དུ་བཞག་བྱས་ཏེ། །དང་པོར་
མཆོད་པས་ཡང་དག་མཆོད། །དམོད་དག་ཡོངས་སུ་བཙུགས་པ་ཡིས། །ཤེས་རབ་བཅུ་གསུམ་བདག་ཉིད་ཅན། །དམར་པོ་གོས་ཀྱིས་བརྒྱན་བྱས་ཏེ། །ཁྲུས་དག་ལེགས་པར་བྱས་པ་དང་། །དྲི་ཡིས་ལེགས་པར་
བྱུགས་བྱས་ལ། །དཔྲལ་བར་ཐིག་ལེ་དམར་པོ་གདབ། །མེ་ཏོག་དྲི་ཞིམ་དམར་པོ་ཉིད། །དེ་ཡི་ལག་ཏུ་སྦྱིན་པར་བྱ། །དེ་ཡིས་དེ་ལ་བླང་བར་བྱ། །དེ་ཉིད་དངོས་པོ་གསལ་བྱ་སྟེ། །བཟང་ངན་ལྟས་སུ་
ངེས་པར་སྟོན། །སྤྱིར་ན་སྣ་ཚོགས་གདོན་ལ་ནི། །འབར་བ་ཆེན་པོའི་སྔགས་བཟླས་བྱ། །གུ་གུལ་ནག་པོའི་དུད་པ་དག །དེ་ཡི་སྣ་རུ་བདུག་བྱས་ལ། །ཡུངས་ཀར་གུ་གུལ་མེ་ཏོག་དང་། །དེ་ཡི་
སྙིང་པོས་སྲེགས་པར་བྱ། །དེ་ཡིས་ནད་པ་གང་ཡིན་པ། །བགེགས་དང་ངེས་པར་བྲལ་བར་འགྱུར། །སྲིན་ལག་ཉིད་ལ་སྐུད་པ་ནི། །སྔོན་པོས་ཡང་དག་བསྡམ་པར་བྱ། །སྤྱི་བོའི་སྐྲ་ལ་སྲད་བུ་གང་། །

90-1-27b

བཅིང་པས་སྔགས་ནི་ངེས་པར་བཟླས། །འཁྲུག་པའི་སྡེ་དག་རྒྱལ་འདོད་ན། །ཁམས་གསུམ་རྣམ་རྒྱལ་སྙིང་པོ་ཡིས། །འབུམ་དུ་བཟླས་པས་བསྙེན་པ་བྱ། །དེ་ནས་ཨ་མྲའི་ལོ་མ་ལས། །ཡུང་
བས་ཡོངས་སུ་བྲིས་བྱས་ལ། །འགི་ཝང་གིས་ནི་རབ་ཏུ་བཀུ། །ཅོད་པན་སྤྱི་བོར་བཏུམས་བྱས་ལ། །རང་ཉིད་སྐུ་རུ་བསྒོམ་བྱས་ལ། །ལག་པ་གཡས་པས་ཡུངས་ཀར་དང་། །སྐེ་ཚེ་ཐལ་བར་
སྦྱར་བྱས་ལ། །སྔགས་བཟླས་སྡིག་མཛུབ་ཕྱར་བ་ཡིས། །ཡོངས་སུ་བྲིས་བར་སྡེ་རྒྱལ་འགྱུར། །རྣལ་འབྱོར་པ་ཡིས་བདག་ཉིད་ལ། །འཆི་བབ་བསླུ་བ་ཡང་དག་བྱ། །བདག་གིས་རྒྱུད་ལ་འཆི་ལྟས་ནི། །
ཕྱི་ནང་བཅུ་གཉིས་ཡང་དག་ལྡན། །བདག་གིས་བྲང་ལ་ཤ་མཚན་དག །དམར་པོ་བྱུང་བར་གྱུར་པ་ན། །སུམ་བཅུ་གཉིས་ཞག་འཆི་འགྱུར་བས། །རིག་པའི་རྒྱལ་པོའི་སྔགས་ཀྱིས་སུ། །ཏིལ་ལ་བསྲེག་
བླུགས་སྟོང་དུ་ནི། །ཚང་བར་བྱས་པས་དེ་བཟློག་འགྱུར། །དེ་དང་ཆ་མཐུན་གང་ཡིན་པ། །རྐན་ལ་འབྲུམ་བུ་གསུམ་པ་དང་། །ལྕེ་ཡི་རྩེ་མོར་སྨེ་བ་དང་། །རྡོ་རྗེའི་ལམ་ནས་ཁྲག་འཛག་དང་། །འཛག་གཉིས་དབུགས་དག་གསུམ་པ་དང་། །རི་ཡི་རྩེ་མོར་
ཤུ་བ་བྱུང་། །ནང་གི་འཆི་ལྟས་ངེས་པ་སྟེ། །སྟག་དང་བྱི་བ་འབྲུག་དག་དང་། །རྩངས་པ་བྱ་གག་ནག་པོ་རུ། །ཡོངས་སུ་སྦྱོར་བས་རིག་པ་བཟླས། །འགི་ཝང་འུག་པ་རུ་སྦལ་དང་། །ཙམ་པ་ཀ་དང་ཨུད་པལ་དང་། །སེང་ལྡེང་
ཕུར་བུ་གང་ཡིན་དང་། །འུག་པའི་སྒྲོ་ལ་སྦྱོར་བ་དང་། །བྱ་རོག་མཁའ་ལ་འཕུར་བ་ཡི། །དཀར་པོས་བདག་ལ་ཕོག་པ་ནི། །ཕྱི་ཡི་འཆི་བལྟས་ཡིན་པས་ན། །གོང་དུ་གྲགས་པའི་སར་སོང་ལ། །རིག་པ་ལ་སོགས་སྦྱོར་
བ་ཡིས། །ཡོངས་སུ་བཟློག་པར་བྱ་བ་ཡིན། །མཁའ་ལ་སྣ་ལྔ་མཐོང་བ་དང་། །ཆུ་ལ་མི་གཟུགས་མཐོང་གྱུར་ན། །ཤིན་ཏུ་སྡིག་པའི་བལྟས་སུ་བསྟན། །རྨི་ལམ་ལ་ནི་སྟག་ཞོན་ལ། །མཆོད་རྟེན་ཉིད་ལ་འཛེག་པ་དང་། །

90-1-28a

སེང་གེའི་ཁར་ནི་ཞུགས་རྨིས་པ། །ཡོངས་སུ་སྡིག་པའི་ལྟས་ཡིན་པས། །ལོགས་ཤིག་སོར་མོ་རྩེ་གསུམ་དང་། །བསེ་རུའི་ཕྱོགས་དང་ཀུན་དའི་འདབ། །ཡོན་ཏན་རྒྱ་མཚོའི་མཚན་བཟང་དང་། །སྐྱེ་མཆེད་འཕགས་
ལཾམ་ཆུ་སྲིན་སོར། །ལོ་གསུམ་ཞག་བཞི་ཟླ་བ་ལྔར། །མི་དེ་ངེས་པར་འཆི་བས་ན། །རིག་པའི་རྒྱལ་མོ་བདུད་རྩི་འཁྱིལ། །རྟེན་འབྲེལ་ཡི་གེ་བརྒྱ་པ་ཡིས། །སྔགས་ཀྱིས་སྨན་ལ་བསྲུང་བ་བྱ། །ཁམས་གསུམ་རྣམ་
རྒྱལ་འཇིག་རྟེན་མགོན། །དེ་དག་གི་ནི་སྙིང་པོ་ཡིས། །སྟག་སོགས་གསོབ་ལ་ངེས་པར་བཟླས། །རྨ་བྱ་ཆེན་མོའི་སྔགས་དག་གིས། །འུག་པའི་སྒྲོ་སོགས་ངེས་པར་བསྔགས། །ཕྱག་ན་རྡོ་རྗེ་འཇམ་དབྱངས་དང་། །སྟོབས་ཆེན་ཁྲོ་བོ་
གང་དག་གི། །སྔགས་ཀྱིས་སེང་ལྡེང་འུག་སྒྲོ་དང་། །ཀུ་ཤ་བྱི་ལ་ལ་སོགས་དང་། །གསོབ་ལ་བསྔགས་པ་ཡོངས་སུ་བཟློག །གཏོར་མ་སྦྱིན་སྲེག་ལས་ཀྱིས་ནི། །ཡོངས་སུ་བཟློག་པར་བྱ་བ་ཡིན། །ཤིན་ཏུ་དཔའ་དང་དད་པར་
ལྡན། །ཤེས་རབ་ཆེ་དང་ཐོས་པ་བསགས། །བླ་མ་ལ་གུས་གཏོང་བར་ཕོད། །ལྟུང་བ་མ་གོས་གཙང་མ་ལ། །རིམ་པ་བཞིན་དུ་དབང་བསྐུར་ནས། །ཚོགས་ཀྱི་འཁོར་ལོ་ལྔ་བྱས་ལ། །ཤེས་རབ་ལྡན་ལ་བསྟན་བྱ་བའི། །
གསང་བ་དྲག་པོའི་རྒྱུད་རྒྱལ་འདི། །གཞན་ལ་བཤད་པར་བྱ་བ་མིན། །གསང་བ་བདག་པོ་ཁྱོད་ཀྱིས་ནི། །ཕན་དང་གནོད་བྱ་གང་ཡིན་ལ། །རིམ་པ་བཞིན་དུ་ཤེས་པ་ཡིས། །ལེགས་པར་སྦ་དང་བཤད་པ་ནི། །གནས་
སྐབས་དུ་མ་དང་ལྡན་ཞིང་། །ཀུན་ལ་ངེས་པར་ཞུགས་པ་ཡིས། །རྒྱུད་འདི་ལ་ནི་ངེས་པར་བརྟག །རྒྱུད་འདི་གང་ན་གནས་པ་ན། །ས་ཕྱོགས་དེ་ཡི་གདུག་པ་རྣམས། །རིང་དུ་བསྲིངས་པས་གནས་མི་བྱེད། །གལ་ཏེ་གནས་པར་
བྱེད་པ་ན། །དེ་རྣམས་ཀུན་གྱི་རྒྱུད་ཚིག་འགྱུར། །དྲག་པོ་རྒྱུད་ཀྱི་རྒྱལ་པོ་ལ། །གང་ཞིག་ཞུགས་པར་གྱུར་པ་ལ། །དུག་གསུམ་སྐུ་ལ་རབ་བརྒྱན་ནས། །བཙུན་མོའི་བྷ་ག་ལ་གནས་ཏེ། །ཉོན་མོངས་འཁོར་གྱིས་རབ་བསྐོར་

90-1-28b

ནས། །བདེ་བ་ཆེན་པོའི་རོལ་པས་གནས།      །      །      །     །ལག་ན་རྡོ་རྗེས་དེ་ཉིད་དུ།      །      །     །     །སྐད་ཅིག་ཙམ་གྱིས་བསྐོར་བ་ནི། །    །    །
འབུམ་ཕྲག་གསུམ་དུ་རབ་བསྐོར་ནས།      །      །།     །བདེ་བར་གཤེགས་ལ་འདི་སྐད་གསོལ།། །།བདག་གིས་རྒྱུད་ཀྱི་རྒྱལ་པོ་འདི། །    །    །།
ངེས་པའི་དོན་དང་རབ་སྦྱར་ནས།། །།གསང་བ་ཉིད་དུ་སྦ་བར་བགྱི།          །།       །ལག་ན་རྡོ་རྗེ་གོས་སྔོན་པོ་ཅན་གནོད་སྦྱིན་དྲག་པོ་རྡོ་རྗེ་མེ་ལྕེའི་
རྒྱུད་ལས་ལས་སྣ་ཚོགས་ཀྱི་ལེའུ་སྟེ་བཅྭ་ལྔ་པའོ།    །    །    །   །   །    །།ཕྱག་ན་རྡོ་རྗེ་གོས་སྔོན་པོ་ཅན།      གནོད་སྦྱིན་དྲག་པོ་ཆེན་པོ་རྡོ་རྗེ་མེ་
ལྕེའི་རྒྱུད་ཀྱི་རྒྱལ་པོ་ཆེན་པོ་རྫོགས་སྷོ།།        །       །      །།རྒྱ་གར་གྱི་མཁན་པོ་ཆེན་པོ་རཏ་ན་ཀཱིར་ཏི་དང་།། །།བོད་ཀྱི་ལོ་ཙྪ་བ་དགེ་ཚུལ་
ཁྱུང་གྲགས་ཀྱིས་བཀའ་དྲིན་མནོས་ནས་རྒྱ་དཔེ་བོད་དུ་སྤྱན་དྲངས་ཏེ་བསྒྱུར་བ་ལགས་སོ།། །།རྒྱུད་འབུམ་སྔ་མ་ཁ་ཅིག་ན་བཞུགས་པའི་ཕྱག་ན་རྡོ་རྗེ་མེ་
ལྕེའི་རྒྱུད་ལེའུ་བཅུ་གཉིས་པ་ནི།     །།     །།    །     །།     །རྒྱུད་འདི་ཉིད་ཀྱི་ལེའུ་བདུན་པ་བརྒྱད་པ་དགུ་པ་རྣམས་དོར་ནས།     །    །    ལེའུ་བཅུ་
གཉིས་པར་མིང་བཏགས་པར་ཡིན་གྱི།         །།         །།འདི་དང་མི་འདྲ་བའི་བརྒྱུད་འབུམ་ལོགས་པ་མིན་ནོ།        །།     །།    །།    །།      །      །

90-1-29a

This is a blank page without image

90-1-29b

༄༅། །རྒྱ་གར་སྐད་དུ།  ཤྲཱི་བཛྲ་པ་ཎི་ཨ་བཱི་ཏན་ཏྲཱ་ནཱ་མ།  བོད་སྐད་དུ།  དཔལ་ཕྱག་ན་རྡོ་རྗེ་གསང་བ་བསྟན་པའི་རྒྱུད། དཔལ་གསང་བའི་བདག་པོ་ལ་ཕྱག་འཚལ་ལོ། །འདི་སྐད་བདག་
གིས་ཐོས་པ་དུས་གཅིག་ན། འོག་མིན་གྱི་གནས་ལྕང་ལོ་ཅན་གྱི་ཕོ་བྲང་ན། བཅོམ་ལྡན་འདས་དཔལ་ཆེན་པོ་ལ། རིག་སྔགས་ཀྱི་ལྷ་ཚོགས་ཀྱིས་བསྐོར་ཏེ་བཞུགས་སོ། །དེ་ནས་དཔའ་མོའི་དབང་
ཕྱུག་མས་འདི་སྐད་ཅེས་གསོལ་ཏོ། །བཅོམ་ལྡན་འདས་གསང་བའི་བདག་པོ་འདི་སྒྲུབ་པའི་རྣལ་འབྱོར་པ་ཇི་ལྟ་བུ་ཅིག་ལགས། བཅོམ་ལྡན་འདས་ཀྱིས་བཀའ་སྩལ་པ། སྙིང་རྗེར་ལྡན་ཞིང་ཤེས་རབ་ཆེ། །
བཟོད་དང་ལྡན་ཞིང་བརྩོན་འགྲུས་ཆེ། །ཕྱི་ནང་གསང་བའི་དབང་ཐོབ་ཅིང་། །བསླབ་པ་གསུམ་ལ་རབ་ཏུ་གནས། །དེས་ནི་དཔའ་བོ་ཡང་དག་འགྲུབ། །གསང་བ་བསྟན་པའི་རྒྱུད་ལས་བསྒྲུབ་པ་པོ་
གང་ཟག་བསྟན་པའི་ལེའུ་སྟེ་དང་པོའོ།། །། ཡང་དཔའ་མོས་གསོལ་པ། བཅོམ་ལྡན་འདས་དཔའ་བོ་འདི་བསྒྲུབ་པའི་གནས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། དབེན་
པ་ཉམས་དགའ་ཡིད་འོང་བ། །བཀྲ་ཤིས་དཔལ་འཕེལ་དབང་ཡང་འཛིན། །དུར་ཁྲོད་ཆེན་པོ་འཇིགས་གནས་པ། །རི་གསུམ་རྩེ་འམ་བྲག་རི་སྔོ། །ཁྲོ་བོའི་ཆ་བྱད་འདྲ་བའི་
གནས། །དེ་ནི་དཔའ་བོ་བསྒྲུབ་ལ་ཤིས། །གསང་བ་བསྟན་པའི་རྒྱུད་ལས་སྒྲུབ་པའི་གནས་བསྟན་པའི་ལེའུ་སྟེ་གཉིས་པའོ།། །།

90-1-30a

ཡང་དཔའ་མོས་གསོལ་པ། བཅོམ་ལྡན་འདས་དཔའ་བོ་འདི་བསྐྱེད་པའི་དམིགས་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། དང་པོ་སྟོང་ཞིང་བདག་མེད་དེ། །སྣང་ཞིང་སྲིད་པའི་ཆོས་རྣམས་ཀུན། །ངོ་བོ་ཉིད་ཀྱིས་རྣམ་པར་དག །
དེ་ལྟ་བུ་ཡི་ཆོས་ཉིད་ལ། །སངས་རྒྱས་སེམས་ཅན་གཉིས་མེད་པས། །མི་སྒོམ་མི་རྟོག་སྣང་ལ་གསལ། །ནམ་མཁའ་མཐའ་མེད་མཁའ་མཉམ་དབུ་མའི་དོན། །སེམས་ཀྱི་རང་བཞིན་དེ་ལྟ་བུ། །དེ་ལྟར་མ་རྟོགས་སེམས་ཅན་ལ། །
སྡུག་བསྔལ་ཀུན་དང་བྲལ་བ་ཡི། །ཐུགས་རྗེ་ཕྱོགས་མེད་བསྒོམ་པར་བྱ། །སངས་རྒྱས་ཐམས་ཅད་འབྱུང་བའི་རྒྱུ། །རང་གི་སེམས་ནི་ཡི་གེ་ཧཱུྃ། །ཡི་གེ་ཧཱུྃ་གི་འཕྲོ་འདུ་ལས། །གཞལ་ཡས་ཁང་དང་ལྷ་ཡི་གདན། །ལྷ་ཡི་ས་བོན་
ཡི་གེ་ལས། །རིམས་བཞིན་དུ་བསྐྱེད་པར་བྱ། །གསང་བ་བསྟན་པའི་རྒྱུད་ལས་བསྐྱེད་པའི་དམིགས་པ་བསྟན་པའི་ལེའུ་སྟེ་གསུམ་པའོ།། །། ཡང་དཔའ་མོས་གསོལ་པ། བཅོམ་ལྡན་འདས་རིག་སྔགས་ཀྱི་བདག་པོ་འདིའི་བསམ་གྱིས་མི་ཁྱབ་པའི་དམིགས་པ་
ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། བསྐྱེད་པའི་དམིགས་པ་ཐོབ་ནས་ནི། །རང་གི་སྙིང་གར་ཡེ་ཤེས་སེམས་དཔའ་བསྒོམ། །ཡེ་ཤེས་སེམས་དཔའི་ཐུགས་ཀར་ནི། །པད་མ་འདབ་བཞི་རྒྱ་སྲན་ཙམ། །དབུས་སུ་ཉི་ཟླའི་གཞལ་ཡས་
ཁང་། །གཞལ་ཡས་ཁང་གི་ནང་དུ་ནི། །ཨ་ཤད་མར་མེའི་རྩེ་ལྟར་སྒོམ། །དེ་ལ་དམིགས་པ་ཐོབ་ནས་ནི། །ཅི་ཡང་བསམ་པར་མི་བྱ་སྟེ། །བསམ་གྱིས་མི་ཁྱབ་དེ་བསམ་ནས། །དེ་ལ་ཡེ་ཤེས་ཐོབ་པར་འགྱུར། །གསལ་ལ་རྟོག་མེད་རིག་པའི་སྐུ། །
ཡེ་ཤེས་ཞེས་ནི་དེ་ལ་བྱའོ། །གསང་བ་བསྟན་པའི་རྒྱུད་ལས་བསམ་གྱིས་མི་ཁྱབ་པའི་དམིགས་པ་བསྟན་པའི་ལེའུ་སྟེ་བཞི་པའོ།། །། ཡང་དཔའ་མོས་གསོལ་པ། བཅོམ་ལྡན་འདས་གསང་བའི་བདག་པོ་འདིའི་འཁོར་ཇི་ལྟ་བུ་ལགས། བཅོམ་ལྡན་འདས་ཀྱིས་
བཀའ་སྩལ་པ། དཔའ་བོ་ཆེན་པོ་འདིའི་འཁོར་ནི། །ཐུགས་ཀྱི་འཁོར་ནི་བཞིའོ། །བསུང་གི་འཁོར་ནི་བརྒྱད་དོ། །སྐུའི་འཁོར་ལྔ་བརྒྱར་ངེས་སོ། །གསང་བ་བསྟན་པའི་རྒྱུད་ལས་འཁོར་བསྟན་པའི་ལེའུ་སྟེ་ལྔ་པའོ།། །།

90-1-30b

ཡང་དཔའ་མོས་གསོལ་པ། བཅོམ་ལྡན་འདས་དཔལ་ཆེན་པོ་འདིའི་རིག་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ༀ་བཛྲ་པཱ་ཎི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ༀ་བཛྲ་ཀྲོ་དྷ་ནཱྀ་ལཱྃ་བ་ར་དྷ་བཛྲ་པཱ་ནི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ༀ་བཛྲ་པཱ་ཎི་
ཀྲོ་དྷ་མ་ཧཱ་ཙཎ་ཌ་མ་ཧཱ་རོ་ཥ་ཎ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། འཁོར་བཞིའི་རིག་པ་ཕུལ་བ་ནི། ༀ་བཛྲ་ཀྲོ་དྷ་མ་ཧཱ་ཀཱ་ལ་ཡ་ཧཱུྃ་ཧཱུྃ་ཕཊ་ཕཊ་ཙིཏྟ་ཀྲོ་ཙི་དུན་ཛ། ༀ་བཛྲ་ཀྲོ་དྷ་ཏྲཻ་ལོཀྱ་བི་ཛ་ཡ་ཧཱུྃ་ཧཱུྃ་ཕཊ་ཕཊ། མ་ར་ཡ་ཙིཏྟ་རྦད་རྦད། ༀ་བཛྲ་ཀྲོ་དྷ་ནཱ་ག་སྤུ་ཤ་
ཧཱུྃ་ཧཱུྃ་ཕཊ་ཕཊ། མ་ར་ཡ་རག་ཏ་རྔུབས་རྔུབས་རྦད། ༀ་བཛྲ་ཀྲོ་དྷ་ཀུ་བཻ་ར་ཧཱུྃ་ཧཱུྃ་ཕཊ་ཕཊ། མ་ར་ཡ་ཀེ་ཚྃ་ཚྃ་རྦད། དཔའ་བོའི་འཁོར་ལྷ་སྲིན་སྡེ་བརྒྱད་ཀྱི་རིག་པ་ཕུལ་བ། མ་ཧཱ་དེ་བར་མཱ་ར་ཡ་སོད་སོད། མ་ཧཱ་ནཱ་ག་མཱ་ར་ཡ་སོད་སོད་ཛ་ཛཿམ་ཧཱ་
དེ་ཝི་མཱ་ར་ཡ། ཧ་ན་ཧ་ན། མ་ཧཱ་མ་ནི་མཱ་ར་ཡ་རྟུབས་རྟུབས། མ་ཧཱ་སིད་དྷ་མཱ་ར་ཡ་ཏིཥྛ་ཏིཥྛ། མ་ཧཱ་ཡཀྵ་མཱ་ར་ཡ་བྷིན་ད་བྷིན་ད། མ་ཧཱ་དྲི་ཟ་མཱ་ར་ཡ་ཁས་ཁས། མ་ཧཱ་མ་ནི་བིན་དྷ་མཱ་ར་ཡ་ནན། མ་ཧཱ་བཛྲ་ཧཱུྃ་ཕཊ་མཱ་ར་ཡ་རུ་དྷ་རུ་དྷ་ཧཱུྃ་ཧཱུྃ་ཕཊ། 
གསང་བ་བསྟན་པའི་རྒྱུད་ལས་རིག་པ་ཕུལ་བའི་ལེའུ་སྟེ་དྲུག་པའོ།། །། ཡང་དཔའ་མོས་གསོལ་པ། བཅོམ་ལྡན་འདས་དཔའ་བོ་འདིའི་ཕྲིན་ལས་མཇུག་སྦྱིན་བསྲེག་གིས་བསྡུ་འཚལ་ལམ་མི་འཚལ་ཅེས་གསོལ་པ་དང་། བཅོམ་ལྡན་འདས་ཀྱིས་
བཀའ་སྩལ་པ། སྦྱིན་བསྲེག་ནི་རྣམ་པ་གསུམ་སྟེ། ཕྱི་དང་ནང་དང་གསང་བ་གསུམ། །རེ་རེ་ལ་ནི་བཞི་བཞིར་བསྟན། །ཞི་བ་དང་ནི་རྒྱས་པར་བསྟན། །དབང་དང་དྲག་པོའི་སྦྱིན་བསྲེག་གོ་གསང་བ་བསྟན་པའི་རྒྱུད་ལས་སྦྱིན་བསྲེག་གི་ལེའུ་སྟེ་བདུན་པའོ།། །།
བཅོམ་ལྡན་འདས་དཔལ་ཆེན་པོས། དེ་སྐད་ཅེས་བཀའ་སྩལ་པ་དང་། དཔའ་མོའི་དབང་ཕྱུག་མ་དང་། རིགས་ཀྱི་ལྷ་ཚོགས་རྣམས་དགའ་མགུ་ཡི་རངས་ཏེ། དཔལ་ཆེན་པོས་གསུངས་པ་ལ་མངོན་པར་བསྟོད་དོ།། །།
དཔལ་ཕྱག་ན་རྡོ་རྗེ་གཏུམ་པོ་གསང་བ་བསྟན་པའི་རྒྱུད་རྫོགས་སོ།། །།རྒྱ་གར་གྱི་པཎ་ཌི་ཏ་ཝ་ལ་ཙན་དྲ་དང་། ལོ་ཙྪ་་བ་གླན་ཆུང་དར་མ་ཚུལ་ཁྲིམས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །ཞུས་དག །།

90-1-31a

༄༅། །རྒྱ་གར་སྐད་དུ།  བྷ་ག་བཱན་བཛྲ་པཱ་ཎི་གུ་ཧྱ་ཨ་བྷི་དེ་ཤ་ཏན་ཏྲ་རཱ་ཛ་ནཱ་མ།  བོད་སྐད་དུ།  བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ། ཞེས་བྱ་བ། དཔལ་གསང་བའི་བདག་པོ་ཕྱག་ན་རྡོ་རྗེ་ལ་ཕྱག་
འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ལྕང་ལོ་ཅན་གྱི་ཕོ་བྲང་ན། སངས་རྒྱས་གང་གཱའི་ཀླུང་གི་བྱེ་མ་དང་མཉམ་པའི་ཚོགས་དང་བྱམས་པ་ལ་སོགས་པ་བྱང་ཆུབ་སེམས་དཔའི་ཚོགས་དང་རིག་
པའི་ཁྲོ་བོའི་ཚོགས་དཔག་ཏུ་མེད་པ་དང་། ལྷ་མ་ཡིན་གྱི་ཚོགས་དང་། གནོད་སྦྱིན་ལྔ་བརྒྱ་དང་བཅས་ཏེ་ཐབས་གཅིག་ཏུ་བཞུགས་སོ། །དེའི་ཚེ་བཅོམ་ལྡན་འདས་བདུད་ཐམས་ཅད་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་བྱང་
ཆུབ་སེམས་དཔའ་ལག་ན་རྡོ་རྗེས་བླ་གོས་ཕྲག་པ་གཅིག་ལ་གཟར་ཏེ། ཕྱག་འཚལ་ནས་འདི་སྐད་ཅེས་གསོལ་ཏོ། །ཀྱེ་མ་གསང་བའི་རྡོ་རྗེ་འཛིན། །ཏིང་འཛིན་རྒྱལ་པོ་མི་གཡོ་ལས། །ཅིག་ཅར་བཞེངས་ཏེ་གསང་བའི་མཆོག །ཡེ་ཤེས་ལྔ་ཡི་སྤྱོད་ཡུལ་གྱི། །སྐུ་
གསུང་ཐུགས་ཀྱི་གསང་བ་མཆོག །ཇི་ལྟར་བསྒྲུབ་པའི་རིམ་པ་དང་། །ལས་ཀྱི་བྱ་བ་མདོར་བསྡུས་ཏེ། །གང་ཟག་ཇི་ལྟ་བུས་སྒྲུབ་ཅིང་། །རིག་པའི་རྒྱལ་པོ་མཆོག་གྱུར་པ། །བཅོམ་ལྡན་འདས་ཀྱིས་ལེགས་པར་གསུངས་ཞེས་ཞུས་པ་དང་། བཅོམ་ལྡན་འདས་མཉམ་པར་བཞགས་པ་ལས་
ལངས་ཏེ། ཐུགས་ཀར་ཡེ་ཤེས་ལྔ་མི་ཕྱེད་པའི་རྡོ་རྗེ་ལན་གསུམ་དུ་གསོར་བས་འཇིག་རྟེན་གྱི་ཁམས་ཐམས་ཅད་འགུལ་བ་དང་། ལྡེག་པ་ལ་སོགས་པ་ཀུན་དུ་འཁྲུགས་ཏེ། གདུག་པ་ཅན་འདུལ་བ་ཞེས་བྱ་བའི་འོད་ཟེར་བཀྱེ་ནས་སླར་ཐུགས་ཀར་ཐིམ་པ་ལས་
རྡོ་རྗེའི་ལྟེ་བ་ནས་ཡུམ་དཔའ་མོ་རྡོ་རྗེ་བདེ་མ་ཞེས་བྱ་བ་བྱུང་སྟེ། རང་གི་སྟོན་པ་ལ་གཡས་ཕྱོགས་སུ་བསྐོར་བ་ལན་གསུམ་བྱས་ནས། ཕྱག་བྱས་ཐལ་མོ་སྦྱར་ཏེ་འདི་སྐད་ཅེས་གསོལ་ཏོ། །ཁྱོད་ཀྱི་སྐུ་གསུང་ཐུགས་ཀྱི་ནྀ། །གསང་བའི་དམ་པ་གང་ཡིན་པ། །རྡོ་རྗེ་འཛིན་
པས་ལེགས་པར་གསུངས། །འདི་ནི་རྙེད་དཀའ་རྒྱུད་ཆེན་ཏེ། །རིན་ཆེན་ལྟ་བུར་འདོད་འབྱུང་བ། །གྲངས་མེད་ཚོགས་ལས་བྱུང་བ་འདི། །ཐུགས་རྗེའི་རང་བཞིན་སྟོང་པ་ལས། །བཅོམ་ལྡན་ཁྱོད་ཀྱིས་བཤད་དུ་གསོལ་ཞེས་ཞུས་པ་དང་། ཞལ་འཛུམ་པ་

90-1-31b

མཛད་ནས་བྱམས་པ་རྣམ་པར་འཕྲུལ་པ་ཞེས་བྱ་བའི་འོད་ཟེར་གྱིས་འཇིག་རྟེན་ཁྱབ་པར་བྱས་ཏེ། ཚུར་འདུས་ནས་རང་གི་ཞལ་དུ་ཐིམ་པ་དང་། དཔའ་མོ་རྡོ་རྗེ་བདེ་མ་ཁྱོད། །སྟོང་པའི་རང་བཞིན་བདག་མེད་མས། །ཇི་ལྟར་ཞུས་བཞིན་བཤད་
པར་བྱ། །གུས་པར་ཉོན་ལ་ལེགས་པར་ཟུང་། །རྡོ་རྗེ་འཆང་གི་སྐུ་གསུང་ཐུགས། །མི་ཕྱེད་སྟོང་པའི་རང་བཞིན་ལས། །ཐུགས་རྗེ་སྣ་ཚོགས་ཐབས་ཚུལ་ཏེ། །འདི་ནི་རབ་ཏུ་རྟོགས་དཀའ་བས། །འདས་དང་ད་ལྟར་བཞུགས་པ་དང་། །མ་འོངས་སངས་རྒྱས་སྤྱོད་ཡུལ་
ཡིན། །བསམ་གྱིས་མི་ཁྱབ་རྣམ་པར་དག །བརྗོད་མེད་མི་གཡོ་འདུས་མ་བྱས། །ནམ་མཁའ་དྲི་མེད་ཆོས་ཀྱི་སྐུ། །དུས་གསུམ་དུས་མེད་རྟོགས་པའི་མཆོག །འདི་ལ་ཇི་ལྟར་བསྟན་དུ་ཡོད། །འོན་ཀྱང་སྙིང་རྗེའི་རང་བཞིན་པས། །
ཐབས་དང་ཤེས་རབ་རང་བཞིན་ནི། །གཉིས་མེད་གཉིས་ཀྱི་ཐབས་ཚུལ་རིག །འདི་ནྀ་གསང་བ་དམ་པ་སྟེ། །དེ་ཉིད་གཞན་ལ་མངོན་བསྟན་པས། །གདུལ་བྱ་ཚིམ་འགྱུར་རྒྱལ་པོ་བཞིན། །རང་འདོད་འབྲས་བུ་འབྱུང་འགྱུར་བས། །གསང་བ་མངོན་པར་བསྟན་
པ་ཡི། །རྒྱུད་ཆེན་རྒྱལ་པོ་བཤད་པར་བྱ། །ཨེ་མ་ཧོ། མི་ཕྱེད་རྡོ་རྗེ་གསང་བའི་མཆོག །ཨེ་མ་ཧོ། ཐབས་དང་ཤེས་རབ་གཉིས་མེད་པའི། །སྣ་ཚོགས་ནོར་བུ་རྒྱུད་ཆེན་འདི། །རང་གི་གསང་བ་དམ་པ་ཡིན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་
རྒྱུད་ཀྱི་རྒྱལ་པོ་ལས་རབ་ཏུ་དགའ་བའི་གླེང་གཞིའི་ལེའུ་སྟེ་དང་པོའོ།། །། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་ཆེན་པོ་ཁྱོད་བསྒྲུབ་པའི་གང་ཟག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། མཛེས་མ་ཁྱོད་ཀྱིས་ཞུས་པ་ལེགས། །
ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ང་ཉིད་སྒྲུབ་པའི་གང་ཟག་ནི། །སྙིང་རྗེ་ལྡན་ཞིང་ཤེས་རབ་ཆེ། །བཟོད་ལྡན་བརྩོན་འགྲུས་ཕུན་སུམ་ཚོགས། །བསླབ་པ་གསུམ་ལྡན་དད་པས་བརྒྱན། །
དཔའ་ཞིང་གསང་བའི་སྤྱོད་པ་ཤེས། །གུས་ཤིང་གཡོ་མེད་སྐྱབས་གནས་གསུམ། །རྟག་ཏུ་མཆོད་ཅིང་ཡེངས་པ་མེད། །ལྷག་པའི་ལྷ་ལ་ཡིད་ཆེས་ཤིང་། །ཕྱི་ནང་གསང་བའི་དབང་ཐོབ་ལ། །དམ་ཚིག་བརྡ་དོན་ངེས་པར་འཛིན། །དེ་ལྟས་སྒྲུབ་པ་བྱས་གྱུར་ན། །

90-1-32a

ཡུན་མི་རིང་བར་ང་ཉིད་ཀྱི། །གསང་གསུམ་ལ་ནི་མཁས་འགྱུར་ཏེ། །འབད་པས་ཐོབ་པའི་འབྲས་བུ་ནི། །སྐལ་ལྡན་དེ་ཡི་སྙིང་ལ་གནས་ཞེས་གསུངས་སོ། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་
བསྟན་པའི་རྒྱུད་ཀྱི་རྒྱལ་པོ་ལས་སྒྲུབ་པ་པོའི་གང་ཟག་བསྟན་པའི་ལེའུ་སྟེ་གཉིས་པའོ།། །། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་སྒྲུབ་པའི་གནས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། 
མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ང་ཉིད་སྒྲུབ་པའི་གནས་མཆོག་ནི། །དུར་ཁྲོད་བརྒྱད་དམ་ཉེ་བའི་གནས། །དུར་ཁྲོད་ནགས་ཀྱི་
ནང་དུ་ནི། །རི་རྩེ་བྲག་རི་སྔོན་པོའི་མདོག །ཁྲོས་པའི་གཟུགས་འདྲ་བྱང་ལྟ་བ། །མེ་ཏོག་སྔོན་པོ་མཛེས་པ་དང་། །ནེའུ་སིང་དང་ཨུཏྤལ་ནག ། །དབེན་ཞིང་ཡིད་འོང་ཉམས་དགའ་བ། །བཀྲ་ཤིས་དཔལ་འཕེལ་དབང་ཡང་འཛིན། །ལྕང་ལོ་ཅན་དང་མིང་མཐུན་པ། །སྣ་
ཚོགས་སྒྲུབ་པའི་གནས་སུ་ཤིས། །ཚྭ་སྒོ་ཆུ་མེད་ཨུ་མའི་གནས། །བརྒྱལ་པོའི་ཕོ་བྲང་ཚོང་དུས་དང་། །ཉན་ཐོས་ལ་སོགས་འདུག་གནས་སུ། །ང་ཉིད་སྒྲུབ་པར་མི་བྱའོ། །སྨིན་པའི་གང་ཟག་རྣམས་ལ་ནི། །གནས་སོགས་བརྟགས་པས་ཅི་ཞིག་བྱ། །ཐམས་
ཅད་བདེ་ཆེན་སངས་རྒྱས་ཀྱི། །ཞིང་ཁམས་རོལ་པས་གནས་པ་ཡིན། །དེ་བས་རིགས་ཀྱིས་བརྟག་པར་བྱ། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱལ་པོ་ལས་སྒྲུབ་པའི་གནས་བསྟན་པ་ཞེས་བྱ་བའི་ལེའུ་སྟེ་གསུམ་པའོ།། །། དཔའ་མོ་
རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་ཁྱོད། སྒྲུབ་པའི་ཐབས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡིན་
མཆོག །ཁྱོད་ལ་བཤད་ཀྱིས་ལེགས་པར་ཉོན། །ང་ཉིད་སྒྲུབ་པའི་རིམ་པ་ནི། །སྙིང་རྗེ་ཆེན་པོས་སྔོན་འགྲོ་ཞིང་། །གཞན་གྱི་དོན་ལ་བསླབ་པར་བྱ། །ནམ་མཁའ་རྡོ་རྗེ་ཅན་དམིགས་ལ། །བདེ་བ་ཆེན་པོ་རྣམ་པར་མཆོད། །རྒྱུད་སྦྱང་སངས་རྒྱས་ཚོགས་དག་ལ། །འགྱོད་པ་སྤངས་ཏེ་རྗེས་ཡིད་རང་། །

90-1-32b

མྱ་ངན་འདས་ལ་གསོལ་བར་བྱ། །དམ་པའི་དོན་ལ་བསྐུལ་བྱ་ཞིང་། །རིགས་ཀྱི་ས་བོན་ཆེར་བསྐྱེད་ལ། །ཀུན་ལ་ཁྱབ་བྱ་གཞན་དོན་བསྒྲུབ། །བདག་གི་སྡུག་བསྔལ་མི་བལྟ་ཞིང་། །གཞན་དོན་བདེ་ལ་དགོད་པར་བྱ། །མེ་འོབས་ལྟ་བུར་
གནས་པ་ཡི། །སེམས་ཅན་ཀུན་ལ་སྙིང་རྗེ་བསྒོམ། །སྤྲོས་བྲལ་གཉིས་འཛིན་སྤངས་པ་ཡི། །ཚུལ་ལ་ཡང་དག་བསླབ་པར་བྱ། །སངས་རྒྱས་སེམས་ཅན་གཉིས་མེད་ཅིང་། །དང་པོ་སྟོང་ཞིང་བདག་དང་བྲལ། །སྣང་ཞིང་སྲིད་པའི་ཆོས་རྣམས་ཀུན། །
ངོ་བོ་ཉིད་ཀྱིས་རྣམ་པར་དག །འཐབ་བྲལ་མཁའ་འདྲ་དབུ་མའི་དོན། །དེ་ལྟ་བུ་ཡི་ཆོས་ཉིད་ལ། །སེམས་ཀྱི་རང་བཞིན་གཉིས་སུ་མེད། །མ་རྟོགས་ལོག་པའི་སེམས་ཅན་ལ། །སྡུག་བསྔལ་ཀུན་དང་དབྲལ་བའི་ཕྱིར། །སྙིང་རྗེ་ཆེན་པོ་
བསྒོམ་པར་བྱ། །རང་གི་སེམས་ཉིད་ཡི་གེ་ཧཱུྃ། །སངས་རྒྱས་ཐམས་ཅད་བསྐྱེད་པའི་མ། །ཆུ་སྐྱེས་ཐབས་དང་ཤེས་རབ་ལྡན། །མཐའ་གཉིས་སྤངས་པ་གདན་དང་བཅས། །གཉིས་མེད་རྡོ་རྗེའི་རང་བཞིན་ཏེ། །སྙིང་རྗེས་སྦྱངས་ནས་གསུམ་པ་རྫོགས། །སྐུ་མདོག་
ནག་པོ་ཞལ་གཅིག་པ། །ཕྱག་གཉིས་གཡས་པ་རྡོ་རྗེ་འཛིན། །སྣུན་པའི་སྟོབས་ཅན་རྡོ་རྗེ་འབར། །གཡོན་པས་དྲིལ་བུ་ཀུར་སྟེན་ཏེ། །སྒེག་པའི་ཚུལ་ཅན་ནམ་མཁར་གདེངས། །རིན་ཆེན་ཆུ་འཛིན་རྒྱན་དང་ལྡན། །སྟག་ལྤགས་དར་གྱིས་སྐུ་ལ་རྒྱན་རྦ། །
གཡས་བསྐུམ་གཡོན་བརྐྱང་བདུད་ལ་བརྫིས། །སྤྱན་གསུམ་གདུག་པའི་མཆེ་བ་གཙིགས། །བསྐལ་པའི་མེ་འོད་ནང་དུ་བཞུགས། །ཡི་གེ་གསུམ་གྱི་གནས་གསུམ་པོ། །ལྷར་བྱས་སྐྱེ་མཆེད་བྱིན་གྱིས་བརླབ། །གནས་སུ་ཁྲོ་བོའི་ཡིག་འབྲུ་
བསྐྱེད། །སྤྲུལ་པ་དཔག་མེད་ཕྱོགས་བཅུར་འགྱེད། །ཡི་གེ་བཞི་ཡིས་ཡེད་ཤེས་དབབ། །རིགས་བདག་ལ་སོགས་སངས་རྒྱས་ཀྱིས། །དབང་བསྐུར་བྱིན་བརླབས་ཅོད་པན་བསམ། །དེ་ཡི་ཏིང་འཛིན་འབྱུང་བའི་རྒྱུ། །ཆོ་ག་གསུམ་པའི་སེམས་དཔའ་ཡིས། །
གཞན་དོན་རྒྱུན་མི་འཆད་པར་བསྒོམ། །ཡང་ན་གསུང་གི་ཡིག་འབྲུས་མཚན། །ཕྲིན་ལས་ཐོགས་མེད་རྣལ་འབྱོར་བཟླས། །འདི་ནི་རྣམ་དག་རིག་པ་སྟེ། །རྟག་ཏུ་མ་ཉམས་འབྲས་བུར་ལྡན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་

90-1-33a

རྒྱུད་ཀྱི་རྒྱལ་པོ་ལས་དཔའ་བོ་གཅིག་པ་བསྒྲུབ་པའི་ལེའུ་སྟེ་བཞི་པའོ།། །། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་དཀྱིལ་འཁོར་བསྒོམ་པའི་ཐབས་ཇི་ལྟ་བུ་ལགས་བཅོམ་ལྡན་འདས་ཀྱིས་
བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མའི་མཆོག །ཁྱོད་ལ་བཤད་ཀྱིས་ལེགས་པར་ཉོན། །སྐད་ཅིག་མ་ཡིས་ལྷར་བསམ་ནས། །སྙིང་ཀར་ཉི་མའི་རིག་པ་ཧཱུྃ། །འོད་ཀྱི་རང་བཞིན་
སྣོད་བཅུད་རྣམས། །སྦྱངས་ཏེ་སངས་རྒྱས་ས་ལ་གཞག །འོད་ཟེར་གཉིས་པས་སངས་རྒྱས་དང་། །བྱང་སེམས་དཀྱིལ་འཁོར་དགུག་བྱ་སྟེ། །ཕྱག་བྱ་ཧཱུྃ་ལས་ལྷ་མོ་བསམ། །མེ་ཏོག་ལ་སོགས་པས་མཆོད་ལ། །ཐ་དད་པ་ཡི་མཆོད་པ་ཆེ། །དེ་འོད་དཔག་མེད་
ལྷ་མོ་ཡིས། །རེག་བྱ་ཐ་མི་དད་པས་མཆོད། །སྡིག་བཤགས་རྗེས་སུ་ཡི་རང་དང་། །གསོལ་ཞིང་སྐྱབས་འགྲོ་བདག་ལུས་དབུལ། །སེམས་བསྐྱེད་དགེ་བ་བསྔོ་བར་བྱ། །དེ་རྗེས་དང་པོ་བྱམ་པ་སྟེ། །གཉིས་པ་སྙིང་རྗེ་གསུམ་པ་དགའ། །ཀུན་གྱི་མཐའ་ལ་བཏང་སྙོམས་
སོ། །སྦྱངས་གཞི་སྔགས་ཀྱིས་ཕྱི་ནང་ཀུན། །སྟོང་པར་བྱས་ཏེ་རང་ལུས་ཀྱང་། །དབང་པོའི་གཞུ་འདྲ་སྲིད་འཛིན་གྱི། །གནས་སུ་ཧཱུྃ་བསམ་དེ་འོད་བཅས། །ཙམ་ལས་བྱུང་བའི་འཁོར་ལོ་སྟེ། །རྩིབས་བཅུ་ལ་ནི་ཉི་མ་བསམ། །དབུས་སུ་ཧཱུྃ་ལས་གནོད་མཛེས་བསྐྱེད། །
དེ་ལས་ཧཱུྃ་འཕྲོས་ཁྲོ་བཅུ་ཡང་། །རང་རང་ས་ལ་གསལ་བར་བསྐྱེད། །སྔགས་པས་བགེགས་མེད་གྱིས་ཤིག་པར། །དེ་ལ་བཀའ་ལུང་བསྒོ་བར་བྱ། །ཞལ་བཞིའི་གསང་སྔགས་དྲན་པ་ཡིས། །མཐེ་བོང་སྡིགས་འཛུབ་སྦྱར་ནས་ནི། །ཕྱོགས་བཅུར་བརྡ་ནི་བསྟན་པར་བྱ། །
ཨོཾ་སུྃ་བྷ་ནི་སུྃ་བྷ་ནི་ཧཱུྃ་ཧཱུྃ་ཕཊ། ཨོཾ་གྲྀཧྞ་གྲྀཧྞ་ཧཱུྃ་ཧཱུྃ་ཕཊ། ཨོཾ་གྲཱིཧྞཱ་པ་ཡ་གྲཱིཧྞཱ་པ་ཡ་ཧཱུྃ་ཧཱུྃ་ཕཊ། ཨོཾ་ཨཱ་ན་ཡ་ཧོ་བྷ་ག་བཱ་ནེ་བི་དྱཱ་རཱ་ཛཱ་ཡ་ཧཱུྃ་ཧཱུྃ་ཕཊ། སྔགས་ཀྱི་རྒྱལ་པོ་འདི་བརྗོད་པས། །ལུས་ངག་སེམས་ལས་བྱུང་བ་ཡི། །བགེགས་ཀུན་གྱི་ནི་
མགོ་སྟེངས་སུ། །རྡོ་རྗེ་ཕུར་པ་གཟུགས་པར་བྱ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ་སརྦ་དུཥྚན་བིགྷྣཱན་ཧཱུྃ་ཧཱུྃ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པྃ་ཨཱ་ཛྙཱ་པ་ཡ་ཏི་ཀཱ་ཡ་བཱ་ཀ་ཙིཏྟ་བཛྲ་ཀཱི་ལ་ཡ་ཧཱུྃ་ཕཊ། རྡོ་རྗེ་ཐོ་བས་བརྡུང་བྱ་སྟེ། །ཨོཾ་བཛྲ་མུད་ག་ར་བཛྲ་ཀཱི་ལ་ཡ་

90-1-33b

ཨཱ་ཀོ་ཊ་ཡ་ཧཱུྃ་ཕཊ། སྤྱི་བོར་བཏབ་པས་ངེས་པར་རླག །སླར་འདུས་ཕྱོགས་མཚམས་མ་ལུས་པར། །ས་གཞི་ར་བ་དྲ་བ་དང་། །གུར་བཅིང་བ་དང་བླ་རེ་དང་། །མདའ་དང་མེ་ཡི་འོད་འབར་བསྒོམ། །ཨོཾ་བཛྲ་མེ་དི་ནི་བཛྲི་བྷཱ་བ་བཛྲ་བན་དྷ་བན་དྷ་ཧཱུྃ་ཨོཾ་བཛྲ་
པྃ་ཙ་ར་ཧཱུྃ་ལྂ་ཧཱུཾ་ཨོྂ་བཛྲ་བི་ཏཱ་ན་ཧཱུྃ་ཁཾ་ཧཱུཾ། ཨོཾ་ཤ་ར་ཛཱ་ལ་ཏྲྃ་སྃ་ཏྲྃ། ཨོཾ་བཛྲ་ཛྭཱ་ལ་ཨ་ན་ལཱརྐ་ཧཱུྃ་ཧཱུྃ་ཧཱུྃ། རིམ་པས་བརྗོད་ལ་སྙིང་རྗེ་ཡི། །བདག་ཉིད་གཞན་ལ་ཕན་འདོད་པ། །སྨོན་ལམ་ལས་འབྱུང་རྫུ་འཕྲུལ་མཆོག །ཡང་ལས་བྱུང་བ་གཞུ་འདྲ་བ། །
སྔོན་པོ་བ་དན་ལྡན་པ་བསམ། །དེ་སྟེང་རམ་བྱུང་རྒོད་མའི་ཁ། །གྲུ་གསུམ་དམར་པོ་འོད་འབར་བ། །བམ་ལས་སྐྱེས་པ་ཟླུམ་པོ་སྟེ། །དཀར་པོ་འཁྱིལ་པའི་ཚུལ་དུ་བསམ། །དེ་ལས་སྐྱེས་པ་དབང་ཆེན་ཏེ། །ལམ་སྐྱེས་སེར་པོ་རྡོ་རྗེའི་རྒྱུ། །གྲུ་བཞི་འོད་
ཟེར་འབར་བ་བསམ། །དེ་སྟེང་ཙྃ་ལས་ཆོས་ཀྱི་འཁོར། །ལྟེ་བར་བྲུམ་ལས་གཞལ་ཡས་ཁང་། །གྲུ་བཞི་སྒོ་དང་རྟ་བབ་བཅས། །དྲ་བ་ཕྱེད་དང་དྲ་བས་བརྒྱན། །ཕྲེང་བ་རིན་ཆེན་རྡོ་རྗེ་དང་། །མཛེས་པའི་བ་དན་བཅས་པ་བསམ། །དེ་ནང་པམ་ལས་ཆུ་སྐྱེས་ནི། །
གེ་སར་འདབ་མར་བཅས་པའི་སྟེང་། །ཉི་མ་ཀཱ་ལི་འོད་འབར་ཚེ། །སྟེང་དུ་ཟླ་བ་ཨཱ་ལི་བསིལ། །ཁ་སྦྱར་བར་དུ་ཧཱུྃ་དང་ཨཱ། །ནག་ཅིང་དམར་བའི་རྣམ་པ་ལ། །དེ་ལས་པད་མ་རྡོ་རྗེ་བསམ། །སླར་ཡང་ཡི་གེས་འགྲོ་བ་སྦྱངས། །ཧཱུྃ་གིས་མི་བསྐྱོད་ཐུགས་རྣམས་བསྡུ། །
ཨ་ཡིས་འོད་དཔག་གསུང་བསྡུས་ལ། །གཉིས་མེད་ཞུ་བས་སྤྲུལ་པ་བསྡུ། །རྡོ་རྗེ་ལས་ནི་ཁྲོ་བོ་སྟེ། །པད་མས་ཁྲོ་མོའི་རྣམ་པར་བསྐྱེད། །ཁྲོ་བོ་མཐིང་ག་ཞལ་གཅིག་པ། །རང་འོད་ལས་བྱུང་ཕྱག་གཉིས་འཁྱུད། །རྡོ་རྗེ་དྲིལ་བུ་ཐབས་ཤེས་རབ། །གཡས་དང་
གཡོན་དུ་བསམ་པར་བྱ། །དབུ་རྒྱན་ལ་སོགས་རིན་ཆེན་ལྡན། །དབུ་སྐྲ་ཁམ་སེར་གྱེན་དུ་འབར། །ནག་པོ་སྦྲུལ་ལུས་ཀླུ་ཆེན་རྒྱད། །སྐུ་སྨད་སྟག་གི་ལྤགས་པས་དཀྲིས། །ཆོས་གོས་སྔོན་པོས་བསྟོད་དཀྲིས་སྟེ། །མཆེ་བ་གཙིག་ཤིང་སྤྱན་གསུམ་དམར། །འདོད་དགུར་སྒྱུར་ཞིང་བརྐྱང་བསྐུམ་ཞབས། །
མཐའ་གཉིས་སྤང་པས་སྟེང་དུ་བཞུག །དེ་ཡུམ་རྡོ་རྗེ་བདེ་མ་ཁྲོ། །དམར་ལྗང་ཞལ་གཅིག་ཕྱག་གཉིས་མ། །གཡས་པ་གྲི་གུག་ཡབ་ལ་འཁྱུད། །གཡོན་པ་ཐོད་པ་བདེ་བ་སྟེར། །གཉིས་མེད་གཡོན་གྱི་ཕྱོགས་ནས་འཁྲིལ། །དེ་རྗེས་སྦྱོར་བའི་སྒྲས་བསྐུལ་ཏེ། །ཤར་ཕྱོགས་པད་མར་ཉི་ཟླ་ལ། །ཧཱུྃ་ལས་ཁམས་གསུམ་རྣམ་པར་རྒྱལ། །དཀར་པོ་ཞལ་

90-1-34a

གཅིག་ཕྱག་བཞི་པ། །གཡས་པ་རྡོ་རྗེ་རྩེ་གསུམ་འཛིན། །གཡོན་པ་དྲིལ་བུ་བེ་ཅོན་ཏེ། །ཁྲོ་བོའི་རྒྱན་ལྡན་བསམས་ནས་ཀྱང་། །འབྱུང་པོའི་ནུས་པ་འཇོམས་པར་བྱེད། །ལྷོ་ཕྱོགས་ཉི་མ་རོ་སྟེངས་སུ། །ཧཱུྃ་ལས་བྱུང་བའི་
ལེགས་ལྡན་གནག །གཡས་པ་གྲི་གུག་གཡོན་ཐོད་པ། །ཞབས་གཉིས་བརྒྱང་བསྐུམ་ཐོད་ཕྲེང་ལྡན། །དགྲ་བོ་གསོད་པའི་ལས་ལ་བརྩོན། །ནུབ་ཏུ་ཀླུ་འདུལ་བདུད་རྩི་འཁྱིལ། །ལྗང་གུ་ཞལ་གཅིག་ཕྱག་བཞི་ཁྲོ། །གཡས་
པ་རྡོ་རྗེ་བྱ་ཁྱུང་དང་། །གཡོན་པ་དབྱུག་ཏོ་ཕུར་བུ་བསྣམས། །ས་འོག་ཀླུ་སོགས་ཟས་སུ་གསོལ། །བྱང་དུ་ཀྵ་ལས་རྣམ་ཐོས་བུ། །ཞལ་གཅིག་ཕྱག་གཉིས་བུམ་སྟེངས་སུ། །མདོག་སེར་གཡས་པ་རྒྱལ་མཚན་བསྣམས། །གཡོན་པས་ནོར་
སྦྱིན་བཟུང་བ་སྟེ། །དབུལ་བ་སེལ་བའི་དོན་ལ་བརྩོན། །སྒོ་མཚམས་ལྷ་ཡི་རང་བཞིན་ལ། །ཡེ་ཤེས་སྤྱན་དྲངས་མཆོད་ལ་གཞུག །དེ་ནི་ཡི་གེ་བཞི་སྦྱོར་ཡིན། །ལུས་ངག་སེམས་ལ་ཡི་གེ་ཡི། །ལྷ་ཡི་མཚན་མ་གདབ་པར་བྱ། །སྐྱེ་མཆེད་
ལྷར་བྱས་ཏིང་འཛིན་གྱི། །ནུས་པ་མི་ཤིགས་ལྷར་བལྟས་ལ། །ཡེ་ཤེས་ལྔ་འདུས་ཡི་གེ་བསམ། །དེ་ཡི་འོད་ཀྱིས་སྤྱན་དྲངས་པའི། །རིག་ལྔ་སྙོམས་འཇུག་བྱིན་བརླབས་ཀྱིས། །མི་བསྐྱོད་རྡོ་རྗེ་དབང་བསྐུར་ཏེ། །
གསང་བ་ཤེས་རབ་ཡེ་ཤེས་ཀྱིས། །རྒྱས་གདབ་རིགས་ལ་བཞི་པ་ཡི། །ཕྱག་རྒྱ་ཆེ་ལ་རིགས་མེད་དོ། །འདི་ནི་གསང་ཆེན་སྐུ་སྒྲུབ་པ། །རིམ་གྱིས་གསལ་ཞིང་རྣམ་པར་དག །རྡོ་རྗེ་འཛིན་པའི་སྐུ་ཐོབ་པ། །ཚེ་གཅིག་
ཉིད་ལ་འགྱུར་བ་ཡིན། །རྟག་ཏུ་གོམ་པའི་སྦྱོར་བ་ཡིས། །ས་སོགས་འཇིག་རྟེན་མ་ལུས་ཀུན། །སྐད་ཅིག་ཉིད་ལ་དབང་དུ་འགྱུར། །གཙུག་ན་རིན་ཆེན་ལ་སོགས་པའི། །གདུག་པ་ཅན་རྣམས་སྙིང་ཡང་འབྱིན། །དགའ་
བོ་ལ་སོགས་ཀླུ་ཆེན་རྣམས། །ཪྟག་ཏུ་དེ་ལ་འདུད་པར་འགྱུར། །ནད་ཀྱི་རིགས་ཀུན་མ་ལུས་འཇོམས། །གནོད་སྦྱིན་མ་ལུས་བཀའ་ཉན་ཅིང་། །ལྷ་སྲིན་མ་ལུས་བྲན་དུ་འགྱུར། །འདི་ནི་གསང་བ་དམ་པ་སྟེ། །

90-1-34b

མཛེས་མ་ཁྱོད་ལ་བཤད་པ་ཡིན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་དཀྱིལ་འཁོར་བསྐྱེད་པའི་ལེའུ་སྟེ་ལྔ་པའོ།། །། དཔའ་མོ་རྡོ་རྗེ་བདེ་མས་གསོལ་པ། 
བཅོམ་ལྡན་འདས་རྡོ་རྗེ་འཆང་གི་རིག་པའི་གསང་སྔགས་ཀྱི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་
མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །གསང་བ་མཆོག་གི་གསང་བ་སྟེ། །ཕྲིན་ལས་ཐམས་ཅད་རྫོགས་བྱེད་ཅིང་། །སྡུག་བསྔལ་ཀུན་ལས་སྐྱོབ་བྱེད་པའི། །ཨཱ་ལི་
ཀཱ་ལི་མཉམ་སྦྱོར་ལས། །ཐབས་དང་ཤེས་རབ་མཉམ་མེད་པའི། །སྔགས་ཀྱི་དོན་ནི་རྣམ་པ་ལྔ། །སྐུ་གསུང་ཐུགས་ཀྱི་རིགས་པ་དང་། །ཕྲིན་ལས་སྣ་ཚོགས་རིག་པ་དང་། །འཁོར་གྱི་ལས་ཀྱི་རིག་པ་དང་། །འབྱུང་པོ་དགུག་དང་
གསད་པ་དང་། །གཏོར་མ་གཏང་བའི་རིམ་པའོ། །ཨོཾ་བཛྲ་པཱ་ཎི་ཧཱུྃ་ཕཊ། སྭཱ་ཧཱ། ཨོཾ་བཛྲ་ཀྲོ་དྷ་ན་ནཱི་ལྃ་བ་ར་དྷ་ར་བཛྲ་པཱ་ཎི་ཌ་ཧཱུྃ་ཕཊ་སྭཱ་ཧཱ། ཨོཾ་བཛྲ་ཙན་ཌ་མ་ཧཱ་རོ་ཥ་ཎ་ཧཱུྃ་ཕཊ་སྭཱ་ཧཱ། ཏད་ཡ་ཐཱ་བྷོ་བྷོ་པཱན་ནཱ་ག་ཨ་དྷི་པ་ཏ་ཡེ། ཨི་དན་
ནཱི་ལཱཾ་བ་ར་དྷ་ར་ཤ་རཱི་རྃ། བཛྲ་པཱ་ཎི་ཧྲཱྀ་ད་ཡཾ། ཡཿས་མཱ་ཏྲི་ཀྲ་མ་ཐ། ཀུ་ཨུད་སཱད་ནི། བྷ་བི་ཥྱནྟི། ཏད་ཡ་ཐཱ་བུད་དྷ་བུད་དྷ། བི་བུད་དྷ་བུདྡྷ་མ་ཧི་པྲཱ་པ་ཏ། ཧ་ར་ཧ་ར་ནཱ་གཱ་ནཱྃ། པྲཱ་ཧ་ར་ནཱྃ་གཱ་ཎཾ། ཧ་ནཱ་ཙྪིན་ད་ཙྪིན་ད་ནཱ་ག་ཧྲྀ་ད་ཡཱ་ནི། བྷིན་ད་བྷིན་ད་ནཱ་
ག་དྷ་མ་ནི། བི་སི་མ་དྷ་ནཱ་ག་ཤ་རི་རཱྃ། བི་སྥོ་ཊ་ཡ་ནཱ་ག་ནཱ་ནི། ཏད་ཡ་ཐཱ། ཨོཾ་ཨཱཿཧཱུྃ་ཕཊ། ནཱ་ག་བི་དཱ་ར་ཎཱ་ཡ་ཧཱུྃ་ནཱ་གོ་ཏ་སཱ་ད་ནཱ་ཡ་ཧཱུྃ་ཕཊ། ནཱི་ལཱྃ་བཱ་ས་ནཱ་ཡ་ཧཱུྃ་ཕཊ། ཨ་པྲ་ཏི་ཧ་ཏ་བ་ལ་པར་ཀྲ་མཱ་ཡ་ཧཱུྃ་ཕཊ། 
ཀྲྀ་ཏཱན་ཏཱ་ཡ་ཕཊ། ཀྲྀ་ཏཱན་ཏ་རཱུ་པཱ་ཡ་ཕཊ། རོ་ཥ་ཎཱ་ཡ་ཕཊ། ཏྲཱ་ས་ནཱ་ཡ་ཕཊ། ཀུསྨཎ་ཌྲོད་སཱ་ད་ནཱ་ཡ་ཕཊ། པྲེ་ཏ་པི་ཤཱ་ཙ་བི་ནཱ་ཤ་ཀ་རཱ་ཡ་ཕཊ། ཡཀྵ་ཨ་པ་སྨར་བི་ནཱ་ཤ །ཀ་རཱ་ཡ་ཕཊ། ཧ་ས་ཧ་ས། ད་ར་ད་ར། མཱ་ར་ཡ་

90-1-35a

མཱ་ར་ཡ། ནཱ་ཤ་ཡ་ནཱ་ཤ་ཡ། སརྦ་བིགྷྲན་བི་ནཱ་ཤ་ཀ་རཱ་ཡ་ཕཊ། སརྦ་ཤ་ཏྲཱུྃ་སཾ་གྷ་བི་ནཱ་ཤ་ཀ་རཱ་ཡ་ཕཊ། ནཱི་ལཱཾ་བ་ར་དྷ་ར་བཛྲ་པཱ་ཎི་རཱ་ཛྙ་པ་ཡ་ཏི་སྭཱ་ཧཱ། ཨོཾ་བཛྲ་ཏྲཻ་ལོཀྱ་བི་ཛ་ཡ་ཧཱུྃ་ཕཊ། ཨོཾ་ཏྲཻ་ལོཀྱ་བི་ཛ་ཡ་
བིསྨ་སྭཱ་ཧཱ། མཱ་ར་ཡ་ཙིཏྟ་རྦད་རྦད། ཨོཾ་བཛྲ་ཀྲོ་དྷ་མ་ཧཱ་ཀཱ་ལཱ་ཡ་ཧཱུྃ་ཕཊ། ཨོཾ་མ་ཧཱ་ཀཱ་ལ་གུ་ན་ཧྲྀ་ད་ཧཱུྃ་ཕཊ། ཙིཏྟ་ཀྲོ་དྷི་དུན་ཛ་ཛ། ཨོཾ་བཛྲ་ཀྲོ་དྷ་ཨ་མྲྀ་ཏ་ནཱ་ག་ཧཱུྃ་ཕཊ། ཨོཾ་ཨ་མྲྀ་ཏ་ཀུཎ་ཌ་ལི་སི་ཁྃ་ཀུ་རུ་ཧཱུྃ་ཕཊ། 
མཱ་ར་ཡ་རཀྟ་རྔུབས་རྔུབས། ཨོཾ་བཛྲ་ཀྲོ་དྷ་ཀུ་བེ་རཱ་ཛ་ཡ་ཧཱུྃ་ཕཊ། ཨོཾ་ཨཱརྱ་ཛཾ་བྷ་ལ་ཛ་ལེན་དྲཱ་ཡ་ཧཱུྃ་ཕཊ་སྭཱ་ཧཱ། མཱ་ར་ཡ་ཀེ་ཆོམ་ཆོྃམ། མ་ཧཱ་དེ་བ་མཱ་ར་ཡ་སོད། མ་ཧཱ་ནཱ་ག་མཱ་ར་ཡ་ཛ་ཛཿ། མ་ཧཱ་དེ་བི་མཱ་ར་ཡ་ཧ་ན་ཧ་ན། 
མ་ཧཱ་མ་ནུ་མཱ་ར་ཡ་གཏུབས་གཏུབས། མ་ཧཱ་གྲུབ་པ་མཱ་ར་ཡ་ཏིཥྛ་ཏིཥྛ། མ་ཧཱ་ཡཀྵ་མཱ་ར་ཡ་བྷིན་ད་བྷིན་ད་མ་ཧཱ་གན་དྷརྦ་མཱ་ར་ཡ་ཁས་ཁས། མ་ཧཱ་མ་རི་ནི་མཱ་ར་ཡ་ནཱྃ། མ་ཧཱ་ནཱི་ལཱྃ་བ་ར་དྷ་ར་བཛྲ་པཱ་ཎི་ཡཀྵ་ཧཱུྃ། མུ་རུ་
ཏ་མུ་རུ་ཏ་ཧཱུྃ་ཕཊ། མཱ་ར་ཎ་སོད་སོད། མཱ་ར་ཎ་བྱིང་བྱིང་། མཱ་ར་ཎ་རྨུགས་རྨུགས། མཱ་ར་ཎ་ཧ་ལ་ཧ་ལ། མཱ་ར་ཎ་མྱོས་མྱོས། མཱ་ར་ཎ་མྱོས་བྱིང་། མཱ་ར་ཎ་ཐུམ་རིལ་ཛ་ཛ། ཀ་ཀ་རཀྵྃ་ཧཱུྃ་ཧཱུྃ་སྟྭྃ་བྷྱོ་ཛཱ་ཁ་ཁཱ། ཏྀ་རཀྵ་
ཧཱུྃ་ཧཱུྃ་སྟྭྃབྷྱོ་ཛཱ་ཁ་ཁཱ། ཙ་པ་རཀྵ་ཧཱུྃ་ཧཱུྃ་སྟྭྃ་བྷྱོ་ཛཱ་ཁ་ཁཱ། ཙ་ཀ་རཀྵ་ཧཱུྃ་ཧཱུྃ་སྟྭྃ་བྷྱོ་ཛཱ་ཁ་ཁཱ། མུན་དུ་རཀྵ་ཧཱུྃ་ཧཱུྃ་སྟྭྃ་བྷྱོ་ཛཱ་ཁ་ཁཱ། ཀ་ཀ་རཀྵ་ས་མ་ཡ་བུད་དྷ་ཡ་སྤུ་ཏ་ར་ཙ་པ་རཀྵ་ས་མ་ཡ་བུད་དྷ་ཡ་སྤུ་ཏ་ར། ཙ་ཀ་རཀྵ་ས་མ་ཡ་བུད་དྷ་ཡ་སྤུ་ཏ་ར། ཙ་ཀ་རཀྵ་ས་མ་
ཡ་བུད་དྷ་ཡ་སྤུ་ཏ་ར། མུནྚ་དུ་དུ་རཀྵ་ས་མ་ཡ་བུད་དྷ་ཡ་སྤུ་ཏ་ར། ཧཱུྃ་ཧཱུྃ་ཧྲིལ་ཧྲིལ། དིམ་དིམ། ཕོབ་ཕོབ། ཤ་ར་ཤ་ར། དི་རི་དི་རི་རྦད་རྦད། ཁ་ཐྃ་ཁ་ཐྃ།  ཐུྃ།  ས། ཛ་རེ་ཛ་རེ་བྷྱོ། ཧ་ས་ཧ་ས། ཏེ་པ་ཏེ་པ། ཀྲི་ཏ་ཧ་
ཀྲི་ཏ་ཧ། ཀྲི་ཁུག་ཀྲི་ཁུག །ཚལ་པ་ཚལ་པ། རྦད་ལིང་རྦད་ལིང་། སྲོག་ཚིག་ནན་རྦད། ལུས་དུལ་མཱ་ར་ཡ་རྦད། རྃ་རྃ་ཛྭ་ལ་ཛྭ་ལ་ཤི་ཤི། རྡུལ་བུན་རྦད་སོད། ནཱ་ག་མ་ར་ཡ་ཧཱུྃ་ཕཊ། ཛཿཧཱུྃ་བྃ་ཧཱྃ། དྷ་མ་ཀ་གི་ཏི་ར། 

90-1-35b

དྷརྨ་ཏེ་ཤ་ས་མུན་ཛ། དྷརྨ་ཏེ་ཤ་ཏ་ཀ་ར། དྷརྨ་ཏེ་ཤ་ཙ་ཀ་ར། དྷརྨ་ཏེ་ཤ་ས་མ་ཡ། བུད་དྷ་ཡ་པུ་ཏ་ར། ཏེ་པ་ཏེ་པ་ཁ་ཁཱ་རྃ། ཏེ་པ་ཏེ་པ་ཀ་ཙ་རི། ཏེ་པ་ཏེ་པ་མུན་དུ་རི། ཏེ་པ་ཏེ་པ་བུ་སྟྭྃ་ཏ་ར། ཏེ་པ་ཏེ་པ་ས་ཛ་
ས་མུྃ་ཛ། ཙི་ཀ་ར་མུན་དུ་ར་ཁེ། བཛྲ་ཙ་མན་རན་ཛཱ་ཛཱ། ཏེ་ཤ་རྃ། མུན་དུ་ནན། བཛྲ་ཛུ་རུ་ཛུ་རུ་རྃ། ཛུ་རུ་ཛུ་རུ་ས་མུྃ་ཛ་ཛཱ་ཧཱྃ། བཛྲ་གྷེ་ནེ་ཁེ་ཛ། བཛྲ་པུརྞི་ཁེ་ཛ། བཛྲ་མུན་དྷ་རེ་ཁེ་ཛ། ཁ་ཛ་རཱ་ཛ་མུན་དུ་ར་ཁེ། ཁ་ཛ་
ཪྫཱ་མུན་དུ་ར་ས་མུྃ་ཁེ། པད་མ་ར་ཎི་ཁ་ཛ་རཱ་ཛཱ་མུན་དུ་རཱ་ཛཱ་ཁེ། ཁ་ཛ་རཱ་ཛ་མུན་དུ་ར་ས་མུན་ཛ་ར་ཁེ་ཛུ་ཛུ་ཛ་ཛ་ཁཱ་ཧི་ཛ། ཨོཾ་ཀཱ་ཡ་ཝཱ་ཀ་ཙིཏྟ་ཨི་དྃ་བ་ལིང་། བུཉྫ་ཛི་གྷྲ་ཕུལླ་དྷུ་པ་མཱྃ་ས་སེ། ས་ཁནྟི་ཁུན་
ཎི་ཕཊ་ག་ཏ། ཨོཾ་ཨ་མྲི་ཏ་པྲ་ཏ་ཛ་ག་ས་ཀ་རུ་པཱུ་ཛཱ་ཁཱ་ཧཱི། རཀ་ཏ་པི་བ་ཏ་ཀ་ས་རུ་པཱུ་ཛ་ཁཱ་ཧི། དྷཱུ་པེ། པུཥྤེ། ཨ་ལོ་ཀེ། གན་དྷེ་ནཻ་བི་དྱེ། ཀ་ས་ཀ་རུ་པཱུ་ཛ་ཁཱ་ཧི། ཨོཾ་ཨ་ཀཱ་རོ་མུ་ཁྂ་སརྦ་དྷརྨཱ་ཎཱྃ། ཨཱདྱ་ནུད་པན་ན་
ཏྭཱཏ་ཨོཾ་ཨཱཿཧཱུྃ། འདི་ནི་རིན་ཆེན་སྔགས་ཀྱི་མཆོག །མ་ལུས་དགོས་འདོད་འབྱུང་བའི་དཔལ། །གཟུངས་མ་ཁྱོད་ལ་ཉེར་བཤད་པས། །འདི་ནི་མི་འདའི་དམ་ཚིག་ཡིན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་
ཀྱི་རྒྱལ་པོ་ལས་གསང་སྔགས་བསྟན་པའི་ལེའུ་སྟེ་དྲུག་པའོ།། །། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་འཁོར་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་
ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ང་ཡི་འཁོར་ནི་བསམ་མི་ཁྱབ། །འདི་ཙམ་གྲངས་ནི་སངས་རྒྱས་ཀྱིས། །བསྐལ་པར་གྲངས་ཀྱང་ཤེས་
མི་འགྱུར། །དེ་བས་ནམ་མཁའི་ཚད་དང་མཚུངས། །མདོར་བསྡུས་ནས་ནི་བཤད་པར་བྱ། །སྐུ་ཡི་འཁོར་ནི་ཁྲོ་བོ་བཅུ། །རིགས་ལྔའི་ངོ་བོ་སྐུ་གསུང་ཐུགས། །མི་འགྱུར་གདུག་པ་འདུལ་བ་ཡིན། །ཐུགས་ཀྱི་འཁོར་ནི་རིགས་བརྒྱ་སྟེ། །

90-1-36a

མདོར་བསྡུས་སྤྲུལ་པའི་ཁྲོ་བོ་བཞི། །གསུང་གི་འཁོར་ནི་དཔག་མེད་ཀྱང་། །རིགས་དྲུག་འདུས་པའི་ཁྱུང་ཆེན་ཡིན། །སྣ་ཚོགས་བསམ་གྱིས་མི་ཁྱབ་བོ། །གདུལ་བྱའི་འཁོར་ནི་ཀླུ་ཆེན་བརྒྱད། །གསུང་གིས་དེ་རིགས་
འདུལ་བ་ཡིན། །གནོད་སྦྱིན་ལག་ན་རྡོ་རྗེའི་ཚོགས། །ལྔ་བརྒྱ་རིགས་བསྡུས་སྐུ་ཡིས་འདུལ། །ཐུགས་ཀྱིས་ལྷ་སྲིན་གདུག་པ་འདུལ། །བྱམས་པའི་ཏིང་ངེ་འཛིན་གྱིས་འདུལ། །འདི་ལ་འདིས་འདུལ་སྤྲུལ་
པའི་ཚོགས། །སྨོན་ལམ་དབང་གིས་བྱུང་བ་སྟེ། །བསམ་གྱིས་མི་ཁྱབ་དེས་འདུལ་བ། །རིགས་ལ་བརྗོད་པར་ག་ལ་ནུས། །མདོར་བསྡུས་མཛེས་མ་ཁྱོད་ལ་བསྟན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་
འཁོར་ངེས་པར་བསྟན་པའི་ལེའུ་སྟེ་བདུན་པའོ།། །། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་ལས་སྒྲུབ་པའི་རིམ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། 
མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །གདུག་པའི་ཀླུ་རྣམས་འདུལ་འདོད་པའི། །རྡོ་རྗེ་ཁྱུང་
ཆེན་སྟོབས་ཆེན་འདུལ། །ང་ཡི་གསུང་གི་སྤྲུལ་པ་སྟེ། །མཆེ་བ་རྣོ་དབལ་དྲག་པོ་གཙིགས། །བྃ་ལས་རྒྱ་མཚོའི་རི་རབ་སྟེང་། །ཡི་གེ་ཧཱུྃ་ལས་བྱུང་བ་ཡི། །དཔའ་བོ་ཀླུ་འདུལ་སྒོམ་པར་བྱ། །སྐུ་མཆོག་ནག་པོ་ཞལ་དགུར་ལྡན། །
རྩ་ཞལ་མཐིང་ནག་གཡས་པ་དཀར། །གཡོན་པ་དམར་པོ་དེ་སྟེང་དུ། །དབུས་དམར་གཡས་པ་ལྗང་བ་སྟེ། །གཡོན་པ་བཙོ་མ་གསེར་དང་འདྲ། །དེ་སྟེང་དབུས་དཀར་གཡས་པ་གནག །གཡོན་པ་བཻ་དུརྱ་ལྟར་སྔོ། །
ཐམས་ཅད་སྤྱན་གསུམ་རྡོ་རྗེའི་མཆུ། །སྤྱི་གཙུག་རིན་ཆེན་རྡོ་རྗེ་རྭ། །ཕྱག་ནི་བཅྭོ་བརྒྱད་གཡས་པ་ན། །རྡོ་རྗེ་རལ་གྲི་དགྲ་སྟ་ཞགས། །མདུང་དང་ལྕགས་ཀྱུ་མདའ་དང་ནི། །རྩེ་གསུམ་ལས་ཀྱི་བྱ་ཁྱུང་བསྣམས། །

90-1-36b

རིམ་བཞིན་ཆུ་བདག་མཐའ་ཡས་དང་། །ནོར་རྒྱལ་སྟོབས་རྒྱུ་དུང་སྐྱོང་དང་། །པད་མ་པད་ཆེན་རིགས་ལྡན་དང་། །འཇོག་པོ་ཀླུ་དགུར་རོ་སྟོད་ལྷ། །ཐལ་སྦྱོར་གཙོ་ལ་རིན་ཆེན་སྟོབ། །མཇུག་མ་ཕྱག་ལ་དཀྲིས་མཛད་དེ། །ཀུན་ཀྱང་རང་རང་ཁ་དོག་འཛིན། །
སྦྲུལ་མགོ་བདུན་པ་སྤྲིན་བཞིན་གཏིབས། །གཡོན་པ་དྲིལ་བུ་བེ་ཅོན་དང་། །འཁོར་ལོ་རྒྱ་གྲམ་ཐོད་དབྱུག་ཆེ། །སྦྲུལ་གྱི་རྒྱལ་མཚན་གཞུ་དང་ནི། །གཏུམ་ཆུང་ཕུར་དང་ཁྱུང་ཕུར་རོ། །རིམ་བཞིན་རླུང་འབྱིན་དགའ་མ་དང་། །མཛེས་ལྡན་དཔའ་མོ་
འོད་བྱེད་མ། །གྲུབ་མ་བརྟན་མ་དགེ་མ་དང་། །གསལ་བྱེད་རིམ་བཞིན་ཡབ་དང་འདྲ། །ཐལ་སྦྱར་གཙོ་ལ་པད་མ་འབུལ། །གདེངས་ཀ་གསུམ་གྱིས་འདུད་བྱེད་མ། །གཡོན་དུ་རིམ་བཞིན་བསམ་པར་བྱ། །ཞབས་བཞི་ཆུ་སྲིན་
རུ་སྦལ་དང་། །ཕག་དང་ལྟོ་འཕྱེའི་སྟེང་ན་བཞུགས། །གཤོག་པ་རིག་བཞིའི་རྡོ་རྗེ་སྟེ། །མཇུག་མ་རལ་གྲི་རིགས་བཞིར་ལྡན། །སྡེར་ཆེན་ལྤགས་ལ་མེ་འབར་བས། །རབ་ཏུ་གཏུམ་ཞིང་ས་བདག་དང་། །ཀླུ་རིགས་མ་ལུས་བརླག་མཛད་པ། །
འོག་མིན་གནས་སུ་སླེབ་པར་བསམ། །དེ་རྗེས་གནས་གསུམ་ཡི་གེས་བརྒྱན། །ཨོཾ་ཨཱཿཧཱུྃ་དཀར་དམར་ཞིང་གནག །སྤྲུལ་པ་གོ་ཆའི་སྔགས་བསམ་པ། །ཨོཾ་ཧཱུྃ་ཏྲཱྃ་ཧྲཱི་ཨཱ། སྤྱི་བོ་མགྲིན་པ་སྙིང་ཀ་དང་། །ལྟེ་བ་གསང་གནས་
བསམ་པར་བྱ། །ཨེ་བྃ་མ་ཡཱ་དཔུང་བ་དང་། །དཔྱིའི་སྟེངས་སུ་བསམ་པར་བྱ། །ཧཱུྃ་སྭ་ཧཱི་ཨ་བྲང་དང་ནི། །སོགས་དཔྲག་ལྟོང་མོ་ལྟེ་ལྐོག་བསམ། །ཛཿཧཱུྃ་བྃ་ཧོཿསྒོ་བཞིར་བསམ། །སྟཾ་ཛ་ཡ་ཨ་སྤྲུལ་པ་དང་། །ཡང་སྤྲུལ་བསམ་གྱིས་མི་ཁྱབ་
བསམ། །དེ་ནས་གསང་བའི་སྔགས་བསྟན་པ། །ལས་ཀྱི་ཁྱུང་ཆེན་དྲག་པོའི་སྔགས། །སངས་རྒྱས་ཀུན་གྱི་མཐུ་བསྡུས་པ། །ཨོཾ་བཛྲ་ཁྱུང་ཀར་ཁྱུང་ཀར་བཛྲ་ག་རུ་ཌ་ཙ་ལེ་ཙ་ལེ་ཧཱུྃ་ཕཊ། སྐུ་ཡི་གསང་བའི་སྔགས་སུ་བསྟན། །
ཨོཾ་བཛྲ་ག་རུ་ཌ་ཧཱུྂ་སྲོག་ཚིག་ནན་རྦད། ལུས་དུལ་ནཱ་ག་མཱ་ར་ཡ་ཕཊ། རཾ་རཾ་ཛྭ་ལ་ཛྭ་ལ་ཞི་ཞི་རྡུལ་བུན་རྦད་ཕཊ། གསུང་གི་རིག་པ་དམ་པའོ། །ཨོཾ་བཛྲ་ཙཎ་ཌ་ག་རུ་ཌ་ཧཱུྃ་མཱ་ར་ཡ་མཱ་ར་ཡ། སྥོ་ཊ་ཡ་སྥོ་ཊ་ཡ། བཛྲ་བ་ཏི་ག་རུ་ཌ་བེ་གེ་ཧཱུྃ་ཛ་ཛ་རི་ཛ་པྲི་ཇ་

90-1-37a

ཧཱུྃ་ཕཊ། ཐུགས་གསང་རྡོ་རྗེ་གཏུམ་པོའི་སྔགས། །དྲག་བྱེད་ཐམས་ཅད་རླག་པར་བྱེད། །ཀླུ་རྣམས་སྙིང་ཁྲག་འཐིག་པ་ཡིན། །རྡོ་རྗེ་འཛིན་པའི་དམ་ཚིག་འདི། །རིན་ཆེན་བཞིན་དུ་རྙེད་དཀའ་
བས། །འདི་ལ་རྟག་ཏུ་འབད་པར་བྱ། །འཐུན་པའི་རྫས་ཀྱི་གཏོར་མ་སྦྱིན། །དེ་ཡི་ནང་དུ་གནོད་པ་དགུག །ཨོཾ་བཛྲ་ཤྲཱི་མ་མཱ་ན་ག་ས་བྷྱི་ཏ་ཆོ་ག་ཁུག་མྃ་ལིང་དྷིང་སྭཱ་ཧཱ། འདིས་ནི་བཀུག་ལ་ལྷ་
ལ་འབུལ། །གལ་ཏེ་གསད་པར་འདོད་པས་ན། །སྐུ་གསུང་ཐུགས་ཀྱི་རིག་པ་ལ། །ཕུར་བུ་གཉིས་པའི་དྲག་སྔགས་དང་། །གསད་པ་སྤྱི་ཡི་ཤམ་བུར་གདགས། །གཟུགས་བརྙན་ཕུར་
བུས་བཏབ་པར་བྱ། །ཚངས་པ་ཡིན་ཡང་ངེས་པར་བརླག །ཨོཾ་བཛྲ་ཙཎ་ཌ་མ་ཧཱ་རོ་ཥ་ཎ་བཛྲ་ཀཱི་ལ་ཡ་སརྦ་བིགྷྣན་མུངྒ་ར་ཀཱི་ལ་ཡ་ཨཱ་ཀོ་ཊ་ཡ་ཧཱུྃ་ཕཊ། ཨོཾ་བཛྲ་ཙཎ་ཌ་ག་རུ་ཌ་ཀཱི་ལི་ཀཱི་ལ་ཡ་སརྦ་བགྷྣི་
ན་མུད་ག་ར་ཀཱི་ལ་ཡ་ཨཱ་ཀྲོ་ཊ་ཡ་ཧཱུྃ་ཕཊ། གཏུམ་ཆུང་ཕུར་བུས་བཏབ་པའི་སྔགས། །དེ་རྗེས་གཟུགས་བརྙན་མ་ལུས་པ། །དྲག་པོའི་ཐབ་ཏུ་བསྲེགས་པར་བྱ། །ཚེར་མ་ཅན་གྱི་མེ་སྦར་ལ། །ཁྱུང་ཆེན་གཏུམ་
པོའི་ང་རྒྱལ་གྱིས། །ནཱ་ག་བྷུ་མི་པ་ཏི་སརྦ་ཀཱ་ཡ་བཱ་ཀ་ཙིཏྟ་བཛྲ་ཛྭ་ལཱན་ལ་ཨ་ན་ལ་ཧཱུྃ། ཅི་རིགས་སྔགས་ཀྱིས་བསྲེག་པ་དང་། །ཐལ་བ་དཀར་གསུམ་སྦྱར་བྱ་སྟེ། །རྒྱ་མཚོར་འབབ་པའི་ཆུ་ལ་དོར། །དེ་ལྟར་ལས་ཀྱི་
སྦྱོར་བ་དེ། །ལན་བདུན་བྱས་པར་གྱུར་ན་ནི། །ཀླུ་ཆེན་དུག་གིས་སྙིང་ལ་ཟིན། །ངེས་པར་སོས་པར་འགྱུར་བ་ཡིན། །གལ་ཏེ་མི་གཏོང་ཀླུ་ཆེན་གྱི། །ལུས་དང་ཁང་པར་བཅས་པ་ལ། །མེ་དང་རྡོ་རྗེའི་ཆར་པ་ཡིས། །
སྐད་ཅིག་ཉིད་ལ་འཚིག་པར་འགྱུར། །དེ་བས་དམ་ཚིག་མི་འདའ་བས། །ལས་འདི་མྱུར་བར་མི་བྱའོ། །ལས་ཀྱི་གཏུམ་པོ་ཁྱུང་སྒྲུབ་པ། །མཛེས་མ་ཁྱོད་ལ་བསྟན་པ་ཡིན། །བཅོམ་ལྡན་འདས་

90-1-37b

ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་སྒྲུབས་པའི་ལྷ་རྡོ་རྗེ་གཏུམ་པོ་ཁྱུང་གི་བསྒྲུབ་པ་བསྟན་པའི་ལེའུ་སྟེ་བརྒྱད་པའོ།། །། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་སྐུའི་
སྤྲུལ་པ། ཕོ་ཉ་གནོད་སྦྱིན་ནག་པོའི་སྒྲུབ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་
པར་ཉོན། །ང་ཡི་གནོད་སྦྱིན་ནག་པོ་འདི། །བྱ་བའི་ལས་ཀུན་ཐོག་པ་མེད། །ཁྱད་པར་དྲག་པོའི་ཕྲིན་ལས་འགྲུབ། །དུར་ཁྲོད་བྲག་རྫོང་ནགས་ཕུག་ཏུ། །ནག་པོའི་ས་ལ་དཀྱིལ་འཁོར་བྱ། །པད་མ་འདབ་བརྒྱད་སྒོ་དང་བཅས། །
མཐིང་ནག་གྲུ་གསུམ་མེ་འོད་ལྡན། །སུྃ་ལས་རི་རབ་སྟེང་དུ་ཧཱུྃ། །འོད་ཟེར་འཕྲོ་འདུས་རྡོ་རྗེར་བསམ། །དེ་ལས་གནོད་སྦྱིན་ནག་པོ་ནི། །ཞལ་གསུམ་ཕྱག་དྲུག་ཞབས་གསུམ་ལྡན། །གཡས་པ་འཇིགས་པ་སྟག་གི་ཞལ། །
གཡོན་པ་སྟོབས་ཆེན་སེང་གེ་སྟེ། །ཕྱག་གཡས་དང་པོ་རྡོ་རྗེ་འཛིན། །གཉིས་པ་རྩེ་གསུམ་གསུམ་པ་ཕུར། །གཡོན་པ་དྲིལ་ཆེན་ལྕགས་ཀྱུ་དང་། །ཐོད་པ་ཁྲག་གིས་བཀང་བ་ཡིན། །གཡས་པ་གཏུམ་པས་
བདུད་མོ་བརྫིས། །གཡོན་པས་བདུད་ཕོ་ཉི་གདོང་མནན། །ཕུར་ཞབས་དམར་པོ་མེ་འབར་བས། །གནོད་བྱེད་བགེགས་ཀྱི་མགོ་ལ་བཏབ། །ཐོད་ཕྲེང་མིའི་པགས་པ་གྱོན། །དུར་ཁྲོད་རུས་པའི་རྒྱན་དང་ལྡན། །དབུ་སྐྲ་དམར་པོ་ཐུར་
དུ་འཕྱང་། །སྤྱན་གསུམ་མཆེ་བ་རབ་ཏུ་གཙིགས། །ཧར་ཧར་དགོད་ཅིང་གདུག་པ་འདུལ། །སྤྲུལ་པའི་གནོད་སྦྱིན་སྟོང་དང་བཅས། །རྡོ་རྗེ་འཆང་གི་བཀའ་བཞིན་སྒྲུབ། །དེ་ཡིས་རིག་པ་ཕུལ་བ་ནི། །ཨོཾ་བཛྲ་ཡཀྵ་ཀཱ་ལ་ཙཎ་ཌ་ནཱི་ལཱྃ་བ་ར་
དྷ་ར་ཤ་རཱི་ར་ཧཱུྃ་ཕཊ། རྩ་བའི་གསང་སྔགས་འབུམ་དུ་བཟླས། །གྲུབ་པར་གྱུར་ནས་གང་དམིགས་ལ། །རྗེས་ཚ་བའི་འབྲུ་དང་ནི། །ཚྭ་ལས་ལིང་གར་འཁོར་ལོ་གཞུག །དམིགས་པ་བསྟིབས་ལ་འགྲུབ་གནས་གཞུག །དེ་སྟེང་ཡུངས་

90-1-38a

ཀར་ཟི་ར་དང་། །དུག་གི་རིགས་ཀྱིས་བྲབ་པར་བྱ། །གསང་བ་དྲག་པོའི་སྔགས་འདི་ཟླས། །ཨོཾ་བཛྲ་ཡཀྵ་ཀཱ་ལ་ཙཎ་ཌ་ནཱི་ལཱྃ་བ་ར་དྷ་ད་ར་སརྦ་ཤ་ཏྲཱུྃ་བི་དྷ་རཱ་ཡ་ཕཊ། ཧ་ར་ཧ་ར་ཕཊ། པྲ་ཧ་ར་པྲ་ཧ་ར་
ཕཊ། ཙྪིན་ད་ཙྪིན་ད་ཕཊ། བྷིན་ད་བྷིན་ད་ཕཊ། བི་སྥོ་ཊ་ཡ་བི་སྥོ་ཊ་ཡ་ཕཊ། སརྦ་ཤ་ཏྲཱུྃ་ཀཱ་ཡ་བཱཀ་ཙིཏྟ་བི་ནཱ་ཤ་ཀ་ར་ཡ་ཕཊ། ཇི་སྲིད་མ་ཤིའི་བར་དུ་བྲབ། །གྲུབ་ནས་རིགས་མེད་ཐོད་པར་གཞུག །ཙེ་ཏི་ཆེན་པོའི་
འོག་ཏུ་སྦ། །སྟེང་དུ་རི་རབ་རྡོ་རྗེ་ཡིས། །མནན་པ་བྱས་པས་ངེས་པར་རླག །ཡང་ན་གནོད་སྦྱིན་ཆེན་པོ་ཏེ། །དུར་ཁྲོད་རས་ལ་བྲིས་བྱས་ལ། །དེ་ཡི་སྙིང་གར་སྔགས་འདི་བྲི། །ཨེ་ཡི་ནང་དུ་ཆུད་པར་ནི། །ཨོཾ་བཛྲ་ཡཀྵ་ཀཱ་
ལ་ཙཎ་ཌ་ས་མ་ཡ་མ་ནུ་སྨ་ར་སིད་དྷི་ཧཱུྃ། ཕྱག་ལ་ཡཀྵ་པ་ཏ་ལི། །ཞབས་ལ་ཀྃ་མྃ་བྷ་ར་བྲི། །དེ་ཉིད་གཏོར་མ་ཆེན་པོ་ལ། །བཅུག་སྟེ་སྔོན་པོའི་དར་གྱིས་དགབ། །དེ་སྟེང་རས་སམ་ཤིང་ལོ་ལ། །གནོད་སྦྱིན་སྲོག་གི་འཁོར་ལོ་ནི། །
ལྟེ་བ་རྩིབས་བཅུ་མུ་ཁྱུད་བཅས། །ཡང་བརྩིབས་བཅུ་དང་མུ་ཁྱུད་ལྡན། །མེ་འོད་ལྡན་པ་བྲི་བྱས་ཏེ། །སྔགས་ཀྱི་འཁྲུལ་འཁོར་བཀོད་ནས་ཀྱང་། །ལས་ཀྱི་མིང་དང་སྤེལ་བ་བྲི། །འདི་ནི་གནོད་སྦྱིན་སྲོག་ཡིན་ཏེ། །མི་འདའ་
བཀའ་ཡི་དམ་ཚིགས་ཡིན། །ལས་རྣམས་གང་བཅོལ་སྐུ་ཡིས་བྱེད། །ཡང་ན་རྒྱལ་རིགས་ཐོད་པ་ལ། །གནོད་སྦྱིན་བྲིས་ལ་ཚ་བའི་མར། །ཆང་དང་བསྲེས་ལ་བྱུག་བྱ་སྟེ། །ཉིན་རེ་གང་འདོད་ལས་དང་སྦྱར། །མེ་ཏོག་ཁ་དོག་མཐུན་
པས་བྲབ། །བསྒོ་བའི་ཕྲིན་ལས་འགྲུབ་པར་འགྱུར། །ཆུ་དར་སྔོན་པོའི་གཞི་མ་ལ། །གསེར་གྱིས་འཁོར་ལོ་བྲི་བར་བྱ། །ལྟེ་བ་རྩིབས་བརྒྱད་མུ་ཁྱུད་ལྡན། །ཕྱི་མ་རེའུ་མིག་བཅུ་དྲུག་པར། །ས་བོན་སྔགས་དང་
སྤེལ་བྱས་ཏེ། །ཀུན་གྱི་མཐའ་རུ་ཕྲིན་ལས་སྔགས། །བྲིས་པ་མགུལ་དུ་བཏགས་པ་ཡིས། །མི་མཐུན་ཕྱོགས་རྣམས་བསྲུང་འགྱུར་ཏེ། །བུང་བ་མེ་ལ་བྱ་བ་བཞིན། །ཁྱི་ཤ་བཏགས་པའི་རི་ལུའི་ནང་། །དགྲ་ཡི་གཟུགས་བྲིས་སྔགས་དང་སྤེལ། །

90-1-38b

ཉི་ནུབ་བྱ་རོག་ལ་བྱིན་ཏེ། །སྔགས་བཟླས་ཕྱིར་ཞིང་ལན་གྲངས་ནི། །བརྒྱ་འམ་སྟོང་དུ་བྱས་གྱུར་ན། །གང་ཡིན་གནས་ནས་བསྐྲད་པར་འགྱུར། །ཁྱི་འབྲེལ་སྤུ་ལ་སྲད་བུ་བྱས། །མདུད་པ་བརྒྱ་རྩ་བརྒྱད་བྱས་ཏེ། །སྔགས་རེ་ཞིང་
ཡང་གནོད་སྦྱིན་རེ། །འབྲས་ཀྱི་ནང་དུ་བསྐྱུར་བ་ན། །ཕུབ་མ་འབྲལ་བར་མི་འགྱུར་རོ། །དེ་བཞིན་ཁྱིམ་དུ་བཅངས་པ་ན། །མི་ཕྱུགས་ལ་སོགས་འཁྲིགས་པ་ན། །ཁྱིམ་དང་འདྲ་བར་འབྲེལ་པར་འགྱུར། །ཁྱི་ནག་སྙིང་དུ་གནོད་སྦྱིན་གྱིས། །
སྙིང་དང་སྐུ་དང་སྔགས་བཅུག་ནས། །བཅིངས་པ་ཙམ་གྱིས་གནོད་སྦྱིན་ཉིད། །ལུས་དང་གྲིབ་མར་འདྲེ་བར་འགྱུར། །སྐད་ཅིག་ཙམ་ཡང་སྒྲུབ་པ་པོ། །དེ་ཡིས་སྟོང་པར་མི་བྱེད་དོ། །དེ་ལས་སོགས་པའི་ལས་ཀྱི་རིམ། །མཛེས་མ་ཁྱོད་ལ་བཤད་པ་
ཡིན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་གནོད་སྦྱིན་ནག་པོ་སྒྲུབ་པའི་ལེའུ་སྟེ་དགུ་པའོ།། །། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་རྣལ་འབྱོར་བསམ་
གྱིས་མི་ཁྱབ་པའི་རྫོགས་པའི་རིམ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་
ལེགས་པར་ཉོན། །བསམ་གྱིས་མི་ཁྱབ་རྫོགས་པ་ཆེ། །ལྷ་ཡི་བྱ་བ་སྔོན་སོང་སྟེ། །བསྐྱེད་ལ་དམིག་པ་ཐོབ་ནས་ནི། །སྙིང་གར་ཡེ་ཤེས་སེམས་དཔའ་བསམ། །དེའི་རང་བཞིན་སྙིང་ནང་དུ། །པད་མ་འདབ་བཞིའི་ཐིགས་ལེས་
བརྒྱན། །ཉི་ཟླའི་བར་དུ་རྒྱ་སྲན་ཚད། །དེ་ཡི་ནང་དུ་གནས་པའི་སྲོག །ཨ་ཤད་མར་མེའི་རྩེ་ལྟར་སྒོམ། །དེ་ལ་དམིགས་པ་བརྟན་པ་དང་། །ཅི་ཡང་བསམ་པར་མི་བྱ་སྟེ། །བསམ་གྱིས་མི་ཁྱབ་དེ་བསམས་ན། །དེ་ལས་ཡེ་
ཤེས་སྐྱེ་བར་འགྱུར། །གསལ་ཞིང་མི་རྟོག་རིག་པའི་སྐུ། །ཡེ་ཤེས་ཞེས་ནི་དེ་ལ་བྱ། །རྟེན་མེད་རྣམ་དག་གསལ་བ་ཡིན། །རྟོག་པ་རྟེན་ཅན་བསྒོམ་འདོད་པས། །སྐུ་ཡི་གནས་སུ་འཁོར་ལོ་ནི། །དཀར་པོ་རྩ་འདབ་

90-1-39a

སུམ་བཅུ་གཉིས། །མཚན་གྱི་ཐབས་གྱིས་ཆས་བརྒྱན་པ། །གསུང་གི་གནས་སུ་རྩ་འདབ་ནི། །བཅུ་དྲུག་དམར་པོ་ཤེས་རབ་སྟེ། །དེ་ལ་ཐབས་ཀྱིས་ངེས་པར་བརྒྱན། །ཐུགས་ཀྱི་གནས་སུ་དུས་སྦྱོར་བརྒྱད། །གཙོ་
བོའི་ཡི་གེ་བརྒྱད་གནས་པ། །ཕྲིན་ལས་བྱ་བའི་གནས་དག་ཏུ། །དབྱུག་གུའི་གྲངས་ཀྱི་རྩ་གནས་པ། །ཤེས་རབ་གཉིས་འགྱུར་ཁ་དོག་དམར། །དེ་དབུས་གཉིས་མེད་གཡས་དང་གཡོན། །ཐབས་དང་ཤེས་རབ་རྣམ་པར་དབྱེ། །
གཏོག་པ་སད་པའི་འཁོར་ལོ་ནི། །ཐབས་ལ་དྲུག་དང་ཤེས་རབ་དྲུག །ཐ་མ་བདེ་བ་འཛིན་པ་ཡིས། །མི་རྟོག་དཔའ་བོ་གནས་པ་ཡིན། །ཡི་གེ་བཞི་ཡིས་རྒྱན་མཛད་དེ། །བདེ་འཛིན་འཁོར་ལོར་ཡི་གེ་མེད། །བརྗོད་པ་ཐམས་ཅད་སྤངས་པ་སྟེ། །
འདུས་མ་བྱས་པའི་རང་བཞིན་མཆོག །ཁུ་བ་ཁྲག་དང་ཆུ་སེར་གནས། །འདི་ནི་ལམ་གསུམ་འཇོམ་བྱེད་པའོ། །སྐད་ཅིག་རླུང་གི་རྟ་ཡིས་ནི། །ཐབས་དང་ཤེས་རབ་གཉིས་བསྐུལ་ནས། །གཉིས་མེད་ཡེ་ཤེས་སྐྱེ་བར་
འགྱུར། །ཡེ་ཤེས་ཀྱིས་ནི་ཏོག་པ་བསྲེག །ཐལ་བའང་དམིགས་པར་མི་འགྱུར་བའི། །རྟགས་ལྔ་རིམ་པར་འབྱུང་བར་འགྱུར། །དེ་ནས་དཔལ་གྱི་ཡོན་ཏན་ཏེ། །ཡང་ནས་ཡང་དུ་གོམས་པར་བྱ། །སྡེ་པ་བཞི་ཡི་ལོངས་
སྤྱོད་ནི། །གནས་སུ་ཡང་དག་སྐྱེ་བར་འགྱུར། །གཉིས་མེད་བདེ་བའི་གནས་ཐོབ་ནས། །སྐྱེ་འཆི་ལ་སོགས་རྒྱུན་ཆད་དེ། །འདི་ནི་རྣམ་དག་ལེགས་པའི་གནས། །ཐོབ་པར་འགྱུར་བ་སྨོས་ཅི་དགོས། །འདི་ལྟར་རྣམ་པར་དག་པ་ནི། །
ཉིན་མཚན་ཆ་ཡི་དབྱེ་བ་ཡིས། །དབྱུག་གུ་ཆུ་ཚོད་དུས་སྦྱོར་སོགས། །བརྩི་བའི་རྣལ་འབྱོར་ངལ་བའི་རྒྱུ། །ཐམས་ཅད་གཅིག་ཏུ་བསྡོམ་གྱུར་ན། །མི་རྟོག་མཉམ་ཉིད་ནམ་ཁར་དག །འབད་མེད་ཡེ་ཤེས་ལྷུན་གྱིས་གྲུབ། །
དང་པོའི་སངས་རྒྱས་ཡེ་ཤེས་ཆེ། །ཁམས་གསུམ་ཐམས་ཅད་སྒྲོལ་མཛད་མ། །ཤེས་རབ་ཡུམ་ལ་ཕྱག་འཚལ་ལོ། །མི་གནས་སྤྲོས་བྲལ་འདུས་མ་བྱས། །ལེགས་རྟོགས་བླ་མ་མཆོག་ལ་འདུད། །བརྗོད་པར་དཀའ་བའི་རྣལ་འབྱོར་འདི། །

90-1-39b

མཛེས་མ་ཁྱོད་ལ་བཤད་པ་ཡིན། །དཔའ་བོ་བརྟན་པར་མ་གྱུར་ན། །ཡི་གེ་ཧཱུྃ་གི་སྦྱོར་བ་ཡིས། །འཇིག་རྟེན་ཁམས་ཀུན་འཇིག་པར་འགྱུར། །མེ་ཡིས་བུད་ཤིང་བསྲེག་མཛད་དེ། །ཤིང་མེད་མེ་ཡང་ཇི་ལྟར་གནས། །རྟན་གཡོ་
ཉམས་པར་གྱུར་པ་ན། །མི་ཤིགས་ཡི་གེ་རྣམ་པར་དག །འདི་ནི་གསང་བ་དམ་པ་སྟེ། །གསང་བ་བླ་ན་མེད་པ་འདི། །བདག་མེད་རྟོག་པ་ཁྱོད་ལ་བཤད། །གཞན་དུ་གང་གའི་བྱེ་མ་དང་། །མཉམ་པའི་སངས་རྒྱས་རྣམས་
ཀྱིས་ཀྱང་། །བརྗོད་པར་ནུས་པ་ག་ལ་ཡོད། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་བསམ་གྱིས་མི་ཁྱབ་པ་རྫོགས་པའི་རིམ་པ། བསྟན་པའི་ལེའུ་སྟེ་བཅུ་པའོ།། །།  
དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་རིགས་དག་ལ་དབང་བསྐུར་བ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །
བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །དང་པོར་སློབ་དཔོན་མཚན་ཉིད་ཀྱང་། །མཛེས་ཤིང་དུལ་ལ་བྱམས་སེམས་ལྡན། །སྔགས་དང་རྒྱུད་ཀྱི་དེ་ཉིད་མཁས། །སྙན་པར་སྨྲ་ཞིང་གཏོང་ལ་
དགའ། །བསྟན་ཞིང་བདེན་སྨྲ་བྱམས་སེམས་ལྡན། །བསམ་པ་ཤེས་ཤིང་གསོང་པོར་སྨྲ། །དམ་ཚིག་ལྡན་ཞིང་སྔགས་ཚུལ་ཁས། །ཕྱག་རྒྱ་དཀྱིལ་འཁོར་བརྡ་རྣམས་མཁས་ཉིད་བཅུ་ཤེས་པ་སྙིང་རྗེར་ལྡན། །
འཇིག་རྟེན་པ་རྣམ་སྤངས་པ། །མཁས་པས་དེ་ཉིད་ཤེས་ནས་ཀྱང་། །དེ་ནི་སངས་རྒྱས་ཀུན་རང་བཞིན། །བྱང་ཆུབ་སེམས་དང་དགྲ་བཅོམ་དང་། །ཉན་ཐོས་རང་རྒྱལ་གོང་ན་མེད། །དེ་ལྟའི་བླ་མ་སྲོག་ལྟར་བསྟན། །
གལ་ཏེ་སློབ་དཔོན་སྨོད་པ་ལ། །དངོས་གྲུབ་རྨི་ལམ་དུ་ཡང་མེད། །དེ་བས་བླ་མ་མཉེས་བྱས་ལ། །བླ་གོས་ཕྲག་པ་ལ་གཡོགས་ཏེ། །པུས་བཙུགས་ཐལ་སྦྱར་མེ་ཏོག་ཐོགས། །དཀྱིལ་འཁོར་བྲི་བར་གསོལ་བར་བྱ། །

90-1-40a

གྲོང་དང་ཚོང་འདུས་དུར་ཁྲོད་དང་། །ཚལ་དང་ལྷ་ཁང་གྲོང་ཁྱེར་ཏེ། །བྱང་ཤར་དངོས་གྲུབ་གཞན་གཉིས་སྤངས། །རོ་ཧི་ཏ་སོགས་ཟླ་བ་ཡི། །ལྟོ་འཕྱེའི་ལྟོ་བར་ཤེས་པར་ཡིན། །གཞན་དུ་གཉིས་པར་
འབྱུང་བར་འགྱུར། །མཁས་པས་ཉེས་པ་མེད་པར་བྱ། །ས་སྣང་བ་དང་བརྟག་པ་ནི། །རིམ་བཞིན་གཙུག་ལག་ཁང་པ་དང་། །ཚལ་དང་རྡོ་ལེབ་ཁང་བཟངས་ཏེ། །ཀུན་ལ་བརྟག་པ་སྤངས་བར་བྱ། །སློབ་དཔོན་སྨིན་པས་
སློབ་མ་རྣམས། །ཕུང་པོ་ལྔ་པོ་དག་པར་བྱ། །ས་ཡི་ཉེས་པ་ཀུན་བསལ་ནས། །ལཾ་ལས་བྱུང་བའི་ལྷ་མོ་ནི། །རྒྱན་ལྡན་བུམ་པ་ཕྱག་ན་བསྣམས། །དེ་ལ་མཆོད་ཅིང་གསོལ་བར་བྱ། །ཨོཾ་
ཚུར་སྤྱོན་ཚུར་སྤྱོན་ས་ཨི་ནི། །ལྷ་མོ་ཆེན་མོ་འཇིག་རྟེན་ཡུམ། །རིན་ཆེན་ཀུན་གྱིས་རབ་གང་མ། །བཟང་པོའི་རྒྱན་གྱི་རྣམ་བརྒྱན་མ། །དོ་ཤལ་རྐང་གདུབ་སྒྲ་ལྡན་མ། །རྡོ་རྗེ་སེམས་དཔའ་
རབ་མཆོད་པར། །མཆོད་ཡོན་འདི་ནི་བཞེས་ནས་ཀྱང་། །དཀྱིལ་འཁོར་ལས་ནི་ལེགས་སྒྲུབ་མཛད། །ཨོཾ་ཧི་ཧི་ཧི་ཧི་ཧཱུྃ་སྭཱ་ཧཱ། །གནས་པའི་ས་ལ་སླར་ཐིམ་བསམ། །སླར་སྦྱངས་བསུང་ཞིང་
གཙོ་བོ་ལ། །དྲི་ཡི་གདན་ཆེན་གྲུ་བཞི་སྟེ། །འཁོར་ལོ་སུམ་ཆ་དོར་བས་བཟླུམ། །མེ་ཏོག་སྔོན་པོའི་གདན་ལ་བསམ། །རིན་པོ་ཆེ་འམ་ས་ཡང་རུང་། །བུམ་པ་ནག་པོའི་སྐྱོན་སྦངས་ཏེ། །བྱ་གྷྲཾ་སངས་དྲི་
དབྱུག་པ་ཡི། །ཨུཏ་པལ་གཞན་གྱིས་མི་ཐུབ་པ། །ཧ་ས་དེ་བས་ནད་རྣམས་སྦྱོང་། །དངུལ་དང་མུ་ཏིག་མུ་མེན་དང་། །བྱི་རུ་གསེར་གྱིས་ཡེ་ཤེས་འཕེལ། །ནས་གྲོ་ཏིལ་བསྲན་མ་དང་། །མུད་ཀ་ཡིས་ནི་
ལམ་ལྔ་དག །ག་པུར་གུར་གུམ་ཛཱ་ཏི་དང་། །ཙན་དན་ཨ་ག་རུ་ཡིས་ནི། །གཞན་དོན་ཕྲིན་ལས་ལྔ་འགྲུབ་བོ། །ཆུ་དང་སྙིང་པོ་ལྔ་ཡིས་ནི། །རྣལ་འབྱོར་ཕུན་སུམ་ཚོགས་གྱུར་པས། །མགྲིན་པ་གོས་ཀྱིས་དཀྲིས་པ་

90-1-40b

དང་། །འབྲས་ལྡན་ཤིང་གིས་ཁ་ཡང་བརྒྱན། །ཀུ་ཤ་ལ་འདུག་ལ་མཚན་མ་ཅན། །རང་རང་ཕྱོགས་སུ་གཞག་པར་བྱ། །བདུག་སྤོས་ཐོགས་ལ་གསོལ་བ་གདབ། །བཅོམ་ལྡན་རྡོ་རྗེ་འཛིན་པའི་བརྒྱལ། །བདག་ལ་དགོངས་
ནས་གཟིགས་སུ་གསོལ། །སློབ་མ་རྣམས་ཀྱི་དོན་ཕྱིར་དང་། །ཁྱེད་རྣམས་ལ་ཡང་མཆོད་པའི་ཕྱིར། །བདག་ནི་དཀྱིལ་འཁོར་འདྲི་བར་འཚལ། །རིན་པོ་ཆེ་ཡི་མཐུ་བཞིན་དུ། །བཀའ་དྲིན་རྗེས་སུ་གནང་བ་ཡིས། །
སང་ནི་བྱོན་པར་མཛད་དུ་གསོལ། །ལན་གསུམ་བར་དུ་གསོལ་བར་བྱ། །སློབས་མ་རྣམས་ལ་རྗེས་བརྩེ་བས། །སྡོམ་གཟུང་གསོལ་ཞིང་སྲུང་བ་དང་། །སློབ་དཔོན་རྡོ་རྗེ་ཅན་དམིགས་ལ། །གང་ཡང་
གསང་སྔགས་ལྷ་ཀུན་དང་། །འཇིག་རྟེན་སྐྱོང་བ་མ་ལུས་པ། །རྫོགས་པའི་བྱང་ཆུབ་ལ་ཞུགས་དང་། །སངས་རྒྱས་བསྟན་དགའི་འབྱུང་པོ་དང་། །གང་དག་རྡོ་རྗེའི་སྤྱན་ལྡན་རྣམས། །རྡོ་རྗེ་འཆང་གི་དཀྱིལ་
འཁོར་མཆོག །དེང་བདག་འདྲི་བར་འགྱུར་བ་ལ། །བདག་དང་སྐལ་ལྡན་སློབ་མ་ལ། །བྱིན་གྱིས་བརླབས་ཕྱིར་བསྲུང་བར་མཛོད། །སྲད་བུ་ཡེ་ཤེས་ལྔ་ཡི་དངོས། །རེ་རེའང་རིགས་ལྔ་རྣམ་དག་སྟེ། །
ཆོས་ཀུན་ངོ་བོ་ཉིད་མེད་པས། །ཕན་ཚུན་སྔགས་བཟླས་བསྒྲིལ་བར་བྱ། །དཀྱུས་སུ་འཁོར་ལོའི་ཉིས་འགྱུར་ལ། །སྦོམས་སུ་སྒོ་ཡི་བཅུ་གཉིས་ཚད། །ཧཱུྃ་བརྗོད་བདུད་རྩི་ལྔ་བྱུགས་ལ། །ཛྫ་ཛྫ་སྒྲ་བརྗོད་ལྟེ་བར་
གཟུང་། །སླར་ཡང་དེ་བཞིན་ཡེ་ཤེས་ཀྱི། །ཐིག་ཆེན་ནམ་མཁར་གདབ་པར་བྱ། །དེ་བཞིན་ཆ་ལྡན་གཉིས་པ་ཡིས། །གཙང་ཞིང་རྡོ་རྗེ་འཛིན་བསམ་ཏེ། །ཚངས་པའི་ཐིག་ཆེན་གདབ་པར་བྱ། །
གཉིས་པ་ཟུར་ཐིག་ལ་སོགས་པར། །ནུབ་དང་ལྷོར་ནི་སློབ་དཔོན་ལ། །བྱང་ཤར་སློབ་མའི་གནས་ས་སྟེ། །གཡས་ཀྱིས་བསྐོར་བར་མ་གཏོགས་པར། །གཡོན་དུ་ནམ་ཡང་མ་ཡིན་ནོ། །

90-1-41a

དེ་ལྟར་ཆ་ཡིས་རྣམ་པར་བྱེད། ཐིག་སྐུད་ཆད་ན་བླ་མ་འཆི། །དམན་དང་ལྷག་པས་ནད་དུ་འགྱུར། །ཕྱོགས་འཁྲུལ་ན་ནི་སློབ་མ་རྨོངས། །དེ་བས་མཁས་པས་སྐྱོན་མེད་བྱ། །
རིན་ཆེན་ལྔའམ་འབྲུ་ཡི་ཕྱེ། །ཡང་ན་འབྱུང་ཁུངས་ལས་བྱུང་བ། །ཡི་གེ་བཅུ་ཡིས་བྱིན་བརླབས་ཏེ། །རིགས་ལྔ་རྣམ་པར་དག་པ་ལས། །དཀར་སེར་དམར་ལྗང་ནག་པོ་དང་། །དབང་ལྡན་ཕྱོགས་ནས་
བྲི་བར་བྱ། །གལ་ཏེ་ཚོན་རྩི་མི་མཉམ་ཞིང་། །ཡོ་དང་དམའ་བར་གྱུར་ན་ནི། །དངོས་གྲུབ་མེད་ཅིང་རྩོད་ལ་བདུང་། །སྦོམ་པས་ནད་འབྱུང་ཕྲ་བས་ནི། །ནོར་ཉམས་གལ་ཏེ་ཆད་པས་ནི། །འཆི་འགྱུར་གཡས་
བསྐོར་མ་བྲིས་ན། །ཕུར་བུས་བཏབ་པ་ཡིན་ཞེས་བྱ། །ཤར་ཕྱོགས་དཀར་ལ་ལྷོ་ནུབ་བྱང་། །སེར་དམར་ལྗང་ཁུར་བྲི་བར་བྱ། །དབུས་ནི་བཻ་དཱུརྱ་ལྟ་བུ། །པད་མ་ཕྱོགས་ཀྱི་རྣམ་པ་སྟེ། །མཚམས་ནི་མཛེས་ཚོན་
བུམ་པས་བརྒྱན། །སྒོ་ལ་སོགས་པའི་རྒྱན་རྣམས་དང་། །དུར་ཁྲོད་ར་བའི་ནང་དུ་བྲི། །གཏུམ་དྲག་ལ་སོགས་ཕྱོགས་མཚམས་དགོད། །དབུས་མཐོ་ཤར་དང་བྱང་གཞོལ་ཞིང་། །མཐོ་ཞིང་མ་འདྲེས་དྲན་བར་བྲི། །
དེ་ནས་རྡོ་རྗེ་འཛིན་དམིགས་ལ། །གུས་པས་མེ་ཏོག་དང་བཅས་ནས། །གསོལ་བ་འདི་ལྟར་གདབ་པར་བྱ། །དཔལ་ལྡན་རྡོ་རྗེ་འཛིན་པ་ཆེ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་
ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་མཆོག་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་
མཆོག་ཏུ། །མགོན་པོས་བདག་ནི་གཞུག་པར་མཛོད། །ཅེས་པ་ལན་གསུམ་བར་དུ་བྱ། །བུ་ཚུར་ཐེག་པ་ཆེན་པོ་ཡི། །ཚུལ་ཆེན་སྣོད་ནི་ཁྱོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་མཆོག །

90-1-41b

ཁྱོད་ལ་ཡང་དག་བཤད་པར་བྱ། །རྡོ་རྗེ་མི་ཕྱེད་མཐུ་ཡིས་ནི། །མཉམ་མེད་པ་ཡི་ཡེ་ཤེས་འཐོབ། །དེ་བས་ཀུན་མཁྱེན་ཐོབ་འདོད་པས། །བུ་ཡིས་བློ་གྲོས་འདི་གྱིས་ཤིག །བླ་མ་སངས་རྒྱས་ཀུན་མཆོད་
ཅིང་། །རྩ་བ་ཡན་ལག་ཉེས་པ་སྤོང་། །མ་གྲོལ་འཁོར་བའི་སེམས་ཅན་ལ། །སྙིང་རྗེ་ཆེན་པོ་རབ་བསྐྱེད་ནས། །བསྒྲལ་ཞིང་གྲོལ་བའི་ལམ་ལ་དགོད། །བདེ་བར་དབུགས་ནི་དབྱུང་བར་བྱ། །དེ་དག་རིམ་དང་
རིམ་མིན་པ། །སློབ་མའི་རིམ་པ་རྣམ་པར་བརྟག །ཁྲུས་བྱ་སོ་ཤིང་སྦྱིན་པར་བྱ། །ཕྲིན་ལས་ཕྱོགས་དང་དངོས་གྲུབ་ཀྱི། །རིམ་པར་རྣམ་པར་བརྟག་པར་བྱ། །བསྲུང་སྐུད་གདགས་དང་ཀུ་ཤ་སྦྱིན། །རྨི་ལམ་
བརྟགས་ལ་ངན་པ་ན། །ཞི་བའི་མེ་ཡིས་བཟློག་པར་བྱ། །གདོང་གཡོགས་བཅིངས་ལ་ཡེ་ཤེས་དབབ། །དཀྱིལ་འཁོར་དམ་པར་གཞུག་པའི་ཕྱིར། །སྔོན་བསགས་སྡིག་པ་མ་ལུས་ལས། །དཀྱིལ་འཁོར་མཐོང་
བ་ཙམ་གྱིས་འབྱང་། །བུ་ཁྱོད་སུ་ཡིན་ཅི་དགའ་བ། །བདག་ནི་སྐལ་བཟང་རིགས་ཡིན་པས། །རྡོ་རྗེ་འཛིན་པ་ཁྱོད་ལ་དགའ། །མིག་དབྱེ་དཀྱིལ་འཁོར་ལྷ་ཡང་བསྟན། །དམ་ཚིག་ཆུ་སྦྱིན་མནའ་ཡང་བསྒག །མེ་ཏོག་དོར་ལ་
ལྷ་ངོ་བསྟན། །གང་དང་གང་དུ་བབ་གྱུར་པའི། །རིགས་ཀྱིས་དེ་ལ་སྤྲོ་བར་བྱ། །ཆུ་དང་ཅོད་པན་རྡོ་རྗེ་དེ། །དྲིལ་བུ་མིང་གིས་དབང་བསྐུར་ཏེ། །རིགས་ལྔའི་བདག་ཉིད་ཡེ་ཤེས་ལྔ། །བརྟུལ་ཞུགས་ལུང་བསྟན་རྗེས་གནང་སྦྱིན། །
དབུགས་དབྱུང་རྡོ་རྗེ་སློབ་དཔོན་བསྒྲུབ། །གསང་བ་ཤེས་རབ་ཡེ་ཤེས་དང་། །བཞི་པ་བརྗོད་མེད་དབང་བསྐུར་བ། །གསང་བ་མཆོག་གི་དཀྱིལ་འཁོར་དུ། །མཆོག་ཏུ་རབ་ཞུགས་མཐོང་བས་ན། །དེང་ཁྱོད་སྡིག་པ་
མ་ལུས་ལས། །རྣམ་གྲོལ་རིགས་སུ་སྐྱེས་པ་ན། །སངས་རྒྱས་ཀུན་དང་མཉམ་གསུངས་པའི། །རྗེས་སུ་གནང་བས་དབུགས་ཕྱིན་འགྱུར། །དངོས་གྲུབ་རྒྱུ་ཡི་དམ་ཚིག་ནི། །བུ་ཡིས་རྟག་ཏུ་བསྲུང་བར་

90-1-42a

གྱིས། །སློབ་མས་བླ་མ་ལ་བཏུད་ནས། །གཙོ་བོས་ཇི་ལྟར་བཀའ་སྩལ་པ། །དེ་ལྟར་བདག་གིས་བསྒྲུབ་པར་བགྱི། །བཅོམ་ལྡན་འདས་ཀྱིས་བཤད་པ་ལྟར། །རྒྱན་དང་ན་བཟའ་རིན་ཆེན་
དང་། །རྒྱལ་སྲིད་བུ་དང་ཆུང་མ་དང་། །རང་གི་ལུས་ཀྱང་བླ་མ་ལ། །བསྙེན་བཀུར་ཚིམ་པ་མེད་པར་བྱ། །དེང་དུ་བདག་ཚེ་འབྲས་བུ་ཡོད། །བདག་ནི་གསོན་པ་འབྲས་བུ་ཆེ། །དེ་རིང་སངས་རྒྱས་
རིགས་སུ་སྐྱེས། །སངས་རྒྱས་སྲས་སུ་བདག་གྱུར་པས། །སེམས་ཅན་དོན་ནི་མཉམ་མེད་བྱ། །ཞི་བའི་སྦྱིན་སྲེག་དངོས་གྲུབ་གྲོགས། །ཚོགས་ཀྱི་འཁོར་ལོ་དགེ་འདུན་མཆོད། །ནད་པའམ་མགོན་མེད་
ཕོངས་པ་ཀུན། །ཁ་ཟས་ཀྱིས་ནི་ཚིམ་པར་བྱ། །ཞིང་སྐྱོང་གཏོར་མས་མཉེས་བྱས་ལ། །རང་འདོད་འབྲས་བུ་གསོལ་བ་གདབ། །རྗེས་སུ་དམ་ཚིག་སྤྱོད་པ་དང་། །སྐྱེད་པ་ལ་སོགས་རྒྱུན་མི་ཆད། །
རྣལ་འབྱོར་པས་ནི་བསམ་པར་བྱ། །འདི་ནི་རིགས་མཆོག་དབང་བསྐུར་བླ་ན་མེད། །མཛེས་མ་ཁྱོད་ལ་སྐལ་ལྡན་བསྒྲུབ་ཕྱིར་བསྟན། །གཞན་དུ་རིགས་མེད་དུག་ལ་དེ་ཡིས་སླར་ཞིང་གནོད། །དེ་
ཕྱིར་འདི་ནི་དམ་ཚིག་རྡོ་རྗེའི་བཀོད་པ་ཡིན། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་སློབ་མ་དབང་བསྐུར་བའི་ལེའུ་སྟེ་བཅུ་གཅིག་པའོ།། །། དཔའ་
མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་འཁོར་ཀླུ་སྒྲུབ་པའི་ཐབས་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་
མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །གདུལ་བྱའི་རིགས་སུ་སྐྱེས་པ་ཡི། །གདུག་པའི་ཀླུ་ཆེན་རྣམ་པ་བརྒྱད། །རིགས་བསྡུས་

90-1-42b

ཆུ་བདག་བ་རུ་ན། །དམ་ཚིག་ལ་གནས་སོག་མ་མེད། །འདི་དག་བསྒྲུབ་པར་འདོད་པས་ནི། །མཛེས་པའི་དཀྱིལ་འཁོར་རྣམ་ལྔས་བྱུག །པད་མ་ལྷ་རྣམ་སྒོ་དང་བཅས། །སྒོ་རྒྱན་ལྟོས་འགྲོས་རབ་ཏུ་མཛེས། །
ལྟེ་བར་རྡོ་རྗེ་འཛིན་པ་བསམ། །མདུན་དུ་ལས་ཀྱི་བཀའ་ཉན་བསྐྱེད། །པད་མ་བརྒྱད་ལ་ཀླུ་ཆེན་བརྒྱད། །གདེངས་ཀ་བདུན་ལྡན་ཐལ་སྦྱར་བསམ། །ལྷ་རྣམས་རིགས་བཞིའི་ས་བདག་སྟེ། །སྒོ་དང་གྲུ་ཆད་
རིགས་ཀྱི་རིམ། །མཆོད་རྫས་ཀླུ་ཡི་རྩི་སྨན་བསམ། །དེ་རྗེས་རྡོ་རྗེ་འཛིན་བསམས་ལ། །ཀླུ་ཆེན་གནས་ནས་སྤྱན་དྲངས་ཏེ། །ཨེ་ཧྱ་ཧི་ནཱ་ག་རཱ་ཛ་ས་པ་རི་བཱ་ར་ས་མ་ཡ་ཛ་ཛ། རང་རང་སྟན་ལ་བཞུགས་པར་བྱ། །
པད་མའི་ལྟེ་བར་ཆུ་བདག་དང་། །དམ་ཚིག་སོག་མེད་དཀར་དང་སེར། །ཐལ་སྦྱར་སྦྲུལ་གྱི་ཞབས་སུ་འཁྱིལ། །གཙོ་བོ་རྡོ་རྗེ་འཆང་ལ་འདུད། །ཤར་ཕྱོགས་མཐའ་ཡས་སྔོན་པོ་སྟེ། །ལྷོ་ཕྱོགས་ནོར་
རྒྱས་སེར་པོ་ཆེ། །ནུབ་ཕྱོགས་འཇོག་པོ་ཁ་དོག་དམར། །བྱང་ཕྱོགས་སྟོབས་རྒྱུ་ནག་པོ་སྟེ། །ཤར་ལྷོར་པད་མ་དུང་དང་འདྲ། །ལྷོ་ནུབ་པད་ཆེན་སེར་བ་སྟེ། །ནུབ་བྱང་དུང་སྐྱོང་བཙོད་དང་འདྲ། །
བྱང་ཤར་རིགས་ལྡན་དུར་བའི་མདོག །མཇུག་མ་འཁྱིལ་བས་གཙོ་ལ་འདུད། །སྣ་ཚོགས་གཟུགས་ནི་རིགས་བཞི་དང་། །ས་བདག་སྣ་ཚོགས་གཟུགས་ཀྱིས་བསྐོར། །དེ་དག་སྔགས་ཀྱི་རིམ་
པ་ནི། །ཨོཾ་བཛྲ་ཙཎ་ཌ་མ་ཧཱ་རོ་ཥ་ཎ་བཛྲ་པཱ་ཎི་ཧྲི་ད་ཡྃ། ནཱ་ག་ཡཿས་མཱ་ཏི་ཀྲཱ་མ་ཐ་ཨུད་སཱ་དྷ་ནྃ་བྷ་བི་ཥྱ་ཏི་སྭཱ་ཧཱ། རྡོ་རྗེ་འཆང་གིས་ཀླུ་དམ་ཚིག་ལ་གཞག་པའོ། །ཨོཾ་མ་རུ་ཥཱ་ཡ་ཧཱུྃ་ཕུཿ
སྭཱ་ཧཱ། ཨོཾ་སྥུ་ཊ་སྥུ་ཊ་མ་ཧཱ་ནཱ། ག་རཱ་ཛ་ཀྲོ་དྷ་ཧཱུྃ། སིད་དྷི་སིད་དྷི་སྥོ་ཊ་ཡ་ཧཱུྃ་ཕུ་སྭཱ་ཧཱ། ཨོཾ་ཨ་ནན་ཏ་ཧཱུྃ་ཕུཿསྭཱ་ཧཱ། ཨོཾ་བ་སུ་ཀི་ཧཱུྃ་ཕུ་སྭཱ་ཧཱ། ཨོཾ་ཏཀྵ་ཀ་ཧཱུྃ་ཕུ་སྭཱ་ཧཱ། 

90-1-43a

ཨོཾ་ཀར་ཀོ་ཊ་ཧཱུྃ་ཕུཿསྭཱ་ཧཱ། ཨོཾ་པད་མ་ཧཱུྃ་ཕུཿསྭཱ་ཧཱ། ཨོཾ་མ་ཧཱ་པད་མ་ཧཱུྃ་ཕུཿསྭཱ་ཧཱ། ཨོཾ་ཤྃ་ཁ་པཱ་ལ་ཧཱུྃ་ཕུཿསྭཱ་ཧཱ། ཨོཾ་ཀུ་ལི་ཀ་ཧཱུྃ་ཕུཿསྭཱ་ཧཱ། འདི་དག་ཀླུའི་རྒྱལ་པོ་རྣམས་ཀྱི་སྔགས་སོ། །
རིམ་པས་མཆོད་ཅིང་གསོ་བ་བྱ། །མཛེས་པའི་རྒྱ་མཚོ་གཏོར་མ་ཡིས། །ཀླུ་རྣམས་ཚིམ་པས་གདུག་སེམས་ཞི། །དེ་རྗེས་བསྟོད་པ་བརྗོད་པར་བྱ། །ཧཱུྃ་ཆུ་བདག་ཆེན་པོ་སྤྲུལ་པའི་དམ་ཚིག་ཅན། །མཐའ་
ཡས་ནོར་རྒྱས་ལ་སོགས་ཀླུ་དབང་རྣམས། །རྒྱ་མཚོ་ཆུ་གཏེར་ཟབ་པའི་འཇིང་ཆེན་གནས། །རིན་ཆེན་སྣ་ཚོགས་ཡིད་འོང་སྤྲས་པ་ཡི། །གཞལ་ཡས་འབྱོར་པ་ཕུན་སུམ་གནས་ན་བཞུགས། །སྦྲུལ་མགོའི་གདེངས་
ཀ་རབ་འབར་རིན་ཆེན་གསལ། །ཡིད་འོང་ནོར་བུ་འདོད་པ་ཀུན་སྒྲུབ་པ། །རང་གཞན་ཕུན་ཚོགས་དོན་རྣམས་སྟེར་བའི་དཔལ། །འོད་འབར་ས་འོག་མུན་པ་མ་ལུས་སེལ། །དུ་མའི་བསྐལ་པར་
ཡོན་ཏན་སྦྱངས་པ་ཡིས། །ཀླུ་རྒྱལ་འབྱོར་པ་མཆོག་ལ་མངའ་བརྙེས་པ། །བསམ་གྱིས་མི་ཁྱབ་རྫུ་འཕྲུལ་མཆོག་བརྙེས་པའི། །ཡོན་ཏན་བསམ་གྱིས་མི་ཁྱབ་ཁྱོད་ལ་བསྟོད། །སངས་རྒྱས་བཀའ་ཐོབ་དད་པའི་
སྟོབས་འཕེལ་བ། །སངས་རྒྱས་སར་གནས་སྒྲུབ་ལ་ནན་ཏན་བྱེད། །ཐབས་དང་ཤེས་རབ་འབྲེལ་བས་གཞན་དོན་མཛད། །བདག་གཞན་དོན་སྒྲུབ་ཁྱོད་ལ་ཕྱག་འཚལ་ལོ། །བདེ་གཤེགས་སྤྱན་སྔར་ཁས་བླངས་
དམ་བཅས་ཏེ། །བསྟན་པ་བསྲུང་ཞིང་འགྲོ་རྣམས་བསྐྱངས་བའི་ཕྱིར། །ཁས་བླངས་མནའ་ཕུལ་དམ་ཚིག་དྲན་གྱིས་ལ། །ཕྲིན་ལས་དོན་གྱིས་བདག་གཞན་དོན་གྲུབ་མཛོད། །གཞན་ཡང་འཇིག་
རྟེན་པ་རྣམས་ལ། །ཨོཾ་མཐའ་ཡས་དང་ནི་འཇོག་པོ་དང་། །སྟོབས་ཀྱི་རྒྱུ་དང་རིགས་ལྡན་དང་། །ནོར་རྒྱས་བུ་དང་དུང་སྐྱོང་དང་། །པད་མ་དང་ནི་ཆུ་ལྷ་དང་། །རྒྱ་མཚོ་རྒྱ་མཚོ་ཆེན་པོ་དང་། །

90-1-43b

དཔལ་གྱི་འོད་དང་འོད་པོ་ཆེ། །གཟུགས་ཆེ་ལྟོ་འཕྱེ་སྦྲུལ་ཆེན་པོ། །ཀླུ་ཆེན་འཁོར་དང་བཅས་པ་ལ། །འཐུན་པའི་དམ་རྫས་ཡིད་འོང་བ། །དཀར་གསུམ་མངར་གསུམ་གསོ་བའི་སྨན། །
རིན་ཆེན་དར་དང་ཟ་འོག་དང་། །དཔག་བསམ་ཤིང་དང་འདོད་འཇོའི་བ། །སྣ་ཚོགས་ཁྱེད་ལ་ཕུལ་བ་ཡིས། །ཀླུ་ཡི་ནད་རྣམས་མེད་པར་མཛོད། །ཕྱིས་ཀྱང་མི་ཕྱེད་དམ་ཆོས་ལ། །སོ་སོའི་
གནས་སུ་འགྲོ་བར་གྱིས། །འདི་ནི་རྡོ་རྗེ་འཆང་གི་བཀའ། །འདི་ལས་འདས་ན་ཀླུ་རྒྱལ་རྣམས། །སྙིང་འཚིག་མགོ་བོ་འགས་འགྱུར་ཏེ། །ལུས་ལ་བསྐལ་པའི་མེ་འབར་ནས། །སྡུག་བསྔལ་གྱུར་ན་མ་ལེགས་པས། །
དམ་ལས་འདའ་བར་མ་བྱེད་ཅིག །ནཱ་ག་རཱ་ཛ་ས་མ་ཡ་ཨ་བྷི་ཤིཉྩ་བཛྲ་ཙཎ་ཌ་མ་ཧཱ་རོ་ཥ་ཎ་བཛྲ་པཱ་ཎི་ཧཱུྃ་ཕཊ། ཀླུ་རྣམས་དམ་ཚིག་སྒྲུབ་པའོ། །དེ་བཞིན་བྱས་ན་ཀླུ་ནད་རྣམས། །སྐད་ཅིག་ཉིད་ལ་བྱང་འགྱུར་ཏེ། །
སྒྲུབ་པོ་བདེ་བར་འགྱུར་བ་ཡིན། །དེ་བས་འདི་ལ་བརྩོན་པར་གྱིས། །མཛེས་མ་ཁྱོད་ཀྱིས་ཞུས་པ་བཞིན། །གཏན་ལ་ཕབ་པས་རབ་ཏུ་བཤད། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་
རྒྱུད་ཀྱི་རྒྱལ་པོ་ལས་ཀླུ་སྒྲུབ་པའི་ལེའུ་སྟེ་བཅུ་གཉིས་པའོ།། །།  དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་འཁོར་ཀླུ་གདུག་པ་ཅན་རྣམས་ཀྱི་ནད་འབྱུང་བའི་རྟགས་ཇི་ལྟ་བུ་ལགས། 
བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ཀླུ་ལ་རིགས་དྲུག་
ལ་སོགས་པ། །སྣ་ཚོགས་རིགས་སུ་ཡོད་གྱུར་ཀྱང་། །འབྱུང་བ་ལྔ་ཡི་རང་བཞིན་ཏེ། །ནོར་རྒྱལ་དུང་སྐྱོང་རྒྱལ་རིགས་ཡིན་ཏེ་མཐོང་བའི་དུག །སེར་པོ་ས་ལ་དབང་སྟེ་ལྕི་འཐིབས་ལུས་པོ་སྦོ། །ཤ་བབས་ར་བ་བཞི་

90-1-44a

ལ་ཁྱད་པར་ན་བ་ཡིན། །བཅྭོ་ལྔ་ཉིན་གུང་རྒྱུ་བའི་དུས་ལ་ན། །ནད་ཀྱི་གནས་ནི་ལ་སྤྱི་བོར་ངེས་པར་འབབ། །རླུང་རྩ་བབས་ལ་ཤ་རུས་བར་དུ་ན། །སྐྲ་འབྱི་ས་བརླང་ཐབས་བྱས་ནས་ན་སྟེ་རྣ་བ་དང་། །
གློ་བར་འབྲེལ་བས་ཤ་རོ་གློ་ལུ་འབྱུང་བ་ཡིན། །དགའ་བོ་རིགས་ལྡན་བྲམ་ཟེ་ཡིན་ཏེ་བལྟསས་པའི་དུག །དམར་པོ་མེ་ལ་དབང་བ་ཡིན་སྟེ་ཚ་ཞིང་གདུང་། །ལུས་དམར་སྐྱི་ཆུང་ཐང་ལ་མིག་རྩ་
ལུས་པོ་སྐམ། །འབྲིང་པོ་བབས་ས་ཉི་ནུབ་དགོངས་མོའི་དུས་སུ་ན། །གནམ་སྟོང་བཅྭ་ལྔ་རྒྱུ་བའི་དུས་ཏེ་དེ་ལ་ན། །སྙིང་གར་བསབས་པ་སྙིང་མི་དགའ་ཞིང་དྲན་པ་ཉམས། །མཇུག་ཏུ་མགོ་དང་ལུས་ལ་
བབས་ཏེ་ན་ཚ་ཆེ། །ཤ་རོ་སྙིང་ལ་འོང་བས་ལྕེ་ཡིས་རོ་མི་ཚོར། །པད་མ་འཇོག་པོ་རྗེ་རིགས་ཡིན་ཏེ་ཁ་རླངས་དུག །དཀར་པོ་ཆུ་ལ་དབང་བས་གྲང་ཞིང་བསིལ་བར་ན། །ལུས་མདོག་དཀར་ལ་
ལྤགས་པའི་སྤྲིས་མ་འཆགས། །ཐ་ཆུངས་བབས་པ་ཡིན་ཏེ་ཚེས་བརྒྱད་བཅྭ་བརྒྱད་ན། །སྔ་དྲོ་ཐོ་རངས་མི་བདེ་སྐེ་དང་དཔུང་པ་གཡས། །བྲང་ན་ཐ་མ་མཆིན་པར་བབས་པའི་ས་ཡིན་ནོ། །ཕོ་བས་ཟས་
མི་འཇུ་ཞིང་མིག་གིས་གཟུགས་མི་འཛིན། །ཤ་བྲུལ་ཚོར་བ་མེད་དེ་ཅུང་ཟད་ཤ་ལྤགས་དམར། །པད་ཆེན་སྟོབས་རྒྱུ་དམངས་རིགས་ཡིན་ཏེ་རེག་པའི་དུག །ནག་པོ་རླུང་ལ་དབང་བས་ཡང་ཞིང་
གཡོ། །ལུས་འདར་སེམས་རྒོད་ཤ་འཕར་ཕུ་ཤུས་འདེབས། །ཡན་ལག་ཚིགས་བཞི་ན་ཞིང་ཕོ་འདང་བད་ཀན་སྐྱེ། །སྒྲེགས་དང་རོ་སྟོད་ན་ཞིང་སྣ་ཁྲག་དག་ཀྱང་འབྱུང་། །འབྱང་ཞིང་བ་ལུས་ངལ་དགོངས་
དང་སྲོག་ལ་ན། །ཐ་ཆུངས་ཞག་ལ་འབས་ཏེ་ཚེས་གསུམ་བཅུ་གསུམ་ན། །འདི་ནི་འགོང་རིགས་རྩུབ་པས་སྨྱོ་འབོག་བཙན་ཐབས་གསོད། །ཐ་མ་མཁལ་མར་འབབ་སྟེ་རྣ་བས་སྒྲ་མི་ཐོས། །ཁུ་ཆུ་ཉམས་པས་

90-1-44b

ཆུ་སྲི་སོར་མོ་ཕྲ། །ཆུ་ལྷ་དམ་ཚིག་ནམ་མཁའ་ཡིན་པས་ཀུན་ལ་ཁྱབ། །གོང་མ་ཅི་རིགས་འབྱུང་ཞིང་དུས་མེད་ཤེས་པ་ཞུམ། །ལུས་ཀྱི་ཤེད་ཉམས་བྲལ་ཏེ་སྣ་ཚོགས་སྟོན་པ་སྟེ། །འདི་ནི་བཅོས་པར་
དཀའ་སྟེ་གཏན་ལ་ཕེབས་པར་བྱ། །ཁྱད་པར་མཚེར་བ་ན་ཞིང་གདོང་ལ་སྨེ་བ་འབྱུང་། །ལུས་ལ་ཤིག་མང་ཀོ་དྲི་རཱ་གཞོབ་མནམ་པ་དང་། །ཐུར་སེལ་རླུང་ལ་རུལ་བའི་དྲི་མ་བྲོ་གྱུར་ལ། །འདི་ནི་མཚེར་
བར་འབབ་སྟེ་ཆུ་ལ་ཁྲག་ཀྱང་འབྱུང་། །སོ་སོའི་རྟགས་སུ་མཁས་པས་ཤེས་པར་གྱིས། །སྤྱིར་ནི་ལྔ་ག་གང་ཞུགས་ཀྱང་། །རིམ་པས་འདི་ལྟར་འབྱུང་བར་འགྱུར། །མེ་དང་གྲོག་པོ་ཕུགས་རྡུགས་དང་། །
རི་ཕུག་དོག་པའི་སྒོ་དང་དོང་། །ལྷ་ཁང་འདམ་རྫབ་མི་སྡུག་གཟུགས། །དུད་འགྲོའི་ཚོགས་དང་མཚོ་རི་གཟར། །སྙིང་མི་དགའ་ཞིང་འཚིགས་པ་ནི། །དང་པོ་འབྱུང་བར་ཤེས་པར་བྱ། །གླུ་ལེན་ནུབ་མོ་ན་དང་
ཤེས་པ་ལྕི། །ཡན་ལག་མི་བདེ་ཤུ་བ་གཡན་པ་དང་། །བས་ལྡགས་འབྲུམ་ཆུང་དམར་སིབ་འོང་། །འཁྲུག་ཅིང་ཟ་འཕྲུག་ཤ་མདོག་ཉམས། །མེ་རིས་ཆུ་གྲང་བླུགས་ལྟར་གྲང་། །གྲང་སིབ་ཚ་ཐིག་ཤ་བཀྲ་
ཆེ་ཆུང་བྱེད། །ཤ་འཕྲིགས་བེམ་དང་སྦྲིད་ཅིང་འཁོལ། །མིག་ཟླུམ་ཚ་ཞིང་སྨིན་མ་བྱི། །ལག་སོར་སེན་མོ་ཉམས་པས་ཕྲ། །ལུས་ལ་དྲི་ང་ཆུ་བུར་དང་། །ཉ་སྒངས་གནག་ཆུ་རུལ་དྲི་མནམ། །སྟོད་གཟེར་
སྨད་དུ་འཁྲུ་བར་བྱེད། །ཕྱིའི་ཤ་སྐམས་མདོག་ཉམས་དྲི་མ་བྲལ། །བུག་པའི་སྒོ་ཡོ་བདུད་རྩི་དུས་མེད་པ། །ཡང་ཅིག་མདོར་བསྡུས་བཤད་པ་ནི། །དབང་པོ་གསལ་བའི་འབྲས་བུ་ནི། །མཆིན་པའི་སྒོ་ཡིན་
མིག་ལ་བརྟག །རྒྱལ་མོ་འཁོར་ལོ་གཡང་ར་ཡིན། །གནས་པ་རུས་པའི་འབྲས་བུ་ནི། །མཛེས་པ་སོ་ཡི་མཁར་ཡིན་པས། །ཁ་དོག་རྐང་བུ་ནུས་པ་བལྟ། །ནུས་པ་ཆུ་བའི་འབྲས་བུ་ནི། །ཟངས་མདོག་སེན་མོའི་ཚོགས་

90-1-45a

ཡིན་པས། །སྐྱེ་ལུགས་ཁ་དོག་རྩ་བ་བརྟག །མདོངས་དང་ཤ་ཡི་འབྲས་བུ་ནི། །ཁྱབ་པ་དྲེག་པ་ཡིན་པས་ན། །ཆགས་ལུགས་ཁ་དོག་འགྱུར་བ་བལྟ། །དྲོད་བརྟེན་ཁྲག་གི་འབྲས་བུ་ནི། །བུད་
མེད་གསང་སྒོའི་ཆུ་ཡིན་པས། །ཁ་དོག་ཀུ་ཡ་གཟུགས་ལ་བརྟག །རྐང་མར་བཅུད་ཀྱི་འབྲས་བུ་ནི། །རྩ་བ་གནས་ལུགས་སྐྱེ་ས་བརྟག །དེ་རྣམས་ཐམས་ཅད་རྟགས་ལྡན་ན། །ངས་ཀྱང་གསོ་བར་ག་ལ་ནུས། །
གསུམ་བཞི་ལྔ་ལ་སོགས་པ་ཡི། །རིམ་པ་རྣམས་དང་ལྡན་པ་ན། །སྔགས་དང་སྨན་གྱིས་གསོ་བར་བྱ། །ཕྱི་ནང་འབྲེལ་བའི་བབས་ས་ཡིས། །ལེགས་པར་བརྟགས་ཏེ་གསོ་བར་བྱ། །བཅོམ་ལྡན་འདས་ཕྱག་ན་རྡོ་རྗེ་གསང་
བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ཀླུའི་ནད་ཞུགས་པ་བརྟག་པའི་ལེའུ་སྟེ་བཅུ་གསུམ་པའོ།། །། དཔའ་མོ་རྡོ་རྗེ་བདེ་མས་གསོལ་པ། བཅོམ་ལྡན་འདས་རྡོ་རྗེ་འཆང་གི་ཀླུའི་ནད་གསོ་བའི་ཆོ་ག་ཇི་ལྟ་བུ་ལགས། བཅོམ་ལྡན་
འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །བྱོལ་སོང་ཀླུ་ཡིས་ཟིན་པ་ལ། །འཚོ་
དང་མི་འཚོ་གཉིས་ཡིན་ཏེ། །ངེས་པའི་རྟགས་ཆེན་དྲུག་ཚང་ན། །དེ་ལ་མཁས་པས་ཅི་བྱར་ཡོད། །རྣམས་སྨིན་ལས་ལས་བྱུང་བ་ཡིན། །གཞན་རྣམས་གསོ་བར་འདོད་པ་ལ། །དཀའ་དང་སླ་བ་གཉིས་ཡིན་ཏེ། །དང་པོ་སྔགས་
ཀྱི་རིམ་པ་ཡིན། །གཉིས་པ་རྫས་དང་འབྲེལ་པ་ཡིན། །དང་པོ་སྔགས་ཀྱི་སྦྱོར་བ་ནི། །དབང་བསྐུར་ཚོགས་བསགས་རྒྱུད་སྦྱངས་ལ། །རིམ་པ་གསུམ་གྱིས་བསྙེན་པར་བྱ། །ཁ་ཅིག་དེ་ཙམ་གྱིས་ཀྱང་ཞི། །གལ་ཏེ་
ནུས་པ་ཆེ་བ་ན། །གསད་པ་དྲག་པོའི་ཤམ་བུ་གདགས། །ཁ་ཅིག་དེ་ཡིས་འཚོ་བ་ཡིན། །གལ་ཏེ་གནོད་ཚབས་ཆེ་བ་ན། །ཀླུ་ཡི་རང་གཤེད་བཟླས་པ་ཙམ། །ནམ་མཁའི་ཀླུ་ཡིས་སྙིང་ནས་གཟིར། །

90-1-45b

རིག་པ་གཉིས་པ་གཤམ་དུ་སྦྲེལ། །རྡོ་རྗེ་ལྟེ་བར་འཁོར་ལོ་བྲི། །དེ་ལ་དམིགས་ཏེ་བསྒྲུབ་པར་བྱ། །དུག་རིགས་གསལ་བར་གྱུར་ན་ནི། །ས་དུག་ངོས་ཟིན་རྡོ་རྗེའི་ནང་། །དགའ་བོ་རིགས་ལྡན་མེ་ཡི་སྔགས། །
བྲམ་ཟེའི་འཁྲུལ་འཁོར་ཤིས་པ་ཡིན། །མེ་ལ་ཆུ་ཡི་འཁྲུལ་འཁོར་ཏེ། །དེ་ཡི་སྔགས་ཀྱིས་གསད་པར་བྱ། །པང་ཆེན་སྟོབས་རྒྱུ་རླུངས་ཡིན་པས། །ས་ཡི་འཁྲུལ་འཁོར་ལྟེ་བར་བཅས། །པད་མ་འཇོག་པོ་ཆུ་ཡིན་པས། །
རླུང་གི་འཁོར་ལོས་གསད་པར་བྱ། །རང་རང་ཁ་དོག་གཤེད་དུ་སྦྱར། །གཞི་སྙིང་སྔགས་རྣམས་དྲི་ལ་བཟླས། །གཉེན་པོ་མི་མཐུན་རྫས་དང་སྦྱར། །གཉེན་པོ་གང་ཡིན་ལྷ་ཡི་གཤེད། །མན་ངག་བཞིན་དུ་ཤེས་པར་བྱ། །
འཁྲུལ་འཁོར་ཚར་ནས་སེམ་བདེ་ན། །རྒྱལ་པོའི་སྡོང་ཟླ་དབྱེ་བར་བྱ། །དུས་ཚོད་ཞག་གྲངས་རིམ་པ་ནི། །བརྟགས་དང་སྦྱར་ལ་ཤེས་པར་བྱ། །རྟགས་རྗེས་རྗེས་སུ་ལོག་པ་ན། །སྦྱིན་བསྲེག་ཅི་རིགས་མཁས་པར་
བྱ། །ཕྱི་རྗེས་དྲག་པོས་བཅད་པ་དང་། །ལྷ་དང་རྫས་ཀྱི་སྔགས་ཀྱིས་གཅད། །མནན་པས་ལས་མཐའ་བརྟུལ་བར་བྱ། །ཞི་བ་དྲག་པོའི་རིམ་པ་ནི། །མཁས་པས་བརྟགས་ལ་བརྟེན་པར་བྱ། །བཅོམ་ལྡན་འདས་ཕྱག་ན་
རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ཀླུའི་ནད་བསལ་བའི་ལེའུ་སྟེ་བཅུ་བཞི་པའོ།། །། དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་གི་གཏོར་མ་བྱ་བའི་རིམ་པ་ཇི་ལྟ་བུ་ལགས། བཅོམ་ལྡན་
འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས་པ། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །དཀྱིལ་འཁོར་བྲི་དང་སྦྱིན་སྲེགས་དང་། །བཟླས་པ་
མཐུན་ཚམས་རབ་གནས་དང་། །དབང་བསྐུར་བསྐྲད་ཅིང་གསད་པ་དང་། །འབྱུང་པོ་ཁྱུང་དང་གནོད་སྦྱིན་དང་། །ཀླུ་དང་གནས་སྐྱོང་མཆོད་པ་ན། །གཏོར་མ་མེད་པར་གང་སྤྱད་པ། །ལས་དེ་འབྲས་བུ་

90-1-46a

མེད་པ་འམ། །བར་ཆད་ཉེ་བར་སྐྱེ་འགྱུར་བས། །གཏོར་མའི་ཆོ་ག་བསྟན་པར་བྱ། །ལྷ་ཡི་རྣལ་འབྱོར་ལྡན་པ་ཡིས། །ཕུན་སུམ་ཚོགས་པའི་འབྱོར་པ་བསག །གཏོར་མའི་འོག་ཏུ་རླུང་ལྷ་ཡི། །ས་བོན་ལས་
སྐྱེ་ཁ་དོག་སྔོ། །གཡོ་བའི་རླུང་ཡབ་དང་བཅས་པ། །དེ་སྟེངས་རྒོད་མའི་ཁ་བསམས་ཏེ། །དམར་པོ་རླུང་ལས་སྐྱེས་པ་བསམ། །གྲུ་གསུམ་ཧཱུྃ་ལས་རྡོ་རྗེ་གསུམ། །སྐུ་གསུང་ཐུགས་ཀྱིས་བརྟན་པོར་བྱ། །དེ་སྟེང་
ཨ་ལས་པད་མ་ཆེ། །ཡངས་ལ་དཀར་ཞིང་ཅུང་ཟད་དམར། །ཆོས་དབྱིངས་སྣོད་ཀྱི་གཞལ་ཡས་ཡིན། །དེ་ནས་སྦྱང་བའི་ས་བོན་ལས། །བྲུྃ་ཨྃ་ཛྲྃ་ཁྃ་ཧཱུྃ་བསམས་སླར་ཡང་ཤ་ལྔ་སྦྱངས་པ་ལས། །མཱྃ་
ལཱྃ་པཱྃ་ཏཱྃ་བཱྃ་བསམས་ཏེ། །ཡུམ་ལྔའི་ཡེ་ཤེས་རྣམ་པར་དག །བདུད་རྩི་ཡེ་ཤེས་རྣམ་དག་འདི། །སྦྱང་དང་སྦར་རྟོགས་སྦྱོར་བ་ཡིས། །ཡི་གེ་གསུམ་གྱི་སྒྲ་ལྡན་པ། །བདེ་བའི་རོ་ཆེར་ཉི་མར་གསལ། །འཆར་བའི་
ཁ་དོག་འདྲ་བར་འགྱུར། །རྡོ་རྗེ་ལས་བྱུང་དངུལ་ཆུའི་མདོག །གཉིས་མེད་ཐབས་དང་ཤེས་རབ་ཡིན། །ས་བོན་ལས་བྱུང་པད་མའི་གདན། །ཡངས་པར་རྡོ་རྗེ་འཛིན་བར་དང་། །ཕྱོགས་སྐྱོང་ལ་སོགས་བཀུག་ལ་བསྟིམ། །
མཛུབ་མདུད་གུང་མོ་རྩེ་མོ་སྦྱོར། །མཐེ་བོང་རྡོ་རྗེ་བརྟན་པར་གནས། །རང་འདོད་དངོས་གྲུབ་སར་བཞག་ལ། །ཧཱུྃ་སྒྲ་ལྡན་པས་སྔགས་འདིས་སྦྱིན། །ཨོཾ་ཨིན་ད་ཛ་མ་ཛ་ལ་ཛཀྑ་བྷུ་ཏ་བ་ཧྣི་བ་ཨུ་རཀྑ་ཙན་ད་སུ་ཐྫ། མ་ད་
པ་པ། ཏ་པ་ལ་པ་ཏ་ལ། ཨཪྠ་སཔྤ་སྭཱ་ཧཱ། ཨི་དམ་བ་ལིང་བྷུྃ་ཛི་གྷ་ཕུལླ་དྷཱུ་པ་མྃ་ས་པྃ་ག །ཨམྦྷ་ཀ་ཛ།  སཔྤ་སཱ་ཧ་ཁན་ཏི་ཁུ་ཎི་ཕེ་ཌ་ག་ད་སྭཱ་ཧཱ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱྃ། ཨཱདྱཱ་ནུད་པན་ན་ཏྭཱད་
ཨོཾ་ཨཱཿཧཱུྃ་ཕཊ་སྭཱ་ཧཱ། འཁོར་རྣམས་རྟོགས་པར་བྱ་བའོ། །ལྷག་པར་ཁྱུང་ཆེན་མཆོད་པ་ནི། །ཉ་ཤ་བྷྲེང་གི་ལ་དུ་དང་། །འོ་མ་སྦྲུལ་གྱི་ཤ་ཡིས་མཆོད། །གནོད་སྦྱིན་དག་ལ་ཤ་རློན་དང་། །ཆང་ནི་མེད་དུ་མི་རུང་ངོ་། །

90-1-46b

ར་ཁྲག་ཤིང་ཐོག་རྣམས་ཀྱིས་སོ། །ཀླུ་ལ་དཀར་གསུམ་མངར་གསུམ་དང་། །རྩི་སྨན་དར་ཟབ་སྣ་ཚོགས་མཆོད། །རང་གི་རིག་པ་ཕུལ་བྱས་ལ། །བསྟོད་ཅིང་གསོལ་བ་གང་ཡིན་བྱ། །ཧཱུྃ་ཁྱོད་ཀྱིས་སེམས་
ཅན་དོན་ཀུན་མཛད། །རྗེས་སུ་འཐུན་པའི་དངོས་གྲུབ་སྩོལ། །རང་གི་གནས་སུ་གཤེགས་ནས་ཀྱང་། །སླར་ཡང་སྤྱན་དྲངས་ཚེ་ན་སྤྱོན། །ཨོཾ་བཛྲ་ས་མ་ཡ་མུཿཞེས་བརྗོད། །མཆོད་སྦྱིན་འདི་དང་མ་བྲལ་
ན། །ཞི་སོགས་གྲུབ་པ་བརྒྱད་གང་ཡིན། །མཆོག་གི་འབྲས་བུ་ཐོབ་པར་འགྱུར། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ཞེས་བྱ་བ་ལས་གཏོར་མའི་ཆོ་ག་བསྟན་པའི་
ལེའུ་སྟེ་བཅྭ་ལྔ་པའོ།། །།  དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་གི་ཞུ་བ་གསོལ་བ་བདག་གི་སྒྲུབ་པའི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་
ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །དུས་གསུམ་སངས་རྒྱས་བསྐྱེད་པའི་མ། །རྡོ་རྗེ་བདེ་ཆེན་སྟོང་པ་ཉིད། །ཁྱོད་
ཀྱི་སྒྲུབ་པ་བཟང་པོ་ནི། །འདས་པའི་སངས་རྒྱས་རྣམས་ཀྱིས་བཤད། །ད་ལྟར་བྱུང་བ་འང་དེ་འཆད་དེ། །མ་འོངས་རྣམས་ཀྱང་འཆད་འགྱུར་ལ། །ང་ཡིས་ཀྱང་ནི་འདིར་བཤད་དེ། །བྱང་ཆུབ་སེམས་ལྡན་གང་ཟག་གི །
རབ་དབེན་པ་ཡི་ས་ཡི་ཆར། །མཆོད་ཅིང་བསྟན་དགའ་བསྙེན་བྱས་ལ། །སངས་རྒྱས་རྡོ་རྗེ་ཅན་མཆོད་བྱ། །རིམ་པས་ཚངས་པའི་གནས་བཞི་བསྒོམ། །ཨོཾ་སྭ་བྷཱ་བ་ཤུད་དྷཱཿསརྦ་དྷརྨཱཿསྭ་བྷཱ་བ་ཤུད་དྷོ྅་ཧྃ། 
རང་བཞིན་རྣམ་པར་དག་པ་བསྒོམ། །ཨོཾ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅་ཧྃ། བརྗོད་མེད་ཡེ་ཤེས་དག་པར་བསྒོམ། །བསྲུང་ཞིང་གཞལ་ཡས་ཁང་པ་དེར། །མཛེས་པའི་པད་མ་ལ་གནས་པ། །ཆོས་འབྱུང་

90-1-47a

རྣམ་དག་ཕོ་བྲང་དུ། །ཉི་མ་ཟླ་བ་རྣམ་དག་དཔལ། །བྃ་ལས་བྱུང་བའི་ལྷ་མོ་ནི། །སྐུ་མདོག་དམར་ལྗང་ཞལ་གཅིག་མ། །ཕྱག་གཉིས་གྲི་གུག་ཐོད་པ་འཛིན། །གར་སྟབས་བརྒྱན་གྱིས་མཛེས་མ་སྟེ། །
ཐོད་པ་སྐམ་པོའི་ཕྲེང་བས་བརྒྱན། །ཤར་དུ་མཱ་མ་ཀཱི་བསམས་ཏེ། །སྔོན་མོ་ཞལ་གཅིག་ཕྱག་གཉིས་མ། །གཡས་པ་རྡོ་རྗེ་གཡོན་ཐོད་པ། །གཡས་སུ་སངས་རྒྱས་སྤྱན་སེར་ཏེ། །ཞལ་གཅིག་ཕྱག་གཉིས་གཡས་པ་ན། །
རིན་ཆེན་གཡོན་པས་ཐོད་པ་འཛིན། །གཡོན་དུ་དམ་ཚིག་སྒྲོལ་མ་ལྗང་། །གཡས་པ་ཨུཏྤལ་ཐོད་པ་འཛིན། །རྒྱབ་ཏུ་གོས་དཀར་དམར་སེར་ཏེ། །པད་མ་ཐོད་པ་བསྣམས་པའི་ཕྱག །ཀུན་ཀྱང་ཁྲོ་ཞིང་གར་སྟབས་
བཞུགས། །རུས་པ་རིན་ཆེན་རྒྱན་དང་ལྡན། །མཆོག་སྒྲུབ་ནད་རྣམས་སྦྱང་བ་དང་། །བསྲུང་ཞིང་འདོད་པ་ཞི་རྒྱས་དང་། །རང་གི་སྲོག་འཛིན་ཕྲིན་ལས་དབང་། །རྟག་ཏུ་ཡེ་ཤེས་པ་ཡང་མཆོད། །རིགས་པ་
ངེས་པར་བསྟན་པ་ནི། །ཨོཾ་བཛྲ་སུ་ཁཱ་བུད་དྷ་སརྦྦ་ཤྚྃ་ཀུ་རུ་སུ་ར་ཀ་ཧཱུྃ་ཕཊ་སྭཱ་ཧཱ། ཨོཾ་ཤང་ཀ་རེ་ཤཱན་ཏིང་ཀ་རེ། གྷུཊྚ་གྷུཊྚ་གྷུཊྚི་ནི་གྷཱ་ཏ་ཡ། གྷཱ་ཏ་ཡ། གྷུཊྚི་ནི་སྭཱ་ཧཱ། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིད་དྷ་ལོ་ཙ་ནི་སརྦ་ཨརྠ་སཱ་དྷ་ནི་
སྭཱ་ཧཱ། ཨོཾ་ཨ་ཀ་ཊེ་བི་ཀ་ཊེ་ནི་ཊེ། ཀ་ཊྃ་ཀ་ཊེ་ཀ་རོ་ཊྃ་བཱི་རྱེེ་སྭཱ་ཧཱ། ཨོཾ་ཏཱ་རེ་ཏུཏྟྭ་རེ་ཏུ་རེ་མ་མ་ཨཱ་ཡུ་ཥྵེ་སྭཱ་ཧཱ། རང་རང་ལས་དང་འབྲེལ་པ་ནི། །འབུམ་འགྱུར་སྔགས་ཀྱིས་འགྲུབ་པར་འགྱུར། །ལས་གཞན་དངོས་གྲུབ་མ་
བསྒྲུབས་པར། །ལྷ་མོ་ཁྱོད་ཀྱིས་བྱེད་པ་ཡིན། །འདི་ནི་གསང་བ་དམ་པ་སྟེ། །ཆེས་གསང་བས་ཀྱང་མཆོག་ཡིན་ནོ། །དེ་བས་མཛེས་མ་ཁྱོད་ལ་བཤད། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་
རྒྱལ་པོ་ལས་ཡུམ་བསྒྲུབ་པར་རྣམ་པར་ཕྱེ་བའི་ལེའུ་སྟེ་བཅུ་དྲུག་པའོ།། །། དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་གི་ལས་སྣ་ཚོགས་པ་སྒྲུབ་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་

90-1-47b

པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །སྒྲུབ་པོ་ཕུན་སུམ་ཚོགས་འདོད་པས། །ང་ཉིད་ཐོག་མར་མཉེས་བྱ་སྟེ། །འདོད་པའི་རྫས་ལ་འཁོར་ལོ་བྲི། །དེ་
ཡི་ནང་དུ་ཆུད་པ་ཡི། །ལོངས་སྤྱོད་མིང་དང་སྤེལ་བྲིས་ནས། །དགུག་ལ་བཅུག་ལ་སྔགས་འདི་བཟླས། །ཨོཾ་ཙཎ་ཌ་མ་ཧཱ་རོ་ཥ་ན། ཏད་ཡ་ཐཱ། ཨོཾ་ཙ་ལེ་པྲ་ཙ་ལེ་ལ་ལཱ་ལུ་ཏེ་ཡཱ་དེ་བ་ཀཱ་མ་ཧཱ་ཀཱ་ལ་ཨ་ན་ཙ་ར་ཡ་བ་སཱི་སྭཱ་ཧཱ། 
ཁྲི་བཟླས་པས་རང་ཅི་འདོད་པ་འོང་བར་འགྱུར་ཏེ། གོང་བུ་དགུག་པའོ། །རང་ཉིད་རྡོ་རྗེ་འཛིན་དུ་བསམས་ལ་ཏ་ལའི་ལོ་མ་ལ་རི་རབ་ཀྱི་འཁོར་ལོ་བྱས་ཏེ། ཟུར་དུ་ཧཱུྃ་དང་ཧྲཱིའི་བར་དུ་བསྒྲུབ་བྱའི་མིང་བྲིའོ། །ལྟེ་བར་
སྔགས་བྲི། རྩིབས་ལ་ཡང་སྔགས་བྲིས་ཏེ། རྐང་པ་གཡོན་པས་མནན་ཅིང་། ཨོྂ་ཙཎ་ཌ་མ་ཧཱ་རོ་ཥ་ན་ཙན་མུཎྚི་དུ་མ་ཀེ་ཤ་ཧྲཱི། ཧ་ན་ཧ་ན་ཧྲིཿཔ་ཙ་པ་ཙ་ཧྲིཿདེ་བ་དད་ཏ་ཆེ་གེ་མོ་མེ་པ་ཤི་རི་སྭཱ་ཧཱ། ཞེས་ཁྲི་བཟླས་པས་
རྐང་པ་དགུག་པའོ། །ཨོཾ་ཙཎྜ་མ་ཧཱ་རོ་ཥ་ན་ཨ་རི་གརྐ་ཐ་ཏ་རི་སྭཱ་ཧཱ། སྔགས་འདི་བཟླས་ལ་ཁ་བཀྲུས་ལ། ཁྱུ་མཆོག་གི་ལྕི་བ་དང་། ལྡོང་རོས་བསྲེས་ལ་རྡོ་རྗེའི་གཟུགས་བྱས་ཏེ། ལྟེ་བར་འཁྲུལ་འཁོར་བཅུག་ལ་དགྲའི་
སྒོར་སྦས་ན་འཆི་བར་འགྱུར་རོ། །བཀླགས་པས་འགྲུབ་འགྱུར་ནུས་པ་འདི། །རྡོ་རྗེ་འཛིན་པར་རབ་ཞུགས་ནས། །རྫ་མཁན་ལག་པའི་འདག་པ་ལ། །རྡོ་རྗེའི་རྣམ་པར་འཁྲུལ་འཁོར་བཅའ། །ཨོཾ་ཙཎྜ་མ་ཧཱ་རོ་ཥ་ཎ་ཆེ་གེ་མོ་མུ་ཁ་ཏེ་ཐཱན་ཏི་ས་གྷ་ཚཱ་ན་ཏིང་གྷན་ད་ན་ཏིང་ལྃ་གྷཱྃ་
མུ་ཏྲ་མུ་རཱི་ཤེ་ནཾ་ཆེ་གེ་མོ་བྷུན་དྷ་མི་སྭཱ་ཧཱ། སྔགས་འདི་ཁྲི་བཟླས་ཁང་པར་མནན། །ངེས་པར་ཤགས་ལས་རྒྱལ་བར་འགྱུར། །ཨོཾ་བཛྲ་ཙཎྜ་མ་ཧ་རོ་ཥ་ཎ་ན་མ་ནི་ཁ་བེ་རཱ་ཡ་ཙི་རི་ཙི་རི་ཀམྙ་ཏུ་བེ་ན་མུ་ཤི་ཏུན་ཏེ་བན་དྷ་སི་རི་ཁ་ལི་སྭཱ་ཧཱ། རྡོ་རྗེ་ལ་ནི་ཁྲག་གིས་བྲི། །གང་གིས་
ཕྱོགས་མཚམས་སྦས་པ་ན་བྱི་བ་ཁ་ནི་འཆིང་བ་ཡིན། །ཙཎྜ་མ་ཧཱ་རོ་ཥ་ཎ་ནཾ་ཏུ་ན་ཏེ་སི་རི་སི་རི་ཁི་ལི་ཁི་ལི་སྭཱ་ཧཱ། སྟག་གི་ལྤགས་པ་ལ་བྲིས་ཏེ། །གང་ལ་བཏགས་པའི་སྤྱང་ཀི་བསྲུང་། །ཨོཾ་ཙཎྜ་མ་ཧཱ་རོ་ཥ་ཎ་མྃ་ར་རཀྴ་ཏོ་ན་ཤ་ཀར་ཡ་སྭཱ་ཧཱ། ཤིང་ཐོག་ལ་

90-1-48a

བཅངས་ན་གདོན་ཐམས་ཅད་ཀྱིས་གླགས་མི་རྙེད་དོ། །བྱི་ཁུང་ཤར་བལྟས་ས་དང་ནི། །འུག་ཆུང་རུས་པ་ལང་ཀའི་རྩྭ། །སྒོ་ལྕགས་ཁུང་བུར་བླུགས་བྱས་ཏེ། །ཨོཾ་བཛྲ་ཙཎ་ཌ་མ་ཧཱ་རོ་ཥ་ཎ་ཀུར་ཏྲི་ས་ནཱ་ཀར་ཏི་ཚུམས་དང་
ཕུཊ་ཕུཊ་སྭཱ་ཧཱ། སྔགས་དེ་བརྒྱ་དང་བརྒྱད་བཟླས་ན། །སྨྱིག་མས་ཡང་ཡང་དཀྲོག་པ་ནི། །སྒོ་ལྕགས་འབྱེ་བར་ཐེ་ཚོམ་མེད། །དུར་ཁྲོད་སོལ་བས་བསྲེགས་པས་ནི། །སླར་ཡང་སྔ་མ་དག་ཏུ་འགྱུར། །རྒྱ་གྲམ་ནང་དུ་ཆུད་པ་ཡི། །
དམག་གི་གཙོ་བོ་བྲི་བྱ་སྟེ། །སྔགས་དང་སྤེལ་ནས་སྙིང་ག་རུ། །སེང་ལྡེང་ཕུར་པ་བཏབ་ན་ནི། །ངེས་པར་དེ་ཉིད་རེངས་པར་འགྱུར། །བྱི་བ་ནག་པོའི་རྟུག་པ་དང་། །ཤ་ཅན་ར་ཡི་རྭ་དང་ནི། །ཁྱི་ནག་སྤུ་དག་བསྲེགས་གྱུར་ན། །འབྲུ་ཡི་རྣམ་
པ་འཕེལ་བར་འགྱུར། །དེ་སོགས་ལས་ཀྱི་རིམ་པ་ནི། །བསམ་གྱིས་མི་ཁྱབ་ཇི་སྙེད་པ། །ཁྱོད་ལ་བསྟན་པར་མི་ནུས་པས། །སྔགས་གྲུབ་དེ་ཡིས་རྟོགས་པར་འགྱུར། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་
རྒྱུད་ཀྱི་རྒྱལ་པོ་ལས་ལས་སྣ་ཚོགས་བསྟན་པའི་ལེའུ་སྟེ་བཅུ་བདུན་པའོ།། །། དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་གི་ཆར་དབབ་པའི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་
ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ཆུ་བདག་གནས་པའི་ས་ཡི་ཆར། །དཀྱིལ་འཁོར་པད་མ་བརྒྱད་པ་ལ། །སྒོ་དང་རྟ་བབས་
སྦྲུལ་གྱིས་བརྒྱན། །མེ་ཏོག་མཆོད་པས་མཉེས་བྱ་བ། །བྲམ་ཟེའི་ཐོད་པ་གཙང་མ་གཉིས། །ཆུ་བདག་དམ་ཚིག་ཀླུ་ཡི་གཟུགས། །གུར་གུམ་བཟང་པོས་བྲི་བར་བྱ། །ཁ་སྦྱར་བར་དུ་རྡོ་རྗེ་འཛིན། །ཞལ་བཞི་པ་ལ་ཕྱག་བརྒྱད་པ། །
བཻ་དཱུརྱ་ལྟར་གནས་པ་ནི། །ཆུ་དར་ཡང་ན་རས་ལ་བྲི། །རྩ་བ་ཁྲོ་བོ་གཡས་གཡོན་རྒྱབ། །དཀར་དམར་དེ་བཞིན་ལྗང་ཁུ་སྟེ། །རྩ་བ་ཁྱུང་ཆེན་ཟིལ་གྱིས་གནོན། །གཡས་ཀྱི་ཕྱག་ན་རིམ་པ་ལྟར། །

90-1-48b

རྡོ་རྗེ་འཁོར་ལོ་རལ་གྲི་དང་། །ལྕགས་ཀྱུ་རིགས་ལྡན་པད་མ་དང་། །པད་ཆེན་དུང་སྐྱོང་ཡུམ་དང་བཅས། །གཡོན་པ་དྲིལ་བུ་རྩེ་གསུམ་དང་། །ཕུར་བུ་སྤྲིན་གྱི་ཞགས་པ་སྟེ། །མཐའ་ཡས་ནོར་རྒྱས་འཇོག་པོ་དང་། །སྟོབས་རྒྱུ་ཡུམ་
གྱིས་བཅིངས་པ་ནི། །ཐམས་ཅད་གཙོ་ལ་ཐལ་སྦྱར་ཏེ། །སྦྲུལ་མགོ་སྤྲིན་ཆེན་བཞིན་དུ་གཏིབས། །འདབ་མར་ཀླུ་ཆེན་བརྒྱད་བསྐྱེད་ལ། །སྤྱན་དྲངས་མཆོད་པ་བྱས་ནས་ཀྱང་། །ཆར་གྱི་རྒྱུན་ཆེན་འབབ་པར་བསམ། །ཀླུ་ཆེན་རྩ་བའི་སྔགས་
རྣམས་ལ། །བྷ་རི་ཤ་ཡ་བཏགས་ཏེ་བཟླས། ངེས་པར་ཆར་རྒྱུན་འབབ་པར་འགྱུར། །གལ་ཏེ་འབབ་པར་མ་གྱུར་ན། །གུ་གུལ་དུད་པས་གཟིར་བྱས་ནས། །ཕྲིན་ལས་སྔགས་ཀྱིས་སྲོག་ཀྱང་གཡོ། །གལ་ཏེ་མ་བབ་ན་རྡོ་རྗེ་འཛིན་པ་
ཕྱུང་ལ་ཚ་བའི་མར་ནག་གིས།     བླུགས་ལ་སྔགས་བཟླས་ན་འབབ་པར་འགྱུར། །ཡང་ན་ཁམ་ཕོར་ལ་སྦྲུལ་མགོ་གཉིས་པའི་ཁྲག་དང་ཤས་སྔར་ལྟར་བྱས་ལ་སྐྱེར་བའི་སོལ་བའི་མེ་ལ་སྔར་ལྟར་བསྲོ་བར་བྱ་སྟེ། དེས་ངེས་པར་འབབ་
པར་འགྱུར་རོ། །ཡང་ན་གཏུམ་པའི་འབྲས་བུ་ལ། །སྔགས་ཀྱིས་བཏབ་ཏེ་ཀླུའི་ཁྱིམ། །སྦྱིན་སྲེག་བྱས་པས་འབབ་པར་འགྱུར། །དེས་ཀྱང་འབབ་པར་མ་གྱུར་ན། །ཡུངས་ཀར་སྐྱེ་ཚེ་སྦྲང་རྒོད་དང་། །བྲ་མའི་མེ་ཏོག་ཕྱེ་མར་བྱས། །
ར་ཡི་འོ་མའི་རི་ལུ་སྦྱར། །སྔགས་བཟླས་མཚོ་འམ་ཆུ་མིག་ཏུ། །རྒྱ་དང་བརྒྱད་དུ་བསྐྱུར་ན་འབབ། །དེས་ཀྱང་འབབ་པར་མ་གྱུར་ན། །རྟ་རུའི་ཁུ་བས་རི་ལུ་བྱས། །མཚོར་བསྐྱུར་ངེས་པར་འབབ་པ་ཡིན། །གལ་ཏེ་དེས་
ཀྱང་མ་བབ་ན། །པད་མ་ཨུཏ་པལ་སྔོན་པོ་དང་། །ཡུངས་ཀར་ཟངས་ཕྱེ་བ་བླ་དང་། །དབང་པོ་ལག་པ་རྒྱ་སྐྱེགས་ཤིང་། །བུར་རམ་ར་ཡི་འོ་མས་བསྡུས། །རྒྱ་ཤུག་འབྲུ་ཙམ་རི་ལུ་ལ། །ལན་བདུན་བསྔགས་ཏེ་མཚོར་
བསྐྱུར་ན། །ཆར་རྒྱུན་མཚུངས་པ་མེད་པར་འབབ། །མི་འབེབས་ཀླུ་རྣམས་མགོ་གས་ཏེ། །ལུས་ནི་བསྐམས་ཏེ་འཚིག་པར་འགྱུར། །ང་ཡི་བཀའ་ལས་གང་འདའ་བ། །སྐད་ཅིག་ཉིད་ལ་བརླག་པར་འགྱུར། །

90-1-49a

བཟླས་ར་བར་སྦས། །སྤྲེའུའི་གནོད་པ་བཟློག་པར་འགྱུར། །ཨོཾ་ཙཎ་ཌ་མ་ཧཱ་རོ་ཥ་ན་སརྦ་སྟྃ་བྷ་ཡ་དུ་མ་བྷེ་སྭཱ་ཧཱ། སྦྲང་རྩི་བུ་རམ་ཁུ་བ་ལ། །འདི་བཟླས་བྱུགས་པས་དོམ་འབྲོས་སོ། །ཨོཾ་ཙཎ་ཌ་མ་ཧཱ་རོ་ཥ་ཎ་
བར་ཏ་དྷིན་དྲྃ་དྲྃ་དྷེ་སྭཱ་ཧཱ། དུག་དང་ལན་ཚྭ་སྐེ་ཚེ་དང་། །ཡུངས་ཀར་ལ་ཕུག་ས་བོན་དང་། །དྷ་དུ་ར་དང་ཀལ་བི་དང་། །མ་ཧེ་ཕག་དང་ཅེ་སྤྱང་ཁྲག །སྦྲུལ་ལ་རྡོ་རྗེ་བརྒྱད་བྱས་ལ། །ཕྱོགས་མཚམས་སྦས་ན་གནོད་པ་ཞི། །མཚམས་
བཅད་པ་ཡི་དམ་པ་ཡིན། ཨོཾ་བཛྲ་ཙཎ་ཌ་མ་ཧཱ་རོ་ཥ་ཎ་བྷི་དྷ་ཧཱི་ནི་ཀྃ་བྷེ་སྭཱ་ཧཱ། སྔགས་ནི་བརྒྱ་རྩ་བརྒྱད་བཟླས་ན། །བསྲུང་བ་འདི་ཡང་མཚམས་གཅད་ཡིན། །ཨཾ་བི་ཏི་པ་ན་ཧཱི་བྷྲི་བི་ཊ་བི་ཊ་ཧཱུྃ་ཧཱུྃ་སྭཱ་ཧཱ། སྔགས་འདི་གང་ཡིན་ལྕི་བ་ལ། །
བཟླས་ཏེ་མ་ཧེ་འཐུངས་བའི་ཆུ། །ནང་བཅུག་ཞོ་རྣམས་བརླག་པར་འགྱུར། །གསེར་མེ་མ་ལ་རེག་པ། གཡུ་མིག་མ་ཕུག་པ། མུ་ཏིག་མུ་མེན། གསེར་གྱིས་བྲིས་པའི་ཁྲྃ། བ་བླ་མུ་ཟི། བཙན་དུག་གུ་གུལ་གི་
ཝང་སྤྲེའུའི་སྤུས་གཏུམས་ལ། ཨོཾ་བཛྲ་ཙཎ་ཌ་མ་ཧཱ་རོ་ཥ་ཎ་ག་རུ་ཌ་ཙ་ལེ་ཙ་ལེ་བདུད་རུ་ཏྲ་མཱ་ར་ཡ། བཛྲ་བྷ་ཏི་ག་རུ་ཌ་བེ་གེ་ཧཱུྃ་རི་ཛ་པྲི་ཛ་ནཱ་ག་རཱ་ཛ་མཱ་ར་ཡ་ཧཱུྃ་ཕཊ། སྔགས་ཁྲི་བཟླས་ཏེ་ལུས་ལ་བཅངས་ན་ཀླུ་
ཐམས་ཅད་འབྲོས་པར་འགྱུར་རོ། །ཨོཾ་པད་མཱཀྵ་པད་མཱཀྵ་བ་རུ་ནི་ཧཱུྃ་ཕཊ་སྭཱ་ཧཱ། ཆུ་གཙང་མ་ལ་བཟླས་ཏེ་མིག་བཀྲུས་ན་མིག་ནད་ཐམས་ཅད་འབྱང་བར་འགྱུར་རོ། །སུག་སྨེལ་དང་། འཛཱ་ཏཱི་དང་། ནཱ་ག་གེ་སར་དང་། ཨ་ཤོ་ཏ་ཀའི་འབྲས་
བུ་རྣམས་ལ་སྔགས་འདི་བཟླས་ཏེ་དཔྲལ་བར་ཤུ་ཏྲས་ཐིག་ལེ་བྱས་ན་ཀུན་གྱི་ཡིད་དུ་འོང་བར་འགྱུར་རོ། །ཨོཾ་བཛྲ་ཙཎ་ཌ་མཱ་ཧ་རོ་ཥ་ཎ་ཛམ་བྷེ་མོ་ཧ་ཡ་ཧྲཱི་སྭཱ་ཧཱ། བརྒྱ་རྩ་བརྒྱད་བཟླས་སོ། །བྱིས་པ་གསར་བཙས་སྲུང་བ་ན། །ཁམ་ཕོར་
ནང་དུ་རྡོ་རྒྱུས་ཀྱིས། །རྡོ་རྗེ་རྒྱ་གྲམ་ལྟེ་བའི་ནང་། །ཨོཾ་བཛྲ་ཙཎ་ཌ་མ་ཧཱ་རོ་ཥ་ཎ་ཆེ་གེ་མོ་ལ་རཀྵ་རཀྵ་སྭཱ་ཧཱ། ཧཱུྃ་བཅུ་བྲིས་ཏེ་ལྷ་བསྟིམས་ལ། །མཆོད་བསྦྱིན་གཏོར་མ་སྦྱིན་བྱས་ཏེ། །དེ་ཡི་སྟེང་དུ་སྦྱང་བར་བྱ། །ལུས་ལ་གུར་གུམ་

90-1-49b

ཆུས་བྲིས་པའི། །འཁོར་ལོ་གཉིས་པས་བསྲུང་བར་བྱ། །ཨོཾ་བཛྲ་ཙཎ་ཌ་མ་ཧཱ་རོ་ཥ་ཎ་བ་ས་ཧ་དོ་ལཱ་ཡི་སྭཱ་ཧཱ། སཱ་ཨེ་ས་བ་ཛི་ཧཱ་ཡི་ན་མཱ་ཏ་ཡི་སྭཱ་ཧཱ། སྔགས་འདི་མེ་ཏོག་དང་། གོས་དང་། ཟས་དང་། རྒྱན་ལ་མངོན་པར་བསྔགས་ཏེ་བྱིན་ན་དབང་དུ་
འགྱུར་རོ། །ཨོཾ་བཛྲ་ཙཎ་ཌ་མ་ཧཱ་རོ་ཥ་ཎ་ན་མ་ས་ར་ནཱ་མ་ཏད་ཡ་ཐཱ། དྷ་ར་ད་མ་ཧཱ་དྷ་ན་དྷ་དྷ་ཌ་དུ་ཌེ་དེ་སྭཱ་ཧཱ། བྱེ་མ་དང་ཐལ་ཆེན་ལ་བསྔགས་ཏེ་ཞིང་ལ་གཏོར་ན་སྲོགས་ཆགས་ཀྱིས་ཟ་བར་མི་འགྱུར་རོ། །ཨོཾ་བཛྲ་སུ་ཁ་དྷེ་བྷི་ཤུད་
དྷ་ཨ་ལླཱི་བ་ར་ཙུ་ལི་ཙེ་ར་ས་ག་གན་དྷ་སཱ་པ་མི་ཧ་བན་དྷ་ལི་ས་སྭཱ་ཧཱ། སྔགས་འདི་རྡོ་རྗེའི་ཤིང་དང་། ད་ལིས་དང་། ཨརྒ་གསུམ་ལ་ལན་བདུན་བདུན་བཟླས་ཏེ། རྣ་བའི་འོག་ཏུ་བཅུག་ན་ཙཽ་ར་བ་ཐམས་ཅད་ཀྱིས་གནོད་པར་བྱ་བར་
མི་ནུས་སོ། །མི་རུས་ལ་བྱས་ཕུར་བུ་ནི། །བགེགས་ཀྱི་ལུས་ཅན་ཞལ་གཅིག་པ། །ཕྱག་བཞི་ཐོ་བ་ཞགས་པ་དང་། །དགྲ་སྟ་རྩེ་གསུམ་བསྣམས་པ་སྟེ། །དུག་ཁྲག་ལན་ཚྭ་སྐེ་ཚེ་དང་། །རྒྱ་ཚྭ་མར་ནག་ནང་དུ་བཙོ། །
སྟོབས་ཆེན་སྔགས་བྲིས་རས་མས་བཏུམ། །ཁྱིམ་སྒོར་སྦས་ན་འཆི་བར་འགྱུར། །ཨོཾ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་བ་ཙ་བི་དྷྭནྶ་ཡ། ཨུད་ས་མཱ་ར་ཡ་ཧཱྃ་ཕཊ། སྦྲུལ་མགོ་གཉིས་པའི་ཐོད་པར་ཁྱི་སྨྱོན་པའི་ལྕེ་ལ་དགྲའི་ལིང་
ག་བྲིས་ཏེ་རྟའི་རྨིག་པའི་འོག་ཏུ་བཅུག་ལ་སྔགས་འདི་བཟླས་ནས་གང་གི་སྒོར་སྦས་ན་བསྐྲད་པའམ་སྨྱོ་བར་འགྱུར་རོ། །ཨོཾ་བཛྲ་ཙཎ་ཌ་མ་ཧཱ་རོ་ཥ་ཎ་ཆེ་གེ་མོ་མུ་པ་ཏ་ཡ་ཕཊ་ཅེས་ཁྲི་བཟླས་སོ། །ཤིང་ལོ་དང་སྟག་པ་ལ་
རྡོ་རྗེའི་རྣམ་པར་བྱས་ལ་ལྟེ་བར་ལས་ཀྱི་རིག་པ་བཅུག །དཔའ་བོ་གཡུལ་དུ་ཤི་བའི་སྐྲའི་ཐི་གུས་རྐེད་པར་བཏགས་ལ་གླད་ལ་བསྐོར་ན་བགེགས་འབྲོས་པར་འགྱུར་རོ། །གྲོ་གའི་འདབ་མ་ལ་རྡོ་རྗེའི་ནང་དུ་ཆུད་པའི་ལྟེ་བར་སྐུ་
གསུང་ཐུགས་ཀྱི་སྔགས་དང་བསྲུང་བྱ་བྲི། དེའི་མཐའ་མར་ལས་རབ་འབྱམ་བྲི། དེའི་ཉེ་བར་བསྟན་པའི་འཁོར་གྱི་སྔགས་བྲི། དེའི་མཐའ་མར་ཤེས་རབ་ཀྱི་སྔགས་བྲི། དེའི་མཐའ་མར་མེའི་ཚོགས་བྲིས་ཏེ་དྲིལ་ལ་ལུས་ལ་

90-1-50a

བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་ཆར་འབབ་པའི་ལེའུ་སྟེ་བཅྭ་བརྒྱད་པའོ།། །། དཔའ་མོ་རྡོ་རྗེ་བདེ་མས་གསོལ་པ། 
རྡོ་རྗེ་འཆང་གི་ཀྲི་སྦྱིན་བསྲེག་གི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་
མཆོག །ཁྱོད་ལ་བཤད་ཀྱིས་ལེགས་པར་ཉོན། །ཐབས་དང་རྫས་དང་ལྷ་དང་ནི། །སྔགས་ཀྱི་རིམ་པ་ཕན་ཡོན་རྣམས། །རིམ་པས་མཛེས་མ་ཁྱོད་ལ་བསྟན། །སྦྱང་བའི་ལས་ནི་སྔོན་འགྲོ་བའི། །སོར་ནི་ཉི་ཤུ་རྩ་
བརྒྱད་དང་། །བཅུ་དྲུག་བཅུ་བཞི་བཅུ་གཉིས་དང་། །བཅུ་དང་བརྒྱད་ལས་ཆུང་བ་སྤང་། །རིམ་བཞིན་ནད་རྣམས་ཞི་ཞིང་ནོར་འཕེལ་དང་། །རིམས་རྣམས་ཞི་ཞིང་ཞི་ལས་འགྲུབ། །དབང་དུ་བསྡུ་དང་རྒྱས་པ་
དང་། །གསོད་པའི་ཐབས་སུ་ཤེས་པར་བྱ། །ཐུར་དུ་རྐོ་བ་སུམ་གཉིས་ཏེ། །ཁ་ཁྱེར་བརྒྱད་ཆ་མཐོ་བའོ། །རིམ་བཞིན་ཕྱེད་ཕྱེད་རྡོ་རྗེས་མཚན། །དཀར་སེར་དམར་ནག་ལྗང་ཁུ་སྟེ། །ལས་དང་འབྲེལ་བ་ཤེས་པར་བྱ། །
མཆོད་པའི་རྫས་དང་ཡམ་ཤིང་དང་། །དུར་བ་ལ་སོགས་སྲེག་པའི་རྫས། །གཡས་དང་གཡོན་གྱི་རིམ་པ་ཡིན། །རང་ཉིད་རྡོ་རྗེ་འཛིན་པར་བསྐྱེད། །རྒྱས་ལ་དགའ་དང་ཞི་ལ་ཞི། །དབང་ལ་ཆགས་པ་ཁྲོ་ལ་
བསད། །གཞན་རྩུབ་བསྐྲད་པ་ལ་སོགས་ཡིན། །དམར་བ་མེ་ཕྱོགས་གདུང་བའི་ལས། །བསྐྲད་པ་རླུང་སྟེ་གནོན་པ་ནི། །བདེན་བྲལ་དབང་དང་དགུག་པ་ཡང་། །ལྷོ་ཡི་ཕྱོགས་སུ་ལྟ་བ་ཡིན། །གསད་དང་བྱེ་བའང་
དེ་བཞིན་ཏེ། །ཤར་ཞི་བྱང་ཕྱོགས་རྒྱས་པ་ཡིན། །ཧཱུྃ་ལས་སྐྱེས་པ་ཁ་དོག་དམར། །མཛེས་པའི་ཞལ་གདངས་ཅུང་ཟད་གནག །དབྱུག་གུ་རིལ་བ་སྤྱི་བླུགས་དང་། །བགྲང་ཕྲེང་གཡོན་དང་གཡས་སུ་བསམ། །

90-1-50b

རལ་པའི་ཅོད་པན་གསུས་པོ་ཆེ། །རྒྱན་དང་ལྡན་པ་བསམས་ལ་བསྟིམ། །བསང་གཏོར་འཐོར་འཐུང་མཆོད་ཡོན་དང་། །ཞབས་བསིལ་ལ་སོགས་དབུལ་བར་བྱ། །མེ་ཏོག་ལ་སོགས་རིམ་པ་སྟེ། །གཟར་བུ་གཉིས་ཀྱི་
དགང་གླུགས་དབུལ། །ཨོཾ་ཨག་ན་ཡེ་སྭཱ་ཧཱ། དེ་རྗེས་མེ་ཡི་མཚན་མ་བརྟག །མདོག་དང་སྒྲ་དང་དྲི་དང་རོ། །དབྱིབས་དང་ཁ་དོག་བལྟ་བར་བྱ། །མེ་ནི་རྩེ་གཅིག་འབར་གྱུར་ན། །བསམ་པ་ཐམས་ཅད་འགྲུབ་པར་སྟོན། །
གཉིས་འབར་རྩེ་གསུམ་མི་གཡོ་ན། །འབར་བའི་འབྲས་བུ་ཐམས་ཅད་འཛིན། །རྩེ་བཞི་མཉམ་ཉིད་བརྟན་པ་སྟེ། །རྒྱས་པའི་ལས་ལ་འབྲས་བུ་ཡོད། །ཟླ་འདྲ་སྣུམ་ལ་དྲི་མ་མེད། །དུ་བེ་མེད་ཅིང་བེ་དཱུརྱ་འདྲ། །ནད་མེད་
རིགས་རྣམས་རྒྱས་པར་བྱེད། །ཆུ་ཤེལ་ནོར་བུ་སྤུང་བ་དང་། །པད་མ་རཱ་ག་གསལ་བ་ནི། །སྡིག་པ་མ་ལུས་ཟད་པར་འགྱུར། །དམར་སེར་པུཎ་ཌ་རི་ཀ་དང་། །བན་དུ་ཁ་དོག་གསལ་བ་ན། །རྒྱལ་སྲིད་དཔལ་རྣམས་འབྱོར་པ་
ཡིན། །ཨུཏ་པལ་མ་ལི་ཨུ་ཤིའི་དྲི། །ཙམ་པ་ཀ་དང་སིག་ཀར་དྲི། །ག་ཕུར་ཨ་ག་རུ་ཡི་དྲིས། །དགེ་ཞིང་ཚེ་རིང་དཔལ་གྱི་གནས། །ཟབ་པའི་སྐད་དང་དུང་དང་ནི། །རྫ་རྔ་པི་ཝང་ཌ་མ་རུ། །དེ་ཡི་སྒྲས་ནི་བདེ་བ་འཕེལ། །
དཔལ་བེའུ་བཀྲ་ཤིས་གཟུགས་སུ་འཆར། །རྒྱལ་མཚན་རྔ་ཡབ་ཕྱག་མཚན་རྣམས། །རིན་ཆེན་གདུགས་ཀྱི་དབྱིབས་སུ་འཆར། །དགེ་བ་མེ་ཡི་དབྱིབས་སུ་བསྟན། །ངན་པ་དེ་ལས་ཅི་རིགས་བཟློག །དེ་རྗེས་
རྫས་ཀྱི་རིམ་པ་ནི། །ཨོཾ་ཨག་ན་ཡེ་ཨ་མུ་ཀ་སྱ་ཤཱན་ཏིང་ཀུ་རུ་ཡེ་སྭཱ་ཧཱ། བསྲེག་བླུགས་སོ། །ཨོཾ་བོ་དྷི་བྲྀཀྵཱ་ཡ་སྭཱ་ཧཱ། ཨ་ཤྭད་ཐའིའོ། །ཨོཾ་བཛྲ་ཏ་ལཱ་ཡ་སྭཱ་ཧཱ། བླག་ཤའི་འོ། །ཨོཾ་བཛྲ་ཀུ་བེ་ར་ཡེ་སྭཱ་ཧཱ། འོ་མ་
ཅན་གྱི་ཤིང་གིའོ། །ཨོཾ་བཛྲ་ཤམ་ཛྲ་ཡ་སྭཱ་ཧཱ། ཨུ་དུམ་ཝཱ་རིའོ། །ཨོཾ་སརྦ་པཱ་པྂ་ད་ཧ་ན་བཛྲ་སྭཱ་ཧཱ། ཏིལ་གྱིའོ། །ཨོཾ་བཛྲ་པུཥྚ་ཡེ་སྭཱ་ཧཱ། འབྲས་སོ་བའིའོ། །ཨོཾ་བཛྲ་སྃ་བྷ་དེ་སྭཱ་ཧཱ། ཞོ་དང་ཟན་གྱིའོ། །ཨོཾ་བཛྲ་ཨཱ་ཡུ་ཤེ་སྭཱ་ཧཱ། 

90-1-51a

དུར་བའོ། །ཨོཾ་བཛྲཱ་པྲ་ཏི་ཧ་ཏ་བཛྲ་ཡ་སྭཱ་ཧཱ། ཀུ་ཤའིའོ། །རྫས་རྣམས་རང་སྔགས་ཅི་རིགས་དབུལ། །བསྟོད་ཅིང་གསོལ་བའི་ལས་བྱ་སྟེ། །མེ་ཡི་སྙིང་གར་དཀྱིལ་འཁོར་མཆོད། །བསད་ལ་སོགས་པ་རིམ་པ་
བཞིན། །སྔར་བསྟན་པ་ལས་ཤེས་པར་བྱ། །དེ་རྗེས་ལྷག་མས་ཅི་རིགས་མཆོད། །ཞུ་བ་ལ་སོགས་རྫས་རྣམས་ནི། །ལྷ་ཡི་ཞལ་དུ་མཆོད་པར་བྱ། །ཡམ་ཤིང་ཀུ་ཤ་ལ་སོགས་པ། །འོད་ལ་མཆོད་པར་བྱ་བ་ཡིན། །ཕྱག་ཏུ་ཞལ་
ཟས་འཐོར་འཐུང་དབུལ། །མེ་ཏོག་བདུག་པ་དབུ་དང་འོད། །ཐིག་ལེ་སྙིང་ག་བསང་གཏོར་ཡང་། །སྐུ་ལ་ཕུལ་ཏེ་ཞབས་བསིལ་ཞབས། །མར་མེ་ལ་སོགས་རིམ་བཞིན་གནས། །དཀྱིལ་འཁོར་བསྡུ་གཤེགས་རིམ་པ་རྣམས། །
མཁས་པས་ཉེ་བར་བརྟག་ཏེ་བྱ། །དཀྱིལ་འཁོར་ལྷས་ནི་མཆོག་སྟེར་ལ། །མེ་ཡིས་འདོད་པའི་དོན་སྒྲུབ་བྱེད། །ལག་པན་གྱིས་ནི་བདེ་བ་འབྱིན། །འོ་མ་སྦྲང་རྩིས་རིག་པ་འཕེལ། །གྲོ་དང་སྲན་མས་ནད་ཀུན་སེལ། །དུར་བས་
སྲོག་ནི་འཛིན་པར་བྱེད། །ནས་ཀྱིས་བརྩོན་འགྲུས་ལ་དབང་སྟེ། །སྟོབས་འཕེལ་མ་ཤ་ཀ་ཡིན་ནོ། །འབྲུ་འཕེལ་གསོ་བའི་ལས་ཡིན་ཏེ། །སྡིག་པ་འདག་པ་ཏིལ་ཡིན་ནོ། །འབྲས་ཀྱིས་ནུས་པ་འཕེལ་བྱེད་པ། །ཞི་ལ་ཡུངས་ཀར་
ཀུ་ཤས་བསྲུང་། །དཔལ་བསྐྱེད་པ་ནི་བུད་ཤིང་སྟེ། །ཡམ་ཤིང་གཟི་བྱིན་སྟེར་བར་བྱེད། །འབྱོར་པ་འཕེལ་བ་མར་ཡིན་ནོ། །སྦྱིན་བདག་བཀྲ་ཤིས་ཐབ་ཡིན་ཏེ། །དངོས་གྲུབ་ཀུན་སྟེར་མཆོད་པའི་རྫས། །ཐབས་དང་ཤེས་
རབ་གཟར་བུ་སྟེ། །བདུད་རྩི་མར་གྱིས་ཚིམ་བྱེད་པ། །མཆོད་པ་གཞན་གྱིས་ཅི་ཞིག་བྱ། །འདི་ནི་མཛེས་མའི་ཡུལ་ཡིན་གྱིས། །གཞན་གྱིས་རྟོགས་པར་ག་ལ་འགྱུར། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་
བསྟན་པའི་རྒྱུད་ཀྱི་རྒྱལ་པོ་ལས་སྦྱིན་བསྲེག་གི་ཆོ་ག་བསྟན་པའི་ལེའུ་སྟེ་བཅུ་དགུ་པའོ།། །།  དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་གི་ཁྱོད་ཀྱི་གསང་བའི་མཚན་ཉི་ཤུ་རྩ་གཅིག་གི་བསྟོད་པ་ཇི་ལྟ་བུ་

90-1-51b

ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ང་ཡི་མིང་
ནི་ཉི་ཤུ་གཅིག །དུས་གསུམ་སངས་རྒྱས་རྣམས་ཀྱིས་གསུང་། །མི་འགྱུར་གཡུང་དྲུང་དབང་བསྐུར་ཏེ། །འདི་དག་མཛེས་མ་ཁྱོད་ལ་བསྟན། །ན་མོ་ནཱི་ལཱཾ་བ་ར་དྷ་བཛྲ་པཱ་ཎི་ཙཎ་ཌ་བཛྲ། ན་མོ་གྷ་ཛ་ཀར་ནོ་བྷོ་ཙཎ་ཌ་བཛྲ་ན་མཿ
སུ་བྷུ་ཤ་ནི་ས་བྷྱོ་ཙཎ་ཌ་བཛྲ། ན་མོ་རཏྣ་གུ་ཎ་ཀ་ར་སི་ཙཎ་ཌ་བཛྲ། ན་མོ་བྷ་ག་བན་པྲཛྙཱ་དྷ་སཱི་ར་ཙཎ་ཌ་བཛྲ། ན་མ་ཨཱརྱ་གྷོ་ཤི་སཱི་ན་ཙཎ་ཌ་བཛྲ། ན་མ་ས་པྲ་ས་རཱ་ཡི་ཏོ་སཱི་ཙཎ་ཌ་བཛྲ། ན་མོ་བཛྲ་ལ་ཨར་ཙི་ཤི་སྭཱི་ཙཎ་
ཌ་བཛྲ། ན་མ་ས་སུ་རཱུ་པ་ནོ་ཕ་ལ་ཙཎ་ཌ་བཛྲ། ན་མོ་དུར་དཱ་ཏ་ད་མ་ཀམ་བ་རཿཙཎ་ཌ་བཛྲ། ན་མ་བྷེ་ར་བ་བྷས་ཏྭ་རུ་པ་བྷི་ཙཎ་ཌ་བཛྲ། ན་མོ་དྲོ་མོ་ཀྲོ་དྷ་བི་གྲ་ཧ་རཱུ་པི་བྷི་ཙཎ་ཌ་བཛྲ། ན་མ་ཙ་ཏུཿསྨཱ་རཱ་རཱི་ཤ་ས་ཎ་ཙཎ་ཌ་
བཛྲ། ན་མོ་མ་ཧཱ་བ་ལ་པ་ར་ཀྲ་མ་ཙཎ་ཌ་བཛྲ་ན་མོ་ནཻ་རཱདྨ་སིདྷ་ནིར་ཏཱ་ཙཎ་ཌ་བཛྲ་ན་མ་ན་མོ་ཨ་མོ་གྷ་ཛ་ག་དརྠ་ཀྲྀད་ཙཎ་ཌ་བཛྲ། ན་མོ་ད་ཤ་དིག་བི་ཤྭ་ནིར་མཱ་ཎྃ་ཙཎ་ཌ་བཛྲ། ན་མོ་ཧ་ཧཱ་སཏྭ་སོ་ནིར་གྷོ་ཤོ་ཙཎ་ཌ་བཛྲ། ན་མོ་ཨ་
ཙ་ལོ་ཧི་ཀ་ཛ་ཏ་ཏོ་ཙཎ་ཌ་བཛྲ། ན་མ་པཉྩ་བུད་དྷ་ཏ་མ་མུ་ཀུ་ཊ་ཙཎ་ཌ་བཛྲ། ན་མོ་བཛྲ་མ་ཧཱ་བྷེ་ཤ་ཡུད་དྷ་རོད་ཙཎ་ཌ་བཛྲ། རྡོ་རྗེ་གཏུམ་པོའི་མཚན་ཉི་ཤུ་རྩ་གཅིག་པོ་འདི་འཛིན་པ་དང་འཆང་བ་དང་ཀློག་པ་དང་ཡིད་ལ་བྱེད་པ་དང་
འདྲི་བ་དང་འདྲིར་འཇུག་པ་དང་། གླེགས་བམ་དུ་བྱས་ཏེ་འཆང་བ་ལ་ནི་ཕྱོགས་བཅུའི་སངས་རྒྱས་ཐམས་ཅད་ཀྱིས་རྗེས་སུ་སྐྱོང་བར་འགྱུར་རོ། །སྲུང་བར་འགྱུར་རོ། །སྦེད་པར་འགྱུར་རོ། །སྐྱོབ་པར་འགྱུར་རོ། །མཚན་འདི་རྣམས་འཛིན་པ་
དེ་མཚམས་མེད་པ་ལྔ་བྱས་པའི་སྡིག་པ་ཡང་བྱང་བར་འགྱུར་རོ། །ལན་གཅིག་ཙམ་བརྗོད་པས་ཀྱང་བསྐལ་པ་བྱེ་བ་ཕྲག་དགུ་བཅུའི་བར་དུ་སེམས་ཅན་དམྱལ་བ་རྣམས་སུ་མི་སྐྱེའོ། །ངན་འགྲོ་གཞན་ཡང་སྤངས་པ་ཡིན་ནོ། །

90-1-52a

ཚེ་རབས་ཐམས་ཅད་དུ་སྐྱེ་བ་དྲན་པར་འགྱུར་རོ། །རྡོ་རྗེ་འཆང་ལྔ་བརྒྱ་ཡང་རྟག་ཏུ་མཚན་འདི་འཛིན་པའི་ཕྱི་བཞིན་རྗེས་སུ་འབྲང་ངོ་། །གདུག་པ་ཅན་གྱི་ཀླུ་རྣམས་ཀྱིས་མི་འཚེ་ཞིང་སླར་ལོངས་སྤྱོད་སྣ་ཚོགས་སྦྱིན་ནོ། །
འཆི་བའི་དུས་སུ་ཡང་བཻ་དུརྱ་ལྟ་བུའི་སྐུ་ལུས་བསྟན་ཏེ། རང་གི་གནས་སུ་ཁྲིད་པར་འགྱུར་རོ། །མཚན་འདི་གནས་པའི་ས་དེ་ནི་ལྕང་ལོ་ཅན་དང་མཚུངས་པ་ཡིན་ནོ། །མི་དང་མི་མ་ཡིན་པ་གདུག་པ་ཅན་རྣམས་ཀྱིས་ནམ་ཡང་
གནོད་པ་བྱེད་པར་མི་འགྱུར་རོ། །གྲུབ་པ་བརྒྱད་དང་སངས་རྒྱས་ཀྱང་སྟེར་བར་བྱེད་ན། གཞན་ལྟ་ཡང་ཅི་སྨོས་ཏེ། མཚན་འདི་དག་རིན་པོ་ཆེ་དང་འདྲ་བར་ལྟ་བར་བྱའོ། །འདི་ནི་དུས་གསུམ་སངས་རྒྱས་ཀྱིས་ཆེད་དུ་
རྗོད་པ་རིན་པོ་ཆེ་གདུག་པ་ཐམས་ཅད་འཇོམས་པར་བྱེད། །དཔལ་དང་གཟི་བརྗིད་འཕེལ་བ་ཡིན། །ཕྲིན་ལས་སྒོ་རྣམས་ཐོགས་པ་མེད། །འདི་ནི་རྡོ་རྗེ་འཆང་ཡིན་པས། །ཉིན་མཚན་དུས་གསུམ་ཀློག་པ་ཡི། །ཕྱི་
བཞིན་རྟག་ཏུ་སྲུང་བར་བྱེད། །ནད་དང་གདོན་རྣམས་ཀུན་ལས་ཐར། །སྨན་ཆེན་ཉེས་པ་ཐམས་ཅད་འཇོམས། འབྱུང་པོ་ཀུན་གྱིས་བཀུར་བ་སྟེ། །མཛེས་མ་ཁྱོད་ལ་བསྟན་པ་ཡིན། །འདི་ནི་རྣམ་དག་ལེགས་པའི་ལམ། །སུ་འཆང་
ལག་ན་དཔལ་གནས་ཏེ། །རྟག་ཏུ་མཚན་འདི་བརྗོད་པར་གྱིས། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་ལས་མཚན་ཉི་ཤུ་རྩ་གཅིག་གིས་བསྟོད་པའི་ལེའུ་སྟེ་ཉི་ཤུ་པའོ།། །། 
དཔའ་མོ་རྡོ་རྗེ་བདེ་མས་གསོལ་པ། རྡོ་རྗེ་འཆང་གི་རྒྱུད་འདི་བཤད་པ་དང་། སྦ་བ་དང་། ཇི་ལྟར་གཟུང་བའི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །མཛེས་མ་ཁྱོད་ཀྱིས་ཞུས་པ་ལེགས། །ཟག་མེད་བདེ་བའི་
རྒྱུ་འབྱུང་མ། །བདག་མེད་ཤེས་རབ་མ་ཡི་མཆོག །ཁྱོད་ལ་བཤད་ཀྱིས་ལེགས་པར་ཉོན། །ཕྱི་མའི་དུས་སུ་ང་ཡི་རྒྱུད། །གསང་བ་སྐུ་གསུང་ཐུགས་ཀྱི་གཏེར། །བླ་མེད་རྒྱུད་རྒྱལ་རིན་ཆེན་འདི། །བྱང་ཆུབ་སེམས་ལྡན་སྙིང་རྗེ་ཆེ། །

90-1-52b

ཐོས་མང་ཤེས་རབ་མཆོག་ཏུ་གསལ། །དད་པ་ཆེ་ཞིང་ལྷ་ལ་གུས། །བླ་མ་བསྟེན་ཅིང་དབང་བསྐུར་ཐོབ། །དམ་ཚིག་སྡོམ་པ་མ་ལུས་ལྡན། །བརྩོན་འགྲུས་ཆེ་ལ་གཞན་དོན་དཔའ། །འཇིག་རྟེན་བདེ་ལ་མ་ཆགས་པས། །
རྒྱུད་འདི་མཉན་དང་བཤད་པར་བྱ། །དེ་ལས་བཟློག་པའི་གང་ཟག་ལ། །མིང་ཙམ་བསྟན་པར་མི་བྱའོ། །གལ་ཏེ་བསྟན་པར་གྱུར་པ་ན། །སྔགས་པ་དམ་ཚིག་ཉམས་གྱུར་ཏེ། །ནད་གདོན་འབྱུང་པོ་མ་ལུས་པས། །
ཉེ་བར་གཙེས་ཏེ་འཆི་བར་འགྱུར། །དེ་ནས་མནར་མེད་སྡུག་བསྔལ་ནི། །གྲངས་མེད་འདས་ཀྱང་ཐར་མི་འགྱུར། །དེ་བས་གསང་བ་སྐུ་གསུང་ཐུགས། །སྙིང་པོ་དམ་པ་འདི་དག་ལ། །རྒྱ་ཡིས་བཏབ་སྟེ་མཆོད་པ་དང་། །བསྟོད་ཅིང་སྦ་བ་བྱས་གྱུར་ན། །
ཡིད་ལ་རེ་བ་ཀུན་རྫོགས་ཤིང་། །འཇིག་རྟེན་ཐམས་ཅད་བདེ་བར་འགྱུར། །གླེགས་བམ་སོར་ནི་བཅུ་དྲུག་ལ། །རིམ་བདུན་བརྒྱ་ཡིས་བཏབ་ནས་ཀྱང་། །རྟག་ཏུ་སྤྱི་བོའི་གཙུག་ཏུ་གཟུང་། །འདི་དང་བྲལ་བར་མ་གྱུར་ན། །སྙེན་པ་དེ་ཡིན་
བསྒྲུབ་པ་དེ། །སྒྲུབ་པ་ཆེན་པོའང་དེ་ཡིན་ཏེ། །སྔགས་ཀྱང་དེ་ཡིན་ལྷ་ཡང་དེ། །བླ་མ་དེ་ཡིན་སློབ་དཔོན་ཡང་། །སངས་རྒྱས་ཆོས་དང་དགེ་འདུན་ཡང་། །དེ་ཡིན་བསྐྱེད་དང་རྫོགས་པ་དེ། །མ་ལུས་དབང་ཡང་དེ་ཡིན་ཏེ། །
འཇིག་རྟེན་བྱ་བ་ཀུན་སྤང་ནས། །འདི་ལ་མཆོད་པར་གྱུར་པ་ནི། །ཚོགས་གཞན་ཅི་ཡོད་རྨོངས་པའི་རྒྱུ། །ཅིས་ཕྱིར་འདི་ལ་འབད་མི་བྱེད། །བཅོམ་ལྡན་འདས་ཀྱིས་གསུངས་ཏེ། །ཡུམ་ལ་རྗེས་སུ་
གཏད་པའི་དོན་བསྟན་པ་ནི། །སངས་རྒྱས་ཀུན་གྱི་ཡུམ་ཆེན་མོ། །རྡོ་རྗེ་བདེ་མ་བདེ་སྟེར་མ། །རྟོག་པ་གཅོད་མཛད་ཡུམ་ཁྱོད་ལ། །རྒྱུད་འདི་གཏད་ཀྱིས་ལེགས་པར་ཟུང་། །གཟུངས་མ་ཡིད་འོང་རྒྱལ་བའི་ས། །རྣམ་དག་
མཆོད་ཅིང་སྡུག་བསྔལ་འཇོམས། །མ་ལུས་འགྲོ་བ་འདྲེན་པའི་དཔལ། །རྡོ་རྗེ་བདེ་མ་ཕྱག་འཚལ་ལོ། །ཞེས་བསྟོད་ནས་རྒྱུད་གཏད་དོ། །དེ་ནས་ཡུམ་གྱིས་རྗེས་བཟུང་སྟེ། །དུས་གསུམ་བདེ་གཤེགས་མ་ལུས་པའི། །ཐུགས་ཀྱི་

90-1-53a

སྲས་པོ་སྡེ་དཔོན་ཆེ། །འཇིག་རྟེན་ཐམས་ཅད་འདུལ་མཛད་པ། །དཔའ་བོ་ཁྱོད་ལ་ཕྱག་འཚལ་ལོ། །གཏུམ་པོ་དཔའ་བོ་འཇིག་པར་བྱེད། །ཀླུ་འདུལ་གཞན་གྱིས་མི་ཐུབ་པ། །དྲག་པོ་
འཇིགས་པར་བྱེད་པའི་ལྷ། །རྡོ་རྗེ་གཏུམ་པོ་ཁྱོད་ཕྱག་འཚལ། །ཞེས་བསྟོད་ནས་ཕྱག་དང་བསྐོར་བས་མཉེས་པར་བྱས་ནས། སླར་ཡབ་ཀྱི་ཐུགས་ཀའི་རྡོ་རྗེའི་ལྟེ་བར་ཐིམ་པར་གྱུར་ཏོ། །དེ་ནས་འཁོར་ཐམས་
ཅད་ཀྱིས་མཆོད་པས་མཆོད་ཅིང་བསྟོད་པས་བསྟོད་དེ། གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་གསུངས་པ་ལེགས་སོ་ལེགས་སོ། །ཞེས་མངོན་པར་མགྲིན་གཅིག་ཏུ་ཆེད་དུ་བརྗོད་པ་ཆེད་དུ་བརྗོད་དེ། 
རྡོ་རྗེ་འཆང་ཆེན་པོས་གསུངས་པ་ལ་མངོན་པར་དགའ་ནས་ཡི་རངས་ཏེ་མངོན་པར་བསྟོད་པར་གྱུར་ཏོ། །བཅོམ་ལྡན་འདས་ཕྱག་ན་རྡོ་རྗེ་གསང་བ་མངོན་པར་བསྟན་པའི་རྒྱུད་ཀྱི་རྒྱལ་པོ་
ལས་རྒྱུད་ཇི་ལྟར་བསྟན་ཅིང་སྦ་བ་དང་རྗེས་སུ་ཡི་རངས་བའི་ལེའུ་སྟེ་ཉི་ཤུ་རྩ་གཅིག་པའོ།། །།བཅོམ་ལྡན་འདས་ཕྱག་ན་རྡོ་རྗེ་གསང་བ་
མངོན་པར་བསྟན་པའི། རྒྱུད་ཀྱི་རྒྱལ་པོ་ཞེས་བྱ་བ། །རྫོགས་སྷོ།། །།རྒྱ་གར་གྱི་མཁན་པོ་ཝ་ལ་ཙན་དྲ་གུ་རུ་ཆེན་པོ་དང་། 
བོད་ཀྱི་ལོ་ཙྪ་བ་གླན་ཆུང་དར་མ་ཚུལ་ཁྲིམས་ཀྱིས་བྱང་ཕྱོགས་ཤམ་བྷ་ལའི་དཔེ་དང་བསྟུན་ཏེ་བསྒྱུར་བའོ། །སླད་ཀྱིས་ཡུལ་དབུས་ཀྱི་དཔེ་དང་། 
ཁ་ཆེ་ནས་བྱུང་བ་དང་བསྟུན་ནས་ལེགས་པར་གཏན་ལ་ཕབ་པའོ། །རྒྱུད་འདི་དང་གསང་བ་བསྟན་པའི་རྒྱུད་གཉིས་པོ་གང་དུ་ཞིག་ལ་རྟེན་ནས་ཅི་འབྱུང་བར་སྣང་ཞིང་སྔགས་རྣམས་ཤིན་ཏུ་དག་པར་བཅོས་སུ་འདོད་ན་འང་ཡིད་ཆེས་པའི་ཕྱི་མོ་མ་སྙད་དོ།། །།

90-1-53b

This is a blank page without image

90-1-54a

༄༅། །རྒྱ་གར་སྐད་དུ།  བཛྲ་ཧྲི་ད་ཡ་བཛྲ་ཛི་ཧྭཱི་ན་ལ་ནཱ་མ་དྷཱ་ར་ཎཱི།  བོད་སྐད་དུ།  རྡོ་རྗེ་སྙིང་པོ་རྡོ་རྗེ་ལྕེ་དབབ་པ་ཞེས་བྱ་བའི་གཟུང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །
འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དུར་ཁྲོད་ཆེན་པོ་བསིལ་བའི་ཚལ་ན་བཞུགས་ཏེ། དེ་ན་འཁོར་ཉེ་བའི་སྲས་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་དང་། 
ལྷ་དང་། མི་དང་། ལྷ་མ་ཡིན་དང་། ཀླུ་རྣམས་དང་ཐབས་གཅིག་ཏུ་བཞུགས་སོ། །དེ་ནས་བཅོམ་ལྡན་འདས་ཀྱིས་རྡོ་རྗེ་སྙིང་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཐུགས་ཀ་ནས་འོད་ཟེར་རབ་ཏུ་བཀྱེ་
བར་གྱུར་ཏེ། འོད་ཟེར་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཁྱབ་པར་བྱས་ནས་སེམས་ཅན་ཐམས་ཅད་ཀྱི་ནད་དང་མི་བདེ་བ་དང་སྡུག་བསྔལ་ཐམས་ཅད་དང་བྲལ་བར་བྱས་ནས་སླར་བཅོམ་
ལྡན་འདས་ཀྱི་ཐུགས་སུ་ཞུགས་སོ། །དེ་ནས་དྲང་སྲོང་ཆེན་པོ་ཉེས་འདོར་ལངས་ཏེ་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གྱི་ཁམས་འདི་ན་སེམས་ཅན་ཐམས་ཅད་
ལ་ནད་དང་། དུག་དང་། རིམས་དང་། དགྲ་དང་། གདོན་དང་། བྱད་སྟེམས་དང་། སྦོད་གཏོང་དང་། ཆར་ཆེས་པ་དང་། ཆར་མི་འབབ་པ་དང་། ལོ་ཏོག་མ་རུངས་པར་བྱེད་པ་རྣམས་ཀྱིས་སེམས་ཅན་ཐམས་ཅད་སྡུག་བསྔལ་
ཞིང་ཉམ་ཐག་པར་གྱུར་ན་དེ་ལ་ཇི་ལྟར་བསྲུང་བ་དང་། བསྐྱབ་པ་དང་སྦ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་ཉེས་འདོར་ང་ལ་རྡོ་རྗེ་སྙིང་པོ་རྡོ་རྗེ་ལྕེ་དབབ་པ་ཞེས་བྱ་བའི་གཟུངས་ཡོད་དེ། 
དེས་སེམས་ཅན་ཐམས་ཅད་ལ་བསྲུང་བ་དང་། བསྐྱབ་པ་དང་། སྦ་བར་བྱེད་དོ། །དེ་ངས་བཤད་ཀྱིས་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག །དེ་ནས་བཅོམ་ལྡན་འདས་ཀྱིས་བཛྲ་བཛྲ་ཧཱུྃ་ཞེས་གསུངས་པས་རྡོ་རྗེ་སྙིང་པོ་ཁྲོ་

90-1-54b

ཞིང་གཏུམ་གདུག་པའི་ཆ་ལུགས་ཅན་འཐོན་ནས་བཅོམ་ལྡན་འདས་ཀྱི་སྣམ་ལོགས་ན་འཁོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་མགྲིན་གཅིག་ཏུ་གཟུངས་འདི་བཀའ་སྩལ་ཏོ། །ཉི་མ་ས་ཟླ་ནན། 
ཀླད་པ་ནན། ཀུན་ཞི་ཙི་ཏ་ཀུ་ལི་ནན། ཡག་ཤ་ཟློག་བྱེད་དེ། དེ་ནས་གཟུངས་འདི་གསུངས་མ་ཐག་ཏུ་བགེགས་དང་ལོག་འདྲེན་ཐམས་ཅད་འཇིགས་ཤིང་སྐྲག་ནས་ཁ་སྦུབ་ཏུ་འགྱེལ་ཏེ་ལྦུ་བར་སྐྱུག་ཅིང་བརྒྱལ་བར་གྱུར་ཏོ། །དེ་ནས་ཀླུའི་རྒྱལ་པོ་
མཐའ་ཡས་ཀྱང་འཇིགས་སྐྲག་ནས་ལུས་འདར་ཞིང་བཅོམ་ལྡན་འདས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་དགྲ་དང་གདོན་ཐམས་ཅད་བརླག་པར་བྱེད་པའི་གཟུངས་འདི་བརྗོད་པར་བགྱིས་
བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ། ན་མོ་བུད་དྷཱ་ཡ། ཙི་ཏྲ་མུ་དྲཱ་ཡག་ཤ་ཟློག་བྱེར། དེ་ནས་གཟུངས་འདི་སྨྲས་མ་ཐག་ཏུ་ས་ཆེན་པོ་གཡོས་པར་གྱུར་ཏེ། འཇིག་རྟེན་གྱི་ཁམས་ཐམས་ཅད་ཁ་སྦུབ་ཏུ་འགྱེལ་
ཏེ། གདོན་དང་ལོག་འདྲེན་ཐམས་ཅད་ཁ་སྦུབ་ཏུ་འགྱེལ་ཏེ། ཁྲག་ཏུ་སྐྱུག་ཅིང་དབུགས་དང་བྲལ་བར་གྱུར་ཏོ། །དེ་ནས་ཡང་ཀླུ་མཐའ་ཡས་ཀྱིས་འདི་སྐད་ཅེས་བརྗོད་དོ། །བཅོམ་ལྡན་འདས་བདག་གིས་སེམས་ཅན་ཐམས་ཅད་ལ་བསྲུང་བ་དང་། །
བསྐྱབ་པ་དང་། སྦ་བར་བགྱིའོ། །བཅོམ་ལྡན་འདས་ཀྱི་བསྟན་པ་བསྲུང་བར་བགྱིའོ། །སངས་རྒྱས་ཀྱི་བསྟན་པ་ཡུན་རིང་དུ་གནས་པར་བགྱིའོ། །ཆར་དུས་སུ་དབབ་ཅིང་ལོ་ཏོག་ཐམས་ཅད་བསྲུང་བར་བགྱིའོ། །ནད་དང་དགྲ་དང་གདོན་ཐམས་ཅད་གཞོམ་པར་བགྱིའོ། །
བཅོམ་ལྡན་འདས་ཀྱིས་ཇི་ལྟར་བཀའ་སྩལ་པ་ལྟར་བགྱིད་པ་ལས་བཟློག་པར་མི་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །ཀླུའི་རྒྱལ་པོ་མཐའ་ཡས་ཁྱོད་ཀྱིས་ཇི་ལྟར་དམ་བཅས་པ་ལྟར་གྱིས་ཤིག །དམ་ཚིག་རྗེས་སུ་བསྲུང་ཤིག །
ཇི་ལྟར་ངའི་བཀའ་བཅག་ན་ངན་སོང་དུ་ལྷུང་བར་གྱུར་ཏ་རེ། ངའི་ཇི་ལྟར་བསྒོ་བ་ཐམས་ཅད་གྱིས་ཤིག །དེ་ནས་གསང་བའི་བདག་པོས་རྡོ་རྗེ་ལྕེ་དབབ་པ་ཞེས་བྱ་བའི་གཟུངས་ཀླགས་པས་འགྲུབ་པ་དྲག་པོ་རབ་ཏུ་མི་བཟད་པ་འདི་སྨྲས་སོ། །ནཱ་ག་ཤིག །ནཱ་ག་བྱེར། ནཱ་ག་ནཱན། 

90-1-55a

ནཱ་ག་གོ་ལ་ནཱན། ནཱ་ག་ཧ་ན་ཧ་ན་མཱ་ར་ཡ་རྦད་ནཱན། ས་གདོན་ནག་པོ་སོད། ས་གདོན་ནག་པོ་སོད། ས་གདོན་ནག་པོ་ནཱན། ཕྱུ་ག་ཙི་ཕཊ། ཙི་ག་ཕྱུ་ཕཊ། ལྕེ་བ་ཏི་ཕཊ། ཨེ་ག་ར་བ་ཙེ་འདི་ནཱ་ད་ག་བོར་མ་མ་ཧཱ་པ་ལ་ས་ཏ། ཡེ་གོ་དེ་སད་ཏེ་ནཱན། 
ཐུམ་རིལ་རྦད་ཆེ་གེ་མོ་མཱ་ར་ཡ། ཛ་རྦད་ནཱན། ནཱ་ག་ཧྲིལ་ཧྲིལ། ནཱ་ག་ཕྲྃ་ཕྲྃ། ནཱ་ག་ཕོ་བ། བཛྲ་པྲ་བེ་ཤ་ཡ་ས་འདི་སྲུངས་ཤིག་བྱེར་ཡ། བྷྱོར་མ་མཱ་ཧཱ་ཨ་ཧཱུྃ་ཧཱུྃ་ཕཊ་སྭཱ་ཧཱ། དེ་ནས་གཟུངས་འདི་གསུངས་མ་ཐག་ཏུ་ནམ་མཁའ་ལ་གནམ་ལྕགས་
དྲག་པོའི་རྡོ་རྗེའི་ཐོག་ཕབ་ནས་དགྲ་དང་། གདོན་དང་། ལོ་ཏོག་མ་རུངས་པར་བྱེད་པ་ཐམས་ཅད་ཀྱི་ལུས་དུམ་བུར་དུམ་བུར་གཏུབས་ནས་རྡུལ་ཕྲ་རབ་བཞིན་དུ་བརླག་པར་བྱས་སོ། །དེ་ནས་བཅོམ་ལྡན་འདས་ཀྱིས་ཆོ་ག་བཀའ་སྩལ་པ། དྲང་སྲོང་ཆེན་
པོ་སའི་དཀྱིལ་འཁོར་གྲུ་བཞི་པ་བྱི་དོར་བྱས་ནས་བའི་རྣམ་ལྔས་བྱུག་པར་བྱའོ། །ཙན་དན་དང་རྒྱ་སྤོས་དྲི་ཞིམ་པོས་བྱུག་པར་བྱའོ། །མེ་ཏོག་སིལ་མ་དགྲམ་མོ། །བུམ་པ་གང་བ་གཞག་གོ། མར་མེ་བུད་དོ། །གཏོར་མ་བཟང་པོ་གཞག་གོ །
ལྕགས་སམ་སེང་ལྡེང་གི་ཕུར་པ་གཟུགས་སོ། །དབུས་སུ་རྡོ་རྗེ་སྙིང་པོ་གཞག་པར་བྱའོ། །དེའི་མདུན་དུ་ཀླུ་མཐའ་ཡས་གཞག་གོ། དེ་ནས་མཆོད་པར་འདོད་ན་མེ་ཏོག་ལ་སོགས་པ་མཆོད་པ་ལྔ་བྱའོ། །ཀླུ་མཆོད་པར་འདོད་ན་འཁར་
བའི་སྣོད་དུ་འོ་མ་དང་། ཀླུ་སྨན་སྣ་ཚོགས་དང་། རྩི་སྨན་སྣ་ཚོགས་ཀྱིས་བྱའོ། །ནད་དང་དུག་བསྲུང་བར་འདོད་ན་ཚིལ་ཆེན་དང་། གླ་རྩི་དང་། སྐུད་པ་སྔོན་པོ་དང་། རྨ་བྱའི་སྒྲོས་བྱའོ། །ཀླུ་ནག་པོ་ཆེན་པོ་ལ་ནི་ཚིལ་ཆེན་དང་། གླ་རྩི་དང་། མཚོན་སྐུད་སྣ་ལྔ་
དང་། སེང་ལྡེང་གི་ཕུར་པས་བྱའོ། །འབྱུང་པོ་ཐམས་ཅད་ལ་ནི་ཕུར་པ་དང་། ཡུངས་ཀར་གྱིས་བྱའོ། །སྐྱ་རེང་འཆར་ཀའི་གདོན་ལ་ནི་ཕུར་པ་དང་། ཡུངས་ཀར་དང་། ཡུངས་ནག་དང་། སྐེ་ཚེ་དང་ཐལ་ཆེན་གྱིས་བྱའོ། །འབྱུང་པོ་ཀུན་དུ་རྒྱུ་བ་ལ་ནི་ཕུར་
བུ་ལྔ་དང་། ཐོད་པས་བྱའོ། །གཞན་དག་གསད་པར་འདོད་ན་ཕུར་པ་དང་། གཟུགས་དང་། ཐོད་པས་བྱའོ། །གནོན་པར་འདོད་ན་ཐོད་པ་དང་། དུག་དང་། ཡུངས་ཀར་གྱིས་བྱའོ། །ལོ་ཏོག་གཞོམ་པར་འདོད་ན་ཐོད་པ་དང་། དུག་དང་ཡུངས་ཀར་དང་། 

90-1-55b

ཚིལ་ཆེན་དང་། ཁྲག་སྣ་ཚོགས་ལ་བྱའོ། །ལོ་ཐོག་བསྲུང་བར་འདོད་ན་ཐལ་ཆེན་དང་། སྐེ་ཚེ་དང་། ཕུར་བུས་བྱའོ། །ཀུན་དུ་བསྲུང་བ་ཞེས་བྱ་བ་གཞན་གྱི་སྦོད་གཏོང་བཟློག་པར་འདོད་ན་མཆོད་རྟེན་དང་གཟུགས་དང་། ཐོད་པ་དང་། ཡུངས་ཀར་
དང་། ཕུར་པས་བྱའོ། །ཐམས་ཅད་ཞི་བར་འདོད་ན་ཐབ་ཁུང་རྙིང་པར་ཙན་དན་ནམ་རྒྱ་ཤུག་ལ་མེ་བཏང་ལ། དཀར་གསུམ་དང་། མངར་གསུམ་དང་། འབྲས་དང་། ཏིལ་དང་། མར་དཀར་ལ་སྦྱིན་སྲེག་བྱ་ཞིང་། ཆེ་གེ་མོ་མཱ་ར་ཡ་ཤཱན་ཏིང་
ཀུ་རུ་སྭཱ་ཧཱ་ཞེས་བཟླས་ན་ཐམས་ཅད་བསྲུང་བར་འགྱུར་རོ། །གང་དག་གསད་པར་འདོད་ན་སླ་ངའི་ནང་དུ་སེང་ལྡེང་ངམ་གདུག་པའི་ཤིང་ལ་མེ་བཏང་ལ། གདུག་པའི་རྫས་སྣ་ཚོགས་དང་། སྐེ་ཚེ་དང་། ཏིལ་དང་། མར་ནག་དང་། ཚིལ་ཆེན་
དང་། མིང་བྱང་སྤེལ་ཏེ། སྦྱིན་སྲེག་བྱ་ཞིང་། ཆེ་གེ་མོ་ར་ཤ་མཱ་ར་ཡ་རྦད་ཅེས་བཟླས་ན་དགྲ་དང་། གདོན་ཐམས་ཅད་བརླག་པར་འགྱུར་རོ། །བདག་དང་གཞན་བསྲུང་བར་འདོད་ན་རྨ་བྱའི་མཁྲིས་པ་དང་ཀ་ར་དང་། སའི་བདུད་རྩི་ལོ་ལྔ་
བརྒྱ་ལོན་པས་བྱའོ། །ཀླུ་ས་བདག་བསྲུང་བར་འདོད་ན་སྤོས་དང་། གུ་གུལ་ནག་པོ་དང་། གླ་རྩི་དང་། མུ་ཟི་དང་། ལྡོང་རོས་དང་། དྲི་ཆེན་དང་། སྦྲང་རྩིས་བྱའོ། །མཆོག་ཏུ་བསྲུང་བར་འདོད་ན་འབྲས་བུ་གསུམ་དང་། བུ་ཆུང་གི་རང་བྱུང་དང་། 
དྲི་ཆུས་བྱའོ། །ཁྱད་པར་དམ་པ་བསྲུང་བ་ཆེན་པོ་ནི་ཨ་རུ་ར་རྣམ་པར་རྒྱལ་བ་བཅང་ཞིང་གཟུངས་འདི་བརྗོད་པར་བྱའོ། །ཤིག་བྱེར་ནཱན། འགོ་ནན་ཧ་ན་ཧ་ན་མཱ་ར་ཡ་རྦད་ནཱན། དྲང་སྲོང་ཆེན་པོ་ཉེས་འདོར་གཟུངས་འདི་ཡིད་ལ་རབ་ཏུ་ཟུང་ཤིག །
སེམས་ཅན་ཐམས་ཅད་ལ་བསྲུང་བ་དང་། བསྐྱབ་པ་དང་། སྦ་བར་གྱིས་ཤིག །ངའི་བསྟན་པ་རྗེས་སུ་སྲུངས་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དྲང་སྲོང་ཆེན་པོ་ཉེས་འདོར་དང་། ཐམས་ཅད་དང་ལྡན་པའི་འཁོར་དེ་དག་
དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།རྡོ་རྗེ་སྙིང་པོ་རྡོ་རྗེ་ལྕེ་དབབ་པ་ཞེས་བྱ་བའི་གཟུངས་རྫོགས་སྷོ།། །།
90-1-56a

འདི་དང་པོ་སྐ་ཅོག་གིས་བསྒྱུར་ཞིང་། ཕྱིས་གཉན་ལོ་ཙྪ་བ་དྷརྨ་གྲགས་ཀྱིས་ཀྱང་བསྒྱུར་རོ། ། ༄༅། །རྒྱ་གར་སྐད་དུ།  བཛྲ་སུ་ཁ་ཀྲོ་དྷ་ཏན་ཏྲ་རཱ་ཛ།  བོད་སྐད་དུ།  རྡོ་རྗེ་བདེ་ཁྲོས་རྒྱུད་ཀྱི་རྒྱལ་པོ། སངས་རྒྱས་དང་བྱང་
ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་བདུད་ལས་རྣམ་པར་རྒྱལ་བ་ཞེས་བྱ་བ་འོག་མིན་གྱི་གནས་གཞན་འཕྲུལ་དབང་བྱེད་ཀྱི་ཕོ་བྲང་ན་བཞུགས་སོ། །དེའི་
ཚེ་འདུས་པ་རྣམས་ཀྱི་དང་པོ་སེམས་དཔའ་ཆེན་པོ་ཡིད་ཆེར་གཡོས་ཏེ། གུས་པས་བཀུར་སྟི་དང་། རིམ་གྲོ་དང་ཕུ་དུད་དང་བསྟི་སྟང་དུ་བྱས་དེ། ཨེ་མའོ་བྱམ་མགོན་ཐུགས་རྗེ་ཅན། །འགྲོ་བའི་སེམས་ཅན་ཐམས་ཅད་ཀུན། །མེ་ཡིས་ཚིག་
ཅིང་མཚོན་གྱིས་ཕོག །མུན་པར་འཁྱམས་ནས་རི་ཡིས་ནོན། །རླུང་གིས་ཁྱེར་བ་སྙིང་རེ་རྗེ། །སྐྱབས་ཀྱི་དམ་པ་བཀའ་སྩལ་འཚལ། །ཞེས་ཞུས་པས། དེར་ནི་མགོན་པོས་སྐུ་བསྟན་ཏེ། །ཞལ་གྱི་པད་མ་རབ་ཕྱེ་ནས། །སྤྱན་གྱི་གཟི་མདངས་
ཀུན་ལ་གཟིགས། །ལྗགས་ཀྱི་དཀྱིལ་ནས་བཀའ་སྩལ་པ། །སྐྱོབ་པའི་དམ་པ་འདི་ཡིན་གྱིས། །རྡོ་རྗེ་བདེ་དང་ཁྲོས་པ་ཡི། །དུམ་བུ་གསུམ་པ་ངས་བཤད་ཀྱིས། །ལེགས་པར་ཉོན་ལ་ཡིད་ལ་ཟུང་། །ཞེས་གསུངས་སོ། །རྡོ་རྗེ་བདེ་ཁྲོས་ཀྱི་རྒྱུད་
ལས་གཏམ་རྒྱུད་ཀྱི་རིམ་པ་བསྟན་པའི་ལེའུ་སྟེ་དང་པོའོ།། །། དེ་ནས་མངོན་པར་བཤད་བྱ་བ། །བཀྲ་ཤིས་མཎྜལ་ལེགས་བྱས་ལ། །ཚུལ་དང་འཐུན་པའི་བུམ་པ་དགོད། །དེ་ཡང་ཆུ་གཙང་སྣ་བདུན་བླུགས། །གཞན་ཡང་ཤིང་ཏོག་འབྲས་
བུ་དང་། །མངར་གྱི་རྣམ་པ་དང་། དྲིའི་རྣམ་པ་དང་། རིན་པོ་ཆེའི་མཆོག་དང་། འབྲུའི་བྱེ་བྲག་དང་། །སྨན་རྣམས་བླུགས་སོ། །བུམ་པ་དེའི་མགྲིན་པ་དར་སྔོན་པོས་དཀྲིས་ཏེ། །སྟེང་དུ་བླ་རེ་ཕུབ་ལ་གཞག་གོ། རྡོ་རྗེ་བདེ་ཁྲོས་ཀྱི་རྒྱུད་ལས་
སྒྲུབ་རྫས་ཀྱི་ལེའུ་སྟེ་གཉིས་པའོ།། །། དེ་ནས་མངོན་པར་བཤད་བྱ་བ། །སྒྲུབ་བྱེད་རང་རྒྱུད་དག་པ་ཡིས། །བསྐྱེད་ཚུལ་རྒྱས་སམ་བསྡུས་ཀྱང་རུང་། །ཧཱུྃ་ལས་ཕྱག་ན་རྡོ་རྗེ་ནི། །དབུ་གསུམ་མཐིང་ནག་ཕྱག་བཞི་མཛེས། །སྐུ་ནི་ཆེ་ཞིང་མཚུངས་

90-1-56b

པ་མེད། །ཞབས་ཀྱིས་རྒྱ་མཚོའི་ནང་དུ་ཡང་། །ཆུ་སྲིན་སྦལ་བའི་སྟེང་དུ་བརྫིས། །གཡས་གཡོན་དང་པོའི་ཕྱག་གཉིས་ཀྱིས། །རྡོ་རྗེ་གསོར་ཞིང་དྲིལ་ཆེན་རྡུང་། །མཐའ་གཉིས་དྲུག་པ་ཞལ་དུ་འདྲེན། །དབུ་གསུམ་གཡས་དཀར་རིགས་
ལྔས་བརྒྱན། །དབུ་གཡོན་དམར་པོ་སྦྲུལ་གྱིས་མཛེས། །ཞལ་དབུས་མཐིང་ནག་ལྕགས་མཆུ་ཅན། །སྟེང་དུ་མཁའ་ལྡིང་ཚངས་པ་སྤྲུལ། །དཔའ་བོ་གདུག་པ་དཔུང་པའི་རྒྱན། །རིན་ཆེན་ལྷུན་པོའི་རི་རབ་ལ། །སྟེགས་བཅས་ཞུམ་
པ་མེད་པར་བཞུགས། །དེ་ལྟར་ལྷ་དང་རབ་སྦྱར་ནས། །དེ་ཉིད་བསྟན་པའི་ཡན་ལག་གིས། །རང་ལུས་ཚགསུ་གཞུག་པར་གྱིས། །རྡོ་རྗེ་བདེ་བ་ཁྲོས་པའི་རྒྱུད་ལས་ལྷ་བསྒོམ་པའི་ལེའུ་སྟེ་གསུམ་པའོ།། །། དེ་ནས་མངོན་
པར་བཤད་བྱ་བ། །སྒོ་གསུམ་སྦྱོར་བ་ཤེས་པ་ཡིས། །གསང་བའི་སྙིང་པོ་འབུམ་དུ་བཟླས། །ཨོཾ་བཛྲ་ཙཎ་ཌ་སརྦྦ་དུཥྚྃ་ཏ་ཀ་ཧ་ན། ད་ཧ་པ་ཙ་ཧཱུྃ་ཕཊ། བཅྭ་བརྒྱད་སྔགས་ཀྱི་རྒྱལ་པོ་འདི། །མ་བྱུང་མི་འབྱུང་འབྱུང་མི་འགྱུར། །
འདི་བཟླས་སྔོན་དུ་གྲུབ་པར་འགྱུར། །རྟག་ཏུ་མཚན་མ་བཟང་པོ་འབྱུང་། །གཞན་གྱི་སྦྱོར་བ་འོང་མི་འོང་། །རང་ལ་ངེས་པར་སྟོན་པར་འགྱུར། །བསྙེན་པའི་རིམ་པས་ཐུབ་མི་ཐུབ། །འབད་པས་ལེགས་པར་བརྟག་པར་བྱ། །དེ་ནས་
གཏོར་མའི་སྦྱིན་པ་ནི། །ཨོཾ་ཨཱཿཧཱུྃ་ཞེས་རྒྱུན་དུ་གཏང་ངོ་། །རྡོ་རྗེ་བདེ་ཁྲོས་ཀྱི་རྒྱུད་ལས་གསང་བའི་སྙིང་པོ་དང་མཚན་ལྟས་བསྟན་པའི་ལེའུ་སྟེ་བཞི་པའོ།། །། དེ་ནས་མངོན་པར་བཤད་བྱ་བ། །སྟེན་ནི་རྡོ་རྗེའི་འོད་དུ་འབར། །བསྟན་
པ་འཕྲོ་ཚད་ཧཱུྃ་དུ་འབར། །འབར་བའི་འོད་ཟེར་ཀུན་དུ་འཕྲོ། །འཇིག་རྟེན་མ་ལུས་སྦྱངས་ནས་ཀྱང་། །སླར་ལ་ཐིག་ལེ་ཉིད་ལ་འདུས། །དགྲ་དང་བཅས་ཏེ་རང་གསལ་འབར། །བརྟེན་པར་གྱུར་ན་སྤྲོ་བསྡུ་བྱ། །རྡོ་རྗེ་བདེ་ཁྲོས་
ཀྱི་རྒྱུད་ལས་མེའི་བསམ་གཏན་གྱི་ལེའུ་སྟེ་ལྔ་པའོ།། །། དེ་ནས་མངོན་པར་བཤད་བྱ་བ། །མཐིང་གི་ཤོག་གུ་སྔོན་པོ་ལ། །གསེར་གྱི་འཁོར་ལོ་བྲིས་པའི་སྟེང་། །བསྲུང་བའི་སྙིང་པོ་ལེགས་བཀོད་དེ། །གང་མིང་རཀྵ་སྦྱར་

90-1-57a

བར་གྱིས། །དེ་ཡང་ཏྲི་ཡིས་ཡོངས་བགོས་ཏེ། །སངས་རྒྱས་སེམས་ཅན་ཉིད་ལ་བསྟིམ། །དེ་ཉིད་བུམ་པར་ལེགས་བཞུགས་ལ། །མཆོད་ཅིང་བཟླས་བརྗོད་གསོལ་བ་གདབ། །དེ་ནས་ཚེས་པའི་དུས་བཟང་ལ། །
རང་ངམ་གཞན་ལ་བཏགས་གྱུར་ན། །བར་ཆད་ཐམས་ཅད་ཉེར་ཞི་ནས། །ཚེ་དཔལ་བསོད་ནམས་རྒྱས་པར་འགྱུར། །རྡོ་རྗེ་བདེ་ཁྲོས་ཀྱི་རྒྱུད་ལས་བསྲུང་བའི་ལེའུ་སྟེ་དྲུག་པའོ།། །། དེ་ནས་མངོན་པར་བཤད་བྱ་བ། །འགྲོ་བ་དུག་གིས་གདུངས་པ་ལ། །གདུག་
པའི་དབང་ཆེན་ལ་སོགས་པ། །འཚེ་བ་འདི་ལྟར་འབྱུང་བར་འགྱུར། །མི་དགའ་སེམས་འཕྱོ་འགྲོ་སྙིང་འདོད། །ཉམས་ཆུང་འཐིབས་དང་ལྟས་ཀྱང་ངན། །ཡང་ཡང་ན་ཞིང་གཏམ་བསྣོལ་འོང་། །དེ་ནི་ཀླུ་ཡི་གནོད་པ་སྟེ། །ཚོར་ནས་ལེགས་པར་
བཅོས་ན་བཟློག །ས་སྲིན་མི་ལ་འདི་ལྟར་གནོད། །ལུས་སྦྲིད་ཤ་འཕྲིག་ཤ་རོ་འབྱུང་། །ཤ་བཀྲ་ཐོར་བུ་ངོ་ཡང་འགྱུར། །དེ་ཡང་ཚོར་ནས་བཅོས་ན་བཟློག །ས་བདག་གནོད་ན་འདི་ལྟར་འགྱུར། །གདོན་ཡང་ཤིན་དུ་ལྡོག་འགྱུར་ཆེ། །ན་ཚའི་
ཟུག་རྔུ་དྲག་པོར་འགྱུར། །རེས་འགའ་བདེ་བ་ལྟར་ཡང་བྱེད། །སྐབས་སུ་ཐིག་ལེ་ཁོ་ནར་ན། །དེ་ཡང་བཅོས་དཀའ་ཤེས་པས་བཟློག །གཉན་གྱི་གནོད་པ་འདི་ཡིན་ཏེ། །ཤིན་དུ་ན་ཚའི་ཚབས་ཀྱང་ཆེ། །རྐང་ལག་ན་འཁུམས་དྲི་མ་ལྡོག །
ཤ་ཁྲག་ལུད་ནས་མིག་ཀྱང་སླེ། །ཁ་ཡོ་སྣ་ཡོ་ཆུ་སེར་ཟ། །ཁ་ཡང་མི་ཐུབ་གནོད་པ་ཟ། །ཆུ་བུར་བྱུར་ན་འཚང་ཡང་ཆེ། །ཚོར་བར་མི་ཆོག་བསྒྲིམ་པ་གཅེས། །གདོན་ཚོགས་གཞན་ཡང་ཡུན་མི་རྟག །ཕྲ་མོ་ཙམ་ལ་སོགས་པ་
ཟློག །ཀུན་ལ་བསྒྲིམས་ཏེ་བཅོས་ན་འཚོ། །རྡོ་རྗེ་བདེ་ཁྲོས་ཀྱི་རྒྱུད་ལས་གཞན་གྱི་གནོད་པ་བརྟག་པའི་ལེའུ་སྟེ་བདུན་པའོ།། །། དེ་ནས་མངོན་པར་བཤད་བྱ་བ། །དབང་ཆེན་ལ་སོགས་ཐམས་ཅད་ལ། །མཆོད་དང་གཏོར་མས་མགུ་
བར་བྱ། །ཅི་འདོད་པ་ཡི་རྫས་རྣམས་སྦྱིན། །རྟེན་ཡོད་གནས་སུ་ལེགས་པར་སྦ། །སྙན་པའི་ཚིག་གི་བསྒོ་བྱས་ལ། །བུམ་པར་ནོར་བུ་རིན་ཆེན་གཞུག །མཛེས་པའི་དར་སྣ་འབྲུ་ཡི་མཛོད། །གང་གི་རྟེན་ལ་སྦས་གྱུར་ན། །གནོད་

90-1-57b

པ་རགས་པ་ཞི་བར་འགྱུར། །རྡོ་རྗེ་བདེ་ཁྲོས་ཀྱི་རྒྱུད་ལས་ཞི་བྱེད་མཆོད་ཐབས་ཀྱི་ལེའུ་སྟེ་བརྒྱད་པའོ།། །། དེ་ནས་མངོན་པར་བཤད་བྱ་བ། །བཙན་དུག་གུ་གུལ་གླ་རྩི་དང་། །ཤུ་དག་ཤིང་ཀུན་མུ་ཟི་དྲུག །གསང་སྔགས་བཏབ་སྟེ་ལུས་ལ་བྱུག །གུ་གུལ་ཉ་
མཁྲིས་གླ་རྩི་དང་། །སྒོག་པ་ཤུ་དག་དྲི་ཆེན་རྣམས། །བདུག་པ་བྱས་ཏེ་ཡང་ན་བཀྲུ། །གསེར་གཡུ་བྱི་རུ་མིག་མ་ཕུག །བཙན་དུག་རྨ་བྱའི་མཁྲིས་པར་བཅས། །བཅངས་ན་བསྲུང་བའི་མཆོག་ཏུ་འགྱུར། །རྡོ་རྗེ་བདེ་ཁྲོས་ཀྱི་རྒྱུད་ལས་རྟེན་འབྲེལ་རྫས་
ཀྱི་ལེའུ་སྟེ་དགུ་པའོ།། །།རྡོ་རྗེ་བདེ་ཁྲོས་ཀྱི་རྒྱུད་ལས་དུམ་བུ་དང་པོ་བསྟན་པའོ།། །། དེ་ནས་མངོན་པར་བཤད་བྱ་བ། །གདུག་པ་ཐམས་ཅད་འདུལ་བའི་ཕྱིར། །དྲག་སྔགས་འདི་དག་བརྗོད་པར་བྱའོ། །ཨོཾ་མཱ་ར་ཎ་སོད་སོད། མཱ་ར་ཎ་བྱིང་བྱིང་། མཱ་ར་ཎ་རྨུགས་རྨུགས། 
མཱ་ར་ཎ་ཧ་ལ་ཧ་ལ། མཱ་ར་ཎ་དུན་དུན། མཱ་ར་ཎ་མྱོས་མྱོས། མཱ་ར་ཎ་མྱོས་བྱིང་ཐུམ་རིལ་ཛཿ། མི་ཚིག་སྤངས་ཏེ་དྲག་སྔགས་འདི། །དབུགས་མ་ཤོར་བར་སྦུབ་མས་དྲངས། །བུམ་པར་བསྟིམ་ནས་རྟགས་ཐོབ་ནས། །འཐུངས་སམ་བཀྲུས་ན་དངོས་
གྲུབ་འཐོབ། །སྔགས་ལ་གང་མིང་སྦྱར་བྱས་ནས། །ཡུངས་ཀར་གདུག་པའི་ཕུར་པ་ལ། །བརྗོད་དེ་ལས་ལ་སྦྱར་གྱུར་ན། །གང་ལ་བཟླས་པ་བརླག་པར་འགྱུར། །མ་བསྒྲུབས་ལན་ཅིག་བརྗོད་པས་ཀྱང་། །དངོས་གྲུབ་ཐམས་ཅད་ཐོབ་པར་འགྱུར། །
མ་བྱུང་མི་འབྱུང་འབྱུང་མི་འགྱུར། །རྡོ་རྗེ་བདེ་ཁྲོས་ཀྱི་རྒྱུད་ལས་དྲག་སྔགས་ཁྲོས་པའི་ལེའུ་སྟེ་བཅུ་པའོ།། །། དེ་ནས་མངོན་པར་བཤད་བྱ་བ། །རྫས་བསག་ལྷ་བསྐྱེད་དྲག་སྔགས་བཟླས། །དགོས་པ་ཚང་བའི་བུམ་པ་སྟེ། །མི་དམིགས་བྃ་ལས་
རིན་པོ་ཆེའི། །བུམ་པ་ཚུལ་དང་འཐུན་པར་བསམ། །དེ་ནས་བྃ་དང་ལྃ་ལས་ནི། །ཆུ་དང་ས་ཡི་དཀྱིལ་འཁོར་བསམ། །ལྷ་བསྒོམས་ཁྱད་པར་བུམ་པ་འཛིན། །མཆུ་ནི་རྡོ་རྗེའི་སྦུ་གུ་སྟེ། །དེ་ནས་སྔགས་ཀྱི་འོད་ཟེར་འཕྲོས། །ཕྱིར་འཕྲོས་
གདུག་པ་མ་ལུས་བསྲེག །འོད་ཟེར་ལྕགས་ཀྱི་སྦུབ་མར་དྲངས། །བུམ་པར་ཁྲོ་ཆུ་ཁོལ་མར་གྱུར། །དེ་འཐུངས་བཀྲུས་པས་གང་གནོད་པ། །རྡུལ་དུ་བརླག་སྟེ་དག་པར་བསམ། །བརྩམས་པའི་ལས་ལ་ཐེ་ཚོམ་མེད། །རྡོ་རྗེ་ཁྲོས་པའི་རྒྱུད་

90-1-58a

ལས་བུམ་པ་ཁྲོས་པའི་ལེའུ་སྟེ་བཅུ་གཅིག་པའོ།། །། དེ་ནས་མངོན་པར་བཤད་བྱ་བ། །རྫས་བསག་ལྷ་བསྒོམ་འཁོར་ལོ་བསྐོར། །རོ་རས་བྱི་དུག་བྱ་རོག་སྒྲོས། །ཁྲུ་གང་ཙམ་གྱི་མཚན་ཉིད་ལ། །འཆི་བར་བྱེད་པའི་སྣག་ཚ་ལ། །འུག་པའི་
སྒྲོ་རྩ་གཡས་པ་ཡིས། །དྲག་སྔགས་མཉམ་པའི་རེའུ་མིག་བྲི། །དེ་ནས་མཚན་མར་གང་དམིགས་གཟུགས། །ཁ་དོག་རིགས་བཞི་ཉིད་དུ་བྱ། །དེ་སྙིང་དྲག་སྔགས་རེ་རེ་དགོད། །མཎ་ཌལ་གཙང་མ་དྲིས་བྱུགས་ཏེ། །དཀར་དང་དམར་དང་སེར་
དང་ལྗང་། །རྨ་བྱའི་སྒྲོ་ཡིས་བརྒྱན་བྱས་ཏེ། །ལྷ་བསྒོམ་ཁྱད་པར་འཁོར་ལོ་འཛིན། །འཁོར་ལོ་བསྐོར་བའི་རིམ་པ་ནི། །དྲགས་སྔགས་མཉམ་པའི་འཁོར་ལོ་བསྐོར། །སྔགས་ནི། ནཱ་ག་ཙཀྲ་མཱ་ར་ཎ་ཧཱུྃ་ཕཊ། གང་བསམས་འདི་ལ་ཐེ་ཚོམ་མེད། །
རྡོ་རྗེ་ཁྲོས་པའི་རྒྱུད་ལས་འཁོར་ལོ་ཁྲོས་པའི་ལེའུ་སྟེ་བཅུ་གཉིས་པའོ།། །། དེ་ནས་མངོན་པར་བཤད་བྱ་བ། །རྫས་བསག་ལྷ་བསྒོམ་ཕུར་པ་གདབ། །ལྕགས་སམ་སེང་ལྡེང་དུག་ཤིང་ལ། །སྔགས་གྲངས་མཉམ་པའི་ཕུར་པ་བཤམ། །འཁོར་
ལོའི་མཐའ་མ་བསྐོར་ཏེ་དགོད། །ལྷ་བསྒོམ་ཁྱད་པར་ཕུར་བུ་འཛིན། །དྲག་སྔགས་བཟླས་པའི་རིམ་པ་ནི། །ནཱ་ག་བཛྲ་ཀཱི་ལ་ཡ་མཱ་ར་ཎ་ཧཱུྃ་ཕཊ། །སྔགས་གྲངས་མཉམ་པའི་ཕུར་པ་བཤམ། །བརྩམ་པའི་ལས་ལ་ཐེ་ཚོམ་མེད། །རྡོ་རྗེ་བདེ་ཁྲོས་
པའི་རྒྱུད་ལས་ཕུར་པ་ཁྲོས་པའི་ལེའུ་སྟེ་བཅུ་གསུམ་པའོ།། །། དེ་ནས་མངོན་པར་བཤད་བྱ་བ། །རྫས་བསག་ལྷ་བསྒོམ་སྦྱིན་སྲེག་བྱ། །གདུག་པའི་ཤིང་བུ་ཁྲུ་གང་ཚད། །སྔགས་ཀྱི་གྲངས་ཀྱང་མཉམ་པར་བྱ། །སྔོན་དམར་སྐུད་པས་རིམ་གསུམ་དཀྲི། །
བར་དེར་འཁོར་ལོའི་སྲོག་རྩ་གཅད། །ལག་ཏུ་གྲི་ཐོག་དྲག་སྔགས་བརྗོད། །ནཱ་ག་ཏིཀྵྞ་ཆེ་གེ་མོ་མཱ་ར་ཡ་ཧཱུྃ་ཕཊ། །རིམ་པར་བགྲངས་ཏེ་གཡང་གཞིའི་ཁུད། །བྱང་ཤར་མཚམས་སུ་རྣམ་པར་གཞག །དེ་ནས་མཎ་ཌལ་དབུས་ཉིད་དུ། །ཧོམ་
ཁུང་བྲིས་ཏེ་དུག་ཁྲག་བྱུག །ནང་དུ་ཧོམ་དུ་གཟུགས་པར་བྱ། །འཁོར་ལོ་གྲིས་གཏུབ་ཐོགས་ནས་ནི། །གྲངས་དང་མཉམ་པར་བསྲེག་པར་བྱ། །མེ་དེ་ཡུགས་སའི་ཁྱིམ་ནས་བསླང་། །ལྷ་བསྒོམ་ཁྱད་པར་མེ་དཔུང་འཛིན། །གསང་སྔགས་

90-1-58b

བཟླས་པའི་རིམ་པ་འདི། །ནཱ་ག་ཙིཏ་ཏ་ཛྭ་ལ་རྃ།  མཱ་ར་ཡ་ཕཊ། །བསྲེགས་ནས་ལས་བརྩམས་འགྲུབ་པར་འགྱུར། །རྡོ་རྗེ་བདེ་ཁྲོས་ཀྱི་རྒྱུད་ལས་མེ་དཔུང་ཁྲོས་པའི་ལེའུ་སྟེ་བཅུ་བཞི་པའོ།། །། དེ་ནས་མངོན་པར་བཤད་བྱ་བ། །རྫས་བསག་ལྷ་བསྒོམ་མནན་
སྔགས་བཟླས། །ཆུ་སྲིན་སྲམ་མམ་བྱི་བའི་མགོར། །བསྲེག་པའི་ཐལ་བ་བསྡུས་བྱས་ལ། །གང་ཡིན་ཉིད་ཀྱི་སྦྱོར་བ་བཅས། །ལྷ་བསྒོམ་ཁྱད་པར་རི་རབ་འཛིན། །དྲག་སྔགས་བཟླས་པའི་རིམ་པ་ནི། །ནཱ་ག་སྟམ་བྷ་ཡ་ནཱན། །མནན་བྱས་ཆུ་སྲིན་ཁ་རུ་
བསྒོམ། །འདི་བྱས་གང་ལ་བཟླས་པ་བརླག །འདི་ལ་ཐེ་ཚོམ་མི་བྱའོ། །རྡོ་རྗེ་བདེ་ཁྲོས་ཀྱི་རྒྱུད་ལས་རི་རབ་ཁྲོས་པའི་ལེའུ་སྟེ་བཅྭ་ལྔ་པའོ།། །།རྡོ་རྗེ་བདེ་ཁྲོས་ཀྱི་རྒྱུད་ལས་དུམ་བུ་གཉིས་པའོ།། །། དེ་ནས་མངོན་པར་བཤད་བྱ་བ། །གླང་པོའི་ལྤགས་པར་
འབྲུག་བྲིས་ནས། །གང་མིང་བཅུག་སྟེ་དྲག་སྔགས་བཟླས། །གནམ་ལྕགས་འབབ་པ་བཟློག་པར་འགྱུར། །འབྲུ་ཡི་པད་མ་འདབ་བརྒྱད་ལ། །ཀླུ་ཡི་གཟུགས་རྣམས་བྲིས་པ་ལ། །བསྟིམ་ནས་དྲག་སྔགས་རྒྱབ་གྱུར་ན། །གནམ་ཆུ་དུས་སུ་ཕེབས་པར་འགྱུར། །
ཐོད་པར་ཨེ་བྲིས་སྔགས་ཀྱིས་བསྐོར། །གང་ཡིན་བཅུག་ལ་བསྟིམ་པ་ལ། །དྲག་སྔགས་གང་ཡིན་བཟླས་བྱས་ན། །མྱུར་དུ་འགྲུབ་པར་གདོན་མི་ཟ། །སྲོག་ཆགས་འཇིགས་པར་གྱུར་པ་ལ། །འཆི་བའི་ཆུ་ཡིས་དྲག་སྔགས་བྲི། །འཇིགས་བྱེད་
བཀུག་སྟེ་དེ་ལ་མཆོད། །དེ་ཉིད་ཡུངས་ཀར་ཐུམ་པོར་འདེབས། །གང་ལ་བཏགས་པ་བསྲུང་བའི་མཆོག །རྡོ་རྗེ་བདེ་ཁྲོས་ཀྱི་རྒྱུད་ལས་ལས་ཕྲ་མོའི་ལེའུ་སྟེ་བཅུ་དྲུག་པའོ།། །། དེ་ནས་དེ་དག་ལ་འཁོར་རྣམས་མངོན་པར་དགའ་སྟེ། 
བཅོམ་ལྡན་འདས་ལ་མཆོད་ཅིང་བསྟོད་ནས་རྗེས་སུ་ཡི་རང་བ་ཕུལ་ཏེ་མི་སྣང་བར་གྱུར་ཏོ། །མཉམ་པ་ཆེན་པོ་ལ་བཞག་པའོ། །རྡོ་རྗེ་བདེ་ཁྲོས་ཀྱི་རྒྱུད་ལས་རྗེས་སུ་ཡི་རང་བའི་ལེའུ་སྟེ་བཅུ་བདུན་པའོ།། །།རྡོ་རྗེ་བདེ་ཁྲོས་ཀྱི་རྒྱུད་ལས་དུམ་བུ་
གསུམ་པའོ།། །།རྫོགས་སྷོ།། །།མཆོག་ཏུ་གསང་བའོ། །ཛྙཱ་ན་ཀཱ་རས་བསྒྱུར་རོ།། །།               །།               །།              །།           །།            །།            །།

90-1-59a

༄༅༅། །རྒྱ་གར་སྐད་དུ།  མཱ་ཡཱ་ཛཱ་ལ་མ་ཧཱ་ཏན་ཏྲ་རཱ་ཛ་ནཱ་མ།  བོད་སྐད་དུ།  རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་
དུས་གཅིག་ན། བཅོམ་ལྡན་འདས་གནས་གཙང་མའི་སྟེང་ན། ཁང་པ་བརྩེགས་པའི་རིན་པོ་ཆེའི་གཞལ་མེད་ཁང་ཆེན་པོ་བཀོད་པ། རྡོ་རྗེའི་ཀ་བས་བརྒྱན་པ་ཤིན་དུ་མཛེས་པའི་རིན་པོ་ཆེ་བཀོད་པས་རྣམ་པར་བཀྲ་བ། རྡོ་རྗེ་
དྲིལ་བུ་འཁྲོལ་བ། ཡིད་ལས་བྱུང་བའི་མཆོད་པའི་ཁྱད་པར་ཆེན་པོས་བརྒྱན་པ། རྡོ་རྗེའི་འཁོར་ལོས་སྤྲས་པ། དེ་བཞིན་གཤེགས་པའི་སྤྲུལ་པའི་ཆ་བྱད་སྣ་ཚོགས་འཆང་བ་རྣམས་ཀྱིས་དོན་གྱི་བྱ་བ་བྱས་པ། རྣམ་པར་སྣང་མཛད་
ཀྱི་སྙིང་པོ་ལས་ཡང་དག་པར་འབྱུང་བའི་སྤྱོད་པ་བསྐྱོད་ནས་ཞལ་བཞིའི་སྒོའི་གོ་སྐབས་ནས་བྱུང་བ་སྣ་ཚོགས་དང་རྡོ་རྗེ་དང་། རིན་པོ་ཆེ་ཆེན་པོ་དང་འོད་དཔག་མེད་དང་། བྱང་ཆུབ་སེམས་དཔའ་སེམས་དཔའ་ཆེན་པོའི་ཚོགས་
དང་། རིག་སྔགས་ཀྱི་ལྷ་མོ་རྣམས་ཀྱིས་བརྒྱན་པ། ཁྲོ་བོའི་རྒྱལ་པོ་དང་། བྲན་དང་བྲན་མོ་དང་། ཕོ་ཉ་དང་ཕོ་ཉ་མོ་དང་ཕྱག་བརྙན་དང་། ཕྱག་བརྙན་མོ་དུ་མའི་འཁོར་གྱིས་བསྐོར་ཅིང་མདུན་གྱིས་བལྟས་པ། ཏིང་ངེ་འཛིན་གྱི་ཡེ་
ཤེས་ཀྱི་བདེ་བ་དེའི་བདག་ཉིད་དང་། དམིགས་པ་དང་མ་བྲལ་བ་ཐུགས་རྗེ་ཆེན་པོས་མཉེས་གཤིན་པ། སེམས་ཅན་ཐམས་ཅད་བསྒྲལ་བ་ལ་བརྩོན་པར་མཛད་པ། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་
ལྡིང་དང་མི་འམ་ཅི་དང་། ལྟོ་འཕྱེ་ཆེན་པོ་དང་མི་དང་། མི་མ་ཡིན་པ་ལ་སོགས་པ་མང་པོས་བརྒྱན་པ་ན། བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེ་དེ་བཞིན་གཤེགས་པ་བཞུགས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་འཁོར་
གྱི་ཁྱམས་ཀྱི་དབུས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་འདུག་པ་ལ་གཟིགས་ནས་འཛུམ་པ་མཛད་དོ། །འཛུམ་པ་མཛད་མ་ཐག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་བླ་གོས་ཕྲག་པ་གཅིག་ཏུ་

90-1-59b

གཟར་ནས་འགྱིང་བག་ཅན་དུ་བལྟས་ནས་རྡོ་རྗེ་གསོར་ཏེ། པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་བཅོམ་ལྡན་འདས་ལ་ཕྱག་འཚལ་ནས་གསོལ་པ། སངས་རྒྱས་བཅོམ་ལྡན་འདས་རྣམས་ནི་དགོངས་པ་
མ་མཆིས་པར་འཛུམ་པ་མི་མཛད་ན། བཅོམ་ལྡན་འདས་ཀྱིས་དགོངས་པ་གང་གི་སླད་དུ་གཟིགས་པ་དང་འཛུམ་པ་མཛད། དེས་ན་བདག་དང་འཁོར་རྣམས་ངོ་མཚར་དུ་གྱུར་པ་ལགས་ན། དེའི་སླད་དུ་བཅོམ་ལྡན་འདས་ཀྱིས་
སེང་གེ་ཆེན་པོའི་སྒྲ་དབྱངས་ཀྱིས་བཀའ་སྩལ་དུ་གསོལ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་དེ་སྐད་དུ་གསོལ་བ་བཏབ་མ་ཐག་ཏུ། བཅོམ་ལྡན་འདས་ཀྱིས་རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་
དྲ་བ་ཡེ་ཤེས་རྣམ་པར་བསྒྱིངས་པ། རྒྱུད་ཐམས་ཅད་ཀྱི་ཕྱི་མའི་ཡང་ཕྱི་མའི་ཐབས་བདེ་བ་རྡོ་རྗེའི་ཡེ་ཤེས་བསྒྲུབ་པ་རོལ་པས་མཉེས་པར་བྱ་བའི་ཐབས་དེ་ཁོ་ན་ཉིད་ཐམས་ཅད་ཀྱི་འབྱུང་གནས་སྟང་སྟབས་ཀྱིས་རྣམ་པར་
རྒྱལ་བའི་ཐབས་དང་ཤེས་རབ་བདེ་བ་ཆེན་པོའི་རྡོ་རྗེས་སྒྲོལ་བ། རོལ་པས་བཞད་ཅིང་བསྒྱིངས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། སྒྱུ་འཕྲུལ་དྲ་བའི་རྒྱུད་ཀྱི་དམ་ཚིག་དང་། དཀྱིལ་འཁོར་
དང་རི་མོའི་གཟུགས་དང་། བསྒོམ་པ་དང་བཟླས་བརྗོད་དང་སྟང་སྟབས་དང་། སྦྱོར་བ་དགོངས་པ་དང་། ཏིང་ངེ་འཛིན་དང་དབབ་པ་དང་། བསྐྲད་པ་དང་དབྲོག་པ་དང་དགུག་པ་དང་བཅིང་བ་དང་བརྡེག་པ་དང་བསྡིགས་པ་དང་
ཉམ་ཐག་པར་བྱ་བ་དང་བཅད་པ་དང་བསྲེག་པ་དང་། བཀང་བ་དང་བསྐྲུན་པ་དང་དབང་བསྐུར་བ་དང་སྦྱིན་པ་དང་། སློབ་དཔོན་དང་སློབ་མ་གཟུང་བ་དང་། གསང་སྔགས་མང་པོའི་འཇོག་ཚུལ་རྣམས་ངས་བཤད་པར་བྱའོ། །
དེའི་ཕྱིར་ཁྱོད་ཀྱིས་ཀྱང་ཏིང་ངེ་འཛིན་མཆོག་ལ་སྙོམས་པར་ཞུགས་ལ་ཉོན་ཅིག །དེ་ནས་དེ་བཞིན་གཤེགས་པ་དེ་དག་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་དང་། གཞན་ཡང་གང་དག་འཁོར་དུ་འདུས་པ་

90-1-60a

དེ་དག་ཐམས་ཅད་ཀྱིས་ཆོས་ཀྱི་འབེལ་བའི་གཏམ་མཉན་པར་བརྩམས་སོ། །དེ་ལ་རེ་ཤིག་དང་པོ་དངོས་གྲུབ་ནི་སློབ་དཔོན་ཆོས་ཀྱི་རྗེས་སུ་འབྲང་བ་ཡིན་པས། སློབ་དཔོན་མེད་པར་གྱུར་ན་ནི། །དངོས་གྲུབ་ཐོབ་
པར་མི་འགྱུར་བས། །སློབ་དཔོན་མཚན་ཉིད་བཤད་པར་བྱ། །ཡེ་ཤེས་སྙིང་པོ་ཁྱོད་ཉོན་ཅིག །བརྟན་ཞིང་དུལ་ལ་བློ་གྲོས་ལྡན། །བཟོད་ལྡན་དྲང་ཞིང་གཡོ་སྒྱུ་མེད། །གསང་སྔགས་རྒྱུད་ཀྱི་སྦྱོར་ཤེས་པས། །དཀྱིལ་
འཁོར་བྲི་བའི་ལས་བྱའོ། །དེ་ཉིད་བཅུ་ནི་ཡོངས་ཤེས་ཤིང་། །སེམས་ཅན་ཀུན་ལ་མི་འཇིགས་སྦྱིན། །ཐེག་པ་ཆེ་ལ་རྟག་དགའ་བ། །དེ་ནི་སློབ་དཔོན་ཡིན་པར་གསུངས། །ཕྱི་རོལ་བསྟན་བཅོས་ཡོངས་ཤེས་ཤིང་། །
ཉན་ཐོས་རྣམས་ཀྱིས་ལམ་འགྲོ་དང་། །གསང་བ་དེ་ཉིད་བསྡུ་བ་དང་། །ཐེག་པ་ཆེན་པོ་མི་ཤེས་པ། །སྙིང་རྗེ་ཡོད་པ་མ་ཡིན་དང་། །དད་མེད་བརྩོན་འགྲུས་མི་ལྡན་ལ། །རྟག་ཏུ་ངན་པའི་ཚུལ་སྤྱོད་དང་། །བསྟན་བཅོས་
རྣམས་ལ་སྨོད་པ་མིན། །གོང་དུ་བསྟན་པའི་མཚན་ཉིད་དང་། །ལྡན་ན་སློབ་དཔོན་ཡིན་པར་གཟུང་། །དེ་ཡི་དཀྱིལ་འཁོར་བྲི་བ་དང་། །དེ་ཉིད་ཀྱིས་ནི་རྒྱུད་རྣམས་བསྟན། །དེ་ཡིས་བསྟན་པའི་གསང་སྔགས་དང་། །འགྲུབ་
འགྱུར་འདི་ལ་ཐེ་ཚོམ་མེད། །དགེ་དང་སྡོམ་ལ་དགའ་བ་དང་། །རྟག་ཏུ་བླ་མ་ལ་གུས་དང་། །རྒྱུན་དུ་ལྷ་རྣམས་མཆོད་བྱེད་པའི། །ཡོན་ཏན་ལྡན་ན་སློབ་མ་ཡིན། །སློབ་དཔོན་ཅི་འདྲ་བལྟ་ཞེ་ན། །བླ་མ་སངས་རྒྱས་ཀུན་དང་མཉམ། །
དེ་ཉིད་རྟག་ཏུ་རྡོ་རྗེ་འཆང་། །དེ་བཞིན་གཤེགས་པ་རིན་ཆེན་ཏོག །དེ་ནི་ཡེ་ཤེས་རྒྱ་མཚོ་ཆེ། །ཡིད་བཞིན་ནོར་བུ་རིན་ཆེན་བཞིན། །སློབ་དཔོན་གྱི་ནི་ཡོན་ཏན་གཟུང་། །སྐྱོན་རྣམས་ནམ་ཡང་མ་ཡིན་ནོ། །ཡོན་ཏན་
བཟུང་བས་དངོས་གྲུབ་ཅིང་། །སྐྱོན་རྣམས་ཀྱིས་ནི་དངོས་གྲུབ་ཉམས། །དེ་ཡི་གྲིབ་མ་མི་འགོམ་སྟེ། །མཆོད་རྟེན་བཤིག་དང་འདྲ་བར་གསུངས། །རྒྱུ་དང་མི་རྒྱུ་གསང་བ་ཡི། །དམ་པ་གང་ཡིན་སྤངས་པར་འགྱུར། །

90-1-60b

སློབ་དཔོན་སྨོད་པར་བྱེད་པ་དག །རྨི་ལམ་དུ་ཡང་མཐོང་མི་བྱ། །སློབ་དཔོན་སྨོད་པ་གང་ཡིན་ཏེ། །བགེགས་དང་ལོག་འདྲེན་རྣམས་ཀྱིས་གཟུང་། །ངན་པ་གཏུམ་པོ་ལས་བྱེད་པ། །མཁས་པས་རྟག་ཏུ་སྤངས་བར་བྱ། །
མནར་མེད་ཤིན་དུ་སྐྱི་གཡའ་བའི། །དམྱལ་བ་བསྟན་པ་གང་ཡིན་པ། །དེར་ནི་སློབ་དཔོན་སྨོད་བྱེད་པ། །གནས་པར་འགྱུར་ཞེས་རབ་ཏུ་གསུངས། །དེ་ཕྱིར་ཀུན་གྱིས་རབ་བསྒྲིམས་ཏེ། །བསམ་ཡས་འབྲས་བུ་སྨིན་བྱེད་པའི། །
སངས་རྒྱས་འབྲས་བུ་འདོད་བྱེད་པའི། །སེམས་ཅན་དད་པ་ལྡན་པས་མཆོད། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས། འདི་ནི་འཇུག་པ་རིམ་པར་ཕྱེ་བའི་ལེའུ་སྟེ་དང་པོའོ།། །། 
དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་གཟིགས་ནས་སྒྱུ་འཕྲུལ་དྲ་བ་ཆེན་པོ་ཡེ་ཤེས་བསྒྱིངས་པ་གསང་བའི་བྱིན་བརླབས་ཀྱི་མཆོག་རྡོ་རྗེ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས་ཀྱང་རྡོ་རྗེ་འཆང་ལ་བཀའ་སྩལ་པ། ཕྱག་ན་རྡོ་རྗེ་རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བའི་དཀྱིལ་འཁོར་གྱི་རྒྱལ་པོ་ཆེན་པོ་དཀྱིལ་འཁོར་ཐམས་ཅད་ཀྱི་
ཕྱི་མའི་ཡང་ཕྱི་མ་ཡེ་ཤེས་ཆེན་པོའི་སྙིང་པོ་འབར་བ་རྡོ་རྗེ་བསྙེན་བཀུར་བྱེད་པ་ཞེས་བྱ་བའི་དཀྱིལ་འཁོར་འདིར་དབང་བསྐུར་ན། དཀྱིལ་འཁོར་ཐམས་ཅད་དུ་དབང་བསྐུར་བར་འགྱུར་བས་ཕྱག་ན་རྡོ་རྗེ་སེམས་ཅན་གང་ལ་ལས་ཚོན་རྩི་མཐོང་
བ་དེ་དག་ཀྱང་དེ་བཞིན་གཤེགས་པ་ཐམས་ཅད་ལ་ཕྱག་བྱས་པ་དང་། མཆོད་པ་བྱས་པར་འགྱུར་བ་ལ་ཡང་དག་པར་ཞུགས་པ་དེ་དག་ནི་དེ་བཞིན་གཤེགས་པའི་སངས་རྒྱས་ཀྱི་ཞིང་དུ་སངས་རྒྱས་ཉིད་ཀྱི་གྲངས་སུ་འགྲོ་བར་འགྱུར་
བ་དེ་ཉོན་ཅིག །དང་པོ་ཁོ་ནས་ཡོངས་སུ་གཟུང་བ་བྱས་ཏེ། སློབ་དཔོན་གྱིས་ལྷ་ཉིད་ཀྱི་སྟང་སྟབས་སུ་འདུག་ལ། ལག་པ་གཡས་པ་བསྒྲིམས་ཏེ་རྡོ་རྗེ་གསོར་ཞིང་། ལག་པ་གཡོན་པས་དྲིལ་བུ་གསིལ་ནས་རྡོ་རྗེ་འགྲོས་ཀྱིས་

90-1-61a

ཡོངས་སུ་བསྐོར་བར་བྱའོ། །རྒྱན་ཐམས་ཅད་ཀྱིས་བརྒྱན་པ་ཁྲོ་བོའི་ང་རྒྱལ་གྱིས་ཧཱུྃ་ཞེས་བརྗོད་ཅིང་དཀྱིལ་འཁོར་གྱི་ས་གཞི་བརྗིད་པ་གིས་བསྐོར་ནས་ཀྱང་ཁྲོ་བོའི་སྐུར་བསྒོམ་ནས་སྡང་བའི་ལྷ་དང་། ལྷ་མ་ཡིན་
དང་གསང་བ་པ་རྣམས་ལ་ཚིག་འདི་རབ་ཏུ་བརྗོད་པར་བྱའོ། །སློབ་དཔོན་མིང་འདི་ཞེས་བྱ་བས་སློབ་མ་ཆེ་གེ་མོ་ཞིག་རྫོགས་པའི་བྱང་ཆུབ་རྫོགས་པར་བྱ་བ་དང་། སེམས་ཅན་ཐམས་ཅད་ཀྱིས་བླ་ན་མེད་པའི་ཡེ་ཤེས་ཐོབ་པར་བྱ་
བའི་ཕྱིར། ས་ཕྱོགས་འདིར་དཀྱིལ་འཁོར་གྱི་རྒྱལ་པོ་མིང་འདི་ཞེས་བྱ་བ་བྲི་ཡིས། ལྷ་དང་ལྷ་མ་ཡིན་དང་། གནོད་སྦྱིན་དང་སྲིན་པོ་དང་ཡི་དགས་དང་། ཤ་ཟ་དང་རྗེད་བྱེད་དང་འབྱུང་པོ་དང་། མཁའ་འགྲོ་མ་དང་གནོན་པོ་དང་། 
ནམ་མཁའ་ལྡིང་དང་མི་འམ་ཅི་དང་། རིག་སྔགས་གྲུབ་པ་དང་། རྒན་པོའམ། རྒན་མོ་གཡོག་དང་འཁོར་དུ་བཅས་པ་གང་དག་འཁོད་པ་རྣམས་དེངས་ཤིག །འདི་ལྟར་རྡོ་རྗེ་འཆང་གི་བཀའ་ཐོས་ནས་མྱུར་བ་ཉིད་དུ་དེངས་
ཤིག །གང་དག་མི་འགྲོ་བ་དེ་དག་ནི་ཕྱག་ན་རྡོ་རྗེ་ཧཱུྃ་ཞེས་བྱ་བ་རབ་ཏུ་ཁྲོས་པའི་བཞིན་འབར་བ་ཅན་གྱིས་ཡེ་ཤེས་ཀྱི་རྡོ་རྗེ་འབར་བ་ཀུན་དུ་འབར་བས་མགོ་ཚལ་པ་རྒྱར་འགས་པར་འགྱུར་རོ་ཞེས་ལན་གསུམ་བརྗོད་ནས། སྟང་སྟབ་
ལ་གནས་བཞིན་དུ་ས་གཞི་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱའོ། །གཡས་བརྐྱང་བ་དང་། གཡོན་བརྐྱང་བ་དང་། ས་གའི་འདུག་སྟངས་དང་ཟླུམ་པོའི་འདུག་སྟངས་དང་། འཐུན་པའི་རྐང་སྟབས་དང་རུས་སྦལ་གྱི་རྐང་
སྟབས་དང་། རྡོ་རྗེ་གདེགས་པ་དང་། རྡོ་རྗེ་འཇོ་ཚུལ་དང་རྐང་པ་ཡ་གཅིག་གི་སྟངས་དང་སེང་གེའི་སྟབས་དང་སེང་གེ་གླལ་བ་དང་། བུང་བའི་འཕུར་བའི་སྟང་སྟབས་དང་རྡོ་རྗེ་སྒྲོག་དང་། རྡོ་རྗེ་གསོར་བ་དང་རྡོ་རྗེའི་སྟང་སྟབས་དང་། 
རྡོ་རྗེ་དགུག་པ་དང་རྡོ་རྗེ་གར་དང་། རྡོ་རྗེ་འཇིགས་སུ་རུང་བ་དང་། རྡོ་རྗེ་རོ་ལངས་མ་དང་རྡོ་རྗེ་ཐོ་བ་དང་། རྡོ་རྗེའི་བྱིན་བརླབས་དང་། རྡོ་རྗེའི་གདུ་བུ་དང་བུད་མེད་ཀྱི་སྒྱུ་འཕྲུལ་སྟང་སྟབས་དང་། རྡོ་རྗེའི་དྲ་བ་དང་། 

90-1-61b

སྟོབས་པོ་ཆེའི་འདེགས་པ་དང་། རྡོ་རྗེ་མཆེ་བ་དང་། རྡོ་རྗེ་གད་མོ་དང་། རྡོ་རྗེ་སྒྲ་དང་། རལ་གྲིའི་ཐབས་དང་། རྡོ་རྗེའི་ཐབས་དང་། འཁོར་ལོའི་ཚུལ་དང་། གཏུན་ཤིང་གི་ཚུལ་དང་། བ་དན་གྱི་ཚུལ་དང་། ཞགས་
པའི་ཚུལ་དང་། པད་མའི་ཚུལ་དང་། བེ་ཅོན་གྱི་ཚུལ་དང་། མི་འཇིགས་པའི་ཚུལ་དང་ལྕགས་ཀྱུའི་ཚུལ་དང་། འབྲས་བུའི་ཚུལ་དང་མདུང་ཐུང་གི་ཚུལ་དང་། གཞུའི་ཚུལ་དང་མདའ་བཟུང་བའི་ཚུལ་དང་། མདའ་འཕང་
བའི་ཚུལ་དང་། ཐག་མདུང་བསྐོར་བའི་ཚུལ་དང་། མཆོག་སྦྱིན་པའི་ཚུལ་དང་མདུང་གི་ཚུལ་དང་། མཚོན་རྩེ་གཅིག་པའི་ཚུལ་དང་ཕྱག་འཚལ་བའི་ཚུལ་དང་རྡོ་རྗེའི་འདུག་སྟངས་དང་། ཏིང་ངེ་འཛིན་གྱི་འདུག་སྟངས་དང་། 
རྡོ་རྗེ་སྐྱིལ་མོ་དཀྲུང་དང་། པད་མའི་འདུག་སྟངས་དང་། སེམས་དཔའི་སྐྱིལ་མོ་དཀྲུང་དང་དཔའ་བོའི་འདུག་སྟངས་དང་། བཟང་པོའི་འདུག་སྟངས་དང་ཙོག་པུའི་འདུག་སྟངས་དང་། རྩེ་བའི་འདུག་སྟངས་དང་མདུན་དུ་དགུ་པ་དང་། ཕྱིར་
དགྱེ་བ་དང་མཐའ་ཡས་དང་། རྣམ་པར་རྒྱལ་བ་དང་སྤྲིན་སྒྲ་དང་། གསུས་པོ་ཆེ་དང་། རྒྱལ་བའི་ཕུར་བུས་གནས་པའི་བཅིང་བ་དང་ཕུར་བུ་བརྡུང་བ་དང་། དྲ་བ་དང་ར་བས་མཚམས་གཅད་པ་དང་། ཕྱོགས་བཅིང་བ་དེ་ལྟ་བུས། 
ས་གཞི་རྡོ་རྗེའི་རང་བཞིན་འོད་འབར་བའི་འཁྲིགས་པར་བསྒོམ་ཏེ། གཏན་ལ་དབབ་པར་བྱའོ། །རང་གི་མིང་ནས་སྨོས་ཏེ། ཧཱུྃ་ཞེས་བྱ་བའི་གསང་སྔགས་ཀྱི་སྒྲ་བརྗོད་ན་འཁོར་ལོ་ཐམས་ཅད་ཀྱི་བླ་ན་མེད་པར་འགྱུར་རོ། །
དེ་ནས་སའི་ལྷ་མོ་སྟ་གོན་དུ་གནས་པར་བྱ་བ་ནི། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །དངོས་གྲུབ་ཐམས་ཅད་ཐོབ་བྱའི་ཕྱིར། །
བདག་གིས་དཀྱིལ་འཁོར་འདྲི་བར་བྱ་ཞེས་ལན་གསུམ་བརྗོད་དོ། །དེ་ནས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྟ་གོན་དུ་གནས་པར་བྱ་སྟེ། ཐུགས་བརྩེར་གནས་པའི་དགོངས་པ་ཅན། །སངས་རྒྱས་བདག་ལ་དགོངས་

90-1-62a

སུ་གསོལ། །སྲས་དང་ལྷན་ཅིག་གཤེགས་ནས་ཀྱང་། །ས་གཞི་ཡོངས་སུ་གཟུང་བར་མཛོད། །དེ་ནས་འཁོར་ལོའི་དབུས་སུ་ཆོས་ཀྱི་དཀྱིལ་འཁོར་བྱས་ལ། མཐའ་ཀུན་དུ་ཡང་མཚན་ནས་སྨོས་ཏེ་ཐིག་ལེར་བྱའོ། །དེ་ལྟར་
སྤྱན་དྲངས་ཏེ་མཆོད་པས་མཉེས་པར་བྱས་ནས་ཕྱིར་བྱུང་སྟེ་ཕྱོགས་ཀྱི་གཏོར་མ་སྦྱིན་ནོ། །དེ་ནས་སེམས་ཅན་སྟ་གོན་དུ་གནས་པར་བྱ་སྟེ་སྤོས་ཆུས་སྤྱི་བོར་བསང་གཏོར་བྱས་ནས། ལག་པ་སྙིང་གར་བཀྲམ་ནས་སུ། །རྩེ་མོ་ལྔ་པ་རྒྱ་གྲམ་བྱ། །
གཡས་པས་བསྲུང་སྐུད་བཅིངས་ནས་སུ། །གཡས་ལག་སོ་ཤིང་ཀུ་ཤ་སྦྱིན། །དེ་ནས་འདུག་སྟེ་གསུམ་ལ་སྐྱབས་སུ་བཏང་བ་དང་། སྡིག་པ་ཀུན་དུ་བཤགས་པ་དང་། བསོད་ནམས་ཀྱི་རྗེས་སུ་ཡི་རང་བ་དང་། 
བདག་ཉིད་དབུལ་བ་དང་བྱང་ཆུབ་ཏུ་སེམས་བསྐྱེད་པར་བྱའོ། །དེ་ལ་འདི་ནི་སྐྱབས་སུ་འགྲོ་བ་ཡིན་ཏེ། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་བཤགས་པར་བགྱི། །འགྲོ་བའི་དགེ་
ལ་ཡི་རང་སྟེ། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་ལན་གསུམ་བརྗོད་དོ། །དེ་ནས་ཅི་ནུས་ཀྱིས་ཅི་འདོད་པའི་ཆོས་བཤད་པར་བྱའོ། །དེ་ནས་སྔར་བཤད་པ་བཞིན་དུ་མཉེས་པར་འགྱུར་བས་མཆོད་པའི་ཆོ་ག་
བཟང་པོ་བྱ་སྟེ། སླར་ཡང་གཤེགས་སུ་གསོལ་བར་བྱའོ། །དེ་ནས་ནང་དུ་ཞུགས་ལ་དཀྱིལ་འཁོར་གྱི་ས་གཞིར་གློ་གཡས་པས་ཉལ་ཏེ། རྨི་ལམ་བཟང་ངན་བལྟས་ནས་ཕྱི་དེ་ཉིན་དཀྱིལ་འཁོར་བྲི་བར་བྱའོ། །ཚོན་དང་ཐིག་ལས་
སངས་རྒྱས་ལྔའི། །ངོ་བོ་དག་ཀྱང་སྤྲུལ་པར་བྱ། །འདི་ནི་ཆོས་དབྱིངས་དག་པ་སྟེ། །སེམས་ཅན་རྣམས་ནི་རྣམ་གྲོལ་མཛད། །དེ་བཞིན་གཤེགས་པ་ཀུན་གྱི་གནས། །རྣམ་པར་སྣང་མཛད་རྒྱལ་བདག་སྟེ། །ཉེས་པ་
ཐམས་ཅད་རྣམ་སྤངས་པའི། །ཚོན་རྩི་དགྱེ་བ་བརྩམས་པར་བྱ། །དང་པོ་སློབ་དཔོན་ཉིད་ཀྱི་བགྱི། །དེ་ནས་ཀུན་དུ་སློབ་མས་བྱ། །དང་པོ་ས་གཞི་ཡོངས་གཟུང་བ། །གཉིས་པ་སྟ་གོན་གནས་པ་སྟེ། །ནུབ་གསུམ་པ་ནི་འཇུག་

90-1-62b

པ་ཡིན། །ཚོན་སྣ་ལྔ་པའི་སྲས་བུ་ཡིས། །ཁྲུ་སྟོང་པ་འམ་ལྔ་བརྒྱ་བར། །དཀྱིལ་འཁོར་དམ་པ་ཐིག་གདབ་བོ། །ཡང་ན་ཁྲུ་ལྔ་ཁྲུ་དོ་པ་འམ་ཁྲུ་གང་བའི་བར་དུ་བྱའོ། །གྲུ་བཞི་པ་ལ་སྒོ་བཞི་པ། །རྟ་བབས་
བཞིས་ནི་བརྒྱན་པ་ཡི། །དབུས་སུ་འཁོར་ལོ་ལེགས་པར་བྲི། །དཀྱིལ་དུ་རྣམ་པར་སྣང་མཛད་གཞག །ཤར་ཕྱོགས་སུ་ནི་མི་འཁྲུགས་པ། །ལྷོ་ཕྱོགས་སུ་ནི་རིན་ཆེན་འབྱུང་། །ནུབ་ཕྱོགས་སུ་ནི་འོད་དཔག་མེད། །
བྱང་ཕྱོགས་སུ་ནི་དོན་གྲུབ་རྣམས། །འཁོར་ལོ་གྲྭར་ནི་ལྷ་མོ་བཞི། །དངོས་གྲུབ་སྦྱིན་པར་མཛད་པར་བྲི། །དབང་བདག་གི་ཕྱོགས་སུ་ནི་སྤྱན་ནོ། །མེའི་ཕྱོགས་སུ་ནི་མཱ་མ་ཀཱིའོ། །བདེན་བྲལ་ཕྱོགས་སུ་ནི་གོས་དཀར་ཅན་ནོ། །
རླུང་གི་ཕྱོགས་སུ་ནི་ལྷ་མོ་སྒྲོལ་མའོ། །རྡོ་རྗེ་ཤུགས་ཀྱིས་ཕྱིར་ཕྱུང་ནས་རིམ་པ་གཉིས་པ་ལ་ཤར་ཕྱོགས་སུ་ནི་རྡོ་རྗེ་སེམས་མ། ལྷོར་རྡོ་རྗེ་རིན་ཆེན་མ། ནུབ་ཏུ་རྡོ་རྗེ་ཆོས་མ། བྱང་དུ་རྡོ་རྗེ་ལས་མ་རྣམས་བྲིའོ། །
གྲྭར་རྣམས་སུ་བསྐུལ་བྱེད་མ་དང་། རིན་ཆེན་སྒྲོལ་མ་དང་། ཁྲོ་གཉེར་ཅན་དང་། རྡོ་རྗེ་ལུ་གུ་རྒྱུད་རྣམས་སོ། །དེ་ནས་ཡང་འགྱིང་བག་ཏུ་ལངས་ཏེ། རྡོ་རྗེ་ཤུགས་ཀྱིས་ཕྱིར་བྱུང་ནས་རིམ་པ་གསུམ་པ་ལ། ཤར་ཕྱོགས་སུ་
བྱང་ཆུབ་སེམས་དཔའ་བྱམ་པ་དང་། འཇམ་དཔལ་དང་སྤོས་ཀྱི་གླང་པོ་དང་། ཡེ་ཤེས་ཏོག་རྣམས་བྲིའོ། །ལྷོ་ཕྱོགས་སུ་བཟང་སྐྱོང་དང་། བློ་གྲོས་རྒྱ་མཚོ་དང་བློ་གྲོས་མི་ཟད་པ་དང་། སྤོབས་པ་བརྩེགས་པ་རྣམས་བྲིའོ། །
ནུབ་ཕྱོགས་སུ་ནི་མཐུ་ཆེན་ཐོབ་དང་། ངན་སོང་ཐམས་ཅད་སྤོང་བ་དང་། མྱ་ངན་གྱི་མུན་པ་ཐམས་ཅད་ངེས་པར་འཇོམས་པའི་བློ་གྲོས་དང་། དྲ་བ་ཅན་གྱི་འོད་རྣམས་བྲིའོ། །བྱང་ཕྱོགས་སུ་ཟླ་འོད་དང་། འོད་དཔག་
མེད་དང་། ནམ་མཁའ་མཛོད་དང་། སྒྲིབ་པ་ཐམས་ཅད་རྣམ་པར་སེལ་བ་རྣམས་བྲིའོ། །ཤར་སྒོར་ནི་གཤིན་རྗེ་མཐར་བྱེད་དོ། །ལྷོར་སྒོར་ནི་ཤེས་རབ་མཐར་བྱེད་དོ། །ནུབ་སྒོར་ནི་པད་མ་མཐར་བྱེད་དོ། །

90-1-63a

བྱང་སྒོར་ནི་བགེགས་མཐར་བྱེད་དོ། །གྲྭ་རྣམས་སུ་ནི་མི་གཡོ་བ་དང་། འདོད་པའི་རྒྱལ་པོ་དང་། བེ་ཅོན་སྔོན་པོ་དང་། སྟོབས་པོ་ཆེའོ། །ཟུར་རྣམས་སུ་ནི་རྡོ་རྗེ་བྲིའོ། །སྒོའི་ནང་ལོགས་སུ་ཡང་རྡོ་རྗེ་བྲིའོ། །
འཁོར་ལོ་ནི་ཚོན་རྩི་དཀར་པོས་བྲིའོ། །གཉིས་པ་ནི་ཚོན་རྩི་དཀར་པོ་དང་། སེར་པོ་དང་སྔོན་པོ་གསུམ་གྱིས་བྲིའོ། །གསུམ་པ་ནི་སྣ་ལྔས་བྲི་བར་བྱ་སྟེ། དེ་ལྟ་བུ་ནི་དཀྱིལ་འཁོར་ཆེན་པོ་ཡིན་ནོ། །དེ་ནས་དབང་བསྐུར་བའི་དོན་
དུ་དཀྱིལ་འཁོར་གྲུ་བཞི་པ་སྒོ་བཞི་དང་ལྡན་པ་རིམ་པ་གཉིས་པར་བྱའོ། །དབུས་སུ་ནི་པད་མ་འདབ་མ་བརྒྱད་པ་སྙིང་པོ་དང་བཅས་པ་བྲིའོ། །སྣམ་བུ་གཉིས་པ་ལ་ཤར་ཕྱོགས་སུ་ནི་རྡོ་རྗེའོ། །ལྷོ་ཕྱོགས་སུ་ནི་རིན་པོ་ཆེ། ནུབ་
ཕྱོགས་སུ་ནི་པད་མ། བྱང་ཕྱོགས་སུ་ནི་རལ་གྲི་སྟེ། དེ་ལྟ་བུར་དཀྱིལ་འཁོར་བྲི་བར་བྱའོ། །དེ་ནས་སློབ་དཔོན་གྱིས་ལུས་ལེགས་པར་བཀྲུས་ཏེ། སྤོས་ཀྱིས་བསྐུས་ནས་ལེགས་པར་བརྒྱུས་པའི་མེ་ཏོག་གི་ཕྲེང་བ་མགོ་
ལ་བཅིངས་ནས་མགུལ་པ་དར་གྱིས་བཅིངས་པ་ལ། །ལྡུམ་བུ་ཡིས་ནི་ཁ་བཀབ་པ། །རིན་ཆེན་སྨན་འབྱུང་སྣ་ལྔ་དང་། །སྤོས་ཆུ་ཡིས་ནི་བཀང་བ་དང་། །བུམ་པ་མངོན་པར་བསྔགས་པར་བྱ། །རྣམ་རྒྱལ་བུམ་པ་དཀྱིལ་འཁོར་
གྱི། །བདག་པོ་ལྷ་མོ་རྣམས་ཀྱི་བཞི། །ལྷ་རྣམས་ཀུན་གྱི་བུམ་པ་བཞི། །སྒོ་ཡི་ཕྱོགས་ཀྱི་བུམ་པ་ནི། །ལས་ཀུན་བྱེད་པས་བཟླས་བརྗོད་དོ། །སེམས་ཅན་ཀུན་གྱིས་བསང་གཏོར་བྱ། །ཡང་ན་ཀུ་ཤའི་ཆུན་པོས་བྱ། །དེ་ནས་བུམ་པ་
མངོན་པར་བསྔགས་ཏེ་ལྷ་བཤོས་དང་གཏོར་མ་ཕུལ་ནས་མེ་ཏོག་དང་བདུག་པ་དང་། དྲི་དང་ཕྲེང་བ་དང་མཆོད་ཡོན་དང་། ཞབས་བཀྲུ་བ་ལ་སོགས་པ་དབུལ་ལོ། །དེ་རྣམས་ཕུལ་ནས་བུམ་པ་རྣམས་གྲྭར་གཞག་པར་བྱའོ། །
རྣམ་པར་རྒྱལ་བའི་བུམ་པ་ནི་དབུས་སུ་སྤྱན་དྲང་བར་བྱའོ། །དེ་བཞིན་གཤེགས་པ་ལ་སོགས་པ་དཀྱིལ་འཁོར་གྱི་ལྷ་རྣམས་སྤྱན་དྲངས་ནས་གསལ་བར་བྱ་སྟེ། གཞུག་པ་དང་བསྡམ་པ་དང་། དབང་དུ་བྱ་སྟེ། ཕུར་བུ་དང་། 

90-1-63b

ར་བ་དང་། དྲ་བས་ཕྱོགས་བཅིངས་བ་དང་། མཚམས་གཅད་པ་བྱས་ལ། མཆོད་ཡོན་དང་ཞལ་བསིལ་དང་། གདན་དང་མེ་ཏོག་དང་། བདུག་པ་ལ་སོགས་པ་ཡང་བསྔོས་ཏེ་ཕུལ་ནས་ཕྱག་རྒྱའི་ཚོགས་རང་རང་ལ་
བསྟན་པར་བྱའོ། །བསྟོད་པ་དང་རྡོ་རྗེའི་གླུ་དང་། དྲིལ་བུ་བསིལ་བའི་སྒྲ་དང་། སིལ་སྙན་དང་གླིང་བུ་དང་། རྒྱུད་ཀྱི་སྒྲའི་ཁྱད་པར་ཡང་དབུལ་ལོ། །རོལ་མོའི་ཁྱད་པར་གཞན་རྣམས་ཀྱིས་ཀྱང་བསྟོད་པར་བྱའོ། །བསྟོད་ནས་
བཟོད་པར་གསོལ་ཏེ་དངོས་གྲུབ་ཐམས་ཅད་ཀྱི་ཕྱིར་གསོལ་བ་གདབ་བོ། །དེ་ནས་སློབ་དཔོན་བདག་ཉིད་ཞུགས་ཏེ། དེའི་འོག་ཏུ་སློབ་མ་གཞུག་གོ། །དེ་ནས་སེམས་ཅན་ཐམས་ཅད་སྙིང་པོ་འདི་དང་ཕྱག་རྒྱས་གནས་ལྔར་བསྲུང་ཞིང་
གནས་ལྔར་ཆོ་ག་བྱའོ། །ཧཱུཾ་ཛི་ན་ཛིན། ། ཨཱཿཨཱ་རོ་ལིཀ ། ཧཱུྃ་བཛྲ་དྷྲྀག ། སྭཱ་རཏ་ན་དྷྲྀག ། ཧཱ་པྲཛྙཱ་དྷྲྀག ། དེ་ནས་ཚིགས་སུ་བཅད་པ་འདིས་གཞུག་པར་བྱ་སྟེ། རྡོ་རྗེ་ཡེ་ཤེས་ཐོབ་བྱེད་པའི། །དེ་བཞིན་གཤེགས་པ་ཐམས་ཅད་ཀྱི། །
ཕོ་བྲང་དཀྱིལ་འཁོར་སྙིང་པོ་འདིར། །བདག་གིས་སློབ་མ་གཞུག་པར་བྱ། །རྡོ་རྗེ་སེམས་མས་མེ་ཏོག་གཏོར་བར་བགྱི་སྟེ། པྲ་ཏཱིཙྪ་བཛྲ་ཧོ། ཚིགས་སུ་བཅད་པ་འདིས་གདོང་གཡོགས་དགྲོལ་ལོ། །དེ་རིང་དད་པའི་ཤུགས་ཀྱིས་ནི། །དཀྱིལ་
འཁོར་དེང་འདིར་བལྟ་བར་གྱིས། །སངས་རྒྱས་གདུང་གི་རིགས་སུ་འཁྲུངས། །སྔགས་དང་ཕྱག་རྒྱས་བྱིན་གྱིས་བརླབས། །དངོས་གྲུབ་ཐམས་ཅད་ཕུན་སུམ་ཚོགས། །དམ་ཚིག་མཆོག་ཏུ་གྲུབ་པར་བྱེད། །རྡོ་རྗེ་པད་མ་རོལ་པའི་མཆོག །
སྔགས་ཀྱི་བདག་ཉིད་ཤེས་པར་བྱ། །དེ་ཡི་སྙིང་པོ་འདི་ཡིན་ཏེ། །པ་ཤྱ་བཛྲ། གང་ལ་མེ་ཏོག་བབ་པ་དེ་དེའི་ལྷ་ཡིན་ནོ། །དེ་ནས་དབང་བསྐུར་སྦྱིན་བྱ་སྟེ། །དྲི་དང་མེ་ཏོག་ཕྲེང་བས་བརྒྱན། །གོས་དང་རྒྱན་གྱིས་ལེགས་པར་བརྒྱན། །སྟེང་དུ་བླ་རེ་བྲི་
བར་བྱ། །གདུགས་དང་རྒྱལ་མཚན་བ་དན་དང་། །ལྷ་དང་ཚངས་པའི་སྐུད་པ་དང་། །གདུ་བུ་དག་དང་སྐ་རགས་དང་། །བཀྲ་ཤིས་ཡོ་བྱད་རྣམས་ཀྱིས་ཀླུབས། །སློབ་མ་སྡིག་དང་བྲལ་བ་ལ། །སློབ་དཔོན་གྱིས་ནི་

90-1-64a

དབང་བསྐུར་རོ། །དང་པོར་རྣམ་རྒྱལ་བུམ་པ་ཡིས། །དེ་ནས་ལྷ་མོ་བཞི་རྣམས་དང་། །ལྷ་རྣམས་ཀུན་གྱི་བཞི་པོ་ཡིས། །བཀྲ་ཤིས་ཚིགས་བཅད་གླུ་སྒྲ་དང་། །རྡོ་རྗེ་དྲིལ་བུ་བསིལ་བ་ཡིས། །སྐྱོབ་པ་ཀུན་གྱིས་མངོན་
སུམ་དུ། །ཏིལ་གྱི་གང་བུ་བཞིན་གང་བའི། །རྒྱལ་བས་བུམ་པ་བཟུང་ནས་ནི། །དེ་ཉིད་ལ་ནི་དབང་བསྐུར་བྱ། །དཀྱིལ་འཁོར་དེ་ཉིད་རིག་པར་བསམ། །དེ་ལྟ་བུར་ནི་བསམས་ནས་ཀྱང་། །ཆོས་ཀྱི་མཚན་ཉིད་བསྟན་པར་
བྱ། །ཐུར་མ་མེ་ལོང་འཁོར་ལོ་དང་། །དུང་དང་རྡོ་རྗེ་གླེགས་བམ་དང་། །གསེར་དག་དང་ནི་དངུལ་རྣམས་ཀྱིས། །མི་ཤེས་རབ་རིབ་ལ་སོགས་པ། །ཅི་ནུས་པར་ནི་བསལ་བར་བྱ། །ཐུར་མ་ལ་སོགས་མེད་ན་ཡང་། །ཕྱག་རྒྱས་གཟུགས་
རྣམས་བསྟན་པར་བྱ། །དེ་ནས་དམ་ཚིག་བསྟན་པར་བྱ། །དེ་རིང་ཕྱིན་ཆད་བུ་ཁྱོད་ཀྱིས། །སྲོག་དང་ལུས་ལ་བབ་གྱུར་ཀྱང་། །དམ་པའི་ཆོས་དང་བྱང་ཆུབ་སེམས། །སློབ་དཔོན་ལ་ནི་བརྙས་མི་བྱ། །རྡོ་རྗེ་སྤུན་རྣམས་བཀུར་སྟི་ཞིང་། །
སྡང་ལ་བྱམས་ཤིང་ཆགས་བྲལ་བ། །ནམ་ཡང་བྱ་བ་མ་ཡིན་ནོ། །དེ་ལྟར་བྱས་ན་སངས་རྒྱས་ཀྱིས། །ཁྱོད་ནི་དམྱལ་བའི་ནང་དུ་འདོར། །དེ་ནས་བླ་མས་ཡོན་བླངས་ཏེ། །ས་དང་ཡིད་འོང་ཆུང་མ་དང་། །རིན་ཆེན་གསེར་དང་ནོར་བུ་
འབར། །མུ་ཏིག་བྱི་རུ་ལ་སོགས་དང་། །ལུས་ཀྱང་དབུལ་དུ་གཞུག་པར་བྱ། །བླ་མ་ལ་ནི་གུས་པ་ཡི། །སློབ་མས་དེ་བཞིན་ཁོ་ནར་བྱ། །བླ་མ་དེ་ནི་མགུ་བར་བྱ། །བླ་མ་མགུ་བ་དངོས་གྲུབ་སྟེ། །གཞན་དུ་མིན་ཞེས་ཐུབ་
པས་གསུང་། །དེ་ནས་སློབ་མ་བསླང་སྟེ། སངས་རྒྱས་ཐམས་ཅད་ཀྱི་སྤྱན་སྔར་མཆོད་པ་བྱ་སྟེ། སྦྱིན་སྲེག་གི་ལས་བྱའོ། །དེ་ནས་ཆོ་ག་མཐོང་བས་ལས་བྱས་ནས། །སྦྱིན་སྲེག་བཟླས་བརྗོད་མཆོད་པ་དང་། །དེ་བཞིན་
བསྒོམ་པའི་རིམ་པའི་ཚུལ། །ཞི་དང་རྒྱས་པའི་རིམ་པ་ཡིས། །ལས་རྣམས་ཐམས་ཅད་ཚིམ་པར་བྱ། །དེ་ནས་དུས་གསུམ་གཤེགས་པ་ཡི། །རྒྱལ་བ་ཐམས་ཅད་གཤེགས་སུ་གསོལ། །བསྒྲིམས་ཏེ་ཚོན་རྩི་རྣམས་

90-1-64b

བསྡུས་ནས། །ཆུ་ཀླུང་ཆེན་པོར་བསྐུར་ནས་ཀྱང་། །བ་ཡི་ལྕི་བས་བྱུག་པར་བྱ། །དཀྱིལ་འཁོར་གྱི་ནི་ཡོ་བྱད་ཀུན། །སློབ་དཔོན་ཉིད་ཀྱིས་བསྡུ་བར་བྱ། །སློབ་མས་ཅུང་ཟད་མི་སྤྱད་དོ། །དེ་ནི་དམ་ཚིག་ཉམས་པར་
འགྱུར། །སློབ་དཔོན་གྱིས་ཀྱང་ཅི་རིགས་པར། །བདག་ཉིད་འདོད་པ་སྤྱད་པར་བྱ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་འདི་ནི་དཀྱིལ་འཁོར་རིམ་པར་ཕྱེ་བའི་ལེའུ་སྟེ་གཉིས་པའོ།། །། དེ་ནས་
བཅོམ་ལྡན་འདས་རྣམ་པར་སྣང་མཛད་རྡོ་རྗེ་དེ་བཞིན་གཤེགས་པས་ཡང་གསང་སྔགས་ཀྱི་འཁོར་ལོ་ལ་འཇུག་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས་ཕྱག་ན་རྡོ་རྗེ་
ལ་བཀའ་སྩལ་པ། ཕྱག་ན་རྡོ་རྗེ་གསང་སྔགས་ཀྱི་སྙིང་པོའི་ཡི་གེ་རྣམས་ཉོན་ཅིག །ཕྱག་ན་རྡོ་རྗེས་གསོལ་པ། སེམས་ཅན་ཐམས་ཅད་ལ་སྨོན་པའི་སླད་དུ་བཅོམ་ལྡན་འདས་ཀྱིས་བཤད་དུ་གསོལ། བདེ་བར་
གཤེགས་པས་བཤད་དུ་གསོལ། ཨོཾ་ལས་རྣམ་པར་སྣང་མཛད་དོ། །ཨོཾ་ཧཱུྃ་མི་འཁྲུགས་པའོ། །ཨོཾ་ཧྲཱི་རིན་ཆེན་འབྱུང་གནས་སོ། །ཨོྂ་ཧྲཱིཿའོད་དཔག་མེད་དོ། །ཨོཾ་ཁྃ་དོན་ཡོད་གྲུབ་པའོ། །ཨོཾ་ག་ག་ན་ལོ་ཙ་ནི་ཧཱུྃ་སྤྱན་གྱིའོ། །ཨོྂ་ཀི་རི་ཀི་རི་
མཱ་མ་ཀཱི་ཧཱུྃ་མཱ་མ་ཀཱིའོ། །ཨོཾ་ཀ་ཊེ་བི་ཀ་ཊེ་ཀ་ཊྃ་ཀ་ཊེ་ཀ་རོ་ཊི་བཱིརྱ་སྭཱ་ཧཱ། གོས་དཀར་མོའོ། །ཨོཾ་ཏཱ་རེ་ཏུཏ་ཏཱ་རེ་ཏུ་རེ་སྭཱ་ཧཱ། སྒྲོལ་མའོ། །ཨོཾ་སཏྭ་བཛྲ་ཧཱུྃ། རྡོ་རྗེ་སེམས་མའོ། །ཨོཾ་རདྣ་བཛྲི་ཧཱུྃ། རྡོ་རྗེ་རིན་ཆེན་མའོ། །ཨོྂ་དྷརྨ་བཛྲི་ཧཱུྃ། རྡོ་རྗེ་ཆོས་
མའོ། །ཨོཾ་ཀརྨ་བཛྲི་ཧཱུྃ། རྡོ་རྗེ་ལས་མའོ། །ཨོྂ་ཙ་ལེ་ཙུ་ལེ་ཙུན་དེ་སྭཱ་ཧཱ། སྐུལ་བྱེད་མའོ། །ཨོྂ་རཏ་ནཱ་ལོ་ཀི་རཏ་ནཱ་ཛྭཱ་ལི་ནི་སྭཱ་ཧཱ། རིན་ཆེན་སྒྲོན་མའོ། །ཨོཾ་བྷྲྀ་ཀུཊྚི་བྷྲི། ཁྲོ་གཉེར་མའོ། །ཨོྂ་བཛྲ་ཤྲྀ་མ་ཁ་ལེ་ཧཱུྃ་ཕཊ་སྭཱ་ཧཱ། རྡོ་རྗེ་ལུ་གུ་
རྒྱུད་མའོ། །ཨོྂ་མཻ། བྱམས་པའོ། །ཨོྂ་མུྃ།། འཇམ་དཔལ་ལའོ། །ཨོཾ་ས་མན་ཏ་བྷ་དྲ་ཧཱུྃ། ཀུན་དུ་བཟང་པོའོ། །ཨོཾ་གན་དྷ་དྷ་སྟི་ནི་ཧཱུྃ། སྤོས་ཀྱི་གླང་པོའོ། །

90-1-65a

ཨོཾ་ཛྙཱ་ན་ཀེ་ཏུ་བ་ཏི་ཧཱུྃ། ཡེ་ཤེས་ཏོག་གོ། །ཨོཾ་བྷ་དྲ་བྷ་ཏི་བྷ་དྲ་པཱ་ལ་ཧཱུྃ། བཟང་སྐྱོང་ངོ་། །ཨོཾ་སཱ་ག་རེ་མ་ཧཱ་སཱ་ག་རེ་ཧཱུྃ། བློ་གྲོས་རྒྱ་མཚོའོ། །ཨོྂ་ཨཀྵ་ཡེ་ཧཱུྃ་ཧཱུྃ་ཨཀྵ་ཡཀྵ་ཡ་ཀརྨ་ཡཱ་པ་ར་ཎ་པ་རི་ཤོ་དྷ་ནི་སྭཱ་ཧཱ། 
བློ་གྲོས་མི་ཟད་པའོ། །ཨོཾ་པྲ་ཏི་བྷཱ་ན་པྲ་ཏི་བྷཱ་ན་ཀུྰ་ཊེ་ཧཱུྃ། སྤོབས་པ་བརྩེགས་པའོ། །ཨོཾ་སྠ་མེ་མ་ཧཱ་སྠེ་མ་བ་ཏི་སྭཱ་ཧཱ། མཐུ་ཆེན་ཐོབ་པའོ། །ཨོྂ་སརྦྦ་ཨ་པ་ཡ་ཛ་ཏེ་སརྦྦ་པཱ་པྃ་ཤོ་དྷ་ཧཱུྃ། ངན་སོང་ཐམས་ཅད་
སྤོང་བའོ། །ཨོཾ་སརྦྦ་ཤོ་ཀ་ཏ་མོར་ན་ཏ་མ་ཏི་ཧཱུྃ། མྱ་ངན་ཐམས་ཅད་ཀྱི་མུན་པ་ངེས་པར་འཇོམས་པའི་བློ་གྲོས་སོ། །ཨོཾ་ཛཱ་ལི་ནི་མ་ཧཱ་ཛཱ་ལི་ནི་ཧཱུྃ། དྲ་བ་ཅན་གྱི་འོད་དོ། །ཨོཾ་སུ་ཏན་ཤྲི་ཡེ་ཧཱུྃ། ནོར་བཟངས་སོ། །
ཨོྂ་ཙན་དྲེ་ཙན་དྲ་ཙན་དྲ་བྱཱ་བ་ལོ་ཀི་ཏེ་སྭཱ་ཧཱ། ཟླ་འོད་དོ། །ཨོཾ་ཨ་མི་ཏེ་པྲ་བྷེ་ཨ་མི་ཏེ་ཧཱུྃ། འོད་དཔག་མེད་དོ། །ཨོྂ་ག་ག་ནེ་ག་ག་ན་བ་ར་ལོ་ཙ་ན་ཧཱུྃ། ནམ་མཁའ་མཛོད་དོ། །ཨོཾ་སརྦྦ་ནི་བ་ར་ཎ་བི་ཤྐྂ་བྷི་ནེ་ཧཱུྃ། སྒྲིབ་པ་ཐམས་ཅད་
རྣམ་པར་སེལ་བའོ། །ཨོཾ་ཡ་མཱན་ཏ་ཀྲྀཏ། གཤིན་རྗེ་གཤེད་དོ། །ཨོཾ་པྲ་ཛྙཱན་ཏ་ཀྲྀཏ། གཞན་གྱིས་མི་ཐུབ་པའོ། །ཨོཾ་པད་མཱན་ཏ་ཀྲྀཏ། རྟ་མགྲིན་ནོ། །ཨོྂ་ཨ་མྲྀ་ཏ་ཀུཎ་ཌ་ལི་བིགྷྣཱན་ཏ་ཀྲྀཏ། 
བདུད་རྩི་ཐབ་སྦྱོར་རོ། །ཨོཾ་ཨ་ཙ་ལ་ཧཱུྃ་ཧྃ། མི་གཡོ་བའོ། །ཨོཾ་ཊཀྐི་ཧཱུྃ། འདོད་པའི་རྒྱལ་པོའོ། །ཨོཾ་ནཱི་ལ་དཎ་ཌ་མ་ཧཱ་དཎ་ཌ་ཧཱུྃ། བེ་ཅོན་སྔོན་པོའོ། །ཨོཾ་ཀྲོ་དྷ་ཧཱུྃ་ཛ།། 
སྟོབས་པོ་ཆེའོ། །དཀྱིལ་འཁོར་དུ་དགོད་པའི་གསང་སྔགས་ཀྱི་ཡི་གེ་དེ་དག་གོ། །འདི་དག་ལ་བསྟེན་ནས་ཏིང་ངེ་འཛིན་གྱི་ཁྱད་པར་ལས་ངེས་པར་འབྱུང་བའི་གསང་སྔགས་བྱེ་བ་ཕྲག་དུ་མ་གསུངས་སོ། །དེ་བཞིན་གཤེགས་
པ་ལ་སོགས་པ་ཐམས་ཅད་ནི་ལྕགས་ཀྱུས་སྤྱན་དྲང་ངོ་། །བྱང་ཆུབ་སེམས་དཔའ་རྣམས་ནི་རྡོ་རྗེའི་ཕྱག་རྒྱས་སོ། །རིག་པའི་ལྷ་མོ་རྣམས་ཀྱི་ནི་རིགས་ཀྱི་ཡུམ་རྣམས་ཀྱིས་སོ། །ཁྲོ་བོ་རྣམས་ཀྱི་ནི་ཞལ་གྱི་ཕྱག་

90-1-65b

རྒྱས་སོ། །བྲན་རྣམས་ནི་ཞགས་པའི་ཕྱག་རྒྱས་སོ། །ཕོ་ཉ་རྣམས་ནི་ལྕགས་ཀྱུའི་ཕྱག་རྒྱས་སོ། །དེ་དག་ལ་སོགས་པ་ནི་སྤྱན་དྲང་བའི་སྦྱོར་བའོ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་འདི་ནི་གསང་སྔགས་
རིམ་པར་ཕྱེ་བའི་ལེའུ་སྟེ་གསུམ་པའོ།། །། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོའི་རྡོ་རྗེའི་དེ་བཞིན་གཤེགས་པ་ཡེ་ཤེས་ཆེན་པོའི་སྟོབས་ཀྱིས་རྣམ་པར་འཕྲུལ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ནས་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ཕྱག་ན་རྡོ་རྗེ་རས་སམ་བརྩིག་པ་ལ་སོགས་པ་ལ་གཟུགས་བརྙན་བསྒྲུབ་པ་ལ་དམིགས་པ་གང་གིས་གསང་སྔགས་འཆང་རྣམས་ཀྱིས་ཡེ་ཤེས་
རྫོགས་པར་འགྱུར་ཞིང་ཡེ་ཤེས་རྫོགས་པས་སངས་རྒྱས་ཉིད་བདེ་བླག་ཏུ་ཐོབ་པར་འགྱུར་ན། དངོས་གྲུབ་གཞན་ལྟ་སྨོས་ཅི་དགོས་པའི་གསང་སྔགས་ཀྱི་ཚོགས་ཐམས་ཅད་ཀྱི་ཏིང་ངེ་འཛིན་གསང་ཆེན་བླ་ན་མེད་པ་
བཤད་པར་བྱ་ཡིས་ཉོན་ཅིག །ཨོཾ་གྱི་ཡེ་ཤེས་ཀྱིས་བསྒྲུབས་པ། །རྒྱལ་ཆེན་རྣམ་པར་སྣང་མཛད་ནི། །ཤེས་རབ་ཡེ་ཤེས་རབ་རྒྱས་པ། །སངས་རྒྱས་ཀུན་གྱིས་མཆོག་གིས་མཆོད། །ཞི་བ་ཐོར་ཚུགས་
ཅོད་པན་འཆང་། །ཞལ་གསུམ་གྱིས་ནི་རྣམ་པར་བརྒྱན། །གསེར་གྱི་མདོག་ཅན་ཕྱག་དྲུག་པ། །དང་པོ་བསམ་གཏན་ཕྱག་རྒྱ་ཅན། །བགྲང་ཕྲེང་ལྡན་ཞིང་མདའ་ཡིས་བརྒྱན། །གཡོན་གྱིས་ལྷ་མོའི་
ནུ་མ་འཛིན། །འཁོར་ལོ་དང་ནི་གཞུ་ཐོགས་ཤིང་། །ལྷ་རྣམས་བྲེད་ཅིང་ཁམས་རྣམས་འཛག །འབར་བའི་འོད་དཀྱིལ་བརྒྱན་པ་ལ། །སངས་རྒྱས་ཀུན་གྱི་སྤྲིན་འཕྲོ་བ། །རབ་ཏུ་འབྱུང་ཞིང་ལེགས་འཁྱུད་པ། །
དེ་ཉིད་སྤྱོད་ཡུལ་ཅན་བསྒོམས་ཏེ། །གསང་སྔགས་ནང་གི་བཟླས་བརྗོད་བྱ། །ཏིང་ངེ་འཛིན་ཐམས་ཅད་ཀྱི་སྟོབས་རྫོགས་པར་བྱེད་པའི་ཡེ་ཤེས་ཞེས་བྱ་བའི་ཏིང་ངེ་འཛིན་ཏོ། །ཨོཾ་ཞེས་བྱ་བའི་ཚིག་གི་ལམ། །

90-1-66a

འཇིག་རྟེན་དབང་ཕྱུག་འོད་ཆེན་བསམ། །ཐོར་ཚུགས་ཅོད་པན་འཆང་བའི་ལྷ། །དབུ་རྒྱན་ཐམས་ཅད་མཁྱེན་པས་བརྒྱན། །རྒྱན་རྣམས་ཀུན་གྱིས་བརྒྱན་པ་སྟེ། །གཙོ་བོ་ཟླ་བའི་གཟུགས་དང་འདྲ། །
ཞལ་གསུམ་སྤྱན་གསུམ་འབར་བ་ལ། །ཕྱག་དྲུག་འདུག་སྟངས་བཞི་པ་ཅན། །ཕྱག་གཉིས་པད་མའི་འཇོ་ཚུལ་ཅན། །གཡས་ན་བགྲང་ཕྲེང་རྡོ་རྗེ་འཆང་། །གཡོན་པས་ནུ་མ་འཛིན་པ་ལ། །རིལ་བ་སྤྱི་བླུགས་
གསུམ་པ་ན། །གཟུགས་རྣམས་ཐམས་ཅད་འཕྲོ་མཛད་ཅིང་། །ཀུན་ནས་འོད་ཟེར་ཕྲེང་བ་ཅན། །ལག་ནས་མཚོན་ཤོར་འཇིགས་འཁྲུགས་པའི། །བགེགས་འགྱེལ་བ་ལ་ལྟ་བྱེད་པའི། །དེ་འདྲའི་ཚིག་གིས་ལམ་
བསྒོམས་ན། །རིང་པོར་མི་ཐོགས་སངས་རྒྱས་འཐོབ། །རྣམ་པ་ཐམས་ཅད་ཀྱི་མཆོག་ཡངས་པ་ཐམས་ཅད་ཀྱི་འབྱུང་གནས་ཆོས་ཀྱི་རྒྱལ་པོ་ཞེས་བྱ་བའི་ཏིང་ངེ་འཛིན་ཏོ། །ཟླ་བའི་གཟུགས་ལ་ཧཱུྃ་ཞེས་པ། །སེམས་ཀྱི་རྡོ་རྗེ་བསྒོམ་
པར་བྱ། །མཐིང་ཤིང་བཟང་པོ་ལྟ་བུའི་མདོག །རྒྱན་རྣམས་ཀུན་གྱིས་རབ་ཀླུབས་པ། །ཅོད་པན་ལ་ནི་མི་འཁྲུགས་བཞུགས། །རིན་ཆེན་རྣམས་ཀྱིས་ཡོངས་སུ་བརྒྱན། །ཞལ་རས་གསུམ་ལྡན་སྤྱན་གསུམ་པ། །ཅུང་
ཟད་བཞད་ཅིང་འཇོ་སྒེག་ཅན། །ཕྱག་བརྒྱད་ཀྱིས་ནི་བརྒྱན་པ་ལ། །རྡོ་རྗེ་དང་པོར་གསོར་བ་དང་། །གཉིས་པ་ན་ནི་རལ་གྲི་གདེངས། །ལྕགས་ཀྱུ་བཟང་པོ་གསུམ་པ་ན། །བཞི་པ་ཡིས་ནི་མདའ་ཡང་གསོར། །དེ་བཞིན་གཡོན་ན་
དྲིལ་བུ་བསྣམས། །དེ་བཞིན་གཉིས་པས་ནུ་མ་འཁྱུད། །གསུམ་པ་ན་ནི་ཞགས་པ་སྟེ། །བཞི་པ་ལྷ་རྫས་གཞུ་ཡང་འཛིན། །རོལ་པའི་སྟབས་སུ་ལེགས་པར་བཞུགས། །དེ་བཞིན་སངས་རྒྱས་སྤྲིན་གྱིས་འབར། །འདི་འདྲ་གང་ཞིང་
རྟག་བསྒོམ་པ། །དེ་ཡི་རྡོ་རྗེ་སེམས་བརྟན་ཞིང་། །རིང་པོར་མི་ཐོགས་བྱང་ཆུབ་འཐོབ། །རྒ་ཤི་རྣམས་ཀྱི་ཕ་རོལ་འགྲོ། །སེམས་ཅན་གྱི་སྟོབས་མཐའ་ཡས་པ་རྫོགས་པར་བྱེད་པའི་ཏིང་ངེ་འཛིན་གྱི་རྒྱལ་པོ་རྡོ་རྗེ་ཤུགས་ཤེས་བྱ་བའི་

90-1-66b

ཏིང་ངེ་འཛིན་ཏོ། །ཏྲཱྃ་གི་ཡེ་ཤེས་ལས་བསྒྲུབས་པ། །རིན་ཆེན་འབྱུང་བའི་བདག་ཉིད་དེ། །ཞལ་རས་གསུམ་ལྡན་སྤྱན་གསུམ་པ། །ཐོར་ཚུགས་ཅོད་པན་རྣམས་ཀྱིས་བརྒྱན། །བདེ་བ་ཆེན་པོ་ཁ་དོག་དམར། །ཏིང་འཛིན་ཕྱག་རྒྱ་རྣམ་
པར་བཞུགས། །སེམས་དཔའི་སྐྱིལ་དཀྲུང་བཅས་པ་སྟེ། །ཕྱག་གཡས་ན་ནི་རྡོ་རྗེ་དང་། །གཡོན་པ་རིན་ཆེན་ཡོངས་སུ་འཛིན། །འོད་ཟེར་སེར་པོ་འཕྲོ་བ་ལས། །རིན་ཆེན་འབྱུང་བའི་སྤྲིན་ཆེན་ནམ། །བྱང་ཆུབ་སེམས་དཔའ་
གཞན་རྣམས་ཀྱིས། །རིན་ཆེན་ཆར་གྱིས་རྒྱས་པར་བྱས། །རིན་ཆེན་མངོན་པར་ཐོབ་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཁྃ་གི་ཡེ་ཤེས་ལས་བསྒྲུབས་པ། །དོན་ཡོད་རྡོ་རྗེ་བསམ་པར་བྱ། །ཏིང་འཛིན་ཕྱག་རྒྱ་ལེགས་
བཞུགས་པ། །མར་ཀ་ཏའི་འོད་ལྟར་འབར། །གཡས་པའི་ཕྱག་ན་རལ་གྲི་དང་། །གཡོན་པ་ཡིས་ནི་ལྕགས་ཀྱུ་ཉིད། །སངས་རྒྱས་ཀྱི་ནི་སྤྲིན་འཕྲོ་ཞིང་། །ལེགས་པར་བསྒྲུབས་ཕྱིར་སླར་ཡང་སྡུད། །འོད་ཟེར་ཆེན་པོས་
རབ་གསལ་ཞིང་། །ཡེ་ཤེས་རྒྱ་མཚོའི་འོད་དང་མཚུངས། །འདི་འདྲ་རྟག་ཏུ་སེམས་བྱེད་པ། །ནམ་མཁའི་སྙིང་པོ་ཐུབ་པ་ཆེ། །འདུ་བྱེད་ཐམས་ཅད་སྤངས་པ་ཡི། །མཁའ་དང་མཉམ་པ་དེར་འགྱུར་རོ། །ནམ་མཁའ་
སྣང་བར་བྱེད་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ལ་ཡི་ཡེ་ཤེས་ལས་བསྒྲུབ་པ། །རྒྱལ་བ་ཐམས་ཅད་ཀྱིས་ཀྱང་བརྒྱན། །ལྷ་མོ་སྤྱན་གསུམ་ཕྱག་བརྒྱད་པ། །ཞལ་གསུམ་གསེར་གྱི་མདོག་དང་མཚུངས། །
སྒེག་པའི་ཆ་ལུགས་ལེགས་འཆང་བ། །ཅུང་ཟད་བཞད་པས་འདོད་ཆགས་མ། །དང་པོའི་ཕྱག་ནི་མཆོག་སྦྱིན་མཛད། །དེ་བཞིན་གཉིས་པ་མི་འཇིགས་སྦྱིན། །ཕྱག་གསུམ་པ་ན་རྡོ་རྗེ་སྟེ། །བཞི་པ་ན་ནི་མདའ་ཡང་གསོར། །གཡོན་པ་སྡིགས་མཛུབ་
ཞགས་པ་ཅན། །རིན་ཆེན་སྙེ་མ་གཉིས་པ་ན། །གསུམ་པ་ན་ནི་བགྲང་ཕྲེང་སྟེ། །བཞི་པ་གཞུ་ཡིས་ལེགས་པར་བརྒྱན། །འོད་དམར་འོད་ཟེར་ཕྲེང་བ་ཅན། །ལྷ་རྣམས་འཇིགས་པས་སེམས་མྱོས་ཏེ། །ལག་པ་ཐལ་མོ་སྦྱོར་བར་བྱེད། །སངས་རྒྱས་

90-1-67a

རྣམས་ཀྱི་སྤྱན་འཕྲོ་བར། །ཡེ་ཤེས་རྡོ་རྗེ་སྤྱན་མ་བསམ། །བྱང་ཆུབ་ཡན་ལག་འབྲས་བརྒྱན་པའི། །ལྷ་མོ་འདི་འདྲ་བསྒོམ་པར་བྱ། །ཡེ་ཤེས་སྤྱན་གྱིས་སྣང་བར་བྱེད་པའི་རྡོ་རྗེ་འཇོ་ཚུལ་ཞེས་བྱ་བའི་ཏིང་ངེ་
འཛིན་ཏོ། །མ་ཡི་ཡེ་ཤེས་ལས་བསྒྲུབས་པ། །རྡོ་རྗེ་རིགས་ཅན་མཱ་མཱ་ཀཱི། །ལྷ་མོ་ཞལ་གསུམ་ཕྱག་དྲུག་མ། །དགོད་ཅིང་ཞལ་རས་ཕྲོ་དང་བཅས། །ཨུཏ་པལ་སྔོན་པོའི་མདོག་འདྲ་བ། །འོད་དམར་
ཤིན་དུ་འབར་བ་ཅན། །དང་པོ་མི་འཇིགས་སྦྱིན་པའི་ཕྱག །གཉིས་པ་ལེགས་པར་རྡོ་རྗེ་བསྡམས། །གསུམ་པ་ཡིས་ནི་མདའ་ཡང་གསོར། །གཡོན་པ་བསྡིགས་པའི་འཛུབ་མོ་སྟེ། །གཉིས་པ་ཞགས་པ་
ལེགས་པར་བསྣམས། །གསུམ་པ་ཡིས་ནི་གཞུ་ཡང་འཛིན། །རྡོ་རྗེ་ཅན་མ་སྐུ་གསུམ་འཆང་། །དངོས་མེད་ངོ་བོ་མཚན་ཉིད་ཅན། །སངས་རྒྱས་ཀྱི་ནི་སྤྲིན་འཕྲོ་བ། །འདི་འདྲ་སྒོམ་པས་བསྒོམ་པར་བྱའོ། །
སྒྱུ་འཕྲུལ་འབྱུང་བའི་སྟོབས་ཀྱིས་ཡེ་ཤེས་ཟབ་མོ་ཞེས་བྱ་བའི་ཏིང་ངེ་འཛིན་ཏོ། །པ་ཡི་ཡེ་ཤེས་ལས་བསྒྲུབས་པ། །ཟླ་བའི་མདོག་དང་ལྡན་པའི་ཡུམ། །མིང་ནི་གོས་དཀར་ཅན་ཞེས་བྱ། །སྤྱན་གསུམ་དག་གིས་རྣམ་པར་བརྒྱན། །
ཞལ་རས་གསུམ་པ་དགའ་མཛད་མ། །ཕྱག་དྲུག་མི་འཇིགས་སྦྱིན་མཛད་མ། །གཉིས་པ་ན་ནི་རྡོ་རྗེ་སྟེ། །གསུམ་པ་མདའ་ཡིས་རྣམ་པར་བརྒྱན། །གཡོན་པ་པད་མ་བསྣམས་པར་བྱ། །གཉིས་པ་ན་ནི་བགྲང་ནོར་ཕྲེང་། །གསུམ་པ་ན་ནི་གཞུ་བསྣམས་ཤིང་། །
རོལ་པའི་སྟབས་སུ་ལེགས་པར་ཞུགས། །སངས་རྒྱས་གཟུགས་ནི་འཕྲོ་བར་མཛད། །པད་མའི་སྤྲིན་གྱིས་རྒྱས་པར་བསྒོམ། །གལ་ཏེ་བྱང་ཆུབ་མཆོག་འདོད་ན། །རིན་ཆེན་སྐུར་ནི་བསྒོམ་པར་བྱ། །པད་མའི་གཟུགས་ཀྱི་འཇོ་
ཚུལ་སངས་རྒྱས་ཀྱི་རྒྱལ་བ་འདྲེན་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཏཱ་ཡི་ཡེ་ཤེས་ལས་བསྒྲུབ་པ། །ལྷ་མོ་སྒྲོལ་མ་རྫུ་འཕྲུལ་ཅན། །འཇོ་སྒེག་ཆ་ལུགས་ལ་གནས་པ། །ཞལ་རས་གསུམ་པ་སྤྱན་གསུམ་པ། །

90-1-67b

ཕྱག་དྲུག་སེམས་དཔའི་སྐྱིལ་མོ་དཀྱུང་། །བཞད་པ་མརྒད་འོད་དང་ལྡན། །དང་པོ་མི་འཇིགས་སྦྱིན་པའི་ཕྱག །གཉིས་པ་ན་ནི་རྡོ་རྗེ་བསྣམས། །གསུམ་པ་ན་ནི་མདའ་ཡང་གསོར། །གཡོན་པ་བསྡིགས་པའི་འཛུབ་མོ་སྟེ། །
གཉིས་པ་ན་ནི་ཨུཏ་པལ་ཉིད། །གསུམ་པ་ན་ནི་གཞུ་ཡང་འཛིན། །འོད་ཟེར་དམར་པོ་འབར་བ་ཅན། །སངས་རྒྱས་འཕྲོ་བས་རྒྱས་མཛད་པ། །དགའ་མཛད་སེམས་ཅན་ཀུན་གྱི་མ། །རྟག་པར་རྒྱུན་དུ་བསྒོམ་པར་བྱ། །
སེམས་ཅན་ཐམས་ཅད་དབང་དུ་འགྲོ་ཞིང་དགའ་བར་བྱེད་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །སྐྱེས་མཆོག་རྒྱལ་བས་གསུངས་པ་ཡི། །སེམས་མ་བཞི་ནི་བརྗོད་པའི་མིང་། །སེམས་མ་དང་ནི་རིན་ཆེན་མ། །
ཆོས་མ་རྡོ་རྗེ་ལས་མ་སྟེ། །རོལ་བའི་རྗེས་སུ་མཉེས་མཛད་མ། །དེ་དག་ཇི་ལྟར་རིགས་པར་བསྒོམ། །དེ་དག་ཀྱང་ནི་བསྒོམས་པ་ཡིས། །རིང་པོར་མི་ཐོགས་བྱང་ཆུབ་འཐོབ། །སེམས་ཅན་རབ་ཏུ་དགའ་བྱེད་པའི། །
འཕགས་མ་བཞི་ཡི་ཏིང་ངེ་འཛིན་ཏོ། །ཙུྃ་གི་ཡི་གེ་ལས་བསྒྲུབས་པ། །མིང་ནི་སྐུལ་བྱེད་ཅེས་མའི་གཟུགས། །སྐུ་གསུམ་རྒྱལ་བ་བྱེ་བ་ཕྲག །བདུན་གྱིས་གསང་སྔགས་གླུ་ཡིས་བསྟོད། །ཡི་གེ་དགུ་པ་ཐབས་དགུ་ཅན། །ལྷ་དགུ་
རྣམས་ཀྱི་གནས་ཀྱང་ཡིན། །ཞལ་གསུམ་སྟོན་ཀའི་འདམ་བུའི་མདོག །རྒྱན་རྣམས་ཀུན་གྱིས་བརྒྱན་པ་སྟེ། །ན་ཆུང་སྐལ་ལྡན་དར་ལ་བབ། །རིག་སྔགས་ཐམས་ཅད་སྒྲོལ་མཛད་མ། །དང་པོའི་ཞལ་ནི་ཅུང་ཟད་ཙམ། །བཞད་
ཅིང་སྤྱན་གསུམ་ལྡན་པ་སྟེ། །གཡས་ཀྱི་ཞལ་ནི་རྣམ་གདངས་པ། །ཨུཏ་པལ་སྔོན་པོ་འདབ་མའི་འོད། །མཆེ་བ་ཟླ་བ་ཚེས་པ་བཞིན། །ལྕེ་ནི་གློག་བཞིན་ལྗིབ་པར་མཛད། །གཡོན་པ་ཁ་དོག་དམར་པོ་སྟེ། །ཚེམས་ཀྱིས་སྒྲོས་ནི་རྣམ་
པར་གནོན། །རོལ་པའི་སྟབས་སུ་ལེགས་པར་བཞུགས། །གདུ་བུ་རྣམ་པ་སྣ་ཚོགས་ཀྱིས། །བརྒྱན་པའི་ཕྱག་ནི་ཉི་ཤུ་རྩ་དྲུག་དེ་ལ་ཕྱག་གཉིས་རྩ་བའི་ཕྱག་རྒྱས་སྙིང་གའི་གནས་རྣམ་པར་བརྒྱན་པའོ། །གཡས་པ་གཉིས་

90-1-68a

ནི་མི་འཇིགས་པ་སྦྱིན་པའོ། །གསུམ་པ་ན་རལ་གྲིའོ། །བཞི་པ་ནི་རིན་པོ་ཆེ་སྦྱིན་པའོ། །ལྔ་པ་ནི་ཤིང་ཏོག་བཱི་ཛ་པཱུ་རའོ། །དྲུག་པ་ན་མདའ་གསོར་བའོ། །བདུན་པ་ན་དགྲ་སྟའོ། །བརྒྱད་པ་ན་དབྱུག་ཏོའོ། །དགུ་པ་ན་
ཐོ་བའོ། །བཅུ་པ་ན་ལྕགས་ཀྱུའོ། །བཅུ་གཅིག་པ་ན་རྡོ་རྗེའོ། །བཅུ་གཉིས་པ་ན་སེ་གོལ་གཏོགས་པའོ། །བཅུ་གསུམ་པ་ན་བགྲང་ཕྲེང་ངོ་། །གཡོན་པ་གཉིས་པ་ན་ཡིད་བཞིན་ནོར་བུའི་རྒྱལ་མཚན་ནོ། །
གསུམ་པ་ན་པད་མའོ། །བཞི་པ་ན་རིལ་བ་སྤྱི་བླུགས་སོ། །ལྔ་པ་ན་ཞགས་པའོ། །དྲུག་པ་ན་གཞུའོ། །བདུན་པ་ན་མདུང་ཐུང་ངོ་། །བརྒྱད་པ་ན་འཁོར་ལོའོ། །དགུ་པ་ན་དུང་ངོ་། །བཅུ་པ་ན་བསྡིགས་པའི་འཛུབ་མོའོ། །བཅུ་
གཅིག་པ་ན་བུམ་པ་བཟང་པོའོ། །བཅུ་གཉིས་པ་ན་ཐག་མདུང་ངོ་། །བཅུ་གསུམ་པ་ན་ཤེས་རབ་ཀྱི་ཕ་རོལ་ཏུ་ཕྱིན་པའོ། །འོད་ཟེར་དམར་པོའི་དཀྱིལ་འཁོར་ཅན། །པད་མ་ལ་བཞུགས་བསྒོམ་པར་བྱ། །ལ་ཡི་ཞིང་
ཅུང་བགོས་པ་ཡི། །སྟེང་དུ་བླ་གོས་གྱོན་པ་སྟེ། །སྣ་ཚོགས་ཚིག་གུ་ན་བཟར་གསོལ། །ཆོ་འཕྲུལ་རྣམ་པ་སྣ་ཚོགས་དང་། །སངས་རྒྱས་རྣམས་ཀྱིས་སྐུ་གཟུགས་འཕྲོ། །སུམ་བཅུའི་ལྷ་རྣམས་ལྟུང་བ་དང་། །བགགས་
རྣམས་ཤིན་དུ་འཇིག་སྐྲག་ནས། །ཐལ་མོ་སྦྱོར་བར་བྱེད་པ་སྟེ། །འདི་འདྲ་གང་ཞིག་རྟག་བསྒོམ་ཞིང་། །བསྒྲིམས་ནས་གསང་སྔགས་བརྗོད་པ་དེས། །སངས་རྒྱས་མྱུར་དུ་ཐོབ་གྱུར་ན། །དངོས་གྲུབ་གཞན་ལྟ་ཅི་ཞིག་སྨོས། །
ཏིང་འཛིན་ངོ་བོ་ཐོབ་འགྱུར་ཞིང་། །སྡིགས་པ་ཀུན་ལས་རྣམ་པར་གྲོལ། །རྒྱལ་བ་མཐའ་ཡས་པའི་ཡེ་ཤེས་བསྐུལ་བར་བྱེད་པའི་སྟོབས་ཀྱི་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ཏོ། །ར་ཡི་ཡེ་ཤེས་ལས་བསྒྲུབས་པ། །
རིན་ཆེན་སྒྲོན་མ་ཞེས་བྱ་བའི་གཟུངས། །ཞལ་རས་གསུམ་པ་སྤྱན་གསུམ་པ། །ཕྱག་དྲུག་གསེར་གྱི་མདོག་དང་ལྡན། །ན་ཆུང་དར་ལ་བབ་པའི་ཚད། །ཞལ་ནི་ཅུང་ཟད་བཞད་པ་སྟེ། །ཕྱག་ནི་རིན་ཆེན་གདུ་བུས་གཏམས། །

90-1-68b

ཕྱག་གཉིས་རིན་ཆེན་ཐལ་མོ་སྟེ། །འོད་ཀྱིས་དཀྱིལ་འཁོར་ཕྲེང་བ་འཁྲུག ། །གཡས་པའི་ཕྱག་ནི་མི་འཇིག་སྦྱིན། །གསུམ་པ་མདའ་ནི་རྣམ་པར་གསོར། །གཡོན་མཛུབ་མ་རུངས་རྣམས་ལ་སྡིགས། །གསུམ་པ་ཡིས་ནི་
གཞུ་ཡང་འཛིན། །འོད་ཟེར་དམར་པོ་ལེགས་པར་འབར། །རོལ་སྟབས་ཐབས་ཀྱིས་ཞབས་ཀྱི་གནོན། །སངས་རྒྱས་སྤྲིན་ནི་འཕྲོ་ཞིང་སྡུད། །ཆོས་འཛིན་ཡིད་དུ་འོང་བ་ཡི། །ལྷ་མོ་འདི་འདྲ་བསྒོམ་པར་བྱ། །
སངས་རྒྱས་རིན་ཆེན་སྤྲིན་གྱི་ཡེ་ཤེས་ཀྱིས་སྣང་བར་བྱེད་པ་ཞེས་བྱ་བའི་ཏིང་ངེ་འཛིན་ཏོ། །བྷྲི་ཡི་ཡེ་ཤེས་ལས་བསྒྲུབས་པ། །འཇིགས་ལས་སྒྲོལ་བ་ཁྲོ་གཉེར་ཅན། །ཞལ་རས་གསུམ་པ་སྤྱན་གསུམ་པ། །སྟོན་
ཀའི་ཟླ་བའི་འོད་དང་མཚུངས། །ཕྱག་དྲུག་པད་མ་ལ་བཞུགས་པ། །རོལ་བའི་སྟངས་ལ་བརྩོན་པ་སྟེ། །ཞལ་ནི་ཁྲོ་དང་བཅས་པར་བཞད། །ལེགས་པར་འབར་བའི་རྩེར་ལྟ་ཅན། །གཡས་པའི་ཕྱག་ན་རྡོ་རྗེ་སྟེ། །གཉིས་པ་
བེ་ཅོན་འཛིན་པར་བཤད། །གསུམ་པ་ཡིས་ནི་མདའ་ཡང་གསོར། །གཡོན་པ་བསྡིགས་པའི་འཛུབ་མོ་ཅན། །གཉིས་པ་རིལ་བ་སྤྱི་བླུགས་བསྣམས། །གསུམ་པ་ན་ནི་མཚོན་ཆ་གཞུ། །སངས་རྒྱས་རྣམས་
ཀྱི་སྤྲིན་འཕྲོ་ཞིང་། །དེ་བཞིན་གཞན་དག་ལེགས་སྡུད་པའི། །ཉལ་དང་འགྲེང་དང་འདུག་པ་ན། །ལྷ་མོ་འདི་འདྲ་རྟག་ཏུ་བསྒོམ། །འཇིགས་པ་ཐམས་ཅད་དམིགས་པ་མེད་པར་བྱེད་པའི་ཡེ་ཤེས་རྡོ་རྗེ་ཞེས་བྱ་བའི་
ཏིང་ངེ་འཛིན་ཏོ། །ཧཱུྃ་གི་ཡེ་ཤེས་ལས་བསྒྲུབས་པ། །མིང་ནི་རྡོ་རྗེ་ལུ་གུ་རྒྱུད་ཐམས་ཅད་འཆིང་བ་བསྐྱེད་པ་སྟེ། །སེམས་ཅན་མ་རུངས་ཕུང་བར་བྱེད། །ཞལ་རས་གསུམ་པ་སྤྱན་གསུམ་པ། །ཕྱག་དྲུག་སྔོ་བསངས་གཟུགས་
བཟང་མ། །ཞལ་ནི་ཅུང་ཟད་བཞད་པ་མཛད། །ལག་པ་གཡས་ན་རྡོ་རྗེ་སྟེ། །གཉིས་པ་རྡོ་རྗེ་ལུ་གུ་རྒྱུད། །གསུམ་པ་ན་ནི་མདའ་ཡང་བསྣམས། །གཡོན་པ་བསྡིགས་པའི་འཛུབ་མོ་སྟེ། །གཉིས་

90-1-69a

པ་ན་ནི་ཞགས་པར་གསུངས། །གསུམ་པ་གཞུ་ཡང་ཐོགས་པར་བརྩོན། །སངས་རྒྱས་རྣམས་ནི་སྤྲིན་འཕྲོ་བ། །རྡོ་རྗེ་ལུ་གུ་རྒྱུད་བསྒོམས་ན། །བྱང་ཆུབ་སྐད་ཅིག་གིས་འཐོབ་ན། །དངོས་གྲུབ་གཞན་ལྟ་ཅི་ཞིག་
སྨོས། །རྡོ་རྗེ་སྒྲོག་གི་ཡེ་ཤེས་ཀྱི་རྡོ་རྗེ་ལྟ་བ་ཞེས་བྱ་བའི་ཏིང་ངེ་འཛིན་ཏོ། །མེ་ཡི་ཡེ་ཤེས་ལས་བསྒྲུབས་པ། །ཐུབ་པའི་སྐྱེས་མཆོག་བྱམས་པ་ནི། །ཞལ་རས་གསུམ་པ་སྤྱན་གསུམ་པ། །དེ་ཡི་འོག་ན་པད་མ་སྟེ། །
སེམས་དཔའི་སྐྱིལ་མོ་དཀྲུང་དུ་བཞུགས། །ཕྱག་བཞི་དག་གིས་རྣམ་པར་བརྒྱན། །ཕྱག་གཉིས་ཆོས་འཆད་ཕྱག་རྒྱས་བརྒྱན། །གཡས་པ་ཡི་ནི་ཕྱག་གཉིས་པ། །སེམས་ཅན་སྐྱོབ་པ་མཆོག་འཛིན་མཛད། །གཡོན་པ་ལྷ་རྫས་
ཀླུ་ཤིང་གི། །མེ་ཏོག་ཟེའུ་འབྲུའི་མགོ་སོགས་བསྣམས། །སངས་རྒྱས་བྱང་ཆུབ་སེམས་དཔའ་ཡི། །སྤྲིན་ཆེན་དེ་བཞིན་འཕྲོ་བར་མཛད། །བྱམས་པའི་སྟོབས་ཀྱི་ཡེ་ཤེས་ཀྱི་རྡོ་རྗེ་རྣམ་པར་བརྒྱན་པའི་ཏིང་ངེ་འཛིན་ཏོ། །མུ་ཡི་
ཡེ་ཤེས་ལས་བསྒྲུབས་པ། །གཞོན་ནུ་འཇམ་པ་ཚིག་གི་ལམ། །ཤེས་རབ་ཡེ་ཤེས་མཆོག་ཐོབ་པ། །ཟབ་མོ་ཚུལ་ནི་སྟོན་པ་པོ། །ཞལ་གསུམ་སྤྱན་གསུམ་ཟུར་ཕུད་གསུམ། །གཞོན་ནུ་རྒྱན་གྱིས་བརྒྱན་པ་སྟེ། །
ཅོད་པན་བཟང་པོ་མི་འཁྲུག་ཅན། །མེ་ཏོག་སྣ་ཚོགས་རྣམས་ཀྱིས་ཀླུབས། །འོག་མ་པད་མ་ཆེན་པོ་ལ། །སེམས་དཔའི་སྐྱིལ་མོ་དཀྲུང་དུ་བཞུག ། །འཇོ་སྒེག་ཐབས་ཀྱིས་རོལ་པ་སྟེ། །ཞལ་ནི་ཅུང་ཟད་བཞད་པ་ལ། །དཔའ་
བོ་ཆེན་པོ་ཕྱག་དྲུག་པ། །དང་པོ་མི་འཇིགས་སྦྱིན་པར་བྱ། །གཉིས་པ་ན་ནི་རལ་གྲི་ཉིད། །གསུམ་པ་ན་ནི་མདའ་ཡང་གསོར། །དེ་བཞིན་གཡོན་པ་ཤེས་རབ་འཆང་། །གཉིས་པ་ན་ནི་ཨུཏ་པལ་ཐོགས། །གསུམ་པ་ན་ནི་གཞུ་ཉིད་
དོ། །ཤེས་རབ་ཡེ་ཤེས་མཆོག་གི་ཀླུབས། །སངས་རྒྱས་རང་བཞིན་སྤྲིན་གྱི་བསྣམས། །འཕྲོ་བར་སངས་རྒྱས་འདོད་པའི་བསྒོམ། །འཇམ་དཔལ་མཆོག་གི་ཤེས་རབ་དང་ཡེ་ཤེས་ཀྱི་རྡོ་རྗེ་སྣང་བ་ཞེས་བྱ་བའི་ཏིང་ངེ་འཛིན་ཏོ། །སྤོས་

90-1-69b

ཀྱི་གླང་པོ་ཡེ་ཤེས་ཏོག །དེ་བཞིན་དུ་ནི་བཟང་སྐྱོང་དང་། །བློ་གྲོས་རྒྱ་མཚོ་བློ་གྲོས་ནི། །མི་ཟད་པ་དང་སྤོབས་བརྩེགས་ཉིད། །ངན་སོང་ཀུན་སྤོང་མཐུ་ཆེན་ཐོབ། །མྱ་ངན་ཀུན་མུན་འཇོམས་པའི་བློ། །ནོར་བཟངས་དང་ནི་དྲ་བའི་
འོད། །དེ་བཞིན་ཟླ་འོད་འོད་དཔག་མེད། །ནམ་མཁའི་མཛོད་དང་སྒྲིབ་ཀུན་སེལ། །དེ་ལྟར་དེ་སོགས་གྲངས་མེད་པའི། །བྱང་ཆུབ་སེམས་དཔའ་སྐྱོབ་པ་ཀུན། །ས་བོན་ཡིག་འབྲུ་རྣམས་ལས་འཁྲུངས། །ཡི་གེ་ཕྱག་རྒྱའི་སྦྱོར་བ་ཅན། །
ཞལ་རས་གསུམ་པ་སྤྱན་གསུམ་པ། །སྣ་ཚོགས་ཐབས་ཀྱིས་རོལ་བར་མཛད། །བྱང་ཆུབ་སེམས་དཔའ་འདི་ཡི་རྒྱུ། །གསང་སྔགས་བཟློས་པར་བསྒོམ་པར་བྱ། །མདོག་ལྡན་འདུ་ཞིང་འཕྲོ་མཛད་པ། །རྣལ་འབྱོར་ཅན་
གྱིས་རྟག་ཏུ་བསམ། །ཧཱུྃ་གི་ཡེ་ཤེས་ལས་བསྒྲུབས་པ། །གཟི་བརྗིད་ལྡན་པ་འཇམ་དབྱངས་ཀྱི། །གཤིན་རྗེའི་དགྲ་ཞེས་རྣམ་གྲགས་པ། །བསྐལ་པའི་མེ་ལྟར་འབར་བ་སྟེ། །ཆར་སྤྲིན་གྱི་ནི་འོད་དང་འདྲ། །
ཞལ་དྲུག་པ་ལ་ཕྱག་དྲུག་པ། །དེ་བཞིན་ཞབས་དྲུག་མིའུ་ཐུང་འདྲ། །གསུས་ཁྱིམ་ཤིན་དུ་ཆེ་བ་སྟེ། །དེ་ནི་དྲག་པོ་ཆེན་པོ་ཡིན། །ལྗགས་འདྲིལ་རྡོ་རྗེ་མཆེ་བ་ཅན། །སྦྲུལ་གྱི་རྒྱན་གྱིས་རྒྱན་པ་སྟེ། །སྟག་ལྤགས་ཀྱི་ནི་
ཤམ་ཐབས་བགོས། །རོལ་པའི་སྟབས་ཅན་མ་ཧེ་བཅིབས། །དེ་ཡི་འོག་ཏུ་པད་མ་བྱས། །མི་ཐོད་ཕྲེང་ཅན་སྐྲ་འཁྱིལ་བ། །ཨག་ཚོམས་སེར་ལ་སྒྲ་ཆེན་འབྱིན། །མགོ་ཡི་སྟེང་ན་མི་འཁྲུགས་པ། །སྐུ་
གསུམ་ལ་ནི་རྣམ་པར་བཞུགས། །འཇམ་པའི་དཔལ་གྱིས་རྣམ་པར་བརྒྱན། །དང་པོའི་ཞལ་ནི་རྣམ་པར་བཞད། །གཡས་པ་ལྗགས་ནི་འདྲིལ་བ་སྟེ། །གཡོན་པའི་ཚེམས་ཀྱིས་སྒྲོས་མནན་ཁྲོ། །གཡས་པའི་ཕྱག་
ན་རལ་གྲི་སྟེ། །གཉིས་པ་ན་ནི་རྡོ་རྗེ་ཉིད། །གསུམ་པ་ཡིས་ནི་མདའ་ཡང་གསོར། །གཡོན་པ་བསྡིགས་མཛུབ་ཞགས་པ་ཅན། །གཉིས་པ་ཡིས་ནི་ནུ་མ་འཛིན། །གསུམ་པ་གཞུ་ནི་བརྡུངས་པ་ཡིས། །ཤིན་ཏུ་ལེགས་

90-1-70a

པར་རྣམ་པར་བརྒྱན། །ལྷ་མོ་ཡིས་ནི་གཡས་ནས་འཁྱུད། །གཉིས་པ་ན་ནི་ཨུཏྤ་པལ་ཐོགས། །གཡོན་པ་ཟླ་བ་ལྟར་སྣང་བ། །པད་མ་དཀར་པོ་ཐོགས་པར་བྱ། །འོག་ཏུ་ལྷ་དང་བགེགས་
ཀྱི་རྣམས། །སྔར་མ་བྲེད་ནས་ཕྱག་ཀྱང་འཚལ། །འོད་ཟེར་དམར་པོ་འབར་དང་བཅས། །སངས་རྒྱས་སྤྲིན་རྣམས་འཕྲོ་ཞིང་སྡུད། །རྣལ་འབྱོར་དག་གིས་བསྒོམས་ནས་སུ། །བསྒྲིམས་ནས་གསང་སྔགས་བཟླས་པ་
དེ། །འདུག་དང་ཉལ་དང་འཆག་པ་ན། །ལེགས་པར་བསམས་ཏེ་ཀུན་ཟོས་ཤིང་། །འདོད་པ་ལྔ་ལ་ལོངས་སྤྱད་ཀྱང་། །ནམ་མཁའ་ལྟ་བུར་གོས་མི་འགྱུར། །གཤེད་བྱེད་ཐམས་ཅད་རྨོངས་པར་བྱེད་པའི་
ཡེ་ཤེས་རྡོ་རྗེ་གཤིན་རྗེ་གསོད་པའི་འདུལ་བ་འཇུག་པ་ཞེས་བྱ་བའི་ཏིང་ངེ་འཛིན་ཏོ། །པྲ་ཡི་ཡེ་ཤེས་ལས་བསྒྲུབས་པ། །ཁྲོ་བོ་གཞན་གྱིས་མི་ཐུབ་པ། །ཞལ་རས་གསུམ་པ་སྤྱན་གསུམ་པ། །
ཕྱག་དྲུག་གིས་ནི་རྣམ་པར་བརྒྱན། །མདོག་སེར་མི་ཐུང་གཟུགས་ཅན་ལ། །འོད་ཟེར་དམར་པོའི་དཀྱིལ་འཁོར་ཅན། །པད་མ་ལ་བཞུགས་རོལ་པའི་སྟབས། །སྦྲུལ་གྱི་རྒྱན་གྱིས་བརྒྱན་པ་ལ། །དང་པོའི་ཞལ་
ནི་རྣམ་པར་བཞད། །དེ་བཞིན་གཡས་པ་རྣམ་པར་བསྒྱུར། །གཡོན་པའི་ཚེམས་ཀྱིས་སྒྲོས་ཀྱང་མནན། །སྣ་ཚོགས་ཚུལ་གྱིས་འབར་བ་སྟེ། །ལག་པ་གཡས་པ་རྡོ་རྗེ་ཐོགས། །གཉིས་པ་ན་ནི་དབྱུག་པ་སྟེ། །
གསུམ་པ་ན་ནི་མདའ་ཡང་ཐོགས། །གཡོན་པ་བསྡིགས་མཛུབ་ཞགས་པ་ཅན། །གཉིས་པ་ཡིས་ནི་ནུ་མ་འཛིན། །གསུམ་པ་གཞུ་ཅན་ཡིན་པར་གསུངས། །སྤྱི་བོའི་སྟེང་ན་མི་འཁྲུག་པ། །རིམ་
བཞིན་འཕྲོ་ཞིང་སྡུད་པ་སྟེ། །འདི་འདྲ་གོམས་པར་བསྒོམ་པར་བྱ། །བཟློས་པར་སངས་རྒྱས་ཉིད་ཀྱང་འཐོབ། །གཞན་གྱིས་མི་ཐུབ་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཧ་ཡི་ཡེ་ཤེས་ལས་

90-1-70b

བསྒྲུབས་པ། །ཁྲོ་བོ་པད་མ་མཐར་བྱེད་པ། །ཞལ་རས་གསུམ་པ་སྤྱན་གསུམ་པ། །ཁ་དོག་དམར་པོ་ཕྱག་བརྒྱད་ཅན། །སྐུ་ནི་སྦྲུལ་གྱིས་དཀྲིས་པ་སྟེ། །པད་མ་ལ་བཞུགས་རོལ་པའི་སྟབས། །ཁྲོ་བོ་བལྟ་བས་གཟིགས་
མཛད་པ། །དང་པོ་ཞལ་ནི་རྣམ་པར་བཞད། །གཡས་པ་ལྗགས་ནི་འདྲིལ་བ་སྟེ། །གཡོན་པ་ཚེམས་ཀྱིས་སྒྲོས་མནན་པ། །སྟག་ལྤགས་གསོལ་ཞིང་ཁྲོ་བ་ལ། །གཡས་པའི་ཕྱག་ན་རྡོ་རྗེ་སྟེ། །གཉིས་པ་ན་ནི་
དབྱུག་ཐོ་གསུངས། །གསུམ་པ་ན་ནི་ལྕགས་ཀྱུ་སྟེ། །བཞི་པ་ན་ནི་མདའ་ཡང་གསོར། །གཡོན་པ་བསྡིགས་པའི་འཛུབ་མོ་སྟེ། །གཉིས་པ་ཡིས་ནི་ནུ་མ་འཛིན། །གསུམ་པ་ན་ནི་པད་མ་སྟེ། །བཞི་པ་ན་ནི་གཞུ་
ཉིད་དོ། །དེ་ནི་ཅོད་པན་མི་འཁྲུགས་པ། །སངས་རྒྱས་གཟུགས་ནི་མང་པོ་དག །འཕྲོ་ཞིང་འདུ་བར་བསྒོམ་བྱས་ན། །འགྲུབ་པར་འགྱུར་ཏེ་གཞན་དུ་མིན། །རྟ་མཆོག་གི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་
འཛིན་ཏོ། །ཧཱུྃ་གི་ཡེ་ཤེས་ལས་བསྒྲུབས་པ། །མིང་ནི་ཁྲོ་བོ་བགེགས་ཀྱི་གཤེད། །མེ་ཡི་དཀྱིལ་བཞུགས་སྒྲུབ་པ་སྦྱིན། །ལག་ན་རྡོ་རྗེའི་རྗེས་འབྲངས་པ། །ཞལ་རས་གསུམ་པ་སྤྱན་གསུམ་པ། །
བགེགས་རྣམས་འཇོམས་མཛད་ཕྱག་དྲུག་ཅན། །དང་པོའི་ཞལ་ནི་བཞད་པ་སྟེ། །དེ་བཞིན་གཡས་པའི་ཞལ་གདངས་པ། །གཡོན་པ་ཚེམས་ཀྱིས་སྒྲོས་མནན་ཁྲོ། །ཨུཏ་པལ་སྔོན་པོའི་འདབ་འདྲའི་མདོག །
ཞབས་ཀྱིས་བགེགས་ནི་མནན་པ་སྟེ། །གཉིས་པ་པད་མའི་སྟེང་ན་བཞུགས། །གཡས་ཀྱི་ཕྱག་ན་རལ་གྲི་སྟེ། །གཉིས་པ་ན་ནི་དགྲ་སྟར་གསུངས། །གསུམ་པ་ཡིས་ནི་མདའ་ཡང་གསོར། །གཡོན་པ་
བསྡིག་མཛུབ་ཞགས་པ་ཅན། །དེ་བཞིན་གཉིས་པ་ནུ་མ་འཛིན། །གསུམ་པ་ན་ནི་གཞུ་ཡང་གསུངས། །སངས་རྒྱས་རང་བཞིན་སྤྲིན་འཕྲོ་བར། །ཡེ་ཤེས་མཁས་པས་བསྒོམ་པར་བྱ། །

90-1-71a

བགེགས་རྣམས་ཐམས་ཅད་འདྲལ་བའི་ཡེ་ཤེས་ཀྱི་རྡོ་རྗེས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ཏོ། །ཧཱུྃ་གི་ཡེ་ཤེས་ལས་བསྒྲུབས་པ། །མིག་གཡོན་བུས་པའི་གཟུགས་དང་
ལྡན། །ཞལ་རས་གསུམ་པ་སྤྱན་གསུམ་པ། །གཞོན་ནུའི་རྒྱན་གྱིས་བརྒྱན་པ་ལ། །དང་པོའི་ཞལ་ནི་བཞད་པ་སྟེ། །དེ་ཡི་གཡས་པའི་ཞལ་གདངས་པས། །ཁྲག་གིས་བརླན་པའི་ལྗགས་ཀྱང་འདྲིལ། །
གཡོན་པ་ཚེམས་ཀྱིས་སྒྲོས་མནན་ཁྲོ། །ཧཱུྃ་གིས་སྙིང་གའི་ཕྱོགས་ཀྱང་བཀང་། །མཐིང་ཤུན་གྱི་ནི་མདོག་ཅན་ཏེ། །རིན་ཆེན་རི་སྟེངས་པད་མ་ལ། །རོལ་པའི་ཞབས་ཀྱིས་སྟབས་སུ་བཞུགས། །
ཐུབ་པ་བགེགས་ཀྱི་ཆུ་འཛིན་འཇོམས། །ཕྱག་དྲུག་འབར་བ་འཕྲོ་བ་ཡི། །འོད་བཟངས་དམར་པོའི་དཀྱིལ་འཁོར་ན། །གཡས་པའི་ཕྱག་ན་རལ་གྲི་སྟེ། །གཉིས་པ་ན་ནི་རྡོ་རྗེར་གསུངས། །གསུམ་
པ་མདའ་ནི་རྣམ་པར་གསོར། །གཡོན་པས་བསྡིགས་མཛུབ་ཞགས་པ་ཅན། །གཉིས་པ་ཡིས་ནི་ནུ་མ་འཛིན། །གསུམ་པ་གཞུ་ནི་བརྡུངས་པ་ལ། །ཚངས་པས་གཟུང་སྟེ་ལྟ་བ་དང་། །སྣ་ཚོགས་མེ་ཏོག་གིས་
བཅིངས་པའི། །ཅོད་པན་དང་ནི་དབུ་རྒྱན་ཐོགས། །ཟུར་ཕུད་གཡོན་པ་བུང་བའི་མདོག །མི་འཁྲུགས་པ་ཡིས་རྣམ་པར་བརྒྱན། །སངས་རྒྱས་རང་བཞིན་སྤྲིན་དག་གིས། །ཆོ་འཕྲུལ་ཆེན་པོ་དུ་མ་འཕྲོ། །
དེ་ལྟར་རྟག་ཏུ་རྣལ་འབྱོར་གང་། །སྒོམ་པས་སྒོམ་པར་བྱེད་པ་དེ། །བླ་ན་མེད་པའི་བྱང་ཆུབ་ཀྱི། །ཐེམ་སྐས་ལ་ནི་འཛེགས་པར་འགྱུར། །དེ་བཞིན་གཤེགས་པ་ཐམས་ཅད་སངས་རྒྱས་ཀྱི་བཀའ་བཞིན་
བྱེད་པ་མི་གཡོ་བའི་ཡེ་ཤེས་རྡོ་རྗེ་བསྒྱིངས་པ་ཞེས་བྱ་བའི་ཏིང་ངེ་འཛིན་ཏོ། །ཧཱུྃ་གི་ཡེ་ཤེས་ལས་བསྒྲུབས་པ། །མིང་ནི་འདོད་པའི་རྒྱལ་པོ་སྟེ། །ཞལ་རས་གསུམ་པ་སྤྱན་གསུམ་པ། །ཕྱག་དྲུག་པ་ཞེས་བྱ་

90-1-71b

བར་བསྒྲགས། །དབུ་རྒྱན་སངས་རྒྱས་ཀྱིས་བརྒྱན་པའི། །ཐོར་ཚུགས་ཅོད་པན་བཟང་པོ་ཅན། །དང་པོའི་ཞལ་ནི་བཞད་པ་ལ། །གཡས་པ་ཡིས་ནི་རྣམ་པར་བསྒྱུར། །གཡོན་པ་ཚེམས་ཀྱིས་སྒྲོས་མནན་ཁྲོ། །དབྲལ་
བ་ཁྲོ་གཉེར་རིམ་པ་ཅན། །འབར་བ་ཆར་སྤྲིན་ལྟ་བུའི་མདོག །དཀྱིལ་འཁོར་དམར་པོ་འབར་བ་ཅན། །ཕྱག་གཉིས་འདོད་པའི་ཕྱག་རྒྱར་ལྡན། །གཡས་པ་ན་ནི་རྡོ་རྗེ་གསུངས། །གསུམ་པ་མདའ་ཡིས་རྣམ་པར་རོལ། །
གཡོན་པ་ཡིས་ནི་ནུ་མ་འཛིན། །གསུམ་པའི་ཕྱག་ན་གཞུ་ཡང་བསྣམས། །པད་མ་ལ་བཞུགས་རོལ་པའི་སྟབས། །འོག་ཏུ་བགེགས་ཀྱང་རྣམ་པར་མནན། །སངས་རྒྱས་ལང་ལོང་འཕྲོ་མཛད་པ། །ཏིང་ངེ་འཛིན་
གྱིས་བསྒོམ་བྱས་ན། །བླ་ན་མེད་པའི་ཡེ་ཤེས་འཐོབ། །སྙིང་ཐམས་ཅད་འགུགས་པའི་ཡེ་ཤེས་ཀྱི་རྡོ་རྗེ་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ཏོ། །ཧཱུྃ་གི་ཡེ་ཤེས་ལས་བསྒྲུབ་པ། །ཁྲོ་བོ་བེ་
ཅོན་སྔོན་པོ་ཅན། །ཞལ་རས་གསུམ་པ་སྤྱན་གསུམ་པ། །ཕྱག་དྲུག་གིས་ནི་རྣམ་པར་བརྒྱན། །དང་པོའི་ཞལ་ནི་འཇོ་སྒེག་བཞད། །དེ་བཞིན་གཡས་པ་རྣམ་པར་གདངས། །གཡོན་པ་ཚེམས་
ཀྱིས་སྒྲོས་ཀྱང་མནན། །སྐུ་ནི་ཁ་ཆུ་འདྲ་བ་སྟེ། །ལུས་ནི་སྦྲུལ་གྱིས་རྣམ་པར་བརྒྱན། །སྐྲ་ཚོགས་ལྕང་ལོར་འཁྱིལ་པ་སྟེ། །དབུ་རྒྱན་ལ་ནི་སངས་རྒྱས་བཞུགས། །པད་མ་ལ་བཞུགས་རོལ་སྟབས་
ཅན། །གཡས་པའི་ཕྱག་ན་རྡོ་རྗེ་སྟེ། །གཉིས་པ་ན་ནི་བེ་ཅོན་ཉིད། །གསུམ་པ་མཚོན་ཆ་མདའ་དང་ལྡན། །གཡོན་པ་བསྡིགས་མཛུབ་ཞགས་པ་སྟེ། །གཉིས་པ་ཡིས་ནི་ནུ་མ་འཛིན། །
གསུམ་པ་ན་ནི་གཞུ་ཉིད་བསྣམས། །དཀྱིལ་འཁོར་དམར་པོ་འབར་བ་ཅན། །སྦྱོར་བའི་ཡེ་ཤེས་ཀྱིས་བསྐྲུན་པའི། །སངས་རྒྱས་སྤྲིན་ནི་རྟག་ཏུ་འཕྲོ། །བགས་ཀྱིས་རྟོགས་པའི་ཡེ་ཤེས་རྡོ་རྗེ་

90-1-72a

རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ཏོ། །ཧཱུྃ་ཞེས་གསུངས་པའི་ཁྲོ་བོ་ནི། །ཡེ་ཤེས་དམ་པ་སྟོབས་པོ་ཆེ། །ཞལ་རས་གསུམ་པ་སྤྱན་གསུམ་པ། །
ཕྱག་བརྒྱད་ཀྱིས་ནི་རྣམ་པར་བརྒྱན། །སྤྲིན་གྱི་ཁ་དོག་འདྲ་བ་སྟེ། །སྦྲུལ་གྱི་རྒྱན་གྱིས་རྣམ་པར་བརྒྱན། །མིག་དམར་སྐྲ་འབར་གྱེན་དུ་བརྫེས། །མགོ་བོ་ལ་ནི་མི་འཁྲུགས་
བཞུགས། །དང་པོའི་ཞལ་ནི་རྣམ་པར་བཞད། །དེ་བཞིན་གཡས་པ་རྣམ་པར་གདངས། །གཡོན་པ་ཚེམས་ཀྱིས་སྒྲོས་མནན་པ། །པད་མ་ལ་བཞུགས་འགྱིང་བག་ཅན། །དྲག་
པོའི་ཚམ་རྔམ་སྟང་སྟབས་ཅན། །ཕྱོགས་བཅུའི་ལྷ་རྣམས་ཕུང་བར་མཛད། །འབར་བ་རྣམས་ཀྱིས་ཡོངས་བསྐོར་བའི། །ཉི་མའི་དཀྱིལ་
འཁོར་ནང་ན་བཞུགས། །གཡས་པའི་ཕྱག་ན་རྡོ་རྗེ་སྟེ། །གཉིས་པ་བེ་ཅོན་ཐོགས་པར་མཚོན། །གསུམ་པ་
ཡིས་ནི་རལ་གྲི་གདེངས། །བཞི་པ་མདའ་ཡིས་རྣམ་པར་བརྒྱན། །གཡོན་པ་སྡིགས་མཛུབ་ཞགས་པ་ཅན། །
གཉིས་པ་ཡིས་ནི་ནུ་མ་འཛིན། །གསུམ་པ་ན་ནི་ཐོ་བ་ཉིད། །ཕྱག་བཞི་པ་ནི་གཞུ་ཅན་ལ། །སངས་རྒྱས་རང་བཞིན་
སྤྲིན་འཕྲོ་བ། །སྒོམ་པ་མཆོག་གིས་བསྒོམ་པར་བྱ། །བསྣོལ་བ་མེད་པའི་ཡེ་ཤེས་རྡོ་རྗེའི་སྟོབས་ཀྱིས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ཏོ། །བྷྲུྃ་གྱི་ཡེ་ཤེས་ལས་བསྒྲུབ་པ། །གཙུག་ཏོར་འཁོར་ལོས་

90-1-72b

བསྒྱུར་བ་སྟེ། །སྐུ་གསུམ་ལྡན་པ་ཞལ་རས་གསུམ། །གསེར་གྱི་མདོག་ཅན་འོད་བཟང་བ། །འདོམ་གང་འོད་ཀྱིས་རྣམ་པར་བརྒྱན། །ཏིང་འཛིན་ཕྱག་རྒྱར་རྣམ་པར་གནས། །རིན་ཆེན་རི་སྟེངས་པད་མ་ལ། །
རྡོ་རྗེ་སྐྱིལ་མོ་དཀྲུང་དུ་བཞུགས། །རིགས་ཀྱི་ཡུམ་ནི་བཞི་པོ་རྣམས། །གཟུགས་དང་ཡན་ལག་ཀུན་མདངས་ཅན། །ཞལ་རས་འཇོ་སྒེག་ཚུལ་གྱིས་བརྒྱན། །གོས་དང་རྒྱན་གྱིས་ཀླུབས་པ་སྟེ། །ཆགས་ཕྱིར་སྤྲོ་བའི་རྩོལ་བ་ཅན། །
ཕྱག་རྒྱ་རིན་ཆེན་སྙེ་མ་དང་། །རྡོ་རྗེ་པད་མ་ཨུད་པལ་ལྡན། །ལྷ་མོ་སོ་སོའི་ཕྱོགས་ན་བཞུགས། །གཙུག་ཏོར་འོད་ཟེར་ལྔ་པ་ཅན། །ཀུན་དུ་འཁོར་ལོའི་ཕྲེང་བ་དང་། །འཁོར་ལོའི་བར་ན་རྡོ་རྗེ་གནས། །འོད་ཟེར་ཕྲེང་
བས་རྣམ་པར་བརྒྱན། །སངས་རྒྱས་རང་བཞིན་སྤྲིན་འཕྲོ་བས། །ནམ་མཁའ་ཐམས་ཅད་འགེངས་པར་མཛད། །བྱང་ཆུབ་སྙིང་པོ་དོན་གཉེར་བས། །འདི་འདྲའི་འཁོར་ལོ་ཅན་སྒོམ་ཞིང་། །བསྒྲིམས་ནས་རྣལ་འབྱོར་བསྒོམ་པ་ཡིས། །
རིང་པོར་མི་ཐོགས་འདོད་པ་འཐོབ། །བྱང་ཆུབ་སྙིང་པོ་ཐམས་ཅད་ཀྱི་རྒྱན་གྱི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །ཛྃ་གྱི་ཡེ་ཤེས་ལས་བསྒྲུབས་པ། །གནོད་སྦྱིན་གནོད་གནས་སྐུ་གསུམ་ཅན། །ཞལ་རས་གསུམ་པ་ཕྱག་གཉིས་
པ། །བཱི་ཛ་པུ་རི་ནེའུ་ལེ་ཅན། །པད་མའི་གདན་ལ་བཞུགས་པ་འམ། །ཡང་ན་བཟང་པོའི་འདུག་སྟངས་གནས། །ངོས་ན་རྒྱན་རྣམས་ཐམས་ཅད་ཀྱིས། །བརྒྱན་པའི་གནོད་སྦྱིན་མེ་བཞི་དག །རིན་ཆེན་ཆར་པ་འབེབས་པར་
བྱེད། །མགོ་བོའི་སྟེང་ན་སངས་རྒྱས་ལྔ། །དེ་ཡི་ཅོད་པན་བཟང་པོ་ཡི། །གཡོན་ཕྱོགས་རྩེ་ཕྲན་རྒྱན་ཡང་ཆགས། །སངས་རྒྱས་རྣམས་ཀྱི་སྤྲིན་འཕྲོ་ཞིང་། །རིན་ཆེན་ཆར་པ་འབེབས་པར་མཛད། །
གང་ཞིག་ནོར་རྫས་འདོད་པ་ཡིས། །གནོད་གནས་འདི་འདྲ་བསྒོམ་བྱས་ན། །དེ་ཡིས་ས་ཆེན་ནོར་རྫས་ཀྱིས། །རིང་པོར་མི་ཐོགས་གང་བར་འགྱུར། །ལག་ན་རྡོ་རྗེས་བདུད་རྩི་ཡི། །ཆུ་ཡང་རྟག་ཏུ་དབུལ་བར་བྱ། །

90-1-73a

རིན་པོ་ཆེ་སྤྲིན་སྦྱིན་པའི་ཆར་པ་འབེབས་པའི་ཡེ་ཤེས་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །མ་ཡི་ཡེ་ཤེས་ལས་བསྒྲུབས་པའི། །ཉི་མའི་འོད་ལྔ་འོད་ཟེར་ཅན། །རྟ་བདུན་ལྡན་པའི་ཤིང་རྟར་བཞུགས། །
འབར་བའི་དཀྱིལ་འཁོར་སྣང་མཛད་པ། །ཞལ་རས་གསུམ་པ་སྤྱན་གསུམ་ལྡན། །ཕྱག་དྲུག་ཁ་དོག་སེར་པོར་སྣང་། །ཕྱོགས་བཅུ་བསྲུང་བར་བརྩོན་པ་སྟེ། །འཇོ་སྒེག་ཚུལ་དུ་ཞལ་ཡང་བཞད། །ན་ཆུང་རྒྱན་ནི་གཡོ་བ་ཅན། །
ཅོད་པན་རྫོགས་པའི་སངས་རྒྱས་ལྔ། །ཐོར་ཚུགས་མེ་ཏོག་རྣམས་ཀྱིས་བརྒྱན། །གཡས་པའི་ཕྱག་ན་རྡོ་རྗེ་སྟེ། །གཉིས་པ་ལ་ནི་ཁབ་སྐུད་རྣམས། །གསུམ་པ་ན་ནི་མདའ་ཡང་གསོར། །གཡོན་པ་སྡིགས་འཛུབ་ཞགས་པ་ཅན། །གཉིས་པ་
ཨ་ཤོའི་ཡལ་ག་སྟེ། །གསུམ་པ་ན་ནི་གཞུ་ཉིད་དོ། །གཟུགས་བརྙན་མང་པོ་འཕྲོ་བ་ཡིས། །སྡང་བའི་སེམས་ཅན་བཅིང་བ་དང་། །མིག་དང་ཁ་ནི་འབྲུབ་པར་བྱེད། །གསང་སྔགས་བཟླས་བརྗོད་བད་པ་དག །གལ་ཏེ་བྱང་ཆུབ་
མཆོག་འདོད་ན། །ལྷ་མོ་ཧཱུྃ་མཛད་བསྒོམ་པར་བྱ། །འདི་ནི་བསྒོམ་པར་བྱེད་པ་ཡིས། །དབང་དུ་སེམས་ཅན་རབ་ཏུ་འགྲོ། །སྡང་བ་རྣམས་ཀྱིས་མི་ཚུགས་པར་བྱེད་པའི་རྡོ་རྗེ་མཆོག་རབ་ཅེས་བྱ་བའི་ཏིང་ངེ་འཛིན་ཏོ། །པ་ཡི་
ཡེ་ཤེས་ལས་བསྒྲུབས་པའི། །རིག་པའི་རི་ཁྲོད་ཤིང་ལོ་ཅན། །ཞལ་རས་གསུམ་པ་སྤྱན་གསུམ་པ། །ཞལ་རས་བཞད་ཅིང་ཁྲོ་དང་བཅས། །རྒྱན་རྣམས་ཀུན་གྱིས་བརྒྱན་པ་སྟེ། །ན་ཆུང་གཞོན་ནུ་ཕྱག་དྲུག་མ། །གཡས་
པའི་ཕྱག་ན་རྡོ་རྗེ་སྟེ། །གཉིས་པ་ན་ནི་དགྲ་སྟ་ཉིད། །གསུམ་པ་མདའ་ཡང་རྣམ་པར་གསོར། །གཡོན་པ་སྡིགས་མཛུབ་ཞགས་པ་ཅན། །གཉིས་པ་ཤིང་ལོའི་བམ་པོ་སྟེ། །ཕྱག་གསུམ་པ་ན་གཞུ་ཉིད་དོ། །
ཐོར་ཚུགས་མེ་ཏོག་ཕྲེང་བས་བརྒྱན། །དེ་སྟེང་ཁ་དོག་ལྔ་པོ་དག །རབ་ཏུ་འདྲེས་པའི་སངས་རྒྱས་བཞུགས། །མདོག་སེར་པད་མའི་གདན་ལ་བཞུགས། །དཀྱིལ་འཁོར་དམར་པོ་ཆེར་འབར་བས། །ཁྲོ་བོའི་སྤྲིན་འཕྲོ་སྡུད་

90-1-73b

མཛད་ཅིང་། །གདོན་གང་སྐྱེས་དགུའི་ནང་གནས་པ། །དེ་དག་ཁྲོ་བོའི་མེས་ཀྱང་བསྲེག །ཕྱིར་ཡང་བསྲེགས་ནས་སངས་རྒྱས་ཀྱི། །ཁ་དོག་བདུད་རྩི་ཆར་འབེབས་མཛད། །དེ་འདྲ་རྣལ་འབྱོར་
གྱིས་བསྒོམས་ན། །མི་དེས་ཐམས་ཅད་ཞི་བར་མཛད། །ནད་ཐམས་ཅད་ཞི་བར་བྱེད་པའི་ཡེ་ཤེས་ཀྱི་རྡོ་རྗེ་འབར་བ་ཞེས་བྱ་བའི་ཏིང་ངེ་འཛིན་ཏོ། །ཛ་ཡི་ཡེ་ཤེས་ལས་བསྒྲུབས་པ། །རིག་སྔགས་
མཚན་ནི་དུག་སེལ་མ། །སྦྲུལ་མགོ་བདུན་གྱི་གདེངས་ཀ་ཅན། །ནོར་བུ་འབར་བས་བརྒྱན་པ་སྟེ། །ཞལ་རས་གསུམ་པ་སྤྱན་གསུམ་པ། །གཞོན་ནུ་མཚན་ནི་འབར་བ་ཅན། །བཞད་ཅིང་ཁྲོ་དང་བཅས་པ་སྟེ། །
སྦྲུལ་གྱི་སྐ་རགས་དག་གིས་བརྒྱན། །ཕྱག་དྲུག་རོལ་པའི་སྟངས་སྟབས་ཅན། །མགོ་ཡི་སྟེང་ན་མི་འཁྲུགས་བཞུགས། །གཡས་པའི་ཕྱག་ན་རྡོ་རྗེ་སྟེ། །གཉིས་པ་རལ་གྲི་ཐོགས་པར་བརྩོན། །ཕྱག་གསུམ་
པ་ནི་གར་ཐབས་ཀྱིས། །སྟངས་སྟབས་ཚུལ་གྱིས་མདའ་ཡང་གསོར། །གཡོན་པ་སྡིགས་འཛུབ་ཞགས་པ་ཅན། །གཉིས་པ་དུག་གི་མེ་ཏོག་ཅན། །ཕྱག་གསུམ་པ་ན་གཞུ་ཉིད་དོ། །དབུ་རྒྱན་མེ་ཏོག་རྣམས་ཀྱིས་
བརྒྱན། །གསེར་མདོག་པད་མའི་གདན་ལ་བཞུགས། །འོད་ནི་དམར་པོའི་དཀྱིལ་འཁོར་ཅན། །ཛ་རྣམས་འཕྲོ་བས་བསྐོར་བ་སྟེ། །ཀུན་ནས་འབར་བ་རྣམས་ཀྱིས་ཁེབས། །སངས་རྒྱས་གཟུགས་བརྙན་
འཕྲོ་བ་ཅན། །ཕྱག་བཟང་བུམ་པ་ཟླ་འདྲ་བའི། །ཁ་ན་ཛ་ཡི་རྣམ་བརྒྱན་པས། །དུག་གིས་ཕོག་པ་རྣམས་ལ་ལྡུགས། །རྟག་ཏུ་སྐུ་གསུམ་དུག་སེལ་མ། །དུག་གིས་ཕོག་པ་རྣམས་ལ་བསྒོམ། །དེ་ལྟར་བསྒོམ་པར་བྱས་
པ་ཡིས། །རིང་པོར་མི་ཐོགས་བྱང་ཆུབ་འཐོབ། །ཉོན་མོངས་རྣམས་ཀྱི་དུག་སེལ་བ། །གདེངས་ཀའི་དབང་པོ་རྡེ་རྗེ་ཡེ་ཤེས་ཀྱི་ཕྱག་རྒྱ་ཞེས་བྱ་བའི་ཏིང་ངེ་འཛིན་ཏོ། །ཏྲི་ཡི་ཡེ་ཤེས་ལས་བསྒྲུབས་པ། །སྐུ་ཆེན་ཧ་ལ་ཧ་ལ་སྟེ། །

90-1-74a

ཞལ་རས་གསུམ་པ་སྤྱན་གསུམ་པ། །ཐོར་ཚུགས་ཅོད་པན་རྣམས་ཀྱིས་བརྒྱན། །ཟླ་བ་ཚེས་པ་བསྣམས་པའི་ལྷ། །དབུ་རྒྱན་ཐོད་པ་དག་གིས་བརྒྱན། །ཐོར་ཚུགས་རྒྱལ་པོའི་སྐུ་གཟུགས་བཞུགས། །རྒྱན་རྣམས་ཀུན་གྱིས་
བརྒྱན་པ་སྟེ། །པད་མ་དཀར་པོ་ལྟ་བུར་སྣང་། །སེམས་སྟོབས་ལྡན་པའི་འཇོ་ཚུལ་ཅན། །ཕྱག་བརྒྱད་ཞལ་ཡང་བཞད་པ་སྟེ། །སྨད་གཡོགས་སྟག་གི་ལྤགས་པ་མནབས། །གཡས་པའི་ཕྱག་ན་རྡོ་རྗེ་སྟེ། །གཉིས་པ་བགྲང་ནོར་ཕྲེང་བ་
ཅན། །གསུམ་པ་ཡིས་ནི་མདའ་ཡང་གསོར། །གཡོན་པ་པད་མས་རྣམ་པར་བརྒྱན། །གཉིས་པ་ཡིས་ནི་ནུ་མ་འཛིན། །གསུམ་པ་ན་ནི་གཞུ་ཉིད་དོ། །གཡས་པ་མདུང་རྩེ་གསུམ་པ་ལ། །སྦྲུལ་གྱིས་ཡོངས་སུ་དཀྲིས་པ་སྟེ། །
གཡོན་ན་ཐོད་པ་དྲི་ཞིམ་པའི། །མེ་ཏོག་སྣ་ཚོགས་ཀྱིས་བཀང་བ། །པད་མ་དམར་པོ་ལ་བཞུགས་པ། །རོལ་པའི་སྟངས་སྟབས་ཚུལ་དུ་གནས། །རིན་ཆེན་རི་ཕུག་ནང་བཞུགས་པར། །རྣལ་འབྱོར་སེམས་དཔས་བསྒོམ་
པར་བྱ། །སངས་རྒྱས་རང་བཞིན་གཟུགས་དང་ནི། །ཆོ་འཕྲུལ་ཆེན་པོ་སྣ་ཚོགས་འབྱུང་། །རྣམ་པར་མི་རྟོག་ཏིང་འཛིན་གྱིས། །ཁ་ཟས་ཐམས་ཅད་ཟ་བྱེད་ཅིང་། །ནང་གི་སྔགས་པས་སྔགས་བརྗོད་ཅིང་། །རིམ་བཞིན་
རྣལ་འབྱོར་གྱིས་བསྒོམས་ན། །བྱང་ཆུབ་མྱུར་དུ་ཐོབ་འགྱུར་ཞིང་། །བླ་ན་མེད་པའི་བདེ་བ་འདྲེན། །འདོད་པ་ཐམས་ཅད་རབ་བསྒྲུབ་པ། །ཧ་ལ་ཧ་ལ་ཡོངས་སུ་མཉེས་པར་བྱེད་པའི་ཡེ་ཤེས་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་
ཏོ། །ས་ཡི་ཡེ་ཤེས་ལས་བསྒྲུབས་པ། །སྟོང་ཆེན་རབ་ཏུ་འཇོམ་མཛད་པ། །ལྷ་མོ་ནད་ཀུན་འཕྲོག་མ་སྟེ། །སྡང་བའི་སེམས་ཅན་འཛོམས་མཛད་མ། །ཕྱག་སྟོང་ལྡན་ཞིང་དབུ་སྟོང་ལ། །སྤྱན་གསུམ་དག་གིས་རྣམ་པར་བརྒྱན། །
བརྩོན་ཆེན་ཕྱག་བརྒྱད་ཁྲོ་བ་དང་། །སྟེག་པའི་སྟབས་ཀྱིས་དགོངས་པ་ཅན། །ཕྱག་གཡས་མཆོད་སྦྱིན་ལྷ་རྫས་ཀྱི། །རལ་གྲི་ལྕགས་ཀྱུ་མདའ་དང་ལྡན། །ཕྱག་གཡོན་པད་མོ་རྡོ་རྗེ་ནོར། །ཞགས་པ་གཞུ་དང་སྟ་རེ་ཅན། །

90-1-74b

མདོག་དམར་ཞལ་རས་བཞི་པ་སྟེ། །བགེགས་སྟོང་འཇོམས་པར་མཛད་པ་ཡིན། །རང་གི་རྣལ་འབྱོར་ལ་བརྩོན་པས། །ནམ་མཁའི་མཐའ་གཏུགས་འཇུག་ཅིང་སྤྲོ། །གླང་པོ་རྟ་དང་སྐྱེས་པ་དག །ཟ་བར་
མཛད་མ་ཕྲེང་བ་ཅན། །དེ་ཡི་ལས་ཀྱིས་བསྐུལ་བ་ཡི། །གསང་སྔགས་དཔའ་བོས་གནོན་པར་བྱ། །རྣལ་འབྱོར་དབང་ཕྱུག་ལས་འདོད་པས། །འདི་བྱས་པས་ནི་སྲུང་བར་འགྱུར། །དཔུང་ཆེན་པོ་ལ་རྣམ་པར་ལྟ་བ་ཐམས་ཅད་སྲུང་
བ་སྟོབས་ཀྱི་མཆོག་སྟོང་ཆེན་པོ་རྣམ་པར་འཇོམས་པའི་ཡེ་ཤེས་ཀྱིས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །དྷྭྃ་ཞེས་བྱ་བས་བསྐྱེད་པ་ཡི། །བསྡིགས་པའི་འཛུབ་མོའི་ཕྱག་རྒྱ་ཅན། །དྲག་མོ་ཆེན་མོ་ཞལ་བཞི་པ། །
སྤྱན་གསུམ་ཕྱག་བརྒྱད་ཀྱིས་རྣམ་བརྒྱན། །རལ་གྲི་གཏུན་ཤིང་འཁོར་ལོ་མདའ། །མདུང་རྩེ་གསུམ་པ་རྡོ་རྗེ་གཞུ། །ཆོམ་རྐུན་འཛུབ་མོས་བསྡིགས་པ་སྟེ། །རྡོ་རྗེ་རོ་ལངས་འབྱུང་བ་དག །མཐོང་བས་དཔུང་རྣམས་བཅོམ་
གཏོར་བས། །ལྷ་མོ་རྟག་ཏུ་བསྒོམས་ན་ནི། །རིང་པོར་མི་ཐོགས་བྱང་ཆུབ་འཐོབ། །འཇིག་རྟེན་གསུམ་རྣམ་པར་འཇོམས་པ་ལ་མཁས་པ་མཆོག་གི་རྩེ་མོ་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །པྲ་ཡི་ཡེ་ཤེས་ལས་བསྒྲུབས་
པ། །སྟོབས་ཆེན་ཕ་རོལ་གནོན་མཛད་མ། །སྤྱན་གསུམ་ཕྱག་བརྒྱད་གཡས་པ་ན། །རལ་གྲི་འཁོར་ལོ་མདུང་རྩེ་གསུམ། །མདའ་ཡིས་རྣམ་བརྒྱན་ཕྱག་གཡོན་ན། །རྡོ་རྗེ་ཞགས་པ་དགྲ་སྟ་གཞུ། །བསྣམས་པས་སྡང་བའི་
བགེགས་ལྟུང་མཛད། །བུ་མི་འཚོ་དང་མོ་ཤམ་དག །གསང་བའི་དཀྱིལ་འཁོར་བཅུ་གནས་སུ། །ལྷ་རྣམས་ཀུན་གྱི་བུམ་པ་འཛིན། །སློབ་དཔོན་གྱིས་ནི་དབང་བསྐུར་ཞིང་། །དེ་ཡི་མངལ་དུ་བྱིས་པ་ནི། །འཇམ་པའི་གཟུགས་
ཅན་འཇུག་པར་བསམ། །ཞགས་པའི་ཕྱག་རྒྱས་མཚན་ངན་ནས། །སྐྱེས་པ་གཟུགས་ཅན་འབྱུང་བ་དང་། །དྲན་པ་ཡིས་ནི་བྲལ་ནས་ཀྱང་། །མངལ་ནི་བསོད་ནམས་དག་གིས་སྤེལ། །མངལ་ཐམས་ཅད་རྣམ་པར་ལྟ་བ་སོ་སོར་

90-1-75a

འབྲང་མའི་ཡེ་ཤེས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བ་ཡི་ཡེ་ཤེས་རོལ་པས་བསྐྲུན། །ལྷ་མོ་ནོར་གྱི་བློ་གྲོས་མ། །གཟི་ཆེན་གསེར་གྱི་མདོག་ཅན་ལ། །ཕྱག་དྲུག་ལང་ཚོ་དར་ལ་བབ། །རྒྱན་རྣམས་
ཀུན་གྱིས་བརྒྱན་པ་སྟེ། །འཇོ་སྒེག་ཐབས་བཅས་འབར་བ་སྟེ། །དེ་ཡི་ཕྱག་གཡས་མཆོག་སྦྱིན་མཛད། །གཉིས་པས་འབྲུ་ཡི་སྙེ་མ་དང་། །གསུམ་པ་ཡིས་ནི་མདའ་ཡང་གསོར། །ཕྱག་གཡོན་ཡིད་བཞིན་ནོར་བུ་དང་། །
རིན་ཆེན་ཆར་འབེབས་གཞུ་ཡང་འཛིན། །གྲོགས་མོའི་སྐྱེ་བོས་ཡོངས་བསྐོར་ཅིང་། །མངག་གཞུག་གནོད་སྦྱིན་མོ་ཡི་གཟུགས། །རིན་ཆེན་ཆར་པ་འབབས་པ་དང་། །ནོར་ཀུན་གྱི་ནི་ཆར་པ་ཡང་། །འབེབས་པར་བྱེད་པ་
བསམ་པར་བྱ། །ནོར་གྱི་བློ་གྲོས་ཆེན་མོ་འདི། །དེ་ལྟར་སྔགས་པས་བསྒོམས་ན་དེས། །དཔག་ཚད་བདུན་ནི་རྒྱས་པར་ཡང་། །ནོར་གྱི་ཆར་གྱིས་ཁྱབ་པར་མཛད། །བྱང་ཆུབ་སྦྱིན་མཆོག་དམ་པ་མ། །དེ་ལྟར་རྣལ་འབྱོར་
བདག་ཉིད་བསྒོམ། །ནོར་གྱི་རྒྱུན་གྱི་ཆར་རབ་ཏུ་འབེབས་པའི་ཡེ་ཤེས་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །བི་ཡི་ཡེ་ཤེས་ལས་བསྒྲུབས་པ། །སྲིན་མོ་འབར་བའི་གློག་ཕྲེང་ཅན། །མིང་ནི་དངུལ་དཀར་ལས་སྐྱེས་མོ། །
སྟོབས་མོ་ཆེ་ལ་ཕ་རོལ་གནོན། །གསུས་འཕྱང་མོ་ལ་མཆེ་གཙིགས་མ། །སྐྲ་སེར་ཁམ་པ་གྱེན་དུ་བརྫེས། །ཐོར་ཚུགས་ཅོད་པན་གྱིས་བརྒྱན་པ། །སྤྱི་བོ་ལ་ནི་མི་འཁྲུགས་བཞུགས། །བཅུ་གཉིས་དབུ་དང་བཅྭ་བརྒྱད་
ཕྱག །སྤྱན་ནི་གསུམ་གསུམ་ཐོད་ཕྲེང་ལྡན། །དྲག་མོ་ལག་ན་རཀྟ་ཡིས། །བཀང་བའི་ཐོད་པ་ཐོགས་པ་སྟེ། །སྨད་གཡོགས་སེང་གེའི་ལྤགས་པས་གཡོགས། །སྦྲུལ་གྱིས་མཆོད་ཕྱིར་ཐོགས་པ་ཅན། །རལ་གྲི་
ལྕགས་ཀྱུ་འཁོར་ལོ་དང་། །གཏུན་ཤིང་རྩེ་གསུམ་དྲིལ་བུ་དང་། །བ་དན་ལྷག་དབྱུག་མདུང་མཆོག་སྦྱིན། །གཞུ་མདའ་མདུང་ཐུང་བེ་ཅོན་དང་། །ཞགས་པ་དགྲ་སྟ་ཐོ་བ་ཐོགས། །རྒྱན་རྣམས་ཀྱིས་ནི་ལུས་ལ་བརྒྱན། །

90-1-75b

མདོག་ནག་རོལ་པའི་སྟབས་ཀྱིས་ནི། །པད་མའི་གདན་བཞུགས་སྡང་བ་དག །འདུལ་བ་ཞེས་བརྗོད་འདི་ལྟ་བུ། །རྟག་ཏུ་ཧཱུྃ་གིས་ཧཱུྃ་མཛད་པ། །བཟླས་བརྗོད་ཡང་དག་ལྡན་པར་བསྒོམས། །སེམས་ཅན་
ཀུན་དོན་ཚོགས་པ་ཡི། །བྱང་ཆུབ་རིང་པོར་མི་ཐོགས་འཐོབ། །སེམས་ཅན་ཐམས་ཅད་འཆིང་བར་བྱེད་པའི་མཆོག་རབ་བྱང་ཆུབ་ཀྱི་སྙིང་པོར་རྣམ་པར་རྒྱལ་བའི་སྟོབས་ཞེས་
བྱ་བའི་བསྒོམ་པའི་གཟུགས། །རྒྱན་རྣམས་ཀུན་གྱིས་བརྒྱན་པ་སྟེ། །ན་ཆུང་གཞོན་ནུ་འཇོ་ཚུལ་ཅན། །མགོ་བོ་སྐྲ་ཚུགས་ཕྱེད་ཏུ་གཟུང་། །དེ་བཞིན་དུ་ནི་སྟོད་གཡོགས་ཀྱང་། །ལ་དཀར་སེང་བ་བགོས་པ་སྟེ། །
དེ་ལ་ཁ་དོག་ལྔ་པ་ཡི། །མེ་ཏོག་འཕྲུལ་པ་རྣམས་ཀྱིས་བརྒྱན། །གསེར་གྱི་མདོག་ཅན་བཞིན་འཛུམ་པ། །ཕྱེད་ཟུར་བས་ནི་རྣམ་པར་རོལ། །དཔག་བསམ་ཤིང་གིས་བརྒྱན་པ་ཡི། །རིན་ཆེན་རི་ལ་
ལེགས་པར་ཞུགས། །འཇམ་པའི་ཁྲོ་བོ་རྡོ་རྗེ་ཡིས། །དེ་ཡི་མགོ་བོ་མནན་ནས་བཞུགས། །ཐ་མ་ཐོག་ཐག་གནོད་སྦྱིན་མོས། །ནམ་མཁའ་གང་བར་བསྒོམ་པར་བྱ། །གནོད་སྦྱིན་མོ་ཐམས་ཅད་སྒྲུབ་པའི་
མཆོག་རབ་ཅེས་བྱ་བའི་ཏིང་ངེ་འཛིན་ཏོ། །སྔགས་ལ་ཨོཾ་ཨཱཿཧཱུྃ། ཡི་གེ་གསུམ་པ་མིག་གསུམ་གཟུགས། །ཁྱབ་འཇུག་ལྷ་ཆེན་མེས་པོ་སྟེ། །གདོང་གསུམ་རང་གི་མཚོན་ཐོགས་ལ། །རྡོ་རྗེ་ཧཱུྃ་མཛད་
ཀྱིས་བསྐུལ་ཅིང་། །རྡོ་རྗེ་ཏིང་ངེ་འཛིན་བསྒོམས་ནས། །མོད་ལ་དངོས་གྲུབ་ཐོབ་པར་འགྱུར། །འཇིག་རྟེན་ཐམས་ཅད་གྲུབ་པ་མིག་གསུམ་རྣམ་པར་རོལ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏོ། །གཞན་ཡང་
གསང་སྔགས་ཡི་གེ་ཡི། །ས་བོན་གང་གིས་སྦྱར་བྱས་ཏེ། །རྡོ་རྗེ་ཡིག་འབྲུ་རྣམས་བསྒོམས་ན། །དེ་དག་མ་བསྒྲིམས་བཞིན་དུ་འགྲུབ། །འཕྲོག་མ་འཕྲོག་བྱེད་ལས་སྐྱེས་པའི། །བུ་ནི་ལྔ་བརྒྱ་པོ་རྣམས་དང་། །ལྔ་རྩེན་དང་ནི་

90-1-76a

དཔལ་ཅན་མ། །མྱུར་བ་ཉིད་དུ་འགྲུབ་པར་འགྱུར། །རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བ་ལས་ཏིང་ངེ་འཛིན་རིམ་པར་ཕྱེ་བའི་ལེའུ་སྟེ་བཞི་པའོ།། །། དེ་ནས་བཅོམ་ལྡན་འདས་རྣམ་པར་སྣང་མཛད་
ཆེན་པོ་རྡོ་རྗེ་དེ་བཞིན་གཤེགས་པ། དེ་བཞིན་གཤེགས་པ་ཐམས་ཅད་ལ་ཞི་བར་ལྟ་བ་རྡུལ་དང་བྲལ་བའི་མཆོག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དེ་བཞིན་གཤེགས་ཐམས་ཅད་ཀྱི་ཡུམ་ལས་སྣ་ཚོགས་
ཀྱི་ཡེ་ཤེས་བསྐྱེད་པར་མཛད་པ་འདི་དམ་ཚིག་གསུམ་གྱི་རྡོ་རྗེ་ལས་ཕྱུང་ངོ་། །ཨོཾ་བྷ་ག་བ་དཱི་རུ་རུ་སྥུ་རུ་ཛྭ་ལ་ཏིཥྛ་སིད་དྷི་ལོ་ཙ་ནི་སརྦྦ་ཨཪྠ་ས་དྷ་ནི་སྭཱ་ཧཱ། དེ་ནས་ལས་ཐམས་ཅད་རབ་ཏུ་རྫོགས་པར་བྱེད་པ་འདི་གསུངས་པ་ཙམ་གྱིས། 
སངས་རྒྱས་རྣམས་ནི་ཐམས་ཅད་དང་། །བྱང་ཆུབ་སེམས་དཔའ་མཁས་རྣམས་དགྱེས། །བདུད་ཀྱི་དཔུང་རྣམས་འདར་འགྱུར་ཏེ། །སངས་རྒྱས་རྡོ་རྗེ་རྗེས་དྲན་བྱེད། །ཞི་བ་སངས་རྒྱས་རྣམས་ཀྱི་ཡུམ། །རྡོ་རྗེ་དམ་ཚིག་གིས་བསྐུལ་ན། །ཤི་བ་རྣམས་ལ་སྲོག་
སྦྱིན་མཛད། །མ་གྲུབ་པ་རྣམས་གྲུབ་པར་སྩོལ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེ་དེ་བཞིན་གཤེགས་པ་སྐུ་གསུམ་རྡོ་རྗེ་འབར་བའི་མཆོག་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་
འཆང་མཆོག་ཐམས་ཅད་བསྐྱེད་པའི་ཡུམ་རྡོ་རྗེ་དཀྱིལ་འཁོར་ཐམས་ཅད་ཀྱི་དངོས་གྲུབ་ཐམས་ཅད་རབ་ཏུ་སྒྲུབ་པར་བྱེད་པ་འདི་ཕྱུང་ངོ་། །ཨོཾ་ཤྃ་ཀ་རེ། ཤཱན་ཏིཾ་ཀ་རི། གྷུཊྚ་གྷུཊྚ་གྷུཊྚི་ནི་གྷཱ་ཊ་ཡ་གྷུཊྚི་སྭཱ་ཧཱ། དེ་ནས་འདི་ནི་གསུངས་
ཙམ་གྱིས། །རྡོ་རྗེ་གསུམ་ལས་སྐྱེས་གྱུར་པ། །ཐམས་ཅད་ཀྱིས་ནི་མིག་ཕྱེ་ནས། །རྡོ་རྗེ་ཤུག་ནི་རྗེས་དྲན་གྱུར། །སྒྲུབ་པ་ཐམས་ཅད་སྲུང་མཛད་མ། །དེ་བཞིན་ལས་རྣམས་སྒྲུབ་པ་ཡིན། །སྡིག་པ་ཐམས་ཅད་
འཇོམས་མ་སྟེ། །ཞི་དང་རྒྱས་དང་འཕེལ་མཛད་མའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་འདོད་ཆགས་ཆེན་པོས་ཞེན་པ་པད་མ་གར་གྱི་སྟང་སྟབས་ཐུགས་ཀྱི་རྡོ་རྗེ་གསུམ་གྱིས་རྣམ་པར་འཐོར་བའི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་

90-1-76b

པར་ཞུགས་ནས་ཆོས་ཐམས་ཅད་འཛིན་པ་མཆོག་གི་ཡུམ་འདི་རྡོ་རྗེ་གསུམ་རྣམས་ལས་ཕྱུང་ངོ་། །ཨོཾ་ཀ་ཊེ་བི་ཀ་ཊེ་ནི་ཀ་ཊེ། ཀ་ཊྃ་ཀ་ཊེ་སྭཱ་ཧཱ། དེ་ནས་ཆོས་ཀྱི་རྒྱལ་མཚན་མཆོག །དམ་པ་
འདི་ནི་གསུངས་ཙམ་གྱིས། །ཏིང་ངེ་འཛིན་གྱིས་མིག་ཕྱེ་ནས། །རྡོ་རྗེ་པད་མ་རྗེས་དྲན་བྱེད། །རྒྱས་པ་ཆེན་པོ་ཡུམ་ཡིན་ཏེ། །ཆོས་མཛོད་རྣམས་པར་འཕེལ་མཛད་མ། །བསྒོམས་ཤིང་བསྟན་ཏེ་བཟླས་
བརྗོད་ན། །རྒྱ་ཆེར་སྲུང་བར་མཛད་པ་ཡིན། །དེ་ནས་བཅོམ་ལྡན་འདས་ཀྱིས་ཐམས་ཅད་དབང་དུ་བྱ་བ་ཁོང་དུ་ཆུད་པས། རྡོ་རྗེ་གསུམ་མཉམ་པ་ཉིད་ཀྱིས་དགའ་བར་བྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ནས་ཡེ་ཤེས་ལ་འཇུག་པར་བྱེད་པ་སྣ་ཚོགས་ཐམས་ཅད་འཆང་བའི་ཡུམ་གྱི་སྒྲོས་མ་འདི་གསུངས་སོ། །ཨོཾ་ཏཱ་རེ་ཏུཏྟྭ་རེ་ཏུ་རེ་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །སངས་རྒྱས་ཀུན་དང་སྲས་ཀྱི་རྣམས། །
སྤྱན་ཕྱེད་རྣམ་པར་གདངས་ནས་སུ། །ཡེ་ཤེས་རྡོ་རྗེ་ལྡན་པར་དྲན། །ལྷ་མོ་བཟླས་བརྗོད་བྱས་ཙམ་གྱིས། །སྐྱེ་དགུ་རྣམས་ནི་མངག་གཞུག་འགྱུར། །དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་
ཅད་ཀྱི་མཆོག་གི་ཡེ་ཤེས་ལ་འཇུག་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་རྡོ་རྗེ་གསུམ་ལས་ཕྱུང་ངོ་། །ན་མཿས་མན་ཏ་བུད་དྷཱ་ཎཱྃ། ཨོཾ་ཁ་ཁ་ཁཱ་ཧི་ཁཱ་ཧི། སརྦ་དུཥྚ་ས་ཏྭོ་ད་མ་ཀ་
ཨ་སི་མུ་ཥ་ལ་པ་ཪྴ་པཱ་ཤ་ཧསྟ། ཙ་ཏུར་མུ་ཁ། ཙ་ཏུར་བྷུ་ཛ། ཥ་ཊ་ཙ་ར་ཎ། ཨཱ་གཙྪ། ཨཱ་གཙྪ། སརྦྦ་དུཥྚ་པྲཱ་ཎ་ཨ་པ་ཧཱ་རི་ཎེ། མ་ཧཱ་བི་གྷྣཱ་གྷཱ་ཏ་ཀ ། བི་ཀྲི་ཏ་ཨཱན་ན། སརྦྦ་བྷུ་ཏ་བྷ་ཡྃ་ཀ་ར། 
ཨཊྚཱཊྚ་ཧཱ་ས་ནཱ་དི་ན། བྱཱ་གྷྲ་ཙར་མ་ནི་བ་ས་ན། ཀུ་རུ་ཀུ་རུ། སརྦྦ་ཀརྨཱ་ཎི། ཚིན་དྷ་ཚིན་དྷ། སརྦྦ་མཱན་ཏྲན། བྷིན་དྷ་བྷིན་དྷ་པ་ར་མུ་དྲཱན། ཨཱ་ཀར་ཥ་ཡ། ཨཱ་ཀར་ཥ་ཡ། སརྦྦ་བྷཱུ་ཏཱན། མ་ཐ་མ་ཐ། ནིར་མ་ཐ་ནིར་མ་ཐ། 

90-1-77a

སརྦྦ་དུ་པྲ་བི་ཤ་ཡ། པྲ་བི་ཤ་ཡ། མཎ་ཌལ་མ་དྷྱེ་བེ་བ་ཤྭ་ཏ། ཛཱི་བི་ཏཱན་ཏ་ཀ་ར། ཀུ་རུ་ཀུ་རུ། མ་མ་ཀཱརྱཾ། ད་ཧ་ད་ཧ། པ་ཙ་པ་ཙ། མཱ་བི་ལམ་བ། མཱ་བི་ལམྦ། ས་མ་ཡ་མ་ནུ་སྨར། ཧཱུྃ་ཧཱུྃ། ཕཊ་ཕཊ། བི་སྥོ་ཊ་ཡ། བི་སྥོ་
ཊ་ཡ། སརྦྦན་ནཱ་ཤ་ཡ་རི་པཱུན། ཀར་ཀར། བིགྷྣ་ནྃ་སརྦ་ཨཱ་ཤཱ་པ་རི་པཱུ་ར་ཀ ། ཧེ་ཧེ་བྷྲ་ག་བཱན། ཀིཉྩིར་ཡ་སི། མ་མ་སརྦྦ་ཨརྠ་སཱ་དྷ་ཡ་སྭཱ་ཧཱ། དེ་ནས་ཁྲོ་བོ་འདི་གསུངས་པས། །སངས་རྒྱས་བྱང་ཆུབ་སེམས་མཁས་ཀུན། །
འདར་ཞིང་འཇིགས་པ་སྐྱེས་གྱུར་ནས། །གཙོ་བོ་རྡོ་རྗེ་རྣམ་སྣང་མཛད། །རྡོ་རྗེ་ར་བ་དྲ་བ་ཡིན། །ཡེ་ཤེས་སྣ་ཚོགས་ཅན་ལ་ལྟ། །སྲུབས་གཅིག་པའམ་སྲུབས་གཉིས་པའི་ཐོད་པ་བཟང་པོ་རྙིང་པ་དང་། །རྐང་རྗེས་སའི་ཆོ་ག་ལ། །
ལྷ་མོ་བཞི་པའི་སྦྱོར་བ་དང་། །སངས་རྒྱས་ལྔ་ཡིས་བྱིན་བརླབས་ཏེ། །སྐུ་གསུམ་དབྱེར་མེད་བསྒོམས་ནས་སུ། །མྱུར་བར་ཁུགས་ཀྱི་བར་དུ་ནི། །རྐང་པས་མནན་ཏེ་བཟླས་བརྗོད་བྱ། །ཞེས་བཅོམ་ལྡན་འདས་རྡོ་རྗེ་
རྣམ་པར་སྣང་མཛད་ཆེན་པོས་བཀའ་སྩལ་ཏོ། །དེ་ནས་བཅོམ་ལྡན་འདས་ཀྱིས་ཡེ་ཤེས་ཀྱི་རྡོ་རྗེ་གདོན་མི་ཟ་བའི་མཆོག་སྤྲིན་ཆེན་པོ་ནམ་མཁའི་རྡོ་རྗེ་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་གསུམ་རྣམས་
ལས་སྙིང་པོ་འདི་གསུངས་སོ། །ན་མཿས་མན་ཏ་བུད་དྷ་ཎཱྃ། ན་མོ་བཛྲ་ཀྲོ་དྷཱ་ཡ། མ་ཧཱ་དྃཥྚོ་ཊྐ་ཊ་བྷཻ་ར་བཱ་ཡ། ཨ་སི་མུ་ཥ་ལ། པ་ར་ཤུ་པཱ་ཤ་ཧསྟཱ་ཡ། ཨོྂ་ཨ་མྲྀ་ཏ་ཀུཎ་ཌ་ལི། ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། 
བན་དྷ་བན་དྷ། ཧ་ན་ཧ་ན། ད་ཧ་ད་ཧ། གརྫྫ་གརྫྫ། བི་སྥོ་ཊ་ཡ། བི་སྥོཊ་ཡ། སརྦྦ་བིགྷྣ་བི་ནཱ་ཡ་ཀཱ་ན། མ་ཧཱ་ག་ཎ་པ་ཏི། ཛཱི་བ་ཏཱནྟ་ཀ་རཱ་ཡ་སྭཱ་ཧཱ། ཁྲོ་བོ་ཆེན་པོ་གསུངས་པ་ཡིས། །གྲག་ཆེན་སངས་
རྒྱས་ཐམས་ཅད་ནི། །ཡིད་ཕྱུང་ནས་ནི་སྐྲག་པར་འགྱུར། །ལོག་འདྲེན་རྣམས་དང་བགེགས་རྣམས་འདར། །སྐུ་གསུམ་ཡེ་ཤེས་མཆོག་མངའ་བའི། །རྡོ་རྗེ་རྣམ་སྣང་མཛད་པ་དྲན། །དེ་ཡི་རྐང་རྗེས་ས་དང་ནི། །

90-1-77b

རླུང་གིས་གཙུགས་པའི་ཤིང་ལོ་ལ། །ཁྲོ་བོའི་འཁོར་ལོར་གཟིར་ནས་སུ། །ཚོགས་བདག་རྐང་པའི་དྲུང་དུ་བཞུགས། །ཧཱུྃ་དང་ཕཊ་ཀྱིས་བསྐུལ་ནས་སུ། །བསྐྲད་པའི་སྦྱོར་བ་བྱས་ན་ནི། །སངས་རྒྱས་རྡོ་རྗེ་ཅན་ཡང་སྐྲོད། །དེ་ནས་
བཅོམ་ལྡན་འདས་དེ་བཞིན་གཤེགས་པ་རྡོ་རྗེ་འཕྲོ་བའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་ཞེས་བྱ་བའི་ཁྲོ་བོ་ཆེན་པོ་སྐུ་གསུམ་རྣམས་ལས་ཕྱུང་ངོ་། །ན་མཿས་མན་ཏ་ཀཱ་ཡ་བཱ་ཀ་
ཙིཏྟ་བཛྲཱ་ཎཱྃ། ཨོཾ་ཧཱུྃ་ཛི་ན་རི་ཊྀཊྚ་ཧཱུྂ་ཧཱུྂ་ཕཊ་ཕཊ་སྭཱ་ཧཱ། དེ་ནས་ཁྲོ་བོ་འདི་བརྗོད་པས། །སངས་རྒྱས་བྱང་ཆུབ་སེམས་དཔའ་རྣམས། །འཇིགས་པར་གྱུར་ཅིང་སྐྲག་གྱུར་ནས། །གཙོ་བོ་རྣམ་སྣང་མཛད་པ་དྲན། །སྲིན་པོ་འབྱུང་པོ་
དང་མཁའ་འགྲོ། །སྐེམ་བྱེད་གདོན་རྣམས་གཟིར་བ་ལ། །རྡོ་རྗེ་གཟིར་བའི་སྦྱོར་བ་ཡིས། །ཧཱུྃ་ཙམ་གྱིས་ཀྱང་ལས་བྱེད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་མཐའ་ཡས་ཀྱིས་ཡོན་ཏན་རིན་པོ་ཆེ་དཔག་ཏུ་མེད་པ་ཀུན་ནས་
སྡུད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་པད་མའི་ཁྲོ་བོ་ཆེན་པོ་འདི་སྐུ་གསུམ་རྣམས་ལས་ཕྱུང་ངོ་། །ན་མཿས་མན་ཏ་བུད་དྷ་ཎཱྃ། ཨོྂ་ཧཱུྂ་ཧཱུྂ་ཧཱུྂ་ཏ་རུ་ལ། བི་རུ་ལ། སརྦྦ་བི་ཥ་གྷཱ་ཏ་ཀ །
ཛྭ་ལི་ཏ། བི་སྥུ་ལ་གྃ། ཨཊྚཱ་ཊྚ་ཧཱ་ས། ན་དི་ནི། ཀེ་ཤ་རིས་ཊཱ་ཊོ་པ་ཊྃ་ཀཱ་ར། བཛྲ་ཁུ་ར། ནིར་གྷཱ་ཏ་ན། ཙ་ལེ་ཏ་བ་སུ་དྷ་ཏ་ལ་ནི་ཤྭཱ་ས་མཱ་རུ་ཏོ་ཏིཀྵ་པྟ་དྷཱ་ར་ཎཱི་དྷ་ར། བྷཱི་ཥ་ཎ་ཨཊྚཱཊྚ་ཧཱ་ས། ཨ་པ་རི་མི་ཏ། བ་ལ་པ་ར་
ཀྲ་མ། ཨཱརྱ་ག་ཎ་བྷཱི་ཏ་བྷཱུ་ཏ་ག་ཎ། ཨདྷྱུ་ཥི་ཏ། བུད་དྷྱུ་བུད་དྷྱུ། ཧ་ཡ་གྲཱི་བ། ཁཱ་ད་ཁཱ་ད། པ་ར་མན་ཏྲཱ་ནཱ། ཚིན་དྷ་ཚིན་དྷ། བྷིན་དྷ་བྷིན་དྷ། སིད་དྷིམ་མེ། ཨ་དྷིཥྛ་ཏེ་ཨཱ་བེ་ཥ་ཡ་ཨཱ་བཻ་ཥ་ཡ། སརྦྦ་ཛྭ་ར་པི་ཤཱ་ཙཱ་
ནི། སརྦྦ་གྲ་ཧེ་ཥུ། ཨ་པྲ་ཏི་ཧ་ཏོ་བྷ་བཱ། བཛྲ་དྃཥྚ་ཀིན་ཙ་རཱི་ཡ་སི། ཨི་དན་དུཥྚ་གྲ་ཧཱ་ན། དུཥྚ་སརྦྦམྦཱ། དྷུ་ན་དྷུ་ན། མ་ཐ་མ་ཐ། མར་ད་མར་ད། པཱ་ཊ་ཡ་པཱ་ཊ་ཡ། མ་ཊ་མ་ཊ། བན་དྷ་བན་དྷ། བུད་དྷ་དྷརྨྨ་སཾ་གྷཱ། ཨ་ནུ་ཛྙཱ་ཏཾ་

90-1-78a

ཀརྨྨ་ཀུ་རུ་ཤཱི་གྷྲི་ཧ་ཡ་གྲཱི་བཱ་ཡ་ཕཊ། བཛྲཱ་ཡ་ཕཊ། བཛྲཱ་གཱ་ཏྲཱ་ཡ་ཕཊ། བཛྲ་ནེ་ཏྲཱ་ཡ་ཕཊ། བཛྲ་དྃ་ཥྚཱ་ཡ་ཕཊ། བཛྲ་ཁུ་རཱུ་ཡ་ཕཊ། བཛྲ་ཁུར་ནིར་གྷཱ་ཏ་ནཱ་ཡ་ཕཊ། པ་ར་མན་ཏྲ་བི་ན་ཤ་ནཱ་ཡ་ཕཊ། 
སརྦྦ་ཏྲཻ་ལོཀྱ་བྷ་ཡྃ་ཀ་རཱ་ཡ་ཕཊ། སརྦ་ཀརྨྨ་སུ་པྲ་ཏི་ཧ་ཏཱ་ཡ་ཕཊ། བཛྲ་ཀུ་ལ་སན་ཏྲཱ་ས་ནཱ་ཡ་ཕཊ། ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། དེ་ནས་ཁྲོ་ཆེན་བྱུང་བ་ཡིས། །རྡོ་རྗེ་པད་མཆོག་ལས་བྱུང་རྣམས། །
ཡིད་ནི་འཇིགས་ཤིང་སྐྲག་པར་འགྱུར། །འཁོར་བཅས་འཇིགས་པས་རྣམ་འཁྲུགས་ནས། །བྱང་ཆུབ་ཚོགས་ནི་དྲན་བྱེད་ཅིང་། །ཡེ་ཤེས་རྡོ་རྗེ་དྲན་འགྱུར་བ། །ལག་པ་ལ་ནི་པད་མ་དང་། ཧ་ཞེས་
བྱ་བ་མཆོག་འབར་བསམ། །ཁྲོ་རྒྱལ་ཏིང་འཛིན་ལ་གནས་ནས། །རྡོ་རྗེ་གསུམ་ཡིག་འཛིན་པའི། ཁམས་གསུམ་དག་ཀྱང་ཁྱབ་བྱེད་པའོ། །མི་བཟད་དུག་ནི་དྲང་བར་བྱ། །དེ་ནས་བཅོམ་ལྡན་
འདས་དེ་བཞིན་གཤེགས་པ་དོན་ཡོད་གྲུབ་ཀྱིས་དོན་ཡང་དག་པར་འབྱུང་བའི་རྒྱལ་མཚན་གྱི་མཆོག་ནོར་བུའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཁྲོ་བོའི་རྒྱལ་པོ་ཆེན་པོ་བེ་ཅོན་སྔོན་པོ་ཅན་འདི་རྡོ་རྗེ་གསུམ་
ལས་ཕྱུང་ངོ་། །ན་མཿས་མན་ཏ་བུད་དྷ་ཎཱྃ། ཨེ་ཧྱེ་ཨེ་ཧྱི། བྷ་ག་བཱན། ནཱི་ལ་བཛྲ་དཎ་ཌ། ཏུ་རུ་ཏུ་རུ། ཧུ་ལུ་ཧུ་ལུ་སྭཱ་ཧཱ། གུ་ལུ་གུ་ལུ། གུ་ལཱ་པ་ཡ་གུ་ལཱ་པ་ཡ། ཀྲ་མ་ཀྲ་མ། བྷ་ག་བཱན། བཱ་ཡུ་བེ་གེ་
ན། བྷཱུ་ཏཱ་ནཱ་ཤཱི་གྷྲཾ། ད་ཧ་ད་ཧ། ད་ར་ད་ར། བ་ཧ་བ་ཧ། པ་ཙ་པ་ཙ། མ་ཐ་མ་ཐ། པཱ་ཏ་ཡ་པཱ་ཏ་ཡ། མ་ཊ་མ་ཊ་མོ་ཊཱ་པ་ཡ་མོ་ཊཱ་པ་ཡ་མོ་ཊཱ་པ་ཡ། སརྦྦ་ཀརྨྨཱ་ཎི། ཚིན་དྷ་ཚིན་དྷ། བྷཀྵ་ཡ་བྷཀྵ་ཡ། ཨསྠི་མེ་དམ་ཨ་སེ། རུ་དྷིར་མད་ཛ་མེ་དམ། 
བི་ཤྭ་མད་ཛ། རུ་དྷི་ར། པྲི་ཡ་ཨེ་ཧྱེ་ཧི་བྷ་ག་བན། སརྦྦ་བིགྷྣ་ནི། སརྦྦ་བིདྱཱ་ནི། སརྦྦ་མན་ཏྲཱ་ཎི། སརྦྦ་མཱུ་ལ་ཀརྨྨཱ་ཎི། ཀྲི་ཏྲི་མ་ཎི། བི་ཥ་དཱི་ནི། སརྦཱ་གྲ་ཧཱ་ན། ཧ་ན་ཧ་ན། བྷན་ཛ་བྷཉྫ་མར་ད་མར་ད། ཨེ་དམ་མེ། 

90-1-78b

ཀཱརྱམ་སཱ་དྷ་ཡ། ཧཱུྃ་ནཱི་ལཱ་ཡ་ནཱི་ལཱ་ཡ། ནཱི་ལ་བཛྲ་དཎ་ཌཱ་ཡ། ཏུ་རུ་ཏུ་རུ། བིགྷྣཱན་བི་ནཱ་ཡ་ཀཱན། ནཱ་ཤ་ཡ་ནཱ་ཤ་ཡ། ཧུ་རུ་ཧུ་རུ། དཱིཔྟ་ཙཎ་ཌཱ་ཡ། སརྦྦ་ཤ་ཏྲཱུྃ་དནཱྃ་ཧྲྀ་ད་ཡཱ་ནི་པཱི་ཊ་ཡ། ཚིན་དྷ་ཚིན་དྷ། པ་ར་བིདྱཱ་ནཱ་མ། ཙྪེ་ད་
ཀ་ཧཱུྃ་བིདྱཱ་ནཱ་མཥྚ་ཀ ། ས་མ་ཡ་མ་ནུ་སྨ་ར། བཛྲ་དྷ་ར་བ་ཙ་ནྃ་ཙ། མར་མཱ་ཎི་ནི་ཀྲྀན་ཏ། ཧཱུྃ་ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཀུ་རུ་ཀུ་རུ། ཏུ་རུ་ཏུ་རུ། ཧུ་རུ་ཧུ་རུ། ཕཊ་ཕཊ་ཧཱུྃ་ཧཱུྃ་ཀྲི་ཏཱན་ཏཱ་ཡ། དེ་བ་རི་ཥི་བི་དྲཱ་བ་ཀཱ་
ཡ། ཧ་ན་བཛྲ་དཎེ་ཌེ་ན་སྭཱ་ཧཱ། ཁྲོ་བོ་ཆེན་པོ་མཆོག་འདི་གསུངས་མ་ཐག་ཏུ་བདུད་ཀྱི་རིས་ཐམས་ཅད་དང་། སངས་རྒྱས་ཀྱི་ཞིང་རྣམས་རབ་ཏུ་གཡོས་ཏེ་སྐུ་གསུམ་གྱི་མཆོག་གཙོ་བོ་རྣམ་པར་སྣང་མཛད་དྲན་པར་
གྱུར་ཏོ། །སངས་རྒྱས་ཐམས་ཅད་ཀྱི་སྦྱོར་བའི་ཚོགས་བསྐུལ་ན་བརྒྱ་རྩ་བརྒྱད་བཟླས་བརྗོད་བྱས་པ་ཙམ་གྱིས་མོད་ལ་ཁྲོ་བོ་ཆེན་པོས་གསོད་པར་བྱེད་དོ། །དེ་ནས་བཅོམ་ལྡན་འདས་རྡོ་རྗེའི་དེ་བཞིན་གཤེགས་པ་
མི་འཁྲུགས་པས་བཀོད་པ་ཀུན་དུ་རྣམ་པར་འཕྲོ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྟོབས་པོ་ཆེ་རྡོ་རྗེ་འདི་སྐུ་གསུམ་ལས་ཕྱུང་ངོ་། །ན་མཿས་མན་ཏ་བུད་དྷ། ཨོཾ་ཧཱུཾ་ཧཱུྂ་ཧཱུྂ། ཕཊ་ཕཊ་ཕཊ། ཨུ་གྲ་ཤཱུ་ལ་
པཱ་ཎི་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཨོཾ་ཛྱོ་ཏ་ནིར་ནཱ་ད་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཨོཾ་མ་ཧཱ་བ་ལཱ་ཡ་སྭཱ་ཧཱ། དེ་ནས་ཁྲོ་བོ་གསུངས་ཙམ་གྱིས། །གདེངས་ཀ་ཡིས་ནི་བསྐོར་བ་ཀུན། །ཡིད་ནི་ཤིན་དུ་འཇིགས་སྐྲག་སྟེ། །རྡོ་རྗེ་རྣམ་པར་སྣང་
མཛད་དྲན། །གསང་སྔགས་རྒྱལ་པོ་བཟླས་པ་ཡིས། །ལས་ཀུན་རབ་ཏུ་གྲུབ་པར་བྱེད། །ཆར་པ་ཆེ་ན་གཅོད་འགྱུར་ལ། །ཆར་པ་ཆུང་ན་རབ་ཏུ་འབེབས། །དེ་ནས་བཅོམ་ལྡན་འདས་ཀྱིས་ཀུན་ཏུ་འབར་བའི་སྙིང་པོ་
རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཁྲོ་བོ་ཆེན་པོ་འདོད་པའི་ཁྲོ་བོ་འདི་རྡོ་རྗེ་སྐུ་གསུམ་རྣམས་ལས་ཕྱུང་ངོ་། །ན་མཿས་མན་ཏ་བུད་དྷ་ནཱྃ། ཊཀྐི་ཧཱུྃ་ཛ། དེ་ནས་ཁྲོ་བོ་གསུངས་པ་ཡིས། །

90-1-79a

སངས་རྒྱས་ཐམས་ཅད་རབ་ཏུ་འདར། །བྱང་ཆུབ་སེམས་དཔའ་རྣམས་ཀྱང་སྐྲག །བདུད་ཀྱི་དཔུང་རྣམས་ལྟུང་བར་འགྱུར། །རྐང་གཡས་སྣ་ཚོགས་རྡོ་རྗེ་ཡི། །སྦྱོར་བའི་མཚན་ནི་མནན་ནས་སུ། །སྐུ་གསུམ་
ཡེ་ཤེས་སྟོབས་ལྡན་པས། །ཁྲོ་གཉེར་རིམ་པར་གཉེར་བྱས་ཏེ། །གསང་སྔགས་ཀུན་གྱིས་བཀུག་ནས་སུ། །སེམས་ཅན་ཐམས་ཅད་དབང་དུ་བྱེད། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་
དེ་བཞིན་གཤེགས་པས་རྡོ་རྗེ་རབ་ཏུ་འབར་ཞིང་ཁྲོ་བའི་ཡེ་ཤེས་རབ་ཏུ་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་ཁྲོ་བོ་མི་གཡོ་བ་གཏུམ་པོ་འདི་རྡོ་རྗེ་སྐུ་གསུམ་རྣམས་ལས་ཕྱུང་ངོ་། །
ན་མཿས་མན་ཏ་བུད་དྷ་ནཱྃ། ཨ་ཙ་ལ་ཀཱ་ཎ་ཙཎ་ཌ། ན་ཊ་ན་ཊ། མཊྚ་མཊྚ་མོཊྚ་མོཊྚ། སཊྚ་སཊྚ། ཏཊྚ་ཏཊྚ། ཏ་ན་ཏ་ན། ད་ཧ་ད་ཧ་མོ་ཧ་མོ་ཧ། མོ་ཧ་ཀ་ར། ཧ་ས་ཧ་ས་བཛྲ་ཧཱ་ས་ཀུ་རུ། ཧ་ས་ཧ་ས། མ་ར་མ་ར་ཊ་མ་ར་མ་ར་ཊ། 
གརྫྫ་གརྫྫ། ཧ་ན་ཧ་ན། བན་དྷ་བན་དྷ། ཏིཥྛ་ཏིཥྛ། ཨ་བི་ཤ་ཨ་བི་ཤ ། མ་ཧཱ་མན་ཏྲ་པཱ་ལ་ཀཱ། དྷུ་ན་དྷུ་ན། ཏི་ཎི་ཏི་ཎི། ཁ་ད་ཁ་ད། བིགྷྣཱ་ནཱན། མཱ་ར་ཡ་མཱ་ར་ཡ། དུཥྚཱ་ན། བྷཀྵ་བྷཀྵ། སརྦྦ་ན་ཀུ་རུ་ཀུ་རུ། ཀི་རི་ཀི་རི། མ་ཧ་བི་ཥ་
མ་བཛྲཿ སྥོ་ཊ་ཡ་སྥོ་ཊ་ཡ། ཧཱུྃ་ཧཱུྃ་ཧཱུྃ། ཏྲི་བི་ལཱ་ཏ་རང་ག་ནར་ཏ་ཀ །ཨྃ་ཨྃ་ཨྃ། ཧཱྃ་ཧཱྃ་ཧཱྃ། ཨ་ཙ་ལ་ཙེ་ཊ། སྥོ་ཊ་ཡ་སྥོ་ཊ་ཡ། ཧཱུྃ་ཧཱུྃ་ཨ་ས་མན་ཏ་ཀཱ་ཊཱ་ཊ་མ་ཧཱ་བ་ལ་ཤ་ཏཱ་ཡ། པ་ར་མན་ཏྲཱ་ན། ཨྃ་ཨྃ། ཧཱྂ་ཧཱྂ་མྂ་
ཤུད་དྷྱྃ་ཏུ་ལོ་ཀ ། ཏུ་ཥྜྱྃ་ཏུ་བཛྲྃ། ན་མོ་ཏུ་ཀྲུ་ཨ་པྲ་ཏི་ཧ་ཏ་བ་ལེ་བྷྱཿ་ཛྭ་ལ་ཡ། ཏྲཱ་ཊ་ཨ་ས་ཧ་ན་མཿསྭཱ་ཧཱ། །དེ་ནས་ཁྲོ་བོ་མི་གཡོ་བ། །ཁྲོ་བོ་སྟོབས་ཆེན་འདི་གསུངས་པ། །ལྷ་དང་ཀླུ་ཀུན་མངག་གཞུག་བྱེད། །གནོད་སྦྱིན་སྲིན་པོ་ལྷ་མ་
ཡིན། །འཇིགས་པ་ཐོབ་ནས་བརྒྱལ་བར་འགྱུར། །བདུད་ཀྱི་སྡེ་རྣམས་ལྷུང་ནས་སུ། །ཚིག་ཅིང་རབ་ཏུ་ཞུམ་བཞིན་དུ། །གཙོ་བོ་རྡོ་རྗེ་སྣང་མཛད་དྲན། །ཁྲོ་བོའི་རྒྱལ་པོ་དུ་མ་ཡིས། །བཅུ་པས་འཇིགས་པས་

90-1-79b

ཉིན་བཞིན་དུ། །གཙོ་བོ་རྣམ་པར་སྣང་མཛད་ཉིད། །སྣ་ཚོགས་ལས་རྣམ་མྱུར་དུ་མཛད། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་སྐུ་གསུམ་གྱི་ཡེ་ཤེས་
རྡོ་རྗེ་འབར་བའི་འོད་ཟེར་གྱིས་འཇིགས་པ་ཆེན་པོའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རིག་པའི་རྒྱལ་པོ་ཆེན་པོ་གནོད་མཛེས་འདི་གསུངས་སོ། །ན་མཿ་ཨོཾ་སུམ་བྷ་ནི་སུམ་བྷ་ཧཱུྃ། གྲིཧྣ་གྲིཧྣ་ཧཱུྃ་གྲིཧྣ་པཱ་ཡ་
གྲིཧྣ་པཱ་ཡ་ཧཱུྃ་ཨཱོཾ་ཨཱ་ན་ཡ་ཧོ་བྷ་ག་བན་བིདྱཱ་རཱ་ཛ་ཧཱུྃ་ཕཊ། དེ་ནས་ཁྲོ་བོ་འདི་གསུངས་པའི། །ལྷ་ཡི་བུ་མོ་ཐམས་ཅད་ནི། །སྐྲ་ཚུགས་ཞིག་ཅིང་གཅེར་བུར་གྱུར། །མིག་རྩ་རིག་རིག་བྱེད་པ་དག །སྐུ་གསུམ་
རྡོ་རྗེ་མཆོག་མངའ་བའི། །ཞལ་གྱིས་ནུ་མ་གཉིས་མནན་པས། །གཙོ་བོ་རྡོ་རྗེ་རྣམ་སྣང་མཛད། །ཡེ་ཤེས་ཀྱིས་འཇོམས་དྲན་པར་འགྱུར། །ལྕགས་ཀྱུ་ཡིས་ནི་རྣམ་དྲལ་ཏེ། །རྡོ་རྗེ་ཞགས་པས་
བཅིངས་ནས་སུ། །བུ་མོ་ཐམས་ཅད་དགུག་བྱ་བ། །བུ་མོ་དགུག་པའི་མཆོག་ཡིན་ནོ། །དེ་ནས་བཅོམ་ལྡན་འདས་ཀྱིས་ཡེ་ཤེས་ཆེན་པོ་རྣམ་པར་བསྒྱིངས་པས་དགའ་བ་སྟོན་པ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ནས་སྐུ་གསུམ་གྱི་མཆོག་རྡོ་རྗེ་འཆང་བསྐྱེད་པར་མཛད་པ་སངས་རྒྱས་ཀྱི་བྱང་ཆུབ་འདི། །རྗེས་སུ་དྲན་པར་མཛད་དོ། །འཁོར་ལོ་ཆེ་ལ་རྣམ་གནས་ནས། །སངས་རྒྱས་རྣམས་ཀྱིས་
སྤྲིན་དག་དང་། །དེ་བཞིན་རྡོ་རྗེ་འཆང་བའི་སྤྲིན། །རྡོ་རྗེ་ལྕགས་ཀྱུ་ཞགས་ཐོགས་འབྱིན། །ཀུན་མཁྱེན་ཡེ་ཤེས་ལས་བྱུང་གཙོ། །གསང་སྔགས་སྐྱེས་བུར་བདག་བསྒོམས་ན། །སངས་རྒྱས་རྣམས་ཀྱང་འགུགས་
བྱེད་ན། །རྡོ་རྗེ་འཆང་སོགས་ཅི་ཞིག་སྨོས། །བུད་མེད་ལྷ་ཆེན་བུ་མོ་དག །རླུང་ལ་རྐང་པ་བཞག་ནས་སུ། །ལྕགས་ཀྱུས་སྙིང་ལ་དྲངས་ནས་ནི། །སེམས་ཅན་ཀུན་ཡང་འགུགས་འགྱུར་ཏེ། །འདི་ལ་དཔྱད་པ་ཅུང་

90-1-80a

ཟད་མེད། །རྡོ་རྗེ་རྣམ་པར་སྣང་མཛད་ནི། །སྐུ་ཆེན་ཟླ་བའི་ཁ་དོག་ཡིན། །ཟླ་བའི་དཀྱིལ་འཁོར་ལ་གནས་པ། །རྡོ་རྗེ་བདུད་རྩི་འབེབས་བསམས་ཏེ། །ལན་གྲངས་བཅུ་ནི་བརྗོད་པ་ཡིས། །
དེ་ནས་གདོན་མི་ཟ་བར་ཁུགས། །རྡོ་རྗེ་དཀྱིལ་འཁོར་ལས་བྱུང་བ། །རྡོ་རྗེ་ལྕགས་ཀྱུ་ཆེན་པོ་ཡི། །འབར་བའི་འོད་ཟེར་འཕྲོ་བ་ཡིས། །གཞོན་ནུ་མ་དག་ངེས་པར་འགུག ། །རྡོ་རྗེ་གསུམ་འཁྲུགས་
ཁྲོ་བོ་ནི། །རྡོ་རྗེ་ས་འོག་གནས་པ་སྟེ། །ལྷ་མ་ཡིན་ཀུན་དེས་སྲེག་ཅིང་། །ལྷ་མིན་བུ་མོ་རྗེས་ཆགས་པས། །གསལ་ཤིང་གིས་ནི་བསྒྱེལ་ནས་སུ། །རྡོ་རྗེ་ལྕགས་ཀྱུ་ཞགས་པ་ཡིས། །དྲངས་ནས་
ལྷ་མིན་བུ་མོ་འགུགས། །བཙག་དང་ཐོད་ལོ་ཀོར་དང་ནི། །བབ་བླ་འབྱོར་པར་གྱུར་ན་ནི། །གཟས་ཟིན་ཚེ་ན་ཁར་བཅུག་སྟེ། །རྫས་རྒྱལ་རྡོ་རྗེ་ལྕགས་ཀྱུས་འགྲུབ། །དྲག་པོ་རླུང་དང་ཁྱབ་འཇུག་དང་། །ལྷ་མོ་གནོད་སྦྱིན་གནོད་
སྦྱིན་མ། །མངག་གཞུག་བཅས་པར་འཇིགས་བསྐྲག་སྟེ། །མིང་བྲིས་ཀུན་ནས་རྟག་ཏུ་འགུགས། །སངས་རྒྱས་འཁོར་ལོར་ལེགས་བཞུགས་ཏེ། །འཇམ་དཔལ་རྡོ་རྗེར་རྣམ་པར་བསྒོམ། །ཁྲོ་བོ་ཆེན་པོ་གཤིན་རྗེ་གཤེད། །
ལག་ན་རྡོ་རྗེ་ལྕགས་ཀྱུ་ཐོགས། །ཁྲོས་ཤིང་འབར་བ་འཕྲོ་བ་ཡིས། །གནོད་སྦྱིན་བུ་མོ་བཀུག་ནས་སྤྱོད། །ཕྱག་རྒྱ་གསང་སྔགས་སྦྱོར་བ་དང་། །བསམ་གཏན་འཁོར་ལོ་སྦྱོར་བ་ཡིས། །དགུག་པར་བྱ་བའི་ཚིག་གསུངས་པ། །
གཞན་དུ་བྱས་ན་འགྲུབ་མི་འགྱུར། །རྒྱལ་པོའི་ཞབས་དྲུང་ཀུན་གནས་པས། །རྡོ་རྗེ་སེམས་དཔའ་སེམས་དཔའ་ཆེ། །ཀུན་གྱིས་སེམས་རབ་རྫོགས་བྱེད་པས། །ཡང་དང་ཡང་དུ་བསྐུལ་བར་བྱེད། །དེ་ནས་བཅོམ་
ལྡན་འདས་རྣམ་པར་སྣང་མཛད་ཆེན་པོས་རྡོ་རྗེའི་དེ་བཞིན་གཤེགས་པས་ཡེ་ཤེས་ཀྱི་རྣམ་པར་རྒྱལ་བའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་རྒྱལ་མོ་ཆེན་མོ་རྣམ་པར་

90-1-80b

བསྒྱུར་བའི་རྡོ་རྗེ་འདི་རྡོ་རྗེ་སྐུ་གསུམ་རྣམས་ལས་ཕྱུང་ངོ་། །ཨོྂ་ཤཱུ་ལཱི་ནི་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །ཀླུ་མོ་དབང་ཆེན་གྲགས་པ་དག །གོས་དང་བྲལ་ཞིང་ཚིག་བཞིན་དུ། །གཙོ་བོ་རྡོ་རྗེ་རྣམ་སྣང་དྲན། །
གསང་སྔགས་རིག་སྔགས་འདི་ཡིས་ནི། །ཀླུ་རྣམས་ཐམས་ཅད་འགུགས་པར་བྱེད། །བསམ་གཏན་རྡོ་རྗེ་མཐུ་དང་ནི། །གསང་སྔགས་བཟླས་བརྗོད་བྱས་པ་ཡིས། །སོར་གདུབ་རྒྱན་ནི་གསོལ་བ་ཡིས། །
ཀླུ་མོ་མིག་ཡངས་བཀུག་ནས་ནི། །འདོད་པའི་ཡོན་ཏན་ལྔས་ཆགས་པའི། །ཀླུ་མོ་ཉེ་བར་སྤྱོད་པར་བྱེད། །དེ་ནས་བཅོམ་ལྡན་འདས་ཀྱིས་ནམ་མཁའ་ཆེན་པོའི་ཤུགས་རྒྱ་མཚོ་འཕྲོ་བའི་དམ་ཚིག་ཅེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ནས་བསྐུལ་བྱེད་མ་ཆེན་མོའི་གཟུངས་ཀྱི་རིག་སྔགས་ཆེན་མོ་འདི་གསུངས་སོ། །ན་མཿས་མན་ཏ་བུད་དྷ་ནཱྃ། སི་མྱག་སྃ་བུད་དྷ་ཀོ་ཊཱི་ནཱྂ། ཏད་ཡ་ཐཱ། ཨོཾ་ཙ་ལེ་ཙུ་ལེ་
ཙུན་དེ་སྭཱ་ཧཱ། དེ་ནས་རིག་སྔགས་ཆེ་གསུངས་པས། །སངས་རྒྱས་ཞིང་རྣམས་རབ་ཏུ་གཡོས། །བྱང་ཆུབ་སེམས་དཔའ་རྣམས་ཀྱི་ལུས། །ཏིང་ངེ་འཛིན་ལས་གཡོས་པར་གྱུར། །བདུད་རྣམས་བརྒྱལ་ཞིང་
ཚིག་ནས་སུ། །ཐམས་ཅད་ཆོ་ངེས་པ་འདེབས་པར་བྱེད། །ས་ཡི་འོག་གི་བུ་མོ་དང་། །ལྷ་མིན་བུ་མོ་ཀླུ་མོ་དང་། །གསང་དབང་བུ་མོ་རྣམས་འཁྲུགས་ནས། །གཙོ་བོ་རྡོ་རྗེ་སྣང་མཛད་དྲན། །རིག་སྔགས་འདི་ནི་
བཟླས་པ་དང་། །སྒོམ་པ་ཡི་ནི་སྦྱོར་བ་ཡིས། །བཟླས་པ་ཙམ་གྱིས་འགྲུབ་འགྱུར་ཞིང་། །བཀུག་ནས་རབ་ཏུ་ལོངས་སྤྱོད་བྱེད། །དེ་ནས་བཅོམ་ལྡན་འདས་ཀྱིས་ནམ་མཁའ་མཛོད་ཀྱིས་རྣམ་པར་རྒྱལ་བའི་
རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཆོས་བདུད་རྩིའི་དམ་ཚིག་གི་རྡོ་རྗེའི་ཁྲོ་གཉེར་འདི་རྡོ་རྗེ་སྐུ་གསུམ་རྣམས་ལས་ཕྱུང་ངོ་། །ཨོཾ་བྷ་ཡ་ནཱ་ཤ་ནི་ཏྲཱ་ས་ནི་ཏྲཱ་སེ། ཏྲཱ་ས་

90-1-81a

ཡ་ཏྲཱ་ས་ཡ། བཻ་ར་ཊི་བྷྲྀ་ཀུ་ཊི་ཏི་ཊེ། བཻ་ཊ་ཊི་བཻ་ཊ་ཊི། ཤྭེ་ཏེ་ཤྭེ་ཏེ། ཛ་ཊི་ནི་སྭཱ་ཧཱ། དེ་ནས་འདི་ནི་གསུངས་ཙམ་གྱིས། །རིག་སྔགས་འཆང་དང་ལྷ་རྣམས་ནི། །གཡོས་ཤིང་འཇིགས་པར་ཐོབ་པར་འགྱུར། །བདུད་རྣམས་
འཇིགས་པས་རྣམས་འཁྲུགས་ཏེ། །གཙོ་བོ་རྡོ་རྗེ་རྣམ་སྣང་མཛད། །ཡིད་གཅིག་ཏུ་ནི་དྲན་པར་བྱེད། །ནོར་བུའི་གདུབ་རྣམས་གཡོ་བ་ཡིས། །རིག་སྔགས་འཆང་མ་ཀླུ་མོར་བཅས། །ལྷ་མིན་བུ་མོ་གསང་བ་ཡི། །བུ་མོ་བཀུག་ལ་སྤྱོད་པར་
བྱེད། །འདིས་ནི་ལས་ཀུན་བྱེད་པ་དང་། །མཁའ་འགྲོ་མ་རྣམས་འཇིགས་པ་ཡིན། །ཡང་ན་གསང་སྔགས་ཐམས་ཅད་ནི། །སྐྱེ་བོ་མེད་པའི་ནགས་ཚལ་དུ། །སྔགས་པས་བྱེ་བ་བཟླས་ནས་སུ། །ལས་རྣམས་ཐམས་
ཅད་བྱ་བ་གསུངས། །གང་གཞན་སློབ་དཔོན་སྨོད་པ་དང་། །ཐེག་པ་ཆེན་པོ་སུན་འབྱིན་དང་། །མི་གང་གསང་སྔགས་རྒྱུད་དག་གིས། །སྦྱོར་བ་ལ་ནི་འཕྱ་བྱེད་པ། །དེ་ཡིས་དངོས་གྲུབ་ཐོབ་མི་འགྱུར། །དེ་ནི་རྟག་ཏུ་གདོན་གྱིས་
ཟིན། །བསྒྲིབས་ནས་གསང་བར་བྱ་བ་འམ། །ཡང་ན་ལུས་ནི་གཞིག་པར་བྱ། །སྔགས་པས་འདི་ལྟར་བྱས་ན་ནི། །བྱང་ཆུབ་དངོས་གྲུབ་ལེགས་པར་འཐོབ། །ཕྱོགས་བཅུའི་སེམས་ཅན་ཐམས་ཅད་ནི། །
སྐུ་གསུམ་ཡེ་ཤེས་ལས་བྱུང་བའི། །ཁྱད་པར་དུ་ནི་བསྒོམ་པར་བྱ། །དགྲ་ལ་འདི་ནི་ཐེ་ཚོམ་མེད། །ཁྲག་འཐུང་ཆུ་ཡིས་བརླན་པའམ། དུར་ཁྲོད་ཐལ་བའམ་བཤང་གཅི་ཡིས། །བརླན་པའི་གོས་ནི་བགོས་ནས་
ཀྱང་། །རྐང་པས་མཚན་མ་མནན་ནས་སུ། །ཁྲོ་བོའི་རྒྱལ་པོར་སྦྱོར་བྱས་ཏེ། །གསང་སྔགས་བརྒྱ་རྩ་བརྒྱད་བཟླས་ན། །སངས་རྒྱས་ཀྱང་ནི་ངེས་པར་འཇིག །ཆུས་བརླན་པ་ཡི་གོས་བགོས་ཏེ། །ཁྲོ་བོའི་
མདུན་དུ་བཅིངས་ནས་སུ། །རྐང་པ་གཡོན་པས་མནན་ན་ནི། །སངས་རྒྱས་ཉིད་ཀྱང་ངེས་པར་འཇིག །བཤང་གཅི་ཡིས་ནི་སྦགས་པའི་གོས། །

90-1-81b

རུལ་བའི་དྲི་ཅན་དམད་པ་དག །བགོས་ནས་གསང་སྔགས་བཟླས་བརྗོད་ན། །མོད་ལ་འཆི་བའམ་སྐམས་པར་འགྱུར། །དུར་ཁྲོད་ཐལ་བས་བསྡུས་པའི་གོས། །བགོས་ནས་ཁྲོ་བོ་ཁུགས་ནས་ནི། །ལན་གྲངས་སྟོང་དུ་བརྗོད་ན་ནི། །
རྡོ་རྗེ་སེམས་དཔའ་རྣམས་པར་འཇིག །སྐྲ་ནི་ལྷུག་པར་བཤིག་ན་ནི། །ཁ་བཞིན་རྣམ་པར་བསྒྱུར་བྱས་ཏེ། །རྐང་པས་མཚན་མ་མནན་ན་ནི། །ནམ་མཁའི་ཁམས་ཀྱང་འཇིག་པར་འགྱུར། །མ་མོའི་གནས་སམ་དུར་ཁྲོད་དམ། །
ཁང་སྟོང་འམ་ནི་བཞི་མདོ་འམ། །མཚན་མ་གཅིག་པའམ་ཤིང་གཅིག་ཏུ། །དྲག་ཤུལ་སྤྱོད་པ་བརྩམས་པར་བྱ། །དེ་ཡི་རྐང་རྗེས་ས་ལ་ནི། །མི་རུས་ལས་བྱས་ཕུར་བུ་དག །སོར་བརྒྱད་ཙམ་གྱི་ཚད་ཙམ་ལ། །ལན་
གྲངས་བརྒྱ་རྩ་བརྒྱད་བརྗོད་པའི། །ཕུར་བུ་ཡིས་ནི་བཏབ་ནས་སུ། །དགྲ་ཡི་ཁྱིམ་སྒོར་བརྐོས་ཏེ་གཞུག །སངས་རྒྱས་སྐུ་གསུམ་མཆོག་སྦྱིན་པ། །ཤེས་དང་མི་ཤེས་སྤངས་པ་ཡང་། །ཟླ་ཕྱེད་ཉ་ཡི་ནང་རོལ་དུ། །འཆིང་
བའམ་ཡང་ན་འཇིག་པར་འགྱུར། །མཁས་པས་ཐོད་པ་ཡོངས་ཚང་བ། །ཁྱད་པར་ཅན་ནི་རྙེད་པ་དང་། །དེ་ལ་གསང་སྔགས་ཚིག་བྲིས་ཏེ། །རྡོ་རྗེ་ཚིག་གིས་བཟླས་བརྗོད་ནས། །དགྲ་ཡི་སྒོ་འམ་ཡང་ན་ནི། །གྲོང་དུ་སྦས་ན་ངེས་པར་
སྐྲོད། །ཏ་ལེའི་འདབ་མའམ་གཞན་ལའང་རུང་། །ཁྲོ་བོའི་གསང་སྔགས་ལེགས་བྲིས་ཏེ། །དགྲ་ཡི་ཁྱིམ་འམ་སྒེ་ཀར་ནི། །སྦས་ན་འཆིའམ་སྐམས་པར་འགྱུར་ཞེས་བཅོམ་ལྡན་འདས་རྡོ་རྗེ་རྣམ་པར་སྣང་མཛད་
ཆེན་པོས་བཀའ་སྩལ་ཏོ། །དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་སྐུ་གསུམ་རྡོ་རྗེའི་ཕུར་བུའི་ཡེ་ཤེས་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཁམས་གསུམ་ཐམས་
ཅད་ཡེ་ཤེས་ཀྱི་སྐུ་དང་གསུང་དང་ཐུགས་རྡོ་རྗེའི་ཕུར་བུ་ཞེས་བྱ་བ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་རྣམས་ལས་ཕྱུང་ངོ་། །ཨོྂ་གྷ་གྷ། གྷཱ་ཏ་ཡ་གྷཱ་ཏ་ཡ། སརྦྦ་དུ་ཕཊ་ཕཊ། ཀཱི་ལ་ཡ་ཀཱི་ལ་ཡ། 

90-1-82a

སརྦྦ་པཱ་པྃ་ཕཊ་ཕཊ། ཧཱུྃ་ཧཱུྃ་ཧཱུྃ་བཛྲ་ཀཱི་ལ་བཛྲ་དྷ་ར་བཛྲ་དྷི་རེ་ཨཛྙ་བ་ཡྟི། ཀཱ་ཡ་བཱཀ་ཙིཏ་ཏ་བཛྲ། ཀཱི་ལ་ཡ་ཧཱུྂ་ཧཱུྂཧཱུཾ་ཕཊ་ཕཊ། དེ་ནས་འདི་ནི་གསུངས་ཙམ་གྱིས། །རྡོ་རྗེ་དབང་ཆེན་གྲགས་པ་ཀུན། །
བརྒྱལ་ནས་འཇིགས་པ་སྐྱེས་གྱུར་ཏེ། །རྡོ་རྗེ་རྣམ་སྣང་མཛད་པ་དྲན། །མི་ཡི་རུས་པའི་ཕུར་བུའམ། །ཡང་ན་སེང་ལྡེང་ལས་བྱུང་བའམ། །ལྕགས་ལས་བྱས་པའི་ཕུར་བུས་ནི། །རྡོ་རྗེ་སེམས་དཔའ་རྣམ་པར་འཇིག ། །རྡོ་རྗེ་
སེམས་དཔའ་མཉམ་གཞག་སྟེ། །འོད་བཟངས་མེ་སྟག་འཁྲུག་པ་ཅན། །སྐུ་གསུམ་རྡོ་རྗེ་མཐའ་གཏུགས་པས། །གཟུགས་བརྙན་ལ་ནི་བསམས་ནས་སྦྱོར། །རྣམ་སྣང་ཕྱག་རྒྱ་ཆེན་པོའམ། །ཡང་ན་འདོད་ཆགས་རྡོ་རྗེ་
ཅན། །ཕྱག་རྒྱ་ཆེན་པོ་གཤིན་རྗེ་གཤེད། །འདོད་པའི་ཁྲོ་བོ་ཉིད་དུ་ནི། །རྡོ་རྗེ་ཕུར་བུ་བསམས་པར་བྱ། །བདག་ཉིད་ཆེན་པོ་སྟོབས་པོ་ཆེ། །བདུད་རྩི་ཐབ་སྦྱོར་རྡོ་རྗེ་དང་། །རྡོ་རྗེ་ཡི་ནི་རྣལ་འབྱོར་གྱིས། །སྡང་དང་གཏུམ་པོ་
གཅད་པར་བྱ། །སངས་རྒྱས་བདག་ཉིད་ཆེན་པོ་ཡང་། །ཐུགས་ནས་ཞབས་ལ་ཐུག་བར་དུ། །རྡོ་རྗེ་ཕུར་བུས་རྣམ་པར་བསྒོམས། །རྡོ་རྗེ་ཏིང་འཛིན་སྦྱོར་བ་ཡིས། །སངས་རྒྱས་དག་ཀྱང་ངེས་པར་གནོན། །འདི་ནི་ཕུར་
བུའི་མཐུ་བརླབས་ཏེ། །སྟེང་འོག་ལྷ་ཡི་དམ་ཚིག་ཡིན། །རྒྱལ་ཆེན་རྡོ་རྗེ་སེམས་དཔའ་དང་། །སངས་རྒྱས་ཐམས་ཅད་གནོན་པ་ཡི། །ཏིང་འཛིན་སྦྱོར་བ་འདི་ཡིས་ནི། །མྱུར་དུ་འཆི་འམ་སྐམ་པར་འགྱུར། །དེ་ནས་བཅོམ་
ལྡན་འདས་དེ་བཞིན་གཤེགས་པ་རྡོ་རྗེ་རྣམ་པར་སྣང་མཛད་ཆེན་པོས་དེ་བཞིན་གཤེགས་པའི་སྐུའི་ཡེ་ཤེས་རྣམ་པར་བསྒྱིངས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེའི་སྐུ་གཉིས་སུ་མེད་པའི་དམ་
ཚིག་གི་ཕུར་བུའི་གསང་སྔགས་འདི་ཉིད་ཀྱི་རྡོ་རྗེའི་སྐུ་དང་། གསུངས་དང་ཐུགས་རྡོ་རྗེ་རྣམས་ལས་ཕྱུང་ངོ་། །ཨོཾ་ཚིན་དྷ་ཚིན་དྷ་ད་ཧ་ད་ཧ། དྲཱིཔྟ་བཛྲ་ཙཀྲ་ཧཱུྃ་ཕཊ། ཕན་ཚུན་བཟླས་པའི་ཚུལ་གྱིས་ནི། །མཐེ་བོའི་

90-1-82b

ངོས་ཀྱི་དྲུང་དུ་བསྡུ། །སྣང་མཛད་ཞབས་ཀྱིས་མནན་ནས་སུ། །རྡོ་རྗེ་ཕུར་བུས་བཏབ་པར་བྱ། །བཏབ་པ་ཙམ་གྱིས་སེམས་དཔའ་ཆེ། །སྐུ་གསུམ་ཡེ་ཤེས་ལས་བྱུང་བ། །དམ་ཚིག་མཆོག་གིས་བཞེངས་པར་མཛོད། །གཞན་དུ་
བྱས་ན་བརླག་པར་འགྱུར། །དེ་ནས་བཅོམ་ལྡན་འདས་ཀྱིས་རྡོ་རྗེའི་ཐུགས་ཀྱི་ཡེ་ཤེས་ཆེན་པོ་རྣམ་པར་བསྒྱིངས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དམ་ཚིག་ཆེན་པོའི་སྟང་སྟབས་ཀྱིས་ཕུར་བུ་ཞེས་
བྱ་བའི་གསང་སྔགས་འདི་ཉིད་ཀྱི་རྡོ་རྗེ་སྐུ་དང་གསུང་དང་ཐུགས་རྣམས་ལས་ཕྱུང་ངོ་། །ཨོཾ་བཛྲ་རཱ་ཛ་ཧཱུྃ། རྩེ་མོ་ལྔ་པ་བཅིངས་ནས་སུ། །མེ་སྟག་འཕྲོ་བ་བསྒོམ་བྱས་ཏེ། །རྡོ་རྗེ་ཐུགས་ཀྱིས་ཞབས་ཀྱིས་མནན། །
རྡོ་རྗེ་ཕུར་བུས་གདབ་པར་བྱ། །བཏབ་པ་ཙམ་གྱིས་རྒྱལ་པོ་ཆེ། །སྐུ་གསུམ་ཡེ་ཤེས་ལས་བྱུང་བ། །དམ་ཚིག་མཆོག་གིས་བཞེངས་པར་མཛོད། །གཞན་དུ་བྱས་ན་བརླག་པར་འགྱུར། །དེ་ནས་བཅོམ་ལྡན་འདས་
ཀྱིས་འཇིག་རྟེན་དབང་ཕྱུག་གི་དམ་ཚིག་མཆོག་རྣམས་པར་བསྒྱིངས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གསུང་གི་དམ་ཚིག་གི་སྟང་སྟབས་ཀྱི་ཕུར་བུའི་གསང་སྔགས་འདི་ཉིད་ཀྱི་སྐུ་
དང་གསུང་དང་ཐུག་དང་རྡོ་རྗེ་རྣམས་ལས་ཕྱུང་ངོ་། །ཨོཾ་ཏྲི་ཨོཾ་བྷུ་རྦུ། རྡོ་རྗེ་སོར་མོ་བཅུམ་པ་ཡིས། །པད་མ་ཁ་བྱེ་འབར་བ་ཡིས། །འདོད་ཆགས་རྡོ་རྗེ་ཞབས་ཀྱིས་མནན། །རྡོ་རྗེ་ཕུར་བུས་ངེས་པར་གདབ། །བཏབ་
པ་ཙམ་གྱིས་རྒྱལ་པོ་ཆེ། །སྐུ་གསུམ་ཡེ་ཤེས་ལས་བྱུང་བ། །དམ་ཚིག་མཆོག་གིས་བཞེངས་པར་མཛོད། །གཞན་དུ་བྱས་ན་བརླག་པར་འགྱུར། །སྐུ་གསུང་ཐུགས་ཀྱིས་ཆགས་པ་ཡིན། །ཆོ་ག་བཟང་པོ་ཚམ་གྱིས་ནི། །
རྡོ་རྗེ་མཁའ་དབྱིངས་མཐའ་གཏུགས་པ། །མནན་འགྱུར་འདི་ལ་ཐེ་ཚོམ་མེད་ཅེས་བཅོམ་ལྡན་འདས་རྣམ་པར་སྣང་མཛད་ཀྱིས་རྡོ་རྗེ་ཕུར་བུའི་ཚིག་རྣམས་བཀའ་སྩལ་ཏོ། །དེ་ནས་སངས་རྒྱས་སྐུ་གསུམ་མཆོག །

90-1-83a

སེམས་ཅན་ཁམས་ལ་ཕན་བཞེད་རྣམས། །དགྱེས་ཤིང་མགུ་བ་བརྙེས་ནས་སུ། །རྡོ་རྗེ་དབྱིངས་ཀྱིས་འདི་སྐད་གསུངས། །ཀྱེ་མའོ་གསང་བའི་ཚིག་གི་མཆོག །ཀྱེ་མའོ་གསང་བ་ཀུན་
འདུས་པ། །ཀྱེ་མའོ་ཞི་བ་ཆོས་ཀྱི་ཚིག །ཡེ་ཤེས་རྡོ་རྗེ་ཕུར་བུ་རྨད། །གསང་སྔགས་ཀུན་གྱི་ཕུར་བུས་འདི། །བདེ་གཤེགས་བཀའ་ཡི་རྗེས་སུ་བྱེད། །འདི་དག་སངས་རྒྱས་ཀུན་གྱི་སྟེ། །ཕུར་བུ་
དེ་ཉིད་རྣམས་ལས་བྱུང་། །དེ་ནས་བཅོམ་ལྡན་འདས་ཀྱིས་ཆོམ་རྐུན་ཐམས་ཅད་མདོངས་པར་བྱེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རིག་སྔགས་ཀྱི་རྒྱལ་མོ་ཆེན་མོ་འོད་ཟེར་ཅན་འདི་
གསུངས་སོ། །ཨོཾ་མཱ་རཱི་ཙྱཻ་དེ་བ་ཏཱ་ཡེ་སྭཱ་ཧཱ། རིག་སྔགས་གསུངས་པའི་མོད་ལ་ནི། །དབང་ཆེན་གྲགས་པའི་སངས་རྒྱས་ཀུན། །ཐུགས་ནི་དགྱེས་ཤིང་མགུ་བར་འགྱུར། །སྲས་རྣམས་ཀྱི་ནི་སྤྱན་ཡང་ཕྱེ། །འདི་ནི་
ལས་རྣམས་ཐམས་ཅད་མ། །ཆོམ་རྐུན་སྡང་བ་འཆིང་མཛད་མ། །འདི་ཡི་སྦྱོར་བ་ལ་གནས་ན། །འགྲོ་བའི་ཚེ་ན་མཐོང་མི་འགྱུར། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་སྡང་
བ་ཐམས་ཅད་རྣམ་པར་འཇོམས་པ་སེམས་ཅན་ཐམས་ཅད་སྒྲོལ་བར་བྱེད་པའི་ཡེ་ཤེས་ཆེན་པོའི་སྟོབས་ཀྱིས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྟོང་ཆེན་པོ་རབ་ཏུ་འཇོམས་པའི་རིག་སྔགས་
ཀྱི་རྒྱལ་མོ་འདི་གསུངས་སོ། །ཨོཾ་མ་ཧཱ་ས་ཧ་སྲ་པྲ་མརྟནཱ་བར་སིད་གེ་མ་ཎི་བཛྲ་ཎི་ཧཱུྃ་ཕཊ་སྭཱ་ཧཱ། དེ་ནས་རིག་སྔགས་ཆེ་གསུངས་པས། །སངས་རྒྱས་ཞིང་རྣམས་རབ་ཏུ་གཡོས། །བྱང་ཆུབ་སེམས་དཔའ་
ཐམས་ཅད་དང་། །བདུད་ཀྱི་རིག་རྣམས་གཡོས་པར་འགྱུར། །གཙོ་བོ་རྡོ་རྗེ་སྣང་མཛད་པ། །ཐམས་ཅད་ཚིག་བཞིན་བཏུད་ནས་སུ། །བཅོམ་ལྡན་རིག་སྔགས་མཐུ་སྟོབས་ཀྱིས། །གནོད་བགྱིད་

90-1-83b

ཐམས་ཅད་གཟེར་ལགས་སོ། །གང་ན་རིག་སྔགས་སྟོབས་མོ་ཆེ། །ཕ་རོལ་གནོན་པ་འདི་ཟློས་པ། །དེར་ནི་བདག་ཅག་མི་མཆི་ཞིང་། །དེར་ནི་སྲུང་བ་དག་ཀྱང་བགྱི། །དེ་ནས་བཅོམ་ལྡན་འདས་རྣམ་པར་སྣང་མཛད་
ཆེན་པོ་རྡོ་རྗེའི་དེ་བཞིན་གཤེགས་པས། བརྒྱ་བྱིན་མངོན་པར་མཐོ་བའི་སྟོབས་ལྷ་མ་ཡིན་རྣམ་པར་འཇོམས་པས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་
རྒྱལ་མཚན་གྱི་རྩེ་མོའི་དཔུང་རྒྱན་གྱི་གཟུངས་ཆེན་མོ་འདི་གསུངས་སོ། །ཨོཾ་བྷ་ག་བཱ་ཏཱི་དྷྭ་ཛཱ་གྲ་ཀེ་ཡུ་རེ་པ་ར་སཻ་ནྱ། བི་དྷྭཱན་ས་ན་ཀཱ་སྭཱ་སཻ་ནྱ་པ་རི་ལ་ནི། ཨུ་ལ་ཀཱ་མུ་ཁི་ཁ་ཁ། ཁཱ་ཧི་ཁཱ་ཧི། པ་ར་སཻ་ནྱ་མ་
ཨ་ནན་ཏ་བྷུ་ཛེ། ཨ་ནན་ཏ་མུ་ཁེ་པྲ་ཧ་ར་པྲ་ཧ་ར་ཧཱུྃ་ཕཊ་ཕཊ་སྭཱ་ཧཱ། དེ་ནས་རིག་སྔགས་ཆེ་གསུངས་པས། །སངས་རྒྱས་ཞིང་རྣམས་གཡོས་པར་འགྱུར། །བྱང་ཆུབ་སེམས་དཔའ་རབ་གཡོས་ཤིང་། །
བདུད་ཀྱི་སྡེ་རྣམས་ཚིག་པར་འགྱུར། །གནོད་སྦྱིན་སྲིན་པོ་གོས་བྲལ་ནས། །འཇིགས་ཤིང་སྐྲག་པར་གྱུར་པ་ཡིས། །གཙོ་བོ་རྡོ་རྗེ་རྣམ་སྣང་དྲན། །བཅོམ་ལྡན་འདས་རིག་སྔགས་ཀྱི་རྒྱལ་མོའི་གཟི་བརྗིད་ཀྱིས་ཚིག་
ལགས་ཏེ། །བདག་ཅག་དམ་ཚིག་ལ་གནས་པར་འཚལ་ལགས་ན་མགོན་མཛད་ཅིང་ལུས་ཐམས་ཅད་རབ་ཏུ་བསྒྲུབ་ཏུ་གསོལ། །དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་མངལ་ཐམས་ཅད་ཡང་དག་པར་
སྐྱེས་པས་ཁྱབ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རིག་སྔགས་ཀྱི་རྒྱལ་མོ་ཆེན་མོ་སོ་སོར་འབྲང་བ་འདི་གསུངས་སོ། །ཨོ་མ་ཎི་དྷ་རི་བཛྲ་ཎི་མཱ་ཧཱ་པྲ་ཏི་ས་རི་སྭཱ་ཧཱ། རིག་སྔགས་ཆེན་མོ་གསུངས་པ་དང་། །རིག་སྔགས་རྒྱལ་
མོའི་མཐུ་ཡིས་ནི། །མི་ཡི་སྐྱེ་དགུ་འཚེ་བྱེད་པ། །མཐུ་ཆེན་མངལ་ནི་འཕྲོག་པ་དང་། །ལོག་འདྲེན་ཀུན་དང་སྡང་བའི་རྣམས། །མི་བཟད་གི་ལྩས་ཚིག་གྱུར་ནས། །འཇིགས་པ་དང་ནི་སྐྲག་པ་ཡིས། །རྡོ་རྗེ་སྣང་མཛད་དྲུང་ལྷགས་ཏེ། །

90-1-84a

ཞབས་ལ་གཏུགས་ཏེ་ཚིག་སྨྲས་པ། །བདག་ཅག་དམ་ཚིག་གནས་པར་འཚལ། །རིག་སྔགས་དམ་ཚིག་རྟག་གནས་པ། །གང་གིས་མངལ་ཡང་མི་འཕྲོག་ཅིང་། །རྟག་ཏུ་མངལ་ནི་སེལ་བར་མཛད། །དེ་ནས་
བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་ནོར་གྱི་རྒྱུན་གྱིས་ཡང་དག་པར་འཛིན་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རིག་སྔགས་ཀྱི་རྒྱལ་མོ་ཆེན་མོ་
ནོར་རྒྱུན་འདི་གསུངས་སོ། །ཨོཾ་བ་སུ་དྷཱ་རི་མ་ཧཱ་བ་སུ་དྷཱ་ར་བྷྀཥྚེ་ནི་པ་ཏ་ནི་བ་སུ་སྭཱ་ཧཱ། ནོར་གྱི་རྒྱུན་ཞེས་བྱ་བ་ཡི། །རིག་སྔགས་གསུངས་པའི་མོད་ལ་ནི། །བགེགས་དང་ལོག་འདྲེན་ཐམས་ཅད་དག །ཡིད་ནི་འཇིགས་ཤིང་སྐྲག་
གྱུར་ནས། །རྡོ་རྗེ་རྣམ་པར་སྣང་མཛད་ཀྱི། །དྲུང་དུ་ཉེ་བར་འོངས་ནས་སུ། །དམ་བཅས་པ་ཡི་ཚིག་སྨྲས་པ། །བཅོམ་ལྡན་ནོར་རྒྱུན་ཞེས་བྱ་བའི། །མཚན་ནི་མི་མཆོག་སྒྲགས་བགྱིད་ན། །དེ་ལ་ནོར་གྱི་ཆར་འབབ་ཅིང་། །ནོར་ཆེན་དང་ནི་
ལྡན་པར་བགྱི། །དེ་ནས་བཅོམ་ལྡན་འདས་ཀྱིས་གནོད་པར་བྱེད་པ་ཐམས་ཅད་འདུལ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་སྲིན་མོ་གློག་འབར་མ་བསྒྱུར་བའི་སྙིང་པོ་འདི་གསུངས་སོ། །ཨོཾ་རེ་དུ་ཏྲེ་ཎི་པྲ་ཀུ་པཏ་ཙཎ་ཌ་
མ་ཧཱ་བེ་ག་དྷ་རི་བིད་སཱ་དྷུ་ཛི་ཛྭེ། མ་ཧོ་ད་ནི་རཽ་ཏྲི་ཀྲ་པཱ་ལ་མཱ་ལ་དྷ་ན་རི་ཎེ་ཛཱ་ཊ་མུ་ཀུ་ཊ། མཎ་ཏི་ཏེ། ན་ན་པྲ་ཧ་ར་ན། དྷ་རི་ཧཱུྃ་ཧཱུྃ་ཕཊ་ཕཊ། སརྦྦ་ཏ་ཐཱ་ག་ཏ་ས་མ་ཡ་མ་ནུ་སྨ་ར། །ཀུ་རུ་ཀུ་རུ་ཧཱུྃ་ཧཱུྃ་སྭཱ་ཧཱ་སརྦྦ་ཤ་ཏྲཱུྃ་ན་ན། ཤོ་ཎི་ཏ་བི་བ་པྲ་ཙཎ་ཌེ། བེ་ག་དྷ་རི་
པ་ཙ་ཏ་པ་ཙ་ཏ། བེ་ཀི་ར་ཏ་ས་ཏ་ཡ་ཧཱུྃ། ད་ཧ་ད་ཧ། སརྦྦ་ཤ་ཏྲཱུཾ། སརྦྦ་དུ་ཤྚཱན། ནི་ཀྲྀན་ཏ། པྲ་སཱ་དྷ་ཡ་ཧཱུྃ། མ་ཧཱ་བྷ་ག་བ་ཏེ། ཛྭཱ་ལ་ཛྭཱ་ལ། ཧཱུྃ་ཕཊ། ཆེ་གེའི་མོ་ཞིག་མེ་བ་ཤ་ནཱ་ཡ་ཧཱུྃ་སྭཱ་ཧཱ། དེ་ནས་སྲིན་མོ་འབར་བའི་གློག །རིག་སྔགས་
ཆེན་མོ་གསུངས་པ་ཡིས། །བདུད་ཀྱི་གནས་རྣམས་ཚིག་པར་འགྱུར། །དགྲ་རྣམས་ཀྱི་ནི་སྙིང་ཡང་སྐམས། །དུར་ཁྲོད་ཀྱི་རས་ལ་སྲིན་མོ་བཙག་གིས་བྲིས་ནས་ལེགས་པར་སྦས་ཏེ་གུ་གུལ་གྱི་བདུག་པས་བསྲེག་ཅིང་

90-1-84b

བརྒྱ་རྩ་བརྒྱད་བཟླས་བརྗོད་བྱས་ལ། །མེ་ཏོག་དམར་པོ་དང་། དྲི་དམར་པོ་དང་། གཏོར་མ་དང་ལྷ་བཤོས་དམར་པོར་བྱས་པ་བྱིན་ནས་དུར་ཁྲོད་དུ་བརྐོ་བར་བྱའོ། །དེའི་སྟེང་དུ་མིང་ནས་སྨོས་ཤིང་བརྒྱ་རྩ་བརྒྱད་བཟླས་བརྗོད་བྱས་
པའི་ཡུངས་ཀར་གྱིས་གཏོར་ཏོ། །བསྐོས་པའི་མོད་ལ་ཕྱིར་རྒོལ་བ་དང་དགྲ་ཐམས་ཅད་བཅིངས་པར་འགྱུར་རོ། །མནན་པ་དང་རྨོངས་པར་བྱས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་འཕྲོག་མའི་དགའ་སྟོན་གནོད་སྦྱིན་མོའི་ཚོགས་
དགའ་བར་བྱེད་པའི་དངོས་གྲུབ་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་འཆང་ཆེན་པོ་འཕྲོག་མའི་གསང་སྔགས་འདི་གསུངས་སོ། །ཨོཾ་ཧཱ་རི་ཏྱེ་ན་ཧཱ་ཡཀྵི་ཎི་ཡེ་ཧ་ར་ཧ་ར། སརྦྦ་ཡཀྵི་ཎི་པྲ་བེ་ཤ་ནི་
སྭཱ་ཧཱ། དེ་ནས་འཕྲོག་དགའ་འཕྲོག་མ་ནི། །གནོད་སྦྱིན་ཆེན་མོ་གསུངས་པ་དང་། །གནོད་སྦྱིན་མ་ཀུན་གཡོས་ནས་སུ། །དངོས་གྲུབ་ཕྱིར་ནི་མངོན་ཕྱོགས་འགྱུར། །ཁྲོ་མོའི་འཁོར་ལོ་གནོད་སྦྱིན་མ། །བརྒྱད་དབུས་འཕྲོགས་མས་བརྒྱན་
བྱས་ཏེ། །ལྕགས་ཀྱུ་འབྲས་བུ་ནེ་ལེ་ཅན། །གནོད་སྦྱིན་བརྒྱད་ཀྱིས་ཀླུབས་ནས་སུ། །གནོད་སྦྱིན་མ་ཀུན་བསྒྲུབ་པར་བྱ། །དེ་ནས་བཅོམ་ལྡན་འདས་ཀྱིས་ནད་ཆེན་པོ་ཐམས་ཅད་ལས་རྣམ་པར་རྒྱལ་བའི་རྡོ་རྗེ་ཞེས་བྱ་བའི་
ཏིང་ངེ་འཛིན་ལ་སྙོམས་པར་ཞུགས་ནས་མི་ངས་ཆེན་པོ་ཞི་བར་མཛད་པའི་རིག་སྔགས་རི་ཁྲོད་ཀྱི་ཤིང་ལོ་ཅན་མ་འདི་གསུངས་སོ། །ཨོཾ་པི་ཤཱ་ཙི་པརྞ་ཤ་བ་རི། སརྦྦ་མཱ་རཱི་པྲ་ཤ་མ་ནི་ཧཱུྃ་ཕཊ། དེ་ནས་རིག་
སྔགས་ཆེ་གསུངས་པས། །སངས་རྒྱས་ཞིང་རྣམས་རབ་ཏུ་གཡོས། །གནོད་བྱེད་ནད་འགྲོ་སྲིན་པོ་དང་། །སྡང་བ་རྣམས་ཀྱི་སྙིང་ཡང་ཟགས། །ཡམ་ཤིང་འོ་མ་ཅན་དང་ཏིལ། །འོ་མས་དུ་བ་ཞི་བར་འགྱུར། །ནམ་
མཁར་ཀུན་ནས་རིག་སྔགས་ཀྱི། །རྒྱལ་མོས་ལེགས་པར་བཀང་ནས་སུ། །བདུད་རྩི་ཆར་འབེབས་བསམས་ན་ནི། །མོད་ལ་གནོད་པ་ཞི་བར་འགྱུར། །རྒྱུད་ཀྱི་རྒྱལ་པོ་ཆེན་པོ་སྒྱུར་འཕྲུལ་གྱི་དྲ་བ་ལས་འདི་ནི་གསང་

90-1-85a

སྔགས་ཀྱི་ཡེ་ཤེས་རྣམ་པར་བསྒྱིངས་པའི་རིམ་པར་ཕྱེ་བའི་ལེའུ་སྟེ་ལྔ་པའོ།། །། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེ་དེ་བཞིན་གཤེགས་པས་ཕྱག་ན་རྡོ་རྗེ་ལ་འདི་སྐད་ཅེས་བཀའ་
སྩལ་ཏོ། །སྐུ་གསུམ་ཡེ་ཤེས་ཀྱི་རྡོ་རྗེ་ལས་ཡང་དག་པར་བྱུང་བ་ལག་པའི་ཕྱག་རྒྱ་ཐ་དད་པ་རྣམས་མཉམ་པར་གཞག་པའི་སེམས་ཀྱིས་ཉོན་ཅིག །གང་ཞིག་བཅིངས་པ་ཙམ་གྱིས་ནི། །སྡིག་པ་ཀུན་ལས་རྣམ་གྲོལ་ཞིང་། །འདི་ན་
ལུས་ནི་བྱིན་རླབས་ཏེ། །རང་གི་གཟུགས་སུ་རྣམ་བསྒོམས་ན། །སངས་རྒྱས་ཉིད་ཀྱང་ཐོབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །ལག་པས་གཉིས་ཁུ་ཚུར་བཅངས་པ་ལས་མཐེ་བོ་གཉིས་གཏེག་པ་ན་
དེ་བཞིན་གཤེགས་པའི་སྟེ། སྐུ་བྱིན་གྱིས་བརླབས་པའི་ཕྱག་རྒྱའོ། །དེ་ཉིད་ལས་གཡོན་པའི་མཐེ་བོ་ནང་དུ་བཅུག་སྟེ། གཡས་པའི་མཐེ་བོ་བཏེག་པ་ནི་འཇིག་རྟེན་དབང་ཕྱུག་གི་སྟེ་གསུང་བྱིན་གྱིས་བརླབ་པའི་ཕྱག་རྒྱའོ། །
དེ་ཉིད་ལས་གཡས་པའི་མཐེ་བོ་ནང་དུ་བཅུག་སྟེ་གཡོན་པའི་མཐེ་བོ་བཏེག་པ་ནི་རྡོ་རྗེ་འཆང་གི་སྟེ། ཐུགས་བྱིན་གྱིས་བརླབ་པའི་ཕྱག་རྒྱའོ། །ལག་པ་གཉིས་ཁུ་ཚུར་བཅངས་པ་ལས་གཡོན་པའི་འཛུབ་མོ་བསྒྲེང་
བའི་ཐོར་ཏོ་གཡས་པའི་ཁུ་ཚུར་གྱིས་བཟུང་བ་ནི་རྡོ་རྗེ་རྣམ་པར་སྣང་མཛད་ཆེན་པོའི་ཕྱག་རྒྱའོ། །སེམས་དཔའི་སྐྱིལ་མོ་དཀྲུང་དུ་འདུག་ནས་ལག་པ་གཡོན་པ་པང་པར་བཞག་སྟེ། གཡས་པ་ས་ལ་གནོན་པ་ནི་མི་
འཁྲུག་པའི་ཕྱག་རྒྱའོ། །དེ་ཉིད་ལས་གཡས་པ་མཆོག་སྦྱིན་པར་བྱས་པ་ནི་རིན་ཆེན་འབྱུང་གནས་ཀྱི་ཕྱག་རྒྱའོ། །དེ་ཉིད་ལས་ལག་པ་གཉིས་བསམ་གཏན་གྱི་ཚུལ་དུ་བྱས་པ་ནི་འོད་དཔག་མེད་ཀྱི་ཕྱག་རྒྱའོ། །དེ་ཉིད་
ལས་གཡས་པ་མི་འཇིགས་པ་སྦྱིན་པར་བྱས་པ་ནི་གདོན་མི་ཟ་བར་གྲུབ་པའི་ཕྱག་རྒྱའོ། །ལག་པ་གཉིས་རྡོ་རྗེ་བཅིང་བར་བྱས་པ་ལས་གུང་མོ་གཤིབས་ཏེ་བསྒྲེང་བ་ནི་རྡོ་རྗེ་སེམས་མའི་ཕྱག་རྒྱའོ། །དེ་ཉིད་ལས་

90-1-85b

གུང་མོའི་ཚིགས་དང་པོ་བཀུག་སྟེ། རིན་པོ་ཆེའི་ཚུལ་དུ་བྱས་པ་ནི་རྡོ་རྗེ་རིན་ཆེན་མའི་ཕྱག་རྒྱའོ། །དེ་ཉིད་ལས་གུང་མོ་པད་མོའི་འདབ་མ་ལྟར་གདུབ་བུའི་ཚུལ་དུ་བྱས་པ་ནི་རྡོ་རྗེ་ཆོས་མའི་ཕྱག་རྒྱའོ། །དེ་ཉིད་ལས་
གུང་མོ་ནང་དུ་བསྐུམ་པ་ནི་རྡོ་རྗེ་ལས་མའི་ཕྱག་རྒྱའོ། །ལག་པ་གཉིས་ཐལ་མོ་ཁོང་སྟོང་དུ་སྦྱར་བ་ལ་འཛུབ་མོ་གཉིས་གདུབ་བུ་ལྟར་བྱས་ཏེ་མཐེ་བོའི་རྩེ་མོར་མིག་གི་ཚུལ་དུ་བྱས་པ་ནི་སངས་རྒྱས་སྤྱན་གྱི་
ཕྱག་རྒྱའོ། །རྡོ་རྗེ་བཅིངས་པ་ལས་གུང་མོ་བསྒྲེང་བའི་ཚིགས་གསུམ་པར་འཛུབ་མོ་གཉིས་རྡོ་རྗེའི་ཚུལ་དུ་བཟུང་བ་ནི་མཱ་མ་ཀཱིའི་ཕྱག་རྒྱའོ། །ལག་པ་གཉིས་ཐལ་མོ་ཁོང་སྟོང་དུ་སྦྱར་ཏེ་པད་མ་ཁ་བྱེ་བའི་ཚུལ་དུ་བྱས་པ་ནི་
གོས་དཀར་ཅན་གྱི་ཕྱག་རྒྱའོ། །ལག་པ་གཉིས་ཐལ་མོ་ཁོང་སྟོང་དུ་སྦྱར་བ་ལས་འཛུབ་མོ་གཉིས་བཀུག་པས་གུང་མོའི་སེན་མོ་མནན་ཏེ་མཐེ་བོ་གཉིས་དབུས་སུ་བཞག་ནས་ཅུང་ཟད་བཀུག་པ་ནི་སྒྲོལ་མའི་ཨུད་
པ་ལའི་ཕྱག་རྒྱའོ། །ལག་པ་གཉིས་ཐལ་མོ་སྦྱར་ཏེ། འཛུབ་མོ་དང་གུང་མོའི་ཚིགས་དབུས་མར་གདུབ་བུའི་ཚུལ་བྱས་ནས་མཐེ་བོ་གཉིས་གློར་བཞག་པ་འདི་ནི་སྐུལ་བྱེད་མའི་གཟུངས་ཀྱི་ཕྱག་རྒྱའོ། །དེ་ནས་རྡོ་རྗེ་
བཅིང་པ་བྱས་པ་ལས་འཛུབ་མོ་གཉིས་མཐེ་བོའི་རྩེ་མོར་བཀུག་པ་འདི་ནི་རིན་ཆེན་སྒྲོལ་མའི་ཕྱག་རྒྱའོ། །ལག་པ་གཉིས་བརྐྱང་སྟེ་མཐེ་བོས་སོ་སོའི་མཐེའུ་ཆུང་གི་སེན་མོ་མནན་ནས་ལྷག་མ་རྡོ་རྗེའི་
མཚན་ཉིད་དུ་བྱས་པ་འདི་ནི་ཁྲོ་གཉེར་ཅན་མའི་ཕྱག་རྒྱའོ། །ལག་པ་གཉིས་སོ་སོར་ཁུ་ཚུར་བཅངས་པ་ལས་འཛུབ་མོ་དང་མཐེའུ་ཆུང་གཉིས་ལུ་གུ་རྒྱུད་ལྟར་བཅིངས་པ་འདི་ནི་རྡོ་རྗེ་ལུ་གུ་རྒྱུད་ཀྱི་
ཕྱག་རྒྱའོ། །ལག་པ་གཉིས་ཁུ་ཚུར་བཅངས་པ་ལས་གུང་མོ་དང་སྲིན་ལག་གཉིས་བསྒྲེངས་ཏེ་རྩེ་མོའི་ཚུལ་དུ་བྱས་ལ་གུང་མོའི་རྒྱབ་ཏུ་སྲིན་ལག་བསྣོལ་ལ། འཛུབ་མོ་གཉིས་གདུབ་བུའི་ཚུལ་དུ་བྱས་

90-1-86a

པས་དཀྲིས་པས་མཐེ་བོ་གཉིས་མདུན་དུ་བཞག་པ་ལས་ཅུང་ཟད་བཀུག་སྟེ་ཁའི་ཚུལ་དུ་བྱས་པ་འདི་ནི་གཤིན་རྗེ་གཤེད་ཀྱི་ཕྱག་རྒྱའོ། །ལག་པ་གཡོན་པ་རྡོ་རྗེ་ཁུ་ཚུར་བཅངས་པ་ལས་ཁྲོ་བོའི་མཛུབ་
མོ་སྙིང་གར་བཞག་སྟེ། ལག་པ་གཡས་པ་ཐལ་ལྕག་གི་ཚུལ་དུ་བྱས་པ་ནི་ཁྲོ་བོ་གཞན་གྱིས་མི་ཐུབ་པའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ལ་མཐེའུ་ཆུང་ལུ་གུ་རྒྱུད་ལྟར་མདུད་ལ་འཛུབ་མོ་གཞིབས་ཏེ་བསྒྲེང་བ་ལས་བཟློག་སྟེ། 
དཔྲལ་བར་བཞག་པ་ནི་རྟ་མགྲིན་གྱི་ཕྱག་རྒྱའོ། །ལག་པ་གཉིས་ཀྱི་མཐེ་བོས་སྲིན་ལག་དང་མཐེའུ་ཆུང་གཉིས་ཀྱི་སེན་མོ་མནན་ལ་རལ་གྲི་ཤུབས་ནས་དབྱུང་བའི་ཚུལ་དུ་བྱས་པ་ནི་འཕགས་པ་མི་གཡོ་བའི་ཕྱག་
རྒྱའོ། །ལག་པ་གཉིས་རྡོ་རྗེ་ཁུ་ཚུར་བཅངས་པ་ལས་རྒྱབ་སྤྲད་དེ་མཐེའུ་ཆུང་གཉིས་ལུ་གུ་རྒྱུད་ལྟར་བཅིངས་ནས་འཛུབ་མོ་གཉིས་བསྒྲེངས་པ་ལས་ཞགས་པའི་ཚུལ་དུ་བྱས་པ་ནི་འདོད་པའི་རྒྱལ་པོའི་ཕྱག་རྒྱའོ། །ལག་པ་གཡོན་
པའི་རྡོ་རྗེ་ཁུ་ཚུར་གྱི་འཛུབ་མོ་སྙིང་གར་བཞག་ལ། གཡས་པ་ཁྲོ་བོའི་སོར་མོ་བེ་ཅོན་གྱི་ཚུལ་དུ་ཕྱར་བ་ནི་བེ་ཅོན་སྔོན་པོ་ཅན་གྱི་ཕྱག་རྒྱའོ། །ལག་པ་གཡོན་པ་རྡོ་རྗེ་སྙིང་གར་བཞག་ལ་གཡས་པའི་རྡོ་རྗེ་ཁུ་ཚུར་
རྡེག་སྟངས་དང་བཅས་པར་ཕྱར་བ་ནི་སྟོབས་པོ་ཆེའི་ཕྱག་རྒྱའོ། །ལག་པ་གཉིས་སོ་སོར་ཁུ་ཚུར་བཅངས་ལ། འཛུབ་མོ་དང་གུང་མོ་བསྒྲེངས་ཏེ་སྤྲད་ནས་མེ་ཏོག་གི་ཚུལ་དུ་བྱས་པ་ནི་བྱམས་པའི་ཕྱག་རྒྱའོ། །ལག་པ་གཉིས་ཐལ་
མོ་ཁོང་སྟོང་དུ་སྦྱར་ནས་འཛུབ་མོ་གཉིས་ཀྱིས་སྲིན་ལག་གཉིས་ཀྱི་སེན་མོ་མནན་ནས་ཨུཏ་པལ་ཁ་བྱེ་བའི་ཚུལ་དུ་གཞུག་པ་ནི་འཇམ་པའི་དབྱངས་ཀྱི་ཕྱག་རྒྱའོ། །ལག་པ་གཡོན་པ་པང་པར་བཞག་ལ། ལག་པ་གཡས་པ་གླང་
པོ་ཆེའི་སྣ་ལྟར་བྱས་པ་ནི་སྤོས་ཀྱི་གླང་པོའི་ཕྱག་རྒྱའོ། །གཡོན་པའི་རྡོ་རྗེ་ཁུ་ཚུར་ནམ་མཁའ་ལ་སྒྲེང་བ་ལག་པ་གཡས་པའི་སོར་མོ་བ་དན་གྱི་ཚུལ་དུ་བྱས་པ་ནི་ཡེ་ཤེས་ཏོག་གི་ཕྱག་རྒྱའོ། །བཟང་པོའི་འདུག་སྟངས་སུ་འདུག་སྟེ། 

90-1-86b

ཐལ་མོ་ཁོང་སྟོང་དུ་སྦྱར་ཏེ་སྙིང་གར་བཞག་པ་ནི་བཟང་སྐྱོང་གི་ཕྱག་རྒྱའོ། །ལག་པ་གཉིས་ཆུ་རླབས་ཀྱི་ཚུལ་དུ་བརྐྱང་བ་ལས་སོར་མོ་རྣམས་ཆུ་རླབས་དྲང་བ་ནི་བློ་གྲོས་རྒྱ་མཚོའི་ཕྱག་རྒྱའོ། །གཡོན་པ་རྡོ་རྗེ་ཁུ་ཚུར་སྙིང་གར་བཞག་ལ་
གཡས་པ་མཆོག་སྦྱིན་པ་ནི་བློ་གྲོས་མི་ཟད་པའི་ཕྱག་རྒྱའོ། །གཡོན་པ་རྡོ་རྗེ་ཁུ་ཚུར་པང་དུ་བཞག་ལ་གཡས་པ་སེ་གོལ་གཏོགས་པའི་ཚུལ་དུ་བྱས་པ་ནི་སྤོབས་པ་བརྩེགས་པའི་ཕྱག་རྒྱའོ། །ལག་པ་གཉིས་པད་མ་ཅུང་ཟད་
ཁ་བྱེ་བ་ལྟར་བྱས་པ་ནི་མཐུ་ཆེན་ཐོབ་ཀྱི་ཕྱག་རྒྱའོ། །ལག་པ་གཉིས་མེ་ཏོག་འདོར་བའི་ཚུལ་དུ་བྱས་པ་ནི་ངན་སོང་ཐམས་ཅད་སྤོང་བའི་ཕྱག་རྒྱའོ། །ལག་པ་གཉིས་ཐལ་མོ་ཁོང་སྟོང་དུ་སྦྱར་བ་ལས་བསྣུན་པའི་ཚུལ་དུ་བྱས་པ་ནི་མྱ་ངན་
ཐམས་ཅད་ཀྱི་མུན་པ་ངེས་པར་འཇོམས་པའི་བློ་གྲོས་ཀྱི་ཕྱག་རྒྱའོ། །ལག་པ་གཉིས་བརྐྱང་ནས་འཕྲོ་བའི་ཚུལ་དུ་བྱས་པ་ནི་དྲ་བ་ཅན་གྱི་འོད་ཀྱི་ཕྱག་རྒྱའོ། །གཡས་པ་མཆོག་སྦྱིན་པར་བྱས་པ་ལ་གཡོན་པ་ཟླ་བའི་ཚུལ་དུ་བྱས་པ་ནི་ཟླ་
འོད་ཀྱི་ཕྱག་རྒྱའོ། །ལག་པ་གཉིས་བུམ་པའི་ཚུལ་དུ་བྱས་ནས་དབང་བསྐུར་བ་ནི་འོད་དཔག་མེད་ཀྱི་ཕྱག་རྒྱའོ། །གཡོན་པ་རྡོ་རྗེ་ཁུ་ཚུར་བྱས་ལ་གཡས་པའི་ཁུ་ཚུར་ནམ་མཁའ་ལ་ཀུན་དུ་བསྐོར་བའི་ཚུལ་དུ་བྱས་པ་ནི་ནམ་མཁའ་མཛོད་ཀྱི་ཕྱག་རྒྱའོ། །
གཡོན་པ་ས་ལ་བརྐྱང་ནས་ལག་པ་གཡས་པའི་འཛུབ་མོ་དང་མཐེ་བོང་སྤྲད་ནས་ཞི་བའི་ཚུལ་དུ་བྱས་པ་ནི་སྒྲིབ་པ་ཐམས་ཅད་ངེས་པར་སེལ་བའི་ཕྱག་རྒྱའོ། །གཡོན་པ་རྡོ་རྗེ་ཁུ་ཚུར་ལས་ཁྲོ་བོའི་འཛུབ་མོ་སྙིང་གར་བཞག་ལ་ཧཱུྃ་ཞེས་བྱ་ཞིང་། ལག་པ་གཡས་
པའི་རྡོ་རྗེ་ཁུ་ཚུར་རྡེག་སྟབས་དང་བཅས་པར་ཕྱར་བ་ནི་རི་ཁྲོད་ལོ་མ་ཅན་གྱི་ཕྱག་རྒྱའོ། །ལག་པ་གཡོན་པ་སོར་མོ་བརྐྱང་བ་ལས་འཛུབ་མོ་དང་མཐེ་བོ་རྐང་པས་འཛིན་པའི་ཚུལ་དུ་བྱས་ལ། ལག་པ་གཡས་པ་ཁབ་ཀྱི་ཚུལ་གྱིས་འཚེ་བར་བྱེད་པ་རྣམས་
ཀྱི་ཁ་མིག་འདྲུབ་པ་ནི་འོད་ཟེར་ཅན་མའི་ཕྱག་རྒྱའོ། །ལག་པ་གཉིས་སྤྱི་བོར་སྦྲུལ་མགོ་གདེངས་ཀའི་གདུགས་ལྟར་བྱས་ནས་ཕུད་ཅེས་བརྗོད་པ་ནི་དུག་སེལ་མའི་ཕྱག་རྒྱའོ། །འདོད་པའི་རྒྱལ་པོའི་ཕྱག་གཉིས་ལས་འཛུབ་མོ་གཉིས་བསྒྲེང་བ་

90-1-87a

ནི་རྡོ་རྗེ་ཧཱུྃ་མཛད་ཀྱི་ཕྱག་རྒྱའོ། །དེ་ཉིད་ལས་གཡས་པའི་ཁྲོ་བོའི་ལྕགས་ཀྱུ་ཡིས་ཛཿཞེས་བྱ་བའི་དགུག་པ་ནི་རྡོ་རྗེ་ཁྲོ་བོ་ལྕགས་ཀྱུ་དགུག་པ་སྟེ། དེ་བཞིན་གཤེགས་པ་ཐམས་ཅད་སྤྱན་འདྲེན་པ་སྟེ་རྡོ་རྗེ་ཁྲོ་བོའི་ལྕགས་ཀྱུའི་ཕྱག་རྒྱའོ། །རྡོ་རྗེ་ཁུ་ཚུར་
གཉིས་ཀྱི་མཐེའུ་ཆུང་མཆེ་བའི་ཚུལ་དུ་བྱས་པ་ལས་བསྣོལ་ཏེ་འགྲམ་པ་གཉིས་སུ་བཞག་ལ། ལྕེ་ལྗིབ་ཅིང་ཁྲོ་བོའི་ལྟ་བས་བལྟ་བར་བྱ་བ་ནི་རྡོ་རྗེ་མཆེ་བའི་ཕྱག་རྒྱའོ། །དེ་ཉིད་ལས་མཐེ་བོ་ཆུང་གཉིས་བསྐུམ། འཛུབ་མོ་གཉིས་ལྕགས་ཀྱུའི་ཚུལ་དུ་
བྱས་ནས་ཁའི་གྲྭར་བཞག་སྟེ་ཧཱུྃ་ཞེས་བྱ་ཞིང་ཁྲོ་བོའི་ལྟ་བས་ལུས་གཅུ་བ་ནི་རྡོ་རྗེ་མཁའ་འགྲོ་མའི་ཕྱག་རྒྱའོ། །ལག་པ་གཉིས་ཀྱིས་རྡོ་རྗེ་ཁུ་ཚུར་བཅངས་པ་ལས་འཛུབ་མོ་གཉིས་བརྐྱང་སྟེ་བསྣོལ་ནས་གྱེན་དུ་བཏེག་པ་ལྟར་བྱས་པ་ནི་དཀྱིལ་འཁོར་གྱི་
ཕྱག་རྒྱའོ། །དེ་ཉིད་ལས་མཁྲིག་མ་གཉིས་བསྣོལ་ཏེ་བསྟོད་ཅིང་བཏེག་པ་ནི་སྒོ་དབྱེ་བའི་ཕྱག་རྒྱའོ། །ལག་པ་གཉིས་རྡོ་རྗེ་ཁུ་ཚུར་བསྣོལ་ནས་མཆན་ཁུང་དུ་བསྡམས་ཏེ་ཁྲོ་བོའི་ལྟ་བས་འགྱུར་བ་དང་བཅས་པ་ནི་གདོན་ཐམས་ཅད་
སྐྲག་པར་བྱེད་པའི་ཕྱག་རྒྱའོ། །ལག་པ་གཡོན་བརྐྱང་སྟེ་ཁ་སྦུབ་པ་ལ་དེའི་སྟེང་དུ་གཡས་པ་བཞག་ནས་ལག་པ་གཉིས་ཀྱིས་སོར་མོ་བསྐྱོད་པ་ནི་ལྷ་མ་ཡིན་གྱི་སྒྱུད་དང་འཁྲུལ་འཁོར་འབྱེད་པ་དང་། ལྷ་མ་ཡིན་གྱི་བུ་མོ་སྨྲར་
གཞུག་པའི་ཕྱག་རྒྱའོ། །ལག་པ་གཉིས་ཀྱི་མཐེ་བོ་དང་མཐེ་བོ་ཆུང་གཉིས་ལུ་གུ་རྒྱུད་ལྟར་བཅིངས་ཏེ་བཞག་ལ། ལྷག་མ་བ་དན་རྩེ་གསུམ་པའི་ཚུལ་དུ་བྱས་ནས་སྟང་སྟབས་དང་བཅས་པར་ཧཱུྃ་ཞེས་བྱ་བ་ནི་ཁྲོ་བོ་རྡོ་རྗེ་ས་འོག་གི་ཕྱག་རྒྱའོ། །
གཡོན་པའི་རྡོ་རྗེ་ཁུ་ཚུར་གྱི་ཁྲོ་བོའི་འཛུབ་མོས་བསྡིགས་པ་ནི་རྡོ་རྗེའི་བདག་མོའི་ཕྱག་རྒྱའོ། །རྡོ་རྗེ་བཅིངས་པ་ལས་འཛུབ་མོ་གཉིས་བརྐྱང་སྟེ་ཕུར་བུའི་ཚུལ་དུ་བྱས་པ་ནི་རྡོ་རྗེ་ཕུར་བུའི་ཕྱག་རྒྱའོ། །གཡས་པའི་རྡོ་རྗེ་ཁུ་ཚུར་བརྡུང་བའི་ཚུལ་དུ་བྱས་པ་ནི་རྡོ་རྗེ་ཐོ་བའི་ཕྱག་རྒྱའོ། །
ལག་པ་གཉིས་རྡོ་རྗེ་ཁུ་ཚུར་བཅངས་པ་ལས་འཛུབ་མོ་གཉིས་བརྐྱང་སྟེ་རྡོ་རྗེ་མདུད་པ་དོར་བའི་ཚུལ་དུ་བྱས་པ་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་བཅིངས་པའི་ཕྱག་རྒྱའོ། །ལག་པ་གཉིས་ཀྱིས་རྡོ་རྗེ་ཁུ་ཚུར་བཅིངས་ཏེ་སོག་ལེ་དྲང་བའི་ཚུལ་བྱས་པ་ནི་རྡོ་རྗེ་སོག་ལེའི་ཕྱག་རྒྱའོ། །ལག་པ་གཉིས་ཐལ་མོ་ཟླ་བའི་ཚུལ་དུ་

90-1-87b

བྱས་ཏེ་གདོང་གཡོག་ཅིང་བརྐྱང་ལ་ཁྲོ་བོའི་མིག་ཏུ་བྱས་ནས་ཨ་ལ་ལ་ཞེས་བྱ་བ་ནི་རྡོ་རྗེ་སྲིན་མོའི་ཕྱག་རྒྱའོ། །ལག་པ་གཉིས་ལུ་གུ་རྒྱུད་དུ་བཅིངས་པ་ལ་འཛུབ་མོ་དང་མཐེ་བོ་གཉིས་པད་མའི་ཚུལ་དུ་བྱས་པ་ནི་སྤྲིན་ཐམས་ཅད་གཏུབ་པའི་
ཕྱག་རྒྱའི་ཕྱག་རྒྱའོ། །ལག་པ་གཉིས་ཁུ་ཚུར་བཅངས་པ་ལས་འཛུབ་མོ་གཉིས་གདུབ་བུ་ལྟར་བྱས་ཏེ་རྐམ་པའི་ཚུལ་དུ་དཔུང་པ་བརྐྱང་བ་ནི་འཁྲུལ་འཁོར་གྱི་ཕུར་པ་དབྱུང་བའི་རྐམ་པའི་ཕྱག་རྒྱའོ། །ལག་པ་གཉིས་ཀྱི་མཐེ་བོ་
ལག་མཐིལ་དུ་བཞག་སྟེ། ལྷག་མ་རྣམས་འདབ་མ་ལྟར་གཡབ་ཅིང་རྐང་པ་ཡ་གཅིག་ས་ལ་བཙུགས་ལ། གཅིག་རྒྱབ་ཏུ་བསྐུམས་ནས་ཁྲོ་བོའི་ལྟ་བས་ལྕེ་ལྗིབ་ཅིང་ཧཱུྃ་ཕཊ་ཅེས་བྱ་བས་རིམ་གྱིས་བསྐྱོད་པ་ནི་རྡོ་རྗེ་ནམ་
མཁའ་ལྡིང་གི་ཕྱག་རྒྱའོ། །འདི་བཅིངས་པ་ཙམ་གྱིས་ཁམས་གསུམ་ཁྱབ་པའི་དུག་ཀྱང་སྐད་ཅིག་གིས་སེལ་བར་བྱེད་དོ། །རྡོ་རྗེ་ཁུ་ཚུར་གཉིས་མདའ་གཞུ་དགང་བའི་ཚུལ་གྱིས་ཕྱོགས་བཞིར་མདའ་བཀང་སྟེ་འཕངས་
པས་ཕ་རོལ་དཔུང་གཞིག་པ་ནི་མཉེས་པར་བྱེད་པའི་རྡོ་རྗེ་མདའི་ཕྱག་རྒྱའོ། །ཁུ་ཚུར་གཉིས་ལས་གུང་མོ་གཤིབས་ཏེ་བསྒྲེང་བ་ལས་རིན་པོ་ཆེའི་ཚུལ་དུ་དགུག་ལ་མཐེ་བོ་བརྐྱང་བའི་སྟེང་དུ་འཛུབ་མོ་གཉིས་གདུབ་བུའི་ཚུལ་དུ་
བྱས་པ་ནི་སངས་རྒྱས་འཁོར་ལོ་ཅན་གྱི་ཕྱག་རྒྱ་གཡུལ་ལས་སྒྲོལ་བར་བྱེད་པའོ། །ལག་པ་གཡོན་པའི་མཐེ་བོས་སོར་མོ་མནན་ཏེ་གུང་མོ་བསྒྲེང་ལ་གཡས་པས་པད་མ་ཁ་འབྱེད་པའི་ཚུལ་དུ་བྱས་པ་ནི་ཧ་ལ་ཧ་ལའི་ཕྱག་
རྒྱའོ། །ཁུ་ཚུར་གཉིས་ཀྱིས་མཐེའུ་ཆུང་གཉིས་དཀྲིས་ལ་འཛུབ་མོ་གཉིས་གཤིབས་ཏེ་བསྒྲེང་ནས་བཟློག་ལ་དཔྲལ་བར་བཞག་པ་ནི་རྡོ་རྗེ་ཁྲག་འཐུང་གི་ཕྱག་རྒྱ་སྟེ། དུར་ཁྲོད་དུ་འཇུག་པ་ན་མཁའ་འགྲོ་མ་
རྣམས་འཇིགས་པར་བྱེད་པའོ། །གཡོན་པས་ཐོད་པ་གཟུང་ལ་གཡས་པས་མདུང་རྩེ་གསུམ་ཐོགས་ནས་རལ་པ་བཅིངས་ཏེ་ཟླ་བས་བརྒྱན་ཅིང་མཚན་བསྒྲེང་ལ། མིག་གསུམ་པ་གར་བྱེད་པ་ནི་གར་སྟབས་ཀྱི་ཕྱག་རྒྱ་སྟེ་ཡ་

90-1-88a

ནི་བདེ་བྱེད་ཀྱི་ཕྱག་རྒྱའོ། །གཡོན་པ་མི་འཇིགས་པར་བྱས་པ་ལས་སོར་མོ་རྣམས་ཅུང་ཟད་ཕྱེ་སྟེ་མཐེ་བོ་ལག་མཐིལ་དུ་བཞག །དེ་བཞིན་དུ་གཡས་པའི་ཁུ་ཚུར་དབྱུག་ཐོ་འཛིན་པ་ལྟར་བྱས་པ་ནི་ཁྱབ་འཇུག་གི་
ཕྱག་རྒྱའོ། །ལག་པ་གཉིས་བརྐྱང་ནས་པད་མའི་ཚུལ་དུ་བྱས་པ་ནི་ཚངས་པའི་ཕྱག་རྒྱའོ། །ལག་པ་གཉིས་ཐལ་མོ་ཁོང་སྟོང་དུ་སྦྱར་ཏེ་མེ་ཏོག་ལྟར་བྱས་པ་ནི་མ་མོ་རྣམས་ཀྱི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱིས་ནི། །
རྒྱབ་དུ་མདུད་པ་ལྟར་འདོར་ཞིང་། །རྡོ་རྗེ་སེམས་མ་ལ་སོགས་པའི། །རིན་ཆེན་ཅོད་པན་ཕྲེང་དབང་བསྐུར། །ཏིང་འཛིན་གནས་པས་འཁོར་ལོ་ཅན། །འཁོར་ལོ་མངའ་བའི་ལྷ་རྣམས་ལ། །སངས་རྒྱས་ས་ནི་
རབ་འགེངས་པའི། །གསང་བའི་མཆོད་པ་འབྱུང་བར་བསམ། །འགྱུར་ཞིང་ཅུང་ཟད་འཇོ་ཚུལ་ཅན། །བསྒེག་མོ་ཡི་ནི་ཕྱག་རྒྱ་ཡིས། །གར་གྱི་ཚུལ་ཏུ་བསྐྱོད་ནས་ཀྱང་། །ཧཱུྃ་ཞེས་བྱ་བ་གླུར་བླངས་ཤིང་། །དེ་ནས་
སངས་རྒྱས་ཀུན་དགྱེས་པ། །རྡོ་རྗེ་རྒྱུད་ནི་བསྒྲེང་བར་བྱ། །དེ་ནས་ཕྲེང་ཚུལ་ཕྲེང་བ་ཡིས། །ལྷ་རྣམས་ཀུན་ལ་བཅིང་བར་བྱ། །འཇོ་སྒེག་ཐབས་ལ་སྤྲོ་བ་ཡིས། །ལག་གཉིས་བསྐོར་ཞིང་དགྲོལ་བ་དང་། །གཡས་ནས་
གཡོན་དུ་བསྐོར་བ་ཡིས། །གར་སྟབས་བྱས་ནས་མགོ་ལ་གཞག །མེ་ཏོག་དབུལ་བའི་ཚུལ་དུ་ནི། །གང་གིས་མེ་ཏོག་ཐལ་མོ་སྦྱར། །བདུག་སྤོས་རྩེ་མོ་སྦྱར་བ་ཡིས། །གུང་མོ་གཉིས་ནི་བཟློག་སྟེ་བསྒྲེང་། །བསྐོར་
ཅིང་བསྒྱུར་བ་བྱས་པ་ཡིས། །མཐེབ་གཉིས་མར་མེའི་ཚུལ་དུ་གཞག །དུང་གི་ཚུལ་དུ་ལག་བསྒྱུར་ནས། །དུང་ཕོར་ལྟ་བུའི་མཆོད་ཡོན་དབུལ། །དེ་ནས་ལྷ་རྣམས་ཀུན་ལ་ཡང་། །ལག་པའི་གར་གྱིས་བྱུག་
ཚུལ་བྱ། །དེ་ནས་སིལ་སྙན་ཚུལ་གྱིས་སུ། །ལག་གཉིས་སིལ་སྙན་ལེགས་པར་བརྡུང་། །དུང་དང་གླིང་བུ་བུད་པ་དང་། །ལག་པ་གཉིས་ནི་རྔ་ཡབ་གཡོབ། །བསིལ་ཡབ་ཚུལ་གྱིས་བསིལ་ཡབ་དང་། །སོར་མོ་

90-1-88b

གཉིས་ཀྱིས་རྒྱལ་མཚན་བྱ། །ཚོན་བགྱེ་ཚེ་ན་ལྕུག་ཕྲན་ལྟར། །བསྐྱོད་ཅིང་ཚོན་གྱི་ཕྲེང་བ་བགྱེ། །ལག་གཡོན་སྣོད་ཀྱི་ཚུལ་བྱས་ལ། །གཡས་པ་ཡིས་ནི་ལྷ་བཤོས་དབུལ། །ཁང་པ་བརྩེགས་པ་བཞག་ནས་སུ། །
གོས་ཀྱི་ཚུལ་གྱིས་གོས་རྣམས་དང་། །གདུབ་བུ་སྐེ་རགས་རྐང་རྒྱན་དང་། །རྣ་ཆ་དོ་ཤལ་གནས་ལྔར་གཞག །དེ་ནས་གདུགས་ཀྱི་ཚུལ་གྱིས་སུ། །ལྷ་རྫས་གདུགས་ནི་ལེགས་པར་གཟུང་། །བསམས་གཏན་
ཚུལ་གྱིས་ལག་པ་དག །ནམ་མཁའ་ལ་ནི་མཛེས་བསྐོར་ན། །སངས་རྒྱས་ཞིང་རབ་འགེངས་བྱེད་པའི། །བླ་རེ་རྣམ་པ་སྣ་ཚོགས་འགྱུར། །གྲྭར་ནི་པད་མའི་ཕྲེང་བ་དང་། །དྲིལ་བུ་གཡེར་ཀའི་དྲ་བས་བརྒྱན། །
གསང་སྔགས་འདི་ནི་ཆོ་ག་བཞིན། །རྡོ་རྗེ་དྲིལ་བུ་བསིལ་བ་ཡིས། །སྒོ་འཕར་དག་ཀྱང་དབྱེ་བར་བྱ། །ཨོཾ་བཛྲ་གཎ་ཌེ་རད་ཎ། པྲ་ར་ཎ། སམ་པཱ་ར་ཎི་སརྦ་བུད་དྷ་ཀྵེ་ཏྲ། པྲ་ཙ་ལི་ཏེ། པྲཛྙ་པཱ་ར་མི་ཏཱ། ནཱ་ད་སྭ་བྷ་བེ་བཛྲ་
དྷམྨ་ཧྲཱི་ད་ཡ། ཨ་པ་ཤོ་དྷ་ནི་ཧཱུྃ་ཧཱུྃ་ཧཱུྃ། ལག་གཡས་རྡོ་རྗེ་གསོར་བྱ་ཞིང་། །སྣ་ཚོགས་ཁུགས་སུ་འགྱུར་བ་ཡི། །རྡོ་རྗེ་གླུ་ཡིས་བསྟོད་པར་བྱ། །རྡོ་རྗེ་ཐེག་པས་མཉེས་བྱེད་པ། །འདི་ནི་དོན་དམ་མཆོད་པ་ཡིན། །གང་གིས་རྣམ་རྟོག་
རྣམ་སྤངས་ཏེ། །བྱང་ཆུབ་སེམས་ནི་རྣམ་བསྒོམས་པས། །ལུས་ངག་སེམས་ནི་རྣམ་དག་པ། །དེ་ཡི་མཆོད་པ་བླ་ན་མེད། །སེམས་ཅན་གང་གིས་དབུ་མ་ཡི། །ཐེག་པ་གོང་མ་མ་བསྒོམས་ཤིང་། །ཐེག་པ་དམན་པ་ལྷག་མོས་པ། །
དེ་ཡི་མཆོད་པ་ཀུན་རྫོགས་པ། །སངས་རྒྱས་དབང་ཆེན་གྲགས་ཀུན་གྱིས། །མཆོད་པ་དེ་དག་གསན་པ་དང་། །ངོ་མཚར་བྱུང་བའི་སྤྱན་ཕྱེ་ནས། །ལེགས་སོ་ཞེས་ནི་རབ་ཏུ་གསུངས། །ཨེ་མའོ་སངས་རྒྱས་ཐམས་
ཅད་ཀྱིས། །བྱང་ཆུབ་སངས་རྒྱས་ཐབས་སུ་སྟེ། །རྡོ་རྗེ་བསྒོམ་པ་བྱས་པ་ཡིན། །ཉོན་མོངས་མེད་པར་བྱང་ཆུབ་འཐོབ། །རྡོ་རྗེ་ཐེག་ཆེན་ལེགས་པ་སྟེ། །སངས་རྒྱས་རྣམས་ཀྱིས་བསྟན་པ་ལེགས། །ཟབ་ཅིང་

90-1-89a

རྒྱ་ཆེ་ལེགས་པ་སྟེ། །རྡོ་རྗེ་རིན་ཆེན་ཀུན་འདུས་ལེགས། །དེ་ནས་ཡེ་ཤེས་ཀྱི་སྐུ་གསུམ་ལས་བྱུང་བའི་བྱང་ཆུབ་སེམས་དཔའ་དེ་དག་གིས་སངས་རྒྱས་ཐམས་ཅད་ཀྱི་རྡོ་རྗེ་ཐེག་པ་སྔགས་པ་ཐོས་ནས། 
དགའ་བས་སྤུ་ཟིང་ཞེས་བྱེད་པར་གྱུར་ནས། གཙོ་བོ་རྡོ་རྗེ་སྣང་མཛད་ལ། །དགའ་བའི་ཡིད་ཀྱིས་སྟོད་པར་བྱེད། །ཐོག་མ་མེད་ཅིང་སྐྱེ་བ་མེད། །འགྱུར་བ་མེད་ཅིང་གནས་པ་མེད། །མཁའ་བཞིན་རྣམ་རྟོག་ལས་
གྲོལ་བ། །རྟོག་པ་རྣམས་ཀྱིས་རྣམ་པར་བརྟག །ཐབས་སུ་བརྟགས་པ་གང་ཡིན་དེས། །ཡེ་ཤེས་ཀྱི་ནི་སྲས་པོ་ཀུན། །རྡོ་རྗེ་ཐེག་པ་བསྒོམས་པ་ཡིས། །སངས་རྒྱས་ས་ཡང་ཐོབ་པར་འགྱུར། །ཞེས་
སྨྲས་སོ། །བདེ་བ་ལས་འཁྲུངས་རྡོ་རྗེ་འཆང་བ་ཡིས། །དངོས་པོ་དངོས་མེད་འབྱུང་གནས་ཆེན་པོར་མཁྱེན། །དང་པོ་གང་དུ་རྣམ་པར་སྣང་མཛད་ནི། །དག་ཅིང་དྲི་མེད་བློས་ནི་ཨོཾ་དུ་སྤྲུལ། །གཟུགས་མང་
ཚུལ་གྱིས་ཕྲེང་བས་བསྐོར་བ་ཡི། །སྒྱུ་འཕྲུལ་དྲ་བ་ཁྱོད་ལ་ཕྱག་འཚལ་ལོ། །གསུང་སྙན་ཡི་གེ་ཀུན་ལ་ཁྱབ་པ་ཡི། །སྤྲོས་མེད་གསུང་དུ་འཇིག་རྟེན་དབང་ཕྱུག་བཞུགས། །མིག་གསུམ་ལྷ་མོ་དང་བཅས་འདུལ་མཛད་
པ། །སྒྱུ་འཕྲུལ་ཚུལ་མང་ལྡན་པ་འགའ་མ་མཆིས། །གང་དུ་བདེ་ཆེན་རང་བཞིན་རྗེས་ཆགས་པ། །ན་ཆུང་དག་དང་ལྷན་ཅིག་བཞད་མཛད་ཅིང་། །གཡས་པའི་ཕྱག་གིས་རྡོ་རྗེ་གསོར་ནས་སུ། །གཡོན་པའི་ཕྱག་གིས་དྲིལ་བུ་
སྒྲ་སྙན་འཁྲོལ། །ལྷ་མོ་མཐའ་དག་བཙུན་མོར་གྱུར་པ་ཡི། །དམ་ཚིག་རྣམས་ཀྱིས་བྱ་བ་བྱས་པར་འགྱུར། །གཅིག་གི་ལག་པས་ཀུན་ནས་འཁྱུད་པ་སྟེ། །གཉིས་པ་རྗེས་སུ་ཆགས་ཕྱིར་བདེ་བའི་མཐུ། །གསུམ་པ་
མི་བཟོད་མེ་ཏོག་ཕྲེང་བ་འཐོར། །བཞི་པ་བདེ་བ་ཡིས་ནི་མདའ་ཡང་འཕེན། །གང་ཞིག་གླུ་འདི་ལེན་པར་བྱེད་པ་དག །བདེ་བའི་རྡོ་རྗེ་ཅན་དང་མཉམ་པར་འགྱུར། །འདི་ནི་སངས་རྒྱས་ཐམས་ཅད་མཉེས་པར་བྱེད་

90-1-89b

པའི་རྡོ་རྗེའི་གླུ་ཡིན་ནོ། །ཨོཾ་ཨ་ནུཏྟ་དྷ་ར་སརྦྦ་པཱུ་ཛཱ་མེ་གྷ་ཨུད་ག་ཏེ། སྥ་ར་ཎ་ཧི་མྃ་ག་ག་ན་ཧཱུྃ་ཕཊ་སྭཱ་ཧཱ། སྔགས་འདི་ལན་གསུམ་བརྗོད་པས་མཆོད་པའི་སྤྲིན་རབ་འབྱམ་ཐམས་ཅད་ཀྱི་བྱིན་གྱིས་བརླབ་པར་འགྱུར་རོ། །
རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་འདི་ནི་ཕྱག་རྒྱའི་མཆོད་པ་རིམ་པར་ཕྱེ་བའི་ལེའུ་སྟེ་དྲུག་པའོ།། །། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་སྐུ་དང་གསུང་དང་ཐུགས་རྡོ་རྗེའི་དེ་བཞིན་
གཤེགས་པ་ལ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱིས་ཚིག་མཐུན་པར་སྒྲ་དབྱངས་གཅིག་གིས་གསོལ་བ་བཏབ་པ། བཅོམ་ལྡན་དེ་བཞིན་གཤེགས་ཀུན་གྱི། །ཡེ་ཤེས་
གཅེས་པ་དྲི་མེད་པ། །བྱང་ཆུབ་སེམས་ནི་རིན་པོ་ཆེ། །བླ་ན་མེད་པ་བཤད་དུ་གསོལ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པ་ཐུགས་སུ་ཆུད་ནས་བྱང་ཆུབ་སེམས་དཔའ་ཐམས་
ཅད་ལ་འདི་སྐད་ཅེས་བཀའ་སྩལ་ཏོ། །སེམས་ནི་ལུས་ཀྱི་རྣམ་པ་ཡིན། །ལུས་ཀྱང་སེམས་ཀྱི་རྣམ་པར་ཡིན། །སེམས་ཀྱང་ཚིག་གིས་བརྗོད་པ་ཡིན། །དེ་ནས་བྱང་ཆུབ་སེམས་དཔའ་དེ་དག་གིས་དེ་བཞིན་གཤེགས་པ་ཐམས་
ཅད་ཀྱི་སྐུ་དང་གསུང་དང་ཐུགས་ཀྱི་རྣམ་པར་སྦྱོར་བ་ཐོས་ནས་ཆེད་དུ་བརྗོད་པ་འདི་བརྗོད་དོ། །ཨེ་མ་ཀུན་དུ་བཟང་པོ་ནི། །སྐུ་གསུང་ཐུགས་ཀྱི་རྡོ་རྗེ་ཅན། །ཆོས་རྣམས་སྐྱེ་བ་མེད་པ་སྟེ། །གཡོ་བ་མེད་ཅིང་
གནས་པ་མེད། །རྟོག་པའི་དྲི་མ་སྤང་པ་འདི། །བསྐྱེད་པར་བྱ་ཞེས་རབ་ཏུ་གསུངས། །དེ་ནས་བཅོམ་ལྡན་འདས་དེ་བཞིན་གཤེགས་པ་མི་འཁྲུགས་པས་གསུང་སྤྲོས་པ་མེད་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་འདི་དག་མ་སྐྱེས་ཏེ། །ཆོས་ཅན་མེད་ཅིང་ཆོས་ཉིད་མེད། །ནམ་མཁའ་བཞིན་དུ་དམིགས་མེད་པའི། །བྱང་ཆུབ་སེམས་འདི་བརྟན་པ་ཡིན། །

90-1-90a

ཞེས་བཅོམ་ལྡན་འདས་རྡོ་རྗེའི་དེ་བཞིན་གཤེགས་པ་མི་འཁྲུགས་པས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་རིན་ཆེན་འབྱུང་གནས་ཀྱིས་དེ་བཞིན་གཤེགས་པ་ཐམས་ཅད་
དམིགས་སུ་མེད་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་འདི་དག་དངོས་མེད་དེ། །ཆོས་ཀྱི་མཚན་ཉིད་སྤངས་པ་ཡིན། །བདག་མེད་ཆོས་
ལས་ལེགས་བྱུང་བའི། །བྱང་ཆུབ་སེམས་འདི་བརྟན་པ་ཡིན། །ཞེས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཏོག་གིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་འོད་དཔག་མེད་ཀྱིས་
རྡོ་རྗེ་མེ་ལྕེ་འབར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །དངོས་པོ་སྐྱེ་བ་མེད་པ་སྟེ། །དངོས་པོ་ངོ་བོ་ཡོད་མིན་པས། །ནམ་མཁའི་གོ་འཕང་ཐོབ་པོ་
ཞེས། །དངོས་རྣམས་རབ་ཏུ་བརྗོད་པ་ཡིན། །ཞེས་བཅོམ་ལྡན་འདས་འོད་དཔག་མེད་ཀྱིས་གསུངས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དོན་ཡོད་གྲུབ་ཀྱིས་དེ་བཞིན་གཤེགས་པ་ཐམས་ཅད་ཀྱི་བླ་མའི་
ཡང་བླ་མ་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བྱང་ཆུབ་ཀྱི་སེམས་འདི་གསུངས་སོ། །ཆོས་རྣམས་རང་བཞིན་འོད་གསལ་བ། །གཟོད་ནས་དག་ཅིང་རྙོགས་པ་མེད། །སེམས་ཅན་མེད་ཅིང་
སྲོག་མེད་ཀྱང་མེད། །སངས་རྒྱས་ཉིད་དང་བྱང་ཆུབ་མེད། །རྨི་ལམ་སྒྱུ་མ་ལྟར་སྣང་བའི། །བྱང་ཆུབ་སེམས་འདི་བརྟན་པ་ཡིན། །ཞེས་བཅོམ་ལྡན་འདས་དེ་བཞིན་གཤེགས་པ་དོན་ཡོད་གྲུབ་ཀྱིས་གསུངས་སོ། །དེ་ནས་
ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་རྡོ་རྗེའི་དེ་བཞིན་གཤེགས་པའི་བྱང་ཆུབ་ཀྱི་སེམས་རྣམ་པར་དག་པར་མཐོང་ནས་

90-1-90b

ངོ་མཚར་སྐྱེས་པར་གྱུར་ཏེ་ཆེད་དུ་བརྗོད་པ་འདི་བརྗོད་དོ། །ཀྱེ་མའོ་སངས་རྒྱས་ཀྱེ་མའོ། །དག་ཀྱེ་མའོ་ཆོས་ནི་བསྟན་པ་རྣམས། །བདག་མེད་ཆོས་ལས་ལས་བྱུང་བ། །བྱང་ཆུབ་སེམས་ལ་ཕྱག་འཚལ་ལོ། །བྱང་ཆུབ་
སེམས་ནི་བསྒོམ་པ་ཡིན། །མི་གཡོ་ཡི་གེ་ལས་བྱུང་བ། །རྨི་ལམ་སོགས་ལྟར་མ་སྐྱེས་པ། །བྱང་ཆུབ་སེམས་ལ་ཕྱག་འཚལ་ལོ། །གནས་དང་སྟན་ནི་རྣམ་བསམས་ཏེ། །སེམས་དཔའི་དཀྱིལ་མོ་དཀྲུང་
བཅས་ནས། །དང་པོར་རང་བཞིན་དག་པ་ཞེས། །དག་པའི་ཆོས་ཀྱི་ཚུལ་ལ་གནས། །ཡིད་ཀྱིས་ཧཱུྃ་བྱས་རྡོ་རྗེ་ཅན། །རྡོ་རྗེ་སེམས་མས་བྱིན་གྱིས་བརླབས། །རིན་ཆེན་ལུས་སུ་ང་རྒྱལ་བྱ། །ལག་པ་བསྟོད་དེ་བསྐོར་བ་ཡི། །
ལྕགས་ཀྱུ་ཡིས་ནི་སྤྱན་ཡང་དྲང་། །བྱོན་ནས་དང་པོར་ཕྱོགས་བཅིངས་ཏེ། །དམ་ཚིག་དག་ཀྱང་དབུལ་བར་བྱ། །གདན་རྣམས་སོ་སོར་ཕུལ་ནས་སུ། །མཆོད་ཡོན་དབུལ་བའི་སྦྱོར་བ་བྱ། །དབང་བསྐུར་མཚོན་ཆ་གོ་ཆ་
སོགས། །སིལ་སྙན་མཆོད་སོགས་ངོ་བོ་བྱ། །རྣམ་པ་ཀུན་གྱིས་མཉེས་པར་བྱ། །རྣལ་འབྱོར་བདག་ཉིད་ཅན་གྱིས་བརྟག །རྣལ་འབྱོར་རྣམ་གསུམ་ཤེས་བྱ་སྟེ། །བྱིན་གྱིས་བརླབས་དང་ཡོངས་བརྟགས་དང་། །གཟུགས་
གཉིས་རྫོགས་པར་གྱུར་པ་ནི། །རྣལ་འབྱོར་ཡིན་ཞེས་སངས་རྒྱས་གསུང་། །སྔགས་ཀྱིས་བྱིན་བརླབས་ང་རྒྱལ་བསྐྱེད། །རྣལ་འབྱོར་བྱིན་བརླབས་ཡིན་པར་གསུངས། །བྱང་ཆུབ་སེམས་ནི་དག་པ་དང་། །གསང་སྔགས་ས་བོན་བསྐྱེད་
པ་ཆེ། །ཕྱག་རྒྱའི་ཚོགས་སུ་བརྟགས་པ་ཡིན། །རིམ་གྱིས་གཟུགས་ནི་རྫོགས་བྱས་པ། །དེ་ནས་བརྟག་པར་བརྗོད་པ་སྟེ། །རྣལ་འབྱོར་ཆོ་ག་ཡིན་པར་གསུངས། །བསྡུ་དང་སྤྲོ་བར་བྱས་པ་ལས། །རྣམ་པའི་མཆོག་ཀུན་ལྡན་པ་
དག །སྐད་ཅིག་ཡེ་ཤེས་ཀྱིས་རྫོགས་པ། །རྫོགས་པའི་རྣལ་འབྱོར་ཞེས་བརྗོད་དོ། །དང་པོར་དམ་ཚིག་བྱིན་བརླབས་པར། །རྣལ་འབྱོར་སྤྱོད་པ་བདག་གིས་བརྟགས། །རབ་ཏུ་རྫོགས་པར་བྱ་བ་དག །འདི་ནི་རྣལ་འབྱོར་

90-1-91a

ཆོ་གར་བཤད། །ཉོན་མོངས་དྲི་མར་བྱས་པའི་སེམས། །བྱང་ཆུབ་སེམས་ཀྱིས་དག་བྱས་ཏེ། །དེ་ནི་རང་བཞིན་དག་པའོ་ཞེས། །བརྗོད་ཅིང་ཐལ་མོ་གསུམ་གྱིས་སྦྱང་། །དག་འགྱུར་དེ་ནས་བློ་ཡིས་ནི། །སེམས་ལ་སོ་
སོར་བརྟག་པར་བྱ། །སེམས་ལ་སོ་སོར་བརྟགས་ནས་ཀྱང་། །ཕྱི་རོལ་རང་བཞིན་སྟོང་པར་བྱ། །སེམས་ཙམ་ལ་ནི་གནས་ནས་སུ། །བྱང་ཆུབ་ཚོགས་ཀྱི་བག་ཆགས་ཏེ། །བསྒོམ་པར་བྱ་བའི་ངོ་བོ་དག །ཟླ་བའི་གཟུགས་སུ་རྣམ་
པར་བརྟག །ལག་པའི་པད་མ་ལ་གནས་པའི། །ༀ་གྱི་མྱུ་གུས་བསྐྲུན་པ་ཡི། །ཡན་ལག་ཀུན་གྱི་མཚན་ཉིད་གཟུགས། །རྡོ་རྗེ་སྐུར་ནི་བསྒོམ་པར་བྱ། །ཨཱཿཞེས་བྱ་བ་སྤྲོས་མེད་གསུང་། །སེམས་ནི་ཧཱུཾྃཞེས་བྱ་བར་སྤྲུལ། །ཡི་གེ་
གསུམ་གྱིས་བྱིན་བརླབས་ལུས། །སྙིང་ལ་གནས་པའི་ཟླ་བའི་གཟུགས། །དེ་ལ་རང་གི་ཡི་གེ་ནི། །མདོག་གཟུགས་འོད་ནི་ཕྱེད་བསམས་ཏེ། །ང་རྒྱལ་བསྐྱེད་ནས་དེ་ལ་ནི། །རྡོ་རྗེའི་བདག་ཉིད་བདག་ཡིན་བརྗོད། །རྒྱན་ཀུན་ཡོངས་
སུ་རྫོགས་པ་དང་། །འོད་ཀྱི་དཀྱིལ་འཁོར་གྱིས་བརྒྱན་པ། །ཆ་ཤས་ཀྱི་ནི་དྲ་བ་ཅན། །ཡེ་ཤེས་སེམས་དཔའ་རྫོགས་པར་བརྟག །དེ་འོག་ལག་པའི་ཕྱག་རྒྱ་ཡིས། །གོ་ཆ་མཚོན་ཆ་ལ་སོགས་བྱ། །རྫོགས་སངས་རྒྱས་
ལྔར་དབང་བསྐུར་ཏེ། །ཅོད་པན་ཕྲེང་བ་རྣམས་ཀྱིས་ཀླུབས། །དེ་ནས་དེ་འོག་སངས་རྒྱས་ཀྱི། །སྤྲུལ་པ་མཛད་པའི་སྒྱུ་མ་སྤྲོ། །ཡན་ལག་བཞི་པའི་དབུས་ལྡན་པའི། །ཕྱོགས་བཅུར་ཁྲོ་བོ་བཅུ་དག་དང་། །བསྙེམས་
མ་དང་ནི་རྟོགས་ལྡན་མ། །མཚོན་ཆ་མདའ་དང་རྩེ་མོ་ཅན། །སྒྱུ་མའི་ཆ་བྱད་རྣམ་མང་པོ། །རྣམ་པར་འཕྲུལ་པར་བྱིན་གྱིས་བརླབ། །ཀུན་ལ་ཁྱབ་པར་བྱེད་པ་ཡི། །སྣ་ཚོགས་དབུས་སུ་བཞག་ནས་ནི། །དེ་ཉིད་ཆེན་པོ་བདག་
ཉིད་ལྔས། །ཕྱོགས་བཞིའི་འཁོར་ལོ་ཁྱབ་བྱས་ཏེ། །དགའ་བས་དགའ་བྱེད་བཞི་ཡང་སྤྲོ། །ཏིང་འཛིན་ཀུན་གྱིས་དགའ་བ་ལ། །ལོངས་པར་སྤྱོད་པའི་སྔགས་པ་ཡིས། །འཁོར་ལོ་ལ་ནི་རྡོ་རྗེའི་གཟུགས། །

90-1-91b

པད་མའི་གཟུགས་ལ་དེ་དག་ནི། །འཁོར་ལོ་ཀུན་ལས་པད་མ་ཡི། །ངོ་བོ་ཡིས་ནི་རོལ་པ་དང་། །ཨེ་ཞེས་བྱ་བ་འཕྲོས་པ་ལས། །མདོག་ལྡན་བདག་གཉིད་གཟུགས་སུ་བྱ། །མཛེས་པའི་རྒྱན་ཉིད་ཀུན་ལྡན་
པ། །ཉིད་ཀྱི་སྟན་ལ་བཞུགས་པར་བལྟ། །སྒེག་མོ་གླུ་དང་གར་རྣམས་དང་། །རྒྱལ་མཚན་ལ་སོགས་ཚོན་དགྱེ་དང་། །སིལ་སྙན་མཆོད་པའི་རྣམ་པ་ནི། །སྣ་ཚོགས་རྣམས་ཀྱིས་མཆོད་པར་བྱ། །རྣམ་པ་
ཀུན་དང་ལྡན་པར་ནི། །བདག་ཉིད་ཀྱི་ནི་ལུས་བསྒོམས་ནས། །མྱུར་ཆེས་པ་དང་བུལ་བ་དང་། །མི་གསལ་གུག་བསྐྱེད་ཉམས་པ་དང་། །རྟོག་པ་ངན་པ་རྣམ་སྤངས་ནས། །དེ་ནས་གསང་སྔགས་བཟླས་
བརྗོད་བྱ། །བཟླས་པ་སྐྱོ་ན་ལག་གཡས་ཀྱིས། །བསྒྲིམས་ཏེ་རྡོ་རྗེ་གསོར་ནས་ཀྱང་། །གཡོན་པས་རྡོ་རྗེ་དྲིལ་བསིལ་ཞིང་། །རྡོ་རྗེ་གླུ་ཚུལ་སྣ་ཚོགས་དང་། །བ་དན་ཚུལ་དུ་བྱ་བས་མཆོད། །བཟླས་པའི་མཇུག་ནི་བརྟུལ་ནས་ཀྱང་། །གཤེགས་
སུ་གསོལ་ཏེ་བདག་ཉིད་བསྲུང་། །ལུས་དང་ངག་དང་སེམས་བསྒོམས་ཏེ། །བརྟན་པོར་ཅི་བདེར་འགྲོ་བར་བྱ། །བར་ཆད་དུ་ནི་གྱུར་ན་ཡང་། །ཡི་གེ་བརྒྱ་པས་བྱིན་གྱིས་བརླབ། །དེ་ལྟར་སྒོམ་པས་སྒོམ་བྱེད་པ། །རྡོ་རྗེ་ཐེག་པས་རབ་རྫོགས་
པའི། །བྱང་ཆུབ་དེས་ནི་མྱུར་ཐོབ་ནས། །ཟླ་ཉིའི་དཀྱིལ་འཁོར་ལྟ་བུར་སྣང་། །སྣ་ཚོགས་ལས་ཀྱིས་ཐོག་འདྲེན་ཅིང་། །རིན་ཆེན་རྒྱལ་མཚན་རབ་དགའ་བྱེད། །ཆགས་ཆེན་པད་མའི་གདུང་རྒྱུད་ཅན། །གནས་ཆེན་འཇིག་རྟེན་དབང་ཕྱུག་
འགྱུར། །དཔལ་ལྡན་རིག་སྔགས་ཀུན་གྱི་གཙོ། །དགའ་ཆེན་རྡོ་རྗེ་ལྕགས་ཀྱུར་འགྱུར། །སྒྱུ་མ་བཤིག་པ་ཀུན་ཤེས་ཤིང་། །དྲེགས་པ་འཇོམས་བྱེད་ཁྲོ་བོར་འགྱུར། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་འདི་ནི་བྱང་ཆུབ་
ཀྱི་སེམས་སྒོམ་པའི་ཡེ་ཤེས་སྒྲུབ་པ་རིམ་པར་ཕྱེ་བའི་ལེའུ་སྟེ་བདུན་པའོ།། །། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་གཤེགས་པས་དེ་བཞིན་གཤེགས་པ་ཐམས་ཅད་ཀྱི་

90-1-92a

བཀའི་འཁོར་ལོ་རབ་ཏུ་སྒྲུབ་པའི་ཡེ་ཤེས་ཀྱི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཕྱི་ནང་གི་འཁོར་ལོ་ཐམས་ཅད་རབ་ཏུ་སྒྲུབ་པའི་ཡེ་ཤེས་ཀྱི་ལས་ཀྱི་སྦྱོར་བ་རབ་འབྱམས་འདི་
བཀའ་སྩལ་ཏོ། །ལྷ་ནི་གང་ཡང་རུང་བ་ཞིག །འཁོར་ལོའི་དབུས་སུ་བཞག་ན་ནི། །དེ་ཡི་མིང་སྨོས་རྡོ་རྗེ་ཡི། །དཀྱིལ་འཁོར་ཡིན་ཞེས་སངས་རྒྱས་གསུང་། །ཞི་དང་རྒྱས་དང་དྲག་ཤུལ་དང་། །རང་གི་ལས་
ལ་སྦྱོར་བ་ན། །འཁོར་ལོའི་རྒྱལ་པོ་རྣམ་བསྒོམས་ནས། །བདག་པོ་ཉིད་ཀྱིས་རབ་ཏུ་བྱ། །ཞི་བ་སྤྱན་དང་སྐུལ་བྱེད་མས། །རྒྱས་ལ་རིན་ཆེན་གོས་དཀར་མོ། །དབང་ལ་སྒྲོལ་མ་ལུ་གུ་རྒྱུད། །ཡམས་དང་གནོད་
པ་གཞིག་པའི་ཕྱིར། །འོད་ཟེར་ཅན་དང་རི་ཁྲོད་མས། །དྲག་ཤུལ་སྤྱད་ལ་མཱ་མ་ཀཱི། །ཁྲོ་གཉེར་ཅན་མ་དག་གིས་བྱ། །འདི་དག་ཤེས་རབ་རོལ་པ་སྟེ། །ཆགས་པའི་རྡོ་རྗེས་རྗེས་ཆགས་པ། །གསང་སྔགས་
དེ་ཉིད་ཀྱིས་བསྐུལ་ན། །གདོན་མི་ཟ་བར་ཕྲིན་ལས་མཛད། །སྤྱན་དང་ལྷ་མོ་སྐུལ་བྱེད་མ། །དབང་པོ་ཞི་བ་ཟླ་འདྲ་བ། །ཕྱག་གཉིས་ན་ནི་བགྲང་ཕྲེང་དང་། །རིལ་བ་སྤྱི་བླུགས་ཀྱིས་བརྒྱན་པ། །དང་པོར་ཏིང་འཛིན་
གྱིས་སྤྲུལ་ནས། །བུམ་པ་ཟླ་བའི་མདངས་ལྡན་པ། །བདུད་རྩིའི་འོ་མས་རབ་བཀང་སྟེ། །ལག་གཉིས་པད་མའི་གདུབ་མཆོག་གིས། །རྣམ་པར་སྣང་མཛད་ཞབས་དྲུང་དུ། །ནད་པ་ལ་ནི་བདུགས་པར་བསམས། །རིན་ཆེན་མ་
དང་གོས་དཀར་ཅན། །སྐུ་ཆེ་ཁ་དོག་སེར་པོ་སྟེ། །ལྷ་མོ་སེར་མོ་སྣང་བ་ལ། །ཕྱག་ན་རིན་ཆེན་པད་མ་ཅན། །དང་པོར་ཏིང་འཛིན་གྱིས་སྤྲུལ་ནས། །ཡིད་འོང་རྒྱལ་བའི་འདོད་པ་ཡིས། །རིན་ཆེན་འབྱུང་བའི་ཞབས་དྲུང་དུ། །
བདུད་རྩིའི་རབ་ཏུ་དགང་བ་དང་། །བླ་མེད་རིན་ཆེན་ཁར་བབ་ན། །རྒྱས་པ་མཚུངས་མེད་མཛེས་པར་འགྱུར། །ལྷ་མོ་སྐུ་ཆེན་མདོག་དམར་བ། །སྒྲོལ་མ་དེ་བཞིན་ལུ་གུ་རྒྱུད། །ཀུན་ནས་འོད་དམར་འབར་བ་ཅན། །

90-1-92b

ལྷ་རྫས་ལྕགས་ཀྱུ་ཞགས་ཐོགས་པ། །རབ་ཏུ་བཞད་ཅིང་སྤྱན་ཕྱེ་བས། །འོད་དཔག་མེད་པའི་ཞབས་དྲུང་དུ། །བསྒྲུབས་བྱ་རྒྱགས་པས་མྱོས་པ་དག །བཀུག་སྟེང་མདའ་ཡིས་བསྣུན་ན་ནི། །སྐད་ཅིག་ཉིད་ལ་དབང་དུ་མཛད། །མི་
ངས་གནོད་པ་གཞིག་པའི་ཕྱིར། །སྐུ་ཆེན་ནམ་མཁའི་ཁ་དོག་ཅན། །འོད་ཟེར་ཅན་དང་རི་ཁྲོད་མས། །རྡོ་རྗེ་དོན་ཡོད་ཞབས་དྲུང་དུ། །མཁས་པས་སྔར་བཤད་ཚུལ་དུ་ནི། །བདུད་རྩི་ཡིས་ཀྱང་རྣམ་པར་བཟློག །ལྷ་མོ་ཁྲོ་
གཉེར་མཱ་མ་ཀཱི། །མརྒད་ལྟ་བུའི་མདོག་ཅན་མ། །ཧཱུྃ་ཞེས་བྱ་བའི་སྒྲ་སྒྲོགས་པ། །རྡོ་རྗེས་བསྡིགས་པར་བརྩོན་པ་ཡིས། །རྡོ་རྗེ་མི་འཁྲུགས་ཞབས་དྲུང་དུ། །ཁྲོས་ནས་རྡོ་རྗེའི་མེ་ཡི་ཆར། །འབེབས་པར་རྣམ་པར་བསམ་པར་བྱ། །
རྡོ་རྗེ་རབ་ཏུ་འབར་བ་དེས། །བསྒྲུབ་བྱ་ཚིག་ནས་མོག་ཅེས་བྱེད། །སྦྱོར་བ་འདི་ཡི་མོད་ལ་ནི། །དེ་ནི་འཆི་བར་འགྱུར་བའམ། །ཡང་ན་ལུས་ནི་འཇིག་པར་མཛད། །བྱིན་བརླབས་དམ་ཚིག་དབང་བསྐུར་ལ། །རྡོ་རྗེ་སེམས་མ་རིན་ཆེན་དང་། །
ཆོས་དང་རྡོ་རྗེ་ལས་མ་བཞི། །སྦྱོར་བ་རྣམས་ནི་རབ་ཏུ་སྦྱར། །སེམས་དཔའ་ཆེན་པོ་བཅུ་དྲུག་ཀྱང་། །བླ་མེད་འཁོར་ལོ་བྱེད་པ་སྟེ། །རང་གི་ཕྱོགས་ནས་ལས་བྱས་ན། །འབྲས་བུ་དོན་ཡོད་སྦྱིན་པར་བྱེད། །ཁྲོ་བོའི་ལུས་ལ་ལེགས་གནས་ཏེ། །
ཁྲོ་བོའི་རྒྱལ་པོ་སྦྱར་བར་བྱ། །དམ་ཚིག་ལ་སོགས་ཆོ་ག་བཞིན། །དེར་ནི་རྡོ་རྗེ་བསྒོམས་ནས་བསྐུལ། །རྐང་པའི་རྗེས་ཀྱི་ས་བླངས་ལ། །དུར་ཁྲོད་ཐལ་བ་དག་དང་བསྲེ། །དེ་ཡི་རས་བླངས་མི་རུས་དང་། །ཆུ་འགྲམ་གཉིས་ཀྱི་ས་དག་
ནི། །བཏགས་ནས་ལུང་བོང་གཅིན་གྱིས་སྦྲུ། །དེ་ལས་དགྲ་བོའི་གཟུགས་བྱས་ལ། །དེ་ཚེ་གཟུགས་བརྙན་བཅིང་བར་བྱ། །དུག་དང་སྐེ་ཚེ་ལན་ཚྭ་དང་། །འབྲུ་མར་ཚ་བ་རབ་བསྲེས་ཏེ། །དགྲ་བོ་ཚ་བ་བསྐྱེད་པའི་ཕྱིར། །
དེ་ཡིས་ལུས་ནང་རབ་ཏུ་དགང་། །དེ་ནས་རྣམ་ཤེས་རླུང་འདྲ་བ། །ལྕགས་ཀྱུ་ཡིས་ནི་བཀུག་ནས་ཀྱང་། །སྲིན་བུ་མེ་ཁྱེར་འདྲ་བཅུག་སྟེ། །ཞགས་པ་ཡིས་ནི་དམ་དུ་གཟུང་། །དེ་ནི་རྡོ་རྗེ་སྒྲོག་ཏུ་གཞུག །

90-1-93a

བསྒྲིམས་ནས་དེ་ཡི་མིང་སྨོས་ཏེ། །དགྲ་བོའི་ལུས་ནི་མ་ལུས་པར། །པོ་སོན་ཆ་ཡི་ཚེར་མས་དབུག །མི་རུས་ལས་བྱས་ཕུར་བུའམ། །ཡང་ན་སེང་ལྡེང་ལས་བྱུང་བས། །དཔྲལ་བ་སྙིང་མགྲིན་དཔུང་
མགོ་གཉིས། །གནས་ལྔ་དག་ཏུ་བསྒྲིམས་ཏེ་གདབ། །ནིམ་པའི་ཤིང་ལ་སྦར་བ་ཡིས། །མེ་འབར་བ་ལ་བཀལ་བར་བྱ། །མཁས་པས་རྐང་པ་ནས་བརྩམས་ཏེ། །མཚོན་ཆ་རྣོན་པོས་གཏུབས་ནས་ནི། །འབར་
བའི་ལུས་ཅན་ཁྲོས་པ་ཡིས། །དེ་ཡི་དུམ་བུ་སྦྱིན་བསྲེག་བྱ། །ལས་འདི་ལ་ནི་ལྷག་པར་ཡང་། །རུས་སྦལ་གྱི་ནི་རྐང་སྟབས་སྦྱར། །ཉི་མའི་གུང་ངམ་ནམ་ཕྱེད་ན། །ལས་འདི་ཉིད་ནི་བསྒྲུབ་པར་བྱ། །ལས་འདི་བྱས་ནས་ངེས་པར་
ནི། །གང་ཞིག་རྒྱལ་བས་བསྲུངས་ནའང་དེས། །ངེས་པར་འཆི་ན་ཁྱབ་འཇུག་དང་། །ལྷ་ཆེན་ཚངས་པས་ཅི་ཞིག་སྨོས། །ཕྱི་རོལ་གྱི་དྲག་ཤུལ་སྤྱོད་པའི་གོ་ཆའོ། །གསོད་པའི་ཡེས་ཤེས་ལས་སྤྲུལ་པ། །ནང་གི་ཡང་ནི་
བཤད་པར་བྱ། །བསྒྲུབ་བྱ་ཡིད་ཀྱིས་བསྲུངས་ནས་སུ། །ཆོ་ག་བཞིན་དུ་དགུག་པར་བྱ། །ལག་ན་རལ་གྲི་མཚོན་ཆ་དང་། །བེ་ཅོན་རྡོ་རྗེ་གཏུན་ཤིང་ཞགས། །ལག་ན་འཁོར་ལོ་མདའ་གཞུ་ཅན། །ཁྲོ་བོ་སྣ་ཚོགས་བསྣམས་
པ་དེས། །བསྒྲུབ་བྱ་ཞགས་པས་བཅིངས་ནས་སུ། །རྡོ་རྗེ་ཡི་ནི་ཁྲོ་བོ་ཡིས། །ལྷོ་ཡི་ཕྱོགས་སུ་ཁྲིད་པ་དང་། །རྡོ་རྗེ་གཞན་གྱིས་བརྡེག་པ་དང་། །དེ་ནི་རལ་གྲིས་གཏུབ་པ་དང་། །རྒྱུ་མ་ལང་ལོང་ནར་བར་བསམ། །ཨོཾ་ཧཱུྃ་
བཛྲ་རཀྵ་སཱི། བྷཀྵ་ཡ་ཐ་ཕཊ། རྡོ་རྗེ་སྲིན་མོ་བསྒོམས་ནས་ཀྱང་། །བྱ་རོག་ཝ་དང་བྱ་རྒོད་ཀྱིས། །ཀུན་ནས་ཡོངས་སུ་བསྐོར་ནས་སུ། །དེ་དག་ཟང་ཐོབ་བྱེད་པར་ནི། །བསྒོམས་ཞིང་མིང་ནས་བསྐུལ་བར་བྱ། །རླུང་
གི་དཀྱིལ་འཁོར་ལ་གནས་པའི། །རྡོ་རྗེ་རྔ་མོ་རྣམས་བསམས་ཏེ། །བསྒྲུབ་པར་བྱ་བར་ཡོངས་བརྟགས་པ། །དེ་ཡི་རྒྱབ་ཏུ་ཞོན་ནས་སུ། །རྡོ་རྗེ་ཁྲོ་བོས་གཟིར་བཞིན་དུ། །ལྷོ་ཕྱོགས་སུ་ནི་དཀྲི་བར་བྱ། །

90-1-93b

དེ་ཡི་རྐང་རྗེས་ས་ལ་ནི། །རླུང་གིས་གཙུབས་པའི་ཤིང་ལོ་ལ། །དེ་ཡི་མིང་ནས་བརྗོད་བྱས་ཏེ། །རྡོ་རྗེ་སྣ་ཡོན་དྲུང་དུ་སྦ། །དེ་ལྟ་བུར་ནི་སྦྱོར་བ་ལས། །བསྒོམ་ཞིང་ཆོ་ག་བཞིན་བྱས་ན། །བརྒྱ་བྱིན་ཉིད་ཀྱང་བསྐྲད་འགྱུར་ན། །
ས་སྟེང་སྐྱེ་བོ་སྨོས་ཅི་དགོས། །དེ་མིང་གསང་སྔགས་དང་སྤེལ་ཏེ། །འུག་པའི་སྒྲོ་ལ་བྲིས་ནས་ནི། །དགེ་སྦྱོང་བྲམ་ཟེའི་སྐྲས་དཀྲིས་ཏེ། །ས་ཡི་འོག་ཏུ་བསྐོས་ནས་གཞུག །རྡོ་རྗེ་ཁྲོ་བོ་གཉིས་ཀྱིས་ནི། །འཐབ་མོ་
འགྱེད་དུ་གཞུག་པར་བྱ། །དེ་ལྟར་བསམས་པའི་སྦྱོར་བ་ཡིས། །འདོད་པ་བཞིན་དུ་དབྱེ་བར་འགྱུར། །ཧཱུྃ་ཞེས་བྱ་བས་གང་བ་ཡི། །རྡོ་རྗེ་ཕྲ་མོ་བསྒོམ་བྱས་ནས། །སྣ་ཡི་རྩེ་མོ་ནས་བཏོན་ཏེ། །བསྒྲུབ་བྱའི་ལུས་ནི་དགང་བར་བྱ། །
ལུས་ཀྱི་ཚིགས་ནི་ཐམས་ཅད་དུ། །སྣ་ཚོགས་རྡོ་རྗེ་བཅིངས་ནས་སུ། །རྡོ་རྗེ་འབར་བ་འཕྲོས་གྱུར་པ། །དེས་ནི་ལུས་ཀྱང་བསྐམ་པར་བྱ། །རྡོ་རྗེ་མཁའ་འགྲོ་མ་བསྒོམས་ཏེ། །ཀུན་ནས་ཀྱང་ནི་གཞིག་པར་བྱ། ། ཨོཾ་
བཛྲ་ཌཱ་ཀི་ནཱི། ཨ་མུ་ཀ་སྱ་རག་ཏ་ཨཱ་ཀར་ཥ་ཙ་ཤ་ཡ་ཧཱུྃ་ཕཊ། སྦྱོར་བའི་རིམ་པ་འདི་ཡིས་ནི། །སྐམ་འགྱུར་འདི་ལ་ཐེ་ཚོམ་མེད། །མཁས་པས་རླུང་གི་ཕྱོགས་སོང་སྟེ། །དཀྱིལ་འཁོར་གྲུ་བཞིར་བྱས་ནས་ནི། །སྤོས་ཀྱི་ཐིག་ལེ་
བདུན་བྱས་ཏེ། །དེ་དག་ཁམ་པའི་ཕོར་པ་དགབ། །དེ་ནི་རི་རབ་ཐམས་ཅད་ནས། །རྩེ་མོ་བརྒྱད་པར་སྤྲུལ་བྱ་ཏེ། །རྡོ་རྗེ་འཕྲོ་བས་བརྒྱན་པ་ཡིས། །དེ་དག་རྣམས་ནི་མནན་པར་བྱ། །ཡྃ་ཞེས་བྱ་བས་བསྐྱེད་པའི་
རླུང་བདུན་རྣམས། །ལྃ་ཞེས་བྱ་བའི་མཚན་མ་དབང་ཆེན་གྱི། །ནང་དུ་རླུང་རྣམས་ངེས་པར་ཆུད་པར་བྱ། །དེ་ལྟའི་སྦྱོར་བས་འཇིག་པའི་རླུང་ཡང་བཅིངས། །པད་མ་འདབ་བརྒྱད་བསྒོམས་ནས་དེའི་འདབ་ལ། །
ཀླུ་བརྒྱད་བཀོད་དབུས་མེ་ཚོགས་འབར་བ་ཅན། །རྡོ་རྗེ་ཁྲོ་བོའི་སྐུ་ཡི་ཞབས་མཐིལ་གྱིས། །ཀླུ་རྣམས་མནན་ན་ཆར་སྤྲིན་ཆར་པ་འབེབས། །ཧཱུྃ་ཞེས་བྱ་བས་གཉིས་དབུས་ཀླུ་རྣམས་ཀྱི། །སྙིང་པོ་ཡོངས་བཅུག་

90-1-94a

སྤེལ་མས་གཟིར་ནས་སུ། །ཧཱུྃ་ཞེས་བྱ་བ་བཟླས་བརྗོད་བྱས་ནས་སུ། །འཇིག་དུས་ཆར་རྣ་ལྟ་བུའི་ཆར་པ་འབབ། །ཉི་མའི་མདོག་ལྟར་དམར་པོའི་འོད་བཟང་ཞལ། །ནམ་མཁའ་ཁྱབ་པར་རྣམ་པར་གདངས་ནས་ནི། །
ཀུན་ནས་ཆར་ཆུས་ཡོངས་སུ་གང་བའི་སྤྲིན། །ཧཱུྃ་ཞེས་བྱ་བའི་འབར་བའི་ལྕེ་ཡིས་ལྷག །དབུགས་རྔུབ་པ་ཡིས་བཀུག་ནས་དབྱུང་བ་ཡིས། །ཤིང་བལ་བཞིན་དུ་རབ་ཏུ་གཏོར་བར་བྱ། །ཡང་ན་རང་གི་ཕྱག་རྒྱའི་
ཚོགས་འབར་བ། །བཏང་བས་སྐད་ཅིག་ལ་ནི་བཅད་གཏུབས་ཏེ། །ཧཱུྃ་ཞེས་བྱ་བས་བསྡིགས་པ་བྱས་ན་ནི། །ནམ་མཁའ་དག་ཀྱང་སྟོན་ཀའི་དུས་ལྟར་སྣང་། །མེ་ཡི་དཀྱིལ་འཁོར་ལ་གནས་སྣང་མཛད་ཀྱི། །
ཞབས་དྲུང་དཔྲལ་དབྱེས་ནས་བྱུང་མི་གཡོ་བྲན། །བདུད་ལས་རྣམ་རྒྱལ་ཕྱག་དྲུག་མདའ་གཞུ་ཞགས། །རལ་གྲི་འཁོར་ལོ་རྡོ་རྗེ་ཆར་འབེབས་པ། །ཁྲོ་བོ་གྲངས་མེད་པ་ཡིས་ཡོངས་བསྐོར་ནས། །བགེགས་རྣམས་
སྲེག་མཛད་ཧཱུྃ་གི་སྒྲས་བཀང་ནས། །འཇིག་རྟེན་གསུམ་པོ་གང་འདི་རྣམ་པར་འཇིག །རྐང་རྗེས་ས་དང་མི་ཡི་ཁྲག་དག་ལས། །མི་ཡི་གཟུགས་བྱས་མི་རུས་ཕུར་བུ་ལ། །འོད་ཟེར་ཅན་གྱི་གསང་སྔགས་བསྒྲགས་པ་ཡིས། །
ལན་གྲངས་ཉི་ཤུར་མངོན་སྔགས་མིག་དུ་གདབ། །ཚོགས་ཀྱི་བདག་པོའི་ཁར་ནི་མིང་བཅུག་ནས། །ཕྱི་བཞིན་རྡོ་རྗེ་གཏུན་ཤིང་དག་གིས་བརྡུང་། །ཨོཾ་སུྃ་བྷཱ་བཛྲ་མུ་ས་ལེ་ན། ཙཱུརྞྞ་ཡ་ན་ར་བྷིག་གྷ་ཧཱུྃ་ཕཊ། ལས་འདི་བསམ་
པས་མོད་ལ་ནི། །མེ་ཡི་བགེགས་ཀྱང་བཟློག་པར་འགྱུར། །སྟང་ཟིལ་ཁ་དོག་ལྟ་བུ་ནམ་མཁའ་ལྡིང་། །ལུས་ལ་སྦྲུལ་སྟོང་དག་གིས་བརྒྱན་བྱས་པ། །མཁའ་ལ་འདུག་ནས་གདེངས་ཀ་སྟོང་ལྡན་པའི། །ཀླུ་བརྒྱད་དག་
དང་ཆར་སྤྲིན་རྣམས་ལ་བསྒོ། །བརྒྱ་བྱིན་བཀའ་ནི་དེ་དག་གིས་ཐོས་ནས། །སྤྲིན་ཚོགས་བུམ་པའི་ཆར་གྱིས་མེ་ཡང་གསོད། །ནམ་མཁའ་ལྡིང་གི་འདབ་མས་བཀབ་ནས་ནི། །མཆུས་བརྐོས་ཆུ་ཀླུང་གིས་ནི་མཚམས་ཀྱང་

90-1-94b

བཅད། །བཛྲ་ནཱ་རཱ་ཡ་ཎ། ནི་ར་བ་བཱ་ཡ། མ་ཧི་ན། བ་མ་མུ་མེ་གེ་ཧཱུྃ། ཞལ་རས་གསུམ་པ་སྟོན་ཀའི་ཟླ་བའི་མདོག །ཕྱག་བཞི་འོད་དམར་སྣ་ཚོགས་འབར་བའི་འོད། །ལྷ་མོ་བཞི་པ་བསྙེམས་མ་བྱམས་མ་དང་། །ཆུ་
སྲིན་རྒྱལ་མཚན་མེ་ཏོག་རོལ་པས་བསྐོར། །གཡས་པའི་ཕྱག་གིས་རྡོ་རྗེ་ལེགས་གསོར་ཞིང་། །གཡོན་པས་རྡོ་རྗེ་དྲིལ་བུ་སྒེག་པར་གཞག །ལྡེམ་བག་འཇོ་སྒེག་ཚུལ་གྱིས་རོལ་པ་སྟེ། །སེམས་དཔའ་
འབྱུང་བའི་སྤྲིན་རྣམས་རྣམ་པར་འཕེལ། །རྣམ་པ་ཀུན་གྱིས་རྣམ་བརྒྱན་ཅིང་། །རིན་ཆེན་ཅོད་པན་དབང་བསྐུར་བས། །ནམ་མཁའ་ལ་ནི་འབབ་པ་ཡི། །ཐོག་ཐོག་རྣམ་པར་བཟློག་པར་བྱེད། །ༀ་མ་ཧཱ་པུ་
ཀ་བཛྲ། ཆེ་གེ་མོ་ཛྫ་ཞེས་བྱ་བ་དང་། ཧཱུྃ་ཞེས་བྱ་བ་ནས། པཱུ་ར་ཊ་བན་དྷ་ཧཱུྃ་ཕཊ། སྦྱོར་བ་འདི་ནི་བྱས་པ་ཡིས། །བླ་མེད་བྱང་ཆུབ་རྒྱས་པར་འགྱུར། །དེ་ནས་བཅོམ་ལྡན་འདས་རྡོ་རྗེའི་དེ་བཞིན་གཤེགས་པ་རྣམ་
པར་སྣང་མཛད་ཆེན་པོ། མི་འཁྲུགས་རིན་ཆེན་འོད་དཔག་མེད། །དོན་ཡོད་གསང་སྔགས་རྒྱལ་རྣམས་དང་། །བཟང་པོ་རྣམ་པ་བཅུ་དྲུག་པོ། །ཀུན་དང་དྲག་པོའི་ཏིང་འཛིན་ལ། །གནས་པ་ཡི་ནི་ཁྲོ་བོ་དང་། །
གསང་སྔགས་རྫོགས་མཛད་རི་རྒྱལ་མ། །རྣམ་པ་ཀུན་དང་ལྡན་པ་དག །རིམས་བྲལ་རང་གི་ཏིང་འཛིན་གནས། །ཐམས་ཅད་ལྡན་པའི་འཁོར་རྣམས་ལ། །གཟིགས་པ་ཆེན་པོས་རྣམ་གཟིགས་ནས། །སྐུ་གསུང་ཐུགས་ཀྱི་
རྡོ་རྗེ་ཅན། །སྨིན་མ་མཛེས་པར་བསྐྱོད་ནས་སུ། །ཡན་ལག་འཕྲོག་པའི་འཛུམ་བསྟན་ནས། །ཐུགས་ཀྱི་སེམས་ནི་དགའ་བར་མཛད། །དགའ་བར་མཛད་པའི་མོད་ལ་ནི། །སངས་རྒྱས་མཆོག་ཀུན་གྱིས་མཆོད་པ། །ཤེས་རབ་ཆེན་པོའི་ཐོག་འདྲེན་
པས། །བསྒྲིམས་ཏེ་སོ་སོར་གསོར་ནས་དེས། །བདེ་ཆེན་ཏིང་འཛིན་ལ་གནས་ཏེ། །ལྡེམ་བག་འཇོ་ཚུལ་གྱིས་བལྟས་ནས། །ལག་གཉིས་པད་མའི་ཚུལ་གྱུར་ཏེ། །སྤྱི་བོར་ཐལ་མོ་སྦྱར་བྱས་ནས། །ཡེ་ཤེས་ལམ་ནི་རབ་སྟོན་པ། །

90-1-95a

རྒྱལ་ཆེན་རྣམ་པར་སྣང་མཛད་ལ། །ལག་ན་རྡོ་རྗེ་སྟོབས་པོ་ཆེ། །ཡིད་རྒྱས་པ་ཡིས་ཚིག་གསོལ་བ། །ཅི་སླད་རྣམ་པ་ཐམས་ཅད་དུ། །ཟུར་གྱིས་རྣམ་པར་གཟིགས་པ་དང་། །སྨིན་མ་བསྐྱོད་བྱས་འཛུམ་མཛད་པ། །ཡེ་
ཤེས་རྣམ་པར་བསྒྱིངས་པས་གསུངས། །བྱང་ཆུབ་ཆེན་པོའི་རྡོ་རྗེ་ཅན། །ལག་ན་རྡོ་རྗེས་གསོལ་མོད་ལ། །བརྟན་ཞིང་ཟབ་པའི་གསུང་གིས་ནི། །སངས་རྒྱས་རྣམས་ཀྱི་རོལ་པ་བཤད། །བསྒོམ་པའི་ལམ་ལ་ལེགས་བྱུང་
བ། །རྡོ་རྗེ་ཡེ་ཤེས་རྣམས་ཀྱི་ཐབས། །བདེ་བའི་བྱང་ཆུབ་ཐོབ་འགྱུར་བ། །སངས་རྒྱས་ཀུན་དང་སངས་རྒྱས་ཀྱི། །རྗེས་སུ་འབྲང་བའི་འཁོར་ཉོན་ཅིག །གང་ལ་དངོས་རྣམས་དངོས་མེད་ཅིང་། །མཐའ་གཉིས་ཀྱི་ནི་
མཚན་མ་མེད། །དབུས་ལའང་སྤྱོད་པ་མེད་པ་དག །དུས་གསུམ་འདས་པའི་ནམ་མཁའ་འདྲ། །ཐབས་དང་ཤེས་རབ་རྣམ་སྤངས་པ། །དེ་ལ་བྱང་ཆུབ་ཇི་ལྟར་རྟོགས། །རྟོགས་པར་འདོད་པ་དེ་དག་ནི། །ཐབས་
རྣམས་ང་ཡིས་བཤད་པར་བྱ། །ཕུང་པོ་དངོས་པོ་ཡོད་མེད་པའི། །བྱང་ཆུབ་སེམས་ནི་གྲོགས་གྱུར་པ། །སྤྲོ་བ་དང་ནི་བཏུང་བ་ཡིས། །སྐུ་གསུམ་མཆོག་ནི་མཆོད་པར་བྱ། །སེམས་ཀྱིས་སྐུ་ནི་ཐོབ་འགྱུར་ཞིང་། །སེམས་
ཀྱིས་ཆོས་རྣམས་བསྟན་པ་ཡིན། །སེམས་ཀྱིས་བྱང་ཆུབ་འཐོབ་འགྱུར་བས། །དེ་བཞིན་ཉིད་ཀྱི་རྣམ་པར་བསྒོམ། །སེམས་ནི་སྒྱུ་མའི་རྣམ་པ་སྟེ། །བྱང་ཆུབ་ཀྱང་ནི་སྒྱུ་མ་འདྲ། །དཔེར་ན་སྒྱུ་མའི་མཁན་པོ་འགས། །གྱོ་མོ་
ལ་ནི་སྔགས་བཟླས་ཏེ། །ལེགས་པར་བྱས་པའི་གཟུགས་དག་ལ། །སྦྱོར་བ་གོམས་པས་བསྣུན་ན་ནི། །རྐང་བཞི་པ་ལ་སོགས་པའི་གཟུགས། །ཞེན་པའི་སེམས་ལ་སྣང་བར་འགྱུར། །དེ་བཞིན་བསོད་ནམས་ཡེ་ཤེས་ལས། །བྱུང་བའི་ཚོགས་
ཀྱིས་བསྒོམ་པའི་སེམས། །སེམས་ཅན་རྣམས་ཀྱི་བསམ་པ་ལ། །བླ་མེད་བྱང་ཆུབ་སྣང་བར་བྱེད། །དངོས་པོ་དོན་དམ་མི་ཤེས་པ། །ཕྱི་རོལ་དངོས་ལ་མངོན་ཞེན་པའི། །ངན་པར་རྟོག་པའི་རྣམ་རྟོག་གིས། །རིན་ཆེན་སེམས་འདི་དྲི་མར་བྱས། །

90-1-95b

འབྱུང་བ་ཆེན་པོ་བཞི་རྣམས་དང་། །དངོས་པོ་ཐམས་ཅད་ལྡན་ཞེས་གསུངས། །དེ་ལ་གཙང་དང་མི་གཙང་སོགས། །མི་ཤེས་པ་ཡིས་ཡོངས་སུ་བཏགས། །བདག་ཏུ་འཛིན་པའི་མངོན་ཞེན་པས། །དོན་དམ་ཕྱི་རོལ་བྱས་པ་ཡི། །ཐེག་པ་དམན་པ་
པ་རྣམས་ཀྱིས། །བླ་མེད་བྱང་ཆུབ་ཅི་ལྟར་འཐོབ། །བྱང་ཆུབ་རྣམ་པ་གཉིས་གསུངས་ཏེ། །ལྷག་མ་དང་བཅས་ལྷག་མ་མེད། །ལྷག་བཅས་ཕུང་པོའི་ངོ་བོ་སྟེ། །ཉོན་མོངས་པ་རྣམས་ཡོངས་སུ་བསྲེགས། །ལྷག་མེད་བག་ཆགས་མེད་པ་སྟེ། །མཁའ་
ལྟར་དྲི་མ་མེད་པ་ཡིན། །བླ་མེད་བྱང་ཆུབ་འདི་ལྟ་བུར། །སངས་རྒྱས་ཀུན་གྱིས་རྣམ་པར་བཤད། །དེ་ཡི་བྱང་ཆུབ་སྤེལ་བའི་ཕྱིར། །ལས་ཀྱི་ཚུལ་ནི་སྣ་ཚོགས་ཡིན། །རྣལ་འབྱོར་ཅན་གྱི་གསང་སྔགས་གང་། །ཡེ་ཤེས་སེམས་དཔའི་ཞབས་
དྲུང་དུ། །རྟག་ཏུ་མཉེས་བྱས་མ་གྲུབ་པའི། །ལྷག་མ་ང་ཡིས་བཤད་བྱ་སྟེ། །དེ་ནི་བདེ་བླག་ཐབས་ཀྱིས་སུ། །ཚར་བཅད་ནས་ནི་བསྒྲུབ་པ་བཤད། །རྡོ་རྗེ་ལྕགས་ཀྱུ་རྒྱལ་པོ་ཆེ། །རྡོ་རྗེ་ཞགས་པ་རབ་གདུང་བྱེད། །རྡོ་རྗེ་ཁུ་ཚུར་
གཟི་བརྗིད་ཆེ། །རྡོ་རྗེ་ཕུར་བུ་རྣམས་འདྲིལ་བྱེད། །རྡོ་རྗེ་ཐོ་བ་རྡུང་བ་སྟེ། །རྡོ་རྗེ་ནག་མོ་ཆེར་འབར་བ། །ལྷ་རྣམས་ཀུན་ལ་འཇིག་པ་བསྐྱེད། །ཕྱག་རྒྱ་རྣམ་པ་སྣ་ཚོགས་འདི། །བསྒོམས་ནས་ལས་ལ་སྦྱར་ན་ནི། །དམ་ཚིག་
རྒྱལ་བས་བསྟན་པའི་ཕྱིར། །མཚུངས་པ་མེད་པའི་ལས་བྱེད་དོ། །གསང་སྔགས་རིག་པས་ཧཱུྃ་ཞེས་པའི། །ལྕགས་ཀྱུ་བཏང་ནས་ཞབས་དྲུང་དགུག །འདི་ནི་གལ་ཏེ་སངས་རྒྱས་སམ། །རྡོ་རྗེ་འཆང་བའི་སྙིང་ལས་དགུག །དམ་
ཚིག་གིས་ནི་ཞུགས་པ་དང་། །རྡོ་རྗེ་བཅིང་བས་བཅིང་བར་བྱ། །རྡོ་རྗེ་ཁུ་ཚུར་གྱིས་བཟུང་ནས། །རྡོ་རྗེ་ནག་མོས་ཀུན་ཏུ་བསྡིགས། །རྡོ་རྗེ་ཡི་ནི་ཕུར་བུ་ཡིས། །གཟུགས་བརྙན་གྱི་ནི་གནས་ལྔ་པོ། །དཔྲལ་བ་མགྲིན་པ་སྙིང་ག་དང་། །
དེ་བཞིན་དཔུང་པ་གཉིས་སུ་གདབ། །རྡོ་རྗེ་ཐོ་བས་བརྡུང་བར་བྱ། །ཆོ་གའི་སྦྱོར་བ་འདི་ཡིས་ནི། །སངས་རྒྱས་ཉིད་ཀྱང་ངེས་པར་གནོན། །བསྡིགས་ལ་སོགས་པའི་སྦྱོར་བ་ཡིས། །གཟུགས་བརྙན་མིག་ཡོར་གྱུར་པ་དང་། །སངས་རྒྱས་བྱང་ཆུབ་རབ་

90-1-96a

རྫོགས་པའི། །དངོས་གྲུབ་དེ་ཚེ་སྦྱིན་པར་མཛད། །འདི་ནི་མཐུ་ཡིས་གྲུབ་པ་ཡི། །སྦྱོར་བ་གཅིག་པུ་གསང་ཆེན་ཡིན། །དེ་ནས་ཐམས་ཅད་དང་ལྡན་པའི་འཁོར་དེ་དག་གིས་གསང་བ་སྒྲུབ་པ་ཐོས་ནས་མགྲིན་གཅིག་ཏུ་ཐམས་
ཅད་ཀྱིས་ལེགས་སོ་ཞེས་བྱ་བར་གསོལ་ཏེ། །གཙོ་བོ་རྡོ་རྗེ་རྣམ་སྣང་མཛད། །དཔའ་བོ་ཆེན་པོ་ལེགས་སོ་ཞེས། །ཟབ་མོ་ཆོས་ཀྱི་མཆོག་གྱུར་པ། །དམ་པ་བཤད་པར་མཛད་པ་ལེགས། །སེམས་ཅན་ཕན་ཕྱིར་ཐུགས་རྗེ་ཡི། །
ལྕགས་ཀྱུས་ཀུན་ནས་འབར་བ་ལེགས། །བདག་མེད་ཆོས་རྣམས་སྒྲུབ་པ་ཡི། །ཡེ་ཤེས་སྙིང་ཁུ་འབར་བ་ལེགས། །གསང་ཆེན་ཐམས་ཅད་བསྟན་པ་ཡི། །རྡོ་རྗེ་ཐེག་པ་ངེས་པར་གསུངས། །ཐེག་པའི་ཚུལ་འདི་ལ་གནས་ན། །
བླ་མེད་བྱང་ཆུབ་བདེ་བར་ཐོབ། །ཨོཾ་བཛྲ་ཨྂ་ཀུ་ཤ་ཨཱ་ཀར་ཥ་ཡ་ཧཱུྃ། ༀ་བཛྲ་པཱ་ཤ་བན་དྷ་ཧཱུྃ། ཨོཾ་བཛྲ་ཊཱཀྐི་རཱ་ཛཱ་ཡ་ཧཱུྃ། ཨོཾ་བཛྲ་མུཥྚི་གྲྀཧྣ་ཧཱུྃ། ཨོཾ་བཛྲ་ཀཱི་ལ་ཡ་ཀཱི་ལ་ཡ་ཧཱུྃ། ༀ་བཛྲ་མུད་ག་ར་ཨ་ཀོ་ཊ་ཡ་ཧཱུྃ། ཡེ་ཤེས་ཀྱི་
སྙིང་ཁུས་སྙིང་པོ་ཅན་དུ་གྱུར་པའི་གསང་སྔགས་དག་པ་མཆོག་ཏུ་གྱུར་པ་དོན་ཡོད་པའི་ལས་འདི་དག་སུ་ལ་ཡང་བསྟན་པར་མི་བྱའོ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་འདི་ནི་སྦྱོར་བའི་ཐབས་ཀྱིས་སྒྲུབ་པའི་རིམ་པར་
ཕྱེ་བའི་ལེའུ་སྟེ་བརྒྱད་པའོ།། །།  དེ་ནས་བཅོམ་ལྡན་འདས་རྡོ་རྗེའི་དེ་བཞིན་གཤེགས་པ་རྣམ་པར་སྣང་མཛད་ཆེན་པོས་སྦྱོར་བའི་ལས་ཐམས་ཅད་ཀྱི་རྗེས་སུ་འབྲང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་
ནས་དབབ་པ་ལ་སོགས་པའི་ལས་བྱ་བ་འདི་བཤད་དོ། །ཨོཾ་ཞེས་བྱ་བ་མགོར་བཞག་སྟེ། །ཨཱཿནི་བཞིན་གྱི་པད་མ་ལ། །ཧཱུྃ་ནི་བསྐུལ་ནས་སྙིང་གར་གཞག །ཡང་ནི་རླུང་གི་དཀྱིལ་འཁོར་ལ། །བཞག་ནས་བསྒྲིམས་ཏེ་
གདེག་བྱས་ན། །འགྲོ་བ་དང་ནི་གནས་པ་ཡི། །འགྲོ་བ་ཐམས་ཅད་འབབ་པར་འགྱུར། །དབབ་སྣོད་སྐུལ་བྱེད་གཟུགས་དེ་ཡི། །གཟུགས་ཀྱི་ངོ་བོར་བསམས་ནས་སུ། །རྡོ་རྗེ་འཆང་བའི་ང་རྒྱལ་གྱིས། །གསང་སྔགས་

90-1-96b

བསྙེམས་དང་བཅས་པར་བཀླག །བརྗོད་པར་བྱ་བ་ཐོགས་པ་མེད་པའི་ཕྲེང་བ་ནི། །ན་མཿས་མནྟ་བུདྡྷ་ནཱྂ། སམྱག་སམ་བུད་དྷ་ཀོ་ཊཱི་ནཱཾ། ཏད་ཡ་ཐཱ། ཨོཾ་ཙ་ལེ་ཙུ་ལེ་ཙུན་དེ་སྭཱ་ཧཱ། བརྩོན་འགྲུས་ཆེན་མོ་ཐོགས་པ་མེད་པར་འདུལ་བ། 
སྟོབས་ཆེ་བ། ཕ་རོལ་གནོད་པ་ཆེ་བ། ཕྱག་ན་རལ་གྲི་དང་ཐོ་བ་དང་དགྲ་སྟ་དང་ཞགས་པ་བསྣམས་མ། ཁྲོ་མོ་ཁྲོ་མོའི་དབང་ཕྱུག་མ། དྲག་པོའི་གཟུགས་ཅན་མ། ཞལ་རས་མཐའ་ཡས་པ། ཕྱག་སྟོང་མ། མ་ཕམ་མ། 
གཞན་གྱིས་མི་ཐུབ་མ། དོན་ཡོད་པ། གདུལ་བར་དཀའ་བ། མིག་སྟོང་མ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ། ལྷ་ཐམས་ཅད་ཀྱིས་ཕྱག་བྱས་ཤིང་མཆོད་པ་རབ་ཏུ་གྲུབ་མ། རྡོ་རྗེའི་སེན་མོ་ཅན། རྡོ་རྗེ་རྡོ་རྗེ་
འདྲེན་མ། རྡོ་རྗེའི་མཚོན་ཆ་ཅན། རྡོ་རྗེའི་སྐུ་ཅན་མ་རྡོ་རྗེའི་སྤྱན་གདངས་པའི་སྟང་སྟབས་ཅན། །དྲག་ཤུལ་ཅན་མ་ལགས་ཀྱང་དྲག་ཤུལ་ཅན་གྱི་གཟུགས་ཅན་དུ་བསྒྱུར་བར་སྣང་བ། སྐུ་རྡོ་རྗེ་དང་བཻ་དཱུརྱས་བརྒྱན་མ། ༀ་བྷ་ག་བཱ་ཏི་ཙུན་
དེ་དྲུྂ་དྲུྂ་དྲུྂ་དྲུྂ། མྲི་མྲི། རུ་རུ། སྲུ་སྲུ་རུ་རུ་གྲཱིཧྣ་གྲྀཧྣ་ཨཱ་བེ་ཤ་ཨཱ་བེ་ཤ་ཡ། གྲྀཧྞ་པ་ཡ་གྲྀཧྞ་པ་ཡ། ས་ར་ས་ར། མཱ་ར་ཡ་མཱ་ར་ཡ། ཧ་ར་ཧ་ཤ་བྷཉྫ་བྷཉྫ། མ་ར་མ་ར། མཱ་ར་ཡ་མཱ་ར་ཡ། པ་ཙ་པ་ཙ། ད་ཧ་ད་ཧ། གྲྀཧྞ་གྲྀཧྞ། སྡང་བའི་གདོན་
དང་། རིམས་ཞག་གཅིག་པ་དང་། ཞག་གཉིས་པ་དང་། ཞག་གསུམ་པ་དང་། ཞག་བཞི་པ་དང་། བརྟག་པའི་རིམ་དང་། ཡུད་ཙམ་པ་དང་། འབྱུང་པོ་དང་། རོ་ལང་དང་། གནོད་སྦྱིན་དང་། སྲིན་པོ་དང་། གྲུལ་བུམ་གྱི་གདོན་དང་། 
མངལ་ནས་སྐྱེས་པ་དང་། ལས་ལས་སྐྱེས་པ་དང་། འགྲོ་བ་དང་། གནས་པ་འདི་དག་དང་། སྡང་བ་གང་དག་བདག་ལ་འཚེ་བ་ཐམས་ཅད། སཱ་དྷ་ཡ་སཱ་དྷ་ཡ། མར་དྷ་ཡ་མར་དྷ་ཡ། ཤོ་ཥ་ཡ་ཤོ་ཥ་ཡ། ཏཱ་པ་ཡ་ཏཱ་པ་
ཡ། ཨུཏ་པ་དྷ་ཡ་ཨུཏ་པ་དྷ་ཡ། ཧ་ན་ཧ་ན། བཛྲེ་ཎ་ས་ར་ས་ར། དཎྚེན། མ་ར་མ་ར། ཁ་ཌྒེན་ཧཱུྃ་ཧཱུྃ་ཧཱུྃ། ། ཏྲི་ཏྲི་ཏྲི། ཨོཾ་ཙ་ལེ་ཙུ་ལེ་ཙུན་དེ་སརྦྦ་སཱ་དྷ་ཡ་སྭཱ་ཧཱ། དེ་ནི་རྡོ་རྗེས་བསྐུལ་ནས་སུ། །རྡོ་རྗེ་དྲིལ་བུ་

90-1-97a

གསིལ་བྱ་ཞིང་། །རྡོ་རྗེ་བཅིང་བར་བསྐྱོད་པར་བྱ། །དབང་ཆེན་དཀྱིལ་འཁོར་ལ་གནས་ཨོཾ། །དབུས་སུ་པད་མ་འདབ་བརྒྱད་དང་། །འབྲེལ་བའི་པད་མ་བཞག་ནས་སུ། །ཨཱཿཞེས་བྱ་བར་བརྒྱད་ཀྱིས་བརྒྱན། །དབུས་
སུ་བསྒྲུབས་བྱ་བཞག་ནས་སུ། །ཧཱུྃ་བཞི་ཡིས་ནི་མཛེས་པར་བྱ། །ཁམ་ཕོར་ཁ་སྦྱར་ནང་བཅུག་སྟེ། །སྟེང་དུ་རྡོ་རྗེ་འཆང་བས་མནན། །བསྒོམས་ཞིང་གསང་སྔགས་བསྐུལ་ཚིག་གིས། །བཟླས་བརྗོད་དག་ནི་བྱ་བ་དང་། །
བ་ཞེས་བྱ་བའི་ཐེག་པ་ཡིས། །ཀུན་ནས་ཀྱང་ནི་བཀྲི་བར་བྱ། །འདི་ནི་སྐུ་གསུམ་ལས་བྱུང་བའི། །ལྷ་དང་མི་ཀུན་མནན་པར་འགྱུར། །སྔགས་ལ་མཁས་པའི་བདག་ཉིད་ནི། །ཁ་དོག་དམར་པོ་རྡོ་རྗེ་ཅན། །འདོད་ཆགས་ཆེ་དང་
ལྡན་པའི་གཟུགས། །འདོད་པའི་ལྷ་དང་ལྷན་ཅིག་བསམས། །སྐུ་གསུམ་ལྡན་པ་མདའ་ཐོགས་ཤིང་། །གཡོན་པ་ཡིས་ནི་གཞུ་ཡང་གཟུང་། །ༀ་ཧཱུྃ་བུད་མེད་སྤྱི་བོར་བསམས་ནས་ནི། །འདོད་པས་སྙིང་ཟགས་
དྲེགས་བདོ་བ། །མདོག་དམར་ཐལ་མོ་སྦྱར་ནས་ནི། །འདུད་བཞིན་དུ་ནི་མདུན་བཞག་སྟེ། །རྡོ་རྗེ་མདའ་ཡིས་བསྣུན་ན་ནི། །པད་མ་དག་ལས་ཟིལ་པ་འཛག །རྡོ་རྗེ་མདའ་ཡི་སྦྱོར་བ་ཡིས། །འདོད་ཆགས་ཅན་མ་འཛག་པར་འགྱུར། །
རྣལ་འབྱོར་ཅན་གྱིས་དབང་བྱའི་ཕྱིར། །འདོད་ཆགས་རྡོ་རྗེ་ཅན་ཡང་བསྒོམ། །མི་ཐོད་ལས་བྱས་ཅང་ཏེའུ་ལ། །སྤྲེའུ་པགས་པས་གཡོགས་ནས་ནི། །ངོས་གཉིས་ལ་ནི་པད་མ་བྲི། །བུད་མེད་ཁྲག་གིས་འཛག་པར་བྱ། །དེ་ཡི་དཀྱིལ་དུ་ཁེར་
བྲིས་ཏེ། །མི་ཡི་སྐྲ་ཡིས་བཏགས་ནས་ནི། །མཐིང་རིལ་གྱི་ནི་རྐང་རུས་ཀྱིས། །ཁྲེ་ཧཱུྃ་མིང་ནས་བརྗོད་ཅིང་བརྡུང་། །ལམ་གྱི་བཞི་མདོར་དཀྱིལ་འཁོར་ནི། །རྐང་པ་གཡོན་པའི་མཐེ་བོས་བྲིས། །གྲྭར་ནི་བུ་མོ་ཟས་སྦྱིན་མ། །
འགུགས་པར་བརྩོན་པའི་ལྕགས་ཀྱུ་བྱ། །གཙོ་བོ་ཁྲག་འཐུང་ཆ་ལུགས་ཀྱི། །གཟུགས་ཅན་གྱིས་ནི་རྟིང་བས་བརྡུང་། །འདི་ནི་ཁམས་གསུམ་རྣམ་གནས་པའི། །བུ་མོ་ཟས་སྦྱིན་འགུག་པར་འགྱུར། །གང་ཡང་རུང་

90-1-97b

བའི་གཟུགས་བརྙན་ལ། །གནས་པ་ཡི་ནི་ང་རྒྱལ་གྱིས། །རྣལ་འབྱོར་འཁོར་ལོ་རྫོགས་གྱུར་ན། །ཚིག་གི་རྣམ་པ་ཙམ་གྱིས་ཀྱང་། །ལྷ་དང་ལྷ་མིན་མི་ལ་སོགས། །རྣལ་འབྱོར་ཅན་གྱིས་ཐམས་ཅད་བྱེད། །གང་ཚེ་དབང་
ཉིད་ལ་གནས་པ། །དེ་ཚེ་ཐམས་ཅད་མངག་གཞུག་འགྱུར། །བལྟས་པ་ཙམ་གྱིས་འཆི་བ་འམ། །མེ་ཙམ་གྱིས་ཀྱང་གཅོད་པའི་མཆོག །སྒྱུ་མའི་ཡེ་ཤེས་ཀྱིས་བསྐུལ་ནས། །རྣལ་འབྱོར་ཅན་གྱིས་གླུ་དང་གར། །ཅི་ལྟར་ཅི་ལྟར་
བསྒོམ་བྱས་པ། །དེ་ལྟར་འགྲོ་བ་རབ་ཏུ་བྱེད། །སྦྱིན་སྲེག་དེ་ཉིད་ལ་གནས་པའི། །མེ་ཡི་ལྷ་ནི་ཞལ་ཡིན་པས། །སྣ་ཚོགས་ལས་རྣམས་གྲུབ་བྱེད་པའི། །སྦྱིན་སྲེག་ལས་ནི་རབ་ཏུ་བཤད། །སྦྱིན་སྲེག་གིས་ནི་ལྷ་རྣམས་ཚིམ། །
ཚིམ་པར་གྱུར་ནས་དངོས་གྲུབ་སྟེར། །གསང་སྔགས་ལྷག་ཆད་གང་ཡིན་པ། །ཐམས་ཅད་སྦྱིན་སྲེག་དག་གིས་སྐོང་། །དེ་ཕྱིར་སྐུ་གསུམ་མཁས་མཆོག་གིས། །སྦྱིན་སྲེག་རབ་ཏུ་བསྔགས་པར་མཛད། །གཙུབ་ཤིང་ལས་ནི་བྱུང་བའི་མེ། །དགེ་བ་ཡི་ནི་ལས་
རྣམས་བྱེད། །གདོལ་པའམ་དུར་ཁྲོད་ལས་བྱུང་བའི། །མེ་ཡིས་ལས་རྣམས་རབ་ཏུ་བསྒྲུབ། །ཐབ་ཁུང་ཟླུམ་པོ་གྲུ་བཞི་པ། །ཟླ་གམ་དང་ནི་ཟུར་གསུམ་པ། །དཀྱིལ་འཁོར་ཟུར་གྱི་ཁ་ཁྱེར་ལ། །རྡོ་རྗེ་མཚན་མ་དག་གིས་བརྒྱན། །སྦྱིན་སྲེག་དེ་ཉིད་ཚུལ་རིག་པས། །
ཐབ་ཁུང་རྣམས་ཀྱི་དབུས་སུ་ནི། །པད་མོ་སྟེང་གནས་གཙུག་ཏོར་དང་། །རྡོ་རྗེ་རིན་ཆེན་པད་མ་གཞག །ཅི་ལྟར་རིགས་པར་འདུག་གནས་སུ། །ལག་གཉིས་པུས་མོའི་བར་བཞག་སྟེ། །དགང་གཟེར་མར་གྱིས་བཀང་ནས་ནི། །བླུགས་གཟར་བཀང་སྟེ་དེ་བཞིན་བསྲེག །
སྦྱིན་སྲེག་ལ་དགོས་གཡས་སུ་གཞག །གཡོན་དུ་ཆུ་ཡི་སྣོད་དག་གོ། །ལས་ཀུན་བྱེད་པ་བཟླས་ནས་སུ། །བསང་གཏོར་དང་ནི་འཐོར་འཐུང་བྱ། །ཀུ་ཤའི་རྩེ་མོས་གནོན་པ་ཡིས། །ཐབ་ཁུང་ཁོར་ཡུག་བསྐོར་བར་བྱ། །མེ་ནི་འབར་བར་
ཤེས་པ་དང་། །གཡས་པས་མི་འཇིགས་མཐེབ་བསྐྱོད་ཅིང་། །གསང་སྔགས་འདིས་ནི་ཆོ་ག་བཞིན། །མེ་ཡི་ལྷ་ནི་སྤྱན་དྲང་ངོ་། །ཚུར་སྤྱོན་ཚུར་སྤྱོན་འབྱུང་པོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །བསྲེག་བླུགས་ཞལ་ཟས་བཞེས་ནས་ཀྱང་། །

90-1-98a

འདི་ཉིད་ཏུ་ནི་བཞུགས་སུ་གསོལ། ཨོཾ་ཨག་ན་ཡེ། དཱི་པྱ་དཱི་པྱ། ཨཱ་བེ་ཤ་མ་ཧཱ་ཤྲི་ཡེ། ཧ་བྱ་ཀ་བྱ། བ་ཧ་ནཱ་ཡ་སྭཱ་ཧཱ། ལག་གཡོན་རྡོ་རྗེ་གསང་གཏོར་ཏེ། །མཆོད་ཡོན་མཆོད་པ་རྣམ་ལྔ་དབུལ། །མེ་ཡི་ཕྱོགས་ནས་བོད་པ་ནི། །
གསུས་པོ་ཆེ་ལ་མིག་གསུམ་པ། །གདོང་བཞི་ལག་པ་བཞི་དང་ལྡན། །འོད་དམར་རལ་པའི་ཐོར་ཚུགས་ཅན། །མེ་ཡི་དཀྱིལ་འཁོར་ལ་གནས་ཤིང་། །ལས་ཀྱི་འོད་ཟེར་རྣམས་ཀྱིས་བརྒྱན། །ལག་པ་དང་པོ་མཆོག་སྦྱིན་ལ། །
གཉིས་པ་ན་ནི་སྔགས་ནོར་ཕྲེང་། །གཡོན་ན་རིལ་བ་སྤྱི་བླུགས་ཏེ། །གཉིས་པ་ན་ནི་བེ་ཅོན་ཉིད། །མདོག་དམར་རྒྱན་ནི་མེད་པ་ལ། །དྲང་སྲོང་རྣམས་ཀྱིས་ཡོངས་བསྐོར་བ། །འདི་ལྟའི་གཟུགས་ནི་བསམས་ནས་ཀྱང་། །ཐབས་
ཀྱི་དབུས་སུ་བཞུགས་སུ་གསོལ། །དེ་ལ་སྦྱིན་སྲེག་ལ་དགོས་པ། །ཀུན་ནས་ལན་གསུམ་བསྲེག་བླུགས་དབུལ། །དེ་ནས་འཐོར་འཐུང་བྱས་ནས་སུ། །འབར་བའི་རྣམ་པར་བསྒྱུར་བར་བྱ། །རིམ་པ་འདི་ཡི་ཚུལ་གྱིས་ནི། །མཁས་པས་
ལྷ་རྣམས་ཚིམ་པར་བྱ། །ལེགས་པར་ཚིམ་བྱས་བཟོད་གསོལ་ཏེ། །འདོད་པའི་དངོས་གྲུབ་གསོལ་བ་གདབ། །བུམ་པ་རྒྱལ་མཚན་རྡོ་རྗེ་གདུགས། །པད་མ་ལྕགས་ཀྱུའི་རྣམ་པ་དག །མེ་ལྕེ་མདོག་དཀར་སྣང་བ་དང་། །འཁྱིལ་པའི་
མཚན་མ་མཁས་པས་བརྟག །དེ་ནས་མྱུར་དུ་འགྲུབ་འགྱུར་བས། །བསྒོམ་དང་བཟླས་ལ་འབད་པར་བྱ། །ཞི་དང་རྒྱས་དང་དབང་ལ་ནི། །ཨོཾ་ཞེས་པ་དང་སྭཱ་ཧཱ་མཐར། །དབྱངས་ཀྱི་རྒྱུན་ནི་བསྲིང་བ་དང་། །བར་ཆད་མེད་པའི་དབྱངས་
ཀྱིས་སྦྱར། །ཞི་བའི་སེམས་ཀྱིས་ཞི་བ་མོ། །འབྱོར་པ་རྒྱས་པ་མངོན་པར་སྤེལ། །དྲེགས་གདོང་སྟབས་ཚུལ་བཅས་པ་དང་། །དབང་དུ་གྱུར་པས་དབང་བྱའོ། །དྲག་ཤུལ་སྤྱོད་ཚུལ་ལ་གནས་པས། །ཧཱུྃ་ཞེས་པ་དང་ཕཊ་དང་བཅས། །ལུས་ནི་
མེ་ལྕེ་འབར་བ་དང་། །འཇིག་རྟེན་གསུམ་པོ་བཟར་བསམས་ནས། །བསྐུལ་བའི་ཚིག་དང་སྤེལ་བ་ཡི། །གསང་སྔགས་ཡི་གེ་ངེས་པར་སྦྱར། །སྔགས་གྲུབ་ཆོ་ག་ཤེས་པ་ཡིས། །སྦྱིན་སྲེག་ཆོ་ག་ཐམས་ཅད་ལ། །སྣ་ཚོགས་ལས་དང་ལྡན་པའི་ལྷ། །

90-1-98b

གང་དག་ཡིན་པར་མཆོད་པར་བྱ། །སྦྱིན་སྲེག་དེ་ཉིད་ཀྱིས་བསྐུལ་ཅིང་། །དང་པོ་དགང་བླུགས་སྲེག་ཅིང་དབུལ། །ཕྱིས་ནི་རིམ་བཞིན་རྣམ་པར་སྤེལ། །ཞི་དང་རྒྱས་དང་དབང་རྣམས་ལ། །དགེ་བ་རྫས་རྣམས་སྦྱིན་སྲེག་བྱ། །བཤང་གཅི་ཁྲག་རྐང་
རུས་པ་དང་། །ཤ་ཆེན་དག་ཀྱང་སྦྱིན་སྲེག་བྱ། །ཅི་སྟེ་ཡེ་ཤེས་སེམས་དཔའི་ཞལ། །མི་གཙང་བ་ཡིས་བཀང་ན་གོ། །ཇི་ལྟར་སྡིག་པ་མི་སྐྱེ་འགྱུར། །གལ་ཏེ་སྡིག་འགྱུར་འབྲས་བུ་གང་། །སེམས་ཅན་མི་ཤེས་པས་རྨོངས་ཏེ། །ཐམས་ཅད་ཤེས་རབ་རྣམས་
སྤངས་ཤིང་། །ཕྱི་རོལ་དངོས་ལ་མངོན་ཞེན་པ། །རྣམ་རྟོག་དྲ་བས་བླུན་བྱས་གང་། །དེ་དག་གིས་ནི་དགེ་སྡིག་གི། །ཕུང་པོ་གཉིས་སུ་རྣམ་པར་བརྟགས། །ཆོས་འདི་རང་བཞིན་གྱིས་དག་སྟེ། །སྐྱེ་བ་མེད་ཅིང་གནས་པ་མེད། །སེམས་ཅན་ཤེས་པ་སྤེལ་
བའི་ཕྱིར། །སངས་རྒྱས་རྣམས་ཀྱི་ཐབས་ཀྱིས་བསྟན། །དམ་པའི་དོན་དུ་དགེ་སྤངས་ན། །བསོད་ནམས་མེད་པ་ཅི་ཞིག་སྨོས། །དཔེར་ན་ཆུས་གང་ཆུ་ཀླུང་གི། །ཕ་རོལ་འགྲོ་བའི་སེམས་ཅན་དག །རྩྭ་དང་ཤིང་ལ་སོགས་བསྡུས་ཏེ། །ཆུ་ལས་རྒལ་བའི་གཟིངས་
བྱས་ན། །དེ་ལ་འཇུས་ཏེ་ལེགས་བརྒལ་ན། །བོར་ཏེ་བདེ་བར་འགྲོ་བ་ལྟར། །དེ་བཞིན་འཁོར་བའི་ཕ་རོལ་གྱི། །ཆོས་ཀྱི་ལམ་ནི་བསྐྱེད་བྱས་ཀྱང་། །ཆོས་དང་ཆོས་མིན་རྣམ་སྤངས་ནས། །བྱང་ཆུབ་བདེ་བ་ཐོབ་པ་བཞིན། །དེ་ཕྱིར་རྣམ་རྟོག་དྲང་
སྤོངས་ལ། །ཟབ་མོ་ཡི་ནི་ཆོས་སྤེལ་ཏེ། །དེ་བཞིན་གཤེགས་པས་གསུངས་ལམ་ལ། །སྔགས་རིག་རྣམ་རྟོག་མ་བྱེད་ཅིག །རྣམ་རྟོག་རྨོངས་པ་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་པས། །ནམ་མཁའ་ལྟ་བུར་དྲི་མེད་པའི། །རྣམ་པར་མི་
རྟོག་ཏིང་འཛིན་མནོན། །དབང་པོ་གཉིས་ནི་མཉམ་སྦྱར་ཏེ། །ལུས་དང་ངག་དང་སེམས་བསྡམས་ནས། །ངའོ་སྙམ་པའི་གཟི་བསྐྱེད་གཟུགས། །རྣམ་པ་ཀུན་གྱིས་རྣམ་པར་བརྒྱན། །རྣལ་འབྱོར་ལྡན་པ་ཚེ་འདི་ལ། །ཡེ་ཤེས་རྫོགས་པ་
ཉིད་དུ་འགྱུར། །ལས་ལས་བྱུང་བར་རྣམ་བསྟན་པའི། །སྐྱེས་པ་བུད་མེད་གཟུགས་མང་ལ། །བརྙས་པ་ཉིད་དུ་མི་བྱ་འདིས། །རྡོ་རྗེ་ལུས་ཅན་དམ་ཚིག་ཡིན། །ངན་རྟོག་བཟང་རྟོག་དྲ་བ་ཡི། །སེམས་ཀྱི་སེམས་ཅན་རྣམས་ལ་ནི། །

90-1-99a

སྣ་ཚོགས་གདུང་བས་སུན་མི་དབྱུང་། །རྡོ་རྗེ་སེམས་ལྡན་དམ་ཚིག་ཡིན། །སྲེད་པས་བསྐྱེད་རྩུབ་ཕྲ་བ་ཡིས། །ཚིག་དག་རྣམ་པར་མི་སྨྲ་ཞིང་། །མཉན་ན་བདེ་བར་བྱེད་པ་འདི། །རྡོ་རྗེ་ངག་ཅན་དམ་ཚིག་ཡིན། །རྣམ་པར་སྣང་མཛད་
ཆེར་འཁྲུགས་མཆོག །ཤ་ཡི་ཁམས་ལ་གནས་པ་ཡིན། །རྐང་ལ་མི་འཁྲུགས་རྒྱལ་པོ་སྟེ། །ཁྲག་ལ་རིན་ཆེན་འབྱུང་བ་གཙོ། །སེམས་ཅན་རྣམས་ཀྱི་རུས་ཕུང་གི། །ཕུང་གོས་ལ་ནི་འོད་དཔག་མེད། །རྩ་ཡི་ཚོགས་རྣམས་རྣམ་འདྲེན་པ། །
ཐུབ་པ་སྐྱེས་མཆོག་དོན་ཡོད་ལ། །དམ་ཚིག་ཤེས་པ་རྣམས་ལ་ནི། །གསང་ཆེན་ང་ཡིས་བསྟན་པ་འདི། །བློ་ལྡན་རྡོ་རྗེ་སེམས་ཀྱིས་ནི། །རྟག་ཏུ་བསྟེན་ཞིང་བསྒོམ་པར་བྱ། །འདོད་ཆགས་ཞེ་སྡང་དེ་བཞིན་རྨོངས། །སྲེད་དང་དེ་བཞིན་
རྣམ་སྤེལ་བའི། །ཆོས་ནི་རྣམ་པ་ལྔ་པོ་འདི། །ཐུབ་པ་སྐྱེས་མཆོག་རྣམས་ཀྱིས་གསུངས། །བཤང་གཅི་ཁུ་བ་མཆིལ་མ་ཁྲག །འཛག་པ་འབྱུང་བ་བཞིས་བསྡུས་པ། །བསྒོམ་པའི་བློ་གྲོས་རྫོགས་པ་ཡིས། །དམ་ཚིག་བསྟེན་
པར་བྱ་བ་སྟེ། །རྟག་ཏུ་བཟའ་ཞིང་བཏུང་བར་བྱ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་གྱི་དྲ་བ་ལས་འདི་ནི་སྦྱིན་སྲེག་རིམ་པར་ཕྱེ་བའི་ལེའུ་སྟེ་དགུ་པའོ།། །།  དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་རྡོ་རྗེའི་དེ་བཞིན་
གཤེགས་པས་ཏིང་ངེ་འཛིན་ཐམས་ཅད་ཀྱི་དངོས་གྲུབ་དམ་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་དམ་ཚིག་ཐམས་ཅད་ཀྱི་རྡོ་རྗེ་ཆེན་པོའི་མཆོག་དངོས་གྲུབ་འདི་བཀའ་སྩལ་ཏོ། །ལག་ན་རྡོ་རྗེ་གསང་སྔགས་བསྒོམ་པའི་
རྣལ་འབྱོར་གྱི་ཆོ་གས་ཡང་དག་པར་བསྐུལ་ནས་རྫས་ཐམས་ཅད་ཀྱི་དངོས་གྲུབ་བསྒྲུབ་པའི་ཐབས་གསང་ཆེན་འདི་ཉོན་ཅིག །རྣམ་པར་སྣང་མཛད་ཏིང་འཛིན་ལ། །གནས་ཤིང་སྐུ་གསུང་ཐུགས་བསྒོམས་ཏེ། །མདུན་དུ་འཁོར་ལོ་ལེགས་པར་བཞག །
སྐུ་གསུམ་རྡོ་རྗེ་ཅན་གྱི་གཟུགས། །འབར་བའི་ཕྲེང་བ་འཁྲུགས་པའི་འོད། །འཁོར་ལོའི་ནང་དུ་ཞུགས་གྱུར་པར། །བསྒོམ་ཞིང་འཁོར་ལོ་བསྒྲུབ་པར་བྱ། །མེ་ཡི་འོད་ལྟར་འབར་བའི་འོད། །འཁོར་ལོ་ཆེན་པོ་འཕགས་པར་འགྱུར། །སྤྱན་ནི་བཟླས་བརྗོད་བྱེད་

90-1-99b

བཞིན་དུ། །བླ་མེད་འཁོར་ལོ་བླང་བར་བྱ། །རྒྱལ་ཆེན་འཁོར་ལོ་དྲུག་པ་དག །འོད་ནི་རྣམ་པར་སྣང་མཛད་བཞིན། །ལན་གསུམ་འཇུག་པའི་སེམས་ཅན་ལ། །ཆོས་ཀྱི་འཁོར་ལོ་བསྐོར་བར་འགྱུར། །མི་འཁྲུགས་པར་ནི་རྣམ་བསྒོམ་ཞིང་། །རྡོ་རྗེ་
མདུན་དུ་བཞག་ནས་ནི། །རིམ་པ་བཞིན་དུ་བསྐུལ་ན་འདིས། །སྐུ་གསུམ་རྣམ་པར་འཕེལ་འགྱུར་ཞིང་། །འབར་བའི་ཕྲེང་ཆེན་མཉམ་པའི་འོད། །རྡོ་རྗེ་ཆེན་པོ་འཕགས་པར་འགྱུར། །མཱ་མ་ཀཱི་ནི་ཟློས་བཞིན་དུ། །རྡོ་རྗེ་བླ་མེད་བླང་བར་བྱ། །རྡོ་རྗེ་རྒྱལ་
པོ་བླངས་པ་ཡིས། །གཙོ་བོ་རྡོ་རྗེ་འཆང་གཉིས་འགྱུར། །གཙོ་བོ་ཆེན་པོ་སངས་རྒྱས་དང་། །བྱང་ཆུབ་སེམས་དཔའ་ཡོངས་བསྐོར་ནས། །སེམས་ཅན་ཀུན་སེམས་ལ་གནས་པའི། །ལག་ན་རྡོ་རྗེ་རྡོ་རྗེ་འཆང་། །འཇིག་རྟེན་
ཁམས་སུ་རྣམ་རྒྱུ་ཞིང་། །ཀུན་གྱི་བསམ་པ་ཡོངས་རྫོགས་བྱེད། །རིན་ཆེན་འབྱུང་བ་བསྒོམ་ན་ནི། །རིན་པོ་ཆེ་ནི་མདུན་བཞག་སྟེ། །སྦྱོར་བའི་རིམ་པས་རྣམ་སྤེལ་ན། །རིན་ཆེན་ཆེན་པོ་འཕགས་པར་འགྱུར། །རིན་ཆེན་སྒྲོལ་མ་ཟློས་བཞིན་
དུ། །འོད་བཟང་གཟི་བརྗིད་འབར་བ་ཅན། །ཕྱོགས་ཀུན་སྣང་བར་བྱེད་པ་ཡི། །ནོར་བུའི་རྒྱལ་པོ་བླང་བར་བྱ། །ལྷ་རྫས་ནོར་བུ་བླངས་པ་ཡིས། །རིན་ཆེན་འབྱུང་བ་གཉིས་པར་འགྱུར། །དེ་ནི་སེམས་ཅན་ཐམས་ཅད་ཀྱི། །
ཡིད་བཞིན་ནོར་བུ་རིན་ཆེན་བཞིན། །རིན་ཆེན་ཆར་པ་རབ་འབེབས་ཤིང་། །སེམས་ཅན་ཀུན་གྱི་དབུལ་བ་འཇོམས། །གཙོ་བོ་ཡིད་བཞིན་ནོར་བུ་ཅན། །སངས་རྒྱས་ཞིང་དུ་རྣམ་པར་རྒྱུ། །འོད་དཔག་མེད་པར་རྣམ་བསྒོམས་
ནས། །པད་མ་ཆེན་པོ་མདུན་བཞག་སྟེ། །རིམ་བཞིན་གཟི་བརྗིད་གཟེངས་བསྟོད་ན། །འདབ་མ་བྱེ་བས་རྣམ་བརྒྱན་པ། །འོད་བཟང་གསེར་ལྟར་འབར་བ་ཅན། །པད་མ་ཆེན་པོ་འཕགས་པར་འགྱུར། །གོས་དཀར་ཅན་
མའི་གསང་སྔགས་ཀྱིས། །ཡིད་ལས་བྱུང་བའི་པད་མ་བླང་། །པད་མའི་རྒྱལ་པོ་བླངས་པ་ཡིས། །འོད་དཔག་མེད་པ་གཉིས་པར་འགྱུར། །ཆོས་མཛད་རྣམས་ཀྱིས་ཐོག་འདྲེན་ཅིང་། །སེམས་ཅན་རྣམས་ལ་བདུད་རྩི་

90-1-100a

སྩོལ། །སངས་རྒྱས་ཞིང་རྣམ་སྣང་བྱེད་གཙོ། །བདེ་བ་ཅན་གྱི་རྒྱན་དུ་འགྱུར། །དོན་ཡོད་གྲུབ་པ་རྣམ་བསྒོམས་ནས། །རལ་གྲི་མདུན་དུ་རྣམ་བཞག་སྟེ། །རྣལ་འབྱོར་རིམ་པ་འདི་ཡིས་ནི། །བསྒོམ་པ་དེ་ཉིད་ཀྱིས་བསྐུལ་
ན། །རྡོ་རྗེ་འབར་བ་ལྟ་བུའི་འོད། །རལ་གྲི་ཆེན་པོ་འཕགས་པར་འགྱུར། །སྒྲོལ་མའི་གསང་སྔགས་ཟློས་བཞིན་དུ། །རལ་གྲི་བླ་མེད་བླང་བར་བྱ། །དེ་ནས་རལ་གྲི་མཆོག་བླངས་ནས། །དོན་ཡོད་གྲུབ་པ་གཉིས་པར་འགྱུར། །སངས་
རྒྱས་ཞིང་དུ་རྣམ་རྒྱུ་ཞིང་། །སེམས་ཅན་རྣམས་ཀྱིས་མི་ཤེས་གཅོད། །རྟག་ཏུ་དྲི་མེད་སྣང་གྱུར་ཏེ། །ཆུ་ཡི་ནང་གི་སྟོན་ཟླ་བཞིན། །རྫས་ཀྱི་དངོས་གྲུབ་བསྣན་ནས་ནི། །ཕྱག་རྒྱ་ཆེན་པོ་བསྒྲུབ་པར་བྱ། །རྣལ་འབྱོར་ཆེ་ལ་
རྣམ་གནས་པ། །དེ་བཞིན་གཤེགས་ཀྱི་བཙུན་མོ་ཆེ། །ཞེ་སྡང་རིགས་ནི་འདྲེན་མཛད་མ། །རྡོ་རྗེ་གདན་ཅན་མཱ་མ་ཀཱི། །རིན་ཆེན་འབྱུང་བའི་ལྷ་མོ་དང་། །ལྷ་མོ་འགྲོ་བ་དབང་མཛད་མ། །མཁའ་ལ་ལོངས་སྤྱོད་སྤྱོད་མཛད་མ། །
རིམ་པ་བཞིན་དུ་ང་ཡིས་བཤད། །དེ་ནས་བུ་མོ་མིག་ཡངས་མ། །ལོ་ནི་བཅུ་དྲུག་ལོན་པ་ལ། །གཟུགས་དང་མདངས་དང་ལང་ཚོར་ལྡན། །གསེར་གྱི་རྣ་ཆ་གཡོ་བ་ཅན། །གཅིག་ཅིག་བསྒྲིམས་ཏེ་བཙལ་ནས་སུ། །ལྷ་མོ་བྱི་དོར་
ལེགས་བྱས་ཏེ། །རིགས་ལྔ་ཡི་ནི་ཚོགས་ཅན་མ། །ལས་ཀྱི་རྗེས་སུ་བསྒོམས་བྱས་ནས། །བཞག་སྟེ་སྤྲད་པའི་སྦྱོར་བ་ཡིས། །པད་མ་ལ་ནི་རྡོ་རྗེ་གཞག །སྤྲད་པ་དང་ནི་འཁྱུད་པ་ཡིས། །རྡོ་རྗེ་དང་ནི་པད་མ་བསྐུལ། །གར་གྱི་ཚུལ་དུ་གྱུར་པ་དང་། །དེ་བཞིན་སྤྲོ་
དང་བསྡུ་བ་ཡི། །མོད་ལ་སྒྱུ་མའི་དྲེགས་མྱོས་ནས། །རྡོ་རྗེ་ལས་ནི་བདུད་རྩི་འབྱུང་། །རྣལ་འབྱོར་ལྡན་པའི་ཤེས་རབ་ལས། །པད་མ་ལ་གནས་བདུད་རྩི་བཏུང་། །རྣལ་འབྱོར་ལྡན་པའི་ཁ་ཡིས་ནི། །འཐུངས་པས་དེ་བཞིན་གཤེགས་
ལྔ་ཡི། །སྐུ་ནི་ཡོངས་སུ་འགྱུར་བ་འཐོབ། །ནམ་མཁའ་འདྲ་བའི་ཆོས་ཀུན་ལ། །ཐབས་དང་ཤེས་རབ་རྣམ་པར་འཕེལ། །འདི་ནི་སངས་རྒྱས་ཐམས་ཅད་ཀྱི། །སྐུ་ཡི་སྙིང་པོ་སྒྲུབ་པ་སྟེ། །འདོད་པའི་ཡོན་ཏན་རྗེས་འཇུག་པའི། །

90-1-100b

བྱང་ཆུབ་བདེ་བས་བསྒྲུབས་ན་ནི། །རྡོ་རྗེ་པད་མ་བྱིན་བརླབས་ནས། །རྗེས་སུ་ཆགས་པས་འཐོབ་པར་འགྱུར། །གྲུབ་ཆེན་གསང་བའི་དངོས་གྲུབ་ནི། །སྡུག་བསྔལ་མེད་པའི་བདེ་བའི་ཐབས། །རྗེས་སུ་ཆགས་པས་བདེ་བ་ཡི། །རྡོ་རྗེ་ཐེག་པས་མཉེས་
པར་འགྱུར། །སྦྱོར་བའི་ཁྱད་པར་འདི་ཡིས་ནི། །ལན་གསུམ་འཇུག་པའི་གསང་སྔགས་དང་། །ལམ་གྱི་ཕྱག་རྒྱ་ངས་བཤད་དོ། །དེ་དག་ལག་པའི་ཕྱག་རྒྱ་དག །ཡེ་ཤེས་ཕྱག་རྒྱ་རབ་བསྐུལ་བས། །དམ་ཚིག་མཆོག་གིས་འགྲུབ་པར་འགྱུར། །
ཐུབ་ཆེན་སྣ་ཚོགས་གཟུགས་མངའ་བ། །སྣ་ཚོགས་ཕྲིན་ལས་མཛད་པར་འགྱུར། །དེ་ནས་ཕྱག་ན་རྡོ་རྗེ་ཁམས་གསུམ་གྱི་དམ་ཚིག་གི་འཁོར་ལོ་འདི་ཉིད་ཀྱི་རྡོ་རྗེའི་སྐུ་དང་གསུང་དང་། ཐུགས་ལས་ཕྱུང་ངོ་། །ས་ནི་སྤྱན་དུ་བརྗོད་པ་སྟེ། །ཆུ་ཁམས་མཱ་མ་ཀཱི་ཞེས་
བཤད། །སྒྲོལ་མ་རླུང་ཞེས་ཀུན་དུ་བརྗོད། །གོས་དཀར་ཅན་མ་མེ་རུ་བསྒྲགས། །རྡོ་རྗེ་དམ་ཚིག་ནམ་མཁའི་དབྱིངས། །སྟོན་པ་རྡོ་རྗེ་འཆང་བཤད་ཅེས་དེ་བཞིན་གཤེགས་པ་ཐམས་ཅད་ཀྱི་སའི་དབང་ཕྱུག་བཅོམ་ལྡན་འདས་རྡོ་རྗེ་སེམས་དཔའ་
ཆེན་པོས་གསུངས་སོ། །དེ་ནས་བཅོམ་ལྡན་འདས་རྡོ་རྗེའི་དེ་བཞིན་གཤེགས་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྐུ་དང་གསུང་དང་ཐུགས་དེ་བཞིན་གཤེགས་པ་ཐམས་ཅད་དང་མཉམ་པ་ཉིད་དུ་གནས་པ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་ལ་རྣམ་པར་བལྟས་ནས་ཅང་མི་གསུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་དེ་བཞིན་གཤེགས་པ་ཐམས་ཅད་ལ་
ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྐུ་དང་གསུང་དང་ཐུགས་གསང་བ་འདུས་པར་དབང་བསྐུར་བའི་སློབ་དཔོན་དེ་ལ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་
ཐམས་ཅད་ཀྱིས་ཅི་ལྟར་བལྟ་བར་བགྱི་ལགས། རིགས་ཀྱི་བུ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཆེན་པོ་ཐམས་ཅད་ཀྱིས་འདི་ནི་རྡོ་རྗེའི་བྱང་ཆུབ་ཀྱི་སེམས་སུ་བལྟ་བར་བྱའོ། །དེ་ཅིའི་ཕྱིར་ཞེ་ན། བྱང་ཆུབ་ཀྱི་སེམས་དང་རྡོ་རྗེ་

90-1-101a

སློབ་དཔོན་འདི་གཉིས་གཉིས་སུ་བྱར་མེད་པའི་ཕྱིར་ཞེས་བྱ་བའི་བར་ནས་རིགས་ཀྱི་བུ་མདོར་བསྡུས་ནས་ཡང་བཤད་པར་བྱའོ། །ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་དང་བྱང་ཆུབ་སེམས་དཔའ་བཞུགས་ཤིང་གཞེས་
པའི་བར་དེ་དག་ཐམས་ཅད་དུས་གསུམ་དུ་བྱོན་ནས། སློབ་དཔོན་ལ་དེ་བཞིན་གཤེགས་པ་ཐམས་ཅད་ཀྱིས་མཆོད་པས་མངོན་པར་མཆོད་ནས་འདི་སྐད་ཅེས་བདག་ཅག་དེ་བཞིན་གཤེགས་པ་ཐམས་ཅད་ཀྱི་ཕ་ཡིན་ནོ། །བདག་ཅག་དེ་བཞིན་
གཤེགས་པ་ཐམས་ཅད་ཀྱི་མ་ཡིན་ནོ། །བདག་ཅག་དེ་བཞིན་གཤེགས་པ་ཐམས་ཅད་ཀྱི་སྟོན་པ་ཡིན་ནོ། །ཞེས་རྡོ་རྗེའི་ཡི་གེ་གསུམ་ཕྱུང་བ་ནས་སླར་ཡང་རང་རང་གི་སངས་རྒྱས་ཀྱི་ཞིང་དུ་གཤེགས་པར་འགྱུར་རོ། །རིགས་ཀྱི་བུ་
དཔེར་ན་སངས་རྒྱས་བཅོམ་ལྡན་འདས་ཕྱོགས་བཅུ་ན་བཞུགས་པའི་བར་དེ་དག་གིས་སངས་རྒྱས་བཅོམ་ལྡན་འདས་རྣམས་ཀྱི་རྡོ་རྗེའི་སྐུ་དང་གསུང་དང་ཐུགས་ཀྱི་བསོད་ནམས་ཀྱི་ཕུང་པོ་བས་ནི་རྡོ་རྗེ་སློབ་དཔོན་དེའི་སྤུའི་ཁུང་བུ་
གཅིག་གི་བསོད་ནམས་ཀྱི་ཕུང་པོ་ཆེས་ཁྱད་པར་དུ་འཕགས་སོ། །དེ་ཅིའི་ཕྱིར་ཞེ་ན། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྙིང་པོར་གྱུར་པའི་བར་ནས་ཐམས་ཅད་མཁྱེན་པའི་ཡེ་ཤེས་ཀྱི་འབྱུང་གནས་
ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་འཇིགས་ཤིང་སྐྲག་པའི་ཡིད་ཀྱིས་ཅང་མི་སྨྲ་བར་གྱུར་ཏོ། །དེ་ནས་ཡང་དེ་བཞིན་གཤེགས་པ་མི་འཁྲུགས་པ་དང་། རིན་ཆེན་འབྱུང་གནས་དང་། དོན་
ཡོད་གྲུབ་པ་དང་། དེ་བཞིན་གཤེགས་པ་འོད་དཔག་མེད་དང་། དེ་བཞིན་གཤེགས་པ་རྣམ་པར་སྣང་མཛད་རྣམས་རྡོ་རྗེ་འཆང་ཐམས་ཅད་ཀྱི་དངོས་གྲུབ་ཀྱི་དམ་ཚིག་ལ་དམིགས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། 
བྱང་ཆུབ་སེམས་དཔའ་དེ་དག་ལ་བོས་ནས་ཤེས་ལྡན་བྱང་ཆུབ་སེམས་དཔའ་ཐམས་ཅད་ཉོན་ཅིག །ཕྱོགས་བཅུ་དུས་གསུམ་དུ་བྱུང་བའི་སངས་རྒྱས་བཅོམ་ལྡན་འདས་རྣམས་རྡོ་རྗེ་སློབ་དཔོན་གྱི་དྲུང་དུ་བྱོན་ནས་མཆོད་པར་མཛད་ཅིང་ཕྱག་འཚལ་བར་

90-1-101b

བརྗོད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱི་སྟོན་པ་ཡིན་པ་དང་། བཅོམ་ལྡན་འདས་རྡོ་རྗེ་འཆང་དེ་ཉིད་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བདག་པོ་ཡིན་པའི་ཕྱིར་རོ། །
དེ་ནས་བྱང་ཆུབ་སེམས་དཔའ་དེ་དག་གིས་དེ་བཞིན་གཤེགས་པ་དེ་དག་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྐུ་དང་གསུང་དང་ཐུགས་ཀྱི་དངོས་གྲུབ་གང་ལ་གནས། དེ་བཞིན་གཤེགས་
པ་ཐམས་ཅད་ཀྱིས་བཀའ་སྩལ་པ། རྡོ་རྗེའི་སྐུ་དང་གསུང་དང་ཐུགས་ཀྱི་གསང་བ་གསུམ་ནི་རྡོ་རྗེ་སློབ་དཔོན་གྱི་ལུས་དང་ངག་དང་ཡིད་ལ་གནས་སོ། །བྱང་ཆུབ་སེམས་དཔའ་ཐམས་ཅད་ཀྱིས་གསོལ་པ། རྡོ་རྗེ་སློབ་དཔོན་གྱི་ལུས་དང་
ངག་དང་སེམས་ཀྱི་གསང་བ་གང་ལ་གནས། ནམ་མཁའ་ལ་གནས། ནམ་མཁའ་གང་ལ་གནས། རྡོ་རྗེ་སློབ་དཔོན་གྱི་སེམས་ལ་གནས། སེམས་གང་ལ་གནས། གང་དུ་ཡང་མ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ངོ་མཚར་དུ་
གྱུར་ནས་ཅང་མི་ཟེར་བར་འཁོད་དོ། །དཀྱིལ་འཁོར་དང་། ཏིང་ངེ་འཛིན་དང་། ཕྱག་རྒྱ་དང་སྟང་སྟབས་དང་། འདུག་སྟངས་དང་། བཟླས་བརྗོད་དང་། སྦྱིན་སྲེག་དང་། མཆོད་པ་དང་ལས་ལ་སྦྱར་བ་དང་སླར་བསྡུ་བ་རྣམས་ནི་གསང་སྔགས་ཀྱི་ཚུལ་དེ་ཁོ་ན་ཉིད་བཅུ་
ཡིན་པར་གསུངས་སོ། །དུས་གསུམ་དུ་འབྱུང་བའི་རྒྱལ་བ་ཐུགས་རྗེའི་རོ་གཅིག་པ་རྣམས་ཀྱི་གསང་བ་དང་གསང་ཆེན་དང་ཡེ་ཤེས་རྣམ་པ་གསུམ་གྱི་སྙིང་པོ་བསྟན་པ་དག་ནི་སློབ་དཔོན་གྱི་ཁ་ནས་བླ་མ་ལ་གུས་པའི་སློབ་མས་ཤེས་
པར་བྱའོ། །བླ་མས་དམ་ཚིག་ཅི་ལྟར་ལྟ་བ་བཞིན་གྱི་དབང་དུ་བྱས་ནས་བཤད་པར་བྱའོ། །བསྒྲིམས་ནས་སེམས་ཅན་རྣམས་ལ་རྣལ་འབྱོར་དང་། རྣལ་འབྱོར་ཆེན་པོ་དང་། ལྷག་པའི་རྣལ་འབྱོར་རྣམས་གོ་རིམས་བཞིན་བཤད་པར་བྱའོ། །
འདི་མཐའ་དག་ནི་རྒྱུད་ཐམས་ཅད་ཀྱི་སྤྱིར་ཤེས་པར་བྱའོ། །དེ་ཁོ་ན་ཉིད་ཀྱི་དངོས་པོ་མཐའ་དག་ཡོངས་སུ་མི་ཤེས་པར་གསང་སྔགས་སྨྲ་བ་ང་ཡིན་ནོ་ཞེས་མངོན་པའི་ང་རྒྱལ་གྱིས་གསང་སྔགས་ཀྱི་ཆོ་ག་འཆད་པར་བྱེད་ན་དམ་ཚིག་ཐམས་ཅད་

90-1-102a

ཉམས་པར་འགྱུར་རོ། །དམ་ཚིག་ལས་ཉམས་ན་བདུད་ཀྱིས་གཟུང་བར་འགྱུར་རོ། །སྐྱེས་བུ་ཤི་ནས་དམྱལ་བའི་གནས་མི་བཟོད་པ་ཆེན་པོར་འགྲོ་བར་འགྱུར་རོ། །སེམས་ཅན་རྣམས་ལ་བརྟེན་ཏེ་བྱང་ཆུབ་ཐོབ་པར་འགྱུར་བས་སེམས་ཅན་
ལ་བསླུ་བར་མི་བྱའོ། །ཞེས་ཤེས་པར་བྱས་ནས་དེ་བཞིན་གཤེགས་པའི་ལམ་དེ་ཉིད་ལ་སེམས་ཅན་དེ་དག་སྦྱར་བར་བྱའོ། །གང་ཞིག་འདི་ལ་བརྩོན་པར་མ་བྱས་པ་དེ་དག་གིས་ནི་ལག་པ་དང་རྐང་པ་དང་། མིག་སྦྱིན་པའི་དཀའ་བ་སྤྱད་པ་དང་། དཀའ་
ཐུབ་ཅི་ལྟ་བུས་ཀྱང་སྡིག་པ་གཞོམ་པའམ། བདུད་རྩིའི་རོ་ཐོབ་པར་མི་ནུས་སོ། །རྣལ་འབྱོར་གཅིག་ཁོང་དུ་ཆུད་ནས་དབེན་པར་སོང་སྟེ། བསྒོམ་པ་བྱས་ན་སྡིག་པ་ལས་གྲོལ་ཞིང་ཚེ་འདི་ཉིད་ལ་སངས་རྒྱས་ཀྱི་ཡོན་ཏན་རྣམས་དང་། ཆོས་བདག་མེད་པར་
བསྒོམས་པས་ཐམས་ཅད་མཁྱེན་པའི་རྣལ་འབྱོར་ཁོང་དུ་ཆུད་པར་བྱའོ། །ཤེས་རབ་དང་ཡེ་ཤེས་ཀྱི་འཇོ་ཚུལ་གྱིས་གསང་བ་ལྔའི་བདག་ཉིད་ཀྱི་གཙོ་བོ་ལ་མཆོད་པར་བྱའོ། །དངོས་པོ་ཐམས་ཅད་དངོས་མེད་པར། །བཞི་བཅུའི་
དོན་ནི་རྟོག་པ་དང་། །རྡོ་རྗེ་པད་མས་དབང་བསྐུར་བས། །བདུད་རྩི་ལྔས་ནི་དགའ་བར་བྱེད། །གསང་བར་བྱ་བའི་ཆོས་གསང་བ། །གསང་ཞིང་སྦས་ཏེ་གཞག་པར་བྱ། །འདོད་ཡོན་ལྔ་ཡི་རྣམ་པ་ནི། །གཟུགས་སྒྲ་དྲི་རོ་རེག་བྱ་སོགས། །
རྣལ་འབྱོར་སེམས་དཔའ་སྤྱད་བྱ་ཞིང་། །དེ་བཞིན་བཟའ་དང་བཏུང་བྱས་ན། །བལྟས་དང་ཁུ་ཚུར་རྣམ་པ་ཡིས། །སེམས་ཅན་ཐམས་ཅད་དབང་དུ་བྱེད། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ལས་ཆོ་ག་ཐམས་ཅད་བསྟན་པ་རིམ་པར་
ཕྱེ་བ་སྟེ་བཅུ་པའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ལྷ་དང་མི་དང་ལྷ་མ་ཡིན་དང་དྲི་ཟ་དང་། ཐམས་ཅད་དང་ལྡན་པའི་འཁོར་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་
བསྟོད་དོ། །རྒྱུད་ཀྱི་རྒྱལ་པོ་ཆེན་པོ་སྒྱུ་འཕྲུལ་དྲ་བ་ཐེག་པ་ཆེན་པོའི་ཡང་ཐེག་པ་ཆེན་པོའི་ཚུལ་ཟབ་མོ་གསང་བ་བས་ཀྱང་ཆེས་གསང་བ་ཆེན་པོ་རྫོགས་སོ།། །།ཞུ་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།

90-1-102b

༄༅། །རྒྱ་གར་སྐད་དུ།  སརྦྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏ་ཏ་ཀྲྀཥྞ་ཡ་མཱ་རི་ནཱ་མ་ཏན་ཏྲ།  བོད་སྐད་དུ།  དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་ནག་པོ་ཞེས་བྱ་བའི་རྒྱུད། འཕགས་པ་འཇམ་དཔལ་
གཤིན་རྗེའི་གཤེད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བཙུན་མོ་ཐམས་ཅད་ཀྱི་བྷ་ག་རྣམས་ལ་བཞུགས་ཏེ། གཏི་མུག་རྡོ་རྗེ་གཤིན་
རྗེའི་གཤེད་དང་ཕྲ་མ་རྡོ་རྗེ་གཤིན་རྗེའི་གཤེད་དང་། འདོད་ཆགས་རྡོ་རྗེ་གཤིན་རྗེའི་གཤེད་དང་། ཕྲག་དོག་རྡོ་རྗེ་གཤིན་རྗེའི་གཤེད་དང་། ཞེ་སྡང་རྡོ་རྗེ་གཤིན་རྗེའི་གཤེད་དང་། ཐོ་བ་གཤིན་རྗེའི་གཤེད་དང་། དབྱུག་པ་གཤིན་རྗེའི་གཤེད་དང་། པད་མ་གཤིན་
རྗེའི་གཤེད་དང་། རལ་གྲི་གཤིན་རྗེའི་གཤེད་དང་། མཚམས་རྣམས་སུ་རྡོ་རྗེ་ཙར་ཙི་ཀཱ་དང་། རྡོ་རྗེ་ཕག་མོ་དང་། རྡོ་རྗེ་དབྱངས་ཅན་མ་དང་། རྡོ་རྗེ་གཽ་རཱི་མ་རྣམས་མཚམས་སུའོ། །དེ་དག་ལ་སོགས་ཏེ་གཤིན་རྗེའི་གཤེད་ཀྱི་ཚོགས་ཆེན་པོ་དང་། 
ཐབས་ཅིག་ཏུ་བཞུགས་སོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་བདག་པོ་ལ་གསོལ་བ་བཏབ་པ་དང་། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་བདུད་ཐམས་
ཅད་རྣམ་པར་འཇོམས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་འདི་ཉིད་ཀྱི་སྐུ་གསུང་ཐུགས་རྡོ་རྗེ་ལས་ངེས་པར་བཏོན་ཏོ། །ཟླ་བ་རྡོ་རྗེ་སྦྱོར་བ་ཡིས། །གཤིན་རྗེ་མཐར་བྱེད་བསྒོམ་པར་བྱ། །བདུད་རྣམས་ཞི་བར་བྱ་ཕྱིར་དང་། །ཞེ་སྡང་ཐམས་ཅད་བསལ་
བའི་ཕྱིར། །འོད་ཟེར་ལྔ་ཡིས་འཁྲིགས་པ་ཡིས། །རྡོ་རྗེ་བསྲུང་བའི་དོན་དུ་བསྒོམ། །ཕྱི་མཚམས་རྡོ་རྗེ་ས་གཞི་དང་། །ར་བ་དྲ་བ་དེ་བཞིན་ནོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྐྱེད་པ་པོ་བདུད་འདུལ་བ་
ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གཏི་མུག་རྡོ་རྗེ་གཤིན་རྗེའི་གཤེད་ལ་སོགས་པ་ཐམས་ཅད་ཀྱི་ས་བོན་འདི་ཉིད་ཀྱི་སྐུ་གསུང་ཐུགས་རྡོ་རྗེ་རྣམས་ལ་ངེས་པར་ཕྱུང་བ། དབུས་སུ་ཡ་ད་ཀྵེ་མ་མེ་ད་ཡཙྪ་ནི་

90-1-103a

རཱ་ཛཱ་ས་དོ་རུ་ཎ་ཡོ་ནི་རའོ། །ཡ་སོགས་ཡི་གེ་དང་པོ་ལས། །གཤིན་རྗེའི་གཤེད་དུ་གྱུར་པ་ཡིན། །ཡི་གེ་ཀྵེ་ནི་གཏི་མུག་བརྗོད། །ཡི་གེ་མ་ནི་ཕྲ་མར་གསུངས། །ཡི་གེ་མེ་ནི་འདོད་ཆགས་ཉིད། །
ཡི་གེ་དེ་ནི་ཕྲག་དོག་འགྱུར། །གཤིན་རྗེའི་གཤེད་སོགས་ལྔ་རུ་གྲགས། །ཡི་གེ་ཡ་ལས་ཐོ་བར་འགྱུར། །ཡི་གེ་ཙྪ་ལས་དབྱུག་པའི་གཙོ། །ལག་ན་པད་མ་ནི་ཡིག་ལས། །ལག་ན་རལ་གྲི་རཱ་ལས་ཡིན། །ཛཱ་ལས་ཙར་
ཙི་ཀཱ་ཞེས་བརྗོད། །ཡི་གེ་ས་ལས་ཕག་གདོང་མ། །ཡི་གེ་དོ་ལས་དབྱངས་ཅན་བསྒྲགས། །ཡི་གེ་རུ་ལས་གཽ་རཱི་དྲན། །ཎ་ཡོ་ནི་ར་མཚམས་ཀྱི་བཞི། །ཐོད་པ་བཞི་རུ་འདོད་པ་ཡིན། །སྣ་ཚོགས་རྡོ་རྗེ་འཇིགས་རུང་བ། །
ནམ་མཁའ་རྡོ་རྗེའི་དཀྱིལ་དུ་བསམ། །དེ་དཀྱིལ་བཞུགས་པ་གཤིན་རྗེའི་གཤེད། །གནག་ཅིང་འབར་བ་བསྒོམ་པར་བྱ། །ཤར་དུ་གཏི་མུག་རྡོ་རྗེ་སྟེ། །ལྷོ་རུ་དེ་བཞིན་ཕྲ་མ་ཡིན། །ནུབ་ཏུ་འདོད་ཆགས་རྡོ་རྗེ་སྟེ། །དེ་བཞིན་བྱང་དུ་
ཕྲག་དོག་གོ། མཚམས་ཀྱི་རྡོ་རྗེ་རྩེ་བཞི་ལ། །ཙར་ཙི་ཀཱ་སོགས་རྣམ་པར་བསྒོམ། །སྒོ་ཡི་རྡོ་རྗེ་རྩེ་བཞི་ལ། །ཐོ་བ་ལ་སོགས་རྣམ་པར་བསྒོམ། །སྣ་ཚོགས་རྡོ་རྗེའི་མཚམས་བཞི་རུ། །མི་ཡི་མགོ་བོ་བཞི་དག་གོ །
དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་གཤིན་རྗེའི་གཤེད་པོ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེ་སྡང་ཆེན་པོའི་རིགས་ཀྱི་སྔགས་གསུངས་པ། ཨོཾ་ཧྲཱིཿ
ཥྚྲི་ཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་གཏི་མུག་རྡོ་རྗེ་ཆེན་པོའི་སྔགས་གསུངས་པ། ཨོཾ་ཛཱི་ན་ཛཱིཀ ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་
ཀྱི་བདག་པོས་ཕྲ་མ་རྡོ་རྗེའི་སྔགས་གསུངས་པ། །ཨོཾ་རཏྣ་ཀ ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་འདོད་ཆགས་རྡོ་རྗེའི་སྔགས་གསུངས་པ། ཨོཾ་ཨཱ་རོ་ལཱིཀ །

90-1-103b

དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ཕྲག་དོག་རྡོ་རྗེའི་སྔགས་གསུངས་པ། ཨོྂ་པྲཛྙཱ་དྷྲཱྀཀ ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་ཐོ་བའི་སྔགས་གསུངས་
པ། ཨོཾ་མུད་གར་དྷྲཱྀཀ ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་དབྱུག་པའི་སྔགས་གསུངས་པ། ཨོཾ་དཎ་ཊ་དྷྲཱྀཀ ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་
ཀྱི་བདག་པོས་རྡོ་རྗེ་པད་མའི་སྔགས་གསུངས་པ། ཨོཾ་པད་མ་དྷྲཱྀཀ ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་རལ་གྲིའི་སྔགས་གསུངས་པ། ཨོཾ་ཁ་ཊ་གདྷྲཱྀཀ ། དེ་ནས་བཅོམ་ལྡན་
འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་ཙར་ཙི་ཀཱའི་སྔགས་གསུངས་པ། ཨོཾ་མོ་ཧ་ར་ཏི། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་ཕག་མོའི་སྔགས་གསུངས་པ། ཨོཾ་དྭེ་ཥ་ར་ཏི། 
དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་དབྱངས་ཅན་མའི་སྔགས་གསུངས་པ། ཨོཾ་རཱ་ག་ར་ཏི། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རྡོ་རྗེ་གཽ་རཱི་མའི་སྔགས་
གསུངས་པ། ཨོཾ་བཛྲ་ར་ཏི། དེ་ནས་དེ་བཞིན་གཤེགས་པ་ཐམས་ཅད་ཀྱི་བདག་པོས་སྐུ་གསུང་ཐུགས་བྱིན་གྱིས་བརླབ་པའི་སྔགས་གསུངས་པ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་བ་ཨཱཏ་མ་ཀོ྅ཧྂ། ཨོཾ་སརྦ་
ཏ་ཐཱ་ག་ཏོ་ཝཱཀ་བཛྲ་སྭ་བྷཱ་བ་ཨཱཏ་མ་ཀོ྅ཧྂ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་བ་ཨཱཏ་མ་ཀོ྅ཧྂ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ཞེ་སྡང་ཆེན་པོའི་སྐུ་ངེས་པར་བསྟན་པ། ཞལ་གསུམ་ཕྱག་
དྲུག་ཁྲོས་པ་ལ། །ཨིན་དྲ་ནཱི་ལ་འདྲ་བའི་མདོག །ཕྱག་ན་རྡོ་རྗེ་བསྣམས་པ་ཉིད། །གཤིན་རྗེའི་གཤེད་ནི་བསྒོམ་པར་བྱ། །ཞལ་གསུམ་ཕྱག་དྲུག་ཞི་བ་ལ། །གསལ་བའི་གཟུགས་དང་འདྲ་བའི་འོད། །ཕྱག་ན་འཁོར་ལོ་

90-1-104a

བསྣམས་པ་ཉིད། །གཏི་མུག་རྡོ་རྗེ་རྣམ་བསྒོམ་བྱ། །ཞལ་གསུམ་ཕྱག་དྲུག་རྒྱས་གྱུར་པ། །གསེར་གྱི་རྣམ་པའི་འོད་དང་ལྡན། །ཕྱག་ན་རྡོ་རྗེ་བསྣམས་པ་ཉིད། །ཕྲ་མ་རྡོ་རྗེ་རྣམ་བསྒོམ་བྱ། །ཞལ་
གསུམ་ཕྱག་དྲུག་དབང་བྱེད་པ། །པད་མ་རཱ་ག་མཚུངས་པའི་འོད། །ཕྱག་ན་པད་མ་བསྣམས་པ་ཉིད། །འདོད་ཆགས་རྡོ་རྗེ་རྣམ་བསྒོམ་བྱ། །ཞལ་གསུམ་ཕྱག་དྲུག་ཐམས་ཅད་ལ། །རིན་ཆེན་མར་གད་འོད་དང་ལྡན། །ཕྱག་ན་
ཤུབས་ཅན་བསྣམས་པ་ཉིད། །ཕྲག་དོག་རྡོ་རྗེ་རྣམ་བསྒོམ་བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་མངོན་པར་རྟོགས་པའི་རིམ་པར་ཕྱེ་བ་སྟེ་ལེའུ་དང་པོའོ།། །། 
དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བཅོམ་ལྡན་འདས་རྡོ་རྗེ་སེམས་དཔའ་ཆེན་པོ་ལ་བསྟོད་པ། གཤིན་རྗེའི་གཤེད་པོ་རབ་འཇིགས་པ། །གཏི་མུག་རྡོ་རྗེའི་ངོ་བོ་ཁྱོད། །སྟོན་པ་སངས་རྒྱས་ཀུན་རང་བཞིན། །
རྡོ་རྗེ་སྐུ་ལ་ཕྱག་འཚལ་བསྟོད། །གཤིན་རྗེའི་གཤེད་པོ་རབ་འཇིགས་པའི། །ཕྲ་མ་རྡོ་རྗེའི་ངོ་བོ་ཁྱོད། །རྡོ་རྗེ་ཐུགས་དང་རབ་མཚུངས་པ། །རྡོ་རྗེ་རིན་ཆེན་ཕྱག་འཚལ་བསྟོད། །འདོད་ཆགས་རྡོ་རྗེའི་ངོ་བོ་ཁྱོད། །གཤིན་རྗེའི་གཤེད་
པོ་རབ་འཇིགས་པ། །རྡོ་རྗེ་གསུང་དང་རབ་མཚུངས་པ། །རྡོ་རྗེ་གསུང་ལ་ཕྱག་འཚལ་བསྟོད། །ཕྲག་དོག་ངོ་བོའི་རང་བཞིན་ཁྱོད། །གཤིན་རྗེའི་གཤེད་པོ་ལས་ཀུན་པ། །རྡོ་རྗེ་ཆགས་དང་རབ་ཏུ་མཚུངས། །ཕྱག་ན་རལ་གྲི་ཕྱག་
འཚལ་བསྟོད། །སངས་རྒྱས་ཀུན་གྱི་དངོས་པོ་ཁྱོད། །སངས་རྒྱས་ཐམས་ཅད་གཅིག་བསྡུས་པས། །སངས་རྒྱས་ཀུན་མཆོག་གཙོ་བོའི་གཙོ། །དཀྱིལ་འཁོར་གཙོ་ལ་ཕྱག་འཚལ་བསྟོད། །རྡོ་རྗེ་མིག་དང་རྡོ་རྗེ་རྣ་བ་དང་རྡོ་རྗེ་སྣ་
དང་རྡོ་རྗེ་ལྕེ་དང་རྡོ་རྗེ་ལུས་དང་རྡོ་རྗེ་ཐུགས་ཞེས་བཅོམ་ལྡན་འདས་ཀྱིས་གསུངས་པ་ནི་མིག་ལ་སོགས་པ་བྱིན་གྱིས་བརླབ་པའི་ཆོ་གའོ། །དེ་ནས་ཡང་དག་བཤད་བྱ་བ། །འདོད་པའི་དོན་གྲུབ་སྒྲུབ་བྱེད་པའི། །གཤིན་རྗེའི་གཤེད་

90-1-104b

པོ་ཉིད་མཚུངས་པ། །གཤིན་རྗེའི་འཇིགས་པའི་དཀྱིལ་འཁོར་ལོ། །སྐུད་པ་གསར་པ་ལེགས་བསྒྲིམས་ལ། །ལེགས་པའི་ཚད་ལ་མཛེས་པ་ཡིས། །སྐུད་པ་བྱས་པས་ཐིག་གདབ་བོ། །གཤིན་རྗེའི་ཚོགས་ཀྱི་དཀྱིལ་འཁོར་ལོ། །
མཚན་རྣམས་ཐམས་ཅད་རབ་རྫོགས་ཤིང་། །བར་ཆད་ཐམས་ཅད་རབ་ཉམ་པ། །ཞི་བ་ལ་སོགས་རབ་འཇུག་པའི། །དཀྱིལ་འཁོར་འཁོར་ལོའི་ཆ་བྱད་ལ། །རྩེ་མོ་ལྔ་དང་མཉམ་ལྡན་པའི། །ལས་ཀྱི་རྡོ་རྗེ་དེ་ལ་བྲི། །རྡོ་རྗེ་འབར་
བ་འཁྲིགས་པ་ཡི། །རྡོ་རྗེ་དེ་ཡི་དབུས་སུ་བྲི། །རལ་གྲི་བྱང་གི་ཕྱོགས་སུ་བྲི། །འཁོར་ལོའི་འོད་ཀྱིས་བསྐོར་བ་ཡི། །འཁོར་ལོ་ཤར་གྱི་ཕྱོགས་སུ་བྲི། །འོད་ཀྱི་ཕྲེང་བ་མཉམ་འཕྲོ་བའི། །རིན་པོ་ཆེ་ནི་ལྷོ་རུ་བྲི། །པད་མ་རཱ་གའི་
མདངས་འདྲའི་འོད། །པད་མ་ནུབ་ཀྱི་ཕྱོགས་སུ་བྲི། །འོད་ཟེར་ལྔ་དང་མཉམ་ལྡན་པའི། །ཤར་གྱི་མཚམས་སུ་འཁོར་ལོ་བྲི། །ལྷོ་རུ་རྡོ་རྗེ་བྲི་བར་བྱ། །ནུབ་དུ་པད་མའི་མེ་ཏོག་ནི། །ཡུ་བ་དང་བཅས་ཁ་བྱེ་གསལ། །འོད་ཀྱི་
ཕྲེང་བ་མཉམ་འཕྲོ་བའི། །ཨུཏ་པལ་ནི་བྱང་ནུབ་བྲི། །ཤར་གྱི་སྒོར་ནི་ཐོ་བ་སྟེ། །དབྱིག་པ་དེ་བཞིན་ལྷོ་ཡི་སྒོར། །འདམ་ལས་སྐྱེས་པ་ནུབ་ཀྱི་སྒོར། །བྱང་དུ་རྡོ་རྗེ་རལ་གྲིའོ། །ཤེས་པས་དཀྱིལ་འཁོར་རྫོགས་པ་ལ། །
མཆོད་པ་ཁྱད་པར་འཕགས་པ་ནི། །འདོད་པའི་ཡོན་ཏན་ལྔ་དག་གིས། །འཇིགས་པ་མེད་པར་མངོན་པར་མཆོད། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་དཀྱིལ་
འཁོར་ཆེན་པོའི་རིམ་པར་ཕྱེ་བ་སྟེ་ལེའུ་གཉིས་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བསྟོད་པའི་རྒྱལ་པོ་འདིས་བསྟོད་ནས་གསོལ་བ་བཏབ་པ། སྡིག་པ་ཐམས་ཅད་འཇོམས་
པ་ཡི། །འཇིགས་པའི་གཤིན་རྗེ་འཇོམས་དཀྱིལ་འཁོར། །དཀྱིལ་འཁོར་ཐམས་ཅད་ཀྱི་གཙོ་བོ། །མགོན་པོ་དཀྱིལ་འཁོར་བྲི་བར་མཛོད། །དེ་ནས་བཅོམ་ལྡན་འདས་རྡོ་རྗེ་འཛིན་ཆེན་པོས་ཉིད་ཀྱི་སྐུ་གསུང་ཐུགས་རྣམས་ལས་

90-1-105a

བདུད་རྩི་མྱང་བའི་ཆོ་ག་ངེས་པར་ཕྱུང་བ། ཨོཾ་ཨཱཿཧཱུྂ། རྡོ་རྗེ་མེ་ལྕེ་སྦྱོར་བ་ཡིས། །རྡོ་རྗེ་ཅན་ཀུན་མཉེས་པ་དང་། །རྫོགས་པའི་སངས་རྒྱས་ཐམས་ཅད་བཞུགས། །ཡེ་ཤེས་འབྱུང་གནས་ངོ་བོ་ཉིད། །དགུག་པ་དང་
ནི་གཞུག་པ་དང་། །བཅིང་དང་དེ་བཞིན་དབང་བྱ་ཉིད། །ཐོ་བ་ལ་སོགས་སྔགས་བཞི་ཡིས། །མཉམ་པར་བཞག་པས་རྣམ་པར་བསྒོམ། །མ་ཧེ་རྡོ་རྗེ་རྣམ་བསྒོམས་ལ། །དཀྱིལ་འཁོར་གཙོ་བོ་རྣམ་བསྒོམ་བྱ། །ཟླ་བའི་དཀྱིལ་
འཁོར་དབུས་གནས་པར། །གཏི་མུག་རྡོ་རྗེ་རྣམ་བསྒོམ་བྱ། །རྟ་བདུན་ལྡན་པའི་དབུས་གནས་པ། །ཕྲ་མ་ཞེས་བྱ་རྣམ་བསམ་བྱ། །དཀྱིལ་འཁོར་དམ་པའི་དབུས་གནས་པ། །འདོད་ཆགས་རྡོ་རྗེ་རྣམ་བསྒོམ་བྱ། །ལས་ཀྱི་དཀྱིལ་འཁོར་དབུས་
གནས་པ། །རྡོ་རྗེ་ལས་ནི་བསྒོམ་པར་བྱ། །ཞི་བའི་གཏི་མུག་རྡོ་རྗེ་སྟེ། །རྒྱས་པ་དེ་བཞིན་ཕྲ་མ་ཡིན། །འདོད་ཆགས་རྡོ་རྗེ་དབང་དུ་བྱས། །རྡོ་རྗེ་ལས་ཀྱིས་ཐམས་ཅད་དུའོ། །རྡོ་རྗེ་ལས་ཀྱི་སྦྱོར་བ་ཡིས། །མི་ཚིལ་མི་ཡི་ཐོད་པར་བཞག །
དེ་བཞིན་མི་སྐྲས་སྡོང་བུ་བྱ། །དུར་ཁྲོད་དག་དུ་དུ་བ་བསྒྲུབ། །མིག་སྨན་དག་ནི་དེ་བཞིན་དུ། །མིག་སྨན་ལས་ཀྱི་བསྒོམ་པ་དང་། །ལས་ཀྱི་བཟླས་པའི་སྦྱོར་བ་ཡིས། །མིག་སྨན་འདི་ནི་འགྲུབ་པར་འགྱུར། །ཁྲག་དང་གུར་གུམ་གཟུང་བྱས་
ནས། །སྒྲུབ་པ་བྱུག་པ་བསྒྲུབ་པར་བྱ། །ལས་ཀྱི་རྡོ་རྗེ་སྦྱོར་བ་ཡིས། །རྐང་མགྱོགས་དག་ནི་འགྲུབ་པར་འགྱུར། །བདུད་རྩི་ལྔ་ནི་མཉམ་པ་ལ། །ཤ་ལྔ་དང་ནི་ལྡན་པ་ཡིས། །ལྕགས་གསུམ་དུ་ནི་བཅུག་བྱས་ན། །ལས་ཀྱི་སྦྱོར་བས་
འགྲུབ་པར་འགྱུར། །ཀན་ཏའི་ལྕགས་ཀྱི་རལ་གྲི་ནི། །ལས་ཀྱི་སྦྱོར་བ་བསྒྲུབ་པར་བྱ། །ལས་ཀྱི་རྡོ་རྗེ་སྦྱོར་བ་ཡིས། །ལས་ཀྱི་རལ་གྲི་རབ་འགྲུབ་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་
རྒྱུད་ལས་ལས་ཀྱི་རིམ་པར་ཕྱེ་བ་སྟེ་ལེའུ་གསུམ་པའོ།། །། དེ་ནས་དེ་བཞིན་གཤེགས་པ་ཐམས་ཅད་ཀྱིས་བཅོམ་ལྡན་འདས་རྡོ་རྗེ་འཛིན་ཆེན་པོ་ལ་བསྟོད་པའི་རྒྱལ་པོ་འདིས་བསྟོད་ནས་གསོལ་བ་བཏབ་པ། ལས་ཀྱི་དབྱེ་བའི་དབྱེ་བ་ལས། །

90-1-105b

སེམས་ཅན་འཇུག་པ་ཇི་ལྟར་འགྱུར། །རྡོ་རྗེ་ཆེན་པོས་བཤད་དུ་གསོལ། །ཡོན་ཏན་རྒྱ་མཚོ་རྣམས་ཉན་ལགས། །དེ་ནས་རྡོ་རྗེ་འཛིན་རྒྱལ་པོས། །ལས་ནི་ཐམས་ཅད་རབ་སྒྲུབ་པ། །ཉེས་ཀུན་གསོ་བའི་བདག་ཉིད་ཀྱིས། །འདི་སྐད་
ཀྱིས་ནི་ཚིག་གསུངས་སོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཐུགས་རྡོ་རྗེ་ཉིད་ཀྱི་མཐུས་ཕྱག་འཚལ་ཞིང་མཆོད་པ་བྱས་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། ཡང་དང་ཡང་དུ་ཕྱག་བྱས་ནས། །
བཅོམ་ལྡན་འདས་ཀྱི་གསུང་ཉན་ཏོ། །དེ་ནས་རྡོ་རྗེ་འཛིན་རྒྱལ་པོས། །དབང་དུ་བྱ་བའི་འཁྲུལ་འཁོར་བསྟན། །གཤིན་རྗེའི་གཤེད་ལས་འཁོར་ལོ་མཆོག །མ་བྱུང་འབྱུང་བར་མི་འགྱུར་རོ། །བུད་མེད་དབང་དུ་བྱ་དང་། །བསྲུང་བའི་
དོན་དང་དེ་བཞིན་དུ། །ཞི་བ་རོ་ཙ་ནས་བཟུང་སྟེ། །གྲོ་གའམ་དེ་བཞིན་སྨྱུག་ཤུན་ལ། །འཁོར་ལོ་གཉིས་ནི་མཉམ་བྲིས་ནས། །ནཱ་མ་མིང་གིས་རྣམ་བསྟེན་ལ། །ནག་དང་ཡུ་ཅན་མ་ཡིན་པའི། །ཁམ་ཕོར་གཉིས་ནི་ཁ་
སྦྱར་ཏེ། །མར་དང་སྦྲང་རྩིས་བཀང་བར་གཞུག །སྐུད་པ་དཀར་པོས་ཁམ་ཕོར་བཅིང་། །ཤར་དུ་མངོན་པར་ཕྱོགས་པ་ཡིས། །མེ་ཏོག་དཀར་པོས་དུས་གསུམ་གཏོར། །གཤིན་རྗེ་མཐར་བྱེད་ཆུ་ཤེལ་འདྲར། །བདག་ཉིད་བསྒོམས་
ནས་མདུན་བཀོད་ལ། །ཟླ་བའི་དཀྱིལ་འཁོར་ལ་གནས་ནས། །བསྒྲུབ་བྱ་བལྟས་ནས་དབང་བསྐུར་བྱ། །བདུད་རྩི་ལྔ་ཡིས་གང་བ་ཡི། །བུམ་པ་དཀར་པོ་ཟླ་བ་འདྲས། །རྫོགས་སངས་དུ་མས་ཁྲུས་བྱས་ཏེ། །བལྟས་ནས་སྔགས་
ཀྱི་བཟླས་པ་བརྩམ། །ཨོཾ་ན་མཿཧྲཱིཿཥྚཱིཿབི་ཀྲི་ཏཱ་ན་ན་ཧཱུྃ་ཧཱུྃ་དེ་བ་དཏྟ་ཤཱནྟིཾ་ཀུ་རུ་ན་མཿསྭཱ་ཧཱ། ཞི་བའི་ཆོ་ག་གསུངས་པའོ། །སྐྱེས་པ་ཞི་ལ་གུར་ཀུམ་གྱིས། །བྲི་བྱ་དེ་བཞིན་རྒྱས་པ་ཡང་། །འཁོར་ལོ་གཉིས་ནི་ཁ་ཆེ་ཡི། །སྭཱ་ཧཱས་མིང་ནི་
བརྒྱན་པ་ཡི། །བསྒྲུབ་བྱའི་མིང་ནི་བྲིས་བྱས་ལ། །མར་དང་སྦྲང་རྩིས་བཀང་ནས་ནི། །ཁམ་ཕོར་ཁ་སྦྱར་ནང་དུ་གཞུག །སྐུད་པ་སེར་པོས་བཅིངས་ནས་ནི། །མེ་ཏོག་སེར་པོ་དུས་གསུམ་གཏོར། །བྱང་དུ་ཁ་བལྟས་མདོག་སེར་བའི། །གཤིན་རྗེའི་

90-1-106a

གཤེད་དུ་བདག་ཉིད་བསམ། །བསྒྲུབ་བྱ་ཟླ་བ་སེར་ནག་ལ། །བུམ་པ་སེར་པོས་བཀྲུ་བྱ་ཞིང་། །དབང་བསྐུར་བ་ནི་བསྒོམ་བྱས་ལ། །སྤྲོས་ལ་རྒྱས་པའི་བཟླས་པ་བྱ། །ཨོཾ་ཧྲཱིཿཥྚཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། 
དེ་བ་དཏྟ་ཤཱནྟི་ཀུ་རུ་སྭཱ་ཧཱ། ཨོཾ་ཧྲཱིཿ་ཥྚཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། བཽ་ཥ་ཊ་དེ་བ་དཏྟ་སྱ་པུཥྚིཾ་ཀུ་རུ་བཽ་ཥ་ཊ་སྭཱ་ཧཱ། འདི་ནི་བཅོམ་ལྡན་འདས་ཀྱིས་རྒྱས་པའི་ཆོ་ག་གསུངས་པའོ། །གྲོ་གའམ་རས་ལ་རྒྱ་སྐྱེགས་ཀྱི། །ཁུ་བའམ་
ཙན་དན་དམར་པོའམ། །སྲིན་ལག་གི་ནི་ཁྲག་ཀྱང་རུང་། །ཡི་གེ་ཧོཿཡིས་བརྟེན་པ་ཡི། །འཁོར་ལོ་གཉིས་ནི་མཉམ་པར་བྲི། །འཁོར་ལོ་ནག་པོ་སོགས་བྲལ་བའི། །ཁམ་ཕོར་གཉིས་ནི་ཁ་སྦྱར་དུ། །མར་དང་སྦྲང་རྩིས་བཀང་བ་
བཞག །སྐུད་པ་དམར་པོས་བཅིངས་བྱས་ལ། །ནུབ་ཕྱོགས་སུ་ནི་ཁ་བལྟས་ནས། །མེ་ཏོག་དམར་པོས་མཆོད་པར་བྱ། །བདག་ཉིད་གཤིན་རྗེ་མཐར་བྱེད་པ། །ཁ་དོག་དམར་པོ་ཆེར་འབར་བ། །ཟླ་བ་དམར་པོ་ལ་གནས་
པའོ། །བསྒྲུབ་བྱ་ཡང་ནི་རྣམ་བསམ་བྱ། །རང་གི་ལུས་ལས་བྱུང་བ་ཡི། །འོད་ཟེར་དམར་པོ་ལྕགས་ཀྱུ་ཡིས། །བསྒྲུབ་བྱ་དགུག་པར་བྱ་བར་བསམ། །སྔགས་ནི་སྤྲོ་ཞིང་ཁྲི་བཟླས་བྱ། །དེས་ནི་བསྒྲུབ་བྱ་ཉམས་གྱུར་ནས། །རྐང་པ་
གཉིས་སུ་ལྷགས་གྱུར་ནས། །གོས་བྲལ་སྐྲ་ནི་བཤིག་གྱུར་པ། །རྣམ་པར་བསམས་ལ་བཟླས་པ་བརྩམ། །གལ་ཏེ་དབང་དུ་མ་གྱུར་ན། །མར་ལ་སོགས་པ་བྲལ་བྱས་ལ། །དུ་བ་མེད་པའི་སེང་ལྡེང་མེས། །འཁོར་ལོ་དེ་ནི་སྒྲུབ་
པོས་སྤྲོ། །ཨོཾ་ཧྲཱིཿཥྚཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཧོ་དེ་བ་དཏྟི་ཝ་ཤཾ་ཀུ་རུ་ཧོཿཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱྃ་ཧཱུྃ་ཕཊ་ཕཊ་སྭཱ་ཧཱ། བཽ་ཥཊ་དེ་བ་དཏྟ་སྱ་ཝ་ཤ་མ་ན་ཡ་བཽ་ཥཊ། འདི་ནི་བཅོམ་ལྡན་འདས་ཀྱིས་དབང་དུ་བྱ་བའི་
ཆོ་ག་གསུངས་པའོ། །དུར་ཁྲོད་གོས་སམ་ཡང་ན་ནི། །རང་བྱུང་གིས་བསྐུས་རས་ལ་ནི། །ཁྲག་དང་རྒྱ་སྐྱེགས་བསྲེས་པ་ཡིས། །འཁོར་ལོ་གཉིས་ནི་མཉམ་བྲིས་ལ། །ཡི་གེ་ཛཿདང་ཡི་གེ་ཧྲཱིཿས། །མིང་ནི་རྣམ་པར་བརྟེན་

90-1-106b

བྱས་ལ། །བཙུན་མོ་ཡི་ནི་པད་མའི་སྣོད། །ཁ་སྦྱོར་ནང་དུ་བཙུད་བྱས་ཏེ། །སྐུད་པ་དམར་པོས་བཅིངས་བྱས་ལ། །མེ་ཏོག་དམར་པོས་མཆོད་པར་བྱ། །བདག་ཉིད་གཤིན་རྗེ་མཐར་བྱེད་པ། །ནུབ་ཀའི་ཉི་མ་དང་འདྲ་དམར། །ལྕགས་
ཀྱུ་དམར་པོས་བཀུག་པ་ཡི། །བསྒྲུབ་བྱ་དག་ནི་རྣམ་བསྒོམ་བྱ། །སྙིང་ལ་ལྕགས་ཀྱུས་བརྒྱབ་ནས་ནི། །སྐེ་ནས་ཞགས་པས་བཅིངས་བྱས་ཏེ། །གཅེར་བུ་སྐྲ་ནི་མ་བཅིངས་པར། །རླུང་གི་དཀྱིལ་འཁོར་སྦྱོར་བ་ཡི། །སེང་ལྡེང་
དམར་པོའི་སྟེང་འདུག་ལ། །རྫས་ལྔ་ཡིས་ནི་བཀྲུ་བྱ་ཞིང་། །འོངས་པ་རུ་ནི་བསམ་པར་བྱ། །གལ་ཏེ་བསྒྲུབ་བྱ་མི་འོང་ན། །སེང་ལྡེང་གི་ནི་མེ་མདག་ལ། །དེར་ནི་བཟླས་པ་བརྩམ་པར་བྱ། །བརྟུལ་ཞུགས་ཅན་གྱིས་འཁོར་ལོ་
བསྲོ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། ཧྲཱིཿཨ་མུ་ཀཾ་ཨཱ་ཀར་ཥ་ཡ་ཧྲཱིཿ ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཛཿ། དེ་བ་དཏྟ་ཨཱ་ཀར་ཥ་ཡ་ཛཿ། འདི་ནི་བཅོམ་ལྡན་འདས་ཀྱིས་དགུག་པའི་ཆོ་ག་གསུངས་པའོ། །
དུར་ཁྲོད་གོས་ལ་མཁས་པས་ནི། །ཡུང་བ་ཡི་ནི་ཁུ་བ་ཡིས། །འཁོར་ལོ་གཉིས་ནི་མཉམ་པར་བྲི། །ཡི་གེ་ལ་གྱིས་བརྟེན་པ་ཡི། །བསྒྲུབ་བྱའི་མིང་ཡང་བྲི་བར་བྱ། །ཁམ་ཕོར་ཁ་སྦྱོར་ནང་དུ་སྟེ། །ཁམ་ཕོར་སེར་པོའི་
སྟེང་དུ་བཞག །དེ་ལ་མཁས་པས་རེ་ཁཱ་བྲི། །རེ་ཁཱ་བདུན་ནམ་ཡང་ན་བཞི། །མཉམ་པར་བཞག་པས་བྲི་བར་བྱ། །རི་རབ་ལྕོག་བརྒྱད་ཅེས་གྲགས་པ། །དེ་ཡི་སྟེང་དུ་མཉམ་པར་བྲི། །ཡི་གེ་ཧཱུྃ་དང་ཡི་གེ་བྂ། །རི་རབ་དེ་ནི་
བརྟན་པར་བྱ། །དེ་ཡི་སྟེང་དུ་ལྂ་ཡིག་ལས། །དབང་ཆེན་དཀྱིལ་འཁོར་དགོད་པར་བྱ། །སྣ་ཚོགས་རྡོ་རྗེས་མནན་པ་ལ། །སྐུད་པ་སེར་པོས་བཅིངས་ནས་ནི། །གཤིན་རྗེའི་གཤེད་པོ་མདོག་སེར་པོ། །དབང་ཆེན་དཀྱིལ་འཁོར་ལ་
གནས་པ། །བསྒྲུབ་བྱ་སེར་པོ་རྣམ་བསམས་ལ། །རི་རབ་ཀྱིས་ནི་མནན་བྱས་པ། །ཕྱག་ན་རྡོ་རྗེས་མནན་བྱས་པ། །དབང་ཆེན་དཀྱིལ་འཁོར་གྱི་འོག་ཏུ། །མན་དཱ་ར་སོགས་རི་བོ་དང་། །སྣ་ཚོགས་རི་བོ་རྣམས་ཀྱིས་ཀྱང་། །

90-1-107a

བསྒྲུབ་བྱ་མནན་པར་བསྒོམ་པར་བྱ། །དེ་ལ་གནས་ནས་བཟླས་པར་བྱ། །ཨོཾ་ཧྲཱིཿཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ལྃ་དེ་བ་དཏ་ཏ་སྠ་ནེ་སྟམ་བྷ་ཡ་ཀུ་རུ་ལྃ། འདི་ནི་བཅོམ་ལྡན་འདས་ཀྱིས་རེངས་པར་བྱེད་
པའི་ཆོ་ག་གསུངས་པའོ། །ངག་ནི་རེངས་པར་འདོད་པ་ཡིས། །དེ་བཞིན་འཁོར་ལོ་གཉིས་བྲིས་ལ། །བསྒྲུབ་བྱའི་མིང་ཡང་བྲི་བར་བྱ། །དེར་ནི་སྔགས་ཀྱང་སྤྲོས་ལ་བཟླས། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྂ་ཧཱུྂ་ཕཊ་ཕཊ་ལྂ་དེ་
བ་དཏ་ཏ་སྱ་ཡ་ཐཱ་སྲ་ར་ཐཱ། ཀར་ཀྲྀཏ་ཏེ་ནན་ཏི་བི་ར་ཡ་ཐཱ་ཨ་བི་རུ་པ་ཀཾ་དེ་བ་དཏ་ཏ་ཡ་ཛྙཱཾ་དཏ་ཏ་ཡ་སྱ་ཝཱཀ་སྟམ་བྷ་ན་ཀུ་རུ་ལྃ། བཅོམ་ལྡན་འདས་ཀྱིས་རེངས་པར་བྱེད་པའི་ཆོ་ག་དེ་སྐད་གསུངས་སོ། །ཤིན་དུ་ལེགས་པར་སྦས་པ་
ཡིས། །འདི་ལས་གསུངས་བཞིན་དགོས་པ་དག །གཤིན་རྗེའི་གཤེད་ནག་སྦྱོར་བ་ཡིས། །ཉི་མ་གཅིག་གིས་འགྲུབ་པར་འགྱུར། །སྔར་བཞིན་དུར་ཁྲོད་ཀྱི་རས་ལ། །འཁོར་ལོ་གཉིས་བྲིས་བརྟུལ་ཞུགས་ཅན། །སྐེ་ཚེ་དང་ནི་
ཚྭ་དང་ནི། །དུག་དང་གཞན་ཡང་ནིམ་པ་དང་། །ཚ་བ་གསུམ་དང་ཚ་བའི་མར། །དུར་ཁྲོད་ཀྱི་ནི་སོལ་བ་དང་། །དྷ་དུར་ལོ་མའི་ཁུ་བ་དང་། །ཙན་དྲ་ལི་འབྲས་འཛུབ་མོ་ཁྲག །ཚ་སྒོ་ཅན་གྱི་ས་བླངས་ཏེ། །གདོལ་པའི་རྫ་
མའི་དྲེག་པ་དང་། །རབ་ཏུ་ལྟོགས་པའི་སྨྱུ་གུ་ཡིས། །བཅུ་བཞི་ལ་བྲིས་བརྟུལ་ཞུགས་ཅན། །ཁྲོས་པའི་སེམས་ཀྱིས་ཉིན་ཕྱེད་ན། །གདུག་པ་ཅན་རྣམས་གསད་པའི་ཕྱིར། །སེམས་ཅན་གནོད་པ་བྱེད་པའི་མིང་། །ཡི་གེ་
ཧཱུྃ་གིས་བརྟེན་བྱས་ལ། །བདག་ཉིད་གཤིན་རྗེ་མཐར་བྱེད་པའི། །སྦྱོར་བས་ལྷོ་ཕྱོགས་ཁ་བལྟས་ཏེ། །ཁྲོ་ཆེན་རབ་ཏུ་དྲག་པོའི་གཟུགས། །རུས་པས་མགོ་བོ་རྣམ་བརྒྱན་ལ། །མ་ཧེ་ལ་བཞུགས་ལྕེ་ཕྱུང་འདྲིལ། །གསུས་པ་
ཆེ་ལ་རབ་འཇིགས་པ། །སྐྲག་བྱེད་སྐྲ་འབར་གྱེན་དུ་འགྲེང་། །སྨ་ར་སྨིན་མ་དེ་བཞིན་སེར། །གཡས་ན་རྡོ་རྗེ་ཆེན་པོ་དང་། །གཉིས་པ་ན་ནི་རལ་གྲི་དང་། །གསུམ་པའི་ཕྱག་ན་གྲི་གུག་གོ། ད་ནི་གཡོན་པའི་བྲི་བར་བྱ། །འཁོར་ལོ་དང་ནི་པད་མ་

90-1-107b

ཆེ། །ཐོད་པ་ཉིད་ནི་གཡོན་ནའོ། །རྩ་བའི་ཞལ་ནི་ཤིན་ཏུ་གནག །གཡས་པའི་ཟླ་འོད་བཟང་པོ་འདྲ། །གཡོན་པའི་དམར་པོ་ཡིན་པར་བརྟག །རྡོ་རྗེ་རྒྱན་གྱིས་རབ་ཏུ་བརྒྱན། །བ་སྤུ་ཁུང་ནས་འཇིགས་ཆེན་པོ། །རང་རིགས་བདག་པོ་རབ་འཕྲོ་བ། །ཉི་
མའི་དཀྱིལ་འཁོར་སྟེང་ན་ནི། །ཞབས་ནི་གཡོན་པ་བརྐྱང་པས་གནས། །མཆེ་བ་གཙིགས་ཤིང་རྒྱགས་པ་ཡིས། །བསྐལ་པའི་འབར་བ་མེ་དང་མཚུངས། །འདི་ལྟ་བུ་ཡི་བདག་ཉིད་ཀྱིས། །བསྒྲུབ་པར་བྱ་བ་མདུན་དུ་དགོད། །གདུག་པའི་མཚོན་གྱིས་
བརྒྱབ་པ་ཡིས། །དྲི་མ་ཅན་ལ་ནད་ཀྱིས་གཟིར། །གོས་མེད་འདར་ཞིང་ཉམས་ཆུང་བས། །དོན་འདོད་པ་ཡི་ཚིག་སྨྲ་ཞིང་། །མཚོན་གྱིས་གཟིར་བར་བྱས་པ་ཡི། །རྣག་གི་ཐུམ་པོས་ལུས་གང་བ། །གྲང་བའི་རླུང་གིས་གཙེས་གྱུར་ཞིང་། །མེ་ཡི་ནང་དུ་
ཞུགས་པ་ལ། །མ་ཧེ་དང་ནི་སྟག་དག་དང་། །ཁྱི་དང་མཆུ་རིངས་ཅན་དག་གིས། །སངས་རྒྱས་སྡེ་ནི་མངོན་འཇིགས་པའི། །སྡིག་པོ་ཆེ་ནི་ཟ་བར་བྱེད། །མཐར་བྱེད་པ་ཡི་ལྷོར་གནས་པ། །ཚེར་མས་ལུས་ནི་བཀང་བ་དང་། །རྐང་པ་ཤིང་
ལྕགས་སྒྲོག་གིས་བསྡམས། །དེ་བཞིན་དུམ་བུ་དུམ་བུར་བྱས། །པགས་པ་དག་ནི་བཤུས་བྱས་ནས། །དེ་ལ་ཚྭ་དང་སྐེ་ཚེ་བསྐུས། །ཧཱུྃ་ཞེས་ཟེར་བ་བསྒོམ་པར་བྱ། །དེ་ཡི་ལུས་བསྲུང་ལ་སོགས་པ། །གཅད་པ་དག་ནི་མདུན་དུ་དགོད། །
དེ་ཡི་གོ་ཆའང་མེད་བྱས་ནས། །སྟོང་པའི་ལུས་ནི་མདུན་དུ་བསམ། །རང་གི་ལུས་བྱུང་ཁྲོ་བོ་ནི། །གཤིན་རྗེའི་གཤེད་སོགས་བདག་ཉིད་འདྲས། །དེ་ཡི་ལུས་ལ་བརྒྱབ་ནས་ནི། །ཚིལ་བུ་རྐང་དག་འཐུང་བར་བྱེད། །དེ་ཡི་མདུན་དུ་གཤིན་རྗེ་བསྒོམ། །
ལག་ན་དབྱིག་པ་སྟོབས་པོ་ཆེ། །གདུག་པ་ཅན་དེས་བརྡེག་པར་བྱེད། །དེ་ཡི་རྒྱུ་མའི་ཕྲེང་བ་སོགས། །བྱ་རྒོད་ཀྱིས་ཁྱེར་མཁའ་ལ་འགྲོ། །ས་ཡི་འོག་ནས་ཀླུ་དང་ནི། །ལྷ་མ་ཡིན་ལ་སོགས་པས་རྡེག །འདི་ལྟར་བསྒྲུབ་བྱ་ཉམས་བྱ་བ། །སྙིང་རྗེ་ལ་
གནས་སེམས་ཀྱིས་ནི། །ཕྱེད་པས་འཁོར་བའི་གནས་བཏོན་ནས། །སངས་རྒྱས་ཞིང་དུ་འགྲོ་བར་བྱེད། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཁྱད་པར་ཅན་གྱི་ཐུགས་ཀྱིས་འདི་ལྟ་བུའི་གསུང་ཕྱུང་བར་མཛད་དོ། །

90-1-108a

ཨེ་མའོ་གསད་པའི་ཡང་དག་གསད། །བསད་པ་མ་ཡིན་སྡིག་ལས་བཀྲོལ། །ཇི་སྲིད་བསད་ཀྱང་མ་བསད་དོ། །སྡིག་པ་སྟོང་ཕྲག་བྱས་པ་ཡི། །མནར་མེད་ལ་སོགས་མི་སྐྱེ་བ། །ཨེ་མའོ་སངས་རྒྱས་ཆེ་བའི་བདག །བསད་པས་
བྱང་ཆུབ་ཐོབ་པར་བྱེད། །སེམས་ཅན་གསོད་པ་བསད་པ་ཉིད། །སྙིང་རྗེ་ཆེན་པོ་ཉིད་ཀྱིས་བྱས། །ཨེ་མའོ་སྙིང་རྗེ་སྟོབས་ཀྱི་མཆོག །སྙིང་རྗེ་དམན་པས་འགྲུབ་མི་འགྱུར། །ཨོཾ་ཧྲཱིཿཥྚྲཱིཿ་ཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། ཧཱུྃ་དེ་བ་དཏ་
ཏ་མཱ་ར་ཡ་ཧཱུྃ་ཕཊ། ཨོཾ་ཧྲཱིཿཥྚྲཱིཿ་ཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། དེ་བ་དཏ་ཏ་མཱ་ར་ཡ་ཕཊ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་རྣམ་པར་རྟོག་པ་གསོད་པའི་རྡོ་རྗེའི་འཁྲུལ་
འཁོར་དང་སྔགས་དང་སྨན་གྱིས་གསད་པ་ལ་སོགས་པའི་ཆོ་ག་སྟེ་རིམ་པར་ཕྱེ་བ་བཞི་པའོ།། །། དེ་ནས་འཁོར་ལོ་གཉིས་བྲིས་ལ། །ཡི་གེ་ཕཊ་ཀྱིས་བརྟེན་པ་ཡི། །བསྒྲུབ་བྱའི་མིང་ནི་བྲི་བྱས་ལ། །ཐོད་པ་ཁ་སྦྱར་ནང་དུ་གཞུག །སྐུད་པ་
སྔོན་པོས་བཅིངས་བྱས་ཏེ། །ཉི་མ་ཕྱེད་ཀྱི་དུས་སུ་ནི། །དུར་ཁྲོད་ས་ཡི་ནང་དུ་སྦ། །གཤིན་རྗེའི་གཤེད་ཀྱི་སྦྱོར་བ་ཡི། །རྟ་དང་མ་ཧེ་ཞོན་པ་ཡི། །ལག་ན་མཚོན་ཐོགས་བསྒྲུབ་བྱ་གཉིས། །མདུན་དུ་བསྒྲུབ་བྱ་དགོད་པར་བྱ། །
ཁྲོས་པའི་ལུས་ལ་སྤྲུལ་པའི་ཚོགས། །གཉིས་ཀའི་ཕྱོགས་སུ་བསམ་པར་བྱ། །གཉིས་ཀས་འཐབ་མོ་མང་པོ་བྱེད། །ཁྲོས་ཤིང་གདུག་པའི་སེམས་ལྡན་པའི། །སྟོབས་ལྡན་ཁྲོས་པ་བསྒོམ་པར་བྱ། །བསྒོམས་པས་བཟླས་པ་བརྩམ་པར་བྱ། །
ཨོཾ་ཧྲཱིཿཥྚྲཱིཿ་ཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། དེ་བ་དཏ་ཏ་ཡཛྙཱ་དཏ་ཏེ་བི་དྭེ་ཥཱ་ཡ་ཧཱུྂ་ཕཊ། འདི་ནི་བཅོམ་ལྡན་འདས་ཀྱིས་དབྱེ་བའི་ཆོ་ག་གསུངས་པའོ། །ཆོ་ག་དག་ནི་སྔ་མ་བཞིན། །འཁོར་ལོ་གཉིས་ནི་བྲི་བྱས་ལ། །ཡི་གེ་ཧཱུྃ་ཕཊ་ཀྱིས་བརྟེན་
པ། །ཐོད་པ་ཁ་སྦྱར་ནང་དུ་གཞུག །སྐུད་པ་ནག་པོས་བཅིངས་བྱས་ལ། །ཤ་ཟའི་ཚུལ་དུ་སྦ་བར་བྱ། །གཤིན་རྗེའི་སྦྱོར་བ་ལ་གནས་པས། །མདུན་དུ་བསྒྲུབ་བྱ་བསྒོམ་པར་བྱ། །ཡྃ་བྱུང་གཞུ་ཡི་དབྱིབས་འདྲ་བའི། །རླུང་གི་དཀྱིལ་འཁོར་

90-1-108b

ནག་པོ་ལ། །དེ་སྟེང་མདོག་སྔོན་རྔ་མོ་བསྒོམ། །དེ་ལ་གདུག་པ་ཅན་བསྐྱོན་ལ། །ལྷོ་ཡི་ཕྱོགས་སུ་ཁ་བསྟན་ཏེ། །ཁྲོ་བོའི་ཚོགས་ཀྱིས་དེ་བརྡེག་པ། །སངས་རྒྱས་ཡིན་ཡང་བཟློག་པ་དཀའ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། ཧཱུྃ་ཕཊ་
དེ་བ་དཏྟ་ཨུཙྪཱ་ཊ་ཡ་ནྃ་ཧཱུྃ་ཕཊ། འདི་ནི་བཅོམ་ལྡན་འདས་ཀྱིས་བསྐྲད་པའི་ཆོ་ག་གསུངས་པའོ། །ཁྲོས་པས་རྣལ་འབྱོར་ལྷོར་བལྟས་ལ། །ར་ཁྲག་རོ་བསྲེགས་ཐལ་བ་དང་། །དུག་གི་ཚྭ་དང་སྐེ་ཚེ་དང་། །མར་ཁུ་སྨྱོན་པའི་ཁུ་བ་ཡིས། །
དུར་ཁྲོད་ལས་ལ་འཁོར་ལོ་གཉིས། །རིམ་པ་འདི་བཞིན་བྲི་བར་བྱ། །བསད་པ་གཤིན་རྗེའི་ལུས་ལ་གནས། །དབྱེ་བ་རྟ་དང་མ་ཧེ་ཡིས། །བསྐྲད་པ་རྔ་མོའི་ལུས་ལ་གནས། །ཞི་བ་ཟླ་བའི་དཀྱིལ་འཁོར་གྱིས། །རྒྱས་པ་ཟླ་བ་སེར་པོ་ལ། །
བཙུན་མོ་སྙིང་གར་དབང་དུ་བྱ། །ར་ལ་བསྐྱོན་པས་འགུགས་པར་བྱེད། །རི་བོའི་དཀྱིལ་དུ་རེངས་བྱ་གཞག །ཤ་ར་བྷ་འམ་སེང་གེས་དགུག །དེ་བཞིན་གཞན་ཡང་མཚོན་པར་བྱ། །རོ་ཙ་ན་དང་རྒྱ་སྐྱེགས་དང་། །ཁ་ཆེ་ཡི་ནི་ཁྱད་པར་གྱི། །
དབང་དུ་བྱ་བ་གྲོ་གར་བྲི། །དགེ་བའི་སེམས་ཀྱིས་བཟུང་བྱས་ན། །འགྲུབ་པར་འགྱུར་ཏེ་ཐེ་ཚོམ་མེད། །ཁམ་ཕོར་ཁ་སྦྱར་ནང་དུ་གཞུག །ཁྲ་ཡི་སྒྲོ་ཡི་སྨྱུ་གུ་ཡིས། །ཉི་མ་ཕྱེད་ནས་བྲི་བར་བྱ། །པད་མའི་ཁ་སྦྱོར་རོ་བསྲེགས་སར། །
གཤིན་རྗེའི་རྣལ་འབྱོར་བདག་ཉིད་ཀྱིས། །ཨོཾ་ཧྲཱིཿཥྚྲཱིཿསོགས་གསང་སྔགས་བཟླས། །ལྷོ་ཕྱོགས་གནས་ཏེ་ཚར་གཅད་བྱ། །མཐའ་ཡི་ཡ་བོར་ཞི་བ་ལ། །ཡི་གེ་ནི་དེ་གཉིས་ཀ་དང་། །ཕྱི་ནས་དཀྱིལ་གྱི་ཡ་སྤངས་ཏེ། །ཡི་གེ་
ལྷག་མ་ཅི་བདེ་བར། །སྔོན་དུ་བསྙེན་པ་ཁྲི་ཙམ་བྱ། །འདིས་ནི་ལས་རྣམས་རབ་བསྒྲུབ་ལ། །ཡེ་ཤེས་རྡོ་རྗེས་བྱ་བ་སྟེ། །གཤིན་རྗེའི་གཤེད་ཀྱི་རྣལ་འབྱོར་པས། །རབ་ཏུ་གྲགས་པའི་འཁོར་ལོ་འདི། །ཡི་གེར་བྲིས་
ནས་གནས་པ་དང་། །འཁོར་ལོ་བྲིས་ནས་གནས་པ་ཡི། །ཁྱིམ་དེར་འཐབ་མོ་རྟག་ཏུ་འབྱུང་། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་འཁྲུལ་འཁོར་གྱི་གོ་རིམས་བྲི་བ་ཞེས་བྱ་སྟེ་རིམ་པར་ཕྱེ་བ་ལྔ་པའོ།། །།

90-1-109a

 དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་བཅོམ་ལྡན་འདས་རྡོ་རྗེ་འཆང་ཆེན་པོ་ལས་དད་པས། བསྟོད་པའི་རྒྱལ་པོ་འདིས་གསོལ་བ་བཏབ་པ། གང་གིས་རྡོ་རྗེ་ཅན་མཉེས་པ། །ཞེ་སྡང་ཕྱག་རྒྱའི་རྣལ་
འབྱོར་གྱིས། །རྡོ་རྗེའི་ཕྱག་རྒྱས་རྒྱས་བཏབ་པས། །དངོས་གྲུབ་རྒྱ་ཆེན་ཐོབ་པར་བྱེད། །དེ་ནས་རྡོ་རྗེ་འཆང་རྒྱལ་པོས། །འདི་ལྟ་བུ་ཡི་གསུང་བསྒྲགས་སོ། །དཀྱིལ་འཁོར་གྱི་ནི་ལྷ་ཀུན་གྱི། །དབུ་ལ་གཤིན་རྗེའི་གཤེད་པོ་བསྒོམ། །རྟག་ཏུ་དཀྱིལ་
འཁོར་བྲི་བར་བྱ། །རྟག་ཏུ་སྦྱིན་སྲེག་གིས་ཀྱང་དགང་། །རྟག་ཏུ་དམ་ཚིག་དག་ཀྱང་གཟུང་། །སྡོམ་པ་དག་ཀྱང་ཡང་དག་གཟུང་། །དང་པོ་ལ་ནི་ཅོད་པན་དབང་། །གཉིས་པ་རལ་གྲི་སྦྱིན་པར་བྱ། །གསུམ་པ་རྡོ་རྗེ་དྲིལ་བུ་དང་། །ཟླ་བ་བཟའ་
བ་བཞི་པ་སྟེ། །བཞི་པོ་འདི་ནི་དབང་ཆེན་པོ། །ནག་པོའི་ཞལ་ནས་བྱུང་བ་ཡི། །དབང་འདི་དག་གི་བྱེ་བྲག་གིས། །རྒྱལ་བའི་སྲས་ཀྱིས་བྱང་ཆུབ་ཐོབ། །འབྱུང་པོ་ཀུན་གྱི་གཏོར་མའི་ལུགས། །སྔགས་འདི་དེ་ནས་རབ་བཤད་བྱ། །
སྔགས་ཆེན་བཟླས་པ་ཙམ་གྱིས་ནི། །འབྱུང་པོ་ཐམས་ཅད་འདར་འགྱུར་བ། །ཨོཾ་ཨིན་དྲཱ་ཡཿ་ཧྲིཿཡ་མ་ཡ། ཥྚྲཱིཿབ་རུ་ཎཱ་ཡ། ཝི་ཀུ་བེ་རཱ་ཡ། ཀྲྀ་ཨཱི་ཤྭ་ནཱ་ཡ། ཏ་ཨགྣ་ཡེ། ཨཱ་ནྀ་ཏྱཱ་ཡ། ན་བཱ་ཡ་བེ་ན་ཙནྡྲཱ་ཡ། ཧཱུཾ་ཨཱརྐྐཱ་རཱ་ཡ་ཧཱུྃ་
བྲཧྨ་ཎཱ་ཡ། ཕཊ་བ་སུ་དྷ་རཱ་ཡེེ། ཕཊ་བེ་མ་ཙི་ཏྲི་ནྂ། སྭཱ་སརྦ། །བྷཱུ་ཏི་བྷྱོ། ཧཱ་ཧ་ཧ་ཧི་ཧི། ཧཱུྃ་ཧཱུྃ། ཕེྃ་ཕེྃ་ཕཊ་ཕཊ་སྭཱ་ཧཱ། བིཌྜ་མུྰ་ཏྲ་ཆུ་བསྲེས་པས། །དཀྱིལ་འཁོར་གྲུ་གསུམ་བྱས་ནས་ནི། །ལྷ་རྣམས་ཀྱང་ནི་ཚིམ་པར་བྱ། །ཧ་ཧ་ཞེས་ཀྱང་དྲན་པར་བྱ། །
དཀྱིལ་འཁོར་རིམ་གསུམ་བྱ་བ་ནི། །བརྒྱད་དང་བཅུ་གཉིས་བཅུ་དྲུག་པའི། །དཀྱིལ་འཁོར་མཁས་པས་བྲིས་པ་ལ། །སྔགས་ནི་ཀུན་དུ་དགོད་པར་བྱ། །བརྟུལ་ཞུགས་ཅན་གྱིས་བཅུ་གཉིས་པར། །གྲུབ་པའི་སྔགས་རྣམས་དགོད་
པར་བྱ། །རྒྱུ་དང་མི་རྒྱུའི་འཇིག་རྟེན་གསུམ། །མ་ལུས་ལུས་པ་མེད་པར་འགྲུབ། །ཡ་མ་རཱ་ཛཱ་ས་དེ་མེ། །ཡམ་དུ་རུ་ན་ཡོ་ད་ཡ། །ཡང་ཡོ་ནི་ར་ཡཀྵེ་ཡ། །ཡཀྵེ་ཡཙྪ་ནི་རཱ་མ་ཡ། །དཀྱིལ་དུ་ཡ་བྱས་ཤར་དུ་ཀྵེ། །ལྷོ་རུ་འཇམ་པའི་རྡོ་རྗེ་སྟེ། །ཡི་གེ་མི་ནི་ནུབ་དུ་བྲི། །

90-1-109b

བྱང་དུ་ད་སྟེ་ད་མ་ནཱ། །བསྒྲུབ་བྱའི་མིང་ནི་སྦྱིན་བྱ་བ། །མཚམས་ཀྱི་སྟོང་པ་དག་ཏུའོ། །ཧཱུྃ་གཉིས་ཀྱིས་ནི་བརྟེན་བྱས་པས། །དགོས་པ་ཐམས་ཅད་སྒྲུབ་པར་བྱེད། །ཡ་ཙྩ་ནི་རཱ་ཛཱ་ས་དོ་རུ་ཎ་ཡོ་ན་ར་ལ་སོགས་པ། །
ཕྱི་རོལ་རིམ་པར་གཡོན་བརྩམས་བྲི། །དོན་ཀུན་རབ་ཏུ་བསྒྲུབ་པའི་ཕྱིར། །རིམ་པ་གསུམ་པ་དེ་ལ་ནི། །ཀུན་དུ་ཆ་རེ་བོར་བ་ལ། །ཤར་ནས་བརྩམས་ནས་བྲི་བར་བྱ། །ཨོཾ་ཧྲཱིཿཥྚྲཱིཿལ་སོགས་པའི་སྔགས། །དེ་ཡི་
བར་དག་ཐམས་ཅད་ཀྱི། །ཆ་བརྒྱད་པོར་བ་དག་ལ་བྲི། །ཨ་མུ་ཀཾ་ཀུ་རུ། །ཨཙྪཱ་ཊ་ཡ། ཝ་ཤ་ཀུ་རུ། བི་དྭེ་ཥ་ཡ། ཤན་ཏིཾ་ཀུ་རུ། པུཥྚིྂ་ཀུ་རུ། འདི་ལྟར་གཡོན་ནས་བརྩམས་ནས་ནི། །ལས་དང་རྗེས་སུ་མཐུན་པར་
ནི། །མིང་དང་ན་མཿཐ་མའི་བར། །ཐ་མ་རུ་བཽ་ཥ་ཊ་དང་། །ཧཱུྃ་ཕཊ་དང་ལྡན་ས་བོན་གྱིས། །ཞི་དང་རྒྱས་དང་མཐར་དབང་བྱེད། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་
ལས་འཁོར་ལོ་རྣམ་པར་བྲི་བ་ཞེས་བྱ་བ་སྟེ་རིམ་པར་ཕྱེ་བ་དྲུག་པའོ།། །། ཁྲག་དགུག་པ་ཡི་སྦྱོར་བ་ནི། །ཞལ་གསུམ་ཕྱག་དྲུག་སྐེམ་པ་ཡི། །ཕྱག་ན་འཁོར་ལོ་ཟླ་འོད་འདྲའི། །མཁས་པས་ཙར་ཙི་ཀཱ་བསྒོམ་བྱ། །ཆང་དག་
དགུག་པའི་སྦྱོར་བ་ནི། །ཞལ་གསུམ་ཕྱག་དྲུག་ཕག་གདོང་མ། །རབ་སྔོ་ཕྱག་ན་རྡོ་རྗེ་བསྣམས། །མཁས་པས་ཕག་མོ་བསྒོམ་པར་བྱ། །ཤེས་རབ་བསྐྱེད་པར་བྱ་བའི་ཕྱིར། །ཞལ་གསུམ་ཕྱག་དྲུག་དམར་བ་ལ། །ཞི་བ་ཕྱག་ན་
པད་མ་བསྣམས། །དབྱངས་ཅན་བརྟུལ་ཞུགས་ཅན་གྱིས་བསྒོམ། །ཁུ་བ་དགུག་པའི་སྦྱོར་བ་ནི། །ཞལ་གསུམ་ཕྱག་དྲུག་རལ་གྲི་བསྣམས། །ནོར་བུ་མར་གད་འདྲ་བ་ནི། །གཽ་རཱི་མཁས་པས་བསྒོམ་པར་བྱ། །དེ་ནས་བཅོམ་
ལྡན་འདས་རྡོ་རྗེ་གཤིན་རྗེའི་གཤེད་པོ་གསད་པ་དང་དགུག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རྡོ་རྗེ་ཙར་ཙི་ཀཱའི་སྔགས་འདི་གསུངས་སོ། །ཨོཾ་ཙར་ཙི་ཀཱ་སིད་དྷེན་དྲ་ནཱི་ལ་ཧཱ་རི་ཚི་རད་ན་ཏྲ་ཡ་ཨ་པ་

90-1-110a

ཀཱ་རི་ཎོ་རུ་དི་ར་ཨཱ་ཀར་ཥ་ཡ་ཛ། སྔགས་འདི་དག་ནི་དྲན་བྱས་ན། །ཁ་གདངས་པ་དག་བྱས་པ་ཡིན། །འཇིག་རྟེན་གསུམ་གྱི་ཁྲག་ཆེན་པོ། །འགུགས་པ་འདི་ལ་ཐེ་ཚོམ་མེད། །དེ་ནས་བཅོམ་ལྡན་འདས་རྡོ་རྗེ་
གཤིན་རྗེའི་གཤེད་ཆེན་པོ་ཆང་འགུགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་ཕག་མོའི་ཆང་འགུགས་པའི་སྔགས་གསུངས་པ། །ཨོཾ་བཛྲ་གྷོ་ཎེ་སུ་གྷོ་ཎེ་བཛྲ་མཱ་མ་ཀཱི་བྷ་ར་བྷ་ར། སམ་བྷ་ར་སམ་བྷ་ར། 
ཏྲཻ་དྷཱེ་ཏུ་ཀ་མྱར། ཨཱ་ཀར་ཥ་ཡ་ཛཿ། རྫ་མཁན་ལག་པ་ཕྱིས་པའི་སས། །བུམ་པ་ཁ་མཛེས་ཉེར་བྱས་ལ། །རྐུན་མའི་སྐྲ་ནི་རྟེན་བཞག་སྟེ། །སྔགས་ནི་རྗེས་སུ་དྲན་པར་བྱ། །སྔགས་འདི་ཆེ་བའི་བདག་ཉིད་འདི། །བ་ཏ་མཆོད་
རྟེན་དག་ཏུ་བསྟན། །དལ་གྱིས་དམིགས་ནས་འབད་པར་བྱ། །ཆང་ནི་འགུགས་པར་རབ་ཏུ་གྲགས། །དེ་ནས་བཅོམ་ལྡན་འདས་དམ་ཚིག་ཆེན་པོའི་གཤིན་རྗེའི་གཤེད་རྡོ་རྗེ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ནས་རྡོ་རྗེ་དབྱངས་ཅན་མའི་སྔགས་གསུངས་པ། ཨོཾ་པི་ཙུ་པི་ཙུ་པྲཛྙ་བ་ར་དྷ་ནི་ཛྭ་ལ་ཛྭ་ལ་མེ་དྷཱ་བ་ར་དྷ་ནི། དྷི་རི་དྷི་རི་བུད་དྷི་བར་དྷ་ནི་སྭཱ་ཧཱ། ཚེས་ཀྱི་དང་པོ་ནས་བཟུང་སྟེ། །ཀུན་དུ་ཟླ་བ་ཉ་ཡི་བར། །སྦྱར་བའི་
སྐད་ནི་སྨྲ་བར་བྱ། །ཇི་སྲིད་ཟླ་བའི་རྗེས་འཇུག་པས། །རྟག་ཏུ་ཚིགས་བཅད་བརྒྱ་ཟིན་འདི། །ངག་གི་དབང་ཕྱུག་འགྲུབ་པར་འགྱུར། །ཁམས་གསུམ་མ་ལུས་པ་དག་ནི། །མ་ལུས་ལུས་པ་མེད་པར་འགྲུབ། །
དེ་ནས་བཅོམ་ལྡན་འདས་གཤིན་རྗེའི་གཤེད་རྡོ་རྗེས་ཁུ་བ་འགུགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཁུ་བ་འགུགས་པར་བྱེད་པའི་གཽ་རཱིའི་སྔགས་འདི་གསུངས་སོ། །ཨོཾ་ཨཱ་ཀར་ཥ་ཎི་ཨཱ་
ཀར་ཥ་ཎི་གཽ་རཱི་ཧྲཱིཿདུཥྚཱ་ཡ། དུཥྚཱ་ཡ་ཤུ་ཀྲམ། ཨཱ་ཀར་ཥ་ཡ་ཛཿཛཿཛཿཧཱུྃ་ཧཱུྃ་སྭཱ་ཧཱ། པད་མ་ཁ་དང་རྡོ་རྗེ་དང་། །དྲིལ་བུ་ལྕགས་ཀྱུའི་རླུང་སྦྱོར་གྱིས། །བཟླས་དང་བསྒོམ་པའི་སྦྱོར་བ་ནི། །ཁུ་བའི་ཚོགས་ནི་འགུགས་པར་བྱེད། །
90-1-110b

ནགས་ཀྱི་ནང་ངམ་དབེན་པ་རུ། །ལས་འདི་དག་ནི་བསྐུལ་བྱས་ནས། །ནུབ་བདུན་ཙམ་དུ་སྦྱོར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །དེ་ནས་བཅོམ་ལྡན་འདས་རྡོ་རྗེ་གཤིན་རྗེའི་གཤེད་ཆེན་པོ། རྡོ་རྗེ་ནག་པོ་འཇིགས་པ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ནས་དབང་བསྐུར་བ་མཆོག་གི་དམ་ཚིག་འདི་ཉིད་ཀྱི་སྐུ་གསུང་ཐུགས་རྡོ་རྗེ་རྣམས་ལས་ཕྱུང་བར་མཛད་དོ། །ཨུ་དུམ་བཱ་ར་མན་དཱ་ར། །པ་རི་ཛ་ཏ་ཀ་ཕྲེང་དང་། །ཀར་ཎི་ཀ་ཡི་ཕྲེང་བ་ནི། །བུ་ཁྱོད་ཟུང་ལ་བྱིན་གྱིས་རློབ། །རལ་གྲི་ཆེན་པོ་
ཁམས་གསུམ་པའི། །སངས་རྒྱས་ཀུན་གྱིས་ཕྱག་བྱས་པ། །འབྱུང་པོ་ཐམས་ཅད་འགུགས་པར་བྱེད། །ལས་ཀྱི་རལ་གྲི་དམ་པ་འདི། །བཟུང་ན་བདུད་ལས་རྒྱལ་བར་འགྱུར། །ཤེས་རབ་ཐབས་ཀྱི་ངོ་བོ་ཉིད། །རྡོ་རྗེ་དྲིལ་
བུ་བསྒྲུབས་པ་འདི། །ལོང་ལ་སློབ་མ་ཡང་དག་ཟུང་། །བཏུང་བ་རིན་པོ་ཆེ་འདིས་ནི། །རྡོ་རྗེ་ལུས་ནི་རབ་ཏུ་སྒྲུབ། །ཀུན་ཏུ་ཡེ་ཤེས་བུ་ཁྱོད་ཀྱིས། །འཐུང་ཤིག་ཡེ་ཤེས་ལས་བྱུང་བ། །སློབ་མའི་ཁར་ཡང་བླུགས་
བྱ་བ། །གཤིན་རྗེའི་གཤེད་ཀྱིས་བསྒྲགས་པ་ཡིན། །རྡོ་རྗེ་སློབ་མ་བདག་ཉིད་ཆེས། །ཤིན་ཏུ་དགའ་བའི་སེམས་སུ་བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་དགུག་
པ་ལ་སོགས་པའི་སྦྱོར་བའི་རིམ་པར་ཕྱེ་བ་སྟེ་བདུན་པའོ།། །། དེ་ནས་རྡོ་རྗེ་འཛིན་རྒྱལ་པོ། །བསྲུང་བའི་འཁོར་ལོ་སྦྱོར་བར་བྱེད། །བགེགས་དང་ལོག་པར་འདྲེན་པ་དང་། །གདུག་པ་ཅན་དག་བསལ་ཕྱིར་གསུངས། །དཔལ་ལྡན་
རལ་གྲི་འཆང་བའི་བདག །སྲུང་བའི་འཁོར་ལོ་སྦྱོར་བར་བྱེད། །རལ་གྲི་འབར་བའི་བདག་ཉིད་ཀྱིས། །རིག་པ་གསུམ་ལས་མཆོད་པར་བྱེད། །སེམས་ཅན་ཐམས་ཅད་སྐྱོབ་པ་ཡི། །ལྷ་མོ་ཁྱོད་ནི་དཔང་དུ་གྱུར། །གཤིན་རྗེའི་
གཤེད་ཀྱི་དཀྱིལ་འཁོར་ནི། །སློབ་དཔོན་བདག་གིས་དཀྱིལ་འཁོར་བྲི། །གོས་ཀྱིས་གདོང་ནི་བཅིངས་བྱས་ལ། །དཀྱིལ་འཁོར་གྱི་ནི་མདུན་སྐོར་བཞག །ཁྱོད་སུ་ཞེས་ཀྱང་འདི་སྐད་དྲི། །སྐལ་བཟང་བདག་ཅེས་ཚིག་ཏུ་བརྗོད། །གསོལ་བཏབ་

90-1-111a

པ་ཡི་བློ་བཟངས་ལ། །ཡོལ་བའི་ནང་དུ་སྦྱིན་པར་བྱ། །དབང་བསྐུར་དོན་དུ་གུས་ཆེན་པོས། །དེ་ནས་ལན་གསུམ་ཆེད་དུ་བརྗོད། །ཇི་ལྟར་སངས་རྒྱས་ཆོས་ཆེན་པོས། །རྡོ་རྗེ་སེམས་དཔའ་དབང་བསྐུར་ལྟར། །བདག་
ཀྱང་མགོན་པོས་དབང་བསྐུར་ཞིང་། །མཆོག་ཀྱང་བདག་ལ་སྩལ་དུ་གསོལ། །དེ་བཞིན་གླུ་དང་རོལ་མོས་མཆོད། །དེ་བཞིན་ཁྲུས་དང་བྱུག་པས་ཀྱང་། །སློབ་མ་དང་བས་བླུག་པར་བྱ། །དེ་ལ་བསྟོད་པ་ཀུན་ཀྱང་བྱ། །དེ་ནས་
རྡོ་རྗེ་འཆང་གི་རྒྱལ་པོས་སྟོང་པའི་སྔགས་གསུངས་པ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཨཱཏ་མ་ཀོ྅ཧྂ། ཨོྂ་བུ་ཛ་བཛྲ་སྭ་བྷཱ་བ་ཨཱཏ་མ་ཀོ྅ཧཾ། ཨོཾ་དྷརྨ་དྷཱ་ཏུ་བཛྲ་སྭ་བྷཱ་ཨཱཏ་མ་ཀོ྅་ཧྂ། ཞི་བ་ལ་སོགས་དབྱེ་བ་ཡི། །སྦྱིན་སྲེག་དེ་
ནས་བཤད་པར་བྱ། །སྦྱིན་སྲེག་གང་གིས་གྲུབ་པ་ཡི། །ལས་རྣམས་ཐམས་ཅད་རབ་སྒྲུབ་པ། །ཞི་བ་ཞི་བའི་སེམས་ཀྱིས་ཏེ། །རྒྱས་པ་རྒྱས་པའི་སེམས་ཀྱིས་སོ། །དབང་ཡང་དེར་གཏང་སེམས་ཀྱིས་ཏེ། །བསད་དང་བསྐྲད་
པ་ལ་ཡང་ངོ་། །ཞི་བའི་དཀྱིལ་འཁོར་ཟླུམ་པོ་སྟེ། །རྒྱས་པ་ཡི་ནི་རྫིང་བུ་འདྲ། །དབང་དུ་བྱ་བ་ཟླ་གམ་ལྟར། །ནམ་མཁའི་ཁམས་འདྲ་བས་ནི་བསད། །ཞི་བ་ཁྲུ་གང་ཚད་དུ་སྟེ། །དེ་བཞིན་རྒྱས་པའི་ཁྲུ་དོ་པ། །ཇི་ལྟར་རྒྱས་པ་
དེ་ལྟར་དབང་། །བསད་པ་ལ་ནི་སོར་ཉི་ཤུ། །ཞི་བ་སྟེང་དུ་ཁྲུ་ཕྱེད་ཚད། །རྒྱས་པ་ལ་ནི་ཁྲུ་ཙམ་སྟེ། །སོར་ལྔ་གཉིས་ནི་བསད་པ་ལ། །དབང་ལ་ཇི་ལྟར་དེ་བཞིན་དགུག །ཚེས་གཅིག་ལ་ནི་ཞི་བ་བྱ། །ཟླ་བ་ཉ་ལ་རྒྱས་པ་སྟེ། །
བཅུ་བཞི་ལ་ནི་མངོན་སྤྱོད་དོ། །དབང་གི་ལས་ནི་ཚེས་བརྒྱད་ལའོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་སྦྱིན་སྲེག་གི་ཆོ་ག་རིམ་པར་ཕྱེ་བ་སྟེ་བརྒྱད་པའོ།། །། 
རྒྱ་མཚོའི་ས་ནི་བླང་བྱས་ལ། །ཀླུ་ཡི་གཟུགས་གཅིག་བརྩམས་བྱས་ཏེ། །ཡི་གེ་ཧཱུྃ་ཕུཿསྙིང་གར་ནི། །ཧྲཱིཿཥྚཱིཿལ་སོགས་བཟླས་པ་བྱ། །ཆར་ནི་མི་འབབ་དུས་དག་ཏུ། །བཟླས་པ་ཁྲི་བྱས་འབབ་པར་འགྱུར། །སྦྲུལ་ནག་པོ་ཡི་

90-1-111b

ཤ་དང་ནི། །ནིམ་པའི་ལོ་མ་དང་བསྲེས་ལ། །དེ་ལ་རི་ལུ་བྱས་ནས་ནི། །བརྟུལ་ཞུགས་ཅན་གྱིས་རྒྱ་མཚོར་གཞུག །སྔགས་ཀྱི་བཟླས་པ་ཁྲི་བྱས་ན། །མཚོ་རླབས་རེངས་བྱེད་མཆོག་ཡིན་ནོ། །ཙན་དའི་
འབྲས་བུ་བརྒྱ་བླངས་ལ། །འབྲས་དང་མར་ཤས་བསྲེས་བྱས་ཏེ། །འབུམ་ཕྲག་བརྒྱ་ནི་རབ་བཟླས་ལ། །སྦྱིན་སྲེག་བྱས་ན་ལྷ་མཐོང་འགྱུར། །དུར་ཁྲོད་རོ་བསྲེགས་ཡོག་པའི་ཤིང་། །བརྟུལ་ཞུགས་ཅན་གྱི་གཟུགས་སུ་
བྲི། །སྨྱོན་པའི་ཁུ་བས་བསྐུ་བྱས་ལ། །སྔགས་ཁྲི་བཟླས་པས་མཛེས་ཐེབས་འགྱུར། །གྲུབ་པའི་ཡུངས་ཀར་བླངས་བྱས་ལ། །འབུམ་ཕྲག་བཞི་ནི་བཟླས་བྱས་ན། །སྦྲུལ་གྱིས་བཟུང་ནས་འགྱེལ་བ་ལ། །གཏོར་ན་འཚོ་བར་ཐེ་ཚོམ་
མེད། །རི་གཤོང་ཆུ་ཡི་ས་བླངས་ལ། །སྔགས་ཀྱི་བཟླས་པ་འབུམ་བྱས་ནས། །མགོ་ལ་བསྐུས་པ་ཙམ་གྱིས་ནི། །མགོ་ཡི་ནད་ནི་ཉམས་པར་བྱེད། །སྔགས་ནི་ལན་བདུན་མངོན་བཟླས་པའི། །ལག་པས་མགོ་བོ་མཉེས་ན་ནི། །མགོ་ནི་ཟུག་གཟེར་
འབྱུང་མི་འགྱུར། །དེ་ནི་འདི་ལྟར་ཐེ་ཚོམ་མེད། །བྲམ་ཟེ་ཡི་ནི་ཤ་དག་ལ། །དུར་ཁྲོད་ས་དང་ཐལ་བ་ལས། །གཤིན་རྗེའི་གཤེད་ཀྱི་གཟུགས་བྱས་ཏེ། །ཕྱག་གཉིས་ཞལ་ནི་གཅིག་པ་ལ། །རྡོ་རྗེ་ཆེན་པོ་གཡས་པ་ན། །དེ་བཞིན་མི་མགོ་གཡོན་པ་ནའོ། །མདོག་
ནི་དཀར་པོ་ཆེར་འཇིགས་པ། །དེ་ཡིས་གདུག་པ་འཇོམས་པར་བྱེད། །བདུད་རྩི་ལྔ་དང་ཤ་ལྔ་ཡིས། །ཉིན་རེ་བཞིན་དུ་གཏོར་མ་སྦྱིན། །བདག་གི་དགྲ་བོ་ཆོམ་ཤིག་ཅེས། །རྣལ་འབྱོར་པས་བདག་གསོལ་བ་གདབ། །ནུབ་མོ་དེ་སྐད་བརྗོད་པས་ཉལ། །དགྲ་ནི་ཐོ་རངས་
འཆི་བར་འགྱུར། །ཆུ་འགགས་ལ་སོགས་པས་གཟིར་ཞིང་། །ཡང་ན་ནད་ཀྱིས་ཐེབས་པར་འགྱུར། །དགྲ་ཡི་བཻ་རོ་ཙ་ན་བླང་། །མི་ཡི་རྐང་སྦུབས་ཡོངས་བཀང་སྟེ། །རབ་ཏུ་བཀང་ནས་འབུམ་བཟླས་ན། །ཤིང་རྩེར་རྒྱུ་བའི་ཡི་དགས་མཚུངས། །
ལྷ་རྫས་དངོས་གྲུབ་ཀུན་བྱེད་ཅིང་། །དགོས་པ་སྣ་ཚོགས་རབ་སྒྲུབ་བོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་འཇིགས་བྱེད་གཤིན་རྗེའི་གཤེད་ཅེས་བྱ་བའི་རིམ་པར་ཕྱེ་བ་སྟེ་

90-1-111c

དགུ་པའོ།། །།  རོ་ལངས་ཆེན་པོའི་སྒྲུབ་ཐབས་ནི། །དེ་ནས་ཡང་དག་བཤད་པར་བྱ། །སྒྲུབ་པ་བཟང་པོ་ཀུན་བྱེད་ཅིང་། །དགོས་པ་སྣ་ཚོགས་རབ་སྒྲུབ་པའོ། །བཟང་པོ་མ་གོད་རྨ་མེད་པ། །ཤིང་ལ་སྦྱངས་པས་བསྡུས་བྱས་ལ། །ཕབ་ལ་
ལེགས་པར་བཀྲུ་བྱ་སྟེ། །དེར་འདུག་སྔགས་བཟླས་བརྟུལ་ཞུགས་ཅན། །ཨེ་མའོ་ངོ་མཚར་སྔགས་ཀྱི་མཐུ། །བསམ་པ་མེད་པའི་འོ་དོད་འབོད། །གཤིན་རྗེའི་རྣལ་འབྱོར་ལྡན་པ་ཡི། །ཡིད་ཀྱིས་ཅུང་ཟད་འཇིགས་མི་བྱ། །
རྣལ་འབྱོར་ལམ་ནི་གང་འདོད་པ། །དེ་ཀུན་ཐམས་ཅད་སྟེར་བར་བྱེད། །མ་ཧེ་དང་ནི་ཀུ་བེ་ར། །སྟག་དང་དེ་ལས་གཞན་པ་དང་། །དོམ་དང་སྤྲེའུ་དག་ལ་ནི། །ཁྱི་དག་གི་ནི་ཁྱད་པར་དང་། །དུག་དང་སྐེ་ཚེ་ཚྭ་དང་ནི། །དེ་བཞིན་ཚྭ་
གསུམ་སོ་བ྅ཛ། །འདི་དག་ལེགས་པར་སྦྱར་གཟུགས་བྱ། །གཤིན་རྗེའི་གཤེད་པོ་འཇིགས་པའི་གཟུགས། །དེ་ལ་རྣལ་འབྱོར་པས་གསོལ་གདབ། །ཧྲཱིཿཥྚྲཱིཿལ་སོགས་སྔགས་ཀྱིས་ནི། །ཆེ་གེ་མོ་དེ་བདག་ལ་སྩོལ། །དེ་ཡི་ཕ་
ཡིས་སྟེར་བར་བྱེད། །གལ་ཏེ་རྣལ་འབྱོར་པ་མ་ཕྱིན། །རྨི་ལམ་གཤིན་རྗེའི་གཤེད་བརྡེག་ཅིང་། །ལྷོ་ཡི་ཕྱོགས་སུ་ཁྱེར་མཐོང་ནས། །སད་ན་དེ་ཡི་ཕ་ཡིས་སྟེར། །ཞལ་གསུམ་ཕྱག་དྲུག་འཇིགས་པ་ལ། །ཨིནྟྲ་
ནཱི་ལ་འདྲ་བའི་མདོག །ཐོ་བ་འཛིན་པའི་བརྟུལ་ཞུགས་ཅན། །ཕྱག་ཏུ་ཐོ་བ་དགོད་པར་བྱ། །ཞལ་གསུམ་ཕྱག་དྲུག་ཁྲོས་པ་ལ། །མདོག་དམར་པོ་སྟེ་ཁྲོས་པར་འཇིགས། །འཇིགས་པ་ཡང་ནི་འཇིགས་པར་མཛད། །
མཁས་པས་ཕྱག་ཏུ་དབྱིག་པ་དགོད། །ཞལ་གསུམ་ཕྱག་དྲུག་དམར་བ་ལ། །འཇིགས་པ་ཆེན་པོ་བསྡིགས་པ་ཡི། །ཕྱག་ན་པད་མ་དམར་པོ་བསྣམས། །པད་མ་ཞེས་བྱ་མཁས་པས་བསྒོམ། །ཞལ་གསུམ་
ཕྱག་དྲུག་ལྗང་གུ་སྟེ། །ཕྱག་ན་རལ་གྲི་བསྣམས་པ་ཡི། །ལས་ཀུན་བྱེད་པར་གྱུར་པའོ། །རལ་གྲི་ཞེས་བྱ་རྣམ་བསྒོམ་བྱ། །བྷ་གར་ལིང་ག་རྣམ་བསྒོམ་ཉིད། །དཀྱིལ་འཁོར་བདག་པོ་རྣམ་པར་བསྒོམ། །ཞེ་སྡང་

90-1-111d

རྗེས་དྲན་རྣལ་འབྱོར་གྱིས། །གཏི་མུག་རྗེས་དྲན་རྣམ་བསྒོམ་བྱ། །གཏི་མུག་རྗེས་དྲན་ལ་དམིགས་ནས། །ཕྲ་མ་རྗེས་དྲན་བསྒོམ་པར་བྱ། །ཕྲ་མ་རྗེས་དྲན་རྣལ་འབྱོར་གྱིས། །འདོད་ཆགས་རྗེས་དྲན་བསྒོམ་པར་བྱ། །འདོད་ཆགས་
རྗེས་དྲན་རྣལ་འབྱོར་གྱིས། །ཕྲག་དོག་དྲན་བྱ་བརྟུལ་ཞུགས་ཅན། །སོ་སོའི་རིགས་ཀྱི་སྤྲིན་རྣམས་ནི། །བ་སྤུའི་ཁུང་ནས་སྤྲོ་བར་བྱ། །ཉི་མའི་དཀྱིལ་འཁོར་དབུས་སུ་ནི། །གཏུམ་པོའི་ཁྲོ་བོ་བསྒོམ་པར་བྱ། །ཟླ་བའི་
དཀྱིལ་འཁོར་དབུས་སུ་ནི། །ལྷ་མོ་བཞི་པོ་རབ་བསྒོམ་བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་རྗེས་སུ་དྲན་པ་རིམ་པར་ཕྱེ་བ་སྟེ་བཅུ་པའོ།། །། 
ཞེ་སྡང་གིས་མནན་འགྲོ་མཐོང་ནས། །ཞེ་སྡང་གཤིན་རྗེའི་གཤེད་གཟུགས་སུ། །བཅོམ་ལྡན་གཤིན་རྗེའི་དབང་དུ་མཛད། །ཞེ་སྡང་ཐམས་ཅད་ཟད་པར་བྱེད། །གཏི་མུག་གིས་མནན་འགྲོ་མཐོང་ནས། །གཏི་མུག་
གཤིན་རྗེའི་གཤེད་གཟུགས་སུ། །བཅོམ་ལྡན་གཤིན་རྗེའི་དབང་མཛད་ནས། །གཏི་མུག་ཐམས་ཅད་ཟད་པར་མཛད། །འགྲོ་བ་ཕྲ་མས་མནན་མཐོང་ནས། །ཕྲ་མ་གཤིན་རྗེའི་གཤེད་གཟུགས་སུ། །བཅོམ་
ལྡན་སྙིང་རྗེ་ཅན་གྱིས་མཛད། །ཕྲ་མ་ཐམས་ཅད་ཟད་པར་མཛད། །འདོད་ཆགས་ཀྱིས་མནན་འགྲོ་མཐོང་ནས། །འདོད་ཆགས་གཤིན་རྗེའི་གཤེད་གཟུགས་སུ། །བཅོམ་ལྡན་སྙིང་རྗེ་ཅན་མཛད་ནས། །འདོད་
ཆགས་ཐམས་ཅད་ཟད་པར་མཛད། །ཕྲག་དོག་གིས་མནན་འགྲོ་མཐོང་ནས། །ཕྲག་དོག་གཤིན་རྗེའི་གཤེད་གཟུགས་སུ། །བཅོམ་ལྡན་སྙིང་རྗེ་ཅན་མཛད་ནས། །ཕྲག་དོག་ཐམས་ཅད་ཟད་པར་མཛད། །བྱམས་པ་
ཙར་ཙི་ཀཱར་གསུངས་ཏེ། །སྙིང་རྗེ་དེ་བཞིན་ཕག་མོའོ། །དབྱངས་ཅན་མ་ནི་དགའ་བ་སྟེ། །བཏང་སྙོམས་གཽ་རཱིའི་གཟུགས་སོ། །བདག་ཉིད་དངོས་པོ་ཐམས་ཅད་ཀྱིས། །རྫོགས་པར་བྱས་ནས་དཀྱིལ་འཁོར་གྱི། །རྣལ་

90-1-112a

འབྱོར་སྙིང་གའི་ས་བོན་སྤྲོ། །འགྲུབ་པར་འདི་ལ་ཐེ་ཚོམ་མེད། །དེ་ནས་ད་ནི་བཤད་བྱ་བ། །སྤྱོད་པ་ཡི་ནི་མཚན་ཉིད་མཆོག །གཤིན་རྗེའི་གཤེད་པོ་འཇིགས་གཟུགས་ཀྱིས། །སྐུ་དང་གསུང་དང་ཐུགས་སུ་
འགྲུབ། །དགོན་པ་ཆེན་པོའི་ས་ཕྱོགས་སུ། །མ་ཧེ་མཆོག་ནི་བཀུག་ལ་ཞོན། །སྦྲུལ་དག་གིས་ནི་བརྒྱན་པར་བྱ། །ལྕགས་ཀྱི་རྡོ་རྗེ་གཟུགས་པར་བྱ། །སྐྲ་ཡང་སེར་པོ་དག་ཏུ་བྱ། །གྱེན་བརྫེས་པ་ཡི་ཁྱད་པར་གྱིས། །མགོ་
ལ་ཐོད་པས་ཡང་དག་བསྐོར། །སྨ་ར་ལྐོག་སྤུ་སེར་པོར་བྱ། །ཧྲཱིཿཥྚྲཱིཿལ་སོགས་སྔགས་བརྗོད་ཅིང་། །ལྕགས་ཀྱི་རྡོ་རྗེ་མཁའ་ལ་གསོར། །རྡོ་རྗེ་གཤིན་རྗེའི་གཤེད་སྦྱོར་བས། །སེང་གེའི་སྒྲ་ཡང་དེ་ལ་བྱ། །ནུས་པ་ཅུང་ཟད་
སྐྱེས་པ་ན། །རོལ་ཅིང་གྲོང་དུ་འཇུག་པར་བྱ། །གར་དང་བདེ་བའི་ཆ་ཀུན་གྱིས། །དྲུག་ལས་སྐྱེད་སོགས་གླུ་བླང་བྱ། །དེ་ནས་རྒྱལ་མཚན་ཁྱམས་མཐོང་ན། །དེར་ནི་འོ་མ་རབ་བསྒྲུབ་བྱ། །འོ་མ་ལ་སེམས་གཅིག་གོམས་པས། །
ཕྱག་རྒྱ་ཆེན་པོ་རབ་བསྒྲུབ་བྱ། །ཕག་མོ་ཡི་ནི་གཟུགས་བཟུང་བའི། །བཙུན་མོ་ཀུན་ལ་མཁྱུད་པ་ཡིས། །དཔའ་མོ་སེང་གེ་བཞིན་དུ་སྤྱད། །འདོད་པའི་དོན་ཀུན་རབ་ཏུ་འགྲུབ། །དེ་ནས་ད་ནི་བཤད་བྱ་བ། །ཕྱག་རྒྱ་མ་ནི་རབ་སྒྲུབ་
ཐབས། །གསང་སྔགས་ཆེན་པོ་ཡི་གེ་གཅིག །དེ་ཡི་བཟླས་པ་མངོན་བཤད་བྱ། །ཡི་གེ་ཧྲཱིཿལས་བྱུང་བ་ཡི། །མ་ཧེ་ཡང་དག་བསྒོམ་བྱ་སྟེ། །རྡོ་རྗེ་དཀྱིལ་འཁོར་ལ་གནས་པ། །མ་ཧེ་སྟེང་དུ་བསྒོམ་པར་བྱ། །གང་ཡང་
ཅུང་ཟད་གཅོད་ཅིང་འབིགས། །མཚོན་ཆ་སྣ་ཚོགས་གཟུགས་དེ་ནི། །མ་ཧེ་སྣ་ཚོགས་བསྒྲུབ་པ་ཡི། །བློ་དང་ལྡན་པའི་ཕྱག་ན་བསྣམས། །དེ་ནས་ཡང་དག་བཤད་བྱ་བ། །དབྱིག་པ་གཤིན་རྗེའི་གཤེད་བསྒྲུབ་ཐབས། །ཡི་གེ་
ཧྲཱིཿནི་གསང་སྔགས་ཆེ། །མ་ཧེ་ཆེན་པོ་ལ་བཅིབ་པ། །ཕྱག་ནི་འབུམ་ཕྲག་རྫོགས་པའི་ཕྱག །སྐུ་ནི་མི་རོའི་ཐལ་བས་བསྐུས། །རི་རབ་དང་ནི་མཉམ་པའི་ལུས། །གསེར་གྱི་ས་གཞི་ཐུག་པར་མནན། །དེ་ནས་ཡང་དག་བཤད་

90-1-112b

བྱ་བ། །བྱེ་བའི་ཕྱག་ཅན་སྒྲུབ་པའི་ཐབས། །ཡི་གེ་ཧཱུྃ་ལས་བྱུང་བའི་གཙོ། །ཝི་ཀྲྀ་ཏཱ་ན་གསང་སྔགས་ཆེ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྂ་ཧཱུྂ་ཕཊ་ཕཊ་ཧ་ཧཱ་ཧི་ཧཱི་ཧུ་ཧཱུ་ཧེ་ཧཻ་ཧོ་ཧཽ་ཧྂ་ཧཿཕཊ་སྭཱ་ཧཱ། དགོས་པ་ཐམས་ཅད་བསྒྲུབ་པ་ཡི། །
དམ་ཚིག་བསྒྲུབ་ཐབས་བཤད་པར་བྱ། །སྔགས་ཀྱིས་དུབ་པས་ཁ་ཟས་བཟའ། །ངན་པ་དང་བྲལ་རྙེད་དཀའ་མིན། །ཤ་ཆེན་དང་ནི་རྟ་དང་ནི། །གླང་པོ་ཆེ་ཡི་ཁྱད་པར་དང་། །བ་ལང་གི་དང་ཁྱི་དང་ནི། །བོང་བུ་རྔ་མོ་ལྕེ་
སྤྱང་ངོ་། །སྔོན་པོ་དང་ནི་བསྲེས་པ་ཡི། །སྣུམ་ཆེན་གྱིས་ནི་ལུས་བྱུགས་ན། །ལུས་ལ་བྱུགས་པ་ཙམ་གྱིས་ནི། །འགྲོ་བ་ཐམས་ཅད་དབང་དུ་འགྱུར། །སྣང་མཛད་སི་དུ་བ་ར་དང་། །དེ་བཞིན་བིལ་བའི་ལོ་མ་དང་། །སོ་ཕག་ཕྱེ་མ་བསྲེས་
པ་དང་། །གསེར་ཤིང་ལོ་མའི་ཁུ་བ་རྣམས། །འདི་ཡིས་དྲིལ་ཕྱིས་བྱས་གྱུར་ན། །ཁམས་གསུམ་པོ་ནི་དབང་དུ་འགྱུར། །དུག་དང་ཆུ་བུར་དེ་བཞིན་མཛེ། །དྲིལ་ཕྱིས་བྱས་པས་ཉམས་པར་བྱེད། །གཅི་བ་ཆེན་པོ་བཏུང་བར་བྱ། །
རྡོ་རྗེ་བདུད་རྩི་དེ་བཞིན་དུ། །འདི་ནི་རྣལ་འབྱོར་མཆོག་གཙོ་བོ། །རང་འབྱུང་མེ་ཏོག་བཏུང་བ་བཞིན། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་སྤྱོད་པ་སྟོན་པ་ཞེས་བྱ་བའི་
རྒྱུད་རིམ་པར་ཕྱེ་བ་སྟེ་བཅུ་གཅིག་པའོ།། །།  དེ་ནས་བཅོམ་ལྡན་འདས་སྐྱེས་བུ་ཆེན་པོའི་དམ་ཚིག་རྡོ་རྗེ་སེམས་དཔའི་ངོ་བོ་ཙར་ཙི་ཀཱའི་རྣམ་པའི་ཏིང་ངེ་འཛིན་ལ་ཡང་སྙོམས་པར་ཞུགས་ཤིང་། ཕག་མོའི་རྣམ་པའི་ཏིང་ངེ་
འཛིན་ལ་ཡང་སྙོམས་པར་ཞུགས་སོ། །དབྱངས་ཅན་གྱི་རྣམ་པའི་ཏིང་ངེ་འཛིན་ལ་ཡང་སྙོམས་པར་ཞུགས་སོ། །གཽ་རཱི་མའི་རྣམ་པའི་ཏིང་ངེ་འཛིན་ལ་སྙོམས་པར་ཞུགས་ཏེ། མཆོད་པའི་གླུ་འདི་དག་བརྗོད་པར་མཛད་དོ། །
ཨ་ཀྱེ་ཀྱེ་གཤིན་རྗེའི་གཤེད་ནག་བླ། །སྲིན་པོའི་གཟུགས་ཅན་རང་བཞིན་ཁྱོད། །བདག་གིས་ཁྱོད་མཐོང་ཤིན་དུ་འཇིགས། །ཁྲོ་བའི་རང་བཞིན་འདི་ཐོང་མཛོད། །མཐོ་རིས་ས་སྟེངས་ས་འོག་བཅས། །ཁྱོད་ཀྱི་གར་གྱིས་གཡོས་

90-1-113a

པར་མཛད། །ཨཉྫ་ནག་པོ་བཅག་འདྲ་བའི། །ཁྲོ་ཁྱོད་རོ་ལངས་ཞི་གར་མཛོད། །རྣམ་པ་སྣ་ཚོགས་གཟུགས་སྤྲུལ་ཞིང་། །མདངས་ནག་ཚད་ནི་ཐུང་བ་ལ། །བདེ་ཆེན་ངོ་བོ་ཁྲོ་གར་གྱིས། །རྡོ་རྗེ་དབྱངས་ཅན་མ་གསོལ་
འདེབས། །ཧྲཱིཿཿསྔགས་ཧྲཱིཿཥྚྲཱིཿསྔགས་དང་གར་གྱིས་ཁྱོད། །སྲིད་པ་གསུམ་གྱི་འཁྲུལ་པ་ཆོད། །སྙིང་རྗེ་ཁྲོས་པའི་ངང་སྒྲོལ་གར། །འགྲོ་བས་དད་ན་ངོ་མཚར་འགྱུར། །དེ་ནས་ཡང་དག་བཤད་བྱ་བ། །བཟླས་པ་ཡི་ནི་མཚན་ཉིད་མཆོག །
བཟླས་པ་གང་ཞིག་རབ་བཟླས་ན། །དངོས་གྲུབ་ཡངས་པ་ཐོབ་པ་ནི། །མྱུར་བར་མ་ཡིན་དལ་བར་མིན། །རིང་དུ་མ་ཡིན་ཐུང་དུ་མིན། །སྔགས་ནི་ཅུང་ཟད་ཐོས་པར་བཟླས། །གཤིན་རྗེ་སློབ་དཔོན་མི་མཆོག་གི། །མ་ཧེ་མི་དང་སོ་
གཉིས་དང་། །བ་ལང་དང་ནི་རྟ་དག་དང་། །བོང་བུ་རྔ་མོའི་རུས་པ་ལས། །བཟླས་པའི་ཕྲེང་བ་རབ་བསྒྲུབ་བྱ། །ཟླ་ངོ་གཅིག་གི་བཅུ་བཞི་ལ། །བདུད་རྩི་ལྔ་དང་ལྡན་པ་ཡིས། །ཤ་ལྔ་དག་ནི་བསྡུ་བྱས་ནས། །བཟླས་ན་དངོས་གྲུབ་འགྲུབ་པའི་
མཆོག །རིལ་བུ་དག་ནི་སོ་སོ་ལ། །རྣལ་འབྱོར་པ་ཡིས་གཤིན་གཤེད་བསྒོམ། །མཁས་པས་ནི་ཡང་མི་མགོ་སྟེ། །ཁྲག་གིས་བཀང་བའི་མགོ་བསྒོམ་བྱ། །ཁྲི་ཙམ་གྱིས་ནི་འབྱུང་པོ་རྣམས། །མཁའ་འགྲོ་མ་རྣམས་སྟོང་ཕྲག་
གིས། །བདུད་དང་ཡི་དགས་ཚོགས་ཀྱང་འཆི། །གཤིན་གཤེད་རྡོ་རྗེའི་སྦྱོར་བ་ཡིས། །རྣལ་འབྱོར་བདག་ཉིད་འབུམ་བཟླས་ནས། །དེས་ནི་ལས་ཀུན་བྱེད་པ་ཡིན། །བྱེ་བ་བཟླས་ནས་དངོས་གྲུབ་སྟེར། །བྱེ་བ་ལྔ་བཟླས་སྨོས་ཅི་དགོས། །
ཉིན་རེའམ་ཡང་ན་ཟླ་རེ་འམ། །དེ་བཞིན་ལོ་ནི་རེ་རེ་ལ། །གཏོར་མ་དྲུག་བཅུ་རྩ་བཞི་སྦྱིན། །དབྱུག་གུ་དྲུག་བཅུ་རྩ་བཞིར་ཤེས། །རྟག་ཏུ་ཅུང་ཟད་ཅི་ཟ་དང་། །དེ་བཞིན་ཅུང་ཟད་འཐུང་བ་དང་། །གཞན་ཡང་བཟའ་བ་ཐམས་ཅད་ཀྱི། །
ཕུད་ནི་གཤིན་རྗེའི་གཤེད་ལ་དབུལ། །དེ་ནས་ཡང་དག་བཤད་བྱ་བ། །བླ་མ་ལ་ནི་ཡོན་དབུལ་བའོ། །ལས་ནི་ཐམས་ཅད་བསྒྲུབ་པ་དང་། །བདག་ཉིད་ཞི་བར་བྱ་བའི་ཕྱིར། །བདག་ཉིད་ཀྱང་ནི་དབུལ་བ་དང་། །རྟ་དང་བ་དང་གླང་པོ་དང་། །

90-1-113b

གསེར་དང་དེ་ལས་གཞན་པ་དང་། །རང་གི་ཆུང་མ་དེ་བཞིན་བུ། །མ་དང་སྲིང་མོ་ཚ་མོ་དང་། །དེ་བཞིན་དུ་ནི་སྤུན་ཟླ་དང་། །ན་བཟའ་སྣ་ཚོགས་དག་དང་ནི། །གདུགས་དང་རྡུལ་ཡབ་མཛེས་པ་དང་། །ཁྱིམ་དང་གདན་དང་དྲི་ཞིམ་དང་། །
དེ་བཞིན་གླུ་དང་རོལ་མོ་དང་། །རལ་གྲི་དང་ནི་རྒྱན་དག་དང་། །བརྟུལ་ཞུགས་ཅན་གྱིས་བླ་མར་དབུལ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་ཉེ་བར་མཁོ་བའི་ལས་ཀྱི་ཁྱད་པར་ཐམས་
ཅད་ཞེས་བྱ་སྟེ་རིམ་པར་ཕྱེ་བ་བཅུ་གཉིས་པའོ།། །། དེ་ནས་སེམས་ཅན་ཐམས་ཅད་ཀྱི། །སྡིག་པ་དག་ནི་ཇི་སྙེད་པ། །དེ་དག་གཅོད་པའི་གྲི་གུག་སྟེ། །ཞེ་སྡང་གཅོད་པའི་ཤུབས་ཅན་ནོ། །དེ་ནས་ཡང་དག་བཤད་བྱ་བ། །རིང་བའི་ཐོས་
པ་བསྒྲུབ་པའི་ཕྱིར། །རྡོ་རྗེ་མཁའ་འགྲོ་མ་སྒྲུབ་ཐབས། །ནམ་མཁའི་ཁམས་ཀྱི་དབུས་གཏོགས་པར། །ཉི་མའི་དཀྱིལ་འཁོར་མཆོག་བསམ་བྱ། །གནས་དེར་རྩེ་ལྔ་པ་ཡང་བསྒོམ། །དེ་ཡི་སྟེང་དུ་གནས་དགོད་བྱ། །མཐིང་མདོག་
ནག་པོ་འཇིགས་ཚུལ་ལ། །ཕྱག་དྲུག་འཇིགས་སུ་རུང་བ་སྟེ། །ཕྱག་ན་རྡོ་རྗེ་རྣམ་བསྒོམ་བྱ། །ཕྱག་གཞན་དག་ལ་གཞན་དག་དགོད། །ཤར་དུ་སངས་རྒྱས་མཁའ་འགྲོ་མ། །ཕྱག་དྲུག་གཏི་མུག་རྡོ་རྗེ་མཚུངས། །ལག་ན་འཁོར་ལོ་འཇིགས་པར་བྱེད། །
བསྒོམ་བྱ་སྦྱོར་བའི་དཀྱིལ་འཁོར་དུ། །ལྷོ་རུ་རིན་ཆེན་མཁའ་འགྲོ་མ། །ཕྱག་དྲུག་ཕྲ་མ་དང་མཚུངས་པ། །ཕྱག་ན་རིན་ཆེན་རབ་འབར་བ། །ཉི་མའི་དཀྱིལ་འཁོར་བསྒོམ་པར་བྱ། །ནུབ་ཏུ་པད་མའི་མཁའ་འགྲོ་མ། །ཕྱག་དྲུག་པད་མ་
འཛིན་པའོ། །བྱང་དུ་ལས་ཀྱི་མཁའ་འགྲོ་མ། །རལ་གྲི་འཛིན་པའི་དཀྱིལ་འཁོར་རིམ་པའོ། །མེ་ལ་སོགས་པ་མཚམས་བཞི་རུ། །ལྷ་མོ་བསྒོམ་བྱ་བརྟུལ་ཞུགས་ཅན། །ལཱ་སྱེ་མཱ་ལེ་དེ་བཞིན་གར། །གླུ་མ་ཡི་ནི་ཁྱད་པར་རོ། །ལས་
ཀྱི་ཆོ་ག་མཐོང་བ་ཡིས། །དེར་ནི་སྒོ་སྐྱོང་བསྒོམ་པར་བྱ། །ཐོ་བ་དབྱིག་པ་དང་པད་མ། །དེ་བཞིན་གཞན་ནི་རལ་གྲིའོ། །ཨོཾ་བཛྲ་ཌཱ་ཀི་ནཱི། ཨོཾ་བུདྡྷ་ཌཱ་ཀི་ནཱི། ཨོཾ་རཏྣ་ཌཱ་ཀི་ནཱི། ཨོྂ་དྷརྨྨ་ཌཱ་ཀི་ནཱི། ཨོཾ་ཀརྨྨ་ཌཱ་ཀི་ནཱི། ལྃ་ནྃ་གྃ་མྃ། མཚམས་སུའོ། །

90-1-114a

ཨོཾ་མུངྒ་ར་ཛ་ཨོཾ་དཎྜ་ཧཱུྃ། ཨོཾ་པདྨ་བྃ། ཨོཾ་ཁཌྒ་ཧོཿ། འདི་ནི་བཅོམ་ལྡན་འདས་རྡོ་རྗེ་ཅན་གྱིས་རྡོ་རྗེ་མཁའ་འགྲོ་མའི་སྒྲུབ་ཐབས་གསུངས་པའོ། །རིང་པོའི་ཐོས་པ་བསྒྲུབ་དོན་དུ། །རྡོ་རྗེ་མཁའ་འགྲོ་མ་བསྒོམ་བྱ། །དེར་ནི་གསང་སྔགས་
ཀྱི་དངོས་གྲུབ་འགྲུབ་པར་འགྱུར་ཏེ། ཨོཾ་ཨཱ་ཀ་ཤ་ཙ་ར་བཛྲ་ཌཱ་ཀི་ནཱི་སྭཱ་ཧཱ། དེ་ནས་ཡང་དག་བཤད་བྱ་བ། །རྡོ་རྗེ་ས་འོག་སྒྲུབ་ཐབས་སོ། །ས་འོག་རྣམ་པར་བསྒྲུབ་དོན་དུ། །གནོད་མཛེས་རྡོ་རྗེ་བསྒོམ་པར་བྱ། །ཕྱག་དྲུག་མདོག་སྔོན་འཇིགས་
པ་ཡི། །ཕྱག་ཏུ་གཏུན་ཤིང་དགོད་པར་བྱ། །དཀྱིལ་འཁོར་གྱི་ནི་དཀྱིལ་དག་ཏུ། །འདི་ནི་རབ་ཏུ་དགོད་པར་བྱ། །ཤར་དུ་སྤྱན་མ་དགོད་པར་བྱ། །དེ་བཞིན་ལྷོ་རུ་མཱ་མ་ཀཱི། །ནུབ་ཏུ་ལྷ་མོ་གོས་དཀར་མོ། །སྒྲོལ་མ་བྱང་གི་ཕྱོགས་སུ་དགོད། །
མེ་ཏོག་སྤོས་དང་དེ་བཞིན་དྲི། །མར་མེ་ལ་སོགས་མཚམས་སུ་དགོད། །ཐོ་བ་ལ་སོགས་སྒོ་དྲུང་སྟེ། །སྦྲུལ་གྱིས་བརྒྱན་པའི་སྐ་རགས་བྱས། །ལས་ཀྱི་ཆོ་ག་མཐོང་ནས་ནི། །དཀྱིལ་འཁོར་འདི་ལྟར་བསྒོམ་པར་བྱ། །རྡོ་རྗེ་ས་འོག་
སྦྱོར་ལྡན་པས། །རྨི་ལམ་དུ་ནི་ལམ་མཐོང་འགྱུར། །དེ་ནས་ཡང་དག་བཤད་བྱ་བ། །བདུན་པའི་རྒྱལ་པོའི་དཀྱིལ་འཁོར་ཏེ། །མཁའ་སྤྱོད་ཉིད་ནི་རབ་བསྒྲུབ་ཕྱིར། །རྟ་ཡི་མཆོག་ནི་རབ་ཏུ་བསྒྲུབ། །ཕྱག་གཉིས་པ་ལ་ཞལ་
གཅིག་པ། །སྐུ་མདོག་ལྗང་གུ་འཇིགས་པར་བྱེད། །ཉི་མའི་དཀྱིལ་འཁོར་སྟེང་དུ་གཞག །རྟ་ཡི་གདོང་པ་རབ་མཛེས་པས། །གཡས་པ་སྲད་བུ་ཁུ་ཚུར་བཅས། །ཕྱག་གཡོན་པ་ནི་ཐོད་པའོ། །ཨོཾ་ཕུྃ་ཕུྃ་ཕུྃ་ཧི་ཧི་ཧི། གསང་སྔགས་
འདི་ནི་མཁས་པས་བཟླ། །རྟ་ཡི་མཆོག་ཏུ་གྱུར་པར་གྲགས། །ཤར་དུ་བ་ཌ་བིང་བསྒོམ་བྱ། །ལྷོ་ཕྱོགས་སུ་ནི་རིམ་གྲོ་མ། །ནུབ་ཏུ་བདུན་པའི་རྒྱལ་པོ་སྟེ། །རྟ་མཆོག་མ་ནི་བྱང་ཕྱོགས་དགོད། །བདག་པོའི་ཞལ་ཕྱག་ཇི་ལྟ་བར། །
ཐམས་ཅད་དེ་དང་འདྲ་བར་བསྒོམ། །སྔགས་འདི་ཡིས་ནི་ཐམས་ཅད་དུ། །གཤེགས་སུ་གསོལ་བར་རབ་ཏུ་གྲགས། །སྨྱུག་མའི་གླིང་བུ་པི་བང་དང་། །རྔ་ཟླུམ་རྔ་བྲན་མཚམས་སུ་གཞག །བན་གླང་སྣ་དང་གླང་པོའི་སྣ། །

90-1-114b

དེ་བཞིན་གདོང་བཟང་གདོང་ངན་ཏེ། །གཏུན་ཤིང་དང་ནི་སྟ་རེ་དང་། །ལྕགས་ཀྱུ་དང་ནི་ཞགས་པ་དང་། །གར་ལ་སོགས་པའི་རྣལ་འབྱོར་གྱིས། །སྒོ་བཞི་རུ་ནི་རྟག་ཏུ་བསྒོམ། །སྔོ་ཆགས་གཡོན་པར་བསྒོམ་པར་བྱ། །རང་གི་ཕྱག་
མཚན་དེ་བཞིན་གཡས། །ཇི་ལྟར་ལྟ་མཆོག་སྔགས་ཀྱིས་ནི། །རྡོ་རྗེ་ས་འོག་གི་ཡང་གཏེར། །རྟ་མཆོག་རྣལ་འབྱོར་ཉིད་ཀྱིས་ནི། །ཁམས་གསུམ་ནམ་མཁའི་ཁམས་སུ་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་
གཤིན་རྗེའི་གཤེད་ནག་པོའི་རྒྱུད་ལས་དངོས་གྲུབ་ངེས་པར་བསྟན་པ་སྟེ་རིམ་པར་ཕྱེ་བ་བཅུ་གསུམ་པའོ།། །།  དེ་ལ་འདི་ནི་སྲད་བུ་བརྐྱང་བའི་དམ་ཚིག་གི་མཆོག་སྟེ། ཨ་ཀཱ་རོ་མུ་ཁྃ་སརྦྦ་དྷརྨཱ་ཎཱྃ། ཨཱདྱཱ་ནུད་པན་ན་ཏྭཱད། དཔལ་
ལྡན་གཤིན་རྗེའི་གཤེད་བསྒོམ་ལ། །སློབ་མ་རྣམ་སྣང་མཛད་དུ་བསྒོམ། །ཡེ་ཤེས་ཐིག་མཆོག་རྩེ་མོ་རྩེ། །ཤིན་དུ་མཉམ་པར་བཞག་ནས་བཏབ། །དེ་ལ་འདི་ནི་དཀྱིལ་འཁོར་ཆེན་པོའི་དམ་ཚིག་མཆོག །ཨོཾ་ཨཱཿཧཱུྂ། དཀྱིལ་
འཁོར་ཉིས་འགྱུར་རིམ་པར་བྱ། །དེ་ཡི་སྒོ་ཡི་ཉི་ཤུའི་ཚད། །བ་ཡི་རྣམ་ལྔ་མཉམ་བྱུགས་པའི། །སྐུད་པ་སངས་རྒྱས་ཀྱིས་རབ་བརྟག ། །དེ་ལ་འདི་ནི་རྡོ་རྗེ་ཆེན་པོ་གསོལ་བ་གདབ་པའི་དམ་ཚིག་གོ། ཨེ་མ་ཧོ་སངས་རྒྱས་སློབ་
དཔོན་ཆེ། །ཨེ་མ་ཧོ་ཆོས་དང་ཚོགས་ཀྱི་གཙོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །དེ་ལ་འདི་ནི་ས་ཆེན་པོ་ཡོངས་སུ་གཟུང་བའི་ཆོ་ག་སྟེ། རྡོ་རྗེ་སའི་ལྷ་མོ་བཀུག་ལ། །ལྷ་མོ་ཁྱོད་ནི་དཔང་དུ་
འགྱུར། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པ་ཡི་ནི་ཁྱད་པར་དང་། །ས་དང་ཕ་རོལ་ཕྱིན་པ་ལའོ། །སྒོ་ནི་དཀྱིལ་འཁོར་ཆ་བརྒྱད་དེ། །ཁྱམས་ཆེན་དག་ནི་བོར་བ་ལ། །བདག་ཉིད་ཆེན་པོས་ཤེས་པར་བྱ། །ཡིད་དུ་འོང་ཞིང་ལེགས་
སྤྲས་པའི། །མུ་ཁྱུད་སྒོ་ཙམ་ཤེས་པར་བྱ། །ལྷ་ཡི་སྣམ་བུའང་དེ་ཙམ་མོ། །རྡོ་རྗེ་ལྷ་མོ་ལྡན་པ་ཡིས། །གླུ་དང་རོལ་མོ་གར་ཡང་དགོད། །མཆོད་སྣམ་སྒོ་ཡི་ཕྱེད་ཉིད་དེ། །འགྲམ་དང་ངོས་ཀྱང་དེ་ཙམ་མོ། །དོ་ཤལ་སེ་མོ་དོ་དང་ནི། །

90-1-115a

ཉི་མ་ཟླ་བ་མེ་ཏོག་ཕྲེང་། །དེ་ལ་གོས་དང་འཕན་དག་གོ། རྩ་བ་ས་ཡི་ཐིག་རྒྱབ་ཏུ། །ཚོན་རྩེའི་སྣམ་བུ་དེ་ཡི་ཕྱེད། །དེ་ལ་སྙིང་པོ་ཆེན་པོ་འདིས། །བདག་ཉིད་འཁོར་ལོ་རྣམ་པར་དགོད། །དེར་ནི་རང་གི་ཕྱག་རྒྱའང་བསྟེན། །
དམ་ཚིག་ཡེ་ཤེས་གཞུག་པ་སྟེ། །དེ་ལྟར་དཀྱིལ་འཁོར་བསྒྲུབ་པར་བྱ། །ཤར་དུ་དཀར་པོ་ཆེན་པོ་སྟེ། །ལྷོར་ནི་སེར་པོ་དང་ལྡན་པས། །ནུབ་ཀྱི་ཆར་ནི་དམར་པོའོ། །བྱང་དུ་ལྗང་ཁུ་དང་ལྡན་པར། །ཨིན་དྲ་ནཱི་ལའི་འོད་འདྲ་བའི། །དབུས་
ཀྱི་ཆར་ནི་ཡང་དག་བྲི། །དེ་ལ་ཕྱག་རྒྱ་དགོད་པར་བྱ། །ལས་ཀྱི་ཆོ་ག་མཐོང་ནས་ནི། །རྟག་ཏུ་ཕྱག་རྒྱ་མཁའ་མཉམ་པ། །ཕྱག་རྒྱ་དེ་ཉིད་རྟག་ཏུ་བྲི། །དེ་ཡི་དཀྱིལ་དུ་རྡོ་རྗེ་བྲི། །ཤར་དུ་འཁོར་ལོ་ཡང་དག་བྲི། །དེ་ལྟ་བུ་ལ་སོགས་པ་བལྟ། །
ཕྱག་མཚན་ཀུན་ཏུ་ཞལ་དང་མཚུངས། །དེ་ལ་འདི་ཡི་དགང་གཟར་ནི། །དེ་ཡི་ཡུ་བའི་ཚད་དུ་བྱ། །ཁྲུ་གང་དང་ནི་ལྡན་པར་བྱ། །དེ་ཡི་དཀྱིལ་འཁོར་རྩེ་མོ་ནི། །སོར་བཞི་པོ་ལ་ཟླུམ་པོར་བྱ། །གཏིང་དུ་སོར་གཉིས་ཟབ་པ་ལ། །དེ་ལ་སོར་ཕྱེད་མཆུར་
བྱས་པའོ། །བླུགས་གཟར་པད་མའི་འདབ་འདྲ་བའི། །ཁ་ནི་མཐེ་བོའི་ལྟོ་གང་ལ། །དེ་ལ་སོར་གཅིག་ཙམ་ཟབ་པ། །རྒྱུད་འདི་རུ་ནི་རབ་ཏུ་བསྔགས། །དཀྱིལ་འཁོར་དུ་ནི་མ་ཞུགས་དང་། །མཚམས་མེད་ལྔ་ནི་བྱས་པ་དང་། །སེམས་ཅན་
སྲོག་ནི་གཅོད་པ་དང་། །ཉ་དང་ཤ་ནི་སྔོན་ཟ་དང་། །ཆང་ལ་མངོན་པར་དད་པ་དང་། །ཆད་ལྟའི་བརྟུལ་ཞུགས་འཛིན་པ་དང་། །མངོན་པར་དབང་ནི་མ་བསྐུར་དང་། །ཀུན་དུ་འཁྱམ་ཞིང་ལྡོམ་བུ་དང་། །གྲོང་ག་གླ་མི་བྱེད་པས་ཀྱང་། །གཤིན་
རྗེའི་གཤེད་རྒྱུད་མངོན་གཞོལ་ན། །ནག་པོའི་ཚིག་ནི་ཇི་ལྟ་བར། །གྲུབ་པར་འདི་ལ་ཐེ་ཚོམ་མེད། །དེ་ནས་བྱམས་པ་ལ་སོགས་ཀྱིས། །རྡོ་རྗེ་ངེས་པ་འདི་མཐོང་ནས། །རྡོ་རྗེ་བྱང་ཆུབ་སེམས་དཔའ་ཀུན། །མི་སྨྲ་བར་ནི་སྡོད་པར་གྱུར། །
དེ་ལ་འདི་ནི་རྡོ་རྗེ་དབབ་པའི་ཆོ་གའོ། །འབྱུང་བཞིའི་ས་བོན་ཆེན་པོ་ཡིས། །འཁོར་ལོ་བཞི་ནི་རབ་བསྒྲུབ་བྱ། །གནས་བཞིར་རབ་ཏུ་སྦྱོར་བ་བསམ། །ནམ་མཁའ་ལ་ནི་གཡོ་བར་བྱེད། །རྐང་པ་དག་གི་འོག་ཏུ་ཡྃ། །ལྟེ་བར་རྃ་སྟེ་སྙིང་གར་ལྃ། །

90-1-115b

མགོ་བོ་ལ་ནི་ཡི་གེ་བྃ། །ཡི་གེ་ཡ་ནི་ནག་ཆེན་པོ། །དྲག་ལ་རྔམ་པ་རབ་འགྱུར་བའི། །གྲུ་གསུམ་སྲེག་པའི་མེ་ལྟར་འབར། །ཉི་མའི་དཀྱིལ་འཁོར་ལྟ་བུར་དམར། །རྡོ་རྗེ་ས་གཞི་འཛིན་བཟོད་པའི། །སེར་པོ་ཆེན་པོ་གྲུ་བཞི་པ། །རི་རབ་རི་
ཡིས་མནན་པ་ཡི། །ནོར་འཛིན་དེ་ནི་བསྒོམ་པར་བྱ། །དཀར་པོ་ཟླུམ་པོ་བསིལ་ཆེན་པོ། །སྤྲིན་བཞིན་དུ་ནི་ཆར་པ་འཛིན། །རྒྱ་མཚོ་དུ་མ་ཆུས་གང་བའི། །གངས་ཀྱི་རི་བོ་ལྟར་བསིལ་བའི། །གནས་བཞི་རུ་ནི་སྦྱོར་བས་ན། །ཁར་ནི་སྣང་
བ་མཐའ་ཡས་ཏེ། །སློབ་མ་རྡོ་རྗེ་བསྒོམ་པར་བྱ། །མྱུར་བ་རུ་ནི་འབེབས་པར་བྱེད། །དེ་ལ་འདི་ནི་སྤྲོ་བའི་ཆོ་གའོ། །རྡོ་རྗེ་ཆོས་ནི་མགོན་ཆེན་པོ། །སྣང་བ་མཐའ་ཡས་བདེ་བ་ཆེ། །གསུངས་ཤིག་འདོད་ཆགས་ཆོས་ཆེན་པོ། །དགེ་དང་མི་དགེ་ལེགས་
པར་དྲི། །ཁྲུ་གང་ནས་ནི་བརྩམས་ནས་ནི། །ཇི་སྲིད་ཁྲུ་ནི་སྟོང་གི་བར། །སློབ་མ་ཆེན་པོ་འཕར་བར་འགྱུར། །དེ་ནི་དབབ་པའི་ཆོ་གའོ། །འཇིགས་གཟུགས་རི་མོའི་མཚན་ཉིད་ནི། །དེ་ནས་ཡང་དག་བཤད་པར་བྱ། །ས་ནི་འཇམ་པོ་བླང་བྱས་ལ། །
བརྟུལ་ཞུགས་ཅན་གྱིས་བཟླས་པ་བྱ། །སྲན་དྲེའུ་འོ་མ་དེ་བཞིན་ཤ ། བུ་རམ་ཏིན་ནི་ནི་ལ་སོགས། །སྣུམ་དང་ནིམ་པའི་འོ་མ་དང་། །ན་ཏི་དེ་བཞིན་ཛ་གེ་ས། །དང་པོར་དཀར་པོར་བྲི་བར་བྱ། །ཁ་དོག་གཞན་གྱིས་དེ་ནས་བསྒོམ། །རྡོ་
རྒྱུས་དང་ནི་བཙག་དག་ལས། །རྒྱ་སྐྱེགས་ལྟ་བུའི་མདོག་ཏུ་འགྱུར། །ཡུང་བ་དེ་དང་རམས་དག་ལས། །དེ་བཞིན་ཁ་དོག་ལྗང་ཁུར་འགྱུར། །སྔོན་པོ་དག་ནི་རམས་ཀྱིས་བྱ། །དེ་བཞིན་དུ་བས་ནག་པོའོ། །ལྡོང་རོས་ཀྱིས་ནི་སེར་པོ་སྟེ། །
དམར་པོ་དེ་བཞིན་མཚལ་གྱིས་སོ། །དེ་ལ་བིལ་བའི་སྙིང་པོ་བཞག །ཧ་ཅང་ཉུང་དང་མང་བ་མིན། །མངས་ན་ནག་པོར་འགྱུར་བ་སྟེ། །ཉུང་ན་དེ་བཞིན་འཐུལ་བར་འགྱུར། །གཟུགས་ནི་ཁྲོ་དང་ཞི་བའོ། །མཚན་ཉིད་དག་ནི་བཤད་
པར་བྱ། །རོལ་བ་ཞི་བར་གསུངས་པ་སྟེ། །ཁྲོ་བོ་སྦོམ་ལ་ཐུང་བར་བཤད། །སྣ་ནི་སོར་བཞི་བྱ་བ་སྟེ། །དཔྲལ་བ་ཀོས་ཀོ་མཆུ་དེ་བཞིན། །མགྲིན་པ་འགྲམ་པ་དེ་བཞིན་མཚན། །སོར་བཞི་དག་ཏུ་བྱ་བ་ཡིན། །ཉི་ཤུ་རྩ་བཞི་ལག་པ་ལ། །གྱེན་

90-1-116a

དུ་སོར་ནི་ཉི་ཤུ་ཡིན། །ལག་པ་རྐང་པ་གདོང་ཇི་ལྟར། །མིག་ནི་མཐེ་བོང་གང་ཙམ་སྟེ། །རྣ་བ་གཉིས་ལ་སོར་གཉིས་བསྒྲགས། །འབྲས་བུ་གཉིས་ལ་དེ་བཞིན་བཞི། །མཆུ་ནི་སོར་གཉིས་བསྡོམས་པའོ། །ལྟེ་བ་སོར་གཅིག་ཟབ་
པ་ཡིན། །ལུས་ནི་མགྲིན་པ་བོར་བ་ཡི། །གདོང་ནི་གསུམ་འགྱུར་ལུས་ལ་དགོད། །རལ་པ་ཅོད་པན་དེ་ཡི་ཚད། །རིན་ཆེན་ཅོད་པན་སོར་དྲུག་པའོ། །རལ་པ་གཅིག་མ་རབ་སྒྲུབ་ཐབས། །དེ་ནས་ཡང་དག་བཤད་བྱ་བ། །གནོད་སྦྱིན་མོ་ནི་བསྒྲུབ་
འདོད་པས། །རལ་པ་གཅིག་མ་རབ་སྒྲུབ་ཐབས། །ཕྱག་གཉིས་པ་ལ་ཞལ་གཅིག་སྟེ། །གྲི་གུག་དང་ནི་ཐོད་པ་ལ། །ཤིན་ཏུ་སྦོམ་ལ་མདོག་སྔོ་བ། །དཀྱིལ་འཁོར་དབུས་སུ་བསྒོམ་པར་བྱ། །ཛམྦྷ་ལ་ནི་ཤར་དུ་བསྒོམ། །བ་སུ་དྷ་ར་ལྷོ་
ཕྱོགས་སུ། །ཆུ་དབང་ནུབ་ཏུ་དགོད་པར་བྱ། །བྱང་དུ་རྣ་ཆ་ཀོས་ཀོ་འཕྱང་། །མེ་ལ་སོགས་པའི་མཚམས་དག་ཏུ། །གནོད་སྦྱིན་མོ་བཞི་རབ་བསྒོམ་བྱ། །ཀུ་ཏལ་ཀྱེ་ཧེ་ནི་གྱི་ཧྃ། །བ་སུ་དྷ་རི་ཆོག་བཞིན་དགོད། །དེར་ནི་སྒོ་བ་རྣམ་བསྒོམ་མ་ཏེ། །
ཐོ་བ་ལ་སོགས་མཉམ་པར་རོ། །འཁོར་ལོ་སྔ་མ་མཐོང་བ་བཞིན། །དེ་བཞིན་མདོག་ནི་རབ་སྦྱར་བྱ། །ཕྱག་མཚན་བདག་ནི་ལྟར་འཛིན་པ། །མཁས་པས་ཕྱི་ནས་སྔགས་བཟླས་ཏེ། །ཨོཾ་ཨེ་ཀ་ཛ་ཊཱི་བ་སུ་དྷ་རི་ཎི་སྭཱ་ཧཱ། །པུཀྐ་སཱི་ནི་རབ་
སྒྲུབ་ཐབས། །དེ་ནས་ཡང་དག་བཤད་པར་བྱ། །གང་ཞིག་བསྒོམས་པ་ཙམ་གྱིས་ནི། །འཇིག་རྟེན་གསུམ་ལ་འཚེ་ནུས་པ། །སྐུ་མདོག་སེར་པོ་ཞལ་བཞི་པ། །ཕྱག་བཞི་བོང་བུ་ལ་བཅིབས་པ། །པུཀྐ་སཱི་ཡི་ལུས་བསྒོམ་བྱ། །ཞགས་
པ་ཐོ་བ་མདའ་དག་དང་། །བརྟུལ་ཞུགས་ཅན་གྱིས་གཞུ་བཅས་བསྒོམ། །ཨོཾ་པུཀྐ་སཱི་ཨྃ། ཞེས་སྔགས་བརྗོད་དོ། །འཇམ་པའི་རྡོ་རྗེའི་དཀྱིལ་འཁོར་ནི། །དེ་ནས་ཡང་དག་བཤད་བྱ་བ། །དེ་ཡི་མོད་ལ་མི་སྣང་བར། །འཇམ་པའི་རྡོ་རྗེ་
གྲགས་འགྱུར་བ། །འབར་བའི་གསེར་འོད་འདྲ་བ་ཡི། །སེར་པོ་ཞལ་གསུམ་ཕྱག་དྲུག་པ། །གཞོན་ནུའི་གཟུགས་ནི་འཛིན་པའི་མགོན། །མི་མཐོང་བྱ་བའི་དོན་དུ་བསྒོམ། །ཤར་དུ་མཛེས་མ་དགོད་པར་བྱ། །དེ་བཞིན་ལྷོ་རུ་སྐྲ་ཅན་མ། །ནུབ་ཏུ་སེར་པོ་བསྒོམ་

90-1-116b

པར་བྱ། །བྱང་དུ་ཉེ་བའི་སྐྲ་ཅན་མ། །ཐམས་ཅད་ཕྱག་ན་རལ་གྲི་དང་། །འཁོར་ལོ་ལ་སོགས་གཞན་ལ་དགོད། །ཐམས་ཅད་ཞལ་གསུམ་ཕྱག་དྲུག་པ། །སྣ་ཚོགས་རྒྱན་གྱིས་བརྒྱན་པའོ། །ས་བོན་ཡི་གེ་མྃ་ལས་བྱུང་། །དཀྱིལ་འཁོར་གྱི་ནི་དབུས་ན་བཞུགས། །
ཐམས་ཅད་ཞབས་ནི་གཡོན་བརྐྱང་བས། །རི་བོང་ཅན་གྱི་གདན་ལ་བཞུགས། །འོད་ཟེར་ཅན་དང་རི་ཁྲོད་མ། །དེ་བཞིན་ནོར་འཛིན་སྐུལ་བྱེད་མ། །མེ་ལ་སོགས་པའི་མཚམས་བཞི་རུ། །བསྡུས་པ་དགོད་བྱ་སྙིང་པོ་ལའོ། །མྱ་ངན་མེད་དང་ཡལ་འདབ་དང་། །
འབྲས་ཀྱི་སྙེ་མ་དབྱིག་པའོ། །སེར་དང་ལྗང་དང་ཡང་སེར་པོ། །དཀར་པོའི་ལུས་ནི་བསྒོམ་པར་བྱ། །ཀུན་ཀྱང་ཞལ་གསུམ་ཕྱག་དྲུག་པ། །དཀྱིལ་འཁོར་དག་ཏུ་གདབ་པར་བྱ། །ཐོ་བ་ལ་སོགས་སྒོ་བ་བཞི། །བསྒོམས་ན་མཐོང་བར་མི་འགྱུར་རོ། །
དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་འཇམ་པའི་རྡོ་རྗེ་བསྒྲུབ་པའི་ཐབས་ཞེས་བྱ་སྟེ་རིམ་པར་ཕྱེ་བ་བཅུ་བཞི་པའོ།། །། འཕགས་པ་འཛམ་གུ་ལའི་བསྒྲུབ་ཐབས། །དེ་ནས་ཡང་དག་
བཤད་པར་བྱ། །གང་ཞིག་བསྒོམ་པ་ཙམ་གྱིས་ནི། །ཆུ་ཡི་སྟེང་ནས་འགྲོ་འགྱུར་བ། །སེར་པོ་ཞལ་གསུམ་ཕྱག་དྲུག་པ། །ས་བོན་ཕུཿལས་ཡང་དག་བྱུང་། །སྐུ་ཆེན་ཕྱག་ན་སྦྲུལ་བསྣམས་པ། །རྨ་བྱ་ལ་ནི་ཞོན་པ་དགོད། །ཤར་དུ་རྨ་བྱ་དགོད་
པར་བྱ། །དེ་བཞིན་ལྷོ་རུ་ཁྲོ་གཉེར་ཅན། །ནུབ་ཏུ་རི་ཁྲོད་ལོ་མ་ཅན། །བྱང་དུ་རྡོ་རྗེ་ལྕགས་སྒྲོག་མ། །རྨ་བྱའི་སྒྲོ་དང་སྤྱི་བླུགས་དང་། །ལོ་མ་དང་ནི་ལྕགས་སྒྲོག་མ། །དེ་དག་རྣམ་པར་བསྒོམ་པར་བྱ། །སེར་དང་དམར་དང་དེ་བཞིན་ལྗང་། །ཁ་
དོག་སྔོན་པོ་དབྱེ་བ་ཉིད། །མཁས་པས་འདི་ལྟར་བསྒོམ་པར་བྱ། །དེ་བཞིན་སྔགས་འདི་དག་ཀྱང་བཟླས། །ཨོཾ་ཕུཿཛཿ། ཐོ་བ་ལ་སོགས་སྒོ་རུ་དགོད། །མེ་ཏོག་ལ་སོགས་མཚམས་སུ་དགོད། །ཛྃ་གུ་ལི་ཡི་སྦྱོར་བ་ཡིས། །ཆུ་ཡི་སྟེང་ནས་རྟག་ཏུ་
འགྲོ། །ཀུ་རུ་ཀུལླེ་རབ་སྒྲུབ་ཐབས། །དེ་ནས་ཡང་དག་བཤད་པར་བྱ། །གང་གིས་བསྒོམས་པ་ཙམ་གྱིས་ནི། །ཀླུ་ཡི་བུ་མོ་རབ་འགུགས་པ། །ཁ་དོག་དམར་པོ་ཞལ་བཞི་པ། །ཕྱག་བརྒྱད་དང་ནི་རབ་ཏུ་ལྡན། །ཧྲཱིཿཡི་ས་བོན་ལས་བྱུང་བས། །ཀླུ་ནི་

90-1-117a

འགུགས་པར་བྱེད་པ་ཡིན། །ཕྱག་བརྒྱད་དུ་ནི་ཀླུ་དགོད་དེ། །མཐའ་ཡས་ལ་སོགས་ཀླུ་རིགས་བརྒྱད། །བརྟུལ་ཞུགས་ཅན་གྱིས་མཛེས་མ་བསྒོམ། །སྔགས་ནི་ཨོཾ་ཀུ་རུ་ཀུལླེ་ཧྲཱིཿཕུཿསྭཱ་ཧཱ། དེ་ནས་གསང་བ་བཤད་པར་བྱ། །བསྡུས་
ནས་ཡིན་གྱི་རྒྱས་པ་མིན། །གང་ཞིག་ཤེས་པ་ཙམ་གྱིས་ནི། །ལྷ་ཡི་བུ་མོ་འགུགས་བྱེད་པ། །ཕྱག་གཉིས་པ་ལ་ཞལ་གཅིག་སྟེ། །ཕྱག་ན་མདའ་དང་གཞུ་བསྣམས་པ། །ལུས་ནི་སེར་པོ་ཆེན་པོ་ཡི། །རྡོ་རྗེ་ལུས་མེད་བསྒོམ་པར་བྱ། །ཤར་
དུ་དགའ་མ་བསྒོམ་པར་བྱ། །ལྷོ་རུ་འདོད་པས་མཛེས་མ་བསྒོམ། །ནུབ་ཏུ་འདོད་པའི་ལྷ་མོ་བསྒོམ། །བྱང་དུ་འདོད་པའི་ལྕགས་ཀྱུའོ། །འདོད་པའི་ལྷ་མོ་ཐམས་ཅད་ཀྱི། །ཕྱག་ཏུ་མདའ་དང་གཞུ་བསྒོམ་བྱ། །སེར་དང་དམར་དང་དེ་བཞིན་
ལྗང་། །དམར་སྐྱ་དག་ནི་བསྒོམ་པར་བྱ། །མཚམས་རྣམས་སུ་ནི་རྟག་དགོད་པ། །མི་འགག་དེ་བཞིན་མཚམས་ཀྱི་བདག །དབྱི་དང་སྤྲེའུའི་རྒྱལ་མཚན་ནོ། །སྒོ་ཡི་ཕྱོབ་ཀྱི་བཤད་པར་བྱ། །འདོད་པ་འགྱིང་དང་འགྱིང་བག་ཅན། །དྲན་
དང་དེ་བཞིན་མདའ་གྲི་ཅན། །ལྷ་རྣམས་དེ་དག་ཐམས་ཅད་ཀྱི། །དབུ་ལ་གཤིན་རྗེའི་གཤེད་པོ་བསྒོམ། །བུད་མེད་ཀྱི་ནི་པད་མ་རུ། །རྡོ་རྗེ་ལུས་མེད་བསྒོམ་པར་བྱ། །ཡི་གེ་ཧྲཱིཿལས་ཡང་དག་བྱུང་། །ཀུན་དུ་འཁོར་བར་རྣམ་པར་འཕྲོ། །
བསླུས་ཤིང་གཡེངས་པ་བསྒོམ་པར་བྱ། །མྱོས་ནས་བདེ་བའི་འདོད་ཡིད་ཀྱིས། །དམར་པོའི་གོས་ཀྱིས་ཡོངས་དཀྲིས་ཏེ། །རྐང་པའི་དྲུང་དུ་ལྷུང་བར་འགྱུར། །དེར་ནི་སྔགས་ཀྱང་བཟླས་པར་བྱ། །ཡི་གེ་ཨོཾ་ནི་རིང་པོར་དྲང་། །ཡི་གེ་སྭཱ་ཧཱ་
མཐའ་མར་སྦྱིན། །ཡི་གེ་སི་ཏའི་སྔགས་བཟླས་བྱ། །ཆེ་གེ་མོ་ཞིག་བདག་དབང་འགྱུར། །ཐམས་ཅད་དུ་ནི་བསྒོམས་བྱས་ན། །ནག་པོའི་ཚིག་ནི་ཇི་བཞིན་གྱིས། །རྣལ་འབྱོར་འདོད་པས་དེ་འཐོབ་འགྱུར། །དེ་བཞིན་
གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་པོའི་རྒྱུད་ལས་ལུས་མེད་རྡོ་རྗེའི་བསྒྲུབ་ཐབས་རིམ་པར་ཕྱེ་བ་སྟེ་བཅྭ་ལྔ་པའོ།། །། ཧེ་རུ་ཀ་ཆེན་བསྒྲུབ་པའི་ཐབས། །དེ་ནས་ཡང་དག་

90-1-117b

བཤད་པར་བྱ། །རྣལ་འབྱོར་འཁོར་བར་བཅིངས་པ་ལ། །གང་ཞིག་ཤེས་པས་མྱུར་གྲོལ་བ། །ཕྱག་གཉིས་པ་ལ་ཞལ་གཅིག་སྟེ། །ཁ་དོག་སྔོན་པོ་ཕྱེད་གར་ཅན། །རྡོ་རྗེ་ཕྱག་དུ་བསྒོམ་པར་བྱ། །གཞན་ཡང་ཐོད་པ་བསྒོམ་
པར་བྱ། །སྤྱན་གསུམ་སྐྲ་ནི་གྱེན་དུ་འགྲེང་། །ཕྱག་རྒྱ་ལྔ་ཡིས་རྣམ་པར་བརྒྱན། །ཁ་ཊྭཱྃ་ག་ནི་གཡོན་ཕྱོགས་སུ། །ཕྲེང་བ་དག་གིས་རྐང་པ་བརྒྱན། །ས་བོན་ཧཱུྃ་ལས་ཡང་དག་བྱུང་། །ཡི་དགས་ལ་གནས་རྟག་ཏུ་དགོད། །
སངས་རྒྱས་ལྔ་རུ་རབ་སྦྱོར་བ། །ཐོད་པ་ལྔ་ནི་དབུ་ལའོ། །ཅོད་པན་ལ་ནི་མི་བསྐྱོད་བསྒོམ། །ཧེ་རུ་ཀར་གྲགས་བསྒོམ་པར་བྱ། །ཤར་དུ་ཆོས་ཀྱི་འཁོར་ལོ་མ། །སངས་རྒྱས་བྱང་ཆུབ་ལྷོ་རུའོ། །འདོད་པ་ཀུན་གྱི་འཁྲིས་མ་ནུབ། །
བྱང་དུ་ཧེ་རུ་ཀ་ཉིད་འདྲ། །རྒྱན་ཀུན་གྱིས་ནི་རྣམ་བརྒྱན་པའི། །ཁ་དོག་སྣ་ཚོགས་རྣམ་པར་དགོད། །གཟུགས་མཛེས་ཡི་དགས་ལ་བཞུགས་པ། །གཏི་མུག་ཐམས་ཅད་ཉེར་འཇོམས་བྱེད། །ཆོས་འཁོར་ཨ་ཤོདྠའི་དབྱུག་
པ། །དེ་བཞིན་ཡིད་བཞིན་ནོར་བུ་ཤིང་། །ལྷ་མོ་རྣམས་ཀྱི་ཕྱག་གཡས་སུ། །རྡོ་རྗེ་ཡང་ནི་བསྒོམ་པར་བྱ། །ཆོས་ཀྱི་འཁོར་ལོ་ཐམས་ཅད་ལ། །ཐོད་པའི་སྣོད་ནི་གཡོན་པ་ལ། །སྤྱན་མ་མཱ་མ་ཀཱི་སྒྲོལ་མ། །གོས་དཀར་ཡིད་
དུ་འོང་བ་རྣམས། །མེ་ལ་སོགས་པའི་མཚམས་བཞི་རུ། །འཁོར་ལོ་ཕྱི་རོལ་གཤིན་གཤེད་དོ། །ཤེས་རབ་མཐར་བྱེད་རྟ་མགྲིན་དང་། །འཁྱིལ་བར་བཅས་པ་བསྒོམ་པར་བྱ། །འཁོར་ལོ་ཡི་ནི་སྒོ་སྲུངས་ཏེ། །
ཆོ་གའི་ལས་ནི་མཐོང་བས་སོ། །གཤིན་རྗེའི་གཤེད་ནག་པོའི་རྒྱུད་ལས་ཧེ་རུ་ཀ་བསྒྲུབ་པའི་རིམ་པར་ཕྱེ་བ་སྟེ་བཅུ་དྲུག་པའོ།། །། རྣམ་པ་ལྔ་ནི་བསྒོམ་བྱས་ལ། །སངས་རྒྱས་གཟུགས་ནི་བསྒོམ་པར་བྱ། །སངས་རྒྱས་
གཟུགས་ནི་བསྒོམ་པ་ཡིས། །མཁས་པས་འཁོར་ལོ་བསྒོམ་པར་བྱ། །གྲུ་བཞི་ཡི་ནི་སྦྱོར་བ་ཡིས། །འཁོར་ལོ་བསྐྱེད་པར་བྱ་བ་སྟེ། །ཙར་ཙི་ཀ་སོགས་གླུ་དང་ནི། །དྲུག་པ་སྐྱེས་སོགས་ལེན་པར་བྱེད། །སྙིང་རྗེ་ཁྲོས་པའི་དད་

90-1-118a

སྒྲོལ་བཞེངས། །ཁམས་གསུམ་ཀུན་གྱི་གཏི་མུག་སོལ། །དད་སྒྲོལ་གསོལ་བས་མ་བཞུགས་བཞེངས། །བདུད་འདི་དག་ལས་རྒྱལ་བར་མཛོད། །འཇིག་རྟེན་མགོན་པོ་སྟོང་ཉིད་ཇི་སྟེ་བཞུགས། །དད་སྒྲོལ་འཇིག་རྟེན་
བསོད་ནམས་ཀྱིས་བཞེངས་ཤིག །བྱང་ཆུབ་འདོད་པའི་འཇིག་རྟེན་མགྲོན་པོས་ནས། །ཁྱོད་ནི་སྟོང་པ་ཉིད་ལ་སེམས་པར་བྱེད། །ཇི་ལྟར་སྐར་མདའ་འཕོ་བ་བཞིན། །བྱང་ཆུབ་སེམས་ལ་ཞུགས་པར་གྱུར། །རྡོ་རྗེ་
འཆང་རང་ངོ་བོ་ཉིད། །སྙིང་རྗེ་དང་ནི་འདོད་ཆགས་སེམས། །དང་པོར་བསྒོམ་པ་རྣལ་འབྱོར་ཏེ། །གཉིས་པ་རྗེས་ཀྱི་རྣལ་འབྱོར་ཡིན། །གསུམ་པ་ཤིན་ཏུ་རྣལ་འབྱོར་ཏེ། །བཞི་པ་རྣལ་འབྱོར་ཆེན་པོའོ། །རྡོ་རྗེ་སེམས་
དཔའ་རྫོགས་པ་ཡིན། །རྣལ་འབྱོར་ཡིན་པར་འདི་ལྟར་འདོད། །དེ་ནི་རྒྱུ་མཐུན་ལྷ་ཡི་སྐུ། །རྗེས་ཀྱི་རྣལ་འབྱོར་ཡིན་པར་གྲགས། །འཁོར་ལོ་ཐམས་ཅད་ཡོངས་རྫོགས་པ། །ཤིན་དུ་རྣལ་འབྱོར་ཡིན་པར་གྲགས། །
སྐུ་དང་གསུང་དང་ཐུགས་རྣམས་དང་། །ལྷ་ཡི་མིག་སོགས་བྱིན་བརླབས་དང་། །ཡེ་ཤེས་འཁོར་ལོ་གཞུག་པ་དང་། །བདུད་རྩི་མྱང་བ་དག་དང་ནི། །མཆོད་དང་བསྟོད་པ་ཆེན་པོ་དག །རྣལ་འབྱོར་ཆེན་པོ་ཞེས་བྱའོ། །
སློབ་དཔོན་ལ་ནི་བརྙས་མི་བྱ། །བདེ་གཤེགས་བཀའ་ལས་འདའ་མི་བྱ། །དེ་བཞིན་སྤུན་ལ་ཁྲོ་བ་དང་། །ཉེས་པ་བསྒྲག་པར་མི་བྱའོ། །བྱང་ཆུབ་སེམས་ཀྱང་གཏང་མི་བྱ། །བདག་གཞན་ཆོས་ལ་སྨད་མི་བྱ། །སེམས་
ཅན་ལ་ནི་བྱམས་པ་དག །ནམ་ཡང་གཏང་བར་མི་བྱའོ། །ཡོངས་སུ་མ་སྨིན་སེམས་ཅན་ལ། །གསང་བ་དག་ནི་བསྟན་མི་བྱ། །བདག་སོགས་ཕུང་པོ་བརྙས་མི་བྱ། །གྲོང་པའི་ཆོས་ནི་སུན་མི་གདོན། །གདུག་ལ་
བྱམས་པ་རྟག་ཏུ་སྤང་། །ཆོས་ལ་ཚད་གཞལ་བར་མི་བྱ། །སེམས་ཅན་དད་པ་ཅན་མི་བསླུ། །རྟག་ཏུ་དམ་ཚིག་བསྟེན་པར་བྱ། །བུད་མེད་ཤེས་རབ་རང་བཞིན་ལ། །སྨོད་པ་ཉེས་པ་དེ་བཞིན་ནོ། །རྣལ་འབྱོར་སློངས་མོས་རྒྱུ་མི་བྱ། །

90-1-118b

རྣལ་འབྱོར་སྤང་བར་མི་བྱ་སྟེ། །རྟག་པར་རྒྱུན་དུ་གསང་སྔགས་བཟླ། །རྟག་ཏུ་དམ་ཚིག་ལ་སོགས་བསྟེན། །གལ་ཏེ་བག་མེད་བྱུང་གྱུར་ན། །བླ་མ་དམ་ཚིག་ལ་གནོད་ན། །དེས་ནི་དཀྱིལ་འཁོར་བྲི་བྱས་ལ། །བདེ་གཤེགས་རྣམས་
ལ་ཉེས་པ་བཤགས། །སྙིང་རྗེ་ཅན་གྱིས་མི་བརྟག་པར། །དད་པས་བླ་མའི་དམ་ཚིག་བསྲུང་། །ཉེས་པ་མ་ལུས་རྣམ་སྤངས་སེམས་ཀྱིས་ནི། །བསམ་གཏན་ལ་སོགས་བཟླས་པ་མཆོག་གཞོལ་བར། །བྱས་ལ་རྟག་ཏུ་བླ་མ་བླ་མར་
བྱ། །བརྟན་ཞིང་དུལ་ལ་སྙིང་རྗེ་གཅིག་ཏུ་སེམས། །དད་དང་ལྷག་པའི་བསམ་པས་བཟོད་པ་འཛིན། །སློབ་མ་བླ་མ་ལ་ནི་གུས་པ་དང་། །དད་པས་གཤིན་རྗེའི་གཤེད་ལ་གུས་པ་ལ། །བརྟུལ་ཞུགས་ལྡན་པས་དེ་ནི་ཡོངས་སྦྱིན་བྱ། །དེ་ནས་
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་དགའ་བ་ཆེན་པོའི་ངོ་བོ་རྡོ་རྗེ་འཆང་གི་གསུང་ཉེ་བར་ཐོས་ནས་ཅང་མི་སྨྲ་བར་གྱུར་ཏོ། འདི་ལྟ་བུའི་ཆེད་དུ་བརྗོད་པས་ཆེད་དུ་བརྗོད་དོ། །བརྟུལ་ཞུགས་མཐར་
ཐུག་ཐོད་པ་ཆེན་པོ་ལྟར། །འཁྲུལ་འཁོར་མཐར་ཐུག་གཤིན་རྗེའི་གཤེད་ཀྱི་རྒྱུད། །རྒྱུད་ཀྱི་མཐར་ཐུག་པ་ནི་འདུས་པ་སྟེ། །བྱུང་བར་མ་གྱུར་འབྱུང་བར་མི་འགྱུར་རོ། །ཨེ་མའོ་ཞི་བ་ཆེན་པོའི་ཆོས། །ཨེ་མའོ་ཁྲོ་བོ་འཇིགས་
མཛད་པ། །ཨེ་མའོ་མྱ་ངན་འདས་པའི་མཆོག །ཨེ་མའོ་འཁོར་བ་ཞི་བ་ཉིད། །ཨེ་མའོ་འདི་ནི་རབ་ཏུ་མཚར། །ཉེས་པ་གང་དེ་ཡོན་ཏན་འགྱུར། །བྱང་ཆུབ་མེད་ཅིང་མངོན་རྟོགས་མེད། །དངོས་པོ་མ་ཡིན་བསྒོམ་བྱ་མིན། །
ཁམས་མ་ཡིན་ཞིང་རྣམ་ཤེས་མིན། །ནམ་མཁའི་ཁམས་དང་མཚུངས་པ་ཉིད། །ནམ་མཁའ་ལྟ་བུར་བདག་མེད་པ། །ཆོས་འདི་བདེ་བ་ཆེན་པོ་སྟེ། །ས་ཡང་མ་ཡིན་ཆུ་མིན་ཏེ། །མེ་མིན་རླུང་མིན་ནམ་མཁའ་མིན། །རྡོ་རྗེ་
སེམས་དཔའི་སྦྱོར་བ་ཡིས། །བསྐྱེད་པ་ཡང་ནི་རབ་གནས་ནས། །དངོས་པོ་ཐམས་ཅད་དངོས་མེད་བཤད། །དངོས་པོ་མེད་ཅེས་མ་བསྒྲགས་པ། །རྣལ་འབྱོར་སྦྱོར་བ་དང་འབྲེལ་ཕྱིར། །ཆད་པ་མ་ཡིན་རྟག་པ་མིན། །ཡན་ལག་མེད་ཅིང་ཁ་

90-1-119a

དོག་མེད། །ཐོག་མ་བར་དང་མཐའ་སྤངས་པ། །དངོས་པོ་ཐམས་ཅད་མེད་པར་འགྱུར། །མཆོག་ཏུ་དགའ་བའི་མཚན་ཉིད་དོ། །དེ་ནས་བཅོམ་ལྡན་འདས་ཙཪྩི་ཀཱ་ཆེན་པོ་ལ་སོགས་པས་ཆེད་དུ་བརྗོད་པས་ཆེད་དུ་བརྗོད་དོ། །
བསོད་ནམས་སྡིག་པ་དག་དང་མ་འབྲེལ་བས། །མཆོག་ཏུ་དགའ་བ་དྲི་མེད་དག་པའི་མགོན། །དེ་བཞིན་ཉིད་ཀྱི་གཏེར་ཆེན་གཅིག་པུ་དང་། །ཀུན་ཀྱང་སྙིང་རྗེའི་སེམས་ཀྱིས་མགོན་འདི་ཡོད། །ཆོས་རྣམས་ངོ་བོ་བདེ་བ་ཆེན་པོའི་དངོས། །
མཆོག་ཏུ་དགའ་བ་འདི་ཡི་ངོ་བོ་ཉིད། །དེ་ལ་གཟུགས་མེད་བསོད་ནམས་མེད་ཅིང་སྡིག་པ་མེད། །སྐྱེ་བ་དང་ནི་འགག་པ་དག་ནི་ཡོད་མ་ཡིན། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་
པོའི་རྒྱུད་ལས་བྱང་ཆུབ་ཀྱི་སེམས་ཀྱི་རིམ་པར་ཕྱེ་བ་སྟེ་བཅུ་བདུན་པའོ།། །། དེ་ནས་གཏམ་རྒྱུད་བཤད་པར་བྱ་སྟེ། བཅོམ་ལྡན་འདས་མངོན་པར་བྱང་ཆུབ་པའི་དུས་སུ་བཅོམ་ལྡན་འདས་ཐུབ་པ་ཆེན་པོ་ལ་བྱང་ཆུབ་ཀྱི་བར་
དུ་གཅོད་པའི་ཕྱིར་ཤིན་ཏུ་འཇིགས་སུ་རུང་བའི་འཇིགས་པ་ཆེན་པོ་སྟོན་ཅིང་། བདུད་ཀྱི་དཔུང་ཆེན་པོ་ལྷགས་ཏེ། དེའི་དུས་ན་བདུད་ཆེན་པོ་ལས་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བཅོམ་ལྡན་འདས་ཀྱི་
ཉིད་ཀྱི་སྐུ་གསུང་ཐུགས་རྡོ་རྗེ་རྣམས་ལས་གཤིན་རྗེའི་གཤེད་ཀྱི་ཁྲོ་བོ་ངེས་པར་ཕྱུང་སྟེ། ངེས་པར་ཕྱུང་ནས་ཀྱང་ལག་ན་རྡོ་རྗེ་ཐུབ་པ་ཆེན་པོའི་བཀའ་བཞིན་བྱེད་པ་ལ། ཕྱག་ན་རྡོ་རྗེ་ཁྱོད་འདི་ལྟ་བུའི་གཤིན་རྗེའི་གཤེད་ཀྱི་ཁྲོ་བོའི་
གཟུགས་སུ་བསྒྱུར་ཏེ། བདུད་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ལྷ་རྣམས་ཀྱང་ཆོམས་ཤིག །ཆིངས་ཤིག །རྟོགས་ཤིག་ཅེས་གསུངས་སོ། །དེའི་དུས་ན་ཇི་ལྟར་བདག་གིས་བཅོམ་ལྡན་འདས་ཀྱིས་གསུངས་པ་ཐོས་ཏེ། 
སྐད་ཅིག་ལ་བཟུང་ཞིང་དོན་བཟུང་སྟེ་བསྡུས་ནས་རབ་ཏུ་ཡིད་ལ་བྱས་སོ། །ཞེས་གསང་བ་ཆེན་པོའི་བདག་པོ་ཆེན་པོ་རྡོ་རྗེ་རིགས་ཀྱི་གཙོ་བོ་ནཱ་ད་ཀུ་བེ་རའི་ཡབ་ཀྱིས་དེ་སྐད་ཅེས་གསུངས་སོ། །ཨཽ་ཌྱན་གྱི་ཡུལ་ནས་ཡང་དག་པར་བྱུང་བ་

90-1-119b

དངོས་གྲུབ་ཐམས་ཅད་སྐྱེད་པར་བྱེད་པ་རྒྱུད་ཀྱི་རྒྱལ་པོ་འབུམ་ཕྲག་བདུན་པ་ལས་ཕྱུང་བ་གཤིན་རྗེའི་གཤེད་ནག་པོའི་རྒྱུད་ལས་ལེའུ་བཅྭ་བརྒྱད་པའོ།། །།དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་ནག་
པོའི་རྒྱུད་རྫོགས་སྷོ།། །།རྒྱ་གར་གྱི་མཁན་པོ་ཆེན་པོ་མཁས་པ་དཱི་པྃ་ཀ་ར་ཤྲཱི་ཛྙཱ་ན་དང་། བོད་ཀྱི་ལོ་ཙ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པའོ། སླད་ཀྱིས་ལོ་ཙ་བ་དགེ་སློང་དར་མ་གྲགས་ཀྱིས་བཅོས་ལ། 
དེ་ལས་ཀྱང་དགེ་སློང་རྡོ་རྗེ་གྲགས་ཀྱིས་བཅོས་སོ། །ཐང་ཆེན་པ་དང་བསྟན་རྒྱལ་རིང་མོ་ཡིས། འདི་ཡི་ཞུས་ཆེན་དག་པར་བགྱིས་པའོ། ། 
༄༅། །རྒྱ་གར་སྐད་དུ།  ཡ་མཱ་རི་ཀྲིཥྞ་ཀརྨྨ་སརྦྦ་ཙཀྲ་སིདྷ་ཀ་ར་ནཱ་མ་ཏན་ཏྲ་རཱ་ཛ།  བོད་སྐད་དུ།  གཤིན་རྗེའི་གཤེད་ནག་པོའི་འཁོར་ལོ་ལས་ཐམས་ཅད་གྲུབ་པར་བྱེད་པ་ཞེས་བྱ་བའི་རྒྱུད་ཀྱི་རྒྱལ་པོ། བཅོམ་ལྡན་འདས་རྡོ་རྗེ་མཁའ་
འགྲོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་བྷ་ག་ལ་གཏི་མུག་རྡོ་རྗེ་དང་། སེར་སྣ་རྡོ་རྗེ་དང་འདོད་ཆགས་
རྡོ་རྗེ་དང་ཞེ་སྡང་རྡོ་རྗེ་དང་། ཕྲག་དོག་རྡོ་རྗེ་དང་། ས་རྡོ་རྗེ་དང་ཆུ་རྡོ་རྗེ་དང་མེ་རྡོ་རྗེ་དང་རླུང་རྡོ་རྗེ་དང་། བྱང་ཆུབ་ཀྱི་སེམས་བདེ་བ་ཆེན་པོ་མ་དང་། ཡོན་ཏན་གྱི་ཕྲེང་བ་མ་དང་སེམས་ཀྱི་རྒྱུད་ཚིམ་པར་བྱེད་པ་མ་དང་། བརྩོན་འགྲུས་ཀྱི་ངོ་
བོ་མ་དང་བདུག་སྤོས་མ་དང་མེ་ཏོག་མ་དང་མར་མེ་མ་དང་དྲི་ཆབ་མ་དང་། དེ་ལ་སོགས་པ་དཔག་ཏུ་མེད་པ་དང་། ཐབས་གཅིག་ཏུ་བཞུགས་སོ། །དེ་ནས་ལྷ་མོ་བཻ་ཏཱ་ལཱི་སྟན་ལས་ལངས་ཏེ་ཐལ་མོ་སྦྱར་ནས། 
བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ད་ལྟར་འདི་ན་གདུག་པ་ཅན་རྣམས་ཀྱིས་སེམས་ཅན་ཐམས་ཅད་ལ་འཚེ་བར་བགྱིད་པ་དང་། མ་འོངས་པར་ཡང་ཐེག་པ་ཆེན་པོ་པ་དང་། སེམས་

90-1-120a

ཅན་ཐམས་ཅད་ལའང་འཚེ་བར་བགྱིད་པ་དག་འབྱུང་ན་དེ་རྣམས་ཇི་ལྟར་ཚར་གཅད་པར་བགྱི། དེ་ནས་བཅོམ་ལྡན་འདས་བགེགས་ཐམས་ཅད་འཇོམས་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཉིད་ཀྱི་སྐུ་གསུང་
ཐུགས་རྡོ་རྗེ་ལས་སྙིང་པོ་འདི་ཕྱུང་ངོ་། །ཧྲཱིཿདེ་མ་ཐག་ཏུ་བཅོམ་ལྡན་འདས་ཉིད་ཞལ་དྲུག་པ་ཕྱག་དྲུག་པ་ཞབས་དྲུག་པའི་ངོ་བོར་གྱུར་ནས་མ་ཧེ་རྭ་གཉིས་པ་བརྫེས་ཏེ། མ་ཧེའི་བདག་པོ་ཆུང་མ་བཅས་པར་ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་
ཧཱུྃ་ཕཊ་ཕཊ་སྭཱ་ཧཱ་ཞེས་ཞལ་བཞད་པ་དང་བཅས་པས་ཨོཾ་གསུང་ཞིང་མནན་པར་གྱུར་ཏོ། །ལྷ་དང་ལྷ་མ་ཡིན་དང་བདུད་ཐམས་ཅད་ཀྱང་སྐྲག་ཅིང་འདར་བ་དང་བཅས་པས་འདུད་པར་གྱུར་ཏོ། །ཚངས་པ་དང་དབང་པོ་ལ་སོགས་པ་ཐམས་
ཅད་ཀྱང་ཕྱག་འཚལ་ཞིང་འདུད་པར་གྱུར་ཏོ། །དེ་ནས་བཅོམ་ལྡན་ཁྲོ་བོ་ཡི། །རྒྱལ་པོ་ཆེན་པོ་རབ་འཇིགས་པ། །ཐུགས་རྗེ་ཆེན་པོ་དང་ལྡན་པས། །གསུང་ནི་འདི་སྐད་བཀའ་སྩལ་ཏོ། །དེ་ནས་སྒྲུབ་པ་བཤད་བྱ་བ། །རྩིབས་བརྒྱད་
དབུས་ཀྱི་ལྟེ་བ་ལ། །བདག་ཉིད་ཕྱག་དང་ཞལ་རྣམས་ནི། །དྲུག་དྲུག་ལྡན་པར་གྱུར་པ་བསྒོམ། །ཞབས་ཀྱང་དེ་དང་འདྲ་བ་སྟེ། །གཡས་ཀྱི་དང་པོའི་ཕྱག་ན་ནི། །རྡོ་རྗེ་ཐོ་བ་གཡས་གཉིས་ན། །རལ་གྲི་དེ་བཞིན་གཡོན་གྱི་ཡང་། །དང་པོར་
ཞགས་པ་བསྡིགས་མཛུབ་ལྡན། །གཉིས་པར་གཏུན་ཤིང་ལེགས་པར་འཛིན། །རྡོ་རྗེ་དྲིལ་བུ་ཐ་མས་བསྣམས། །སྟེང་ཞལ་ནག་པོ་རབ་འཇིགས་པ། །ཞབས་གཉིས་རྡོ་རྗེ་སྐྱིལ་ཀྲུང་སྟེ། །བརྐྱང་བསྐུམ་གར་གྱིས་ཞབས་བཞིར་གནས། །
སྟག་པགས་ཀྱིས་ནི་རྣམ་དཀྲིས་ཤིང་། །སེང་གེ་སེ་རལ་རལ་པ་ནི། །གྱེན་འགྲེང་བསྡུས་ཏེ་སྤྱི་བོར་ཡང་། །ཐོད་པའི་ཕྲེང་བས་རྣམ་པར་བཅིངས། །འདི་ནི་ཁྲོ་བོ་འཆོལ་བ་སྟེ། །ལག་ཆ་སྣ་ཚོགས་དག་དང་ལྡན། །ཤར་རྩིབས་ལ་
སོགས་རྣམ་བཞི་ལ། །གཏི་མུག་སོགས་ཏེ་བཞི་པོ་ཡང་། །དཀར་དང་སེར་དང་དམར་བ་ཡང་། །དེ་བཞིན་བཞི་པ་ལྗང་གུ་སྟེ། །གཡས་ཀྱིས་འཁོར་ལོར་རིན་ཆེན་འབར། །པད་མ་སྣ་ཚོགས་རྡོ་རྗེ་སྟེ། །གཡོན་གྱིས་དྲིལ་བུ་ལེགས་པར་

90-1-120b

འཛིན། །མཚམས་སུ་ལྃ་སོགས་ལས་སྐྱེས་པ། །ལྷ་མོ་བཞི་པོ་ངེས་པར་བསམ། །བདག་པོ་འདྲ་སྟེ་སྒེག་ཉམས་འཛིན། །གྲྭ་ཡི་ལྷ་མོ་མཚན་ལ་ནི། །སྒེག་མོ་ཁུ་ཚུར་དཀུར་ལྡན་ནོ། །རིན་ཆེན་ཕྲེང་བ་ཕྱག་གཉིས་བསྣམས། །པི་ཝང་
སྒྲོགས་པའི་གསུང་དབྱངས་ཅན། །གར་གྱིས་རྒྱས་པར་འགྲོ་བ་ཡི། །དོན་ལ་རྟག་ཏུ་བརྩོན་འགྲུས་ལྡན། །བདུག་སྤོས་སོགས་དང་བཞི་པོ་ཡང་། །རང་གི་མཚན་མ་ངེས་པར་འཛིན། །ཕྱག་རྒྱའི་སྔགས་རྣམས་བརྗོད་པས་སོ། །དེ་
ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་གཏི་མུག་རྡོ་རྗེའི་སྔགས་འདི་གསུངས་སོ། །ཨོཾ་ཛཱི་ན་ཛི་ཀ ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་
སེར་སྣ་རྡོ་རྗེའི་སྔགས་འདི་གསུངས་སོ། །ཨོཾ་རཏྣ་དྷྲྀཀ ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་འདོད་ཆགས་རྡོ་རྗེའི་སྔགས་འདི་གསུངས་སོ། །ཨོཾ་ཨཱ་རོ་ལཱིཀ །དེ་ནས་ཡང་བཅོམ་ལྡན་འདས་
དེ་བཞིན་གཤེགས་པ་ཐམས་ཅད་ཀྱི་བདག་པོས་ཕྲག་དོག་རྡོ་རྗེའི་སྔགས་འདི་གསུངས་སོ། །ཨོཾ་པྲཛྙཱ་དྷྲཱྀཀ ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ས་རྡོ་རྗེའི་སྔགས་འདི་གསུངས་སོ། །
ཨོཾ་ལོ་ཙ་ནཱ་ཧཱུྃ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ཆུ་རྡོ་རྗེའི་སྔགས་འདི་གསུངས་སོ། །ཨོཾ་མཱ་མ་ཀཱི་ཏྲཱཾ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་
བདག་པོས་མེ་རྡོ་རྗེའི་སྔགས་འདི་གསུངས་སོ། །ཨོཾ་པཎྜ་ར་བཱ་ཧྲཱིཿ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རླུང་རྡོ་རྗེའི་སྔགས་འདི་གསུངས་སོ། །ཨོཾ་ཏཱ་རཱ་ཨཱཿ། དེ་ནས་ཡང་
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་བདེ་བ་ཆེན་པོའི་སྔགས་འདི་གསུངས་སོ། །ཨོྂ་ལཱ་སྱེ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ཡོན་ཏན་བརྒྱུད་པ་མའི་སྔགས་འདི་གསུངས་

90-1-121a

སོ། །ཨོཾ་མཱ་ལེ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་དབྱངས་ཅན་མའི་སྔགས་འདི་གསུངས་སོ། །ཨོཾ་གཱི་ཏི། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་
ཅད་ཀྱི་བདག་པོས་གར་མའི་སྔགས་འདི་གསུངས་སོ། ། ཨོཾ་ནྲྀ་ཏྱེ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་མཆོད་པའི་སྔགས་རྣམས་གསུངས་པ་ནི། ཨོཾ་བཛྲ་དྷཱུ་པེ། ཨོཾ་བཛྲ་པུཥྤེ། 
ཨོཾ་བཛྲ་དཱི་པེ། ཨོཾ་བཛྲ་གནྡྷེ། དེ་ནས་ཡང་བཅོམ་ལྡན་འདས་ཀྱིས་ཐམས་ཅད་འགུགས་པར་བྱེད་པའི་སྔགས་དང་། དེ་བཞིན་གཤེགས་པ་ཐམས་ཅད་བཞུག་པ་དང་། དེ་བཞིན་གཤེགས་པ་ཐམས་ཅད་བཅིངས་པ་དང་། དེ་བཞིན་
གཤེགས་པ་ཐམས་ཅད་རྗེས་སུ་དགྱེས་པར་བྱེད་པའི་སྔགས་རྣམས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་གསུངས་པ་ནི། ཨོཾ་བཛྲ་ཨྃ་ཀུ་ཤ་ཛཿ། ཨོཾ་བཛྲ་པཱ་ཤ་ཧཱུྃ། ཨོཾ་བཛྲ་སྥོ་ཊ་བྃ། ཨོཾ་བཛྲ་
ཨཱ་བེ་ཤ་ཧོཿ། བློ་ལྡན་མཁས་པས་ཅི་ནུས་ཀྱིས། །ཐིག་གི་ཐིག་ནི་གདབ་པ་ལ། །ཚད་ལྡན་འཇུར་མདུད་མེད་པ་དང་། །གཤེར་ཞིང་སར་པ་མཛེས་པ་ཡིས། །ཤར་དུ་བལྟས་ཏེ་གདབ་པར་བྱ། །ཚངས་ཐིག་གཉིས་པ་གདབ་པ་ཡང་། །
ལྷོ་རུ་བལྟས་ཏེ་གདབ་པར་བྱ། །དེ་འོག་མཐའ་ཡི་ཐིག་གདབ་པ། །བྱིན་ཟར་གནས་ཏེ་དབང་ལྡན་བལྟ། །རླུང་གནས་བདེན་བྲལ་ཁ་བལྟས་ཏེ། །ནུབ་ཏུ་ལེགས་པར་བྲི་བར་བྱ། །དེར་གནས་ཤར་དུ་ཁ་བལྟས་ཏེ། །བྱང་དུ་བྲིས་ཏེ་བྱིན་ཟར་གནས། །
བདེན་བྲལ་མིན་པའི་མཐའ་མ་གདབ། །བལྟ་བ་བདེན་བྲལ་ཕྱོགས་སུའོ། །སློབ་དཔོན་ལྡང་མིན་གྲོགས་པོ་ནི། །རི་དགས་ཞོན་པའི་ཕྱོགས་འདུག་སྟེ། །ཚངས་ཐིག་དང་པོ་གདབ་པར་བྱ། །གཉིས་པའང་བདེན་བྲལ་ཕྱོགས་འདུག་སྟེ། །བགེགས་
ཕྱོགས་བརྐྱང་ལ་གདབ་པར་བྱ། །དབུས་དང་མཐའ་མར་ཕྱེ་བ་ཡི། །གཞལ་ཡས་ཁང་པའི་མཚན་ཉིད་ནི། །གྲུ་བཞིར་བགྱི་ཞིང་སྒོ་བཞི་དང་། །རྟ་བབས་བཞིས་ནི་བརྒྱན་པ་ཡི། །དབུས་སུ་རྩིབས་བརྒྱད་ལྟེ་བ་ལ། །རྡོ་རྗེ་ཐོ་བ་བྲི་བར་བྱ། །ཉི་མའི་

90-1-121b

དཀྱིལ་འཁོར་དབུས་ཉིད་དུ། །གྲི་གུག་ཀྱང་ནི་བྲི་བར་བྱ། །ཤར་རྩིབས་འཁོར་ལོ་ཆེན་པོ་སྟེ། །རིན་ཆེན་ལྷོ་ཡི་ཕྱོགས་རྩིབས་ལ། །པད་མ་དམར་པོ་ནུབ་ཏུ་བྲི། །བྱང་དུ་རྡོ་རྗེ་ཀུན་དུ་རྩེ། །ཤར་ལྷོ་ཕྱོགས་སུའང་དེ་དང་འདྲ། །གྲྭ་བཞིར་
བརྒྱད་པོའང་ཉིས་བརྩེག་ཏུ། །མཚན་མ་རྣམས་ནི་ལེགས་པར་བྲི། །སྒོ་བཞི་དག་ཏུ་བྲི་བ་ཡང་། །ལྕགས་ཀྱུ་ཞགས་པ་ལྕགས་སྒྲོག་དྲིལ། །གཞན་ཡང་རྒྱན་ཀུན་ལེགས་པར་བྲི། །མཆོད་པ་ལེགས་པར་དགྲམ་པར་བྱ། །ཁུ་ཚུར་དཀུ་གཉིས་
བཞག་པ་དང་། །དེ་བཞིན་དཔྲལ་བར་ཉུག་པ་དང་། །ཁ་ནས་འབྱིན་དང་གར་བསྐྱོད་དང་། །བདུག་སྤོས་ཉུག་དང་མེ་ཏོག་འཐོར། །མཐེ་བོང་བསྒྲེང་སྟེ་རང་ལུས་ལའང་། །གཞན་ལ་ཉུག་ཚུལ་གནས་པ་ནི། །བརྒྱད་པོ་མཆོད་པའི་ལྷ་མོ་དག །
བསྐྱེད་དང་ལེགས་གནས་ཕྱག་རྒྱ་ཡིན། །སྐུ་གསུང་ཐུགས་ཀྱི་ལྷ་རྣམས་དག །རང་ལུས་བཅུག་སྟེ་གནས་པ་ལ། །སྔགས་ཀྱིས་བྱིན་གྱིས་བརླབ་པ་ནི། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོཾ་སརྦ་ཏ་ཐཱ་ག་ཏ་ཝཱཀ་བཛྲ་
སྭ་བྷཱ་བ་ཨཱཏྨ་ཀོ྅ཧྃ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧྃ། མིག་སོགས་བྱིན་གྱིས་བརླབ་པ་ལ། །གཏི་མུག་རྡོ་རྗེ་སོགས་ཀྱིས་བསྲུང་། །དབང་སྦུབས་སྟོང་པ་ཉིད་བྱས་ཏེ། །སྙིང་པོའམ་མིང་གི་ཡི་གེ་ཡི། །རིགས་ཀྱི་ཕྱག་
མཚན་བསྣམས་པ་ཡི། །སྐུ་རྣམས་ངེས་པར་བསྐྱེད་པས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་བདུད་རྩི་མྱང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་སྔགས་འདི་གསུངས་སོ། །
ཨོཾ་ཨཱཿཧཱུྃ། དག་ཅིང་འབར་བར་རྣམ་བརྟགས་ཏེ། །ཉི་མའི་དཀྱིལ་འཁོར་དབུས་གནས་པར། །ཞེ་སྡང་རྡོ་རྗེའི་བདག་པོ་སྟེ། །ཟླ་བའི་དབུས་སུ་གཏི་མུག་བསམ། །རིན་ཆེན་དབུས་སུ་བསམ་པ་ཡང་། །སེར་སྣ་ཉིད་དུ་
བསམ་པར་བྱ། །པད་མའི་དབུས་སུ་འདོད་ཆགས་བསམ། །སྣ་ཚོགས་དབུས་སུ་ཕྲག་དོག་བསམ། །བསམ་བྱ་ལྗགས་ལ་ས་བོན་ཏེ། །འཕྲོས་པས་བཀུག་སྟེ་ཚིམ་པར་བྱ། །ཤར་ནི་དཀར་པོ་ཆེན་པོ་སྟེ། །ལྷོ་ནི་སེར་པོ་ཉིད་དུའོ། །

90-1-122a

ནུབ་ཏུ་དམར་པོར་ངེས་པར་ཤེས། །བྱང་ནི་ལྗང་གུ་ཡང་དག་ལྡན། །དེ་ལས་དེ་བཞིན་རེ་ཁཱའི་རིམ། །དཀྱིལ་འཁོར་བསྒོམ་པའི་ཚེ་ན་ཡང་། །བྱམས་དང་སྙིང་རྗེ་དགའ་བཏང་སྙོམས། །ཚད་མེད་པའི་རིམ་པ་ཡིས། །
སེམས་ཅན་རྣམས་ལ་ཕན་གདགས་ཕྱིར། །བརྟན་དང་གཡོ་བའི་དངོས་པོ་རྣམས། །ཡོད་མིན་མེད་མིན་གཉིས་ཀ་མིན། །གཉིས་ཀ་མིན་པའང་མ་ཡིན་ཏེ། །སྤྲོས་བྲལ་ངོ་བོ་མེད་པར་བསྒོམ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། 
རྃ་ལས་ཉི་མ་རྣམ་བསྒོམས་ཏེ། །དེ་དབུས་ལས་ཀྱི་རྡོ་རྗེ་ནི། །ཀུན་ཏུ་རྩེ་ལྔའི་རང་བཞིན་ཏེ། །དེ་དབུས་ཧཱུྃ་ལས་རྡོ་རྗེ་ནི། །ཀུན་ཏུ་ཕྲ་མོས་བགེགས་བཅོམ་སྟེ། །ར་བ་གུར་དང་ས་གཞི་ཡང་། །དེ་ཡི་འོག་ཏུ་ངེས་པར་བསྒོམ། །གྲུ་གསུམ་
གྱེན་བསྒྲེང་དཀར་པོ་ནི། །ཤིན་དུ་གསལ་བར་བདག་གིས་དམིགས། །ཞེ་སྡང་ལས་ནི་སྔར་མ་བྱུང་། །བྱུང་ཞིང་འབྱུང་བར་མི་འགྱུར་རོ། །བྱང་ཆུབ་སེམས་ལ་གཞོལ་བ་དང་། །གཏོང་ཞིང་ཐོས་པའི་ཁེངས་པ་མེད། །ལེ་ལོ་བཅོམ་
ཞིང་ཁྲོ་བ་མེད། །སེར་སྣ་མེད་དེ་གཡོ་ཡང་མེད། །སྒྱུ་སྤངས་ཤེས་རབ་གསལ་བ་དང་། །གཅིག་ཏུ་ཐེག་པ་ཆེ་ལ་གཞོལ། །དེས་ནི་དཀའ་བ་མེད་པར་ཡང་། །གཞན་གྱི་དོན་དུ་འདི་བརྩམས་ན། །གྲངས་ནི་བྱེ་བ་ཚང་བ་ཡི། །
བཅུ་བཞིར་ཚང་བའི་གསང་སྔགས་ཀྱིས། །ལས་རྣམས་ཀུན་གྲུབ་ཐེ་ཚོམ་མེད། །ཡང་ལྷ་མོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་ཡི་འཁྲུལ་འཁོར་ཇི་ལྟ་བུ། །ཡི་གེ་རྣམས་ནི་ཇི་ལྟར་བྲི། །བཅོམ་ལྡན་འདས་ཀྱིས་བཀའ་
སྩལ་པ། །བདུན་ཚན་བདུན་དང་ལྡན་པ་ཡི། །རེའུ་མིག་ལེགས་པར་བྲི་བར་བྱ། །ལས་ཀུན་བྱེད་པའི་འཁོར་ལོ་ལ། །མཆོད་པ་ཡིས་ཀྱང་ལེགས་མཆོད་ལ། །དེ་འོག་ལས་རྣམས་བརྩམ་པར་བྱ། །བཟླས་པའི་
མཚན་མ་རྨི་ལམ་མམ། །མངོན་སུམ་བྱུང་བར་གྱུར་ནས་ཀྱང་། །འཁྲུལ་འཁོར་རྣམས་ནི་བྲི་བྱ་བའི། །རྨི་ལམ་མཚན་མ་འདི་ཡིན་ཏེ། །ཚལ་ཆེན་ཟུག་པའི་གླིང་དག་དང་། །ལྷ་ཁང་མཆོད་རྟེན་གཞལ་ཡས་སུ། །

90-1-122b

དམ་པ་རྣམས་དང་ངེས་ཕྲད་དེ། །དབང་བསྐུར་རི་ལ་འཛེག་པ་དང་། །རྒྱ་མཚོར་བཅས་པའི་ཆུ་བརྒལ་ལམ། །ཀླ་ཀློ་བྲན་དུ་འཁོལ་རྨི་ན། །ངེས་པར་འགྲུབ་སྟེ་འཁོར་ལོ་བྲི། །དེ་ནས་ཡང་བཅོམ་ལྡན་འདས་ཀྱིས་འབྱུང་བའི་
དཀྱིལ་འཁོར་བསྒོམ་པ་གསུངས་ཏེ། ཡྃ་ལས་བྱུང་བའི་རླུང་དཀྱིལ་འཁོར། །སྔོན་པོ་གཞུ་ཡི་དབྱིབས་ཅན་ལ། །བ་དན་ལྡན་པར་ངེས་པར་བསམ། །རྃ་ལས་བྱུང་བའི་མེ་དཀྱིལ་འཁོར། །གྲུ་གསུམ་དམར་པོ་བསམ་པར་བྱ། །
བྃ་ལས་བྱུང་བ་ཆུ་ཡིན་ཏེ། །དཀར་པོ་ཟླུམ་པོ་བསམ་པར་བྱ། །ལྃ་བྱུང་ས་ཡི་དཀྱིལ་འཁོར་ནི། །ལྗང་སེར་གྲུ་བཞི་བསམ་བྱས་ཏེ། །སྔོན་དུ་བསམ་བྱ་ལྟ་རིམ་བཞིན། །ཏྭ་ར་ཕྱི་ནས་ངེས་པར་བསམ། །བྷྲུྃ་ལས་བྱུང་བའི་འཁོར་
ལོའི་རྩིབས། །དྲུག་གཉིས་ལྡན་པའི་ལྟེ་བ་ལ། །བྷྲུྃ་ལས་གཞལ་ཡས་ཁང་པ་སྟེ། །གདན་དང་ལྡན་པར་སྒྲུབ་པོས་བསམ། །དེ་ནས་ཡང་བཅོམ་ལྡན་འདས་ཀྱིས་རྡོ་རྗེ་བསྡུ་བའི་ཕྱག་རྒྱ་དང་སྔགས་ཀྱིས་བདེ་བར་གཤེགས་པ་
འཁོར་དང་བཅས་པ་བསྡུ་བར་བྱའོ། །ཨོཾ་བཛྲ་ས་མཱ་ཛཿ། ལག་ངར་གཉིས་ནི་ངེས་བསྣོལ་ལ། །མཛུབ་གཉིས་ལྕགས་ཀྱུའི་ཚུལ་བྱས་ཏེ། །སེ་གོལ་བརྡབ་ཅིང་བསྡུ་བར་བྱ། །ལྕགས་ཀྱུ་ལ་སོགས་རྣམ་པ་བཞིས། །ངེས་པར་དགུག་པ་
ལ་སོགས་བྱ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་མཆོད་པའི་སྔགས་འདི་གསུངས་སོ། །ཨོཾ་ཨརྒྷྂ་པྲ་ཏཱི་ཙྪ་སྭཱ་ཧཱ། པྲ་བ་ར་སཏྐཱ་ར་པྲ་ཏཱི་ཙྪ་སྭཱ་ཧཱ། ནག་པོ་ར་རི་མེད་པ་ཡི། །བུམ་པ་
ལྟོ་ཆེ་བྲེ་ཚད་པ། །མཆུ་འཕྱང་མགྲིན་རིང་གདན་ལྡན་པར། །སྙིང་པོར་ལྡན་པའི་སྨན་སོགས་གཞུག །མགྲིན་པར་རས་བཟངས་དག་གིས་དཀྲི། །འདབ་མར་ལྡན་པའི་ལྕུག་མ་ཡང་། །དྲི་དང་ལྡན་པའི་ཁ་རྒྱན་ཏེ། །བདུད་
རྩིར་ལྡན་པ་ཡིས་ཀྱང་མཆོད། །བླ་རེ་གདུགས་དང་རྒྱལ་མཚན་དང་། །བ་དན་སིལ་སྙན་རོལ་མོ་ཡིས། །གུས་པས་དཀྱིལ་འཁོར་ལ་ཡང་མཆོད། །འཛམ་བུའི་གླིང་ངམ་གླིང་གཞན་དག །ནོར་བུ་རིན་ཆེན་བཀང་བ་ཡང་། །

90-1-123a

སྟོང་གསུམ་ལ་སོགས་དེ་བཞིན་ཏེ། །ཞུམ་པ་མེད་པར་བྱས་ཏེ་དབུལ། །བློ་ལྡན་སྒྲུབ་པོས་སེམས་ཅན་ལ། །ཕན་པའི་སེམས་ཀྱིས་སྲོག་མི་གཅོད། །མ་བྱིན་པར་ཡང་མི་བླང་ངོ་། །འདོད་པ་མི་སྤྱད་བརྫུན་མི་སྨྲ། །གནོད་པའི་
རྒྱུ་ཕྱིར་ཆང་མི་བཏུང་། །གདུག་པ་རྣམས་ལས་བཟློག་སྟེ་བྱ། །དངོས་སུའམ་ཡང་ན་སྔགས་དང་གཞན། །འཁྲུལ་འཁོར་དང་ནི་ཏིང་ངེ་འཛིན། །སྨན་གྱིས་ཀྱང་ནི་བྱ་བ་སྟེ། །དེ་ལྟར་མི་བྱེད་དེ་ཡི་ནི། །ངེས་པར་དམ་ཚིག་ཉམས་པར་
འགྱུར། །གདོན་དང་ལོག་འདྲེན་དག་གིས་ཀྱང་། །ངེས་པར་འཆི་སྟེ་དམྱལ་བར་ནི། །ཡུན་རིང་སྡུག་བསྔལ་གྱིས་སྡུག་སྟེ། །དེ་བས་ནན་ཏན་ལྡན་པ་རུ། །བཟོད་པ་མི་བསྐྱེད་སྙིང་རྗེ་ཡིས། །སྔགས་ཀྱིས་ངེས་པར་གསད་པར་
བྱ། །མི་ལྡོག་པ་ཡི་སེམས་སུ་གནས། །བྱང་ཆུབ་ཆུ་ཡིས་ར་རོ་ཞིང་། །ཤེས་རབ་ཕ་རོལ་ཕྱིན་པ་ཡི། །ཕྱག་རྒྱ་ཆེ་ལ་དེ་གཞོལ་ཏེ། །ངོ་བོ་དང་བྲལ་དངོས་པོ་འཇིག །མ་བྱིན་བྱང་ཆུབ་བླང་བ་ལ། །བརྩོན་པས་ལེ་ལོ་དོར་བར་བྱ། །
བརྫུན་དུ་ཤེས་བྱ་དངོས་པོ་རྣམས། །དེ་ནས་དེ་བཞིན་གཞན་ལ་བརྗོད། །རྒྱས་བཏབ་པ་ཡི་དངོས་པོ་ལ། །རྒྱ་བཤིག་ཤེས་རབ་རལ་གྲི་ཡིས། །བཅད་ཅིང་རྣམ་པ་མེད་པ་ལ། །བསད་པ་ཡང་ནི་ང་ཡིས་བསྒྲགས། །ཨུ་མེད་པ་ཡི་
ཡི་གེ་རྣམས། །སྟེང་གི་གཡས་ཕྱོགས་ཉིད་ནས་བྲི། །འོག་གི་ཡི་གེ་བྲི་བ་ནི། །དེ་ཉིད་གཡོན་གྱི་ཕྱོགས་ནས་བྲི། །ཨཱ་ལི་ཀཱ་ལི་ངེས་བྲིས་ཏེ། །ཀྴཿམ་གཏོགས་པར་དབུས་སྟོང་སྟེ། །དེ་ལ་བགེགས་ཀྱི་མཚན་མ་འམ། །མིང་སོགས་
ངེས་པར་བྲི་བ་ཡང་། །ལྟོ་བའི་ནང་དུ་ཆུད་པར་བྲི། །འཁོར་ལོ་ཉིད་ཀྱང་དེ་འདྲ་བ། །གྲྭ་བཞི་དག་ཏུ་བྲི་བ་ནི། །མ་ནིང་འདོད་པའི་ཀཱ་ལི་དང་། །ཨཱ་ལི་མིན་ཏེ་ལྷག་མ་ཡིན། །གདུག་པའི་ཡི་གེ་བཅུ་བཞི་པོ། །མིང་དང་བཅས་པ་
ཕྱོགས་བཞིར་བྲི། །དབྱངས་ཀྱི་ཡི་གེ་བཞི་པ་ཡིས། །བཞི་པ་གཅིག་གི་མགོ་སྟེངས་སུ། །སུམ་སྐོར་ཉིད་ནི་ཤིས་པ་ཡིན། །ལས་ཀུན་བྱེད་པའི་འཁོར་ལོ་དེ། །འབྲི་བར་བྱེད་པའི་སྤྱི་དུས་དང་། །ཁྱད་པར་དུས་ཚེས་ལྷ་ཡི་ནི། །

90-1-123b

རྣལ་འབྱོར་མེད་པས་བྱ་བ་མིན། །ཕྱོགས་སུ་བལྟ་བའི་བྱེ་བྲག་གིས། །ལས་ཀྱི་སྒྲུབ་པ་ཤེས་པར་བྱ། །ལས་ཀུན་བྱེད་པའི་འཁོར་ལོ་ནི། །བདེ་གཤེགས་ཀུན་གྱི་སྙིང་པོ་སྟེ། །དེ་བཞིན་གཤེགས་པའི་གསང་བའང་ཡིན། །
འཁོར་ལོ་འདིར་ནི་བཅུག་པ་གང་། །སངས་རྒྱས་ཀྱང་ནི་ངེས་པར་འཇིག །དམ་ཆོས་སྨོད་པའང་དེ་བཞིན་ཞི། །འཁོར་ལོས་སྒྱུར་བའང་དབང་དུ་འདུ། །ལྷ་མིན་པྲ་ཏིའང་ཞི་བར་བྱེད། །དགྲ་བཅོམ་གསོད་པའང་དེ་ཞི་ལ། །བརྒྱ་
བྱིན་ཉིད་ཀྱང་དབང་དུ་ངེས། །དེ་ལྟ་བུ་ཡི་འཁོར་ལོ་དེ། །ཐོག་མར་བྲིས་ཏེ་དེ་འོག་ཏུ། །བྱིན་བརླབས་མ་ནོར་དེ་ཉིད་ལ། །མཆོད་པ་གུས་པར་བདག་གིས་བྱ། །མཆོད་མིན་ལས་རྣམས་བྱས་པ་ལ། །འབྲས་བུ་འབྱུང་མིན་འཁྲུལ་པ་
ལའང་། །འབྲས་མེད་ངལ་བ་ཉིད་ཡིན་ནོ། །ཡང་ལྷ་མོ་རོ་ལངས་མ་ཉིད་སྟན་ལས་ལངས་ཏེ་མཆོད་པ་ཆེན་པོ་བྱས་ཏེ་འདི་སྐད་ཅེས་གསོལ་བ་བཏབ་བོ། །འཁོར་ལོ་འདྲི་བའི་སྣག་ཚ་གང་། །བྲི་བའི་སྨྱུ་གུ་ཇི་ལྟ་བུ། །གཅིག་གམ་འོན་
ཏེ་དེ་ཐ་དད། །བཅོམ་ལྡན་འདས་ཀྱིས་བཀའ་སྩལ་པ། །ལེགས་སོ་ལེགས་སོ། །དེའི་ཕྱིར་ལེགས་པར་ཉོན་ལ་ཡིད་ལ་ཟུང་ཤིག་དང་ངས་བཤད་དོ། །ཇི་ལྟར་ལས་རྣམས་བྱེ་བྲག་ཡོད་པ་ལྟར། །བྲི་བའི་གནས་
ཐ་དད་དེ་བཞིན་འཁོར་ལོ་བསྒྲུབ། །སྣག་ཚ་ཐ་དད་འབྲུ་རྣམས་བཞིན། །གྲོང་ཁྱེར་ཆེན་པོ་བསྲུང་འདོད་དམ། །སྐྱེས་པ་བསྲུང་བར་འདོད་ན་ཡང་། །གྲོ་ག་དེ་བཞིན་ཨུ་བྷི་ཤུན། །གླ་གོར་ཞོ་ཤའི་ཤུན་པའམ། །རས་ལ་ཁ་
ཆེས་འཁོར་ལོ་ནི། །བསྐུལ་བའི་ཚིག་དང་ལྡན་པར་རོ། །སོ་མ་བཏང་བའི་ཁམ་ཕོར་དུ། །སྦྲང་མར་དག་དབུས་འཁོར་ལོ་གཞུག །སྐུད་པ་དཀར་པོས་ལེགས་པར་དཀྲི། །ནང་པར་ཤར་དུ་ཁ་བལྟས་ཏེ། །མེ་ཏོག་དཀར་པོ་དག་གིས་
མཆོད། །བདག་ཉིད་དཀར་པོའི་མདོག་ཏུ་བསམ། །མདུན་དུ་སྐྱེས་པ་ཟླ་བ་ལ། །མཐའ་དག་གནས་པ་མདུན་དུ་བསམ། །སངས་རྒྱས་ཕྱོགས་བཅུར་བཞུགས་པ་ཡིས། །བདུད་རྩི་ལྔས་གང་བུམ་པ་ཡི། །ཆུ་རྒྱུན་དག་གིས་དབང་

90-1-124a

བསྐུར་ཏེ། །དེ་འོག་བཟླས་པ་བརྩམ་པར་བྱ། །སྭཱ་ཧཱའི་སྔོན་དུ་བསྐུལ་ཚིག་ལྡན། །བུད་མེད་ལ་ནི་འགི་ཝང་སྟེ། །ཕྱི་རོལ་མཚམས་བཞིར་ཕུར་པ་ཡིས། །བགེགས་བསྐྲད་སྟེང་དུ་བླ་རེ་བྲེ། །ཕྱི་མ་སྐྱེས་པའི་
ཇི་བཞིན་ནོ། །བྱེ་བྲག་ཏུ་ཡང་སྐྱེས་པ་འམ། །བུད་མེད་ཞི་བར་འདོད་ན་ཡང་། །ག་པུར་ཙན་དན་དག་གིས་ནི། །ཤིར་ཤ་ཤིང་གི་ཤུན་པ་ལ། །འཁོར་ལོ་ཡི་གེ་ལེགས་བྲིས་ཏེ། །ཤར་དུ་ནང་པར་བལྟས་ཏེ་མཆོད། །ལས་ཀུན་
བྱེད་པའི་ཐབས་ལ་ཡང་། །སྔོན་གསུངས་ཞལ་ལྡན་དགོད་པར་བྱ། །ཕྱི་རོལ་མཚམས་བཞིར་ཕུར་པ་ཡིས། །བགེགས་བསྐྲད་སྟེང་དུ་བླ་རེ་བྲི། །བུམ་པ་ཁ་རྒྱན་དང་ལྡན་ཞིང་། །རིན་ཆེན་འབྲུ་དང་སྨན་དུ་ལྡན། །དྲི་ཞིམ་ཆུ་དང་ལྡན་པར་བྱ། །
གོས་བཟངས་ཀྱིས་ནི་མགྲིན་པ་དཀྲི། །ཕྱོགས་བཞི་དག་ཏུ་གཞག་པར་བྱ། །ཐང་ཀའམ་དཀྱིལ་འཁོར་ལ་མཆོད་དེ། །དྲིའམ་ཆུ་དང་མེ་ཏོག་དང་། །བསྲེས་པའི་སྐྱོར་མོས་ཆུ་ཡང་བླུགས། །གཟར་བ་སྟོང་གིས་སྦྱིན་སྲེག་བྱ། །
ཆུ་དེས་གཞན་ཡང་གཏོར་བར་བྱ། །བར་མ་ཆད་པར་ཉིན་བདུན་དུ། །དེ་ལྟར་རྒྱུན་ཏུ་གཏོར་མ་སྦྱིན། །ཕྱི་ནས་འཁོར་ལོ་རིན་ཆེན་དེ། །བུམ་པའི་ནང་ནས་རྣམ་ཕྱུང་སྟེ། །རྒྱལ་མཚན་རྩེ་ལ་བཏགས་ནས་སུ། །གནས་མཐོན་པོར་
ཡང་བཞག་པར་བྱ། །ཞི་བར་བྱེད་པ་ཐེ་ཚོམ་མེད། །སྔར་བཤད་པ་ཡི་ཤིང་ཤུན་དང་། །དུར་ཁྲོད་རས་ལ་སྒྲུབ་པོ་ཡིས། །ཡུང་བའི་ཁུ་བས་འཁོར་ལོ་བྲི། །སོ་མ་བཏང་བའི་ཁམ་ཕོར་དུ། །བསྒྲུབ་བྱའི་རྐང་རྗེས་ས་དག་དང་། །
སྣང་མཛད་ཆུ་ངོགས་ས་དག་དང་། །རི་དང་ལམ་ས་བཏགས་ནས་ནི། །ལྡོང་རོས་དང་ནི་ཡུང་བ་ཡི། །ཁུ་བས་བསྤྲུས་ཏེ་གཟུགས་བྱས་ལ། །འཁོར་ལོ་གཉིས་དྲིལ་ཡུང་བ་དང་། །ལྡོང་རོས་ཀྱི་ནི་ཁུ་བས་བསྐུ། །སྙིང་གར་
བཅུག་སྟེ་གཞུག་པར་བྱ། །སེང་ལྡེང་ཕུར་པ་སོར་བརྒྱད་པས། །ལུས་ལ་སོགས་པ་གདབ་པར་བྱ། །དགྲ་རྣམས་འོང་བའི་ལམ་དུ་ཡང་། །ཁུང་བུར་བརྐོས་ཏེ་གཞུག་པར་བྱ། །ལྃ་ལས་དབང་ཆེན་གྱིས་མནན་ཅིང་། །

90-1-124b

སུྃ་ལས་སྐྱེས་པ་དེ་སྟེང་ན། །སྣ་ཚོགས་ལས་ཀྱིས་མནན་པ་ཡི། །ཁམ་ཕོར་སྐུད་སེར་དཀྲི་བར་བྱ། །རྒྱལ་ཆེན་དག་ནི་སེར་པོ་ཡང་། །དབང་ཆེན་ལ་གནས་ལྷོར་བལྟས་ཏེ། །བསྒྲུབ་བྱ་སེར་པོའི་རིགས་མནན་པར། །བསམས་
ནས་བཟླས་པ་བརྩམ་པར་བྱ། །སྭཱ་ཧཱ་མེད་པར་སྟྃ་བྷ་ཡ། །ལྃ་གྱི་མཐའ་ཅན་ལྔ་སྟོང་བཟླས། །གཏོར་མ་རྒྱུན་དུ་སྦྱིན་པར་བྱ། །རེངས་པ་ཆེན་པོའི་ལས་འདི་ཡིས། །དམག་གི་དཔུང་ཡང་ངེས་པར་རེངས། །འགའ་ཙམ་ལ་ནི་
སྨོས་ཅི་དགོས། །སྲན་ནེ་ལན་གསུམ་བསྔགས་པ་ཡིས། །དུར་ཁྲོད་རས་ལ་འཁོར་ལོ་བྲི། །རིམས་དང་དུག་གིས་ཟིན་པ་དེ། །དེ་ཡི་སྟེང་དུ་གཞག་པར་བྱ། །བདག་ཉིད་དཀར་པོར་རྣམ་བསམས་ཏེ། །ཆོ་གས་བྱབ་ཅིང་གདོན་པར་
བྱ། །དེ་ནི་དེ་ནས་ཞི་བར་འགྱུར། །ངག་དག་རེངས་པར་འདོད་ན་ཡང་། །སྨྱོ་བྱེད་ཁུ་བ་དུར་ཁྲོད་སོལ། །བཙག་རྣམས་བསྲེས་ཏེ་སོ་མ་བཏང་། །ཁམ་ཕོར་གཉིས་ལ་འཁོར་ལོ་འདི། །ཕོ་དང་མོ་ཡི་སྐོར་ཕྱོགས་གཉིས། །མ་ནོར་
བྲིས་ཏེ་ཁ་སྦྱར་ལ། །རོ་བསྲེགས་ས་དང་ཐལ་བས་གཡོག ། །སྟེང་དུ་བཟླས་ཤིང་སྤེལ་བ་ནི། །སྟྃ་བྷ་ན་དང་ཀུ་རུ་ལྃ། །སྭཱ་ཧཱ་མེད་པའི་སྔགས་འདི་ཡིས། །ཁ་བཅིང་བ་ནི་ངེས་པར་འགྱུར། །གང་ཞིག་གསད་པར་བྱེད་པ་ལ། །སྙིང་
རྗེར་ལྡན་པའི་གང་ཟག་གིས། །གདུག་བྱེད་ལས་འདི་བྱེད་པ་ལ། །གཤིན་དགྲ་ལྷ་ཡི་རྣལ་འབྱོར་གྱིས། །ཞག་གཅིག་གིས་ནི་འགྲུབ་པར་བྱེད། །བཅུ་བཞི་ཉི་མ་ཕྱེད་པ་ན། །བྱ་རོག་སྒྲོ་རྩའི་སྨྱུ་གུ་ཡིས། །དུར་ཁྲོད་ཀྱི་ནི་
རས་དག་ལ། །དུག་དང་ཚྭ་དང་སྐེ་ཚེ་དང་། །ནིམ་པ་ཚ་བ་གསུམ་དག་དང་། །ཚ་བའི་མར་ཁུ་དུར་ཁྲོད་སོལ། །སྨྱོ་བྱེད་མཛུབ་མོའི་ཁྲག་གིས་བྲི། །རོ་བསྲེགས་པ་ཡི་ཐལ་བ་དང་། །བསྒྲུབ་བྱའི་རྐང་པའི་རྗེས་ཀྱི་ས། །
མི་ཡི་རུས་ཕྱེ་ལ་སོགས་ལ། །གཟུགས་བྱས་དེ་ཡི་སྙིང་གར་གཞུག །དུར་མེ་དག་ལ་དེ་བསྲོ་ཞིང་། །ཁྲོས་པའི་སེམས་ཀྱིས་ཁྲི་བཟླས་ན། །སྐད་ཅིག་ཙམ་གྱིས་འཆི་བ་ནི། །དེ་ཡི་ཁྱིམ་མམ་དུར་དུ་སྦ། །དེ་ལྟའི་ལས་

90-1-125a

ཀྱིས་དེ་འགྲུབ་སྟེ། །མཚན་མོ་ཕྱེད་ན་ཁ་ལྷོར་བལྟ། །བདག་ཉིད་འཇིགས་པའི་གཟུགས་ཅན་ཏེ། །ཞལ་སོགས་སྔོན་དུ་གསུངས་པ་ལྟར། །མ་ཧེའི་སྟེང་ན་མཆེ་བ་གཙིག ། །གསུས་ཁྱིམ་ཆེ་ལ་གྱེན་སྐྲ་འབར། །སྤུ་སོགས་
གཞན་ཡང་དེ་འདྲའོ། །བ་སྤུ་དག་གི་བུ་ག་ནས། །འཇིགས་མཚོན་སྣ་ཚོགས་ཐོགས་པ་ཡི། །ཁྲོ་བོ་མང་པོ་འཕྲོ་བ་སྟེ། །བདག་ཉིད་བསྐལ་པའི་མེ་ལྟར་འབར། །བསྒྲུབ་བྱ་མདུན་དུ་བསམ་བྱ་བ། །མཚམས་མེད་
རྫོགས་པའི་སྡིག་དང་ལྡན། །དྲི་མ་ཅན་དེ་ཕྱོགས་གོས་འཆང་། །གྲོང་ཁྱེར་སྐྱེ་བོས་འཚེ་བ་ཅན། །གྲང་བའི་རེག་པས་ལུས་ལ་རྒྱས། །མཚོན་གྱིས་བཏབ་པ་བྱས་པ་ལ། །གཅན་གཟན་སོགས་ཟ་མདུན་དུ་བསམ། །ངག་
ཏུའང་དེ་ལྟར་ཡང་ཡང་བརྗོད། །ལྕགས་ཀྱི་འཁྱུད་མོས་ཡན་ལག་བསྡམས། །ཚེར་མས་དབུབ་པ་བྱས་པ་སྟེ། །ལུས་ཀྱི་པགས་པ་མེད་པར་བསམ། །སྐེ་ཚེ་ལན་ཚས་ལུས་བྱུགས་ཏེ། །ཨ་ཆུ་བ་ཡི་སྒྲ་འབྱིན་བསམ། །
དེ་ཡི་མགོན་སྐྱབས་བསལ་བྱས་ནས། །གཤིན་རྗེའི་ལྟོ་བའི་ཐ་མར་གཞག །བེ་ཅོན་ཐོགས་པས་དེ་ཟའོ། །འདི་ལྟར་བསད་པས་སངས་རྒྱས་ཀྱི། །སྲས་སུ་དེ་ནི་སྐྱེ་བར་འགྱུར། །ལས་ཀྱི་སྡིག་ལས་དེ་གྲོལ་ལོ། །གསོད་པའི་
སྔགས་དེ་སྤེལ་བ་ནི། །ཧཱུྃ་ཆེ་གེ་མོ་མཱ་ར་ཡ་ཧཱུྃ། བསྒྲུབ་བྱ་ནང་དག་དབྱེ་བ་ནི། །མ་ཧེ་རྟ་ཡི་པགས་པ་དག །ཡང་ན་རོ་དང་དུར་ཁྲོད་རས། །རྟ་དང་མ་ཧེ་བྱི་ལ་འམ། །ཁྱི་དང་ནིམ་པའི་འདབ་ཁུ་དང་། །ཁྱིམ་བྱའི་ཁྲག་
དང་སྐེ་ཚེ་བསྲེ། །དེར་ནི་འཁོར་ལོ་འདི་བྲིས་ཏེ། །རྣམ་པར་འགྲས་པ་བསྐུལ་དང་ལྡན། །རྟ་སྦལ་དག་གི་ནང་བཅུག་སྟེ། །མ་ཧེའི་རྨིག་པའི་ནང་བཅུག་ལ། །སྟོང་ཕྲག་བཅུ་ནི་ཚང་བར་བཟླས། །ནིམ་པའི་ཤིང་བསྲོས་དེ་ནས་
སྦ། །དེ་ནང་འགྲས་པ་ཉིད་དང་ནི། །དཔག་ཚད་བརྒྱས་མཆོད་འཐབ་པར་འགྱུར། །མཱ་མ་ཀི་དང་ཨ་མུ་ཀི། །བི་དྭེ་ཥ་ཡ་ཕཊ། རིམས་ཀྱིས་ཐེབས་པར་བྱ་བ་ལ། །དུར་ཁྲོད་ཀོ་བ་ཆེ་བ་ལ། །ཨབྵུ་ཤིང་གི་ལོ་མ་དང་། །ཙི་ཏྲ་

90-1-125b

ཀ་དང་སྐེ་ཚེ་དང་། །ཁྲག་གིས་འཁོར་ལོ་བྲི་བར་བྱ། །བྲི་བ་བསྐོས་ལ་རི་མོས་དགང་། །སེང་ལྡེང་འདབ་མ་དུ་མེད་ལ། །བསྲོ་ཞིང་ཁྲོས་པས་ལྔ་བརྒྱ་བཟླ། །ཁྱིམ་དང་ལམ་གྱི་བཞི་མདོ་དང་། །དུར་ཁྲོད་སྦས་ན་རིམས་
ཀྱིས་འཛིན། །རྒྱས་པའི་ལས་ཀྱིས་རྒྱས་འདོད་ན། །འགི་ཝང་གིས་ནི་གྲོ་ག་ལ། །འཁོར་ལོ་གཉིས་ནི་རྣམ་བྲིས་ཏེ། །བསྐུལ་ཚིག་ལྡན་པར་ཡི་གེ་བྲི། །ཟླ་དྲུག་ཐང་ཀའི་མདུན་དག་ཏུ། །གནོད་སྦྱིན་དང་ནི་གནོད་སྦྱིན་མོས། །
རིན་ཆེན་ཆར་ནི་འབེབས་པ་དང་། །གཤིན་དགྲ་སེར་པོ་ཟླ་སེར་ལ། །གནས་པར་བསམས་ཏེ་ཁྲི་བཟླས་ན། །འཕགས་པ་ནོར་འཛིན་འདྲ་བར་འགྱུར། །ཨོཾ་ཆེ་གེ་མོ་པུཥྚིཾ་ཀུ་རུ་ༀ། གྲོ་ག་སོགས་ཀྱི་ཤོག་ཤོག་ལ། །འགི་
ཝང་དང་ནི་རང་བྱུང་གི། །མེ་ཏོག་དག་གིས་བྲི་བ་སྟེ། །ཡང་ན་ཐ་ལྟག་ཁྲག་དང་ནི། །བིལ་བའི་ལོ་མའི་ཁུ་བ་དང་། །རས་དམར་པོའི་ཡ་ཁུ་བ་དང་། །སེན་རྩི་རྣམས་བསྲེས་བྲི་བར་བྱ། །སྤྲ་ཚིལ་གྱིས་ནི་འཁོར་ལོ་དྲིལ། །
བུམ་པ་མར་སྦྲང་ལྡན་པར་གཞག །དུས་བཞི་དག་ཏུ་མཆོད་པ་ནི། །མེ་ཏོག་དམར་པོས་མཆོད་པའོ། །དེ་ཚེ་བཟླས་པ་ཚུལ་དག་ནི། །ཧོཿབཱ་ཤང་ཀུ་རུ་ཧོཿ། །དེ་མ་ཐག་ཏུ་ལྷ་རྣམས་ཀྱང་། །དབང་དུ་བྱེད་པར་
ངེས་འགྱུར་རོ། །གྲོ་ག་དག་ལ་བྲི་བ་ནི། །ཟླ་བ་གཟས་ཟིན་དུས་དག་གམ། །རྒྱལ་གྱི་ཉིན་པར་བྲི་བྱ་སྟེ། །སྐུད་པ་དམར་པོས་འཁོར་ལོ་བྲི། །མེ་ཏོག་དམར་པོས་མཆོད་པར་བྱ། །ཐོད་པ་ཁ་སྦྱར་ནང་གཞག་སྟེ། །
བཟླས་པ་ཁྲིས་ནི་བརྒྱ་བྱིན་གྱི། །བུ་མོའང་རྙེད་པར་ངེས་འགྱུར་རོ། །དུར་ཁྲོད་ཀྱི་ནི་རས་དག་ལ། །གུར་གུམ་སོགས་ཀྱིས་འཁོར་ལོ་བྲི། །ཡི་གེ་ཐིག་ལེས་རྣམ་བསྐོར་ཏེ། །ཨ་མུ་ཀི་དང་མཱ་མ་ཀཱི། །མོ་ཧ་ན་དང་
རྣམ་སྤེལ་ལ། །བསྒྲུབ་བྱའི་གོས་ཀྱི་མཐའ་མ་ལ། །ལེགས་བཏགས་ཆོས་ཀྱི་དབྱིངས་ཉིད་དུ། །བསྒོམས་ནས་ཟློས་ཤིང་འགྲོ་ན་ཡང་། །ལྷ་དང་ལྷ་མིན་གྱིས་མི་མཐོང་། །བདག་ཉིད་གཤིན་དགྲ་ཉིད་བསྒོམས་ནས། །

90-1-126a

ཆུ་ཡི་སྟེང་ནས་འགྲོ་འདོད་ན། །རྡུལ་ཕྲན་ལྷ་ཡི་རྣམ་པར་ཏེ། །དབུ་རྒྱན་དུ་ནི་བདག་རང་ཉིད། །ངེས་པར་སྟེང་འགྲོ་གཞན་དག་ཀྱང་། །བུ་མོས་ནགས་ཀྱི་རས་བལ་ལ། །སྐུད་པ་བཀལ་བ་གཞོན་ནུ་མས། །སུམ་
སྒྲིལ་དུ་ཡང་དེ་ཡིས་བྱ། །གདུག་སྔགས་སྟོང་དུ་ཚང་བར་ཏེ། །བཟླས་ཚུལ་སྔོན་དུ་གསུངས་པ་བཞིན། །སྐར་མ་རྒྱལ་གྱི་དུས་ལ་བཟླ། །བྲི་བའི་ཉིན་མོའང་དེ་ལའོ། །དཀྱིལ་འཁོར་གྱི་ནི་ལྷར་བརྟག་པས། །གཡོན་གྱིས་
མདུད་བྱས་གཞན་ལ་གདགས། །མ་ལུས་མཚོན་དག་རེངས་བྱེད་དེ། །གཅེར་བུ་བ་ལང་རེངས་པར་བྱེད། །མེ་ཏོག་ལས་ནི་གཞན་དུ་མིན། །ཤ་ལྔ་སོགས་ཀྱི་རིལ་བུ་ནི། །ལེགས་པར་གྲིབ་མ་དག་ལ་བསྐམ། །ལྕགས་གསུམ་
དག་གིས་དཀྲི་བར་བྱ། །བཟླས་ཤིང་མཆོད་པ་བྱེད་པའི་ཚེ། །དངུལ་དག་གི་ནི་རང་བཞིན་བྱ། །འབར་བར་གྱུར་པ་ཉིད་ན་ཡང་། །མཆོད་པ་ལེགས་པར་རྣམ་བྱས་ཏེ། །སྐོར་བ་བརྒྱ་ཕྲག་དུ་མ་བྱ། །དེ་ནས་བློ་ལྡན་སྒྲུབ་པ་
བས། །ཁར་བཅུག་ཙམ་གྱིས་འདོད་པ་བསྒྲུབ། །ཕྱུང་ན་སྔོན་ལྟར་རྣལ་མ་ཉིད། །གསོ་བ་འདྲ་བར་འོ་མས་ཀྱང་། །ངེས་པར་འཁྲུལ་འཁོར་བཀྲུ་བར་བྱ། །རིག་སྔགས་འཁྲུལ་འཁོར་ལས་གྲོལ་ཏེ། །རྣལ་མ་
ཉིད་ལ་གནས་པ་ཡིན། །སྣུམ་སྟེར་དག་གི་ས་བོན་ལ། །ཉ་ལྕིབས་དང་ནི་བྱི་ཏང་ཀ ། ཁུ་བས་ཡང་དེ་བྱུགས་པ་ལ། །ཐོད་པ་སས་ནི་རྣམ་བཀང་བར། །སྦས་ཏེ་བཟླས་པ་གྲངས་མེད་བྱ། །དེ་ཚེ་མཆོད་དང་
གཏོར་མ་དག །ཡོངས་རྒྱས་འབྲས་བུ་རྣམ་བླངས་ཏེ། །ཁར་བཅུག་མཁའ་འགྲོའི་བྱར་འགྱུར་རོ། །དེ་ལ་འདི་སྐད་ཅེས་བྱ་སྟེ། །ཞུས་དང་འདས་དུས་བྱུང་གདུག་པ། །མངོན་པར་རྟོགས་པའི་ཏིང་ངེ་འཛིན། །དཀྱིལ་
འཁོར་རྣམ་པར་སྤྲོས་པ་དང་། །ཐིག་གིས་གཞལ་ཡས་མཚོན་པ་དང་། །རྡུལ་ཚོན་ཕྱོགས་ལས་རྣམ་པར་བརྟགས། །ཡང་དག་བྱིན་གྱིས་བརླབས་པ་དང་། །བདུད་རྩི་མྱང་བར་བྱ་བ་དང་། །ཚངས་པའི་གནས་བཞི་བསྒོམ་པ་དང་། །

90-1-126b

སྔགས་ཀྱི་དངོས་མེད་དེ་བཞིན་མཚམས། །ཆོས་འབྱུང་དང་ནི་སྒྲུབ་པོ་དང་། །བཟླས་དང་དེ་ཡི་གྲངས་ཚད་དང་། །འཁོར་ལོ་དང་ནི་ཡི་གེ་གཉིས། །ངེས་པར་ཞུས་དང་མཆོད་པ་དང་། །འཁོར་ལོ་འདྲི་བའི་མཚན་མ་དང་། །
འབྱུང་བ་བཞི་དང་བསྡུ་སོགས་དང་། །སྡོམ་པ་འཁོར་ལོའི་ཡི་གེ་བྲི། །གཞི་དང་དེ་བཞིན་སྣག་ཚ་དང་། །སོ་སོ་ལས་ཀྱི་བྱེ་བྲག་སྟེ། །བསྡུས་ཏེ་ང་ཡིས་བསྟན་པ་ཡིན། །དེ་ནས་བཅོམ་ལྡན་འདས་ཀྱིས་འབྱུང་པོ་རྣམས་ལ་གཏོར་མས་
ཚིམ་པར་བྱ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། །སྐུ་དང་གསུང་དང་ཐུགས་རྡོ་རྗེ་ལས་སྔགས་འདི་ཕྱུང་ངོ་། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། འབྱུང་པོ་རྣམས་དང་རྣམ་སྤེལ་ཏེ། །ཐ་མར་སྦྱར་
བ་བྱས་པ་ནི། །ཧི་ཧི་ཧི་ཧཱུྃ་ཕྃ་ཕྃ་སྭཱ་ཧཱ། །དུར་ཁྲོད་རྒྱན་གྱིས་རྣམ་བཞག་པའི། །ཞེ་སྡང་གཤིན་གཤེད་རྡོ་རྗེ་ནི། །སྤྲོས་མེད་ནམ་མཁའ་ལྟ་བུ་ལས། །སྙིང་རྗེའི་ཐབས་ཀྱིས་སྐུ་སྤྲུལ་པ། །ཡེ་ཤེས་ཁྲོ་རྒྱལ་རབ་འཇིགས་པའི། །དུད་པ་མུན་
ཆེན་སྐུ་ལ་འདུད། །གར་དགུ་ཉམས་དང་ལྡན་པ་ཡི། །གཏི་མུག་རྡོ་རྗེ་གཤིན་རྗེའི་གཤེད། །སྐྱེ་མེད་དོན་དམ་དེ་ཉིད་ལས། །ཐབས་ཀྱིས་སྤྲུལ་པའི་སྐུར་བསྟན་པ། །འཇིགས་བྱེད་དྲག་པོའི་ཆ་ལུགས་ཅན། །ཟླ་བ་ཉ་འདྲ་ཁྱོད་ལ་འདུད། །
བསྐལ་པའི་མེ་ལྟར་འབར་བ་ཡི། །སེར་སྣ་གཤིན་རྗེའི་རྡོ་རྗེ་ནི། །འཛིན་པ་པོ་ལས་གྲོལ་བ་ཡིས། །གདུག་པ་འདུལ་ཕྱིར་ཁྲོ་བོར་སྤྲུལ། །གཏེར་འཆང་སེར་སྣ་གྲོལ་མཛད་པ། །བཙོ་མ་གསེར་འདྲ་ཁྱོད་ལ་འདུད། །ཆགས་པས་མ་ལུས་
དབང་མཛད་པའི། །འདོད་ཆགས་གཤིན་རྗེའི་རྡོ་རྗེ་ནི། །སྐྱེ་མེད་རྣམ་དག་ཆོས་དབྱིངས་ལས། །ཁམས་གསུམ་པ་དག་ཁྲོ་བར་སྤྲུལ། །མ་ཆགས་སྤྱན་ལྡན་ཐུགས་རྗེ་ཅན། །བན་དུ་ལྟ་བུའི་སྐུ་ལ་འདུད། །ཤེས་རབ་ཐབས་ལྡན་ཧེ་རུ་ཀ །
ཕྲག་དོག་གཤིན་རྗེའི་རྡོ་རྗེ་ནི། །རྣམ་རྟོག་དཔེ་དང་བྲལ་བ་ལས། །ཐུགས་རྗེས་སྤྲུལ་པའི་ཁྲོ་བོ་ནི། །འགྲོ་དོན་བརྩོན་པའི་རལ་གྲི་ཅན། །སྣ་ཚོགས་མདོག་ཅན་ཁྱོད་ལ་འདུད། །ཐམས་ཅད་བསྐྱེད་པའི་ལྷ་མོ་ཆེ། །དབང་པོ་ལྟ་བུར་

90-1-127a

བསྒྱུར་མཛད་པ། །ཁམས་གསུམ་གཟིགས་པའི་སྤྱན་དང་ལྡན། །རྣམ་སྣང་ཅན་གྱིས་བདུད་བཞི་འཇིགས། །བདེ་བ་ཆེན་པོས་རྟག་ཏུ་དགྱེས། །ཡེ་ཤེས་སྤྱན་ཅན་ཁྱོད་ལ་འདུད། །ཀུན་སྡུད་ལྷ་མོ་རིན་པོ་ཆེ། །རྣམ་རྟོག་སྐྱོན་ལས་
རྣམ་གྲོལ་ཡང་། །དུས་གསུམ་བདེ་གཤེགས་བདག་གིར་བྱེད། །རིན་ཆེན་ཏོག་ཅན་མཛེས་པའི་སྐུ། །དོན་དམ་ཐུགས་ཆུད་འཁོར་བ་སེལ། །མ་ལུས་ཀུན་གྱི་བདག་ལ་འདུད། །འདུས་བྱས་མ་ལུས་བསྲེག་བྱེད་པ། །རྣམ་རྟོག་ཞི་བའི་རང་
བཞིན་ལས། །ཁམས་གསུམ་མ་ལུས་སྒྲོལ་བར་བྱེད། །འོད་དཔག་མེད་ཀྱིས་རབ་མཛེས་པ། །མ་ཆགས་ཕྱག་ན་བསྣམས་པ་ཡི། །ཕྲིན་ལས་དག་བྱེད་ཅན་ལ་འདུད། །ཐུགས་རྗེས་གཡོ་བའི་རང་བཞིན་ཅན། །འཇིག་རྟེན་
གསུམ་དག་སྒྲོལ་བར་བྱེད། །གཉིས་མེད་བདེ་ཆེན་ངང་ཉིད་ལས། །ཕྲིན་ལས་གྲུབ་པའི་རང་བཞིན་ཅན། །བཏང་སྙོམས་བཞུགས་པས་འགྲོ་བ་འདུལ། །ཀུན་ཏུ་ལས་ཀྱི་རྒྱལ་ལ་འདུད། །ཅེས་གཟུགས་རྡོ་རྗེ་ལ་སོགས་པ་ལ་སོ་སོར་
ཡོངས་སུ་བསྟོད་དོ། །དེ་ཡང་ཐམས་ཅད་ཀྱི་བདག་པོས་ལེགས་སོ་ཞེས་བྱ་བ་བྱིན་ཏེ། ལྷ་མོ་རྣམས་ཀྱི་སྐུ་ལ་བཏུད་དེ། །གདུག་པ་འཇིགས་པའི་ཡི་གེ་ནི། །བཅུ་བཞི་པ་ལ་དམིགས་པ་ཡང་། །འཁོར་བར་དམིགས་པར་བྱ་བའམ། །
ཉི་མའི་སྟེང་ན་སྐྱེས་པ་ལྟར། །དམིགས་ཏེ་མ་ཡེངས་བརྗེད་པ་མེད། །བཟླས་པ་ཉིད་ནི་དེ་ལྟར་བྱ། །བྱེ་བ་ཚང་བར་བཟླས་པ་ཡིས། །རབ་འབྱམ་ལས་ལ་མི་འགྲུབ་པ། །མེད་དེ་དེ་ཡིས་ཐམས་ཅད་འགྲུབ། །འབུམ་དང་ས་ཡ་བཟླས་པས་
ཀྱང་། །ཕྲ་མོའི་ལས་རྣམས་འགྲུབ་པར་བྱེད། །གཞན་དུ་མི་འགྲོའི་སེམས་ཀྱིས་ནི། །དེ་ལྟའི་ཚུལ་དུ་བཟླས་པ་བྱ། །ཡུལ་གཞན་བློ་ནི་འགྲོ་བ་ཡིས། །བསྐལ་པར་བཟླས་ཀྱང་འབྲས་མི་འབྱིན། །མི་འཕྲོ་སེམས་ཀྱིས་འདི་ཟློས་ཤིང་། །
ལམ་དུ་ཞུགས་པའི་སྐྱེས་བུ་ལ། །སྟག་སོགས་ཆུ་ཡིས་མི་འཇིགས་སོ། །དེ་ནས་ཡང་དག་བཤད་བྱ་བ། །དབང་གི་བློ་སྦྱངས་རབ་ལྡན་པས། །འབྲས་ཐོབ་དེ་མེད་མི་འགྲུབ་སྟེ། །དེ་བས་དེ་ནི་བཤད་པར་བྱ། །བུམ་པའི་དབང་གིས་ཐོག་མར་སྦྱང་། །གསང་བའི་དབང་

90-1-127b

གིས་གཉིས་པ་སྟེ། །གསུམ་པར་བྱ་བ་དེ་ཉིད་ནི། །ཤེས་རབ་ཡེ་ཤེས་དེ་ཡིན་ཏེ། །དེ་ལྟར་དེ་བཞིན་བཞི་པ་ཡིན། །བརྟན་གཡོ་དངོས་པོ་མ་ལུས་པ། །བསྒོམ་པར་བྱ་བའི་དུས་ཉིད་ལ། །བློས་ནི་ཡོངས་སུ་མི་བསྒོམ་སྟེ། །ཀུན་
གྱི་མཚན་ཉིད་མ་ཤེས་ན། །བསྒོམ་པ་ཁོ་ན་དེ་མིན་ཏེ། །ཐམས་ཅད་དངོས་ཉིད་ཡོངས་ཤེས་ན། །དེ་ནི་བསྒོམ་པར་ཡོངས་སུ་བསྒྲགས། །དེ་ཉིད་བླ་མའི་ཁ་ཡིས་ཏེ། །འབད་པས་མཉེས་བྱ་དེ་མི་སྨད། །དེ་ལ་ཐམས་ཅད་
འབྱུང་བ་སྟེ། །བླ་མ་ལ་སྨོད་གཡོ་སྒྱུ་ཅན། །ངེས་པར་དེ་ནི་དུག་དང་ཡང་། །གདོན་ཆེན་དག་ནི་མ་ལུས་པས། །འཆི་ཞིང་བརླགས་པར་དེ་གྱུར་ནས། །དམྱལ་བ་དག་ཏུ་ཡུན་རིང་ལྟུང་། །བསྐལ་པ་དུ་མར་སྡུག་བསྔལ་ཏེ། །
རྟག་ཏུ་ཆོ་ངེས་འབེབས་པར་བྱེད། །དེ་བས་བློ་གྲོས་ཆེན་པོ་ལ། །ནམ་དུའང་མི་སྨད་གཞན་དུ་ན། །བཀུར་སྟི་ཕུ་དུད་འགྲོ་བ་ལ། །ཕན་པའི་སེམས་ཀྱིས་དེ་ལྟར་བྱ། །གཞན་ཡང་བསྒོམ་པར་བྱ་བ་ཉིད། །གང་དག་དབང་པོའི་ལམ་
འགྲོ་བ། །དེ་དེའི་ངོ་བོར་བདག་གིས་བྱ། །བསམ་གཏན་མི་བྱེད་དེ་བློ་ཡིས། །ཀུན་ཏུ་བློ་ཡིས་བསྒོམ་པར་བྱ། །བཅོམ་ལྡན་བདག་པོ་ཆེན་པོ་ཡིས། །གསང་དབང་ལག་ན་རྡོ་རྗེ་ལ། །བོས་ནས་གསང་བའི་དབྱངས་འདི་གསུངས། །
གཟུགས་སྒྲ་ལ་སོགས་དྲུག་པོ་རྣམས། །དངོས་མེད་མཁའ་དང་འདྲ་བ་ལས། །ལོངས་སྤྱོད་ཡུལ་དུ་དུ་མར་སྣང་། །ཤེལ་ལ་ཚོན་ནི་ཇི་བཞིན་དུ། །འདོད་པ་ལྔ་དང་ཆོས་རྣམས་ལ། །རྟག་ཏུ་རྣལ་འབྱོར་སྤྱོད་པར་ཤོག །
ཨ་ལ་ལ་ཧོ། །རོལ་དུ་གསོལ་བསྣམས་པར་མཛོད། །མི་འཛིན་སྒྱུ་མ་ལྟ་བུ་ལ། །གར་གྱིས་དགྱེས་པའི་རོལ་པ་མཛོད། །རིག་བྱ་དགག་པ་མེད་པ་ལ། །མི་གཡོ་བཞིན་དུ་རོལ་པར་མཛོད། །ཧོ་ཆགས་པ་མེད་པས་
ཆགས་པར་མཛོད། །དེ་ནས་ཡང་དག་རབ་བཤད་པ། །སྔགས་དང་ཕྱག་རྒྱ་དབང་བསྐུར་བའི། །དེ་ཡི་མཚན་ཉིད་བཤད་པའི་ཕྱིར། །གསུང་ནི་འདི་སྐད་བཀའ་སྩལ་ཏོ། །ལྕེ་ལ་སྒོམ་པའི་རྡོ་རྗེ་ནི། །རྡོ་རྗེ་གནོད་

90-1-128a

མཛེས་ནག་པོ་སྟེ། །ཁ་ནི་ཀུན་དུ་དགྱེས་པ་ཡི། །ལག་གཉིས་ཐལ་མོ་ངེས་སྦྱར་ཏེ། །གུང་མོའི་རྩ་བའི་ཚིགས་ཉིད་ལ། །མཐེ་བོང་ངེས་པར་སྦྱར་བར་བྱ། །མཛུབ་མོ་གུང་མོའི་རྒྱབ་རྩེར་སྦྱར། །འདི་ནི་
དམ་ཚིག་ཕྱག་རྒྱ་སྟེ། །སྙིང་ག་དཔྲལ་བ་ལྐོག་མ་དང་། །སྤྱི་བོར་བྱིན་གྱིས་བརླབ་པར་བྱ། །ཨོཾ་ཧྲཱིཿཥྚྲཱིཿབི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཨ་དྷི་ཏིཥྛ་སྭ་མཱཾ། །གཞན་ཡང་རྡོ་རྗེ་སེམས་མ་སོགས། །ཕྱག་རྒྱས་དབང་བསྐུར་
དབུ་རྒྱན་བརྟག །གཏི་མུག་རྡོ་རྗེ་ལ་སོགས་པ། །སོ་སོའི་བདག་པོས་དབུ་བརྒྱན་ཅིང་། །དབང་བསྐུར་ཚེ་ན་བུམ་པ་ཆེ། །ཕྱག་གིས་བསྣམས་ཏེ་དབང་བསྐུར་རོ། །འཁོར་ལོ་ལས་ཀུན་བྱེད་པ་ལ། །གསང་དབང་ལག་ན་རྡོ་རྗེ་ཡིས། །
བསྟོད་པའི་རྒྱལ་པོ་འདི་ཡིས་བསྟོད། །གདུག་པ་སྐྲག་བྱེད་འཁོར་ལོ་མེ་ལྟར་འབར། །དུས་གསུམ་ཁྲོ་རྒྱལ་ཧེ་རུ་ཀ་ཡི་ཐུགས། །ལས་རྣམས་དག་བྱེད་ཕྲག་དོག་རྡོ་རྗེ་སྟེ། །མ་ལུས་ཚེམས་གཅོད་གསོལ་བས་སྐུ་ཡི་དང་། །ཧཱུྃ་དང་ཕཊ་ཀྱི་
གདུག་རྩུབ་སྦྱོར་བས་གསུང་། །ཀུན་གྱི་རང་བཞིན་ཁྱོད་ཀྱིས་གཤིན་རྗེ་ཡི། །ལྟོར་འཛུད་བཀའ་ལས་ངེས་ཀྱང་མི་འདའ་ཞིང་། །ཕྱོགས་བཅུའི་སྤྲུལ་པས་གནས་ནས་འགུགས་མཛད་པ། །མ་ལུས་ཀུན་བྱེད་འཁོར་ལོ་ཆེ་མཆོག་ལ། །
གཞན་གྱི་དོན་རྫོགས་གུས་པས་ཕྱག་འཚལ་ལོ། །ཁྱོད་ནི་དཔའ་བོ་ཐུབ་ཆེན་ཀུན་གྱི་བདུད། །ང་ཡིས་ལམ་བསྟན་བདུད་རྣམས་མི་ཕྱེད་ཀྱང་། །དམ་ལས་འདའ་ཞིང་ལོག་པ་ཀུན་བསྐྱེད་ལ། །ཁྱོད་ཀྱང་བཀའ་ལས་མ་འདའ་ལས་རྣམས་སྒྲུབས། །
ཚེ་དང་སྲོག་བསྡུས་ཡན་ལག་རྣམ་པར་བཅིངས། །བདུད་རྩི་ཆུ་རྒྱུན་རྣལ་འབྱོར་ང་ལ་འདོད་སྒྲུབ་ན། །ངས་ནི་སྦྱིན་བྱ་ཁྱོད་ནི་དམ་ལས་མ་འདའ་ཞིག །ཅེས་དཔལ་གཤིན་རྗེའི་དགྲ་ནག་པོའི་འཁོར་ལོ་གཞན་གྱི་ལྟོ་བ་ལ་གནས་འཆའ་
བར་འདོད་པའི་གཏན་འཕོ་བ་མ་ཡིན་པའི་ཚེ་བྱའོ། །འཁོར་ལོ་སྙིང་གར་ལྟ་བའི་ཚེ། །ས་བོན་ཚུལ་ཏེ་ལྟེ་བ་ལ། །ཡི་གེ་མ་ལུས་འདོད་པ་ཡང་། །མཚན་ཉིད་ངན་པའི་རྟོག་པ་ལས། །གྲོལ་ཏེ་མཐའ་གསུམ་ངོ་བོ་ལས། །ཀྵཿནི་ཟད་

90-1-128b

པའི་བདག་ཉིད་ལ། །ཨུ་ནི་ཧཱུྃ་གི་བདག་ཉིད་དེ། །དེ་ནི་སེམས་ཀྱི་རང་བཞིན་ཉིད། །དགའ་ལས་འདས་པའི་ཡེ་ཤེས་ཏེ། །ཐབས་ནི་ཤེས་རབ་ལྡན་པ་ལས། །དུས་ཐབས་བསྟེན་པའི་བདག་ཉིད་ཀྱིས། །འཐོབ་སྟེ་གཞན་དུ་དེ་མི་
འཐོབ། །ཆུ་འགྲམ་ཆེན་པོ་བས་མཐའ་དང་། །དུར་ཁྲོད་ཤིང་དྲུང་དགོན་པ་སྟེ། །དབེན་པའི་ཡུལ་དང་མ་མོའི་ཁྱིམ། །དེར་ནི་མགོན་པོ་འདི་ལ་འབད། །གཞན་དུ་བསྒྲུབས་ཀྱང་དེ་མི་འགྲུབ། །སྐད་ཅིག་དེ་ལ་རང་བཞིན་
ཀུན། །ངེས་པར་མི་སྣང་རིག་པ་ཡི། །ལམ་དུ་གྱུར་པ་མེད་པར་ཤེས། །འབྲས་བུ་དེ་ནི་རྒྱ་ཆེན་ཏེ། །མཐའ་ཡི་འཐོབ་པ་དེ་ཡིན་ནོ། །དེ་ནས་ཡང་ཐམས་ཅད་ཀྱི་བདག་པོ་བདེ་བར་གཤེགས་པས་རྡོ་རྗེ་སའི་ཆོ་ག་གསུངས་པ་ནི། །
སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱིས། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དབང་དུ་གྱུར། །བསྲུང་བའི་དཀྱིལ་འཁོར་རབ་གནས་པས། །སྡང་བའི་ལོག་འདྲེན་སྐྱེ་བོ་དང་། །བགེགས་རྣམས་
བསལ་བ་འདི་སྐད་གསུངས། །དཔལ་ལྡན་བདག་ནི་རྡོ་རྗེ་འཛིན། །བསྲུང་བའི་འཁོར་ལོ་རབ་སྦྱོར་བས། །བདག་གིས་ཡེ་ཤེས་རྡོ་རྗེ་ཡིས། །ལུས་ངག་ཡིད་དུ་བཅས་པ་དག །སངས་རྒྱས་ཀུན་གྱི་བདག་ཉིད་ནི། །ཁྲོ་བོ་
གཤིན་རྗེ་ནག་པོའི་བདག །སློབ་དཔོན་གྱིས་ནི་དཀྱིལ་འཁོར་བྲི། །ཞེས་ལན་གསུམ་གྱི་བར་དུ་བརྗོད་པར་བྱའོ། །དཀྱིལ་འཁོར་གྱི་ནི་དྲུང་ཉིད་དུ། །དར་གྱིས་གདོང་ནི་བཀབ་པ་ལ། །སྒོ་དྲུང་གནས་པ་ཁྱོད་གང་ཡིན། །སློབ་དཔོན་
གྱིས་ནི་རབ་བརྗོད་དེ། །དེས་བདག་སྐལ་བ་ལྡན་པར་བརྗོད། །ཇི་ལྟར་བླ་མེད་དཔའ་བོ་ཡིས། །མགོན་ལ་དབང་ནི་བསྐུར་བ་བཞིན། །བླ་མེད་བྱང་ཆུབ་གནས་བྱའི་ཕྱིར། །བདག་ལའང་མགོན་པོས་དབང་བསྐུར་གསོལ། །
མེ་ཏོག་སོགས་ཏེ་མཆོད་པའི་མཆོག །རབ་འབྱམ་རྒྱ་མཚོ་མ་ལུས་པས། །སློབ་དཔོན་དཔའ་བོ་དེ་ཉིད་ལ། །ཡང་ཡང་མཆོད་ཅིང་བསྟོད་པའི་ཚོགས། །རྒྱས་པར་མཉེས་བྱ་དེ་འོག་ཏུ། །དཔའ་བོས་དེ་ལ་དབང་རྣམས་

90-1-129a

སྦྱིན། །དེ་ནས་རྒྱལ་པོ་བདེ་ཆེན་པོ། །དཔའ་བོ་ལོངས་སྤྱོད་ཀུན་ལྡན་པ། །འགྲོ་དོན་བརྩོན་པའི་སྐུ་གསུམ་བདག །ཉིད་ཀྱིས་འདི་སྐད་བཀའ་སྩལ་ཏོ། །སྦྱིན་སྲེག་མེད་ན་འབྲས་མི་འབྱིན། །དེ་བས་བདག་
ཉིད་དམ་པ་ཡིས། །དེ་ཡི་ལས་ལ་འབད་པར་བྱ། །གོས་ནག་རྒྱན་གྱིས་རྣམ་བརྒྱན་ལ། །གཤིན་རྗེར་རྣམ་བལྟས་རྣལ་འབྱོར་པས། །ཁྲོ་བོའི་སྐྱིལ་ཀྲུང་བཅས་པ་ཡིས། །སྲ་བའི་སྟན་ལ་བདག་འདུག་ནས། །ལས་རྣམས་བསྒྲུབ་པར་བྱ་བ་
ནི། །མཚན་མོའམ་ཉི་མ་ཕྱེད་ཉིད་ན། །རྃ་བྱུང་མེ་ཡི་དཀྱིལ་འཁོར་དུ། །ཧཱུྃ་ཕཊ་མཐའ་ན་ཡོད་པ་ཡི། །སྔགས་ཀྱི་ཐོག་མ་བར་ཐ་མར། །སྦྱིན་སྲེག་བྱ་སྟེ་དེ་མེ་ནི། །དུར་ཁྲོད་མེ་འམ་རུས་པ་འམ། །རྡོ་ཉིད་ལས་ནི་བྱུང་བ་
འམ། །ཙན་ཌ་ལཱི་ཡི་ཁྱིམ་ཉིད་ནས། །ཐབ་ཁུང་གྲུ་གསུམ་ཅན་དེར་ནི། །ཚེར་མ་ཅན་གྱི་བུད་ཤིང་བརྫང་། །རླུང་གཡབ་སྦར་ཏེ་ཧཱུྃ་ཛྭ་ལ་རྃ། །ཛྭ་ལ་ཧཱུྃ་བརྗོད་མེ་སྦར་བརྗོད། །ལག་གཡས་ཀུ་ཤ་བཅས་པ་ཡིས། །མཐེ་
བོང་སྲིན་ལག་རྩ་རུ་གཟུགས། །ཨོཾ་ཨེ་ཧྱེ་ཧི་མ་ཧཱ་བྷཱུ་ཏ་དེ་བ་རྀ་ཥི་དྭི་ཛ་སོཏྟ་མ་གྲྀ་ཧཱི་དྭཱ་ཨཱ་ཧཱུ་ཏི་ཨཱ་ཧཱ་རྃ་ཨསྨིན་སྃ་ནི་ཧི་ཏོ་བྷ་བ་ཞེས་བརྗོད་ལ་སྤྱན་དྲང་ངོ་། །འབར་བ་མེ་ཡི་དབུས་ཉིད་དུ། །མིང་དེ་ཟད་བྱེད་ཅེས་བྱ་བ། །ཁྲོ་བོ་
མེ་ལྟར་ཕུན་སུམ་ཚོགས། །བ་སྤུ་ཁམ་པ་དེ་བཞིན་དུ། །དུ་མདོག་ཟུར་མིག་སྟེང་དུ་གཟིགས། །སྒྲ་ཆེ་མཆེ་བཞི་ལྡན་སྟོབས་ཆེ། །ཡྃ་ལས་རླུང་གི་དཀྱིལ་འཁོར་ཏེ། །བཞུགས་ནས་དྲག་པོའི་ཡི་གེ་བརྗོད། །སྤྱན་གསུམ་
པ་ལ་ཕྱག་བཞི་པ། །རིག་པའི་གནས་ལ་ལེགས་པར་བཞུགས། །ཞལ་བདུན་རྣམ་གཙིགས་མ་ཧེ་ལ། །ཆིབས་པ་དུ་བའི་ཕྲེང་རྣམས་འཁྲིགས། །ཕྱག་གཉིས་མདུང་དང་རྡོ་རྗེ་འཛིན། །གཉིས་ཀྱིས་རལ་གྲི་གྲི་གུག་འཛིན། །དེ་ཡི་
གཡས་ཀྱི་ཕྱོགས་ཉིད་དུ། །དེ་བཞིན་མདུན་གྱི་ཕྱོགས་ཉིད་དམ། །སྤྱན་དྲངས་བྱིན་བརླབས་ལྡན་པ་ལ། །ཨརྒྷྃ་སོགས་ཀྱིས་མཆོད་པ་བྱ། །ཨོཾ་ཨརྒྷྃ་པྲ་ཏཱིཙྪ་སྭཱ་ཧཱ། །ལག་གཡས་མཛུབ་མོ་མཐེ་བོང་དག །སྐམ་པ་ལྟ་བུར་རྣམ་བྱས་

90-1-129b

པས། །ཆུ་བླངས་བསྐྱོད་པས་དབུལ་བར་བྱ། །ཨོཾ་པཱ་ཏྱྃ་མཐར་ནི་སྔོན་གྱི་བརྗོད། །ཞབས་བཀྲུ་བ་ལ་ཤིས་པ་ཡིས། །དགང་གཟར་ཡུ་བ་སོར་བཅུ་དྲུག །དེ་མིན་སོར་བཞི་ཟབས་སོར་གཉིས། །ཟུར་གསུམ་དབུས་སུ་སོར་གཉིས་
ཚད། །རྩེ་གསུམ་ཕྲེང་བས་ཡོངས་སུ་བསྐོར། །དེ་ཡི་དབུས་སུའང་མཚན་མ་སྟེ། །སྟག་སྦྲུལ་གང་འདོད་པས་མཚན་བྱ། །ཁུ་བཅུད་འཛག་པ་སོར་གཅིག་གོ། ཁྲོ་བོ་རྡོ་རྗེ་མཆུ་ཡི་དབྱིབས། །བྱིན་བརླབས་སོར་གཅིག་ཚད་ཅན་ནོ། །
བླུགས་གཟར་ཡུ་བ་སོར་བཅུ་བཞི། །ཟབས་སུ་སོར་གཅིག་གྲུ་གསུམ་དང་། །ཡུ་བའི་མཐར་ནི་རྩེ་གསུམ་པ། །གདེངས་པ་བྱིན་བརླབས་མངོན་སྤྱོད་ཀྱི། །གཟར་བུ་ཡིན་པར་ང་ཡིས་བསྟན། །གནམ་ལྕགས་ཚེར་མ་ཅན་སོགས་ཤིང་། །
དེ་ལ་དེ་བྱས་སངས་རྒྱས་འཇིགས། །བསྲེག་རྫས་གཟུགས་བརྙན་ལ་སོགས་བསྲེག །སྟོང་དུ་ཚང་པས་འབྲས་བུ་ནི། །ངེས་པར་འབྱིན་པར་བྱེད་མ་ཡིན། །གཡོན་གྱི་རྩ་དེར་དགང་གཟར་ལ། །གཡས་པ་བླུགས་པའི་གཟར་བུ་ཡིན། །
ཁ་ནི་པད་མའི་འདབ་མ་ཡིན། །སོར་མོ་གཉིས་པར་དེ་རྒྱས་སོ། །རྡོ་རྗེ་བར་གྱི་ཐོད་པ་དག །བསྲེག་རྫས་ཀྱི་ནི་སྣོད་ཡིན་ལ། །རྫས་རྣམས་རྡོ་རྗེ་རིན་ཆེན་དཔལ། །ཧཱུྃ་ཕཊ་ཀྱི་ནི་མཐའ་ཅན་གྱིས། །བསྲེག་བྱ་ས་ཆུ་མེ་དང་རླུང་། །
ནམ་མཁའ་ལྟ་བུའི་དབུས་སུ་གནས། །ཁ་བྱེ་གནས་པ་རྟག་ཏུའོ། །ཀུན་ཏུའང་ཁ་ཕྱེ་བསྐོར་བར་བྱ། །བཞི་གཉིས་འདབ་མའི་སྟེང་དུ་སྟེ། །ལྟེ་བ་དང་ནི་ཡང་དག་ལྡན། །ལྷན་ཅིག་རྣམ་པར་ཤེས་པའི་ལྷ། །ནམ་མཁའ་ཉིད་དུ་
ངེས་པར་འབར། །དེ་ཡི་མཚན་མར་ཤེས་བྱ་བ། །རྡུལ་གྱི་རྣམ་པར་དེ་ཉིད་དོ། །ཐིག་ལེ་ཡི་གེ་མེད་པ་སྟེ། །རྒྱུན་མི་འཆད་པར་འོད་ཀྱིས་གནས། །བརྒྱར་གཤགས་སྐྲ་ཡི་ཚད་ཀྱིས་སོ། །ཨརྒྷས་རབ་ཏུ་སྦར་བར་བྱ། །
སྔར་གསུངས་འབྱུང་བ་རྣམ་བཞི་དང་། །ནམ་མཁར་ཡང་དག་ལྡན་པ་ཡི། །སོར་མོ་ལྔ་དང་ངེས་ལྡན་པས། །གང་གི་སྦྱིན་སྲེག་དེས་བྱའོ། །གཞན་དག་སོར་མོ་གསུམ་གྱིས་བསྲེག །དམིགས་པ་ཐམས་ཅད་འགག་པར་འགྱུར། །

90-1-130a

རྟེན་མེད་སྟོང་པ་ནམ་མཁའ་འདྲ། །ཤེས་རབ་ཕ་རོལ་ཕྱིན་པ་ཡི། །ཕྱག་རྒྱ་ཆེན་པོ་དབང་དུ་འགྱུར། །བདེ་གཤེགས་ཀུན་དང་མཉམ་འགྱུར་བ། །ཤེས་རབ་དང་ནི་སྙིང་རྗེ་ཆེས། །འགག་པ་མེད་པའི་ཆོས་འགྱུར་རོ། །
བདེ་ཆེན་ནམ་མཁའ་ལྟ་བུ་སྟེ། །རྣལ་འབྱོར་པ་ཡི་དམིགས་པ་ཡིན། །མདོག་ནག་འདབ་བརྒྱད་ལྟ་བུ་ལ། །རྒྱ་དང་ཟབས་སུ་སོར་མོ་ནི། །ཉི་ཤུ་དེ་བཞིན་བཅུ་པའི་ཐབ། །བྱང་དུ་རྩེ་མོ་བསྟན་པ་ལ། །རྡོ་རྗེ་ཐོ་བའི་མཚན་
མ་དེ། །སོར་ནི་བཞི་པར་བྲི་བར་བྱ། །དེ་སྟེང་སོར་མོ་གསུམ་བོར་བར། །ཁ་ཁྱེར་ཀྱང་ནི་དེ་ཡི་ཚད། །ས་ནག་བོང་བུ་རྔ་མོའི་སྦངས། །མི་རུས་འབྲས་ཀྱི་ཕུབ་མ་དང་། །སོལ་བའི་ཕྱེ་མས་རྣམ་བྱུགས་ལ། །མི་ཞིམ་དྲི་དང་བདུག་
པས་མཆོད། །དུར་ཁྲོད་ཤིང་ངམ་བོང་བུ་དང་། །རྔ་མོའི་སྦངས་སྐམ་བུད་ཤིང་ངོ་། །སོར་གཅིག་གིས་ནི་དམའ་བ་ཡིན། །ནིམ་པ་དེ་བཞིན་སེང་ལྡེང་དང་། །སེ་བ་དེ་བཞིན་བསེ་ཤིང་དང་། །དུར་ཁྲོད་ཤིང་བུ་སོར་བཅུ་པ། །
རྩ་བའི་ཆ་ལས་རྣམ་བྱུང་བ། །དུར་ཁྲོད་མར་ཁུ་རྣམས་བསྙུགས་ལ། །དེ་ཡིས་ཡམ་ཤིང་བྱ་བ་ཡིན། །བྱ་རོག་འུག་པའི་གཤོག་པ་དང་། །ནིམ་པའི་འདབ་མ་ཐལ་བ་དང་། །རྐང་རྗེས་ས་དང་བོང་བུ་དང་། །རྔ་མོ་སོགས་ཀྱི་
སྦངས་དང་ནི། །སྐྲ་དང་ཞག་དང་བཤང་བ་དང་། །གཅི་བ་མི་རུས་ཡུངས་ཀར་དང་། །ཡུངས་མར་ངག་དང་ལན་ཚྭ་དང་། །དེ་ལ་སོགས་པ་རེ་རེ་ཞིང་། །ཇི་ལྟར་རྙེད་པའི་རྫས་རྣམས་ནི། །དུག་དང་ཁྲག་དང་སྨྱོ་བྱེད་ཀྱི། །
འདབ་ཁུང་ཐལ་བ་སོལ་བ་དང་། །འབྲས་ཀྱི་ཕུབ་མ་ལ་སོགས་ལ། །དགྲ་བོ་དག་གི་གཟུགས་བྱས་ལ། །མགོ་ནས་བརྩམས་ཏེ་རལ་གྲི་ཡིས། །དུམ་བུར་གཏུབ་ཅིང་ལྕགས་ཕོར་དུ། །ཁྲག་དང་ཆུ་དང་མི་རྣམས་དང་། །བོང་བུའི་
གཅིན་ལ་ཕཊ་ལྡན་པའི། །གདུག་པའི་ཡི་གེ་རྣམས་བཟླས་པའི། །རྫས་ལ་བསང་གཏོར་བྱས་ནས་ཀྱང་། །སློབ་དཔོན་ལ་སྡང་རྨོངས་པ་འདི། །བརྗོད་ཅིང་སྦྱིན་སྲེག་དབུལ་བར་བྱ། །དེ་ལ་འདི་སྐད་ཅེས་བྱ་སྟེ། །འབྱུང་

90-1-130b

པོ་ཚིམ་བྱ་གཏོར་མ་དང་། །བསྟོད་བཟླས་མཉེས་པར་བྱ་བ་དང་། །དབང་གི་དབྱེ་བ་བསྟན་པ་དང་། །དཀྱིལ་འཁོར་འཇུག་པར་བྱ་བ་དང་། །དེ་ཡི་ས་ལ་མཆོད་པ་སོགས། །ཅོད་པན་དུ་ནི་བདེ་གཤེགས་གཞག །མངོན་སྤྱོད་
ཧོམ་གྱི་ཆོ་ག་དང་། །བསྡུས་ནས་བར་དུ་རྣམ་པ་བརྒྱད། །པད་མ་དཀར་འདྲ་མགྲིན་པ་རིང་། །གཟུགས་མཛེས་ཧ་ཅང་རིང་བ་མིན། །ལུས་ལ་རྡུལ་བྱུང་ཡིད་འཕྲོག་མ། །དྲི་ནི་ཤིན་ཏུའང་ཞིམ་པ་ཡིན། །ལྟ་སྟངས་མིག་སོགས་
རི་དག་འདྲ། །མགྲིན་དང་ལྟོ་བའང་རི་དགས་ཀྱི། །སྐལ་བཟང་རྐར་པའང་རི་དགས་ཀྱི། །གླང་ཆེན་དྲི་ལྡན་བཞིན་འཕེལ་ཆེ། །མྱོས་ཤིང་ནུ་མ་རབ་ཏུ་རྒྱས། །གཞན་ཡང་ཀུན་རྫོབ་བདེན་པ་ནི། །བོང་ཐུང་དེ་ཡི་
སྐྲ་ཡང་ཐུང་། །རྐང་ལག་རིང་ཞིང་བཞིན་རིང་མ། །ཉ་ཡི་དྲི་བྲོ་བོང་རིང་མ། །ཟླ་འདྲ་སྐྱེ་གནས་རབ་ཏུ་རིང་། །སྐྱེ་གནས་ཆུང་ཞིང་ཡན་ལག་རྩུབ། །བོང་རིང་དེ་བཞིན་ནུ་མ་མཁྲང་། །སྐྲ་སྲབ་དལ་སྨྲ་ཡན་ལག་ཆུང་། །
སྔོ་བསངས་རི་མོ་མཉམ་པ་དེ། །གསང་བ་ཤེས་རབ་རྣམ་གཉིས་ལ། །རིག་མར་ང་ཡིས་བསྒྲགས་པ་ཡིན། །ངང་པའི་འགྲོས་ཅན་སྐྲ་འཁྱིལ་མ། །བཞིན་ཟླུམ་ནུ་རྒྱས་ལུས་ཀྱང་རྒྱས། །ཤིན་ཏུ་རིང་མིན་དལ་བར་
སྨྲ། །དབུས་ནས་རྣ་འཕྱང་གཉེར་གསུམ་ཅན། །མཚན་ཉིད་ངན་ཞིང་ལེ་ལོ་ཆེ། །ཡན་ལག་ནག་ཅིང་སྐྲ་འཁྱིལ་མ། །ཁང་པར་གནས་ཤིང་ལུས་རྩུབ་མ། །ས་ལིའི་དྲི་འབྱུང་ས་ལི་བྲོ། །ནུ་ཡངས་དེ་ནི་སྐྱེས་བུ་བཞིན། །
ཆང་གིས་མྱོས་པའི་དཔའ་མོ་སྟེ། །ཆང་ལ་ཤིན་དུ་ཆགས་པ་ཡིན། །དེ་གཉིས་དེ་ལ་ཤིས་པ་ཡིན། །ཐ་མ་ཐ་མར་ངེས་པར་ཡིན། །འཆི་བའི་བསམ་གཏན་དེ་ཉིད་ནི། །བདེ་བ་དམ་པ་ཁོ་བོས་འདོད། །འདི་ལའང་བདེ་བ་དེ་ཉིད་
ཡིན། །ཀ་སོགས་སྤངས་པའི་ཨཱ་ལི་ནི། །བཅུ་དྲུག་ཡིན་ཏེ་ཕྲག་གཉིས་པོ། །འཁོར་ལོ་སོགས་པའི་ས་བོན་ཡིན། །ཟླ་བ་དེ་དག་སུམ་ཅུ་གཉིས། །ཨ་སོགས་སྤངས་པའི་ཀཱ་ལི་སྟེ། །བཅུ་བདུན་གཉིས་པ་དེ་སྟེང་དུ། །

90-1-131a

ཡ་སོགས་སྤངས་པ་མིན་པ་ཉིད། །གསུམ་པའི་གསུམ་དང་བཞི་པའི་གཉིས། །བཅུ་ཕྲག་བཞི་སྟེ་དེ་ཕྲག་གཉིས། །སེན་མོ་ཟངས་སོགས་ས་བོན་ཏེ། །ཉི་མར་རྣམ་བསྒྲགས་དེ་དབུས་གནས། །ཧཱུྃ་དང་ཨ་ཡི་རང་བཞིན་ལས། །
རྡོ་རྗེ་ཐོ་སོགས་སོ་སོར་རྟོག །ཐིམ་པས་ནན་ཏན་ཡེ་ཤེས་ཏེ། །ཆོས་ཀྱི་དབྱིངས་ཉིད་དག་པ་སྟེ། །གཤིན་དགྲར་བདག་ཉིད་འདོད་པ་ཡིན། །རྒྱན་གྱི་བྱེ་བྲག་ལུས་ལ་གནས། །དེ་ནི་འདི་སྐད་བྱ་བ་སྟེ། །རིག་པ་ཤེས་རབ་བསྟན་
པ་དང་། །བསྐྱེད་པའི་རྒྱུ་ཡི་བྱེ་བྲག་ནི། །ཐ་མར་བསྟན་ཏེ་སྡོམ་གསུམ་མོ། །མཚོན་པར་བྱེད་པའི་བདག་ཉིད་དེ། །མཚོན་བྱ་སྔོན་བསྟན་ཉིད་ཡིན་ནོ། །གཤིན་རྗེའི་གཤེད་ནག་པོའི་ལས་ཐམས་ཅད་གྲུབ་པར་བྱེད་པའི་འཁོར་
ལོའི་རྒྱུད་ཀྱི་རྒྱལ་པོ། རྫོགས་སྷོ།། །།པཎྜི་ཏ་བཱ་རོ་ཕྱག་རྡུམ་གྱི་ཞལ་སྔ་ནས། རྭ་རྡོ་རྗེ་གྲགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། ། 
༄༅། །རྒྱ་གར་སྐད་དུ།  ཤྲཱི་བཛྲ་མ་ཧཱ་བྷཻ་ར་བ་ནཱ་མ་ཏན་ཏྲ།  བོད་སྐད་དུ།  དཔལ་རྡོ་རྗེ་འཇིགས་བྱེད་ཆེན་པོའི་རྒྱུད་ཅེས་བྱ་བ། དཔལ་རྡོ་རྗེ་འཇིགས་བྱེད་ཆེན་པོ་ཁྲོས་པའི་རྒྱལ་པོ་ལ་ཕྱག་འཚལ་ལོ། །དེ་ནས་རྡོ་རྗེ་འཇིགས་བྱེད་ཀྱི། །
བསྒྲུབ་པ་ཡང་དག་རབ་བཤད་དེ། །དེ་ནི་ལྷ་རྣམས་ཐམས་ཅད་ལ། །དྲག་ཤུལ་ཆེ་ཞིང་འཇིགས་པར་བྱེད། །དེ་ལ་ཐོག་མར་སྔགས་པས་ཡིད་དུ་འོང་བའི་གནས་གང་ཡང་རུང་བར་གནས་ལ་དགོས་པ་ཐམས་ཅད་བསྒྲུབ་
པར་བྱའོ། །དེ་ལ་གནས་གསུངས་པ་ནི། དུར་ཁྲོད་དམ། ཆུ་ཀླུང་གི་འགྲམ་མམ། ཤིང་གཅིག་གམ། མཚན་མ་གཅིག་པའམ། བཞི་མདོའམ། རིའི་རྩེ་མོའམ། ཁང་སྟོང་ངམ། མ་མོའི་ཁྱིམ་མམ། ལྷའི་ཁང་པའམ། 
འཐབ་མོའི་གནས་སམ། གྲོང་ཁྱེར་རམ། ནགས་ཁྲོད་དམ། གྲོང་བར་ལ་སོགས་པའི་གནས་སུ་སྔགས་པ་གནས་ཏེ། དཔལ་རྡོ་རྗེ་འཇིགས་བྱེད་ཆེན་པོའི་དབང་བསྐུར་བའི་རྣལ་འབྱོར་པས་དབང་དང་དགུག་པ་དང་གསད་པ་དང་། 

90-1-131b

བསྐྲད་པ་དང་དབྱེ་བ་དང་རེངས་པ་དང་། བ་རལ་གྲི་དང་མིག་སྨན་དང་ས་འོག་དང་། རིལ་བུ་དང་གསེར་འགྱུར་དང་བཅུད་ཀྱིས་ལེན་པ་དང་། ནོར་དང་འབྱུང་པོ་དང་རོ་ལངས་དང་ཤ་ཟ་དང་གནོད་སྦྱིན་དང་གནོད་སྦྱིན་མོ་དང་ཀླུ་ལ་སོགས་
པ་ཆོ་ག་འདིས་བསྒྲུབ་པར་བྱའོ། །དེ་ལ་ཆོ་ག་ནི་དང་པོར་རེ་ཤིག་སྔགས་པས་རོའི་ཐལ་ཆེན་གྱིས་ལུས་བྱུགས་ཏེ། མཚན་ཕྱེད་ན་གཅེར་བུ་སྐྲ་བསིལ་བུ་བྱས་ལ་འཕགས་པ་མ་ཧེའི་གདོང་ཅན་གྱི་རྣལ་འབྱོར་གྱིས་དུར་ཁྲོད་ལ་སོགས་
པར་དཀྱིལ་འཁོར་བྲིས་ཏེ། གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །དྲིལ་བུ་དར་གྱི་འཕན་ལ་སོགས། །མེ་ཏོག་ཕྲེང་བས་རྣམ་པར་ཀླུབ། །གྲྭ་རྣམས་དག་ནི་ཐམས་ཅད་དང་། །སྒོ་གྱུད་ཀྱི་ནི་
མཚམས་རྣམས་སུ། །རྡོ་རྗེ་རིན་ཆེན་གྱིས་སྤྲས་པའི། །ཟླ་བ་ཕྱེད་པ་དེ་བཞིན་ནོ། །དེ་དབུས་འཁོར་ལོ་བྲི་བ་ནི། །རེའུ་མིག་དགུ་པ་ཟླུམ་པོའོ། །སྒོ་གཅིག་པ་ནི་དབྱེ་བར་བྱ། །ལྷག་མ་ཡོངས་སུ་གཅད་པར་བྱ། །དེ་དབུས་མི་རོ་བྲི་
བར་བྱ། །ཤར་དུ་མགོ་བོ་ལྷོར་ལག་པ། །ནུབ་ཏུ་རྒྱུ་མ་བྱང་དུ་རྐང་པ། ཤར་ལྷོའི་གྲྭར་ཐོད་པ། ལྷོ་ནུབ་ཏུ་ཐོད་ཚལ། ནུབ་བྱང་དུ་དུར་ཁྲོད་ཀྱི་རས། བྱང་ཤར་དུ་སྐྱེས་བུ་གསལ་ཤིང་ལ་བཙུགས་པའོ། །དེ་དག་ནི་འཁོར་ལོའི་དབུས་
སུ་མཚན་མའི་ཕྱག་རྒྱའོ། །དེ་ནས་འཁོར་ལོའི་ཕྱི་རོལ་གྱི་ཕྱག་རྒྱ་རྣམས་ནི་ཤར་ཕྱོགས་ཀྱི་སྣམ་བུ་ལ་གྲི་གུག་དང་། མཚོན་རྩེ་གཅིག་པ་དང་། གཏུན་ཤིང་དང་། ཆུ་གྲི་དང་། རྡོ་རྗེ་རྩེ་གཅིག་པ་དང་། ལྕགས་ཀྱུ་ལ་སོགས་པ་
རྣམས་བྲིའོ། །ལྷོ་ཕྱོགས་ཀྱི་སྣམ་བུ་ལ་སྟ་རེ་དང་། མདའ་དང་། ཁ་ཊྭཱཾ་ག་དང་། དབྱིག་ཐོ་དང་། འཁོར་ལོ་དང་། རྡོ་རྗེ་ཞགས་པ་ལ་སོགས་པ་བྲིའོ། །ནུབ་ཕྱོགས་ཀྱི་སྣམ་བུ་ལ་རྡོ་རྗེ་དང་། རྡེའུ་ཆུང་དང་། ཕུབ་དང་། གཞུ་དང་། དྲིལ་བུ་དང་། 
རླུང་གི་རས་ལ་སོགས་པ་བྲིའོ། །བྱང་ཕྱོགས་ཀྱི་སྣམ་བུ་ལ་བསྡིགས་མཛུབ་དང་། འཕན་རྩེ་གསུམ་པ་དང་། གླང་པོའི་པགས་པ་དང་། རྡོ་རྗེ་ཐོ་བ་དང་། མདུང་དང་། མེ་ཐབ་ལ་སོགས་པ་བྲིའོ། །སྒོ་བཞི་དང་གྲྭ་རྣམས་ལ་རོ་ལངས་ཆེན་

90-1-132a

པོ་བྲིའོ། །གལ་ཏེ་མཆོག་གི་དངོས་གྲུབ་འདོད་ན་མར་ཁུ་ཆེན་པོའི་མར་མེ་དབུལ་ལོ། །མི་དང་། བོང་བུ་དང་། རྔ་མོ་དང་། ཁྱི་དང་། ཝ་དང་། མ་ཧེ་དང་། གླང་པོ་ཆེ་དང་། བ་ལང་དང་། བ་མེན་དང་། ལུག་དང་། རི་དགས་དང་། ཕག་པ་ལ་སོགས་
པའི་ཤ་རྣམས་དབུལ་བར་བྱའོ། །གཞན་ཡང་བྱ་རྒོད་དང་། འུག་པ་དང་། བྱ་རོག་དང་། ཁྲ་དང་། ཆུ་སྐྱར་དང་། མཐིང་རིལ་དང་། བཞད་དང་། རྨ་བྱ་དང་། ཁྱིམ་བྱ་དང་། རི་སྐྱེགས་དང་། ལྟས་ནང་ཆེན་པོ་ལ་སོགས་པའི་ཤ་རྣམས་དབུལ་བར་
བྱའོ། །ཤིན་ཏུ་མཉམ་པར་གཞག་པས་བཟའ་བ་དང་། སྟོན་མོ་དང་། སྦྱིན་སྲེག་དང་། གཏོར་མའི་ལས་བྱའོ། །དཀྱིལ་འཁོར་གྱི་གྲྭ་ཐམས་ཅད་དུ་ཁྲག་གིས་ཆག་ཆག་བྱའོ། །དཔལ་རྡོ་རྗེ་འཇིགས་བྱེད་མ་ཧེའི་གདོང་གི་སྦྱོར་བ་ལ་
གནས་པས་ལྷ་བཤོས་ཐམས་ཅད་དབུལ་བར་བྱའོ། །དེ་ནས་སྔགས་པས་སྔོན་དུ་སྤྱད་པ་བྱས་ཏེ། བདག་ཞི་བར་གྱུར་པའི་ཤིན་ཏུ་མཐུན་པའི་གྲོགས་སམ། བདག་གཅིག་པུ་རྣམ་པར་སྣང་མཛད་ཀྱིས་ལུས་བྱུགས་ཏེ་གཅེར་བུར་ཕུད་
ནས་སྐྲ་བསིལ། མཚན་ཕྱེད་ནས་ཅང་ཏེའུ་དཀྲོལ་ལ་ཧ་ཧ་ཞེས་བྱ་ཞིང་མཉམ་པར་གཞག་སྟེ། རྡོ་རྗེ་འཇིགས་བྱེད་ཆེན་པོའི་དཀྱིལ་འཁོར་དུ་དངོས་གྲུབ་འདོད་པས་འཇུག་པར་བྱའོ། །རབ་ཏུ་ཞིམ་པའི་ཆང་ལ་སོགས་པ་བཏུང་བ་དང་། 
བཟའ་བའི་རོ་རྣམས་དབུལ་ལོ་ཕྱི་ནས་དངོས་གྲུབ་དང་། དངོས་གྲུབ་མ་ཡིན་པ་ལ་དམིགས་ལ་དེའི་སྟེང་དུ་དཔལ་རྡོ་རྗེ་འཇིགས་བྱེད་ཆེན་པོ་མ་ཧེའི་གདོང་ཅན་བསམ་པར་བྱའོ། །དེའི་མདུན་དུ་གཡས་བསྐུམ་དུ་གནས་ལ་ང་རྒྱལ་
དང་བཅས་པས་སེམས་རྩེ་གཅིག་ཏུ་ཤིན་དུ་མཉམ་པར་བཞག་པས་ཡི་གེ་བཅུ་པའི་སྔགས་བཟླ་བར་བྱའོ། །དེ་ནས་འཇིགས་པ་ཆེན་པོ་བྱུང་ན། དེ་ལ་སྔགས་པས་འཇིགས་པར་མི་བྱ་སྟེ། གལ་ཏེ་འཇིགས་པར་གྱུར་ན། 
དེ་ལ་བགེགས་ཆེན་པོའི་བར་ཆོད་འབྱུང་ངོ་། །བར་ཆད་བྱུང་ན་དངོས་གྲུབ་མི་འགྲུབ་བོ། །དེ་བས་ན་སྔགས་པས་འཇིགས་པར་མི་བྱ་སྟེ། དེ་ལ་དཔལ་རྡོ་རྗེ་འཇིགས་བྱེད་ཆེན་པོ་དགྱེས་སོ། །དགྱེས་ནས་ཁྱོད་ཅི་འདོད་ཅེས་

90-1-132b

གསུང་བ་དང་། དེ་ལ་རིག་འཛིན་གྱིས་སྨྲ་བར་བྱ་སྟེ། རལ་གྲི་དང་། ས་འོག་དང་། མིག་སྨན་དང་། གསེར་འགྱུར་དང་། བཅུད་ཀྱིས་ལེན་པའམ། དེ་ལས་གཞན་ཡང་ཡིད་ལ་འདོད་པའི་དངོས་གྲུབ་ངེས་པར་བདག་ལ་སྩོལ་ཅིག་ཅེས་
བརྗོད་ན། དེ་ལ་ཐེ་ཚོམ་མེད་པར་སྩོལ་ལོ། །བརྒྱ་ཞིག་ལ་སྔགས་པས་དེ་དག་མ་གྲུབ་ན་ཡང་དེའི་ཕྲ་མོའི་ལས་ཐམས་ཅད་ངེས་པར་འགྲུབ་བོ། འདི་ནི་འཇམ་དཔལ་ཞེས་བྱ་བའི་མིང་དཔལ་རྡོ་རྗེ་འཇིགས་བྱེད་ཆེན་པོའི་འཁོར་
ལོའི་རྣལ་འབྱོར་རྒྱུད་ལས། དཀྱིལ་འཁོར་བསྟན་པ་སྟེ་རྟོག་པ་དང་པོའོ།། །།  དེ་ནས་ལས་ཀྱི་ཚོགས་ཀྱི་ཆོ་ག་རབ་ཏུ་བཤད་དེ་རིམ་པ་ཇི་ལྟ་བ་བཞིན་དུ། བསད་པ་དང་། བསྐྲད་པ་ལ་སོགས་པ་སྔགས་པ་ཁྲོས་པས་དཔལ་རྡོ་རྗེ་འཇིགས་
བྱེད་ཆེན་པོའི་སྦྱོར་བ་ལ་གནས་པས་བྱ་སྟེ། དང་པོར་རེ་ཤིག་སྔགས་པས་གསད་པར་བྱ་སྟེ། དེ་ཅིའི་ཕྱིར་ཞེ་ན། རྣལ་འབྱོར་གཙོ་བོ་ཡིན་པའི་ཕྱིར་རོ། །རྣལ་འབྱོར་གྱི་རྒྱུད་ལ་ལྷའི་སྦྱོར་བ་དང་ལྡན་པས་ཐོག་མར་ནི་དེ་བྱ་སྟེ། དེ་སྦྱོར་
བའི་གཙོ་བོ་ཡིན་པའི་ཕྱིར་རོ། །དེ་ལ་འདིའི་ལས་ནི་ཇི་ལྟར་གསད་པར་འདོད་པའི་སྔགས་པས་དུར་ཁྲོད་ཀྱི་རས་ལ། དུག་དང་ཁྲག་དང་ལན་ཚྭ་དང་། སྐྱེ་ཚེ་དང་། ནིམ་པ་དང་། དྷ་དུ་རའི་ཁུ་བ་ཡིས་རྡོ་རྗེ་འཇིགས་བྱེད་ཆེན་པོའི་འཁོར་ལོ་ལེ་ཚེ་
བཅུ་དྲུག་པ་བྱ་རོག་ཆེན་པོའི་སྒྲོ་རྩའི་སྨྱུ་གུའམ། མིའི་རུས་པའི་སྨྱུ་གུས་གཅེར་བུ་སྐྲ་བཤིག་པས་ཁ་ལྷོར་བལྟས་ཏེ། མ་ཧེའི་གདོང་གི་སྦྱོར་བས་བྲི་བར་བྱའོ། །མེ་གཉིས་ཀྱི་དབུས་སུ་བསྒྲུབ་བྱའི་མིང་དང་བཅས་པར་གཞག་ལ་དེ་ཡི་གེ་
བཅུ་པས་བསྐོར་ཞིང་ཧཱུྃ་བརྒྱད་བྲི། ཟུར་རྣམས་སུ་ཕཊ་ཀྱི་ཡི་གེ་རྣམས་བྲི། བདག་ཉིད་ཚ་བའི་མར་གྱིས་ལུས་བྱུགས་ལ། ཐོད་པ་གཉིས་ཀྱི་དབུས་སུ་འཁྲུལ་འཁོར་རབ་ཏུ་བཅུག་ལ་སྒྱེད་པུ་གསུམ་གྱི་སྟེང་དུ་གཞག་ནས་དུར་ཁྲོད་ཀྱི་མགལ་
བས་མེ་རབ་ཏུ་སྦར་ཏེ། རྐང་པ་གཡོན་པས་མནན་ལ་ཡི་གེ་བཅུ་པའི་སྔགས་བཟླས་སོ། །དེ་ཡིས་སྐད་ཅིག་གིས་ཐེ་ཚོམ་མེད་པར་འཆིའོ། །གཞན་ཡང་རིམས་ཀྱིས་ཐེབས་པར་འདོད་ན་འཁོར་ལོ་དེ་ཉིད་མིའི་ཉ་ཕྱིས་གཉིས་ཀྱི་

90-1-133a

དབུས་སུ་ལེགས་པར་བཞག་ལ་མེ་ཐབ་ཀྱི་འོག་ཏུ་ཁྲུ་ཕྱེད་བརྐོས་ལ་བཅུག་ནས་མེ་སྦར་ན་རིམས་ནད་ཀྱིས་འཛིན་ནོ། །དེ་ལ་ལེ་ཚེ་བཅུ་དྲུག་པའི་རབ་ཏུ་སྦྱོར་བ་འདི་གསུངས་ཏེ། འོན་ཀྱང་འདིའི་ཁྱད་པར་ནི་ཡི་གེ་སུམ་
བཅུ་རྩ་གཉིས་པའི་སྔགས་དང་ལྡན་པ་ཡི་གེ་བཅུ་པའི་སྔགས་བསྒྲུབ་བྱའི་མིང་དང་ལྷན་ཅིག་ཏུ་ཡི་གེ་དང་སྔགས་སྤེལ་ལོ། །སྔོན་དུ་གསུངས་པའི་རྫས་དང་ལྷན་ཅིག་ཏུ་བྱ་རོག་གིས་བཏོགས་པའི་ལྷག་མ་མི་གཙང་བ་དང་། 
རྣམ་པར་སྣང་མཛད་དང་ལྷན་ཅིག་ཏུ་དུར་ཁྲོད་ཀྱི་རས་ལ་བྱུགས་ཏེ། དེ་ལ་སྔོན་དུ་གསུངས་པའི་ཆོ་གས་འཁོར་ལོ་བྲིས་ཏེ། དུར་ཁྲོད་དུ་སྦས་ན་འཆི་བར་འགྱུར་རོ། །ཤིང་གཅིག་གི་དྲུང་དུ་སྦས་ན་བསྐྲད་པར་འགྱུར་རོ། །མཚན་
མ་གཅིག་པར་སྦས་ན་དབྱེ་བར་འགྱུར་རོ། །ཆུའི་ནང་དུ་སྦས་ན་རེངས་པར་འགྱུར་རོ། །ཁྱིམ་དུ་གཞག་ན་ཞི་བར་འགྱུར་རོ། །ཕྱུང་ནས་ལེགས་པར་བཀྲུས་ན་གྲོལ་བར་འགྱུར་རོ། །གཞན་ཡང་རབ་ཏུ་སྦྱོར་བ་གསུངས་པ་གཤིན་
རྗེའི་འཁོར་ལོ་སྔོན་གྱི་ཆོ་གས་དུར་ཁྲོད་ཀྱི་རས་ལ་བྲིས་ཏེ། དུར་ཁྲོད་དམ། ལམ་བཞི་མདོ་དང་། ཤིང་གཅིག་དང་། གྲོག་མཁར་དང་། ཆུ་འགྲམ་དང་། མཚན་མ་གཅིག་པ་དང་། རྒྱལ་པོའི་སྒོ་དང་། རྣམ་པར་སྣང་མཛད་དང་། རྡོ་རྗེ་
ཆུ་དང་། དུར་ཁྲོད་ཀྱི་སོལ་བས་བསྒྲུབ་བྱའི་གཟུགས་སོར་བརྒྱད་པ་བྱས་ལ་དེའི་སྙིང་གར་འཁོར་ལོའི་སྔགས་བཅུག་སྟེ། མིའི་རུས་པའི་ཕུར་བུས་གནས་ལྔར་གདབ་པར་བྱའོ། །ཚིགས་ཐམས་ཅད་ལ་ཚེར་མ་རྣོན་པོས་དགང་བར་
བྱའོ། །དེ་ཐོད་པ་གཉིས་ཀྱི་དབུས་སུ་བཅུག་སྟེ། དེ་གྲོག་མཁར་དང་གནས་བདུན་གྱི་སས་གཤིན་རྗེའི་གཟུགས་ཁྲུ་གང་ཙམ་ཞལ་གཙིགས་པ། གསུས་པ་ཆེ་བ། ཞལ་གཅིག་པ། ཕྱག་གཉིས་པ། ཕྱག་ན་རལ་གྲི་དང་ཞགས་པ་འཛིན་
པ། གཅེར་བུ་སྐྲ་བསིལ་བ་བྱས་ལ། དེའི་སྙིང་གར་ཐོད་པ་གཉིས་བཅུག་སྟེ། ཉི་མ་ཕྱེད་དམ་ནམ་ཕྱེད་ན་དུར་ཁྲོད་དམ། རོ་བསྲེགས་པའི་སར་སྦས་ཏེ། ཤིན་དུ་རིང་བར་མགོ་ལྷོར་བསྟན་ལ། ཁ་ཐུར་དུ་ཕུབ་ལ་སྦའོ། །ཁྱིམ་དུ་འོང་པ་

90-1-133b

དང་མཉམ་པར་གཞག་པས་མ་ཧེའི་གདོང་གི་སྦྱོར་བས་བསྒྲུབ་བྱའི་མིང་དང་བཅས་པ་ཡི་གེ་བཅུ་པའི་སྔགས་བཟླས་པ་བྱས་ན་ཉི་མ་གསུམ་གྱིས་འཆིའོ། །ཕྱུང་ནས་བཀྲུས་ན་ཐར་བར་འགྱུར་རོ། །དེ་ནས་རེངས་པའི་རབ་ཏུ་
སྦྱོར་བ་གསུངས་ཏེ། རྟེའུ་ལོའི་པགས་པ་ལ་དུག་ལ་སོགས་པའི་རྫས་ཀྱིས་ཡི་གེ་བཅུ་པའི་སྔགས་བྲིས་ལ། པགས་པ་དེ་བསྒྲུབ་བྱའི་རྐང་རྗེས་ཀྱི་རྡུལ་དང་། གཅིན་བཏང་བའི་ཤུལ་གྱི་སས་བཀང་ལ་དེའི་སྐྲས་བཅིང་བར་བྱའོ། །
ཕྱི་ནས་བོང་བུའི་གཅིན་དང་། རྣམ་པར་སྣང་མཛད་དང་ལྷན་ཅིག་ཏུ་བརྫིས་ལ་ཁམ་ཕོར་དགང་བར་བྱའོ། །དེར་འཁོར་ལོ་བཅུག་ལ་རོ་བསྲེགས་པའི་མེ་ལ་གཞག་སྟེ། རྐང་པ་གཡོན་པས་མནན་ལ་གཤིན་རྗེའི་སྦྱོར་བས་ཡི་གེ་
བཅུ་པའི་སྔགས་བཟླས་པ་བྱས་ན་ཞག་གཅིག་གིས་རེངས་པར་བྱེད་དོ། །འདི་ནི་ཕྱིས་རྗེས་སུ་བཟུང་བ་མི་འགྲུབ་པའི་རབ་ཏུ་སྦྱོར་བའོ། །སྔགས་པ་ཤིན་ཏུ་ཁྲོས་པས་རབ་ཏུ་སྦྱོར་བ་བྱའོ། །གཞན་ཡང་དབྱེ་བའི་རབ་ཏུ་
སྦྱོར་བ་ནི་གཤིན་རྗེའི་འཁོར་ལོ་སྔོན་གྱི་ཆོ་གས་བྲིས་ལ། གནས་བདུན་གྱི་སས་མ་ཧེ་དང་རྟ་བྱས་ཏེ། དེ་གཉིས་གཅིག་གི་སྟེང་དུ་གཅིག་གཞག་ལ། དེ་གཉིས་ཀྱི་སྙིང་གར་འཁོར་ལོ་བཅུག་སྟེ། ནིམ་པའི་ཤིང་དྲུང་དུ་གཞག་གོ། འཁོར་
ལོ་ཡང་མ་ཧེ་དང་རྟའི་ཁྲག་གིས་བྲིས་ཏེ་འདི་ནི་སྔགས་ཀྱི་བྱེ་བྲག་སྟེ། ཤིན་དུ་མཉམ་པར་བཞག་པས་བྱས་ན་ཞག་གསུམ་གྱིས་འབྱེད་པར་བྱེད་དོ། །དེ་ནས་སྔགས་པས་བསྐྲད་པར་འདོད་ན་གནས་བདུན་གྱི་སས་རྔ་མོ་བྱས་ལ། དེ་ཡི་
རྒྱབ་ཏུ་ཡི་གེ་ཡྃ་ཡོངས་སུ་གྱུར་པ་ལས་རླུང་གི་དཀྱིལ་འཁོར་ཟླ་བ་ཕྱེད་པའི་རྣམ་པ་དམིགས་ཏེ། དེའི་སྟེང་དུ་བསྒྲུབ་བྱ་དམིགས་ལ། དེའི་རྒྱབ་ཏུ་གཤིན་རྗེའི་གཟུགས་ལག་པས་དབྱུག་པ་འཛིན་པར་དམིགས་ཏེ་དེའི་དབྱུག་པས་བརྡེག་
ཅིང་ཁ་ལྷོ་རུ་བལྟས་ནས་ཁྲིད་པར་རྣམ་པར་བསམ་པར་བྱའོ། །འཁོར་ལོ་དེ་དེའི་སྙིང་གར་གོང་དུ་གསུངས་པའི་ཆོ་གས་བསྒྲུབ་བྱའི་མིང་དང་སྤེལ་བ་ཡང་དག་པར་བྲིས་ལ་བཅུག་ན་ཞག་བདུན་གྱིས་ཐེ་ཚོམ་མེད་པར་སྐྲོད་པར་

90-1-134a

འགྱུར་རོ། །དེ་ནས་གཞན་ཡང་རབ་ཏུ་སྦྱོར་བ་གསུངས་ཏེ། ཉི་མའི་ཚེས་ལ་གཏུམ་པོ་ཚ་བའི་མར་ཁུས་བྱུགས་ལ་ནིམ་པའི་ཤིང་ལ་འཛེགས་ནས། དེར་གཞག་ལ་དེའི་ལུས་ཀྱི་མར་ཁུ་ཉ་ཕྱིས་ཀྱིས་བཞར་ལ་དེར་གནས་
པར་གཟུང་ངོ་། །མར་ཁུ་དེ་བླངས་ནས་ལྷ་ཆེན་པོའི་རྒྱལ་མཚན་གྱི་རས་བླངས་ལ་དེ་བསྲེགས་པའི་བར་གྱི་དུ་བའི་དྲེག་པ་དེ་དང་མར་ཁུ་དེ་གཅིག་ཏུ་བྱས་ལ་བསྐྲད་པར་འདོད་པ་དེའི་མཆིལ་ལྷམ་ལ་དེ་བསྐུའོ། །དེའི་ལག་པ་དང་རྐང་པ་གཉིས་
ལ་ཡང་བྱུགས་ན་སྐད་ཅིག་གིས་དེ་སྐྲོད་དོ། །དེ་ནས་གཞན་ཡང་རབ་ཏུ་སྦྱོར་བ་གསུངས་པ་ནི་དུར་ཁྲོད་ཀྱི་རས་སམ། གྲོ་གའི་ལོ་མ་ལ་རླུང་གི་དཀྱིལ་འཁོར་བྱ་རོག་གི་ཁྲག་དང་བྱ་རོག་གི་སྒྲོའི་སྨྱུ་གུས་བྲི་བར་བྱ་སྟེ། 
རླུང་གི་དཀྱིལ་འཁོར་གྱི་དབུས་སུ་བསྒྲུབ་བྱའི་མིང་དང་སྤེལ་ཏེ་གཏོར་མ་ཟ་བའི་མགྲིན་པར་བཅིངས་ལ། བྱ་རོག་བཟུང་ནས་མ་ཧེའི་གདོང་པའི་སྦྱོར་བར་གནས་པས་ཁ་ལྷོར་བལྟས་ལ་འཕང་སྟེ། དེའི་སྐད་ཅིག་གིས་བྱ་རོག་བཞིན་
ས་ཀུན་དུ་འཁོར་རོ། །གཞན་ཡང་བསྐྲད་པ་ནི་ཚ་བའི་མར་ཁུས་བསྐུས་ལ་ནིམ་པའི་ཤིང་ལས་གཏོར་མ་ཟ་བའི་ཚང་བླངས་ལ། ཚང་དེའི་ཤིང་ཕའི་ནགས་ཀྱི་ཤིང་མེས་བསྲེགས་པའི་ཐལ་བ་དེ་བླངས་ལ། གང་གི་མགོར་
བླུགས་པ་དེ་སྐྲོད་པར་འགྱུར་རོ། །གཞན་ཡང་དབྱེ་བའི་རབ་ཏུ་སྦྱོར་བ་ནི། བྱ་རོག་དང་འུག་པའི་གཤོག་པ་དང་། བྲམ་ཟེ་དང་གཏུམ་པོ་རྣམས་ཀྱི་སྐྲ་གཅིག་ཏུ་བྱས་ལ། དྷ་དུ་རའི་ཤིང་ལ་མེ་རབ་ཏུ་སྦར་ཏེ། དུ་བ་མེད་པའི་མེས་
བསྲེགས་ལ། དེའི་ཐལ་བ་བླངས་ལ་ཡི་གེ་བཅུ་པའི་སྔགས་བཟླས་ནས་བུད་མེད་དང་སྐྱེས་པ་གཉིས་ཀྱི་བར་དུ་ཐལ་བ་བཞག་ན། དེ་སྐད་ཅིག་གིས་འབྱེད་པར་བྱེད་དོ། །དེ་ནས་དུར་ཁྲོད་ཀྱི་རས་བླངས་ལ་དུག་ལ་སོགས་པའི་
རྫས་ཀྱིས་བྲན་པའི་བར་དུ་བསྒྲུབ་བྱའི་མིང་བྲིས་ལ་ཟེར་མོ་དང་སྦྲུལ་གྱི་སྤུ་དང་ལྤགས་པ་བླངས་ཏེ། དེ་ལ་བཅུག་ནས་སྡོང་བུ་བྱས་ཏེ། གང་གི་ཁྱིམ་དུ་སྦར་བ་དེར་ཕན་ཚུན་འཐབ་པར་འགྱུར་རོ། །དེ་ནས་གསད་པར་འདོད་པ་ནི་

90-1-134b

བཤང་གཅི་ལ་གཟུགས་བརྙན་བྱས་ལ། དེའི་སྟེང་དུ་རུས་པ་ཕྱེ་མས་རབ་ཏུ་བྱུགས་ལ། དུར་ཁྲོད་ཀྱི་མེ་ལ་སྐྲ་བཤིག་པ་བྱས་ལ། ཁ་ལྷོར་བལྟས་ཏེ་མ་ཧེའི་གདོང་པའི་སྦྱོར་བས་ནམ་ཕྱེད་ན་དེ་གཏུབས་ལ་བསྲེག་གོ། གང་གི་མིང་དང་བཅས་
པར་བྱས་ན་དེ་སྐད་ཅིག་གིས་འཆིའོ། །རྡོ་རྗེ་འཇིགས་བྱེད་ཆེན་པོ་ཉིད་ཀྱི་རབ་ཏུ་སྦྱོར་བ་འདི་གསུངས་སོ། །དེ་ནས་བསྐྲད་པར་འདོད་པས་རྒྱལ་མཚན་གྱི་རས་ལ་ལེང་ཚེ་བཅུ་དྲུག་པའི་འཁོར་ལོ་ལ་ཡི་གེ་བཅུ་པའི་སྔགས་སྔོན་དུ་
གསུངས་པའི་རྫས་དང་དུར་ཁྲོད་ཀྱི་སོལ་བས་གང་གི་མིང་དང་བཅས་པ་བྲིས་ཏེ། ནིམ་པའི་ཤིང་ལ་རྒྱལ་མཚན་བཞག་ན་དེ་སྐྲོད་པར་འགྱུར་རོ། །དེ་ནས་རེངས་པར་འདོད་པས་གཤིན་རྗེའི་འཁོར་ལོ་གཡམ་པའམ་རས་ལ་བ་བླ་དང་། 
ཡུང་བས་གང་གི་མིང་དང་བཅས་པ་ལེགས་པར་བྲིས་ལ་བཞག་ན། དེ་རེངས་པར་འགྱུར་རོ། །གལ་ཏེ་སྔགས་པས་དབང་དུ་བྱ་བར་འདོད་ན། གྲོག་མཁར་གྱི་ས་དང་གུར་ཀུམ་དང་། འགི་ཝང་དང་བ་བླ་དང་ཡུང་བ་རྣམས་ལྷན་ཅིག་ཏུ་བྱས་
ཏེ། བསྒྲུབ་བྱ་ཕོའམ། གལ་ཏེ་མོའི་གཟུགས་བརྙན་སོར་བཅུ་དྲུག་པ་བྱས་ལ། འགི་ཝང་དང་། སྲིན་ལག་གི་ཁྲག་གིས་གྲོ་ག་ལ་གཤིན་རྗེའི་འཁོར་ལོ་བྲིས་ཏེ། དེའི་སྙིང་གར་བཅུག་ནས་རང་གི་ཁྱིམ་དུ་བཞག་ལ། མེ་ཏོག་
དམར་པོ་དུས་གསུམ་དུ་དབུལ་བ་དང་། ཁ་ནུབ་ཏུ་བལྟས་ལ་ཡི་གེ་བཅུ་པའི་སྔགས་བཟླས་པ་བྱས་ན། ཞག་བདུན་གྱིས་བརྒྱ་བྱིན་ཡང་དབང་དུ་འགྱུར་ན་ཡང་ཕྲ་མོའི་མི་ལྟ་ཅི་སྨོས། དེ་ནས་ཡང་དགུག་པར་འདོད་ན་
དེ་ལ་ཐོད་པ་ལ་འཁོར་ལོ་འགི་ཝང་དང་སྲིན་ལག་གི་ཁྲག་གིས་བྲིས་ཏེ། སེང་ལྡེང་གི་མེ་ལ་བསྲོ་ཞིང་གང་བྱ་བའི་མིང་དང་བཅས་པར་བཟླས་ན། དེ་སྐད་ཅིག་གིས་རླུང་གི་ཤུགས་བཞིན་དུ་འགུགས་པར་འགྱུར་རོ། །དེ་ནས་སྔགས་
པས་སྨྱོ་བར་བྱ་བར་འདོད་ན་དྷ་དུ་རའི་འབྲས་བུ་བླངས་ལ། ཤ་ཆེན་དང་ལྷན་ཅིག་ཏུ་ཤིང་སྲིན་གྱིས་ཟོས་པའི་ཕྱེ་མ་དང་བསྲེས་ནས་བཟའ་བ་དང་བཏུང་བ་ལ་སྦྱིན་ནོ། །སྔགས་ཀྱང་བཟླས་པ་བྱ་སྟེ། དེ་སྐད་ཅིག་གིས་

90-1-135a

སྨྱོ་བར་འགྱུར་ཞིང་ཞག་བདུན་གྱིས་འཆིའོ། །དེ་ནས་གཞན་ཡང་རབ་ཏུ་སྦྱོར་བ་གསུངས་པ། གཤིན་རྗེའི་སྔགས་དུར་ཁྲོད་ཀྱི་རས་ལ་དུག་ལ་སོགས་པའི་རྫས་ཀྱིས་བྲིས་ཏེ། མར་མེ་ཆེན་པོ་དང་རྣམ་པར་སྣང་མཛད་ཀྱི་
གཟུགས་བརྙན་བྱས་ལ། དེའི་སྙིང་གར་འཁོར་ལོ་བཅུག་ནས་ཕའི་གནས་སུ་སོང་ལ་རོ་བསྲེགས་པའི་མེ་ལ་མཚོན་རྣོན་པོས་གཏུབས་ནས་རྣམ་པར་བརྩེགས་པའི་སྦྱོར་བས་རྣལ་འབྱོར་པ་གནས་པས། རྣམ་པར་སྣང་མཛད་
ཀྱིས་ལུས་བྱུགས་ཏེ། ཁ་ལྷོར་བལྟས་ནས་བསྲེགས་ན་དེ་མྱུར་དུ་འཆིའོ། །དེ་ནས་དཔྲལ་བའི་རབ་ཏུ་སྦྱོར་བ་འབྱུང་བ་ནི་བྱ་རོག་དང་། འུག་པའི་རུས་པ་བླངས་ལ་དེ་གཉིས་ལ་ལྕགས་ཀྱི་ཚེར་མས་བསྒྲུབ་བྱའི་མིང་དང་ལྷན་ཅིག་ཏུ་
ཡི་གེ་བཅུ་པའི་སྔགས་བྲིས་ལ། གཅིག་པུ་གནས་སུ་གནས་ཏེ། གང་གི་མིང་དང་བཅས་པར་བཟླས་ཤིང་། དེ་གཅིག་ལ་གཅིག་བྲུད་ན་འབྲལ་བར་འགྱུར་རོ། །དེ་ནས་གཤིན་རྗེའི་འཁོར་ལོ་གྲོ་གའི་འདབ་མ་ལ་བུད་མེད་དང་
སྐྱེས་པའི་མིང་བྲིས་ནས་སྦལ་པའི་གསུས་པར་བཅུག་ནས། གང་གི་མིང་དང་བཅས་པ་ཐེམ་པའི་འོག་ཏུ་སྦས་ན། དེའི་ཡན་ལག་མཚོན་གྱིས་འབུགས་པར་འགྱུར་རོ། །དེ་ནས་བུ་མོ་རེངས་པའི་རབ་ཏུ་སྦྱོར་བ་འདི། 
གཤིན་རྗེའི་སྔགས་དུར་ཁྲོད་ཀྱི་རས་ལ་དུག་ལ་སོགས་པས་བྲིས་ལ། རོ་བསྲེགས་པའི་སོལ་བས་གཟུགས་བརྙན་མཐོ་གང་ཙམ་གྱི་ཚད་བརྩིགས་ལ། དེའི་སྙིང་གར་འཁོར་ལོ་བཅུག་ནས་རྐང་པ་གཡོན་པས་མནན་ལ། མ་ཧེའི་
སྦྱོར་བས་ཆེ་གེ་མོའི་བུ་མོ་མྱུར་བར་རེངས་པར་གྱུར་ཅིག་ཅེས་ཡི་གེ་བཅུ་པའི་སྔགས་བཟླས་ན་རེངས་པར་འགྱུར་རོ། །འདིའི་ལས་རྣམས་ནི་གཞན་སུ་ལ་ཡང་སྨྲ་བར་མི་བྱའོ། །གལ་ཏེ་སྔགས་པ་རྨོངས་པའི་བདག་
ཉིད་ཅན་གྱིས་བྱེད་ན་དམྱལ་བར་ངེས་པར་ལྟུང་ངོ་། །དཀོན་མཆོག་གསུམ་ལ་གནོད་པར་བྱེད་པ་དང་། བླ་མ་ལ་བརྙས་པར་བྱེད་པ་དང་། དམ་ཚིག་དང་བྲལ་བ་དང་། སྔགས་དང་བྲལ་བ་དང་། སྔགས་དང་རྒྱུད་ལ་འཕྱ་བར་

90-1-135b

བྱེད་པ་དང་། སེམས་ཅན་ལ་འཚེ་བ་འདི་རྣམས་ལ་ཕན་པའི་ཕྱིར་སྔགས་པས་སྙིང་རྗེས་གདུངས་པའི་སེམས་ཀྱིས་གནོད་པ་རབ་ཏུ་སྦྱོར་བ་བྱའོ། །གལ་ཏེ་གཞན་ལ་བྱས་ན་དམ་ཚིག་ཉམས་ནས་ཚ་བ་ཆེན་པོར་འགྲོའོ། །
ངེས་རྒྱུད་གཞན་དུའང་བཤད་དེ། སློབ་དཔོན་ལ་ནི་སྨོད་བྱེད་དང་། །ཐེག་པ་ཆེན་པོ་སྐུར་པ་དང་། །སྔགས་རྒྱུད་རབ་སྦྱོར་ཡེ་ཤེས་ལ། །འཕྱ་བར་བྱེད་པའི་མི་གང་དག །དེ་ནི་འབད་ལ་གསད་པར་བྱ། །ཡང་ན་གནས་
ནས་གཡོ་བར་བྱ། །རྣལ་འབྱོར་སྙིང་རྗེ་མེད་པ་ཡིས། །གཞན་ལ་རུང་རུང་བྱས་ན་ནི། །དེ་ལ་དེ་བཞིན་ལས་དེ་ནི། །ཕྱིར་ལྡོག་པར་ནི་འབྱུང་བར་འགྱུར། །ཅི་ཕྱིར་སེམས་ཅན་ཐོ་བརྩམ་ཕྱིར། །རྣལ་འབྱོར་པ་ནི་འདི་
ལའོ། །འདི་ནི་འཇམ་དཔལ་ཞེས་བྱ་བ། དཔལ་རྡོ་རྗེ་འཇིགས་བྱེད་ཆེན་པོའི་རྣལ་འབྱོར་གྱི་རྒྱུད་ལས་ཐམས་ཅད་གྲུབ་པའི་རྟོག་པ་སྟེ་གཉིས་པའོ།། །།   དེ་ནས་གོ་རིམས་ཇི་ལྟ་བའི་ཆོ་གས་སྔགས་བཏུ་བ་རབ་ཏུ་
གསུངས་ཏེ། རབ་ཏུ་གཙང་བའི་ཡུལ་ཁམས་སུ་སྔགས་པས་གནས་ལ་སྔགས་བཏུ་བར་བྱ་སྟེ། ཇི་ལྟར་དྲུག་པའི་དང་པོ་དང་། །ལྔ་པ་ཡི་ནི་ལྔ་པ་དང་། །དྲུག་པ་ཡི་ནི་གཉིས་པ་ལ། །དབྱངས་ཡིག་གཉིས་པ་དང་ལྡན་པ། །
གཉིས་པ་ཡི་ནི་གསུམ་པ་ལ། །ཡང་ནི་དབྱངས་ཡིག་གཉིས་པར་ལྡན། །བདུན་པ་ཡི་ཡང་གསུམ་པ་དང་། །བཞི་པ་ཡི་ཡང་གསུམ་པ་ལ། །དབྱངས་ཡིག་བཅུ་གསུམ་དང་ལྡན་པ། །ལྔ་པ་ཡི་ཡང་ལྔ་པ་ལ། །དབྱངས་
ཡིག་བཅུ་གཅིག་དང་ལྡན་པ། །དྲུག་པ་ཡི་ནི་དང་པོ་དང་། །དྲུག་པའི་དང་པོ་གཉིས་འགྱུར་དང་། །ཡང་ནི་རླུང་གི་ས་བོན་སྦྱིན། །ལྔ་པ་ཡི་ཡང་ལྔ་པ་ལ། །བཅུ་གཅིག་གི་མནན་ལྡན་པ། །བཞི་པ་ཡི་ནི་གསུམ་པ་ལ། །
བཅུ་གསུམ་པ་ཡིས་མཉམ་མནན་པ། །དྲུག་པ་ཡི་ཡང་གཉིས་པ་ལ། །དབྱངས་ཡིག་ལྔ་པ་དང་ལྡན་པ། །གསུམ་པ་ཡི་ནི་ལྔ་པ་དང་། །རླུང་གི་ས་བོན་དེ་ནས་སྦྱིན། །དབྱངས་ཡིག་བཅུ་གསུམ་ཡང་དག་ལྡན། །

90-1-136a

བཞི་པ་ཡི་ནི་གསུམ་པ་དང་། །དེ་ནས་རླུང་གི་ས་བོན་སྦྱིན། །དྲུག་པ་ཡི་ཡང་དང་པོ་དང་། །བཞི་པ་ཡི་ནི་གསུམ་པ་དང་། །དེ་ལ་རླུང་གི་ས་བོན་ནི། །དབྱངས་ཡིག་བཅུ་གསུམ་པ་དང་ལྡན། །བཞི་པ་ཡི་ནི་ལྔ་
པ་ལ། །དབྱངས་ཡིག་གསུམ་པ་དང་ལྡན་པ། །དེ་ནས་མེ་ཡི་ས་བོན་སྦྱིན། །རླུང་གི་ས་བོན་དེ་བཞིན་ནོ། །དེ་ནས་ཡི་གེ་ཐ་མ་སྦྱིན། །དབྱངས་ཡིག་བཅུ་གཅིག་པ་དང་ལྡན། །རླུང་གི་ས་བོན་དེ་བཞིན་མཆོག །དྲུག་པ་
ཡི་ནི་དང་པོ་དང་། །དེ་ནས་ཡི་གེ་ཐ་མ་སྦྱིན། །དབྱངས་ཡིག་བཅུ་གཅིག་པ་དང་ལྡན། །ཡང་ནི་རླུང་གི་ས་བོན་དང་། །གཉིས་པ་ཡི་ནི་དང་པོ་དང་། །དེ་ནི་གཉིས་འགྱུར་ལྡན་པར་བྱ། །བཞི་པ་ཡི་ནི་ལྔ་པ་ལ། །དབྱངས་
ཡིག་གསུམ་པ་དང་ལྡན་པ། །དེ་ནས་མེ་ཡི་ས་བོན་དང་། །ལྔ་པ་ཡི་ནི་ལྔ་པ་དང་། །དེ་ནས་རླུང་གི་ས་བོན་སྦྱིན། །དང་པོར་རྣམ་པར་སྣང་མཛད་སྦྱིན། །མཆོག་གི་དབང་ཕྱུག་དང་སྦྱར་བ། །ལྔ་པ་ཡི་ནི་གཉིས་པ་དང་། །
གསུམ་པ་ཡི་ནི་དང་པོ་ནི། །མཁས་པས་ལན་གཉིས་བརྗོད་པར་བྱ། །འདི་ནི་འཇམ་དཔལ་ཞེས་བྱ་བའི། །འཇིགས་བྱེད་ཆེན་པོ་རྒྱུད་འཁོར་ལོ། །མ་ཧེ་གདོང་ཅན་རྩ་སྔགས་ཏེ། །འབུམ་བཟླས་པ་ཡིས་ལས་ཀུན་བྱེད། །འདི་ནི་སྔགས་
ཀྱི་རྒྱལ་པོ་སྟེ། །མ་བྱུང་འབྱུང་བར་མི་འགྱུར་རོ། །བདུན་པ་ཡི་ནི་བཞི་པ་ལ། །དབྱངས་ཡིག་བཞི་པ་དང་ལྡན་པ། །མེ་ཡི་ས་བོན་འོག་ཏུ་སྦྱིན། །དེ་ནས་མངའ་བདག་བཅུ་དྲུག་མཐའ། །བདུན་པ་ཡི་ནི་གཉིས་པ་ལ། །
དབྱངས་ཡིག་བཞི་པ་དང་ལྡན་ཞིང་། །གསུམ་པ་ཡི་ནི་དང་པོ་ལ། །འོག་དུ་མེ་ཡི་ས་བོན་གདགས། །མངའ་བདག་བཅུ་དྲུག་མཐའ་མ་སྟེ། །དྲུག་པ་ཡི་ནི་བཞི་པ་ལ། །དབྱངས་ཡིག་གསུམ་པ་དང་ལྡན་པ། །དང་པོ་ཡི་
ཡང་དང་པོ་དང་། །དབྱངས་ཡིག་བདུན་པ་དང་ལྡན་པ། །འོག་ཏུ་མེ་ཡི་ས་བོན་སྦྱིན། །བཞི་པ་ཡི་ནི་དང་པོ་ལ། །དབྱངས་ཡིག་གཉིས་པ་དང་ལྡན་པ། །བཞི་པ་ཡི་ནི་ལྔ་པ་ནི། །མཁས་པ་ཡིས་ནི་ལན་གཉིས་བརྗོད། །དང་པོར་

90-1-136b

རྣམ་པར་སྣང་མཛད་སྦྱིན། །ཡ་སོགས་བརྒྱད་པའི་ས་བོན་ལ། །དབྱངས་ཡིག་དྲུག་པ་དང་ལྡན་ལ། །སྤྱི་བོ་རུ་ནི་ཐིག་ལེས་བརྒྱན། །ལྔ་པ་ཡི་ནི་གཉིས་པ་དང་། །གསུམ་པ་ཡི་ནི་དང་པོའོ། །འདི་ནི་སྔགས་ཀྱི་རྒྱལ་པོ་སྟེ། །
མ་ཧེའི་གདོང་ཅན་སྦྱོར་བ་ཡིན། །ཐམས་ཅད་ལས་ནི་བྱེད་པའོ། །ལས་ཀྱི་སྔགས་སུ་གྲགས་པ་སྟེ། །སུམ་འབུམ་བཟླས་ན་ལས་ཀུན་བྱེད། །དྲུག་པ་ཡི་ནི་དང་པོ་དང་། །ལྔ་པ་ཡི་ཡང་ལྔ་པ་ལ། །དབྱངས་ཡིག་གཉིས་པ་དང་ལྡན་
པ། །བཞི་པ་ཡི་ནི་དང་པོ་སྟེ། །དེ་ཡི་ལྔ་པ་གླད་དུ་གཞག །དང་པོ་ཡི་ནི་དང་པོ་དང་། །དང་པོར་རྣམ་པར་སྣང་མཛད་སྦྱིན། །ཡ་ཚོགས་བརྒྱད་པའི་ས་བོན་ལ། །དབྱངས་ཡིག་དྲུག་པ་དང་ལྡན་ལ། །སྤྱི་བོ་རུ་ནི་ཐིག་ལེས་བརྒྱན། །
ལྔ་པ་ཡི་ནི་གཉིས་པ་དང་། །གསུམ་པ་ཡི་ནི་དང་པོའོ། །འདི་ནི་མ་ཧེ་གདོང་ཅན་གྱི། །སྙིང་པོའི་སྔགས་སུ་རབ་ཏུ་གྲགས། །ཡི་གེ་རེ་རེ་འབུམ་བཟླས་ན། །འཇིག་རྟེན་གསུམ་གྱི་ལས་ནི་གང་། །ཅི་ཡང་རུང་བ་ཐམས་ཅད་བྱེད། །
སྔགས་བཏུ་བའི་ཆོ་གའི་དུས་འདིར་མཆོད་པར་བྱའོ། །འདི་ནི་འཇམ་དཔལ་ཞེས་བྱ་བ་དཔལ་རྡོ་རྗེ་འཇིགས་བྱེད་ཆེན་པོའི་རྣལ་འབྱོར་གྱི་རྒྱུད་ལས་སྔགས་བཏུ་བ་བསྟན་པའི་རྟོག་པ་སྟེ་གསུམ་པའོ།། །། དེ་ནས་རྡོ་རྗེ་འཇིགས་
བྱེད་ཀྱི་སྒྲུབ་པ་ཡང་དག་པར་བཤད་དེ། ཆོས་ཐམས་ཅད་ལ་བདག་མེད་པ་སྔོན་དུ་འགྲོ་བས་ལྷར་དམིགས་པར་བྱ་སྟེ། དང་པོར་རེ་ཤིག་རང་བཞིན་གྱིས་དག་པའི་སྔགས་བརྗོད་པས། ཆོས་ཐམས་ཅད་བདག་མེད་པའི་ངོ་བོར་བྱས་ནས་
ནམ་མཁའི་དཀྱིལ་དུ་ཡྃ་གི་རྣམ་པ་ལས་གྲུབ་པའི་རླུང་གི་དཀྱིལ་འཁོར་མདོག་དུ་བའི་རྣམ་པ་བསམ་མོ། །དེའི་སྟེང་དུ་དང་པོའི་དབྱངས་ཡིག་ལས་གྱུར་པའི་ཟླ་བའི་དཀྱིལ་འཁོར་དམིགས་ཏེ། དེའི་སྟེང་དུ་དྷཱིཿའི་རྣམ་པ་ལས་འཇམ་
དཔལ་གཞོན་ནུའི་གཟུགས་སུ་གྱུར་པར་བསམ་པར་བྱའོ། །དེར་ཨའི་རྣམ་པ་ལས་གྲུབ་པའི་ཉི་མའི་དཀྱིལ་འཁོར་བསམ་སྟེ། ཉི་མའི་དཀྱིལ་འཁོར་དེ་ལས་འོད་ཟེར་འཕྲོས་པས་ཕྱོགས་བཅུ་ན་བཞུགས་པའི་དེ་བཞིན་

90-1-137a

གཤེགས་པ་རྣམས་དང་བྱང་ཆུབ་སེམས་དཔའ་དང་རིག་པའི་ལྷ་མོ་དང་ཁྲོ་བོ་ལ་སོགས་པ་ཤིན་དུ་བསྐུལ་ཏེ། ཡང་འོངས་ནས་ཉི་མའི་དཀྱིལ་འཁོར་ལ་བཞུགས་པར་བསམ་མོ། །དེ་ནས་ཡང་འཇམ་
དཔལ་དང་དེ་བཞིན་གཤེགས་པ་ལ་སོགས་པ་དེ་རྣམས་གཅིག་ཏུ་གྱུར་ནས། ཉི་མའི་དཀྱིལ་འཁོར་དུ་བསམ་པར་བྱའོ། །འོད་ཟེར་འབར་བའི་རྣམ་པས་དཔག་ཚད་སྟོང་ཕྲག་བརྒྱར་ཁྱབ་པར་གསལ་བར་བྱའོ། །དེའི་
སྟེང་དུ་ཧཱུྃ་མདོག་ནག་པོ་འོད་ཟེར་ལྔ་དང་ཡང་དག་པར་ལྡན་པར་བསམ་སྟེ། ཧཱུྃ་དེ་ལས་འོད་ཟེར་གྱི་རྣམ་པར་འཕྲོས་པས།  སྔོན་དུ་གསུངས་པ་བཞིན་དུ་ཡང་ཞུགས་ཏེ། ཡི་གེ་དེ་ལས་རྡོ་རྗེ་ཆེན་པོ་རྣམ་པར་གདེངས་པ་ཁ་དོག་ནག་
པོ་འོད་ཟེར་ལྔ་དང་ལྡན་པ་རྣམ་པར་དམིགས་པར་བྱ་སྟེ། རྡོ་རྗེ་དེ་ལས་ཕྲ་མོའི་རྣམ་པ་སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་རིག་པའི་ལྷ་མོས་ནམ་མཁའ་ཏིལ་གྱི་གང་བུ་ལྟར་གང་བ་ཉི་མ་ལ་གནས་པ་རྣམ་པར་
བསམ་པར་བྱའོ། །དེ་སངས་རྒྱས་ལ་སོགས་པ་རྣམས་ཀྱིས་ནི་སེམས་ཅན་ཡོངས་སུ་སྨིན་པར་བཏུལ་ནས་བྱང་ཆུབ་ལ་རབ་ཏུ་བཀོད་དེ། ཡང་དེ་ཉིད་ལྷན་ཅིག་ཏུ་བསྡུས་ནས་རྡོ་རྗེའི་གཟུགས་བརྙན་ལ་རབ་ཏུ་ཞུགས་པར་བསམ་
མོ། །རྡོ་རྗེའི་གཟུགས་དེ་ཉིད་ཞལ་དགུ་པ། མ་ཧེའི་གདོང་ཅན་འཇིག་པའི་དུས་ཀྱི་མེ་ལྟར་འབར་བའི་རྡོ་རྗེ་འཇིགས་བྱེད་ཆེན་པོ་ཁམས་གསུམ་ཟ་བར་ནུས་པ། ཞལ་གཙིགས་པ། ཧ་ཧ་ཞེས་ལྗགས་འདྲིལ་བ། 
རྣམ་པར་གཙིགས་པའི་ཁྲོ་གཉེར་འཇིགས་པ། ཁྲོ་གཉེར་གྱི་འགྲམ་ནས་སྨིན་མ་དང་སྤྱན་འཇིགས་པ་ཆེན་པོའི་དུས་ལྟར་ཁྲོ་བ་སྒྲ་སྒྲོགས་པ། མིའི་ཁྲག་དང་ཚིལ་དང་ཞག་དང་རྐང་ཟ་བ། འཇིག་རྟེན་དང་འཇིག་རྟེན་ལས་
འདས་པའི་ལྷ་ལ་སོགས་པ་ལ་བསྡིགས་མཛུབ་བྱེད་པ། བརྒྱ་བྱིན་དང་ཚངས་པ་དང་དབང་ཕྱུག་ཆེན་པོ་དང་ཁྱབ་འཇུག་དང་གནོད་སྦྱིན་ལ་སོགས་པ་ཟ་བ། ཐོད་པ་གཙིགས་པའི་རྩེ་མོ་འཇིགས་སུ་རུང་བའི་ཐོད་པས་ཐོད་བྱས་པ། 

90-1-137b

འཇིགས་པ་ཆེན་པོ་ཅན། ཕཊ་ཅེས་སྒྲ་སྒྲོགས་ཤིང་ཐོད་པའི་འཕྱང་འཕྲུལ་གྱི་རྒྱན་གྱིས་བརྒྱན་པ། ཞབས་བཅུ་དྲུག་པ། གཅེར་བུའི་གཟུགས་མཚན་མ་གྱེན་དུ་འགྲེང་བ། གཡོན་བརྐྱང་བ། གསུས་པ་ཆེ་བ། སྐྲ་གྱེན་དུ་བརྫེས་པ། 
འཇིགས་པ་ཆེན་པོར་བྱེད་པ་ཕེཾ་ཅེས་སྒྲ་སྒྲོགས་པ། ཕྱག་སུམ་བཅུ་རྩ་བཞི་དང་ལྡན་པ། གླང་པོ་ཆེའི་པགས་པ་རློན་པ་འཛིན་པ། དཔལ་རྡོ་རྗེ་འཇིགས་བྱེད་ཆེན་པོ། མ་ཧེའི་གདོང་ཅན་རྣམ་པར་བསམ་པར་བྱ་སྟེ། 
དེ་ལྟར་ཤིན་དུ་བསམ་པ་བརྟན་པར་བྱས་ཏེ། དེ་ཁོ་ན་ཉིད་ཀྱི་སྦྱོར་བ་ལ་ཤིན་དུ་མཉམ་པར་གཞག་པའི་སྔགས་པས་རྟག་ཏུ་བསྒོམ་པར་བྱ་སྟེ། གཡས་དང་པོ་ན་གྲི་གུག །གཉིས་པ་ན་མཚོན་རྩེ་གཅིག་པ། གསུམ་པ་ན་གཏུན་
ཤིང་། བཞི་པ་ན་ཆུ་གྲི། ལྔ་པ་ན་རྡོ་རྗེ་རྩེ་གཅིག་པ། དྲུག་པ་ན་སྟ་རེ། བདུན་པ་ན་མདུང་ཐུང་། བརྒྱད་པ་ན་མདའ། དགུ་པ་ན་ལྕགས་ཀྱུ། བཅུ་པ་ན་དབྱིག་ཐོ། བཅུ་གཅིག་པ་ན་ཁ་ཊྭཱྃ་ག །བཅུ་གཉིས་པ་ན་འཁོར་ལོ། བཅུ་གསུམ་
པ་ན་རྡོ་རྗེ། བཅུ་བཞི་པ་ན་རྡོ་རྗེ་ཐོ་བ། བཅྭ་ལྔ་པ་ན་རལ་གྲི། བཅུ་དྲུག་པ་ན་ཅང་ཏེའུའོ། །གཡོན་པའི་དང་པོ་ན་ཐོད་པ། གཉིས་པ་ན་མགོ་བོ། གསུམ་པ་ན་ཕུབ། བཞི་པ་ན་རྐང་པ། ལྔ་པ་ན་ཞགས་པ། དྲུག་པ་ན་གཞུ། 
བདུན་པ་ན་རྒྱུ་མ། བརྒྱད་པ་ན་དྲིལ་བུ། དགུ་པ་ན་ལག་པ། བཅུ་པ་ན་དུར་ཁྲོད་ཀྱི་རས། བཅུ་གཅིག་པ་ན་སྐྱེས་བུ་གསལ་ཤིང་ལ་བཙུགས་པ། བཅུ་གཉིས་པ་ན་མེ་ཐབ། བཅུ་གསུམ་པ་ན་ཐོད་ཚལ། བཅུ་བཞི་པས་
བསྡིགས་མཛུབ། བཅྭ་ལྔ་པ་ན་འཕན་རྩེ་གསུམ་པ། བཅུ་དྲུག་པ་ན་རླུང་གིས་ཕྱར་བའི་དུར་ཁྲོད་ཀྱི་རས། ཕྱག་གཉིས་ཀྱིས་གླང་པོ་ཆེའི་པགས་པ་རློན་པ་འཛིན་པའོ། །ཞབས་གཡས་པའི་དང་པོས་མི། གཉིས་
པས་མ་ཧེ། གསུམ་པས་གླང་། བཞི་པས་བོང་བུ། ལྔ་པས་རྔ་མོ། དྲུག་པས་ཁྱི། བདུན་པས་ལུག །བརྒྱད་པས་ཝ། ཞབས་གཡས་པས་འདི་དག་ལ་ཞོན་པའོ། །ཞབས་གཡོན་པའི་དང་པོས་བྱ་རྒོད། གཉིས་

90-1-138a

པས་འུག་པ། གསུམ་པས་བྱ་རོག །བཞི་པས་ནེ་ཙོ། ལྔ་པས་ཁྲ། དྲུག་པས་ཁྱུང་ཆེན་པོ། བདུན་པས་རི་སྐེགས། བརྒྱད་པས་བཞད། ཞབས་གཡོན་པས་འདི་དག་མནན་པའོ། །དཔལ་འཇིགས་བྱེད་ཆེན་པོའི་དང་པོའི་
ཞལ་ནི་རབ་ཏུ་གནག་པ་མ་ཧེའི་རྣམ་པ་ཤིན་དུ་ཁྲོས་པ་ཅན། རྭ་གཡས་ཀྱི་ཞལ་གསུམ་ལ་དང་པོ་སྔོན་པོ། གཉིས་པ་དམར་པོ། གསུམ་པ་སེར་པོ་སྟེ། མངའ་བདག་གི་ཞལ་གསུམ་ཤུན་དུ་ཁྲོས་པ། རྭ་གཡོན་པར་ཞལ་གསུམ་
ལ། དང་པོ་དཀར་པོ། གཉིས་པ་དུད་ཁ། གསུམ་པ་ནག་པོ་རབ་ཏུ་ཁྲོས་པ། གཙིགས་པའི་ཞལ་རབ་ཏུ་བསམ་པར་བྱའོ། །རྭ་གཉིས་ཀྱི་བར་དུ་དབུས་ཀྱི་ཞལ་དམར་པོ་རབ་ཏུ་འཇིགས་པ་ཞལ་ནས་ཁྲག་འཛག་པ་བསམ་
པར་བྱའོ། །སྟེང་དུ་འཇམ་དཔལ་གྱི་ཞལ་ཅུང་ཟད་སེར་བ་ཡུད་ཙམ་ཁྲོ་བ་བྱས་པའི་རྒྱན་གྱིས་བརྒྱན་པ། སྤྱི་བོར་རལ་པ་ལྔ་དང་ལྡན་པ་རྣམ་པར་བསམས་ཏེ། ཞལ་རྣམས་ཐམས་ཅད་སྤྱན་གསུམ་པར་བསྒོམ་སྟེ། འདི་ལྟར་
བདག་ཉིད་རྟག་ཏུ་རྩེ་གཅིག་ཏུ་དམིགས་སོ། །དེ་ཉིད་དཔལ་རྡོ་རྗེ་འཇིགས་བྱེད་ཆེན་པོ་མ་ཧེའི་གདོང་ཅན་དེ་བདག་ཉིད་ཡིན་པར་བསྒོམས་ནས། དཔའ་བོའི་གནས་ལ་གནས་པའི་རྣལ་འབྱོར་པས་དེ་ནས་ཕྱི་ནས་སྔགས་བཟླ་བར་བྱ་སྟེ། 
བཟླས་པའི་དུས་སུ་རང་གི་སྙིང་གར། ཉི་མའི་དཀྱིལ་འཁོར་བསམས་ཏེ། དེའི་སྟེང་དུ་རང་གི་སྔགས་ཀྱི་ཡི་གེ་དགོད་པར་བྱའོ། །འབར་བ་དང་ཕྱི་ནས་མ་ཡེངས་པའི་ཡིད་ཀྱིས་བཟླས་པ་བྱའོ། །སྦྱོར་བ་འདི་ལ་གནས་པའི་སྔགས་
པ་ཡིས། །རྟག་ཏུ་འཇིགས་བྱེད་ལས་ཀུན་བྱ། །དུར་ཁྲོད་གནས་ལ་བསྒོམ་བྱ་ཞིང་། །རྟག་ཏུ་བདུད་རྩི་ལྔ་རྣམས་བཟའ། །དེ་ཡིས་བསྒྲུབ་ལས་བསྒྲུབ་གཞན་མེད། །གཞན་ཡང་མར་མེ་ཆེ་ཟ་ཞིང་། །མཚན་མོ་
རྒྱུ་བའི་རྣལ་འབྱོར་པས། །སུམ་འབུམ་རྩ་བའི་སྔགས་བཟླས་བྱ། །འདི་ཟློས་པ་ཡི་སྔགས་པ་ཡིས། །ཐམས་ཅད་ལས་ནི་བྱེད་པར་འགྱུར། །འདི་ནི་འཇམ་དཔལ་ཞེས་བྱ་བ། དཔལ་རྡོ་རྗེ་འཇིགས་བྱེད་ཆེན་པོའི་རྒྱུད་ལས་

90-1-138b

བསྒོམ་པའི་རྟོག་པ་སྟེ་བཞི་པའོ།། །། དེ་ནས་དཔལ་འཇིགས་བྱེད་ཆེན་པོས་བསྟན་པའི་བྲིས་སྐུའི་ཆོ་ག་རབ་ཏུ་གསུངས་པ། དཔའ་བོའི་རས་སམ། རོ་ལ་བཀབ་པའི་རས་སམ། མེ་ཏོག་ཅན་གྱི་རས་སམ། བུ་
སྐྱེས་པའི་རས་སམ། དེ་མ་རྙེད་ན། རས་གང་ཡང་རུང་བ་ལ། རི་མོ་མཁན་བཟང་པོ་རྣམ་རྟོག་མེད་པ་མི་ཁྲོ་བ། གཙང་བ། མཁས་པ། ཡིད་གཞུངས་པ། དད་པ་དང་ལྡན་པ། བརྩེ་བ་ཅན། སྲེད་པ་དང་བྲལ་བ། འདི་ལྟར་ཡོན་ཏན་
དང་ལྡན་པའོ། །དེ་ལྟ་བུའི་རི་མོ་མཁན་གྱི་ལག་པས་དཔའ་བོའི་རས་ལ་བྲི་བར་བྱའོ། །གལ་ཏེ་དངོས་གྲུབ་འདོད་པས་དཔའ་བོའི་ཡོན་སྦྱིན་ནོ། །དེ་ལ་ཆོ་ག་ནི་གསང་བའི་གནས་སུ་གནས་ལ། ཤིན་ཏུ་མཉམ་པར་གཞག་པས་བྲི་
བར་བྱ་སྟེ། རི་མོ་མཁན་དང་སྒྲུབ་པ་པོས་མཐོང་བ་ལས་འཇིག་རྟེན་པ་གཞན་གྱིས་མི་མཐོང་བར་བྲི་བར་བྱ་སྟེ། ཞབས་བཅུ་དྲུག་པ། ཕྱག་སུམ་ཅུ་རྩ་བཞི་པ། ཞལ་དགུ་པ། གཅེར་བུ་ཁ་དོག་ནག་པོ་གཡོན་བརྐྱང་བ། 
འཇིགས་པ་ཆེན་པོ་ཡང་འཇིགས་པར་བྱེད་པའི་རྣམ་པ་ཅན། མཚན་མ་གྱེན་དུ་འགྲེང་བའི་ཐང་ཀ་བྲི་བར་བྱའོ། །ཞལ་དང་པོ་མ་ཧེ། རྭའི་གཡས་སུ་ཞལ་གསུམ་པ་སྟེ། སྔོན་པོ་དང་། དམར་པོ་དང་སེར་པོ་ཤིན་དུ་ཁྲོས་
པ་བྲི་བར་བྱའོ། །གཡོན་དུ་དཀར་པོ་དང་། དུད་ཁ་དང་། ནག་པོའོ། །དེ་གཉིས་ཀྱི་དབུས་སུ་རབ་ཏུ་དམར་བ་བྲི་བར་བྱའོ། །དེའི་སྟེང་དུ་འཇམ་དཔལ་གྱི་ཞལ་སེར་པོ་ཅུང་ཟད་ཁྲོ་བ་བྲི་བར་བྱའོ། །ཕྱག་གཡས་པར་གྲི་གུག་
དང་། མཚོན་རྩེ་གཅིག་པ་དང་། གཏུན་ཤིང་དང་། ཆུ་གྲི་དང་། རྡོ་རྗེ་རྩེ་གཅིག་པ་དང་། སྟ་རེ་དང་། མདུང་དང་། མདའ་དང་། ལྕགས་ཀྱུ་དང་། དབྱིག་ཐོ་དང་། ཁ་ཊྭཱྃ་ག་དང་། འཁོར་ལོ་དང་། རྡོ་རྗེ་དང་། རྡོ་རྗེ་ཐོ་བ་དང་། རལ་གྲི་དང་། 
ཅང་ཏེའུའོ། །ཕྱག་གཡོན་པ་ན་ཐོད་པ་དང་། མགོ་བོ་དང་། ཕུབ་དང་། རྐང་པ་དང་། ཞགས་པ་དང་། གཞུ་དང་། རྒྱུ་མ་དང་། དྲིལ་བུ་དང་། ལག་པ་དང་། དུར་ཁྲོད་ཀྱི་རས་དང་། སྐྱེས་བུ་གསལ་ཤིང་གིས་ཕུག་པ་དང་། མེ་ཐབ་དང་། 

90-1-139a

ཐོད་ཚལ་དང་། བསྡིགས་མཛུབ་དང་། འཕན་རྩེ་གསུམ་པ་དང་། རླུང་གིས་བསྐྱོད་པའི་རས་སོ། །ཕྱག་གཉིས་ཀྱིས་གླང་པོ་ཆེའི་པགས་པ་རློན་པ་འཛིན་པ་བྲིའོ། །ཞབས་གཡས་པས་མི་དང་། མ་ཧེ་དང་། གླང་དང་། 
བོང་བུ་དང་། རྔ་མོ་དང་། ཁྱི་དང་། ལུག་དང་། ཝ་རྣམས་སོ། །ཞབས་གཡོན་པས་བྱ་རྒོད་དང་། འུག་པ་དང་། བྱ་རོག་དང་། ནེ་ཙོ་དང་། ཁྲ་དང་། བྱ་ཆེན་དང་། རི་སྐེགས་དང་། བཞད་རྣམས་སོ། །འདི་ལྟ་བུར་འདུག་པའི་རྡོ་རྗེ་
འཇིགས་བྱེད་ཆེན་པོ་བྲི་བར་བྱའོ། །དེའི་འོག་ཏུ་དུར་ཁྲོད་ཆེན་པོ་ཡང་བྲི་བར་བྱའོ། །འཇིགས་པ་ཆེན་པོ་བྱེད་པ། སྲིན་པོ་དང་། ཞིང་སྐྱོང་བ་དང་། རོ་ལངས་དང་ལྡན་པ་སྐྱེས་བུ་མདུང་རྩེར་བཙུགས་པའི་གཟུགས་དེར་མཐོང་
བར་བྱའོ། །ནྱ་གྲོ་དྷའི་ཤིང་དག་གི་སྟེང་དུ་སྐྱེས་བུ་འཕྱང་བ་བྲི་བར་བྱ། སྐྱེས་བུ་བསྲེགས་བཞིན་པ་ཡང་བྲི། མདུང་གིས་ཕུག་པའི་སྐྱེས་བུ་ཡང་བྲི། བྱ་སྣ་ཚོགས་དང་། བྱ་རོག་དང་ཁྱི་དང་ལྕེ་སྤྱང་དག་ཧ་ཧ་འབྱིན་པ་བྲི། 
སྒྲུབ་པ་པོ་རྣམས་ཀྱང་བྲི་སྟེ། བཅོམ་ལྡན་འདས་ལ་རྩེ་གཅིག་ཏུ་ལྟ་བ་གཅེར་བུ་སྐྲ་བཤིག་པ། ཕྱག་རྒྱ་ལྔས་བརྒྱན་པ། ཅང་ཏེའུ་དང་། ཐོད་པ་དང་། ཁ་ཊྭཱྃ་ག་འཛིན་པ། ཐོད་པས་སྤྱི་བོར་བརྒྱན་པ། རྒོད་ཅིང་དུར་ཁྲོད་དེར། 
འཇུག་པ་བྲི། འདི་ནི་གསང་བའི་བྲིས་སྐུ་སྟེ། གནས་གཅིག་ཏུ་ལེགས་པར་གཞག་ལ། ཤ་ཆེན་གྱི་སྤོས་དབུལ། དེའི་མདུན་དུ་དུང་ཆེན་གྱི་ཕྲེང་བས་བཟླས་པ་བྱ། སྔགས་པ་མཉམ་པར་གཞག་པས་དུས། 
གསུམ་དུ་འབད་ལ་བྲིས་སྐུ་བསྲུང་ངོ་། །གཞན་གང་ཡང་མི་གཞག་གོ་གཞན་གང་གི་མདུན་དུ་ཡང་མི་དགྲམ་མོ། །ཀློག་པ་དང་། བཏུང་བ་དང་བཟའ་བ་དང་། སྟོན་མོ་ནི་ཤ་ཆེན་རྟག་ཏུ་མཚན་མ་བཟའོ། །གལ་ཏེ་མཆོག་
གི་དངོས་གྲུབ་འདོད་ན་དུས་གསུམ་དུ་རྣམ་པར་སྣང་མཛད་དང་ཁྲག་གི་སྤོས་བྲིས་སྐུའི་མདུན་དུ་དབུལ་ལོ། །འདི་ནི་འཇམ་དཔལ་ཞེས་བྱ་བ། རྡོ་རྗེ་འཇིགས་བྱེད་ཆེན་པོ་རྣལ་འབྱོར་ཀྱི་རྒྱུད་ལས་བྲིས་སྐུའི་ཆོ་གའི་རྟོག་པ་སྟེ་ལྔ་པའོ།། །།

90-1-139b

དེ་ནས་སྦྱིན་སྲེག་གི་ལས་ཀྱི་ཆོ་ག་གསུངས་པ། ཇི་ལྟར་སྔོན་གྱི་རིམ་པ་སྟེ། དང་པོར་རེ་ཞིག་སྔགས་པ་དབེན་པའི་གནས་སུ་ཕྱིན་ལ། མཚན་ཕྱེད་ན་སྦྱིན་སྲེག་གི་ལས་ཀུན་བྱས་ཏེ། གོང་དུ་གསུངས་པའི་ལྷའི་རྣལ་འབྱོར་ལ་གནས་
པས་ལས་ཐམས་ཅད་བྱའོ། །དེ་ལ་ལས་ནི་འདི་རྣམས་ཡིན་ནོ། །གལ་ཏེ་གསད་པར་འདོད་ན་དེར་མིའི་རུས་པ་དང་། རྣམ་པར་སྣང་མཛད་དང་། བོང་བུའི་སྦངས་དང་། ཁྱིའི་སྦངས་དང་། ཚེར་མ་དང་སྐྲ་དང་སེན་མོ་དང་། དེ་དག་
ཐམས་ཅད་ཚ་བའི་མར་ཁུས་སྦྲས་ལ། མ་ཧེའི་ཞལ་གྱི་སྦྱོར་བས་ཤིན་དུ་མཉམ་པར་གཞག་ལ། ཁ་ལྷོར་བལྟས་ཏེ་རོ་བསྲེགས་པའི་མེ་ལ། གང་གི་མིང་དང་བཅས་པར་བརྒྱ་རྩ་བརྒྱད་བསྲེགས་ན་ཐེ་ཚོམ་མེད་པར་དེ་ཞག་
གསུམ་གྱིས་འཆིའོ། །ཡང་ན་ཕྱོགས་གཅིག་ཏུ་གནས་ལ་མེ་ཐབ་གྲུ་གསུམ་བྱས་ནས། དེར་སྔོན་དུ་གསུངས་པའི་རྫས་ཀྱིས་གཏུམ་པོའི་མེ་ལ་སྦྱིན་སྲེག་བྱ་སྟེ། སྦྱོར་བ་དེས་ནི་ལས་དེ་ཉིད་འགྲུབ་བོ། །དེ་ནས་དབྲལ་བར་འདོད་ན་
བྱ་རོག་དང་འུག་པ་དང་། རྨ་བྱ་དང་སྦྲུལ་དང་སྐྲ་དང་འབྲས་ཕུབ་དང་མ་ཧེ་དང་། རྟའི་ཤ་དང་ལྷན་ཅིག་ཏུ་གང་གི་མིང་དང་བཅས་པར་ཡི་གེ་བཅུ་པའི་སྔགས་ཀྱིས་དུར་ཁྲོད་ཀྱི་མེ་ལ་བསྲེགས་ན་དེས་འབྲལ་བར་འགྱུར་རོ། །
ཡང་ན་དུར་ཁྲོད་ཀྱི་ཤིང་ལ་གཏུམ་པོའི་མེ་རབ་ཏུ་སྦར་ལ། ཁྱིམ་དུ་གནས་ཏེ། གོང་གི་རྫས་དེ་བསྲེགས་ན། རྡོ་རྗེ་འཛིན་པ་ལྟ་བུ་ཡང་ཉི་མ་བདུན་གྱིས་འབྲལ་ལོ། །དེ་ནས་བསྐྲད་པར་འདོད་ན་བྱ་རོག་གི་ཤ་དང་། རྔ་མོའི་རྟུག་
པ་དང་ལྷན་ཅིག་ཏུ་ཆང་དང་ཡང་དག་པར་ལྡན་པ་རླུང་གི་དཀྱིལ་འཁོར་གྱི་དབུས་སུ་དུར་ཁྲོད་ཀྱི་ཤིང་ལ་མེ་རབ་ཏུ་སྦར་ལ། གཅེར་བུ་སྐྲ་བཤིག་པར་བསྒྱུར་ནས། ཁ་ལྷོ་ཕྱོགས་སུ་བལྟས་ཏེ། གཤིན་རྗེའི་སྔགས་ཀྱིས་ཆེ་གེ་
མོའི་མིང་དང་བཅས་པར་ལག་པ་གཡོན་པས་སྦྱིན་སྲེག་སྟོང་བྱས་ན་སྐྲོད་པ་ལས་གཞན་དུ་མ་ཡིན་ནོ། །དེ་ནས་རེངས་པར་འདོད་ན། བ་བླ་དང་ཡུང་བ་དང་། ལྡོང་རོས་དང་འགི་ཝང་དང་བཅས་པས་དཀྱིལ་འཁོར་གྲུ་བཞི་

90-1-140a

པ་བྱས་ལ་ཁ་བྱང་དུ་བལྟས་ཏེ་ལས་ཀྱི་རྗེས་སུ་འབྲང་བའི་སྦྱོར་བ་དམིགས་ནས། གང་གི་མིང་དང་བཅས་པར་སྦྱིན་སྲེག་བྱས་ན། དེ་ཉི་མ་བདུན་གྱིས་རེངས་པར་འགྱུར་རོ། །དེ་ནས་གྲོང་བསྐྲད་པར་འདོད་ན། 
ནིམ་པའི་ཤིང་ལ་མེ་རབ་ཏུ་སྦར་ལ། ཁྱིའི་ཤ་དང་སྦལ་བའི་ཤ་དང་ཁྱིམ་བྱའི་ཤ་དང་རྔ་མོའི་རྟུག་པ་དང་བྱི་ལའི་ཁྲག་གཅིག་ཏུ་སྦྲུས་ལ། གཤིན་རྗེའི་སྦྱོར་བ་ལ་གནས་པས། གྲོང་གི་མིང་དང་བཅས་པར་ཡི་གེ་
བཅུ་པའི་སྔགས་ཀྱིས་རླུང་གི་དཀྱིལ་འཁོར་གྱི་དབུས་སུ་སྦྱིན་སྲེག་སྟོང་ཕྲག་བཅུ་བྱས་ན་གྲོང་སྐྲོད་པར་འགྱུར་རོ། །ལས་དེ་རྣམས་ནི་ཤིན་དུ་ཡང་མཉམ་པར་བཞག་པས་བྱ་སྟེ། གཞན་དུ་ན་སྔགས་པ་རང་ཉིད་
ལ་འབབ་པར་འགྱུར་རོ། །གཞན་གང་ལ་ཡང་མི་བསྟན་ནོ། །དེ་ནས་བུ་མོ་རེངས་པར་འདོད་ན། ཚེར་མ་དང་། དུག་དང་། སྐེ་ཚེ་དང་བཅས་པར་རང་གི་ཁྲག་གིས་སྦྲུས་ནས། ཡི་གེ་བཅུ་པའི་སྔགས་དང་བཅས་པར་
གྱུར་ཅིག་ཅེས་དུར་ཁྲོད་ཀྱི་མེ་ལ་སྦྱིན་སྲེག་སྟོང་བྱས་ན་རེངས་པ་ལས་གཞན་མ་ཡིན་ནོ། །དེ་ནས་ཞི་བར་བྱ་བར་འདོད་ན་མར་དང་སྦྲང་རྩི་དང་འོ་མ་དང་དཱུར་བ་དང་བཅས་པར་པ་ལ་ཤའི་ཤིང་ལ་མེ་རབ་ཏུ་སྦར་ན་ཞི་བར་
འདོད་པར་དམིགས་ནས་ཡུལ་གྱི་ཤར་ཕྱོགས་སུ་ཁ་བལྟས་ཏེ་གནས་པས་དུས་གསུམ་དུ་སྦྱིན་སྲེག་སྟོང་རྩ་བརྒྱད་བྱས་ན་དེས་ཡུལ་ཞི་བར་བྱས་པར་འགྱུར་རོ། །དེ་ནས་རྒྱས་པར་འདོད་ན་ཏིལ་དང་འབྲས་དང་ནས་དང་། 
མར་དང་བཅས་པས་ཨུ་དུམ་ཝ་རའི་ཤིང་ལ་མེ་རབ་ཏུ་སྦར་ན་ལས་ཀྱི་རྗེས་སུ་འབྲང་བའི་ལྷའི་སྦྱོར་བ་དམིགས་ཏེ། ཁ་བྱང་དུ་བལྟས་ནས་མཉམ་པར་བཞག་པས་ཡི་གེ་བཅུ་པའི་སྔགས་ཀྱིས་དུས་གསུམ་དུ་སྦྱིན་སྲེག་
སྟོང་བྱས་ན་རྒྱས་པར་འགྱུར་རོ། །དེ་ནས་དགུག་པར་འདོད་ན་སྐེ་ཚེས་གཟུགས་བརྙན་བྱས་ལ། དེ་ནས་སེང་ལྡེང་གི་མེའི་དབུས་སུ་གཤིན་རྗེའི་སྔགས་ཀྱིས་བརྒྱ་རྩ་བརྒྱད་དུ་བསྲེགས་ན་མ་གྲུབ་པ་ཡང་འགྲུབ་པར་འགྱུར་རོ། །

90-1-140b

ཉི་མ་བདུན་གྱིས་གང་འདོད་པ་ཐེ་ཚོམ་མེད་པར་འགུགས་སོ། །དེ་ནས་སྨྱོ་བར་བྱ་བར་འདོད་ན། བྱ་རྒོད་ཆེན་པོའི་ཚང་དང་། ཤ་ཆེན་བསྲེགས་ན་སྨྱོ་བར་འགྱུར་རོ། །དེ་ཕུབ་མའི་མེ་ལ་བསྲེགས་ན་བདེ་ལེགས་སུ་འགྱུར་
རོ། །དེ་ནས་ནོར་ནོར་མ་ཡིན་པར་བྱ་བར་འདོད་ན། རས་བལ་གྱི་མེ་ལ་དྷ་དུ་རའི་འབྲས་བུ་བཅས་པར་མཚན་མོ་ཡི་གེ་བཅུ་པའི་སྔགས་བརྒྱ་རྩ་བརྒྱད་སྦྱིན་སྲེག་བྱས་ན་ཤིན་དུ་ཆུད་ཟོས་པར་འགྱུར་རོ། །ཨ་རུ་ར་
བསྲེགས་ན་སླར་རྫས་དེ་ཉིད་དུ་འགྱུར་རོ། །རྗེ་བཙུན་གྱི་མདུན་དུ་ཤ་ཆེན་ཆང་དང་བཅས་པ་ཟླ་བ་དྲུག་ཏུ་མཚན་མོ་སྦྱིན་སྲེག་བརྒྱ་རྩ་བརྒྱད་བྱས་ན་ཡུལ་ཐམས་ཅད་ཀྱི་བདག་པོར་འགྱུར་རོ། །བ་ལང་གི་ཤ་དང་ཁྲག་ཏུ་
བཅས་པར་གང་གི་མིང་དང་བཅས་པར་སྦྱིན་སྲེག་སྟོང་བྱས་ན་དེ་ཇི་སྲིད་འཚོའི་བར་དུ་བྲན་དུ་གནས་པར་ཐེ་ཚོམ་མེད་དོ། །ཁྱི་ཤ་རྡོ་རྗེའི་ཆུ་དང་བཅས་པར་སྐྱེས་པའི་བདག་ཉིད་ཀྱིས་མཚན་མོ་གང་གི་མིང་
དང་བཅས་པར་སྦྱིན་སྲེག་བརྒྱ་རྩ་བརྒྱད་བྱས་ན་བདག་ཉིད་ཀྱི་ནོར་དང་བཅས་པ་དབང་དུ་འགྱུར་རོ། །རྟའི་ཤ་རྣམ་པར་སྣང་མཛད་དང་བཅས་པ་གཤིན་རྗེའི་གཤེད་ཀྱི་སྔགས་ཀྱིས་སྦྱིན་སྲེག་བརྒྱ་རྩ་བརྒྱད་གནས་གཅིག་
ཏུ་གནས་ལ། མཚན་མོ་རྒྱལ་པོ་ལ་དམིགས་ནས་བྱས་ན་ཞག་བདུན་གྱིས་འཁོར་དང་བཅས་པ་དབང་དུ་འགྱུར་རོ། །གླང་པོའི་ཤ་ཁུ་བ་དང་བཅས་པས་མིའི་འཇིག་རྟེན་ཀུན་ལ་དམིགས་ལ་ཡི་གེ་བཅུ་པའི་སྔགས་ཀྱིས་
མཚན་མོ་སྦྱིན་སྲེག་སྟོང་བྱས་ན་ཞག་བདུན་གྱིས་དབང་དུ་འགྱུར་རོ། །ཉ་དང་ཤ་དང་ཆང་དང་བཅས་པས་འཇིགས་པ་མེད་པར་ཡི་གེ་བཅུ་པའི་སྔགས་ཀྱིས་སྦྱིན་སྲེག་བརྒྱ་རྩ་བརྒྱད་བྱས་ན་བུད་མེད་ཐམས་ཅད་དབང་
དུ་འགྱུར་རོ། །དེ་ནས་བསྐྲད་པར་འདོད་ན། བྱ་རོག་གི་ཤ་མ་འདྲེས་པར་ཡི་གེ་བཅུ་པའི་སྔགས་ཀྱིས་གང་གི་མིང་དང་བཅས་པར་སྦྱིན་སྲེག་སྟོང་བྱས་ན་ཉི་མ་བདུན་གྱིས་རྡོ་རྗེ་འཛིན་པ་ལྟ་བུ་ཡང་རབ་ཏུ་འབྲོས་ན་

90-1-141a

ཕྲ་མོའི་མི་ལྟ་ཅི་སྨོས། དེ་ནས་བྱ་རོག་གི་ཚང་དང་འབྲས་ཀྱི་ཕུབ་མ་དང་ལྷན་ཅིག་ཏུ་དྷ་དུ་རའི་ཤིང་ལ་མེ་རབ་ཏུ་སྦར་ནས། ཡི་གེ་བཅུ་པའི་སྔགས་གང་གི་མིང་དང་བཅས་པར་ནམ་ཕྱེད་ན་སྦྱིན་སྲེག་
བྱས་ན། ཉི་མ་བདུན་གྱིས་སྐྲོད་པར་འགྱུར་རོ། །དེ་ནས་དབང་དུ་བྱ་བར་འདོད་ན། སེང་ལྡེང་གི་མེ་ལ་ཏིལ་དང་འབྲས་དང་བུད་མེད་ཀྱི་མེ་ཏོག་དང་ལྷན་ཅིག་ཏུ་རྡོ་རྗེའི་ཆུ་དང་བསྲེས་ཏེ། རྣལ་འབྱོར་གྱི་གཟུགས་
དམར་པོ་དམིགས་ནས་ཁ་ནུབ་ཏུ་བལྟས་ཏེ། ཡི་གེ་བཅུ་པ་གང་གི་མིང་དང་བཅས་པར་སྔགས་པས་བསྲེགས་ན། ཉི་མ་བདུན་གྱིས་དབང་དུ་འདུས་ཏེ། དེ་ཇི་སྲིད་འཚོའི་བར་དུ་མི་འབྲལ་ལོ། །དེ་ནས་འགུག་པར་
འདོད་ན། བདུད་རྩི་ལྔ་མར་དང་བཅས་པར་སེང་ལྡེང་གི་མེ་གང་གི་མིང་དང་བཅས་པར་སྦྱིན་སྲེག་བརྒྱ་རྩ་བརྒྱད་བྱས་ན་དེ་སྐད་ཅིག་གིས་འོང་བར་འགྱུར་རོ། །ལས་འདི་རྣམས་ནི་སྔོན་དུ་བསྙེན་པ་བྱས་པའི་སྔགས་
པས་བྱའོ། །གཞན་པས་བྱས་ན་སྔགས་པ་འཇིག་རྟེན་པས་དཔྱས་པར་འགྱུར་རོ། །ཇི་ལྟར་བྱེ་བྲག་མི་བྱ་སྟེ། གང་ལ་ཡང་བྱེ་བྲག་སྦྱིན་པར་མི་བྱའོ། །བྱེ་བྲག་ཕྱེ་ན་སྔགས་པས་དངོས་གྲུབ་མི་འགྲུབ་བོ། །
ངས་རྒྱུད་གཞན་ལས་ཀྱང་བཤད་དེ། ཇི་ལྟར་བྱེ་བྲག་མ་སྐྱེས་པ། །དེ་བཞིན་བྱ་བའི་བྱེ་བྲག་སྨྲས། །རྡོ་རྗེ་སེམས་དཔས་ཀྱང་མི་འགྲུབ། །གང་གི་མདུན་དུའང་སྔགས་པ་ཡིས། །དེ་ཕྱིར་ལས་རྣམས་
མཐོང་མི་བྱ། །གཞན་དུའང་ལྷན་ཅིག་ཏུ་མི་བྱ། །གལ་ཏེ་སྔགས་པས་ལས་བྱ་འདོད། །དེ་དག་གཅིག་པུ་ཞིག་གིས་བྱ། །སྔགས་པ་དེ་ཡིས་ལས་ཀུན་བྱེད། །འདི་ནི་འཇམ་དཔལ་ཞེས་བྱ་བ། དཔལ་རྡོ་རྗེ་
འཇིགས་བྱེད་ཀྱི་རྣལ་འབྱོར་གྱི་རྒྱུད་ལས་སྦྱིན་སྲེག་གི་ལས་ཀྱི་ཆོ་ག་རྒྱ་ཆེ་བའི་རྟོག་པ་སྟེ་དྲུག་པའོ།། །། དེ་ནས་བསམ་གཏན་གྱི་ལས་ཀྱི་ཆོ་ག་ཇི་ལྟ་བུ་ཡང་དག་པར་གསུངས་ཏེ། 

90-1-141b

བསམ་གཏན་དང་སྔགས་ཀྱི་རབ་ཏུ་སྦྱོར་བ་ལས་དགོས་པ་ཐམས་ཅད་རབ་ཏུ་བསྒྲུབ་པར་བྱ་སྟེ། དེའི་ཆོ་གའི་དང་པོར་རེ་ཤིག་རྣལ་འབྱོར་པ་མ་ཧེའི་གདོང་པའི་སྦྱོར་བ་ལ་གནས་པའི་སྔོན་དུ་སྦྱང་བ་བྱས་
པས་ལས་ཐམས་ཅད་བྱའོ། །རེ་ཕ་ལས་ཡོངས་སུ་གྱུར་པའི་མེའི་དཀྱིལ་འཁོར་ཀུན་དུ་གསལ་བར་འབར་བར་རྣམ་པར་བསམས་ལ། དེའི་སྟེང་དུ་བསྒྲུབ་བྱ་གཅེར་བུ་སྐྲ་བཤིག་པ། བྲེད་པར་གྱུར་པ་
བདག་གི་མདུན་དུ་རྣམ་པར་བསམ་མོ། །དེ་ནས་རང་གི་ལུས་ལས་ཁྲོ་བོའི་གཟུགས་མང་པོ་རྣམ་པར་སྤྲོས་ཏེ། ཁྲོ་བོ་དེ་རྣམས་ཀྱིས་རལ་གྲི་བཏབ་ཅིང་ཁྲག་འཐུང་བར་བསམ་པར་བྱའོ། །བསྒྲུབ་བྱ་དེའི་ཤ་ཟ་བ་དང་། 
རྒྱུ་མ་དྲངས་པར་བསམ་པར་བྱའོ། །འདི་སྐད་སྨྲ་བར་བྱ་སྟེ། དཀོན་མཆོག་གསུམ་ལ་གནོད་པར་བྱེད་པ་དང་། བླ་མ་ལ་སྐུར་པ་འདེབས་པ་ལ་རྒྱོབ་ཅིག་རྒྱོབ་ཅིག །སོད་ཅིག་སོད་ཅིག་བསམས་པ་ཙམ་གྱིས་རྡོ་རྗེ་
འཛིན་པ་ཡང་ཞག་བདུན་གྱིས་འཆི་ན་ཕྲ་མོའི་སྲོག་ཆགས་གཞན་ལྟ་ཅི་སྨོས། དེ་ནས་གཞན་ཡང་བསམ་གཏན་གྱི་རབ་ཏུ་སྦྱོར་བ་འབྱུང་བ་ནི་མ་ཧེའི་གདོང་པའི་སྦྱོར་བའི་ང་རྒྱལ་ལ་གནས་ཏེ་ལས་ཐམས་ཅད་
བསྒྲུབ་པར་བྱའོ། །མེའི་དཀྱིལ་འཁོར་གྱི་དབུས་སུ་བསྒྲུབ་བྱ་དུ་བར་བསམས་ལ། དེའི་མདུན་དུ་སྲིན་པོ་མང་པོ་བསམ་པར་བྱ་སྟེ། སྲིན་པོ་དེ་དག་ཐ་དད་པའི་ལུས་ཅན་མ་རུངས་པ། ཤིན་དུ་གཏུམ་པར་ཤ་ཟ་བ་དང་། 
ཁྲག་འཐུང་བར་རྣམ་པར་བསམ་པར་བྱའོ། །གཞན་ཡང་རྣམ་པ་སྣ་ཚོགས་པའི་བྱ་རྣམས་ཏེ། བྱ་རྒོད་དག་དང་། བྱ་རོག་དང་འུག་པ་དང་ཝ་རྣམས་དང་ཁྱི་རྣམས་ཀྱིས་ཤ་ཟ་བ་དང་ཁྲག་འཐུང་བར་རྣམ་པར་
བསམ་པར་བྱ་སྟེ། བསམ་གཏན་འདིའི་རབ་ཏུ་སྦྱོར་བས་ཐེ་ཚོམ་མེད་པར་འཆིའོ། །དཔག་ཚད་བརྒྱ་ན་གནས་པའི་སྐྱེས་བུ་ཡང་སེམས་ཀྱིས་བཟུང་བས་བསམ་གཏན་བརྩམ་མོ། །སྔགས་པས་བསམ་གཏན་བརྟན་

90-1-142a

པར་བྱའོ། །དེ་ནས་དབྲལ་བར་འདོད་ན་མ་ཧེའི་སྙིང་གར་བསྒྲུབ་བྱ་བསམ་པར་བྱ་སྟེ། བསྒྲུབ་བྱ་གཞན་རྟའི་སྙིང་གར་རྣམ་པར་བསམ་པར་བྱའོ། །རྟ་དང་མ་ཧེ་གཉིས་ཕན་ཚུན་འཐབ་པར་བྱེད་པར་
བསམ་སྟེ། ཇི་སྲིད་དུ་རྟ་དང་མ་ཧེ་གཉིས་ཕྱེ་བར་མ་གྱུར་གྱི་བར་དུའོ། །ཕྱི་ནས་བསྒྲུབ་བྱ་དེ་གཉིས། རབ་ཏུ་མི་མཛའ་བར་བསམ་པར་བྱ་སྟེ། བསམས་པ་ཙམ་གྱིས་ཉི་མ་བདུན་གྱིས་ངེས་པར་འཐབ་པར་འགྱུར་ཏེ། 
གཞན་དུ་མ་ཡིན་ནོ། །དེ་ནས་བསྐྲད་པར་འདོད་ན་དེ་རུ་ཡྃ་ལས་ཡོངས་སུ་གྱུར་པའི་རྔ་མོ་བསམ་པར་བྱ་སྟེ། ཡྃ་དེའི་རྒྱབ་ཏུ་ཡྃ་གི་རྣམ་པ་ལས་གྱུར་པའི་རླུང་གི་དཀྱིལ་འཁོར་ཟླ་བ་ཕྱེད་པའི་རྣམ་པར་བསམ་པར་བྱའོ། །དེའི་
སྟེང་དུ་བསྒྲུབ་བྱ་གཅེར་བུ་སྐྲ་བཤིག་པ་བྲེད་པར་གྱུར་པར་བསམ་པར་བྱ་སྟེ། མ་ཧེའི་གདོང་ཅན་གྱི་སྦྱོར་བ་ལ་གནས་པས་དེའི་རྒྱབ་ཏུ་གཤིན་རྗེའི་གཟུགས་ལག་པ་གཡས་པས་དབྱུག་པ་འཛིན་པ་སྐྲ་བསིལ་བ་རྣམ་
པར་བསམ་པར་བྱ་སྟེ། རྔ་མོ་དེ་ཁ་ལྷོར་བསྟན་ལ་གཏང་ངོ་། །དེའི་མིང་དང་བཅས་པར་གཤིན་རྗེའི་སྔགས་བརྗོད་པས་རྣམ་པར་བསམ་པར་བྱའོ། །རྣལ་འབྱོར་པས་འདི་བསམས་པ་ཙམ་གྱིས་ཞག་བདུན་ན་འདི་ལྟར་རྡོ་རྗེ་འཛིན་
པ་ཡང་བསྐྲོད་པར་འགྱུར་རོ། །གཞན་ཡང་བསམ་གཏན་གྱི་རབ་ཏུ་སྦྱོར་བ་ནི་བྱ་རོག་གམ། བྱ་རྒོད་ཀྱི་རྒྱབ་ཏུ་བསྒྲུབ་བྱ་སྐྲ་གྲོལ་བ་གཅེར་བུ་རྣམ་པར་བསམ་མོ། །དེའི་རྒྱབ་ཏུ་གཤིན་རྗེ་རྣམ་པར་བསམ་པར་བྱ་སྟེ། ལག་པ་
ཐོ་བ་ཐོགས་པ་བསྒྲུབ་བྱའི་སྐྲ་བཟུང་བ་དེ་ལ་མ་ཧེའི་གདོང་ཅན་གྱིས་བཀའ་བསྒོ་སྟེ། ཁ་ལྷོ་རུ་བལྟས་ནས་སོང་བར་བསམ་པར་བྱ་སྟེ། རྩེ་གཅིག་པའི་སྦྱོར་བས་བསམ་པར་བྱས་ན། རྩེ་གཅིག་པའི་སྦྱོར་བ་དེས་ཞག་བདུན་
གྱིས་སྐྲོད་པར་འགྱུར་རོ། །དེ་ནས་འགུགས་པར་བྱེད་པར་འདོད་ན་ཡི་གེ་ཡྃ་ལས་བྱུང་བའི་རླུང་གི་དཀྱིལ་འཁོར། དེའི་སྟེང་དུ་ཨ་ལས་བྱུང་བའི་ཟླ་བའི་དཀྱིལ་འཁོར་དེའི་སྟེང་དུ་གཤིན་རྗེའི་གཟུགས་ལྕགས་ཀྱུ་དང་ཞགས་པ་ལག་ཏུ་ཐོགས་

90-1-142b

པ་རྣམ་པར་བསམ་མོ། །མ་ཧེའི་གདོང་པའི་རྣལ་འབྱོར་ལ་གནས་པས་དེ་ལ་བཀའ་བསྒོ་བ། གཤིན་རྗེ་སོང་ལ་ཡུལ་ཆེ་གེ་མོ་ནས་བུ་མོ་ཆེ་གེ་མོ་མྱུར་བར་ཁུག་ཅིག །དེ་སྐད་བསྐུལ་བས་ཡྃ་གི་རྣམ་པར་བསྐྱོད་དེ་སོང་བར་རྣམ་པར་
བསམ་པར་བྱའོ། །བསམ་གཏན་འདིའི་རབ་ཏུ་སྦྱོར་བ་ལ་གནས་པའི་སྔགས་པས་ཁམས་གསུམ་དུ་གཏོགས་པའི་བུད་མེད་བཀུག་ལ་རོལ་བར་བྱའོ། །ཇི་ལྟར་བསམ་པ་བརྟན་པར་གྱུར་ན་འདིའི་རབ་ཏུ་སྦྱོར་བས་དེ་དག་བྱའི་གཞན་གྱིས་མི་
བྱའོ། །དེ་ནས་སྦྲུལ་གྱིས་ཟིན་པ་བླང་བའི་རབ་ཏུ་བྱེད་པ་གསུངས་ཏེ། རང་གི་སྙིང་གར་པད་མ་དཀར་པོ་འདབ་མ་བརྒྱད་པ་རྣམ་པར་བསམ་མོ། །དེའི་སྟེང་དུ་དབྱངས་ཡིག་གསུམ་པ་འདབ་མར་ཕཊ་བརྒྱད་རྣམ་པར་བསམ་མོ། །དེ་
ཡིས་ནི་འོག་གི་ཀླུའི་གཟུགས་རྣམ་པར་བསམ་པར་བྱ་སྟེ། དེའི་སྤྱི་བོར་ཡི་གེ་ཨི་ཁ་དོག་དཀར་པོ་ལས་བདུད་རྩི་འཛག་པ་བསམ་པར་བྱའོ། །ཀླུ་དེའི་མིག་རྣམས་ནས་བདུད་རྩི་འཕྲོས་ནས་བསྒྲུབ་བྱ་དེའི་ལུས་ལ་ཐིམ་པར་བསམ་
པར་བྱ་སྟེ། བསམ་གཏན་འདིའི་སྦྱོར་བས་ཁམས་གསུམ་ཡོངས་སུ་གང་བའི་དུག་ཀྱང་མེད་པར་འགྱུར་རོ། །དུག་ཁུར་སྟོང་ཡང་ཟ་ནུས་སོ། །དེ་ནས་ཞུ་བའི་བསམ་གཏན་གྱི་རབ་ཏུ་སྦྱོར་བ་འབྱུང་སྟེ། བསྒྲུབ་བྱ་མདུན་དུ་
བསམ་སྟེ། དེའི་རྐང་པ་གཉིས་ལ་ཡི་གེ་ཡྃ་ལས་གྱུར་པའི་རླུང་གི་དཀྱིལ་འཁོར་བསམ་པར་བྱ། དེའི་སྟེང་དུ་གསང་བའི་གནས་སུ་མེའི་དཀྱིལ་འཁོར་གྲུ་གསུམ་ཁ་དོག་དམར་པོ་རྃ་གྱིས་བྱིན་གྱིས་བརླབས་པ་བསམ་པར་བྱའོ། །
དེའི་སྟེང་དུ་སྙིང་གར་སའི་དཀྱིལ་འཁོར་གྲུ་བཞི་པ་མདོག་སེར་པོ་ལྃ་གྱིས་བྱིན་གྱིས་བརླབས་པ་བསམ་པར་བྱའོ། །དེའི་སྟེང་དུ་དཔྲལ་བར་ཟླ་བའི་དཀྱིལ་འཁོར་རྣམ་པར་བསམ་པར་བྱའོ། །དེའི་དབུས་སུ་ཡི་གེ་བྃ་མགོ་ཐུར་
དུ་གནས་པ་ལས་བདུད་རྩི་འཛག་པར་བསམ་སྟེ། འདི་ནི་ལེགས་པར་རྣམ་པར་བསམས་ནས་རླུང་གིས་མེ་རབ་ཏུ་སྦར་ཏེ། མེ་དེས་དབང་ཆེན་གྱི་དཀྱིལ་འཁོར་བསྲེགས་པར་རྣམ་པར་བསམ། དབང་ཆེན་གྱི་དཀྱིལ་འཁོར་

90-1-143a

གྱི་དྲོད་ཀྱིས་བདུད་རྩིའི་དཀྱིལ་འཁོར་དེ་ཞུ་བར་བསམ་པར་བྱའོ། །འདི་ཡི་སྦྱོར་བ་ཙམ་གྱིས་ནི། །དེ་ཡི་བུད་མེད་ཞུ་འགྱུར་ཏེ། །འོ་མ་ཡི་ནི་ཤིང་བཞིན་དུ། །ཞུ་བར་བྱེད་པར་ཐེ་ཚོམ་མེད། །དེ་ནས་རྒྱལ་པོའམ། 
རྒྱལ་པོའི་བློན་པོ་དབང་དུ་བྱ་བར་འདོད་ན་སྔགས་པ་མ་ཧེའི་གདོང་ཅན་གྱི་རྣལ་འབྱོར་ལ་རབ་ཏུ་གནས་ལ། དེ་ཉིད་མདོག་དམར་པོར་བསམས་ཏེ། བསྒྲུབ་བྱ་གང་དུ་གནས་པ་དེའི་སྟེང་དུ་གནས་ལ། ཕྱི་ནས་རང་གི་
ལུས་འཇམ་དཔལ་མདོག་དམར་པོ་ཕྱག་ན་ལྕགས་ཀྱུ་དང་ཞགས་པ་ཅན་ཕྱུང་སྟེ། འཇམ་དཔལ་དེས་བསྒྲུབ་བྱའི་སྙིང་ག་དང་མགྲིན་པ་བཅིངས་ནས་བཀུག་པར་བསམས་ཏེ། འཇམ་དཔལ་གྱི་སྐུ་ལ་རབ་ཏུ་གཞུག་གོ །
བསྒྲུབ་བྱ་དེ་མྱོས་པར་བསམ་པར་བྱ་སྟེ། དེའི་སྙིང་གར་ཡི་གེ་བཅུ་པའི་སྔགས་རྣམ་པར་བསམ་པར་བྱའོ། །ཡང་ཁ་དོག་དམར་པོ་སྒྲུབ་པ་པོས་ཡེ་ཤེས་ཀྱི་གཟུགས་ཀྱིས་ཡི་གེ་ལ་གཞུག་པར་བྱའོ། །དེ་དང་བསྒྲུབ་
བྱ་གཅིག་ཏུ་གྱུར་པར་བྱའོ། །བསམ་གཏན་འདིའི་རབ་ཏུ་སྦྱོར་བས་ཉི་མ་བདུན་གྱིས་འཁོར་ལོས་སྒྱུར་བ་ཡང་དབང་དུ་འགྱུར་ཏེ། ཇི་སྲིད་འཚོའི་བར་དུ་ཐེ་ཚོམ་མེད་དོ། །རབ་ཏུ་མཉམ་པར་བཞག་པའི་སྔགས་
པས་མི་གཡོ་བའི་བསམ་གཏན་གྱིས་བྱའོ། །རྒྱུད་གང་ལ་ཡང་མི་སྦྱིན་ནོ། །གལ་ཏེ་སྔགས་ཀྱང་མི་བསྟན། དཔལ་རྡོ་རྗེ་འཇིགས་བྱེད་ཆེན་པོ་མ་ཧེའི་གདོང་ཅན་གྱི་བསམ་གཏན་གང་ལ་ཡང་མི་སྦྱིན། སྨྲ་བར་ཡང་
མི་བྱ། སྔགས་ཀྱི་དབྱེ་བ་ཡང་མི་བྱ། བྲིས་སྐུ་ཡང་གང་གི་མདུན་དུ་ཡང་མི་དགྲམ་སྟེ། ཐང་ཀ་ཡང་གསང་བར་གཞག་གོ། རྒྱུད་འདི་རབ་ཏུ་སྦྱོར་བ་དང་། །བཟླས་པ་དང་། སྨྲ་བ་གཞན་སུ་ལ་ཡང་འགའ་ཙམ་ཡང་མི་
སྨྲ། གལ་ཏེ་སྨྲས་ན་དཔལ་རྡོ་རྗེ་འཇིགས་བྱེད་དང་། གཞན་ཡང་རྣལ་འབྱོར་མ་རྣམས་དང་། མཁའ་འགྲོ་མ་རྣམས་ཀྱིས་ཟའོ། །དམ་ཚིག་ཉམས་པར་འགྱུར་བས། དེའི་ཕྱིར་སྔགས་པས་སུ་ལ་ཡང་མི་སྦྱིན་ནོ། །

90-1-143b

དེ་ནས་དམ་ཚིག་མ་ཉམ་པ་དང་། རྣམ་པར་རྟོག་པ་མེད་པ་དང་། དམ་པའི་བརྟུལ་ཞུགས་ཅན་དཔའ་བོ་བླ་མ་ལ་གུས་པ་དུལ་བ་ཅན། དེ་བཞིན་གཤེགས་པའི་བསྟན་པ་ལ་ངེས་པར་འཛིན་པ། རྒྱུད་སྦས་པ། མི་ཁྲོས་
སྙིང་རྗེ་དང་ལྡན་པ། བཟླས་པ་དང་བསམ་གཏན་ལ་ཕྱོགས་པ། རྣམ་པར་སྨིན་པ་ལ་འཛེམ་པ། འདི་ལྟ་བུའི་ཡོན་ཏན་ཁྱད་པར་ཅན་ནི་སློབ་མ་བཟང་མོ་སྟེ། དཀྱིལ་འཁོར་དམ་པ་དཔལ་རྡོ་རྗེ་འཇིགས་བྱེད་ཆེན་པོ་ལ་
མཆོག་ཏུ་གུས་པ། སྙིང་རྗེ་ཆེན་པོས་ཡིད་བརླན་པ། རྣམ་པར་རྟོག་པ་མེད་པ། མཆོག་ཏུ་བླ་མ་ལ་གུས་པ། རབ་ཏུ་བརྟག་པ་ལ་ཤིན་དུ་རྣམ་པར་བསམས་ཏེ། བླ་མས་དེ་ལྟ་བུའི་སློབ་མ་ལ་དཔལ་རྡོ་རྗེ་འཇིགས་
བྱེད་ཆེན་པོའི་རྒྱུད་སྦྱིན་ནོ། །སྔགས་པས་གཞན་ལ་བྱིན་ན་དེ་དང་སློབ་མར་བཅས་ནས་དམྱལ་བར་འགྲོ་བར་ཐེ་ཚོམ་མེད་དོ། །འཇིག་རྟེན་འདིར་ནི་འཇིགས་པ་ཆེན་པོར་འགྱུར་རོ། །འཇིག་རྟེན་ཕ་རོལ་ཏུ་ནི་དམྱལ་
བར་འགྲོའོ། །དམ་ཚིག་ཀྱང་ཉམས་པར་འགྱུར་རོ། །འདི་ནི་འཇམ་དཔལ་ཞེས་བྱ་བ། དཔལ་རྡོ་རྗེ་འཇིགས་བྱེད་ཆེན་པོའི་རྣལ་འབྱོར་གྱི་རྒྱུད་ལས་བསམ་གཏན་གྱི་ལས་བསྒྲུབ་པ་བརྟག་པའི་རྟོག་པ་སྟེ་
བདུན་པའོ།། །།དཔལ་རྡོ་རྗེ་འཇིགས་བྱེད་ཆེན་པོའི་འཁོར་ལོའི་རྒྱུད་འབུམ་པ་ནས་བཏུས་ནས་ཕྱུང་བ་རྟོག་པའི་ཕྱོགས་བཀླགས་པས་འགྲུབ་པ། དཔལ་རྡོ་རྗེ་འཇིགས་བྱེད་
ཆེན་པོ་མ་ཧེའི་གདོང་ཅན་གྱི་དངོས་གྲུབ་འགྲུབ་པའི་རྟོག་པ་རྫོགས་སྷོ།། །།དཔལ་ཨུ་ཌྱན་གྱི་གནས་ཆེན་པོ་ནས་དཔལ་འཇམ་དཔལ་གྱི་རྒྱུད་ལས་ཕྱུང་བ་རྒྱུད་ཀྱི་རྒྱལ་པོ་ཆེན་པོ་དཔལ་རྡོ་རྗེ་འཇིགས་
བྱེད་ཆེན་པོ་ཞེས་བྱ་བ། བླ་མ་དམ་པའི་དཀྱིལ་འཁོར་ཆེན་པོའི་སློབ་དཔོན་དཔལ་ལ་ལི་ཏ་བཛྲས་བཏོན་ནས་མཛད་པ་རྫོགས་སྷོ།། །།རྒྱ་གར་གྱི་པཎྜི་ཏ་མཆོག་གི་དངོས་གྲུབ་བརྙེས་པ་བཱ་ར་ཕྱག་རྡུམ་གྱི་ཞལ་སྔ་ནས་དང་། 

90-1-144a

བོད་ཀྱི་ལོ་ཙྪ་བ་དགེ་སློང་རྡོ་རྗེ་གྲགས་ཀྱིས་བསྒྱུར་བའོ། ། ༄༅། །རྒྱ་གར་སྐད་དུ།  ཤྲཱི་བཛྲ་བྷཻ་ར་བ་ཀལ་པ་ཏན་ཏྲ་རཱ་ཛ།  བོད་སྐད་དུ།  དཔལ་རྡོ་རྗེ་འཇིགས་བྱེད་ཀྱི་རྟོག་
པའི་རྒྱུད་ཀྱི་རྒྱལ་པོ། ངག་གི་དབང་ཕྱུག་ལ་ཕྱག་འཚལ་ལོ། །དེ་ནས་འདིར་ནི་བཤད་བྱ་བ། །ཇི་ལྟར་འགྲོ་རྣམས་ཟད་བྱེད་ཅིང་། །སྡུག་བསྔལ་རྣམ་ཐར་བྱེད་པ་ཡི། །སྒྲུབ་པའི་ཐབས་ཆེན་མཆོག་གྱུར་པ། །གསང་
སྔགས་དེ་ལས་འབྱུང་བར་འགྱུར། །དང་པོར་རྣམ་པར་སྣང་མཛད་དེ། །དེ་དང་ཉེ་བར་ངག་དབང་ཕྱུག །རྡོ་རྗེས་འཁོར་ལོ་བསྒྱུར་བའོ། །གདོན་གྱི་བདག་དང་འབྱུང་པོའི་རྗེ། །མི་ཡི་ས་བོན་གཉིས་ལྡན་བྱ། །མཆོད་
རྟེན་སྲེག་བྱེད་མཐའ་དང་བཅས། །གཞན་དུ་ཤེས་པར་མི་འགྱུར་ཏེ། །རྡོ་རྗེ་ཅན་གྱི་མཁའ་ལ་གནས། །ཡི་གེ་འབུམ་ཕྲག་ཁྲི་བརྗོད་ན། །ཉམས་པ་ཐམས་ཅད་སེལ་བྱེད་ཅིང་། །ཞི་དང་རྒྱས་དང་དབང་མངོན་སྤྱོད། །གསོད་
དང་སྐྲོད་དགུག་དབྱེ་རིངས་དང་། །དམན་པར་བྱེད་དང་རྒྱལ་སྲིད་སོགས། །ཐོབ་པ་ཉིད་ལ་ཐེ་ཚོམ་མེད། །དུར་ཁྲོད་ཚང་ཚིང་ཁྲོན་ངོགས་རྩུབ། །ཤིང་གཅིག་ཁང་སྟོང་མཚན་གཅིག་དབེན། །གང་འདོད་གནས་སུ་བསམ་
གཏན་བརྩམ། །དེ་ནས་བཅོམ་ལྡན་འདས་འཕྲུལ་པ་ཐམས་ཅད་ལ་ཁྱབ་པ་མེ་ལོང་ལྟ་བུ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྐུ་དང་ཡེ་ཤེས་ཐམས་ཅད་ལ་ཁྱབ་པར་བྱ་བའི་ཕྱིར། སྐུ་མདོག་དཀར་པོ་
ཞལ་ལྔ་དང་ལྡན་པར་བྱས་ནས། འཇིག་རྟེན་པ་ཐམས་ཅད་ལ་གཟིགས་ནས། རང་གི་རིགས་ཀྱི་ཡི་གེ་ཉིད་བརྗོད་པས། སྐུ་དང་གསུང་དང་ཐུགས་དང་ཡོན་ཏན་དང་ཕྲིན་ལས་དང་། ཡེ་ཤེས་ཀྱང་གཅིག་གི་ངོ་བོར་
སྤྲུལ་པའི་སྐུར་གྱུར་ཏོ། །ཀྱེ་མ་བཅོམ་ལྡན་རྡོ་རྗེ་ཆེ། །དོན་རྣམས་བསྐྱེད་པ་ཡང་ཉིད་དོ། །མཁའ་དཀྱིལ་འོད་ཀྱིས་འགེངས་འགྱུར་བ། །སླར་ཞིང་ཁ་དོག་ལྔ་ལྡན་པ། །ས་བོན་སྔགས་ཀྱིས་བསྐུལ་བ་ཡི། །འོད་ཀྱི་རྩེ་

90-1-144b

ཕྲག་ཐུབ་པའི་སྐུ། །ཀུན་ཀྱང་སངས་རྒྱས་གནས་ལས་སྐྱེས། །རང་ལ་ཞུགས་པས་སྐུ་རྫོགས་འགྱུར། །ཞལ་དྲུག་ཁྲོ་གཉེར་རབ་བརྗིད་པ། །མ་ཧེའི་ཞལ་ལྡན་སྟེང་གནས་པ། །འཇམ་དཔལ་ཞལ་ནི་འཛུམ་བཅས་བཞུགས། །ལྷག་མ་
དམར་དང་སེར་དང་སྔོ། །དུ་བའི་མདོག་མཚུངས་གྱེན་སྐྲར་ལྡན། །ཐོད་པ་སྐམ་རློན་རྒྱུ་མ་སྦྲུལ། །རུས་པ་རྡོ་རྗེའི་ཕྲེང་བས་བརྒྱན། །གླང་ཆེན་སྟག་ལྤགས་གྱོན་ནས་ནི། །ཧཱུྃ་ཕཊ་གླུར་ལེན་གད་མོ་ཅན། །ནམ་མཁའི་ལུས་ཅན་ཁྲོ་བོའི་
སྤྲིན། །ཡང་དང་ཡང་དུ་སྤྲོ་བྱེད་པའི། །ཕྱག་དྲུག་རབ་ཏུ་བརྗིད་པ་སྟེ། །དབྱུག་པ་ཐོ་བ་གཏུན་ཤིང་དག །གཡས་པའི་ཕྱག་གིས་རིམ་བཞིན་འཛིན། །བེ་ཏ་ལི་དང་ལྕགས་ཀྱུ་དང་། །ཞགས་པ་གཡོན་པའི་ཕྱག་གིས་འཛིན། །པད་མ་
ཉི་མ་མ་ཧེ་དང་། །གཤིན་རྗེའི་སྟེང་ན་འགྱིང་བག་ཅན། །ཞབས་དྲུག་གཡས་བརྐྱང་གར་གྱིས་གནས། །འཇིག་རྟེན་བདག་པོ་མཐར་མཛད་པའོ། །དེ་ལྟར་གང་ཞིག་དད་པ་དང་། །བློ་ལྡན་གཡོ་སྒྱུ་རབ་སྤངས་ཤིང་། །ལེགས་པར་དབང་རྣམས་
ཐོབ་བྱས་ནས། །རྡོ་རྗེ་སློབ་དཔོན་མཉེས་བྱེད་པས། །ཡང་ནས་ཡང་དུ་དྲན་བྱེད་ན། །བརྟན་པ་ཆེན་པོ་ཐོབ་པར་འགྱུར། །ལྷ་ཡི་དགེ་འདུན་ང་ལ་ཉོན། །དཔའ་བོ་ཆང་ལ་རབ་དགའ་ཞིང་། །ཤ་ཆེན་རྟག་ཏུ་མུར་བྱེད་ན། །ལས་རྣམས་
དེ་ཡིས་མྱུར་དུ་འགྲུབ། །སྐུ་ནི་དུ་མ་འཕྲོ་བྱེད་ཅིང་། །སྐུ་ལ་སྐུ་རྣམས་ངེས་ཐིམ་བྱེད། །ཐམས་ཅད་སྒྱུ་མ་ཉིད་ཤེས་པས། །འཇིག་རྟེན་རྣམས་སུ་ཡིད་སད་བྱེད། །ཁོང་སྟོང་རྩ་ནི་ཀ་བ་སྟེ། །རྒྱུན་ཏུ་བྱང་ཆུབ་སེམས་འཛག་བྱེད། །ཆུ་སྐྱེས་
དམར་པོ་ཁ་སྦྱར་གཉིས། །ཡན་ལག་གཉིས་ཀྱིས་ལེགས་པར་བཅུན། །ཤེས་པ་འཕེལ་བ་མེ་དང་རླུང་། །ཉི་མ་ཟླ་བ་ཐབས་ལྡན་དང་། །ཤེས་རབ་ལྡན་པར་ཤེས་པར་བྱ། །གཉིས་པོ་དེ་ཉིད་རྣམ་སྤངས་ན། །ཁོང་དུ་ཆུད་
པར་མི་འགྱུར་རོ། །ཆུ་སྐྱེས་ཁ་སྦྱོར་ལ་བརྟེན་ཏེ། །གསུམ་གནས་པ་ཡི་ཏིང་འཛིན་ལ། །རྡོ་རྗེ་ཆོས་ཀྱིས་རྒྱས་བཏབ་པའི། །ཐབས་དང་ཤེས་རབ་གྲོལ་བའི་རྒྱུ། །བློ་ལྡན་འབད་པས་ཤེས་པར་འགྱུར། །དེ་ཕྱིར་དེ་ལ་བརྩོན་པར་བྱ། །

90-1-145a

ཆོས་རྣམས་ཆོས་ཉིད་དབྱེར་མེད་པས། །སྟོང་པ་ཉིད་ཀྱི་ཡེ་ཤེས་ཆེ། །མི་ཤིགས་རྟོག་བྲལ་མཚན་མ་མེད། །བདེ་ཆེན་ཡེ་ཤེས་རྡོ་རྗེའི་སྐུར། །ཡེ་ཤེས་མི་རྟོག་རྟོག་པ་བྲལ། །རྟོག་པའི་མཚན་མ་ཐམས་ཅད་
བསྲེག །སྤྲོས་པའི་མཚན་མ་མཐའ་དག་ནི། །ཇི་སྙེད་སྒྱུ་མའི་རྣམ་པ་ཤེས། །དེ་ཉིད་ཤེས་ནས་གྲོལ་བའོ། །མ་ཤེས་པས་ནི་ཕྱིར་ཞིང་འཁོར། །འཇིག་རྟེན་སྐྱེ་བོ་བློ་ལྡན་འགས། །ངེས་པར་རྟོག་པ་ཐབས་ཀྱི་མཆོག །སྡུག་བསྔལ་
ཆེན་པོ་རབ་འཇིགས་ནས། །བདེ་བ་འདོད་པས་ནན་ཏན་བྱ། །དཔལ་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི་རྒྱལ་པོ་ལས། ཐབས་དང་ཤེས་རབ་ཀྱི་བསམ་གཏན་བསྟན་པའི་ལེའུ་སྟེ་དང་པོའོ།། །། དེ་ནས་ཡང་དག་བཤད་བྱ་བ། །
སྔགས་གྲུབ་པ་ལས་བྱུང་བ་ཡི། །ལས་རྣམས་འདིར་ནི་ཤེས་བྱ་སྟེ། །དེར་ནི་ལྷ་ཡི་སྐུ་ཡང་སྦྱར། །ཞི་སོགས་བཟླས་པའི་རིམ་པ་ལ། །རྡོ་རྗེའི་དབུས་སུ་རྡོ་རྗེ་ནི། །ཉི་ཟླ་ལ་བརྟེན་ཡི་གེ་ཡི། །ཕྲེང་བ་ཁ་དོག་ལྔར་ཤེས་པ། །སྐྱེན་
བུལ་སྤངས་ནས་བཀླག་པ་ནི། །མཁས་པའི་བཟླས་པའི་རིམ་པའོ། །དྲག་པོའི་ལས་རྣམས་སྒྲུབ་པ་ལ། །ཉོན་མོངས་གཅོད་པའི་འཁོར་ལོ་ནི། །སེར་པོ་རྩེ་རྩིབས་བཅུ་པ་ལ། །འོད་ཟེར་སྣ་ཚོགས་འཕྲོ་བ་བསམ། །ཞི་བར་འདོད་
པའི་སྐྱེས་བུ་དེས། །སེམས་ནི་ཡང་དག་མཉམ་གཞག་ནས། །སྔགས་ཀྱི་འོད་ཀྱང་འགྲོ་གཞན་ལ། །ཕན་པའི་ཡིད་དང་ལྡན་པར་བྱ། །གྲོ་ཁ་རས་དང་ཤིང་ཤུན་ལ། །གུར་གུམ་གི་ཧང་དྲི་རྣམས་ཀྱིས། །མཆོད་རྟེན་རིམ་པ་
ལྔར་ལྡན་ཞིང་། །གདུགས་དང་འཁོར་ལོ་ལྡན་པར་བྱ། །སྒྲུབ་པ་པོ་ཡི་མིང་དང་རུས། །དེ་ཡི་བུམ་པའི་ནང་དུ་བྲི། །ཡེ་དྷརྨཱ་ལ་སོགས་པ་ཡི། སྔགས་ཀྱིས་གཡས་ནས་བསྐོར་བར་བྲི། །རབ་ཏུ་གནས་པར་བྱས་ནས་ཀྱང་། །
ལུས་སམ་མགུལ་ལམ་གང་བདེར་གཞག །དེས་ནི་གདོན་དང་བྱད་སྟེམ་དང་། །རིམས་དང་ཡམས་རྣམས་སེལ་བར་བྱེད། །གང་ཞིག་ཡུལ་རྣམས་གཞོམ་འདོད་ན། །ཧཱུྃ་གི་ས་བོན་དང་ལྡན་པར། །མིང་ཡིག་ཙམ་པོ་བྲི་བར་བྱ། །

90-1-145b

སོ་ཕག་ཕྱེ་མ་ལྡོང་རོས་དང་། །བབ་ལ་མ་ཧེ་ཁྲག་གིས་བརྫིས། །ཟླ་གམ་གཉིས་པའི་གཟུགས་བྱས་ཏེ། །བར་དུ་གང་འདོད་བསྒྲུབ་བྱ་ཡི། །གཟུགས་བརྙན་སོར་བརྒྱད་པ་ཡི་ཚད། །བྱས་ལ་གན་རྐྱལ་དུ་གཞག་ལ། །མ་ཧེ་གདོང་
གི་སྦྱོར་བ་ཡིས། །ཁྲི་ཕྲག་གཅིག་ཏུ་སྔགས་བཟླས་ནས། །དུམ་བུ་དུམ་བུར་གཏུབས་བྱས་ཏེ། །ཆུ་བོའི་གཞུང་དུ་དོར་བྱས་ན། །སྐད་ཅིག་དེ་ལ་དེ་དབང་འགྱུར། །བྱ་རོག་འུག་པའི་གཟུགས་བྱས་ཏེ། །མ་ནུ་མ་ལི་རོ་ཙ་ནས། །
ཁྱོ་ཤུག་བསྒྲུབ་བྱའི་མིང་བྲིས་ཏེ། །གཤིན་རྗེའི་ཕྱོགས་བལྟས་གསང་སྔགས་གདོན། །རྐང་པ་གཡོན་པས་མནན་ནས་ནི། །མི་ཡི་རྗེ་ངར་ཕུར་པས་གདབ། །སྐད་ཅིག་ཙམ་ལ་དེ་དག་འབྱེ། །དེ་ནས་འདིར་ནི་བསད་པ་ཡི། །
ཆོ་གའི་རིམ་པ་བཤད་པར་བྱ། །ཞལ་དྲུག་ཕྱག་དྲུག་ཞབས་དྲུག་གམ། །ཡང་ན་ཞལ་གཅིག་ཕྱག་བཞིའམ། །ཞལ་གཅིག་ཕྱག་གཉིས་པ་ཡང་རུང་། །མ་ཧེའི་གདོང་གི་སྦྱོར་བ་ཡིས། །ཁྲག་རྣམས་སྣ་ཚོགས་ཐ་དད་དང་། །བསྒྲུབ་
བྱའི་རྗེས་དང་དུག་གི་རིགས། །རྟ་དང་མ་ཧེ་བོང་བུའི་ཆུས། །སྦྲུས་པའི་བསྒྲུབ་བྱའི་ལིང་ག་བྱ། །ལུས་ལ་ཚེར་མས་གཟུགས་བྱ་ཞིང་། །ཏིལ་མར་གྱིས་ཀྱང་བསྐུ་བར་བྱ། །ཡང་ནི་ཤིང་ལོ་གྲོ་ཁ་འམ། །དུར་ཁྲོད་རས་སམ་ཤུན་པ་
ལ། །རང་ཉིད་གཅེར་བུ་སྐྲ་བཤིག་ནས། །ལུས་ནི་ཐལ་བས་བྱུགས་བྱས་ཏེ། །མངོན་སུམ་ཁྲོས་ནས་ཤ་ཆེན་བཟའ། །རབ་ཏུ་ཞིམ་པའི་ཆང་འཐུང་ཞིང་། །ནག་པོའི་ཚེས་ཀྱི་མཚན་ཕྱེད་དུས། །འཁོར་ལོ་བྲི་བ་བརྩམ་པར་བྱ། །ལེང་
ཚེ་བཅུ་གཉིས་འཁོར་ལོ་ནི། །ཡུངས་ཀར་ཏིལ་དང་སྐགས་ཁུ་དང་། །རྟ་དང་མ་ཧེ་ར་ཁྱི་ཁྲག །བྱ་རོག་འུག་པའི་སྒྲོ་ཡིས་བྲི། །ཡི་གེ་ཡ་ཡི་ལྟོ་བར་ཡང་མིང་དང་རུས་སུ་ལྡན་པར་བྲི། །ཕྱོགས་བཞིར་ཡི་གེ་བཅུ་པ་ནི། །མིང་
དང་བཅས་པ་བྲི་བར་བྱ། །བརྒྱད་པོ་དག་ལ་རིམ་པ་བཞིན། །ཡི་གེ་འདི་དག་བྲི་བར་བྱ། །ཨོཾ་མུ་ས་ལེ་ཙུཪྞ་ར་ག་ཙར་ན་ཙུ་ཤ་ན་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ། ཡི་གེ་ཡ་ལ་བསྐོར་ནས་ནི། །བསྒྲུབ་བྱ་གཟུགས་དང་ལྡན་པར་བྲི། །དེ་ཡི་

90-1-146a

མུ་ཁྱུད་དག་ལ་ནི། །ཡི་གེ་བཅུ་པ་མིང་བཅས་བྲི། །ཕྱོགས་བཞིར་རྩེ་གསུམ་རྡོ་རྗེས་མཚན། །དེ་བཞིན་རྫས་རྣམས་མ་ལུས་པས། །འཁོར་ལོ་ལྟོ་བར་ལྡན་པ་བྲི། །གཤིན་རྗེའི་གཟུགས་ནི་རལ་གྲི་དང་། །
དབྱུག་པ་འཛིན་པ་བྲིས་ནས་ནི། །དེ་དང་དེ་གཉིས་ལྟོ་སྦྱར་ལ། །མཚན་ངན་ཐོད་པའི་ནང་དུ་གཞུག །ཚ་གསུམ་སྐེ་ཚེ་དུག་མུ་ཟི། །རོ་ཉེས་བཀང་ནས་དཀྱིལ་འཁོར་ནི། །གྲུ་གསུམ་དབུས་སུ་གཞག་པར་བྱ། །ཡུངས་དང་
བྲ་བོ་སཱ་ལུ་ནག །ཛ་བྷི་བྲ་བ་སོགས་རྣམས་ལ། །གསང་སྔགས་རྒྱལ་པོ་བརྗོད་བྱས་ཏེ། །དྲོའམ་དུ་བ་འཐུལ་བར་དུ། །རིམས་དང་རིམས་ཀྱི་ཁྲག་རྣམས་ནི། །མ་ལུས་ཟད་པར་འཐུང་བ་ཡིས། །མ་ཡེངས་པར་ནི་བསམ་
གཏན་བྱ། །ཡང་ན་བསྒྲུབ་བྱ་ཟ་བར་མཐོང་། །ཤིང་གཅིག་རྩར་ནི་རེངས་པ་དང་། །མལ་གྱི་འོག་ཏུ་ཞ་ཞིང་ལྐུགས། །ཆུ་མདོར་འབྱེད་ཞིང་རི་རྩེར་བསྐྲད། །གསད་པ་མེ་ཐབ་འོག་ཏུ་སྦ། །དགུག་པ་ལ་ནི་སྒོ་ཁང་འོག །ལྷ་
འམ་འཁོར་ལོ་སྒྱུར་བའོ། །བདེ་གནས་རྣམས་ཀྱིས་དབང་དུ་འགྱུར། །མར་ཁུ་ཆེན་པོ་ཐོད་པ་ཡི། །ནང་དུ་བླུགས་ནས་བསྐོལ་བྱས་ཏེ། །བཞར་བས་མིག་ལ་བྱུག་བྱེད་ན། །མངོན་ཤེས་དེ་ཉིད་མྱུར་དུ་འཐོབ། །རིགས་ལྡན་རྒྱལ་
པོ་ལས་རྙེད་ཅིང་། །མདོག་ལྡན་ལང་ཚོ་གསེར་བཀུག་ལ། །ཙན་དན་འདེ་གུ་མང་བྱས་ཏེ། །ལས་ཀྱི་སྦྱོར་བས་དེ་ཉིད་བཅིང་། །ཡང་ན་མེ་ལ་གདུང་བས་འགྲུབ། །ཨོཾ་བཛྲ་ཀྲོ་དྷ་ཡ་མ་རཱ་ཛ་བཛྲ་ཀཱི་ལི་ཀཱི་ལེ། ཧ་ན་ཧ་ན་མ་ར་ཡ་
ཕཊ། ཅེས་བྱའི་གསང་སྔགས་བརྗོད་བྱས་ལ། །རུས་པའི་ཕུར་པས་གདབ་པར་བྱ། །གསལ་ཤིང་ལ་བཙུག་སྐྱེས་བུ་ཡི། །རྫས་ལ་བརྟེན་ཏེ་བསྒྲུབ་པར་བྱ། །ཏིལ་མར་བྱུགས་ལ་ཐོད་པས་གཞར། །མར་མེར་བྱས་པའི་
དུད་པ་ཡིས། །མིག་རྣོན་དག་ནི་འགྲུབ་པར་འགྱུར། །གསང་སྔགས་རྒྱལ་པོ་ཐོགས་མེད་ལ། །བཏེན་པས་ཐོབ་བྱ་མང་མོད་ཀྱང་། །འདིར་ནི་བརྗོད་པ་ཅི་ཞིག་དགོས། །ཡང་ནི་འདི་ལྟར་ཤེས་བྱ་སྟེ། །རང་ཉིད་སྔགས་དང་
90-1-146b

ཏིང་འཛིན་ལྡན། །བརྩོན་ཆེན་གཞན་དུ་མ་ཡེངས་པས། །གང་དུ་བརྩམས་པ་དེ་འགྲུབ་འགྱུར། །སྨད་འཚོང་རང་བྱུང་ཉིད་ཀྱིས་ནི། །སྔོན་བསྟན་ཙཀྲ་ལེགས་བྲིས་ཏེ། །ལིང་གའི་སྙིང་གར་བཅུག་བྱས་ལ། །རང་མདུན་ཁྲག་གི་
ཟླ་གམ་སྟེང་། །ཁྲག་གིས་བྱུགས་པའི་སྟེང་དུ་གཞག །མི་འམ་རྒྱལ་པོའི་བུ་མོ་དག །དགུག་དང་དབང་གི་ཡི་གེ་ཡིས། །དེ་ཉིད་དུ་ནི་ངེས་པར་འགྱུར། །ཉལ་སའི་འོག་ཏུ་མནན་པར་བྱ། །མི་གླང་ར་ཁྱི་བསེ་ཕག་ཁྲག །
འཁོར་ལོ་བྲིས་ནས་ལིང་ག་ཡི། །མགྲིན་པར་བཅུག་ནས་བྱ་རོག་གི། །ཁྲག་གིས་ཁྲག་སྐྱུག་སྔགས་བྲིས་ནས། །ཡི་གེ་དེ་ལྡན་ཐོད་པ་རུ། །བཅུག་ནས་གསང་སྔགས་མང་བཟླས་ཏེ། །དུར་ཁྲོད་མེ་ཐབ་འོག་གཞག་ན། །
ཁྲག་སྐྱུག་པ་ལ་ཐེ་ཚོམ་མེད། །བསྲོས་ན་ཚ་བའི་ནད་ཀྱིས་འཆི། །སྦལ་ཁྲག་ཕ་ཝང་གླད་པ་ཡིས། །འཁོར་ལོ་དེ་ཉིད་ལེགས་བྲིས་ནས། །ལིང་གའི་མཆན་ཁུང་གཡོན་བཅུག་ལ། །གཡས་གཡོན་གླང་ཁྲག་
སྦལ་ཁྲག་བྱུག །ལིང་གའི་ཕྱོགས་སུ་རང་ཉིད་ཀྱི། །རྐང་པ་གཡོན་པའི་མཐེ་བོས་མནན། །དེ་ཚེ་བཟླས་པ་མང་བྱས་ནས། །རྒྱ་གྲམ་ལམ་དུ་མནན་ལ་གཞག །དེ་ལས་ཟློག་པ་བྲིས་ནས་ནི། །ཤིང་གཅིག་ཁོང་པར་
སྦས་ན་རེངས། །རྔ་མོ་བྱ་རོག་རྒན་པོའི་ཁྲག །འཁོར་ལོ་བྲིས་ནས་ལིང་ག་ཡི། །རྐང་གཉིས་བར་བཅུག་རང་མདུན་དུ། །ཁྲག་གིས་རྔ་མོ་གཟུགས་བྲིས་ཏེ། །དེ་ཡི་སྟེང་གཞག་རང་ཉིད་ཀྱིས། །རླུང་གི་བསམ་
གཏན་ངེས་ལྡན་ན། །བསྐྲད་པ་ཉིད་དུ་ཐེ་ཚོམ་མེད། །རི་བོའི་རྩེ་ལ་འཛེགས་ཏེ་སྦ། །ནེའུ་ལེ་སྦྲུལ་རྟ་མ་ཧེ་དང་། །བྱ་རོག་འུག་པའི་ཁྲག་གིས་ནི། །ཁྱོ་ཤུག་རྐང་ཡའི་རྗེས་སྦྲུས་པའི། །ལིང་ག་སོར་བརྒྱད་པར་བྱས་ཏེ། །
ཁྲག་དེས་བྲིས་པའི་འཁོར་ལོ་དག །སྙིང་གར་བཅུག་པ་གཉིས་བྱས་ཏེ། །ནེའུ་ལེ་གཟུགས་བྱས་སྟེང་དུ་གཞག །ལག་གཉིས་རྟ་དང་མ་ཧེ་ཡི། །རུས་པས་བརྡུང་ཞིང་གསང་སྔགས་ཟློས། །རྩེ་འདྲུད་ཤིང་རྩར་སྦས་ན་འབྱེར། །

90-1-147a

ཙན་དན་དཀར་པོས་ལེགས་བྲིས་ནས། །གསེར་སོགས་རིན་ཆེན་རྫས་སུ་དྲིལ། །མདུན་དུ་ཟླ་བའི་གཟུགས་སྟེང་དུ། །གཞག་ལ་ཉིན་རེའི་བསྐོར་བ་ནི། །ཇི་སྲིད་བྱས་ན་བསྲུང་བར་ངེས། །སྤྱི་བོར་བཏགས་
ན་གཡུལ་ལས་རྒྱལ། །རྐང་པར་བཏགས་ན་ཆུ་སྟེང་འགྲོ། །བ་ཡི་འོ་མས་ཁྲུས་བྱས་ཏེ། །ཀུ་ཤ་བ་མར་སོགས་མཆོད་ན། །གསོལ་བཏབ་ནད་རྣམས་ཐམས་ཅད་སྲུང་། །དེ་ནས་བཅོམ་ལྡན་འདས་ལས་ཕྲ་བ་ཐམས་ཅད་ལས་
རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ལས་ཐམས་ཅད་ཀྱི་རྗེས་སུ་འགྲོ་བའི་སྔགས་འདི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །མ་ར་ཡ་ཕཊ་ཅེས་བསད་པའི་འོ། །བི་དྭེ་ཥ་ཡ་དབྱེ་
བའི་འོ། །ཨུཙྪ་ཊ་ཡ་བསྐྲད་པའིའོ། །མོ་ཧ་ཡྃ་རྨོངས་པའི་འོ། །བ་ཤྃ་ཀུ་རུ་དབང་དུ་བྱ་བའི་འོ། །སྟམྦྷ་ཡ་མནན་པའིའོ། །ཨཱ་ཀཪྵ་ཡ་ཛཿདགུག་པའིའོ། །ༀ་ཧྲཱིཿསྭཱ་ཧཱ་མཆོད་པའིའོ། །ཨི་དྃ་གྷ་སྭཱ་ཧཱ་ཞལ་བསིལ་
གྱིའོ། །ཨོཾ་དུཥྚ་སྭཱ་ཧཱ་དྲིའི་འོ། །ཨོཾ་བྷོ་ཡྃ་ཛཿཛ་མེ་ཏོག་གིའོ། །ཥྚི་ཧ་ཧེ་ཕཊ་ཕཊ། བདུག་པའིའོ། །དཱི་པོ་དྷ་ན་མ་ཡ་སྭཱ་ཧཱ་མར་མེའིའོ། །ཨོཾ་བཛྲ་ནཻ་བིདྱ་ཨཱཿཧཱུྃ་སྭཱ་ཧཱ་ཞལ་ཟས་ཀྱིའོ། །ཨོཾ་ཀཱ་ལ་རུྰ་པ་སཏྭ་ད་མ་
ཀ་མ་ཧཱ་བྷཱུ་ཏ་པ་ཏི། ཨི་དྃ་བ་ལི་གྲྀཧྞ་པ་ཡ་གྲྀཧྞ་པ་ཡ་སྭཱ་ཧཱ་གཏོར་མའིའོ། །ཨོཾ་ཧྲཱིཿཡ་མ་རཱ་ཛ་ཨེ་ཧྱེ་ཧི་ཨཱ་གཙྪ་ཨཱ། གཙྪ་བྷ་ག་བན་སརྦྦ་ས་མེ་ད་མཛྫ། རུ་དྷི་ར་པྲི་ཡེ་བྷཀྵ་བྷཀྵ། མ་མ་སརྦྦ་སཏྭ་ད་མ་ཀ །
ཀརྨྨ་ཀུ་རུ་སིདྷིམྨེ་སྭཱ་ཧཱ་ལྷ་སྤྱན་དྲང་བའིའོ། །ཨོཾ་ཧྲཱིཿབཛྲ་ཛ་ཡེ་སུ་ཛ་ཡེ་མ་ཧཱ་བཛྲ་ཛ་ཡེ་མུ་ནི་བཛྲ་མུཿ། ལྷ་ལ་སོགས་པ་གཤེགས་སུ་གསོལ་བའིའོ། །དེ་ནས་རྡོ་རྗེ་འཛིན་པ་ཉིད་ཆོས་ཐམས་ཅད་ཀྱི་རྗེས་སུ་འགྲོ་བ་དང་། 
ལྡོག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གསང་སྔགས་ཡོངས་སུ་རྫོགས་པའི་ཕྲིན་ལས་འདི་ཉིད་བཀའ་སྩལ་ཏོ། །ནམ་མཁའི་དབྱིངས་ཀྱི་དབུས་གནས་པར། །ཧཱུྃ་ལས་ཡོངས་སུ་རྫོགས་པ་ཡི། །

90-1-147b

རྡོ་རྗེ་འཇིགས་བྱེད་བསམ་པར་བྱ། །དམར་པོ་ཞལ་གཅིག་ཕྱག་གཉིས་པ། །ཤེས་རབ་མོ་དང་མཉམ་དུ་སྦྱོར། །དབྱུག་པ་ཐོད་ཁྲག་ཕྱག་ན་འཛིན། །མ་ཧེ་པད་མ་ཉི་མ་ལ། །གཡོན་བརྐྱང་བ་ཡི་ཚུལ་གྱིས་བསྒོམ། །
ཨོཾ་ཡ་མཱན་ཏ་ཀྲྀ་ཧཱུྃ་ཕཊ། གསང་སྔགས་རྒྱལ་པོ་འདི་བཟླས་ན། །འདོད་པའི་དངོས་གྲུབ་ཐམས་ཅད་འབྱུང་། །ནམ་མཁའི་དབྱིངས་སུ་དབུས་གནས་པར། །ཡ་ཡིག་སྔོན་པོ་ལས་སྐྱེས་པའི། །ཁྲོ་བོ་རྡོ་རྗེ་འཇིགས་བྱེད་ནི། །
པད་མ་ཉི་མའི་གདན་སྟེང་ན། །སེམས་དཔའི་སྐྱིལ་ཀྲུང་གིས་གནས་པའི། །གྲི་གུག་པི་དྷི་པ་ལ་དང་། །དགྲ་སྟ་དང་ནི་ཐོད་ཁྲག་དང་། །ཕྱག་བཞི་པོ་ནི་རིམ་པས་འཛིན། །མ་ཧེ་ནག་པོ་ཞལ་སྟེང་ན། །འཇམ་དཔལ་ཞལ་
ནི་སེར་ཞིང་འཛུམ། །དཔའ་བོ་ཆེན་པོ་རང་ཉིད་བསྒོམ། །རབ་ཏུ་ཞིམ་པའི་ཆང་བཏུང་ཞིང་། །ཤ་ཆེན་དག་ཀྱང་མུར་བར་བྱ། །མཚན་མོ་དུར་ཁྲོད་རྒྱུ་བྱེད་ཅིང་། །རྟག་པར་གསང་སྔགས་བཟླ་བར་བྱ། །ཐིག་ལེ་འདྲེན་པའི་
རྣལ་འབྱོར་ནི། །བསྒྲུབ་བྱའི་ཕྱོགས་སུ་བསམ་པར་བྱ། །ལས་རྣམས་མྱུར་དུ་འདིས་འགྲུབ་བོ། །ཡང་ན་འདི་ལྟར་ཤེས་བྱ་སྟེ། །མ་ཧེ་གདོང་གི་སྦྱོར་བ་ཡིས། །སྐུ་ཡི་ཁ་དོག་སོ་སོར་ཤེས། །ཁྱད་པར་དུ་ཡང་གསད་པ་ལ། །
དམར་པོ་མ་ཧེའི་ཞལ་ཅན་ནི། །རྩེ་གསུམ་ལྕགས་ཀྱུ་འཛིན་པ་དེས། །མ་ཧེ་ཤ་སྟེང་བསམ་བྱས་ན། །ཁྲག་འདྲེན་པ་ཡི་མཆོག་ཏུ་གསུངས། །རས་འགའ་སྐུ་ལ་ཁྲོ་བོ་ནི། །ལྕགས་ཀྱུ་འཛིན་པ་གྲངས་མེད་སྤྲོ། །ཟླ་བ་སྤྱང་ཀིས་
ཟིན་དུས་སུ། །བྱི་ལའི་སྡེར་མོ་ར་སྙིང་དང་། །བྱ་ཡི་ཁྲག་དང་མི་རུས་བསྲེས། །གང་ལ་ཕོག་པ་སྨྱོ་བར་འགྱུར། །དཔལ་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི་རྒྱལ་པོ་ལས་སྦྱོར་བའི་ལེའུ་སྟེ་གཉིས་པའོ།། །། 
དེ་ནས་ཡང་དག་བཤད་བྱ་བ། །སྒྲུབ་པར་བྱེད་པའི་རྣལ་འབྱོར་པས། །དུར་ཁྲོད་རས་སམ་དཔའ་བོའི་གོས། །ཡང་ན་མཚན་གྱི་ཁེབ་མ་ལ། །རྣམ་སྣང་མཛད་དང་རྡོ་རྗེ་ཆུས། །དཔའ་བོའི་ཁྲག་དང་ཆང་དང་དུག །གོ་རོ་ཙ་ནས་རས་ཚོས་

90-1-148a

བྱ། །ལེགས་པར་དམ་པོར་དྲུད་བྱས་ཏེ། །ལུས་ངག་ཡིད་ཀྱི་གནས་སུ་ནི། །བདུད་རྩི་ལྔ་དང་ལྡན་པའི་ཆུས། །ཡི་གེ་དང་ཨཱཿཧཱུྃ་བྲི། །སྐྲ་ཕྱེད་དུར་ཁྲོད་སོལ་བ་དང་། ཁྲག་ཆེན་ལྡོང་རོས་བབ་བླ་ཡིས། །དབང་ཐོབ་དམ་ཚིག་སྲུང་
བྱེད་ཅིང་། །ཤིན་དུ་གསང་ལ་དམ་པ་ཡི། །རི་མོ་མཁན་ནི་བརྩོན་ལྡན་དེས། །རྒྱུད་ཀྱི་དོན་ལ་མཁས་བྱས་ནས། །ནག་པོའི་ཚེས་ཀྱི་མཚན་ཕྱེད་དུས། །གསང་བའི་གནས་སུ་རབ་ཞུགས་ནས། །བཅོམ་ལྡན་རྡོ་རྗེ་འཇིགས་
མཛད་བྲི། །རྩ་བ་མ་ཧེ་ཁྲོས་པའི་ཞལ། །དེ་སྟེང་འཇམ་དཔལ་འཛུམ་པའི་ཞལ། །ལྷག་མ་དམར་དང་སེར་དང་སྔོ། །དུ་བའི་མདོག་མཚུངས་གྱེན་སྐྲ་ཅན། །རབ་ཏུ་བརྗིད་ཅིང་ཁྲོ་བོའི་ཞལ། །དྲུག་དང་ལྡན་པའི་སྐུ་ལུས་ཆེ། །
ཐོད་པ་སྐམ་རློན་རྒྱུ་མ་སྦྲུལ། །རུས་པ་རྡོ་རྗེ་ཕྲེང་བས་བརྒྱན། །གླང་ཆེན་སྟག་ལྤགས་གྱོན་ནས་ནི། །པད་མ་ཉི་མ་མ་ཧེ་ལ། །གཤིན་རྗེ་མནན་ནས་ཞབས་དྲུག་གིས། །གཡོན་བརྐྱང་གཡས་བསྐུམ་གར་གྱིས་འགྱིང་། །
ཕྱག་དྲུག་གཡས་ཀྱི་དང་པོ་ན། །རྩེ་གཅིག་གཉིས་པ་ཐོ་བ་སྟེ། །གསུམ་པ་གཏུན་ཤིང་མཁའ་ལ་འཕྱར། །དགྲ་སྟ་ལྕགས་ཀྱུ་ཞགས་པ་ནི། །གཡོན་པའི་ཕྱག་གིས་འཛིན་པ་བྲི། །ནམ་མཁའི་མདོག་ཅན་ཐལ་བས་བྱུགས། །
སྐུ་ལ་ཁྲོ་བོ་དུ་མ་འཕྲོ། །སྣ་ཚོགས་མཆོད་པའི་ལྷ་མོས་བསྐོར། །ལེགས་པར་དེ་ལྟར་བྲིས་པ་ཡི། །རྒྱབ་དང་ཕྱོགས་རྣམས་ཐམས་ཅད་དུ། །དུར་ཁྲོད་ཆེན་པོས་བསྐོར་བར་བྲི། །མགོ་རྡུམ་རྒྱུ་མ་མཁའ་ལ་ཁྱེར། །རྐང་རྡུམ་
ལག་རྡུམ་རོ་ལངས་དང་། །ཝ་དང་སྤྱང་ཀི་གཏུམ་པོ་དང་། །མཁའ་འགྲོ་ཕོ་མོ་ཤ་ཟའི་ཚོགས། །བྱ་དང་གཅན་གཟན་སྣ་ཚོགས་བྲི། །སྐྱི་བུང་རབ་ཏུ་འཇིགས་བྲིས་ནས། །དེར་ནི་བསྒྲུབ་པ་པོ་ཡང་བྲི། །གྲི་ཐོད་བཟུང་ནས་ཤ་
ཆེན་མུར། །གོས་ནག་གྱོན་ནས་ཁྲག་ཆེན་འཐུང་། །རྟ་དང་མ་ཧེ་རུས་པ་ཡི། །ཕྲེང་བ་བཟུང་ནས་གསང་སྔགས་འདོན། །བཅོམ་ལྡན་འདས་ལ་ལྟ་བར་བྲི། །དེ་ལྟར་བྲིས་ནས་ཆང་དང་ཁྲག །ཤ་ཆེན་གོ་རོ་ཙ་ནས་མཆོད། །

90-1-148b

མཉམ་གཞག་ལྷ་ཡི་དགེ་འདུན་དེས། །དུས་གསུམ་རྒྱུན་དུ་མཆོད་བྱེད་ན། །རྡོ་རྗེ་འཛིན་པ་མྱུར་དུ་འཐོབ། །སྐུ་ནི་རབ་ཏུ་སྦ་ཞིང་གསང་། །ཕན་ཡོན་དམ་པ་འདི་ལས་འབྱུང་། །དཔལ་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི་རྒྱལ་
པོ་ལས། བྲིས་སྐུའི་ལེའུ་སྟེ་གསུམ་པའོ།། །། དེ་ནས་ཡང་དག་བཤད་བྱ་བ། །རྟོག་པ་མ་ལུས་ཟད་བྱེད་ཅིང་། །ལས་རྣམས་ཐམས་ཅད་གྲུབ་འདོད་པས། །བློ་ལྡན་སེར་སྣ་རྣམ་སྤངས་ཏེ། །རྟུལ་ཕོད་གཡེང་བ་རྣམ་སྤངས་ནས། །
སྦྱིན་སྲེག་ལས་ལ་རབ་བརྩོན་བྱ། །མཚལ་དང་བབ་བླ་ལྡོང་རོས་དང་། །ཤན་པའི་གོ་ཐབ་དུར་ཁྲོད་ས། །མི་དང་མ་ཧེ་ཁྲག་གིས་བརྫི། །ཁྲུ་དོ་པ་ལ་ཁྲུ་ཕྱེད་བརྩིག །གྲུ་བཞིའི་སྟེང་དུ་ཟླུམ་པོ་ནི། །རྡོ་རྗེ་རྒྱ་གྲམ་
ལྡན་བྱས་ལ། །དེ་སྟེང་འཁོར་ལོ་རྩིབས་དྲུག་ལ། །མཚན་མ་དྲུག་ནི་དགོད་པར་བྱ། །ལྟེ་བར་མེ་ཡི་དཀྱིལ་འཁོར་ནི། །མཐོ་གང་ཚད་དུ་བྱས་པ་ལ། །མ་ཧེའི་ཁྲག་གིས་ལེགས་པར་བྱུག །བདག་ཉིད་ལྷོ་ཡི་ཕྱོགས་
བལྟས་ཏེ། །མ་ཧེ་ཞལ་གྱི་སྦྱོར་བ་ཡིས། །ཐབ་ཀྱི་ནང་གི་ཕྱོགས་མཚམས་སུ། །མེ་ཡི་ས་བོན་མངོན་བལྟས་ལ། །བསྐལ་པའི་མེ་ཆེན་ལྟ་བུར་བསྒོམ། །དེར་ནི་མེ་ལྷའང་བསྒོམ་བྱ་སྟེ། །ཞལ་གསུམ་ཕྱག་བཞི་
གནག་ལ་རྩུབ། །གཡས་པའི་ཕྱག་གིས་འགྲོ་རྣམས་ལ། །སྐྱབས་སྦྱིན་མཛད་ཅིང་བགྲང་ཕྲེང་འཛིན། །གཡོན་པས་རིལ་བ་མཆོག་སྩོལ་བརྩོན། །ཞལ་ནས་མེ་རྣམས་རབ་འཕྲོ་ཞིང་། །འོད་རྣམས་སྣ་ཚོགས་ཀྱིས་
བརྒྱན་པ། །དེ་ལྟར་ཤེས་ནས་རབ་བསྲེགས་ན། །འདོད་པའི་དོན་རྣམས་རབ་ཏུ་འབྱུང་། །དགྲ་བོའི་གཟུགས་དང་ཤ་ཆེན་དང་། །ཆང་དང་མ་ཧེའི་ཁྲག་བཅས་པ། །སྟོང་ཕྲག་གསུམ་དུ་བསྲེགས་བྱས་ན། །བསྒྲུབ་བྱ་
ཁྲག་ཏུ་སྐྱུགས་ནས་འཆི། །གླང་པོ་རྟ་བོང་ཁྱི་ཤ་ལ། །སྟོང་ཕྲག་གསུམ་གྱིས་དབང་དུ་བྱེད། །བྱ་རོག་འུག་པ་ཁྱི་ཤ་ཆུ། །བསྲེགས་ན་མི་རྟ་འབྱེར་བར་ངེས། །ཏིལ་དང་ནས་དང་གྲོ་སཱ་ལི། །ཡུང་བ་གི་ཧང་སོ་

90-1-149a

ཕག་རྣམས། །སྟོང་ཕྲག་དྲུག་ཏུ་གང་བསྲེགས་པ། །ལོངས་སྤྱོད་ཐམས་ཅད་རྙེད་པར་འགྱུར། །རྟ་དང་རྔ་མོ་བྱ་རོག་ཤ ། མི་ཤ་རྡོ་རྗེ་ཆུར་བཅས་པ། །གསང་སྔགས་རྣལ་འབྱོར་ལྡན་བྱས་ཏེ། །བརྒྱ་རྩ་བརྒྱད་ཀྱིས་
ངེས་པར་སྐྲོད། །ར་ཤ་ད་ན་ཨུད་པ་ལ། །ཆང་དང་མ་ཧེ་ཆུར་བཅས་པ། །གང་འདོད་བརྒྱ་རྩ་བརྒྱད་ཀྱིས་ལྐུགས། །དུག་དང་ཁྲག་དང་སྒོག་པ་དང་། །ཤ་ཆེན་ཏིལ་མར་རབ་སྦགས་ཏེ། །བརྒྱ་རྩ་བརྒྱད་དུ་བསྲེགས་
བྱས་ན། །ཕ་རོལ་གཞན་གྱི་རིག་སྔགས་གཅོད། །ཙན་དན་དཀར་པོ་འབྲས་དཀར་དང་། །ཏིལ་དཀར་འབྲས་ཆན་ཡུངས་ཀར་དང་། །ཨུད་པལ་དཀར་དམར་ག་པུར་དག །ཤར་དུ་བལྟས་ཏེ་བརྒྱ་རྩ་བརྒྱད། །བསྲེགས་ནས་
དུས་རྣམས་ཀུན་དུ་བསྲུང་། །གང་ཞིག་བྱ་བའི་རིམས་སོགས་དང་། །སྔགས་རྣམས་བསམ་གཏན་ངེས་ལྡན་པས། །སྙིང་རྗེའི་ཡིད་ནི་མ་བྲལ་ན། འདོད་པ་ཐམས་ཅད་འདིར་བསྒྲུབ་བྱ། །གཞན་དུ་རྨོངས་པའི་བྱིས་པ་
འགའ། །བློ་གྲོས་མེད་གང་ཤེས་རབ་འཆལ། །སྔགས་དང་དམ་ཚིག་སྨན་གྱུར་ཅིང་། །ཏིང་ངེ་འཛིན་ལ་མངོན་གཡེལ་བ། །བརྩོན་པ་ཆུང་ཞིང་ལྷོད་པ་འགས། །བསྐལ་པ་སྟོང་དུ་བསྒྲུབས་བྱས་ཀྱང་། །འབྲས་བུ་
ཡོད་པ་མ་ཡིན་ཏེ། །ཤ་ཐང་ཆད་པ་ཉིད་དུ་འགྱུར། །དཔེར་ན་བློ་ཞན་བྱིས་པ་རྣམས། །འགའ་ཞིག་འབྲས་འདོད་འཁྲུལ་གྱུར་ནས། །ཕུབ་མ་རྡུང་ཁར་བྱེད་པ་ལ། །འབྲས་ཡོད་ནམ་ཡང་མི་འགྱུར་བཞིན། །ཇི་ལྟར་སྤྲིན་
དང་ཆུ་ཟླ་དང་། །དབང་པོའི་གཞུ་རྣམས་རྟག་མིན་ཏེ། །ཐར་པ་འདོད་པའི་བྱ་བའང་དེ། །སྒྱུ་མ་ཉིད་ལ་སྒྱུ་མ་རོལ། །ཡེ་ཤེས་གཅིག་པུ་རྣམ་གྲོལ་རྒྱུ། །སྟོང་པ་དཔག་པར་བློས་ཅི་ནུས། །དེ་ལ་དཔྱད་ཅིང་གཞལ་བཟོད་ན། །
བརྟགས་པའི་སྙིང་པོ་དེ་ལ་མེད། །དེ་ལ་དངོས་རྣམས་མ་གྲུབ་ན། །བསྒྲུབ་པའི་རིམ་གཞན་སྨོས་ཅི་དགོས། །བྱ་བ་དང་ནི་བྱེད་པ་དག །ངེས་པར་དེ་ལ་བརྟག་མི་བཟོད། །ངམ་གྲོག་གཡང་སར་ལྷུང་ཡང་བླའི། །ཆད་པར་རྟོག་

90-1-149b

པ་འདི་མི་བཟོད། །རྟག་པ་ཉིད་ཀྱང་རིག་མིན་ཏེ། །དངོས་པོ་ཡོད་པར་གལ་ཏེ་འགྱུར། །དཔེར་ན་བྱིས་པ་རྣམས་ལ་མས། །ས་འདིར་སྡོད་དང་མ་ཉིད་ཀྱིས། །འབྲས་བུ་ཤིང་ཏོག་མང་བླངས་ལ། །ཁྱོད་ལ་བདེ་
བས་སྦྱིན་ཞེས་བརྗོད། །དེ་བཞིན་རྣམ་པ་དུ་མ་ཡང་། །འཇིག་རྟེན་རྟོག་པ་ཐ་དད་པས། །དེ་དག་དྲང་བར་བྱ་ཕྱིར་བཤད། །བཅོམ་ལྡན་ལྷ་ཡི་ལྷ་མདུན་དུ། །ཤ་ཆེན་པོ་ཡི་ཞལ་ཟས་དང་། །ཆང་དང་ཏིལ་མར་
མ་ཧེ་ཁྲག །རབ་ཏུ་ཞིམ་པའི་ཟས་མཆོག་རྣམས། །དུས་རྣམས་རྟག་ཏུ་དབུལ་བར་བྱ། །གསང་སྔགས་རྒྱལ་པོ་ཡི་གེ་བཅུ། །བདག་གིས་རྒྱུན་དུ་གདོན་བྱ་ཞིང་། །བསམ་གཏན་རྟག་ཏུ་བརྩོན་པར་བྱ། །
དེ་ལྟར་ཤེས་ཤིང་སྒྲུབ་བྱེད་པའི། །སྐྱེས་བུ་བློ་ལྡན་དེ་ཡིས་ནི། །སངས་རྒྱས་ཉིད་ཀྱང་མྱུར་འགྲུབ་འགྱུར། །ཞི་སོགས་ལས་རྣམས་སྨོས་ཅི་དགོས། །གྲོང་ཁྱེར་དཀྲུག་ན་སྔགས་པ་དེས། །ཁྱི་ཤ་སྦལ་
ཤ་རུས་སྦལ་ཤ ། རྔ་མོ་བྱི་ལའི་ཤ་རྣམས་ལ། །སྟོང་རྩ་བརྒྱད་དུ་བསྲེག་པར་བྱ། །རྟ་ཤ་དྲི་ཆེན་རབ་སྦྱར་བས། །རི་ལུ་བྱས་ཏེ་བདག་མདུན་དུ། །གསང་སྔགས་རྒྱལ་པོ་བཟླས་བྱས་ནས། །བརྒྱ་རྩ་བརྒྱད་དུ་
བསྲེགས་པས་ནི། །རྒྱལ་པོ་དབང་དུ་བྱེད་པར་འགྱུར། །བུད་མེད་དབང་དུ་བྱེད་འདོད་ན། །ཤ་ཆེན་གླང་པོ་ཤ་དང་བཅས། །བྱང་ཆུབ་སེམས་དང་བསྲེས་བྱས་ཏེ། །སྟོང་ཕྲག་བརྒྱད་དུ་སྲེག་པར་བྱ། །དགུག་
པ་དུས་རྣམས་ཐམས་ཅད་དུ། །ཁྱི་ཤ་ཉ་ཤ་བདུད་རྩི་ལྔ། །ཆ་མཉམ་རི་ལུ་བྱས་ནས་ནི། །བརྒྱ་རྩ་བརྒྱད་དུ་བསྲེགས་ན་འགུགས། །སྦྱིན་སྲེག་ལས་རྣམས་ཐམས་ཅད་ཀྱང་། །མ་ཧེ་ཞལ་གྱི་སྦྱོར་
བས་ནི། །གསང་སྔགས་རྒྱལ་པོས་འདོད་པ་སྦྱར། །མ་ཡེངས་རྩེ་གཅིག་སེམས་ཀྱིས་བྱ། །གསུངས་དང་མ་གསུངས་མཐའ་དག་ཀྱང་། །ཇི་ལྟ་བ་ཡི་རིམ་པ་ཡིས། །རྒྱུད་ཀྱི་རྒྱལ་པོ་ཉིད་

90-1-150a

ཉེར་གནས། །སངས་རྒྱས་འབྲས་བུ་མྱུར་དུ་འཐོབ། །ཞི་ལ་ཞི་བའི་ཡིད་ཀྱིས་ཏེ། །རྒྱལ་པོ་ལྟ་བུར་རྒྱས་པ་ལ། །སྡང་བྲལ་ཆགས་པས་དབང་ལའོ། །དྲག་པོའི་ལས་ལ་ཁྲོ་
ཞིང་རྩུབ། །རབ་ཏུ་གཏུམ་པའི་ཡིད་ཀྱིས་ནི། །གསོད་པའི་སེམས་དང་ལྡན་པར་བྱ། །གང་ཞིག་ལྟོས་པ་མེད་པའི་མི། །གྲུབ་པ་མྱུར་དུ་ཚོལ་བྱེད་ན། །སེམས་ཀྱི་རང་བཞིན་རྣམ་དག་པས། །རྡོ་རྗེ་
འཛིན་པ་དེ་འགྲུབ་འགྱུར། །དངོས་པོ་གང་དང་གང་སྤྱོད་ཡུལ། །དེ་དང་དེ་ཡི་རང་བཞིན་འགྲོ། །མཉམ་གཞག་ཉམས་པར་མི་བྱ་ལ། །དུས་རྣམས་རྟག་ཏུ་རྣལ་འབྱོར་པས། །ཤིན་དུ་མཉམ་
པར་གཞག་པར་བྱ། །དེས་ནི་ཐར་པ་ཉིད་ཀྱི་རྒྱུ། །རྒྱུད་ཀྱི་རྒྱལ་པོ་འདི་ལས་ནི། །འདོད་པའི་དངོས་གྲུབ་མྱུར་བྱེད་དེ། །དཀའ་བ་མེད་པའི་ཐབས་འདི་ནི། །དཀའ་སྤྱོད་བརྟུལ་ཞུགས་རྣམས་
སྤངས་ཏེ། །ཤིན་དུ་བདེ་བར་སྒྲུབ་པའི་ཐབས། །སྡུག་བསྔལ་འཇིགས་མེད་བདུད་རྩིའི་རོ། །བློ་ལྡན་ལེགས་པར་བླང་བྱ་སྟེ། །ཤིན་དུ་འབད་པས་བསྒྲུབ་པར་བྱ། །མི་ཤེས་བློ་གྲོས་རྨོངས་
པ་འགའ། །རྟོག་པའི་དྲ་བས་བསྒྲིབས་པའི་ཚེ། །བསོད་ནམས་དང་ནི་སྡིག་པ་ཡི། །ཕུང་པོ་རྣམ་པ་གཉིས་སུ་བརྟགས། །འོན་ཀྱང་འདོད་པ་ཐམས་ཅད་ནི། །རྒྱུད་མཆོག་འདི་ལས་འབྱུང་འགྱུར་
ཕྱིར། །དམན་ཞིང་བརྩོན་པ་ཆུང་བ་འགའ། །འདི་ལ་ཞུགས་ན་མྱུར་དུ་འགྲུབ། །དེ་བས་ངོ་མཚར་རྒྱུད་འདི་ནི། །རྙེད་དཀའ་ཁྱད་པར་མཆོག་གྱུར་པ། །ཡི་གེའི་དབྱིབས་ཀྱང་མི་བསྟན་ན། །བཤད་
ཅིང་འགྲོལ་བ་སྨོས་ཅི་དགོས། །དབང་རྣམས་ངེས་པར་མ་བླངས་ཤིང་། །བླ་མ་མཉེས་པར་མ་བྱས་ཚེ། །བསྟན་ཀྱང་ཐོབ་པར་མི་འགྱུར་ཏེ། །ཚ་བ་ལ་སོགས་འཁོར་བར་འཁོར། །དེ་སྐད་

90-1-150b

སྟོན་པས་བཤད་པའི་ཚེ་སྡེ་རྣམས་མྱོས་ཤིང་བརྒྱལ་རྨོངས་ཏེ། །ཀུན་ཀྱང་འདུད་ཅིང་མགོ་བོ་སྨད། །འཇིག་རྟེན་འདི་ནི་ཤིན་དུ་གཡོས། །གང་ཞིག་རྒྱུད་འདི་ཉན་པ་དང་། །ཤེས་ནས་འཆང་
བར་བྱེད་པ་དང་། །དུས་རྣམས་ཀུན་དུ་འདོན་བྱེད་ན། །ཚེ་འདིར་འཇིགས་པ་ཀུན་བསལ་ཏེ། །ཤི་ནས་མཐོ་རིས་མྱུར་དུ་འཐོབ། །གལ་ཏེ་གཞན་དུ་རྒྱུད་མཆོག་འདི། །བསྟན་ནམ་བཤད་དམ་
གསལ་ཕྱེ་ན། །དེ་ནི་སྡུག་བསྔལ་མང་མྱོང་ནས། །ཤི་ནས་མྱུར་དུ་དམྱལ་བར་འགྲོ། །རང་གིས་ཤིན་དུ་བཅང་བྱས་ཤིང་། །དངོས་གྲུབ་ཉིད་བཞིན་མངོན་བྱས་ན། །སྡུག་བསྔལ་མཐའ་
དག་ངེས་ཟད་ནས། །མྱུར་དུ་བླ་མེད་ཐོབ་པར་འགྱུར། །དཔལ་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི་རྒྱལ་པོ་ལས་སྦྱིན་སྲེག་གི་རིམ་པར་ཕྱེ་བའི་ལེའུ་སྟེ་བཞི་པའོ།། །།
དཔལ་རྡོ་རྗེ་འཇིགས་བྱེད་ཀྱི་རྟོག་པའི་རྒྱུད་ཀྱི་རྒྱལ་པོའི་ལས་ཀྱི་དངོས་གྲུབ་བརྟག་པ་ཞེས་བྱ་བ་རྫོགས་སོ།། །།པཎྜི་ཏ་ཆེན་པོ་ཨ་མོ་གྷའི་ཞབས་ནུས་པ་
ཅན་དང་། བོད་ཀྱི་ལོ་ཙ་བ་མར་པ་བནྡེ་ཆོས་ཀྱི་དབང་ཕྱུག་གྲགས་པས་བསྒྱུར་ཅིང་ཞུས་པའོ། །

90-1-151a

༄༅། །རྒྱ་གར་སྐད་དུ།  ཤྲི་ཀྲྀཥྞ་ཡ་མཱ་རི་ཏན་ཏྲ་རཱ་ཛཱ་ཏྲི་ཀལྤ་ནཱ་མ།  བོད་སྐད་དུ།  དཔལ་གཤིན་རྗེའི་གཤེད་ནག་པོའི་རྒྱུད་ཀྱི་རྒྱལ་པོ་རྟོག་པ་གསུམ་པ་ཞེས་བྱ་བ། བཅོམ་ལྡན་འདས་དཔལ་གཤིན་རྗེའི་གཤེད་པོ་ལ་ཕྱག་
འཚལ་ལོ། །དོན་དམ་ཆོས་སྐུ་ཞི་བ་ཉིད། །གང་འདིར་ཁམས་གསུམ་རྣམ་རྒྱལ་ཏེ། །གཤིན་རྗེའི་དགྲ་ཞེས་གྲགས་པ་ཡི། །འཁོར་ལོ་བསྐོར་བའི་ཆོ་ག་བཤད། །ཡོན་ཏན་ལྡན་པའི་སྔགས་པ་ཡིས། །ཆོ་ག་བཞིན་དུ་བསྙེན་བྱས་
ནས། །དུར་ཁྲོད་དབེན་པ་ལ་སོགས་པར། །མཎྜལ་ཁྲུ་དོའི་ཚད་དུ་བྱ། །དྲི་དང་བ་ཡི་རྣམ་ལྔ་དང་། །ཉི་ཟླ་སོགས་པས་བྱི་དོར་བྱ། །བ་ལང་ལ་སོགས་དམ་རྫས་ལྔ། །གཞན་ཡང་ཚོགས་ཀྱི་འཁོར་ལོ་དང་། །ཕྱི་ནང་མཆོད་པའི་བྱེ་
བྲག་གིས། །ལེགས་པར་མཆོད་པ་བྱས་ནས་ནི། །འཁོར་ལོ་བྲི་དང་བཏུ་བ་དང་། །དྲང་དང་བསྲེ་དང་སྤོ་བ་བརྩམ། །སྔགས་པ་རྣལ་འབྱོར་ལྡན་པ་ཡིས། །ལྷོ་ཡི་ཕྱོགས་སུ་ཁ་བལྟས་ཏེ། །དམ་ཚིག་རྗེས་སུ་དྲན་པ་ཡིས། །
ཨོཾ་བཛྲ་ས་མ་ཡ་སྟྭྃ། །གསང་སྔགས་འདི་ནི་དྲན་བྱེད་ཅིང་། །འཁོར་ལོ་བྲི་བ་བརྩམ་པར་བྱ། །དབུས་ནས་སོར་ཚད་བཅུ་དྲུག་པར། །ཀུན་ནས་ཟླུམ་པོར་བསྐོར་བ་ནི། །འདི་ནི་ནང་གི་འཁོར་ལོ་སྟེ། །རིམ་པ་གསུམ་དུ་བསྐོར་བ་ལ། །སྒོ་མེད་
ལྕགས་མཁར་བཅུ་དྲུག་བྱ། །འདི་ནི་གཤིན་རྗེའི་གྲོང་ཁྱེར་ཏེ། །སྲིད་པ་གསུམ་གྱི་འཇུག་ས་ཡིན། །དེ་ཡི་ཕྱི་རིམ་མུ་ཁྱུད་གསུམ། །ཀུན་ཏུ་ལྕགས་རིས་བསྐོར་བ་སྟེ། །མུ་ཁྱུད་དེ་དག་རེ་རེ་ལའང་། །ཁང་པ་སུམ་བཅུ་རྩ་གཉིས་མཛེས། །
འགྲོ་བ་ཆོས་བཞིན་སྤྱོད་པ་ཡི། །འཁོར་ལོ་འདི་ལྟར་བྲིས་ནས་ནི། །ཕྱི་རིམ་མུ་ཁྱུད་ཐ་མ་ལ། །ཡི་གེ་ཀ་སོགས་ད་ཡིག་མཐའ། །ང་ཉ་བསལ་ནས་དགོད་པར་བྱ། །ཡི་གེ་དྷ་སོགས་ཀྵཿཡིག་མཐར། །དེ་ཡི་རྗེས་སུ་བྲི་བར་བྱ། །མུ་ཁྱུད་
དབུས་མ་དག་ལ་ནི། །དབྱངས་ཡིག་བཅུ་དྲུག་ཉིས་འགྱུར་དགོད། །བཏུ་དང་དགོད་སོགས་བརྩོམ་པ་ན། །མཚན་མ་འདི་དག་ཤེས་པར་བྱ། །ཟླ་བ་མིག་དང་ཡོན་ཏན་དང་། །རིག་བྱེད་མདའ་དང་དབང་པོ་དང་། །རྒྱ་མཚོ་བཀྲ་ཤིས་གཟའ་དང་

90-1-151b

ཕྱོགས། །དྲག་པོ་ཉི་མ་ཡན་ལག་ས། །ཚེས་ཞེས་བྱ་བར་རབ་ཏུ་གྲགས། །ཕྱི་རོལ་མུ་ཁྱུད་ཐ་མ་ལ། །ཤར་གྱི་ཚངས་ཐིག་ནས་བརྩམས་ཏེ། །རིམ་མིན་གཟའ་ཅན་ཁང་པ་ནས། །ཡི་གེ་བཀྲ་ཤིས་ཙམ་བླངས་ཏེ། །ནང་གི་ངོས་ཀྱི་མུ་ཁྱུད་ཀྱི། །ཚངས་
ཐིག་གི་ནི་ངོས་དག་ལ། །ཕྱོགས་བཞིར་མིག་གི་ཚད་དུ་སྦྱིན། །རིམ་མིན་ཕྱོགས་ཅན་ཁང་པ་ནས། །ཡི་གེ་མིག་གི་ཚད་བླངས་ཏེ། །ཤར་དུ་དེ་ཡི་གཡས་གཡོན་གཞག །རིམ་མིན་བཀྲ་ཤིས་ཁང་པ་ནས། །དབྱངས་ཡིག་གཉིས་པ་ཅན་བླངས་
ཏེ། །མིག་གི་ཚད་དུ་བྱས་ནས་ནི། །དེ་ཡི་ངོས་ལ་རེ་རེ་གཞག །ནུབ་ཀྱི་ཚངས་ཐིག་ནས་བགྲངས་པའི། །རྒྱ་མཚོ་ཅན་གྱི་ཁང་པ་ནས། །དབྱངས་ཡིག་བཅུ་གཅིག་དང་ལྡན་པ། །མིག་གི་ཚད་དུ་བླངས་ནས་ནི། །ལྷོ་ཕྱོགས་དེ་ཡི་གཡས་གཡོན་
གཞག །ནུབ་ནས་རིམ་པ་མིན་པ་ཡི། །ཟླ་བ་ཅན་གྱི་ཁང་པ་ནས། །དབྱངས་ཡིག་བཅུ་གསུམ་དང་ལྡན་པ། །མིག་གི་ཚད་དུ་བླངས་ནས་ནི། །ལྷོ་རུ་དེ་རྗེས་སྦྱིན་པར་བྱ། །དེ་ཉིད་དབྱངས་ཡིག་གསལ་བ་ནི། །མིག་གི་ཚད་དུ་བླངས་ནས་ནི། །སྔོན་བཞིན་
ནུབ་ཀྱི་ངོས་སུ་སྦྱིན། །ནུབ་ནས་བཀྲ་ཤིས་ཁང་པ་ནས། །དབྱངས་ཡིག་བཅུ་གསུམ་པར་ལྡན་པ། །མིག་གི་ཚད་དུ་བླངས་ནས་ནི། །ནུབ་ཀྱི་ངོས་ལ་དེ་བཞིན་སྦྱིན། །བྱང་ནས་བཀྲ་ཤིས་ཁང་པ་ནས། །དབྱངས་ཡིག་བཅུ་གཅིག་པར་ལྡན་པ། །
མིག་གི་ཚད་དུ་བླངས་ནས་ནི། །བྱང་གི་ངོས་ལ་དེ་བཞིན་སྦྱིན། །རླུང་གི་ས་བོན་ཞེས་བྱ་བ། །མིག་གི་ཚད་བླངས་དེ་རྗེས་སྦྱིན། །མདའ་ཅན་ཁང་པ་ནང་གནས་པ། །འོད་ཀྱི་གོང་བུར་བྱས་པ་དང་། །དེ་ཉིད་ནས་ནི་བགྲངས་པ་ཡི། །ས་ཅན་ཁང་པ་
ལ་གནས་པ། །དབྱངས་ཡིག་གསུམ་པར་ལྡན་པ་དག །ཟླ་བའི་ཚད་དུ་བླངས་ནས་ནི། །བྱང་ཤར་མཚམས་སུ་རེ་རེ་སྦྱིན། །རྒྱ་མཚོའི་ཁང་པ་ན་གནས་པ། །དབྱངས་ཡིག་གཉིས་པ་དང་ལྡན་དག །རིམ་མིན་ཡོན་ཏན་ཁང་པ་ནས། །ཟླ་བའི་ཚད་
དུ་བཟུང་ནས་ནི། །ཤར་ལྷོའི་མཚམས་སུ་དེ་བཞིན་སྦྱིན། །རིམ་མིན་བཀྲ་ཤིས་ཁང་པ་ནས། །དབྱངས་ཡིག་ལྔ་པ་ལྡན་པ་དག །ཡན་ལག་ཅན་གྱི་ཁང་པ་ནས། །ཟླ་བའི་ཚད་དུ་བླངས་ནས་ནི། །ལྷོ་ནུབ་མཚམས་སུ་དེ་བཞིན་སྦྱིན། །རིམ་མིན་ཚེས་

90-1-152a

ཅན་ཁང་པ་ནས། །དབྱངས་ཡིག་གསུམ་དང་ལྡན་པ་དང་། །རིམ་མིན་བཀྲ་ཤིས་ཁང་པ་ནས། །ཟླ་བའི་ཚད་དུ་བླངས་ནས་ནི། །ནུབ་བྱང་མཚམས་སུ་དེ་བཞིན་སྦྱིན། །དེ་ལྟར་དགོད་པ་བྱས་ནས་ནི། །དེ་ནས་དྲང་བ་བརྩམ་པར་བྱ། །དམ་ཚིག་
རྗེས་སུ་དྲན་བྱེད་ཅིང་། །རྡོ་རྗེ་ཤུགས་དང་ལྡན་པ་ཡིས། །ཤར་གྱི་ཚངས་ཐིག་ངོས་གཉིས་ནས། །ཡི་གེ་ཟུང་ལྡན་དྲངས་ནས་ནི། །དབུས་ཀྱི་ཁང་པར་གཞག་པར་བྱ། །ཕྱོགས་གཞན་ཚངས་ཐིག་ངོས་དག་ནས། །དེ་བཞིན་ཟུང་ལྡན་དྲངས་ནས་ནི། །
དེ་བཞིན་དབུས་ཀྱི་ཁང་པར་གཞག །དེ་ནས་ཤར་གྱི་ཡི་གེ་ཡང་། །ཟུང་ལྡན་གཉིས་པ་དྲངས་ནས་ནི། །རིམ་པ་གཉིས་པའི་ཁང་པར་གཞག །ཕྱོགས་གཞན་དུ་ཡང་དེ་བཞིན་ནོ། །ཤར་གྱི་ཟུང་ལྡན་གསུམ་པ་ཡང་། །རིམ་པ་
གསུམ་པའི་ཁང་པར་དྲང་། །ཕྱོགས་གཞན་དུ་ཡང་དེ་བཞིན་ནོ། །མཚམས་ཀྱི་ཡི་གེ་ཡ་བྲལ་ནི། །རང་རང་ནང་གི་མཚམས་སུ་དྲང་། །དེ་དག་ཕྱུང་བའི་ཁང་སྟེང་དུ། །དབྱངས་ཀྱི་ཡི་གེ་དྲང་བར་བྱ། །དབྱངས་ཀྱི་ཡི་གེའི་གཞི་ལ་ནི། །མིང་གི་ཡི་གེ་དྲང་བར་
བྱ། །མིང་གི་ཡི་གེའི་གཞི་ལ་ནི། །སོ་སོ་ལས་དང་མཐུན་པ་ཡི། །བསྐུལ་བའི་ཡི་གེ་དགོད་པར་བྱ། །གསད་དང་བསྐྲད་དང་དབྱེ་བ་ལ། །ཡི་གེ་ཕཊ་ནི་གཞག་པར་བྱ། །མནན་པ་ལ་ནི་ཡི་གེ་ལྃ། །ཞི་བ་ལ་ནི་ཡི་གེ་ཨོཾ། །རྒྱས་པ་དེ་བཞིན་
ཡི་གེ་སྭ། །དབང་ལ་བྃ་གིས་བརྒྱན་པ་སྟེ། །དགུག་པ་ལ་ནི་ཡི་གེ་ཛཿ། །དེ་ལ་ལས་ཀྱི་འོད་ཟེར་ནི། །ཞི་བ་ཆུ་སྟེ་རྒྱས་པ་ས། །དབང་ནི་རླུང་སྟེ་དྲག་པོ་མེ། །དབྱེ་དགུག་བསྐྲད་པ་དབང་དང་མཐུན། །མནན་པ་ལ་ནི་རྒྱས་པ་བཞིན། །དྲང་བའི་
སྦྱོར་བ་བྱས་ནས་ནི། །བསྲེ་བའི་སྦྱོར་བ་བརྩམ་པར་བྱ། །གཉིས་མེད་སྔགས་དང་ལྡན་པ་ཡིས། །དབུས་ཀྱི་བཀྲ་ཤིས་ཡི་གེ་ཡ། །ཟླ་ལྟར་འོད་ཀྱི་གོང་བུར་བྱ། །འོད་ཀྱི་གོང་བུར་དེ་ནང་དུ། །འདོད་པའི་བསྒྲུབ་བྱ་གཞག་པར་བྱ། །
དེ་དཀྱིལ་རང་མིང་དང་པོར་གཞག །ཕྱོགས་ཀྱི་ཁྱིམ་ན་གནས་པ་ཡི། །ཡི་གེ་ཟུང་མ་ཐམས་ཅད་ཀྱང་། །དེ་ཚེ་འོད་ཀྱི་གོང་བུར་བྱ། །སྔགས་ཀྱི་རྒྱལ་པོ་བཅུ་པ་ཡང་། །བཅུ་གཉིས་ཁྱིམ་དུ་སྤེལ་ཏེ་བྲི། །བྱིན་རློབ་ཧཱུྃ་ཞེས་བྱ་བ་ཡང་། །

90-1-152b

ཁང་པ་བཞི་ལ་ཟུར་རེ་མཛེས། །ཡོངས་སུ་དག་པར་བཀོད་བྱས་ནས། །མཆོད་དང་གཏོར་མ་བྱས་ནས་ནི། །སྤོ་བ་དག་ནི་བརྩམ་པར་བྱ། །ལས་ཀྱི་དབྱེ་བ་ཇི་ལྟ་བར། །འཁོར་ལོའི་རས་ནི་བླངས་བྱ་སྟེ། །ཞི་བ་དང་ནི་རྒྱས་པ་ལ། །ཤིན་དུ་དགེ་བའི་རས་
ལ་བྱ། །དབང་དང་དགུག་པ་སྨད་འཚོང་སོགས། །བསད་དང་དབྱེ་དང་བསྐྲད་པ་དང་། །མནན་པ་ལ་ནི་དུར་ཁྲོད་རས། །གི་ཧྃ་གུར་གུམ་ཞི་རྒྱས་ལ། །དབང་དང་དགུག་ལ་ཙན་དན་དམར། །མནན་པ་ལ་ནི་ལྡོང་རོས་སོགས། །བསྐྲད་ལ་བྱ་རོག་ཁྲག་
གིས་ཏེ། །དབྱེ་ལ་རྟ་དང་མ་ཧེའི་འོ། །བསད་ལ་དུག་ལ་སོགས་པས་བྲི། །དགེ་བའི་རས་ལ་བཟང་པོའི་ཤིང་། །དགེ་མིན་ལ་ནི་རུས་པ་དང་། །ལྕགས་ལ་སོགས་པས་བྲི་བར་བྱ། །ཞི་བ་ཤར་བལྟས་དབང་ལ་ནུབ། །རྒྱས་པ་བྱང་སྟེ་དྲག་པོ་ལྷོ། །
གཞན་ཡང་ཅི་རིགས་སྦྱར་བར་བྱ། །ཞི་རྒྱས་དབང་དང་དགུག་པ་ལ། །ས་བསྐོར་རིམ་བཞིན་དགོད་བྱས་ཏེ། །གནམ་སྐོར་དག་ནི་རིམ་ལས་བཟློག །བསད་བསྐྲད་དབྱེ་དང་མནན་པ་ལ། །ས་སྐོར་རིམ་ལས་བཟློག་པ་སྟེ། །གནམ་བསྐོར་དག་ནི་
རིམ་བཞིན་བྲི། །འདི་ལྟར་ལེགས་པར་མ་བྲིས་ན། །འཁོར་ལོ་རང་ལ་ལྡོག་པར་འགྱུར། །དེ་བས་ནན་ཏན་བསྐྱེད་དེ་བྱ། །རས་ཀྱི་འཁོར་ལོ་ལེགས་ཟིན་ནས། །མཎྜལ་ལ་གནས་འཁོར་ལོ་དེ། །རས་ཀྱི་འཁོར་ལོ་སྤྱན་དྲངས་ཏེ། །རྡོ་རྗེ་བསྡུ་
བའི་སྦྱོར་བ་ཡིས། །མཎྜལ་འཁོར་ལོ་བསྡུ་བར་བྱ། །རས་ཀྱི་འཁོར་ལོ་མཆོད་ནས་ནི། །བདེན་པའི་བྱིན་བརླབས་དམིགས་པར་བྱ། །ཇི་ལྟར་གསུངས་པའི་ཆོ་ག་བཞིན། །འཁོར་ལོ་སྦ་བ་བྱས་ནས་ནི། །གསང་སྔགས་བཟླས་པ་བརྩམ་
པར་བྱ། །ཨོྂ་བཛྲ་ས་མ་ཡ་སྟྭྃ། །དམ་ཚིག་གི་སྔགས་སོ། །ཨོྂ་བཛྲ་བེ་ག་ཧཱུྃ། །རྡོ་རྗེ་ཤུགས་ཀྱི་སྔགས་སོ། །ཨོྂ་ཨ་ས་མེ་ཏྲི་ས་མེ་མ་ཧཱ་ས་མ་ཡེ་སྭཱ་ཧཱ། ཡི་གེ་བསྲེ་བའི་སྔགས་སོ། །ཨོྂ་བཛྲ་ས་མཱ་ཛཿ། འཁོར་ལོ་སྤོ་བའི་སྔགས་སོ། །
ཨོྂ་ཡ་མ་རཱ་ཛཱ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ཀྵེ་ཡ། ཡ་ཀྵེ་ཡཙྪ་ནི་རཱ་མ་ཡ་ཕཊ་ཕཊ། འདི་ནི་རྩ་བའི་གསང་སྔགས་ཏེ་ལས་ཐམས་ཅད་པའོ། །ཨོྂ་ཧྲཱི་ཥྚྲཱིཿཝི་ཀྲྀ་ཏཱ་ན་ན་ཧཱུྃ་ཕཊ། འདི་ནི་ལས་ཀྱི་གསང་སྔགས་ཏེ་ལས་ཐམས་ཅད་པའོ། །

90-1-153a

ཤཱནྟིཾ་ཀུ་རུ་སྭཱ་ཧཱ། །ཞི་བར་བསྐུལ་བའོ། །པུཥྚིཾ་ཀུ་རུ་སྭཱ་ཧཱ། རྒྱས་པའི་འོ། །བ་ཤྱཾ་ཀུ་རུ་སྭཱ་ཧཱ། དབང་གིའོ། །མཱ་ར་ཡ་ཕཊ། གསད་པའི་འོ། །བི་དྭེ་ཥ་ཡ་ཕཊ། དབྱེ་བའི་འོ། །ཨུཙྪཱ་ཊ་ཡ་ཕཊ། བསྐྲད་པའི་འོ། །སྟྭཾ་བྷ་ཡ་ཧཱུྃ་ལྃ། 
མནན་པའི་འོ། །ཨཱ་ཀཪྵ་ཡ་ཧཱུྃ་ཛཿ། དགུག་པའིའོ། །ཨོཾ་མུཿ། སླར་དགྲོལ་བའི་འོ། །ཨཱ་ལི་ཀཱ་ལིའི་གྲོང་ཁྱེར་ནི། །གསང་སྔགས་འབྱུང་བའི་རྩ་བ་སྟེ། །ལས་ཀྱི་བཙོན་ར་དག་ཀྱང་ཡིན། །ཡི་གེ་བཏུ་བ་མེད་ན་ནི། །གསང་སྔགས་སྒྲ་ནི་ལོག་
པར་འགྱུར། །ཡི་གེ་ཚང་བར་མ་བཀོད་ན། །གསང་སྔགས་སྒྲ་ནི་ཉམས་པར་འགྱུར། །གསང་སྔགས་བརྡ་ཡིས་མ་བརྗོད་ན། །སྔགས་ནི་དངོས་གྲུབ་མེད་པར་འགྱུར། །དྲང་བ་དག་ནི་མ་བྱས་ན། །ཤིན་དུ་འཁོར་བར་མི་འགྱུར་རོ། །
ཡི་གེ་བསྲེ་བ་མ་བྱས་ན། །བཅུ་དྲུག་ཁང་པ་དོན་མེད་འགྱུར། །བསྐོར་ཕྱོགས་ལོག་ན་དོན་མི་འགྲུབ། །རིག་སྔགས་ཉམས་དང་ལོག་པ་ནི། །ལྷ་མིན་གཡུལ་ལས་ཕམ་པ་དང་། །དབང་པོའི་དགྲ་ཡིས་དགྲ་བསད་བཞིན། །འཁོར་ལོ་སྤོ་བ་མ་བྱས་ན། །
ཆོ་ག་དག་ནི་ཉམས་པར་འགྱུར། །རྒྱུ་ཡིན་པ་དང་སྦྱོར་བ་དང་། །དད་པ་བརྟན་པས་འགྲུབ་པར་འགྱུར། །དེ་བས་ནན་ཏན་བསྐྱེད་དེ་བྱ། །དཔལ་གཤིན་རྗེའི་གཤེད་ནག་པོའི་འཁོར་ལོ་བྲི་བའི་ཆོ་ག་རྒྱས་པའི་རྟོག་པ་སྟེ་དང་པོའོ།། །། དེ་ནས་གཞན་
ཡང་བཤད་བྱ་བ། །སྔགས་པས་རྟག་ཏུ་བསྟེན་པ་ནི། །རུ་སྦལ་འོ་མ་ཞེས་བྱ་དང་། །དེ་བཞིན་འོད་ཀྱི་ལོ་མ་དང་། །འཇིམ་པ་སྐམ་པོ་ཉིད་དང་ནི། །དེ་བཞིན་མེ་ཡི་ཁུ་བ་དང་། །སྒྲ་བརྙན་གྱི་ནི་རྫས་དག་སྟེ། །འདི་རྣམས་རྟག་
ཏུ་སྤྱད་ན་ནི། །རང་བཞིན་གྱིས་ནི་ནད་མེད་ཅིང་། །ཚེ་རིང་དབང་པོ་རྒྱས་པ་དང་། །རྟག་ཏུ་ལང་ཚོ་དར་ལ་བབ། །ལྷ་རྣམས་ཀུན་གྱིས་བྱིན་གྱིས་རློབ། །འདི་ལ་དཔྱད་པར་མི་བྱ་སྟེ། །མཐུ་དང་ངོ་བོ་ཉིད་ཀྱིས་འགྲུབ། །ཏིང་འཛིན་
སྔགས་ཀྱིས་བྱིན་བརླབས་ན། །ལས་ཀྱི་རྣམ་སྨིན་སྦྱོང་བར་བྱེད། རིག་པ་འཛིན་པའི་ས་ལ་གནས། །དེ་ཕྱིར་ཆོ་ག་བཞིན་དུ་བསྟེན། །ཚེས་གཅིག་སྐྱ་རེངས་ཤར་ཙམ་ན། །སྣོད་མ་རེག་ལ་རུ་སྦལ་ཞོ། །དྲོད་མ་ཡལ་བར་བཏུང་བའི། །ཡང་ན་ཉི་མའི་

90-1-153b

སྦུ་གུས་བཏུང་། །མར་གྱི་ངོ་ཡི་ཚེས་གཅིག་ལ། །འོད་ཀྱིས་ལོ་མ་བཙིལ་ནས་ནི། །དེ་ཉིད་ནས་ནི་བཟུང་ནས་ཀྱང་། །ཞག་གསུམ་སྐྱ་རེངས་ཤར་བ་ན། །ལོ་མ་དེ་བཅང་བཟའ་བར་བྱ། །ཡང་ན་ཉི་མའི་སྦུ་གུས་བྱ། །འཇིམ་པ་བཟང་པོ་སྦྱར་ནས་ནི། །ཞག་གསུམ་
ཆུ་ཡི་ནང་དུ་སྦྂ། །དེ་བླངས་ནས་ནི་ཡང་སྐམས་ནས། །ཕྱེ་མ་བྱི་ལའི་སྤར་ཚད་རེ། །བ་ཡི་འོ་མ་དང་སྦྱར་ནས། །སྔགས་པས་རྟག་ཏུ་བཏུང་བར་བྱ། །མེ་ཡི་སྡོང་པོ་སར་བ་ནི། །ས་ཡི་མར་གྱིས་དྲིལ་ནས་ནི། །ཁ་སྦྱར་སྣོད་དང་ལྡན་བྱས་ནས། །མེ་ཆུ་
ས་ཡིས་བཙིར་ནས་ནི། །བཏུང་ངམ་ཉི་མའི་སྦུ་གུས་བཏུང་། །ལན་ཚྭ་བྲལ་བའི་སྒྲ་ལས་ནི། །ཞག་གསུམ་བཅིངས་པའི་དགྲ་བརྙན་རྫས། །ནམ་གྱི་གུང་ལ་སྔགས་པས་བླངས། །ཆ་གསུམ་སྣོད་དུ་ཞག་གསུམ་གཞག །རྩེ་མོའི་ཆ་ནི་བྱུག་
པ་སྟེ། །དབུས་མའི་ཆ་ནི་བདུད་རྩི་ཡིན། །རྩ་བའི་ཆ་ནི་དོར་བར་བྱ། །འདི་རྣམས་སོ་སོར་བསྟེན་པ་ན། །ཐ་མར་འབྲས་བུ་གསུམ་གྱི་ཕྱེ། །བྱི་ལའི་སྤར་ཚད་རེ་དང་སྦྱར། །མ་སྦྱར་ན་ཡང་ཉེས་པ་མེད། །ཚོགས་པར་བསྟེན་ན་བཟང་བར་བཤད། །
རེ་རེ་བསྟེན་ཀྱང་ཉེས་པ་མེད། །འཇམ་དཔལ་གྱི་རྟོག་པ་ལས་དམ་རྫས་སྨན་དུ་བསྒྱུར་ཏེ་བསྟེན་པའི་ཆོ་གའི་རྟོག་པ་སྟེ་གཉིས་པའོ།། །། དེ་ནས་གཞན་ཡང་བཤད་པ་ནི། །ལས་ཀྱི་གྲོགས་ཀྱི་བྱེ་བྲག་སྟེ། །ཞི་བའི་ལས་ནི་ཟླ་བ་ཡིན། །རྒྱས་པ་དེ་
བཞིན་མིག་ཏུ་བསྒྲགས། །དབྱེ་བ་ཡོན་ཏན་ཞེས་བྱ་སྟེ། །དབང་དུ་བྱ་བ་རིག་བྱེད་ཡིན། །དགུག་པའི་ལས་ནི་དེ་བཞིན་མདའ། །བསྐྲད་དང་མནན་པ་དབང་པོ་ཡིན། །མནན་པ་རྗེས་སུ་འབྲང་བ་ཡིས། །གསད་པའི་ལས་ནི་རྒྱ་མཚོར་
འདོད། །ལས་རྣམས་དེ་དག་རེ་རེ་ཡང་། །འཕགས་སོགས་མཆོད་སྦྱིན་དང་པོ་སྟེ། །ཉི་མ་གཉིས་པ་གཏོར་མ་སྦྱིན། །གསུམ་པ་བཟླས་པ་རྣམ་པར་འབད། །བཞི་པ་སྦྱིན་སྲེག་ཚང་བར་བྱ། །ལྔ་པ་ལས་ཀྱི་འཁོར་ལོ་བསྐོར། །དྲུག་པ་
བསམ་གཏན་རྩེ་གཅིག་བྱ། །བདུན་པ་ལས་ཀྱི་ལྷག་ཆད་བསྐང་། །གྲོགས་ཀྱི་ལས་ལ་ཁྱད་པར་དུ། །ལས་ཀྱི་གཙོར་ནི་གང་བསྒྲུབ་དེའི། །འཁོར་ལོ་བསྐོར་བ་ཉི་མ་བཞི། །ལས་ཀྱི་བྱེ་བྲག་འདི་ཤེས་ན། །ཞི་བས་འཇིགས་པ་བརྒྱད་ལས་སྐྱོབ། །

90-1-154a

རྒྱས་པས་ཡོན་ཏན་དྲུག་དང་སྦྱོར། །དབང་གིས་མོས་པ་རྣམ་བཞིར་འགྱུར། །དབྱེ་བས་གསང་སྡེ་བརྒྱད་དང་འབྱེད། །མནན་པས་དབང་པོ་དྲུག་འཆིང་བྱེད། །གཞན་ནི་ཇི་ལྟར་དེ་བཞིན་ནོ། །སྔགས་དང་རྫས་ཀྱི་སྦྱོར་བ་ལ། །དཔྱད་ན་དངོས་གྲུབ་
མི་འགྲུབ་སྟེ། །གལ་ཏེ་ཡིད་གཉིས་ཟ་གྱུར་ཏམ། །བསམ་པར་འགྱུར་རམ་དད་པ་ཉམས། །དེ་ཚེ་དངོས་གྲུབ་ཉེ་བ་ཡང་། །ཕྱིར་ལྡོག་འགྱུར་བར་གདོན་མི་ཟ། །དད་པ་བརྟན་པོས་བསྒྲུབ་པ་ན། །ནམ་མཁའ་མེད་པར་གྱུར་ན་ཡང་། །སྔགས་ཀྱི་དངོས་
གྲུབ་མེད་མི་སྲིད། །ལྷ་དང་དྲང་སྲོང་གིས་བཤད་པའི། །རིག་སྔགས་བསླུ་བ་མི་སྲིད་ན། །འདོད་ཆགས་བྲལ་བས་བཤད་པ་ཡི། །གསང་སྔགས་སྦྱོར་བས་བསླུ་བ་ནི། །མ་བྱུང་འབྱུང་བར་མི་འགྱུར་རོ། །ཆོས་ཉིད་བསམ་གྱིས་མི་ཁྱབ་པའི། །
དོན་ལ་ཐེ་ཚོམ་མེད་པ་ཡི། །མཁས་པ་ལ་ནི་དངོས་གྲུབ་ཉེ། །ཡང་ན་བླུན་པོ་དད་པ་བརྟན། །དེ་ལ་སྦྱོར་བའི་དངོས་གྲུབ་ཉེ། །རྟོག་ཅིང་དཔྱོད་པའི་རྟོག་གེ་པ། །དེ་ལ་སྦྱོར་བའི་དངོས་གྲུབ་རིང་། །བླ་མས་མན་ངག་བསྟན་བྱས་ཀྱང་། །སློབ་མ་ཡིད་
གཉིས་ཡོད་པ་ན། །དེ་ལ་དངོས་གྲུབ་རིང་བར་བཤད། །བླ་མས་མན་ངག་སྦས་བྱས་ཀྱང་། །སློབ་མ་ཡིད་གཉིས་མི་ཟ་ཞིང་། །བླ་མའི་མན་ངག་དམ་པ་ཞེས། །གཅེས་སྤྲས་བྱས་ན་འགྲུབ་པར་ངེས། །དེ་ཡི་ཕྱིར་ན་སྔགས་པ་ཡིས། །རང་གི་
ཡིད་གཉིས་སྤང་བའི་ཕྱིར། །བླ་མ་མཉེས་པར་བྱ་བ་གཅེས། །བསྙེན་བཀུར་བྱས་ན་ནུས་མཐུ་ཆེ། །གསང་སྟེ་བརྗོད་པས་བར་ཆད་མེད། །ཡོན་ཆེན་ཕུལ་བ་བྱས་པས་ནི། །རང་སེམས་རིན་ཆེན་རྣམ་གཉིས་འགྱུར། །རིན་ཆེན་གཉིས་ལས་གྲུབ་
པ་འབྱུང་། །དཀོན་པར་གྱུར་པས་བསྔགས་པ་བརྗོད། །བསྔགས་ན་ཡོན་ཏན་འབྱུང་འགྱུར་ཏེ། །བསྔགས་པ་དག་ནི་མ་བྱས་ན། །ཇི་ལྟར་ཡིད་བཞིན་ནོར་བུ་ཡང་། །གང་གིས་བསྔགས་པ་མ་བྱས་པ། །དེ་ལ་འདོད་དོན་མི་སྟེར་རོ། །དད་པ་སངས་
རྒྱས་དད་པ་ཆོས། །དད་པ་དགེ་འདུན་དད་པ་མ། །དད་པ་བླ་མ་དད་པ་ཕ། །དད་པ་ལམ་ཆེན་དད་པ་གྲུ། །དད་པ་ཡིད་བཞིན་ནོར་བུ་སྟེ། །དད་པ་གསང་སྔགས་དངོས་གྲུབ་ཉིད། །དད་པ་བསོད་ནམས་ནོར་ཉིད་དེ། །དེ་ཡི་ཕྱིར་ན་སྔགས་པ་ཡིས། །

90-1-154b

རང་སེམས་དད་པ་བསྐྱེད་པའི་ཕྱིར། །གཞན་ལ་གུས་པས་མཆོག་ཏུ་བཀུར། །དཔལ་གཤིན་རྗེའི་གཤེད་ནག་པོའི་འཁོར་ལོ་བསྐོར་བའི་ཆོ་ག་ལས། ལས་ཀྱི་རྒྱུད་དང་གྲོགས་བསྟེན་པའི་རྟོག་པ་སྟེ་གསུམ་པའོ།། །།དཔལ་གཤིན་རྗེའི་གཤེད་ནག་པོའི་རྒྱུད་རྟོག་པ་
གསུམ་པ་རྫོགས་སྷོ།། །། དེ་ནས་ཡང་དག་བཤད་བྱ་བ། །བཅོམ་ལྡན་ཉིད་ཀྱི་སྐུ་གསུང་ཐུགས། །རྡོ་རྗེ་རྣམས་ལས་བྱུང་བ་ཡི། །རྡོ་རྗེ་འཇིགས་བྱེད་ཆེན་པོ་ཡིས། །ལྷོ་ཕྱོགས་རྒྱ་མཚོའི་ཕར་རྒལ་ན། །དེ་ནས་གཤིན་རྗེའི་གྲོང་ཁྱེར་ནི། །ག་ལ་བ་ཡི་གནས་
སུ་བྱོན། །མི་བཟད་ཞབས་ནི་བཅུ་དྲུག་གིས། །ལྕགས་མཁར་སྒོ་མེད་བཅུ་དྲུག་བརྫིས། །ཡེ་ཤེས་རྩེ་གཅིག་མཚན་མ་ཡིས། །དབུས་ཀྱི་ལྕགས་མཁར་ཆེན་པོ་བརྫིས། །དེ་ཚེ་བདུད་ཆེན་ལས་བརྒྱལ་ནས། །ཧ་ཧ་ཧི་ཧིའི་སྒྲ་སྒྲོགས་པས། །
ཆོས་ཀྱི་རྒྱལ་པོ་ལ་སོགས་པ། །གཟིར་བཞིན་དུ་ནི་རབ་སྨྲས་པ། །དཔའ་བོ་ཆེན་པོ་ག་ལ་ཅི། །དཔའ་བོའི་དགོས་པ་བདག་གིས་བགྱི། །བདག་ཅག་སྲོག་གི་སྙིང་པོ་རྣམས། །ཚུལ་བཞིན་འབུལ་གྱིས་དཔའ་བོས་བཞེས། །ལྷ་མ་སྲིན་ནི་སྡེ་བརྒྱད་ཀྱིས། །
སྲོག་གི་ཡང་སྙིང་ཕུལ་བ་ནི། །གཤིན་རྗེས་ཡ་ཕུལ་མ་མོས་མ། །སྲིན་པོས་ར་ཕུལ་གནོད་སྦྱིན་ཀྵེ། །མི་ཡིས་ཎི་ཕུལ་ས་བདག་ས། །བཙན་གྱིས་ཙྪ་ཕུལ་བདུད་ཀྱིས་ད། །དེ་རྣམས་གཅིག་ཏུ་དྲིལ་བ་ནི། །བྲན་དུ་ཡང་ནི་ཁས་བླངས་སོ། །གཏན་ཚིགས་
ཆེན་པོ་དེ་ཡི་ཕྱིར། །ཡེ་ཤེས་ལྷ་ཡི་དགོངས་པ་དང་། །བསྙེན་པ་ཉམས་འོག་རབ་ཆུད་ནས། །ལྷ་ཡི་བསྙེན་པ་ལ་ཆུད་ནས། །སྔོན་གྱི་ཐུགས་དམ་ལས་མི་འདའ། །མི་འགྲུབ་པ་ནི་མི་སྲིད་དོ། །ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་
ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ། དེ་སྐད་ཅེས་ནི་སྨྲས་པ་དང་། །རྡོ་རྗེ་འཇིགས་བྱེད་ཆེན་པོ་ཡིས། །ཆོས་ཀྱི་རྒྱལ་པོ་ལ་སོགས་པ། །གཤིན་རྗེའི་ཕོ་ཉ་ཐམས་ཅད་ཀུན། །སྒྲོལ་བའི་ཞིང་དུ་བྱིན་གྱིས་བརླབས། །མ་དང་སྲིང་མོ་བུ་མོ་
རྣམས། །འཁོར་བཅས་རྣམས་ལ་བཀའ་བསྒོ་བ། །ལྔ་བརྒྱ་དུས་ཀྱི་ཐ་མ་ལ། །ང་ཡི་བསྟན་པ་འབྱུང་བའི་ཚེ། །རྣལ་འབྱོར་རིག་འཛིན་ལྡན་པ་ལ། །བཀའ་བསྒོའི་ལས་རྣམས་ཚུལ་བཞིན་གྱིས། །ཅེས་པས་དམ་བཅས་པ་དང་མནན་བཞིན་

90-1-155a

དུ་མནའ་བོར་རོ། །གཏམ་རྒྱུད་ཀྱི་རྟོག་པ་རྫོགས་སྷོ།། །།ཐང་ཆེན་རྒྱལ་རིང་གིས་ཞུས་ཆེན་བགྱིས་པས་དག ། ༄༅། །རྒྱ་གར་སྐད་དུ།  ཤྲཱི་རཀྟ་ཡ་མཱ་རི་ཏནྟྲ་རཱ་ཛ་ནཱ་མ།  བོད་སྐད་དུ།  དཔལ་གཤིན་རྗེའི་གཤེད་དམར་པོ་
ཞེས་བྱ་བ་རྒྱུད་ཀྱི་རྒྱལ་པོ། བཅོམ་ལྡན་འདས་གཤིན་རྗེའི་གཤེད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་
བྷ་ག་རྣམས་ལ་བཞུགས་སོ། །དེར་བཅོམ་ལྡན་འདས་ཀྱི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་རྗེ་བཙུན་གསང་བ་ལས་ཆེས་ཤིན་ཏུ་གསང་བ། ཨེ་མའོ་བྱང་ཆུབ་སེམས་དཔའ་ཆེན་པོ་སྙིང་རྗེ་ཆེན་པོ་
ཕྱག་ན་ལེགས་སོ་ལེགས་སོ། །ཞེ་སྡང་རྡོ་རྗེའི་རྡོ་རྗེ་བྱང་ཆུབ་སེམས་དཔའ་ཆེན་པོའི་སྙིང་པོ་གཤིན་རྗེའི་གཤེད་དམར་པོའི་རང་བཞིན་ཉོན་ཅིག །ཕྱག་ན་རྡོ་རྗེས་གསོལ་པ། འདིར་གསུངས་པའི་གཤིན་རྗེ་འཇོམས་པར་བྱེད་པ་ཇི་ཙམ་
ཞིག་མཆིས། གཏི་མུག་རྡོ་རྗེ་གཤིན་རྗེའི་གཤེད་དང་། ཕྲ་མ་རྡོ་རྗེ་གཤིན་རྗེའི་གཤེད་དང་། འདོད་ཆགས་རྡོ་རྗེ་གཤིན་རྗེའི་གཤེད་དང་། ཕྲག་དོག་རྡོ་རྗེ་གཤིན་རྗེའི་གཤེད་ཅེས་བྱའོ། །རྡོ་རྗེ་ཙཪྪི་ཀཱ་དང་། རྡོ་རྗེ་ཕག་མོ་དང་རྡོ་རྗེ་
དབྱངས་ཅན་མ་དང་རྡོ་རྗེ་གཽ་རཱི་མ་རྣམས་ཀྱང་ངོ་། །མཚམས་རྣམས་ལ་བུམ་པ་རྣམས་སོ། །དེ་ལྟ་བུ་ལ་སོགས་པའི་གཤིན་རྗེ་འཇོམས་པའི་ཚོགས་རྣམས་ཀྱིས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་
ཐམས་ཅད་ཀྱི་བདག་པོ་བདུད་ཐམས་ཅད་འཇོམས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་རྣམས་ལས་ཕྱུང་བར་མཛད་པ་ནི། སྔགས་ཀྱིས་འགུགས་དང་དབང་བྱེད་ཆེ། །དེ་བཞིན་མཐུ་
ཡི་ཆོ་ག་མང་། །རལ་གྲི་བསྒྲུབ་དང་རྒྱལ་པོ་དང་། །ཕ་རོལ་དམག་ཚོགས་རྣམ་འཇོམས་དང་། །མི་སྣང་མིག་སྨན་བཅུད་ལེན་དང་། །དེ་བཞིན་གྲིབ་གནོན་རིག་པ་དང་། །རོ་ལངས་གནོད་སྦྱིན་སྒྲུབ་པ་དང་། །སྦྲུལ་གདུག་ལ་སོགས་

90-1-155b

བསྲུང་བ་དང་། །སྦྱིན་སྲེག་དཀྱིལ་འཁོར་ལས་རྣམས་དང་། །བྱང་ཆུབ་སེམས་ཀྱི་རྣམས་དཔྱད་དང་། །ཐབས་རྣམས་ཀུན་གྱི་སྤྱོད་པ་དང་། །ཕ་རོལ་གྲོང་དུ་འཇུག་རྣམས་ལ། །འོད་ཟེར་རྣམ་ལྔ་འཁྲིགས་པ་ཡི། །རྡོ་རྗེ་བསྲུང་བའི་དོན་དུ་
བསྒོམ། །རྡོ་རྗེ་ས་གཞིའི་ཆ་རྣམས་ལ། །ར་བ་གུར་རྣམས་དེ་བཞིན་ནོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བསྐྱེད་པར་མཛད་པ། བདུད་ཐམས་ཅད་རྣམ་པར་འཇོམས་པ་རྡོ་རྗེ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་ནས་གཏི་མུག་གཤིན་རྗེའི་གཤེད་ལ་སོགས་པ་ཐམས་ཅད་ཀྱི་ས་བོན་འདི་ཉིད་ཀྱི་སྐུ་དང་གསུང་དང་ཐུགས་རྣམས་ལས་ངེས་པར་ཕྱུངོ་། །ཡ་ནི་དབུས་སུ་སྟེ། ཀྵེ་མ་མེ་ད་ཡ་ཙྪ་ནི་རཱ། ཛཱ་ས་དོ་རུ་ཎ་ཡོ་ནི་ར། དང་པོར་ཡ་
ལས་གཤིན་རྗེའི་གཤེད། །ཀྵེ་ཡིག་ལས་ནི་རྨོངས་པར་བརྗོད། །མ་ཡིག་ལས་ནི་ཕྲ་མར་བཤད། །མེ་ཡིག་ལས་ནི་འདོད་ཆགས་ཉིད། །ད་ཡིག་ལས་ནི་ཕྲག་དོག་སྟེ། །གཤིན་རྗེའི་གཤེད་རྣམས་ལྔ་རུ་གྲགས། །
ཛ་ཡིག་ཙར་ཙི་ཀཱར་བཤད་དོ། །ས་ཡིག་ལས་ནི་ཕག་མོའོ། །དོ་ཡིག་དབྱངས་ཅན་མར་བཤད་དོ། །རུ་ཡིག་གཽ་རཱི་མར་འདོད་དོ། །ཎ་ཡོ་ནི་ར་མཚམས་བཞི་ལ། །མི་ཡི་ཐོད་པ་རྣམ་པ་བཞི། །དེ་ནས་བཅོམ་ལྡན་འདས་
དེ་བཞིན་གཤེགས་པ་ཐམས་ཅད་ཀྱི་བདག་པོ་གཤིན་རྗེའི་གཤེད་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེ་སྡང་ཆེན་པོའི་རིགས་བསྒོམ་པའི་རྣལ་འབྱོར་གསུངས་པ། སྦྱིན་དང་ཚུལ་ཁྲིམས་བཟོད་པར་
ལྡན། །རོ་གཅིག་མཁས་པས་སེམས་ཅན་དོན། །བྱམས་སོགས་ཡོན་ཏན་ཀུན་དུ་རྫོགས། །ཐོས་པའི་རྒྱུན་གྱིས་རྣམ་པར་བརྒྱན། །དང་པོར་ཁ་སོགས་ཡོངས་སུ་གསང་། །སྔ་བར་སྙིང་རྗེའི་བདག་ཉིད་ཅན། །རབ་ཏུ་རྩོམ་པ་དབེན་
པའི་ཕྱོགས། །དུ་ཁྲོད་སོགས་སུ་བདེ་བའི་གདན། །དབེན་ཞུགས་ཉིད་ཀྱི་ཐུགས་ཀར་ནི། །པད་ཉི་བལྟ་ཞིང་འོད་རབ་འབར། །དེ་ཡི་འོད་ཀྱིས་བཀུག་བྱས་ནས། །སེམས་ཅན་དོན་རྣམས་ཕུན་སུམ་ཚོགས། །

90-1-156a

བསྒོམ་བྱ་བླ་མ་སངས་རྒྱས་རྣམས། །ཇི་སྙེད་མ་ལུས་ནམ་མཁའི་མཐིལ། །དམིགས་ཏེ་ཕྱག་འཚལ་དེ་རྣམས་ཀྱི། །སྐུ་ཡི་བཀོད་པ་རྣམ་པར་བསྒྲུབ། །ཙར་ཙི་ཀཱ་སོགས་རྣམས་ཀྱིས་མཆོད། །དེ་ལ་སྡིག་པ་
རབ་ཏུ་བཤགས། །ལུས་དང་ངག་དང་ཡིད་རྣམས་ཀྱིས། །ཡང་དག་སྡིག་གྱུར་བྱས་དེ་བཞིན། །བདག་གིས་དེ་བཤགས་གང་ཞིག་ཡང་། །དུས་གསུམ་མགོན་མཛོད་རྗེས་ཡི་རང་། །རྫོགས་པའི་སངས་རྒྱས་མཚུངས་
རྣམས་ཀྱིས། །བསོད་ནམས་ཚོགས་ལ་རྗེས་ཡི་རང་། །རྫོགས་པའི་སངས་རྒྱས་དམ་ཆོས་དང་། །ཚོགས་མཆོག་རྣམས་ལ་བདག་སྐྱབས་མཆི། །ཡོན་ཏན་རྒྱ་མཚོ་ཁྱེད་རྣམས་ལ། །བདག་གི་ལུས་འདི་དབུལ་བར་
བགྱི། །གནས་དང་ཆོས་ཀུན་སྟོན་པ་དང་། །ཤིན་དུ་མཐར་ཡང་མཛེས་པ་དང་། །ཡང་དག་རྫོགས་པའི་སངས་རྒྱས་ཀྱི། །དེ་ཉིད་སྦྱིན་སོགས་གཟུགས་ཅན་གྱི། །སྐུ་གསུམ་ཡེ་ཤེས་ཐོབ་བྱའི་ཕྱིར། །བསྟེན་ཅིང་འདི་
ལ་རབ་ཏུ་དད། །སེམས་ཅན་རྣམས་ཀྱི་དོན་བྱེད་ཕྱིར། །བྱང་ཆུབ་སེམས་དག་བདག་གིས་བསྐྱེད། །གང་ཞིག་བསོད་ནམས་ཉེར་བསགས་རྣམས། །རྫོགས་པའི་བྱང་ཆུབ་བདག་གིས་བསྔོ། །འགྲོ་འདི་ཀུན་ལ་ཕན་
མཛད་ཕྱིར། །དཔལ་ལྡན་གཤིན་རྗེ་མཐར་བྱེད་གྱུར། །ལྷག་པར་སྨོན་ལམ་འདི་བྱས་པས། །དེ་རྣམས་ལ་ནི་གཤེགས་སུ་གསོལ། །བརྩེ་བས་བྱང་ཆུབ་བཞིན་དུ་བལྟ། །ཁམས་གསུམ་རྣམས་ནི་སྟོང་པར་བསམ། །
རང་བཞིན་གྱིས་ནི་སྦྱོར་བྲལ་བས། །རྒྱུ་དང་དེ་བཞིན་མཚན་ཉིད་ལ། །རྣམ་པར་རྟོག་པ་བྲལ་བ་དང་། །ལྷ་དང་སྨོན་ལམ་རྣམས་པར་སྤངས། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཡྃ་རྃ་བྃ་ལྃ་བཞི་ལ་དཀྱིལ་འཁོར་
བསྡུས་ནས་བྷྲུྃ་ཡིག་ལས་སྐྱེས་པའི་གཞལ་ཡས་ཁང་བསྒོམ་པར་བྱའོ། །ཟུར་བཞི་པ་དང་སྒོ་བཞི་པ། །རྟ་བབས་བཞི་ཡིས་བརྒྱན་པ་ལ། །དྲ་བ་དྲ་ཕྱེད་ཀྱིས་སྤྲས་པ། །ལྷ་དང་ལྷ་མོས་ཤིན་དུ་མཛེས། །བ་དན་དྲིལ་བུ་

90-1-156b

བཅས་པ་རྣམས། །སྣ་ཚོགས་རྩེ་མོ་རླུང་གིས་བསྐྱོད། །པྂ་ཡིག་ལས་ནི་དེ་དབུས་གནས། །སྣ་ཚོགས་པད་མ་རྣམ་པར་བསམ། །དེ་ཡི་ཟེ་འབྲུའི་དབུས་གནས་ལ། །སྣ་ཚོགས་རྡོ་རྗེ་དབྱུག་པར་བཅས། །ཡོངས་སུ་གྱུར་ལས་མཐའ་
དག་རྟགས། །ཞེ་སྡང་བདག་ཉིད་རྣམ་པར་བསྒོམ། །རིམ་མཚུངས་པད་མ་ཉི་མ་ལ། །མ་ཧེ་དམར་པོའི་སྟེང་དུ་ནི། །སྤྲུལ་པས་བདུད་རྣམས་མ་ལུས་པ། །གཡོན་བརྐྱང་ཞབས་ཀྱིས་མནན་པར་བྱ། །ཉི་མ་བྱེ་བའི་
འོད་འབར་ལྷ། །རོ་ལངས་མ་ཡིས་མགུལ་ནས་འཁྱུད། །དཔའ་བོ་ཞལ་གཅིག་ཕྱག་གཉིས་པ། །ཀླུ་བརྒྱད་ཀྱིས་ནི་རྣམ་པར་བརྒྱན། །སྤྱན་གསུམ་དམར་ཞིང་འཇིགས་སུ་རུང་། །མགོ་བོ་དམར་པོ་བརྒྱ་ཡི་ཕྲེང་། །གཡས་ན་
རྡོ་རྗེའི་དབྱུག་པ་དང་། །གཡོན་ན་ཐོད་པ་བསྣམས་པའོ། །ཁྲོ་བོའི་མཚུངས་པར་ལྡན་པ་དང་། །ལྗགས་ནི་བསྐྱོད་ཅིང་མཆེ་བ་གཙིགས། །ཁྲོ་གཉེར་སྐུ་མཁྲེགས་རྐེད་པ་ལ། །སྟག་གི་པགས་པས་རྣམ་པར་བརྒྱན། །ཐུང་ཞིང་ལྟོ་འཕྱང་
རྔམ་ཞིང་འབར། །ཤིན་ཏུ་རྣམ་དག་དྲི་མ་བྲལ། །རོ་ལངས་མ་ཡི་གཡས་གྲི་གུག །གཡོན་ན་མི་ཡི་ཐོད་པའོ། །སྤྱན་གསུམ་སྐྲ་ནི་གྲོལ་བ་དང་། །ཕྱག་རྒྱ་ལྔ་ཡིས་རྣམ་པར་བརྒྱན། །མགོ་བོའི་ཕྲེང་བ་མཚུངས་པར་ལྡན། །
རོ་བཅུད་འཛིན་པ་གཙོ་བོ་ཡི། །ཤར་གྱི་འདབ་མ་ལ་གཏི་མུག་རྡོ་རྗེ་དཀར་པོ། རྡོ་རྗེ་ཙར་ཙི་ཀཱ་དང་སྙོམས་པར་འཇུག་པའོ། །ལྷོའི་འདབ་མ་ལ་ཕྲ་མ་གཤིན་རྗེའི་གཤེད་ཁ་དོག་སེར་པོ། རྡོ་རྗེ་ཕག་མོ་དང་སྙོམས་པར་ཞུགས་
པའོ། །ནུབ་ཀྱི་འདབ་མ་ལ་འདོད་ཆགས་གཤིན་རྗེའི་གཤེད་ཁ་དོག་དམར་པོ། རྡོ་རྗེ་དབྱངས་ཅན་མ་དང་སྙོམས་པར་ཞུགས་པའོ། །བྱང་གི་འདབ་མ་ལ་ཕྲག་དོག་གཤིན་རྗེའི་གཤེད་ཁ་དོག་ལྗང་གུ་རྡོ་རྗེ་གཽ་རཱི་དང་སྙོམས་པར་ཞུགས་པའོ། །
ཙར་ཙི་ཀཱ་ནག་མོའོ། །ཕག་མོ་སེར་མོའོ། །དབྱངས་ཅན་མ་དཀར་མོའོ། །གཽ་རཱི་སྔོན་མོའོ། །གཡོན་པ་ན་ཐོད་པ་དང་གཡས་པ་ན་གྲི་གུག་གོ། ཕྱག་དང་ཞལ་དང་སྐུ་མདོག་ཡང་དག་པར་གནས་པ་ནི་དཔའ་བོ་ཇི་ལྟ་བ་

90-1-157a

བཞིན་ནོ། །མེའི་མཚམས་ན་མུ་མེན་གྱི་བུམ་པ་བཞི་མཉམ་གྱིས་གང་བའོ། །བདེན་བྲལ་དུ་གསེར་གྱི་བུམ་པ་གླ་བ་ཡིས་གང་བའོ། །རླུང་དུ་བྱི་རུའི་བུམ་པ་སིཧླ་ས་གང་བའོ། །དབང་ལྡན་དུ་དངུལ་གྱི་བུམ་པ་
ག་པུར་གྱིས་གང་བའོ། །ཐོད་པ་ཡིས་ཁ་གཡོགས་པ་རྣམ་པར་བསྒོམ་པར་བྱའོ། །ཁྲོ་བོའི་རྒྱལ་པོ་ལ་སོགས་པ་དཔའ་བོ་གཙོ་བོའི་སྔགས་གསུངས་པ་ནི། ཨོྂ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྙིང་པོའི་སྔགས་སོ། །
ཨོཾ་ཧྲྃསྵྃ་ཀྵ་ཡྃ་ཀཱ་རཱ་ཡ་གྲྀཧྞ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཉེ་བའི་སྙིང་པོའི་སྔགས་སོ། །ཨོཾ་མ་ཧཱ་ཡཀྵ་སེ་ནཱ་དྷི་པ་ཏ་ཡེ་མ་ཧཱ་དུར་དཱན་ཏ་ད་མ་ཀཱ་ཡ་ནཱ་ཥ་ཡ་ནཱ་ཥ་ཡ། བི་དྲཱ་པ་ཡ་བི་དྲཱ་པ་ཡ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཕྲེང་སྔགས་སོ། །ཨོཾ་དྭེ་
ཥ་ར་ཏི་ནུ་ད་ནུ་ད་ཏྲུ་ཊ་ཏྲུ་ཊ་ཧཱུྃ་ཛཿསྭཱ་ཧཱ། རྗེ་བཙུན་མའི་སྔགས་སོ། །ཨོཾ་མོ་ཧཱན་ཏ་ཀྲྀཏ་ཧཱུྃ་ཧཱུྃ་ཕཊ། ཨོཾ་པི་ཤུ་ནཱན་ཏ་ཀྲྀཏ་ཧཱུྃ་ཧཱུྃ་ཕཊ། ཨོཾ་རཱ་གཱན་ཏ་ཀྲྀཏ་ཧཱུྃ་ཧཱུྃ་ཕཊ། ཨོཾ་ཨཱིར་ཥྱཱན་ཏ་ཀྲྀཏ་ཧཱུྃ་ཧཱུྃ་ཕཊ། དཔའ་བོ་བཞིའི་སྔགས་སོ། །
ཨོཾ་མོ་ཧཱ་ར་ཏི་ཧཱུྃ་ཛཿ། ཨོཾ་པི་ཤུ་ན་ར་ཏི་ཧཱུྃ་ཛཿ། ཨོཾ་རཱ་ག་ར་ཏི་ཧཱུྃ་ཛཿ། ཨོཾ་ཨཱིར་ཥྱཱ་ར་ཏི་ཧཱུྃ་ཛཿ། དཔའ་བོའི་དབང་ཕྱུག་མ་བཞིའི་སྔགས་སོ། །ཨོཾ་མར་མེ་མར་མཱ་བི་གྷཱ་ཏེ་ཨོཾ་བཛྲ་ཙར་ཙི་ཀེ་ཧ་ར་ཧ་ར་བུཀྐ་མ་རཱ་ཡ་ཆེ་གེ་མོ་ལ་ཛཿ། 
ཨོཾ་གྷོ་ཎེ་སུ་གྷོ་ཎེ་བཛྲ་མཱ་མ་ཀཱི། བྷ་ར་བྷ་ར། སམྦྷ་ར་སམྦྷ་ར་ཧཱུྃ་ཛཿ། ཨོཾ་མར་མེ་མར་མཱ་ཀྵོ་བྷ་ཎཱི་ས་ར་སྭ་ཏི་ད་ར་ད་ར། ཐ་ར་ཐ་ར་ཕ་ར་ཕ་ར། ཀྃ་པ་ཀྃ་པ། དྷུ་ན་དྷུ་ན་ཧཱུྃ། ཆེ་གེ་མོ་ལ་ཛཿ། ཨོཾ་གམྦྷཱི་རེ་བཛྲ་ཀཱར་ཏི་ཀེ་གྷ་གྷ། 
རཀྟ་ཤོ་ཎ་ཏི་པྲི་ཡེ་གཽ་རཱི་ཆེ་གེ་མོ་ལ་ཛཿ། གདེངས་ཀའི་དབང་པོ་དགའ་བོ་ནི། །སྔོན་པོས་སྐྲ་བཅིངས་འཇིགས་པར་བྱེད། །ཀླུ་འཇོག་དམར་པོས་རྣ་བ་ལ། །བརྒྱན་ཅིང་རྩེ་མོ་འཁྱིལ་བ་སྟེ། །རིག་ལྡན་ཁྲ་བོས་དཔུང་པ་བརྒྱན། །
ལག་གདུབ་གདེངས་ཀ་དུང་སྐྱོང་སེར། །ཤིན་དུ་དཀར་བ་པད་དོ་ཤལ། །མཐའ་ཡས་སྔོན་པོ་མཆོང་ཕྱིར་ཐོགས། །ཤིན་དུ་མཛེས་པར་བྱས་པའོ། །བདུད་རྩིའི་ཁ་དོག་གདེངས་ཀ་ནི། །ནོར་རྒྱས་ཀྱིས་ནི་ཅོད་པན་བྱས། །

90-1-157b

པད་མའི་སྡོང་བུའི་ཁ་དོག་དཀར། །རྐང་གདུབ་པད་མ་ཆེན་པོ་ཡིས། །ཐམས་ཅད་ཕུ་ཏཱའི་ཡི་གེ་སྒྲོགས། །ཕྱག་གཉིས་པ་དང་མཆེ་བ་གཙིགས། །འཁོར་བ་དང་ནི་མྱ་ངན་འདས། །གཤིན་རྗེ་འཇོམས་པ་ཞེས་བྱ་ལ། །
རྣམ་རྟོག་ཐམས་ཅད་འཇོམས་པ་ཡི། །སྔགས་ཀྱིས་བྱིན་གྱིས་བརླབ་པར་བྱ། །མཁའ་ཁྱབ་རྫོགས་པའི་སངས་རྒྱས་ཀུན། །རང་གི་སྙིང་གའི་ས་བོན་གྱི། །ལྕགས་ཀྱུས་ཀུན་བཀུག་ཁར་ཞུགས་ནས། །བདེ་བ་
སྙིང་གར་ཞུགས་ཤིང་ཞུ། །དེ་ལས་སྤྲོ་བྱས་ས་བོན་རྣམས། །དེ་ཞུ་རྡོ་རྗེའི་ལམ་ནས་ནི། །རང་འོད་པད་མའི་ནང་མཐར་གནས། །དེ་བལྟས་ས་བོན་རང་གཟུགས་ལ། །དེ་ཡི་ས་བོན་ལས་སྐྱེས་པའི། །འཁོར་ལོ་ས་བོན་ཀུན་
བྱིན་བརླབ། །མེ་སྟག་འཕྲོ་བའི་ཚོགས་གསལ་བ། །ཆོ་ག་བཞིན་དུ་མཁས་པས་བསྒོམ། །བལྟ་ཞིང་སྙིང་གར་བཞུ་བྱས་ལ། །རྡོ་རྗེའི་ལམ་ནས་དབྱུང་བར་བྱ། །རང་རིག་པད་མའི་ཟེ་འབྲུ་ལ། །ལྷ་ཡི་ཚོགས་རྣམས་བལྟ་
བྱས་ལ། །སྣ་ཚོགས་མེ་ཏོག་ལ་སོགས་དབུལ། །ལག་ན་ལོ་མ་འཛིན་རྣམས་ཀྱིས། །ལེགས་པར་མཆོད་པར་བྱ་བ་སྟེ། །མཆོད་པའི་གླུ་ནི་ཡིད་འོང་དང་། །སྣ་ཚོགས་གར་གྱི་རང་བཞིན་དང་། །དེ་བཞིན་བདེ་བ་ཆེན་
པོས་མཆོད། །ཨེ་མ་གཤིན་རྗེའི་གཤེད་དམར་པོ། །བླ་མ་སྲིན་པོའི་རང་བཞིན་ཏེ། །བདག་ནི་ཁྱོད་མཐོང་འཇིགས་པས་ན། །བླ་མ་སྲིན་པོའི་རང་བཞིན་སྤངས། །མཐོ་རིས་ས་སྟེངས་ས་འོག་རྣམས། །ཁྱོད་ཀྱི་
གར་གྱིས་གཡོ་བར་བྱེད། །ཁྲག་གི་མིག་སྨན་ཁྲོ་བོའི་སེམས། །གར་མཛད་ཁྱོད་ནི་རོ་ལངས་གཟུགས། །དམར་ཞིང་ཐུང་བའི་ཚད་ལྡན་པ། །རྣམ་པ་མང་པོའི་སྤྲུལ་གཟུགས་བྱེད། །རྡོ་རྗེ་དབྱངས་ཅན་མ་ཡིས་
ཞུས། །ཁྱོད་ཀྱི་གར་མཛད་བདེ་བ་ཆེ། །ཁྱོད་ཀྱི་ཧྲཱིཿཥྚྲཱིཿའི་སྔགས་ཀྱི་གར། །ས་གསུམ་པོ་ཡི་འཁྲུལ་པ་སེལ། །བརྩེ་བས་ཁྲོ་བའི་རྗེ་བཙུན་ཁྱོད། །འགྲོ་ལ་ལྟ་ཞིང་གར་མཛད་དོ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་

90-1-158a

སྭ་བྷཱ་བ་ཨཱཏྨ་ཀོ྅ཧྃ། སྒྲ་ཡི་ཚོགས་པ་ཐམས་ཅད་ལ། །སྒྲ་བརྙན་དང་ནི་མཚུངས་པར་བལྟ། །འཁོར་ལོ་ཡི་ནི་འདྲེན་པ་ལ། །དེ་ཡི་དེ་ལ་དེ་བཞིན་བསྟོད། །གཏི་མུག་རྡོ་རྗེའི་རང་བཞིན་ཁྱོད། །
གཤིན་རྗེའི་གཤེད་པོ་ཤིན་དུ་འཇིགས། །སྟོན་པ་སངས་རྒྱས་ཀུན་རང་བཞིན། །རྡོ་རྗེའི་སྐུ་ལ་ཕྱག་འཚལ་བསྟོད། །ཕྲ་མ་རྡོ་རྗེའི་རང་བཞིན་ཁྱོད། །གཤིན་རྗེའི་གཤེད་པོ་ཤིན་དུ་འཇིགས། །རྡོ་རྗེའི་ཐུགས་དང་རབ་
མཚུངས་པའི། །རིན་ཆེན་རྡོ་རྗེ་ཕྱག་འཚལ་བསྟོད། །འདོད་ཆགས་རྡོ་རྗེའི་རང་བཞིན་ཁྱོད། །འདོད་ཆགས་ཆོས་ཀྱི་འབྱུང་གནས་གཙོ། །གསུང་མཆོག་ཀུན་གྱི་རབ་མཆོག་སྟེ། །གསུང་གི་རྡོ་རྗེ་ཕྱག་འཚལ་བསྟོད། །
ཕྲག་དོག་རྡོ་རྗེའི་རང་བཞིན་ཁྱོད། །གཤིན་རྗེའི་གཤེད་པོ་ལས་ཀུན་པ། །རྡོ་རྗེའི་སྐུ་དང་རབ་མཚུངས་པ། །ཕྱག་ན་རལ་གྲི་ཕྱག་འཚལ་བསྟོད། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་
གཅིག་བསྡུས་པ། །སངས་རྒྱས་ཀུན་གྱི་རབ་མཆོག་གཙོ། །དཀྱིལ་འཁོར་དབང་ཕྱུག་ཕྱག་འཚལ་བསྟོད། །ཨཱཿཡིག་ལས་སྐྱེས་རྣམ་དག་པ། །མགོ་བོ་གསུམ་གྱི་སྟེང་དུ་གནས། །པད་མའི་སྣོད་ནི་གང་བ་ཡི། །
དེ་འོག་མེ་ཡི་དཀྱིལ་འཁོར་ཏེ། །ར་ཡིག་ལས་བྱུང་གྲུ་གསུམ་མོ། །དེ་འོག་རླུང་གི་དཀྱིལ་འཁོར་ཏེ། །ནག་ཅིང་གཡོ་བ་གཞུ་ཡི་དབྱིབས། །ཡྃ་ལས་བྱུང་བ་བ་དན་མཚན། །དེ་ལ་རྣམ་པར་སྣང་མཛད་སོགས། །
ད་ཡིག་ལ་སོགས་ལས་བྱུང་བ། །གླང་པོ་ལ་སོགས་ལྔ་རྣམས་སོ། །ཧཱུྃ་སྐྱེས་རྡོ་རྗེའི་གདབ་བྱ་འདིས། །གདབ་བྱ་མཁས་པས་བསྒོམ་པར་བྱ། །རླུང་གིས་བསྐྱོད་ཅིང་མེ་ཡིས་ཞུ། །དེ་ལ་རྣམ་པར་བསྒོམ་པར་བྱ། །
རྡོ་རྗེས་མཚུངས་པར་རོ་གཅིག་གྱུར། །ཤིན་དུ་དྲི་མེད་དག་པར་བལྟ། །ཧཱུྃ་ཡིག་འོད་ཀྱིས་སངས་རྒྱས་རྣམས། །ཡེ་ཤེས་གཟུགས་ཀྱིས་དགུག་པར་བྱ། །རབ་ཞུགས་སྔགས་ཀྱི་གཟུགས་ཀྱིས་ནི། །མཆོག་གི་

90-1-158b

བདུད་རྩི་ལྔ་རྣམས་བལྟ། །དེ་ཉིད་གསུམ་གྱིས་བྱིན་གྱིས་བརླབ། །དཀྱིལ་འཁོར་བདག་པོ་རྣམས་ལ་མཆོད། །ལྕེ་ལ་རྣམ་དག་རྡོ་རྗེ་ཉིད། །ཧཱུྃ་ཡིག་ལས་བྱུང་དེ་ལ་བལྟ། །དེ་ཡི་འོད་ཟེར་སྦུབས་རྣམས་ལས། །
མཚུངས་པར་དགུག་ཅིང་དེ་ཡིས་ནི། །ཁམས་གསུམ་བཞུགས་པའི་རྫོགས་སངས་ཀུན། །དེ་བཞིན་དཀྱིལ་འཁོར་མཆོག་འདི་ལ། །སྙིང་གའི་ཡེ་ཤེས་དགུག་གཞུག་བྱ། །རྣམ་པར་རྟོག་པ་ཐམས་ཅད་སྤངས། །ཐོག་
མཐའ་དབུས་མའི་དབྱེ་བ་ཡིས། །དཔག་མེད་གཟུགས་བྱེ་དེ་ལ་ཡང་། །འཁྲུལ་པའི་གཟུགས་ལ་དེ་ཉིད་མེད། །གང་ལས་འཁྲུལ་པ་གཉིས་ལ་གནས། །འཁྲུལ་མེད་ཐམས་ཅད་སེམས་ལ་སྦྱིན། །འཕྲོ་དང་བསྡུ་བ་རྣམ་པར་
གཟུང་། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེའི་གཤེད་དམར་པོའི་རྒྱུད་ལས་མངོན་རྟོགས་ཀྱི་རིམ་པར་ཕྱེ་བ་སྟེ་དང་པོའོ།། །།  དེ་ནས་བཅོམ་ལྡན་འདས་དེ་བཞིན་
གཤེགས་པ་ཐམས་ཅད་ཀྱིས་བཅོམ་ལྡན་འདས་རྡོ་རྗེ་སེམས་དཔའ་ཆེན་པོ་ལ་བསྟོད་པའི་རྒྱལ་པོ་འདིས་གསོལ་བ་བཏབ་པ་དང་། ཇི་ལྟར་སེམས་ཅན་རབ་འཇུག་ལ། །ལས་ཀྱི་དབྱེ་བའི་རབ་དབྱེ་ལས། །ཡེ་ཤེས་ཀྱི་ནི་རྒྱ་མཚོ་
རྣམས། །རྡོ་རྗེ་ཆེན་པོ་བཤད་ཀྱིས་ཉོན། །དེ་ནས་རྡོ་རྗེ་འཛིན་རྒྱལ་པོས། །ལས་ཀུན་ཐམས་ཅད་རབ་བསྒྲུབ་པ། །ཉེས་ཀུན་གསོ་བའི་བདག་ཉིད་ཀྱིས། །ཚིགས་འདི་ཉིད་ནི་བཀའ་སྩལ་ཏོ། །དེ་ནས་
བཅོམ་ལྡན་འདས་དེ་བཞིན་གཤེགས་པ་རྣམས་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་རབ་ཏུ་གསལ་བར་མཛད་པ་ལ། བཅོམ་ལྡན་འདས་མཆོད་ཅིང་ཕྱག་འཚལ་ཏེ། གཡས་ཕྱོགས་སུ་ལན་གསུམ་བསྐོར་བ་
བྱས་ནས། ཡང་དང་ཡང་དུ་ཕྱག་འཚལ་ཏེ་བཅོམ་ལྡན་འདས་ཀྱི་བཀའ་ཉན་པར་མཛད་དོ། །དེ་ནས་རྡོ་རྗེ་འཛིན་རྒྱལ་པོས། །དབང་དུ་བྱ་བའི་འཁྲུལ་འཁོར་གསུངས། །འཁྲུལ་འཁོར་མཐར་ཐུག་གཤིན་རྗེ་གཤེད། །

90-1-159a

མ་བྱུང་འབྱུང་བར་མི་འགྱུར་རོ། །བུད་མེད་དབང་དུ་བྱ་བ་དང་། །བསྲུང་བའི་དོན་དང་དེ་བཞིན་དུ། །ཞི་བ་ལ་ནི་གཱི་ཝང་གཟུང་། །དེ་བཞིན་གྲོ་གའམ་སྨྱུག་ཤུན་ལ། །འཁོར་ལོ་གཉིས་ནི་མངོན་པར་བྲི། །
མིང་ནི་ནཱ་མཿབརྟེན་པར་བྱ། །ནག་པོའི་རྩ་སོགས་དང་བྲལ་བའི། །ཁམ་ཕོར་གཉིས་ནི་ཡང་དག་སྦྱར། །དབུས་སུ་ཞུན་མར་སྦྲང་རྩི་བླུགས། །སྲད་བུ་དཀར་པོས་དཀྲི་བར་བྱ། །མེ་ཏོག་དཀར་པོས་ཐུན་མཚམས་
གསུམ། །མཆོད་བྱ་ཁ་ནི་ཤར་དུ་ཕྱོགས། །གཤིན་རྗེ་མཐར་བྱེད་ཆུ་ཤེལ་བཞིན། །བདག་ཉིད་བསྒོམ་ནས་བསྒྲུབ་བྱ་ནི། །མདུན་དུ་ཟླ་བའི་དཀྱིལ་འཁོར་སྟེང་། །བལྟས་ལ་མངོན་པར་དབང་བསྐུར་རོ། །
བུམ་པ་དཀར་པོ་ཟླ་བ་བཞིན། །བདུད་རྩི་ལྔ་ཡིས་ཡོངས་སུ་གང་། །སངས་རྒྱས་རྣམས་ཀྱིས་ཁྲུས་མཛད་པ། །ཡང་དག་བལྟ་ཞིང་བཟླས་པ་བརྩམས། །ཨོཾ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུྂ་ཧཱུྂ་ཕཊ་ཕཊ། ན་མཿལྷ་སྦྱིན་
ལ་ཤཱནྟིཾ་ཀུ་རུ་ན་མཿ། ཞི་བའི་དམ་ཚིག་འདི་ལྟ་སྟེ། །སྐྱེས་བུ་རྣམས་ཀྱི་ཞི་བ་ལ། །གུར་གུམ་གྱིས་བྲི་རྒྱས་པ་ཡང་། །འཁོར་ལོ་གཉིས་བྲི་ཁ་ཆེ་ཡིས། །སྭཱ་ཧཱའི་དབུས་སུ་མིང་བཅུག་སྟེ། །བསྒྲུབ་བྱའི་མིང་བླང་དེ་
རྣམས་ལ། །ཕུ་ཡིས་མངོན་པར་གཏོར་བར་བྱ། །ཁམ་ཕོར་ཁ་སྦྱོར་ནང་བཅུག་ནས། །སྲད་བུ་སེར་པོས་དཀྲི་བར་བྱ། །ཁ་ནི་བྱང་བལྟས་ཐུན་མཚམས་གསུམ། །མེ་ཏོག་སེར་པོས་མཆོད་པར་བྱ། །ཁ་དོག་སེར་
པོ་གཤིན་རྗེ་གཤེད། །བདག་ཉིད་ངེས་པར་བལྟ་བར་བྱ། །བསྒྲུབ་བྱ་ཟླ་བ་སེར་ལ་གནས། །བུམ་པ་སེར་པོ་ཆུ་ཡིས་བཀྲུ། །མངོན་པར་དབང་བསྐུར་བསྒོམ་པར་བྱ། །རྒྱས་པར་བྱ་ཕྱིར་ཡང་དག་བཟླ། །
ཨོཾ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ལྷ་སྦྱིན་གྱི་པུ ཀུ་རུ་སྭཱ་ཧཱ། བཽ་ཥ་ཊ་ཨོཾ་ཧྲཱིཿཿཝི་ཀྲི་ཏཱ་ན་ན་ཧཱུྃ་ཧཱུྃ་ཕཊ་ཕཊ། ལྷ་སྦྱིན་གྱི་པུཥྚིྃ་ཀུ་རུ་བཽ་ཥཊ། ཅེས་པ་ནི་བཅོམ་ལྡན་འདས་ཀྱིས་རྒྱས་པའི་དམ་ཚིག་ཏུ་གསུངས་སོ། །

90-1-159b

གྲོ་གའམ་ནི་རས་དག་ལ། །རྒྱ་སྐྱེགས་དག་གི་ཁུ་བའམ། །ཡང་ན་ཙན་དན་དམར་པོ་ལ། །མིང་མེད་དག་གི་ཁྲག་བསྲེས་ནས། །འཁོར་ལོ་གཉིས་ནི་ཡང་དག་བྲི། །ཧོཿཡིག་གིས་བརྟེན་བྱས་པ་ཡི། །འཁྲུལ་འཁོར་
ནག་སོགས་དང་བྲལ་བ། །ཁམ་ཕོར་གཉིས་ནི་ཡང་དག་སྦྱར། །མར་དང་སྦྲང་རྩི་བཅུག་བྱས་ལ། །སྲད་བུ་དམར་པོས་དཀྲི་བར་བྱ། །ཁ་ནི་ནུབ་ཏུ་མངོན་ཕྱོགས་གནས། །མེ་ཏོག་དམར་པོས་མཆོད་པར་བྱ། །
ཁ་དོག་དམར་པོ་འབར་བ་ཆེ། །བདག་ཉིད་གཤིན་རྗེ་འཇོམས་བྱེད་ལ། །བསྒྲུབ་བྱ་ཟླ་བ་དམར་པོའི་སྟེང་། །དེ་བཞིན་དུ་ནི་བསམ་པར་བྱ། །རང་གི་ལུས་ལས་འཐོན་གྱུར་ཏེ། །འོད་ཟེར་དམར་པོའི་ལྕགས་ཀྱུ་ཡིས། །
བསྒྲུབ་བྱ་འགུགས་པར་བསྒོམ་པར་བྱ། །སྔགས་ནི་ཁྲི་ཙམ་སྤྲོ་ཞིང་བཟླས། །དེས་ནི་བསྒྲུབ་བྱ་མྱོས་གྱུར་ཏེ། །རྐང་པ་དག་ནི་དེ་བཞིན་འགྱེལ། །གོས་བྲལ་སྐྲ་ནི་གྲོལ་བ་རུ། །བསམ་ཞིང་བཟླས་པ་བརྩམ་པར་བྱ། །
གལ་ཏེ་དབང་དུ་མ་གྱུར་ན། །བརྟུལ་ཞུགས་ཅན་གྱིས་འཁོར་ལོ་བསྲོ། །མར་སོགས་བྲལ་བར་བྱས་ནས་ནི། །དུ་མེད་སེང་ལྡེང་མེ་ལའོ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཧོཿ། ལྷ་སྦྱིན་གྱི་མཆོད་སྦྱིན་དབང་དུ་
གྱིས་ཤིག་སྭཱ་ཧཱ། ཨོཾ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུྃ་ཧཱུྃ་ཕཊ་ཕཊ། བཽ་ཥཊ་ལྷ་སྦྱིན་གྱི་མཆོད་སྦྱིན་དབང་དུ་གྱིས་ཤིག །བཽ་ཥཊ་ཞེས་པ་ནི་འདིར་བཅོམ་ལྡན་འདས་ཀྱིས་དབང་གི་དམ་ཚིག་ཏུ་གསུངས་སོ། །ཡང་ན་དུར་ཁྲོད་གོས་དག་གམ། །
རང་བྱུང་གིས་བྱུགས་རས་དག་ལ། །རྒྱ་སྐྱེགས་ཁྲག་དང་བསྲེས་པ་ཡིས། །འཁོར་ལོ་གཉིས་ནི་ཡང་དག་བྲི། །ཛཿཡིག་དང་ནི་ཧྲཱིཿཡིག་གིས། །བསྒྲུབ་བྱའི་མིང་ནི་བརྟེན་བྱས་ལ། །བུད་མེད་པད་མའི་སྣོད་དག་ནི། །
ཁ་སྦྱར་ནང་བཅུག་མཆོད་པར་བྱ། །སྲད་བུ་དམར་པོས་དཀྲི་བྱས་ལ། །མེ་ཏོག་དམར་པོས་མཆོད་པར་བྱ། །ཉི་མ་འཆར་ཁ་དང་མཚུངས་དམར། །བདག་ཉིད་གཤིན་རྗེ་འཇོམས་བྱེད་དོ། །ཁ་དོག་དམར་པོའི་ལྕགས་ཀྱུ་ཡིས། །

90-1-160a

དྲི་མ་དང་ནི་རྨ་དག་དང་། །གདུག་པའི་ནད་ཀྱིས་བཟུང་ཞིང་འཇོམས། །གོས་དང་བྲལ་ཞིང་འདར་བར་བྱེད། །ངལ་ཞིང་ལུས་ནི་རྨ་དང་ལྡན། །ཕོལ་གྱི་ཕྲེང་བས་ལུས་ལ་གཟུང་། །མཚོན་གྱིས་རྨ་
ནི་འདོད་པར་བྱེད། །གྲང་བ་དང་ནི་རླུང་གིས་གཙེས། །མེ་ཡི་དབུས་སུ་ཡང་དག་བརྟེན། །མ་ཧེ་སྟག་དང་ཁྱི་རྣམས་དང་། །མཆུ་རིངས་རྣམས་ཀྱིས་ཟ་བར་བྱེད། །སངས་རྒྱས་སྡེ་རྣམས་འཇོམས་བྱེད་པའི། །
མ་རུངས་ཆེན་པོ་རྣམས་ཀྱི་ནི། །ལྟོ་བའི་ནང་ནས་རྒྱུ་མ་དང་། །ལུས་ལ་ཚེར་མས་གང་བ་དང་། །རྐང་པ་གདོས་དང་སྒྲོག་གིས་བསྡམས། །དེ་བཞིན་དུམ་བུ་དུམ་བུར་བྱས། །ལྤགས་པ་ངེས་པར་
ཤུ་བ་བསམ། །སྐེ་ཚེ་ཚྭ་ཡིས་བྱུག་པར་བྱ། །གྲང་བ་ཡིས་ནི་ལུས་འདོན་བསྒོམ། །དེ་ཡི་ལུས་ཀྱི་བསྲུང་སོགས་རྣམས། །བཅད་ཅིང་བདག་ཉིད་མདུན་དུ་གཟུང་། །དེ་ཡི་གོ་ཆ་གཅད་པར་བྱ། །
ལུས་ནི་དེ་བཞིན་སྟོང་པར་བསྒོམ། །བདག་གི་ལས་ལས་སྐྱེས་པ་ཡི། །ཁྲོ་བོ་གཤིན་རྗེ་གཤེད་གཟུགས་ཀྱིས། །འཇོམས་པ་དག་ཏུ་བསྒོམ་བྱ་ཞིང་། །རྐང་དང་ཚིལ་རྣམས་འཐུང་བ་སྟེ། །དེ་ཡི་མདུན་དུ་གཤིན་
རྗེ་བསྒོམ། །ལག་ན་དབྱུག་པ་སྟོབས་ཆེན་ལྡན། །མ་རུངས་དེ་ཡིས་གདུག་པ་དེ། །རྣམ་པར་འཇོམས་པ་བསྒོམ་པར་བྱ། །དེ་ཡི་རྒྱུ་མ་རྩ་རྣམས་ནི། །བྱ་རྒོད་ཀྱིས་གཟུང་མཁའ་ལ་འགྲོ། །ཀླུ་ཡིས་ས་འོག་འགུག་པར་བྱེད། །
ལྷ་མ་ཡིན་ལ་སོགས་པས་བཙིར། །དེ་ལྟར་བསྒྲུབ་བྱ་བསམ་པར་བྱ། །སྙིང་རྗེའི་སེམས་ཀྱིས་རབ་བཅིངས་ནས། །འཁོར་བ་ལས་ནི་ཕ་རོལ་བྱས། །སངས་རྒྱས་རྣམས་ཀྱི་ཞིང་དུ་འགྲོ། །དེ་ནས་བཅོམ་ལྡན་འདས་དེ་བཞིན་
གཤེགས་པ་རྣམས་ཐུགས་དགྱེས་ནས་གསུངས་པ། འདི་ལྟ་སྟེ། ཀྱེ་མ་གསད་བྱ་ལེགས་པར་བྱས། །གསད་པར་བྱ་བ་མ་བསད་དེ། །ཇི་སྲིད་སྡིག་རྣམས་གྲོལ་བར་བྱས། །ཤི་བ་དེ་ཡང་མ་ཤི་སྟེ། །སྡིག་པ་སྟོང་ཕྲག་བྱས་པ་ཡིས། །

90-1-160b

མནར་མེད་ལ་སོགས་མི་སྐྱེའོ། །ཨེ་མ་བདག་ཉིད་ཆེན་པོ་སྟེ། །བསད་པས་སངས་རྒྱས་བྱང་ཆུབ་ཐོབ། །སླར་ཡང་བརྩེ་བས་སེམས་ཅན་རྣམས། །གསད་པར་བྱ་བས་གསད་པར་བྱ། །ཨེ་མ་སྙིང་རྗེའི་སྟོབས་ཀྱིས་ཏེ། །
སྙིང་རྗེ་དམན་པས་འགྲུབ་མི་འགྱུར། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཧཱུྃ་ལྷ་སྦྱིན་སོད་ཧཱུྃ། ཨོཾ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུྃ་ཧཱུྃ་ཕཊ་ཕཊ། ཧཱུྃ་ཕཊ་ལྷ་སྦྱིན་མཱ་ར་ཡ་ཧཱུྃ་ཕཊ། ཅེས་པ་ནི་བཅོམ་ལྡན་འདས་ཀྱིས་རྟོག་པ་ཆེན་པོ་གསད་པའི་རྡོ་རྗེའི་
འཁྲུལ་འཁོར་དང་སྔགས་དང་རྒྱུད་ཀྱིས་གསད་པ་ལ་སོགས་པའི་དམ་ཚིག་ཏུ་གསུངས་སོ། །དེ་ནས་འཁོར་ལོ་གཉིས་བྲིས་ཏེ། །ཕཊ་ཀྱི་ཡི་གེའི་ནང་དུ་ནི། །བསྒྲུབ་བྱའི་མིང་དང་བཅས་པ་གཟུང་། །ཐོད་པ་ཡང་དག་སྦྱར་བྱས་ཏེ། །སྲད་བུ་
ནག་པོས་དཀྲི་བར་བྱ། །ཞེ་སྡང་སེམས་ཀྱིས་ཉིན་གུང་ལ། །དུར་ཁྲོད་དུ་ནི་གཞུག་པར་བྱ། །གཤིན་རྗེ་མཐར་བྱེད་མཚུངས་བལྟས་ནས། །བསྒྲུབ་བྱ་རང་གི་མདུན་དུ་བྱ། །རྟ་དང་མ་ཧེའི་སྟེང་ན་གནས། །གཉིས་པོ་དེ་ཡི་ལག་ན་མཚོན། །
ཁྲོ་བོའི་ཚོགས་ཀྱིས་ཀུན་ནས་བསྐོར། །གཉིས་པོའི་ཕྱོགས་ལ་བསམ་པར་བྱ། །གཉིས་པོ་དག་ནི་འཐབ་བྱེད་ཅིང་། །ཁྲོ་བས་སེམས་ནི་བཅིངས་པ་སྟེ། །འཐབ་མོ་བྱེད་པར་བསྒོམ་བྱས་ལ། །སྒོམ་ཞིང་བཟླས་པ་བརྩམ་པར་བྱ། །
ཨོཾ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུྃ་ཧཱུྃ་ཕཊ་ཕཊ། ལྷ་སྦྱིན་དང་མཆོད་སྦྱིན་དག་རྣམ་པར་ཞེ་སྡང་བར་གྱིས་ཤིག་ཕཊ་ཅེས་པ་ནི་བཅོམ་ལྡན་འདས་ཀྱིས་ཞེ་སྡང་ཆེན་པོའི་དམ་ཚིག་ཏུ་གསུངས་སོ། །ཆོ་ག་དེ་ཡིས་སྔོན་མ་བཞིན། །འཁོར་ལོ་གཉིས་པོ་
ཀུན་དུ་བྲི། །ཧཱུྃ་ཕཊ་ཡི་གེ་དག་གིས་བརྟེན། །ཐོད་པ་གཉིས་ནི་ཡང་དག་སྦྱར། །སྲད་བུ་ནག་པོས་ཡང་དག་དཀྲི། །ཕ་གཤིན་ནགས་སུ་བཞག་བྱས་ལ། །གཤིན་རྗེ་གཤེད་ཀྱི་རྣལ་འབྱོར་གྱིས། །བསྒྲུབ་བྱ་སྔོན་དུ་གཟུང་བར་
བསྒོམ། །ཡྃ་ལས་བྱུང་བ་གཞུ་ཡི་དབྱིབས། །རླུང་གི་དཀྱིལ་འཁོར་ནག་པོ་ལ། །རྔ་མོ་ཆེན་མོ་ཁ་དོག་སྔོ། །དེ་ཡི་སྟེང་དུ་བསྒོམ་པར་བྱ། །དེ་ལ་མ་རུངས་ཆེན་པོ་སྟེ། །རྡེག་ཅིང་ལྷོ་ཕྱོགས་འདེང་བ་དང་། །

90-1-161a

བསྒྲུབ་བྱ་འགུགས་པར་བསྒོམ་པར་བྱ། །སྙིང་གར་ལྕགས་ཀྱུས་དགུག་བྱ་ཞིང་། །མགྲིན་པ་ཞགས་པས་བཅིངས་བར་བྱ། །སེང་གེ་དམར་པོ་ལ་ཞོན་ནས། །རླུང་གི་དཀྱིལ་འཁོར་སྦྱར་བ་ཡིས། །འོང་བ་
དག་ནི་བསམ་བྱ་ཞིང་། །བདུད་རྩི་ལྔ་ཡི་ཆུ་ཡིས་བཀྲུ། །གལ་ཏེ་བསྒྲུབ་བྱ་མ་འོངས་ན། །བརྟུལ་ཞུགས་ཅན་གྱིས་འཁྲུལ་འཁོར་བསྲོ། །སེང་ལྡེང་ཤིང་གི་མེ་ལའོ། །དེ་ནས་བཟླས་པ་ཡང་དག་བརྩམས། །
ཨོཾ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཆེ་གེ་མོ་ཁུག་ཅིག་ཧྲཱིཿ ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་ཛཿལྷ་སྦྱིན་ཁུག་ཛཿཞེས་པ་ནི་འདིར་བཅོམ་ལྡན་འདས་ཀྱིས་འགུག་པའི་དམ་ཚིག་ཏུ་གསུངས་སོ། །བློ་ལྡན་གང་གིས་དུར་
ཁྲོད་གོས། །ཡུང་བ་དག་གི་ཁུ་བ་ཡིས། །འཁོར་ལོ་གཉིས་ནི་ཡང་དག་བྲི། །ལཾ་ཡིག་དག་གིས་བརྟེན་བྱས་ལ། །བསྒྲུབ་བྱའི་མིང་ནི་ཡང་དག་གཟུང་། །ཁམ་ཕོར་ཁ་སྦྱོར་དབུས་སུའོ། །ཁམ་ཕོར་སེར་པོ་སྟེང་དུ་གཞག །
དེ་ལ་མཁས་པས་རེ་ཁཱ་བྲི། །བདུན་དང་བཞི་པའི་རེ་ཁཱ་སོགས། །ཡང་དག་བྲིས་ཏེ་ཏིང་འཛིན་བྱ། །རི་རབ་རྩེ་མོ་བརྒྱད་པར་གྲགས། །དེ་ཡི་སྟེང་དུ་ཡང་དག་བྲི། །ཧཱུྃ་ཡིག་དང་ནི་བྃ་ཡིག་སྟེ། །དེ་ཡི་དབུས་སུ་རི་རབ་བོ། །
དེ་ཡི་སྟེང་དུ་ལྂ་ཡིག་གིས། །དབང་ཆེན་དཀྱིལ་འཁོར་དགོད་པར་བྱ། །སྣ་ཚོགས་རྡོ་རྗེས་མནན་བྱ་ཞིང་། །སྲད་བུ་སེར་པོས་བཅིང་བར་བྱ། །གཤིན་རྗེ་འཇོམས་བྱེད་ཁ་དོག་སེར། །བདག་ཉིད་རྣམ་པར་བསམ་
པར་བྱ། །བདག་ཉིད་ཁ་ནི་ལྷོ་རུ་ཕྱོགས། །དབང་ཆེན་དཀྱིལ་འཁོར་གྱིས་མནན་པའི། །བསྒྲུབ་བྱ་སེར་པོ་རྣམ་པར་བསམ། །མྱུར་དུ་རི་བོ་དགོད་ཅིང་གནོན། །སྣ་ཚོགས་རྡོ་རྗེས་མནན་བྱས་ལ། །དབང་ཆེན་
དཀྱིལ་འཁོར་འོག་དག་ཏུ། །མན་ད་ར་སོགས་རི་འཇིགས་དང་། །གངས་རི་མི་གཡོར་གྱུར་པ་ཡིས། །བསྒྲུབ་བྱ་མནན་པར་བསྒོམ་པར་བྱ། །དེ་ལ་འདི་བཞིན་བཟླས་པར་བྱ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྂ་ཧཱུྂ་ཕཊ་ཕཊ། 

90-1-161b

ལྃ་ལྷ་སྦྱིན་རང་གནས་སུ་རེངས་ལྃ་སྭཱ་ཧཱ། ཞེས་པ་ནི་བཅོམ་ལྡན་འདས་ཀྱིས་རེངས་པ་ཆེན་པོའི་དམ་ཚིག་གོ། ངག་ནི་རེངས་པར་འདོད་པ་ཡིས། །འཁོར་ལོ་གཉིས་པོ་དེ་བཞིན་བྲི། །ནང་དུ་བསྒྲུབ་བྱའི་མིང་བྱས་ནའང་། །
དེ་ལ་སྔགས་ནི་སྤྲོ་ཞིང་བཟླས། ཨོཾ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུྃ་ཧཱུྃ་ཕཊ་ཕཊ་ལྃ་ལྷ་སྦྱིན་གྱི་འདོད་པའི་དོན་གྱི་ཕྱིར་འགོག་ཅིང་ངན་པར་སྨྲོས་ཤིག །མཆོད་སྦྱིན་གྱི་ངག་སྟྃ་བྷ་ནྃ་ཀུ་རུ་ལྃ་ཞེས་པ་ནི་འདིར་བཅོམ་ལྡན་འདས་ཀྱིས་ངག་
རེངས་པའི་དམ་ཚིག་ཏུ་གསུངས་སོ། །ཤིན་དུ་མཐར་ཐུག་ལེགས་པར་སྦ། །ཇི་ལྟར་འདི་ཡི་བྱ་བ་བཤད། །ཉི་མ་གཅིག་གིས་འགྲུབ་པར་འགྱུར། །གཤིན་རྗེ་གཤེད་དམར་སྦྱོར་བས་སོ། །དུར་ཁྲོད་རས་ལ་སྔོན་བཞིན་དུ། །
འཁོར་ལོ་གཉིས་བྲི་བརྟུལ་ཞུགས་ཅན། །སྐེ་ཚེ་བ་དང་ཚྭ་དང་ནི། །དུག་དང་ནིམ་པ་ཀ་འམ་ནི། །ཚ་བ་གསུམ་དང་ཚྭ་རྐྱང་ངོ་། །དེ་བཞིན་དུར་ཁྲོད་སོལ་བ་དང་། །དྷ་དུ་ར་ཡི་ལོ་མའི་ཆུ། །ཙནྚའི་ས་བོན་དེ་བཞིན་དུ། །མཛུབ་མོ་ཡི་
ནི་ཁྲག་བླངས་ཏེ། །ཙི་ཏྲ་ཀ་ཡི་ཁུ་བས་སམ། །ཚ་སྒོ་ཙན་གྱི་ས་བླངས་ཏེ། །རྡོལ་པའི་རྫ་ཡི་དྲེག་པ་དང་། །བྱ་རོག་སྒྲོ་ཡི་སྨྱུ་གུ་ཡིས། །བཅུ་བཞི་ལ་བྲི་བརྟུལ་ཞུགས་ཅན། །གུང་ཐུན་ཁྲོ་བའི་སེམས་ཀྱིས་ནི། །
གདུག་པ་ཅན་རྣམས་བསད་པའི་ཕྱིར། །སྣ་ཚོགས་སེམས་ཅན་རྣམ་འཇོམས་པ། །ཧཱུྃ་གི་ཡི་གེས་མཐའ་རྟེན་ལ། །རྣལ་འབྱོར་ཁ་ནི་ལྷོ་རུ་ཕྱོགས། །བདག་ཉིད་གཤིན་རྗེ་འཇོམས་བྱེད་དེ། །ཁྲོ་བོའི་གཟུགས་
ཅན་གཏུམ་པོ་ཆེ། །མགོ་བོའི་དུམ་བུས་རྣམ་པར་བརྒྱན། །མ་ཧེ་ལ་བཞུགས་ལྗགས་བསྐྱོད་ཅིང་། །གསུས་ཆེན་འཇིགས་པར་བྱེད་པ་པོ། །མཆེ་གཙིགས་སྐྲ་ནི་གྱེན་དུ་བརྫེས། །སྨིན་མ་དམར་སེར་དེ་བཞིན་དུ། །
གཡས་ན་རྡོ་རྗེའི་དབྱུག་ཆེན་ལ། །དེ་བཞིན་གཡོན་ན་ཐོད་པའོ། །མི་སྡུག་མཆེ་བ་རབ་ཏུ་གཙིགས། །བསྐལ་པའི་མེ་ནི་འབར་བ་བཞིན། །དེ་བཞིན་བདག་ཉིད་རྣམ་པར་བསྒོམ། །མྱུར་དུ་བསྒྲུབ་བྱ་དེ་མདུན་གཟུང་། །

90-1-162a

ཁྲོ་བོ་རྣམས་ཀྱིས་འཇོམས་པ་དང་། །སངས་རྒྱས་ཡིན་ཡང་བཟློག་པར་དཀའ། །ཨོཾ་ཧྲཱིཿཥྚྲཱིཿཝི་ཀྲི་ཏཱ་ན་ན་ཧཱུྃ་ཧཱུྃ་ཕཊ་ཕཊ་ལྷ་སྦྱིན་སྐྲོད་པར་གྱིས་ཤིག་ཧཱུྃ་ཕཊ་ཅེས་པ་ནི་བཅོམ་ལྡན་འདས་ཀྱིས་བསྐྲད་པ་ཆེན་
པོའི་དམ་ཚིག་ཏུ་གསུངས་སོ། །རྣལ་འབྱོར་ཁྲོ་ཞིང་ལྷོར་ཕྱོགས་ལ། །ཁྲག་བཅས་དུར་ཁྲོད་ཐལ་བ་དང་། །དུག་དང་ཚྭ་དང་སྐེ་ཚེ་དང་། །ཚ་བའི་མར་ཁུ་སྨྱོ་ལོ་མས། །དེ་བཞིན་དུར་ཁྲོད་གོས་ལ་ནི། །འཁོར་ལོ་
གཉིས་པ་དེ་བཞིན་བྲི། །གསད་བྱ་གཤིན་རྗེའི་ལུས་ལ་གནས། །སྡང་སེམས་མ་ཧེ་རྟ་དག་ལ། །བསྐྲད་པ་རྔ་མོའི་ལུས་ལ་གནས། །ཞི་བ་ཟླ་བའི་དཀྱིལ་འཁོར་དཀར། །རྒྱས་པ་ཟླ་བ་སེར་པོ་ལ། །བུད་མེད་སྙིང་གར་
དབང་དུ་བྱ། །ངག་བཅིང་ར་ཡི་ལུས་ལ་གནས། །རེངས་པ་རི་རབ་དབུས་སུ་སྟེ། །དགུག་པ་སེང་གེ་སྟག་ལ་གནས། །དེ་བཞིན་གཞན་ཡང་མཚོན་པར་བྱ། །གི་ཧྃ་དང་ནི་རྒྱ་སྐྱེགས་དང་། །དེ་བཞིན་ཁ་ཆེའི་བྱེ་བྲག་གིས། །
དབང་བྱ་གྲོ་ག་ཤིང་ཤུན་བྲི། །འགྲུབ་འགྱུར་འདི་ལ་ཐེ་ཚོམ་མེད། །ཁམ་ཕོར་ཁ་སྦྱར་ནང་དུ་གཞུག །དགེ་བའི་སེམས་ཀྱིས་ཡང་དག་གཟུང་། །བྱ་རོག་སྒྲོ་ཡིས་བྲི་བར་བྱ། །པད་མ་ཁ་སྦྱོར་དུར་ཁྲོད་ལ། །ཉི་མའི་
གུང་ལ་སྦ་བར་བྱ། །གཤིན་རྗེ་གཤེད་ཀྱི་རྣལ་འབྱོར་བདག །ཨོཾ་ཧྲཱིཿཥྚྲཱིཿསོགས་སྔགས་བཟླས་ལ། །ལྷོ་ཕྱོགས་གནས་ཏེ་ཚར་བཅད་དོ། །ཞི་བའི་ཁ་དོག་ཡ་ཡིག་དབྱི། །ནི་གཉིས་ཀྱང་ནི་དེ་བཞིན་ནོ། །ཕྱི་ནས་དབུས་
སུ་ཡ་ཡིག་ལས། །ལྷག་མའི་ཡི་གེ་ཅི་བདེ་བར། །སྔོན་དུ་བསྙེན་པ་ཁྲི་བཟླས་ལ། །ལས་འདི་རབ་ཏུ་བསྒྲུབ་པར་བྱ། །ཡེ་ཤེས་རྡོ་རྗེས་བྱ་བ་སྟེ། །གཤིན་རྗེ་གཤེད་ཀྱི་སྦྱོར་བ་ཡིས། །དྲག་པོ་ཆེན་པོའི་དཀྱིལ་འཁོར་འདི། །
གང་དུ་བྲིས་ཤིང་གནས་པ་དང་། །ཡི་གེ་བྲིས་པར་གྱུར་པ་ཡིས། །ཁྱིམ་དེ་རྟག་ཏུ་འཐབ་མོར་འགྱུར། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་འཁྲུལ་འཁོར་གྱི་སྐབས་རིམ་པར་ཕྱེ་

90-1-162b

བ་གཉིས་པའོ།། །། རི་དང་སྐྱེ་བོས་དབེན་པའི་ཕྱོགས། །གསང་ཞིང་ཡིད་བརྟགས་ས་གཞི་ལ། །རི་མོ་གསལ་བྲིས་རྣལ་འབྱོར་བདག །སྔགས་ཀྱིས་འགུག་པ་བརྩམ་པར་བྱ། །དཀར་ཞིང་ཞལ་གཅིག་ཕྱག་གཉིས་པ། །གྲི་གུག་ཐོད་པ་འཛིན་
པ་ཡི། །ཙར་ཙི་ཀཱ་ནི་བསྒོམ་པར་བྱ། །རྣལ་འབྱོར་ཁྲག་འགུགས་རབ་སྦྱོར་བ། །དེ་ནས་བཅོམ་ལྡན་འདས་གཤིན་རྗེ་གཤེད་ཆེན་པོ་དཀྲུག་པ་རྡོ་རྗེ་ཁྲག་འགུགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །རྡོ་རྗེ་ཙར་ཙི་ཀཱའི་
སྔགས་གསུངས་པ་འདི་ལྟ་སྟེ། ཨོཾ་བཛྲ་ཙར་ཙི་སི་དྷཱ་ན་ཏྲ་ནཱ་ལ་ཧཱ་རི་ཎི་རཏྣ་ཏྲ་ཡ་པ་རི་ཎོ་རུ་དྷི་ར་མཱ་ཀར་ཥ་ཡ་ཛཿ། ཞལ་ནི་རབ་ཏུ་བསྐྱོད་མཛད་ནས། །སྔགས་འདི་རྗེས་སུ་དྲན་བྱས་ལ། །ཁམས་གསུམ་པ་ཡི་ཁྲག་ཆེན་པོ། །འགུགས་
འགྱུར་འདི་ལ་ཐེ་ཚོམ་མེད། །དེ་ནས་གཤིན་རྗེ་གཤེད་ཆེན་པོ་རྡོ་རྗེ་མྱོས་པ་འགུགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །རྡོ་རྗེ་ཕག་མོས་ཆང་དགུག་པའི་དམ་ཚིག་གསུངས་པ་འདི་ལྟ་སྟེ། ཨོཾ་གྷོ་ནེ་
སྡུ་གྷོ་ནེ་བཛྲ་མཱ་མ་ཀཱི་བྷ་ར་བྷ་ར། སྃ་བྷ་ར་སྃ་བྷ་ར། ཏྲཻ་དྷཱ་ཏུ་ཀ་མ་དྱཱ་ཀར་ཥ་ཡ་ཛཿ། རྫ་མཁན་ལག་པ་ཕྱིས་པའི་སས། བུམ་པ་ཁ་ནི་མཛེས་བྱས་ཏེ། རྐུན་པོའི་སྐྲ་ཡི་སྟེང་དུ་གཞག །སྔགས་ནི་རྗེས་སུ་དྲན་པར་བྱ། །སྔགས་འདིའི་
བདག་ཉིད་ཆེ་བ་ནི། །མཆོད་རྟེན་པ་ཏ་ན་རུ་བསྟན། །མཁས་པས་འབད་པས་དམིགས་བྱས་ན། །ཆང་ནི་འགུགས་པར་རབ་ཏུ་གྲགས། །དེ་ནས་བཅོམ་ལྡན་འདས་གཤིན་རྗེ་གཤེད་ཀྱི་རྡོ་རྗེ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་སོ། །ཨོཾ་པི་ཙུ་པི་ཙུ་པྲཛྙཱ་བར་དྷ་ནི། ཛྭ་ལ་ཛྭ་ལ་མེ་དྷཱ་བར་དྷ་ནི། དྷི་རི་དྷི་རི། བུད་དྷི་བར་དྷ་ནི་སྭཱ་ཧཱ། ཚེས་གཅིག་ནས་ནི་བཟུང་ནས་ནི། །ཇི་སྲིད་བཅྭ་ལྔའི་མཐར་ཐུག་ཀུན། །ལེགས་པར་
སྦྱར་བ་བརྩམ་པར་བྱ། །ཇི་སྲིད་ཟླ་བའི་རྗེས་འབྲངས་ནས། །གསུང་གི་དབང་ཕྱུག་མ་ནི་འགྲུབ། །འདི་ཡིས་ཚིགས་བཅད་བརྒྱ་ཕྱེད་དོ། །ཁམས་གསུམ་པ་ནི་མ་ལུས་ཤིང་། །མ་ལུས་ལུས་པ་མེད་པ་འགྲུབ། །

90-1-163a

དེ་ནས་བཅོམ་ལྡན་འདས་གཤིན་རྗེ་མཐར་བྱེད་ཆེན་པོ་དཀྲུག་པ་རྡོ་རྗེ་ཁུ་བ་འགུགས་པ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཁུ་བ་འགུགས་པ་གཽ་རཱིའི་སྔགས་གསུངས་པ་འདི་ལྟ་སྟེ། 
ཨོཾ་ཀརྜྷྲི་ནི་ཀཪྵ་ཎི་གཽ་རཱི་ཛཿ་དུཥྚ་པྲ་དུཥྚཱ། ཡཱཿཤུ་ཀྲ་མཱ་ཀར་ཥ་ཡ་ཛཿཛཿཛཿཧཱུཾ་སྭཱ་ཧཱ། །ནམ་མཁའི་གདོང་དང་རྡོ་རྗེའི་ལམ། །རླུང་དང་དྲིལ་སྦྱོར་ལྕགས་ཀྱུ་ཡིས། །ཁུ་བའི་ཚོགས་རྣམས་འགུགས་པར་བྱེད། །བསྒོམ་དང་བཟླས་
པ་རབ་སྦྱོར་བས། །སྐྱེ་བོས་དབེན་དང་ནགས་ཚལ་དུ། །ལས་འདི་རབ་ཏུ་བསྒྲུབ་པར་བྱ། །མཚན་མོ་བདུན་གྱི་སྦྱོར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །དེ་ནས་བཅོམ་ལྡན་འདས་རྡོ་རྗེ་གཤིན་རྗེ་གཤེད་ཆེན་པོ་
དུས་ཀྱི་དབྱེ་བ་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །འདིར་མཆོག་གི་དབང་བསྐུར་བའི་དམ་ཚིག་ཉིད་ཀྱི་སྐུ་གསུང་ཐུགས་རྡོ་རྗེ་རྣམས་ལས་སྤྲོ་བར་མཛད་ནས། ཨུ་དུྃ་བ་ར་མན་དཱ་ར། །ཡོངས་སུ་སྐྱེས་
དང་སྣ་མ་དང་། །ཀར་ཎ་ཀ་ཡི་ཕྲེང་བ་རྣམས། །བུ་ཁྱོད་ཟུང་ལ་བྱིན་གྱིས་རློབས། །ཁམས་གསུམ་རལ་གྲི་ཆེན་པོ་ལ། །སངས་རྒྱས་ཀུན་གྱིས་ཕྱག་བྱས་པ། །བཟུང་ན་བདུད་ལས་རྒྱལ་བར་འགྱུར། །ལས་ཀྱི་རལ་གྲི་དམ་
པ་འདི། །ཐབས་དང་ཤེས་རབ་རང་བཞིན་གྱི། །རྡོ་རྗེ་དྲིལ་བུ་བསྒྲུབ་པའི་ཕྱིར། །བུ་ཁྱོད་གསང་བའི་རྡོ་རྗེ་ཟུང་། །སློབ་མ་ཡང་དག་གཟུང་བར་གྱིས། །འདི་ནི་བཏུང་བ་རིན་ཆེན་ཏེ། །རྡོ་རྗེའི་ལུས་སུ་རབ་སྒྲུབ་པ། །
མི་ཡི་བཏུང་བྱ་ཡེ་ཤེས་ཆུ། །བུ་ཁྱོད་ཀྱིས་ནི་ཐམས་ཅད་དུ། །སློབ་མའི་ཁར་ཡང་བླུད་པར་བྱ། །གཤིན་རྗེ་གཤེད་ཀྱིས་རབ་ཏུ་གསུངས། །སེམས་ནི་རབ་ཏུ་དགའ་བ་ཡིས། །རྡོ་རྗེ་སློབ་མ་བདག་ཉིད་ཆེ། །
དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་སྔགས་ཀྱིས་འགུགས་པ་རབ་ཏུ་སྦྱོར་བ་སྟེ་རིམ་པར་ཕྱེ་བ་གསུམ་པའོ།། །། དེ་ནས་དཔལ་ལྡན་རྡོ་རྗེ་འཆང་། །

90-1-163b

རལ་གྲི་སྒྲུབ་པ་གསུང་བར་མཛད། །སྐྱོབ་པ་སངས་རྒྱས་ཐམས་ཅད་ཀྱི། །ལྷ་མོ་ཁྱོད་ནི་དབང་དུ་གྱུར། །གཤིན་རྗེ་གཤེད་ཀྱི་དཀྱིལ་འཁོར་གྱི། །སློབ་དཔོན་རྣམས་གསུངས་རྒྱུད་བསྒྲུབ་ཕྱིར། །ཁབ་ལེན་ལྕགས་ཀྱི་
རལ་གྲི་ཉིད། །དེ་རྣམས་ཡང་ན་བཅུད་ཅན་གྱི། །རལ་གྲི་ཁྲུ་གང་ཚད་བཅས་ཚད། །བརྟུལ་ཞུགས་ཅན་གྱིས་རྣམ་པར་བསམ། །བཅུ་བཞི་འམ་ནི་བརྒྱད་དག་ལ། །དུར་ཁྲོད་དབུས་སུ་སྦ་བར་བྱ། །བདུད་རྩི་ལྔ་དང་མཚུངས་
པར་ལྡན། །ཐུན་མཚམས་གསུམ་དུ་བཟླས་པ་ཁྲི། །ཟླ་བ་སོ་སོའི་བཅུ་བཞི་ལ། །གཏོར་མས་སྔོན་དུ་མཆོད་པར་བྱ། །ཟླ་བ་རེ་ལ་བཟླས་པ་འབུམ། །འབུམ་ཕྲག་ལྔ་ཡིས་འགྲུབ་པར་འགྱུར། །གྲུབ་ན་རལ་
གྲི་རབ་ཏུ་འབར། །འོད་ཟེར་ལྔ་ཡི་གློག་ཆེན་འཁྱུག །གྲུབ་པ་དེ་ནི་གཟུང་གྱུར་པས། །མི་རྣམས་ཁམས་གསུམ་ལས་རྒྱལ་འགྱུར། །རྣལ་འབྱོར་གང་གིས་རལ་གྲི་གྲུབ། །གཤིན་རྗེ་གཤེད་པོ་འཇིགས་བྱེད་
སྦྱོར། །བདེ་བར་འགྲུབ་ཅིང་ས་ཆེན་གྱིས། །དེ་ཡིས་འཐབ་པ་བཟོད་མི་ནུས། །རྐང་གཉིས་པ་དང་རྐང་བཞི་ཀུན། །མཐོང་བས་གནས་སྐབས་བཅུ་རུ་འགྱུར། །ལྷ་དང་ལྷ་མིན་གྱིས་མི་བཟོད། །མི་ཡི་འཇིག་
རྟེན་སྨོས་ཅི་དགོས། །རྒྱ་མཚོའི་ས་ནི་བླངས་བྱས་ལ། །ཀླུ་ཡི་གཟུགས་ནི་སྦྱར་བར་བྱ། །ཨོཾ་ཕུ་ཡི་གེ་ཧཱུྃ་ལ་དགོད། །ཧྲཱིཿཥྚྲཱིཿ། །ལ་སོགས་སྔགས་རྣམས་བཟླ། །ཆར་མི་འབབ་པའི་དུས་རྣམས་ལ། །ཁྲི་ནི་བཟླས་པས་
འབབ་པར་འགྱུར། །སྦྲུལ་ནག་ཤ་དང་ནིམ་པ་ཡི། །ལོ་མ་དག་ནི་བསྲེས་པ་ཡིས། །དེ་ཡི་རི་ལུ་ལེགས་པར་བྱ། །བརྟུལ་ཞུགས་ཅན་གྱིས་རྒྱ་མཚོར་འཕང་། །ཁྲི་ཕྲག་བཟླས་པར་གྱུར་པ་ཡིས། །དབའ་ཀློང་རེངས་བྱེད་མཆོག་ཡིན་ནོ། །
ཙཎ་ཌའི་ས་བོན་བརྒྱ་གཟུང་ཞིང་། །མོན་སྲན་གྲེའུ་འབྲས་བསྲེས་ཏེ། །འབུམ་ཕྲག་བརྒྱད་བཟླས་སྦྱིན་སྲེག་གིས། །དེ་ཡིས་ལྷ་རྣམས་མཐོང་བར་འགྱུར། །དུར་ཁྲོད་རོ་བསྲེགས་མགལ་བའི་ཤིང་། །བརྟུལ་ཞུགས་ཅན་གྱིས་

90-1-164a

གཟུགས་བརྙན་བྲི། །སྨྱོ་བྱེད་ཁུ་བས་བྱུགས་བྱས་ཏེ། །ཁྲི་ཕྲག་བཟླས་ན་མཛེ་ཡིས་འཁྱེར། །ཡུངས་ཀར་ས་བོན་བསྡུས་པ་ལ། །འབུམ་ཕྲག་བཞི་ནི་བཟླས་བྱས་ཏེ། །སྦྲུལ་གྱིས་གཟུང་ནས་འགྱེལ་བ་ལ། །གཏོར་ན་འཚོ་བར་
ཐེ་ཚོམ་མེད། །རི་བོ་ཆུས་བཀས་ས་བླངས་ནས། །སྔགས་ནི་འབུམ་དུ་བཟླས་པ་ཡིས། །མགོ་ལ་བྱུག་པ་ཙམ་གྱིས་ནི། །མགོ་ཡི་ཟུག་རྣམས་འཇོམས་པར་འགྱུར། །བདུན་ཉིད་མངོན་པར་བསྔགས་བྱས་ཏེ། །ལག་པས་མགོ་བོ་
མཉེ་བྱས་ན། །མགོ་ཡི་ཟུག་རྔུ་མི་འབྱུང་ཞིང་། །ཉམས་པར་འདི་ལ་ཐེ་ཚོམ་མེད། །བྲམ་ཟེ་ཡི་ནི་ཤ་དག་དང་། །དུར་ཁྲོད་ས་དང་ཐལ་བ་ལ། །གཤིན་རྗེ་གཤེད་ཀྱི་སྐུ་གཟུགས་བྱ། །ཞལ་གཅིག་ཕྱག་ནི་གཉིས་པ་སྟེ། །གཡས་
ན་རྡོ་རྗེ་ཆེན་པོ་སྟེ། །གཡོན་ན་མགོ་བོ་དེ་བཞིན་དུ། །ཁ་དོག་དཀར་པོ་འཇིགས་ཆེན་པོ། །དེ་ཡིས་གདུག་པ་འཇོམས་པར་བྱེད། །བདུད་རྩི་རྣམ་པ་ལྔ་ཡིས་ནི། །ཉི་མ་སོ་སོར་གཏོར་མ་སྦྱིན། །བདག་གི་དགྲ་བོ་སོད་ཅིག་ཅེས། །
རྣལ་འབྱོར་པ་ཡིས་རྟག་གསོལ་གདབ། །འདི་སྨྲས་མཚན་མོ་ཉལ་བ་ལས། །དགྲ་བོ་ཐོ་རངས་འཆི་བར་འགྱུར། །ཡང་ན་ནད་ཀྱིས་འདེབས་འགྱུར་ཏེ། །ཆུ་འགགས་ལ་སོགས་ཀྱིས་ཁྱབ་འགྱུར། །དགྲ་ལས་རྣམ་པར་སྣང་མཛད་
བླང་། །མི་ཡི་རྐང་སྦུབས་ཡོངས་བཀང་སྟེ། །སྔགས་ནི་འབུམ་དུ་བཟླས་ནས་ནི། །ཤིང་གི་དྲུང་དུ་མངོན་པར་འགྱེལ། །ཡི་དགས་ནགས་སུ་རྟག་ཏུ་འཁྱམ། །རྣལ་འབྱོར་དབང་ཕྱུག་ཚིམ་པས་བདེ། །སྣ་ཚོགས་དོན་རྣམས་རབ་
ཏུ་འགྲུབ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་འཇིགས་པར་བྱེད་པ་ཞེས་བྱ་བ་སྟེ་རིམ་པར་ཕྱེ་བ་བཞི་པའོ།། །། 
དེ་ནས་རྒྱལ་པོ་རབ་བསྒྲུབ་པ། །བདག་གིས་ཡང་དག་བཤད་པར་བྱ། །མ་ཉམས་དེ་བཞིན་རྨ་མེད་པ། །ལྗོན་ཤིང་དག་ལ་སྦྱངས་པ་བླངས། །ཕབ་ནས་ལེགས་པར་ཁྲུས་བྱས་ཏེ། །ཕྲེང་བའི་བཟླས་པས་བསྒྲུབ་པར་བྱ། །

90-1-164b

ཟླ་བ་ཟླ་བའི་བཅུ་བཞི་ལ། །བདུད་རྩི་ལྔ་དང་ལྡན་པ་ཡི། །ཤ་ལྔ་ཡིས་ནི་བྱུག་བྱས་ལ། །མཆོག་གི་བཟླས་པས་བཟླས་པར་བྱ། །འདི་ནི་བྱེ་བ་བཟླས་པ་ཡིས། །རྒྱལ་པོ་ངེས་པར་འགྲུབ་འགྱུར་ཏེ། །ཨེ་མ་སྔགས་ཀྱི་ནུས་པ་
ཡིས། །རོ་ནི་སྒྲོགས་པར་བྱེད་འགྱུར་ན། །གཤིན་རྗེ་གཤེད་ཀྱི་རྣལ་འབྱོར་ལྡན། །ཅུང་ཟད་འཇིགས་པར་མི་བྱའོ། །རྣལ་འབྱོར་གང་དང་གང་འདོད་པ། །དེ་རྣམས་ཐམས་ཅད་སྟེར་བར་འགྱུར། །མ་ཧེ་དང་ནི་ཆུ་སྲིན་ནམ། །
སྟག་གམ་དེ་བཞིན་གཞན་ཡང་ནི། །དྲེད་དང་སྤྲེའུའི་ཁྱད་པར་ཅན། །དུག་དང་སྐེ་ཚེ་ཚྭ་དང་ནི། །ཤཽ་བྷཱཉྫ་ནྃ་ཚ་བ་གསུམ། །དེ་རྣམས་ལས་ནི་གཟུགས་བརྙན་ནི། །གཤིན་རྗེ་གཤེད་ཀྱི་གཟུགས་འཇིགས་བྱེད། །
ཧྲཱིཿཥྚྚཱིཿ་ལ་སོགས་སྔགས་བཟླས་ལ། །རྣལ་འབྱོར་པ་ཡིས་གསོལ་བ་གདབ། །རྒྱལ་པོ་ཆེ་གེ་མོ་སོད་ལ། །བདག་ལ་དེ་ཡི་བྱ་བ་གྱིས། །བསྙེན་པ་བྱེ་བ་བཟླས་པས་འགྲུབ། །ངེས་པར་བདེན་པར་ཐེ་ཚོམ་མེད། །དེ་ནས་
གཞན་ཡང་རྒྱལ་ཟླ་ཡི། །དཀར་ཕྱོགས་ཉི་མ་སྣུམས་ལྡན་ཚེ། །རྡུལ་གྱི་གོས་ནི་ཡང་དག་བླང་། །རི་མོ་མཆོག་ཉིད་བྲི་བར་བྱ། །སྣག་ཚ་ཆེན་པོ་མཚུངས་སྦྱོར་བས། །དཀྱིལ་འཁོར་གྱི་ནི་བདག་པོ་ཉིད། །ཁ་དོག་དཀར་པོ་
འཇིགས་ཆེན་པོ། །མཆོག་ནི་ཞལ་གཅིག་ཕྱག་གཉིས་པ། །གཡས་ན་རྡོ་རྗེ་འབར་བ་དང་། །གཡོན་ན་ཁྲག་བཅས་མགོ་བོ་འཛིན། །གཡོན་བརྐྱང་ཞབས་དང་འཇིགས་པ་སྟེ། །རིན་ཆེན་ཅོད་པན་རྣམ་བརྒྱན་ཅིང་། །
རིན་ཆེན་རྒྱན་རྣམས་ཡོངས་རྫོགས་ལ། །འོད་ཟེར་ཕྲེང་བས་འཁྲིགས་པ་སྟེ། །རྒྱལ་པོ་གསོད་པར་བྱེད་པ་ནི། །འོག་གི་ཆ་ལ་ངེས་པར་སྦྱར། །མིང་བཅས་ཁ་དོག་ཡང་དག་ལྡན། །ཇི་ལྟ་བ་ཡི་རྣམ་པར་གནས། །ལྷ་ལ་ཡོངས་
སུ་རྫོགས་པར་བྱ། །ཇི་ལྟ་བ་ཡི་དངོས་པོའི་ཚད། །དཀྱིལ་འཁོར་གྲུ་གསུམ་ངེས་པར་ནི། །དེ་ཡི་མདུན་དུ་སྦྱིན་སྲེག་བྱ། །སྦྱིན་སྲེག་འབུམ་གྱིས་རྒྱལ་པོ་ནི། །ཐོབ་འགྱུར་འདི་ལ་ཐེ་ཚོམ་མེད། །དེ་ནས་གཞན་ཡང་ཟླ་གཟས་གཟུང་། །

90-1-165a

ཡང་ན་ཉི་མ་མ་མཐོང་ཚེ། །དུར་ཁྲོད་ཐལ་བ་བླངས་ནས་ནི། །བརྟུལ་ཞུགས་ཅན་གྱིས་གཟུགས་རྙན་བྱ། །རྭ་ཅན་སྐེ་ཚེ་ཤ་ལྔ་དང་། །ནིྂ་བ་དྷ་དུ་རའི་ལོ་མ། །ཆོ་ག་འདི་ཡིས་གཅིག་བྱས་ནས། །མཁས་པ་ཡིས་ནི་གཟུགས་
བརྙན་བྱ། །ཁ་དོག་སྔོན་པོ་འཇིགས་ཆེན་པོ། །ཞལ་གཅིག་པ་ལ་ཕྱག་ནི་གཉིས། །མ་ཧེ་ལ་གནས་ཞལ་ནི་གདངས། །རྡོ་རྗེ་དང་ནི་ཐོད་པ་འཛིན། །སྐུ་གཟུགས་རྫོགས་པར་བྱས་ནས་ནི། །རྣམ་པ་མང་པོས་མཆོད་པར་བྱ། །ཧྲཱིཿཥྚྲཱིཿལ་སོགས་
སྔགས་ནི་བཟླས། །བཟླས་པ་འབུམ་གྱིས་རིག་པར་བྱ། །རྒྱལ་པོ་ཆེ་གེ་མོ་ཡི་ནི། །སྡེ་དང་ཡོངས་སུ་འཛིན་བཅས་ཆོམ། །རྣལ་འབྱོར་བདག་ཉིད་བཟླས་པ་འབུམ། །འབུམ་དུ་བཟླས་པའི་ཁྱད་པར་ལས། །ཆོ་ག་འདི་ཡིས་སྦྱིན་
སྲེག་དང་། །མཆོད་པའི་ལས་རྣམས་ལྡན་པར་བསམ། །སེམས་ཅན་དོན་བྱེད་བློ་ལྡན་གྱིས། །རྒྱལ་པོ་ཐོབ་འགྱུར་ཐེ་ཚོམ་མེད། །དེ་ནས་གཞན་ཡང་རྡུལ་གྱི་གོས། །ནམ་མཁའི་རང་བཞིན་ཆུ་ཡིས་ནི། །གཟའ་ནི་བཀྲ་ཤིས་
ལ་བཀྲུས་ཏེ། །རི་མོ་མངོན་པར་བྲི་བར་བྱ། །ཞལ་གཅིག་པ་དང་ཕྱག་ནི་གཉིས། །ཁ་དོག་ནག་པོ་འཇིགས་ལྡན་པ། །སྐྲ་ནི་འོད་ཟེར་ཡང་དག་ལྡན། །མགོ་བོའི་ཕྲེང་བ་རབ་ཏུ་འཕྱང་། །གྲི་གུག་ཐོད་པ་ལག་ན་ལྡན། །
མ་ཧེའི་སྟེང་དུ་བྲི་བྱས་ནས། །འདི་ཡི་བསྒོམ་པ་བརྩམ་པར་བྱ། །དགྲ་ནི་མདུན་དུ་བསམ་བྱ་སྟེ། །གྲི་གུག་གིས་ནི་གཅོད་བྱེད་ཅིང་། །རྐང་དང་ཞག་རྣམས་འཐུང་བར་བྱ། །རྒྱུ་མ་རྣམས་ནི་ཟ་བ་དང་། །ཁྲག་ནི་མང་པོ་
འཐུང་བར་བྱེད། །འབུམ་དུ་གྱུར་པ་ཙམ་གྱིས་ནི། །ཞ་འམ་རྨ་ཡིས་སྙིང་ལ་གཟེར། །དེ་ནས་གཞན་ཡང་མིའི་རུས་པ་སོར་བཞི་པ་བླངས་ལ། ཧྲཱིཿཥྚྲཱིཿལ་སོགས་པའི་སྔགས་ཀྱི་ནང་དུ་བྱས་ཏེ་དགྲའི་སྒོ་ལ་སྦས་ན་འཁོར་དང་
བཅས་པ་བསྐྲོད་པར་བྱེད་དེ། །གལ་ཏེ་བརྒྱ་བྱིན་དང་མཚུངས་པ་ཡིན་ཡང་འགྱུར་རོ། །སྐྱེ་བོས་དབེན་པའི་ས་ཕྱོགས་སུ་གཅིག་པུར་གྱུར་པས་རྗེ་བཙུན་གྱི་ཐད་ཀ་གསལ་བར་བྱས་ཏེ། ཕྱོགས་བཅུ་ན་བཞུགས་པའི་བླ་མ་དང་

90-1-165b

སངས་རྒྱས་དང་བྱང་ཆུབ་སེམས་དཔའ་རྣམས་བལྟས་ཏེ། མིའི་རུས་པ་བཅད་པའི་ཁྲག་ཆེན་པོ་བྱ་རོག་གི་ཁྲག་དང་བསྲེས་ནས། སོར་བཅུ་གཉིས་པའི་ཚད་ཀྱི་འཁོར་ལོ་རྩིབས་བཅུ་གཉིས་པོའི་དབུས་སུ་ས་བོན་
བཅུ་གཉིས་པོ་དེ་ལ་དགྲའི་མིང་མང་དུ་ཚེག་དྲག་དང་བཅས་པ་ཡང་དག་པར་སྦྱར་ཏེ། ཋ་ཡིག་གསུམ་གྱིས་ཕྱི་སྐོར་ཏེ་བྱ་རོག་གི་སྐེ་ལ་བཏགས་ནས་གལ་ཏེ་རྒྱུན་རབ་ཏུ་འབབ་པ་ལ་བསྐུར་ན་དེ་གཟུང་དུ་མེད་དོ། །དེ་བཞིན་དུ་ས་བོན་
བཅུ་གཉིས་བྲིས་ཏེ། ཕཊ་ཕཊ་ཧཱུྃ་ཧཱུྃ་ན་ན་ཏཱ་ཀྲྀ་ཝི་ཥྚྲཱིཿཧྲཱིཿༀ། ཇི་ལྟ་བའི་དངོས་པོས་མཆོད་པ་བྱས་ཏེ། སྟོབས་ཆེན་པོའི་སྤོས་བྱིན་ཏེ་རྒྱུན་རབ་ཏུ་འབབ་པ་ལ་བསྐུར་ན་དེ་གཟུང་དུ་མེད་དོ། །མི་འདོད་ན་བྱ་རོག་གི་གཤོག་པ་ལ་ལན་
བདུན་དུ་མངོན་པར་བསྔགས་ཏེ། མིང་ནང་དུ་བྱས་ཏེ་དགྲའི་སྒོ་ལ་སྦས་ན་འཁོར་དང་བཅས་པ་ངེས་པར་བསྐྲོད་པར་འགྱུར་རོ། །དེ་བཞིན་དུ་འཁོར་ལོ་རྩིབས་བཅུ་གཉིས་པའི་དབུས་སུ་ཚ་བ་གསུམ་དང་དུག་དང་སྐེ་ཚེ་རྣམས་རུས་
པ་ཆེན་པོའི་སྨྱུ་གུས་མེའི་ས་བོན་གྱི་དབུས་ཀྱི་དབུས་སུ་ཚེག་དྲག་དང་བཅས་ཤིང་གྷ་ཡིག་གཉིས་ཡང་དག་པར་སྦྱར་ཏེ། ཋ་ཡིག་གསུམ་གྱིས་ཕྱི་བསྐོར་ཏེ་གཅི་བའི་མེ་ལ་བསྲེགས་ན་བུ་དང་ཆུང་མ་དང་འཁོར་དང་བཅས་པ་
དེའི་སྐད་ཅིག་ལ་འཆི་བར་འགྱུར་ཏེ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་རྒྱལ་པོ་སྒྲུབ་པ་སྟེ་རིམ་པར་ཕྱེ་བ་ལྔ་པའོ།། །། དེ་ནས་ཕ་རོལ་དམག་ཚོགས་རྣམས། །
ཉམས་བྱ་བདག་གིས་བཤད་པར་བྱ། །བྲྃ་ཟེ་མོ་ཡི་རྡུལ་གོས་ལ། །རྒྱལ་ཟླ་ཉིད་ལ་ཡང་དག་བརྩམ། །མ་ཧེའི་གདོང་ཅན་རི་མོ་བྲི། །ལག་པ་བརྒྱ་ནི་རབ་གསལ་ལ། །མཚོན་ཆ་ཤིན་དུ་རྣོ་བ་རྣམས། །ཐམས་ཅད་དུ་ནི་བྲི་བར་བྱ། །
རི་མོ་དཀར་པོ་རྫོགས་པ་ལ། །པད་མ་དཀར་པོས་མཆོད་པར་བྱ། །སྔགས་ནི་འབུམ་དུ་བཟླས་བྱས་ཏེ། །པད་མ་ཡང་ནི་དེ་བཞིན་ནོ། །རི་མོ་མདུན་དུ་གཞག་བྱ་སྟེ། །བ་དན་སྟེང་དུ་བཟུང་བྱས་ན། །སྐྱེ་བོ་གང་གིས་མཐོང་རྣམས་ཀྱི། །

90-1-166a

རྐང་གཉིས་རྐང་བཞི་ལ་སོགས་རྣམས། །ཐམས་ཅད་དེ་ལ་ལྟ་མི་ནུས། །སེང་གེ་གླང་ཆེན་མཐོང་བ་བཞིན། །དེ་ནས་གཞན་ཡང་ཚངས་ས་བོན། །ཁྲི་བཟླས་ཞག་ཆེན་སྟ་རེས་བཅད། །རྔ་མོའི་ཆུ་དང་སྦྱར་བྱས་ཏེ། །
བརྟུལ་ཞུགས་ཅན་གྱིས་རི་མོ་བྱ། །རང་གི་དམག་གདོང་ཐིག་ལེ་བྱ། །ཕ་རོལ་དམག་རྣམས་རྣམ་པར་འཇིག །མྱ་ངན་མེད་ཀྱི་ལྗོན་ཤིང་འོག །འགྲོ་ཞིང་བརྒྱད་དམ་བཅུ་བཞི་ལ། །ཟླ་བ་གཅིག་གི་ཐུན་མཚམས་
གསུམ། །སྔོན་བསྙེན་འབུམ་ཕྲག་གཅིག་བྱས་ནས། །ཨོཾ་སིདྷཱ་ན་ཏ་ནཱ་ལ་ཧཱ་རི་ཎི་བ་ར་སཻ་ནྱ་བི་ནཱ་སི་ནི་ཧྲཱིཿསྭཱ་ཧཱ། དེ་རྣམས་ཀྱིས་ནི་འགྲུབ་འགྱུར་ཏེ། །མཐོང་བར་གྱུར་པ་ཙམ་གྱིས་ནི། །ཕ་རོལ་དམག་རྣམས་རྣམ་པར་
འཇིག །གཤིན་རྗེ་ཡི་ནི་སྣང་བ་ཡིས། །དེ་རྣམས་ཀྱང་ནི་འབྲོས་པར་འགྱུར། །དེ་ནས་གཞན་ཡང་ཤིང་གཅིག་དྲུང་དུ་སོང་ནས་ནི། །རོ་ནི་སྦྱངས་པ་མཆོག་ལ་ནི། །གཡས་ན་རལ་གྲི་བཟུང་བྱས་ནས། །གཡོན་བརྐྱང་
པ་ཡི་ཞབས་ཀྱིས་སོ། །ཧྲཱིཿཥྚྲཱིཿལ་སོགས་སྔགས་རྣམས་ནི། །མཐའ་དག་མཚན་མོ་བཟླས་པར་བྱ། །དེ་ལ་རལ་གྲི་འཕྲོ་བ་སྟེ། །དེ་ཡིས་ཕ་རོལ་དམག་རྣམས་འཇོམས། །དེ་བཞིན་གཤེགས་པ་ཐམས་ཅད་ཀྱི་སྐུ་
གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་ཕ་རོལ་གྱི་དམག་ཉམས་པར་བྱ་བ་སྟེ་རིམ་པར་ཕྱེ་བ་དྲུག་པའོ།། །། དེ་ནས་རྒྱལ་པོ་རྡོ་རྗེ་འཆང་། །མི་སྣང་སྒྲུབ་པར་རབ་བཤད་དེ། །དང་པོ་རྣལ་འབྱོར་པ་མི་སྣང་བ་བསྒྲུབ་པའི་
ཕྱིར་རྒྱལ་གྱི་ཉི་མའི་ཉི་མ་ལ་བརྩམ་པར་བྱའོ། །ཡང་དག་པའི་བསམ་པས་སྔོན་དུ་འབུམ་བཟླས་པས་དེ་གྲོལ་བར་འགྱུར་རོ། །ཉི་མ་བཟུང་བའི་དུས་ལ་པ་ཎི་ཊ་ག་རའི་རྩ་བ་དང་། དངུལ་ཆུ་དང་། ཁྃ་གཱ་རི་དང་། དཎ་ཌའི་རྩ་བ་དང་ཐམས་
ཅད་གཅིག་ཏུ་རི་ལུ་བྱས་ཏེ་ཁར་བཅུག་པས་མི་མཐོང་བར་འགྱུར་རོ། །དེ་ནས་གཞན་ཡང་ཁོ་ཊཱྀ་ཛཱ་ལ་ཀི་ཛ་ཡན་ཏི་དང་། རྒན་པོ་འཇོམས་པའི་རྩ་བ་དང་། ཐམས་ཅད་སྦལ་པའི་ཤ་དང་ཆ་མཉམ་དུ་བྱས་ཏེ་ཉི་མ་གསུམ་བསྐམས་ནས་

90-1-166b

རིལ་ཁར་བཅུག་ན་མི་སྣང་བར་འགྱུར་རོ། །དེ་ནས་གཞན་ཡང་ཉི་མ་གཟས་བཟུང་བའི་དུས་སུ་ཨུ་ཀ་ནུ་ཁྃ་དང་། དངུལ་ཆུ་དང་གསེར་དང་དྷ་དུ་ར་ཞེས་པ་རྣམས་རྟ་རྒོད་མའི་ཆུ་དང་ཡང་དག་པར་སྦྱར་ནས་རིལ་བྱས་ཏེ་ཁར་བཅུག་ན་
མཆོག་ཏུ་མི་སྣང་ངོ་། །དེ་ནས་གཞན་ཡང་བྱི་བའི་མིག་དང་བྱ་རྒོད་ཀྱི་མིག་དང་འོག་སྐྱོང་གི་མིག་དང་ཆ་མཉམ་དུ་རི་ལུ་གཅིག་ཏུ་བྱས་ཏེ་ཁར་བཅུག་ན་དེའི་སྐད་ཅིག་ལ་མི་སྣང་བར་འགྱུར་རོ། །དེ་ནས་གཞན་ཡང་གཟའ་
ཉི་མ་ལ་བྱི་བའི་མིག་རབ་ཏུ་བླངས་ཏེ། རམས་དང་ཙི་ཏྲ་ཀའི་རྩ་བ་དང་། བྱ་རྒོད་ཀྱི་ཁྲག་དང་སྦྱར་ཏེ་རི་ལུ་ཁར་བཅུག་ན་མི་སྣང་བའི་མཆོག་གོ། ད་ནས་གཞན་ཡང་པཱ་ཤཱིའི་ཤ་དང་། བ་ཧུ་རའི་འབྲས་བུ་མཉམ་དུ་དར་གོས་ཀྱིས་དྲིལ་
ནས་བྲམ་ཟེའི་ཐོད་པ་ལ་མིག་སྨན་བྱའོ། །དེའི་མིག་སྨན་གྱིས་མིག་གཉིས་ལ་བྱུགས་ན་མི་སྣང་བར་འགྱུར་རོ། །དེ་ནས་གཞན་ཡང་ཙཎ་ཊ་ལཱིའི་མེ་ཏོག་དང་། ཤ་ཏཱ་བར་ཏྃ་དང་བྷ་དྲ་པཀྵིའི་མིག་དང་དེ་རྣམས་རིལ་བུར་བྱས་ནས་
ཁར་བཅུག་ན་མི་སྣང་བར་འགྱུར་རོ། །དེ་ནས་གཞན་ཡང་བྷ་དྲ་པཀྵ་ཎྃ་བཟུང་སྟེ་ཉི་མ་བདུན་གྱི་མཐར་ཐུག་པ་དངུལ་ཆུ་མ་ཤ་གཅིག་ཟས་སུ་བྱས་ནས་དེའི་བྲུན་གང་ཡིན་པ་དང་། དེ་ཡིས་བདག་ཉིད་ཀྱི་ཁུ་བ་དང་ལྷན་ཅིག་ཏུ་
བྱས་ནས་ཐིག་ལེ་བྱས་ན་མི་སྣང་བར་འགྱུར་རོ། །འདི་ནི་མི་སྣང་བའི་རབ་ཏུ་བྱ་བའོ། །མིག་སྨན་བཤད་པར་བྱ་བ་ལ། རེ་ཞིག་དང་པོ་མིག་སྨན་གྱི་ཕྱིར་བཅོམ་ལྡན་འདས་ཀྱི་སྔགས་འབུམ་ཕྲག་ལྔ་ཡོངས་སུ་བཟླས་ཏེ་མིག་
སྨན་སྒྲུབ་པ་བརྩམ་པར་བྱའོ། །སྲམ་དང་བྱ་རྒོད་དང་ཀུ་ར་རཱ་རྣམས་ཀྱི་མིག་བླངས་ནས་ཚད་མཉམ་པར་བྱས་ཏེ་ས་འོག་གི་སྦྲང་གི་ཁུ་བ་ལ་དར་གོས་ཀྱི་སྡོང་བུས་མིག་སྨན་བྱའོ། །འདིའྀ་མིག་སྨན་གྱིས་སའི་མཐོངས་
མཐོང་བར་འགྱུར་རོ། །སྐར་མ་ལག་ལ་བྲི་ཧ་ཏཱི་དཀར་པོའི་རྩ་བ་དང་། ནག་པོ་ཛ་ཡན་ཏིའི་རྩ་བ་དང་ལྩེ་སྤྱང་གི་མིག་རྣམས་མཉམ་དུ་དོང་གི་སྦྲང་རྩི་དང་ལྷན་ཅིག་ཏུ་བྱས་ཏེ་ཐིག་ལེ་བྱས་ན་སའི་མཐོངས་ལས་མཐོང་བར་འགྱུར་རོ། །

90-1-167a

སའི་འཁྲི་ཤིང་དང་བི་ཥྃ་ཀ་རཱིའི་རྩ་བ་དང་། ཙ་སེན་དང་། རྡུལ་དང་ལྷན་ཅིག་ཏུ་དར་གོས་ལ་གཞོན་ནུ་མས་བཀལ་པའི་སྲད་བུས་དཀྲིས་ནས་སྡོང་བུ་བྱས་ཏེ་མིའི་ཐོད་པ་ལ་དྲེག་པ་བྲུས་པའི་མིག་སྨན་གྱིས་གཏེར་རྣམས་
ངེས་པར་མཐོང་ངོ་། །དེ་ནས་གཞན་ཡང་རྒྱལ་གྱི་ཟླ་བ་སྐར་མ་སྣུམས་ལ་རྡུལ་གྱི་གོས་བཟུང་སྟེ། བརྒྱད་དམ་ཡང་ན་བཅུ་བཞི་ལ་རྡོ་རྗེ་ཙར་ཙི་ཀཱའི་རི་མོ་མངོན་པར་བྲིས་ནས་མཆོད་པ་ཆེན་པོ་བྱས་ཏེ། མཚན་མོ་གཅིག་ཁྲི་བཟླས་ན་
རྨི་ལམ་དུ་གཏེར་ངེས་པར་མཐོང་ངོ་། །གཞན་ཡང་ནིམ་པའི་ཤིང་ལྗོན་པའི་འོག་ཏུ་ཕྱིན་ཏེ་བརྒྱད་དང་ཡང་ན་བཅུ་བཞི་ལ་རི་མོའི་མདུན་དུ་ཙར་ཙི་ཀཱ་བསྒོམ་པར་བྱ་ཞིང་། ལྩེ་སྤྱང་གི་མགོ་བོའི་སྟེང་དུ་ཁྲི་བཟླས་སོ། །ཙར་ཙི་ཀཱ་
འོངས་ནས་བདག་གིས་ཅི་བྱ་ཞེས་འདྲི་བར་འགྱུར་རོ། །སྒྲུབ་པ་པོས་སྨྲ་བར་བྱ་སྟེ། བདག་ལ་མིག་སྨན་གྱི་དངོས་གྲུབ་གནང་བར་མཛོད་ཅིག །དངུལ་ཆུ་དང་བཅུད་ཀྱིས་ལེན་ཡང་སྩོལ་ཅིག་ཅེས་སོ། །གི་ཧྃ་དང་ཤ་ལའི་མིག་དང་
དངུལ་ཆུ་དང་ཤཱི་ཏ་ལཱིའི་ཁུ་བ་དང་དོང་གི་སྦྲང་རྩི་རྣམས་མཉམ་དུ་རི་ལུ་བྱས་ཏེ་འདིའི་མིག་སྨན་གྱིས་སའི་མཐོངས་ལས་མཐོང་བར་འགྱུར་རོ། །ལྩེ་སྤྱང་གི་མིག་དང་བྱ་རྒོད་ཀྱི་མིག་དང་ཀུ་ར་རཱའི་མིག་རྣམས་དེ་བཞིན་དུ་
གཡོན་ལ་གཡོན་དང་། གཡས་ལ་གཡས་བླངས་ཏེ་ཞག་ཆེན་པོའི་དྲེག་པ་བྱའོ། །འདིའི་མིག་སྨན་གྱིས་སའི་མཐོངས་ལས་མཐོང་བར་འགྱུར་རོ། །དེ་ནས་གཞན་ཡང་གི་ཧྃ་དང་མིའི་མཁྲིས་པ་དང་ག་བུར་དང་དངུལ་དང་
དེ་བཞིན་དུ་ཟས་སྦྱིན་པར་བྱའོ། །འདིའི་མིག་སྨན་གྱིས་སའི་མཐོངས་ལས་མཐོང་བར་འགྱུར་རོ། །དེ་ནས་གཞན་ཡང་སྣ་ཚོགས་པའི་དངོས་གྲུབ་ཀྱི་དོན་དང་ནོར་དང་འབྲུ་ལ་སོགས་པའི་ཕུན་སུམ་ཚོགས་པ་རྣམས་
དང་། རིག་བྱེད་བརྒྱད་རྨོངས་པ་དང་། མཁའ་ལ་སྤྱོད་པ་སྟེར་བར་བྱེད་དོ། །སྔོན་དུ་བསྙེན་པའི་དོན་ལ་སྔགས་འབུམ་ཕྲག་གཅིག་བཟླས་ནས་དངུལ་ཆུ་བསྒྲུབ་པ་བརྩམ་པར་བྱའོ། །དང་པོ་དངུལ་ཆུ་བླངས་ནས་ཙི་ཏྲ་ཀ་

90-1-167b

དམར་པོའི་ཁུ་བས་མཉེ་བར་བྱའོ། །དེའི་རྗེས་ལ་ཟངས་ཀྱི་ཕྱེ་མ་དང་། གསེར་གྱི་ཕྱེ་མ་བཞི་ཆ་སྦྱིན་ཏེ་ཤཱ་ཁོ་ཌའི་ཁུ་བས་བསྡུ་བར་བྱའོ། །གླང་པོ་ཆེའི་ཤ་དང་ལྷང་ཚེར་མཉམ་དུ་བྱས་ཏེ་ལུགས་ཀོང་གི་དབུས་སུ་ར་ཛྃ་ལ་བྱིན་
ནས་སྦྱར་ཞིང་བཅིངས་པས་རྡོག་པོར་འགྱུར་རོ། །འདིའི་ཕྱེ་མར་ཏི་ཡིས་སྲང་ལ་བསྣུན་པར་གྱུར་ན་གསེར་དུ་འགྱུར་རོ། །འདིར་དངུལ་ཆུ་ཞག་ཆེན་ལ་མཉེས་ནས་ལྷང་ཚེར་དང་མུ་ཟི་ཞག་ཆེན་པོ་ལ་ཉི་མ་གསུམ་དུ་བཙོ་
ཞིང་། ཡང་ཇི་སྲིད་རྡོག་པོར་མ་གྱུར་གྱི་བར་དུའོ། །སྦྲང་དང་ལྷན་ཅིག་ཟེགས་མ་རེ་ཟོས་ན་མི་དེ་ལོ་སྟོང་དུ་འཚོའོ། །དངུལ་ལ་བསྣུན་ན་གསེར་དུ་འགྱུར་རོ། །དེ་ནས་གཞན་ཡང་པཱ་ཧླཱ་པའི་ཁུ་བ་ནས་དངུལ་ཆུ་མཉེ་བར་བྱ་
སྟེ་རྡོག་པོར་མ་སོང་གི་བར་དུའོ། །ཤཱི་ཏ་ལི་དང་ཛམྦྷི་རའི་ཁུ་བ་ལ་ཛཱ་ཁོ་ཌའི་འབྲས་བུ་བ་གུ་ལ་ལ་སོ་སོར་མཉམ་དུ་བྱིན་ནས་ལུགས་ཀོང་གི་ནང་དུ་བཅུག་སྟེ་དེས་དེ་བཞིན་དུ་ཡོངས་སུ་བྱུགས་ཏེ་ལུགས་ཀོང་བསྐམ་
པར་བྱའོ། །ཕྱི་ནས་ལྕི་བའི་མེ་ལ་བསྲེགས་པས་རྡོག་པོར་འགྱུར་རོ། །ར་ཏི་གཉིས་ཀྱི་ཚད་ཀྱིས་ཉི་མ་ཉི་ཤུ་རྩ་གཅིག་ཏུའོ། །ཇི་སྲིད་དུ་ལོ་མ་དང་སྐྱུར་རྣམས་སྤོང་ངོ་། །ཐམས་ཅད་དུ་བུད་མེད་བསྟེན་པ་སྤངས་པས་མི་དེ་
ལོ་སྟོང་ཕྲག་བཅུ་གཉིས་འཚོ་ཞིང་མཁའ་སྤྱོད་འཐོབ་བོ། །སྤྱང་ཚེར་ལ་བསྣུན་ན་གསེར་དུ་འགྱུར་རོ། །དེ་ནས་གཞན་ཡང་རཉྫ་ནཱི་ལའི་ཁུ་བ་ལ་སུ་པར་ཎ་མཱ་ཀྵི་ཀྃ་དང་སྦྱར་བའི་སྙིང་པོ་དང་། དཱི་སྣ་ནེ་ན་དང་མཉེ་བར་
བྱའོ། །ལྷང་ཚེར་དང་ན་ར་ཤེ་ཎའི་ཁུ་བ་བསྲེས་ཏེ་ལུགས་ཀོང་གི་ནང་དུ་བཅུག་ནས་ས་ཧ་རཱིའི་མར་ཁུས་སྦྱར་ན་ཟླ་བ་དྲུག་གིས་རྡོག་པོར་འགྱུར་རོ། །ལྕགས་བརྒྱད་ལ་བྱུགས་ན་ངེས་པར་གསེར་དུ་འགྱུར་རོ། །ཟོས་ན་མཁའ་སྤྱོད་ཐོབ་པར་
འགྱུར་རོ། །མིག་ལ་བྱུགས་པ་ཙམ་གྱིས་ལོ་ལྔ་བརྒྱར་འཚོ་བར་འགྱུར་རོ། །དེ་ནས་གཞན་ཡང་དངུལ་ཆུ་ཀུ་མཱ་རཱའི་ཁུ་བ་ཡིས་མཉེས་ནས་སོ་མ་ལ་ཏ་དང་པ་ལཱ་ཤའི་རྩ་བ་དང་ནཱ་ག་གེ་ཤ་ར་དང་བ་ཀུ་བྃ་དང་བཙག་དང་ཀ་ཐི་ནཱི་

90-1-168a

དང་དེ་བཞིན་དུ་ནྱ་གྲོ་དྷའི་ལོ་མ་དང་། དེ་བཞིན་དུ་ཡང་མཉམ་དུ་ལུགས་ཀོང་གིས་ཁ་བཀབ་ཅིང་སྦྱར་བར་བྱའོ། །ཐུན་ཚོད་གཉིས་ཀྱིས་རྡོག་པོར་འགྱུར་རོ། །གཟེགས་མ་ཟོས་པ་ཙམ་གྱིས་ས་གསུམ་ལ་ངེས་པར་འགྲོ་བར་
འགྱུར་རོ། །ར་ཏི་ཙམ་གྱིས་ཟངས་སྲང་གསེར་དུ་ངེས་པར་འགྱུར་རོ། །དེ་ནས་གཞན་ཡང་དངུལ་ཆུ་ཤི་རི་ཁན་དའི་འོ་མས་དར་ཙམ་མཉེས་ལ་མུ་ཟི་དང་མཉམ་དུ་ཟངས་ཀྱི་སྣོད་དུ་ཛྃ་བི་རའི་ཁུ་བས་མཉེས་ཏེ་ཉི་མ་ལ་བསྐམ་པར་
བྱས་ན་རྡོག་པོར་འགྱུར་རོ། །ལུགས་ཀོང་གི་ནང་དུ་བཅུག་ཅིང་སྦྱར་ཏེ་ཐུན་ཚོད་གཉིས་ཀྱིས་སོ། །ཤིན་དུ་གྲངས་པ་དང་བཏོན་ནས་ར་ཏིའི་ཚད་ཀྱིས་མནན་ཏེ་ཟངས་ལ་བསྣུན་ན་གསེར་དུ་འགྱུར་རོ། །ལུས་ལ་བྱུགས་པས་སྐྲ་
དཀར་གཉེར་མ་དང་བྲལ་བར་འགྱུར་རོ། །དེ་ནས་གཞན་ཡང་དངུལ་ཆུ་དང་བཱ་ལཱའི་རྩ་བ་མཉེ་བར་བྱའོ། །སླར་ཡང་ཙཎ་ཌཱ་ལིའི་མེ་ཏོག་དངུལ་ཆུ་དང་མཉེ་བར་བྱའོ། །རྩབས་དང་རྣམ་པར་སྣང་མཛད་ཀྱི་ཁུ་བས་སླར་ཡང་མཉེ་
བར་བྱའོ། །དེའི་རྗེས་སུ་བཞི་ཆའི་ཚད་ཀྱིས་གསེར་གྱི་ཕྱེ་མ་ལ་བྱིན་པས་རྡོག་པོར་འགྱུར་རོ། །འདབ་མ་བདུན་པའི་ལུགས་ཀོང་གི་ནང་དུ་གླང་པོ་ཆེའི་རྐང་པའི་ཚད་ཀྱི་ཐུམ་པོ་ལ་བྱིན་པ་ལས་རྡོག་པོར་འགྱུར་རོ། །
དེ་བཏོན་ནས་ར་ཏིའི་ཚད་ཀྱིས་ཟངས་ལ་བསྣུན་ན་གསེར་དུ་འགྱུར་རོ། །ལུས་ལ་ཡང་ར་ཏིའི་ཚད་ཀྱིས་ཉེས་པ་གསུམ་འཇོམས་པར་འགྱུར་རོ། །རྣལ་འབྱོར་ཆེན་པོ་རྣམས་ཀྱི་འདུ་བའི་ནང་འཚོ་བར་འགྱུར་རོ། །ཟོས་པ་ཙམ་
གྱིས་རྒྱང་གྲགས་བརྒྱར་འགྲོ་ནུས་སོ། །དེ་ནས་གཞན་ཡང་དངུལ་ཆུ་ཙམ་གནས་པ་ལ་རྡོ་རྗེ་དང་ངེས་པར་ཏྲི་ཥ་དང་ཏྲི་ཧཱིའི་རྩ་བ་དང་། ཀ་རཉ་ཛཉྩ་དང་མ་ནུའི་རྩ་བ་དང་མཉེ་བར་བྱའོ། །པ་ཎི་ཊ་པ་ཤཱུ་ར་ཎ་སྦྱར་ཏེ་
ལུགས་ཀོང་ནང་དུ་སྦྱར་བར་བྱའོ། །མཚན་མོ་རིལ་པོ་བསྲེགས་པས་དེ་འགྲུབ་སྟེ། ར་ཏིའི་ཚད་བླངས་ནས་ཟངས་ལ་བསྣུན་པས་དེ་འགྲུབ་བོ། །ར་ཏི་ཙམ་གྱིས་བཟའ་བས་སྐྲ་དཀར་དང་གཉེར་མ་དང་བྲལ་བར་འགྱུར་རོ། །

90-1-168b

ཟླ་བ་དྲུག་ཏུ་རབ་ཏུ་སྦྱོར་བས་ལོ་སྟོང་འཚོ་བར་འགྱུར་རོ། །དེ་ནས་གཞན་ཡང་སྦྱོར་བ་དེ་བཞིན་དུ་དངུལ་ཆུ་སྲང་གཅིག་བཟུང་ནས་ཤྲིང་གཱིའི་ཁུ་བ་དང་མཉེ་བར་བྱའོ། །ཨ་བྷྲ་ཊྃ་དང་གསེར་གྱི་གཟེགས་མ་སྦྱར་ལ། 
ཤྲིང་གཱི་དམར་པོ་དང་མཉམས་ཏེ་ཙི་ཊི་པཱའི་ཁུ་བ་བླངས་ཏེ་ཉི་མ་བཅུ་གཉིས་དེའི་རྗེས་སུ་ལུགས་ཀོང་གི་ནང་དུ་བཅུག་ནས་སྦྱར་བར་བྱའོ། །གླང་པོ་ཆེའི་རྐང་པའི་ཚད་ལས་
ཕྱུང་སྟེ་མཉམ་དུ་བླངས་ནས་ར་ཏིའི་ཚད་གཞུག་པར་བྱའོ། །ཟངས་མ་ལ་བསྣུན་ན་མ་ལུས་པ་ངེས་པར་གསེར་དུ་འགྱུར་རོ། །ཟོས་པས་ཡུན་རིང་དུ་འཚོ་ཞིང་མཁའ་སྤྱོད་དུ་འགྲོ་བར་ཐེ་ཚོམ་མེད་དོ། །
གནོད་སྦྱིན་དང་མི་འམ་ཅིའི་བདག་པོ་རྣམས་ཞམ་རིང་བྱེད་པར་འགྱུར་ཞིང་གཤིན་རྗེའི་འཇིག་རྟེན་དུ་མི་འགྲོའོ། །དེ་ནས་གཞན་ཡང་ལྷང་ཚེར་ནག་པོ་སྲང་གཅིག་དང་སྦལ་པའི་ལོ་མའི་ཁུ་བས་སྦྱར་བའི་དངོས་པོ་ཟླ་བ་ཕྱེད་མཚལ་དང་རོ་
མཉམ་པར་བྱས་ཏེ་ཟླ་བ་གཅིག་གི་ཚད་ཀྱིས་ཆུ་གྲང་མོ་དང་བཅས་ཏེ་བཟའ་བར་བྱའོ། །ཟླ་བའི་སྦྱོར་བས་རྣལ་འབྱོར་གྱི་བདག་ཉིད་ནད་དང་འཆི་བ་མེད་པར་འགྱུར་རོ། །དེ་ནས་གཞན་ཡང་ལྕགས་སྲང་ཙམ་གཟུང་སྟེ་རེ་ཏྱའི་ཕྱེ་
མའི་རབ་ཏུ་བྱེད་པ་དང་། ཀ་ཤཱིའི་ཁུ་བ་དང་མཉམ་དུ་སྦྱར་ཏེ་ཉི་མའི་འོད་ཟེར་ལས་བསྐམ་པར་བྱའོ། །དངུལ་ཆུ་དང་ལྷང་ཚེར་དང་མུ་ཟི་རྣམས་དེའི་བཞི་ཆའི་ཚད་སྦྱོར་བ་ལས་ཀ་ཀོ་ལ་དང་ལི་ཤིའི་ཕྱེ་མ་རྣམས་སྔོན་མའི་
ཚད་ལས་ཕྱེད་དང་གཉིས་སོ། །ཐམས་ཅད་གཅིག་ཏུ་བྱས་ཏེ། ལྕགས་དང་མཉེ་བར་བྱ་སྟེ་རྡོ་བརྟན་པོ་ལའོ། །ལུགས་ཀོང་གི་ནང་དུ་བཅུག་སྟེ་ཁ་བཅད་ནས་སྦྱར་ཏེ་ལྕི་བའི་མེ་ལ་བསྲེག་པར་བྱའོ། །དེ་ནས་ཕྱུང་སྟེ་ལྕགས་
ཆེན་པོ་དང་མཱ་ཤའི་ཚད་ཀྱིས་ཟོས་ན་སྐྲ་དཀར་གཉེར་མ་རྣམ་པར་འཇོམས་ཤིང་ནད་དང་འཆི་བས་མི་ཚུགས་སོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་མི་སྣང་བ་དང་

90-1-169a

མིག་སྨན་དང་བཅུད་ལེན་སྒྲུབ་པ་སྟེ་རིམ་པར་ཕྱེ་བ་བདུན་པའོ།། །། དེ་ནས་རྡོ་རྗེ་འཛིན་པའི་རྒྱལ་པོས་གྲིབ་གནོན་གྱི་རབ་ཏུ་བྱེད་པ་གསུངས་པ་འདི་ལྟ་སྟེ། དགྲ་བོ་རྐང་བཞི་པ་རྣམས་ཀྱི། །ཆད་
པའི་རབ་ཏུ་སྦྱོར་བ་འདི་གསུངས་ཏེ། དང་པོར་རེ་ཞིག་གཤིན་རྗེ་གཤེད་འཇིགས་སོ། །སེམས་ཅན་ཀུན་གྱི་རྨོངས་བྱེད་བསྒོམ་པར་བྱ། །རང་གི་ཁྱིམ་དུ་མཚན་མོའི་དུས། །སྟག་གི་ལྤགས་པའི་སྟན་ལ་གནས། །ཞལ་གཅིག་
དམར་པོ་ཤིན་དུ་རྔམ། །ཞགས་པ་དང་ནི་ལྕགས་ཀྱུ་འཛིན། །རོ་ཡི་སྟེང་དུ་འཇིགས་ཆེན་གནས། །སྤྱན་གསུམ་ཤིན་དུ་འཇིགས་པར་བྱེད། །ལྷ་རྣམས་ཐམས་ཅད་རྨོངས་བྱེད་པ། །མེ་སྟག་ཚོགས་པས་འཁྲིགས་པ་སྟེ། །
དེ་བཞིན་བསྒོམ་ཞིང་བཟླས་པ་འབུམ། །ཕྱི་ནས་ཆོ་གས་སྤྱད་པར་བྱ། །ཀ་ར་བཱི་ར་དཀར་པོའི་རྩ། །དེ་བཞིན་དན་ཏི་དམར་པོའི་རྩེ། །སྦལ་པའི་ཁྲག་གིས་སྦྱར་བྱས་ཏེ། །བརྟུལ་ཞུགས་ཅན་གྱིས་ཐིག་ལེ་གཟུང་། །གང་གི་གྲིབ་མ་རྐང་པས་མནན། །དེ་ནི་བརྒྱལ་བར་
བྱེད་འགྱུར་ཏེ། །རྐང་གཉིས་པ་དང་རྐང་བཞི་དག །ཐམས་ཅད་རྨོངས་པར་ཐེ་ཚོམ་མེད། །གཟའ་ནི་ཉི་མའི་དཀར་ཕྱོགས་ལ། །ལྟོ་བ་ལས་བྱུང་སྲིན་བུ་ལ། །དེ་རྙེད་ནས་ནི་འབད་པ་ཡིས། །ཤྲིང་གཱི་ཎ་ཡིས་ཐིག་ལེ་བྱ། །དཔྲལ་
བར་ཐིག་ལེ་བྱིན་པ་ཡིས། །གང་གི་གྲིབ་མ་འཕྲོ་བར་བྱེད། །གལ་ཏེ་མྱོས་ཐོབ་གྲོལ་བྱེད་ན། །འོ་མས་གཏོར་བས་བདེ་བར་བྱེད། །དན་ཏཱི་རོ་ཧ་ལུང་ཐང་ནག །དེ་རྣམས་རྩ་བ་གཅིག་ཏུ་བྱས། །བྱ་རོག་ཁྲག་གིས་སྦྱར་བྱས་ཏེ། །
བརྟུལ་ཞུགས་ཅན་གྱིས་ཐིག་ལེ་བྱ། །ཐིག་ལེ་འདི་ཡི་མཐུ་ཡིས་ནི། །ལྷ་རྣམས་ཀྱང་ནི་རབ་ཏུ་གཡོ། །ཕྱག་ནི་བཙལ་བར་མི་བྱ་སྟེ། །བྱས་ན་དེ་ནི་བརྒྱལ་བར་འགྱུར། །དེ་བཞིན་གཞན་ཡང་རབ་སྦྱོར་ཏེ། །ར་ས་ཤྲིང་གཱི་
ཀུ་ཐཱ་རི། །ཕ་ཎི་ནཱ་ག་ཕ་ཎི་དང་། །དེ་རྣམས་ཐམས་ཅད་ཟླ་བ་ཡིས། །བརྟུལ་ཞུགས་ཅན་གྱིས་རི་ལུ་བྱ། །ནམ་མཁའི་རང་བཞིན་ཆུ་ཡིས་ནི། །ཐིག་ལེ་སྤྱི་བོར་གཟུང་བར་བྱ། །ཕྱག་འཚལ་གདོང་དུ་བལྟས་པ་ཡིས། །

90-1-169b

མི་དེ་ཁྲག་ཏུ་སྐྱུག་པར་འགྱུར། །ཀཱ་མ་ཙཱ་དང་མ་དྷུ་དཀར། །ཁུ་བྱུག་དཀར་པོའི་མིག་རྣམས་ནི། །ནམ་མཁའི་ཆུ་དང་ཡང་དག་ལྡན། །སྤྱི་བོ་རུ་ནི་ཐིག་ལེ་བྱ། །ཐིག་ལེ་དེ་ཡི་མཐུ་ཡིས་ནི། །དགྲ་རྣམས་དབང་དུ་འདུ་བར་འགྱུར། །
གང་ལ་ཕྱག་ནི་བཙལ་གྱུར་ན། །དེ་ནི་ངེས་པར་རྨོངས་འགྱུར་ཏེ། །དེ་ནས་གཞན་ཡང་རབ་སྦྱོར་ཏེ། །ལྟོས་འགྲོ་ནག་པོའི་ལྕེ་དང་ནི། །དེ་བཞིན་ན་ཀུ་ལ་ཡི་ལྕེ། །བྱི་བའི་མཁྲིས་པ་ཡང་དག་བསྲེས། །རི་ལུ་ཁྲི་
ཕྲག་ལྔ་བྱས་ནས། །འདི་ཡི་ཐིག་ལེའི་མཐུ་ཡིས་ནི། །ཁྲོ་བོའི་སྔགས་འཇུག་དེ་ལ་འགྲོ། །རྒྱལ་པོ་རྟོག་ཏུ་རྨོངས་འགྱུར་ཏེ། །གདུག་པ་ཅན་དང་ལྷན་ཅིག་གོ། དེ་ནས་གཞན་ཡང་རབ་སྦྱོར་ཏེ། །བདུད་རྩི་རྩ་བ་
ཨ་རཀ་དཀར། །བ་ཀུ་རི་ཡི་འབྲས་དེ་བཞིན། །དེ་རྣམས་ཆ་ནི་མཉམ་པོ་རུ། །མཁས་པ་ཡིས་ནི་རི་ལུ་བྱ། །འདི་ཡི་ཐིག་ལེ་རྟག་བཟུང་ན། །འཇིག་རྟེན་གསུམ་ནི་རྨོངས་པར་འགྱུར། །ཁ་ཡི་བདུད་རྩི་བླངས་
ནས་ནི། །གཡོན་པ་ཡི་ནི་མིང་མེད་ཀྱིས། །སྔགས་འདིས་རི་ལུ་ཐམས་ཅད་ལ་བྱིན་གྱིས་བརླབ་པར་བྱའོ། །ཨོཾ་མ་ཧཱ་ཡཀྵ་སེ་ནཱ་དྷི་པ་ཏ་ཡེ་མ་ཧཱ་དུར་ད་མྟྃ་ད་མ་ཀཱ་ཡ། ནཱ་ཤ་ཡ་ནཱ་ཤ་ཡ། བི་ནཱ་ཤ་ཡ་བི་ནཱ་ཤ་ཡ། བི་ཏྲཱ་
པ་ཡ་བི་ཏྲཱ་པ་ཡ། ཧཱུྃ་ཧཱུྃ་སརྦ་དུཥྜཱྃ་ཌཱྃ་ཕཊ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་གྲིབ་གནོན་བསྒྲུབ་པ་སྟེ་རིམ་པར་ཕྱེ་བ་བརྒྱད་པའོ།། །། 
འདིར་བཅོམ་ལྡན་འདས་ཀྱིས་རོ་ལངས་ལ་སོགས་པའི་སྒྲུབ་ཐབས་གསུངས་པ་ནི། ཨོཾ་ཧཱུྃ་ཛཱཿཨ་པ་རཱ་ཛི་ཏཿཨོཾ་ཧཱུྃ་ཛཿཨ་ཛི་ཏཿཨོཾ་ཧཱུྃ་ཛཿཔཱུ་ར་ཎ། ཨོཾ་ཧཱུྃ་ཛཿཨ་པཱུ་ར་ཎ། ཨོཾ་ཤྲཱྃ་ཛཿཤྨ་ཤཱ་ནཱ་དྷི་པ་ཏེཿ། ཨོཾ་རྱུྃ་ཛ་ཀུ་ལེ་
ཤྭ་རཿ། ཨོཾ་ཧཱུྃ་ཛཿབྷཱུ་ཏེ་ཤྭ་རཿ། ཨོཾ་ཨྃ་ཛཿ། ཀིྂ་ཀ་རོ་ཏ་ཏ་མཿཞེས་པ་འདི་རྣམས་འབྱུང་པོའི་བདག་པོ་ཆེན་པོ་རྣམས་སོ། །གཞན་གྱིས་མི་ཐུབ་པ་སྒྲུབ་པར་གྱུར་ན་དཔལ་ལྡན་རྡོ་རྗེ་དབྱུག་པ་འཛིན་པའི་མདུན་དུ་སྔོན་

90-1-170a

དུ་བསྙེན་པ་འབུམ་བཟླས་པ་བྱས་ནས་དེ་རྫོགས་པ་དང་མཆོད་པ་རྒྱ་ཆེན་པོ་བྱས་ནས་ཟས་དཀར་པོ་དང་ཞོ་དང་བུ་རམ་དང་འོ་མའི་ཐུག་པས་ཇི་ལྟར་གསུང་བའི་མཆོད་པ་བྱའོ། །གུ་གུལ་གྱི་སྤོས་ཕུལ་ནས་
མཚན་མོ་ཧྲིལ་པོ་བཟླས་པ་བྱའོ། །ཤིན་དུ་སྔ་བ་ན་ངེས་པར་འོང་བར་འགྱུར་རོ། །གལ་ཏེ་མ་འོངས་ན་དེའི་སྐད་ཅིག་ལ་འཆི་བར་བྱེད་དོ། །འོངས་ནས་གནང་བ་ཞུ་བར་བྱེད་དེ། །བདག་གིས་ཅི་བྱ་ཞེས་སོ་སྒྲུབ་པ་པོས་
སྨྲ་བར་བྱ་སྟེ། །བདག་གིས་གང་བསྒོ་བ་གྱིས་ཤིག་ཅེས་སོ། །དེ་ནས་བཟུང་སྟེ་གང་བསྒོ་བའི་ལས་རྣམས་བྱེད་དོ། །རིག་པ་འཛིན་པ་དང་རྒྱལ་པོ་ཡང་སྟེར་རོ། །དགྲ་རྣམས་ལ་ཆད་པས་གཅོད་པར་བྱེད་དོ། །ཟླ་བའི་
ལྷ་མོ་ཡང་བླངས་ནས་སྟེར་རོ། །རྒྱབ་ལ་ཞོན་པས་ལྷའི་འཇིག་རྟེན་དུ་འགྲོ་ཞིང་བརྒྱ་བྱིན་ཡང་སྟེར་རོ། །བསྐལ་པ་བདུན་དུ་འཚོ་བར་འགྱུར་རོ། །དེ་ནས་ཨ་ཛི་ཏ་སྒྲུབ་པར་གྱུར་ན་མཆོད་རྟེན་གྱི་མདུན་དུ་མཚན་མོ་
སྟོང་ཕྲག་བརྒྱད་བཟླས་པ་བྱས་ཏེ། ཉི་མ་བདུན་པའམ་བརྒྱད་པ་ལ་མཆོད་པ་རྒྱ་ཆེན་པོ་བྱས་ཏེ་གཏོར་མ་ཕུལ་ནས་གུ་གུལ་གྱི་སྤོས་ཕུལ་ཏེ་བཟླས་པ་བྱའོ། །བཟླས་པའི་མཐའ་ལ་ངེས་པར་འོང་བར་འགྱུར་ཏེ། ཀྱཻ་
སྒྲུབ་པ་པོ་བདག་གིས་ཅི་བགྱི་ཞེས་སོ། །སྒྲུབ་པ་པོས་སྨྲ་བར་བྱ་སྟེ། བདག་གི་བྱ་བ་གང་ཡིན་པ་བྱ་དགོས་སོ་ཞེས་སོ། །དེ་ནས་བཟུང་ནས་བསྒོ་བའི་ལས་རྣམས་བྱེད་པར་འགྱུར་རོ། །སླར་ཡང་རྒྱལ་པོ་སྟེར་
ཞིང་ལོ་སྟོང་དུ་འཚོ་བར་འགྱུར་རོ། །དེ་ནས་གང་སྒྲུབ་པར་གྱུར་ན་རྡོ་རྗེ་འཛིན་པའི་ཁང་པར་ཞུགས་ཏེ་སྟོང་ཕྲག་བརྒྱད་བཟླས་པར་བྱའོ། །ཉི་མ་བདུན་པའམ་ཉི་མ་བརྒྱད་པ་ལ་གཏོར་མ་དང་མཆོད་པ་རྒྱ་ཆེན་པོ་
བྱས་ཏེ། ཁ་ཟས་དཀར་པོ་དང་ཞོ་དང་ཇི་སྐད་བཤད་པའི་མཆོད་པ་ཕུལ་ནས་ཇི་སྲིད་ནམ་ཕྱེད་ཀྱི་བར་དེ་སྲིད་བཟླས་པར་བྱའོ། །ཇི་སྲིད་ནམ་ཕྱེད་དུ་གྱུར་པ་ན་རང་ཉིད་འོང་བར་འགྱུར་རོ། །མེ་ཏོག་དང་མཆོད་ཡོན་

90-1-170b

ཕུལ་ཏེ་ཚིམ་པར་བྱས་པས་རྒྱལ་པོ་སྟེར་བར་འགྱུར་རོ། །འདོད་པ་ཐམས་ཅད་ཡོངས་སུ་རྫོགས་པར་བྱེད་དོ། །ལོ་སྟོང་དུ་འཚོ་བར་འགྱུར་རོ། །ཇི་སྲིད་འཚོའི་བར་དུ་གང་བཅོལ་བའི་ལས་རྣམས་བྱེད་དོ། །
ཆེ་གེ་མོ་སོད་ཅིག་ཅེས་པ་དང་། ཆེ་གེ་མོ་འཚོ་བར་གྱིས་ཤིག་ཅེས་པ་ཡང་བྱེད་དོ། །དེ་ནས་མ་གང་བ་སྒྲུབ་པར་གྱུར་ན་བདུང་དང་བཅས་པའི་མཆོད་རྟེན་གྱི་དྲུང་དུ་སྔོན་དུ་ཁྲི་བཟླས་ཏེ་བསྙེན་པ་བྱས་པར་གྱུར་པས་དེ་
ནས་ཟླ་བ་ཡོངས་སུ་རྫོགས་པ་ལ་ཇི་སྐད་བཤད་པའི་དངོས་པོས་མཆོད་པ་བྱས་ནས་ཇི་སྲིད་ནམ་ཕྱེད་དུ་གྱུར་པ་དེ་སྲིད་དུ་བཟླས་པ་བྱའོ། །དེ་ནམ་ཕྱེད་ན་མྱུར་དུ་འོང་བར་འགྱུར་ཏེ་འོངས་ནས་མདུན་དུ་བསྡད་དེ་ཀྱཻ་བུ་ཅི་
བྱ་ཞེས་སྨྲ་བར་འགྱུར་རོ། །སྒྲུབ་པ་པོས་སྨྲ་བར་བྱ་སྟེ་བདག་གི་བྱ་བ་གང་ཡིན་པ་བྱ་དགོས་སོ་ཞེས་སོ། །དེ་ནས་བཟུང་སྟེ་ཅི་བཅོལ་བའི་ལས་རྣམས་བྱེད་དོ། །གནོད་སྦྱིན་གྱི་བུ་མོ་མཆོག་རྣམས་བླངས་ནས་སྟེར་བ་
དང་། འདོད་པའི་ཁ་ཟས་མཆོག་རྣམས་སྟེར་བ་དང་། ཉི་མ་སོ་སོ་ལ་གུས་པས་གོས་ཟུང་དང་དོང་ཙེ་ལྔ་རབ་ཏུ་སྟེར་བར་འགྱུར་རོ། །ལོ་ལྔ་བརྒྱར་འཚོ་བར་འགྱུར་རོ། །དེ་ནས་དུར་ཁྲོད་ཀྱི་བདག་པོ་སྒྲུབ་པར་གྱུར་ན་མཚན་
མོ་དུར་ཁྲོད་དུ་ཕྱིན་ནས་བཟླས་པ་སྟོང་ཕྲག་གཅིག་བྱའོ། །ཉི་མ་བདུན་པ་དང་བརྒྱད་པ་ལ་རབ་ཏུ་མང་པོའི་ཉ་དང་ཏིལ་དང་ཛྃ་བུ་ལི་ཀ་དང་དཀར་བའི་ཟས་དང་ཞོ་དང་བུ་རྃ་དང་བཱུ་པ་དང་འབྲས་བུ་དང་ཉེ་བར་སྤྱོད་པ་
རྣམས་དང་ཇི་སྐད་གསུངས་པའི་གཏོར་མ་བྱིན་ཏེ་གུ་གུལ་གྱི་སྤོས་ཕུལ་ཏེ་ཇི་སྲིད་ནམ་ཕྱེད་ཀྱི་བར་དེ་སྲིད་བཟླས་པ་བྱའོ། །དེའི་ནམ་ཕྱེད་ན་ཧཱ་ཧཱ་སྒྲོགས་པ་ཐོས་པར་འགྱུར་ཏེ། དེ་ལ་འཇིགས་པར་མི་བྱའོ། །
དེ་འཁོར་གྱི་ཚོགས་ཀྱིས་ཡོངས་སུ་བསྐོར་ནས་འོང་བར་འགྱུར་རོ། །འོངས་པ་དང་གཏོར་མ་བྱིན་པས་ཚིམ་པར་འགྱུར་རོ། །འབྱུང་པོ་ཐམས་ཅད་གང་བརྒོ་བ་བྱེད་དོ། །ཉི་མ་རེ་རེ་ཞིང་དོང་ཙེ་བརྒྱད་བླང་བར་འགྱུར་རོ། །

90-1-171a

དགྲ་ཐམས་ཅད་འཇོམས་ཤིང་ལོ་སྟོང་དུ་འཚོ་བར་འགྱུར་རོ། །དེ་ནས་རིགས་ཀྱི་དབང་ཕྱུག་སྒྲུབ་པར་གྱུར་ན་ལྷའི་གནས་སུ་ཕྱིན་ནས་དྲི་དམར་པོ་དང་། མེ་ཏོག་དམར་པོ་དང་གུ་གུལ་ཕུལ་ནས་
སྔོན་དུ་བསྙེན་པ་ཁྲི་བཟླས་པར་བྱའོ། །ནག་པོའི་ཕྱོགས་ཀྱི་བཅུ་བཞིའི་མཚན་མོ་ལ་ཉ་ཤ་དང་ཏིལ་དང་ཛྃ་བུ་ལི་ཀ་དང་ཁ་ཟས་དམར་པོ་དང་ཇི་ལྟ་བའི་མཆོད་པས་གཏོར་མ་འབུལ་བར་བྱ་ཞིང་སི་ཧླའི་
སྤོས་ཕུལ་ནས་ཇི་སྲིད་ནམ་ཕྱེད་ཀྱི་བར་བཟླས་པ་བྱའོ། །དེ་ནས་འབར་བ་ཆེན་པོ་མཐའ་མེད་པ་ཤིན་དུ་འཇིགས་པའི་གཟུགས་འོང་བར་འགྱུར་རོ། །དེ་ལ་འཇིགས་པར་མི་བྱ་སྟེ། བུ་བདག་གིས་ཅི་བྱ་ཞེས་སྨྲ་བར་
འགྱུར་རོ། །སྒྲུབ་པ་པོས་སྨྲ་བར་བྱ་སྟེ། བདག་གིས་གང་བསྒོ་བ་གྱིས་ཤིག་ཅེས་སོ། །དེ་ཇི་སྲིད་འཚོའི་བར་དུ་གང་བཅོལ་བའི་ལས་བྱེད་པར་འགྱུར་རོ། །ཉི་མ་རེ་རེ་ལ་དོང་ཙེ་ལྔ་ཐུན་མཚམས་གསུམ་དུ་སྟེར་བར་བྱེད་
དོ། །འདོད་པའི་ཁ་ཟས་མཆོག་སྟེར་ཞིང་ལོ་ལྔ་བརྒྱ་འཚོ་བར་འགྱུར་རོ། །དེ་ནས་འབྱུང་པོའི་དབང་ཕྱུག་སྒྲུབ་པར་གྱུར་ན་ལིང་ག་གཅིག་པའི་དྲུང་དུ་ཕྱིན་ཏེ། ཉིན་མཚན་གསུམ་དུ་དམར་བའི་ཟས་དང་ཉ་ཤ་དང་ཏིལ་དང་། 
ཛྃ་བུ་ལི་ཀེའི་གཏོར་མ་བྱིན་པས་ཉི་མ་གསུམ་པ་ལ་བདག་ཉིད་མྱུར་དུ་འོངས་ནས་མདུན་དུ་འཁོད་དེ་བདག་གིས་ཅི་བྱ་ཞེས་སྨྲ་བར་འགྱུར་རོ། །སྒྲུབ་པ་པོས་སྨྲ་བར་བྱ་སྟེ། བདག་གིས་གང་བསྒོ་བ་གྱིས་ཤིག་ཅེས་སྨྲས་པས་རྟག་ཏུ་རྗེས་
སུ་འབྲང་ཞིང་ལྷའི་བུ་མོ་བླངས་ནས་སྟེར་བར་བྱེད་ཅིང་། རང་གིས་ཟས་བླངས་ཏེ་སྟེང་གཡོགས་ནས་རྣམ་པ་སོ་སོར་སྟེར་བར་བྱེད་དོ། །ལོ་ཉིས་སྟོང་དུ་འཚོ་བར་འགྱུར་རོ། །དེ་ནས་མངག་གཞུག་པ་མཆོག་སྒྲུབ་པར་གྱུར་ན་རྡོ་རྗེ་འཛིན་
པའི་ཁང་པར་ཞུགས་ནས་ནག་པོའི་བཅུ་བཞི་ལ་བཟླས་པ་ཁྲི་ཕྲག་གཅིག་བྱའོ། །སྔོན་དུ་བསྙེན་པ་བྱས་ནས་ཉི་མ་བདུན་པ་ལ་དེ་ནས་སྒྲུབ་པ་བརྩམ་པར་བྱའོ། །དཀྱིལ་འཁོར་ལ་ཙན་དན་གྱིས་བྱུགས་ཏེ་གུ་གུལ་གྱི་སྤོས་ཕུལ་

90-1-171b

ནས་དཀར་བའི་ཟས་དང་ཞོ་དང་མར་དང་འོ་མ་དང་ཀུ་ཤ་ཆུན་པོའི་སྟེང་དུ་མར་གྱི་མར་མེ་རབ་ཏུ་སྦར་ཏེ། མཚན་མོ་ཇི་སྲིད་པ་དེ་སྲིད་དུ་བཟླས་པར་བྱའོ། །ནམ་ཕྱེད་ན་མངག་གཞུག་པ་མཆོག་ཉིད་འོང་བར་འགྱུར་རོ། །འོངས་
པ་ན་ཙན་དན་གྱི་མཆོད་ཡོན་ཕུལ་བས་ཚིམ་པར་བྱའོ། །བདག་གིས་ཅི་བྱ་ཞེས་འདྲི་བར་འགྱུར་རོ། །སྒྲུབ་པ་པོས་སྨྲ་བར་བྱ་སྟེ། བདག་གིས་གང་བསྒོ་བ་གྱིས་ཤིག་ཅེས་སོ། །དེ་ནས་བཟུང་སྟེ་གང་བཅོལ་བའི་ལས་
རྣམས་བྱེད་པར་འགྱུར་རོ། །འདོད་པའི་འབྲས་བུ་ཐམས་ཅད་སྟེར་ཞིང་འདོད་པའི་དོན་ཐམས་ཅད་ཕུན་སུམ་ཚོགས་པར་བྱེད་དོ། །དེ་ནས་འདོད་པའི་དབང་ཕྱུག་མ་སྒྲུབ་པར་གྱུར་ན་གྲོ་གའི་ལོ་མ་ལ་གི་ཧྃ་གིས་གཟུགས་བརྙན་བྲིས་
ཏེ། རང་གཅིག་པུ་ཉལ་བའི་སྟེང་དུ་བསྡད་ལ་སྟོང་ཕྲག་གཅིག་བཟླས་པ་བྱའོ། །དེ་ནས་ཟླ་བའི་མཐར་མཆོད་པ་རྒྱ་ཆེན་པོ་བྱས་ལ་མར་གྱི་མར་མེ་རབ་ཏུ་སྦར་ཏེ་མི་སྨྲ་བར་གྱུར་པས་བཟླས་པར་བྱའོ། །དེའི་ནམ་ཕྱེད་ན་ངེས་པར་
འོང་བར་འགྱུར་རོ། །འོངས་པ་ན་འདོད་པ་བྱས་པས་ཆུང་མར་འགྱུར་རོ། །མཛེས་པའི་རྒྱན་དང་བཟའ་བ་དང་བཅས་ཤིང་ཉལ་ཏེ་ཉིན་མོ་ཡོངས་སུ་སྤངས་ཤིང་འགྲོའོ། །བུད་མེད་གཞན་དང་འགྲོགས་པ་སྤང་བར་བྱ་སྟེ། གཞན་
དུ་ན་རྣམ་པར་འཇིག་པར་བྱེད་དོ། །དེ་ནས་ཀ་ན་མ་ནཱི་སྒྲུབ་པར་གྱུར་ན་ནྱ་གྲོ་དྷའི་ཤིང་དྲུང་དུ་ཕྱིན་ཏེ་ཆོ་གས་ཉ་ཤའི་གཏོར་མ་སྦྱིན་ནོ་བདག་ཉིད་འཐུངས་པའི་ལྷག་མས་མཆོད་ཡོན་བྱིན་ལ་བཟླས་པ་སྟོང་ཕྲག་གཅིག་བྱའོ། །
དེ་བཞིན་དུ་ཉི་མ་བདུན་པའི་མཚན་མོ་བདག་ཉིད་འོང་བར་འགྱུར་ཏེ། རྒྱན་ཐམས་ཅད་ཀྱིས་བརྒྱན་ཅིང་འཁོར་བརྒྱ་ཕྲག་གསུམ་དང་ལྷན་ཅིག་ཏུ་ནམ་ཕྱེད་ན་ངེས་པར་འོང་བར་འགྱུར་རོ། །འོངས་པ་ན་འདོད་པ་བྱས་པས་ཆུང་མར་
འགྱུར་རོ། །སྐྱེ་བོ་བཅུ་གཉིས་ཀྱི་གོས་དང་རྒྱན་དང་བཟའ་བ་རྣམས་སྟེར་བར་བྱེད་དོ། །ཉི་མ་སོ་སོ་ལ་དོང་ཚེ་བརྒྱད་རབ་ཏུ་སྟེར་བར་བྱེད་དོ། །དེ་ནས་དགའ་མ་སྒྲུབ་པར་གྱུར་ན་ཐང་ཀ་ལ་རི་མོ་བྲི་བར་བྱ་སྟེ། གསེར་གྱི་མདོག་ཅན་

90-1-172a

རྒྱན་ཐམས་ཅད་ཀྱིས་བརྒྱན་པ་ལག་ན་ཨུད་པ་ལ་དང་ལྡན་པའོ། །ཛི་ཏིའི་མེ་ཏོག་གིས་མཆོད་པར་བྱའོ། །གུ་གུལ་གྱི་སྤོས་བྱིན་ནས་སྟོང་ཕྲག་བརྒྱད་བཟླས་པར་བྱའོ། །ཟླ་བའི་མཐའ་ལ་ཇི་ལྟ་བའི་དངོས་པོས་མཆོད་
པ་བྱ་སྟེ། མར་གྱི་མར་མེ་རབ་ཏུ་སྦར་ལ་ཇི་སྲིད་ནམ་ཕྱེད་ཀྱི་བར་དུ་དེ་སྲིད་བཟླས་པ་ན་རང་ཉིད་འོང་བར་འགྱུར་རོ། །འོངས་པ་ན་མི་སྨྲ་བར་བསྒོམ་ཞིང་འདོད་པ་བྱས་པས་ཆུང་མར་འགྱུར་རོ། །སྒྲུབ་པ་པོའི་འཁོར་རྣམས་ནི་སྐྱོང་
བར་འགྱུར་རོ། །འདོད་པའི་བཟའ་བ་མཆོག་རྣམས་དང་དངུལ་ཆུ་དང་བཅུད་ལེན་རྣམས་སྟེར་ཞིང་དོང་ཙེ་ཉི་ཤུ་རྩ་ལྔ་རབ་ཏུ་སྟེར་བར་བྱེད་དོ། །དེ་ནས་པད་མི་ནི་སྒྲུབ་པར་གྱུར་ན་རང་གི་ཁང་པར་སྤྱི་བོའི་གནས། སུ་དཀྱིལ་
འཁོར་ལ་ཙན་དན་བྱུགས་ཏེ་གུ་གུལ་གྱི་སྤོས་ཕུལ་ལ་ཟླ་བ་གཅིག་ལ་སྟོང་ཕྲག་གཅིག་བཟླས་སོ། །དེ་ནས་ཟླ་བ་ཡོངས་སུ་གང་བ་ན་ཇི་ལྟ་བའི་དངོས་པོས་མཆོད་པར་བགྱིས་ཏེ། ཇི་སྲིད་ནམ་ཕྱེད་པ་དེ་སྲིད་དུ་བཟླས་པས་
ངེས་པར་འོང་བར་འགྱུར་རོ། །འོངས་པ་ན་འདོད་པ་བྱས་པས་ཆུང་མར་འགྱུར་རོ། །འདོད་པའི་མཆོག་རབ་ཏུ་སྟེར་ཞིང་དངུལ་ཆུ་དང་བཅུད་ལེན་དང་དངོས་གྲུབ་ཀྱི་རྫས་ཀྱང་སྟེར་བར་འགྱུར་རོ། །དེ་ནས་རལ་པ་གཅིག་
མའི་སྒྲུབ་ཐབས་བདག་གིས་ཡང་དག་པར་རབ་ཏུ་བཤད་པར་བྱའོ། །གནོད་སྦྱིན་མོ་རྣམས་སྒྲུབ་པའི་དུས་སུ་རལ་པ་གཅིག་མ་རྣམ་པར་བསྒོམ་པར་བྱའོ། །ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པ་
ཁ་དོག་སྔོན་མོ། འཇིགས་པ་ཆེན་མོ་བྷ་གའི་དཀྱིལ་འཁོར་ལ་བསྒོམ་པར་བྱའོ། །ཤར་གྱི་འདབ་མ་ལ་ཛམྦྷ་ལ་བསྒོམ་པར་བྱའོ། །ནོར་བུ་འཛིན་པ་ནི་ལྷོ་རུའོ། །ཆུ་དབང་ནི་ནུབ་དུའོ། །ཙི་བི་འཁྱིལ་བ་ནི་བྱང་དུའོ། །
མེ་ལ་སོགས་པའི་མཚམས་བཞི་ལ་གནོད་སྦྱིན་མོ་བཞི་བསྒོམ་པར་བྱ་སྟེ། ཀུཎ་ཌ་ལཱྃ་དང་། ཧ་ཌྷི་ནཱི་དང་། རོ་ཧྲྃ་དང་། མཛེས་མ་རྣམས་ཆོ་གས་དགོད་པར་བྱའོ། །དེ་ནས་སྒོ་སྐྱོང་བསྒོམ་བྱ་ཞིང་། །དབྱུག་པ་ལ་སོགས་

90-1-172b

མཐའ་དག་ལ། །སྔོན་དུ་འཁོར་ལོ་ཇི་ལྟ་བཞིན། །དེ་བཞིན་ཁ་དོག་རབ་ཏུ་སྦྱོར། །ཀུན་ལ་བདག་པོའི་མཚན་མ་འཛིན། །ཕྱི་ནས་ཀྱང་ནི་སྔགས་བཟླས་ཏེ། །ཨོཾ་ཨེ་ཀ་ཛ་ཊི་བ་སུ་སཱ་དྷ་ནི་སྭཱ་ཧཱ། དེ་ནས་པུཀྐ་སཱི་ཡི་ནི། །སྒྲུབ་ཐབས་
བདག་གིས་བཤད་པར་བྱ། །གང་གིས་བསྒོམས་ཙམ་སྐད་ཅིག་ལས། །འཇིག་རྟེན་གསུམ་ལ་པུཀྐ་སཱི། །ཁ་དོག་དམར་སེར་ཞལ་བཞི་པ། །ཕྱག་བཞི་བོང་བུ་ལ་ཞོན་སྒོམ། །ལས་ཀྱི་པུཀྐ་སཱི་ཡི་ནི། །བྱ་རོག་
དང་ནི་ཐོ་བ་དང་། །མདའ་གཞུ་བརྟུལ་ཞུགས་ཅན་གྱིས་བསྒོམ། །སྔགས་བཟླས་པར་བྱའོ། །ཨོཾ་པུཀྐ་སཱི་ༀ། དེ་ནས་འཇམ་པའི་རྡོ་རྗེ་ཡི། །སྒྲུབ་ཐབས་བདག་གིས་རབ་བཤད་བྱ། །འཇམ་པའི་རྡོ་རྗེའི་
གྲུབ་པ་ལས་སྐད་ཅིག་གཅིག་ལས་མི་མཐོང་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་རོ་ལངས་གནོད་སྦྱིན་མོ་བསྒྲུབ་པ་སྟེ་རིམ་པར་ཕྱེ་བ་དགུ་
པའོ།། །།  དེ་ནས་རྡོ་རྗེ་འཛིན་པའི་རྒྱལ་པོས་རོ་ལངས་དང་། གཅན་ཟན་གདུག་པ་ཅན་ལ་སོགས་པ་བསྲུང་བའི་སྔགས་བཤད་པར་བྱའོ། །འབུམ་ཕྲག་བཞི་ནི་བཟླས་པ་ཡིས། །དོན་གྲུབ་ས་བོན་གཏོར་བྱས་ན། །
རོ་ནི་དོན་བྱེད་ལངས་འགྱུར་ཏེ། །འཚོ་བར་ཡང་ནི་ཐེ་ཚོམ་མེད། །ཞི་ལ་གཤིན་རྗེ་གཤེད་དཀར་པོ། །རྣལ་འབྱོར་བསྒོམ་བྱར་རྟག་ཏུ་རིག །ལག་ན་དོན་འགྲུབ་ས་བོན་ལ། །འབུམ་ཕྲག་བཞི་ནི་བཟླས་པ་ཡིས། །
རོ་ནི་མདུན་དུ་ཕྱོགས་བྱས་ནས། །ཡུངས་ཀར་གྱིས་ནི་བསྣུན་གྱུར་ན། །དེ་ཉིད་ལྡང་བར་ཐེ་ཚོམ་མེད། །གལ་ཏེ་ནག་པོས་གཟུང་གྱུར་ན། །ཧཱུྃ་མཛད་དཀར་པོ་དང་མཚུངས་པ། །བསྒྲུབ་བྱ་ཡི་ནི་སྙིང་གར་བསྒོམ། །
ཧྲཱིཿཥྚྲཱིཿ་ལ་སོགས་སྔགས་རྣམས་བཟླས། །འོད་ཟེར་གྱིས་ནི་དུག་རྣམས་དགུག །ལག་པ་གཡས་དང་དེ་བཞིན་གཡོན། །པད་མ་འདབ་མ་བརྒྱད་པ་འཛིན། །དེ་དབུས་ཧཱུྃ་མཛད་དཀར་པོ་སྟེ། །འོད་ཟེར་གྱི་ནི་བདུད་རྩི་

90-1-173a

འབབ། །དེ་ཡི་མགོ་བོའི་སྟེང་དུ་ཡང་། །བསིལ་ཟེར་བྱེད་པའི་དཀྱིལ་འཁོར་དབུས། །མཁས་པས་ཧཿཡིག་བསམ་པར་བྱ། །ཧྲཱིཿཥྚྲཱིཿལ་སོགས་སྔགས་དེ་ཡི། །རྒྱུད་ཀྱི་དུག་རྣམས་དྲང་བྱ་སྟེ། །
ཨོཾ་ཧྲཱིཿཥྚྲཱིཿཧ་ཧྲཱྃཿཛཿཕུཿཞེས་པའི་སྔགས་ཀྱི་ཡི་གེས་མགོ་བོ་ནས་བརྩམས་ནས་རྐང་པའི་མཐར་ཐུག་པ་སྔགས་ཀྱིས་བྱབ་པར་བྱའོ། །བདུད་རྩིའི་ཆར་རྒྱུན་འབབ་པར་བསྒོམ། །དེ་ཡིས་འཚོ་བར་ཐེ་ཚོམ་མེད། །ས་
བོན་ཡི་གེ་ལས་གྲུབ་པའི། །གཟུངས་ཀྱིས་འཆིང་བ་མཆོག་ཏུ་འགྱུར། །རྨ་ཡི་གནས་ལ་འདི་བསྒོམ་སྟེ། །ཁ་དོག་སེར་པོ་ལས་བྱུང་བའི། །ཨོཾ་ཡིག་ལ་སོགས་མཐར་ཚེག་དྲག །ཧ་ཋའི་རྣམ་པ་སྦྱར་བྱས་ལ། །
སྦྱོར་བ་ཡིས་ཀྱང་བརྡ་བར་བྱ། །མགོ་གཟེར་རབ་ཞི་བློ་མཆོག་ལྡན། །དེ་བཞིན་གཞན་ཡང་སྡོམ་དང་ནི། །བི་ཀ་ཊ་དང་རྐང་ཤུ་སོགས། །རབ་ཏུ་སྦྱོར་བ་མང་པོ་རྣམས། །ལག་པས་ངེས་གཟུང་འཚོ་བར་བྱེད། །
དེ་ནས་རྒྱལ་པོ་རྡོ་རྗེ་འཆང་། །བསྲུང་བའི་འཁོར་ལོ་རབ་སྦྱོར་བ། །བགེགས་དང་ལོག་འདྲེན་གདུག་པ་རྣམས། །བརྟུལ་ཞུགས་ཅན་གྱིས་གཞོམ་བྱའི་ཕྱིར། །བདག་ཉིད་དཔལ་ལྡན་དབྱུག་འཛིན་གྱི། །སྤྲུལ་པའི་འཁོར་ལོ་
རབ་ཏུ་སྦྱོར། །དབྱུག་པའི་འོད་ཀྱིས་རང་ལུས་ཁྱབ། །སྐུ་གསུམ་ལས་ནི་སྐྱེས་པའོ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །གཤིན་
རྗེའི་གཤེད་ཀྱི་དཀྱིལ་འཁོར་དུ། །སློབ་དཔོན་བདག་གིས་དཀྱིལ་འཁོར་བྲི། །གོས་ཀྱིས་གདོང་ནས་བཅིངས་བྱས་ལ། །དཀྱིལ་འཁོར་ཁང་པའི་སྒོ་དྲུང་དུ། །ཀྱེ་མ་འབོད་པ་སུ་ཞིག་ལགས། །སྐལ་བཟང་བདག་ཅེས་བརྗོད་པར་
བྱ། །ཡོལ་བ་ཡི་ནི་ནང་བྱས་ནས། །བླ་མ་མགོན་ལ་མཁས་པས་ཞུ། །གུས་པ་ཆེན་པོས་དབང་གི་ཕྱིར། །རྗེས་སུ་མགོན་བྱེད་ལན་གསུམ་བརྗོད། །ཇི་ལྟར་སངས་རྒྱས་བདེ་ཆེན་གྱིས། །རྡོ་རྗེ་སེམས་དཔའ་དབང་བསྐུར་ལྟར། །

90-1-173b

བདག་ཀྱང་མགོན་པོས་དབང་བསྐུར་ནས། །མཆོག་ཀྱང་བདག་ལ་སྩལ་དུ་གསོལ། །གླུ་དང་རོལ་མོས་དེ་བཞིན་མཆོད། །མཆོད་ཡོན་ཞབས་བསིལ་དེ་བཞིན་དུ། །སློབ་མས་གུས་དང་བཅས་ཏེ་དབུལ། །བསྟོད་པ་ཡང་ནི་དེ་ལ་བྱ། །
དེ་ནས་རྒྱལ་པོ་རྡོ་རྗེ་འཆང་། །སྟོང་ཉིད་གསུངས་པ་འདི་ལྟ་སྟེ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧྃ། ཨོཾ་པཱུ་ཛཱ་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོཾ་དྷརྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧྃ། དེ་ནས་ཞི་བ་ལ་སོགས་པའི། །སྦྱིན་སྲེག་
རབ་དབྱེ་བདག་གིས་བཤད། །གང་གིས་ལས་ཀུན་རབ་སྒྲུབ་པ། །སྦྱིན་སྲེག་གིས་ནི་འགྲུབ་པར་འགྱུར། །ཞི་ལ་ཞི་བའི་སེམས་ཀྱིས་ཏེ། །རྒྱས་ལ་རྒྱས་པའི་སེམས་ཀྱིས་སོ། །དབང་ལ་རྗེས་སུ་ཆགས་སེམས་ཏེ། །བསད་པ་
ལ་ནི་ཁྲོ་སེམས་ཀྱིས། །ཞི་ལ་མཎ་ཌལ་རྣམ་པ་སྟེ། །རྒྱས་ལ་རྫིང་གི་རྣམ་པའོ། །དབང་ལ་ཟླ་བ་ཕྱེད་པ་སྟེ། །ནམ་མཁའི་ཁམས་ནི་བསད་པ་ལ། །ཞི་ལ་ཁྲུ་གང་ཚད་ཡིན་ཏེ། །རྒྱས་ལ་དེ་བཞིན་ཁྲུ་དོའོ། །རྒྱས་པ་ཇི་ལྟ་དེ་བཞིན་
དབང་། །གསད་ལ་སོར་མོ་ཉི་ཤུའོ། །ཞི་ལ་ཁྲུ་ཕྱེད་གཏིང་དུའོ། །ཁྲུ་ཡི་ཚད་ཀྱིས་རྒྱས་པ་ལ། །བསད་པ་ལ་ནི་ལྔ་གཉིས་སོ། །རྒྱས་པ་ཇི་ལྟར་དེ་བཞིན་དགུག །ཞི་བའི་སྦྱིན་སྲེག་ཚེས་གཅིག་ལ། །རྒྱས་པ་ཟླ་བ་གང་བ་ལ། །
བཅུ་བཞི་ལ་ནི་མངོན་སྤྱོད་དོ། །བརྒྱད་ལ་དབང་གི་ལས་ཡིན་ནོ། །ཉ་སྐྱོགས་དང་ནི་ཤེལ་དག་དང་། །ཞི་ལ་མུ་ཏིག་འབྲས་བུ་མཆོག །དུང་གི་བུ་ནི་འཚོ་བ་ལ། །ནད་མེད་པ་ལ་མུ་མེན་ནོ། །ཙན་དན་དམར་པོ་དག་དང་ནི། །
བྱི་རུ་དམར་པོའི་ཁྱད་པར་དང་། །རག་ཤ་དང་ནི་ལུང་ཐང་ནག །མི་ཡི་རུས་དང་དེ་བཞིན་དུ། །ནཱ་ག་ཕ་ཎཱི་ཞེས་བྱ་རྣམས། །ཞི་བ་ལ་ནི་བརྒྱ་ཕྲག་གཅིག །རྒྱས་པ་བརྒྱད་ཀྱིས་ལྷག་དེ་བཞིན། །དབང་དགུག་ཉི་ཤུ་རྩ་ལྔའོ། །
མངོན་སྤྱོད་དྲུག་བཅུ་རྩ་བཞིའོ། །རྡོག་པོ་རྣམས་ནི་སྔགས་ཀྱིས་བསྐུ། །བརྒྱ་ཕྱེད་སྔགས་ཀྱིས་བསྒྲུབ་པར་བྱ། །ཕྲེང་བ་ཀུན་ལ་མཐར་མདུད་བྱ། །དེ་བཞིན་དུ་ནི་རི་རབ་གཉིས། །མཛུབ་མོའི་སྟེང་ནས་ཞི་བ་ལ། །

90-1-174a

གུང་མོ་ལ་ནི་རྒྱས་པའོ། །དབང་དགུག་དག་ལ་མིང་མེད་ལས། །ཆད་པས་བཅད་ལ་མཐེ་ཆུང་ལས། །ཞི་ལ་ཁ་དོག་དཀར་པོ་དང་། །ཁ་དོག་སེར་པོ་རྒྱས་པ་ལ། ། དམར་པོ་དབང་ལ་རྟག་ཏུ་བསྒོམ། ། ནག་པོ་
ཤིན་དུ་གསད་ལ་འདོད། ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གཤིན་རྗེ་གཤེད་དམར་པོའི་རྒྱུད་ལས་སྦྱིན་སྲེག་གི་ཆོ་ག་སྟེ་རིམ་པར་ཕྱེ་བ་བཅུ་པའོ།། །།  རྣལ་འབྱོར་བཞི་དང་ལྡན་པའི་
རྣལ་འབྱོར་པས་སྣ་ཚོགས་པའི་བཅའ་བ་ལ་སོགས་པ་དང་། བཟའ་བ་དང་མྱང་བ་དང་བཏུང་བ་དང་བལྡག་པ་ལ་སོགས་པ་དང་ཡང་དག་པར་ལྡན་པའི་དྲི་དང་ཕྲེང་བ་དང་བྱུག་པ་དང་ཕྱེ་མ་དང་གོས་དང་གདུགས་དང་རྒྱལ་
མཚན་དང་དྲིལ་བུ་དང་བ་དན་ལ་སོགས་པ་རྣམས་ཀྱིས་རབ་ཏུ་གང་བ་ལ་རོལ་མོའི་སྒྲ་ཆེན་པོ་ལྔ་བསྒོམ་པར་བྱའོ། །མདུན་དུ་གཏོར་མ་བཞི་ཁྱོགས་དང་ཁུར་དང་དཔུང་ཐེགས་དང་མཐའ་ན་ཟན་ཙམ་ཆུ་དང་བཅས་པ་
ཁྱོར་བ་གསུམ་དང་ཇི་ལྟར་རྙེད་པའི་དམ་ཚིག་གི་རྫས་དང་ལྡན་པ་བཤམས་ནས་དེ་སྟོང་པར་དམིགས་ཏེ་བརྩམས་པར་བྱའོ། །ནམ་མཁའི་ཁམས་སུ་པད་མ་འདབ་མ་བརྒྱད་པ་བསྒོམ་པར་བྱ་སྟེ། གེ་སར་དང་བཅས་པའི་
ཟེའུ་འབྲུ་ལ་ཡྃ་ཡིག་ལས་རླུང་གི་དཀྱིལ་འཁོར་ཁ་དོག་ནག་པོ་གཞུའི་རྣམ་པ་ལ་རྩེ་མོ་གཉིས་ལ་གཡོ་བའི་བ་དན་དཀར་པོ་བརྒྱད་ཀྱིས་སྤྲས་པའོ། །དེའི་སྟེང་དུ་རྃ་ཡིག་ལས་མེའི་དཀྱིལ་འཁོར་ཟུར་གསུམ་དམར་
པོ་ཟུར་གསུམ་ན་ར་ཡིག་གིས་སྤྲས་པའོ། །དེའི་སྟེང་དུ་ཨུ་ཡིག་གཉིས་ཡོངས་སུ་གྱུར་པ་ལས་མགོ་བོ་དམར་པོའི་སྒྱེད་པུ་གསུམ་གྱི་སྟེང་དུ་ཨཱཿཡིག་ལས་སྐྱེས་པའི་པད་མའི་སྣོད་ཕྱི་དཀར་ལ་ནང་དམར་བ་དེ་ལ་
ཆུ་སྐྱེས་འདབ་མ་བརྒྱད་པའི་རྣམ་པར་བསམ་པར་བྱའོ། །དེའི་ཤར་ལ་སོགས་པའི་འདབ་མ་ལ་ཨོཾ་ཨཱྃ་ཛྲཱིྂ་ཁྃ་ཧཱུྃ་གི་ཡི་གེ་རྣམས་ལས་རྣམ་པར་སྣང་མཛད་ལ་སོགས་པའི་རང་གཟུགས་རྣམས་སོ། །དེ་བཞིན་དུ་མེ་

90-1-174b

ལ་སོགས་པའི་མཚམས་རྣམས་ལ་ལཱྃ་མཱྃ་པཱྃ་ཏཱྃ་བཱྃ་གི་ཡི་གེ་རྣམས་ལས་སྤྱན་མ་ལ་སོགས་པའི་རང་གཟུགས་རྣམས་བསྒོམ་པར་བྱའོ། །ཡི་གེ་བཅུ་པོ་འདི་རྣམས་ཡོངས་སུ་གྱུར་པ་ནི་གོ་ཀུ་ད་ཧ་ན་རྣམས་དང་། བི་ར་ཤུ་མཱ་མཱུ་ཞེས་པ་སྟེ། འདི་རྣམས་
ཀྱི་ས་བོན་གྱི་ཡི་གེས་མཚན་པའི་དམ་ཚིག་གི་རྫས་བཅུ་པོ་དེ་པད་མའི་སྣོད་དུ་བལྟས་ཏེ། དེའི་སྟེང་དུ་ཨོཾ་ཡིག་ཁ་དོག་དཀར་པོས་བཀབ་པའི་གཟུགས་སུ་བསྒོམ་མོ། །ཨོཾ་ཡིག་ལས་སྐྱེས་པའི་ཟླ་བའི་དཀྱིལ་འཁོར་
དེའི་སྟེང་དུ་ཧཱུྃ་ཡིག་དཀར་པོ་ལས་བྱུང་བའི་རྡོ་རྗེ་དབྱུག་པ། དེ་ས་བོན་གྱིས་མཚན་པ་བལྟས་ཏེ། དེ་ཡང་པད་མའི་སྣོད་ལས་འོག་ན་སྒྱེད་པུ་ལ་ཨོཾ་ཨཱཿཧཱུྃ་ལན་གསུམ་བཟླས་ཤིང་བརྗོད་པར་བསྒོམ་
ཏེ་སྔོན་མ་རྒྱུན་མ་ཆད་པར་རླུང་གི་དཀྱིལ་འཁོར་རྒྱ་ཆེན་པོ་དང་། །རབ་ཏུ་འབར་བ་མེའི་དཀྱིལ་འཁོར་བསྒོམས་ཏེ། རྒྱ་ཆེན་པོ་འབར་ཞིང་བར་མ་ལུས་པའི་རང་གཟུགས་གོ་གུ་ལ་སོགས་པའི་དམ་ཚིག་གི་རྫས་བཅུ་ཞུ་བ་ལས་རྡོ་
རྗེ་དབྱུག་པས་དཀྲུགས་པར་བལྟའོ། །དེ་ཡང་རྡོ་རྗེ་དབྱུག་པས་བདུད་རྩི་ཞུ་སྟེ་ཉི་མ་གསར་པའི་ཁ་དོག་གམ། དངུལ་ཆུའི་རྣམ་པར་བསམ་པར་བྱའོ། །དེ་ལ་ཡང་ཨོཾ་ཨཱཿཧཱུྃ་གསུམ་གྱི་ཡི་གེ་བལྟས་ཏེ། དེ་ལས་ཡི་གེ་གསུམ་གྱི་
འོད་ཟེར་གྱི་ཚོགས་ཆེན་པོ་རྣམ་པར་འཕྲོས་ཏེ་འཇིག་རྟེན་གསུམ་ན་གནས་པའི་བདུད་རྩི་རབ་ཏུ་མང་པོ་འོད་ཟེར་གྱིས་བཀུག་སྟེ། དེ་ལ་རབ་ཏུ་གཞུག་པར་བྱའོ། །དེ་རབ་ཏུ་ཞུགས་པས་ཟླ་བའི་འོད་ཟེར་ཚོགས་པ་ཤིན་དུ་ལྷག་
པ་ཡོངས་སུ་གྱུར་པ་ལས་ཁ་བ་ལྟ་བུ་སྦྲང་རྩིའི་ཚོགས་པའི་གཟུགས་ཀྱིས་མནན་པར་བྱའོ། །ཕྱི་ནས་ཡི་གེ་གསུམ་གྱིས་བྱིན་གྱིས་བརླབ་པར་བྱ་སྟེ། ཁ་དོག་དང་དྲི་དང་རོ་བཅུད་དང་ལྡན་པ་སྟོན་ཀའི་ཟླ་བ་དྲི་མ་མེད་པའི་
འོད་ལྟ་བུ་ཡེ་ཤེས་ཀྱི་བདུད་རྩིའི་སྦྱོར་བས་གཏོར་མར་གྲུབ་པར་འདུན་པ་བྱའོ། །གཤིན་རྗེ་གཤེད་ཀྱི་གཟུགས་འཛིན་པའི་སྔགས་ཀྱིས་ཁྲོ་བོ་རྣམས་ལ་ཕྱག་ན་ཞགས་པ་དང་ལྕགས་ཀྱུ་འཛིན་ཅིང་འཕྲོ་བས་ཕྱོགས་སྐྱོང་

90-1-175a

རྣམས་ཀྱི་སྙིང་ག་ནས་ལྕགས་ཀྱུས་འབིགས་ཤིང་མགྲིན་པ་ལ་ཞགས་པས་བཅིངས་ཏེ་འགུག་པར་བསྒོམ་པར་བྱའོ། །དེ་ནས་ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྂ་ཧཱུྂ་ཕཊ་ཕཊ་དུཥྚེན་དྲ་ས་པ་རི་ཝཱ་ར་མཱ་ཀར་ཥ་ཡ་ཛཿ
སྔགས་འདིས་དབང་པོ་མིག་སྟོང་སེར་སྐྱ་གླང་པོ་ཆེ་དཀར་པོ་ལ་ཞོན་པ། ལག་པ་གཡས་པ་དང་གཡོན་པ་རྡོ་རྗེ་དང་བསྡིགས་མཛུབ་ཅན་བཀུག་སྟེ་ཤར་དུ་རྣམ་པར་དགོད་པར་བྱའོ། །དེ་བཞིན་དུ་དེའི་སྔགས་ཀྱིས་ཉེ་བའི་དབང་
པོ་བྱ་ཁྱུང་ལ་གནས་པ། རིན་པོ་ཆེའི་ཅོད་པན་ཅན། གཡས་ན་དབྱུག་པ་དང་འཁོར་ལོ། །གཡོན་ན་དུང་དང་ནོར་བུ་འཛིན་པ། དེའི་གཡོན་མི་རིང་བ་ན་གནས་པའོ། །ཡང་དེ་བཞིན་དུ་གཤིན་རྗེ་ནག་པོ་མ་ཧེ་ལ་ཞོན་པ། 
དབྱུག་པ་འཛིན་པ་ལྷོར་གནས་པའོ། །ཡང་དེ་བཞིན་དུ་ཆུ་བདག་ཁ་དོག་དཀར་པོ་སྦྲུལ་ལ་གནས་པ། ལག་ན་ཀླུའི་ཞགས་པ་འཛིན་པ། ནུབ་ཏུ་རྣམ་པར་གནས་པའོ། །ཡང་དེ་བཞིན་དུ་ལུས་ངན་པོ་སེར་པོ་གཏེར་ལ་གནས་
པ། ལག་ན་བཱི་ཛ་པཱུ་ར་ཀ་དང་ན་ཀུ་ལི་བསྣམས་པ། བྱང་དུ་རྣམ་པར་གནས་པའོ། །དེ་བཞིན་དུ་སྣ་ལྡན་དཀར་པོ་བྱི་བ་ལ་གནས་པ། གཡས་ན་བགྲང་ཕྲེང་དང་དགྲ་སྟ་འཛིན་པ། གཡོན་ན་ལ་ཕུག་དང་ལ་དུའོ། །དེ་བཞིན་དུ་
དབང་ལྡན་དཀར་པོ་ཁྱུ་མཆོག་དཀར་པོ་ལ་གནས་པ། རལ་པ་འཛིན་པ་རྩེ་གསུམ་དང་ཐོད་པ་ལག་ན་བསྣམས་པ། ལག་པ་གཉིས་གཽ་རཱི་ལ་མཁྱུད་པ། དབང་ལྡན་དུ་རྣམ་པར་གནས་པའོ། །ཡང་དེ་བཞིན་དུ་མེ་ནི་
དམར་པོར་ལ་གནས་པ། ལག་ན་བགྲང་ཕྲེང་དང་སྤྱི་བླུགས་བསྣམས་པ། མེའི་ཕྱོགས་སུ་རྣམ་པར་གནས་པའོ། །ཡང་དེ་བཞིན་དུ་སྲིན་པོ་ནི་རོ་ལ་ཞོན་པ། ལག་ན་གྲི་གུག་དང་ཐོད་པ། ཁ་དོག་སྔོན་པོ་ཁྲོ་ཞིང་གཏུམ་
པ་བདེན་བྲལ་གྱི་ཕྱོགས་སུ་རྣམ་པར་གནས་པའོ། །ཡང་དེ་བཞིན་དུ་རླུང་ལྷ་ནི་ངུ་བའི་ཁ་དོག་རི་དགས་སེར་པོ་ལ་གནས་པ། རླུང་གི་བ་དན་བསྣམས་པ། རླུང་གི་ཕྱོགས་སུ་རྣམ་པར་གནས་པའོ། །ཡང་དེ་བཞིན་དུ་ཉི་མ་ནི་

90-1-175b

དམར་པོ། ལག་པ་གཉིས་ན་པད་མ་འཛིན་པ། རྟ་བདུན་གྱི་སྟེང་ན་སྟེང་གི་ཕྱོགས་སུ་རྣམ་པར་གནས་པའོ། །ཡང་དེ་བཞིན་དུ་ཟླ་བ་ནི་དཀར་པོ། །ལག་པ་གཉིས་ན་ཀུ་མུ་ད་བསྣམས་པ། ཤིང་ལ་ཞོན་པ། སྟེང་གི་
ཕྱོགས་ན་རྣམ་པར་གནས་པའོ། །ཡང་དེ་བཞིན་དུ་ཚངས་པ་ནི་སེར་སྐྱ་གདོང་བཞི་པ། སྤྱི་བླུགས་དང་མི་འཇིགས་པ། དབྱུག་པ་དང་བགྲང་ཕྲེང་བསྣམས་པ། ངང་པ་ལ་ཞོན་པ། སྟེང་གི་ཕྱོགས་ན་རྣམ་པར་གནས་པའོ། །
ཡང་དེ་བཞིན་དུ་སའི་ལྷ་མོ་ཕྱག་གཡོན་ན་བུམ་པ་བསྣམས་པ། གཡས་ན་དམ་འཆའ་དང་ཁས་ལེན་གྱི་ཕྱག་རྒྱ་སྟེ། འོག་གི་ཕྱོགས་སུ་རྣམ་པར་གནས་པའོ། །ཡང་དེ་བཞིན་དུ་ཐགས་ཟངས་རིས་སྔོན་པོ་ཤིང་རྟ་ལ་གནས་
པ། གཡས་དང་གཡོན་ན་རལ་གྲི་དང་བསྡིགས་མཛུབ་འཛིན་པ། དེ་ཡང་དེ་བཞིན་དུ་རྣམ་པར་གནས་པའོ། །དེ་རྣམས་ཁྲོ་བོ་གཤིན་རྗེ་གཤེད་ཀྱི་གཟུགས་ལ་ལག་ན་ཕུར་བུ་འཛིན་པས་ཁྲོ་བོའི་མགྲིན་པ་དང་སྙིང་
གའི་ས་བོན་གྱི་འོད་ཟེར་གྱིས་བཀུག་སྟེ། དེ་རྣམས་ཀྱི་སྙིང་ག་དང་མགྲིན་པ་དང་སྤྱི་བོ་དང་རྐང་པའི་མཐར་ཐུག་འདིས་ཕུར་བུས་གདབ་པར་བྱ་སྟེ། ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུྂ་ཧཱུྂ་ཕཊ་ཕཊ་ཧཱུྂ་སཪྦེན་ད་དི་ན་ཀཱི་ལ་ཡ་ཧཱུྃ་ཕཊ་ཅེས་པ་ནི་
ཕུར་བུ་བར་མ་ཆད་པར་གྲུབ་པའི་ཁུ་བའི་ཚོགས་པ་ལ་སོགས་པས་དེ་ཐམས་ཅད་ཀྱང་གཤིན་རྗེ་མཐར་བྱེད་ཀྱི་རྣམ་པར་གྲུབ་པའི་མཐར་བྱང་ཆུབ་སེམས་ཀྱི་ཁུ་བའི་གཟུགས་རླུང་གི་ས་བོན་གྱི་རྟགས་ཀྱི་གོ་རིམས་ཀྱིས་གྲུབ་
པའི་མཐའ་ལ། དེ་ལ་ཧྲཱིཿཡིག་གི་ས་བོན་ལས་གྲུབ་པ་ནི་དབང་པོའོ། །ཥྚྲཱིཿཡིག་གི་ས་བོན་ལས་གྲུབ་པ་ནི་གཤིན་རྗེའོ། །བི་ཡིག་གི་ས་བོན་ལས་གྲུབ་པ་ནི་ཆུ་བདག་གོ། ཀྲྀ་ཡིག་གི་ས་བོན་ལས་གྲུབ་པ་ནི་ལུས་ངན་ནོ། །
ཏཱ་ཡིག་གི་ས་བོན་ལས་གྲུབ་པ་ནི་དབང་ལྡན་ནོ། །ཨ་ཡིག་གི་ས་བོན་ལས་གྲུབ་པ་ནི་མེའོ། །ན་ཡིག་གི་ས་བོན་ལས་གྲུབ་པ་ནི་བདེན་བྲལ་ལོ། །ན་ཡིག་གི་ས་བོན་ལས་གྲུབ་པ་ནི་རླུང་ངོ་། །ཧཱུྃ་ཡིག་གི་ས་བོན་ལས་

90-1-176a

གྲུབ་པ་ནི་ཟླ་བའོ། །ཧཱུྃ་ཡིག་གི་ས་བོན་ལས་གྲུབ་པ་ནི་ཉི་མའོ། །ཕཊ་ཡིག་གི་ས་བོན་ལས་གྲུབ་པ་ནི་ཚངས་པའོ། །ཕཊ་ཡིག་གི་ས་བོན་ལས་གྲུབ་པ་ནི་ནོར་རྒྱུན་མའོ། །སྭཱ་ཡིག་གི་ས་བོན་ལས་གྲུབ་པ་ནི་
ཐགས་ཟངས་རིས་སོ། །ཧཱ་ཡིག་གི་ས་བོན་ལས་གྲུབ་པ་ནི་འབྱུང་པོ་ཐམས་ཅད་དོ་ཞེས་ཏེ། དེ་བཞིན་དུ་གྲུབ་པར་བསམ་པར་བྱའོ། །དེ་རྣམས་ཀྱི་མིག་ལ་སོགས་པ་རྣམས་ལ་ཇི་ལྟར་གནས་པ། ཡང་མིག་ལ་སོགས་པ་རྫོགས་པའི་
སྐུ་ལ་སོགས་པ་རྣམས་ལ་ཡང་སྐུ་རྡོ་རྗེ་ལ་སོགས་པ་ཇི་ལྟར་མངོན་པར་དབང་བསྐུར་བ་བཞིན་དུ་གཤིན་རྗེ་མཐར་བྱེད་ཀྱིས་དབུ་བརྒྱན་པ་ཉིད་དོ། །ཡང་མཆོད་ཡོན་ལ་སོགས་པའི་བསང་གཏོར་དང་། ཞལ་བསིལ་ལ་སོགས་པ་དབུལ་
བར་བྱའོ། །ཕྱི་ནས་གཏོར་མ་ཉེ་བར་དབུལ་བ་ནི་བདུད་རྩི་སྒྲུབ་པའི་གོ་རིམ་སྔོན་དུ་རྫོགས་པ་ལ་དེ་ཉིད་གསུམ་གྱིས་མངོན་པར་བསྔགས་ཏེ་ཡང་དེ་རྣམས་ཀྱི་ལྗགས་རབ་ཏུ་སྦྱོར་བར་བསྒོམ་པར་བྱའོ། །སྔགས་འདིས་བདུད་རྩི་དབུལ་
བར་བྱ་སྟེ། ཨོཾ་རཀྟ་མུ་ཀུ་ཊཱ་ཡ། རཀྟ་ཛ་ཊཱ་ཡ། རཀྟ་མུ་ཁཱ་ཡ། རཀྟ་ཤ་རཱི་རཱ་ཡ། རཀྟ་བྷུ་ཛཱ་ཡ། རཀྟ་མུཎ་ཌ་མཱ་ལཱ་བྷ་ར་ཎཱ་ཡ། རཀྟ་ར་ཐ་ས་མཱ་རཱུ་ཌྷཱ་ཡ། རཀྟ་པད་མ་ས་ནཱ་ཡ། རཀྟ་བྷ་ར་ཎ་བྒཱུ་ཥ་ཎཱ་ཡ། ཨི་དྃ་བ་ལིཾ་གྲྀཧྞ་གྲྀཧྞ། 
མ་མ་བིགྷྞྃ་ཧ་ར་ཧ་ར། ཙ་ཏུར་མཱ་རཱནྣི་བཱ་ར་ཡ། ནི་བཱ་ར་ཡ། ཏྲཱ་ཤ་ཡ་ཏྲཱ་ཤ་ཡ། བྷྲཱ་མ་ཡ་བྷྲཱ་མ་ཡ། ཙྪིནྡ་ཙྪིནྡ། བྷིནྡྷ་བྷིནྡྷ། ནཱ་ཤ་ཡ་ནཱ་ཤ་ཡ། ཤོ་ཥ་ཡ་ཤོ་ཥ་ཡ། ཙྪེ་ད་ཙྪེ་ད། བྷེ་ད་བྷེ་ད། ཧཱུྃ་ཧཱུྃ་ཕཊ་ཕཊ་སྭཱ་ཧཱ། 
ཕྱི་ནས་སོ་སོའི་ཆ་ཡིས་སྤྱད་པར་བྱ། །ཨོཾ་ཨིནྡྲཱ་ཡ་ན་མཿཧྲཱིཿཡ་མཱ་ཡ་ན་མཿཥྚཱིཿ། བ་རུ་ཎཱ་ཡ་ན་མཿབི། ཀུ་བེ་རཱ་ཡ་ན་མཿ་ཀྲི། ཨཱི་ཤ་རཱ་ཡ་ན་མཿཏཱ། ཨགྣ་ཡེ་ན་མཿ་ཨཱ། ནཻ་རྀ་ཧྱཱ་ཡ་ན་མཿན། བཱ་ཡ་བེ་ན་མཿན། ཙནྡྲཱ་ཡ་
ན་མཿཧཱུྃ། ཨརྐྐཱ་ཡ་ན་མཿཧཱུྃ། བྲཧྨེ་ཎེ་ན་མཿཕཊ། བ་སུྃ་དྷ་རཱ་ན་མཿཕཊ། བེ་མ་ཙི་ཏྲི་ཎེ་ན་མཿསྭཱ། སརྦྦ་བྷཱུ་ཏེ་བྷྱ་ན་མཿཧཱ། ཧི་ཧི་ཧི་ཧཱུྃ་ཧཱུྃ་ཧཱུྂ། །ཕེྂ་ཕེྂ་ཕེྂ། ཕྱི་ནས་མེ་ཏོག་དང་སྤོས་དང་མར་མེ་དང་ཞལ་ཟས་ལ་སོགས་པ་

90-1-176b

ཡང་དབུལ་བར་བྱའོ། །དེ་རྣམས་ཀྱང་སྒྲུབ་པ་པོའི་མངོན་པར་རབ་ཏུ་དད་པས་རོ་བཅུད་ཐམས་ཅད་མྱོང་ཞིང་ལོངས་སྤྱོད་པར་འགྱུར་རོ། །རྡོ་རྗེ་གསོར་ཞིང་དྲིལ་བུ་དལ་གྱིས་འཁྲོལ་བས་གནས་དེ་ལ་བསྟོད་པར་བྱའོ། །གཏི་མུག་
དགའ་མ་ལ་སོགས་པ་རྣམས་ལ་ཕྱི་ནས་མངོན་པར་འདོད་པ་ཞུས་ཏེ་མཆོད་པའི་མཐར་བཞད་པ་སྔགས་རྣམ་པ་བརྒྱད་བརྗོད་པར་བྱ་སྟེ། དེ་ལ་སྔགས་འདིས་གཤེགས་སུ་གསོལ་ལོ། །ཧཱ་ཧཱ་ཧེ་ཧཻ་ཧོ་ཧཽ་ཧཱུྂ་ཧཱུྂ། 
བི་སརཛྫ་ཡེ་ཏ། ཨོཾ་ཨཱཿམུ་ཞེས་པས་ཀྱང་ངོ་། །ཕྱི་ནས་སྒྲུབ་པ་པོའི་མངོན་པར་འདོད་པས། སེམས་ཅན་ཀུན་གྱི་དོན་མཛད་ཕྱིར། །ཇི་ལྟར་རྗེས་འཇུག་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་
ཀྱང་། །སླར་ཡང་འདིར་ནི་བྱོན་པར་ཞུ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་གཏོར་མའི་རིམ་པར་ཕྱེ་བ་སྟེ་བཅུ་གཅིག་པའོ།། །། 
དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་བཅོམ་ལྡན་འདས་རྡོ་རྗེ་སེམས་དཔའ་ཆེན་པོ་ལ་བསྟོད་པ་མཛད་དེ། གཏི་མུག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ཤིན་དུ་འཇིགས། །སྟོན་
པ་སངས་རྒྱས་ཀུན་རང་བཞིན། །རྡོ་རྗེའི་སྐུ་ལ་ཕྱག་འཚལ་བསྟོད། ཕྲ་མ་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ཤིན་དུ་འཇིགས། །རྡོ་རྗེའི་ཐུགས་དང་རབ་མཚུངས་པ། །རིན་ཆེན་རྡོ་རྗེ་ཕྱག་འཚལ་བསྟོད། །འདོད་ཆགས་
རྡོ་རྗེའི་རང་བཞིན་ཁྱོད། །འདོད་ཆགས་ཆོས་ཀྱི་འབྱུང་གནས་གཙོ། །རྡོ་རྗེའི་གསུང་ལ་ཕྱག་འཚལ་བསྟོད། །ཕྲག་དོག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ལས་ཀུན་པ། །རྡོ་རྗེའི་སྐུ་དང་རབ་མཚུངས་པ། །
ཕྱག་ན་རལ་གྲི་ཕྱག་འཚལ་བསྟོད། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་གྱི་རབ་མཆོག་གཙོ། །དཀྱིལ་འཁོར་དབང་ཕྱུག་ཕྱག་འཚལ་བསྟོད། །

90-1-177a

རྡོ་རྗེའི་མིག་དང་རྡོ་རྗེའི་རྣ་བ་དང་རྡོ་རྗེའི་སྣ་དང་རྡོ་རྗེའི་ལྕེ་དང་རྡོ་རྗེའི་ལུས་དང་རྡོ་རྗེའི་ཡིད་ཅེས་བཅོམ་ལྡན་འདས་ཀྱིས་གསུངས་པ་ནི་མིག་ལ་སོགས་པ་བྱིན་གྱིས་བརླབ་པའི་དམ་ཚིག་གོ། དེ་ནས་གཤིན་རྗེ་
གཤེད་འཇིགས་ཀྱི། །དཀྱིལ་འཁོར་བདག་གིས་རབ་བཤད་བྱ། །གཤིན་རྗེ་གཤེད་པོ་དང་མཚུངས་པ། །དོན་རྣམས་ཐམས་ཅད་སྒྲུབ་བྱེད་པ། །སྲད་བུ་གསར་པ་ལེགས་བསྒྲིམས་ཤིང་། །མཛེས་ཤིང་ཚད་དང་ཡང་
དག་ལྡན། །གཤིན་རྗེ་གཤེད་ཀྱི་དཀྱིལ་འཁོར་ལ། །ཤེས་རབ་ཅན་གྱིས་ཐིག་གདབ་བོ། །མཚན་ཉིད་ཐམས་ཅད་ཡོངས་རྫོགས་པ། །དོན་མེད་ཐམས་ཅད་རྣམ་པར་འཇིག །ཞི་བ་ལ་སོགས་རབ་སྒྲུབ་པའི། །མཎ་
ཌལ་དཀྱིལ་འཁོར་རྣམ་པ་ལ། །ལས་ཀྱི་རྡོ་རྗེ་བྲི་བྱ་སྟེ། །དེ་ལ་རྩེ་ལྔ་མཐའ་དག་ལ། །དེ་ཡི་དབུས་སུ་རྡོ་རྗེ་བྲི། །རྡོ་རྗེ་འབར་བས་ཀུན་དུ་འཁྲིགས། །ཤར་གྱི་རྩིབས་ལ་འཁོར་ལོ་བྲི། །འཁོར་ལོའི་འོད་ཟེར་ཀུན་དུ་
འཁྲིགས། །ལྷོ་རུ་རིན་ཆེན་བྲི་བྱ་སྟེ། །འོད་ཟེར་ཕྲེང་བས་ཀུན་དུ་ཁྱབ། །ནུབ་ཏུ་པད་མ་བྲི་བྱ་སྟེ། །པད་མ་རཱ་གའི་འོད་ཟེར་མཛེས། །བྱང་དུ་རལ་གྲི་བྲི་བྱ་སྟེ། །སྤྲིན་གྱི་ཁ་དོག་འོད་ཟེར་མཚུངས། །ཤར་གྱི་
མཚམས་སུ་འཁོར་ལོ་བྲི། །ལྷོ་རུ་རྡོ་རྗེ་བྲི་བར་བྱ། །ནུབ་ཏུ་པད་མ་བྲི་བྱ་སྟེ། །པད་མ་གདོང་བཅས་རྒྱས་པའི་ཞལ། །བྱང་དུ་རལ་གྲི་བྲི་བྱ་སྟེ། །འོད་ཟེར་ལྔ་དང་མཚུངས་པར་ལྡན། །ཤར་གྱི་སྒོ་རུ་ཐོ་བ་སྟེ། །རྡོ་རྗེ་དབྱུག་
པ་ལྷོ་རུའོ། །ནུབ་ཀྱི་སྒོ་རུ་ཆུ་སྐྱེས་ཏེ། །རྡོ་རྗེ་རལ་གྲི་བྱང་དུའོ། །དཀྱིལ་འཁོར་རྫོགས་པར་ཤེས་བྱས་ལ། །ཁྱད་པར་ཅན་གྱིས་མཆོད་བྱ་བ། །འདོད་པའི་ཡོན་ཏན་ལྔ་རྣམས་ཀྱིས། །ཐེ་ཚོམ་མེད་པས་སངས་རྒྱས་
མཆོད། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་དཀྱིལ་འཁོར་ཆེན་པོའི་རིམ་པར་ཕྱེ་བ་སྟེ་བཅུ་གཉིས་པའོ།། །། དེ་ནས་བཅོམ་ལྡན་འདས་དེ་

90-1-177b

བཞིན་གཤེགས་པ་ཐམས་ཅད་ཀྱིས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་རྡོ་རྗེ་འཆང་ཆེན་པོ་ལ་བསྟོད་པའི་རྒྱལ་པོ་འདིས་གསོལ་བ་གདབ་བོ། །ཕྱག་རྒྱ་གསུངས་པས་རབ་སྦྱོར་བ། །གང་གིས་རྡོ་རྗེ་རྣམས་
ལ་བསྟོད། །ཕྱག་རྒྱ་རྡོ་རྗེ་ཕྱག་རྒྱ་ཡིས། །དངོས་གྲུབ་མང་པོ་སྒྲུབ་པར་མཛོད། །དེ་ནས་རྒྱལ་པོ་རྡོ་རྗེ་འཆང་། །ཚིག་འདི་དག་ནི་གསུང་བར་མཛད། །དཀྱིལ་འཁོར་པ་རྣམས་ཐམས་ཅད་ཀྱི། །སྤྱི་བོར་གཤིན་རྗེ་གཤེད་པོ་
བསྒོམ། །རྟག་ཏུ་དཀྱིལ་འཁོར་ཟླུམ་བྱས་ལ། །རྟག་ཏུ་སྦྱིན་སྲེག་མཆོད་པ་དང་། །རྟག་ཏུ་དམ་ཚིག་བསྒྲུབ་བྱ་ཞིང་། །དེ་ཡི་སྡོམ་པ་གཟུང་བར་བྱ། །དང་པོ་ཅོད་པན་དབང་བསྐུར་ཏེ། །གཉིས་པ་རལ་གྲི་སྦྱིན་པར་བྱ། །
གསུམ་པ་རྡོ་རྗེ་དྲིལ་བུ་སྟེ། །བཞི་པ་ཟླ་བའི་བཟའ་བའོ། །དབང་བསྐུར་ཆེན་པོ་བཞི་པ་ནི། །ར་ཀ་ཏ་ཡི་ཞལ་ནས་འབྱུང་། །དབང་བསྐུར་འདི་ཡི་མཐུ་ཡིས་ནི། །བྱང་ཆུབ་རྒྱལ་བའི་རོ་བཅུད་འཐོབ། །དེ་ནས་བདག་གིས་
སྔགས་བཤད་པས། །འབྱུང་པོ་ཀུན་ལ་གཏོར་མ་བྱ། །སྔགས་ཆེན་པོ་ནི་བརྗོད་པ་ཡིས། །འབྱུང་པོ་ཐམས་ཅད་རབ་ཏུ་འབར། །སྔགས་ཀྱི་ས་བོན་ཧྲཱིཿཥྚྲཱིཿསོགས། །མཐར་ནི་སྭཱ་ཧཱ་ངེས་པར་སྦྱར། །བི་ཊ་མ་ཏྲ་ཆུ་
བསྲེས་ཀྱིས། །མཎ་ཌལ་ཟུར་གསུམ་བྱས་ནས་ནི། །ལྷ་རྣམས་མཉེས་བྱ་རྣལ་འབྱོར་པས། །ཧཱ་ཧཱ་ཞེས་སྒྲོགས་སླར་དྲན་བྱ། །འཁོར་ལོ་རིམ་གསུམ་བྱ་བ་ནི། །བརྒྱད་དང་བཅུ་གཉིས་བཅུ་དྲུག་དང་། །མཁས་པས་ཆོ་ག་བཞིན་
དུ་བྲི། །སྔགས་ནི་ཀུན་དུ་དགོད་པར་བྱ། །བརྟུལ་ཞུགས་ཅན་གྱིས་བཅུ་གཉིས་པར། །གྲུབ་པའི་སྔགས་རྣམས་དགོད་པར་བྱ། །ཁམས་གསུམ་གཡོ་དང་མི་གཡོ་བ། །མ་ལུས་ལུས་པ་མེད་པ་འགྲུབ། །ཡ་མ་རཱ་ཛཱ་ས་དོ་མེ་ཡ། 
ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵི་ཡ། ཡ་ཀྵེ་ཡཙྪ་ནི་རཱ་མ་ཡ། ཡ་དབུས་ཀྵེ་ནི་ཤར་དུ་སྟེ། །མ་ཡིག་འཇམ་པའི་རྡོ་རྗེ་ལྷོར། །མེ་ཡིག་ནུབ་ཏུ་བྲི་བར་བྱ། །བྱང་དུ་ད་ནི་དཀར་པོ་སྟེ། །བསྒྲུབ་བྱའི་མིང་ནི་གཟུང་བྱས་ནས། །

90-1-178a

སྟོང་པའི་མཚམས་ལ་དགོད་པར་བྱ། །ཧཱུྃ་གཉིས་དག་གིས་བརྟེན་པར་བྱ། །དགོས་པ་ཐམས་ཅད་སྒྲུབ་པར་བྱེད། །ཡཙྪ་ནིར། ཛཱ་ས་དོ་རུ། ཎ་ཡོ་ནི་ར་ཞེས་པས་ཀྱང་ནི་ཕྱི་རོལ་དུ། །གཡོན་ནས་བརྩམས་ཞིང་ཡང་དག་བྲི། །
དོན་ཀུན་རབ་ཏུ་བསྒྲུབ་པའི་ཕྱིར། །རེའུ་མིག་གསུམ་པའི་མདུན་ནས་ནི། །རེའུ་མིག་ཆ་རེ་སྤངས་པར་ནི། །ཤར་ནས་བརྩམས་ཏེ་བྲི་བར་བྱ། །ཧྲཱིཿཥྚྲཱིཿཞེས་པའི་སྔགས་རྣམས་ཀྱིས། །རེའུ་མིག་བརྒྱད་ཀྱི་བར་བར་དུ། །རེའུ་མིག་
རྣམས་ལ་ཡང་དག་བྲི། །ཆེ་གེ་མོ་ཀུ་རུ་མཱ་ར་ཡ། ཨུད་ཙྩ་ཏྲ་ཡ། བ་ཤྃ་ཀུ་རུ། བི་དྭེ་ཥ་ཡ་ཤཱྃཏིཾ་ཀུ་རུ། པུཥྚིཾ་ཀུ་རུ། ཞེས་པ་ལ་སོགས་པ་ནི་ལས་ཀྱི་རྗེས་སུ་འབྲངས་ཏེ། ཨོཾ་ནི་དང་པོར་ན་མཿམཐར། །མཐར་ནི་བ་ཤྃ་བཽ་ཥ་ཊ། ཧཱུྃ་ཕཊ་ཡི་གེ་
དང་ལྡན་པས། །ཞི་རྒྱས་དབང་དུ་བྱེད་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་དབང་བསྐུར་བ་དང་འཁྲུལ་འཁོར་གྱི་སྣང་བ་ཞེས་བྱ་བའི་རིམ་པར་ཕྱེ་བ་སྟེ་བཅུ་གསུམ་པའོ།། །།
བཅོམ་ལྡན་འདས་ཀྱིས་བརྩེ་བར་མཛད། །གཤིན་རྗེ་གཤེད་ཆེན་ཡང་དག་གཟུགས། །ཞེ་སྡང་གིས་མནན་འགྲོ་ལ་གཟིགས། །ཞེ་སྡང་ཐམས་ཅད་ཟད་པར་མཛད། །བཅོམ་ལྡན་འདས་ཀྱིས་བརྩེ་བར་མཛད། །གཏི་མུག་གཤིན་རྗེ་
གཤེད་མཆོག་གཟུགས། །གཏི་མུག་གིས་མནན་འགྲོ་ལ་གཟིགས། །གཏི་མུག་ཐམས་ཅད་ཟད་པར་མཛད། །བཅོམ་ལྡན་འདས་ཀྱིས་བརྩེ་བར་མཛད། །ཕྲ་མ་གཤིན་རྗེ་གཤེད་མཆོག་གཟུགས། །ཕྲ་མས་མནན་པའི་འགྲོ་ལ་གཟིགས། །
ཕྲ་མ་ཐམས་ཅད་ཟད་པར་མཛད། །བཅོམ་ལྡན་འདས་ཀྱིས་བརྩེ་བར་མཛད། །འདོད་ཆགས་གཤིན་རྗེ་གཤེད་མཆོག་གཟུགས། །འདོད་ཆགས་ཀྱིས་མནན་འགྲོ་ལ་གཟིགས། །འདོད་ཆགས་ཐམས་ཅད་ཟད་པར་མཛད། །བཅོམ་ལྡན་
འདས་ཀྱིས་བརྩེ་བར་མཛད། །ཕྲག་དོག་གཤིན་རྗེ་གཤེད་མཆོག་གཟུགས། །ཕྲག་དོག་གིས་མནན་འགྲོ་ལ་གཟིགས། །ཕྲག་དོག་ཐམས་ཅད་ཟད་པར་མཛད། །བྱམས་པ་ཙར་ཙི་ཀཱར་གསུངས་ཏེ། །ཕག་མོ་དེ་བཞིན་སྙིང་

90-1-178b

རྗེའོ། །དབྱངས་ཅན་དགའ་བར་ཤེས་བྱ་སྟེ། །བཏང་སྙོམས་གཽ་རཱིའི་གཟུགས་སུའོ། །བདག་ཉིད་དངོས་པོ་ཐམས་ཅད་ཀྱིས། །སླར་ཡང་དཀྱིལ་འཁོར་ཡོངས་རྫོགས་པ། །རྣལ་འབྱོར་སྙིང་གའི་ས་བོན་སྤྲོ། །འགྲུབ་འགྱུར་འདི་
ལ་ཐེ་ཚོམ་མེད། །དེ་ནས་སྤྱོད་པའི་མཚན་ཉིད་མཆོག །བདག་གིས་ཡང་དག་བཤད་པར་བྱ། །གཤིན་རྗེ་གཤེད་པོའི་འཇིགས་གཟུགས་ཀྱི། །སྐུ་དང་གསུང་དང་ཐུགས་རྣམས་དག །དགོན་པ་ཆེན་པོའི་ཕྱོགས་རྣམས་ལ། །མ་ཧེ་མཆོག་
ལ་ཞོན་བྱས་ཏེ། །སྦྲུལ་གྱི་རྒྱན་གྱིས་རྣམ་པར་བརྒྱན། །ལྕགས་ཀྱི་རྡོ་རྗེ་བསྒོམ་པར་བྱ། །སྐྲ་ནི་དམར་སེར་གྱེན་དུ་འཁྱིལ། །ཁྱད་དུ་འཕགས་པའི་གཟུགས་ཅན་བྱ། །མགོ་ལ་ཐོད་པས་ཡང་དག་བསྐོར། །སྨ་ར་དམར་སེར་བརྫེས་པ་སྟེ། །ཧྲཱིཿ་ཥྚྲཱིཿ
ལ་སོགས་སྔགས་རྣམས་བརྗོད། །རྡོ་རྗེ་དབྱུག་པ་ཡང་དག་གསོར། །གཤིན་རྗེ་གཤེད་ཀྱི་རྣལ་འབྱོར་པས། །སེང་གེའི་སྒྲ་ནི་བསྒྲགས་པར་བྱ། །ཅུང་ཟད་མཐུ་ནི་ཐོབ་པ་ཡིས། །གྲོང་ཁྱེར་ཞུགས་ཏེ་རོལ་པར་བྱ། །རབ་མཛེས་གར་ནི་བྱ་བ་དང་། །
དྲུག་འགྱུར་ལ་སོགས་གླུ་བླང་ངོ་། །སྲང་དུ་རྒྱལ་མཚན་དེ་བལྟ་ཞིང་། །དེ་ལ་འོ་མ་རབ་ཏུ་བསྒྲུབ། །འོ་མ་ལ་འདྲིས་རྩེ་གཅིག་སེམས། །ཕྱག་རྒྱ་ཆེན་པོ་རབ་བསྒྲུབ་བྱ། །ཕྲག་མོའི་གཟུགས་སུ་བསྒོམ་བྱས་ལ། །འདོད་པའི་མཐའ་ལ་བཙུན་མོ་ཀུན། །
སེང་གེ་བཞིན་དུ་འཇིགས་མེད་པས། །འདོད་དོན་ཀུན་འགྲུབ་རྣལ་འབྱོར་པའི། །དེ་ནས་ཕྱག་རྒྱ་རབ་བསྒྲུབ་པ། །བདག་གིས་ཡང་དག་རབ་བཤད་བྱ། །ཡི་གེ་གཅིག་གི་སྔགས་ཆེན་ཏེ། །དེ་ཡི་བཟླས་པ་ངེས་པར་བཤད། །ཥྚྲཱིཿཡིག་ས་བོན་ལས་
བྱུང་བའི། །མ་ཧེའི་གདོང་པ་རྣམ་པར་བསྒོམ། །རྡོ་རྗེའི་དཀྱིལ་འཁོར་ལ་གནས་པ། །མ་ཧེའི་སྟེང་དུ་བསྒོམ་པར་བྱ། །གང་ཞིག་ས་ལ་གནས་པ་ཡི། །སྣ་ཚོགས་མཚོན་ཆའི་རང་གཟུགས་རྣམས། །བློ་དང་ལྡན་པས་ལག་ན་བསྒོམ། །
མ་ཧེའི་གདོང་ཅན་སྒྲུབ་པའོ། །དེ་ནས་རྡོ་རྗེ་དབྱུག་པ་ཡི། །སྒྲུབ་ཐབས་བདག་གིས་རབ་བཤད་བྱ། །ཡི་གེ་ཧྲཱིཿནི་གསང་སྔགས་ཆེ། །མ་ཧེ་ཆེན་པོ་ལ་ཞོན་པ། །འབུམ་ཕྲག་གཉིས་ནི་རྫོགས་པའི་ཕྱག །ཐལ་བའི་རྡུལ་གྱིས་ལུས་

90-1-179a

ལ་བྱུགས། །རི་རབ་བཞིན་དུ་མཐོ་བ་ལ། །རོ་ལྡན་འོག་དུ་ཡང་དག་གནོན། །དེ་ནས་ཕྱག་ནི་བྱེ་བ་ཡི། །སྒྲུབ་ཐབས་བདག་གིས་རབ་བཤད་བྱ། །ཝི་ཀྲྀ་ཏཱ་ནན་གསང་སྔགས་ཆེ། །ཧཱུྃ་ཡིག་ལས་བྱུང་གཙོ་བོ་སྟེ། །ཨོཾ་ཝི་ཀྲྀ་ཏཱ་ན་ན་ཧྃ་ཧཱ་ཧི་
ཧོཿཧཱུྂ་ཧཱུྃ་ཧེ་ཧེཿཧོཿཧཿསྭཱ་ཧཱ། དགོས་པ་ཐམས་ཅད་རབ་སྒྲུབ་པའི། །དམ་ཚིག་སྒྲུབ་པ་འདིར་བཤད་དོ། །སྔགས་ཀྱིས་དུབ་ལ་ཁ་ཟས་བཟའ། །ཁ་ན་མ་ཐོ་མེད་རྙེད་བླང་། །ཤ་ཆེན་དེ་བཞིན་རྟ་དང་ནི། །དེ་བཞིན་གླང་ཆེན་ཁྱད་པར་ཅན། །
བ་གླང་གཟུགས་དང་ཁྱི་དང་ནི། །བོང་བུ་རྔ་མོ་ལྕེ་སྤྱང་ངོ་། །རམས་དང་བསྲེས་ཤིང་བཙོ་བྱས་ནས། །ཞག་ཆེན་ལུས་ལ་མངོན་པར་བྱུག །འདི་ཡིས་ལུས་ལ་བྱུགས་ཙམ་གྱིས། །འགྲོ་བ་མཐའ་དག་དབང་དུ་བྱེད། །རྣམ་སྣང་སིན་དུ་བཱ་
རཉྩ། །དེ་བཞིན་བིལ་བའི་ལོ་མ་དང་། །སོ་ཕག་ཕྱེ་མ་ལྷན་ཅིག་ཏུ། །གསེར་ཤིང་ལོ་མའི་ཁུ་བའི་རྣམས། །འདི་ཡི་ལུས་ལ་དྲིལ་ཕྱིས་བྱ། །རྡོ་རྗེ་ཆེན་པོའི་བདུད་རྩི་བཞིན། །རང་འབྱུང་མེ་ཏོག་བཏུང་བ་བཞིན། །འདི་ནི་རྣལ་
འབྱོར་རབ་མཆོག་གོ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་སྤྱོད་པའི་དམ་ཚིག་སྒྲུབ་པའི་རིམ་པར་ཕྱེ་བ་སྟེ་བཅུ་བཞི་པའོ།། །། དེ་ནས་བཅོམ་
ལྡན་འདས་སྐྱེས་བུ་ཆེན་པོའི་དམ་ཚིག་ཙར་ཙི་ཀཱའི་རྣམ་པའི་ཏིང་ངེ་འཛིན་ལ་སྙོམས་པར་ཞུགས་པ་དང་། རྡོ་རྗེ་ཕག་མོའི་རྣམ་པའི་ཏིང་ངེ་འཛིན་ལ་སྙོམས་པར་ཞུགས་པ་དང་། དབྱངས་ཅན་མའི་རྣམ་པའི་ཏིང་ངེ་འཛིན་ལ་
སྙོམས་པར་ཞུགས་པ་དང་། གཽ་རཱི་མའི་རྣམ་པའི་ཏིང་ངེ་འཛིན་ལ་སྙོམས་པར་ཞུགས་པ་ལས་མཆོད་པའི་གླུ་འདིས་གསོལ་བ་གདབ་བོ། །ཨེ་མ་གཤིན་རྗེ་གཤེད་དམར་པོ། །བླ་མ་སྲིན་པོའི་རང་བཞིན་ཏེ། །བདག་ནི་ཁྱོད་མཐོང་
བས་འཇིགས་པས། །བླ་མ་ཁྲོ་བོའི་རང་བཞིན་སྤངས། །མཐོ་རིས་ས་སྟེང་ས་འོག་རྣམས། །ཁྱོད་ཀྱི་གར་གྱིས་གཡོ་བར་བྱེད། །ཁྲག་གི་མིག་སྨན་ཁྲོ་བའི་སེམས། །གར་མཛད་ཁྱོད་ནི་རོ་ལངས་གཟུགས། །དམར་ཞིང་ཐུང་

90-1-179b

བའི་ཚད་ལྡན་པ། །རྣམ་པ་མང་པོའི་སྤྲུལ་གཟུགས་བྱེད། །རྡོ་རྗེ་དབྱངས་ཅན་མ་ཡིས་ཞུས། །ཁྱོད་ཀྱི་གར་མཛད་བདེ་བ་ཆེ། །ཁྱོད་ཀྱི་ཧྲཱིཿཥྚྲཱིཿའི་སྔགས་ཀྱི་གར། །ས་གསུམ་པོ་ཡི་འཁྲུལ་བ་སོལ། །བརྩེ་བས་ཁྲོ་བའི་རྗེ་བཙུན་
ཁྱོད། །འགྲོ་ལ་བལྟ་ཞིང་གར་མཛད་དོ། །དེ་ནས་བཟླས་པའི་མཚན་ཉིད་མཆོག །བདག་གིས་ཡང་དག་རབ་བཤད་བྱ། །གང་གིས་བཟླས་པ་རབ་སྦྱོར་བས། །མང་པོ་ཡིས་ནི་དངོས་གྲུབ་འཐོབ། །མྱུར་བ་མ་ཡིན་བུལ་བ་མིན། །རིང་པོ་མ་
ཡིན་ཐུང་བ་མིན། །ཅུང་ཟད་སྔགས་ནི་ཐོས་པར་རོ། །གཤིན་རྗེ་གཤེད་ཀྱི་སློབ་དཔོན་མཆོག །མི་དང་མ་ཧེ་གཉིས་འཐུང་དང་། །བ་གླང་གཟུགས་དང་རྟ་དང་ནི། །བོང་བུ་རྔ་མོའི་རུས་བཟུང་ནས། །བཟླས་པའི་ཕྲེང་བས་རབ་བསྒྲུབ་བྱ། །
ཟླ་བ་ཟླ་བའི་བཅུ་བཞི་ལ། །བདུད་རྩི་ལྔ་དང་ལྡན་པ་ཡི། །ཤ་ལྔ་ཡིས་ནི་བྱུག་པར་བྱ། །བཟླས་པ་ཡིས་ནི་དངོས་གྲུབ་མཆོག །སོ་སོའི་རྐང་པའི་རི་ལུ་ལ། །གཤིན་རྗེ་གཤེད་སྒོམ་རྣལ་འབྱོར་པས། །མཁས་པས་ཡང་ན་མི་
མགོ་ནི། །ཁྲག་འཛག་རློན་པ་བསྒོམ་པར་བྱ། །ཁྲི་ཡི་སྔགས་ཀྱིས་འབྱུང་པོ་རྣམས། །མཁའ་འགྲོ་མ་རྣམས་སྟོང་གིས་ཏེ། །གཤིན་རྗེ་གཤེད་པོ་རབ་སྦྱོར་བས། །ཡི་དགས་རྣམས་ནི་གཞོམ་ཞིང་བསད། །རྣལ་འབྱོར་བདག་ཉིད་
འབུམ་བཟླས་ན། །ལས་ཀུན་དེ་ཡིས་བྱེད་པར་འགྱུར། །བྱེ་བ་བཟླས་ན་དངོས་གྲུབ་སྟེ། །བྱེ་བ་ལྔ་ཡིས་སྨོས་ཅི་དགོས། །ཉི་མ་སོ་སོའམ་ཡང་ན་ཟླ། །ཡང་ན་ལོ་ནི་སོ་སོ་ལ། །མཁས་པས་དབྱུག་གུ་དྲུག་བཅུ་བཞིའི། །གཏོར་མ་དྲུག་ཅུ་རྩ་
བཞི་སྦྱིན། །འགའ་ཞིག་རྟག་ཏུ་བཟའ་བ་དང་། །འགའ་ཞིག་དེ་བཞིན་བཏུང་བ་དང་། །གཞན་ཡང་བཟའ་བ་ཐམས་ཅད་ཀྱི། །དང་པོ་གཤིན་རྗེ་གཤེད་ལ་དབུལ། །དེ་ནས་བླ་མར་ཡོན་གྱི་མཆོག །དབུལ་བར་བྱ་བ་དག་བཤད་བྱ། །
བདག་ཉིད་ཞི་བའི་ཕྱིར་དང་ནི། །དེ་བཞིན་ལས་ཀུན་སྒྲུབ་པའི་ཕྱིར། །བདག་གི་ལུས་དབུལ་ངེས་པར་འདུད། །རྟ་དང་བ་གླང་གླང་པོ་དང་། །གསེར་དང་ནོར་དང་མ་མ་དང་། །རང་གི་ཆུང་མ་དེ་བཞིན་བུ། །མ་དང་སྲིང་མོ་ཚ་མོ་དང་། །

90-1-180a

གོས་ནི་རྣམ་པ་སྣ་ཚོགས་དང་། །གདུགས་དང་མཛེས་པའི་རྔ་ཡབ་དང་། །ཁྱིམ་དང་ཁྲི་དང་དྲི་བཟངས་དང་། །གླུ་དང་དེ་བཞིན་རོལ་མོ་དང་། །རལ་གྲི་རྒྱན་རྣམས་དེ་བཞིན་དུ། །བརྟུལ་ཞུགས་ཅན་གྱིས་བླ་མར་དབུལ། །དེ་བཞིན་
གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་ཐབས་ཐམས་ཅད་སྒྲུབ་པའི་རིམ་པར་ཕྱེ་བ་སྟེ་བཅྭ་ལྔ་པའོ།། །། དེ་ནས་སེམས་ཅན་ཐམས་ཅད་ཀྱི་བདུད་དང་འདོད་ཆགས་ལ་སོགས་པའི་
ཉོན་མོངས་པ་གཅོད་ཅིང་གཞོམ་པའི་དོན་གྱི་ཕྱིར་སྐུ་མདོག་དམར་པོའོ། །སྤྱན་གསུམ་ནི་འདས་པ་དང་མ་འོངས་པ་དང་ད་ལྟར་གྱི་དུས་གསུམ་མོ། །ཕྱག་གཉིས་ནི་དངོས་པོ་དང་དངོས་པོ་མེད་པའི་རྣམ་པར་རྟོག་པ་རྣམས་འཇོམས་པའོ། །ཤེས་
རབ་མ་ལ་འཁྱུད་པ་ནི་སྟོང་པ་ཉིད་དང་སྙིང་རྗེ་ཐ་མི་དད་པར་སྦྱོར་བའོ། །ཀླུ་བརྒྱད་ནི་རྣམ་པར་ཤེས་པ་བརྒྱད་དུ་གསུངས་སོ། །མགོ་བོའི་བརྒྱ་ཕྱེད་ཕྲེང་བ་ནི་ཡི་གེ་ལྔ་བཅུ་སྦྱོར་བའོ། །གཡོན་ན་ཐོད་པ་ནི་ཡེ་ཤེས་ལྔའི་བདུད་རྩིའི་བཅུད་ཀྱིས་
ཡོངས་སུ་གང་ཞིང་སྟོང་པ་ཉིད་ཀྱི་རང་བཞིན་ནོ། །གཡས་ན་དབྱུག་པ་ནི་ཕུང་པོ་དང་ཉོན་མོངས་པ་དང་ལྷའི་བུ་དང་འཆི་བའི་བདུད་རྣམས་འཇོམས་ཤིང་སྙིང་རྗེའི་རང་བཞིན་ནོ། །ཞབས་གཡོན་བརྐྱང་བ་ནི་ཁམས་གསུམ་དུ་བཤད་དོ། །ལྷ་མོའི་
ཕྱག་གཡོན་ན་ཐོད་པ་བདུད་བཞིའི་ཁྲག་དཔག་ཏུ་མེད་པ་དངུལ་ཆུ་དང་བཅུད་ལེན་དང་རོ་བཅུད་དོ། །གཡས་ན་དངོས་པོ་དང་དངོས་པོ་མེད་པའི་རྣམ་པར་རྟོག་པ་གཅོད་པའི་གྲི་གུག་གོ། ཁྲོ་བོའི་གཟུགས་ཕྱལ་རྒྱས་པ་ནི་གདུག་པ་ཅན་རྣམས་
འདུལ་བའོ། །སྐྲ་དམར་སེར་གྱེན་དུ་བརྫེས་པ་ནི་སྤྲུལ་པ་དཔག་ཏུ་མེད་པའི་ཕྱིར་རོ། །གྲུ་བཞི་ནི་སྡུག་བསྔལ་དང་ཀུན་འབྱུང་དང་འགོག་པ་དང་ལམ་གྱི་བདེན་པར་བཤད་དོ། །སྒོ་བཞི་ནི་བདུད་བཞི་སྐྲག་པར་བྱེད་པའོ། །ཟུར་བཞི་ནི་ཚངས་པའི་
གནས་བཞི་རབ་ཏུ་རྫོགས་པའི་ཕྱིར་རོ། །ཀ་བ་བརྒྱད་ནི་སྒྱུ་མའི་དཔེ་བརྒྱད་ཀྱི་ཕྱིར་ཏེ། སྤྲུལ་པའི་གྲོང་ཁྱེར་དང་སྒྲ་བརྙན་དང་སྒྱུ་མ་དང་སྤྲིན་དང་རི་དགས་སྲེད་དང་མེ་ལོང་དང་གཟུགས་བརྙན་དང་ཆུ་ཟླའོ། །ནམ་མཁའ་ནི་དངོས་པོ་

90-1-180b

དང་དངོས་པོ་མེད་པའི་ཉོན་མོངས་པ་འཇོམས་པའི་ཕྱིར་རོ། །ཡང་དག་པར་སྤོང་བ་ནི་དྲ་བ་དྲ་ཕྱེད་དོ། །རྟ་བབས་བཞི་ནི་སྦྱིན་པ་དང་སྙན་པར་སྨྲ་བ་དང་དོན་སྤྱོད་པ་དང་དོན་འཐུན་པ་བཞིའི་རྣམ་པར་དག་པའོ། །དེ་ནས་རྡོ་རྗེ་མཁའ་འགྲོ་མའི། །
སྒྲུབ་ཐབས་བདག་གིས་རབ་བཤད་བྱ། །ནམ་མཁའི་ཁམས་ཀྱི་དབུས་སོང་ནས། །ཉི་མའི་དཀྱིལ་འཁོར་མཆོག་བསམས་ཏེ། །རྩེ་ལྔ་པ་ནི་རྣམ་པར་བསྒོམ། །དེ་ཡི་སྟེང་དུ་པད་མ་དགོད། །འདི་མདོག་ནག་ལ་འཇིགས་ཆེན་མོ། །
ཕྱག་དྲུག་མཛེས་པའི་གཟུགས་ལྡན་མ། །ཕྱག་ན་རྡོ་རྗེ་རྣམ་པར་བསྒོམ། །ལྷག་མའི་ཕྱག་ཏུ་གཞན་དགོད་དོ། །ཤར་དུ་སངས་རྒྱས་མཁའ་འགྲོ་མ། །ཕྱག་དྲུག་གཏི་མུག་དང་མཚུངས་པ། །ཕྱག་ན་འཁོར་ལོ་འཇིགས་ཆེན་མོ། །
རྣལ་འབྱོར་དཀྱིལ་འཁོར་ལ་བསྒོམ་བྱ། །ལྷོ་རུ་རིན་ཆེན་མཁའ་འགྲོ་མ། །ཕྲ་མ་དང་མཚུངས་ཕྱག་དྲུག་མ། །ཕྱག་ན་རིན་ཆེན་འཇིགས་ཆེན་མོ། །ཉི་མའི་དཀྱིལ་འཁོར་ལ་བསྒོམ་བྱ། །ནུབ་ཏུ་ཆོས་ཀྱི་མཁའ་འགྲོ་མ། །ཕྱག་དྲུག་པད་
མ་འཛིན་པ་མོ། །བྱང་ན་ལས་ཀྱི་མཁའ་འགྲོ་མ། །སྙིང་པོའི་དཀྱིལ་འཁོར་རལ་གྲི་མ། །མེ་ལ་སོགས་པའི་མཚམས་བཞི་ལ། །བརྟུལ་ཞུགས་ཅན་གྱིས་ལྷ་མོ་བསྒོམ། །དྲི་མ་དེ་བཞིན་གར་མ་དང་། །གླུ་མ་སྒེག་མོ་ཁྱད་པར་ཅན། །དེ་ནས་
སྒོ་སྐྱོང་བསྒོམ་པར་བྱ། །ཆོ་ག་བཞིན་དུ་ལས་རྣམས་བལྟ། །ཐོ་བ་དབྱུག་པ་པད་རལ་གྲི། །ཨོཾ་བུདྡྷ་ཌཱ་ཀི་ནཱི། ཨོཾ་བཛྲ་ཌཱ་ཀི་ནཱི། ཨོཾ་དྷརྨྨཱ་ཌཱ་ཀི་ནཱི། ཨོཾ་རཏྣ་ཌཱ་ཀི་ནཱི། ལཱྃ་མཱྃ་ནཱྃ་གཱྃ་མཚམས་སུའོ། །ཨོཾ་མུང་ག་ར་ཛཿཨོཾ་དཎ་ཌ་ཧཱུྃ། ཨོཾ་པད་
མ་བྃ། ཨོཾ་ཁ་ཌ་ག་ཧོ། ཞེས་པ་ནི་བཅོམ་ལྡན་འདས་རྡོ་རྗེ་ཅན་གྱིས་རྡོ་རྗེ་མཁའ་འགྲོ་མའི་སྒྲུབ་ཐབས་གསུངས་པའོ། །རིང་པོར་ནས་ཐོས་པ་བསྒྲུབ་པའི་ཕྱིར་རྡོ་རྗེ་མཁའ་འགྲོ་མ་བསྒོམ་པར་བྱའོ། །དེའི་སྔགས་ཀྱི་ཚིག་རྣམས་ནི་འདི་
ཡིན་ཏེ། ཨོཾ་ཨཱ་ཀཱ་ཤ་ཙ་ར་བཛྲ་ཌཱ་ཀི་ནཱི་སྭཱ་ཧཱ། དེ་ནས་གཞན་ཡང་རྡོ་རྗེ་ས་འོག་གི། །སྒྲུབ་ཐབས་བདག་གིས་རབ་བཤད་བྱ། །ས་འོག་བུ་ག་བསྒྲུབ་པའི་ཕྱིར། །གནོད་མཛེས་རྡོ་རྗེ་བསྒོམ་པར་བྱ། །ཕྱག་དྲུག་ཁ་དོག་སྔོན་པོ་ལ། །

90-1-181a

ཕྱག་ན་གཏུན་ཤིང་འཛིན་པར་བྱེད། །སྙིང་པོའི་དཀྱིལ་འཁོར་དབུས་སུ་ནི། །འདི་ནི་རབ་ཏུ་སྤྱོད་པར་བྱེད། །ཤར་ལ་སྤྱན་མ་དགོད་བྱ་སྟེ། །ལྷོ་རུ་དེ་བཞིན་མཱ་མ་ཀཱི། །ནུབ་ཏུ་ལྷ་མོ་གོས་དཀར་མོ། །བྱང་དུ་སྒྲོལ་མ་དགོད་པར་
བྱ། །མེ་ཏོག་སྤོས་དང་མར་མེ་དང་། །དྲི་རྣམས་མེ་སོགས་རྣམས་ལ་དགོད། །སྒོ་ལ་ཐོ་བ་ལ་སོགས་ཏེ། །སྦྲུལ་གྱི་རྒྱན་གྱིས་སྐེ་རགས་བྱས། །དེ་བཞིན་འཁོར་ལོ་བསྒོམ་བྱ་ཞིང་། །ཆོ་ག་བལྟ་བས་ལས་རྣམས་སོ། །རྡོ་རྗེ་ས་འོག་སྦྱོར་ལྡན་
པས། །རྨི་ལམ་དུ་ནི་བུ་ག་ཤེས། །དེ་ནས་རྒྱལ་པོ་བདུན་གྱི་ནི། །དཀྱིལ་འཁོར་བདག་གིས་རབ་བཤད་བྱ། །མཁའ་སྤྱོད་རབ་ཏུ་བསྒྲུབ་བྱའི་ཕྱིར། །རྟ་མཆོག་རབ་ཏུ་བསྒྲུབ་པར་བྱ། །ཞལ་གཅིག་པ་དང་ཕྱག་གཉིས་པ། །སྐུ་མདོག་
སྔོན་པོ་འཇིགས་པར་བྱེད། །ཉི་མའི་སྟེང་དུ་གནས་པ་སྟེ། །ཤིན་དུ་འཇིགས་བྱེད་རྟ་ཡི་གདོང་། །གཡས་ན་སྣན་གྲེའི་ཁུ་ཚུར་ཏེ། །ཕྱག་དྲུག་གཡོན་ན་ཐོད་པའོ། །ཨོཾ་ཕུ་ཕུ་ཧཱི་ཧཱི། །ཤེས་རབ་ཅན་གྱིས་སྔགས་འདི་བཟླ། །རྟ་མཆོག་རབ་
ཏུ་བསྒྲུབ་པའི་ཕྱིར། །ཤར་ལ་བཏབའི་བསྒོམ་བྱ། །ལྷོ་ཕྱོགས་སུ་ནི་མྱུར་འགྲོ་མ། །ནུབ་ཏུ་བདུན་པའི་རྒྱལ་མོ་སྟེ། །རྟ་མཆོག་མ་ནི་བྱང་དུ་དགོད། །བདག་པོའི་ཞལ་དང་ཕྱག་བཞིན་དུ། །ཐམས་ཅད་དེ་བཞིན་མཚུངས་པར་བསྒོམ། །སྔགས་
འདིས་ཐམས་ཅད་མཚུངས་པ་དང་། །སྤྲོ་བ་རུ་ནི་རབ་ཏུ་གྲགས། །གླིང་བུ་པི་ཝང་རྔ་ཟླུམ་དང་། །རྔ་བྲན་རྣམས་ཀྱང་ཟུར་ལ་དགོད། །བ་གླང་སྣ་དང་གླང་ཆེན་སྣ། །དེ་བཞིན་བཞིན་བཟང་བཞིན་ངན་མ། །གཏུན་ཤིང་དང་ནི་སྟ་རེ་དང་། །ལྕགས་ཀྱུ་
དང་ནི་ཞགས་པའོ། །གར་ལ་སོགས་པའི་རྣལ་འབྱོར་གྱིས། །སྒོ་བཞི་ལ་ནི་རྟག་ཏུ་བསྒོམ། །ནས་ལྗང་སྙེ་མ་དང་བཅས་བསམ། །རང་གི་རྟགས་རྣམས་དེ་བཞིན་གཡས། །ཇི་ལྟར་རྟ་མཆོག་གི་ནི་སྔགས། །རྡོ་རྗེ་ས་འོག་གི་ཡང་ངོ་། །
རྟ་མཆོག་བསྒོམ་པའི་སྦྱོར་བ་ལས། །ཁམས་གསུམ་མཁའ་ལ་རྒྱུ་བར་བྱེད། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་དངོས་གྲུབ་ངེས་པའི་རིམ་པར་ཕྱེ་བ་སྟེ་བཅུ་དྲུག་པའོ།། །།

90-1-181b

 དེ་ལ་འདིར་ཐིག་གདབ་པའི། །དམ་ཚིག་མཆོག་ནི། ཨ་ཀཱ་རོ་མུ་ཁྃ་སརྦ་དྷརྨྨཱ་ཎཱྂ་མཱ་དྱཱ་ནུཏ་པན་ན་ཏྭཱཏ། དཔལ་ལྡན་གཤིན་རྗེ་མཐར་བྱེད་གཟུགས། །སློབ་མ་རྣམ་པར་སྣང་མཛད་བྱ། །ཡེ་ཤེས་ཐིག་མཆོག་རྩེ་དག་གཟུང་། །མཉམ་གཞག་
ནས་ནི་ལེགས་པར་གདབ། །དེ་ལ་འདི་ནི་དཀྱིལ་འཁོར་ཆེན་པོར་རབ་ཏུ་འཇུག་པའི་དམ་ཚིག་གོ། ཨོཾ་ཨཱཿཧཱུཾ། དཀྱིལ་འཁོར་ཉིས་འགྱུར་རིང་བ་ལ། །སྒོ་ཡི་ཉི་ཤུ་ཆ་ཡིས་སྦོམ། །བ་ཡི་རྣམ་ལྔས་ལེགས་པར་བྱུག །སྐུད་པ་གཉིས་
སུ་མེད་པར་བརྟག །དེ་ལ་འདི་ནི་རྡོ་རྗེ་ཆེན་པོར་རབ་ཏུ་འཇུག་པའི་དམ་ཚིག་སྟེ། ཀྱེ་མ་སངས་རྒྱས་སློབ་དཔོན་ཆེ། །ཀྱེ་མ་ཆོས་དང་ཚོགས་ཀྱི་གཙོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་བྱིན། །དེ་ལ་འདི་ནི་
ས་ཆེན་པོ་ཡོངས་སུ་གཟུང་བའི་དམ་ཚིག་གོ། རྡོ་རྗེ་ས་ཡི་ལྷ་མོ་སྤྱན་དྲངས་ལ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །སྒོ་ནི་དཀྱིལ་འཁོར་
བརྒྱད་ཆ་རུ། །བདག་ཉིད་ཆེན་པོས་ཤེས་བྱ་སྟེ། །ཁམས་ཆེན་པོ་ནི་མ་གཏོགས་པའི། །ཚད་ལྡན་ཤིན་ཏུ་མཛེས་པའོ། །སྒོ་དང་སྒོ་ཁྱུད་དེས་ཤེས་བྱ། །དེ་ཡི་ཕྱེད་ཀྱིས་སྣམ་བུ་སྟེ། །གླུ་མ་རྔ་མ་གར་མ་སོགས། །རྡོ་རྗེའི་ལྷ་མོ་ཡང་
དག་ལྡན། །དེ་ཡི་ཕྱེད་ཀྱིས་རྡུལ་ཚོན་ས། །སྒོ་ཡི་ཕྱེད་ཀྱིས་འགྲམ་དང་ལོགས། །འདིར་ཡང་དྲ་བ་དྲ་ཕྱེད་དང་། །ཉི་མ་ཟླ་བ་མེ་ཏོག་ཕྲེང་། །ལྷ་ཡི་སྣམ་བུ་དང་པོའི་ཚད། །དེ་བཞིན་ཕྱི་ཡི་དཀྱིལ་འཁོར་རོ། །དེ་ལ་སྙིང་པོ་ཆེན་པོ་འདི། །
བདག་གིས་འཁོར་ལོ་ནམ་མཁར་དགོད། །རང་གི་ཕྱག་རྒྱའང་དེ་རུ་བརྟེན། །དམ་ཚིག་ཡེ་ཤེས་གཞུག་བྱས་ནས། །དཀྱིལ་འཁོར་རབ་ཏུ་བསྒྲུབ་པར་བྱ། །ཤར་དུ་དཀར་པོ་ཆེན་པོ་སྟེ། །ལྷོ་རུ་སེར་པོ་དང་ལྡན་པ། །དམར་པོ་ནུབ་ཀྱི་ཆ་ལ་སྟེ། །
བྱང་དུ་མ་ར་ཀ་ཏ་ལྡན། །ཨིནྡྲ་ནཱི་ལའི་འོད་མཚུངས་པ། །དབུས་ཀྱི་ས་གཞིར་ཡང་དག་བྲི། །ལས་ཀྱི་ཆོ་ག་མཐོང་བ་ཡིས། །དེ་ཡི་ཕྱག་རྒྱ་དགོད་པར་བྱ། །དབུས་སུ་རྡོ་རྗེ་ཡང་དག་བྲི། །ཤར་ལ་འཁོར་ལོ་ལེགས་པར་བྲི། །དེ་ལྟ་བུ་ལ་སོགས་

90-1-182a

པར་བལྟ། །ཕྱག་རྒྱ་རྟག་ཏུ་ནམ་མཁའ་མཚུངས། །དེ་ལ་བླུགས་གཟར་དགང་གཟར་ཚད། །འདི་ཡི་ཚད་ཀྱིས་ཡུ་བ་བྱ། །ཁྲུ་གང་ཚད་དང་ལྡན་པ་ལ། །དེ་ཡི་རྩེ་མོར་དཀྱིལ་འཁོར་བྱ། །སོར་མོ་བཞི་ཡི་ཚད་ལྡན་ལ། །གཏིང་དུ་
སོར་གཉིས་ཟབ་པ་ལ། །དེ་ལ་སོར་ཕྱེད་བཅུད་ཁུང་དུ། །བླུགས་གཟར་པད་མའི་རྣམ་པ་བཞིན། །མཐེ་བོའི་ལྟོ་གང་ཚད་ལ་ནི། །གཏིང་དུ་སོར་མོའི་ཚད་ལྡན་ནོ། །རྒྱུད་འདི་ལ་ནི་རབ་ཏུ་བསྔགས། །དཀྱིལ་འཁོར་དུ་ནི་མ་ཞུགས་ཤིང་། །མཚམས་
མེད་ལྔ་ནི་བྱས་པ་དང་། །གང་གིས་སྲོག་ཆགས་གསོད་པ་དང་། །ཉ་དང་ཤ་སོགས་ཟ་བ་དང་། །ཆང་དང་འདོད་མ་ལ་ཆགས་དང་། །ཆད་ལྟའི་བརྟུལ་ཞུགས་འཛིན་པ་དང་། །མངོན་པར་དབང་ནི་མ་བསྐུར་དང་། །བྱ་བ་མ་ཡིན་བྱེད་སྤྲོ་དང་། །གྲོང་ཁྱེར་
དབྱེན་བྱེད་བས་ཀྱང་ནི། །དམར་པོའི་གསུང་ནི་ཇི་ལྟ་བར། །གཤིན་རྗེ་གཤེད་རྒྱུད་མཆོག་ལ་གཞོལ། །འགྲུབ་འགྱུར་འདི་ལ་ཐེ་ཚོམ་མེད། །དེ་ནས་བྱམས་པ་ལ་སོགས་པའི་རྡོ་རྗེའི་བྱང་ཆུབ་སེམས་དཔའ་ཀུན་གྱིས་རྡོ་རྗེ་ཆེན་པོའི་སྔོན་མེད་པའི་
གསུང་ཐོས་པས་ཅང་མི་སྨྲ་བར་གྱུར་ཏོ། །དེ་ལ་འདི་ནི་རྡོ་རྗེ་དབབ་པའི་དམ་ཚིག་སྟེ། དེ་ཡང་འབྱུང་བའི་ས་བོན་ཆེ། །འཁོར་ལོ་བཞི་པོ་རབ་བསྒྲུབ་བྱ། །གནས་བཞིར་རབ་ཏུ་སྦྱོང་བ་ཡིས། །ནམ་མཁའ་ཡང་ནི་གཡོ་བར་བྱེད། །རྐང་པ་
དག་གི་འོག་ཏུ་ཡྃ། །ལྟེ་བར་རྃ་སྟེ་སྙིང་གར་ལྃ། །མགོ་བོ་ལ་ནི་བྃ་ཡིག་གོ། གཞུ་ཡི་རྣམ་པ་ནག་པོ་ཆེ། །གཏུམ་པོའི་རླུང་ནི་འཇིགས་བྱེད་པ། །བསྲེག་བྱེད་ཟུར་གསུམ་མེ་བཞིན་འབར། །ཉི་མ་དམར་པོའི་འོད་དང་མཚུངས། །རྡོ་རྗེའི་
ས་གཞིའི་རིམ་པ་ནི། །སེར་པོ་ཆེན་པོ་གྲུ་བཞི་པ། །རི་རབ་རི་ཡིས་མནན་པ་ཡི། །ནོར་འཛིན་དེ་ནི་བསྒོམ་པར་བྱ། །དཀར་པོ་ཟླུམ་པོ་བུམ་པ་བཞིན། །སྤྲིན་བཞིན་དུ་ནི་ཆར་པ་འཛིན། །སྟོང་གིས་རབ་ཏུ་གང་བ་ཡི། །གངས་ཀྱི་རི་བོ་ལྟ་
བུར་བསིལ། །གནས་བཞི་རབ་ཏུ་སྦྱོར་བ་ཡིས། །སློབ་མ་རྡོ་རྗེ་ཅན་ལ་བསྒོམ། །རྡོ་རྗེ་སྣང་བ་མཐའ་ཡས་སྦྱོར། །མྱུར་བ་ཉིད་དུ་འབེབས་པར་བྱེད། །དེ་ལ་འདི་ནི་དྲི་བའི་དམ་ཚིག་གོ། རྡོ་རྗེ་ཆོས་ནི་མགོན་ཆེན་པོ། །སྣང་བ་མཐའ་ཡས་

90-1-182b

བདེ་བ་ཆེ། །གསུངས་ཤིག་འདོད་ཆགས་ཆོས་ཆེན་པོ། །དགེ་དང་མི་དགེ་ལེགས་པར་འདྲི། །ཁྲུ་གང་ནས་ནི་གཟུང་ནས་ནི། །ཇི་སྲིད་ཁྲུ་ནི་སྟོང་གི་བར། །སློབ་མ་ཆེན་པོ་འཕར་བར་འགྱུར། །འདི་ནི་དབབ་པའི་དམ་ཚིག་གོ། རི་མོ་བྲི་
བའི་མཚན་ཉིད་རྣམས། །བདག་གིས་ཡང་དག་བཤད་པར་བྱ། །ས་ནི་སྣུམ་པ་བླངས་བྱས་ལ། །བརྟུལ་ཞུགས་ཅན་གྱིས་མནན་པར་བྱ། །སྲན་གྲེ་དེ་བཞིན་འོ་མ་ཤ ། བུ་རམ་བསེ་ཡབ་ལ་སོགས་པ། །ཏིལ་དང་ནིམ་པའི་ལོ་མ་དང་། །
དེ་བཞིན་ནཱ་ཊཱིའི་ས་བོན་ནོ། །དང་པོ་དཀར་པོ་བྲི་བར་བྱ། །དེ་ལ་ཁ་དོག་གཞན་གྱིས་བྲི། །ཐོད་ལོ་ཀོར་དང་བཙག་དག་ལ། །ཆུ་ཡིས་སྦྱར་བས་རྒྱ་སྐྱེགས་བཞིན། །ཡུང་བ་དང་ནི་རམས་དག་ལས། །དེ་བཞིན་ཁ་དོག་ལྗང་གུར་འགྱུར། །
སྔོན་པོ་རྟག་ཏུ་རམས་ཀྱིས་སོ། །དེ་བཞིན་མེ་དྲག་ནག་པོ་སྟེ། །སྐྱ་བོ་དེ་བཞིན་བབ་བླ་ཡིས། །དེ་བཞིན་དམར་པོ་མཚལ་གྱིས་སོ། །ཀ་པེད་ཁུ་བ་དེ་ལ་སྦྱིན། །ཆུང་ངུས་མ་ཡིན་ལྷག་དེ་བཞིན། །ལྷག་པས་ནག་པོ་དམན་པ་ཡིས། །སྐྱ་བོ་
རུ་ནི་འགྲོ་བར་བྱེད། །ཁྲོ་དང་ཞི་བ་རྣམ་གཉིས་ཀྱི། །གཟུགས་ཀྱི་མཚན་ཉིད་བཤད་པར་བྱ། །ཞི་བ་སྒེག་པོར་གསུངས་པ་སྟེ། །ཁྲོ་བོ་སྦོམ་ལ་ཐུང་བར་ཐོས། །སོར་མོ་བཞི་ཡི་ཚད་ཀྱིས་ནི། །དཔྲལ་བ་དེ་བཞིན་ཁ་ལའོ། །མགྲིན་པ་དེ་
བཞིན་འགྲམ་པ་དང་། །གསང་གནས་ལ་ནི་སོར་བཞིའི་ཚད། །སོར་མོ་ཉི་ཤུ་བཞི་ཡིས་ལག །སོར་མོ་ཉི་ཤུ་བར་ལྷུའོ། །ལག་པ་རྐང་པ་དེ་བཞིན་གདོང་། །མིག་ལ་མཐེ་བོའི་ཚད་ཡིན་ཏེ། །རྣ་བ་ལ་ནི་སོར་གཉིས་
གསུངས། །སྒོང་ངའི་སྦུབས་ལ་དེ་བཞིན་བཞི། །མཆུ་གཉིས་དག་ལ་སོར་གཉིས་སོ། །ལྟེ་བའི་ཟབས་སུ་སོར་མོ་སྟེ། །མགྲིན་པ་མ་གཏོགས་ལུས་ལ་ནི། །གདོང་གི་སུམ་འགྱུར་དག་ཏུ་འདོད། །རལ་པ་རྣམས་ནི་གདོང་གི་ཚད། །རིན་ཆེན་
དབུ་རྒྱན་སོར་མོ་དྲུག །དེ་ནས་འཕགས་མ་སོར་མོ་ཡི། །སྒྲུབ་ཐབས་བདག་གིས་རབ་བཤད་བྱ། །གང་གིས་བསྒོམ་པ་ཙམ་གྱིས་ནི། །ཆུ་ཡི་སྟེང་དུ་འཆགས་པར་བྱེད། །སེར་མོ་ཞལ་གསུམ་ཕྱག་དྲུག་པ། །ཕུ་ཡིག་ས་བོན་ལས་བྱུང་བ། །

90-1-183a

ཕྱག་ན་སྦྲུལ་དང་གཟུགས་ཆེན་མོ། །རྨ་བྱ་ལ་ནི་ཞོན་པར་དགྱེས། །ཤར་ལ་རྨ་བྱ་མ་དགོད་དོ། །ལྷོ་རུ་དེ་བཞིན་ཁྲོ་གཉེར་ཅན། །ནུབ་ཏུ་རི་ཁྲོད་ལོ་མ་ཅན། །བྱང་དུ་རྡོ་རྗེ་ལྕགས་སྒྲོག་མ། །རྨ་བྱའི་སྒྲོ་དང་སྤྱི་བླུགས་དང་། །ཡལ་ག་དེ་
བཞིན་ལྕགས་སྒྲོག་སྟེ། །དེ་རྣམས་རྣམ་པར་བསྒོམ་པར་བྱ། །སེར་པོ་དམར་པོ་ལྗང་ཁུ་དང་། །ཁ་དོག་སྔོན་པོའི་དབྱེ་བ་ཉིད། །ཤེས་རབ་ཅན་གྱིས་དེ་བཞིན་བསྒོམ། །དེ་བཞིན་དུ་ནི་སྔགས་འདི་བཟླས། །ཨོཾ་ཕུ་ཛཿར། ཐོ་བ་ལ་སོགས་
སྒོ་ལ་དགོད། །མེ་ཏོག་ལ་སོགས་མཚམས་སུའོ། །ཨཱརྱ་ཛྃ་གུ་ལིའི་སྦྱོར་ལྡན་པས། །ཆུ་ཡི་སྟེང་དུ་རྟག་ཏུ་འགྲོ། །དེ་ནས་ཀུ་རུ་ཀུལླེ་ཡི། །སྒྲུབ་ཐབས་བདག་གིས་རབ་བཤད་བྱ། །གང་གིས་བསྒོམས་པ་ཙམ་གྱིས་ནི། །ཀླུ་ཡི་བུ་མོ་འགུགས་
པར་བྱེད། །ཁ་དོག་དམར་པོ་ཞལ་བཞི་པ། །ཕྱག་བརྒྱད་དང་ནི་ཡང་དག་ལྡན། །ཧྲཱིཿཡིག་ས་བོན་ལས་བྱུང་བ། །ཀླུ་རྣམས་འགུགས་པར་བྱེད་པའོ། །མཐའ་ཡས་ལ་སོགས་ཀླུ་རིག་བརྒྱད། །ཕྱག་བརྒྱད་དུ་ནི་དགོད་པར་བྱ། །སྦྲུལ་གྱི་རྒྱན་གྱིས་སྐུ་ལ་
བརྒྱན། །བརྟུལ་ཞུགས་ཅན་གྱིས་མཛེས་མ་བསྒོམ། །སྔགས་ནི་ཀུ་རུ་ཀུལླེ་ཧྲཱིཿཕུཿསྭཱ་ཧཱ། །དེ་ནས་རྒྱས་མིན་མདོར་བསྡུས་པས། །གསང་བ་པ་ནི་བཤད་པར་བྱ། །གང་གིས་ཤེས་པ་ཙམ་གྱིས་ནི། །ལྷ་ཡི་བུ་མོ་འགུགས་པར་བྱེད། །ཞལ་གཅིག་མ་
དང་ཕྱག་གཉིས་མ། །ཕྱག་ན་མདའ་དང་གཞུ་བསྣམས་པ། །ལུས་ནི་སེར་པོ་ཆེན་པོ་ཡི། །ལུས་མེད་རྣམ་པར་བསྒོམ་པར་བྱ། །ཤར་དུ་དགའ་མ་བསྒོམ་པར་བྱ། །མྱོས་བྱེད་མཛེས་མ་ལྷོ་རུ་བསྒོམ། །ནུབ་ཏུ་འདོད་པའི་ལྷ་མོ་སྟེ། །བྱང་དུ་མྱོས་
པར་སྤྲོ་མའོ། །འདོད་པའི་ལྷ་མོ་ཐམས་ཅད་ཀྱི། །ལག་ན་མདའ་དང་གཞུ་བསྒོམ་མོ། །སེར་དང་དམར་དང་དེ་བཞིན་ལྗང་། །དཀར་དམར་ཉིད་རྣམས་བསྒོམ་པར་བྱ། །མཚམས་སུ་རྟག་ཏུ་རྒོད་མ་དང་། །མ་འགགས་མ་དང་དབང་བྱེད་མ། །
ཆུ་སྲིན་རྒྱལ་མཚན་ཞེས་པ་རྣམས། །སྒོ་ཡི་ཆ་ལ་རབ་ཏུ་བཤད། །འདོད་འགྱིང་དང་ནི་སྙེམས་ཅན་དང་། །དྲན་པ་དེ་བཞིན་མཚམས་ཀྱི་བདག །ལྷ་རྣམས་དེ་དག་ཐམས་ཅད་ཀྱི། །སྤྱི་བོར་གཤིན་རྗེ་གཤེད་པོ་བསྒོམ། །བུད་མེད་རྣམས་ཀྱིས་

90-1-183b

ནམ་མཁའི་གདོང་། །མཐའ་ལ་རྡོ་རྗེ་ལུས་མེད་སྒོམ། །ཤཱིཏ་ཡིག་སྔགས་ལས་ཡང་དག་བྱུང་། །ཀུན་དུ་རྣམ་པར་འཕྲོ་བ་སྟེ། །བསླུས་ཤིང་གཡེང་བ་བསྒོམ་པར་བྱ། །མྱོས་པས་བདེ་བ་འདོད་ཡིད་ཀྱིས། །གོས་ནི་དམར་པོས་ཡོངས་དཀྲིས་ཏེ། །
རྐང་པ་དག་གི་དྲུང་དུ་ལྷུང་། །དེ་ལ་སྔགས་ནི་ཤིན་དུ་བཟླ། །ཨོཾ་ཡིག་དབྱངས་ཀྱི་དབྱེ་བ་དང་། །སྭཱ་ཧཱའི་ཡི་གེ་མཐའ་མར་སྦྱིན། །ཤཱི་ཏ་ཡི་གེའི་སྔགས་རྣམས་བརྗོད། །ཆེ་གེ་མོ་ནི་བདག་དབང་གིས། །དམར་པོའི་གསུང་ནི་ཇི་བཞིན་དུ། །ཐམས་ཅད་
དུ་ནི་བསྒོམ་བྱས་ན། །རྣལ་འབྱོར་པ་ཡི་འདོད་པ་འཐོབ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་ལུས་མེད་པ་ལ་སོགས་པའི་རིམ་པར་ཕྱེ་བ་སྟེ་བཅུ་བདུན་པའོ།། །། 
དེ་ནས་ཧེ་རུ་ཀ་ཆེན་གྱི། །སྒྲུབ་ཐབས་བདག་གིས་རབ་བཤད་བྱ། །རྣལ་འབྱོར་འཁོར་བས་བཅིངས་པ་ལས། །གང་ཞིག་ཤེས་པས་མྱུར་གྲོལ་བ། །ཞལ་གཅིག་པ་ལ་ཕྱག་གཉིས་ཏེ། །སྐུ་མདོག་སྔོན་པོ་གཏུམ་པོ་ཆེ། །ཕྱག་ན་རྡོ་རྗེ་བསྒོམ་
པར་བྱ། །གཞན་ལ་ཐོད་པ་དགོད་པར་བྱ། །སྤྱན་གསུམ་སྐྲ་ནི་གྱེན་དུ་བརྫེས། །ཕྱག་རྒྱ་ལྔ་ཡིས་རྣམ་པར་བརྒྱན། །ཁ་ཊྭཱྃ་ག་ནི་གཡོན་གྱི་ཆར། །རྐང་གདུབ་ཆེན་པོས་རྣམ་པར་བརྒྱན། །ཧཱུྃ་ཡིག་ས་བོན་ལས་བྱུང་བ། །ཡི་དགས་སྟེང་བཞུགས་
རྟག་ཏུ་འཛུམ། །སངས་རྒྱས་ལྔ་ནི་རབ་སྦྱོར་བས། །ཐོད་པ་ལྔ་ཡིས་དབུ་ལ་བརྒྱན། །མི་བསྐྱོད་པ་ཡི་ཅོད་པན་བསམ། །ཧེ་རུ་ཀར་གྲགས་རྣམ་པར་བསྒོམ། །ཤར་དུ་ཆོས་ཀྱི་འཁོར་ལོ་བྲི། །སངས་རྒྱས་བྱང་ཆུབ་ལྷོ་རུའོ། །འདོད་ལྔའི་ཁྲོ་ཤིང་
ནུབ་ཏུ་སྟེ། །བྱང་དུ་ཧེ་རུ་ཀ་དང་མཚུངས། །སྣ་ཚོགས་གཟུགས་ཅན་སྒེག་པ་ལ། །རྒྱན་རྣམས་ཀུན་གྱིས་རྣམ་པར་བརྒྱན། །གཟུགས་མཛེས་ཡི་དགས་སྟེང་དུ་སྟེ། །གཏི་མུག་ཐམས་ཅད་ཉེར་འཇོམས་མ། །ཆོས་ཀྱི་འཁོར་ལོ་དེ་བཞིན་
གཞན། །ཡིད་བཞིན་ནོར་དང་དཔག་བསམ་ཤིང་། །བུམ་པ་བཟང་པོ་དེ་བསྒོམ་བྱ། །ལྷ་མོ་རྣམས་ནི་ཕྱག་གཡས་ན། །རྡོ་རྗེ་ཡང་ནི་བསྒོམ་པར་བྱ། །དཀྱིལ་འཁོར་དཀྱིལ་འཁོར་ཐམས་ཅད་ལ། །ཐོད་པའི་སྣོད་ནི་གཡོན་དུའོ། །

90-1-184a

སྤྱན་དང་མཱ་མ་ཀཱི་སྒྲོལ་མ། །གོས་དཀར་ཤིན་དུ་ཡིད་འོང་རྣམས། །མེ་ལ་སོགས་པའི་མཚམས་བཞི་ལ། །ཕྱི་ཡི་འཁོར་ལོར་གཤིན་རྗེ་གཤེད། །ཤེས་རབ་མཐར་བྱེད་རྟ་མགྲིན་དང་། །བདུད་རྩི་འཁྱིལ་བཅས་བསྒོམ་པར་བྱ། །
འཁོར་ལོ་ཡི་ནི་སྒོ་སྲུངས་ཏེ། །ལས་རྣམས་ཆོ་ག་མཐོང་བ་ཡིས། །རྣམ་པ་ལྔ་ནི་བསྒོམ་བྱས་ནས། །སངས་རྒྱས་བྱང་ཆུབ་རྣམ་པར་བསྒོམ། །འཁོར་ལོ་བསྒོམ་བྱ་རྣལ་འབྱོར་པས། །གླུ་བཞི་རབ་ཏུ་སྦྱོར་བ་ཡིས། །འཁོར་ལོ་ཅན་ནི་བསྐུལ་
བར་བྱ། །ཙར་ཙི་ཀཱ་སོགས་སྙན་པའི་གླུ། །དྲུག་འགྱུར་ལ་སོགས་གླུ་རྣམས་ཀྱིས། །བརྩེ་བས་ཁྲོ་བའི་རྗེ་བཙུན་བཞེངས། །ས་གསུམ་པོ་ཡི་གཏི་མུག་སོལ། །བསམ་དུ་མེད་པའི་རྗེ་བཙུན་བཞེངས། །བདུད་བཞི་རྣམས་ལས་རྒྱལ་བར་
མཛད། །འཇིག་རྟེན་མགོན་པོས་སྟོད་པར་བཞུགས། །འཇིག་རྟེན་བསོད་ནམས་རྗེ་བཙུན་བཞེངས། །བྱང་ཆུབ་དངོས་ལ་འཇིག་རྟེན་མགོན། །ཁྱོད་ནི་སྟོང་ཉིད་སེམས་པར་མཛད། །ཇི་ལྟར་སྐར་མ་འཕྲོ་བ་ལྟར། །བྱང་ཆུབ་སེམས་ནི་དེ་
ལ་ཞུགས། །བརྩེ་བས་ཆགས་པའི་སེམས་ཞུ་སྟེ། །རྡོ་རྗེ་འཛིན་པ་རང་ཉིད་དོ། །དང་པོར་རྣལ་འབྱོར་བསྒོམ་པར་བྱ། །རྗེས་སུ་རྣལ་འབྱོར་གཉིས་པའོ། །ཤིན་དུ་རྣལ་འབྱོར་གསུམ་པའོ། །རྣལ་འབྱོར་ཆེན་པོ་བཞི་པའོ། །རྡོ་རྗེ་སེམས་དཔའ་རྫོགས་པ་
ལ། །རྣལ་འབྱོར་ཞེས་ནི་མངོན་པར་བརྗོད། །ལྷ་ཡི་སྐུ་ནི་རྫོགས་པ་ལ། །རྗེས་སུ་རྣལ་འབྱོར་ཞེས་གྲགས་སོ། །འཁོར་ལོ་ཐམས་ཅད་རྫོགས་པ་ལ། །ཤིན་དུ་རྣལ་འབྱོར་ཡིན་པར་འདོད། །ལྷ་ཡི་མིག་སོགས་བྱིན་བརླབ་དང་། །སྐུ་དང་གསུང་དང་
ཐུགས་རྣམས་དང་། །ཡེ་ཤེས་འཁོར་ལོ་རབ་གཞུག་དང་། །དེ་བཞིན་བདུད་རྩི་མྱང་བ་དང་། །མཆོད་དང་བསྟོད་པ་ཆེན་པོ་ནི། །རྣལ་འབྱོར་ཆེན་པོ་ཞེས་འདོད་དོ། །སློབ་དཔོན་ལ་ནི་བརྙས་མི་བྱ། །བདེ་གཤེགས་བཀའ་ལས་མི་འདའ་སྟེ། །
དེ་བཞིན་སྤུན་ལ་ཁྲོ་བ་དང་། །ཉེས་པ་བསྒྲག་པར་མི་བྱའོ། །སེམས་ཅན་ཀུན་ལ་བྱམས་པའི་སེམས། །ནམ་ཡང་གཏང་བར་མི་བྱའོ། །བྱང་ཆུབ་སེམས་ཀྱང་གཏང་མི་བྱ། །བདག་གཞན་ཆོས་ལ་སུན་མི་དབྱུང་། །ཡོངས་སུ་མ་སྨིན་སེམས་

90-1-184b

ཅན་ལ། །གསང་བ་བསྒྲག་པར་མི་བྱའོ། །བདག་གི་ཕུང་པོ་སྨད་མི་བྱ། །བཅོམ་ལྡན་ཆོས་ནི་སུན་མི་དབྱུང་། །གདུག་པའི་བྱམས་པ་རྟག་ཏུ་སྤང་། །ཆོས་ལ་ཚད་གཞལ་མི་བྱའོ། །སེམས་ཅན་དད་པ་ཅན་མི་བསླུ། །རྟག་ཏུ་དམ་
ཚིག་བསྟེན་པར་བྱ། །བུད་མེད་ཤེས་རབ་རང་བཞིན་ལ། །སྨོད་པའི་ཉེས་པ་དེ་བཞིན་ནོ། །རྣལ་འབྱོར་སློང་མོས་རྒྱུ་མི་བྱ། །རྣལ་འབྱོར་སྤང་བར་མི་བྱ་སྟེ། །རྟག་པར་ཀུན་དུ་གསང་སྔགས་བཟླ། །རྟག་ཏུ་དམ་ཚིག་ལ་སོགས་
བསྟེན། །གལ་ཏེ་བག་མེད་གྱུར་པ་ཡིས། །བླ་མའི་དམ་ཚིག་ལས་ཉམས་ན། །དེས་ནི་དཀྱིལ་འཁོར་ཟླུམ་པོ་བྲི། །བདེ་གཤེགས་རྣམས་ལ་ཉེས་པ་བཤགས། །དད་པས་བླ་མའི་དམ་ཚིག་བསྲུང་། །སྙིང་རྗེ་ཅན་
གྱིས་མི་རྟོག་པར། །ཉེས་པ་མ་ལུས་སྤང་སེམས་ཀྱིས། །བསམ་གཏན་ལ་གཞོལ་བཟླས་མཆོག་གཞོལ། །བརྟན་ཞིང་དུལ་ལ་བརྩེ་བའི་སེམས། །དད་དང་ལྷག་པའི་བསམ་པ་དང་། །མཆོག་ཏུ་བཟོད་པ་འཛིན་པ་
ཡི། །སྐྱེས་བུ་རྟག་ཏུ་བླ་མར་བྱ། །སློབ་མ་བླ་མ་ལ་གུས་དང་། །གཤིན་རྗེ་གཤེད་ལ་རབ་གུས་པ། །བརྟུལ་ཞུགས་ཅན་གྱིས་ཡོངས་སྨིན་བྱ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདེ་བ་
ཆེན་པོ་མཆོག་ཏུ་དགའ་བའི་ངོ་བོ་ཉིད་རྡོ་རྗེ་སེམས་དཔའི་གསུང་ཉེ་བར་ཐོས་ནས་ཅང་མི་སྨྲ་བར་གྱུར་ཏོ། །འདི་ལྟ་བུའི་ཆེད་དུ་བརྗོད་དོ། །འཁྲུལ་འཁོར་མཐར་ཐུག་གཤིན་རྗེ་གཤེད། །བརྟུལ་ཞུགས་མཐར་ཐུག་ཐོད་པ་ཆེ། །
རྒྱུད་ཀྱི་མཐར་ཐུག་འདུས་པ་སྟེ། །མ་བྱུང་འབྱུང་བར་མི་འགྱུར་རོ། །ཨེ་མ་ཞི་བ་ཆེན་པོའི་ཆོས། །ཨེ་མ་ཁྲོ་བོ་འཇིགས་མཛད་པ། །ཨེ་མ་མྱ་ངན་འདས་པའི་མཆོག །ཨེ་མ་འཁོར་བ་ཞི་བ་ཉིད། །
ཨེ་མ་འདི་ནི་རབ་ཏུ་མཚར། །ཉེས་པ་གང་དེ་ཡོན་ཏན་འགྱུར། །བྱང་ཆུབ་མེད་ཅིང་མངོན་རྟོགས་མེད། །དངོས་པོ་མེད་ཅིང་སྒོམ་པའང་མེད། །ཁམས་ཀྱང་མེད་ཅིང་རྣམ་ཤེས་མེད། །ནམ་མཁའི་དཀྱིལ་དང་

90-1-185a

མཚུངས་པ་ཉིད། །ནམ་མཁའ་བཞིན་དུ་བདག་མེད་པ། །ཆོས་འདི་བདེ་བ་ཆེན་པོའོ། །ས་ཡང་མེད་ཅིང་ཆུ་ཡང་མེད། །མེ་མེད་རླུང་མེད་ནམ་
མཁའ་མེད། །རྡོ་རྗེ་སེམས་དཔའ་རབ་སྦྱོར་བས། །བསྐྱེད་པ་འདི་ནི་རབ་ཏུ་གནས། །དངོས་པོ་ཐམས་ཅད་དངོས་མེད་བཤད། །དེས་ན་རང་བཞིན་མེད་ཅེས་བསྒྲགས། །
རྣལ་འབྱོར་སྦྱོར་བ་དང་ལྡན་པས། །ཆད་པ་མ་ཡིན་རྟག་པ་མིན། །ཡན་ལག་མེད་ཅིང་ཁ་དོག་མེད། །དངོས་པོ་ཐམས་ཅད་བདེན་པར་མེད། །
ཐོག་མ་བར་དང་མཐའ་མ་སྤངས། །མཆོག་ཏུ་དགའ་བའི་མཚན་ཉིད་དོ། །དེ་ནས་ཙར་ཙི་ཀཱ་ལ་སོགས་པས་ཆེད་དུ་བརྗོད་པ་འདི་བརྗོད་དོ། །བསོད་ནམས་སྡིག་
པ་དག་དང་མ་འབྲེལ་བས། །མཆོག་ཏུ་དགའ་བ་དྲི་མེད་རྣམ་དག་པ། །དེ་བཞིན་ཉིད་ཀྱི་གཏེར་ཆེན་གཅིག་པུ་ནི། །ཀུན་ནས་སྙིང་རྗེའི་སེམས་ཀྱིས་རབ་
ཏུ་གནས། །མཆོག་ཏུ་དགའ་བ་འདི་ཡི་ངོ་བོ་ནི། །ཆོས་རྣམས་ངོ་བོ་བདེ་བ་ཆེན་པོའི་དངོས། །གཟུགས་མེད་བསོད་ནམས་མེད་ཅིང་སྡིག་པ་མེད། །
སྐྱེ་དང་འགག་པ་དག་ནི་ཡོད་མ་ཡིན། །དེ་བཞིན་གཤེགས་པ་ཐམས་ཅད་ཀྱི། སྐུ་དང་གསུང་དང་ཐུགས་གཤིན་རྗེ་གཤེད་དམར་པོའི་རྒྱུད་ལས་བྱང་ཆུབ་སེམས་ཀྱི་རིམ་པར་
ཕྱེ་བ་སྟེ་བཅྭ་བརྒྱད་པའོ།། །། དེ་ནས་གཏམ་རྒྱུད་རབ་ཏུ་བཤད་པར་བྱ་སྟེ། བཅོམ་ལྡན་འདས་

90-1-185b

མངོན་པར་བྱང་ཆུབ་པའི་དུས་སུ་བཅོམ་ལྡན་འདས་ཐུབ་པ་ཆེན་པོ་ལ་བྱང་ཆུབ་ལ་བར་དུ་གཅད་པའི་ཕྱིར་ཤིན་དུ་འཇིགས་སུ་རུང་བའི་འཇིགས་པ་ཆེན་པོ་སྟོན་ཅིང་བདུད་ཀྱི་དཔུང་གི་
ཚོགས་ཆེན་པོ་དཔག་ཏུ་མེད་པ་ལྷགས་ཏེ། དེའི་དུས་ན་བདུད་ཆེན་པོ་ལས་མཆོག་ཏུ་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། 
བཅོམ་ལྡན་འདས་ཉིད་ཀྱི་སྐུ་གསུང་ཐུགས་རྡོ་རྗེ་རྣམས་ལས་གཤིན་རྗེ་གཤེད་ཀྱི་ཁྲོ་བོ་ངེས་པར་ཕྱུང་སྟེ། ངེས་པར་ཕྱུང་ནས་ཀྱང་
ཕྱག་ན་རྡོ་རྗེ་བཅོམ་ལྡན་འདས་ཐུབ་པ་ཆེན་པོའི་བཀའ་བཞིན་བྱེད་པ་ལ། ཕྱག་ན་རྡོ་རྗེ་ཁྱོད་འདི་ལྟ་བུའི་གཤིན་རྗེ་གཤེད་ཀྱི་ཁྲོ་བོའི་
གཟུགས་སུ་བསྒྱུར་ཏེ། བདུད་དང་གནོད་སྦྱིན་དང་ལྷ་མ་ཡིན་དང་ལྷ་དང་སྲིན་པོ་རྣམས་སྐྲག་ཅིང་འཇིགས་པ་དང་སོད་ཅིག་ཅེས་གསུངས་སོ། །
དེའི་དུས་ན་ཇི་ལྟར་བདག་གིས་བཅོམ་ལྡན་འདས་ཀྱིས་གསུངས་པ་ཐོས་ཏེ། སྐད་ཅིག་ལ་གཟུང་ཞིང་དོན་གཟུང་སྟེ། བསྡུས་ནས་
ཤིན་དུ་དགའ་བས་ལེགས་པར་སེམས་བསྐྱེད་དོ། །གསང་བའི་བདག་པོ་ཆེན་པོ་ལ། །འདི་སྐད་ཅེས་ནི་བཀའ་སྩལ་ཏོ། །
ཕ་རོལ་གྲོང་དུ་རབ་འཇུག་པའི། །ཐབས་རྣམས་རབ་ཏུ་གསལ་བྱ་སྟེ། །འགྲོ་དང་འོང་བར་འདོད་པ་ཡིས། །

90-1-186a

ཏིང་ངེ་འཛིན་དང་གསང་སྔགས་བཟླ། །བྱེ་བ་བཟླས་པས་འགྲུབ་འགྱུར་ཏེ། །བྱེ་བ་ལྔ་ཡིས་སྨོས་ཅི་དགོས། །
དང་པོ་དེ་ནས་བརྩམ་པར་བྱ། །བདག་ཉིད་ནམ་མཁའ་ལྟ་བུ་སྟེ། །དང་པོར་གོམས་པར་བྱ་བའི་དུས། །
སེམས་ལ་སེམས་ཉིད་གཞུག་པར་བྱ། །དཔེར་ན་སེམས་འདི་རྨི་ལམ་ན། །འགྲོ་དང་སླར་ཡང་བཟློག་པར་བྱ། །
སྐད་ཅིག་ལ་ནི་དེ་བཞིན་གནས། །རྒྱུན་མི་འཆད་པར་སྦྱོར་གོམས་པས། །དཔེར་ན་མཚོན་ཆ་གནས་བྱས་ནས། །གཞུ་ཡིས་
མདའ་ནི་འཕེན་པ་སྟེ། །དེ་བཞིན་འདིར་ཡང་ཡིད་ཀྱི་གཞུས། །རྒྱུན་མི་འཆད་པར་འགྲོ་བར་བྱེད། །ཟླ་བ་ཉི་མ་སྦྱོར་
བ་ཡིས། །རླུང་གིས་སེམས་ནི་གཞུག་པར་བྱ། །ལུས་ནི་རྣམ་པར་སྤངས་ནས་ནི། །དེ་ལ་ཡིད་ནི་
འགྲོ་དང་འཇུག །ཅུང་ཟད་དྲོད་ནི་རྙེད་པ་ཡིས། །ཐོབ་པའི་ཕྱོགས་སུ་སྒོམ་པ་པོ། །ལུས་ཀྱི་ནང་དུ་འཇུག་པ་ནི། །
དཔེར་ན་གྲོང་གཞན་ལས་འགྲོ་ཞིང་། །ཟླ་བ་ཉི་མའི་འགྲོས་འཇོམས་ཤིང་། །སྒྲ་གཅན་འཇུག་པ་སྦྱོར་བ་ཡིས། །བགྲོད་

90-1-186b

པའི་གནས་ནི་ཐོབ་པ་ན། །རླུང་གི་བཞོན་པའི་སྦྱོར་བ་ཡིས། །འཆི་བལྟས་མཚན་ཉིད་ཤེས་བྱས་ལ། །ཆོ་ག་མཚན་ཉིད་ལྡན་པས་བགྲོད། །
ཇི་ལྟར་འདོད་པ་གཡོ་མི་གཡོ། །རང་འདོད་ཀུན་དུ་སྐྱེ་བར་འགྱུར། །ཐུར་སེལ་འོག་ལམ་གསང་བའི་མཐའ། །གཏོང་ཞིང་ལྟེ་བར་རྩོམ་པར་
བྱེད། །སྙིང་ག་མགྲིན་པར་སོང་ནས་ནི། །སྲོག་ནི་སྣ་བུག་དག་ནས་འགྲོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་
དང་ཐུགས་གཤིན་རྗེ་གཤེད་དམར་པོའི་རྒྱུད་ལས་ཕ་རོལ་གྱི་གྲོང་དུ་འཇུག་པ་སྟེ། རིམ་པར་ཕྱེ་བ་བཅུ་དགུ་པའོ།། །།
དཔལ་ལྡན་གཤིན་རྗེ་གཤེད་དམར་པོའི་རྒྱུད་ཀྱི་རྒྱལ་པོ་རྫོགས་སྷོ།། །།བླ་མ་ཆོས་ཀྱི་རྒྱལ་པོའི་གསུང་གི་འོད་ཟེར་དང་། 
བྷོ་ཊ་པཎ་ཌི་ཏའི་གསུང་དང་། མིའི་དབང་པོ་ཀུན་དགའ་བཟང་པོའི་གསུང་དང་། དཔོན་ཀུན་གཞོན་གྱིས་གསེར་གནང་བ་ལ་བརྟེན་
ནས། ཤཱཀྱའི་དགེ་སློང་ཙན་དྲ་ཤྲཱིའི་ཞལ་སྔ་ནས་ཞུས་ཤིང་། པཎ་ཌི་ཏ་ཆེན་པོ་ཙན་དྲ་ཀཱིར་ཏི་དང་། 
ཡར་ལུངས་པ་གྲགས་པ་རྒྱལ་མཚན་གྱིས་བལ་ཡུལ་ཡམ་བུའི་གྲོང་ཁྱེར་དུ་བསྒྱུར་རོ།། །ཐང་རྒྱལ་གཉིས་ཀྱིས་ཡང་ཞུས་མཚར་།། །།

90-1-187a

༄༅། །རྒྱ་གར་སྐད་དུ།  ཤྲཱི་བྷ་ག་བཱན་ཨེ་ཀ་ཛ་ཊ་མ་ཧཱ་ཀལྤ་ཏནྟྲ་རཱ་ཛ་ནཱ་མ།  བོད་སྐད་དུ།  དཔལ་བཅོམ་ལྡན་འདས་རལ་པ་གཅིག་པའི་བརྟག་པའི་རྒྱུད་ཀྱི་རྒྱལ་པོ་ཆེན་པོ་ཞེས་བྱ་བ། བཅོམ་ལྡན་འདས་རལ་པ་གཅིག་པ་ལ་
ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ལྕང་ལོ་ཅན་གྱི་གནས་རྡོ་རྗེའི་རི་བོའི་ཟོམ་ན་བཞུགས་ཏེ། བྱང་ཆུབ་སེམས་དཔའ་ཕྱག་ན་རྡོ་རྗེ་དང་། འཇིགས་བྱེད་རྒྱལ་པོ་དང་། ཀླུའི་དབང་པོ་དང་། 
ཉི་མ་དང་ཟླ་བའི་གདོང་ཅན་དང་། ཡེ་ཤེས་བཀོད་པའི་ཕྱག་རྒྱ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་གསང་བའི་དེ་ཁོ་ན་ཉིད་ཤིན་ཏུ་སྦས་པའི་མཛོད་ལ་མངའ་བརྙེས་པ། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་ཡང་དག་པར་
ངེས་པ། རིགས་དང་ཚོགས་དང་དམ་ཚིག་དང་བཏུལ་ཞུགས་ཆེན་པོ་ཕྱག་རྒྱ་རྒྱ་མཚོ་ལྟ་བུའི་ཚུལ་ལ་གནས་པ། གསང་བ་བས་ཀྱང་ཆེས་གསང་བའི་བདེ་བ་ཆེན་པོ་ལ་རྣམ་པར་རོལ་པ། ཐབས་དང་ཤེས་རབ་བླ་ན་མེད་པའི་ཁ་སྦྱོར་ལས་ངེས་པར་འབྱུང་བའི་
ཡེ་ཤེས་ཅན། འགྲོ་བ་ཐམས་ཅད་ཀྱི་ཀུན་ནས་ལྡང་བ་དང་བག་ལ་ཉལ་འཇོམས་པ་ལ་མཁས་པ་དཔག་ཏུ་མེད་པ་དང་ཐབས་གཅིག་ཏུ་བཞུགས་སོ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་སྟན་ལས་ལངས་ཏེ་པུས་མོ་གཡས་པའི་ལྷ་ང་ས་ལ་
བཙུགས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །རྡོ་རྗེ་དབང་ཕྱུག་རྡོ་རྗེ་ཆེ། །རྡོ་རྗེའི་རྒྱལ་པོ་ཀུན་བདག་པོ། །སངས་རྒྱས་ཐམས་ཅད་བསྐྱེད་མཛད་ཡབ། །བདེ་ཆེན་འཁོར་ལོ་བདག་ལ་གསུངས། །སྲིད་གསུམ་ཐིབས་པོ་སེལ་
མཛད་ཅིང་། །མྱ་ངན་འདས་ལ་མི་གནས་པ། །ལུས་ཅན་ཀུན་སྐྱོབ་བརྩེ་ཆེན་པོ། །འདྲེན་པ་ཁྱོད་ལམ་བསྟན་དུ་གསོལ། །བློ་གྲོས་སྙིང་རྗེ་བརྟན་ལྡན་པས། །ཐབས་ནི་གང་ཞིག་མངོན་བསྒོམས་ན། །སྐུ་ལྔ་ཕྱག་རྒྱ་འགྲུབ་འགྱུར་བ། །
གཙོ་བོ་དེ་ནི་འདིར་བཤད་གསོལ། །རྡོ་རྗེ་དཀྱིལ་འཁོར་ཆེར་འབྱུང་བ། །འབུམ་ཕྲག་རྒྱུད་ཆེན་ལས་གསུངས་པ། །རལ་པ་གཅིག་ཕྲེང་དཀྱིལ་འཁོར་གཙོ། །སྦས་པ་གང་ལགས་བརྩེ་བས་གསུངས། །ཞེས་གསོལ་པ་དང་། བཅོམ་

90-1-187b

ལྡན་འདས་རྡོ་རྗེ་དཀྱིལ་འཁོར་མ་ལུས་པའི་བདག་པོ་རབ་ཏུ་དགྱེས་པས་འཛུམ་པ་མཛད་དེ། ཞལ་གྱི་སྒོ་ནས་འོད་ཟེར་ཁ་དོག་ལྔ་ཕྱུང་སྟེ། འཇིག་རྟེན་གྱི་ཁམས་ཐམས་ཅད་སྣང་བར་བྱས་ཏེ་སླར་འདུས་པས་འཁོར་གྱི་དཀྱིལ་
འཁོར་ཡོངས་སུ་བསྦྱངས་ཏེ། བཅོམ་ལྡན་འདས་ཉིད་ལ་བསྐོར་བ་ལན་གསུམ་བྱས་ནས་སྤྱི་གཙུག་ཏུ་ནུབ་པར་གྱུར་ཏོ། །དེ་ནས་ཡང་དབུའི་གཙུག་ཏོར་གྱི་ནོར་བུ་ལས་ཟླ་བ་དང་། ཀུནྡ་ལྟ་བུའི་འོད་ཟེར་དཀར་པོ་བྱུང་སྟེ། དབུའི་
སྟེང་དུ་དཀྱིལ་འཁོར་ཆེན་པོ་མངོན་པར་འབྱུང་བའི་རྣམ་པར་བཀོད་པ་མངོན་སུམ་དུ་གསལ་བར་མཛད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །སྙིང་
རྗེ་ཆེན་པོ་ཁྱོད་སེམས་ཅན་ཐམས་ཅད་ལ་སྨན་པ་དང་བདེ་བའི་ཕྱིར་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་མངོན་པར་འབྱུང་བའི་མཛོད་རྡོ་རྗེ་སྒེགས་པ་ཆེན་པོ་རལ་པ་གཅིག་པའི་གསང་བ་མཆོག་ཞུས་པ་ལེགས་སོ་ལེགས་སོ། །
རྡོ་རྗེ་འཆང་འདི་ནི་ཁྱོད་ཀྱི་དུས་ཡིན་ཞིང་འདི་ནི་ཁྱོད་ཀྱི་སྣང་བར་བྱེད་པ་ཡིན་ནོ། །ང་ཡང་སྔོན་རྡོ་རྗེ་རི་བོའི་ཟོམ་འདི་ཉིད་དུ་བྱང་ཆུབ་སེམས་དཔའ་སྐར་མ་ལ་དགའ་བ་ཞེས་བྱ་བར་གྱུར་པ་ན། དེ་བཞིན་གཤེགས་པ་ཐམས་ཅད་དང་། ཡེས་ཤེས་
རལ་པ་གཅིག་གསང་བ་ལྷན་ཅིག་ཏུ་རྣམ་པར་རོལ་པས་སེམས་ཅན་དཔག་ཏུ་མེད་པ་སྨིན་པར་བྱས་པ་རྗེས་སུ་དྲན་ནོ། །དེ་བས་ན་ཁྱོད་ཀྱིས་སྙིང་རྗེ་ཆེན་པོ་དང་ཐབས་ལ་མཁས་པས་གསང་སྔགས་ཀྱི་ངེས་པར་འབྱུང་བའི་རྟོག་པ་འདི་ལེགས་པར་
ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བྱང་ཆུབ་སེམས་དཔའ་ཕྱག་ན་རྡོ་རྗེས་བཅོམ་ལྡན་འདས་ཀྱི་ལྟར་མཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཨོཾཨཱཿ་ཧཱུྃ་ཨོཾ་ཨཱཿཧྲཱི་ཏྲྃ་ཧཱུྃ། ཨོཾཨཱཿསརྦ་
ཏ་ཐཱ་ག་ཏོ་གརྦྷེ་བཛྲ་ཏ་ཏྭ་སརྦྦ་ཛྙཱ་ན་ཛྭཱ་ལ་ཧཱུྃ་ཕཊ་སྭཱ་ཧཱ། ཨོཾཨཱཿསརྦ་ཏ་ཐཱ་ག་ཏོ་མ་ཏྀ་བཛྲ་ཏ་ཏྭོ་པ་ཡ་ས་ར་བྃ་ཧཱུྃ་ཕཊ་སྭཱ་ཧཱ། ཨོཾཨཱཿབཛྲ་ཛྙཱ་ན་ཧཱུྃ་ཕཊ། ཨོཾཨཱཿབཛྲོ་པཱ་ཡ་ཧཱུྃ་ཕཊ། ཨོཾཨཱཿབཛྲ་ཙཀྲ་ཨ་ཧཱུྃ་ཕཊ་སྭཱ་ཧཱ། ཨོཾཨཱཿབཛྲ་ར་ཧཱ་

90-1-188a

ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་པདྨ་ཨུ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་བི་ཤྭོ་ཨེ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་མོ་ཧཱ་ཨྃ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་ཝརྞ་ཨཱི་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་རཱ་ག་ཨྴུ་ཧཱུྃ་ཕཊ་སྭཱ་ཧཱ། 
ཨོཾ་ཨཱཿབཛྲ་དྭེ་ཥ་ཨཻ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་སྠི་ར་ཨོཾ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་ཡོ་ག་ཨྃ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་ཛྭཱ་ལ་ཨཿཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་བ་ལ་ཨཱཿཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་རཱུ་པ་ཎི་ཀ་ཧཱུྃ་ཕཊ་
སྭཱ་ཧཱ། ཨོཾ་ཨཱཿབཛྲ་ཤཔྡ་ཙ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་གནྡྷ་ཊ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་ར་ས་ཏ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་སྤཪྵ་པ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་དྷརྨ་རེ་ཡ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་ཀྵེ་ཏྲ་ཤ་ཧཱུྃ་ཕཊ་སྭཱ་ཧཱ། 
ཨོཾ་ཨཱཿབཛྲ་ཨཱ་ལོ་ཀཱ་ཀྵཿཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་ཨྃ་ཀུ་ཤ་རྀ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་པཱ་ཤ་རཱྀ་ཧཱུྃ་ཕཊ་སྭཱ་ཧཱ། ཨོཾ་ཨཱཿབཛྲ་བནྡྷ་ལྀ་ཧཱུྂ་ཕཊ་སྭཱ་ཧཱ། ཨོཾ་ཨཱཿབཛྲ་གྷཊ་ལཱི་ཧཱུྃ་ཕཊ་སྭཱ་ཧཱ། ཨོཾ་སྭ་བྷཱ་བ་ཤུདྡྷཱཿསརྦཱ་དྷརྨཱཿ
སྭ་བྷཱ་བ་ཤུདྡྷོ྅ཧཾ། ཨོཾ་བཛྲ་ཤུདྡྷཱཿསརྦྦ་དྷརྨྨཿབཛྲ་ཤུདྡྷོ྅ཧཾ། ཨོཾ་ཡོ་ག་ཤུདྡྷཱཿསརྦྦ་དྷརྨྨཱ་ཡོ་ག་ཤུདྡྷོ྅ཧཾ། །རྡོ་རྗེ་མི་བསྐྱོད་རལ་པ་གཅིག །མི་བསྐྱོད་པ་ནི་བྱང་སེམས་བཅས། །རྡོ་རྗེ་སྒྲོན་མ་རྡོ་རྗེ་དང་། །རྡོ་རྗེ་ཞགས་པ་རྣམ་པར་
བསྒོམ། །གཏི་མུག་བག་ཆགས་འདོད་ཆགས་དང་། །ཞེ་སྡང་རྡོ་རྗེ་འཁོར་ལོར་གནས། །རི་རབ་ཉི་ཟླ་བ་དན་ལས། །འབྱུང་བཞིའི་རྡོ་རྗེ་དེ་བཞིན་ནོ། །ཁྱམས་བཞིར་མེ་ལོང་པི་ཝྃ་དང་། །དྲི་མཆོག་ཞལ་ཟས་ལས་བྱུང་བ། །གཟུགས་
སྒྲ་དྲི་རོ་རྡོ་རྗེ་མ། །མཁས་པས་རྟག་ཏུ་མཉམ་པར་གཞག །ཕྱོགས་བྲལ་ན་བཟའ་ཆོས་འབྱུང་དང་། །མཎྜལ་མར་མེ་ལས་སྐྱེས་པ། །རེག་ཆོས་ཞིང་དང་སྣང་བ་ཡིས། །རྡོ་རྗེ་ལྷ་མོ་རྣམ་པར་བལྟ། །སྒོ་བཞིར་ལྕགས་ཀྱུ་ཞགས་པ་དང་། །ལྕགས་
སྒྲོག་དྲིལ་བུ་ཡོངས་གྱུར་པས། །རྡོ་རྗེ་ལྕགས་ཀྱུ་ལ་སོགས་བསྒོམ། །རང་མཚན་ཀ་པཱ་ལས་རབ་མཛེས། །གཏུམ་དྲག་ཚང་ཚིང་འཁྲིག་པ་དང་། །འུར་འུར་འབར་བས་ཁྱབ་པ་དང་། །ཀེང་རུས་འཇིགས་རུང་ཤར་སོགས་ཀྱིས། །ཕྱོགས་སུ་གཡོན་

90-1-188b

བསྐོར་གྱིས་ལེགས་གནས། །ཧ་ཧར་དགོད་པ་དབང་ལྡན་དུ། །བྱིན་ཟར་དཔལ་གྱི་ནགས་ཚལ་ལོ། །མུན་པ་མི་བཟད་བདེན་བྲལ་དུ། །རླུང་དུ་ཀི་ལི་ཀི་ལིར་སྒྲོགས། །མི་མཉམ་མེད་པ་ཟུར་བཞི་ཡིན། །དྲན་དང་དབང་པོ་
སྒོ་བཞི་སྟེ། །བསམ་གཏན་བཞི་ནི་རྟ་བབས་བཞི། །རྣམ་ཐར་བརྒྱད་ཕྱིར་ཀ་བ་བརྒྱད། །བྱང་ཆུབ་ཡན་ལག་བདུན་དག་ཕྱིར། །དྲ་བ་དང་ནི་དྲ་བ་ཕྱེད། །ཕྱོགས་བཞིར་ཚད་མེད་བཞི་ཡིན་ཏེ། །པད་མ་འཁོར་ལོ་ཤེས་རབ་ཐབས། །
རྣམ་པར་ཤེས་བརྒྱད་ཡོངས་དག་པ། །དེ་ནི་དུར་ཁྲོད་ཆེན་པོ་བརྒྱད། །ཟླ་བ་མེ་ལོང་ཉི་མཉམ་ཉིད། །ས་བོན་མཚན་མ་ཀུན་ཏུ་རྟོག །ཡོང་གྱུར་བྱ་བ་གྲུབ་པ་སྟེ། །ཉིང་རྫོགས་ཆོས་དབྱིངས་ཡེ་ཤེས་ཡིན། །ལྔ་ཕུང་དང་ནི་དྲི་མ་བཞིན། །
ཆེན་པོ་བཞི་དང་སྤྱོད་ཡུལ་བརྒྱད། །རྣམ་བཞི་ཚོར་བ་རྣམ་དག་ལྷ། །ཡེ་ཤེས་བདག་ཉིད་འཁོར་ལོའོ། །རྒོད་དང་ཕྲད་འཁྱུད་འཁྲིག་པ་དག །པཱུ་ཛཱ་ཨོ་ཨ་གོ་ར་དེ་མ། །ཀ་ཨོ་ཏྲི་ཀོ་ཀ་ལ་ཀཱ་ཧི། །པྲེ་གྲྀ་སཽ་སུ་ན་སི་མ་ཀུ། །ཧ་ཧི་ཧུ་ཧེ་
ཧོ་ཧྃ། །ཨ་ཨི་ཨུ་ཨེ་ཨོ་ཨྃ། །རྣམ་པ་སྣ་ཚོགས་རྣམ་པར་སྨིན། །རྣམ་པར་འཇོམས་དང་རྣམ་མཚན་བྲལ། །དགའ་དང་མཆོག་དགའ་དགའ་བྲལ་དང་། །ལྷན་ཅིག་སྐྱེས་དགའི་མཚན་ཉིད་དོ། །རྒོད་དང་ཕྲད་འཁྱུད་འཁྲིག་པ་
དག །བདེ་ཆེན་དག་ཕྱིར་བུམ་པ་དང་། །གསང་བ་ཤེས་རབ་བདེ་བ་ཆེ། །དབང་བཞི་རྒྱལ་པོ་ཐོབ་པར་འགྱུར། །ཛཿཧཱུྂ་བྃ་ཧོཿ། དམིགས་པས་དུབ་དང་གཞན་གོམས་འདོད། །རྣམ་པར་མི་རྟོག་དེ་ཉིད་བསྒོམ། །རྨི་ལམ་ནམ་མཁའི་སྦྱོར་
བ་ནི། །ཉིན་མཚན་རྟག་ཏུ་རྣམ་པར་གཞག །སྤྱི་བོ་སྙིང་ག་ལྟེ་བར་ནི། །ཟླ་བ་པད་མ་ཉི་སྟེང་དུ། །ཧྃ་དང་ཧཱུྃ་དང་ཨ་ཞེས་པ། །ཡི་གེ་བདེ་གསལ་མི་རྟོག་རྒྱུད། །སྙིང་པོ་འཕོ་དང་ཐིམ་དང་གནས། །འགྱུར་དང་འགུལ་དང་འཕར་བ་དང་། །
མདའ་བསྣུན་བསྡུ་དང་འགྲོ་འོང་སྦྱར། །ལུས་མེད་སེམས་ནི་ཅི་བདེར་འགྲོ། །བསྟིམས་ནས་འཕྲོ་ཞིང་འབར་བར་བྱེད། །དབང་དུ་བྱེད་དང་ཁ་སྦྱར་བསྒོམ། །འདུན་པས་བསྒྲུབ་དང་ས་བོན་བསྒྱུར། །འཕེན་དྲན་བར་དོར་དོན་སྒྲུབ་འགྱུར། །

90-1-189a

དྲི་མ་དང་ནི་རྨ་དག་དང་། གདུག་པའི་ནད་གྱིས་བཟུང་ཞིང་འཇོམས། །གོས་དང་བྲལ་ཞིང་འདར་བར་བྱེད། །ངལ་ཞིང་ལུས་ནི་རྨ་དང་ལྡན། །ཕོལ་གྱི་ཕྲེང་བས་ལུས་ལ་བཟུང་། མཚོན་གྱིས་རྨ་ནི་དོད་པར་
བྱེད། ། གྲང་བ་དང་ནི་རླུང་གིས་གཙེས། །མེ་ཡི་དབུས་སུ་ཡང་དག་བརྟེན། །མ་ཧེ་སྟག་དང་ཁྱི་རྣམས་དང་། །མཆུ་རིངས་རྣམས་ཀྱིས་ཟ་བར་བྱེད། །སངས་རྒྱས་སྡེ་རྣམས་འཇོམས་བྱེད་པའི། །མ་རུངས་ཆེན་པོ་རྣམས་
ཀྱི་ནི། །ལྟོ་བའི་ནང་ནས་རྒྱུ་མ་དང་། །ལུས་ལ་ཚེར་མས་གང་བ་དང་། །རྐང་པ་གདོས་དང་སྒྲོག་གིས་བསྡམས། །དེ་བཞིན་དུམ་བུ་དུམ་བུར་བྱས། །པགས་པ་ངེས་པར་ཤུ་བར་བསམ། །སྐེ་ཚེ་ཚྭ་ཡིས་བྱུག་པར་བྱ། །
གྲང་བ་ཡིས་ནི་ལུས་འདོན་བསྒོམ། །དེ་ཡི་ལུས་ཀྱི་བསྲུང་སོགས་རྣམས། །བཅད་ཅིང་བདག་ཉིད་མདུན་དུ་གཟུང་། །དེ་ཡི་གོ་ཆ་བཅད་པར་བྱ། །ལུས་ནི་དེ་བཞིན་སྟོང་པར་བསྒོམ། །བདག་གི་ལས་ལས་
སྐྱེས་པ་ཡི། །ཁྲོ་བོ་གཤིན་རྗེ་གཤེད་གཟུགས་ཀྱིས། །འཇོམས་པ་དག་ཏུ་བསྒོམ་བྱ་ཞིང་། །རྐང་དང་ཚིལ་རྣམས་འཐུང་བ་སྟེ། །དེ་ཡི་མདུན་དུ་གཤིན་རྗེ་བསྒོམ། །ལག་ན་དབྱུག་པ་སྟོབས་ཆེན་ལྡན། །
མ་རུངས་དེ་ཡིས་གདུག་པ་དེ། །རྣམ་པར་འཇོམས་པ་བསྒོམ་པར་བྱ། །དེ་ཡི་རྒྱུ་མ་རྩ་རྣམས་ནི། །བྱ་རྒོད་ཀྱིས་གཟུང་མཁའ་ལ་འགྲོ། །ཀླུ་ཡིས་ས་འོག་འགུགས་པར་བྱེད། །ལྷ་མ་ཡིན་ལ་སོགས་
པས་བཙིར། །དེ་ལྟར་བསྒྲུབ་བྱ་བསམ་པར་བྱ། །སྙིང་རྗེའི་སེམས་ཀྱིས་རབ་བཅིངས་ནས། །འཁོར་བ་ལས་ནི་ཕ་རོལ་བྱས། །སངས་རྒྱས་རྣམས་ཀྱི་ཞིང་དུ་འགྲོ། །དེ་ནས་བཅོམ་ལྡན་འདས་དེ་བཞིན་གཤེགས་པ་
རྣམས་ཐུགས་དགྱེས་ནས་གསུངས་བ། འདི་ལྟ་སྟེ། ཀྱེ་མ་བསད་བྱ་ལེགས་པར་བྱས། །བསད་པར་བྱ་བ་མ་བསད་དེ། །ཇི་སྲིད་སྡིག་རྣམས་གྲོལ་བར་བྱས། །ཤི་བ་དེ་ཡང་མ་ཤི་སྟེ། །སྡིག་པ་སྟོང་ཕྲག་བྱས་

90-1-189b

པ་ཡི། །མནར་མེད་ལ་སོགས་མི་སྐྱེའོ། །ཨེ་མ་བདག་ཉིད་ཆེན་པོ་སྟེ། །བསད་པས་སངས་རྒྱས་བྱང་ཆུབ་ཐོབ། །སླར་ཡང་བརྩེ་བས་སེམས་ཅན་རྣམས། །བསད་པར་བྱ་བས་བསད་པར་བྱ། །ཨེ་མ་སྙིང་རྗེའི་སྟོབས་ཀྱིས་ཏེ། །
སྙིང་རྗེ་དམན་པས་འགྲུབ་མི་འགྱུར། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཧཱུཾ་ལྷ་སྦྱིན་སོད་ཧཱུཾ། ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཧཱུཾ་ལྷ་སྦྱིན་མཱ་ར་ཡ་ཧཱུཾ་ཕཊ་ཅེས་པ་ནི། བཅོམ་ལྡན་འདས་ཀྱིས་རྟོག་པ་ཆེན་པོ་བསད་པའི་
རྡོ་རྗེའི་འཕྲུལ་འཁོར་དང་སྔགས་དང་རྒྱུད་ཀྱིས་བསད་པ་ལ་སོགས་པའི་དམ་ཚིག་ཏུ་གསུངས་སོ། དེ་ནས་འཁོར་ལོ་གཉིས་བྲིས་ཏེ། །ཕཊ་ཀྱི་ཡི་གེའི་ནང་དུ་ནི། །བསྒྲུབ་བྱའི་མིང་དང་བཅས་པ་གཟུང་། །ཐོད་པ་ཡང་
དག་སྦྱར་བྱས་ཏེ། །སྲད་བུ་ནག་པོས་དཀྲི་བར་བྱ། །ཞེ་སྡང་སེམས་ཀྱིས་ཉིན་གུང་ལ། །དུར་ཁྲོད་དུ་ནི་གཞུག་པར་བྱ། །གཤིན་རྗེ་མཐར་བྱེད་མཚུངས་བལྟས་ནས། །བསྒྲུབ་བྱ་རང་གི་མདུན་དུ་བྱ། །རྟ་དང་མ་
ཧེའི་སྟེང་ན་གནས། །གཉིས་པོ་དེ་ཡི་ལག་ན་མཚོན། །ཁྲོ་བོའི་ཚོགས་ཀྱིས་ཀུན་ནས་བསྐོར། །གཉིས་པོའི་ཕྱོགས་ལ་བསམ་པར་བྱ། །གཉིས་པོ་དག་ནི་འཐབ་བྱེད་ཅིང་། །ཁྲོ་བས་སེམས་ནི་བཅིངས་པ་སྟེ། །འཐབ་
མོ་བྱེད་པར་བསྒོམ་བྱས་ལ། །སྒོམ་ཞིང་བཟླས་པ་བརྩམ་པར་བྱ། ། ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཧཱུཾ་ལྷ་སྦྱིན་དང་མཆོད་སྦྱིན་དག་རྣམ་པར་ཞེ་སྡང་བར་གྱིས་ཤིག་ཕཊ་ཅེས་པ་ནི་བཅོམ་ལྡན་འདས་ཀྱིས་ཞེ་སྡང་ཆེན་པོའི་དམ་ཚིག་ཏུ་
གསུང་སོ། །ཆོ་ག་དེ་ཡིས་སྔོན་མ་བཞིན། །འཁོར་ལོ་གཉིས་པོ་ཀུན་ཏུ་བྲི། །ཧཱུཾ་ཕཊ་ཡི་གེ་དག་གི་བརྟེན། །ཐོད་པ་གཉིས་ནི་ཡང་དག་སྦྱར། །སྲད་བུ་ནག་པོས་ཡང་དག་དཀྲི། །ཕག་ཤིན་ནགསུ་གཞག་བྱས་ལ། །གཤིན་རྗེ་གཤེད་ཀྱི་
རྣལ་འབྱོར་གྱིས། །བསྒྲུབ་བྱ་སྔོན་དུ་གཟུང་བར་བསྒོམ། །ཡཾ་ལས་བྱུང་བ་གཞུ་ཡི་དབྱིབས། །རླུང་གི་དཀྱིལ་འཁོར་ནག་པོ་ལ། །རྔ་མོ་ཆེན་མོ་ཁ་དོག་སྔོ། །དེ་ཡི་སྟེང་དུ་བསྒོམ་པར་བྱ། །དེ་ལ་མ་རུངས་ཆེན་པོ་སྟེ། །རྡེག་ཅིང་ལྷོ་ཕྱོགས་འདེད་པ་དང་། །

90-1-190a

ཚེ་འདི་འང་ནི་དེ་བཞིན་དུ། །ཉིང་མཚམས་སྦྱོར་དང་སྲིད་མཚམས་ཡང་། །རྣལ་འབྱོར་རྒྱལ་པོ་ཐབས་ལྡན་པས། །བདེ་ཆེན་ས་གསུམ་བདེ་བླག་འགྲོ། །སྲིད་ཞི་དག་དང་ངེས་པ་དང་། །
རྟེན་འབྲེལ་འབྱུང་དང་ཟློག་དང་གསད། །ཞི་རྒྱས་དབང་དང་ཞི་ལ་སོགས། །འདི་ལ་ཐེ་ཚོམ་མི་བྱའོ། །གཉིས་སྦྱོར་རྒྱུན་མི་འཆད་བདེ་དང་། །ཀུན་ནས་འོད་གསལ་ལྷན་ཅིག་སྐྱེས། །བུང་བས་
མེ་ཏོག་རྩི་ལྟར་ནི། །རྣམ་པ་ཀུན་ཏུ་དོན་བསྒྲུབ་པའོ། །ཨོཾ་ཨ་ཀཱ་རོ་མུ་ཁྃ་སརྦྦ་དྷརྨྨ་ནྃ་ཨཱདྱ་ནུཏྤནྣ་ཏྭཱཏ་སརྦྦ་ནི་སྭ་བྷཱ་བ་ཧཱུྃ། བཅོམ་ལྡན་འདས་ཀྱིས། དེ་སྐད་ཅེས་བཀའ་སྩལ་པ་དང་། 
བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་ལ་སོགས་པ་འཁོར་དེ་དག་ཐམས་ཅད་རབ་ཏུ་ཡི་རངས་ཏེ། ཚིགསུ་བཅད་པ་འདི་དག་གིས་མངོན་པར་བསྟོད་ཅིང་མཆོད་པ་བསམ་གྱིས་མི་ཁྱབ་པ་ཐམས་ཅད་ཀྱིས་
མཆོད་པ་ལ་བརྩོན་པར་གྱུར་ཏེ། འཇིག་རྟེན་མགོན་པོ་བཅོམ་ལྡན་ལེགས། །འགྲོ་བ་ཉོན་མོངས་བསྐྱབ་སླད་དུ། །སྟོང་པའི་ཏིང་འཛིན་སྤངས་ནས་ནི། །ཁྱོད་ཀྱིས་བྱམས་ཆེན་སྐུར་བསྟན་
མཛད། །ཐུགས་རྗེ་ཆེན་པོ་བཅོམ་ལྡན་ལེགས། །སེམས་ཅན་སྡུག་བསྔལ་བསྒྲལ་སླད་དུ། །ཞི་བའི་མཐའ་ལ་མི་གནས་པར། །བརྩེ་ཆེན་རྣམ་པར་འཕྲུལ་པར་མཛད། །བདེ་ཆེན་རྒྱལ་
པོ་བཅོམ་ལྡན་ལེགས། །ལུས་ཅན་བདེ་དོན་བསྒྲུབ་སླད་དུ། །ཟག་མེད་དབྱིངས་ཐུགས་མ་གཞོལ་བར། །དགྱེས་ཆེན་ཀུན་དུ་སྣང་མཛད་ལེགས། །གཙོ་བོ་རྡོ་རྗེ་རྒྱལ་པོ་ལེགས། །སྐྱེ་བོ་དུབ་པ་
ངལ་བསོའི་ཕྱིར། །མཐའ་གཅིག་རྒྱུན་ཆད་མི་བཞུགས་པར། །མ་ལུས་འཚལ་བ་སྒྲུབ་པ་མེད། །དེ་ནས་འཁོར་གྱི་ཚོགས་ཕལ་མོ་ཆེ་དེ་དག་དང་། རྡོ་རྗེའི་རིགས་ཀྱི་བྱང་ཆུབ་སེམས་དཔའ་ཆེན་པོ་དེ་དག་

90-1-190b

ཐམས་ཅད་ཀྱང་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་པའི་ངེས་པར་གྱུར་པ་ཐབས་དང་ཤེས་རབ། བསམ་གྱིས་མི་ཁྱབ་ཅིང་གཞལ་དུ་མེད་པའི་ཏིང་ངེ་འཛིན་ལ་གནས་བཞིན་དུ་ཐམས་ཅད་ཀྱི་
བྱིན་གྱི་བརླབས་ཀྱིས་སེམས་ཅན་ཐམས་ཅད་ལ་ཕན་གདགས་པའི་དོན་དུ། ཆོ་འཕྲུལ་ཆེན་པོ་དུ་མ་བསྟན་ཏོ། །བཅོམ་ལྡན་འདས་ཀྱིས་ཡང་བཀའ་སྩལ་པ། གང་ལ་ལ་ཞིག་བཅོམ་ལྡན་འདས་རྡོ་རྗེ་
མི་བསྐྱོད་པའི་གསང་བ་ཆེན་པོ་རྒྱུད་ཀྱི་རྒྱལ་པོ་འདི་ཉན་པ་དང་། འཛིན་པ་དང་། འཆང་བ་ལ་སོགས་པ་དེ་དག་ནི་ང་དང་རྒྱལ་བ་ཐམས་ཅད་ཀྱིས་དགོངས་པར་འགྱུར་རོ། །རྡོ་རྗེ་འབར་བ་ཁྲག་འཐུང་གི་
རྒྱལ་པོའི་དཀྱིལ་འཁོར་གྱི་ལྷ་བྱེ་བ་ཁྲག་ཁྲིག་མང་པོ་ཡང་དེ་ཡི་ཕྱི་བཞིན་དུ་འབྲང་བར་འགྱུར་རོ། །དྲན་པ་ཙམ་གྱིས་ཚེ་རབས་ཐམས་ཅད་དུ་ཡི་དམ་བྱེད་པར་འགྱུར་རོ། །མིའམ་མི་མ་ཡིན་པ་ལ་སོགས་
པའི་གནོད་པ་ཐམས་ཅད་དང་། འཚེ་བ་དང་ཡ་ང་བ་དང་། བཀྲ་མི་ཤིས་པ་ཐམས་ཅད་འབྱུང་བར་མི་འགྱུར་རོ། །གང་གི་ཁྱིམ་ན་གནས་པ་དེ་ཡང་མཆོད་རྟེན་དུ་བྱ་བར་འགྱུར་རོ། །རིག་པ་དང་དངོས་གྲུབ་
ཐམས་ཅད་ཀྱི་གཏེར་ཚད་མེད་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་དེ་དག་དང་། ལྷ་དང་། མི་དང་། ལྷ་མ་ཡིན་དང་། 
དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །བཅོམ་ལྡན་འདས་རལ་པ་གཅིག་པ་བརྟག་པ་རྡོ་རྗེའི་རྒྱུད་ཆེན་པོ་བླ་ན་མེད་པ་རྫོགས་སྷོ།། །།རྣལ་འབྱོར་གྱི་
དབང་ཕྱུག་ཆེན་པོ་ཤྲཱི་ཛ་ག་ཏ་མི་ཏྲ་ཨཱ་ནནྡའི་བཀའ་དྲིན་ལ་བརྟེན་ནས། རྒྱ་གར་གྱི་པཎྜི་ཏ་ཆེན་པོ་བཛྲ་ཤྲཱི་ཁ་ལ་རུ་ཏྲ་དང་། བོད་ཀྱི་ལོ་ཙ་བ་དགེ་སློང་བྱམས་པའི་དཔལ་གྱིས་བསྒྱུར་བའོ། །མཆན་བུ་ལོ་ཙྪའི་དངོས་བྱས་ནས་ལེགས་རྫོགས་སོ་ཤུབྷྂ།། །།

90-1-191a

༄༅༅། །རྒྱ་གར་སྐད་དུ།  ཤྲཱི་ཙནྡྲ་གུ་ཧྱ་ཏི་ལ་ཀ་ནཱ་མ་མ་ཧཱ་ཏནྟྲ་རཱ་ཛ།  བོད་སྐད་དུ།  དཔལ་ཟླ་གསང་ཐིག་ལེ་ཞེས་བྱ་བ་རྒྱུད་ཀྱི་རྒྱལ་པོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དེ་ནས་བཅོམ་ལྡན་འདས་དེ་
བཞིན་གཤེགས་པ་ཐམས་ཅད་ངོ་མཚར་ཆེན་པོར་གྱུར་ཏེ། ཡང་འདུས་ནས་ཕྱག་གར་དང་བཅས་པས་ཐལ་མོ་ཁོང་སྟོང་དུ་སྦྱར་ནས། བཅོམ་ལྡན་འདས་ཀུན་དུ་བཟང་པོ་ཆེན་པོ་ལ་གཙུག་གིས་འདུད་པས་གསོལ་བ་བཏབ་པ། དཔའ་བོ་ཀུན་གྱི་གསང་
བ་ཡི། །ཟླ་གསང་ཐིག་ལེ་དགའ་བྱེད་པ། །གཉིས་མེད་ཡེ་ཤེས་ཡང་དག་འབྱུང་། །བཅོམ་ལྡན་ཁྱེད་ཀྱིས་བཤད་དུ་གསོལ། །སེམས་ཅན་ཀུན་གྱི་མ་སྐྱེས་པ། །སྐྱེ་དང་མ་སྐྱེས་རྣམ་སྤངས་པའི། །བྱུང་
དང་འབྱུང་འགྱུར་རབ་སྦྱོར་བའི། །མཆོག་ཏུ་རྟོག་པར་སྦྱོར་བའོ། །རིན་ཆེན་ཐམས་ཅད་འབྱུང་གནས་དག །དྲི་མེད་ནམ་མཁའ་དང་འདྲ་བའི། །རྒྱལ་མཚན་ཆེན་པོ་བསྒྲེང་བྱས་ཏེ། །ཉི་མ་ཆེན་པོས་དབང་བསྐུར་
བའོ། །ཆོས་ཀྱི་ལོངས་སྤྱོད་ཡང་དག་འབྱུང་། །པད་མ་དམར་པོ་མཆོག་གི་མདོག །འདོད་ཆགས་དེ་ཉིད་གསང་བ་ཆེ། །ཐམས་ཅད་བདེ་བྱེད་བདུད་རྩིའི་མཆོག །ཨཱ་དང་ལར་ནི་ཡང་དག་ལྡན། །ཡང་དག་
མཛེས་པ་འགྱིང་བའི་འགྲོས། །སྣ་ཚོགས་ཡེ་ཤེས་སྣ་ཚོགས་ཆེ། །ཟླ་གསང་ཐིག་ལེའི་མཆོག་ཉིད་དོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཀུན་ཏུ་བཟང་པོས་དེ་བཞིན་གཤེགས་
པ་ཐམས་ཅད་ཀྱིས་གསང་བའི་གསོལ་བ་བཏབ་པར་མཁྱེན་ནས། འགོག་པ་ཆེན་པོའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཅང་མི་གསུང་བར་བཞུགས་སོ། །དེ་ནས་དེ་བཞིན་གཤེགས་པ་ཐམས་
ཅད་ངོ་མཚར་རྨད་དུ་གྱུར་ཏེ། ཡང་འདུས་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་ལ་དེ་ཁོ་ན་ཉིད་དབྱངས་ཀྱིས་བསྐུལ་ཏེ་བཞེངས་པར་མཛད་དོ། །ཨོཾ་ཧཱུྃ་ཨ། མི་སྐྱེ་ཡེ་ཤེས་བདེ་བའི་མཆོག་དང་ལྡན་པའི་རོ་ལ་

90-1-191b

མནབས་སུ་གསོལ། །ཨ་ལ་ལ་ཧོ། སེམས་པ་བདེ་མཆོག་དེ་ཉིད་འགོག་པ་རྣམས་ལ་བསླང་བའི་ཕྱིར། །ཆགས་པ་མེད་པའི་བདེ་མཆོག་མངའ་མཛད་བཞེངས་ཤིག་བརྣབས། །མཆོག་ཏུ་གསང་བའི་བདེ་ལ་རོལ་ཅིང་
དམ་བཅས་འཇིག་རྟེན་སྒྲོལ། །བྱང་ཆུབ་སྐྱེ་གནས་བདེ་མཆོག་དབྱིངས་ལས་མི་ཉམས་དགའ་བའི་གར་མཛོད་ཅིག །ཨ་ལ་ལ་ཧོ། སྔོན་གྱི་ཞེན་པའི་མཐའ་དང་སྔོ་སྐམས་ཉོན་མོངས་གཟིར་བ་ལ། །རྨོངས་
མེད་བདེ་མཆོག་རྒྱན་དང་ལྡན་པས་ཐབས་ཀྱིས་བསྐུལ་ཏེ་གོ་བར་མཛོད། །འགྲོ་ཀུན་མཚུངས་པར་སྤྱོད་པའི་སྒོ་མོར་བྱང་ཆུབ་ལམ་སྟོན་ཅིང་། །བདེ་མཆོག་བདུད་རྩི་ཁྱད་པར་མེད་པར་འདུས་པའི་ཚོགས་ལ་བཀའ་སྩོལ་
ཅིག །ཨ་ལ་ལ་ཧོ། དེ་ནས་བཅོམ་ལྡན་འདས་ཀུན་དུ་བཟང་པོ་ཆེན་པོ་ནམ་མཁའི་དབྱིངས་ཐམས་ཅད་དུ་ཁྱབ་པའི་བདག་ཉིད་ཆེན་པོས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་ཆེན་པོ་ཟླ་གསང་ཐིག་ལེ་བསྐུལ་
བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རང་གི་ཐུགས་ཀྱི་གསང་བའི་ཐིག་ལེ་ལས་ཤིན་ཏུ་དགྱེས་པ་ཆེན་པོའི་བདེ་བ་ཞེས་བྱ་བའི་འོད་ཟེར་གྱི་ཚོགས་ཕྱུང་ནས། དེ་བཞིན་གཤེགས་པ་ཐམས་
ཅད་ཀྱི་གསང་བའི་སྙིང་པོ་ཟླ་བའི་ཐིག་ལེའི་དབུས་སུ་རྒྱས་པར་བྱས་ཏེ། ནམ་མཁའི་དབྱིངས་ཐམས་ཅད་དུ་ཡང་སྣང་བར་བྱས། སྟེང་དང་འོག་ཏུ་ཡང་ཞུགས་ཏེ། མ་ལུས་ལུས་པ་མེད་པའི་རི་དང་། སེམས་ཅན་
རྣམས་ལ་གསལ་བར་བྱས་ནས་ཤིན་དུ་དགྱེས་པ་ཆེན་པོའི་བདེ་བས་མཉེས་པར་བྱས་ཏེ། སླར་དེ་ཉིད་དུ་ལོག་ནས་བཅོམ་ལྡན་འདས་ཤིན་དུ་མཉེས་པ་ཆེན་པོའི་བདེ་བའི་བདག་པོ་སྙིང་པོ་གསང་བ་མཆོག་གི་ཟླ་བའི་ཐིག་ལེའི་
དབུས་ན་བདེ་བར་བཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་འོད་ཟེར་གྱི་ཚོགས་ཀྱི་ཕྲེང་བ་མཆོག་ཏུ་བདེ་བ་ཆེན་པོར་གྱུར་པའི་སྙིང་པོ་དེས་བསྐུལ་བ་ན། གར་མཛད་ཅིང་རང་རང་

90-1-191c

གི་ཏིང་ངེ་འཛིན་དུ་དམིགས་ནས། བཅོམ་ལྡན་འདས་ཀུན་ཏུ་བཟང་པོ་ཆེན་པོའི་ཐུགས་ཁའི་ཟླ་བའི་ཐིག་ལེའི་དབུས་སུ་མཆོག་ཏུ་གསང་བའི་ཤིན་ཏུ་དགྱེས་པ་ཆེན་པོའི་བདེ་བར་གཅིག་ཏུ་སྟུག་པོར་གྱུར་
པ་བསྒྲུབས་ཏེ། རང་རང་གི་སྐུ་བུད་མེད་ཀྱི་ཚུལ་དུ་བསྐྱེད་ནས། བཅོམ་ལྡན་འདས་ཀྱི་ཐུགས་ཁ་ནས་མངོན་པར་བྱུང་བར་གྱུར་ཏོ། །དེ་ནས་ལ་ལ་ནི་སྤྱན་པད་མོ་འབར་བ་རྒྱས་པ་ལྟར་བསྒྱུར་ཞིང་བཟློག་སྟེ་སྨིན་རིས་གཡོ་
བས། སངས་རྒྱས་ཚུལ་གྱིས་གར་མཛད་ཅིང་། །སངས་རྒྱས་རྣལ་འབྱོར་མ་དཀྱིལ་དུ། །རྡོ་རྗེ་རབ་དགྱེས་གདོན་མི་ཟ། །སེམས་དཔའ་ཆེ་ལ་དགྱེས་མཛད་ཅིང་། །སངས་རྒྱས་བདེ་བའི་བདེ་བ་ཡིས། །བཅོམ་ལྡན་
སངས་རྒྱས་བཞུགས་པར་འགྱུར། །སྨིན་མ་བསྒྱུར་ཞིང་ཞབས་བསྒྱུར་བ། །སྤྱན་བསྒྱུར་ཤིན་ཏུ་གནོན་པ་ཡི། །སོར་མོའི་མཐའ་མ་རྣམས་བསྒྱུར་བ། །རྡོ་རྗེའི་ཚུལ་གྱིས་གར་མཛད་དེ། །རྡོ་རྗེ་ཆེ་ལ་མཉེས་མཛད་ཅིང་། །རྡོ་རྗེ་
རྣལ་འབྱོར་མ་དཀྱིལ་དུ། །སྐད་ཅིག་སྐད་ཅིག་བསྐུལ་བ་ཡིས། །བཅོམ་ལྡན་རྡོ་རྗེ་གནས་པར་གྱུར། །བརྗིད་པའི་ཞབ་དང་རིན་ཆེན་དབུ། །དྲི་མེད་སྤྱི་བོས་གར་མཛད་ཅིང་། །ཞལ་གྱི་དཀྱིལ་འཁོར་རྣམས་བསྒྱུར་བས། །བདེ་
བྱེད་ཆེན་པོ་མྱང་བར་མཛད། །དུར་ཁྲོད་ཡོན་ཏན་ཚོགས་དག་གི། །པད་མོའི་སྤྱན་གྱིས་གཟིགས་མཛད་ཅིང་། །བདེ་བ་བདག་པོ་ཆེན་པོ་ལ། །རིན་ཆེན་ཚུལ་གྱིས་མཛེས་པར་མཛད། །ཤིན་ཏུ་དགྱེས་གསལ་བདེ་དམ་པ། །
པད་མོ་དམར་ལ་ཕྱེ་མཛད་དེ། །འདོད་ཆགས་བུལ་དགྱེས་རྣམ་བསྒྱུར་བར། །པད་མོ་དྲ་བས་གར་མཛད་ཅིང་། །པད་མོ་རྣལ་འབྱོར་མ་ཀྱིལ་དུ། །བརྗིད་པའི་སྤྱན་གྱིས་ཀུན་གཟིགས་ཏེ། །བདེ་བ་ཆེ་ལ་མཉེས་མཛད་ཅིང་། །བཅོམ་
ལྡན་པད་མོར་གནས་པར་གྱུར། །ཕྱག་གིས་རྩེ་མོར་སོར་མོའི་མཐའ། །རྣམ་པར་བསྒྱུར་བས་གར་མཛད་ཅིང་། །ཕྱག་སྦྱར་ཁོང་སྟོང་པད་མོ་ཡིས། །གློག་བཞིན་དཔལ་དང་སྤྱི་གཙུག་ཏུ། །མཆོད་པའི་སྤྲིན་གྱིས་ལོང་ལོང་པོས། །

90-1-191d

སྣ་ཚོགས་བདེ་བྱེད་གཙོ་ཉིད་ལ། །ལས་ཀྱི་ཚུལ་གྱིས་མཉེས་མཛད་ཅིང་། །སྣ་ཚོགས་བཅོམ་ལྡན་གནས་པར་གྱུར། །དེ་ནས་བཅོམ་ལྡན་འདས་བདེ་བ་ཆེན་པོ་དཔལ་རྡོ་རྗེ་སེམས་དཔའ་ཀུན་ཏུ་བཟང་པོ་ཆེན་པོ་དེ་བཞིན་
གཤེགས་པ་ཐམས་ཅད་ཀྱི་མཆོག་ཏུ་གསང་བ་ཟླ་གསང་ཐིག་ལེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཡང་དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་གསང་བ་དང་། པད་མོ་དང་ལས་ཀྱི་གསང་བ་ཆེན་པོ་ཐམས་ཅད་
ཀྱིས་བཞེད་པ། བདེ་བ་ཆེན་པོ་ཞེས་བྱ་བ་འོད་ཟེར་ཆེན་པོའི་སྤྲིན་གྱི་ཚོགས་ཉིད་ཀྱི་སྐུ་དང་། གསུང་དང་། ཐུགས་རྡོེ་མཆོག་ལས་ཕྱུང་ངོ་། །དེ་ནས་དེ་བཞིན་གཤེགས་པའི་སྐུ་འདི་དག་ཐམས་ཅད་སྣང་བས་སྣང་བར་བྱས་ཏེ། ཉིད་ཀྱི་ཐུགས་
ཀྱི་ཟླ་བའི་ཐིག་ལེ་ལ་སྟུག་པོ་གཅིག་ཏུ་གྱུར་ནས་བཞུགས་ཏེ། ཐུགས་ཀྱི་ཟླ་བའི་ཐིག་ལེའི་དབུས་སུ་འོད་ཟེར་དེས་དགྱེས་པ་བསྐྱེད་ཅིང་དྲངས་ནས་བཅུག་སྟེ་གཅིག་ཏུ་བྱས་ནས་ཉིད་ཀྱི་སྐུ་དང་། གསུང་དང་། ཐུགས་དགྱེས་པ་ཆེན་པོ་གདོན་མི་ཟ་
བར་རྣམ་པར་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་ཟླ་གསང་ཐིག་ལེ་ཞེས་བྱ་བའི་དཀྱིལ་འཁོར་གྱི་རྒྱལ་པོ་ཆེན་པོ་ཤིན་ཏུ་དགྱེས་པའི་བདེ་བ་ཆེན་པོ་ཉིད་ཀྱི་སྐུ་
དང་། གསུང་དང་། ཐུགས་རྡོ་རྗེ་ལས་ཕྱུང་ངོ་། །དཀྱིལ་འཁོར་གྱི་ནི་ཚུལ་གྱིས་སུ། །ཆོ་ག་སྦྱོར་བས་སྤྲོ་བྱས་ཏེ། །ཐེག་དང་མཐུན་པར་དཀྱིལ་འཁོར་དོན། །སྦྱོར་བའི་གར་གྱིས་གར་བྱ་ཞིང་། །ཇི་ལྟར་ཡང་དག་བརྟག་པར་བྱ། །ཇི་ལྟར་
དཀྱིལ་འཁོར་དེ་ཁོ་ན། །ཟླ་གསང་ཐིག་ལེའི་དཀྱིལ་འཁོར་ནི། །རྡོ་རྗེ་སེམས་དཔའ་དཔའ་བོས་ཀྱང་། །བརྟག་པར་ནུས་པ་མ་ཡིན་ནོ། །དཀྱིལ་འཁོར་ཡེ་ཤེས་ཀྱིས་བརྟགས་པ། །སྙིང་པོ་ཕྱག་རྒྱ་སྔགས་རིག་གིས། །ལྷ་ཡི་
སྦྱོར་བས་རྒྱས་བཏབ་པས། །ཆོ་ག་ཤེས་པས་བྲི་བར་བྱ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ཡང་དག་ལྡན། །ཐིག་བཞིས་ཡོངས་སུ་བྲིས་པ་སྟེ། །ཀ་བ་བརྒྱད་མཆོག་ཡང་དག་གནས། །ཀུན་ཏུ་ཡོངས་སུ་ཟླུམ་

90-1-192a

པ་སྟེ། །ཟླ་བ་དེ་ཡི་དབུས་བསམ་པ། །བདེ་བ་ཆེན་པོ་མི་ཕྱེད་པ། །གཙོ་བོ་དེ་སྟེང་བྲི་བར་བྱ། །དེ་ནི་ཚེག་དྲག་བཅས་པ་སྟེ། །ཡི་གེ་བཅུ་གསུམ་ལྡན་པ་ཡི། །ཡི་གེ་མཆོག་ཏུ་བདེ་བ་སྟེ། །རླུང་གི་
དཀྱིལ་འཁོར་ཡང་དག་འབྱུང་། །ཤེས་རབ་ཅན་གྱིས་དེ་མདུན་དུ། །མི་ཕྱེད་ཡིད་ཕྱུང་བྲི་བྱ་སྟེ། །དྲག་པོའི་ཚེག་དང་འདྲེན་པར་བཅས། །བཞི་ཡིས་གཙུག་ཏུ་བྱས་པའོ། །དེ་ཡི་ལྷོ་ཡི་ཕྱོགས་སུ་ནི། །མི་སྨྲ་
བ་ཡི་ཡི་གེ་མཆོག །ཕྱག་རྒྱའི་ཡེ་ཤེས་མཆོག་ཐམས་ཅད། །སྒྲུབ་པར་བྱེད་པའི་ཡི་གེ་བྲི། །ཧ་དང་རང་ལྡན་ཚེག་དྲག་བཅས། །བཞི་པོ་ཡི་ནི་དབུས་བྱས་པ། །སྔགས་ཀྱི་གཟུགས་ཀྱི་ཡི་གེ་ནི། །ནུབ་ཀྱི་ཕྱོགས་སུ་བྲི་
བར་བྱའོ། །ཁྲོ་བོའི་ཡི་གེ་ཡེ་ཤེས་ཆེ། །ཡི་གེའི་ཕྱག་རྒྱའི་རྨད་བྱུང་བ། །བརྗིད་དུ་བཅས་པ་དགོད་པ་ཡི། །བྱང་གི་ཕྱོགས་སུ་བྲི་བར་བྱ། །སེམས་ཅན་ཐམས་ཅད་མཆོག་དག་དང་། །དགྱེས་པ་ཆེན་པོ་རབ་འགྲུབ་ཕྱིར། །
ང་ཡི་དེ་ཉིད་གསུང་གིས་ནི། །དཀྱིལ་འཁོར་དེ་ཉིད་བསྟན་པ་ཡིན། །སངས་རྒྱས་བྱང་ཆུབ་བདེ་ཆེན་པོ། །གར་གྱིས་ཚུད་པས་རྫོགས་སངས་རྒྱས། །སེམས་ཅན་མཆོག་གིས་སྟོན་བྱེད་ན། །དེ་ཉིད་སངས་རྒྱས་བྱང་ཆུབ་འགྲུབ། །
དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་གཅིག་ཏུ་འདུས་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་བདག་པོ་རྡོ་རྗེ་འཛིན་ཆེན་པོ་ལ་གར་མཛད་ཅིང་། རབ་ཏུ་སྤྲོས་པ་སྤྱན་གདངས་ནས། །ཞབ དང་ཞབས་
ཀྱིས་གནོན་པ་ཡིས། །སྡུད་ཅིང་འདོར་བ་འཛུགས་པར་མཛད། །གཡས་དང་གཡོན་གྱི་ཕྱག་གཉིས་ཀྱིས། །རྗིད་པའི་རྩེ་མོ་མཐའ་ལས་དགྲོལ། །ཅུང་ཟད་ཟུར་གྱིས་གདངས་པའི་སྤྱན། །མཛེས་པའི་སྤྱན་ཚུགས་རྣམ་བསྒྱུར་བས། །སྤྱན་
གྱི་ཕྱག་རྒྱས་གར་མཛད་པས། །འགྲོ་ལ་རྒྱས་བཏབ་འདུད་པར་འགྱུར། །སེམས་དཔའ་ཆེན་པོ་དཔའ་བོ་ལ། །དབྱངས་འདི་ཡིས་ནི་བསྐུལ་མཛད་ཅིང་། །ཤིན་ཏུ་དགྱེས་ཆེ་དཀྱིལ་འཁོར་དུ། །རྣལ་འབྱོར་མ་ཀུན་གནས་པར་འགྱུར། །

90-1-192b

ཤིན་ཏུ་དགྱེས་ཆེ་རྡོ་རྗེ་དག །སངས་རྒྱས་ཀུན་གྱི་བདེ་ཆེན་པོ། །དཀྱིལ་འཁོར་མཆོག་ཏུ་དགྱེས་པ་ཡི། །དེ་ཉིད་བཅོམ་ལྡན་ཉིད་ཀྱིས་ཤོད། །རྣམ་པ་ཀུན་ཏུ་སྐྱེ་བ་མེད་པའི་བདེ་བས་རོལ་ཅིང་ཆུབ་མཛད་པའི། །བདག་ཅག་
གཟུགས་ཀྱི་དམ་དང་བཅས་ཏེ་རྣམ་སྤྱོད་འགྱུར་བ་མེད་པའི་ཡིད། །བདེ་མཆོག་བྱང་ཆུབ་སེམས་ནི་རྣམ་པ་ཀུན་ཏུ་སྡུག་བསྔལ་ཡོངས་བྲལ་ཏེ། །ཆེ་བའི་ཡེ་ཤེས་ལྷུན་གྲུབ་མཆོག་ལྡན་བདེ་སྤྱོད་བདེ་ལ་རོལ་པར་མཛོད། །ཨ་ལ་ལ་ཧོ། །འདི་ནི་
གླུ་རུ་བླངས་པ་ཡིས། །ཤིན་ཏུ་སྲིད་པས་མྱ་ངན་འདས། །དགའ་ཆེན་དེ་བཞིན་གཤེགས་པ་རྣམས། །དཀྱིལ་འཁོར་འདི་ལ་བྱིན་གྱིས་རློབ། །དེ་ནས་བཅོམ་ལྡན་འདས་རྡོ་རྗེ་བདེ་བ་ཆེན་པོ་ཞལ་འཛུམ་པ་དང་བཅས་པས་རྒྱས་པའི་སྤྱན་
ཨུདྤ་ལ་ཁ་ཕྱེ་བ་བཞིན་སྨིན་མ་དང་སྐུ་རྣམ་པར་འགྱུར་བ། གློག་དང་ཆུ་རླབས་བཞིན་དུ་འགྱུར་བའི་རྣམ་པར་གནོན་པས་ཉིད་ཀྱི་སྐུ་དང་གསུང་དང་། ཐུགས་རྡོ་རྗེ་ལས་དེ་ཁོ་ན་ཉིད་འདི་གསུངས་སོ། །དཀྱིལ་འཁོར་དཀྱིལ་འཁོར་ཞེས་བྱ་བ། །
རྡོ་རྗེ་ཡེ་ཤེས་ཐུགས་ལ་གནས། །དཀྱིལ་འཁོར་རྡོ་རྗེའི་མཆོག་ཉིད་ནི། །བདག་ཉིད་སྦྱོར་བས་བརྟགས་པ་ཡིན། །རྡོ་རྗེ་དགྱེས་པ་ཆེན་པོ་ཡི། །དཀྱིལ་འཁོར་ཟླ་བ་གང་བ་འདྲ། །འོད་ཟེར་དཀར་པོའི་ཕྲེང་བས་མཛེས། །བྱང་ཆུབ་སེམས་
མཆོག་འདྲ་བ་ཡིན། །རྡོ་རྗེ་དཔའ་བོའི་དཀྱིལ་འཁོར་ནི། །མཛེས་པའི་ཟླ་བ་ཁམ་པ་ལ། །མཐིང་གའི་འབར་བ་ཀུན་རྒྱས་པ། །མེ་དང་རླུང་གིས་བུས་པ་བཞིན། །ཤིན་ཏུ་དགྱེས་པའི་མཆོག་སྒྲུབ་པ། །རྡོ་རྗེ་རིན་ཆེན་དཀྱིལ་འཁོར་ནི། །
དགའ་བྱེད་དཀྱིལ་འཁོར་ཆ་བརྒྱད་ཀྱི། །འབར་དང་བཅས་པའི་ཉི་མ་བཞིན། །དཀྱིལ་འཁོར་དགྱེས་མཆོག་འབྱུང་བྱེད་པ། །པད་མོའི་དབང་པོ་པད་མ་འདྲ། །འདབ་མ་བརྒྱད་པོ་གྱེས་པ་ཡི། །གེ་སར་ཟླ་བས་མཛེས་བྱས་པའོ། །
ཐམས་ཅད་ལས་ནི་གྲུབ་བྱེད་པ། །རྡོ་རྗེའི་ལས་ཀྱི་དཀྱིལ་འཁོར་ནི། །དགའ་བྱེད་དཀྱིལ་འཁོར་གྲུ་གསུམ་སྟེ། །རབ་ཏུ་འབར་བ་མེ་དང་འདྲ། །དེ་ལ་སོགས་པ་མཐའ་ཡས་པའི། །དཀྱིལ་འཁོར་རྣམས་ནི་བརྟག་པར་བྱ། །

90-1-193a

སྐྱོང་བ་རྡོ་རྗེ་སེམས་དཔའ་ཡིས། །ཇི་ལྟར་དེ་ཉིད་སྤྲུལ་པ་ཡིན། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་བཞེངས་ནས་བརྗིད་པའི་རྡོ་རྗེ་གང་དག་གིས་གར་མཛད་ཅིང་གླུ་དང་སིལ་སྙན་གྱི་གླིང་
བུ་དང་པི་ཝང་དང་། རྫ་རྔ་དང་། དུནྡུ་བྷི་དང་། བ་ན་ཝ་དང་། པ་ལི་ཀ་དང་། ཞི་བའི་ཐལ་མོ་ལ་སོགས་པ་དང་། རྣམ་པ་སྣ་ཚོགས་ཀྱིས་ཀུན་ཏུ་བརྡུང་བ་དང་། སིལ་སྙན་ལ་སོགས་པའི་རྣམ་པར་རོལ་པས་ལྷའི་རོ་དང་། རོའི་ཟས་དང་། 
བཟའ་བ་དང་། བཅའ་བ་དང་། བཏུང་བ་དང་། ཐེག་པ་དང་། སྟན་དང་། གོས་དང་། བལྡག་པ་དང་། བཞིབ་པ་དང་། འཇམས་ལ་སོགས་པ་རྣམ་པ་སྣ་ཚོགས་ཀྱིས་བཅོམ་ལྡན་འདས་བདེ་བ་ཆེན་པོ་དཔལ་རྡོ་རྗེ་འཛིན་པ་ལ་བསྟབས་
ནས་གུས་པ་དང་བཅས་པས་པད་མོའི་སོར་མོ་ཁོང་སྟོང་དུ་མཛད་དེ་གཡོན་དུ་བཏུད་པའི་ཚུལ་གྱིས་འཛུམ་པ་དང་བཅས་པའི་སྤྱན་གདངས་ཏེ། ཡང་དེ་ཁོ་ན་ཉིད་བསྐུལ་བར་མཛད་པའི་དབྱངས་འདིས་བསྟོད་པ་མཛད་དོ། །ཤིན་ཏུ་
བདེ་བའི་བྱམས་པ་ཀུན་ཏུ་གཟིགས་པའི་ཐུགས་རྗེ་སྤྱན་མངའ་བས། །བྱང་ཆུབ་ཆེན་པོ་སྙིང་པོར་འགྲོ་བ་བསྒྲལ་བས་སྐྱོ་ཡིད་མི་མངའ་སྟེ། །མཐུན་པའི་ལམ་སྟོན་ཉོན་མོངས་དྲུག་ལས་བསྒྲལ་བའི་ཕྱིར། །ནམ་མཁའི་ཚུལ་དུ་གཟུངས་
ཀྱི་རང་བཞིན་བདེ་གཤེགས་ཀུན་ལ་སྟོབས། །ཨེ་མའོ། །བདེ་བ་ཀུན་ཏུ་རྒྱས་པས་ཆེ་བའི་ཡེ་ཤེས་འདྲེན་ཅིང་བསྣམས། །ས་ཡི་ཁྱད་པར་བདེ་བས་རྫོགས་པའི་སྐུ་ཉིད་སྟོང་པས་ཚོགས་པའི་རྒྱལ་པོ་བཞིན། །ཆོས་ཉིད་ཇི་བཞིན་དེ་ལ་རེག་པས་
སྐུ་ཉིད་ཆེ་བ་ཀུན་སྟོན་ཅིང་། །སྙིང་པོ་བྱང་ཆུབ་བགྲོད་ཕྱིར་འགྲོ་བ་ཐམས་ཅད་སྒོ་མོ་བསམ་གྱིས་མི་ཁྱབ་བསྟེན། །དཔལ་གྱི་སྙིང་པོ་གཟུངས་སུ་བསྟེན་ཏེ་རིགས་ལྔའི་གཙོ་རྣམས་མཉེས་མཛད་ཅིང་། །དགྱེས་པས་དྲོངས་ལ་བནབས་ཤིང་རབ་ཏུ་
དགྱེས་པས་རོལ་མོ་མཛོད། །དེ་བཞིན་གཤེགས་པའི་བདེ་བ་མནོས་ཏེ་བྱིང་བའི་གནས་ནས་བསླང་བའི་ཕྱིར། །གནོད་སྦྱིན་ཆ་ལུགས་སྐྱེ་འགོག་མེད་པའི་ཚུལ་དང་རྣམ་པར་ལྡན། །སྙིང་རྗེ་ཆེན་པོ་རྒྱུན་དང་བཅས་ནས་བདེ་བ་ཆེན་པོ་

90-1-193b

སྟོན་པའི་ཆོས་ཉིད་ནམ་མཁའ་བཞིན། །དགྱེས་པ་མཆོག་གི་ངང་ལ་སྤྲུལ་པའི་ལྷ་མོ་སྐྱེ་མཆེད་དང་། །རོལ་པས་འདུས་པའི་ཚོགས་ལ་བདེ་མཆོག་སྩོལ་བར་མཛོད། །ཧ་ཧ་ཧ་ཧོཿབདེ་ལ་གནས་ཤིང་བདེ་བསྒོམས་ཧཱུྂ། །དགྱེས་
པ་མཆོག་དང་ལྡན་པའི་མི་སྐྱེ་བདེ་མཆོག་བདེ་ལ་ཆར་པ་རབ་ཏུ་དབབ་ཏུ་གསོལ། །རྣམ་པ་ཀུན་ཏུ་མཐའ་དང་བྲལ་བའི་དབྱིངས་ལ་བདེ་གཤེགས་སློབ་མ་གཟུངས་དུ་གསོལ། །དཔལ་གྱི་རྒྱལ་པོ་ཚུལ་བཞིན་དེ་ལྟར་བཞུགས་
པའི་གནས་སུ་བསྣམས་སུ་གསོལ། །ངོ་མཚར་བྱང་ཆུབ་ཆེ་བ་འདི་ཉིད་འགྲོ་བ་རྟེན་བཞིན་བདེ་ཐོབ་པ། །ཕ་རོལ་ཕྱིན་དྲུག་དངོས་ཉིད་གང་ལའང་མི་བརྟེན་པར། །མི་སྐྱེ་མྱ་ངན་འདས་པའི་གཟུངས་དང་རྟག་ཏུ་རྣམ་པར་ལྡན། །མཐའ་དང་
བྲལ་བའི་བདེ་བས་ཆོས་ཀྱི་དབྱིངས་ལ་གནས་པ་ཡི། །རྨོངས་པའི་བདེ་བས་བྱིང་ཞིང་གནས་པའི་འགྲོ་ལ་སྙིང་རྗེའི་ཆུས་ཁྲུས་མཛོད་ཧོཿ། དེ་ནས། ཤིན་ཏུ་དགྱེས་མཆོག་མི་ཆགས་པ། །འདི་ནི་གླུ་རུ་བླངས་པ་ཡིས། །ཡིད་དང་
མཐུན་པའི་བདེ་ཆེན་པོ། །དངོས་གྲུབ་མྱུར་དུ་འཐོབ་པར་འགྱུར། །དེ་ནས་བཅོམ་ལྡན་འདས་ཀུན་ཏུ་བཟང་པོ་བདེ་བ་ཆེན་པོ་དཔལ་རྡོ་རྗེ་སེམས་དཔའ་དེ་བཞིན་གཤེགས་པ་ཐམས་ཅད་ཀྱི་བདག་པོ་ལ་གསོལ་བའི་དབྱངས་ཀྱིས་བསྟོད་པ་ཉེ་
བར་གནས་ནས་ཡང་ཆུ་སྐྱེས་ཀྱི་འདབ་མ་དྲི་མ་མེད་པ་དང་འདྲ་བའི་སྤྱན་གྱིས་ཀུན་ཏུ་གཟིགས་ཤིང་འཛུམ་པ་དང་བཅས་པས་ཞལ་རྒྱས་པར་གྱུར་ནས། ཡང་ཚད་མེད་པ་མཐའ་ཡས་པའི་སངས་རྒྱས་ཀྱི་ཞིང་རྡུལ་ཕྲ་རབ་ཀྱི་ཚོགས་ཀྱི་
འཇིག་རྟེན་གྱི་ཁམས་མང་པོ་བསྐལ་པ་རྒྱས་པའི་སྤྲིན་གྱི་རྒྱ་མཚོ་མ་ལུས་ལུས་པ་མེད་པའི་དེ་བཞིན་གཤེགས་པ་དང་། རྡོ་རྗེ་དང་། ནོར་བུ་རིན་པོ་ཆེ་དང་། པད་མ་དང་། ལས་ཀྱི་རིགས་ཐམས་ཅད་ལས་བྱུང་བའི་དེ་བཞིན་གཤེགས་པ་དང་། རྡོ་རྗེ་འཛིན་དང་། རིན་ཆེན་འཛིན་
དང་། ཆོས་འཛིན་དང་། སྣ་ཚོགས་རྡོ་རྗེ་འཛིན་པ་ཆེན་པོ་ཐམས་ཅད་དང་། རྣལ་འབྱོར་གྱི་དབང་ཕྱུག་གི་ཚོགས་ཆེན་པོ་དང་། ཐུགས་ལས་བྱུང་བ་དང་། མཚོན་དང་དགའ་བ་དང་། སྒེག་མོ་ལ་སོགས་པའི་རྣལ་འབྱོར་མའི་དབང་ཕྱུག་ཆེན་མོའི་གཡོག་གི་ཚོགས་ཚད་མེད་པ་འདྲེན་པར་བྱེད་པ་དང་། 

90-1-194a

འགུགས་པར་བྱེད་པ་དང་། འཇིབ་པར་བྱེད་པ་ལ་སོགས་པའི་རྡོ་རྗེ་ནམ་མཁའ་ལ་འགྲོ་བ་དང་། ནམ་མཁའ་ལ་འགྲོ་བ་ཆེན་མོའི་ཚོགས་དང་། གྲངས་མེད་པའི་རྡོ་རྗེ་འཕྲོག་པར་བྱེད་པའི་ཚོགས་དང་། གཞན་ཡང་ཕྱི་རོལ་
གྱི་རྡོ་རྗེ་དང་། རིན་པོ་ཆེ་དང་། པད་མ་དང་། ལས་ཀྱི་རིགས་ལས་བྱུང་བའི་རྣལ་འབྱོར་དང་། རྣལ་འབྱོར་གྱི་དབང་ཕྱུག་ཆེན་པོ་དང་། ནམ་མཁའ་ལ་འགྲོ་བའི་ཚོགས་རྣམས་ལ་རྣམ་པར་བདེ་བ་ཆེན་པོ་གྱུར་པ་དང་བཅས་པའི་ཀུན་ཏུ་གཟིགས་པའི་སྤྱན་
གྱིས་གར་མཛད་པ་དང་། རྣམ་པར་འགྱུར་བ་དང་བཅས་པའི་རྣམ་པར་གནོན་པས་ཀུན་ཏུ་གནོན་པས། རྣམ་པར་འགྱུར་བ་དང་བཅས་པས་འདེག་ཅིང་ཚེམས་ཀྱིས་འདེབས་པ་དང་། རྣམ་པར་འགྱུར་བ་དང་བཅས་པའི་ཀུན་ཏུ་འབྲེལ་པའི་ཕྱག་
གིས་གར་མཛད་པ་དང་། རྣམ་པར་འགྱུར་བ་དང་བཅས་པའི་སྒེག་པས་འགྱིང་བ་དང་། སྤྱོད་པ་དང་མི་སྤྱོད་པར་བཅས་པའི་རྣམས་དང་། ཀུན་ཏུ་འདོར་བའི་རྣམ་པར་གནོན་པས་འཁོར་གྱི་ཚོགས་ཀྱི་དཀྱིལ་འཁོར་ཆེན་པོ་ལ་བྱིན་གྱིས་བརླབས་
ནས་དགྱེས་པ་ཆེན་པོ་རྡོ་རྗེ་གདོན་མི་ཟ་བ་ཞེས་བྱ་བ་དཀྱིལ་འཁོར་གྱི་རྒྱལ་པོ་ཆེན་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །བདག་ཉིད་དེ་ཉིད་མཉམ་གཞག་དང་། །དེ་བཞིན་ལྷ་ཡི་དེ་ཉིད་དང་། །སྔགས་དང་ཕྱག་རྒྱ་དེ་ཉིད་དང་། །
དེ་ཡི་དཀྱིལ་འཁོར་མཆོག་ཏུ་འགྱུར། །ཡན་ལག་ཐམས་ཅད་བསྒོམ་ལས་འདས། །རྟོག་དང་མི་རྟོག་རྣམ་སྤངས་པ། །འདྲེན་དང་ཚིག་ལས་ཡང་དག་འདས། །འདི་ནི་དཀྱིལ་འཁོར་མཆོག་ཅེས་བྱ། །ཆོས་དང་ཆོས་
མིན་རྣམ་སྤྱོད་པ། །ཆོས་རྣམས་ཐམས་ཅད་བརྟག་པར་བྱ། །རྣམ་དག་ནམ་མཁའ་འདྲ་བ་ཡི། །དཀྱིལ་འཁོར་འདི་ནི་བསྟེན་པ་ཡིན། །འདོད་ཆགས་མི་ཆགས་འདོད་ཆགས་མཉམ། །ཆུ་ཡི་པད་མ་དམར་བ་འདྲ། །རང་
སེམས་འདོད་ཆགས་ཤིན་ཏུ་ཆགས། །འདི་ནི་དཀྱིལ་འཁོར་མཆོག་ཡིན་ནོ། །གཟུགས་དང་གཟུགས་མིན་དྲི་མེད་པས། །གང་ཁམས་ཀུན་ལ་འཇུག་འགྱུར་བ། །སེམས་ནི་ཆུ་དང་སྐུལ་བྱེད་པ། །དཀྱིལ་འཁོར་དཀྱིལ་འཁོར་

90-1-194b

ཞེས་བྱའོ། །དེ་ནས་དེ་བཞིན་གཤེགས་པ་རྣལ་འབྱོར་གྱི་དབང་ཕྱུག་ཆེན་པོ་གཡོག་དང་བཅས་པ་དང་། ཕོ་ཉ་དང་ཕོ་ཉ་མོ་དང་། ནམ་མཁའ་ལ་འགྲོ་བ་ཆེན་པོ་དང་། ནམ་མཁའ་ལ་འགྲོ་བ་ཆེན་མོའི་ཚོགས་ཀྱི་དཀྱིལ་འཁོར་
དེ་དག་ཐམས་ཅད་ཡང་བཅོམ་ལྡན་འདས་དཔལ་ཀུན་ཏུ་བཟང་པོ་རྡོ་རྗེ་འཛིན་གཙོ་བོ་ཆེན་པོ་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །ཀྱེ་མའོ་རབ་དགྱེས་སེམས་དཔའ་མཆོག །ཀྱེ་མའོ་རབ་དགྱེས་ཕྱོགས་བསྒྱུར་བ། །རྣལ་
འབྱོར་མ་ཡི་ཚོགས་མཆོག་གི། །དཀྱིལ་འཁོར་གསང་བ་ཉིད་ཀྱིས་གསུངས། །སངས་རྒྱས་སྦྱོར་བ་སྦྱོར་ཆེ་བ། །རྡོ་རྗེ་སྦྱོར་བ་བླ་ན་མེད། །འཇིགས་གསུམ་བདེ་མཆོག་ཐོབ་འགྱུར་བས། །གསང་བའི་དཀྱིལ་འཁོར་ཉིད་ཀྱིས་གསུང་། །
རིན་ཆེན་པད་མ་སྣ་ཚོགས་ཆེ། །སྣ་ཚོགས་སྦྱོར་བའི་གར་མཛད་པ། །རྣམ་གྲངས་ཐིག་ལེའི་འཇིག་རྟེན་དུ། །རྣམ་དག་དཀྱིལ་འཁོར་ཉིད་ཀྱིས་གསུང་། །དེ་ནས་བཅོམ་ལྡན་འདས་ལ་རྣལ་འབྱོར་མ་ཐམས་ཅད་གར་དང་བཅས་པའི་
ཕྱག་པད་མའི་སོར་མོའི་འདབ་མ་ཀུན་ཏུ་འབྲེལ་པའི་རྡོ་རྗེའི་ཐལ་མོ་དང་། གར་རྣམ་པར་འགྱུར་བའི་བརྗིད་བག་ཏུ་བཅས་པས་མཐའ་འགྲོལ་ཞིང་མ་མཆུ་ཚེམས་ཀྱིས་མནན་ནས་ཆུ་སྐྱེས་སར་པའི་འདབ་མ་བཞིན་གཟིགས་པས་བཞད་པ། 
གླུའི་ཕྱག་རྒྱས་དབྱངས་ལེན་པ་དང་། གཅིག་ལ་གཅིག་བསྐུལ་བ་དང་། བདག་ཉིད་ཀྱི་དཔུང་པ་ལ་འདེགས་ཤིང་གཡས་དང་གཡོན་པའི་རྣལ་པར་གནོན་པའི་ཚུལ་གྱིས། ཨོཾ། ཧཱུྃ་ཨ་ལ་ལ་ལ་ཧོ། །ཀུན་ཏུ་སྣང་ཞིང་མི་ཆགས་
པར། །མི་ཆགས་པ་ཡི་བདེ་མཆོག་གིས། །བདེ་བའི་རྣལ་འབྱོར་གཟུགས་ཀྱི་རྣམས། །སྟོབས་ཤིང་བདེ་བ་སྦྱིན་མཛད་པས། །ཨ་ལ་ལ་ཧོ། བསམ་གྱིས་མི་ཁྱབ་ནམ་མཁའི་རང་བཞིན་ཏེ། །བཞེངས་ཤིང་གཞན་ལ་སྟོབ་ལ་
གྲུབ་པར་མཛོད། །ཆགས་པས་མི་གོས་དངོས་པོ་ཡི། །བདེ་བ་ཀུན་ལ་རེག་པར་མཛད་ཅིང་དགོངས་སུ་གསོལ། །དེ་ནས་ཀུན་ཏུ་བཟང་པོ་ཤིན་ཏུ་དགྱེས་པ་ཆེན་པོ་རྡོ་རྗེའི་བདག་པོ་དེ་ཁོ་ན་ཉིད་ཀྱིས་དབྱངས་ཆེན་པོའི་བསྐུལ་བས་ཐུགས་

90-1-195a

སད་པར་གྱུར་ཏེ། ཤིན་ཏུ་དགྱེས་པ་ཆེན་པོ་ཀུན་ཏུ་ལོངས་སྤྱོད་པ་རྡོ་རྗེ་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཤིན་ཏུ་དགྱེས་པ་ཆེན་པོའི་རྡོ་རྗེ་གདོན་མི་ཟ་བའི་རྣལ་འབྱོར་མའི་ཚོགས་ཀྱི་དཀྱིལ་འཁོར་
ཆེན་པོ་འདིར་སྣ་ཚོགས་ཤིན་ཏུ་དགྱེས་པ་ཆེན་པོའི་རྣམ་པར་གནོན་པར་གར་མཛད། ཤིན་ཏུ་དགྱེས་པ་ཆེན་པོའི་རྡོ་རྗེའི་དབྱངས་ཀྱིས་གླུ་ལེན། རྡོ་རྗེ་རྣམ་པར་རོལ་པ་ཆེན་པོས་རྣམ་པར་རོལ། ཤིན་ཏུ་དགྱེས་པ་ཆེན་པོའི་རྡོ་རྗེ་བཞད་པ། 
ཆེན་པོས་བཞད་ཅིང་ཉིད་ཀྱི་སྐུ་དང་གསུང་དང་ཐུགས་རྡོ་རྗེའི་ཟླ་བའི་ཐིག་ལེའི་དཀྱིལ་ནས། ཨོཾ་མ་ཧཱ་སུ་ཁ་ཧཱུྃ་ཞེས་བརྗོད་ནས། དེ་བཞིན་གཤེགས་པ་ཐམས་ཅད་ཀྱི་བདག་མོ་ཡེ་ཤེས་དབྱིངས་ཕྱུག་མ་ཕྱུང་ངོ་། །སྟེང་དུ་ཟླ་གམ་ལྡན་པ་ཡི། །
གཉིས་པ་ཡི་གེ་མ་ལྟ་བུ། །མཚན་དུ་ཐིག་ལེ་ལྡན་བྱས་པ། །ཡེ་ཤེས་གསལ་བའི་རྣལ་འབྱོར་མའོ། །ཨཱ་ལི་ཀཱ་ལི་འདྲེན་བྱ་བ། །དབུས་སུ་རི་མོ་བརྟག་བྱས་ཏེ། །དེ་ཡི་མགོ་དང་མཇུག་དག་ཏུ། །ཁྲོ་བོ་གཉིས་པོ་མཆོག་བསམ་བྱ། །འདི་
ནི་བཙུན་མོའི་རབ་གསལ་བ། །དཀྱིལ་འཁོར་རྡོ་རྗེ་རྣལ་འབྱོར་མའོ། །འདི་ནི་དྲན་པ་ཙམ་གྱིས་ཀྱང་། །བསོད་ནམས་ཀུན་གྱིས་བྱིན་རློབ་འགྱུར། །ཨཱ་ལི་གཉིས་དབུས་རི་མོ་བྲི། །ལྡན་པ་འདྲེན་པ་ཡང་དག་ལྡན། །དེ་སྟེང་ཟླ་གམ་ཐིག་
ལེ་དག །མགོ་མཇུག་གཉིས་སུ་གཞན་ཡང་ཏྲྃ། །འདི་ནི་དོན་དམ་གསལ་བ་སྟེ། །རིན་ཆེན་རྣལ་འབྱོར་མ་དབང་སྦྱིན། །དྲན་པས་བསོད་ནམས་ཐོབ་འགྱུར་ཏེ། །སྡིག་པ་རྣམས་ཀྱང་འཇིག་པར་བྱེད། །ཨཱ་ལི་གཉིས་དང་ལྡན་བྱས་
ཏེ། །ཚེག་དྲག་ཡི་གེ་གཉིས་སུ་བཤད། །འདི་ནི་རབ་དགའ་ཀུན་ཏུ་ཆགས། །ཆུ་སྲིན་མ་ཞེས་བསྟེན་པ་ཡིན། །དང་པོ་སྐལ་བ་ཆེན་པོ་ཡི། །ཚེག་དྲག་པོ་དང་བཅས་པ་གཞན། །སངས་རྒྱས་ཀུན་གྱི་ཨཱ་ལི་འདི། །སངས་
རྒྱས་བྱང་ཆུབ་རབ་སྦྱིན་བྱེད། །བདག་ཉིད་ལའམ་ཡང་ན་གཞན། །ཕྱག་རྒྱ་འདི་ཡིས་རྒྱས་བཏབ་སྟེ། །བསྒྲུབ་བྱའི་དཀྱིལ་འཁོར་གྲུབ་བྱེད་ན། །དངོས་གྲུབ་མྱུར་དུ་ཐོབ་པར་འགྱུར། །འདི་ནི་དཀྱིལ་འཁོར་རྣམས་ཀྱི་མཆོག །

90-1-195b

ཡི་གེའི་ཕྱག་རྒྱའི་མངོན་གནས་པའི། །འཛིན་པའི་བསོད་ནམས་ཅི་འདྲ་བ། །བྲིས་པ་ཡིས་ཀྱང་ཁྱད་པར་འགྱུར། །ཨེ་མའོ་བདེ་བ་ཡེ་ཤེས་ཆེ། །དེ་ཡི་ཡེ་ཤེས་ཚེ་འདི་ལ། །འདོད་བྱེད་བདེ་བ་སྟེན་བྱེད་ཅིང་། །འདི་ཡི་ཚུལ་གྱིས་ཐོབ་པར་
འགྱུར། །ཁམས་གསུམ་མཆོག་གི་དཀྱིལ་འཁོར་འདིར། །འདི་ལས་རྒྱ་ཆེ་མཆོག་གཞན་མེད། །སྒྲུབ་པ་པོ་ཡི་སེམས་ཅན་ཀུན། །ཚེ་འདི་ཉིད་ལ་སངས་རྒྱས་འགྲུབ། །ཟླ་གསང་ཐིག་ལེའི་གསང་བའི་རྒྱལ་པོ་ཆེན་པོ་
ཤིན་ཏུ་དགྱེས་པ་རྡོ་རྗེ་གདོན་མི་ཟ་བའི་དམ་ཚིག་གི་དཀྱིལ་འཁོར་ཆེན་པོ་རྒྱས་པ་མཆོག་ཏུ་གསང་བ་ལས། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་བཙུན་མོ་རྣམས་ཀྱི་གསང་བ་ཆེན་པོ་རྣལ་འབྱོར་མའི་དབང་ཕྱུག་ཆེན་པོ་རྣམས་ཀྱི་མཆོག་ཏུ་
གསང་བའི་ཡེ་ཤེས་ཀྱི་དཀྱིལ་འཁོར་ཏེ་དང་པོ་རྫོགས་སྷོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ངོ་མཚར་དུ་གྱུར་ཏེ། དགྱེས་པའི་ཡིད་བདེ་བ་དང་། མགུ་
བ་དང་། ཡིད་དགའ་བ་བསྐྱེད་ནས་གར་དང་ཤིན་ཏུ་དགྱེས་པ་ཆེན་པོའི་རྡོ་རྗེ་བཞད་པ་མཛད་ཅིང་ཡང་ཤིན་ཏུ་དགྱེས་པ་ཆེན་པོའི་བདེ་བ་གཉིས་སུ་མེད་པའི་ཡེ་ཤེས་རྡོ་རྗེ་ཞེས་བྱ་བ་འདུ་བ་མཛད་ནས། བཅོམ་ལྡན་འདས་ལ་གསོལ་
བ་འདེབས་པར་འགྱུར་རོ། །བདེ་བྱེད་ཆེན་པོ་བཤད་པ་ཤོད། །བདེ་བ་ཆེན་པོ་བཤད་པ་ཤོད། །གསང་བ་ཆེན་པོ་བཤད་པ་ཤོད། །དགྱེས་པ་ཆེན་པོ་བཤད་པ་ཤོད། །ཁྱོད་ལས་འདོད་ཆགས་ཡང་དག་འབྱུང་། །ཁྱོད་ལས་
ཞེ་སྡང་ཆེན་པོ་སྟེ། །ཁྱོད་ལས་སྡིག་བྱེད་སྡུག་བསྔལ་དང་། །ཁྱོད་ལས་ཁམས་གསུམ་ཐམས་ཅད་འབྱུང་། །ཁྱོད་ལས་སྐྱེས་པ་མ་ནིང་དང་། །ཁྱོད་ལས་འདོད་གཟིར་བུད་མེད་དང་། །ཁྱོད་ལས་འདོད་ལས་རྣམ་གྲོལ་དང་། །ཁྱོད་ལས་
བྱང་ཆུབ་བླ་མེད་འབྱུང་། །ཁྱོད་ལས་ནམ་མཁའ་རླུང་དག་དང་། །ཁྱོད་ལས་གཟི་བརྗིད་མེ་ཡི་ཁམས། །ཁྱོད་ལས་དེ་བཞིན་ཆུ་དང་ས། །ཁྱོད་ལས་སྤྱོད་དང་མི་སྤྱོད་ཀུན། །ཁྱོད་ལས་སངས་རྒྱས་དཔའ་

90-1-196a

ཆེན་པོ། །ཡང་ནས་ཡང་དུ་འབྱུང་བར་འགྱུར། །ཁྱོད་ལས་ཆོས་དང་དགེ་འདུན་དང་། །ཁྱོད་ལས་ཕ་རོལ་ཕྱིན་པའི་ཚོགས། །བྱང་ཆུབ་སེམས་དཔའ་ཆེན་པོ་དང་། །རི་དང་སྐྱེ་བོ་ཐམས་ཅད་འབྱུང་། །ཁྱོད་
ལས་རྡོ་རྗེ་སེམས་དཔའ་དང་། །ཁྱོད་ལས་དྲི་མེད་པད་མོ་དང་། །ཁྱོད་ལས་རིན་ཆེན་ཚད་མེད་ཆེ། །དེ་བཞིན་རྡོ་རྗེ་སྣ་ཚོགས་འབྱུང་། །ཁྱོད་ལས་ཕྱག་རྒྱ་སྔགས་ཀྱི་རྣམས། །ཁྱོད་ལས་རིག་པའི་སྙིང་པོ་འབྱུང་། །དེ་
ནས་བཅོམ་ལྡན་འདས་སྤྱན་མི་འཛུམས་པས་སྨིན་མ་བརྐྱང་སྟེ་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཕ་རོལ་ཏུ་ཕྱིན་པ་ལ་སོགས་པ་ཆེན་པོ་དང་། རྣལ་འབྱོར་མ་ཆེན་མོའི་ཚོགས་དང་། 
རྡོ་རྗེ་ནམ་མཁའ་ལ་འགྲོ་བ་དང་། ནམ་མཁའ་ལ་འགྲོ་བའི་ཚོགས་དང་། འཇིག་རྟེན་དང་འཇིག་རྟེན་ལས་འདས་པ་དང་། གཞན་ཡང་ལྷ་དང་ཀླུ་དང་གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་
དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ཀུན་འདུས་པ་ཐམས་ཅད་ལ་སྐད་ཅིག་སྐད་ཅིག་ཏུ་ཀུན་ཏུ་གཟིགས་ནས་བརྗིད་པ་དང་བཅས་པའི་ཕྱག་འཇམ་པོས། ཉིད་ཀྱི་སྙིང་གའི་རྡོ་རྗེ་གསོར་ཞིང་། ཉིད་
ཀྱི་མཚན་མའི་ཕྱག་རྡོ་རྗེ་རྗེས་སུ་ཆགས་པ་རབ་ཏུ་རྒྱས་པ་ཆེན་པོའི་ལྟ་བས་འཁོར་ཐམས་ཅད་ཟིལ་གྱིས་མནན་ཏེ། ཉིད་ཐུགས་པདྨ་ཟླ་བའི་དཀྱིལ་འཁོར་ཡི་གེའི་ཐིག་ལེའི་དཀྱིལ་ནས་འོད་ཟེར་ཕྱུང་སྟེ་ཀུན་ཏུ་སྣང་བར་བྱིན་གྱིས་བརླབས་ནས། 
ཤིན་ཏུ་དགྱེས་པ་གདོན་མི་ཟ་བའི་རྡོ་རྗེ་ཞེས་བྱ་བའི་གསང་བའི་དཀྱིལ་འཁོར་ཆེན་པོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །དང་པོའི་ཡི་གེ་བཅུ་གསུམ་པ། །ཐིག་ལེར་བཅས་པ་བསམ་བྱས་ཏེ། །བདེ་ཆེན་ཚུལ་བཞིན་
གཞག་བྱས་ལ། །གཞན་གྱིས་མི་ཕྱེད་ཐིག་ལེར་བཅས། །ཡི་གེ་དྲུག་པ་འདྲེན་པ་རུ། །ཚུལ་བཞིན་འོག་ཏུ་ཡོངས་སུ་བརྟག །འདི་ནི་གསང་བ་ཆེན་པོ་སྟེ། །རྨད་བྱུང་ཡི་གེ་ཕྱག་རྒྱའོ། །བདེ་ཆེན་བདེ་བར་བསྐྱེད་པའི་ཕྱིར། །

90-1-196b

སངས་རྒྱས་ཀུན་གྱིས་བསྒྲགས་པ་ཡིན། །ཡེ་ཤེས་ཀྱི་ནི་ཕྱག་རྒྱ་འདིས། །སྐད་ཅིག་སྙིང་པོས་རྒྱས་བཏབ་ན། །དཀྱིལ་འཁོར་རྣམས་ཀྱི་འཆད་པ་པོ། །སྟོན་པ་རྡོ་རྗེ་འཛིན་པར་འགྱུར། །བདེ་བ་ཆེན་པོ་སྐུལ་བྱེད་པའི། །
སངས་རྒྱས་རྣམས་ཀྱི་རྟོགས་པར་བྱེད། །ཡི་གེ་ཡེ་ཤེས་གྲུབ་པ་ཡིས། །ཡེ་ཤེས་དབང་ཕྱུག་ཉིད་དུ་འགྱུར། །འཕྲུལ་གྱི་མིག་དང་ཤེས་རབ་ཆེ། །མི་ཤེས་སྡིག་པ་འཇོམས་པར་བྱེད། །རྡོ་རྗེ་སེམས་དཔའ་ཉིད་འདྲ་བར། །ཚེ་འདི་ཉིད་
ལ་འཐོབ་པར་འགྱུར། །བདེ་བ་ཆེན་པོ་རེག་པ་ཆེ། །སྡུག་བསྔལ་འདོད་པ་འཇོམས་བྱེད་པའོ། །ཤེས་རབ་ཡེ་ཤེས་དངོས་གྲུབ་ཆེ། །བྱང་ཆུབ་མྱུར་དུ་འཐོབ་འགྱུར་ཏེ། །རིག་མ་འབུམ་ཕྲག་བརྒྱས་བསྐོར་ཅིང་། །སེམས་དཔའ་ཆེན་
པོ་དེ་དང་རྩེན། །རྡོ་རྗེ་པད་མ་མཉམ་སྦྱོར་བས། །ཐལ་མོ་བརྐྱང་སྟེ་རོལ་པ་ཡིས། །ཚེ་དང་ལང་ཚོ་སྐལ་དང་ལྡན། །དྲན་པ་ཙམ་གྱིས་འཐོབ་པར་འགྱུར། །འདོད་པ་ཡིས་ནི་དགོས་པའི་རྣམས། །མྱུར་བ་ཉིད་དུ་འགྲུབ་པར་འགྱུར། །འོག་
དང་སྟེང་གི་ནམ་མཁའ་ལ། །བདག་འདོད་བཞིན་དུ་འགྲོ་འོང་བྱེད། །ས་ཡང་རྣམ་པར་ཕུག་ནས་སུ། །སྟོབས་ཆེན་དེ་འདིར་འོང་བར་བྱེད། །སངས་རྒྱས་ཀུན་ལ་གནོད་བྱེད་དེ། །བྱང་ཆུབ་པར་ནི་གདོན་མི་ཟ། །བདེ་བ་ཆེན་པོའི་རྣམ་མཛད་པས། །
གཞོམ་ཞིང་དེ་བཞིན་མྱང་བ་ཡི། །རྡོ་རྗེ་བློ་ཡིས་བདུད་ཀྱི་རྣམས། །རྣམ་པར་འགྱུར་བས་ཐམས་ཅད་བསྒྲལ། །བདེ་བ་ཆེན་པོ་གཏོང་བ་ཡིས། །སྐད་ཅིག་ཉིད་དུ་གསོལ་བར་བྱ། །གྲུབ་པའི་རྡོ་རྗེ་འཛིན་པ་ཆེ། །དཔའ་བོ་ཆེན་པོས་དགུག་པར་བྱ། །
རྣལ་འབྱོར་མ་རྣམས་ཅི་འདོད་པར། །རྣམ་གནོན་ཚུལ་གྱིས་གནོན་པར་བྱ། །དབང་པོ་ཉེ་དབང་དབང་ཆེན་པོ། །གནོད་བྱེད་སྟོབས་ཀྱིས་དགོན་གནས་པར། །རབ་ཏུ་རྣམ་འཇོམས་གནོན་པ་ཡིས། །གཞོམ་པའི་ཚུལ་གྱིས་བསྒྲལ་བར་བྱ། །
མཚོན་ཆ་ལྔ་ཡིས་རྣམ་གནོན་པས། །གཞན་གྱི་བུད་མེད་རྩེན་པར་བྱ། །ཀྱེ་མའོ་བདེ་བ་བདེ་གནས་པའི། །སེམས་ཅན་ཆེན་པོས་གྲོལ་བྱས་ཏེ། །བྱང་ཆུབ་སེམས་ནི་བདེ་འབྱུང་བས། །སེམས་དཔའ་བདག་ཉིད་མཆོད་པར་བྱ། །དམ་ཚིག་རྗེས་
90-1-197a

སུ་ལྡན་པ་ཡིས། །རྣལ་འབྱོར་རྟག་པའི་ངོ་བོར་འགྱུར། །སྐད་ཅིག་མཐོ་རིས་འགྲོ་བར་བྱ། །སྐད་ཅིག་བདེ་ལྡན་འགྲོ་བར་བྱེད། །རྡོ་རྗེའི་ཤུགས་ཀྱིས་ཐམས་ཅད་དུ། །སེམས་ཅན་སྐད་ཅིག་འདི་རུའོ། །སངས་རྒྱས་ཀུན་གྱི་གནས་
སུ་འགྱུར། །སེམས་ཅན་རྣམས་དང་གྲགས་ཆེན་པོ། །ཐམས་ཅད་ཀྱི་ནི་རིགས་རྣམས་དང་། །ཕ་རོལ་ཕྱིན་རྣམས་སྐྱེ་གནས་ཏེ། །དེ་བཞིན་རིགས་དང་ཕ་རོལ་ཕྱིན། །དེ་དག་འདི་ལ་རབ་ཏུ་གནས། །དབང་པོར་གྱུར་པ་བརྟེན་ཆེན་པོ། །ཡོན་
ཏན་ཚོགས་ནི་ནམ་མཁའ་བཞིན། །དེ་ཉིད་དངོས་པོ་ཐམས་ཅད་ལ། །ཐམས་ཅད་དུས་གསུམ་མཉམ་གནས་ཏེ། །རྡོ་རྗེ་སེམས་དཔའ་མཆོག་ཏུ་བདེ། །སེམས་དཔའ་ཐོག་མ་ཐ་མེད་ཡིན། །བཅོམ་ལྡན་འདས་དཔལ་རྡོ་རྗེ་
སེམས་དཔའི་ཤིན་ཏུ་བདེ་བ་ཆེན་པོའི་རྡོ་རྗེ་ཆོས་ཀྱི་ཡི་གེ་ཞེས་བྱ་བ་ཡི་གེ་ཆེན་པོའི་ཕྱག་རྒྱའི་ཡེ་ཤེས་སོ། །བཅུ་གསུམ་གྱི་ནི་ཡི་གེ་ཆེ། །ཡེ་ཤེས་ཐིག་ལེ་ལྡན་པ་སྟེ། །རྡོ་རྗེ་ཡིད་འབྱུང་ལྷགས་
པ་ཡི། །ཧ་ལ་རས་བཏགས་དབུ་བསྐོར་བྱ། །འདི་ནི་ཡིད་ལས་སྐྱེས་པ་སྟེ། །ཤིན་ཏུ་དགྱེས་ཆེ་མཛེས་པ་ཡིས། །ཡི་གེའི་ཕྱག་རྒྱ་ཕྱག་རྒྱ་ཆེ། །གཙོ་བོའི་སྤྱན་སྔར་གནས་པ་ཡི། །གསང་བའི་སྙིང་གི་པད་མ་ལ། །ཕྱག་རྒྱ་འདི་
ཡིས་རྒྱས་བཏབ་པས། །དེ་ནི་དེ་མ་ཐག་ཉིད་དུ། །ཤིན་ཏུ་དགྱེས་པའི་མཉེས་པར་འགྱུར། །གཙོ་ཆེན་རྡོ་རྗེ་སེམས་དཔའ་ལ། །དེ་ཡི་བདེ་བས་མཉེས་བྱས་ཏེ། །དབང་པོ་ཡི་ནི་སྦྱོར་བ་ཡིས། །དེ་དང་རོལ་པས་མྱུར་དུ་འགྲུབ། །དེ་གཉིས་
ཕན་ཚུན་དགྱེས་པ་ལས། །ཤིན་ཏུ་དགྱེས་པའི་གཞིར་གྱུར་ཏེ། །རིག་འཛིན་མཆོག་གི་གཟུགས་ལྡན་དང་། །ལྷ་མིན་ཀུན་གྱིས་མཆོད་པར་འགྱུར། །དེ་དང་ལྷན་ཅིག་རོལ་པ་ན། །ལྷ་ཆེན་ཚངས་པ་གཏོགས་འདོད་རྣམས། །ཕྱག་རྒྱ་སྦྱོར་བའི་ཚུལ་
གནས་པའི། །བདག་ཉིད་ཆེ་ལ་ཕྱག་བྱེད་པའོ། །ཉེས་གསུམ་དྲི་མ་སྤངས་པ་ཡི། །ཤིན་ཏུ་སྦྱོར་བའི་རྒྱས་བཏབ་པ། །སེམས་ཅན་གར་ནི་བྱེད་པ་དང་། །སེམས་དཔའ་ཆེ་ལ་མཉེས་པར་བྱེད། །དེ་ནི་ས་དང་ནམ་མཁའ་ལ། །བདེ་བར་གནས་

90-1-197b

ཤིང་འགྲོ་བར་བྱེད། །སྣ་ཚོགས་ལྷ་མོ་བདེ་ཆེ་བའི། །སྣ་ཚོགས་བདེ་བས་ཉེར་སྤྱོད་དོ། །ཕྱག་རྒྱའི་གར་གྱིས་གྱིར་མཛད་ཅིང་། །སེམས་ཅན་མྱུར་དུ་རྟོགས་པར་བྱེད། །རལ་གྲིར་གྱུར་པ་གཟི་ཆེན་པོ། །ནམ་མཁའ་ཀུན་ཏུ་ཕན་ཚུན་
འགྲོ། །ལྷ་མོ་འཕྲུལ་གྱི་འགྲོ་བ་དང་། །ལྷ་མིན་ཀླུ་ཡི་བུ་མོ་དང་། །གཞན་ཡང་འཕྲུལ་ལྡན་མི་བུ་མོ། །དེ་ཡི་བུད་མེད་ཀུན་བསྒྲུབ་བྱ། །ཕྱག་རྒྱའི་ཡེ་ཤེས་རབ་གནས་པས། །དེ་ཉིད་ཀུན་ཏུ་འགྲོ་བྱེད་དེ། །ཇི་ཙམ་
འདོད་པར་དཀྱིལ་འཁོར་དུ། །རྡོ་རྗེ་སེམས་དཔའ་ཆེ་གནས་སོ། །སངས་རྒྱས་ཐམས་ཅད་མྱུར་དུ་འགྲུབ། །ཐམས་ཅད་ཆོས་ནི་བདེ་ཆེན་པོ། །དགེ་འདུན་ཆགས་མེད་ཐམས་ཅད་རྣམས། །དེ་དག་ཐམས་ཅད་དེ་ཡིན་ནོ། །དབང་
པོ་དེ་དབང་དབང་ཆེན་གྱི། །ཐོགས་མེད་སྟོབས་ཀྱིས་བཀུག་ནས་སུ། །རྡོ་རྗེ་སེམས་དཔའི་ཐབས་གནས་པས། །གཞན་གྱི་བུད་མེད་རྩེན་པར་བྱ། །དེ་ལ་སོགས་པ་མཐའ་ཡས་པ། །ཕྱག་རྒྱ་ཡེ་ཤེས་བསྒྲུབ་བྱ་སྟེ། །སྐད་ཅིག་
སྐད་ཅིག་བསྟེན་པ་ཡི། །བདག་གི་སྦྱོར་བས་འགྲུབ་པར་འགྱུར། །གཉིས་མེད་སྦྱོར་བ་འདི་ཡིས་ནི། །དེ་ནི་དངོས་གྲུབ་ཀུན་འགྱུར་ཏེ། །བདག་མེད་ང་རྒྱལ་མེད་འགྱུར་ཏེ། །སྣང་བ་མེད་ཅིང་ཡི་གེ་མེད། །ཤིན་ཏུ་དགྱེས་པ་ཆེན་པོའི་ཡིད་
དང་རྗེས་སུ་འཐུན་པར་མཛད་མའི་ཡི་གེའི་ཕྱག་རྒྱའི་ཡེ་ཤེས་སོ། །ལྷ་མོ་རྡོ་རྗེ་ཀཱི་ལི་ནི། །དང་པོར་ཨོཾ་གྱིས་རྣམ་བརྒྱན་པ། །བགེགས་མཐར་བྱེད་དང་ལྡན་པ་ནི། །དབང་མཆོག་སྦྱིན་པར་མཛད་མ་སྟེ། །དེ་ཡིས་བུད་མེད་སྙིང་ག་རུ། །
བདག་ཉིད་ཀྱིས་ནི་བྱིན་བརླབས་ཏེ། །དབང་པོ་གཉིས་ནི་སྦྱོར་བ་ཡིས། །མཁས་པས་ཚུལ་བཞིན་བསྒོམ་པར་བྱ། །དེ་ནས་རྣལ་འབྱོར་ཆེན་པོ་དེ། །རྣལ་འབྱོར་དབང་ཕྱུག་བྱིན་བརླབས་པས། །ནམ་མཁའི་དཀྱིལ་འཁོར་མཐའ་དག་ཏུ། །མཛེས་
པའི་སྤྱན་དང་རོལ་ཅིང་འགྲོ། །བདག་གམ་འོན་ཏེ་གཞན་དག་ལ། །ཕྱག་རྒྱ་དེ་ཡིས་རྒྱས་བཏབ་སྟེ། །རྡོ་རྗེ་པད་མོ་ཕྱེ་བ་ཡིས། །སྒྲུབ་པ་པོས་ནི་མྱུར་དུ་བསྒྲུབ། །པད་མ་རྣམ་པར་ཕྱེ་བྱས་ཏེ། །ཕྱག་རྒྱ་སྦྱོར་བས་རོལ་པ་ཡི། །ཕྱག་རྒྱ་འདི་

90-1-198a

ཡིས་རྒྱས་བཏབ་ན། །འགྲོ་དང་འོང་བ་གདོན་མི་ཟ། །གཡས་དང་གཡོན་པའི་ཚུལ་གྱིས་སུ། །ལག་པའི་ཕྱག་རྒྱ་བཟུང་བྱས་ཏེ། །སྦྱོར་བ་ཆེན་པོ་བསྒོམ་བྱས་ན། །དེ་མ་ཐག་ཏུ་ནམ་མཁར་འགྲོ། །བདག་ཉིད་གན་རྐྱལ་
གནས་བྱས་ཏེ། །ཉིད་ཀྱི་སྟེང་དུ་ཕྱག་རྒྱ་གཞག །ཉིད་ཀྱིས་བྱིན་བརླབས་ཕྱག་རྒྱ་ལ། །སྔགས་པས་ཚུལ་བཞིན་བསྐྱོད་པར་བྱ། །གཡས་དང་གཡོན་གྱི་གློ་དག་ཏུ། །དགྱེས་དང་མཛའ་བ་གཉིས་བཞུགས་པར། །མི་གཡེང་ཕྱག་རྒྱ་བཞག་
བྱས་ཏེ། །བདག་ཉིད་ཤིན་ཏུ་དགྱེས་པར་བསྒོམ། །འདི་ཡིས་དངོས་གྲུབ་ཐོབ་འགྱུར་ཏེ། །འདི་དག་ལྷན་ཅིག་འགྲོགས་པ་ཡིས། །གཟུངས་མ་ཀུན་གྱི་དཀྱིལ་འཁོར་དུ། །སངས་རྒྱས་ལ་སོགས་ཐམས་ཅད་འགྱུར། །འདི་དང་ལྷན་ཅིག་
སྦྱོར་བ་ཡིས། །ནམ་མཁའ་བདག་པོ་སངས་རྒྱས་བཞིན། །སངས་རྒྱས་ཀུན་གྱིས་བྱིན་བརླབས་པས། །དེ་ནི་སངས་རྒྱས་ངོ་བོར་འགྱུར། །དབང་པོ་གཉིས་ནི་རབ་སྦྱོར་བས། །ནུབ་གཅིག་བདུད་རྩི་དབྱུང་བྱས་ཏེ། །གཟུངས་མའི་ཕྱག་
རྒྱ་ལ་བརྟེན་ནས། །རྨད་འབྱུང་ཉིད་ནི་འཐོབ་ཅེས་བཤད། །མཚན་གྱི་མཐའ་དང་ཉིན་གྱི་མཐའ། །དང་པོར་གཉིས་ཀ་འདུས་བྱས་ན། །སྔགས་ཀྱི་དབྱིངས་ཕྱུག་གར་འགྲོ་བ། །དེ་དང་ལྷན་ཅིག་དངོས་གྲུབ་འགྲོ། །ཕྱེད་དམ་ཡང་ན་ནམ་ཕྱེད་ན། །
རིགས་མའི་དབྱིངས་སུ་རེག་བྱ་ཞིང་། །མྱུར་བས་ཁྲོས་པའི་སྒྲ་སྒྲོགས་པས། །གྱད་ཀྱི་འགྱེད་པས་བརྩམ་པར་བྱ། །བཀྱེ་བའི་མཇུག་ཏུ་དེ་མ་ཐག །འོ་མ་མཆོག་ནི་བཏུང་བྱས་ནས། །དེ་ནས་དེ་ནི་རྡོ་རྗེ་འགྲུབ། །ཟླ་གསང་དཀྱིལ་དུ་འགྲོ་བར་
བྱེད། །བྱ་བ་དེ་བཞིན་བཟློག་པ་དང་། །ཅི་བདེ་བསྟེན་པ་བྱས་པ་ལས། །བྱང་ཆུབ་སེམས་ནི་འཆར་མ་ཐག །འཕྲོག་མ་ཡི་ནི་དངོས་གྲུབ་བོ། །འདི་ཡིས་རིན་ཆེན་གཙུག་ཉིད་དུ། །མི་གཡེང་མཚན་མོ་བྱས་གྱུར་ན། །སངས་རྒྱས་
དངོས་གྲུབ་འཕྲོག་བྱེད་དེ། །སངས་རྒྱས་དངོས་གྲུབ་ཉིད་ཀྱིས་ཐོབ། །འདི་ཡིས་སྙིང་གི་ཟླ་གསང་ལ། །ཐིག་ལེ་ཉིད་དུ་བརྟག་བྱས་ན། །དེ་ནི་དེ་མ་ཐག་ཏུ་ཡང་། །ཟླ་གསང་ཐིག་ལེའི་མཆོག་འདྲར་འགྱུར། །འདི་ཡིས་

90-1-198b

རེག་པ་ཙམ་གྱིས་ཀྱང་། །དངོས་གྲུབ་གང་དག་འཐོབ་བྱེད་དེ། །རྡོ་རྗེའི་ཕྱག་རྒྱ་གཟི་ཆེན་པོ། །རྒྱལ་པོ་འདི་ནི་རྣམ་པར་རྒྱུ། །འདི་ནི་སྒྲུབ་པའི་དུས་སུ་ཡང་། །རྣམ་པར་རྟོག་པ་ཡོང་མི་བྱ། །རྟག་ཏུ་མི་རྟོག་འགྱུར་བ་ཡིས། །
ནན་ཏན་གྱིས་ནི་བསྒྲུབ་པར་བྱ། །སྡུག་བསྔལ་བ་ཡི་སེམས་ཅན་ལ། །སྦྱིན་པ་བཞི་ནི་རྟག་ཏུ་སྦྱིན། །དེ་ལ་བདེ་བ་སྦྱིན་བྱས་ཏེ། །མི་སྙན་ནམ་ཡང་སྦྱིན་མི་བྱ། །ཤིན་ཏུ་དགྱེས་པའི་སེམས་མ་ཆེན་མོ་དཔེ་མེད་པ་དང་ལྡན་མ་
ཞེས་བྱ་བའི་རྡོ་རྗེ་ཀཱི་ལི་ཀཱི་ལ་ཤིན་ཏུ་དགྱེས་པའི་བདེ་བ་ཆེན་པོ་འཐོབ་པར་བྱེད་པའོ། །ཐོག་མ་ཨོཾ་སྟེ་འཇའ་ཆེན་མོ། །རྡོ་རྗེ་ཤིན་ཏུ་དགྱེས་དང་འབྲེལ། །འདི་ནི་འདོད་ཆགས་ཐམས་ཅད་ལ། །འདོད་ཆགས་བདེ་བྱེད་སྙོམས་པར་འཐོབ། །
རོལ་པའི་སྦྱོར་བས་བུད་མེད་ལ། །འདི་ནི་རྟག་ཏུ་མཉེས་པར་བྱ། །འདི་ཡི་འགྲོ་བ་གསུམ་དག་ཏུ། །དངོས་གྲུབ་མྱུར་དུ་འཐོབ་པར་བྱེད། །པད་མ་ཁ་ཆེ་རྒྱས་པའི་སྤྱན། །སྔགས་མཁན་དེ་ནི་སྐད་ཅིག་འགྱུར། །གཙོ་བོ་ཡི་ནི་བདེ་མཆོག་
གིས། །ཨཱ་ལི་ཀཱ་ལི་མཉམ་སྦྱོར་བྱ། །སྤྲོད་པའི་ཕྱག་རྒྱ་རྒྱས་བཏབ་སྟེ། །སྐད་ཅིག་སྐད་ཅིག་སྤྱད་པར་བྱ། །དུས་དག་ཏུ་ནི་རེག་པ་དང་། །གཞུག་པ་ཡང་ནི་རྟག་ཏུ་བྱ། །བསྐྱོད་དང་མཉེ་བ་དེ་བཞིན་དུ། །མཉམ་དུ་འགྲོགས་
པའི་ཆོ་ག་བྱ། །བསྐྱེད་པ་དང་ནི་སྦྱང་བ་དང་། །སྐད་ཅིག་སྐད་ཅིག་བསྙེན་པར་བྱ། །གར་དང་ཀུན་ནས་བསྐོར་བ་དང་། །འཇིབ་དང་དེ་བཞིན་བཏུང་བ་དང་། །ཐེ་ཚོམ་མེད་པའི་སེམས་ཀྱིས་ནི། །དམ་ཚིག་དང་ནི་བསྒྲུབ་པར་བྱ། །ཕྱག་རྒྱ་འདི་ཡིས་
རྣལ་འབྱོར་པ། །མི་གཡོ་ཚར་ནི་དངོས་གྲུབ་སྟེ། །སངས་རྒྱས་བྱང་ཆུབ་དངོས་གྲུབ་དང་། །བསྐལ་པར་གནས་པ་སྨོས་ཅི་དགོས། །འདི་ནི་དངོས་གྲུབ་འཐོབ་མ་ཐག །པད་མ་འཛིན་པའི་རྗེས་འགྱུར་ཏེ། །ལག་ན་པད་མ་འབར་ཁྱེར་བཞིན། །བློ་
ལྡན་མི་གཡེང་བསྐལ་པར་གནས། །བརྗིད་པས་དཔལ་དགྱེས་ལྷན་ཅིག་ཏུ། །བདེ་ལྡན་ཞིང་དུ་འགྲོ་འགྱུར་ཏེ། །རྣལ་འབྱོར་ཆེན་པོ་དེར་ཕྱིན་ནས། །བདེ་ལྡན་གྱི་མཆོག་གཙོ་བོ་ཡི། །པད་མའི་གཟུགས་ཀྱི་དཀྱིལ་འཁོར་དུ། །དེ་ནི་

90-1-199a

བདེ་བར་གནས་པར་འགྱུར། །བདེ་ལྡན་རྟག་ཏུ་འགྲོགས་འགྱུར་བ། །དངོས་གྲུབ་ཡེ་ཤེས་བདེ་མྱོང་འགྱུར། །ཡི་གེ་ཡི་ནི་ཕྱག་རྒྱ་འདིས། །པད་མ་ལས་སྐྱེས་གཟུངས་གཟུང་སྟེ། །བྱིན་གྱིས་བརླབས་ནས་བདེ་མྱངས་ན། །པད་མ་བདེ་
བའི་བདག་པོར་འགྱུར། །གཞན་གྱི་བུད་མེད་བདག་ཉིད་ཀྱིས། །ཕྱག་རྒྱ་འདི་ཡིས་རྒྱས་བཏབ་སྟེ། །བསྟེན་བྱས་འདོད་པའི་གཟུགས་ཉིད་དུ། །སྔགས་མཁན་འགྱུར་བ་གདོན་མི་ཟ། །སྡུག་ཅིང་ལ་སོགས་བརྒྱན་པ་ཡི། །ཉི་མའི་འོད་ཟེར་གསེར་བྱུང་
བཞིན། །དྲི་མེད་ཡངས་པའི་ལྟ་བ་ཡིས། །པད་མ་སེམས་དཔའི་ཚེ་འགྲུབ་པོ། །ཇི་ཙམ་ནམ་མཁར་ཉེ་བར་ནི། །དཔའ་བོ་ཆེན་པོ་འཕུར་བྱེད་དེ། །རིག་མ་འབུམ་ཕྲག་བརྒྱ་ཚོགས་ཀྱི། །ལྷ་མོ་ཡིས་ནི་མཆོད་པ་བྱེད། །སངས་རྒྱས་སྲས་དང་བཅས་ཀུན་
གྱིས། །སངས་རྒྱས་ཀུན་གྱིས་བདག་ཉིད་མཆོད། །འཁོར་བ་ཉིད་ན་གནས་པའི་ཚེ། །འཁོར་བའི་དྲི་མས་མི་གོས་སོ། །ཕྱག་རྒྱ་འདི་ཡིས་རྒྱས་བཏབ་ན། །རྟག་ཏུ་ཉོན་མོངས་དག་འགྱུར་ཏེ། །སྨན་གྱི་ཕྱེ་མ་སྦྱོར་བ་ཡིས། །སྦྲུལ་ནི་གསོད་པར་གྱུར་པ་བཞིན། །
ཟླ་གསང་ཐིག་ལེའི་དགའ་བྱེད་འདི། །ཚེ་འདི་ཉིད་ལ་འཐོབ་འགྱུར་ཏེ། །འདི་ཡི་མཐུ་ཡི་ངོ་བོ་ཡིས། །དགོས་པ་ཐམས་ཅད་དངོས་གྲུབ་བོ། །གང་འདོད་དངོས་གྲུབ་དོན་ཡོད་པ། །འཁོར་བ་འདི་དང་ཕ་རོལ་གྱི། །མཐུ་ཆེན་ཕྱག་རྒྱ་འདི་ཉིད་ཀྱིས། །དྲན་པ་ཙམ་གྱིས་
དེ་དངོས་འགྲུབ། །ཤིན་ཏུ་དགྱེས་པ་པད་མོའི་ཕྲེང་བ་ཞེས་བྱ་བའི་ཡི་གེའི་ཕྱག་རྒྱ་ཡེ་ཤེས་སོ།། །།དང་པོར་ཨོཾ་དང་ཡང་དག་ལྡན། །ཐ་མར་བསྒྱིངས་པའི་ཧཱུྃ་ཉིད་དེ། །དབུས་སུ་རབ་དགྱེས་རྡོ་རྗེ་བཞག །ཡི་གེ་འདི་ནི་རྨད་འབྱུང་བའོ། །ཕྱག་རྒྱ་འདི་ཡིས་རྒྱས་
བཏབ་པས། །སྡིག་པ་སྐད་ཅིག་མེད་པར་འགྱུར། །ཁམས་གསུམ་འདི་ནི་དངོས་གྲུབ་ཆེ། །དཔལ་གྱི་བསྒྱིངས་པ་འཐོབ་པར་འགྱུར། །བདུད་དང་བདུད་ལས་རྗེས་འཇུག་པ། །མི་ཐོགས་པར་ནི་བརྒྱལ་བྱེད་དེ། །སྣ་ཚོགས་རྡོ་རྗེ་མཉམ་སྦྱོར་བས། །དེ་ཡིས་ཁམས་གསུམ་
འཕྲོག་པར་བྱེད། །བདག་གི་མཐུ་ཡིས་རྣམ་རྒྱལ་ཏེ། །དེ་ཡིས་ཁམས་གསུམ་ལོངས་སྤྱོད་དོ། །ཕྱག་རྒྱ་འདི་ཡིས་རྒྱས་བཏབ་སྟེ། །པད་མ་རྡོ་རྗེ་རབ་ལྡན་བྱ། །ཕྲེང་བྱེད་ཕྲེང་བའི་ཚུལ་གྱིས་སུ། །ཕྲེང་བ་བསྐུམས་ཏེ་འཛིན་པ་བཞིན། །འདི་ཡིས་བྱིན་གྱིས་

90-1-199b

བརླབས་བྱས་ཏེ། །བསྙེན་ན་མྱུར་དུ་དངོས་གྲུབ་བོ། །གཡས་དང་གཡོན་གྱི་སྨིན་བསྒྱུར་བས། །ཆུ་སྐྱེས་སྤྱན་ནི་སྦྱར་བྱས་ཏེ། །ཕྱག་རྒྱས་བཏབ་སྟེ་རོལ་བྱས་ན། །བླ་མའི་དངོས་གྲུབ་འཐོབ་པར་བྱེད། །རྡོ་རྗེ་རྣལ་འབྱོར་ཉེ་བ་ཡིས། །རྡོ་རྗེའི་བདག་ཉིད་མཆོད་བྱེད་དེ། །དེ་དག་ཀུན་གྱིས་བསྐོར་བྱས་
ནས། །དཀྱིལ་འཁོར་དུ་ནི་དབང་བསྐུར་རོ། །རྡོ་རྗེ་སེམས་དཔའ་དཔའ་བ་ཡིས། །འཇིགས་ཤིང་སྐྲག་ལས་སྦྱིན་བྱེད་པ། །རང་ཉིད་ཀྱི་ནི་ཕྱག་རྒྱའི་གཟུངས། །ཉིད་ཀྱིས་དངོས་གྲུབ་སྟོབས་པར་བྱེད། །གཞན་ནི་ཡང་དག་ཕ་རོལ་ཕྱིན། །སངས་རྒྱས་རྣམས་ཀྱི་ཡོན་ཏན་རྒྱན། །དེ་ཡང་དེ་
ལ་འཇིགས་སྐྲག་ནས། །རང་གི་དགྱེས་མཆོག་སྟོབས་པར་བྱེད། །བདག་ཉིད་ཆེན་པོ་དམིགས་གསུམ་དང་། །ཆེ་བའི་ཕ་ནི་ངོ་བཞི་དང་། །རྡོ་རྗེ་འཛིན་དང་གཏོགས་རྣམས་དང་། །རང་གི་སྡུག་པ་སྟོབས་པར་བྱེད། །གཤིན་རྗེ་ཤ་ཀ་རྒྱལ་པོ་
དང་། །རྡོ་རྗེ་འཛིན་དེ་དངོས་གྲུབ་ལ། །འོངས་ནས་བདག་གི་སྡུག་པ་རྣམས། །སྲོག་གི་ཕྱིར་ཡང་སྟོབས་པར་བྱེད། །གཞན་གྱི་འཕྲུལ་གྱི་ལུས་ཀྱི་རྣམས། །ཁམས་གསུམ་ལམ་ལ་གནས་པ་དག །མྱུར་དུ་ཉེ་བར་འོངས་ནས་ཀྱང་། །
བདག་ཉིད་དངོས་གྲུབ་སྦྱིན་པར་བྱེད། །སྣ་ཚོགས་གཉེན་ནི་རྒྱལ་པོ་ཆེ། །དབང་ཕྱུག་དམ་པ་སྣ་ཚོགས་བྱེད། །དེ་ཡང་ཉེར་འོངས་གཙུག་གཏུགས་ཏེ། །རྣལ་འབྱོར་སྣ་ཚོགས་མ་སྦྱིན་བྱེད། །གནོད་སྦྱིན་སྲིན་པོའི་གཟུགས་ལ་སོགས། །
ཤ་ཟ་ཡི་དགས་བུ་མོ་རྣམས། །སྦྱོར་ལྡན་ཕྱག་རྒྱ་བླང་བྱས་ཏེ། །བརྟག་པ་མཆོག་གིས་བརྟག་པར་བྱ། །ཐམས་ཅད་ལས་བྱེད་དགེ་བ་ཡི། །འདི་ཡིས་དངོས་གྲུབ་མྱུར་དུ་འགྲུབ། །ལྷ་དང་ཀླུ་ཡི་བུ་མོ་དང་། །ལྷ་མིན་ལྷ་ཡི་མངལ་སྐྱེས་
པ། །ཕྱག་རྒྱ་འདི་ཡིས་བྱིན་བརླབས་ན། །གྲུབ་པ་མྱུར་དུ་དངོས་གྲུབ་པོ། །གཟུགས་བཟང་ཡང་ན་ངན་ཡང་རུང་། །གང་དེ་བུད་མེད་བཟུང་བྱས་པ། །རིམ་པ་འདི་ཡི་ཚུལ་གྱིས་སུ། །ཕྱག་རྒྱའི་སྦྱོར་བ་བརྟག་པར་བྱ། །འདི་ཡིས་སངས་
རྒྱས་ཐམས་ཅད་དང་། །དེ་བཞིན་དཔའ་བོ་ཀུན་ཉིད་དུ། །སྐད་ཅིག་སྐད་ཅིག་རྒྱས་བཏབ་པས། །ཚེ་འདི་ཉིད་ལ་ཐོབ་པར་འགྱུར། ཤིན་ཏུ་དགྱེས་པ་ཆེན་པོ་སྣ་ཚོགས་དཔེ་མེད་པའི་ཕྲེང་བ་ཞེས་བྱ་བའི་ཡི་གེའི་ཕྱག་རྒྱའོ།། །།

90-1-200a

ང་རོ་བཅུ་གསུམ་སྟེང་ཉིད་དུ། །དེ་བཞིན་ཐིག་ལེའི་རྒྱལ་པོ་སྟེ། །རབ་དགྱེས་རྡོ་རྗེ་ལྟ་ཆེ་བདེ། །མཐའ་ནི་ཡི་གེ་ཧི་སྦྱར་བའོ། །འདི་ནི་སངས་རྒྱས་ཐམས་ཅད་ཀྱི། །བདེ་ཆེན་སྤྱན་ནི་དགའ་བྱེད་ཡིན། །ཕྱག་རྒྱའི་ཡི་གེ་
འདི་ཡིས་ནི། །མཁས་པས་བྱིན་གྱིས་བརླབས་བྱས་ནས་ན། །དེ་ནི་དེ་མ་ཐག་ཏུ་ཡང་། །བླ་མེད་འཕྲུལ་གྱི་སྤྱན་དུ་འགྱུར། །སྟོང་ཉིད་ཡེ་ཤེས་གནས་པ་ཡི། །སངས་རྒྱས་ཤིན་ཏུ་འཕྲ་བ་མཐོང་། །སྨིན་མ་རྣམ་བསྒྱུར་
རྒྱས་པ་ཡིས། །ལྟ་བའི་ཕྱག་རྒྱས་གར་བྱེད་ཅིང་། །འགུགས་བྱེད་སངས་རྒྱས་ཐམས་ཅད་དང་། །དཔའ་བོ་རྡོ་རྗེ་ཀུན་འཛིན་དང་། །ཕ་རོལ་ཕྱིན་པ་ཐམས་ཅད་དང་། །དེ་བཞིན་གཟུངས་མིན་ཚོགས་རྣམས་དང་། །རྣལ་འབྱོར་
མ་དང་མཁའ་འགྲོ་དང་། །ཕྱི་དང་ནང་གི་ཚོགས་རྣམས་དང་། །ལྷ་མོ་ཀླུ་མོ་གནོད་སྦྱིན་མོ། །ལྷ་མིན་དངོས་གྲུབ་ལུས་ཀྱི་མཆོག །གྲུལ་བུམ་མི་འམ་ཡི་དགས་སམ། །ཤ་ཟ་འཕྲུལ་གྱི་མི་བུ་མོ། །འདི་ནི་སྙིང་གར་བཞག་པ་ཡིས། །
རྡོ་རྗེ་འཛིན་དུ་བདག་ཉིད་འགྱུར། །སངས་རྒྱས་ཡང་ན་ཉི་མ་དང་། །པད་མོ་དྲ་བ་སྣ་ཚོགས་བློ། །ལྷ་དང་ལྷ་མིན་མི་དག་དང་། །གཞན་ཡང་གནོད་སྦྱིན་སྲིན་པོ་དང་། །བདུད་དང་བདུད་ཀྱི་ཚོགས་རྣམས་ཀྱི། །གཞན་གྱིས་འཕྲོག་
པར་ཡོང་མི་ནུས། །ལྷ་དང་ལྷ་མིན་གྱིས་མཆོད་ཅིང་། །དངོས་གྲུབ་ཁམས་གསུམ་འགྲོ་བར་བྱེད། །ལྷ་དང་ལྷ་མིན་བསྟེན་བྱེད་ཅིང་། །སྐད་ཅིག་ཉིད་དུ་འགྲོ་བར་བྱེད། །སངས་རྒྱས་རྣམས་གྱི་མཁྱེན་པའི་ཡུལ། །སངས་རྒྱས་
རྣམས་ཀྱི་ཞིང་ཀུན་ཏུ། །རིག་པའི་རིགས་ནི་བརྒྱ་དག་དང་། །དེ་ནི་རྩེན་ཞིང་འགྲོ་བར་བྱེད། །འཇིགས་མེད་ཡན་ལག་ཀུན་སྤངས་པ། །ཐོག་མ་ཐ་མ་མེད་འགྱུར་ཏེ། །སངས་རྒྱས་རྣམས་ཀྱིས་མཁྱེན་སྦྱོར་བས། །དགྱེས་
པའི་རྨད་མཆོག་གཅིག་ཏུ་འགྱུར། །རྡོ་རྗེའི་ནང་ན་རྡོ་རྗེར་འགྱུར། །རིན་ཆེན་ནང་ན་རིན་ཆེན་འགྱུར། །པད་མའི་ནང་ན་པད་མར་འགྱུར། །སྣ་ཚོགས་ནང་ན་སྣ་ཚོགས་མཆོག །དེ་ལ་སོགས་པ་མཐའ་ཡས་མཆོག །མཉམ་དང་

90-1-200b

མི་མཉམ་ཆོས་ཀྱི་དབྱིངས། །ཕྱག་རྒྱའི་ཡེ་ཤེས་བྱིན་བརླབས་པས། །དམ་པ་སྣ་ཚོགས་ཉིད་དུ་འགྱུར། །གཟུགས་མི་སྡུག་པ་གཟུགས་མཆོག་འགྱུར། །མིག་མེད་པ་ཡང་མིག་ལྡན་འགྱུར། །རྣ་འོན་པ་ཡང་སྒྲ་ཐོས་ཏེ། །
གླན་པ་ཡང་ནི་ཡིད་རྣོར་འགྱུར། །དེ་ལ་སོགས་པ་དཔག་མེད་པ། །མིག་གི་ཕྱག་རྒྱས་བཏབ་པར་འགྱུར། །དེ་ཡིས་ལུས་ལ་ཡོན་ཏན་ནི། །ཡོན་ཏན་དམ་པ་མདངས་ཆེར་འགྱུར། །ཇི་ཙམ་དེ་ནི་ནམ་མཁའི་མཐོངས། །འཕུར་ཞིང་འོག་ཏུ་
འབབ་པར་བྱེད། །དེ་ནི་རི་ཡང་ཕུག་ནས་འགྲོ། །ས་དང་ས་ཡི་འོག་ཏུ་ནི། །སྣ་ཚོགས་རྫུ་འཕྲུལ་རྣམས་བྱེད་པས། །དེ་ནི་སྐད་ཅིག་འགྲོ་བར་བྱེད། །སྣ་ཚོགས་མཁའ་འགྲོའི་དཀྱིལ་འཁོར་དུ། །སྔགས་མཁན་འགྱིང་བ་གར་བྱེད་པ། །བདེ་
བ་ཆེན་པོ་བསྐྱེད་པ་ཡིས། །སེམས་ཅན་དེ་ནི་འཇུག་པར་བྱེད། །མི་གཡེང་བལྟ་བའི་བསྒྱུར་བ་ཡིས། །ལས་རྣམས་ཐམས་ཅད་དེ་ཡིས་བྱེད། །འདེག་པ་དང་ནི་ལྟ་བ་ཡིས། །གར་དང་རྣམ་པར་བསྐོར་བ་དང་། །འགྲོ་བ་ཐམས་ཅད་འབབ་བྱེད་དེ། །རི་
དང་སེམས་ཅན་ཐམས་ཅད་ལ། །སྨྲ་བ་དང་ནི་སྒྲ་འབྱིན་དང་། །ཅི་དགའ་བ་ནི་མངག་པར་བྱེད། །གདུག་པའི་ལྟ་བས་སྲོག་ཆགས་རྣམས། །བརྡེག་པ་དང་ནི་སྒྲོལ་བར་བྱེད། །གཏུམ་དང་གདུག་འཇིགས་ཆེ་བ་དང་། །ཁྲོ་བོའི་ལྟ་བས་སྒྲོལ་བར་བྱེད། །ཤིན་ཏུ་
དགྱེས་པ་ཆེན་པོའི་རྡོ་རྗེ་སྤྱན་དང་ལྡན་པ་ཞེས་བྱ་བ་འདོད་པའི་ཡོན་ཏན་ཐམས་ཅད་འགྲུབ་པར་བྱེད་པའི་ཡི་གེའི་ཕྱག་རྒྱ་ཡེ་ཤེས་ཀྱི་མཐུ་ཆེན་པོའོ།། །།དང་པོ་ཨོཾ་གྱིས་རྣམ་པར་བརྒྱན། །ཐ་མར་འབྲུག་གི་སྒྲ་འབྱིན་པ། །རྡོ་རྗེ་
རབ་ཏུ་དགྱེས་པའི་སྐུ། །བདེ་བ་སྐྱེད་བྱེད་བཤད་པ་ཡིན། །ཕྱག་རྒྱ་འདི་ནི་ཕྱག་རྒྱ་ཆེ། །སངས་རྒྱས་རྡོ་རྗེ་དཔའ་བོ་ཡི། །གང་གིས་འདི་ནི་བསྒོམས་མ་ཐག །རྡོ་རྗེ་གསུམ་གྱིས་བྱིན་རློབ་འགྱུར། །བདག་གམ་ཡང་ན་གཞན་ཡང་རུང་། །
འདི་ཡིས་ཉིད་ཀྱི་སྙིང་ག་རུ། །བསྒོམས་ཏེ་གཉིས་མེད་སྦྱོར་བྱས་ན། །སངས་རྒྱས་སྐུ་ནི་རབ་ཏུ་འགྲུབ། །བསྒྲུབ་ན་སངས་རྒྱས་ཐམས་ཅད་ཀྱི། །བུད་མེད་ཀུན་དང་རྩེན་བྱེད་དེ། །ཨཱ་ལི་ཀཱ་ལི་མཉམ་སྦྱོར་བས། །སེམས་ཅན་

90-1-201a

དམན་པའང་དངོས་གྲུབ་པོ། །ཤིན་ཏུ་སྐལ་ལྡན་ཐམས་ཅད་དང་། །སངས་རྒྱས་སྐལ་ལྡན་འཐོབ་འགྱུར་ཏེ། །སྐལ་དང་ལྡན་པ་ཐམས་ཅད་ཀྱིས། །ཆུ་སྐྱེས་ཞབས་ལ་བསྙེན་པར་བྱེད། །ལྷ་དང་ལྷ་མིན་བུ་མོ་དེའི། །
རིག་མས་མཐོང་ན་དགའ་བྱེད་དེ། །ཕྱག་རྒྱའི་ཡེ་ཤེས་བརྒྱན་པ་ཡི། །སྣ་ཚོགས་འདོད་པའི་གཟུགས་སུ་འགྱུར། །སྤྱོད་དང་མི་སྤྱོད་མི་དག་དང་། །ལྷ་དང་ཀླུ་དང་གནོད་སྦྱིན་དང་། །མི་འམ་ཅི་དང་སྐྱེས་བུ་ཡིས། །
དངོས་གྲུབ་པས་ནི་འཕྲོག་མི་ནུས། །དེ་ལ་སོགས་པས་སྟོད་བྱེད་དེ། །འཇིགས་པར་འགྱུར་བའི་སེམས་ཀྱིས་ནི། །བླ་མ་བཞིན་དུ་མཆོད་བྱེད་ཅིང་། །ཀུན་གྱིས་བསྟོད་མཆོད་བསྟི་སྟང་བྱེད། །དེ་ལ་སོགས་པ་མཐའ་ཡས་མཆོག །
ནམ་མཁའ་མཐའ་ཀླས་ལྷ་རྣམས་དང་། །ཉི་མ་བཅུ་ཡི་འོད་ཟེར་བཞིན། །རྣལ་འབྱོར་ཆེན་པོ་འགྲུབ་པ་འགྲོ། །སངས་རྒྱས་ཀུན་གྱི་ཞིང་ཀུན་དུ། །འོད་ཀྱིས་ཐམས་ཅད་མཉེས་བྱེད་ཅིང་། །སངས་རྒྱས་བྱང་ཆུབ་སེམས་དཔའ་རྣམས། །ཟིལ་གྱིས་
མནན་ཏེ་གནས་པར་འགྱུར། །སངས་རྒྱས་ཀུན་གྱི་བདག་ཉིད་ལ། །སྲས་རྣམས་འདུད་ཅིང་ཕྱག་བྱེད་དེ། །ལྷ་དང་ལྷ་མིན་གྲུལ་བུམ་དང་། །ཚངས་པ་གཏོགས་འདོད་ལྷ་ཆེན་པོ། །ཕྱག་རྒྱའི་ཡེ་ཤེས་བྱིན་བརླབས་དེར། །འཇིགས་ཤིང་སྐྲག་
པས་འོང་བར་བྱེད། །བཅོམ་ལྡན་དངོས་གྲུབ་བཀའ་སྩལ་སྩོལ། །ཇི་ལྟར་ཐུགས་ལ་དགོངས་པ་བཞིན། །སྤྱི་བོས་བཀའ་བླང་གདུལ་དཀའ་རྣམས། །དེ་དག་ཐམས་ཅད་བསྒྲུབ་པར་བགྱི། །མདོར་བསྡུས་རྣམ་པ་བཞི་པོ་ཡི། །དམ་
པ་རྣམས་ཀྱང་བསྐྱང་བར་བགྱི། །ཟླ་གསང་ཐིག་ལེའི་མཆོག་ཉིད་ཀྱི། །དབང་བསྐུར་བ་ཡང་བླང་བགྱི་སྟེ། །རིགས་ལྔ་རྣམས་ཀྱི་སྡོམ་པ་ཉིད། །རྣམ་པ་བཞི་པོ་ཐམས་ཅད་བླང་། །ཆུ་སྐྱེས་དངོས་གྲུབ་ཁྱོད་ཞབས་དྲུང་། །འཚོ་བའི་
བར་དུ་བདག་ཅག་འབངས། །ཁྱེད་ཀྱི་སྤྱན་སྔར་ཞམ་རིང་དུ། །ཅི་བགྱི་ཞེས་ནི་བཀའ་ནོད་དོ། །ཕྱག་རྒྱ་འདི་ཡིས་རྒྱས་གདབ་ན། །སྤྱོད་བཅས་མི་སྤྱོད་དགའ་བྱེད་དེ། །རྟག་ཏུ་སངས་རྒྱས་རྣམས་ཀྱི་མཆོག །ཤིན་དུ་བདེ་དང་མཛའ་བ་མྱོང་། །

90-1-201b

རྡོ་རྗེ་ཤིན་ཏུ་དགྱེས་པའི་སྐུ་ཆེན་མོ་བདེ་བ་དཔེ་མེད་པ་དང་ལྡན་པ་ཞེས་བྱ་བའི་ཕྱག་རྒྱའི་ཏིང་ངེ་འཛིན་ཏོ།། །།དང་པོར་ཨོཾ་སྟེང་ཐིག་ལེ་སྟེ། །གཞན་གྱིས་མི་ཕྱེད་ཁྲོས་བཅས་པས། །གཉིས་ཀྱི་དབུས་སུ་གཞག་པ་ནི། །
གསུང་གི་རྡོ་རྗེ་ཤིན་ཏུ་དགྱེས། །བདེ་གསུང་སངས་རྒྱས་ཐམས་ཅད་ཀྱི། །མཆོག་ཏུ་རོ་ནི་མྱོང་བྱེད་པ། །དམ་ཆོས་སྒྲ་ཡིས་གང་བྱས་པའི། །གསུང་གསལ་རྣ་བ་དགའ་བར་བྱེད། །ཡི་གེའི་ཕྱག་རྒྱ་ཆེན་པོ་འདི། །བྱང་ཆུབ་
ཆེན་པོར་གྲུབ་བྱེད་དེ། །ཡོན་ཏན་ཡོན་ཏན་སྡུག་མཐོ་བའི། །ཚད་མེད་ཡོན་ཏན་འཛིན་པའོ། །དཔལ་ལྡན་ཕྱག་རྒྱ་འདིས་བཏབ་ན། །དཔལ་ཀུན་བདག་པོ་དེ་མ་ཐག །བདག་དང་བདག་གིར་འཛིན་སྤངས་པ། །སངས་
རྒྱས་ཀུན་གྱི་བདག་ཉིད་འཐོབ། །ཕྱག་རྒྱ་འདི་ཡིས་བདག་གམ་གཞན། །རྒྱས་བཏབ་འདོད་པ་སྤྱད་བྱས་ནས། །དངོས་གྲུབ་རྨད་དུ་བྱུང་བ་ཡི། །དེ་ཡིས་མྱུར་དུ་འཐོབ་པར་འགྱུར། །སངས་རྒྱས་རྡོ་རྗེ་འཛིན་རྒྱལ་པོ། །སྒྲུབ་
པ་པོ་ཡི་བཀའ་ཉན་ཏེ། །ཅི་སྟེ་རྨོངས་པས་འདའ་བྱེད་ན། །དེ་ཡི་སྲོག་ནི་ཐ་མ་ཡིན། །དེ་ཡི་བསྲུང་བ་བྱས་ན་དཔལ། །ཚེ་དང་ལང་ཚོ་བདེ་བའི་མཆོག །རྡོ་རྗེ་གསུང་གིས་བསྟན་པ་བཞིན། །གདོན་མི་ཟ་བར་འཐོབ་པར་འགྱུར། །
ཕྱག་རྒྱ་ཡེ་ཤེས་རྗེས་བསྡུས་པས། །སྒྲུབ་པ་མི་བྱེད་ཅུང་ཟད་མེད། །བདག་ཉིད་ཐམས་ཅད་སྤྲུལ་པ་ནི། །མཆོག་གི་ཡེ་ཤེས་དངོས་གྲུབ་འགྱུར། །ཕྱག་རྒྱའི་ཡེ་ཤེས་བྱིན་བརླབས་ལ། །སངས་རྒྱས་བྱང་ཆུབ་མི་ལྡོག་དང་། །ཆོས་
དབྱིངས་མི་མཉམ་རབ་ཀླས་པ། །དངོས་གྲུབ་བདག་ཉིད་གཤེགས་ནས་ཀྱང་། །ཤིན་ཏུ་འདས་པའི་སངས་རྒྱས་ཀྱིས། །སེམས་དཔའ་ཆེན་པོ་དེ་ཁྲིད་དོ། །རང་གི་ཏིང་འཛིན་ལྡང་བའི་ཚེ། །དམ་ཚིག་མཆོག་ཏུ་བསྲུང་བྱ་བ། །
ཇི་སྙེད་ནམ་མཁའི་དཀྱིལ་འཁོར་དུ། །འདོད་པ་ཐམས་ཅད་དེ་སྤྱོད་དེ། །རྣལ་འབྱོར་ཆེན་པོ་མི་འདའ་ཞིང་། །ངན་སོང་གསུམ་ཡང་མི་འགྲོ་བྱེད། །དེ་ནི་ཅུང་ཟད་འོག་སྡུག་བསྔལ། །འགྲོ་བ་ཐམས་ཅད་མྱོང་མི་འགྱུར། །རྡོ་རྗེ་གསུམ་དེ་རྨད་འབྱུང་བས། །

90-1-202a

སངས་རྒྱས་ཀུན་གྱིས་བསྔགས་བྱེད་དེ། །བག་ཆགས་མཚམས་སྦྱོར་རྣམ་གྲོལ་བས། །ནམ་མཁའི་རིམ་པར་འགྲོ་འོང་བྱེད། །ལྷ་ཡི་རྟག་ཏུ་མཆོད་བྱེད་དེ། །མཆོད་པར་བྱས་པས་ཤིན་ཏུ་མཆོད། །སེམས་དཔའ་
ཆེན་པོ་འགྲོ་འདུག་ཀྱང་། །བདེ་བྱེད་ཀུན་གྱིས་བདག་ཉིད་དགེ། །གནས་དང་ཟས་དང་བཏུང་བ་སོགས། །ནམ་མཁའ་ལས་ནི་སྐད་ཅིག་རྙེད། །བུད་མེད་རིན་ཆེན་མཆོག་མཁའ་ལས། །བསམས་པ་ཙམ་གྱིས་འགྲུབ་པར་འགྱུར། །
ལས་ཀྱི་དབྱིངས་རྣམས་མ་ལུས་པ། །དེ་ཡིས་ཁམས་གསུམ་འཐོབ་པར་བྱེད། །རྣལ་འབྱོར་སྦྱོར་བ་དངོས་གྲུབ་ཀྱི། །རྣལ་འབྱོར་གྲུབ་ཆེན་འཕྲོག་པར་འགྱུར། །འདི་ལས་བརྟུལ་ཞུགས་དྲག་པ་མེད། །དཀའ་ཐུབ་འདི་དང་འདྲ་མེད་
དེ། །བུད་མེད་མཆོག་ཏུ་བདེ་བ་ལས། །འདོད་པའི་ལོངས་སྤྱོད་སྤྱད་པས་འགྲུབ། །དགེ་བའི་པད་མའི་རིགས་ཀུན་ཏུ། །སེམས་དཔའ་ཆེན་པོ་ངག་དབང་འགྱུར། །གཟུངས་མ་ཀུན་གྱིས་བདེ་ཆེན་པོ། །རྒྱལ་པོ་ཆེན་པོར་
དེ་འགྱུར་རོ། །གསུང་ཐམས་ཅད་ཀྱི་རྡོ་རྗེ་དཔེ་མེད་པ་དང་ལྡན་པ་ཞེས་བྱ་བ་རྡོ་རྗེ་ཤིན་ཏུ་དགྱེས་པ་ཆེན་པོའི་བདེ་བ་ཆེན་པོས་འཐོབ་པར་བྱེད་པ་ཁམས་གསུམ་ཀུན་ཏུ་སྣང་བར་གྲགས་པ་པད་མའི་རིགས་ཀྱི་ཚོགས་ཞལ་གྱི་གསུང་གིས་དགོངས་
པ་ཐམས་ཅད་འགྲུབ་པར་བྱེད་པའོ།། །།ཨོཾ་བཅས་མི་ཕྱེད་ཐ་མར་ཏེ། །རབ་ཏུ་སེམས་ནི་བདེ་བ་སྟེ། །རྡོ་རྗེ་རབ་དགྱེས་བདེ་བྱེད་ཆེ། །དབུས་སུ་མིང་ནི་སྦྱར་བར་བྱ། །ཕྱག་རྒྱ་འདི་ཡིས་དངོས་གྲུབ་ཆེ། །བྱང་ཆུབ་
སེམས་ནི་རབ་བསྒྲུབས་པ། །འདི་ཡིས་བྱིན་གྱིས་བརླབས་མ་ཐག །བདུད་རྩིའི་མཆོག་ནི་ཆུད་པར་འགྱུར། །ཐམས་ཅད་འདོད་པ་ལྡན་བྱས་ན། །དེ་སྟེ་ཐམས་ཅད་སེམས་ཀྱང་རུང་། །བདེ་བ་ཆེན་པོས་སེམས་ཐམས་ཅད། །སྔགས་མཁན་རེག་པའི་
རྒྱས་བཏབ་ན། །འདི་ཡིས་རྡོ་རྗེ་འཛིན་ཉིད་དང་། །རྡོ་རྗེ་དཔའ་བོ་ཉིད་དུ་ཡང་། །ལྷ་མོའི་ཕྱག་རྒྱས་བྱིན་བརླབས་པ། །སྐད་ཅིག་དུ་ནི་འཐོབ་པར་འགྱུར། །ལྷ་མོ་རྣམས་དང་གར་བྱེད་ཅིང་། །དེ་ནི་རབ་དགྱེས་བདག་པོ་ཁྲིད། །ཕོ་བྲང་དགའ་བྱེད་རབ་

90-1-202b

དགྱེས་ཆེ། །རབ་ཏུ་ཆེན་པོ་བདེ་འཐོབ་ཏུ། །སེང་གེའི་གདན་རབ་འཇོག་བྱེད་དོ། །བཞི་དང་བཞི་ཡི་མཆོག་ཉིད་ཀྱི། །རྡོ་རྗེ་པད་མ་སྦྱོར་བ་ཡིས། །དེ་ནི་ཁྲིད་ནས་དབང་བསྐུར་རོ། །དེ་ནས་རྫོགས་སངས་ཚེ་དཔག་མེད། །བྱང་ཆུབ་སེམས་
དཔའ་བརྩོན་འགྲུས་ཆེ། །ཡོད་དང་མེད་པའི་འདོད་སྤངས་པ། །དེ་ལ་ཕྱག་ནི་བྱེད་པར་འགྱུར། །རྡོ་རྗེ་སེམས་མཆོག་འཇོག་བྱེད་དེ། །རང་གི་སྤྱོད་པའི་ཚུལ་གྱིས་ནི། །ཕ་རོལ་ཕྱིན་པ་ཐམས་ཅད་དང་། །སངས་རྒྱས་ཀུན་གྱིས་མདུན་དུ་བསྐོར། །
ས་གསུམ་ཐམས་ཅད་ཀུན་ཏུ་ནི། །སེམས་དཔའ་ཆེན་པོས་སྟོན་བྱེད་པ། །རེས་འགའ་ཤིན་ཏུ་དགའ་སྤྱོད་པ། །རེས་འགའ་ཁབ་ནས་འབྱུང་བ་དང་། །རེས་འགའ་བྱང་ཆུབ་རེས་འགའ་ལྷུམས། །རེས་འགའ་སྐྱེ་དང་རེས་འགའ་འཕོ། །རེས་འགའ་
སྤྱོད་ཆེན་རོལ་པ་དང་། །རེས་འགའ་བདུད་ལས་རྒྱལ་བར་མཛད། །རེས་འགའ་བྱང་ཆུབ་མངོན་བྱང་ཆུབ། །རེས་འགའ་འཁོར་ལོ་སྐོར་མཛད་དེ། །རེས་འགའ་སྣ་ཚོགས་འཇུག་པར་མཛད། །རེས་འགའ་དོན་དུ་ཤིན་ཏུ་མཛེས། །རེས་འགའ་
བུད་མེད་སྐྱེས་པ་དང་། །རེས་འགའ་ལྷ་དང་སྐྱེ་དགུའི་བདག །རེས་འགའ་འདོད་དབང་རྒྱལ་པོ་སྟེ། །རེས་འགའ་འདོད་ལ་རྒྱབ་ཀྱིས་ཕྱོགས། །རེས་འགའ་ཞི་ལ་རེས་འགའ་དྲག །རེས་འགའ་གདོན་ཆེན་བགེགས་མཛད་དེ། །དེ་ལ་སོགས་པ་མཐའ་ཡས་
པ། །ཕྱག་རྒྱ་འདི་ཡིས་རྒྱས་བཏབ་པ། །ཅི་དགར་དངོས་གྲུབ་འདོད་པ་ལ། །བདག་གིས་ངོ་བོར་སྟོན་པར་བྱེད། །མི་ཕྱེད་ཆོ་ག་སྦྱོར་བ་ཡིས། །འདྲེན་པ་མི་ཕྱེད་ཉེ་བྱས་ཏེ། །ཕན་ཚུན་རེག་པ་ཆེན་པོ་ཡིས། །རྡོ་རྗེ་ཅན་གྱིས་དེ་འབིགས་
ཏེ། །གཟུངས་མ་མང་པོ་ཚོགས་ཀྱི་རྣམས། །བདེ་བྱེད་ཆེན་པོ་གཞན་ཅི་སྨོས། །སྤྱོད་བཅས་མི་སྤྱོད་བདེ་དམ་པ། །འབད་པ་མི་དགོས་ཐོབ་པར་འགྱུར། །བརྗིད་པས་བྱང་ཆུབ་སྙིང་པོ་རུ། །རྟག་པ་རུ་ནི་གནས་འགྱུར་ཏེ། །ཕྱག་
རྒྱ་འདི་ཡིས་རྣལ་འབྱོར་པ། །སྦྱོར་བ་རྗེས་སྡུད་ལྡན་པས་སོ། །ཐམས་ཅད་ཆ་ནི་རྣམས་བྲལ་བ། །བྱང་ཆུབ་སེམས་ནི་མཆོག་བཞིན་དེ། །ཡི་གེ་འདིས་ནི་སྦྱོར་བ་ཡིས། །བདག་ཉིད་ཆེན་པོར་དེ་འགྱུར་རོ། །རྡོ་རྗེ་ཤིན་

90-1-203a

ཏུ་དགྱེས་པ་ཆེན་མོ་ཚིམ་པའི་ཡིད་ལས་སྐྱེས་པ་དཔེ་མེད་པ་དང་ལྡན་པ་ཞེས་བྱ་བའི་ཡི་གེའི་ཕྱག་རྒྱ་སྟེ། ལས་ཐཾ་ཅད་གྲུབ་པར་བྱེད་པའོ།། །།དང་པོར་ཨོཾ་ནི་སྦྱོར་བ་སྟེ། །ཐ་མར་གཉིས་པོ་རྫ་རྔའི་སྒྲ། །རབ་
དགྱེས་རྡོ་རྗེ་བྱིན་བརླབས་པའི། །ལྷ་མོ་དངར་བྱེད་དབུས་སུ་གཞག །འདི་ནི་སངས་རྒྱས་ཐམས་ཅད་ཀྱི། །རབ་དགྱེས་ཐོབ་པ་རྨོངས་བྱེད་མ། །རྡོ་རྗེ་ཡེ་ཤེས་ཐུགས་གནས་པ། །དངོས་གྲུབ་ཐམས་ཅད་བསྒྲུབ་པར་བྱ། །སྔགས་མཁན་
ཡི་གེ་ཕྱག་རྒྱ་འདིས། །བདག་གམ་གཞན་ལ་རྒྱས་བཏབ་སྟེ། །རྡོ་རྗེ་འདམ་སྐྱེས་བཅུག་བྱས་ན། །དེ་ནས་དེ་མྱུར་དངོས་གྲུབ་བོ། །ཐམས་ཅད་ལས་བྱེད་དཔལ་དང་ལྡན། །ཚེ་དང་ལང་ཚོ་སྐལ་ལྡན་པའི། །རྡོ་རྗེ་འཛིན་དང་འདྲ་འཐོབ་སྟེ། །
རྡོ་རྗེ་སེམས་དཔའ་རབ་ཏུ་འགྲུབ། །སངས་རྒྱས་རྣམས་དང་དཔའ་བོ་ཡི། །སངས་རྒྱས་ཀུན་དང་རྩེན་བྱེད་ཅིང་། །སྡེ་དབང་རྣམས་དང་ལྷ་རྣམས་ཀྱི། །འཕྲུལ་གྱི་བུད་མེད་འཕྲོག་བྱེད་དོ། །རྡོ་རྗེ་རབ་ཏུ་དགྱེས་པ་ཆེན་མོ་དངར་བྱེད་ཀུན་ཏུ་མྱང་
བ་མེ་ཏོག་གི་རྒྱལ་མཚན་དང་ལྡན་པ་ཞེས་བྱ་བའི་ཡི་གེའི་ཕྱག་རྒྱ་སྟེ། སྒྲིབ་པ་ཐམས་ཅད་རྣམ་པར་སེལ་བ་ལས་ཐམས་ཅད་བྱེད་པ་ཆེན་མོ་གདོན་མི་ཟ་བའི་གཞན་གྱིས་མི་ཕྱེད་མའོ།། །།ཚངས་པའི་གསུང་གི་ང་རོར་བཅས། །ཐ་
མར་དྲིལ་བུའི་ང་རོ་གཉིས། །དབུས་སུ་མིང་གི་ཕྲེང་བ་སྟེ། །ཡི་གེ་འདི་ནི་ཆུ་འཛིན་མཆོག །འདི་ནི་སངས་རྒྱས་ཐམས་ཅད་ཀྱི། །ཡིད་ཀྱི་དངོས་གྲུབ་ཐོབ་བྱེད་དེ། །འདོད་པ་ཡི་ནི་ཐམས་ཅད་རྣམས། །ཡི་གེ་སྐད་ཅིག་འགྲུབ་པར་བྱེད། །འདི་
ཡིས་རྒྱས་བཏབ་བུད་མེད་རྣམས། །བདག་ཉིད་རང་གི་སློབ་མའང་རུང་། །དེ་ཉིད་སྦྱོར་བས་བསྟེན་བྱས་ན། །རྡོ་རྗེ་འཛིན་དཔའ་འདྲ་བར་འགྱུར། །རྣལ་འབྱོར་མ་རྣམས་བདག་པོར་ནི། །མྱུར་དུ་མཁའ་ལ་འགྲོ་བྱེད་དེ། །ཚངས་པ་གཏོགས་འདོད་དབང་
ཆེན་དང་། །ལྷ་རྣམས་ཀྱིས་ནི་མཆོད་པར་འགྱུར། །ལྷ་མོའི་ཚོགས་དང་རྩེན་བྱེད་ཅིང་། །ལྷ་མོ་ཀུན་གྱི་བདག་པོར་འགྱུར། །འཕྲོག་བྱེད་ལ་སོགས་བདག་པོ་ཆེ། །འཇིགས་པར་བྱེད་དང་སྐུ་བྱེད་པ། །སེམས་ཅན་ཀུན་གྱི་མཆོག་དམ་པ། །

90-1-203b

སེམས་དཔའ་ཆེན་པོར་དེ་འགྱུར་རོ། །སྡུག་པའི་ཚོགས་ཀྱི་དབུས་སུ་ནི། །བརྗིད་ལ་སོགས་པའི་སྤྱོད་པས་འགྲོ། །བརྗིད་ཆེ་པད་མ་ཆེན་མོ་ལ། །ཐམས་ཅད་ཀུན་ཏུ་བརྗིད་པ་ཡིས། །བདེ་བྱེད་ཆེན་པོ་མྱོང་བྱེད་དེ། །རབ་ཏུ་དགྱེས་པས་བསྒེག་
པ་བཞིན། །རབ་ཏུ་སྐལ་ལྡན་མགྲིན་འཁྱུད་པས། །རྣལ་འབྱོར་ཆེན་པོར་དེ་གནས་ཏེ། །འདི་ནི་སྙིང་ལ་བྲིས་པ་ཡིས། །ཅི་འདོད་པར་ནི་འདོད་པ་ཐོབ། །ཕྱག་རྒྱ་ཆུ་སྐྱེས་བཏབ་བྱས་ཏེ། །དེ་ལྟར་བྱས་ན་ཕྱག་རྒྱ་དགྱེས། །རྡོ་རྗེ་ཤིན་ཏུ་དགྱེས་
པ་ཆེན་མོའི་དྲི་མ་མེད་པའི་མདོག་དང་ལྡན་པ་ཞེས་བྱ་བའི་ཡི་གེའི་ཕྱག་རྒྱ་སྟེ། ཐམས་ཅད་ལས་བྱེད་པ་དགེ་བའོ།། །།དང་པོ་ཉིད་དུ་ཨོཾ་བྱ་སྟེ། །ཐིག་ལེའི་རྒྱལ་པོས་ཉེ་བར་བརྒྱན། །ཚེག་དྲག་བཅས་པ་འདྲེན་པ་གཉིས། །ལྡན་པ་
མཐའ་མར་གཞག་བྱས་ཏེ། །རྡོ་རྗེ་རབ་དགྱེས་བརྒྱན་བྱས་པ། །རྡོ་རྗེ་སྟོན་ཀ་དབུས་སུ་བསམ། །འདི་ནི་སངས་རྒྱས་ཐམས་ཅད་ཀྱི། །ཡེ་ཤེས་སྣང་བ་རབ་སྒྲུབ་པ། །ཡི་གེ་ཡི་ནི་ཕྱག་རྒྱ་འདིས། །ཉིད་ཀྱི་སྙིང་གར་རྒྱས་བཏབ་ན། །སངས་
རྒྱས་ཡེ་ཤེས་མཆོག་བྱེད་པ། །དེ་ཡིས་སྟོན་ཀ་མ་དངོས་གྲུབ། །སྡེ་དབང་ལྷར་བཅས་ལྷ་རྣམས་དང་། །གནོད་སྦྱིན་སྲིན་པོར་བཅས་པ་དང་། །སྦྲུལ་དང་མི་འམ་ཅི་གནས་པ། །ཐམས་ཅད་འདི་ཡི་གཡོག་ཏུ་འགྱུར། །འདི་ནི་འོད་ཟེར་རབ་ཏུ་འབར་བ་ཡིས། །
སངས་རྒྱས་མཆོག་གི་ཐུགས་ལྡན་དེ་འགྲོ་སྟེ། །སྣ་ཚོགས་རབ་འབྱུང་དཔལ་གྱིས་ཡང་དག་ཁྱབ། །ཆོས་མཆོག་དམ་པ་བྱེད་པ་གཏོང་བྱེད་ཅིང་། །སྤྱོད་བཅས་མི་སྤྱོད་འཇིག་རྟེན་སྣང་བྱེད་དེ། །སྤྲིན་དང་བྲལ་བའི་ཟླ་བའི་འོད་མཆོག་བྱེད། །མཁའ་དབྱིངས་
རྣམ་པར་བསྒྱིངས་པས་རབ་དགའ་བས། །ཨཱ་ལི་ཀཱ་ལི་པད་མ་བདེ་མཆོག་ལ། །མྱོང་ཞིང་མཆོག་བྱས་བསྐལ་པར་གནས་པར་འགྱུར། །འདི་ཡིས་སྡིག་པ་འཕྲོག་བྱེད་དེ། །འདི་ཡིས་མྱུར་དུ་དགའ་བར་འགྱུར། །འདིས་ནི་བདེ་བའི་ངོ་བོ་དེ། །
འདི་ཡིས་དངོས་གྲུབ་གྲུབ་པར་འགྱུར། །སྐྱེ་བའི་སྡུག་བསྔལ་རྒྱབ་ཕྱོགས་པ། །ཚེ་འདི་ཉིད་ལ་ཐོབ་པར་འགྱུར། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཤིན་ཏུ་དགྱེས་པ་ཡེ་ཤེས་ཀྱི་སྣང་བ་དང་ལྡན་པ་ཞེས་བྱ་བའི་ཕྱག་རྒྱ་ཆེན་མོ་སྟེ་

90-1-204a

ཐམས་ཅད་མཁྱེན་པའི་ཡེ་ཤེས་འགྲུབ་པར་བྱེད་པའོ།། །། དང་པོ་ཨོཾ་དང་ཡང་དག་ལྡན། །ཐ་མར་དགྱེས་པའི་ཡི་གེ་གཉིས། །རྡོ་རྗེ་ཤིན་ཏུ་དགྱེས་པ་ཆེ། །དབུས་སུ་གསལ་བའི་ཡི་གེ་བསམ། །
འདི་ནི་སངས་རྒྱས་ཐམས་ཅད་ཀྱི། །སྣ་ཚོགས་ཆེན་མོའི་མདུན་དུ་འགྲོ། །སྣ་ཚོགས་ཆེན་མོ་འདི་ཡིས་ནི། །སྣ་ཚོགས་ཡེ་ཤེས་དངོས་གྲུབ་བོ། །སྔགས་མཁན་ཉིད་ཀྱིས་བྱིན་བརླབས་པ། །སྣ་ཚོགས་བདག་པོ་ཆེན་པོར་འགྱུར། །
སྡིག་པའི་ཡན་ལག་ཀུན་སྤངས་ཏེ། །བསོད་ནམས་ཀུན་གྱི་ཡན་ལག་དགེ། །ཀུན་ཏུ་འགྲོ་བའི་དངོས་གྲུབ་ནི། །འདི་ཉིད་ཀྱིས་ནི་རབ་ཏུ་འགྲུབ། །སྣ་ཚོགས་སྒྱུ་མའི་བདེ་ཆེན་གྱིས། །སྣ་ཚོགས་ཆེན་པོའི་བསྐལ་པར་གནས། །རྡོ་
རྗེའི་བདག་ཉིད་བརྒྱན་པ་ཡི། །བུད་མེད་ཀུན་དང་བརྩེན་པར་འགྱུར། །དེ་ནས་དེ་ཡི་ཆོས་དབྱིངས་གནས། །དབང་ཕྱུག་མཆོག་གི་དངོས་གྲུབ་བོ། །པད་མའི་མདུན་དུ་ཐོག་མའི་ལྷ། །བྱས་ཏེ་རྡོ་རྗེ་བསྒྲུབ་པར་བྱ། །མཐེ་བོང་སྲིན་ལག་དེ་ཕྱུང་
སྟེ། །ཁ་ཡི་ནང་དུ་གཞག་པར་བྱ། །ཆང་བཞིན་མྱང་བར་བྱས་ན་ནི། །མོད་ལ་འདོད་པའི་གཟུགས་སུ་འགྱུར། །ཨཱ་ལི་ཀཱ་ལི་རབ་སྦྱོར་བས། །བུད་མེད་རྣམས་དང་རྩེན་པར་བྱེད། །བློ་ལྡན་རྡོ་རྗེ་སེམས་དཔའ་ཡི། །འདི་ནི་ཤིན་ཏུ་
དགྱེས་ཞེས་བྱ། །བསིལ་བ་དགའ་བྱེད་ཆེན་མོ་སྟེ། །སྣ་ཚོགས་འདི་ནི་འགྲོ་ལ་གནས། །དང་པོ་ཨོཾ་ནི་གནས་པ་སྟེ། །ཏྲ་ཏ་དང་ལྡན་ཐ་མར་བྱ། །རྡོ་རྗེ་ཤིན་ཏུ་དགྱེས་ཆེ་ཧོ། །སྒེག་མོ་དབུས་སུ་བསྐུལ་བའོ། །འདི་ནི་སངས་རྒྱས་
ཐམས་ཅད་ཀྱི། །བསྒེག་པར་བྱ་བ་སྤྲུལ་པ་ཡིན། །འདི་དག་མཉམ་པར་སྦྱོར་བ་ཡིས། །སྒེག་མོས་ཡེ་ཤེས་སྐྱེད་པར་བྱ། །རྡོ་རྗེ་བློ་ལྡན་བརྟེན་པོ་ཡིས། །བདེ་བར་འདོད་པའི་པད་མར་གཟུགས། །འདོད་པས་འདོད་པ་སྤྱད་པར་བྱ། །མྱུར་
དུ་འདོད་པས་དངོས་གྲུབ་བོ། །དེ་ནས་རྡོ་རྗེ་འདོད་དཔལ་ཏེ། །བདེ་བྱེད་ཐམས་ཅད་ཉེ་བར་སྒྲུབ། །སེམས་ཅན་ཀུན་གྱིས་འདོད་བསྐྱེད་པ། །བདེ་བ་ཆེན་པོར་དེ་འགྱུར་རོ། །མཐུ་ཡིས་ཕ་རོལ་ཕྱིན་པའི་མཆོག །པད་མའི་ཚུལ་དུ་བསྒེག་

90-1-204b

པ་ཡིས། །རྡོ་རྗེ་སྦྱོར་ཐབས་ལ་གནས་པས། །རྡོ་རྗེ་ཆེན་པོ་དེ་དངོས་གྲུབ། །ཅི་དགའ་འདོད་པའི་འདོད་ཆགས་ཀྱིས། །རྟག་པའི་ལམ་དང་ཡང་དག་ལྡན། །རྟག་པའི་ཆོས་ཀྱིས་རྗེས་འཐུན་སྤྱོད། །བསྒྲུབས་ན་བརྟག་པ་རྟོགས་པར་འགྱུར། །འདི་
ཡིས་ཀུན་ཏུ་བཟང་ཞེས་བྱ། །དེ་ནི་དངོས་པོ་ཀུན་ཡིན་ཏེ། །འདོད་པ་མེད་ཅིང་ཉོན་མོངས་མེད། །ང་རྒྱལ་མེད་ཅིང་འཛིན་མེད་པ། །སངས་རྒྱས་མཆོག་ཏུ་བརྟག་པ་ཡི། །སངས་རྒྱས་ཆེན་པོ་དེ་ཡི་དངོས། །དཔལ་ལྡན་ཐོག་མ་ཐ་མ་
མེད། །ཆོས་རྣམས་ཀུན་གྱི་རྗེས་འཐུན་པའི། །འདིས་ནི་དངོས་པོ་ཐམས་ཅད་ཀྱི། །སངས་རྒྱས་བདག་པོར་བདག་ཉིད་འགྱུར། །སངས་རྒྱས་རྣམ་པར་སྣང་མཛད་དང་། །འདི་ལ་ཁྱད་པར་ཅུང་ཟད་མེད། །ཤིན་ཏུ་དགྱེས་པ་ཆེན་པོ་རྡོ་རྗེ་
བདག་པོའི་དཔལ་ཤིན་ཏུ་དགྱེས་པ་སྒེག་མོ་དཔེ་མེད་པ་དང་ལྡན་པའི་ཡི་གེའི་མཆོག་གི་སྐུའོ།། །།དང་པོ་ཨོཾ་བཅས་ལྷ་མོ་ཡི། །ཐ་མར་ཚེག་དྲག་མི་ཕྱེད་གཉིས། །དེ་གཉིས་དབུས་ཀྱི་ཕྱོགས་ཉིད་དུ། །ཧེ་ཞེས་བྱ་བ་
རྣམ་བརྒྱན་ཏེ། །ཤིན་ཏུ་དགྱེས་པ་རྡོ་རྗེ་ཆེ། །བཞད་པ་ཉིད་ནི་རབ་ཏུ་སྦྱར། །ཡི་གེ་ཡི་ནི་ཕྱག་རྒྱ་འདིས། །ཉིད་ཀྱི་སྙིང་ལ་རྒྱས་བཏབ་ན། །ཕྲེང་བའི་རྒྱན་གྱིས་རྣམ་བརྒྱན་པར། །དཔལ་ལྡན་དེ་མ་ཐག་ཏུ་འགྱུར། །ཡིད་ཀྱིས་ཇི་ལྟར་
བསམས་པ་བཞིན། །དེ་ནི་སངས་རྒྱས་ཡུལ་དུ་འགྲོ། །དེ་ནི་དེ་ཕྱིར་སངས་རྒྱས་མཐོང་། །ཆུ་སྐྱེས་དེ་དང་རྩེན་པར་བྱེད། །དེ་ནས་འདུས་པ་དགྱེས་འགྱུར་ཏེ། །སངས་རྒྱས་ཡང་དག་ཞིང་ཉིད་ནས། །སངས་རྒྱས་རྣམས་ཀྱིས་བདེ་བ་ཆེ། །དངོས་གྲུབ་རྣལ་འབྱོར་
དེ་ལ་སྦྱིན། །བྱེད་པ་དང་ནི་བཟློག་པ་དང་། །བདེ་བ་ཆེན་པོ་འཕྲོག་པ་ཡིས། །རྣལ་འབྱོར་གསང་བའི་དབང་ཕྱུག་ལ། །གསང་བ་ཆེན་པོས་མགུ་བར་བྱེད། །ཐབས་བཅས་ཤེས་རབ་ཆེན་པོ་ལ། །རྒྱལ་བ་ཉིད་ཀྱིས་སྟོབས་བྱེད་དེ། །ཨཱ་ལི་ཀཱ་ལི་མཉམ་
སྦྱོར་བས། །བདེ་བ་ཆེན་པོ་འགུ་བར་བྱེད། །བདེ་བ་ཐབས་ཀྱི་དངོས་གྲུབ་རྣམས། །སྒྱུ་མའི་ཚུལ་གྱིས་བསྒྲུབ་པར་བྱ། །ཡི་གེ་ཡི་ནི་ཕྱག་རྒྱ་འདིས། །ཤིན་ཏུ་དངོས་གྲུབ་མཆོག་ཏུ་བརྟག །རྡོ་རྗེ་ཤིན་ཏུ་དགྱེས་པའི་བདེ་བའི་ཕྲེང་བ་རྒྱས་པ་དཔེ་མེད་པ་

90-1-205a

དང་ལྡན་མ་ཞེས་བྱ་བའི་ཕྱག་རྒྱ་སྟེ། ལས་ཐམས་ཅད་ཀྱི་དོན་གྱི་དངོས་གྲུབ་སྦྱིན་པའོ།། །།ཨོཾ་ནི་དང་པོར་གཙུག་ཏོར་བྱ། །ཏེ་ཏེ་སྐད་སྙན་ཐ་མར་ཏེ། །དབུས་སུ་ཧེ་དགའ་ཞེས་བྱ་བ། །བདེ་ཆེན་དགའ་བ་རྡོ་རྗེ་
དབྱངས། །རྡོ་རྗེ་ཤིན་ཏུ་དགྱེས་ཆེ་ཡི། །ཕྱག་རྒྱ་འདི་ནི་རབ་དགྱེས་འབྲེལ། །བྲིས་པ་དང་ནི་འཛིན་པ་དང་། །དྲན་པ་ཡིས་ཀྱང་དངོས་གྲུབ་སྟེར། །སྡིག་པ་ཀུན་ལས་གྲོལ་བྱེད་ཅིང་། །བསོད་ནམས་ཐམས་ཅད་ཉེ་བར་འགྲོ། །མི་དགེ་ཐམས་ཅད་མ་ལུས་
སྤོང་བྱེད་ཅིང་། །སེམས་ནི་ཕྱག་རྒྱའི་ཡི་གེ་བརྒྱན་ཏེ་འགྲོ། །འཇིག་རྟེན་ཐམས་ཅད་ཀུན་ཏུ་བཀུར་སྟི་བྱེད། །རིག་མ་སྟོང་གིས་མངོན་པར་མཆོད་བྱེད་ཅིང་། །རིག་འཛིན་མུ་སྨན་བུད་མེད་རྣམས་ཀྱིས་ནི། །གཡག་རྔ་དཀར་པོའི་ཚོགས་ཀྱིས་གཡོབ་བྱེད་
པའི། །འཇིག་རྟེན་དབང་པོ་བདེ་མཆོག་འབྲེལ་པ་འཐོབ། །བློ་ལྡན་ནམ་མཁའ་ངོས་ནི་ཐམས་ཅད་དུ། །རྡོ་རྗེ་འཛིན་གྱི་དགྱེས་པའི་རྣལ་འབྱོར་མ། །ཡིད་དུ་འོང་བའི་སྤྱན་ནི་རྒྱས་པ་དང་། །རྣལ་འབྱོར་སྤྱོད་པའི་བདེ་བས་འབིགས་པ་ཡིས། །མགུལ་
ནས་འཁྱུད་པའི་རྩེན་པས་རོལ་པར་བྱེད། །པི་ཝང་གླིང་བུ་ཡ་མཚན་སྒྲ་སྙན་གྱིས། །གླུ་བླངས་དངོས་གྲུབ་རྒྱ་ཆེ་ཐོབ་པར་བྱེད། །ཇི་སྙེད་ཡིད་དུ་འོང་བའི་གླུ་དག་ནི། །འཇིག་རྟེན་གྲགས་པའི་བདེ་བའི་བདེ་བ་དག །བདེ་བའི་སྒྲ་ཡིས་བསྐྱེད་པར་རྣམས་བསྒྱུར་
བའི། །དེ་དང་འཐུན་པའི་དབྱངས་འདིས་སྒྲུབ་པར་བྱེད། །ཁ་ཊཾ་བ་ད་གར་ཛའི་དབྱངས། །གླུ་རུ་བླངས་པས་པད་མ་གནས། །དངོས་གྲུབ་མྱུར་དུ་འཐོབ་པར་བྱེད། །འདི་ཡིས་བྱིན་བརླབས་དག་པ་དང་། །འདི་ཡིས་བྱིན་བརླབས་བདེ་བའི་རྣམས། །
སྦྱོར་བ་འདི་ཡིས་སྦྱར་བ་ཡིས། །འདོད་བྱེད་ཐམས་ཅད་འཐོབ་པར་འགྱུར། །ཤིན་ཏུ་དགྱེས་པ་ཆེན་པོ་རྡོ་རྗེ་སེམས་དཔའ་མཆོག་ཏུ་དགྱེས་པ་ཆེན་མོའི་དབྱངས་དཔེ་མེད་པ་དང་ལྡན་པའི་ཡི་གེའི་ཕྱག་རྒྱའོ།། །།དེ་བཞིན་ཨོཾ་ནི་དང་པོར་
ཏེ། །དབུས་སུ་ཧེ་དགྱེས་བདེ་བ་ཆེ། །རྡོ་རྗེ་གར་བྱེད་བདེ་བ་གཉིས། །འདི་ནི་ཐམས་ཅད་བདེ་བྱེད་དེ། །སངས་རྒྱས་རྣམས་ཀྱིས་རབ་དགྱེས་ཉིད། །རྣལ་འབྱོར་ཡིས་ནི་རྒྱས་བཏབ་ན། །བདེ་དང་ལྡན་པར་བྱེད་ཅིང་འགྲོ། །འོག་མིན་གྱི་ནི་

90-1-205b

གནས་ཆེན་དུ། །སངྱས་རྣམས་དང་ཐབས་གཅིག་འགྲོགས། །བདེ་བྱེད་ཆེན་པོའི་དབང་ཆེན་དང་། །ཆོས་ཀྱི་རྒྱལ་པོ་བདེ་ཆེན་ཐོབ། །ཇི་སྙེད་གར་གྱི་གཙུག་ལག་ལས། །སྒྱུར་བར་བྱེད་པ་ཤད་པ་དང་། །ཇི་སྙེད་དེ་སྙེད་ཕྱག་རྒྱའི་རྣམས། །གཉིས་
མིན་འདུས་པས་འདི་དངོས་གྲུབ། །ཀྱེ་མའོ་དགྱེས་པ་བདེ་བྱེད་ཆེ། །ཀྱེ་མའོ་བདེ་བ་བདེ་ཆེན་པོ། །ཀྱེ་མའོ་འདོད་པ་འདོད་ཆགས་ཆེ། །ཀྱེ་མའོ་སྣ་ཚོགས་བདག་ཉིད་ཆེ། །དེ་ལ་སོགས་པ་ཚད་མེད་པ། །འཇིག་རྟེན་གྱི་ནི་ཡོ་བྱད་རྣམས། །
པད་མ་གསལ་བ་གར་གྱིས་ནི། །རྣལ་འབྱོར་གར་བྱས་དངོས་གྲུབ་བོ། །སངས་རྒྱས་ཀུན་གྱི་ཕྱག་རྒྱ་འདི། །སྣ་ཚོགས་གར་ནི་སྟོན་བྱེད་པས། །མྱུར་དུ་གར་ནི་མང་བྱས་པས། །གར་གྱི་གཙུག་ལག་དངོས་གྲུབ་བོ། །རྡོ་རྗེ་ཤིན་ཏུ་དགྱེས་པ་ཆེན་པོའི་
དཔལ་བདེ་བ་ཆེན་པོ་དགའ་བྱེད་གར་ཞེས་བྱ་བའི་ཡི་གེ་ཕྱག་རྒྱ་ཕན་ཚུན་བཅུ་པ་རྒྱལ་མཚན་དང་བ་དན་གསུམ་པའོ།། །།བཅུ་གསུམ་ཡི་གེ་དང་པོ་ཉིད། །རྡོ་རྗེ་ཤིན་ཏུ་དགྱེས་པ་ཆེ། །རྡོ་རྗེའི་སྐུ་ནི་སྣ་ཚོགས་ཆེ། །ཐ་མར་འབར་དང་འདྲ་བའི་ཛ། །
ནམ་མཁར་ཟླ་སྐར་འདྲ་བ་ཡི། །ཕྱག་རྒྱའི་ཡེ་ཤེས་རྨད་བྱུང་བའི། །འདི་ཡིས་ཐབས་ཀྱིས་མཉམ་གཞག་སྟེ། །གཟུང་བ་གསལ་བར་གཟུང་བ་ཡི། །ཚ་བའི་གསེར་གྱིས་གཟི་བརྗིད་འཛིན། །ཡེ་ཤེས་སྙིང་གར་བསམ་པར་བྱ། །ནམ་མཁའ་
ཉི་མ་བུམ་འདྲ་བར། །དེ་ནི་དེ་མ་ཐག་ཏུ་འགྱུར། །འདི་ནི་སངས་རྒྱས་ཐམས་ཅད་ཉིད། །ཤིན་ཏུ་རྨད་བྱུང་ཐོབ་པར་འགྱུར། །རྣལ་འབྱོར་ཀུན་གྱི་བདེ་འབྲེལ་པ། །རྡོ་རྗེ་བློ་མཆོག་དངོས་གྲུབ་བོ། །སངས་རྒྱས་རྡོ་རྗེ་འཛིན་དགེ་ཡི། །སྣ་ཚོགས་ཆེན་
པོ་ཐོབ་འགྱུར་ནས། །འདོད་པའི་ཆོས་ཀྱིས་མི་གོས་ལོ། །འདོད་པ་ཆེན་པོ་སྟེན་པར་བྱེད། །དེ་བཞིན་གཤེགས་པ་ཐམས་ཅད་ཀྱི་བདག་པོ་ཤིན་ཏུ་དགྱེས་པ་ཆེན་པོ་དཔལ་རྡོ་རྗེ་སེམས་དཔའི་རྡོ་རྗེ་མ་ལུས་པ་ལུས་པ་མེད་པའི་རྡོ་རྗེའི་སྐུ་དཔེ་མེད་པ་དང་ལྡན་པ་ཞེས་བྱ་
བའི་ཡི་གེ་ཆེན་པོའི་ཕྱག་རྒྱའོ།། །།དེ་བཞིན་ཨོཾ་ནི་གཞག་བྱ་སྟེ། །རྡོ་རྗེ་ཤིན་ཏུ་དགྱེས་པ་ཆེ། །རྡོ་རྗེའི་སྒྲ་ནི་བདེ་འབྲེལ་པ། །ཐ་མར་ཁྲོ་བཅས་སྦྱར་བར་བྱ། །ཕྱག་རྒྱ་འདི་ནི་བདེ་མཆོག་སྟེ། །བར་བཅད་པ་ཡང་ཐོས་པར་

90-1-206a

འགྱུར། །ཁམས་གསུམ་ངོ་བོ་ཐམས་ཅད་ནི། །སྒྲ་ཡི་ཐོས་པ་དངོས་གྲུབ་བོ། །འདི་ཡིས་སངས་རྒྱས་ཐམས་ཅད་ཉིད། །ཚེ་འདི་ཉིད་ལ་དངོས་གྲུབ་སྟེ། །བུད་མེད་པད་མ་ཨུཏྤལ་དང་། །མ་ལུས་རྒྱལ་བ་རྣམས་དང་རྩེན། །
རྡོ་རྗེ་པད་མར་སྦྱར་བས་ན། །དགའ་བྱེད་མྱུར་དུ་དངོས་གྲུབ་བོ། །རབ་ཏུ་དགྱེས་པ་ཆེན་པོ་དཔལ་རྡོ་རྗེ་སེམས་དཔའི་ཚད་མེད་པའི་ཡོན་ཏན་གྱི་སྒྲ་དཔེ་མེད་པ་དང་ལྡན་པ་ཞེས་བྱ་བའི་དོན་གྱིས་དཔལ་ཐམས་ཅད་གྲུབ་པར་བྱེད་མའོ།།  ཨོཾ་ནི་སྤྱི་
གཙུག་ཐིག་ལེར་བབས། །རབ་དགྱེས་ཆེན་མོ་རྡོ་རྗེ་ཅན། །རྡོ་རྗེ་དྲི་བདེར་འབྲེལ་པ་ཡི། །ཐ་མར་གནས་ཤེས་རབ་སྦྱར་བྱ། །འདི་ནི་སངས་རྒྱས་ཐམས་ཅད་ཀྱི། །སྣ་ཚོགས་ཆེན་མོ་མདུན་དུ་འགྲོ། །སྣ་ཚོགས་ཆེན་མོ་འདི་ཡིས་ནི། །
སྣ་ཚོགས་ཡེ་ཤེས་གྲུབ་པར་འགྱུར། །བདག་ཉིད་རྡོ་རྗེ་བརྒྱན་པ་ཡི། །དེ་ནི་མཚན་ལྡན་ཀུན་དང་རྩེན། །དེ་ནས་ཆོས་དབྱིངས་གནས་པ་དེས། །ཨཱ་ལི་ཀཱ་ལི་མཉམ་སྦྱོར་བས། །དགའ་བྱེད་ལྷན་ཅིག་རྩེན་བྱས་ན། །དབང་ཕྱུག་དམ་
པ་དངོས་གྲུབ་འགྱུར། །འདི་ནི་རྡོ་རྗེ་སེམས་དཔའ་ཡི། །བློ་ལྡན་རབ་ཏུ་དགྱེས་ཞེས་བྱ། །རྡོ་རྗེའི་དྲི་དཔེ་མེད་པ་དང་ལྡན་མ་ཞེས་བྱ་བའི་ཡི་གེའི་ཕྱག་རྒྱའོ།། །།ཨོཾ་མཆོག་གཙུག་ཏོར་རྣམས་བྱས་ཏེ། །ཤིན་ཏུ་དགྱེས་ཆེ་དབུས་
ཉིད་དུ། །རྡོ་རྗེ་རོ་ནི་སྦྱོར་ཆེ་བ། །ཐ་མར་ཧོ་སྟེ་ཐིག་ལེ་གཉིས། །འདི་ཡིས་རབ་ཏུ་དགྱེས་པར་འགྱུར། །དཔལ་ལྡན་དཔེ་མེད་བདེ་བ་དང་། །བཅོམ་ལྡན་རྡོ་རྗེ་སེམས་དཔའ་ཉིད། །སྣ་ཚོགས་སྦྱོར་བ་སྣ་ཚོགས་བདག །སངས་རྒྱས་ཀུན་
གྱི་རོལ་པ་ཡིས། །མཆོད་པ་མི་ཟད་བྱེད་པར་འགྱུར། །སངས་རྒྱས་རྣམས་ཀྱི་གནས་ཐམས་ཅད། །ནམ་མཁའ་མཉམ་པ་ཉིད་ཐོབ་བོ། །རབ་ཏུ་དགྱེས་པའི་དབང་པོ་ཤིན་ཏུ་དགྱེས་པ་ཆེན་པོའི་རོ་མཆོག་གི་རྒྱལ་མཚན་དང་ལྡན་པ་ཞེས་བྱ་བ་སེམས་
ཅན་ཐམས་ཅད་ཀྱི་དོན་ཐམས་ཅད་གྲུབ་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་པོ་ཟླ་གསང་ཐིག་ལེ་བཤད་པའི་རྒྱལ་པོ་ལས། ཆོས་ཀྱི་འཁོར་ལོ་སྟེ་གཉིས་པའོ།། །།

90-1-206b

དེ་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོ་དཔལ་རྡོ་རྗེ་སེམས་དཔའ་ཀུན་ཏུ་བཟང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཤིན་ཏུ་དགྱེས་པ་ཆེན་པོ་གདོན་མི་ཟ་བའི་རྒྱལ་པོ་ཞེས་བྱ་བའི་དཀྱིལ་འཁོར་ཆེན་པོ་བཤད་ནས་ཅང་མི་གསུང་
བར་གྱུར་ཏོ། །དེ་ནས་ནམ་མཁའི་དབྱིངས་ཅད་ཀྱི་རྡུལ་ཕྲན་དང་མཉམ་པའི་དེ་བཞིན་གཤེགས་པ་དེ་དག་ཐམས་ཅད་གསང་བའི་གཟུངས་དང་གཡོགས་ཏུ་བཅས་པ་རྣམས་ཀྱིས་ཡོངས་སུ་བསྐོར་བ། བྱང་ཆུབ་སེམས་དཔའི་འཁོར་ཆེན་པོ་དང་
བཅས་པ་རྣམས་ཀྱིས་མདུན་དུ་བྱས་པ་མ་ལུས་པ་ལུས་པ་མེད་པའི་ནམ་མཁའ་ལ་འགྲོ་བ་དང་། ནམ་མཁའ་ལ་འགྲོ་བའི་ཚོགས་དང་ལྡན་པ། ཕྱི་ནང་གི་ཕོ་ཉ་དང་ཕོ་ཉ་མོ་རབ་ཏུ་རྒྱས་པ་རྣམས་ཤིན་ཏུ་ངོ་མཚར་རྨད་དུ་གྱུར་ཏེ། དགྱེས་ཤིང་
སྤྱན་ནི་རྒྱས་པ་ཡིས། །བཞེངས་ནས་དགྱེས་པ་ཆེན་པོ་ཡི། །བརྗིད་པའི་ཕྱག་གིས་གར་མཛད་ཅིང་། །ཐལ་མོ་སྦྱར་ནས་གཙུག་ཉིད་དུ། །བཞག་པ་ཡིས་ནི་འདུན་པ་བྱེད། །བསྐུལ་བ་ཡིས་ནི་དབྱངས་འདི་ཡིས། །དེ་དག་གཙོ་ལ་མཉེས་པར་བྱེད། །
ཀྱེ་མའོ་ཆོས་ནི་ངོ་མཚར་ཆེ། །ཀྱེ་མའོ་སྤྱོད་པ་ངོ་མཚར་ཆེ། །ཀྱེ་མའོ་སྦས་པ་ངོ་མཚར་ཆེ། །ཀྱེ་མའོ་བདེ་བ་ཡང་དག་འབྱུང་། །ཀྱེ་མའོ་ཀུན་ཏུ་བཟང་པོའི་དོན། །ཀྱེ་མའོ་རབ་དགྱེས་ཡང་དག་འགྲོགས། །ཀྱེ་མའོ་བདེ་བ་དག་པ་ཆེ། །
ཀྱེ་མའོ་བདེ་བ་བདེ་མཆོག་སྟེ། །ཀྱེ་མའོ་སྔགས་ཀྱི་ཡང་དག་སྦྱོར། །ཀྱེ་མའོ་སྙིང་པོ་ཡང་དག་བསྡུས། །ཀྱེ་མའོ་ཕྱག་རྒྱ་མཉམ་པར་བཞུགས། །ཀྱེ་མའོ་སྒྲུབ་པ་རྨད་འབྱུང་བའོ། །ཀྱེ་མའོ་ཕ་རོལ་ཕྱིན་མ་ཡིན། །ཀྱེ་མའོ་ཇི་ལྟར་
མཐུ་རིག་མའི། །ཀྱེ་མའོ་སྣ་ཚོགས་དགོས་པ་ཆེ། །ཀྱེ་མའོ་དག་པ་གསུམ་སྦྱར་བ། །ཀྱེ་མའོ་རྡོ་རྗེ་མཉམ་སྦྱོར་བའི། །ཀྱེ་མའོ་པད་མ་རྣམ་བྱེ་བས། །ཀྱེ་མའོ་དབང་པོ་གཉིས་སྦྱོར་བའོ། །ཀྱེ་མའོ་མཆོག་དང་མཉམ་པའོ། །ཀྱེ་མའོ་གར་
ནི་དག་པ་ཆེ། །ཀྱེ་མའོ་གླུ་རབ་དྲི་མ་མེད། །ཀྱེ་མའོ་སིལ་སྙན་རྣམ་པར་འབྲེལ། །ཀྱེ་མའོ་བརྡབ་དང་མུན་པ་སེལ། །ཀྱེ་མའོ་དག་བྱེད་མེ་ཏོག་ཕྲེང་། །ཀྱེ་མའོ་སྤོས་སྣོད་དགེ་བ་སྟེ། །ཀྱེ་མའོ་མར་མེ་མུན་པ་སེལ། །ཀྱེ་མའོ་དྲི་ནི་ཤིན་ཏུ་

90-1-207a

བསིལ། །ཀྱེ་མའོ་རྣལ་འབྱོར་མཉམ་པར་སྦྱོར། །ཀྱེ་མའོ་སྒྱུར་བ་ནམ་མཁའ་འདྲ། །ཀྱེ་མའོ་སངས་རྒྱས་རྡོ་རྗེ་མཆོག །ཀྱེ་མའོ་རིན་ཆེན་བདེ་མཆོག་སྐྱེད། །ཀྱེ་མའོ་སྣ་ཚོགས་པད་མཆོག་ལྡན། །ཀྱེ་མའོ་སྣ་ཚོགས་
སྒྱུ་མ་མཛད། །ཀྱེ་མའོ་ངོ་མཚར་སངས་རྒྱས་དང་། །ཀྱེ་མའོ་ངོ་མཚར་དཔའ་བོ་རྣམས། །ཀྱེ་མའོ་ངོ་མཚར་སེམས་དཔའ་རྣམས། །ཀྱེ་མའོ་ངོ་མཚར་ལྷ་ཡི་རྣམས། །ཤིན་ཏུ་དགྱེས་ཆེ་རྡོ་རྗེ་ལ། །རྒྱན་པ་ཀུན་གྱིས་བསྟོད་བྱས་ཏེ། །རྡོ་རྗེ་
སེམས་དཔའི་འགྱིང་བ་ཡིས། །དགའ་དང་བདེ་བྱེད་སྐྱེས་པར་འགྱུར། །དེ་ནས་ཕ་རོལ་ཕྱིན་ཐམས་ཅད། །འཁོར་གྱི་དཀྱིལ་འཁོར་དགྱེས་འགྱུར་ཏེ། །སེམས་དཔའ་ཆེ་ལ་ཕྱག་བྱས་ནས། །མཆོག་གི་དབྱངས་ཀྱིས་བསྟོད་པར་བྱེད། །ཆུ་སྐྱེས་ཞལ་
ནི་འཛུམ་བཅས་པ། །ཡངས་པའི་སྤྱན་གྱིས་གར་མཛད་དེ། །ཕྱག་དང་ཞབས་ནི་བསྒྱུར་བ་ཡིས། །རབ་ཏུ་དགྱེས་ལྡན་སྨིན་མ་བསྒྱུར། །ཡིད་ཙམ་འཛུམ་པའི་སྤྱན་ཟུར་གཟིགས། །ཤས་རྒྱས་བརླ་ནི་ནུ་མར་མདུད། །རྐེད་པའི་དབྱིབས་
ནི་རྣམ་པར་ཡངས། །སྣམས་ཀྱི་ངོས་ཀྱང་ཆེ་ལ་མཛེས། །ཆགས་པ་ཆུང་ཟད་ཚེམས་ཀྱིས་གནོན། །ཚེམས་ཀྱི་ཕྲེང་བ་ཀུན་ད་ཟླ། །མིག་དྲག་ཟློས་པའི་དབུགས་འབྱིན་ཅིང་། །ཨ་ལ་ལ་ལ་ཧོ། དམ་ཚིག་རྗེས་སུ་ཆགས་པའི་བདག་ཉིད་སྡུག་
བསྔལ་ཞི་མཛད་ཅིང་། །རབ་ཏུ་དགྱེས་ཆེ་དགྱེས་པར་བསྟོད། །བདེ་བས་བདེ་ལ་ལོངས་སྤྱོད་མཆོག་ཏུ་བདེ་བའི་རང་བཞིན་བསམ་གྱིས་མི་ཁྱབ་བསྟེན། །དགོངས་པའི་དབང་དང་ལྡན་པས་འགྲོ་བ་ཡ་མཚན་ཆེན་པོའི་སྒོ་ནས་འདུལ་མཛད་ཅིང་། །གསང་
བའི་ཐིག་ལེ་འཇིག་རྟེན་གསུམ་པོ་འདིར་ནི་དངོས་གྲུབ་གཙོར་བསྟེན་ཏེ། འཇིག་རྟེན་གསུམ་པོ་སྦྱང་བར་བྱ་བའི་ཆོས་དེ་བདེ་གཤེགས་དོན་དུ་མཛད། །ངོ་མཚར་ཡོན་ཏན་ལྡན་པ་དམ་ཚིག་བདེ་ལས་འབྱུང་། །བདེ་མཛོད་བདེ་སྤྱོད་དགའ་ལ་རོལ་པ་ཚུལ་
བཞིན་མཛོད། །ཐམས་ཅད་དགའ་བའི་ངང་ཉིད་ཐིག་ལེའི་དཀྱིལ་དུ་བསྐྱེད་མཛད་དེ། །བྱང་ཆུབ་སྙིང་པོ་འགྲོ་བའི་ལམ་འདི་བདེ་བར་བསྐུལ་ལ་བསྙེན་པ་མཛོད། །ངོ་མཚར་དེ་བཞིན་གཤེགས་པའི་དམ་ཚིག་རིག་པ་ཆེ་ལ་དགྱེས་ཤིང་བཞུགས། །བདག་

90-1-207b

ཅག་འདུ་ཤེས་རྣམས་དང་བྲལ་བ་ཉིད་ཀྱང་བཞུགས་སྤྱོད་འཛེམ་བཅས་པས། །ཚངས་པའི་རྒྱལ་པོ་དབང་དང་ལྡན་པས་ཀྱང་ནི་དེ་ལ་རག་ལུས་སོ། །ཨ་ལ་ལ་ལ་ཧོ། ཡངས་པའི་སྤྱན་ཅན་དྲང་ཤིང་བཅུག་སྟེ་རོལ་པ་ཚུལ་བཞིན་མཛོད། །
རྣམ་དག་ཡེ་ཤེས་ཆུ་དེས་འགྲོ་བ་རྣམས་ཀྱི་སྡིག་པ་ཁྲུས། །བྱམས་མའི་གཟུངས་མ་བདག་ཉིད་ཆེ་དང་རབ་ཏུ་བརྩོན་མཛོད་ལ། །ཐུགས་རྗེ་ཆེན་པོ་རང་བཞིན་དག་པའི་ཆུ་དེས་བདག་ཅག་དབང་སྐུར་ཅིག །མི་གཡོ་མཉམ་པ་ཉིད་
ཀྱི་རང་བཞིན་ཡེ་ཤེས་ཐོབ་འདོད་ཕྱིར། །དམ་ཚིག་ཆེན་པོ་གསུམ་པོ་འདི་ལ་གནས་ནས་ནི། །ཟླ་གསང་ཐིག་ལེའི་དབྱིངས་སུ་བདག་ཅག་དོགས་མེད་འགྲོ་བར་བགྱི། །དབྱངས་ཀྱི་རྒྱལ་པོ་འདི་ཡིས་ནི། །ཤིན་ཏུ་སྲིད་པས་སྐྱོ་
བ་ཡིས། །སངས་རྒྱས་ཀུན་ཀྱང་འདོད་པ་བཞིན། །གླུ་བླངས་མྱུར་དུ་བསྐུལ་བར་འགྱུར། །དེ་ནས་བཅོམ་ལྡན་འདས་ལ་དབྱངས་ཀྱི་རྒྱལ་པོ་འདིས་བསྟོད་པས་ཤིན་ཏུ་དགྱེས་ཏེ་དེ་བཞིན་གཤེགས་པ་དང་བྱང་ཆུབ་སེམས་པར་བཅས་
པ་དང་། རྡོ་རྗེ་དང་རིན་པོ་ཆེ་དང་། པད་མ་དང་ལས་ཀྱི་རིགས་ཀྱི་བཙུན་མོ་དེ་དག་ཐམས་ཅད་ལ་རྡོ་རྗེ་ཤིན་ཏུ་དགྱེས་པའི་བདེ་བ་ཆེན་པོས་མཉེས་པར་མཛད་དེ། དེ་བཞིན་གཤེགས་པ་ཐམས་ཅད་དང་། རྣལ་འབྱོར་གྱི་དབང་ཕྱུག་ཆེན་པོའི་ཚོགས་
རྣམས་དང་། བྱང་ཆུབ་སེམས་པར་བཅས་པ་དང་། ནམ་མཁའ་ལ་འགྲོ་བ་དང་། ནམ་མཁའ་ལ་འགྲོ་བའི་མའི་ཚོགས་སུ་བཅས་པ་རྣམས་དང་། ཕྱི་ནང་གི་རྡོ་རྗེའི་རིགས་ལས་སྐྱེས་པ་རྣམས་ལ་ཤིན་ཏུ་དགྱེས་པ་ཆེན་པོའི་གར་དང་དབྱངས་
དང་། བརྡུང་བ་དང་ཞི་བའི་ཐལ་མོ་ལ་སོགས་པ་རྣམ་པར་མཛད་པ་ཆེན་པོས་རབ་ཏུ་མཛད་ནས། དམ་ཚིག་ཆེན་པོ་རྡོ་རྗེ་ཤིན་ཏུ་དགྱེས་པ་འདོད་པའི་དབང་པོ་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བདེ་བར་བཅང་མི་
གསུང་བར་གྱུར་ཏོ། །དེ་ནས་དེ་དག་ཀུན་དགྱེས་ནས། །ཤིན་ཏུ་དགྱེས་པ་ཉིད་བྱས་ཏེ། །ཐལ་མོ་སྦྱར་ནས་ས་སྟེང་དུ། །པུས་མོའི་ལྷ་ང་བཙུགས་མཛད་དེ། །ཆོས་ཀྱི་ཕྱིར་ནི་གསོལ་བ་འདེབས། །དཀྱིལ་འཁོར་དམ་ཚིག་བདག་

90-1-208a

ཉིད་ལ། །བཅོམ་ལྡན་དགྱེས་པས་བཤད་དུ་གསོལ། །གང་གི་སེམས་ཅན་བདེ་ཉིད་ཀྱི། །བདེ་བས་དཀྱིལ་འཁོར་བསྒྲུབ་པར་བགྱི། །དེ་ནས་བཅོམ་ལྡན་འདས་དམ་ཚིག་འདོད་པ་ཉེ་བར་ལོངས་སྤྱོད་པའི་དཔལ་ཞེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ཏེ། དཀྱིལ་འཁོར་མཛད་དོ། །ཕྱག་གཉིས་གར་དང་བཅས་པ་ཡིས། །མདུན་དུ་ཐལ་མོ་བཀན་པར་བྱ། །སོར་མོ་ཀུན་གྱི་རྩེ་མོ་ལ། །ཕ་རོལ་ཕྱིན་པའི་ཚོགས་རྣམས་བསམ། །དེ་དག་
མིང་གི་བརྡ་ཡིས་ནི། །སོར་མོ་ཐམས་ཅད་བརྟག་པར་བྱ། །སྦོམ་པོ་ཕན་ཚུན་བསྣོལ་བྱས་ཏེ། །ཤེས་རབ་མཆོད་རྟེན་དུ་ནི་བརྟག །རྡོ་རྗེ་མཆོད་རྟེན་ཕྱིར་བྱས་ཏེ། །ལྷག་མ་འོད་བཞིན་སྤྲོ་བར་བྱ། །འདི་ནི་སངས་རྒྱས་ཐམས་
ཅད་ཀྱི། །ཤེས་རབ་ཕ་རོལ་ཕྱིན་མ་དགེ། །གང་གིས་བཅིངས་པ་ཙམ་གྱིས་ཀྱང་། །སངས་རྒྱས་བྱང་ཆུབ་བྱིན་རློབ་བོ། །ཕྱག་རྒྱ་འདི་ཡིས་རྒྱས་བཏབ་པས། །རྟག་པའི་ཕོ་བྲང་འགྲོ་འོང་བྱེད། །སངས་རྒྱས་སྣང་མཛད་དཔལ་དང་ལྡན། །བཙོ་
མའི་གསེར་གྱི་ཁ་དོག་འཛིན། །ཤེས་རབ་ལྡན་པས་སྦྱོར་བྱས་ན། །འདི་ཡིས་མྱུར་དུ་དངོས་གྲུབ་བོ། །སྐལ་ལྡན་འཕྲུལ་གྱི་བུ་མོ་ལ། །འདི་ཡིས་བྱིན་བརླབས་གར་བྱས་ཏེ། །རྡོ་རྗེ་པད་མར་གཞུག་བྱས་ནས། །སེམས་ནི་བཞུགས་པས་
བསྒྲུབ་བྱས་ལ། །དེ་ནས་སེམས་དེ་བླང་བྱས་ཏེ། །བློ་ལྡན་དེ་ཡིས་བཏུང་བྱས་ཏེ། །གྲུབ་པ་གཟུངས་ཀྱི་དཀྱིལ་འཁོར་དུ། །ཡང་དག་དངོས་གྲུབ་འགྲོ་བར་བྱེད། །ཤེས་རབ་དང་ནི་འཕུལ་གྱི་འམ། །དེ་བཞིན་གཤེགས་པ་འཕྲུལ་བརྟག་
འཐོབ། །སངས་རྒྱས་རྡོ་རྗེ་བློ་ལྡན་གྱིས། །ཀུན་ཏུ་འཕྲོག་པར་ཡོང་མི་ནུས། །ཤིན་ཏུ་དགྱེས་པ་ཀུན་ཏུ་ལོངས་སྤྱོད་པའི་བདེ་བ་ཞེས་བྱ་བའི་ཤེས་རབ་ཀྱི་ཕ་རོལ་ཏུ་ཕྱིན་མའོ།། །།ཐལ་མོ་དེ་ཉིད་ཁྲོ་སྐྱེས་པ། །སྦོམ་པོ་སྐྱིལ་དཀྲུང་གཞག་བྱས་ཏེ། །
སྣ་ཚོགས་ཕྲེང་བ་འབར་བྱེད་པ། །རྣལ་འབྱོར་གྱིས་ནི་ལྷག་མེ་སྤྲོ། །འདི་ནི་རྡོ་རྗེ་ཐམས་ཅད་ཀྱི། །ཤེས་རབ་ཕ་རོལ་ཕྱིན་མ་གསལ། །ཕྱག་རྒྱ་འདི་ཡིས་རྒྱས་བཏབ་པས། །རྡོ་རྗེ་ཡེ་ཤེས་བླ་ན་མེད། །འདི་ཡིས་མྱུར་དུ་འཐོབ་པར་འགྱུར། །

90-1-208b

ཕྱག་རྒྱ་འདི་ཡིས་རྒྱས་བཏབ་པས། །འདི་ནི་བཅིངས་པ་ཙམ་གྱིས་ཀྱང་། །རིང་དུ་སྡིག་པ་འཇིག་པར་བྱེད། །ཚེ་དང་དཔལ་དང་ཡེ་ཤེས་སྐལ། །རྡོ་རྗེ་འཛིན་གྱིས་ཐོབ་པར་འགྱུར་འདི་ནི་དབང་བསྐུར་ཙམ་གྱིས་ཀྱང་། །རྡོ་རྗེ་འཛིན་རྗེར་དེ་འགྱུར་ཏེ། །
རྡོ་རྗེ་དཀྱིལ་གྱིས་མཚན་བཏབ་པས། །ས་ཆེན་འོང་ཞིང་འགྲོ་བར་བྱེད། །འདི་ནི་དགའ་བྱེད་རྡོ་རྗེ་རིགས། །རྡོ་རྗེ་བུད་མེད་འགྲོགས་པ་དང་། །རྡོ་རྗེ་གཟུངས་ཀྱི་དཀྱིལ་འཁོར་དུ། །རྡོ་རྗེ་སེམས་ཉིད་འཐོབ་པར་འགྱུར། །ཇི་ལྟར་དངོས་གྲུབ་
འདུག་པ་དང་། །སངས་རྒྱས་རྡོ་རྗེ་དཔའ་བོ་རྣམས། །སྐད་ཅིག་གཅིག་གིས་འདྲེན་པར་བྱེད། །བསྒྲལ་དང་མཉེས་པར་བྱ་བ་དང་། །རྒྱས་བཏབ་དེ་བཞིན་རྨོངས་པ་དང་། །གསོ་བར་བྱེད་དང་ཟ་བ་དང་། །ཕན་ཚུན་དུ་ནི་བསྐྱེད་པར་བྱེད། །དེ་བཞིན་
གཤེགས་པ་ཐམས་ཅད་ཀྱི་རྡོ་རྗེ་ཆེན་པོའི་དབང་བསྐུར་བ་རྡོ་རྗེའི་ཕྲེང་བ་ཞེས་བྱ་བ་ཤིན་ཏུ་དགྱེས་པ་བདེ་བ་ཐོབ་པར་བྱེད་པ་དཔེ་མེད་པའི་རྡོ་རྗེར་བྱེད་པའི་ཕྱག་རྒྱའོ།། །།རྡོ་རྗེའི་ཐལ་མོ་དེ་ཉིད་ལས། །ཁྲོ་མོ་རྒྱབ་ནི་བསྐུམ་བྱས་ཏེ། །སོར་མོ་ལྷག་མ་
སྔ་མ་བཞིན། །ཕྱག་རྒྱ་འདི་ནི་དབང་བསྐུར་བའོ། །རིམས་དང་གདོན་དང་དུག་ལ་སོགས། །དེ་མ་ཐག་ཏུ་འཕྲོག་པར་བྱེད། །འདི་ནི་བཅིངས་པ་ཙམ་གྱིས་ཀྱང་། །སངས་རྒྱས་ཀྱི་ནི་དགྱེས་པ་ཐོབ། །འདི་ཉིད་ཀྱི་ནི་དབང་སྐུར་དང་། །འདི་ཉིད་ཀྱིས་
ནི་བདེ་དམ་པ། །འདི་ཉིད་ཀྱིས་ནི་རྒྱལ་པོ་ཆེ། །འདི་ཉིད་ཀྱིས་ནི་དཔལ་དམ་པ། །འདི་ཡིས་རྩེན་པ་བྱས་པ་ཡིས། །རབ་དགའ་འགུགས་པ་དངོས་གྲུབ་བོ། །མི་ལ་འདི་ཡིས་བྱིན་བརླབས་ཏེ། །ཉི་མ་ཕྱེད་ན་སྤྱད་བྱས་ན། །འདི་ནི་དེ་མ་ཐག་ཏུ་
ཡང་། །དཔལ་ལྡན་རྡོ་རྗེ་གཟི་བརྗིད་འཛིན། །ཉི་མ་བཅུ་གཉིས་འོད་འདྲར་འགྱུར། །ཞག་བདུན་གྱིས་འགྱུར་གཞན་གྱིས་མིན། །སངས་རྒྱས་ཀུན་གྱིས་འདུལ་བ་དང་། །དགེ་བ་ཐམས་ཅད་དབང་དུ་བྱེད། །གྲོལ་འདོད་རྣམས་ཀྱི་
མུན་པ་སེལ། །བློ་ལྡན་ཕྱག་རྒྱ་མཆོག་ཏུ་འགྱུར། །དེ་བཞིན་གཤེགས་པ་ཐམས་ཅད་ཀྱི། བདེ་བ་ཆེན་པོ་གཟི་བརྗིད་དཔེ་མེད་པ་དང་ལྡན་པའི་ཕྲེང་བ་ཞེས་བྱ་བ་བ་དན་གསུམ་པའི་འཇིག་རྟེན་གསུམ་དུ་བདེ་བ་ཆེན་པོ་ཐོབ་པར་བྱེད་པའི་དམ་ཚིག་གི་

90-1-209a

ཕྱག་རྒྱ་ཆེན་པོའོ།། །།ཕ་རོལ་ཕྱིན་པའི་ཕྱག་རྒྱ་ཉིད། །དགེ་བའི་ཁྲོ་མོ་དང་བྲལ་བ། །ཕ་རོལ་ཕྱིན་པའི་ཆོས་ཡིན་ཏེ། །ཚིག་དང་ཚིག་ཏུ་རྣམ་བྲལ་བའོ། །ཕྱག་རྒྱ་འདི་ནི་བཅིངས་པ་ཡིས། །ཆོས་ཀྱི་དབྱིངས་ནས་རྗེ་རུ་འགྱུར། །
སངས་རྒྱས་ཀུན་གྱིས་དབང་བསྐུར་བས། །དབང་ཕྱུག་དམ་པ་དེ་འགྱུར་ཏེ། །ཐམས་ཅད་དག་པ་མོས་པ་ཡིས། །པད་མ་དམར་པོ་མཆོག་འཛིན་འགྱུར། །པད་མ་སྒྱུ་མ་རྣམ་མཛད་པས། །སྣ་ཚོགས་ཆེན་པོར་དེ་འགྱུར་རོ། །སྡུག་
བསྔལ་ཐམས་ཅད་འཕྲོག་པར་བྱེད། །སེམས་ཅན་ཀུན་ལ་ཐམས་ཅད་སྦྱིན། །འདོད་ཆགས་ཆེན་པོ་ཉེས་སྤངས་ཏེ། །དེ་ནི་བདུད་རྩི་འདྲ་བར་འགྱུར། །འདི་ནི་མྱུར་དུ་གར་བྱས་པ། །བསྒྲུབ་པར་མི་བྱེད་ཅུང་ཟད་མེད། །འདི་ནི་པད་མོ་
སྦྱོར་བ་ཡིས། །བདེ་མཆོག་རྟག་པ་ཐོབ་པར་འགྱུར། །ཤིན་ཏུ་དགྱེས་པ་ཆེན་པོའི་མྱོས་པར་བྱེད་པའི་དཔལ་པད་མ་ཕྲེང་བ་ཞེས་བྱ་བ་ཐམས་ཅད་ཀྱི་དོན་དཔལ་ཤིན་ཏུ་དགྱེས་པར་བྱེད་པའི་ཕྱག་རྒྱའོ།། །།འདི་ཉིད་གཉིས་པའི་སྤྱི་གཙུག་ཏུ། །
བསྒྱུར་ནས་གཞག་པར་བྱས་པ་ནི། །མ་ལུས་དྲི་མ་འཕྲོག་བྱེད་པ། །སྣ་ཚོགས་ཆེན་པོར་དེ་འགྱུར་རོ། །འདི་ཡིས་དབང་ནི་བསྐུར་མ་ཐག །ཁམས་གསུམ་སྣ་ཚོགས་བྱེད་པར་འགྱུར། །སྣ་ཚོགས་དབང་པོ་རྒྱལ་པོ་ཆེ། །སྣ་ཚོགས་གཟུགས་
དང་སྣ་ཚོགས་བདག །སྒྲུབ་པ་ཐམས་ཅད་བདེ་དམ་པ། །འདོད་པ་ཀུན་གྱི་དབང་ཕྱུག་རྒྱལ། །འདོད་པའི་དོན་ཀུན་བསྒྲུབ་བྱེད་པ། །ཐམས་ཅད་འདི་ཡིས་དངོས་གྲུབ་བོ། །བུད་མེད་འདི་ཡིས་བྱིན་བརླབས་ནས། །སྔོ་བསངས་ཁུར་ཚོས་དཀར་
མོ་དང་། །དེ་དང་ལྷན་ཅིག་གར་བྱས་པས། །སྣ་ཚོགས་བདག་པོ་ཆེན་པོར་འགྱུར། །སྔོ་བསངས་ཞིང་མ་ཕྲེང་མ་དག །བྱིན་གྱིས་བརླབས་ནས་དུས་གསུམ་དུ། །མཚན་གྱིས་མཐར་ནི་བསྙེན་བྱས་ནས། །ལས་ཀྱི་དངོས་གྲུབ་ཐོབ་
པར་འགྱུར། །རིགས་ངན་ཅན་དང་སྨེ་མ་དང་། །གར་མཁན་དེ་བཞིན་གར་བྱེད་དག །ཕྱག་རྒྱ་ཡེ་ཤེས་བྱིན་བརླབས་ཏེ། །བསྙེན་དང་དངོས་གྲུབ་ཐོབ་པར་འགྱུར། །ཤིན་ཏུ་དགྱེས་པ་སྣ་ཚོགས་བདེ་བ་སྦྱིན་པར་བྱེད་པ་ཞེས་བྱ་བ་འདོད་པར་བྱེད་

90-1-209b

པ་ཐམས་ཅད་ཀྱི་མཆོག་སྒྲུབ་པར་བྱེད་པའི་ཕྱག་རྒྱའོ།། །།ཕྱག་རྒྱ་དེ་དག་བསྟེན་པའི་རྣམས། །གར་གྱི་ཚུལ་གྱིས་རང་གི་གནས། །དམ་ཚིག་མཆོག་གི་དམ་ཚིག་གིས། །དངོས་གྲུབ་ཆེན་པོའི་མཐུར་འགྱུར་རོ། །ཐལ་མོ་དེ་ཉིད་
སྦྱར་བྱས་ཏེ། །རྡོ་རྗེ་བཅིང་པས་བཅིང་བར་བྱེད། །དེ་ནས་དགའ་བྱེད་དབང་བསྐྱེད་དེ། །མངའ་ཡི་ཚུལ་གྱིས་གཟུང་བར་བྱ། །འདི་ནི་རབ་དགྱེས་གཙོ་བོ་ཡིས། །ཕ་རོལ་ཕྱིན་མཆོག་སྡུག་པ་ཡིན། །སངས་རྒྱས་རྣམས་ཀྱི་མྱོས་བྱེད་པ། །དཔའ་བ་རྣམས་
ཀྱང་རྨོངས་པར་བྱེད། །འདི་ནི་བཅིངས་པ་ཙམ་གྱིས་ཀྱང་། །མི་ཤེས་བྱེད་པ་འཇིགས་པར་བྱེད། །ལས་ཀྱི་དོན་ནི་བཀའ་བཞིན་དུ། །དགའ་ནས་བྲན་བཞིན་བྱེད་པར་འགྱུར། །འདི་ཡིས་བྱིན་གྱིས་བརླབས་པ་ཡིས། །བདེ་ཆེན་རྒྱལ་པོ་འདྲ་
བར་འགྱུར། །དགའ་དང་ལྷན་ཅིག་གར་བྱེད་ཅིང་། །འདོད་དབང་སར་ནི་འགྲོ་བར་བྱེད། །དཔལ་རྡོ་རྗེ་སེམས་དཔའ་ཤིན་ཏུ་དགྱེས་པ་ཀུན་ཏུ་བཟང་པོའི་དགྱེས་པ་ཆེན་མོའི་བདེ་བ་གཉིས་སུ་མེད་པ་དང་ལྡན་མ་ཞེས་བྱ་བ་སྦྱོར་བའི་ཕྱག་རྒྱ་ཆེན་པོའོ།། །།
སྙིང་གར་བཟུང་བའི་སྦྱོར་བ་ཡིས། །འདི་ཡིས་ལས་ཀུན་བྱེད་འགྱུར་ཏེ། །བདུད་རྣམས་ཐམས་ཅད་འབིགས་པར་བྱེད། །རྒྱལ་བ་འདོད་ཆགས་བྲལ་སྤྱོད་པ། །བདེ་གཤེགས་མྱ་ངན་འདས་ཀུན་དང་། །ཐམས་ཅད་འདི་ཡིས་བསློང་བར་བྱེད། །
སངས་རྒྱས་ཐམས་ཅད་མཉེས་བྱས་ནས། །མྱུར་དུ་ལས་ལ་སྦྱོར་བར་བྱེད། །དབང་པོ་ཉེ་དབང་དབང་ཆེན་གྱི། །གདུག་པ་ཐམས་ཅད་འཇོམས་བྱེད་དེ། །འཇིགས་བྱེད་དྲག་པོ་ཆེན་པོ་ཡིས། །གདུག་པ་ཐམས་ཅད་གདུང་བར་བྱེད། །
རྡོ་རྗེ་པད་མར་བཅུག་པ་ཡིས། །མཆེ་བས་མ་མཆུ་བཟུང་བྱས་ཏེ། །སོར་མོ་ཕན་ཚུན་བསྣོལ་བ་ཡིས། །དཔུང་པ་བརྐྱང་སྟེ་གར་དུ་བྱ། །སྣ་ཚོགས་ཆེན་པོ་རབ་རྒྱས་པས། །བདེ་ཆེན་པོ་ཡི་བདེ་འཐོབ་བོ། །འདི་ནི་སངས་རྒྱས་ཐམས་ཅད་
ཀྱི། །འདོད་དང་ཐར་བར་གྲུབ་བྱེད་དེ། །ཕྱག་རྒྱ་འདི་ཡིས་རྒྱས་བཏབ་ན། །འདོད་པ་བཞིན་དུ་འཕུར་བར་བྱེད། །རབ་དགྱེས་འབྲེལ་པས་གར་བྱས་ཤིང་། །ནམ་མཁའ་གཟུང་མའི་ཐབ་ཉིད་ཀྱིས། །ཕན་ཚུན་གཅུ་བའི་གནོན་པ་ཡིས། །

90-1-210a

བཅིངས་ན་འདི་ཡིས་དངོས་གྲུབ་བོ། །དེ་ནི་དེ་མ་ཐག་ཏུ་ཡང་། །ལྷ་དང་ལྷ་མིན་མཆོད་བྱེད་དེ། །དབང་པོ་ཉེ་དབང་དབང་ཆེན་དང་། །ཉི་ཟླ་གཤིན་རྗེ་ཆུ་དབང་རྣམས། །སྤྱི་བོ་ཡིས་ནི་ཕྱག་བྱས་ནས། །རང་གི་དཔལ་མཆོག་སྟོབས་
བྱེད་དེ། །རྡོ་རྗེ་འཛིན་པ་ཐམས་ཅད་ཀྱང་། །ཉིད་ཀྱིས་དཔལ་ཅན་སྟོབས་པ་ཡིས། །བརྟན་པ་དེ་ལ་མགུ་བྱེད་ཅིང་། །སངས་རྒྱས་དགོས་པ་རབ་སྒྲུབ་བྱེད། །འདི་ཡིས་ལས་ཀྱི་ཚུལ་གྱི་རྣམས། །ལས་དང་རྗེས་སུ་འཐུན་འགྱུར་ཏེ། །རྣལ་
འབྱོར་དབང་ཕྱུག་རྣམ་མཛད་པས། །སངས་རྒྱས་ཀུན་དང་མཉམ་སྦྱོར་ཏེ། །གཟུངས་དང་གཉིས་མེད་སྦྱོར་བ་ཡིས། །ཡིད་ལ་འདོད་པའི་ལས་ཀུན་བྱེད། །འཛུམ་དང་གནས་དང་སྦས་པ་དང་། །སྤྱོད་པས་གར་གྱིས་བྱས་པས་སོ། །གཞན་དག་
ཀྱང་དེ་དངོས་གྲུབ་ཆེ། །པད་མའི་འདབ་མ་རྣམས་ཕྱེ་བས། །བྱང་ཆུབ་སེམས་ནི་རབ་སྒྲུབ་པ། །སྒྲུབ་པ་པོས་ནི་པད་མོ་བསྒྲུུབ། །དེ་བཞིན་གཤེགས་པ་ཐམས་ཅད་ཀྱི། །བདེ་བ་གཉིས་སུ་མེད་པའི་དཔལ། །ཤིན་ཏུ་དགྱེས་པའི་པད་མ་འདབ་མ་
ཞེས་བྱ་བ་ཤིན་ཏུ་དགྱེས་པ་ཆེན་པོའི་བདེ་བ་ཐོབ་པར་བྱེད་པའོ། །ཐལ་མོ་དེ་ཉིད་བཅིངས་པ་ཡིན། །བཅིངས་པ་གྱེན་དུ་བཟུང་བྱས་ཏེ། །མཐེའུ་ཆུང་གཉིས་ནི་བསྒྲེང་བྱས་ཏེ། །དེ་བཞིན་སྦོམ་པོ་གཉིས་ཀྱང་བྱ། །ཕྱག་རྒྱ་འདི་ནི་ཆུ་
སྲིན་ཞེས། །རྒྱལ་མཚན་ལྡན་པར་བཤད་པ་ཡིན། །རྡོ་རྗེ་སེམས་དཔའ་སྤྲུལ་པ་སྟེ། །འདོད་བྲལ་ཆགས་པར་བསྒྲུབ་པ་ཡིན། །ཕྱག་རྒྱ་འདི་ཡིས་བདེ་ལྡན་གྱི། །ཕོ་བྲང་ཆེན་པོར་འགྲོ་བར་བྱེད། །དེར་ཕྱིན་ཆོས་ཀྱི་འཁོར་ལོ་དག །
བླ་མེད་པར་ནི་སྐོར་བར་བྱེད། །སངས་རྒྱས་ཕ་རོལ་ཕྱིན་མས་བསྐོར། །སྡིག་སྤངས་རྣམས་ནི་བཀུག་ནས་ཀྱང་། །སྤྱོད་པ་དྲག་པོའི་ཚུལ་གྱིས་ནི། །བསྐལ་པ་བྱེ་བར་བསྙེན་པར་བྱེད། །ཡང་དག་བྱང་ཆུབ་གནས་པ་ཡི། །སངས་རྒྱས་འདི་ཡིས་
མཉེས་པར་བྱེད། །དེ་ནས་དགྱེས་ཏེ་སྣ་ཚོགས་ཆེ། །སྣ་ཚོགས་ཡེ་ཤེས་སྐྱེ་བ་ཡི། །རང་གི་དམ་ཚིག་གསུངས་པ་ཡི། །སེམས་དཔའ་ཆེན་པོ་སྒྲུབ་པར་བྱེད། །བླ་མེད་དངོས་གྲུབ་ཐམས་ཅད་ཀྱང་། །འདི་ཡིས་ཐམས་ཅད་ཐུབ་པར་བྱེད། །སྦྱོར་དང་ལྡན་

90-1-210b

པས་བྱིན་བརླབས་ཏེ། །སྙིང་གར་ཉེ་བར་བསམ་བྱས་ན། །ལས་ཀྱི་ངོ་བོ་ཚུལ་འདི་ཡིས། །ཐམས་ཅད་ལས་ནི་བྱེད་དུ་གཞུག །གར་དང་དབྱངས་ཀྱི་རོ་དགའ་དང་། །སིལ་སྙན་བརྡུང་བ་རྣམས་བྱེད་དང་། །པི་བང་གླིང་བུ་རྫ་རྔ་ཡི། །ཕྱག་
རྒྱ་འདི་ཡིས་བསྒྲུབ་པར་བྱ། །དཔལ་རྡོ་རྗེ་ཤིན་ཏུ་དགྱེས་པ་ཆེན་པོའི་ཐུགས་ཀྱི་དགྱེས་པ་དཔེ་མེད་པ་དང་ལྡན་མ་ཞེས་བྱ་བའི་ཕྱག་རྒྱའོ།། །།ཐལ་མོ་དེ་ཉིད་མཉམ་བཟུང་ནས། །འགྱིང་ཞིང་འགྱིང་བས་གར་བྱས་ཏེ། །བཅིང་བ་ཆེན་པོས་བཅིངས་
བྱས་ནས། །སྦྱོང་བ་ཆེན་པོ་གཉིས་སུ་བྱ། །ཁུ་ཚུར་གཉིས་པོ་དཀུ་ཉིད་དུ། །གཡོན་དུ་འགྱིང་བས་བརྟན་པར་བྱ། །ཕྱག་རྒྱ་འདི་ནི་རྒྱལ་ལ་སོགས། །བདེ་བ་དམ་པས་མཆོད་བྱས་ཏེ། །འགྱིང་བའི་སྦྱོར་བས་གར་བྱས་ན། །དངོས་གྲུབ་ཐམས་ཅད་
གྲུབ་པར་བྱེད། །འགྱིང་བ་ཙམ་གྱི་སྦྱོར་བ་ཡིས། །འགྱིང་བ་ཐམས་ཅད་འཕྲོག་པར་བྱེད། །ལྷ་དང་ལྷ་མིན་རིག་མ་ཡིས། །འབུམ་ཕྲག་བརྒྱ་ཡིས་མཆོད་པར་བྱེད། །རབ་ཏུ་དགྱེས་པ་བདེ་མཆོག་ཆེ། །ཀུན་ཏུ་གར་བྱས་གནས་པར་འགྱུར། །ཀླུ་
མོ་ལྷ་དང་ལྷ་མིན་དང་། །དེ་བཞིན་མི་འམ་བདག་པོར་འགྱུར། །ནམ་མཁར་འགྲོ་མའི་ཁྱོར་འགྱུར་ཏེ། །རྣལ་འབྱོར་མ་ཀུན་བདེ་བ་ཆེ། །གཟུངས་མ་རྣམས་ཀྱི་དག་པ་བདག །གསང་བ་ཕ་རོལ་ཕྱིན་པའི་རྗེ། །ལས་ཀྱི་སྦྱོར་བ་འདི་ཡིས་ནི། །ཐམས་ཅད་
ལས་ནི་བྱེད་པར་བཤད། །སངས་རྒྱས་ཀུན་གྱི་གསང་བ་ཆེ། །གསང་ཆེན་སྦྱོར་བས་དངོས་གྲུབ་བོ། །དཔལ་ཤིན་ཏུ་དགྱེས་པ་བདེ་བ་ཆེན་མོ་སེམས་ཅན་ཐམས་ཅད་སྒྲོལ་བར་སྦས་པ་ཞེས་བྱ་བའི་ཕྱག་རྒྱ་ཐམས་ཅད་འགྲུབ་པའོ།། །།ཕྱག་རྒྱ་དེ་ཉིད་མཉམ་
བཟུང་སྟེ། །ལག་པའི་འདབ་མ་གར་དང་བཅས། །མྱུར་བར་སྟེང་དུ་དོར་བ་ཡིས། །མགྱོགས་སུ་འགྲོ་བ་དངོས་གྲུབ་བོ། །འདི་ཡིས་སངས་རྒྱས་ཐམས་ཅད་ཀྱི། །རྨད་འབྱུང་དམ་པ་མཆོད་བྱས་པ། །སྦྱོར་བ་གར་གྱིས་མཆོད་བྱས་ན། །ཐམས་
ཅད་ལས་བྱེད་དངོས་གྲུབ་བོ། །གང་དག་དངོས་གྲུབ་མེད་པ་དང་། །གང་དག་བདེ་བ་མེད་པའི་རྣམས། །དེ་དག་ཕྱག་རྒྱ་འདིས་བཏབ་ན། །ནམ་མཁའི་དཀྱིལ་འཁོར་འགྲོ་བར་འགྱུར། །དེ་ཡིས་ཐམས་ཅད་ལས་རྣམས་ནི། །རྨད་འབྱུང་དམ་པ་འགྲུབ་

90-1-211a

པར་བྱེད། །བཙུན་མོ་ཆེན་པོ་དེ་བཞིན་གཤེགས། །འདི་ཡིས་དེ་ནི་འགྲུབ་པར་བྱེད། །གཞན་ཡང་མཆོག་ཏུ་རྒྱ་ཆེ་བ། །མཉམ་དང་མི་མཉམ་ཆོས་ཀྱི་དབྱིངས། །བཙུན་མོ་དམ་པ་དེ་བཞིན་གཤེགས། །ཕྱག་རྒྱའི་
སྦྱོར་བས་དངོས་གྲུབ་པོ། །དཔལ་བདེ་བ་ཆེན་པོ་རྡོ་རྗེ་རབ་ཏུ་དགྱེས་པའི་མེ་ཏོག་གི་ཕྲེང་བ་ཞེས་བྱ་བའི་ཕྱག་རྒྱའོ།། །།དེ་ཉིད་འོག་གི་ངོས་སུ་དོར། །སྟེང་དུ་ཅུང་ཟད་བསྒྲུབ་པར་བྱ། །འདི་ཡིས་སངས་རྒྱས་ཐམས་ཅད་ཀྱི། །བདེ་མཆོག་ཡང་
ནི་ཚིམ་བྱེད་པ། །འདིས་ནི་བཅིངས་པ་ཙམ་གྱིས་ཀྱང་། །བདུད་རྣམས་ཤིན་ཏུ་རིང་བར་འགྱུར། །ཕྱག་རྒྱ་བཅིངས་ཏེ་བསྡིགས་པ་ཡིས། །སྐྲག་ནས་དངོས་གྲུབ་སྦྱིན་པར་བྱེད། །སངས་རྒྱས་དམ་ཚིག་གསུམ་གནས་པའི། །འདི་ཡིས་
མཆོད་པ་བྱས་པར་འགྱུར། །དེ་ནས་གཙོ་བོ་འདིས་མཉེས་ནས། །མཆོག་གི་ཐབ་ནི་སྟོབ་པར་བྱེད། །ཕྱག་རྒྱ་བཅིངས་པ་སྦྱོར་བ་ཡིས། །འདི་ནི་ཐམས་ཅད་བྱེད་པར་འགྱུར། །རྒྱུན་དུ་བྱས་ན་རྣལ་འབྱོར་པ། །དགོས་པ་ཐམས་
ཅད་བྱེད་པར་འགྱུར། །སྡིག་པ་ཐམས་ཅད་འཕྲོག་བྱེད་དེ། །བདེ་བ་དམ་པ་འཐོབ་བྱེད་ཅིང་། །ཚེ་འདི་དང་ནི་ཕ་རོལ་ཏུ། །ཕྱག་རྒྱའི་གནས་སུ་དེ་འགྲོའོ། །དཔལ་ཤིན་ཏུ་དགྱེས་པ་ཆེན་པོའི་བདེ་བ་ཚིམ་པར་བྱེད་པ་ཞེས་བྱ་བའི་ཕྱག་རྒྱ་
སྟེ། དྲི་མ་ཐམས་ཅད་སྤོང་བ་དཔལ་ཤིན་ཏུ་དགྱེས་མའོ།། །།ཐལ་མོ་དེ་ཉིད་སྦོམ་པོ་བསྒྲེང་། །ལྷག་མ་གསལ་བའི་ཉི་མ་བཞིན། །འདི་ནི་སངས་རྒྱས་ཐམས་ཅད་ཀྱི། །ཡེ་ཤེས་མཆོག་ཏུ་སྣང་བྱེད་པའོ། །ཐོག་མ་མེད་ནས་བསྐོར་
བ་མས། །འདི་ཡིས་ཏི་གཏི་མུག་འཕྲོག་བྱེད་དེ། །མཉམ་པར་གཞག་ནས་བཅིངས་མ་ཐག །སངས་རྒྱས་ཀུན་གྱིས་བྱིན་གྱིས་རློབ། །མཉམ་ཉིད་ཡེ་ཤེས་དྲི་མེད་དང་། །པད་མོ་དྲ་བ་དགའ་བ་ཆེ། །སྣ་ཚོགས་དྲ་བ་དཔལ་ཆེན་པོ། །བདེ་
བྱེད་ཆེན་པོ་འཐོབ་པར་འགྱུར། །རྡོ་རྗེ་དགྱེས་པ་ཆེན་མོའི་དཔེ་མེད་པའི་དཔལ་དང་ལྡན་མ་ཞེས་བྱ་བའི་ཕྱག་རྒྱའོ།། །།གཡས་དང་གཡོན་པའི་ལག་པ་ཡིས། །བརྗིད་པའི་གར་གྱིས་གར་བྱ་ཞིང་། །ཐལ་མོ་དེ་ཉིད་མཉམས་སྦྱར་ཏེ། །གཡོན་

90-1-211b

གྱི་ཁུ་ཚུར་སྤྱི་བོར་གཞག །རྒྱལ་བ་རྣམས་ཀྱི་ཕྱག་རྒྱ་འདི། །མཆོད་པ་ཐམས་ཅད་གྲུབ་བྱེད་དོ། །ཐམས་ཅད་དོན་རྣམས་གྲུབ་པ་དགེ། །བཀྲ་ཤིས་རྒྱལ་བ་འཐོབ་པར་བྱེད། །གང་ཞིག་བཅིངས་པ་ཙམ་གྱིས་ཀྱང་། །མཆོད་
པའི་སྤྲིན་ཉིད་རྒྱས་པ་ཆེ། །མཐའ་ཡས་དྲི་མེད་གཟི་བརྗིད་དང་། །སངས་རྒྱས་ཞིང་ནི་དངོས་གྲུབ་པོ། །ཕྱག་རྒྱ་སྦྱོར་བས་སྦྱར་བྱས་ཏེ། །སྐད་ཅིག་གཅིག་གིས་སྦྱར་བྱས་ན། །རྫོགས་སངས་རྒྱས་དང་སྲས་མཆོག་དང་། །འདི་ཡིས་ཐམས་
ཅད་འབབ་པར་འགྱུར། །སྣ་ཚོགས་ཀྱི་ནི་སྦྱོར་བ་ཡིས། །སྣ་ཚོགས་གར་གྱིས་གར་བྱས་ན། །དཔའ་བོ་ཐམས་ཅད་ཀུན་ཏུ་འགྲོ། །ཕུན་སུམ་ཚོགས་པ་འདིས་འགྲུབ་པོ། །དཔལ་ཤིན་ཏུ་དགྱེས་པ་ཆེན་པོ་བདེ་བའི་སེམས་འཕེལ་བར་བྱེད་
མ་ཞེས་བྱ་བའི་ཕྱག་རྒྱའོ།། །།དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་བདག་པོ་དཔལ་ཀུན་ཏུ་བཟང་པོ་ཤིན་ཏུ་དགྱེས་པ་ཆེན་པོ་བདེ་བའི་བདག་ཉིད་རྣམ་པར་སྣང་མཛད་ཆེན་པོ་བཤད་པ་མཐས་ཀླས་པ་
དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་ཟླ་གསང་ཐིག་ལེ་མཆོག་ཏུ་ཕ་རོལ་ཏུ་ཕྱིན་པ། གསང་བ་ཆེན་པོ་དམ་ཚིག་གི་ཕྱག་རྒྱའི་ཡེ་ཤེས་ཀྱི་དཀྱིལ་འཁོར་ཤིན་ཏུ་དགྱེས་པ་རྡོ་རྗེ་གདོན་མི་ཟ་བའི་དཀྱིལ་འཁོར་ཆེན་པོ་
བསྐལ་པའི་མཐའ་ཀླས་པ་ཞེས་བྱ་བ་གསུམ་པ་རྫོགས་སོ།། །། དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་གསང་བའི་ཕ་རོལ་ཏུ་ཕྱིན་པའི་དམ་ཚིག་གི་ཡེ་ཤེས་ཀྱི་ཕྱག་རྒྱའི་དཀྱིལ་འཁོར་འདི་བཤད་ནས་
སླར་ཡང་བདེ་བར་ཅང་མི་གསུང་བར་གནས་པར་གྱུར་ཏོ། །དེ་ནས་དེ་བཞིན་གཤེགས་པ་དེ་དག་ཐམས་ཅད་དང་། ཕ་རོལ་ཏུ་ཕྱིན་མ་རྣལ་འབྱོར་མ་ཆེན་མོའི་ཚོགས་ཐམས་ཅད་དང་། ནམ་མཁའ་ལ་འགྲོ་བ་དང་། ནམ་མཁའ་ལ་འགྲོ་
མའི་ཚོགས་ཐམས་ཅད་ངོ་མཚར་དུ་གྱུར་ནས་ཕྱི་ནང་གི་རྡོ་རྗེའི་རིགས་སུ་གཏོགས་པ་འཕྲོག་པར་བྱེད་པའི་ཚོགས་ཐམས་ཅད་ལ་སླར་དབུགས་ཕྱུང་སྟེ། དེ་ལས་བཞེངས་ནས་གར་མཛད་ཅིང་རབ་ཏུ་དགྱེས་པའི་སྤྱན་རྒྱས་པས་བཅོམ་ལྡན་འདས་ལ་ཡང་དང་

90-1-212a

ཡང་དུ་ལྟ་ཞིང་དབྱངས་ཀྱི་མཆོག་བདེ་བ་འདི་གླུ་བླངས་ཏེ་དགྱེས་པར་བྱེད་དོ། །རྣམ་མང་བདེ་བའི་རོལ་པས་བདག་ཉིད་ཆེན་པོ་ཡིས། །སྐྱེ་དང་མི་སྐྱེའི་ཆོས་ཉིད་ཡ་མཚན་རྨད་དག་དཔལ་བསྟེན་པ། །ཤིན་ཏུ་བདེ་བའི་དཀྱིལ་འཁོར་འཇིག་རྟེན་འདིར་
བྱུང་སྟེ། །རང་བཞིན་དག་པའི་གཟུངས་མའི་དཀྱིལ་ནས་བསྐྱེད་པར་མཛོད། །ངོ་མཚར་རྨད་དུ་བྱུང་བའི་ཆོས་ཉིད་བདེ་བས་རོལ་མཛད་ཅིང་། །བདུད་རྩིའི་རང་བཞིན་འདུས་པ་རྣམས་ལ་དབུགས་འབྱིན་ཅིང་། །གསང་བའི་ཐིག་ལེའི་དངོས་ཉིད་ནམ་མཁའ་འདྲ་
བ་རྣམས་སྤྱད་དེ། །བདེ་བ་ཕུན་སུམ་ཚོགས་པའི་ལོངས་སྤྱོད་རྒྱུ་ལ་དབང་མཛད་པས། །བྱང་ཆུབ་མཆོག་གི་ལམ་འདི་ཉོན་མོངས་མཐའ་དང་རྣམ་བྲལ་ཞིང་། །བདེ་བའི་འབྱུང་གནས་སྐྱེ་ཤི་མེད་པའི་སྒོ་མོར་པད་མ་རྣམ་དག་པ། །ཉོན་མོངས་མི་གོས་སྒྱུ་མར་
གནས་པ་ཆུ་ཟླའི་དཀྱིལ་འཁོར་བཞིན། །ཨེ་མའོ་ཀུན་ཏུ་བཟང་པོ་རིག་པ་རྒྱ་ཆེན་བསམ་གྱིས་མི་ཁྱབ་པ། །དངོས་ཉིད་མེད་པས་ཆོས་ལ་དགའ་བའི་རོལ་པས་གཟུངས་སུ་འགྱུར། །སངས་རྒྱས་ཀུན་གྱི་བདེ་མཆོག་བདུད་རྩི་ར་ས་ཡན། །ཇི་ལྟར་བདེ་ལ་རྟེན་ཅིང་
ཀུན་ཏུ་གནང་བར་མཛད། །ཀྱེ་མ་བདེ་མཆོག་བདེ་བས་རོལ་པ་ཚུལ་བཞིན་མཛོད། །སྡུག་བསྔལ་འགྲོ་བའི་ལས་ཅན་བདེ་བས་ཚིམ་པར་མཛོད། །བྱམས་པའི་སྤྱན་ཅན་ཐུགས་རྗེ་ཉི་མ་ཤར་མཛད་ནས། །གཏི་མུག་ཐིབས་པོའི་མུན་ནག་བྱང་ཆུབ་སེམས་ཀྱིས་གསལ་
བར་སྟོན། །དེ་ནི་འདུས་པའི་ཚོགས་ལ་བདེ་སྦྱིན་རོལ་པའི་རྒྱལ་པོས་གསུངས། །བྱང་ཆུབ་མཆོག་གི་སེམས་དེས་སྙིང་པོ་མཆོག་ཏུ་དབང་བསྐུར་ཅིག །དབྱངས་ཀྱི་ཕྱག་རྒྱ་འདི་ཡིས་ནི། །སྐད་ཅིག་སྐད་ཅིག་བསྐུལ་བྱས་ན། །རབ་ཏུ་དགྱེས་པའི་བདག་ཉིད་ཀྱིས། །
མདུན་དུ་གནས་ཏེ་དངོས་གྲུབ་སྦྱིན། །དེ་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་བདེ་བའི་བདག་པོ་ཀུན་ཏུ་བཟང་པོ་ཆེན་པོ་རྡོ་རྗེ་ཟླ་གསང་ཐིག་ལེ་ཆེན་པོ་ལ། རྡོ་རྗེ་ནམ་མཁའ་ལ་འགྲོ་བ་གསང་བ་ཆེན་པོ་ཚད་མེད་པ་དང་། མཆོག་ཏུ་ཕ་རོལ་ཏུ་ཕྱིན་པའི་
རྣལ་འབྱོར་དང་། རྣལ་འབྱོར་མའི་ཚོགས་ཆེན་པོ་དེ་རྣམས་ཀྱིས་བསྟོད་ཅིང་བསྐུལ་བ་བྱ་བ་དང་། གསང་བ་ཐམས་ཅད་ཀྱི་བདེ་བ་ཆེན་པོ་ཤིན་ཏུ་དགྱེས་པ་ལོངས་སྤྱོད་པའི་དཔལ་ཞེས་བྱ་བའི་ཏིང་ངེ་འཛིན་གྱི་རྒྱལ་པོ་འདི་ལ་སྙོམས་པར་

90-1-212b

ཞུགས་ནས། ཤིན་ཏུ་དགྱེས་པ་ཆེན་པོ་གནོན་མི་ཟ་བའི་དམ་ཚིག་ཅེས་བྱ་བ་རྣལ་འབྱོར་མའི་དཀྱིལ་འཁོར་ཆེན་པོ་འདི་རང་གི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །གྲུ་བཞི་པ་ལ་སྒོ་བཞི་པ། །རྟ་བབས་རྣམས་པ་བཞི་ཡིས་བརྒྱན། །
དར་དང་དྲིལ་བུའི་ཆུན་པོ་དང་། །ཉི་མ་ཟླ་བས་རྣམ་པར་བརྒྱན། །རིན་ཆེན་མུ་ཏིག་འབྲས་བུས་སྤྲས། །དོ་ཤལ་གདུ་བུ་རྣམས་ཀྱིས་བརྒྱན། །སྣ་ཚོགས་གདུག་ནི་རྣམ་བྲེས་པ། །སྣ་ཚོགས་ཕྲེང་བ་གོས་ཀྱི་བརྒྱན། །སྲད་བུ་བཞི་དང་ལྡན་པ་སྟེ། །
ཀ་བ་བརྒྱད་མཆོག་ཡང་དག་གནས། །དབུས་ཀྱི་དགའ་བྱེད་སྟན་ལ་ནི། །དངུལ་ལ་སོགས་པས་རྣམ་པར་བརྒྱན། །སྣ་ཚོགས་པད་མ་དར་གྱིས་གཡོགས། །ཐམས་ཅད་སྟེན་དེ་དག་ཅེས་བྱ། །དབུས་སུ་རྡོ་རྗེ་ཤིན་ཏུ་དགྱེས། །སྟན་དེ་ལ་ནི་གཞག་
པར་བྱ། །ཚད་མེད་པད་མ་དམར་འདྲ་བའི། །སྣ་ཚོགས་རྒྱན་གྱིས་རྣམ་པར་ཀླུབས། །ཡིད་བཞིན་ནོར་བུ་དབུ་རྒྱན་ལྡན། །རིན་ཆེན་གཙུག་གིས་རྣམ་པར་མཛེས། །ཚད་མེད་དར་ནི་དཔྱངས་པ་ཡིས། །དབུ་ལ་ཆུ་བོས་མཛེས་པར་བྱ། །
སྣ་ཚོགས་སངས་རྒྱས་ཀུན་གྱི་བདག །སྣ་ཚོགས་ཡེ་ཤེས་རབ་ཏུ་གནས། །ཆུ་སྐྱེས་སྤྱན་ནི་ཡིད་ཙམ་རྒྱས། །དགའ་བྱེད་ཡིད་ཙམ་གཡོན་དུ་འདུད། །གཡས་པའི་ཕྱག་གིས་རྡོ་རྗེ་ཆེ། །སྙིང་གར་གསོར་ལ་ཤིན་ཏུ་བརྩོན། །དེ་ལ་སོགས་
པའི་ཡོན་ཏན་ལྡན། །ཐོག་མ་ཉིད་དུ་རྣམ་པར་གཞག །སློབ་མའམ་ཡང་ན་གཞན་ཡང་རུང་། །མཚན་ཀུན་གྱིས་ནི་རྣམ་བརྒྱན་པ། །ཚུལ་བཞིན་བྱིན་གྱིས་བརླབ་བྱ་སྟེ། །དབུས་ཀྱི་དཀྱིལ་དུ་གཞག་པར་བྱ། །བདག་ཉིད་ཀྱང་ནི་མཉམ་གཞག་
སྟེ། །དེ་ལ་སོགས་པ་ཡོན་ཏན་གཙོ། །དབུས་ཀྱི་སྟན་ལ་འདུག་པ་ན། །བདག་ནི་རབ་དགྱེས་ཞེས་སུ་སྨྲ། །དེས་ནི་སློབ་མ་བྱིན་བརླབས་ཏེ། །ཐམས་ཅད་ལས་བྱེད་ཕུན་སུམ་ཚོགས། །རྡོ་རྗེ་པད་མ་ལས་བྱུང་བའི། །གསང་བ་ཡིས་ཀྱང་དབང་
སྐུར་རོ། །རབ་དགྱེས་ལ་སོགས་ཡོན་ཏན་ལྡན། །ཡིད་འོང་བུ་མོ་བཙལ་བྱས་ཏེ། །མགྲིན་པ་དཔྲལ་བ་སྙིང་སྤྱི་བོར། །ལྷ་ལ་སོགས་པའི་འབྲུ་བསྒོམས་ཏེ། །མཚན་མ་ཕྱག་རྒྱར་རབ་འབར་བ། །རྡོ་རྗེ་པད་མར་མཉམས་སྦྱོར་བའི། །རང་ལ་འཁྱུད་པའི་

90-1-213a

ཕྱག་རྒྱ་ཡིས། །ཚུལ་བཞིན་ཐམས་ཅད་གཞག་པར་བྱ། །མདུན་དུ་ལྷ་མོ་སྨྱོ་བྱེད་མ། །མ་མཆུ་འཛིན་པས་རོ་ལ་དགྱེས། །དཀར་དམར་ཁ་དོག་འདྲེས་པ་ཡིས། །ཐམས་ཅད་རྒྱན་དང་ཡང་དག་ལྡན། །ལོ་ནི་བཅུ་དྲུག་ལོན་པའི་
མཆོག །ཤེས་རབ་ཅན་གྱིས་མདུན་དུ་གཞག །གཡས་སུ་ལྷ་མོ་གསོད་བྱེད་མ། །མཚོན་ཆའི་མདའ་ནི་འདྲེན་པར་བརྩོན། །དོ་ཤལ་རྐང་གདུབ་དག་གིས་བརྒྱན། །ལོ་གྲངས་ཉི་ཤུ་ལོན་པ་སྟེ། །གསེར་གྱི་རི་བོ་ཞུ་བ་འདྲ། །ཆུ་སྐྱེས་སྤྱན་ནི་
ཡིད་ཙམ་སྔོ། །སེམས་དཔའ་ཆེ་ལ་དགྱེས་མཛད་ཅིང་། །འདི་ནི་ཚུལ་བཞིན་གཞག་པར་བྱ། །རྒྱབ་ཏུ་ལྷ་མོ་རྨོངས་བྱེད་མ། །པད་མ་དམར་པོ་མདོག་གི་འོད། །ཆུ་སྲིན་རྒྱལ་མཚན་མཛེས་མའོ། །སྐུ་ཚེའི་ཚད་ནི་ཉི་ཤུ་གཅིག །དགའ་
བྱེད་འདོད་པའི་རོ་ལ་དགྱེས། །སྣ་ཚོགས་ན་བཟའ་ཡང་དག་གསོལ། །སྣ་ཚོགས་རྒྱན་གྱིས་རྣམ་པར་ཀླུབས། །སྣ་ཚོགས་པད་མ་སྦྱོར་ལ་སོགས། །གར་གྱི་བྱ་བ་རབ་བསླབས་གཞག །གཡོན་དུ་སྣ་ཚོགས་ཆེན་མོ་སྟེ། །སྣ་ཚོགས་དགོས་
པའི་རྗེས་བསླབས་པ། །སྐུ་ཚེའི་ཚད་ནི་བཅུ་གཉིས་ལྡན། །རྣལ་འབྱོར་ལ་ནི་ཤིན་ཏུ་བརྩོན། །ལྷ་དང་ལྷ་མིན་མི་ཡི་རྣམས། །འགྲོ་བ་ཐམས་ཅད་མྱོས་འགྱུར་མ། །སྣ་ཚོགས་རྒྱན་གྱིས་རྣམ་པར་ཀླུབས། །སྣ་ཚོགས་དར་གྱི་ན་བཟའ་
གསོལ། །གྲྭ་རྣམས་ཀྱི་ནི་ཐམས་ཅད་དུ། །གཟུགས་སྒྲ་དྲི་རོ་རེག་གི་རྣམས། །བདུག་པ་མེ་ཏོག་བསུང་ལྡན་པ། །གཟི་བརྗིད་ཆེན་པོ་འོད་དང་ལྡན། །ཅི་རིགས་པར་ནི་གཞག་པར་བྱ། །སྒོ་ཡི་ཕྱོགས་རྣམས་ཐམས་ཅད་དུ། །རང་
གི་ལས་ཀྱི་ཕྱག་རྒྱར་ལྡན། །སྐལ་ལྡན་དགའ་ལ་རྣམ་མོས་པ། །སྒོ་སྲུངས་བཞི་ནི་གཞག་པར་བྱ། །གཞན་ཡང་རྣམ་པ་སྣ་ཚོགས་རྣམས། །པི་ཝང་གླིང་བུ་བརྡབ་པ་དང་། །རྫ་རྔ་རྔ་ཆེན་མུ་ཀུ་དང་། །མུ་ར་ཛ་དང་ད་ར་དང་། །གར་དང་དབྱངས་
དང་བཞད་པ་ཆེ། །རོལ་མོའི་ཡོ་བྱད་སྣ་ཚོགས་རྣམས། །དགའ་བྱེད་དཀྱིལ་འཁོར་གཞག་པར་བྱ། །ཕྱི་ཡི་དཀྱིལ་འཁོར་ཐམས་ཅད་དོ། །དཀྱིལ་འཁོར་འདི་ཡི་ཕྱི་རོལ་དུ། །རྡོ་རྗེ་ནམ་མཁར་འགྲོ་མ་གཞག །ཡི་དགས་རྒྱལ་པོ་ཡང་

90-1-213b

དག་ཞོན། །དཔའ་བོ་འཇིགས་བྱེད་གཟུགས་འཛིན་ཏེ། །སྐལ་ལྡན་རང་གི་ལག་ཅར་ལྡན། །གདུག་པའི་སེམས་ཀྱིས་བསྡིགས་བྱེད་ཅིང་། །ཤ་ཁྲག་དང་ནི་རྒྱུ་མ་དང་། །རྐང་དང་ཚིལ་བུ་ཟ་སྤྱོད་པ། །དཀྱིལ་འཁོར་བྱས་ཏེ་འདུག་པ་ནི། །
ཚོགས་ཀྱི་དཀྱིལ་འཁོར་གཞག་པར་བྱ། །དགའ་བར་བྱེད་དང་འདྲེན་པར་བྱེད། །གསོད་པར་བྱེད་དང་སྤྲོ་བར་བྱེད། །རྡོ་རྗེ་མཁའ་འགྲོ་ཚོགས་ཀྱི་རྣམས། །ཤར་གྱི་ཕྱོགས་སུ་གཞག་པར་བྱ། །གཟི་བརྗིད་ཆེ་དང་འབར་བྱེད་མ། །
འཇིགས་བྱེད་བོང་བུའི་ལྷ་རུ་སྟེ། །གཙུག་ལག་མཐོང་བའི་རྒྱུ་ཡིས་ནི། །མཁས་པས་ཚུལ་བཞིན་གཞག་པར་བྱ། །ཆགས་ཆེན་མོ་དང་ཆགས་བྲལ་དང་། །འཁོར་ལོ་མ་དང་རྒྱས་འདེབས་མོ། །རབ་ཏུ་སྦྱོར་བས་སྦྱོར་བྱས་ཏེ། །ཅི་རིགས་
ནུབ་ཏུ་གཞག་པར་བྱ། །སྣ་ཚོགས་ལུས་དང་བསྲུང་བ་དང་། །གནོད་སྦྱིན་མ་དང་ཡང་དག་འཕྲོག །སྔགས་དང་ཕྱག་རྒྱས་བྱིན་བརླབས་ཏེ། །སྔགས་མཁན་ཅི་རིགས་བྱང་དུ་གཞག །ཤར་གྱི་གྲྭ་རུ་གཞག་པ་ནི། །བྱ་རོག་
གདོང་སྟེ་མིག་འདྲ་ཞིང་། །འཇིག་པའི་མིག་དང་འཇིགས་པའི་གདོང་། །ཇི་ལྟར་རྗེས་སུ་འཐུན་བྱས་ཏེ། །ཡི་དགས་སྟན་ལ་ཡང་དག་འདུག །སྣ་ཚོགས་མཆོག་གི་མདོག་འཛིན་ཏེ། །ལག་པ་གྲི་དང་འཁར་གཞོང་ཐོགས། །མཆོག་
ཏུ་ཤ་དང་ཁྲག་ཟ་བའོ། །ནུབ་དང་ལྷོ་ཡི་མཚམས་གཞག་པ། །བཞད་དང་འུག་པའི་གདོང་རིང་མ། །ཁྲོས་པའི་ཁྱི་དང་ཕག་གི་གདོང་། །གསུས་པོ་ཆེ་ལ་ལྟོ་འཕྱངས་མ། །ནུབ་བྱང་གི་ནི་མཚམས་དག་ཏུ། །རྔ་མོ་བོང་བུའི་གདོང་འཛིན་དང་། །
ཁྲོས་པའི་ར་དང་བྱི་ལའི་གདོང་། །རྒྱུ་མའི་མགོ་ནས་ཟ་བྱེད་རྣམས། །ཤར་དང་བྱང་གི་མཚམས་དག་ཏུ། །ཀེང་རུས་དཀར་པོ་འཛིན་པ་སྟེ། །ཁྲོས་པ་རུས་པའི་ཕྲེང་བས་ཀླུབས། །ལྟོ་འཕྱངས་མོ་ལ་བུམ་པ་འཛིན། །ཕན་ཚུན་
འཐབ་པར་བརྩོན་པ་ཡི། །ལྕེ་སྤྱང་གི་ནི་འཁོར་གྱི་རྣམས། །འཇིགས་བྱེད་གདོང་ནི་མཆེ་བ་འབྱིན། །རྣམ་པར་འགྱུར་བས་གཟུགས་འཛིན་པའོ། །སྒོ་སྲུང་ཀྱི་ནི་ཕྱོགས་ཀུན་དུ། །སྒོ་བཞི་རྣམས་སུ་གཞག་བྱ་བ། །བྱང་གི་ཕྱོགས་

90-1-214a

སུ་འབོད་སྒྲོགས་ཏེ། །བུམ་པའི་རྣ་ནི་ཤར་ཉིད་དུ། །ནུབ་ཏུ་རྣམ་པར་འཇིག་པའོ། །ལྷོར་ནི་གཤིན་རྗེའི་རྒྱལ་པོ་གཞག །དེ་དང་གཞན་ཡང་རྒྱལ་པོ་མཆོག །ནམ་མཁའ་འགྲོ་བས་ཀུན་ཏུ་བསྐོར། །བུམ་པ་རྣམ་པ་སྣ་ཚོགས་ཏེ། །
གསེར་དང་དངུལ་ལས་བྱས་པ་ལ། །སྣ་ཚོགས་གོས་ཀྱིས་ཡང་དག་དཀྲིས། །མེ་ཏོག་འབྲས་བུ་རྣམས་ཀྱིས་བརྒྱན། །བདུད་རྩི་ལྔ་ཡིས་གང་བྱས་པ། །སྨན་ལྔ་དང་ནི་ཡང་དག་ལྡན། །རིན་ཆེན་ལྔ་དང་ལྡན་བྱས་པ། །འབྲུ་སྣ་ལྔ་ཡིས་བརྒྱན་
བྱས་པའི། །བུམ་པ་བཅུ་དྲུག་གཞག་བྱས་ཏེ། །བཅུ་གཉིས་བརྒྱད་དམ་ཡང་ན་ཕྱེད། །ཐ་ན་ཆུང་ངུ་གཅིག་ཙམ་ཡང་། །ཇི་ལྟར་རིམས་བཞིན་གཞག་བྱས་ཏེ། །དབུས་སུ་བུམ་པ་རོ་ཡི་མཆོག །དམ་ཚིག་ཆུས་ནི་གང་བྱས་པ། །
གསེར་རམ་དངུལ་ལམ་ཟངས་ཀྱང་རུང་། །ལྕགས་སམ་ས་ལས་བྱས་པ་ལ། །ཟླ་བ་ཉི་མ་དྲི་ཆུ་དང་། །བཏུང་བ་བསྣུམ་པོར་ལྡན་པ་ཡི། །དབང་པོ་ཀུན་ལས་འབྱུང་བ་རྣམས། །ཤ་སྲང་གཅིག་གིས་རབ་བསྲེས་པ། །ཀུན་ལས་འཕགས་པ་རོ་ཡི་
མཆོག །ཚོགས་ཀྱི་དབུས་སུ་བསྒྲུབ་བྱས་ཏེ། །བཏུང་བ་བཞིན་དུ་མྱངས་པ་ཡིས། །རྡོ་རྗེ་བློ་ལྡན་བསྐལ་པར་གནས། །རྣམ་པ་སྣ་ཚོགས་ཉེ་བའི་ཟས། །བཟའ་བ་དང་ནི་བཅའ་བས་མཆོད། །མཆོད་པ་ཉེ་བའི་ཟས་ལྔ་དང་། །ཚད་མེད་འདོད་པའི་ཡོན་ཏན་
ལྔས། །ཚད་མེད་རྣལ་འབྱོར་མ་ཚོགས་ལ། །སྐད་ཅིག་སྐད་ཅིག་མཆོད་པར་བྱ། །སྔགས་མཁན་ཚུལ་བཞིན་མཉམ་གཞག་སྟེ། །འབྱུང་པོ་རྣམས་ལ་གཏོར་མ་སྦྱིན། །ལྷ་རྣམས་ཀྱི་ནི་ཐམས་ཅད་ལ། །ཧེ་རུ་ཀ་ཡི་ཕྱག་རྒྱ་ཡིས། །ཉིད་ཀྱི་
གཏོར་མ་བྱིན་བརླབས་ཏེ། །སྤྱན་དྲངས་གཙང་སྦྲ་བྱས་པ་དབུལ། །གཟུངས་ཀྱི་ཚོགས་ནི་དེ་རྣམས་ལ། །མཉེས་པར་བྱས་ནས་སླར་གཤེགས་སོ། །རྣལ་འབྱོར་མ་ཆེན་དཀྱིལ་འཁོར་དུ། །སློབ་མའི་མཆོག་ནི་གཞུག་པར་བྱ། །མཚུངས་པར་
སྤྱོད་པ་རབ་མཛེས་མ། །སྣ་ཚོགས་གོས་ཀྱིས་ཡང་དག་དཀྲིས་ལག་པ་གཡོན་གྱིས་གཟུང་བྱས་ཏེ། །རབ་དགྱེས་ལོངས་སྤྱོད་ཕྱག་རྒྱ་ཡིས། །བཅུག་ནས་སྒོ་ཡི་གྲྭ་ཉིད་དུ། །བློ་ལྡན་དམ་ཚིག་བསྒྲགས་པར་བྱ། །འདི་ལས་མི་བྱ་ཅུང་ཟད་མེད། །

90-1-214b

ཐབས་དང་ཤེས་རབ་སེམས་ཉིད་ཀྱིས། །རྟག་ཏུ་དོགས་པ་མེད་བྱས་ཏེ། །འདོད་པ་ལྔ་ཡི་ཡོན་ཏན་སྤྱད། །གཞན་ཡང་དམ་ཚིག་ཉམས་པ་དང་། །སྐྱེ་བོ་གང་དག་དམ་ལ་གནོན། །བརྟུལ་ཞུགས་ཁྱོད་ཀྱི་དེ་དྲངས་ཏེ། །ཁྲག་ཆེན་པོ་ནི་བཏུང་བར་བྱ། །
གང་དག་སློབ་དཔོན་སྨོད་བྱེད་དང་། །གང་དག་བཀའ་རྣམས་མི་བྱེད་པ། །དེ་དག་བྲོས་ནས་བྲག་ཆེན་པོ། །བློ་ལྡན་སྙིང་ལས་བཏུང་བར་བྱ། །དཀོན་མཆོག་གསུམ་ལ་གནོད་བྱེད་དང་། །སློབ་དཔོན་ལ་ཡང་གནོད་བྱེད་པ། །རྡོ་རྗེ་ཁྲོ་བོ་
བསྡུས་པ་ཡིས། །དམ་ཚིག་བསྒོམས་ཏེ་བསྒྲལ་བར་བྱ། །དེ་ནས་དམ་ཚིག་བླུད་བྱས་ཏེ། །རྡོ་རྗེ་བདུད་རྩི་རོ་ཡི་མཆོག །དུང་ཆེན་པོར་ནི་གཞག་པར་བྱ། །རྡོ་རྗེ་བདུད་རྩིའི་ཆུ་བླུད་དོ། །ཀྱེ་མ་དམྱལ་བ་འི་ནི་ཆུ་འདི་སྟེ། །ཁྱོད་ཀྱི་
སྙིང་ལ་ཀུན་དུ་གནས། །དམ་ཚིག་བསྲུངས་པས་དངོས་གྲུབ་སྟེར། །རྡོ་རྗེ་བདུད་རྩིའི་ཆུ་འདི་འཐུང་། །ཨོཾ་བཛྲ་ཨུཏ་ཀ་ཧཱུྃ་ཐ། །དམ་ཚིག་འདི་ནི་བརྒྱར་བཟླས་པའི། །བྱིན་གྱིས་བརླབས་ཏེ་འཐུང་དུ་གཞུག །གཞན་དུ་དམ་ཚིག་མི་འགྱུར་
ཏེ། །དངོས་གྲུབ་ཉིད་དུའང་འདི་འགྱུར་རོ། །བདག་ནི་དམ་ཚིག་སྐལ་དགའ་ཞེས། །སློབ་མ་སྔགས་ནི་བརྗོད་དུ་གཞུག །སྒོ་གྲྭར་གནས་ནས་དྲི་བྱ་བ། །ཀྱེ་ཁྱོད་དགའ་བ་ཅི་ལ་དད། །འཇུག་པ་ཡིས་ཀྱང་སྨྲ་བྱ་བ། །བདག་ནི་སྐལ་ལྡན་བདེ་མཆོག་
ལ། །རབ་དགྱེས་འཕྲུལ་ལ་བདག་དགའ་སྟེ། །མཆོག་ཏུ་དགའ་བ་བདག་དགའོ། །དེ་ནས་རྣལ་འབྱོར་མ་མཆོག་གི། །དཀྱིལ་དུ་མེ་ཏོག་བོར་བྱས་ཏེ། །མེ་ཏོག་གང་ལ་ལྷུང་བ་ཡི། །ལྷ་ཉིད་དུ་ནི་དངོས་གྲུབ་བོ། །དབང་བསྐུར་བ་ཡི་ཕྱག་
རྒྱ་ཡིས། །དེ་ནས་སྤྱི་བོར་དབང་བསྐུར་བྱ། །བུམ་པ་རྣམ་པ་བཞི་ཡིས་ཀྱང་། །མཉམ་པར་བཞག་སྟེ་ལྔ་པོ་ཡིས། །པད་མ་དཀྱིལ་འཁོར་ཞུགས་བྱས་ཏེ། །དེ་ནས་ཡང་ནི་དབང་བསྐུར་བྱ། །ཅི་རིགས་པར་ནི་གཟུངས་མ་རྣམས། །བདག་
ཉིད་སྐལ་ལྡན་ཞེས་སུ་སྨྲ། །གང་དག་འགྲོ་བར་གྱུར་པ་ཡིས། །ལྷ་དེ་ཉིད་ནི་བསྟེན་པར་བྱ། །དགའ་བར་བྱེད་པའི་གཟུངས་མ་འདིའི། །ཁྱོད་ཀྱིས་རྟག་ཏུ་བསྒྲུབ་པར་གྱིས། །དེ་ནས་རྒྱལ་དབང་སློབ་མ་དེ། །ནང་གི་སྦས་པ་བསྡུས་པ་ཡི། །

90-1-215a

གསང་བ་མཉམ་པར་འཇུག་པ་ཡིས། །སྦྱོར་དང་ལྡན་པས་དབང་བསྐུར་བྱ། །རྡོ་རྗེ་པད་མ་ལས་དྲངས་པ། །སྦོམ་པོ་དང་ནི་དབང་གིས་བླང་། །རྡོ་རྗེ་བཀན་དུ་གཞག་བྱས་ན། །རྟག་པ་དགེ་བ་བདེ་བ་ཆེ། །ཀྱེ་མའོ་
དམ་ཚིག་བྱེད་བརྗོད་ཅིང་། །ཀྱེ་མ་བདེ་བ་བླང་བར་བྱ། །འདི་ནི་གསང་བ་ཞེས་བྱ་སྟེ། །དབང་བསྐུར་བ་ཡི་ཐབས་མཆོག་གོ། རྡོ་རྗེ་སློབ་དཔོན་བདག་ཉིད་ཆེས། །རང་གི་ཁར་ནི་རྡོ་རྗེ་གཞག །སེམས་དཔའ་ཆེན་པོ་དྲངས་
བྱས་ན། །སེམས་ཀྱིས་བྱང་ཆུབ་བདེ་བ་འཐོབ། །འདི་ནི་མཆོག་ཏུ་གསང་བ་སྟེ། །དབང་བསྐུར་བ་ཡི་བདེ་བའོ། །སློབ་མ་མི་ཤེས་པ་རྣམས་ལ། །འདི་དག་ཐམས་ཅད་བསྒྲག་མི་བྱ། །རྡོ་རྗེ་སློབ་དཔོན་གྱིས་བྱ་བ། །ཡང་ནས་ཡང་
དུ་བརྟག་པར་བྱ། །འདི་ཡིས་དབང་ནི་བསྐུར་མ་ཐག །སློབ་མ་ཚོགས་ཀྱི་བདག་པོར་འགྱུར། །སངས་རྒྱས་རྡོ་རྗེ་འཛིན་པ་ཡི། །སློབ་དཔོན་ཉིད་དུ་བདེ་བར་འགྱུར། །གཟུང་མེ་རྣམས་ཀྱིས་དགའ་བའི་བདག །སངས་རྒྱས་རྣམས་ཀྱི་རྗེར་བཤད་
དོ། །མཁའ་ལ་འགྲོ་བའི་ཁྱོར་འགྱུར་ཏེ། །རི་དང་འགྲོ་བ་ཀུན་གྱི་བདག །དེ་ནས་ཤེས་རབ་ཡེ་ཤེས་དབང་། །སློབ་མ་མཆོག་ལ་སྦྱིན་པར་བྱ། །གཟུངས་མེ་དེ་ནི་བདག་ཉིད་ལ། །བླ་མ་ཉིད་ཀྱིས་བྱིན་བརླབས་ཏེ། །དངོས་གྲུབ་འབྲས་བུ་མྱུར་འཐོབ་
ཕྱིར། །སློབ་མ་ལ་ནི་སྦྱིན་པར་བྱ། །དབང་བསྐུར་ཤིན་ཏུ་སྦས་པ་ཡིས། །རྡོ་རྗེ་སློབ་དཔོན་ཚུལ་ཇི་བཞིན། །བློ་ལྡན་ཐེ་ཚོམ་མེད་པའི་ཕྱིར། །རྣམ་པ་བཞི་པོ་འདི་སྦྱིན་ནོ། །དེ་ཚུན་ཅད་ནི་སློབ་མ་ལ། །རྒྱུད་ཀུན་ལས་ནི་གང་ཆུང་ཟད། །ཡི་
གེའི་ཚུལ་གྱིས་སྦས་པ་རྣམས། །གསང་བ་མཆོག་ནི་བསྟེན་པར་བྱ། །དེ་ནས་དེ་ཉིད་ལངས་བྱས་ཏེ། །སློབ་དཔོན་རྐང་པར་གཏུགས་བྱས་ནས། །རྒྱལ་པོ་དབང་ཕྱུག་བདེ་དམ་པ། །ཐམས་ཅད་ཡོན་ནི་དབུལ་བར་བྱ། །གཟུངས་དེ་དག་ནི་ཐམས་ཅད་ལ། །
ཅི་དགའ་བར་ནི་ཡོན་ཡང་འབུལ། །སློབ་དཔོན་ཅུང་ཟད་གང་འདོད་པ། །ཡིད་ལ་བསམས་པའི་ཡོན་ཡང་རུང་། །དམ་ཚིག་འདས་པས་འཇིགས་པ་ཡིས། །དེ་དག་ཐམས་ཅད་དབུལ་བར་བྱ། །སློབ་དཔོན་ལ་ནི་ཡོན་གྱི་མཆོག །རིགས་ཀྱི་ཁྱད་པར་

90-1-215b

དབུལ་བྱས་ཏེ། །སེང་གེའི་གདན་ལ་ཉིད་ཀྱི་མ། །སངས་རྒྱས་བྱིན་ནི་ཡོན་མཆོག་ཡིན། །གླང་པོ་རིན་ཆེན་གསེར་དག་དང་། །སྲིང་མོ་བླ་མའི་ཡོན་མཆོག་ཡིན། །རྡོ་རྗེ་སེམས་དཔའི་རིགས་ཡིན་ཏེ། །ཡོན་དེ་མཆོག་གི་ཡོན་ཡིན་
ནོ། །རིན་ཆེན་པད་མའི་ཆུང་མ་དང་། །ཤིང་རྟ་རྟ་ནི་ཤིན་ཏུ་བརྒྱན། །སྣ་ཚོགས་རིན་ཆེན་རྣམ་དག་པ། །མུ་ཏིག་ཕྲེང་བས་ཤིན་ཏུ་མཛེས། །བུ་མོ་རིན་ཆེན་དྲ་བ་ཡིས། །བརྒྱན་ཏེ་སྣ་ཚོགས་རྡོ་རྗེ་ལའོ། །རྒྱལ་པོ་ཡི་ནི་དབང་
ཕྱུག་དང་། །ཆུང་མ་བླ་མ་དབུལ་བར་བྱ། །འཕྲུལ་གྱི་བཞོན་པ་རྣམ་སྣ་ཚོགས། །གླང་པོ་རྟ་ནི་ཤིན་ཏུ་བརྒྱན། །དེ་བཞིན་གཤེགས་པ་ཀུན་གྱི་རྗེ། །ནན་ཏན་བླ་མ་དབུལ་བར་བྱ། །བླ་མའི་ཡོན་གྱི་ཕྱག་རྒྱ་འདི། །རྡོ་རྗེ་བློ་ལྡན་
སློབ་མ་ཡིས། །ཅི་སྟེ་བདེ་བྱེད་ཀུན་འདོད་ན། །དགའ་དང་མོས་པའི་སེམས་ཀྱིས་བྱ། །དེ་ལ་སོགས་པའི་སྦྱོར་བ་ཡིས། །རབ་དགྱེས་གདོན་མི་ཟ་བའི་བདེ། །གང་གིས་མྱུར་དུ་ཐོབ་འགྱུར་ཏེ། །སློབ་དཔོན་གཙོ་མཆོག་ཉིད་དུ་འགྱུར། །ཆོས་
རྣམས་ཀུན་གྱི་དབང་ཕྱུག་རྒྱལ། །རྡོ་རྗེ་བློ་ལྡན་མཆོག་ཏུ་འགྱུར། །རིན་ཆེན་ཀུན་གྱི་རིགས་ཀྱི་རྒྱལ། །དེ་བཞིན་སྣ་ཚོགས་རིགས་ཀུན་ཏུ། །པད་མའི་རིགས་ཀུན་དཔལ་དང་ལྡན། །རྡོ་རྗེ་རིགས་ཀུན་བདག་པོར་དེ། །སངས་རྒྱས་ཀྱི་
ནི་རིགས་ཀུན་དང་། །རྒྱལ་བའི་གཙོ་བོ་མཆོག་ཏུ་འགྱུར། །དཀྱིལ་འཁོར་གྱི་ནི་འཁོར་ལོའི་གར། །ཉིད་དང་སློབ་མའི་ཚོགས་གྱུར་པས། །རྡོ་རྗེ་སེམས་དཔའ་བདེ་བ་ཆེ། །སེམས་དཔའ་བདག་ཉིད་མཆོད་པར་བྱ། །ཕན་ཚུན་ལ་སོགས་
ཚུལ་གྱིས་ནི། །ཤེས་རབ་མཆོད་པའི་སྦྱོར་བ་ཡིས། །རྡོ་རྗེ་ཆེ་ཡིས་ཐབས་གནས་ཏེ། །མཁའ་འགྲོ་ཀུན་ལ་མཆོད་པར་འགྱུར། །ཕྱི་ཡི་སྦས་པ་གསང་ལ་སོགས། །ནང་གི་མཆོད་པ་མཆོག་གི་རྣམས། །ཕྱག་རྒྱའི་སྦྱོར་བ་ཚུལ་གནས་
ཏེ། །ཚུལ་བཞིན་རྒྱས་བཏབ་དབུལ་བར་བྱ། །ལུས་དང་ངག་སེམས་བདེ་བྱེད་ཀྱིས། །མཆོད་པའི་བདག་ཉིད་མཆོད་པར་བྱ། །འདོད་པའི་རོལ་པ་མྱོང་བ་ཡིས། །མྱང་ན་མཆོད་པ་ཐོབ་པར་འགྱུར། །མཆོད་པ་ཀུན་གྱི་ཆོ་ག་ཡིས། །རང་

90-1-216a

རིག་ཁྱད་པར་ཤེས་བྱས་ཏེ། །སྒྲུབ་པ་ཐམས་ཅད་བསྒྲུབ་བྱས་ན། །དངོས་གྲུབ་ཐམས་ཅད་མྱུར་དུ་འཐོབ། །དཀྱིལ་འཁོར་འཁོར་ལོ་འདི་མཐོང་བས། །དགའ་མགུ་རངས་པའི་ཡིད་ཀྱི་ནི། །རྡོ་རྗེ་སེམས་ལ་ཕྱག་བྱེད་ཅིང་། །
རང་གི་དཀྱིལ་འཁོར་གསོལ་བ་འདེབས། །བདེ་བྱེད་ཆེན་པོའི་དཀྱིལ་མོ་རྒྱ། །རིགས་ཀྱི་ཁྱད་པར་གྱིས་ནི་ལྔ། །ལྷ་རྣམས་ཀྱང་ནི་རེ་རེ་ཡང་། །སེམས་ཀྱི་ཁྱད་པར་མཆོག་མཐའ་ཡས། །འདས་པའི་དུས་ནི་མ་བྱུང་བ། །མཐའ་
ཡས་ཆོས་ནི་ཡངས་པ་བསྟེན། །འདོད་ཆགས་རྣམས་ཀྱིས་དཀྲིས་པ་ཡི། །སྡུག་བསྔལ་གཟིར་བའི་མཐའ་ནས་འགྲོ། །འདོད་པའི་མཆོག་གི་ལོངས་སྤྱོད་རྣམས། །མོས་པའི་རྗེས་སུ་ཞུགས་ཤིང་སྤྱོད། །ཀུན་ཏུ་ཆགས་པར་མི་འགྱུར་
ཞིང་། །བདེ་བས་ལོངས་པའི་ཡིད་དང་ལྡན། །བྱང་ཆུབ་སྙིང་པོར་བགྲོད་པ་ནི། །དམ་བཅས་རྣམས་དང་སེམས་ཀྱིས་སོ། །དེ་ནས་བཅོམ་ལྡན་འདས་ཤིན་ཏུ་དགྱེས་པ་ཐམས་ཅད་ཀྱི་བདག་པོ་ཀུན་ཏུ་བཟང་པོ་ཆེན་པོ། །རབ་ཏུ་བཞད་
ཅིང་སྤྱན་ཟུར་གྱིས་གཟིགས་པའི་ཐུགས་ཀྱིས་ཤིན་ཏུ་དགྱེས་པ། ཀུན་ཏུ་ལོངས་སྤྱོད་པའི་སྐྱིལ་མོ་དཀྲུང་གི་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། །སྐྱིལ་མོ་དཀྲུང་ཆེན་པོའི་དཔལ་ཞེས་བྱ་བ་རང་གི་ཕྱག་རྒྱའི་ཡེ་ཤེས་ཉིད་ཀྱི་སྐུ་
དང་གསུང་དང་ཐུགས་རྡོ་རྗེ་ལས་ཕྱུང་ངོ་། །གཡས་དང་གཡོན་གྱི་ཚུལ་གྱིས་ནི། །རྐང་པ་གཉིས་ཀ་བཏེག་བྱས་ཏེ། །བདག་ཉིད་བརླ་ནི་མི་སྣང་བཞིན། །རྩ་བ་སྐྱིལ་མོ་བཅིང་བར་བྱ། །སྦྱོར་བ་གར་མཁན་ཚུལ་གྱིས་ནི། །གར་གྱིས་
སྦྱོར་བས་གར་བྱའོ། །རྡོ་རྗེ་གདན་གྱི་བདེ་བ་ཆེ། །འདི་ཡིས་བདུད་ལས་རྒྱལ་བར་འགྱུར། །གདུག་པ་དང་ནི་དགྲ་ཐམས་ཅད། །སྐད་ཅིག་གིས་ཀྱང་སྨོས་ཅི་དགོས། །རབ་ཏུ་དགྱེས་པའི་སྟན་འདི་ཡིས། །ཡང་དག་བྱང་ཆུབ་མྱུར་དུ་འཐོབ། །མི་
ཕྱེད་པ་ནི་ཐིག་ལེར་བཅས། །འོག་གི་ཕྱོགས་སུ་ཡི་གེ་དྲུག །ཤེས་རབ་ཅན་གྱིས་བསྐྱོད་ཅིང་ཟླས། །བྱུང་བའི་ཚེ་ནི་ཕཊ་ཅེས་བཤད། །པད་མ་མི་ཕྱེད་འདྲེན་པ་དང་། །ཐིག་ལེར་བཅས་པའི་སྦྱོར་བ་བྱ། །མི་ཕྱེད་ཨོཾ་དང་ཡང་དག་ལྡན། །

90-1-216b

ཚེག་དྲག་བཅས་པ་བདེ་འབྱུང་ནའོ། །བུད་མེད་ལ་ནི་ཞག་བདུན་དུ། །འདི་ཡིས་རྩེན་པར་བྱས་པ་ནི། །ནམ་མཁའ་ཐམས་ཅད་གང་བ་ཡི། །སངས་རྒྱས་རྣལ་འབྱོར་ཆེན་པོ་མཐོང་། །རབ་དགྱེས་ལོངས་སྤྱོད་གནས་པ་ཡི། །སེམས་
དཔའ་ཆེ་ལ་སློང་མཛད་དེ། །གཟུངས་ཀྱི་པད་མ་ལས་བྱུང་བ། །བདེ་བྱེད་མཆོག་གི་དབང་བསྐུར་རོ། །དེ་ནས་རབ་དགའ་བདེ་ཐོབ་པ། །སེམས་དཔའ་དེ་ནི་དངོས་གྲུབ་བོ། །ཐོག་མ་དང་ནི་མཐའ་མེད་པར། །འདོད་པ་ཐམས་ཅད་དེ་ལོངས་སྤྱོད། །
ཚེ་དང་དཔལ་དང་ཕུན་སུམ་ལྡན། །གདོན་དང་དུག་དང་ཚ་བའི་ནད། །མཁའ་འགྲོས་ཉེ་བར་གཙེས་པ་དང་། །སྡིག་ཅན་འཁོར་བ་ལས་གྲོལ་ཏེ། །ས་རྣམས་ཀུན་ལ་རྣམ་པར་རྒྱུ། །གཟི་བརྗིད་ཉི་མ་ཤར་དང་འདྲ། །སྣ་ཚོགས་འདྲ་བ་འབར་བྱེད་པས། །
སྣ་ཚོགས་ཐམས་ཅད་སྣང་བྱེད་ཅིང་། །དེ་ཡིས་སེམས་ཅན་ཐམས་ཅད་ཀྱི། །ནད་དང་མྱ་ངན་འཇིགས་ཆེན་འཕྲོག །ཕྱག་རྒྱ་འདི་ཡིས་སྦྱོར་བ་ཡིས། །ཡེ་ཤེས་ལྔ་ནི་བསྟན་པར་བྱ། །རྩེ་བའི་སྐྱིལ་མོ་དཀྲུང་ཞེས་བྱ་བ་ཕྱག་རྒྱ་ཆེན་པོའི་ལས་
ཀྱི་དོན་ཐམས་ཅད་སྒྲུབ་པར་བྱེད་པའོ། །བདག་གི་རྐང་པ་དབུས་སུ་བསྡུ། །དེ་ཡིས་རྐང་པས་བཅིངས་བྱས་ཏེ། །སེམས་དཔའི་སྐྱིལ་མོ་བཞིན་དུ་འབྲེལ། །འདི་ནི་བཅིངས་པ་ཙམས་གྱིས་ཀྱང་། །ཁམས་གསུམ་སྒྲུབ་པར་བཞེད་པ་
ཡིན། །ཡི་གེ་རྣམས་ནི་སྔ་མ་བཞིན། །རང་གི་ལྷར་ནི་སྦྱོར་བརྩོན་པས། །སྒོམས་སམ་ཡང་ན་བསྐྱོད་ཀྱང་རུང་། །སྔགས་པ་འདི་ཡིས་དངོས་གྲུབ་སྟེ། །སྔགས་ཀྱི་སེམས་འཛིན་གཙང་མ་ཡི། །ཞག་བདུན་སྒོམ་པ་བསྒོམ་བྱས་ནས། །ཡང་དག་དངོས་
གྲུབ་ཉིད་དུ་འགྱུར། །ཕྱག་རྒྱ་འདི་ཡིས་རྒྱས་བཏབ་སྟེ། །སྦྱོར་བ་ཤིན་ཏུ་བསྟན་བྱས་ན། །གདོན་མི་ཟ་བར་རྒྱལ་པོ་འཐོབ། །ཡིད་བཞིན་དགོས་པ་ཐམས་ཅད་བྱེད། །རྡོ་རྗེའི་སྐྱིལ་མོ་དཀྲུང་ངོ་། །གཟུངས་མ་གཟུང་སྟེ་བཅིང་བ་ན། །རིན་པོ་ཆེ་ལྟར་སྦྱར་
བྱས་ཏེ། །རང་གི་རྐང་པ་མི་སྣང་བྱ། །རིན་ཆེན་ཀུན་གྱི་སྐྱིལ་མོ་དཀྲུང་། །འདི་ནི་རིན་ཆེན་ཐམས་ཅད་ཀྱི། །དབུལ་ཞིང་འཕོངས་པ་འཇོམས་བྱེད་དེ། །སྡིག་པ་ཐམས་ཅད་འཕྲོག་བྱེད་མ། །གནོད་པའི་དུག་ཀུན་འཕྲོག་པར་བྱེད། །གདུག་པ་ཐམས་ཅད་རྨོངས་

90-1-217a

བྱེད་དོ། །དགྲ་རྣམས་ཐམས་ཅད་འཇོམས་པར་བྱེད། །ཁྲོ་བོ་ཐམས་ཅད་འཛུམ་བྱེད་དེ། །གདུག་པ་རྣམས་ཀྱི་རྒྱས་འདེབས་ན། །མི་གཡེང་ཟླ་བ་གཅིག་གིས་ནི། །འདི་ཡིས་རྒྱལ་པོ་དངོས་གྲུབ་བོ། །ཡིད་བཞིན་ལས་རྣམས་ཐམས་ཅད་
བྱེད། །ཅི་སྟེ་བདག་ཉིད་རྒྱལ་པོ་རུ། །མཆོག་ཏུ་རྨད་འབྱུང་བསྒྲུབ་འདོད་ན། །རིན་ཆེན་སེམས་ཀྱི་རིན་ཆེན་མཚན། །གསང་བའི་ཕྱག་རྒྱ་ཚུལ་གནོན་པ། །རྒྱལ་པོ་ཁམས་གསུམ་རྒྱལ་བྱེད་པ། །ཟླ་ཕྱེད་ཙམ་གྱིས་འགྲུབ་པར་འགྱུར། །
རིན་པོ་ཆེ་ཡི་སྐྱིལ་མོའོ། །དེ་བཞིན་རྐང་པ་གཉིས་བཞག་པ། །པད་མ་འདྲ་བ་སྦྱར་བྱས་ཏེ། །བདག་གམ་དེ་བཞིན་གཞན་ཡང་རུང་། །བློ་ལྡན་པད་མ་བདེ་བསྒྲུབ་བྱ། །འདི་ཡིས་སེམས་ཅན་ཐམས་ཅད་དང་། །མདོར་ན་སངས་རྒྱས་
རྣམ་དག་དང་། །རྡོ་རྗེ་ཉི་མ་མ་ལུས་ཀྱང་། །དབང་དུ་འགྱུར་བ་གདོན་མི་ཟ། །བདེ་ལྡན་ཕོ་བྲང་ཆེན་པོ་ཡི། །བདེ་བྱེད་འདི་ཡིས་ཐོབ་པར་བྱེད། །སེམས་ཅན་ཁམས་རྣམས་ཐམས་ཅད་དུ། །སེམས་དཔའ་ཆེན་པོ་འགྲོ་འོང་བྱེད། །པད་མའི་
སྐྱིལ་མོའོ། །དེ་བཞིན་སྐྱིལ་མོ་རྒྱས་བྱས་ཏེ། །སྣ་ཚོགས་ཚུལ་གྱིས་སྦྱོར་བ་བྱ། །སྔགས་མཁན་ཆེན་པོའི་སྦྱོར་བ་ཡི། །སྔགས་མཁན་ཡི་གེ་ཤིན་ཏུ་བརྩོན། །ཟློས་པ་བྱེད་ཅིང་རྣམས་སྒོམས་ན། །དངོས་གྲུབ་རྟག་པ་ཐོབ་པར་འགྱུར། །
མི་གཡེང་སྔོན་གྱི་བདུག་པ་ཡི། །ལས་རྣམས་ཐམས་ཅད་འཕྲོག་པར་བྱེད། །སྣ་ཚོགས་དཀྱིལ་དུ་གནས་པ་ཡིས། །བླ་མེད་དངོས་གྲུབ་ཐོབ་པར་འགྱུར། །སྣ་ཚོགས་ཀྱི་ནི་སྐྱིལ་མོའོ། །དེ་ནས་མཁའ་འགྲོ་མའི་སྐྱིལ་མོ་རྒྱས། །ཐམས་ཅད་
ཁྲག་ནི་འཕྲོག་བྱས་ཏེ། །གཟུངས་མ་ཡི་ནི་རྐང་པ་གཉིས། །ཉིད་ཀྱིས་གཉའ་བར་རྐང་པ་བཏེག །རྡོ་རྗེ་མཁའ་འགྲོའི་སྦྱོར་བ་ཡི། །བསྙེན་པས་ཁྲག་རྣམས་འཕྲོག་པར་བྱེད། །མཉམ་པར་བཞག་ནས་གཟུངས་མ་ཡི། །རྐང་
པ་གཅིག་ནི་མགུལ་ཉིད་དུ། །སྦྱོར་དང་ལྡན་པས་གཏེག་བྱས་ན། །ཟས་རྣམས་ཐམས་ཅད་འཕྲོག་བྱེད་དེ། །བཏུང་བ་བཟའ་བ་བཅའ་བ་དང་། །གོས་ཀྱི་རྒྱན་གྱིས་ཀླུབས་པ་ཡིས། །དེ་བཞིན་ཞག་བདུན་ཉིད་ཀྱིས་ཀྱང་། །ཐམས་ཅད་

90-1-217b

ལས་བྱེད་གདོན་མི་ཟ། །ཚངས་པ་རྟོགས་འདོད་དབང་པོ་ཡི། །དཔལ་ཆེན་མཆོག་ནི་འཕྲོག་པར་བྱེད། །ལག་པ་བསྒྲེང་བའི་ཚུལ་གྱིས་ནི། །ཁམས་གསུམ་རིམ་པར་བརྒལ་བར་བྱེད། །མིག་ནི་བཙུམས་པར་བྱེད་འགྱུར་བ། །འགྲོ་བ་གསུམ་
པོ་རྣམ་པར་འཇིག །རུ་སྦལ་བཞིན་དུ་མཉམ་གཞག་སྟེ། །མི་གཡེང་སྐད་ཅིག་བཅིང་བྱས་ན། །གདུག་པའི་སྲོག་ཆགས་ཐམས་ཅད་དང་། །དགྲ་དང་སྤྱོད་བཅས་མི་སྤྱོད་ཕྲོག །སྦལ་པ་བཞིན་དུ་མཉམ་བཞག་སྟེ། །དཀྱིལ་འཁོར་ཚུལ་གྱིས་བསྐོར་བར་
བྱའོ། །མ་ལུས་རྣམས་ཀྱང་རྨོང་བྱེད་དེ། །ཁམས་གསུམ་རྣམས་ཀྱང་བརྒལ་བར་བྱེད། །གཏོགས་འདོད་ཀྱིས་ནི་མཉམ་གཞག་སྟེ། །ས་གསུམ་རྣམས་ཀྱི་རྒྱས་གདབ་བྱ། །གར་དབང་གིས་ནི་མཉམ་བཞག་སྟེ། །ས་གསུམ་རྣམས་ནི་
གར་བྱེད་གཞུག །དྲིལ་བུ་ཡིས་ནི་མཉམ་བཞག་སྟེ། །ས་གསུམ་རྣམས་ནི་གདབ་པར་བྱ། །གཞོན་ནུའི་སྐྱིལ་མོ་བཅིངས་པ་ཡིས། །སངས་རྒྱས་བདེ་ཆེན་འཐོབ་པར་བྱེད། །སྐྱིལ་མོ་ཕྱེད་ནི་མཉམ་གཞག་ནས། །གཉིས་པ་ཡིས་ནི་མནན་བྱས་
ན། །ཁམས་གསུམ་ཐམས་ཅད་གནོན་འགྱུར་ཞིང་། །འདོད་བྱེད་ཐམས་ཅད་དངོས་གྲུབ་བོ། །དགའ་བྱེད་མ་ཡི་མཉམ་གཞག་པས། །སྐྱིལ་མོ་རབ་ཏུ་དགའ་ཐོབ་སྟེ། །དགའ་བྱེད་མ་ཡི་ཡིད་འོང་མ། །ཁམས་གསུམ་ཐམས་ཅད་དངོས་གྲུབ་
བོ། །རིག་འཛིན་རྣམ་པར་གཞག་བྱས་ཏེ། །ཁམས་གསུམ་སྐད་ཅིག་མནན་པར་བྱ། །ཁམས་གསུམ་རྣམ་པར་རྒྱལ་བ་ཡི། །མདོར་བསྡུས་གཟུངས་མའི་བཅིངས་པ་ཡི། །འཇིག་རྟེན་གསུམ་ནི་རྣམ་རྒྱལ་ཏེ། །སྐད་ཅིག་ཁམས་
གསུམ་བདག་པོར་འགྱུར། །རྟག་པར་ཕན་ཚུན་འབྲེལ་བ་ཡིས། །དཔུང་པ་གཉིས་ནི་བསྐུམ་བྱས་ཏེ། །ཐམས་ཅད་སྒོ་ནི་འགེགས་པ་ཡིས། །མཆེ་བ་སྦོམ་པོ་རབ་ཏུ་སྦྱར། །གཡས་ཀྱི་བརྐྱང་བསྐུམ་ཚུལ་གྱིས་ནི། །གནོན་པའི་མནན་པས་
བསྡིགས་བྱས་ཏེ། །མི་ཕྱེད་སྦྱོར་བས་བསྐུལ་བྱ་བ། །ཁྲོས་པའི་སེམས་ཀྱིས་མྱང་བར་བྱ། །གཡོན་པའི་བརྐྱང་བསྐུམ་སྦྱར་བར་བྱ། །མྱུར་དུ་གནོན་པས་བཏེག་བྱ་ཞིང་། །མཐེའུ་ཆུང་བདེ་བའི་ལྕགས་ཀྱུ་ཡིས། །མཛུམ་མོ་ལྕེ་ལ་རེག་བྱས་ཏེ། །

90-1-218a

ས་བོན་ཚེག་དྲག་ཧྲི་ལྡན་པའི། །ཐིག་ལེའི་སྤྱི་བོར་བརྒྱན་བྱས་པས། །བདུད་རྩིའམ་རིག་མ་དྲང་བར་བྱ། །ལྕེ་ཡི་ཐོག་མར་སྤྲོ་བྱས་ཏེ། །འདྲེན་པའི་ཚུལ་གྱིས་དྲང་བར་བྱ། །རྡོ་རྗེ་གནོད་སྦྱིན་མཉམ་བཞག་སྟེ། །ཁ་ཡི་ཕྱོགས་
སུ་མཆེ་བ་ཡི། །སྦོམ་པོ་ལྕེ་དང་འདྲ་བྱས་ཏེ། །ཁྲོས་པ་མཆེ་བ་སྦྱོར་བ་ཡིས། །སོར་མོ་ཐོད་པ་བཞིན་བྱས་ན། །ཁྲག་མང་པོ་ནི་བཏུང་བར་བྱ། །ཡི་གེ་དང་པོ་ཨོྂ་དང་ལྡན། །སྤྱི་བོར་ཐིག་ལེ་ལྡན་བྱས་ཏེ། །འོག་གི་ཕྱོགས་སུ་ར་ཡི་གདགས། །
ཨུ་འདྲེན་ང་རོས་བརྒྱན་པར་བྱ། །འདི་ནི་ཁྲོ་བོའི་སྙིང་པོ་སྟེ། །མཆོག་ཏུ་ཐམས་ཅད་ལས་བྱེད་པའོ། །གསོད་པ་དང་ནི་འདྲེན་པ་ཀུན། །དབང་དང་དབང་རྣམས་བྱེད་ལ་སོགས། །དེ་ལ་སོགས་པའི་ལས་གཞན་ཡང་། །ཚུལ་བཞིན་སྦྱར་བས་བྱེད་པར་
འགྱུར། །ཤི་བ་བཞིན་དུ་མིག་བཙུམ་ནས། །རང་གི་ལུས་ནི་བསྐུམ་བྱས་ཏེ། །བུམ་པ་ལྔ་མཐའི་སྦྱོར་བ་ཡིས། །དགྲ་རྣམས་ཐམས་ཅད་བསད་པར་བྱ། །ང་རོ་དང་པོ་ཡང་དག་ལྡན། །བདག་ཉིད་ངོ་བོ་ཐམས་ཅད་བྱ། །སངས་རྒྱས་
ཆེན་པོ་བསྒོམ་བྱས་ཏེ། །ཞི་བའི་འོད་ཟེར་སྤྲིན་ཕུང་སྤྲོ། །དེ་ཡིས་ལུས་ནི་ཞི་བར་འགྱུར། །དེ་ཡིས་སེམས་ཅན་ཐམས་ཅད་ཀྱི། །ཚ་བ་གདོན་དང་དུག་ལ་སོགས། །སྡུག་བསྔལ་མཁའ་འགྲོའི་མཆེ་བ་དང་། །འཇིགས་པ་ཐམས་ཅད་བྲལ་
བར་བྱེད། །ཤེས་རབ་ཕ་རོལ་ཕྱིན་མཉམ་གཞག །བདག་ཉིད་ཀྱིས་ནི་ཚུལ་བཞིན་དུ། །འདི་ཡིས་ཐམས་ཅད་ནང་གི་རྣམས། །སྡུག་བསྔལ་དོགས་པ་འཕྲོག་པར་བྱེད། །དེ་ལ་སོགས་པ་མཐའ་ཡས་པ། །ནམ་མཁའ་ས་སྟེང་ལས་ཀྱི་རྣམས། །
སྙིང་གར་རྡོ་རྗེ་སེམས་དཔའ་གཞག །ཡིད་བཞིན་ཐམས་ཅད་བྱེད་པར་འགྱུར། །མྱུར་དུ་རྡོ་རྗེ་སློབ་དཔོན་ལ། །སྔགས་ཀྱི་དངོས་གྲུབ་དོན་འདོད་པས། །གུས་ལ་ཞེས་སར་བཅས་པ་ཡིས། །ཤིན་ཏུ་ལྷག་པར་ཕྱོགས་པར་བྱ། །ནམ་ཡང་རྡོ་རྗེ་སློབ་
དཔོན་གྱི། །སེམས་ནི་དཀྲུག་པར་མི་བྱ་སྟེ། །ཅི་སྟེ་ཤེས་རབ་འཆལ་པས་བྱེད། །མྱུར་དུ་ན་རག་ལྟུང་བར་འགྱུར། །ནད་དང་འཚེ་བ་དགྲ་དག་དང་། །གདོན་དང་ཚ་བ་དུག་ཉིད་ཀྱིས། །སློབ་དཔོན་ཞབས་ལ་དམོད་བྱེད་པ། །གཏི་མུག་ཆེན་པོར་དེ་འཆིའོ། །

90-1-218b

བླ་མ་ལས་ནི་དངོས་གྲུབ་ཐོབ། །བླ་མ་མཐོ་རིས་བླ་མ་བདེ། །དེ་བས་ནན་ཏན་ཐམས་ཅད་ཀྱིས། །བླ་མའི་བཀའ་ལས་འདའ་མི་བྱ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་། ཐུགས་རྡོ་རྗེའི་བདག་པོ་ཀུན་ཏུ་བཟང་པོ་ཆེན་
པོ་དཔལ་ཤིན་ཏུ་དགྱེས་པ་ཆེན་པོའི་བདེ་བ་ཆེན་པོ་རྡོ་རྗེ་སེམས་དཔའ་ཤིན་ཏུ་དགྱེས་པ་ཆེན་པོའི་བདེ་བ་གདོན་མི་ཟ་བའི་རྡོ་རྗེ་དམ་ཚིག་གི་དབང་བསྐུར་བའི་ཡེ་ཤེས་ཀྱི་དཀྱིལ་འཁོར་ཆེན་པོ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་། 
ཐུགས་རྡོ་རྗེ་མཆོག་གསང་བ་སྦས་པ་ཆེན་པོ་ཟླ་གསང་ཐིག་ལེའི་རྒྱུད་ཀྱི་རྒྱལ་པོ་ཤིན་ཏུ་དགྱེས་པ་ཆེན་པོའི་རྡོ་རྗེ་རྣལ་འབྱོར་མ་ཆེན་མོའི་ཚོགས་ཀྱི་དཀྱིལ་འཁོར་ཏེ་བཞི་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་
པ་འཁོར་དང་བཅས་པའི་འཁོར་ལོའི་ཚོགས་དང་། རྡོ་རྗེ་རྣལ་འབྱོར་ཕ་དང་། རྣལ་འབྱོར་མ་དང་། རྣལ་འབྱོར་གྱི་དབང་ཕྱུག་ཆེན་པོའི་ཚོགས་དང་། །རྡོ་རྗེ་ནམ་མཁའ་ལ་འགྲོ་བ་དང་། ནམ་མཁའ་ལ་འགྲོ་མའི་ཚོགས་ཀྱི་གཡོག་
རྣམས་མཆོག་ཏུ་དགའ་བ་ཆེན་པོ་སྐྱེས་ཏེ། ཅ་ཅོ་འབྱིན་ཅིང་དབྱངས་ཆེན་པོ་བརྗོད་པར་གྱུར་ཏེ། ཀྱེ་མའོ་རྡོ་རྗེ་སེམས་དཔའ་ཡི། །རྡོ་རྗེ་ཤིན་ཏུ་དགྱེས་པ་ཆེ། །སྣ་ཚོགས་ཐབས་ནི་བདེ་བྱེད་ཆེ། །སྣ་ཚོགས་ཡེ་དགེས་བདེ་བ་ཆེ། །ཀྱེ་མ་ཀུན་ཏུ་
བཟང་པོ་ཡི། །དགེ་བའི་ཡེ་ཤེས་བདེ་བ་ཆེ། །གང་བདེ་ཕྱིར་ནི་རིག་མ་ཡི། །པད་མོ་ལས་ནི་གནས་པ་མཛད། །ཀྱེ་མའོ་རིག་པ་ཤིན་ཏུ་ཟབ། །ཤེས་རབ་ཕ་རོལ་ཕྱིན་པ་བདེ། །སེམས་ཅན་ཀུན་ལ་ཤེས་རབ་ཀྱིས། །མུན་པའི་ཐིབས་པོ་
སེལ་བར་མཛད། །ཀྱེ་མའོ་ཐམས་ཅད་ངོ་མཚར་ཆེ། །མཁའ་འགྲོའི་དྲ་བས་གར་མཛད་ཅིང་། །རྣམ་པར་མཛད་དང་མྱང་བ་དང་། །མཉེ་བ་དང་ནི་འཕྲོག་པའི་མཆོག །ཨེ་མའོ་ཤིན་ཏུ་རབ་ཏུ་དགྱེས། །སྐལ་ལྡན་སྐལ་ལ་སྤྲོད་
པ་དང་། །སྣ་ཚོགས་སྐལ་བ་བདེ་བྱེད་ཆེ། །སྣ་ཚོགས་རྡོ་རྗེ་ཤིན་ཏུ་མཛེས། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་ཤིན་ཏུ་དགྱེས་པ་ཆེན་པོ་ཀུན་ཏུ་ལོངས་སྤྱོད་པའི་འདོད་པའི་ལྷ་ཤིན་ཏུ་དགྱེས་པ་བདེ་བ་ཆེན་པོ་ལ་གནས་པ་ལ་རྣལ་

90-1-219a

འབྱོར་མ་ཐམས་ཅད་དང་། མཆོག་གི་ཕ་རོལ་ཕྱིན་མ་ལ་སོགས་པ་རྣལ་འབྱོར་གྱི་དབང་ཕྱུག་ཆེན་མོ་ཐམས་ཅད་རང་གི་གདན་ལས་བཞེངས་ཏེ། ཤིན་ཏུ་དགྱེས་པ་བདེ་བ་ཆེན་པོའི་འགྱིང་བའི་འདུད་བཅིང་པས་ཕྱག་བྱས་ཏེ། ཤིན་ཏུ་
དགྱེས་པ་ཆེན་པོའི་བདེ་བ་འཐོབ་པར་བྱེད་པའི་དབྱངས་ཀྱི་ཕྱག་རྒྱ་ཆེན་པོ་འདིས་མཉེས་པར་བྱེད་དོ། །སྒྱུ་མའི་བདེ་བས་ནམ་མཁའ་ཀུན་ཏུ་གང་བ་ཡི། །སྤྲུལ་པའི་རང་བཞིན་སྐྱེ་བ་མཆོག་གི་བདེ་སྟོན་ཏེ། །རྗེས་སུ་ཆགས་པའི་པད་མ་དགའ་བས་
ཀུན་ཁྱབ་ཅིང་། །ཆོས་ཀྱི་བདེ་བ་ཉིད་ཀྱང་ཀུན་ཏུ་བཏང་སྙོམས་མཛད། །ཨེ་མའོ་འདི་ལྟའི་གཟུངས་མ་བདེ་མཆོག་དཔལ་དང་རྣམ་ལྡན་མ། །བྱམས་མའི་ཕྱོགས་སུ་མི་གཏོང་ཡེ་ཤེས་ཉིད་ཀྱིས་འཇུག །འདོད་པའི་ཡོན་ཏན་འདི་རྣམས་ཆོས་ཉིད་
རྣམ་པར་དག །དུག་གསུམ་དབང་དུ་མཛོད་ཅིང་མོས་པ་རྣམས་མི་སྐྱོད། །ངོ་མཚར་ཕྱོགས་དང་མ་བྲལ་བྱང་ཆུབ་སྙིང་པོར་བགྲོད། །དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོ་འཛུམ་པ་དང་བཅས་པའི་སྤྱན་རྒྱས་པས་འཁོར་དེ་དག་ཐམས་ཅད་ལ་
ཡུད་ཙམ་ཡུད་ཙམ་ཀུན་ཏུ་གཟིགས་ཏེ། རྡོ་རྗེ་པད་མ་དང་གཉིས་སུ་མེད་པའི་སྦྱོར་བའི་དཔལ་ཆེན་མོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཅང་མི་གསུང་བར་མཉམ་པར་བཞུགས་ཏེ། དབུགས་མི་རྔུབ་དབུགས་མི་འབྱིན། 
དབུགས་རབ་ཏུ་གཏོང་བར་མི་མཛད། ཀུན་ཏུ་མི་གཟིགས། ཀུན་ཏུ་རྣམ་པར་མི་གཟིགས། བཞེང་པར་མི་མཛད། བཞུགས་པར་མི་མཛད། །གཤེགས་པར་མི་མཛད། གསུང་བར་ཡང་མི་མཛད། རྣམ་པར་རྟོག་པར་ཡང་
མི་མཛད། དེ་བཞིན་དུ་བཅོམ་ལྡན་འདས་ཤིན་ཏུ་བདེ་བ་ཆེན་པོས་ནམ་མཁའི་དབྱིངས་ཐམས་ཅད་དུ་ཤིན་ཏུ་ཁྱབ་པར་ཤིན་ཏུ་དགྱེས་པ་ཆེན་པོའི་བདེ་བ་ལས་བཙལ་ཏེ་རྒྱས་པར་མཛད་པ་ན། དེར་དེ་བཞིན་གཤེགས་པ་ཐམས་ཅད་དྲངས་བཅུག་
བཅིང་དབང་དུ་བྱས་ཏེ། འདོད་པ་ལྔའི་ཡོན་ཏན་གྱིས་མཉེས་པར་བྱས་ཏེ་བཞུགས་པར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་འདུ་བ་མཛད་ནས། ཡང་ནས་ཡང་བཅོམ་ལྡན་འདས་ལ་གཟིགས་ཏེ། 

90-1-219b

བདེ་བ་ཆེན་པོ་ཤིན་ཏུ་དགྱེས་པ་དང་གཉིས་སུ་མེད་པར་ལོངས་སྤྱོད་པ་དཔལ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བསྐུལ་ནས་བཅོམ་ལྡན་འདས་ཀྱི་ཐུགས་ཁར་ཞུགས་ཏེ། བྱང་ཆུབ་ཀྱི་སེམས་ཆེན་པོ་ལ་
ཡང་ཐིམ་པར་གྱུར་པ་ན། ཁམས་གསུམ་འདིར་དམ་པའི་ཆོས་སྟོན་པ་དང་། འཇུག་པར་བྱེད་པ་དང་། བསྟན་པ་ལ་གནས་པར་བྱེད་པ་འགའ་ཡང་མེད། སངས་རྒྱས་དང་། ཆོས་དང་། དགེ་འདུན་འཇུག་པར་བྱེད་པ་ཡང་མེད། 
ཁྲོས་པ་དང་གཏུམ་པོ་ཆེན་པོ་དང་། རྔམ་པ་དང་། རབ་ཏུ་གདུག་པ་ཆེན་པོར་སེམས་པ་དང་། འདོད་ཆགས་དང་། ཞེ་སྡང་དང་། གཏི་མུག་གི་མུན་པས་སྒྲིབས་པ་དང་། གཏུམ་འཁྲུགས་ཆེན་པོ་དང་། གཞན་གྱི་སྲོག་ཕྲོག་པ་དང་། གཞན་གྱི་སེམ་ཕྲོག་པ་དང་། 
བུད་མེད་ཀྱིས་འཆུམས་པ་དང་། ཚིག་རྩུབ་མོ་ལ་སོགས་པའི་ཉོན་མོངས་པ་དང་། ཉེ་བའི་ཉོན་མོངས་པས་གཞན་ལ་གཙེས་པ་དང་། གཅིག་གི་ཤ་གཅིག་གིས་ཟ་བ་དང་། ཐབས་མེད་པའི་ལམ་ལ་གནས་པ་རྣམས་ཀྱིས། ཀྱེ་མའོ་འཇིག་
རྟེན་གསུམ་པོ་འདི་བརླག་གོ་ཞེས་སྔོན་གྱི་སྨོན་ལམ་ལས་ཀྱི་སྟོབ་ལ་གནས་པའི་དེ་བཞིན་གཤེགས་པ་རྣམས་ཀྱིས་གཟིགས་སོ། །ཐབས་དང་ཤེས་རབ་ཀྱི་ཐུགས་རྗེའི་སྨོན་ལམ་ཆེན་པོ་ནམ་མཁའི་དབྱིངས་ཀུན་ཏུ་འཇུག་པའི་ཡང་དག་
པར་གནས་པ་འདི་ལྟ་བུའི་འཇིག་རྟེན་གྱི་ཁམས་ཐམས་ཅད་རབ་ཏུ་བརླག་པར་གཟིགས་ནས། དེ་བཞིན་གཤེགས་པ་ཐམས་ཅད་ཀྱི་བདག་པོ་ཤིན་ཏུ་དགྱེས་པ་ཆེན་པོའི་བདེ་བ་ཡང་དག་པར་ཞུགས་པ་ཀུན་ཏུ་བཟང་པོ་ཆེན་པོ་དཔལ་རྡོ་རྗེ་སེམས་དཔའ་
ལ་དབྱངས་ཀྱི་རྒྱལ་པོ་འདིས་བསྐུལ་བ་མཛད་དོ། །ཧོ་རང་བཞིན་དག་པ་པད་མ་བདེ་བའི་མཆོག་མངའ་བ། །ཐུགས་ཀྱི་ཡིད་བཞིན་རིན་ཆེན་གཞན་ལ་དགོངས་ནས་བཞེངས་མཛད་དེ། །བསྐལ་པའི་མཐའ་ནས་བསྒྲུབས་པའི་བྱམས་པས་གཟུགས་
ཀྱིས་བརྗིད་པ་དང་། །བྱང་ཆུབ་སྙིང་པོའི་ཆུ་ལས་འགྲོ་བ་རྣམས་ཀྱི་རང་བཞིན་ཁྲུས། །ཨ་ལ་ལ་ལ་ཧོ། །པད་མའི་འབྱུང་གནས་བདེར་གཤེགས་ཀུན་གྱི་སྐལ་བ་མཆོག་དང་ལྡན། །

90-1-220a

སྡུག་བསྔལ་ནད་ཀུན་སེལ་བའི་ཐུགས་རྗེའི་འཇིག་རྟེན་གསུམ་ལ་གཟིགས། ། དགའ་བའི་རོལ་པས་གར་དང་བཅས་ཏེ་བཞེངས་ཤིང་དབང་དུ་མཛོད། །ཨ་ལ་ལ་ལ་ཧོ། །སྔོན་གྱི་རྒྱལ་བ་རྣམས་ཀྱིས་མ་བསྒྲགས་གསང་བ་ཡི། །
འགྲོ་བ་ཀུན་གྱི་ཡིད་དང་འཐད་པའི་གསང་ཆེན་འདི་ཕྱུང་སྟེ། །རྣམ་དག་སྤྱོད་ཡུལ་གཞན་གྱིས་མི་འཕྲོགས་ནམ་མཁའ་ལ། །དངོས་མེད་རོལ་མོའི་གཞན་ལས་འཕགས་པ་བཞེངས་ཤིང་མཛད་དུ་གསོལ། །ཨ་ལ་ལ་ལ་ཧོ། །སྐད་ཅིག་མ་ཡི་སྤྱོད་
ཡུལ་འདིས། །མུན་པ་ཐམས་ཅད་སེལ་བའི་ཕྱིར། །གཞན་ལ་ཐུགས་རྗེས་དགོངས་ནས་སུ། །ལྷ་རྣམས་བྱིན་གྱིས་བརླབས་ཏུ་གསོལ། །དབྱངས་ཀྱི་རྒྱལ་པོ་འདི་ཡིས་ནི། །དགྱེས་མཆོག་དམ་པ་བསྐུལ་བྱས་ན། །པད་མ་དྲ་བ་རྡོ་རྗེ་དང་། །
བདེ་བར་སྦྱོར་བར་བཞེངས་སུ་གསོལ། །བདེ་བ་ཆེན་པོ་བདེ་གནས་པ། །གཙོ་ལ་འདི་ཡིས་བསྐུལ་བ་ཡིས། །སེམས་ཅན་ཀུན་དོན་བཞེངས་འགྱུར་ཏེ། །རྒྱལ་བ་ཐམས་ཅད་གདོན་པར་མཛད། །དེ་ནས་བཅོམ་ལྡན་འདས་བདེ་བ་
ཆེན་པོ་ཀུན་ཏུ་བཟང་པོ་དཔལ་རྡོ་རྗེ་འཛིན་ཡང་དག་པ་དང་ལྡན་པའི་བདེ་བ་ཆེན་པོས་བརྒྱན་པའི་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། བཞེངས་ནས་ཕྱོགས་བཅུ་མཐའ་ཡས་རབ་འབྱམ་མཐས་ཀླས་པའི་འཇིག་རྟེན་གྱི་ཁམས་ཀུན་
གཟིགས་ནས་ངོ་མཚར་དུ་གྱུར་ཏེ། །ཀྱེ་མའོ་ཁམས་གསུམ་འདི་སྟོངས་སོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཆེན་པོ་རྣམས་དང་བྲལ་བས་གདུག་པ་ཐམས་ཅད་ཀྱིས་འདི་དག་ཉེ་བར་གཙེས། གནོད་སྦྱིན་དང་སྲིན་པོ་ཐམས་
ཅད་དང་། ནད་དང་འཚེ་བ་དང་། གདོན་ཆེན་པོ་དང་། ཉོན་མོངས་པ་དང་། ཉེ་བའི་ཉོན་མོངས་པ་ཐམས་ཅད་ཀྱིས་ཡང་དག་པར་ཟོས་ཤེས་དགོངས་པ་ན་བཅོམ་ལྡན་འདས་ཀུན་ཏུ་བཟང་པོ་དེ་བཞིན་གཤེགས་པ་ཐམས་ཅད་གཏོང་བའི་རྡོ་རྗེ་ཡེ་ཤེས་ཀྱི་བདེ་
བ་ཆེན་པོ་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་ཡེ་ཤེས་བདེ་བ་ཆེན་པོའི་རང་གི་རྡོ་རྗེ་དང་པད་མ་ལས་བྱང་ཆུབ་ཀྱི་སེམས་ཉེ་བར་བསྡུ་བར་བྱ་སྟེ། ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་

90-1-220b

ལས་ཕྱུང་ངོ་། །ཐོག་མར་ཡོ་ནི་ཐིག་ལེར་བསམ་བྱས་པའི། །རྡོ་རྗེ་སེམས་དཔའ་བཅས་པ་འབྲུག་གི་སྒྲ་འབྱིན་པ། །མི་འཕྱེད་འདྲེན་པ་ཡང་དག་གཉིས་དང་ལྡན་པ་སྟེ། །འདི་ནི་སྟོན་པའི་མཆོག་སྟེ་རྡོ་རྗེའི་རིགས་ཉིད་དོ། །ཕྱུང་ནས་ནམ་མཁའི་དབྱིངས་
ཐམས་ཅད་དུ་གང་བའི་སྤྲོས་བའི། །སྣང་བར་བྱས་ཏེ། སླར་ཡང་མདུས་ནས་རྡོ་རྗེ་ལྟ་བུར་གནས་སོ། །ཡང་སྤྲོ་བ་དང་བསྡུ་བར་བྱས་ནས་སླར་འདུས་པ་ལས་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་ཐུགས་རྡོ་རྗེ་སེམས་དཔའ་ལྟ་བུར་གྱུར་ནས་
ཤར་གྱི་དཀྱིལ་འཁོར་དབུས་སུ་བཞུགས་པར་གྱུར་པ་ན། ཧཱུྃ་ཧཱུྃ་ཧཱུྃ་ཞེས་བཞད་པ་ཆེན་པོར་བཞད་ཅིང་ཨ་ཞེས་བརྗོད་ནས་བཞུགས་ཏེ། རང་གི་སེམས་དཔའི་སྐྱིལ་མོའི་གཡོན་དུ་ཡིད་ཙམ་འགྱིང་བས་འདུད་པ། གཡས་ཀྱི་རྡོ་རྗེ་གསོར་ཞིང་འཛུམ་པ་དང་
བཅས་ཤིང་སྤྱན་རྒྱས་པ། །ཆེ་བའི་ཆེན་པོ་དབུ་ལྔ་པ། །ཕྱག་ནི་བཅུ་དྲུག་རྣམ་དང་ལྡན། །སྣ་ཚོགས་སྐུ་ནི་མཆོག་འཛིན་པ། །དཔའ་བོ་ཐམས་ཅད་ལས་བྱེད་པ། །ཁ་དོག་རྣམ་ལྔ་གཟི་བརྗིད་ཆེ། །མཚོན་ཆ་རྣམས་པ་སྣ་ཚོགས་འཛིན། །རྡོ་རྗེ་རྒྱུ་མར་
རབ་ཏུ་གནས། །མཁས་པ་གང་གིས་སྙིང་ག་ཉིད། །མཉམ་པར་བཞག་སྟེ་འཛིན་བྱས་ན། །རྡོ་རྗེ་པད་མ་བདེ་ཆེན་ཡིས། །རྡོ་རྗེ་སེམས་དཔའ་བདེ་མྱུར་འཐོབ། །དེ་ནས་བཅོམ་ལྡན་འདས་ནམ་མཁའ་འགྲོ་མ་ཀུན་ལོངས་སྤྱོད་པའི་དཔལ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་ཏེ། ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་མཆོག་ཏུ་གསང་བ་དེ་བཞིན་གཤེགས་པ་ཐམས་ཅད་ཀྱི་ཟླ་གསང་ཐིག་ལེ་ལས། ནམ་མཁའ་ཤིན་ཏུ་དགྱེས་པ་འཐོབ་པར་བྱེད་པའི་བདེ་བ་ཆེན་པོ་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱི་སྙིང་
པོ་འདི་ཕྱུང་ངོ་།། །།ༀ་ཡི་གཙུག་ཏུ་ཐིག་ལེ་སྟེ། །མི་ཕྱེད་ཐིག་ལེར་བཅས་པ་ཡི། །འོག་ཏུ་གཟི་བརྗིད་ཡང་དག་བཅས། །མཐར་ནི་དྲལ་ཏེ་ཚེག་དྲག་བཅས། །འདི་ནི་རིན་ཆེན་ཐམས་ཅད་ཀྱི། །སྙིང་པོ་མཆོག་ཏུ་རྨད་འབྱུང་བའོ། །ཕྱུང་བ་ཡིས་ནི་ནམ་
མཁའ་དང་། །སངས་རྒྱས་ཀྱི་ནི་ཞིང་ཀུན་དང་། །འོད་ཟེར་སྤྲིན་ཕུང་རྒྱས་བྱས་ཏེ། །སླར་ཡང་དེ་ཉིད་བཞུགས་པར་འགྱུར། །དེ་ཡི་ཐུགས་ཀར་ཞུགས་ནས་ཀྱང་། །བརྡ་ཡི་ཚུལ་གྱིས་བཞུགས་པར་འགྱུར། །རྒྱལ་བ་ཀུན་གྱིས་དབང་བསྐུར་ནས། །

90-1-221a

སེམས་དཔའི་ཚུལ་གྱིས་སྤྲུལ་པ་ནི། །ཁ་དོག་རྣམ་ལྔ་ཡངས་པའི་སྤྱན། །ཆུ་སྐྱེས་བཞད་པ་འཛུམ་དང་བཅས། །ཉི་མའི་གཟི་བརྗིད་མཛེས་པ་ཆེ། །ཕྱག་རྒྱ་ལ་སོགས་སྣ་ཚོགས་བརྒྱན། །སྐྱིལ་མོ་
འགྱིང་བ་གཡོན་དུ་མདུད། །གཡས་ཀྱི་སྙིང་གར་རིན་ཆེན་འཛིན། །བརྒྱད་གཉིས་ཕྱག་རྒྱ་ངོ་བོ་ཡིས། །དྲི་མ་གསུམ་སྤང་བརྒྱན་པ་སྟེ། །རང་གི་དཀྱིལ་འཁོར་གང་བྱས་ནས། །སྣ་ཚོགས་ལྷོ་རུ་གནས་པར་འགྱུར། །
རྣམ་པ་ཀུན་མཁྱེན་མངོན་རིགས་པའི། །ནད་ཀྱིས་གློང་པ་འཇིག་པར་འགྱུར། །འདི་ནི་སངས་རྒྱས་ཐམས་ཅད་ཀྱི། །གཟི་བརྗིད་ཆེན་མོ་མདངས་ཆེ་བ། །དབུལ་དང་ནད་དང་གདོན་ཆེན་པོ། །
སེམས་ཅན་ཀུན་གྱི་འཕྲོགས་པར་བྱེད། །ཉི་མ་འཆར་པའི་དུས་ཉིད་དང་། །ཉི་མ་ཕྱེད་པའི་དུས་ཉིད་དུ། །ཉིད་ཀྱི་སྙིང་གར་འདི་བྱས་ཏེ། །ནོར་བུ་རིན་ཆེན་བསྒོམ་བྱས་ན། །ཞག་བདུན་གྱིས་ནི་ངེས་པར་ཡང་། །དངོས་གྲུབ་ནོར་
མང་སྦྱིན་མཛད་དེ། །དབང་པོ་གཉིས་ཀྱི་སྦྱོར་བ་ཡིས། །ཀྱེ་མའོ་བདེ་བས་དབང་སྐུར་བྱ། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་མཆོག་ཏུ་བདེ་བ་ཆེན་པོ་དཔལ་རྡོ་རྗེ་སེམས་དཔའ་ཤིན་ཏུ་དགྱེས་པའི་འདོད་པའི་དབང་
གི་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། པད་མ་ཆེན་པོ་ཀུན་ཏུ་གཟིགས་པའི་ལོངས་སྤྱོད་པའི་དཔལ་ཞེས་བྱ་བའི་སྙིང་པོ་ཆེན་པོ་ཉིད་ཀྱི་སྐུ་དང་གསུང་དང་ཐུགས་ཀྱི་ཡེ་ཤེས་མཆོག་ཏུ་གསང་བ་ཟླ་གསང་ཐིག་ལེ་ལས་
འདི་ཕྱུང་ངོ་། །དང་པོར་ཨོཾ་དང་ལྡན་བྱས་ཏེ། །མི་ཕྱེད་རབ་བཏགས་འདྲེན་པར་བཅས། །ཚེག་དྲག་པ་ནི་སྔགས་ཡིན་ཏེ། །བསམ་པ་ཐམས་ཅད་ཡོངས་སུ་བསྐོར། །སྔགས་མཁན་གང་གིས་མཉམ་བཞག་སྟེ། །སྙིང་གར་འདི་ནི་སྦྱར་
བྱས་ནས། །བདག་ནི་འདོད་ཆགས་ཞེན་སེམས་ཤིང་། །པད་མ་སྦྱར་བས་བསྒོམས་པར་བྱ། །མཚམས་ཀྱི་མཐའ་མ་དུས་དག་ཏུ། །དམ་ཚིག་འདི་ནི་སྤྱད་བྱས་ན། །ཟླ་བ་ཕྱེད་ཀྱི་ནང་ལོགས་སུ། །དབང་ཕྱུག་མོ་ནི་དངོས་གྲུབ་

90-1-221b

འཐོབ། །པད་མ་ཆེ་ལས་བྱུང་ནས་ཀྱང་། །ཐམས་ཅད་དུ་ནི་རྒྱས་འགྱུར་ཏེ། །འདི་ཉིད་དུ་ནི་སླར་ཞུགས་ནས། །པད་མའི་ཚུལ་གྱིས་གནས་པར་འགྱུར། །ཀུན་ཏུ་སྣང་བས་ཁྱབ་བྱས་ན། །སེམས་དཔའི་ཚུལ་གྱིས་སྤྲུལ་
པ་ནི། །དེ་ནས་འདོད་ཆགས་བབས་ནས་ཀྱང་། །པད་མའི་དབུས་སུ་ཞུགས་པར་འགྱུར། །དཀྱིལ་འཁོར་དུ་ནི་གང་བ་ཡིས། །རྒྱབ་ནས་རྗེས་སུ་མཉེས་མཛད་ཅིང་། །འཛུམ་བཅས་པད་མ་ཕྱེ་བ་ཡིས། །ཐུགས་ཀྱི་དབུས་སུ་ཡིད་ཙམ་འདུད། །
དཔལ་དང་ལྡན་པ་ཞལ་ལྔ་འཛིན། །ཕྱག་ནི་ཉི་ཤུར་བཞིས་མ་གཏམ། །མཚོན་ཆ་རྣམ་པ་སྣ་ཚོགས་འཛིན། །སྣ་ཚོགས་རྒྱན་གྱིས་ཀླུབས་པ་ཡིས། །ཟླ་བ་བཞིན་དུ་རྣམ་གྲོལ་བ། །བརྗིད་པའི་གར་ནི་མཛད་ཅིང་བཞུགས། །
འདི་ཡིས་པད་མའི་གནས་ཉིད་དུ། །ཚེ་འདི་ཉིད་ལ་ཐོབ་པར་འགྱུར། །དཔལ་ལྡན་གར་དབང་འཐོབ་འགྱུར་ཏེ། །འདོད་ཆགས་ཀུན་གྱིས་ཐབས་གནས་པས། །འཇམ་པའི་ཕྱག་ནི་སྟོང་རྣམས་ཀྱི། །གར་དུ་མཛད་ཅིང་འགྲོ་བ་འདུལ། །
དེ་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་བདེ་བ་ཆེན་པོ་ཀུན་ཏུ་བཟང་པོས་ཡང་སྣ་ཚོགས་ཆེན་པོ་ཀུན་ཏུ་ལོངས་སྤྱོད་པའི་རྣམ་པར་འགྱུར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཉིད་ཀྱི་སྐུ་དང་གསུང་དང་ཐུགས་
རྡོ་རྗེའི་ཡེ་ཤེས་མཆོག་ཏུ་གསང་བ་ཟླ་གསང་ཐིག་ལེ་ཆེན་པོ་ལས་ཕྱུང་ངོ་། །སྣ་ཚོགས་ཆེན་པོ་ཨོ་ཆེན་པོ། །སྟེང་དུ་ཐིག་ལེར་ཡང་དག་ལྡན། །འདི་ནི་དབུས་ཏེ་ལྟ་འོག་ཁྲོ། །སྔགས་ཀྱི་མཆོག་ནི་གཞག་པར་བྱ། །སྣ་ཚོགས་
འདི་ནི་ཐུགས་གར་གྲགས། །སྣ་ཚོགས་ཕྱུང་ནས་ཀུན་གནང་བས། །སངས་རྒྱས་ཚུལ་བཞིན་ཀུན་མཉེས་བྱས། །དེ་ཉིད་སླར་འཁོར་རབ་བཞུགས་ཏེ། །སྣ་ཚོགས་རྡོ་རྗེ་གཟུགས་མཆོག་གནས། །སྐད་ཅིག་སེམས་དཔའ་སྐུ་
གནས་པ། །རྣམ་པ་སྣ་ཚོགས་བཞད་པས་བརྒྱན། །འགྱིང་བཅས་ཐུགས་ཀར་སྣ་ཚོགས་འཛིན། །སྣ་ཚོགས་གཟི་བརྗིད་འབར་བ་གཏོང་། །ཕྱག་ནི་བརྒྱད་གཉིས་གཉིས་ཀྱིས་ཕྱོགས། །ས་འབྱེད་སྣ་ཚོགས་མཚོན་ཆ་གཏོང་། །ཞལ་ལྔ་སྣ་ཚོགས་

90-1-222a

ཡངས་ཆེ་བ། །བགེགས་སྤོང་ཐམས་ཅད་དངོས་གྲུབ་མཛད། །དཀྱིལ་འཁོར་གང་བར་གཞག་ནས་བྱང་དུ་གནས། །སྣ་ཚོགས་རྡོ་རྗེ་བདག་མོར་རྡོ་རྗེ་ཡང་དག་གིས། །ཐུགས་ཀར་མཛད་ནས་བདེ་བར་ཡང་དག་གནས། །
སྔགས་མཁན་ཞག་བདུན་དུ་ནི་བསྒོམ་བྱས་ན། །སྣ་ཚོགས་གྱུར་ཏེ་སྣ་ཚོགས་དེ་ལ་བབ། །སྣ་ཚོགས་ལས་ནི་སྣ་ཚོགས་བྱེད་པར་འགྱུར། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་མཆོག་ཏུ་ངོ་མཚར་དུ་གྱུར་ཏེ། དབྱངས་
ཆེན་པོ་ལེན་ཅིང་དཀྱིལ་འཁོར་ཆེན་པོའི་དབུས་ཀྱི་བཅོམ་ལྡན་འདས་ལ་མཉེས་པ་མཛད་དོ། །གཙོ་བོ་བྱིན་གྱིས་བརླབ་པའི་ཕྱིར། །ཡེ་ཤེས་ལྔ་ཡི་ངོ་བོ་དག །རྒྱལ་བ་ཉིད་ཀྱིས་བཤད་པར་མཛོད། །སངས་རྒྱས་སྐུ་ལ་བསྟོད་ཕྱག་
འཚལ། །སྔགས་རིག་ཕྱག་རྒྱ་ཡན་ལག་བཅས། །ལྷ་ཡི་དེ་ཉིད་ཕ་རོལ་ཕྱིན། །བདག་ནི་དེ་ཉིད་སྣ་ཚོགས་ཆེ། །སྣ་ཚོགས་ཡེ་ཤེས་བསྟོད་ཕྱག་འཚལ། །གཟུངས་ཀྱི་པད་མ་ཡང་དག་ལྡན། །འདོད་བྱེད་ཐུགས་
ཀྱི་མཆོག་ཡིན་ཏེ། །ཤེས་རབ་ཕ་རོལ་ཕྱིན་སྦྱོར་བ། །སྦྱོར་བའི་ཡེ་ཤེས་བསྟོད་ཕྱག་འཚལ། །ཆོས་ཀྱིས་དོན་ནི་གཉིས་མེད་ཚུལ། །སྟོང་པ་ཉིད་ཀྱི་ལམ་རིག་པ། །ཡངས་པའི་སྤྱན་ནི་སོ་སོར་གཟིགས། །མེ་ལོང་ཡེ་ཤེས་
ཡང་དག་འབྱུང་། །བྱ་བ་ནན་ཏན་སེམས་ཅན་དོན། །རང་གི་ཡོན་ཏན་མི་མཉམ་ཤོད། །དེ་ཉིད་རིག་པའི་སེམས་ཅན་ཀུན། །རྡོ་རྗེ་གསུམ་གྱིས་བྱིན་བརླབས་པ། །གང་གིས་བྱིན་གྱིས་བརླབས་མ་ཐག །སངས་རྒྱས་
གསུམ་ནི་དབང་དུ་འགྱུར། །དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོ་གཉིས་སུ་མེད་པའི་མཉམ་པ་ཉིད་ཀྱི་རྡོ་རྗེ་ཡེ་ཤེས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་
བརླབས་པའི་འབྲུ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་བྷྲཱུྃ། སྟོང་པ་ཆེན་པོའི་སྙིང་པོ་ཡི། །ཨོཾ་བཛྲ་ཙིཏྟ་ཧཱུྃ། ཨོཾ་བཛྲ་ཀཱ་ཡ་ཧཱུྃ། ཨོཾ་བཛྲ་བཱཀ་ཨཱཿ། ཨོཾ་བཛྲ་ཨ་བྷི་ཤིཉྩ་ཏྲཱྃ། 

90-1-222b

ཨོཾ་བཛྲ་ས་མ་ཡ་ཧཱུྃཿ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཤིན་ཏུ་མགུ། རབ་ཏུ་དགྱེས་པའི་ཡིད་ཀྱིས་བཅོམ་ལྡན་འདས་ལ་ཕྱག་བྱས་ཏེ། འདི་སྐད་ཅེས་གསོལ་ཏོ། །དེ་བཞིན་གཤེགས་པ་
ཐམས་ཅད་ཀྱང་རང་རང་གི་སྙིང་པོ་བཅོམ་ལྡན་འདས་ལ་འབུལ་ལོ། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོས་དེ་བཞིན་གཤེགས་པ་ཐམས་ཅད་ལ་དགེའོ་ཞེས་བདེ་བ་ཆེན་པོའི་ཚུལ་གྱིས་རབ་ཏུ་སྤྲོ་བར་མཛད་དོ། །དགེའོ་
དགེའོ་རྒྱལ་བ་ཀུན། །དགེའོ་དགེའོ་རྒྱལ་བ་མཆོག །དགེའོ་དགེའོ་ལེགས་པའི་ལས། །དགེའོ་དགེའོ་སྔོན་འགྲོ་བ། །དགེའོ་དགེའོ་སྣ་ཚོགས་ཆེ། །ཉིད་ཀྱི་སྙིང་གར་དྲངས་བྱས་ཏེ། །རང་གི་གསང་བ་བཤད་པར་མཛོད། །
གང་གིས་མ་འོངས་སངས་རྒྱས་རྣམས། །བདེ་བའི་ཡིད་ནི་ཆུད་པར་འགྱུར། །དེ་ནས་བཅོམ་ལྡན་འདས་སྟོང་པ་ཉིད་ཀྱི་ཡེ་ཤེས་རྡོ་རྗེ་ཆེན་པོ་དེ་བཞིན་གཤེགས་པས་རང་གི་སྙིང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །
ཨོཾ་སརྦྦ་ཏ་ཐཱ་ག་ཏ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧྃ། དེ་ནས་བཅོམ་ལྡན་འདས་མེ་ལོང་གི་ཡེ་ཤེས་རྡོ་རྗེ་དེ་བཞིན་གཤེགས་པས་རང་གི་སྙིང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་སརྦྦ་
ཏ་ཐཱ་ག་ཏ་ཨཱ་དཪྵ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་དེ་བཞིན་གཤེགས་པ་སོ་སོར་ཀུན་ཏུ་གཟིགས་པས་ཡེ་ཤེས་རྡོ་རྗེ་དེ་བཞིན་གཤེགས་པས་རང་གི་སྙིང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་ས་
སརྦྦ་ཏ་ཐཱ་ག་ཏ་མ་ཧཱ་པྲ་ཏྱ་པྲ་བེཀྵ་ཛྙཱ་ཊན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། དེ་ནས་བཅོམ་ལྡན་འདས་མཉམ་པ་ཉིད་ཀྱི་ཡེ་ཤེས་རྡོ་རྗེ་དེ་བཞིན་གཤེགས་པས་རང་གི་སྙིང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །
ཨོཾ་སརྦྦ་ཏ་ཐཱ་ག་ཏ་མ་ཧཱ་ས་མནྟ་ཛྙཱ་ན་བཛྲ་སྭ་བྷཱ་ཝ་ཨཱམ་ཏྨ་ཀོ྅ཧཾ། དེ་ནས་བཅོམ་ལྡན་འདས་བྱ་བ་ནན་ཏན་གྱི་ཡེ་ཤེས་རྡོ་རྗེ་དེ་བཞིན་གཤེགས་པས་རང་གི་སྙིང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །

90-1-223a

ཨོཾ་སརྦྦ་ཏ་ཐཱ་ག་ཏ་ཀྲྀད་ཏྱེ་ཨ་ནུཥྛཱ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧྃ། དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོས་ཡང་དགེ་བའི་ཚུལ་སྦྱིན་པར་མཛད་དེ། །ཨོཾ་དགེའོ་དགེའོ་སྟོང་པ་ཆེ། །
ཨོཾ་དགེའོ་དགེའོ་ཐུགས་ཆེན་པོ། །ཨོཾ་དགེའོ་དགེའོ་སྐུ་ཆེན་པོ། །ཨོཾ་དགེའོ་དགེའོ་གསུང་ཆེན་པོ། །ཨོཾ་དགེའོ་དགེའོ་རིན་པོ་ཆེའོ། །ཨོཾ་དགེའོ་དགེའོ་སྣ་ཚོགས་ཆེ། །དེ་ནས་བཅོམ་ལྡན་འདས་དེ་བཞིན་
གཤེགས་པ་ཐམས་ཅད་འདུ་བ་མཛད་ནས་བཅོམ་ལྡན་འདས་ལ་རང་གི་དཀྱིལ་འཁོར་བཤད་པར་གསོལ་བ་འདེབས་ཏེ། དཀྱིལ་འཁོར་སངས་རྒྱས་རྡོ་རྗེ་ཡི། །དགའ་བྱེད་བཅོམ་ལྡན་ཉིད་ཀྱིས་ཤོད། །གང་གིས་སེམས་ཅན་
བདེ་ཉིད་ཀྱིས། །དཀྱིལ་འཁོར་རབ་ཏུ་འཐོབ་པར་འགྱུར། །དཀྱིལ་འཁོར་དཀྱིལ་འཁོར་ཞེས་བགྱི་བ། །རྒྱལ་བའི་བདག་པོས་གསང་བ་གསུངས། །གང་གིས་དཀྱིལ་འཁོར་མྱུར་བྲིས་ནས། །དཀྱིལ་འཁོར་གྱི་ནི་རྒྱན་དུ་འགྱུར། །
དཀྱིལ་འཁོར་བདེ་བའི་གཞི་ཉིད་ནི། །གསང་བའི་དཀྱིལ་འཁོར་ཞེས་བགྱིའོ། །དཀྱིལ་འཁོར་བརྒྱན་པའི་བདག་ཉིད་དེ། །གསང་བ་བཅོམ་ལྡན་ཉིད་ཀྱིས་གསུངས། །དཀྱིལ་འཁོར་མཉམ་པའི་ཡེ་ཤེས་ནི། །
དཀྱིལ་འཁོར་སྙིང་པོ་ཞེས་བགྱི་བ། །དཀྱིལ་འཁོར་གྱི་ནི་ཅི་རིགས་པར། །གཙོ་བོ་ཆེན་པོ་ཉིད་ཀྱིས་ཤོད། །དཀྱིལ་འཁོར་མི་མཉམ་ཡེ་ཤེས་ནི། །དཀྱིལ་འཁོར་གསང་བ་པད་མ་སྟེ། །དཀྱིལ་འཁོར་རབ་དགྱེས་འཐོབ་བྱེད་པའི། །
ཚད་མེད་དཀྱིལ་འཁོར་བཤད་པར་མཛོད། །དེ་ནས་བཅོམ་ལྡན་འདས་ཀུན་ཏུ་བཟང་པོ་རབ་ཏུ་དགའ་བའི་ཡེ་ཤེས་ཀྱི་དཀྱིལ་འཁོར་རྡོ་རྗེའི་འབྱུང་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་བཞིན་གཤེགས་པ་ཐམས་ཅད་
ཀྱི་དམ་ཚིག་གི་དཀྱིལ་འཁོར་ཆེན་པོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །གཟུགས་དང་ལང་ཚོས་བརྒྱན་པ་ཡི། །བུ་མོ་མིག་ཡངས་གཟུངས་བྱ་སྟེ། །ཤེས་རབ་ཅན་གྱིས་བྱིན་བརླབས་འབྲུས། །

90-1-223b

མཉམ་པར་བཞག་སྟེ་བྱིན་བརླབས་ནས། །ཤེས་རབ་ཕ་རོལ་ཕྱིན་པའི་བདག །དེ་བཞིན་གཤེགས་ཀྱི་བཙུན་མོ་གཞག །གཉིས་པོ་མདུན་དུ་གཞག་བྱས་པ། །བརྩོན་འགྲུས་ཕ་རོལ་ཕྱིན་པའི་གནས། །རྡོ་རྗེ་
སེམས་དཔའི་བཙུན་མོ་སྟེ། །ཐུགས་ནི་དགྱེས་པར་བྱེད་པ་ཡིན། །གསུམ་པ་ལྷོ་རུ་བསམ་བྱ་བ། །དགེ་བ་སྦྱིན་པའི་བདག་ཉིད་གཞག །རིན་ཆེན་འབྱུང་ལྡན་བཙུན་མོ་ཆེ། །དབང་
བསྐུར་ཡོན་ཏན་འཐོབ་བྱེད་པའོ། །བཞི་པ་ཚུལ་ཁྲིམས་ཆེན་མོ་སྟེ། །དེ་ཉིད་ཆོས་དོན་ཡང་དག་གནས། །རྡོ་རྗེ་ཆོས་ཀྱི་བཙུན་མོ་སྟེ། །དེ་སྦྱིན་དགའ་བྱེད་མ་ཡིན་ནོ། །བཟོད་
པ་ཆེན་མོ་བྱང་དུ་སྟེ། །གསོད་པའི་བདག་ཉིད་ཟད་པ་སྦྱིན། །བཙུན་མོ་རྡོ་རྗེ་གདོན་མི་ཟ། །དམ་ཚིག་གནས་ནི་སྐྱོང་བྱེད་མའི། །གྲྭ་དག་ཏུ་ནི་ཐམས་ཅད་དུ། །སྔ་མ་
བཞིན་དུ་མཆོད་ལ་སོགས། །སྒོ་ཡི་ཕྱོགས་རྣམས་ཐམས་ཅད་དུ། །སྒོ་བསྲུང་རྣམས་ནི་རྣམ་པ་བཞི། །ཅི་འདོད་པར་ནི་མཆོད་བྱ་སྟེ། །སློབ་མ་མཆོག་ནི་གཞུག་པར་བྱ། །ཕྱག་
རྒྱས་ལག་པ་བརྒྱན་བྱས་ཏེ། །མཛུམ་དང་བཅས་པའི་འདོད་ཆགས་མིག །རྒྱན་ཀུན་གྱིས་ནི་རྣམ་པར་ཀླུབས། །སྤྲོ་བ་ཆེ་བས་གར་བྱ་ཞིང་། །ལྷ་ཡི་འགྱིང་བའི་འདུན་པ་ཡིས། །དགའ་
བྱེད་དཀྱིལ་འཁོར་གཞུག་པར་བྱ། །མིག་ནི་དར་གྱི་གོས་ཉིད་ཀྱིས། །གཡོགས་ཏེ་ལག་པས་གཟུང་ནས་ཀྱང་། །སྒོ་ཡི་གྲྭར་ཡང་གཞག་བྱ་སྟེ། །སྨོན་ལམ་མཆོག་ནི་སྨྲ་རུ་གཞུག །རྡོ་རྗེ་
ཆེན་མོ་བདག་ཅེས་བགྱི། །རང་གི་ལྷ་རྣམས་ཕྱག་བགྱི་སྟེ། །རང་དགྱེས་གནས་ལས་བྱུང་བ་ཡི། །བདེ་བྱེད་ཆེན་མོས་མཉེས་པར་བགྱི། །ཇི་ལྟ་བཞིན་དུ་མཉམ་ཉིད་འཐོབ། །

90-1-224a

མེ་ཏོག་ཕྲེང་བ་དོར་བྱས་ཏེ། །ལྷ་མོ་ཆེན་མོ་བཞེངས་སུ་གསོལ། །ཁྱོད་ཀྱི་དཀྱིལ་འཁོར་བདག་འཚལ་ལོ། །ལྷ་མོ་གང་ལ་ལྷུང་བ་ཡི། །དེ་ཡི་ལག་ནས་བསྐོར་བ་བྱ། །ལྷ་མོ་འདི་ནི་ཁྱོད་དང་མཐུན། །
སེམས་ཆེ་ཁྱོད་ཀྱིས་འདོད་པར་གྱིས། །དེ་ནས་སློབ་མ་དེ་ཡིས་ནི། །བདག་གི་རབ་དགྱེས་སྨྲ་བྱ་ཞིང་། །དེ་ལ་འདོད་པ་སྤྱད་པར་མཛོད། །ཁྲོ་བོ་རྣམས་ཀྱི་མི་ཕྱེད་ཕཊ། །མཐའ་ནི་ཧཿཞེས་སྦྱར་བར་བྱ། །འབྱུང་བའི་དུས་སུ་བྱ་བ་ནི། །ཨ་ཧོ་སུ་ཁ་བདེ་ཞེས་སྨྲ། །
དེ་ནས་རྡོ་རྗེ་ཕྱུང་བ་ཡི། །མཁས་པས་དེ་ནི་བླང་བྱས་ཏེ། །བདེ་བ་ཆེན་པོ་དངོས་གྲུབ་རྫས། །བླ་མ་ལ་ནི་དང་པོར་དབུལ། །དེ་ནས་དེ་ཉིད་ཀུན་ལ་ཡང་། །ཅི་བདེ་བར་ནི་དབུལ་བར་བྱ། །སྤྱི་བོ་ཞབས་ལ་
གཏུགས་བྱས་ཏེ། །བླ་མ་ལ་ནི་དབང་བསླང་བྱ། །ཤིན་ཏུ་སྦས་པ་འཕགས་པའི་དབང་། །བཅོམ་ལྡན་བདག་ལ་སྩལ་བར་མཛོད། །དེ་ནས་སྦྱོར་བ་ཆེན་པོ་ཡི། །སྙོམས་པར་ཞུགས་ཏེ་དེའི་བདེ་བ། །
སློབ་དཔོན་རྡོ་རྗེ་ཕྱུང་བྱས་ཏེ། །སྤྱི་བོར་རབ་ཏུ་གཞག་པར་བྱ། །ལག་པ་ཡིས་ནི་མ་རེག་པར། །ཁ་ལ་རབ་ཏུ་སྦྱིན་པར་བྱ། །ཁྱད་པར་དུ་ནི་དྲང་བྱས་ཏེ། །ཅི་བདེ་བར་ནི་བཏུང་བར་བྱ། །གཟུངས་མ་དེ་དག་
ཐམས་ཅད་ལ། །རྡོ་རྗེ་ཡིས་ནི་སྦྱིན་པར་བྱ། །དེ་ནས་སློབ་མ་མཆོག་ཉིད་ཀྱིས། །བླ་མ་ལ་ནི་ཡོན་དབུལ་བ། །མ་དང་སྲིང་མོ་བུ་མོ་དང་། །ཆུང་མ་དང་ནི་རང་གི་བུ། །བདག་ཉིད་དང་ནི་རྒྱལ་སྲིད་དང་། །
དེ་བཞིན་ལོངས་སྤྱོད་དབང་ཕྱུག་དང་། །རྫས་དང་ནོར་དང་གཏེར་རྣམས་དང་། །གླང་པོ་རྟ་དང་ཤིང་རྟ་དག །བླ་མ་ལ་ནི་ཡོན་མཆོག་སྟེ། །དགའ་བའི་ཡིད་འགྱུར་དབུལ་བར་བྱ། །ཕྱི་ཡི་སྦས་པ་གསང་བ་དང་། །
དེ་བཞིན་གཤེགས་པ་ཐམས་ཅད་དང་། །རྡོ་རྗེ་དང་ནི་གཟུངས་མ་རྣམས། །འདོད་པའི་དངོས་གྲུབ་དྲི་བར་བྱ། །སྙིང་པོ་ཡང་དག་ཤེས་གྱུར་ནས། །དངོས་གྲུབ་མཆོག་ནི་བསྒྲུབ་པར་བྱ། །དེ་བཞིན་གཤེགས་པ་ཐམས་ཅད་

90-1-224b

ཀྱི། །གསང་བ་ཡིས་ནི་དཀྱིལ་འཁོར་འདི། །ཅི་སྟེ་རྨོངས་པས་སྨྲ་བྱས་ན། །སློབ་དཔོན་གྱི་ནི་དམ་ཚིག་ཉམས། །མྱུར་དུ་ཟླ་ཕྱེད་ཚུན་ཆད་དུ། །བསྟན་པས་རྣམ་པར་འཇིག་པར་འགྱུར། །དང་པོར་དམ་ཚིག་གཞག་
བྱས་ཏེ། །ཕྱི་ནས་དཀྱིལ་འཁོར་བསྟན་པར་བྱ། །གཞན་དུ་བྱས་ན་དཔའ་བོའི་རྣམས། །དམྱལ་བར་བསྐལ་པར་གྲངས་མེད་སྨིན། །དེ་བས་བློ་ལྡན་རྡོ་རྗེ་ཡིས། །ནན་ཏན་དམ་ཚིག་བསྒྲགས་མི་བྱ། །སྔགས་ཀྱི་དངོས་
གྲུབ་དོན་འདོད་པས། །དམ་ཚིག་བསྲུང་ལ་བརྩོན་པར་བྱ། །གཞན་དུ་བྱས་ན་སྔགས་མཁན་གྱི། །སྔགས་ལ་སོགས་པའི་དོན་མི་འགྲུབ། །ལྷ་རྣམས་ཀྱང་ནི་དམ་ཚིག་གི། །གསོལ་ཡང་བཞེས་སུ་མི་གནང་སྟེ། །འཇིག་རྟེན་འདི་རུ་
སྡུག་བསྔལ་ཆེ། །འཇིག་རྟེན་ཕ་རོལ་དམྱལ་བའི་རྣམས། །དམ་ཚིག་སྤྱོད་པ་འདས་པས་སོ། །རྨོངས་པའི་བདག་ཉིད་དེས་འཐོབ་བོ། །སློབ་མ་དེ་ཡང་དེ་བཞིན་དུ། །བློ་ཞན་སྡུག་བསྔལ་འཐོབ་གྱུར་ཏེ། །དེས་ན་སྔགས་ཀྱི་དོན་མི་སྨིན། །
ལྷ་རྣམས་ཀྱི་ནི་མཆོག་ཏུ་བདེ། །དམ་ཚིག་མེད་པ་སློབ་མ་ལ། །ནམས་ཀྱང་སྦྱིན་པར་མི་འགྱུར་རོ། །དེ་བས་དམ་ཚིག་གཙོ་ཡིན་ཏེ། །ཐོག་མར་དམ་ཚིག་སྦྱིན་པར་བྱ། །སྔགས་རྣམས་དང་ནི་ཕྱག་རྒྱ་ཡང་། །དེ་བཞིན་ཐབས་
དང་ཤེས་རབ་རྣམས། །དམ་ཚིག་དེ་རྣམས་ཐམས་ཅད་ཀྱང་། །སྔགས་པས་གསང་བ་སྦྱོར་བ་ཡིས། །དམྱལ་བ་ངན་སོང་ཟློག་པའི་ཕྱིར། །བུ་དང་སློབ་མ་སྦྱིན་པར་བྱ། །སྔགས་ཀྱི་དངོས་གྲུབ་བསོད་ནམས་བྱེད། །
གཙང་སྦྲ་དོགས་པ་མེད་པ་འགྱུར། །དེ་བཞིན་གཤེགས་པ་ཀུན་གྱིས་དམ། །དཀྱིལ་འཁོར་ཚུལ་བཞིན་བྲི་བྱས་ཏེ། །གཞོན་ནུའི་ཚད་ནི་བཅུ་དྲུག་ལོན། །དམ་ཚིག་སློབ་མའི་དཀྱིལ་འཁོར་དུ། །གཞག་ནས་ཆོ་ག་འདིས་
གཞུག་བྱ། །དམ་ཚིག་རྣམས་ནི་འདི་ཡིན་ཏེ། །སྦྲང་རྩི་ཤ་དང་དྲི་ཆེན་པོ། །ཉི་མ་ཟླ་བའི་བློ་ཆེན་དང་། །རྡོ་རྗེ་ལས་བྱུང་ཆུ་བསྒྲུབས་རྣམས། །དཀྱིལ་འཁོར་ལ་སོགས་ཚུལ་བཞིན་གཞག །དམ་ཚིག་ཡི་གེ་གཞག་པ་ཡིས། །

90-1-225a

མྱུར་དུ་དམ་ཚིག་བསྒྲུབ་བྱས་ན། །དགའ་བྱེད་དམ་ཚིག་དངོས་གྲུབ་སྟེ། །དངོས་གྲུབ་ཐམས་ཅད་འཐོབ་པར་འགྱུར། །དམ་ཚིག་འདི་ནི་སྣ་ཚོགས་ཏེ། །འཛིན་པ་ཡིས་ནི་མཐུ་རུ་འགྱུར། །མ་འོངས་སངས་
རྒྱས་ཆེན་པོ་དང་། །རྡོ་རྗེ་སེམས་དཔའ་བདག་པོ་ཆེ། །བློ་ལྡན་དབང་བསྐུར་བླངས་པ་ཡིས། །དབང་བསྐུར་ཕུན་སུམ་ཚོགས་པ་ཀུན། །སངས་རྒྱས་ཀུན་གྱིས་འཐོབ་འགྱུར་ཏེ། །དབང་བསྐུར་བ་ཡི་ཡིད་དུ་འགྱུར། །
དེ་བཞིན་གཤེགས་པ་ཐམས་ཅད་ཀྱི་དམ་ཚིག་རྡོ་རྗེ་ཡེ་ཤེས་ཆེན་པོ་ཞེས་བྱ་བ་མཆོག་ཏུ་གསང་བ་ཆེན་པོའི་དཀྱིལ་འཁོར་ཏེ་ལྔ་པའོ།། །། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་མཆོག་
ཏུ་དགྱེས་པ་ཆེན་པོ་ཡིད་བདེ་བར་གྱུར་ཏེ། བཅོམ་ལྡན་འདས་ལ་གསོལ་བ་འདེབས་སོ། །གདུག་པ་ཐམས་ཅད་རྣམས་འདུལ་བ། །འཇིགས་པར་བྱེད་པ་ཆེན་པོ་འདི། །རྡོ་རྗེ་ཁྲོ་བོ་ཆེན་པོ་ཡི། །དཀྱིལ་འཁོར་ཆེན་
པོ་རྣམ་བཤད་ཕྱིར། །འཇིགས་བྱེད་ཆེན་པོ་རྣམས་འདུལ་བ། །དཀྱིལ་འཁོར་རྡོ་རྗེ་ཐམས་ཅད་ཀྱི། །ཁྲོ་བོ་དམ་ཚིག་དེད་དཔོན་གྱིས། །གསང་བ་ཆེན་པོ་ཉིད་ཀྱིས་ཤོད། །དེ་ནས་བཅོམ་ལྡན་འདས་བདེ་བ་ཆེན་
པོ་དཔལ་རྡོ་རྗེ་སེམས་དཔའི་དེ་བཞིན་གཤེགས་པ་ཐམས་ཅད་འདྲེན་པའི་ཁྲོ་བོའི་དམ་ཚིག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་ཡེ་ཤེས་ལས་འདི་ཕྱུང་
ངོ་། །ཨོཾ་བཛྲ་མ་ཧཱ་ཙཎྚ་སརྦྦ་དུ་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊ། འདི་ཕྱུང་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ཁྲོ་བོ་ཆེན་པོའི་མཐུས་རྣམ་པ་དྲུག་ཏུ་གཡོས། ཀུན་ཏུ་གཡོས་
ལྷ་དང་། ཀླུ་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། གནོད་སྦྱིན་དང་། སྲིན་པོ་ཐམས་ཅད་འཁྲུག་པ་ཆེན་པོར་གྱུར་ཏོ། །དེ་ནས་འཇིགས་པ་ཆེན་པོས་ཉེན་པས་

90-1-225b

དེ་དག་བརྒྱ་བྱིན་གྱི་ཐད་དུ་ལྷགས་ནས་བརྒྱ་བྱིན་བདག་ཉིད་ཀྱང་བསྐྱབས་མེད་པར་མཐོང་ནས་ཚངས་པའི་ཐད་དུ་ཕྱིན། ཚངས་པ་ཡང་གཏོགས་འདོད་ཀྱི་གན་དུ་ཕྱིན། གཏོགས་འདོད་ཀྱང་དབང་ཕྱུག་ཆེན་པོའི་ཐད་དུ་ཕྱིན་ཏེ། 
དེ་ནས་དབང་ཕྱུག་ཆེན་པོ་བདག་ཉིད་ཀྱི་མཐུ་འཇིགས་བྱེད་ཆེན་པོའི་གཟུགས་སུ་བྱས་ཏེ། འཇིག་རྟེན་གྱི་ཁམས་འདི་དག་ཐམས་ཅད་རང་གི་རྫུ་འཕྲུལ་གྱིས་ཀུན་ཏུ་སྣང་བར་བྱས་ཏེ། ལྷ་རྣམས་ལ་མ་འཇིགས་
ཤིག །ཀླུ་རྣམས་ལ་མ་འཇིགས་ཤིག །གནོད་སྦྱིན་རྣམས་ལ་མ་འཇིགས་ཤིག །ལྷ་མ་ཡིན་རྣམས་མ་འཇིགས་ཤིག །དྲི་ཟ་རྣམས་ལ་མ་འཇིགས་ཤིག །ལྷ་དང་འཇིག་རྟེན་དུ་བཅས་པ་རྣམས་མ་འཇིགས་
ཤིག །ངའི་རྫུ་འཕྲུལ་གྱི་ཁྱད་པར་འདི་ལྟ་བུ་གཞན་འགས་ཀྱང་རབ་ཏུ་བརྫི་ནུས་སམ། ཁྱེད་རྣམས་ཅི་དགར་སྤྱོད་པས་གནོས་ཤིག་ཅེས་དབུགས་ཕྱུང་ངོ་། །དེ་ནས་བཅོམ་ལྡན་འདས་ཀྱིས་ཀྱང་དེ་བཞིན་
གཤེགས་པ་ཐམས་ཅད་ཀྱི་གཟི་བརྗིད་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་བཞིན་གཤེགས་པ་ཐམས་ཅད་ཀྱི་ཁྲོ་བོའི་ཁྲོ་གཉེར་ཆེན་པོ་ཞེས་བྱ་བ། ཁྲོ་བོ་ཆེན་པོའི་སྙིང་པོ་ཉིད་ཀྱི་
སྐུ་དང་གསུང་དང་ཐུགས་རྡོ་རྗེ་ཡེ་ཤེས་ལས་ཕྱུང་ངོ་། །ཨོཾ་བཛྲ་བྷྲི་ཀུ་ཊི། མ་ཧཱ་ཀྲོ་དྷ་ཧ་ན་ཧ་ན། གྲྀཧྣ་གྲྀཧྣ། མཱ་ར་མཱ་ར། བྷནྡྷ་བྷནྡྷ། ད་ཧ་ད་ཧ། པ་ཙ་པ་ཙ་ཧཱུྃ། བྷྲྀ་བྷྲྀ། བྷྲ་བྷྲ་ཡ། བྷྲྀ་ཀུཊྚ་སརྦྦ་མཱ་རཱ་ན་སརྦྦ་དུ་མ་ཊ་མ་ཊ།  
མོ་ཊ་མོ་ཊ། ཧཱུྃ་བྷྲྀ། ཧཱུྃ་ཏྲཱྃ། ཏྲ་ཊ་ཏྲ་ཊ། བྷྲྀ་ཧཱུྃ་ཧྲྀ་ཧཱུྃ་ཏྲྃ་ཏྲ་ཊ། འདི་བརྗོད་མ་ཐག་ཏུ་དེ་དག་སྔ་མ་བཞིན་དུ་སྐྲག་ནས་དབང་ཕྱུག་ཆེན་པོའི་ཐད་དུ་ཉེ་བར་ལྷགས་སོ། །དེ་ནས་དབང་ཕྱུག་སྔ་མ་བཞིན་དུ་བདག་གི་ཆེ་བ་ཉེ་བར་སྟོན་ཅིང་
གཏོགས་འདོད་ལ་སྨྲས་པ། ཁྱེད་ཀྱང་མཐུ་ཆེན་པོའི་ཆེན་པོ་སྟེ་གདུག་པ་ཐམས་ཅད་ཀྱི་ཚོགས་ཀྱི་བདག་པོ་ཡིན་ན། རང་གི་མཐུ་རྒྱ་ཆེན་པོའི་རྫུ་འཕྲུལ་ཉེ་བར་སྟོན་པས་གདུག་པ་དེ་རྣམས་དབུགས་དབྱུང་བར་མཛོད་ཅིག །དེ་ནས་གཏོགས་འདོད་དེ་མ་

90-1-226a

ཐག་ཏུ་རང་གི་མཐུ་འཇིགས་བྱེད་ཀྱི་གཟུགས་འཁོར་ལོའི་ནག་པོ་ཆེན་པོར་བསྒྱུར་ནས་རྡོ་རྗེའི་སྐད་དྲག་པོ་ཆེན་པོའི་བརྒད་པའི་གདངས་འབྱིན་པས་འཇིག་རྟེན་ཐམས་ཅད་ལ་ཉེ་བར་སྟོན་ཅིང་གནས་པར་གྱུར་ཏོ། །དེ་ནས་
བཅོམ་ལྡན་འདས་ཀུན་ཏུ་བཟང་པོ་ཆེན་པོ་ཡང་ཁྲོ་བོ་ཆེན་པོའི་པད་མ་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྙོམས་པར་ཞུགས་མ་ཐག་ཏུ་པད་མའི་དྲ་བ་འཆར་བའི་ཁྲོ་བོ་ཐམས་ཅད་སླར་ལྡོག་སྟེ། 
བཅོམ་ལྡན་འདས་ཀྱི་ཐུགས་ཀར་ཞུགས་སོ། །ཞུགས་ནས་ཁྲོ་བོ་ཆེན་པོའི་སྙིང་པོར་བདག་ཉིད་བྱིན་གྱིས་བརླབས་ནས། བཅོམ་ལྡན་འདས་ཀྱི་སྐུ་དང་གསུང་དང་ཐུགས་རྡོ་རྗེའི་ཐུགས་ཀ་ནས་ཕྱུང་ངོ་། །ཨོཾ་པདྨ་ཛྭཱ་ལ་མ་ཧཱ་
ཀྲོ་དྷ་བ་ད་བ་མུ་ཁ་ཁ་ཁ། སརྦྦ་དུཥྚན། ཁཱ་ཧི་ཁཱ་ཧཱི། སརྦྦ་དུ། པྲ་དུཥྚ་ནྃ། ད་མ་ད་མ། བཛྲ་དྃ་ཥྚོད་ཀ་ཊ་མ་ཧཱ་མ་ཊ་མ་ཊ། ཀྵོ་ཊ་ཀྵོ་ཊ། བཛྲ་ཁ་ར། ཙ་པ་ལ་དུར་ག་བེ་ག །ཏྲ་ས་ཏྲ་ས། མ་ཧཱ་བཛྲ་བ་ཌ་བ་མུ་ཁ། 
པྲ་མ་ཐ་པྲ་མ་ཐ་ཧཱུྃ་ཕཊ། ཧྲཱི་ཧ་ཧ་ཧི་ཧི། ཙ་ཏུརྨུ་ཁ། བེ་ཤ་པྲཱ་ཎ་ཤ་ན། ཧཱུྃ་ཧྲཾི་ཧཱུྃ་ཧཱུྃ་དྷཱྂཿཧ། དེ་ནས་འདི་གསུངས་མ་ཐག་ཏུ་ཚངས་རིས་ཆེན་པོ་འདར་ཡེར་ཡེར་ཞིང་ཁས་བུབ་ཏུ་འགྱེལ་ཏེ། བརྡབ་འཆོས་སོ། །
དེ་ནས་ཚངས་པ་ཆེན་པོ་ངོ་མཚར་དུ་གྱུར་ཏེ། དབང་ཕྱུག་ཆེན་པོ་ལ་དྲིས་པ། ལྷ་འདི་ནི་ཤིན་ཏུ་ངོ་མཚར་དུ་སྣང་ངོ་། །དེ་ནས་དབང་ཕྱུག་ཆེན་པོས་ཚངས་པ་ལ་བསྐུལ་བ། ཁྱོད་ནི་སེམས་ཅན་ཀུན་གྱི་གཙོ་བོ། 
ལྷའི་ཚོགས་ཐམས་ཅད་ཀྱི་བདག་པོ། ཁྱོད་ནི་འཇིག་རྟེན་གསུམ་ན་གཏོང་བ་དང་བྱེད་པའོ། །རྫུ་འཕྲུལ་ཆེན་པོ་དང་ལྡན་པ་དེའི་ཕྱིར་ཁྱོད་ཀྱིས་གདུག་པའི་སེམས་ཅན་དང་། གདུག་པའི་ལུས་ཅན་ཐམས་ཅད་བརླག་པར་གྱིས་
ཤིག །དེ་ནས་ཚངས་པས་རང་ཉིད་ཀྱི་མཐུ་དང་། ཚངས་པ་ཆེན་པོའི་སྲིན་པོའི་གཟུགས་སུ་མངོན་པར་སྤྲུལ་ནས། འཇིགས་བྱེད་ཆེན་པོ་ལྟ་བུར་གདོང་བཞི་པ། མེ་ལྕེ་སྟོང་གི་གཟི་བརྗིད་ཅན་གྱི་ལུས་འགུལ་བ་དང་བཅས་པས་བརྒད་

90-1-226b

པ་ཆེན་པོ་འབྱིན་པས་ལྷའི་ཚོགས་ཀྱི་གདུག་པ་ཐམས་ཅད་ལ་ཉེ་བར་སྟོན་ཅིང་གནས་སོ། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་ཡང་ལྷ་ཐམས་ཅད་རབ་ཏུ་འཇོམས་པ་ཞེས་བྱ་བ་ཁྲོ་བོ་ཆེན་པོའི་ཏིང་ངེ་འཛིན་
ལ་ཡང་དག་པར་སྙོམས་པར་ཞུགས་ཏེ། རྡོ་རྗེ་ཆེན་པོའི་འཇིགས་བྱེད་ཅེས་བྱ་བའི་ཁྲོ་བོ་ཆེན་པོའི་སྙིང་པོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེའི་ཡེ་ཤེས་ཀྱི་ཐུགས་ཀ་ནས་ཕྱུང་ངོ་། །ཨོཾ་བཛྲ་བྷཻ་ར་བ། མ་ཧཱ་ཀྲོ་དྷ། སརྦྦ་
དུ་ཥྚཱན། སྃ་བྷཀྵ་ཡ་ཧཱུྃ་ཧཱུྃ་ཕཊ་ཕཊ། བཛྲ་ཡཀྵ་ཧ་ན་ཧ་ན་ཧཱུྃ་ཕཊ། དེ་ནས་འདི་ཕྱུང་མ་ཐག་ཏུ་བརྒྱ་བྱིན་གྱི་ཁང་པ་འདི་ཐམས་ཅད་དུམ་བུ་བརྒྱར་རྣམ་པར་བཤིག་སྟེ། རི་རབ་ཀྱི་རྩེ་མོ་ཡང་འགུལ་ཞིང་ཀུན་ཏུ་འཁོར་ནས་
གནས་པར་གྱུར། བརྒྱ་བྱིན་འཁོར་དང་བཅས་པ་ཡང་ཁས་བུབ་ཙམ་དུ་འགྱེལ་ཏེ་བརྒྱལ་བར་གྱུར་ཏོ། །དེ་ནས་ལངས་ཏེ་དབང་ཕྱུག་ཆེན་པོ་ལ་བལྟས་པ་དང་། །དབང་ཕྱུག་ཆེན་པོས་ཀྱང་བསྐུལ་བ། ཁྱོད་ནི་ལྷའི་ཚོགས་
ཐམས་ཅད་ཀྱི་བདག་པོ་སྟེ། མཐུ་ཆེ་བ་ཡིན་ལ་སུམ་བཅུ་རྩ་གསུམ་གྱི་ལྷ་གདུག་པའི་ཚོགས་ཐམས་ཅད་ཀྱང་ཁྱོད་ལ་མཉེས་པར་བྱེད་པ་ཡིན་ན་དེ་ལྟར་བདག་ཉིད་ཀྱི་རྫུ་འཕྲུལ་གྱི་མཐུ་ཉེ་བར་སྟོན་ཅིག །དེ་ནས་ལྷའི་རྒྱལ་པོ་
ཆེན་པོ་བརྒྱ་བྱིན་དེ་རང་ཉིད་ཀྱི་མཐུ་གནོད་སྦྱིན་དང་། སྲིན་པོ་ཆེན་པོའི་གཟུགས་ཉེ་བར་སྟོན་ཅིང་གདུག་པའི་ཚོགས་ཐམས་ཅད་ལ་གདུག་པ་དག་མ་འཇིགས་ཤིག །ངའི་རྫུ་འཕྲུལ་འདི་ལྟ་བུ་དག་མཐོང་ན་སུས་ཀྱང་
ཟིལ་གྱིས་གནོན་མི་ནུས་སོ་ཞེས་དབུགས་འབྱིན་པར་བྱེད་དོ། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་ཡང་སྔགས་ཀྱི་ལྷ་ཐམས་ཅད་འདྲེན་པའི། །རྡོ་རྗེ་ཞེས་བྱ་བའི་ཏིང་ངེ་འཛིན་ལ་
སྙོམས་པར་ཞུགས་སྟེ་ལྷ་དེ་དག་ཐམས་ཅད་ཉིད་ཀྱི་སྐུ་དང་གསུང་དང་ཐུགས་རྡོ་རྗེའི། །ཡེ་ཤེས་ལས་འཇུག་པར་མཛད་དེ། བཅུག་ནས་ཀྱང་ཁྲོ་བོ་ཆེན་པོ་ཐམས་ཅད་ཕྱག་རྒྱ་ཆེན་པོར་མངོན་པར་བསྒྱུར་

90-1-227a

ནས་བདག་ཉིད་ཀྱང་ཁྲོ་བོ་ཐམས་ཅད་འབྱིན་པའི་ཁྲོ་བོ་ཆེན་པོའི་གཟུགས་སུ་དམིགས་ཏེ་མཆེ་བ་ཆེན་པོ་འབྱིན་པ། ཞལ་མི་སྡུག་པ། སྤྱན་སྟོང་པ། ཉི་མ་ཆེན་པོ་སྟོང་གི་གཟི་བརྗིད་ཅན་རབ་ཏུ་མི་བཟད་པར་བྱེད་པའི་མེ་རླུང་གིས་བདས་
པས་མདོག་སྔོན་པོའི་སྐུ། དུར་ཁྲོད་ཆེན་པོའི་དཔལ་ཆེན་གྱི་ཕྱག་རྒྱ་མིའི་ཀེང་རུས་དང་། ཁྲག་དང་ཤ་དང་། ཀླད་པ་དང་། རྐང་དང་ཚིལ་རྣམས་ཟས་སུ་གསོལ་པ། མིའི་ལྤགས་པས་སྣོམ་ལོགས་རྒྱབ་ལ་གཡོགས་ཏེ་བསྡམས་པ། མིའི་མགོ་
བོའི་ཕྲེང་བ་དབུ་ལ་འཛིན་པ། སེང་གེ་དང་། གླང་པོ་ཆེ་དང་། བོང་བུ་དང་། རྔ་མོ་དང་། མ་ཧེ་དང་། ཕག་དང་། ལྕེ་སྤྱང་དང་། ར་དང་། ཁྱི་དང་། འུག་པ་དང་། བྱ་རོག་དང་། བཞད་དང་། བྱི་ལ་དང་། གཟིག་དང་། སྟག་ལ་སོགས་པའི་ཁྲོ་བོ་བྱོལ་
སོང་གི་གདོང་བརྒྱ་སྟོང་མང་པོ་རང་གི་བ་སྤུའི་བུ་ག་ནས་ཕྱུང་སྟེ། དཀྱིལ་འཁོར་ཆེན་པོའི་ཚུལ་གྱིས་ཤར་ཕྱོགས་ན་འཇིགས་བྱེད་ཆེན་པོ་འདུལ་བ་རྣམ་པར་བསྙེད་བའི་འཇིགས་པ་ལྟ་བུའི་སྤྱན་དང་། ཞལ་རྡོ་རྗེའི་མཆེ་བ་ཆེན་པོ་གཙིགས་
པ། འཇིགས་པར་བྱེད་པའི་ཁྲོ་བོ་ཆེན་པོ་བརྒྱ་སྟོང་གི་གཡོག་དང་། ཤར་ཕྱོགས་ཀྱི་དཀྱིལ་འཁོར་དུ་འཁྱིལ་བར་གྱུར་ཏེ་གནས་སོ། །ལྷོའི་དཀྱིལ་འཁོར་དུ་ཡང་རྡོ་རྗེ་ཁྲོ་གཉེར་ཅན་ཁྲོ་བོ་བརྒྱ་སྟོང་མང་པོའི་གཡོག་དང་། འཁྱིལ་བར་
གྱུར་ཏེ་གནས་སོ། །ནུབ་ཀྱི་དཀྱིལ་འཁོར་དུ་ཡང་པད་མ་ཆེན་པོ་རྟ་གདོང་ཁྲོ་བོ་བརྒྱ་སྟོང་མང་པོའི་གཡོག་དང་། ནུབ་ཀྱི་དཀྱིལ་འཁོར་དུ་འཁྱིལ་པར་གྱུར་ཏེ་གནས་སོ། །བྱང་གི་དཀྱིལ་འཁོར་དུ་ཡང་རྡོ་རྗེ་འུར་འུར་ཆེན་པོའི་ཁྲོ་བོ་བརྒྱ་
སྟོང་མང་པོའི་གཡོག་དང་འཁྱིལ་པར་འགྱུར་ཏེ་གནས་སོ། །བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཁྲོ་བོ་ཆེན་པོ་ཡང་ཁྲོ་བོ་ཆེན་པོའི་ཚོགས་བརྒྱ་སྟོང་མང་པོས་བསྐོར་ནས་དཀྱིལ་འཁོར་གྱི་དབུས་སུ་བཞུགས་ཏེ། ཁྲོ་བོ་
ཆེན་པོའི་ཚོགས་དེ་དག་དང་ཤིན་ཏུ་དགྱེས་པ་ཆེན་པོའི་བདེ་བ་ཆེན་པོས་ཀུན་ཏུ་སྤྱོད་ཅིང་ཁྲོ་བོ་ཆེན་པོའི་རྣམ་པ་བརྒྱ་སྟོང་མང་པོའི་རི་རབ་ཀྱི་རྡུལ་ཕྲན་དང་མཉམ་པ་སྙེད་ཕྱུང་ནས། ནམ་མཁའི་དབྱིངས་རབ་འབྱམ་ཐམས་ཅད་དུ་

90-1-227b

གང་བར་བྱས་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ཀྱང་གང་བར་བྱས་སོ། །དེ་ནས་གདུག་པའི་ཚོགས་ཐམས་ཅད་ཀྱིས་དེ་དག་མཐོང་ནས་འཇིགས་དངངས་སྐྱབས་མ་མཐོང་ནས། རང་རང་གི་
བདག་པོའི་ཐད་དུ་སོང་སྟེ། རྗེ་ཅིག་རྗེ་ཅིག་ཉིད་ཀྱིས་བདག་ལ་སྐྱོབས་ཤིག །དེ་ནས་དབང་ཕྱུག་ཆེན་པོ་ལ་སོགས་པའི་ལྷའི་བདག་པོ་དེ་དག་བདག་ཉིད་ཀྱི་མཐུ་སྤྲུལ་ནས་ཁ་ཅིག་དུ་མ་འཇིགས་ཤིག་མ་འཇིགས་ཤིག་ཅེས་པ་ནས། 
གཡོག་དང་བཅས་པ་ཁ་སྦུབས་སུ་འགྱེལ་ཏེ་བརྒྱལ་བར་གྱུར་དང་བཅས་པ་འོག་ནས་འབྱུང་བར་འདོད་མོད་སླར་ཡང་བསླང་སྟེ་འཇིག་རྟེན་གསུམ་པོ་ཡོངས་སུ་བསྐོར་དུ་བཅུག་ནས་འཇིགས་བྱེད་གདུང་པ་ང་ལ་སྐྱབས་སུ་སོང་ཞེས་བསྒོ་ཡང་སྐྱབས་སུ་
འགྲོ་བ་མི་ལེན་ཅིང་། སླར་ཡང་རང་གི་རྒྱུད་ཀྱི་ང་རྒྱལ་བསྐྱེད་དེ། འཇིགས་བྱེད་ཆེན་པོ་བརྒྱད་པ་ཞེས་བྱ་བ་ཕྱུང་ནས་རི་རབ་ཀྱི་བདག་ཉིད་ཆེན་པོ་ཉེ་བར་སྟོན་ཅིང་། བརྒོད་པ་ཆེན་པོའི་ང་རོ་འབྱིན་པར་གྱུར་ཏོ། །ཨོཾ་མ་ཧཱ་བྷཻ་ར་བ་
བེ་ཥྚིཾ་ཥྚིཾ། ཊྲ་ཊྲ་ཊྲ་ཏ་ཊྲ་ཏ། ཧ་ཧ་ཨི་ཨི། འོན་ཀྱང་བ་སྤུའི་བུ་གའི་རྩེའུ་ཆུང་ཚད་ཙམ་ཡང་མ་འགུལ་ཏོ། །དེ་ནས་ཡང་འཇིགས་བྱེད་ཆེན་པོ་འདུལ་བར་བྱེད་པའི་ཁྲོ་བོ་དེས་ཧེ་རུ་ཀའི་ང་རོ་འབྱིན་ཅིང་མགོ་བོར་མནན་ནས་བསྣུན་ཏེ་
ཧེ་རུ་ཀས་བདག་ཉིད་ཀྱི་མཐུ་ཆེན་པོས་འཇིགས་བྱེད་ཆེན་པོའི་ང་རོ་འབྱིན་ཅིང་རྒྱུ་མའི་སྦུབ་གུ་དྲངས་ནས་ཁྲག་དང་རུས་པ་དང་རྐང་རྣམས་ཟ་ཞིང་ཆེམ་ཆེམ་མཛད་པས། དེའི་འཁོར་ལ་རབ་ཏུ་སྟོན་པར་མཛད་དེ། ཨུ་མ་དང་གྃ་གཱ་
ཡང་རྣམ་པར་བཅོམ་མོ། །མ་མོའི་ཚོགས་ཐམས་ཅད་ཀྱང་སྒྲེན་མོར་བྱས་ཏེ་དམའ་ཕབ་ནས། ཁྲོ་བོ་བདག་ཉིད་ཀྱི། །མཐུ་ཉེ་བར་སྤེལ་ཅིང་འཁོར་ཐམས་ཅད་ཀྱང་བཏུལ། སྐྱབས་ལེན་དུ་ཡང་བཅུག །
དམ་ཚིག་ལ་ཡང་གནས་པར་བྱས་ཏེ་ཡང་དག་པར་ཞུགས་སོ། །དེ་ནས་བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཆེན་པོའི། །ཁྲོ་བོ་ཆེན་པོ་དྲག་པོ་བཞེད་པས་བཞད་

90-1-228a

ཅིང་རྡོ་རྗེའི་ཁྲོ་གཉེར་ཁྲོ་བོ་ཆེན་པོའི་ཞལ་ནས་མ་འཇིགས་ཤིག །མ་འཇིགས་ཤིག་ཅེས་དབུགས་འབྱིན་པར་བྱེད་དོ། །དེ་ནས་བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཁྲོ་བོ་ཆེན་པོས་ཁྲོ་བོའི་ཚོགས་ཀུན་ལ་བཀའ་
སྩལ་པ། ན་མོ་རད་ན་ཏྲ་ཡཱ་ཡ། མ་ཧཱ་ཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏཱ་ཡེ། ཏཏྱ་ཐཱ། ཨོཾ་བོ་ཏ་བོ་ཏ། མ་ཧཱ་བྷཻ་ར་བ་ད་ར་བ་པ་ཧཱ་རི་ཧ་ར་ཧ་ར། གྲྀཧྞ་གྲྀཧྞ། མཱ་ར་མཱ་ར། བཉྫ་བཉྫ། ཤཱི་གྷྲྃ་མ་ཧཱ་བཛྲ། ཙནྟ་སརྦྦ་དུཥྚཱན། ཏ་ཀ་ཧ་ན་ཧ་ན། 
ད་ཧ་ད་ཧ། པ་ཙ་པ་ཙ། མ་ཐ་མ་ཐ་ཧཱུྃ་ཕཊ། འདི་གསུངས་མ་ཐག་ཏུ་འཇིགས་བྱེད་ཆེན་པོའི་འདུལ་བར་བྱེད་པས་རང་གི་སྐུ་ནམ་མཁའི་དབྱིངས་ཀྱི་ཚད་དུ་བསྐྱེད་དོ། །ཁྲོ་བོ་བརྒྱ་སྟོང་མང་པོ་རྣམ་པར་བསྙེར་བའི་ཞལ་མཆེ་བ་གཙིགས་
ཏེ། འཁྱིལ་ཞིང་བསྒྱུར་བ། ཕྱག་བརྒྱ་སྟོང་མང་པོ་ལ་མཚོན་ཆ་སྣ་ཚོགས་འཛིན་པ་ཞལ་སྣ་ཚོགས་མང་པོ་བརྒྱ་སྟོང་མེ་ལྕེ་བཞིན་དུ་རབ་ཏུ་འབར་བའི་སྐུ་བརྒྱ་སྟོང་རྣམས་འཇིགས་བྱེད་ཆེན་པོ་ག་ན་བ་དེར་སོང་སྟེ། རྡོ་རྗེ་དྲག་པོའི་གད་མོ་
ཆེར་འབྱིན་པས་བཞད་ཅིང་མདུན་ན་གནས་སོ། །ཨོཾ་མ་ཧཱ་བཛྲ་ཧེ་རུ་ཀ་བཛྲ་ཨཊྚ་ཧཱ་ས་ཧཱ་ས་ར་ཧ་ཧ་ཧ་ཧ་ཧཱུྃ་ཧ་ཨི་ཏི། དེ་ནས་དབང་ཕྱུག་ཆེན་པོས་རྡོ་རྗེ་དྲག་པོས་བཞད་པ་ཆེན་པོ་ཐོས་ནས་གཡོག་དང་བཅས་པར་ཁས་བུབ་ཏུ་འགྱེལ་
ཏེ་བརྒྱལ་བར་གྱུར་ནས། མགོ་ལ་ཞབས་ཀྱིས་བསྣུན་ཏེ་གཏོང་བར་མཛད་དོ། །ཨོཾ་བཛྲ་བྷྲྀ་ཀུ་ཊི། ཧ་ན་ཧ་ན། གྲིཧྞ་གྲིཧྞ་ཧཱུྃ། མ་ཏ་མ་ཏ་ཀིཉྩི་རཱ་ཡ་སི། སུྰརྱ་ས་ཧ་སྲ་ཧ་སྟི། རེ་ཀ་བ་སུ་རཱ་ཛ་ལ་ལ་རྩི་པྲ་ཛྭཱ་ལི་ཏ། མ་ཧཱ་མུྰརྟི་ཨཱ་ཀཌྜྷྱ་
ཨཱ་ཀཌྜྷྱ་ཨ་བྱ་ཝ་མ་བྱ་ཝ་མ། ཀྲི་ཎ་པ་ཙཀྲ་བྷཻ་ར་བ་ཧྲྀ་ད་ཡྃ་ཧཱུྃ་བྷྲྀ། དེ་ནས་རྡོ་རྗེ་ཁྲོ་གཉེར་ཆེན་པོའི་ཁྲོ་བོ་ཆེན་པོས་བཞད་པས་བཞད་ཅིང་འགྲོ་བ་ཐམས་ཅད་ལ་ཁྱབ་པའི་གཟུགས་སུ་མངོན་པར་སྤྲུལ་ནས་འཁོར་ལོ་ཅན་གྱི་
མདུན་དུ་སྟོན་ཏོ། །དེ་ནས་འཁོར་ལོ་ཅན་གྱི་འཁོར་འཇིགས་པ་ཆེན་པོས་ཉེན་ཏེ། ཁས་སྦུབ་དུ་འགྱེལ་ཏེ་རབ་ཏུ་བརྒྱལ་ཞིང་རྗེ་ཅིག་བདག་ཅག་ལ་སྐྱོབས་ཤིག་ཅེས་སྨྲ་ཞིང་། སྐྱབས་མེད་པར་བདག་ཉིད་ཀྱིས་མཐོང་ནས་

90-1-228b

འཁོར་ལོ་ཅན་ལ་སྐྱབས་སུ་སོང་ངོ་། །དེ་ནས་བིཥྞུས་ཀྱང་བདག་ཉིད་ཀྱི་མཐུ་མང་པོ་རབ་ཏུ་ཉེ་བར་སྟོན་ཅིང་ཤིན་ཏུ་དགྱེས་པ་ཆེན་པོའི་མདུན་དུ་གནས་ཏེ་རྒྱབ་ལ་ཞུགས་སོ། །ཀྭ་ཡེ་ཀྭ་ཡེ་གདུག་པ་ཉེ་བའི་ཁྲོ་གཉེར་གྱིས་
སྙིང་དྲལ་ཏེ་ཇི་སྲིད་མ་འཐུངས་ཀྱི་བར་དུ་དེ་སྲིད་རང་གི་གནས་སུ་སོང་ཤིག །དེ་ནས་རྡོ་རྗེ་ཁྲོ་གཉེར་ཆེན་པོ་དེ་རབ་ཏུ་འཁྲུགས་གཏུམ་པོར་གྱུར་ནས། དེ་དྲངས་ཏེ་བསྡམས་ནས་སྙིང་དྲལ་ཏེ། དེའི་ཁྲག་ལ་ཉི་མ་ཁྲོ་གཉེར་ཆེན་པོ་
གནོད་སྦྱིན་ཆེན་པོའི་གདོན་གྱི་བདག་ཉིད་ཡང་དག་པར་ཚིམ་པར་མཛད་དོ། །ཨོཾ་བཛྲ་སུྰརྱ་བྷྲྀ་ཀུ་ཊི་ཀྲོ་དྷ་མ་ཧཱ་གྲ་ཧ་ཏ་ར་པ་ཏ་ར་པ། སྱ་སུ་དྷེ། ར་མཱྃ་ས་མེ་ད་མདྫེ་ན། ཨོཾ་བྷྲ་བྷྲ་བྷྲྀ་བྷྲུྃ་བྷྲ། དེ་ནས་འཁོར་ལོ་ཅན་དེ་སེམས་རབ་ཏུ་
བརླག་པར་གྱུར་ཏེ་གནས་སོ། །དེའི་ཆུང་མ་རུག་མི་ནི་དང་། མ་ཧཱ་ཤྲི་དང་། ལ་ཡང་གཡོག་དང་བཅས་པར་རྣམ་པར་བཅོམ་སྟེ། སྣ་ཚོགས་རྣམས་རྣམ་པར་བཏུལ་ནས་བཞུགས་སོ། །དེ་ནས་བཅོམ་ལྡན་འདས་ཀྱིས་
རྟ་གདོང་ཆེན་པོ་ཁྲོ་བོ་ཆེན་པོའི་རྒྱབ་ཏུ་གཅིག་བསྣུན་ནས་གཏོང་བར་མཛད་དོ། །ཨོཾ་བཛྲ་བ་ཌ་བ་མུ་ཁ་ཁ་ཁ་ཁཱ་ཧི་ཁཱ་ཧི། ཙ་ཏུ་རྨུ་ཁཱ། པི་བ་པི་བ། ཨསྱཾ་རུ་ཏེ་ར་མ། ཨཱ་ཀཌྜྷྱ། ཨཱ་ཀཌྜྷྱ། ཧྲྀ་ད་ཡྃ་ཏྲཱན། ད་མ་ཧེ། བཛྲ་
བ་ཌ་བ་མུ་ཁ། ཧི་ཧི་ཥ་མ་ཧཱ་ཤྭ་ཤྭེ་ཤྭེ་ར་ཧཱི་ཧཱི། དེ་ནས་རྡོ་རྗེ་རྟ་གདོང་ཆེན་པོ་རྟ་སྐད་ཆེན་པོ་མཛད་ཅིང་ཚངས་པའི་མདུན་དུ་གནས་པར་གྱུར་ཏོ། །དེ་ནས་ཚངས་པ་ཚངས་པའི་སྲིན་པོ་བདག་ཉིད་ཀྱིས་ནམ་མཁའ་བཀང་ནས་བརྒྱུ་
བར་བྱེད་དེ། དེ་ནས་ཚངས་པ་ཆེན་པོའི་འཁོར་ཁས་སྦུབ་ཏུ་འགྱེལ་ནས། རྗེ་ཅིག་སྐྱོབས་ཤིག །རྗེ་ཅིག་སྐྱོབས་ཤིག་ཅེས་སྨྲས་སོ། །ཀྭ་ཡེ་ཀྭ་ཡེ་གདུག་པའི་གདོང་མྱུར་དུ་སོང་སོང་། ཁྱོད་ཀྱི་རྒྱབ་ཏུ་ཞོན་ཏེ་མ་བཏུལ་
རེ་ཞེས་སྨྲས་སོ། །དེ་ནས་རྡོ་རྗེ་རྟ་གདོང་ཆེན་པོ་རབ་ཏུ་འཁྲུགས་གཏུམ་པོར་གྱུར་ནས། ཚངས་པ་ཆེན་པོ་དེའི་མགོར་བརྫིས་ཏེ། སྙིང་དྲངས་ནས་ཁྲག་བཏུང་བ་ལ་ཞུགས་ཏེ། ཤ་དང་གླད་པ་དང་། ཚིལ་བུ་དང་། རུས་པ་རྣམས་

90-1-229a

མྱངས་ནས་ཕྱོགས་བཅུར་གཏོར་ཏོ། །དེའི་ཆུང་མ་ཤི་རི་མ་དང་། སྭ་ར་སྭ་སྟི་དང་། ཤཱན་ཏི་རྣམས་ཀྱང་རྣམ་པར་བཅོམ། དེའི་ཚོགས་རྣམས་ཀྱང་བཏུལ་ནས། དམ་ཚིག་གི་སྡོམ་པ་ལ་གནས་པར་བྱས་ཏེ་བཞུགས་སོ། །
དེ་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་ཁྲོ་བོ་ཆེན་པོས་ཁྲོས་པ་དང་བཅས་པའི་ལྟ་བས་གཟིགས་ཏེ་གཏོང་བར་མཛད་དོ། །ཨོཾ་གུ་ལུ་གུ་ལུ་བཛྲ་མ་ཧཱ་ཀྲོ་དྷ། ཨཱ་ཀཪྵ་ཡ། ཨཱ་ཀཪྵ་ཡ་ཤ་ཀྲ་ཧྲྀ་ད་ཡྃ། མ་ཧཱ་བཛྲ་
དྃཥྚྲཱ་ཡ། ཧཱུྃ་བྷཀྵ་ཡ་བྷཀྵ་ཡ་ཧཱུྃ། དེ་ནས་རྡོ་རྗེ་གནོད་སྦྱིན་ཆེན་པོའི་སྐུ་ཆེན་པོས་ནམ་མཁའི་ངོས་ཀུན་བཀང་སྟེ། བརྒྱ་བྱིན་གྱི་མདུན་དུ་བཞུགས་པར་གྱུར་ཏོ། །དེ་ནས་བརྒྱ་བྱིན་འགྱིང་བ་ཆེན་པོས་འགྱིངས་ཏེ། མི་བཟད་པར་
ཁྲོས་པས་གནོད་སྦྱིན་ཆེན་པོ་ཁྱོད་སུའི་བྲན་ཡིན་ཞེས་དེ་ལ་སྨྲས་སོ། །དེ་ནས་རྡོ་རྗེ་གནོད་སྦྱིན་ཆེན་པོ་ཁྲོས་འཁྲུགས་རྔམ་པར་གྱུར་ཏེ། སྙིང་ནས་གཙུག་གི་ནོར་བུ་ཕྱུང་སྙིང་ཡང་དྲལ་ཏེ། དེའི་ཤ་དང་། ཁྲག་དང་། གླད་པ་དང་། ཚིལ་བུ་དང་། 
རུས་པ་དང་། བཟའ་བ་རྣམས་བཟའ་བར་ཞུགས་སོ། །དེ་ནས་དེའི་འཁོར་རྣམས་འཇིགས་ཤིང་དངངས་པའི་ཡིད་དུ་གྱུར་ཏེ། སྐྱབས་སུ་ཉེ་བར་གྱུར་ཏོ། །དེའི་ལྷ་མོའི་ཚོགས་རྣམས་ཀྱང་བཅོམ་ནས་དེའི་གནས་ན་གནས་པར་གྱུར་ཏོ། །
དེ་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོ་ཁྲོ་བོ་ཆེན་པོ་རྡོ་རྗེའི་རྣལ་འབྱོར་མ་རྣམས་དང་། རོལ་ཅིང་ཤིན་ཏུ་དགྱེས་པའི་ཀུན་ཏུ་ལོངས་སྤྱོད་པའི་ཁྲོ་བོ་ཆེན་པོའི་དཀྱིལ་འཁོར་ཆེན་པོ་ན་བཞུགས་སོ། །དེ་ནས་བཅོམ་ལྡན་འདས་
དེ་བཞིན་གཤེགས་པ་ཐམས་ཅད་ཡང་འདུ་བར་མཛད་ནས་བཅོམ་ལྡན་འདས་ལ་བསྐུལ་བར་མཛད་དོ། །ཨོཾ་མ་ཧཱ་སུ་ར་ཏ་བཛྲ་མ་ཧཱ་ཀྲོ་དྷ་སྃ་ཧ་རོ་པ་སྃ་ཧ་ར། སརྦྦ་ཀྲོ་དྷ་མ། ཤ་མ་ཤ་མ། པྲ་ཤ་མ་པྲ་ཤ་མ། སརྦྦ་ཀྲོ་དྷ། ཨུཏྟི་མ་ཀྲོ་དྷ། 
སྭ་ས་མ་ཡ་མ་ཧཱ་མཎྜ་ལེ། སྠཱ་པ་ཡ་སྠཱ་པ་ཡ། སརྦྦ་ཀྲོ་དྷ་མ་དུཥྚ་པྲ་དུཥྚ་བི་བ་ཡ། བི་ཛ་ཡ་བི་ཛ་ཡ་ཤ་ཀྲ་བྲཧྨ་བིཥྞུར་མ་ཧེ་ཤྭ་ར་མ་ཧོ་བྷ་ག་ཝཱན། སུ་ར་ཊ། སཽ་ཁྱ་ཀྲོ་དྷ། སརྦྦ་ཏ་ཐཱ་ག་ཏ་སཏྟྱ་ན་ས་མ་ཡེཉྩ་ཧོ། སུ་ར་ཏ་ས་མ་ཡ་ཨི་ཏེ། དེ་ནས་

90-1-229b

བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཆེན་པོ་ཁྲོ་བོ་ཆེན་པོས་ཁྲོ་བོ་ཐམས་ཅད་འདྲེན་པ་དང་། གཞུག་པ་དང་། བཅིང་བ་དང་། དབང་དུ་བྱ་བའི་ཕྱིར། ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་ཛཿཧཱུྃ་བྃ་ཧོཿ། ཊཀྐི་ཧཱུྃ་ཛཿ
ཊཀྐི་ཧཱུྃ་ཛཿ། ཧཱུྃ་ཊཀྐི་ཧཱུྃ་ཛཿ། ཧཱུྃ་ཊཀྐི་ཧཱུྃ་ཛཿ། ཨཱ་ཀཪྵ་ཡ། ཨཱ་ཀཪྵ་ཡ། བྷནྡྷ་ཡ། བ་ཤྃ་ཀུ་རུ། སརྦྦ་ཀྲོ་དྷ། ས་མ་ཡྃ། ཛཿཧཱུྃ་བྃ་ཧོཿ། ཊཀྐི་ཧཱུཾ་ཛཿ། ཧཱུྃ་ཊཀྐི་ཧཱུྃ། དེ་ནས་ཁྲོ་བོ་ཆེན་པོའི་དམ་ཚིག་དེ་དག་ཐམས་ཅད་འོངས་ནས། རང་གི་དཀྱིལ་
འཁོར་ཆེན་པོའི་འཁོར་ལོར་འཁྱིལ་བར་གྱུར་ཏེ། ཀྱེ་བཅོམ་ལྡན་འདས་ཉིད་ཀྱིས་བཀའ་སྩལ་དུ་གསོལ་ཞེས་སྨྲ་ཞིང་གནས་པར་གྱུར་ཏོ། །དེ་ནས་བཅོམ་ལྡན་འདས་ཁྲོ་བོ་ཐམས་ཅད་ཀྱི་བཀའི་འཁོར་ལོའི་རྡོ་རྗེ་དམ་ཚིག་ཅེས་བྱ་
བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཁྲོ་བོ་ཐམས་ཅད་ཀྱི་བཀའི་འཁོར་ལོ་ཆེན་པོ་ཕྱུང་ངོ་། །ཨོཾ་སུམྦྷ་ནི་སུམྦྷ་མ་ཧཱ་ཀྲོ་དྷ་ཤ་ཧཱུྃ་ཕཊ། དེ་ནས་དེ་དག་ལ་ཁྱོད་ཀྱིས་དབང་ཕྱུག་ཆེན་པོ་ལ་སོགས་པ་གདུག་པའི་སེམས་ཅན་ཆེན་པོ་
རྣམས་གསོས་ཤིག་ཅེས་བཀའ་སྩལ་ཏོ། །དེ་དག་གིས་བཅོམ་ལྡན་འདས་ཉིད་ཀྱིས་རབ་ཏུ་གདུག་པའི་རྣམས་གསོས་ཞེས་གསོལ་ནས། དེ་ནས་ཅང་མི་གསུང་བར་བཞུགས་པར་གྱུར་ཏོ། །དེ་ནས་བཅོམ་ལྡན་འདས་རྡོ་རྗེ་ཤིན་ཏུ་
དགྱེས་པས་ཁྲོ་བོས་ཕྱག་བསྣོལ་ཏེ་བཙིར་ནས་རྡོ་རྗེ་བདུད་རྩི་ཁྲོ་བོའི་དབང་མོ་ཆེན་མོ་ཕྱུང་ངོ་། །ཨོཾ་བཛྲ་ཨ་མྲྀ་ཏ། མ་ཧཱ་ཀྲོ་དྷེ་ཤྭ་རི། ཨུཏ་ཤྲཱི་ཛ་ཨུཏ་ཤྲཱི་ཛ། བཛྲ་ཨ་མྲི་ཏ་ཧཱུྃ་ཨཱཿ། དེ་ནས་བཅོམ་ལྡན་འདས་མ་བདུད་
རྩི་ཆེན་མོ་དེ་དག་ཀུན་ཏུ་ཁྲོས་ཏེ་སྨྱིན་མ་བསྒྱུར་བའི་གཟིགས་པའི་ཞལ་བཞད་པ། རུ་ལུ་རུ་ལུ། ཞེས་པའི་སྒྲ་འབྱིན་ཅིང་རང་གི་པད་མ་ལ་བཅོམ་ལྡན་འདས་ཀྱི་རྡོ་རྗེ་བཅུག་ནས་བདུད་རྩི་ཡང་དག་པར་
བསྒྲུབ་པའི་རིག་པ་འདི་ཕྱུང་ངོ་། །ཨོཾ་ཨ་མྲྀ་ཏ་སཉྫི་བ་ནི་མ་ཧཱ་མྲྀ་ཏ་མུ་ཤེ། པྲ་བེ་ཤ་ཡ་པྲ་བེ་ཤ་ཡ། སརྦྦཱན་བཛྲ་པདྨ་སངྱོ་གེ ། མ་ཧཱ་བོ་དྷི་ཙིཏྟ་པི་ཋ་པི་ཋ། མཱུཪྟེ་ཨཱ། དེ་ནས་དབང་ཕྱུག་

90-1-230a

ཆེན་མོ་ལ་སོགས་པ་གདུག་པ་དེ་དག་ཐམས་ཅད་སྔ་མ་བཞིན་དུ་བདག་ཉིད་ཀྱི་ལུས་སོས་པར་གྱུར་ཏེ། སེམས་དྲན་པས་དེ་བཞིན་གཤེགས་པའི་འཁོར་ལོ་ཐམས་ཅད་མཐོང་ནས་ངོ་མཚར་དུ་གྱུར་ཏོ། །
བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཁྲོ་བོ་ལ་སྐྱབས་སུ་དོང་ནས། ཕྱིའི་དཀྱིལ་འཁོར་ཇི་ལྟ་བ་བཞིན་དུ་ཁྲོ་བོའི་འཁོར་ལོ་རྣམས་གནས་པར་གྱུར་ཏོ། །དེ་ནས་དེ་དག་རབ་ཏུ་མགུ་བའི་ཡིད་ཀྱིས། བཅོམ་ལྡན་འདས་
ལ་བསྟོད་པར་བྱེད་དེ། ཁྱོད་ནི་སེམས་ཅན་ཀུན་གྱི་ཡབ། །ཕན་བྱེད་དེ་བཞིན་ཡུམ་ཡིན་ཏེ། །གཙོ་བོ་འདུས་པས་བདག་ཅག་རྣམས། །འཇིགས་པ་ཆེ་ལས་སྐྱོབ་པ་སྟེ། །རྗེ་བོ་སྡུག་བསྔལ་ཐམས་ཅད་སེལ། །ཁྱོད་ནི་
འགྲོ་བའི་དབང་པོ་རྗེ། །ཁམས་གསུམ་འདི་ནི་བྱེད་དང་གཏོང་། །ཆེ་བ་ཆེ་ཁྱོད་སྐྱེ་བོ་སྐྱོང་། །ཐོག་མ་མེད་ཁྱོད་ང་རོ་ཐིགས། །ང་རོའི་སྟེང་ནི་ཆ་ཡང་མེད། །གཙོ་བོ་ཡིག་མེད་བདུད་མི་ཡི། །རབ་དགྱེས་བདེ་བྱེད་
གཏོང་བ་ཡི། །འགྲོ་བ་ཀུན་ལ་ཕན་བྱའི་ཕྱིར། །དེ་ནི་སངས་རྒྱས་ཐམས་ཅད་རྣམས། །རབ་དགྱེས་འགྲོ་ལ་བདེ་བའི་ཕྱིར། །མགོན་པོ་ཁྱོད་ཀྱིས་གཏོང་བར་མཛོད། །སེམས་ཅན་འདམ་གྱིས་མི་གོས་ཤིང་། །བླ་ན་
མེད་པ་བྱང་ཆུབ་ལམ། །སྣ་ཚོགས་སྡུག་བསྔལ་ཞི་མཛད་པ། །སེམས་ཅན་སྐོམ་པ་ངོམས་མཛད་ཅིང་། །འཁོར་བ་རྦ་ཀློང་གྲོལ་མཛད་དེ། །མྱུར་དུ་བདག་ལ་དགོངས་པ་མཛད། །དངོས་པོ་ཀུན་གྱིས་ཐམས་
ཅད་དུ། །རྒྱལ་བ་ཀུན་གྱིས་མི་དཔོགས་ཏེ། །ཞི་བའི་རྣམ་པས་ཞིར་གྱུར་པ། །རྡུལ་དང་བྲལ་བས་འཛུམས་པ་སྤངས། །ནམ་མཁའ་སྒོམ་ལས་རྣམ་འདས་པ། །རྣམ་རྟོག་དྲི་མས་མ་གོས་ཏེ། །སྒྱུ་མ་
ཀུན་ལས་ཡང་དག་འདས། །འདོད་པ་ཀུན་ལ་རྒྱབ་ཕྱོགས་པ། །གཙོ་བོ་ཁྱོད་ལ་བདག་ཕྱག་འཚལ། །དྲེགས་པ་མེད་པ་འཇིགས་བྱེད་ལ། །བྱང་ཆུབ་མཆོག་ནི་ཐོབ་ཀྱི་བར། །བདག་ཅག་སྐྱབས་སུ་རབ་ཏུ་མཆི། །ཇི་སྲིད་

90-1-230b

འཚོ་བ་མཆིས་པ་དང་། །དམྱལ་བ་རྩུབ་མོའི་འཇིག་རྟེན་དུ། །ལྟུང་བར་གྱུར་པ་ཇི་སྲིད་པ། །ཁྱོད་ཀྱི་དམ་ཚིག་བསྐྱང་བར་བགྱི། །བྱང་ཆུབ་མཆོག་ཏུ་བདག་ཅག་ཀྱང་། །དྲི་མེད་སྐལ་བར་གྱུར་པ་ཡི། །གཙོ་བོ་བདག་ཅག་དབང་བསྐུར་བ། །
བདེ་བ་ཆེན་པོས་སྩལ་དུ་གསོལ། །དེ་ནས་བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཆེན་པོས་དེ་དག་གི་གསོལ་བའི་ཚིག་ཉེ་བར་གསན་ནས་མཉམ་པ་ཉིད་ཀྱི་བདེ་བའི་གནས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། ཞུགས་མ་ཐག་ཏུ་
བཅོམ་ལྡན་འདས་ཀྱིས་བདེ་བ་དང་ཡིད་བདེ་བ་བསྒྲུབ་པའི་ཐབས་མང་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་སྟེ། བདེ་བ་ཆེན་པོའི་སྤྲོ་བའི་ཆོ་འཕྲུལ་ཆེན་པོས་ལྷའི་འཁོར་ཐམས་ཅད་དབང་བསྐུར་ཏེ། དེ་ནས་དབང་ཕྱུག་ཆེན་པོ་ལ་སོགས་
པའི་ལྷ་ཆེན་པོ་དེ་དག་བདེ་བ་ཆེན་པོའི་སྤྲོ་བའི་ཆོ་འཕྲུལ་གྱིས་དབང་བསྐུར་བས་ཡིད་བདེ་བར་གྱུར་ཏེ། བཅོམ་ལྡན་འདས་ཀྱི་ཞབས་ལ་ཡང་དང་ཡང་དུ་གཏུགས་ནས་བསྐོར་བ་བྱས་ཏེ། ཇི་ལྟ་བ་བཞིན་དུ་ཀུན་ཏུ་ཡོངས་སུ་བསྐོར་ནས་
གནས་སོ། །དེ་ནས་བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཆེན་པོ་དེ་བཞིན་གཤེགས་པས་ཡང་རྡོ་རྗེ་གཟུངས་མ་ཤིན་ཏུ་དགྱེས་པ་བདེ་བ་ཆེན་མོའི་དམ་ཚིག་དང་སྦྱོར་བའི་ཐབས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། 
ཅང་མི་གསུང་བར་ཞུགས་ནས། དེ་མ་ཐག་ཏུ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཁྲོ་མོ་དབང་མོ་ཆེན་མོ་ཞེས་བྱ་བ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་སརྦྦ་ཏ་ཐཱ་ག་ཏ་མ་ཧཱ་བཛྲ་ཀྲོ་དྷེ་ཤྭ་རི་སརྦྦ་དུཥྚཱ་ནི་
མུ་དྲཱ་ཎི། མ་ཧཱ་པྲ་ལ་ཡཱ་ན་ལཤྨ་ཤཱ་ན་བྷཱི་ཥ་ཎེ། བཛྲ་མ་ཧཱ་ཀྲོ་དྷ་དཾ་ཀ་རཱ་ལོ་གྲ་ཏ་བ་ཏ་ནེ། སརྦྦ་ཤ་ཏྲཱུྃ། པྲ་ཤ་མ་ནི། ཧཱུྃ་ཧཱུྃ་མ་ཧཱ་ཀྲོ་དྷེ་ཤྭ་རི་ཧཱུྃ་ཕཊ་ཕཊ། འདིས་ཇི་ལྟ་བ་བཞིན་དུ་བྱིན་གྱིས་བརླབས་ནས། 
དབུས་ཀྱི་དཀྱིལ་འཁོར་དུ་གཞག་སྟེ། དཔུང་པ་བཅུ་དྲུག་ལ་ཕྱག་ན་མཚོན་ཆ་སྣ་ཚོགས་བསྣམས་པ། ཞལ་གསུམ་པ་མདོག་ཨིན་དྲ་ནཱི་ལའི་འོད་འབར་བ་འདྲ་བ། རྡོ་རྗེ་དང་། ཐོད་པའི་འཁར་བ་དང་། ཐོད་

90-1-231a

པ་དང་། མདུང་དང་སྟ་རེ་དང་། ཞགས་པ་དང་། རྩེ་གསུམ་པ་དང་། བེ་ཅོན་དང་། མུ་སུ་རུ་དང་། འཁོར་ལོ་དང་། ཀ་ན་ཡ་དང་། ཏོ་མ་ཡ་དང་། གཞུ་དང་། མདའ་དང་། ཤག་ཏི་དང་། གྲི་རྣམས་ཕྱག་ན་འཛིན་པ། ཐོད་པའི་ཕྲེང་
བས་དབུ་རྒྱན་བྱས་པ། ཉི་མ་བརྒྱ་དང་མེའི་འོད་འདྲ་བའོ། །དེའི་མདུན་དུ་རྡོ་རྗེ་ཁྲག་འཐུང་ཆེན་མོ་དེ་དང་འདྲ་བའི་གཟུགས་དང་ཆ་ལུགས་འཛིན་པ་རིག་པ་འདིས་གཞག་པར་བྱའོ། །ཨོཾ་མ་ཧཱ་བཛྲ་དྷ་ར་མ་ཧཱ་
ཀྲོ་དྷེ་ཤྭ་རི་མ་ཧཱ་ཤྨ་ཤཱ་ན་བྷཱི་ཥ་ནི་ནཱི་ལ་ཛྭཱ་ལ་ས་ཧ་སྲ་པྲ་ཛྭ་ལི་ཏ་མཱུརྟི་དྷ་རེ་ཀ་པཱ་ལ་མཱ་ལཱ་བྷཱུ་ཥི་ཏ་མ་གུ་ཏེ། ན་ར་དཱུ་ཏིར་ར་ཏྲ། པ་རི་པུ་རི། ཏ་ཀ་པཱ་ལ། ཨ་སྟེ་ཁ་ཊྭཱྃ་ག །བཛྲ་ཏྲི་ཤཱུ་ལ་གྷནྡྷ་མ་ཧཱ་ཀྲོ་དྷེ་ན། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། 
ཧེ་ཧེ་རུནྟ་མུནྟ་པྲི་ཡེ་ཧཱུྃ་ཕཊ། དེ་ནས་བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཁྲོ་བོ་ཆེན་པོའི་གཟི་བརྗིད་ཆེན་པོའི་མཆོག་དང་ལྡན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་ཉི་མ་
ཁྲོ་མོའི་དབང་མོ་ཆེན་མོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་ཧཱུྃ་ཏྲཱྃ་མ་ཧཱ་སུྰརྱ་བཛྲ་ཀྲོ་དྷེ་ཤྭ་རི་བི་ད་མ། མ་ཐ་མ་ཐ། གྲཱ་ས་གྲཱ་ས། སརྦྦ་དུཥྚ། པྲ་དུ་ཥྚཱན། ཧཱུྃ་ཕཊ་ཨོཾ་ཧཱུྃ་ཏྲྃ་ཏྲྃ། ཏྲ་ཏྲ་ཏྲ། ཁྲོ་མོ་ཆེན་
མོ་འདིས་ལྷོ་ཕྱོགས་ཀྱི་རིན་ཆེན་འབྱུང་ལྡན་གྱི་དཀྱིལ་འཁོར་དུ་གཞག་པར་བྱ་སྟེ། གཟི་བརྗིད་ཆེན་པོར་རབ་གཏོང་ཞིང་། །ཤིན་ཏུ་འཇིགས་པ་མེ་བཞིན་འབར། །དཔུང་པ་བཅུ་དྲུག་རྣོ་བ་སྟེ། །དཔུང་རྒྱན་ཐོད་
པས་བརྩེགས་པར་བྱ། །སྤྱན་ནི་རབ་དམར་སྔོ་བསངས་མདོག །མཚོན་ཆའི་ཚོགས་ནི་བསྣམས་པར་བརྩོན། །གདུག་པ་ཐམས་ཅད་འཆའ་བྱེད་ཅིང་། །ཡིད་དགས་ཆེན་པོའི་སྟན་ལ་ཞོན། །རང་གི་གཡོག་གིས་མདུན་
དུ་བསྐོར། །དེ་ནས་བཅོམ་ལྡན་འདས་པད་མ་འབྱུང་ནས་བཀོད་པའི་འོད་ཀྱི་ཕྲེང་བ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། པད་མའི་དྲ་བ་ཁྲོ་མོའི་དབང་མོ་ཆེན་མོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་

90-1-231b

ཕྱུང་ངོ་། །ཨོཾ་ཧྲཱིཿབཛྲ་པདྨ་མ་ཧཱ་བནྡྷ་མུ་ཁེ། ཁ་ཁ་ཁཱ་ཧི་ཁཱ་ཧི། མ་ཧཱ་མ་ཧོ། དྷ་ར་བི་ཀོ་པེ་ཧཱུྃ་ཧེ་ཧཱུྃ་ཧཱུྃ་ཧ་ཧ། ཧཱུྃ་ཧཱུྃ་ཧྲཱིཿ ཧི་ཤ་ཧི་ཤ ། མ་ཧཱ་བཛྲ་བ་ད་བ་མུ་ལ་མི་ཧོ་ཏྱོ་ཏྱེ། ཧཱུྃ་ཧཱུྃ། ཧི་ཧི་ཧཱུྃ་ཧྲཱིཿཧཱུཾ། དཀྱིལ་འཁོར་ནང་གི་དབུས་ཉིད་དུ། །འདི་ནི་རྒྱབ་
ཏུ་གཞག་པར་བྱ། །རྣོ་བ་ཆེན་པོ་ཞལ་གསུམ་པ། །རྟ་གདོང་གྱེན་དུ་སྟོན་པ་སྟེ། །ཁྲོ་མོ་ཆེན་མོ་དཔུང་བཅུ་དྲུག །རྣམ་པར་བསྒྱུར་བའི་མི་སྡུག་གདོང་། །མི་རོའི་རྟ་ལ་ཡང་དག་ཞོན། །ཁྲག་མང་པོ་ལ་འཐུང་བྱེད་པ། །མཚོན་ཆ་སྣ་ཚོགས་
འཛིན་པ་སྟེ། །ཁྲོས་པའི་དབུ་རྒྱན་ཐོད་པས་བརྩེགས། །འོད་ཟེར་རྣོན་པོ་གཏོང་བྱེད་ཅིང་། །གཡོག་བཅས་དཀྱིལ་འཁོར་བརྒྱན་ཏེ་གནས། །དེ་ནས་བཅོམ་ལྡན་འདས་ཡང་གདོན་མི་ཟ་བའི་ཡེ་ཤེས་ཁྲོ་མོ་གཉིས་སུ་མེད་པར་འདུ་
བའི་ཐབས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། གདོན་མི་ཟ་བའི་དྲག་པོ་དང་ལྡན་མ་ཆེན་མོ་ཞེས་བྱ་བའི་ཁྲོས་པའི་དབང་མོ་ཆེན་མོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་སརྦྦ་ཨ་མོ་གྷ་མ་
ཧཱ་བི་ཤྭེ་ཤྭ་རི་ཧཱུྃ་ཧཱུྃ་ཧཱུྃ། ཧྃ་ཧྃ་ཧྃ། མ་ཧཱ་ཀྲོ་དྷེ་གྲ་མུ་ཁེ། མ་ཧཱ་བི་ཤྭེ་བ་ད་རི་ཎི། སརྦྦ་དུཥྚ། པྲ་ཤ་མ་ནི་ཧཱུྃ་ཧཱུྃ་ཕཊ། །འདི་ཉིད་ཀྱིས་ནི་ཅི་རིགས་པར། །རྡོ་རྗེ་གདོན་མི་ཟ་བ་ཡི། །དཀྱིལ་འཁོར་གཡོག་བཅས་རྣམ་པ་བཞི། །སྣ་
ཚོགས་དམ་ཚིག་གཞག་བྱས་ཏེ། །སྣ་ཚོགས་གཟུགས་དང་ཁྱད་པར་ལྡན། །ཀུན་ཏུ་ཡོངས་སུ་བསྐོར་ནས་གནས། །བསྙེར་བ་དང་ནི་བཙུམས་པའི་གདོང་། །རབ་ཏུ་དྲག་ལ་རོ་མྱོང་ཞིང་། །གདོང་བསྙེར་ཐོད་པའི་རྩེ་མོར་བྱས། །དཔུང་
པ་བཅུ་དྲུག་གིས་བརྒྱན་པའི། །ཁྲོ་མོ་ཆེན་མོ་གདོང་གསུམ་པ། །ཟ་བྱེད་མི་བཞིན་ལྟ་བ་ཡི། །དེ་ཡི་ངོ་བོ་ཐམས་ཅད་ཀྱི། །གཡོག་ནི་རྣམ་པ་བཞི་རྣམས་ཀྱིས། །བསྐོར་བར་ཤེས་རབ་ཅན་གྱིས་གཞག །རང་གི་ཕྱག་
རྒྱ་མཚན་མར་ལྡན། །དཔུང་པ་བརྒྱད་དང་ལྡན་པ་ཡི། །དེ་ནས་ཆོ་ག་ཇི་བཞིན་དུ། །འབྱུང་མོའི་ཕྱག་རྒྱ་ཡང་དག་ཞོན། །དུར་ཁྲོད་བཞིན་དུ་འཇིགས་བྱེད་པ། །ཕྱི་ཡི་རྣལ་འབྱོར་མ་ཚོགས་རྣམས། །དེ་དག་ཀུན་ཏུ་ཡོངས་སུ་

90-1-232a

བསྐོར། །གཞག་གམ་བྲི་བར་བྱ་ཡང་རུང་། །དེ་ནི་དེ་ལྟའི་སྟན་ལ་གནས། །བཞིན་མི་སྡུག་པ་དཔུང་བཞི་མོ། །གདུག་པའི་ཁྲོ་མོ་རྣམ་བསྒྱུར་བཅས། །དེ་ལ་སོགས་པའི་རིམ་པར་ལྡན། །མཁས་པས་དཀྱིལ་འཁོར་བྲི་བར་བྱ། 
དེ་ནས་རྣལ་འབྱོར་གྱི་དབང་ཕྱུག་ཆེན་མོ་དེ་དག་བཅོམ་ལྡན་འདས་ལ་ཕྱག་འཚལ་ཏེ། ཡང་དང་ཡང་རང་རང་གིས་མངོན་པར་གར་བྱས་པས་མངོན་པར་མཆོད་ནས་གསོལ་བ་འདེབས་སོ། །རྣལ་འབྱོར་མ་ཡི་སྔགས་ཚོགས་དང་། །
ཕྱག་རྒྱ་མ་ནི་ཅི་རིགས་པར། །གསང་བའི་གར་ནི་བདེ་ཆེན་མོ། །བཅོམ་ལྡན་དེ་ཉིད་ཉིད་ཀྱིས་གསུངས། །དེ་ནས་བཅོམ་ལྡན་འདས་རྣལ་འབྱོར་མ་ཐམས་ཅད་རྣམ་པར་སྤྲོ་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་ཏེ། རྣལ་འབྱོར་མ་ཐམས་ཅད་ཀྱི་སྔགས་དང་ཕྱག་རྒྱ་དང་སྦས་པ་དང་། དེ་ཁོ་ན་ཉིད་དང་། གསང་བ་རྣམས་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་སརྦྦ་བཛྲ་དྷ་ར་སྟྭ་ཨཱ་ནུ་རཱ་ག་ཎི་མ་ཧཱ་ཀྲོ་དྷེ་ཤྭ་རི་ཧཱུྃ་ཧཱུྃ། 
ཛཱ་ཛཱ་ཧཱུྃ་ཧཱུྃ། ཨོཾ་སརྦྦ་བཛྲ་དྷ་ར་ཀུ་ལ་ཨ་ནུ་རཱ་གི་ཎི་མ་ཧཱ་ཀྲོ་དྷེ་ཤྭ་རི་ཧཱུྃ་ཧེ་ཧེ་ཧཱུྃ་ཕཊ། ཨོཾ་སརྦྦ་བཛྲ་དྷ་རོ་གྲ་མ་ཧཱ་ཀྲོ་དྷེ་ཤྭ་རི་ཧཱུྃ་སྭ་སྭ་ཧཱུྃ་ཕཊ། ཨོཾ་སརྦྦ་བཛྲ་དྷ་ར་མ་ཧཱ་ཏེ་ཛ་ཨ་བྷི་ཥེ་ཀེ་ཧཱུྃ་ཏྃ་ཧཱུྃ། ཨོཾ་སརྦྦ་བཛྲ་དྷ་ར་མ་ཧཱ་སུྰརྱ་བྷྲི་ཀུ་ཊེ་ཀ་རོ་ཀེ་ཏྲ་ཏ་ཊ་
ཏ་ཧཱུྃ་ཕཊ། ཨོཾ་སརྦྦ་བཛྲ་དྷ་ར་མ་ཧཱ་ཀེ་ཏུ་ཀྲོ་དྷེ་ཤྭ་རི། མ་ཧཱ་བི་ཛ་ཡོཏྟྲ་ཡེ་ཧཱུྃ་ཧཱུྃ་ཏྲྃ་ཏྲྃ་ཕཊ་ཕཊ། ཨོཾ་སརྦྦ་བཛྲ་དྷ་ར་མ་ཧཱ་བཛྲ་ཀྲོ་དྷ་ཨཎྟྲ་ཨཱ་སི་ཧཱུྃ་ཧཱུྃ་ཏྲིཾ་ཏྲིཾ་ཏྲོ་ཊ་ཡ་ཏྲོ་ཊ་ཡ་ཧྲི་ད་ཡ་ཧཱུྃ་ཕཊ། ཨོཾ་སརྦྦ་བཛྲ་དྷ་ར་མ་ཧཱ་ཀྲོ་དྷ་བྷ་ཀྵི་ཎི། ཧཱུྃ་ཧཱུྃ་
བྷཀྵ་བྷཀྵ་ཧཱུྃ་ཧྲཱིཿ། ཨོཾ་སརྦྦ་བཛྲ་དྷ་ར་མ་ཧཱ་ཏཱིཀྵྞ་ཀྲོ་དྷེ་ཤྭ་རི་ཚིནྡ་ཚིནྡ། ཧཱུྃ་ཧཱུྃ་བཛྲ་ཏཱིཀྵྞ་ཧ་སྟེ་ཙྪེ་ད་ཡ་ཧཱུྃ་ཧཱུྃ་མ་ཊ་མ་ཊ། ཨོཾ་སརྦྦ་བཛྲ་དྷ་ར་ཙཀྲ་དྷ་རི་ཎི་མཱ་ཧོ་གྲ་དུ་པི་ནི་ཧཱུྃ་ཧཱུྃ། པ་ཏ་ཡ་པ་ཏ་ཡ། མ་ཧཱ་བཛྲ་ཙཀྲེ་ཎ། ཙུརྞ་ཡ་ཙུརྞ་ཡ། 
ཧཱུྃ་ཧཱུྃ་ཕཊ། ཨོཾ་སརྦྦ་བཛྲ་དྷ་ར་མ་ཧཱ་ཤྭ་ག་པྲ་བྷ་ནི་ཧཱུྃ་ཧཱུྃ་མ་ཏ་མ་ཏ་ཕཊ། ཨོཾ་སརྦྦ་བཛྲ་དྷ་ར་མ་ཧཱ་བི་ཤྭ་མུ་ཁི་ཧཱུྃ་ཧཱུྃ་ཕཊ། ཨོཾ་སརྦྦ་བཛྲ་དྷ་ར་མ་ཧཱ་བཛྲ་པཱ་ཎི་ཧཱུྃ་ཧཱུྃ་ཧྃ་ཧྃ་ཕཊ་ཕཊ། ཨོཾ་སརྦྦ་བཛྲ་དྷ་ར་མ་ཧཱ་བཛྲ་ཡཀྵི་ཎི་ཧཱུྃ་ཧཱུྃ་ཁ་ཁ་ཁཱ་ཧི་ཁཱ་ཧི་

90-1-232b

ཨཱ་བི་བྷ་ཨཱ་བི་བྷ་ཧཱུྃ་ཕཊ། ཨོཾ་སརྦྦ་བཛྲ་དྷ་ར་མ་ཧཱ་བཛྲ་བྷ་ནི་དྷ་ནི་མ་ཧཱ་ཀེ་དྷེ། བྷནྡྷ་ཡ་བྷནྡྷ་ཡ། ཨོཾ་སརྦྦ་བཛྲ་དྷ་ར་མ་ཧཱ་ཀྲོ་དྷ་མ་ཧཱ་བཛྲ་པཱ་ཤྱ་པྲ་བེ་ཤ་ནི་ཧཱུྂ་ཧཱུྂ། བི་ཏ་ཡ་བི་ཏ་ཡ་ཧཱུྃ་ཕཊ། ཨོཾ་སརྦྦ་བཛྲ་དྷ་ར་ཧ་ལ་ད་ནི་མ་ཧཱ་ཀྲོ་དྷེ་
ཤྭ་རི་ཧཱུྃ་ཧཱུྃ། སརྦ་བཛྲ་དྷ་ར་མ་ཧཱ་ཀྲོ་དྷ་མཱ་ལི་ནི་ཧཱུྂ་ཧཱུྂ་གྷུྰྂ་གྷུྂ། ཨོཾ་སརྦ་བཛྲ་དྷ་ར་མ་ཧཱ་ཀྲོ་དྷེ་གནྡྷ་བ་ཧི་ཧཱུྃ་ག་གྲི། ཨོཾ་སརྦ་བཛྲ་དྷ་རཱི་མ་ཧཱ་ཀྲོ་དྷེ་ཤྭ་རི་མ་ཧཱ་ལོ་ཀ་དྷ་རི་ཎི། དཱི་པ་ཡྂ་དཱི་པ་ཡྂ་ཧཱུྃ་ཧཱུྃ། ཨོཾ་སརྦྦ་བཛྲ་དྷ་ར་མ་ཧཱ་ཀྲོ་དྷེ་ཤྭ་རི་མ་ཧཱ་ལཱ་སྱ་ཧཱུྃ། 
ཨོཾ་སརྦ་བཛྲ་དྷ་ར་མ་ཧཱ་ཀྲོ་དྷེ་མཱ་ལེ་དྷ་རི་ཎི་ཧཱུྃ། ཨོཾ་སརྦྦ་བཛྲ་དྷ་ར་མ་ཧཱ་གཱི་ཏེ་ནི་ཧཱུྃ་ཧེ་ཧེ། ཨོཾ་སརྦྦ་བཛྲ་དྷ་ར་མ་ཧཱ་ཀྲོ་དྷ་ནཱི་རྟི་ཀེ་ཧཱུྃ་ཧཱུྃ། ཨོཾ་སརྦ་བཛྲ་དྷ་ར་མ་ཧཱ་ཀྲོ་དྷ་ཨཱ་ཀཪྵ་ཡ་ཛ་ཛ་ཧཱུྃ་ཧཱུྃ་ཛ། ཨོཾ་སརྦ་བཛྲ་དྷ་ར་མ་ཧཱ་ཀྲོ་དྷ་བྷནྡྷ་བྷནྡྷ་ཧཱུྃ་བྃ། 
ཨོཾ་སརྦ་བཛྲ་དྷ་ར་མ་ཧཱ་ཀྲོ་དྷེ་མ་ཧཱ་བཛྲ་བ་ཤི་ན་ཧཱུྃ་ཧཱུྃ། ཨོཾ་སརྦ་བཛྲ་དྷ་ར་མ་ཧཱ་ཀྲོ་དྷེ་ཤྱ་ཤྱེ་ཧཱུྃ་ཧོ། ཨོཾ་ཧཱུྃ་ཏྲཱྃ་ཧྲཱིཿཨཱཿ། དེ་ནས་རྣལ་འབྱོར་མ་དེ་དག་མགུ་རངས་དགའ་བར་གྱུར་ཏེ། ཡང་དབྱངས་འདིས་གསོལ་བ་འདེབས་སོ། །བདེ་བ་མཆོག་གི་
རྒྱ་ཆེན་དགོངས་སུ་གསོལ། །བསམ་གྱིས་མི་ཁྱབ་བདེ་མཆོག་དབྱིངས་དང་ལྡན། །མི་གཡོ་གསུང་དང་བྲལ་བའི་དབྱངས་སྙན་པས། །གཟུངས་ལ་རོལ་པའི་བདེ་བ་བཞེས་སུ་གསོལ། །ངོ་མཚར་ཆེན་པོ་ཆོ་འཕྲུལ་སྣང་
མཛད་ཅིང་། །སྙིང་པོ་བྱང་ཆུབ་བགྲོད་པ་རྣམས་ཀྱི་ལམ་སྟོན་ཏེ། །རྒྱུད་རྣམས་ཡང་དག་གང་ལའང་མི་རྟེན་པར། །བདེ་བ་མཆོག་གི་གཟུངས་ཀྱིས་གྲོལ་བར་མཛོད། །ར་མུ་མ་ཧཱ་སུ་ཧཱུ་ཛོ་ཧི་ནི་ཛོ་ལ་སུ་ཧུྰ་པཱུ་མཱུ། མ་ཧཱ་སུ་
ཛོ་ཨི་ནི། ཛྭ་ལ་སུ་ཧཱུ་བ་བྷྲཱུྂ་ཛཱུ་མ་ཧཱ་སུ་ཧུྰ། ཨི་ནི་ཛྭ་ལ་སུ་ཧུྰ་ཨུ་ཛི། ཨུ་མ་ཧཱ་སུ་ཧུྰ་ཛོ། ཛ་ཨི་ནི་ཛྭ་སུ་ཧཱུྃ་ཨ་ལ་ལ་ལ་ཧོ། མ་ཧཱ་སུ་ཧུ་ར་མ་ར་མ་མ་ཧཱ་སུ་ཧཱུ། ཨ་ལ་ལ་ལ་ཧོ། མ་ཧཱ་སུ་ཏྲེ་ཎ། དེ་ནས་བཅོམ་ལྡན་འདས་རྡོ་རྗེ་
ནམ་མཁའ་ལ་འགྲོ་མ་ཆེན་མོ་དམ་ཚིག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་ནམ་མཁའ་ལ་འགྲོ་མ་ཐམས་ཅད་ཀྱི་སྙིང་པོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་སརྦྦ་ཏ་ཐཱ་ག་ཏ་མ་ཧཱ་

90-1-233a

བཛྲ་དྷ་ར་ཧཱུྃ་ཕཊ། ཨོཾ་བཛྲ་ཀྲོ་དྷ་གི་ནི་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་ཧེ་མ་བ་ཏི་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་ཀུ་མཱ་ར་པྲི་ཡེ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་ཏྲྀ་ཤྱེ་མཱ་ར་ཡ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་བཛྲ་མུཥྚི་ཏ་ན། 
བྷཱི་ཏ་ཡ་བྷཱི་ཏ་ཡ། སུམྦྷ་ནི་སུམྦྷ་ནི་ཧཱུྂ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་བཛྲ་ཀྲོ་དྷ་ཡ་དྷ་ར་ལ་ལི་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་ཀྲོ་དྷ་ཙཀྲེ་ནི། ཙྪིནྡ་ཙྪིནྡ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་ཨ་མྲྀ་ཏོད་པ་ཏ་ཀི་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་
མ་ཧཱ་སཽ་མཱ་ཀྲོ་དྷྃ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་བཛྲ་ཏནྟི་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་མཱ་ར་ཎི་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་ཨ་མྲྀ་ཏེ་ཀ་པཱ་ལ་ཧཱ་སེ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་སཽ་མྱ་ཀྲོ་དྷེ་ཤྭ་རི་ཧཱུྃ་ཕཊ། ཨོཾ་བཛྲ་
ཌཱ་ཀི་ནཱི་མ་ཧཱ་ཨ་མྲྀ་ཏེ་པུ་དནྡྷ་ད་རི་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་བཛྲ་པིངྒ་ལི་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་པི་བ་པི་བ་རུ་དྷི་རྃ། མ་ཧཱ་བཛྲ་བ་ལི་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་བཛྲ་ཤ་ནི་བྷཀྵ་བྷཀྵ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་བཛྲ་ཤ་ནི་
ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་བཛྲ་པཱ་ཤེ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་ཨ་ནཱ་ཡ་ཨ་ནཱ་ཡ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་བཛྲ་བེ་བྷི་ནི་གུ་གུ་མཱ་ར་ཡ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་བཛྲ་ཛྭ་ལ་ཡ་བྷ་སྨི་ཀུ་རུ་ཧཱུྃ་ཕཊ། ཨོཾ་བཛྲ་
ཌཱ་ཀི་ནཱི་མ་ཧཱ་བཛྲ་པི་ག་ཏ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་བཛྲ་དྃ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་བཛྲ་ཀི་ལི་པྲ་བི་ཤ་པྲ་བི་ཤ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་པུཥྚི་མཱྃ་སཱ་ཤ་ནི་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་ཀ་ར་ར་བཛྲ་
ར་ནི་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་ཨཱ་ཀཪྵཱ་ཎི་མ་ཧཱ་པིཾ་ག་རཱ་ལི་མུ་ཀུ་ཧཱུྃ་ཛྫཿཛྫཿཧཱུཾ་ཕཊ། ཨོཾ་བཛྲ་ཌཱ་ཀི་ནཱི་བི་ཤ་ནེ་ཧཱུྃ་ཧཱུྃ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་མ་ཧཱ་བནྡྷ་ཧཱུྃ་ཧཱུྃ་བྃ་བྃ་ཧཱུྃ། ཨོཾ་བཛྲ་ཌཱ་ཀི་ནཱི་མ་ཧཱ་ཏོ་ཥ་ཎི་
ས་མ་ཡེ་ཧཱུྃ་ཧཱུྃ་ཨཱ་ཨཱ། ཨོཾ་བཛྲ་མ་ཧཱ་རཀྵ་ས་མཱྂ་ས་རུ་དྷི་ར་མེ་ད་པྲི་ཡ། མ་ཧཱ་ཀུམྦྷ་ཀརྞ་ཧཱུྃ་ཧཱུྃ་ཧཱུྃ་ཧཱུྃ་ཀྵཿ། ཨོཾ་བཛྲ་མ་ཧཱ་རཱཀྵ་ས་ཨཱ་ཀཌྜྷྱ་པྲ་བེ་ཤ་ཡ། སརྦྦ་བཛྲ་ཀཱ་ལ་ཤི་ན་བནྡྷེ་ཧཱུྃ་ཧཱུྃ་ཧཱུྃ་ཧཱུྃ་ཕཊ་ཕཊ། ཨོཾ་བཛྲ་རཱཀྵ་ས་བནྡྷ་ཡ་

90-1-233b

བནྡྷ་ཡ། བི་ཥ་ཡ་བི་བི་ཥ་ན། སརྦྦཱ་ན་ཧཱུྃ་ཧཱུྃ་ཕཊ། ཨོཾ་བཛྲ་མ་སཱ་རཀྵ་ས། བྷནྡྷ་ཡ་བྷནྡྷ་ཡ། སརྦྦ་མ་ཧཱ་བི་ཀྲྀ་ཏཱ་ན་ན། ཧ་ཡ་གྲཱི་བ་ཧཱུྂ་ཕཊ། དེ་ནས་རྡོ་རྗེ་ནམ་མཁའ་ལ་འགྲོ་མ་རྣལ་འབྱོར་གྱི་དབང་ཕྱུག་ཆེན་མོ་དེ་དག་ཐམས་ཅད་རབ་ཏུ་
མགུ་ནས། ཡིད་དགའ་བར་གྱུར་ཏེ། དབྱངས་ཆེན་མོ་འདི་འབྱིན་པར་གྱུར་ཏོ། །ཀྱེ་མ་རྡོ་རྗེ་སེམས་དཔའ་ཡི། །རྡོ་རྗེ་སྦྱོར་བ་རབ་བསྟན་པས། །མཁའ་ལ་འགྲོ་བ་སངས་རྒྱས་ཉིད། །ཅི་བདེ་བས་ནི་སྒྲུབ་པར་བྱེད། །དེ་ནས་བཅོམ་
ལྡན་འདས་ཀུན་ཏུ་བཟང་པོས་ཡང་རྡོ་རྗེ་ནམ་མཁའ་ལ་འགྲོ་མ་དེ་དག་ཀུན་མགུ་དགའ་བར་བསྒྲུབ་པར་བྱ་བའི་སྙིང་པོ་འདི་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ཨོཾ་ཌཱ་ཀི་ནཱི་ཨཱ་ཀཪྵ་ཡ་པྲ་བེ་ཤ་ཡ། བྷནྡྷ་ཡ་ཏོ་ཥ་ཡ་
སརྦྦཱ་ན་བཛྲ་ཌཱ་ཀི་ནཱི་ཧྲྀ་ད་ཡྃ་ཧཱུྃ་ཛྫ། ཛཿཧཱུྃ་བྃ་ཧོཿ ཊཀྐི་ཧཱུྃ་ཛཿ། ཨོཾ་ཧེ་རུ་ཀ་མ་ཧཱ་བཛྲ། ཨཱ་ཀཌྜྷ་ཡ། ཨཱ་ཀཌྜྷ་ཡ། པྲ་བེ་ཤ་ཡ། པྲ་བེ་ཤ་ཡ། བྷནྡྷ་ཡ་བྷནྡྷ་ཡ། ཏོ་ཥ་ཡ་ཏོ་ཥ་ཡ། ཧཱུྃ་ཧཱུྃ་ཕཊ། ཨོཾ་བཛྲ་པདྨ་མ་ཧཱ་པ་ཌ་བ་མུ་ཁ། 
ཨཱ་ཀ་ཌྜྷ་ཡ་ཨཱ་ཀ་དྡྷྱ་ཡ། པྲ་བེ་ཤ་ཡ། བྷནྡྷ་ཡ། མོ་ཧ་ཡ། ཏོ་ཥ་ཡ། ཧ་ཧ་ཧི། ཁྲོ་བོའི་སྔགས་ཀྱི་ཚོགས་འདིས་རྡོ་རྗེ་རྣལ་འབྱོར་མ་དང་། མཁའ་ལ་འགྲོ་མ་དང་། ནམ་མཁའ་ལ་འགྲོ་བ་དང་། རྡོ་རྗེ་འཕྲོག་པར་བྱེད་མ་དེ་དག་ལ་སོགས་
པ་དེ་དག་དགུག་པ་དང་། གཞུག་པ་དང་། དབང་དུ་བྱ་བ་ལ་སོགས་པའི་ལས་བྱ་སྟེ། གཏོར་མས་མཆོད་པ་ལ་སོགས་པའི་དམ་ཚིག་ཧེ་རུ་ཀའི་ཕྱག་རྒྱ་དང་། ཏ་ཀི་རྒྱལ་པོའི་ཕྱག་རྒྱ་དང་། རྟ་མགྲིན་གྱི་ཕྱག་རྒྱ་སྦྱིན་ཏེ། ལས་ཐམས་ཅད་ལ་སྦྱོར་
རོ། །རྡོ་རྗེའི་ཐལ་མོ་ཇི་ལྟ་བ་བཞིན་བཅིངས་ཏེ། ཁྲོ་བོ་གཉིས་ལྕགས་ཀྱུ་ལྟར་བྱ། སྦོམ་པོ་གཉིས་ཕན་ཚུན་རྩེ་སྦྱར་ཞིང་། ཞི་བ་གཉིས་ཀྱང་རབ་ཏུ་བསྒྲེང་། ལྷག་མ་གཉིས་བརྐྱང་སྟེ་འོད་ཟེར་ལྟར་གཏང་བ་འདི་ནི་ཕྱག་
རྒྱའི་མཆོག་ཡིན་ནོ། །ཕྱག་རྒྱ་འདི་ནི་གཟི་བརྗིད་ཆེ། །ལྷ་དང་ལྷ་མིན་ཕྱག་བྱས་པ། །སངས་རྒྱས་རྡོ་རྗེ་འཛིན་ལ་སོགས། །བསྔགས་ཤིང་མཆོད་པ་བྱས་པ་ཡིན། །བཅིངས་པ་དེ་ཉིད་འབེབས་པ་དང་། །ཐམས་ཅད་

90-1-234a

ཚོགས་ནི་འཛུད་པར་བྱེད། །གདུག་པ་ཐམས་ཅད་གསོད་བྱེད་མ། །སྲིན་མོ་ཐམས་ཅད་ཟ་བར་བྱེད། །རྣལ་འབྱོར་དམ་པ་གནས་པ་ཡིས། །འདི་ཡིས་ལས་རྣམས་ཐམས་བྱེད། །ལས་རྣམས་ཐམས་ཅད་བསྒྲུབ་
པ་པོ། །མི་ལྡན་དངོས་གྲུབ་མི་འགྱུར་ཏེ། །འདོད་ཆགས་ཞེ་སྡང་གཏི་མུག་རྣམས། །བསྙེན་པས་དངོས་གྲུབ་མྱུར་དུ་འཐོབ། །རྡོ་རྗེ་བཅིངས་པ་གཉིས་སུ་བྱས་ཏེ། རྒྱབ་གཉིས་རྒྱབ་སྦྱར་ཏེ། མཐེའུ་ཆུང་གཉིས་བརྐྱང་སྟེ། 
ཕན་ཚུན་བསྣོལ་ཁྲོས་པ་གཉིས་གྱེན་དུ་སྒྲེང་སྟེ་སྙིང་གར་བསྟན་ནས། བརྐྱང་བསྐུམ་གྱི་ཚུལ་དུ་གནས་པ་འདི་ལས་ཐམས་ཅད་བྱེད་པའོ། །འདི་ཡིས་ཐམས་ཅད་ལས་ཀྱི་རྣམས། །ཇི་ཙམ་ཡིད་འདོད་བྱེད་པར་འགྱུར། །ཚེ་འདིར་
སྡིག་པ་གང་བྱས་པ། །འདི་ཡིས་ཐམས་ཅད་འཕྲོག་པར་བྱེད། །དེ་དག་ཐམས་ཅད་མྱུར་འགྱུར་ཏེ། །དངོས་གྲུབ་ཡིད་བཞིན་རིན་ཆེན་ནོ། །ཇི་སྙེད་ནམ་མཁའི་ལམ་དག་ཏུ། །རྣལ་འབྱོར་འདི་ཡིས་འཕུར་བར་བྱེད། །རིག་འཛིན་
མཆོག་ནི་མཚོན་པར་ཡང་། །ཆོ་ག་གྲུབ་པ་སླར་ཡང་འོང་། །ཐལ་མོ་མཉམ་པར་སྦྱར་ཏེ། སྦོམ་པོ་གཉིས་དབུས་སྦྱར། ལྷག་མ་འདབ་མ་ཁ་བྱེ་བ་ལྟར་བྱས་པ་ནི་པད་མའི་གདན་ནོ། །སྦོམ་པོ་གཉིས་རྩེ་མོ་མཐུར་དུ་བསྟན་པ་
ནི་རྟ་གདོང་གིའོ། །གང་གིས་སྦྱོར་བྱས་སྐད་ཅིག་ཏུ། །དེ་ཡིས་དངོས་གྲུབ་ཆེན་པོར་འགྱུར། །བཅིངས་མ་ཐག་ཏུ་འཕུར་འགྱུར་བ། །འདོད་པ་བཞིན་དུ་ཉེ་བར་འགྲོ། །ས་འོག་དངོས་གྲུབ་འདོད་པ་བཞིན། །མྱུར་དུ་སླར་ཡང་
ལྡོག་པར་འགྱུར། །དེ་ལ་སོགས་པ་མཐའ་ཡས་པ། །ཕྱག་རྒྱ་འདི་ནི་སྦྱོར་བ་དགེ། །ང་ནི་བསྟན་ཏེ་རྒྱལ་བའི་རྣམས། །རྣལ་འབྱོར་པ་ཡིས་དྲང་བར་བྱ། །རྣལ་འབྱོར་མ་རྣམས་ཐམས་ཅད་ཀྱང་། །ཕྱག་རྒྱའི་ཡན་ལག་
མཆོག་དེས་སྦྱར། །དེ་ནས་ནམ་མཁའ་ལ་འགྲོ་བ་ཆེན་མོ་དེ་དག་སོགས་འདོད་པས་གཟིར་བའི་རྣམས་རངས་ཏེ། རང་གི་གཟུགས་ནི་བསྒྱུར་བ་ཡིས། །བཞེངས་ཏེ་གར་ནི་རབ་མཛད་ཅིང་། །དུར་ཁྲོད་ཀྱི་ནི་ས་ཆེན་དུ། །མགུ་བ་ཆེན་པོས་

90-1-234b

བརྟགས་པར་བྱེད། །ཕྱག་ན་ཐོད་པ་གྲི་དག་དང་། །རྡོ་རྗེ་ཁ་ཊྭཱྃ་རྣམ་པར་འཛིན། །སྐལ་ལྡན་རང་གི་ཕྱག་རྒྱས་མཚན། །དབུ་སྨུག་རྣམ་པར་བསྙེར་བའི་ཞལ། །བདེ་བའི་ཆ་ལུགས་སྦྱར་བ་ཡིས། །བདེ་བ་དམ་པ་ལོངས་སྤྱོད་མྱོང་། །
རབ་ཏུ་རྨོངས་པས་བསྙེན་བྱེད་ཅིང་། །རབ་དགྱེས་ཁྲོ་ལ་གསོལ་བ་འདེབས། །ཟླ་བ་དྲི་མེད་སྟོང་རབ་རྫོགས་པའི་སྤྱན། །ཐུགས་རྗེའི་དབྱིངས་རུམ་ཉིད་དུ་བདག་ཅག་བསྐྱེད། །འགྲོ་བའི་སྡུག་བསྔལ་ཚ་བས་གདུངས་པ་ཡི། །བྱང་
ཆུབ་དེས་ནི་ཀུན་ཏུ་ཚིམ་པར་མཛོད། །ཨ་ལ་ལ་ལ་ཧོ། །མཆོག་གི་རོལ་པས་ཡང་དག་སྒོ་འབྱེད་ཅིང་། །བྱང་ཆུབ་མཆོག་ལམ་སྙིང་པོ་ཉིད་འདི་སྟོན། །གསང་བའི་བདག་ཉིད་བདེ་བས་ཟིལ་གནོན་ཏེ། །རྨོངས་ཤིང་བྱིང་བའི་རྣམས་
ལ་ཐུགས་རྗེས་སྒྲོལ། །ཨ་ལ་ལ་ལ་ཧོ། །ཆེ་བའི་ཡེ་ཤེས་ལྷུན་གྱིས་མངར་ལྡན་པ། །ཕྱོགས་ཀྱི་ཐུགས་རྗེས་མ་ཟིན་སྙོམས་པར་དགོངས། །བདེ་བ་མཆོག་གིས་གསང་བའི་གནས་ཉིད་དུ། །མྱ་ངན་འདའ་བའང་ལོངས་སྤྱོད་
བསྟན་པས་འགྲུབ། །འཇིག་རྟེན་གསུམ་པོ་འདིར་ནི་དངོས་བསྟན་ཀྱང་། །རྨུགས་པའི་འགྲོ་བས་བདུད་རྩིའི་དངོས་མ་མཐོང་། །ཀྱེ་མའོ་མ་སྐྱེས་ཆོས་ཏེ་སྙིང་པོ་ལས་བྱུང་བ། །བསམ་གྱིས་མི་ཁྱབ་ནམ་མཁའི་མཐའ་དང་
མཉམ། །རབ་ཏུ་དགྱེས་པའི་བདེ་མཆོག་འབར་བའི་གཙོ། །རིན་ཆེན་སྣ་ཚོགས་ཀུན་འདུས་འདི་ལ་གཟིགས། །སྔོན་མེད་རོལ་མོ་འདི་ལ་རོལ་མཛད་ཅིང་། །དུར་ཁྲོད་ཆེན་པོའི་དངོས་གྲུབ་སྩལ་བར་མཛོད། །འདུལ་བའི་དབང་
གི་གུབ་པའི་ཆ་ལུགས་མི་ཟད་མ། །རྣལ་འབྱོར་མཁའ་འགྲོས་གཟི་བརྗིད་འབར་བ་འདིས། །སྡུག་བསྔལ་གསུམ་པོས་འཐོམས་ཤིང་རྨོངས་པ་ལ། །བདེ་བའི་སྤྱོད་པས་གནས་ནས་སྤྱོད་མཛད་དེ། །ཐུགས་རྗེས་པད་མའི་དབྱིངས་
ལས་བསྐྱེད་པར་མཛོད། །ཨ་ལ་ལ་ལ་ཧོ། །ཇི་ལྟར་པད་མ་འདི་ལ་ཆགས་མེད་བཞིན། །སྡུག་པའི་བཅིངས་པས་མ་ཟིན་རྣམ་གྲོལ་ཏེ། །རོལ་པས་ཆུབ་པའི་ས་ལ་གནས་ཤིང་རྣམ་མཛད་པ། །འཇིག་རྟེན་གསུམ་པོ་འདི་གཟིགས་

90-1-235a

རོལ་མོ་མཛོད། ། བདག་ཅག་དམ་ཚིག་འདི་ལ་འདུས་ཤིང་སྣང་བའི་རྣམས། །མཉེས་མཛོད་ཤིན་ཏུ་བདེ་བ་བཞེངས་སུ་གསོལ། །འགལ་བའི་ཡིད་དང་མ་ཆགས་རྡོ་རྗེ་ལ། །ནམ་མཁའ་ཇི་བཞིན་མི་འགྱུར་ཚུལ་བཞིན་གནས། །
ཁམས་ཀྱི་རང་བཞིན་བནབས་ཤིང་རྣམ་ཁྲོ་ཡང་། །བྱམས་པའི་ཐུགས་རྗེས་ཀུན་དུ་གནས་ཁྱབ་མཛད། །ཨེ་མའོ་བདེ་བས་བདེ་སྦྱིན་ཕྱག་འཚལ་ལོ། །རང་བཞིན་གྲུབ་པའི་བདེ་བ་དངོས་གྲུབ་གསོལ། །ཆགས་མེད་ཆགས་
དང་ལྡན་པའི་ལོངས་སྤྱོད་ཀྱིས། །དམ་ཚིག་སྐྱོན་མེད་བདག་ཅག་རོལ་པ་མཛོད། །ཐུགས་རྗེ་གསལ་བའི་བྱང་ཆུབ་སེམས་ཆེན་དེས། །འགྲོ་བ་ཀུན་གྱི་བག་ཆགས་རྣམ་པར་སྦྱོངས། །རྒྱུ་དང་རྐྱེན་ལ་མ་རྟེན་རང་བཞིན་གྲུབ། །
མ་ཆགས་དྲི་མེད་ཡོངས་གསལ་ཟླ་བ་བཞིན། །འཇིག་རྟེན་གསུམ་པོ་འདིར་ནི་མངའ་མཛད་དེ། །ཐམས་ཅད་མཁྱེན་པའི་ཡེ་ཤེས་ཀུན་དུ་བདེ་བས་རྩེན། །འདི་ཡིས་གཙོ་ལ་བསྐུལ་བྱས་ན། །དཀྱིལ་འཁོར་ཉིད་དུ་དངོས་
གྲུབ་བོ། །ཡིད་གདུང་མཉེན་པའི་ང་རོ་ཡིས། །དཔྱིད་ཀྱི་རྒྱལ་པོ་གླུ་བླངས་ཏེ། །མཁའ་འགྲོ་དྲ་བའི་དྲི་མེད་པའི། །དགོངས་པ་ཐམས་ཅད་བསྟན་བྱས་ཏེ། །རྡོ་རྗེ་པད་མ་ཡིད་འོང་བའི། །དངོས་གྲུབ་ཐམས་ཅད་སྦྱར་བར་བྱ། །
བདེ་བྱེད་ཆེན་པོ་འདི་ཡིས་ནི། །བསྐུལ་བས་དགྱེས་པ་སྦྱིན་པར་བྱེད། །རྡོ་རྗེ་ཅན་གྱི་ཡི་གེར་ལྡན། །དུས་གསུམ་རབ་ཏུ་སྦྱར་བར་བྱ། །དེ་ནས་བཅོམ་ལྡན་འདས་ཀྱིས་རྡོ་རྗེ་ནམ་མཁའ་ལ་འགྲོ་མ་ཐམས་ཅད་ཀྱི་ཤིན་ཏུ་དགྱེས་པའི་
ལོངས་སྤྱོད་དཔལ་གྱི་བདེ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་དག་ཐམས་ཅད་ལ་རྗེས་སུ་མགུ་བར་མཛད་དོ། །གཡོན་གྱི་ལག་པས་གཟུང་བྱས་ཏེ། །གསང་སྐྱེས་པད་མ་ཕྱེ་བ་ལས། །རྡོ་རྗེ་ཆེན་པོ་གཡས་ཉིད་
ཀྱིས། །བཅུག་ན་མཆོད་པ་འཐོབ་འགྱུར་ཏེ། །མཁའ་ལ་འགྲོ་བ་དྲ་བ་འདིས། །མཉེས་པས་འདི་ནས་དངོས་གྲུབ་འཐོབ། །ཨོཾ་དང་ཨོཾ་དང་མི་ཕྱེད་རྡོ་རྗེ་བདེ། །མཐའ་རུ་ཕཊ་ཀྱིས་སྟོབས་རབ་སྦྱོར་བ་ཡིས། །ཀྱེ་མའོ་བདེ་བ་

90-1-235b

མཁའ་འགྲོ་དྲ་བ་ཆེ། །རབ་དགྱེས་དབང་མོ་བདེ་བྱེད་བདེ་སྟབས་མཛོད། །བདེ་མའི་སྐྱིལ་མོ་བཅིང་བར་བྱ། །འདི་ཡིས་བརྩེན་པར་བྱས་ན་ནི། །བུད་མེད་མཆོག་ནི་འགྲུབ་པར་འགྱུར། །བདེ་བ་ཆེན་པོས་གར་བྱེད་ཅིང་། །རབ་དགྱེས་
བདེ་བྱེད་གནོད་བྱེད་དང་། །ཀུན་ཏུ་འཁྱུད་དང་སྤྲོད་བྱེད་དང་། ། རྣལ་འབྱོར་མ་ཚོགས་གསལ་རྣམས་ལ། །འདི་ཡིས་བརྩེན་པ་རྣམ་བྱས་ན། །བདེ་ཆེན་བདེ་བ་དགྱེས་པ་ཡི། །རབ་དགྱེས་དངོས་གྲུབ་འགྲུབ་པར་འགྱུར། །རྣལ་འབྱོར་མའི་ཆེ་བ་
རྗེས་སུ་མཉེས་པར་བྱེད་པའི་ཡེ་ཤེས་ཀྱི་ཕྱག་རྒྱ་ཡེ་ཤེས་སོ།། །།མགོ་ལ་ཐལ་མོ་ཕྱེད་སྦྱིན་ཏེ། །ཆུ་སྐྱེས་ལ་ནི་ཡོངས་སུ་རྫོགས། །རྡོ་རྗེ་བཅིང་བ་ཡང་དག་ལྡན། །སྣ་ཚོགས་གར་གྱིས་གར་བྱས་ཏེ། །ཐམས་ཅད་
ཟས་དང་རོས་དངོས་འགྲུབ། །མཆོག་གི་བདེ་བས་དངོས་གྲུབ་འགྱུར། །རྩ་བའི་ཕྱག་རྒྱ་བཅིང་བྱས་ཏེ། །སངས་རྒྱས་སྦྱོར་བ་བདེ་ཆེན་པོ། །མྱུར་བའི་ཐལ་མོས་བསྒྲུབ་པར་བྱ། །གསུམ་གྱིས་མཚམས་སུ་རབ་བྱ་ཞིང་། །
མཁུར་ཙོས་སོ་ཡིས་བཏབ་བྱས་ཏེ། །མ་མཆུ་ཡང་ནས་ཡང་དུ་གཟུང་། །འོ་མ་འཛིན་པ་ཕྱིར་ཞིང་མཉེ། །གཡའ་བྱེད་པད་མ་རྣམ་བཞི་བྱ། །པད་མོ་ཕྱི་ཕྱིར་རབ་མཉེ་ཞིང་། །ཟེ་བ་མཚན་པས་རབ་ཏུ་སྦྱར། །
སེན་མོས་མཆན་ཁུང་སུམ་མདོ་དང་། །རྣ་བ་གཉིས་སུ་རབ་ཏུ་གཟུགས། །དལ་ནས་རྡོ་རྗེ་གཞུག་བྱ་ཞིང་། །ཁྲོ་བོའི་རྒྱལ་པོས་བསྐྱོད་པར་བྱ། །གཡས་ཀྱིས་ཤིན་དུ་བསྐྱོད་བྱས་ནས། །གཡོན་པ་ཡིས་ནི་གཏང་
བར་བྱ། །སྦྱོར་བ་འདི་ཡིས་བརྩེན་པ་ཡིས། །མཁའ་འགྲོའི་འཁོར་ལོ་མཆོད་པར་བྱ། །ཀྱེ་མའོ་བདེ་ཞེས་རབ་བརྗོད་དེ། །བདེ་བ་ཆེན་པོ་དབྱངས་ཀྱིས་བསྐུལ། །ཡང་དང་ཡང་དུ་འཛིན་པ་ན། །བློ་ལྡན་སྒྲུབ་པས་བསྒྲུབ་
པར་བྱ། །རྣལ་འབྱོར་མ་ཐམས་ཅད་ཀྱི་མཆོད་པ་ཆེན་པོའི་སྤྲོ་བ་ཡེ་ཤེས་སོ། །དེ་དག་ཐམས་ཅད་མགུ་ནས་ནི། །རྡོ་རྗེ་འཛིན་ལ་གསོལ་བ་འདེབས། །ཉེ་བའི་ཟས་ནི་ཐམས་ཅད་དང་། །དེ་བཞིན་ཉེ་བའི་ཡོ་བྱད་རྣམས། །

90-1-236a

བདེ་བ་བསྒྲུབས་པས་སྒྲུབ་པ་པོ། །སྣ་ཚོགས་ཆེན་པོ་བསྒོ་བར་གསོལ། །བསྒྲུབ་པ་ཐམས་ཅད་སྒྲུབ་བྱེད་པས། །གདོན་མི་ཟ་དཀའ་རྟག་བགྱིད་པས། །གང་གིས་མྱུར་དུ་མཉམ་སྦྱོར་བས། །དཀྱིལ་འཁོར་
རབ་ཏུ་རྣམ་བསྒྱུར་བགྱི། །དེ་ནས་བཅོམ་ལྡན་འདས་ཀྱིས་ཉེ་བའི་ཡོ་བྱད་ཁ་ཟས་ཐམས་ཅད་ཀྱི་ཕྱག་རྒྱ་གསུངས་པ། ཡོ་བྱད་ཕྱི་ཡི་ཐམས་ཅད་དང་། །གོས་དང་རྒྱན་ལ་སོགས་པའོ། །ཉེ་བའི་ཁ་ཟས་རྣམས་ལ་ནི། །ཤ་དང་
ཁྲག་ལས་ཡང་དག་བསྒྲུབ། །འབྲས་བུ་རྩ་བ་ཚད་མེད་དོ། །མཆོག་ཏུ་བདེ་བ་ཡིད་ཚིམ་པ། །འདི་ཡིས་མཆོད་པ་བྱས་པ་ན། །མཁའ་འགྲོ་མ་ནི་དངོས་གྲུབ་འགྱུར། །བུས་པའི་ཤ་ལས་རབ་བསྒྲུབ་པའི། །འོ་མ་དམ་
པས་ཐོད་པ་དགང་། །མཁའ་འགྲོ་མ་ཀུན་དབུལ་བྱས་ན། །དཀྱིལ་འཁོར་འདིར་ནི་དངོས་གྲུབ་འགྱུར། །གཏོར་མའི་མཆོད་པའི་ཡོ་བྱད་ཀྱི་ཡེ་ཤེས་སོ། །དེ་ནས་དེ་བཞིན་གཤེགས་པ་ཐམས་ཅད་དང་། རྡོ་རྗེ་འཛིན་ཐམས་
ཅད་བཞེངས་ཏེ་ཕྱག་འཚལ་ནས་ཡང་གཅིག་ཏུ་སྟུག་པོར་འདུ་བ་མཛད་དེ་བཅོམ་ལྡན་འདས་ལ་གསོལ་བ་འདེབས་སོ། །རྣལ་འབྱོར་ཀུན་གྱི་ཡེ་ཤེས་མཚན། །རྡོ་རྗེ་རྣལ་འབྱོར་མ་རྣམས་ཀྱི། །ཐམས་ཅད་བརྡ་རྣམས་དྲན་གྱུར་
པ། །བཅོམ་ལྡན་འདས་ཀྱིས་བཤད་དུ་གསོལ། །དེ་ནས་བཅོམ་ལྡན་འདས་ཤིན་དུ་དགྱེས་པ་ཆེན་པོའི་རོ་མྱོང་བ་དང་འབྲེལ་བའི་དཔལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་ནམ་མཁའ་ལ་འགྲོ་བ་དང་། 
མཁའ་ལ་འགྲོ་མ་ཐམས་ཅད་ཀྱི་བརྡའི་ཕྱག་རྒྱ་འདི་གསུངས་སོ། །ཀ་ནི་འདོད་པ་བྱེད་འདོད་ཕྱིར། །བདག་ནི་འདོད་ཅན་སྨྲས་ཡིན་ཏེ། །གཏི་མུག་ལྡོངས་པས་མ་བྱིན་ན། །མྱུར་དུ་དམ་ཚིག་དེ་ཉམས་སོ། །དམ་ཚིག་དམ་ཚིག་
ཅན་མཐོང་ན། །ལག་པ་གཡས་པ་བརྐྱང་བྱས་ཏེ། །དེས་ཀྱང་གཡོན་པ་བརྐྱང་བ་ཡིས། །རང་གི་ནུ་མ་རབ་བསྡམས་ན། །མགོ་བོས་གཡོན་དུ་འདུད་བྱས་ནས། །ཕྱག་བྱེད་བདེ་བ་དྲིས་པ་ཡིན། །ལག་པ་གཡོན་པ་དཀུར་བརྟེན་ན། །

90-1-236b

དེ་ཡིས་ཕྱག་ནི་བྱས་པར་འགྱུར། །གཡོན་པ་མགོ་རུ་གཞག་པ་ཡི། །གཡོན་དུ་འདུད་པས་ཕྱག་ལན་ནོ། །གཡོན་གྱི་སྨིན་མ་བསྐྱོད་པ་ཡིས། །མྱུར་དུ་ཕྱག་ནི་བྱས་པར་འགྱུར། །སྦྱོར་བ་ཤིན་དུ་བརྩོན་པ་ཡིས། །གཡས་ཀྱི་
སྨིན་མས་ཕྱག་ལན་བྱ། །གཡས་ཀྱི་ལག་པས་སྙིང་ག་རུ། །སྦྱོར་དང་ལྡན་པས་མཉེ་བྱས་ན། །འདི་ནི་རྡོ་རྗེ་སློབ་དཔོན་མཆོག །དེ་ཡི་མཚན་མར་ཤེས་པར་བྱ། །གཡོན་གྱི་ཁྲོ་མོ་བསྒྲེང་བ་ཡི། །ནམ་ཞིག་དེ་ལྟར་བསྟན་
བྱས་ན། །ལུས་ཆེ་དེ་ནི་ཁྲོས་གྱུར་ཞེས། །རྣལ་འབྱོར་པ་ཡི་རྟགས་ཞེས་བྱ། །གཡོན་དུ་འགྱིང་བ་བསྒྱིངས་པ་ཡི། །ལག་པ་སྙིང་གར་བརྐྱང་བྱ་སྟེ། །དབང་མོ་གྱེན་དུ་རྣམ་བསྟན་ན། །དེ་ཚེ་མཛའ་བར་རབ་ཏུ་བརྟག །ཆུང་ངུ་རྩེ་
མོར་བྱས་པ་ཡི། །ནམ་ཞིག་བསྐྱོད་པ་མཐོང་བ་ན། །དེ་ཚེ་རིག་མ་རྣལ་འབྱོར་དབང་། །རྡོ་རྗེ་པད་མོ་བརྩེན་པར་འདོད། །སྦོམ་པོ་ནམ་ཞིག་མཐོང་འགྱུར་ན། །དེ་ལ་སྟོན་མོ་སྦྱིན་པར་བྱ། །གང་ཚེ་ཤིན་དུ་མཐོར་སྟོན་ན། །མངོན་
པའི་ང་རྒྱལ་རབ་ཏུ་བརྟག །ཁྲོ་མོ་ལྕགས་ཀྱུ་འདྲ་བྱས་ཏེ། །གང་ཚེ་སྔགས་མཁན་གྱིས་བསྟན་ན། །དེ་ཚེ་ངེས་པར་འོས་བྱས་ཏེ། །གཞན་དུ་ན་ནི་དམྱལ་བར་ལྟུང་། །དེ་ཉིད་རྣམ་པར་བཟློག་པ་ལྟར། །སྔགས་མཁན་གྱིས་ནི་མ་བསྟན་ན། །
དེ་ཚེ་མྱུར་དུ་འགྲོ་བྱས་ཏེ། །གཞན་དུ་བྱས་ན་དམ་ཚིག་ཉམས། །གཞན་རྣམས་ཀྱི་ནི་ཕྱག་རྒྱ་ཡིས། །རྣལ་འབྱོར་པ་ཡིས་རྣམས་བསྐུལ་ན། །ལས་ཀྱི་སྦྱོར་བ་ཤེས་པ་ཡིས། །ལས་དེ་དག་ནི་བརྩམ་པར་བྱ། །བརྡ་ཡི་ཕྱག་རྒྱའི་
ཡེ་ཤེས་སོ། །འདྲེན་པ་མེད་པའི་ཡི་གེ་ཀུན། །རྣལ་འབྱོར་པ་ཡིས་རབ་ཏུ་བརྟག །རྟག་ཏུ་ཚེག་དྲག་རྣམས་བྲལ་བ། །འདྲེན་ཚུལ་རྣལ་འབྱོར་མ་ཡིའོ། །ཨོཾ་ནི་ཐིག་ལེར་བཅས་པའི་བརྡ། །སྦྱོར་བ་སྔགས་འཛིན་རྣལ་འབྱོར་
བརྟག །དེ་ལ་སོགས་པ་མཐའ་ཡས་མཆོག །སྦྱོར་བའི་དཀྱིལ་དུ་བརྟག་པར་བྱ། །རྡོ་རྗེ་པད་མ་མཉམ་པར་སྦྱོར་བས་རྗེས་སུ་མཉེས་པར་བྱེད་པ་དཔལ་དམ་ཚིག་མ་ཞེས་བྱ་བའི་ཕྱག་རྒྱའི་ཡེ་ཤེས་སོ། །དེ་ནས་བཅོམ་ལྡན་

90-1-237a

འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཀུན་ཏུ་བཟང་པོ་ཆེན་པོ་ཡང་ཀུན་ཏུ་རྒྱས་འདེབས་པའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྡོ་རྗེ་ཕ་རོལ་ཏུ་ཕྱིན་མའི་གསང་བ་རྣལ་འབྱོར་མ་
ཆེན་མོ་ཐམས་ཅད་ཀྱི་ཕྱག་རྒྱའི་ཡེ་ཤེས་འདི་ཉིད་ཀྱི་སྐུ་དང་། གསུང་དང་། ཐུགས་རྡོ་རྗེ་ལས་ཕྱུང་ངོ་། །རྡོ་རྗེ་ཐལ་མོ་མཉམ་གཞག་སྟེ། །སྦོམ་པོ་སྐྱིལ་མོ་བཅིང་བར་བྱ། །ཁྲོ་མོ་གཉིས་ནི་སྦྱར་བྱ་སྟེ། །ལྷག་མ་འོད་བཞིན་གཏང་བར་བྱ། །
སྙིང་གར་ཕྱག་རྒྱ་འདི་བཞག་ནས། །ཐམས་ཅད་ལས་ནི་རབ་སྦྱར་ཏེ། །སྣ་ཚོགས་མཁའ་འགྲོའི་དཀྱིལ་འཁོར་དུ། །གདོན་མི་ཟ་བའི་དངོས་གྲུབ་བྱེད། །ཐལ་མོ་དེ་གཉིས་མཉམ་སྦྱར་ཏེ། །མཆོག་དང་རྡོ་རྗེ་མཉམ་དུ་སྦྱར། །ཆུང་
ངུ་གཉིས་ཀྱང་གདོང་སྤྲད་དེ། །སྙིང་གར་དེ་བཞིན་སྦོམ་པོ་སྦྱར། །འདི་ཡིས་རྡོ་རྗེ་ཐམས་ཅད་རྣམས། །དམ་ཚིག་འཇིགས་བྱེད་རབ་མཛད་ཅིང་། །སེམས་ཅན་ཐམས་ཅད་ཕན་མཛད་མ། །དེ་ནི་དངོས་གྲུབ་འགྲུབ་པར་འགྱུར། །དེ་
ཉིད་ལས་ནི་རྡོ་རྗེ་དང་། །མཆོག་ཉིད་བསྒྲེང་བའི་ཚུལ་བྱས་ཏེ། །རྡོ་རྗེ་ཐལ་མོ་གནས་པ་ཡིས། །དྲང་བའི་ཚུལ་གྱིས་དྲངས་བྱས་ན། །མི་གཡེང་དེ་ནས་དངོས་གྲུབ་བོ། །གནོད་བྱེད་ཡང་དག་ལྡན་པ་འདིས། །རྒྱལ་བ་མཆོག་ཀྱང་འདྲེན་
འགྱུར་ན། །ལྷ་དང་མི་ཡི་བུ་མོ་དག །ལྷ་མིན་ལ་སོགས་སྨོས་ཅི་དགོས། །ཇི་ལྟར་ཡིད་ལ་འདོད་པ་བཞིན། །འདི་ཉིད་ཀྱིས་ནི་དངོས་གྲུབ་སྟེ། །སྔགས་ཀྱི་བཟླས་པ་མཉམ་སྦྱོར་བས། །མཆོག་ཏུ་མྱུར་དུ་འདྲེན་པར་འགྱུར། །ཐལ་
མོ་དེ་ཉིད་ལས་བྱུང་ཁྲོ། །རྩེ་མོ་ཡིད་ཙམ་བཀུག་བྱས་ཏེ། །ལྷག་མ་འོད་ཟེར་རྩེ་མོ་བཞིན། །དེས་ནི་མྱོས་བྱེད་ཐོབ་པ་ཡིན། །འདི་ནི་བཅིངས་མ་ཐག་ཏུ་ཡང་། །བདེ་བར་གཤེགས་ཀྱང་དབང་བསྒྱུར་ན། །ཡིད་ལས་སྐྱེས་པ་འདོད་
ཆགས་ཅན། །གཏི་མུག་ཆོས་གནས་སྨོས་ཅི་དགོས། །ཅི་དགར་འདོད་ཆགས་སྦྱོར་བ་ཡིས། །དེ་ཡིས་ལས་རྣམས་བྱེད་འགྱུར་ཏེ། །ཡང་དག་སྦྱོར་བ་ཐམས་ཅད་འགྲུབ། །སྦྱོར་དང་མི་ལྡན་དངོས་གྲུབ་མེད། །སྙིང་གར་འདི་ཉིད་ཀྱིས་

90-1-237b

བྱས་ཏེ། །མགུ་བའི་སྦྱོར་བ་བདེ་ཆེན་པོས། །རྒྱལ་བ་མཆོག་ནི་མཉེས་པར་འགྱུར། །མཆོག་གི་བཅིང་བ་འདི་ཀུན་དང་། །འདི་ཡིས་ལས་རྣམས་ཐམས་ཅད་དང་། །ཡིད་ལ་བསམ་པ་བྱེད་པ་འཐོབ། །ཕན་ཚུན་དུ་ནི་མགུ་བྱེད་ཅིང་། །
མགུ་བས་དངོས་གྲུབ་མྱུར་དུ་འཐོབ། །རྡོ་རྗེ་ཐལ་མོ་མཉམ་སྦྱར་ཏེ། །རྡོ་རྗེ་བཀུག་ནས་སྦོམ་པོར་སྦྱར། །ལྷག་མ་འོད་ཀྱི་ཚུལ་དུ་གཏང་། །དགའ་བྱེད་མཆོག་ནི་ཕྱག་རྒྱ་འདི། །སངས་རྒྱས་འབྲས་བུ་དངོས་གྲུབ་འཐོབ། །རྒྱལ་སྲིད་ནོར་
དང་འབྲུ་ཡི་རྣམས། །དེ་བཞིན་ནོར་བུ་འདི་དངོས་གྲུབ། །དེ་ནི་དེ་མ་ཐག་ཏུ་ཡང་། །ལྷ་དང་ལྷ་མིན་མཆོད་པར་འགྱུར། །བདག་ཉིད་ཀྱིས་ནི་འདི་བཅིངས་ཏེ། །མཁས་པ་ཡིས་ནི་དུས་མཚམས་ཕྱིར། །གནས་ལྔར་རབ་ཏུ་སྦྱོར་བ་
ཡིས། །སྤྱི་བོར་དབང་ནི་བསྐུར་བྱས་ན། །རྡོ་རྗེ་འཛིན་པ་ཀུན་གྱི་དབང་། །དེ་ནས་དེ་ནི་ངེས་པར་འགྱུར། །ལོ་གཅིག་ཙམ་དུ་མཉམ་སྦྱོར་བས། །ཕན་ཚུན་དུ་ནི་དབང་བསྐུར་བས། །ཁམས་གསུམ་རབ་དགྱེས་བདག་པོ་རུ། །བློ་ལྡན་རྡོ་རྗེ་
མི་གཡེང་འགྱུར། །དེ་ཉིད་འཁོར་ལོ་བསྐོར་བྱས་ཏེ། །སྙིང་གར་འཁོར་ལོ་བཞིན་དུ་བསྐོར། །ཟླ་བ་གཅིག་ཙམ་མཉམ་སྦྱོར་བས། །འཁོར་ལོ་བསྐོར་བ་རབ་ཏུ་བསྒྲུབ། །དེ་ཉིད་གཡོན་པར་རབ་སྦྱར་ཏེ། །རྒྱལ་མཚན་ཚུལ་དུ་ཡང་དག་སྤྲོ། །
ཞག་བདུན་དུ་ནི་མཉམ་གཞག་པས། །འཇིག་རྟེན་དུ་ནི་རྒྱལ་བར་འགྱུར། །དེ་ཉིད་ཁ་ནས་བརྒད་པར་སྦྱར། །མཉམ་གཞག་ཟླ་བ་གཅིག་ཙམ་གྱིས། །ལས་རྣམས་ཐམས་ཅད་རབ་གྲུབ་པ། །བརྒོད་པ་ཙམ་གྱིས་བྱེད་པར་འགྱུར། །ཐལ་མོ་དེ་ཉིད་
མཉམ་གཞག་སྟེ། །རྩེ་མོ་ཁ་ཕྱེད་རྣམ་བསྒྱུར་བས། །སྦོམ་པོ་ཟེ་བར་རྣམ་བྱས་ཏེ། །ལོ་མ་ལྷག་མ་རྒྱས་པར་བྱ། །རྣལ་འབྱོར་འདི་ནི་བཅིངས་པ་ཡིས། །སྡིག་པ་ཀུན་ལས་རབ་ཏུ་གྲོལ། །བསོད་ནམས་ཆེན་པོས་བྱིན་རློབ་སྟེ། །བདེ་བྱེད་ཐམས་
ཅད་གྲུབ་པར་འགྱུར། །ཐལ་མོ་དེ་ཉིད་སྙིང་གར་སྦྱར། །མཆོག་དང་ཁྲོ་མོ་གཉིས་སྦྱར་ཏེ། །དེ་གཉིས་ཚིགས་གསུམ་རབ་ཏུ་དགུག །སྦོམ་པོ་དཀྱིལ་མོ་ཙམ་དུ་བྱ། །རྣལ་འབྱོར་དག་ཏུ་སྦྱོར་བ་ཡིས། །འདི་ཡིས་ཟླ་བ་གཅིག་བྱས་ན། །འཇིག་

90-1-238a

རྟེན་གསུམ་ལས་རྣམ་རྒྱལ་རྗེར། །དཔའ་བོ་ཆེན་པོར་དེ་འགྱུར་རོ། །ཐལ་མོ་དེ་ཉིད་མཉམ་སྦྱར་ཏེ། །རང་གི་སྙིང་གར་བསྐོར་བར་བྱ། །དེ་ནས་སྔགས་མཁན་ཆོས་སྟོན་པར། །མི་གཡེང་སེམས་ཀྱིས་དེ་འགྱུར་རོ། །སྦོམ་པོ་
ལྕེ་ཡི་ཚུལ་གཞག་པས། །དེ་ཉིད་ཁར་ནི་རྣམ་བཞག་ན། །འཇིག་རྟེན་ཀུན་གྱི་ཐམས་ཅད་དག །མདོར་ན་ཞག་བདུན་ཙམ་གྱིས་ཀྱང་། །དབྱིག་དང་གསེར་དང་གོས་ལ་སོགས། །བདུད་རྩི་བཏུང་བ་མཆོག་གི་རྣམས། །འདི་ཡིས་ཐམས་ཅད་
འཕྲོག་བྱེད་དེ། །འགྲུབ་པར་འགྱུར་བར་གདོན་མི་ཟ། །ཐལ་མོ་དེ་ཉིད་མཉམ་སྦྱར་ཏེ། །མཆོག་རབ་གཉིས་ནི་འོག་ཏུ་གཞུག །ཆུང་ངུ་གཉིས་དང་སྦོམ་པོ་གཉིས། །སྦྱར་ཏེ་སྙིང་གར་རབ་ཏུ་གཞུག །ཡིད་ལ་དགའ་བའི་ལས་རྣམས་
ཐམས་ཅད་བྱེད། །སྒྱུ་མའི་མཐུ་དང་སྲིད་པ་མཐར་བྱེད་པ། །རྟག་ཏུ་བློ་ལྡན་ལོ་ནི་ཕྱེད་གཉིས་ཀྱིས། །ཁམས་གསུམ་རྒྱལ་སྲིད་མཐུ་ཆེན་ཐོབ་པར་འགྱུར། །ཐལ་མོ་དེ་ཉིད་མཉམ་སྦྱར་ཏེ། །རང་གི་མ་མཆུ་དབུས་ཉིད་ནས། །སྦོམ་
པོ་རོ་འཐོབ་ཚུལ་གྱིས་ནི། །ཁྲོ་མོ་འཁོར་ལོ་ཡང་དག་སྤྲོ། །ཞག་བདུན་དུ་ནི་བསྒྲིམས་པ་ཡིས། །འདི་ཡིས་ཁྲག་འདྲེན་དངོས་གྲུབ་སྟེ། །ཤ་ཟས་བཟའ་བ་ལས་ཀུན་བྱེད། །ཐལ་མོ་ཉིད་ནི་བཅིངས་བྱས་ནས། །རྡོ་རྗེ་གཉིས་ནི་པད་
མར་སྦྱོར། །སྦོམ་པོའི་ཟུར་ནི་སྦྲེལ་ནས་ཀྱང་། །ཆུང་ངུ་གཉིས་ཀྱང་དེ་བཞིན་ཏེ། །མགྲིན་པ་ནས་ནི་རྩེ་མོ་བརྐྱང་། །ཐམས་ཅད་ལས་ནི་སྦྱར་བྱས་ཏེ། །འདི་ཡིས་གདུག་པ་ཐམས་ཅད་དག །རབ་ཏུ་སྦྱར་བས་འཇིགས་པར་
འགྱུར། །ཐལ་མོ་དེ་ཉིད་མཉམ་གཞག་ནས། །བཅིང་བ་དམ་པོས་བཅིང་བར་བྱ། །སྦོམ་པོ་གཉིས་ནི་ནང་དུ་གཞུག །ཁྲོ་མོ་གཉིས་ཀྱང་བསྐུལ་བར་བྱ། །འདི་ཡིས་གདུག་པ་ཐམས་ཅད་དག །འཛུམས་པར་རབ་ཏུ་བྱས་པར་འགྱུར། །
སྐད་ཅིག་ཏུ་ནི་གནོད་བྱེད་དེ། །དེ་བཞིན་བསྡུས་དང་བཙིར་བར་འགྱུར། །ཕྱག་རྒྱ་འདི་ཡིས་རྒྱས་བཏབ་པས། །དེ་ནི་དངོས་གྲུབ་ཐམས་ཅད་ཀྱི། །དངོས་གྲུབ་ཆེན་པོ་བདག་པོ་དང་། །ཐམས་ཅད་ལས་དོན་འགྲུབ་པར་འགྱུར། །ཕྱག་

90-1-238b

རྒྱ་འདི་ཡིས་རྒྱས་བཏབ་པས། །རིམ་པར་མྱུར་དུ་འགྲོ་འོང་བྱེད། །ལོ་གཅིག་གི་ནི་སྦྱོར་བ་ཡིས། །ལས་རྣམས་ཐམས་ཅད་སྒྲུབ་པར་བྱེད། །རྡོ་རྗེ་རྣལ་འབྱོར་མ་རྣམས་ཀུན་གྱི་ལས་ཐམས་ཅད་བྱེད་པའི་ཕྱག་རྒྱའོ། །དེ་ནས་རྣལ་
འབྱོར་མ་དེ་དག་ཐམས་ཅད་རབ་ཏུ་མགུ་ནས་ངོ་མཚར་དུ་གྱུར་ཏེ། རྣམ་པར་འགྱུར་བས་གར་མཛད་ཅིང་། །ཧི་ཧི་ཞེས་པས་གླུ་རུ་ལེན། །ཧ་ཧ་ཞེས་པས་རབ་ཏུ་མགུ། །ཧོ་ཧོ་ཞེས་པས་མཉེས་པར་བྱེད། །ཧེ་ཧེ་ཞེས་པས་
འབོད་པར་བྱེད། །ཧཱུྃ་ཧཱུྃ་ཞེས་པས་གད་པར་བྱེད། །ཧཱ་ཧཱ་ཞེས་པས་སྐྱོད་པར་བྱེད། །ཕཊ་ཕཊ་ཞེས་པས་གསོད་པར་བྱེད། །ཧཱུྃ་ཧཱུྃ་ཞེས་པས་ཕུར་བུས་འདེབས། །ཛཱ་ཛཱ་ཞེས་པས་འདྲེན་པར་བྱེད། །ས་ས་ཞེས་པས་དམ་པར་
བྱེད། །དགེ་བ་དབང་ཕྱུག་ང་རོ་མཆོག །ཧཱུྃ་བྷྲུྃ་ཞེས་པས་གསོད་པར་བྱེད། །ཧཱུྃ་བྷྲཱུྃ་ཧཱུྃ་བྷྲཱུྃ། ཧཱུྃ་ཧཱུྃ་ཞེས་པས་འབར་བར་བྱེད། །ཏྲུྃ་ཏྲུྃ་ཞེས་པས་གཟི་བརྗིད་བྱེད། ། ཏྲིཾ་ཏྲིཾ་ཞེས་པས་འདྲེན་པར་བྱེད། །ཏྲྃ་ཏྲྃ་ཞེས་པས་མཆོད་པར་བྱེད། །དངོས་
གྲུབ་ཐམས་ཅད་འབྲས་བུ་སྨིན། །ཏྲྃ་ཏྲྃ་ཞེས་པས་རྨོངས་པར་བྱེད། །དྡྷྲིྂ་དྡྷྲིྂ་ཞེས་པས་འཛུམས་པར་བྱེད། །ཧྲིཾ་ཧྲིཾ་ཞེས་པས་འདྲེན་པར་བྱེད། །ཧཱུྃ་ཧཱུྂ་ཞེས་པས་འཕྱན་པར་བྱེད། །ཧྲྃ་ཧྲྃ་ཞེས་པས་རྨོངས་པར་བྱེད། །ཧྲ་ཧྲ་ཞེས་པས་གནོན་
པར་བྱེད། །ཧོ་ཧོ་ཞེས་པས་མཉེས་པར་བྱེད། །ཧྃ་ཧྃ་ཞེས་པས་བསྲུང་བར་བྱེད། །ཧཱུྃ་ཧཱུྃ་ཞེས་པས་གསོད་པར་བྱེད། །ཧུ་ཧུ་ཞེས་པས་མགུ་བར་བྱེད། །ཏྲྃ་ཏྲྃ་ཞེས་པས་བདུག་པར་བྱེད། །གྷུྃ་གྷུྃ་ཞེས་པས་ཕྲེང་བར་བྱེད། །གྃ་གྃ་ཞེས་པས་དྲི་རུ་
བྱེད། །རྃ་རྃ་ཞེས་པས་བརྒྱལ་བར་བྱེད། །དེ་ནས་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་གྱི་འཁོར་ལོའི་ཚོགས་རྣམས་ངོ་མཚར་ཆེར་གྱུར། རྨད་དུ་བྱུང་བ་ཆེན་པོར་གྱུར་ཏེ། རང་གི་སེམས་མགུ་བར་བྱེད་པ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེའི་བདག་པོ་ཀུན་ཏུ་བཟང་པོ་ཆེན་པོ་ལ་ཕྱག་འཚལ་ཏེ་གསོལ་བ་འདེབས་སོ། །གཉིས་མེད་མཆོག་ཏུ་རྨད་བྱུང་བ། །

90-1-239a

བཅོམ་ལྡན་དེ་ཉིད་བཤད་དུ་གསོལ། །གང་གིས་སེམས་ཅན་གྲུབ་པ་འདི། །གསང་བ་སྦས་པ་གྲུབ་པར་འགྱུར། །གར་དང་གླུ་དང་བཞད་པ་ཆེ། །སྒེག་མོ་རོལ་པ་བདེ་བ་མཆོག །སིལ་སྙན་གླིང་བུ་རྣམ་སྣ་ཚོགས། །བརྡབ་དང་
རྒྱུད་རྣམས་རབ་འབྱོར་པ། །གསང་རྒྱུད་ཆོ་གའི་རིམ་པ་རྣམས། །རྫུ་འཕྲུལ་བློ་ཡི་ཆེ་བ་ཆེ། །དངོས་གྲུབ་ཐམས་ཅད་གྲུབ་པ་ཡིས། །སྔགས་རྒྱལ་ཁྱོད་ཀྱིས་བཤད་དུ་གསོལ། །དེ་ནས་བཅོམ་ལྡན་སངས་རྒྱས་རྣམས། །ཐམས་ཅད་བདག་པོ་རྒྱལ་པོ་ཆེ། །
ཐོག་མ་མེད་ནས་སྤྱོད་རྨད་བྱུང་། །སྣ་ཚོགས་ཆེན་པོ་རྣམ་མི་རྟོག །སྣ་ཚོགས་ཡེ་ཤེས་ཡོན་ཏན་ཆེ། །བླ་མེད་ཆོས་ཀུན་དབང་པོ་སྟེ། རིག་དང་སྔགས་ཀྱི་བདག་པོ་ཆེ། །དེ་ཉིད་ཆེན་པོ་སྙིང་པོ་མཆོག །བློ་རྨོངས་ཕྱག་རྒྱ་རྒྱས་འདེབས་ཏེ། །རྒྱས་འདེབས་
རྨོངས་བྱེད་ཟ་བ་པོ། །གཏོང་དང་བྱེད་པ་ཁྱབ་པ་ཆེ། །བསྐྱོད་པ་སྡིག་པ་འཕྲོག་པར་བྱེད། །སྡིག་པའི་ཆོས་རྣམས་སེལ་བར་བྱེད། །དུས་ངན་འདོད་བྱེད་ཁྲོས་པ་པོ། །གཏི་མུག་ཆོས་རྗེས་འདེབས་པར་བྱེད། །ས་དང་བར་སྣང་དེ་བཞིན་བདེ། །དེ་བཞིན་རྣལ་འབྱོར་
པ་ལ་སྦྱིན། །ཚངས་དང་གཏོགས་འདོད་དབང་ཆེན་པོས། །དེ་ལ་ཕྱག་དང་མཆོད་པར་བྱེད། །དེ་ཉིད་སྐྱོང་བྱེད་སྐྱོབ་པ་པོ། །གསང་བའི་གསང་བ་བདེ་བ་ཆེ། །ཟླ་གསང་ཐིག་ལེ་ལས་བྱུང་བའི། །སྦས་པ་ཆེན་པོ་གསང་བ་སྟོན། །ཉིད་ཀྱི་སྐུ་གསུང་
ཐུགས་རྡོ་རྗེ། །བདེ་བ་ཆེན་པོ་འབྱིན་མཛད་དོ། །སྐལ་ལྡན་ཉེ་བར་ལོངས་སྤྱོད་ཀུན། །བུད་མེད་ཐམས་ཅད་དབང་དུ་བྱེད། །རང་འབྱུང་མཚན་དུ་ཐིག་ལེ་སྟེ། །བཅུ་གསུམ་དྲ་བ་དབུ་རུ་ལྡན། །འདི་ཡིས་བུད་མེད་བསྐྱེད་བྱས་ཏེ། །ས་བོན་གྱིས་ནི་རྒྱལ་པོ་
འདུ། །འོད་ཟེར་གཟི་བརྗིད་འབར་བ་ཅན། །རང་ལས་མྱུ་གུར་འདྲ་བ་ཡིས། །འོག་གི་ཕྱོགས་སུ་གཞག་པ་ནི། །ཧྃ་བྱས་མྱུར་དུ་དྲང་བར་བྱ། །དང་པོ་དྲང་བ་གཉིས་དྲང་པས། །ཚེག་དྲག་དེས་ནི་ལྕགས་ཀྱུ་བྱས། །ལྷ་དང་ལྷ་མིན་མཆོག་
གི་བདག །ཁམས་གསུམ་ཐམས་ཅད་དྲང་བར་བྱེད། །འདི་ཡི་ཚུལ་གྱིས་སྦྱོར་བ་ཡིས། །ཕན་ཚུན་དུ་ནི་བསྒྲུབ་བྱས་ནས། །རྨད་བྱུང་རྣམ་པ་སྣ་ཚོགས་ཀྱི། །དངོས་གྲུབ་བྱེད་པ་སྦྱིན་པར་བྱེད། །བདག་ཉིད་རང་བཞིན་མཐོང་བར་བྱ། །

90-1-239b

སྦྱོར་ལྡན་ཟླ་བའི་གཟུགས་ཉིད་དུ། །དེ་སྟེ་ས་བོན་གཞག་པར་བྱ། །དེ་ཉིད་དེ་ཉིད་ཐབས་ཀྱིས་གནས། །སྔགས་ཀྱི་སྦྱོར་བ་རབ་སྦྱོར་བས། །དེ་ནས་སྔགས་མཁན་དེར་འགྲུབ་བོ། །དེ་ཉིད་སྔགས་དང་སྙིང་པོ་དང་། །ཕྱག་རྒྱ་རིག་དང་མི་ལྡན་པས། །སངས་
རྒྱས་རྡོ་རྗེ་སེམས་དཔའ་ཡང་། །འགྲུབ་པ་ཉིད་དུ་ཡོང་མི་འགྱུར། །དེ་ཉིད་ནང་དུ་སྦྱར་བྱས་ན། །སྙིང་པོ་སྙིང་གར་སྦྱོར་བ་ཡིས། །ཕྱག་རྒྱ་ཕྱག་རྒྱས་སྦྱར་བར་བྱ། །སྔགས་དང་སྔགས་ཀྱི་འབྲུ་བསྒོམས་ཏེ། །རིག་མ་རིག་མ་ཉིད་དུ་སྦྱར། །
འདི་ཡིས་མྱུར་དུ་དངོས་གྲུབ་སྟེ། །མགྱོགས་པར་འགྲོ་བ་རབ་ཏུ་འགྲུབ། །སངས་རྒྱས་ཀུན་གྱི་ས་ཆེན་པོར། །འབྱུང་དང་འབྱུང་ལས་འགྱུར་བ་ཉེ། །རྣལ་འབྱོར་འབྱོར་དོན་སྒྲུབ་པ་པོ། །དཔའ་བོ་ཆེན་པོ་འགྲོ་འོང་བྱེད། །དེ་ནས་དེ་བཞིན་
གཤེགས་པ་ཐམས་ཅད་རབ་ཏུ་མགུ་རངས་པར་གྱུར་ཏེ། རྡོ་རྗེའི་དབྱངས་འདི་བསྒྲགས་སོ། །ཀྱེ་མའོ་ཀུན་ཏུ་བཟང་པོ་ཡི། །རྡོ་རྗེའི་ཐེག་པ་བླ་ན་མེད། །བཤད་པ་གསང་བ་ཞེས་བགྱི་བ། །དེ་ཉིད་དོན་དུ་བསྒྲུབ་པ་སྟེ། །སྙིང་པོ་ཕྱག་རྒྱ་དམ་ཚིག་
ནི། །སྔགས་རིག་རང་གི་ལྷ་ཉིད་དེ། །བདག་གི་དེ་ཉིད་ཇི་བཞིན་པ། །གསང་བ་རྒྱལ་བ་མཆོག་གིས་གསུངས། །དཀྱིལ་འཁོར་དང་ནི་དམ་ཚིག་དང་། །གསང་བ་སྦས་པ་དེ་ཉིད་དེ། །འཇིག་རྟེན་གསུམ་གྱིས་འདུད་པའི་རིམ། །དཔའ་བོ་ཆེན་
པོས་རབ་ཏུ་བསྒྲགས། །རྡོ་རྗེ་པད་མ་རྣམ་མཛད་པས། །རིག་མ་དང་ནི་ལྷན་ཅིག་བརྩེན། །གདུག་པ་ཐམས་ཅད་མཉེ་བྱ་དང་། །དམ་ལ་ཞེ་སྡང་བཟའ་བ་དང་། །སློབ་དཔོན་སྨོད་ལ་བསྒྲལ་བ་དང་། །གཟུངས་མའི་བདག་པོར་བསྒྲུབ་པོ་དང་། །
སངས་རྒྱས་ཐམས་ཅད་བསྐྱེད་བྱ་དང་། །རབ་དགྱེས་བདག་ཉིད་བསྐུལ་བ་དང་། །སྡིག་པ་ཐམས་ཅད་སྦྱང་བ་དང་། །བུད་མེད་ཐམས་ཅད་འདོད་བྱ་དང་། །བདུད་རྣམས་ཐམས་ཅད་དྲང་བྱ་དང་། །རྡོ་རྗེ་ཀུན་དུ་གཞུག་བྱ་དང་། །པད་མའི་གནས་
ནི་དགང་བྱ་དང་། །བསྒྲུབ་དང་ཉེ་བར་བསྒྲུབ་པ་དང་། །ཤིན་དུ་སྦྱོར་དང་སྦྱོར་ཆེ་བ། །སྦྱོར་བ་རབ་སྦྱོར་སྦྱོར་སྐྱེ་བ། །དེ་རྣམས་དེ་ཉིད་མཁྱེན་པ་པོ། །བདེ་བ་ཆེན་པོ་ཉིད་ཀྱིས་གསུངས། །བསྒྲུབ་པ་ཡི་ནི་སྦྱོར་ཆེ་བ། །སྦྱོར་དང་སྦྱོར་

90-1-240a

མར་ཡང་དག་སྦྱོར། །དེ་ཉིད་གསལ་བར་སེམས་དཔའ་ཆེ། །ཕན་པར་དགོངས་པ་ཉིད་ཀྱིས་གསུངས། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་གསོལ་བའི་མདོ་རྗེས་སུ་དྲིས་པ། རང་གི་ཐུགས་ལ་བཞག་སྟེ། 
ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་བ། །སངས་རྒྱས་ཀུན་གྱི་དམ་ཚིག་ནི། །ཀུན་དུ་སྦྱོར་བ་མཉམ་པར་ལྡན། །དེ་ཉིད་ཕྱག་རྒྱ་ཆེན་པོ་སྟེ། །ཡེ་ཤེས་ལྔ་ཡིས་རྗེས་སུ་བསྐྱེད། །དཀྱིལ་འཁོར་ཕྱག་རྒྱ་བཞི་པ་སྟེ། །ཕྱག་རྒྱ་ཆེན་པོས་རྗེས་སུ་
བསྒྲུབས། །རྡོ་རྗེ་སེམས་དཔའ་བསྐྱེད་མཛད་དེ། །ཀྱེ་མའོ་བདེ་བ་རྣམ་པར་འབྱུང་། །སྙིང་པོ་ཡེ་ཤེས་ཤེས་བྱ་སྟེ། །ཡེ་ཤེས་བཞི་དང་ཡང་དག་ལྡན། །ཕྱག་རྒྱ་ཡེ་ཤེས་ཕྱག་རྒྱ་ཆེ། །དམ་ཚིག་མཆོག་ནི་རིག་མའོ། །སྔགས་ཀྱི་ཡི་གེ་
ཚུལ་འདྲ་བ། །ཡི་གེའི་ཕྱག་རྒྱ་དོན་ཆེན་སྦྱིན། །འདི་ཡིས་བསྒྲུབ་པ་བྱས་པའི་གཟུངས། །བདག་གི་དེ་ཉིད་ལྷ་དེ་ཉིད། །དེ་དག་དེ་ཉིད་ཅི་བཞིན་པར། །ང་ཡིས་གསང་བ་རབ་ཏུ་བསྒྲགས། །དམ་ཚིག་མ་ཡིན་མི་ཤེས་ལ། །སྔགས་རིག་པས་ནི་བསྟན་
མི་བྱ། །ཕྱག་རྒྱ་ཐམས་ཅད་གསང་བྱ་སྟེ། །དམ་ཚིག་རྒྱས་འདེབས་གསང་བ་ཡིན། །དེ་ཉིད་ལྷ་ཡི་སྦྱོར་བ་ནི། །གསང་བ་གསང་བ་རབ་ཏུ་བསྒྲུབ། །རྡོ་རྗེ་པད་མ་རྣམ་མཛད་པས། །རོལ་པ་ཕྱི་ནང་སྦྱོར་བ་ཡིས། །རིག་དང་ལྷན་ཅིག་བརྩེན་བྱ་
བ། །སྤྲོད་པ་དང་ནི་འཁྱུད་པ་དང་། །དེ་བཞིན་མཆུ་ནི་སོ་ཡིས་གཟུང་། །རྡོ་རྗེ་བསྟན་པ་གཞུག་པར་བྱ། །གཡས་དང་གཡོན་གྱི་ཚུལ་གྱིས་ནི། །བསྐྱོད་ཅིང་རྣམ་པར་གར་བྱའོ། །གདུག་པ་ཐམས་ཅད་མཉེ་བྱ་སྟེ། །ནུ་མ་མཆན་ཁུང་ཁུར་ཚོས་
གཉིས། །འགྲམ་པ་དང་ནི་བརླ་གཉིས་རྒྱབ། །རྐང་པ་ལག་པ་འཇམ་པོ་གཉིས། །མཉེ་བའི་སྦྱོར་བ་འདི་ཡིས་ནི། །མཛའ་བ་ཆེན་པོ་དེ་འགྲུབ་བོ། །འདོད་པའི་དོན་གྱི་བར་གཅོད་དང་། །དམ་ལ་ཞེ་སྡང་བཟའ་བ་དང་། །ཞེ་སྡང་
ཅན་གྱིས་ཟོས་འགྱུར་བ། །ཁྱད་པར་གཞན་དང་གཞན་ཡང་བཟའ། །རྟག་པར་མི་ཕྱོགས་སྨྲ་བ་དང་། །བླ་མ་སྨོད་རྣམས་བསྒྲལ་བར་བྱ། །ཤ་དང་ཁྲག་དང་གླད་པ་རྣམས། །དྲངས་ཏེ་ཚོགས་ཀྱི་མཆོད་པར་བྱ། །འདི་ནི་གསང་བ་དྲག་

90-1-240b

པོ་སྟེ། །རྡོ་རྗེ་སློབ་དཔོན་སྨོད་པ་དང་། །བླ་མ་སྨོད་བྱེད་བརྩོན་པ་ལ། །དམ་ཚིག་ཕྱིར་ནི་བསྒྲུབ་པར་བྱ། །གཏི་མུག་དེ་ནི་འགྲུབ་མི་འགྱུར། །སྡུག་བསྔལ་བ་ཡང་འཐོབ་འགྱུར་ཏེ། །ཐམས་ཅད་ནད་དང་ཁྲོས་ཆེན་དང་། །
འཇིགས་བྱེད་ཉེ་བར་འཚེ་བ་ཡིས། །བསྐལ་པ་གྲངས་མེད་བྱེ་བ་རུ། །སྡུག་བསྔལ་ཆེན་པོ་བསྟེན་བྱེད་ཅིང་། །འོ་དོད་འབོད་པར་སྦྲུལ་གྱི་བདག །སྟིར་མེད་ཆེན་པོ་བརླག་པར་འགྲོ། །ལུས་ངག་སེམས་ནི་བདེ་དམ་པ། །རིག་མ་
ཀུན་ལ་བསྐྱོད་བྱས་ཏེ། །བྱང་ཆུབ་ཆེན་པོ་བདེ་བ་ཡིས། །ཚུལ་བཞིན་དུ་ནི་བསྔགས་པར་བྱ། །བསྐུལ་བའི་སྙིང་པོ་འདི་སྨྲས་ཏེ། །ཛཿཞེས་སྐད་ཅིག་སྐད་ཅིག་དུ། །རང་གི་གནས་ནས་གནས་པ་ཡིས། །དེ་ཉིད་ལྷ་ནི་བསྐྱོད་པར་བྱ། །བཅུ་
དྲུག་ཆ་དང་ཡང་དག་ལྡན། །ཟླ་བ་གསང་བའི་ཐིག་ལེ་ལ། །མེ་ཏོག་དང་ནི་འདྲ་བ་ཉིད། །རླུང་གིས་ཕུལ་བ་བསྐྱོད་པར་བྱ། །དེ་ནི་བསྐྱོད་པས་འགྲུབ་པ་སྟེ། །དེ་བཞིན་དུ་ཡང་བསྐུལ་བར་བྱ། །རྒྱུན་གྱི་ཕྲེང་ནི་འོད་གསལ་
བཞིན། །བློ་ལྡན་རྟག་ཏུ་བསྒྲུབ་པར་བྱ། །བདུད་རྣམས་ཐམས་ཅད་འདྲེན་པ་ནི། །ལྷ་མོ་རྣམས་ནི་སྙིང་པོར་བཤད། །ཞགས་པའི་ཚུལ་གྱིས་གཞུག་པ་དང་། །དེ་བཞིན་དགང་བ་བཅིང་བའོ། །བསྒྲུབ་པ་ལྷ་ཡི་སྦྱོར་བ་སྟེ། །
རྗེས་སུ་བསྒྲུབ་པ་ལྷ་མོའི་དོན། །བསྒྲུབ་པ་ཆེན་པོ་གཉི་གའི་རྒྱ། །མཉམ་པར་སྦྱོར་བ་རྡོ་རྗེའི་མཆོག །ཉེ་བར་སྒྲུབ་པ་གཉི་ཀ་གནས། །ཤིན་དུ་བསྒྲུབ་པ་བདེ་དམ་པ། །སོ་ཡི་རྩེ་མོས་མཆུ་བཟུང་སྟེ། །མ་མཆུ་མཆོག་
ནི་བསྡམ་པར་བྱ། །སྦྱོར་བ་རབ་སྦྱོར་སྐལ་ལྡན་པའི། །རབ་དགྱེས་རོ་མྱང་བདེ་དམ་པ། །ལྷ་དང་ལྷ་ཉིད་ཡང་དག་སྦྱོར། །འདི་ནི་གཉིས་སུ་མེད་ཅེས་བྱ། །སྙིང་པོ་ཕྱག་རྒྱ་སྔགས་རིག་གིས། །ཉིད་ཀྱི་གཟུགས་ནི་བསྒྲུབ་བྱ་སྟེ། །བདག་ནི་
སེམས་དཔའོ་ཞེས་བསམས་ན། །འདི་ནི་གཉིས་མེད་མྱུར་དུ་འགྱུར། །གཟུགས་དང་སྒྲ་ལ་སོགས་པའི་ལྷའི། །དངོས་གྲུབ་ཐམས་ཅད་བསྒྲུབ་པར་བྱ། །སྦྱོར་དང་རབ་སྦྱོར་སྦྱོར་ཆེ་བ། །རྒྱལ་བ་ཀུན་གྱི་མཆོག་གིས་གསུངས། །བཅོམ་ལྡན་རྡོ་རྗེ་སྦྱོར་བ་

90-1-241a

སྟེ། །རབ་ཏུ་སྦྱོར་བ་མཁའ་ལ་འགྲོ། །ཕྱག་རྒྱ་དེ་དང་རབ་སྦྱོར་བ། །སྦྱོར་བ་ཆེན་པོ་བསྒྲགས་པ་ཡིན། །འདི་ཡིས་དཔའ་བོ་ཐམས་ཅད་དང་། །སངས་རྒྱས་ཀུན་དང་མཉམ་སྦྱོར་བ། །སྦྱོར་བའི་དབང་པོ་བདེ་བ་ཆེ། །ཚེ་འདི་ཉིད་ལ་འཐོབ་པར་འགྱུར། །
ཕྱག་རྒྱ་འདི་ཡིས་རྒྱས་བཏབ་ན། །རྡོ་རྗེའི་བདག་པོ་ཆེན་པོར་འགྱུར། །མཉམ་པར་སྦྱོར་བ་སྦྱར་བ་ཡིས། །འཇིག་རྟེན་གསུམ་པོ་མྱུར་དུ་རྒྱལ། །ཡང་དག་སྦྱོར་བ་སྦྱར་ཚུལ་གྱིས། །དྲངས་ཏེ་རབ་ཏུ་བཅུག་ནས་ཀྱང་། །རྡོ་རྗེ་བརྟན་པོས་བསྐུལ་བྱས་ཏེ། །ཤིན་
དུ་འདོད་པས་འདོད་པ་བསྐྱེད། །མཁའ་འགྲོ་ཐམས་ཅད་ཐབས་མཁས་ལྡན། །རྒྱས་དང་དེ་བཞིན་ཟག་པར་བྱ། །འདི་ནི་ཡང་དག་སྦྱོར་བ་སྦས། །སྦས་པ་རྣལ་བྱོར་མ་དཀྱིལ་ལོ། །འདི་ཡིས་ཡང་དག་དངོས་གྲུབ་བླང་། །རྫུ་འཕྲུལ་ཆེན་པོ་འབྲས་བུ་འཐོབ། །
སངས་རྒྱས་བྱང་ཆུབ་བདེ་ཆེ་དང་། །བྱང་ཆུབ་མཆོག་རབ་ཡང་དག་འཐོབ། །གསང་བ་ཆེན་པོ་རྨད་འབྱུང་བ། །དེ་དག་དེ་ཉིད་སྦས་པ་ཆེ། །སངས་རྒྱས་རྣམས་ཀྱིས་དྲིས་པའི་རྒྱ། །ང་ཡིས་ཡང་དག་རབ་ཏུ་བསྟན། །གང་གིས་ཡང་དག་ལྡན་མཐོང་
དང་། །བདག་པོ་ཆེན་པོ་མཆོད་བྱེད་ན། །དེ་ཡིས་སྟོན་པ་ཀུན་མཐོང་སྟེ། །རྒྱལ་བ་མཆོག་ལ་མཆོད་པར་འགྱུར། །སྲིད་པ་གཅོད་པ་པོར་འགྱུར་ཏེ། །འགྲོ་བའི་སྟོན་པ་མཆོག་ཏུ་འགྱུར། །དེ་ལ་ལྷ་ཀུན་མཆོད་བྱེད་ཅིང་། །སྐད་ཅིག་སྐད་ཅིག་
ཕྱག་ཀྱང་བྱེད། །ཇི་ལྟར་སྟོན་པ་རྫོགས་སངས་རྒྱས། །ཕན་བྱེད་འཇིག་རྟེན་སྐྱེས་གྱུར་པ། །སྣ་ཚོགས་ཡེ་ཤེས་རྗེས་བསྡུས་པས། །རྣལ་འབྱོར་ཆེན་པོར་དེ་བཞིན་འགྱུར། །རང་གིས་དམ་ཚིག་བསྲུངས་པ་ཡིས། །རྡོ་རྗེ་སེམས་དཔའ་བདེ་སྐྱེ་བ། །
རྡོ་རྗེ་སེམས་དཔའི་སྦྱོར་ལྡན་པས། །དངོས་གྲུབ་ཆེན་པོ་དེས་འཐོབ་བོ། །རྡོ་རྗེ་སེམས་དཔའི་མཚན་བཏབ་ལ། །ཅུང་ཟད་མི་འགྲུབ་ཡོད་མེད་དེ། །ཕྱག་རྒྱ་ཀུན་གྱི་བདེ་བ་ཆེ། །བདག་ཉིད་སོ་སོར་རྗེས་སུ་འགྲུབ། །རབ་དགྱེས་མཚན་དང་མཛའ་
ཆེན་མོ། །རོ་དང་རེག་པའི་ཆེ་བའི་ཆེ། །རྡོ་རྗེ་སེམས་དཔའ་སྦྱོར་བ་ཡིས། །དཔྱད་མི་དགོས་པར་འགྲུབ་པར་འགྱུར། །དེ་ནས་དེ་དག་མགུ་འགྱུར་ཏེ། །རྡོ་རྗེ་སེམས་དཔའ་བདེ་ཆེ་བ། །སྦྱོར་བ་འདོད་པའི་གཟིར་བ་ཡིས། །སྦྱོར་བ་ཆེན་པོས་མཉེས་

90-1-241b

པར་མཛད། །ར་མ་ར་མ་ས་མ་ཧོ་མ་ཧཱ་ས་ཏྭ། །རབ་དགྱེས་གདོན་མི་ཟ་ལ་བཞུགས། །སངས་རྒྱས་ཀུན་དང་མཉམ་སྦྱོར་བ། །ཟླ་གསང་ཐིག་ལེར་ཡང་དག་ལྡན། །བདག་ཅག་ཀུན་ཀྱང་དམ་ཚིག་སྟེ། །སྐལ་ལྡན་དྲི་མེད་རབ་དགྱེས་
ཀྱི། །རྣལ་འབྱོར་མ་སྙིང་མཆོག་ཉིད་དུ། །སྦྱོར་བ་ཉིད་ཀྱིས་རོལ་པ་མཛོད། །ཐེག་པ་ཆེན་པོ་བདེ་ཆེ་ཡི། །པད་མ་རྡོ་རྗེ་རིན་ཆེན་གྱིས། །རྣལ་འབྱོར་མ་ཀུན་དཀྱིལ་འཁོར་དུ། །རབ་དགྱེས་ལོངས་སྤྱོད་ཉིད་བསྟེན་མཛོད། །
བདག་ཅག་ཐམས་ཅད་ཉེས་བྲལ་ཏེ། །གནོད་མེད་དེ་ནི་གསེར་དང་འདྲ། །དེ་ཉིད་ཐམས་ཅད་གྲུབ་ཆེན་པོ། །རབ་དགྱེས་བདག་ཉིད་ཉིད་བསྟེན་མཛོད། །སྤྲོད་པ་འཁྱུད་པ་སྦས་པ་དང་། །གཞུག་པ་དང་ནི་གཏོང་བའི་མཆོག །
འདི་ནི་སྒྱུ་མའི་བརྟན་པ་ཡིས། །དེད་དཔོན་རབ་ཏུ་བརྟག་པ་མཛོད། །དེ་ནས་བཅོམ་ལྡན་འདས་བདེ་བ་ཆེན་པོ་ཀུན་དུ་བཟང་པོས་འདོད་པ་ཐམས་ཅད་ཉེ་བར་ལོངས་སྤྱོད་པའི་རྣམ་པར་རྒྱལ་བའི་དཔལ་ཞེས་བྱ་བའི་ཆོས་ཐམས་ཅད་མཉམ་པ་
ཉིད་ཀྱི་སྦས་པ་ཆེན་པོའི་ཏིང་ངེ་འཛིན་ལ་སྙོམས་པར་ཞུགས་ཏེ། རྣལ་འབྱོར་མ་ཐམས་ཅད་ཀྱི་ཤིན་ཏུ་དགྱེས་པ་ཆེན་པོའི་ཀུན་དུ་འཁྱུད་པ་དང་། སྤྲོད་པ་དང་། གཞུག་པ་དང་། འདྲེན་པ་དང་། རབ་ཏུ་བསྐུལ་བ་དང་། མཉེ་
བ་དང་། ཐིགས་པ་དང་། ཚོར་བར་བྱ་བ་དང་། བསྐྱོད་པ་དང་། ཀུན་ཏུ་བསྐྱོད་པ་དང་། བཅིང་བའི་རྡོ་རྗེ་དང་། པད་མ་ཆེན་མོ་མཉམ་དུ་སྦྱོར་བ་ལ་ཡང་དག་པར་ཞུགས་ཏེ། ཤིན་ཏུ་དགྱེས་པའི་བདེ་བ་ཆེན་པོས། 
བདེ་བས་ཀུན་ཏུ་རྒྱས་པར་མཛད་ཅིང་། དེ་བཞིན་གཤེགས་པ་ཐམས་ཅད་དང་། གཟུངས་མའི་ཚོགས་ཐམས་ཅད་ལ། བསྐྱོད་པ་དང་། རབ་ཏུ་དགྱེས་པ་དང་། རབ་ཏུ་རྣམ་པར་
འབྱིན་ཅིང་ཤིན་ཏུ་དགྱེས་པ་ཆེན་པོའི། །བདེ་བའི་མཉམ་པ་ཉིད་ཀྱི་ཚོགས་ཀྱིས་ནམ་

90-1-242a

མཁའི་དབྱིངས་ཐམས་ཅད་ཀུན་དུ་རྒྱས་པར་བྱས་ཏེ་གནས་སོ། །དེ་ནས་རྣལ་འབྱོར་མ་ཆེན་པོ་ཤིན་ཏུ་དགྱེས་པའི་བདག་ཉིད་ཆེན་པོ་དེ་དག་ཉིད་མགུ་ཞིང་བདེ་བར་གྱུར་ཏེ། ཀྱེ་མའོ་བདེ་བ་བདེ་བ་ཆེ། །རྫོགས་སངས་
རྒྱས་ནི་མགུ་བ་ཆེ། །བདེ་བ་ཆེན་པོ་རངས་པར་འགྱུར། །ཀྱེ་མའོ་བདེ་བ་བདེ་བ་ཆེ། །བདེ་བ་ཉིད་ཀྱིས་ཕྱག་བྱེད་དེ། བྱང་ཆུབ་སེམས་དཔའ་སེམས་ཆེན་པོ། །མགུ་བ་ཆེན་པོའི་བདེ་དང་ལྡན། །ཀྱེ་མའོ་བདེ་བ་བདེ་བ་
ཆེ། །འཇིགས་ཤིང་སྐྲག་པས་སྡུག་པར་བྱེད། །ཁྲོས་པ་ཆེན་པོ་མཁའ་འགྲོ་མ། །རབ་ཏུ་མི་བཟད་དུག་དང་འདྲ། །བདེ་བྱེད་ཆེན་པོའི་རོལ་པ་ཡིས། །བདེ་བྱེད་ཆེ་ལ་མཆོད་པར་བྱེད། །སྐལ་བ་ཆེན་པོ་སྲིན་མོ་
དང་། །བདེ་བྱེད་བདེ་བས་རབ་རྨོངས་པ། །མཆོད་པའི་སྤྲིན་ཕུང་བདེ་ལྡན་པའི། །རྒྱ་ཆེན་མཆོག་གིས་མཆོད་པར་བྱེད། །དྲག་མོ་ཆེན་མོ་མ་ལྟ་བུ། །རབ་ཏུ་གཏུམ་པ་མེ་འདྲ་བ། །འོངས་ནས་བདེ་བྱེད་ཆེན་མོ་ཡིས། །
གཙོ་བོ་མཆོག་ལ་མཆོད་པར་བྱེད། །ལྷ་དང་ལྷ་མོ་ཐམས་ཅད་ཀྱང་། །ཀླུ་མོ་དང་ནི་རྟ་གདོང་ཡང་། །འོངས་ནས་བདེ་བ་སྦྱོར་བ་ཡིས། །ཡིད་དུ་འོང་བས་མཆོད་པར་བྱེད། །དེ་ནས་དབང་པོ་ལྷ་ཆེན་པོ། །བདག་ཉིད་ཆེན་པོ་ལྷ་ཡི་ལྷ། །
ཀྱེ་མའོ་བདེ་བ་སྣ་ཚོགས་ཉིད། །སྣ་ཚོགས་སྦྱོར་བ་བདེ་བ་ཆེ། །མགུ་ཞིང་རབ་ཏུ་རངས་པ་ཡིས། །ལྷ་ཡི་ལྷ་ནི་སྔོན་དུ་འགྲོ། །དཔའ་བོ་བདེ་ལ་ཕྱག་བྱས་ཏེ། །ཀྱེ་མའོ་བདེ་བ་བདེ་བ་ཆེ། །རང་གི་བདེ་བས་མངོན་མཆོད་ཅིང་། །
འཇིགས་ཤིང་སྐྲག་པས་མཉེས་པར་བྱེད། །ཚད་མེད་རངས་པ་བཞད་པ་ཆེ། །གླུ་གར་མཆོག་ཏུ་ལྡན་པ་དང་། །བཟའ་དང་བཅའ་བ་ཤ་ཆེན་དང་། །སིལ་སྙན་ཕྲེང་བ་རོ་ཆེན་དང་། །གླིང་བུ་རྒྱུད་མངས་རྫ་རྔ་དང་། །པི་བང་པལ་ཀིག་
ཧ་ལ་ལེ། །སྟག་དང་དཔའ་བོ་འཇིགས་པ་དང་། །ཞི་དང་རྨད་འབྱུང་འཇིགས་བྱེད་དང་། །བདག་དང་ཁྲོས་དང་སྤྱན་རྒྱས་པས། །སྐད་ཅིག་སྐད་ཅིག་མཆོད་བྱེད་ཅིང་། །བྱེད་པ་དང་ནི་བཟློག་པ་དང་། །འཕྲོག་པ་དང་ནི་གཞུག་པ་དང་། །སིད་ཅེས་དང་ཧཱུྃ་ཧཱུྃ་

90-1-242b

དང་། །ཧ་ཧ་ཞེས་པས་མཉེས་བྱེད་ཅིང་། །རབ་དགྱེས་བདག་ཉིད་བདེ་བ་ཡི། །རང་གི་ཆུང་མས་མཉེས་པར་བྱེད། །དེ་ནས་བཅོམ་ལྡན་འདས་ཀུན་ཏུ་བཟང་པོ་ཆེན་པོ་རབ་ཏུ་དགྱེས་པ་བདེ་བ་ཆེན་པོས། ནམ་མཁའ་དང་ནམ་མཁའི་སྐབས་ཐམས་
ཅད་ལ་གནས་པའི་སངས་རྒྱས་ཐམས་ཅད་དང་བྱང་ཆུབ་སེམས་དཔའ་དང་། རང་རྒྱལ་དང་ཉན་ཐོས་དང་། རང་བཞིན་གྱིས་འགག་པ་དང་། ངོ་བོ་ཉིད་མེད་པའི་ཆོས་ཉིད་ཀྱི་ཡེ་ཤེས། ལ་གནས་པ་རྣམས་ཤིན་ཏུ་དགྱེས་པ་ཆེན་པོའི་
བདེ་བའི་ཐབས་དང་། ཤེས་རབ་ཀྱི་བདེ་བས་བསྐུག་སྟེ་དབང་བསྐུར་ནས། ཤིན་ཏུ་དགྱེས་པ་ཆེན་པོའི་བདེ་བའི་ཏིང་ངེ་འཛིན་ལ་ཡང་དག་པར་འཇོག་པ་དང་། ཤིན་དུ་དགྱེས་པ་ཆེན་པོའི་བདེ་བའི་ཆོས་ཉིད་ཀྱི་རྒྱལ་པོ་རྗེས་སུ་སྐྱོང་ཞིང་
མི་མཉམ་པ་དང་མཉམ་པ། ནམ་མཁའ་དང་མཉམ་པའི་འཇིག་རྟེན་གྱི་ཁམས་ཆེན་པོ་མ་ལུས་པའི་སེམས་ཅན་གྱི་ཁམས་རྣམས་སུ་རབ་ཏུ་གཟིགས་པས་གཟིགས་ནས། འཇིག་རྟེན་དང་། ལྷར་བཅས་པ་རྣམས་ལ་བདེ་བ་ཆེན་པོས་
ཁྱབ་པར་མཛད་དོ། །སེམས་ཅན་དང་རིགས་ཐམས་ཅད་དང་། གནས་ཐམས་ཅད་དང་། སྤྱོད་པ་དང་མི་སྤྱོད་པར་བཅས་པ་དང་། འབྱུང་བ་དང་། འབྱུང་བ་ལས་གྱུར་པ་དང་། སའི་འོག་དང་། ཕུང་པོ་དང་། ཁམས་དང་། སྐྱེ་མཆེད་དང་། 
བསགས་པའི་དབང་པོ་ལྔ་དང་། རྣམ་པར་ཤེས་པ་དང་། ཤེས་བྱ་དང་། བདག་དང་། བདག་གི་དང་། སྣ་ཚོགས་དང་། སྣ་ཚོགས་མ་ཡིན་པ་དང་། བུས་པ་དང་། རྒན་པོ་དང་། གཞོན་ནུ་དང་། བུད་མེད་དང་། སྐྱེས་
པ་དང་། སྐྱེས་པ་མ་ཡིན་པ་དང་། སྲོག་དང་། རབ་ཏུ་ཟད་པ་དང་། འཇིགས་པ་དང་། མི་འཇིགས་པ་དང་། མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། ཤེས་པ་དང་། མི་ཤེས་པ་དང་། 
ཤེས་རབ་དང་། ཐབས་དང་། ཁྱབ་པ་དང་། ཁྱབ་བྱེད་དང་། ཟླ་བ་དང་། དབང་ཆེན་དང་། ཉི་མ་དང་། མེ་དང་། གཤིན་རྗེ་དང་། ཆུ་བདག་དང་། ལུས་སྲུལ་པོ་དང་། ཚངས་པ་དང་། གཏོགས་འདོད་དང་དབང་ཕྱུགས་

90-1-243a

ཆེན་པོ་དང་། ལྷ་མོ་དང་། སྐལ་བ་དང་ལྡན་པ་དང་། སྐལ་བ་དང་མི་ལྡན་པ་དང་། དངོས་པོ་དང་། དངོས་པོ་མེད་པ་དང་། མཚན་དང་། རྡོ་རྗེ་དང་། པད་མ་དང་། རིན་པོ་ཆེ་དང་། རལ་གྲི་དང་། ཐོ་བ་དང་། 
དབྱིག་པ་དང་། རྩེ་གསུམ་པ་དང་། འཁོར་ལོ་དང་། སྦྱོར་བ་དང་། རབ་ཏུ་སྦྱོར་བ་དང་། སྟོང་པ་དང་། སྟོང་པ་ཆེན་པོ་དང་། མཆོག་ཏུ་སྟོང་པ་དང་། ཤིན་ཏུ་སྟོང་པ་དང་། སྟོང་པ་རབ་ཏུ་སྟོང་པ་དང་། བྱང་ཆུབ་དང་། 
བྱང་ཆུབ་ཀྱི་སེམས་དང་། ཡི་གེ་དང་། ཡི་གེ་མེད་པ་དང་། དྲ་བ་དང་། ལྕུག་མ་དང་། ཆ་དང་། ཆ་མེད་པ་དང་། ཐིག་ལེ་དང་། རོ་དང་། རོ་ཆེན་པོ་དང་། ཡིད་ལ་བྱེད་པ་མེད་པ་དང་། རྟག་པ་དང་། ཞི་བ་དང་། མི་ཟད་པ་དང་། 
ཐར་པ་དང་། ཐར་བྱེད་དང་། གྲོལ་བ་དང་། རིགས་པ་དང་། ཉོན་མོངས་པ་མེད་པ་དང་། ནམ་མཁའ་དང་། སྐབས་དང་། སྐབས་མེད་པ་རྣམས་ལ་གཅིག་ཏུ་སྟུག་པོར་གྱུར་ཏེ། རྣམ་པར་ཕྱེ་ནས་མི་སྣང་བའི་ཚུལ་དུ་
གནས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་བཙུན་མོ་ཤེས་རབ་ཀྱི་ཕ་རོལ་ཏུ་ཕྱིན་མ་དང་། ཐབས་ཀྱི་ཕ་རོལ་ཏུ་ཕྱིན་མ་དང་། སྨོན་ལམ་གྱི་ཕ་རོལ་ཏུ་ཕྱིན་མ་དང་། རྡོ་རྗེའི་ཕ་རོལ་ཏུ་ཕྱིན་མ་
རྣམས་ཀྱིས། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཤིན་དུ་དགྱེས་པ་རྡོ་རྗེ་གདོན་མི་ཟ་བ་ཆེན་པོ་གསང་བ་ཆེན་པོའི་དགོངས་པ་ངེས་པར་འགྲེལ་པ་ཆེན་པོ་ལ་ཕྱག་མཛད་དེ། མངོན་
སུམ་དུ་ཡང་དག་པར་བསྐུལ་ནས་དྲིས་པ། སུ་ར་ཏ་སྟྭྃ་མ་སི་ཧོ། །གང་ཕྱིར་འདོད་པ་བདེ་བ་ཆེ། །གང་གིས་འདོད་ལས་བྱང་ཆུབ་འགྱུར། །འདོད་ཆགས་བྲལ་བ་ཇི་ལྟར་བདེ། །གང་གིས་ཞེ་སྡང་རྡོ་རྗེ་ཆེ། །གང་
གིས་གཏི་མུག་རྒྱལ་བ་ཆེ། །གང་གིས་འདོད་ཆགས་པད་མར་འགྱུར། །གང་གིས་ང་རྒྱལ་ནམ་མཁའི་བདག །གང་གིས་ཕྲག་དོག་གདོན་མི་ཟ། །བྱང་ཆུབ་སེམས་ནི་ཇི་ལྟར་བདེ། །གང་གིས་བདེ་བྱེད་མཆོད་པར་

90-1-243b

འགྱུར། །མཆོད་པ་ཡིས་ནི་ཇི་ལྟར་འགྲུབ། །ཇི་ལྟར་གཟུངས་དང་མཉམ་སྦྱོར་བས། །ཡི་གེ་མཆོག་ནི་འགྲུབ་པར་འགྱུར། །ཇི་ལྟར་འདོད་པའི་ཡོན་ཏན་ལྔ། །བསྙན་པ་ཡིས་ནི་མྱུར་དུ་འགྲུབ། །ཇི་ལྟར་གསང་བ་མཉམ་
སྦྱོར་བས། །རྨད་དུ་བྱུང་བའི་དབང་བསྐུར་འགྱུར། །ཇི་ལྟར་པད་མ་མཉམ་སྦྱོར་བས། །དཀྱིལ་འཁོར་རབ་ཏུ་ཞུགས་པར་འགྱུར། །ཇི་ལྟར་དྲི་ཆུ་བྱང་ཆུབ་དང་། །ཁྲག་དང་སྣང་མཛད་ཆེན་པོ་ཡིས། །དམ་
ཚིག་ཉིད་དུ་ཇི་ལྟར་འགྱུར། །ཇི་ལྟར་བཏུང་བ་རབ་ཏུ་བརྟག །དེ་ནས་བཅོམ་ལྡན་འདས་ཤིན་ཏུ་དགྱེས་པ་ཆེན་པོའི་བདག་པོ་ཀུན་དུ་བཟང་པོ་ཆེན་པོས། རྡོ་རྗེ་ཕ་རོལ་ཏུ་ཕྱིན་མའི་གསང་བ་ཆེན་མོ་དེ་དག་ཐམས་ཅད་ལ་
རང་གི་བདེ་བས་མཉེས་པར་བྱས་ཏེ། མི་མཉམ་པ་དང་མཉམ་པའི་སྦས་པ་ཆེན་པོ་ཤིན་དུ་སྦས་པ། མཆོག་ཏུ་གསང་བའི་དྲིས་ལན་ཆེན་པོ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་ཕྱུང་ངོ་། །ངན་སོང་གསུམ་གྱི་འཇིག་
བྱེད་དུ། །སེམས་ཅན་ཉོན་མོངས་སྡང་བྱས་པས། །དེ་ཕྱིར་ང་ནི་རྡོ་རྗེ་ཆེ། །ཞེ་སྡང་ཞེས་ནི་བསྒྲགས་པ་ཡིན། །ངན་སོང་འཇིགས་པ་ཆེན་པོ་རུ། །སེམས་ཅན་ཐམས་ཅད་རྨོངས་བྱེད་པས། །དེ་ཕྱིར་འདི་ནི་གཏི་མུག་
སྟེ། །རྟག་པ་ཐུབ་པ་མཆོག་ཡིན་ནོ། །ཐབས་དང་ཤེས་རབ་ཚུལ་ཉིད་ཀྱིས། །འགྲོ་བ་ཐམས་ཅད་དགའ་བྱེད་ཅིང་། །པད་མའི་ཚུལ་དུ་རབ་རྟོགས་ཕྱིར། །དེ་ཕྱིར་འདོད་ཆགས་ཞེས་བྱའོ། །བདེ་ཆེན་སྦྱིན་པའི་སྤྲིན་
གྱིས་ནི། །སེམས་ཅན་ཐམས་ཅད་ང་རྒྱལ་བསྐྱེད། །ནམ་མཁའི་བདེ་བ་བསྡུས་པའི་ཕྱིར། །དེ་ཕྱིར་མཁའ་ཆེན་ང་རྒྱལ་ཡིན། །རོ་ལ་སོགས་པས་མཉམ་སྦྱོར་བས། །ཕྲག་དོག་རྡོ་རྗེ་གདོན་མི་ཟ། །སྣ་ཚོགས་
པད་མ་རབ་འཇུག་ཕྱིར། །དེ་ཡི་ཕྱིར་ནི་སྣ་ཚོགས་ཆེ། །འདོད་ཆགས་བྲལ་བ་དགའ་མེད་ཕྱིར། །བདག་ནི་རབ་དགྱེས་སྦས་པ་ཆེ། །འདོད་པ་མ་གཏོགས་བདེ་བྱེད་མེད། །བདེ་ཆེ་འདོད་པ་ང་ཡིན་ནོ། །འདོད་ཆགས་

90-1-244a

མེད་པར་བྱང་ཆུབ་མེད། །བྱང་ཆུབ་མེད་ནའང་འདོད་ཆགས་མེད། །སྡིག་པའི་ནང་ན་ཆགས་བྲལ་ཏེ། །སངས་རྒྱས་བདེ་མཆོག་མཉེས་བྱེད་པས། །འདོད་ཆགས་འདོད་ལས་བདེ་བྱེད་ཀྱི། །བདེ་བ་མཆོག་
ཏུ་རྨད་འབྱུང་འགྱུར། །བྱང་ཆུབ་སེམས་མེད་བདེ་བྱེད་གཞན། །འཇིག་རྟེན་གསུམ་པོ་འདིར་མེད་དོ། །ཐམས་ཅད་བྱང་ཆུབ་སེམས་ངོ་བོ། །བདེ་བ་ཀུན་གྱིས་ཚིམ་པར་འགྱུར། །བོ་ཞེས་པ་ནི་རྡོ་རྗེར་བཤད། །དྷི་ཞེས་པ་ནི་གཟུངས་
མའི་མཆོག །ཙི་ཏ་ཞེས་པ་ནི་ཟག་པར་བཤད། །ཏ་ཞེས་པ་ནི་བདེ་བ་ཆེ། །མཆོད་པ་མེད་པས་བདེ་བྱེད་མེད། །བདེ་བ་མེད་པས་མགུ་བ་མེད། །མགུ་བས་དངོས་གྲུབ་ཐོབ་པར་འགྱུར། །གྲུབ་ན་བདེ་བྱེད་རྟག་པ་ཡི། །
ཕྱག་ན་རྡོ་རྗེ་བདེ་བ་ཆེ། །འདོད་པའི་བདེ་བས་མཆོད་བྱེད་ཅིང་། །ཚེ་འདི་ཉིད་ལ་འཐོབ་པར་འགྱུར། །བདེ་བ་ཀུན་གྱི་གཞིར་གྱུར་པའི། །ཆོས་ཀྱི་དབྱིངས་ནི་རྣམ་པར་འཛིན། །རྡོ་རྗེ་འཛིན་ཕྱིར་གཟུངས་མ་སྟེ། །
ཧྲི་ཞེས་པ་ནི་པད་མ་འཛིན། །འདི་དང་མཉམ་པར་སྦྱོར་བ་ཡིན། །ཡི་གེ་མྱུར་དུ་འགྲུབ་པར་འགྱུར། །འདོད་པ་ལྔ་ཡི་ཡོན་ཏན་ཀུན། །རྫོགས་སངས་རྒྱས་ཀྱི་སྤྲུལ་པ་སྟེ། །སངས་རྒྱས་རྣམས་དང་རྡོ་རྗེ་འཛིན། །
མཁའ་འགྲོ་སྒྱུ་མའི་ལོངས་སྤྱོད་དེ། །དེ་ཕྱིར་འདོད་པའི་ཡོན་ཏན་ལྔ། །དེ་ཡིས་བསྙེན་ན་གྲུབ་པར་འགྱུར། །སྔགས་ཀྱི་སྐུ་འཛིན་དཔལ་དང་ལྡན། །དབང་ཕྱུག་མཆོག་གིས་སྔགས་རྒྱལ་ལོ། །རྡོ་རྗེ་སེམས་ཀྱི་ཐུགས་
ལས་སྐྱེས། །མཚན་ཅན་མཆོག་ཏུ་སྦས་པར་བཤད། །དེ་དང་མཉམ་དུ་སྤྱོད་པ་ཡིས། །མཆོག་གི་དབང་ནི་བསྐུར་བར་འགྱུར། །པད་མའི་དཀྱིལ་འཁོར་ཞེས་བྱ་བས། །དཀྱིལ་འཁོར་ཐམས་ཅད་སྒྲུབ་པར་བྱེད། །བློ་ལྡན་
དེ་རུ་ཞུགས་གྱུར་ནའོ། །དམ་ཚིག་སྦས་པ་ཚོགས་ཀྱི་རྣམས། །དྲི་ཆུ་བྱང་ཆུབ་དམར་པོ་མཆོག །ཤ་ཆེན་སྦྲང་རྩི་མར་ཉིད་ཀྱིས། །ལུས་ལ་ཀུན་ཏུ་ཁྱབ་གནས་ཏེ། །དེ་ཡི་ཕྱིར་ནི་དམ་ཚིག་ཆེ། །དམ་ཚིག་འདི་ཡིས་

90-1-244b

དངོས་གྲུབ་སྟེ། །དམ་ཚིག་ཡི་གེར་ལྡན་པ་ཡིས། །སྦྱོར་ཅེས་སྦྱང་དང་བསྐྱེད་བྱས་ན། །བཟའ་བ་དངོས་གྲུབ་ཐོབ་པར་འགྱུར། །དེ་ནས་ཕ་རོལ་ཕྱིན་མ་ཀུན། །པད་མའི་གཟིགས་པ་རྒྱས་པ་ཡི། །འཛུམ་བཅས་
གཡོན་ནས་གར་མཛད་ཅིང་། །རྟག་པ་ལ་ནི་ཡང་གསོལ་པ། །རིགས་དེ་རྣམ་པ་དུ་རུ་བསྟན། །ཇི་ལྟར་སྦས་པ་གསུམ་ཞེས་བགྱི། །སྣ་ཚོགས་ཆེན་པོ་དེ་དག་ཀུན། །བདེ་ལ་གནས་པས་བཤད་དུ་གསོལ། །དེ་ནས་
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་གཉིས་སུ་མེད་པའི་མཉམ་པ་ཉིད་ཀྱི་བདེ་བ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་ཉིད་ཀྱི་སྐུ་དང་གསུང་དང་ཐུགས་རྡོ་རྗེ་ལས་དེ་བཞིན་
གཤེགས་པ་ཐམས་ཅད་ཀྱི་མཆོག་ཏུ་གསང་བ་ཕ་རོལ་ཏུ་ཕྱིན་མའི་དེ་ཁོ་ན་ཉིད་རབ་ཏུ་ཕྱུང་ངོ་། །ང་ཉིད་སྦྱོར་བ་བཅོམ་ལྡན་འདས། །རྡོ་རྗེ་སེམས་དཔའ་དོན་ཆེན་སྦྱིན། །རིགས་ཀྱི་ཁྱད་པར་ལྔ་རྣམས་ཀྱིས། །སྤྱོད་
བཅས་མི་སྤྱོད་རྣམས་ལ་རོལ། །རྟག་པ་མི་བསྐྱོད་རིན་ཆེན་མཆོག །འཇིག་དབང་གདོན་མི་ཟ་གྲུབ་རྣམས། །རིགས་ནི་རྣམ་པ་བརྒྱད་བསྟན་ཏེ། །མདོ་རུ་བསྡུས་ན་རྣམ་པ་ལྔ། །ལུས་དང་ངག་དང་ཡིད་རྣམས་ཀྱིས། །
ཁྱད་པར་ཐེག་པ་རྣམ་པ་གསུམ། །དེ་ཉིད་གསུམ་པོ་རྡོ་རྗེ་མངའ། །བདེ་བའི་གནས་ལ་རོལ་པ་མཛད། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་མཆོག་ཏུ་ངོ་མཚར་དུ་གྱུར་ཏེ། །
རང་གི་སྡོམ་པ་གསོལ་བ་འདེབས་སོ། །སྡོམ་པ་དངོས་གྲུབ་ཀུན་སྦྱིན་པ། །བརྟུལ་ཞུགས་དཀའ་ཐུབ་སྔགས་མཁན་གྱི། །དམ་ཚིག་མཆོག་ཏུ་བསྲུང་བ་རྣམས། །བཅོམ་ལྡན་གསང་བ་ཉིད་ཀྱི་གསུངས། །དེ་ནས་བཅོམ་ལྡན་འདས་
ཀུན་ཏུ་བཟང་པོ་ཆེན་པོ་མཆོག་ཏུ་ཤིན་དུ་དགྱེས་པའི་བདེ་བ་ལ་མངོན་པར་ཆགས་པས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པས་མཁྱེན་ཏེ། ཞལ་རབ་ཏུ་བཞད་པས་རྒྱས་ནས་ཉིད་ཀྱི་སྐུ་དང་། གསུང་དང་ཐུགས་

90-1-245a

རྡོ་རྗེ་ལས་འདི་ཕྱུང་ངོ་། །སྐུ་དང་གསུང་དང་ཐུགས་སྦས་པས། །ནན་ཏན་དུ་ནི་བསྲུང་བར་བྱ། །བསྲུངས་པ་ཡིད་ནི་བསོད་ནམས་ཆེ། །དངོས་གྲུབ་ཤིན་དུ་སྐྱེ་བར་འགྱུར། །དེ་ནི་འདི་ཡིས་རྒྱ་ཆེ་བའི། །ཡིད་ཀྱིས་ཁ་
དོག་དབྱིབས་ཆེན་གྱི། །ཕྱག་རྒྱ་བཅིངས་ལ་སོགས་པས་བཏབ། །སྦས་པའི་སྐུ་ནི་རབ་བསྒྲུབ་བྱ། །རྡོ་རྗེ་གསུང་དུ་རབ་སྦྱོར་བར། །ཆོས་ཀྱི་ངོ་བོ་ཕྱག་རྒྱས་བརྗོད། །ངག་སྦས་གསང་བར་བརྗོད་པ་ནི། །ང་རོ་སྦས་པ་རྡོ་རྗེའི་གསུང་། །རང་
སེམས་རབ་ཏུ་འབིགས་པ་ཡིས། །ཟླ་བ་རྡོ་རྗེ་རྣམ་པར་བསྒོམ། །རང་བཞིན་གསུམ་པོ་གཅིག་ཏུ་བསྒོམ། །འདི་ནི་ཡིད་སྦས་ཆེན་པོ་ཡིན། །འདི་ནི་དེ་ཉིད་རྒྱ་ཆེན་མཆོག །རྒྱུན་དུ་བསྒོམ་པ་རྣམས་བྱས་ཏེ། །གསུམ་བསྒོམས་པས་
ནི་འགྲུབ་པར་འགྱུར། །གཞན་མིན་རྡོ་རྗེ་འཛིན་གྱིས་གསུངས། །སྦས་གསུམ་ལ་སོགས་ཆོ་ག་ཡིས། །ཕྱག་རྒྱ་ཐམས་ཅད་རྒྱས་བཏབ་སྟེ། །དེ་བས་ནན་ཏན་ཐམས་ཅད་ཀྱིས། །སྦས་གསུམ་རྣམ་པར་སྦ་བར་བྱ། །རྡོ་རྗེ་མཆོག་
འཛིན་ཆེན་པོ་དང་། །གཙོ་བོ་ཆེན་པོས་བྱིན་གྱིས་རློབ། །བླུན་པོ་གང་གིས་འདས་བྱས་ན། །རྡོ་རྗེ་འཛིན་པའང་སྐད་ཅིག་འཇིག །སེམས་དཔའ་ཆེ་དང་བྲལ་གྱུར་ན། །ངན་སོང་གསུམ་དུ་ཡང་དང་ཡང་། །ཇི་ཙམ་ནམ་མཁའི་
དཀྱིལ་འཁོར་བ། །ཤིན་དུ་མི་བཟད་སྨིན་པར་འགྱུར། །དེ་ནས་དམ་ཚིག་དེ་དག་ཀུན། །རྡོ་རྗེ་འཛིན་ལ་མགུ་གྱུར་ཏེ། །འཇམ་པོའི་ཕྱག་གིས་གར་མཛད་ཅིང་། །གཡོན་གྱིས་ཕྱག་བྱས་སླར་གསོལ་པ། །གར་དབང་རྣམ་གནོན་
གར་མཛད་ཅིང་། །མཐའ་ཡས་ཕྱག་ནི་བཅུ་པའི་བསྒྱིངས་པ་ཡིས། །པད་མའི་ལོ་མ་འཇམ་པོ་བརྒྱད་བྱེད་ནས། །གཉིས་མིན་བདེ་བར་རྡོ་རྗེ་འཇོག་མཛད་དེ། །སྦས་པ་དེ་ཉིད་མི་མཉམ་སད་པར་འགྱུར། །
རྡོ་རྗེ་འདསྐམ་སྐྱེས་ཟླ་བ་ཡང་དག་འདུ། །ཐབས་དང་ཤེས་དགྱེས་པ་བདེ་བྱེད་སོགས། །བདེ་གཤེགས་རྣམས་ཀྱི་སྦས་པ་ཉིད་ཀྱིས་ཤོད། །སྦྱོར་དང་སྦྱོར་མིན་ཡང་དག་སྦྱོར། །ཞི་བའི་ཐལ་མོ་མཆོག་ཏུ་བདེ། །འདོད་པ་ལྔ་ཡི་ཡོན་

90-1-245b

ཏན་འགྲུབ། །སངས་རྒྱས་བྱང་ཆུབ་རབ་བསྒྲུབས་པའོ། །དེ་ནས་བཅོམ་ལྡན་དམ་ཚིག་རྒྱལ། །རྡོ་རྗེ་སེམས་དཔའ་བདེ་བ་ཆེ། །དེ་ཉིད་སྦས་པ་བསྐུལ་བ་ཡིས། །སྦས་པ་མ་ལུས་འཆད་པར་མཛོད། །རྡོ་རྗེ་པད་མ་
མཉམ་སྦྱོར་བས། །ཆོ་གར་ལྡན་པས་གང་དབང་བསྐུར། །བདེ་བར་འདོད་པའི་སློབ་དཔོན་གྱིས། །དེ་ཉིད་འདི་ནི་དེ་ལ་བསྟན། །འདི་ལ་ཁྲུས་མེད་ཉེས་པ་མེད། །དཀའ་ཐུབ་མེད་དེ་དཀའ་བའང་མེད། །
སངས་རྒྱས་ཐམས་ཅད་མཉམ་སྦྱོར་བ། །ང་ཉིད་སྦྱོར་བས་འགྲུབ་པར་འགྱུར། །ལུས་དང་ངག་སེམས་རྡོ་རྗེ་ཡི། །རྡོ་རྗེ་སེམས་དཔའ་ཉིད་དུ་འགྱུར། །རྡོ་རྗེ་དབབ་པ་སྐྱེས་གྱུར་
ན། །ཇི་ཙམ་འདོད་པ་ནམ་མཁར་འཕུར། །སྙིང་གར་རྡོ་རྗེ་ཁུ་ཚུར་བཅིངས། །རྡོ་རྗེ་ལྟ་བས་རྣམ་བལྟས་ཏེ། །དགྱེས་པའི་ཚུལ་གྱིས་བསྙེན་བྱས་ན། །རྡོ་རྗེ་སེམས་དཔའ་
སྐད་ཅིག་འགྱུར། །རྣམ་སྒེག་དགྱེས་པའི་རྣམ་གནོན་པས། །རབ་དགྱེས་སར་ནི་འགྲོ་བྱེད་དེ། །སངས་རྒྱས་བདེ་བ་ཆེན་པོ་དང་། །གྲུབ་པ་ཡིས་ཀྱང་མཆོད་བྱེད་ཅིང་། །རྡོ་རྗེ་སེམས་དཔའི་རྒྱ་ཆེ་མཆོག །
འགྱིང་བའི་ལོངས་པས་གར་བྱེད་པས། །བདེ་བྱེད་ཟླ་བའི་འོད་འདྲ་ཞིང་། །ལས་ཀྱི་ཁྱད་པར་ལས་སོགས་གནོན། །སྦས་པའི་ཁུར་གྱིས་གར་བྱས་པས། །སྦས་པ་སྦྱོར་བའི་བདག་ཉིད་འགྲུབ། །སྣ་ཚོགས་
དཀྱིལ་འཁོར་གར་བྱེད་ཅིང་། །ལག་པ་མང་པོ་རྣམ་བསྒྱུར་དང་། །ཕྱིར་བརྐྱང་དབྱིངས་སུ་ལྡན་པ་དང་། །ཁྲོ་བར་དྲི་མེད་ལྟ་བ་ཡིས། །གདུལ་དཀའ་གནོན་པ་འཇིགས་བྱེད་པའི། །འཇིག་རྟེན་གསུམ་པོ་རྣམ་རྒྱལ་འགྱུར། །
མེ་འབར་ཉི་མའི་དབུས་ཉིད་དུ། །ཁྲོ་བོ་ཧཱུྃ་མཛད་བསྒོམ་བྱས་ན། །མྱུར་དུ་འཇིག་རྟེན་དོན་བསྒྲུབ་ཕྱིར། །འཇིག་རྟེན་གསུམ་པོ་རྣམ་རྒྱལ་འགྱུར། །ལྷ་མོ་བཞི་དང་མཉམ་སྦྱོར་བས། །སུ་ར་ཏ་སྟྭྃ་ཞེས་སྨྲ་ཞིང་། །

90-1-246a

ཧ་ར་ཐིག་ལེ་ཚུལ་སྦྱར་ན། །རབ་དགྱེས་དེ་མ་ཐག་ཏུ་འགྱུར། །རབ་དགྱེས་མཆོག་ཏུ་བརྟག་པ་ཡིས། །ས་ཆེན་རྣལ་འབྱོར་འགྲོ་འགྱུར་ཏེ། །ལྷ་མོ་བཞི་དང་འགྲོགས་པ་ཡིས། །སེམས་ཅན་རྣམས་ཀྱི་དོན་ཀུན་བྱེད། །
དེ་ནས་དེ་བཞིན་གཤེགས་པ་དེ་དག་ཐམས་ཅད་བདེ་བ་ཆེན་པོ་ལ་ཕྱག་བཞེས་ནས་གསོལ་པ། ཐལ་མོ་ཡང་དག་སྦྱར་བྱས་ཏེ། །ཕྱག་རྒྱ་དེ་ཉིད་ཉིད་ཀྱིས་ཤོད། །རྡོ་རྗེ་མཆོག་ལ་གསོལ་བ་འདེབས། །བདེ་བའི་བདག་ཉིད་
མཆོད་པ་ཤོད། །གཟུགས་དང་སྒྲ་དང་དྲི་ཆེ་དང་། །རོ་དང་རེག་པ་ཡིད་འོང་བ། །ཐུགས་རྗེ་ཆེན་པོས་བསྒྲུབས་པ་ཡིས། །དཔའ་བོ་ཆེན་པོ་ཉིད་ཀྱིས་ཤོད། །དེ་ནས་བཅོམ་ལྡན་བདེ་བྱེད་ཆེ། །རྡོ་རྗེ་སེམས་དཔའ་བདག་པོ་ཆེ། །
ཕྱག་རྒྱ་བཅིངས་པ་བདེ་བ་ཆེ། །དེ་ཉིད་མཆོག་ནི་བཤད་པར་མཛད། །དང་པོ་ཆོས་ཀྱི་ཕྱག་རྒྱ་སྟེ། །གཉིས་པ་དམ་ཚིག་ཕྱག་རྒྱ་ཡིན། །གསུམ་པ་ཕྱག་རྒྱ་ཆེན་པོ་སྟེ། །བཞི་པ་ལས་ཀྱི་ཕྱག་རྒྱར་བཤད། །དེ་ནས་
སྐུ་གསུང་ཐུགས་རྡོ་རྗེ། །ཇི་ལྟར་འགྱིང་བཞིན་བསྒོམ་བྱ་བ། །སྣ་ཚོགས་ཡེ་ཤེས་རྗེས་སུ་དག །སྣ་ཚོགས་ཆེན་པོས་འཆད་པར་མཛད། །རྟག་པའི་སྐུ་ནི་སེར་པོ་སྟེ། །མི་བསྐྱོད་རྡོ་རྗེ་དཀར་པོ་ཡིན། །ནམ་མཁའི་སྙིང་
པོ་མཐིང་ག་ཆེ། །ཚེ་དཔག་མེད་པ་པད་མ་དམར། །སྣ་ཚོགས་ཁ་དོག་རྒྱ་ཆེ་མཆོག །འོད་ཟེར་ཕྲེང་བ་རྨད་བྱུང་བའི། །གདོན་མི་ཟ་བ་རྡོ་རྗེ་ཆེ། །དོན་ཆེན་བྱེད་པ་བསམ་པར་བྱ། །རང་རང་རིགས་ཀྱི་གནས་ཉིད་དུ། །མྱུར་དུ་
ནམ་མཁའ་འགྲོ་བྱེད་ཅིང་། །རིགས་ཀྱི་ལྷ་མོ་བཞི་རྣམས་ཀྱིས། །རོལ་པ་དང་ནི་མཆོད་པར་བྱེད། །སྣ་ཚོགས་སྦྱོར་བ་བདེ་ཆེ་བའི། །ལྷ་མོ་བཞི་དང་མཉམ་སྦྱོར་བ། །རྡོ་རྗེ་སྦྱོར་བདག་བསྒོམ་བྱས་ན། །རྡོ་རྗེ་སེམས་དཔའ་
བདག་ཉིད་འགྱུར། །རྡོ་རྗེ་སེམས་སོགས་སེམས་དཔའ་མཆོག །རྡོ་རྗེ་ལ་སོགས་གདན་ཞུགས་པར། །རང་གི་འཁོར་ལོ་མཆོག་གིས་བརྒྱན། །རང་གི་ཕྱག་རྒྱར་གནས་པར་བསམ། །པད་མའི་གདན་གྱི་ཚུལ་

90-1-246b

གྱིས་ནི། །བརྩེ་དང་ལྡན་པའི་བསྒོམ་བྱས་ཏེ། །སྙིང་པོ་སྦས་དོན་གར་བྱས་པས། །སྦས་པ་ཆེ་ལ་བདེ་བྱེད་ན། །འགྱིང་བའི་བདེ་བར་ལྡན་པ་ཡི། །རྡོ་རྗེ་ཆེན་པོ་དེ་འགྲུབ་སྟེ། །སྣ་ཚོགས་དཀྱིལ་འཁོར་རབ་ཉེ་བར། །སྣ་ཚོགས་
ཆེན་པོ་འགྲོ་བར་འགྱུར། །བདེ་བ་ཆེན་པོ་ཐམས་ཅད་འགྲུབ་པའི་སྦྱོར་བ་ཆེན་པོའི་བདེ་བ་ཞེས་བྱ་བའི་ཕྱག་རྒྱ་རབ་ཏུ་རྒྱས་པའོ།། །།དེ་ནས་ཕྱག་རྒྱ་བཅིང་བཤད་དེ། །རྟག་ལ་སོགས་པའི་དེ་ཁོ་ན། །གང་གིས་མྱུར་དུ་བཅིངས་
པ་ཡིས། །སངས་རྒྱས་དངོས་གྲུབ་བདེ་ཆེར་འགྲོ། །ཐབས་ནི་གཡས་ཀྱི་ལོགས་སུ་བྱ། །དེ་བཞིན་ཤེས་རབ་གཡོན་པར་ཏེ། །ཞི་བའི་ཐལ་མོ་གསུམ་ཉིད་ཀྱིས། །སྦྱོར་བའི་ཚུལ་གྱིས་བསྡུ་བར་བྱ། །སོར་མོ་
ཐམས་ཅད་བར་བར་དུ། །མཉམ་དུ་སྦྱོར་བས་ཁྱད་པར་སྦྱིན། །རྡོ་རྗེ་ཡི་ནི་ཐལ་མོ་འདིས། །སངས་རྒྱས་ཐམས་ཅད་ཉིད་དུ་བསྒྲུབ། །འདི་ནི་བཅིངས་པ་ཙམ་གྱིས་ཀྱང་། །ནམ་མཁའི་སྙིང་པོའི་གནས་སུ་འགྲོ། །
འདི་ཉིད་ཤིན་དུ་བཅིངས་པ་ཡིས། །གསུམ་དུ་སྦྱོར་བས་མཆོད་པར་བྱ། །དེ་ཉིད་ལས་ནི་སོར་མོ་ཀུན། །ཀུན་དུ་བསྐུམས་ཏེ་བཅིང་བར་བྱ། །རྡོ་རྗེའི་བཅིང་བ་བསྡུས་པས་ནི། །བཅིང་བར་ལྡན་པར་རྣམ་བསྒྱུར་ཏེ། །
དེ་ཉིད་སྦོམ་པོ་རབ་བཅུག་ནས། །ཁྲོ་མོའི་རྩེ་མོ་རབ་ཏུ་དགུག །འདི་ནི་རྡོ་རྗེ་རིགས་ཀྱི་བཅིང་། །རྡོ་རྗེ་སེམས་དཔའ་ཉིད་འགྲུབ་བྱེད། །དེ་བཞིན་བཅིངས་པ་རྣམ་བཞག་སྟེ། །སྦོམ་པོ་ཁྲོ་མོའི་རྩེ་མོ་སྦྱར། །འདི་ནི་བཅིང་བ་
བཅིང་བ་ཆེ། །ནམ་མཁར་འགྲོ་བ་ཉེ་བར་བསྒྲུབ། །དེ་ཉིད་བཅིང་བ་བཅིང་བྱས་ཏེ། །ཁྲོ་མོ་གཉིས་པོ་མཚན་བཞིན་དུ། །རྩེ་མོ་སྤྲད་དེ་དགུག་བྱ་བ། །བཅིང་བ་འདི་ཡིས་པད་མ་བསྒྲུབ ། བཅིང་བ་དེ་ཉིད་རབ་ཏུ་སྦོམ། །བདེ་བར་
བཅུག་ནས་བསྡམ་བྱས་ཏེ། །ལས་ཀྱི་བཅིང་བ་སྦྱོར་བ་ཡིས། །དོན་ཡོད་མཆོག་གི་རིགས་སུ་འགྲོ། །བཅིང་བ་དེ་ཉིད་བཅིང་བྱས་ཏེ། །སྦོམ་དང་ཁྲོ་མོའི་རྩེ་མོ་སྦྱར། །གཡས་པའི་སྦོམ་པོ་རྡོ་རྗེ་ཡིས། །དེ་ཡི་དབུས་

90-1-247a

སུ་བཅུག་བྱ་བ། །དེ་འདི་བཅིང་བ་ཆེན་པོ་སྟེ། །རབ་དགྱེས་རོ་ནི་སྒྲུབ་བྱེད་པ། །གང་གིས་བཅིངས་པ་ཙམ་གྱིས་ནི། །རབ་ཏུ་དགྱེས་པ་ཉིད་ཐོབ་བོ། །དངོས་གྲུབ་ཐམས་ཅད་བདེ་བ་ཆེ། །དེ་ཡིས་
འདི་ཚེ་འཐོབ་གྱུར་ཏེ། །ཕྱག་རྒྱ་བཅིང་བའི་ཆོ་ག་ཡིས། །སངས་རྒྱས་ཐམས་ཅད་རབ་ཏུ་གནས། །ཕྱག་རྒྱ་བཅིང་བའི་ཡེ་ཤེས་རྣམ་པར་རྒྱས་པའོ།། །།བཅིང་བ་ལྔ་ཡི་ཆོ་ག་ཡིས། །གཅིག་གིས་རྣལ་འབྱོར་
བསྒྲུབ་མི་བྱ། །དྲུག་ནི་སྦྱོར་བས་སྦྱོར་བྱས་ན། །དེ་མ་ཐག་ཏུ་རབ་དགྱེས་འགྱུར། །བཅིང་བ་ལྔ་ཡི་ཕྱག་རྒྱའོ། །དེ་བཞིན་བཅིང་བ་གཉིས་བྱས་ཏེ། །གཡོན་གྱི་སྙིང་གར་བཅིང་བར་བྱ། །གཡས་ཀྱི་རྩེ་མོ་བསྒྲེང་བྱས་
ཏེ། །རྡོ་རྗེའི་ཚུལ་གྱིས་གཟུང་བར་བྱ། །ཕྱག་རྒྱ་འདི་ནི་བྱང་ཆུབ་བདེ། །སངས་རྒྱས་ཐམས་ཅད་གཅིག་ཏུ་བསྒྲུབ། །གདོན་མི་ཟ་བར་ཚེ་འདི་ལ། །རྟག་པ་འདྲ་བ་ཐོབ་པར་བྱེད། །གཡོན་པ་དེ་ཉིད་སྙིང་གར་གཞག །
གཡས་པ་ས་ལ་རེགས་བྱས་པས། །ས་ལ་བདེ་བ་རོལ་པ་ཡིས། །འདི་ཡིས་མི་ཟད་ཐོབ་པར་འགྱུར། །དེ་བཞིན་སྙིང་གར་གཡོན་པ་བཞག །ལག་པ་གཡས་པ་རབ་སྦྱིན་བྱ། །འདི་ཡིས་རིན་ཆེན་སྐལ་ལྡན་སོགས། །
ནམ་མཁའ་ཉེ་བར་འགྲུབ་པར་འགྱུར། །དེ་བཞིན་གཡོན་པ་སྙིང་གར་གཞག །གཡས་ཀྱང་གཞག་སྟེ་ཏིང་འཛིན་གནས། །འདི་ཡིས་ཚེ་དཔག་མེད་པ་ཉིད། །ཚེ་འདི་ཉིད་ལ་ཐོབ་པར་འགྱུར། །དེ་བཞིན་གཡོན་པ་སྙིང་གར་སྦྱར། །ལག་པ་གཡས་པ་མི་
འཇིགས་སྦྱིན། །འཇིགས་པ་མ་ལུས་རབ་སྒྲོལ་བ། །སྡིག་པ་གདུག་པ་འཇིགས་པ་ཆེ། །འདི་ཡིས་ཐམས་ཅད་འཕྲོག་པར་བྱེད། །གདོན་མི་ཟ་བའི་ངེས་པར་ཡི། །དེ་ནི་ཆེན་པོའི་ཆེན་པོར་འགྱུར། །དེ་ཉིད་བཅིང་བ་གཉིས་བྱས་ཏེ། །གཡོན་པ་
གཡོན་དུ་སྦྱར་བར་བྱ། །གཡས་ནི་སྙིང་གར་གཟུང་བྱས་ཏེ། །བརྗིད་པས་རབ་ཏུ་བཞད་ཅིང་གནས། །བདེ་བ་ཆེན་པོ་ཐབས་གནས་པས། །འདི་ཡིས་རབ་དགྱེས་ཉིད་འགྱུར་ཏེ། །བདེ་མཆོག་ཉིད་དུ་སྒྲུབ་པ་པོ། །

90-1-247b

ཚེ་འདི་ཉིད་ལ་ཐེ་ཙོམ་མེད། །དེ་བཞིན་བཅིང་བ་བཅིང་བྱས་ཏེ། །སྦྱོར་དང་ལྡན་པས་བརྟན་པར་བྱ། །སྦོམ་པོའི་རྩེ་མོ་པད་མའི་གནས། །གཡོན་གྱི་ཁྲོ་མོའི་རྩེ་མོར་སྦྱར། །གཡས་པ་ཡི་ནི་སྦོམ་པོ་ཡིས། །མངོན་སུམ་
རྡོ་རྗེར་བྱས་པ་ཡིས། །བཅུག་ནས་བདེ་བ་སྤྱོད་བྱ་ཞིང་། །སྐད་ཅིག་སྐད་ཅིག་བསྡམ་པར་བྱ། །དེ་འདི་སངས་རྒྱས་ཐམས་ཅད་ཀྱི། །དགྱེས་པ་དགྱེས་མཆོག་སྒྲུབ་པ་པོ། །འདི་ནི་བཅིང་པ་ཙམ་གྱིས་ཀྱང་། །ཡང་དག་
རྡོ་རྗེ་དགྱེས་པ་འཐོབ། །རབ་དགྱེས་བདེ་མཆོག་ལོངས་སྤྱོད་ཀྱི། །བཙུན་མོ་དངོས་གྲུབ་ཉིད་དུ་འགྱུར། །གཡས་ནི་མཚན་མས་བགྲང་བྱས་ཏེ། །ལྕགས་ཀྱུའི་ཚུལ་དུ་གཞག་པར་བྱ། །རྡོ་རྗེ་འདོད་མ་ལྕགས་ཀྱུ་སྟེ། །རྡོ་རྗེ་
འདོད་བྱེད་བཙུན་མོ་ཡི། །དང་པོར་འདྲེན་པ་དེ་ཉིད་བཞག །ཐ་མར་ཧ་ར་ཐིག་ལེར་བྱ། །རྡོ་རྗེ་དགྱེས་པ་བདེ་འཐོབ་བྱེད། །མིང་ནི་དབུས་སུ་བྲི་བར་བྱ། །འདི་ཡིས་སྙིང་གར་བྱས་པ་ཡིས། །དེ་བཞིན་གཤེགས་པ་
བདེ་མཆོག་འགྲོ། །ཕྱག་རྒྱ་བཞི་དང་འགྲོགས་པ་ཡིས། །ལུས་འདིས་ཚེ་འདི་འགྲུབ་པར་འགྱུར། །རབ་དགྱེས་སྦྱོར་བར་ཡང་དག་ལྡན། །ཕྱག་རྒྱ་བཞི་དང་མཉམ་འགྲོགས་ཤིང་། །རྡོ་རྗེ་འགྱིང་ལ་སོགས་སྤྲོད་པས། །
རྣལ་འབྱོར་འདི་ནི་བཅིངས་པ་ཡིས། །རབ་དགྱེས་ལ་སོགས་མ་ལུས་པ། །རབ་དགྱེས་རོ་ལ་བསྒྱིངས་མ་ཡིས། །སྐད་ཅིག་ཉིད་དུ་འདྲེན་པར་འགྱུར། །དེ་བཞིན་སྦོམ་མོའི་རྩེ་མོར་སྦྱར། །སྙིང་རྗེ་ཆེན་པོ་དེར་གཞག་པ། །
སྐལ་བ་ཆེན་པོ་རྡོ་རྗེ་སྤྱན། །དེ་ཉིད་དོན་ཀུན་སྟོན་བྱེད་མ། །འདི་ནི་ཡང་དག་བཅིངས་པ་ཡིས། །རྡོ་རྗེ་རྟག་པའི་སྤྱན་དུ་འགྱུར། །ཡོད་དང་མེད་པ་རྣམས་སྤངས་པ། །དངོས་པོ་ཐམས་ཅད་མཐོང་བར་འགྱུར། །
རྡོ་རྗེའི་ཐལ་མོ་བརྟན་བྱ་སྟེ། །ཁྲོ་མོ་རྩེ་མོ་བཟླུམ་པོ་ཡི། །མཐོན་པོར་མཚན་དང་འདྲ་བྱས་ཏེ། །སྦོམ་པོར་རྡོ་རྗེ་བརྟན་པ་ཆེ། །དེ་འདི་བཅོམ་ལྡན་འདས་མ་མཆོག །རྡོ་རྗེ་པད་མའི་བདེ་འཐོབ་བྱེད། །རྣལ་འབྱོར་འདི་ནི་

90-1-248a

བཅིངས་པ་ཡིས། །སྦས་པ་ཆེན་པོའི་དགྱེས་པ་འཐོབ། །དེ་ནས་ལྷ་མོ་ཆེན་མོ་དག །སྤྲོ་བ་ཆེ་བས་གར་མཛད་ཅིང་། །རྡོ་རྗེ་བདེ་བྱེད་བདག་ཉིད་ལ། །བདུད་དང་བཅས་པས་ཕྱག་བྱས་ཏེ། །ཆོས་
ཀྱིས་ཡི་གེ་ཐབས་གནས་ནས། །དེ་ནས་ཆོས་ཀྱི་གསོལ་བ་འདེབས། །ཆོས་ཀྱི་ཕྱག་རྒྱ་བདེ་བ་ཆེ། །རྡོ་རྗེ་བཅོམ་ལྡན་བཤད་དུ་གསོལ། །བསྒྲུབ་པ་པོས་ནི་རབ་བསྒྲིམས་ན། །གང་གིས་ལྷ་ནི་འགྲུབ་པར་
འགྱུར། །གང་གིས་མྱུར་དུ་བྱིན་བརླབས་པས། །སངས་རྒྱས་བྱང་ཆུབ་རབ་བསྒྲུབ་སྟེ། །བདེ་བྱེད་གཉིས་ཀྱིས་སྤྲོ་ཆེ་བ། །དེ་བཞིན་གཤེགས་པས་གནས་འཇུག་འགྱུར། །དེ་ནས་བཅོམ་ལྡན་འདས་ཀྱིས་ལྷ་མོ་ཐམས་ཅད་
ཀྱིས་གསོལ་བ་བཏབ་པ་མཁྱེན་ནས། ཉིད་ཀྱི་སྐུ་དང་གསུང་དང་ཐུགས་རྡོ་རྗེ་སྦས་པ་ལས་ཆོས་ཀྱི་ཕྱག་རྒྱ་ཆེན་པོའི་ཚིག་འདི་ཕྱུང་ངོ་། །བཅུ་གསུམ་བདག་ཉིད་འདྲེན་པ་སྟེ། །ཐིག་ལེ་ལྷར་ནི་ཡང་དག་ལྡན། །ཐ་མར་
ཧ་ར་ཐིག་ལེས་གནས། །རབ་ཏུ་དགྱེས་པ་རྡོ་རྗེ་དགྱེས། །སྙིང་གར་ཕྱག་རྒྱ་འདི་བྱས་ནས། །དགའ་བྱེད་ལྷན་ཅིག་བརྩེན་བྱེད་ཅིང་། །སྤྱོད་དང་མི་སྤྱོད་འགྲུབ་འགྱུར་སྟེ། །རྣལ་འབྱོར་བདེ་བ་ཆེན་པོར་འགྲོ། །དེ་བཞིན་འདྲེན་པ་ཐོག་
མར་བྱ། །རྡོ་རྗེ་འདོད་པ་སྐྱོ་བ་མཆོག །ཧ་ར་ཐིག་ལེ་ཡང་དག་ལྡན། །ཆ་གཉིས་གསུམ་པ་སྦྱོར་བྱས་པ། །འདི་ནི་སྙིང་གར་གཞག་བྱས་ན། །བདེ་བར་ནམ་མཁའ་འགྲོ་འགྱུར་ཏེ། །བདེ་བ་ཤིན་ཏུ་རྟག་པ་ཡི། །འདི་
ཡིས་མཆོག་ཏུ་དངོས་གྲུབ་བོ། །འདྲེན་པ་དེ་ཉིད་ཐོག་མར་གཞག །ལྟོས་ལྟོས་ཞེས་པ་ཧཱུྃ་དང་ལྡན། །སྐལ་བ་ཆེན་པོ་རྡོ་རྗེ་སྤྱན། །དབུས་སུ་བསྐུལ་བས་འགྲུབ་པར་འགྱུར། །འཕྲུལ་གྱི་སྤྱན་ལྔ་ནོར་ཆེ་བ། །
འདི་ཡིས་རྣལ་འབྱོར་འགྲུབ་འགྱུར་ཏེ། །རྡོ་རྗེ་བྱང་ཆུབ་དགྱེས་པ་ཆེ། །སངས་རྒྱས་ཐམས་ཅད་མཐོང་བར་འགྱུར། །དང་པོར་འདྲེན་པ་དེ་ཉིད་གཞག །ཐ་མར་ཧ་ར་ཐིག་ལེར་བྱ། །རྡོ་རྗེ་དགྱེས་པ་བདེ་

90-1-248b

འཐོབ་བྱེད། །མིང་ནི་དབུས་སུ་བྲི་བར་བྱ། །འདི་ཡིས་སྙིང་གར་བྱས་པ་ཡིས། །དེ་བཞིན་གཤེགས་པ་བདེ་མཆོག་འགྲོ། །ཕྱག་རྒྱ་བཞི་དང་འགྲོགས་པ་ཡིས། །ལུས་འདིས་འདི་ཚེ་འགྲུབ་པར་འགྱུར། །
རབ་དགྱེས་སྦྱོར་བར་ཡང་དག་ཞོན། །ཕྱག་རྒྱ་བཞི་དང་མཉམ་འགྲོགས་ཤིང་། །རྡོ་རྗེ་འགྱིང་ལ་སོགས་སྤྲོད་པས། །བཅོམ་ལྡན་འདོད་མ་འགྲུབ་པར་འགྱུར། །ཆོས་ཀྱི་དེ་ཁོ་ན་ཉིད་ཀྱི་དོན་གྱི་ཡེ་ཤེས་ཀྱི་
ཕྱག་རྒྱའོ།། །།དེ་ནས་བཅོམ་ལྡན་སྦྱོར་བ་ཆེ། །ཐོག་མ་ཐ་མ་མེད་པ་མཆོག །གདུག་པ་ཐམས་ཅད་གདུལ་བའི་ཕྱིར། །རྡོ་རྗེ་ཁྲོ་བོར་དེ་འགྱུར་རོ། །མདུན་དུ་
ཐོག་མའི་ལྷ་ཉིད་དུ། །རྡོ་རྗེ་ཧཱུྃ་མཛད་ཉི་མ་འབར། །ཉི་མ་བཅུ་གཉིས་གཟི་བརྗིད་ཆེ། །མེ་འབར་རབ་ཏུ་འབར་བར་ལྡན། །འཁོར་གྱི་འཁོར་ལོ་དེ་དག་ཀུན། །དུར་ཁྲོད་
ཀྱི་ནི་རྒྱན་མཆོག་གིས། །བརྒྱན་ཏེ་གདུག་པའི་ཚོགས་རྣམས་ལ། །དེ་ནི་ཡང་དག་རོལ་པ་མཛད། །ཁྲོ་ཆེན་མཆོག་འདུལ་ཕྱག་རྒྱ་འདི། །སྔགས་ནི་རང་གི་སྙིང་གར་བསྒོམ། །ཁྲོ་མོའི་
བུ་མོའི་མདུན་དུ་བསྐོར། །ཁྲོ་མོ་ཆེན་མོ་དེ་འགྲུབ་བོ། །འདི་ཡིས་གདུག་པ་ཐམས་ཅད་རྣམས། །ཧཱུྃ་བྱས་མྱུར་དུ་བརྒྱབ་པར་འགྱུར། །དེ་དག་གདུག་པ་གདུག་པ་ཆེ། །འཇིགས་
ཤིང་འཁྲུགས་ཏེ་རབ་ཏུ་འཇིག །སྐྱོབས་ཤིག་སྐྱོབས་ཤིག་ཅེས་སྨྲ་ཞིང་། །རྡོ་རྗེ་གཙོ་ལ་དྲན་པར་བྱེད། །ཕྱག་རྒྱ་འདི་ནི་མཉམ་པར་གཞག །འགྲོ་བ་ཐམས་ཅད་དབབ་བྱ་སྟེ། །ལས་
མཆོག་ཐམས་ཅད་སྒྲུབ་པ་པོས། །དགྲ་ཡི་རྣམས་ནི་གཞིག་པར་བྱ། །སྦྱོར་དང་ལྡན་པས་འབུམ་བཟླས་ཏེ། །ལས་རྣམས་ཐམས་ཅད་བྱེད་པ་ན། །གདོན་མི་ཟ་བར་ཀུན་འགྱུར་ཏེ། །རྡོ་རྗེ་

90-1-249a

སེམས་དཔའ་འང་བསྒྲུབ་པར་ནུས། །ཞེས་བཅོམ་ལྡན་འདས་དཔལ་རྡོ་རྗེ་སེམས་དཔས་གསུངས་སོ། །ཁྲོ་བོའི་ཕྱག་རྒྱའི་ཡེ་ཤེས་སོ། །
དེ་ནས་སངས་རྒྱས་ཆེ་དེ་དག །སངས་རྒྱས་ཉིད་སྐྱེས་ཐམས་ཅད་མཆོག །གཟུངས་མ་རྣལ་འབྱོར་མ་ཐམས་ཅད། །རང་གི་འཁོར་གྱི་འཁོར་ལོའི་ཚོགས། །
ཕན་ཚུན་བདེ་བ་ལྡན་པ་ཡི། །དགའ་བས་འཁོར་རྣམས་འཕགས་འགྱུར་ཏེ། །རང་གི་བདེ་བྱེད་སྐྱེས་པར་འབྲེལ། །སྐལ་བ་ཆེན་མོ་རྩེན་པར་བྱེད། །
དེ་ནས་བཅོམ་ལྡན་འདས་རྡོ་རྗེ་ཤིན་ཏུ་དགྱེས་པ་ཆེན་པོས། རང་གི་འཁོར་གྱི་འཁོར་ལོའི་ཚོགས་རྣམས་ལ། ཡང་དང་ཡང་དུ་གཟིགས་ཏེ་དེ་བཞིན་གཤེགས་པ་ཐམས་ཅད་ཀྱི་
འདྲེན་པའི་རིག་མའི་སྙིང་པོ་འདིས་སྡུད་པ་མཛད་དོ། །ཨོཾ་བཛྲ་ཨྃ་ཀུ་ཤ་དུ་རུ་དུ་རུ། ཨེ་ཧྱེ་ཧི་ཀཊྚྡྷྱ་བི་ཀདྡྷྱ། །སརྦཱན་བཪྵ་ད་ཙ་ཀྲ་སཉྩ་ཡ། བཛྲ་ཨྃ་ཀུ་ཤ་ཧཱུྃ་
ཕཊ། འདི་ཡིས་ཕྱག་རྒྱ་རྡོ་རྗེ་ཡི། །བཅིང་བ་གཉིས་ནི་དམ་བྱས་ཏེ། །རྡོ་རྗེ་ཁྲོ་མོ་དགྲོལ་བར་བྱ། །རྡོ་རྗེ་ཁྲོ་བ་རབ་སྦྱར་བ། །རྡོ་རྗེ་ཀྱོ་བ་ཞེས་བྱ་
འོ། །འགྲོ་དང་རི་བོ་སེམས་ཅན་རྣམས། །ཕྱག་རྒྱ་འདི་ཡིས་ཀུན་བཀུག་སྟེ། །འདོད་པས་འགྱིང་བའི་ཡིད་རྟག་རྣམས། །མིའི་
བུ་མོ་སྨོས་ཅི་དགོས། །རྡོ་རྗེ་བཅིངས་པ་མཉམ་གཞག་སྟེ། །གཡོན་གྱི་སྟེང་དུ་དེ་བཞིན་གཞག །དབུས་སུ་སྦོམ་མོ་གཞག་པར་བྱ། །

90-1-249b

རྡོ་རྗེ་འདྲེན་པ་གཟི་བརྗིད་ཆེ། །རྡོ་རྗེ་བཅིང་བ་བསྡམ་བྱས་ཏེ། །རྡོ་རྗེ་སྦོམ་མོ་རྩེ་མོ་སྤྲད། །བདག་ནི་རྡོ་རྗེ་ཞེས་བསྒོམ་ཞིང་། །བཅིང་བ་དེ་ནི་དགྲོལ་
བར་བྱ། །དེ་ཉིད་བཅིང་བ་དམ་བྱས་ཏེ། །དབང་དང་ཆུང་ངུའི་རྩ་བའི་མཚམས། །རྡོ་རྗེ་སྦོམ་པོ་ནུས་བྱས་ཏེ། །རབ་དགྱེས་བདག་ཉིད་བསྐྱོད་པར་
བྱ། །དེ་ལས་རྡོ་རྗེ་མཆོག་གཉིས་བསྐྱེད། །མདུད་པའི་ཚུལ་དུ་སྦྱར་བར་བྱ། །གཞུག་པ་དང་ནི་འདྲེན་པའི་མཆོག །འདི་ཡིས་ཐམས་ཅད་
དངོས་གྲུབ་པས། །རྣལ་འབྱོར་ཕྱག་རྒྱ་འདི་ཉིད་ཀྱིས། །དྲངས་ཏེ་བཅུག་ནས་བཅིང་བྱས་ཏེ། །དབང་དུ་བྱས་ནས་བསྒྲུབ་པར་བྱ། །དེ་ནས་དེ་
དག་ཐམས་ཅད་དྲངས་བཅུག་བཅིངས་དགའ་བར་བསྐྱེད་ནས། རང་གི་རབ་ཏུ་དགྱེས་པའི་བདེ་བ་ཆེན་པོས། །རང་གི་རྒྱལ་སྲིད་རྗེས་སུ་སྐྱོང་ཞིང་རྡོ་རྗེ་ཆོས་ལ་བཀའ་
སྩལ་པ། སངས་རྒྱས་ཀུན་གྱི་ཚུལ་ཆེན་པོ། །དགའ་བྱེད་ཟླ་གསང་ཐིག་ལེ་ཡི། །རབ་དགྱེས་བདག་ཉིད་གསང་བ་འདི། །
སེམས་དཔའ་ཆེན་པོ་ཁྱོད་ཀྱིས་ཟུང་། །དེ་ནས་གདན་ལས་མྱུར་བཞེངས་ཏེ། །ཐལ་མོ་སྦྱར་ཏེ་ཕྱག་བཞེས་ནས། །ཆོས་ཀྱི་ངོ་བོར་ཚིག་
སྨྲས་པ། །བདེ་བ་ཆེན་པོ་བདག་གིས་བླངས། །རང་བདེ་ལོངས་སྤྱོད་གར་བྱས་ཏེ། །རྡོ་རྗེ་ཚེ་ཡིས་འདི་སྐད་སྨྲས། །

90-1-250a

རྡོ་རྗེ་ཆོས་ནི་སྣ་ཚོགས་ཆེ། །སྣ་ཚོགས་པད་མ་གར་རབ་བྱེད། །དེ་ནས་ཕ་རོལ་ཕྱིན་དེ་ཀུན། །རབ་དགྱེས་
ལོངས་སྤྱོད་གར་བྱེད་ཅིང་། །བདེ་བྱེད་ཆེན་པོས་བདག་ཉིད་རྗེས། །ལེགས་པ་ཞེས་པ་སྦྱིན་བྱེད་དེ། །ལེགས་སོ་ལེགས་
སོ་བདེ་བ་ཆེ། །ལེགས་སོ་ལེགས་སོ་ཡེ་ཤེས་ཆེ། །ལེགས་སོ་ལེགས་སོ་སྣ་ཚོགས་ཆེ། །
ལེགས་སོ་ལེགས་སོ་དགྱེས་པ་ཆེ། །བཅོམ་ལྡན་འདས་དགྱེས་པའི་ཐུགས་ཀྱིས་དེ་སྐད་ཅེས་བཀའ་སྩལ་ནས། ཕ་རོལ་ཏུ་
ཕྱིན་མའི་འཁོར་ཆེན་མོ་དེ་དག་མངོན་པར་དགའ་བར་གྱུར་ཏོ། །ཟླ་གསང་ཐིག་ལེ་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོ་མཆོག་ཏུ་གསང་བ་ཡོངས་སུ་རྫོགས་
སྷོ།། །།ཞུ་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ། གསུང་
རབ་དོན་ཏོགས་བསློབ་དཔོན་གྱིས། །ལྷག་པར་བཀྲོལ་ཏེ་བསྟན་པ་ལ། །ཅི་རིགས་བསྒྱུར་བའི་བསོད་ནམས་ཀྱིས། །
སེམས་ཅན་སེམས་བདེ་ཐོབ་པར་སྨོན། །ཞུས་ཤིག །།